CLOSE WINDOW

D2662
བོད་ཡིག

@##/ /rgya gar skad du/ bai ro tsa na a b+hi sam+bo d+hi tan+t+ra piN+DAr+tha/ bod skad du/ rnam par snang mdzad mngon par rdzogs par byang chub pa'i rgyud kyi bsdus pa'i don/ bam po dang po/ bcom ldan 'das rnam par snang mdzad de bzhin gshegs pa'i ye shes kyi sku can la phyag 'tshal lo/ /gang zhig nyid kyi sku gsung thugs bcas pa'i/ /tshogs zad mi shes rnams kyis 'jig rten gyi//skye rgyud rab tu zhi mdzad bde gshegs las/ /'byung ba'i sku gsung stsol mdzad byang chub phyir/ /rdo rje can dang rgyal ba'i sras rnams kyis/ /bsten bya rnam par snang mdzad de dang ni/ /de yi sku gsung nyid la'ang phyag 'tshal nas//rnam snang rgyud bsdus pa yi don bsdus bshad/ /de la sangs rgyas dang byang chub sems dpa' bcom ldan 'das kyis rang dang gzhan gyi don phun sum tshogs pa thugs su chud par mdzad nas/gdul bya rnams de kho na la gzud pa'i phyir rang dang gzhan gyi don phun sum tshogs pa de dag nyid gsang sngags kyi spyod pa ston par byed pa dang / pha rol tu phyin pa'i spyod pa ston par byed pa'i mdo sde rnams kyis bstan to//de lta bas na rgyud 'di ni 'di lta ste/ bsdus pa dang rgyas pa dang rnam pa gnyis kyi sgo nas bcom ldan 'das rnam par snang mdzad kyi rang gi don phun sum tshogs pa dang gzhan gyi don phun sum tshogs pa'i don bsdu bar bzhed do//de la bsdus pa'i sgo nas ni/ /rnam par snang mdzad mngon par rdzogs par byang chub pa rnam par sprul pa byin gyis rlob pa zhes bya ba'i ming gi / rgyud kyi don thams cad ston par byed pa 'dis bsdus par bzhed pa yin no/ /rgyas pa'i sgo nas ni/ rnam par snang mdzad kyi rgyud 'di mtha' dag gis bcom ldan 'das rnam par snang mdzad kyi rang gi don phun sum tshogs pa'i rgyu dang ngo bo nyid dang /'bras bu phun sum tshogs pa gsum gyi mtshan nyid can rab tu dbye ba dang / de bzhin du gzhan gyi don phun sum tshogs pa'i thabs phyag rgya dang / dkyil 'khor dang gsang sngags la sogs pa'i mtshan nyid can bstan pa dang /rab tu dbye ba'i sgo nas bsdus par bzhed pa yin par blta'o/ /de la rgyu phun sum tshogs pa ni/ 'di las bcom ldan 'das rnam par snang mdzad kyi 'grub pa'i lam gyi rim pa bstan pa'i sgo nas brjod pa yin no/ / ngo bo nyid phun sum tshogs pa ni mngon par rdzogs par byang chub pa'i mtshan nyid bstan pa'i sgo nas brjod pa yin no/ /'bras bu phun sum tshogs pa ni sku la sogs pa bkod pa mi zad pa'i rnam par sprul pa'i mtshan nyid bstan pa'i sgo nas brjod pa yin no/ /gzhan gyi don phun sum tshogs pa ni sku la sogs pa mi zad pa rnam par sprul pa de nyid kyi byin gyi rlabs kyi phyag rgya dang /gsang sngags dang / dkyil 'khor la sogs par brtags pa'i sgo thabs dang bcas par brjod pa yin no/ /rnam par sprul pa 'di phyag rgya dang gsang sngags la sogs par byin gyis brlabs pa'i sgo nas gzhan gyi don du brtags pa de yang rnam pa nyi shu rtsa gcig tu rig par bya ste/'di lta ste/ dkyil 'khor gyi slob dpon gyi mtshan nyid bstan pa dang / slob ma'i mtshan nyid rnam par dbye ba dang / dkyil 'khor gyi sa'i mtshan nyid dang / yongs su dag pa dang /yongs su gzung ba'i mtshan nyid dang / dngos po gsum bstan pa dang / slob ma sta gon du gnas pa'i cho ga brjod pa dang / dkyil 'khor gyi thig bri ba dang / de'i rim pa dang / de'i sgo khyud kyi mtshan nyid dang / dngos po gsum rnam par dbye ba dang / snying rje chen po 'byung ba'i dkyil 'khor du dkyil 'khor gyi lha rnams kyi lus bkod pa dag gis bcom ldan 'das kyi sku bkod pa mi zad pa'i byin gyi rlabs brjod pa dang /yi ge 'khor lo yongs su bskor ba'i dkyil 'khor du bcom ldan 'das kyi gsung bkod pa mi zad pa'i byin gyi rlabs su gyur pa'i sa bon gyi yi ge rnams kyis dkyil 'khor gyi lha rnams dgod pa dang /gsang ba'i dkyil 'khor du bcom ldan 'das rnam par snang mdzad kyi thugs bkod pa mi zad pa'i byin gyi rlabs su gyur pa me dang rlung dang / sa dang chu'i dkyil 'khor la gnas pa'i phyag rgya'i khyad par dag gis dkyil 'khor de'i lha rnams dgod pa'i bye brag bstan pa dang /tshon rtsi dgye ba'i bye brag bstan pa dang / dkyil 'khor bris zin nas dkyil 'khor gyi lha rnams byin gyis brlab pa'i sbyor ba bstan pa dang / de dag nyid la phyi nang gi mchod pa bya ba'i phyir mchod pa'i yan lag bstan pa dang / slob ma gzung ba'i cho ga brjod pa dang / de dag nyid la dam tshig bsgrags pa'i cho ga bstan pa dang / de dag dbang bskur ba'i cho ga bstan pa dang / de bzhin du rig sngags 'dzin du gzhug pa'i cho ga brjod pa dang / rig sngags dang / gsang sngags dang / phyag rgya rnams kyi khyad par rgyas par bstan pa dang /sgrub pa'i yan lag rab tu dbye ba bstan pa dang / rig sngags dang / gsang sngags la sogs pa'i sgrub pa'i dkyil 'khor la sogs pa sgrub pa'i yan lag bstan pa dang / grub pa'i mtshan ma bstan pa dang / phyi dang nang gi grub pa'i mtshan nyid brjod pa dang /mes bya ba'i cho ga bstan pa dang / sgrub pa'i yan lag rab tu dbye ba bstan pa'o/ /de lta bas na 'di las ni dngos po 'di rnams kyi mtshan nyid rang gi dang / gzhan gyi don bzlas brjod la sogs pa mdor bstan par ldan pa dang / rgyas par bstan pa'i sgo nas bstan te/de'i phyir blo bzang po rnams dran pa bskyed pa'i phyir 'di dag gis bsdus pa'i don ci rigs par mdor bsdus nas rig par bya'o/ /de la mdor na/ rnam par snang mdzad chen po mngon par rdzogs par byang chub pa zhes bya ba'i ming 'dis ni rgyud mtha' dag gi don ji ltar bsdus pa de bzhin du 'di'i ming bye brag tu bstan pa yin no//gang gi phyir gdul ba rnam pa gnyis yin pa de'i phyir kha cig ni theg pa chen po la sogs pa'i mdo sde las bstan pa'i sbyin pa la sogs pa'i pha rol tu phyin pa la goms pas mngon par mtho pa'i mtshan nyid lha dang mi'i dpal bsod nams dang ye shes kyi tshogs yongs su rdzogs pa sngon du 'gro ba nyams su myong bar byas te/rim gyis dpal rnam par snang mdzad kyi go 'phang 'dod do/ /gzhan dag ni rig sngags dang / gsang sngags mnyes par byed pa'i sgo nas bsod nams dang ye shes kyi tshogs bsags te/de'i 'bras bur gyur pa lha dang mi'i dpal nyams su myong bar byas nas rnam par snang mdzad chen po'i go 'phang 'dod de/ 'di ltar pha rol tu phyin pa'i spyod pa la mos pa rnams la dngos su phan gdags pa'i phyir mdo sde'i pha rol tu phyin pa'i spyod pa gtsor mdzad pa 'phags pa sa bcu pa dang /dkon mchog sprin dang blo gros mi zad pa la sogs pa dag dang / don zab cing rgya che ba gtsor mdzad pa 'phags pa ting nge 'dzin gyi rgyal po dang / sdong pos brgyan pa dang / shes rab kyi pha rol tu phyin pa la sogs pa dag bstan to/ /gsang sngags kyi spyod pa rnams la mos pa ni kha cig la phan gdags pa'i phyir rnal 'byor gyi lugs phyag rgya chen po la sogs pa sgrub pa'i rnal 'byor la goms pa gtsor mdzad cing rang gi lhag pa'i lha mnyes par bya ba dang /rjes su mthun pa'i lus la sogs pa'i spyod pa dang / mchod pa'i yan lag gi khyad par dag ci rigs par bye brag tu bstan pa/'phags pa de kho na nyid bsdus pa'i rgyud dang / dpal mchog dang po la sogs pa dag bstan to/ /de las gzhan pa'i gdul ba dag la ni dad pa'i sgo nas bya ba'i lugs can gyi rgyud phyi'i bya ba'i khyad par yang dag par bstan pa thabs dang shes rab la goms pa gtsor mdzad pa rang dang gzhan gyi don phun sum tshogs par byed pa dag bstan te/'di ltar 'phags pa dam tshig gsum gyi rgyal po dang / sku gsum gyi gtsug tor dang / phyag na rdo rje dbang bskur ba la sogs pa dag yin no/ /rnam par snang mdzad mngon par rdzogs par byang chub pa rnam par sprul pa byin gyis rlob pa'i rgyud don dam pa'i tshul rab tu bsgrags pa sgrub pa'i sbyor ba thabs dang shes rab la goms pa sngon du 'gro ba yang dag par bstan pa phyi'i gtsang sbra spyod pa la sogs pa'i sgrub pa rnam par smad pa don dam pa'i rnal 'byor la goms pa'i rgyur gyur pa bstan pa 'di yang gdul ba'i skye bo bya ba'i rgyud kyi lugs de lta bu la mos pa dag gzung ba'i phyir bya ba'i rgyud do zhes bsgrags so//gsang sngags kyi lugs la mos pa'i gdul ba de dag kyang / rnam pa gsum ste/ 'di lta ste/ mgo smos pas go ba dang /rnam par phye bas go ba dang / tshig lhur len pa'o/ /de la shes rab shin tu rno ba dang / theg pa chen po la sogs pa'i chos cher go ba dang ldan pa dag ni tshig dang ngag mdor bsdus pas kyang mgo smos pa'i don gyis rigs kun shes par nus pas mgo smos pas go ba zhes bya'o//shes rab 'bring dang theg pa chen po la sogs pa'i chos 'bring du go ba dang ldan pa dag ni tshig dang ngag rnam par phye ba'i don 'dzin par nus pas rnam par phye bas go ba yin no/ /shes rab phal pa dang / chos phal par go ba dang ldan pa dag ni tshig re re nas rnam par bshad pas don 'dzin nus pa'i phyir tshig lhur len pa zhes bstan to//de la gdul ba mgo smos pas go ba rnams kyi dbang du mdzad do/ /don dang mthun pa'i ming mdo sde dang / rgyud dang / ting nge 'dzin dang / rnam par thar pa'i sgo dang / byang chub sems dpa' la sogs pa dag kho nas bstan te/'di ltar de dag gis ni mdor bsdus pa las kyang mgo smos pa'i don rgyas par khong du chud par nus so snyam du dgongs pa yin no/ /rnam par phye bas go ba rnams la yang phan gdags pa'i phyir ming de dag nyid kyi don ni rab tu dbye ba tsam du brjod do//tshig lhur len pa rnams la ni phan gdags pa'i phyir rgyud la sogs pa'i tshig de dag nyid kyi yan lag rnam par dbye ba brtag pa'i rim gyis rgyas par spros te rnam par bshad pa mdzad do/ /de lta bas na 'dir rnam par snang mdzad mngon par rdzogs par byang chub pa rnam par sprul pa byin gyis rlob pa zhes bya ba ni bcom ldan 'das kyis ming don dang mthun pa bye brag tu ston par mdzad pa mgo smos pas go ba rnams la phan gdags par bstan pa ste/'di ltar de ltar de dag ni shes rab shin tu rno ba dang theg pa chen po la sogs pa'i chos cher go pa dang ldan pas rgyud 'di'i ming thos pas kyang don 'di khong du chud par byed de/'di lta ste/ 'di ltar bcom ldan 'das rnam par snang mdzad ni bsod nams dang ye shes kyi tshogs phul du byung ba dang ldan pa yin no/ /mngon par rdzogs par byang chub pa ni des chos thams cad ngo bo nyid med par thugs su chud pa yin te/skad cig ma dang po la rang gi ye shes kyi rjes su 'gro ba'i ngo bo nyid nyon mongs pa dang shes bya'i sgrib pa'i nyes pa spangs pa/ nam mkha' bzhin du spros pa'i bag chags kyi gnas thams cad bsal ba shin tu 'od gsal zhing rang rig pa'i ngo bo nyid yin no/ /byang chub de brnyes pa kho na'i chos nyid kyis thob pa sku la sogs pa bkod pa sems can yongs su dag pa dang yongs su ma dag pa la sogs pa dang 'dra ba dang /sangs rgyas kyi gsung bkod pa sems can thams cad kyi skad du gsung bar mkhas pa dang / ye shes kyi dkyil 'khor don dam pa dang /kun rdzob kyi bden pa yul can 'grub pas ni rnam par snang mdzad mngon par rdzogs par byang chub pa rnam par sprul pa yin te/ de bzhin du de bzhin gshegs pa'i skye ba 'byung ba bstan pa'i mdo las kyang / rigs kyi bu de bzhin gshegs pa rnams mngon par rdzogs par sangs rgyas nas ting nge 'dzin sangs rgyas shin tu rnam par sangs rgyas pa zhes bya ba la snyoms par 'jug ste/snyoms par zhugs ma thag tu sems can rnams ji snyed pa de snyed kyi sku kun du gnas so/ /sku ci snyed pa de snyed kyi gsung dang / sku dang gsung ji snyed pa de snyed kyi thugs dag kun du gnas so//kye rgyal ba'i sras dag de ltar na sems can gyi khams tshad med pa yin pas de bzhin gshegs pa rnams kyi sku dang / gsung dang / thugs rab 'byam tshad med pa kho nar rtogs par bya'o zhes bya ba rgyas par gsungs sa/ /yang don 'di nyid rgyud 'di kho na las/de nas byang chub sems dpa' sems dpa' chen po kun du bzang po la sogs pa de dag gis bcom ldan 'das rnam par snang mdzad mi g.yo ba'i sku byang chub kyi snying po mchog dam pa la zhugs par mthong ngo zhes gang rgyas par gsungs pa 'byung ba'i gzhung 'dis yang dag par bstan te rgyud las brtag par bya'o//rnam par sprul pa ni rnam par rol pa ste/ sku la sogs pa bkod pa rnam par sprul pa zhes bya ba 'di ni sems can thams cad yang dag par dga' bar byed pa yin no zhes bya ba'i tha tshig go zhes bya bar bshad par 'gyur ro/ /de lta bas na/rnam par snang mdzad mngon par rdzogs par byang chub pa'i rnam par sprul pa 'di lhag par gnas pa la de skad ces bya ste/ de la dgongs pa ni ci rigs par sems can thams cad la sogs pa'i lus dang ngag dang yid dang 'dra ba nyid bkod pa mi zad pa'i mtshan nyid kyis rnam par sprul pa de phyag rgya dang /dkyil 'khor dang / gsang sngags kyi sgo nas mtshon te/ 'khor ba ji srid par sems can skal ba ji lta ba bzhin du yang dag par dga' bar byed par byin gyis rlob cing lhag par gnas pa gang yin pa de rjod par byed pa ni rgyud 'di yin no//gdul bya mgo smos pas go bas 'di'i ming gi don nges par dpyad pa nyid kyis rgyud kyi don mtha' dag mdor go bar byed do snyam pa 'di yin no/ /de'i phyir gdul bya mgo smos pas go ba rnams la phan gdags pa'i phyir ming don dang mthun pa rnam par snang mdzad mngon par rdzogs par byang chub pa rnam par sprul pa byin gyis rlob pa zhes bya ba 'dir btags so//gzhan yang rnam par snang mdzad mngon par rdzogs par byang chub pa rnam par sprul pa byin gyis rlob pa zhes bya ba'i ming don dang mthun pa gang yin pa 'di ni sems can mgo smos pas go ba la phan gdags pa 'ba' zhig tu ma zad kyi/gzhan rgyud 'di'i 'brel pa dang / brjod par bya ba dang / dgos pa yang ston par byed de/ 'di ltar rgyud 'dis rnam par snang mdzad kyi sku dang / gsung dang / thugs mi zad pa rnam par sprul pa phyag rgya dang dkyil 'khor la sogs pa'i sgo nas mtshon par byed pas de'i phyir de'i sku la sogs pa bkod pa ni rgyud 'di'i rgyu yin la/rgyud 'di ni de'i 'bras bu yin no zhes bya bar rtogs par bya'o/ /brjod par bya ba yang sku la sogs bkod pa phyag rgya dang dkyil 'khor la sogs pas mtshon pa de nyid yin no zhes bya bar khong du chud par bya'o/ / 'di'i dgos pa ni phyag rgya dang dkyil 'khor la sogs pas mtshon pa yin no/ /mtshon pa de'i dgos pa ni/ nges par legs pa dang mngon par mtho ba thob pa kho na yin no zhes bya bar khong du chud par bya'o/ /gdul ba rnam par spros pas go ba rnams kyis ni ming don dang mthun pas yang dag par bstan pa'i don rgyas par khong du chud par mi nus pas de dag la phan gdags pa'i phyir/bcom ldan 'das de bzhin gshegs pa byin gyis rlob pa zhes bya ba la sogs pas rgyud bshad pa 'di mdzad do/ /'di ltar de dag la rnam par snang mdzad kyi rgyu ni gang / de'i ngo bo nyid ni gang / de'i mngon par rdzogs pa'i byang chub pa'i rgyu ni gang /de'i ngo bo nyid ni ji lta bu/ de'i rnam par sprul pa ni gang gi tshe 'byung / de'i ngo bo nyid ni gang / rnam par sprul pa de ni ji ltar na phyag rgya dang dkyil 'khor la sogs pa'i sgo nas mtshon pa brjod dgos te/ de'i phyir de dag la phan gdags par de dag thams cad rgyud 'di las ston to zhes bya par khong du chud par bya'o//de lta bas na tshig 'di rnams so sor bsdus pa'i don bstan pa rgyud kyi tshig rnams yang dag par bsdu bar bya'o/ /de la rnam par snang mdzad kyi go 'phang thob par 'gyur ba'i rgyu ni 'di lta ste/ 'jig rten pa'i lam gyis 'jug pa dang /'jig rten las 'das pa'i lam gyis 'grub pa'o/ /de la rgyud 'di las 'jig rten pa'i lam gyis 'jug pa'i rim pa 'di yang dag par bstan te/ 'di lta ste/ sems can 'khor ba pa'i khyad par ngar 'dzin pa dang nga yir 'dzin pa dag gis bdag tu 'dzin pas zin pa 'ga' kho na sdug bsngal gsum gyi rgud pa sa gzir ba ni chos kyi 'du shes kyis bsnyung ba'i sems la sogs pa'i sems brgyad skyed par byed de/rgyud 'di las byis pa so so'i skye bo phyugs dang mtshungs pa dag brgya lam na res 'ga' res 'ga' zhig la chos kyi 'du shes 'byung ba ni 'di lta ste/bsnyung bar gnas pa la gnas par bya'o zhes bya ba la sogs pa nas/ 'di ni stobs su gyur pa ste/ sems brgyad par rgyal ba rnams kyis bshad do zhes bya ba'i bar du gsungs pa yin no/ /de lta bas na de ltar bdag la sogs par nga rgyal byed pas zin pa'i sbyin pa dang tshul khrims la goms par byas pa'i rim gyis 'jig rten pa'i lam ston pa khyab 'jug dang /lha chen po dang tshangs pa la sogs pa ston pa nyid du khas blangs pa ni de dag gi bstan pa la zhugs pa rnams la de dag gi bstan bcos kyi don khong du chud par bya ste/ de dag gis nye bar bstan pa'i lam gyis 'ba' zhig pa nyid la blo nye bar bskyed nas 'di snyam du bdag las dang nyon mongs pa la sogs pa'i zhags pa lhan cig skyes pa dang /glo bur ba dang bral ba 'ba' zhig pa'i dngos po ni 'ba' zhig pa nyid ces bya'o/ /de'i phyir 'ba' zhig pa nyid kyi mtshan nyid kyi thar pa la yang dag pa ma yin pa'i grong khyer 'di dag thams cad med pa nyid de bdag 'ba' zhig pa nyid cha phra ba mi gsal ba skra'i rtse mo 'bum gyi cha tsam zhig lus so snyam du rtog par byed do//de'i phyir de dag bdag tu 'dzin pas chos thams cad stong pa nyid kho nar rtogs par byed pas lam dam pa ma yin no zhes ston cing 'di yang spang bar bya ba'i phyogs nyid yin par ston par mdzad de/gsang ba'i bdag po gzhan yang khyad par rtogs pa ji skad du/ yongs su bsgrags pa'i khyad par de dang de dag las khyad par du gnas pa rnams 'ba' zhig pa nyid kyi don du blo skye zhing de la yang yod do zhes stong pa nyid kho na la dngos por sems te zhes bya ba la sogs pa/gang dag stong nyid mi shes pa/ /de dag mya ngan 'das mi shes/ /zhes bya ba'i bar gang gsungs pa yin no/ /de lta bas na 'di'i rim pa 'dis dge ba'i bshes gnyen la yang dag par bstan te/ rigs pa dang /lung dag gis thos pa dang bsams pa las byung ba'i shes rab kyis 'jig rten pa'i lam yang thar par byed pa'i lam ma yin no zhes nges par brtags nas 'jig rten las 'das pa'i lam ston par byed pa'i dge ba'i bshes gnyen dag la brten te/ de las nye bar bsten pa 'jig rten las 'das pa'i lam gyis thar par bya ba'i phyir yang dag par rtsol ba rtsom par byed do//lam de yang 'dir rnam par snang mdzad chen po'i go 'phang thob par byed pa'i mtshan nyid kyi thar pa'i lam yin par dgongs pa yin no/ /de la 'jug pa yang 'di las sems can dbang po rtul po dang /dbang po rnon po'i bye brag gis gang zag la bdag med par rtogs pa dang / gang zag dang chos la bdag med par rtogs pa'i sgo nas rnam pa gnyis su bstan to/ /de la dbang po rtul po ni/ dang po nyid du 'jig rten pa'i lam 'ba' zhig pa'i lam spangs nas gang zag la bdag med par rtogs pa'i lam la 'jug ste/'og nas 'dod chags kyi sems la sogs pa'i mtshan nyid can 'jig rten pa'i sems brgya drug cu 'byung ba de lta bu rnams sun phyung nas gang zag la bdag med par rtogs par byed de/ 'dod chags kyi sems dang / 'dod chags dang bral ba'i sems dang /zhe sdang gi sems dang / byams pa'i sems dang / gti mug gi sems dang zhes bya ba la sogs pa rgyas par bya ste/ 'jig rten pa'i sems brgya drug cu bskal pa gsum gyis 'das nas 'jig rten las 'das pa'i sems skye ste/ 'di lta ste/ 'di ni phung po tsam nyid de//bdag ni nam yang yod ma yin/ /dbang po'i grong khyer khams rnams kyis/ /'jig rten don med rnam par nyams/ /zhes bya ba la sogs pa'i bar gang gsungs pa yin no/ /rnal 'byor pa dbang po rnon po ni dang po nyid du bdag la sogs pa dang / phung po dang khams dang skye mched dang /gzung ba dang 'dzin pa'i rnam par rtog pa dag bsal te/ 'jig rten pa'i sems brgya drug cu las 'das nas gang zag dang chos la bdag med pa la 'jug ste/ gsang ba'i bdag po gzhan yang theg pa chen pos bgrod pa gzhan gyi dring mi 'jog pa rnams la chos la bdag med pa'i sems skye'o//de ci'i phyir zhe na/ 'di ltar 'di dag sngon spyad pa spyod cing phung po'i gnas rnam par 'jig pa na ngo bo nyid yongs su shes pa'i phyir/ sgyu ma dang smig rgyu dang gzugs brnyan dang brag ca dang mgal me'i 'khor lo dang / dri za'i grong khyer lta bu'i 'du shes skyes so//gsang ba'i bdag po de'i phyir de dag gi sems kyi dbang du byas pa'i chos la bdag med pa nyid kyang spang bar bya ste zhes bya ba la sogs pa gang gsungs pa yin no/ /de lta bas na de ltar dbang po rtul po dang dbang po rnon po dag las cig shos gang zag la bdag med pa'i lam la goms par byed pa'am/dbang po rnon po chos dang gang zag la bdag med par byed pa'i lam la goms par byed pa na rnal 'byor pa dbang po rtul po 'dod chags la sogs pa 'jig rten pa'i sems brgya drug cu spangs pa sngon du 'gro ba can rim gyis rgyun du zhugs pa'i 'bras bu la 'jug pa la sogs pa 'bras bu brgyad thob nas phyis phung po la sogs pa de dag nyid la sgyu ma dang smig rgyu la sogs pa'i ngo bo nyid lta bur zhugs te/phung po dang / khams dang / skye mched kyi 'du shes ma lus pa bral bas de dag nyid zhi ba stong pa nyid kyi mtshan nyid kho na rtogs par 'gyur te/de skad du/ gsang ba'i bdag po de la 'jig rten las 'das pa'i sems la gnas pa rnams la yang phung po dag la yod do snyam pa'i blo nye bar skye'o/ /gang de'i tshe phung po dag la 'dod chags dang bral ba bskyed pa de'i tshe/ lbu ba dang chu'i chu bur dang smig rgyu dang mtshungs par 'jig pas rnam par grol bar 'gyur te/'di lta ste/ phung po dang / khams dang / skye mched dang / gzung ba dang 'dzin pa rnam par spangs la/ chos nyid kyi rang bzhin ngo bo zhi ba'i dbyings rtogs par 'gyur ro/ /gsang ba'i bdag po 'jig rten las 'das pa'i sems phyin ci log dang /phyin ci ma log pa'i sems kyi khyad par brgyad dang 'brel pa las dang nyon mongs pa'i dra ba dang 'brel pa 'di ni rnal 'byor pa dag ces bya ba la sogs pa rgyas par gsungs pa yin no/ /de la 'dod chags kyi sems la sogs pa dag las kha cig lung las nye bar bstan pa'i lugs su bsdus pa'i don gyi sgo nyid nas gsal bar bya ba brjod do//de la 'dod chags kyi sems gang zhe na/ chags pa can chos kun du stan pa'o zhes gang gsungs pa rgyud kyi tshig 'di ni mdor bsdus nas rnam par dbye ba nye bar bstan par bya ste/ de la ci rigs par 'dod pa'i khams na spyod pa'i gzugs dang /sgra dang / dri dang / ro dang / reg bya'i mtshan nyid kyi yul can gyi chags pa dang mngon par zhen pa gang yin pa dang / de bzhin du gzugs dang gzugs med pa na spyod pa dang / zag pa med pa dang / bsam gtan dang / ting nge 'dzin dang /snyoms par 'jug pa dang / rnam par thar pa la sogs pa dag la/ chags pa dang mngon par zhen ba dang / ro myong ba gang yin pa de ni 'dir 'dod chags kyi sgrar dgongs pa yin no/ /sems can gang 'ga' zhig la 'dod chags kyi mtshan nyid sems las byung ba de dang ldan pa'i sems yod pa de ni chags pa can yin no zhes bya bar bzhed do//de lta bu de ji skad bshad pa'i yul ma thob pa thob par bya ba dang / thob pa 'phel zhing rgyas par bya ba'i phyir ci zhig byed ce na/ chos kun du ston zhes bya ba gsungs so/ /chos zhes bya ba'i sgra ni ngan 'gro dmyal ba dang / yi dwags dang dud 'gro'i g.yang sar lhung ba las 'dzin pa'i phyir chos te/de yang mdor na/ sbyin pa dang / tshul khrims kyi sdom pa dang / bsam gtan la sogs pa la goms pa'i mtshan nyid yin no/ /des na dgongs pa ni ji skad bshad pa'i yul de thob par 'dod pa dang / thob pa mngon par 'phel bar bya ba'i phyir yul de la chags pa can du gyur na/de thob par bya ba kho na'i phyir/ sbyin pa la sogs pa'i chos rnams la 'jug gi 'khor ba'i btson ra nas mngon par 'byung ba'i lam du gyur pa zag pa med pa'i bsam gtan dang ting nge 'dzin dang snyoms par 'jug pa dag la ro myong ba med par 'jug pa ni ma yin no snyam pa 'di yin no//de ltar na sems 'di yang thar pa 'dod pas gang zag la bdag med pa'i lam la goms pa'am/ chos dang gang zag la bdag med pa goms pa'i sgo nas spang bar bya ba yin no zhes 'di nyid las sems brgya drug cu bshad pa'i mjug tu rgyud las bshad pa'i tshig yang dag par bsdu ba bstan pa bshad par bya'o//'di las gzhan pa zhe sdang la sogs pa'i sems de dag las 'da' ba dang / rnam par dbye ba'i bya ba 'og nas 'byung ba rnams la yang phal cher lugs 'di kho nas bsgre bar bya'o/ /'di dag gi khyad par gang yin pa de ni 'dir brjod par bya ste/ sdang bas chos kun du bsten pa'o zhes bya ba 'di'i don ni dgra bsad pa'i bsam pas bzlas brjod dang / sbyin sreg dang / sbyin pa dang tshul khrims la sogs pa'i mtshan nyid kyi chos de kho na byed pa yin no snyam du dgongs pa yin no/ /ma dpyad par chos kun du bsten pa'o zhes bya ba 'di sbyin pa dang tshul khrims la sogs pa'i mtshan nyid kyi chos de'i mthong ba dang ma mthong ba'i 'bras bu 'di yin no zhes ma dpyad par ba lang gi khyu'i tshul du 'jug ces bya ba'i tha tshig go//de ltar na byams pa dang ldan pas chos kun du bsten pa'o zhes bya ba de lta bu la sogs pa rgya mtsho lta bu'i sems la thug pa'i bar gyi tshig rnams kyang khong du chud par sla ba'i phyir/bdag gis 'dir rnam par ma phye bar khong du chud par bya'o/ /de la skye bar 'gyur ba'i sems gang zhe na/ gang gi sems 'du byed pa gang kho na dang skyes pa de kho na dang lhan cig 'gro ba ste zhes bya ba 'di'i don ni yul 'ga' zhig la 'dod chags la sogs pa'i 'du byed gang kho na dang mtshungs par ldan pa'i sems skyes pa sems las byung ba de kho na dang lhan cig skad cig ma'i 'gag pa'am rgyun gyis 'gags pas rnam par 'jig par 'gyur gyi/'dod chags la sogs pa'i 'du byed dang mtshungs par ldan pa'i sems kyi rgyun de'i yul brgyud pa gzhan thob par bya ba'i phyir/sbyin pa dang tshul khrims la sogs pa'i chos kun du rtsom pa de ni med do zhes bya ba yin no/ /de lta bas na 'dod chags la sogs pa skye bar 'gyur ba'i sems la thug gi bar gyi drug cu po 'di dag brgya drug cur 'gyur ba de bstan pa'i phyir/gcig gnyis gsum bzhi lnga gnyis su bsgyur ba byas pas 'jig rten pa'i sems brgya drug cur bskal pa gsum gyis 'das nas zhes bya ba gsungs so/ /de bas na yan lag gi don ni/ gcig dang gnyis dang gsum dang bzhi dang lnga gnyis su bsgyur ba 'di dag ni gcig gnyis gsum bzhi lnga gnyis su bsgyur ba 'di dag yin la/de dag bya ba ni/ 'dod chags la sogs pa'i sems gcig gnyis gsum la sogs par bgrangs pas brgya drug cur bya ba yin no/ /'dir gnyis su bsgyur ba byas pa zhes bya ba gzhan gnyis su bsgyur bar bya ba'i skabs ma yin pa'i phyir gcig dang gnyis dang gsum la sogs pa'i sems lnga po 'di dag nyid so sor gnyis su bsgyur bar bya ba nyid du mdzad par mngon no//de lta bas na dgongs pa ni 'di yin te/ gang gi tshe 'dod chags la sogs pa'i sems rgyun chags par rang gi yul re re kho na la dmigs pa de'i tshe ni khams gsum pa'i 'dod chags la sogs pa'i yul la dmigs pa'i sems 'di dag drug cu yin no//gang gi tshe 'dod chags la sogs pa'i sems gang yang rung ba'i yul gyi rgyu na de nyid la ci rigs par zhe sdang la sogs pa'i sems gnyis pa gang yang rung ba zhig gis dmigs pa gang yin pa de'i tshe ni sems drug cu po 'di dag rgyun gyi sems sum cur 'gyur te/de skad du/ chos mngon pa dag las kyang / gang rjes su chags pa'i kun du sbyor ba dang mtshungs par ldan pa de khong khro ba'i kun du sbyor ba dang yang mtshungs par ldan no zhes bya ba la sogs pa rgyas par gsungs so//de bzhin du gang gi tshe/ 'dod chags la sogs pa'i sems gang yang rung ba gsum gyi yul gyi rgyun de nyid 'dod chags dang zhe sdang dang gti mug la sogs pa dag gi nang nas sems gsum pa gang yang rung ba gcig gis dmigs pa de'i tshe ni 'dod chags la sogs pa dang mtshungs par ldan pa'i sems drug cu po 'di dag rgyun gyi sems nyi shur 'gyur ro//gang gi tshe 'dod chags la sogs pa'i sems gang yang rung ba gsum gyi yul gyi rgyun de nyid 'dod chags la sogs pa sems drug cu po 'di dag gi nang nas sems bzhi ba gang yang rung ba cig gis dmigs bde'i tshe ni 'dod chags la sogs pa dang mtshungs par ldan pa'i sems drug cu po 'di dag nyid rgyun gyi sems bco lngar 'gyur ro//gang gi tshe khams gsum pa'i yul gyi rgyun ci rigs par 'dod chags la sogs pa'i sems ba zhi'i dmigs par gyur pa de nyid sems drug cu po 'di dag gi nang nas sems lnga pa gang yang rung ba zhig gis dmigs pa de'i tshe ni sems drug cu po 'di dag rgyun gyi sems bcu gnyis su 'gyur ro//de ni grangs gcig dang gnyis dang gsum dang bzhi dang lnga 'di nyid kyis gcig la sogs pas so sor gnyis su bsgyur bar bya ba nyid sbyar bar bya ste/de la gang gi tshe khams gsum pa'i yul la ci rigs par 'dod chags la sogs pa'i sems re res dmigs pa de'i tshe ni sems 'di dag drug cu yin no zhes gong du bshad zin pas yang mi bgrang ngo / /gang gi tshe 'dod chags la sogs pa'i sems kyi yul de nyid la sems gnyis kyi dmigs pa de'i tshe ni/de dag nyid gong ma bzhin du gnyis su bsgyur ba'i grangs kyis brtsis na sum cu kho nar 'gyur bas yang mi bgrang ngo / /des na grangs gcig gnyis su bsgyur ba ni gong du ba rtsis zin pa nyid kyi phyir bgrang bar mi bya la/de bzhin du grangs gnyis gnyis su bsgyur ba yang rgyun gyi sems bzhir 'gyur la de yang gong du grangs bzhir bgrang ba nyid du brtsis zin pa yang mi bgrang gi /sngar ma bsgyur ba grangs gsum gnyis su bsgyur na grangs drug cur 'gyur ro/ /des na dgongs pa ni 'di yin te/ gang gi tshe yul gyi rgyun gcig kho na la sems drug gis dmigs pa de'i tshe ni sems drug cu po 'di dag rgyun gyi sems drug cur 'gyur bar shes par bya'o//de bzhin du sngar bshad pa'i grangs bzhi gnyis su bsgyur na grangs brgyad du 'gyur te/ de ltar 'dod chags la sogs pa'i sems drug cu po grangs brgyad dang ldan pa 'di dag ni rgyun gyi sems bdun du 'gyur ro//'dir grangs bzhi dang ldan pa'i rgyun gyi sems gcig kho nar 'gyur ba gang yin pa de ni gong du rgyun gyi sems grangs bzhir bgrang ba brtsis zin pa nyid kyi phyir yang mi bgrang ngo / /de bzhin du 'dod chags la sogs pa'i sems 'di dag nyid gong du bshad pa'i grangs lnga gnyis su bsgyur na grangs bcur 'gyur te/des na 'dod chags la sogs pa'i sems 'di dag rgyun gyi sems grangs bcur yongs su chud pa drug tu 'gyur bar shes par bya'o/ /de ltar na gong du bshad pa'i sems ni drug cu'o//de dag gnyis su bsgyur ba ni sum cu'o/ /de bzhin du gsum du bsgyur ba ni nyi shu'o/ /bzhir bsgyur ba ni bco lnga'o/ /lngar bsgyur ba ni bcu gnyis so/ /yang gsum gnyis su bsgyur ba ni drug go/ /grangs bzhi gnyis su bsgyur ba ni bdun no/ /grangs lnga gnyis su bsgyur ba ni drug go//de lta bas na tshul 'dis 'dod chags la sogs pa'i sems drug cu bgrang ba dag sems brgya drug cur 'gyur bar shes par bya'o/ /'di ni rnal 'byor pa gang zag la bdag med par rtogs par bya ba la zhugs pa'am/ gang zag dang chos la bdag med par rtogs par bya ba la rab tu sbyor ba'i mi mthun pa'i phyogs su gyur pa yin pas/de'i phyir gang zag la bdag med pa'i lam rtog pas spang bar bya ba dang / gang zag dang chos la bdag med pa'i lam rtog pas spang bar bya ba yin te/ rgyud las/ 'jig rten pa'i sems brgya drug cu bskal pa gsum gyis 'das pa 'jig rten las 'das pa'i sems skye ba ni 'di lta ste/'di ni phung po tsam nyid de/ /bdag ni nam yang yod ma yin/ /dbang po grong khyer khams rnams kyis/ /'jig rten don med rnam par nyams/ /zhes bya ba la sogs pa gang rgyas par gsungs pa pa yin no//sems brgya drug cur sbyar ba zhar la 'ongs pa 'di ni rdzogs so// //dkyus ma brjod par bya ba ste/ gong du bshad pa'i tshul gyis na/ rnal 'byor pa dbang po rnon po dang / dbang po rtul po'i rim gyis gang zag dang chos la bdag med pa'i lam du zhugs nas chos thams cad sgyu ma lta bu'i snang ba sems rmongs par byed pa la zhugs pa gnyis ka yang mos pas spyod pa'i sa rtogs par bya ba'i phyir 'bad pa rtsom par byed de de'i rim pa ni 'di'o//gang zag dang chos la bdag med par rtogs pa'i lam ji ltar khong du chud pa de nyid du 'jug pa dang gnas pa dang ldang ba'i sems mngon par 'du byed pa'i bsgom pas goms par byed cing sems can rnams bsdu ba'i dngos po bzhis sbyin pa la sogs pa'i pha rol tu phyin pa'i spyod pa sgrub pa sngon du 'gro ba'i rjes su 'dzin pas na/sa bcu pa la 'jug par byed pa rnams dang / de dag gi rgyu mthun pa'i lus dang ngag dang yid kyi yon tan rnams ma thob kyang thos pa dang