CLOSE WINDOW

D2683
བོད་ཡིག

@##/ /rgya gar skad du/ badzra bi dA rA Na nA ma d+ma ra Ni byA ka khyu na/ bod skad du/ rdo rje rnam par 'joms pa zhes bya ba'i gzungs rnam par bshad pa/ dpal phyag na rdo rje la phyag 'tshal lo/ /rgyal ba kun gyi gsang ba'i mdzod 'dzin pa/ /rgyud kyi don 'byung ston pa ngo bo la/ /sgo gsum dang bas btud te phyag 'tshal nas//mdo yi rnam bshad bdag gis bya bar 'dod/ /de la dang por rgyud kyi don la mos pa dang dad pa rnams la/ mdo'i don phun sum tshogs pa rnam pa lnga la rab tu mkhas par bya ste/ de'i 'og tu ji ltar yongs su shes par bya ba'i go rims la 'jug par bya ba'i phyir ro//de la dang por mdo'i mtshan gyi don phun sum tshogs pa la mkhas par bya ste/ de la rdo rje ni yang dag pa'i ye shes kyi tshig bla dwags te/ ci'i phyir zhe na/ rdo rje ltar 'dus ma byas pa'i phyir dngos po la zhen pa rnams dang lta ba log pa'i phyogs thams cad kyis mi bskyod cing /dngos po dang bral ba'i don to/ /rnam par ni rgyu med pa dang / rgyu dang rkyen kyis bskyed pa dang / rtag pa dang mi rtag pa dang bde ba dang sdug bsngal ba la sogs te mtshan ma'i chos thams cad smos pa'i phyir ro/ /'joms pa ni de rnams thugs yang dag pa'i ye shes kyis 'joms pa dang /thugs rje thabs kyi bye brag gis 'joms pa'i don to/ /gzungs ni mi 'da' ba'i phyir dang gnyis su med pa'i don to/ /de ltar mdo'i dgos ched bstan nas/ de'i 'og tu dgos pa dang 'brel pa'i don bstan to/ /ci'i phyir zhe na/ dgos 'brel gyi sgo nas 'jug pa'i phyir ro//ma nor bar ston pa'i ston pa phun sum tshogs pa dang / yongs su dag pa'i 'khor phun sum tshogs pa dang / gang du bshad pa'i gnas dang / ma nor bar sdud pa'i sdud pa po dang gang bshad pa'i mdo'i dgos pa rnams su shes par byed pa'i tha tshig go/ /de la 'brel ba ni phun sum tshogs nas dgos pa grub cing don gtan la 'be+ebs pa'i phyir ro//de'i 'og tu ji ltar yongs su shes par bya ba'i don ston te/ mdo'i don 'byung ba'i gtan tshigs dang / dkyil 'khor gyi don 'byung ba'i thabs dang / dgos ched phun sum tshogs pa'i don rnams su shes par bya ba'i phyir ro//de ltar dgos ched kyi don bstan nas/ de'i 'og tu bsdu ba'i don dang / go rims la 'jug pa'i thabs smos pa'i phyir ro/ /ston pa sangs rgyas bcom ldan 'das mtha' gnyis kyi skyon spangs te/ thugs mnyam pa nyid kyi ting nge 'dzin rdo rje lta bu las ma g.yos kyang /nyid kyi che ba'i don ched du thugs yang dag pa'i sras gsang ba'i bdag po byin kyis brlabs nas/ rgyud kyi don 'di gsungs pa'i tshe/ sangs rgyas kyi zhing mtha' yas pa na 'dus pa'i 'khor rnams kyi nang du 'phags pa 'jam dpal gyis de bzhin gshegs pa dgra bcom pa yang dag par rdzogs pa'i sangs rgyas bcom ldan 'das kyi byin gyis brlabs pas 'phags pa dpal rdo rje rnam par 'joms pa'i don 'di rna ba'i dbang po yongs su dag pas dpal phyag na rdo rje la rab tu thos pa'i phyir 'di skad bdag gis thos pa'i dus gcig na zhes gsungs pa ste/'di ltar ston pa sangs rgyas bcom ldan 'das kyis rgyud kyi don 'di ltar bshad de/ ting nge 'dzin ye shes kyi ngo bo las phyag na rdo rjer sprul te/ ye shes kyi ngo bo sngags kyi tshig tu smras te/ 'khor rnams dga' mgu bskyed nas dad par bya ba dang / sems can thams cad kyi nyon mongs pa'i sdig pa rnam par sbyang ba dang /bla na med pa'i byang chub la dgod pa'i phyir 'di skad ces bya'o/ /blo rno zhing shes rab mchog tu gyur pa rnams kyis don gyi rgyal po 'di thos pas na bdag gis thos pas zhes bya'o/ /ston pa dang 'khor dang sdud par ldan pa la zhes bya'o/ /lan grangs mang du ma gsungs par lan cig brgya lam du gsungs pas na/gcig na zhes bya ba'o/ /bcom ldan 'das rdo rje la bzhugs te ni rang bzhin kyi ston pa'i don te/ nyon mongs pa'i bdud sde bcom ste/ thugs ting nge 'dzin gyis mkhyen pa'i yon tan sna tshogs kyi legs pa dang ldan pa/ sangs rgyas bcom ldan 'das mtha' gnyis kyi skyon spangs pa'o/ /rdo rje ni gnas phun sum tshogs pa ste/ rdo rje gdan byang chub kyi shing drung ngo / /rnam pa gcig tu bcom ldan 'das rdo rje lta bu'i ting nge 'dzin la thugs mnyam par gzhag pa la bya'o/ /bzhugs thabs gsum las ni mnyam pa'i skyil mo krung las chos ston pa'i tshul du bzhugs pa'o//da ni byin gyi rlabs kyis ston pa'i dus gsum gyi rgyal ba thams cad kyi thugs gsang ba'i mdzod 'dzin pa'i ye shes kyi ngo bo ste/ de'i rtags rdo rje 'dzin pa'o/ /sangs rgyas kyi mthus ni phyogs bcu'i sangs rgyas thams cad kyi sku dang /gsung dang / thugs dang / yon tan dang / phrin las kyi byin gyis brlabs te/ ting nge 'dzin la snyoms par zhugs pa'i phyir ro/ /lus thams cad rdo rjer byin gyis brlabs nas ni/ yang dag pa'i ye shes de ni chos thams cad kyi rang bzhin 'dus ma byas pa'i don lus ngag yid gsum sku gsung thugs rdo rje ltar byin gyis brlabs pa'i phyir ro//rdo rje'i ting nge 'dzin la snyoms par zhugs pa ni yang dag pa'i ye shes rdo rje'i ting nge 'dzin la snyoms par zhugs pas don thams cad la thogs pa med pa'i ye shes kyi ngo bo bdag gnas pa'i phyir ro/ /de nas lag na rdo rje sangs rgyas kyis mthus dang ni skabs kyi de ma thag pa ste/snyoms par zhugs pa'i rting thogs su phyogs bcu'i sangs rgyas thams cad kyi mthus ye shes kyi 'od zer sku dang gsung dang thugs las 'thon te lag na rdo rje la phog pas sku gsung thugs ye shes kyi don smra ba'i dbang bskur nas thogs pa med pa'i ye shes kyi tshig smra ba'i phyir ro//byang chub sems dpa' thams cad kyi byin gyi rlabs kyis/ sngon kyi bskal pa mtha' yas pa nas/ byang chub kyi spyod pa dka' ba nyams su blangs pa'i byin gyi rlabs dang / sangs rgyas kyi zhing khams mtha' yas pa na byang chub sems dpa' rnams kyi sngon gyi dge ba'i rtsa ba'i tshogs su mthun pas byin gyis brlabs pa la mthu stong pa'i phyir ro//sangs rgyas kyi byin gyi rlabs kyis zhes pa ni sangs rgyas dang byang chub sems dpa'i byin gyi rlabs ni ma dros ltar mthu stobs mtha' yas pa'i tshig smra ba'i spobs pa bskyed pa'i phyir ro//rdo rje khro bo las byung ba ni de ltar lag na rdo rje byin gyis brlabs pa'i mthus rdo rje lta bu'i yang dag pa'i ye shes kyis khams gsum gyi grags pa can la khro bo'i thabs kyi sprul pas bdud rnams 'dul ba'i