CLOSE WINDOW

D2694
བོད་ཡིག

@#/ /rgya gar skad du/ Ar+ya mu kha Sha Ta d+hA ra Ni byA khya ta/ bod skad du / 'phags pa sgo drug pa'i gzungs kyi rnam par bshad pa/ 'jam dpal gzhon nur gyur pa la phyag 'tshal lo//gzungs 'di ni don drug la brtsams nas gsungs par mngon te/ shes rab yongs su rdzogs pa dang / snying rje'i stobs rnam par dag pa dang / rang gi rgyud rnam par dag pa dang gzhan gyis bsgrubs pa'i gegs yongs su shes pa dang /byang chub kyi tshogs kun du sdud pa dang de'i 'bras bu yang dag pa'i ye shes dang de bzhin nyid do/ /rnam grangs gzhan yang sdug bsngal ba'i dus dang /bde ba'i dus na sems can gyi khams 'dzin pa dang / bdag dang gzhan la tshogs kyi bar chad yongs su spong ba dang / tshogs kyi rnam pa thams cad sogs pa dang / tshogs bsags pa yang rang gi don phun sum tshogs pa dang /gzhan gyi don phun sum tshogs pa las brtsams nas bstan to/ /rnam grangs gzhan du'ang rtogs te/ thams cad mkhyen pa nyid las ldog pa'i rgyu ni drug ste/sems can la mi phyogs shing 'khor ba'i sdug bsngal la ji mi snyam pa med pa dang / 'jig rten pa'i phun sum tshogs pa dag la kun du 'dzin pa'i sems nyid dang / nyon mongs pa dang las kyi sgrib pa sogs pa dang /mi dge ba'i grogs pos yongs su bskyod pa'i rjes su 'jug pa dang / tshogs ma bsags pa nyid dang / srid pa'i phun sum tshogs pa la gzhol ba'i sems zang zing dang bcas pa nyid de/ de'i gnyen por go rims bzhin du sgo drug po dag rig par bya'o//dang po dang gnyis pas ni sdug bsngal ba dang bde ba'i gnas skabs na/ sems can yongs su mi gtong bas sems can yongs su smin par byed pa bstan to/ /lnga pas ni sangs rgyas kyi chos yongs su smin par byed do//gsum pa dang bzhi pas ni gegs sel bas bdag nyid kyis bsgrub par nus pa nyid do/ /drug pas nyan thos dang / rang sangs rgyas dang thun mong ma yin pa'i 'bras bu chos kyi sku zhes bya ba phul du dbyung du med pa'i phyir dang /sems can thams cad kyi don bya bar nye bar gnas pa'i phyir 'khor ba'i mtha' ji srid pa yin par rig par bya'o/ /rnam pa gcig tu na rnam grangs gzhan yang bsam pa yongs su dag pa rnam pa bzhis yongs su bstan te/chos la bdag med par rab tu rtogs pas/ sems can log par zhugs pa rnams dang / 'khor ba'i sdug bsngal rnams kyis mi g.yos pa nyid dang / phun sum tshogs pa'i dus na sems can la blta ba dang bcas pa la kun du rmongs pa mi 'byung ba dang /ma dag pa'i rgyu gnas ngan len gyi 'bras bu skyed pa'i mthu dang mi mthun par byed pa dang / de yongs su brtas par byed pa'i rgyu yongs su spong bas so/ /sbyor ba rnam par dag pa ni pha rol tu phyin pa dang ldan pa'i dge ba'i rtsa ba la sbyor bar byed pa'o/ /bsam pa rnam par dag pa'i 'bras bu ni bla na med pa'i ye shes so// // spyor ba rnam par dag pa'i 'bras bu ni/ rnam par grol ba ste gnas gyur pa'o/ /bla na med pa'i ye shes dang / rnam par grol ba ni sbyor ba rnam par dag pa'i 'bras bu yin te/ pha rol tu phyin pa dang ldan pa'i dge ba'i rtsa ba 'jig rten pa'am 'jig rten las 'das pa'ang rung gang ci yod pa de bla na med pa'i ye shes kyi 'bras bur gyur cig ces bya ba la sogs pa gsung ba'i phyir ro//pha rol tu phyin pa yongs su ma rdzogs na/ bsam pa 'ba' zhig gis bla na med pa'i ye shes bskyed mi nus pa'i phyir te/ pha rol tu phyin pa'i 'bras bur bshad de/ rigs mthun pa'i phyir bla na med pa'i ye shes nyid bsam pa rnam par dag pa'i 'bras bur rigs so/ /de gnyis ka'i 'bras bu ni gnyis ka ste bsam pa dang sbyor ba gcig la gcig ltos pa gnyis shin tu mthar thug pa'i phyir ro/ /chos thams cad mi dmigs pa'i rnam par yongs su bsgoms pas yongs su bsngos pa'i dbang gis thams cad mkhyen pa'i ye shes dang /de bzhin gshegs pa'i yon tan gzhan rnams kyang 'thob ste rgyu yin pa'i phyir ro/ /de lta ma yin na ni bsam pa yongs su sbyangs pa 'bras bu med pa kho nar 'gyur ro//de gnyis ni 'khor ba dang mya ngan las 'das pa la mi gnas pa yin no/ /rgyu rnam pa gnyis kyang shes rab dang snying rje mnyam pa nyid kyis yongs su zin pa ste/ rnam pa de nyid kyis yang dag par bsgrubs pa'i phyir ro/ /yon tan de lta bu thob par bya ba'i phyir byang chub sems dpa' dge ba'i rtsa ba thams cad yongs su bsngo bar bya'o//de lta bas na 'di ni dge ba'i rtsa ba yongs su bsngo ba chen po zhes bya'o/ /de ltar rnam pa drug po bdag gis bsgoms pa de dag gi phan yon rnam pa drug khong du chud par bya ste go rims bzhin no/ /dge ba'i rtsa ba 'di dang ldan pa'i byang chub sems dpa' ni 'khor bar 'khor ba na sdug bsngal srab mor myong bar 'gyur te des yongs su gtugs par mi 'gyur ba dang /zad mi shes pa dang rgya che ba'i rgyun gyis 'jig rten pa'i phun sum tshogs pa myong bar 'gyur zhing sems can gyi khams tshad med pa yongs su smin par byed pa dang /sgrib pa med par dge ba'i rtsa ba rnams myur du yang dag par sdud par byed la dge ba la kun du dga' zhing dge ba la mos pa dang / byang chub sems dpa' la 'khrul pa shin tu phra ba yang mi snang zhing rab tu rtogs pas sel ba dang / myur du tshogs yongs su rdzogs par byed cing thams cad mkhyen pa nyid mngon par bsgrub pa'i ting nge 'dzin kyang thob pa dang /'jig rten ji tsam pa dang sems can ji snyed de tsam du sems can thams cad kyi don byed par snang ste de yang bsgrub po/ /'phags pa sgo drug pa'i gzungs kyi rnam par bshad pa/ slob dpon dbyig gnyen gyis mdzad pa rdzogs so/