CLOSE WINDOW

D2693
བོད་ཡིག

@##/ /rgya gar skad du/ ma hA shI ta ba ti bi d+yA rA dza sU trAM ti sa ha ra Sha TI kA nA ma/ bod skad du/ rig sngags kyi rgyal mo chen mo bsil ba'i tshal gyi mdo'i 'bum 'grel zhes bya ba/ rig sngags kyi rgyal mo chen mo bsil ba'i tshal la phyag 'tshal lo/ / bder gshegs yang dag rdzogs pa'i sku/ /skyon gyis ma gos yongs rdzogs pa/ /gzhan yang sems can don mdzad de/ /thub pa'i sku la phyag 'tshal lo/ /bsil ba'i tshal gyi mdo sde 'di/ /yang dag bsams la ston byed pa/ /rab rib kyis ni mi shes pa'i/ / bdag gi bsams la yang dag bshad/ /'di skad bdag gis thos pa'i dus gcig na zhes bya ba ni/ 'di skad ces bya ba ni/ sgro skur dang bral ba'o/ /bdag gis thos pa zhes bya ba ni kun dga' bos so/ /grogs med dam zhe na/ nyan thos la sogs pa dang thabs cig tu thos pa'o//su la thos na/ bcom ldan 'das la'o/ /gang thos na bsil ba'i tshal gyi mdo 'di thos pa'o/ /sus thos na kun dga' bos thos pa'o/ /dus gcig na zhes bya ba'i sgra ni don gnyis la 'jug ste/ sdud pa po shes rab che bar go ba dang / dam pa'i chos 'byung ba dkon pa'i don to//ston pa ni bcom ldan 'das so/ /bcom ldan 'das zhes bya ba ni/ bcom pa ni bzhi bcom/ bzhi ni dgra'o/ /dgra ni bdud bzhi'o/ /bdud bzhi ni phung po'i bdud dang / nyon mongs pa'i bdud dang / 'chi bdag gi bdud dang / lha'i bu'i bdud dang bzhi'o//gang gi dus na bcom zhe na/ rdo rje'i gdan la bzhugs pa'i dus so/ /ldan pa zhes bya ba ni/ skal ba dang ldan pas na/ bcom ldan no/ /'das zhes bya ba ni/ mya ngan las 'das pa'o/ /'das pa ni gang gi dus she na/ dpyid zla ra ba'i gnam stong gi nub mo'o//rgyal po'i khab ces bya ba ni/ dan ta ka'i grong khyer dang / ka ling ka'i grong khyer dang / ma ga ta'i grong khyer dang gsum po yod pa las/ ma ga ta'i grong khyer na/ drang srong sgom chen gcig yod pa las/ byis pa gcig gis gnod pa byas pas/ drang srong gi kha nas me byung bas/grong khyer gsum po tshig pas dur khrod gsum du gyur/ de'i tshe lha'i bu shed las skyes dang / shed bu grogs gnyis byung ste/ 'jig rten gyi mi rnams byung ste/ dang po sa'i bcud za/ gnyis pa bdud rtsi'i zhag za/ gsum pa myu gu za/bzhi pa 'bras sA lu'i ljang pa za ba la/ sems can de rnams ma mthun nas/ sems can de dag 'di snyam du sems te/ bdag cag tshogs shing 'dus pa la/ bdag cag gi nang nas sems can lhag par gzugs bzang ba/ lhag par lta na sdug pa/ lhag par mdzes pa/lhag par bsod nams che bar grags pa gang yin pa de ni/ bdag cag gi zhing rnams kyi bdag por bskos dang / des bdag cag chad pa gcad par bya ba ni chad pas gcod par 'gyur/ phan gdags par bya ba rnams la phan 'dogs/ bdag cag gi zhing dag las 'khrungs pa gang yin pa de las/de chos bzhin du thog shas sbyin par bya'o zer nas/ de rnams kyi nang nas lhag par gzugs bzang ba/ lhag par mdzes pa/ lhag par bsod nams che bar grags pa gang yin pa de zhing rnams kyi bdag por bskos te/ 'di skad ces kyi sems can khyod tshur shog /kho bo cag las chad pa gcad par 'os pa rnams la chad pa chod cig phan gdags par bya ba rnams la ni phan thogs shig /kho bo cag gi zhing dag las 'khrungs pa gang yin pa de las/ khyod la kho bo cag gis chos bzhin du thog shas sbyin no/ / des de rnams la chad pa gcod par bya ba la ni chad pa gcod/ phan gdags par bya ba rnams la ni phan 'dogs par byed cing de la de rnams kyi zhing dag las 'khrungs pa gang yin pa de las/ chos bzhin du thog shas 'bul te/ skye bo'i tshigs chen pos bkur zhing / skye bo'i tshogs chen po mang pos bkur bas mang pos bkur ba zhes grags so/ /zhing de rnams kyi bdag por gyur pa na/ nyams pa las skyo bar byed pas rgyal rigs rgyal rigs zhes bya bar grags so/ /chos kyis mgu bar byed cing / tshul khrims nyams su blangs te gnas/shes rab nyams su blangs te gnas pas/ rgyal po rgyal po zhes bya bar grags so/ /mi rnams ni bsod nams rtag par bya ba'i phyir/ 'bras sA lu ljang pa dgos so/ /'jag ma'i spyil bo la me mi gtang ba'i khrims bcas so/ /de nas dus nam zhig na rgyal po'i btsun mos me shor bas rgyal po na re rang gi khrims rang gis bshig tu mi btub pas/bya rgod phung po'i ri'i nub phyogs su nga'i khyim cig rtsigs shig gsungs so/ /de nas brtsigs pas/ nyin mo brtsigs pa nub mo zhig pa la/ rgyal po'i zhal nas nga bsod nams khyad par du 'phags pa yin pas/phyogs bzhir rgyal po'i khab yin no/ /bris shig gsungs pas/ phyogs bzhir rgyal po'i khab yin no zhes bris pas/ mi ma yin gyi gnod pa zhi'o/ /de nas pho brang bai DUr+ya zhes bya bar kyang grags so/ /rgyal po'i khab kyi tshad ni gzhan du shes par bya'o//bya rgod phung po'i ri zhes bya ba ni/ gzhal yas khang ngo / /ci'i phyir gzhal yas khang zhe na/ sangs rgyas rabs bdun bzhugs nas chos gsungs pa'i phyir ro/ /bya rgod phung po'i ri ni brtsegs pa'o/ /ci'i phyir brtsegs she na/ rin po che sna bzhi las grub pa'i phyir ro//gser dang / dngul dang / pad+ma rA ga dang / in+d+ra nI la'o/ /ri rab de de bzhin du brgyan pas gzhal yas khang ngo / /ri rab de'i tshad ni 'di lta ste/ mtho ba zlum pa/ gnam 'phang dang / rgyar yangs pa/ lo tog thams cad kyi sa 'dzin me tog dang /phreng ba dang / spos rnam pa sna tshogs dang ldan pa'o/ /dge slong nyis brgya lnga bcu'i dge slong gi dge 'dun chen po dang zhes bya ba ni/ nyan thos chen po rab tu mang po thams cad dgra bcom pa/ zag pa zad pa/ srid par kun du sbyor ba/ chad pa/ yang dag pa'i ye shes sems shin tu rnam par grol ba/rdzu 'phrul gyi stobs dang / cho 'phrul bsam gyis mi khyab pas/ rnam par 'phrul pa'i mthu chen po thob pa/ lta ba chags pa med pa/ thams cad kyang dri ma dang bral ba/ kun nas nyon mongs pa'i bag chags kyi sa bon bsregs pa sha stag la 'di lta ste/tshe dang ldan pa shA ri'i bu dang / tshe dang ldan pa byams ma'i bu gang po dang / tshe dang ldan pa ka pi na dang / tshe dang ldan pa rab 'byor dang / tshe dang ldan pa maud gal gyi bu chen po dang / tshe dang ldan pa skul byed dang / tshe dang ldan pa dga' byed dang / tshe dang ldan pa 'od srungs dang / tshe dang ldan pa 'od srungs chen po dang / tshe dang ldan pa lteng rgyas 'od srungs dang / de dag la sogs pa nyan thos rab tu mang po dang / dge slong dang / dge slong ma dang / dge bsnyen dang / dge bsnyen ma dang / lha dang / mi dang / lha ma yin dang / dri za la sogs pa mang po 'dus pa'o/ /thabs cig tu zhes bya ba ni/ 'khor de dag dang / byang chub sems dpa' rnams yin te/ byang chub sems dpa' bye ba khrag khrig 'bum phrag brgyad cu rtsa bzhi thams cad kyang skye ba gcig gis thogs pa/ bla na med pa yang dag par rdzogs pa'i byang chub las phyir mi ldog pa mthu chen po thob pa/rdo rje chen po'i rnam par thar pa dang / ting nge 'dzin gyis sangs rgyas kyi zhing du rnam par 'phrul pa dang / cho 'phrul chen po kun du ston pa dang / sems kyis skad cig thang cig yud tsam cig la sems can thams cad kyi sems dang /spyod pa'i rjes su 'jug pa'i chos bstan pa sna tshogs mnyam pa nyid mnyam zhing rgya che la zab pa dang / spobs pa dang / cho 'phrul dang ldan pa sangs rgyas kyi zhing du mar de bzhin gshegs pa la mchod pa chen po'i sprin gyis mchod pa dang /rnam par thar pa'i sgo dang / gzungs dang / ting nge 'dzin dang / dbang dang / mngon par shes pa dang / ma 'dres pa dang / byang chub kyi yan lag dang / lam dang / sa dang / pha rol tu phyin pa dang / bsdu ba'i dngos po dang / byams pa dang / snying rje dang dga' ba dang / btang snyoms dang /byams pa'i stobs dang / dben pa dang / yongs su byang ba'i sems kyi rgyun dang ldan pa sha stag la 'di lta ste/ byang chub sems dpa' sems dpa' chen po sa'i snying po dang / nam mkha'i snying po dang / phyag na rdo rje dang / 'jig rten dbang phyug dang /sgrib pa thams cad rnam par sel ba dang / kun du bzang po dang / nyi ma grags pa dang / zla ba'i grags pa dang / rdo rje'i snying po dang / rdo rje grags dang / 'jam dpal grags dang / byang chub sems dpa' sems dpa' chen po byams pa la sogs pa bye ba khrag khrig 'bum phrag brgyad cu rtsa bzhi dang thabs cig tu'o//bzhugs te zhes bya ba ni/ yang dag par rdzogs pa'i sangs rgyas shAkya seng ges 'dir chos kyi 'khor lo shin tu bskor ba dang / sangs rgyas kyi mdzad pa shin tu yongs su rdzogs par mthar phyin pa dang /bsod nams dang / ye shes kyi tshogs ni shin tu yongs su rdzogs/ thams cad mkhyen pa nyid kyi byang chub chen po'i phyir pha rol tu phyin pa dang / sa mnyes pa ni shin tu yongs su gzung / rin po che rdo rje pad+ma'i snying po seng ge'i khri la ni bzhugs te/ seng ge'i khri ni gang zhe na/sngon gyi smon lam gyi stobs kyis sangs rgyas bcom ldan 'das gang du gshegs pa'i sa na yod pa'o/ /rin po che dang / rdo rje pad+ma'i khri bya rgod kyi phung po'i ri mdzes pa dang / rin po che dang / mu tig dang / dril bu g.yer ka'i dra ba du ma si li si li'i sgra 'byung ba/ rdo rje dang / rin po che du ma'i stegs bu la/ rtsa ba legs par brtan pa/ rdo rje dang / rin po che du ma'i chu srin gyi kha nas byung ba'i mu tig dmar po'i phreng ba dang / 'dab ma'i rnam rten bcug pa/ rin po che du ma'i pad+ma'i snying po la chags pa'i rin po che ke ke ru dang / ke ke ru chen po dang /in+d+ra nI la dang / in+d+ra nI la chen po dang / mdun nas 'od zer chen po bar snang la khyab pas kun du mdzes pa dang / rin po che dang / rdo rje'i thur mas brgyan pa'i gdugs yu bas bstod pa bye ba khrag khrig 'bum phrag du mas grib mar bsgribs shing bskyabs pa/dpag bsam gyi shing du mas brgyan par mdzes pa/ rdo rje rin po che'i khri bya rgod kyi phung po'i rtse mo la bzhugs te/ gser gyi ri bo'i rgyal po ltar dpal ni 'bar/ sa phyogs ni nyi ma stong pas lhag pa'i 'od zer gyi dkyil 'khor gyis rnam par brgyan/ zla ba nya ba ltar 'jig rten thams cad la ni sdug par snang /dpag bsam gyi shing ljon pa chen po ltar sangs rgyas kyi chos rnams shin tu rgyas shing chos ston te/ tshangs par spyod pa/ thog mar dge ba/ bar du dge ba/ tha mar dge ba/ don bzang po/ tshig 'bru bzang po/ ma 'dres pa/ yongs su rdzogs pa/ yongs su byang ba/ yang dag par rab tu ston to/ /spyi gtsug ni sems can thams cad kyis blta bar mi mthong / bdud kyi las thams cad las ni nges par rgyal/ de kho na thams cad mkhyen pa nyid thugs su chud/ spyan lnga ni mnga'/ rnam pa thams cad kyi mchog dang ni ldan/ thams cad mkhyen pa'i ye shes dang ni ldan/ sangs rgyas kyi chos thams cad dang ni ldan/ bdud dang phas kyi rgol ba'i tshogs thams cad ni bcom/ grags pa dang / sgra dang tshigs su bcad pa ni 'phags/ khyu mchog dang seng ge'i sgra ni sgrogs/ma rig pa'i mun pa ni kun du bsal/ bskal pa bye ba khrag khrig 'bum phrag grangs med pa/ dpag tu med par sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / thabs dang / stobs dang /smon lam dang / ye shes kyi pha rol tu phyin pa dang / dka' ba spyad pas mngon par grub pa'i skyes bu chen po'i mtshan sum cu rtsa gnyis dang / dpe byad bzang po brgyad cus sku brgyan par mdzes shing / rin po che rdo rje chen po'i pad+ma'i snying po seng ge'i khri la bzhugs pa'o//rig sngags kyi rgyal mo bsil ba'i tshal gyi gnas dang / 'khor phun sum tshogs pa'i gnas skabs te dang po'o// //de'i tshe na zhes bya ba ni/ bcom ldan 'das rgyal po'i khab na/ bya rgod kyi phung po'i ri la bzhugs pa'i tshe'o/ /tshe dang ldan pa sgra gcan zin zhes bya ba ni/gzhon nu la rab tu byung ba/ 'dul ba'i bya ba mang po mi shes pa/ nga rgyal gyis khengs shing sangs rgyas kyi sras yin sems nas chos la ma chud do/ /rgyal po'i khab kyi dur khrod chen po bsil ba'i nags na zhes bya ba ni/ dpag tshad brgya yod pa/'jigs su rung ba/ ro dang / ro langs dang / ce sbyang dang / stag dang / sbrul dang / seng ge dang / yi dwags dang / sha za dang / 'byung po rnams kyis ro la ma mthun zhing / phar 'grad tshur 'grad byas shing skad rnam pa sna tshogs 'don pa dang /ce sbyang rnams 'thab pa'i skad 'jigs su rung ba dang / keng rus dang / mgo dang / pags pa dang / lag pa'i sor mo dang / rkang pa'i dum bu dang / ro'i dum bu dang / gsal shing la bskyon pa dang / shing la btags nas mgo gzhug zlog pa'i ro dang /man mkhal lcags kyus phigs nas shing la bka' ba'i ro dang / mtshon gyis dum bur byas shing / kha yo ba dang / mig yar la bltas shing shi ba dang / ro mi gcig pa sna tshogs kyis khengs te/ dur khrod shar na ba tra'i nags tshal yod de/ nags tshal gyi nang na lha'i gdon ma rungs pa thams cad gnas pa'o//lho phyogs na ka rany+dza ka'i nags tshal yod de/ gshin rje dang / grul bum dang / mkha' 'gro gnas te/ nub phyogs na la da'i nags tshal yin te/ 'dab chags bya dang / nam mkha' lding dang / klu'i gdon gnas pa'o//byang phyogs na brang ki TI'i nags tshal yod de/ nags tshal de'i nang na/ gnod sbyin dang / sha za dang / gdon ma rungs pa thams cad gnas pa'o/ /shar lho mtshams na tsu ta'i nags tshal yod de/ me lha dang / brjed byed dang / smyo byed la sogs pa'i gdon rnams gnas pa'o//lho nub mtshams na u dum+WA ra'i nags tshal yod de/ de'i nang na srin po'i gdon dang / ma mo'i gdon la sogs pa'o/ /nub byang gi mtshams na n+ya gro d+ha'i nags tshal la rlung gi gdon dang / lha ma yin la sogs pa gnas pa'o/ /byang shar gyi mtshams na ta la'i nags tshal yod de/de'i nang na dbang ldan gyi gdon dang / 'byung po thams cad gnas pa'o/ /de bzhin du de dag la sogs pa shing sna tshogs kyis khengs shing 'byung po dang / sha za dang / ro langs dang / bar snang la rgyu ba'i bya dang / bya rog dang /'ug pa dang / bya rgod dang / khrung khrung dang / de bzhin du ka raN+Da la sogs pa yang / rtag tu 'gyur zhing ro la rgod de/ gzhan yang bya la sogs pa skad sna tshogs 'don pas 'jigs su rung ste/ sa srin dang / sa bdag la sogs pa yang de bzhin te/ dngos grub thob pa dang /rnal 'byor pa'i tshogs mang po dang / ro la rgod cing za 'dod pa'i tshogs dang / dngos grub 'dod pas sgom pa yang sha stag go/ /yi dags dang / sha za dang / bya dang / rnal 'byor ba'i tshogs kyis hUM dang phaT kyi sgra sgrogs shing / hi hi dang ha ha dang / kI li kI li'i sgra sgrogs shing /'jigs su rung ba dur khrod bsil ba'i tshal na 'byung po rnams gnas so/ /de nas dur khrod chen po bsil ba'i tshal gyi shar phyogs na/ de nas dpag tshad lnga na/ na len+d+ra'i grong khyer chen po'o/ /de'i lho phyogs dpag tshad gnyis na/ grong khyer yangs pa can gnas pa'o//de'i nub phyogs dpag tshad phyed dang gnyis na ka ling+ka'i grong khyer gnas pa'o/ /de'i byang phyogs na/ dpag tshad gcig la bya rgod kyi phung po dang / rgyal po'i khab na gnas pa'o/ /bya rgod phung po dang / rgyal po'i khab kyi bar na rgyang grags gcig go//de bzhin du grong dang grong rdal dang / grong khyer dang / ljongs dang / gzhan yang mang po'o/ /bud shing chen po su'i phyogs na 'dug go zhes bya ba ni/ nga rgyal che zhing nyan thos tsam la 'gran te/ nga yang yang dag par rdzogs pa'i sangs rgyas kyi sras yin sems nas/thos pa mi byed cing / bcom ldan 'das la zhu ba mi 'bul zhing / rang mthong gi nga rgyal gyis/ ngas ni dgra bcom pa grub par bya yi snyam nas dur khrod bsil ba'i tshal du phyin to/ /der 'di lta ste zhes pa ni/ bsgom mo snyam nas bsdad pa dang /ma rungs pa'i 'byung po rnams kyis 'tshe bar byas so/ /lha'i gdon dang / lha ma yin gyi gdon rnams dang zhes bya ba ni/ lha dang drang srong gang gnas pa/ de dag thams cad mi bzad cing / /'jigs pa'i sems kyis nyan byed pa/ /bye ba stong gi lha dag dang / / bye ba phrag brgya'i lha rnams dang / /lha yi bu mo skal chen dang / /thags bzangs ris dang sgra gcan dang / /lha min bye ba phrag stong dang / /lha min bye ba phrag brgya dang / /de dag bu mo 'phrul ldan pa/ /rnam pa sna tshogs gzugs sprul la/ /de bzhin skad kyang sna tshogs 'don//gzhon nu sgra zin rtsar bsdad nas/ /'tshe bar byas te sdig pa rnams/ lha'i gdon rnams dang / lha ma yin gyi gdon rnams kyis kyang / 'dug tu mi ster zhing drag shul bstan to/ /klu'i gdon rnams dang / gnod sbyin gyi gdon rnams dang zhes bya ba ni/rab tu gnas na rgya mtsho dang / /klu yi rgyal po gzi can dang / /klu yi rgyal po ma dros dang / /dga' bo nye dga' gnyis po dang / /rdo rje blo gros pak+Shu dang / /gang+gA dga' bo sin d+hu mtsho/ /bya yi rgyal po 'dab bzang dang / /rgya mtsho chen po 'khrug byed dang //rigs ni klu ni klu bzhi dang / /sa srin sa bdag za byed dang / /ma rungs byed cing khro ba dang / /gdug pa byed cing 'tshe byed dang / /stong phrag bye ba'i klu yi gdon/ /bye ba brgya yi klu dag dang / /de yi bu mo skal chen rnams/ /rtag tu sems can gnod par byed//gnod sbyin ma rungs mdangs 'phrog pa/ /snying rje med cing khrag 'thung ba/ /gsus chen 'jigs pa chen po ste/ /stobs po che la sgra yang che/ /mgrin bcu po la mig stong po/ /gdon chen mig ni dmar po rnams/ /'khor ni mang po rnams gtang ste/ / lag na mtshon thogs rab tu 'jigs/ /sbrul gyi zhags pa thogs pa dang / /lag bzhi lag na sgron ma thogs/ /lag na mtshon dang mi lpags thogs/ /rdo rje mdung rtse lag na thogs/ /rab tu grags pa'i gtam brgal nas/ /phyogs kun du ni grags par byed//de yi gnas na 'god pa yi/ /zab mo yi ni rtag tu bskyang / /mi yi 'jig rten 'di dag tu/ /skyes pa bud med rnams kyang 'dzin/ /sha khrag dron mor bcas pa la/ /rnam par 'khrul cing 'dod pa'i gzugs/ /gnod sbyin de dag ma rungs pa/ / sems can rnams la 'tshe bar byed/ /gzhon nu sgra zin bsgom pa la/ /drag shul gyis ni gnod pa byas/ /klu'i gdon dang gnod sbyin gyi gdon gyis bsgom par mi ster zhing drag shul gyis 'tshe bar byas so zhes bya ba'o/ /srin po'i gdon rnams dang mi'am ci'i gdon rnams dang zhes bya ba ni//mi 'am ci dang srin po dang / /rnam pa sna tshogs gzugs bstan pa/ /kha cig mtshon gyis rab tu 'tshe/ /lus dang 'bral ba dag tu snang / /rnam par 'khrugs shing 'dod la mos/ /rgyu ma'i phreng bas kun du dkris/ /rtse gsum mdung gis rab 'debs shing //srog chags rnams la gnod par byed/ /mi bzad pa yi dbugs 'byin cing / /skye dgu 'di dag skrag par byed/ /srog chags rgyud ni ji snyed pa/ /sna tshogs kyi ni gzugs su snang / /kha cig dag ni ri yang thogs/ /la la ral gri 'khor lo thogs//bgegs ni brgya phrag stong rnams te/ /dbyug pas bsdigs shing kha drag po/ /mig phyung ba la bzhin mi sdug /srin po so ni rno ba dang / /sna dang rna ba bcad pa dang / /lce bcad gdong ni gnyer ma can/ /rkang lag dag ni 'khums pa dang / / mgo bo bcad pa'i srin po rnams/ /skabs ni rab tu 'tshol bar byed/ /sdig pa can rnams gzi brjid 'phrog /mi dag gi ni lus rnams la/ /rab tu phra ba'i gdon du snang / /spu yi bar dang gnad rnams dang / /de bzhin rma yi kha rnams zlum/ /srin po mi'am ci'i gdon rnams kyis//'tshe ba rab tu byas pa'o/ /srin po dang mi 'am ci'i gdon gyis/ gzhon nu sgra gcan zin la rnam pa sna tshogs kyi gzugs bstan zhing gnod pa skyel ba'o/ /lto 'phye chen po'i gdon rnams dang / dri za'i gdon rnams dang zhes bya ba ni/ lto 'phye dri za'i gdon rnams kyis/ / snying rje med cing 'tshe byed pa/ /rnam pa sna tshogs sgra 'byin nas/ /gzhon nu de la 'tshe bar byed/ /rdza rnga dag ni brdungs nas su/ /la las rnga zlum dag ni brdungs/ /pi wang gling bu 'khar rnga dang / /stobs chen rnams ni sgra 'byin te/ /rol mo'i dbyangs sgra sna tshogs dang / / glu dang gar rnams byas nas su/ /gzhon nu de la 'tshe bar byed/ /lto 'phye'i gdon rnams dang / dri zi'i gdon rnams kyis kyang / gzhon nu sgra gcan zin la sgra sna tshogs kyi skad kyis 'tshe bar byed pa'o/ /mi ma yin gyi gdon rnams dang / rlung lha'i gdon rnams dang zhes bya ba ni/de yi mdun na 'jug pa yi/ /mi ma yin dang rlung lha'i gdon/ /lag pa bzhi pa ma rungs pa/ /rkang mangs dang ni rkang gcig pa/ /rkang pa bzhi dang rkang pa gnyis/ /rkang pa sgreng la spyi gtsug dang / /lus mangs mgo bo gcig pa dang //lus gcig pa la mgo bzhi dang / /mig mangs po la lus phyed dang / /mig gcig lto ba bcu gnyis dang / /bong bu rnga mo glang chen mgo/ /lag pa sgreng la mgo btud dang / /mtshon cha'i so dang mtshon cha'i lag /mtshon cha'i rkang pa mi ma yin/ /zangs kyi skra dang zangs kyi so/ / zangs kyi mig dang zangs kyi lag /zangs kyi sna dang lcags kyi kha/ /rkang lag kun du 'bar ba dang / /mi yi lus su gnas pa rnams/ /sgur zhar lba ba gsum yod pa/ /mig mi sdug la kha glal ba/ /chu srin dag gi gzugs dang ni/ /gzugs mi sdug la kha ral po//mchu 'phyangs po dang so yon po/ /rab tu gdug pa khro gnyer can/ /gsus po che dang bum sna bo/ /rna 'phyangs pa dang rna ba med/ /lag rings dang ni rna ba ring / /sna yi rtse dang lag rtse ring / lus bskams lus ni ring ba dang / /skra ring rab tu brgyan pa dang / /rkang pa mid pa phra ba dang //dri ba dang bum lto bo/ /yan lag chu srin 'dra ba dang / /mi ma yin dang rlung lha'i sde/ mdun la rgyu zhing ltas ngan bstan/ /sems can thams cad 'tshe byed pa/ /gzhon nus lus la 'tshe bar byed/ /mi ma yin gyi gdon dang rlung lha'i gdon rnams kyis kyang / sna tshogs kyis gzugs bstan zhing gzhon nu'i lus la 'tshe bar byas so//yi dags kyi gdon rnams dang / 'byung po'i gdon rnams dang zhes bya ba ni/ yi dags 'byung po'i gdon rnams kyis/ /phyogs bzhi la ni gnod byed pa/ /mi sdug gzugs ni bstan nas su/ /drag po'i tshul gyis sgra yang 'byin//shin tu 'jigs pa'i tshul bstan nas/ /gtun shing tho ba 'dra ba'i lto/ /rnam lto ba la rna bo che/ /gyen du brdzes skra rab tu dmar/ /mgo bo che la mjug rings po/ /skem po sgrur bo bum lto bo/ /ri rab rtse mo 'gul nas su/ /me mdag gi ni char pa 'bebs//ldon shing ri rab rdo ba dang / /sprin gyi tshogs kyi mdog 'dra ba/ /dung dang rnga chen rdza rnga dang / /'byung po yi dags rnams kyis rdung / /shin tu mi srun thal mdog 'dra/ /mgal pa chu la bcug pa'i mdog /khrag la dga' zhing sha la dga'/ /bzhin mi sdug cing gzugs che ba//keng rus gzugs ni skra rings po/ /mig yo kha yo mgo gnyis pa/ /skyes pa bud med gnod byas nas/ /gzi brjid 'phrog cing srog kyang 'phrog /phyogs bzhi dag nas gnod pa po/ /gzhon nu sgra zin 'tshe bar byas/ /yi dags kyi gdon dang 'byung po'i gdon rnams kyis gzhon nu sgra gcan zin la phyogs bzhi nas byas so//sha za'i gdon rnams dang grul bum gyi gdon rnams dang zhes bya ba ni/ sha za grul bum gdon rnams ni/ /stobs dang ldan zhing lus ngan po/ /gsus po che la mgo bo che/ /mig zlum sna ni sbrul 'dra ba/ / la la chu srin sna 'dra ste/ /skad cig tsam gyis gar yang khyab/ /sa g.yo byed cing ri rab 'gul/ /ma rungs pa ni 'bebs byed pa/ /ske ba che la sgra yang 'byin/ /la la mi lpags thogs nas su/ /sems can rnams la 'tshe bar byed/ /mi yi gzugs la zhugs nas su//mdze yi nad rnams gtong ba'i bdag /de bzhin phran tshegs nad gtang ba/ /sems can rnams la 'tshe bar byed/ /grul bum rnga bran rnams kyi sgra/ /'jigs pa'i sgra ni rab tu 'byin/ /ming po che la bong bu'i sgra/ /nag po sngon po ser po dang / / dmar ser me ltar dmar ser dang / /khab 'dra'i spu dang ral gri'i skra/ /dmar po khrag gis bskus pa rnams/ /mi ro dag ni khyer nas su/ /za bzhin du ni rnam par rgyug /so rnon lag pa dmar po dang / /mchu ni khrag gis bskus pa dang / /lus phyed dag ni zos pa dang //mkhal ma snying dang nang grol gyis/ /snyim pa shin tu gang ba dang / /byin pa dag ni za bzhin du/ /mer mer po dang srog chags kyi/ /rkang lag rnams kyi stobs kyang 'phrogs/ /keng rus kyi ni lus kyis su/ /skye bo mang po skrag par byed/ /khrag gis rab tu gang ba yi//mi yi pags pa thogs nas su/ /mi bzad dug gis kun bskus te/ /phyogs phyogs dag tu rnam par rgyugs/ /grong khyer rnams kyi sgo dag dang / /khyim nas khyim du rnam par 'thor/ /rlung dang bad kan mkhris pa rnams/ /phyogs bzhi dag tu 'khrug par byed/ /sha za grul bum gdon rnams ni//gzhon nu de la gnod par byed/ /sha za grul bum gdon rnams kyis rnam pa sna tshogs kyi nad btang la rnam par 'tshe bar byas so/ /gzig rnams dang / bya rog rnams dang / 'ug pa rnams dang / grog sbur dang / sdig pa rnams dang zhes bya ba ni/ rnam par 'khrul zhing 'dod pa'i gzugs//seng ge dang ni stag dang rta/ /ma he ba lang bong bu dang / /glang po che yi gzugs 'dra dang / /dom dang lug dang spyang ki dang / /khyi dang wa dang ra dag dang / /byi la byi ba spre'u'i gzugs/ /bse dang phag dang dred mo dang / /nya dang rus sbal dag gi gzugs/ / kha cig dag ni sram gyi gzugs/ /khwa dang 'ug pa khu byug dang / /bya rog khra dang nya mid can/ /rma bya ngang pa thi ba dang / /khrung khrung dang ni bya rnams dang / /kha cig bya gag gzugs rnams su/ /gdon rnams la ni mi yis mthong / /'dab bzangs bya yi tshul gyis kyang / /skye bo mang po skrag par byed//kha cig mi yi mgo can la/ /lus ni bya gag bong bu 'dra/ /kha cig mtshon gyis rab tu 'tshe/ /lus dang bral ba dag tu snang / /sa dang bar snang phyogs dag tu/ /khengs nas sems can byung ba ste/ /gzhon nu'i lus la rnam par za/ /bsdad pa gang dang gang rnams su//sems can rnams kyis 'dug mi ster/ /bar snang tshogs nas