phyir/ 'og nas 'byung ba'i dkyil 'khor kyi lha rnams sku gsung thugs las 'byung ba'i phyir ro//rdo rje snying pos rab tu smras te zhes bya ba ni sku gsung thugs kyi rdo rje ltar 'dus ma byas pa des sems can thams cad la phan pa'i phyir 'og nas 'byung ba'i don smra ba'i dkyil 'khor dang / snying po skyon dang bral ba ston pas gsungs pa'i phyir ro//da ni khro bo rnams kyi rang bzhin gyi don thugs ka nas ston te/ mi chod pa mi shigs pa/ bden pa sra ba zhes bya ba ni gzung ba'i yul du ma grub pas/ mtshan ma 'joms pas gshin rje gshed du bstan/ nyon mongs pa'i skyon 'joms pa'i tho ba bsnams so/ byang chub kyi sems skyon med pas sku mdog dkar/ rtsa ba'i yig 'bru ma las bskyed pas/ ma tha badzra zhes bya ba ngag gi las dang cho ga tshang bar byas nas bsgoms na dngos grub ya mtshan can thob po/ /dngos grub de bdud kyis bar du mi chod pas mi chod pa/ sku gsung thugs mtshan mas mi shigs pas mi shigs pa zhes gsungs gsung gi ngo bo bden pa dang ldan pas tshig gi dngos grub ste/de lta bu ni hUM ka ra nyid kyi rang bzhin yang yin te/ ci'i phyir na/ gcig gi ngo bor kun gyur cing dbyer med pa'i phyir ro/ /thugs byang chub rnam par dag pas mtshan ma'i skyon kyis rab tu mi chod pa'i rtags su bstan te/de ni ting nge 'dzin 'bum phrag gi sgo nas 'gro ba'i don mdzad pa la bar mi chod pa'i phyir smos so/ /sku gsung thugs rdo rje lta bu'i mi 'gyur ba'i byang chub kyi che ba mnga' bas mi shigs pa/ bden pa'i tshig mi 'gyur bas chos ston pas bden pa/de lta bu'i khro bo'i rgyal po de bsgoms pa'i phyir phrin las rnams bzhi'i las byas na 'grub bo/ /hUM ka ra'i don bshad zin to// //sra ba brtan pa thams cad du thogs pa med pa zhes bya ba nyon mongs pa'i 'khor ba las rgyal ba'i phyir ye shes kyi 'khor lo rnams sku gsung thugs rdo rje ltar sra bas sra ba/byang chub kyi sems mi 'gyur bas brtan pa/ thugs rdo rje brtson 'grus ci la yang thogs pa med pas thogs pa med pa/ rtsa ba'i snying po yig 'bru du las bskyed pas/ du na badzra zhes gsungs te/ rdzas dang cho ga tshang bar byas na dngos grub ya mtshan can thob bo//de nas bdud dang bgegs byed kyis glags mi rnyed pas sra ba'i dngos grub ci bya ba 'grub pas brtan pa'i dngos grub thams cad dbang du sdud pa'i phyir thogs pa med pa'i dngos grub thob bo/ /khams gsum rnam par rgyal ba'i don bshad zin to// // thams cad du ma pham pa/ sems can thams cad skrag par byed pa/ sems can thams cad 'jil bar byed pa ni khams gsum thams cad du byang chub sems thugs rje'i rang bzhin du gnas pas ma pham pa/ bdud dregs byed thams cad las rgyal bar byed pas na skrag par bstan/ 'dod chags la sogs pa'i nyon mongs pa 'jil ba'i phyir na 'jil bar bstan/ de'i rtags thabs thugs rje chen po'i pad+ma bsnams pa/ de lta bu'i khro bo'i rgyal po ha ya kr-i ba sku mdog dmar po nyon mongs pa'i skyon kyis ma gos pa'i phyir yang dag pa'i yon tan dang ldan pa'i rtsa ba'i snying po ste/byang chub sems kyi yig 'bru d+ha las bskyed pas d+ha ra badzra zhes brjod do/ /'og nas 'byung ba ltar bsgoms na bkra shis par 'gyur ro/ /ha ya gr-i ba'i don bshad zin to// //rig sngags thams cad gcod par byed pa/ rig sngags thams cad gnon par byed pa/ las thams cad 'joms par byed pa ni/phas kyi rgol ba'i gnod pa byed pa thams cad dang / drang srong gi gnod pa rnams dang / phyir log gi bye brag rnams dang / sdug bsngal gyi gnod pa rnams bya ba nan tan gyi ye shes kyi rang bzhin kyis thams cad gcod par byed pa/ thams cad gnon pa'i tshul du gnas pas yon tan thams cad ma lus par rdzogs par byed pa/ye shes kyi ngo bo las ma yin pa thams cad 'joms pa'i rtags su khro bo bdud rtsi 'khyel pas mkhyen pa'i yon tan byang chub sems kyi rang bzhin ye nas rnam par dag pa'i phrin las sna chogs pa rnams so/ /rtsa ba'i yig 'bru las bskyed pas d+ha ra ya badzra zhes gsungs so//de bsgrub pa'i phyir rdzas dang yo byad la sogs pa tshong bar bya ste las byas na dmod pa'i bye brag thams cad las thar bar 'gyur ro/ /bdud rtsi 'khyil pa'i don bshad zin to// //da ni ya mAn+ta ka'i don bshad de/ gzhan gyi las thams cad 'jig par byed pa/gdon thams cad rlag par byed pa/ gdon thams cad las thar bar byed pa ni phyir rgol ba ma lus pa thams cad thugs rje chen po'i ye shes kyis thams cad 'jig par byed cing / byang chub sems kyi rang bzhin du 'gyur bas gzhan gyi las thams cad 'jig par gsungs/ gdon stong phrag brgyad cu rtsa bzhi thugs rje chen po'i ye shes kyi zhabs kyis gnon cing grol bar byed pas na gdon thams cad brlag par gsungs/ gnod pa'i bye brag byed pa'i nyams len pa sna tshogs dge ba'i bar du gcod pa rnams 'dul bar mdzad pa dang / gzhan sems can gang zhig nyam thag pa sna tshogs tshe dang mdongs 'phrog pa las thar bar mdzad pas na de'i phyir gdon thams cad las thar bar byed par gsungs so//de'i rtags kyi cha 'dzin pa ni khro bo'i rgyal po ya mAn+ta ka ste/ de bsgrub par bya ba'i phyir ting nge 'dzin gyi bum pa hUM las gzhal yas khang du bsgom/rtsa ba'i yig 'bru byang chub sems kyi rang bzhin du bsam ste/ de 'od du zhu ba las byang chub sems kyi rang bzhin du gyur to/ /snying po dang rgyan cha rnams la ye shes kyi lha 'bar bar bsams te 'od du zhu bas rgyan dang snying po la thim pas gnyis su med par gyur to/ /ye shes kyi cho 'phrul bsam gyis mi khyab pa byung nas dngos grub sna tshogs pa sbyin par bsam/bdag ya mAn+ta ka'i ting nge 'dzin du zhugs la/ phrin las rnam bzhi gang byed pa so so'i kha dog tu bsgyur te bum pas dbang bskur na thams cad 'grub par gsungs so/ /rtsa ba'i yig 'bru de las bskyed pas da ha badzra ste/bsnyen pa grangs mang por brjod na bkra shis par 'gyur ro/ /ya mAn+ta ka'i don bshad zin to// //da ni Tak+ki rA byed don bshad de/ 'byung po thams cad 'gugs par byed pa/ rig sngags kyi las thams cad byed du 'jug pa ni sems can gyi rnam par rtog pa phyin ci log gi lta ba las byung bas na 'byung po/bal sna drug mgul la sogs pa rdzas kyi bye brag las byung bas na 'byung po/ de 'gugs par byed pas ni Tak+ki rA dza'i rang bzhin du bstan te/ thabs mkhas pa'i thugs rjes khams gsum gyi 'byung po'i rigs thams cad dbang