bsams pas rtogs pa'i shes rab kyi stobs kyis de dag la 'jug pa'i chos kyi tshig dag gis bstan pa rnams la de kho na ltar yin no zhes mos pa ni mos pa yin no//byang chub sems dpa'i spyod pa mos pa sngon du 'gro ba ci rigs par rang dang gzhan gyi don bsgrub pa'i ngo bo gang yin pa de ni mos pas spyod pa yin te/mos pas spyod pa nyid bzhi'i don gyi sa yin no/ /mos pas spyod pa'i sa de bskal pa gcig gis 'da' bar 'gyur ro zhes ston par mdzad de/ mos pa'i sa ni spyod pa'i sa/ / sems gsum rnam par bsgom pa ste/ /pha rol phyin rnams spyod pa dang / /bsdu ba dag ni bzhi po yis/ /mos pa'i sa ni mtshungs pa med/ /dpag tu med cing bsam mi khyab/ /dpag med ye shes 'byung ba ni/ /sems bcu dag gis thob par 'gyur/ /ngas gang cung zad brjod pa ni//thams cad 'di yis thob par 'gyur/ /de phyir thams cad mkhyen pa yis/ /mos pa zhes ni bya bar bshad/ /blo ldan bskal pa gcig gis ni/ /sa las yang dag 'da' bar 'gyur/ /zhes gang gsungs pa yin no/ /gzhan yang sems gsum rnam par bsgom pa mos pa spyod pa'i sar bshad pa 'di nyid dang ye shes kyi sa bcu rdzogs par byed pa'i chos dag las mos pa'i sa'i sems bcu po 'di dag gsal bar byed pa ni rnam par snang mdzad kyi rgyud 'di nyid kyi rgyud phyi ma dang 'brel pa gsang ba'i rim pa phye ba las gzhung 'di sa yang dag par bstan te/de la gsang ba'i bdag po mos pas spyod pa'i sems gsum yongs su shes pa gang zhe na/ gsang ba'i bdag po sems kyi skad cig ma dang po rtogs pa'i phyir/ sems skye ba med pa dang 'gag pa med par khong du chud pa'i mtshan nyid ni rtogs pa dang po yin no/ /gnyis pa ni rtog pa'i dra ba thams cad las yang dag par 'das pa rnam par mi rtog pa yin no//sgrib pa med par rtogs nas sems can rnams yang dag pa'i lam la dgod par bya'o snyam pa'i snying rje chen po bskyed de/ 'di ni 'di'i sems gsum pa yin no/ /gsang ba'i bdag po sems gsum bsgrubs pas sa dang pha rol tu phyin pa dang bsdu ba'i dngos po rnams bsgrub par 'gyur ro//gsang ba'i bdag po de la sa dang pha rol tu phyin pa bsgrub pa'i sbyor ba dag ni byang chub sems dpa' gsang sngags kyi sgo nas byang chub sems dpa'i spyad pa spyod cing thabs dang shes rab dang ye shes dang ldan pa gang gi tshe/sems can rnams bsdu ba'i dngos po bzhi dag gis yang dag par len du bcug ste/ yid rab tu dga' bas chos kyi sbyin pa sbyin par byed pa 'di ni 'di'i sa dang pha rol tu phyin pa'i yan lag gi sbyor ba yin no/ /gsang ba'i bdag po gzhan yang byang chub sems dpa'i sems rnam par dag pa 'dus ma byas pa'i tshul khrims la gnas pa ni chos de nyid byin zhing sems can rnams bsam pa ji lta ba bzhin du tshul khrims la bkod la/bdag nyid kyang de la gnas par 'gyur te/ 'di ni 'di'i sa dang pha rol tu phyin pa'i yan lag gi sbyor ba yin par blta'o//gsang pa'i bdag po byang chub sems dpa' sems 'od gsal zhing sems kyi phyogs bcu'i chos la khyab pa gang gi tshe/ bdag nyid kyang mi skye ba'i chos la bzod pa thob la/ gzhan dag kyang de la 'god par byed pa 'di ni de'i sa dang pha rol tu phyin pa'i yan lag gi sbyor ba yin par blta'o//gsang ba'i bdag po gzhan yang ye shes kyi 'od zer ldan pa ni sems de nyid kyi phyir phyir zhing gong nas gong du rtogs pa la mkhas pa'i blos brtson 'grus rtsom zhing gzhan dag kyang de la 'god par byed de/ gsang ba'i bdag po 'di ni 'di'i sa dang pha rol tu phyin pa'i yan lag dag bsgrub pa'i sbyor ba yin par blta'o//gsang ba'i bdag po byang chub sems dpa' gsang sngags kyi sgo nas byang chub sems dpa'i spyad pa spyod pa gang gi tshe sems de nyid bsam gtan thams cad la mi lta bar ye shes dang ldan pa'i blos nges par sems shing gzhan dag kyang de la yang dag par len du 'jug pa de'i tshe/'di'i sa dang pha rol tu phyin pa'i yan lag 'grub pa'i sbyor ba yin par blta'o/ /gsang ba'i bdag po gzhan yang sems 'di nyid kyis ye shes dang ldan pa'i blos 'jig rten dang 'jig rten las 'das pa nyan thos kyi bsam gtan dang tshad med pa dag la mi lta bar bdag nyid kyang de la gnas par 'gyur zhing gzhan dag kyang de la 'god par byed pa de'i tshe 'di'i sa dang pha rol phyin pa'i yan lag 'grub pa yin par blta'o//gsang ba'i bdag po gzhan yang byang chub sems dpa' gsang sngags kyi sgo nas byang chub sems dpa'i spyad pa spyod pa bsam gtan gyi lhag pa'i bsam pa de lta bu dang ldan pa ni sems de nyid kyi ye shes dang ldan pa'i blos bdag nyid kyang 'jig rten las 'das pa'i shes rab rnam par spyod par byed pa la gnas par 'gyur zhing gzhan dag kyang de la 'god par byed de/de lta bu ni 'di'i shes rab kyi pha rol tu phyin pa dang / sa mngon du 'gyur gyi yan lag 'grub pa yin par blta'o/ /gsang ba'i bdag po gzhan yang byang chub sems dpa' thabs kyis yang dag par bsdu ba la mkhas pa dge ba'i bshes gnyen gyis legs par byin gyis brlabs pa ni sangs rgyas kyi chos thams cad la smon lam btab nas sems dang po bskyed pa nas bzung ste/sems can rnams bsdu ba'i dngos po bzhi dag gis sdud par byed de/ 'di ni 'di'i thabs kyi pha rol tu phyin pa dang / sa ring du song ba'i sbyor ba 'grub pa yin par blta'o/ / gsang ba'i bdag po gzhan yang ye shes dang ldan pa'i blo mi g.yo zhing rab tu mi bsgul ba ni phas kyi rgol ba thams cad dang bdud kyi rigs kyi lha dag gis kyang zil gyis mi non te/ 'di ni 'di'i sa mi g.yo ba dang pha rol tu phyin pa'i sbyor ba yin par blta'o/ / gsang ba'i bdag po gzhan yang byang chub sems dpa' dge ba'i bshes gnyen gyis legs par zin pa/ chos thams cad la sgyu ma'i chos dang mnyam pa nyid du gyur pa snying rje chen po'i pha rol tu phyin pa dang ldan pa ni snying rje chen po'i pha rol tu phyin pas phyogs bcur sangs rgyas kyi zhing dag kyang khyab par byed cing /lus dang / ngag dang / yid mnyam pa nyid kyis yang dag par mgu nas lus kyi spu langs shing dga' ba mang pos phyogs bcu na rnams par bzhugs pa'i de bzhin gshegs pa rnams mthong bar 'gyur ro/ /sems can gyi mthar thug pa'i snying rje chen po dang ldan zhing sems can thams cad la nam mkha'i mthar thug pa dang /sems can gyi mthar thug pa dang / ye shes kyi mthar thug pa dang / rnam par shes pa'i mthar thug pas khyab par byed de/ de ltar dad pa dang / brtson 'grus dang / shes rab kyi stobs bskyed pa thob pa na rmi lam dang mngon sum du sangs rgyas dang byang chub sems dpa' rnams mthong bar 'gyur zhing byang chub kyi sems mi brjed pa'i ting nge 'dzin yang thob par 'gyur te/'di ni byang chub sems dpa' mos pa'i ting nge 'dzin gyi dkyil 'khor la zhugs pa yin par shes par bya'o zhes gang gsungs pa yin te/rgyas par rgyud phyi ma las bshad pa gsang ba'i rim par phye ba las rtogs par bya'o/ /zhar la 'ongs pa 'di rdzogs so// //dkyus ma brjod par bya ste/ mos pas spyod pa'i sa bskal pa gcig gis 'da' bar 'gyur ro zhes bshad pa 'di'i mjug thogs su yang mos pas spyod pa'i sa'i stegs su gyur pa yon tan can ye shes kyi sa rab tu dga' ba byang chub kyi sems dang po'i mtshan nyid la 'jug par gyur pa rnams bskal pa bzhi cha'i bar du goms par byas nas mos pas spyod pa'i sa las 'das te/ye shes kyi sa la 'jug par 'gyur ro zhes bya ba gang yin pa ston te/'di yi yang ni bzhi cha yis/ /mos pa las ni 'da' bar 'gyur/ /zhes bya ba yin no/ /de'i 'og tu gang zag dang chos la bdag med pa'i lam ji ltar rtogs pa'i lam de nyid 'jug pa dang / gnas pa dang / ldang ba dang ldan pa'i sgo nas mngon du byed pa na/sbyin pa la sogs pa'i pha rol tu phyin pa la goms pa'i phyir/ bskal ba dpag tu med par bsod nams dang ye shes kyi tshogs la bsgrub pa lhur len pas chos thams cad kyi de bzhin nyid la dmigs pa'i sgo nas sa dang po'i mtshan nyid phung po la sogs pa la sgyu ma dang smig rgyu la sogs pa'i ngo bo nyid du rnam par rtog pa rnams kyi yang gnyen por gyur pa'i sems thob par gyur pa de ston te/gsang pa'i bdag po gzhan yang byang chub sems dpa'i gsang sngags kyi sgo nas byang chub sems dpa'i spyad pa spyod pa bskal pa bye ba khrag khrig brgya stong dpag tu med par bsod nams dang ye shes kyi tshogs dpag tu med par bsags pa rnams la zhes bya ba la sogs pa 'di lta ste/stong pa nyid kyi ngo bo nyid kyi rdzas med pa mtshan nyid med pa mtshan ma med pa/ spros pa thams cad las 'das pa nam mkha' lta bur dpag tu med pa chos thams cad kyi go skabs su gyur pa 'dus byas dang 'dus ma byas kyi khams dang bral ba las dang bya ba med pa mig dang rna ba dang sna dang lce dang lus dang yid dang bral ba shin tu ngo bo nyid med pa'i sems bskyed de/gsang ba'i bdag po 'di ni byang chub kyi sems dang po zhes rgyal ba rnams kyis gsungs so zhes bya ba'i bar yin no//de bas na/ de ltar bshad ma thag pa'i rim gyis na byang chub sems dpa'i ye shes kyis bcu la 'jug par byed pa'i yon tan can rnams go rims ji lta ba bzhin du goms par byed cing / byang chub sems dpa'i sa bcu'i bar du go rims ji lta ba bzhin kho nar bsgrub pa la zhugs pa ni byang chub sems dpa' zhes bya ba'i ming 'thob bo zhes ston te/byang chub nam mkha'i mtshan nyid de/ /kun du rtog pa thams cad spangs/ /gang zhig de rtogs 'dod pa de/ /byang chub sems dpa' zhes pa'o/ /zhes 'byung ba yin no//de rtogs 'dod pa zhes bya ba ni/ so so'i mtshan nyid byang chub kyi sems de bzhin nyid la dmigs pa go rims ji lta ba bzhin du rtogs par bya ba la zhugs pa'o snyam du dgongs pa yin no/ /de'i 'og tu gang gi tshe byang chub sems dpa'i sa bcu dang / dbang bcu bsgrub pa sngon du 'gro ba chos sgyu ma lta bu rnams kyang stong pa nyid du rtogs par byed cing kun rdzob kyi lam la yang zhugs te/sems can rnams kyi las bde 'gro dang ngan 'gror 'dren par byed pa dang / rgyu dang 'bras bu so sor nges pa la 'dris pa ji srid pa de bzhin du yul gyi ye shes mngon du mdzad pa'i sgo nas mkhyen pa de'i tshe/sangs rgyas zhes bya bar tha snyad gdags pa de ston te/ gang gis sa bcu bsgrubs nas ni/ /dbang bcu legs rtogs khong du chud/ /stong pa sgyu ma 'dra ba'i chos/ /rnam pa thams cad mkhyen cing 'dir/ /'jig rten kun gyi tshul mkhyen pa//sangs rgyas zhes ni bya ba yin/ /zhes 'byung ba yin no/ /sangs rgyas zhes bya ba ni gang gis chos thams cad sgyu ma lta bu'i ngo bo nyid du yang med par rtogs pa ste/ de'i phyir sangs rgyas zhes bya'o snyam du dgongs pa yin no/ /da ni gang gi tshe ma rtogs pa'i chos thams cad don dam pa'i ngo bo nyid kyi mtshan nyid stong pa nyid du ji ltar rtogs pa bzhin nam mkha' dang 'dra bar gnyis su med pa'i mtshan nyid du mtshan nyid gcig par rtogs par bya ste/kun rdzob kyi ye shes kyis kyang stobs bcu dag sgrub par byed pa de'i che/ rdzogs par byang chub pa zhes bya'o zhes bya bar ston te/chos ni nam mkha'i mtshan nyid de/ /gnyis su med cing mtshan nyid gcig /stobs bcu rdzogs par sangs rgyas pa/ /de ni rdzogs sangs rgyas zhes bya/ /zhes 'byung ba yin no/ /rdzogs par byang chub pa zhes bya ba yang chos thams cad kyi de bzhin nyid kyang gcig par rtogs pa'i phyir yang kun du byang chub pa'o zhes bye brag tu bshad pa'i phyir te/de skad du/ shes rab kyi pha rol tu phyin pa las kyang / chos thams cad stong pa nyid du gcig par rtogs pa'i mtshan nyid ni 'di lta ste/ gzugs rnam par dag pa gang yin pa de ni tshor ba rnam par dag pa'o//tshor ba rnam par dag pa gang yin pa de ni gzugs rnam par dag pa ste/ de ltar na gzugs rnam par dag pa dang tshor ba rnam par dag pa 'di la gnyis su med de gnyis su byar med so so ma yin tha mi dad do zhes bya ba la sogs pa gsungs so/ /rdzogs par byang chub pa'i ye shes rtogs pa'i gnas skabs 'di yang 'di las dpa' bo chen po'i ting nge 'dzin bstan pa las/bcom ldan 'das byang chub sems dpar gyur pa kho nas sprul pa'i sbyor ba dag gis sems can yongs su smin par bya ba'i phyir/ 'dod pa'i khams nyid du skye ba len pa dang / mngon par 'byung ba dang / dka' ba spyod pa la sogs pa kun du bstan te/ byang chub kyi snying por nye bar gshegs pa sngon du 'gro ba can dpa' bo chen po'i ting nge 'dzin yan lag lnga pa rtogs pa'i sgo nas bdud bzhi las rgyal nas brnyes so zhes 'byung ngo / /de la 'di las dpa' bo chen po'i ting nge 'dzin bstan par gsungs pa 'di yin te/ji skad du/ de nas yang bcom ldan 'das kyis byang chub sems dpa' phyag na rdo rje la bka' stsal pa/ byang chub snying por 'dug nas su/ /bdud ni rnam pa bzhi bcom pas/ /des na dpa' bo chen po zhes/ /tshangs pa la sogs lha tshogs rnams//'jigs pa thams cad med pa'i sgra/ /dga' ba bzhin du sgrogs par byed/ /de phyin cad ni nga dpa' bo/ /dpa' bo chen po zhes su grags/ /skye ba med par ngas rtogs pa/ /tshig gi spyod yul rnam spangs shing / /nyes pa thams cad med pa ste//rgyu dang rkyen dang bral ba yin/ /stong pa'i ye shes mkha' 'dra ba/ /mun pa kun dang bral gyur cing / /shin tu dri med de kho na/ /ji ltar 'byung ba nga las 'byung / /kun mkhyen tsam gyi tshul du gnas/ /kun mkhyen sangs rgyas mtshan nyid do/ /nga yi de nyid dam pa 'di//'jig rten snang bar byed pa ste/ /byin gyi rlabs kyi stobs kyis su/ /yig 'bru rnams su bstan nas ni/ /sems can rnams la snying brtse'i phyir/ /ngas ni thams cad rab tu bshad/ /ces gsungs pa lta bu yin no/ /de la dpa' bo chen po rdzogs par byang chub pa'i ting nge 'dzin 'di'i gzhir gyur pa dpa' bo chen po'i snying po'i mtshan nyid kyi yig 'bru dag ni/namaH sa man+ta bud+d+hA nAn/ a khaM bI ra hUM zhes bya ba yin te/ sa bon gyi yi ge 'di lngas dpa' bo chen bo rdzogs par byang chub pa'i ting nge 'dzin yan lag lnga pa'i gzhis byas so zhes bya bar khong du chud par bya'o//de bzhin du snying po 'di'i mthu dang sgrub pa dag kyang 'di nyid las dpa' bo chen po rim par phye ba las rgyas par bstan to/ /de bzhin du yang bcom ldan 'das 'di nyid 'dir sems can rdzogs par byang chub pa ston pa sngon du 'gro ba'i gsang sngags spyod par mos pa rnams la phan gdags pa'i phyir/sangs rgyas kyi zhing stug por gshegs te/ de nas yod pa'i byang chub kyi snying po la zhugs pa dang / sangs rgyas thams cad kyi 'phags pa de kho na nyid bsdus pa'i rgyud kyis bskul nas mngon par rdzogs par byang chub pa rnam pa lnga'i sbyor bas sangs rgyas kyi skur byin gyis brlabs te/ri rab kyi steng du gshegs nas rdo rje dbyings la sogs pa'i dkyil 'khor kun brtags pa'i sgo nas 'dod pa dang gzugs na spyod pa'i lha rnams la phan gdags pa dang / sdang ba rnams tshar bcad pa mdzad de/ yang 'dzam bu'i gling du gshegs nas byang chub kyi snying por bzhugs te/ gsang sngags kyi tshul bshad pa'i rim pas de la mos pa'i lha dang mi la phan gdags pa'i phyir yang rnal 'byor gyi lugs kyi rgyud kyi tshul gyis byang chub pa kun du bstan te/ don 'di yang rgyas par de kho na nyid bsdus pa'i rgyud las bstan to//de lta bas na sgo sna tshogs nas mngon par rdzogs par byang chub pa rtogs pa'i mthu bstan pas/ gdul bar bya ba rnams gzung ba'i phyir bcom ldan 'das kyis mngon par rdzogs par byang chub pa'i sgo gzhan dang gzhan dag kyang gsang sngags kyi rgyud dang pha rol tu phyin pa'i mdo sde'i rjes su 'brang ba'i sgo nas khong du chud par bya'o snyam du bsams pa yin no//de ltar na sngar bshad pa'i 'jig rten pa'i sems rnam pa brgyad nas bzung ste/ rdzogs par byang chub pa'i gnas skabs dpa' bo chen po la sogs pa'i bar 'di ni bcom ldan 'das dpal rnam par snang mdzad du 'grub pa'i rgyu bsod nams dang ye shes kyi tshogs kyi bdag po nyid yin no//bcom ldan 'das dpal rnam par snang mdzad kyi ngo bo nyid ni sku bzhi'i mtshan nyid yin te/ 'di ltar rgyud 'di las sprul pa'i sku rnam pa gnyis su brtag pa mdzad nas sku bzhir bshad de/'di lta ste/ rdzogs par byang chub pa'i sku dang / chos kyi sku dang / longs spyod rdzogs pa'i sku dang / sprul pa'i sku zhes bya ba yin no/ /de la sku 'di rnams don dam par mngon par rtogs pa'i rim pa ni 'ga' zhig ji skad du bshad pa'i 'khor bas skyo zhing smyung ba dang /brtul zhugs dang nges pa la sogs pa'i mtshan nyid kyis 'jig rten pa'i lam la zhugs te/ rigs dang bshes gnyen la brten pa'i sgo nas rim gyis bsod nams dang ye shes kyi tshogs byang chub sems dpa'i sa bcu rtog pa sngon du 'gro ba'i bar du bsags shing rdzogs par byang chub pa'i gnas skabs 'di lta bu'i bar du rtogs par mdzad nas khams gsum pa las 'das te/sangs rgyas kyi zhing stug po na gnas pa rnams dang skal ba mnyam par skyes pa dang / ye shes kyi spyan gyis sems can gyi khams sdug bsngal gsum gyi me 'bar bas dkris pa la gzigs te thugs rje chen po'i yum gyi thugs spro ba bskyed nas 'di snyam du sems can gyi khams 'di ni sku mi zad pa la sogs pa rdo rje bkod pa phun sum tshogs pa med par sdug bsngal gsum dang bral ba gsal bar mi nus la/sku mi zad pa la sogs pa phun sum tshogs pa de yang byang chub rtogs pa med par mi 'gyur bas de'i phyir byang chub kyi snying po la 'dug ste/ye shes kyi snang ba rnam par rtog pa'i dgra'i tshogs thams cad dang bral ba spros pa'i bag chags kyi rten thams cad med pa bla na med pa yang dag par rdzogs pa'i byang chub kyi mtshan nyid mngon du bya'o//de mngon du byas pa las kyang sngon gyi smon lam gyi 'phen pa las sku dang gsung dang thugs rdo rje'i bkod pa sems can bskal pa ji lta ba bzhin du yang dag par mgu bar mdzad pa gcig pu mthar thug pa 'di dag 'byung bar 'gyur ro snyam du dgongs so/ /de ltar dgongs nas ji ltar dgongs pa sgrub pa lhur len pa gnas gyur pa dang /sku bzhi brnyes par gyur to/ /de la ye shes rnam par rtog pa'i rten thams cad gsal ba rnam pa thams cad las nges par grol bas shin tu 'od gsal ba rang rig pa tsam gyis mthar thug pas 'khor ba ji srid par rgyun mi 'chad pa'i skad cig ma'i rgyun brgyud pa'i tshogs can mi gnas pa'i mya ngan las 'das pa'i gnas skabs gang yin pa de ni chos kyi sku yin no//chos kyi sku de'i mtshan nyid ni 'di las/ 'du shes tsam yang spang ba'i phyir/ /rang gi ngo bor bstan du med/ /shes pa rang rig bya ba 'di//de bzhin gshegs pa yin zhes bshad/ /ces 'byung ba yin no/ /de bas na de bzhin gshegs pa'i mtshan nyid kyi chos kyi sku 'di'i ngo bo nyid kyang rigs pa dang lung dag gis kyang ma skyes shing skye ba med par brtag pa sngon du 'gro ba'i lam dngos po nyid mngon par zhen pa yongs su 'dor ba las 'jug par 'gyur te/'di ltar yongs su dag pa dang yongs su ma dag pa'i ngo bo nyid du rnam par brtags pa'i chos thams cad don dam par rang bzhin gyis ma skyes shing skye ba med par brtag pa'i rigs pas brtags na dngos po yod par khong du mi chud de/ji skad du/ blo yis rnam par gzhigs rnams kyis/ /ngo bo nyid ni ngos mi zin/ /de phyir de dag ngo bo nyid/ /med cing skye ba med par bstan/ /zhes gsungs pa lta bu yin no/ /chos thams cad rigs pas skye ba med par brtag pa yang slob dpon 'phags pa klu sgrub kyi zhal snga nas la sogs pa dag gis dbu ma la sogs pa'i bstan bcos du ma las rgyas par spros te bshad zin pas yang 'dir de'i don du 'bad par mi bya'o//de'i phyir chos kyi sku de bzhin gshegs pa'i gnas skabs kyi mtshan nyid yongs su dag pa 'di yang rten cing 'brel bar 'byung ba yin pa'i phyir don dam par dngos po yod do snyam du mngon par zhen par mi bya ste/de skad du sangs rgyas thams cad kyi yum ye shes snang ba rgyan gyi mdo las kyang / 'jam dpal skye ba med pa zhes bya ba 'di ni de bzhin gshegs pa'i tshig bla dwags yin no zhes gsungs so/ /yang de nyid las/skye med chos ni rtag tu de bzhin gshegs/ /chos rnams thams cad de bzhin gshegs dang 'dra/ /byis pa'i blo can mtshan mar 'dzin pa yis/ /'jig rten na ni med pa'i chos la spyod/ /de bzhin gshegs pa dge bas zag med kyi/ /gzugs brnyan dag tu gyur pa yin te 'dir//de bzhin nyid med de bzhin gshegs pa med/ /'jig rten kun na gzugs brnyan yang dag snang / /zhes gsungs te/ tshul 'di ni longs spyod rdzogs pa'i sku la sogs pa'i chos thams cad la dngos por mngon par zhen pa yongs su dor ba'i rigs pa la nye bar sbyar ro// //bam po gnyis pa/ de lta bas na chos kyi sku 'di'i dbang gis dang po nyid du 'og nas 'byung ba'i mtshan nyid can longs spyod rdzogs pa dang / sprul pa'i sku 'jug pa'i rim gyis byang chub sems dpa' chen po rgyud yongs su dag pa rnams la rnam par snang mdzad chen po bzang po dpe med pa ji ltar ston pa'i dus bzhin du rtag tu snang ba gang yin pa de ni bcom ldan 'das 'di'i mngon par rdzogs par byang chub pa'i sku yin te/byang chub kyi snying po nyid ni de lta bus 'dul ba rnams la rtag tu snang bar 'gyur pa'i phyir mngon par rdzogs par byang chub pa'i sku zhes bshad do//de'i mtshan nyid kyang 'di las/ de nas byang chub sems dpa' chen po kun du bzang po la sogs pa de dag gis bcom ldan 'das byang chub kyi snying po mchog dam pa la bzhugs par mthong ngo zhes bya ba la sogs pas bstan pa yin no/ /de bzhin du chos kyi sku kho na brnyes pa'i dus nyid du na/chos nyid kyis 'thob pa'i sku dang / gsung dang / thugs mi zad pa'i bkod pas sems can mos pa ji lta ba bzhin yang dag par mgu bar mdzad pa 'gro ba gsum la snang bar gyur pa gang dag yin pa de dag gi nang nas byang chub kyi snying po'am gzhan gang yang rung ste/ yul dang dus la sogs pa ma nges pa nyid dag na byang chub sems dpa' rnam par dag pa rnams kho na la sku bzang po dpe med pa snang bar gyur pa'i sgo nas lung dang rtogs pa'i bdag nyid kyis chos zab cing rgya che ba rab tu ston pa lhur mdzad pa byang chub sems dpa' chen po de dag gi dmigs pa gang yin pa de ni 'dir bcom ldan 'das rnam par snang mdzad kyis longs spyod rdzogs pa'i sku'i ngo bo nyid yin par bstan te/bcom ldan 'das rnam par snang mdzad kyis longs spyod rdzogs pa'i sku bstan pa 'di yang rgyud 'di las 'di lta ste/ sems can las kyi tshe rnam par bskyed pa rnams sems dang po bskyed pa nas bzung ste/sa bcu'i bar mnan pa nyid la yongs su rdzogs par bya ba dang las kyi tshe bkag pa rnams kyang srid pa'i myu gu mngon par 'grub par bya ba'i phyir/ rdo rje 'dzin pa'i lus 'dra ba dang / byang chub sems dpa' kun du bzang po dang /phyag na pad+mo'i lus 'dra ba phyogs bcu na gsang sngags kyi tshul gyis tshig rnam par dag pa'i tshig dag gis chos ston pa dag kyang mthong ngo zhes bya ba'i mdo'i tshig 'di dag gis yongs su bstan to/ /lha dang / mi dang / mi ma yin pa la snang pa'i sku gang dag lha dang mi dang mi ma yin pa la sogs pa kho na la skal ba ji ltab bzhin du chos ston pa la sogs pa sbyor bar snang bar 'gyur zhing byis pa so so'i skye bo la sogs pa dag ci rigs par 'jig rten pa dang 'jig rten las 'das pa'i lam la gzud par zhugs pa de ni 'dir sprul pa'i sku yin no zhes bya bar shes par bya'o//'di'i mtshan nyid kyang bcom ldan 'das ji ltar de bzhin gshegs pa dgra bcom pa yang dag par rdzogs pa'i sangs rgyas rnams kyis thams cad mkhyen pa'i ye shes brnyes nas thams cad mkhyen pa'i ye shes de sems can rnams la rnam par bya ste/ tshul sna tshogs dang bsam pa sna tshogs dang thabs sna tshogs dag gis ston cing /kha cig la ni nyan thos kyi theg pa'i tshul/ kha cig la ni rang sangs rgyas kyi theg pa'i tshul/ kha cig la ni theg pa chen po'i tshul/ kha cig la ni mngon par shes pa lnga'i tshul/ kha cig la ni lhar skye bar bya ba dang /kha cig la ni mir skye bar bya ba nas/ lha chen po dang / klu dang / dri za dang / gnod sbyin dang / lha ma yin dang / nam mkha' lding dang / mi 'am cir skye bar bya ba'i bar du chos ston pa lags/ de la sems can la la sangs rgyas kyis gdul bar bya ba dag gis ni sangs rgyas kyi gzugs su mthong /la las ni nyan thos kyi gzugs su/ /la las ni rang sangs rgyas kyi gzugs su/ /la las ni byang chub sems dpa'i gzugs su/ la las ni dbang phyug chen po'i gzugs su/ la las ni tshangs pa'i gzugs su/ la las ni rnam thos kyi bu'i gzugs su/ la las ni sred med kyi bu'i gzugs su nas/ la las ni lto 'phye chen po dang / mi dang mi ma yin pa'i bar du mthong ste/ rang rang gi tshig brjod pa'i tshul dag dang / spyod lam sna tshogs su mthong la/ /thams cad mkhyen pa'i ye shes de yang 'di lta ste/de bzhin gshegs pa'i rnam par grol ba'i ror gcig pa lags zhes bya ba la sogs pa gsungs pa 'di yin no/ /de bzhin du sangs rgyas kyi gsung bkod pa sprul pa rnam par sprul pa bshad pa 'di yang yin te/ gsang ba'i bdag po pa'i gsung gi 'khor lo'i dkyil 'khor sprul pa rgya chen po 'jig rten gyi khams mtha' yas par khyab pa/rnam par dag pa'i sgo sems can thams cad re ba ji lta ba bzhin mgu bar byed pa/ chos kyi dbyings so sor rnam par rig par byed pa'i sgo ni da ltar bcom ldan 'das shAkya thub pa 'jig rten gyi khams nam mkha'i dbyings kyi klas pa ma lus par sangs rgyas kyi bya ba byed pa la zhugs kyang gsang ba'i bdag po sems can rnams kyis 'di ni bcom ldan 'das kyi gsung gi 'khor lo'i dkyil 'khor byung ba ste/sangs rgyas kyi gsung rnam par bkod pa'i rgyan gyi snying po 'byung ba'i sangs rgyas kyi sku sems can re ba ji lta ba bzhin du mgu bar mdzad pa byung ba bzhin no zhes bya bar rab tu mi shes pa la ltos zhes bya ba la sogs pa gang gsungs pa yin no//sku bzhi po 'di byin gyis rlob pa yang snying rje chen po 'byung ba'i dkyil 'khor rnam par dgod par sangs rgyas dang byang chub sems dpa'i gzugs dang /phyag rgya dang / rig sngags dang / gsang sngags kyi mtshan mas gsal bar kun du bstan te/ 'di ltar der de bzhin gshegs pa thams cad kyi chos kyi sku byin gyis rlob pa ni gru gsum pa'i phyag rgya rnam par dgod par bstan to/ /bcom ldan 'das rnam par snang mdzad byang chub kyi snying po can gyi sku ni snying po'i dkyil 'khor gyi dbus su ting nge 'dzin gyi phyag rgya can du rnam par gzhag go//de bzhin du snying po'i rim pa nyid du 'jig rten dbang phyug dang / rdo rje 'dzin pa la sogs pa rigs gsum gyis bsdus pa'i lha'i mtshan nyid can longs spyod rdzogs pa'i sku byin gyis rlob pa'i gzugs dag blta bar bya'o//de bzhin du snying po'i rim pa nyid du rim pa gnyis par sprul pa'i sku bcom ldan 'das shAkya thub pa sprul pa'i sku 'jig rten pa'i lha'i gzugs/ dbang po dang / gshin rje dang / chu lha dang / rlung lha dang / me lha dang / tshangs pa dang / khyab 'jug dang / bde byed la sogs pa'i gzugs su snang ba sems can de dag la mos pa yang dag par mgu bar byed pa gzhan dag dang thabs cig tu rnam par bzhugs so/ /de ltar na snying rje chen po 'byung ba'i dkyil 'khor chen po'i rim pa dang gnyis pa'i lha rnams rnam par dgod pas ni bcom ldan 'das rnam par snang mdzad kyi chos kyi sku dang /mngon par rdzogs par byang chub pa'i sku dang / longs spyod rdzogs pa dang / sprul pa'i sku rnams bsdus par blta'o/ /rim pa ltar gsum par ni pha rol tu phyin pa'i sems dpa' bcom ldan 'das 'jam pa'i dbyangs dang /sgrib pa thams cad rnam par sel ba dang / sa'i snying po la sogs pa byang chub sems dpa' chen po sa bcu'i sa'i dbang phyug 'khor dang bcas pa bcom ldan 'das rnam par snang mdzad kyi mngon par rdzogs par byang chub pa'i sku la sogs pa blta bar 'dod pas nye bar lhags pa dag rnam par 'khod do//de ltar na 'di ni sku bzhi'i mtshan nyid bstan pas bcom ldan 'das rnam par snang mdzad kyi ngo bo nyid bstan pa yin par khong du chud par bya'o/ /nga ni 'di bsam par bya ste/ sangs rgyas brgyud pa thog ma med pas de bzhin gshegs pa re zhig chos kyi sku la rnam par gnas kyang byang chub sems dpa' chen po kha cig la gdul ba'i dus la lar mngon par rdzogs par byang chub pa'i skur snang bar 'gyur ro zhes bshad pa de'i phyir/de bzhin gshegs pa'i sku mang po dag de ltar snang bar bskyed na dus gcig kho nar mngon par rdzogs par byang chub pa'i mtshan nyid can gyi de bzhin gshegs pa'i sku phal mo che snang bar 'gyur ro zhe na/gal te de ltar yin na yang yin du zad mod nyes pa ci zhig yod/ 'di ltar theg pa chen po las longs spyod rdzogs pa dang / sprul pa'i skur snang ba'i rgyal ba dag dus gcig kho nar 'du bar 'dod pa nyid de/ji ltar sangs rgyas yang dag par bgro ba la sogs pa'i mdo dag las 'byung ba lta bu'o/ /gsang sngags kyi mdo 'phags pa de kho na nyid bsdus pa la sogs pa dag las kyang gdul ba'i skye bo de lta bu'i ngor mngon par rdzogs par byang chub pa'i skur snang ba de lta bu yang 'byung bar 'gyur ro zhes 'byung ste/'di la nyes pa ci zhig yod/ rnam pa gcig tu na/ tshogs dang chos kyi sku dag dang / 'gro ba'i don ni spyod pa yis/ /sangs rgyas thams cad mnyam pa nyid/ /ces 'byung ba'i phyir sangs rgyas thams cad kyi mngon par rdzogs par byang chub pa'i skur snang ba gcig po kho na yin la/gdul ba'i skye bo'i tshogs thams cad kyi don mdzad pa nyid du 'gyur te/ de'i phyir yang nyes pa med do/ /de lta na 'o na ni/ de bzhin gshegs pa'i sku snang ba gcig kho nas sems can thams cad kyi don 'grub pas de las gzhan pa'i de bzhin gshegs pa rnams 'byung ba don med par 'gyur ro zhe na/'di ni nyes pa med de/ 'di ltar don dam par ni gdul ba'i skye bo rnams rang gi rgyud la yod pa'i 'khor ba'i sdug bsngal gsum gyi me 'bar ba nye par zhi bar bya ba'i phyir rim gyis yang dag pa'i lam thabs dang shes rab zung du 'brel bar 'byung ba la kun du brten cing de ltar zhugs pa rnams la rdzogs pa'i byang chub rang gi nyon mongs pa dang shes bya'i sgrib pa spong ba'i mtshan nyid mngon du 'gyur te/de'i phyir sems can gyi don la 'jug pa ni sngon yang byang chub thob pa'i yan lag tu gyur pa kho na yin la/phyis kyang mngon par rdzogs par byang chub pa'i sku bkod pa mi zad pa la sogs pas sems can gyi don la mngon du 'jug pa'i chos nyid kyis 'thob pa gang yin pa de yang de bzhin gshegs pa gcig kho nas sems can thams cad kyi don mdzad par spyod pas bdag gis ni mi bya'o zhes bya bar yal bar mi 'dor te ha cang thal bar 'gyur bas chog go//bcom ldan 'das rnam par snang mdzad kyi ngo bo nyid kyi sku bzhi'i mtshan nyid bshad zin to/ /de lta bas na sku bzhi po 'di thob pa'i rgyu ni mngon sum dang brgyud pa'i rgyu gnyis kyi bye brag gis rnam pa gnyis yin te/de la brgyud pa'i rgyu'i mtshan nyid ni bshad zin te/ 'di lta ste/ 'jig rten pa'i sbyin pa la sogs pa'i sems nas bzung ste/ dpa' bo chen po rdzogs par byang chub pa'i gnas skabs kyi bar yin no/ /nye ba'i rgyu ni byang chub dang thams cad mkhyen pa nyid yin no//de la byang chub dang thams cad mkhyen pa nyid kyi mtshan nyid ni/ sangs rgyas kyi sa'i mdo las gsungs te/ 'di lta ste/ byang chub ni mnyam pa nyid kyi ye shes so/ /thams cad mkhyen pa nyid ni so sor rtog pa'i ye shes la sogs pa zhes bya ba yin no/ / 'di ltar bcom ldan 'das byang chub sems dpa'i spyad pa spyod pas yun ring po nas 'gro ba sna tshogs sgyu ma lta bur goms pa dang yang dag par na chos thams cad stong pa nyid du goms pa gnyi ga yang mdzad de/ de lta bas na rgyu rnam pa 'di gnyis kyi 'bras bu ni so sor rtog pa la sogs pa'i ye shes dang /mnyam pa nyid kyi ye shes dang rnam pa gnyis kho na yin no/ /mngon par rdzogs pa'i dus na skad cig ma dang po la mnyam pa nyid dang / so sor rtog pa la sogs pa'i ye shes lnga po rnam pa med pa/ chos thams cad kyi de bzhin nyid la dmigs pa 'byung ba ni/ byang chub dang thams cad mkhyen pa nyid ces bya ste/de'i 'og tu ni chos kyi sku'i ming thob bo/ /de nyid kyi phyir 'di las snying rje chen po 'byung ba la sogs pa'i dkyil 'khor du chos kyi sku'i byin gyis rlob par 'gyur ba gru gsum gyi phyag rgya'i dkyil na ye shes kyi rdo rje rtse lnga pa yod pa yin par bshad do/ / 'di las thams cad mkhyen pa nyid dang byang chub kyi mtshan nyid kyi ye shes lnga po 'di yang de bzhin nyid la dmigs pa'am/ gdod ma nas ma skyes shing skye ba med pa'i rigs pa mi bzod pa nyid kyi phyir don dam par ngo bo nyid gcig par bshad de/ byang chub dang thams cad mkhyen pa nyid dang 'di gnyis ni gnyis su med de gnyis su byar med do zhes gsungs pa yin no//'di las 'di gnyis ni rtogs par bya ba'i phyir 'di lta ste/ snying rje chen po dang sa dang po'i mtshan nyid can gyi byang chub kyi sems dang / sbyin pa la sogs