byung nas su/ /gzhon nu'i lus la 'tshe bar byas/ /gzhon nu sgra gcan zin la dur khrod bsil ba'i tshal du 'dug mi ster zhing / /lus la 'tshe bar byed pa'o/ /gzhan yang mi dang mi ma yin gyi sems can rnams kyis zhes bya ba ni/zhags pa ral gri 'dzin rnams dang / /mda' gzhu mdung rnams thogs nas su/ /skra 'dzings skra mdud spyi gtsug tu/ /khro bo'i tshul du bstan pa ste/ /zhi ba'i tshul du mi ston to/ /mi rgod mang po der byung nas/ /bsdigs shing 'tshog par byed pa ste/ / khrid pa'i tshul ni bstan nas su/ /mtshon gyis brdegs shing bsdigs par byed/ /sems can thams cad gnod byed pa/ /mi rgod de rnams sdig pa can/ /lha dang klu dang dri za dang / /gnod sbyin srin po lha ma yin/ /nyin gsum pa yi smyo byed dang / /de bzhin du ni ri dgas dang //'jig rten 'tshe ba gang yin pa/ /gdon sbyin srin po ma rungs rnams/ /'dir ni 'khod de gzhon nu la/ /drag shul gyis ni gnod byed do/ /gzhan yang bya rog 'ug pa dang / /bya gag bya la sogs pa yis/ /bar snang dag la 'tshe bar byas/ /gdon rnams de rnams dag gis ni//log par bstan nas 'tshe byed pa/ /bud med dag dang skyes pa dang / /de bzhin bu pho bu mo dang / /mngal na gnas pa'ang 'jig par byed/ /dud 'gro'i skye gnas gtogs pa'ang 'tshe/ /skar ma dag dang nyi zla dang / /gtum pa'i gza' rnams gnod par bgyid//lo tog sa bon 'bras bu dang / /me tog sman dang zas skom dang / /mi rnams kyi ni dpal 'phrog cing / /mthon po rnams ni dma' bar byed/ /'jig rten dag na snang ba rnams/ /dmag dang 'thab mo sha gnyer dang / /tshig gam gzhig gam gsang bya ba/ /de kun 'byung po'i rnam par sgyur//sbed cig gtong bar byed pa dang / /log par byed cing dgad par 'gyed/ /'jig par byed cing lta bar bgyid/ /dgrar 'gyur ba yang ston par bgyid/ /sdig pa'i rmi lam mthong bar bgyid/ /nyal ba dag la gnod par bgyid/ /sgo nas se gol sgra phyung zhing //mi snyan brjod de za bar bgyid/ /mdza' bo gnyen bshes gzugs dag tu/ /dga' zhing dka' mchid smra bar bgyid/ /bu mo sdu gu'i gzugs dag tu/ /'dod pa spyod par dga' bar bgyid/ /nyi ma skar ma'i gzugs dang ni/ /zla ba'i gzugs su gda' bar bgyid//rlung dang skar mda' lce gzugs su/ /de la gnod pa byed par gda'/ /skar ma'i tshogs dang 'dra ba dag /'jigs par bgyid pa wa dang khyir/ /rnam par sprul nas ljon shing dang / /mchod rten dag gi gnas na gda'/ /skyes pa gzhon nu'i gzugs mdzes las//'bar zhing shing rta'i sgra yang 'byin/ /nad rnams dang ni shul dag tu/ /rnam pa sna tshogs rjes kyang ston/ /grong khyer dag dang khyim rnams kyi/ /sgo yang gdon chen de dag 'byed/ /srog dang lus kyang blangs bgyis shing / /lam ngan kun du skor bar bgyid//rnam pa sna tshogs gzugs dag dang / /rnam pa sna tshogs sgra rnams dang / /rnam pa sna tshogs nad kyi rnams/ /lus la na ba gnas par ston/ /nad rnams kun gyi mtshan nyid kyang / /phyin ci log tu ston par bgyid/ /ji snyed 'jig rten rang bzhin dag /thams cad log par de dag ston/ /de bzhin log par ston byed pa/ /'jig rten la ni 'jigs par byed/ /'tshe ba sgra zin gzhon nu la/ /phyin ci log cing gnod par byed/ /gzhon nu sgra gcan zin la gnod pa de rnams kyis/ zhe sdang byas shing 'tshe bar byas so//tshe dang ldan pa sgra gcan zin la ni shin tu gtses so zhes bya ba ni/ dug lnga khong du shar bas zhe sdang byas shing nga rgyal che ba dang / ma shes par shes par smra ba/ ma snyan par snyan par smra ba/ rang gi rig pas bsgrubs pa byas pa/ rang gi rig pas smra zhing gzhan la ston pa/bla ma la mi zhu zhing / rang rig gis bstan pa dang / bla ma'i rig pa bzhag cing rang rig smra ba dang / lung dang bka' la mi brten cing / rang gi nga rgyal gyis rang bzo byas pa dang / tshe phyi ma la mnar med du skye ste/ tshe 'di la yang gdon de rnams kyis 'tshe bar byed cing srog 'phrog pa'o//de bzhin du gzhon nu sgra gcan zin yang / skad sna tshogs 'byin cing gzugs sna tshogs ston cing gdon rnams kyis phar 'then tshun 'then byas shing rang gi lus la rang dbang med do/ /gzhon nu sgra gcan zin de 'jigs par byed cing 'dar te/lus la yang na tshas thebs te/ bcom ldan 'das dran zhing skad sna tshogs 'byin zhing kyi hud kyi hud zer zhing sangs rgyas la skyabs su gsol lo/ /chos la skyabs su gsol lo/ /dge 'dun la skyabs su gsol lo/ /de skad ces gsol ba dang /gdon rnams kyis lan cig gzhag go/ /bzhag ma thag tu bsil ba tshal nas bros te/ bros ma thag tu gdon rnams kyis ded pa dang / gzhon nu sgra gcan zin mdog shor zhing / ba spu yang gyen la log ste/ hag zad cing 'jigs pa'i sdug bsngal nyams su myong ngo //rig sngags kyi rgyal mo bsil ba'i tshal gyi gzhon nu sgra gcan zin gdon gyis zin pa'i gnas skabs te gnyis pa'o// //de nas zhes bya ba ni/ gdon gyis zin pa'i de nas so/ /de nas tshe dang ldan pa sgra gcan zin/ bya rgod kyi phung po'i rig la ba dang bcom ldan 'das ga la ba der song ste/phyin nas zhes bya ba ni/ gdon thams cad kyis 'tshe bar byas pas/ 'jigs shing mdog kyang shor te/ ba spu rnams gyen du log cing / g.yengs te phar lta tshur lta byas shing / gdon rnams kyis phyir 'brang ngo sems so//bcom ldan 'das kyi zhabs la mgo bos phyag 'tshal te zhes bya ba ni/ bag chags shes bya'i dri ma thams cad 'joms pa/ sems can thams cad kyi don mdzad pa/ de kho na nyid kyi ye shes khong du chud pa/ sangs rgyas thams cad kyi ngo bo nyid ces pa rdo rje'i seng ge pad+ma chen po'i gdan la bzhugs te/bya rgod phung po'i ri gzhal yas khang gi rang bzhin gyi sa gzhi la/ byang chub sems dpa' dang / dge slong dang / dge slong ma dang / dge bsnyen pha dang / dge bsnyen ma dang / lha dang / mi dang / 'khor phun sum tshogs pa'i spyan sngar 'jigs shing lus po thams cad 'dar ba dang kha nas dbugs kyang 'thon to//bcom ldan 'das la lan gsum bskor ba byas nas zhes bya ba ni/ tshe dang ldan pa sgra gcan zin gdon gyis btab pa'i 'jigs pas bcom ldan 'das la gus par bya'o/ /bcom ldan 'das kyi spyan sngar 'dug ste/mchi ma blags so zhes bya ba ni/ gdon gyis btab pa'i yus kyis/ kyi hud kyi hud zer zhing dbyar gyi char bzhin du gdong gi mchi ma mi thub po/ /de nas zhes bya ba ni/ gzhon nu sgra gcan zin yus che ba de nas so/ /bcom ldan 'das kyis tshe dang ldan pa sgra gcan zin la bka' stsal pa zhes bya ba ni/sems can thams cad mnyam pa nyid du bsgom pa'i sems dang ldan pa sngon gyi bya ba dur khrod bsil ba'i tshal gyi lo rgyus thugs kyis mkhyen nas/ sems can thams cad kyi don la tshe dang ldan pa sgra gcan zin la bka' stsal pa'o zhes sgra gcan 'dzin khyod ci'i phyir nga'i mdun du 'dug nas mchi ma blag ces bya ba ni/stong gsum gyi stong chen po'i 'jig rten gyi bya ba thams cad skad cig mas thugs su chud nas/ des tshig gi gtam dris pa'o/ /de skad ces bka' stsal nas zhes bya ba ni/ bcom ldan 'das kyis tshe dang ldan pa sgra gcan zin la smras pa'o/ /bcom ldan 'das la tshe dang ldan pa sgra gcan zin gyis 'di skad ces gsol to zhes bya ba ni/ bcom ldan 'das kyi spyan sngar des tshig gi gtam smras shing zhus pa'o/ /bcom ldan 'das rgyal po'i khab kyi dur khrod chen po bsil ba'i tshal na zhes bya ba ni/bya rgod kyi phung po'i ri dang rgyal po'i khab dang / bsil ba'i tshal gyi bar na dpag tshad gcig yod de/ bya rgod kyi phung po'i ri'i lho phyogs na ro thams cad bskyal ba'i sa/ rnam rtog gsum bcom pa'i bsil ba'i tshal lo/ / rnam rtog gsum dang / bsil ba'i tshal ni nges tshig gang gi phyir zhe na/ bsil ba'i tshal de yang / 'jigs pa'i sgra'i rnam par rtog pa byung ste/ sems can thams cad mnyam pa nyid sgom zhing / byams pa'i stobs kyis 'jigs pa dang bral ba'o/ /rnam par rtog pa de spangs pas 'jigs pa'i rang bzhin de mi 'byung ngo //ngo tsha'i rnam par rtog pa ni yi dags dang / ro yang gcer bur gnas te/ de bzhin du 'jig rten gyi khams kyi sems can yang mi rtag ste/ de'i ngo bor bzhag nas 'jig rten gyi khams sgyu ma lta bu yin te/ de'i rang bzhin gyis ngo tsha ba'i rnam rtog dang 'dral ba'o//skyugs bro ba'i rnam rtog ni dur khrod bsil ba'i tshal de la yang 'byung ste/ ro'i rnam pa mi gcig pa dang sha dang khrag dang klad pa la sogs pas khengs pa'i sa gzhi yin te/ de bzhin du rang gi lus las rnag dang mchil ma dang rgyu ma dang gci ba la sogs pa yang 'byung ste/de bzhin du mi rtag cing rnam par rtog pa med do/ /bsil ba'i tshal ni rnam par rtog pa gsum dang bral zhing / yang dag pa'i ye shes de nas de byung ste/ dngos grub thams cad kyis gzhi/ byang chub thob pa'i lam/sgyu ma thams cad bstan pa/ mi rtag pa'i rang bzhin du bstan pa/ sems can thams cad dug gsum gyi rang bzhin gyi rnam par rtog pa dang bral bar byed pas na bsil ba'i tshal yin te/ de bzhin du lus ngag yid zhi bar byed pas na/ bsil ba'i tshal yin zhes/ yang na bsil ba'i tshal ni rnam par rtog pa thams cad dang 'bral ba'i phyir ro/ /bud shing chen po lta bu'i phyogs na mchis na zhes bya ba ni/ dug lnga'i rang bzhin gyis nga rgyal dang zhe sdang byas te/ de bzhin du gti mug kyang shas che zhing / bcom ldan 'das la mi zhu zhing bdag dgra bcom pa thob par bya snyam nas bsil ba'i tshal du mchis so zhes smras so//der zhes bya ba ni dur khrod bsil ba'i tshal gyi dbus su bdag gis sdug bsngal thams cad myong ba zhes pa'o/ /lha'i gdon rnams dang lha ma yin gyi gdon rnams dang zhes bya ba ni/lha dang lha ma yin gyi gdon yang gzugs sna tshogs ston cing / lha'i 'khor pho dang lha'i 'khor mo sna tshogs pa bye ba stong gi lha dang / bye ba phrag brgya'i lha rnams dang / de bzhin du lha ma yin gyis kyang 'tshe bar byas so zhes bya ba'o/ /klu'i gdon rnams dang gnod sbyin gyi gdon rnams dang zhes bya ba ni/klu'i nad thams cad gtong zhing / gnod sbyin gyi gzugs sna tshogs bstan te/ de bzhin du bye ba stong gi klu dang / bye ba stong gi gnod sbyin dang bye ba phrag brgya'i klu'i g.yog dang thabs cig tu 'tshe bar byas so/ /srin po'i gdon rnams dang /mi'am ci'i gdon rnams dang zhes bya ba ni/ sha khrag la dga' zhing / gdon de gnyis ni dpon g.yog dang bcas shing / bye ba stong dang bye ba phrag brgya'i gdon rnams kyis kyang bdag la 'tshe bar byas so zhes pa'o/ /dri za'i gdon rnams dang / lto 'phye chen po'i gdon rnams dang zhes bya ba ni/ glu len zhing bro rdung zhing sgra sna tshogs ston te/ gdon de gnyis ni bye ba phrag brgya 'khor g.yog dang bcas pa byung ste/ de bzhin du bdag la gnod pa bskyal zhes bya ba'o/ /mi'i gdon rnams dang / rlung lha'i gdon rnams dang zhes bya ba ni/dur khrod bsil ba'i tshal gyi nang na/ gzugs dang sgra sna tshogs byas shing byung ba ste/ de bzhin du g.yog dang 'khor mang po 'dus shing sgom du mi ster ba'o/ /yi dags kyi gdon rnams dang 'byung po'i gdon rnams dang zhes bya ba ni/ gdon de gnyis kyang bzhin mi sdug cing /mdun du ltar byung ste/ gzugs sna tshogs ston cing sgra sna tshogs ston pa'o/ /sha za'i gdon rnams dang / grul bum gyi gdon rnams dang zhes bya ba ni/ gsus po che la mgo che ba mang po 'dus nas byung ste/ gdon de rnams kyis kyang phyogs bzhi nas 'tshe bar byas pa'o/ /gzig rnams dang bya rog rnams dang 'ug pa rnams dang grog sbur rnams dang sdig sbrul rnams dang zhes bya ba ni/sa dang bar snang la rgyu ba'i sems can thams cad kyis kyang lus la 'tshe bar byas shing bdag la na tsha byung ngo zhes pa'o/ /mi dang mi ma yin pa'i sems can rnams kyis/ bdag shin tu gtses pa lags mod kyi zhes bya ba ni/mi rgod mtshon sna tshogs thogs pa dang / gzhan yang bgegs ma rungs pa rnams kyis kyang / gzhon nu sgra gcan zin la sdug bsngal thams cad myong zhing 'tshe bar byas so zhes pa'o/ /de nas zhes bya ba ni/ sgra gcan zin gyis smras pa'i de nas so//bcom ldan 'das kyis tshe dang ldan pa sgra gcan zin la bka' stsal pa zhes bya ba ni/ sems can thams cad kyi don du dmigs la 'khor phun sum tshogs pa'i nang du khyu mchog dang seng ge'i sgra sgrogs pa'o/ /sgra gcan zin khyod kyis zhes bya ba ni/ gti mug gi rang bzhin gyis nga rgyal dang / phrag dog byas te da yang khyod kyis ma byed cig ces rig sngags kyi rgyal mo bsil ba'i tshal be con chen po zhes bya ba ni/ rig sngags kyi rgyal mo ni chos kyi sku ste/ bsil ba ni longs sku'o/ /tshal ni sprul sku ste/ be con ni chang pa thams cad dang bral bar byed pa'o//de bzhin ci'i phyir zhe na/ rig pa ni stong pa ste/ ngo bo nyid dang bral zhing brjod du med pa'o/ /sngags ni ma man+t+ra ste skyob pa dang srung ba'o/ /de yang stong pa nyid kyi rang bzhin no/ /bsil ba ni sgyu ma lta bu'i rang bzhin te/ / longs spyod rdzogs pa'i sku'i rang bzhin/ yod pa yang ma yin med pa yang ma yin/ gnyis ka yang ma yin no/ /tshal ni sprul sku ste/ stong gsum gyi stong chen po'i 'jig rten gyi khams la dus gcig tu nam mkhas khyab pa bzhin du khyab pa'o/ /be con gyi lha'i gdon rnams kyi chad pa dang 'jig rten 'di'i rgyal po dang /rkun po dang chu dang me la sogs pa'i chad pa dang / gzhan yang gshin rje dang 'khor ba na 'bral te/ de sdug bsngal thams cad dang bral bas na be con zhes pa'o/ /yang na bsil ba'i tshal ni lus ngag yid zhi bar byas te/'khor ba'i sdug bsngal thams cad dang bral bar byed pa'o/ /gzungs kyi rig sngags zhes bya ba ni/ gzungs ni lus dang ngag dang yid kyi gzungs te/ de yang dag par gzung zhing / stong pa nyid la sems bzhag nas/ sems can thams cad la byams pa dang snying rjes khyab pa'o//'khor bzhi po zhes bya ba ni/ bcom ldan 'das gar gshegs pa'i sar 'khor ba'o/ /dge slong rnams dang zhes bya ba ni/ byang chub sems dpa' dang / dgra bcom pa la sogs pa'o/ /dge slong ma rnams dang zhes bya ba ni/ sgra gcan zin gyi ma dang / dge slong ma lnga brgya la sogs pa'o/ /dge bsnyen rnams dang / dge bsnyen ma rnams dang zhes bya ba ni/ rgyal po chen po ma skyes dgra dang / btsun mo la sogs pa'o/ /bsrung ba dang / bskyab pa dang / sba ba dang / yun rings po'i don dang phan pa dang bde bar 'gyur ba zung shig ces bya ba ni/rig sngags kyi rgyal mo 'di 'chang bar gyur na/ sdug bsngal thams cad dang 'bral zhing bde ba thob pa'o/ /lha dang mis kyang de bzhin du zung shig ces bya ba ni/ gzugs khams kyi lha dang 'dod khams kyi lha dang / sangs rgyas dang chos dang dge 'dun la gus par byed pa'i mi rnams kyis/ rig sngags 'di zung shig ces pa'o/ /rigs kyi ngo bo nyid gang zhe na shes rab dang thabs yin te/ 'dir ni shes rab kyi ngo bo las/ thabs kyi ngo bor mi snang ngo zhes pa'o/ /slob dpon las kyi rdo rjes gsungs pa ni/mtshon pa dag ni ye shes te/ /mtshon byed rig sngags rgyal mo la/ /phyag mtshan sku mdog bstan pa ste/ /thabs kyi ngo bo de bzhin no/ /de bzhin du bya ba nan tan gyi ye shes mtshon pa ni shes rab po/ /rig sngags nyid sgom pa ni thabs kyi ngo bo nyid yin te/de yang mtshon par byed pa'o/ /de'i phyir na thabs dang shes rab gnyis su med pa'o/ /de'i phyag mtshan dang sku mdog ni gang zhe na/ zhal gsum pa phyag drug pa sku mdog ljang gu sangs rgyas lnga'i dbu rgyan can/ spyan gsum pa zhal g.yas dkar po/g.yon dmar ba lo bcu drug pa'i gzugs su bzhugs pa phyag g.yas pa gsum na/ ral gri dang / skyabs sbyin dang / rin po che'i steng na rdo rje'o/ /g.yon pa gsum na bum pa'i steng na rdo rje dang / zhags pa dang lcags kyu'o/ /zhabs rdo rje'i skyil krung du bzhugs pa/pad+ma'i steng na zla ba'i gdan la nyi ma'i 'od dang ldan pa'o/ /rgyan thams cad kyis brgyan pa ye shes lnga'i ngo bo nyid las kyi rigs rlung gi khams lus kyi skye mched traM gi yig 'bru las ye shes lnga 'phros sems can thams cad kyi don byas so/ /rig sngags kyi ngo bo nyid sems can gyi don byed pa'i tshig ni las kyi snying po ste/'di lta ste/ ang gA bang gA b+haM gA la sogs pa'o/ /rgyal po dang dbang po dang zhes bya ba ni/ brgya byin yin te/ zhal gcig pa phyag bzhi pa sku mdog ser po/ spyan gsum pa la dpral ba'i mig phred la yod pa/lha'i dbu rgyan la sogs pas brgyan pa/ phyag g.yas pa gnyis na rdo rje dang mda'o/ /g.yon pa gnyis na gdugs dang / gzhu bsnams pa/ glang po che la zhon pa'o/ /rgyal po gshin rje dang zhes bya ba ni/ zhal gcig phyag bzhi pa sku mdog nag po khro bo'i tshul du bstan pa dbu skra thor tshugs can g.yas pa gnyis na ral gri dang be con 'dzin pa/g.yon pa gnyis na zhags pa dang lcags kyu bsnams pa'o/ /ma he la zhon pa zhal gcig phyag bzhi pa ste/ sku mdog dkar po go cha gyon pa/ /g.yas g.yon gnyis na pad+ma dkar po bsnams pa/g.yas pa na ral gri g.yon pa na ri bong gi rgyal mtshan bsnams pa'o/ /rnga mo dkar po'i shing rta la zhon pa'o/ /rgyal po chu lha dang zhes pa ni/ zhal gcig phyag bzhi pa/ sku mdog dkar po sbrul gyi gdengs ka dang bcas pa phyag g.yas pa'i dang po na pad+ma dmar po ste/'og ma ni rin po che'o/ /g.yon pa dang po na sprul gyi zhags pa 'og ma na bum pa bsnams pa ste/ chu srin la zhon pa'o/ /rgyal po dang nyi ma dang zhes bya ba ni/ zhal gcig sku mdog dmar po phyag bzhi pa g.yas g.yon gnyis na pad+ma dmar po 'dzin pa/ g.yas na ral gri g.yon pa na lcags kyu bsnams pa'o/ /shing rta dang bcas shing nam mkha' la rgyu ba'o/ /rgyal po rlung lha dang zhes bya ba ni/ zhal gcig phyag bzhi pa sku mdog sngo skya phyag g.yas pa gnyis na ba dan dang lcags kyu bsnams pa g.yon pa gnyis na rlung 'khyil ba dang /bum pa bsnams shing sha ba la zhon pa'o/ /rgyal po gzi can dang zhes bya ba ni/ zhal gcig phyag gnyis pa ste/ sku mdog ser po phyag g.yas na sbrul zhags 'dzin zhing / g.yon na a 'bras 'dzin pa ku be ra la zhon pa'o/ /rgyal po sems zhes bya ba ni/ pa bsangs yin te/ zhal gcig phyag gnyis pa sku mdog dkar po/ /phyag g.yas na bum pa spyi blugs g.yon pa phreng ba bsnams pa/ pad+ma'i gdan la zhugs pa'o/ /rgyal po gshin rje'i dbyug to can zhes bya ba ni/ zhal gcig phyag bzhi pa sku mdog dmar nag phyag g.yas pa gnyis na/ral gri dang tho ba bsnams pa/ g.yon pa gnyis na zhags pa dang sdigs mdzub mdzad cing / ro langs la zhon pa'o/ /rgyal po me'i dbyug to can zhes bya ba ni/ me lha'i dbang po yin te/ zhal gcig phyag bzhi pa sku mdog dmar po/ phyag g.yas pa gnyis na rtse gcig dang bum pa spyi blugs bsnams pa/ g.yon pa me 'bar ba dang phreng ba bsnams pa ra skyes la zhon pa'o/ /rgyal po dbyug to can dang zhes bya ba ni mig dmar yin te/ zhal gcig phyag gnyis pa sku mdog dmar po khro bo/ g.yas na dbyug to mig can 'dzin pa/g.yon pa ni mi mgo sdigs mdzub bsnams pa/ ra dmar po la zhon pa'o/ /rgyal po rgyal ba zhes bya ba ni spen pa yin te/ zhal gcig phyag gnyis pa sku mdog dkar po phyag g.yas na bu sti bsnams pa/ g.yon na bum pa bsnams pa/ brag gi gdan la zhugs pa'o/ / rgyal po rnam par rgyal ba zhes bya ba ni/ phur bu yin te/ zhal gcig phyag gnyis pa/ sku mdog mthing nag phyag g.yas g.yon gnyis kyis mda' gzhu bsnams shing glang po che la zhon pa'o/ /rgyal po 'jigs pa dang zhes bya ba ni/ lag pa yin te/ zhal gcig phyag gnyis pa/ sku mdog ljang nag phyag g.yas na ral gri g.yon na sdigs mdzub rus sbal la zhon pa/rgyal po rnam par gzigs dang zhes bya ba ni/ rA hu la yin te/ zhal gcig phyag gnyis pa/ sku mdog nag po ro smad med pa phyag g.yas g.yon gnyis na zla ba dang nyi ma bsnams pa/ sprin gyi gdan la bzhugs pa'o//rgyal po 'byung po zhes bya ba ni/ dbang ldan yin te/ zhal gcig phyag bzhi pa/ thal ba'i mdog can spyan gsum pa phyag g.yas pa gnyis na rtse gsum dang bum pa spyi blugs bsnams pa/ g.yon gnyis na phreng ba dang / a 'bras bsnams pa glang la zhon pa'o//rgyal po yul 'khor srung zhes bya ba ni/ dri zi'i rgyal po yin te/ zhal gcig phyag bzhi pa/ sku mdog dkar po phyag g.yas g.yon gnyis na 'khor lo dang / mchod rten bsnams pa/ pad+ma'i gdan la bzhugs pa'o/ /rgyal po 'phags skyes po dang zhes bya ba ni/grul bum gyi rgyal po yin te zhal gcig phyag bzhi pa sku mdog mthing ga /phyag g.yas pa gnyis na dbyug to dang tho ba bsnams pa/ g.yon pa gnyis na rin po che dang rtse gsum bsnams pa/ pad+ma'i gdan la bzhugs pa'o/ /rgyal po mig mi bzang zhes bya ba ni/klu'i rgyal po yin te/ zhal gcig phyag bzhi pa/ sku mdog dmar po phyag g.yas pa na pad+ma/ gnyis pa na dgra sta/ g.yon dang po na sbrul gyi zhags pa gnyis pa dung bsnams pa/ pad+ma'i gdan la bzhugs pa'o/ /rgyal po lus ngan po zhes bya ba ni gnod sbyin gyi rgyal po yin te/zhal gcig phyag bzhi sku mdog ljang gu/ phyag g.yas kyi dang po na ral gri/ 'og ma dbyug to/ /g.yon pa na ne'u le/ 'og ma na bum pa/ pad+ma'i gdan la bzhugs pa'o/ /rgyal po mi mjed kyi bdag po tshangs pa zhes bya ba ni/ zhal bzhi pa phyag bzhi pa sku mdog ser po//spyan gsum pa phyag g.yas na dbyu gu rtse gsum/ 'og ma na mchod sbyin/ g.yon dang po na phreng ba/ 'og ma na bum pa spyi blugs/ pad+ma'i gdan la bzhugs pa'o/ /sangs rgyas bcom ldan 'das chos kyi rje/ chos kyi rgyal po 'jig rten la thugs brtse ba bla na med pa zhes bya ba ni/yang dag par rdzogs pa'i sangs rgyas shAkya thub pa rnams yin te/ de yang chos sku dang longs spyod rdzogs pa'i sku dang / sprul sku yin te/ 'dir yang sprul sku'i rang bzhin ni thugs rje che zhing sems can gyi don la bshad de/ zhal gcig phyag gnyis pa/sku mdog 'dzam bu gling gi gser gyi kha dog 'dra ba/ sa gnon gyi phyag rgya mdzad pa/ rdo rje'i seng ge pad+ma'i gdan la bzhugs pa/ rab tu byung ba'i cha byad du bzhugs pa/ dus gcig tu sems can gyi don la snying rjes khyab pa'o/ /bdag dang sems can thams cad la srung du gsol/srung du gsol zhes bya ba ni/ rig pa 'chang ba gang yin pa de ni 'jig rten dang 'jig rten las 'das pa'i 'khor rnams kyis kyang srung zhing sdug bsngal thams cad dang bral te/ bla na med pa yang dag pa'i bde ba thob pa'o/ /sems can thams cad kyang de bzhin no//yongs su bskyab pa dang yongs su gzung ba dang yongs su bskyang ba dang zhi ba dang bde legs su gyur pa dang / chad pa spang ba dang mtshon cha spang ba dang dug bsad pa dang dug gzhil ba dang mtshams bcad pa dang sa bcing ba mdzad du gsol zhes bya ba ni/rig sngags kyi rgyal mo bsil ba'i tshal 'di la gus par byas nas/ 'chang ba dang / klog pa dang / sgom pa la sogs pa byas te/ de bzhin du de ni 'grub par 'gyur ro/ /de nas rig sngags 'chang bar bya'o zhes pa'o/ /rig sngags ni gang zhe na/ ye shes lnga dang ldan pa ste/ mtshon pa ni bya ba nan tan gyi ye shes te/mtshon byed ni rig sngags kyi rgyal mo'i bdag nyid do/ /de yang thabs dang shes rab gnyis su med pa'i rnam par dag pa'o/ /gzhi bstan pa ni rnam par thar pa'i ye shes lnga dang ldan pa ste/ mtshon pa ni bya ba nan tan gyi ye shes te/ mtshon byed ni rig sngags kyi bdag nyid do//de yang thabs dang shes rab gnyis su med pa'i rnam pa zhal bzhi bstan pa ni rnam par thar pa'i sgo bzhi'i rnam par dag pa'o/ /sangs rgyas lnga'i dbu rgyan ni gti mug la sogs pa dug lnga bcom nas/ ye shes lnga shar ba'i rnam par dag pa'o/ /spyan gsum dang ldan pa ni ye shes kyi spyan gyis mun pa mun nag bcom nas 'khor ba thams cad las thar bar byed pa'o//zhal nag po dang dkar po dang dmar po dang ser po bstan pa ni/ mngon spyod dang zhi ba dang dbang dang rgyas pa'i las bzhi bstan pa'o/ /khro bo dang / zhi ba dang / sgeg pa dang / dgod pa ni sems can mi gcig pa'i theg pa sna tshogs bstan pa'o//sku mdog nag po ni byams pa chen po dang ldan pa'i rnam par dag pa'o/ /rgyan thams cad dang ldan pa ni/ pha rol tu phyin pa drug rnam par dag pa'o/ /phyag brgyad ni rnam par thar pa brgyad kyi rnam par dag pa'o/ /g.yas dang po na ral gri ni shes rab kyi rang bzhin blo dman pa rnams la blo 'phel bar byed pa'o//'og ma na rdo rje rgya gram bsnams pa ni/ sems can ma rig pa'i las las thar bar byed pa'o/ /de'i 'og ma na dgra sta bsnams pa ni/ 'khor ba rnams la gcod par byed pa'o/ /tha ma na mda' bsnams pa ni/thabs kyi rang bzhin brtan pa'o/ /g.yon pa'i dang po na zhags pa bsnams pa ni 'khor ba na gnas pa'i sems can 'dren pa'o/ de'i 'og mas 'khor lo bsnams pa ni/ gti mug la sogs pa'i dug lnga gcod pa'o/ /de'i 'og ma na rtse gsum bsnams pa ni/srid pa gsum 'joms par byed pa'o/ /tha ma na gzhu bsnams pa ni/ shes rab kyi rang bzhin rnam par dag pa'o/ /zhabs phyed skyil du bzhugs pa ni/ bdud bzhi rnam par bcom pa'i brda'o/ /pad+ma dang zla ba'i gdan la bzhugs pa ni/ chos de'i nyams myong 'khor ba thams cad las thar ba'o//nyi ma'i 'od dang ldan pa ni/ rig sngags kyis bya ba bstan nas/ khro bo'i tshul du sems can ma rungs pa rnams 'dul ba'o/ /rig sngags kyi snying po gang zhe na/ 'di lta ste/ bA la bA ti tsa ra ma ti la sogs pa'o/ / sgra gcan be con chen po'i gzungs kyi rig sngags zhes bya ba ni gdon thams cad las thar bar byed pa/ chad pa thams cad 'joms pa/ las thams cad las kyang thar ba ste/ rig sngags 'di ni gzi brjid che zhing stobs che ba/ mthu che zhing dpa' ba/ sangs rgyas thams cad kyi rigs pa'i phyag rgya'o//rig sngags 'di bzung na sdug bsngal thams cad las thar bar byed pa'o/ /brgya rtsa brgyad pa 'di skud pa la btags sam zhes bya ba ni/ skud pa sngon po bram ze'am/ rgyal rigs sam/ rje rigs la sogs pa'i bu mo lo brgyad nas bcu gnyis lon pa'i bar gyis gos