CLOSE WINDOW

D2674
བོད་ཡིག

/ //[ ]@##/ /rgya gar skad du/ sid+d+hai ka bI ra tan+t+ra TI kA/ bod skad du/ dpa' bo gcig tu sgrub pa'i rgyud kyi 'grel pa/ dpal rdo rje 'chang la phyag 'tshal lo/ /gang zhig sgrol ma'i zhabs pad spyi bos len mdzad cing / /bde gshegs tshul khrims gsum ldan dri med dge 'byung gnas//bstan pa'i khur 'dzin bzod pa gsum gyis brgyan pa po/ /srid gsum mchod 'os byams pa'i rtsa lag la btud de/ /bla ma'i man ngag ji bzhin rgyud gzhung 'di dag gi/ /snying rje'i ga bur yal ga rgyas pa rgya che ba/ / gsal zhing gzhal med dga' ba'i rol pa pad+ma'i rtse/ /dpa' bo gcig sgrub rgyud tshig gsal bar dbye bar bya/ /rgyud 'di'i brjod par bya ba ni ci zhig /de bzhin du dgos pa dang / dgos pa'i dgos pa dang / 'brel pa ni gang zhig snyam na/ zhi ba la sogs pa'i rang bzhin can gyi las kyi tshogs rnams ni rgyud 'di'i brjod par bya ba yin la/de'i don rgyud kyi gzhung gi tshogs le'u bzhi pa'i bdag nyid can 'di la brten nas rtogs par gyur pa ni dgos pa'o/ /sgrub pa po'i mngon par 'dod pa'i don rang dang gzhan gyi bde legs phun sum tshogs pa la dbang 'byor pa ni dgos pa'i yang dgos pa'o//'brel pa ni shugs las shes par 'gyur ro/ /kha cig 'di snyam du 'di skad bdag gis zhes pa la sogs pa gleng gzhi phun sum tshogs pa ston pa'i tshig med pas ston pa'i gsung rab nyid du ma grub po snyam du rtog na ma yin te/'di skad thes pa zhes bya ba la sogs pa ni 'phags pa kun dga' bo la sogs pa sdud pa po'i tshig yin la/ 'dir ni ston pa dang sdud pa po tha dad med par dgongs nas sdud pa po'i tshig ma gsungs pa yin no/ /yang na e waM ni thabs dang shes rab gnyis su med par mtshon pa yin la/rgyud kyi brjod par bya ba thams cad kyang ye nas thabs dang shes rab gnyis su med pa'i bdag nyid du gnas pas e waM gyi sgra ma gsungs par zad do/ /yang na rgyud 'dir ni yongs su rdzogs pa ma yin pa'i phyir gleng gzhi ma gsungs te/ sgyu 'phrul chen po la sogs pa bzhin no/ /de ltar gdul bya rnams kyi the tshom gyi rnam par rtog pa bsal nas rgyud kyi gzhung la 'jug par byed do/ /gang zag mos pa dang skal ba tha dad pa'i dbang gis 'jig rten pa'i 'bras bu dang / 'jig rten las 'das pa'i 'bras bu la mos pa gnyis las/dang po'i dbang du byas te/ shes rab kyi pha rol tu phyin pa la sogs pa zag pa dang rgya che ba'i bstan bcos la 'jug mi nus pa'i sems can la/ zhi ba dang rgyas pa la sogs pa'i phrin las la nges pa dang bcas pa de dag la/ snying rje chen po'i gzhan dbang du gyur pa nyid kyis rang rang gi rgyud du rtog pa la gnas pa'i dpa' bo gcig tu sgrub pa rnams gcig tu yang dag par bsdus te bstan to//gang zhig don 'di la nges par phyogs pa de dag 'di rnams kyi ting nge 'dzin gyi rim pas sa bcu dang pha rol phyin pa la sogs pas rgyud sde yang dag pa'i byang chub thob par 'gyur ro//'jam pa'i rdo rje zhes pa la sogs pa la/ dpa' bo gcig pa'i rgyud chen po 'dzin par nus pa'i gdul bya yang mi snang yang / cung zad tsam 'dod pa'i gdul bya la thugs rjes rjes su chags pa ni 'jam pa'i rdo rje ste/'jam dpal lo/ /'jam dpal ni sku gsung thugs mdzes pa'o/ /rdo rje ni mi shigs pa dang thogs pa med pa'i ye shes dang ldan pa ste/ des rgyud rab tu gsungs zhes 'brel to/ /gang gi don du zhe na/ sems can thams cad kyi don du ste/ sems kyi zhen pa ni bdag gi'o//don gyis zhes pa ni dgos pa'o/ /sbyin pa la sogs pas rang gi rgyud la bsod nams kyi tshogs sogs pas sems can gyi don to/ /yang na sems ni gdul bya la/ /don ni yongs su rdzogs pa'o/ /de'i don du rgyud dang sngags dang rdzas dang ting nge 'dzin la sogs pas yang dag par bsdus pa'o//rgyun mi 'chad pas na rgyud de bshad par bya ba zhi ba la sogs pa'i dngos grub gdul bya'i rgyud la rjes su 'brel pa'o/ /de gang yin na dpa' bo'i gtso zhes pa ste/ dpa' bo ni nyon mongs pa dang las dang skye ba g.yul du rnam par 'joms pa la brtson 'grus brtsam par bya ste/byang chub sems dpa' rnams so/ /de rnams kyi gtso bo ni mnga' bdag ces bya ba'i don to/ /chos ston pa la don dang tshig la mi 'jigs pas gdul bya'i rgyud bla na med pa'i yon tan phyir smra ba rnams kyi mchog go//yang na smra ba rnams ni ston pa ste/ dbang phyug chen po la sogs pa'o/ /mchog ni 'phags pa ste/ rtogs pa las byung ba'i rdzu 'phrul gyis rdo rje 'jigs byed la sogs par sprul pa'i dus su lha chen po rnams spobs pa med par bya ba'i phyir ro/ /de bas na de dag ni skyes bu chen po'i ming gi yon tan dag gis khyad par du 'phags pa'o//'gro ba'i bla ma zhes pa la/ 'gro ba ni shin tu 'od gsal bar 'gro ba dang / de las 'ongs pa ste/ 'gro ba sna tshogs so/ /de dag gi bla ma ni mnga' bdag go/ /yang na 'gro ba ni sku gsung thugs kyi don ma rtogs pa rnams yin la de dul bas na bla ma'o//yang na 'gro ba drug gi gzugs su gyur pas 'gro ba ste/ khams gsum mo/ /de dag la dbang mdzad pas bla ma'o/ /ji ltar na rgyud yin zhe na/ dpa' bo gcig grub pa zhes pa ste/ grub pa ni yongs su rdzogs pa la rab tu grags pa ste/las gang dang gang gi dbang du byas pa'i rdzas dang sngags la sogs pa'o/ /zhi ba la sogs pa'i dngos grub kyis bdud 'joms dpa' bo rnams so/ /rab mchog ces bya ba ni khyad par du 'phags pa ste rgyun mi 'chad par gnas pa'i rgyu'o/ /gzugs can gyi lha bsgom par sngags pas sngags de dag ci'i phyir sgrub ce na/gsungs pa/ lha nyid ces pa la sogs pa ste/ sngags gang grub pa'i yongs su gsal bar gyur na de'i lha de de la 'grub par 'gyur te/ 'dod pa'i don yongs su rdzogs pa'i don to/ /de ci'i phyir zhe na/rdzogs pa'i rim pa la lha dang sngags tha dad med pa dang / bskyed rim la rgyu lha la 'bras bu sngags su bstan pas so/ /de bas na/ lha nyid gsang sngags tshul gyis ni/ /zhes pa nyid ni ma nor ba'i don to/ /sngags pa ni sgrub pa po'o/ /de nyid ni sngags so//bsgoms na ni zhes pa ni rnam pa de la yang dang yang du rtse gcig tu bya ba'i dang po yid ches pa'i don du 'dod pa'i don la yang dag par bzlas pa'i sngags kyis dngos grub chen po la mi sbyor ro zhes gsungs pa ni phra mo zhes pa la sogs pa ste go sla'o/ / legs par bzlas pa'i sngags ni don de bsgoms pas 'di dang phyi mar lhag par rtogs pa'i bsgom pa 'od gsal ba la rab tu zhugs pa'i rjes su rim pas chos thams cad rnyed pas zhes gsungs pas so/ /sa la sogs pa go sla'o/ /dang po rab tu 'jug pa'i sgo nas 'di bshad pa'o//de ltar mkhyen nas zhes pa la sogs pa ni go sla'o/ /oM kA lu zhes pa la sogs pa ni 'chad par 'gyur pa'i rengs par byed pa'i sngags bzhi ste/ 'di la yang bsnyen pa dang las la sbyar ba'i dus thams cad du skad cig gis rdo rje gdan gyi rnal 'byor bya'o/ / dang po dang gnyis pa'i sngags kyi mngon spyod la sogs pa la rdo rje sems dpa'i rnal 'byor nyid kyis bya'o/ /legs par bzlas na zhes pa ni 'bum bzlas pa'o/ /dran pa nyid ces pa thams cad du brgya rtsa brgyad dam nyi shu rtsa gcig bzlas pas so/ /thal ba la zhes pa ni rdza mkhan gyi thal bas so//mngon par bzlas na zhes pa ni lag pa g.yas pa'i mthil du thal ba bzhag nas lag pa g.yon pa'i srin lag gis brgya rtsa brgyad bzlas pas so/ /gang du 'dod pa der 'gro'o/ /zhes pa ni go sla'o/ /oM ga ru zhes pa la sogs pa ni thod lo kor dang rnga lcag la lan nyi shu rtsa gcig mngon par bzlas nas rnga brdung bar bya'o/oM he he zhes pa la sogs pa la/ sngon du bsnyen pa'i cho ga ni sangs rgyas bcom ldan 'das yang dag par mchod de/ bla ma la gsol ba btab nas nyi ma re re bzhin lus thams cad bkru ba dang zas dkar gsum za ba rgyun ma chad pas 'bum phrag gcig tu bzlas par bya'o//thal ba dang zhes pa ni gza' nyi ma'i tshes grangs la bram ze shi ba'i thab kyi thal ba'am yang na dge slong gi thab kyi thal ba dang / ba dmar skya'i lci ba