pa'i pha rol tu phyin pa la goms pa dang rgyu gsum du bshad de/ji skad du/ 'di las thams cad mkhyen pa'i ye shes de yang byang chub kyi sems kyi rgyu can snying rje'i rtsa ba can thabs kyi pha rol tu phyin pas yongs su bzung ba ste zhes bya ba gsungs pa yin no/ /de lta bas na 'dis ni byang chub dang thams cad mkhyen pa nyid rtogs par byed pa'i rgyu gsum bshad pa yin te/'di lta ste/ rtog pa 'jug pa'i rgyu dang / rtog pa nye bar len pa'i rgyu dang / rtog pa lhan cig byed pa'i rgyu'o/ /de la bla na med pa yang dag par rdzogs pa'i byang chub don du gnyer bar byed pa'i 'jug pa'i rgyu ni snying rje chen po yin te/ 'di ltar de'i mtshan nyid ni sems can thams cad sdug bsngal dang bral bar 'dod pa yin no//nye bar len pa'i rgyu ni sa dang po'i mtshan nyid can gyi byang chub kyi sems yin te/ 'di ltar de nyid sa gong nas gong du mi mthun pa dang gnyen po'i tshul gyis yongs su sbyangs nas bla na med pa yang dag par rdzogs pa'i byang chub kyi mtshan nyid can gyi thams cad mkhyen pa nyid kyi ngo bo nyid du yang 'gyur ro//lhan cig byed pa'i rgyu ni pha rol tu phyin pa drug po dag sgrub pa yin pa nye bar bstan to/ /de la rang gi sems dang chos thams cad mngon par rtogs pa'i dus na skad cig ma dang po la byung ba ma skyes shing skye ba med par rtogs pa'i mtshan nyid can gyi ye shes ni byang chub ces bya ste/de rtogs pa'i thabs kyang de la byang chub gang zhe na/ rang gi sems yang dag pa ji lta ba bzhin yongs su shes pa ste zhes bya ba la sogs pa'i ngo bo nyid brjod pas ston to/ /de la dngos po rnams la rtog pa ni rnam pa gnyis te/'di lta ste/ sems snang ba la ma gtogs pa phyi'i don rten cing 'brel bar 'byung ba las phung po dang khams dang skye mched la dmigs par bya ba dang dmigs par byed pa'i ngo bor rtog pa dang de las gzhan te phyi'i don med pa kho nar sngon po la sogs par snang ba nyid kyis de nyid gzung ba dang 'dzin par rtog pa'o//de lta bas na rtog pa 'di gnyis ni nyon mongs pa dang shes bya'i sgrib pa'i rgyu yin pa nyid kyis bcom ldan 'das rnam par snang mdzad kyi sku bzhi thob pa'i mi mthun pa'i phyogs su gyur pa'i phyir spang bar bya ba yin no//'di spong ba'i lam yang bla na med pa yang dag par rdzogs pa'i byang chub yin la/ de yang re zhig dang por rang gi sems gzung ba dang 'dzin pa'i rnam pa can gyi gnyen por gyur pa kho na yin par bstan pa'i phyir/ 'di lta ste/ byang chub ni rang gi sems yang dag pa ji lta ba bzhin yongs su shes pa ste zhes bya ba gsungs so//de la byang chub ces bya ba ni skad kyi dbyings las rtogs pa yin par 'byung bas byang chub ces bya ba'i sgra byang chub spyir ston par byed pa yin no/ /de'i phyir byang chub ni rang gi sems yang dag pa ji lta ba bzhin yongs su shes pa ste zhes bya ba khyad par du byed de/de la rang gi sems zhes bya ba ni gzung ba dang 'dzin par snang ba'i sems dbang po dang yid kyi rnam par shes pa la sogs pa'i ngo bo nyid do snyam du dgongs pa yin no/ /yang dag pa ji lta ba bzhin yongs su shes pa zhes bya ba ni ngo bo nyid med pa ston par byed pa'i rigs pa dang lung de dag gis gzung ba dang 'dzin pa'i rnam pa can gyi sems de'i ngo bo nyid brtag pa'i sgo nas rnam pa thams cad mi dmigs par rtogs pa ni yang dag pa ji lta ba bzhin yongs su shes pa'i byang chub yin pa ste/yang dag pa zhes bya ba'i sgra ni phyin ci ma log pa'i don ston par byed pa yin pa'i phyir ro//de skad du 'di las kyang gsang pa'i bdag po ji ltar rang gi sems yongs su shes par bya zhen 'di lta ste/ rnam par ram/ kha dog tu'am/ dbyibs su'am/ yul du'am/ thu gzugs su'am/ tshor bar ram/ 'du shes su'am/ 'du byed du'am/ rnam par shes pa'am/bdag tu'am/ bdag gir ram/ gzung bar ram/ 'dzin par ram/ dag par ram/ ma dag par ram/ phung por ram/ khams su'am/ skye mched du'am/ rnam pa thams cad kyi bar du yongs su btsal yang mi dmigs pa yin te zhes gsungs te/ rang gi sems yang dag pa ji lta ba bzhin du yongs su shes pa'i mtshan nyid can gyi byang chub 'di yang /de ni bla na med pa yang dag par rdzogs pa'i byang chub bo zhes bya ba 'dis nyan thos dang rang sangs rgyas kyi byang chub dag las kyang khyad par du byed do/ /des na dgongs pa ni nyan thos dang rang sangs rgyas kyi byang chub la sogs pa ni phung po la sogs pa snang ba nyid kyis yang dag pa kun nas nyon mongs pa dang shes bya'i sgrib pa dag gi gnyen po nyid ma yin no//de nyid kyi phyir gsang ba'i bdag po de la ni chos rdul tsam yang med cing mi dmigs so zhes bya bar gsungs te/ byang chub 'di phung po la sogs par snar ba dang bral ba nyid kyis rnam pa thams cad du nyon mongs pa dang shes bya'i sgrib pa'i gnyen po nyid yin par bstan te/ 'di'i don yang bla na med pa yang dag par rdzogs pa'i byang chub de la/ chos rdul tsam phra mo yang gzung ba'i ngo bor med cing de bzhin du 'dzin pa'i ngo bor yang mi dmigs so zhes bya ba 'di yin no//de'i phyir dgongs pa ni de rnam pa thams cad kyis dben pa nyid kyi rang bzhin gyis 'od gsal ba'i phyir/ gzung ba dang 'dzin pa'i rnam pa can gyi chos phra mo yang med cing mi dmigs so snyam pa 'di yin no/ /de nyid kyi phyir/byang chub de ni nam mkha'i mtshan nyid de/ /zhes bya ba gsungs te/ byang chub kyi dpe nam mkha' yang rnam pa thams cad kyis dben pa nyid kyi rang bzhin gyis 'od gsal ba nyid du ston par byed pa yin gyi ma skyes pa'i dngos po'i ngo bo nyid khong du chud par byed pa ni ma yin no//de nyid kyi phyir de la byang chub par byed pa yang med la byang chub par bya ba 'ga' yang med do zhes bya ba gsungs te/ de bas na dgongs pa ni rang gi sems yang dag pa ji lta ba bzhin du yongs su shes pa'i bdag nyid mnyam pa nyid kyi ye shes kyi ngo bo nyid kyi rang bzhin gyis 'od gsal pa'i ngo bo nyid kyi byang chub ni yod pa kho na yin la/'on kyang de byang chub par byed pa dang byang chub par bya ba'i rnam par rtog pa dang bral ba ni bral lo snyam pa 'di yin no/ /yang ci'i phyir byang chub de la byang chub par byed pa dang byang chub par bya ba'i rnam par rtog pa mi srid snyam pa la/ byang chub la mtshan nyid med pa'i phyir te zhes bya ba gsungs te/ des na dgongs pa ni sngon po la sogs pa'i sems kyi rnam par rtog pa gang gis sngon po la sogs pa'i yon tan dang ldan pa'i dngos po shes par byed/ mtshon par byed/ rtogs par byed pa de ni mtshan nyid ces bya na/de yang byang chub de la rnam pa med cing rnam par mi rtog pa'i phyir med de/ de'i phyir mtshan nyid med pa zhes bshad do snyam pa 'di yin no/ /de ltar byang chub gzung ba dang 'dzin pa'i rnam pa can gyi sems kyi gnyen po nyid yin par brjod nas phung po dang khams dang skye mched rnams kyi gnyen po nyid kyang yin par bstan pa'i phyir/gsang ba'i bdag po chos thams cad kyang mtshan nyid med pa ste zhes bya ba gsungs te/ chos thams cad ni phung po dang khams dang skye mched kyi ngo bo nyid dag go/ /de dag gi mtshan nyid ni chos mngon pa las gzugs kyi mtshan nyid ni gzugs su rung ba'o//tshor ba'i mtshan nyid ni myong ba'o/ /'du shes kyi mtshan nyid ni mtshan mar 'dzin pa'i bdag nyid do zhes bya ba la sogs pa gsungs pa yin te/ de dag gi mtshan nyid 'di yang chos bdag med par ston pa'i rig pa dag gis brtags na yod pa ma yin pas chos thams cad kyang mtshan nyid med pa'o zhes bshad do//mtshan nyid dgag pa 'di yang phung po la sogs pa kun rdzob pa'i ngo bo nyid med pa kho nar ston pa yin gyi/ 'di dag gi don dam pa'i ngo bo nyid chos thams cad stong pa nyid kyi mtshan nyid gang yin pa de ni mi 'gog go zhes 'di lta ste/nam mkha'i mtshan nyid do zhes bya ba nam mkha'i dpes bstan to/ /de nas 'di skad du gang dag la nam mkha' lta bu'i mtshan nyid stong pa nyid kyi rang bzhin kho nar yod pa de dag ni nam mkha'i mtshan nyid do zhes bshad pa yin te/nam mkha'i dpe yang skabs 'dir phung po la sogs pa'i ngo bo nyid kun rdzob pa ngo bo nyid med par ston par byed pa nyid du bshad do snyam du dgongs pa yin no/ /de ltar na byang chub ni rang gi sems dang chos thams cad ngo bo nyid med par rtogs pa yin no zhes byang chub kyi mtshan nyid bshad pa yin no//byang chub kyi ngo bo nyid rang bzhin gyis 'od gsal ba'i sems 'di yang de bzhin gshegs pa'i sa las 'byung ba'i skad cig ma dang po la ni byang chub ces bya'o/ /de'i 'og tu mi gnas pa'i mya ngan las 'das pa dang de bzhin gshegs pa'i chos kyi sku zhes bya ba'i ming 'thob po zhes bya bar khong du chud par bya'o//chos kyi sku 'di'i dbang gis kyang gdul ba rnams la skabs ji lta bar dus ji lta ba bzhin ji skad bshad pa'i sku so sor snang ste/ de'i phyir 'di la bshad pa'i mtshan nyid can gyi sku bzhi char yang byang chub kho na'i rgyu can yin no zhes bstan pa yin no//ye shes rang bzhin gyis 'od gsal ba rdzogs par byang chub pa dang mi gnas pa'i mya ngan las 'das pa'i ngo bo nyid 'di la yang rang gi bdag nyid la yang / de las gzhan pa la dngos po'i ngo bo nyid du rtog pa mi srid do/ /'di ltar rang bzhin gyis shin tu 'od gsal ba'i phyir dang bdag dang gzhan mnyam pa nyid kyi mtshan nyid kyi stong pa nyid 'dris par bya ba'i phyir/rtag tu rnam par mi rtog pa'i ye shes kyi snang ba rab 'byam gyi ngang du gyur pa'i phyir ro/ /bcom ldan 'das dag gis 'di dang gzhan las gdul ba rnams kyi dngos po dang dngos po med par rnam par rtog pa dgag pa'i phyir/theg pa chen po la sogs pa ston pa lung gi bdag nyid kyi gtan tshigs 'byung ba las rten cing 'brel te 'byung ba yongs su dag pa dang / yongs su ma dag pa'i ngo bo nyid dag kyang spyir gdod ma nas ma skyes shing skye ba med par ston pa kho nar dngos por 'dzin pa dgag par gsungs te/ji skad du/ blo yis rnam par gzhigs rnams kyis/ /ngo bo nyid ni ngos ma zin/ /de'i phyir de dag ngo bo nyid/ /med cing skye ba med par bstan/ /zhes gsungs pa lta bu'o/ /de nyid kyi phyir sangs rgyas thams cad kyi yul ye shes snang ba'i rgyan gyi mdo las/skye med chos ni rtag tu de bzhin gshegs/ /chos rnams thams cad de bzhin gshegs dang 'dra/ /byis pa'i blo can mtshan mar 'dzin pa dag /'jig rten na ni med pa'i chos la spyod/ /ces gsungs so/ /don 'di nyid kyang shes rab kyi pha rol tu phyin pa sum brgya pa las/gang dag nga la gzugs su mthong / /gang dag nga la sgrar shes pa/ /log pas spong par zhugs pa ste/ /skye bo de yis nga mi mthong / /zhes gsungs pa yin no/ /ji ltar bcom ldan 'das don dam par blta bar bya ba de bzhin du yang 'di nyid las/chos nyid du ni sangs rgyas blta/ 'dren pa rnams ni chos kyi sku/ /chos nyid rig par mi rung ste/ 'di ni rnam par shes mi nus/ /zhes gsungs pa yin no/ /bcom ldan 'das ji ltar kun rdzob tu de bzhin gshegs pa mi mthong ba dang 'di'i stong pa nyid kyi ngo bo nyid kyang dngos por yod par ma yin no zhes bya ba de bzhin du/de bzhin gshegs pa dge chos zag med kyi/ /gzugs brnyan dag tu gyur pa yin te 'dir/ /de bzhin nyid med de bzhin gshegs pa med/ /'jig rten kun na gzugs brnyan yang dag snang //zhes gsungs pa 'di yin no/ /'phags pa shes rab kyi pha rol tu phyin pa chen po las kyang / 'phags pa rab 'byor gyis gdul ba rnams la gzigs nas yongs su dag pa dang / yongs su ma dag pa'i chos rnams la dngos por 'dzin pa yang dag pa bshad de/'di lta ste/ sangs rgyas kyi byang chub kyang sgyu ma lta bu rmi lam lta bu'o/ /lha'i bus smras pa/ 'phags pa rab 'byor ci mya ngan las 'das pa yang sgyu ma lta bu rmi lam lta bu yin nam/ rab 'byor gyis smras pa/ lha'i bu mya ngan las 'das pa yang sgyu ma lta bu rmi lam lta bu yin no zhe smras la/gang mya ngan las 'das pa las khyad par du 'phags pa'i chos gzhan zhig yod na yang sgyu ma lta bu rmi lam lta bu zhes smra'o zhes gang smras pa yin no/ /de lta bas na bcom ldan 'das thugs rje chen po'i chus brlan pa mya ngan las 'das pa'i grong khyer chen por phyin par byed pa'i ded dpon chen por gyur pa dag gis de ltar kun rdzob dang don dam pa'i ngo bo yongs su dag pa dang /yongs su ma dag pa'i ngo bo nyid kyi dngos po rnams la dngos por 'dzin pa'i rtog pas kyang nyon mongs pa dang shes bya'i sgrib pa ngar 'dzin pa dang nga yir 'dzin pa la sogs pa sngon du 'gro ba 'jug par dgongs nas de'i mngon par zhen pa yongs su dor ba'i phyir/gdul ba'i skye bo 'dren pa la phan par byed pa dngos po thams cad gzod ma nas ma skyes zhing skye ba med par bstan par mdzad par khong du chud par bya ste/ 'di ltar dngos po kun rdzob pa rnams ni bskal pa brgyar gzod ma nas ma skyes shing skye ba med par bstan kyang tha snyad chad par mi snang ngo //de skad du 'phags pa ting nge 'dzin gyi rgyal po'i mdo las kyang / rtag ces bya ba btags pa tsam/ /'khor ba la ni mtha' mi dmigs/ /zhes gsungs so//gzhan yang kha cig dngos po kun rdzob pa dang don dam pa rnams kyi de kho na nyid kyi rjod par byed pa'i lung nges pa'i don yang drang ba'i don nyid du 'dren par byed la/ de bzhin du rang gi shes rab kyi stobs kyis don rig pa dang ldan pa yang tshig ston pa dag gis rigs pa dang mi ldan pa nyid du rnam par 'jog par byed de/'di la kho bo cag ltar mngon par zhen pa'i dpyang thag la 'jug pa yid la byed pas ci zhig bya/ de'i phyir mkhas pa rnams gzu bo lta ba'i ri bo dam pa la 'dzegs te/ dam pa ma yin pa'i rnam par rtog pa'i chom rkun pa bzlas brjod dang bsam gtan la sogs pa'i mda' dag gis bsnun nas rdzogs par byang chub pa'i phun sum tshogs pa blang ba lhur bya'o snyam na de ltar na ches rigs par zhugs pa yin no zhes brjod do//kho bo yang dam pa rnams la pus mo gcig sa la btsugs te spyi bor thal mo sbyar nas/ dam pa bde gshegs ji skad bshad pa yi/ /rang lha'i rnal 'byor kun dang bzlas brjod dang / gsang sngags mdzod cig de nas grub pa dang / /rgyal ba gzigs nas de nyid rig mkhyen mdzod/ /ces rnam pa thams cad du gsol ba 'debs so/ /de la rang gi lha'i ngo bo nyid kun rdzob dang don dam pa dang kun du sbyor zhing ldan pa zhes bya ba ni/rang gi lha'i rnal 'byor gyi mtshan nyid yin no/ /kun du sbyor ba rgyud las gsungs pa 'di'i go rims kyang 'di yin te/ rgyud 'di las 'di lta ste/ ji ltar mthong ba dag thos pa'i dngos po rnams gzod ma nas ma skyes shing skye ba med pa'i rigs pas don dam pa'i ngo bo nyid skye ba med pa'i mtshan nyid la mos par byas nas/de'i 'og tu phung po dang khams dang skye mched la sogs par rtog pa kun rdzob tu yod pa yang gcig dang du mar dpyad pa'i rigs pas cha shas nas brtags te/ de dag tu snang bas dben pa'i sems mngon sum du byas nas rang gi lha'i rnal 'byor du sgrub ba kun rdzob pa'am don dam par bya'o zhes 'byung ngo / /de la lha'i mtshan nyid don dam pa'i ngo bo nyid ni chos kyi dbyings yin te/ rang gi lha dang bdag gi de bzhin nyid dag tha mi dad pa'i mtshan nyid du mos pa'i sgo nas de dang lhan cig gcig pa nyid 'di ni rang gi lha'i rnal 'byor don dam pa yin no//rang gi lha'i rnal 'byor kun rdzob pa'i go rims kyang 'di las rnam pa gnyis su bstan te/ de la gcig ni rang gi sems kyi rnam pa snang ba thams cad kyis dben pa zla ba'i dkyil 'khor la sogs pa'i rnam par bsgyur bas bdag nyid rang gi lhar snang ba bsgrub pa yin no//de las gzhan pa ni snang bas dben pa'i sems las langs te/ bdag dang rang gi lha sgyu ma lta bur mnyam pa nyid du mos pa sngon du 'gro ba chos nyid du mnyam par gcig tu mos pas bdag nyid lha'i gzugs su mos par byas te/bdag gi rnam par smin pa'i gzugs kyi rnam pa kho na rang gi lha nyid du nga rgyal bya ba ni 'di lta ste/ rang gi lha'i rnal 'byor kun rdzob pa gnyis pa yin no/ /don 'di yang rgyud 'di las lha'i de kho na nyid la sogs pa rim par phye ba dag las bstan pa yin par khong du chud par bya'o//zhar la 'ongs pa rdzogs so// //rnam par snang mdzad chen po mngon par rdzogs par byang chub par dpyad pa'i rim pa la bab pa'i dkyus ma nyid brjod par bya ste/ rnam par snang mdzad mngon par rdzogs par byang chub pa de kho na rtogs pa'i dus nyid na sngon gyi smon lam gyi 'phen pas sku dang gsung dang thugs rab 'byam sems dang sems ma yin pa thams cad dang 'dra bar sems can la skal ba ji lta ba bzhin du snang ba dag gis 'jig rten gyi khams rab 'byam thams cad du khyab pa gang yin pa de ni byang chub kyi rnam par sprul pa yin no zhes bya bar shes par bya'o//de'i mtshan nyid kyang 'di las gong du bstan zin te/ 'di lta ste/ de nas byang chub sems dpa' kun du bzang po la sogs pa de dag dang / gsang ba'i bdag po la sogs pa rdo rje 'dzin pa de dag bcom ldan 'das rnam par snang mdzad kyi byin gyi rlabs kyis sku mnyam pa nyid bkod pa mi zad pa'i mdzod rnam par bsgyings pa la bzhugs so//de bzhin du gsung dang thugs mnyam pa nyid bkod pa mi zad pa'i mdzod rnam par bsgyings ba la bzhugs so zhes bya ba la sogs pa 'di yin no/ /rnam par snang mdzad mngon par rdzogs par byang chub pa'i dus gzhan las kyang gsungs te/de skad du/ de bzhin gshegs pa skye ba 'byung ba bstan pa'i mdo las kyang yang dag par bstan to/ /sngar bris zin pa gang yin pa de yang mtshams sbyar ba'i phyir skabs 'dir bri bar bya ste/ rigs kyi bu de bzhin gshegs pa rnams mngon par rdzogs par sangs rgyas nas ting nge 'dzin sangs rgyas shin tu rnam par sangs rgyas pa zhes bya ba la snyoms par 'jug ste/snyoms par zhugs ma thag tu sems can rnams ji snyed pa de snyed kyi sku kun du gnas so/ /sku ji snyed pa de snyed kyi gsung dang / gsung ji snyed pa de snyed kyi thugs kun du gnas so zhes bya ba la sogs pa rgyas par 'byung ba yin no//sku mi zad pa'i bkod pa la sogs pa bstan pa 'dis kyang bcom ldan 'das kyis de'i rang gi ngo bo rtogs par bya ba'i phyir/ thabs yang dag par bstan pas sems can yongs su dag pa byang chub sems dpa' kun du bzang po la sogs pa'i don mdzad pa yin no//yongs su ma dag pa thub pa dang mi dang lha dang lha ma yin dang dri za la sogs pa gang yin pa de dag ni de'i mi zad pa bkod pa gsum gyi ngo bo rang gi ngo bo'i sgo nas mthong ba'i lam du mi 'jug ste/ de'i phyir de dag la phan gdags pa'i ched du rgyud 'di las de'i sku la sogs pa bkod pa'i dkyil 'khor dang phyag rgya dang gsang sngags kyi mtshan mar byin gyis brlabs nas bstan te/'di ltar de dag gis de'i sku la sogs pa bkod pa'i dkyil 'khor dang phyag rgya dang gsang sngags kyi ngo bor gyur pa yang de dag mnyes par byed pa'i sbyor bas bcom ldan 'das kyis nye bar bstan pa dag kho nas mnyes par bya ste/'bras bu legs par nges pa dang mngon par mtho ba ston par 'gyur ro/ /de'i mtshan ma yang rgyu dang ngo bo nyid dang 'bras bu'i mtshan ma'i bye brag gis rnam pa gsum yin no//de la 'di'i rgyu ni mngon sum dang brgyud pa'i rgyu'i ngo bo nyid gnyis kyi bye brag gis rnam pa gnyis te/ de la 'di'i brgyud pa'i rgyu ni 'jig rten pa dang / byang chub sems dpa' dang sangs rgyas dang / rdzogs par byang chub pa'i ting nge 'dzin dang bzhi'i bye brag gis shes par bya'o//mngon sum gyi rgyu ni rdzogs par byang chub pa dang chos kyi sku'o/ /rnam par sprul pa 'di'i ngo bo nyid ni ji skad du/ mtshan nyid sngar bshad pa yin no/ /'di'i 'bras bu ni thabs sna tshogs kyis sems can thams cad gdul ba la sbyor ba dag yin no/ /de lta bas na rgyud 'di las rdzogs par byang chub pa rnam par sprul pa 'di byin gyis rlob pa na ngo bo nyid du gsum po de 'di dag dkyil 'khor dang phyag rgya dang /gsang sngags dang ting nge 'dzin gyi mtshan mar bstan pa'i sgo nas ci rigs par byin gyis brlab par rjes su dpag pa'o/ /de la sku bkod pa byin gyis rlob pa ni 'di las snying rje chen pos 'byung ba'i dkyil 'khor gyi sgo nas dngos su bstan te/de las ni dkyil 'khor gyi sbyor ba'i sgo nas lha'i sku gzugs dag kho nar dgod par gsungs te/ 'di skad du/ de yi snying po dbus su ni/ /rgyal mchog gtso bo gser gyi mdog /'bar bcas thor tshugs dbu rgyan can//zhes bya ba la sogs pa dang / mgon po yi ni byang phyogs su/ /spyan ras gzigs kyi dbang po ni/ /pad+ma dkar po'i stan la 'dug /dung dang kun+da zla 'dra la/ /mgo la 'od dpag med bzhugs shing / /bzhin ni bag tsam 'dzum pa bri/ /zhes bya ba la sogs pa dang /mgon po rnam snang mdzad chen gyi/ /lho yi phyogs su rdo rje 'dzin/ /re ba thams cad skong byed pa/ /mdog ni pri yang+ku lta bur/ /ljang ser ram ni margad ltar/ /sngo bsangs mgon po dbu rgyan can/ /sems dpa' chen po rgyan kun gyis/ /rnam par brgyan cing mtha' yas par//'jug pa rgya chen rdo rjer bcas/ /zhes bya ba la sogs pa rgya cher 'byung ste/ snying rje chen po'i snying po can gyi dkyil 'khor byin gyis rlob pa las rig par bya'o/ /gsung mi zad pa bkod pa byin gyis rlob pa yang 'di las dngos su yi ge'i 'khor lo bskor ba'i dkyil 'khor gyi rnam par bstan te/'di ltar der ni dkyil 'khor du lha rnams phyag rgya dag gam sa bon gyi yi ge dag tu dgod par bshad do/ /'di skad du yi ge 'khor lo bskor ba'i dkyil 'khor bstan pa las dkyil 'khor gyi bdag po bcom ldan 'das rnam par snang mdzad gzugs dang phyag rgya dang sa bon gyi yi ge rnams las gang yang rung ba zhig tu dgod par yang dag par brjod nas/de las gzhan pa rnams phyag rgya'am sa bon gyi yi ge dag tu dgod par bstan par 'byung ste/ de skad du shar phyogs su sangs rgyas thams cad kyi yi ge a zhes bya ba klad kor dang bcas pa ste/aM me'i phyogs su byang chub sems dpa' thams cad kyi phyag rgya yid bzhin gyi nor bu rin po che'am/ yi ge ka bri ste ka de bzhin du dkyil 'khor bstan pa 'di las ni gzhan du yang phal cher sa bon gyi yi ge dag kho nar bstan to/ /de bzhin du gsang ba'i dkyil 'khor ni thugs mi zad pa bkod pa bsdus nas bstan te/'di ltar gsang ba'i dkyil 'khor du lha rnams phyag rgya'i khyad par rang gi rnam par thar pa'i don gyi rjes su byed pa pad+ma dang rdo rje la sogs pa dag dang / de bzhin du me'i dkyil 'khor la sogs pa'i rang gi sems snang ba'i khyad par me dang rlung dang sa dang chu'i dkyil 'khor dgod pa dag gis dgod par 'byung ste/gsang ba'i bdag po gzhan yang de bzhin gshegs pa rnams kyi dkyil 'khor ni zla ba'i dkyil 'khor 'dra ba mdog dung lta bu'i dbus su ni/ sangs rgyas kun gyi gru gsum pa/ /pad+ma dkar po'i steng na 'dug /klad kor bcas pa'i mtshan gyis btab/ /rdo rje'i mtshan ma rnams kyis mtshan/ /dpyad mi dgos pa kun nas ni/ /'od zer dag ni gnyis bya ba/ /gsang sngags mgon las byung nas su/ /de ni phyogs bcu rnams su song / /zhes bya ba dang / de bzhin 'jig rten mgon gyi ni//spyan ras gzigs kyi dkyil 'khor ni/ /de las nan tan mnyan par gyis/ /kun du gru bzhi lham pa la/ /dbus su dung 'dra gzhag par bya/ /de yi steng du pad+ma ni/ /sa bon bcas byas rgyas par bri/ /de yi steng du rdo rje che//rdo rje las kyang pad+ma che/ /thams cad sa bon rnams kyis mtshan/ /rang gi sa bon legs par sbyor/ /zhes bya ba la sogs pa gang gsungs pa yin te/ rgyas par gsang ba'i dkyil 'khor bstan pa las khong du chud par bya'o/ /dkyil 'khor 'di gsum yang grangs bzhin du sku gsung ba la sogs pa'i gsum bsdus par gyur pa yin par bshad mod kyi/'on kyang sku med pa'am gsung med la/ thugs kyang phal cher sku med par med pas dkyil 'khor re re la yang sku la sogs pa gsum char byin gyis rlob par rig par bya'o/ /de bzhin du dkyil 'khor gsum char la yang phal che ba'i phyir/la lar sku dang gsung dang thugs dag byin gyis rlob par gyur na gzugs dang phyag rgya dang sa bon rnams bkod pa yang snang ngo / /de bzhin du 'di las rim pa mdor bsdus pa la sogs pa'i mtshan nyid kyi dkyil 'khor bstan pa gzhan dag kyang 'di'i rgyud phyi ma las bshad pa gsang ba'i rim par phye ba la sogs pa las blta bar bya ste/de dag tu yang dgongs pa ni 'di nyid yin par khong du chud par bya'o/ /yang sku la sogs pa bkod pa 'di nyid las sgrub pa po rnams las bzlas brjod yan lag bzhi pa la sogs pa ston par lha sangs rgyas dang /byang chub sems dpa'i gzugs la sogs pa nang dang phyi rol du gyur pa bsam gtan bya ba'i sgo nas bstan te/ 'di las ji skad du/ yi ge dang ni yi ger sbyar/ /de bzhin bzhi las bzhir gyur pa/ /shin tu bsdams pas yid la ni/ /bzlas brjod 'bum phrag gcig bya'o//zhes bya ba dang / yi ge byang chub sems yin te/ /gnyis pa sgra zhes bya ba yin/ /gzhi ni rang gi lha gzhag pa/ /rang gi lus kyi gnas la bya/ /gzhi gnyis pa ni rdzogs sangs rgyas/ /rkang gnyis mchog tu shes par bya/ /zla ba'i dkyil 'khor rnam dag pa//sngags pas de la gnas par bsam/ /yi ge rnams ni go rims bzhin/ /de yi dbus su legs par dgod/ /ces bya ba la sogs pa gsungs pa lta bu yin no/ /de bzhin du ri mo'i sku gzugs dang sku gzugs kyi rnam pa byin gyis rlob pa'i sgo nas kyang khong du chud par bya'o//gsung mi zad pa bkod pa yang 'di las gsang sngags dang rig sngags kyi sa bon gyi yi ge byin gyis rlob pa'i sgo nas bstan par snang ste/ 'di ltar gsang sngags dag ni/ na maH sarba bud+d+ha bo d+hi satwA nAn/ AH bi ra hUM khaM/ zhes bya ba la sogs pa dang / na maH sa man+ta bud+d+hA nAn/a sa me tri sa me sa ma ye swA hA/ zhes bya ba la sogs pa yin no/ /rig sngags kyi sa bon gyi yi ge dag ni/ a A aM aH/ zhes bya ba la sogs pa yin no/ /de bzhin du thugs mi zad pa bkod pa yang / lag pa'i phyag rgya dgod pa dang bri ba'i phyag rgya dgod pa'i sgo nas bstan par blta bar bya'o//de ltar na sku la sogs pa bkod pa 'di'i rgyu dang ngo bo nyid dang 'bras bu'i mtshan ma yang 'di las de lta bu la sogs pa bstan pa las blta bar bya'o zhes bshad pa yin no/ /rdzogs par byang chub pa rnam par sprul pa byin gyis rlob pa'i bsdus pa'i don ni 'di las rnam par sprul pa byin gyis rlob pa'i dkyil 'khor dang /rig sngags dang / gsang sngags dang / phyag rgya dang sa bon gyi ngo bo mnyes par byed pa'i sgo nas rang bzhin gyis don 'grub par bya ba'i phyir/ sku dang gsung dang thugs kyi spyod pa can la sogs pa'i gsang sngags bstan pa yin no//spyod pa de yang rnam pa gnyis te/ de la gcig ni dkyil 'khor gyi cho ga la yang dag par bstan pa yin no/ /de las gzhan pa ni rig sngags dang / gsang sngags la sogs pa bstan pa'i mtshan nyid yin te/ ci rigs par rgyud kyi rjes su 'brang nas rig par bya'o//de la dkyil 'khor gyi chog la yang dag par bstan pa ni 'dir rnam pa bcu bzhis bstan te/ 'di lta ste/ slob dpon gyi mtshan nyid bstan pa dang / dkyil 'khor gyi sa bstan pa dang / de yongs su dag pa'i mtshan nyid bstan pa dang / de'i byin gyis rlob pa'i cho ga dang / slob ma'i mtshan nyid bstan pa dang / slob ma sta gon du gnas pa'i cho ga bstan pa dang / dkyil 'khor gyi thig gdab pa'i cho ga brjod pa dang / dkyil 'khor gyi rim pa la sogs pa rnam par dbye ba dang / dkyil 'khor gyi tshon gyi mtshan nyid dang / de dgye ba la sogs pa'i cho ga bstan pa dang /dkyil 'khor gyi lha rnams nye bar bya ba'i sbyor ba dang / de dag mchod pa'i cho ga'i yan lag bstan pa dang / slob ma gzung ba'i cho ga bstan pa dang / de dbang bskur ba'i cho ga brjod pa dang / mes bya ba'i cho ga bstan pa bcu bzhi yin no//de la slob dpon gyi mtshan nyid ni/ slob dpon nyid du 'jug pa dang / mngon par 'du byed pa dang / grub pa'i bye brag gis rnam pa gsum mo/ /de la slob dpon nyid du 'jug pa'i mtshan nyid ni snying rje can sgyu rtsa la dag la mkhas pa shes rab kyi pha rol tu phyin pa'i tshul la rtag tu mkhas pa theg pa gsum gyi khyad par shes pa gsang sngags kyi de kho na nyid kyi don la mkhas pa bsam pa shes pa/sangs rgyas dang byang chub sems dpa' rnams la dad pa la sogs pa yin no/ /slob dpon nyid du mngon par 'du byed pa'i mtshan nyid zab pa dang mi zab pa'i bye brag gi sgo nas te/gsang sngags phyag rgya rtog shes pa'i/ /slob dpon rnam pa gnyis zhes bya/ /zab dang mi zab bye brag gis/ /de yi mtshan nyid shes par bya/ /zab mo rgya cher shes par bya/ /lus can rnams ni yid mi rton/ /sangs rgyas rnams kyi sras mchog ste//mthong ba'i chos ni rnam par spangs/ /gnyis pa mthong ba'i chos rnams kyis/ /mos par gyur pa dmigs pa can/ /sangs rgyas rkang gnyis mchog rnams kyis/ /'jig rten pa yi dkyil 'khor kun/ /de yis bri bar bya ba'i phyir/ / rjes su gnang zhing dbang yang bskur/ /zhes gang gsungs pa yin te/ slob dpon dmigs pa can mngon par 'du byas pa 'di ni gnyis pa yin no/ /slob dpon gyi thabs bsgrub pa'i mtshan nyid ni/ 'di las rnam pa gnyis su bstan te/ 'di lta ste/ snying rje chen po'i snying po can dang /yi ge 'khor lo bskor ba'i dkyil 'khor 'dri ba'i slob dpon du dbang bskur ba dang / gsang ba'i dkyil 'khor 'dri bar dbang bskur ba yin te/ sangs rgyas rnams kyis mdor na ni/ /dam tshig can rnams sngar bshad de/ /dkyil 'khor 'di ni mthong ba las/ / dam tshig shes pa gcig ces bya/ /de la phyag rgya mi bstan cing / /sngags kyang sbyin par mi bya'o/ /byang chub sems kyi bye brag las/ /sngags dang phyag rgya yongs su bzung / /dkyil 'khor mthong zhes bya ba 'di/ /dam tshig can gnyis shes par bya/ /dkyil 'khor dang ni phyag rgya mthong //las dang bya ba la yang sbyar/ /bla mas lung ni ma byin pa/ /de yang dam tshig shes par bshad/ /phyag rgya dkyil 'khor bri ba rnams/ /de tshe cho ga bzhin bstan na/ /gsang ba'i ye shes 'byung ba yi/ /dbang bskur med pa'i sngags pa min/ /gsang ba'i dkyil 'khor dbus su ni//sngags pa cho gas dbang bskur ba/ /dam tshig shes pa sngar shes bya/ /dam tshig can zhes gzhan mi bya/ /zhes gang gsungs pa yin no/ /de lta bas na rim pa 'dis ni dkyil 'khor gsum gyi slob dpon nyid kyi thabs thob pas dkyil 'khor 'dri ba'i tshe rig pa'i rgyal mo yan lag bcu gnyis pa 'byung bas sngar bsnyen pa bya ste/ji skad du/ dkyil 'khor gyi ni sngon rol du/ /bya ba rnams ni nges pas nyon/ /so so'i las rnams 'dod pa yis/ /tshul shes pas ni ci rigs par/ /rang gi ting 'dzin la gnas te/ /rig sngags rgyal po stobs po che//yan lag bcu gnyis tshig 'byung ba/ /go rims bzhin du bzlas brjod bya/ /zhes gsungs pa lta bu yin no/ /de'i phyir slob ma byang chub kyi sems shin tu goms pa dkyil 'khor gyi slob dpon nyid du gyur pa'ang rung / byang chub kyi sems ma goms pa nyid kyis dmigs pa can yang rung ste/dkyil 'khor 'dri ba'i tshe rig pa'i rgyal po yan lag bcu gnyis pa 'byung ba sngar bsnyen pa bya'o zhes bstan par 'gyur ro/ /rang gi ting nge 'dzin la gnas te zhes bya ba'i dgongs pa ni/ slob dpon rang gi ting nge 'dzin la gnas te/ rig pa'i rgyal po 'di bzlas brjod bya'o zhes bshad par 'gyur pa 'di yin no//na maH sa man+ta bud+d+hA nAn/ a sa man+ta d+harmA d+hA tu kar+ya ga ti ga tA nAn sarba thA/ AM khAM aM aH/ saM sa haM ha raM ra baM ba swA hA/ haM ha swA hA/ raM ha swA hA/ rig pa'i rgyal po tshig yan lag bcu gnyis 'byung ba yin no//slob dpon gyi ting nge 'dzin gyi mtshan nyid kyang bshad pa ni 'di yin no/ /bdag nyid a zhes bya bas rnam par snang mdzad kyi skur byin gyis brlab pa la yi ge'i 'khor lo mtha' dag rang gi lus la dgod de/ ka ni lkog mar shes par bya/ /zhes bya ba la sogs pa gsungs pa gang yin pa rim gyis rang gi lus la dgod pa ni slob dpon gyi ting nge 'dzin gcig pa yin no//de bzhin du de kho na dang 'dra bar rnam par snang mdzad kyi skur byas la/ rigs kyi bdag po gsum gyi sa bon gsum dgod pa ni slob dpon gyi ting nge 'dzin gnyis pa yin no//yang na dpa' bo chen po'i yi ge lnga bkod pas shAkya thub pa'i skur byin gyis brlabs te/ slob dpon gyi ting nge 'dzin gsum pa yin no/ /ci zhig 'tshal nas slob dpon 'gyur/ /zhes gang gsungs pa la gleng ste/ a ni gsang sngags thams cad kyi/ /snying po yin par yang dag bshad//'di las 'byung ba'i gsang sngags ni/ /grangs med rnams kyang 'byung bar 'gyur/ /spros pa thams cad zhi ba yi/ /ye shes mtha' dag skye bar 'gyur/ /zhes bya ba dang / rdzogs pa'i sangs rgyas rkang gnyis gtsos/ /a ni 'tsho ba yin par gsungs/ /de bas 'di kun thams cad de//yan lag kun la rnam par gnas/ /yan lag rnams kyang ci rigs par/ /rtag par kun du rig par gyis/ /yi ge rnams kyis thams cad khyab/ /yi ge rnams kyang de yis khyab/ /yi ge rnams las sgra 'byung ba/ /cha