gtsang ma gon zhing khrus legs par byas te/kha zas dkar po la brten cing kha lho phyogs su bstan la bkal bar bya'o/ /rig sngags re re la mdud pa re re bor te/ rig sngags dang mdud pa ni brgya rtsa brgyad du bya'o/ /de bzhin du byas na/ gdon thams cad las thar ba dang /sdug bsngal thams cad las thar bar 'gyur ro/ /mgul lam lus sam lag pa la btags na zhes bya ba ni/ gro ga'am/ shing shun nam/ ras sam/ dar la sogs pa la bris nas mgul du btags te/ rgyal mtshan gyi rtse mo'am/ mchod rten gyi rtse mo'am/rnga la sogs pa la btags bas kyang / thos pa tsam gyis kyang bsrung bar 'gyur te mthong ba tsam yang bsrung ngo / /kun nas dpag tshad brgya khor yug tu zhes bya ba ni/ gzhan gyi yul du 'gro na yang rang gi yul gyi srung ba byas pas kyang srung bar 'gyur ro//de bzhin du rig sngags 'di mthu che zhing gzi brjid che ba ste/ thugs rje che zhing sems can rnams kyi don mdzad pa'o/ /dri'am me tog rnams dang zhes bya ba ni/ yang dag par rdzogs pa'i sangs rgyas rnams kyi gsung bzhin du mchod par byas te cho gar byas te/ gzung bar byas te/ 'chang ba la sogs pa gus par byas na/ de 'grub par 'gyur ro/ /phyag rgya rnams kyis de bsrung bar byas par 'gyur ro zhes bya ba ni/ rig sngags kyi rgyal mo bsil ba'i tshal 'khor dang bcas pa rnams kyis kyang / tshe 'di dang tshe phyi ma rnams la yang srung bar byed de/'di'i lam las yang dag pa'i byang chub thob pa'o/ /de la zhes bya ba ni rig sngags 'di 'chang ba ste/ bla na med pa'i byang chub thob cing / da ltar yang chad pa la sogs pa thams cad dang bral ba'o/ /mi dang mi ma yin pa rnams kyis mi tshugs par 'gyur ro zhes bya ba ni/mi ni rgyal po dang / rkun po dang / mi rgod dang gnyen bshes la sogs pas lto byed pa'i chad pa dang gzhan yang 'jigs pa thams cad dang 'bral ba'o/ /mi ma yin pa rnams ni lha'i gdon la sogs pa ma rungs pa rnams yin te/ chu dang me'i 'jigs pa la sogs pa dang bral ba'o//mtshon dang dug dang zhes bya ba ni/ g.yul 'gyed pa dang glo bur du 'thab pa ste/ des mi tshugs shing dug rnam pa gsum gyis kyang mi tshugs so/ /nad dang rims rnams dang zhes bya ba ni/ mdze las gyur pa la sogs pa dang bad kan dang mkhris pa dang rlung dang ldan pa dang /'dus pa la sogs pa'i nad do/ /rims drag po dang zhes bya ba ni bzhi 'dus pa yin te/ de bzhin du rlung shas che zhing gzhu bzhin du gug ste/ mda' btang ba bzhin du rengs nas 'chi bar 'gyur ro/ /rig sngags dang gsang sngags dang zhes bya ba ni/ gzhan gyi sbod gtong btang ba dang / 'jig rten gyi rig pa rbad pa dang / de bzhin du gsang sngags gshin rje dang / ma mo dang / 'jig rten gyi ngan sngags kyis kyang mi tshugs pa'o/ /ro longs dang / khro dug dang zhes bya ba ni/ rig pa mkhan pos ro langs bsgrubs nas btang ste/de yang de'i khro dug gis kyang mi tshugs so/ /me dang chus 'chi ba'i dus byed par mi 'gyur ro zhes bya ba ni/ dus ma yin par 'chi ba rnams yin te/ rig sngags kyi gzi brjid kyis de'i 'jigs pas kyang mi tshugs so/ /rig sngags dang gsang sngags dang /sbyor bas legs par sbyor ba thams cad kyi ma grub pa rnams grub par byed pa'o zhes bya ba ni/ bri nyes dang / smra nyes dang / sgom nyes pa dang / gtam nyes pa dang / tshul nyes pa dang / de la sogs pa nyes pa thams cad ni/ rig sngags 'di'i gsang sngags kyis nyes pa thams cad kyang gso bar byas pa'o//rig sngags 'di'i gsang sngags kyi tshig tsam gyis bar chod byed pa'o/ /gdon rnams kyis mi tshugs pa'o/ /ma grub pa rnams grub par byed/ /grub pa rnams chud mi za bar byed do/ /gzhan yang dngos grub nyams par gyur na/rig sngags 'dis 'grub par 'gyur te/ thob pa rnams gzhan la ma btang ste/ glo bur gyi bar chod kyis mi tshugs pa'o/ /pha rol gyi sbyor ba 'ching ba'o zhes bya ba ni/ sngags dang 'jig rten gyi skyon rnams yin te/ de'i 'jigs pas kyang mi tshugs pa'o//pha rol gyi bcings pa las grol bar byed pa'o zhes bya ba ni/ gzhan gyis sbyor ba'i sngags btang ste/ des kyang mi tshugs shing bar chod dang bral ba'o/ /nad dang mya ngan dang bgegs rnams 'jigs par byed pa'o zhes bya ba ni/ bzhi brgya brgyad cu'i nad rnams dang mya ngan gyis mi phog cing /bgegs [(]gyi [,]kyi [)]rigs stong phrag brgyad cu las thar ba'o/ /'thab pa rab tu zhi bar byed pa'o zhes bya ba ni/ phra ma dang gcugs dang 'thab rtsod kyi rgyu rnams rna bas mi thos shing / bde ba dang dge ba'i gtam thos te/ 'thab rtsod dang nyag nyog gi sdug bsngal dang bral ba'o//gdon thams cad zlog par byed pa'o zhes bya ba ni/ sgom pa la sgom du mi ster ba dge ba dang dge ba byed pa de rnams kyang bgegs rigs te/ de rnams kyis mi tshugs shing / rig pa'i gzi brjid kyis mi tshugs pa'o//gdon gang gis mi gtong ba de'i mgo ardza ka'i dog pa bzhin du mgo tshal pa bdun du 'gas pa'o zhes bya ba ni/ rig sngags kyis srung ba dang 'chang ba dang sgom pa dang / kha ton byed pa la sogs pa la gnod par byed na/ rig sngags kyi dmod mos mgo tshal pa tshal par 'gyur ro//srog dang bral zhing dmyal ba mnar med du skye'o/ /gnod sbyin gyi ded dpon chen po lag na rdo rje yang rdo rje 'bar ba kun du 'bar ba/ kun du rab tu 'bar ba me lce gcig tu gyur pa/ de'i mgo ardza ka'i dog pa bzhin du tshal ba bdun du 'gas so zhes bya ba ni/rig sngags kyi bka' las 'das pa dang / rig sngags 'di 'chang ba la bar chod byed pa dang / gzhan yang 'di'i sgo nas dge ba la bar chod byed na/ phyag na rdo rje'i gzi brjid kyis dum bur byas shing / dngos po mi snang bar byed pa'o/ /rgyal po chen po bzhis kyang lcags kyi 'khor lo spu gri'i so lta bu'i mtshon gyis phung bar byed do zhes bya ba ni/rig sngags kyi dam las 'das shing / gdon rnams kyis sems can la 'tshe bar byas te/ de'i rig sngags kyi dmod mos rgyal po bzhi rnams kyis kyang lcags kyi 'khor lo me lce 'bar bas dum bu dum bur byas shing /chad pa gcod par 'gyur ro/ /gnod sbyin gyi 'jig rten de nas shi 'phos nas/ lcang lo can gyi pho brang 'khor du gnas pa mi thob po zhes bya ba ni/ rig sngags kyi bka' las 'das pa'i gdon de shi ba ni rgyal po bzhi'i chad pas shi ste/gal te 'byung po'i tshogs su skyes na/ lcang lo can gyi pho brang du mi tshud do/ /sgra gcan zin zhes bya ba ni/ bcom ldan 'das kyis gzhon nu la bka' stsal pa'o/ /rgyal po dang mi rgod dang me dang chu dang mtshon dang 'brog dang dgon pa dang / mya ngam du song ba zhes bya ba ni/ rig sngags kyi rgyal mo bsil ba'i tshal 'dis chad pa thams cad gcod par byed pa ste/ gzhon nu sgra gcan zin gyis kyang sgoms shig /yid la zung shig /mchod par gyis shig /kha ton du bya zhing sems can thams cad la phan par gyis shig ces bya'o//de bzhin du byas na de dang de'i 'jigs pa dang bral ba'o/ /yang na bdud bzhis mi tshugs te/ 'khor ba'i sdug bsngal thams cad 'joms pa'o/ /gang gi be con chen po'i gzungs kyi rig pa 'di lan cig brjod na/ sdig pa thams cad las thar bar 'gyur ro zhes bya ba ni/da ltar byas pa yang dag ste/ sngon du byas pa yang 'dag pa'o/ /de bzhin du mthu che zhing gzi brjid dang ldan pa/ ngan song gsum gyi sdug bsngal dang bral bar byed pa'o/ /sgra gcan zin zhes bya ba ni/ sgra gcan zin gyi rkyen gyis sems can gyi don la/bcom ldan 'das kyis yang nas yang du bka' stsal pa'o/ /be con chen po'i gzugs kyi rig sngags 'di/ sangs rgyas bcom ldan 'das gang+gA'i klung dgu bcu rtsa gcig gi bye ma snyed kyis gsungs pa zhes bya ba ni/ gzhan gyis mi thub pa rig sngags kyi rgyal mo bsil ba'i tshal 'dis chad pa thams cad 'joms pa/byang chub kyi lam yang dag par rdzogs pa'i sangs rgyas rnams khams bsam gyis mi khyab cing ngo bo nyid dang bral ba'o/ /gsung ba gsung bar 'gyur ba zhes bya ba ni/ 'das pa rnams kyis kyang gsungs pa'o//ma 'ongs pa rnams gyis kyang gsungs te/ de bzhin du da ltar bzhugs pa rnams kyis kyang gsungs pa'o/ /phyag 'tshal rjes su yi rang 'di'i lam gyis 'bras bu grub pa'o/ /grub mchog tu grub pa gzhan gyis mi thub pa zhes bya ba ni/ thun mong gi dngos grub pa zhes bya ba ni/thun mong gi dngos grub kyang 'grub ste/ thun mong ma yin pa yang de bzhin no/ /thun mong gi dngos grub ni/ 'jig rten 'di'i sa la spyod pa dang / nam mkha' la spyod pa dang sa'i 'og na spyod pa'o/ /de la sogs pa phra mo'i dngos grub kyang yod de/ de yang zhi ba dang rgyas pa dang dbang dang mngon spyod la sogs pa'o/ /thun mong ma yin pa'i dngos grub ni/ sa la spyod pa la sogs pa ni mgo mnyam ste/ nam mkha' 'jig rten gyi khams la khyab pa bzhin du 'khor ba bor zhing / srid pa ma yin 'das pa yang ma yin te/da ltar yod pa yang ma yin no/ /de'i dngos grub thob pa'i phyir na mchog tu grub pa'o/ /gzhan gyis mi thub pa ni 'khor ba'i sdug bsngal gyis mi thub ste/ de bzhin du gdon la sogs pas kyang mi thub pa'o/ /lha dang / klu dang / dri za dang / gnod sbyin dang / lha ma yin dang / nam mkha' lding dang / mi'am ci dang / lto 'phye la sogs pas bstod pa zhes bya ba ni/ rig sngags 'di la rtag tu rjes su yi rang ste/ mchod par byas shing rig sngags kyi rgyal mo'i bka' las mi 'da'o/ /'byung po'i tshogs thams cad kyis yongs su bzung ba ste zhes bya ba ni/gnod pa skyel ba'i sems yod pa rnams kyang rig sngags kyi srung ba yod par gyur nas/ gzhan yang de'i rtsar bsdad nas/ de rnams kyang srung bar 'gyur ro/ /rtag tu 'byung po rnams kyis phyag 'tshal zhing rjes su yi rang ba'o//bdag dang sems can thams cad gnod pa thams cad las bde legs su gyur cig ces bya ba ni/ tshe dang ldan pa gzhon nu sgra gcan zin gyis kyang / rig sngags 'di lus la btags par byas so/ /yid la bzung zhing kha ton du byas so//bsgoms par byas so/ /gzhan gyis mi thub pa rig sngags kyi go cha gon nas gti mug la sogs pa dug lnga bor te/ dgra bcom pa'i 'bras bu bsgrub par dur khrod bsil ba'i tshal 'jigs su rung ba'i nang du song ngo / /sems can thams cad kyis kyang rjes su yi rang zhing bsrung ba'o//nad med pa dang 'jigs pa med par gyur cig ces bya ba ni/ lha'i gdon rnams dang / lha ma yin gyi gdon rnams dang / klu'i gdon rnams dang / gnod sbyin gyi gdon rnams dang / srin po'i gdon rnams dang / mi'am ci'i gdon rnams dang /lho 'phye chen po'i gdon rnams dang / dri za'i gdon rnams dang / mi ma yin gyi gdon rnams dang / rlung lha'i gdon rnams dang / yi dags kyi gdon rnams dang / 'byung po'i gdon rnams dang / sha za'i gdon rnams dang / grul bum gyi gdon rnams dang / gzig rnams dang /bya rog rnams dang / 'ug pa rnams dang / grog sbur rnams dang / sdig sbrul rnams dang / gzhan yang mi dang mi ma yin gyi sems can rnams kyis kyang / tshe dang ldan pa sgra gcan zin la gus par byas te phyag 'tshal lo/ /mchod par byas so/ /tshe dang ldan pa gzhon nu sgra gcan zin yang dgra bcom pa yang dag pa thob cing /zag pa zad pa/ rdzu 'phrul dang ldan pa/ cho 'phrul ston nus pa'o/ /bkra shis te/ sems can thams cad byang chub kyi lam la 'jug pa'o/ /rig sngags kyi rgyal mo bsil ba'i tshal gyis/ gzhon nu sgra gcan zin gyi gdon 'dul ba'i gnas skabs te gsum pa'o//rig sngags kyi snying po brtag pa dang po rdzogs so// //de nas rgyal po chen po lus ngan po dang / yul 'khor srung dang / mig mi bzang dang / 'phags skyes po bu dang bcas pa zhes bya ba ni/ gnod sbyin gyi rgyal po stong phrag nyi shu rtsa brgyad dang /dri za'i rgyal po stong phrag nyi shu rtsa brgyad dang / grul bum gyi rgyal po stong phrag nyi shu rtsa brgyad dang / klu'i rgyal po stong phrag nyi shu rtsa brgyad dang bcas pa/ de bzhin du bu dang yang bcas pa'o/ /blon po dang bcas pa/ 'khor dang bcas/mngag gzhug pa dang bcas/ pho nya dang bcas/ g.yog 'khor dang bcas zhes bya ba ni/ gnod sbyin dang / dri za dang / grul bum dang / klu stong phrag nyi shu rtsa brgyad dang / thabs cig tu ste/ de bzhin du chung ma dang / bu dang bu mo dang / tsha bo dang yang tsha bo la sogs pa dang thabs cig tu'o//kha dog 'phags pa dag nam phyed na lhags nas/ gros mthun par dur khrod chen po bsil ba'i tshal du dong ste zhes bya ba ni/ bcom ldan 'das kyang bya rgod kyi phung po'i ri nas/ sems can gyi don la 'khor bzhi po dag dang bcas shing 'jigs su rung ba bsil ba'i tshal gyi nang du phyin nas zhugs so//de nas rgyal po chen po bzhi po dag 'khor dang bcas pa rnams kyang so so rang rang gi gzi brjid dang mthu dang kha dog dang stobs dang rdzu 'phrul dang bcas shing dur khrod bsil ba'i tshal la kha bltas pa'o//rang bzhin gyi kha dog dang mthus 'od chen po snang bar byas nas zhes bya ba ni/ gzhan rnams kyi kha dog ma yin te/ rgyal po chen po bzhi 'khor dang bcas pa'i gzi brjid kyi so so rang rang gi rang bzhin mthu'i kha dog ces bya'o/ /bcom ldan 'das ga la ba der song ste phyin nas zhes bya ba ni/byang chub sems dpa' dang / nyan thos dang / dge slong dang / dge slong ma dang / dge bsnyen pha dang / dge bsnyen ma dang / lha dang mi dang / 'khor mang po 'dus pa'i nang du/ bcom ldan 'das kyi mdun du'o/ /bcom ldan 'das kyi zhabs la mgo bos phyag 'tshal te/lan gsum bskor ba byas te thal mo sbyar te zhes bya ba ni/ rgyal po chen po bzhi dang 'khor de dag rnams dang bcas shing bcom ldan 'das la gus par byas nas so so rang rang gi me tog dang spos la sogs pas mchod par byas so//bcom ldan 'das 'ba' zhig la phyag 'tshal zhing phyogs gcig tu 'khod do zhes bya ba ni/ bcom ldan 'das la lus ngag yid gsum gyis gus par byas nas/ yang dang yang du phyag 'tshal te/ de rnams kyang thabs cig tu 'khod pa'o/ /phyogs gcig tu 'khod nas/rgyal po chen po bzhis bcom ldan 'das la tshigs su bcad pas bstod pa zhes bya ba ni/ de rnams kyis kyang dbyangs gcig skad cig tu byas nas bcom ldan 'das la gus par byas pa'o/ /'jig rten mkhas pa rdzogs sangs rgyas/ / dpa' chen khyod la phyag 'tshal lo/ /zhes bya ba ni/ chos kyi rang bzhin dbyer med pa/ ngo bo nyid dang bral ba'i chos sku dang sgyu ma lta bu'i rang bzhin me long gi gzugs brnyan bzhin du snang ba/ longs spyod rdzogs pa'i sku dang ldan pa dang ngo / /mtshan bzang po sum cu rtsa gnyis dang /dpe byad bzang po brgyad cu dang ldan zhing / sems can gyi don la stong gsum gyi stong chen po'i 'jig rten gyi khams la sprul pa'i skus khyab pa'o/ /sprul pa'i sku de yang dpa' ba dang zhing bdud bzhi bcom pa la stobs dang ldan te/ bag chags dang shes bya'i sgrib pas ma gos shing /nyon mongs pa lnga bcom zhing / 'khor ba'i ming yang med de/ de bzhin nyid du ldan pa'i sangs rgyas la phyag 'tshal zhing 'dud pa'o/ /gau ta ma khyod kyis gang mkhyen pa/ /de ni lha rnams ma 'tshal to/ /zhes bya ba ni/ chos kyi phung po brgyad khri bzhi stong sems can gyi don la thugs la gzung ba/stong gsum gyi stong chen po'i 'jig rten gyi khams la skad cig mas khyab pa/ sems can lta ba mi gcig pa rnams la so so rang rang gi chos ston pa ste/ de lta bu'i sangs rgyas la 'jig rten dag gis mi 'tshal lo zhes bya ba'o/ / lan gnyis lan gsum du yang rgyal po chen po bzhis/ bcom ldan 'das la tshigs su bcad pas bstod pa zhes bya ba ni/ lan dang po 'bul ba ni chos sku'i rang bzhin gnyis su med pa'i sku ste/ bcom ldan 'das kyi thugs la dbul ba'o/ /lan gnyis pa ni sgyu ma lta bu'i rang bzhin gyi ste/longs spyod rdzogs pa'i sku yin te/ bcom ldan 'das kyi gsung la 'bul ba'o/ /sems can don la rdzu 'phrul dang cho 'phrul gyi rang bzhin dang ldan te/ stong gsum la skad cig mas sprul pa'i skus khyab ste/ bcom ldan 'das kyi sku la bstod pa'o/ / 'jig rten mkhas pa rdzogs sangs rgyas/ /dpa' chen khyod la phyag 'tshal lo/ /zhes bya ba ni/ grong khyer ser skya'i gzhi'i grong khyer ra ba rim pa bdun dang / 'obs rim pa bdun gyis bskor nas grong khyer gyi sgo 'phar lcags las byas shing / sgo 'phar rnams la dril bu shin tu sgra gsal ba btags te sgo phyen de'i sgras dpag tshad gcig khor yug tu grags par 'gyur ro//rgyal po chen po zas gtsang ma yod de/ byang chub sems dpa' dga' ldan nas sgyu ma chen po'i mngal du zhugs te de skyes nas rab tu byung nas ma ga d+hA'i dbus su rdo rje gdan la yang dag pa'i byang chub thob par 'gyur ro//lha'i bdud la sogs pa bcom zhing / de rnam par rtog pa thams cad dang bral te/ de lta bu'i rang bzhin du shAkya'i bu sangs rgyas te/ gau ta ma'i rigs su skyes pa yang dag par rdzogs pa'i sangs rgyas shAkya seng ge la phyag 'tshal/bstod cing 'dud do zhes bya'o/ /gau ta ma khyod kyis gang mkhyen pa/ /de ni lha rnams ma 'tshal to/ /zhes bya ba ni/ yang dag par rdzogs pa'i sangs rgyas shAkya thub pas mkhyen pa/ lha rnams kyis ci smos zhes te/ rgya mtsho'i nang na nor yod pa bzhin du'o//rgyal po bzhi la sogs pas bcom ldan 'das la bstod pa'o/ /de nas zhes bya ba ni rgyal po bzhis bstod pa'i de nas so/ /bcom ldan 'das la rgyal po chen po bzhis 'di skad ces gsol te zhes bya ba ni/ bcom ldan 'das kyi spyan sngar zhu ba dbul ba'o//btsun pa bcom ldan 'das yul dang spro lags sam/ 'tsho ba dang ldan lags sam zhes bya ba ni/ bcom ldan 'das kyi 'khor bzhi po de dag kyang bde bar gnas sam zhes bya ba'o/ /btsun pa bcom ldan 'das kyi sku bde lags sam/ snyun mi mnga' lags sam/ nyam nga ba ma mchis sam zhes bya ba ni/ bdud bzhi po rnams kyis bar du ma chod dam/ 'jig rten gyi dug gsum po ma shar ram zhes bya ba yin no/ /bcom ldan 'das kyi sku la/ gnod pa mi mnga' lags sam zhes bya ba ni ma rungs pa bdud bzhi'i rigs kyi 'byung po rnams kyis chos la bar chod ma byas sam zhes bya ba'o//bcom ldan 'das la gnod sbyin dang zhes bya ba la sogs pa ni chos la bar chod byed cing / sems can rnams la gnod par byed pa rnams yin te/ yid mi bde bar byed pa yang de rnams yin te/ lus la na tsha drag pos thebs par byed pa yang de yin no//sems can mngal na 'tshe ba ni/ mi'i khong du zhugs nas/ mer mer po dang / nur nur po rnams kyang 'chags su mi ster te/ gal te chags nas kyang ma la na tsha drag pos thebs nas 'chi ba dang shi ro dang skyes nas shi ba dang / der ma nus na glags gar rnyed pa'i dus su gnod pa skyel ba'o//mngal du zhugs pa'i dus su yang gzi brjid 'phrog cing / skyes pa dang bud med kyi tshogs kyang 'jigs par byed pa'o/ /chung ba la 'ju ba ni ba spu'i rtse mo brgya stong tsam gnas zhes bya ba'o/ /che ba ni ri rab bas kyang che ste/stobs btang na ri rab kyang 'gul lo/ /rgyu ba'i dus khams gsum skad cig mas rgyu'o/ /de lta bu'i 'byung po rnams kyis gnod par ma byas sam zhes bya ba'o/ /rims drag po dang zhes bya ba la sogs pa ni nad bzhi brgya brgyad cu de las 'du ba yin te/nad de rnams kyang mi mnga' 'am zhes pa'o/ /mi dang mi ma yin pa sdang bar sems pa dang zhes bya ba la sogs pa ni/ rkun po dang mi rgod dang rgyal po la sogs pa yin te/ mi dang mi ma yin pa ni ma rungs pa'i sdig can gyi rigs sems can la 'tshe bar byed pa rnams so/ /de rnams kyis kyang gnod pa ma byas sam zhes bya'o//de skad ces gsol pa dang zhes bya ba ni bcom ldan 'das la rgyal po bzhis snyun gsol pa'o/ /bcom ldan 'das kyis rgyal po chen po bzhi la 'di skad ces bka' stsal to zhes bya ba ni/ bcom ldan 'das kyis rgyal po chen po bzhi las snyun gsol ba ni lan bka' stsal pa'o//kye rgyal po chen po dag nga la ni thams cad yod de zhes bya ba ni/ rgya mtsho lta bu ste/ de'i nang na rin po che sna tshogs zad mi shes pa yod pa bzhin du nga la yang de bzhin no/ /yul dang yang sprod/ 'tsho ba dang yang ldan/lus kyang bde/ nad kyang med/ nyam nga ba yang med do zhes bya ba ni/ mngon sum du 'khor phun sum tshogs pa yang de bzhin te/ dang po phung po'i bdud bcom pa ste/ /gnyis pa nyon mongs pa'o/ /de bzhin du gsum pa 'chi bdag gi bdud bcom pa ste/ bzhi pa lha'i bu'i bdud bcom pa'o/ /de bas nyam mi nga ba zhes bya ba'o/ /kye rgyal po chen po dag nga'i lus la ni gnod pa yang med do zhes bya ba ni rdo rje phung po'i rang bzhin gyi sku la smos ci dgos te/ gzhan yang sangs rgyas kyi byin gyis brlabs pa yang mi tshugs so/ /kye rgyal po chen po dag ngas ni 'jig rten lha dang bcas pa zhes bya ba la sogs pa ni sangs rgyas rnams la gnod pa skyel bar 'dod pas kyang gnod pa skyel ba'i skabs ma rnyed cing /gnod pa rnams kyang mi snang ba'o/ /gal te gzhan gyi sems ma dad pa skyes par gyur na/ 'jig rten 'di la sdug bsngal drag pos thebs shing shi nas kyang mda' 'phangs pa bzhin du dmyal bar 'gro'o//dmyal ba nas kyang ngan song nas ngan song du mi thar te/ thar pa'i dus kyang mi 'ong ngo / /de bas na bde bar gshegs pa bla ma dang / nyon mongs pa la sogs pa dang / pha ma la sogs pa la yang gnod par mi bya'o/ / de'i phyir na gnod par byed par sems pa yang dag par ma mthong ngo zhes bya ba'o/ /kye rgyal po chen po dag de lta mod kyi khyed kyi 'khor rnams pa'i 'khor la gnod par byed par sems so zhes bya ba ni/ yang dag par rdzogs pa'i sangs rgyas kyis mngon par bltas pas ma rungs pa'i gdon rnams kyis gnod par bya bar sems so//de sems ma thag tu yang dag par rdzogs pa'i sangs rgyas kyi zhal nas smra ba dang / ting nge 'dzin gyi byin gyis brlabs pa'o/ /de skad ces bka' stsal pa dang zhes bya ba ni/ bcom ldan 'das kyis rgyal po chen po bzhi la bka' stsal ba zhes bya ba'o//bcom ldan 'das la rgyal po chen po bzhis 'di skad ces gsol to zhes bya ba ni rgyal po chen po bzhis bcom ldan 'das la zhu ba 'bul ba'o/ /btsun pa bcom ldan 'das bdag cag gsol ba mchis te zhes bya ba ni/rgyal po chen po bzhis sems bcom ldan 'das la gus par byas nas srung ba dang sba ba dang yongs su bskyab pa dang zhi ba dang bde legs kyi tshigs ni bcom ldan 'das la zhus pa'o/ /de'i slad du bcom ldan 'das la blta ba pa dang / phyag bgyi ba dang / bsnyen bkur bgyi ba dang /bcom ldan 'das nyid la zhu ba'i slad du/ bdag cag bcom ldan 'das kyi spyan sngar mchis pa lags so zhes bya ba ni/ gnod pa'i sems ni ci mchis te/ /zhes bya ba dang rgyal po chen po bzhi dang 'khor rnams kyang bsrung bar 'dod cing / rig sngags kyi rgyal mo bsil ba'i tshal gyis grags pa thos pa dang /srung ba dang bde bar 'dod pas bcom ldan 'das nyid la gus par byas shing / zhu ba dbul ba'o/ /de ci'i slad du zhe na zhes bya ba ni/ bcom ldan 'das kyi bka' dang / rig sngags kyi byin gyi rlabs kyis sems can thams cad bde bar gnas shing nad med de/ma rungs pa'i gdon thams cad bcom zhing yang dag pa'i byang chub kyi lam la 'jug pa'o/ /btsun pa bcom ldan 'das dgon pa dang bas mtha'i gnas mal 'di dag na zhes bya ba ni 'jigs su rung ba dur khrod bsil ba'i tshal na ro langs dang ro dang ce spyang la sogs pa dang /bya'i tshogs mang po 'dus pa'i sa/ khyi dang ce spyang 'thab pa'i sgras 'jigs su rung ste/ de bzhin du ro langs dang yi dags kyang skad 'don zhing 'jigs su rung ste/ de bas na bas mtha'i gnas mal zhes btags pa'o//shin tu sdang ba'i gnod sbyin dang / /zhes bya ba la sogs pa ni/ sa gzhi der gnas pa'i gdon rnams ni shin tu mi srun zhing ro la dga' ste/ gson pa'i sha khrag la dga' zhing sems can rnams la 'tshe bar byed de/ gzugs sna tshogs ston cing gzi brjid 'phrog pa dang /skad sna tshogs 'don zhing skyes pa dang bud med kyi tshogs la 'jigs par byed pa dang / gdon rigs mi gcig pa bsam gyis mi khyab pa gnas shing 'jig rten gyi khams na sems can la gnod pa'o/ /rims dang zhes bya ba la sogs pa ni/ nad bzhi brgya rtsa bzhi de rims de dag la 'dus te/nad de rnams kyang ma rungs pa'i 'byung po rnams kyis btang zhing sems can rnams la gnod pa skyel ba'o/ /mi dang mi ma lags pa zhes bya ba la sogs pa ni/ sa gzhi der mi rgod la sogs pa 'gyur ba ste/ gzhan yang rgyal po la sogs pa'i 'jigs pa dang mi dang mi ma yin pa ma rungs pa'i 'byung po rnams kyis kyang bcom ldan 'das kyi bka' dang /rig sngags kyi byin gyi rlabs kyis ma nus pa'o zhes bya ba'o btsun pa bcom ldan 'das kyi nyan thos de dag kyang de la gnas lags te zhes bya ba ni/ bcom ldan 'das kyi 'khor bzhi po yang rig sngags kyi rgyal mo bsil ba'i tshal la sbyor zhing da la gnas pa'o//btsun pa bcom ldan 'das kyi nyan thos de dag ni/ srod dang tho rangs la mi nyal bar sbyor ba la brtson par gnas so zhes bya ba ni da lta bar chod kyi rkyen zlog pa dang /tshe phyi ma'i don la byang chub kyi lam bsgoms pa dang / de ltar mi rtag pa'i rang bzhin bsgom ste/ nyan thos de rnams kyang rig sngags yid la byed pa'o/ /btsun pa bcom ldan 'das gnod sbyin dang srin po nas gnod par bgyid pa'i bar gang dag bcom ldan 'das kyi bstan pa 'di la dad pa'i sems dang ldan zhing cung zad cig mchis par bas so zhes bya ba ni/gzhan yang sdig pa'i sems dang ldan pa rnams ni/ bcom ldan 'das kyi zhal mthong ma thag tu dge ba'i sems la brtson zhing sems can gzhan rnams la yang sdang ba dang sdig pa'i sems dang mi ldan zhing byams pa dang snying rje la brtson zhing chos kyi sems dang ldan te/sems can rnams la 'tshe bar mi byed pa'o/ /de'i yon tan gyis ni cung zad cig mchis bas so zhes bya ba'o/ /gang dag bcom ldan 'das kyi bstan pa 'di la ma dad pa'i sems dang ldan pa ni/ches mang lags te zhes bya ba ni/ gang dang gang dag sems can rnams ni dge ba la mi brtson zhing sdig la brtson par 'gyur ro/ /sdig pa'i sems dang sdang