CLOSE WINDOW

D2682
བོད་ཡིག

/ //[ ]@##/ /rgya gar skad du/ Ar+ya badzra bi dA ra Na nA ma d+hA ra Ni byA khyA na br-it+ti TI kA/ bod skad du/ 'phags pa rdo rje rnam par 'joms pa'i gzungs rnam par bshad pa'i rgya cher 'grel pa/ 'jam dpal gzhon nur gyur pa la phyag 'tshal lo/ /gnyis ka rgyud kyi man ngag snying po'i don//rnam par bshad pa'i don 'di gsal ba'i phyir/ /'gro don rnam par mdzad la phyag 'tshal te/ /'di yi rnam bshad 'grel pa bya bar 'dod/ /'di don gleng gzhi sgrub thabs bshad pa rnams/ /ston pa'i rang bzhin 'dul dbang bstan pa ste/ /mdor bsdus dkyil 'khor sgrub thabs khyad par dag /rab tu bsdus nas bstan pa'i dgos pa yin/ /'di brtsam par bya ba'i don bshad par dam bca' ba bstan pa ni/ /rgyal ba kun gyi gsang ba'i mdzod 'dzin pa/ /rgyud kyi don byung ston pa'i ngo bo la/ /sgo gsum dang bas btud te phyag 'tshal te/mdo yi rnam bshad bdag gis bya bar 'dod/ /ces smos pa ni thugs kyi rgyud 'di gsungs pa'i ston pa de la brtsams pa mthar phyin par bya ba'i phyir phyag 'tshal zhing bstod nas bshad par dam bca' bar bya ba'i phyir smos pa don dgrol ba'i man ngag bstan pa'o/ /gong 'og gi mtshams sbyar ba ni//de la dang por rgyud kyi don la mos pa dang zhes pa dang / go rims la 'jug pa'i phyir ro zhes pas ni las dang po pa rdo rje rnam par 'joms pa la rab tu mos pa rnams la rigs pas phun sum tshogs pa lnga dang / ston pa'i rang bzhin dkyil 'khor dang //sgrub thabs su bstan pa'i thabs kyi don gyi go rims kyi khyad par shes nas sgrub pa'i phyir smos so/ /gang yin pa bstan pa'i dgongs pa ni/ /de la dang por mdo'i mtshan gyi don zhes pa ni dbang po rab mgo smos pas go ba'i dbang du bstan to/ /de la rdo rje ni yang dag pa'i ye shes kyi tshig bla dgas te zhes pa dang /dngos po dang bral ba'i don to zhes pa'i bar ni don las mtshan du btags pas na chos nyid rtogs pa ni ye shes te/ ye shes kyi tshig bla dgas su rdo rje bstan la/ des phyi rol gyi mu stegs dang / nyan thos rnams skyon du bstan nas mtha' dang bral ba'i rtags so//de ni mi mthun pa'i rnam par ni rgyu med pa dang smos pa'i phyir ro zhes pa'i bar gyis bstan te/ mu stegs rgyu med pa dang / dbang phyug chen po rgyu dang rkyen gyis bskyed pa dang / mu stegs rtag par lta ba dang / nyan thos kyis mi rtag par lta ba dang / so so'i skye bos bde bar lta ba dang / nyan thos kyis sdug bsngal bar lta ba'i mtha' sel ba'i don du bstan to/ /de'i gnyen po don du bstan pa ni 'joms pa zhes bstan to/ /rgyud kyi ston pa'i ye shes kyis 'joms pa'i rtags dang / de sgrub pa'i thabs dkyil 'khor dang /sgrub thabs kyi khyad par gyis 'joms pa'i phyir ro/ /gnyen po dang mi mthun pas gzungs ni mi 'da' ba'i phyir dang / gnyis su med pa'i don zhes pa ni/ gnyen po don las mi 'da' ba'i phyir dang / gnyen po dang mi mthun pa gnyis su med par bsgom pa'i don to//dgos 'brel bsten pa ni/ de ltar mdo'i dgos ched rnams bstan nas/ de'i don rnams dgos pa dang 'brel pa'i don ston te zhes pa ni/ dgos pa rgyud dang 'brel pa phun sum tshogs pa'i sgo nas dkyil 'khor dang / sgrub thabs dang / dbang dang / dam tshig dang / lta spyod du 'brel pa'i don du smos so//phun sum tshogs pa'i dgos pa ni de las dgos pa mi 'gal bar ston pa'i ston pa dang / gang du bshad pa'i gnas dang / yongs su dag pa'i 'khor dang / tha tshig ces pa'i bar ni rgyud dang mdo sde thams cad lung yin pas sngags dang / pha rol tu phyin pa'i don byung ba ni phun sum tshogs pa rnam pa lnga'i sgo nas rab tu smos pa'i phyir ro//dgos pa phun sum tshogs pa'i sgo nas ni de la 'brel ba ni zhes pas bstan te/ don ni phun sum tshogs pa rnam pa drug dang lnga'i sgo nas rgyud kyi don gtan la 'bebs pa'i phyir ro/ /don shes par bya ba'i dngos po ni/de'i 'og tu ji ltar yongs su shes par bya ba'i dang zhes pa nas phyir ro zhes pas bstan te/ phun sum tshogs pa dang rgyud 'brel pa dang / rgyud dang dkyil 'khor/ dkyil 'khor dang sgrub thabs so/ /'di bsdus pa'i don ni de ltar dang / smos pa'i phyir ro/ /zhes pa'i bar te dgos 'brel gyi sgo nas bstan pa yang go rims dang /bsdus pa'i don du bstan pa bcom ldan 'das kyis 'da' kar kun dga' bo la gsungs pa'o/ /ston pa sangs rgyas bcom ldan 'das dang / rab tu thos pa'i phyir zhes pa'i bar ni bcom ldan 'das sangs rgyas pa ni rdo rje lta bu ste/bdud rnam bzhi byang chub kyi snying po ga la bar btul nas gsungs pa'i don du bstan pa'i tha tshig go/ /de ni 'di skad bdag gis thos pa dus gcig na dang zhes bya'o/ /zhes pa'i bar ni ston pa sangs rgyas bcom ldan 'das ni gsung ngag la mnga' brnyes pa na/ gdul bya so so'i skad du chos rnams go bas ston pa thugs rje che ba dang /sdud pa thos pa che bas don 'di ldem dgongs su bstan to/ /bcom ldan 'das rdo rje la bzhugs te dang / chos ston pa'i tshul du bzhugs so/ /zhes pa'i bar ni de bzhin gshegs pa rdo rje gdan du mngon par sangs rgyas pa'i dus der byang chub kyi snying po ga la ba der sangs rgyas nas bdud 'dul ba'i dus su gnyis ka rgyud thugs kyi don 'di gsungs pas smos pa'i phyir ro//de'i dus gsum gyi sangs rgyas thams cad kyi phrin las pa ni/ da ni byin gyi rlabs kyi ston pa ste/ dus gsum gyi sangs rgyas pa dang / snyoms par zhugs pa'i phyir ro zhes pa'i bar ni sngon 'das pa'i bskal pa grangs med pa'i dus su de bzhin gshegs pa rin chen mang zhes bya ba 'jig rten du byung ngo //dus de'i tshe na rgyal po chen po dpa' bo zhes bya ba gling bzhi la dbang byed par sras rgyal bu stong du tshang ba byung bas/ kun byang chub tu sems bskyed pa'i tha ma phyag na rdo rje 'di yin pas na/dus der smon lam chen po rnams kyis bstan pa la gnod pa'i bdud 'dul zhing / sku dang gsung dang thugs gsang ba'i mdzod 'dzin pas smos te/ 'di yang byang chub kyi snying po la bdud btul nas chos ston pa'i tshe mnga' bdag tu dbang bskur bas de bzhin gshegs pa thams cad kyis byin gyis brlabs nas dbang bskur ba'i don to//lus thams cad rdo rjer byin gyis brlabs nas dang / byin gyis brlabs pa'i phyir ro/ /zhes pa'i bar ni lag na rdo rjes sngon gyi bdag gi smon lam gyis mi mjed kyi 'jig rten gyi khams 'di sangs rgyas shAkya thub pa'i las rnams bya ba'i phyir smos so//rdo rje'i ting nge 'dzin la snyoms par zhugs so zhes pa'i bar ni bcom ldan 'das dang po sangs rgyas pa yang rdo rje lta bu ste/ de dang mthun pa'i sgo nas lag na rdo rjes kyang bdud 'dul ba/ phyi rabs kyi sems can la phan pa'i thabs bstan pa'i phyir ro//de nas lag na rdo rje sangs rgyas kyi mthu dang / thogs pa med pa'i ye shes kyi tshig smra ba'i phyir zhes pa'i bar ni lag na rdo rje de sngon gyi smon lam des ni rigs lnga la sogs pa'i phyogs bcu'i sangs rgyas bcom ldan 'das de dag gi mthus gnyis su med pa'i dbang bskur nas byin gyi rlabs bskyed pa'i phyir ro//sdud pa las kyang / /'dzam bu'i gling 'dir chu klung ji snyed cig 'bab cing / /zhes pa lta bu'o/ /sangs rgyas kyi byin gyi brlabs dang / spobs pa bskyed pa'i phyir ro zhes pa'i bar ni lag na rdo rje sangs rgyas kyi byin gyis brlabs nas 'jig rten gyi khams sangs rgyas kyi zhing thams cad du lag na rdo rje zhes kun du grags pas mthu bo che thams cad dbang du gyur pa'i don to//byang chub sems dpa' thams cad kyi byin gyi rlabs kyis zhes pa dang / mthus stong pa'i phyir ro zhes pa'i bar ni phyogs bcu'i sangs rgyas kyi mthus lag na rdo rje de sangs rgyas kyi zhing gzhan gyi byang chub sems dpa' yang /rang rang gi sangs rgyas la zhus nas/ bdag cag kyang mi mjed kyi 'jig rten gyi khams kyi sangs rgyas shAkya thub pa'i 'khor lag na rdo rje lta bar mchi zhes zhus nas 'dir byon te/ byin gyi rlabs dang mthu sngon gyi smon lam dang las mthun pas byin gyis rlob pa'i phyir gsungs so//rdo rje khro bo las 'byung ba dang / phyir ro zhes pa'i bar ni de ltar lag na rdo rjes rnam par 'joms pa'i rgyud kyi don 'di dbyung ba'i phyir/ ye shes bzhi dang / phrin las rnam pa bzhi dang / khro bo phyogs bzhi dang /mtshams bzhi dang / tshad med pa bzhi las sgo ba bzhi byung nas 'jig rten gyi khams thams cad dkyil 'khor gyi lha de dag gi sprul pas rab tu bkang nas bdud srin po 'dul ba'i don to/ /rdo rje snying pos smras te dang gsungs pa'i phyir ro zhes pa'i bar ni lag na rdo rje lus sangs rgyas kyi sku rdo rje lta bu dang /sems sangs rgyas kyi thugs snying po byang chub sems dang ldan pa'i sgo nas sems can thams cad la phan pa'i phyir/ de bzhin gshegs pa'i sku la brten cing thugs nyid la dgongs nas don ma lus par smra ba'i phyir ro/ /shar phyogs kyi hUM ka ra'i don ston te/mi chod pa/ mi shigs pa/ brten pa zhes pa dang / phrin las rnam bzhi'i las byas pas 'grub po zhes pa'i bar ni/ nyan thos kyi yul rdul phra rab 'dus pa las yul du grub par 'dod de/ thugs kyi khro bo des 'joms pas gzung ba bcom ste/ gshin rje gshed du bstan to//nang gi 'dzin sems mu stegs kyis bdag tu brtags pa de 'joms pas na tho ba ye shes kyi med bal can 'dzin/ de ltar gzung 'dzin dang bral ba'i byang chub sems dkar pos 'gro ba 'dul bar byed do/ /de rnal 'byor pas dkyil 'khor du sgrub thabs tshul bzhin du byas nas bsgrubs na de bzhin gshegs pa thams cad kyi sku gsung thugs kyi dngos grub ya mtshan can dag sus kyang bar mi chod par thob ste/de rnam par thar pa'i sgo gsum la gnas pas mtshan ma rnams kyis mi shigs te/ bskal pa grangs med par gsung bden pa'i 'bras bu tshad med pa'i yon tan dang ldan pas 'gro ba la