CLOSE WINDOW

D2672
བོད་ཡིག

@/ /'phags pa dpung bzangs kyis zhus pa'i rgyud kyi tshig gi don bshad pa'i brjed byang bzhugs// @##/ /chos dbyings mnyam pa nyid la rab zhugs kyang / /thugs rjes gtan du mya ngan mi 'da' zhing / /'gro ba'i don mdzad mtha' yas gzugs mnga' ba/ /dpal brtan rdo rje bsnams la phyag 'tshal lo//de ltar bsdus pa'i don dang dgos pa dag /slob dpon khyad par can gyis gsal mdzad kyang / /tshig gi don dang mtshams sbyar brgal ba'i lan/ /rang la gces pa'i don du cung zad dbye/ /de la gnod sbyin bdag po zhes bya ba ni phyag na rdo rje ste/gnod sbyin thams cad 'dul bar mnga' gsol ba'i phyir ro/ /nyi ma stong gi gzi zhes bya ba ni sku dang thugs kyi yon tan la sbyar ro/ /thugs rje zhes bya ba ni sems can thams cad la brtse bar dgongs pa'i don to/ /rtse gcig yid gyur zhes bya ba ni de bzhin nyid la dgongs pa'i don to//bzhugs pa la zhes bya ba ni tshangs pa'i gnas pa la sogs pa ste thugs rjes zhes smos pa'i phyir ro/ /dpung bzangs tshul bzhin gus par phyag 'tshal nas/ /zhes bya ba ni shin tu dang bas mgo bos yab kyi zhabs la gtugs te phyag byas pa'i don to//tshogs kun grub la zhus zhes bya ba ni sangs rgyas dang byang chub sems dpal la sogs pas/ rig sngags dang gsang sngags mang po so so'i cho ga zhib mo gsungs pa rnams nges par dngos grub tu gyur par bya ba'i don rnams zhus zhes bya ba'i tha tshig go//sa steng mi rnams zhes bya ba ni skabs 'di la sogs rig sngags 'chang la sbyar ba'i shas chung ba'i don to/ /bzlas brjod ces bya ba ni yan lag bzhi pa'i don to/ /smyung ba zhes bya ba ni kha zas mi za ba'o/ /dka' thub ces bya ba ni 'gal ba'i zas dang gos spang ba'o//nges par spyad pa zhes bya ba ni smyung ba dang mi smra ba'i dka' thub kyi dus 'di srid gcig tu bya'o zhes lus dang ngag gi sgo shin tu sdom pa'o/ /rab tu bsgrims kyang grub pa ma mthong na/ /zhes bya ba ni 'bad par ni gzigs la grub par ni ma gzigs zhes bya ba'i tha tshig go//gtso bo khyod kyis zhes bya ba ni skabs 'dir phyag na rdo rje kho na smos pa ni sa 'dzin nam rdo rje'i rigs kyi shas cher gsungs par rig par bya'o/ /sdig 'joms zhes bya ba ni gsang sngags de dag gi las rnam par dag pa bstan to/ /dag byed rnams kyi mchog ces bya ba ni rang bzhin rnam par dag pa bstan to//bden pa'i gsung gis rab tu bka' stsal na/ /zhes bya ba ni rgyud rnam par dag par bstan pa'o/ /ji ltar sngags rnams 'bras bu ma mchis gyur/ /zhes bya ba ni rnam par dag pa'i khungs nas byung ba la/ slu ba mi srid par brjod pa'o//rab dang 'bring dang de bzhin tha ma zhes bya ba la sogs pas ni nam mkha' la 'gro ba la sogs pa'i dngos grub sgrub pa po la yon tan yang yod/ gsang sngags kyang mthu che mod kyi/ ma bsgrubs pa'i phyir dngos grub ma thob po zhes bya ba'i glan ka bsal ba'i don to//'bras bu zhes bya ba dang grub pa zhes bya ba ni rnam grangs te/ nam mkha' la 'gro ba la sogs pa'o/ /sgrub pa nyon mongs kho na ci rung lags/ /zhes bya ba ni ngal ba'i 'bras bu med pa ni smad pa'o zhes bya ba'i tha tshig go/ /rgyal ba zhes bya ba ni sdig pa mi dge ba'i chos las rgyal ba'i phyir sangs rgyas te/ji skad du/ sdig pa mi dge'i chos las nga rgyal te/ /de phyir nga ni nye 'gro rgyal ba yin/ /zhes gsungs pa lta bu'o/ /ye shes zhi ba zhes bya ba ni sangs rgyas kyi mkhyen pa la 'dod chags la sogs pa ma zhi ba mi srid pa'i phyir ro//de yis 'di dag gso bar sngon gsungs na/ /zhes bya ba ni ye shes de sems can rnams kyis rtogs par bya ba'i don du 'dod chags nas le lo'i bar gyi gnyen por ma chags pa nas brtson 'grus kyi bar la gdul bya rnams dgod par lung las gsungs pa'o//gang la sngags dang rig pa'ang 'grub med pa/ /zhes bya ba ni gsang sngags kyi sgo nas 'jug pa rnams bag med pa'i gnas nas bslangs te/ dngos grub thob par 'gyur ba'i thabs bshad par gsol ba 'debs pa'i don to/ /de dag rnams kyang ji ltar gsol bar bgyi//zhes bya ba ni zhar la pha rol tu phyin pa'i sgo nas 'jug pa rnams kyang bag med pa'i gnas nas bslangs te/ ma chags pa nas brtson 'grus kyi bar la dgod par gsol ba 'debs pa'i tha tshig go/ /thugs rje dang ldan pas zhes bya ba la sogs pas ni/ yang gsang sngags kyi las dang rang bzhin dang rgyu rnam par dag pa de ci'i phyir ma grub ces bzlas te zhus pa'o//cho ga zhes bya ba ni 'jug pa la sogs pa dang gsang sngags dang phyag rgya'o/ /nyams zhes bya ba ni de dag nyid las ma tshang ba'am 'khrul pa'o/ /mthu ma mchis zhes bya ba ni kye gsang sngags de dag la 'grub par nus pa'i mthu yod dam zhes bya ba'i don to//dus kyi rang bzhin zhes bya ba ni dbyar dgun dang snga dro la sogs pa'i dus dang ma sbyar ba'i nyes pa'am zhes bya ba'i tha tshig go/ /sdig pas bsgribs zhes bya ba ni mtshams med pa la sogs pa mi dge ba'i las bsags pas mngon par mtho ba'i dpal dang dngos grub thob pa'i skal ba dang mi ldan par gyur tam zhes bya ba'i don to//gsang sngags gzhan du gyur tam zhes bya ba ni yi ge lhag pa dang chad pas dbyings dang rnam par thar pa'i sgo ston pa'i sgra gzhan du gyur tam/zhes bya ba'i tha tshig go/ /mchod las gyur zhes bya ba ni rigs kyi bye brag gis gzhan gyi mchod pa gzhan la phul bas 'os pa ma yin pa'am/ /yang na ma lcogs pa'i nyes pa'am zhes bya ba'i don to/ /thams cad ma lus bcom ldan 'das kyis gsungs//zhes bya ba ni dpung bzangs kyis yongs su zhus pa rnams ma lus par bka' stsol cig ces mjug bsdus pa'o/ /yud tsam zhes bya ba ni se gol thang cig skad cig ma drug cu rtsa bzhi la sogs te/ dus kyi bye brag rab tu phra bar 'dren pa la ni mi bya'i//'phral gyi spyod pa'i skad cig yud tsam zhes bya ba la gdags so/ /dgongs nas zhes bya ba ni ma 'ongs pa'i so so'i skye bo'i slob dpon rnams la gdams pa'i dbang du mdzad de zhus pa'i don ma 'khrul pa dang ldan pa dang 'khrul pa glan par bstan to/ /rdo rje zhes bya ba ni bcom ldan 'das kyi ye shes kyi mtshan ma'o//me stag ces bya ba ni 'od zer ro/ /'phro zhes bya ba ni sems can gyi don rgyas par mdzad pa'i mtshan nyid do/ /e ma'o zhes bya ba ni yab thugs dgyes shing dam pa'i tshig go/ /zla ba'i 'od ltar lam me ba'i/ /zhes bya ba ni thugs rje chen pos sems can thams cad la dbri bkol med par phan 'dogs pa'i dpe ste/ji skad du/ 'od zer rab tu gsal ba yis/ /gnam ni rgod pa ltar byed pa'i/ /ston ka'i zla ba de dang ni/ /'jig rten rnams dang ci yis 'brel/ /zhes 'byung ba dang 'dra bar/ / snying rjes sems can phan phyir zhes bya ba'i don dang yang / dam pa ring na gnas gyur kyang / /ma 'dris gnyen du ma 'brel ba'i/ /skye bo dga' pas rjes 'brangs pa/ /de yi rgyu ni yon tan dpal/ /zhes bshad do/ /shin tu dri ma med pa'i sems/ /zhes bya ba ni lhag par sems can rnams la bcos pa med par brtse zhes bya ba'i tha tshig go//de yis zhes bya ba ni thugs rje lhag par che ba de'i phan yon gyis zhes bya ba'i don to/ /bde gshegs sras nang zhes bya ba ni thugs las skyes pa'i byang chub sems dpa' sar chud pa rnams kyi nang ngo / / pha rol phyin par gyur zhes bya ba ni sangs rgyas kyi tshogs myur du rdzogs par 'gyur ro zhes bya ba'i tha tshig go/ /thugs rje de ltar skyes pa tsam gyis mthar thug pa ma yin gyis kyang / /'jig rten na sa bon shin tu bzang zhing skyon med pa la de'i 'bras bu bzang po zhes 'dogs pa bzhin te nyes pa med do//rang gi bde ma chags zhes bya ba ni byang chub sems dpa' rnams bdag gi 'du shes dang bral bas bdag la phangs par sems pa yang med na yo byad thams cad la phangs par sems pa lta ga la yod de 'khor los sgyur ba'i rgyal srid la sogs pa yang rtswa dang 'dra bar 'dor ba'i phyir ro//rang gi sdug bsngal rnams kyis mi brjed kyang / /zhes bya ba yang bdag tu 'dzin pa dang bral ba'i dbang gis 'chi ba la sogs pa'i sdug bsngal gyis mi 'jigs zhes bya ba'i don to/ /gzhan gyi sdug bsngal rnams kyis sdug bsngal te/ / zhes bya ba ni snying rje chen po sngon du 'gro ba'i lhag pa'i bsam pa ma nyams pa dang mi dma' bas sems can thams cad kyi dge ba'i rtsa ba bskyed pa'i phyir shin tu brtson par byed pa'i tha tshig go/ /de dag bde bas dga' dang ldan par gyur/ /zhes bya ba ni byams pa chen po dang ldan pa rnams kyi chos nyid do//skye bo dam pas gzhan gyi bde bsgrubs sam/ /sdug bsngal bzlog na de dang mtshungs par ni/ /bde dang sdug bsngal rab tu myong bar 'gyur/ /rang gi bde ba grub kyang de lta min/ /zhes bshad do/ /rtse gcig yid byos zhes bya ba ni byang chub sems dpa'i rgyud la ma zhi bar mi 'byung gis kyang ma 'ongs pa'i skye bo chos nyan pa'i mi rnams la gdams pa'i dbang du mdzad de gsungs so//de yi brtul zhugs zhes bya ba ni 'jug pa la sogs pa rnam pa bzhi'o/ /de yis zhes bya ba ni sgrub pa po'i skyes bus so/ /bde bar gshegs pa zhes bya ba ni sangs rgyas te/de ni bde bar gyur cing mtho ris kyi bde ba dang ldan pa la gnod pa mi mnga' ba'i don to/ /dad pa skyes nas zhes bya ba ni de la dang ba dang 'dun pa bskyed par bya ba'i tha tshig go/ /de bzhin du zhes bya ba ni dang ba dang 'dun pa ltar ro//byang chub sems kyang bskyed ces bya ba ni 'dir smos pa dang sbyar ro/ /ser sna zhes bya ba ni 'dod chags kyi char gtogs pa'i sems kyis yo byad rnams kun du 'dzin pa'o/ /dregs dang rgyags pa zhes bya ba ni rnam pa gsum ste/ rigs dang stobs dang gzugs dang yid gzhungs pa dang blo dang longs spyod dang /dbang phyug la sogs pas so/ /rnam spangs te zhes bya ba ni thams cad du bsal te'o/ /dkon mchog gsum la dad pa brtan par bya/ /zhes bya ba ni sangs rgyas la blta ba dang chos nyan pa dang / dge 'dun la rim gro bya ba'i don to//rdo rje'i rigs zhes brjod pa rgya chen dang / /zhes bya ba ni 'dir rdo rje'i rigs kyi shas cher gsungs pa'i lha'i bye brag mang po rnams so/ /nga la yang ni dad cing dga' bar bya/ /zhes bya ba ni phyag na rdo rje la mos par bya ba'i don to/ /tshig rtsub ces bya ba ni zher 'debs shing brlang ba'o//phra ma zhes bya ba ni dbyen gyi tshig go/ /'khyal pa smra zhes bya ba ni tshig gi rnam par g.yengs pa'o/ /gzhan gyi bud med bgrod ces bya ba ni rus dang bdag po dang chos kyis bsrungs pa rnams la gnyis kyi dbang po sprod pa'am/ yan lag ma yin par spyod pa don gnyer ba'o/ /brdzun zhes bya ba ni slu ba'i tshig go/ /rkun po zhes bya ba ni rku sems nye bar bzhag ste ma byin par len pa'o/ /gzhan gyi srog gcod gnod byed ces bya ba ni/ ched du bsams te lus kyis mtho btsams pa chen po byed pa'o//chang dang byed pa ni rang bzhin gyis kha na ma tho ba ma yin gyis kyang nyes pa thams cad 'byung ba'i rtsa bar 'gyur ba'i phyir ro/ /rtag tu spang bar zhes bya ba ni thams cad la sbyar ba'i don to/ /rmongs pa gang gis zhes bya ba ni mi blun po 'ga'o/ /bsod nams bsags byas kyang zhes bya ba ni/yongs su ma dag pa la sogs pa'i sbyin pa byas pa'o/ /thams cad log par lta bas bcom pas na/ /zhes bya ba ni rgyu dang 'bras bu dang byed pa la skur pa 'debs pa dang / /tshul khrims ngan pa'i lta ba dang ma bral ba'i phyir dge ba'i phyogs thams cad la rgyab kyis phyogs par gyur to//de yi rnam smin mi 'dod 'bras bur 'gyur/ /zhes bya ba ni yid du mi 'ong ba ste ngan song du lhung ba'i don to/ /'o na/ bskal pa dag ni brgya ru yang / /las rnams chud zar mi 'gyur te/ /zhes bshad pa dang sbyar na/log par lta ba'i sdig pas mi 'dod pa myong yang bsod nams byas pas 'dod pa'i 'bras bu ci'i phyir mi 'gyur zhe na/ log par lta ba'i mes bsregs pas dge ba mi skye zhes bya ba'i tha tshig go/ /dper brjod pa ni sa bon tshig pa'o/ /'dir ngag rtsub po dang srog gcod pa'i rgyu ni gnod sems yin la/ma byin par len pa'i rgyu ni brnab sems yin pa de gnyis gud du ma phye ste 'bras bu la bsdus so/ /go rims 'khrugs pa ni tshigs su bcad pa sbyar ba la bde ba'i phyir ro/ /log par lta ba rnam spangs la/ /zhes bya ba la sogs pas ni rjes su bstan pa brjod pa'o//lha ni sa dang ri la gnas pa dang lha yul pa'o/ /lha ma yin zhes bya ba ni skabs 'dir lha ma gtogs pa'i gdon thams cad la rig par bya'o/ sha khrag za 'thung zhes bya ba ni de dag gi zas tha dad par smos pa'o/ /mtshan mo rgyu ba zhes bstan pa ni mi ma yin pa'i gdon rnams de'i dus su spyod pa'i phyir ro//gnod pa byed cing rgyu zhes bya ba ni mi rnams la gtse ba'i bsam pa kho nas bgegs byed par nges pa zhes bya ba'i tha tshig go/ /bzlas brjod brtson pa'i sems ni g.yeng bar byed//ces bya ba ni khyad par du bgegs byed par bstan to/ /de dag rnams kyi gnyen por gyur pa'i phyir/ /zhes bya ba la sogs pas ni bgegs byed pa'i rgyur bstan to/ /gnod byed de dag ces bya ba ni bgegs rnams so/ /bdag nyid ces bya ba ni sgrub pa po'i skyes bu'o//'byor bar bya phyir zhes bya ba ni dngos grub kyi dpal mngon du phyogs par bya ba'i tha tshig go/ /ngas gsungs pa'i zhes bya ba ni rdo rje'i rigs shas cher gsungs pa'i don to/ /dkyil 'khor lha dang lha min gnas gyur pa/ /dam tshig ji bzhin zhes bya ba ni dam tshig gi dkyil 'khor tshul bzhin du bris pa ste//der mi ma yin pa thams cad kyis dam tshig phul bas rgya che bar khong du chud par bya'o/ /bsod nams don du blta zhes bya ba ni der zhugs na bsod nams 'phel zhes bya ba'i tha tshig go/ /sna tshogs pa'i gdon zhes bya ba ni gdon gyi rigs stong phrag brgyad cu rtsa bzhi dag tu 'phel ba'o//rnam pa sna tshogs las byed pa'i/ /dkyil 'khor zhes bya ba ni gdon de dag gzhom pa'i gnyen por/ dkyil 'khor tha dad par bshad pa dag ste/ de dag ni gdon gyi rigs re re'i las nyi tshe byed pas rgya chung bar bstan to//gnod byed gzhom pa'i phyir zhes bya ba ni sa 'dzin te dngos su gdon thams cad 'joms par go bar bya'o/ /gang yang rig pa mchog tu gsungs pa dang / /zhes bya ba ni rgyud der gdon sna tshogs kyi gnyen por dkyil 'khor gang dag gang bshad pa'o//khro bo'i dkyil 'khor du yang 'jug par bya/ /zhes bya ba ni de nyid la sogs pa brgyad kyi dkyil 'khor 'byung ba'o/ /der ni zhes bya ba ni rig pa mchog gi rgyud chen por zhes bya ba'i don to/ /dam tshig sna tshogs ngas bshad pa/ /zhes bya ba ni phyag na rdo rje dang dbang phyug chen po'i dam tshig bshad pa'i dkyil 'khor gyi rgyal po der thams cad kyi dam tshig 'dus zhes bya ba'i tha tshig go//sdig pa bsal phyir rgyun du blta bar bya/ /zhes bya ba ni dkyil 'khor gyi rgyal po der zhugs na sdig pa thams cad 'byang zhes bya ba'i don to/ /rdo rje'i rigs gtso zhes bya ba ni yum mA ma kI'o//pho nya mo'i tshogs dang rig pa mang pos bstan pa'i lha mo zhes bya ba yang de nyid do/ /thams cad kyis mchod cing bsnyen bkur bya ba'i gnas yin par bstan to/ /zlos pa zhes bya ba ni yum gyi gsang sngags zlos pa'i rig sngags 'chad pa'o//mthong nas zhes bya ba ni bgegs kyis mthong zhes bya ba'i don to/ /bgegs rnams phung ba dang / rngam pa 'don cing shin tu skrag par 'gyur/ /zhes bya ba ni yum gyi gsang sngags mthu rlabs che bar bstan pa'i tha tshig go/ /ji lta ji ltar dkyil 'khor mthong ba dang / / zhes bya ba ni dam tshig gi dkyil 'khor du zhugs pa'o/ /de lta de ltar rdo rje'i rigs bstan dang / /zhes bya ba ni dkyil 'khor du zhugs nas lhar mnos te gsang sngags rjes su dran pa'o/ /rig pa'i tshogs la brten pa'i bsod nams kyis/ /zhes bya ba ni rigs gzhan gyi rig sngags kyi tshogs la brten pa'i mthu yang de bzhin du che bar dgongs pa'o//de yi lus la byin rlabs ma lus 'jug /ces bya ba ni dkyil 'khor du zhugs pa'i dus na mi'i spyod yul du ma gyur gyis kyang / ye shes kyi rang bzhin rdo rje la sogs pa'i phyag rgya rnams las gsang sngags kyi byin gyi rlabs kyis 'od zer byung ste/de dag sgrub pa po'i lus la 'jug /ces bya ba'i tha tshig go / mi tshugs rdo rje'i bdag nyid ces bya ba la sogs pas ni de'i phan yon bstan to/ /nga yi dam tshig mthong ba'i bu dag gis/ /zhes bya ba la sogs pas ni dkyil 'khor du zhugs pa'i phan yon gyi rnam grangs gzhan bstan pa'o//rig sngags ma mthong ba ni lha'i rang bzhin mi shes pa'o/ /dam tshig ma mthong zhes bya ba ni dam tshig gi dkyil 'khor du ma zhugs shing dam tshig mi srung ba'o/ /snying rje med ces bya ba ni rang bzhin rtsub pa'o//byang chub kyi sems ma bskyed ces bya ba ni smon pa tsam yang med pa'o/ /sangs rgyas la ma dad ces bya ba ni yid ma ches pas brnyas shing ma dad pa'i don to/ /lha gzhan la brten zhes bya ba ni 'jig rten pa'i lha la brten cing mu stegs pa'i phyogs 'dzin pa'o//nga yi gsang sngags bzlas na phung bar 'gyur/ /zhes bya ba ni 'chi ba dang 'jig rten pha rol du yang ngan song du skye bar 'gyur ro/ /bsam pa zhan cing zhes bya ba ni sems zhum pa'o/ /nyams kyis mi lcogs pas zhes bya ba ni yo byad dang mi ldan zhes bya ba'i don to/ / dkyil 'khor kun zhes bya ba ni gong du smos pa thams cad do/ /blta bar mi nus na'ang zhes bya ba ni yo byad ma 'byor te sems zhum nas/ dkyil 'khor 'bri zhing 'jug ma nus na yang / zhes bya ba'i don to/ /gcig tsam zhig kyang dad pas mthong gyur na/ /zhes bya ba ni yo byad med pa'i sgrub pa po dbul pos kyang dkyil 'khor de dag rnams las nyams kyis gang lcogs pa gcig ni nges par 'dri dgos par gsungs te/don de nyid rab tu grub par byed pa'i rgyud chen po las kyang ji skad du/ yo byad chung ngu dag gis kyang / /bzlas brjod byed pas dkyil 'khor bri//zhes gsungs pa'i phyir ro/ /gnod sbyin gyi tshogs zhes bya ba ni sa dang ri dang ri rab kyi ngos la gnas pa'o/ /mtshan mo rgyu ba zhes bya ba ni mi ma yin pa thams cad do/ /sa bla'i gdon zhes bya ba ni bar snang ba las khru gang gis spags pa yan chad na gnod sbyin gyi grong gnas pa rnams so//klu'i bdag po zhes bya ba ni klu'i rgyal po'o/ /lha zhes bya ba ni sa dang ri la gnas pa dang lha yul pa'o/ /sogs pa zhes bya bas ni 'dir ma smos pa'i gdon thams cad bsdus par rig par bya'o/ /bgegs zhes bya ba ni rnam par 'jigs pa la sogs pa'o//log 'dren zhes bya ba ni/ de dag nyid gnod par byed pa'i khyad par gyis ming gzhan no/ /brtul zhugs gnas pa zhes bya ba ni rig sngags 'chang 'jug pa la sogs pa'i dus su tshul khrims rnam pa gsum po dag la gnas pa'o/ /glags mi lta zhes bya ba ni tshul khrims de dag la gnas pa'i phan yon gyis gong du smos pa'i gdon thams cad 'dzem nas rgol mi phod par bstan to//tshul khrims la brten nas zhes bya ba ni tshul khrims ni dge ba'i phyogs thams cad kyi rten yin par brjod pa'o/ /chos dkar po zhes bya ba ni mos pa spyod pa'i sa la snang ba thob pa'i dus su dngos por rnam par byang ba'i phyogs skyes pa gang yin pa'o//snying rje'i chus brlan pas ni rnam par skye/ /zhes bya ba ni 'dir snying rje'i rtsa ba'i rlan gyis tshul khrims kyis gzhi la brten pa'i byang chub kyi sems kyi myu gu bskyed ces bya bar sbyar ro//rgyal ba ngas gsungs zhes bya ba ni sangs rgyas kyis shin tu legs par phye ste bstan zhes bya ba'i don to/ /so sor thar pa'i bslab pa zhes bya bas ni mya ngan las 'das pa'i grong khyer du phyin par byed ces bya ba'i tha tshig go/ /tshul khrims rnam par dag pa zhes bya ba ni zag pa med pa'i rgyu yin pa'i phyir ro//'dul ba zhes bya ba ni gdul bya rnams srab kyis kha lo sgyur ba dang 'dra ba'i don to/ /ma lus zhes bya ba ni rab tu byung ba la bslab ba'i gzhi thams cad do/ /sngags pa khyim pa rnams la ni gzhan te/ rtags zhes bya ba skra dang kha spu breg pa dang /ngur smrig gi snam sbyar bcang ba la sogs pa dang / cho ga spang zhes bya ba yang lhung bzed bdug pa la sogs pa bya mi dgos pa bstan to/ /lhag ma rnams ni nyams su blang bar bya/ /zhes bya ba ni bslab pa'i gzhi bsnyen gnas dang rig sngags kyi brtul zhugs la gnas pas smad 'tshong dang gdol pa dang shan pa dang rgyal po'i pho brang du mi 'gro ba'i spyod yul phun sum tshogs pa la ni rab tu byung ba bzhin du bslab par bya ba'i don to//de ltar sdig pa'i chos las rnam grol nas/ /zhes bya ba ni sdom pa la gnas pa'i phyir ro/ /legs par gsungs pa'i phyir chos zhes bya ba ni gzhan phyi rol pa dang mi 'dra bar bcom ldan 'das kyis legs par bstan zhing go bar byas te rig pa dang ldan zhes bya ba'i tha tshig go//dag cing zhes bya ba ni nyon mongs pa dang ma 'dres pa'i don to/ /grol ba zhes bya ba ni khams gsum gyi 'ching ba gcod pa'i tha tshig go//zlos pas skyo na mdo sde bklag par bya/ /zhes bya ba ni bzlas brjod btang ba'i dus na yang shes rab kyi pha rol tu phyin pa la sogs pa gdon par bstan pa'i don to/ /gtsang zhing zhes bya ba ni sa gzhi la sogs pa skyon med pa'o//dben pa'i sa phyogs zhes bya ba ni rtog lam du ma bab pa'o/ /'jim pa'am ni bye ma zhes bya ba ni yul rnams kyis gang mod pa las bya ba'i don to/ /las byas pa'i bde gshegs mchod rten zhes bya ba ni mchod rten gyi cha dbye ba las bde bar gshegs pa'i che ba'i yon tan de la/rdzogs par gzhag pas mchod pa'i 'os yin par bstan to/ /rten 'brel snying po can zhes bya ba ni rnam par snang mdzad mngon par rdzogs par byang chub pa'i rgyud chen po las/ ji skad du/ chos gang rgyus byung de dag gi/ /rgyu dang de 'gag gang yin pa/de bzhin gshegs pas bka' stsal te/ /de skad gsungs pa dge sbyong che/ /zhes gsungs pa 'di dang ldan par bstan to/ /sdig pa sbyang ba'i phyir ni rtag tu gdab/ /ces bya ba ni kun nas sgor 'jug pa'i 'od zer gtsug tor dri ma med par snang ba'i gzungs las/ji skad du/ gang+gA'i klung gi bye ma snyed de bzhin gshegs pa rnams la dge ba'i rtsa ba bskyed par 'gyur ro zhes bya ba la sogs pa'i yon tan mang por 'gyur ba'i phyir ro/ /ring bsrel can gyis zhes bya ba ni byang chub kyi snying po'i rgyan gyi gzungs kyi cho ga zhib mo las/ chos kyi sku'i ring bsrel dang / de bzhin gshegs pa'i sku gdung gi ring bsrel dang / sku bal gyi ring bsrel dang / chos kyi ring bsrel dang / yungs 'bru tsam gyi ring bsrel zhes gsungs te/ /'di rnams gang dang ldan na yang ring bsrel can du go bar bya'o/ /sku gzugs zhes bya ba'i mtshan nyid ni 'og mas 'chad do//mchod rten zhes bya ba ni rig pa mchog gi rgyud chen po las bya gag gi sgo nga 'dra bar 'dug na dngos grub sbyin par 'gyur ro zhes gsungs te/ de dang sbyar ro/ /bstod cing zhes bya ba la sogs pas ni lus dang ngag dang yid kyi mchod pa dang mthun mthun du sbyar ba'i don to//rab tu grub par byed ba'i rgyud chen po las/ yid kyi mchod pa lhag par nan tan du bya dgos par gsungs te/ ji skad du/ yid kyi mchod pa khyad par can/ /yang dag nyid du brtsam par bya/ /chos kyi thog mar yid 'gro zhes//thub pa chen pos bka' stsal to/ /zhes gsungs pa'i phyir ro/ /nam yang 'khor lo gcig pa'i shing rta ni/ /rta dang ldan yang zhes bya ba la sogs pas ni sgrub pa pos gang du smos pa'i tshul las mi 'gal bar 'bad kyis kyang / sgrub pa'i grogs mchog med na dngos grub mi