CLOSE WINDOW

D2923
བོད་ཡིག

/[ ]@#/ /rgya gar skad du/ badzra bi dA ra Na kar+m+ma bi d+hi sA d+ha naM/ bod skad du/ rdo rje rnam par 'joms pa'i las sgrub pa'i thabs kyi cho ga /rdo rje rnam par 'joms pa la phyag 'tshal lo/ /rang lha'i dmigs pa gsal ba dang / /sngags kyi bzlas pa mthar phyin pas//rig sngags thogs pa med pa dang / /pha rol sde las rgyal ba dang / /skrag dang mthu stobs gzhig pa dang / /rig sngags gcad dang mnan pa dang / /las gzhol pha rol las gzhig dang / /gdon brlag gdon las grol ba dang / /'byung po dgug dang mnan pa dang / /las rnams ma grub spogs pa dang //grub pa'i 'bras bu mthar dbyung dang / /'dod 'bras dngos grub bsgrub pa dang / /bsrung dang zhi dang rgyas pa dang / /rengs dang rmugs par byed pa yi/ /thun mong khyad par bdag nyid kyi/ /cho ga nyi shu'i sbyor ba rnams/ /ji ltar bla ma'i man ngag las/ / rtogs pa'i rim pa gsal bar bya/ /de la las gang sgrub kyang thog ma nyid du rang gi rig sngags kyi mthu thogs pa med par bya ba las/ de'i rim pa ni 'di yin te/ dben zhing rab tu shis pa'i gnas su maN+Dal gyi dbus su thab khung brus te/ der dri bzang po dang ldan pa'i bud shing brtsig la/sgrub pa po'i khyim nas me blangs te sbar ba'i dbus su sgrub thabs nas 'byung ba'i rim pas rang gi lha gsal bar dmigs la/ de la mchod pa dang bstod pa sngon du song ba'i mar gyi sreg blugs phul te/ de nas gzhan du longs ma spyad pa'i me tog sngon po dkar gsum dang mngar gsum gyis rnam par sbags la/gang la bsnyen pa byas pa'i sngags kyis thab tu dbul zhing bsreg par bya'o/ /ji srid mngon par 'dod pa'i sbyin sreg gi mthar rig sngags kyi mthu thogs pa med pa'i don gsol nas/ yi ge brgya pa muH'i mtha' can gyis gshegs shing bsdu'o/ /rim pa 'dis bsnyen pa ji tsam du byas pa'i grangs kyi bcu'i cha'i sbyin sreg yongs su rdzogs par byas na rig sngags kyi las gang sgrub kyang mthu thogs pa med par 'gyur ro//gzhan yang de'i sbyor ba la/ /me dbus bdag gi lha dmigs te/ /sngags bcas mar la bsnyugs pa yi/ /dUr ba bsregs pa khri phrag gis//gang la bsnyen pa'i sngags kyi las/ /thogs pa med par byed pa'o/ /'jug dogs bye ma'i mchod rten 'bum/ /sngags bcas bgegs sgrib zhi ba yis/ /sgrub pos gang gi las sgrub pa'i/ /rig sngags thogs pa med par byed/ /pha rol gyi dmag dpung las rgyal bar 'dod na lha chen po la phul ba'i rgyal mtshan gyi ras sam/'gegs nas shi ba'i ro las bshus pa'i ras la dug dang khrag dang dur khrod kyi sol bas re khA bcu yongs su bskor ba'i 'khor lo rtsibs brgyad pa phyi rol du pad+ma 'dab ma brgyad pa dang ldan pa/ de'i phyi rol du slar yang 'khor lo rtsibs brgyad pa kha drug pa rdo rje dang bcas pa la bla ma'i man ngag rnam par rig pas sngags kyi yi ge rnams yang dag par bkod pa'i lte bar che ge mo'i dmag dpung stam+b+ha ya nan/zhes pa'i bskul tshig dang bcas pa bris te/ rang gi lha'i rnal 'byor byas pa'i mdun du lhag pa'i lha gsal bar dmigs nas de las rnam par spros pa'i sbrul ba'i pho nyas pha rol gyi dmag dpung stong grogs kyi lha dang bcas pa