chos ston pa'i shugs dang ldan pa'o//'di ni khro bo thams cad kyi ngo bor gyur pas na/ de bzhin gshegs pa thams cad kyi snying rje chen po dang ldan pas mi dge ba ni spangs pa'i dngos grub rnams rab tu 'grub par byed pas mi shigs pas/de dpa' bar 'gro ba la sogs te/ ting nge 'dzin gyi sgo'i rnam grangs 'bum phrag la mnga' brnyes pas na cis kyang bar du gcod pa dang bral te/ phyogs bcu'i de bzhin gshegs pa'i rang bzhin du gyur pas ni skye shi dang bral ba'i sku tshe dang ldan pas mi shigs pa ste/ bden pa'i tshig la thogs pa med pas 'gro ba'i rgyud sgrol ba'i bden pa'i chos rnams ston te/ de'i sgrub thabs rnams sla bsam brjod do/ /hUM ka ra'i don rgya cher bshad zin to// //da ni lho phyogs kyi khro bo khams gsum rnam par rgyal ba'i don rgya cher ston te/ sra ba brtan pa thams cad du thogs pa med pa zhes pa dang thogs pa med pa'i dngos grub thob bo zhes pa'i bar ni/de bzhin gshegs pa'i ting nge 'dzin tshad med pa'i yon tan gyis 'dod chags la sogs pa'i nyon mongs pas 'khor bar skye bar byed pa las rgyal ba'i rtags su srid pa'i 'khor lo bsnams te/rnam par thar pa'i sgo gsum dang ldan pa'i ngang du 'dus ma byas pas na sra bar mdzad/ de snying rje tshad med pa'i byang chub sems mi 'gyur ba'i sgo nas brtan por mdzad do/ /sems can thams cad thugs rjes 'dul zhing / thabs mkhas pa'i brtson 'grus 'gro ba'i don ma lus par mdzad pa de phrin las ci la yang thogs pa med pas bden pa'i dngos grub rnams rnal 'byor pa la rab tu ster ro//dge ba'i bar du gcod pa gzhan 'phrul dbang byed lha'i rgyal ba'i bdud sdig can dang / gnod sbyin dang srin po rnams 'dul bas na/ pha rol tu phyin pa'i go sra ba sbyin zhing / thogs pa med pas bsam pa brtan pa'i sgo nas 'gro ba ma lus pa sgrol ba la thogs pa med pa'o/ /khams gsum thams cad las rnam par rgyal ba'i don rgya cher bshad zin to// //da ni nub phyogs kyi khro bo ha ya gri ba'i don ston te/ gsung gi sgo nas 'gro ba'i phrin las sna tshogs pa mnga' bas na thams cad du ma pham pa/sems can thams cad skrag par byed pa/ sems can thams cad 'jil bar byed pa dang / zhes pa dang / bkra shis par 'gyur ro zhes pa'i bar gyis ni 'dod khams dang / gzugs khams dang / gzugs med pa'i khams rnams thabs mkhas pa'i sprul pas thams cad ma pham pa/ bdud kyi rgyal po ded dpon nag po dang / bgegs kyi rgyal po bi nA ya ka la sogs pa 'jig rten na mthu che ba rnams dngangs shing skrag par mdzad cing / nyon mongs pa'i 'dod chags dang / zhe sdang dang /gti mug dang / nga rgyal dang / phrag dog dag gis khams gsum dag tu nyon mongs pa rnams 'jil zhing / gsung ma chags shing thugs rjes 'gro ba la rol pa'i rtags su pad+ma bsnams so/ /thugs rje thabs mkhas pas sku bskal pa'i 'od zer dmar po 'phro ba mtshan ma'i rnam par rtog pa rnams dang bral bas che ba'i yon tan tshad med pa dpag tu med pa'i yon tan dang ldan pas 'gro ba la phan 'dogs pas gzhung nas 'byung ba bzhin du bsgrubs na/yon tan tshad med pa'i bkra shis par 'gyur ro/ /khro bo rgyal po rta mchog dpal gyi don rgya cher bshad zin to// //da ni byang phyogs kyi khro bo bdud rtsi 'khyil pa'i don ston te/ phrin las rgya mtshos 'gro ba 'dul ba'i phrin las mdzad de/ rig sngags thams cad gcod par byed pa/ rig sngags thams cad gnon par byed pa/ las thams cad 'joms par byed pa zhes pa dang / dmod pa'i bye brag thams cad las thar bar 'gyur ro zhes pa'i bar ni/bdud dang / srin po dang / gnod sbyin dang / sha za la sogs pa phas kyi rgol bas sems can la gnod pa'i thabs dang / drang srong nag po dang / snag tsha dang / mis sbyin la sogs pa'i dmod pa rnams kyis/ sems can gyi sems phyin ci log tu byed pa rnams la/sdug bsngal ba gsum dang brgyad kyis mnar ba rnams/ de bzhin gshegs pa'i phrin las bya ba nan tan gyi ye shes kyis gong gi sdug bsngal ba dang / gnod pa ma lus pa gcod par byed pas/ thabs mkhas pa'i thugs rjes sems can gyi las thams cad rab tu ma lus par rdzogs par byed pas/'bras bu'i rang bzhin ye shes kyis/ sdug bsngal gyi rnam pa 'joms pa'i phrin las sna tshogs pa'i rtags su/ de bzhin gshegs pa'i thabs kyi phyag rgya bdud rtsi 'khyil pa ste/ yang dag pa'i ye shes las byung ba'i rtags su/thams cad rang bzhin rnam par dag pa'i rtags su phrin las rnam pa sna tshogs pa rnam 'gro ba'i don du mdzad do/ /dkyil 'khor du sgrub thabs kyi khyad par gzhung bzhin du byas na/ pha rol gyi ngan sngags kyi bye brag rnams 'joms shing thar bar 'gyur ro/ / khro bo bdud rtsi 'khyil pa'i don rgya cher bstan zin to// //da ni shar lho mtshams kyi khro bo ya mAn+ta ka'i don bshad de/ gshin rje dang / me lha la sogs pa'i gnod pa rnams 'joms pa'i rtags su bstan te/ gzhan gyi las thams cad 'jig par byed pa/ gdon thams cad rlag par byed pa/gdon thams cad las thar bar byed pa zhes pa dang / khro bo'i rgyal po ya mAn+ta ka ste zhes pa'i bar gyis bstan te bdud dang / srin po dang / gnod sbyin la sogs pa phyir rgol ba rnams/ /sngon gyi smon lam gyis sems can ma lus pa thams cad thabs mkhas pa'i thugs rjes 'joms shing /gnyen po ye shes kyis dngos po thams cad 'jig par byed cing / snying rje chen po rgyu mthun pa'i byang chub kyi sems gzhan la phan 'dogs pa'i ngo bor bsgyur bas/ sems can gyi las thams cad 'joms par byed pa'i rtags su gyur par gsungs te/gdon ma lus pa stong phrag brgyad cu rtsa bzhi'i dpon po bi nA ya ka dang dbang ldan la sogs pa'i mthu dang blo gros tshad med pa dang ldan pas/ gzhan gyi rig sngags thams cad 'gro ba rnams byed du 'jug par gsungs so/ /khams gsum gyi sems can la gnod pa rnams 'joms par byed pa'i thabs dang ldan bas/ye shes kyi rtags kyi zhabs kyi zil gyi non cing / sems can rnams kyi sdug bsngal la rol cing zad par byed pas/ gdon thams cad 'joms par byed cing brlag par gsungs te/ nyan thos dang mu stegs la sogs pa'i phyi nang gi lta ba rnams kyi gnod pa sna tshogs pa rnams rtog pa'i rang bzhin gyis dge ba'i bar du gcod pa'i gnod pa rnams/phrin las sna tshogs pas gdul bar yang mdzad pas/ khams gsum gyi 'gro ba las sna tshogs pas phung po nyam thag nas dang / sna tshogs kyis tshe dang mdangs 'phrog pa ma lus pa rnams thugs rjes thabs mkhas pas thar bar mdzad cing /phyi'i gdon dang / nang gi gdon dang / 'byung ba'i khams ma snyoms pa'i gdon thams cad las rab tu thar ba'i rtags su/ khro bo'i rgyal po ya mAn+ta kar bstan/ de bsgrub par bya ba'i phyir zhes pa dang /bkra shis par 'gyur ro zhes pa'i bar ni/ rnal 'byor pas don rnams ma nor bar bsgrub par bya ba'i phyir/ dus gsum gyi de bzhin gshegs pa yum shes rab kyi pha rol tu phyin pa'i rang bzhin du gnas par byin gyis brlabs nas/ gzhal yas khang du gnas te/ rang bzhin gyis dag par bsams te/de nyid bsgom pa'i rgyu/ ya mAn+ta ka'i rtsa ba'i yig 'bru/ thugs byang chub sems kyi dkyil 'khor bsams te/ 'od du zhu bas dngos po'i rang bzhin byang chub sems su gnas pas na snying po rnam pa lnga thugs kyi rtags dang ldan pa la/ rgyan chas rnam pa yon tan gyi rnam pa sna tshogs pa 'byung ba'i gnas su thugs ye shes kyi byin gyi rlabs kyi rtags ha 'bar ba bsams te/ha des dngos po rnams 'od du dngos po med par zhu bas 'bras bu'i rang bzhin yon tan gyi ngo bo rgyan chas dang / byang chub sems kyi snying po dang / rgyan la thim pas thams cad rang bzhin gnyis su med par gyur par bsams te/dus gsum gyi sangs rgyas kyi ye shes kyi rnam par thar pa'i cho 'phrul bsam gyis mi khyab par gyur nas/ de bzhin gshegs pa'i sku gsung thugs kyi thugs rdo rje'i byin rlabs/ dngos grub sna tshogs pa 'byung bas sems can thams cad kyi dgos pa sna tshogs par grub par bsams te/de nas rnal 'byor sgrub pa pos bdag ya mAn+ta ka'i ting nge 'dzin du zhugs te/ 'gro ba 'dul ba'i dbang du bdag zhi ba dang / rgyas pa dang / dbang dang / drag po'i las rnams 'gro ba gang la mos pa bzhin du/ dkar ba dang / ser ba dang / dmar ba dang / gnag pa phrin las so so'i kha dog tu bsgyur te/ye shes kyi bum pa des dbang bskur zhing bsnyen pa yang grangs dang / mtshan ma dang / dus kyi bsnyen pa dag /da ha badzra grangs mang por brjod na bkra shis kyi yon tan sna tshogs pa rab tu thob par 'gyur ro/ /gong dang 'og gi sgrub thabs rnams bshad pa las 'byung ba yang 'di bzhin du rgyas par shes par bya'o//rig pa'i gtan tshigs gong 'og la sbyar bar shes par bya'o/ /gzhan dag don gcig pas mi smos so/ /shar lho mtshams kyi khro bo'i rgyal po ya mAn+ta ka'i don rgya cher bstan zin to// //da ni byang shar mtshams kyi khro bo Tak+ki rA dza'i don rgyas par ston te/khams gsum gyi 'byung po'i rgyal po dbang ldan rig sngags kyi dmod pa'i tshogs thams cad zhi bar byed pas Tak+ki rA dza phyung nas 'gro ba'i don du bzhugs pa'i thabs ni 'byung po thams cad 'gugs par byed pa/ rig sngags kyi las thams cad byed du 'jug pa zhes bya ba dang / las thams cad byed du 'jug par gsungs zhes pa'i bar ni//'dod khams kyi sems can gyi gzung ba dang / 'dzin pa'i bag chags rnam par rtog pa kun gzhi la rab tu bsags pas ni/ nam mkha' la sprin gyis bsgribs pa ltar/ phyin ci log gi bag chags mthu brtas pas/ bdag tu lta ba las 'byung bas na 'byung po log pa'i mthu rab tu zhen pas rdzas kyi bye brag sna tshogs pa las 'byung ba dang /sngon gyi las las gyur pa'i 'byung po thams cad kyi rgyal po dbang ldan la sogs pa rnams 'gugs par byed pa'i rtags kyi phyag rgya ni 'dul ba'i dbang du sku