thang lam lhung ba'i thal ba'o/ /yungs kar la zhes pa ni bram ze'i thod phor du kun rdzob kyi bdud rtsi byugs te/skar ma rgyal gyi nyin par yungs kar bskrun pa'i 'bras bu'o/ /yang na yungs kar nyid la brgya rtsa brgyad bzlas pas so/ /zhing las zhes pa ni zhing gi phyogs gcig tu sgo gcig gzhag ste/ gzhan du na byi ba la sogs pa 'ching bar 'gyur ro//dur khrod kyi ras ni ro ras so/ /dur khrod kyi bum pa ni 'o mas rab tu bkang ba'i bum pa dur khrod du bskyal ba'o/ /sbas pa ni rlung bzung nas zhes bya bas te man ngag go/ /yung ba zhes pa ni 'dir rengs pa'i ras la bri ba ste/ yung ba dang ba bla dang a ru ra'i chu bsres pas so//rgol ba ni bkur sti la sogs pa la phrag dog pa'o/ /rtsod sbyong ba ni nor gyi don du phan tshun rtsod pa'o/ /kham phor ni zhabs nag po ra ri med pa la sngags lan bdun bzlas pa'i thod lo kor gyis sngags g.yas skor du bri bar bya'o/ /kha sbyor du byas te zhes pa ni steng du gnas pa'i kham phor la sna tshogs rdo rje ser po bri'o//de'i phyi rol du skud pa ser pos dkri bar bya'o zhes pa ni man ngag go/ /rkang pa'i mthil du sngags kyi rgyal po 'di bcug ste zhes pa ni rkang pa gnyis kyi bar du'o/ /bla gos ni gos kyi phyogs gcig la mi mthun pa thams cad rab tu zhugs par bsgoms te rang gi gnas kyi mtshams 'dab rlung bzung ste nus tshad kyi sngags bzlas nas mdud pa bya ste/'drul gyi rgyab na gnas pa'i sgrub pa'i grogs phyi mas kyang sngags dang 'dun pa'i grogs byas nas cho ga 'di mdun du 'gro bar bya'o//'jigs pa las thar nas mdud pa dgrol bar bya'o/ /chu'i pha rol du phyin nas bong ba bcug pa de gdon par bya'o/ /gnyis dang ldan par bri ste zhes pa ni sna tshogs rdo rje'i phyi rol du sa'i dkyil 'khor gnyis phyogs dang mtshams su rdo rje rgya gram gyi rnam par brgyan pa/pha rol gyi mtshams sam ri khrod la sba bar bya'o/ /sngags oM gnyis kyi kha sbyor zhes pa ni lhor sngags mgo gnyis phan tshun phrad par byas pa oM gnyis kyi dbus su bri bar bya'o/ /tha gnyis kyis yongs su bskor zhes pa la tha gnyis ni tsheg drag ste de dag gi phyi rol du bri'o//sna tshogs rdo rjes nye bar mdzes pa ni dbang chen gyi dkyil 'khor gyi khyad par ro/ /chu gnyis pa bdun zhes pa ni bum pa sar pa'i chus so/ /thal bas zhes pa ni rma bya chen mo'i rnal 'byor gyis so/ /nas chan ni bal sran dang 'bras 'dres pa btsos pa'i zan no//gtor ma chen po gtang bar bya/ /zhes pa ni gtor ma gtong ba'i dus su khyung gi dang / rdo rje'i dang / dpal be'u'i phyag rgya gsum bcing bar bya'o/ /de la khyung gi phyag rgya ni lag pa gnyis thal mo brkyang ba rgyab sprad de mthe'u chung gnyis lu gu rgyud du mdud nas ming med kyi sen mo gnyis mthe bong gis mnan pa'o//de gnyis la sdigs mdzub gnyis lu gu rgyud du bcings pa dang / gung mo dang ming med kyi sen mo'i steng du mthe bong gzhag pa ni rdo rje'i phyag rgya'o/ /lag pa gnyis thal mo sbyar nas ming med nang du bskums pa'i sen mo la nye ba'i tshigs kyi rgyab mthe bong gnyis kyis mnan te/mthe'u gnyis rtse sprad cing gung mo gnyis kyang brkyang rtse sprad de mdzub mo gnyis gung mo gnyis kyi rgyab tu lcags kyu'i tshul du gzhag pa ni dpal gyi be'u'i phyag rgya'o/ /yang lag pa gnyis gan rkyal du byas nas g.yon dang g.yas pa nyi ma dang /zla ba dang nyi ma la A li dang kA lis mtshan pa bsgoms la/ /yang lag pa gnyis kha sbub par bya ste/ oM brjod pas g.yon pa bstan/ AHbrjod pas g.yas pa bstan/ hUM brjod pas gnyis ka mnyam par sbub la gtor ma la bstan/de'i rjes su lag pa gnyis mnyam por kha sbyar nas rdo rje rtse gcig gi phyag rgya gtor snod la reg pa'o/ /yam shing lnga zhes pa ni/ a 'bras dang / byang chub kyi shing dang / bra ka Di dang / ba Da dang / ba la shing rnams so/ /'bru lnga zhes pa ni/ 'bras so ba dang / nas dang / til dang / bal sran dang / gro rnams so/ /gseg ma zhes pa ni rdo dang dngul la sogs pa'i nye bar mtshon pa'o/ /rdo leb la zhes pa ni rdo leb bzhi la sngags bris nas khang pa'i zur bzhi la gzhag par bya'o/ /dur khrod kyi ro bsregs ba'i shing gi byur bu zhes pa ni gza' nyi ma'i tshes grangs la bram ze'i dge slong gi ro bsregs pa'i shing ngo //de sgo'i steng kho na la gzhag par bya'o/ /skyed kyis 'tsho ba zhes pa ni ri dgas la sogs pa'o/ /oM hi ni zhes pa ni bsnyen pa 'bum bzlas pa'i rjes la/ ma bsgrubs su zin kyang zhes pa ni las sbyor gyi dus su khyad par gyi cho ga ma byas kyang grub par 'gyur ro//lan tshwa zhes pa ni lan tshwa dang ske tshe rin la mi rtseg par nyo ba'o/ /dpung gi tshogs rnams kyang byer bar ni bskrad pa'o/ /sbun pa'i sbyin sreg ces pa ni sha mi dang seng ldeng gi yam shing dkyus sor bcu gnyis la sogs sboms su mdzub mo dang mnyam pa'i shing bu shun pa dang bcas spar ba gang sbyin sreg bya'o//rengs pa'i sngags bzhi po 'di dag la sngags gcig gis kyang sngags gzhan gsum gyi rab sbyor byed par nges so/ /zhi ba dang rgyas pa dang dbang du bya ba dang drag po'i las rnams la rim pa bzhin du 'jag ma shar dang /me tog a mra na dang / mya ngan med pa'i shing dang bya rog gi sgro rnams kyi smyu gus bya'o/ /am+pa sim+pa zhes pa la sogs pa la/ du pa pu zhes pa'i gong du bdag gi don grub par gyis shig ces gdags par bya'o/ /rtag tu bzlas pa zhes pa ni nyi ma re re zhing rgyun ma chad par bzlas pa'o//rdo rje'i chu zhes pa ni rdo rje'i lag pa g.yas par blugs nas g.yon pa'i srin lag gis reg ste/ lan bdun bzlas nas rlung bzung ste/ /dpral bar thig le bya'o/ sim+pa zhes pa ni sim+pa'i chung shos sor gsum gyi tshad kyog po ma yin pa'o//mngon spyod la sogs pa thams cad la thun gsum ste/ mtshan mo'i thun gsum mo/ /g.yon ngos su rdza so btang ba'i thal ba dang / g.yas ngos su shing a 'bras dang / srin shing si ba dang / ras bal gyi lo ma dang / de dag gi lo ma tha dad du bzhag nas mdun du smyug ma la byas pa'i snod du lag pa g.yon pas bor nas rkang pa g.yon pas bsgrub bya de'i ling+ga bris nas rkang pa g.yon pas mnye zhing sngags bzlas par byed pa'i rnal 'byor pas zhib ma la bris pa'i ling+ga'i snying gar rkang pa g.yon pa'i mthe bong gis mnan cing /ling+ga'i mgo la a 'bras kyi lo ma dang / snying gar sim+pa'i lo ma rkang pa la ras bal gyi lo ma bzhag nas sngags bzlas pa'i rjes la rkang pas shin tu mnye bar bya'o/ /de bzhin du lan nyi shu rtsa gcig gi bar du bri ba dang phyi bar bya ba'i rjes la yi ge la sogs pa ngal so nas thal ba de dag thams cad ngos nas rkang pas shin tu drag por mnye bar bya'o//nam phyed kyi thun la yang lan nyi shu rtsa gcig bzlas pa byas pa'i thal ba dang thun mong po la bsres nas mnye bar bya'o/ /de bzhin du tho rangs kyi thun la'ang de ltar bya'o/ /gzhan yang thun gnyis kyis zhib ma'i phyogs gcig la bzhag ste langs te mi gtsang ba'i gnas su dor bar bya'o zhes pa ni man ngag go//yang de kho na'i las sbyor gzhan ni skad cig mas rma bya chen mo'i las sbyor gyis zhib ma la sogs pa la don dang sbyar ba sngags bzlas shing lag pa g.yon pa gan rkyal du byas nas a 'bras kyi lo ma dang /sim+pa'i lo ma dang / ras bal gyi lo ma gsum gcig tu dril nas skud pa ser pos dkris te gong bur bzhag ste/ de lta bu lan brgya rtsa brgyad kyi bar du bya'o/ /dbang du bya ba la sogs pa la skud pa dmar po la sogs pas bya'o/ / 'di ni zhag bdun gyi bar du nyin mo thun gsum dang mtshan mo thun gsum bya'o/ /de nas sngar gyi dril ba de skye bos dben pa'i gnas su shing la sogs pa'i 'og tu nyi ma re re gzhag par bya'o/ /de nas gzhan rdzas 'bags pa can gyi nang du chu dang bcas pa'i skyur po blugs nas/rim pa ji lta bar bshad pa'i lo ma rnams snod de gang bar ma gyur gyi bar du sbyin sreg byas nas snod de nyi ma re re zhing mis dben pa'i