bkug cing 'khor lo'i lte bar bstims la/dmigs pas sngags kyi bzlas pa rdzogs pa dang / 'khor lo thod pa kha sbyar du bcug ste/ dbang chen dang ri bo la gnas pa'i sna tshogs rdo rjes rgyas btab nas gang du g.yul 'gyed pa'i gnas der sbas pas thams cad du rang gi sde rnams pha rol las rgyal bar byed do//yang pha rol dang rtsod pa las rgyal bar 'dod pas sngar bstan pa'i 'khor lo'i lte bar che ge mo'i ngag stam+b+ha ya nan zhes pa dang bcas pa bris nas rang lha'i rnal 'byor dang mdun du lhag pa'i lha gsal bar dmigs te/de las sprul pa'i pho nya'i tshogs kyis pha rol gyi ngag gi stobs thams cad bkug cing 'khor lo'i lte bar bstim pa dang / grog mkhar gyi sa la gzugs brnyan byas pa'i snying gar bcug nas de la'ang bsgrub bya'i rnam par shes pa bcug ste/de nas sngags dang bcas pa'i seng ldeng gi tsher ma dug gi chu la sbags pa lce la bsnun pa dang / mthar thod pa kha sbyar du bcug nas rig sngags mnan pa'i sbyor ba byas na pha rol dang rtsod pa las rgyal bar byed do/ /'byung po'i gdon skrag par bya bar 'dod pas sngar bstan pa'i 'khor lo'i lte bar skrag cing tshar gcod pa'i 'byung po'i ming bris nas grog mkhar gyi sa las byas pa'i gzugs brnyan gyi snying gar bcug ste rang lha'i rnal 'byor la gnas pa'i mdun du lhag pa'i lha gsal bar dmigs shing /de las rnam par spros pa'i pho nya'i tshogs kyis bkug cing bstim pa dang /de nas sngags brjod pa dang bcas pa'i yungs kar gyis brab pa'i mthar dug dang khrag dang gu gul dang byi la'i ril ma dang khyi'i rtug pa sbyar ba'i bdug pas bdugs na rnam par skrag cing tshar gcod par byed do/ /pha rol gyi mthu stobs gzhil bar 'dod na sngar bstan pa'i 'khor lo'i lte bar gang gi mthu stobs gzhil bar 'dod pa de'i ming bskul tshig dang bcas pa bris nas rang lha'i rnal 'byor la gnas pa'i mdun du lhag pa'i lhar dmigs pa de las spros pa'i pho nya rnams kyis pha rol gyi sbyor ba las byung ba'i mthu stobs bkug nas 'khor lo'i lte bar bstims la dmigs te/sngags kyi bzlas pa byas pa'i mthar thod pa kha sbyar du bcug nas/ dbang chen ri rab la gnas pa'i sna tshogs rdo rjes rgyas btab pa sbyor ba po'i the ma 'og tu sbas na pha rol gyi sbyor ba las byung ba'i mthu stobs thams cad 'jil bar byed do/ /gzhan gyi rig sngags gcad por 'dod pas sngar bstan pa'i 'khor lo'i lte bar che ge mo'i rig sngags ts+tshin+da ts+tshin+da zhes pa'i spel tshig dang bcas pa bris la rang lha'i rnal 'byor dang /mdun du lhag pa'i lha dmigs te/ de las spros pa'i pho nya'i tshogs kyis pha rol gyi rig sngags kyi sbyor ba las byung ba'i mthu thams cad 'khor lo'i lte bar bsdus pa dang /rang gi rig pa'i mthu las byung ba'i mtshon cha dang me'i tshogs kyis dum bur byas shing bsreg pa la dmigs nas sngags bzlas so/ /de nas 'khor lo dum bur gtubs nas sbyin sreg byas pa'i thal ba rlung la bskur na gzhan gyi rig sngags kyi las thams cad gcod par byed do//pha rol gyi rig sngags mnan par 'dod na sngar bstan pa'i 'khor lo'i lte bar che ge mo'i rig sngags stam+b+ha ya nan zhes pa'i spel tshig bkod