sprul ste 'gro ba'i don byed pa'i rtags Tak+ki rA dza ste/ 'jig rten gyi khams rnam pa gsum gyi nang du phyi'i 'byung po dang las las gyur pa'i 'byung po'i rigs thams cad thabs mkhas pa'i thugs rjes dbang du bsdus nas 'khol bas na byang shar mtshams kyi 'byung po rnams 'gugs shing dbang du bsdus pas 'dod pa'i rgyal por snang bas/ des phyogs bcu'i de bzhin gshegs pa thams cad kyi phrin las sna tshogs pa rab tu mdzad pa thams cad byed du 'jug cing nyams su len pa rnams byams pa'i ral gris mngon du btul te legs par gnas pa'i don to//byang shar mtshams kyi khro bo'i rgyal po Tak+ki rA dza'i don rgyas par bshad zin to// //da ni lho nub mtshams kyi khro bo'i rgyal po stobs po che'i don rgyas par bshad de/ yang dag pa'i ye shes kyi stobs kyis sems can rnams kyi don ma grub par grub par byed pa don grub pa rnams chud mi za bar byed pa/ gang bsgrub pa de'i don rnams phun sum tshogs pa thob par byed pas na/ de ni ma grub pa rnams grub par byed pa/ 'dod pa thams cad rab tu sbyin pa zhes pa dang / khro bo'i rgyal po stobs po cher bstan zhes pa'i bar ni rnal 'byor sgrub pa po gang yang rung ba dag gis 'di tshul bzhin du bsgrubs na mdo las 'byung ba'i de bzhin gshegs pa rnams kyi sku gsung thugs kyi dngos grub ma grub pa rnams grub par byed pa/sgrub par byed pa'i thabs rnam pa sna tshogs pa'i las rnams phas kyi rgol ba bdud rnam pa bzhi nyon mongs pa dang phung bo dang lha'i bu dang 'chi bdag gi bdud rnams kyi dbang du mi gtong bar mdzad pa dang /de bzhin gshegs pa'i yon tan gyi rnam grangs ma lus pa thams cad rab tu sbyin par mdzad pa dang dpa' bar 'gro bdag zla ba'i rgyal mtshan la sogs pa'i ting nge 'dzin gyi sgo bsam gyis mi khyab pa'i stobs dang ldan pa/ 'jig rten gyi khams kyi sems can gyi 'dod pa phun sum tshogs pa rnam pa bsam gyis mi khyab pa rnams thob par sgrub cing de bzhin gshegs pa'i phrin las sna tshogs pa mdzad do//lho nub mtshams kyi khro bo'i rgyal po stobs po che'i don rgyas par bshad zin to// //da ni nub byang mtshams kyi khro bo a mo g+ha pA sha'i don ston te/ thabs mkhas thugs rje'i zhags pas khams gsum gyi sems can ma lus pa rnams 'khor ba'i sdug bsngal las 'dren cing thugs rjes srung bar byed pa'i don te/sems can thams cad srung ba zhes pa dang / byang chub sems thabs mkhas pas srung bar byed do zhes pa'i bar ni/ thabs mkhas pa'i thugs rje tshad med pa'i rang bzhin/sngon bskal pa tshad med par sems can ma lus pa thams cad la/ byang chub sems tshad med pa skyes nas/ ye shes kyi khro bo'i sprul pa bsam gyis mi khyab pa phyung nas/ sprul pa dag 'dod khams dang / gzugs khams dang / gzugs med pa'i khams kyi sems can dag ji ltar 'dul ba bzhin du/thabs mkhas pa'i thugs rje tshad med pa'i sprul pa des/ 'gro ba sna tshogs pa rnams ji ltar 'dul ba bzhin du ston te/ des 'dod chags dang / zhe sdang dang / gti mug la sogs pas sdug bsngal ba'i rnam pa la/ tshad med pa'i thugs rje yon tan sna tshogs pas phan btags nas/ 'khor ba'i sems can rnams bsrung ba'i phyir ro//de ni thugs rje dang phrin las don yod pa'i zhags pa ste/ sngon gyi phrin las tshad med pa'i snying rje dang / byams pa dang / dga' pa dang btang snyoms kyis sems can thams cad la phan 'dogs shing bsdu ba'i dngos po sbyin pa dang / snyan par smra ba dang / don spyod pa dang / don mthun pa'i sgo nas sdud cing srung bar byed do//nub byang mtshams kyi khro bo don yod zhags pa'i don rgyas par bstan zin to// //da ni dkyil 'khor gyi dbus kyi gtso bo phyag na rdo rje'i don ston te/ rgyal ba thams cad kyi thugs gsang ba'i mdzod 'dzin pa/ thugs chos nyid las ma g.yos kyang / sngon gyi bsod nams kyi tshogs kyis sems can gyi don 'dod pa phun sum tshogs pa sgrub cing /bdud dang srin po la sogs pa gdul ba'i phyir thugs rjes khro bor sku sprul te/ rengs par mdzad de/ zhi ba rgyas pa/ sems can thams cad rengs par byed pa zhes pa dang / dbang du bsdus phan 'dogs pa'i phyir ro/ /zhes pa'i bar ni/ sems phyin ci log dang /lta ba phyin ci log dang / shes rab phyin ci log dang / 'du shes phyin ci log gis nyon mongs pa thams cad las/ thabs mkhas pa'i sngon gyi bsod nams kyi tshogs bsam gyis mi khyab pa rab tu bsags pas da ltar shAkya thub pa'i bstan pa la gnod pa'i sems can dregs pa can la 'jigs byed thabs la mkhas pa'i sprul pa bsam gyis mi khyab pa rnam pa sna tshogs pa dag gis gnod par byed pa'i sems can gzhan la bsnan nas/de dag gis nga dang bdag tu lta ba'i 'du shes phyin ci log gi nyon mongs pa'i sdug bsngal ma lus pa rnams med par mdzad do//dregs pa can de dag btul nas/ byang chub chen po la ji ltar 'dod pa bzhin du/ yon tan gyi tshogs bsam gyis mi khyab pas rgyas par mdzad cing / bdud kyi rgyal po dang / dregs pa can khyo shug can rnams skrag cing dngangs pa dang / rengs shing 'dar bar mdzad pa'i phyir ro/ / rnam pa gzhan du yang rnam par mi rtog pa'i byang chub sems chos nyid zhi ba'i ting nge 'dzin mnyam pa'i ngang las ma g.yos kyang / tshe rabs sngon gyi bsod nams kyi tshogs bsam gyis mi khyab pa thams cad rgyas par mdzad do/ /'jig rten rnam pa gsum na gnas nas sems can thams cad la/thugs rjes thabs la mkhas pa'i phrin las kyis/ de bzhin gshegs pa thams cad kyi bstan pa la gnod pa'i bdud rnams 'dul ba'i phrin las sna tshogs pa 'byung ba'i yon tan gyi rang bzhin phun sum tshogs pa gzhan la 'byung ba'i phyir/ rnam grangs sna tshogs pa'i sgo nas sems can rnams tshim zhing bde bar mdzad do//gong gi zhibs mi 'dul ba'i bdud dang srin bu dregs byed rnams khro bo'i ting nge 'dzin las khro bo'i sprul pa sna tshogs dag gis 'dul zhing / sdug bsngal las skyob nas bde ba la dgod pa'i phyir/ 'jigs byed kyi drag shul gyis rengs shing 'dar bar mdzad do//de dag de bzhin gshegs pa'i 'khor du thugs rjes dbang du bsdus nas/ phan pa'i yon tan chen po'i sgo nas don mdzad pa'i phyir ro/ /dkyil 'khor gyi dbus kyi gtso bo phyag na rdo rje'i don rgyas par bshad zin to/ /da ni shar dang lho dang / nub dang byang gi sgo ba'i don ston te/ tshad med pa rnam pa bzhi'i rtags te snying rje'i lcags kyu dang /byams pa'i zhags pa dang / dga' ba'i lcags sgrog dang / btang snyoms kyi dril bu dang ldan pa'i sgo nas/ sbyin pa dang / snyan par smra ba dang / don spyod pa dang / don mthun pa'i sgo nas 'gro ba'i don mdzad pa'i rtags so/ /rmugs par byed pa'i gsang sngags kyi mthu chen po 'di zhes pa dang /mi gnas par byed pa'i don to zhes pas bstan te/ ye shes kyi sgo ba rnam pa bzhis 'dod pa dang / gzugs dang / gzugs med pa'i sems can ma lus pa rnams/ phyag rgya rnam pa bzhi'i sgo nas 'gro ba'i don mdzad pa'i thabs sna tshogs pa bstan nas/me long lta bu'i lcags kyu dang / mnyam pa nyid kyi zhags pa dang / so sor kun tu rtog pa'i lcags sgrog dang / bya ba nan tan gyi dril bur sku sprul te/ 'dul ba'i dbang du rdo rje rta gdong lcags kyu ma dang / rdo rje phag gdong zhags pa ma dang / rdo rje lcags sgrog nyi zla'i spyan dang /rdo rje thal byed dril 'khrol mar sprul te/ shar dri za dang / lho grul bum dang / nub klu dang / byang gnod sbyin la sogs pa'i bdud rnams skabs tshol zhing glags lta ba rnams thugs rjes ma rungs pa rnams rmugs par byas nas/ log pa'i lam du 'dug tu mi ster bar gsang ba'i/ drag shul gyi mthus bsdigs nas/ sdug bsngal las mi gnas par byed pa'i don to/ /tshad med pa'i sgo ba bzhi'i don bshad zin to// //sngags dbyung ba'i don ston te/ sngags ni ye shes kyi rtags kyi don gsang ba dbyung ba'i thabs te/ sangs rgyas kyi mthus/ lag na rdo rjes rab tu smras so zhes pa dang /thugs khro bo'i sngags dang dbyung bar bya ba'i don to zhes pa'i bar ni dkyil 'khor gyi rang bzhin bshad pa las/ de bzhin gshegs pa thams cad kyi mthus lag na rdo rje la/ sku dang gsung dang thugs kyi dbang bskur bas byin gyis brlabs nas/ 'das pa dang ma byon pa dang / da ltar byung ba'i sangs rgyas kyi ye shes lag na rdo rje rab tu gnas nas/ byang chub snying por dbang bskur bas/ lha gnas dang ni mi gnas kun tu thugs yang dag pa'i ye shes rdo rje lta bu'i mthu'i dbang bskur bar/ bcom ldan 'das kyi 'khor 'jig rten pa dang / 'jig rten las 'das pas mthong bar gyur to//de bzhin gshegs pa thams cad kyi ye shes kyis byin gyis brlabs nas lha'i rgyal po dbang sgyur gyi gnas dang / lho phyogs gyad kyi yul dang / snying po byang chub ga la ba 'dir lag tu ye shes kyi rdo rje byin nas/ rdo rje ming 'dzin par dbang bskur bas/ lha dang / klu dang / gnod sbyin dang /dri za dang / lha ma yin dang / nam mkha' lding dang / lto 'phye chen po dang / mi dang mi ma yin pa rnams su lag na rdo rjer so sor skad du 'ur ces rab tu gyur pa'i don to/ /dus der 'dod khams dang / gzugs khams dang / gzugs med pa'i khams kyi srid pa gsum gyi mthu che ba rnams dbang du 'dus par 'gyur ro//thams cad zhabs 'og tu bsdus nas bka' dam la btags nas so so rang rang gi snying po mdongs gsol du phul nas/ dam tshig can du byas nas de rnams kyang dus gcig tu go ste/ gong gi khro bo rnams kyi sngags dang / cho ga'i phan yon rnams 'dul ba'i dbang gis 'gro ba'i don du lag na rdo rje phyogs bcu de bzhin gshegs pa'i ye shes kyi tshig 'jig rten rnam pa gsum du srid pa'i sems can la phan pa'i phyir ro//gsung khro bo'i dkyil 'khor 'di 'dul ba'i dbang du gsungs so/ /gsang sngags gsung gi dkyil 'khor dbyung ba'i thabs bshad zin to// //da