sar gzhag ste/ phyag gi shing bu don ma grub kyi bar du thun gsum gsum du bskul bar bya'o/ /de nas gzhan yang rdzas 'bags pa la ji ltar bshad pa'i rim pas sngar bshad pa'i lo ma rnams/tshwa dang bsres pa'i sngags bskul tshig dang bcas pa bzlas shing don ma grub kyi bar du sbyin sreg bya'o/ /snod de nyi ma re re zhing cung zad cung zad yon so sor gzhag par bya ste/ des ni bsgrub bya nad kyis zin par 'gyur ro//snod de kha sbub par gyur na bsgrub bya de nges par 'chi bar 'gyur ro/ /snod de bkrus na ni bsgrub bya de nges par sos par 'gyur ro/ /sems can rnams ni sangs rgyas kyi rang bzhin yin pas sangs rgyas gsad par 'gyur ba'i nyes pas las sbyor de gnyis kyis gnod pa tsam bya'i gsad pa ni mi bya'o//de nas gzhan yang chu shing gi 'bras bu dang bcas pa'i lo ma la tsher mas bsgrub bya bris/ de'i snying gar don dang bcas pa'i sngags bris nas bzlas shing lo ma dril te bcings nas sbrum ma yin pa la zhag bdun gyi bar du zar gzhug go//gal te mi za na de'i tshe tshwa dang bcas pa zar gzhug go/ /des kyang za bar ma gyur na de'i tshe dngos grub mi 'byung bar rig par bya'o/ /de nas gzhan yang dbye bar 'dod na/ lag pa g.yon pa'i mthil du sngar bshad pa'i lo ma gsum po gzhag nas dpung pa g.yon pa'i 'og tu nye ba'i lag pa g.yas pas lan brgya rtsa brgyad dril te sa la bskyur te sgrub pa po ma mthong bar langs te 'gro bar bya'o//de bzhin du nyin zhag gsum gyi bar du bya'o/ /de nas gzhan yang zhib ma'i snod sar pa'i nang du rdza bsregs pa'i thal bas maN+Dal byas nas lag pa g.yas pa'i lo ma gsum po ri mo ji lta bar g.yon pa'i sen mos bcad nas bya ba pa'i sngags brjod cing thal ba'i maN+Dal gyi steng du dor bar bya'o//de nas maN+Dal de bshig nas dri zhim po la ral gcig ma dang / mya ngan med pa'i lha mo dang / dug sel ma dang / rma bya chen mos yongs su bskor ba'i 'jigs pa med pa'i sgrol ma'i maN+Dal byas nas sngags ji tsam du nus par bzlas pa byas nas zhag bdun du nyin re zhing thun gsum gsum du bya ste/ thun re la brgya rtsa brgyad bzlas nas thal ba des rtsod sbyong la sogs pa thams cad zhi bar 'gyur ro//a 'bras kyi lo ma srang gcig /shing sim+pa'i lo ma srang gcig /ras bal gyi lo ma srang gcig /tshwa zho gnyis/ ske tshe zho gnyis/ dud pa zho gnyis de dag zhib mar blugs te/ mtshan phyed na sgrub pa po gcer bur byas te/ skra grol bar byas nas byang du mngon par phyogs te/zhi ba'i sems dang ldan pas sngags bzlas shing mnye bar bya'o/ /yang lo ma de dag srang la bcal te cha bsnyams te/ 'dag pa byas nas khang dri'i rus pa'i tshad tsam gyi ri lu bya ste/ ku sha'i skud pa la rgyus nas thogs te/ gos gtsang ma gyon/kha nub tu bltas nas btson dgrol ba la sogs pa'i bzlas pa bya'o/ /phrin las thams cad la phreng ba 'di dang ldan pas phrin las bya'o/ /de nas yang shing sim+pa'i lo ma dang dbang du bya ba'i rdzas la sngags bzlas shing sbyin sreg bya'o/ /de'i rjes la dkyil 'khor la thab khung bya ste mtshan mo'i dus su seng ldeng ngam khang dri'i me la mdog gcig pa'i ka ra bdun gyis thun gsum du sbyin sreg bya'o//gzhan yang zhib ma mkhregs po mdun du bzhag nas skrod pa'i las bya ba 'dod pa'i bsam pas sngags spel tshig dang bcas par bzlas shing /zhib ma la rim pa ji lta bar lo ma gsum gzhag ste bskams pa la lag pa gnyis kyis mnyes te/ rang gi g.yon ngos su lo ma'i phye ma de dag la bkab ste/ zad pa dang ma mthong bar spangs te 'gro bar bya'o/ /gzhan yang sngar bshad pa'i lo ma rnams la re re zhing brgya rtsa brgyad du bzlas nas tsher mas rengs par byed pa'i sngags spel tshig dang bcas pa bris te/kham phor gtsang ma'i nang du gzhug la kha sbyar ba la rdo rje rgya gram bris la skud pa ser pos dkris nas skud pa sar pa btags te khron par dbyangs pa dang / ji ltar chur nub pa de ltar skud pa gtang bar bya'o/de nas gzhan yang gnas par 'dod pas sngar bshad pa'i lo ma gsum po la brgya rtsa brgyad bzlas shing / lo ma re re la yang kha la phur bu'i 'debs pa'i sngags spel tshig dang bcas pa lan bdun bzlas pa'i tsher mas phug ste dben pa'i gnas su gzhag go//de nas gzhan yang rang nyid mgrin pa nub tsam gyi chur zhugs te/ rkang pa g.yas pa a 'bras kyi yal ga dang / g.yas pas sim+pa'i yal ga mnan te/ ras bal gyi me tog gis zhag bdun gyi bar du thun re re bzhin du chu'i nang du dor bar bya'o/ /des dgra la sogs pa rengs par 'gyur ro//de nas gzhan yang bshad ma thag pa'i me tog gsum po de'i kha smras kyi sa la mngon par chas pa'i thag mi ring tsam du gnas te sngags brgya rtsa brgyad du bzlas shing mnye bar bya'o/ /des ni kha smras las rgyal bar 'gyur ro/ /de nas gzhan yang ba'i lci ba las kong bu gsum byas nas de la a 'bras dang shim+bi dang ras bal gyi lo ma chag pa rnyings pa ma yin pa rim pa ji lta bar bcug ste/lag pa g.yon pas phreng ba bzung nas sngags bzlas shing skud pa phreng ba la nye bar mchod pa byas nas gtsang ba'i phyogs su 'dug ste/ kha lhor bltas nas mtshan mo thun dang po'i rjes la don dang sbyar ba'i sngags ji tsam nus pa zhag bdun du bzlas pa bya'o//de nas gzhan yang sgyed [(]po [,]pu [)]gsum gyi steng du khog ma sar par 'bras sA lu'i ling+ga gsum byas nas dbang du bya ba'i bsam pas sngags spel tshig dang bcas pa zlos shing 'og tu me btang lo ma de dag thams cad bsreg par bya'o//gzhan yang rgyas pa'i thab khung ngam gyo mo sar par srin nyi chung shos la sngags bzlas shing byang bu mngon du phyogs pas sngags 'bum phrag gcig bzlas shing sbyin sreg byas na dpal chen por 'gyur ro/ /e shod thi rdo rje zhes pa la sogs pa la/e sha zhes Do ste sho ta pu r+Na rna ba'o/ /ud+thi ta zhes pa dan pa la'o/ /dz+wa la zhes pa ni arga dkar po'o/ /dzi ho zhes pa ni snu hi'o/ /'di dag cha mnyam por bsres te 'dag par byas nas srang la gzhal ba'i ri lu bya ste/ gzhon nu mas bkal pa'i skud pa'i phreng bas swAhA'i gong du zhi ba la sogs pa gang 'dod sbyar ba'i sngags bzlas par bya'o//sbun pa'i zhes pa bar shun spar ba gang dang u dum+WA ra'i shing sor bcu gnyis kyi tshad shing bu dang bcas pa'i yam shing dang / kha nub tu bltas te/ rengs pa'i thab ser po'i nang du sbyin sreg bya'o//chu zhes pa ni 'bab chu'o/ /khyim zhes pa ni gang gi khyim srung bar byed par ming sngon du 'gro bas snyim pa bdun gtor te phyogs che ge mo srung bar bsam par bya'o/ /mes tshig pa'i me kha las thar bar byed do zhes pa ni tshig pa'i sa la lan nyi shu rtsa gcig bzlas nas rang gi lag gam rtsa dUr bas byab pa byas shing phu gsum byas nas me gdon par bya'o//de nas gzhan yang rab tu sbyor ba ni gser dang dngul dang rdza gsar pa'i khog ma la sogs pa'i snod gtsang ma'i chus yongs su gang ba'i dbus su zhi ba la sogs pa'i don du thod pa'i snod du me tog dkar po la sogs pa la thun gsum du sngags brgya rtsa brgyad bzlas shing /rma bya chen mo'i rnal 'byor dang ldan pas don ma grub kyi bar du pad+ma'i phyag rgyas sbyin sreg bya'o/ /oM pad+me zhes pa la sogs pa ni/ oM pany+tsa ni la swAhA zhes pa'i mtha' can 'di nas sngags brgyad mi 'jigs pa'i sgrol ma'i rnal 'byor gyi bzlas pa dang las la sbyar bar bya'o//sngags dang po la phu gsum gyi yi ge sbyar bar bya'o/ /mig ces pa ni tshes grangs gang la mig nad langs pa la de kho na la rengs par bya ste/ sngags 'di bzlas shing mthe bong dang srin lag gi thal ba khyer nas kha steng du blta ste mig kun du yongs su bskor bar bya'o//byab pa zhes pa lag pas byab pa'o/ /rtsig pa la zhes pa ni thod lo kor la lan brgya rtsa brgyad rtsig pa la bris pa'i sngags de mig nad can gyis rtag tu blta bar bya'o/ /oM mo tsa ni zhes pa la sogs pa la/mi 'jigs pa'i sgrol ma 'dis mngon par bsngags zhes pa ni lan brgya