ba'i sems dang gcig gis gcig la 'tshe bar byed pa'i sems dang ldan pa'o//byams pa dang snying rje'i sems dang ldan zhing chos la rtsom pa nyung ste/ de ci'i phyir zhe na/ ma rig pa'i rkyen gyis nyon mongs pa 'phral du skye ste/ phal cher sems can de rnams ni mtho ris su 'gro ba nyung zhing ngan song gsum du skye ba'o/ /de bas na 'byung po yi dags kyi lus thob nas kyang gzhan la gnod par byed pa'i sems dang ldan par skye ba'o//de dag ni zhes bya ba ni ma rungs pa'i gdon dang 'byung po rnams glags btsal zhing / dge ba dang bsgom pa la sogs pa la bar chod byas nas mtho ris thob tu mi ster ba'o//btsun pa bcom ldan 'das kyi nyan thos srod dang tho rangs la mi nyal zhing sbyor ba la brtson par gnas pa rnams la gnod par byed par sems lags te zhes bya ba ni/ phung po la gnod par byas nas rlung dang mkhris pa dang / bad kan dang 'dus pa'i nad btang zhing dge ba'i sbyor ba de yang mi nus par byed pa'i sems dang ldan pa mang po 'dus pa'o//sems la gnod par byed cing mi dga' bar byed pa ste/ bsgom snying mi 'dod cing log par byed pa'i sems dang ldan pa mang po yod pa'o/ /bsgom pa'i dus su srog la zhugs shing 'chi bar byed pa'i sems dang ldan pa mang po sha stag yod pa'o//bsgom pa'i dus su ltas ngan pa dang rmi lam ngan pa bstan zhing phal cher dngos por 'byung zhing sgom du mi ster ba ste/ bsgom pa'i gang zag la 'jigs par byas shing / nam sgom pa'i dus su bar chod byed cing sgom du ster ba'o//de bas na gdon de dag gis gnod par bgyid pa lags te zhes bya'o/ /rig sngags kyi rgyal mo bsil ba'i tshal gyi bcom ldan 'das kyi 'khor bzhi po la/ gdon gyis glags btsal ba'i gnas skabs te bzhi pa'o// //de dag dgag pa'i slad du zhes bya ba ni gdon ma rungs pa rnams dang sdig can bdud kyi rigs dang sa dang bar snang dang sa 'og la rgyu ba'i 'byung po rnams stong phrag brgyad cu ste/de phrag nyi shu rtsa drug go/ /de bzhin du g.yog dang chung ma dang bu dang bu mo la yang yin no/ /gnod sbyin ma rungs pa rnams dad par bgyi ba dang zhes bya ba ni/ de bzhin du ma rungs pa'i gdon rnams mi dad de sangs rgyas dang chos dang dge 'dun gyi byin gyi rlabs kyis dad par byed pa'o//dad pa rnams slar zhing dad par bgyi ba dang zhes bya ba ni phyi bzhin nas yod pa'i sems ni yang dang yang du dad pa skyes pa ste/ de 'ong bar mi byed pa'i sems ni brtan par mi byed pa'o//'khor bzhi po rnams bde legs dang zhes bya ba ni sngar gnod par byed 'dod pa'i sems dang sdang bar 'dod pa'i gdon de rnams ni dad pa'i sems dang ldan par gyur na/ 'khor bzhi po de dag dang sems can thams cad bde bar gnas par 'gyur ro/ /bde bar gnas par bgyi ba dang zhes bya ba ni/bsgom pa dang nyan pa la yang bar chod med cing de bzhin du spyod pa dang / dge ba'i rtsa ba bsngo ba la bar chod med cing de rnams la bde bar bgyi bas na bde ba'o/ /ma lus par shin tu mnyam par bzhag par 'gyur ba'i slad du zhes bya ba ni/ rnam par rtog pa ma lus par 'joms te/de 'joms na bar du gcod pa'i bgegs kyang smos ci dgos te/ shes bya dang bag chags kyi dri mas mi gos pa'o/ /bsil ba'i tshal gyi mdo chen po 'di bshad par 'tshal lo zhes bya ba ni/ 'das pa dang ma 'ongs pa dang da ltar yod pa'i sangs rgyas rnams kyis gsungs pa thabs shes rab gnyis su med de/de'i chos kyi nyams myong gis zla ba sems can rnams la bsil bar byed pa bzhin du des kyang sems can rnams la bde bar byas pa'o/ /rig sngags des kyang 'jig rten gyi khams thams cad la nam mkhas khyab pa bzhin du khyab pa'o//mi ma yin pa sdang sems can/ /rgyal ba'i bstan la ma dad pa/ /zhes bya ba ni/ yang dag par rdzogs pa'i sangs rgyas shAkya thub pas sems can rnams la phan par bgyid pas mi ma yin gyi gdon dang / lha'i gdon la sogs pa rig sngags kyi rgyal mo bsil ba'i tshal gyi byin gyi rlabs kyis sdig pa'i sems dang ldan pa yang sdig pa'i sems med cing srog gcod pa'i sems dang ldan pa rnams kyang srog mi gcod cing / bstan pa yang srung bar byed pa'o/ /de dag bdag gis bzlog par bya//rgyal chen rnams ni bdag la nyon/ /zhes bya ba ni/ bcom ldan 'das kyi bkas rig sngags kyi rgyal mo'i gzi brjid kyis ma dad par byas pa ste/ dad pa rnams kyang spang bar mi byed pa'o/ /rgyal chen bzhi 'khor dang bcas pa rnams kyis kyang sems la zung shig ces bya'o//mdo chen 'di ni thos nas kyang / /mi rnams la ni gnod ma byed/ /ces bya ba ni/ sdig pa thams cad rlag par byed pas na mdo ste/ dge ba'i rtsa ba 'dod pas na mdo'o/ /yang na sangs rgyas rnams kyi yon tan dang chos kyi nges tshig dang / dge ba dang mi dge ba thams cad de nas 'byung zhing bshad de gsal bar bshad pas mdo zhes bya'o//chen po ni sangs rgyas kyi bka' dang / ye shes bsam gyis mi khyab pa ste/ de lta bu'i ye shes kyi don thob pas na thob pa ste/ da lta bu'i rang bzhin gyi don gyis 'jigs pa med cing gnod pa yang mi mnga' ste/sems can rnams la phan par byed pa'o/ /gnod sbyin srin po klu rnams dang / /nam mkha' lding dang gsang ba pa/ /zhes bya ba ni/ ma rungs pa thams cad de rnams kyis byed de/ sdig pa yang de rnams kyis byed pa/ sems can la gnod par byed cing za ba dang 'thung ba tshol ba'o//phan par mi 'dod gang yang rung / /de dag thams cad bzlog par bya/ /zhes bya ba ni/ sangs rgyas kyi bka' dang rig sngags kyi dmod mos/ ma rungs pa thams cad rlag par byed cing thal bar btang ste/ ma dad pa rnams kyang snang bar mi byed do//lha dang lha min rlung lha dang / /ma mo'i tshogs kyis gang ba yi/ /zhes bya ba ni/ gzugs kyi khams kyi lha dang / /'dod pa'i khams kyi lha rnams dang / /phyogs skyong ba la sogs pa dang / dam tshig la gnas pa'i lha mo rnams yin te/de yang ye shes pa dang / 'jig rten gyi lha mo rnams so/ /gzhal med khang mdzes de dag ni/ /me dang 'dra bar 'od gsal zhing / /zhes bya ba ni/ 'jig rten pa ni 'jig rten gyi khams gzhal yas khang la gnas te/ ye shes pa yang de bzhin yin te/ so so rang rang gi 'od zer gyi snang bas nam mkha' la mdzes par snang ba'o//nyi ma zla ba'i tshul 'dra bar/ /rin chen las byas shin tu snang / /zhes bya ba ni/ mun pa mun nag gi nang na/ yid bzhin gyi nor bu rin po ches mi snang ste/ de bzhin du nyi ma zla bas gsal bar byas shing rin po che mthong ngo //de bzhin du glo bur gyi skyon nyon mongs pa rnams kyis bkag cing / bla ma dam pa rnams kyi gdams ngag bstan pas ye shes de snang ba'o/ /bsod nams byas pa dag gis gang / /rab sdang gdon rnams rnam par spangs/ /zhes bya ba ni/ de bzhin de'i dge ba byas pa'i bsod nams bsam gyis mi khyab pa'o/ /gnod par byed pa dang / sdig ba bsags pa thams cad des de'i 'joms par byed pa'o/ /mi la gnod byed gang yin pa'i/ /'byung po grul bum srin po dang / /zhes bya ba ni/ khams gsum tsam yang skad cig gis khyab ste/ /la la bza' rgyu yod cing mchod par 'os te/ la la sems can rnams kyis kyang sdang zhing dmod mos pa'o/ /de 'byung po rnams kyis kyang mi'i sems can la gnod par byed pa'o/ /yi dags srul po de dag gis/ /rmad byung de dag mi mthong ste//zhes bya ba ni/ rig sngags kyi rgyal mo bsil ba'i tshal gyi ye shes sdig can de dag gis mi mthong zhing de dag rnams kyang bde bar gnas par mi 'gyur ro/ /gzi brjid ldan pa'i lha rnams kyis/ /grong khyer du yang mi 'gro'o/ /zhes bya ba ni/ 'jig rten dang 'jig rten las 'das pa'i lha rnams te/sems can la gnod par mi byed cing / byams pa dang snying rjes 'tsho ba'o/ /de rnams kyi gzi brjid kyis ma rungs pa'i gdon rnams kyang rtsar 'gro bar mi nus shing / /gnas kyang thob par mi 'gyur ro/ /'byung po chen po 'du ba na//der yang de dag 'dur mi dbang / /zhes bya ba ni/ sems can la gnod par byed pa 'byung po de kun yang / lcang lo can gyi pho brang ci smos te/ de'i ra ba'i phyi rol yang mi thob cing / rig sngags kyi dmod mos bde bar mi gnas pa'o/ /stan nam yang na chu yang rung //zas dang skom yang mi dbang ngo / /zhes bya ba ni/ de bzhin de la dam las 'das pa rnams 'thung ba dang za ba ci smos te/ 'thung ba'i skom yang zangs [(]gyi [,]kyi [)]chur mthong ngo / /bza' ba'i zas kyang lcags kyi thu lum 'bar bar mthong / lus ngan gyi ni pho brang du/ / nam yang de dag 'gro mi 'gyur/ /zhes bya ba ni/ gnod sbyin gyi sde dpon lcang lo can gyi pho brang du sdig can 'byung po gnod byed rnams dang / gzhan yang gnod sbyin rnams kyis srung zhing pho brang nang du stan yang thob par mi 'gyur ro/ /rgyal po chen po rnams kyi tshig /'byung po gang zhig mi nyan pa//zhes bya ba ni/ rgyal po chen po bzhi po dag gis smras pa ste/ rgyal po chen po bzhi po ni/ yul 'khor srung dang / 'phags skyes po dang / spyan mi bzang dang / lus ngan po rnams yin te/ de'i rig sngags kyi dmod mo dang rgyal po bzhi'i chad pas/ 'byung po de rnams bde bar mi 'gyur ro//de yi kha nas khrag dron dag /myur du rab tu 'bab par 'gyur/ /zhes bya ba ni/ ma rungs pa'i 'byung po de rnams rgyal po chen po bzhi'i chad pas myur du nad kyis thebs te/ kha nas khrag dron skyug cing srog gi dus la bab ste/ mda' 'phangs pa bzhin du myur du dmyal bar skyes so//de yi brla yi g.yas rol nas/ /phol mig dag kyang 'byung 'gyur te/ /zhes bya ba ni/ 'byung po de rnams kyi brla g.yas rol nas ma rungs pa'i nad 'byung ste/ de ci'i phyir 'byung zhe na/ rig sngags kyi bka' las 'das pa dang /sems can la gnod par byas pa'i phyir ro/ /de ni nad kyis 'chi 'gyur zhing / /gdon sbyin gzugs kyang ston par 'gyur/ /zhes bya ba ni/ nad de rnams kyis btab na 'chi ste/ tshe phyi ma la ngan song gsum du skye zhing / 'byung po'i lus blangs par gyur kyang gzhan rnams kyis bsnyen du mi btub cing //de bas kyang sdug bsngal thob par 'gyur ro/ /'jig rten skyong gis bshad pa yi/ /mdo las gang zhig 'gal byed pa/ /zhes bya ba ni/ 'jig rten skyong ba bcu po ste/ brgya byin dang / gshin rje dang / chu lha dang / gnod sbyin dang /me lha dang / srin po dang / rlung lha dang / dbang ldan dang / nyi ma dang / zla ba dang / tshangs pa dang / sa bdag dang ngo / /de rnams kyis kyang chad par gsungs so/ /yang na 'jig rten las 'das pa'i 'jig rten skyong ba ni thabs la mkhas pa/ sems can la snying rje che ba/yang dag par rdzogs pa'i sangs rgyas rnams so/ /de rnams kyis kyang bden pa'i bka' gsungs pa'o/ /'jigs pa thams cad de la'o/ /mgo bo tshal pa bdun du 'gas/ /zhes bya ba ni/ sa g.yo ba'i 'jigs pa dang / me'i char 'bab pa dang / gnod sbyin 'byung po la sogs pa'i 'jigs pa dang /za ba dang skom med cing rig sngags kyang dmod mos 'chi ba'i dus su mgo tshal par 'gas nas 'chi'o/ /rgyal po chen po rnams kyi tshig /gnod sbyin gang dag ma nyan pa/ /zhes bya ba ni/ rgyal po chen po rnams thos kyi bu la sogs pas gsungs te/rig sngags kyi bka' las 'da' ba dang / rgyal po chen po bzhi'i bka' ma nyan par gyur na/ de rnams kyis sdug bsngal chen po thob pa'o/ /'byung po srin po gang yod pa/ /ngan phreng lhag pa'i ngan phreng rnams/ /zhes bya ba ni/ 'byung po de rnams ni gcig la gcig gi phrag dog gis ngan sems skye ste/ de'i ngan pa yang nas yang du ngan pa'o/ /lcags las byas pa'i 'khor lo yi/ /mtshon cha spu gri so 'dra bas/ /zhes bya ba ni/ de yis de ngan pa rnams ni rig sngags kyi bka' las 'das te/ mtshon cha lta bu'i las kyi spu gris yang nas yang du gcod cing sdug bsngal chen po thob pa'o/ /gnod sbyin de dag brlag par 'gyur/ /rgyal po chen po dpal dang ldan/ /zhes bya ba ni/ yang dag par rdzogs pa'i sangs rgyas kyi bka' las 'das pa dang / rig sngags kyi bka'i dmod mos rlag par byed pa ste/de bzhin du rgyal po chen po bzhi po rnams kyis kyang / dpal dang ldan pa ni gzi brjid che zhing stobs che ba ste/ rdzu 'phrul dang ldan zhing sems can gyi don byed pa'o/ /go cha sra zhing mtshon rno la/ stan rnams la ni 'khod pa dag /ces bya ba ni/ sangs rgyas kyi bka' dang / rig sngags kyi bka' las 'das pa la ni/ de dag dang 'khod par byas nas/ /mtshon cha sna tshogs thogs nas phyogs phyogs su bsdad pa'o/ /shar phyogs na ni yul 'khor srung / /lho phyogs na ni 'phags skyes po/ /zhes bya ba ni/ dri za'i rgyal po stong phrag nyi shu rtsa brgyad 'khor g.yog dang bcas pa ste/ de bzhin du grul bum gyi rgyal po 'khor g.yog dang bcas pa'o/ /nub phyogs na ni mig mi bzang / /byang phyogs na ni lus ngan po/ /zhes bya ba ni/ klu'i rgyal po stong phrag nyi shu rtsa brgyad 'khor g.yog dang bcas pa ste/de bzhin du gnod sbyin gyi rgyal po rnams kyang yin no/ /go cha gon zhing mtshon sna tshogs pa stobs dang ldan pa sha stag go/ /de dag de na 'khod pa yi/ /nyen skor gnod sbyin 'di rnams gnas/ /zhes bya ba ni phyogs bzhi nas bu dang 'khor g.yog dang chung ma la sogs pa rnams kyis kyang phyogs phyogs nas srung zhing gnas pa'o//seng ge'i gzugs dang stag gi gzugs/ /mi sdug pa dang 'gro zhing rgyu/ /zhes bya ba ni/ 'byung po de rnams kyang 'dul bar byed pa'i rgyal po rnams ni seng ge dang stag gi mgo can du gnas pa'o//skad cig mas stong rgyu zhing 'khor bar gnas pa'o/ /glang chen gzugs dang rta yi gzugs/ /kha cig ma he'i gzugs can te/ /zhes bya ba ni stobs dang ldan zhing gzi brjid che ste/ skad cig mas ri rab rtse mo dang bar snang dang sa steng dang sa 'og tu dus gcig tu rgyu'o/ / dred mo dang ni ba yi gzugs/ /lug dang spyang ki phag rgod rnams/ /zhes bya ba ni/ 'byung po de rnams kyang sna tshogs kyi gzugs su sprul zhing sems can rnams la bstan pa'o/ /rna ba 'phyang dang rna bo che/ /rna ba gcig pa tha dad pa/ /zhes bya ba ni/ glang po che bzhin du rna ba 'phyang ba ste/rna ba gcig pus gos byas shing / /lus po thams cad khebs pa ste/ /de bzhin du gzugs bstan zhing sems can rnams la gnod par byed pa'o/ /skad cher 'byin cing 'jigs byed pa/ /sa gzhi rab tu g.yo bar byed/ /ces bya ba ni/ bum pa'i nang du skad smras pa bzhin du sems can rnams la 'tshe bar byas shing 'jigs par byed de/bar chod byed pa dang / gnod par byed pa'i dus su sa g.yo zhing skad sna tshogs 'don par byed pa'o/ /bong bu dang ni rnga mo che/ /cha lugs gzhan yang nye 'khor 'khod/ /ces bya ba ni/ mi'i lus la rnga mo bong bu'i mgo bo dang /gzhan yang sems can gyi gzugs su sprul nas/ gzugs dngos su bstan pa dang / rmi lam du bstan pa'o/ /rgyal po chen po stobs po che/ /de dag phan tshun 'du ba ni/ /zhes bya ba ni/ de bzhin du stobs dang ldan pas 'byung po ma rungs pa rnams kyang / rgyal po chen po rnams kyis 'dul zhing sangs rgyas kyi bstan pa bsrung ba'o/ /lha yi shing rta bcas pa yis/ /nam mkha' las ni 'gro bar byed/ /ces bya ba ni/ sna tshogs pa'i mtshon cha thogs shing dpung dang bcas shing 'gro ba ste/ de bzhin du bar snang dang sa 'og dang sa stengs la rgyu ba'o//gnod sbyin dag gi bdag po yang / /mi rnams la ni bde legs byed/ /ces bya ba ni/ sangs rgyas kyi bden pa dang / rig sngags kyi bka' las mi 'da' zhing / gnod sbyin 'khor g.yog stong phrag nyi shu rtsa brgyad kyi bdag po ste/ rnam thos kyi bu de yang sems can la gnod par mi byed cing / snying rje la gnas pa'o/ /de bzhin du rig sngags la mchod par byed cing / gus par byed pa'o/ /rig sngags kyi ngo bo ni gang zhe na/ las kyi rigs las/ las kyi rigs ma yin te/ mtshon pa ni bya ba nan tan gyi ye shes//mtshon byed ni rig sngags kyi rgyal mo'o/ /ye shes lnga'i bdag nyid can/ sangs rgyas lnga'i dbu rgyan can/ spyan gsum zhal gsum phyag drug pa sku mdog ljang gu'o/ /zhal g.yas mthing ga /g.yon dmar ba ste/ phyag g.yas pa gnyis na ral gri dang rdo rje rgya gram mo//g.yon pa gnyis na/ skyabs sbyin dang 'khor lo bsnams pa'o/ /phyag 'og ma'i g.yas g.yon gyis mda' gzhu 'gengs pa ste/ rgyan thams cad dang ldan pa'o/ /zhabs g.yas bskum pa/ g.yon brkyang ba/ pad+ma dang zla ba'i gdan la bzhugs shing /nyi ma'i 'od dang ldan zhing bzhad pa'i tshul du bzhugs pa'o/ /rig sngags kyi gsang sngags ni gang zhe na/ 'di lta ste/ b+ha ga hu mu le b+ha ga hu mu le/ zhes bya ba la sogs pa'o/ /rgyal po chen po rnam thos bu/ /mi la zhon pa sde bcas pa//zhes bya ba ni/ rig sngags kyi rgyal mo bsil ba'i tshal gyi tshigs su bcad pa 'di thos pa tsam gyis lus 'dar zhing 'jigs par gnas te/ gnod sbyin gyi gdon stong phrag nyi shu rtsa brgyad kyang de bzhin no/ /'di smras nas ni tshub ma langs/ /de bzhin ri yang g.yos par 'gyur//zhes bya ba ni/ rig sngags kyi rgyal mo bsil ba'i tshal 'di'i gzi brjid dang stobs kyis rlung tshub sna tshogs 'byung ste/ sa ni lan drug tu g.yos shing / dril bu'i skad bzhin du rings par snang ngo / /rgyal po chen po rnam thos bu'i/ /rin chen shing rta bcas pa na//zhes bya ba ni/ byang ngos kyi rgyal po rnam thos kyi bu de yang gzugs sna tshogs bstan zhing / rin po che'i gdan la bzhugs nas/ skad sna tshogs smra ba'o/ /lha dang mi yi sgra skad bsgrags/ /rgyal po chen po mchis pa na/ /zhes bya ba ni/ lha dang mi'i gzugs su sprul zhing rdzu 'phrul chen po bstan te/skad sna tshogs kyang de bzhin du smras pa'o/ /dngos po rnams kyang 'bar 'gyur ro/ /srin po 'dod dgur bsgyur ba'i gzugs/ /zhes bya ba ni/ rig sngags kyi rgyal mo'i gsang sngags kyi dmod mo dang / gnod sbyin gyi rgyal po rnam thos kyi bu'i stobs kyis kyang /ma rungs pa'i srin po 'byung po rnams kyang dngos po rnams ni skrag par 'gyur ro/ /de yi mdun na rgyug par bgyid/ /mi ma yin pa'i gzugs rnams kyis/ /zhes bya ba ni/ gzi brjid de mthong zhing 'jigs par byed cing phyir 'gro ba'o//'jigs shing skrag pa skyed par bgyid/ /che zhing gtum la mi bzad pa/ /zhes bya ba ni/ 'byung po de rnams kyi mtshan nyid ni/ sems can la 'tshe bar byed cing / rmi lam nyams pa la yang gzugs bstan zhing / 'jigs pa'i sgra sgrogs te rtag tu sems can la gnod par byed pa'o//drag cing mthong na mi sdug la/ /spu yang ring la sen mo ring / /zhes bya ba ni/ bzhin mi sdug cing lus dang gdong pa khra bor gnas te/ khab dang 'dra ba'i spus ni lus la khengs shing de bzhin du sder mo yang mtshon dang 'dra ba'o/ /lag na ral gri tho ba thogs//so ni zangs can 'jigs par bgyid/ /ces bya ba ni/ 'byung po de rnams ni khrag khrug la dga' zhing / phra ma byed pa la dga' ba ste/ de bzhin du khrag khrug byed pa'i sha khrag la dga' zhing 'jigs pa'i ral gri dang 'jigs pa'i zangs kyi so rnams kyis sems can la 'tshe bar byed pa'o//sna che rnga mo stag gi 'dra/ /drag cing lag pa khrag dmar ba/ /zhes bya ba ni/ 'byung po 'di rnams kyis kyang sna tshogs kyi gzugs bstan zhing / mi'i lus la mgo gcig pa bstan zhing bud med kyi mngal khrag la dga' zhing byis pa rnams la gnod par byed pa'o//yan lag ma tshang phyed tshal lus/ /mig ser lus kyang shin tu ser/ /zhes bya ba ni/ la la mgo bo med cing brang la gdong pa yod pa ste/ la la lag pa gcig med cing / mgo la gnas pa'o/ /tshan gcig la yang rkang pa gcig med cing //lte ba nas res snang res mi snang bar byed de/ la la phyed gzugs su snang zhing sems can rnams skrag par byed pa'o/ /dri ma can la lus skem pa/ /skra brdzes lcags kyi mchu can la/ /zhes bya ba ni keng rus la pags pas g.yogs pa dang 'dra ba yod de/de la drag pa chags shing bzhin mi sdug pa ste/ khab kyi rtse mo tsam gyi mchu la gsus pa yang ri tsam mo/ /de lta bu'i lus la skra bzang brdzes pa'o/ /mtshon cha tshabs cher 'debs par bgyid/ /rna ba gzhu 'dra stobs po che/ /zhes bya ba ni/'thab mo la sbyar te/ gcig la gcig 'dzugs shing / 'khrug pa dpung dang bcas pa byas te/ de la mtshon cha tshabs cher 'bebs pa zhes bya ba'o/ /rna ba gzhu 'dra ba yod cing bzhin mi sdug pa yin te/ de lta bu'i 'byung po rnams kyis kyang sems can rnams la drag por gnod pa'o//sbrul gyi gzugs can be'u'i gzugs/ /phag gi gzugs can lto bo che/ /zhes bya ba ni/ mi'i lus la mgo brnyan mi gcig pa ste/ rtag tu ltas dang rmi lam la yang de'i gzugs bstan la/ rnam par rtog pa skye bar byed pa'o/ /de skyes pa dang nad drag pos mi tshugs te/nad kyis srog dang bral bar byed pa'o/ /mgo bo che la lag ring ba/ /rna 'phyang po la nu ma 'phyang / /zhes bya ba ni/ tshan gcig 'dre mo'i gzugs yod de/ dpag tshad brgya'i bar nas kyang 'tshe bar byas shing sha khrag len nus te/ bzhin mi sdug cing lag pa ring ba'i sbar mos 'debs pa'o//de 'dra'i gnod sbyin mang po yi/ /g.yog 'khor dag gis yongs su bskor/ zhes bya ba ni/ de dag ni rgyal po chen po rnam thos kyi bu'i 'khor yin te/ stobs che zhing mi srun te/ khams gsum tsam la 'gyur zhing dur khrod bsil ba'i tshal na gnas pa'o//gnod sbyin bye ba phrag stong rnams/ /de dag ma ni lam log can/ /zhes bya ba ni/ de dag ni byang phyogs na gnas pa ste/ byang gi phyogs nas 'ongs nas/ tshan gcig phan bya dang gnod bya gnyis byed par 'ongs pa ste/ tshan gcig snying rje med cing sems can la 'tshe ba/tshan gcig snying rje dang ldan zhing sems can la grogs byed pa'o/ /g.yog 'khor de dag lhan cig tu/ /bdag ni phyag 'tshal slad du mchis/ /zhes bya ba ni/ de dag lta bu'i 'byung po rnams kyis kyang / bcom ldan 'das dang lhan cig tu 'khod cing gus pas phyag 'tshal ba'o//gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ sems can rnams la 'tshe bar mi byed de/ chos dang ldan zhing snying rje skye ste/ rig sngags kyi rgyal mo'i gzi brjid kyis 'tshe bar mi nus pa'o//drag cing rgod la gtum pa dang / /lto bo che la skra ring ba/ /zhes bya ba ni/ 'byung po de lta bu'i tshan gcig byung ste/ sdig la mi 'dzem zhing sems can rnams la gnod par byed pa drag po'i tshul bstan nas/ phyogs bzhi mtshams bzhir 'gyu ba'o/ /mi rnams dang ni ri dgas dang //bya rnams gzi brjid 'phrog par bgyid/ /ces bya ba ni/ tshan gcig grong ngam grong khyer du phyin cing mi rnams kyi lus la zhugs nas gzi brjid 'phrog pa ste/ tshan gcig ni ri dgas la sogs pa'i sems can la 'tshe bar byas nas srog 'phrog ste/ sems can rnams la ma rungs par byed pa'i 'byung po'o//me 'bar za dang mang du za/ /mig gcig pa dang mig ser dang / /zhes bya ba ni/ bzhin mi sdug cing gzugs sna tshogs bstan te/ sems can rnams la 'tshe bar byed cing ma'i mngal nas zhugs nas gzi brjid 'phrogs pa rnams so//sna dang rna ba bcad pa dang / /chad pa mang pos bcad pa dang / /zhes bya ba ni/ tshan gcig kyang sna dang rna ba bcad pa'i gzugs su byas nas/ sems can 'tshe bar byas te/ de rnams kyis kyang mi rnams kyi lus la zhugs nas ma rungs pa thams cad byed pa'o//gzhan rnams kyis kyang de'i 'bras bu sna dang rna ba dang / rkang pa dang / lag pa gcod pa'i chad pa byed par 'gyur ro/ /de yang 'byung po rnams kyis skyon byas pa yin no/ /mgo ma mchis dang mgo bcad dang / /lus kyang sgur la gnyer ma gdong //zhes bya ba ni/ de rnams tshan gcig gis kyang sems can rnams la rmi lam dang / ltas dang / dngos por mthong bar byas te/ de'i rtog pas nad sna tshogs btang zhing sems can gyi srog 'phrog pa'o/ /de rnams ni ltas ngan gyi 'byung po rnams yin no/ / mig la me 'bar rkang phyed pa/ /mi rnams 'jigs par bgyid pa ste/ /zhes bya ba ni/ nags tshal lam/ dur khrod dam/ ri dang / lung stong la gnas pa ste/ sems can mi rnams kyis mthong bar gyur pa na ngo sbed pa ste/ 'byung po des sems can mthong na nyin mo gnod mi nus shing /mtshan mo'i rigs la cis kyang phan pa med cing srog 'phrog pa'o/ /'phel ka che la rgod bag can/ /de bzhin 'gro zhing rgyu bar bgyid/ /ces bya ba ni/ 'phel ka che zhing mtshan rnams rgyu ba ste/ pho mo nyal ba'i dus su mnyan nas glags rnyed par gyur na lus la 'jug ste/bdud kyi rigs su skyes nas pha ma rnams skrag par byed pa'o/ /de 'dra'i gnod sbyin mang po yi/ /g.yog 'khor dag gis yongs su bskor/ /zhes bya ba ni/ bcom ldan 'das ga la der 'byung po rnams kyis bskor te/ phyogs gcig tu 'khod de/'jig rten mgon gyi spyan sngar bsdad pa'o/ /gnod sbyin bye ba phrag stong rnams/ /de dag ma ni rkun ma lags/ /zhes bya ba ni/ de dag kun kyang dur khrod chen po bsil ba'i tshal na gnas shing / rgyal po chen po rnam thos kyi bu'i 'khor yin te/ de rnams kyang rig sngags kyi gzi brjid kyis 'khod pa'o//g.yog 'khor de dag lhan cig tu/ /bdag ni phyag 'tshal slad du mchis/ /zhes bya ba ni/ dpon g.yog de rnams kyis kyang / bcom ldan 'das la gus par byas nas/ phyogs gcig tu 'khod nas phyag 'tshal ba'o//gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ 'jig rten dbang phyug gi spyan sngar sems can rnams la 'tshe bar mi byed cing snying rje dang ldan te/ rig sngags kyi rgyal mo bsil ba'i tshal gyi dmod mos 'tshe bar mi nus pa'o//bdag cag gi ni gnas 'di na/ shing rta zhes bgyi srin po mchis/ /zhes bya ba ni/ lho nub kyi mtshams na lang ka na gnas pas srin po'i tshogs mang po 'byung ste/ de rnams kyis kyang sems can rnams la gnod par byed cing 'bru gu'i nad rnams gtong ba'o//de la bu mo stobs ldan pa/ /stong phrag bcu yi grangs snyed mchis/ /zhes bya ba ni/ srin mo'i tshogs kyang de rnams 'byung ste/ stobs dang ldan zhing rang gi kha dog tu snang ba de rnams kyis kyang bcom ldan 'das kyi spyan sngar 'khod pa'o/ /de dag bdag gi g.yog lags te//de dag phyag 'tshal slad du mchis/ /zhes bya ba ni/ bdag cag kyang bcom ldan 'das kyi spyan sngar g.yog du ma dang