ni gsung yig 'bru'i dkyil 'khor bshad pa'i don ston te dang po phyag na rdo rje'i phrin las bshad do/ /na mo rat+na tra yA ya/ dkon mchog gsum la phyag 'tshal ba'i don te/ phyag na rdo rje dkon mchog gi rang bzhin du gyur pas na/ ye shes las grub pa'i phyir zhes pa ni/dus gsum du rgyal ba'i rang bzhin du gyur pas dkon mchog gsum zhes brjod do/ /na mash+tsaN+Da badzra pa NA ye/ rdo rje rin chen gyi ngo bo phyag na rdo rje'i yang dag pa'i snying po'o zhes pa ni thugs rdo rje lta bu dang / yon tan rin chen lta bu dang ldan pa'i tha tshig go/ /ma hA yak+Sha se nA pa ta ye/ gnod sbyin gyi sde dpon chen po lag na rdo rje drag po la phyag 'tshal ba'i don te/ gnod sbyin rnams thugs rjes 'dul bas de skad ces brjod do/ /zhes pa ni khams gsum gyi dregs pa can 'dul ba'i phyir rigs gnod sbyin du bstan te/ thabs mkhas pa'i phrin las kyis dbang du sdud pas so/ / tad+ya thA/ 'di lta ste gang lta zhe na/ 'og nas 'byung ba'i sngags kyi tshig rnams zhes pa ni/ 'og gi don ma nor bar bstan pa'i phyir gsal bar bstan cing smos pa'i don/ oM tra Ta tra Ta ye shes lnga'i ngo bo dag gis nyon mongs pa thams cad sod cig pa'i don ni/ chos kyi dbyings kyi ye shes la sogs pa rnam pa lngas/nyon mongs pa rnams rab tu gcod pa'i don no/ /tro Ta ya tro Ta ya phyag na rdo rje'i byin gyi rlabs kyis rab tu gcod cing legs par sod cig pa'i don ni/ thugs gsang ba'i mdzod 'dzin pa ye shes kyi don la dpyod cing / nyon mongs pa las skyobs shig pa'o/ /s+phu Ta s+phu Ta zhes pa ni nyon mongs pa las ye shes kyi mes 'bar bar gyis shig pa'i don ni sdug bsngal gyi rang bzhin ye shes kyi phrin las nyon mongs pa la don gsal bar gyis shig pa'o//spo Ta ya spo Ta ya/ byang chub kyi rang bzhin gyis legs par 'bar bar gyis shig pa ni thugs rje tshad med pa'i phrin las kyis legs pa mthong bar bya ba'i tha tshig go//g+hUr+Na g+hUr+Na/ bdag gi bgegs rnams zungs la skrod cig /ye shes kyi mes mtshan ma sregs shig pa'i don ni/ lta ba log pa ni bgegs dang 'dra ste/ yang dag pa'i lta ba'i bgegs te/ ye shes kyi mes nyon mongs pa choms shig pa'i don no//g+hUr+Na pa ya g+hUr+Na pa ya ni thugs rje'i lcags kyus zung la legs par skrod cig pa'i don ni/ phrin las kyi lcags kyus gdon zung la mtshan ma skrod cig pa'i don no/ /sarba satwa ni sems can thams cad thugs rje'i thugs kyis gzigs shig pa'i don ni thugs rje'i zhing ste/dgos 'brel yod pas gzigs pa'i phyir ro/ /bo d+ha ya bo d+ha ya/ khams gsum gyi sems can rnams/ byang chub tu sems rab tu bskyed cig pa'i don ni/ dngos por lta ba rnams dngos po med pa'i byang chub sems la dgod pa'i phyir ro/ /saM b+ho d+ha ya saM bo d+ha ya/'gro ba rnams legs par byang chub tu sems bskyed pa'i don ni/ lam log pa'i 'gro ba rnams yang dag pa'i byang chub la dgod pa'i phyir ro/ /b+h+ra ma b+h+ra ma/ byang chub kyi sems dang mi mthun pa'i bgegs rnams skrod cig pa'i don ni/ gzung 'dzin gyi bag chags rnams byang chub kyi skyon gyis sol cig /saM b+h+ra ma ya saM b+h+ra ma ya/ phyin ci log gi nyon mongs pa rnams las thugs rjes legs par skrod cig pa'i don ni/ /lta ba log pa ni nyon mongs pa'i rgyu las phrin las kyis sel ba'i don to/ /sarba bud+d+ha/ sangs rgyas thams cad kyi thugs rje chen pos bdag gi sdig pa thams cad choms shig pa'i don to//ni sngon gyi thugs rjes phyi nang gi gnod pa thams cad med par bya ba'i phyir choms shig ces gsungs so/ /ku Ta ni ku Ta ni/ gdon 'byung po rnams gtubs shig gtubs shig /thugs rje ye shes kyi spyan gyis gzigs pa'i don ni/ gnod pa rnams med par byed pa dang / gdug pa rnams gcad pa dang / thugs rjes gzigs par byed pa'i tha tshig go/ /saM ku Ta ya saM ku Ta ya/ 'jig rten na gnod par byed pa rnams byams pa'i thugs kyis gtubs shig /legs par gtubs shig pa'i don ni/ sarba sha truM/ bdag la gnod par byed pa'i bgegs rnams thams cad rang bzhin 'dul ba'i don ni/ gnod sbyin dang / srin po dang / bgegs kyi rigs rnams 'dul ba'i phyir ro/ /g+ha Ta ya g+ha Ta ya/ bgegs dang 'byung po de rnams thugs rjes skrod cig pa'i don ni/ bi nA ya ka dang dbang ldan la sogs pa rnams thugs rjes skrod cig pa'i tha tshig go/ /saM g+ha Ta ya saM g+ha Ta ya/ni legs par skrod cig pa'i don te/ bdag dang sems can thams cad nyon mongs pa las thar bar gyis shig pa'i don ni/ nyon mongs pas sems can thams cad 'khor ba de las bzlog cing thar bar bya ba'i phyir ro/ /sarba bid+yA/ rig sngags kyi mthus gang la bya ba'i las thams cad rdo rje 'bar bas sgrub par byed pa'i don ni/ ye shes kyi mthu dang ldan pas don ma lus pa thams cad 'grub par bya ba'i phyir smos so/ /badzra badzra s+phoT/ ye shes 'bar ba'i che bas bgegs rnams gzhan du spor cig pa'i don ni/thugs rje thabs kyi phrin las che ba dang 'dra bas/ skye bzhi bgegs rtsad gcod pa'i phyir smos so/ /badzra badzra ka Ta/ ye shes las grub pa'i rdo rje 'bar bas nyon mongs pa thams cad chod cig pa'i don ni/ dngos po rnams dngos po med par bya ba'i phyir/'dul dbang du chod cig pa'i don to/ badzra badzra ma Ta/ byang chub sems kyi rdo rjes bdag la gdug pa rnams gtugs shig pa'i don no/ /chos nyid ngo bo rdo rje dang 'dra bas mtshan ma rnams med par byed pa'i thabs so/ badzra badzra ma tha/ yang dag pa'i ye shes rdo rjes bgegs rnams thul cig pa'i don ni/rtogs pa'i lta ba ni rdo rje dang 'dra bas/ log pa'i lta ba rnams med par byed pa'i thabs so/ /badzra badzra aSh+Ta/ ye shes las grub pa'i yang dag pa'i rdo rjes bdud rnams gnas der mi gnas par gyis la skrod cig pa'i don ni/ dngos po rnams dngos po med par byed pa'i yang dag pa'i don/rdo rjes mtshan ma rnams med par byed pa'i phyir skrod cig pa'o/ /ha sa ni la badzra/ rdo rje rnon po me dang 'dra bas bag chags rnams chod cig rol cig pa'i don ni/ ting nge 'dzin ral gri dang 'dra bas dngos po rnams gcod cing don mthong ba'i tha tshig go/ /su badzra swA hA/ thugs mkhyen pa'i rdo rje chos kyi dbyings rnam par dag pa la legs par sbyor cig pa'i don ni/ rtogs pa'i lta ba rnam par dag pas don rnams mthong zhing legs par rtogs pa'i phyir ro/ /dkyil 'khor gtso bo phyag na rdo rje'i rang bzhin gyi don bshad zin to// //da ni de'i thugs khro bo'i phrin las kyi don bshad de/thugs yang dag pa'i ye shes kyis nyon mongs pa rnams 'joms pa'i rtags su thugs rjes khro bor sprul te/ dregs pa can 'dul ba dang / phrin las bya ba dang / dngos grub rnams sbyin pa'i phyir/ rnam par thar pa brgyad kyi rtags kho na'i don ston pa'i phyir ro//ho phu l+lu ni ru phu l+lu/ de ltar phyag na rdo rje thugs kyi ngo bor gsungs nas/ rdo rje khro bo las sbyor ba'i phyir ro/ /rdo rje khro bo 'bar bas nyon mongs pa'i gshin rje khams gsum pa rnams thugs rjes 'bar bas byed pa'i don ni/ thugs kyi bdag po'i don bstan nas/ de'i 'og tu khro bo'i lta ba la sogs pa rnams thugs rje'i khro bo'i rang bzhin gyis 'joms pa'i don/gr-ih+Na ku l+lu/ khams gsum gyi gshed kyi sdug bsngal dang / las rnams 'joms pa'i don ni/ 'jig rten pa rnams nyon mongs pas gshin rje'i dbang du song ba'i sdug bsngal rnams thugs rjes gshin rje lta bus 'joms pa'i rtags so//mi l+li tsu l+lu/ ku ru ku l+lu/ 'phags pa rta mgrin sngon po 'bar bas sdug bsngal rnams sbyongs shig pa'i don ni/ 'khor ba las 'phags pa'i gsung gi rta skad dang ldan pas/ chos nyid kyi ngo bos sdug bsngal rnams choms shig pa'i don to//badzra bi dza ya swA hA/ khro bo'i rgyal po bdud rtsi 'khyil pa 'bar bas nyon mongs pa thams cad bdud rtsir byin gyis rlobs shig pa'i don ni/ yang dag pa'i rtags gzung 'dzin las rgyal zhing / dug bdud rtsir gyur zhing nyon mongs pa 'joms pa'i rtags thugs chos nyid du 'khyil pas smos so//kI li kI lA ya swA hA/ Ar+ya A tsa las thugs kyi phrin las mdzad pa dang / stobs po ches drag shul gyis phrin las mdzad pa'i don ni/ 'khor ba las 'phags shing thugs kyi phrin las sna tshogs pa'i ngo bo dang / yang dag pa'i shes rab kyi stobs dang ldan pa gnyis kyi phrin las so//ka Ta ka Ta/ zhes pa ni ya mAn+ta ka khro bos bdud rnams spa bkongs shig pa'i don ni/ thugs ye shes kyi rgyal pos lta ba ngan pa rnams med par byed pa'i tha tshig go/ /ma Ta ma Ta ni hUM kA ras nyon mongs pa rnams las thugs rjes skyobs shig pa ni/ mtshan ma thams cad 'jig par ye shes kyi khro bos lta ba log pa rnams med par byed pa'i tha tshig go//ra Ta ra Ta khro bo'i rgyal po pad+ma 'khyil pas nyon mongs pa rnams zhi bar mdzod cig pa'i don ni/ nyon mongs pa la khro zhing ma chags pa'i skyon gyi dbu 'khyil pas mtshan ma rnams zhi bar byed pa'i tha tshig go/ / mo Ta na pra mo Ta nA ya swA hA ye shes kyi gnod sbyin 'bar ba gshin rje gshed kyis skyobs shig pa'i don ni/ 'khor ba 'joms pa'i ngo bo thugs rje'i me 'bar bas/ mtshan ma rnams med par byed pa'i tha tshig go/ /tsa ra ni tsa ra zhes pa ni khro bo'i rgyal po nI la daN+Das/ bdag dang sems can thams cad la tshe dang dbang thang stsol cig pa'i don ni/mtshan ma med pa'i ye shes kyi bdag pos/ mi 'chi ba'i g.yung drung dang / bsod nams kyi tshogs thob par byed pa'i tha tshig go/ /ha ra ha ra ye shes kyi gshog pas 'khor ba'i sdug bsngal las skyobs shig pa'i don ni/ rtogs pa'i ye shes pas 'khor ba'i sdug bsngal rnams las thar par mdzad do//sa ra sa ra ting nge 'dzin drag shul gyi sems nyams pa rnams dran par gyis shig pa'i don ni thugs kyi rang bzhin phun sum tshogs pa dang ldan pas/ sems nyams pa'i