rtsa brgyad do/ /bcings pa la mngon du phyogs pa zhes pa ni gang na btson bu bcings pa yod pa'i phyogs de la blta zhing de la dmigs pas bzlas pa byas na grol par 'gyur bar blta ba dang / grong de la gnas nas chu gtor ba'o/ /rtag tu zhes pa ni gong bzhin du'o/ /oM ha ri zhes pa la sogs pa la/ sa'i steng du zhes pa ni dri zhim po la sogs pas byug pa bya'o/ /yang dang yang du zhes pa ni sngags kyi phreng ba gnyis rim pa dang rim pa las bzlog pa bris te rim pa dang rim pa ma yin pa phyi ba'i thal ba gtor te bsrub par bya'o//yang na pad+ma phyed pa bri zhes pa gong bzhin du 'brel lo/ /oM ta ra Ni zhes pa la sogs pa ni che ge mo'i dzi baM zhes pa ni lha sbyin la sogs pa nye bar mtshon pa'o/ /oM ta ra zhes pa yang gong bzhin no/ /oM raN+Da zhes pa la sogs pa la/pho nyar 'ong bas zhes pa ni pho nyar 'byung ba la chu khyor ba re re la lan bdun bdun bzlas nas 'thung du bcug pa'o zhes 'brel to/ /yang na bum pa'i chu la lan nyi shu rtsa gcig bzlas te pho nyar 'byung ba la ji tsam 'dod pa 'thung du gzhug ces pa ni man ngag go/ /oM a ma ra Ni zhes pa la sogs pa la/legs par bzlas pa ni sngon du bsnyen pa 'bum mo/ /mngon par bsngags zhes pa las sbyor ba lan brgya rtsa brgyad mngon par bsngags na'o/ /sngags mdud ces pa ni gzhon nu mas bkal pa'i skud pa de thal mo'i bar du bcug nas stong pa nyid las byung ba dmigs te sngags brgya rtsa brgyad bzlas so//de nas mdud pa rang la sngags lan bdun bzlas pa'i mdud pa byas nas nad pa'i ske la gdags par bya'o/ /rtag tu zhes pa gong bzhin no/ /mar dang til zhes pa ni nyi ma re re bzhin du nad zhi ba la byi la'i rkang rjes tshad tsam gyi til gyi brgya rtsa brgyad dang /de bzhin du ba dmar mo'i mar la yang sbyin sreg brgya rtsa brgyad bya'o/ /dgos pa chen po la sbyin sreg stong ngo / /shin tu che ba la khri tsho'o/ /lan brgya sgrub pa zhes pa rgyun ma chad par sngags bzlas shing snod la mar gzhag la bskus te g.yas skor gyis chu de der bar bya'o//de ltar lan brgya'i bar du bya'o/ /gdug pa'i sman la zhes pa ni/ 'bras mkhar ma can gyi 'dag pa cha lnga mnyam por byas nas ri lu bya'o/ /rjes la cha lnga po'i phyed me la gdung bar byas pa dang phyed de ltar bzhag nas yang gcig tu byas nas g.yas ngos kyi snod du gzhag go//g.yon du ni tshwa dang ske tshe'o/ /de nas skrangs rlos dang thor pa la sogs pa byung ba'i nad pa byang du kha bstan la/ slob dpon lhor kha bltas nas lag pa gnyis kyis 'dag pa des nad pa la byab par bya'o/ /de nas tshwa dang ske tshes kyang byab par bya'o/ /de'i rjes la chus g.yas skor dang g.yon skor bya'o//de nas de dag thams cad khron pa skam po'am lam rgya gram du gtor bar bya'o/ /be+e do la sogs pa ni shing tog gi nye bar mtshon pa'o/ /gza' nyi ma'i tshes grangs la nad pa byang du mgo bstan la gan rkyal du gzhag ste/ de'i gsus pa'i skran gyi thog tu be+e do la sogs pa'i shing tog gzhag ste/nyi ma gsum du lan nyi shu rtsa re re bzlas pa'i mtshon gyis sngags bzlas shing / steng 'og tu gshags la tshal pa bzhi bya'o/ /gshags pa de dag las logs su thal ba nye ba'i rtsig logs la gzhag ste/de dag bskams pa dang skran yang skam par 'gyur ro/ /de nas yang sngags 'di bzlas shing byang shar du mgo bstan pa'i skran nad kyi steng du tA la'i lo ma gzhag ste/ be'i shing thog gi yu ba tshig pa'i sol ba'am de'i shing tshig pa'i sol bas sngags mgo zhabs bzlog la bri'o//ni rgun thi zhes pa la sogs pa ni sman gsum po de cha mnyam por byas la sngags 'di zlos shing bdug par bya'o/ /de la ni rgun thi ni sin du bar la'o/ /nim pa'i rtsa ba ni grags par zad do/ /rma bya'i mjug sgro ni shing khi bi tsha'o/ /kha cig mA yU ra shing kha yang zer ro//las kyi sbyor ba gzhan yang bram ze'i srin po la sogs pa dgra gang yang rung ba'i skra bzung nas rang skra grol ba gcer bu khro ba can du byas nas them pa la gnas nas mtshan mo'i thun gsum du ming dang spel ba'i sngags brjod cing mnye bar bya'o/ /nub gsum gyis 'chi bar gdon mi za'o//khrus byas na zhes bsnyen gnas yan lag brgyad la gnas pa'i bud med do/ /rjes su dran pa zhes pa ni rgyun ma chad par bzlas zhes pa'i tha tshig go/ /gzhan yang tho rangs nam langs pa'i dus su mal las ma g.yos par sngags lan brgya rtsa brgyad bzlas pa'i chu khyor ba bdun nas ji srid du chu srang brgyad kyi bar du 'thungs na de srid du nad byang bar 'gyur ro//byab pa zhes pa ni nyi shu rtsa gcig bzlas pa'i lag pas sam rtswa ku shas so/ /oM pa da zhes pa la sogs pa la/ legs bsgrubs na zhes pa ni yi ge'i grangs kyi bsnyen pa 'bum byas la de'i bcu'i cha sbyin sreg byas na dngos grub kyi rtags mthong ba'o//chu 'thungs na zhes pa ni lan brgya rtsa brgyad bzlas pa'i chus so/ /mar la btags pa'i zhes pa ni thun gsum du brgya phrag brgyad kyis lhag pa ste de'i khyad par ro/ /oM bi shA tsi zhes pa la sogs pa ni ri khrod lo ma'i sku bsgoms nas swA hA'i 'og tu nad pa'i ming sbyar te sngags bzlas phyi dro'i dus su kha shar du blta ste zhi ba'i thab khung du me tog dkar po dang zho'i zan dang /'bras ma chag pa dang / rtswa dUr ba dang / tsan+dan dkar po rnams kyis sbyin sreg bya'o/ / de bzhin du brgya phrag brgyad bzlas pa dang / de bzhin du bum pa gsar pas blangs pa'i chu la brgya rtsa brgyad bzlas pa'i chus khrus bya ba dang / de bzhin du sngags 'dis gong bzhin du mdud pa bya ba dang / de bzhin du lag pa g.yas pa'i khyor bas chu blugs te/ g.yon pa'i srin lag gis reg nas sngags brgya rtsa brgyad bzlas pa'i chu khyor ba gsum gsum zhag bdun gyi bar du 'thung ba dang /de bzhin du byab pa zhes pa gong bzhin du sngags lan nyi shu rtsa gcig bzlas pa'i lag pa'am ku shas byab pa ste/ las kyi tshogs thams cad la sbyar bar bya'o/ / de bzhin du rtag tu zhes pa thun gsum du brgya phrag brgyad bzlas pa'am/ de gsum mi nus na thun gcig la'o/ /de bzhin du rab tu sbyor ba gzhan man ngag gis kyang shes par bya ste/ dza yan+ti dkar po'i yal ga bdun bdun gcig tu bsdoms te lan bdun bdun sngags bzlas nas phon bdun bya ste/'brum bu gcad pa'i phyir 'brum bus btab pa'i nad pa shar phyogs su mngon par bltas nas/ bdag nyid nad pa'i mdun du langs nas thun gsum du byab pa byas pas na da las grol bar 'gyur ro/ /man ngag gi rab tu sbyor ba gzhan yang / shar du mngon par phyogs par 'phags pa spyan ras gzigs dang rdo rje gdan pa'i mdun du maN+Dal dang mchod pa bya ste/zhi ba dang byams pa'i sems dang ldan pas zhi ba'i thab khung du g.yul du shi ba'i skra dang rus pa bsreg par bya'o/ /man ngag gzhan yang gtam gyi sbyor ba ni gleng gzhi las glA gA zhes bya ba'i ma dang /gangs zhes bya ba'i bu glas 'tsho ba zhig yod de/ de nyin par las byas nas/ dgongs mo brdos te zas za'o/ /nam zhig gi tshe rmi lam du khu ba 'dzags pa gos hrul la lhung ste de skam pa'i phyir tshang bang gi steng du gzhag go/ /de'i tshe de'i mas 'bras zan gyi khu ba zhig btung ba'i phyed 'og tu bzhag pa dang /de'i nang du gos hrul lhung bar gyur to/ /de nas ma des khu ba dang 'dres pa'i 'bras kyi chu de 'thungs pa dang sbrum mar gyur te/ dus la bab pa dang bu gcig btsas so/ /de nas mas sdig pa'i nad bdag la ci yis bskyed ces smras nas grong gi phyi rol du bor ro//de nas bu des sdig pa'i nad ces bya ba 'brum nad du gyur to zhes grag ste gtam rgyud de dran du gzhug cing bdag gis kyang gtam rgyud 'di zlos shing sngags 'di bzlas te/ sngags kyi yi ge re re'i bar du ma smad gnyis kyi ming bcug nas bris pa'i shog bu yang nad pas grang nad byung dogs pas rtag tu blta bar bya'o//oM a+ya r+ya zhes pa la sogs pa la tri ti ya zhes pa ni tshes gzhan mtshon pa'i brda'o/ /nad langs pa'i nyi ma la byabs nas phu