du bsdus nas 'khor bas/ de'i phyir 'byung po thams cad 'gugs par byed par gsungs/ gzhan yang de bzhin gshegs pa'i phrin las la mnga' brnyes pas/ las thams cad kyang byed du 'jug cing gzhan la ston pa dang / nyams su len pa'i nus pa dang ldan pas rig sngags kyi las thams cad byed du 'jug par gsungs/de bsgrub par bya ba'i phyir bum pa lar bsams te 'od du zhu bas/ Tak+ki rA dza'i rang bzhin du bsams/ nang gi chu la ra bsams te 'od du zhu ba las byang chub sems zla ba'i dkyil 'khor du bsam/ bum pa'i rgyan cha la ya bsams te 'od du zhu bas ting nge 'dzin kyi cho 'phrul 'byung bar bsam mo//de ltar byin gyis brlabs pa'i bum pas phrin las so so'i las byas na 'grub par gsungs/ Tak+ki rA dza'i don bshad zin to// //da ni stobs po che'i don bshad de/ ma grub pa rnams grub par byed pa/ grub pa rnams chud mi za bar byed pa/ 'dod pa thams cad rab tu sbyin pa ni/gang zhig gis bsgrubs par gyur na dngos grub ma grub pa rnams grub par byed pa dang / las grub pa rnams chud zos kyi dbang du mi gtong ba dang / 'dod pa thams cad rab tu sbyin pa'o/ /ting nge 'dzin gyi stobs dang ldan pa/ gzhan gyi phun sum tshogs pa sgrub pa khro bo'i rgyal po stobs po cher bstan/de bsgrub par bya ba'i phyir bum pa la du bsams te/ 'od du zhu ba las byang chub sems stobs po che'i rang bzhin du bsam/ bum pa'i chu la su bsams te 'od du zhu ba las byang chub sems zla ba'i dkyil 'khor du bsam/ bum pa'i rgyan cha la na bsams te 'od du zhu bas ting nge 'dzin bsam gyis mi khyab pa'i cho 'phrul 'byung bar bsam/de ltar byin gyis brlabs pa'i bum pa de phrin las rnam bzhi gang byed pa so so'i kha dog tu byin gyis brlabs pa'i bum pas dbang bskur na thams cad 'grub par gsungs/ de'i phyir dA ru Na badzra zhes pa rtsa ba'i bsnyen pa grangs mang du brjod na las thams cad grub pas chud mi za bar gsungs so//stobs po che'i don bshad zin to// //da ni a mo g+ha pA sha'i don bshad de/ sems can thams cad bsrung ba ni a mo g+ha pA sha'i don to/ /thugs rje chen po byang chub sems kyi rang bzhin las thabs mkhas pa'i sprul pa byung nas khams gsum gyi sems can la thabs mkhas pa'i thugs rje'i bye brag sna tshogs bstan nas nyon mongs pa'i sdug bsngal las phan btags nas sems can thams cad bsrung ba'i phyir ro//de'i rang bzhin a mo g+ha pA sha ste/ de ni sems can thams cad la byang chub sems thabs mkhas pas srung bar byed do//de bsgrub par bya ba'i phyir bum pa la ra bsams te 'od du zhu bas/ a mo g+ha pA sha'i rang bzhin du bsam mo/ /bum pa'i chu la ru bsams te 'od du zhu bas ye shes kyi sprul pa sna tshogs pa'i yon tan dang ldan par bsam mo/ /de nas a mo g+ha pA sha bsgrub par bya ba'i phyir/phrin las rnam bzhi gang byed pa'i kha dog so so'i bye brag tu bsgoms nas dbang bskur zhing las byas na thams cad 'grub par gsungs so/ /a mo g+ha pA sha'i don bshad zin to// //da ni dbus kyi gtso bo'i don bshad de/zhi ba rgyas pa sems can thams cad rengs par byed pa zhes pa ni phyin ci log gi nyon mongs pa thams cad la sngon kyi bsod nams kyi tshogs dang / phrin las kyi thugs rje thabs mkhas pa'i bye brag sna tshogs pa gzhan la bstan nas/ phyin ci log gi nyon mongs pa thams cad med par mdzad cing yon tan gyi tshogs bsam gyis mi khyab par mdzad pa dang /bdud dang dregs byed can rnams skrag cing rengs par byed pa'i phyir ro/ /gzhan yang byang chub kyi sems mchog chos nyid zhi ba'i don las ma g.yos kyang / sngon gyi bsod nams kyis khams gsum gyi sems can thams cad la thabs mkhas pa'i phrin las sna tshogs 'byung ba'i yon tan byang chub kyi sems gzhan las 'byung ba'i phyir che ba'i yon tan sna tshogs pa byung nas/sems can rnams kyi phongs pa rnams tshim zhing bde bar mdzad pa dang / 'jig rten kyi dregs byed thams cad la ting nge 'dzin gyi cho 'phrul sna tshogs pa bstan nas bde ba la bkod pa'i phyir rings shing 'dar bar mdzad de dbang du bsdus nas phan 'dogs pa'i phyir ro//de ltar yon tan dang ldan pa'i phyag na rdo rje bsgom pa'i phyir ro/ /bum pa la oM bsgoms pas 'od du zhu bas phyag na rdo rje'i skur bsgom/ bum pa'i chu las ha bsams te cho ga rnam gsum gyi tshul spro bsdu byas pas byang chub sems zla ba'i dkyil 'khor du bsam mo/ /bum pa'i rgyan cha la ra bsams te 'od du zhu bas yon tan dpag tu med pa'i rgyan cha dang ldan par bsam mo/ /thugs kyi rang bzhin dpal phyag na rdo rje'i skur bsgom pa'i phyir phrin las rnam bzhi'i las kyi bye brag tshang bar bya ste/bsnyen pa stong dang 'bum la sogs pa phul na dngos grub ya mtshan can thob bo/ /las kyi lhag chad kha bskong ba'i phyir khro bo'i rting la gsungs/ dkyil 'khor kyi bdag po yin pa'i phyir tshogs kyi mjug sdud pa'o/ /dbus kyi gtso bo'i don bshad zin to// //da ni sgo ba'i don bshad de/ rmugs par byed pa'i gsang sngags kyi mthu chen po 'di zhes bya ba ni thugs rje chen pos khams gsum gyi sems can thams cad la thugs rje thabs mkhas pa'i bye brag sna tshogs pa bstan nas ye shes bzhi'i ngo bos phan gdags pa'i phyir sgo ba bzhir sku sprul te/bdud dang dregs byed glags dang skabs tshol ba rnams la rmugs par byed pa'i thabs kyis 'dug tu ma ster nas gsang sngags kyi mthu chen po bstan nas mi gnas par byed pa'i don to/ /de'i rtags kyi cha 'dzin pa ni sgo ba chen po bzhi yin te/ de bsgrub par bya ba'i phyir bdag gis bum pa la hUM bsams te/'od du zhu bas sgo ba lcags kyu ma'i rang bzhin du bsam mo/ /bum pa'i chu la lu bsams te 'od du zhu bas byang chub sems zla ba'i dkyil 'khor du gyur par bsgom/ bum pa'i rgyan cha la dzaHbsams te ye shes kyi cho ga rnam pa gsum gyis spro bsdu bya/ye shes kyi lcags kyus phyi nang gi bye brag rnams bsdus nas bum pa mdzes par bsam mo/ /de nas lho phyogs kyi bum pa la ti bsams te 'od du zhu bas zhags pa'i rang bzhin du bsam/ bum pa'i chu la shu bsams te 'od du zhu bas byang chub sems zla ba'i dkyil 'khor du bsam mo//bum pa'i rgyan cha la hUM bsams te cho ga rnam gsum kyis spro bsdu byas pas ting nge 'dzin gyi rgyan chas bsam gyis mi khyab par bsam mo/ /de nas nub phyogs kyi bum pa la lha bsams te 'od du zhu bas lcags sgog gi rang bzhin du bsam mo/ /bum pa'i chu