thob par bstan te/tshig gi don gzhan ni go bar zad do/ /rtsod pa'i dus zhes smos pas ni 'di ltar ting nge 'dzin brtan pa'i dus dang / ting nge 'dzin dge ba'i rtsa ba la brten pa'i dus dang / thos pa 'dzin pa'i dus na yang khams gsum las sgrol ba'i rgyu nges par gnas kyi/dus lnga brgya'i tha ma la dge ba'i rtsa ba mthu chung ba'i tshe dngos grub kyi mthu la brten nas thar pa'i lam la 'jug par bstan pa'i don du rtsod pa'i dus su dngos grub sgrub pa gtsor gsungs zhes bya ba'i tha tshig go/ /le'u dang po'i don bshad zin to// //rang sangs rgyas zhes bya ba ni rang byang chub ste de dag bzhugs pa'i gnas ni bA rA Na sI'i drang srong lhung ba'i ri la sogs pa'o/ /bde gshegs nyid skyes zhes bya ba ni byang chub sems dpa' rnams te de dag gi gnas nges pa ni ri bo rtse lnga la sogs pa'o/ /rgyal ba sngon chad gang na bzhugs pa yi//gnas gang zhes bya ba ni bya rgod phung po'i ri la sogs pa'o/ /bsod nam ldan zhing zhes bya ba ni 'phags pa bsod nams dang ldan pas zhabs kyis bcags pa'o/ /yid dga' ba zhes bya ba ni sgrub pa po gnas der mos pa'o/ /lha dang lha min sogs pas phyag 'tshal mchod//ces bya ba ni sngon 'phags pa rnams bzhugs pa'i tshe/ /de dag gis phyag byas shing mchod pa'am/ /yang na sngon zhabs kyis bcags pas de yang sa phyogs mchod pa'i 'os yin pa'i phyir ro/ /gso sbyong sdom pa dang ni ldan pa yis/ /zhes bya ba ni sgrub pa po'i skyes bu'o//bdag nyid dag par bya phyir brten bya ba/ /zhes bya ba ni rab tu grub par byed pa'i rgyud chen po las/ gnas de rnams su dngos grub ni/ /rnam pa gsum dag rab tu bstan/ /nges shing myur la rgya che zhing / /bgegs med par yang der 'gyur ro/ / zhes pa'i phyir ro/ /de lta bu dag ma rnyed ces bya ba ni byin gyis brlabs pa'i gnas so/ /gzhan yang zhes bya ba ni rang bzhin gyis yon tan can btsal bar bstan pa'o/ /chu bo chu klung zhes bya ba la sogs pas ni gnas kyi rang bzhin gyi yon tan rnams brjod pa'o/ /mi bzad gdon rnams kyang ni mi gnas pa//zhes pa ni klu nag po gdug pa la sogs pa'o/ /grog po grog mkhar thal ba skra shad dang / /nyal nyil sol ba tsha sgo'am btsog can spang / /zhes bya ba la sogs pas ni gnas kyi mtshan nyid mngon par 'dus byas pa'i yon tan dang ldan par bya bar bstan to//lho phyogs su ni nam yang sgo mi gdod/ /ces bya ba ni gshin rje'i phyogs yin pas bkra mi shis pa'i phyir ro/ /dri gtsang khang pa de yi phyogs cig tu/ /zhes bya ba ni shar phyogs la dgongs pa'i don to/ /rgyal ba'i lam mchog rnam par ston pa yi/ /zhes bya ba ni dngos grub dang thar pa zhes bya ba'i tha tshig go//ras kyi sku gzugs las phyir bstan par gdags/ /zhes bya ba ni sgrub pa po'i khyad par gyi lha'i gzugs ni so so'i cho ga zhib mo dag las 'byung ste yod kyang rung mi 'byung ste med kyang rung gi sangs rgyas kyi sku gzugs ni rgyas pa la sogs pa'i las 'grub pa'i don du nges par gzhag par bstan pa'o//yang na shing gzugs legs pa mchod phyir gzhag /ces bya ba yang phan yon gong ma dang 'dra ba'i phyir ro/ /shing gi sku gzugs de'i tshad ji tsam zhes bya zhe na/ /gsang rgyud ltar ram/ 'phags pa phyag na rdo rje dbang bskur ba'i rgyud chen po las bde bar gshegs pa'i mtho gang tshad kyi sku gzugs gzhag la zhes 'byung ste de dang sbyar ro//thag pas btags zhes bya ba la sogs pa ri mor bri ba'i cho ga yang rgyud de nyid kyi tshig gis dgrol bar bya ba ste/ de las ji skad du/ bram ze'am rgyal rigs kyi bu mo gzugs bzang ba/yan lag thams cad yongs su rdzogs pa/ gso sbyong bzung ba zhag gi rin la ma brtsegs par nyos pa'i shing bal 'khal du bcug la/ tshes grangs dang byed pa dang yud tsam bzang po la yan lag thams cad yongs su rdzogs pa'i tha ga pa 'thag tu gzhug ste/ba lang gi lci ba sa la ma lhung bas dkyil 'khor bskus la/ spos dang me tog dang bdug pa la sogs pas yang mchod do/ /tha ga pa'i thags cha rnams kyang ba'i rnam lnga dang spos chus bkru'o zhes gsungs so/ /'jam la snyoms pa dang /thags bzangs de bzhin skra shad med pa dang / /zhes bya ba yang de nyid las skra med pa dang mnyam pa dang 'jam par bya'o zhes gsungs so/ /kho lag che zhing zhes bya ba ni chu zhing 'tsham par mi chung ba'o/ /ma nyams zhes bya ba ni ma dras pa'o/ /kha tshar bcas zhes bya ba ni ma god pa'o//gtsang ma zhes bya ba yang rgyud de nyid las/ sgrub pa po khrus byas shing byug pas byugs la/ thod ze'u kas bcings shing dri zhim po'i dri dang ldan par byas pas mchod pa rgya cher byas la/ a ka ru'i bdug pa bsreg cing tha ga pa la yon bzang du byin la dgrol bar bya'o//bkrol nas kyang byin gyis brlabs te/ sa phyogs gtsang mar me tog gi sil ma bkram pa spos dang bdug pas bdugs la spos chu'i nang du bcug ste zhag bdun du gzhag go zhes gsungs so/ /spos kyis btab pa zhes bya ba yang de nyid las phye ma 'jam pos ras la lan mang du bsgo bar bya'o//klu shing dang tsam pa ka dang skya snar la sogs pa'i me tog gis kyang bskor bar bya'o/ /de'i 'og tu srung ba byas pas tshes grangs ngan pa dang mi mthun par 'jug pa'i nyes pa dang bral zhing / tshes grangs dang byed pa dang / yud tsam bzang po la rol mo'i sgra sna tshogs mang po 'byin pa/shis par brjod pa yod pa/ me tog bkram pa'i dkyil 'khor du mchod pa rgya cher byas la/ de bzhin gshegs pa thams cad la phyag byas nas gsol ba btab ste bri'o zhes gsungs so/ /de la ni zhes bya ba ni dag cing bsgos pa'i ras la'o//tshon rtsi spyin med ces bya ba ni ka pi ta dang sbyar ba'o/ /khrus byas gtsang la gso sbyong gzung ba'i mi/ /mkhas pas zhes bya ba yang de nyid las/ /ri mo mkhan gso sbyong gzung ba/ mkhas pa dad pa snying rje dang ldan pa ser sna med pa yan lag thams cad yongs su rdzogs pas bri bar gsungs so//ba lang spu zhes bya ba ni rna spu ste pir gyi rgyu'o/ /bri bar bya zhes bya ba yang / de nyid las sgrub pa po byams pa'i sems dang ldan pa/ thod ze'u ka bcings pa/ sngags ba grang nor bu 'chang ba dang bcas par ri mo mkhan gyi rgyab na 'dug cing /bcom ldan 'das kyi sku gzugs dang kha dog dang bcas par bya'o/ /phyag rgya dang yi ge rnams kyang bsam mo/ /yang na sgrub pa po bdag nyid kyis bri bar bya'o zhes gsungs so/ /de'i kha dog dang tshul ni rig pa mchog gi rgyud chen po las/de bzhin gshegs pa'i sku gzugs brnyan gser gyi kha dog lta bu mtshan thams cad yongs su rdzogs shing dpal gyi be'us brgyan pa/ phyag g.yas pa mchog sbyin pa'i tshul lam skyabs mdzad pa'i tshul la bltas te/ rig sngags bsgrub par bya'o zhes gsungs so//shing gzugs kyi tshul de dang mthun par khong du chud par bya'o/ /phreng ba zhes bya ba la sogs pa'i mchod pa ni rab tu grub pa'i rgyud chen po las blta bar bya ste/ 'dir yi ge mang du dogs pas ma spros so/ /sku gzugs cher mchod de zhes bya ba ni bri ba zin nas te/ de yang phyag na rdo rje dbang bskur ba'i rgyud de nyid las/gdugs dang rgyal mtshan dang ba dan bsgreng zhing / sil snyan dang dga' bar 'gyur ba'i sgra mang po dang / shis pa rgya chen po dang / bkra shis brjod pa rnams kyis mchod par bya'o zhes gsungs so/ /nub phyogs zhal bstan zhes bya ba ni bsnyen pa la 'jug pa'i dus su rgyas ba'i las dang sbyar dgos pas sku gzugs zhal nub phyogs su bstan la/sgrub pa po kha shar phyogs su bstan pa'i don to/ /de yi spyan sngar dngos grub brtsam par bya/ /zhes bya ba ni rig pa mchog gi rgyud chen po las/ sku gzugs la thad kar blta zhing bsgrub par bya ba ste/gzhan du blta zhing bsgrub par mi bya'o zhes gsungs so/ /yang de nyid las de bzhin gshegs pa'i spyan sngar drag shul bsgrub par mi bya ste/ de ni lag na rdo rje'i drung du bsgrub par bya'o zhes kyang gsungs so/ /gtsug phud gzhag ste skra ni bregs nas su//zhes bya ba ni sgrub pa po khyim pa rnams tshul bsgyur bar bstan to/ /'byung khungs tshon gyis gos kyi kha dog bsgyur/ /zhes bya ba ni rab tu byung ba rnams te ngur smrig las dgongs so/ /gos dkar po zhes bya ba ni khyim pa rnams la'o/ /shing lo zhes bya ba la sogs pa ni gnyis ka'i thun mong gi brtul zhugs khyad par can las dgongs par rig par bya'o//gzhan ni go bar zad do/ /bza' btung mod ces bya ba ni/ grong bkren pa ma yin pa'i don to/ /dmangs rigs mang ba zhes bya ba ni de dag lugs kyis dge sbyong dang bram ze la rim gro che ba'i phyir ro//mgron po la mchod byed ces bya ba ni bsod snyoms pa la sogs te glo bur ba la byams pa'i don to/ /legs par gnas pa'i grong zhes bya ba ni bza' btung mod pa'am yang na chom po la sogs pa'i g.yon can rnams kyis phung bar mi 'gyur ba'o//ha cang mi nye zhes bya ba ni sgrub pa'i gnas grong de dang nye ches na rnal 'byor la sbyor ba'i dus su sgra la sogs pa'i tsher mas gnod par 'gyur ba'i phyir ro/ /ha cang mi ring zhes bya ba ni bsod snyoms bsnyag tu mi slebs pa'am/ yang na skye bo g.yon can rnams 'tshe ba'i phyir ro//bram ze phyi rol skye bo zhes bya ba ni bstan pa las phyi rol pa'o/ /med ces bya ba ni gnas pa'o/ /nga rgyal gyis ni non pa zhes bya ba ni rang bzhin gyis mngon pa'i nga rgyal dang / che ba'i nga rgyal dang ldan pa'i phyir ro/ /bram ze rnams rigs kyis rlom zhing zhes bya ba ni tshangs pa'i bu yin par sems pa'i phyir ro//snying rje mi ldan pa zhes bya ba ni sangs rgyas kyi bstan pa la phyogs pa rnams la rnam pa sna tshogs kyis mtho btsams pa'i dus na brtse ba med pa'i tha tshig go/ /de dag ces bya ba ni bram ze rnams so/ /bde bar gshegs pa'i mchod rten zhes bya ba ni sku gzugs la sogs pa'o//mchod pa zhes bya ba ni phyogs 'di'i nang pa'i rig sngags 'chang ba'o/ /mthong nas bgegs kyang byed par 'gyur/ /zhes bya ba ni bram ze rnams thabs sna tshogs kyis 'gog pa'i don to/ /bram ze sangs rgyas pa las ji ltar dman//zhes bya ba la sogs pas ni/ sgrub pa po dmangs rigs zhig yin na bram ze rnams 'di skad du/ /khyed nged la bkur sti dang mchod pa byed pa dang / rang gi las sbyin pa byed pa dang / phyugs 'tsho bas grol ba yin na/ ci'i phyir sangs rgyas pa'i lta ba la phyogs shing de'i gsang sngags zlos zhes 'tshe ba'i don to//lha dang mgron mchod pa zhes bya ba ni de'i don dang bram ze'i gzhung gis srog gcod par gnang ba'o/ /las drug ces bya ba ni bram ze rnams mchod sbyin byed/ byed du 'jug /smrang 'don/ 'don du 'jug / sbyin par byed/ sbyin pa lan pa dang ldan pa'o zhes brtags pa'o/ /rgyal po dang ni me lha bsten pa zhes bya ba ni srid btsal ba dang / lha mnyes par bya ba'i don gyi phyir ro/ /bu yi don du 'gro bar bya ba dag /ces bya ba ni rigs rgyun mi gcad par bya ba'i phyir rang dbang ba'i bud med dang 'tsho ba'o//bram ze rnams kyis nges par grub pa yin/ /zhes bya ba ni sgrub pa po bram ze'i rigs shig yin na ni/ de'i phyi rol pa'i bram ze rnams bdag cag gis las nges pa 'di lta bu bor nas ci'i phyir sangs rgyas pa'i gsang sngags zlos zhes 'tsho ba'i don ston to/ / rgyal rigs rje'u rigs rnams kyang rang gi las grub pa 'di la the tshom byed ces bya ba ni sgrub pa po rgyal rigs na rang gi las bzhi dang 'gro ba skyong ba yin/ sgrub pa po rje'u rigs na rang gi las gnyis dang zhing med pa yin na/ ci'i phyir 'di la the tshom du gyur cing lta ba gzhan du phyogs zhes 'tshe bar byed pa'i don to//brdzun du smra ba sna tshogs skyon dag gis/ /zhes bya ba ni gong du bshad pa lta bu'i gzhung de dag 'jugs pa'i tshe kha stobs kyis sgro 'dogs pa dang skur pa 'debs pa'o/ /bdag dang gzhan gyi sems ni sreg par byed/ /ces bya ba ni khros pa'i dbang gis zhe sdang langs pa'i phyir dge ba'i rtsa ba bsregs te ji skad du/yid la zhe sdang yod na bdag dang gzhan dag la/ /phan par 'gyur ba med bzhin rab tu sreg par byed/ /ces bshad pa de lta bu'o/ /yan lag brgyad lam gnas par rab tu byung ba la ma smos kyis kyang / gnyis ka la gdams pa'i don du go bar bya'o/ /nyi ma phyed mtshams tshun chad blang bar bya/ /zhes bya ba ni 'di ni sangs rgyas pa'i dus yin pa'i phyir ro/ /bram ze'i dus ni phyi dro yin pas na/ /zhes bya ba ni de dag gi zas za ba'i dus nges pa'o/ /de phyir bram ze'i khyim du 'gro mi bya//zhes bya ba ni dus mi mthun te/ kha zas med pa dang glan ka tshol ba'i phyir ro/ /dge dang mi dge'i shes pa bzung ba ni/ /zhes bya ba ni las legs nyes kyi 'bras bu 'dod pa dang mi 'dod par smin par rig na zhes bya ba'i don to/ /bram ze dmangs rigs dag la khyad par med//ces bya ba ni bram ze rnams tshangs pa'i bu yin pas rang bzhin gyis dag ste/ rigs mtho ba'i phyir mtho ris su skye la/ gzhan rnams ni rigs kyis dma' bas 'gro ba gzhan du skye'o zhes bram ze'i gzhung las 'byung ba dgag pa'i don du/ las legs nyes kyi dbang gis gnas mtho dman du skye bar mtshungs par bstan pa'o//brtags pa zhes bya ba ni gang la gang med pa de la de 'dogs pa ste/ nam mkha'i me tog gi gtsug phud ces bya ba dang 'dra'o/ /gzhan ni go sla bas ma phye'o/ /'dod pa'i khams ni kha zas kyis gnas zhes//rgyal bas chos gcig tu ni bka' stsal pas/ /zhes bya ba ni khams gang ma dag na sems pa'i zas kyis lus brten te/ 'ju ba'i zas la mi ltos pa ltar 'dir de lta ma yin par bstan to/ /lus ni chu shing bzhin du rig bya ste/ /zhes bya ba ni snying po med pa de 'ju ba'i zas kho nas brten par bstan to//sogs la zhes bya ba ni bca' ba dang bldag pa dang gzhibs pa dang btung ba dag go/ /chags mi bya zhes bya ba ni tshe dang longs spyod la dga' ba'i don du ma yin gyi/ gzhan du na lus gnas pa tsam du bya ba'i phyir bza' zhes bya ba'i tha tshig go//dbang po drug po zhes bya ba ni mig gi dbang po nas yid kyi dbang po'i bar dag go/ /yul la zhes bya ba ni gzugs nas chos kyi bar dag go/ /'phros pa zhes bya ba ni so sor 'jug pa'o/ /bde gshegs gsungs pa'i shes pas bsrung bar bya//zhes bya ba ni mi rtag pa dang / sdug bsngal ba dang / stong pa dang / bdag med pas sun phyung ste 'phro ba dgag par bstan to/ /lhung bzed de dag las gcig thogs nas su/ /zhes bya ba ni gong du smos pa'i ku ba la sogs pa las gang 'byor pa'o/ /gnya' shing gang du blta zhing zhes bya ba ni spyod lam zhi bar byed par bstan to//'dzum zhing 'gro la smra zhing mig zur can/ /zhes bya ba ni bud med kyi ngag 'dod chags la zhen pas skyes pa la yang 'dod chags skyed par byed pa'i don to/ /yan lag thams cad yid 'phrog byed pa'i gzugs//zhes bya ba ni skyes pa'i sems slu ba'i don to/ /mtshon cha 'jebs 'dra bas zhes bya ba ni dge ba srog dang 'dra ba'i rgyun gcod ces bya ba'i tha tshig go/ /skyes pa'i sems dag mngon du 'phrog par byed/ /ces bya ba ni rang dbang med par nyon mongs pa'i dbang du 'gyur ba'i don to//lcags kyi thong lcags rab tu 'bar ba yis/ /mig ni rnam par bkab pa ches bla yi/ /zhes bya ba ni 'dra ba'i don mthong ba'i phyir ro/ /nyis na dran pa nyams byed bud med kyi/ /dkyus ring mig can bzhin ni ma mthong sla/ /zhes bya ba ni 'dod chags la sogs pa'i rgyu mthong ba'i phyir ro//yang na gnod pa de tsam dang bsdos te mi blta'o zhes dgag par bstan to/ /gang du dga' bar 'gro zhes bya ba ni bsod snyoms la gang mos pa'i grong du 'gro zhes bya ba'i tha tshig go/ /'dzin med ces bya ba ni grong de dag tu 'gro ba na bud med la sogs pa la mtshan ma dang mngon rtags su mi gzung ba'o//sems kyis zhes bya ba ni blo sngon du btang ba'o/ /sems ni rnam par btul bzhin du/ /zhes bya ba ni/ 'dod pa'i yon tan lnga la sems 'phro ba mi rtag pa la sogs pa'i gnyen po la brten cing glan pa'o/ / rab dang 'bring la sogs par zhes bya ba ni rgyal rigs la sogs pa'i rigs bzhi'i khyim du bsod snyoms bslang bar gsungs te/ gdol pa dag gi der ni ma yin no/ /spangs nas su zhes bya ba ni de dag tu spyod lam ma zhi ba spangs pa'i don to/ /mi smra bar ni zhes bya ba ni ngag gi brtul zhugs la gnas pa'i phyir ro//gang na ba bzhon be'u phrug chung ba dang / /zhes bya ba la sogs pas ni gnod pa dang chags pa'i sgo nas gnyen du 'gyur bas spang bar bstan to/ /bsod snyoms ci rnyed ces bya ba ni ji tsam rnyed pa las zhes bya ba'i don to//dang por ji ltar bde bar bgo bar bya/ /zhes bya ba ni cha gsum du bgos te cha dang po chung ngu gcig ni lha la dbul bar bstan to/ /rkang pa bkrus te zhes bya ba ni/ dang por bsod snyoms blangs nas slar 'khor ba'i dus su ste/ tshigs su bcad pa sbyar ba la bde ba'i phyir 'dir smos par go bar bya'o//glo bur ba la byin nas su zhes bya ba ni cha gnyis pa'o/ /lus bsrung phyir ni kha zas bza' bar bya/ /zhes bya ba ni cha gsum pa bdag nyid kyis bza' bar bstan to/ /dus su zos nas zhes bya ba ni phyed mtshams su bza' ba'i don to/ / dus gsum khrus byas te zhes bya ba'i don ni phyi rol che chung dang kha zas bza' ba dang / bzlas brjod kyi dus 'di gsum du khrus bya bar bstan mod kyi/ bzlas brjod nyid dus gsum du bya dgos pas khrus ni mang du bya dgos par rig par bya'o/ /gzhan ni go bar zad do/ rjes su dran drug ces bya ba ni sangs rgyas dang chos dang dge 'dun dang lha dang gtong pa dang tshul khrims rjes su dran pa'o/ /so so'i yon tan dang zhes bya ba ni dang po gsum ni rang bzhin gyi yon tan las rjes su dran par bya'o/ /bzhi pa ni rgyu yi yon tan las rjes su dran par bya'o/ / lnga pa dang drug pa ni 'bras bu'i yon tan las rjes su dran par byas te/ 'dir ni mdor brjod pa yin no/ /rgyas par ni mdo sde las blta bar bya ste/ 'dir yi ge mangs su dogs nas ma spros so/ /rig par bcas te rjes su dran par bya/ /zhes bya ba ni/ 'greng dang 'dug dang ma log nyal ba dang //'gro 'phres za klog ces bya ba'i dus ni/ gong du smos pa drug po de dag rjes su dran par byas la/ bzlas brjod byed pa'i dus su ni rang gi rig sngags rjes su dran pa'i don to/ /le'u gnyis pa'i don bshad zin to// //'dod chags zhes bya ba ni nye bar len pa'i phung po lnga la zhen pa dang /lhag par chags pa'o/ /sogs pa zhes bya ba ni khong khro ba dang / nga rgyal dang / ma rig pa dang / lta ba dang / the tshom la sogs pa'i nyon mongs pa rnams so/ /tshogs ldan pa zhes bya ba ni khro ba dang khon du 'dzin pa la sogs pa nye ba'i nyon mongs pa rnams so//sems ni 'khor ba yin par kun du brjod/ /ces bya ba ni ji tsam du sems kyi rgyud la 'dod chags la sogs pa'i nyon mongs pa rnams dang ldan na de srid du 'khor ba zhes bya ba'i don to/ /nyon mongs rnam grol zhes bya ba ni 'dod chags la sogs pa'i nyon mongs pa rnams spangs pa nyid 'khor ba las log par bstan to//shel zhes bya ba ni rang gi sems kyi rgyud la nyon mongs pa'i sgrib pa spangs pa'i dag pa'i dpe'o/ /zla ba 'dra ba zhes bya ba ni shes bya'i sgrib pa yang spangs pas/bdag dang gzhan gyi rgyud gnyi ga'i gti mug gi mun pa sel ba'i dpe brjod pa'o/ /srid pa'i rgya mtsho'i mthar ni yongs su bsgrags zhes bya ba ni 'dod chags la sogs pa'i nyon mongs pa dang bral ba'i dbang gis yang srid par sems mngon du phyogs par byed pa'i skye bo'i rkyen rnams kyi tshogs ldog pa'i phyir ro//dper na dri med chu ni rdul sogs kyis/ /skad cig tu yang rnyog par byed pa ltar/ /zhes bya ba ni chu dngas pa'i nang du btsag la sogs pa mnyes na/ gzhan du snang ste chu'i rang bzhin du mi snang ba lta bu'o/ /de bzhin rnam dag dri ma med pa'i sems//'dod chags la sogs skyon gyis rnyogs par 'gyur/ /zhes bya ba yang glo bur gyi dri mas nyon mongs par byas kyi gcig pa ma yin te/ chu khams gser dang nam mkha' rnams/ /dag pa bzhin du dag par 'dod/ /ces ji skad bshad pa lta bu'o/ /'o na sems kyi ngo bo nyid de ji lta bu zhig ce na/rnam par snang mdzad mngon par rdzogs par byang chub pa'i rgyud chen po las 'di skad du/ dngos po thams cad dang bral ba phung po dang khams dang skye mched dang / gzung ba dang 'dzin pa rnam par spangs pa/ /chos bdag med pa mnyam pa nyid kyis rang gi sems gzod ma nas ma skyes pa stong pa nyid kyi ngo bo nyid ces gsungs so//bdag gi de kho na nyid kyi chos nyid de lta bu dang / lha'i chos kyi sku de bzhin nyid dang yang dbyer med do/ /don de nyid 'phags pa phyag na rdo rje dbang bskur ba'i rgyud chen po las 'di skad du/ bdag gi ngag ma gtogs par yid med/ yid ma gtogs par ngag med/ bdag gi yid ma gtogs par lha'i sku med de yid nyid ngag yin/ ngag nyid yid yin la/ lha'i gzugs nyid kyang yid yin la/ ngag nyid kyang lha'i gzugs yin no zhes rgya cher gsungs so/ / de ltar de kho na nyid kyi don la dmigs pa'i ting nge 'dzin 'di nges par bsgoms pa'i don ni 'phags pa rdo rje'i gtsug tor rgyud phyi ma bsam gtan gyi le'u las 'di skad du/ mi 'byed 'byed pa rnam par spangs/ /phra ba mi g.yo gsal ba ste/ /blo yi spyod pa mdun na gnas/ / zhes gsungs pa ste/ de ltar ci nus su bsgom zhing goms par byed pa ni sgrub pa po de kho na nyid kyi don la dmigs pa zhes bya'o/ /gzhan ni go bar zad do/ /'dug nas zhes bya ba ni rab tu grub par byed pa'i rgyud chen po las/ ji skad du/ skyil mo bkra shis bzang mo ste/ de dag 'dug pa gsum yin no//zhes gsungs pa nyid blta bar bya'o/ /dbang po yang dag bsdam pa zhes bya ba ni ngo bo nyid kyis g.yengs pa la sogs te/ rnam par g.yeng ba drug las slar glan par dgongs pa'o/ /lus kyang drang zhing zhes bya ba ni sgal tshigs bsrang ba'i don to/ /brtan pa zhes bya ba ni dang po las phyis mi bskyod pa'i tha tshig go//phyis ni zhes bya ba ni lus brtan por bzhag nas de'i 'og tu bzlas brjod brtsam par bstan to/ /ma mchu shin tu mdzes par yang bsgul zhing / /zhes bya ba ni shub bur bzlas brjod bya ba'i don to/ /gsang sngags ci dgar bzlas brjod bya//zhes bya ba ni bzlas brjod kyi yan lag bzhi la sogs pa gang las goms ba'i tshul du bzlas pa'i tha tshig go/ /sems ni glog dang 'dra zhes bya ba ni byung ma thag tu 'gag pa'i mtshan nyid du bstan to/ /spre'u dang 'dra zhes bya ba ni yul kun du 'jug pa'i don to//rlung dang mtshungs zhes bya ba ni ring du 'gro zhing gzung rgyu med par rgyu ba'o/ /rgya mtsho chen po yi ni rlabs dang 'dra/ /zhes bya ba ni/ ji ltar rgya mtsho'i rlabs de che chung dang gnyer ma sna tshogs su 'gyur ba bzhin du/ sems 'di yang dngos po sna tshogs kyi ngang du 'byung ba'i don to//sgyu can zhes bya ba ni phyin ci log tu slu ba'i tha tshig go/ /'dod dgur yul la mngon dga' ba/ /zhes pa ni 'dod chags la sogs pa'i yul la so sor zhen par rgyu ba'i don to/ /g.yo zhing 'phyen pa zhes bya ba ni mi brtan pa'o/ /nges par gdul bar bya zhes bya ba ni rang gi lha'i bzlas brjod la 'bad pa'i dus su rang yan du mi gtong bar dgug pa'i don to//gang tshe zlos dga'i sems ni zhi ba la/ /brten pas nyid kyi dran pa rmongs gyur na/ /zhes bya ba ni rgod pa las dgug drags pas bying bar gyur pa'o/ / langs nas bcag cing zhes bya ba la sogs pas ni gnyid bsal ba'i thabs bstan pa'o/ /las kyi dbang gyur zhes bya ba ni des skyid