gsum bya'o/ /de ma yin na mi 'grub bo//tshes gang la zhes pa la sogs pa ni 'di'i las sbyor gzhan yin te/ tha chen po gsum gyi nang du phreng ba phyed dang gsum gyi sngags gsum shes rab kyi pha rol tu phyin pa'i las sbyor gyis bri bar bya'o/ /oM sh+tsa zhes pa la sogs pa srung ba byed do zhes pa ni/ rtag tu bzlas pas so zhes pa ni tshig gi lhag ma'o//bal sran zhes pa la sogs pa la/ sogs kyi sgras bal sran chung shos dang ku lang+tha dang yungs kar dang yungs nag dang ske tshe rnams bsdu'o/ /'di dag kyang srin la sogs pas ma khyer ba dang ma zos pa dang ma tshig pa la lan nyi shu rtsa gcig bsngags te/nad pa'i spyi bor bcom ldan 'das sku mdog dkar po bdud rtsi'i rang bzhin gyi 'od zer gyi rgyun 'bab par bsgoms pas sngags bzlas shing thun gyis brdeg go/ /rdo rgyus zhes pa ni shar du mngon par phyogs pa'i bcom ldan 'das bsgoms nas brgya rtsa brgyad bzlas pa'i rdo rgyus kyis rdza so ma btang ba'i kham phor gnyis la lan nyi shu rtsa gcig bsngags te/bu che ge mo bsrung bar gyis shig ces pa dang spel ba'i sngags bris te kha sbyar nas lan nyi shu rtsa gcig bzlas pa'i nya rgyas dril te gang na bu yod pa de'i khang pa'i sgo'i nang ngos su gdags par bya'o//spra tshil zhes pa ni spra tshil la sngags lan gcig bzlas nas yang sngags bzlas shing dgra bo'i gzugs byas na zhes 'brel to/ /brkos na zhes pa ni de kho na bzhin du phur ba'i las tshogs rnams la yang dgra'i sgo'i 'og tu brko'o zhes pa ni tshig gi lhag ma'o/ / mngon par bsngags pa zhes pa ni khro bo gtum po chen po'i rnal 'byor gyis mar ngo'i tshes brgyad dang bcu bzhi la dur khrod kyi thal ba la lan brgya rtsa brgyad bzlas nas gtor bar bya'o zhes pa ni man ngag go/ /mngon par bsngags zhes pa ni shar du mngon par phyogs pas nyi ma nub pa'i dus su bcom ldan 'das yang dag par mchod de ral gri bkrus nas sngags 'di bzlas shing thal ba la lan bdun sngags bzlas nas gtor te sngags 'dis lan brgya rtsa brgyad mngon par bsngags nas sgo'i thad kar gzhag go//rang rgyal bar gsol ba btab nas snga dro g.yul du gzhug par bya'o//snying rje'i sems bskyed de bdag rgyal bar gyur pa dang / gzhan la mi gnod pa sems la byed cing g.yul ngor 'jug pa'i dus su dri chu la lan bdun bzlas nas ral gri myur du bkrus te bcom ldan 'das kyi gzugs bsgoms nas gong bzhin mngon par bsngags par bya'o//de nas gzhan yang sngar bshad pa ltar ral gri bkrus te lan brgya rtsa brgyad mngon par bsngags pa'i rgya skyegs kyi khu bas ral gri la hUM phaT kyi gong du rgyal bar gyur cig ces sbyar ba sngon du 'gro bas sngags bri'o/ /de nas gzhan yang gong bzhin du rdza'i thal ba ral gri la gtor nas rgya skyegs nyid kyis sngags bri'o//bya ba gang la zhes pa ni khong pa'i mdun gyi gla yer mtho sar ba'i lci ba gtsang mas byug pa byas nas rang nyid shar du mngon par phyogs par byas pa'i mdun du bcom ldan 'das bsgom zhing / de'i mdun du zho rdza phor gang dang /'o ma phor gang dang / me tog dkar po dri zhim po'i chu rdza phor gang dang / nyer spyod lnga'i mchod pa dang bcas nas don bsams nas 'dod pa'i don la gsol ba btab nas/ mtshan mo'i thun gcig la lan brgya rtsa brgyad bzlas nas dbul bar bya'o//gal te bsod nams can yin na de'i tshe dge ba dang mi dge ba mngon sum du ston par 'gyur ro/ /yang na rmi lam du bcom ldan 'das kyis ston to/ /don thams cad la zhag nyi shu rtsa gcig gi bar du bya'o/ /de nas gzhan yang rtsod pa byung ba'am/ grong gzhan du 'gro ba'am/ don gzhan byung ba la gong bzhin du bcom ldan 'das kyi spyan sngar thams cad byas nas 'bras sA lu'i mkhar ma zan dang 'o ma dang nya sha btsos pa rnams kyis bcom ldan 'das la gtor ma dbul lo/ /de nas gzhan yang zho la sogs pa 'dres pa'i zan gyis bkang ba'i rdza phor gnyis lag pa gnyis kyis gzung ste/mtshan mo mi thams cad nyal ba'i dus su rang nyid gcig pu phyi rol du byung ste bcom ldan 'das la gtor ma phul nas bdag gi don la gsol ba btab ste bag tsam phyin pa na/ gal te de la dge ba'i smra ba thos na dge ba'i 'bras bu 'grub la/mi dge ba'i smra ba thos na mi dge ba'i 'bras bu 'byung ngo / /de nas gzhan yang bdag gis bcom ldan 'das kyi bskyed pa'i rim pa'am/ rdzogs pa'i rim pa bsgom par bya ste/ bcom ldan 'das kyi gzugs ji lta bu zhe na/ sa la btsugs pa zhes la sogs pa la/ thags mkhregs ni mkhregs pa'o/ /thags bzangs ni bar med pa'o/ /stong pa nyid ni de'i mtshan nyid dang bral ba ste/ dngos po de dag gi thugs su sba ba'i mtshan nyid gzugs dang rjes su myong ba'i mtshan nyid tshor ba zhes pa la sogs pa'o//ya sos ma mchu mnan pa dang / pus mos la btsugs pa dang / nga rgyal thams cad zil gyis mnan pa'i phyir steng 'og tu mig gi 'bras bu blta ba dang / dam tshig sems dpa' bzhin du bsgom par bya zhes pa ni rang gi snying gar ro zhes pa'i don to/ / de nas gzhan yang sems dpa'i skyil krung gis sngags nyi shu rtsa gcig bzlas te de'i rjes la mal na 'dug pa tsam gyis kyang thams cad bsrung bar 'gyur ro/ /de nas gzhan yang ni las brgya rtsa brgyad bzlas pa'i lo ma skam po la oM tsaN+Da ma hA ro Sha Na che ge mo'i rims 'jig par gyis shig hUM phaT ces pa'i sngags 'di snag tshas bris nas shog bu zur bzhi nas dril te skud pa dmar pos phyogs bzhir bcings nas/de nas mi g.yo ba'i nga rgyal gyis shar du mngon par phyogs nas bcom ldan 'das kyi gzugs su mngon par bsgoms nas pus mo btsugs pas rims nad can mnan te/gzi brjid chen pos skra la sogs pa la btags na rims 'jig par 'gyur ro/ /rims sod pa'i rjes la shog bu de chu gtsang ma la bskyur ro/ /de nas yang thun phyed lus pa'i nam gyi cha smad la mal nas langs te/ sems dpa'i skyil krung gis shar du mngon par phyogs par 'dug pa la bcom ldan 'das bsgoms te/g.yas pa'i khu tshur gyis sdigs mdzub gyen du bsgreng ba/ g.yon pa'i khu tshur gyis brtan por bzung nas shes rab 'dod pas rgyun ma chad par bzlas pa bya'o/ /zhag bdun gyi bar gyis mkhas par 'gyur ro//de ma yin na yang nyi ma re re zhing rim gyis bzlas pas shes rab dang ldan zhing thos pa 'dzin par 'gyur ro/ /oM kA sh+ya pa na zhes bya ba la sogs pa la yum shes rab kyi pha rol tu phyin pa'i rnal 'byor gyis mig 'gul ba'i dus su gal te mi dge na sngags zlos shing bya ba byas pas dge bar 'gyur ro//oM dzaM le na zhes pa la sogs pa ni sna tshogs pad+ma dang zla ba la rdo rje skyil krung gis bzhugs pa/ zhal gcig phyag gnyis sku mdog dmar po lang tsho la bab pa/ g.yas pas lcags kyu dang / g.yon pas ut+pal 'dzin pa/dbu la 'od dpag med kyis rgyas btab pa/ chags pa chen po'i gdangs can gyis bcom ldan 'das ma sgrol ma bdag gis bsgom par bya'o/ /bsnyen pa sngon du 'gro bas las sbyor brtsam par bya ste/ nyi ma re re zhing gdong bkru ba ni man ngag go/ /du ba blangs la zhes pa ni mar ngo'i tshes brgyad dam bcu bzhi la nyi ma phyed dam nam phyed na kha nub tu bltas te sngags bzlas shing /ba dmar skya'i mar gyis so ma btang ba'i rdza phor la du ba phab la zhes pa ni man ngag go/ /kha thur du bltas pa'i me tog ces pa ni a d+ho puSh+pa ke'am/he ta hu li'am/ go ban+d+ha na zhes grag go/ /shrI khaN+Da zhes pa ni tsan+dan dkar po dang de gnyis las sbyor gyi gong du nyi ma la tshags byas nas gzhag ste/ skar ma rgyal la de gnyis bzung nas sngags bzlas te/ srang la gzhal nas mnyam par bya ste/ bsres te nyi ma de nas brtsams nas thig le bya'o//cho ga bzhin du zhes pa ni zan dang me tog la sogs pa dang ldan pa'i sgrub pa po'i grogs po dang bcas pa dur khrod du phyin nas ro'i thab khung gi steng du dbang du byas pa'i thog tu rtswa ku sha gzhag pa'i mdun du gong du bshad pa'i rdzas kyi tshogs bshams te/'dod pa'i don la gsol ba btab nas smra ba bcad pas ling+ga