CLOSE WINDOW

D2710
བོད་ཡིག

/[ ]@##/ /rgya gar skad du/ /b+hag bAn Ar+ya many+dzu shrI sA d+hiSh+ThA na stu ti/ /bod skad du/ bcom ldan 'das 'phags pa 'jam dpal gyi bstod pa byin rlabs dang bcas pa/ bcom ldan 'das 'phags pa 'jam dpal la phyag 'tshal lo/ /'jam dbyangs phyogs bcu'i de bzhin gshegs pa bye ba rnams kyis bstod par gyur mod de lta na'ang //bsam pa blun po'ang bla ma la gus dbang gis kyang ni khyod kyi yon tan brjod bgyi ste/ /rab tu dregs bcas ngang pa'i rgyal po'i sde dag gis bsten chu dang ldan pa'i yid bzhin mtshor/ /bzhad rnams kyang ni yid la rab tu dga' ba bskyed de rgyu zhing rnam par gnas par bgyid//zur phud gsal ldan gser mchog snyan chas legs par rnam brgyan mgul ni rab tu sgeg bcas shing / /snyan gyi gong rgyan ut+pal mdzes 'dra mnga' slad khyod ni gzhon nur rab grags de lta na'ang / /kun tu bzang po 'jig rten dbang phyug rdo rje 'dzin sogs rnga yab mchog tu mdzes 'dzin pa'i//mkhas pa rnams kyis bla ma lta bur 'khor gyi dkyil 'khor rnams su khyod ni bsten par gyur/ /do shal phreng ba'i sil sil sgrogs byed mchog tu dga' skyed snyan gdub mnga' ba spyi gtsug gi/ /rin chen 'od mdzes 'phro ba dang ldan gzhon nu'i na tshod dge legs mnga' ba gang na yang //bcom ldan sa gsum dag na gus pas phyag byar 'os pa khyod ni rtse gcig nyer zhi yi/ /snod gyur mchod par 'os 'di gang na'ang de slad su zhig ngo mtshar ci phyir skye mi 'gyur/ /shin tu rnam 'gyur bzhin ldan sprul stong dag gi chun po gdu bur byas pa 'dzin mdzad cing //rno ba'i mtshon bsnams g.yul ngor rab dpa' gshin rje rnams ni rab tu skrag par mdzad pa yi/ /mi bzad 'phags pa gshin rje'i gshed dang bcas par gyur kyang khyod ni zhi ba'i dkyil 'khor te/ /cha yi tshogs kun yongs rdzogs lus ldan ston ka'i zla ba nya ba lta bur gyur pa lags//khyod ni chos lam nye bar ston la mkhas kyang chos 'dir 'ga' yang gzigs pa yod ma yin/ /khyod ni sems can phan la dgyes kyang sems can nyid ni 'ga' yang dmigs par gyur ma lags/ /bde gshegs dgyes pa phan tshun du ni mi 'grigs 'gyur ba'i mdzad spyod mang po 'di 'gal bas//khyod ni sa gsum ngo mtshar rgyu gcig gyur pa de slad khyod 'dir bsnyen par bgyid pa la lags/ /gzhan don 'bras bu smin pas shing bzhin rnam par gnas pas gangs chen lta bur gyur pa ste/ /brtan pa yi ni ri rab dang 'dra grub pas bsten pas ri rgyal ma la ya dang mtshungs//gti mug rab rib zhi bar mdzad pas nyi ma bzhin te phun sum tshogs gzugs zla 'dra yi/ /mgon khyod gzhan don mdzad slad 'gro na byis pa rol 'dra'i mdzad pa yis ni rnam par rgyu/ /dri zhim gyis bsgos mchog tu mdzes pa'i ut+pal sngon po bsnams pas rdzing bu lta bu ste/ /shin tu rnam sgeg tshul dang ldan pas yul gyi byis pa lo brgyad lon pa dang 'dra zhing //chos char dri ma med pa 'bebs pas char sprin 'brug sgra rab tu sgrogs pa lta bu dang / /ngang pa'i rgyal po yid 'ong sgra skad zil gnon gsung mnga' khyod la su zhig bsnyen mi bgyid/ /skad cig nyid la yongs su 'bar gyur gti mug