sdug tu gyur pa'o/ /bdag po med ces bya ba ni sdug bsngal las skyob par byed pa'i rje dbon 'ga' yang med pa'i don to/ /mgon med ces bya ba ni nyon mongs pas log par khrid kyang de las bzlog pa'i nye du gang yang med par bstan to//rten med ces bya ba ni mi rtag pa dang skad cig mas bcom pa'i tshe sdod pa'i mthu med pa'i don to/ /tshe rabs gcig nas gcig ces bya ba ni khams gsum gyi nang du 'khor ba'i/ / lus kyi kha brgyud ces bya ba ni/ skye gnas bzhi yi ming la brtags/ /zhes bya ba'i tha tshig go/ /rjes su rab 'gro ba zhes bya ba ni/ 'gro ba drug po dag gi nang du'o/ /de yi rjes su dge dang mi dge 'brang / /zhes bya ba ni lha la sogs pa'i skye gnas su lus blangs kyang / sems dang 'brel pa ma yin gyi/ /las dge ba la sogs pa'i bag chags kho na dang 'brel bar bstan to/ /gzhan ni go bar zad do/ /'dod chags shas che ba zhes bya ba ni sgrub pa po kha cig go/ /mi gtsang sha tshil dang / pags pa keng rus blta bas rnam par bzlog /ces bya ba ni gnyen po rnam par thar pa'i lam mi sdug pa'i ting nge 'dzin bsgom par bstan te/de yang / thog mar pags pa'i rim pa 'di/ /rang gi blo yis tha dad phye/ /sha yang rus pa'i dra ba las/ /shes rab mtshon gyis gung du phye/ /rus pa rnams kyang dbye byas nas/ /rkang gi bar du blta bya zhing //'di la snying po ci yod ces/ /bdag nyid kyis ni brtag par gyis/ /zhes ji skad bshad pa lta bu'o/ /byams dang zhes bya ba ni sgrub pa po la la zhe sdang gi shas che ba la gnyen po byams pa'i ting nge 'dzin bsgom par bstan te/ de la dang por gang zag yon tan dang ldan pa bkur sti bya bar 'os pa bla ma lta bu'i gnas shig la dad pa bskyed nas skyes bu dam pa 'di bde bar gyur cig snyam pa'i yid la byed pa 'jug par byed de/ji srid du 'di sems chung ngu 'byung ba de srid du 'jug par byed do/ /de nas gang zag sdug pa la sems gtod par byed de/de la yang ji srid du gang zag snga ma dang mnyam pa'i sems bskyed pa de srid du/ sems gtod par byed do/ /de nas gang zag tha mal pa la gtod par byed de snga ma bzhin no/ /de nas gang zag mi sdug pa la gtod par byed de snga ma bzhin no/ /gal te 'di la gang zag sha khon can zhig yod na/de la 'di bde bar gyur cig snyam pa'i sems bskyed par bya ste/ de la yang ji srid du snga ma dag dang lhan cig mnyam pa'i sems bskyed pa de srid du skyed par byed de/ 'di tsam gyis na byams pa'i sems kyis rnam par grol ba mtshams tha dad pa bsgoms pa yin no//de phyin chad ni phyogs khyad par byed pa'i dbang gis yid la byed par rig par bya'o/ /snying rje zhes bya ba ni gang zag sdug bsngal ba mgon med pa skyabs med pa la dmigs nas/ rim pa 'di nyid kyis 'jug par bya'o/ /'di'i phan yon yang rnam par snang mdzad kyi rgyud phyi ma las//gang gis rta dang 'dra ba'i sems/ /mnyam par gzhag pas btul nas su/ /byams dang snying rje brtan byas na/ /dngos grub brtan pa mod la thob/ /ces ji skad gsungs pa lta bu'o//chus gdab zhe sdang la zhes bya ba ni byams pa dang snying rjes zhe sdang gi me bsad pa'am/ yang na dge ba'i rtsa ba bskyed pa'i don to/ /gti mug ces bya ba ni mi shes pa ste/ sgrub pa po la la'i rgyud la gti mug gi shas che zhes bya ba'i tha tshig go/ /rten 'brel lam gyis so zhes bya ba ni gti mug gi gnyen po ste/'di ltar ma rig pa'i rkyen gyis 'du byed rnams zhes bya ba nas/ skye ba'i rkyen gyis rga shi zhes bya ba'i bar du'o/ /de bzhin du ma rig pa ma byung na 'du byed rnams kyang mi mngon/ skye ba ma byung na rga shi'i bar du yang mi mngon pa zhig na zhes bya ba la sogs pa rgyas par mdo sde las ji skad 'byung ba bzhin blta bar bya ste/'dir ni yi ge mangs su dogs pas ma spros so/ /re zhig cig na dgra yang mdza' bor 'gyur/ /zhes bya ba la sogs pas ni nges pa med par bstan to/ /blo gros ldan pas nam yang chags mi bya//zhes bya ba ni sgrub pa po'i phyin ci log gi blo bzlog par rtsol ba rnams kyis zhes bya ba'i tha tshig go/ /gnyen la dga' ba'i sems kyi rnam rtog dag /bzlog nas zhes bya ba'i shugs kyis ni dgra la zhe sdang bzlog dgos par yang go bar bya'o/ /de ltar na dge ba la sems ci bder 'jog nus kyi de lta ma yin te mdza' ba bzung na ni/ha cang yang byed 'dod par 'gyur/ mi mdza' bas bzung na ni/ thams cad kyi thams cad du byed mi 'dod par gyur pas/ rjes su chags pa dang khong khro ba'i sems gnyis dang ldan pas ni chos mnyam pa nyid de khong du chud par byed mi nus so//sngags 'chang nam yang smra bar mi bya'o/ /zhes bya ba ni bzlas brjod la sbyor ba'i dus su thams cad bkag go/ /ji ste dgos pa yod na sngags g.yog dang / /bzlas brjod zin nas cung zad smra bar bya/ /zhes bya ba ni bsnyen pa la zhugs pa'i tshe bzlas brjod dang mdo sde bklag pa ma gtogs pa'i tshig mi smra ba'i brtul zhugs la gnas pa'i dus su yang ched che ba zhig yod na//sngags g.yog kho na cung zad smra bar skabs phye ba'o/ /me tog dri snod ces bya ba la sogs pas ni lha mnyes par bya ba'i don du dge ba gang dang gang spyad pa'o//sangs rgyas byang chub mchog tu bsngo bar bya/ /zhes bya ba ni thabs mkhas par 'bras bu yongs su mi zad par bya ba'i phyir rgya chen por bsngo bar bstan to/ /chu klung zhes bya ba ni phyogs tha dad pa nas 'bab pa'i ro sna tshogs dang ldan pa'o/ /rgya mtshor phyin pa na//lan tshwa'i ror ni gcig tu gyur/ /ces bya ba ni der son pa'i dbang gis ro gcig par gyur par bstan to/ /de bzhin zhes bya ba ni dpe brjod pa de bzhin du zhes bya ba'i tha tshig go/ /rgyal ba'i ror ni gcig tu 'gyur/ /zhes bya ba ni tshul khrims dang brtson 'grus la sogs pa sgo tha dad pa nas bsgrubs pa yang /'bras bu sangs rgyas kho nar 'grub par bstan pa'i don to/ /'bras bu'i phyir sA lu bskyed kyis zhes bya ba la sogs pas ni de ltar dge ba spyad do cog sangs rgyas nyid du bsngos na nam mkha' la 'gro ba la sogs pa'i rig sngags 'chang du mi 'grub par dogs pa'i rtog pa bsal te/tshig gi don gzhan ni go bar zad do/ /sog ma dper brjod pa ni lha dang mi'i longs spyod la snying po med par zhar la bstan pa'i tha tshig go/ /tshe ring ba legs par thob pa zhes bya ba ni srog gcod pa spangs pa'i 'bras bu'o//dang zhes bya ba ni mi dge ba lhag ma dgu spang ba'i tshul khrims la yang de bzhin du spro ba bskyed par bya ba'i tha tshig go/ /chos bzhin bsgrubs zhes bya ba ni/ dge ba bcu'i tshul bzhin spyod pa'o/ /yul dag rnyed pa zhes bya ba ni de'i dbang gis mngon par mtho ba'i dpal mngon du phyogs par 'gyur zhes bya ba'i tha tshig go//skyo ba med par 'gyur zhing zhes bya ba ni dge ba bcu'i 'bras bu'i phan yon dpag tu med par rdzogs pa'i phyir rgyu nyid zad mi shes par bsngo ba'i don to/ /'gro ba'i bsam pa rnams ni rtag tu rdzogs par bya//zhes bya ba ni dpag bsam gyi shing ljon pa'am yid bzhin gyi nor bu lta bur sems can rnams kyi re ba sna tshogs skong ba'i mthu dang ldan par gyur cig ces bsngo bar bstan to/ /grags dang ma grags zhes bya ba la sogs pa ni 'jig rten gyi chos brgyad brjod pa ste/rab bcom ste zhes bya ba ni mi rtag pa la sogs pa la/ dmigs pas so sor brtag ces bya ba'i tha tshig go/ /sdig pa'i gnas su gyur pa zhes bya ba ni 'jig rten pa'i phan yon grags pa la sogs pa zhig byung nas chags shing rgyags pa ni sdig pa'i gnas yin no//de bzhin du 'jig rten pa'i skyon ma grags pa la sogs pa rnams byung ba'i tshe/ zhum zhing 'khrug pa yang sdig pa'i gnas yin no/ /spang bar bya zhes bya ba ni thams cad du'o/ /lhan cig mi gnas ltar zhes bya ba ni rgya mtsho chen po'i nang du mi ro bor na/klu mthu bo che rnams kyis gcig gi gnas nas gcig tu phul te/ mthar phyin pa ni dper brjod pa'o/ /de bzhin rnam rtog sems kyis sdig byas pa/ /zhes bya ba ni chags pa nas le lo'i bar gyis dbang du gyur pa'o/ /sngags pa skad cig tsam yang gnas mi bya//zhes bya ba ni ma chags pa nas brtson 'grus kyi bar gyis gsal bar bya ba'i don to/ /rtse gcig sems kyis zhes bya ba ni rnam par rtog pas glags mi thod ba'i zhi gnas dang lhag mthong gis 'khyud pa'i ting nge 'dzin to/ /zlos la mngon par dga' ba yi/ /zhes bya ba ni bzlas brjod shes rab dang ldan pas sgrib pa bsal ba'i dbang gis bzlas brjod la zhen te ting nge 'dzin gyi bde ba dang ldan zhes bya ba'i tha tshig go//lus la chos kyang de bzhin 'bar bar 'gyur/ /zhes bya ba ni ting nge 'dzin thob pas sems byang ste/ dga' ba thob pa'i dbang gis lus kyang byang nas rig sngags 'chang lha'i gzugs su gyur te/gzi brjid thob bo zhes bya ba'i don to/ /gzhan ni go bar zad do/ /de ltar bzlas brjod byed pa'i sgrub pa pos/ /nyin gcig bzhin du byas nas zhes bya ba ni bsod snyoms blang ba dang / bzlas brjod bya ba dang / mdo sde bklag pa dang / mchod rten gdab pa la sogs pa'i dge ba spyad pa 'ba' zhig gis nyin par gyi dus 'das par bya ba'i tha tshig go/ /bzlas pa phul nas zhes bya ba ni 'phags pa rmugs 'dzin la sogs te nor can gyi rigs sgrub pa la ni bsod nams kyi tshogs bstan par bya ba'i don to//bzlas brjod byas pa rnams gser gyi bum pa rin po che sna tshogs kyis spras pa'i nang du bcug ste/ kha pad+ma dkar pos bcad nas lha'i phyag tu dbul bar bsam par byed ces grag go/ /gsang sngags gzhan la ni 'dis mi bsgre ste/bzlas brjod byas pa'i bsod nams kyi tshogs 'phel bar bya ba'i don du/ rang gi lha la dbul bar bstan te/ ji skad du/ sangs rgyas bcom ldan 'das thams cad la dge ba'i rtsa ba thams cad phul nas/ bsod nams kyi phung po yongs su bsdus pa'i bsod nams kyi phung po dpag tu ma mchis shing bsam gyis mi khyab pa de bzhin gshegs pa'i ye shes kyis mkhyen pa gang lags pa des bdag brtan par gyur nas zhes bya ba dang 'dra'o//nub mo zhes bya ba ni nyin par mi nyal bar bstan to/ /ku sha bting nas nyal bar bya//zhes bya ba ni khri la mi nyal bar bstan to/ /byams pa zhes bya ba ni sems can rnams bde ba dang phrad par shog cig pa'i bsam pa'o/ /snying rje zhes bya ba ni sdug bsngal ba rnams de dang bral bar shog shig pa'i bsam pa'o/ /dga' ba zhes bya ba ni bde ba rnams dang mi 'bral bar shog shig pa'i bsam pa'o//btang snyoms zhes bya ba ni phan pa dang bde bas gzhan dag gi nyon mongs pa mi skye bar bya ba'i phyir kun nas nyon mongs pa med pa'i bsam pa'o/ /ldan zhes bya ba ni rang gi lha'i lhag pa'i ting nge 'dzin la gnas pa'i zhar la de rnams rjes su dran par bya ba tsam du zad kyi/rgyun gyi ting nge 'dzin rnams rnam par phye ste bsgom pa lta bu ni ma yin no/ /bcas par dran byas te zhes bya ba ni lha dang gtong ba dang tshul khrims so/ /shA ri'i bu la phyag 'tshal nas nyal ba ni bsod nams 'phel ba'i don du nyal ba ste/rig pa mchog gi rgyud chen po las/ thub pa sangs rgyas gnyis pa ni/ /'phags pa sha ra dwa ti'i bu/ /lha dang lha min dri zar bcas/ /klu dang gnod sbyin tshogs kyis mchod/ /ces gsungs pa'i phyir ro/ /nga la thal sbyar btud nas nyal//zhes bya ba ni log 'dren rmongs par bya ba'i don du ste/ yang rgyud de nyid las/ de bzhin dam pa grub pa de/ /rig sngags 'chang kun dbang phyug rje/ /dpa' bo gcig po dgra thul ba/ /rdo rje 'dzin la phyag 'tshal lo/ /zhes gsungs pa'i phyir ro/ /sdig pa mtha' dag zad par bya//zhes bya ba ni rim pa de rnams spyad pas so/ /le'u gsum pa'i don bshad zin to// //sor bcu zhes bya ba la sogs pas ni rdo rje rnams kyi tshad bstan to/ /rig sngags 'chang nyid ces bya ba ni nam mkhar 'gro ba kho na'o/ /sa rnams thob pa zhes bya ba ni yul thams cad la dbang ba'i rgyal po'o//rgyal po'i don du zhes bya ba ni rgyal phran don du gnyer ba'o/ /rin chen 'byung ba ni de'i gter rgya mtsho yin no/ /don kun sgrub pa zhes bya ba ni yul thams cad la/ lcags gsum gyi zhes bya ba ni gser dang dngul dang zangs rnams bsres pa'i rdo rje zhes bya ba'i tha tshig go//gdon gzhan zhes bya ba ni gnod sbyin ma gtogs pa thams cad do/ /seng ldeng zhes bya ba ni de'i rdo rjes gzhom pa'i don to/ /dpal zhes bya ba ni dbang phyug gi don 'byor pa'o/ /tshe zhes bya ba ni brtan pa dang srid pa'o//nor rdzas zhes bya ba ni gter la sogs pa dang rta la sogs pa 'phel bar grub pa'o/ /sha za sgrub pa la yang rtag tu shis/ /zhes bya ba yang ba ru ra'i shing las byas pa'i rdo rje nyid do/ /gzugs bsgyur ba zhes bya ba ni mi las byol song la sogs par bsgyur zhing brdzu'o//sa las byas pa'i rdo rje zhes bya ba ni rig pa mchog gi rgyud chen po las/ chu ngogs gnyis ka nas blangs pa'i sa zhes gsungs so/ /yid du 'ong ba'i 'dod pa zhes bya ba ni 'dod pa'i yon tan rnam lnga yid bzhin du 'byor par sgrub pa'o//dbyibs legs zhes bya ba ni chu zheng 'tsham pa'o/ /'jam zhing zhes bya ba ni byi dor legs pa'o/ /ma nyams zhes bya ba ni mtshan nyid rdzogs pa'o/ /yang na ya yo med pa'i don to/ /rma med ces bya ba ni sel lam 'phan med pa'o/ /rdo rje rtse lnga zhes bya ba ni de thams cad kyi dbyibs te rigs lnga'i ngo bo nyid du bstan pa'i don to//gzhan ni go bar zad do/ /rdo rje med na grub par mi 'gyur ro/ /zhes bya ba ni rab tu grub par byed pa'i rgyud chen po las/ ji skad du/ rdo rje de ni bcangs pa yis/ /bgegs dang log 'dren thams cad dang //gang dag gnod par byed pa rnams/ /shin tu skrag nas 'byer bar byed/ /ces bya ba dang / de bzhin du las kyi rdo rje zhes bya ste/ de nyid smad kyi las kyang byed/ /'di ni sgrub pa po rnams kyi/ /gsang zhing phra ba gcig pur bsgrags/ /zhes gsungs pa'i phyir ro//khu tshur bcangs nas zhes bya ba ni rig sngags 'chang dngos grub la mi rtsol ba rnams kyi ngor gsungs so/ /ldong ros zhes bya ba la sogs pas ni sgrub pa po'i rdzas kyi mtshan nyid bstan te/ de yang cho ga zhib mo kha cig tu gsang sngags gsungs la/rdzas gang las sgrub pa ma gsungs pa dang / gzhan dag tu rdzas thams cad la sgrub ces khungs phyung la/ rdzas dngos su ma bstan pa rnams spyi'i rgyud 'di dang sbyar ro/ /rdzas ni bcu bdun sgrub pa po de rnams kyis/ /zhes bya ba ni grangs nges pa ste de dag blta ba dang /gzung ba dang / sbyang ba dang / rab tu grub par byed pa dang / rig pa mchog gi rgyud chen po de dag las 'byung ste/ 'dir yi ge mangs su dogs nas ma spros so/ /grub pa rnam pa gsum rnams grub par byed/ /ces bya ba ni/ de dag sbyangs nas bsgrubs na 'bar ba dang /dud pa 'byung ba dang / tshe'i bye brag gis rab dang 'bring dang tha ma'i dngos grub thob pa'i don to/ /rang sngags cho gar lhag par bshad pa gang / /zhes bya ba ni so so'i cho ga zhib mo dag tu 'dir ma smos pa'i rdzas zhig byung na yang sgrub tu rung zhes bya ba'i tha tshig go//der yang grub pa rnam pa gsum du mthong / /zhes bya ba ni rdzas bcu bdun las lhag pa'i 'gal ba med de/ /dngos grub tu gyur par bstan to/ /bgegs dang log 'dren grub par mi dga' ba/ /zhes bya ba ni de dag gi rang bzhin bstan to/ /rig pa'i tshogs rnams kyi ni mdun nas rgyu//zhes bya ba la sogs pas ni de dag gi spyod pa bstan to/ /rnam pa bzhi yod de zhes bya ba ni de dag gi rigs kyi sdom ste/ 'og nas rigs gnyis 'byung bas bsnan na rigs drug tu bgegs thams cad 'dus so/ /'jig rten skyong ba bzhi zhes bya ba ni rgyal po chen po bzhi'o//de dag g.yog 'khor zhes bya ba ni rgyal po chen po bzhi'i g.yog 'khor du gtogs pa'o/ /mya ngan med pa zhes bya ba yang de nyid de bgegs kyi rigs rnams 'jig ces bya ba'i sde dpon ming ngo / /de yi g.yog 'khor bye ba phrag bdun rnams//zhes bya ba ni rnam par 'jig gi rigs la gtogs pa mya ngan med pa'i g.yog gi grangs so/ /de dag gsang sngags sgrub la bgegs byed do/ /zhes bya ba ni rgyal po chen po bzhi yis gsang sngags sgrub pa rnams la bgegs byed pa'i don to/ / sa stengs mtha' dag kun du bgegs kyang byed/ /ces bya ba ni rang gi rigs dang gzhan la yang byed de/ 'jig rten las 'das pa dang 'jig rten pa thams cad la yang go bar bya'o/ /gzhan ni go sla bas mi phye'o/ /khros shing 'khrugs nas phyir yang phyogs par 'gyur//zhes bya ba ni bgegs kyi dbang du gyur pa'i nyes dmigs bstan pa ste/ bdag dang gnas dang rdzas rnams bsrung bar gsungs pa rnams khyad du bsad de ma byas pas dngos grub kyi snod du mi rung ba'i don to/ /sems ni 'jungs shing zhes bya ba ni ser sna'i dbang gis gzhan gyi 'byor pa mi bzod pa'o//rmongs pa zhes bya ba ni blun pas ma dpyad par byas pa'o/ /lha zhes bya ba ni bgegs sprul par byin gyis rlob pa rnams so/ /log 'dren bgegs kyi lugs 'di gtod/ /ces bya ba ni phrag dog gi bar gtod pa'i don to/ / rig pa mchog gi rgyud chen po las/ ji skad du/ lha rnams la yang lha min rnams/ /'thab pa'i phyir ni dang ba ltar/ /sems can rnams la bgegs byed phyir/ /de bzhin bgegs rnams 'byung bar 'gyur/ /zhes gsungs so/ /rnam par snang mdzad mngon par rdzogs par byang chub pa'i rgyud chen po las ni gzhan du bka' stsal te/sngon chad ser sna bsten pa'i phyir/ /bgegs ni rang gi sems las byung / /zhes gsungs so/ /gnyen po yang de nyid las ji skad du/ de yi rgyu ni gzhig pa'i phyir/ /gang du sems dang sems 'byung ba'i//rtog pa thams cad spong ba dang / /rnam par rtog pa las byung ba'i/ /spros pa thams cad 'gag 'gyur ba/ /byang chub sems zhes bshad pa yin/ /zhes gsungs te/ de dang yang sbyar bar bya'o/ /bzlog mi nus zhes bya ba ni bgegs mi byed pa'i lugs sdod par mi nus pa'i don to//bgegs kyis 'jigs su rung ba byas pa dag /ces bya ba ni rig pa mchog gi rgyud chen po las ji skad du/ log 'dren de dag ni bsod nams kyang zad par byed de/ log 'dren rnams kyis reg pa tsam gyis lha'i lo stong gi bar du pha rol tu phyin pa drug bsags pa'i bsod nams kyi phung po yang thal bar rlog par byed cing /rig sngags sgrub pa'i bsod nams kyang zad par byed de/ des na rig sngags 'grub par mi 'gyur ro zhes gsungs so/ /sngar bshad pa ni de dag zlog par byed/ /ces bya ba la sogs pas ni gong du bzlas brjod dang dkyil 'khor du 'jug par gsungs pa dag go//gzhan ni go bar zad do/ /'di ltar phan tshun du ni 'gro ba na/ /rig pa 'don pa'i sems ni g.yeng bar byed/ /ces bya ba ni bgegs 'jug ces bya bar go bar bya ste/ rgyud de nyid las/nges par gnas pa la yang gnas nas/ gnas su 'gro ba la yang gom pa re re la log 'dren rnams glags tshol ba'i phyir 'khod pa yang yod do zhes gsungs so/ /dper na chu nang grib ma snang ba ltar/ /zhes bya ba ni grib ma chu'i nang du 'byung ba na/ thogs pa'am song ba'i rjes shul mi snang bar gting du phyin to/ /de bzhin mi yi lus la 'jug par 'gyur/ /zhes bya ba yang thogs pa med cing rma med par 'jug pa'i don to/ /'khru tshe gzhan la zhes bya ba la sogs pa ni bgegs kyi rigs drug so so la yang khyad par du bgegs byed pa rnams kyis rang bzhin bstan pa ste tshul ni 'og nas 'chad do//ma brtsal me ni 'byung ba ltar/ /zhes bya ba ni rang dbang med par 'byung ba'i dpe'o/ /'dod chags me chen zhes bya ba des dge ba'i rtsa ba thams cad bsreg pa'i don to//g.yo zhing 'gul ba zhes ni bya ba'i bgegs/ /zhes bya ba la sogs pas ni khyad par du bgegs byed pa de dag sgrub pa po la 'dzin pa'i dus dang / zin pa'i mtshan ma bstan pa ste tshig gi don ni go sla bas ma phye'o/ /bgegs kyis brlams pa zhes bya ba ni des zin nas mi'i rang bzhin gyur pa'o//phyogs na lam min lam du mthong / /zhes bya ba ni log pa'i spyod pa la 'jug pa'o/ /gzhan ni go bar zad do/ /bgegs dang log 'dren rnam par gzhig pa'i phyir/ /zhes bya ba ni de dag gzhom pa'i don du zhes bya ba'i tha tshig go/ /bdud rtsi thab sbyor drag shul las can sbyor//sngags pa de yis gsang sngags lam zhugs pa/ /zhes bya ba yang rgyud de nyid las/ /de bas na rig sngags 'chang gis nyi ma shar phyogs su kha bltas la/ rtag tu chu khyor ba gang gtor nas khro bo'i gsang sngags kyang lan bdun brjod par bya ste/ji skad du/ bdag ming 'di zhes bya ba rig sngags che ge mo zhig sgrub kyis khyed yid dga' bar gyis shig ces smra bar bya'o/ /bgegs dang log 'dren rnams kyis yang mi tshugs/ /zhes bya ba ni bdud rtsi thab sbyor gyi lam du zhugs pa'i phan yon bstan pa ste/ yang rgyud de nyid las des log 'dren rnams dga' zhing mgu la yid dga' bar 'gyur te/ dngos grub sbyin par byed cing sems kyang dang bar 'gyur ro zhes gsungs so/ /bgegs kyi rnam grangs mang po de dag gi ngo lon dang gnyen po tha dad pa yang rgyud de las rgyas par so sor phye ste bstan pa rnams 'dir yi ge mangs su dogs te ma spros pas rgyud nyid las blta bar bya'o//phyugs lhas zhes bya ba la sogs pas ni dbang bskur ba'i gnas bstan to/ /shing gcig ces bya ba ni rab tu grub par byed pa'i rgyud chen po las/ kun du zlum po'i shing drung ngam//zhes gsungs so/ /gzhan ni go bar zad do/ /dkyil 'khor gru bzhi lham pa khru bzhi'i tshad/ /ces bya ba ni dkyil 'khor gyi phyi'i rgya'i ra ba'i tshad do/ /tshon rtsi rnam pa sna tshogs zhes bya ba ni dkar po dang dmar po dang ser po dang ljang gu dang nag po rnams te/ de yang dbus su ni khru phyed pa'i sa khru do dor ro/ /phyogs kyi lha rnams gnas ni yongs su gzung / /zhes bya ba ni de'i phyi rim khyon khru gang zhig yod pa'i sum cha 'khor sar gzhag ste/ sum gnyis la lha rnams dgod pa ni gsang ba'i dkyil 'khor las/ ji skad du/ brgya byin gyi ni rdo rjer gsungs/ /me lha'i phyag rgya zhugs thab yin/ /gshin rje'i phyag rgya be con yin/ /bden bral gyi ni ral gri yin/ /chu bdag gi ni zhags par bshad/ /rlung gi phyag rgya rgyal mtshan yin/ /ku be+e ra yi dbyug to yin/ /dbang phyug gi ni rtse gsum gsungs//sa yi phyag rgya bum pa yin/ /nyi zla'i phyag rgya zlum por bya/ /zhes gsungs te/ shar phyogs nas brtsam par bya'o/ /zla ba ni mdung rtse gsum pa dang rdo rje'i bar du gzhag ste dkar por bya'o/ /nyi ma ni ral gri dang zhags pa'i bar du gzhag ste shin tu dmar por bya'o//sa'i lha mo'i bum pa ni zhags pa dang rgyal mtshan gyi bar du gzhag go/ /sgo bzhi pa la zhes bya ba yang rgyud de nyid las/ dbus su sgo ni gdod par bya/ /ngos gnyis su ni tshad dag kyang / /bzhi bzhi dag ni dor bar bya/ /zhes gsungs so/ /ku sha'i rtswa yang dgram zhes bya ba ni dkyil 'khor gyi ri mo la ma bab pa'i tha ma thog thag rtse mos rtsa ba mnan nas bskor ro//bza' ba zhes bya ba ni khur ba sna tshogs so/ /sha chang la phug ces bya ba ni spyir smos kyang / lha gzhan la sbyin par bya ba ma yin te/ gshin rje dang bden bral la sbyin no//'bras bu mang po zhes bya ba ni shing thog sna tshogs so/ /gtor ma sbyin zhes bya ba ni gtor ma de dag sbyar nas 'khor ba'i snam bu la so so'i mdun du dbab bo/ /bum pa zhes bya ba ni tshad dang dbyibs ni 'dir yi ge mangs su dogs nas ma spros te/ 'gro lding gi bum pa'i cho ga las blta bar bya'o/ /pad+ma dmar po'i mdog 'dra ba/ /zhes bya ba ni so btang legs pas kha dog dmar por gyur pa'o/ /nag po ra ri med ces bya ba ni so btang nyes pa'i skyon med pa'o/ /rin chen