khyer te/ rang gi khang par 'ongs nas nyi ma phyed dam nam phyed na ling+ga'i thog tu nye bar 'dug ste/ nub tu mngon par phyogs pas snying gar zla ba la gnas pa'i hrIH'i yi ge las spros pa'i 'od zer lcags kyu dang /zhags pa lta bus g.yo ba dang mi g.yo ba thams cad snying gar phug ste/ 'gugs shing rang gi rkang pa'i 'og tu lhung bar bltas nas nyi ma re re la brgya phrag brgyad bzlas shing zhes 'brel lo/ /de nas gzhan yang phyag gnyis pa'i ku ru kul+le bsgoms te/ rang gi snying gar gnas pa'i hrIH'i sa bon gyi 'od zer gyis brtan pa dang g.yo ba bkug ste rang gi rkang pa'i drung du lhung ba dang dbang du gyur pa dang /ci zer ba nyan pa dang / rjes su gnang ba zhu ba'i rnam par bsgoms te gong du bshad pa'i dus tshod la sngags bzlas par bya'o/ /oM s+t+waM b+ha ni zhes pa la sogs pa ni spyan ma'i snying po ste/rgyun ma chad par zlos pa la 'jigs pa thams cad sel bar byed do zhes pa'i tshig gi mtha' can dang 'brel lo/ /nyon mongs pa rgyun gyis brgyud pa'i tshogs las skyob pa gos bzhin du ste pa Ta'o/ /de rnam par 'jig pa'i sbyor bas len pa'i don sbyar bas pa Ta la ste le'u'o//dang po zhes pa ni nyon mongs kyi dgra gsod par nye bar brtsam pa thog mar byed pas so/ /le'u dang po'i 'grel pa'o// //legs par sangs rgyas pa'i zhes pa ni ston pa gzhan ma yin pas so/ /rab sad ces pa ni rgyun ma chad par gsung rab la goms pas dbang po rnon po rab tu sad pa'o//yon tan gzhi yin pa zhes pa bla ma'i zhabs kyi pad+ma la nges pas dbang ba la sogs pa'i rim pas bde gshegs kyi sgrub thabs rtogs pas so/ /bla ma la gus pas zhes pa ni lus ngag gi sri zhus bla ma mnyes par bya'o/ / brtson pa zhes pa ni bya ba ngan pa dang bral ba sems can gyi don la spro ba can no/ /oM na mo zhes pa la sogs pa ni khas pA Ni'i skur bdag nyid bsgoms nas shar du mngon par phyogs pas khye'u'am bu mo kha shar du bstan nas/ oM na mo zhes pa la sogs pa nas sU trA ya na mo zhes pa'i mtha' can gyi sngags bzlas shing me long bkrus pas dag par byas pa'i me long bstan pa zhes 'brel lo//dgongs sngar drung du zhes pa ni khrus dang gtsang sbra dang bsnyen gnas kyi sdom pa dang ldan pas so/ /lha'i bu zhes pa ni gzhon nu gzugs can gser gyi mdog lta bu rgyal po chen po'i rol pas bzhugs pa'o//rtag tu bzlas na zhes pa ni 'bum bzlas pa'i rjes la nyi ma re re zhing rgyun ma chad par stong phrag re re bzlas par bya zhes 'brel lo/ /oM shra ba na zhes pa la sogs pa ni gong bzhin du thams cad go sla'o/ /oM na ma zhes pa la sogs pa ni lha mo tsun+de'i ting nge 'dzin gyis bya ste/gzhan thams cad gong bzhin no/ /oM mu tsi li zhes pa la sogs pa la/ bsnyen gnas la sogs pa thams cad gong bzhin no/ /gzhan ni go sla'o/ /oM pra dz+wa la la sogs pa'i las so/ /oM na ma zhes pa la sogs pa ni go sla'o//oM kar+Na zhes pa la sogs pa la/ sha za'i shing zhes pa ni sha ko Da ka'i shing ngo / /'jig rten gsum las rnam par rgyal ba'i ting nge 'dzin la gnas shing zhes pa ni gshin rje gshed kyi ting nge 'dzin la yang dag par zhugs so/ /oM tsa tur pU dza zhes pa la sogs pa ni legs par gsal lo//oM b+hu d+ha zhes pa la sogs pa la/ the tshom med pa ni bsnyen gnas kyi sdom pa dang ldan pas so/ /lig bu mig ces pa ni tshong dpon las 'ong ba'i rdzas rdo'i bye brag go/ /ma ri sha sngo'i sa bon dang 'dra ba la'i lungs so/ /shing a gasti zhes pa ni shukla bang gla sha na zhes pa rgya gar dang bal yul na yod/oM swa b+hA na zhes pa la sogs pa ni cho ga gong du bstan pas go sla'o/ /oM ad+hid ces pa la sogs pa yi ge 'bum bzlas pa zhes pa ni yi ge re re la 'bum bzlas nas don brtsam par bya'o/ /pri yang ku'i me tog ces pa la sogs pa ni nyi ma re re zhing thun gsum nyi shu rtsa gcig gi zhag gi bar du brgya phrag brgyad sbyin sreg bya'o//pa lA sha zhes pa la sogs pa ni sbyin sreg 'bum gyis zhes pa'i mtha' rgyun ma chad ces lhag ma'o/ /'o ma can gyi yam shing zhes pa ni dug shing gi rigs spangs pa'i gzhan rnams so//bzlas pa byas pa rnyed par 'gyur/ /zhes pa ni bdun phrag gsum du'o/ /gzhan go sla'o/ /oM dza ye zhes pa ni 'jig rten dbang phyug gi ting nge 'dzin la yang dag par zhugs pas te/ zhal gcig phyag gnyis/ sku mdog dkar po//dpe med pa'i gzugs can bde ba'i gdan la gzhugs pa'o/ /gzhan go sla'o/ /oM me khe zhes pa la sogs pa la/ 'bum ni mi zad pa'i nor gyi phung po'o/ /oM ka ma la zhes pa la sogs pa la/ dpal chen mo zhes pa ni zhal gcig phyag gnyis pa me tog pri yang ku lta bu'i sku mdog ljang gu//sna tshogs pad+ma dang zla ba la gnas pa/ chos 'chad kyi phyag rgya can rgyal po chen po'i rol pas bzhugs pa/ g.yon du ut+pal sngon po gzhag pa/ bud med kyi sgyu ma'i nga rgyal gyis 'gying bag can gyi sgrol ma ste/ dpal chen mo'i ming gi rnam grangs so//de'i ting nge 'dzin la gnas pa'am/ kha cig na re nor rgyun ma'i ting nge 'dzin la gnas par bya'o zhes zer ro/ /gzhan go sla'o/ /oM nan+ti zhes pa la sogs pa la/ 'di ru cho ga ni 'di kho na'o/ /oM dzaM b+he zhes pa la sogs pa la/ rje btsun ma sgrol ma zhes pa ni byin rlabs dang bcas pa'o//mngon par ma chad ces pa brtsams pa'i nyi ma nas bzung nas ji srid 'bum phrag bdun rdzogs par ma gyur pa de srid du rgyun ma chad par nyi ma re re thun gsum du ji ltar nus pa'i sngags bzlas shing me tog re re'i zhabs la dbul bar bya'o//oM ba su zhes pa la sogs pa la/ ba'i lci ba zhes pa ni sa la ma reg pas so/ /lhag ma go sla'o/ /oM ba su zhes pa la sogs pa la nges pa la gnas pa zhes pa ni bsnyen gnas kyi sdom pa dang ldan pa dang / dkar gsum za ba/ dus gsum la mgo 'khru ba dang / rtswa ku sha'i gdan la bsnyal ba'i don to//nor rgyun ma'i ting nge 'dzin la gnas pas bya'o zhes pa ni man ngag go/ /de kho na bzhin byas nas rgyud las ji ltar gsungs pa ltar rnyed par 'gyur ro/ /oM ba su zhes pa la sogs pa ni/ bcom ldan 'das ma'i sngags so/ /lhag ma brgyad ni 'khor gyi lha mo brgyad kyi'o//bcom ldan 'das ma ni sna tshogs pad+ma dang zla ba la skyil krung phyed pas bzhugs pa/ gser btso ma'i mdog lta bu dang / phyag g.yas na shing thog pi dza pU ra dang bcas pa'i mchod sbyin gyi phyag rgya can/ phyag g.yon pa na 'bras kyi snye ma bsnams pa/ rin po che'i cod pan can/ rgyan kun gyis yang dag par brgyan pa/ bud med kyi sgyu ma'i nga rgyal gyis 'gying ba/ rin po che 'bar ba skyug par gyur pa'i pad+ma'i gter la sogs pa zhabs kyis mnan pa/ lha mo gzhan rnams ni gtso mo dang 'dra ba'o/ /gser gyi 'dab ma zhes pa ni khrus byas gos gtsang ma gyon bsnyen gnas la gnas pa skar ma rgyal gyi nyi ma la gser gyi smyu gus mngon par bris zhes 'brel lo//bcug ste zhes pa ni sgrub pa pos de'i nyin par kho na rab gnas byas te dbang bskur nas nyi ma de nas brtsams te dus gsum du de'i mdun du de'i dkyil 'khor dang de'i mchod pa byas nas bcom ldan 'das ma'i sngags brgya phrag brgyang bzlas par bya zhes pa ni man ngag gi bshad pa'o//oM dzaM b+ha la zhes pa la sogs pa la/ bcas pa zhes pa ni byin pa g.yon pa'i steng nas lha mos 'khyud pa'i don te/ kha sbyor du bya ste zhes pa gsung gi tshig gi mtha' can gyi bar du bcom ldan 'das ma'i cho ga bzhin du mngar gsum gyis yongs su gang ba'i snod kyi dbus su bzhag nas de'i mdun du thun gsum du mchod pa dang dkyil 'khor la sogs pa bya ste/nyin re bzhin du thun re brgya rtsa brgyad bzlas pa'i khyor chu sbyin pa'i rjes la bcom ldan 'das la mngar gsum phul nas/oM dzaM lum swA hA zhes pa'i sngags 'dis kha bkab pa'i rdza phor gyi steng du chu khyor ba brgyad phul nas sngags brgya phrag brgyad bzlas par bya'o/ /zla ba drug gi bar du'o zhes pa ni man ngag go//bdud kyi bar chad 'byung bas brtson 'grus bskyed par bya'o/ /nam du