skyon sbyong pa'i thabs so/ /mA ra ya nyon mongs pa 'joms pa'i rdo rjes bgegs rnams sod cig /las drag pos rdul du thong shig pa'i don ni/ lta ba ngan pa 'joms pa'i drag po'i stobs dang ldan pa'i rdo rje lta bus gnod pa'i gdon rnams stongs par byed pa'i thabs so/ /badzra bi dA ra NA ya swA hA/ rdo rje rnam par 'joms pas rdo rje lta bu'i ting nge 'dzin gyi gnod pa rnams zhi bar mdzod cig pa'i don ni/yang dag pa'i ye shes kyis mtshan ma thams cad mtshan ma med par byed pa'i tha tshig go/ /tshin+da tshin+da/ khro bo'i rgyal po ha ya gr-i bas/ nyon mongs pa rnams rtsad chod pa ni/ gsung gi bdag po chags pa'i bdag nyid kyi gdug pa rnams med par byed pa'i don/b+hin+da b+hin+da/ bdag dang sems can rnams kyi sdug bsngal bshig pa'i don/ thugs rje phun sum tshogs pas sdug bsngal gsum dang brgyad las thar bar byed pa'o/ /ma hA kI li kI lA ya swA hA/ khro bo'i rgyal po stobs po che las dang nyon mongs pa thams cad thugs zhi ba'i sgo nas zhi bar mdzod cig pa'i don ni/'khor ba 'joms pa'i stobs dang ldan pas gzung 'dzin gyi bag chags rags pa rnams stongs par byed pa'i tha tshig go/ /ban+d+ha ban+d+ha/ Tak+ki rA dza ste khro bo'i rgyal pos gdug pa'i bdud rnams mgo nas bzung la chings shig pa'i don ni/'khor ba 'joms pa'i rgyal pos lta ba'i bdud rnams rtsa ba nas 'byin pa'i tha tshig go/ /tro Ta tro Ta/ khro bo'i khro bos nyon mongs pa rol cig pa'i don ni/ nyon mongs pa khro bo la thugs rje khro bos 'joms pa'i tha tshig go/ / kI li kI lA ya swA hA/ byang chub sems kyi rang bzhin bdud rtsi 'khyil pas thams cad zhi bar mdzod cig pa'i don ni/ gzung 'dzin gyi skyon spangs pa'i bdud rtsi dang ldan pas/ chos nyid du dngos po rnams las bzlog pa'i phyir ro/ /tsu ru tsu ru/ khro bo'i rgyal po a mo g+ha pA shas dam tshig bzhin du phrin las mdzod cig pa'i don ni/thabs thugs rje chen po'i zhags pa dang ldan pas sngon gyi phrin las bzhin du las mdzod cig pa'i don no/ /tsaN+Da li/ khro bo'i rgyal po tshur spyon/ dam tshig la dgongs shig pa'i don ni/ ma rungs pa 'dul ba'i bdag po gnyis su med par bya ba dang /mi 'da' bar bya ba'i phyir ro/ /kI li kI lA ya swA hA/ bdud rtsi 'khyil pas thugs rje tshad med pa'i gsung sgras thams cad byang chub sems su zhi bar mdzod cig pa'i don ni/ lta ba'i bdud rnams byang chub sems kyi rtsis bsgyur zhing / shes rab kyi sgras chos nyid du ston cing byang chub sems la dgod pa'i don/trA sa ya trA sa ya/ khro bo'i rgyal po ma hA ba las bdud dang dregs byed rnams skrag par gyis skrag par gyis shig pa'i don ni/ nyon mongs pa 'joms pa'i stobs dang ldan pa/ bdud rnam bzhi 'joms shing skrag par byed pa'i don no//badzra kI li kI lA ya swA hA/ ye shes kyi rdo rje 'bar bas thams cad zhi bar mdzod cig pa'i don ni/ yang dag pa'i ye shes kyi dngos po rnams dngos po med par gyis shig pa'i don/ ha ra ha ra badzra d+hA rA ya swA hA/ rdo rje ye shes 'bar ba'i sgo ba bzhis bgegs skrogs shing skrogs shig pa'i don ni/phrin las 'joms pa'i bdag nyid kyis lta ba'i bgegs rnams med par gyis shig pa'i don no/ pra ha ra pra ha ra/ khro bo'i rgyal po bdud rtsi 'khyil pas/ mtshan ma'i dngos po thams cad zhi bar mdzad nas/ byin gyis rlobs shig pa'i don ni/ nyon mongs pa'i bdud 'joms pa'i bdud rtsi 'khyil pas mtshan ma thams cad bdud rtsir byin gyis rlobs shig pa'i don no//badzra pra b+hany+dza nA ya swA hA/ byang chub sems kyi rdo rje 'bar bas las dang nyon mongs pa'i bag chags thams cad zhi bar mdzod cig pa'i don ni/ 'bras bu'i rang bzhin mtshan ma 'joms pa'i ye shes kyis dngos po ma lus pa rnams zhi bar gyur pa dang /rab tu zhi bar gyur pa'i phyir ro/ /ye shes kyi rtags kyi khro bo rnams kyi phrin las don rnams bshad zin to// //da ni thugs khro bo'i phrin las bsrung ba'i don ston te/ ma ti s+thi ra badzra/ blo gros brtan pa'i rdo rjes byang chub sems kyi rang bzhin dang ldan par gyis shig pa'i don ni/ting nge 'dzin gyi rdo rjes bdag gi lus rdo rje lta bur zhi bar mdzod cig pa'i don no/ /su ti s+thi ra badzra/ shin tu brtan pa'i rdo rjes legs pa'i yon tan rdo rje lta bu zhi ba dang ldan par gyis shig pa'i don ni/ ting nge 'dzin mi 'gyur ba'i ngo bos skyon spangs nas thams cad zhi bar byed pa'i don/pra tis+thi ra badzra/ so sor brtan pa'i rdo rjes bdag gi lus rdo rje lta bur zhi bar mdzod cig pa'i don ni/ so sor rtog pa'i ye shes kyis dngos po rags pa rnams rab tu bcom nas chos nyid la gnas par byed pa'i don no/ /ma hA badzre chen po rdo rjes zhi ba'i tshul du bdud las rgyal bar mdzod cig pa'i don ni/lta spyod rnam par dag pas gzung 'dzin gyi skyon gyi bdud 'dul ba'i rtags so/ /a pra ti ha ta badzra/ rab tu brtan pa'i rdo rjes bdag la ye shes kyi mtshon cha stsol cig /gzhan gyi gti mug rnams gzhom pa'i phyir ro ni/ chos kyi dbyings kyi ye shes kyis dngos po'i mtshan ma rnams 'joms shing gti mug gnas su dag par byed pa'i phyir ro//a mo g+ha badzra/ don yod pa'i rdo rjes bdag la don rnams stsol cig pa'i don ni/ de bzhin gshegs pa'i thugs rje'i phrin las kyis 'khor ba las 'dren pa dang / don rnams sbyin pa'i tha tshig go/ /e hi badzra bden pa'i rdo rjes bdag 'khor ba las drongs shig /tshur gshegs tshur byon zhes pa ni/ me long lta bu'i ye shes kyis 'khor ba rnams stongs par gsal bar byed pa/ rtogs shing 'gro ba'i don du gshegs pa'i tha tshig go/ /shI g+h+raM badzra d+ha rA ya swA hA/dpa' bar 'gro ba'i rdo rje la gor rgyug pa'i phyir/ de bzhin gshegs pa'i phrin las mdzod cig pa'i don ni/ bya ba sgrub pa'i ye shes kyis las kyi phrin las sna tshogs pa mdzad cing dngos po rnams 'joms pa'i don/ khro bo bsrung ba'i phrin las bshad zin to// //sgo bzhi'i srung ba ston te/ye shes kyi rtags kyis srung bar byed pa'o/ /de ni lta ba log pa'i sems can rnams la/ ye shes rnam pa bzhis 'gro ba'i don du thugs rjes 'dul ba'i dbang du bstan to/ /sarba ku la A brta ya/ rdo rje 'dzin 'khor dang bcas pa bdag la byin gyis rlobs shig /gnod pa'i bye brag thams cad rab tu zhi bar mdzod cig pa'i don ni/ye shes kyi 'khor rtags kyi phyag rgyas dngos grub sbyin zhing gnod pa rnams 'dul zhing med par byed pa'i don to/ /d+ha ra d+ha ra/ byang chub sems kyi rang bzhin zhi bas thams cad khyer la gzungs su gyis shig pa'i don ni/snying rje chen po tshad med pas nyon mongs pa zhi bar bya ba dang / byang chub tu khyer la gnyis su med par byed pa'i don to/ /d+hi ri d+hi ri/ dbyings kyi rang bzhin chos nyid kyis legs par thogs shig pa'i don ni/ de bzhin gshegs pa'i ye shes kyi phrin las kyis chos nyid la zlo ba'i don to//d+hu ru d+hu ru/ lus can thams cad thugs rjes rab tu zungs la thogs shig pa'i don ni/ sgo ba bzhis dngos po rnams thugs rjes rab tu 'dul zhing 'dzin par gyur pa'i thabs so/ /sarba badzra ku laM A brta ya swA hA/ zhes pa ni rdo rje 'khor dang bcas pas bdag la byin gyis rlobs shig /gnod par byed pa'i bye brag thams cad rab tu zhi bar mdzod cig pa'i don no/ /a mu ka mA ra ya phaT/ bdag dus ma yin pa'i 'jigs pa bzlog cing / bdud rnams choms shig pa'i don ni/ dngos po'i bdud dngos po med pa la bzla ba'i phyir dang / phyi nang gi bdud 'joms pa'i rtags so//khro bo brgyad dang / sgo ba bzhi'i srung ba'i phrin las kyi don bshad zin to// //da ni khro bo'i dbang gi don ston te/ thugs rjes 'khor ba dbang du sdud pa'i phyir 'dul ba'i dbang du dbang gi las bstan te/ na maHsa man+ta badzrA NAM/ kun tu bzang po ye shes kyi rdo rje rang bzhin du dbang bskur ba'i don ni/chos kyi dbyings kyi ye shes kyis dngos po'i skyon rang bzhin gyis dag par dbang bskur ba'i don ni/ sarba ba la/ thams cad kun gyi rang bzhin stobs po ches dbang bskur ba'i don ni chos nyid kyi stobs kyis dngos po thams cad 'joms pa'i dbang bskur ba'i phyir ro//A brta ya/ ma hA ba le/ mnyes par byed pa stobs po che mgyogs pa rlung dang 'dra bas dbang bskur ba'i don ni/ mnyam pa nyid kyi ye shes kyi stobs mgyogs par byed pa dang / myur ba rlung lta bus dbang bskur ba'i phyir ro/ /ka ta be+e ta ta le/ ye shes kyi mche bas nyon mongs pa'i bdud thul cig pa'i don ni/so sor kun du rtog pa'i ye shes kyis mche bas skye bzhi 'joms pa'i rtags so/ /a tsa le/ khams gsum rnam par rgyal ba'i dkyil 'khor gyi mnga' bdag gi sprul pas bdag la dbang bskur la skyobs shig pa'i don ni/ 'jig rten las ye shes kyis rgyal bar byed pa'i thugs chos nyid kyi mnga' bdag gis dbang bskur ba'i don no//maN+Dal ma ye/ dkyil 'khor gyi srung ma rnams kyis sprul pa'i ngo bo nyid kyi mche ba sna tshogs su snang ba'i don ni/ thugs rjes 'dul ba'i dbang du skur sprul te/ 'gro ba'i don du thabs mkhas pa'i bde ba sbyin pa'i don no/ / a ti badzra rdo rje bzang pos gnod pa thams cad las bdag skyobs shig pa'i don ni/ me long lta bu'i ye shes kyis las kyi bag chags rnams 'joms pa'i phyir ro/ /ma hA ba le be+e ga ra Na/ stobs po ches mgyogs pa rlung dang 'dra bas/ gnod pa thams cad zhi bar mdzod cig pa'i don ni/ mnyam pa nyid kyi ye shes kyi stobs kyi phrin las kyis ni sdug bsngal 'joms pa'i tha tshig go//a dzi te dz+wa la dz+wa la/ yang dag pa'i shes rab kyis bdud kyi dregs pa rnams sregs shig /'bar bas nyon mongs pa sregs shig pa'i don ni/ de bzhin gshegs pa'i so sor kun du rtogs pa'i ye shes kyis lta ba'i bdud rnams med par gyis shig pa'i don/ti Ti ti Ti ping+ga le/ 'bar ba skam po 'bar bas sdug bsngal las skyobs shig