dang cha las byung ba'o/ / de bas 'di kun thams cad de/ /lus ni sna tshogs las byung ba'o/ /de yi dgongs pa yang dag bstan/ /snying po dag ni nges pas nyon/ /yan lag rnams la yan lag dgod/ /blo ldan rnal 'byor stan 'dug ste/ /bdag lus rdzogs sangs rgyas kyi skur/ /byas nas de bzhin gshegs pa rnams//dran par byas te 'di kun bya/ /gang gis ye shes rgya chen te/ /cho ga bzhin du shes gyur na/ /de tshe sangs rgyas mthu chen gyis/ /de ni slob dpon yin par bshad/ /de bas de nyid de bzhin gshegs/ /de nyid rdzogs sangs rgyas zhes bya/ / sangs rgyas byang chub sems dpa' dang / /tshangs dang khyab 'jug dbang phyug che/ /zhes bya ba la sogs pa phan yon rgyas par rgyud las rtogs par bya'o/ /slob dpon byang chub kyi sems legs par bsgom pa rang gi lus la yi ge'i 'khor lo dgod pa ni/ don dam par 'jug pa'i thabs yin pa nyid kyis 'bras bu'i phan yon che bar bstan pa'i phyir/gang zhig byang chub sems brtan zhing / /sgra shes pas ni lhur len gang / /chos rnams kun la ma chags par/ /rnam pa kun du kun zhes bya/ /yi ge'i 'khor lo thams cad ni/ /gang gi lus la rnam gnas pa//de ni sngags pa gsang sngags 'chang / /dpal ldan sngags rgyal rdo rje 'dzin/ /zhes bya ba gsungs so/ /'di ni slob dpon gyi ting nge 'dzin yi ge'i 'khor lo'i dgod pa'i rim pa rgyas pa yin te/ slob dpon gyi rnal 'byor gyi cho ga 'di ni slob dpon zab cing rgya che ba la mos pa byang chub kyi sems brtan pa/sgra'i don de kho na nyid la mkhas pa kho na'i thun mong ma yin pa nyid yin no/ /da ni slob dpon rnam pa gnyis ka'i yang cho ga mdor bsdus pa dang / bar ma'i lam gyis so sor slob dpon gyi rnal 'byor gnyis ston te/ slob dpon nyid lus rnam par smin pa kho na la rigs kyi bdag po gsum gyi sa bon gyi yi ge gsum bkod pa las sgra'i de kho na nyid la gtod pa'i sgo nas de mdor bsdus pa bstan pa'i phyir/smin mtshams dbus su yi ge hUM/ /rdo rje can gyi gzhi yin no/ /brang du yi ger zhes bya/ /phyag na pad+ma'i gzhi zhes bya//a ni snying ga'i gnas bzhag la/ /kun gyi rje de dbang phyug yin/ /rgyu dang rgyu min sna tshogs pa/ /mtha' dag ngas ni rab tu khyab/ /ces bya ba gsungs so/ /de bzhin du gzhan yang slob dpon gyi rnal 'byor bar ma ni gsang ba'i dkyil 'khor 'dri ba'i tshe nyid na sngon gyi rnam par smin pa'i lus kho na la yi ge lnga pa 'di dag bkod la/sgra'i de kho na nyid la gtod pa'i sgo nas yongs su gsungs te/ de bstan pa'i phyir/ A zhes bya ba srog gi mchog /bI zhes bya ba tshig tu bshad/ /ra zhes bya ba me zhes brjod//hUM zhes bya ba khro bor bshad/ /kha ni nam mkhar shes par bya/ /klad kor stong pa'i mchog ces bya/ /gang zhes slob dpon zhes bya ba/ /'di ni yang dag dam pa yin/ /zhes bya ba gsungs so/ /yi ge lnga po 'di dag ni dpa' bo chen po'i snying po dgod pa'i rim par go rims bzhin du chu so dang /lte ba dang / brang dang / smin mtshams dang / klad par dgod pa shes par bya'o/ /de lta bas na de ltar ting nge 'dzin gang yang rung ba la gnas te/ rig pa'i rgyal po tshig yan lag bcu gnyis 'byung ba bzlas brjod bya'o zhes bshad par bya'o//de la dkyil 'khor gyis ni phyi dang nang gi bye brag gi rnam pa gnyis so/ /de la phyi'i sa'i mtshan nyid bstan pa'i phyir/ me tog 'bras bu ldan pa'i ri/ /gtsang zhing yid 'ong chu yi gnas/ /zhes bya ba la sogs pa gsungs te/ rgyas par rgyud las shes par bya'o/ / de ni sbyang ba yang kun rdzob pa kho nar bshad de/ rdo ba dang / bong ba dang / gyo mo dang / gseg ma med cing zhes bya ba la sogs pas gsungs pa yin no/ /sbyang ba ni sngar sa'i lha la sbran par bshad de/ sangs rgyas skyob pa thams cad kyi/ /spyod pa'i tshul dang khyad par dang / /sa dang pha rol phyin pa la//lha mo khyed ni dbang du gyur/ /zhes bya ba la sogs pa gsungs pa yin no/ /don dam pa'i sa ni slob dpon zab mo spyod pa'i rang gi sems kho na yin la/ de la sbyang ba yang byang chub kyi sems goms pa'i sgo nas yin no/ /de gnyis ka yang bstan pa'i phyir/ /sa ni dang por shes par bya//sems kyi sar ni bshad pa yin/ /sbyang ba sngar ni bstan pa yin/ /de yis de ni yongs su sbyang / /zhes bya ba rgyas par/ mngon par byang chub mthong bas na/ /de ltar de ni bstan zhes bya/ /zhes bya ba'i bar du gsungs pa yin te/ de sbyang ba de ni byang chub kyi sems goms pa'i sbyor ba yin par bshad do//de lta bas na dgongs pa ni/ phyi rol gyis sbyang ba med par yang byang chub kyi sems goms pa'i sgo nas sa'i skyon du rnam par rtog pa thams cad spangs pa kho nas yongs su dag par 'gyur ro snyam pa 'di yin no/ /de nyid kyi phyir/ sngags pa rtog la gnas nas su/ /gang zhig sbyong bar byed pa ni/ /byang chub sems ni rnam spangs pa/ /gsang ba'i bdag po de mi 'dag /de bas rtog pa rnam spangs nas/ /sa kun rnam par dpyad par bya/ /nga yis dkyil 'khor rnams kyi ni/ /cho ga rgyas par gang bstan pa//de dag thog mar bstan pa ni/ /rmongs pa rnams kyis mi shes te/ /rtog pa sdug bsngal rgyur 'gyur bar/ /ji srid ma spangs bar du ni/ /'jig rten 'di na sangs rgyas min/ /kun mkhyen zhes kyang mi bya'o/ /zhes bya ba gsungs so/ /rang gi sems kyis yongs su sbyang ba'i don 'di nyid rdo rje dam tshig mngon par 'byung ba la sogs pa'i rgyud las rgyas par bstan to//de nas zhag gsum nas dkyil 'khor 'dri bar rtsom pas sa yongs su gzung bar bya ste/ de'i mtshan nyid ni/ sa byin gyis brlab pa dang po ni/ rdzogs sangs rgyas kyis bya bar bshad//gnyis pa sems kyi dbang gis te/ /'di ni gzhan du mi bya'o/ /zhes bya ba gsungs so/ /de la sems kyi dbang gis zhes bya ba ni/ slob dpon gyi sems kyi dbang sa phyogs 'dir bdag gis dkyil 'khor bri bar bya'o snyam pa de lta bu'i rnam par rtog pas so/ / rdzogs pa'i sangs rgyas kyis sa yongs su gzung ba ni rnam pa bcur bshad de/ 'di lta ste/ yongs su 'dzin pa'i tshe ba'i lci ba sa la ma lhung ba dang / ba'i gcin gyis byug pa dang / gsang sngags kyis mngon par bsngags pas bgegs nye bar zhi bar bya ba dang / byug spos kyis lha rnams kyi dkyil 'khor bya ba dang /dkyil 'khor gyi sar ci rigs par rdzogs pa'i sangs rgyas rnams nye bar bya ba dang / dri dang me tog la sogs pas mchod pa bya ba dang / yongs su gzung ba'i bsam pas lag pa sa la bzhag ste/ 'phags pa 'jig rten gsum las rnam par rgyal ba dang /mi g.yo ba'i sngags dag las gang yang rung ba zhig brjod pa dang / dkyil 'khor gyi lha sangs rgyas dang byang chub sems dpa' spyan drang ba dang / gsang sngags kyi sa'i lha yang dag par mgu bar bya ba dang / dkyil 'khor gyis nyid du nyal bar bya ba dang /rmi lam bzang po brtag pa'o/ /rnam pa bcu po 'di dag ni sa yongs su gzung bar bya ba la bstan pa ste/ de la ji skad du bstan pa'i gnas gang yang rung bar sa gzhi rab tu 'thas par bcags te/ ba'i lci ba sa la ma lhung ba dang / ba'i gcin du bsres pas byug go zhes bya ba la sogs pa rgyas par/de nas sngags pas rmi lam blta/ /byang chub sems dpa' grags chen nam/ /yang na sangs rgyas bcom ldan 'das/ /sems can rnams la phan bya'i phyir/ /bdag nyid kun du rtsol 'bad pa'am/ / bdag nyid la ni 'di skad du/ /sems dpa' chen po bu khyod legs/ /dkyil 'khor myur du bris shig ces/ /spro ba bskyed pa mthong yang rung / /zhes bya ba'i bar du gsungs pa yin no/ /de ltar sa yongs su gzung ba byas nas sang lta bu dkyil 'khor 'dri ba dang / slob ma de dag yongs su brtags nas gzung bar bya'o// //bam po gsum pa/ de la slob ma rnams kyi mtshan nyid ni rnam pa gsum ste/ 'di lta ste/ khyad par gyi mtshan nyid dang / spyi'i mtshan nyid dang / rab tu dbye ba'i mtshan nyid do/ /de la khyad par gyi mtshan nyid bstan pa'i phyir/slob ma dad cing rigs btsun pa/ /de bzhin dkon mchog gsum la dad/ /zab mo yi ni blo dang ldan/ /zhes bya ba la sogs pa gsungs so/ /de'i phyir mtshan nyid 'di lta bu dang ldan pa mang po mi srid pas/ bcu'am brgyad dam bdun nam lnga/ / gcig gnyis bzhi las lhag kyang rung / /zhes grangs nges pa kun du ston to/ /de nyid kyi phyir/ gang dag gis sngon theg pa chen po gsang sngags kyi spyod pa'i tshul sgo mtha' yas pa bsgrub pa la goms par byas pa de dag ni rdo rje sems dpa' yin te/ de rnams nyid kyi don gyi phyir/grangs kyi tshad 'di byas so zhes bya ba gsungs so/ /de la spyi'i mtshan nyid ni yon tan 'di lta bu med pa rnams kyang dkyil 'khor du gzud pa'i phyir yongs su gzung ba gang yin pa ste/ de nyid kyi phyir/ 'on kyang slob dpon snying rje chen po dang ldan pas/ sems can gyi khams ma lus par bsgral bar yi dam bca' ba kho nar bya ste/des byang chub kyi sems kyi rgyur gyur par bya ba'i phyir/ sems can tshad med pa rnams yongs su gzung bar bya'o zhes bya ba gsungs so/ /slob ma rab tu dbye ba'i mtshan nyid kyi dbang du mdzad nas/ dus dang dus min bye brag las//slob ma rnam bzhir shes bya ste/ /gcig ni de yi mod la bsgrub/ /gnyis su bsgrub dang gnyi gar min/ /mtshan nyid thams cad rdzogs pa yi/ /slob ma de ni rgyal ba'i mchog /ces bya ba gsungs so/ /de la gcig ni de'i mod la bsgrub ces bya ba ni/slob ma dkyil 'khor mthong ba/ byang chub kyi sems goms pa dang du gyur pa/ slob dpon las phyag rgya dang gsang sngags mnos pa/ rgyud thos pa las gsang sngags spyad pa'i bya ba cho ga shes pa zhi ba la sogs pa'i las dang / dngos grub mchog la sogs pa'i las kyi cho ga la mkhas pa gang yin pa ste/yon tan de lta bu dang ldan pa ni slob dpon gyi thabs su sgrub pa nyid kyi phyir dkyil 'khor du bcug pa'i tshe/ mjug thogs kho nar dbang bskur ba'i dkyil 'khor du dbang bskur nas bsgrub cing rdzogs par bya'o zhes bya ba'i tha tshig go/ / gsang sngags mnos pa ni/ gsang sngags rab tu 'byin pas bzlas brjod byed pa nyid du bsgrub par bya ba yin te/ de lta bas na 'di yang / de'i mod la bsgrub par bya zhes bya'o/ /gnyis su bsgrub ces bya ba ni byang chub kyi sems ma goms pa dkyil 'khor du bcug nas phyis byang chub kyi sems sgom du bcug ste/phyag rgya dang gsang sngags byin nas/ de yang bzlas brjod byed pa nyid du bsgrub par bya ste/ de lta bas na 'di ni dus gnyis su bsgrub par bya ba yin pas gnyis su bsgrub ces bya'o/ /yang na de nyid rgyud nyan du bcug nas/ bya ba'i las la mkhas par byas la slob dpon du dbang bskur te/slob dpon gyi thabs su bsgrub pa'i sgo nas bsgrub par bya ste/ de lta bas na 'di yang dus gnyis su bsgrub pa yin te/ dang po dkyil 'khor du bcug pa'i dus ni gcig yin la/ de las gzhan pa ni slob dpon du dbang bskur ba'i dus yin pas/gnyis pa ni dus su bsgrub par brjod pa yin no/ /gang zhig byang chub kyi sems goms pa dang du ma gyur pa de ni dang po dkyil 'khor du 'jug pa na yang phyag rgya dang gsang sngags kyi 'os ma yin la phyis kyang byang chub kyi sems goms par mi nus pa'i phyir dang /de bzhin du rgyud la sogs pa thos par 'dzin mi nus pa'i phyir gnyis kar yang min zhes bya'o/ /mtshan nyid thams cad rdzogs pa yi/ /slob ma de ni rgyal ba'i mchog /ces bya ba ni gang zhig snying rje chen po'i snying po can dang / yi ge 'khor lo bskor ba dang / gsang ba'i dkyil 'khor gsum char du dbang bskur ba de ni slob dpon gyi mtshan nyid rnam pa thams cad du rdzogs par gyur pa yin pas/ mtshan nyid thams cad rdzogs pa yi/ /slob dpon de ni rgyal ba'i mchog /ces bya'o/ /'di ltar slob dpon gyi lam thabs thob pa de lta bu yang bsod nams mngon par 'phel bar bya ba'i phyir dang /bgegs nye bar zhi bar bya ba'i phyir dang / sdig pa rnams zad par bya ba'i phyir/ slob dpon gzhan gyis dkyil 'khor legs par bris pa mthong bar byed pas 'di yang slob ma'i grangs su 'gro'o zhes bya bar khong du chud par bya ste/ de skad du/ ji lta ji ltar rig sngags tshogs kyis ni/ /bsten pa'i dkyil 'khor bsod nams can mthong ba/ /de lta de ltar rdo rje rigs bsten pa'i/ /lus la 'dir ni byin rlabs kun du 'jug /rdo rje'i lus ni rgya cher mthong 'gyur nas/ /bgegs rnams mtha' dag 'jig par rab tu 'gyur//zhes gsungs te/ rgyas par ni lag bzangs kyis zhus pa las 'byung ngo / /go rims 'di ni dam tshig can rnam pa lnga'i mtshan nyid bstan pa las khong du chud par bya ste/ rgyud 'di nyid las ji skad du/ dkyil 'khor 'di ni mthong ba las/ /dam tshig shes pa gcig ces bya//de la phyag rgya mi bstan cing / /sngags kyang sbyin par mi bya'o/ /byang chub sems kyi bye brag las/ /sngags dang phyag rgya yongs su bzung / /dkyil 'khor mthong zhes bya ba 'di/ /dam tshig can gnyis shes par bya/ /dkyil 'khor dang ni phyag rgya mthong / / las dang bya ba la yang sbyar/ /bla mas lung ni ma byin par/ /de yang dam tshig shes par bzhed/ /phyag rgya dkyil 'khor bri ba rnams/ /de tshe cho ga bzhin du bstan/ /gsang ba'i ye shes 'byung ba yi/ /dbang bskur med pa'i sngags pa yin/ /gsang ba'i dkyil 'khor dbus su ni//sngags pa tshul bzhin dbang bskur ba/ /dam tshig shes pa sngar shes bya/ /dam tshig can zhes gzhan mi bya/ /zhes gsungs pa lta bu'o/ /'di'i don bshad ma thag pa kho na yin pas rnam par mi bshad do/ /de la slob ma sta gon du gnas pa ni rnam pa dgu ste/ 'di lta ste/ gsum pa skyabs su btang ba dang / sdig pa rnams bshags pa dang / dus gsum du sgrib pa med pa'i ye shes kyi sdom pa 'dzin du gzhug pa dang / sta gon du gnas par bya ba la/ me tog dang dri la sogs pa sbyin pa dang / so shing bca' ba'i mtshan ma brtag pa dang /'phags pa mi g.yo ba la sogs pa bzlas brjod byas pa'i skud pas bcings te bsrung ba'i sbyor ba dang / slob ma sta gon du gnas pa yang dag par dga' bar bya ba'i sbyor ba dang / sta gon du gnas pa rnams gnyid la nyal khar rmi lam bzang ngan gyi khyad par brjod pa dang / de dag kho na la chos bshad pas sems spro ba bskyed pa'o/ /sta gon du gnas pa'i dus na/ dgos pa'i cho ga rnam pa 'di dgu yang / gsum la skyabs su gtang bar bya'o/ /sdig pa mi bya ba rnams kyang bsgo bar bya'o zhes bya ba la sogs pa byang chub sems dpa' rnams ni lus dang ngag dang yid yongs su ma btang bar bslab pa 'dzin par mi byed do zhes bya ba'i bar gyi gzhung 'dis bstan to//de la dkyil 'khor gyi thig gdab pa'i cho ga la sbyor ba drug ste/ 'di lta ste/ slob dpon dang srad bu 'dzin pa dag dkyil 'khor gyi thig gdab par gsungs pa'i lha'i rnal 'byor mngon du bya ba dang /dkyil 'khor gyi mtshan bstan pa dang / dkyil 'khor gyi thig gdab pa'i rab tu dbye ba bstan pa dang / de'i rim pa rnam par dbye ba dang / dkyil 'khor gyi lha rnams kyi gnas dgod pa brjod pa dang / sgo dang rta babs dang sgo khyud rnam par dbye ba'o//de la snying rje chen po'i snying po can gyi dkyil 'khor gyi thig 'debs pa'i tshe ni dkyil 'khor gyi slob dpon rnam par snang mdzad kyi rnal 'byor du bya ba kho nar bstan te/ snying rje chen po'i snying po can gyi dkyil 'khor gyi thig gdab pa bstan pa las/ tshon sna lnga pa'i srad bu thogs te/bdag nyid bcom ldan 'das rnam par snang mdzad du byin gyis brlabs la zhes bya ba gang rgyas par gsungs pa yin no/ /yi ge 'khor lo sgrub pa'i dkyil 'khor gyi thig gdab pa ni chos kyi skur mos pas gdab ste/ 'di ltar bdag nyid gzod ma nas zhi ba gnyis su med pa'i rnal 'byor gyi gzugs de bzhin gshegs pa'i gzugs stong pa nyid kyi rang gi ngo bor byin gyis brlabs la zhes gang gsungs pa yin no//gsang ba'i dkyil 'khor ni bdag nyid rdzogs par sangs rgyas pa'i sku sa'i dkyil 'khor la sogs pa bzhi dang ldan pas byin gyis brlabs la bri ba dang thig gdab par bya ste/ji skad du/ dang por sngags pas dkyil 'khor de/ /rang gi lus la dgod bya ste/ /rkang pa nas ni chu so la/ /thug gi bar du sa yi bsam/ /de nas gong du snying ga'i bar/ /sdom brtson can gyis chu yi bsam/ / chu yi yan chad me yi ste/ /me yi yan chad rlung yin no/ /bsams nas de ni mkhas pa yis/ /sa la gzugs brnyan gzhag par bya'o/ /zhes gang gsungs pa yin no/ /slob ma rnams gzung ba'i tshe ni/ slob dpon gyi ting nge 'dzin sngar bshad pa yi ge bkod pa'i rnal 'byor gyi sgo nas rgyas pa dang /bar ma dang mdor bsdus pa kho na bya bar khong du chud par bya'o/ /dkyil 'khor gyi thig gdab ba'i tshe slob dpon gyi ting nge 'dzin gyi khyad par bshad zin to/ /da ni dkyil 'khor gyi tshad kyi cho ga dpyad par bya ste/ de la rgyud 'di las dkyil 'khor 'di gsum char yang gdan dang ra ba'i ri mo dang lha'i gzugs dang /phyag rgya rnams khru dang mtho la sogs pa'i grangs nges pa nyid du ma bstan gyi/ khru la sogs pa'i tshad ma nges par kun du bstan to/ /ji ltar dkyil 'khor chen po gzhan dag las ra ba'i ri mo nges par bya ba'i phyir/dkyil 'khor gyi cha khru bdun dang brgyad la sogs pa nges par snang ba dang / ji ltar dkyil 'khor chen po bkod pa la sogs pa'i rgyud dag las/ lha'i gzugs dang phyag rgya bri bar bya ba rnams/ khru dang mtho la sogs pa rab tu phye ste bstan pa de ltar rnam par snang mdzad kyi rgyud 'di las ni/snying rje chen po'i snying po can la sogs pa'i dkyil 'khor dag tu rdzogs par byang chub pa rnams kyi ra ba'i ri mo dang / lha'i gzugs dang / phyag rgya bri bar bya ba dag gi tshad nges par ma bstan to/ /des na dkyil 'khor 'di gsum ni khru la sogs pa'i grangs kyi tshad 'di ma nges so zhes bya bar gnas so//de skad du snying rje chen po 'byung ba'i dkyil 'khor bstan pa las/ rnam par snang mdzad kyi gdan pad+ma'i mtshan nyid 'di bshad de/ de yi tshad kyang sor bcu drug /yan chad du ni bshad pa yin/ /zhes gang gsungs pa yin no/ / 'di'i don ni rnam par snang mdzad kyi gdan pad+ma'i tshad sor bcu drug yan chad sor bcu bdun dang bco brgyad la sogs par bya'i/ sor bcu drug gi 'og ma grangs bcu bzhi dang bco lnga la sogs pa'i mtshan nyid du bya ba ni ma yin no zhes bya ba 'di yin no/ /de ltar na dkyil 'khor gsum char la yang rnam par snang mdzad kyi gdan pad+ma 'ba' zhig sor bcu drug las mi chung bar bya'i/dkyil 'khor gyi lha'i bye brag lhag ma rnams kyi gdan pad+ma ni ma nges pa kho nar bshad par blta bar bya'o/ /de ltar na dkyil 'khor gsum char la yang spyir lha'i gzugs dang / gdan dang phyag rgya rnams kyi tshad nges pa med pa kho nar gzhung 'dis bstan te/yid kyi rgya ni ji tsam pa/ /stan dang phyag rgya dag dang ni/ /lha yi tshad kyang go rims bzhin/ /de tsam du ni shes par bya/ /zhes gang gsungs pa yin no/ /tshul 'dis ni yid kyi rgya ji lta bar rnam par snang mdzad kyi gdan pad+ma'i sor dag ji lta ji ltar bskyed pa de bzhin du dkyil 'khor gyi ra ba la lha'i gzugs dang /phyag rgya tshad ma nges pa rnams kyang rnam par snang mdzad kyi gdan pad+ma'i rjes su mthun par mngon par bskyed par bya'o zhes bya bar khong du chud par bya'o/ /snying rje chen po'i snying po can gyi dkyil 'khor la sogs pa 'di ni sku mi zad pa la sogs pa bkod pa bsdus pa yin no zhes bya bar gnas so//de la dkyil 'khor gyi thig gdab pa ni tshon sna lnga pa'i srad bu rnam pa gnyis su bstan te/ 'di lta ste/ bar snang la rang bzhin gyi dkyil 'khor gyi thig gdab pa dang /sa la de'i gzugs brnyan du gyur pa byin gyis brlab pa'i dkyil 'khor gyi thig gdab pa ste/ srad bu rnam pa bzhir bshad de/ /dkar po ser po dmar po dang / /nag po zhes ni brjod par bya'o/ /snga ma nam mkha' lta bur bshad/ /bar snang la ni bzung bas su/ / der ni dkyil 'khor brtag par bya/ /srad bu dag ni gnyis pa yis/ /sa la dkyil 'khor dgod par bya/ /zhes gang gsungs pa yin no/ /de la/ bar snang la ni bzung nas su/ /zhes bya ba ni snying rje chen po can la sogs pa'i dkyil 'khor du tshon sna lnga'i srad bu bskor nas bar snang la tshangs pa'i srad bu'i cho gas dkyil 'khor gyi thig gdab par bya'o snyam du dgongs pa yin no//srad bu dag ni gnyis pa yis/ /zhes bya ba ni tshon sna lnga pa'i srad bu dag gis bar snang gi dkyil 'khor gyi thig gdab pa'i srad bu de nyid kyis sa'i dkyil 'khor gyi thig gdab par mi bya ste/ rgyu de ni dkyil 'khor gzhan du spyad zin pa nyid kyis dman ma dang 'dra ba'i phyir ro snyam du dgongs pa yin no//gsher thig ni mtshan nyid ma bstan kyang / kha dog 'chol pa yongs su spang ba'i phyir/ dkar po kho nar bya'o zhes khong du chud par bya'o/ /de la 'di snying rje chen po'i snying po can la sogs pa'i dkyil 'khor gyi thig gdab pa'i cho ga bshad pa yin te/'di la yang thig ni rnam pa gnyis so/ /gcig ni bar snang gi dkyil 'khor rnam par dbye ba'i thig yin te/ gang gi dbang du mdzad nas/ shar phyogs srad bu bre ba ni/ /lte ba'i thad kar bzung nas su/ /bar snang la ni gzung bar bya'o//de nas lho phyogs song nas su/ /byang phyogs su ni bri bar bya/ /zhes gsungs pa yin no/ /'di'i don ni dkyil 'khor gyi thig gi thog ma gnyis slob dpon rang gi lte ba'i thad kar dang thig 'dzin par byed pa'i lte ba'i thad kar bzung nas myur du bcom ldan 'das rnam par snang mdzad kyi rang bzhin gyi dkyil 'khor sku mi zad pa la sogs pa bkod pa'i mtshan nyid bsams nas/phyis de gsal ba'i phyir sa la tshon sna lnga pa'i srad bu gzhan gyis de'i gzugs brnyan du gyur pa ni byin gyis brlabs pa'i dkyil 'khor gyi thig gdab par bya'o/ zhes bya ba yin no/ /de la yang dang po kho nar dkyil 'khor gyi sa'i dbus su gtan la dbab pa'i phyir tshangs pa'i srad bu'i cho ga bstan pa 'di lta ste/ de nas srad bu gnyis pa ni/ /rang gis blangs nas de nyid du/ /de bzhin gshegs pa rjes dran zhing / /shar phyogs bltas te bri bar bya//de nas lho phyogs song nas ni/ /byang phyogs su ni bri bar bya/ /zhes bya ba yin no/ /de'i rjes la kun nas dkyil 'khor gyi thig gdab par bya ba de ston to/ /blo can de nas slar log nas/ /bden bral phyogs su gnas nas ni/ /byang phyogs su ni bri bar bya//de nas g.yas su bsgyur bar bya/ /bsgyur te de ru 'dug nas ni/ /lho yi phyogs su bri bar bya/ /de nas gnas de btang nas su/ /me yi phyogs su gnas nas ni/ /sngags par gsang sngags cho gar gnas/ /shar du srad bu bre bar bya/ /de nas de bzhin dbang ldan phyogs/ / song nas nub tu kha bltas te/ /rlung gi phyogs kyi bar du ni/ /byang phyogs su ni bre bar bya/ /sngags pa yis ni de lta bur/ /kun nas gru bzhi lham pa bya/ /zhes bya ba yin no/ /da ni cha'i sgo nas dkyil 'khor gyi gnas su gru bzhir byas pa la/ de'i nang du rim pa gsum gyis char brtag par bya'o zhes ston te/de nas dbus su zhugs nas ni/ /de la cha ni gsum du brtag /ces bya ba yin no/ /de la dkyil 'khor gyi sa'i cha gsum du brtag pa'i rim pa ni 'di yin te/ dkyil 'khor gyi sa'i thig gis kun nas gru bzhir byas pa'i nang du ngos gnyis nas ri mo brgyad brgyad kyis yongs su bcad la re'u mig brgyad cu rtsa gcig tu bya'o//re'u mig de dag kyang cha gsum byas nas cha re re la re'u mig nyi shu rtsa bdun du 'gyur ro/ /de'i phyir dkyil 'khor gyi rim pa re re la re'u mig nyi shu rtsa bdun dag tu bsgrub bar bya'o zhes bya bar gnas so//de la re'u bsgrengs pa ngos bzhin gnas pa dang pos dkyil 'khor gyi rim pa dang po bya'o/ /re'u mig gi phreng ba dang po ngos bzhin gnas pa de yang bgrang na re'u sum cu rtsa gnyis su 'gyur te/ de'i phyir 'di la re'u mig lnga lhag par gyur to//sngar ni rim pa gsum re'u mig nyi shu rtsa bdun dag tu shes par bya'o zhes bshad de/ de'i phyir re'u lnga po 'di dag gis sa'i cha dang nang rol gyi rim pa dag tu 'brel par mngon te/ 'di ltar re'u lnga po 'di dag med par nang rol gyi rim pa dag re'u nyi shu rtsa bdun du mi 'gyur ro//de'i phyir re'u lnga po 'di dag rnams kyis sa'i cha rim pa dang po'i re'u dag gi nang nas kun nas drangs te/ nang rol gyi rim pa gnyis kyi sar bsnan par bya'o/ /de'i rim pa yang 'di yin te/ re zhig dang po re'u bzhi las re'u re re zhing cha brgyad brgyad du byas nas re'u bzhi po 'di dag cha sum cu rtsa gnyis su 'gyur ro//de'i phyir rim pa dang po'i ri 'u bsgrengs pa sum cu rtsa gnyis dag las cha re re zhig kun nas drangs te/ nang rol gyi rim pa gnyis kyi re'u'i sa dag tu bsnan par bya'o/ /de ltar na rim pa dang po'i re'u bsgrengs pa dag las re'u bzhi kun tu drangs par 'gyur ro//re'u lnga pa gang yin pa de yang cha bzhir byas la/ cha re re la yang brgyad brgyad du byas na/ sum cu rtsa gnyis su 'gyur ro/ /de'i phyir 'dir yang snga ma bzhin du rim pa dang po'i re'u bsgrengs pa phyogs bzhin gnas pa dag la cha re re zhig kun nas drangs te/nang rol gyi rim pa gnyis kyi re'u'i sa dag tu kun nas bsnan par bya'o/ /de ltar na re'u lnga po 'di yang rim pa dang po'i re'u bsgrengs pa dag las kun nas drangs te/ nang rol gyi rim pa gnyis kyi re'u mig dag tu kun nas bsnan par 'gyur ro/ /de ltar na rim pa dang po'i re'u mig gis nyi shu rtsa bdun dag tu byas par 'gyur ro//de ltar rim pa dang po'i las drangs pa'i re'u lnga po nang rol gyi rim pa gnyis kyi re'u sa dag tu bsnan pa dag gis rim pa gnyis po de re'u sa nyi shu rtsa bdun dag tu mnyam par 'gyur mod kyi/ 'on kyang re'u bgo ba snga ma dang sbyar na nang rol gyi rim pa gnyis po 'di byar mi rung ste/de lta bas na nang rol gyi rim pa gnyis rnam par dbye ba'i phyir/ rim pa dang po'i re'u'i sa kun nas drangs pa gang yin pa de dag thams cad nang rol gyi rim pa gnyis kyi re'u mig dang bcas te cig car phyis nas nang gi cha dang gcig tu byas la yang ri mo drug pa dag gis kun nas yongs su bcad de/re'u bzhi bcu rtsa dgu par thig gdab par bya'o/ /de'i phyir rim pa dang po dang nye ba'i phyogs bzhir yang re'u bsgrengs pa dag gis re'u nyi shu rtsa bzhir 'gyur te/ de dag gis rim pa gnyis pa brtag par bya'o//de'i nang rol na lhag ma nyi shu rtsa lnga zhig lus gang dag yin pa de dag gi nang nas re'u nyi shu rtsa bzhi nang rol gyi rim pa gsum pa bya'o/ /'dir yang re'u nyi shu rtsa lnga pa gang yin pa de'i phyed rim pa dbu ma kho nar bzhag la/ ched gzhan gang yin pa de cha bcu drug tu bya ste/ de'i cha re re'i tshad du ni rim pa dbu ma dang 'brel pa'i re'u bcu drug ngos bzhin gnas pa las cha re re zhig kun nas drangs te rim pa gnyis pa'i re'u mig gi sa phyogs bzhin gnas pa dag tu yang bsnan par bya'o/ /de ltar na rim pa gnyis pa dang gsum pa ni so sor re'u sa nyi shu rtsa phyed dang lnga dag tu byas par 'gyur ro//de lta bas na de ltar rim pa gsum char yang chu dang zhing gi tshad dag gis so so'i re'u'i sa nyi shu rtsa bdun dag tu kun nas cha mnyam par thig gdab par 'gyur zhes bya bar khong du chud par bya'o/ /de'i rjes la phyogs bzhi char du yang rim pa re re zhing chu dang zheng gi tshad dag las thig gis cha mnyam du bya ste/rim pa re re zhing cha re re 'khor sar bya'o/ /lhag ma rim pa re re zhing cha gnyis lus pa gang yin pa de ni/ so so rang rang gi lha rnams kyi gnas su brtag par bya ste/ re zhig 'di ni rnam par snang mdzad kyi rgyud 'di las snying rje chen po'i snying po can la sogs pa'i dkyil 'khor gyi rim pa gsum char yang so sor chu dang zheng gi tshad dag gis mnyam par brtag par bshad pa yin no//gsang ba'i rgyud kyi dkyil 'khor gyi cho ga ma bshad pa thams cad bsdus par gyur pa las ni rim pa dang po lhag par bya bar gsungs te/'di ltar de las bcom ldan 'das rdo rje 'dzin gyis 'di skad du/ dkyil 'khor yang dag par bsdu bar bya ba la yang rim pa gnyis sam gsum mam bzhi yang rung / rim pa mang po yang rung ste/ phyi rol gyi rim pa gang yin pa de ni rgya che ba dang /sgo gcig par rab tu brtag par bya'o zhes gsungs so/ /de yang ji ltar 'gyur zhe na/ gong du bshad pa'i lugs su re'u gcig po 'di kho na rim pa dang po las kun du drangs te/ nang rol gyi rim pa gnyis kyi sar ma bsnan na de ltar na rim pa dang po 'di nang rol gyi rim pa gnyis pas re'u sa gcig gis lhag par 'gyur ro//de ltar na/ de nas dbus su zhugs nas su/ /de la cha ni gsum du brtab/ /sa rnams thams cad kun du yang / /cha gsum dag tu brtags nas ni/ /cha rnams kyang ni re re la/ /cha gsum dag tu rab tu brtag /ces bya ba gsungs pa gang yin pa de gsal ba yin te/ 'di ni snying rje chen po'i snying po can la sogs pa'i dkyil 'khor gyi thig gdab pa dang / rim par dbye ba spyi'i yin par rig par bya'o/ /de la gong du snying rje chen po'i snying po can gyi dkyil 'khor gyi sku bkod pa mi zad pa'i mdzod rnam par bsgyings pa byin gyis rlob par 'gyur ba yin no//yi ge 'khor los sgyur ba'i dkyil 'khor ni gsung bkod pa mi zad pa'i mdzod rnam par bsgyings pa byin gyis rlob pa yin no/ /gsang ba'i dkyil 'khor ni thugs bkod pa mi zad pa'i mdzod rnam par ba sgyings pa byin gyis rlob par 'gyur ba yin par rig par bya'o zhes bshad do//de la dkyil 'khor gsum char la yang phyag rgya'i gzugs gru gsum bri ba gang yin pa de ni de bzhin gshegs pa chos kyi sku la rnam par zhugs pa thams cad yin te/ snying po ye shes kyi rdo rje rtse lnga pas mtshan pa rnam par thar pa stong pa nyid dang /mtshan ma med pa dang / smod pa med pa dang gsum ston par byed pa dang / gru gsum par byin gyis rlob pa gru gsum dag tu rnam par gzhag par rig par bya'o/ /de la snying rje chen po can gyi dkyil 'khor du ni bcom ldan 'das rnam par snang mdzad chen po mngon par rdzogs par byang chub rtogs pa'i tshe brnyes pa gnas gyur pa'i sku dang rang gi sku'i khyad par rigs gsum du snang ba 'jig rten dbang phyug dang /rdo rje 'dzin pa la sogs pa'i mtshan nyid longs spyod rdzogs pa'i sku'i ngo bo nyid de lta bu dag dang thabs cig tu nang gi dkyil 'khor na rnam par bzhugs so//'jig rten dbang phyug dang rdo rje 'dzin pa la sogs pa'i snying po'i dkyil 'khor na gnas pa rnams longs spyod rdzogs pa'i sku'i ngo bo nyid yin par yang 'di las gong du 'di lta ste/ sems can las kyi tshe rnam par bskyed pa rnams sems dang po bskyed pa nas bzung ste sa bcu pa'i bar la gnas pa 'di nyid la yongs su rdzogs par bya ba dang /las kyi tshe bkag pa rnams la yang srid pa'i myu gu mngon par grub par bya ba'i phyir rdo rje 'dzin pa'i lus 'dra ba dang / byang chub sems dpa' kun du bzang po dang /phyag na pad+ma'i lus 'dra ba dang phyogs bcu na gsang sngags kyi tshul gyi tshig rnam par dag pa'i tshig gis chos ston pa dag kyang mthong ngo zhes bya ba'i gzhung 'dis yongs su bstan to/ /rim pa gnyis pa ni bcom ldan 'das rnam par snang mdzad nyid kyi sprul pa'i sku bcom ldan 'das shAkya thub pa sprul pa'i sku yongs su dag pa dang /yongs su ma dag pa'i lha dag dang thabs cig tu rnam par bzhugs so/ /rim pa gsum pa na ni bcom ldan 'das rnam par snang mdzad nyid kyi sku la sogs pa mnyam pa nyid bkod pa mi zad pa'i mdzod rnam par bsgyings pa rdzogs par byang chub pa'i gnas skabs na brnyes pa dang de bzhin du sems can gyi don gyi thabs sgo du ma lta ba dang mnyam pa'i phyir yang dag par lhags pa bcom ldan 'das 'jam pa'i dbyangs la sogs pa byang chub sems dpa' chen po dag sku sna tshogs su snang ba kho nar rnam par bzhugs par shes par bya'o//de bzhin du yi ge'i 'khor lo bskor ba'i dkyil 'khor dang / gsang ba'i dkyil 'khor du yang lha dgod pa'i rim pa ni 'di kho nar zad do/ /'on kyang 'di las yi ge'i 'khor lo bskor ba'i dkyil 'khor ni gsung bkod pa mi zad pa'i mdzod byin gyis rlob pa yin par bstan te/'di ltar 'di las dkyil 'khor gyi lha de dag nyid gsung byin gyis rlob par gyur pa sa bon gyi yi ge de dag nyid ting nge 'dzin ston par byed pa rnams su dgod par bstan to/ /'di las dkyil 'khor gyi lha rnams sa bon dag gam/ phyag rgya dag tu dgod par bya'o zhes gsungs pa gang yin pa der yang dgongs pa ni 'di yin te/rdo rje la sogs pa'i phyag rgya de dag ni dkyil 'khor gyi lha rnams kyi ye shes kyi mtshan mar gyur pa yin la ye shes kyi dbang gis kyang gdul ba rnams la/ /lha'i sku dang gsung dang thugs dag tu snang ngo / /de'i phyir dngos su na ye shes de nyid de ltar snang bas/ye shes gang yin pa de sku dang gsung yin te/ ye shes kyi mtshan ma des gsung gi mtshan mar yang mtshon par gyur pas nyes pa med do/ /de bzhin du gsang ba'i dkyil 'khor du ni dkyil 'khor gyi lha de dag nyid kyi thugs bkod pa mi zad pa'i mdzod byin gyis rlob par 'gyur ba/ral gri dang pad+ma dang rdo rje la sogs pa phyag rgya'i khyad par med dang rlung dang sa dang chu'i dkyil 'khor la gnas pa dag tu dgod par rig par bya'o/ /snying rje chen