bcas zhes bya ba ni gsang ba'i dkyil 'khor las ji skad du/byi ru dang ni sa le sbram/ /dung dang mu tig nor bu ste/ /rin chen kun zhes bya ba la/ /lnga po 'di dag shes par bya/ /zhes gsungs so/ /sman dang zhes bya ba yang de nyid las/ /sing ha bya kr-i ka ra Ni/ /ha sa ha sa de ba ste/ /sman rnams kun zhes bya ba la//lnga po 'di dag shes par bya/ /zhes gsungs so/ /'bru dang zhes bya ba yang de nyid las/ /'bras kyi so ba mo sran gre'u/ /nas dang til dang gro dang lnga/ /'bru rnams kun zhes bya ba ni/ /las rnams kun la 'di dag gzung / /zhes gsungs so/ /spos chus bkang zhes bya ba ni 'phags pa 'jam dpal gyi rgyud chen po las/tsan+dan dang ga pur dang gur kur gyis bsre ba gsungs so/ /bzhi zhes bya ba ni bum pa re re'i nang du lha re re spyan 'dren pa'i phyir ro/ /ldum bus kha bkang zhes bya ba ni rig pa mchog gi rgyud chen po las/ 'o ma yod pa'i shing gi yal gas kha brgyan par gsungs so//ras kyis mgul ba dkris zhes bya ba ni ras phran dkar po kha tshar ma god pa khye'u gtsang gis mgrin pa bcing ba'i don to/ /lus dmar po dang ki li ki li dang / /'gro lding ba'i zhes bya ba'i lha 'di dag ni phyag na rdo rje'i thugs kyi rang bzhin snying po zhes bya ste/gtan tshigs ni 'og nas 'chad do/ /sogs pa zhes bya ba ni 'phags pa stobs po che las rig par bya ste/ 'og nas sbyin sreg gi skabs su yang las thams cad la sbyar bar 'byung ste/ ji skad du/ me yi mtshan ma 'di rnams mthong nas ni//stobs po che yis mar gyi sbyin sreg bya/ /zhes 'byung bas lha gzhan ma yin par mngon no/ /khro bo snga ma gsum po nas bzlas pa yang ma yin te/ bum pa bzhi yod la/ bzlas brjod byed cing bum pa re res bkru/ /zhes 'byung ba dang 'gal ba'i phyir ro//brgyar bzlas te zhes bya ba ni bum pa re re la lha re res brgya rtsa brgyad bzlas pa'i don to/ /khor yug tu ni gzhag par bya/ /zhes bya ba ni khrus byed pa'i sa bor ba'i phyi rim gyi grwa bzhir yang ku sha bting nas de'i steng du bum pa gzhag ste de'i nang du khro bo rnams spyan drang ngo //de'i nang du spyan drang bar ci mngon zhe na/ las kyi phreng ba las/ 'jig rten dbang phyug chu dbus spyan drangs te/ /zhes gsungs pa de dang mthun pa'i phyir ro/ /de lta bas na bum pa de dag kyang yid bzhin gyi mtsho bdud rtsi'i chus gang bar bsams la/ de la gnas rnams bkod de 'phags pa rnams mchod yon nam gsang sngags kyis spyan drang ngo //de nas byug spos bdug spos la sogs dbul/ /zhes bya ba ni de dag gshegs par rig pa dang mchod pa rnam lnga rim pa bzhin du dbul ba'i don to/ /de nas phyogs skyong dag la yang gtor ma bsngos nas bzlas brjod brtsam par bya'o//bzlas brjod zin nas phyogs kyi lha rnams dga' bar bya ba'i phyir rig pa mchog gi rgyud chen po las/ de dag las bstod pa'i tshig 'byung ba brjod par bya ste/ 'dir yi ge mangs su dogs pas ma spros so/ / bde ba'i stan la gzhag ces bya ba ni dkyil 'khor gyi dbus su ku sha'i khres cig gzhag la/ de'i steng du nad pa gzhag go/ /bzlas brjod byed cing bum pa re res bkru/ /zhes bya ba ni lha gang gi bzlas pa'i bum pa de chu blugs pa ni de nyid kyi gsang sngags brjod pa'i don to//'on kyang log 'dren rnams las thar bar 'gyur/ /zhes bya ba ni bgegs kyis zin pa'am/ ma zin pa rnams kyis las 'di byas na yang phyis mi tshugs par thar pa'o/ /sgrub pa po yi ming ni 'ba' zhig la/ /bgegs rnams gzhig phyir phan par ma zad kyi/ /zhes bya ba la sogs pas ni zhar gyi phan yon bstan te/tshig gi don gzhan ni go bar zad do/ /bu mo dag ces bya ba ni mi la ma song ba'o/ /bud med phal zhes bya ba ni smad 'tshong ma'o/ /le'u bzhi ba'i don bshad zin to// //rnam par bsal te zhes bya ba ni bgegs dang bral ba'i dbang gis sdig pa'i dri ma med de sems kyi rgyud dang zhes bya ba'i tha tshig go//cho ga nyams dang zhes bya ba ni skad cig gsungs pa'i cho ga rnams ma lcogs par zlos pa'o/ /yi ge gug skyed med ces bya ba ni lhag pa dang chad pas dbyings dang rnam par thar pa'i sgo ston pa'i don gyis sgra gzhan du gyur ba'i phyir ro//mchod pa med ces pa ni ma 'byor pa'o/ /mi gtsang zhes bya ba ni phyi nang gi dri ma ma bsal ba'o/ /dngos grub rgya chen mi ster ro/ /zhes bya ba ni skyon gong ma rnams dang ma bral ba'i nyes pas zhes bya ba'i tha tshig go/ /char pa legs par 'bebs zhes bya ba ni lo legs pa'i skal ba dang ldan pa rnams kyi yul du'o//mi yi skal ba dang ldan pa zhes bya ba ni tshe 'di dang gzhan du spyad pa'i bsod nams kyi 'phro yod pa'o/ /'dod pa bzhin du zhes bya ba ni nam mkha' la 'gro ba la sogs pa sgrub pa po gang la re ba'i 'bras bu thob pa'i don to//yul zhes bya ba ni rab tu grub pa'i rgyud chen po las ji skad du/ gang du bdud bzhi btul nas ni/ /bcom ldan mngon par sangs rgyas par/ /dngos grub mang po kun gyi mchog /rmad byung go 'phang thob gyur pa/ /zhes bya ba la sogs pa'o//dus zhes bya ba yang rgyud de nyid las/ /ji skad du/ dgun zla tha chungs ston zla 'bring / /dpyid zla rab 'bring po dang / /dbyar zla ra ba'i nya la yang / /sgrub pa chen po brtsam par bya/ /zhes gsungs pa'o/ /cho ga zhes bya ba ni lha gzi byin bskyed pa la sogs pa'o//las zhes bya ba ni rnam pa bzhi'o/ /sdig pa byang zhes bya ba ni bzlas brjod dang bsam gtan dang dka' thub la sogs pas 'byang ba'i don to/ /bsod nams bsags pa zhes bya ba ni tshul khrims rnam pa gsum po la gnas shing pha rol tu phyin pa rnams dang ldan pa'o/ / gus pa zhes bya ba ni lha dang bla ma la yid ches pas/ nan tan nges par byed par 'gyur ba'i don to/ /bzlas brjod ces bya ba ni yan lag dang ldan par byed ces bya ba'i tha tshig go/ /ji tsam sdig pa mang po zhes bya ba la sogs pas ni snga ma'i yon tan las bzlog pa'i skyon rnams brjod pa'o//bar chad sngags gzhan bzlas zhes bya ba ni sgrub pa po blo tsam la ma phebs pa kha cig lha la lha'i yon tan myur myur skad 'byung ba dag thos nas/ rang gi khyad par gyi lha btang ste/ de'i gsang sngags zlos pa'o/ /bzlas pa btang zhes bya ba ni bsnyen pa'i grangs tshang nas sgrub pa'i dus la sdod pa'i skabs su ste/rab tu grub par byed pa'i rgyud chen po las/ ji skad du/ sngon du bsnyen pa rdzogs pa la/ /mi nus na ni dus gcig gam/ dus gnyis su ni cho ga bsgom/ /zhes bya ba de ma zlos pa'o/ /gzhan la byin zhes bya ba ni bdag gis bsnyen pa byas pa rnams gzhan dngos grub thob par bsngos nas sbyin pa'o//des ji ltar phan thogs par 'gyur zhe na/ 'phags pa phyag na rdo rje dbang bskur ba'i rgyud chen po las/ ji skad du/ las gzhan gyis byas la 'bras bu gzhan spyod pa'i dpe 'khor los sgyur ba'i rgyal po dang zhing pa brjod pa lta bur go bar bya'o//dus gsum mchod pa la ni brtson byas nas/ /slar yang 'bum bzlas zhes bya ba ni gong du smos pa'i skyon de dag byung nas/ slar bsab par 'dod pas sngon du bsnyen pa byas pa rnams kyang brdeg bsnun te/sngon pas kyang mchod pa'i bungs bskyed/ yo byad bzang du bstar nas bsab pa'i don du 'bum bzlas brjod bya bar bstan to/ /sgrub la 'jug par bya zhes bya ba ni de ltar nyes pa bsab nas/ de'i 'og tu bsnyen pa'i mgo gzugs zhes bya ba'i tha tshig go/ /stong phrag ces bya ba ni thams cad la sbyar ro//bcu zhes bya ba ni dngos grub rab kyi don du'o/ /brgyad dam bdun zhes bya ba ni 'bring las dgongs pa'o/ /bzhi zhes bya ba ni dngos grub tha ma sgrub pa rnams kyi grangs so/ /bzlas mthar zhes bya ba ni bsab pa'i don du bzlas brjod 'bum byed pa'i tshe/'bum gyi grangs ma tshang gi bar du bzlas brjod dus gsum du byed par mjug thogs su sbyin sreg bya dgos par bstan pa'o/ /mar gyi sbyin sreg bya zhes bya ba ni de'i tshe mar 'ba' zhig gi sbyin sreg bya bar gsungs so/ /yang na zhes bya ba la sogs pas ni mar 'ba' zhig gi sbyin sreg las rnam pa gzhan du yang bstan to//'dzam bu ma nu zhes bya ba la sogs pas ni yam shing gi rigs bstan to/ /yam shing gzhon nu zhes bya bas ni mtshan nyid bstan to/ /sor bcu gnyis pa'i zhes bya bas ni tshad bstan to/ / zho mar sbrang rtsi la btags nas/ /zhes bya ba ni bsab pa'i don du sbyin sreg byed pa rgyas pa'i las dang sbyar dgos pa'i phyir ro/ /nga yi mdun du zhes bya ba ni phyag na rdo rje'i sku gzugs kyi drung g.yon logs su bzhag pa'i don to/ /mngon du phyogs par bzhag ces bya ba ni 'jim gzugs de'i zhal yang phyag na rdo rje la bstan pa'i tha tshig go//ki li ki sogs zhes bya ba ni gong du bum pa'i cho ga las 'byung ba'i lha bzhi po rnams so/ /snying pos mar dang 'o ma zhes bya ba ni mar dang 'o ma gtsang mas bum pa bkang la/ lha de rnams kyi snying po brgya rtsa brgyad bzlas pa'i don to//de'i gzugs brnyan bkru zhes bya ba ni 'jim gzugs de dus gsum du bzlas pa'i mar dang 'o mas bkru ba'i don to/ /de ltar zhag bdun byas nas zhes bya ba ni zhag bdun du dus gsum du bkrus pas gzugs brnyan de yang 'jig par 'gyur te zhes pa'i rdzas dang /bkru ba'i rdzas bcas te/ chu klung chen por dor ro/ /de'i gzugs zhes bya ba ni rang gi lha'i gzugs spra tshil las byas pa'o/ /mda' dug dang ske tshes byugs nas zhes bya ba ni de'i lde gus gzugs brnyan bsku ba'i don to/ /ki li ki la 'gro lding la sogs pa'i//sngags kyis zhes bya ba yang / gong ma'i lha bzhi po de rnams nyid de/ lha de rnams drag po'i tshul gyis drag po'i thab tu spyan drangs la/ rang gi lha la drag shul mdzod cig ces gsol ba gdab pa'i don to/ /de la zhes bya ba ni rang gi lha'i gzugs brnyan no//yungs mar tsha ba dang sbyar zhes bya ba ni de'i dum bur bcad nas yungs mar tshwa dang bsre ba'i tha tshig go/ /zhag bdun dus gsum sbyin sreg las byas na/ /zhes bya ba ni gzugs kyi dum bu de dang drag po'i rdzas rnams bsogs la drag po'i bskul tshig bcug ste/ sbyin sreg bya ba'i don to/ /gsang sngags 'ongs nas rmi lam dag tu ni/ /zhes bya ba ni drag shul spyad pa'i rjes la nges par lha byon te ston pa'i tha tshig go/ /cho ga nyams pa'am yi ge lhag chad ston/ zhes bya ba ni gsang sngags kyi lha rnams kyang thugs rje chen po dang ldan pas cho ga ma nyams na/dngos grub mi ster mi srid pas sgrub pa pos cho ga nyams pa 'ga' zhig ngos ma zin par drag shul gyi las byas te bskul bas gang nyes pa de ston par 'gyur zhes bya ba'i don to/ /ji ltar rgya mtsho dus las mi 'da' ltar/ /zhes bya ba ni chos nyid de gzhan du 'gyur mi srid par bstan pa'o//sngags kyis gzhan gyi gsang sngags mi gnon cing / /zhes bya ba la sogs pas ni gsang sngags mthu che bar bstan pa'i skabs su/ de ltar las sna tshogs 'grub nus par brda sprad kyis kyang / de dag gcig la gcig gnod pa mi mdzad ces bya ba'i tha tshig go//dpe ni go sla bas ma phye'o/ /de bzhin zhes bya ba ni de'i phyir zhes bya ba'i don to/ /sngags pas gang yang rung ba'i sngags bzlas nas/ /zhes bya ba ni gsang sngags gdug pa gang yang rung ba'o/ /gzhan gyi gsang sngags mnan mi bya//zhes bya ba ni phrag dog gi dbang gis sgrub pa po gzhan dngos grub thob tu dogs nas/ de'i lha la phur bus 'debs pa dag dgag par bstan to/ /gsang sngags bcad dang bcing bar mi bya zhing / /zhes bya ba yang de'i dngos grub bkag pa'i don du/ gzhan gyi lha'i gzugs brnyan nam rtswa ku sha las mtshon rnon pos gcod pa dang /de'i gzugs brnyan tshon sna lnga'i skud pas 'ching ba lta bu'i las drag po byed du ma gnang ba'i don to/ /yi ge lhag chad gsang sngags mi sbyin no/ /zhes bya ba ni ser sna'i thab dang ma bral bas gzhan mi 'grub par bya ba'i don du/gsang sngags kyi yi ge 'bru bsnan pa'am/ phri ste sbyin pa dgag par bstan pa'o/ /las rnams spyad pas gzhan du bsgyur mi bya/ /zhes bya ba ni zhi ba'i las byed 'dod pa rnams la mi 'grub par bya ba'i don du/drag po la sogs pa'i tshul du man ngag log par mi bstan to zhes bya ba'i tha tshig go/ /gnas rnams gzir bar nam yang mi bya'o/ /zhes bya ba ni klu la sogs pa gnas pa'i sa gzhi la/ de dag gtse ba'i don du gsang sngags drag po'i phur bus gdab pa la sogs mi bya bar bstan to//gzhan ni go sla bar zad do/ /dngos grub phyir ni rnam pa bcur gsungs te/ /zhes bya ba ni sgrub pa po la la'i lugs las gtso bo bcur 'dod ces bya ba'i tha tshig go/ /de yang sngags pa dang zhes bya ba ni sgrub pa po'i skyes bu'o/ /rang sngags zhes bya ba ni bsgrub par bya ba'i khyad par gyi lha'o//g.yog ces bya ba ni sgrub pa po'i grogs mchog go/ /rdzas zhes bya ba ni ldong ros la sogs pa'o/ /brtson 'grus zhes bya ba ni sbyor ba la sogs pa'o/ /phyogs zhes bya ba ni dbus la sogs pa'i yul lo/ /sa gzhi zhes bya ba ni ri'i rtse mo la sogs pa'i gnas so//dus zhes bya ba ni dpyid zla la sogs pa dang / snga dro la sogs pa'o/ /yan lag rdzogs pa'i lha zhes pa ni ri mo dang shing gzugs la sogs pa'o/ /sems stobs zhes bya ba ni 'jigs pa med cing sran che ba'o/ /tshig gi don lhag ma ni go bar zad do//bcu zhes bya ba ni bshad pa tha ma'o/ /brgyad ces bya ba ni bcu po de dag las tha ma gnyis phri ba'o/ /lnga zhes bya ba ni/ gzhan dag kha cig rig 'dzin grogs zhes zer/ /gzhan dag phyogs dang brtson 'grus dus rnams nyid/ /ces bya ba 'di nyid kyis bstan par rig par bya'o//bzhi zhes bya ba ni/ /gzhan ni rdzas dang sa gzhi'i lha dang sngags/ /zhes bya ba de nyid kyis bstan to/ /gsum zhes bya ba ni lnga po'i grangs su smos pa'i rkang pa 'og ma/ gzhan dag phyogs dang brtson 'grus dus rnams nyid/ /ces bya bas bstan to/ / gcig ces bya ba ni/ kha cig sems stobs yin zhes rnam par smra/ /zhes bya bas bstan to/ /sngags rig rang rang blo yis rnam par 'chad/ /ces bya ba ni de bzhin gshegs pa 'jig rten du ma byung ba'i tshe 'jig rten pa'i lha de dag gis so sor brtags zhes bya ba'i tha tshig go/ / sangs rgyas rgyud la cho ga gnyis kyis 'grub/ /ces bya ba ni shin tu rigs par gsungs zhes bya ba'i don to/ /de yang sgrub pa gang zhig rang gi yon tan rdzogs/ /zhes bya ba la sogs pa dang / gug skyed klad kor tsheg tshang zur phyin la/ /gsang sngags dag cing shin tu cho gar bcas//zhes bya ba 'di gnyis gtso bor gzhag go/ /phyi rol pa rnams kyis ni thams cad gtso bor bzhag pas/ gtso bo dang yan lag ces bye brag dbyer med pa nyid kyis nyes par bshad pa yin no/ /gnas zhes bye brag tu smos pa ni yan lag gi nang nas gces par dgongs pa'i phyir ro//gzhan ni go bar zad do/ /gling bu'i sgra dang zhes bya ba la sogs pas ni chags pa dang gnod pa'i sgo nas g.yeng ba'i rgyur 'gyur ba'i phyir spang bar dgongs pa'o/ /mi myur zhes bya ba ni bzlas brjod zur mi phyin pa dgag par bstan to/ /mi ngal zhes bya ba ni sems gzhan du g.yeng ba'i skyon du 'gyur ba'i phyir ro//sgra cher mi 'byung zhes bya bas ni rgod pa'i skyon bzlog par bstan to/ /ha cang chung bar min zhes bya bas ni bying ba'i skyon dgag par bstan to/ /smra bzhin min zhes bya ba ni gsang sngags kyi tshig bden par byin gyis brlabs pa 'don pa na tshig gzhan dang 'dres na dngos grub tu mi 'gyur bas de dgag par bstan to//gzhan du yengs bzhin min zhes bya ba ni lha'i sku dang zla ba'i dkyil 'khor la yi ge'i phreng ba bkod pa dang / yi ge'i sgra la ma gtogs par gzhan du yengs par mi bya ba'i don to//gug skyed klad kor tsheg rnams nyams par min/ /zhes bya ba ni dmigs pa dang 'don pa gnyi ga la'o/ /ji ltar chu klung nyin mtshan rtag tu ni/ /zhes bya ba la sogs pa ni bye brag tu smra ba'i sdom pa dang / sdom pa ma yin pa yang dag par blangs pa las skyes pa'i rnam par rig byed ma yin pa'i gzugs gnas pa dang 'dra bar 'dir yang dge ba'i bag chags kyi rgyun gnas pa nyid du bzhed do//le lo zhes bya ba ni dge ba la sems mngon par spro ba med pa ste/ gnyid dang glos phab ste nyal ba dang / bsod snyoms la brten nas snyom pa'i dbang du gyur pa'o//'dod chags zhes bya ba ni bud med la sogs pa la sems mngon par phyogs pa'o/ /mi dger ldan pa'i sems zhes bya ba ni de dag dang cha mthun pa gzhan rnams dang nye ba'i nyon mongs pa thams cad do/ /bzlog nas zhes bya ba ni skabs 'dir gnyen po la brten par bya ba ma yin gyi dgag par bstan to//gsang sngags yi ge mchod la sbyar bar bya/ /zhes bya ba ni phyag rgya dang gsang sngags dang yid dang zang zing gi mchod pa rnams ni skabs 'dir mi srid pas nan tan gyis gus par bzlas brjod byed pa nyid 'phags pa dgyes pa'i mchod pa zhes gdags so//sna rtser blta zhing zhes bya ba ni mig zam zim du bltas te/ sna'i rtse mo la blta bar dmigs pa nye bar gzhag na/ sems gzhan du mi g.yeng zhes bya ba'i tha tshig go/ / rnam par rtog pa spang zhes bya ba ni gang la dmigs pa'i ting nge 'dzin gyi yul las sems gzhan du ma 'phros par gzhag pa'i don to/ /nam zhig bskyod kyang rnam par mi g.yo ba/ /zhes bya ba ni rnal 'byor pa sems mnyam par gzhag pa de goms pa'i shugs kyis sgra la sogs pa'i rkyen ci byung yang gang la dmigs pa'i ting nge 'dzin las mi g.yo ba'o//de tshe dmigs la gnas pa thob pa ste/ /zhes bya ba ni ting nge 'dzin gyi ming de skad ces gdags pa thob ces bya ba'i tha tshig go/ /sems ni las su rung bar gyur pa des//zhes bya ba ni de nas bsnyen pa la 'jug pa'i las byar rung ba'i don to/ /rtse gcig sems dang ldan pa zhes bya ba la sogs pas ni bsam gtan thob pa'i phan yon bstan to/ /de tshe bzlas brjod thogs pa med par 'gyur/ /zhes bya ba ni sems las su rung ba'i bzlas brjod rnams bsnyen pa'i grangs su chud de/dngos grub kyi don la chud mi za zhes pa'i tha tshig go/ /gzhan ni go bar zad do/ /bcom ldan rgyal ba'i dbang po yis/ /zhes bya ba ni lung shin tu dag pa las khungs phyung ba'o/ /chos 'di kun zhes bya ba ni kun nas nyon mongs pa dang rnam par byang ba thams cad do//rtsa ba sems zhes gsungs zhes bya ba ni khams gsum pa'i sems dang sems las byung ba ste/ de'i rang bzhin ngo bo nyid gsum po kun brtags pa dang / gzhan gyi dbang dang / yongs su grub pa ste/ der chos thams cad kyi de kho na 'dus pa'i phyir ro//der chos lha mi'i bde ba zhes bya ba ni de dag gis longs spyad pa'o/ /mtho ris zhes bya ba ni 'gro ba'i ris kyis mtho ba'o/ /byang grol zhes bya ba ni phyogs gcig pa'i mya ngan las 'das pa'o/ /sems rab tu dang ba zhes bya ba ni sgrib pa rnam pa gnyis spangs pas gnas gyur zhes bya ba'i tha tshig go//sa chu me rlung dang bral zhes bya ba ni chos sku'i ngo bo nyid thob pa'i phyir ro/ /skye ba dang rgas pa dang 'chi ba dang bral zhes bya ba ni de la dbang thob pa'i don to/ /sogs pa zhes bya ba ni na ba dang yang bral bar bstan to/ /thog ma dang bar dang tha mar gnod pa kun dang bral ba zhes bya ba ni chos kyi dbyings la gnas pa de dus gsum las 'das pa'i phyir ro//rnam par grol ba zhes bya ba ni khams gsum pa'i 'ching ba'i rgyu bcad pa'i don to/ /bde zhing zhi par thob bar 'gyur/ /zhes bya ba ni mi gnas pa'i mya ngan las 'das pa thob pa ste/ji skad du/ thabs chen rnams dang ldan pa la/ /nyon mongs byang chub yan lag 'gyur/ /'khor ba'ang zhi ba'i bdag nyid de/ /de phyir de bzhin gshegs bsam yas/ /zhes bshad pa'i phyir ro/ /gsang sngags dngos grub kun dang thun mong ba/ /zhes bya ba ni/'jig rten pa dang 'jig rten las 'das pa gnyis kas sgrub tu rung ba'i don to/ /bde ba chung zhing zhes bya ba ni mya ngan las 'das pa la ltos na mi bde bar 'gyur te/ rig pa mchog gi rgyud chen po las/ ji skad du/ myangs 'das pa bde ba'i mchog /ces gsungs pa'i phyir ro//sdug bsngal zhes bya ba ni 'gyur ba dang / 'du byed kyi sdug bsngal dang ma bral ba'i don to/ /brgya zhes bya ba ni mang por mtshon pa'i tha tshig go/ /'brel pa zhes bya ba ni lta 'og nas 'byung ba'i skyon de dag dngos grub thob pa'i rig sngags 'chang dang ma bral ba'i don to//nyon mongs dug bcas zhes bya ba ni de nyid na 'dod chags dang zhe sdang dang gti mug gi thab ma spangs pa'i phyir ro/ /rnam par 'jig 'gyur ba zhes bya ba ni ther zug ma yin par bstan te/ don de nyid rdo rje gtsug tor gyi rgyud las kyang //bde ba dang ni sdug bsngal mtha'/ /'dod dang khro dang 'jigs pa dang / /nad dang 'chi dang gdon dag gi/ /rgyu ni sngags pa rnams la yod/ /ces ji skad gsungs pa lta bu'o/ /'dir dngos grub kyi 'bras bu smad pa yang / /de nyid la zhen pa'i blo spangs pas thar pa la sems gzhol bar 'gyur ba'i phyir ro//dang ba'i sems kyis thob par 'gyur ba yin/ /zhes bya ba ni thar pa 'dod pa 'ba' zhig gis bsam gtan la brten par bya bar ma zad kyi/ dngos grub 'dod pas kyang de mi bsgom du mi rung bar bstan to/ / yang rgyud de nyid las ji skad du/ /gsang sngags bsam gtan zhes bya ba/ /mchog tu gsang ba yang dag gsungs/ /drang srong dka' thub chen po yang / /de dag med na mi 'grub po/ /zhes ji skad gsungs pa lta bu'o/ /'dod rgyal zhes bya ba ni gnam babs su smra ba'o/ / de las kyang ma byung zhes bya ba ni skyes bu'i byed pa 'bras bu dang bcas par mthong ba'i phyir ro/ /dus zhes bya ba ni ji skad du/ dus ni 'byung ba rnam smin byed/ /dus ni skye dgu rnams 'jig byed/ /dus ni gnyid log rnam sad byed/ /dus ni 'da' bar dka' ba yin/ /zhes smra ba'o//de las min zhes bya ba ni chos thams cad kyi skye ba'i rgyu ma yin te/ rjes su 'gro ba dang ldog par mi dmigs pa'i phyir/ nam mkha'i me tog bzhin no/ /rang bzhin zhes bya ba ni grangs can rnams kyis brtags te/ chos thams cad kyi rgyur gyur pa'i snying stobs dang rngul dang /mun pa'i ngo bo nyid gcig pu rtag pa khyab pa zhig dmigs pa'o/ /de yang ma yin zhes bya bar sbyar te/ de nam mkha' ltar rtag pa khyab pa zhig na ni 'gyur du mi btub pas chos gang la yang rgyu'i bya ba byed mi srid do/ /'gyur ba zhig na ni bdag nyid thams cad kyis sam phyogs gcig gis rgyu byed ce na gal te bdag nyid thams cad kyis na ni rang bzhin chad par 'gyur ro//'on te phyogs gcig gis ni mi rtag pa nyid du thal bar 'gyur ro/ /dbang phyug ces bya ba ni/ phra zhing bsam gyis mi khyab rab tu srab byed kun rig thams cad byed//rnal 'byor goms pas thob pa'i blo can bsam gtan pa yi bsam gtan yum/ /nyi ma zla ba sa chu me rlung phyogs dang nam mkha'i lus can te/ /zhi ba'i bde dga' 'grub par 'dod pa rnams kyis dbang phyug rtag tu bsgom/ /zhes smra ba'o//ma yin zhes bya ba ni dbang phyug kyang phra ba ma yin te/ sa la sogs pa'i lus can yin pa'i phyir/ sa la sogs pa lta bu kho na'o/ /gcig la phan tshun 'gal ba'i ngo bo nyid kyang rung ba ma yin la/ du ma'i bdag nyid kyang ma yin pas 'di sa la sogs pa'i lus can nyid du yang mi srid do//rab tu srab mor byed pa yang ma yin te/ skye ba'i lus can yin pa'i phyir skyes bu lta bu kho na'o/ /kun rig pa yang ma yin te rab tu srab mor byed pa'i phyir/ grol ba'i bdag bzhin no/ /thams cad byed pa yang ma yin te/phra ba'i phyir rdul phra rab bzhin no/ /rtag pa yang ma yin te/ sa la sogs pa'i lus can yin pa'i phyir ro/ /chos thams cad kyi rgyu yang ma yin te/ cig