la da bsams te/'od du zhu bas byang chub kyi sems zla ba'i dkyil 'khor du bsam mo/ /bum pa'i rgyan cha la baM bsams te cho ga rnam pa gsum kyis spro bsdu byas pas mchod pa'i rgyan chas bsam gyis mi khyab pa dang ldan par bsam mo/ /de nas byang phyogs kyi bum pa la ha bsams te 'od du zhu bas sgo ba dril bu'i rang bzhin du bsam mo//bum pa'i chu la n+ta bsams te 'od du zhu bas byang chub sems zla ba'i dkyil 'khor du bsam mo/ /bum pa'i rgyan cha la hoHbsams te cho ga gsum gyis spro bsdu byas pas ting nge 'dzin gyi cho 'phrul 'byung bar bsam mo/ /de ltar bsgoms pa'i bum pa de la rang bzhin kyi dkyil 'khor nas 'phags pa spyan drangs nas mdun gyi nam mkha' la dmigs so//bsnyen pa dang mchod pa phul bas rab tu mnyes te 'od du zhu bas bdag gis bsgoms pa'i bum pa la thim nas gnyis su med par bsam mo/ /de ltar thim nas byang chub sems chos nyid kyi yon tan 'byung bar bsams te/byin gyis brlabs pa'i yon tan bum pa des/ gang zhig bkra mi shis pa la ye shes kyi 'od zer kha dog dkar po bstims nas khrus byas te zhi ba'i las byas na thams cad zhi bar 'gyur ro/ /gang zhig bdog pa nyams pa la ye shes kyi 'od zer kha dog ser po bstims nas khrus byas te rgyas pa'i las byas na thams cad rgyas par 'gyur ro//gang zhig tshe nyams pa la ye shes kyi 'od zer kha dog dmar po bstims nas khrus byas te/ dbang gi las byas na thams cad dbang du 'gyur ro/ /gang zhig yul dang mkhar shor ba dang /bgegs kyi cho 'phrul dang lha 'dre'i cho 'phrul gnod pa rnams la ye shes kyi 'od zer kha dog nag po bstims nas khrus byas te/ drag po'i las byas na thams cad phung nas 'jig par 'gyur ro/ /sgo ba'i don bshad zin to// //sangs rgyas kyi mthus lag na rdo rje zhes bya ba ni gong du khro bo'i rang bzhin bstan pa las/byang chub sems dpa' lag na rdo rje la dus gsum kyi sangs rgyas thams cad kyi thugs yang dag pa'i ye shes rdo rje lta bus byin kyis brlabs nas/ lag tu ye shes kyi rtags rdo rje byin nas ming gi dbang bskur te/srid pa gsum gyi mthu can zhabs 'og tu bsdus nas/ dam la btags pa'i phyir dang 'og gi khro bo'i sngags dang phan yon smra ba la gzhug pa'i phyir dang / de bzhin gshegs pas byin gyis brlabs nas che ba'i yon tan dang ldan pa'i lag na rdo rje de bzhin gshegs pa'i ye shes kyi tshig gis khams gsum gyi sems can la phan gdags pa'i phyir sku gsung thugs rdo rje las mtshon pa'i rtags thugs rdo rje'i dkyil 'khor gyi sngags 'di 'byung ba'i don to//sngags kyi don 'byung ba'i thabs bshad zin to// //da ni phyag na rdo rje'i phrin las kyi don bshad de/na mo rat+na tra yA ya zhes pa ni dkon mchog gsum la phyag 'tshal ba'i don to/ /phyag na rdo rje ni dkon mchog gsum gyi rang bzhin du gyur pas na ye shes las byung ba'i phyir ro/ /na mash+tsaN+Da badzra pA Na ye zhes pa ni rdo rje gtum po rin po che'i ngo bo phyag na rdo rje'i yang dag pa'i ye shes kyi snying po'o//ma hA yak+Sha se na pa ta ye zhes pa ni gnod sbyin gyi sde dpon chen po lag na rdo rje drag po la phyag 'tshal ba'i don te/ gnod sbyin rnams thugs rjes btul las de skad ces brjod do/ /tad+ya thA zhes pa ni 'di lta ste/ gang lta zhe na 'og nas 'byung ba'i sngags kyi tshig smras so//oM tra Ta tra Ta zhes pa ni ye shes lnga pos bdag gi nyon mongs pa thams cad sod cig pa'i don/ tro Ta ya tro Ta ya zhes pa ni phyag na rdo rje'i byin gyi rlabs kyis rab tu spyod cig legs par spyod cig pa'i don/ sbu Ta sbu Ta zhes pa ni nyon mongs pa'i las rnams ye shes kyi me 'bar bas sregs par gyis shig pa'i don/s+phoT ya s+phoT ya zhes pa byang chub kyi sems kyi rang bzhin gyis legs par 'bar bar gyis shig pa'i don/ g+hUr+Na g+hUr+Na zhes pa ni bdag gi bgegs rnams zung la sregs shig /ye shes mes mtshan ma bsreg pa'i don/ g+hUr+Na pa ya g+hUr+Na pa ya zhes pa ni thugs rjes lcags kyus zung la legs par sprod cig pa'i don/sarba satwa ni zhes pa ni sems can thams cad la thugs rje'i thugs kyis gzigs shig pa'i don/ /bo d+ha bo d+ha zhes pa ni khams gsum kyi sems can la byang chub tu sems rab tu bskyed cig pa'i don/ saM bod+ha ya saM bod+ha ya zhes pa ni 'gro ba rnams legs par byang chub tu sems bskyed cig pa'i don/b+h+ra ma b+h+ra ma zhes pa ni byang chub sems dang mi mthun pa'i bgegs rnams skrod cig pa'i don/ saM b+h+ra ma ya saM b+h+ra ma ya zhes pa ni phyin ci log gi nyon mongs pa rnams thugs rjes legs par skrod cig pa'i don/sarbab+hU ta ni zhes pa ni sangs rgyas thams cad kyi thugs rje chen pos bdag gi sdang ba thams cad choms shig pa'i don/ ku Ta ku Ta zhes pa ni gdon 'byung po rnams gtubs shig gtubs shig pa'am thugs rjes ye shes kyi spyan gyis gzigs shig pa'i don/ saM ku Ta ya saM ku Ta ya zhes pa ni 'jig rten na gdon bar chad byed pa rnams byams pa'i thugs kyis legs par gtubs shig pa'i don/sarba sha hUM ni zhes pa ni bdag la gnod pa byed pa'i bgegs rnams yang dag pa'i ye shes kyis mtshan ma med pa'i don yang bstan/ g+ha Ta g+ha Ta zhes pa ni bgegs dang 'byung po rnams thugs rjes skrod cig pa'i don/saM g+ha Ta ya saM g+ha Ta ya zhes pa ni legs pa'i yon tan thams cad 'byung bar byed pas na thugs rjes nyon mongs pa thams cad las thar bar gyis shig pa'i don/ sarba bid+yA zhes pa ni rig sngags kyi mthus gang la bya ba'i las thams cad grub par byed pa'i don/badzra badzra s+pho Ta ya zhes pa ni ye shes kyi rdo rje 'bar ba'i me chen po'i bgegs rnams rol cig pa'i don/ badzra badzra ka Ta zhes pa ni ye shes las grub pa'i rdo rje 'bar bas nyon mongs pa thams cad chod cig pa'i don/ badzra badzra ma Ta zhes pa ni byang chub kyi sems kyi rdo rjes bdag la gdug pa rnams gtubs shig pa'i don/badzra badzra mA tha zhes pa ni yang dag pa'i ye shes rdo rjes bgegs rnams thul cig pa'i don/ badzra badzra aT+Ta zhes pa ni ye shes las grub pa'i yang dag pa'i ye shes rdo rjes bdud rnams gnas der mi gnas par gyis la skrod cig pa'i don/hA sa nI la badzra zhes pa ni rdo rje rnon po me dang 'dra bas bag chags rnams chod cig drol cig pa'i don/ su badzra badzrA ya swA hA zhes pa ni thugs mkhyen pa'i rdo rje chos kyi dbyings rnam par dag pa la legs par sbyor cig pa'i don to/ /phyag na rdo rje'i