po'i snying po can la sogs pa'i dkyil 'khor 'di dag gsum char la yang rim pa re re zhing sgo re re kho nar bstan te/de la nang gi dkyil 'khor gyi sgo'i nang gi phyag rgya ni rnam par snang mdzad kyi pad+ma'i tshad du bya'o/ /dkyil 'khor gyi rim pa gnyis pa dang gsum pa'i sgo ni de dang 'tsham par rim gyis cung zad lhag par bya bar khong du chud par bya ste/ dang po'i sgo ni snying po yi/ / dkyil 'khor dang ni mnyam zhes bya/ /'jigs med dag gi rim gyis ni/ /bskyod de de las lhag ces bya/ /zhes gang gsungs pa yin no/ /dkyil 'khor gyi phyi rol du yang phyogs bzhi char du yang rta babs bri ba'am shing la sogs pa'i rgyu las bya'o/ /de bzhin du dkyil 'khor gyi phyi rol nyid du rta babs dang 'brel pa'i sgo khyud dag bri bar bya'o//de bzhin du gzhan yang / blo dang ldan pas phyogs bzhi ru/ /so so'i phyogs der sgo khyud ni/ /sdom brtson can gyis nan tan du/ /lha rnams gtso bo'i gnas su bya/ /zhes gang gsungs pa dang / 'di gsum char gyi yang tshad bstan pa'i phyir/rta babs rnams kyi tshad kyang ni/ /dkyil 'khor dbu ma dang mnyam mo/ /sgo khyud dag kyang de dang mnyam/ /pad+ma sor bcu drug tu bshad/ /ces bya ba gsungs te/ 'di'i don ni rta babs dag dang / sgo khyud kyi tshad rim pa dbu ma'i snam bu gcig gi zheng gi tshad du bya ba yin no//de bzhin du/ pad+ma sor bcu drug tu bshad/ /ces bya ba 'di'i don ni rnam par snang mdzad kyi pad+ma'i rgyar sor bcu drug tu bshad la/ sgo khyud dag ni phyogs bzhir pad+ma sor bcu drug pa de yang tshad ma nges pa kho nar bya'o snyam du dgongs pa yin no//gang yang phyogs cha phyogs char lha gtso bo rnams kyi sgo khyud dag bya'o zhes bshad pa 'di'i don ni lha'i stan pad+ma de dag gi yang sgo khyud lho du bya ste/ 'on kyang ngos gcig kho nar sgo khyud gcig kho na zhig bya'o snyam du dgongs pa 'di yin no/ /de la dbus kyi dkyil 'khor du ni rnam par snang mdzad kyi gdan pad+ma'i sgo khyud dag kho nar nang du phyogs ji lta ba bzhin du de bzhin gshegs pa thams cad kyi phyag rgya dang /'jig rten dbang phyug dang rdo rje 'dzin dag dgod par bya'o/ /rim pa gnyis par ni/ dkyil 'khor dgu ma'i khyams dang 'brel pa'i sgo khyud dag bya ste/der shar phyogs su ni shAkya thub pa'i rgyal po dgod par bya ste/ de bzhin du byang phyogs su ni lha'i rgyal po'o/ /lho phyogs su ni gshin rje dgod par bya'o/ /de bzhin du rim pa gnyis pa dang 'brel pa'i shar phyogs la sogs pa'i sgo khyud dag tu bcom ldan 'das 'jam dpal dbyangs la sogs pa'i dkyil 'khor gsum pa'i bdag po lha gtso bo'i rang bzhin can bzhi phyogs bzhir dgod par bya'o//da ni dkyil 'khor gyi thig gdab pa'i 'og tu dkyil 'khor gyi tshon dgye bar bya'o/ /de'i yan lag ni lnga ste/ 'di lta ste/ slob dpon gyi tshon byin gyis brlab ba'i ting nge 'dzin bstan pa dang /tshon byin gyis brlab pa'i cho ga dang / tshon dgye ba'i ting nge 'dzin dang / dkyil 'khor gyi tshon dkar po la sogs pa'i ra ba'i rim pa bstan pa dang / tshon dgye ba'i thabs so/ /de la tshon byin gyis brlab pa'i ting nge 'dzin ni/bdag nyid bcom ldan 'das rnam par snang mdzad kyi skur byin gyis brlabs te/ de nas yang bdag nyid bcom ldan 'das rnam par snang mdzad de'i phyag rgyas byin gyis brlabs la chos kyi dbyings rgya chen por byin gyis brlabs te zhes bya ba gang gsungs pa yin no//de la tshon byin gyis brlab pa ni tshon dkar po na ri zhes bya ba bkod nas chos kyi dbyings kyi rang bzhin du byin gyis brlab bo/ /tshon dmar po ni aM zhes bya ba bkod nas rdzogs pa'i sangs rgyas thub dka' ba'i ngo bo nyid du'o/ /tshon ser po ni yi ge ka zhes bya ba bkod nas gser thub kyi ngo bo nyid du'o//tshon ljang gu ni ba zhes bya ba bkod nas thub pa byang chub kyi snying po can gyi ngo bo nyid du'o/ /nag po la ni ha zhes bya ba bkod nas khro bo 'jig rten gsum las rnam par rgyal ba'i ngo bo nyid du'o snyam du rnam par bsam par bya ste/ thog mar tshon rtsi dkar po blangs la 'di ltar byin gyis brlab par bya'o//'di ni chos dbyings dag pa ste/ /sems can khams ni rnam sbyong ba/ /'di ni bdag nyid de bzhin gshegs/ /nyes pa thams cad rnam par spangs/ /zhes bya ba nas rgyas par/ bdud sde sdang ba thams cad la/ / rnam pa kun du bsdigs par byed/ /ces bya ba'i bar gsungs pa'o/ /tshon dgye ba'i ting nge 'dzin de las langs te dkyil 'khor bskor la nang du zhugs nas byams pa chen po dang snying rje chen po'i stobs kyis sgrub pa po la dmigs te/ bdag nyid ces bya ba sa las kyi rdo rje sems dpar byin gyis brlabs la/rdo rje dam pa sbyin pa dang lhan cig tu snying rje chen po 'byung ba'i dkyil 'khor bri bar bya'o zhes bya ba gang gsungs pa yin no/ /dkar po la sogs pa'i ra ba'i ri mo'i rim pa 'di lta ste/ dkar po thog mar gtang bar bya/ /de yi 'og tu dmar po ste/ /de nas ser po gtang bar bya//de yi 'og tu ljang gu gtang / /kun gyi nang rol nag po ste/ /tshon rtsi'i cho ga de ltar bshad/ /ces bya ba yin no/ /rab rnams kyi tshon dgye ba'i thabs kyi dbang du mdzad nas/ tshon ni nang nas dgye bar bya/ /phyi rol nas ni tshon mi dgye/ /zhes bya ba gsungs so//dkyil 'khor bris nas mchod pa bya'o/ /de'i yan lag ni bzhi ste/ 'di lta ste/ mchod pa'i ting nge 'dzin mngon du bya ba dang / dkyil 'khor bsrung ba dang / dkyil 'khor gyi lha rnams yang dag par gnas par bsam pa dang / mchod pa rnam pa bzhi bsgrub pa'o//de la mchod pa'i ting nge 'dzin gyi dbang du mdzad nas/ chos kyi dbyings la gzhol ba yi/ /sngags pa de na 'dug nas su/ /chos kyi dbyings kyi rang bzhin gyi/ /byang chub sems su gyur pa yis/ /shar phyogs kha bltas gnas nas ni/ /rdo rje can gyi rgya bcings nas/ / de nas las ni rdo rjer gyur/ /nan tan du ni mchod par bya/ /zhes bya ba gsungs so/ /dkyil 'khor bsrung ba ni phyag rgya rim par phye bas las bshad pa mtshams bcad pa la sogs pa'i phyag rgya dag gis bya'o/ /de la lha yang dag par gnas par bsam pa ni rgyud thams cad las 'di lta ste/ dkyil 'khor la sogs par lha spyan drangs pa rnams dang spyan ma drangs pa rnams kyang / chos kyi dbyings las byung ba de'i ngo bor mos pa'i sgo nas te rnam pa gnyis so/ /de la rnal 'byor gyi lugs 'phags pa de kho na nyid bsdus pa la sogs pa dang bya ba'i rgyud thams cad las kyang lha rnams yang dag par gnas par bsams la phal cher spyan 'dren pa sngon du 'gro ba can kho nar mthong ste/'di ltar rgyud de dag las/ bcom ldan 'das 'dul ba'i skye bo'i ngor yul dang dus ma nges pa na yang bzhugs par bstan to/ /'di ltar 'phags pa de kho na nyid bsdus pa las/ bcom ldan 'das sangs rgyas kyi zhing stug por mngon par rdzogs par sangs rgyas nas ri rab kyi steng du gshegs te/ lung dang rtogs pa'i bdag nyid kyi chos ston to/ /de nas kyang 'dzam bu'i gling la sogs par gshegs te phan gdags par mdzad do zhes 'byung ste/ rnal 'byor gyi rgyud dag las de lta bu'i la sogs pa bstan par snang ngo //bya ba'i rgyud dag las kyang rig sngags dang gsang sngags kyi lha rnams gnas ma nges pa kho nar bsgrags te/ de'i phyir rgyud de dag las lha rnams mchod pa'i phyir spyan drang ba'i cho ga nyid sngon du 'gro ba nyid du rung bar 'byung bas de kho na ltar bya'o//rnam par snang mdzad kyi rgyud 'di las ni/ dkyil 'khor gyi cho ga dag dang bzlas brjod la sogs pa'i las la lha rnams spyan ma drangs pa nyid du dam tshig gi phyag rgya bcings te bsam pa kho nas lha rnams yang dag pa kho nas gnas par bsam par bshad de/'di ltar 'di las bcom ldan 'das byang chub kyi snying po nyid rnam par mi rtog pa'i ting nge 'dzin la snyoms par zhugs pa/ sku bkod pa mi zad pa la sogs pa byang chub rtogs pa'i dus na brnyes pa rtag tu 'gro ba gsum la khyab par mdzad pas/ sems can la skal ba ji lta ba bzhin du mtshan mar snang pa 'jig rten dang 'jig rten las 'das pa'i rig sngags la sogs pa'i ngo bo nyid dag gis sems can rnams kyi don mdzad cing gang nas kyang mi byon gang du yang mi bzhud do zhes 'byung ste/ 'di las ji skad du bcom ldan 'das de bzhin gshegs pa byin gyis rlob pa'i rdo rje chen po rgya che ba chos kyi dbyings kyi pho brang rdo rje 'dzin thams cad 'du ba zhes bya ba nas rgyas par byang chub sems dpa' kun du bzang po dang /byams pa dang / 'jam dpal dang / sgrib pa thams cad rnam par sel ba la sogs pa dag gis kyang bskor zhing mdun gyis bltas pa la/'di lta ste/ de bzhin gshegs pa nyid dus gsum las 'das par byin gyis brlabs nas sku dang gsung dang thugs mnyam pa nyid kyi gzhi zhes bya ba'i chos kyi sgo'i chos bstan to/ /de nas byang chub sems dpa' kun du bzang po la sogs pa byang chub sems dpa' de dag dang /gsang ba'i bdag po la sogs pa rdo rje 'dzin de dag bcom ldan 'das rnam par snang mdzad kyi byin gyi rlabs kyis sku mnyam pa nyid bkod pa mi zad pa'i mdzod rnam par bsgyings pa la zhugs so/ /de bzhin du gsung dang thugs mnyam pa nyid bkod pa'i mdzod rnam par bsgyings pa la zhugs te/bcom ldan 'das rnam par snang mdzad kyi sku'am gsung ngam/ thugs la 'jug pa'am ldog pa yang mi dmigs so/ /thams cad du yang bcom ldan 'das rnam par snang mdzad kyi sku'i phrin las thams cad dang /gsung gi phrin las thams cad dang / thugs kyi phrin las thams cad dang / sems can gyi khams thams cad la kun du gsang sngags kyi tshul gyi tshig dag gis chos ston pa dag mthong na ni 'di lta ste/ sems can las kyi tshe rnam par bskyed pa rnams sems dang po bskyed pa nas bzung ste/sa bcu pa'i bar gnon pa 'di lta nyid la yongs su rdzogs par bya ba dang / las kyi tshe bkag pa rnams yang srid pa'i myu gu mngon par bsgrub par bya ba'i phyir rdo rje 'dzin pa'i lus 'dra ba dang / byang chub sems dpa' kun du bzang po dang /phyag na pad+ma'i lus 'dra ba dang / phyogs bcu nas gsang sngags kyi tshul gyi tshig dag gis chos ston pa dag kyang mthong ngo zhes bya ba'i bar du gsungs pa 'di dag yin no/ /'dir las kyi tshe bkag pa ni nyan thos dang rang sangs rgyas phung po lhag ma dang bcas pa'i mya ngan las 'das pa'i dbyings la rnam par gnas pa dag yin par dgongs so//de dag yang sred pa'i myu gu mngon par bsgrub par bya ba'i phyir zhes bya ba ni/ sangs rgyas kyi zhing yongs su dag pa dag tu skyes pa rnams la sa dang pha rol tu phyin pa la sogs pa sangs rgyas kyi chos rnams thob par bya ba'i phyir chos ston par mdzad do snyam du dgongs pa yin no//'di ltar de ni zad pa dang / mi skye ba dang / 'gog pa shes pa dang / snyoms par 'jug pa'i stobs bskyed pas/ dus re zhig cig ting nge 'dzin gyi bde ba nyams su myong la/ sangs rgyas bcom ldan 'das kyis bskul ba dang /sangs rgyas kyi zhing yongs su dag pa dag tu/ de dag las sa dang pha rol phyin pa la sogs pa yongs su rdzogs par byed pa'i thabs dag thob nas/ des sgrub pa dag lhur len cing yang dag par rdzogs pa'i sangs rgyas kyi go 'phang thob pa'i sgo nas mi gnas pa'i mya ngan las 'das pa'i grong khyer du phyin pa'i bar du 'gyur ro zhes bshad par 'gyur ro//'di ltar don 'di nyid rnam par snang mdzad kyi rgyud 'di nyid kho na'i rgyud phyi ma dang 'brel ba gsang ba'i rim par phye ba las rgyas par yang dag par bstan te/ byang chub sems pa'i spyod pa gsang sngags kyi sgo'i lam shes pa nyid spyod pa'i byang chub sems dpa' dang /nyan thos dang rang sangs rgyas lam gyi rnam pa shes pa dmigs pa dang bcas pa'i sa la gnas pa'i rang gi sems kyi spyod yul ma thob pa'i sems dang ldan pa rnams ji skad du bshad pa rgyas par brjod nas/nyon mongs pa dang shes bya'i sgrib pas bsgribs pa rnams bdag nyid lam mnyam pa nyid la dmigs nas nyon mongs pa rnams rnam par mnan te/ mtha' gnyis shin tu med par bya ba la/ ye shes med cing rgyu dang 'bras bu 'gags pa dang mtha' gnyis med pa dang /sems 'gog pa med pa'i phyir nyan thos kyi ye shes kyi mig yongs su ma dag pa'i ting nge 'dzin las ldang ba'i sbyor ba can rnams gzugs dang / snang ba dang / de las skyes pa'i rkyen bag chags kyis mtshams sbyor ba la 'dzin par byed cing khams gsum na nyon mongs pa'i spyod pa rnams rnam par mnan te/sngon gyi smon lam gyi dbang gis phung po yongs su bor nas/ sangs rgyas kyi zhing rnam par dag par skye ba 'thob ste/ yang sems dang po bskyed pa nas bzung ste sa dang pha rol tu phyin pa gnon pa'i sgo nas thams cad mkhyen pa nyid don du gnyer bar bya'o//zad pa dang / mi skye ba dang / 'gog pa dang snyoms par 'jug pa'i stobs kyis 'phen pas lo drug khrir pad+ma'i snying po la myos shing gnas so/ /de nas smon lam ji lta ba bzhin du bla na med pa yang dag par rdzogs pa'i byang chub tu rnam par dag par 'gyur ro zhes gang gsungs pa yin te/rgyas par gsang ba'i rim par phye ba las rtogs par bya'o/ /de'i phyir bcom ldan 'das rnam par snang mdzad sku la sogs pa thams cad du 'jig rten dang 'jig rten las 'das pa'i gsang sngags dang / rig sngags la sogs pa'i ngo bor rnam par gnas na/ de la spyan drang ba dang gshegs su gsol ba lta ci zhig dgos/yang don 'di nyid bcom ldan 'das kyis mdor bsdus te rgyud 'di las gzhung 'dis bstan te/ gsang ba'i bdag po gzhan yang de bzhin gshegs pa ni thams cad dang rjes su mthun pa sems can thams cad kyi bsam pa dang mthun pa sems can thams cad yang dag par mgu bar mdzad pa ste/byang chub sems dpa' thams cad dang gsang sngags spyad pa spyod pa rnams kyi mdun du gzugs brnyan lta bur bzhugs so/ /de bzhin gshegs pa ni rnam par mi rtog cing / yid kyi yul las yang dag par 'das pa dus dang yul dang dbye ba dang /las dang chos ma yin pa rnam par spangs kyang / gsang sngags spyod pa las byung ba'i/ /thams cad mkhyen pa'i go 'phang stsol/ /de bas kun mkhyen dngos grub dang / /go 'phang mchog kyang bsgrub par bya/ / zhes gang gsungs pa yin no/ /byang chub sems dpa' kun du bzang po la sogs pa pha rol tu phyin pa las skyes pa rnams rim pa gsum par bri bar bya'o zhes bshad pa ma yin nam/ de dag ni bcom ldan 'das rnam par snang mdzad kho na'i sku mi zad pa la sogs pa rnam par sprul pa rtag tu 'gro ba gsum la khyab pa ma yin pas de'i phyir gdon mi za bar de dag yang dag par gnas par bsam par bya ba'i phyir spyan drang dgos na/de ci'i phyir de dag gi spyan drang ba'i rim pa ma brjod ce na/ 'di ni nyes pa med de/ byang chub sems dpa' de dag ni rtag tu ye shes kyi mig gis bcom ldan 'das rnam par snang mdzad kyi sku mi zad pa la sogs bkod pa ci 'dra ba dang /de ji ltar sems can gyi don du 'jug pa de kho na nges par rtog pa lhur len pa nyid yin te/ de'i phyir gang du bcom ldan 'das sems can gyi don du snying rje chen po'i snying po can la sogs pa'i dkyil 'khor gyi sgo nas snang ba de dag gi mngon sum kho nar 'gyur te/de'i phyir de dag kyang dam tshig gi dbang gis de na byin gyis rlob par byed do/ /rnam pa gcig tu na de dag kyang sgyu ma lta bu'i ting nge 'dzin thob pa yin pas/ gnas gcig na 'dug kyang smon lam gyi dbang gis sems can gyi don du de ltar snang ste/de'i phyir yang nyes pa med do/ /gzhan yang rnam par snang mdzad kyi rgyud 'di 'ba' zhig las/ dkyil 'khor la sogs pa'i rig sngags dang gsang sngags rnams spyan ma drangs pa kho nar byin gyis rlob par bshad pa yang ma zad kyi/rnal 'byor gyi rgyud dang bya ba'i rgyud las gang dag las dkyil 'khor la sogs par spyan ma drangs pa nyid kyi las bstan pa de dag las kyang / rig sngags dang gsang sngags rnams spyan ma drangs pa kho na las sa'i phyag rgya la sogs pas bdag bsrung ba dang /gnas bsrung ba dang / me tog la sogs pa mchod pa sngags kyis gdab pa dang / bgegs la sogs pa bsdigs pa rnam pa du ma yang snang na/ de ji ltar las kyi phyag rgya dang sngags dag kyang spyan ma drangs par rang byin gyis rlob par mdzad/de'i phyir rgyud de dag las kyang spyan ma drangs pa'i nges pa ma brjod pa nyid pas nyes pa med do/ /rnam par snang mdzad kyi rgyud 'di las ni rnam pa thams cad du rig sngags dang gsang sngags rnams spyan ma drangs pa kho nar yang dag par gnas par bsam par bya'o zhes bstan to//'dir dkyil 'khor ni dang por nam mkha'i phyogs su nges par bsam pa dang / sa la dkyil 'khor bri ba dang rnam pa gnyis su bstan to/ /dkyil 'khor rnam pa 'di gnyi ga la yang dag par gnas par bsam par bya ba'i phyir/ dam tshig gsum gyi phyag rgya bcings nas/dam tshig gsum gyi sngags zlos shing dang por nam mkha'i phyogs su rang bzhin gyi dkyil 'khor thams cad du khyab pa chos kyi dbyings las nges par skyes pa bsams la/ phyis sa la yid kyis snying rje chen po'i snying po can la sogs pa'i mtshan nyid bsgrubs nas mchod pa bya ste/de nas las kyi rdo rjer gyur/ /nan tan du ni mchod par bya/ /kun du khyab pa'i yid kyis su/ /sangs rgyas skyob pa thams cad kyis/ /dam tshig ces bya'i rgyu bstan nas/ /gsang sngags lan gsum bzla bar bya/ /zhes gang gsungs pa yin no//rnam pa gang gis dkyil 'khor la sogs par lha rnams spyan ma drangs pa nyid du yang dag par gnas par bsam par rung ba'i sbyor ba bshad zin to/ /mchod pa'i cho ga legs par brjod par bya ste/ de la dkyil 'khor 'di las ni phyi dang nang gi mchod pa'i bye brag gi mchod pa rnam pa gnyis su bstan to//de la phyi'i mchod pa ni 'di lta ste/ me tog dang / dri dang / bdug pa dang / lha bshos dang / mar me dang / na bza' dang / bum pa dag dbul ba'i sgo nas rnam pa bdun te/ de nas sngags pa de yis su//me tog dkar po ser po dmar/ /yid du 'ong bas nan tan du/ /lha rnams la ni mchod par bya/ /zhes bya ba la sogs pa rgyas par/ lha yi gtso bo rnams la ni/ /ras ni zung re dbul bar bya/ /sems dpa' chen po phal rnams la/ /lan re dbul bar rab tu bsgrags//zhes gang gsungs pa yin no/ /'di'i tshul ni 'di lta bu yin te/ 'di lta ste/ dkyil 'khor gyi thig gdab pa'i cho ga gong du bshad pa lta bus bar snang gi dkyil 'khor la gnas par bsam pa'i lha dag na/ phyi'i tshon dgye ba la sogs pa'i mtshan ma la mi ltos pa'i phyir/'jig rten las 'das pa'o zhes bstan to/ /lha de dag nyid sngar bshad pa'i cho gas sa la gnas pa'i dkyil 'khor du bris pa rnams ni/ phyi'i tshon dgye ba la sogs pa bya ba la ltos pa dang bcas pa'i phyir 'jig rten pa zhes bya ste/ 'di ltar gang gi tshe 'di las bzlas brjod dang sbyin sreg dang /mchod pa la sogs pa'i phyi'i bzlas brjod dang / sbyin sreg dang mchod pa'i yan lag la ltos pa dang bcas pa nyid du mdzad pa de'i tshe ni rgyud 'di las phal cher 'jig rten pa'o zhes tha snyad du 'dogs so/ /gang gi tshe bzlas brjod la sogs pa de dag nyid phyi'i mtshan ma la mi ltos shing sems tsam gyi rnam par rtog pas sgrub par byed pa'i tshe ni phal cher 'jig rten las 'das pa zhes kyang bshad do//de'i phyir gang dag gi nges pa'i tshig 'jig rten las 'das pa'i lha rnams zhes bya ba de skabs dang sbyar te/ skabs kha cig tu ni 'jig rten pa'i lha'i khyad par ji ltar bsgrags pa dag kho na yin par shes par bya'o//skabs dang sbyar te la lar ni 'jig rten las 'das pa dag nyid yin par khong du chud par bya'o/ /de la bar snang gi dkyil 'khor du bsams pa'i lha'i khyad par 'jig rten las 'das par bsgrags pa rnams la me tog dbul ba'i sbyor ba ni/mthe bong srin lag sbyar ba ni/ /bkra shis pa zhes bshad pa ste/ /de yi me tog blangs nas su/ /rang gi snying ga'i phyogs nas dbul/ /zhes gsungs pa 'di yin no/ /de dag nyid sa'i dkyil 'khor la bris shing 'jig rten pa zhes bsgrags pa rnams la me tog dbul ba'i tshul bstan pa'i phyir/'jig rten pa yi lha rnams la/ /lte ba'i thad ka nas shes bya/ /zhes bya ba gsungs pa yin no/ /'jig rten las 'das pa rnams la bdug pa dbul ba'i sbyor ba'i khyad par bshad pa/bdug spos rdo rje khu tshur ram/ /yang na pad+ma'i phreng ba yi/ /bar snang la ni bzung nas su/ /'jig rten mgon skyob rnams la dbul/ /zhes bya ba gsungs pa yin no/ /de bzhin du sa'i dkyil 'khor du bris pa rnams la dbul ba'i cho ga yang / de las gzhan pa'i 'jig rten pa'i//lha rnams la ni go rims bzhin/ /zhes gsungs pa yin no/ /de ltar na 'di ni sngar bshad pa'i tshul gyis snying rje chen po'i snying po can la sogs pa'i dkyil 'khor gyi lha rnams nam mkha'i dkyil 'khor du bsams pa rnams dang / sa'i dkyil 'khor la bris pa rnams dang /me tog la sogs pa phyi'i mchod pa'i rim pa bstan pa yin no// //bam po bzhi pa/ 'di la nang gi mchod pa ni rnam pa gsum du bshad de/ 'di lta ste/ phyag 'tshal ba'i thal mo sbyar ba dang / byams pa dang / snying rje goms pa dang / de bzhin du yid kyi mchod pa zhes bya ba dang rnam pa gsum mo//sngar bshad pa'i phyi'i mchod pa dang rnam pa bzhir bshad do/ /de nyid kyi phyir/ mchod pa rnam bzhir shes par bya/ /phyag 'tshal thal mo sbyar ba dang / /de bzhin byams dang snying rje dang / me tog bdug spos 'jig rten pa'i//sor mo las byung me tog rnams/ /skyob pa kun la dbul bar bya/ /yan lag kun 'byung phyag rgya ni/ /bcings nas byang chub sems bsgoms te/ /so sor mgon po thams cad dang / /de yi sras rnams nan tan bya'o/ /'di ni skyon med me tog ste/ /rab tu bsrung zhing rnam par mdzes//chos kyi dbyings kyi ljon shing rnams/ /rgyal ba mchod pa'i phyir 'byung ba/ /ting 'dzin dbang gis bsgyur ba yis/ /sngags kyis de dag byin brlabs nas/ /chos kyi dbyings las byung ba yi/ /sprin mang rgya chen dam pa rnams/ /sangs rgyas rnams kyi spyan sngar ni//de tshe rtag tu char bzhin dbab/ /lha rnams phal pa gzhan la ni/ /me tog 'di rnams bsgrags pa ste/ /rang gi sngags rgyud rtogs shes pas/ /ji ltar rigs pas dbul bar bya/ /zhes bya ba gsungs so/ /de la 'dir/ /me tog bdug spos 'jig rten pa'i//zhes bya ba ni phyi'i mchod pa bstan par gsungs pa yin te/ de'i me tog la sogs pa'i phyi'i mchod pa yan lag la ltos pa dang bcas pa'i phyir 'jig rten pa zhes bya'o/ /sor mo las byung me tog rnams/ /zhes bya ba la sogs pas ni yid kyi mchod pa'i sbyor ba kun du bstan par mdzad do//'dir yang / chos kyi dbyings las byung ba yi/ /sprin mang rgya chen dam pa rnams/ /sangs rgyas rnams kyi spyan sngar ni/ /de tshe rtag tu char bzhin dbab/ /ces bya ba 'dis ni rang bzhin gyi dkyil 'khor du yid kyis mchod par bya ba'i mchod pa'i sbyor ba dngos su bstan te/de nyid kyi phyir/ lha rnams phal pa gzhan la ni/ /me tog 'di rnams bsgrags pa ste/ /zhes bya ba gsungs te/ phal pa zhes bya ba'i sgras ni/ 'jig rten las 'das pa'i lha de nyid sa'i dkyil 'khor du bri ba rnams gzung ba'i 'jig rten las 'das pa'i lha sa'i dkyil 'khor du bris pa rnams la me tog la sogs pa'i phyi'i mchod pa bkag par 'gyur du 'ong bas/phal pa zhes bya ba'i sgras khyab 'jug dang tshangs pa la sogs pa'i 'jig rten pa nyid ni mi gzung ngo / /dkyil 'khor 'dir ni 'jig rten pa'i lha khyab 'jug dang tshangs pa la sogs pa ji ltar grags pa yang bri ba med do//'dir dbus kyi dkyil 'khor du 'jig rten pa'i lha'i khyad par gang dag yin pa de dag ni/ bcom ldan 'das rnam par snang mdzad kyi sprul pa'i sku'i sems can dag yin par blta bar bya ste/ 'di skad du/ 'di las 'jig rten pa dang 'jig rten las 'das pa'i lha rnams kyi phyag rgya rim par phye ba yongs su rdzogs par mdzad nas/ gsang ba'i bdag po de lta bu la sogs pa ni de bzhin gshegs pa rnams kyi de bzhin gshegs pa'i mos pa las byung ba/ byang chub kyi mtshan mar gyur pa phyag rgya rab 'byam rnams te zhes bya ba la sogs pa rgyas par gsungs te/mchod pa rnam pa bzhi dbul ba'i rim ni 'di lta te/ dang por bdag nyid las kyi rdo rje sems dpar bsgoms nas/ dri dang me tog la sogs pa'i phyi'i mchod pa'i yan lag chos kyi dbyings kyi yi ges rnam par dag pa 'phags pa mi g.yo ba'i snying po'i sngags kyis btab pa dri dang me tog la sogs pa mchod pa'i sngags dag gi sngags kyis gdab par bya'o//de nas sa la bris pa'i dkyil 'khor du bsrung bar bya'o/ /de nas dam tshig gi phyag rgya bcings nas/ dam tshig gi sngags zlos shing nam mkha'i phyogs su rang bzhin gyi dkyil 'khor yang rnam par bsams la/de'i gzugs brnyan gyi dkyil 'khor sa la ji ltar bris pa yang srog dang bcas ba lta bu yid kyis bsams te/ de bris pa'i lha rnams la so so rang rang gi phyag rgya bcings nas de'i sngags zlos shing myur du de'i bsam gtan bya'o//de nas mchod pa rnam pa bzhi bya ste/ de'i rim pa ni dang po pus mo gnyis sa la btsugs te/ phyag 'tshal ba'i thal mo sbyar nas phyag bya ste/ 'di ni phyag 'tshal ba'i mchod pa yin te dang po'o/ /de nas sngar bshad pa'i tshul du dri dang me tog la sogs pa ji ltar yang dag par bsgrags pa rnams kyis mchod par bya ste/'di ni phyi'i mchod pa'i mtshan nyid yin te mchod pa gnyis pa'o/ /de nas gsang ba'i phyag rgya brgyad rim par phye ba las bshad pa yan lag thams cad 'byung ba'i phyag rgya bcings nas/ de bzhin gshegs pa'i dkyil 'khor 'jig rten gyi khams rab 'byam na rnam par bzhugs pa thams cad mchod pa'i yan lag bzang po dpe med pa byang chub sems dpa' kun du bzang po'i spyod pa las nges par 'byung ba rnams 'byung bar gyur cig ces rnam par bsams te/ de nas byang chub kyi sems mngon du byas nas/ langs la nam mkha' mdzod kyi rig sngags lan gsum brjod par bya ste/ 'di ni yid kyi mchod pa'i mtshan nyid yin te/ mchod pa gsum pa'o/ /de nas byams pa dang snying rje goms pa'i mtshan nyid can sgrub pa'i mchod pa rnam pa gnyis su bya ste/de'i sbyor ba ni 'di yin no/ /bdag gis dge ba ji ltar byas pa'i dge ba'i rtsa bas sems can thams cad ngan song gi sdug bsngal thams cad rab tu zhi bar gyur cig /'jig rten dang 'jig rten las 'das pa'i phun sum tshogs pa dag ni 'byung bar gyur cig ces bsam par bya ste/'di ni mchod pa bzhi pa ste/ sems can thams cad la byams pa dang snying rje goms pa'i mtshan nyid can bsgrub pa'i mchod pa yin par bstan to/ /da ni slob ma gzung ba'i cho ga bshad par bya sta/ de la slob ma'i mtshan nyid ni gong du 'di lta ste/khyad par gyi mtshan nyid dang / spyi'i mtshan nyid dang / rab tu dbye ba zhes bya ba'i mtshan nyid rnam pa gsum du bshad do/ /slob ma de dag kyang sngon rig sngags mnos kyang rung rig sngags ma mnos kyang rung dkyil 'khor du 'dzud de/ de dag gi nang nas sngon dkyil 'khor ma mthong ba nyid kyis rig sngags ma mnos pa'i sngon du dam tshig nod pa kho na'i phyir/dkyil 'khor du 'jug pa ni gcig yin no/ /gzhan ni dngos grub mchog dang / 'bring dang tha ma la sogs pa don du gnyer ba ste/ dkyil 'khor du bcug nas byang chub kyi sems goms par ma byas pa de goms par bya ste/rig sngags sngon du 'gro ba'i bsgrub pa la brtson par byed pa'o/ /gzhan dag ni sngon byang chub kyi sems goms par byas kyang rung / byang chub kyi sems goms par ma byas kyang rung / rig sngags dang gsang sngags mnos pa/ rig sngags dang gsang sngags kyi rtog pa dag la thos pa dang bsams pa las byung ba'i shes rab kyis sems shin tu gtan la phab pa ste/snying rje chen po'i snying po 'byung ba'i dkyil 'khor ram/ yi ge 'khor lo bskor ba'i dkyil 'khor du bcug nas/ de las byung ba'i slob dpon du dbang bskur ba don du gnyer ba yin no//de bzhin du gzhan dag ni sngar bshad pa'i rim pas slob dpon du dbang bskur ba thob kyang / gsang ba'i dkyil 'khor du dbang bskur ba don du gnyer ba ste/ gsang ba'i dkyil 'khor du 'jug par byas nas de las byung ba'i dbang bskur ba nod pa yin no//de las gzhan dag ni dang po nyid nas dam tshig can yin la/ rig sngags mnos kyang rung ma mnos kyang rung / de bzhin du slob dpon gyi thabs thob kyang rung ma thob kyang rung ste/ rang gi bsod nams 'phel bar bya ba kho na'i phyir dkyil 'khor gang yang rung ba lta bar byed pa yin no//gzhan dag ni bgegs kyi 'tshe ba la sogs pa zhi ba don du gnyer ba'am/ 'byor ba 'dod pas dkyil 'khor lta bar yid dga' ba yin no/ /de lta bas na 'di dag ni dang po nas ci rigs par dkyil 'khor mthong ba nyid kyis dam tshig can kho na yin no//de las gzhan pa ni dkyil 'khor gcig kyang ma mthong ba'i phyir dam tshig can ma yin no/ /de'i phyir re zhig slob ma 'di rnams dkyil 'khor gsum du 'jug pa'i spyi'i cho ga bshad par bya ste/ de la re zhig dang por slob dpon gyis sngar bshad pa'i rim pas bdag nyid las kyi rdo rje sems dpar byin gyis brlabs la/ji skad bshad pa'i mchod pa rnams mngon par bsgrub par bya'o/ /de nas sngar bshad pa'i slob dpon gyis rnal 'byor rnams las gang yang rung ba zhig gis bdag nyid rnam par snang mdzad kyi skur byin gyis brlabs la/ slob ma rnams pos te dkyil 'khor gyi sgo'i phyi rol du 'dug pa la/khro bo 'jig rten gsum las rnam par rgyal bas bzlas brjod byas pa'i chus bsang gtor byas nas/ slob dpon bdag nyid kyis dam tshig gsum gyi phyag rgya bcings te/ ras la dam tshig gsum gyi gsang sngags kyis lan gsum du sngags kyis gdab bo//de nas ras des slob ma'i gdong bkab ste/ dkyil 'khor gsum pa'i sgor sgo khyud kyi nang du legs par gzhag par bya'o/ /der bzhag nas gsum la skyabs su 'gro ba dang / byang chub kyi sems byin te/ chos kyi dbyings kyi phyag rgya bcings la/der gsang sngags brjod cing slob ma chos kyi dbyings kyi ngo bo nyid stong par byin gyis brlab par bya'o/ /de'i rjes la chos kyi 'khor lo'i phyag rgya bcings nas de'i sngags brjod cing / slob ma de nyid rdo rje sems dpa'i skur bsam par bya'o/ /de nas de la dam tshig gi phyag rgya bcings pa'i lag par me tog bzhag la dam tshig gsum gyi sngags lan gsum brjod par bya'o//de'i rjes la de'i spyi bor chos kyi dbyings kyi yi ge bsam par bya'o/ /de nas bden pa'i byin rlabs bya ste/ phyag rgya la 'dug pa'i me tog dkyil 'khor du dor du bcug la/gang la me tog bab pa de'i gsang sngags de la sbyin par bya'o/ /slob ma sngon de las gzhan pa'i dkyil 'khor mthong ba dam tshig can gsang sngags mnos pa ni gdong bkab pa phye ste/ phyis phyag rgya la 'jug pa'i me tog rnams dkyil 'khor gyi bdag po bcom ldan 'das rnam par snang mdzad dam/sngon de las gzhan pa'i dkyil 'khor du rang gi rig sngags mnos pa yong na dbul bar bya'o/ /gtan tshigs ni sngon gyi dkyil 'khor mthong ba gsang sngags mnos pa/ dam tshig can rnams ni gdong ma bkab pa kho nar bden pa'i byin rlabs sngon du 'gro ba nyid kyis me tog dor bar 'dod pa nyid de/de ltar rig sngags kyi cha mang po nyid kyis sgrub pa po rig sngags du ma bsgrub pa'i snod can/ sngon mnos pa'i rig sngags la ma gtogs pa/ de las gzhan pa'i rig sngags la me tog bab na/ rig sngags gnyis bzlas rjod byed pa'i go skabs su 'gyur du 'ong ba'i phyir ro//rnam pa gcig tu na rig sngags gang yang rung ba zhig bzlas brjod byed cing de las gzhan pa'i rig sngags khyad du gsad na phung ba 'byung bar 'gyur te/ de skad du/ gang la me tog bab pa'ang / /de nyid bsgrub bya'i rig sngags gzhan//bzlas brjod byas na brlag par 'gyur/ /zhes gsungs so/ /dkyil 'khor gsum du slob ma gzung pa'i cho ga 'di yang / rgyud 'di la gzhung 'di kho nas bstan te/ ji skad du/ slob ma dkyil 'khor drung bkug ste//sngags pa yis ni bsang gtor bya/ /dri dang me tog phreng sbyin bya/ /de bzhin gshegs pa dran byas nas/ /byang chub sems kyang 'dzin du gzhug /des na rgyal ba'i rigs dag la/ /thams cad rab tu skyes par 'gyur/ /chos kyi dbyings las skyes pa yis/ / phyag rgya de dag rnams la bcings/ /chos kyi 'khor lo bcings nas ni/ /rdo rje sems dpar byin gyis brlabs/ /de nas sangs rgyas kun gyi ni/ /dam tshig sdom brtson bdag gis bcings/ /de tshe sngags pas cho ga bzhin/ /ras la lan gsum gdab par bya/ /snying rjer gyur pa'i yid kyis su//de dag gis ni gdong yang bkab/ /dam tshig lan gsum bzlas nas ni/ /spyi bor yi ge ra zhes bya/ /glad kyi 'khor bcas brjid dang ldan/ /'bar ba'i phreng ba rnam par 'phro/ /zla ba 'char ka lta bu yi/ /kha dog dkar po gzhag par bya/ / skyob pa kun gyi spyan sngar ni/ /de nas me tog 'dor du gzhug /me tog gang la bab pa de/ /sngags pas de la sbyin par bya/ /dkyil 'khor dang po sgo yi drung / /sgo khyud kyi ni dbus kyi cha/ /dkyil 'khor gyi ni sgo gnyis kyi/ /bar du slob ma gzung bar bya/ /der gnas pa la cho ga kun//rim pa bzhin du legs par bya/ /zhes gsungs pa lta bu yin te/ 'di ni dkyil 'khor gsum char du 'jug pa'i spyi'i cho ga yin no/ /gsang ba'i dkyil 'khor du 'jug pa la ni khyad par du cho ga gzhan bstan pas de brjod par bya ste/ re zhig dang por snying rje chen po'i snying po can dang /yi ge 'khor lo bskor ba'i dkyil 'khor du dbang bskur ba thob pa'i slob ma sngar bshad pa'i cho ga kho nas gsang ba'i dkyil 'khor du bcug la/ de'i nang du legs par bzhag nas de'i snying khar raM zhes bya ba'i me'i dkyil 'khor la gnas pa 'bar ba'i phreng bas 'khrigs pa rnam par bsam ste/de'i 'bar bas de'i lus thams cad thal bar brlag par bsam par bya'o/ /thal ba'i dbus su sa bon du gyur pa'i yi ge oM zhes bya ba me tog kun+da dang zla ba lta bur dkar ba rnam par brtag par bya ste/ des kyang lus de nyid kyang bcom ldan 'das rnam par snang mdzad kyi skur bsgrub pa nas/de'i gdan pad+ma la rig pa'i rgyal po tshig yan lag bcu gnyis 'byung bar bsam par bya'o/ /slob ma la yang khyod nyid kyis kyang 'di ltar sgoms shig bya ba'i lung 'di bsgo bar bya ste/ de skad du/ de nas bcom ldan 'das kyis gsang ba'i dkyil 'khor du 'jug pa'i cho ga gsungs pa/kun du bslab pa'i sngags pa ni/ /gsang ba'i dkyil 'khor la mkhas pas/ /de tshe slob ma'i sdig pa kun/ /cho ga bzhin du bsreg par bya/ /ci nas slar yang mi skye bar/ /de yi 'tsho ba'ang bsreg par bya'o/ /bsregs te thal bar gyur nas kyang //de ni slar yang gso bar bya/ /yi ge yis ni mi 'gyur bsreg /'tsho bas slar yang gso bar bya/ /'tsho bas thams cad gsos pa ni/ /kun du dag cing dri ma med/ /yan lag bcu gnyis tshig rnams ni/ /de yi snod la dgod par bya/ /byang chub sems dpa' skyob rnams dang //sangs rgyas rnams kyi dam tshig ni/ /sangs rgyas rnams dang nyan thos dang / /'jig rten rnams kyis bkur ba yin/ /gsang ba'i dkyil 'khor dbus gnas pa'i/ /dam tshig 'di ni sus rig pa/ /rgyud rnams kun du zhugs pa dang / /dkyil 'khor kun la dbang ba yin//sngags pa de ni nga dang 'dra/ /dam tshig ces ni gzhan mi bya/ /zhes gsungs pa lta bu yin no/ /'di'i don ni/ kun du bslab pa'i sngags pa ni/ /gsang ba'i dkyil 'khor la gnas pas/ /zhes bya ba ni snying rje chen po'i snying po can la sogs pa dkyil 'khor bri ba'i cho ga dang /rig sngags dang gsang sngags thams cad bsgrub pa'i yan lag gi cho ga dag las/ thos pa dang bsams pa dang bsgoms pa las byung ba'i shes rab kyis ci nus su nan tan du bslab pa zhes bya bar dgongs pa yin no/ /de cho slob ma'i sdig pa kun/ /cho ga bzhin du bsreg par bya//zhes bya ba la 'dir sdig pa zhes bya ba'i sgra ni 'dir ni mi 'dod pa'i las kyi bag chags ngan song ba yin par dgongs pa yin no/ /der bsreg pa ni slob ma'i rgyud bsal ba yin no/ /de la dgongs pa ni slob ma'i snying gar chos kyi dbyings kyi yi ge dgod pa dang /de'i don sems pa'i sgo nas chos kyi dbyings kyi ngo bo nyid du brtag par bya'o/ /slob ma nyid kyang de bzhin du bdag nyid la mos par bya'o/ /de'i phyir chos kyi dbyings kyi sems mos pa ni mi 'dod pa'i las kyi bag chags kyis mi mthun pa'i phyogs yin pas sdig pa kun/cho ga bzhin du bsreg par bya/ /zhes bshad pa yin no/ /de yi cho ga'ang bsreg par bya/ /zhes bya ba la 'tsho ba ni rang gi lus la bya ste/ de bas na dgos pa ni chos kyi dbyings su mos pa sdig pa'i bag chags kyi gnyen po yin pa 'ba' zhig tu ma zad kyi rang bzhin gyi lus su snang ba'i gnyen po yang yin no snyam pa 'di yin no//ci nas slar yang mi skye ba zhes bya ba ni slob dpon dang slob ma dag chos kyi dbyings su shin tu mos pa ston par byed do/ /bsregs te thal bar gyur nas kyang / /zhes pa 'dis ni chos kyi dbyings kyi yi ge snying gar dgod pa de'i don sems pa'i sgo nas slob ma chos kyi dbyings kyi ngo bo nyid du byin gyis brlab par bya ba 'ba' zhig tu ma zad kyi/raM zhes bya ba snying gar bkod pa 'bar ba'i phreng bas 'khrigs pa de kho nas slob ma thal bar brlag par yang bsam par bya ba 'di ston par byed do/ /de ni slar yang gso bar bya/ /zhes bya ba ni yang rang gi lus su snang bar bya'o snyam du dgongs pa yin no//de yi 'tsho ba'ang bsreg par bya/ /zhes gang gsungs pa gang gis bsreg par bya ba ma gsungs pas de'i phyir/ yi ge yis ni mi 'gyur bsreg /ces bya ba gsungs te/ de la yi ge yis zhes bya ba ni raM zhes bya pa'i dkyil 'khor la gnas pas zhes bya bar khong du chud par bya'o//mi 'gyur bsreg ces bya ba ni ngo bo nyid las mi 'gyur bas na mi 'gyur ba'o/ /bsreg pa ni legs par bsreg ces bshad pa yin no/ /de ni slar yang gso bar bya/ /zhes bshad kyi/ ji ltar gso bar bya ba ni ma bshad pas de'i phyir/'tsho pas slar yang gso bar bya/ /zhes gsungs so/ /de la 'tsho ba zhes bya ba ni 'dir a zhes bya ba yi ge thams cad kyi 'tsho ba yin par bshad de/ ji skad du/ a zhes bya ba 'tsho bar bshad/ /kun du gtso bor dbang phyug yin/ /zhes gsungs pa lta bu yin no//de'i phyir a zhes bya bas rnam par snang mdzad kyi skur byin gyis brlab par bya'o snyam du dgongs pa yin no/ /de nyid kyi phyir/ 'tsho ba thams cad gso ba yin/ /kun du dag cing dri ma med/ /ces bya ba gsungs te/ 'di ni gdan pad+ma la bzhugs pa'i byin gyis brlab par bya ba yin no//pad+ma de'i 'dab ma de dag la rig pa'i rgyal po tshig yan lag bcu gnyis pa 'byung bar bsam par bya ste de'i phyir/ yan lag bcu gnyis tshig rnams ni/ /de yi snod la dgod par bya/ /zhes bya ba gsungs te/ snod ni 'dir rten yin par bshad do//de lta bas na rim pa 'dis slob ma rnam par snang mdzad kyi skur bsgrub pa de yin pa de nyid 'dir mi rung ba'i don dam rtogs par bya ba'i don gyis dam tshig yin no/ /gzhan yang bcom ldan 'das rnam par snang mdzad kyi gzugs kyi skur mos par bya pa'i dam tshig gang yin pa de ni thams cad kyis bkur zhing mngon par 'dod pa la 'da' bar bya ba ma yin no zhes bya ba'i tha tshig ste de nyid kyi phyir/byang chub sems dpa' skyob rnams dang / /sangs rgyas rnams kyi dam tshig 'di/ /sangs rgyas rnams dang nyan thos dang / /'jig rten rnams kyis bkur ba yin/ / zhes gsungs so/ /rnam par snang mdzad kyi sku'i mtshan nyid kyi dam tshig 'di yang gsang ba'i dkyil 'khor gyi nang kho nar byin gyis brlab pa'i dam tshig ces bya'i/ gzhan du ni ma yin no zhes bstan pa'i phyir/ gsang ba'i dkyil 'khor dbus gnas pa'i/ /dam tshig 'di ni sus rig pa//zhes bya ba gsungs so/ /gsang ba'i dkyil 'khor gyi nang du byas pa'i dam tshig 'di'i phan yon bstan pa'i phyir/ rgyud rnams kun du zhugs pa dang / /dkyil 'khor kun la dbang ba yin/ /zhes bya ba gsungs te de la/ rgyud rnams kun du zhugs pa dang //zhes bya ba 'di ni rgyud thams cad kyi dkyil 'khor dag tu dam tshig can dag tu 'gyur ro snyam du dgongs pa yin no/ /dkyil 'khor kun la dbang ba yin/ /zhes bya ba ni rgyud thams cad kyi dkyil 'khor gyi slob dpon du 'gyur ro zhes bshad par 'gyur ro//gong du/ 'tsho bas thams cad gsos pa ni/ /kun du dag cing dri ma med/ /ces bshad pa'i tshig 'di slob ma rnam par snang mdzad kyi skur bya'o zhes gsal bar kun du ma bstan pas/ sngags pa de ni nga dang 'dra/ /dam tshig can ni gzhan mi bya//zhes bya ba gsungs te/ 'di'i don slob ma des bdag nyid bcom ldan 'das rnam par snang mdzad kyi skur bsgom par bya'o zhes pa yin no/ /da ni dbang bskur ba'i rim pa kun nas bsdu bar bya ste/ de la dbang bskur ba'i sgra'i don ni 'di yin te/ dkyil 'khor gyi lha bris pa rnams kyi mdun du gsher bar bya ba'i khrus gang yin pa de ni dbang bskur ba zhes bya ba'i tshig gi don yin no//dbang bskur ba de yang slob ma ji lta bu zhig la bya ba dang / ci ltar bya ba dang / ci'i phyir bya ba zhes bya ba 'di gsum brjod par bya ste/ de la rgyud 'di las dbang bskur bar mos pa'i slob ma gnyis kyis mtshan nyid gsungs te/'di lta ste/ dam tshig dkyil 'khor mthong ba byang chub kyi sems la legs par goms par byas pa nyid kyis shes rab zab mo dang ldan pa thos pa dang bsams pa las byung ba'i shes rab shin tu rnam par nges pas rig sngags dang gsang sngags dang /rgyud dang rtog pa la sogs pa'i don gyi de kho na nyid ji lta ba bzhin du khong du chud pa theg pa chen po'i tshul zab mo la mos pa las byung ba'i blos mos pa shin tu brtan par bya ba'i slob ma 'di ni dbang bskur bar 'os pa cig yin no/ / gnyis pa ni dam tshig gi dkyil 'khor mthong ba de bzhin du rig sngags dang gsang sngags dang rgyud dang rtog pa dag la thos pa dang bsams pa dang goms pas sems kyi rgyud shin tu dri ma med par byas pa byang chub kyi sems bsgom pa dang du ma gyur pa'i tshe/ dmigs pa can nyid kyis phyi'i bya ba la mngon par zhen pa yin te/de gnyis kyi mtshan nyid kyang / rgyud 'di las slob dpon rab tu dbye ba bstan pa kho na las khong du chud par bya'o/ /de las ni slob ma shes rab zab mo la mos pa 'jig rten dang 'jig rten las 'das pa'i dkyil 'khor dag bri bar bya ba'i slob dpon nyid du dbang bskur bar bya ba ni gcig yin no//de las gzhan pa ni 'jig rten pa'i dkyil 'khor gyi slob dpon du dbang bskur bar bya ba yin no zhes bshad do/ /ji skad du/ gsang sngags phyag rgya rtog shes pa'i/ /slob dpon rnam pa gnyis shes bya/ / zab dang mi zab bye brag las/ /de yi mtshan nyid shes par bya/ /zab mo rgya chen shes par bya/ /lus can rnams ni yid mi rton/ /sangs rgyas rnams kyi sras mchog ste/ /mthong ba'i chos ni rnam par spangs/ /gnyis pa mthong ba'i chos rnams kyis/ /mos par gyur pa dmigs pa can//sangs rgyas rkang gnyis mchog rnams kyis/ /'jig rten pa yi dkyil 'khor kun/ /de yis bri bar bya ba'i phyir/ /rjes su gnang zhing dbang yang bskur/ /zhes gsungs pa lta bu yin no/ /'dir/ 'jig rten pa yi dkyil 'khor kun/ / de yis bri bar bya ba'i phyir/ /zhes bya ba ni gong du 'jig rten las 'das pa'i dkyil 'khor tsho na dgye ba la sogs pa'i bya ba la ltos pa dang bcas pa dag kho na 'jig rten pa zhes bya'o zhes bshad pa yin no/ /dkyil 'khor 'di ni mthong ba las/ /dam tshig shes pa gcig ces bya/ / de la phyag rgya mi bstan cing / /sngags kyang sbyin par mi bya'o/ /byang chub sems kyi bye brag las/ /sngags dang phyag rgya yongs su bzung / /zhes bshad pa ma yin nam/ ji ltar dmigs pa dang bcas pa byang chub kyi sems ma goms pa nyid kyis slob dpon du dbang bskur ba'i go skabs su 'gyur//'di ltar gang la phyag rgya dang sngags kyang mi sbyin pa'i slob ma dmigs pa la spyod pa de la/ ji ltar slob dpon du dbang bskur ba sbyin par bya zhes brjod ce na/ 'di ni nyes pa med de 'di ltar tshig 'di ni sgrub pa po la dgongs pas bshad par bya ba yin te/ slob ma gang zhig sngags kyis dngos grub sgrub par 'dod pa de la byang chub kyi sems ma goms par sngags sbyin par mi bya'o//gang zhig dkyil 'khor gyi slob dpon nyid kyis sems can gyi don byed par 'dod pa rnams sam gsang sngags bzlas brjod byed pa la sogs pas bsod nams sgrub pa de la ni byang chub kyi sems ma goms kyang sngags sbyin par bya'o snyam du dgongs pa yin no//de lta bas na yang dag par brjod pa'i yon tan dang ldan pa'i slob ma dmigs pa can dang / dmigs pa med par gnyis ka la yang dkyil 'khor gyi slob dpon gyi dbang bskur bar bya'o zhes bya bar gnas so//dkyil 'khor de yang gong du 'jig rten pa dang 'jig rten las 'das pa'i bye brag gis rnam pa gnyis su bshad pa yin te/ 'di ltar gang gi tshe snying rje chen po'i snying po can la sogs pa'i dkyil 'khor tshon gyis bri ba la sogs pa'i phyi'i bya ba la ltos pa dang bcas pa dag sgrub par byed pa de'i tshe ni 'jig rten pa'o zhes tha snyad 'dogs so//'di ltar rgyud 'di las gsang sngags mnyes par bya ba'i yan lag phyi'i bzlas brjod dang / sbyin sreg dang mchod pa la sogs pa sgrub pa gzhan dag la bshad pa'i sbyin sreg la sogs pa de dag gi mtshan nyid kyi tshig dag la yang 'jig rten pa'o zhes bshad do//phyi'i me tog la sogs pa'i dkyil 'khor mtshan ma la ltos pa dang bcas pa'i phyir ro snyam du dgongs pa yin no/ /gang gi tshe slob dpon gyis slob ma sems zab cing rgya che ba dang skal ba mnyam pa rnams kho na'i ched du snying rje chen po'i snying po can la sogs pa'i dkyil 'khor de nyid dam/dkyil 'khor gzhan yang rung ste yid kyis bshad pa'i mtshan nyid can yid kyis bsgrubs te/ slob ma de dag la dam tshig sbyin pa la sogs pa'i bya ba la 'jug pa'i tshe ni rgyud 'di las dkyil 'khor de phyi'i bya ba tshon dgye ba la sogs pa ltos pa dang bcas pa ma yin pa nyid kyis 'jig rten las 'das pa zhes bshad do zhes bya bar khong du chud par bya'o//de ltar na byang chub kyi sems goms pa zab cing rgya che ba la sogs pa ni khyad par med par 'jig rten dang 'jig rten las 'das pa'i dkyil 'khor gnyis ka bri bar dbang bskur ba kho nar rjes su dpag la/slob ma'ang dmigs pa can ni 'jig rten pa'i dkyil 'khor dag kho na bri ba dbang bskur ba de yang snying rje chen po'i snying po can la sogs pa'i dkyil 'khor dag tu rnam pa kun du bstan te/ tshul 'di la bcom ldan 'das kyi dgongs pa ni slob ma dbang bskur ba gsum char yang rim gyis thob nas slob dpon gyi mtshan nyid yongs su rdzogs pa dang ldan par 'gyur ro snyam pa yin par mngon no/ /de la dkyil 'khor gsum char du yang dbang bskur ba nod pa'i rim pa ni brjod par bya ste/de la re zhig dang por snying rje chen po'i snying po can gyi dkyil 'khor bris pa'i mdun du/ byang chub kyi snying po dang mthun par byed pa'i dbang bskur ba'i dkyil 'khor bris par slob ma ji ltar rtsa ba'i dkyil 'khor du 'jug pa'i tshe/ rdo rje sems dpa'i sku kho nar byin gyis brlabs pa lta bu kho nas slob dpon nyid kyis thams cad thob par bya ba'i phyir dbang bskur ro//de nas dam tshig bsgrags par bya ste 'di ni slob ma bcom ldan 'das rnam par snang mdzad kyi mngon par rdzogs par byang chub pa'i sku thob par bya ba'i phyir/ byang chub kyi snying por dbang bskur te dang po yin par khong du chud par bya'o//dbang bskur ba 'di'i mtshan nyid kyang snying rje chen po'i snying po can gyi dkyil 'khor bstan pa las gsungs te/ gsang ba'i bdag po de la slob dpon gyis rtsa ba'i dkyil 'khor gyi mdun du bar khru ngo bor mas/ phyi rol gyi sa la dkyil 'khor gnyis pa gru bzhi pa sgo gcig pa bri bar bya'o//grwa bzhir rdo rje 'dzin pa bzhi dgod de/ bzhi gang zhe na/ 'di lta ste/ spros pa med par gnas pa dang / nam mkha' dri ma med pa dang / dri ma med pa'i mig dang / gos sna tshogs gon pa rnams so/ /dbus su pad+ma chen po 'dab ma brgyad pa ze ba dang bcas pa bzhag ste/'dab ma bzhi la byang chub sems dpa' grogs su gyur pa sngon gyi smon lam gyi mthu can bri bar bya ste/ gzungs kyi dbang phyug rgyal po dang / dran pa dang shes bzhin can dang phan pa'i lhag pa'i bsam pa can dang snying rje can no//'dab ma gzhan rnams la ni phyag brnyan bzhi bri ste/ bzhi gang zhe na 'di lta ste/ sems kyi khyad par la spyod pa dang / 'dod pa yongs su rdzogs par byed pa dang / ma chags pa dang rnam par grol ba'o/ /dbus su ni chos kyi dbyings bsam gyis mi khyab pa'i gzugs bzhag go//de nas rin po che'i bum pa bzhir rin po che dang sman thams cad blugs pa kun du bzang po dang / byams pa dang / sgrib pa thams cad rnam par sel ba dang / ngan song thams cad spong ba rnams kyis byin gyis brlabs pas spyi bo nas dbang bskur ro//pad+ma dam pa de la ni/ /sngags pa bdag gis de bzhin te/ /sbos dang me tog gis mchod nas/ /mar me mchod yon sbyin par bya/ /gdugs dang rgyal mtshan ba dan dang / /rnga sgra yid du 'ong ba dang / /bkra shis rgya chen snyan pa yi//tshig gis legs par mngon dga' bya/ /skyob pa rnams kyi spyan snga ru/ /de ni bsgrims te dbang bskur ro/ /sbos dang me tog bzang po yis/ /de la yang ni mchod par bya/ /de nas gser gyi thur ma ni/ /thogs te mdun du 'dug nas su/ /slob ma'i snying la 'bab pa'i tshig /'di skad du ni smra bar bya/ /sngon gyi mig mkhan rgyal po yis/ /'jig rten ling tog bsal ba bzhin/ /bu khyod kyis ni mi shes pa'i/ /ling tog rgyal ba rnams kyis bsal/ /de nas me long blangs nas su/ /chos kyi mtshan nyid bshad par bya//chos rnams gzugs brnyan lta bu ste/ /dang sa shing dag la rnyog pa med/ /gzung du med cing brjod du med/ /rgyu dang las las 'byung ba ste/ /ngo bo nyid med gnas pa med/ /de ltar chos rnams shes nas su/ /sems can don ni mnyam med byos/ / 'on kyang sangs rgyas sras su skye/ /de nas rkang pa'i bar 'og tu/ /chos kyi 'khor lo gzhag par bya/ /de nas lag pa g.yas par yang / /shin tu bzang po'i dung byin te/ /chos kyi dung ni bla med pa/ /kun du rgyas par bus nas kyang / /de ring phan chad 'jig rten la/ / skyob pa rnams kyi 'khor lo bskor/ /som nyi yid gnyis mi bya zhing / /dogs pa med pa'i sems kyis khyod/ /gsang sngags spyod pa'i tshul gyi mchog /'jig rten 'di la rab tu shod/ /de ltar byas na sangs rgyas la/ /phan 'dogs byas pa gzo zhes bya'o/ /rdo rje 'dzin pa de kun kyang //khyod la rnam pa kun du srung / /zhes gang gsungs pa yin no/ /de la rin po che'i bum pa bzhi zhes bya ba ni/ rin po che kha dog dkar po dang ser po dang dmar po dang sngon por snang ba las byas pa'am/ de dang mthun par kham pa las byas pa dag snyam du dgongs pa yin no//bum pa kun du bzang po dang / byams pa dang / sgrib pa rnam par sel ba dang / ngan song thams cad spong ba rnams kyis byin gyis brlabs pas zhes bya ba ni/ byang chub sems dpa' skal ldan de dag gis ming don dang mthun pa dag kho nas bu ma pa bzhi'i dbang bskur bar dgongs par bshad pa yin te/'di ltar ngan song gi las thams cad zad par bya ba'i phyir byang chub sems dpa' ngan song thams cad spong bas byin gyis brlabs pa'i bum pas dbang bskur ro/ /de bzhin du nyon mongs pa thams cad rnam par gnon pa'i phyir sgrib pa thams cad rnam par sel pa'i bum pas dbang bskur ro//de'i phyir dbang bskur ba 'di dag gnyis ni 'khor ba'i nyes pa thams cad rnam par bzlog pa'i phyir/ las dang nyon mongs pa thams cad 'joms pa'i gnyen po'i sa bon btab pa yin no/ /kun du bzang pos byin gyis brlabs pa'i bum pas dbang bskur ba ni bsod nams dang ye shes kyi tshogs yongs su rdzogs pa'i gnas skabs kyi sa bon btab pa yin no//byams pas byin gyis brlabs pa'i bum pas dbang bskur ba ni rgyal tshabs kyi sa thob pa'i sa bon btab pa yin no/ / de'i phyir dbang bskur bar bya zhing / 'di gnyis kyis bcom ldan 'das rnam par snang mdzad kyi go 'phang thob pa'i rgyu'i sa bon btab pa byas pa yin no zhes bya bar blta bar bya'o/ /de'i phyir slob dpon gyi rim pa 'di nyid kyi bum pa dag gis dbang bskur bar bya zhing / don de lta bu dang ldan pa'i tshig dag gis mngon par dga' ba sngon du 'gro ba brjod pa'i bum pas dbang bskur bar bya'o zhes khong du chud par bya'o//de ltar dbang bskur ba'i slob ma yang rtsa ba'i dkyil 'khor gyi nang du bcug ste/ dkyil 'khor gyi lha rnams kyi mdun du/gong dang mthun par byas nas sngags rnams mnyan par bya ba dang / dkyil 'khor rnams bri bar bya ba la dbang bskur bar 'gyur ba la lus dang ngag dang yid kyi bslab pa dge ba dang mi dge ba la 'jug cing ldog pa'i ngo bo dam tshig ces bya ba nod du gzhug go/ / bslab pa de ni 'dis dngos grub la sogs pa kun nas thob par 'gyur bas rgyud 'di las dam tshig ces bshad do/ /de nyid 'da' bar mi rung ba'i don gyis kyang dam tshig ces bya bar bstan to/ /dam tshig nod pa'i cho ga ni/ /de nas slob ma de bslang la/ /sngags pa snying rjer gyur pa yis//yid kyis nang du bcug nas ni/ /de la dam tshig bstan par bya/ /de ring phan chad khyod kyis ni/ /dam pa'i chos dang byang chub sems/ /srog gi phyir yang da phyin chad/ /yongs su gtang bar mi bya'o/ /khyod kyi ser sna dang ni gang / /sems can gnod par mi bya'o//dam tshig 'di dag sangs rgyas kyi/ /brtul zhugs bzang po khyod la bshad/ /ji ltar bdag gis srog bsrung ba/ /de ltar khyod kyis 'di dag bsrung / /zhes bya ba gsungs pa yin no/ /slob dpon gyi dam tshig bsgo ba dang / slob mas khas blang ba'i lung ni/slob mas bla ma'i rkang pa la/ /dad cing gus pas phyag byas nas/ /shin tu nges pa'i yid kyis ni/ /de dag thams cad khas blang ngo / /zhes gsungs pa yin no/ /de ltar snying rje chen po'i snying po can gyi dkyil 'khor du dbang bskur ba mnos pa'i slob ma de'i 'og tu yi ge 'khor lo'i dkyil 'khor bris pa de'i mdun du dbang bskur bar bya ba'i phyir/chos kyi dbyings kyi yi ges sa bon byas pa'am pad+ma can gyi dkyil 'khor bris pa'i mdun du bcug la/ slob ma yan lag thams cad 'byung ba'i phyag rgyas bcom ldan 'das rnam par snang mdzad kyi longs spyod rdzogs pa'i sku 'og nas 'byung ba'i rim gyis yi ge dgod pa sngon du 'gro ba can gyi skur byin gyis brlabs te/rin po che sna bzhi'i bum pa snga ma bzhin du byang chub sems dpa' chen po'i sngags kyis btab pa dag gis dbang bskur bar bya'o/ /de nas yang 'og nas 'byung ba'i rim gyis oM zhes pa la sogs pa'i yi ge dgod pa'i sgo nas rnam par snang mdzad kyi sku rdzogs par mos pa bya ste/ji skad du gsang ba'i bdag po de la slob dpon gyis bdag nyid de bzhin gshegs pa'i gzugs su de'i sngags sam phyag rgyas byin gyis brlab bo/ /de nas slob ma rnams bos te/chos kyi dbyings kyi ngo bo nyid kyi pad+ma'i rgyal po zhes bya ba la bzhag ste/ yan lag 'byung ba'i phyag rgya bcings la byang chub sems dpa' bzhi'i byin gyis brlabs pa'i rin po che sna bzhi'i bum pa'i chus spyi bo nas dbang bskur bar bya'o/ /a ni klad kor bcas pa ru//mkhas pas spyi bor bzhag nas ni/ /a zhes bya ba snying khar gzhag /ra zhes bya ba brang du gzhag /yang na a ni kun du gzhag /gser gyi kha dog 'bar dad bcas/ /thor tshugs dang ni dbu rgyan bcas/ /pad+ma dkar po'i gdan la bzhugs/ /rgyal ba'i mchog ni ting 'dzin gnas//zhes gsungs pa lta bu yin no/ /chos kyi dbyings kyi pad+ma la dbang bskur ba'i dgongs pa ni/ chos kyi dbyings ni chos thams cad stong pa yin no/ /de brjod par 'gyur ba'i sa bon ni rgyud 'di las ra zhes bya bar bshad pa yin no/ /des mtshon pa'i pad+ma ni chos kyi dbyings kyi ngo bo nyid yin par bshad do//de la 'dug pa'i slob ma la dbang bskur ba sbyin par bya ste/ ji ltar chos kyi dbyings nyes pa thams cad las rnam par grol ba de ltar 'dir dbang bskur ba'i slob ma la longs spyod rdzogs pa dang sprul pa'i sku gnyis thob pa'i sa bon dang ldan pa yang rim gyis sku gnyis thob nas/sems can gyi don gyi rjes su chags pa'i chos dag ston kyang / chos kyi dbyings lta bur nyes pa thams cad kyis ma gos par 'gyur ro snyam pa 'di yin no/ /de bzhin du gsang ba'i dkyil 'khor bris par sngar ma bshad pa'i cho gas bcug la/de'i nang du bzhag ste/ yi ge yis ni mi 'gyur bsreg /ces bya ba la sogs pas ting 'dzin sgom pa'i lung gis chos kyi sku'i dbang bskur bas dbang bskur bar bya ba 'di ni/ bcom ldan 'das rnam par snang mdzad chos kyi sku 'thob par 'gyur ba'i dbang bskur ba ste gsum pa yin par blta'o//'di ltar gsang ba'i dkyil 'khor las dbang bskur ba'i dkyil 'khor ji skad bshad pa lta bu bri ba yang ma smos la gsang ba'i dkyil 'khor du dbang bskur ba'i cho ga gzhan yang dag par ma bstan gyi/ gsang ba'i dkyil 'khor du 'jug pa'i phan yon bstan pa'i skabs su/gsang ba'i dkyil 'khor dbus gnas pa'i/ /dam tshig 'di ni sus rig pa/ /rgyud rnams kun du zhugs pa dang / /dkyil 'khor kun la dbang ba yin/ /zhes bya ba 'di gsungs so/ /dkyil 'khor kun zhes bya ba ni 'dir 'jig rten pa dang 'jig rten las 'das pa rnams gzung ngo //de dag la dbang ba ni bri ba dang / lung 'bogs pa la sogs pa ste/ de yang shugs kyis slob dpon gyi dbang bskur ba rnams thob nas 'thob bar 'gyur ro zhes bshad pa yin no/ /gsang ba'i dkyil 'khor gyi nang du bcug pa'i tshe ting nge 'dzin bsgom pa'i lung /yi ge yis ni mi 'gyur bsreg /ces bya ba la sogs pa'i mtshan nyid can/ slob ma dang slob dpon bdag nyid kyi yi ges lus sreg pa'i rim gyis slob ma chos kyi skur bsam pa gang yin pa 'di nyid gsang ba'i dkyil 'khor du dbang bskur ba yin par rjes su dpag go//gsang ba'i dkyil 'khor du dbang bskur ba 'di'i mtshan nyid kyang gsang ba'i dkyil 'khor du 'jug pa'i skabs kho nar bstan par bya'o/ /dkyil 'khor gsum char du slob ma dbang bskur ba'i cho ga bshad zin to/ /de ltar na snying rje chen po'i snying po can dang /yi ge 'khor lo bskor ba'i dkyil 'khor du phyi'i dbang bskur ba gnyis bshad pa yin no/ /dbang bskur ba de gnyis kyi dbang bskur ba'i phyir yo byad rnams 'byor kyang rung ma 'byor kyang rung ste/ zab cing rgya che ba la spyod pa'i slob ma la yid kyis dbang bskur ba 'di gnyis bshad do//de la yid kyis dbang bskur ba'i cho ga ni/ snying rje chen po'i snying po can ni yi ge 'khor lo bskor ba'i dkyil 'khor bris pa'i mdun du bzhag nas/ ci rigs par dkyil 'khor gnyis su dbang bskur ba'i cho ga yid kyis bsgoms te 'di skad du/ ngas khyod cho ga ci nus su dbang bskur zin gyi gsang sngags kyi tshul la 'jug par gyis shig ces brjod par bya'o//de lta bas na yid kyis dbang bskur ba 'di dang / 'og nas 'byung ba'i cho gas yan lag thams cad 'byung ba'i phyag rgyas dbang bskur ba dang / gong du bshad pa'i phyi'i dbang bskur ba zhes bya ba dang rnam pa gsum mo//rnam pa 'di gsum gyi mtshan nyid kyang rgyud las bshad de/ dbang bskur gsum du shes bya ste/ /de bas nan tan mnyan par gyis/ /phyag rgya gang zhig dbang bskur ba/ /las dang bya ba spangs pa ste/ /skyob pa rnams kyis dbang bskur ba//de ni mchog ste dang po yin/ /gnyis pa las dang bya ba yis/ /kun nas bslang bar yang dag bshad/ /gsum pa yid kyis zhes bya ste/ /yul dang dus ni spang ba'o/ /bla ma legs par mgu byas na/ /phan par byed pa gang smras pa/ /dbang bskur 'di ni mchog yin par//rdzogs pa'i sangs rgyas rnams kyis bsgrags/ /zhes gang gsungs pa yin no/ /de la slob ma phyag rgyas gang zhig dbang bskur ba zhes bya ba ni slob ma dbang bskur ba sbyin par 'os pa snying rje chen po'i snying po can gyi dkyil 'khor ram/ yi ge 'khor lo bskor ba'i dkyil 'khor bris par bcug la dkyil 'khor gyi mdun du bzhag ste/yan lag thams cad 'byung ba'i phyag rgyas dbang bskur bar bya'o/ /khyad par du ni snying rje chen po'i snying po can gyi dkyil 'khor bris pa'i mdun du dbang bskur ba'i tshe ni dbang bskur ba gsum char la yang ci rigs par slob ma rdo rje sems dpa'i sku kho nar byin gyis brlab par bya'o//yi ge 'khor lo bskor ba'i dkyil 'khor du dbang bskur ba'i tshe ni slob ma bcom ldan 'das rnam par snang mdzad kyi sku nyid du bsgoms nas dbang bskur bar bya'o/ /gsang ba'i dkyil 'khor du dbang bskur ba'i tshe ni/slob ma rdo rje sems dpa'i sku nyid du bsgoms nas dkyil 'khor der bcug ste/ de las bshad pa'i mtshan nyid can chos kyi sku'i dbang bskur bas dbang bskur bar bya'o/ /de la slob ma snying rje chen po'i snying po can gyi dkyil 'khor du dbang bskur ba ni//byang chub kyi snying po can gyi sku thob par byed pa yin no/ /yi ge 'khor lo bskor bar dbang bskur ba ni phyis longs spyod rdzogs pa dang / sprul pa'i sku thob par byed pa yin no/ /gsang ba'i dkyil 'khor du dbang bskur ba gang yin pa 'di ni 'di'i chos kyi sku thob pa yin par blta'o zhes sngar bshad pa yin no//de la 'di la byang chub kyi snying po'i sku la sogs pa la 'jug pa'i mtshan nyid bshad pa ni/ da ni 'jig rten dang po yi/ /'jig rten mgon zhes bsgrags pa yin/ /bla med gzod nas zhi ba ni/ /mnyam pa med pa'i chos bshad do//de nas bcom ldan 'das kyis tshigs su bcad pa de dag gsungs nas byin gyis brlabs/ gang gis byin du brlabs na byang chub sems dpa' de rnams dang / rdo rje 'dzin pa de rnams kyis bcom ldan 'das byang chub kyi snying po mchog dam pa la bzhugs pa nam mkha' bzhin du spros pa med pa/spyod pa la gnyis su med pa'i rnal 'byor gyi mtshan nyid las kyi rnam par smin pa bzhin du mthong bar gyur pa de lta bus byin gyis brlabs pa mdzad do zhes gang gsungs pa yin te/ de la da ni 'jig rten dang po'i zhes bya ba la sogs pa'i tshigs su bcad pas ni//bdag nyid longs spyod rdzogs pa dang sprul pa'i sku gnyis kyis 'jig rten la chos ston par byed do/ /de la dang po 'byung ba'i 'jig rten ni 'jig rten dang po ste mu stegs byed khyab 'jug dang / lha chen po dang / tshangs pa la sogs pa yin te/ 'chags pa'i bskal pa dang po nyid du byung ba'i phyir ro//'jig rten dang po de dag ni nang na ni 'jig rten gyi mgon yin no/ /khyod ji ltar 'jig rten mgon po yin zhe na zhes bya ba'i sgra ni/ gang gi phyir zhes bya ba'i don to/ /gang gi phyir chos bla na med pa gzod ma nas zhi ba/ mnyam pa med pas ston pa zhes bya ba'i don yin no//de bas na dgongs pa ni de dag gi lam zag pa dang bcas shing dmigs pa dang bcas pa ston par byed pa nyid kyis yang dag par 'jig rten skyong ba ma yin no snyam pa 'di yin no/ /bcom ldan 'das byang chub kyi snying po mchog dam pa la bzhugs par mthong zhes bya ba ni rdo rje 'dzin pa rnams dang /byang chub sems dpa' chen po rnams mngon par byang chub pa'i sku la 'jug pa ston to/ /'di ltar dang por de dag bcom ldan 'das rnam par snang mdzad kyi longs spyod rdzogs pa'i sku dang sprul pa'i sku la 'jug par/ de nas byang chub sems dpa' kun du bzang po la sogs pa de dag dang / gsang ba'i bdag po la sogs pa'i rdo rje 'dzin pa de dag bcom ldan 'das rnam par snang mdzad kyi byin gyi rlabs kyis sku mnyam pa nyid bkod pa mi zad pa'i mdzod rnam par bsgyings pa la zhugs so/ /de bzhin du gsung dang thugs mnyam pa nyid bkod pa mi zad pa'i mdzod rnam par bsgyings pa la zhugs te zhes bya ba'i gzhung 'dis bstan to//de'i phyir bcom ldan 'das rnam par snang mdzad kyi sku mi zad pa la sogs pa mthong nas yon tan gyi khyad par mthong bas/ bcom ldan 'das rnam par snang mdzad kyi mngon par rdzogs par byang chub pa'i sku mthong ba'i lam du gyur pa de rnams kyis shes par bya bar khong du chud par bya'o//gzhan yang / nga ni 'jig rten dang po yi/ /'jig rten mgon zhes bsgrags pa yin/ /bla med gzod nas zhi ba ni/ /mnyam pa med pa'i chos bshad do//zhes bya ba'i tshig 'di rnams kyi tshig gi don kha cig chos kyi sku'i dgongs pas gzhan du yang dpog par byed de/ 'di lta ste/ bcom ldan 'das yang dag par rdzogs pa'i sangs rgyas rnams kyi sku ni chos dang longs spyod rdzogs pa dang / sprul pa'i sku gsum gyi bye brag gis sku gsum yin no//de la de dag thams cad kyi chos kyi sku ni/ ngo bo nyid gcig pa mi 'gyur bar yongs su grub pas rtag par 'gro ba skye ba dang 'jig pa dang ldan pa thog ma med pa thams cad kyi dang por gyur pa yin no/ /de'i phyir bcom ldan 'das kyis chos kyi sku de bdag nyid kyi thugs la bzhag nas/nga ni 'jig rten dang po'i zhes bya ba gsungs te/ des na dgongs pa ni nga nyid chos kyi sku'i ngo bo nyid kyis 'jig rten skye ba dang 'jig pa dang ldan pa rnams kyi dang po yin no/ /phyogs 'di la ni tshigs su bcad pa dang mthun par rnam par dbye ba dang po mi mngon par bstan par rig par bya'o//chos bshad do zhes bya ba 'di'i don yang chos kyi sku'i dbang gis bcom ldan 'das kyis sangs rgyas kyi gsung bkod pa'i rgyan sems can thams cad dga' bar byed pa 'grub pa'i phyir ro snyam pa yin no/ /chos kyi sku la 'jug pa yang gsang ba'i dkyil 'khor bstan pa'i skabs su bstan te/rig pa'i rgyal po tshig yan lag bcu gnyis 'byung ba bshad pa'i skabs der ji skad du/ de nas phyag na rdo rje bcom ldan 'das rnam par snang mdzad kyi sku dang gsung dang thugs kyi sa la bzhugs nas chos mnyam pa nyid la bltas te/ma 'ongs pa'i skye bo rnams la brtags nas rig sngags kyi rgyal po the tshom thams cad gcod par byed pa 'di smras so zhes bya ba la sogs pa/ de nas dpal ldan rdo rje 'dzin/ /bsam pa thams cad mgu gyur pa/ /rdzogs sangs rgyas kyis byin brlabs pas//'di skad kyi ni tshig tu smras/ /chos 'di rnams ni mtshan nyid med/ /ngo bo nyid med gnas med pa/ /las dang tshe las rnam par grol/ /rdzogs pa'i sangs rgyas 'dra bar 'dod/ /thugs rje mnga' ni mdzad pa yi/ /mgon po rnams kyi thabs kyis ni/ / rnam par sprul nas chos rnams kyi/ /mtshan nyid 'di dag rtogs par gyur/ /zhes bya ba'i bar bstan pa lta bu yin no/ /dkyil 'khor du slob dpon du dbang bskur ba'i cho ga rnam pa gsum char yang bshad zin to zhes bya ba'i cho ga ni/ 'og nas mtshan ma dang