pa bris la/ rang lha'i rnal 'byor la gnas pa'i mdun du lhag pa'i lhar dmigs shing de las spros pa'i pho nya'i tshogs kyis pha rol gyi rig sngags kyi mthu thams cad 'khor lo'i lte bar bsdus pa dang /rang gi sngags las byung ba'i dbang chen la gnas pa'i ri bo rdo rje dang bcas pas mnan par bsgom zhing sngags bzlas la/ mthar thod pa kha sbyar du bcug ste dbang chen la sogs pa'i rgyas btab nas de bzhin gshegs pa'i ring bsrel gyi snying po can gyi mchod rten gyi 'og tu mnan na pha rol gyi rig sngags mnan par 'gyur ro//gal te rang gi mi dge ba'i las thams cad 'joms par 'dod na rin po che'i snod du tsan+dan gyi gsol ba la me bus te/ rang lha'i rnal 'byor la gnas pa'i mdun du til gyi snod gzhag la snying ga nas spros pa'i 'od kyis lhag pa'i lha mdun du spyan drangs nas/de las spros pa'i 'od zer gyis bdag gi lus khyab par mi dge ba'i las kyis bsags pa'i dri ma rnams snying gar 'dus nas mi sdug pa'i gzugs can du gyur pa sna'i bu ga nas 'thon te/til la thim par bsams la sngags brjod pa dang bcas pa bsregs pa'i mthar mdun gyi lha'i lus las ye shes kyi bdud rtsi babs pas bdag nyid kyi lus kun du gang bar bsgoms la/ yi ge brgya pa ci nus brjod nas gshegs pa'o/ /'dis ni mi dge ba'i las thams cad bcom ste 'bras bu mi 'byin par byed do//yang gzhan gyi mi dge ba'i las 'jig par 'dod na de'i rim pa 'di yin te/ dben zhing nyams dga' ba'i sa phyogs su zhi ba'i las dang mthun pa'i thab khung du bud shing brtsig ste/ rang lha'i rnal 'byor la gnas pas der me sbar ba'i dbus su lhag pa'i lha la kun nas dkar ba'i kha dog can du dmigs la/de'i lus la dkar zhing bsil ba'i 'od zer byung bas pha rol po'i sdig pa thams cad 'jig par dmigs nas sngags dang bcas pa'i til gyi sbyin sreg byas pa'i mthar mchod bstod dang yi ge brgya pa brjod la gshegs su gsol de ltar pha rol po la dmigs nas yang dang yang du byas na de'i las thams cad nges par 'jig par byed do//yang lha la sogs pa'i gdon thams cad rlag par byed 'dod pas sngar bstan pa'i 'khor lo'i lte bar gang dag brlag par bya ba'i gdon gyi ming spel tshig dang bcas pa bris nas grog mkhar dang tshwa sgo can dang 'jug ngogs dang shing rkang gcig gi sa dur khrod kyi thal ba dang lhan cig sprus pa las gzugs brnyan byas pa'i snying gar bcug ste/rang lha'i rnal 'byor dang mdun du lhag pa'i lha gsal bar dmigs nas/ rnam par spros pa'i pho nya'i tshogs kyis bkug cing bcug ste/'tshe zhing dum bur gtub ba dang bsreg cing thal bar byed pa la dmigs nas sngags brjod pa dang bcas pa'i yungs kar gyis brabs pa'i mthar sbyin sreg bya ste/ thal ba rlung la phyar na gang la dmigs pa'i gdon de rlag par byed pa la the tshom med do/ / gal te gza' la sogs pa'i gdon gyis bzung ba'i gnod pa thams cad las thar bar 'dod na gtsang zhing nyams dga' ba'i sa phyogs su maN+Dal byas te/ der bum pa gtsang ma'i dri'i chu la sogs pa nye bar mkho ba'i yo byad dang bcas pa gzhag ste/ rang lha'i rnal 'byor byas pas bum pa'i nang du'ang lhag pa'i lha gsal bar dmigs la gzungs kyi