phrin las kyi don bshad zin to // //da ni khro bo rnams kyi phrin las kyi don bshad de/ te phul+lu ni ru phul+lu zhes pa ni de ltar phyag na rdo rje thugs kyi ngo bo gsungs nas/ rdo rje khro bo la sbyor ba'i phyir rdo rje khro bo 'bar bas nyon mongs pa'i gshin rjes khams gsum pa rnams thugs rjes 'bar bar byed pa'i don/g+hi h+Na kul+lu zhes pa ni khams gsum gyi gshin rje gshed kyi sdug bsngal rnams 'joms pa'i don/ mi l+li tsul+li ku ru kul+lu zhes pa ni 'phags pa rta mgrin sngon po 'bar bas sdug bsngal sbyongs shig pa'i don/ badzra bi dza yA ya swA hA zhes pa ni khro bo bdud rtsi 'khyil pa 'bar bas nyon mongs pa thams cad bdud rtsir byin gyis rlobs shig pa'i don/kwi li kwi lA ya swA hA zhes pa ni Ar+ya a tsa las thugs kyi phrin las mdzad pa dang / stobs po ches drag shul gyi phrin las mdzad pa'i don/ ka Ta ka Ta zhes pa ni ya mAn+ta ka khro bo'i rgyal pos bdud rnams spa bkongs shig pa'i don/ma Ta ma Ta zhes pa ni khro bo hUM ka ras nyon mongs pa rnams las thugs rjes skyobs shig pa'i don/ ra Ta ra Ta zhes pa ni khro bo'i rgyal po pad+ma 'khyil pas nyon mongs pa rnams zhi bar mdzod cig pa'i don/ mo Ta na pra mo Ta nA ya swA hA zhes pa ni ye shes kyi gnod sbyin 'bar ba gshin rje gshed kyis skyobs shig pa'i don/tsa ra ni tsa ra zhes pa ni khro bo'i rgyal po nI la daN+Das bdag dang sems can thams cad la tshe dang dbang thang stsol cig pa'i don/ ha ra ha ra zhes pa ni ye shes kyi gshog pas 'khor ba'i sdug bsngal skyobs shig pa'i don/ sa ra sa ra zhes pa ni ting nge 'dzin gyi drag shul gyi sems nyams pa rnams dran par gyis shig pa'i don/mA ra ya mA ra ya zhes pa ni nyon mongs pa 'joms pa'i rdo rjes bgegs rnams sod cig pa'i ngang las drag pos rdul du thong shig pa'i don/ badzra bi dA ra Na ya swA hA zhes pa ni rdo rje rnam par 'joms pas sems can kyi las rnams mdzod cig pa'i don/ts+tshin+da ts+tshin+da zhes pa ni khro bo'i rgyal po ha ya kr-i bas nyon mongs pa rnams sod cig pa'i don/ b+hin+da b+hin+da zhes pa ni bdag dang sems can rnams kyi sdug bsngal shig cig ces pa'i don/ ma hA kI li kI lA ya swA hA zhes pa ni khro bo'i rgyal po stobs po ches las dang nyon mongs pa thugs zhi ba'i sgo nas zhi bar mdzod byug pa'i don/ban+d+ha ban+d+ha zhes pa ni Tak+ki rA dza ste khro bo'i rgyal pos gdug pa'i bdud rnams mgo nas chings shig pa'i don/ kro d+ha kro d+ha zhes pa ni khro bo'i khro bos nyon mongs pa rnams la rol cig pa'i don/kI li kI lA ya swA hA zhes pa ni byang chub sems kyi rang bzhin bdud rtsi 'khyil pas thams cad zhi bar mdzod cig pa'i don/ tsu ru tsu ru zhes pa ni khro bo rgyal po a mo g+ha pA shas dam tshig bzhin du phrin las mdzod cig pa'i don/ tsaN+Da zhes pa ni khro bo'i rgyal po tshur spyon tshur spyon dam tshig la dgongs pa'i don/badzra kI li kI lA ya swA hA zhes pa ni bdud rtsi 'khyil pas thugs tshad med pa'i gsung sgras thams cad byang chub sems su zhi bar mdzod cig pa'i don/ trA sa ya trA sa ya zhes pa ni khro bo'i rgyal po ma hA ba las bdud dang bgegs byed rnams skrag par gyis shig pa'i don/badzra kI li kI lA ya swA hA zhes pa ni ye shes kyi rdo rje 'bar bas thams cad zhi bar mdzod cig pa'i don/ ha ra ha ra badzra d+hA rA ya swA hA zhes pa ni rdo rje ye shes 'bar ba'i sgo ba bzhis bgegs rnams skyogs shig skyogs shig ba'i don/ pra ha ra pra ha ra zhes pa ni khro bo'i rgyal po a mr-i ta kuN+Da lis mtshan ma'i dngos po thams cad zhi bar mdzad nas byin kyis rlobs shig pa'i don/badzra pra b+hany+dza nA ya swA hA zhes pa ni byang chub sems kyi rang bzhin rdo rje 'bar bas las dang nyon mongs pa'i bag chags thams cad zhi bar mdzod cig pa'i don/ khro bo rnams kyi phrin las kyi don bshad zin to// //da ni khro bo rnams kyi bsrung ba'i don te/ ma tis+thi ra badzra zhes pa ni blo brten pa'i rdo rjes byang chub sems kyi rang bzhin dang ldan par gyis shig pa'i don dang / su tis+thi ra badzra zhes pa ni shin tu brtan pa'i rdo rjes legs pa'i yon tan thams cad rdo rje lta bu zhi ba dang ldan par gyis shig pa'i don/pra tis+thi ra badzra zhes pa ni so sor brtan pa'i rdo rjes bdag gi lus rdo rje lta bur zhi bar mdzod cig pa'i don/ ma hA badzra zhes pa ni rdo rje chen po zhi ba'i tshul du bdud las rgyal bar mdzod cig pa'i don/ pra tis+thi ra badzra zhes pa ni rab tu brtan pa'i rdo rjes bdag la ye shes kyi mtshon cha spyod cig pa ste/gzhan gyi gti mug gzhom ba'i phyir ro/ /a mo g+ha badzra zhes pa ni don yod pa'i rdo rje'i zhags pas ma gtang ba'i don/ e hi badzra zhes pa ni bden pa'i rdo rjes bdag 'khor ba las drongs shig tshur gshegs tshur gshegs pa'i don/ shrI g+haM badzra d+hA rA ya swA hA zhes pa ni dpa' bar 'gro bas rdo rje la gor rgyug pa'i phyir bdag gi las grub par mdzod cig pa'i don/d+ha ra d+ha ra zhes pa ni sgo bzhi srung ba bshad de/ byang chub kyi rang bzhin zhi ba thams cad khyer la gzungs su gyis shig pa'i don/ d+hi ri d+hi ri zhes pa ni dbyings kyi rang bzhin chos nyid kyis legs par thogs shig pa'i don/d+hu ru d+hu ru zhes pa ni lus thams cad thugs rjes rab tu zung la thogs shig pa'i don/ sarba badzra ku laM A brta ya swA hA zhes pa ni rdo rje dang bcas pas bdag la byin gyis rlobs shig /gnod pa byed pa'i bye brag thams cad rab tu zhi bar mdzod cig pa'i don/ a mu kaM mA ra ya phaT ces pa ni bdag dus ma yin pa'i 'jigs pa las zlogs shig /bdud rnams kyi 'jigs pa las choms shig pa'i don no/ /khro bo dang sgo srung ba bshad zin to// //da ni khro bo'i ngo bo nyid bstan te/ na maHsa man+ta badzA hUM zhes pa ni kun du bzang po ye shes kyi rdo rjes rang bzhin gyis dbang po'i don to//sarba ba laM zhes pa ni thams cad kun gyi rang bzhin stobs po ches dbang bskur cig pa'i don/ A brta ya ma hA ba le zhes pa ni mnyes par byed pa'i stobs po che mgyogs pa rlung dang 'dra bas dbang bskur ba'i don/ ka ta be+e ta ta le zhes pa ni ye shes kyi mche bas nyon mongs pa'i bdud thul cig pa'i don/a tsa le zhes pa ni khams gsum rnam par rgyal ba'i dkyil 'khor kyi mnga' bdag gi sprul pas bdag la dbang bskur la skyobs shig pa'i don/ maN+Da la mA ye zhes pa ni dkyil 'khor gyi srung ma