111a1 @##/ /rgya gar skad du/ ma hA kA ru Ni ka ku bAkya sto trA d+hitiSh+ThA ta nA ma/ bod skad du/ thugs rje chen po la smre sngags kyis bstod pa byin rlabs can zhes bya ba/ byang chub sems dpa' spyan ras gzigs dbang phyug la phyag 'tshal lo/ /thugs rje chen po 'phags pa spyan ras gzigs/ /
111a2 dri med dung mdog mchog tu gzugs bzang ba/ /rnam dag 'od gsal zla ba'i dkyil ltar mdzes/ /ji ltar mkha' la nyi 'od stong 'bar bzhin/ /dpa' bo 'od zer stong 'bar lham me ba/ /srid pa gsum gyi sa mkhan ston bar grags/ /khams gsum 'gro ba kun gyi gnyen gcig
111a3 po//byams mgon thugs rje'i lha khyod bdag la dgongs/ /bdag ni thog ma med pa'i dus mtha' nas/ /lam log lam stor srid pa'i 'khor bar 'khyam/ sngon tshe las log sdig pa spyad pas nongs/ /sdig pa'i las rnams ci byas rab gnong 'gyod/ /dar zhing drag pa'i las de dbang btsan
111a4 pas//'khor ba'i sdug bsngal rgya mtshor bying gyur te/ /zhe sdang 'bar ba'i me yis rang rgyud bsregs/ /gti mug mun pa'i tshogs kyis shes rgyud rmongs/ /'dod chags rgya mtsho'i nang du rnam shes bying / /nga rgyal chen po'i ri bos ngan 'gror mnan/ /phrag dog rlung dmar 'tshub mas 'khor bar
111a5 g.yengs//bdag tu 'dzin pa'i mdud pa dam pos bcings/ /'dod pa me mdag dong 'dra'i 'obs su lhung / /sdug bsngal drag po'i 'dam rdzab char ltar bab/ /me khams nyi ma'i dugs ni steng nas tsha/ /chu khams sa yi rlan ni 'og nas grang / /phyi yi ser bu'i ngad ni thad nas tsha/ /kun nas
111a6 'khrugs pa'i rlung ni khong nas ldang //de lta'i sdug bsngal shin tu bzod dka' yang / /sdom pa'i yi dam gzhig tu ga la rung / /sdug bsngal kun dang bsdos nas sdom bsrung zhing / /mos pa'i dad pas 'phags mchog mi 'dor na/ /'phags mchog 'gro don mi mdzad ci zhig dgongs/ /
111a7 byams mgon ci slad bdag la thugs mi brtse/ /bdag 'dra'i blun rmongs las ngan sdig po cha/ /las kyi dbang gis snyigs ma'i dus 'dir skyes/ /skyes pas 'gyod de las la yi re chad/ /yi chad 'gyod kyang las dbang bcos su med/ /las kyi shugs ni chu bo'i rgyun dang 'dra/ /las
111b1 dbang chu rgyun 'bog par shin tu dka'//bka' la zhugs kyang bka' bzhin rdo ma thogs/ /lus ngag yid gsum sdig pa'i dbang du song / /sdig pa'i las dbang drag po'i me 'bar bas/ /rnam shes dbang po'i myu gu gdungs gyur te/ /phung po sgyu ma'i lus 'dis mi bzod na/ /byams
111b2 mgon thugs rje can gyis dgongs lags sam//nyi ltar 'od gsal zla ltar mdangs gsal ba'i/ /thugs rje'i zhal nyid blta bar 'tshal lags na/ /thog ma med nas ma rig ling thog gis/ /ldongs pa'i chu bur mig gis ma mthong na/ /'gro ba'i mgon khyod nga lta ga na bzhugs/ /sdug
111b3 bsngal drag po shin tu mi bzod pa//shin tu skrag cing skyi g.ya' rab 'jigs nas/ /dung dung gdungs pa'i smre sngags 'di 'don cing / /nyam thag phongs pa'i da ros 'o dod 'bod/ /byams mgon thugs rje can gyis gsan lags sam/ /nam zhig 'chi 'pho lus sems brje ba'i tshe/ /gnyen