bcas pa dang / mtshan ma med pa la sbyor ba la goms pa'i sgo nas kun nas bsdu bar bya ste/ 'di ni dkyil 'khor rnam pa gsum char las bshad pa'i cho ga bsdus pa'i don yin no// //bam po lnga pa/ da ni rig sngags dang gsang sngags la sogs pa mnyes par bya ba'i phyir/ sgrub pa po rnams kyi spyod pa'i 'bras bu dang bcas pa rgyud las bshad pa'i bsdus pa'i don dpyad par bya'o//de la sgrub pa po'i spyod pa ni rnam pa gsum ste/ 'di lta ste/ gsang sngags mnyes par bya ba la 'jug pa'i spyod pa dang / gsang sngags mnyes par bya ba'i phyir sngar bsnyen pa'i cho ga'i mtshan nyid can gyi sbyor ba'i spyod pa dang /de bzhin du spyod pa gsum pa gsang sngags bsgrubs pas gsang sngags kyi 'bras bu 'grub pa ste/ 'bras bu ni gsang sngags kyi 'bras bu'i ngo bo nyid dngos grub kyi mtshan nyid bstan pa yin no/ /de la gsang sngags mnyes par bya ba la 'jug pa'i spyod pa ni/phyi dang nang gi bye brag gis rnam pa gnyis so/ /de la phyi'i ni dkyil 'khor du 'jug pa dang dbang bskur ba'i mtshan nyid ji skad du bshad pa dag yin no/ /de las gzhan pa dag ni rig sngags dang gsang sngags mnyes par byed pa'i dam tshig gi ngo bo nyid yin te/de ring phyin chad bu khyod kyis/ /dam pa'i chos dang byang chub sems/ /srog gi phyir yang da phyin chad/ /yongs su gtang bar mi bya'o/ /yang dang yang du snying rje dang / /byams pa'i sems ni nyer bzhag ste/ /khyod kyis ser sna dang ni gang / /sems can gnod pa mi bya'o//slob dpon brnyas par mi bya ste/ /'di ni sangs rgyas kun dang 'dra/ /zhes bya ba la sogs pa gang gsungs pa yin te/ re zhig 'di ni gsang sngags mnyes par byed pa rnams kyi 'jug pa'i spyod pa phal cher thun mong du bya ba'i ngo bo nyid yin no/ /de las gzhan pa dag ni 'di las byang chub sems dpa'i theg pa rnams dang /gsang sngags spyod pa la mngon par brtson pa rnams kyi spyod pa thun mong du bshad pa dag yin te/ de yang 'di las bslab pa bzung bar rim par phye ba las dge ba bcu'i las kyi lam thabs dang bcas pa'i rjes su byed pa'i ngo bo bstan pa yin no//bcom ldan 'das byang chub sems dpa' chen po rnams kyi bslab pa'i gzhi thabs dang shes rab kyis yongs su zin pa gang dang ldan na/ byang chub sems dpa' sems dpa' chen po rnams the tshom dang yid gnyis ma mchis shing 'khor ba na 'khor ba'i tshe/nyams par mi 'gyur ba dag bshad du gsol zhes bya ba rgyas par gsungs pa nas yang byang chub sems dpa' srog gcod pa dang / ma byin par len pa dang / 'dod pas log par g.yem pa las phyir ldog par bya'o/ /brdzun du smra ba dang / ngag rtsub mo smra ba dang /phra ma zer ba dang / tshig 'khyal par smra ba las phyir ldog par bya'o/ /brnab sems dang gnod sems dang log par lta ba las kyang phyir ldog par bya'o zhes bya ba gang gsungs pa yin te/ 'di dag thabs dang shes rab kyis yongs su zin pa las 'da' ba dang mi 'da' ba ni rgyud 'di las yongs su dpyad par bya ste/'di ni sgrub pa po rnams mnyam par ma bzhag pa'i gnas skabs na yang 'jug pas sgrub pa po'i 'jug pa'i spyod pa phyi'i zhes bshad pa yin no/ /nang gi ni sgrub pa po'i 'jug pa'i spyod pa mnyam par 'jog pa dang / mthun pa kho na yin te/ de yang 'di las sems kyi rgyun mtshan ma dang bcas pa dang / mtshan ma med pa'i mnyam par 'jog pa dang mthun pa nyid du rnam pa gnyis su bstan par shes par bya ste/ sgrub pa po rnams kyi goms pa'i mthu dang mthun par bstan pa yin no/ /de la sgrub pa po'i 'jug pa'i spyod pa mtshan ma med pa ni/byang chub kyi sems goms pa'i mtshan nyid de gang gi dbang du mdzad nas/ dkyil 'khor 'di ni mthong ba las/ /dam tshig shes pa gcig ces bya/ /de la phyag rgya mi bstan zhing / /sngags kyang sbyin par mi bya'o/ /byang chub sems kyi bye brag las//sngags dang phyag rgya yongs su bzung / /zhes gsungs pa yin no/ /re zhig 'di ni gsang sngags sgrub pa thams cad kyi 'jug pa'i spyod pa byang chub kyi sems goms pa'i mtshan nyid can yin no/ /de bzhin du khyad par du yang de bzhin gshegs pa'i snying po rnams bsgrub pa'i skabs nas/'jug pa'i spyod pa byang chub kyi sems goms pa'i mtshan nyid can kho nar bshad de/ gang gi dbang du mdzad nas/ skyed mos tshal lam gtsug lag khang ngam/ phug gam yid gang du dben pa der byang chub kyi sems bsgom zhing nam mtshan ma byung gi bar du de srid du 'dug par bya'o zhes bya ba la sogs pa gsungs pa yin no//'dir mtshan ma ni chos thams cad kyi ngo bo nyid med par rtogs pa'i ting nge 'dzin la sems dus ji srid 'dod kyi bar du brtan par gyur pa yin te/ de skad du 'di las/ slob mas bsgrims te byang chub kyi sems kyis kun du dag par bya'o//gang tshe dmigs pa rnams kyis ni/ /slob ma nam yang mi g.yo ba/ /de tshe nam mkha' lta bur ni/ /dri med kun du dag pa yin/ /zhes bshad pa yin no/ /de bzhin du gzhan las kyang sems yongs su sbyor ba mtshan ma dang bcas pa dang mtshan ma med pa la dmigs pa'i ting nge 'dzin goms pa las sems dmigs pa gcig la dus ji srid 'dod kyi bar du brtan par gyur pas bzlas brjod la sogs pa la btub pa'i sems mnyam par 'jog pa grub pa gang yin pa de nyid de yongs su sbyor ba'i mtshan nyid du gsungs te/sna yi rtse mor blta zhing rnam rtog spang / /gang tshe rnam par spyod kyang mi g.yo ba/ /de tshe sems ni dmigs pa la gnas pa/ /thob par 'grub ces bya bar shes par bya'o/ /zhes gang gsungs pa yin no/ /de nyid las sems dmigs pa gcig la/ brtan pa lus dang sems kyi yon tan 'byung bas bzlas brjod kyi lha bsgom pa la sogs pa btub pa nyid du bstan pa'i phyir/ sgrub pa po ni bsam gtan dang ldan pa'i/ /mi la dga' ba'i mchog ni skye bar 'gyur/ /dga' bas lus ni shin tu sbyangs par 'gyur/ /shin tu lus sbyangs pa las bde ster 'gyur//dga' zhing bde na de tshe dogs med par/ /bzlas brjod dag la yid gcig ting 'dzin skye/ /zhes gsungs so/ /de bzhin du de nyid las bzlas brjod byed pa na sems brtan pa'i bzlas brjod byed pa'i phan yon bshad de/ bzlas brjod kyis ni tshe rabs brgyud par gang //sdig pa byas te ma lus zad par 'gyur/ /sdig pa ngan pa kun nas zad gyur na/ /dngos grub yid du 'ong ba thob par 'gyur/ /zhes gang gsungs pa yin no/ /de bzhin du de nyid las sems brtan par ma byas pa'i bzlas brjod kyi sbyor ba'i lung yang bstan te/le lo'i dga' dang sdug bsngal mtshungs ldan pa'i/ /sems ni gang dang gang du rgyur gyur pa/ /de dang de nas bsgrims te de bzlog nas/ /gsang sngags yi ge mchod bya dag la sbyar/ /zhes gang gsungs pa yin no/ /sems mnyam par gzhag pa'i mtshan ma 'di ni rang gi sems yongs su sbyang ba dang /mtshan ma dang bcas pa dang mtshan ma med pa'i 'og nas 'byung ba dag las kyang khong du chud par bya'o/ /de bzhin du mtshan ma med pa'i ting nge 'dzin goms pa'i sgo nas 'jug pa'i spyod pa mtshan ma med pa'i rnal 'byor goms pa'i mtshan nyid can yang bshad do//byang chub sems dpa' gsang sngags kyi sgo nas byang chub sems dpa'i spyad pa spyod pa mtshan ma med pa'i ting nge 'dzin sgrub par 'dod pas 'di ltar bsam par bya'o/ /mtshan ma rnams gang nas byung / ci bdag gi lus sam bdag gi sems sam/bdag gi yid las byung / de la lus ni las las skyes pa ste/ rtswa dang shing dang bong ba lta bu ngo bo nyid kyis bya ba med pa blun pa/ phyi rol gyi rnam pa lta bu la/ bzos byas pa'i gzugs lta bur brtag par bya'o/ /ji ltar bzos byas pa'i gzugs de las mi zhig khros te/me'am dug gam mtshon nam chu'am/ rdos bshig gam bsregs sam bcad kyang / mi dga' cung zad kyang med la/ bza' ba'am/ btung ba'am/ bkru ba'am/ byug pa'am/ spos sam phreng ba'am gos sam tsan+dan nam ga pur la sogs pa lha dang mi'i yo byad rnam pa sna tshogs kyis mchod kyang mi de la dga' bar 'gyur ba yang med do//de ci'i phyir zhe na/ gang ngo bo nyid kyis stong pa'i gzugs de la/ rang gi nga rgyal kun nas bslang ba'i phyir phyin ci log gi yang dag pa ma yin par rtog pa las byung ba'i mchod pa'am gnod par byed pa'i mi gang yin pa de ni byis pa'i rang bzhin can yin no//gsang ba'i bdag po de ltar lus la lus kyi rjes su song ba'i dran pas ngo bo nyid kyis stong par bsgrub par bya'o/ /gsang ba'i bdag po gzhan yang / sems ni ngo bo nyid med pa mtshan ma thams cad dang bral ba/ ngo bo nyid kyis stong par bsam par bya'o//gsang ba'i bdag po sems las ni/ dus gsum med do/ /dus gsum dang bral ba gang yin pa de ni ngo bo nyid kyis mtshan ma dang bral ba'o snyam du bsam par bya'o/ /gsang ba'i bdag po gzhan yang byis pa so so'i skye bo rnams yid mtshan ma dang bcas par rtogs te/ 'di ni yang dag pa ma yin pa'i kun du rtog pa'i tshig bla dwags ma yin no/ /yang dag pa ma yin pa gang yin pa de ni/ ma skyes pa'o zhes bya bar ni rab tu mi shes so/ /gsang ba'i bdag po byang chub sems dpa' gsang sngags kyi sgo nas byang chub sems dpa'i spyad pa spyod pas de ltar bsams na mtshan ma med pa'i ting nge 'dzin thob par 'gyur ro//gsang ba'i bdag po nam mtshan ma med pa'i ting nge 'dzin la gnas par gyur pa de'i tshe de la de bzhin gshegs pa'i gsang sngags rnams mngon du phyogs shing gzhol bar 'gyur ro zhes gang gsungs pa yin no/ / 'dir sems zhes bya ba'i sgra ni gzugs la sogs pa la dmigs pa/ mig la sogs pa'i rnam par shes pa drug bzung ste/ sems kyi dmigs pa gzugs la sogs pa de dag ni gcig dang du ma'i rigs pa'am/ gzod ma nas ma skyes shing skye ba med pa'i rigs pas dpyad na/ ngo bo nyid med pa mig la sogs pa'i rnam par shes pa'i mtshan nyid kyi sems kyis dmigs par rung ba ma yin no/ /de'i phyir gzugs la sogs pa'i dmigs pa med pa'i phyir/ de la dmigs par byed pa mig la sogs pa'i rnam par shes pa yang ma skyes pa yin no/ /gang ma skyes pa de ni 'das pa dang ma 'ongs pa dang /da ltar byung bar rnam par gzhag par rung ba ma yin no/ /de'i phyir sems la dus gsum yod pa ma yin no/ /de ltar na gzugs la sogs pa'i phung po bzhi'i ngo bo nyid la dmigs pa mig la sogs pa'i rnam par shes pa'i phung po'i ngo bo nyid kyi sems med par brtag par bya'o//da ni gzung ba dang 'dzin pa'i ngo bo nyid kyi sems kyang gzod ma nas ma skyes shing ma byung ba nyid du brtags pa'i lung ni byis pa so so'i skye bo rnams yid mtshan ma dang bcas par rtogs te/ 'di ni yang dag pa ma yin pa'i kun du rtog pa'i tshig bla dwags so/ /yang dag pa ma yin pa de ni ma skyes pa'o zhes bya bar ni/mi shes so zhes gang gsungs pa yin no/ /de la 'dir yid ces bya ba gzung ba dang 'dzin pa'i rnam pa can gyi rnam par shes pa yin par dgongs te/ de skad du 'di las/ dkar po ser po dmar po gang / yid kyis sems par byed pa ste/ /de la yongs su gcod pa gang / /de ni sems kyis byed pa yin/ /sems ni mgu nas nges gyur pa/ /ting nge 'dzin zhes bsgrags pa yin/ /rnal 'byor der gnas rdzogs sangs rgyas/ /rkang gnyis dam par bsam par bya/ /zhes gsungs so//'dir dkar po ni zla ba'i dkyil 'khor ro/ /ser po ni sa'i dkyil 'khor ro/ /dmar po ni me'i dkyil 'khor te ci rigs par rgyud 'di las rdzogs par sangs rgyas pa la sogs pa'i ting nge 'dzin sgom par byed pa'i rnal 'byor pa rnams kyi bstan pa nyid du bshad do/ /yid de la sngon po dang ser po dang dmar po la sogs par snang ba gang yin pa de sngar mdzad pa'i rigs pa nyid kyis dpyad na rung ba ma yin pas rnal 'byor pa rnams de'i rnam pa can gyi yid kyang med pa la 'jug go//de nyid kyi phyir 'di ni yang dag pa ma yin pa'i kun du rtog pa'i tshig bla dwags so//yang dag pa ma yin pa gang yin pa de ni ma skyes pa'o zhes bya ba gsungs te/ de skad du gzhan las kyang / don dang sems can bdag rnam rig /snang ba'i rnam par shes pa ni/ /rab tu skye ba de do na med/ /de med pas na de yang med/ /ces bshad do/ /de ltar mtshan ma med pa'i ting nge 'dzin sgrub par 'dod pa'i rnal 'byor pas dang po nyid du lus ma bsgoms pa'i gzugs nyid rang bzhin gyis bems po nyid yin pas sngon po la sogs pa mtshan ma'i rnam par rtog pa'i rgyu ma yin pa nyid la 'jug go//de'i 'og tu sngar bshad pa'i tshul gyis/ phyi'i gzugs la sogs pa'i phung po yang med pa la zhugs nas de la dmigs pa'i sems kyang skye ba med par sems par byed do//de'i phyir rnal 'byor pas don dang sems can la sogs par snang ba'i yid kyang sgyu ma dang / smig rgyu dang / rmi lam la sogs pa'i rnam par shes pa bzhin du don dang 'brel ba nyid kyis med pa la zhugs te/thos pa dang / bsam pa dang bsgom pa'i sgo nas mtshan ma med pa'i ting nge 'dzin gyi ngang du bya'o zhes bya bar gnas so/ /'di'i phan yon bshad pa yang 'di yin te/ gang tshe mtshan ma med pa yi/ /ting 'dzin ji lta bzhin reg pa'i/ /de tshe sngags pas dngos grub ni//yid la yang dag 'byung ba 'thob/ /ces gsungs pa yin no/ /de bzhin du mtshan ma med pa'i rnal 'byor gyi phan yon bstan pa'i skabs nas/ mtshan ma med pas ni mtshan ma dang bcas pa'i dngos grub kyang 'byung bar 'gyur ro/ /mtshan mar bcas pas mtshan bcas kyi//dngos grub rgyal ba dam pa bzhed/ /mtshan ma med la gnas pas ni/ /mtshan ma can yang bsgrub tu rung / /de bas rnam pa thams cad du/ /mtshan ma med par brten par bya/ /zhes gzhan 'di yang gsungs so/ /sgrub pa po 'jug pa'i spyod pa mtshan ma dang bcas pa ni/nang gi zhes bya ste/ de yang gsang sngags thams cad kyi spyi'i bzlas brjod yan lag bzhi pa'i skabs nas/ bdag lhar sgyur ba la sogs pa yan lag bzhi'i goms pa'i mtshan nyid bshad pa ni gcig yin te/ gzhi ni rang gi lha bzhag pa/ /rang gi lus kyi gnas zhes bya//zhes bya ba la sogs pa rgyas par gang gsungs pa yin no/ /de bzhin du gzhan ni de bzhin gshegs pa'i snying po rnams sgrub pa'i skabs nas/ bdag nyid rdzogs par sangs rgyas pa'i skur bsgyur ba goms pa'i sgo nas bshad pa yin te/ de nas snying po de dag las gang yang rung ba cig bzung ste/the tshom med par gyur gyi bar du gzhi bsgrub par bya'o zhes bya ba la sogs pa'i mtshan nyid gang gsungs pa yin no/ /de bzhin du gzhan ni sgrub pa po'i 'jug pa'i spyod pa thams cad kyi spyi'i mtshan ma dang bcas pa dang / mtshan ma med pa'i rnal 'byor goms pa'i sgo nas/ sems sbyor ba'i mtshan nyid bshad pa 'di yin te/de yang mig gnyis su ra zhes pa snang ba'i bkod pas/ rang gi snying gar zla ba'i dkyil 'khor la bcom ldan 'das rnam par snang mdzad rdzogs par byang chub pa'i sku snying po a zhes bya bas bsgrub pa pad+mo la bzhugs par bsgoms la/ rang gi klad pa'i rgyas kyi nang du/yang snying po aM zhes bya ba de bzhin gshegs pa'i gnas skabs kyi mtshan nyid kyi chos kyi sku rjod par byed par gyur pa/ snying rje chen po'i snying po can las bshad pa/ de bzhin gshegs pa thams cad kyi chos 'byung ba'i phyag rgya la gnas pa'i rdo rje'i dkyil na 'dug par ji srid du mig tu bkod pa'i ra zhes bya ba'i snang bas zla ba'i dkyil 'khor la/bcom ldan 'das rnam par snang mdzad kyi rdzogs par byang chub pa'i sku pad+ma la bzhugs pa gzugs brnyan lta bur mthong ba'i bar du legs par bsgom par bya'o/ /de nas zla ba'i 'od kyi lam gyis rang gi sems gyen du btang zhing klad pa'i rgyas su bkod pa'i snying po aM zhes bya ba de shin tu cha phra zhing zla ba ltar dkar la rab tu gsal bar snang ba nyid du bya ste/yun de lta bur ring du bsgom par bya'o/ /de nas sngar mig gnyis su ra zhes bya ba bkod pa'i gnas su la zhes bya ba zla ba ltar dkar ba nyid bkod nas de'i tshe na chos thams cad mtshan nyid dang bral ba'o zhes bya bar sems shing chos kyi sku la mos pas rang gi lus ril dang 'jig rten gsum gyi mthas gtugs par stong par ji srid 'dod kyi bar du bsgom par bya'o//de'i mjug bsdu ba ni rang gi lus de bzhin gshegs pa la sogs pa dang ldan pa ji ltar bkod pa dang ldan pa mthong ba'i sgo nas byas la/de bzhin gshegs pa la sogs par snang ba mjug brtul ba yang rang gi lus 'ba' zhig lta ba'i sgo nas bya ste/ de lta bas na 'di ni rim gyis mtshan ma dang bcas pa dang / mtshan ma med pa'i ting nge 'dzin gnyis sems pa'i sgo nas sgrub pa po'i 'jug pa'i spyod pa nang gi yin par blta bar bya ste/ji skad du/ dkar po ser po dmar po gang / /yid kyis sems par byed pa ste/ /de la yongs su gcod pa gang / /de ni sems kyis byed pa yin/ /sems ni mgu nas nges gyur pa/ /de ni snying zhes bshad pa yin//gnas der gnas pa'i gsang sngags rnams/ /'bras bu rgya chen ster bar 'gyur/ /de ru pad+ma bsam pa ni/ /'dab ma brgyad pa ze bar bcas/ /a zhes bya ba 'bar phreng 'khrug /bzang po de ru gnas pa la/ /zhi ba kun du rnam par g.yo/ /gtso bo sna tshogs gzugs mnga' ba//glog stong dag ni 'khrug pa bzhin/ /sna tshogs kun du ston pa ni/ /me long phug na gnas pa bzhin/ /chu yi zla ba rnam pa bzhin/ /thams cad na yang mdun na gnas/ /sngags pas gsang sngags la gnas pa/ /yid ni bde bar shes nas su/ de nas sngags pas stong du yang / /klad pa'i rgyas kyi dbus su ni/ /klad kor bcas pa'i mtshan ma can/ /aM zhes bya ba der bsams te/ /shel dngas pa dang gangs 'dra ba/ /dri med dag pa mthong ba ni/ /zhi ba chos kyi rang bzhin sku/ /thams cad kyi ni gzhi zhes bya/ /de las gsang sngags dngos grub ni//sna tshogs gzugs can 'thob par 'gyur/ /de bzhin gshegs pa'i gnas mthong na/ /mtho ris dang ni byang grol thob/ /ra zhes bya ba mar me bzhin/ /'bar ba'i mig tu bzhag nas kyang / /mgrin pa cung zad dgu por bya/ /lce yang rkan la sbyar nas ni//snying ga'i gnas su rnam blta zhing / /mnyam par bzhag ste yid la blta/ /dri med shin tu rnam dag par/ /rtag tu me long bzhin du gnas/ /de ni yid kyi yang dag par/ /sngon gyi rgyal ba rnams kyis gsungs/ /yid kyis snang byas lam la ni/ /rnam par shes pa snang bar 'gyur//de nas sngags pas rdzogs sangs rgyas/ /rkang gnyis gtso bo mthong bar 'gyur/ /de mthong sngags pas dngos grub ni/ /rab tu rtag pa thob par 'gyur/ /de nas gong du bsgyur nas su/ /yi ge yongs su bsam pa ni/ /la zhes bya ba klad kor bcas/ /mig gi gnas su bsam par bya//'di kun stong par mthong na ni/ /go 'phang mi nyams thob par 'gyur/ /ye shes rlabs po che'am ni/ /yang na mngon shes lnga po dang / /rig sngags 'chang gyur dngos grub dang / /tshe ring gzhon nur gyur pa gang / /gal te mthong bar 'dod na ni/ /ji srid 'di dag ma bsnyems par//de srid 'thob par mi 'gyur ro/ /gsang sngags ye shes las byung ba'i/ /'di ni de nyid ye shes mchog /ces bya ba la sogs pa rgyas par gsungs pa yin no/ /de lta bas na 'di yang gsang sngags thams cad sgrub par byed pa'i thabs dang shes rab bslab pa'i sngags pa rnams kyis sgrub pa po'i spyod pa'i mtshan nyid can mtshan ma dang bcas pa dang /mtshan ma med pa dang / rnal 'byor gyi ngo bo nyid kho nar bshad pa yin no/ /de bzhin du khyad par du bcom ldan 'das kyis dpa' bo chen po'i snying po sgrub par byed pa rnams kyi bsgrub pa'i spyod pa/byang chub kyi sems goms pa sngon du 'gro ba can rdzogs pa'i sangs rgyas kyi go 'phang sa'i dkyil 'khor la gnas pa bdag gi de kho na nyid ces bya ba 'grub pa'i mtshan nyid kyang gsungs pa nyid de/ cho ga shes pas thog mar ni/ /bdag gi de nyid rim bzhin bya//sngags pa snga ma bzhin 'dug la/ /de bzhin gshegs pa rjes dran nas/ /bdag nyid a zhes bya ba ni/ /klad kor rgyas dang bcas byas pa/ /thams cad shin tu ser zhing bzang / /gru bzhi rdo rjes mtshan byas shing / /sngags pas der gnas rdzogs pa yi/ /sangs rgyas kun gyi gtso bor bsam//'di ni sangs rgyas thams cad kyi/ /bdag gi de nyid yin par gsungs/ /nam zhig sngags pas bdag gi ni/ /de nyid dogs pa med gyur pa/ /de ni 'jig rten thams cad la/ /phan par byed pa nyid du 'gyur/ /ngo mtshar sna tshogs dag dang ldan/ /mig 'phrul can gyi gnas 'dug la//sngags pas nam zhig mnyam gzhag na/ /srid pa rab tu dogs par ni/ /thog med dus nas mi shes pas/ /bsags pa'i las de kun zad 'gyur/ /bla na med pa'i byang chub sems/ /sems ni nam zhig sgom byed pa/ /de tshe sngags pa rnal 'byor pa//chu yis pad+ma lta bur ni/ /dge dang mi dge'i 'bras bur ni/ /las kyis rtag par mi gos na/ /'di bdag nyid ni rgyal mchog tu/ /bsgyur na smos kyang ci zhig dgos/ /zhes gang gsungs pa yin te/ 'di ni gsang sngags sgrub par byed pa'i 'jug pa'i spyod pa mtshan ma dang bcas pa nang gi bshad pa yin no//de ltar na rnal 'byor pa ci rigs par phyi dang nang gi 'jug pa'i spyod pa gang yang rung pa legs par byas pa'i mtshan nyid can gyis gsang sngags mnyes par bya ba'i sbyor ba'i spyod pa sngon du bsnyen pa'i bzlas brjod kyi mtshan nyid brtsam par bya'o/ /de yang mtshan ma dang bcas pa dang /mtshan ma med pa'i bzlas brjod kyi sbyor ba'i bye brag gis rnam pa gnyis so/ /de la mtshan ma dang bcas pa'i bzlas brjod kyi sbyor ba ni/ gsang sngags sgrub par byed pa thams cad kyi sbyor ba phyi'i bzlas brjod yan lag bzhi'i mtshan nyid can brtsam par bya'o zhes bshad pa kho na yin te/de'i cho ga yang 'di las/ yi ge dang ni yi ger sbyar/ /de bzhin gzhi las gzhir gyur pa/ /shin tu bsdams pas yid la ni/ /bzlas brjod 'bum phrag gcig bya'o/ /yi ge byang chub sems yin te/ /gnyis pa sgra zhes bya ba yin/ /bzhi ni rang gi lha bzhag la//rang gi lus kyi gnas la bya/ /gzhi gnyis pa ni rdzogs sangs rgyas/ /rkang gnyis mchog tu shes par bya/ /zla ba'i dkyil 'khor rnam dag pa/ /sngags pas de la gnas par bsam/ /yi ge rnams ni go rims bzhin/ /de yi dbus su legs par dgod/ /ces bya ba la sogs pa gsungs pa 'di yin no//de bzhin gshegs pa'i snying po bzhis bzlas brjod byed pa rnams kyi nang gi bzlas brjod yan lag bzhi pa'i sbyor ba yang bshad pa yin no/ /de la de bzhin gshegs pa'i rgyud las bstan pa ni 'di dag yin te/ 'di lta ste/ a byang chub kyi'o/ / A spyod pa'o/ /aM rdzogs par sangs rgyas pa'i go 'phang ngo / /aHmya ngan las 'das pa'o zhes bya ba yin te/ de lta bas na snying po bzhi po de dag gis ni bcom ldan 'das rnam par snang mdzad kyi byang chub dang / spyod pa dang / rdzogs par sangs rgyas pa dang / mya ngan las 'das pa'i ye shes kyi gnas skabs dag bsdu ba yin no//de la byang chub ni rang gi sems rnam pa thams cad du skye ba med cing ye shes skye ba med par rtogs pa yin te/ byang chub rtogs pa'i gnas skabs de yang snying po a zhes bya bas mtshon pa yin no/ /de bzhin du byang chub mngon par rdzogs par sangs rgyas pa'i dus nyid na/chos nyid kyis thob pa sku dang gsung dang thugs bkod pa mi zad pa longs spyod rdzogs pa dang / sprul pa'i sku'i mtshan nyid skal ba ji lta ba bzhin du sems can gyi don mdzad par bzhugs pa dag gis 'gro ba gsum char khyab cing sems can gyi don dang sgrol bar byed pa'i mtshan nyid can gyi bdag nyid gang yin pa 'di nyid bcom ldan 'das kyi spyod pa zhes bshad do//de yang snying po A zhes bya ba ring du 'dren pas mtshon pa yin no/ /gang gi tshe byang chub kyi mtshan nyid kyi ye shes de bud shing zad nas me mi 'bar ba bzhin du dmigs pa med pas shes bya la mi 'jug pa de'i tshe/shes bya stong pa nyid du brjod pa'i klad kor dang ldan pa yin pas byang chub kyi snying po de nyid sems dang yul rnams skye ba med par rtogs pa'i phyir kun nas sangs rgyas pa zhes bya ste/ ye shes de rtogs pa'i gnas skabs de yang aM zhes bya ba 'dis mtshon pa yin no//de'i rjes la rnam par snang mdzad kyi ye shes dang shes bya dag stong pa nyid rang gi ngo bo yang ngo bo nyid med do/ /zhes bya ba la de ltar rtogs pa'i gnas skabs de nyid na/ mya ngan las 'das pa dang 'dra ba mtha' las 'das pa stong pa nyid rtogs pa'i gnas skabs yin te/stong pa nyid kyang stong pa nyid du rjod par byed pa'i snying po aHzhes bya ba tsheg gnyis dang ldan pas mtshon par byed pa yin no/ /de la snying po bzhi po 'di dag ni nang gi bzlas brjod yan lag bzhi pa'i sbyor ba 'di yin te/ 'di lta ste/ bdag nyid a zhes bya ba la sogs pa'i snying po bzhi pas/snying po gang yang rung ba gcig gis rdzogs pa'i sangs rgyas shAkya thub pa'i sku bsams la/ snying po yi ge 'di nyid kyis rdzogs pa'i sangs rgyas bdag dang gnyis su med par gyur pa de'i thugs kar der zla ba'i dkyil 'khor bsams te/ der yang dag par rdzogs pa'i sangs rgyas kyi sku bcom ldan 'das rnam par snang mdzad gdan pad+ma la bzhugs pa gzhan zhig bsams nas de'i thugs kar yang snying po'i yi ge de nyid zla ba'i dkyil 'khor la gnas par bsam zhing de bzlas brjod bya ba yin te/de bstan pa'i phyir/ de nas snying po de dag gang yang rung ba gcig bzung ste/the tshom med par gyur gyi bar du gzhi bsgrub par bya'o/ /de nas snying po snying gar bzhag ste yid bsgrub par bya'o/ /shin tu rnam par dag pa'i dri ma med par brtan par rab tu mi g.yo ba rnam par mi rtog pa me long lta bur rab tu phra ba la mngon du blta zhing rtag tu goms pa'i sbyor bas/rang gi lus rang gi lha'i lus su mthong ba'i bar du bya'o/ /de nas gzhi gnyis pa yang dag par rdzogs pa'i sangs rgyas me long gi dkyil de nyid na/ pad+ma'i rgyal po chen po la bzhugs pa phug na bzhugs pa lta bu'i ting nge 'dzin la snyoms par zhugs pa thor tshugs dang dbu rgyan can 'od zer mtha' yas pas bskor ba/rtog pa dang rnam par rtog pa thams cad dang bral ba/ nam mkha' bzhin gzod ma nas zhi ba ste/ de la sgra gnas par bsam zhing / /mnyam par gzhag pas bzlas brjod bya'o zhes bya ba la sogs pa gsungs te/de bzhin du mtshan ma med pa'i ting nge 'dzin rang gi lha chos kyi sku sbyor ba'i sgo nas kyang cir rig sngags dang gsang sngags thams cad kyi bzlas brjod kyi cho ga bshad de/ 'di las mtshan ma dang bcas pa dang / mtshan ma med pa gnyis kyis go rims bzhin du yongs su ma dag pa dang yongs su dag pa'i sku gnyis kyi bye brag gi sgo nas/lha'i sku'i ngo bo nyid rnam pa gnyis su bstan to/ /de yang yongs su dag pa ni chos kyi sku mtshan ma med pa'i ting nge 'dzin gyi ngo bo nyid ye shes rnam pa med pa'i rang bzhin gyi mtshan nyid yin no/ /yongs su ma dag pa yang kun du brtags pa'i gzugs kyi ngo bo nyid rdzogs pa'i sangs rgyas rnams kyi sku ji ltar longs spyod rdzogs pa dang /sprul pa'i sku'i mtshan nyid gdul bya'i skye bo la snang ba'i dbang gis kha dog dang dbyibs kyi bdag nyid du rnam par gzhag pa yin no/ /lha'i khyad par yongs su dag pa dang / yongs su ma dag pa de las gzhan pa rnams kyi gzugs kyi sku bsod nams kyi rgyu ji ltar gzung ba bzhin du snang ba yang / kun brtags pa'i ngo bo nyid kyis yongs su ma dag pa yin no/ /'dir yang de nyid kyi rnam par thar pa'i sgo'i sems goms pa'i mtshan nyid ji ltar rtogs pa gang yin pa de ni de dag gi yang chos kyi sku yin no zhes bya bar rnam par gzhag ste/de skad du gzhan las kyang / gsang sngags byang chub sems yin te/ /zhes gsang sngags spyi'i mtshan nyid gsungs so/ /sku de gnyi ga'i mtshan nyid kyang 'di las yongs su bstan te/ lha'i gzugs kyang rnam pa gnyis te/yongs su dag pa dang yongs su ma dag pa'o/ /de la yongs su dag pa ni rtogs pa'i ngo bo ste mtshan ma thams cad dang bral ba'o/ /yongs su ma dag pa ni mtshan ma dang bcas pa'i gzugs te kha dog dang dbyibs so/ /de la lha'i gzugs rnam pa gnyis kyis dgos pa rnam pa gnyis 'grub par 'gyur te/mtshan ma dang bcas pas ni mtshan ma dang bcas pa'o/ /mtshan ma med pas ni mtshan ma dang bcas pa'i dngos grub kyang 'byung bar 'gyur ro/ /mtshan mar bcas pas mtshan bcas kyi/ /dngos grub rgyal ba dam pa bzhed/ /mtshan ma med la gnas pas ni//mtshan ma can yang sgrub tu rung / /de bas rnam pa thams cad du/ /mtshan ma med pa brten par bya/ /zhes gang gsungs pa yin te/ lha'i sku mtshan ma med pa la 'jug pa'i thabs de yang 'di las sngar mtshan ma med pa'i ting nge 'dzin rim par phye ba las bshad pa 'di nyid do//de la rang gi lha la sogs pa kun du brtags pa kha dog dang dbyibs kyi bdag nyid du snang ba'i mtshan nyid kyi skus bzlas brjod kyi yan lag bzhi la sogs pa sgrub pa ni sngar bshad zin to/ /rang gi lha chos kyi sku'i mtshan nyid can mtshan ma med pa'i ting nge 'dzin goms pa'i sgo nas bzlas brjod sgrub pa'i sbyor ba'i go rims 'di yin te/de la re zhig snga ma bzhin du bzlas brjod yan lag bzhi la sogs pa thams cad mngon du byas la rang gi lha'i sku bdag dang gnyis su med pa'i kha dog dang dbyibs la sogs pa'i ngo bo nyid kun du brtags par snang ba la rdul phra rab tu rnam par gzhag par brtags pa'am gzod ma nas ma skyes shing skye ba med pa'i rigs pa'am/de bzhin du rang gi sems kha nang du bltas par bya ba'i sbyor ba'i sgo nas srog slar sdud pa'i rigs pa'am/ der snang ba yid la mi byed pa'i sgo nas kyang rung ste/ ji ltar rtogs pa bzhin sems rang rig pa tsam rang gi lha'i gzugs kyi sku dang bral ba snang ba med pa mngon du bya ste/ci rigs par rang gi yid la rig sngags bzlas brjod bya'o zhes bya ba yin no/ /de bstan pa'i phyir/ yid kyi 'jig rten 'das zhes bya/ /slar sdud la sogs rnam par spangs/ /lha dang gcig tu sbyor ba dang //tha dad ma yin 'jig pa'o/ /yid kyi rang bzhin dbyer med bya/ /gzhan du bya ba ma yin no/ /zhes bya ba gsungs te/ 'di ni sgrub pa po rnams kyis sngon du bsnyen pa'i tshe gsang sngags mnyes par bya ba'i phyir sbyor ba'i spyod pa bshad pa yin no/ /da ni sngar bsnyen pa byas zin pa'i gsang sngags kyi dngos grub sgrub pa'i spyod pa'i sbyor ba brjod par bya ste/de yang phyi dang nang gi bye brag gis rnam pa gnyis so/ /de la phyi'i ni gsang sngags kyi dngos grub thams cad sgrub pa'i dkyil 'khor 'di yin te/ 'di ltar ji skad du gsang sngags sgrub pa'i dkyil 'khor gyi mtshan nyid/kun du gru bzhi lham pa ste/ /sgo gcig pa la mu rang can/ /thams cad kha dog ser po yi/ /rdo rje dkyil 'khor mchog bris nas/ /rdo rje phan tshun 'brel bya ba/ /zhes bya ba la sogs pa gsungs pa 'di yin te/ dkyil 'khor gyi mtshan nyid rgyas par gsungs nas/ de ni bsrung byas der 'dug ste/ /sbyangs pa'i rdzas ni blangs nas su/ /nang gi bdag nyid rnam dag pas/ /mtshan gcig thal byung bzlas brjod bya/ /der ni nam gyi phyed dus sam/ /yang na nyi ma 'char ba'i tshe/ /rdzas de yongs su gyur pa ni/ /'bar phreng can gyi gzi brjid bzhin/ /zhes bya ba la sogs pa rgyas par gsungs so//de lta bas na 'di ni phyi'i dngos grub ral gri la sogs pa'i mtshan nyid rnams bsgrub pa'i phyir phyi'i sgrub pa'i dkyil 'khor dngos su bshad pa yin no/ /nang gi dkyil 'khor ni me dang rlung dang chu dang sa'i mtshan nyid yin te/ de dag goms par byas pas nang gi dngos grub sems kyi dbang tsam la rag las pa mngon par shes pa la sogs pa'i mtshan nyid dag kho na sgrub par byed do//nang gi dngos grub de dag gi mtshan nyid kyang 'di las dpa' bo chen po'i rim par phye ba dang yi ge brgya pa rim par phye ba bstan pa las dngos su bstan par khong du chud par bya'o//de bzhin du 'di las nang gi dngos grub rnams 'grub par bya ba'i phyir mtshan nyid ma med pa'i ting nge 'dzin gyi dbang thob pa gzhan yang gsungs pa nyid do/ /gang tshe mtshan ma med pa'i sa/ /ting 'dzin ji lta bzhin reg pa/ /de tshe sngags pas dngos grub ni/ /yid las yang dag 'byung ba thob//ces gsungs so/ /'dir dngos grub yid las yang dag par 'byung bar bstan pa ni/ dngos grub thams cad rnam par dbye ba las brjod pa yin te/ 'di lta ste/ byang chub sems thob gang yin des/ /dngos grub de las gzhan ci dgos/ / de las gzhan du'ang dngos grub ni/ /rnam pa dag ni lngar 'dod de/ /spyod pa'i rjes su 'jug pa dang / /de bzhin sa ni gnon pa dang / /'jig rten mngon shes lngar 'dod dang / /sangs rgyas nyid dang gang gzhan no/ /zhes gang gsungs pa yin no/ /de lta bas na phyi dang nang gi 'jug pa'i spyod pa'i dkyil 'khor du 'jug pa dang /byang chub kyi sems goms pa dang / sems spyod pa la sogs pa'i mtshan nyid bshad pa 'di ni sbyor ba'i spyod pa bzlas brjod yan lag bzhi pa la sogs pa'i mtshan nyid la 'jug par 'gyur ba yin no/ /de la sbyor ba'i bzlas brjod yan lag bzhi pa la sogs pa'i mtshan nyid ni 'di yin te/'di lta ste re zhig dang por rim pa gang yang rung bas bzlas brjod kyi sbyor ba dmigs pa dang bcas pa dang / dmigs pa med pa'i bdag nyid kyi sgo nas ji srid du sngags kyi sngon du bsnyen pa bzlas brjod ji skad bshad pa yongs su rdzogs pa de srid du bzlas brjod bya'o zhes bya ba yin no//gsang sngags kyi bsnyen pa'i bzlas brjod kyang