rnams kyi sprul pa'i ngo bo nyid kyi che ba sna tshogs su snang ba'i don/a ti badzra zhes pa ni rdo rje bzang pos gdon thams cad las bdag la skyobs shig pa'i don/ ma hA ba le bi ga ra Na zhes pa ni stobs po che rlung dang 'dra ba mgyogs pas bdag la gnod pa thams cad zhi bar mdzod cig pa'i don/ a dzi te dz+wa la dz+wa la zhes pa ni yang dag pa'i ye shes kyi shes rab kyis bdud kyi dregs pa rnams sregs shig pa'i don 'bar ba 'bar bas nyon mongs pa sregs shig pa'i don/ti Ti ti Ti piM ga le zhes pa ni 'bar ba skam po so sor 'bar bas sdug bsngal las skyobs shig pa'i don/ da ha da ha zhes pa ni bdag gi nyon mongs pa rnams sregs shig yang dag pa'i ye shes 'bar bar gyis shig pa'i don/te dzo ba ti zhes pa ni yang dag pa'i ye shes kyis gti mug gi mun pa las 'bar bar gyis shig pa'i don/ ti li ti li zhes pa ni bdag gi sdug bsngal thams cad chod cig pa'i don/ ban+d+ha ban+d+ha zhes pa ni bgegs 'byung po rnams chings shig pa'i don/ma hA ba le zhes pa ni stobs po ches las mdzod cig pa'i don/ badzAM ku sha dz+wA lA ya swA hA zhes pa ni rdo rje me dang 'dra bas mtshan ma thams cad zhi bar mdzod cig pa'i don/ khro bo'i ngo bo dbang gi don bshad zin to// //da ni ye shes kyi khro bo lag na rdo rjes mtshan ma 'joms pa dang thugs khro bo'i ye shes kyi snying po las rnam bzhi'i rang bzhin de dkon mchog gsum la phyag 'tshal ba'i don byas phyag na rdo rje'i bdud rtsi'i ngo bo'o//na mo rat+na tra yA ya/ na mash+tsaN+Da badzra pA Na ye zhes pa ni khams gsum gyi gnod sbyin rnams 'dul ba'i phyir na phrin las khro bo'i tshul du bzhugs pas rdo rje khro bo bstan/ma hA yak+Sha se nA pa ta ye zhes pa ni gnod sbyin gye sde dpon lag na rdo rjes ye shes kyi ngo bo zhes gsungs pa'i phyir ro/ /oM ha ra ha ra badzra zhes gsungs pa ni ye shes lnga'i ngo bo phyag na rdo rje dbus na bzhugs te/ lus ni gnod sbyin du bstan pa'i don/ma tha ma tha badzra zhes pa ni hUM ka ra gshin rje gshed kyi don rgyal por bstan pas snying po'i rang bzhin no/ /d+hu na d+hu na badzra zhes pa ni mtshan ma'i dngos po thams cad 'joms pas khams gsum rnam par rgyal ba'i snying po'o/ /da ha da ha badzra zhes pa ni ya mAn+ha ka khro bo'i rgyal po'i snying po byang chub sems kyi rang bzhin no//pa tsa pa tsa badzra zhes pa ni nI la daN+Da'i rang bzhin rta mgrin sngon po'i rang bzhin du bstan/ d+ha ra d+ha ra badzra zhes pa ni ha ya gr-i ba'i rang bzhin sngags kyi sa bon byang chub sems kyi ngo bo'i snying po'o/ /dA ra ya dA ra ya badzra zhes pa ni bdud rtsi 'khyil pa'i snying po'i rang bzhin byang chub sems kyis mtshon pa'i rang bzhin no//dA ru Na dA ru Na badzra zhes pa ni yang dag pa'i ye shes kyi stobs dang ldan pas/ a mo g+ha pA sha'i rang bzhin byang chub sems kyi snying por bstan/ ts+tshin+da ts+tshin+da badzra zhes pa ni ma hA ba la dang / hUM ka ra gnyis kyi rang bzhin du bstan/ b+hin+da b+hin+da badzra hUM phaT ces pa ni pad+ma 'khyil pa'i rang bzhin te/ye shes kyi phyag rgya bzhis sdoms shig pa'i rang bzhin te/ khro bo'i rang bzhin bshad zin to// //da ni phyag btsal ba'i don te/ na mash+tsaN+Da badzra kro d+ha ya zhes pa ni phyag btsal ba'i don te a mr-i ta kuN+Da li'i snying po/ phyag na rdo rje gtum po bsgrub pa'i don pas rdo rje khro bo zhes pa'i don to//da ni sgo ba'i don bstan te/ hu lu hu lu zhes pa ni bgegs dang 'byung po rnams tshul bzhin du drongs shig pa'i don/ shar phyogs kyi khro bo aM ku sha'i me long lta bu'i ye shes kyi phyag rgya'o/ /tiSh+Tha tiSh+Tha zhes pa ni chings shig chings shig pa'i lho phyogs kyi sgo ba zhags pa ste/ mnyam pa nyid kyi ye shes kyi phyag rgyas nyon mongs pa rnams dbang du sdus shig pa'i don to//ban+d+ha ban+d+ha zhes pa ni nub phyogs kyi sgo ba lcags sgrog ste/ so sor kun du rtog pa'i ye shes kyi phyag rgya ste lcags sgog gis bgegs dang 'byung po rnams sdoms shig pa'i don/ ha na ha na zhes pa ni byang phyogs kyi sgo ba dril bu ste/bya ba nan tan gyi ye shes kyi ngo bos bgegs dang 'byung po log lta rnams rdul du rlog shig pa'i don/ a mr-i te hUM phaT ces pa ni/ dkyil 'khor gyi sngags gong du gsungs pa dang sngags 'byung ba rnams ye shes kyi ngo bo bas las kyi kha bskang ba'i phyir bdud rtsi'i ngo bor byin kyis brlab pa'i thabs su shes par bya'o// //de ltar khro bo rnams kyi don bshad nas de'i 'og tu yon tan gyi rnam grangs cho ga'i thabs kyi bye brag bstan te/ sdug bsngal thams cad las thar bar byed pa'o/ /sdig pa thams cad byang byas nas/ /zhes pa ni don rnam pa gnyis su shes par bya ste/ rgyud kyi don la 'jug par bya ba'i phyir sdog pa thams cad byang bar bya ba dang /rgyud kyi don rtogs pas sdig pa thams cad byang ba dang / de ltar don gnyis su shes par bya'o/ /rgyud kyi don la 'jug par bya ba'i phyir sdig pa thams cad sbyong bar byed pa ni nyon mongs pa'i sgrib pa dang / las kyi sgrib pa dang / rnam par smin pa'i sgrib pa dang / chos kyi sgrib pa dang / lta ba log pa la sogs pa rnams dkyil 'khor gyi lha rnams spyan drangs nas mdun gyi bar snang la gsal bar byas te/ mchod pa phul la 'gyod pa bskyed du gzhug go/ /yan lag lnga sa la gtugs la/ sems rtse gcig tu gus pa dang ldan par byas te/byang chub mchog tu sems bskyed de/ sta gon la gnas pa'i cho ga bya/ de nas 'phags pa rnams la mkhyen pa gsol zhing sdig pa rnams la 'gyod pa bskyed pa'i don rgyud kyi don rtogs nas sdig pa sbyang ba ni dkyil 'khor du bcug nas lha'i gral rim dang / bzhugs thabs dang / sku mdog dang rgyan chas dang bstod pa dang / mchod pa'i bye brag dang / rgyud kyi don bstan te sems grol nas sdog pa byang bar gsungs/ de ltar sdig pa sbyang ba byas te/ de'i 'og tu 'bras bu yon tan thams cad dang ldan pa'i don te/ ci'i phyir zhe na/sdug bsngal thams cad med par byed/ /ces gsungs te/ de ltar rgyud don nyams su blangs te/ bsgrubs pas nyon mongs pa'i sdug bsngal gsum dang brgyad la sogs pa sdug bsngal gyi bye brag thams cad med par mdzad pas de skad gsungs/ de'i 'og tu rgyud thams cad kyi rtsa ba'i don yin pa ston te/ci'i phyir zhe na/ rgyud do cog gi rtsa ba ste/ /zhes gsungs te/ ston pa'i zhal nas gsungs