pa'i don ni/ bya ba grub pa'i ye shes kyi dngos po rnams med par byed pa'i tha tshig go/ /da had ha/ bdag gi nyon mongs pa rnams sregs shig /yang dag pa'i ye shes 'bar bar gyis shig pa'i don ni/mnyam pa nyid kyi ye shes kyis rtog pa rnams mi rtog par byed pa'i don to/ /te dzo ba ti/ yang dag pa'i ye shes kyis gti mug gi mun pa las 'bar bar gyis shig pa'i don ni/ me long lta bu'i ye shes kyis ma rig pa'i lta ba rnam par sel ba'i don to//ti li ti li/ bdag gi sdug bsngal thams cad chod cig pa'i don ni/ chos kyi dbyings kyi ye shes kyis sdug bsngal rnams med par byed do/ /ban+d+ha ban+d+ha/ bgegs dang 'byung po thams cad chings shig pa'i don ni/ bya ba grub pa'i ye shes kyis gnod pa rnams 'joms par byed pa'i don no//ma hA ba le/ stobs po ches las mdzod cig pa'i don ni/ mnyam pa nyid kyi ye shes kyis 'dod pa 'byung ba'i las byed pa'i rtags so/ /badzra aM ku sha dz+wA lA ya swA hA/ rdo rje me dang 'dra bas mtshan ma thams cad zhi bar mdzod cig pa'i don ni/ me long lta bu'i ye shes kyis sdug bsngal rnams med par bsreg pa'i thabs so//thugs khro bo'i dbang gi don bshad zin to// //da ni ye shes kyi khro bo lag na rdo rje dang / khro bo brgyad dang sgo ba'i don ston te/ de ni dkyil 'khor gyi bdag po dang / 'khor gyi snying po byang chub sems yin par bstan to/ /na mo rat+na tra yA ya/ye shes kyi snying po las rnam pa bzhi'i rang bzhin te/ dkon mchog gsum la phyag 'tshal ba'i don yin pas phyag na rdo rje bdud rtsi ngo bo ni me long lta bu ye shes kyis/ ye shes thams cad kyi rang bzhin dang / 'byung gnas yin pas dkon mchog gi don du bstan to/ /na mo sh+tsaN+Da badzra pA Na ye/khams gsum gyi sems can rnams 'dul ba'i don du/ thugs rjes khro bo'i tshul du bzhugs pas rdo rje khro bor bstan pa ni/ sangs rgyas kyi thugs las skyes pas bdud 'dul dbang phyug tu bstan/ ma hA yak+Sha se nA pa ta ye/ gnod sbyin gyi sde dpon lag na rdo rje ye shes kyi ngo bor gsungs pa'i phyir ro ni/'jig rten gyi dregs pa can thugs rjes 'dul ba'i rtags su bstan pa'i don to/ /ha ra ha ra badzra/ ye shes rnam pa lnga'i ngo bo phyag na rdo rje dbus na bzhugs te/ rus ni gnod sbyin du bstan pa ste/ lha chen pos ma lus pa 'dul ba'i phyir/ dkyil 'khor gyi bdag por bstan to//gshin rje gshed kyi snying po ni ma tha ma tha badzra/ hUM ka ra gshin rje gshed kyi rgyal po'i rang bzhin me long lta bu'i ye shes kyis bdud g.yul bzlog pa'i rtags su bstan to/ /khams gsum rnam par rgyal ba'i snying po ni/ d+hu na d+hu na badzra/ mtshan ma'i dngos po thams cad 'joms pas khams gsum rnam par rgyal ba'i snying po ni/chos kyi dbyings kyi ye shes ni bdag tu lta ba'i mtshan ma rnams 'joms shing don mthong bar byed pa'i phyir ro/ ya mAn+ta ka'i snying po ni/ da ha da ha badzra/ ya mAn+taka khro bo'i rgyal po byang chub sems kyi rang bzhin ni/ so sor kun du rtogs pa'i ye shes kyis byang chub thob pa'i rgyu'o/ /nI la daN+Da'i snying po ni/ pa tsa pa tsa badzra/ nI la daN+Da'i rang bzhin/ rta mgrin sngon po'i ngo bor bstan pa ni/ ye shes rnam pa bzhi'i phrin las 'dul dbang du phyung ba'o/ /ha ya gr-i ba'i snying po ni/ da ra da ra badzra/ ha ya gr-i ba'i rang bzhin sngags kyi sa bon byang chub sems kyi ngo bo'i snying po ni/thabs mkhas pa'i chags pas dbang du sdud pa pad+ma 'khyil pa'i rtags su snang ngo / /da ra ya da ra ya badzra/ bdud rtsi 'khyil pa'i snying po'i rang bzhin/ byang chub sems mtshon pa'i rang bzhin ni/ thabs mkhas pa'i thugs rje'i phrin las kyis sems can gyi 'dod pa skong ba'i phyir ro//a mo g+ha pA sha'i snying po ni/ dA ru Na dA ru Na badzra/ yang dag pa'i ye shes kyi stobs dang ldan pas/ a mo g+ha pA sha'i rang bzhin byang chub sems kyi snying po ni/ thugs rje thabs kyi zhags pas 'khor ba rnams 'dren pa'i phyir ro/ / stobs po che'i snying po ni/ tshin+da tshin+da badzra/ ma hA ba la stobs po che/ ma hA ba la dang hUM ka ra gnyis kyi rang bzhin du bstan pa ni/ ye shes kyi stobs kyis thabs dang shes rab gnyis su med pa'i don to/ /de rnams kyi phyag rgya ni/ b+hin+da b+hin+da hUM phaT/ pad+mo 'khyil pa'i rang bzhin ye shes kyi phyag rgya bzhis sdoms shig pa'i don ni/ma chags pa chos nyid kyi phyag rgya ste/ 'dzin cing 'dren pa dang / sdud cing dgyes par byed pa'o/ /khro bo'i snying po'i rang bzhin bshad zin to/ /da ni phyag 'tshal ba dang sgo ba'i don bshad de/ de bzhin gshegs pa thams cad kyi ye shes rnam pa bzhis mtshon pa'i thabs sgo ba bzhi bstan te/na mash+tsaN+Da badzra kro d+hA ya/ phyag 'tshal ba'i don dang / phrin las te a mr-i ta kuN+Da li'i snying po'o/ /phyag na rdo rje sgrub pa'i thabs kyi don gyis rdo rje ye shes kyi khro bo zhes smos so ni/ de bzhin gshegs pa'i phrin las ni bdud rtsi 'khyil pas de'i rtags su rdo rje 'dzin pa ste/ye shes kyi khro bo ste/ phyag na rdo rjer bstan te/ 'dul dbang du smos pas mi 'gal lo/ /hu lu hu lu/ bgegs dang 'byung po rnams tshur lcags kyus drangs shig /shar gyi lcags kyu me long lta bu'i phyag rgya'o ni/ gnod pa'i bye brag rnams thugs rje lcags kyus 'dren cing /'gugs pa'i pho nya'o/ /tiSh+Tha tiSh+Tha/ chings shig lho'i zhags pa ma ste/ mnyam pa nyid kyi ye shes kyi phyag rgyas nyon mongs ba rnams dbang du sdus shig pa ni/ las dang nyon mongs pa'i bag chags rnams thabs mkhas pa'i thugs rjes 'dren cing 'dzin pa'i phyir ro//ban+d+ha ban+d+ha/ nub kyi sgo ba lcags sgrog ma ste/ so sor kun du rtogs pa'i ye shes kyi lcags sgrog gis bgegs dang 'byung po thams cad sdoms shig pa'i don no/ /byang chub sems thabs dang shes rab 'brel pa'i lcags sgrog gis gnyis su med par byed pa'i don no//ha na ha na/ byang gi dril bu ma ste/ byang ba nan tan gyi ye shes kyi ngo bos bgegs dang 'byung po thams cad rdul du rlogs shig bya ba'i don ni/ phyin ci log gnod pa'i bye brag la thabs mkhas pa'i thugs rjes stongs shig zad par byed pa'i phyir ro/ /las kyi lhag chad kha skong ba ni/a mr-i te hUM phaT/ dkyil 'khor gyi sngags zhes pa dang / shes par byed pa'i bar ni/ gong gi dkyil 'khor gyi lha rnams kyis thams cad bdud rtsir byin gyis brlabs pa'i phyir dang / dngos grub 'grub par byed pa'i thabs so/ /sgo ba dang sgrub thabs bstan zin to// //de ltar khro bo rnams kyi don bshad nas/ de'i 'og tu yon tan gyi rnam grangs cho ga'i thabs kyi bye brag ston te ni/ dkyil 'khor gyi don bstan nas/ sgrub thabs dang cho ga'i bye brag ston pa'i tha tshig go/ /sdig pa thams cad byang byas nas/ don rnam pa gnyis su shes par bya'o//rgyud kyi don la 'jug pa'i phyir dang / rgyud kyi don rtogs pas sdig pa 'byang ba ni/ dang po nyan pa'i tshe gzhan la rag las pas nyes pa 'gyod nas 'jug pa dang / de nas bsri zhing bsgom pa'i tshe/ bar chad zhi bar bya ba'i phyir gshegs pa'i don no/ /rgyud kyi don la 'jug pa'i phyir/ sdig pa thams cad byang bar bya ba ni/shes bya'i sgrib pa dang / nyon mongs pa'i sdig pa dang / zhes pa dang / sdig pa rnams 'gyod pa bskyed pa'i don zhes pa'i bar ni/ dang por nyan pa'i don la 'jug pa'i tshe/ sdig pa'i rnam grangs chos la bdag tu lta ba dang / gang zag la bdag tu lta ba dang / sgo lnga'i yal la las kyis zhen pa'i bag chags kun gzhi la bsgribs pa dang /sngon gyi bag chags da ltar smin pa dang / dngos po la zhen pa'i bdag tu lta ba dang / yang dag pa dang rgyu 'bras la yid ma ches pa'i bag chags rnams rang bzhin gyi dkyil 'khor gyi lha rnams/ ting nge 'dzin gyi dkyil 'khor du spyan drangs nas/gsal bar bsgom par bya ste/ phyi nang gi mchod pa phul nas/ nyes pa bshags te/ lus ngag gi dad pas byang chub kyi sems rin po che rab tu bskyed nas sta gon la sogs pa'i cho ga byas nas/ las kyi gzhung ma nor bar bgyi zhing mkhyen par gsol nas/ nyes pa la sogs pa bshags pa'i don no//de la rgyud kyi don rtogs pas sdig pa 'byang ba ni zhes pa dang / 'byang bar gsungs zhes pa'i bar ni/ dkyil 'khor gyi lha rnams kyi don ma nor bar bstan cing / slob dpon gyis rgyu 'bras kyi don ma nor bar bstan pas sems grol ba'o/ /de'i 'og tu sdig pa byang nas/'bras bu yon tan thams cad dang ldan pa zhes pa ni/ gang du gsungs pa bzhin byas nas 'bras bu chud mi za ba'i phyir smos so/ /sdug bsngal thams cad med par byed/ /ces pa dang / de skad gsungs zhes pa'i bar ni/ 'di'i don tshul bzhin du byas pas sdug bsngal gsum spong par byed pa ni/lha 'gyur ba'i sdug bsngal dang / 'du byed kyi sdug bsngal dang / sdug bsngal gyi sdug bsngal dang / rnam pa gsum mo/ /sdug bsngal brgyad kyang spong ste/ skye ba'i sdug bsngal dang / rgas pa'i sdug bsngal dang / na ba'i sdug bsngal dang / 'chi ba'i sdug bsngal dang /dgra sdang ba dang phrad kyis dogs pa'i sdug bsngal dang / gnyan byams pa dang bral gyis dogs pa'i sdug bsngal dang / yod pa med par dogs pa'i sdug bsngal dang / med pa mi rnyed pa'i sdug bsngal lo/ /de'i 'og tu rgyud thams cad kyi rtsa ba'i don ston te ni/ 'di ni rnal 'byor gyi rgyud dang bya ba'i rgyud gnyis don 'dir 'dus pas rtsa ba'o//rgyud do cog gi rtsa ba ste/ /zhes pa dang / don gyi rtsa bar gsungs zhes pa'i bar ni/ 'di ni/ rtsa ba byang chub sems dpas rtsa ba'i dkyil 'khor te/ 'jig rten pa dang / 'jig rten las 'das pa dbyer med pa'i dkyil 'khor te/khro bo dang / bskal bzangs dang phyi nang lha mo dang / bkra shis kyi rtags brgyad dang / lha brgyad dang / gza' brgyad dang / rgyu skar dang / phyogs skyong ba bcu dang / sgo