bcas nas mchis te/ sangs rgyas dang / chos dang / dge 'dun la skyabs su mchi'o zhes bya ba'o/ /gau tam dpa' bo khyod la ni//chos bzhin mthun par lta zhing mchis/ /zhes bya ba ni/ 'jig rten bla ma'i spyan snga ru/ sems can rnams la snying rje dang ldan zhing 'tshe bar mi byed de/ /rig sngags kyi rgyal mo'i gzi brjid kyis sems can rnams la 'tshe bar mi byed pa'o/ /bdag cag gis ni gnas rnams na//mgrin rings zhes bya'i srin mo mchis/ /zhes bya ba ni/ lang ka mgrin bcu'i rigs mgo bcu gcig yod pa 'jigs su rung ba rnams 'byung ba'o/ /srin mo shin tu gnag pa dag /srin mo nag mo zhes bgyi dang / /zhes bya ba ni/ dpal lha mo dang / 'khor g.yog yin te/srin mo ral pa gcig pa rnams/ 'khor g.yog du ma dang bcas pa byung ste/ de rnams kyang bcom ldan 'das kyi spyan snga ru'o/ /srin mo rab gnas rnams mchis te/ /de dag gau tam mthun par lta/ /zhes bya ba ni/ rgya mtsho'i 'gram na zangs gling zhes bya ba'i yul na gnas te/de bas kyang gnag pa lnga brgya yod de/ de rnams kyis kyang sems can la 'tshe bar byas shing / bud med du brdzus nas gnod pa skyel ba'o/ /sa yi gnod sbyin bdag nyid che/ /de dag sa stengs gnas pa lta/ /zhes bya ba ni/nor rgyun ma'i 'khor g.yog yin te/ de yang ljang ma mo dang / kun du bzang mo dang / 'od ldan ma la sogs pa yin te/ de rnams kyis kyang sems can la gnod par mi byed cing / phan pa sha stag ste/ sa la gnas shing sa la bdag byed pa'o/ /g.yog 'khor de dag rnams kyis ni//yongs su bskor te 'dir mchis lags/ /zhes bya ba ni/ srin po dang / srin mo dang / sa bdag mo la sogs pa 'khor g.yog du ma dang thabs cig tu bcom ldan 'das kyi spyan sngar ro/ /de dag kun dang lhan cig tu/ /bdag ni phyag 'tshal slad du mchis//zhes bya ba ni/ rig sngags dang / sangs rgyas rnams la skyabs su mchi'o/ /sems can la gnod par mi byed cing / sangs rgyas bcom ldan 'das dang thabs cig tu 'khod pa'o/ /gau tam dpa' bo khyod la ni/ /chos bzhin mthun par lta zhing mchis//zhes bya ba ni/ stong gsum gyi stong chen po'i 'jig rten gyi khams kyi dbang phyug la bdag cag sems can rnams la 'tshe bar mi byed cing spyan sngar mchis pa'o/ /bdag gi mdun na rgyug pa yi/ /yi dags gnod sbyin srin po rnams/ /zhes bya ba ni/ lus ngan po'i spyan sngar rgyug pa'i ma rungs pa byed pa la dga' ba'i 'khor tshan gcig yod de/ sdig la dga' zhing snying la mi sdug pa sha stag go/ /lus chen shugs kyang drag po ste/ /so yang che la lto bo che/ /zhes bya ba ni/ 'jig rten g.yo bar nus shing yud tsam gyis gang la yang khyab ste/gzi brjid che zhing rbad pa la dga' ste/ /de'i gzugs kyis sems can la gnod par byed pa'o/ /rna 'phyang 'jigs pa chen po ste/ /slob ma sna la rab tu 'phyang / /zhes bya ba ni/ glags btsal te dam tshig nyams pa la smad cing gnod pa che bar byas pa ste/de rnams kyis kyang chad pa gcod cing drag shul bstan pa'o/ /yan lag drug pa so bstan pa/ /gur gum mdog can tho ba 'dra/ /zhes bya ba ni/ mgo bo drug phyag drug /rkang pa drug de bzhin du sprul pa ste/ mdog mdzes pa ste/ mche ba gtsigs shing so gtsigs shing sems can rnams la ston par byed pa'o/ /so yang rtsub cing rno ba dang / /mdung thung gsal zhing 'jigs par bgyid/ /ces bya ba ni/ sems can la gnod pa byed pa'i dus su ni mtshon cha sna tshogs bstan te/ /so rno zhing sems can smad pa la dga' ba'o//glang chen mgo dang bum rna can/ /mgo bo seng ge stag dang 'dra/ /zhes bya ba ni/ gzugs sna tshogs par sprul zhing sems can rnams la 'jigs par byed pa ste/ de rnams mi srun zhing gnod par byed pa la dga' ba'o/ / lcags kyi so can lcags kyi skra/ /gdon rnams rnam par skrag bgyid pa/ /zhes bya ba ni/ mtshon gyi so dang khab kyi skra ste/ de bzhin du lus po'i ba spu rnams kyang yin no/ /nang la nang 'thab 'dod cing sems can gyi lus la zhugs nas kyang de bzhin no/ /lag na lcags kyi gtun bu thogs//lag na lcags kyi tho ba thogs/ /zhes bya ba ni/ gdon de rnams kyang 'thab pa'i dus su de bzhin te/ de'i tshul gyis bstan zhing sems can la 'thab rtsod rngod par byed pa'o/ /so rnon lag pa ring ba ste/ /'jigs pa'i gzugs can lcags kyi mchu//zhes bya ba ni/ /za ba'i dus su so rno ba/ /gnod par byed pa lag ring ba/ /yang na lag pa ring ba ni phyogs gcig na bsdad nas dpag tshad brgyar slebs pa'o/ /drag po'i tshul du bstan zhing mtshon gyi mchu dang ldan pa'o/ /mgo bo che la skra g.yengs pa//nag cing mig ser sna zhom pa/ /zhes bya ba ni/ yan lag phra zhing bong thung ba ste/ mgo bo che la bzhin mi sdug ste/ sol ba'i mdog la mig la me 'bar te/ sna med cing sug sug byed pa de'i gzugs kyis gnod par byed pa'o//bum pa'i mgrin dang mig dmar ba/ /mig gcig pa dang lto bo che/ /zhes bya ba ni/ bum pa 'dra ba'i lba ba gsum yod pa ste/ de'i lus la mig dmar ba'o/ /mig gcig sbrul gyi mgo can te/ stobs dang ldan zhing sa bdag gi gzugs su gnas pa'o/ / mchu 'phyang po dang lag gcig pa/ /rkang gcig pa dang rkang gnyis pa/ /zhes bya ba ni/ chu srin gyi mchu dang ldan pa/ lus la lag pa gcig med cing 'jigs su rung ba ste/ la la yang rkang pa re re yod cing gnyis gnyis 'grogs nas 'gro ba'o/ / gzhan yang khro bo'i tshul du yod pa la rkang pa gnyis dang ldan pa'o/ /kha med kha gnyis drag po ste/ /mi rnams rab tu 'jigs par bgyid/ /ces bya ba ni/ khab kyi kha la gsus po che ste/ kha yang kha ltag khung na yang kha yod pas kha gnyis yod pa ste/ de bzhin du mi rnams la yang gnod pa ste/ drag po'i tshul gyis gnod par byed pa'o/ /lag na 'khar ba dbyug pa thogs/ /mdud rtse gsum pa drag cing 'jigs/ /zhes bya ba ni/ gdon ma rungs pa rnams la ni/ mtshon cha sna tshogs thogs shing mi rnams la 'jigs par byed pa ste/de bzhin du 'tshe ba drag po byed pa'o/ /skrag cing 'jigs par byed pa ste/ /gdon rnams rnam par skrag bgyid pa/ /zhes bya ba ni/ drag po'i tshul gyis gnod par byed de de bzhin du gdon sna tshogs kyis nad sna tshogs btang nas 'tshe bar byed pa'o//skrag par bgyid cing smra bar bgyid/ /sems kyang 'khrugs par byed pa ste/ /zhes bya ba ni/ nad kyis thebs shing lab lob smrar 'jug pa ste/ yang na sems can de smyos par byas nas sems gtong zhing kha'i kha bden smra ba'o/ /smyo bar bgyid cing rmongs par bgyid//de nas gzi brjid 'phrog par bgyid/ /ces bya ba ni/ gdon gyis btab pa de ni 'bog ste/ sems kyang gtong / de bzhin du ngag kyang med do/ /lus de yang nyon mongs shing dpal dang mi ldan te/ de bzhin du gnod sbyin gyi gdon gyis btab pa'o//de dag 'jig rten 'jigs pa ste/ /stobs po che la brten par dka'/ /zhes bya ba ni/ de bzhin du 'jig rten gyi khams thams cad la sems can gyis sems can la gnod par byas te/ 'jigs shing skrag par byed pa'i phyir na/ rig sngags kyi rgyal mo bsil ba'i tshal la brten pa'o//stong phrag drug cu rtsa bzhi po/ /rgyal po chen po'i mdun na rgyug /ces bya ba ni/ gnod sbyin gyi sde dpon lus ngan po'i mdun du rgyug ste/ de dag 'jigs nas skyabs gsol ba'o/ /de 'dra'i gnod sbyin mang po yi/ /g.yog 'khor dag gis yongs su bskor//zhes bya ba ni/ lus ngan po dang thabs cig tu/ /sangs rgyas ga la ba der 'khor de/ gus par bskyed nas thabs cig tu'o/ /gnod sbyin bye ba stong phrag rnams/ /de dag phyag 'tshal slad du mchis/ /zhes bya ba ni/'khor g.yog bdag cag sangs rgyas dang chos dang dge 'dun la skyabs su mchis te/ gus par byas nas rig sngags la phyag 'tshal ba'o/ /gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ bdud bzhi bcom pa la dpa' bo ste/de bzhin du mun pa mun nag bsal te/ 'jig rten las 'das nas sems can rnams kyi don byed pa ste/ bdag cag gi sems kyis sems can rnams la 'tshe bar mi byed de/ rig sngags bdag gis gzung bar bya/ /sa ga lngas rtsen zla ba dang //seng ge sde dang rab gnon dang / /zhes bya ba ni/ de yang gnod sbyin gyi sde dpon nyi shu rtsa gnyis yin te/ de rnams kyi ming grangs ni gsang sngags che dang la ba la sogs pa'o/ /rig pa stobs chen nor bu dang / /zhes bya ba ni/ gsang sngags chen dang / la ba la sogs pa'i bar nas 'di dag yin te/ gnod sbyin gyi sde dpon nyi shu rtsa gnyis de yang stobs dang ldan zhing gzi brjid che ba ste/ kha dog dang ldan zhing rdzu 'phrul dang ldan pa/ lha dang lha ma yin gyi rtsod pa las rtsod par nus te/gnod sbyin de dag kyang sangs rgyas kyi bstan pa srung zhing / rig sngags la rjes su yi rang ba'o/ /'jog po nag po chen po dang / /la ba can dang rje'u gnyis/ /zhes bya ba ni/ klu'i rgyal po klu rigs bzhi yin te/ de dag kyang sa dang chu la gnas shing bstan pa bsrung ba'o//klu yi rgyal po sa srung bu/ /yan lag chen po rdzu 'phrul che/ /zhes bya ba ni/ stobs dang ldan zhing kha dog dang ldan te/ sangs rgyas kyi bstan pa srung zhing 'jigs pa med cing / gnod par mi byed pa'o/ / nam mkha' lding ni shugs chen ldan/ /'dab chags kun gyi mchog gyur pa/ /zhes bya ba ni/ nam mkha' lding gi rgyal po gser mig can yin te/ 'dab chags bya ba la gzugs che zhing stobs dang ldan pa'o/ /bya yi shugs kyis 'chi bgyid cing / / rgya mtsho kun du 'khrug par bgyid/ /ces bya ba ni/ sems can des klu'i sems can rnams la 'jigs par byed de/ de yang de dag rnams kyis kyang / /'tshe bar byed pa'i rgyu la gnas pa'o/ /lha dang lha min dri za rnams/ /'jigs bgyid pa dang dge ba'ang rung //zhes bya ba ni/ phan byed dang gnod byed gnyis nus te/ de rnams kyis kyang phan par byed pa dang / gnod par byed pa la gnas pa'o/ /ma dad pa dang dad pa rnams/ /de dag thams cad 'dir mchis te/ /zhes bya ba ni/ chos la gnas pa dang mi gnas pa gnyis sdig la 'dzem pa dang mi 'dzem pa gnyis yin te/de dag rnams kyang bcom ldan 'das kyi spyan sngar mchis so/ /gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ ma rig pa la sogs pa bcom ldan 'das la dpa' ba nyon mongs pas mi tshugs shing thugs rje dang ldan pa ste/gdon de rnams kyang rig sngags kyi mthus chos dang ldan par gnas pa'o/ /'phrog ma zhes bya gnod sbyin mo/ /'jigs par bgyid pa stobs chen mo/ /zhes bya ba ni/ rang gi bu tsha ni snying du sdug ste/ gzhan gyi bu tsha rnams 'jigs par byed cing /gnod byed nus pa ste/ des kyang byis pa rnams la 'jigs par byed cing srog 'phrog pa'o/ /de yi bu ni lnga brgya rnams/ /'jigs bgyid gnod sbyin mthu rtsal can/ /zhes bya ba ni/ 'phrog ma'i bu ste/ de rnams kyis kyang sems can la gnod par byed cing mngal nas rlag par byed de/ma dang bu rnams kyang srog 'phrog pa'o/ /bdag nyid kyi ni g.yog lags te/ /de dag phyag 'tshal slad du mchis/ /zhes bya ba ni/ 'phrog ma'i bu lnga brgya dang / 'phrog ma dang bcas pa 'khor g.yog du ma gnas te/ de dag kyang sangs rgyas dang chos dang / dge 'dun la phyag 'tshal zhing skyabs su gsol te/ de ltar bcom ldan 'das ga la ba der phyogs gcig tu gnas pa'o/ /gau tam dpa' bo khyod la ni/ /chos bzhin mthun par lta zhing mchis/ zhes bya ba ni/ nyon mongs pa rnams bcom zhing /de bzhin du de bcom ldan 'das la dpa' bo zhes bya ste/ sdig dang / dge ba dang bral zhing sangs rgyas pa'o/ /bdag cag gis kyang chos dang mthun par dge ba la gnas te/ sems can la snying rje bya zhing spyan sngar mchis pa'o/ /ma ga d+hA na thams cad mthong //ka shi na ni pad+ma 'chang / /zhes bya ba ni/ mngon sum du 'jig rten gsum la rdzu 'phrul gyis mthong ba ste/ stobs de dang ldan pa'i gnod sbyin ni rgya gar gyi dbus su'o/ /yul ko shi ka nas kyang pad+ma 'chad gnas te/ pad+ma bzhin du spyan yod pa'i phyir na pad+ma 'chang ba'o//yangs pa can na rgyal mchog gnas/ /gyad yul na ni grags 'dzin gnas/ /zhes bya ba ni/ ma ga d+hA na gnod sbyin rgyal mchog gnas te/ de bzhin du gyad yul na yang de dang 'dra bar gnas pa te/ stobs che zhing gzi brjid dang ldan pa'o//rgyal po'i khab na ku m+b+hi ra/ /ser skya'i gnas na drag po ste/ /zhes bya ba ni/ ri'i rgyal po'i khab kyi ded dpon ni gnod sbyin chen po ku m+b+hi ra la sogs pa'o/ /de bzhin du ser skya'i yul na grags pa dang ldan pa'o/ /ta ma la ni 'byor pa gnas//mi thi la dang kun du rgyal/ /zhes bya ba ni/ mi thi la dang ta ma la gnyis ni ma ga d+hA'i lho phyogs yin te/ gnod sbyin chen po 'byor pa dang kun du rgyal gnas pa'o/ /ma mo chen mo 'di brgyad ni/ /gnod sbyin rnams kyi sde dpon mchog /ces bya ba ni/'jig rten gyi ma mo brgyad yin te/ de yang 'di dag gi ming ni 'joms pa'i dngos grub dang / keng rus can dang / tshangs chen ma dang / nag mo chen mo dang / gzhon nu mo dang / rnam rgyal mo dang / drag mo dang / khyab 'jug mo dang brgyad do/ /de rnams ni 'jig rten gyi mar gyur cing mi srun gnod sbyin rnams kyi bdag mo'o//rdzu 'phrul chen mo skal ba che/ /stobs chen de dag thams cad ni/ /zhes bya ba ni/ skad cig mas 'jig rten khams la 'gyu ste/ kha dog ldan zhing gtor ma rnams len par byed pa'o//gzhan rnams kyis kyang mchod par 'os shing gtor ma len du gtang ba'o/ /yid dge dad pa'i sems dang ldan/ /rdzogs sangs rgyas la skyabs mchis pa/ /zhes bya ba ni/ glo bur gyi dad pa ma yin pa snga nas kyang dad pa dang ldan te/ sangs rgyas kyi bstan pa bsrung zhing rig sngags kyi chos la gus par byas te/sangs rgyas dang chos dang / dge 'dun la rjes su yi rang zhing skyabs su 'gro ba'o/ /de dag dang ni 'dus nas kyang / /rgyal po chen po stobs chen gyis/ /zhes bya ba ni/ rgyal po chen po rnam thos kyi bu yang stobs dang ldan te/de dag kyang dbang du 'du zhing sems can rnams la 'tshe bar mi byed pa'o/ /yang dag rdzogs sangs rgyas bstan la/ /mi rnams la ni snying brtse slad/ /ces bya ba ni/ bcom ldan 'das kyi gzi brjid la brten nas/ rig sngags kyi dmod mo'i 'jigs pas 'jig rten gyi khams kyi mi rnams 'jigs par mi byed cing /snying rje skye ba'o/ /gnod sbyin 'byung po yi dags dang / /sdang ba'i gdon rnams bzlog pa dang / /zhes bya ba ni/ sdig pa'i sems dang ldan pa thams cad sangs rgyas kyi bka' dang rig sngags kyi gzi brjid kyis gnod sbyin 'byung po'i gdon rnams zlog par byed cing //de rnams kyis kyang mi tshugs pa'o/ /mi ma yin rnams bzlog pa yi/ /bsrung ba 'di ni legs par bgyis/ /zhes bya ba ni/ srung ba'i dam pa sbod gtong dang / rig pa dang / sngags dang /de rnams bzlog pa ste/ de bzhin du 'byung po dang / yi dags la sogs pa zlog par byed pa'o/ /de nas rgyal po rnam thos bu/ /thal sbyar 'dug ste smras pa ni/ /zhes bya ba ni/ bcom ldan 'das ga la ba der rgyal po chen po rnam thos bus/ pus mo g.yas pa'i lha nga sa la btsugs te/bcom ldan 'das la thal mo sbyar nas zhus pa'o/ /khon dang 'jigs pa kun 'das pa/ /rnam grol zag pa mi mnga' ba/ /zhes bya ba ni/ shes bya'i dri ma dang / bag chags kyi dri ma mi gnas shing / 'khor ba'i sdug bsngal thams cad bcom ste/'jigs pa thams cad dang bral bar byed pa dam pa'i dam pa'o/ /gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ 'jig rten gyi khams la dbang mdzad cing / bgegs thams cad bcom pa ste/ de bcom pas na/ dpa' bo zhes bya ba'o/ /gau tam la phyag 'tshal skyabs su 'gro ba'o/ /khyod la lha dang grub pa dang / /bram ze thams cad phyag 'tshal te/ /zhes bya ba ni/ mi mjed kyi bdag po tshangs pa la phyag 'tshal te/ 'jig rten pa'i stong spyi phud kyi bdag po yin te/ yang na bram ze phyag 'tshal lo//zhes bya ba ni/ tshangs par spyod pa'i dbang po de la phyag 'tshal skyabs su mchis zhes bya'o/ /gnod sbyin bye ba drug khri dang / /bzhi stong dag kyang lhags nas ni/ /zhes bya ba ni/ gzugs sna tshogs bstan pa/ sna tshogs kyi lta ba yod pa/ gnod byed dang phan byed gnyis yod pa/sdig pa dang / dge ba byed pa sha stag bcom ldan 'das kyi spyan sngar mang po 'dus pa'o/ /kho ra khor yug yongs bskor nas/ /thal mo sbyar te 'khod gyur lags/ /zhes bya ba ni/ dur khrod bsil ba'i tshal gyis gzhi la/ gnod sbyin 'byung po rnams pus mo g.yas pa'i lha nga sa la btsugs te/bcom ldan 'das kyi spyan sngar phyogs nas bskor zhing thal mo sbyar ba'o/ /bdag ni rgyal po rnam thos bu/ /byang phyogs skyong bar bgyid pa ste/ /zhes bya ba ni/ rgyal po rnams thos kyi bus kyang gnod sbyin chen po 'khor g.yog dang bcas shing byang phyogs na srung bar bgyid pa'o//'jig rten mgon po'i nye skor du/ /gnod sbyin rgyu ba smyo byed dang / /zhes bya ba ni/ bcom ldan 'das ga la ba der gza' dang rgyu skar dang bcas shing bzhin sdug pa dang / mi sdug pa rnams kyis bskor te/ 'byung po mang po spyan sngar 'dus pa'o//brjed byed dang ni mi'am ci/ /skem byed dang ni rims drag dang / /zhes bya ba ni/ glo bur du nad gtong ba dang / glo bur du bar chod byed pa 'di rnams yin te/ gzi brjid 'phrog pa 'di rnams kyang / bcom ldan 'das kyi spyan sngar gnas pa'o/ /de bzhin rims rnams zhag bzhi pa//de dag bdag gis bzlog par bgyi/ /zhes bya ba ni/ rgyal po chen po rnam thos kyi bus/ rig sngags kyi rgyal mo bsil ba'i tshal gyi gzi brjid kyis/ rims nad la sogs pa nad rigs mi gcig pa bzhi brgya rtsa bzhi zlog par byed pa'o/ /rig sngags kyi rgyal mo bsil ba'i tshal gyi/'byung po mang po rigs brtag pa'i gnas skabs te drug pa'o// //bsil ba'i tshal gyi rig sngags zhes bya ba 'di ni/ gang zhe na/ las kyi rigs kyi de bzhin gshegs pa'i rigs ni/ mtshon pa ni chos kyi dbyings kyi ye shes so/ /mtshon byed ni rig sngags kyi rgyal mo bsil ba'i tshal lo//gzugs kyi phung po ste/ khams ni sa'i khams so/ /skye mched ni mig ste/ rang bzhin ni ye shes lnga'o/ /sangs rgyas lnga'i dbu rgyan can/ spyan gsum pa/ rgyan thams cad kyis brgyan pa/ zhal gsum pa/phyag drug pa/ sku mdog dkar mo/ /zhal g.yas mthing ga /g.yon dmar ba/ phyag g.yas pa gnyis na ral gri dang / 'khor lo/ g.yon pa gnyis na dgra sta dang rtse gsum/ 'og ma'i g.yas g.yon gnyis kyis mda' gzhu 'gengs pa/ zhabs g.yas bskum pa/ g.yon brkyang ba/ pad+ma dang zla ba'i gdan la bzhugs shing nyi ma'i 'od dang bcas pa ste/ zhi ba'i tshul du bzhugs pa'o/ /rig sngags kyi gsang sngags kyi tshig ni gang zhe na/ 'di lta ste/ u ha haM zhes bya ba la sogs pa'o/ /rgyal po chen po rnam thos kyi bu lus ngan lcang lo can gyi bdag po phyogs skyong bar gyur cig ces bya ba ni/sangs rgyas kyi bka' rig sngags kyi byin rlabs kyis sangs rgyas rnams kyi bstan pa srung ste/ byang phyogs skyong zhing sems can rnams kyi don byed pa'o/ /lha'i rgyal po nor lha'i bu zhes bgyi ba mchis te zhes bya ba ni/sems can rnams la don byed cing / rnam thos kyi bu la phyag 'tshal te/ de bzhin 'byung po rnams kyis kyang skyabs su mchi zhes bya'o/ /de la bdag kyang phyag 'tshal zhes bya ba ni/ gnod sbyin 'byung po rnams kyis phyag 'tshal ba'o/ /de yang bcom ldan 'das nyid la phyag 'tshal te zhes bya ba ni/'jig rten dbang phyug sems can gyi don la sprul pa'i skus khyab pa de la bdag gis phyag 'tshal zhes bya ba'o/ /rdzogs pa'i sangs rgyas dpa' bo ste/ /kun mkhyen kun gzigs khyod la 'dud/ /ces bya ba ni/ shes bya dang bag chags kyi sgrib pa 'joms shing /'jig rten gyi rnam par rtog pa grol zhing / rgyal ba rnam par rgyal na sangs rgyas so/ /'jig rten kun 'jigs skyob pa khyod la 'dud do zhes bya'o/ /yang dag dpa' bo khyod la 'dud/ /chos bzhin mthun par lta zhing mchis/ /zhes bya ba ni/ phyin ci ma log cing nges par bdud bzhi bcom pa ste/ yang dag pa'i ye shes thob cing / sems can gyi don mdzad pa'o/ /de lta bu'i gzi brjid kyis bdag kyang sems can la snying rje byas shing spyan sngar mchis so zhes bya ba'o/ /de nas zhes bya ba ni/ rnam thos kyi bu'i tshig gi de nas so//rgyal po chen po yul 'khor srung / /thal sbyar 'dug ste smras pa ni/ /zhes bya ba ni/ shar phyogs kyi rgyal po dri za thams cad la dbang mdzad pa/ pus mo g.yas pa'i lha nga sa la btsugs pa'o/ /bcom ldan 'das kyi spyan sngar thal mo sbyar nas zhu ba'o/ / chos kyi rgyal po 'od mdzad pa/ /sangs rgyas dpal la bdag phyag 'tshal/ /zhes bya ba ni/ chos kyi phung po brgyad khri bzhi stong 'jig rten la bshad nas sku mya ngan las 'das te/ chos de'i 'od zer 'jig rten gyi khams rnams la khyab ste/ de bzhin du de sangs rgyas shing snying rje che la bdag gis phyag 'tshal lo zhes bya ba'o//gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ 'jig rten gyi khams thams cad spangs shing bdud rnams btul ba ste/ de bzhin du 'khor ba'i mun nag sel zhing sangs rgyas pa'o/ /de lta bu'i chos kyi gzi brjid kyis bdag cag dri za rnams ni sems can rnams la snying rje byas shing spyan sngar mchis so//gau tam khyod kyis gang mkhyen pa/ /de ni lha rnams ma 'tshal to/ /zhes bya ba ni/ rig sngags kyi rgyal mo bsil ba'i tshal gyi ye shes de ni bdag cag rnams kyis mi shes te/bsam gyis mi khyab pa/ rang bzhin dang bral ba/ skye ba med pa'i rang bzhin no/ /srin po mthong na rab 'jigs pa/ /stong phrag drug cu rtsa bzhi rnams/ /zhes bya ba ni/ bzhin mi sdug pa dang / sdug pa rnams dri za srin po mang po 'dus pa'o/ /kho ra khor yug yongs bskor nas//thal mo sbyar te 'khod gyur lags/ /zhes bya ba ni/ 'jigs su rung ba dur khrod chen po bsil ba'i tshal la/ srin po'i gdon dang dri za'i gdon rnams kyis phyogs bzhi nas pus mo g.yas pa'i lha nga sa la btsugs te/ thal mo sbyar nas 'jig rten mgon po la'o/ /bdag ni rgyal po yul 'khor srung //shar phyogs skyong bar bgyid pa ste/ /zhes bya ba ni/ yang dag par rdzogs pa'i sangs rgyas kyi bstan pa srung zhing / rig sngags kyi bka' las mi 'da' ste/ rig sngags 'di 'chang ba'i gang zag la shar phyogs skyong bar bgyid cing sems can gyi don byed pa'o//'jig rten mgon po'i nye 'khor du/ /srin po rnams dang sha za dang / /zhes bya ba ni/ de bzhin du rig sngags kyi gzi brjid kyis sangs rgyas kyi bka' las mi 'da' zhing / de rnams kyis kyang skyong bar byed pa'o/ /dri za dang ni rlung lha rnams/ /de dag bdag gis bzlog par bgyi//zhes bya ba ni/ dri za'i rgyal po yul 'khor srung gis kyang / sbod gtong dang rig pa dang / sngags dang ma rungs pa'i 'byung po rnams bzlog cing rig sngags la gus par byed pa ste/ rig sngags kyi ngo bo ni gang zhe na/ las kyi rigs kyi rin chen rigs/ mtshon pa ni mnyam pa nyid kyi ye shes te/ mtshon byed ni rig sngags kyi rgyal mo bsil ba'i tshal lo/ /ye shes lnga'i rang bzhin sangs rgyas lnga'i dbu rgyan can/ spyan gsum pa/ rgyan thams cad kyis brgyan pa/ zhal gsum pa/ phyag drug pa/ sku mdog ser mo/ / phyag g.yas pa gnyis na ral gri dang rin po che/ g.yon pa gnyis na pad+ma dang 'khor lo bsnams pa'o/ /de'i 'og ma g.yas g.yon gnyis kyis mda' gzhu 'gengs pa'o/ /zhabs g.yas pa bskum pa/ g.yon pa brkyang ba/ pad+ma dang zla ba'i gdan la bzhugs shing /nyi ma'i 'od dang ldan zhing sgeg pa'i tshul du bzhugs pa'o/ /rig sngags kyi gsang sngags kyi tshig ni gang zhe na/ 'di lta ste/ i Te mi Te la sogs rgyal po chen po yul 'khor srung phyogs skyong bar gyur cig ces bya ba ni/ shar phyogs su skyong ba ste/ rig sngags 'di la bka' stsal zhing /sems can don la skyong ba'o/ /srin po dang zhes bya ba la sogs pa ni/ shar phyogs na gnod par byed pa de rnams ni/ rgyal po chen po yul 'khor srung rig sngags kyi gzi brjid kyis de rnams shar phyogs nas byung ba zlog pa'o/ /lha'i nang na lha'i rgyal po nor lha'i bu zhes bgyi ba mchis te zhes bya ba ni/dri za'i rgyal po yul 'khor srung la skyabs su mchi ste/ shar phyogs kyi mnga' bdag la phyag 'tshal lo/ /de la phyag 'tshal lo zhes bya ba ni/ shar phyogs na yod pa'i 'byung po rnams kyis phyag 'tshal ba'o//de yang bcom ldan 'das nyid la phyag 'tshal ba ste zhes bya ba ni/ bzhi bcom drug ldan/ de lta bu'i sangs rgyas la bdag cag rnams kyis phyag 'tshal lo zhes pa'o/ /rdzogs pa'i sangs rgyas dpa' bo ste/ /kun mkhyen kun gzigs khyod la 'dud//ces bya ba ni/ rnam par rtog pa thams cad dang bral zhing 'dod pa'i yon tan lnga bcom ste/ de lnga dang bral nas mya ngan las 'das pa'o/ /de lta bu'i sangs rgyas kun nas kun du gzigs pa bcom ste/ de yang 'khor ba'i 'jigs pa bcom pa'o/ /yang dag dpa' bo khyod la 'dud//chos bzhin mthun par lta zhing mchis/ /zhes bya ba ni/ phyin ci ma log cing rig sngags kyi ngo bo nyid bstan to/ de'i ye shes kyis nyon mongs pa thams cad bcom ste/ de lta bu'i chos la mthun par byas shing sems can rnams la 'tshe bar mi byed pa'o//de nas zhes bya ba ni/ yul 'khor srung gi tshig gi de nas so/ /rgyal po chen po 'phags skyes po'o/ /thal sbyar 'dug ste smras pa ni/ /zhes bya ba ni/ rgyal po chen po 'phags skyes pos kyang stan las langs te/ bcom ldan 'das kyi spyan sngar pus mo g.yas pa'i lha nga sa la btsugs nas thal mo sbyar te zhes bya ba'o//'jig rten mgon po skyabs mdzad pa/ /'jig rten kun la phan par mdzad/ /ces bya ba ni/ stong gsum gyi stong chen po'i 'jig rten gyi khams la sprul pa'i skus khyab ste/ de rnams la byams pa dang snying rjes gzigs nas sdug bsngal thams cad 'joms pa'i thabs la mkhas pa'o//gau tam dpa' bo khyod la ni/ /chos bzhin mthun par lta zhing mchis/ /zhes bya ba ni/ nyon mongs pa rnams bcom zhing dpa' ba ste/ sku gsung thugs thams cad ma lus par sangs rgyas pa de'i chos bzhin grul bum bdag cag gis mchis te/sems can la 'tshe bar mi byed cing snying rje'i sems dang ldan pa'o/ /grul bum yi dags srul po rnams/ /stong phrag drug cu