pa'i rgyud de thams cad kyi rtsa ba rdo rje lta bu'i ting nge 'dzin yin pas don gyi rtsa ba yin par gsungs/ de'i 'og tu rgyud kyi don gyi dpal gyi gzhir 'gyur ba'i thabs ston te/ ci'i phyir zhe na/ dpal kun gyis ni legs par brgyan/ /zhes gsungs te/ dpal ni 'jig rten dang 'jig rten las 'das pa'i legs pa'i yon tan thams cad la bya/ kun ni dus gsum gyi rgyal ba sras dang bcas pa thams cad kyang 'di'i don rtogs pa las byung ba'i tha tshig go/ / de lta bu'i don de ni nyes pa thams cad spangs shing / yon tan thams cad kyi phul du phyin pa'i rgyu yin pas legs par brgyan zhes pa'i don to/ /de'i 'og tu sems can dbang po nyams pa la phan pa'i thabs ston te/ ci'i phyir zhe na/ sems can dbang po nyams pa dang / /zhes gsungs te/ sems can gyi rgyal po stobs ldan snying po la sogs te/ khams gsum gyi sems can kun la bya ba'i tha tshig go/ /de rnams la dbang po nyams pa'i skyon bco brgyad yod de/ de bzlog pa'i thabs ni rgyud kyi rgyud nas 'byung ba'i phrin las rnam bzhi tshang bar byas nas sbyang ba'i phyir ro/ /de'i 'og tu tshe nyams pa gso ba'i thabs ston te/ci'i phyir zhe na/ tshe zad pa dang tshe nyams dang / /zhes gsungs te/ de ni srog go/ /zad pa ni med pa ste/ tshe zad pa'i snga ltas lnga yod pa la/ de gso ba'i thabs ni dkyil 'khor gyi lha rnams spyan drangs nas sngags dang phyag rgya rnams kyis dbang bskur nas sos par gsungs/de'i 'og tu bdog pa nyams pa spel ba'i thabs ston te/ de ci'i phyir zhe na/ phun sum tshogs med gang chags dang / /zhes gsungs te/ khams gsum gyi sems can rnams bde ba dang bral te/ nyon mongs pa'i sdug bsngal bkres grang la sogs pa gnod pa'i bye brag rnams kyis bde ba mi 'chags te/sdug bsngal chags pa de sbyang ba'i thabs ni dkyil 'khor gyi lha rnams spyan drangs te rgyas pa'i las byas na/ bde ba phun sum tshogs pa dang ldan pa'i tha tshig go/ /de'i 'og tu nyon mongs pa'i phyogs kyis 'jig rten pa'i lha mi dga' ba ston te/ci'i phyir zhe na/ lha rnams rgyab kyis phyogs pa dang / /zhes gsungs te/ rgyal ba'i spyan sngar dam tshig mnos pa las/ gzhung dang ma mthun pas mya ngan las 'das pa'i lha 'phags pa rnams ma mnyes pa dang / kun rdzob kyis mi mthun pa'i phyogs pas lha rnams 'phongs pa dang / de la sogs te lha rnams rgyab kyis phyogs pa de rnams zhi bar bya ba'i tha tshig ni/bdag nyid las kyi lha'i ting nge 'dzin du zhugs te/ las bya ba'i lha dang / mchod rdzas la sogs pa 'od dang / kha dog dmar por bsgyur te/ chags pa'i tshul gyis dbang gi las byas na 'grub par gsungs/ de'i 'og tu lha mi dga' ba'i snga ltas ston te/ci'i phyir zhe na/ mdza' sdug skye bo sdang ba dang / /zhes gsungs te/ lha phongs pa'i snga ltas bdag la mdza' bo dang / 'khor la sogs pa rnams bsam pa dang mi mthun pa'i phyogs zhe sdang dang ngan sems la sogs pa'i byad stems rnams drag po'i las byas na 'grub par gsungs/de'i 'og tu 'khor la gnod pa ste/ ci'i phyir zhe na/ bram ze la sogs gtses pa dang / /zhes gsungs te/ rgyal po stobs ldan snying po dang / khams gsum gyi sems can g.yog bran dang / bza' mi la sogs pa la gnod sbyin dang bdud la sogs pas gtses pa'i rgyus rang re'i mi mthun pa la las byas na 'grub par gsungs/de'i 'og tu mi mthun pa ston te/ ci'i phyir zhe na/ phan tshun mthun pa ma yin pa dang / /zhes gsungs te/ gdon 'byung pos byin gyis brlabs pa'i mthus/ sems can rnams la phan tshun mi mthun te/dgra bo lta bur sems pa zhi ba'i las byas na 'grub par gsungs/ de'i 'og tu bdog pa nyams pa ston te/ de ci'i phyir zhe na/ nor 'gribs pas ni gnod pa dang / /zhes gsungs te/ bdag gi bdog pa phun sum tshogs pa nyams nas phongs pa ste/ gzhan la rag lus nas bdag nyon mongs pa la/rgyas pa'i las byas na bdog pa yod par gsungs/ de'i 'og tu mya ngan gyi gnod pa ston te/ ci'i phyir zhe na/ mya ngan ngal las gnod pa dang / /zhes gsungs te/ khams gsum gyi sems can rnams sems kyi mya ngan sna tshogs dang ldan pas lus rab tu ngal te/sdug bsngal rnams kyis rab tu gzir ba la mya ngan gyi cho 'phrul la sogs pa zhi ba'i las byas na 'grub par gsungs/ de'i 'og tu 'jigs shing phongs pa ston te/ ci'i phyir zhe na/ 'jigs pa dang ni phongs pa dang / /zhes gsungs te/ sems can rnams rgyal po'i chad pa'i 'jigs pa dang /gnam lcags kyis 'jigs pa dang / rkun pos 'jigs pa dang me dang chus 'jigs pa dang / mtshon chas 'jigs pa dang / dug gis 'jigs pa dang / skar mda' ltung bas 'jigs pa dang brgyad do/ /gzhan yang mgon skyabs med cing phongs pa'i bye brag rnams phrin las rnam bzhi'i las byas na 'grub par gsungs/de'i 'og tu byad stems bshad de/ ci'i phyir zhe na/ gza' dang rgyu skar byad stems dang / /zhes gsungs te/ 'jig rten gyi khams su gza' chen po brgyad dang / rgyu skar nyi shu rtsa brgyad la sogs pa so so'i byad stems kyi 'dzam bu'i gling gi sems can rnams la mi nad dang phyugs nad dang /chom rkun dang mdangs 'phrog pa la sogs pa gnod pa'i bye brag rnams la/ phrin las rnam bzhi'i las byas na 'grub par gsungs/ de'i 'og tu gdon gyis nyen pa ston te/ ci'i phyir zhe na/ mi bzad gdon gyis nyen pa dang / /zhes gsungs te/ 'jig rten gyi sems can rnams la phung po dang khams ma snyoms pa dang / sems kyi rnam par rtog pa nyon mongs pa'i gdon dang / gzhan yang bi nA ya ka la sogs pa'i gdon stong phrag brgyad cu rtsa bzhis nyen pa la/ phrin las rnam bzhi'i las byas na 'grub par gsungs/ de'i 'og tu mya ngan ngal las byung ba'i rmi lam ston te/ci'i phyir zhe na/ mya ngan ngal las byung ba yis/ /mi lam sdig pa mthong na yang / /zhes gsungs te/ nyon mongs pa'i sems can phyin ci log gi lta ba'i bag chags kyi mya ngan kyis gdungs pa langs pa'i rgyus lus dang sems ngal zhing thang chad pas blo gtibs pas/gnyid log pa'i rmi lam la ltas ngan gyi rmi lam sdig pa'i bag chags las byung ba dmyal bas bsregs pa la sogs pa'i rmi lam sum cu rtsa gnyis rmis pa rnams phrin las rnam bzhi'i las byas na 'grub par gsungs/ de'i 'og tu cho ga'i thabs ston te/ ci'i phyir zhe na/des ni rab bkrus gtsang ma yin/ /mdo sde dam pa mnyan par bya/ /zhes gsungs te/ slob dpon slob ma sta gon la gnas par bya ba dang / lha dang mi sta gon la