ba rnams bri ba'i don no/ /de'i 'og tu yang rgyud kyi don gyis dpal gyi gzhir 'gyur ba ni/ de bzhin gshegs pas 'di gsungs na rdo rje gdan la gshegs pa'i tshe bdud la rtags brgyad sku la bstan nas bdud btul ba'o//dpal kun gyis ni legs par brgyan/ /zhes pa dang / legs par brgyan zhes pa'i bar ni sku ye shes kyi dkyil 'khor te/ de bzhin gshegs pa'i sku la ye shes kyi rtags bkra shis kyi rtags bstan pas/'jig rten dang 'jig rten las 'das pa'i dpal bsgrub pa'i phyir na/ thugs khro bo'i dkyil 'khor la rtags brgyad bri ba'i phyir ro/ /de'i 'og tu sems can dbang po nyams pa la phan pa'i thabs ni dbang po nyams pa'i snga ltas bco brgyad gso ba'i don te/ sems can dbang po nyams pa dang //zhes pa dang / 'byang bar 'gyur ro zhes pa'i bar ni/ dbang po nyams pa ni/ mig dang / rna ba dang / sna dang / lce dang / yid kyi dbang po nyams pa dang / de'i yul 'bras bu gzugs ni/ gzugs dang / sgra dang / dri dang / ro dang / reg bya dang / chos rnams kyang mi gsal bas nyams te/de'i rgyu bzhi mi mthun te/ sa dang / chu dang / me dang / rlung dag mi mthun pas/ de'i rkyen gyis na ba dang / 'chi ba'i snga ltas byung ba de bzlog pa'i thabs so/ /de'i 'og tu tshe nyams pa gso ba'i thabs te/ tshe srog ste/ rnam pa bzhir bstan te/ srog dbugs dang / drod dang /zas dang / las gsungs so/ /tshe zad pa dang tshe nyams pa/ /zhes pa dang / sos par gsungs kyi bar du/ tshe nyams pa'i snga ltas rnam pa lnga ste/ rgyu ni 'dod chags dang / zhe sdang dang / gti mug dang / phrag dog dang / nga rgyal te/ rgyu de dang / sems can ldan pas/ 'byung ba bzhi dus dang lnga gyur pa dang /rtags rnam pa lnga 'byung ba'o/ /de'i 'og tu dogs pa nyams pa gso ba'i thabs ni/ dkyil 'khor gyi lha rnams cho ga rgyas pa'i sbyin sreg tshul bzhin bya ba'i tha tshig ste/ phun sum tshogs min gang chags dang / /zhes pa dang / phun sum tshogs pa dang ldan pa'i thabs zhes pa'i bar ni/rgyas pa'i sbyin sreg bya ba'i thabs/ mchod rdzas rnams dang / bsreg rdzas rnams tshang bar bya ba dang / gzhung gzhan nas 'byung ba dag tu sa stegs brtsigs la/ thams cad kha dog ser po byas la/ gang la las byas pa'i sems can gyi ming dang / lha'i sngags spel zhing las byas na rgyas par 'gyur ro//de'i 'og tu nyon mongs pa'i phyogs kyis 'jig rten dang 'jig rten las 'das pa'i lha'i mi dga' ba ston pa ni/ thugs khro bo'i dkyil 'khor gyi phyi rol du lha brgyad kyi dkyil 'khor bris nas las bya ba'i don ni/ lha rnams rgyab kyis phyogs pa dang / zhes pa dang / 'grub par gsungs pa ni gong gi dkyil 'khor du gzhung gi lha mi dga' ba ste/ lha chen po'i dkyil 'khor dang / dbang gi sbyin sreg gi las dag ni/ gzhung gzhan nas rgyas par 'byung ba bzhin du rgyas par bya ba'i tha tshig go /de'i 'og tu lha 'phangs pa'i snga ltas ston te ni/ dam tshig nyams pa dang / lus ngag yid kyi spyod pa mi dge bas nyams pa'i snga ltas ni/ mdza' sdug skye bo sdang ba dang / /zhes pa dang / 'grub par gsungs zhes pa'i bar ni/ drag po'i sbyin sreg dang / dkyil 'khor gyi las dag byas par bdag gis mdza' bo shag bshes dang / snying du sdug pa'i bu smad dang / yongs kyi skye bo rnams la sdang ba'i rnam pa med par 'gyur ro//de'i 'og tu 'khor ba gnod pa ste/ bsod nams can gyi sems can bsod nams zad du nye ba na/ de'i 'khor gyi bran dang / nang gi bza' mi la sogs pa/ gnod sbyin dang / gdon stong phrag brgyad bcu'i gnod pa rnams kyis gtses pa rnams bzlog pa'i thabs ni/bram ze la sogs gtses pa dang / zhes pa'i don no/ /de'i 'og tu mi mthun pa ston pa ni/ sems can de dag las kyi bag chags gdon gyis byin gyis brlabs pa'i mthus/ phan tshun dgra bo lta bur byed pas/ de dag gi ming dang / lha'i sngags bsre zhing las byas na/phan tshun zhi bas na/ phan tshun mthun pa ma yin dang / zhes pa'i tha tshig go/ /de'i 'og tu dogs pa nyams pa ston te ni/ sems can rnams sngon gyi bsod nams zad pa'i snga ltas ni/ bdog pa'i nor rdzas dang 'brel te/ shin tu phongs pas sdug bsngal ba la rgyas pa'i las byas na 'grub pa'i phyir na/nor 'gribs pas ni gnod pa dang / /zhes pa'i tha tshig go/ /de'i 'og tu mya ngan gyis gnod pa ston te ni/ sems de dag gdon gyis gnod pas byin gyis brlabs nas/ sems sdug bsngal gyis gnod pas mya ngan skyes pas lus thang chad nas ngal ba'i sdug bsngal ba de dag la las bya ba'i dmigs yin pas na/mya ngan ngal dang gnod pa dang / /zhes pa'i don no/ /de'i 'og tu 'jigs pa dang spang pa ston te/ sems can de dag ni 'jigs pa brgyad de/ me dang / chu dang / chu dang / dus ma yin pa'i 'chi ba dang / dgra dang dug dang /rgyal po'i chad pa dang / gcan gzan khro bo dang / mi rgod kyi chom rkun gyi 'jigs pa rnams la sogs pa la/ las bya ba'i phyir na/ 'jigs pa dang ni phongs pa dang / /zhes pa'i tha tshig ste'o/ /de'i 'og tu byad stems ston te ni/ 'jig rten gyi sems can rnams gza' dang rgyu skar gyi byad stems kyis phog pa la/khro bo'i dkyil 'khor 'khor lo la gza' dang rgyu skar gyi lha dgod la/ so so'i gdug pa zhi bar bya ba'i phyir/ dkyil 'khor dang sbyin sreg gi las rnams tshul bzhin du bya ba dang / dbang bskur ba'i thabs la sogs pas zhi ba ste/ gza' dang rgyu skar byad stems dang //zhes pa'i tha tshig go/ /de'i 'og tu gdon gyis nyen pa bstan te ni/ gdon stong phrag brgyad cu rtsa bzhi rnams/ sems can rnams la gnod par byed pa la/ de bzhin gshegs pas de dag rab tu btul nas bka' dam la btags te gnas pas/ gdon gyi gtso bo phyogs skyong ba bcu'i dkyil 'khor gyi dbus su khro bo rnams rab tu bkod la/cho ga'i khyad par dkyil 'khor gyi las dang / sbyin sreg dag tshul bzhin du byas te/ dbang bskur ba ni zhi ba ste/ mi bzad gdon gyis nyen pa dang / zhes gsungs pa'i tha tshig go/ /de'i 'og tu mya ngan gyi las las byung ba'i rmi lam bstan pa ni/'khor ba'i sems can rnams nyon mongs pa'i bag chags mthur brtas pa'i sdig pa'i snga ltas kyi rmi lam sum cu rtsa gnyis te/ de yang mdo 'di gsungs pa'i tshe/ de bzhin gshegs pa byang chub kyi snying por gshegs kar bdud kyi sde gzhom pa'i phyir/ bdud kyi gnas thams cad mog mog por byas nas/bdud kyi rmi lam ltas ngan sum cu rtsa gnyis rmis pa dag /zhib tu rgya cher rol pa las 'byung ba dang sbyar ro/ /yang ni bsnan pa'i don te/ cho ga'i thabs kyis zhi bar byed pas na/ mya ngan ngal las byung ba yi/ /rmi lam sdig pa mthong na yang / zhes gsungs pa'i tha tshig go//de'i 'og tu cho ga'i thabs ston te/ des ni rab bkrus gtsang ma yin/ mdo sde dam pa mnyan par bya/ zhes pa dang / lha ngo bo bstan pa'i tha tshig go zhes pa'i bar ni/ rnal 'byor pas dang po dkyil 'khor gyi las byed pa'i tshe/ slob ma la bum pa byin gyis brlabs pa der/slob ma la sogs pa'i yon bdag dag par khrus byas nas phyi nang gi dri ma rnams rab tu bsal zhing / de'i 'og tu sta gon la gnas pa'i cho ga bya'o/ /byang chub tu sems bskyed nas/ mdo'i don 'di dad pas nyan pa'i bsod nams bskul zhing phan yon bshad/ dkyil 'khor du gzhug cing lha'i ngo bstan cing /dam bsgrags la/ bsgom pa'i lung yang dbog go/ /de'i 'og tu phyi nang gi cho ga bstan zhes pa ni/ phyis ni sa gzhi byin gyis brlab pa la sogs pa/ nang gi sngags dang phyag rgya la sogs pa/ ting nge 'dzin gyi khyad par du gyur pa'i sgom pa'i man ngag tu bstan pa'o//gang dag yid dge sems dang zhing / /gtsang ma'i gos kyis rab brgyan te/ /zhes pa dang / phyi nang gi rgyan gyis lus sems mdzes par brgyan te/ /zhes pa'i bar ni/ slob ma gzhi dad pa dang ldan zhing rab tu yid ches pas dam tshig lnga la gnas te/ dkon mchog gsum gtsor lta ba dang rdo rje slob dpon rigs gsum gyi sangs rgyas 'dra bar lta ba dang /rdo rje spun dang ming sring byang chub sems dpa'i tshogs su lta ba dang / sngags ni gtsang ma mchog gi dngos grub tu lta ba dang / phyag rgya ni dam tshig gtsang ma'i dpung du lta ba'o/ /dam tshig rnam pa de lnga dang ldan pa yang /yid dge ba rnam pa bcu ste/ lus kyi rnam pa gsum dang / ngag gi rnam pa bzhi dang / yid kyi rnam pa gsum dang ldan pas/ sems dang zhing / tshul khrims kyi spyod pa bsnyen gnas yan lag brgyad la gnas pas spyod pa tshang pa dang / slob dpon gyi lung ji skad gsungs pa bzhin bgyid pas bka' blo bde la/g.yo sgyu la sogs pa chung bas ngo rtag pa ste/ sems kyi dri ma bsal te/ slob ma de lta bus de'i 'og tu ni bdag gis yon tan dang ldan pa thob pa'i phyir sems kyi dri ma'i skyon rab tu gsal te/ nyes pa bsal nas/ de'i 'og tu nang gi rtags bsal sogs pa rab tu sar pa rab tu gtsang ma rnams slob ma'i lus dang /slob dpon gyi lus la bskon nas/ zas ni kha zas dkar gsum bza' zhing / rgyan gyi rnam pa bsam gyis mi khyab pas slob dpon dang / slob ma'i lus dkon mchog mchod pa'i phyir dad pas rgyan gyi rnam pa sna tshogs kyis mdzes par bya ba'i tha tshig go//de'i 'og tu theg pa chen po'i chos nyan pa'i yon tan bstan cing skul ma gdab ste zhes pa ni/ slob ma de lta bu de chos la skyabs su song ba'i phan yon rnam pa bzhi bstan te/ dang por chos ma nor bar ston pa'i mkhan po smra ba bsten pa dang / gnyis pa de las chos nyan pa dang /gsum pa yid la 'jog pa dang / bzhi pa gzhan la bstan pa'i phan yon ston pa'o/ /zab mo sangs rgyas spyod yul ba/ /mdo sde 'di ni nyan byed na/ /zhes pa dang / slob ma la bstan zhes pa'i par ni/ 'das pa dang / da ltar dang / ma byon pa thams cad kyis thugs ye shes kyi rtags/mdo sde 'di don zab la rgya che ba/ /de bzhin gshegs pa mngon par