car mi bskyed pa'i phyir rdza mkhan bzhin no/ /gzugs la sogs pa bskyed pa yang ma yin te/ dngos po yin pa'i phyir dbang phyug bzhin no//thams cad byed pa yang ma yin te/ bdag med pa'i phyir bum pa bzhin no/ /bdag yod na ni skyes bu bcings pa bzhin du dbang phyug ma yin pa nyid du thal bar 'gyur ro/ /rgyu med pa can zhes bya ba ni/ ji skad pad+ma'i sdong bu lo ma snying po dang //kha dog dbyibs dang 'jam la sogs pa'i rgyu ni gang / /bya yi 'dab gshog sna tshogs ri mor 'bri ba su/ /'gro ba 'di dag ngo bo nyid kyis de bzhin nges/ /zhes smra ba ste/ de'i phyogs gcig pa ni 'jig rten nyid kyis gsal bar zad pas cung zad kyang mi brjod do//skyes bu zhes bya ba dang / bdag ces bya ba dang / shed bu zhes bya ba la sogs pas ni bdag tu lta ba rnams kyis ming tha dad par brtags pa ste/ ma byas zhes bya ba'i gtan tshigs ni bshad ma thag pa rnams so/ /las zhes bya ba ni/dge ba dang mi dge ba dang mi g.yo ba'o/ /nyon mongs pa zhes bya ba ni ma rig pa la sogs pa'o/ /sems can byung zhes bya ba ni 'khor ba lugs bzhin du byung ba'i rgyu nges pa de gnyis yin par bstan to/ /gzugs zhes bya ba ni las dang nyon mongs pas bskyed pa'i reg pa dang yul brtags pas gzugs su rung ba'o//'byung ba chen po bzhi dang ldan zhes bya ba ni gzugs de yang sa dang chu dang me dang rlung gi rang bzhin las gzhan ma yin pa'i don to/ /de ni bdag min zhes bya ba ni gzugs de la mu stegs can gyis brtags pa'i bdag med do zhes bya ba'i tha tshig go//bdag kyang gzugs ma yin zhes bya ba ni bdag ces bya ba kun brtags pa de gzugs kyi ngo bo nyid dam/ gzugs dang ldan par yang yod pa ma yin pa'i don to/ /gzugs la bdag med ces bya ba ni 'byung ba'i ngo bos so sor bshig gam/'dus pa la yang bdag med ces bya ba'i tha tshig go/ /bdag la gzugs med ces bya ba ni brtags pa'i ngo bo de la gzugs kyi rdzas med pa'i don to/ /gzugs ni stong pa'o zhes bya ba ni de ltar gzugs kyi grub pa'i mtha' ni rdul phra rab dag yin la/de nyid kyang phyogs chas so sor bshig na/ tha ma med par grub pas don dam par gzugs kyang gzugs kyi rang bzhin gyis stong zhes bya ba'i tha tshig go/ /phung po bzhi yang rig par gyis/ /zhes bya ba ni gzugs la ji ltar rnam pa bzhir phye ste brtags na/ bdag yod par ma gyur cing stong pa ltar phung po lhag ma rnams la yang go bar bya ba'i don to//gzugs ni dbu ba dag dang 'dra ba ste/ /zhes bya ba la sogs pas ni dpe brjod pa ste ji skad du/ /gzugs ni dbu ba rdos pa 'dra/ /tshor ba chu yi chu bur bzhin/ /'du shes smig rgyu lta bu ste/ / 'du byed rnams ni chu shing 'dra/ /rnam shes sgyu ma lta bu'o zhes/ /nyi ma'i gnyen gyis bka' stsal to/ /zhes bshad pa lta bu'o/ /de ltar mthong la lta ba bzang po yin/ /zhes bya ba ni 'di las chos thams cad don dam par stong pa nyid du bshad la kun rdzob tu ni sgyu ma lta bur rang snang bar rtogs pas dbu ma'i lam ma nor bar bstan pa'i phyir ro//gang zhig gzhan gyur de ni lta ngan gsungs/ /zhes bya ba ni phyi rol pa la sogs pas bden pa gnyis kyi don ma rtogs pa dang / log par rtogs pa'i phyir ro/ /sems dang ba dang ma dang ba'i skabs nas 'phros te zhar las 'ongs pa bshad nas dkyus cha la 'jug pa ni/dang ba'i yid kyis dngos grub thob par 'gyur/ /zhes bya ba dang 'dir 'brel te/ de ltar zlos pa'i gsang sngags nye gyur na/ /mtshan mo nyal ba'i rmi lam 'di rnams mthong / /zhes bya ba la sogs pa gsungs pas sgrub pa'i dus la bab par shes par bya ste/tshig gi don gzhan ni go sla bas ma phye'o/ /tho rangs khar zhes bya ba ni lta 'og thams cad la sbyar ro/ /de yang srod la ni bad kan gyi dus la bab pas lci/ 'jing dang nam gung la ni mkhris pa'i dus la bab pas rmugs te mi gsal bas ltas rnams rtogs par mi 'gyur gyi/tho rangs ni rlung gi dus la bab pas gsal te rtogs pa'i don to/ /don de nyid phyag na rdo rje dbang bskur ba'i rgyud chen po las kyang ji skad du/ nam gyi bzhi cha lus pa'i tshe/ /gal te rmi lam bzang rmis na//zhes gsungs pa'i phyir ro/ /le'u lnga pa'i don bshad zin to// //dngos grub dang nye ba zhes bya ba ni gsang sngags mngon du phyogs pa la bsnyen pa khyad par can gyis lha mnyes nas snga ma bas kyang dngos grub thob pa dang nye ba'i don to/ /zlos la dga' zhes bya ba la sogs pas ni lha nye bar gyur nas lus dang ngag dang yid kyi yon tan rnams 'byung bar bstan te/tshig gi don gzhan ni go bar zad do/ /bud med ces bya ba ni lha dang lha ma yin gyi bu mo byad gzugs khyad par can rnams so/ / 'dod lha zhes bya ba ni lha dang lha ma yin byad gzugs khyad par can rnams so/ /mdangs 'phrog ces bya ba ni de dag gcig la gcig mthong ba tsam gyis rang dbang med par 'dod chags skye ba ste/ lha'i bu mo de dag gzhan gyis mi mthong bar bya ba'i phyir gsang sngags dang sman gyis bsgrubs te/lus sbas pa rnams so/ /'dod la longs spyad phyir ni 'bod par 'gyur/ /zhes bya ba ni sgrub pa po sgo gsum dag pas/ /lha'i bu mo lus sbas pa de dag kyang mngon sum du mthong zhing de dag gis kyang nye bar spyod pa rnams kyis mchod ces bya ba'i tha tshig go//lus ni dri med dag par rig pa dang / /zhes bya ba ni mtshan ma de dag byung na/ dngos grub dang 'gal ba'i skyon med par khong du chud par bya ba'i don to/ /gso sbyong sdom pa dang ni ldan pa yis/ /zhes bya ba ni de nas nyes pa thams cad bshags la rang gi lha'i gzugs kyi spyan sngar byang chub kyi sdom pa nod ces bya ba'i tha tshig go//nyin zhag gcig gam gnyis sam gsum du ni/ /kha zas spangs shing smyung bar gnas pa yis/ /zhes bya ba ni dngos grub rab la sogs pa gsum gyi don du zhag grangs mang nyung du smyung ba bya bar bstan to//gzhan dag na re sgrub pa po nyid kyi nyams che chung las byung ba na rnam pa gsum du gsungs so zhe'o/ /rang gi 'byor pa zhes bya ba ni nam mkha' la 'gro ba la sogs te mngon par mtho ba'i dpal thob par 'gyur ro/ /gzhan ni go bar zad do/ / de ltar yan lag thams cad 'dus pa dang / /zhes bya ba ni bshad ma thag pa'i mi gtsang ba rnams so/ /sa chu me rlung nam mkha' rnams dang ldan/ /zhes bya ba ni de nyid kyang khams lnga'i rang bzhin yin par bstan to/ /ji bzhin las kyi rjes 'brangs mi yi lus/ / zhes bya ba ni sngon gyi las bzang ngan gyi dbang gis grub pa'o/ /thams cad ldan zhes bya ba ni nang grol la sogs pa dang 'brel par bstan to/ /mi yi gzugs la gnas pa yis/ /bshang gci snabs dang mchil ma bad kan dang / /zhes bya ba ni bu ga dgu nas 'dzag pa rnams so//'di dag zad par bya phyir smyung bar gsungs/ /zhes bya ba ni nang grol dang / mi gtsang ba dang ldan pa'i lus de thams cad spang du mi rung gis kyang btsog pa de dag chung zhing nyung bar bya ba'i don to/ /dri ma zad nas zhes bya ba ni chung zhing nyung ba'o/ /mi yi lus dag bsgrubs na bde bar 'jug /ces bya ba ni lus dag ste dri ma med na dngos grub kyi snod du rung zhes bya ba'i don to/ /'dod chags kyis ni gdungs par gyur na yang / /zhes bya ba la sogs pas ni gong du gnyen po bshad pa'i skabs nas/ 'dod chags shas che mi gtsang sha tshil dang //pags pa keng rus blta bas rnam par bzlog /ces gsungs pa der mi gtsang ba gang dang gang yin pa phye ste/ ma bshad pa yang 'dis zhar la bstan to/ /ye shes kyi mig ces bya ba ni blo ma 'khrul ba'i shes rab kyis brtags pa'o//'dod chags rtsad nas yong ye zhi gyur te/ /zhes bya ba ni mi sdug pa'i ting nge 'dzin gyis sun phyung ba'i phyir ro/ /dper na nyi mas mun nag gtan nas bsal ba bzhin/ /zhes bya ba ni rnam par thar pa'i ting nge 'dzin gyi mthus nyon mongs pa zil gyis mnan nas spangs pa'i don to//phan yon de yis zhes bya ba ni rnam par thar pa'i ting nge 'dzin la brten pas zhes bya ba'i tha tshig go/ /gsang sngags des bsnyen nas zhes bya ba ni sngar nyon mongs pa gang dang gang byung ba'i gnyen po bsgoms nas/ de'i 'og tu bsnyen pa la 'jug par bstan to//rang gi lus la nye bar rig pa dang / /zhes bya ba ni ji skad du gsungs pa'i lus dang ngag dang yid kyi yon tan gyis bdag nyid la yid ches pa dang / de bzhin du phyi rol gyi yon tan yang / gang tshe mkha' las lha dang gnod sbyin dang / /dri za lha yi bu mo'i lus dang sgra//mis ni dag pa'i yid kyis mthong thos na/ /de tshe shin tu nye bar 'gyur ba yin/ /zhes bya ba dag byung zhes bya ba'i tha tshig go/ /yar gyi tshes brgyad dam ni bcu bzhi'am/ /yang na bco lnga la ni zhes bya ba ni tshes grangs de dag la sgrub par bstan to//bzlas brjod bya zhes bya ba ni sgrub pa'i nub mo mtshan rangs par bzlas pa la dgongs pa'i don to/ /sa bstar ba zhes bya ba ni sgrub pa'i dkyil 'khor gyi sa'o/ /sogs pa zhes bya ba ni der spos gtsang ma sna tshogs kyis bsres pa'i don to/ /byug ces bya ba ni nub mo bsgrub na de'i nang par nas bsku bar bstan to//rdo rje 'dzin pa nga la mchod/ /ces bya bas ni de'i shugs kyis pad+ma 'dzin pa la yang go bar bya'o/ /gzhan ni brda phrad par zad do/ /tshon rtsi rnams kyis bri bar bya/ /zhes bya ba ni so so'i cho ga zhi ba mo dag las sna lnga'am sna gsum mam sna gcig gis bri bar gsungs pa'o//rdo rje zhes bya ba ni rab tu grub par byed pa'i rgyud chen po las ji skad du/ rdo rje'i ra bas bsngags pa yi/ /lcags kyi phye mas ra ba bya/ /zhes gsungs so/ /me dang chu dang rlung zhes bya ba ni phyag na rdo rje dbang bskur ba'i rgyud chen po las/rtswa dang me dang chu dang thal ba la lan bdun bsngags pas ra bar 'gyur ro zhes gsungs pa'o/ /mdung thung zhes bya ba ni mdung thung gi rtse mo phyi rol du bstan pa sha stag bri ba'i don to/ /rim bzhin dkyil 'khor 'dir ni bri bar bya/ /zhes bya ba ni dang por lcags phye las rdo rje'i ra ba bri ba ni phyi rim du bri la/mdung thung ni nang du bri ba'i don to/ /sdang ba'i bdag nyid sems ni myos par 'gyur/ /zhes bya ba ni dkyil 'khor de bris pa'i byin gyi rlabs kyis rdo rje dang me la sogs pa dngos kyi ra bar mthong bas rgol mi nus pa'i don to//bstan zhes bya ba ni rab tu grub par byed pa'i rgyud chen po las/ ji skad du/ dUr ba sngon po'i rtsa stan ni/ /'phang du sor bzhi bya ba ste/ /mnyam zhing zheng du mtho gang ba/ /srid du sor ni bcu drug go/ /zhes gsungs pa nyid blta bar bya'o/ /bdag nyid bsrung bar bya ste zhes bya ba ni sa 'dzin tsam zhig smos kyi/dngos su ni rgyud de nyid las ji skad du/ bskrad pa dang ni 'og 'ching dang / /steng yang bcing zhing 'khor yug tu/ /mtshams gcad phyogs kyang bcing bar bya/ /rdo rje'i ra ba dra bar bya/ /rdzas dang bdag dang lha rnams bsrung / / zhes gsungs pa dang sbyar ro/ /rdzas blangs myur du bzlas brjod byas nas ni/ /zhes bya ba ni de nas sgrub pa'i rdzas las lag tu blangs nas brgya rtsa brgyad tsam zhig bzlas brjod bya ba'i don to/ /bdug pa'i sbyin sreg stong bya zhes bya ba de'i 'og tu rdzas la mar gyis bdug pa'i sbyin sreg stong bya bar bstan to//de nas de ni dri chus bkrus nas su/ /zhes bya ba ni sgrub pa'i rdzas de sbyin sreg gi dus su dri ma dang snum gyis 'bags pa'i phyir ro/ /bgegs mang rnams kyang rab tu bsal byas nas/ /zhes bya ba yang rgyud de las/ gsang sngags dag gi phyi nang du//bgegs rnams thams cad bzlog par bya/ /zhes gsungs so/ /gzhan ni go bar zad do/ /dbyib ces bya ba ni rin po che sna lnga'o/ /bstod dang bcas par zhes bya ba ni tshig tu lha de'i yon tan brjod pa'o/ /rtse gcig sems kyis zhes bya ba ni rang gi lha kho na la dmigs pa las sems gzhan du ma yengs pa'o//dad pa zhes bya ba ni dang po nas lha de la dad pa'o/ /'bad pa zhes bya ba ni sgrub pa po dngos grub 'dod pas sngar dka' ba sna tshogs sbyad pa'o/ /rjes su mthun pa'i mchog bslang ngo / /zhes bya ba ni dang po nas dngos grub gang la dmigs pa de nyid gsol ba'i don to//gzhan ni go bar zad do/ /sems stobs mchog dang ldan pa zhes bya ba ni gcig tu dpa' ba'o/ /'jigs dang bcas pa'i las zhes bya ba ni nyen chen po yod pa'i don to/ /sha za zhes bya ba ni dur khrod la dbang bsgyur ba'i gdon rnams so//phung bar byed ces bya ba ni gsod pa'i don to/ /gzhan ni go sla bsam phye'o/ /ral gri be con lag na thogs pa yis/ /nyin par thog thag tu ni bsrung bar bya/ /zhes bya ba ni sgrub pa po'i grogs po mchog gis byas pa'i don to/ /gzhan ni go bar zad do/ / 'jigs pa'i gzugs can bgegs ni sna tshogs 'byung / /zhes bya ba ni chos nyid kyis 'byung ste/ de la sgrub pa po ni bzlas brjod byed pa las mi bskyod par 'dug la grogs po mchog gis ni bgegs gzhom mo/ /gtsug tor rgyal po zhes bya ba ni de'i gsang sngags khyad par du mthu rlabs che ba'i phyir ro//'byer bar 'gyur zhes bya ba ni gsang sngags kyi gzi brjid la nye mi phod ces bya ba'i don to/ /khro bo bdud rtsi thab sbyor drag shul las can sbyar/ /zhes bya ba'i mthu rlabs kyang snga ma dang 'dra ste/ gang la goms par bya ba bstan to//gang zhig gsang sngags cho ga zhib mo las/ /mthong ba de ni dogs pa med par 'grub/ /ces bya ba ni de dag las dngos grub gang gsungs pa thams cad 'grub ces bya ba'i tha tshig go/ /de yis gsang sngags cho ga mi shes na/ /zhes bya ba ni rang gi cho ga zhib mo las las 'di mi 'byung na zhes bya ba'i don to//gsang sngags gzhan du bstan pa'i cho ga yis/ /de la rang gis dngos grub bslang zhes bya ba ni gzhan gyi cho ga zhib mo de'i dngos grub 'byung ba rnams bslangs na ster ro zhes bya ba'i tha tshig go/ /gter gyi phyogs zhes bya ba la sogs pas ni de'i 'bras bu dngos grub rnams bstan pa ste/gter la sogs pa de dag gi mtshan nyid ni 'og nas 'chad pas 'dir ma phye'o/ /bsrung ba'i stobs med ces bya ba ni dus gsum byas shing ma lcogs pa'o/ /gsang sngags kyi stobs med ces bya ba ni lha nyid mthu zhan pa'o//dka' thub kyi stobs med ces bya ba ni dka' thub zhig pa'o/ /sems stobs med ces bya ba ni sdar ma'o/ /blo zhan zhes bya ba ni dang blun pa'o/ /de ni mtshan mo rgyu ba rnams kyis bsad/ /ces bya ba ni nyen chen po yod par bstan pa'i don to/ /le'u drug pa'i don bshad zin to// //'tshong 'dod ces bya ba ni sgrub pa po kha cig las de lta bu la dga' ba'o/ /mar gyi ngo la zhes bya ba ni mar gyi ngo'i dus tshigs gang yang rung ba zhes bya ba'i tha tshig go/ /gzhan ni go bar zad do/ /mi nyung zhes bya ba ni srang brgya yan chad do//de yang skyes pa'i sha zhes grag go/ /tshig gi don gzhan ni go bar zad do/ /rab tu bsgrims nas zhes bya ba ni rang gi lha rjes su dran pa dang / mi skrag par 'bad pa'i don to/ /sgra cher 'bod cing zhes bya ba ni spa mi 'gong ba'i tshig gis skad cher 'bod pa'i tha tshig go//shar dang byang dang lho dang nub phyogs su/ /zhes bya ba ni shar lho'i mtshams nas byang shar logs su 'gro bar bya'o/ /de nas slar log ste shar lho'i mtshams nas lho nub kyi mtshams logs su 'gro bar bya'o/ /myur du zhes bya ba ni der le lo mi byed cing drag tu 'gro bar bya ba'i don to//bskor zhing zhes bya ba ni de nas mtha' bskor te dbus su mi 'gro zhes bya ba'i tha tshig go/ /shin tu brjod par bya zhes bya ba ni gong du smos pa'i tshig gi don brjod cing skabs skabs su mi smra bar nyan cing 'gro ba'i don to/ /sngar ni gang zhig sems kyis bsams pa'i don//de nyid smra ba zhes bya ba ni dang po nas gang la rnam pa de dang tshong byas pa'i tha tshig go/ /gzhan du smra mi bya zhes bya ba ni sngar dngos po chung ngur bsams la/ 'phral la khe mthong ste chen por mi btsong / sngar dngos po chen po zhig bsams la der spa bkong nas chung ngur yang mi btsong zhes bya ba'i don to//de nyos pas cir bya zhe na/ nyo ba'i gsang sngags kyis lha la yang rnam pa gnyis te/ 'jig rten las 'das pa'i khro bo la sogs pa dang / 'jig rten gyi ma mo dag ni byin gyis brlabs dag las byung ba zhes bya ba ste//de'i rang bzhin gyis phan 'dogs pa'i don du 'byung ngo / /sha za'i rigs su skyes pa'i srin po la sogs pa'i rnam par smin pa'i gsang sngags zhes bya ste de nyid za ba'o/ /gzhan ni go bar zad do/ /gsang sngags ma bzlas pa yis bsten mi bya/ /zhes bya ba ni sngar bsnyen pa ma rdzogs pa'am rdzogs kyis kyang las 'di lta bu byos shig ces lha nyid kyi bka' lung med par mi bya ba'i don to//sogs pa zhes bya ba ni bdud rtsi thab sbyor ro/ /bsrung ba ngas gsungs so zhes bya ba ni gsang sngags de dag khyad par du mthu rlabs che ba'i phyir ro//gsang sngags drag po gang zhig sha za ba/ /zhes bya ba ni srin po la sogs pa'o/ /me tog ma nyams pa zhes bya ba ni ma rnyings pa'o/ /gzhan ni go bar zad do/ /tshes grangs dag la zhes bya ba ni mar gyi ngo'i dus tshigs so/ /grub pa 'di rnams ster zhes bya ba ni dngos grub kyi rnam grangs so//yid bzhin rin chen bzhin du grub pa mchog /ces bya ba ni gang bsams pa'i don thams cad sgrub par byed ces bya ba'i tha tshig go/ /grub 'bring zhes bya ba ni sdig pa lta dgos pa'i nyen dag yod pa'i phyir ro/ /grub pa tha ma zhes bya ba ni nyon mongs pa'i 'dam du bying zhing phrag dog la sogs pa'i nyen chen po yod pa'i don to//dus gsum du zhes bya ba ni snga dro dang gung dang dgongs ka'o/ /gtor ma sna tshogs pa zhes bya ba ni rab tu grub par byed pa'i rgyud chen po las blta bar bya ste/ 'dir yi ge mangs su dogs pas ma spros so//rtag tu mtshan mo sbyin par bya/ /zhes bya ba ni dngos grub thob kyi bar du nub mo'i dus shig tu lan re gtor ma sbyin pa'i don to/ /dga' nas zhes bya ba ni bsnyen pas mgu zhes bya ba'i tha tshig go/ /mngon du phyogs pa zhes bya ba ni bsnyen pa byas pa'i dbang gis dngos grub thob par nges pa'o//rnyed pa rnyed cing zhes bya ba ni nor rdzas 'du ba'i don to/ /sa bon 'byung bar byed ces bya ba ni khu ba rlugs pa'o/ /'dod chags zil gyis non pa'i bud med dag /ces bya ba ni gnod sbyin mo mi gzugs las khyad par du 'phags pa lha'i bu mo'i gzugs dang 'dra ba de mthong bas rang dbang med par 'dod chags kyis myos nas sgrub pa gzhan mi dran par 'gyur ba'i phyir ro//gnod par byed pa nges par gnas par 'gyur/ /zhes bya ba ni sgrub pa pos dngos grub mi thob par bya ba'i don du/ rtsed 'jo la sogs pas bsten cing sems g.yeng bar byed ces bya ba'i tha tshig go/ /gnod pa byed tshe 'gro bar mi bya zhing / /zhes bya ba ni de dag gis bros pa'i dus su bslur mi btub pa'o/ /rnyed pa mang nyung la yang 'dod mi skyed/ /ces bya ba ni de'i dus su ci rnyed na yang mi bslang ba dang gzhan la gtang ba'i don to//mtshan mo khu ba dgag byas nas/ /zhes bya ba ni rab tu grub par byed pa'i rgyud chen po las/ ji skad du/ bu mos bkal pa'i skud pa ni/ /le brgan rtsi'am gur kur btsos/ /de ni bzlas brjod stong byas shing / /mdud pa dag ni bdun bor la//srod la rig sngags 'di yis ni/ /bdag gi rked par bcing bar bya/ /zhes gsungs pa nyid 'dir sbyar ro/ /brtson 'grus rab tu bskyed de bsgrub par bya/ /zhes bya ba ni bgegs kyis bslus pa'i dbang du yang mi gtang / 'di dag ni dngos grub dang nye ba'i mtshan ma'o zhes ya ya po'i dga' ba bskyed par yang mi bya bar sngon bas kyang shin du brtson 'grus bskyed de sgrub pa'i don to//sems rmongs pa zhes bya ba ni sgrub pa po blun po kha cig go/ /gzhan du brtsams nas zhes bya ba ni 'dod chags la zhen pa'i dbang gis bgegs kyis 'brongs pa'i tshe bslur btub pa dang /nor rdzas dag blangs pa dang / brtson 'grus lhod pas sgrub pa rnams so/ /phung bar 'gyur zhes bya ba ni srog dang bral bar byed pa'i phyir ro/ /sha za'i gnod sbyin mo la'ang de nyid do/ /zhes bya ba ni cho ga'i sbubs gong ma dang 'dra bar bstan to//cho ga lhag ma 'di rnams bya/ /zhes bya ba ni snga ma las ma bshad pa'o/ /gzhan ni go bar zad do/ /gos kyang sngon po zhes bya ba ni sgrub pa po rang bgo ba'o/ /brang gis 'gro ba zhes bya ba ni klu rnams kyi rang bzhin gyi gzugs sbrul yin pa'i phyir ro/ /rtag tu 'byung zhes bya ba ni rdzas de rnams pra se na ston pa'i gzhi yin te/snang du btub ces bya ba'i tha tshig go/ /mtho ris zhes bya ba ni lha yul ba rnams so/ /sa stengs zhes bya ba ni mi rnams so/ /de'i shugs kyis ngan song dag kyang rtogs par khong du chud par bya'o/ /dus dang mi ldan pa zhes bya ba ni dus gsum las 'das pa 'phags pa dgra bcom pa la sogs pa yang rtogs par 'gyur ba'i don to//gzhan ni go bar zad do/ /sngon du cho ga bzhin bzlas shing / /zhes bya ba ni so so'i cho ga zhib mo dag las bsnyen pa'i grangs nges par gzung pa'o/ / tshes grangs bzang la zhes bya ba ni yar gyi ngo'i dus tshigs rnams so/ /smyung ba zhes bya ba ni zhag gcig gi mdun nas kha zas spang bar bstan to/ /dgongs kar zhes bya ba ni smyung ba byas pa'i phyi 'phred do/ /byis pa gzhon nu zhes bya ba ni lo bcu drug lon pa man chad do//sta gon gnas par bya zhes bya ba ni byis pa de dag kyang smyung ba byed du bcug la 'di dag gis mthong bar gyur cig ces lha la gsol ba btab ste de rnams bsrung bar byas nas me tog dang spos dag kyang bdag gis lag dar te byin nas sa gtsang mar gos sar pa bskon te/bsnyal ba'i don to/ /khrus byas zhes bya ba ni sgrub pa po dang byis pa gnyis ka'o/ /shar phyogs kha bltas ku sha'i stan steng du/ /'dug nas zhes bya ba ni sgrub pa po nyid do/ /gsang sngags rjes su dran par bya/ /zhes bya ba ni lha'i ting nge 'dzin la gnas las brtsam par bstan to//thal ba gtsang ma zhes bya ba ni sbyin sreg bya ba'i thal ba'o/ /rtse gcig sems kyis gsang sngags zlos bzhin du/ /zhes bya ba ni bdag nyid lha'i ting nge 'dzin du ji lta ba bzhin du bsgoms pa las ma nyams pas gzhi gang yin pa la lha spyan drangs te mchod nas/dngos po gang blta bar bya ba yang ston cig ces bskul zhing bzlas brjod bya bar bstan to/ /nub tu kha bstan zhes bya ba ni sgrub pa po kha blta dgos pa'i phyir te bar gnya' shing gang lhag tsam gyis bcad nas bltar gzhug go/ /lha yi mig gis zhes bya ba ni sbyin sreg byas pa'i thal bas sor mo la bskus te/gsang sngags dag kyang bzlas nas/ lha'i mig tu byin gyis brlab tu gsol/ /zhes bskul tshig bcug nas/ byis pa'i mig la bsku ba'i don to/ /bltas na zhes bya ba ni nyi ma shar ba gab nas dros chen gyi bar du bltar gzhug pa'i tha tshig go//mthong bar gyur zhes bya ba ni dngos po rnams gzugs su mthong ba 'am/ yi ge'i 'bras bus kyang brda sprod par byed do/ /kha cig na re gzhi bsnyen na sgrar yang grag ce'o/ /gzhan ni go bar zad do/ /gal te yid ches par ni ma gyur na//zhes bya ba ni pra se nas gtan la ma phebs su dogs na zhes bya ba'i tha tshig go/ /rig sngags mi gdug ces bya ba ni rig sngags kyi lha la yang rnam pa gnyis te/ sangs rgyas dang byang chub sems dpa' dag ni ye shes las byung ba'o/ /dbang phyug la sogs pa ni rnam par smin pas bskyed pa'o//de bzhin du de dag gi byin gyi rlabs las 'khor ba'i mtha' ji tsam par sems can gyi don mdzad pa khro bo 'jigs pa'i me la sogs pa dang / 'jig rten pa'i yang bskal pa'i mthar thug par