gnas par bya ba dang / rdzas dang yo byad la sogs pa sta gon la gnas pa'i cho ga'o/ /de'i 'og tu slob dpon gyis dkyil 'khor gyi cho ga rdzogs par byas la/bdud rtsi'i bum pas slob ma la sogs pa'i spyi bo nas dbang bskur zhing khrus bya ba ni phyi nang gi dri ma bkru ba'o/ /de ltar bdud rtsi'i bum pas nyon mongs pa rnams gtsang bar byin gyis brlabs nas/ de nas byang chub tu sems bskyed de/ mdo sde'i don bshad cing nyan du bcug la/bsgom pa'i lung dbog cig lha'i ngo bo bstan pa'i tha tshig go/ /de'i 'og tu phyi nang gi chos bstan te/ de yang ci'i phyir zhe na/ gang dag yid dge sems dang zhing / /gtsang ma'i gos kyis rab brgyan te/ /zhes gsungs te/ slob ma gzhi dad pa dang ldan zhing /yid dge ba la sems dang zhing spyod pa tshang ba dang / dka' blo bde ba la ngo rtag pa de lta bu'i de sems kyi dri ma dang bral bar byas te/ de nas slob dpon gyis slob ma la de lta bu la ni ras sam dar dkar po la sogs pa'i gos gtsang ma bkon la dri zhim po'i me tog gi cod pan la sogs pa'i rgyan mang pos brgyan la/phyi nang gi rgyan gyis lus sems mdzes par brgyan la/ de'i 'og tu theg pa chen po'i chos nyan pa'i yon tan bstan cing bskul ba gdab ste/ ci'i phyir zhe na/ zab mo sangs rgyas spyod yul ba/ /mdo sde 'di ni nyan byed na/ /zhes gsungs te/ dus gsum gyi sangs rgyas thams cad kyi mkhyen pa'i ye shes kyi rang bzhin rdo rje rnam par 'joms pa'i mdo'i don zab pa rgya che ba sangs rgyas nyid kyi spyod yul/mdo sde thams cad kyi snying po 'di theg pa chen po'i rigs can/ slob pa'i rgyun la zhugs pa gang zhig gis mnyan par byed pa dang klog cing 'dzin pa dang /gzhan la don nyams su len pa'i yon tan slob dpon gyis slob ma la bstan te/ de ltar bstan nas de'i 'og tu nyan pa'i bsod nams kyi phan yon ston te/ ci'i phyir zhe na/ mdo sde 'di yi gzi brjid kyis/ /srog chags dag ni thams cad kyi/ /zhes gsungs/mdo sde 'di mnyan cing nyams su blangs pa'i yon tan gyi gzi brjid kyis/ khams gsum gyi sems can rnams kyi nyon mongs pa'i rnam par rtog pa dang sdug bsngal gyi bye brag rnams la phan pa'i tha tshig go/ /ci'i phyir zhe na/ mi bzad pa yi nad rnams kyang / /de dag thams cad zhi bar lta//zhes gsungs te/ khams gsum gyi sems can rnams la las dang nyon mongs pa'i bag chags rgyu dang 'bras bu'i tshul bzhin du mi bzad pa'i nad kyi rang bzhin pas/ de zhi bar bya ba gong du gsungs pa ltar bya ba'i tha tshig go/ /de ltar gnod pa zhi nas de'i 'og tu bde ba thob pa'i thabs ston te/de ci'i phyir zhe na/ tshe dang bsod nams 'phel bar 'gyur/ /sdig pa kun las rnam par thar/ /zhes gsungs te/ sems can las kyi bag chags kyi mthus tshe zad cing 'chi ba la sogs pa la mdo'i don mnyan pas bsgom pa'i tshul ma nor bar byas na tshe dang bsod nams tshad med pa 'phel bar 'gyur zhing /nyon mongs pa'i sdig pa thams cad las thar bar 'gyur ba'i tha tshig go/ /cho ga'i thabs dang phan yon bshad zin to// //da ni bum pa'i cho ga'i rkyen bstan te/ ci'i phyir zhe na/ nor bu yungs kar dUr ba dang / /zhes gsungs te/ nor bu ni mu tig dang / byi ru dang / gzi dang / mchong dang / rin po che dang zhes bya ba'i tha tshig go/ /yungs kar ni 'bru sna lnga'i gtso bo ste/ de'i khongs su bsdu ba ni/ nas gro til 'bras mon sran la sogs pa'o/ /drur ba ni kha rgyan gyi don te/ de'i khongs su bsdu ba ni byA gri sing gri tsan+dan la sogs pa dri zhim po'i shing tsan+dan la sogs pa yal ga dang bcas zhes pa'o//da ni rin po che lnga dang snying po ston te/ rin chen rma med tsan+dan bcas/ /zhes pa ni rin po che ni rnam pa lnga ste/ bai DUr+ya dang / gser dang / shel dang / in dra nI la dang / byi ru zhes pa'i don no/ /rma med pa ni de rnams la skyon la sogs pa med pa'o//tsan+dan ni gla rtsi dang gur gum dang / spos dang / tsan+dan dang / a ka ru la sogs pa'i bye brag smos pa'i don to/ /shel dang rdo rje me tog dang / /zhes pa ni shel dang rdo rje gnyis ni snying por shes pa'i don no/ /shel ni me shel dang chu shel gnyis kyi don no/ /da ni snying po phyi ma gsum gyi don ston to//'o ma'i snying po mar dang / shing gi snying po bu ram dang / me tog gi snying po sbrang rtsi zhes pa'i don no/ /me tog ni bum pa'i gdan gyi tha tshig go/ /dbyar ni me tog gi dkyil 'khor bya/ dgun ni tshon sna lnga'i dkyil 'khor pad+ma la sogs pa la bya ba'i don to/ / gzhan du bum pa'i kha rgyan te/ me tog la sogs pa dag gis kha rgyan bya ba'i phyir smos so/ /chu yi gser ram yang na ni/ /dngul gyi bum pa dag kyang rung / /gtsang ma'i gos kyis dkris shing dgang / /zhes pa ni bum pa'i rgyu ste/ rgyal po ni gser gyi bum pa bya/ blon po ni dngul gyi bum pa kyang ni tshig gi lhag ma can te/'bangs phal pa ni zangs dang lcags la sogs pa'i bum pas bya ba'i don to/ /gzhan du na phrin las so so'i bye brag tu shes par bya'o/ /gtsang ma'i gos ni ras kha tshar ma nyams pa ting nge 'dzin kyis byin gyis brlab rtsa pa'i tha tshig go/ /de'i 'og tu grangs ston te/ci'i phyir zhe na/ lan grangs nyi shu rtsa gcig gam/ /yang na lan grangs brgya rtsa brgyad/ /rdo rje rnam 'joms bzlas na ni/ /zhes gsungs te/ grangs kyi don te/ 'bangs kyi ni nyi shu rtsa gcig la sogs te/ ji tsam 'byor pa'o/ /blon po ni brgya rtsa brgyad la sogs pa ste/ 'grub tshad do/ /rgyal po ni bsod nams che bas tha ma brgya rtsa brgyad do/ /blon po tha ma nyi shu rtsa gcig gam/ 'bangs kyi tha ma bdun no/ /de ni grangs kyi bsnyen pa'o/ /mtshan ma'i bsnyen pa dang / tshig dang don bzlog pa ni rang bzhin gyis shes par bya ba'i tha tshig go/ /de'i 'og tu khrus bya ba'i dmigs ston te/ci'i phyir zhe na/ rgyal po rtag tu khrus gyis shig /ces gsungs te/ rgyal po stobs ldan snying po la sogs pa rgyal po'i rigs su gtogs pa rnams so/ /rgyal po sna la smos pa ci'i phyir zhe na/ bsod nams che bas byas pa sna la smos pa'i phyir ro/ / des thams cad bde ba'i phyir ro/ /'bangs ni rgyal po'i 'khor bas don gyis shes par bya ba'i tha tshig go/ /mdo yi don gyi dgongs pa la/ /rigs pa'i tshul kyis 'di gzhung 'chad/ /'phags pa rnams la bzod par gsol/ /'di grub brtsams pas de grub shog /rdo rje rnam par 'joms pa'i gzungs kyi don rnam par bshad pa/