sangs rgyas par byed pa'i rgyu 'di rigs kyi bu dang / rigs kyi bu mo dad pa dang ldan pas/ 'di'i don gzhan la nyan pa dang / glegs bam klog pa dang / man ngag mi brjed par 'dzin pa dang / de ltar shes pa'i sgo nas gzhan la ston pa dang /gus pa'i dad pas nyams su len pa'i don dag rgyas par bstan pa'i don ni/ de'i 'og tu nyan pa'i bsod nams kyi phan yon bstan/ de ni 'di'i don mi shes pa'i mun pa sel ba dang / blo rno zhing shes rab che ba dang / rtag tu chos dang ldan zhing / de bzhin gshegs pa dang 'grogs par 'gyur ro//mdo sde 'di yi gzi brjid kyis/ /srog chags dag ni thams cad kyi/ /zhes pa dang / phan pa'i tha tshig go/ /zhes pa'i bar ni/ mdo sde 'di'i don sgrub pa'i phan yon ni/ de bzhin gshegs pa'i sku gsung thugs kyi gzi brjid kyis khams gsum sa dgu'i so so'i nyon mongs pa'i phra rgyas kyi mi mthun pa'i rnam par rtog pas sdug bsngal gsum dang brgyad kyi las rnams las thar par 'gyur ba'i don to//ci'i phyir zhe na/ mi bzad pa yi nad rnams kyang / /de dag thams cad zhi bar lta/ /zhes ba dang / gong du gsungs pa ltar bya ba'i tha tshig ces pa'i bar ni/'dod khams dang / gzugs khams dang / gzugs med pa'i khams thams cad nyon mongs pa'i las sna tshogs dang / kun gzhi la bag chags rgyu dang 'bras bu'i tshul du snga phyi da ltar glo bur du bsgribs pas/ des nad bzhi brgya rtsa bzhi 'byung ba'i khams ma snyoms pa'i nad mdo'i yon tan gyis zhi bar 'gyur ro//de'i 'og tu gnod pa zhi nas/ bde ba thob pa'i thabs ston te/ 'di'i don la don ma nor bar byas pas g.yung drung gi tshe dang / mi zad pa'i bsod nams thob par 'gyur ro/ /tshe dang bsod nams 'phel bar 'gyur/ sdig pa kun las rnam par thar//zhes pa dang / thar par 'gyur ba'i don zhes pa'i bar ni/ 'dzam bu'i gling gi sems can sngon gyi las kyi 'chi ba de mi 'chi bar bya ba dang / bsod nams zad pa bsod nams rab tu 'phel ba dang / sdig pa can rnams sdig pa las thar par bya ba'i phyir/ cho ga dang las kyi bye brag tshul bzhin du byas na bsod nams thob par 'gyur ro//dkyil 'khor gyi cho ga'i thabs dang phan yon bshad zin to// //dkyil 'khor gyi rgyan dang bum pa'i cha rgyan ston te/ che ba'i yon tan lnga dang ldan pa'i rtags su snang ste/ nor bu yungs kar dUr ba dang ni/ nor bu ni mu tig dang /byi ru dang / gzi dang / mchong dang / rin chen chu zhes pa'i tha tshig ste ni/ de ni bum pa'i snying po bya ba'i don no/ /rnam pa gcig tu dkyil 'khor gyi tshon sna lnga yang bstan to/ /yungs kar ni sku lnga dag pa'i rtags su bstan te/ de'i khongs su bsdu ba ni/ nas so ba dang / gro dang / til dang / 'bras so ba dang / mon sran gre'u la sogs te/ bum pa'i yo byad du bstan to/ /gzhan du yang rgyu chung na/ tshon rnam pa lngas kha dog bsgyur la bya ba'i don to/ /dkyil 'khor gyi mchod rdzas rnams de la bya ba'i don du yang bstan/ rnam pa gcig tu yungs kar ni mu ga ti ha rar bstan to//dUr ba ni kha rgyan gyi don te/ de'i khongs su byA kr-i dang / sing gri dang / tsan+dan la sogs pa dri zhim po'i yal ga dang bcas pa'o/ /de ni sems can gyi 'dod pa phun sum tshogs pa'i sgrub pa'i rtags su/ dpag bsam gyi shing ljon par bstan/ dkyil 'khor gyi gnas skabs su/dUr pa'i gdan bya ba dang / ku sha'i gdu bu bya ba'i don to/ /rin chen rma med tsan+dan bcas/ /zhes pa ni/ rin chen ni lnga ste/ gser dang / bai DUr+ya dang / shel dang / mu tig dang / pad+ma rA ga'o/ /zhes pa ni che ba'i yon tan lnga dang ldan pa'i rtags su bstan to//dkyil 'khor gyi rin po che'i phung po la bya ba'i tha tshig go/ /rma med ni skyon la sogs pa med pa ni zhes pa ni/ rin po che ma yin pa'i skyon kha dog 'dra ba dang / ma dag pa'i sel med pa'o/ /dkyil 'khor pho brang du gcod pa'o/ /tsan+dan bcas ni/ a ga ru dang / du ru ska/ sha ka ra dang / gur kum mo/ /sbrul gyi snying po la sogs pa'i bye brag smos pa'i don ni/ phrin las rnam pa lnga dang ldan pa'i rtags so/ /dkyil 'khor la ni lha'i gdan sa la de dag sta gon gyi dus su thig ler bya ba'i tha tshig go/ /shel dang rdo rje me tog dang ni/ shel dang rdo rje gnyis ni snying por shes pa'i don te/shel ni me shel dang chu shel gnyis kyi don te ni/ rdo rje ni snying po phyi ma gsum gyi don ni/ shing gi snying po bu ram/ rtsi'i snying po mar/ me tog gi snying po sbrang rtsi zhes pa'i don ni/ de bzhin gshegs pa'i thugs lnga rnam par dag pa'i rtags su snying po rnam pa lngar bstan pa'i dgongs pa'o//mdor na thabs dang shes rab kyi rtags dang / de bzhin gshegs pa'i ye shes kyi dper snang bas na/ byang chub shing la brten nas/ rtsa dUr ba'i steng du sangs rgyas nas/ spre'u'i rgyal pos sbrang rtsi phul nas cho 'phrul chen po 'byung bar bstan to/ /gzhan du na dkyil 'khor bstan pa ni/shel ni dkyil 'khor gyi sa ri ste/ shel ltar dkar zhing dri ma med par bstan te/ byang chub sems rang bzhin dag pa dri ma med pa'i don/ /rdo rje ni rdo rjer ba ste/ thugs mi 'gyur ba dang / thabs dang shes rab 'brel bas/ grwa'i rdo rje zla bur du bstan to/ me tog ces pa ni/bum pa'i gdan gyi tha tshig ste/ dbyar ni me tog gi dkyil 'khor bya/ dgun tshon sna lnga'i pad+ma 'dab ma brgyad pa dang / nas la sogs pa la bya ba'i don to/ /gzhan du na bum pas brgyan te/ me tog la sogs pa dang / dar gyis kha rgyan bya ba'i tha tshig ces ba'i bar ni/ bum pa'i gnas dang / kha rgyan du bstan te/ gzhan du na dkyil 'khor la ni me tog ni mdzes pas mchod pa rnam pa lngar yang bstan to/ /rnam gcig tu dkyil 'khor me tog ltar rab tu mdzes pa'i phyir mda' dang / ral gri dang / me tog dang / phur bu dang / tshon rtsi dang / srung skud dang tshems shing la sogs par smos pa'i don to//chu yi gser ram yang na ni/ dngul gyi bum pa dag kyang rung / /gtsang ma'i gos kyis dkri zhing dgang ni/ bum pa'i rgyu ste/ rgyal po ni gser gyi bum pa/ blon po ni dngul gyi bum pa/ kyang gi tshig ni lhag ma can te/ 'bangs pa la ni zangs dang lcags la sogs pa'i bum pa la bya ba'i tha tshig go//gzhan du ni phrin las so so'i bye brag tu shes par bya ba'i don ni/ bum pa de rnams kyang / dkyil 'khor gyi khyad par gyi rgyan chas te/ dbus rnam par rgyal ba'i bum pa gser las byas pa mi bsgul bar gzhag pa'i tha tshig go//dngul la sogs pa'i phyi ma rnams ni thugs khro bo'i dkyil 'khor gyi lha grangs su bya bar 'byung ngo / /lha so so'i kha dog bzhin du bum pa yang de bzhin du phyogs phyogs su rgyan chas gong du gsungs pa bzhin bya ba'i tha tshig go/ /gtsang ma'i gos ni ras sar pa kha tshar ma nyams pa dang / ting nge 'dzin gyis byin gyis brlabs pa'i tha tshig ste/ zhes pa ni bum pa de rnams kyi mgul chings lha'i na bza' ka tsa lin+da ltar byin gyis brlabs shing / tshul khrims kyi gos mchog tu bsgom mo/ /gzhan du na dkyil 'khor gyi zhal kha ba dang / 'gab dkris su shes par bya'o/ /dkyil 'khor gyi rgyan chos dang /bum pa'i don sbyar ba bshad zin to// //da ni grangs kyi khyad par gyi don ston te/ da ni bzlas brjod kyi don la dga' ba'i dbang du gsungs te/ lan grangs nyi shu rtsa gcig gam/ /yang na lan grangs brgya rtsa brgyad/ /rdo rje rnam 'joms bzlas nas su/ /zhes pa dang /grangs kyi don te/ 'bangs nyi shu rtsa gcig la sogs te/ ci 'byor pa blon po ni brgya rtsa brgyad la sogs te 'grub tshad do/ /rgyal po ni bsod nams che bas tha ma brgya rtsa brgyad do/ /blon po tha ma nyi shu rtsa gcig /'bangs kyi tha ma bdun no/ /da ni grangs kyi bsnyen pa'i don/mtshan ma'i bsnyen pa dang / tshig dang / don dang / bzlas brjod ni/ rang bzhin gyis shes par bya ba'i tha tshig go zhes pa ni/ grangs kyi bsnyen pa'i don dang / dus kyi bsnyen pa'i don dang ldan pa ste/ de yang bzlas brjod la dga' ba dang / dngos grub kyi rtags kyi mtshan ma la dga' ba dang /nam sla dus bzhi dang / tshes grangs dang / gza' dang / skar ma la dga' ba'i don gsungs so/ /de yang bzlas pa'i don la dga' ba la sngags kyi bzlas pa gsungs so/ /don gyi bzlas pa'i ting nge 'dzin la dga' ba'i phyir ro/ /gang gis de'i 'og tu khrus bya ba'i dmigs ni/rgyal po rtag tu khrus kyis shig /ces pa'i don ni/ rgyal po stobs ldan snying po la sogs pa/ rgyal po'i rigs su gtogs pa rnams so zhes pa dang / don gyis shes par bya ba'i tha tshig tu rig par bya'o zhes pa'i bar ni/ mdo'i don ni sems can thams cad byang chub snying po can du byin gyis brlabs pa'i phyir na/sems can gyi dpon po rgyal po smos pas na/ phyi rabs kyi 'gro ba'i dpon po rgyal po bas gtsor byas pas na/ phyi'i khrus bya ba dang / nang gi khrus bya ba dang / phyi nang gnyi ga'i khrus bya'o/ /phyi ni bzlas brjod dang / nang ting nge 'dzin gyi dbang du byas pa ste/des ni gzung ba dang / 'dzin pa dag par byed pa'o/ /rnam pa gcig tu phyi lus dang / nang sems kyi bag chags kyi rnam pa'o/ /de dag pa'i phyir ro/ /da ni dge ba bsngo ba'i tshul ston te/ brtsams pa'i don ni/ mdo'i don gyis dgongs pa la zhes pa'o/ /brtsam pa'i thabs ni/rig pa'i tshul gyis 'di gzhung 'chad/ brtsams pa dang mi mthun pa ni/ 'phags pa rnams la bzod par gsol/ brtsams pa'i 'bras bu ni/ 'di grub brtsams pas bde grub shog /zhes pa dang / slob dpon gyis dge ba bsngo ba'i tshul lo/ /'di don gzhan gyis bshad kyang de gsal phyir/gtan tshigs rigs pas mdo yi dgongs pa bkrol/ /mkhas pa rnams kyis mi dpya bzod par gsol/ /bsod nams mi slu 'gro ba yongs la bsngo/ /rdo rje rnam par 'joms pa'i gzungs kyi don rnam par bshad pa rgya cher 'grel pa/ bI ma la mi tras mdzad pa rdzogs so/