bzlas pa rdzogs pa'i mthar chu'i ngo bor bsams pas lus bkrus te/sngags kyis mngon par bsngags pa'i sa rdza na'i bdug pa byin na gdon gyis bzung ba las thar bar 'gyur ro/ /'byung po dgug par 'dod na smad 'tshong gi ras la rgya skyegs kyi khu bas sngar bstan pa'i 'khor lo'i lte bar nu tA A kAR+Sha ya dzaHzhes pa'i spel tshig dang bcas pa bris nas grog mkhar la sogs pa'i sa las byas pa'i gzugs brnyan gyi snying gar bcug ste/maN+Dal gyi steng du bram ze'i thod par gzhag la/ rang lha'i rnal 'byor du gnas pa'i mdun du lhag pa'i lha gsal bar dmigs te/de las spros pa'i pho nyas bkug cing gzhug pa'ang byas te/ sngags kyi mthar 'byung po A kAR+Sha ya dzaHzhes pa bzlas shing / 'bras chan dang 'bru'i thug pa dang la phug la sogs pa 'byung po'i gtor ma'i nye bar sbyor ba byas na 'byung po zhugs nas bdag gis las ci bya zer ba 'byung ste/'byung po dgug pa'i cho ga'o/ /de nas rig sngags kyi las thams cad byed du 'jug par mngag pa ni/ sngar bstan pa'i gtor ma dus gsum du sbyin zhing / b+hU ta wa shaM mA na ye zhes pa'i spel tshig dang bcas pa'i sngags bzlas te/bram ze mo gtsang ma'i zla mtshan gyis bsgos pa'i ras dang sa rdza na'i bdug pa byin nas/ mngon par bsngags pa'i tsan+dan dmar po'i thig le dpral bar byas na ci bsgo ba nyan cing mngag gzhug gi las byed par 'gyur ro/ /de ltar dbang du gyur pa de rig sngags kyi las gang bsngags kyang myur du grub pa'i grogs byed do//gal te las ma grub na spogs pa'i cho gas grub par byed pa ni rang gi mdun du maN+Dal byas te/ der 'dod pa'i lha'i sku gzugs bzhugs la/ rang lha'i rnal 'byor dang ldan pas lhag pa'i lha mdun du gsal bar dmigs nas/ de las sngags brjod pa dang bcas pa'i me tog khri phrag gcig phul la/ de nas me tog de rnams bsdus te/ de nyid kyis bsreg rdzas byas pa'i sbyin sreg de nyid du byas na las ma grub pa rnams grub par byed par 'gyur ro/ /grub pa chud mi za bar bya ba'i phyir las kyi 'bras bu dbyung ba ni/ las dang mthun pa'i thab khung du bud shing brtsigs nas me sbar ba'i dbus su lhag pa'i lha gsal bar dmigs la/ de nas las gang sgrub kyi spel tshig dang bcas pa'i sngags kyis de dang mthun pa'i sbyin sreg byas na bsgrubs pa'i las rnams chud mi za bar gang mngon par 'dod pa'i 'bras bu des 'byin par byed do//mngon par 'dod pa'i 'bras bu sgrub par 'dod na gnas dben par maN+Dal gyi steng du lhag pa'i lha'i sku gzugs bzhugs la/ de'i drung du rin po che'i snod du dngos grub kyi rdzas bzhag nas rang lha'i rnal 'byor dang ldan pas/ mdun du lhag pa'i lha gsal bar dmigs te/de la mchod pa dang bstod pa sngon du song bas sngags kyi bzlas pa bya zhing / pho nya'i tshogs spro ba dang bsdu ba'i sbyor bas dngos grub sgrub par dmigs te/ dro ba dang du ba 'thul ba dang 'bar ba las mkha' spyod dang sa spyod dang sa 'og gi dngos grub sbyin par byed do//sems can thams cad bsrung bar 'dod na tshes grangs dang dus tshod bzang po la sgrub pa po shar du mngon par phyogs pas gro ga 'am ras la gur gum mam gi wang gis sngar bstan pa'i 'khor