yang the tshom mi za bar bya'o/ /gnyis pa zhes pa ni 'jug pa'i sems rtogs pas so/ /le'u ni snga ma bzhin no/ /le'u gnyis pa'i 'grel pa'o// //oM badzra tIk+Sh+Na zhes pa la sogs pa la//sngags 'dis bcom ldan 'das mtshan yang dag par brjod pa'i skus las kyi tshogs bsgrub par bya ste/ mtshan yang dag par brjod pa'i sgrub thabs las shes par bya'o/ /snying ga'i pad+ma dang zla ba'i steng du zhes pa ni sna tshogs pad+ma dang zla ba'i steng du'o/ / sems dpa' can zhes pa ni sems dpa'i skyil krung gis bzhugs pa'o/ /lag pa gnyis kyis bdag gi mgo 'dzin ma zhes pa ni lag pa gnyis kyis spyi bor rdo rje 'dzin ma zhes pa'o/ /rdo rje lcags kyu la sogs sngags rnams kyis zhes pa ni rim pa ji lta bar mdun du gnas pa pad+ma dang zla ba'i steng du ye shes kyi 'khor lo bkug ste/bdag la rab tu zhugs shing dbang sdud la sogs pas tshim par byed pa dang / 'gro ba dgag pa dang / dgag par byas nas rim pa bzhin du yang dag par mchod/ des de kho na bzhin du rab tu zhugs par bya'o zhes so//nang par bsam zhes pa'i tshig gi mtha' can la baM gyi sa bon yongs su gyur pa las sna tshogs pad+ma'i nang na gnas pa'i zla ba la pad+ma'i skyil krung gis bzhugs pa zhes pa ni lhag ma'o/ /d+harma d+hA tu zhes mthar rnam par bsgoms nas gong bzhin du bsnyen gnas kyi sdom pa la sogs pa sbyor ro//shu dag ces pa la sogs pa ni bcom ldan 'das yang dag par mchod pa dang maN+Dal byas la de'i mdun du rim gyis shu dag sran ma tsam nas zho phyed kyi bar du goms pas de nas tshad de nyid kyis 'thung ba brtsam par bya zhes pa ni man ngag go/ / gzhan ni go sla'o/ /oM bA kye zhes pa la sogs pa la me tog spos ma reg pa dang 'brel lo/ /sbyin sreg 'bum phrag bzhi byas nas zhes pa ni shar du las thams cad pa'i thab khung zhes pa ni lhag ma'o/ /'di dag ni sngon du bsnyen gnas sdom pa dang ldan pas bya'o/ /rang skyur zhes pa ni lo ma skyur po'i don to//b+h+ra ma'i phye dang skyur po bsres pa 'di gnyis kyi nyams len ni shu dag gong bzhin no/ /lcags las byas pa zhes pa ni ma yu ral gri ba dang / su bar paN+Di ta zhes pa'i lcags gnyis gang yang rung ba las byas pa'i ral gri lag pa g.yon pas bzung nas/phyi rol du sgrub pa po'i grogs gzhag ste/ gzas zin pa ma mthong bar g.yas pas lte ba'i thad kar phreng ba bzung zhes grogs pos zla ba gza' las grol lo zhes mi zer gyi bar du bzlas pa bya'o/ /'khor lo zhes pa ni gser dang dngul dang 'khar ba dang zangs de rnams yang gang yang rung ba cig la byas pa'o//rdo rje zhes pa ni me tog pun+ta ka'i shing dang me tog nA ga ge sar gyi shing gang yang rung ba cig gis so/ /rtse gsum pa zhes pa ni byang chub kyi shing las byas pa'o/ /'jag ma shar zhes pa ni mda'i rgyu'o/ /tho ba zhes pa ni ma d+hu ka'i shing ngam/rak+ta tsan d+ha na'i shing ngam/ a sho ka'i shing rnams gang yang rung ba las byas pa'o/ /zhags pa zhes pa ni gser dngul la sogs lcags brgyad kyi gang yang rung ba zhes pa'o/ /yang na rtsa mur ba'am 'jag ma bal pa dzas byas pa'o/ /lcags kyu dang /ral gri khru gang ba dang / mtshon b+hir+Na Di pA la dang / mdung thung dang / dgra sta dang / mdung dang / gtun shing dang / dbyug pa dang / ras dang / /nor bu dang / rma bya'i mjug ma dang / gter dang / gdugs dang / rnga yab dang / rgyal mtshan dang / ba dan dang / me tog ut+pal dang / me tog pad+ma dang / tA la'i lo ma dang / ta ri rnams ni la sogs pa'i don te/ ji ltar 'byor pa khyer nas bsgrub par bya'o/ /rim pa rnams kyis zhes pa ni badzra tIk+Sh+Na la sogs pa rnams kyis so/ /bcud len la sogs pa ni bdud rtsi rnam pa bdun dang ka ra'i bza' ba'o//'o ma'i thug pa dang / lcags sman dang / dbang phyug chen pos byas pa'i dngul chu'i sman dang / ka ra dang rtsa ba med ces bya ba sman sbyor dang / ka ra dang ku shu'am Na Da gnyis las byung ba'i sman sbyor dang / bu ram dang shing thog kuSh+ma Na p+Di las byung ba'i sman sbyor dang /ka ra dang skyu ru ra las byung ba'i sman sbyor rnams so/ /mig sman ni ra sAny+dza na zhes pa rdo'i bye brag go/ /ba dmar skya'i mar dang / pad+ma dkar po'i skud pa'i sdong bu las byung ba'i snag tsha dang / sngo b+h+r-ing+ga ra dza'i khu bas sbyar ba'i dum bu dang arka'i lo ma las byas pa'i snag tsha'o//thig le zhes pa ni gi wang ngam/ ldong ros sam/ gur gum mam/ tsan+dan dmar pos so/ /rkang la bsku ba zhes pa ni sngo go ban+d+ha na dang shing shal ma li'i khu ba dang bcas pas so/ /rkang la bsku ba ni nye bar mtshon pa'i brda'o/ /yang na lha ma ni shing las byas pa'o//dbang du gyur pa'i rdzas ni me tog pri yang ku dang / spos kyi shing sa li ha ka dang / ru ta cha phyed dang / me tog nA ga ge sar cha phyed kyis byugs pa'o/ /sman spos ni la pa Na kha Di dang / spos ni na khi dang / tsan+dan dkar po dang / ga pur dang / a ru ra dang / 'di gnyis cha mnyam pa'i spos so//gzhan du bstan pa'i dbang du bsdu ba'i rdzas rnams lhan cig tu bsdus nas kyang cho ga 'dis bsgrub par bya'o/ /'o ma zhes pa ni de bzhin du zla ba gzas zin pa'i dus su mar khu dang ka ra btab pa'i 'o ma 'bras thug dang de bzhin du zho dang 'dres pa'i zan dang bza' bar bya zhes 'brel to//bal sran ma sha zhes pa ni me dang mar nag dang mar khu dang chus ma reg pa dang / ma rul ba dang srin la sogs pas ma khyer ba dang / yongs su rgyas pa dang / bdud rtsi lngas yang dag par byug pa byas pa dang / legs par bskams pa dang / spos dkar pos dril ba'i bal sran rnams zla ba gzas zin pa'i dus su bcom ldan 'das yang dag par mchod nas de'i mdun du shar phyogs su kha bltas nas de dag khar bcug ste/ bde ba'i stan la 'dug nas zla ba ma mthong bar zla ba gza' las ma grol bar du ma yengs par bzlas pa bya'o//de nas sgrub pa'i grogs pos zla ba grol ba bshad pa dang kha nas phyung nas ban sran myu gu can rnams chu khyor ba gang gi nang du bzhag nas sos ma reg par mid par bya zhes 'brel lo/ /myu gu med pa de dag sa la ma reg par byas nas mi ma yin pas zin pa rnams kyi mgor sngags bzlas shing phye ma byas nas btab na de las thar bar 'gyur ro//pad+ma zhes pa ni ji ltar rnyed pa'i dkar po la sogs pa'i pad+ma rnams so/ /bil ba rnams kyi zhes pa ni srin la sogs pas ma khyer ba dang / dgos pa can smin pa dang / ma smin pa rnams kyi'o/ /ji lta ba bzhin du rnyed pa zhes pa la sogs pa ni dri zhim pa'i me tog dkar po rnams kyis so//pad+ma la sogs pa me tog gi mtha' can gyi las sbyor gsum po 'di dag 'jam dpal gyi rgyud las gsungs pa'i rgyas pa'i thab khung khru bcu drug la rab tu sbyor ro/ /mar la btags pa'i zhes pa la sogs pa ni bal sran bzhin du 'bru lngas dbang gi thab khung la sbyin sreg bya'o//rtag tu zhes pa la sogs pas rgyun ma chad par byams pa la sogs pa bsgoms pa'i sems dang ldan pa dang / mtshan yang dag par brjod pa'i bshad pas badzra tIk+Sh+Na zhes pa la sogs pa'i sngags kyi don skye ba med pa'i rang bzhin bsgoms pa dang ldan pa dang /theg pa chung ngu'i byang chub la rgyab kyis phyogs pa dang / bdag don bag tsam byed pa las kyang log pa dang / bskal pa mthar thug par rgyun ma chad par gzhan don mngon par phyogs par byed pa dang / brtson 'grus shin tu 'bar ba dang /drod la sogs pa lhag par mos pa'i sa rnams rtogs pas rab tu dga' ba la sogs pa rnams la rab tu 'jug pa'i rjes su rim pas chos kyi sprin gyis thob pa'i rjes la kun du 'od kyis skye ba 'di la thob par 'gyur ro/ /de bzhin gshegs pas rjes su bzung ba la yang dag par zhugs pas zhes 'brel lo//oM d+h+rIHzhes pa la sogs pa ni dpa' bo gcig tu sgrub pa bcom ldan 'das kyi sngags 'di sngar gyi sngags gnyis dang bya ba mtshungs pas gong gi bzhin du 'bras bu yang mtshungs par 'gyur ro zhes so/ / oM hrIHzhes pa la sogs