ma mo la sogs pa drag cing gdug par byin gyis brlabs pa dag yod de/de dag phab na byis pa 'chi ba'i nyen yod pas de lta bu ma yin pa'i gsang sngags mi gdug pa bzlas par bstan to/ /nga yi gsang sngags zhes bya ba ni skabs 'dir rdo rje'i rigs kyi shas cher gsungs pa'i tha tshig go/ /dag pa zhes bya ba ni yi ge lhag chad med pa'o//gang yang rung zhes bya ba ni sgrub pa po nyid gang la dad pa'o/ /gso sbyong byas pas nan tan bzung nas su/ /zhes bya ba ni rang gi lha mnyes par bya ba'i don yin pas/ lha gzung ba yang rang gi lha la bzod par gsol yang mi dgos/ bla ma las nod kyang mi dgos par rang gis gso sbyong byas nas gzung bar bstan to//rgyal ba'i ring bsrel zhes bya ba la sogs pas ni de'i bsnyen pa'i gnas bstan to/ /g.yo ba zhes bya ba ni yul so sor 'jug pa'o/ /rab tu bsdams nas zhes bya ba ni so sor dag par bstan to/ /de la yid gzhol ba zhes bya ba ni lha'i de kho na la sems gtod cing /bzlas brjod yan lag dang ldan par byed pa'o/ /byams la gnas shing zhes bya ba ni dang por byams pa'i ting nge 'dzin bsgoms la de'i rjes la lha'i sbyor ba bya bar bstan te/ de ni bsod nams 'phel bas bgegs kyis mi tshugs par 'gyur ro//ku sha'i khres la 'dug ces bya ba ni de'i dka' thub kyi stan bstan pa ste/ dbyibs dang tshad dang sogs pas ni sngar bshad pa dang mthun par rig par bya'o/ /ji srid du ni rtse gcig gnas gyur pa/ /zhes bya ba ni sems bzlas brjod la zhen te/gzhan du mi g.yo bar gyur pa'i don to/ /de srid du ni 'bum mam nyis 'bum bzlas/ /zhes bya ba ni sems kyi gdeng las dpag par bya ba'i tha tshig go/ /hUM zhes bya ba ni gsang sngags gang yang rung ba'i klad la spel ba'i don to/ /shing la'ang 'bab na mi la smos ci dgos//zhes bya ba ni spyir gsang sngags mthu che bar rjes su bsngags pa'o/ /snod ces bya ba ni byis pa yon tan dang ldan pa la lha dbab pa'i skal ba yod pas snod du rung zhes bya ba'i don to/ /tshig gi don gzhan ni go sla bas ma phye'o/ /tshes grangs bzang la zhes bya ba ni ngo gnyis kyi dus tshigs rnams so//smyung ba byas pa zhes bya ba ni rig sngags 'chang nyid dang byis pa rnams so/ /khrus byas gos dkar bskon zhes bya ba ni 'bebs pa nyid kyis snga dro'o/ /shar phyogs kha bstan rgyan ni rnam par spangs/ /zhes bya ba yang bus pa rnams te/de dag 'dab ma phrag par bkod la/ gnya' ba la dbab par bya ba'i gsang sngags spyan drangs te mchod nas khong du zhugs par bsam mo/ /bdug pas bdugs shing zhes bya ba ni gu gul gyis bdugs pas so/ /rdzogs par gyur par shes par bya//zhes bya ba ni lha zhugs pa'i mtshan ma ma lus zhes bya ba'i don to/ /'jigs pa med pa zhes bya ba ni ma babs su dogs pa med ces bya ba'i tha tshig go/ /rig pa mchog gi gsang sngags dran byas nas/ /zhes bya ba ni der bgegs gzhan mi 'jug par bya ba'i don du bsrung bar gsungs so//gzhan ni go bar zad do/ /gang zhig blun pas gzhan du brtsams nas ni/ /de ni mi rnams kun gyis dpyas par 'gyur/ /zhes bya ba ni lha gdug pa phab pas byis pa thal byung khyer ba dang / bsnyen pa gus par ma byas shing / cho ga ma smin pas ma phebs na dpyas su 'gyur ba'i phyir ro//gzhan ni go bar zad do/ /drag po'i sbyin sreg nyi shu rtsa gcig bya/ /zhes bya ba ni drag po'i thab tu me khro gnyer la bskrad pa'i bskul tshig bcug nas drag po'i las bya bar bstan to/ /snga ma bzhin zhes bya ba la sogs pas ni gong du smos pa'i cho ga rnams las mi 'gal bar byas pa'i phan yon brjod pa'o//sngags pa yun rings nyon mongs mi 'gyur ro/ /zhes bya ba ni yon tan dang skyon lha nyid las lung thob pa'i phyir ro/ /le'u bdun pa'i don bshad zin to// //sangs rgyas kyis gsungs zhes bya ba ni mi slu ba'i khungs te lung shin tu dag pa yin par bstan to//yan lag brgyad ces bya ba ni lam de'i rang bzhin gyi rnam grangs so/ /lam zhes bya ba ni rnal 'byor pa rnams kyis bgrod par bya ba sgrub pa'i gzhi yin pa'i phyir ro/ /yang dag pa'i 'tsho ba zhes bya ba ni tshul 'tshos pa dang gzhogs slong la sogs pa log pas 'tsho ba'i nyes pa spangs shing yongs su dag pa'i lus dang ngag gi las kun du spyod pa'o//yang dag pa'i las kyi mtha' zhes bya ba ni srog gcod pa la sogs pa'i nyes pa spangs shing lus kyi las yongs su dag pa'o//yang dag pa'i ting nge 'dzin zhes bya ba ni gong nas gong du yon tan gyi khyad par rnams mngon par bsgrub pa'i phyir rtag tu mnyam par gzhag pa'o/ /yang dag pa'i ngag ces bya ba ni gzhan dag la gdams ngag ma nor bar 'chad cing brdzun pa la sogs pa'i nyes pa spong ba'o//yang dag pa'i rtsol ba zhes bya ba ni nyes pa thams cad spong ba la mngon par spro ba'o/ /yang dag pa'i rtog pa zhes bya ba ni/ des ji ltar rtogs pa'i don rnam par bzhag nas gdon pa'o/ /yang dag pa'i dran pa zhes bya ba ni de nyid mi brjed pa'o//yang dag pa'i lta ba zhes bya ba ni de kho na nyid kyi don la ma nor ba'i rang bzhin du 'dzin pa'o/ /'dir go rims 'khrugs pa ni tshigs su bcad pa sbyar ba la bde ba'i phyir ro/ /so so so sor yang dag bsten par bya/ /zhes bya ba ni lam gyi yan lag re re la yang gus pas brten par bstan to//yang na so so'i skye bo dang 'phags pa nyan thos dang / /rang byang chub dang / byang chub sems dpa' rnams kyis so so'i rgyu'i stobs kyis 'jug ces bya ba'i tha tshig go/ /lam 'di rnams kyis zhes bya ba ni bshad ma thag pa'i yan lag brgyad pa'o//gsang sngags dngos grub sgrub cing / de bzhin 'dis ni mtho ris zhes bya bas ni so so'i skye bo mngon par mtho bar 'dod pa rnams kyis bgrod dgos par bstan to/ /thar pa thob ces bya ba ni nyan thos dang rang sangs rgyas kyi 'bras bu 'dod pas 'phags pa'i lam bgrod dgos par bstan to//rgyal sras zhes bya ba ni byang chub sems dpa' rnams so/ /sngon gyi rgyal ba zhes bya ba ni 'das pa'i sangs rgyas rnams so/ /de bzhin gshegs par 'gyur zhes bya ba ni ma byon pa'i sangs rgyas rnams so/ /'byung ba'i lam srol yang 'di nyid yin par gsungs pa'i don to//ngoms med sems kyis zhes bya ba ni go 'phang khyad par can 'dod pa rnams kyis bgrod pa de nges par bsgrub dgos pa'i phyir ro/ /bden pa'i lam dmigs na zhes bya ba ni mi slu ba'i gzhi de la nges par gzud de yid brtan na zhes bya ba'i don to//dge ba'i las de yang dag bskyed pa yin/ /zhes bya ba ni de'i phan yon gyis so so'i 'bras bu thob par 'gyur ro zhes bya ba'i tha tshig go/ /yongs su 'dzin pa rnam par spangs nas su/ /zhes bya ba la sogs pas ni yang dag pa'i 'tsho ba rnam par phye ste bstan pa'o//stag ces bya ba ni srog phangs pa dang bral bar byed pas bsnyen du mi rung ba'i don to/ /sbrul zhes bya ba ni gdug cing ma rungs pa nyid yin pas yid 'byung bar bya ba yin no/ /me zhes bya ba ni gdung bar byed pa nyid kyis sdug bsngal bskyed pa'i tha tshig go//'jig rten la bsams nas zhes bya ba ni dpe gong ma rnams dang 'jig rten pa'i 'dod pa'i yon tan dang mtshungs par dmigs par bstan pa ste/ ji skad du/ 'dod pa rnams ni phung ba bskyed pa ste/ /rgyal ba'i dbang pos kim pa'i 'bras 'drar gsungs/ / de dag spang bya de yi lcags sgrog gis/ /'khor ba'i btson rar 'jig rten 'di dag bcings/ /zhes bshad pa lta bu'o/ /spangs te zhes bya ba ni gnyen po bsgom pa'i dus su'o/ /bud med mtshan nyid ces bya ba la sogs pas ni yang dag pa'i dran pa'i mi mthun pa'i phyogs spang bar bstan to//glang chen rta dang zhes bya ba la sogs pas ni yang dag pa'i rtsol ba'i mi mthun pa'i phyogs spang bar bstan to/ /yul sa'i gtam dang zhes bya ba la sogs pas ni yang dag pa'i ngag gi mi mthun pa'i phyogs spang bar bstan to/ /bsti gnas zhes bya ba la sogs pas ni yang dag pa'i las kyi mtha' bstan te/de la bsti gnas ni bsod nams 'dod pa dag gis lam gyis dub pa rnams bstan pa'i gnas bshams pa'o/ /sngar bshad pa'i gnas rnams ma rnyed na zhes bya ba ni gang du/ /dro la brtan zhing 'jim pas zhal zhal byas//zhes bya ba la sogs pa'i gnas sgrub pa po dbul pos mi nus na zhes bya ba'i don to/ /lha khang stong pa zhes bya ba la sogs pas ni rig sngags 'chang dbul po rnams gnas de dag tu bsgrub par bstan to/ /yang na gnas ni nges par ma byas na//zhes bya ba ni dang po nas gnas gar bde ba der bstan par dam bcas pa'o/ /zla ba brgyad po zhes bya ba ni ston zla tha chungs nya nas dbyar zla 'brang po'i nya'i bar ro/ /gnas 'di gang yang rung ba cig tu bsten/ /zhes bya ba ni sgrub pa po dbul po ma yin pas kyang gnas gar bde ba der 'pho zhing bsnyen pa bya bar dam bcas na ni 'phos pa'i nyes pa med ces bya ba'i tha tshig go//mtsho dang zhes bya ba la sogs pas ni/ gang dang gang du gnas su rung ba'i rnam grangs bstan pa'o/ /dgun dpyid ces bya ba ni gong du smos pa'i zla ba brgyad po las bzhi bzhi'o//dbyar ni gcig tu gnas par bya'o zhes bya ba ni dbyar zla 'bring po nya nas ston zla 'bring po nya'i bar du zla ba gsum ni mi 'pho bar gnas gcig tu gnas te bzlas brjod bya bar gsungs so/ /dpe ni go bar zad do/ /sngags pas dbyar ni sgrub la mi 'jug par//zhes bya ba ni bsnyen pa rdzogs te sgrub pa la 'jug pa dag gis kyang char pa la sogs pa'i bgegs mang bas zla ba de gsum la bsgrub par mi bya ba'i don to/ /bzlas brjod kyis ni dus kyang 'da' bar bya/ /zhes bya ba ni bsnyen pa'i grangs tshang gis kyang dbyar 'das 'das su nyin re zhig dus gnyis sam dus gcig la bzlas brjod bar chad med par bstan to//ston zla 'bring po nya nas tha chungs nya'i bar du zla ba gcig ma smos pa ni bsgrub pa'i dus su ni mi rung ste/ rab tu grub par byed pa'i rgyud chen po las/ ji skad du/ston zla 'bring po glog 'gyu zhing / /sgra chen rnams kyang 'byung bar 'gyur/ /zhes gsungs so/ /dbyar gyi nang du ma bsdus pa ni zla ba 'di la tshul nas byung ba'i phyir ro/ /gsang sngags gzi brjid bskyed pas zhes bya ba ni bzlas brjod dang sbyin sreg gis byin bskyed nas dngos grub tu 'gyur ba'i mthu dang ldan pa'i don to//bdag nyid ces bya ba ni sgrub pa po'i skyes bu'o/ /zlum po zhes bya ba ni kun du dkyil 'khor ro/ /gru gsum zhes bya ba ni zur gsum mo/ /gru bzhi zhes bya ba ni lham pa'o/ /pad+ma lta bu zhes bya ba ni pad+ma'i 'dab ma ya gcig gi dbyibs so//dbyibs legs shing / 'jam zhing shin tu mnyam par byas nas su/ /sa dang lci bas legs par byug /ces bya ba ni thab kyi dbyibs rnam pa bzhi char la yang sbyar ba'i don to/ /dbang thang bskyed ces bya ba ni dbang phyug gi dpal mngon du phyogs par sgrub pa'i don to//nor 'gugs pa zhes bya ba ni gter la sogs pa bsdu ba'o/ /spyan drang ba zhes bya ba ni lha mnyes par bya ba'i don du tshim pa dang gzi byin bskyed pa'i sbyin sreg byed pa ste/ de dag ni rgyas pa'i las so/ /zhi ba'i cho ga zhes bya ba ni rab tu grub par byed pa'i rgyud chen po las/ji skad du/ dus min 'chi dang nad rnams dang / /yams kyi nad dang gnod pa dang / /de bzhin bgegs dang nad 'go dang / /zhi bar byed pas zhi zhes bya/ /zhes gsungs so/ /bya bar shis zhes bya ba ni rgyas pa dang zhi ba'i las thab khung zlum por byas na 'grub par bstan to//dgar zhes bya ba ni gnas snga ma nas 'pho zhing 'gro 'dod par byed pa'i sbyor ba'o/ /bskrad pa zhes bya ba ni mi ma yin pa'i gdon rnams kho na la ste/ gnas de nas mi 'gro mi snang bar tshar bcad pa'o/ /bsad pa zhes bya ba ni srog dang bral bar byed pa'o//gshed byed ces bya ba ni ro langs rbad pa la sogs pa'o/ /sogs pa drag po rnams zhes bya ba ni dgra'i yul du nad 'byung ba dang / dmag mnan pa dang / dbye ba la sogs pa gtong ba dang / de lta bu dag dang cha mthun par sgrub pa thams cad do//srog skam pa'am yan lag gzhig pa zhes bya ba 'dir yang drag po'i las dang mthun par gsungs pa rgyud gzhan las thab khung gru bzhi por rgyas pa'i las dang sbyar ba mi 'gal lo zhe na/ klu dang gnod sbyin la sogs pa gzir ba dang / lha ma yin gyi phug gi 'khrul 'khor la sogs pa choms nas/khyad par gyi dpal mngon du phyogs pa'i phyir nyes pa med do/ /bud med ces bya ba ni yugs sa mo la sogs pa'o/ /bu mo zhes bya ba ni bdag 'dod pa ste/ de bzhin du bzlog nas sbyor ba byas pas ni skyes pa yang dbang du 'gyur bar go bar bya'o//grong dang yul 'khor 'thob pa zhes bya ba yang dbang gi las kyis 'grub pa'i phyir ro/ /don kun zhes bya ba ni 'dod pa'i yon tan lnga'o/ /lci ba gtsang ma zhes bya ba ni ba'i lci ba sa la ma lhung pa'o/ /tha ma thog thag tu ku sha dgram par bya zhes bya ba ni bcom ldan 'das ma tsun+da'i cho ga zhi ba mo las ji skad du/ku sha'i rtswa ni rlon pa dag /thab khung bskor ba'i tshul du bting / /tha mas rtse mo mnan nas su/ /rtsa ba dag kyang rtse mos mnan/ /zhes gsungs pa'i phyir ro/ /phyag na rdo rje dang zhes bya ba ni 'dir rdo rje'i rigs kyi shas cher gsungs pa'i phyir/de skad mos te/ rigs gzhan ni skabs su yang so so'i gtso bo la rig par bya'o/ /yam shing mang po zhes bya ba ni rnam grangs bcu gnyis su phye ba'am/ /las kyi bye brag gis tha dad pa rnams las sna gcig yin gyi 'dir sna tshogs ba sogs pa ni ma yin no//thab kyi drung du bzhag ste zhes bya ba ni sgrub pa po'i g.yas phyogs su bzhag pa'i don to/ /bdun nam brgyad ces bya ba ni bgegs kyi mtshan ma chung ngu byung ba'i ngo lon du bstan to/ /bcu zhes bya ba ni 'bring gi ngo lon du bstan to/ / nyi shu zhes bya ba ni bgegs chen po'i mtshan ma zhig byung na des bzlog par dgongs pa'i don to/ /ku sha bting ba'am khres sam rtswa stan la/ /zhes bya ba ni gsang ba'i dkyil 'khor las/ zhi ba la ni pad+ma'i stan/ /rgyas pa la ni ku sha'i khres/ drag shul spyod la stan med par/ /zhes gsungs so/ /'dug nas zhes bya ba ni rab tu grub par byed pa'i rgyud chen po las/ skyil krung bkra shis bzang po ste/ /de dag 'dug pa gsum yin no/ /zhes gsungs te/ las rnam gsum dang sbyar ro/ /drag po la ni gsang ba'i dkyil 'khor las/ji skad du/ rkang pas rkang pa mnan te bya/ /zhes gsungs so/ /shar phyogs kha bltas zhes bya ba ni lha mnyes par bya ba'i skabs dang 'brel pas/ rgyas pa'i las kyi dbang du gsungs par go bar bya ste/ 'dis thams cad la mi bsgre bar gsang ba'i dkyil 'khor las ji skad du//byang du kha bltas zhi ba'i phyir/ /shar du la kha ltas rgyas pa la/ /lho phyogs kha bltas drag po yi/ /sbyin sreg las ni brtsam par bya/ /zhes gsungs pa'i phyir ro/ /rdzas rnams zhes bya ba ni so so'i cho ga zhi ba mo dag las ji skad bshad pa rnams so//mar dang sbrang rtsi 'o ma la btags nas/ /zhes bya ba la/ rang gi lha mnyes par byed pa'i skabs dang 'brel bas rgyas pa'i don nye bar gzung ba'i tha tshig go/ /me ni ston par byed ces bya ba ni bzlas brjod la yang zhen las la goms nas sbyin sreg byas na/me yang mtshan ma ston to/ /de nyid kyi dbang du mdzad nas byang chub kyi snying po'i rgyud chen po las kyang / las dang po pas sbyin sreg byas pas ni bgegs kyi zas su 'gyur ro zhes gsungs so/ /tshig gi don gzhan ni go sla bas ma phye'o/ / me yi mtshan ma 'di rnams mthong nas ne/ /zhes bya ba ni ngan pa rnams byung na zhes bya ba'i don to/ /stobs po che yis mar gyi sbyin sreg bya/ /zhes bya ba ni sbyin sreg snga ma byed pa'i 'phro gzhag ste/ thab der bla thabs su khro bo'i rgyal po de spyan drangs la/ mar gyi dgang blugs nyi shu rtsa gcig dbul bas ni lta ngan de'i ngo lon pas de nas snga ma'i 'phro nas bzung ste/rang gi lha la sbyin sreg dbul ba'i don to/ /sbyin pa dag dang zhes bya ba la sogs pas ni gong du/ gtsug phud gzhag ste skra ni breg par bya/ /zhes gsungs pas skra las thal te/spu 'di dag btogs pa la sogs pa la 'jug pa dgag par bstan to/ /ral gri so la 'dzin zhes pa'i dpe ni go bar zad do/ /legs par ma bzlas zhes bya ba ni ma gus pa'o/ /'bras bu med ces bya ba ni mthong ba dang ma mthong ba'i phan yon no/ /phung bar 'gyur zhes bya ba ni 'chi ba la sogs pa'i nyen yod pa'i don to//mi ni tshul khrims gtsang sbrar mi ldan yang / /zhes bya ba la sogs pas ni 'phags pa don yod zhags pa'i cho ga zhib mo las/ dper na mi la las tsan+dan nam/ ga pur ram gur kur mam gla rtsi yang rung ste/spyos shing mtshang brus nas/ lus la byugs kyang tsan+dan la sogs pa 'di snyam du 'dis bdag spyos kyis 'di la dri nga bar bya'o snyam du mi sems te/ chos kyis dri zhim po kho nar byed pa bzhin du/ bdag gis don yod zhags pa'i snying po 'di yang khros te dran nam bton kyang de la bsrung ba dang bskyab pa dang sbed par bgyid lags so zhes 'byung ba dang 'gal bar 'gyur ba'i the tshom bsal bar bstan to//gzhan ni go bar zad do/ /lha dang zhes bya ba la sogs pas ni gdon rnams kyi rigs bstan pa'o//ri rab steng gnas dang zhes bya ba la sogs pas ni de dag gi gnas bstan to/ /de ltar rigs dang gnas tsam smos pas spyir gnyer ba yang gdon de dag rnam grangs ma nges pas re re nas brjod kyis mi lang ba'i phyir ro/ /de dag bzhed nas zhes bya ba la sogs pas ni mdangs len pa rnams la bsngo ba'i don to//btung zhing bsnams su gsol zhes bya ba ni kham gyis za ba rnams la sbyin par bstan to/ /de ltar gdon la mchod par byas nas su/ /zhes bya ba ni de la mkhas pa dag na re/ bden bral gyi phyogs nas rgyang bsrings te bya'o zhes zer ro//las 'di rnams ni 'bras bu mchis par mdzod/ /ces bya ba ni de dag la las bcol bar bstan to/ /de nas phyogs skyong rnams la mchod par bya/ /zhes bya ba ni de'i 'og tu dbang ldan gyi phyogs nas brtsams te re re nas mchod par bya ba'i don to//ci'i phyir gdon rnams la sngar mchod ce na de dag gtum zhing myur du 'tshe ba'i phyir ro/ /lha rnams kun dang zhes bya ba la sogs pas ni 'jig rten skyong ba de dag kyang 'khor dang bcas par mchod pa'i tha tshig ste/ 'dir 'khor ma smos pa rnams kyang /rig pa mchog gi rgyud dag las gsungs pa bzhin brjod par bya ste/ 'dir ni yi ge mangs su dogs pas ma spros so/ /de ltar gang zhig ces bya ba la sogs pas ni gtor ma gtong ba'i phan yon bstan pa'o/ /le'u brgyad pa'i don bshad zin to// //de bzhin gshegs pa la sku mtshal 'byin zhes bya ba ni zhe sdang drag pos de'i sku'i yan lag la bcad pa'i ngan sems bskyed pa'o/ /mtshams med pa zhes bya ba ni 'jig rten 'di nas pha rol tu nying mtshams sbyor ba na/ skye gnas gang gis kyang bar du mi chod par mnar med pa'i dmyal bar nges par sbyor ba'i don to//phung po 'di la zhes bya ba ni da ltar gyi lus nye bar len pas zin pa'o/ /mchod rten zhes bya ba ni sku gzugs dang sku gdung bzhugs pa'i mchod rten dang lung gi chos so/ /'jig ces bya ba ni de dag gtan du mi snang bar byed pa'o//byang chub sems dpa' zhes bya ba ni sa chen po la gnas pa'o/ /slob pa zhes bya ba ni mos pa'i sa la gnas pa'o/ /mtshams med pa dang nye ba zhes bya ba ni mtshams med pa lnga dang mi bzad par 'dra ba las/ /dge ba'i las drag po dag gis de las bzlog pa dag srid pa ni bye brag go//tshul nyams pa zhes bya ba ni mtho ris dang byang grol thob pa'i rgyu med par gyur pa'o/ /bskal pa'i bar du zhes bya ba ni bskal pa chen po gcig tu zhes bya ba'i don to/ /mnar med pa yi sdug bsngal myong bar 'gyur/ /zhes bya ba ni phyogs drug nas me 'bar ba 'khrigs pas sems can rnams kyi pags pa dang sha dang rgyus pa dang rus pa dang rkang mar me'i snying po la zhen pa bzhin du lus po la khyab nas//de nas nyam thag pa'i nga ro ma gtogs par 'di dag ni sems can no/ /'di dag ni me yin no zhes dbye bar mi nus pa'i phyir sdug bsngal brgyud pa'i bar mtshams med pa'i dmyal ba mnar med pa zhes bya ba'i tha tshig go//chos kyi sku spong ba zhes bya ba ni 'thob pa'i chos la rgyab kyis phyogs pa'o/ /bslab pa'i tshig ma lus pas brgyan pa zhes bya ba ni so sor thar pa'i sdom pas bsdus pa la gnas pa'o//ngan pa'i sems zhes bya ba ni zhe sdang gis dkrugs pa'o/ /dka' bar spyod par ldan zhes bya ba ni dka' thub khyad par can rlung za ba la sogs pa byed pa'o/ /dngos grub mi thob ces bya ba ni shing tA la'i mgo bcad pa bzhin du/dngos grub thob pa'i skal ba can du slar gsor med do zhes bya ba'i tha tshig go/ /bdag nyid mnar med yun ring dmyal bar btsos/ /zhes bya ba ni gong ma gnyis dang mthun par bstan te/ skye gnas gzhan gyis bar du mchod pa srid pa dang / bskal bar mi gnas pa ni bye brag go//mdor bshad pa'o zhes bya ba dang mtshams med pa dang mthun pa'i chos 'dir ma smos pa rnams kyang / de dag dang 'dra bar sdig lci bar bstan to/ /byang chub sems ni blangs pa las/ /zhes bya ba ni byang chub kyi sdom pa mnos pa ste/ smon pa byang chub kyi sems dang ldan pa'i don to/ /rmongs pas zhes bya ba ni sgrub pa pos byang chub tu sems bskyed pa mi mkhas pa kha cig go/ /de la mi dgar gyur nas su/ /zhes bya ba ni byang chub tu sems bskyed pa des gzhan la phyag byas na de dag gi dpal 'bri bar 'gyur ba'i phyir ro//gang gi tshe na sems ni dang ba yis/ /zhes bya ba la sogs pas ni byang chub kyi sdom pa mnos pa'i skyes bu de mchod pa'i gnas yin par bstan to/ /bslab pa mtha' dag blangs pa zhes bya ba ni tshul khrims rnam pa gsum po dag mnos zhes bya ba'i tha tshig go//sems can kun la mi 'jigs sbyin pa zhes bya ba ni snying rje la gnas pas lhag par srog gcod pa la sogs pa'i tho 'tsham pa spong ba'i sdom pa len te/ ji skad du/ byang chub sems dpa'i ltung ba ni phal cher zhe sdang las byung gi zhes bshad pa lta bu'o//dkon mchog gsum gyi gdung yang bsabs pa yin/ /zhes bya ba ni byang chub tu sems bskyed pa la brten nas/ bla na med pa'i sangs rgyas su grub na/ dam pa'i chos 'chad cing 'phags pa'i dge 'dun gyi tshogs kyang sdud pa'i don to//mi bzad pa'i las byed ces bya ba ni sems can la rdeg pa dang 'ching ba dang / go rar 'jug pa la sogs pa'i gnod pa'i sbyor bas tho 'tsham pa'o/ /thub pa gsod ces bya ba ni lus dang ngag mi dge ba las sdom pa'i drang srong rnams srog dang bral bar byed pa ste/ 'dir ni 'jig rten pa rnams la go bar bya ba'o/ /gzhan ni brda phrad par zad do/ /phan gnod byas pa'i dge sdig mtha' mi rtogs/ /zhes bya ba ni/ gang zhig de 'dra'i rgyal sras sbyin bdag la/ /gal te ngan sems bskyed par byed pa ste/ /ngan sems bskyed pa'i grangs bzhin bskal par ni//dmyal bar gnas par 'gyur zhes thub pas gsungs/ /'on te gang zhig yid rab dang byed na/ /de yi 'bras bu de las lhag par 'phel/ /zhes bshad pa'i phyir ro/ /pha rol du yang grub mi thob/ /ces bya ba ni sems can la tho 'tsham pa'i rnam pa de dag gong ma dag pas lci bar bstan pa'i don to//bdud kyi dgra zhes bya ba ni sangs rgyas de bdud nag po'i phyogs me tog mda' la sogs pas dgrar bzung ba'i phyir ro/ /de yang nye bar bstan par zad kyi dngos su 'jig rten las 'das pa'i gsang sngags thams cad dang /dkon mchog gsum la phul ba'i me tog kun la go bar bya'o/ /bkres pas gdungs kyang zhes bya ba ni gong du/ 'byung bo'i zas dang lha bshos gtor ma dang / /gu lang mchod byas gtor ma mi