rtsa bzhi ni/ /zhes bya ba ni/ lho phyogs na grul bum gdon rigs mi gcig pa 'byung ste/ srun pa dang mi srun po sha stag mang po 'dus pa'o//kho ra khor yug yongs bskor nas/ /thal mo sbyar te 'khod gyur lags/ /zhes bya ba ni phyogs phyogs nas bcom ldan 'das kyi spyan sngar pus mo g.yas pa'i lha nga sa la btsugs nas bcom ldan 'das la gus pas thal mo sbyar ba'o//bdag ni rgyal po 'phags skyes po/ /lho phyogs skyong bar bgyid pa ste/ /zhes bya ba ni/ sangs rgyas kyi bka' rig sngags kyi bka' las mi 'da' ste/ gang zag rig sngags 'chang ba'i de la lho phyogs skyong bar byed pa'o/ /'jig rten mgon po'i nye 'khor du/ / 'byung po rgyu ba gzi brjid 'phrog /ces bya ba ni ma rungs pa'i 'byung po rnams kyis kyang bar du gcod cing gzi brjid 'phrog pa ste/ drag shul gyis ni gnod pa byed pa'o/ /grul bum yi dags srul po rnams/ /de dag bdag gis bzlog par bgyi/ /zhes bya ba ni/ sangs rgyas kyi bka' dang / rig sngags kyi rdzu 'phrul gyis grul bum gyi gdon bzlog pa dang sbod gtong dang / sngags dang / rig pa rnams bzlog ste/ de yang rig sngags kyi rgyal mo'i rig pas bzlog pa'o/ /rig sngags kyi rgyal mo'i ngo bo ni gang zhe na/ las kyi rigs kyi pad+ma'i rigs so//rig sngags 'di'i mtshon pa ni/ so sor rtog pa'i ye shes so/ /mtshon byed ni rig sngags bdag nyid do/ /phung po ni 'du shes kyi phung po ste/ khams ni me'i khams so/ /skye mched ni lce ste/ ye shes lnga'i rang bzhin no/ /sangs rgyas lnga'i dbu rgyan can/spyan gsum pa/ rgyan thams cad kyis brgyan pa/ zhal gsum pa phyag drug pa/ sku mdog dmar mo/ /phyag g.yas pa gnyis na ral gri dang pad+ma/ g.yon pa gnyis na lcags kyu dang zhags pa/ 'og ma'i g.yas g.yon gnyis kyis mda' gzhu 'gengs pa'o//zhabs g.yas bskum pa/ g.yon brkyang ba/ pad+ma dang zla ba'i gdan la bzhugs shing nyi ma'i 'od zer dang ldan pa ste/ cung zad khro bo'i tshul du bzhugs pa'o/ /rig sngags dang gsang sngags kyi tshig ni gang zhe na/ 'di lta ste/ a le i le le la sogs pa'o//rgyal po chen po 'phags skyes po phyogs skyong bar gyur cig ces bya ba ni/ yang dag par rdzogs pa'i sangs rgyas kyi bka' dang / rig sngags dang gsang sngags kyi tshig gis rig sngags 'dzin pa'i gang zag dang sems can thams cad la rgyal po chen po 'phags skyes pos rig sngags kyi dam las ma 'da' bar bsrungs pa'o//grul bum dang zhes bya ba la sogs pa ni/ rgyal po chen po 'phags skyes pos kyang lho phyogs skyong zhing nad thams cad 'joms shing grul bum la sogs pa'i yi dags zlog par byed cing /rig sngags 'chang gi gang zag la skyong bar byed pa'o/ /lha'i nang na lha'i rgyal po nor lha'i bu zhes bgyi ba mchis te zhes bya ba ni/ rgyal po chen po 'phags skyes po lho phyogs skyong bar mchis te/ de la bdag gis phyag 'tshal zhing skyabs su 'gro ba'o/ / de la bdag phyag 'tshal lo zhes bya ba ni/ grul bum gyi gdon la sogs pa 'byung po rnams kyis phyag 'tshal ba'o/ /de yang bcom ldan 'das nyid la phyag 'tshal te zhes bya ba ni/ bdud bzhi bcom zhing sangs rgyas te/ ye shes mnyam pa nyid kyis sems can thams cad la snying rjes khyab ste/de lta bu'i ye shes ldan pa'i sangs rgyas la phyag 'tshal zhes bya ba'o/ /rdzogs pa'i sangs rgyas dpa' bo ste/ /kun mkhyen kun gzigs khyod la 'dud/ /ces bya ba ni/ nyon mongs pa rnams 'dul zhing 'jig rten gyi bya ba bor nas mun pa'i mun nag sel te/de lta bu'i 'khor ba bzhag nas sangs rgyas te/ lus ngag yid yang dag par rdzogs pa'o/ /de'i ye shes kyis kun nas kun du nyon mongs pa rnams la sprul ba'i skus 'jig rten gyi khams la khyab ste/ de rnams kyis 'jigs pa thams cad dang bral bar byed cing 'khor ba'i 'jigs pa'i thabs la mkhas pa'o//yang dag dpa' bo khyod la 'dud/ /chos bzhin mthun par lta zhing mchis/ /zhes bya ba ni/ nyon mongs pa lnga bcom zhing dpa' ba ste/ phyin ci ma log pa ye shes thob cing / yang dag par rdzogs pa'i sangs rgyas la 'dud pa ste/bdag cag grul bum gyi gdon la sogs pa'i rig sngags kyi rgyal mo ba'i tshal gyi gzi brjid kyis sems can la 'tshe bar mi byed cing snying rje dang ldan pa'o/ /de nas zhes bya ba ni/ 'phags skyes po'i tshig gi de nas so/ /rgyal po chen po mig mi bzang //thal sbyar 'dug ste smras pa ni/ /zhes bya ba ni/ rgyal po chen po de yang stan las langs te/ bcom ldan 'das kyi spyan sngar pus mo g.yas pa'i lha nga sa la btsugs te/ thal mo sbyar nas bcom ldan 'das la zhus pa'o/ /mun par gyur pa'i 'jig rten la//bcom ldan lam rnams ston mdzad pa/ /zhes bya ba ni/ ma rig pa'i rkyen gyis ye shes de yang nus te/ de'i ye shes brtan par byed pa yang dag par rdzogs pa'i sangs rgyas shAkya thub pas bsten pa'o/ /gau tam dpa' bo khyod la ni/ /chos bzhin mthun par lta zhing mchis//zhes bya ba ni/ bdud bzhi bcom pas na dpa' bo ste/ de bcom zhing ye shes thob pa ste/ bdag cag klu rnams kyang sems can gyi don byed cing snying rje la gnas pa'o/ /'jig rten dag na nyi zla 'dra/ /rin chen snying po stobs po che/ /zhes bya ba ni/ rang gi ye shes shar te/de'i ye shes kyang thams cad la khyab pa'o/ /de bzhin du nyi zla yang rang gi 'od zer gyis snang ba'o/ /de'i 'od zer thob cing yid bzhin gyi nor bu rin po che lta bu ste/ yid bzhin gyi nor bu rin po che de yang / 'jig rten gyi khams so/ /klu dang mkha' lding gsang ba pa/stong phrag drug cu rtsa bzhi rnams/ /zhes bya ba ni/ klu'i rgyal po mig mi bzang dang / klu'i gdon sa bdag la sogs pa nub phyogs nas mang po 'dus te/ de rnams kyang bcom ldan 'das kyi spyan sngar ro/ /kho ra khor yug yongs bskor nas/ /thal mo sbyar te 'khod gyur lags//zhes bya ba ni/ gdon de rnams kyis kyang / dur khrod bsil ba'i tshal la bcom ldan 'das ga la ba der phyogs bzhi nas bskor nas/ pus mo g.yas pa'i lha ngas la btsugs te/ bcom ldan 'das kyi spyan sngar thal mo sbyar nas zhu ba 'bul ba'o zhes bya ba'o//bdag ni rgyal po mig mi bzang / /nub phyogs skyong bar bgyid pa ste/ /zhes bya ba ni/ yang dag par rdzogs pa'i sangs rgyas kyi bka' rig sngags kyi gzi brjid kyis rgyal po chen po mig mi bzang gis kyang klu'i gdon srung ba'i don du/ nub phyogs skyong bar bgyid do zhes bya ba'o/ /'jig rten mgon po'i nye 'khor du/ /klu dang mkha' lding gsang ba pa/ zhes bya ba ni/ /bcom ldan 'das ga la ba der rgyal po mig mi bzang dang / srin po'i gdon dang / sa bdag la sogs pa bcom ldan 'das kyi spyan sngar 'khod nas/sems can rnams la gnod par bgyid do zhes pa'o/ /lha min dbang po stobs po che/ /de dag bdag gis bzlog par bgyi/ /zhes bya ba ni/ sa bdag gi gdon la sogs pa/ gsang ba po dang klu rnams kyang rig sngags kyi dmod mos gnod par byed pa'i gdon dang /sbod gtong dang / sngags dang / gzhan gyi rig pa dang / de rgyal po mig mi bzang gis kyang de rnams zlog par byed pa'o/ /rig sngags kyi rdo rje ni gang zhe na/ las kyi rigs kyi rdo rje'i rig ma ste/ mtshon pa ni me long lta bu'i ye shes te/ mtshon byed ni rig sngags kyi rgyal mo'i bdag nyid do//phung po ni rnam par shes pa'i phung po ste/ khams ni nam mkha'i khams so/ /skye mched ni yid kyi skye mched do/ /rang bzhin ni ye shes lnga'i rang bzhin no/ /sangs rgyas lnga'i dbu rgyan can/ spyan gsum pa rgyan thams cad kyis brgyan pa/zhal gsum pa/ phyag drug pa/ sku mdog mthing ga /zhal g.yas dkar ba/ g.yon dmar ba/ phyag g.yas gnyis na ral gri dang rdo rje/ g.yon gnyis na zhags pa rdo rje rgya gram/ de'i 'og ma gnyis mda' gzhu 'gengs pa'o/ /zhabs g.yas bskum pa/g.yon brkyang ba/ pad+ma dang zla ba'i gdan la bzhugs shing nyi ma'i 'od dang ldan pa/ khro bo'i tshul du bzhugs pa'o/ /rig sngags kyi gsang sngags kyi tshig ni gang zhe na/ 'di lta ste/ Ta ka ge Ta ka ge zhes bya ba la sogs pa'o/ /rgyal po chen po mig mi bzang phyogs skyong bar gyur cig ces bya ba ni/bcom ldan 'das kyi bka' dang / rig sngags kyi gzi brjid kyis/ rgyal po spyan mi bzang gis kyang / nub phyogs skyong zhing sems can gyi don mdzad pa'o/ /klu dang zhes bya ba la sogs pa ni/ klu'i gdon rnams kyis kyang nad sna tshogs btang zhing sems can rnams la gnod pa skyel zhing srog gcod pa ste/de'i gzi brjid 'phrog 'dod pa dang / rig sngags kyi dmod mos rgyal po chen po spyan mi bzang gis de rnams 'joms par byed pa'o/ /lha'i nang na lha'i rgyal po nor lha'i bu zhes bgyi ba mchis te zhes bya ba ni/ nub phyogs kyi rgyal po spyan mi bzang dang /yang dag thabs cig tu gzi brjid che zhing stobs che ba/ kha dog dang ldan zhing rdzu 'phrul dang ldan te/ lha dang lha ma yin gyi rtsod pa la yang rtsod par nus pa de rnams la yang bdag gis skyabs su mchi/ de la bdag phyag 'tshal lo zhes bya ba ni/ klu'i gdon dang / gsang ba po rnams kyis phyag 'tshal ba'o/ /de yang bcom ldan 'das nyid la phyag 'tshal te zhes bya ba ni/ bzhi bcom zhing phun sum tshogs pa dang ldan te/ mnyam pa nyid kyi ye shes kyis kyang 'jig rten gyi khams la khyab cing thugs rje'i spyan gyis lta ba'i bcom ldan 'das la phyag 'tshal zhes bya ba'o//rdzogs pa'i sangs rgyas dpa' bo ste/ /kun mkhyen kun gzigs khyod la 'dud/ /ces bya ba ni/ shes bya'i sgrib pa dang / bag chags kyi sgrib pa de nyid spangs pa'o/ /sku dang gsung dang thugs rdzogs pas na rdzogs pa ste/ 'jig rten gyi bya ba thams cad spangs nas sangs rgyas pa'o//gau tam yang bdag cag gis kyang / yang dag par rdzogs pa'i sangs rgyas kyi bka' dang / rig sngags kyi gzi brjid kyis rgyal po chen po spyan mi bzang dang gdon de rnams kyis kyang snying rje dang ldan zhing / sems can gyi don mdzad pa'o/ /de nas zhes bya ba ni/rgyal po chen po spyan mi bzang gi tshig gis de nas so/ /rgyal po chen po bzhi bla gos phrag pa gcig tu gzar nas pus mo g.yas pa'i lha nga sa la btsugs te/ thal mo sbyar nas zhes bya ba ni/ 'jigs su rung ba dur khrod bsil ba'i tshal gyi nang du yul 'khor srung dang /'phags skyes bo dang / spyan mi bzang dang / lus ngan po dang / rgyal po bzhi po dag gis bcom ldan 'das ga la ba der bcom ldan 'das la bskor nas/ bcom ldan 'das la zhu ba 'bul ba'o/ /bcom ldan 'das 'ba' zhig la phyag 'tshal zhing zhes bya ba ni/ rgyal po chen po bzhi po dag gis kyang / bskor ba lan gsum byas nas yang nas yang du phyag 'tshal ba'o/ /gros mthun pa dang / tshig mthun pa dang / skad mthun par bcom ldan 'das la 'di skad ces gsol to zhes bya ba ni/ rgyal po de dag gis dbyangs gcig tu byas nas/ bcom ldan 'das la zhu ba 'bul ba'o//btsun pa bcom ldan 'das zhes bya ba ni/ rgyal po chen po bzhis bcom ldan 'das la zhu ba 'bul ba'i tshig go/ /bsil ba'i tshal gyi mdo chen po 'di rgyal po chen po bzhis gsungs pa ste/ yang dag par rdzogs pa'i sangs rgyas rnams kyis gsungs pa/ de bzhin du 'das pa dang / ma 'ongs pa dang / da ltar byung ba shAkya thub pas gsungs te/ gzi brjid che zhing stobs che ba/ byams pa dang / snying rje dang / dga' ba dang / btang snyoms dang ldan pa/ thabs shes rab gnyis su med cing / 'khor ba bcom pa/ rgyal po chen po bzhi po dag gis kyang yi dam du bzung ba'o//'khor bzhi po rnams la yongs su khyab pa lags so zhes bya ba ni/ dge slong ngam/ dge slong ma'am/ dge bsnyen nam/ dge bsnyen ma'am/ gzhan yang lha dang / mi dang de na gnas pa'i sems can thams cad dang / rgyal po chen po bzhi dag gis kyang rig sngags kyi gzi brjid kyis/bsrung ba dang yongs su bskyab pa dang / yongs su gzung ba dang / yongs su zhi ba dang / mtshams gcad pa dang / dug gsad pa dang / dug zhi ba dang / chad pa gcod pa dang / bde legs su gyur cig ces bya ba'o/ /gnod sbyin dang srin po nas gnod pa bgyid pa'i bar du zlog par bgyid pa dang zhes bya ba ni/rig sngags kyi gzi brjid kyi mthus ma rungs pa'i 'byung po rnams dang / sngags dang phyag rgya dang / gzhan gyi sbod gtong gtang ba dang / rig pa dang / khrag khrug dang / dus ma yin par 'chi ba rnams bzlog pa'o//de yang rgyal po bzhis kyang rig sngags kyi gzi brjid kyis bzlog pa'o/ /'khor bzhi po rnams la srung ba dang zhes bya ba la sogs pa ni/ bde bar gnas shing yang dag pa'i ye shes thob ste/ gal te 'jig rten gyi khams su skye bar 'gyur na/ rig pa 'di dang ma bral zhing nam skye ba'i dus su dran par 'gyur zhing /bde ba phun sum tshogs par 'gyur ro/ /rgyal po chen po bzhi po dag gis kyang de bzhin du srung ba dang / skyob pa la sogs pa byed par 'gyur ro/ /de skad ces gsol ba dang zhes bya ba ni/ de dag ni rgyal po chen po bzhi po de dag gis smras pa'o//bcom ldan 'das kyis rgyal po chen po bzhi la 'di skad ces bka' stsal to zhes bya ba ni/ byams pa dang / snying rje dang / btang snyoms kyis khyab pa'i sems kyis sems can gyi don la rgyal po chen po bzhi la bka' stsal pa'o/ /kye rgyal po chen po dag /rig sngags kyi rgyal po chen po bzung zin no zhes bya ba ni/bcom ldan 'das kyis kyang rgyal po chen po byin gyis brlabs nas rig sngags 'dzin du bcug pa dang / dran par byed pa dang / rig sngags kyi tshig rgyal po chen po bzhi'i zhal nas smras par bgyid pa'o/ /bsil ba'i tshal gyi mdo chen po ngas yongs su bzung zin no zhes bya ba ni/bskal pa grangs med pa'i sngon rol du rig sngags kyi rgyal mo bsil ba'i tshal 'di dag thugs la bzung ste/ de bzhin du gsung dang skus kyang yin no/ /de bas na yongs su bzung ngo zhes bya ba'o/ /kye rgyal po chen po dag ces bya ba ni/bcom ldan 'das kyis rgyal po chen po bzhi la yang nas yang du bka' stsal ba'o/ /gzhan yang ngas kyang bsil ba'i tshal gyi mdo chen po rjes su yi rang ba'i zhes bya ba ni/ 'das pa'i sangs rgyas 'od srungs la sogs pa bsam gyis mi khyab pas rjes su yi rang zhing / 'di gsungs pa'o/ /de bzhin du ma 'ongs pa rnams kyang gsung bar 'gyur te/ de yang byams pa la sogs pa bsam gyis mi khyab pa'i sangs rgyas rnams kyis gsung bar 'gyur ba'o/ /da ltar bdag gis kyang rjes su yi rang zhing gsungs pa'o/ /rig sngags kyi rgyal mo chen mo brjod kyis de legs par rab tu nyon la yid la zung shing dang ngas brjod do zhes bya ba ni/gnyug ma'i rang bzhin gzhan gyi dri mas ma gos pa ste/ rang bzhin med cing rnam par dag pa/ srid pa dang / mya ngan las 'das pa med cing nam mkha' bzhin du khyab pa ste/de lta bu'i rig pa nyon mongs pa rnams kyis zung shig bcom ldan 'das kyis bshad do zhes bya'o/ /bcom ldan 'das de ltar 'tshal zhes bya ba ni/ gnyug ma'i rang bzhin/ stong pa nyid kyi don 'di rgyal po chen po bzhis kyang bzung nas/ 'khor ba na 'khyams nas yod pa nyon mongs pa rnams la ston par bgyid do zhes bya ba'o//rgyal po chen po bzhis bcom ldan 'das kyi bka' la mnyan to zhes bya ba ni/ rig sngags 'di'i cho ga ni ngo bo dang bral zhing rang bzhin med de/ de lta bu'i ye shes kyi tshig ni mnyan to zhes bya ba'o//rig sngags kyi rgyal mo bsil ba'i tshal gyi las kyi rigs lnga bshad pa'i gnas skabs te bdun pa'o// //de nas zhes bya ba ni rgyal po chen po bzhi la gtad pa'i de nas so/ /bcom ldan 'das kyi phyag rin po che g.yas pas na bza' chos gos phye nas 'byung po'i tshogs de dag la bka' stsal to zhes bya ba nas/rdo rje seng ge'i pad+ma chen po'i khri la rdo rje skyil krung du ting nge 'dzin gyi phyag rgya mdzad pa bshig nas/ skyabs sbyin gyi phyag rgya bstan pa'o/ /chos gos de phye ba'i rgyu mtshan ni/ ci'i phyir zhe na/ rig sngags kyi rgyal mo bsil ba'i tshal bcom ldan 'das kyis gsungs shing /'byung po rnams rlag par byed pa'o/ /de'i phyir na chos gos phye ba zhes bya ba'o/ /rin chen phyag gis skyabs sbyin bstan pa ni/ yid bzhin gyi nor bu rin po che bzhin du yod de/ de lta bu'i chos kyi nyams myong sems can thams cad sangs rgyas shing /sdig can bdud kyi rig sngags la mi 'jigs pa bstan pa'o/ /sor mo re re la yang 'od zer sna tshogs dang ldan pa 'od zer de yang ye shes lnga'i rang bzhin du yod de/ ye shes lnga ni phung po lnga ste/ phung po lnga ni rigs lnga/ rigs lnga ni khams lnga/ khams lnga po de yang stong pa nyid du bsam mo/ /de lta bu'i phyag rgya 'byung po rnams la ston pa'o/ /bsam gyis mi khyab pa'i rig sngags 'di bka' stsal pa'o/ /ngas 'di bstan par bya'o zhes bya ba ni/ rig sngags kyi rang bzhin gyi ye shes ngo bo nyid nas dag pa ste/ dngos po med pa'i rang bzhin brjod du med pa/ngag gis 'di yin zhes bya bar brjod par mi nus so/ /rig sngags kyi phyag rgya'i phyag rgya de ni rnam thos kyi bu la bstan te/ de yang rgyal po bzhi'i gtso bo nas yin no/ /thams cad la go bar bya'o zhes bya ba ni/ stong gsum gyi stong chen po'i 'jig rten gyi khams la sprul pa'i skus khyab ste/de lta bu'i sems can rnams kyis go bar byed pa'o/ /de nas zhes bya ba ni/ rgyas par bshad pa de nas so/ /bcom ldan 'das yang dag par rdzogs pa'i sangs rgyas kyis rig sngags 'di bka' stsal to zhes bya ba ni/ bcom ldan 'das kyi thugs ka nas hUM gi yi ge las 'od zer sna tshogs 'phros te/ 'od zer sna tshogs de yang 'gro ba rigs drug gi don byas te/ 'od sna tshogs de yang bcom ldan 'das kyi thugs ka'i hUM la thim mo/ /hUM de'i yi ges bcom ldan 'das kyi thugs ka nas rig sngags kyi rgyal mo bsil ba'i tshal rdo rje'i rigs su sna la 'phros pa'o//de'i thugs ka nas kyang hUM gi yi ge las 'od zer sna tshogs snang ba'o/ /rig sngags 'di ni zhal bzhi pa/ phyag bcu gnyis pa/ sku mdog nag mo khro mo'o/ /dbu skra ser po gyen du 'bar ba/ thod pa lnga yis dbu la brgyan pa/ dbu la rdo rje'i mtshan ma dang ldan pa/ spyan gsum pa/ zhal g.yas dmar po/ g.yon ljang gu/ rgyab dmar po'o/ /zhal bzhi yang mche ba gtsigs pa/ khro gnyer dang ldan pa/ rgyan thams cad ni sprul gyis brgyan pa/ phyag dang po'i g.yas g.yon gyis rdo rje snying gar 'dzin cing /g.yon gyis dril bu dkur brten zhing gnas pa'o/ /de'i 'og ma g.yas g.yon gnyis kyis chos kyi dbyings kyi phyag rgya dbu steng du mdzad pa'o/ /g.yas pa gsum na rdo rje/ bzhi pa na ral gri /lnga pa na 'khor lo/ /g.yon pa gsum na rin po che/bzhi pa na zhags pa/ lnga pa na lcags kyu de'i 'og ma g.yas g.yon gyis mda' gzhu 'gengs pa'o/ /thabs shes rab ngo bo nyid du bzhugs pa/ rdo rje sems dpa'i rang bzhin mi bskyod pas rgyas btab pa/ chos kyi dbyings kyi ye shes te/de yang sgyu ma lta bu me long lta bu'i ye shes kyis brgyan pa'o/ /de gnyis kyi rang bzhin gyi ye shes lnga rgyas btab pa'o/ /mtshon pa ni ye shes lnga yin te/ mtshon byed ni rig sngags kyi rgyal mo'o/ /phung po ni rnam par shes pa'i phung po'o/ /khams ni nam mkha'i khams/skye mched ni yid kyi skye mched/ zhabs phyed skyil du bzhugs shing / klu pho mo dang / gnod sbyin pho mo mnan pa/ pad+ma dang zla ba nyi ma'i gdan la bzhugs shing / bskal ba'i me ltar 'bar ba'i 'od dang ldan zhing / ma rig pa'i mun pa thams cad sreg pa'o//rig sngags kyi rdo rje'i snying po ni gang zhe na/ 'dir bstan pa ste/ gang gis bstan zhe na/ yang dag par rdzogs pa'i sangs rgyas shAkya thub pas bstan pa'o/ /de yang rdo rje'i snying po'o/ /hi lI hi lI b+hi sa ni la sogs pa'o/ /bcom ldan 'das kyis rig sngags kyi rgyal mo 'di bka' stsal pa na zhes bya ba ni/rig sngags kyi rgyal mo 'di'i gzi brjid dang stobs dang / dpa' bas 'di'i gsang sngags bshad ma thag tu sa g.yo ba dang / sgra chen po byung ba'o/ /sa ni kun du g.yos zhes bya ba ni/ rnam pa drug tu g.yos/ji bzhin du g.yos she na/ sa chen po 'di rnam pa drug tu g.yos/ rab tu g.yos/ kun du rab tu g.yos so/ /'gul rab tu 'gul/ kun du rab tu 'gul/ ldeg rab tu ldeg /kun du rab tu ldeg chem chem rab tu chem/ kun du rab tu chem chem/ 'ur 'ur rab tu 'ur/ kun du rab tu 'ur 'ur/shig shig rab tu shig shig /kun du rab tu shig shig ste/ ltas chen po bco brgyad byung ba'o/ /des na sa ni kun du g.yos zhes bya'o/ /rig sngags kyi gzi brjid kyis sa des kyang mi theg cing g.yos pa'o/ /'byung po thams cad ni rab tu 'dar nas zhes bya ba ni/skad kyang smra bar mi nus shing / lus kyang 'thoms nas ba spu yang gyen du log ste/ 'jigs par byas nas 'bros pa'i tshul du bstan to/ /kye ma kyi hud kye ma sdug bsngal sgra chen po byung ngo zhes bya ba ni/ 'byung po'i tshogs rnams kyang rab tu 'jigs nas 'byung po rnams rlag par byed do snyam nas skad chen po bton to//yang nas yang du skad ngan chen po bton to/ /srin po rnams kyis kyang 'di skad ces smras te zhes bya ba ni 'byung po dang bcas shing / bcom ldan 'das la zhu ba 'bul ba'o/ /'di ltar yang dag rdzogs sangs rgyas//sems can kun la thugs brtse ba/ /zhes bya ba ni/ rig sngags kyi rgyal mo'i lam nas kyang sangs rgyas te/ de bzhin du bskal pa grangs med pa'i sngon du tshogs bsags te/ tshogs bsags pa de yang sems can thams cad kyi don du bsngo ste/ mnyam pa nyid kyis sems can kyi don mdzad pa'o//'byung po kun 'jigs nyen pa yi/ /rig sngags 'di 'dra gsung bar mdzad/ /ces bya ba ni rig sngags kyi dmod mos ma rungs pa'i 'byung po rnams kyang bcom zhing thal bar rlog pa ste/ de lta bu'i gzi brjid che ba'i rig sngags ni sangs rgyas shAkya thub pa'i zhal nas gsungs pa'o/ / de nas kun mkhyen ston pa po/ /sems can kun la thugs brtse bas/ /zhes bya ba ni/ de nas ni mtshams sbyor ba'i de nas so/ /chos kyi phung po brgyad khri bzhi stong bstan te/ de yang sems can rigs mi gcig pas theg pa sna tshogs bstan pa ste/ 'khor ba'i sems can rnams la byams pa dang snying rjes khyab pa'o//gnod sbyin srin po dri za dang / /klu dang mkha' lding gsang ba pa/ /zhes bya ba ni/ sems can las kyi 'bras bu mi gcig pas/ 'byung po'i lus su gzhan la gnod pa'i sems dang ldan par skyes te/ de yang yi dags dang /byol song gi lus su skyes pa'o/ /'byung po rgyu ba gzi brjid 'phrog /grul bum yi dags srul po dang / /zhes bya ba ni/ rgyu ba dang sems can phrad par gyur na/ gti mug dang zhe sdang yod pas/ sems can rnams la gzi brjid 'phrog ste/ snying rje'i sems dang mi ldan pa'o//lha min gshed byed ro langs dang / /brjed byed dang ni mi 'am ci/ /zhes bya ba ni/ de rnams la bza' ba med cing skom pa'i sbyin pa ma btang zhing khro ba ste/ la la yang mchod rdzas la sogs pa za bar yod pa ni sbyin pa gtong zhing khro bar byas pa'o//skems byed dang ni rims drag dang / /de bzhin bram ze srin po dang / /zhes bya ba ni/ gzhan la grags pa 'dod pas/ sems can gyi srog gcod cing / sbyin pa zad pa med pa btang ste/ de'i 'bras bus kyang srin po la sogs par skye zhing snying rje med pa'o//smyo byed rims nad zhag gsum pa/ /de bzhin zhag ni bzhi pa rnams/ /zhes bya ba ni/ 'byung po dang / 'byung po ma yin pa/ rims de dag kyang rig sngags kyis 'joms shing 'byung po de rnams kyang rig sngags kyi dmod mos 'joms pa ste/ gzhan yang nad rlung dang /bad kan dang / mkhris pa las gyur pa bzhi brgya brgyad cu rtsa bzhi yang 'joms pa'o/ /skrag cing rab tu 'dar gyur te/ /phyogs bcur rgyug pa gzigs nas kyang / /zhes bya ba ni/ 'byung po'i tshogs rnams kyang rig sngags kyi gzi brjid mthong bas 'jigs shing skrag pa ste/phyogs bzhi nas kyang 'bros par 'gyur ro/ /de dag la ni thugs brtse'i phyir/ /rig sngags 'di ni rjod par mdzad/ /ces bya ba ni/ de dag kyang las kyi 'bras bus skyes te/ de yang sangs rgyas thugs rje'i sems kyis sems can la 'bros par 'gyur ro//de dag kyang las kyi 'bras bus skyes te/ de yang sangs rgyas thugs rje'i sems kyis sems can la mnyam pa nyid du khyab ste/ de yang rig sngags kyi ngo bo ni/ thabs dang shes rab gnyis su med pa ste/ ye shes kyi rang bzhin chos kyi dbyings kyi ye shes so//thabs kyi ngo bo nyid ni de bzhin gshegs pa'i rigs te/ phung po ni gzugs kyi phung po'o/ /khams ni sa'i khams te/ skye mched ni mig gi skye mched do/ /ye shes lnga dang ldan zhing / sangs rgyas lnga'i dbu rgyan can/ spyan gsum pa/ rgyan thams cad kyis brgyan pa'o//zhal bzhi pa/ phyag brgyad pa/ sku mdog dkar mo zhal g.yas mthing ga /g.yon ljang gu /rgyab dmar pa'o/ /dbu la 'khor los brgyan pa'o/ /zhi ba'i gzugs can ma'o/ /phyag g.yas dang po na/ snying gar rdo rje brten zhing / g.yon dril bu dku la brten pa'o//de'i 'og ma g.yas pa gsum na ral gri dang / 'khor lo dang / dgra sta'o/ /de bzhin du g.yon pa gsum na/ zhags pa dang / rtse gsum dang / dung bsnams pa'o/ /zhabs rdo rje'i skyil krung du bzhugs shing / pad+ma dang zla ba'i gdan la nyi ma'i 'od dang ldan pa'o//rig sngags bsil ba'i tshal de bzhin gshegs pa'i rigs kyi ngo bo yin no/ /de bzhin gshegs pa'i snying po ni gang zhe na/ 'di lta ste/ rig sngags dang gsang sngags kyi tshig go/ /hi ri ma kha/ ti ri kha kha ka Ta ma TA la sogs pa'o//gsang sngags chen mo'i rig sngags chen mo 'di las 'gal bar ma byed cig ces bya ba ni/ 'byung po la sogs pa rnams kyis kyang rig sngags las 'gal bar byed par gyur na tshe 'di la yang sdug bsngal drag po thob cing / phyi ma la yang dmyal bar skye bar 'gyur ro//bcom ldan 'das kyi gsung gi chos la yang dag par rtogs shig ces bya ba ni sangs rgyas kyi bka' la mi bden pa mi mnga' ste/ de bzhin du rig sngags kyi gzi brjid kyang bsam gyis mi khyab pa'o/ /khyed kun lus zhig ste zhes bya ba ni/ yang dag par rdzogs pa'i sangs rgyas kyi bka' las 'das shing /rig sngags la smra bar gyur na/ mgo bo dang lus tshal ba brgyar 'gas shing / ardza ka'i many+dza ra bzhin du 'gas te/ tshe 'di la yang nad kyi sdug bsngal chen po theb par 'gyur ro/ /shi ba'i 'og tu ngan song ngan 'gro log par ltung ba sems can dmyal ba rnams su skye zhing 'khor bar 'gro ba re zhes bya ba ni/sangs rgyas dang rig sngags kyi bka' las 'das pa'i 'byung po rnams ni/ shi 'phos ma thag tu mda' 'phangs pa bzhin du mnar mes sreg ste/ gal te dmyal ba de nas 'phos na yang dmyal ba gzhan du yang nas yang du skye bar 'gyur ro zhes bya ba ni/rgyas par bshad pa'i de nas so/ /rgyal po chen po bzhis/ bcom ldan 'das kyi rig sngags kyi rgyal mo sngon ma thos pa 'di thos nas zhes bya ba ni gzhan gyis mi thub pa 'khor ba'i sdug bsngal thams cad bcom pa/stong pa nyid kyi rang bzhin/ thabs la mkhas pa/ 'byung po thams cad kyi gnyen po'o/ /sangs rgyas dang byang chub sems dpa' thams cad kyi yum/ sems can rnams la khyad par 'phags pa 'di thos pa'o/ /skrag cing sdangs te/ mi dga' la skyi bung zhes byed nas/thal mo sbyar te zhes bya ba ni/ rig sngags kyi dmod mos rgyal po chen po bzhi yang mdog shor zhing ba sbu rnams kyang gyen du log ste/ bcom ldan 'das kyi spyan sngar dad pa skyes nas thal mo sbyar ba'o/ /bcom ldan 'das la phyag 'tshal zhing gros mthun pa dang tshig mthun pa dang zhes bya ba ni rgyal po chen po de rnams kyis kyang /bcom ldan 'das kyi spyan sngar phyag 'tshal zhes bya ba'o/ /skad mthun par bcom ldan 'das la 'di skad ces gsol to zhes bya ba ni dbyangs gcig tu byas nas/ bcom ldan 'das la zhu ba 'bul ba'o/ /sdang ba'i 'byung po zad bgyid pa//rig sngags 'di ni legs par gsungs/ /zhes bya ba ni/ sdig can bdud kyi rigs/ sems can rnams la gnod par byed pa rnams/ rig sngags kyi dmod mos rlag par byed pa'o/ /dngos po med cing yang dag par rdzogs pa'i sangs rgyas kyis gsungs pa/'khor ba'i sdug bsngal thams cad dang bral bar byed pa'o/ /mi yi 'jig rten bde bgyid pa'i/ /rig sngags bdag cag brjod par 'tshal/ /zhes bya ba ni/ rig sngags 'di 'chang ba rnams bsrung ba dang / sba ba dang / bskyab pa dang / zhi ba dang / bde legs su 'gyur zhing /sdug bsngal thams cad dang bral bar byed pa'o/ /de la rig sngags 'di lags te/ /'jig rten mgon po bdag la gson/ /zhes bya ba ni/ sha za dang / yi dags dang / gnod sbyin gyi gdon 'byung po rnams kyis mi tshugs shing / ngo bo nyid dang bral zhing mi dmigs pa'o//'jig rten dbang phyug gis kyang / rig sngags legs par gsungs shing legs par nyon cig ces gsungs pa'o/ /yang dag par rdzogs pa'i sangs rgyas kyi byin gyi rlabs kyis/ rgyal po chen po bzhis bsrungs te/ rig sngags kyi ngo bo ni gang zhe na/ thabs dang shes rab ma bral ba'o//mtshon pa ni mnyam pa nyid kyi ye shes te/ mtshon byed ni rig sngags bsil ba'i tshal lo/ /rigs ni rin po che'i rigs te/ phung po ni tshor ba'o/ /khams ni chu'i khams te/ skye mched ni sna'i skye mched do/ /ye shes lnga'i rang bzhin sangs rgyas lnga'i dbu rgyan can/spyan gsum pa/ rgyan thams cad kyis brgyan pa'o/ /zhal bzhi pa/ g.yas dkar po/ g.yon mthing ga /rgyab dmar po'o/ /phyag brgyad pa/ sku mdog ser mo/ phyag g.yas pa na rdo rje 'dzin pa/ g.yon pa dril bu dkur brten pa/ phyag g.yas pa gnyis pa dang /gsum pa dang / bzhi pa rnams ni ral gri dang / rin po che dang / mda' bsnams pa'o/ /g.yon pa gnyis pa dang / gsum pa dang / bzhi pa rnams na zhags pa dang / 'khor lo dang / gzhu bsnams pa'o/ /zhabs rdo rje'i skyil krung du bzhugs shing /pad+ma dang zla ba'i gdan la bzhugs shing / nyi ma'i 'od dang ldan pa ste/ lo bcu gnyis pa'i tshul du bzhugs shing / sgeg pa'i tshul dang ldan pa'o/ /rig sngags dang gsang sngags gzhan gyis mi thub pa ni/ gang zhe na/ 'di lta ste/ u hu ha la ku li dzi pa la sogs pa'o//bcom ldan 'das 'byung po thams cad bzlog pa 'di gzung bar gsol zhes bya ba ni/ sngags dang / sbod gtong dang / gzhan gyi rig pa dang / ma rungs par byed pa'i 'byung po rnams/ rig sngags kyi gzi brjid dang / stobs kyis zlog par byed pa'o//rig sngags kyi ngo bo 'di yang stong pa nyid yin te/ thabs dang shes rab gnyis su med pa'o/ /shes rab kyi ngo bo ni so sor rtog pa'i ye shes yin te/ thabs kyi ngo bo ni rig sngags nyid do/ /de yang thabs dang shes rab gnyis su med cing / mtshon pa dang mtshon byed kyang gnyis su med do//rig sngags de'i rigs ni pad+ma'i rigs te/ phung po ni 'du shes kyi phung po'o/ /khams ni me'i khams te/ skye mched ni lce'i skye mched do/ /ye shes lnga'i ngo bo nyid ni rigs lnga'i dbu rgyan can/ spyan gsum pa/ rgyan thams cad kyis brgyan pa/zhal bzhi pa/ phyag brgyad pa/ sku mdog dmar mo/ /phyag g.yas pa dang pos rdo rje snying gar brten pa/ g.yon pa dang pos dril bu dkur brten pa'o/ /g.yas gnyis pa na ral gri/ gsum pa na pad+ma/ g.yon gnyis pa na dgra sta dang / gsum pa na rtse gsum mo//de'i 'og ma g.yas g.yon gnyis kyis mda' gzhu 'gengs pa'o/ /zhabs rdo rje skyil krung du bzhugs shing / pad+ma dang zla ba'i gdan la bzhugs shing / nyi ma'i 'od zer dang ldan te/ zhal g.yas dkar po/ /g.yon mthing ga /rgyab ser po/ /bzhad pa'i tshul du bzhugs pa'o//rig sngags kyi gsang sngags pad+ma'i snying po gang zhe na/ 'di lta ste/ i li i li la sogs pa'o/ /rig sngags kyi rgyal mo 'di ni lo gcig gi bar du mtshams gcod pa dang zhes bya ba ni/ lo gcig gi sngon du yang srung ba byed par 'gyur/ /srung ba dang / sba ba dang / bskyab pa dang / mtshams gcod pa dang / dug zhi ba dang / dug gsad pa dang / zhi ba dang bde legs su 'gyur zhing / rig sngags kyis yongs su bskyab par 'gyur ro/ /'byung po thams cad bzlog pa dang / don thams cad sgrub pa lags so zhes bya ba ni/ de bzhin du byas par gyur na/ sdig can gyi rigs ma rungs pa'i gdon thams cad kyang mi 'ong ste/ gal te 'ong bar gyur na/ rig sngags kyi dmod mos brlag par 'gyur ro/ /bya ba thams cad grub cing bde bar gnas pa'o/ /de nas zhes bya ba ni/ bar du gcod pa'i de nas so//gnod sbyin dang / srin po dang / dri za nas gnod par byed pa'i bar rnams kyis zhes bya ba ni/ de dang de ma slebs pa'i mtshams su 'byung po de rnams kyis kyang bar du gcod par byas te/ rig sngags 'di byung ba tsam gyis kyang / bar du gcod par mi nus pa'o//bcom ldan 'das kyi rig sngags kyi rgyal mo chen mo sngon ma thos pa 'di yang thos zhes bya ba ni/ sangs rgyas kyi ye shes 'dis chad pa thams cad 'joms par byed pa/ nor bu rin po che lta bu bcom ldan 'das kyis gsungs pa'o/ /rgyal po chen po bzhi'i srung ba/ sngon ma thos pa 'di yang thos nas/skrag cing dngangs la mi dga' ste zhes bya ba ni/ khyad par du 'phags shing sems can gyi don mdzad pa ste/ de bzhin du rgyal po chen po bzhi po dag kyang yin te/ ma rungs pa rnams la 'jigs par byed pa ngan song gsum nas 'byin pa'i gzugs 'di yang dag pa'o//skyi bung zhes byed nas sa la 'dzul/ kun du 'dzul/ kun du rab tu 'dzul bar byed do zhes bya ba ni/ rig sngags kyi gzi brjid dang / dmod mos sdig can gyi rigs 'byung po rnams/ de yang rig sngags kyi gzi brjid mthong bas ma tshugs par skad ngan grag ste/de rnams kyang sa la 'dzul zhing bying bar 'gyur ro/ /mthong bar mi gnas shing so so rang rang bros so/ /de nas zhes bya ba ni 'byung po rnams 'jigs pa'i de nas so/ /bcom ldan 'das kyi sa gzhi rdo rjer sprul nas zhes bya ba ni/ sdig can bdud kyi rigs de rnams rdzu 'phrul sa la 'dzul du mi ster zhing /rig sngags kyi gzi brjid kyis byin gyis brlabs nas/ rdo rje'i sa gzhir snang ba'o/ /de dag phyogs bzhir rgyug go zhes bya ba ni/ sdig can 'byung po bdud kyi rigs de rnams ni/ sa la 'dzul ma nus shing phyogs phyogs su bros te hag zad do/ / de nas zhes bya ba ni 'byung po rnams bros pa'i de nas so/ /rgyal po chen po bzhis phyogs bzhir me lce'i phung po mngon par sprul to zhes bya ba ni/ rig sngags kyi rgyal mo'i gzi brjid kyis/ rgyal po chen po bzhi po rnams kyis kyang / phyogs mtshams thams cad du me sna tshogs sprul zhing /sdig can de rnams 'gror mi ster ba'o/ /de nas zhes bya ba ni/ tshig sbrel ba'i de nas so/ /de dag nam mkha' la rgyug go zhes bya ba ni/ sdig can rnams rdzu 'phrul gyis nam mkha' la rgyug ste/ phyogs mtshams bzhi la 'dzul ba med cing nam mkha' la rgyug pa'o//de nas zhes bya ba ni/ nam mkha' la bros pa'i de nas so/ /bcom ldan 'das kyis nam mkha' gser du sprul to zhes bya ba ni/ nam mkha'i phyogs na rdo rje'i gser gyi sa gzhir byin gyis brlabs te/ sdig can de rnams kyang 'gro dbang med cing rdugs pa'o//de nas zhes bya ba ni/ rdugs pa'i de nas so/ /'jig rten skyong ba rgyal po chen po rnam thos kyi bu lta bu dang / dri zas bskor zhing mdun du bdar te/ steng gi bar snang la 'phags nas zhes bya ba ni/ sems can la gnod par byed pa'i sems dang ldan pa/ sdig pa'i sems dang ldan pa/ sdang ba'i sems dang ldan pa/ drag shul gyi sems dang ldan pa/ gzhan la srog 'phrog pa'i sems dang ldan pa sha stag /sdig can gyi 'byung po de rnams 'gro sa mi rnyed cing mar log nas rgyal po chen po rnam thos kyi bu la skyab tshol ba'o/ / gnod sbyin dang srin po nas gnod pa byed pa'i bar rnams gzhom pa dang zhes bya ba ni/ dpa' zhing gzi brjid che ba ste/ stobs dang ldan zhing sdig can bdud kyi rigs/ rig sngags kyi dmod mos 'joms pa'o/ /sems can thams cad la snying brtse ba dang / 'byung po thams cad bzlog pa dang zhes bya ba ni/'jig rten gyi khams su sems can gyi don du byams pa dang / snying rje dang btang snyoms kyis khyab ste/ de lta bu'i thugs rjes khyab nas/ byad dang / ro langs dang / dug dang / dug sbyor dang / dug 'thung ba dang / gzhan gyi rig pa dang / sngags dang /sbod gtong dang / 'jig rten gyi ma mo dang / ngan sngags sbyor ba dang / sdig can bdud kyi rigs de rnams la sogs pa rig sngags kyi gzi brjid 'joms pa'o/ /'khor bzhi po rnams bsrung ba dang zhes bya ba la sogs pa ni/ de bzhin du bdud kyi rigs 'byung po la sogs pa bcom zhing /bar chod med cing bde bar gnas te/ 'khor ba'i sdug bsngal thams cad dang bral bar byed do/ /rig sngags 'di brjod do zhes bya ba ni/ rig sngags kyi rang bzhin gzhan gyis ma bcos par gnyug ma ste/ phyogs dang bral zhing rang bzhin med pa de lta bu'i ye shes brjod pa'o//de yang rig sngags kyi rgyal mo las kyi rigs ni las thams cad rdzogs par byed pa/ las kyi gdon thams cad 'joms pa/ las thams cad grub pa/ sna tshogs kyi rigs su snang ba'o/ /de yang rig sngags kyi mtshon pa ni bya ba nan tan gyi ye shes so//mtshon byed ni rig sngags kyi bdag nyid do/ /phung po ni 'du shes kyi phung po'o/ /khams ni rlung gi khams so/ /skye mched ni lus kyi skye mched do/ /ye shes lnga'i ngo bo nyid sangs rgyas lnga'i dbu rgyan can/ spyan gsum pa/ zhal bzhi pa/ phyag brgyad pa/sku mdog ljang nag /zhal g.yas dkar po/ g.yon dmar po/ rgyab ser po/ phyag g.yas dang po na rdo rje gdengs pa/ gnyis pa na ral gri/ /gsum pa rdo rje rgya gram mo/ /g.yon dang po na dril bu/ gnyis pa na zhags pa/ gsum pa na 'khor lo'o/ / 'og ma'i phyag g.yas g.yon gnyis kyis mda' gzhu 'gengs shing / zhabs g.yas pa pus mo btsugs pa/ g.yon brkyang ba/ bdud bzhi'i rang bzhin 'byung po rnams mnan pa'o/ /pad+ma'i steng na nyi ma'i gdan la nyi ma'i 'od dang ldan pa'o/ /yan lag thams cad sbrul gyis brgyan pa/khro bo 'jigs su rung ba'i gzugs so/ /rig sngags kyi gsang sngags las kyi snying pos ni/ las thams cad 'grub cing bdud thams cad 'dul ba ste/ sems can thams cad rab tu zhi bar byed pa'o/ /gsang sngags kyi tshig ni 'di lta ste/gi ma gi ma la sogs pa'o/ /rgyal po chen po rnam thos kyi bu phyogs skyong bar gyur cig ces bya ba ni/ sangs rgyas kyi bka' dang / rig sngags kyi byin gyi rlabs kyis gang zag rig sngags la gus pa dang / sems can thams cad dang / de la srung ba dang /skyob par byed cing / rig sngags kyi chos kyi bstan pa bsrung ba'o/ /lha rnams kyi nang na lha'i rgyal po nor lha'i bu zhes bgyi ba mchis te zhes bya ba ni/ sems can thams cad kyi don mdzad pa/ nor thams cad gzhan gyi don du byin pa/ sems can thams cad kyi don byed pa ste/de lta bu'i sems dang ldan pa/ nor lha lta bu 'byung ba'o/ /de la bdag phyag 'tshal lo zhes bya ba ni/ de lta bu'i byang chub sems dpa' la rgyal po rnams dang / 'byung po rnams kyis phyag 'tshal ba'o/ /de yang bcom ldan 'das nyid la phyag 'tshal te zhes bya ba ni/bdud rnams las rnam par rgyal zhing dgra rnams kyang ma lus te/ phun sum tshogs pa dang ldan zhing sangs rgyas pa ste/ de lta bu'i bcom ldan 'das la/ bdag cag rnams kyis phyag 'tshal ba'o/ /rdzogs pa'i sangs rgyas dpa' bo ste//kun mkhyen kun gzigs khyod la 'dud/ /ces bya ba ni/ nyon mongs pa thams cad bcom zhing dpa' ba ste/ sku gsung thugs rdzogs par byas pas na rdzogs pa ste/ dug gsum dang bral zhing / sangs rgyas pa'o/ /de lta bu'i sangs rgyas la 'dud ces bya ba'o//rdzogs pa'i sangs rgyas rkang gnyis mchog /shes rab chen po khyod la 'dud/ /ces bya ba ni sngon bskal ba grangs med pa'i dus su tshogs rdzogs te/ da ltar ma lus par sems can thams cad rdzogs par 'dod nas/ theg pa sna tshogs dang / thabs sna tshogs bstan pa ste/ rkang gnyis kyi tshogs kyi dam pa/ phyi nang gi tshogs la mkhas pa/ thams cad mkhyen zhing thams cad la byams pas khyab pa'o/ /de lta bu'i thub pa chen po la 'dud pa'o/ /gau tam khyod kyis gang mkhyen pa/ /de ni lha rnams ma 'tshal to/ /zhes bya ba ni/yang dag pa'i ye shes ni rgya mtsho lta bu ste/ sangs rgyas kyi yon tan yang de bzhin no/ /de lta bu'i ye shes shes pa ni lta ci smos te/ rang nyid kyis rang gi rig pa yang mi shes pa'o/ /rang gi rig pa ci'i phyir ma shes na/ rang la skyes pa'i ma rig pas ma shes pa'o/ /yang dag dpa' bo khyod la 'dud//chos bzhin mthun par lta zhing mchis/ /zhes bya ba ni/ yang dag par bdud bzhi bcom ste/ de 'dul bas na dpa' bo ste/ de lta bu'i ye shes dang ldan pa la yang dag par 'dud de/ bdag cag kyang snying rje dang ldan zhing mchis pa'o zhes bya ba'o/ /gnod sbyin dang /srin po dang / dri za nas gnod par byed pa'i bar rnams ming 'di zhes bya ba'i lus la babs pa las gud du dengs shig ces bya ba ni/ ma rungs pa'i sdig can 'byung po rnams ni/ gang zag rig sngags 'chang ba dang / sems can rnams la gnod pa byas nas/ rig sngags kyi dmod mos mgo bo ardza ka'i many+dza ra'i rdog pa bzhin du tshal par 'gas pa'o/ /gal te ming 'di zhes bya ba'i lus la myur du ma dong na zhes bya ba ni/ rig pa mi 'chang ba'i gang du/ sdig pa can ma rungs pa rnams kyis gzung bar gyur na/ de nas sangs rgyas rnams kyis gsungs pa bzhin du rig pa 'chang ste/de'i chos bzhin du gang zag dang sems can la bsrung bar bya ste/ myur du ma thon na nyes pa chen por 'gyur ro/ /de dag la myur du 'jigs pa chen po dang / nad drag pos 'debs par 'gyur la zhes bya ba ni/ rig sngags kyi bka' las 'das pa sdig can gtum po'i rigs 'byung po rnams ni nad drag po mdze dang /phol mig dang / 'bras dang / lhog pa dang / sha bkra dang / me dpal dang / chu sbur dang / 'brum bu dang / lus thams cad rul zhing g.yan pa la sogs pa'i nad kyis thebs shing srog dang 'bral te/shi 'phos nas kyang mnar med du skye ba med pa'o/ /de'i rkyen gyis mgo dang snying tshal pa brgyar 'gas par 'gyur ro zhes bya ba ni/ gang zag ji bzhin du gnod par byed bzhin te sdig can de yang sdug bsngal drag po ste/ nad chen pos btab pa'o//de'i mod la sdug bsngal bu ma byung ba dang brlag pa dang / mtha' med par 'gyur ro zhes bya ba ni/ rig sngags kyi dmod mos sdug bsngal drag po 'byung ste/ gar yang 'gros med cing lcang lo can gyi pho brang yang mi thob ste/ de'i lus kyang zhig cing rul bar 'gyur ro//'brum bu'i gdon gang yin pa dang / skya rengs 'char ka'i gdon gang yin pa dang / grib gnon gyi gdon gang yin pa de dag kyang bsil ba'i tshal gyi mdo chen po 'di thos nas zhes bya ba ni/ 'di 'don pa dang sgom pa dang yid la byed pa dang gdams ngag byin pa dang /bshad pa dang / rjes su yi rang zhing 'chang ba ste/ de dag la gnod par 'gyur na/ rig sngags kyi bka' las 'das pa'o/ /yang na rig sngags 'di mnyan nas/ sems can la 'tshe bar mi bya'o/ /ming 'di zhes bya ba'i lus las myur du gud du dengs shig ces bya ba ni/gnod par byed pa de rnams gang zag dang sems can thams cad kyi don la myur du thon cig ces bya'o/ /yang na rig sngags kyi dmod mos sdug bsngal myur du thob po zhes bya'o/ /gal te myur du ma dong na 'jigs pa chen po dang / nad drag pos 'debs par 'gyur la zhes bya ba ni/rig sngags kyi bka' las 'das shing ma btang bar gyur na/ rgyal po chen po bzhi'i chad pa'i 'jigs pa dang / g.yan pa'i nad la sogs pas myur du thebs par 'gyur ro/ /de'i rkyen gyis mgo bo dang snying tshal pa brgyar 'gas par 'gyur zhes bya ba ni/yang dag par rdzogs pa'i sangs rgyas kyi bka' dang / rig sngags kyi dmod mos ardza ka'i mardza ri'i dogs pa bzhin du 'gas pa'o/ /de'i mod la sdug bsngal du ma 'byung ba dang / brlag pa dang mtha' med par 'gyur ro zhes bya ba ni/ de bzhin du rig sngags kyis kyang dmod mos 'gros mi rnyed cing /de'i rnam par smin pas sdug bsngal drag po thob ste/ shi nas kyang mnar med kyi mes bsreg cing / dmyal ba nas dmyal bar 'khor bar 'gyur ro/ /gzi byin dang ni khrag za ba/ /nyin mtshan rgyu ba gang yin pa/ /zhes bya ba ni/zas su khrag za ba dang sha za ba la sogs pa rnams kyis kyang gzi brjid 'phrog pa dang / sems can la 'tshe bar byed pa dang / nyin mo dang mtshan mo la sogs pa rgyu zhing ma byed cig ces bya'o/ /de dag gis kyang legs gsungs pa'i/ /mdo bshad thos nas spang bar gyis//zhes bya ba ni/ yang dag par rdzogs pa'i sangs rgyas rnams kyis/ rig sngags 'di yang yang dag par gsungs te/ de bzhin du rgyal po chen po bzhi po rnams kyis kyang / rjes su yi rang zhing srung ba ste/ de bzhin du khyad par du 'phags pa'i mdo 'di thos par gyur nas/sems can la gnod par byed pas sdug bsngal dpag tu med pa thob pa'o/ /de bas na spang bar gyis zhes bya ba'o/ /sha za lus 'phags skem byed dang / /'byung po 'jigs byed srul po rnams/ /zhes bya ba ni/ 'byung po de rnams kyis kyang sems can la gnod par byas te/de yang dam la btags nas gnod par byed pa spangs pa'o/ /de dag gis kyang legs gsungs pa'i/ /mdo 'di bshad pa thos nas mthong / /zhes bya ba ni 'das pa dang ma 'ongs pa dang / da ltar byung ba'i sangs rgyas rnams kyis kyang gsungs te/ de bzhin rgyal po bzhi po rnams kyis kyang dam tshig bsrung ste/rig sngags kyi gzi brjid kyis sdig can 'byung po de rnams kyis kyang gzhan la 'tshe ba spangs pa'o/ /lha dang lha min rlung lha dang / /dri za dang ni gdon gyi bla/ /zhes bya ba ni/ zhe sdang dang / gti mug gis sems can thams cad la gnod par byas te/ de yang rig sngags kyi gzi brjid dam pa thob pa'o/ /'byung po dang ni sha za dang / /de bzhin gnod sbyin srin po rnams/ /zhes bya ba ni/ ser sna dang / zhe sdang dang / 'dod chags kyi sems can rnams la 'tshe bar byas te/ de yang rig sngags kyi dmod mo'i 'jigs pas gnod mi nus pa'o//kun du 'khrugs shing kun du g.yos/ /skrag cing kun du rab tu 'gul/ /zhes bya ba ni rig sngags 'di'i gzi brjid dang / stobs kyis sa lan drug tu g.yos te/ de bzhin du ltas chen po bco brgyad byung ba'o/ /kun du 'khrugs shing kun du g.yos pa ni shar dma' ste/nub mtho ba'o/ /nub dma' na shar mtho ba'o/ /phyogs phyogs rnams kyang de bzhin no/ /mgo 'khrugs shing phyogs rnams gtor ba'o/ /de bas kyang skrag cing kun du 'gul ba ste/ yun ring zhing drag pa'o/ /gdon dang gnod pa byed pa rnams/ /lhung zhing rab tu pham par 'gyur//zhes bya ba ni/ sdig can bdud kyi rigs kyi 'byung po rnams ni/ sems can la gnod par byed bas rang pham ste/ sdug bsngal chen po thob cing rig sngags kyi dmod mos 'joms pa'o/ /sa gzhi dag kyang rab tu g.yos/ /sgra bo che yang sgrogs par byed/ /ces bya ba ni/rig sngags kyi gzi brjid kyis/ stong gsum gyi stong chen po'i 'jig rten gyi khams sa g.yo zhing 'byung po rnams skrag par byed de/ sa de yang rnga bo che dang cha lang dang dril bu'i skad 'byung ngo / /kun du rab tu 'byung ngo zhes bya'o/ /yi dags dang ni grul bum rnams//sdang ba'i gdon ni zlog byed pa'o/ /zhes bya ba ni/ 'byung po de rnams kyang sems can drag pos gnod par byas te/ gzhan gang gis kyang mi thub cing de'i gnyen po lta bu rig sngags kyi rgyal mo yin te/ mdo 'di dag ni thos gyur na/ /'jigs pa drag po 'bebs par 'gyur//zhes bya ba ni/ gnod byed sdang ba'i sems dang ldan pa dang sdig pa'i sems dang ldan pa dang / sems can gyi srog 'dod pa rnams/ rig sngags kyi rgyal mo bsil ba'i tshal 'dis rlag par byed pa'o/ /sangs rgyas chos dang dge 'dun la//dad pa'i gnod sbyin gang yin pa/ /zhes bya ba ni/ 'byung po byang chub sems dpa'i rigs yod de/ yang dag par rdzogs pa'i sangs rgyas shAkya thub pa dang / chos dang dge 'dun la dga' zhing 'jig rten gyi khams rnams skyong bar byed de/ sangs rgyas kyi bstan pa bsrung zhing sems can rnams kyi don byed pa'o//rig sngags kyi rgyal mo bsil ba'i tshal 'di la rjes su yi rang zhing rig sngags kyi bka' las mi 'da' ba'o/ /de dag mgu zhing yid dga' nas/ /legs par rjes su yi rang ngo / /zhes bya ba ni/ byang chub sems dpa'i rigs 'byung de rnams kyang rig sngags kyi rgyal mo bsil ba'i tshal gyi chos la dga' zhing snga nas kyang chos la dad pa yod do//de ltar dad pa kun du rab tu skyes nas/ dga' bas rab tu dga' ste/ chos la mchod pa legs par mchod nas/ /de rnams kyis rjes su yi rang ngo zhes bya ba ni/rig sngags kyi rgyal mo bsil ba'i tshal gyi 'byung po dam la btags pa'i gnas skabs te brgyad pa'o// //de nas zhes bya ba ni/ 'byung po dam la btags pa'i de nas so/ /rgyal po chen po bzhi bar snang las babs nas zhes bya ba ni/ rgyal po chen po de yang chos la rab tu dga' ste/bcom ldan 'das la snga nas kyang dad pa skyes te/ da ltar yang rab tu skyes nas bcom ldan 'das kyi spyan sngar phyin pa'o/ /bcom ldan 'das ga la ba der dong ste/ lhags nas zhes bya ba ni/ so so rang gi 'od zer yang 'phags te/ bsil ba tshal gyi chos 'di la dad pa yang nas yang du skyes te/ de bzhin du bcom ldan 'das la yang de bzhin no/ /de bas na rgyal po chen po bzhis kyang legs lhags pa zhes bya ba'o/ /bcom ldan 'das kyi zhabs la mgo bos phyag 'tshal te zhes bya ba ni/ rgyal po chen po bzhi rab tu dga' nas zhabs kyi pad+ma la gus pas phyag 'tshal ba'o//thal mo sbyar nas bcom ldan 'das la phyag 'tshal zhing zhes bya ba ni/ rgyal po chen po bzhis bcom ldan 'das kyi spyan sngar pus mo g.yas pa'i lha nga sa la btsugs te/ de nas bcom ldan 'das la thal mo sbyar ba'o//gros mthun pa dang / tshig mthun pa dang / skad mthun par bcom ldan 'das la 'di skad ces gsol to zhes bya ba ni dbyangs gcig tu byas shing / rgyal po chen po rnams kyis kyang rig sngags kyi chos la gus pa'i sems kyis bcom ldan 'das la zhu ba 'bul ba'o//btsun pa bcom ldan 'das bsil ba'i tshal gyi mdo chen po 'di ni zhes bya ba ni srung ba dang / skyob pa dang / sbed pa dang / sems can thams cad la rig sngags kyi gsang sngags kyis khyab ste/ sdang ba'i sems zhi bar byed pa 'khor ba rnams bcom zhing yang dag pa'i ye shes kyi lam bstan pa'o//rgyal po chen po bzhis zhabs la phyag bgyi ba dang zhes bgyi ba ni gus par bya ba phyag 'tshal te/ rgyal po chen po bzhis kyang rang bsrung zhing / ngag gis 'don pa dang / yid kyis bzung ba dang /lus kyis bcang bar byas te/ rig sngags 'di yang btags nas kyang / ngan song gsum du mi 'gro zhing byang chub kyi lam bstan pa'o/ /'khor bzhi po rnams la bsrung ba dang zhes bya ba ni/ dge slong ngam/ dge slong ma'am/ dge bsnyen nam/ dge bsnyen ma la sogs pa'i sems can rnams kyang bsrung ba'i dam pa'o//yongs su skyob pa dang zhes bya ba ni/ gzhan las kyang khyad par du 'phags te/ zhi ba dang bde legs su 'gyur zhing sdug bsngal thams cad dang bral ba'o/ /gnod sbyin dang srin po nas gnod par bgyid pa'i bar rnams 'joms pa lags so zhes bya ba ni/ma rungs pa bdud kyi rigs rnams kyi 'byung po de yang 'joms shing rig sngags dang / gsang sngags kyi dmod mos rlag par byed pa'o/ /btsun pa bcom ldan 'das zhes bya ba ni/ rgyal po chen po bzhi dag gis kyang bcom ldan 'das la rig sngags 'di 'dri bar byed pa ste/de yang 'khor bzhi la rtag tu srung bar byed pa'o/ /dge slong dang / dge slong ma dang / dge bsnyen nam/ dge bsnyen ma de dag gis kyang zhes bya ba ni/ bcom ldan 'das la rtag tu 'khor ba'i 'khor bzhi yin te/rig sngags kyis kyang de dag srung zhing bar gcod bsal te rtag tu bde ba thob pa'o/ /bsil ba'i tshal gyi mdo chen po 'di gzung bar bgyi/ bcang bar bgyi/ brjod par bgyi/ kun chub par bgyi'o zhes bya ba ni/ rig sngags kyi rgyal mo bsam gyis mi khyab pa 'di dur khrod chen po yi dags dang /'byung po rnams kyi gnyen po/ mi'i sems can rnams kyi ston pa/ stong gsum gyi stong chen po'i 'jig rten gyi khams skyong bar byed pa ste/ 'khor bzhi po dag gis kyang 'chang ba dang / bzung nas kyang sems can thams cad la bstan nas/sdug bsngal thams cad dang 'bral bar byed pa ste/ 'khor bzhi po dag gis kyang lus ngag yid gzung ba'o/ /btsun pa bcom ldan 'das zhes bya ba