pa ni/ bcom ldan 'das ma 'di'i bsgom pa brjod pa'i rjes su zhes brjod do/ /oM pra kr-i ti zhes pa la sogs pa ni rang bzhin gyis yong su dag pa ste sgrib pa dang bral ba'i phyir ro/ /sarba d+harmA zhes chos thams cad ces pa phyi rol gyi chos rnams so/ /pra kr-i ya pa ri shud+d+hou0f85haM zhes pa ni pra kr-i ya ni rang bzhin gyis so//pa ri shud+d+ha ni yongs su dag pa'o/ /a haM ni bdag ste nang gi chos rnams so/ /de gnyis kyi khyad par bshad pa brjod pa ni swa b+hA ba zhes pa la sogs pa ste yongs su rdzogs pa'i tha snyad btags nas rgyu dang mi rgyu zhes pa la sogs pa'o//'od gsal mngon par brjod nas rdzus skyes kyi sems can gyi tshul gyis rdzogs rim gyis bcom ldan 'das ma brjod pa ni pad+ma zhes pa la sogs pa'o/ /gong du smos pa zhes pa ni bcom ldan 'das ma bzhin du lha mo bzhi yang bsam par bya'o/ /lte ba'i phyogs su zhes pa ni lte ba'i nang du'o//gzhan yang bsgom pa brjod pa ni nges par bdag nyid ces pa ni gong gi dmigs pa la sems rtse gcig pa'o/ /oM mdzad de kho na'i yi ge ni pad+ma rA ga lta bu'o/ /sngags dang 'dres pa'i sman gyi nus pa brjod pa ni/ pa tha ni sngo a ka na b+hid d+hi zhes pa'o//se gru zhes pa ni sman sho bany+dza na'o/ /sen+ta pa ni rgyam tsha'o/ /a ru ra la sogs pa'i phye ma srang gcig khyer nas/ mar bre gang zhes pa ni ba mar phul bzhi blugs nas sman btab nas chu 'o ma la ma thim gyi bar du bskol bar bya'o/ /sngags 'di'i sbyor ba gzhan ni shu dag ces pa la sogs pa 'di dag thams cad phye ma mnyam por byas nas thun gcig tshad dam phyed kyi tshad kyis so//oM b+ha ga ba ti ni la sogs pa go sla'o/ /oM a rka zhes pa la sogs pa la bsnyen gnas las zhes pa ni gong bzhin du sgom pa pos bzlas par bya zhes sbyar ro/ /dbyangs/ can gyi mar ram zhes pa ni sngar gong du bshad pa'i dbyangs can gyi mar ram/ yang na sngo b+ha rma'i mar kho na dbyangs can gyi mar ro/ /mar srang sum cu rtsa gnyis ni ba mar phul bzhi dang / b+harmi'i khu ba phul bcu drug /ra'i 'o ma phul bcu drug /u ba la sogs pa srang re re/ a ru ra ni lho las byung ba'o//ma la ti ni sre shing sge'u me tog go/ /pi pi ling la sogs pa sman lnga srang gi bzhi cha bzhi cha'o/ /yang dag par bsdus nas mar dang bsres nas sman pa'i man ngag gis zhes 'brel lo/ /oM a nan+ta zhes pa la sogs pa ni go sla'o/ /oM a ra zhes pa la sogs pa la/dben pa ni yid du 'ong ba'i gnas so/ /de las gzhan pa ni ri bong 'dzin pa zhes bya ba'i sgrub thabs las shes par bya'o/ /rgyud 'di las bdag nyid bcom ldan 'das kyi sku dang de ma yin pa 'jam dpal gyi sku'i pad+ma'i 'og tu bsgrub bya gan rkyal du bya ste/ bcom ldan 'das kyi phyag gi ut+pal las bcings par bsams nas de'i khar thun gsum du me tog dkar po brgya rtsa brgyad kyi sbyin sreg bya'o//oM bA gI zhes pa la sogs pa la 'khor lo'i dbus su zhes pa ni 'khor lo la gnas pa'i zla ba'i dkyil 'khor gyi steng du yi ge muM dmar po bsgom par bya'o//oM d+harmA zhes pa la sogs pa ni go sla'o/ /oM badzra tIk+Sh+Na zhes pa la sogs pa go sla'o/ /'jug pa'i sems bskyed kyis 'bring gi chen po rtogs nas gsum pa'o/ /pa Ta la snga ma bzhin no/ /le'u gsum pa'i 'grel pa'o// //oM la ba Na zhes pa la sogs pa la/sgeg pa'i cha lugs zhes pa ni sgrol ma dang khro gnyer can la rol pas blta ba'o/ /bzhugs pa zhes pa ni pad+ma'i skyil krung gis so/ /tsha ba'i sbyin sreg ces pa ni dbang du sdud pa'i cho ga las bshad pa'i sor bcu gnyis pa'i thab khung seng ldeng ngam khong khri'i me mdag du ba med pa la rin la mi rtseg par nyos pa'i thun gcig gi tshad kyi sbyin sreg bya'o//de nas g.yas pa dang g.yon pa gnyis su dgang gzar dang blugs gzar bzung tshwas bkang nas gzar bu gnyis kha sbyar te de lta bu'i dgang blugs gsum dbul bar bya'o/ /tshwa dang bcas pa zhes pa ni rin la mi rtseg par nyos pa'i tshwa dang bcas pa'i spra tshil gyis bsgrub bya pho'am mo'i sor bzhi'i tshad byas la/seng ldeng gi me mdag ces pa ni seng ldeng gi me mdag gam khong khri'i me mdag pa ba sangs kyi nyin par blangs pa'i dur khrod kyi sol ba dang bcas pas gang ba'i snod la zangs kyi thur mas bud med kyi mtshan ma phug pa'i rkang mthil phug nas/thur ma ma zhig par bya ste me la bdug par bya'o/ /gal te zhig par 'gyur na de gnyis thal bas gang ba'i snod kyi steng du gzhag ste dus bag tsam song nas yang gcig tu bya'o//yang na sngar bzhin tshwa dang bcas pa'i bsgrub bya pho dang mo gang yang rung ba'i ling+ga bsku byug byas pa'i 'dag pa'i snod du byas nas gong bzhin du bdug par bya'o/ /gzhan go sla'o/ /oM la ba Na zhes pa la sogs pa la/ tshwa dang ske tshe mnyam por byas pa zhes pa ni 'gron bu rdog po nyi shu rtsa gcig gam/brgyad cu rtsa bzhi'am/ khal nyi shu rtsa gcig gi rin ma rtseg par ske tshe nyos nas thum po byas te dur khrod kyi thab kyi steng du ling+ga dang bcas pa snying gar bcug nas thun gsum du ma dang bde'am/ bza' bde'am/ nyin mo bde'am/ phyi nas zhag bdun bar du bri bar bya'o//de rjes khugs na rin la mi rtseg par nyo ba'i tshwa dang mnyam par byas nas gyo mog che shos kyi thab khung du sbyin sreg bya'o zhes 'brel lo/ /oM ku ru ku l+le zhes pa la sogs pa la/ /sngar smos pa'i ting nge 'dzin la gnas pa zhes pa ni ku ru ku l+le'i ting nge 'dzin la gnas pas so//yungs kar dkar po zhes pa ni 'bum phrag bdun sbyin sreg bya'o/ /sangs rgyas kyis bcom ldan 'das ma'i bzlas pa'i tshig 'bum phrag bdun gsungs kyang bsnyen pa bye ba byas na zhag nyi shu rtsa gcig gis las sbyor gyi sgrub pa po'i mngon par 'dod pa bsgrub po//de nas gzhan yang las la sbyar na gong bzhin du sgrub pa byas pa'i ske tshe dang tshwa cha mnyam por byas nas gong bzhin du sol bas gang ba'i snod du grong khyer dkrug pa'i phyir nub tu kha bltas rdo rje skyil krung bcas te dbang du bsdu ba'i phyir thun gsum du sbyin sreg bya'o/ /ji ltar bla ma'i rim pa dang rim pa las lhag ma 'di'i las sbyor yod pa rnams ji bzhin du gzungs sngags kyi rgyal po 'di la yang yod do//ta nyi ku rul+lA/ g+hu ru g+hu rA si/ ag+ni ni ku Ta dza Ni/ ta ka ta ka mi/ de kha ku ru kul+lA/ mo ha ri b+hi ban+ti/ tsha tha pa te ra/ a pa ra d+ho hi ni b+ha dza bI/ hi ra Ni nam ka ra si/tin+ni rtsu lu rak+ta pi yaM/ a mu ka ka ra ma ba shaM/ sngags kyi rgyal po 'di la gang gi ming btags nas chu la brgya rtsa brgyad bzlas te 'thungs na de ji srid 'tsho'i bar du dbang du 'gyur ro/ /oM a ma le zhes pa la sogs pa ni rtsig pa 'dod yon gyi snam bu zur bzhi byas nas de'i nang du g.yas skor gyis rtswa ku sha rnams dgram mo//'grub par 'gyur zhes pa ni skyes bu'i 'dod pa'i don byed pa'i mchog dang / gzhan don la chags pas bklags pa tsam gyis sngags 'grub par mi 'gyur ro zhes mi mos pas spro bar mi bya'o/ /gsung rab kho na bzhin du dad pa dang brtson 'grus kyi sgo nas ji ltar gsungs pa'i las sbyor dang bzlas pa la sogs pa shin tu 'bad par bya ste brtson 'grus dang ldan pa la re ba nges par 'grub ces pa'i don to//de bzhin gshegs pa'i gsung rab la nam yang 'gyur ba med do/ /mang du smos pas ci zhig bya ste/ bde bar gshegs pa las gzhan pa'i bden pa smra ba dang khams gsum la yang dag par spyod pa mi srid do//bzhi pa zhes pa ni rab kyi chen po rtogs nas so/ /rdzogs pa zhes pa ni de bzhin gshegs pa'i mdun du bdag gis ma lus par thob pa'i don to/ /le'u bzhi pa'i bshad pa'o// // bsod nams 'di yis zag med phung po thob gyur nas/ /'gro rnams srid gsum las rgyal sangs rgyas myur thob cing / /gzhan yang dge ba'i tshogs kyi nyes pa kun spangs te/ /ye shes blo can rgyal sras yon tan ldan par shog /dpa' po gcig tu sgrub pa'i 'grel pa gtsug lag khang dza gad da lI lan gyi su b+hA ka ra zhes bya bas mdzad pa rdzogs sho/