rab rib skad cig nyid la zad gyur cing //thams cad du ni legs pa'i lam ston bde gshegs sdig med mya ngan 'das par gyur pa na/ /gzhon nu'i tshul 'dzin 'od zer stong phrag 'bar ba'i rgyan gyis legs par spras par gyur pa yi/ /khyod nyid gcig pu phyogs bcu rnams na da lta mchog tu snang bar mdzad pa ma lags sam//mgon po kye ma khyod gzugs ri mor byas pas kyang ni ji ltar tshim pa skyed byed ltar/ /ston ka'i mtshan mo dkar zhing rab tu mdzes par gyur pa zla ba'i dkyil 'khor ma lags te/ /ut+pal sngon po mdzes pa'i dri ngad zhim pos bsgos pa'i ser bu'i dad kyang ma lags shing //lha yi bu mos bstabs par gyur pa'i ha ri tsan+dan dri bzangs ldan pa'ang de lta min/ /gzhon nu khyod zhabs sen mo'i 'od zer phreng ba rgya chen thun mtshams su shar zla 'od bzhin/ /shin tu yid 'ong dkar dmar mdog can rab btud lha dang lha min gtsug nor 'od zer dang //'dres pas gang reg ral pa can gyi mi de dag kyang skye bo kun gyis phyag byar 'os/ /mgon po khyod kyi sngags 'dzin grub pa thob nas rab chags sgeg pa las byung ba'i/ /gom tshugs kyis 'gro rgyan phreng rkang gdub yid 'phrog dang ldan mdzes ma brgya dang lhan cig tu/ /sa stengs na rol gzhan ni lha yi dbang pos tsan+dan gtul ba'i dri zhim dang ldan pa'i//li shi me tog dri ldan sbrang mas dkrigs pa'i tsan+dan gyi ni nags na gnas par byed/ /na tshod gzhon zhing dregs dang bcas pas sgeg cing rnam par 'phyen byed gsal bar byas gyur pa'i/ /dri zhim la ni chags pa skyed byed sbrang ma'i tshogs rnams kyis ni rab tu dkrigs gyur cing //pi wang gling bu ngang pa'i rgyal po dang 'dra shin tu snyan pa'i dbyangs dang ldan gyur pa'i/ /gnod sbyin bu mo mchog kyang khyod kyi sngags bzlas pa yi mi yis rab tu 'gugs par byed/ /'gro ba gsum gyi mgon po 'bras bu med pa'i mang du brjod pa yis ni ci bgyir mchis//khyod kyi yon tan rgya mtsho yang yang brjod par thub pa'i mkhyen pas spyod pa ma lags pa/ /de phyir 'jam pa'i dbyangs kyi yon tan 'di tsam zhes bya bdag gis rtogs par nus ma lags/ /kun nas dpag med chu dang ldan pa'i rgya mtsho las ni phan tshun 'gro ba bsgral ba'i phyir//mgon po sems dang bcas pa'i mi rnams dag las su zhig 'dir ni 'jug par 'tshal bar bgyid/ /de ltar bcom ldan 'das ni mgon po 'jam pa'i dbyangs la mngon par bstod pa bgyid pa las/ /bdag gis dge ba gang zhig bsags pa des ni 'gro ba kun gyi rnyog pa zhi gyur cig /de yis bdag kyang skye ba dang ni skye bar brtan zhing mtshungs pa med pa'i snyan dngags dang / /rigs dang ldan zhing tshe rabs dran dang snying rje rgya chen yid 'phrog pa dang ldan par shog /bcom ldan 'das 'phags pa 'jam pa'i dbyangs kyi bstod pa byin rlabs dang bcas pa snyan dngags mkhan rnams kyi gtsug gi nor bu byang chub sems dpa'i rigs can mkhas pa chen po tsan+d+ra go mis mdzad pa rdzogs so// //rgya gar gyi mkhan po mkhas pa chen po su ma ti kI rti'i zhal snga nas/ bod kyi lo tsA ba dge slong blo ldan shes rab dang / mar pa chos kyi dbang phyug gis bsgyur ba'o/