ni/ rgyal po bzhis kyang bcom ldan 'das la yang dang yang du zhu ba 'bul ba'o//dge slong ngam/ dge slong ma'am/ dge bsnyen nam/ dge bsnyen ma gang la la zhes bya ba ni/ 'khor bzhi po dag dang / sems can thams cad la bsrung zhing sdug bsngal thams cad dang 'bral bar byed de/ 'di'i lam nas kyang byang chub kyi tshogs bstan pa'o//bdag bsrung ba dang / bdag sba ba dang / gzhan bsrung ba dang / gzhan sba ba'i slad du zhes bya ba ni/ gang zag rig sngags 'chang ba dang / nyon mongs pa'i sems can rnams srung ba ste/ byams pa dang / snying rje'i lam nas bdag gis kyang sems can gyi don la bstan par bya'o//bsil ba'i tshal gyi mdo chen po 'di 'dzin pa dang / 'chang ba dang / brjod pa dang / kun chub par bgyid pa de la ni zhes bya ba ni/ stong pa nyid kyi rang bzhin/ thabs dang shes rab gnyis su med pa ste/ chos dang / longs spyod dang / sprul pa'i skus khyab pa ste/ de bzhin du 'di la gus pa byas pa'i gang zag ni/ sdug bsngal thams cad dang 'bral ba'o/ /gnod sbyin dang / srin po nas gnod par bgyid pa'i bar rnams nye 'khor yang gnas par mi 'gyur na/ gnod par bgyid pa ltag la sems lags zhes bya ba ni/mthu che zhing gzi brjid che ba ste/ dpa' ba stobs che zhing sems can rnams la byams pa dang / snying rje dang ldan pa ste/ gang zag 'di 'chang ba la da lta'i rkyen lta ci smos te/ tshe phyi ma la yang de bzhin no/ /de gang du mtshan gcig tsam gnas pa der yang zhes bya ba ni/rig sngags kyi rgyal mo bsil ba'i tshal 'di yang grong ngam/ grong khyer ram/ grong rdal lam/ ljongs la sogs pa la yi ge gcig tsam yang dag par gyur na/ de bzhin du 'byung po'am/ yi dags la sogs pas gnod par mi 'gyur te/grong de na gnas pa'i sems can rnams la yang khrag khrug dang / rtsod pa dang / rims drag po'i nad mi 'byung ste/ gzhan gyi rgyal po'i chad pa yang mi 'byung ngo / /gnod sbyin dang / srin po nas gnod par bgyid pa'i bar rnams nyen kor du yang gnod par mi 'gyur zhes bya ba ni/mtshan de yang lus la btags pa'am/ yid kyis 'dzin pa'am/ ngag gis 'don pa'am/ rgyal mtshan gyi rtse mo'am/ mchod rten gyi rtse mo la btags nas/ de thos pa dang / de mthong ba tsam gyis de'i 'od zer gyi gzi brjid kyis rgyang grags kyi bar tshun chad du yang nye bar mi nus so//de gang du rtag tu gnas pa der lta smos kyang ci 'tshal lags zhes bya ba ni/ rig sngags 'di yang 'das pa'i sangs rgyas bsam gyis mi khyab pa rnams kyis rjes su yi rang zhing gsungs pa'o//de bzhin du ma 'ongs pa rnams kyis kyang gsung bar 'gyur ba'o/ /da ltar yang dag par rdzogs pa'i sangs rgyas shAkya thub pas/ sems can gyi don la gsungs pa ste/ gnyis pa'i sems med cing / nges par the tshom med do zhes bya ba'o//btsun pa bcom ldan 'das gang la la mi ma lags pa'i gnod pas thebs pa'i mdun du bsil ba'i tshal gyi mdo chen po 'di brjod na zhes bya ba ni/ yul 'khor bsrung ba dang / byad dang / ro langs kyi nad kyis btab pa dang / bsgom nyes pa dang /bri nyes la sogs pa gso ba dang / bkra mi shis pa bkra shis par byed pa dang / gzhan yang de la sogs pa thams cad la sngags te/ gzhan yang mkha' la rgyu ba'i yi dags rnams bzlog pa'i cho ga yang dag par bshad par bya'o/ /lci ba chu dang 'dres pa yis//dkyil 'khor yang dag byug par bya/ /nad pa'i mdun du yang dag tu/ /de bzhin gzhan yang mkhas pas shes/ sa tshon lngas ni yang dag tu/ /rgyal ba'i dkyil 'khor mdzes par bris/ /dbus su sna tshogs pad+ma la/ /phyi rim rdo rje ra ba ste/ / de phyir 'khor lo sna tshogs rtsibs/ /de phyir lha snam zlum por bri/ /de yi phyi rim gru bzhi la/ /lha snam pad+ma rA ga'i mdog /gru bzhi sgo bzhi ka ba brgyad/ /twa ra bzhi yis yang dag brgyan/ /dra ba la sogs brgyan pa la/ /rin chen sna bdun gzhal yas khang //gdugs dang ba dan de bzhin rgyan/ /mdzes pas yang dag rnam par brgyan/ /pad+ma 'khor lo lha rnams dang / /ye shes lha dang 'jig rten lha/ /gzhan yang gsungs pa de bzhin du/ /mkhas pa'i blo yis shes par bya/ /bzhi ba'i dbus su yang dag tu//rnam par rgyal ba dbus su gzhag /lto ba ldir ba rke ba ring / /mchu 'phyangs mtshan ma legs pa la/ /nag po ra ri rtsa ba spangs/ /de lta bu yi bum pa la/ /gu gul la sogs bdug par bya/ /rin chen 'bru lnga sman lnga dang / /dri lnga byang chub shing lnga dang //mgul chings dang ni gdugs dang ni/ /me tog phreng dang rin chen phreng / /gzhan yang ji snyed yang dag brgyan/ /de bzhin rgyal ba'i bum pa'i gzugs/ /gzhal yas khang gi dbus su gzhag /rims nad phyugs nad gang yin pa/ / de ni bkra shis la sogs dang / /dbang bskur sbyin sreg de bzhin te/ /lha dang rab gnas de bzhin shes/ /rdo rje slob dpon mkhas pa yis/ /dkyil chog blo yis yang dag shes/ /grog shing shun dar sogs la/ /gur gum gi wang la sogs bri/ /phyi rim mu khyud ra ba la//rgyal ba'i mtshan ni yang dag bri/ /dar gyis bcings pa'i pad+ma la/ de steng phyag mtshan rgyas pa bri/ /ral gri skyabs sbyin rin chen dang / /rin chen steng du rdo rje gnas/ /zhags pa lcags kyu bum pa dang / /de steng rdo rje yang dag gnas/ / mtshams bzhi rdo rje rgya gram yin/ /be con dang ni ut+pal dang / /pad+ma la sogs 'khor lo dang / /gzhan yang phyag mtshan gang yod pa/ /mkhas pas brtags nas bri bar bya/ /de nas mu khyud zlum po la/ /rdo rje rgya gram yang dag bri/ /rdo rje rgya gram bar du ni/ / las kyi snying po yang dag bri/ /phyag mtshan bar du rdo rje rigs kyi yi ge dgod/ /de nas mu khyud gsum po la/ /sngar gsungs las kyi snying po bri/ /de nas mu khyud 'khor lo bri/ /'khor lor bri ba'i yi ge ni/ /rig sngags skyed byed yang dag tu/ /hUM dang phaT kyis rnam par brgyan//de nas mu khyud gsum po la/ /rig sngags snying po yang dag bri/ /de nas pad+ma 'dab brgyad la/ /yang snying snying po bri bar bya/ /de bzhin mu khyud bskor ba la/ /gzhan gyis mi thub snying po bri/ /de dbus yi ge gnas pa ni/ /bsil ba'i tshal gyi bskyed yig bri//yi ge'i nang du mkhas pa ni/ /yang dag gis ni bri bar bya/ /de bzhin rig sngags 'chang bris la/ /mgul lam phyag sogs gdags par bya/ /de bzhin btags par gyur na ni/ /nad dang 'jigs pas mi tshugs te/ /mya ngan la sogs de bzhin du/mi rigs thams cad mi tshugs so/ /tshe ring sdug bsngal thams cad med/ ngan song gsum yang de bzhin no/ /rgyal ba'i bsrung ba yang dag tu/ /nga yis yang dag bshad par bgyi/ /rdo rje'i ra ba gur dang ni/ /bla res sa gzhi dra ba dang / /rdo rje'i rang bzhin shes par bya//de phyir me ri sna tshogs kyis/ /yang dag gis ni bskor ba'o/ /nad pa'i drung du dkyil 'khor 'di/ /de bzhin yang dag bri bar bya/ /ring bsrel gdung rten lugs ma'am/ /tsha tsha la sogs mchod rten gang / /nad pa'i mdun du yang dag mchod/ /rig sngags bsil ba'i tshal gyi gzungs/ / cho ga'i dus su yang dag gdon/ /bar gyis mi chod de bzhin du/ /bzlas pa la sogs de bzhin bya/ /phyogs skyong gza' dang rgyu skar dang / /de bzhin 'byung po la sogs la/ /rjes su mthun par dbul bar bya/ /dri dang me tog spos dang ni/ /arga la sogs yang dag dbul/ /de bzhin mkhas pas thun gtor du//yang dag gis ni dbul bar bya/ /nad pa la sogs khrus byas la/ /rig sngags gtad pa'i cho ga bya/ /dbang bskur la sogs gzhan yang mthun/ /de bzhin sdom pa 'bogs pa dang / /gzhan dang la sogs mthun pa ste/ /de bzhin la sogs byas na ni/ /gang yang las kyang 'grub par 'gyur//rig sngags kyi rgyal mo bsil ba'i tshal gyi dkyil 'khor dang bsrung ba bshad pa'i gnas skabs te dgu ba'o// //de myur ba kho nar bde legs dang nad ma mchis pa dang zhes bya ba ni/ de bzhin du dkyil 'khor la sogs pas bsrung ba byas na/ /sdug bsngal thams cad dang bral te/ ma rungs pa'i gdon thams cad kyang de bzhin no//bde bar 'gyur zhing thar bar 'gyur la zhes bya ba ni/ tshe da lta dang phyi ma la yang bde bar 'gyur ba ste/ 'khor ba'i sdug bsngal thams cad las thar ba'o/ /mi ma lags pa rnams de la log pa mi bgyid cing / myur du 'chi bar 'gyur lags te zhes bya ba ni 'di 'chang ba'i gang zag rnams la 'byung po de rnams grogs mi byed na 'byung po de rnams kyang rig sngags kyi dmod mos sdug bsngal drag po thob par 'gyur ro//btsun pa bcom ldan 'das zhes bya ba ni/ rgyal po bzhis bcom ldan 'das la zhus pa'o/ /bsil ba'i tshal gyi mdo chen po 'di ni/ de ltar don che ba lags so zhes bya ba ni/stong gsum gyi stong chen po'i 'jig rten gyi khams la/ /sems can rnams la bde bar gnas par byas shing tshe da ltar dang phyi ma'i sdug bsngal zhi bar 'gyur ro/ /btsun pa bcom ldan 'das/ dge slong ngam dge slong ma gang la la sogs pa ni yang nas yang du bcom ldan 'das la/rgyal po bzhis zhu ba 'bul ba ste/ de yang 'khor bzhi'i don la zhu ba 'bul ba'o/ /bsil ba'i tshal gyi mdo chen mo 'di 'dzin pa dang zhes bya ba ni/ grong ngam grong khyer ram grong rdal lam/ /de la sogs pa la yod pa tsam gyis kyang 'jigs pa thams cad dang 'bral bar 'gyur te/'chang ba dang zhes bya ba ni/ mgul du btags nas gus par byas par gyur na/ rig sngags kyi rgyal mo 'di'i nus pas sdug bsngal thams cad las thar bar 'gyur te/ tshe da lta dang tshe phyi ma de bzhin no/ /brjod pa dang zhes bya ba ni/ klog pa bsgom pa rjes su yi rang ba de la bshad par byed pa/ de la sogs pa byas par gyur na de bzhin du sdug bsngal dang bral bar 'gyur ro//kun chub par bgyid pa dang zhes bya ba ni/ stong gsum gyi stong chen po'i 'jig rten gyi khams kyi sems can gyi don la khyab pa'o/ /yang na rig pa ni nam mkha' bzhin du khyab pa ste/ sems can gyi don la khyab pa'o/ / sbyor bar bgyid pa de la ni zhes bya ba ni 'das pa dang ma 'ongs pa dang da ltar yod pa'i sangs rgyas rnams kyis gsungs pa/ rig sngags kyi rgyal mo bsil ba'i tshal 'di ni rjes su yi rang zhing gsungs pa'o/ /de dag gi gang zag ni sdug bsngal thams cad dang bral zhing de bzhin dus gsum du yin no//dad pa can gyi gnod sbyin dge bsnyen rnams/ rgyal po chen po bzhi'i gan du mchis nas/ ming smos par bgyid do zhes bya ba ni/ mi ma yin pa'i 'byung po rnams kyis kyang / tshes brgyad dam/ bcu dgu'am/ nya'am/ stong la sogs pa la/ rgyal po chen po bzhi dang / de bzhin du byas par gyur na/gdug pa can gyi gnod sbyin rnams kyang dad par 'gyur ro/ /kye rgyal po chen po dag ces bya ba ni/ bsil ba'i tshal gyi mdo chen po 'di la rgyal po chen po bzhi dag kyang 'di la 'chang bar 'gyur na/ dad par 'gyur te/ de bzhin du yang dag pa'i don yang thob par 'gyur ro/ / dge slong ngam zhes bya ba nas dge bsnyen ma zhes bya ba ni/ 'khor bzhi la yang bsil ba'i tshal gyi mdo 'dis bsrung bar 'gyur ro/ /che ge mo zhig ces bya ba la sogs pa ni/ stong gsum gyi stong chen po'i 'jig rten gyi khams kyi sems can thams cad do/ /yang na ni gang zag sems can 'di 'chang ba'o//btsun pa bcom ldan 'das zhes bya ba ni/ rgyal po chen po bzhis bcom ldan 'das la yang nas yang du zhus pa'o/ /dad pa can gyi gnod sbyin dge bsnyen rnams/ rgyal po'i pho brang lcang lo can du mchis nas zhes bya ba ni/ sngon du bshad pa bzhin du bsil ba'i tshal gyi mdo 'di'i bka' bzhin du rgyal po chen po bzhi po de mchod pa byas na/nad thams cad las thar bar 'gyur ro/ /rgyal po chen po rnam thos kyi bu'i mdun du gnod sbyin rnams 'dus shing / 'byung po thams cad tshogs pa'i nang du yang bsgrags nas zhes bya ba ni/ gnod sbyin mthu bo che sum cu rtsa gnyis dang sde dpon chen po nyi shu rtsa brgyad dang /bgegs rigs stong phrag brgyad cu rnams kyi mdun du bsil ba'i tshal gyi mdo 'di bsgrags na/ sdug bsngal thams cad dang bral bar 'gyur/ der de dag mngon par dga' bar 'gyur te zhes bya ba ni/ rig sngags kyi rgyal mo bsil ba'i tshal gyi byin gyi rlabs kyis/de rnams kyis kyang grogs byed par 'gyur ro/ /btsun pa bcom ldan 'das bsil ba'i tshal gyi mdo chen mo 'di ni de ltar don che ba lags so zhes bya ba ni/ 'jig rten dang 'jig rten las 'das pa'o/ /yang dag pa'i don thob ste/ mi'i yul du skye bar gyur nas kyang / chos 'di dang mi 'bral ba'o/ / btsun pa bcom ldan 'das zhes bya ba ni/ sems can gyi don la rgyal po chen po bzhis yang nas yang du zhu ba phul ba'o/ /dge slong ngam zhes bya ba la sogs pa ni/ sde ba bzhi dang / mi dge ba bcu dang / dge bsnyen gyi sdom pa lnga'o/ /sde ba bzhi ni/ phal chen pa dang / thams cad yod par smra ba dang / gnas brtan pa dang / mang pos bkur ba'i sde'o/ /mi dge ba bcu ni/ srog gcod pa dang / ma byin par len pa dang / mi tshangs par spyod pa dang / brdzun du smra ba dang / tshig rtsub mo dang / ngag 'khyal pa dang / phra ma'o/ /brnab sems dang / gnod sems dang / log par lta ba'o/ /dge bsnyen gyi sdom pa ni/ srog gcod pa dang /ma byin par len pa dang / 'dod pas log par g.yem pa dang / brdzun du smra ba dang / chang dang lnga ste/ bsil ba'i tshal gyi mdo 'di bton pa tsam gyis kyang / de rnams kyi sdom pa nyams kyang / de'i sdig pa las thar bar 'gyur ro/ /chang mi btung ba dang / dran pa dang / shes bzhin du mchis pa dang zhes bya ba ni/chang mi btung ba ni/ sgog pa dang / sha dang / bud med la sogs pa bkag pa kr-i ya'i gzhung ngo / /dran pa ni rig sngags 'di dran pa ste/ de dran pa tsam gyis kyang zas nyams pa las kyang thar bar 'gyur ro/ /shes bzhin du mchis pa ni/ sdig pa'i rang bzhin du shes pa yin te/de bzhin du dge ba'i rang bzhin du yang shes par bya'o/ /dge dang mi dges mi tshugs shing / de dran pa tsam gyis thar bar 'gyur ro/ /zas rnam pa lnga la 'di lta ste zhes bya ba ni/ bcom ldan 'das la rgyal po chen po bzhis zhus pa'o/ /bu ram dang / sbrang rtsi dang / til dang / sha dang / nya sha rnams yongs su spang bar bgyi'o zhes bya ba ni/ 'byung po rnams kyi zas yin no/ /de yang sdig par 'gyur ba'i zas yin pas/ bu ram ni 'bu rnams kyi zas yin no/ /sbrang rtsi ni bung ba'i zas so/ /til ni srog chags rnams kyi zas so/ /sha ni srog bcad pas sdig par 'gyur ba'i zas so//nya sha yang de bzhin no/ /de'i phyir na zas rnam pa lnga yongs su spang ba'o zhes gsungs pa'o/ /de ci'i slad du zhen zhes bya ba ni zas lnga po de sdig par 'gyur ba'i phyir ro/ /btsun pa bcom ldan 'das zhes bya ba ni/ rgyal po chen po bzhis zhu ba'i phyir bos pa'o/ /gnod sbyin dang srin po nas gnod par bgyid pa'i bar rnams zhes bya ba ni/zas rnam pa lnga po de spangs par gyur na/ dpag tshad lnga brgya'i nang tshun chad du/ gdon de rnams kyis mi tshugs so/ /bsil ba'i tshal gyi mdo chen po 'di 'dzin pa la sogs pa ni/ bye ba khrag khrig gang+gA'i klung gi bye ma snyed kyi/ sangs rgyas rnams kyis kyang rjes su yi rang ste/de bzhin du 'das pa dang ma 'ongs pa dang da ltar byung ba'i sangs rgyas rnams kyis kyang rjes su yi rang ba ste/ de rnams bka' bden pas sems can thams cad kyi don mdzad pa'o/ /de dag gzhom pa'i slad du yi dam 'di bgyi 'tshal lags so zhes bya ba ni da ltar gyi shAkya thub pas gsungs te/sdug bsngal thams cad dang bral bar byed cing 'khor ba las thar te/ de bzhin du yang dag pa'i don thob nas rig pa'i don gyi rjes su 'brang ba'o/ /btsun pa bcom ldan 'das zhes bya ba ni rgyal po chen po bzhis sems can gyi don du yang nas yang du zhu ba'o//dge slong ngam dge slong ma'am/ dge bsnyen nam/ dge bsnyen ma gang la la zhes bya ba ni sems can thams cad do/ /bsil ba'i tshal gyi mdo chen mo 'di zhes bya ba ni nam mkha' bzhin du 'jig rten gyi khams thams cad la khyab ste/ de bzhin du sems can thams cad bsil bar byed pa'o//'dzin pa zhes bya ba la sogs pa ni dad par byas shing rjes su yi rang bar gyur na/ sdug bsngal thams cad dang bral te/ sems can thams cad thar pa thob pa'o/ /btsun pa bcom ldan 'das zhes bya ba ni gong du bshad pa'o/ /bsil ba'i tshal gyi mdo chen po 'di ni de ltar don che ba lags so zhes bya ba ni nam mkha' bzhin du khyab pa ste/me long gi gzugs brnyan bzhin du sgyu mar snang bas/ stong gsum gyi stong chen po'i 'jig rten gyi khams thams cad la khyab pa'o/ /btsun pa bcom ldan 'das gzhan mu stegs can zhes bya ba la sogs pa ni/ /bdud kyi rigs sdig can/bstan pa 'jig pa'i lta ba log pa'i rigs/ de rnams kyi don mi 'grub cing the tshom gyi dus su yang pham par 'gyur ro/ /de'i phyir na mdo 'di la dad pa la don che ba'o/ /mi ma lags pa rnams kyis bar ma dor 'gum pa dang zhes bya ba la sogs pa ni/ 'di 'chang ba'i gang zag de la/chu dang / me dang / rkun ma dang / chom rkun dang / seng ge dang / glang po che dang / dug dang / thog dang / rgyal po'i chad pa la sogs pa zhi bar byed pa yin te/ yang na ni mi rigs pa'i 'byung po rnams kyis rims kyis gsad pa'o/ /de ci'i phyir zhe na zhes bya ba ni 'jigs pa de rnams rlag par byed pa'o/ / de ni de dag la gnod par 'tshal ba dang zhes bya ba la sogs pa ni bar du gcod pa'i bgegs rnams glags tshol te/ gang zag de gus par gyur na glags mi rnyed cing bar du gcod par mi nus so/ /btsun pa bcom ldan 'das 'jig rten na sems can rnams bsrung ba dang zhes bya ba la sogs pa ni snying rje che zhing sems can thams cad la byams pas khyab pa ste/rig sngags kyi rgyal mo bsil ba'i tshal 'di chad pa thams cad dang bral zhing bde bar gnas pa'o/ /de nas zhes ba ni bsil ba'i tshal gyi yon tan bshad pa de nas so/ /bcom ldan 'das la rgyal po chen po bzhis tshigs su bcad de gsol ba zhes bya ba ni rig sngags kyi rgyal mo bsil ba'i tshal gyi phan yon rgyal po chen po bzhis tshigs su bcad de bshad pa'o//mi mchog gang zhig mdo 'di dag /yongs su rdzogs pas bsrungs pa dang / /zhes bya ba ni gling bzhi na gnas pa'i 'jig rten 'di gang zag gang gis kyang gus par byas shing 'chang ba de la bsrung ba gzhan gyis mtshungs pa med do//bde legs bgyid pa de la ni/ /srin po rnams kyang 'tshe mi bgyid/ /ces bya ba ni gzi brjid che zhing stobs dang ldan te/ tshi phyi ma yang ngan song gsum las grol zhing / da ltar yang dpal dang ldan te/ de de dag 'dzin pa'i gang zag yang dag pa'i byang chub thob pa'o//yang na stong gsum gyi stong chen po na yod pa'i bgegs rnams kyis kyang 'tshe bar mi nus shing srin po rnams kyang lta ci smos pa'o/ /su yang rung ste mdo 'di dag /mi mchog gis ni gsungs pa bzhin/ /zhes bya ba ni/ lha'am/ mi'am/ lha ma yin nam/ yi dags la sogs pa gang zag 'di la gus par byas pa de la sogs pa'i sems can gzhan la yang phan thogs pa ste/'das pa'i sangs rgyas rnam par gzigs dang / gtsug tor can dang / kun skyob dang / log par dad sel dang / gser thub dang / 'od srungs rnams kyis kyang bsrung ba'o/ /ma 'ongs pa'i sangs rgyas rnams kyis kyang bsrung ste/de yang phyag na rdo rje dang / 'jam dpal dang / spyan ras gzigs dang / byams pa la sogs pa'i sangs rgyas rnams kyis kyang gsung bar 'gyur ro/ /da ltar yang sems can gyi don la rig sngags la rjes su yi rang zhing bsrungs pa'o/ /yongs su rdzogs shing ma chad par//shin tu chang bar 'chang bgyid pa/ /zhes bya ba ni/ sbyin pa dang / tshul khrims dang bzod pa dang / brtson 'grus dang bsam gtan dang / shes rab la sogs pa yongs su rdzogs pa ste/ de yang de'i 'khor gsum dag pas 'chang ba'o/ /yang na pha rol tu phyin pa bcu dang /sa bcu'i byang chub sems dpa' la yongs su rdzogs pa'o/ /de la gnod sbyin yi dags dang / /'byung po grul bum srin po dang / /mi dang mi ma yin pa'i gdon rnams kyis kyang rig sngags 'di la rjes su yi rang zhing bstan pa bsrung ba ste/ 'di la tshig gcig kyang smras par gyur na/ 'byung po rnams kyi 'jigs pa dang bral ba'o//smyo byed rgyu ba klu rnams dang / /de lta bu dag 'tshe mi bgyid/ /ces bya ba ni smyo byed kyi gdon stong phrag brgyad cu rtsa bzhi yod de/ de bzhin klu'i gdon yang yin no/ /de rnams kyis kyang / srod tho rangs nam phyed la rgyu zhing sems can rnams la 'tshe bar byed pa ste/ de rnams kyis kyang mi tshugs shing sems can rnams la bde bar byed pa'o//de la mi ma lags dang gdon/ /myur du gud du 'chi bar 'gyur/ /yang dag par rdzogs pa'i sangs rgyas rnams kyi bka' dang rig sngags kyi dmod mos 'tshe bar byed pa'i 'byung po de rnams mgo tshal pa brgyar 'gas shing 'chi bar 'gyur te/ shi ma thag tu mda' 'phangs pa bzhin du mnar med par skye'o//de la cis kyang mi tshugs te/ de la rtse bar yang mi nus zhes bya ba ni u du wA ra'i me tog bzhin/ shin tu dkon pa rig sngags kyi rgyal mo 'di yang mthu che zhing gzi brjid che ste/ 'di'i nus pas gang gis kyang 'tshe bar mi nus pa'o/ / rgyal po chen po bzhi po yis/ /bcom ldan phyag 'tshal zhes brjod de/ /zhes bya ba ni stong phrag nyi shu rtsa brgyad kyi dri za rnams dang / de bzhin du grul bum dang / klu dang gnod sbyin rnams so/ /de rnams kyi gdon kyis kyang 'tshe bar mi nus shing / /phyogs rnams kyang bsrung bar 'gyur ro/ /sangs rgyas zhabs la phyag 'tshal nas//de nyid du ni mi snang 'gyur/ /zhes bya ba ni/ dur khrod bsil ba'i tshal du bcom ldan 'das la bar chod byed cing glags lta ba rnams glags mi rnyed cing / bcom ldan 'das la gus par byas na/ sems can la 'tshe bar mi byed cing mi snang bar 'gyur ba'o/ /de nas zhes pa ni tshigs su bcad pa'i de nas so//bcom ldan 'das de'i mtshan mo 'das te zhes bya ba ni 'jigs su rung ba bsil ba'i tshal gyi nang na bcom ldan 'das 'khor bzhi dang bcas pa bzhugs pa'i nam la 'das pa'o/ /nam langs nas/ dge slong gi dge 'dun gyi gung la bzhugs te zhes bya ba ni rnam rtog gsum dang bral ba'i dur khrod bsil ba'i tshal gyi dbus su bcom ldan 'das 'khor bzhi dang bcas pa'o//dge slong rnams la bka' stsal pa zhes bya ba ni/ de'i tshe de'i dus su bcom ldan 'das kyis stong gsum gyi stong chen po'i 'jig rten gyi khams kyi sems can gyi don la bka' stsal pa'o/ /dge slong dag mdang sum dag rgyal po chen po bzhi bu dang bcas zhes bya ba la sogs pa ni/rgyal po chen po bzhi dang / 'khor rnams dur khrod bsil ba'i tshal du 'ongs te/ de dag gis kyang glags tshol ba ste/ rig sngags kyi rgyal mo bsil ba'i tshal gyi gzi brjid kyis glags tshol mi nus par gnas pa'o/ /nga'i rkang pa la mgo bos phyag byas te zhes bya ba ni/rgyal po bzhi dang / 'byung po de rnams kyis bskor ba lan gsum byas nas/ bcom ldan 'das la gus par byas nas rig sngags kyi rgyal mo bsil ba'i tshal la rjes su yi rang ba'o/ /phyogs gcig tu 'khod do zhes bya ba ni rgyal po chen po bzhi dang / 'byung po thams cad phyogs gcig tu 'khod/phyogs gcig tu 'khod nas/ rgyal po chen po bzhis nga'i thad du bsil ba'i tshal gyi mdo chen po 'di brjod nas dong ngo zhes bya ba ni/ bcom ldan 'das kyi 'khor bzhi la bka' stsal zhing / rig sngags kyi rgyal mo bsil ba'i tshal gyi don yang dag par bstan pa'o//khyed kyis de legs par rab tu nyon la yid la zung shig dang / ngas bshad do zhes bya ba ni sdug bsngal thams cad dang bral ba stong pa nyid kyi rang bzhin no/ /rig pa mthar thug pa yang dag par rdzogs pa'i sangs rgyas rnams kyis gsungs pa'o/ /btsun pa de ltar 'tshal lo zhes gsol te zhes bya ba ni/dge slong la sogs pa'i 'khor rnam bzhis bcom ldan 'das la zhus pa'o/ /dge slong rnams kyis bcom ldan 'das kyis bka' stsal ba mnyan nas zhes bya ba ni/ de rnams kyis kyang rig sngags kyi rgyal mo 'di la rjes su yi rang zhing / 'chang ba dang / klog pa dang / bsgom pa la sogs pa byas pa'o//bcom ldan 'das kyis zhes bya ba la sogs pa ni chad pa med cing tshig la yang dag pa khyab pa ni nam mkha' bzhin du khyab pa/ rig pa phyi nang yang dag par bstan pa thabs shes rab gnyis su med pa'o/ /bcom ldan 'das kyis de skad ces bka' stsal nas zhes bya ba ni/ gzhon nu sgra gcan 'dzin gyi sems can thams cad kyi don la bsil ba'i tshal gyi mdo chen po 'di rgyas par bka' stsal te/ de yang bcom ldan 'das mya ngan las 'das nas kun dga' bos bsdus pa'o/ /dge slong dang zhes bya ba ni sgra gcan 'dzin la sogs pa nyis brgya lnga bcu'o/ /dge slong ma dang zhes bya ba ni grags 'dzin ma la sogs pa'o//dge bsnyen dang zhes bya ba ni rgyal po ma skyes dgra la sogs pa'o/ /dge bsnyen ma de dag yi rangs te zhes bya ba ni/ ma skyes dgra'i btsun mo la sogs pa de dag gis kyang rig sngags kyi rgyal mo 'di la rjes su yi rang ba'o/ /gzhan yang rgyal po chen po bzhi dang /sum cu rtsa gsum gyi lha rnams dang / gnas gtsang ma'i lha rnams dang / gzhan yang lha dang / lha ma yin la sogs pas rjes su yi rang ba'o/ /rig sngags kyi rgyal mo bsil ba'i tshal gyi mdo'i 'bum 'grel/ slob dpon mkhas pa chen po las kyi rdo rjes mdzad pa rdzogs so// //smon lam stobs kyis grong khyer mu gyer btsas//mkhas par grags pa mi mnyam rdo rje'i sras/ /skye ba lnga brgyar sbyangs pa'i 'bras bu yis/ /rig pa'i gnas lnga dag la ma rmongs shing / /gsang sngags gdams pa ma lus thugs la mnga' ba can/ /mtshan yang don yod rdo rje zhes par grags/ /sngon gyi smon lam dbang gis bod yul dbus su byon//smon lam stobs kyis dam pa 'bro lo'i bla mar gyur/ /'dzam gling byang phyogs brag dmar dpal gyi bsam yas su/ /rgyal po khyad par 'phags pa khri pa'i gdung rgyud sras/ /lha gcig khyad par 'phags pa lha lcam dar sgron gyis/ /bkra shis pho brang rdo lung dgon pa ru//lo paN zhabs nas bteg nas dam chos 'di bsgyur ba/ /bsgyur ba'i bsod nams gang thob bsags pa des/ /bdag dang mtha' yas sems can kun/ /bla med byang chub thob par shog/ //