bza'o/ /zhes bya ba nyid kyi rnam grangs bstan pa'o/ / 'jigs kyang phyag mi bya zhes bya ba ni/ /rmongs pas 'jig rten lha tshogs phyag byas na/ /de dag de la mi dgar gyur nas su/ /zhes bya ba nyid kyi rnam grangs rgyas par 'dir bstan to/ /de rnams chos la ngan sems mi bya zhing / /zhes bya ba ni rnam par snang mdzad mngon par rdzogs par byang chub pa'i rgyud chen po las/ji skad du/ gsang ba'i bdag po 'di ni byis pa so so'i skye bo 'khor ba na kun du 'khyams pa rnams kyi dbugs 'byin pa'i mchog yin te zhes rgya cher gsungs pa'i phyir ro/ /gzhan ni go bar zad do/ /bde bar gshegs pa kun gyis bsten pa'i gnas//zhes bya ba ni rdo rje'i gdan la sogs pa'i mchod rten brgyad do/ /rgyal sras rnams zhes bya ba la sogs pas ni bkur sti'i gnas rnams brjod pa'o/ /dad pas rgyal ba'i thugs sras la phyag bya'o/ /zhes bya ba ni byang chub sems dpa' rnams yon tan phyir zhing skyes te/de las sangs rgyas nyid kyi go 'phang du 'byung ba'i phyir ro/ /bde bar gshegs pa min zhes bya ba ni dgongs pa'i don mi shes pa dag lhag ma med pa'i mya ngan las 'da' bar 'gyur ro zhes/ de las snga ma lhag par nan tan gyis gus par phyag mi 'tshal ba dag srid ces bya ba'i tha tshig go//dgongs pa ni 'di yin te/ /la lar rdzogs par byang chub ston/ /la lar med bzhin mya ngan 'das/ /nam yang med pa ma yin te/ /de bzhin gshegs pa rtag pa'i sku/ /zhes ji skad bshad pa'o/ /'jig rten kun gyi mngon mtho'i bslab pa can//zhes bya ba ni sdom pa nod pa nyid kyi tshe na ji skad du/ dus 'di nas bzung nas nam byang chub kyi snying po la gnas kyi bar du/ sems can thams cad bsgral ba dang / sems can thams cad sgrol ba dang / sems can thams cad dbugs dbyung ba dang /sems can thams cad yongs su mya ngan las 'da' ba dang / sems can thams cad thams cad mkhyen pa'i ye shes la dgod pa'i slad du zhes sdom pa blangs pa'i phyir ro/ /snying rje'i bdag nyid 'gro ba'i don du ni/ /skye ba len pa zhes bya ba ni skye ba la dbang thob kyis kyang gang dang gang du sems can gdul ba yod pa de dang der skye ba len gyi zhing dag pa dag kho nar nges par skye ba mi 'dzin pa'i don to//skyes bu bsam yas zhes bya ba ni rig pa'i gnas lnga la 'byams pas/ bdag gzhan gyi don phun sum tshogs par sgrub pa'i tha tshig go//rmad byung rdzu 'phrul can zhes bya ba ni nyan thos la sogs pa la med pa'i cho 'phrul sna tshogs ston pa'i tha tshig go/ /de la rgyal ba thams cad thugs byung nas/ /zhes bya ba ni byang chub sems dpa' la ma gus pa'i sdig gi mthu las byung ba'i sgrib pas thugs rjes bskyang bar dgongs pa las/spyan ras kyis 'tsho ba'i skal ba med par gyur pa ste/ ji skad du/ ji ltar nyi ma'i 'od zer rnams/ /sprin la sogs pas bsgrib par 'dod/ /de bzhin sangs rgyas ye shes rnams/ /sems can gyi ni nyes pas bsgribs/zhes bshad pa'i phyir ro/ /gzhan ni go bar zad do/ /khro la khro ba dang zhes bya ba ni khro bos 'dul ba rnams la 'phags pa bdud rtsi thab sbyor la sogs pas khro bo'i tshul gyis sems can rnams kyi don mdzad pa'o/ /'dod chags can la chags can ltar ston pa//zhes bya ba ni zang zing la chags te khyim gyi gnas nas 'phags mi nus pa rnams gdul ba'i don du ni 'phags pa dri ma med par grags pa la sogs pa btsun mo'i 'khor dang bcas pa lta bur ston pa'o/ /byang chub mchog gnas zhes bya ba ni don dam pa'i rtog pas chos kyi dbyings la gnas pa'i phyir ro//las dang rnam smin mkhyen pa yis/ /zhes bya ba ni khams dang bag la nyal rdzogs pas kun brjod pa'i cho 'phrul ston pa'i don to/ /'gro ba kun dang ji ltar mthun pa yi/ /gsang sngags gzugs kyi rjes su chags mdzad pa//zhes bya ba ni khro bo dang zhi ba la sogs pa'i gzugs tha dad pa rnams kyis gdul bya'i 'gro ba rnams yid mgu tsha bar byed pa'i sgo nas/ rdzu 'phrul gyi cho 'phrul ston zhes bya ba'i tha tshig go/ /sngags kyis rnam 'dren zhes bya ba ni gsang sngags kyi rang bzhin rnam pa drug tu phye ste/rjes su bstan pas/ mngon par mtho ba dang nges par legs pa la sems can rnams bkod pa'i phyir rjes su bstan pa'i cho 'phrul ston pa'i don to/ /le'u dgu pa'i don bshad zin to// //gsang sngags rig sngags rnam pa sna tshogs dag /ces bya ba ni gtsug tor rnams dang yum rnams dang / khro bo rnams dang de bzhin khro mo dang / phyag brnyan la sogs pa dang / gzhan yang de bzhin gshegs pa'i rigs su bsdu ba'i byang chub sems dpa' rnams dang / /gnas gtsang ma'i lha rnams su rnam grangs du mar phye ba dag go//bye ba phrag gsum dang ni 'bum phrag lnga/ /zhes bya ba ni sh+lo ka'i grangs so/ /rig 'dzin gyi sde snod ces bya ba ni rig sngags 'chang rnams kyi bslab pa'i gzhi dang / lta ba'i klung gis grub pa'i mtha' 'di nyid kyis ston pa'i don to//rgyal bas gsungs zhes bya ba ni de bzhin gshegs pa'i rigs kyi dbang du mdzad nas bka' stsal pa'o/ /ngas ni zhes bya ba ni phyag na rdo rjes gsungs pa rnams so/ /gsang ba pa rnams gzhom pa zhes bya ba ni des khyad par du gnod sbyin la sogs pa gdul bar bstan to//dbul ba'i sdug bsngal sel zhes bya ba ni lha ma yin gyi dpal gyi sgo 'byed pa dang / gter dbyung ba'i cho ga la sogs pas sems can rnams la phan 'dogs pa'i don to/ /pho nya mo bcu zhes bya ba ni rig pa mchog gi rgyud chen po las/ rdo rje'i blo gros ma dang / dril bu ma dang /nag mo dang / gzhan gyis mi thub ma dang / mdzes ma dang / shugs dang / thog thag dang / bden ma dang / nyi ma dang / rdo rje'i dbyug pa ma zhes 'byung ba dag go/ /rig pa'i rgyal po bdun zhes bya ba ni phyag na rdo rje dbang bskur ba'i rgyud chen po las/ rab tu grub ba dang /dbu rgyan rtse gsum dang / badzra ki li ki la dang / rin chen ki li ki la dang / gzugs legs dang / rdo rje'i thigs pa dang / rdo rje'i rol pa'o/ /de bzhin phyag brnyan drug cu rtsa bzhi dang / /zhes bya ba ni rig pa mchog gi rgyud chen po las/ rdo rje'i lta ba la sogs pa 'byung ba rnams te/dngos su pho nya mo bcu'i phyag brnyan yin no/ /nga yi snying po dam pa brgyad rnams dang / /zhes bya ba ni 'phags pa stobs po che'i cho ga zhib mo dang / rnam par rgyal ba'i rgyud chen po las/ ji skad du/ snying po ni ki li ki la dang /'gro lding dang / lus dmar dang / rdo rje rnam par 'joms pa dang / rdo rje rgya chen dang / snying po'i mchog dang / sog med gtum po dang / dpal ldan zhi bar grags pa zhes bya ba dag ste/ lha de rnams ni phyag na rdo rje'i thugs kyi yon tan gyi khyad par las brgyad du phye bar rig par bya'o//khro bo drag po zhes bya ba ni rig pa mchog gi rgyud chen po las/ tshogs brgyad bshad pa dag ste/ bdud rtsi thab sbyor dang / rmugs byed dang / rdzong ldan dang / mtshan sbyin dang / lcags can dang / so can dang / gsar can dang / gtum byed dag go/ / rig pa mchog la sogs pa mthu bo che rig pa'i bdag po zhes bya ba ni phyag na rdo rje dbang bskur ba'i rgyud chen po las/ rig pa'i rgyal po gzhan bstan te/ rig pa mchog dang / glang po'i rna ba dang / gnod mdzes dang / bsdigs su rung ba dang / 'phrog byed dang / rdo rje'i zhags pa dag go//gsang sngags rjes su 'brang bcas zhes bya ba ni rig pa'i rgyal po rnams kyi rjes su 'brang ba'i lha'i bye brag mang por bstan pa rnams so/ /de yi rig sngags bdag po rta mgrin dang / /zhes bya ba ni pad+ma'i rigs kyi gsang sngags thams cad kyi rgyal po yin pa'i don to/ / de yi ming can dkyil 'khor zhes bya ba ni dpal rta mgrin pad+ma'i rigs kyi rig pa'i rgyal po yin pas/ dpal sdom gyi rgyud la sogs pa las/ rab tu gnas pa'i dkyil 'khor 'byung ngo cog la de'i ming can zhes gdags te/ 'phags pa rta mgrin nyid kyi khyad par gyi dkyil 'khor 'ba' zhig la gdams pa ni ma yin no//don yod zhags pa bdun bstan pa/ /zhes bya ba ni bshad ma thag pa'i don yod pa'i zhags pa drug dang dpal rta mgrin dang bdun no/ /nyi ma bdun ltar 'bar zhes bya ba'i dpes ni sgrub pa po'i las dang nyon mongs pa thams cad bsreg cing mngon par mtho ba'i dpal yang 'bar bar byed pa'i don to//de rnams rta mgrin dkyil 'khor gsang sngags te/ /zhes bya ba ni rig pa'i rgyal po yin pas/ de dag gi dkyil 'khor la yang dbang bsgyur bar bstan to/ /mi la mchog sbyin zhes bya ba ni dam pa brgyad la sogs pa ster ba'i don to//'jig rten gsum gyis 'dud ces bya ba ni lha'i rigs dang mi'i rigs dang / klu'i rigs rnams kyis mchod gnas su gyur ces bya ba'i tha tshig go/ /sgrol ma zhes bya ba la sogs pa ni pad+ma'i rigs kyi yum brgyad yod par bstan pa'o/ /de dag dkyil 'khor zhes bya ba ni yum de rnams kyi dkyil 'khor zhes bya ba'i tha tshig go//sna tshogs gzugs can zhes bya ba ni dkyil 'khor gyi tshul tha dad pa dang / 'khor sna mang bar bstan to/ /phyag rgya rnam pa sna tshogs rnams dang ldan/ /zhes bya ba ni las kyi bye brag gis lha re re la yang phyag rgya du ma dang bcas pa'i phyir ro//rgyas pa'i gsang sngags rgyud du zhes bya ba ni rigs bzhi par bstan pa'o/ /'og pag can/ rig pa'i dbang phyug gsang sngags bdag mor gsungs/ /zhes bya ba ni rigs bzhi pa 'dis gsang sngags thams cad la dbang bsgyur bar bstan to//dngos su lngas rtsen gyi btsun mo 'phrog ma yin no/ /de la lngas rtsen yang ni mngon par dga'/ /zhes bya ba ni rigs kyi bdag pos de rgyal mor bsgo bar dga' ba'i don to/ /gnod sbyin dbang phyug ces bya ba ni rgyas pa'i rigs la gtogs pa'i gnod sbyin gyi sde dpon rnams so//de dang rtag tu mthun pa zhes bya ba ni lngas rtsen dang gnod sbyin gyi gtso bo rnams blo mthun pas/ 'og bag can 'dis rgyas pa'i rigs kyi gsang sngags kyi bdag mor dbang bskur ba'i don to/ /de yi bka' yis gsang sngags tshogs rnams bshad//ces bya ba ni 'og pag can rgyas pa'i rigs kyi rgyud rnams bshad ces bya ba'i tha tshig go/ /lngas rtsen gyis ni stong phrag nyi shu ste/ /zhes bya ba ni rgyas pa'i rigs la lngas rtsen gyi rgyud du grags pa ni sh+lo ka nyi khri'o/ /de yi chung ma zhes bya ba ni 'phrog ma nyid de/ de'i phyed bshad do zhes bya ba ni sh+lo ka khri bshad pa'i don to//nor gyi bdag po zhes bya ba ni rigs lnga pa nor bu'i rigs bstan pa ste/ dngos su dpal nor bu bzang po'o/ /stong phrag sum cu zhes bya ba ni nor bu'i rigs la dpal nor bu bzang po'i rgyud du grags pa ni sh+lo ka sum khri bshad par bstan to/ /gang po'i pha zhes bya ba ni lha'i drang srong rnam thos zhes bya ba yin no//lha dang lha min la sogs rgyal ba la/ dad pa rnams kyis gsang sngags mtha' yas bshad/ /ces bya ba ni sangs rgyas dang byang chub sems dpa' rnams kyi spyan sngar gnang zhing rjes su thugs rangs nas so so nas bshad pa'o//gzhan yang kha cig gnas med rnam par 'khyam/ /zhes bya ba ni pha rol tu phyin pas bskyed pa'i rigs bzhi po de dag gi bgab tu ma bsdus pa'o/ /gzhan ni go bar zad do/ /ngas bshad gang yin de zhes bya ba ni 'jig rten pa'i rigs rgyal ba la dad pa rnams so//bzhi po 'di dag rnam par sbyang bar bya/ /zhes bya ba ni de dag gi rigs bzhi po'i bgab tu phal cher 'dus par bstan to/ /gang gzhan la la 'di na gnas med par/ /zhes bya ba ni rigs bzhir ma bsdus pa rnams so/ /bde bar gshegs la brten zhes bya ba ni dad pas sangs rgyas kyi spyan sngar so so'i cho ga zhib mo bshad pa'o//yongs 'khyam pa zhes bya ba ni de dag rigs lnga char gyis ma bsdus pa'i don to/ /de bzhin gshegs pa'i rigs su ma bsdus sam zhe na/ de'i rigs su gtogs pa ni gtsug tor la sogs pa ye shes las byung ba yin la/'di dag ni rnam par smin pas bskyed pa'i phyir ro/ /mdo sde 'dir ni zhes bya ba ni dpung bzangs kyis zhus pa'i rgyud 'dir zhes bya ba'i don to/ /de dag thams cad kyang zhes bya ba ni 'phags pa'i rigs lnga dang / 'jig rten pa'i rigs dang drug car ro//rnam par sbyang zhes bya ba ni rgyud 'di cho ga thams cad la sbyar bar bstan to/ /srid pa gsum zhes bya ba ni 'dod pa dang gzugs dang gzugs med pa'o/ /rgyal ba zhes bya ba ni sangs rgyas so/ /dkon pa zhes bya ba ni u dum+WA ra'i me tog dang 'dra ba'i don to//mchog ces bya ba ni yid bzhin gyi nor bu ltar de dang yon tan mnyam pa med pa'i phyir ro/ /de yi 'og tu de las byung ba'i chos/ /zhes bya ba ni rang gi don du rtogs pa'i chos thugs su chud pa dang / gzhan gyi don du lung gi chos nges par bstan pa rnams so/ /de'i dge 'dun zhes bya ba ni sangs rgyas kyi bstan pa la rab tu byung ba'i 'phags pa nyan thos rnams so//skyes chen brgyad po zhes bya ba ni rgyun du zhugs pa la sogs pa zung bzhi ya brgyad do/ /srid pa gsum na dkon mchog gsum po gtso/ /zhes bya ba ni khams gsum pa thams cad kyis mchod cing bkur sti bya ba'i 'os bla na med par bstan to//gzhan ni go bar zad do/ /bde bar gshegs pa min zhes bya ba ni theg pa chen po la mi phyogs pa rnams so/ /nyan thos dang rang sangs rgyas rnams kyi lam la gnas pa dang zhes bya ba ni theg pa dman pa la phyogs pa'o//dad pa med cing zhes bya ba ni gsang sngags kyi phyogs la ma dad pa'o/ /tshul 'chos zhes bya ba ni gzhan la slu ba'i bsam pas gsang sngags kyi sgo nas theg pa chen po la dad pa ltar spyod lam bsgyur ba'o/ /'jungs pa zhes bya ba ni ser snas kun nas dkris pa'o//gzhan ni go sla bas ma phye'o/ /gang gi nga yi rjes su 'brang ba'i gdon/ /'byung po klu dang gnod sbyin sha za yi/ /zhes bya ba ni rnam par smin pas bskyed pa'i 'jig rten las ma 'das pa de dag phyag na rdo rje'i byin gyi rlabs kyis btul nas/so so nas dam tshig phul te rdo rje'i rigs su bsdus pa rnams so/ /nga yi sngags zlos rdo rje thogs pa dang / /zhes bya ba ni bshad ma thag pa'i snod du ma gyur pa rnams so/ /phung bar byed ces bya ba ni gsod pa'am rigs kyang rlag par byed ces bya ba'i tha tshig go/ / theg pa mchog ces bya ba ni theg pa chen po ste/ de'i bla mar gyur pa gzhan med pa'i phyir ro/ /rgya chen zhes bya ba ni theg pa gzhan las khyad par du dmigs pa la sogs pa khyad zhugs par che ba'i phyir ro/ /brtson 'grus che zhing zhes bya ba ni bdag dang gzhan gyi don du brtson pa'i don to//byang chub kyi sems brtan pa zhes bya ba ni brtson 'grus dang ting nge 'dzin dang / shes rab mtshungs par ldan pas byang chub kyi sems gzung ba'i tha tshig go/ /sangs rgyas pa'i gsang sngags zhes bya ba ni rigs lngas bsdus pa'o/ /yangs shing zhes bya ba ni sgo mang po nas drangs pa'i don to//rgya chen bshad pa zhes bya ba ni 'bras bu chen po dang ldan pa zhes bya ba'i tha tshig go/ /de nas zhes bya ba ni sangs rgyas dang byang chub sems dpa' rnams kyis 'dul ba'i skye bo rnams kyi ngor/ 'jig rten las 'das pa'i gsang sngags rnams kyi rgyud gtsor bshad pa'i skabs nas glengs pa'i de ma thag pa'o//gzhan yang 'jig rten pa bsdus nas zhar la bshad pa 'di dag ces bya ba ni 'jig rten las 'das pa'i rgyud kyi sdom bshad pa'i zla ba glengs zhes bya ba'i tha tshig go/ /drag po zhes bya ba ni lha chen po'i ming gi rnam grangs so//nor lha'i bu zhes bya ba ni khyab 'jug gi rnam grangs so/ /gtum byed ma zhes bya ba ni 'jig rten pa'i rig sngags kyi lha mo skal ldan ma zhes brjod pa ste/ mkha' 'gro rnams kyi lha zhes kyang grag go/ /phur bu gsum pa zhes bya ba ni gdol pa'i rgyal po'o/ / mtshan mo rgyu ba'i dbang po zhes bya ba ni gnod sbyin gyi sde dpon rnams so/ /'jig rten bdag po bzhi zhes bya ba ni rgyal po chen po rnams so/ /lha'i dbang po zhes bya ba ni brgya byin no/ /rang sngags mdo sde'i rjes 'brangs zhes bya ba ni so so'i tshul ma nyams pa ste/ gzhan gyi cho ga dang ma bsres zhes bya ba'i tha tshig go//dad pa skyed ces bya ba ni so so'i lha de dag la dang pas the tshom med par sgrub pa'o/ /de las bzlog na dngos grub mi thob la/ /zhes bya ba ni so so'i cho ga dang 'gal bar bsgrub pa dang / lha de dag nyid la ma dad pa rnams so/ /sdug bsngal mang po yang ni thob par 'gyur//zhes bya ba ni bzlas brjod la sogs pa'i las chen po ni byas la/ 'bras bu mi thob pa'am/ yang na de dag 'khrugs nas nyen du gyur ba'i don to/ /le'u bcu pa'i don bshad zin to// //bcud len zhes bya ba ni sman bcud len te/ de yang khams las byung ba dang /rtsa las byung ba dang / srog chags kyi lus las byung ba dang / lde gu dang rnam pa bzhi'o/ /de dag gi phan yon ni tshe ring ba dang / nad med pa dang / dbang po rno ba dang / slar gzhon nur gyur pa ste/ de yang gsang sngags mnyes pa'i sgo nas/ bcud len gyi mthu 'grub kyis skal pa med pa rnams la ni ma yin te/rdo rje gtsug tor gyi rgyud las kyang / ji skad du/ sman gyi yang ni lus can la/ /nye bar gyur dang sngags grub pas/ /dbang du gyur par rtag par ro/ /zhes gsungs pa'i phyir ro/ /lha dang mi'i gter zhes bya ba ni sa la yod do//de la lha'i gter kha gab yod de/ de phye na ri lu dang lig bu mig dang mchil lham dang glegs bam dag 'byung ste/ de dag gi phan yon ni nam mkha' la 'gro ba dang / lus mi snang bar 'gyur ba dang / rkang bas mgyogs pa dang / bstan bcos thams cad la thogs pa med pa'i blo dang ldan par 'gyur ro//mi'i gter ni gser dang dngul dang rin po che sna tshogs dag 'byung ba'o/ /lha ma yin gyi phug tu 'gro ba zhes bya ba ni dpal gyi sgo dang slas kyi sgo nas 'gro ste/ de la dpal gyi phug gi sgo dbye ba ni lha'i gter gyi dngos grub rnams las gang yang rung ba cig thob par 'gyur ro//slas kyi phug gi sgo dbye na ni lha ma yin gyi bu mo dang phrad de/ lha ma yin gyi gnas su khrid nas de dag dang 'tsho zhing bskal par gnas par 'gyur ro/ /nor rgyun ma zhes bya ba ni sman sna tshogs bsdus nas ro nye la sogs pa las gser dngul du byed pa'o//'byung khungs zhes bya ba ni gser dngul la sogs pa'i khron phyin pa'o/ /gsang sngags kyi dngos grub ces bya ba ni 'jig rten las 'das pa dang / 'jig rten pa'i lha mnyes pa thob pa'o/ /gser sgyur rtsi zhes bya ni dngul chu'i rigs gser du snang ba zhes bya ba cig yod de de ni srang gcig gis lcags srang stong gser du sgyur nus la dngul chu srang gcig po des ni lcags srang stong po des zad par bya ba'am/lcags bsgyur bar mi nus so zer/ la lan re ras zhes bya ba dngul chu 'dra ba zhig yod de/ de lta bu'i thigs pa gcig gis zangs srang stong gser du sgyur nus zhes grag go//rin thang med pa'i rin chen nor sbyin te/ /zhes bya ba ni nor gyi rgyun grub pa'o/ /sdig pa spong bar byed pas zhes bya ba ni rnam pa de dag 'dod pas bsod nams khyad par can la brten dgos pa'i phyir ro//mchog tu ston zhes bya ba ni dam pa brgyad po de rnams kyi nang na 'bras bu che ba'i phyir ro/ /dang por bstan pa'i snod ces bya ba ni gsang sngags grub pa dang / phug tu 'gro ba dang bcud kyis len grub pa'o/ /rdul zhes bya ba ni 'dir 'dod chags kyi dri ma las dgongs so//shes che ba zhes bya ba ni sgrub pa po la la'i rgyud la 'dod chags kyi bag la nyal che ba rnams so/ /'bring po rnams grub par 'gyur zhes bya ba ni rin po che la sogs pa nor gyi rgyun dang / 'byung khungs kyi khron phyin pa ste/ de dag ni 'dod chags kyi shas che bas kyang 'grub par bstan to//tha ma zhes bya ba ni gser dang nor bsgyur ba'i rtsi ste/ sbyor ba dka' zhing chud za la 'bras bu chud za ba'i phyir ro/ /mun pa zhes bya ba ni yang dag pa'i don la sgrib pas gti mug la bya'o/ /rten zhes bya ba ni gti mug gi shas che ba'i sgrub pa pos/ las gong ma dag ni mi lcogs pa'i phyir/tha ma tsam la brten dgos par bstan to/ /gang zhig mchog tu bstan pa bsten 'dod pas/ zhes bya ba ni bcud kyis len la sogs pa dang por bstan pa rnams sgrub par 'dod pa'o/ /des ni tha mar bstan pa rnam par spang / /zhes bya ba ni gser sgyur la sogs pa'i las phran tshegs mi bya bar bstan to//ji ltar tshabs kyi mda' bdar ba bzhin du sngar mi spyad pa dang 'dra'o/ /gal te nor la sred cing sdug bsngal gyis/ /gdungs na 'bring po la ni bsten par bya/ /zhes bya ba ni sgrub pa po dang dngos grub mchog sgrub pa'i yon tan gzhan rnams yod la srid pa'i shas che na zhes bya ba'i don to//lha'i bde ba zhes bya ba la sogs pas ni gong du smos pa'i 'bras bu rnams brjod pa'o/ /dka' thub stobs kyis thob/ chags dang rnam bral zhes bya ba la sogs pas ni/ 'bras bu de rnams thob pa'i rgyu bstan to//rdo rje mtshon zhes bya ba'i dpes ni/ /las dang nyon mongs pa'i dra ba'i thigs po mtha' dag gcod cing 'bigs par bstan to/ /me zhes bya ba'i dpes ni/ dug gsum gyi nags sbyor gyi tshang tshing mtha' dag sreg par ston/ gnam lcags zhes bya ba'i dpes ni/bag la nyal phra mo lus pa rnams kyang dmigs kyis sel zhes bya ba'i tha tshig go/ /mi'i 'jig rten zhes bya ba ni bya ba'i rgyud 'dis mi rnams kyi don du gsungs pa'i shas che ba'i don to/ /'jig rten 'di dang pha rol nyid na yang / /sdug bsngal sel cing zhes bya ba ni phyag na rdo rje dbang bskur ba'i rgyud chen po las/ji skad du/ tshe 'di la dngos grub la nges par gzhol bar 'gyur ba dang / shi 'phos nas kyang rdo rje'i rigs su gzhon nu'i lus thob par 'gyur ro zhes gsungs pa'i phyir ro/ /sdig 'joms zhes bya ba ni 'og nas/ ji skad du/tshe rabs stong nas gnas pa'i sdig pa'i mun/ /bzlas brjod byas pas myur du sel bar byed/ /ces gsungs pa lta bu'o/ /gzhan med do zhes bya ba ni gsang sngags 'dra ba'i 'dren pa med ces bshad pa'i phyir ro/ /gang zhig ces bya ba ni rig sngags kyi byin gyi rlabs gang gis zhes bya ba'i don to//dpag bsam ljon pa'i shing lta bur/ zhes bya ba ni sems can rnams kyi re ba sna tshogs skong ba'i dper brjod pa'o/ /la lar dngos grub ces bya ba la sogs pas ni de'i phan yon gyi 'bras bu sna tshogs su phye ste bstan pa rnams kyi rnam grangs bkod pa'o//gsang sngags zhes bya ba ni gsang sngags rnams kyi lha de ni zhes bya bar sbyar ro/ /sna tshogs gzugs su rnam sprul nas/ /zhes bya ba ni sangs rgyas la sogs pa dag pa'i gzugs dang / gnod sbyin la sogs pa ma dag pa'i gzugs su bstan pa'i don to//gang zhig sdug bsngal gang gis 'jigs skrag pa/ /zhes bya ba la sogs pas kyang / gsang sngags la brten pa'i phan yon gyi 'bras bu gzhan brjod pa'o/ /gang zhig ces bya ba ni rig sngags 'chang dngos grub chen po sgrub par mi rtsol ba rnams so/ /yul zhes bya ba ni dgon par ma spangs pa'am/'dod pa'i yon tan lnga la spyod pa'o/ /khyim zhes bya ba ni rab tu ma byung zhing 'cho tshis lhur len pa'o/ /dka' thub ma nyams zhes bya ba ni dam tshig rnams bsrungs pa'o/ /rtse gcig sems kyis zhes bya ba ni bzlas brjod yan lag dang ldan par byed pa'o//nyin gcig bzhin du cung zad sngags zlos na/ /zhes bya ba ni yi dam rgyun mi 'chad par byed ba'o/ /de yi gsang sngags dus gcig na ni 'grub/ /ces bya ba ni gsang sngags kyi lha'i sngon gyi smon lam dang / sgrub pa po'i mos pa'i shugs kyis tshe rabs gzhan dang gzhan du yang lha de'i cho ga zhib mo dang mi 'bral te/rgyu'i stobs ji tsam pas las srid pa phyi ma dang yang phyi ma la sogs par dngos grub thob par gsungs so/ /cho ga bzhin