111b4 bshes grogs dang phral te gshin rjes khrid//de tshe 'jig rten nye dus mi stongs te/ /las kyi dbang gis bdag rang gcig pur khrid/ /dus der bdag la mgon skyabs ma mchis na/ /byams mgon khyed kyis 'khor bar bdag gtong ngam/ /las kyis mnar ba'i skye bo bdag 'dra ba/ /thog
111b5 ma med pa'i dus nas lam log pas//khams gsum 'khor ba'i gnas las ma thar te/ /bskal pa dpag med skye ba ji snyed du/ /sngon chad lus blangs grangs med zhig gyur te/ /sha rus bsags na 'jig rten gtos dang mnyam/ /rnag khrag bsags na rgya mtsho chen po tsam/ /las 'phro
111b6 bsags na bsam 'das brjod mi la//khams gsum bgrang zhing skye ba mang brgyud kyang / /byas pa'i las rnams don med chud re zos/ /skye ba grangs med ji snyed de tsam la/ /skye ba gcig gis kho na tsam gyi las/ /bla med byang chub don du rab 'bad na/ /de tsam byas pa'i las la'ang don re yod/
111b7 las ni dbang btsan nyon mongs stobs che bas/ /sha khrag 'dus pa'i lus blangs 'khor bar 'khyams/ /sdug bsngal drag pos srid pa'i btson rar tshud/ /mi bzod sdug bsngal drag po 'di myong na/ /nyes byas thams cad rang gi las las byung / /byams mgon thugs rje can gyis
112a1 bzod lags sam//thugs rje chen pos ngan song rgyun gcad de/ /nyon mongs las kyi rlung ni zlog tu gsol/ /nyon mongs las kyi rlung ni dbang btsan nas/ /ma rig mun pa'i gling du gtan 'khyams na/ /ye shes sgron me'i zer gyis mi gzigs sam/ /nyes byas las kyi 'bras
112a2 bu mi bzod na//thugs rje can khyod phrin las mi mdzad dam/ /dug gsum bzod dka'i nad kyis gdungs lags na/ /thugs rje thabs mkhas sman gyis mi gso 'am/ /phyin ci log gi g.yang sar lhung lags na/ /thugs rjes myur mgyogs phyag gis mi 'dzin nam/ /sdug bsngal drag
112a3 po'i las dbang me 'bar na//thugs rjes bsil ba'i chu rgyun mi 'bebs sam/ /sdug bsngal chen pos mnar ro ra mda' mdzod/ /re sas slu bar ma mdzad spyan ras gzigs/ /gang la gang 'dul 'gro ba'i don mdzad par/ /zhal bzhes mang po'i dam bca' mi mdzad dam/ /mthong thos dran
112a4 reg 'byung bar ma gsungs sam//snyigs ma'i dus kyi ngan spyod ma gzigs sam/ /ngan song rgyu 'bras bsgrub pa ma gzigs sam/ /sdug bsngal dba' klong 'khrugs pa ma mkhyen nam/ /nus mthu dpag med mnga' ba ma lags sam/ /byams mgon 'gro don mdzad par 'phyis pa tsam/ /
112a5 khams gsum 'khor ba'i gnas su sbyangs sbyangs nas/ /nam zhig rang gis 'bras bu thob pa'i tshe/ /'phags pa'i thugs rjes ci 'tshal don ma mchis/ /sems can las 'phro rang sor bzhag na ni/ /'phags pa'i thugs rjes su la ci zhig bgyi/ /thugs rjes 'gro rnams sgrol bar zhal bzhes
112a6 pa'i//dam bcas don de de ring dgongs su gsol/ /'phags mchog khyed la thugs rje'i stobs mnga' na/ /yal yol le lo btang snyoms ma mdzad par/ /snying nas gzigs shig thugs rje rgyal ba'i lha/ re sa gzhan na med do thugs rjes zung / /byang chub sems dpa' spyan ras gzigs
dbang phyug la smre sngags kyi sgo nas bstod pa byin rlabs can 'di nyid lnga brgya pa rnams kyi gtsug gi nor bu lta bur gyur pa/