lo'i lte bar ming spel tshig dang bcas pa bris la/ rang lha'i rnal 'byor du gnas pa'i mdun du lhag pa'i lha spyan drangs nas mchod bstod byas te/'khor lo'i sngags dang dbyer med du bstims nas bzlas pa ci rigs byas na mgo'am mgul pa'am dpung ba la btags na gang la btags pa'i sems can thams cad nad dang gdon la sogs pa'i mi mthun pa'i phyogs thams cad srung bar byed do//gal te rang bzhin gyi nad dang gdon la sogs ba zhi bar 'dod na/ dge ba'i shing gi lo ma la tsan+dan dkar po'i khu bas sngar bstan pa'i 'khor lo'i lte bar zhi ba'i spel tshig dang bcas pa bris la/ rang lha'i rnal 'byor dang mdun du lhag pa'i lha dmigs nas de'i lus kyi 'od zer gyis 'khor lo dang /'khor lo las 'phros pa'i 'od zer gyis bsgrub bya'i lus kun nas 'gengs par bsgom zhing sngags bzlas pa'i mthar 'khor lo 'o mas bkrus nas/ des gang la khrus byas pa de'i nad gdon zhi bar 'gyur ro/ /yang tshe dang longs spyod la sogs pa rgyas par 'dod na rang lha'i rnal 'byor byas pa'i mdun du lhag pa'i lha gsal bar bltas la/puSh+TiM ku ru oM zhes pa'i spel tshig dang bcas pa'i sngags bzlas shing mdun gyi lha las gser btso ma lta bu'i 'od zer gyi phreng ba spros pas gang la dmigs nas las sgrub pa de'i lus kun du khyab cing yongs su rgyas par bsgoms pas tshe dang longs spyod la sogs pa rgyas par byed do//gal te rengs pa'i las sgrub par 'dod na dur khrod kyi ras la yung ba'i khu bas sngar bstan pa'i 'khor lo che ge mo'i kA ya wAka tsit+ta staM b+ha ya laM zhes pa'i spel tshig dang bcas pa bris la/ grog mkhar la sogs pa'i sa las byas pa'i gzugs brnyan gyi snying gar bcug ste/rang lha'i rnal 'byor la gnas pa'i mdun du lhag pa'i lha dmigs nas/ de la rnam par spros pa'i pho nya'i tshogs kyis bsgrub bya bkug cing bstims la/ de nas sngags bzlas pa dang / rig pa'i mthu las byung ba'i dbang chen dang /ri bo la gnas pa'i rdo rje'i tshogs kyis lus dang yan lag thams cad rnam par gtams shing mi g.yo bar bsams na rengs pa la the tshom med do/ /gzhan yang rmugs par bya bar 'dod na/ dur khrod kyi ras la myos byed kyi khu ba dang nim pa'i 'dab mas sngar bstan pa'i 'khor lo'i lte bar che ge mo mo ha ya zhes pa'i spel tshig dang bcas pa bris nas/grog mkhar gyi sa las byas pa'i gzugs kyi snying gar bcug ste/ rang lha'i rnal 'byor dang mdun du lhag pa'i lha dmigs la/ de las spros pa'i pho nyas bsgrub bya bkug cing bstims te/ de nas gsang sngags bzlas pa'i rig pa'i mthu las byung ba'i dbang chen dang ri bo la gnas pa'i rdo rje snying gar mnan te/dran pa dang bral bar bsams na rmugs par byed pa la the tshom med do/ /gang la bsnyen pa byas pa'i sngags/ /las sgrub pa 'ang de nyid de/ /dang brtan the tshom med pa la/ /sngags ni yid bzhin nor ltar 'grub//rdo rje rnam par 'joms pa'i las sgrub pa'i thabs kyi cho ga byang chub sems dpa' byams pa'i zhabs kyi rdul la reg pa/ dpal gaM gA d+ha ra'i sras kyi thu bo bram ze ma Ni badzras mdzad pa rdzogs so// //paN+Di ta dz+nyA na shrI dang / lo tsA ba rab zhi bshes gnyen gyis bsgyur ba'o/