du zhes bya ba ni brtul zhugs la sogs pa'i cho ga mtha' dag bsnyen pa la sbyor ba dang 'dra bar bshad do//dang por 'bum bzlas nas zhes bya ba ni cho ga zhib mo dag la bsnyen ba'i grangs nges par gsungs pa la ma gtogs par 'jug pa'i spyod pa sngar spyad pa 'bum bzlas brjod bya dgos pa'i don to/ /de nas sngags pa sgrub la 'jug par bya//zhes bya ba ni sngar spyod pa byas nas so so'i cho ga zhib mo bsnyen pa'i grangs nges pa'i mgo gzugs par bstan to/ /yun ring nyon mi mongs zhes bya ba ni lus dang sems sbyangs pas las su bya ba thams cad chud mi gson pa'i phyir ro/ /lus las yi dril phyis byas nas su//zhes bya ba la sogs pa ni gong du dus gsum khrus byas te zhes 'byung la/ khrus kyi cho ga der ma gsungs pa 'dir bstan to/ /sbrid pa byung na kha yang bkru bar bya/ /zhes bya ba ni gtsang sbra'i rnam grangs gzhan bstan pa'o/ /gtsang sbra la dad ces bya ba ni phyi rol gyi dri ma spong ba'o//zlos la dga' zhes bya ba ni bzlas brjod byas ba'i stobs che ba'o/ /snying rje can zhes bya ba ni rang bzhin gyis sems can rnams la brtse ba'o/ /len pa las ni ldog ces bya ba ni sred pa'i shas chung bas yo byad mi mkho ba mi sogs zhes bya ba'i tha tshig go/ / slong mo zas za zhes bya ba ni bsod snyoms la brten pa'o/ /lha'i las la brtson zhes bya ba ni bzlas brjod dang / mdo sde bklag pa dang / mchod rten gdab pa dang / mchod pa byed pa la sogs pa dge ba'i phyogs la skyo ba med pa'o/ /de yi lus la gsang sngags 'jug par 'gyur//zhes bya ba ni gsang sngags kyi byin gyi rlabs 'jug pa'i snod yin par bstan to/ /'ga' yis bud med gos dang nor rnams dang / /zhes bya ba la sogs pa ni bsnyen pa la sbyor ba'i dus su ci yang mi blang bar bstan pa'i don to/ /sa phung bshad sgor lnga ste zhes bya ba la sogs pas ni khrus kyi cho ga 'di 'dag pa'i chal dang tshad bstan pa'o//sos ka'i nags zhes bya ba ni dpyid kyi dus su nyi mas gdungs pas skom pa'i don to/ /ma bsgrims bzhin du tshang tshing kun bsreg ltar/ /zhes bya ba ni shing rlon pa la me btang ba ltar/ mis 'bad pa'i nan tan mi dgos zhes bya ba'i tha tshig go//bzlas brjod me zhes bya ba ni sdig pa thams cad bsreg pa'i rgyu'i gtso bor bstan to/ /tshul khrims rlung gis sbar/ brtson 'grus chen po'i me lces zhes bya ba ni lhan cig byed pa'i rgyur bstan pa'o/ /sdig pa'i gangs zhes bya ba ni 'dod chags dang zhe sdang dang gti mug gi rgyun yang dang yang du byung ba'i bag chags tha mar 'gyur zhes bya ba'i don to//gzhan ni go bar zad do/ /ci ste sbyin sreg dang bzlas brjod kyi gsang sngags bsgrubs kyang dngos grub ma thob na zhes bya ba ni ji skad gsungs pa'i cho ga bzhin du/ gus par len bdun gyi bar du spogs shing bsgrubs na yang dngos grub ma thob na zhes bya ba'i tha tshig go//'jim pa la ni mchod rten 'bum gdab pa'am/ yang na chu 'gram bye ma dag la gdab/ ces bya ba ni bsod nams kyi tshogs cher bskyed dgos par ston to/ /don de nyid rab tu grub par byed pa'i rgyud chen po las kyang /ji skad du/ rgya mtshor 'bab pa'i bye ma la/ /mchod rten dag ni khru gang ba/ /zhes bya ba dang / /de bzhin du/ re re'i mdun du 'dug nas ni/ /bzlas brjod dag kyang stong du bya/ /mchod rten tha ma 'bar bar ni/ /mthong na nges par 'grub par 'gyur//zhes bya ba la sogs pa gsungs pa'i phyir ro/ /des ni zhes bya ba la sogs mchod rten gdab pa'i phan yon des zhes bya ba'i tha tshig go/ /des ni de yi sdig pa srid gzhan la/ /byas pa gang yin de ni zad 'gyur na/ /zhes bya ba ni tshe rabs gzhan la sgrib pa chen po byas pa thams cad 'byang bar bstan te/rgyud de nyid las ji skad du/ /mtshams med lnga dag byed pa yang / /mchod rten 'bar bar gyur na ni/ /nges pa nyid du 'grub par 'gyur/ /zhes gsungs pa'i phyir ro/ /des ni zhes bya ba ni sdig pa zad nas zhes bya ba'i don to//mthong ba'i chos zhes bya ba ni tshe 'di nyid ces bya ba'i tha tshig go/ /bsod nams 'bras bu thob ces bya ba ni dngos grub kyi dpal thob pa'i don to/ /sngags kyi rtsa ba dang po tshul khrims te/ /zhes bya ba ni sdom pa dang dge ba'i chos sdud pa dang / sems can gyi don byed pa'i tshul khrims rnams kyis dkar po'i phyogs kyi gzhi thams cad bsdus pa'i phyir ro//yang na gsang sngags kyi sgo nas byang chub sems dpa'i spyad pa spyod pa rnams kyi dor ni 'phags pa phyag na rdo rje dbang bskur ba'i rgyud chen po las/ ji skad du/ bdag nyid rang gi lha'i gzugs su byas la/the tshom med pa'i yid kyis nga rgyal bskyed cing / rtag par dus thams cad du bskyod kyang mi g.yo ba de'i tshe tshul khrims dang ldan pa yin no zhes 'byung ba'i phyir ro/ /ji ltar mi dbang zhes bya ba ni dpe bstan pa ste/ de la yan lag bdun dang ldan/ / zhes bya ba ni mkhar dang blon po snying nye zhing lcogs pa dang / gru dang / nor dang / glang po che dang / rta dang / dmag mi rnams dang ldan pa'o/ /skye ba med par skye dgu 'dul bar byed/ /ces bya ba ni dngos po bdun dang ldan pa'i rgyal po de ni bde blag tu rgyal srid la dbang bsgyur bas/bde ba la reg cing dgra dregs pa thams cad kyang thul ba'i don to/ /de bzhin sngags pa'ang yan lag 'di bzhin du/ /ldan par gyur na sdig pa 'dul bar byed/ /ces bya ba ni tshul khrims kyi mkhar dang / brtson 'grus kyi blon po dang / bzod pa'i gru dang / dad pa'i nor dang / bla na med pa'i byang chub chen por smon pa'i blo gros kyi glang po dang / gzhan gyi gsang sngags gcod pa la sogs pa'i don chung ngu la rang gi gsang sngags ma spyad pa'i rta cang shes dang / le lo spangs pa'i dmag mi'i tshogs de bdun dang ldan na/ dngos grub kyi skyid pa'i dpal yang nyams su myong la//las dang nyon mongs pa'i dgra'i tshogs kyang choms pa'i don to/ /dang por bzlas brjod phal cher byas nas su/ zhes bya ba ni/ las dang po pa rnams kyis zhes bya ba'i tha tshig go/ /de yi 'og tu 'dir ni sbyin sreg bya/ /zhes bya ba ni las rnams la goms pas cho ga'i gnas thams cad la thags thogs med par lcogs pa rnams kyis bya bar bstan to//gzhan ni go sla bas ma phye'o/ /rgyal ba la dad ces bya ba ni sangs rgyas la dad pa'i 'jig rten pa'i lha rnams so/ /gzhan la phan brtson zhes bya ba ni ma 'ongs pa'i sems can rnams la brtse bar sems pa ste/de yang lha zhes bya ba la sogs pa 'jig rten pa'i gsang sngags kyi lha sangs rgyas la dad pa rnams so/ /rgyal ba'i nyan thos rang sangs rgyas/ /de bzhin gshegs dang byang chub sems dpa' yis/ /zhes bya ba ni 'jig rten pa'i zhu gnas rnams smos pa'o//ma 'ongs sems can zhes bya ba la sogs pas ni so so'i gsang sngags phul ba rnams bzhes par gnang zhing byin gyis brlab pa'i rgyu bstan to/ /de dag 'bras bu zhes bya ba la sogs pas ni 'bras bu rnam par dbye ba bstan te/ dpal zhes bya ba ni lha ma yin gyi phug gi sgo'i rnam grangs kyi ming ngo //phug tu 'gro zhes bya ba yang rnam grangs gzhan te slas kyi sgo la bya'o/ /mig 'phrul sgyu ma zhes bya ba ni sangs rgyas kyi gzugs mang por ston pa la sogs pa'o/ /mtshan mo rgyu ba zhes bya ba ni ro longs la sogs pa dur khrod kyi las rnams grub pa'o//de dag mchog yin zhes bya ba ni rnam pa de brgyad dngos grub rab yin par bstan to/ /'bring ni sa bdag go zhes bya ba ni rgyal por gyur pa'o/ /gzhan ni go bar zad do/ /ngo mtshar sna tshogs dag ni ston par byed/ /ces bya ba ni glu len pa dang rnga rdung ba dang tsham ngam lus kyi sgyur ba la sogs pas gdon dag skrod pa'o//phra mo'i phran tshegs yin zhes bya ba ni dngos grub chung ngu bstan pa bas kyang chung ba zhes bya ba'i don to/ /bya ba ces bya ba ni sbrul gyis zin tam dug 'thungs pa'i lus la lag pas byab cing sngags gdab pa'o//khu tshur thal lcag skra drang dang / rna bar bzlas zhes bya ba ni dug gis phog ste myos pa bslang ba'i thabs bstan to/ /dbab pa zhes bya ba ni dug de shing la sogs pa la phab nas dor ba'o/ /bskrad pa zhes bya ba ni sngags btab pas 'bros su gzhug pa'o/ / gsad pa zhes bya ba ni sngags kyis de nyid du gsad de shi bar bya ba'o/ /bcing ba zhes bya ba ni dug gi mthu g.yor mi gnang par sngags dang phyag rgyas bcing ba'o/ /bod pa zhes bya ba ni myos pa bslang ba'i don du khus gdab cing ming nas bod pa'o/ /rig pa'i gos dang sngags gos dang //zhes bya ba ni dug gis phog pa'i gos la chu'i dkyil 'khor dkar po'i steng du/ chu'i sa bon dkar po gcig mgo thur du bstan te gzhag ba las/ chu rgyun dkar po bab pas nyis rim du bskor zhing 'khyil pa las bdud rtsi'i rgyun 'bab par bsams la/ 'khor gyi mi rnams kyi khar yang gso ba'i sa bon bkod de/ rig sngags zlos shing gos de bshus la 'khor gyi mi rnams kyis kyang dug phrogs so zhes brjod par bya'o/ /rdog pas bsnun dang rnam par bskyod pa dang / /zhes bya ba ni myos pa las bslang ba'i don du/ rting sgras bsdigs pa dang lus bsgul ba'o//mig tu dug song ltar ni gzhug pa dang / /zhes bya ba ni mig la zhen pa dang 'dra na/ der sngags kyi 'bru bkod de mig phye nas bltar gzhug pa'i tha tshig go/ /khab kyis gzugs pa dang zhes bya ba ni myos pa bslang ba'i don du/ sen mo la sogs pa'i yan lag la khab kyis gzugs pa'i don to//skyug tu gzhug ces bya ba ni zos shing 'thungs pas 'phrang du tshor na skyug tu gzhug pa'i tha tshig go/ /phu zhes bud dang zhes bya ba ni rig sngags bzlas pa'i dbugs kyis bud pa'o/ /yan lag gzhig pa zhes bya ba ni sngags dang sman gyis ma phyin pa'i mi la/ma'i sa bon khong du gzhug pa dang bcas te bsregs nas thal bar sbyor ba byas te/ de nas gso ba'i sa bon gyis lus bskyed pa'i don to/ /brang gi 'gro ba dag kyang dgug pa dang / /zhes bya ba ni sbrul de nyid sngags kyi mthus bkug ste/ngo mtshar dag bstan pa'o/ /bcings zhes bya ba ni phyag rgyas yan lag tu 'bros su mi gnang bar mtshams bcad pa'o/ /mnan par bya ba zhes bya ba ni dug gi mthu nyid bkug la phur bus btab ste/ sa'i snying pos bskyed pa'i dbang chen gyi dkyil 'khor mnan pa'i don to//rmongs par bya zhes bya ba ni sbyor ba de rnams kyis sbyar na/ dug gi mthu drug go zhes bya ba'i tha tshig go/ /dug zar gzhug pa zhes bya ba ni 'gro ba'i dug bsad pa'i don du gnas pa'i dug 'byin la/ de nyid sman dang sngags kyi phyag rgyas gsad par bstan pa'o/ /dug ni gzhan la spo bar bya ba dang //zhes bya ba ni rlung gi sa bon gyis bskyed pa'i rlung gi dkyil 'khor gyi steng du dug bzhag la gzhan gyi lus la spo'o/ /de nas kyang shing la sogs pa la spos nas sa'i dkyil 'khor gyis mnan te gzhag pa'i don to/ /lcags kyur ldan pas drang bar bya ba'am//zhes bya ba ni tshigs la zhen pa rnams lcags kyu'i phyag rgyas drang bar bstan to/ /lus la zhen pa'i dug ni bslang ba dang / /zhes bya ba ni rkang pa la zhen te dbyung dka' bar gyur na/ rlung dang me'i dkyil 'khor gyi steng du/ dug bzhag na slong bar byed de/ langs te de nas spo ba dang gsad pa dag bya ba'i don to/ /zos par bza' ba dang zhes bya ba ni snga ma'i rma khar sbrul la sogs pa'i srog chags zar gzhug ces bya ba'i tha tshig go/ /zos pas bcad pa dang zhes bya ba ni gdug pas zin pa'i kha 'phro bcad de dor ba'o/ /sa bcing ba dang zhes bya ba ni dug mched de yan lag gzhan du 'phros su mi gnang bar mtshams bcad pa'o//pho nya btang ba dang zhes bya ba ni sbrul gyis zin tam/ dug 'thungs so zhes sbron pa'i mi ste/ de'i tshul la sogs pa'i brtag pa ni/ nam mkha' lding gi rgyud zhi ba'i gtsug tor rnal 'byor dag las blta bar bya ste/'dir yi ge mangs su dogs pas ma spros so/ /bskrad pa zhes bya ba ni dug gis btab pa nyid la bya ba'i don to/ /klu rnams gzhig pa zhes bya ba ni sbrul mgo'i phyag rgya la sogs pa bstan pas klu'i gdon rnams gzhi la ba'i tha tshig go//rnga dang dung gi sgras ni bslang bar bya/ /zhes bya ba ni sman dang spos la bsngags pas/ rol mo'i cha byad la bskus te/ bsgrags pas dug gis myos pa bslang ba'i don to/ /sa yi steng na sbrul ni brgyad cu dag /gzhan la gnod pa byed cing rnam par 'khyam/zhes bya ba ni sbrul gyi rigs kyi sdom bshad pa'o/ /de dag rnams las nyi shu gdengs ka can/ /'khyil pa drug dang zhes bya ba ni rigs so sor dbye na dug can du rig par bya'o/ /khra bo bcu gsum zhes bya ba ni dug can yang yod dug med kyang yod par rig par bya'o//sum cu gang yin rigs de'i nang du gtogs/ /zhes bya ba ni bar ma do'i rigs su bsdu zhes bya ba'i tha tshig go/ /gcig lhag pa yang bar ma do'i rigs gar yang brtsir rung bas nyes pa med do/ /go d+ha zhes bya ba ni rtsangs pa dang 'dra bar 'dug pa zhig yod do zhes grag go//kha brgyad ces bya ba ni sdom gdug pa'o/ /rnam par dbye ba rab tu mang po yod ces bya ba ni 'dir ma smos pa'i srog chags gdug pa rnams so/ /gci na rtug kha chu reg dang zhes bya ba ni rngad dang shing thog dag las dug dbyung ba'o/ /mthong ba dang zhes bya ba ni klu gdug pas bltas pas mi la dug gtong pa'i don to//mche ba btsugs pa las ni dug kyang gtong / /zhes bya ba ni sbrul la sogs pas zin nas dug ldang pa'o/ /de la dug gi rgyud la mkhas pa yis/ /rab 'bring tha ma rnam pa gsum du dbye/ /zhes bya ba ni gcin rtug la sogs pa'i tshad mang nyung dang //mche bas zin pa'i rma che chung las drag dal dang / dug gi rigs dbye ba shes par bya ste/ de yang nam mkha' lding gi rgyud kang kas bsdus pa las/ ji skad du/ sa yi dug gis blun bcas khyi la sogs/ /'dus pa dag gi nad kyang byed par bshad/de bzhin du ni chu spu rnam ldang ba/ /khu chu 'dzag cing lkog ma 'gag par byed/ /mchi ma 'dzag cing skom par byed pa dang / /khrag 'phrog pas ni mer yang mngon par 'gyur/ /rlung gis mdog med skam zhing lce bskyod dang / /zin pa'i sa yang nag por byed pa yin/ / zhes bshad pa bzhin rtogs par bya ba'i don to/ /dug bdo ba zhes bya ba ni dug langs nas rang dbang med par mi la dug 'dzin pa'o/ /khro bo'i dbang gyur zhes bya ba ni rang bzhin gtum pas 'dzin par bstan pa'o/ /skrag pa zhes bya ba ni mi mthong nas spangs te slar za zhes bya ba'i tha tshig go//spangs pa zhes bya ba ni rnga la sogs pa'i sgras 'drogs nas mi la za ba'i don to/ /bkres pa'i zas phyir zhes bya ba ni zas 'dod pa kho na'i phyir 'dzin pa'i tha tshig go/ /sha kho na yod pa zhes bya ba ni gtses shing tshang bshig pa'o/ /gshin rjes bstan pa zhes bya ba ni glo bur du gang las 'ongs gtol med pas zin nas 'chi bar byed do//lus la brdzis na zhes bya ba ni snad de khros nas slar ro mkhris ldon zhing 'dzin pa'o/ /ma bsgrims te/ gsang sngags cho ga bzhin bzlas bsgrubs na ni/ /zhes bya ba yang de nyid las ji skad du/ khyab bdag byung ba rnams kyi rang bzhin du/ /gyur pas sa dang chu dang me rlung gi/ /ngo bo nyid de gnyen po'i sa bon gyi/ /sbyor ba yis ni dug kyang dbrog par bya/ /zhes bya ba ni 'dir sbyor bar bstan to/ /lha klu lha min zhes bya ba la sogs pa ni gong du gdon rnams kyis zin pa las gso pa'o zhes ni gsungs na/gdon gyi rigs nges par ma gsungs pa rnams kyi 'dir bstan pa'o/ /sa yi steng na gdon ni sna tshogs pa/ /zhes bya ba ni de dag gi gnas bstan pa'o/ /mi yi sha tshil za zhing khrag kyang 'thungs/ /zhes bya ba ni de dag gi zas bstan to/ /mya ngan zhes bya ba la sogs pa ni gdon 'jug pa'i skabs bstan to//de dag rnams kyis zin pa'i mi 'phyan zhing / /zhes bya ba la sogs pa ni gdon gyis zin pa'i rtags bstan to/ /gtor ma 'dod pa'am zhes bya ba la sogs pas ni gdon 'jug pa'i rgyu bstan to/ /de la rtsed mo byed 'dod pa'am//zhes bya ba ni gdon pho mos 'dod chags la brten 'dod pas 'dzin 'dod pa'o/ /bsad pa'i don du zhes bya ba ni de dag gis bza' ba'i phyir bzung nas mi gtong ba'i don to/ /lus la 'bebs shing 'jug ces bya ba ni de dag khong du zhugs nas brlams par gyur pa'o//gsang ba pa rnams gzhig phyir zhes bya ba ni gdon rnams la ngo lon bya dgos par bstan pa'i don to/ /rigs kyi mchog mthu chen sbyin zhes bya ba ni nyid rdo rje lcags kyu ma zhes bya ba yin no/ /gzhan yang / nga yi rigs las byung ba'i rig pa yi//zhes bya ba ni rdo rje rigs kyi pho nya mo bcu la sogs pa'o/ /khro bo bdud rtsi thab sbyor la sogs pas/ /zhes bya ba ni rdo rje rigs kyi khro bo thams cad do/ /gso zhes bya ba ni gsang sngags de rnams kyis gdon dang bral nus pa'i phyir sbyar bar bstan to/ /gdon rnams 'jigs par zhes bya ba ni gsang sngags de rnams kyi gzi brjid zla dpe med par che ba'i phyir ro//de ltar ni mi min zhes bya ba la sogs pas ni 'jig rten pa'i gsang sngags la goms pa'i mthu lta bu med pas ni gdon rnams mi skrag par gsungs so/ /grong khyer sum brtsegs zhes bya ba ni/lha ma yin gnas pa'i grong rdal lo/ /sum brtsegs zhes bya ba la/ lha ma yin gyi gnas dang po ni/ grong khyer 'od can zhes bya ba ste/ lha ma yin mnyes shing brtse ba'i gnas so/ /de'i bdag po ni sgra gcan zhes bya'o/ /lha ma yin gyi gnas gnyis pa ni/grong khyer skar phreng zhes bya ste/ lha ma yin mgul phreng rnams gnas so/ /de'i dbang po bstan pa zhes bya'o/ /lha ma yin gyi gnas gsum pa ni/ grong khyer zab pa zhes bya ste/ lha ma yin kun du 'gro rnams gnas pa'o/ /de'i dbang po ni/ me tog phreng zhes bya ba'o//yang lha ma yin gyi rgyal po thags bzangs ris dang / sgra gcan gyi pho brang rim par brtsegs pa'i zer te snga ma bde'o/ /de dag 'joms byed ces bya ba ni/ lha chen pos lha ma yin gyi gnas de rnams su lcags kyi mda' 'bar ba gcig 'phangs pas bsregs te thal bar bya ba'i phyir ro//lha ma yin gyi gnas bzhi pa ni lha ma yin dpung bzangs rnams dang / de'i dbang po thags bzangs ris gnas pa'i grong khyer mdzes pa zhes bya ba de ci'i phyir mi gzhom zhe na/ grong khyer de ni sa 'og gi steng na gnas pa yin la/ de la 'og tu gyur pa'i gnas gzhan med pas/ phan tshun 'khrug pa dang bral bas/ dgra zla'i 'jigs pa dang bral ba/ nam mkha' gnyis pa lta bu yin te/ ji ltar nam mkha' gza' dang / rgyu skar dang / skar ma'i tshogs dag gis mdzes par byas par de ltar grong khyer de yang /rin po che sna tshogs kyis brgyan cing / mdzes pa yin pas/ de ni lha rnams kyi mthus kyang choms par mi 'gyur ba'i phyir smos so/ /gzi can nyi ma zhes bya ba ni lha'i bu nyi ma'o/ /mes po zhes bya ba ni tshangs pa ste/ de las sems can thams cad 'byung bar 'dod pa'i phyir ro//chu bdag ces bya ba ni klu'i rgyal po rnams so/ /nor bdag ces bya ba ni ku be+e ra'o/ /gnod sbyin rgyal po zhes bya ba ni rnam thos kyi bu'o/ /lhag ma zhes bya ba ni gong ma dag la ltos nas de'i phyir ram gzhan yang zhes bya ba'i don to/ /sa srungs kyi bu zhes bya ba ni glang po che ste/de la zhon pa zhes bya ba ni brgya byin no/ /lha ma yin gyi grong khyer 'jig byed ces bya ba yang de nyid do/ /'byung po'i rig sngags 'dir ni kun mthong dang / /zhes bya ba la sogs pas ni 'jig rten pa'i gsang sngags de rnams de ltar smad pa yin gyis kyang gdon gyi las kyi rgyus la mkhas par bya ba'i phyir bslab dgos par bstan to//rig gsum 'phel dang zhes bya ba ni sangs rgyas te de la lhag pa'i tshul khrims dang lhag pa'i sems dang lhag pa'i shes rab kyi rig pa dpag tu med pa'i don to/ / srid gsum mthar phyin dang zhes bya ba ni khams gsum las rnam par grol ba'i phyir ro/ /nyes pa gsum spangs zhes bya ba ni 'dod chags dang zhe sdang dang gti mug gi nyes pa gtan du bsal ba'i tha tshig go/ /lam gsum thugs su chud dang zhes bya ba ni theg pa gsum gyi tshul mkhyen pa'i phyir ro//des pa de'i sras zhes bya ba ni nyan thos dang byang chub sems dpa' rnams so/ /de'i lam rjes su 'gro ba'i lha dang lha min zhes bya ba ni 'jig rten pa'i lha sangs rgyas la phyogs pas so so nas rig sngags phul ba rnams te/ bdag nyid chen po zhes bya ba ni mthong ba'i chos la mngon par mtho ba'i dpal thob pa'i don to/ /mun pa sel ba zhes bya ba ni yang dag pa'i shes rab kyis ma rig pa'i mun pa bsal bas nges par legs par 'gyur ro/ /byin gyis brlabs pa zhes bya ba ni bshad ma thag pa'i 'jig rten pas so so nas byin gyis brlabs pas so//'jig rten lha tshogs rnams kyis bsngags pa yi/ /gsang sngags mthu yis zhes bya ba ni de bzhin gshegs pa 'jig rten du ma byung ba'i tshe so so nas bshad pa rnams te/ de la bskyod du med ces bya ba ni snga ma'i mthu la des 'gran du mi bzod ces bya ba'i don to//gzhan ni go bar sla bas ma phye'o/ /khyod kyi spyod pa sna tshogs zhes bya ba ni gang la gang gis 'dul ba de la de'i gzugs dang tshul du bstan pas gdul bya'i 'gro ba rnams 'dzud pa'i don to/ /kha cig gis ni rdo rje 'bar ba mthong //zhes bya ba ni dbang po 'dul ba rnams la ni brgya byin gyi gzugs dang rdo rje thogs pa dang / lha rnams dang mthun pa'i tshul du bstan to zhes bya ba'i tha tshig go/ /gzhan gyi dbyug to gzhan gyi 'khor lo can/ /zhes bya ba de bzhin du ku be+e ra'i gzugs su yang ston pa'i don to//'khor lo can zhes bya ba ni khyab 'jug go/ /mdung rtse gsum thogs pa zhes bya ba ni dbang ldan no/ /zhags pa can zhes bya ba ni chu lha'o/ /ral gri thogs pa zhes bya ba ni bden bral lo/ /gzhu thogs pa ni nyi ma'o/ /be con can zhes bya ba ni gshin rje'o/ /de bzhin du rlung lha dang me lha la sogs te 'dir ma smos pa'i lha la sogs pa thams cad kyi gzugs su yang ston to//'jigs pa'i gzugs can zhes bya ba ni 'phags pa rdo rje ri rab kyi rtse mo khang pa brtsegs pa'i gzungs las ji skad du/ 'jigs pa bas kyang 'jigs par byed pa 'chi bdag kyang skrag par byed pa khams gsum pa thams cad kyis bsdus pa lta bu'i lus dang ldan pa'i khro bor gyur nas zhes gsungs pa lta bur yang ston pa'i don to//mtshon cha kun thogs zhes bya ba yang de nyid las/ lag pa stong phrag du ma la/ /rdo rje dang zhags pa dang gtun shing dang zhes rgya cher gsungs pa lta bur ston pa'i phyir ro//zhi ba nyid du mthong zhes bya ba ni des 'dul ba rnams la de ltar snang ba'i tha tshig go/ /dmigs med sku mnga' zhes bya ba ni chos kyi sku dang ldan pa'i don to/ /gzhan ni go bar zad do/ /dbul ba'i mun pa zhes bya ba ni shes rab dang dpal dang gzugs dang nor rnams gang la yang mi snang ba'o//gsal nas nyi ma bzhin du 'bar bar 'gyur/ /zhes bya ba ni shes rab dang dpal dang gzugs dang nor rnams legs par rdzogs par gyur nas 'jig rten na mngon par mtho bar snang ba'i don to//yan lag mi nyams zhes bya ba ni dngos grub thob nas kyang bzlas brjod kyi yan lag mi nyams pas zlos pa'i don to/ /sems kyang mi nyams shing zhes bya ba ni de'i dus su 'dod pa'i yon tan la spyod kyang phyin ci log gi dbang du mi 'gyur ba'i tha tshig go/ / nad dang sdug bsngal lus nyams mi 'gyur ba/ /khyod la dad pa'i mis ni thob par 'gyur/ /zhes bya ba ni gnod pa sna tshogs sel ba'i sman pa'i rgyal po yin par brjod pa'o/ /gzhan ni go sla bas ma phye'o/ /le'u bcu gcig pa'i don bshad zin to/ /'phags pa dpung bzangs kyis zhus pa'i rgyud kyi tshig gi don bshad pa'i brjed byang rdzogs so/