rgyud 'di las rnam pa gsum du nges par gsungs te/ 'di lta ste/ grangs dang dus nges pa dang mtshan ma byung ba'o/ /de la byang chub kyi sems legs par goms pa ci rigs par kun rdzob dang don dam pa'i bden pa'i lha'i ngo bo nyid kyi dang du byas pa la ni spyir gsang sngags thams cad dang khyad par du de bzhin gshegs pa'i snying po bzhi rnams las gang yang rung ba'i sngon du bsnyen pa'i dus snga ma dang por grangs kyi bsnyen pa bzlas brjod 'bum bya ba/sngon du 'gro ba'i bzlas brjod zla ba gnyis su nges par bya ba nyid du gsungs pa yin no//dpa' bo chen po'i yi ge rnams kyi sngon du bsnyen pa ni/ sgrub pa po bdag gi de kho na nyid kyi mtshan nyid ngang du byas pa'i rnal 'byor gyi gzhi can la bzlas brjod kyi grangs so sor yongs su chad pa med pa kho nar gsungs so/ /de la re zhig bcom ldan 'das kyis 'di las gzhung 'dis gsang sngags thams cad kyi spyi'i bsnyen pa'i bzlas brjod nges pa'i mtshan nyid bshad de/yi ge dang ni yi ger sbyar/ /de bzhin gzhi las gzhir gyur pa/ /shin tu bsdams pas yid la ni/ /bzlas brjod 'bum phrag gcig bya'o//zhes bya ba rgyas par gsungs nas yang / de nas sngags pas zla gcig tu/ /shin tu bsdams te bzlas brjod bya/ /gsang sngags sngon du spyad pa ni/ /gzhi gcig nas ni gcig tu 'jug /grags chen sangs rgyas thams cad kyis/ /sngar spyad pa zhes bshad pa yin/ / de phyin chad ni gang cung zad/ /me tog spos la sogs pa 'bul/ /sangs rgyas nyid du 'gyur bya'i phyir/ /de tshe byang chub tu yang bsngo/ /sngags pas 'jigs med de lta bus/ /zla ba gnyis la bzlas brjod bya'o/ /de nas zla ba nya ba'i tshe/ /mi de sgrub pa la 'jug bya/ /zhes bya ba la sogs pa gang gsungs pa yin no//de bzhin du khyad par dus na de bzhin gshegs pa'i snying po bzhi po dag gi sngon du bsnyen pa gzhung 'dis nges par bshad pa nyid de/ de nas snying po de dag nyid las gang yang rung ba cig bzung ste/ the tshom med par gyur gyi bar du gzhi bsgrub par bya'o zhes bya ba rgyas par gsungs nas/de la sgra gnas par bsam zhing / mnyam par gzhag pas bzlas brjod bya'o/ /de nas sngon du bsnyen pa ni 'bum phrag gcig tu bya bar bshad de/ de nas zla ba gnyis pa la/ /me tog dri la sogs pa 'bul/ /sems can rnam pa mang po yi//phan pa nye bar sgrub byed cing / /rnyed dang ma rnyed rnam spangs te/ /zla ba gzhan las bzlas brjod bya/ /de la de ru sbyor ba 'di/ /mnyam par gzhag par bsam par bya'o/ /bdag gi bsod nams mthu yis su/ /sems can thams cad bde gyur cig /thams cad nad kyang med gyur cig /yang na de bzhin gshegs bsngags pa'i/ /'dod pa phun sum tshogs gyur cig /ces bya ba la sogs pa rgyud 'di las/ sems can la phan par bsngags pa'i sbyor ba rgyas par bstan pa'i bar du yin no/ /de bas na 'di ni de bzhin gshegs pa'i snying po bzhi sngon du bsnyen pa nges pa'i bzlas brjod kyi sbyor bas kun nas bslang ba spyir mdor yang dag par bsdus pa yin no//rgyas par na rgyud 'di nyid las nges par gzung bar bya'o/ /de bzhin du nang gi rnal 'byor yan lag bzhi pa byas pa las/ bzlas brjod med kyang khyad par du snying po a zhes bya ba las bsam pa'i sbyor bas kun nas bslang ba'i tshe brtan par byed pa dang /dug [(]sal [,]sel [)]ba 'di gsungs pa nyid de/ 'on te srog gzung bar 'dod na a zhes bya ba srog dang lhan cig tu byas la dus gsum du bsam par byas na yun ring du gnas par 'gyur ro/ /de nyid kyi steng du klad kor bzhag na gnas pa dang /'gro ba'i dug thams cad sel to zhes gang gsungs pa yin no/ /bsam pa'i sbyor ba'i sgo nas snying po a zhes bya ba'i dbang du bya ba'i sbyor ba 'di yang gsungs te/ de nas gzi can dbang du bya bar 'dod na/ a zhes bya ba bdag tu 'dod pa las de bzhin mi dbang ngo //gcig la pad+ma gzhag par bya/ /gzhan la yang ni dung bzhag ste/ /gcig la gcig ni gdong bltas na/ /de yi mod la dbang du 'gyur/ /zhes bya ba la sogs pa gsungs pa yin no/ /'di'i don ni bdag nyid rnam par snang mdzad kyi sku kha dog dmar por bsgoms te/ de'i lce la pad+ma dmar po kho na bsams la/bsgrub par bya ba yi ge ba zhes bya bas rdo rje sems dpa'i sku kha dog dmar por bsams te/ de'i lce la yang dung kha dog dmar po kho na bsams nas/ phan tshun gdong du bltas na dbang gi sbyor ba yin no/ /de lta bas na de lta bu ni de bzhin gshegs pa'i snying po bzhi po dag gi sngon du bsnyen pa'i bzlas brjod nges pa dang /bsam pa la goms pa'i las kyi sbyor ba nges par bshad pa yin no/ /'di las bzlas brjod kyis kun nas bslang ba'i dngos grub kyi ched du/ dpa' bo snying po chen po'i yi ge sgrub par byed pa rnams kyi sngon du bsnyen pa rnal 'byor gyi gnas sgrub pa sngon du 'gro ba can gyi bzlas brjod kyi grangs nges pa yang bstan la/bsams pas kun nas bslang ba'i las rnams 'grub par bya ba'i phyir snying po de dag nyid kyis bzlas brjod kyi sbyor ba dang / de bsgoms pas kun nas bslang ba'i dngos grub rnams kyi sbyor ba yang bstan to zhes bya bar shes par bya'o//de la rnal 'byor gyi gnas kyi mtshan nyid ni/ 'di las/ a ni mchog tu shes bya ba/ /dbang chen dkyil 'khor ldan pa ste/ /phyi rol dang ni nang du yang / /rdo rje dkyil 'khor shes par bya/ /der 'dug nas ni thams cad bsam/ /rnal 'byor gnas zhes bshad pa yin//zhes gsungs pa 'di yin no/ /bcom ldan 'das dbang chen gyi sku 'di las/ gser gyi kha dog 'bar dang bcas/ /thor tshugs dbu rgyan 'chang ba yi/ /rdzogs pa'i sangs rgyas ting nge 'dzin bzhugs/ /dbang chen gyi ni gzhi zhes bya/ /zhes gsungs pa yin no/ /de ltar na rnal 'byor gyi gnas bsgrub ste/rnal 'byor gyi gnas de la dpa' bo chen po snying po yi ge rnams gang yang rung ba zhig bkod nas/ rang dang gzhan gyi don phun sum tshogs pa 'grub par bya ba'i phyir ci rigs par 'di lta ste/ bsam pa'i rgyud las 'grub pa'i sbyor ba dang / zla pa'i sngon du bsnyen pa'i bzlas brjod sgrub pa'i dngos grub kyi sbyor ba dang /yi ge de dag nyid bsgoms pas shin tu goms pa las byung ba'i dngos grub 'grub pa'i sbyor ba dang / rnam pa gsum gyis rnal 'byor du bya'o/ /re zhig snying po a zhes bya bar sngar bshad pa rdzogs pa'i sangs rgyas kyi mtshan nyid can rnal 'byor gyi gnas dbang chen gyi dkyil 'khor la bsams pa'i sems pa'i sbyor ba'i sgo nas sems can thams cad 'gugs pa'i las dang /dug dang rims nad 'byin par byed pa'i las ston te/ a ni mchog tu shes bya ba/ /dbang chen dkyil 'khor ldan pa ste/ phyi rol dang ni nang du yang / /rdo rje dkyil 'khor shes par bya/ /der 'dug pas ni thams cad bsam/ /rnal 'byor gnas zhes bshad pa yin/ /a ni srog gi dam pa ste/ /'gugs par byed pa'i mchog tu bshad/ /nam zhig klad kor gyis mnan na/ /lus can kun gyis sel bar 'gyur//zhes gsungs pa yin no/ /de bzhin du de la gnas pa'i snying po a zhes bya ba nyid goms pas zla bar sngon du bsnyen pa'i bzlas brjod sgrub pa dus gsum du byas pa'i sgo nas rgyas pa'i las dag dang pad+ma dang rdo rje la sogs pa'i dngos grub dag bsgrub par bya ste/ sngags pas nam zhig zla gcig tu//rdo rje can gyi rgya bcings nas/ /dus gsum bzlas brjod byas na ni/ /mi shes grong khyer 'jug par 'gyur/ /lha dang lha min rnams kyis kyang / /mi phyed shin tu brtan par 'gyur/ /bdag gi rnyed pa grub bya'i phyir/ /rgyas pa'i las ni gang cung zad/ /de kun rtag tu sngags pa yis//dkyil 'khor gyi ni dbus su bya/ /zhes bya ba dang / rdo rje pad+ma ral gri dang / /de bzhin ngang par bshad pa dang / /gser dag dang ni sa dag dang / /yang na yid bzhin nor bu'ang rung / /de la sogs pa'i rdzas rnams ni/ /dbang chen du ni bsgoms te bsgrub/ /ces gang gsungs pa yin no//dbang chen du bsgoms te zhes bya ba ni/ dbang chen gyi gzhi la gnas te zhes dgongs pa yin no/ /de'i mtshan nyid ni gong du/ gser gyi kha dog 'bar dang bcas/ /thor tshugs dbu rgyan 'chang ba yi/ /rdzogs pa'i sangs rgyas ting 'dzin bzhugs/ /dbang chen gyi ni gzhi zhes bya//zhes gsungs pa yin no/ /de lta bas na sngar bshad pa'i cho gas snying po a zhes bya ba zla bar bzlas brjod byas pa'i dngos grub yin par blta bar bya'o/ /rnal 'byor pa dbang chen gyi gzhi la gnas pa nyid bsams pa tsam gyis dmag la sogs pa sems can thams cad gnon par bstan pa'i phyir/mnan pa dag kyang bshad par byas/ /'di ni khyed kyis mnyam bzhag nyon/ /sngags pas mdor na ri rab ni/ /rtse mo brgyad pa bsam par bya/ /de yi steng du pad+ma gzhag /de yi rjes la rdo rje'o/ /de steng rnal 'byor pa yis ni/ /yi ge dam pa gtso bo ste/ /de yi spyi bor mnan na ni//de ni mi g.yo gnas par 'gyur/ /zhes bya ba gsungs te/ 'di'i don ni mnan par bya ba'i steng du ri rab bsams la de'i steng du pad+ma dbang chen gyi dkyil 'khor la gnas par bsam zhing / de la rdo rje rtse mo brgyad pa bsam ste/ de la bcom ldan 'das dbang chen gyi kha dog can ting nge 'dzin la snyoms par zhugs pa kho nas ji srid de legs par snang ba kho na gyur pa de srid du bsam par bya'o zhes bya bya yin no//de bzhin du rnal 'byor pa dbang chen gyi gzhi can dag gis bdag dang gzhan dag gi nad zhi bar bya ba'i phyir/ nad kyi gnyen po dang 'tsham pa'i sman la lan brgyar bzlas brjod byas nas btung bar bya ste/sman la yang ni lan brgya ru/ /bzlas brjod byas te mis 'thungs na/ /sngon gyi las las byung pa yi/ /de yi nad rnams 'byang bar 'gyur/ /zhes gang gsungs pa yin no/ /snying po a zhes bya ba'i las dang dngos grub dag bshad zin to// //bam po drug pa/bzhes bya ba'i las kyang brjod par bya ste/ de la sngar bshad pa'i rnal 'byor gyi gnas bdag dang gnyis su med par gyur pa'i lte ba'i dkyil du pad+ma dkar po rdo rje'i dkyil 'khor la gnas pa rnam par bsams la/ de la yang chu'i dkyil 'khor bsam zhing de'i steng du ba zhes bya ba 'od zla ba lta bu dbyibs bum pa dang 'dra ba bsams nas/de las chu bo bdud rtsi'i chur 'bab pa dgu mthong ste/ de dag gis ba zhes bya ba'i bum pa bskor nas bum pa'i ngos nas phyi rol du 'byung bar bsam mo/ /smugs pa'i zil pa'i tshogs kyis 'khor bar yang bsam zhing / snga ma bzhin du snying po ba zhes bya ba zla bar bzlas brjod bya'o//de nas mar gsar dang 'o ma la sogs pa'i dngos grub rnams bsgrub par bya ste/ de nas gzhan yang nges pa yis/ /ba zhes bya ba dam pa nyon/ /gdangs dang 'o ma dang 'dra ba/ /lte ba'i dbus na byung ba ste/ /pad+ma dkar po dam pa ni/ /de yi dbus na rab tu gnas/ /mgon po dam pa rab tu zhi//ston ka'i zla ba'i 'od dang 'dra/ /de yi dkyil 'khor ngo mtshar can/ /rdzogs pa'i sangs rgyas rnams kyis bshad/ /kun du dkar po bsam par bya/ /khyud skor rim pa dgus kyang bskor/ /gdung ba thams cad zhi byed pa/ /smugs zil 'dus pa'i nang na gnas/ /'o ma mu tig phreng dkar dang //shel dang zla ba'i 'od 'dra ba/ /chu rgyun rnams kyis khor yug tu/ /kun nas rab tu 'bab pa bzhin/ /sngags pas yid la bsams na ni/ /gdung ba kun las thar bar 'gyur/ /mnyam par gzhag pas dngos 'di rnams/ /dkyil 'khor 'dir ni bsgrub par bya/ / mar gsar 'o ma mu tig phreng / /de bzhin khyu mchog shel yang rung / /zho'am yang na chu yang rung / /de la sogs pa'i rdzas rnams ni/ /dngos grub sna tshogs grub phyir bsgrub/ /ces gang gsungs pa yin no/ /dngos grub 'di dag gi 'bras bu bstan pa'i phyir/ /tshe ni ring bar gyur pa dang //gzugs ni ngo mtshar che gyur dang / /nad rnams kun las thar ba dang / /skal ba bzang po'i mchog gyur dang / /yid rno 'dzin par nus pa dang / /shes rab shin tu dri med pa/ /sgrub pa'i rdzas ni 'di rnams kyis/ /de dag thams cad myur du 'grub/ /dkyil 'khor dpal dang ldan pa 'di//zhi bar byed pa bshad pa yin/ /zhes gsungs so/ /ba zhes bya ba 'di nyid dkyil 'khor de lta bu la gnas shing klad kor dang ldan pa bya ste/ bsgrub par bya ba'i lte ba'i thad kar bsams na rims nad dang dug la sogs pa sel bar byed de/ klad kor 'khor dang bcas byas nas//sel bar byed pa'i mchog tu 'gyur/ /zhes gang gsungs pa yin te/ 'dir ba zhes bya ba'i klad kor yang kha dog sprin dkar po lta bu las char 'bab par bsam par bya'o/ /ba zhes bya ba'i las dang dngos grub bshad zin to/ /de bzhin du ra zhes bya ba'i rang gi dkyil 'khor la gnas pa sngar bshad pa'i rnal 'byor gyi gnas bdag dang gnyis su med par gyur pa'i brang gi thad kar bkod pa de'i sgra'i de kho na nyid sems pa sngon du 'gro ba'i bzlas brjod 'bum byas pa'i dngos grub dang las bstan pa'i phyir/ra zhes bya ba yang dag mchog /'od can rnams kyi 'od ces bya//'dis ni las rnams gang cung zad/ /mtshams med lnga las byung ba yang / /rnal 'byor shin tu mnyam gzhag nas/ /bsams na de kun zad par 'gyur/ /yid 'ong thams cad rab tu dmar/ /gru gsum pa yi tshul du gnas/ /zhi ba 'bar ba'i phreng bas 'khrigs/ /sum mdo ris dang snying gar gzhag /rnal 'byor pa ni der 'dug nas/ /ra ni klad kor bcas par bsam/ /mi 'jigs pas ni ci rigs par/ /dngos po 'di rnams der bsgrub bo/ /nyi ma dang ni gza' kun dang / /de bzhin bsgrims te me dang ni/ /dbang du bya ba'i rdzas rnams dang / /yang ni 'khor bar 'gyur ba dang //skam pa dang ni gsad pa dang / /de bzhin bkar dang gnod pa dag /me dang lhan cig 'di sbyar na/ /de dag thams cad med par 'gyur/ /zhes bya ba gsungs so/ /de bzhin du de ltar rnal 'byor gyi gnas bdag dang gnyis su med par gyur pa'i smin mtshams su hUM zhes bya ba rlung gi dkyil 'khor la gnas pa rnam par bsams la de'i sgra'i de kho na nyid sngon du 'gro ba'i bzlas brjod zla bar rim gyis dus gsum du bya zhing /de nas nam mkha' la 'gro ba la sogs pa'i dngos grub rnams bsgrub par bya ste/ ha zhes bya ba dam pa mchog /rlung ni thams cad yang dag 'byung / / zhes gang gsungs pa yin te/ 'di ni rlung gi ting nge 'dzin gyi rgyu'i mtshan nyid par bstan to/ /rgyu dang las dang 'bras bu dang / /gang gi sa bon rnams skye ba/ /'dir ni klad kor bcas sbyar na/ /de dag thams cad 'jigs par byed/ /ces bya ba 'dis kyang 'di la sgra'i de kho na nyid rjod par byed par don dam pa'i ting nge 'dzin la zhugs pa'i mtshan nyid can yin par bstan to//de yi gzugs kyang bshad pa ni/ /kha dog gnag la 'od po che/ /mi zad 'bar ba'i phreng bas 'khrigs/ /zhes bya ba ni 'di'i gzugs rlung gi ngo bo nyid de gang par bshad pa yin no/ /mkhas pas smin ma'i mtshams su ni//dkyil 'khor la ni gnas par bsam/ /zhes bya ba'i rlung gi dkyil 'khor la ni gnas pa 'di smin ma'i mtshams su gzhag par brjod par bya ba yin no/ /rlung gi dkyil 'khor gyi mtshan nyi bstan pa'i phyir/ de ni mthing ga zla ga ma 'dra/ /tog dang bcas pa ba dan g.yo//yi ge rab tu mi 'gyur ba/ /sngags pas der gnas bsam par bya/ /zhes gsungs so/ /de ltar bsgom shing zla bar bzlas brjod byas pa'i dngos grub mngon par mtho ba bstan pa'i phyir/ gang zhig mthong ba nyid la ni/ /sems can rnams kyi don bya ba'i/ /dngos grub rnams ni de tshe sgrub//mkha' la 'gro ba nyid dang ni/ /yang na rdzu 'phrul rkang pa dang / /lha yi mig dang rna ba dang / /sngags pas de bzhin thob pa dang / /mi snang ba la sogs kun dang / /dbye ba dag kyang gang gsungs pa/ /sngags pas mnyam par gzhag pa yis/ /dkyil 'khor gnas na de kun byed//ces gsungs so/ /'di sgra'i de kho na nyid rgyu mi dmigs pa'i mtshan nyid sems pa'i sgo nas bdud bzhi 'joms pa'i rgyu yin pas/ nges par legs pa'i go 'phang thob pa'i mtshan nyid kyi dngos grub kyi rgyu nyid yin par bstan pa'i phyir/ 'dis ni byang chub snying po 'dir/ / byang chub sems dpa' grags chen rnams/ /rgyu kun dmigs su med pas na/ /bdud las rnam par rgyal bar byed/ /ces gsungs so/ /da ni ral gri'i phyag rgya bcings nas rnal 'byor gyi gnas bdag dang gnyis su med par gyur pa'i ji ltar nges par bsams pa la sogs pa'i dngos po thams cad stong pa nyid du mos pa'i sgo nas/khaM zhes bya ba zla bar bzlas brjod byas pa ral gri dang 'khor lo la sogs pa'i dngos grub kyi rgyu nyid yin par bstan te/ rgyu med pa na 'bras bu'ang med/ /las kyang yod pa ma yin te/ /dngos po de gsum med pas na/ / stong pa'i ye shes thob par 'gyur/ /rdzogs pa'i sangs rgyas mthu chen gyis/ /de yi gzugs kyang bshad pa yin/ /klad kor bcas par ldan pa ste/ /khaM ni stong pa'i mchog ces bya/ /zhes gsungs pa yin te/ 'dis ni khaM zhes bya ba chos thams cad stong pa'i ting nge 'dzin rjod par byed pa nyid yin pa dang stong pa nyid kyi ting nge 'dzin yang khaM zhes bya ba'i gzugs su byin gyis rlob pa yin par bstan par rig par bya'o//ral gri phyag rgyar ldan pa yis/ /bsgrub par bya ba nges par sgrub/ /ces bya ba 'dis ni zla bar sngon du bsnyen pa'i cho ga kun du bstan to zhes bya bar khong du chud par bya'o//zla bar sngon du bsten pa'i dngos grub bstan pa'i phyir/ ral gri zhags pa 'khor lo dang / /lcags mda' de bzhin thob ste/ /rdzas de rnams dang ldan na ni/ /go 'phang dam pa sgrub par byed/ /ces gsungs pa yin te/ 'di dag ni rnal 'byor gyi gnas ji skad bshad pa la mos pa bstan pa sngon du 'gro ba'i yi ge re re sems pa dang /de bzhin du bzlas brjod byed pa'i sgo nas/ dpa' bo chen po'i snying po yi ge lnga'i dngos grub dag yin par bshad do/ /da ni mnyam par gzhag pa'i gnas skabs kyi rnal 'byor pa rnam par g.yeng ba bsal ba'i sgom pa shin tu goms pas/rnal 'byor gyi gnas bdag dang gnyis su med par gyur ba/ ji ltar mos pa bzhin snang ba brtan pa'i yi ge 'di dag gis bsgom pa goms pa 'grub pa las rab tu 'byung ba dang rdzu 'phrul cho 'phrul la sogs pa'i dngos grub dag bstan pa'i phyir/ gsang ba'i bdag po byang chub sems dpa' gsang sngags kyi sgo nas/byang chub sems dpa'i spyad pa spyod pas/ bdag nyid a zhes bya ba'i rang gi ngo bor bsgyur nas/ phyi dang nang du bcas pa'i dngos po thams cad la mi lta bar gyur cing / bong ba dang rdo ba dang gser du mtshungs la/ 'dod chags dang zhe sdang la sogs pa'i nyes pa rnams dang sdig pa'i las rnam par spangs pa/de tshe de ni dag gyur pa/ /thub pa rdzogs pa'i sangs rgyas bzhin/ /des ni las rnams thams cad nus/ /nyes pa thams cad rnam par spangs/ /zhes gsungs so/ /'dir phyi nang du bcas pa'i dngos po thams cad la mi lta bar gyur zhes bya ba'i dgongs pa ni/rnal 'byor pas rnal 'byor gyi gnas ji skad du bshad pa ji srid du mnyam par gzhag pa'i gnas skabs na/ de'i rnam pa yid la snang ba kho nar gyur pa de srid du goms par byas nas phyi dang nang gi bdag nyid kyi gzugs la sogs par snang ba nyon mongs pa can dang /nyon mongs pa can ma yin pa la mi blta'o snyam pa 'di yin no/ /de ltar na rnal 'byor pa mnyam par gzhag pa'i gnas skabs su/ rnal 'byor gyi bdag nyid la yod pa'i snang ba'i yid grub pa'i phyir khyad par du ci rigs par yang a zhes bya ba la sogs pa dpa' bo chen po ting nge 'dzin byin gyis rlob par gyur pa 'di dag gis lam bsgoms pa dang /bzlas brjod goms pa las byung ba gzhan dag kyang bshad/ de nas gzhan sngags rnal 'byor la/ /gzhol zhing cho ga shes pa yis/ /sems can rnams la phan 'dod pas/ /ba zhes bya ba'i las bya'o/ /snying rjer gyur pa'i sems kyis su//'jig rten sdug bsngal la dmigs nas/ /mgon po de yi bdag nyid kyi/ /lus ni thams cad nyid du yang / /gangs dang ba yi 'o ma ltar/ /dkar ba'i rgyun gyi yongs su dgang / /de tshe nges pa bskyed nas su/ /yan lag rnams ni thams cad kyi/ /ba spu'i bu ga kun nas kyang //shin tu dri med chu rgyun 'byung / /chu yis sa ni ma lus pa/ /'di dag yongs su dgang bar bya/ /gang gis chu de 'thungs pa'am/ /lag pas kyang ni reg kyang rung / /de kun nges par byang chub tu/ /'gyur te 'di la thogs pa med/ /ces gang gsungs pa yin no/ /'di la dgos pa ni sngar bshad pa'i chu'i dkyil 'khor gyi rnal 'byor thams cad mngon du byas la/de las byung ba'i rgyun gyis rang gi lus thams cad yongs su gang bar byas nas/ ba spu'i khung bu dag nas chu'i rgyun phyung ste/ srid pa'i rtse mo'i bar mtha' dag kun dag par bya'o snyam pa 'di yin no//de bzhin du ra zhes bya ba'i las kyang bstan pa'i phyir/ yan lag kun du ra zhes pa/ /'bar ba'i phreng ba zhi bas 'khrigs/ /kun du rnam par 'phro ba ni/ /shin tu mnyam par gzhag pas bsam/ /de tshe rnal 'byor pa yis phyir/ /'bar ba kun du snang byed pa/ / btang na ra yi rnam sprul pas/ /sngags pas 'dod pa bzhin du byed/ /ces gsungs pa 'di'i don ni/ rnal 'byor gyi gnas can gyi gang gi gnas su ra zhes bya ba me'i dkyil 'khor la gnas pa rnam par bsams la/ de'i 'bar ba zhi bas rang gi lus kyi nang kun du bkang ste/ de na de dag phyi rol du phyung ste snang bar bya'o snyam pa 'di yin no//dpa' bo chen po'i snying po 'di dag gi las de la sogs pa bzlas brjod dang bsgoms pa las byung ba gzhan dang gzhan dag kyang dpa' bo chen po'i rim par phye ba'i rjes su 'brangs te rig par bya'o/ /dngos grub dang las 'di dag ni rnal 'byor pa'i rang gi sems kyi dbang la snang ba'i dbang dang /de bzhin gshegs pa'i byin gyi rlabs kyis grub par rig par bya'o/ /de la las dang dngos grub ji skad bshad pa 'di dag rang gi sems la snang ba'i dbang gis 'grub pa'i dbang du mdzad nas/ gsang ba'i bdag po dngos grub kyi go 'phang de lta bu la sogs pa dag ni yid las 'byung ba yin no//gsang ba'i bdag po rnam par bsams pa tsam kho nas/ dngos po gzugs can ma yin pa rnams kyi 'du byed rnam pa sna tshogs thams cad pa'i sa bon gyi bya ba tshig tu brjod pa tsam las byung ba la ltos zhes gsungs te/de la gzugs can ma yin pa rnams kyis zhes bya ba ni sems dang sems las byung ba rnams kyi'o/ /'du byed rnam pa tha dad pa sna tshogs rnams zhes bya ba ni/ dbang chen dang chu'i dkyil 'khor la sogs par snang ba'i mtshan nyid dag yin no/ /las thams cad kyi sa bon gyi bya ba'i tshig tu brjod pa tsam las zhes bya ba de la sa bon gyi bya ba ni dpa' bo chen po'i snying po ni sa bon rnams kyi bya ba'i rang gi dkyil 'khor bsam pa yin no//tshig tu brjod pa tsam las zhes bya ba ni/ snying po de dag nyid bzlas brjod kyi sbyor ba'i sgo nas shes bar bya dgos pa yin no/ / de bzhin du de bzhin gshegs pa'i byin gyi rlabs kyis kyang rnal 'byor pa 'di dag gis las dang dngos grub 'grub par rig par bya ste/ 'di ltar de bzhin gshegs pa ni sngon gyi smon lam gyi dbang gis lhun gyis grub pa kho nar gsang sngags kyi spyad pa spyod cing dngos grub kyi bya ba la zhugs pa rnams la/rtag tu rig sngags dang gsang sngags dang lha la sogs pa snang la/ sems can skal ba ji lta ba bzhin du yang dag par mgu bar mdzad par nye ba kho na yin no/ /de'i phyir de'i byin gyi rlabs dang / dam pa stsol ba'i dbang gis kyang dngos grub dang las rnams 'grub par khong du chud par bya ste/ji skad du/ gsang ba'i bdag po gzhan yang de bzhin gshegs pa ni thams cad dang rjes su mthun par sems can thams cad kyi bsam pa dang mthun pa dang / sems can thams cad yang dag par mgu bar mdzad pa ste/ byang chub sems dpa' las thams cad dang / gsang sngags spyad pa spyod pa rnams kyi mdun na gzugs brnyan lta bur bzhugs so/ /de bzhin gshegs pa de ni rnam par mi rtog cing yid kyi yul las yang dag par 'das pa/ dus dang yul dang bya ba dang / las dang chos dang chos ma yin pa rnam par spangs kyang / gsang sngags spyod pa las byung ba'i//thams cad mkhyen pa'i go 'phang stsol/ /de bas kun mkhyen dngos grub dang / /go 'phang mchog kyang bsgrub par bya/ /zhes gang gsungs pa lta bu yin no/ /gzhan yang rgyud 'di las rig sngags dang gsang sngags thams cad kyi spyod pa'i sbyor ba sngon du bsnyen pa'i cho ga phyi'i bzlas brjod yan lag bzhi pa la sogs pa sbyor ba'i sgo nas 'bum dang zla ba la sogs pa'i grangs su gsungs pa nas/de bzhin gshegs pa'i snying po bzhi sngon du bsnyen pa nang gi bzlas brjod yan lag bzhi pa la sogs pa'i thabs kyis 'bum dang zla bar so sor nges par bstan pa'i bar dang / de bzhin du dpa' bo chen po'i snying po'i yi ge rnams kyi sngon du bsnyen pa'i rnal 'byor gyi gnas ji skad bshad pa sgrub pa sngon du 'gro ba can zla ba la sogs pa so sor nges par bshad pa gang yin pa 'di thams cad ni sgrub pa po rgyud yongs su dag pa'i dbang du mdzad par mngon te/bcom ldan 'das kyis/gsang sngags grangs ni sum 'bum du/ /phal cher ngas ni bshad pa dag /lus can sdig dang bral ba yi/ /sngags pa rnam par dag pa la/ /bzlas brjod grangs 'di bstan pa las/ /gzhan du bya ba ma yin no/ /zhes gang gsungs pa yin no/ /'dir sgrub pa po yang 'di lta ste/mthong ba dang ma mthong ba'i tshe la las dge ba dang mi dge ba gsang sngags kyi dngos grub dang 'gal ba skyed pa'i bag chags med pa dang / de bzhin du sgrub pa po'i rgyud la las dge ba'i sa bon gsang sngags kyi dngos grub dang mthun pa 'das pa'i tshe rabs dang / 'das pa ma yin pa las byas pa snga nas yod pa dang /sgrub pa po'i 'jug pa'i spyod pa byang chub kyi sems goms pa la sogs pa phyi dang nang gi bdag nyid ji skad du bshad pa dag bslabs pa nyid kyi yon tan dang ldan pa dang / rnam pa gsum gyis dag pa yin par mngon no/ /rgyud 'di gsum dang ldan pa'i sgrub pa po ni/rgyu gsum gyis ji ltar 'dod pa'i dngos grub 'byung bar mngon te/ 'di lta ste/ dus dpag tu med pa'i bzlas brjod dang / bsam gtan la sogs pa ji ltar 'dod pa'i dngos grub dang mthun pa'i mtshan ma byung ba dang / de bzhin du ji ltar 'dod pa'i dngos grub dang 'gal pa'i las dge ba dang mi dge ba'i bag chags kyi rnam par smin pa myong ba dang /chos thams cad gzod ma nas ma skyes shing skye ba med pa'i mtshan nyid du chos thams cad kyi de bzhin nyid goms pas mtshan ma med pa'i ting nge 'dzin la reg pa'o/ /mtshan ma med pa'i ting nge 'dzin la sogs pa'i sgo nas dngos su mi mngon par shes pa la sogs pa yid las byung ba'i dngos grub rnams 'byung ba kho nar bshad de/de tshe sngags pas dngos grub ni/ /yid las yang dag 'byung ba thob/ /ces gang gsungs pa yin no/ /mtshan ma med pa'i ting nge 'dzin goms pa'i sgo nas ni mtshan ma dang bcas pa'i dngos grub kyang bstan te/mtshan ma med pas ni mtshan ma dang bcas pa'i dngos grub kyang 'byung bar 'gyur ro zhes gang gsungs pa yin no/ /de bzhin du gsang sngags mnyes par byed pa'i las dge ba bsam gtan dang / sbyin sreg la sogs pas kun nas bslang ba'i dngos grub 'thob pa'i dus nges pa yang bstan to//de la gsang sngags mnyes par byed pa'i las dge ba kha cig gi 'bras bu ni srid pa gzhan du mngon par 'grub pa nyid do/ /kha cig ni bsam pa dang sbyor ba'i dbang gis tshe 'di nyid la rnam par smin par 'gyur te/ de bstan pa'i phyir/ rgyud las rgyud du gyur pa yi//las ni ji srid ma nyams shing / /rnam smin rnam par ma smin te/ /dngos grub dag ni dus su 'dod/ /ces gsungs so/ /'dir rgyud las zhes bya ba ni/ gsang sngags mnyes par byed pas las dge ba sgrub pa'i skyes bu'i sems kyi rgyud las zhes bya bar dgongs pa yin no/ /rgyud du gyur pa zhes bya ba ni rig sngags 'chang ba la sogs pa'i dngos grub kyi khyad par gyi rgyur gyur pa'i rgyud do//dus ji srid cig ci zhig de'i ci zhig snyam pa la/ las ni ji srid ma nyams shing / /zhes bya ba gsungs te/ ji srid ces bya ba ni dus so/ /las zhes bya ba ni gsang sngags mnyes par byed pa'i las de zhes bshad pa yin no//ma nyams shing zhes bya ba ni gsang sngags mnyes par byed pa'i las byas pa de tshe rabs brgyud pa dag tu yang 'bras bu rab tu 'byin pas zad par ma gyur na'o/ /las de'i 'bras bu yang nyams su myong bar ma gyur na zhes bya ba bstan pa'i phyir/ rnam smin rnam par ma smin zhes bya ba gsungs so//dus 'di gnyis su dngos grub dag tu 'gyur ro zhes bstan pa'i phyir te/ dngos grub dag ni dus su 'dod/ /ces bya ba gsungs so/ /des na dgongs pa ni bdag gang gi tshe gsang sngags mnyes bar byed pa'i las de'i rnam par smin pa tshe rabs brgyud pa dag tu yang nyams su myong bar ma gyur na/de'i tshe tshogs pa yod na de'i 'bras bu rab tu 'byin pa'i dus su 'gyur ro snyam pa 'di yin par shes par bya'o/ /tshe 'di'am tshe rabs gzhan du 'bras bu myong ba gang yin pa'i de'i 'bras bu ni de kho na yin par khong du chud par bya'o/ /mthong ba'i chos la mngon par gyur pa'i las kyi 'bras bu rab tu 'byin par gyur pa'i dus bstan pa'i phyir/mdor na gang tshe dus gcig tu/ /las dang skye ba 'phangs gyur pa/ /de tshe'ang sngags pas dngos grub ni/ /yid las yang dag 'byung ba 'thob/ /ces gsungs te/ des na dgongs pa ni gang gi tshe tshe rabs gang kho na la gsang sngags mnyes par byed pas las dge ba bsags par gyur pa'i tshe rabs kho na las kyi 'bras bu gsang sngags kyi dngos grub kyi mtshan nyid de sgrub pa po'i rgyud las 'byung bar 'gyur na/de'i tshe dus gcig kho nar las dang skye ba 'phangs par bya bar gyur to snyam pa 'di yin te/'di ni sgrub pa po rnams sngon du bsnyen pa byed pa'i tshe/ gsang sngags ma nyes par bya ba'i phyir sbyor ba'i spyod pa bshad pa yin no/ /da ni sngon du bsnyen pa byas zin pa'i gsang sngags kyi dngos grub 'grub pa'i spyod pa'i sbyor ba brjod par bya ste/ de yang phyi dang nang gi bye brag gis rnam pa gnyis so//de la phyi'i gsang sngags thams cad kyi dngos grub thams cad sgrub par byed pa'i dkyil 'khor gang yin pa ste/ ji skad du gsang sngags sgrub pa'i dkyil 'khor gyi mtshan nyid/ kun du gru bzhi lham pa ste/ /sgo gcig pa la mu ran can/ / thams cad kha dog ser po yis/ /rdo rje'i dkyil 'khor mchog bris nas/ /rdo rje sprel ba'i tshul gyis su/ /rdo rje phan tshun 'bral bar bya/ /zhes bya ba'i dkyil 'khor gyi mtshan nyid 'di rgyas par gsungs nas/ /de ni bsrung byas der 'dug ste/ /sbyangs pa'i rdzas ni blangs nas su/ /nang gi bdag nyid rnam dag pas//mtshan gcig thal byung bzlas brjod bya/ /der ni nam gyi phyed dus sam/ /yang na nyi ma 'chang ba'i tshe/ /rdzas de yongs su gyur pa ni/ /'bar phreng can gyi gzi brjid bzhi/ /zhes bya ba rgyas par gsungs pa yin no/ /de lta bas na phyi'i sgrub pa'i dkyil 'khor 'di ni phyi'i dngos grub ral gri la sogs pa'i mtshan nyid dag kho na bsgrub par bya ba'i phyir bshad pa yin no//nang gi dkyil 'khor ni me dang rlung dang chu dang sa'i mtshan nyid yin te/ de goms par byas nas nang gi dngos grub mngon par shes pa la sogs pa'i mtshan nyid sems kyi dbang tsam la rag las pa bdag sgrub par byed pa nyid do//nang gi dngos grub de dag gi mtshan nyid kyang 'di las dpa' bo chen po rim par phye ba dang yi ge brgya pa rim par phye ba bstan pa las dngos su bstan pa khong du chud par bya'o/ /de bzhin du 'di las nang gi dngos grub rnams kyi thabs kyi mtshan ma med pa'i ting nge 'dzin la dbang thob pa gzhan yang bstan te/ji skad du/ gang tshe mtshan ma med pa yi/ /ting 'dzin ji bzhin rigs pa'o/ /de tshe sngags pas dngos grub ni/ /yid las yang dag 'byung ba thob/ /ces gsungs pa lta bu yin no/ /de la dngos grub rnams kyi rnam par dbye ba bstan pa yang /'di las brjod de 'di lta ste/ /byang chub sems thob gang yin te/ /dngos grub de las gzhan ci dgos/ /de las gzhan du'ang dngos grub ni/ /rnam pa dag ni lngar 'dod do/ /spyod pa'i rjes su 'jug pa dang / /de bzhin sa ni gnon pa dang / /'jig rten mngon shes lngar 'dod dang //sangs rgyas nyid dang gang gzhan no/ /zhes ji skad du gsungs pa yin no/ /de ltar na rnam par snang mdzad mngon par rdzogs par byang chub pa rnam par sprul pa byin gyis rlob pa'i rgyud kyi ming kho nas yang dag par bstan pa'i don/ bcom ldan 'das rnam par snang mdzad kyi rgyu dang ngo bo nyid rjod par byed pa rnams dang /de bzhin du 'di nyid las byang chub kyi rnam par sprul pa byin gyis rlob pa yang dag par rjod par byed pa'i don rnam par spros pa rnams dang / de bzhin du 'di nyid las rnam par sprul pa byin gyis rlob pa gsang sngags dang rig sngags dang phyag rgya la sogs pa'i mtshan nyid bstan pa dang /de dag mnyes par byed pa'i thabs su gyur pa dang / 'jug pa'i spyod pa dang / de bzhin du sbyor ba dang / sgrub pa dang dngos grub dang spyod pa bzhi po bdag gis bsdus pa'i don kun nas bsdus te/ rgyud kyi tshig kun nas bsdus nas/ slob ma don rnam par spro bas go bas khong du chud par bya ba'i thabs bsdus pa'i don mdor bstan to zhes bya bar shes par bya'o//gdul ba'i tshig lhur len pa rnams ni/ rnam par snang mdzad mngon par rdzogs par byang chub pa rnam par sprul pa byin gyis rlob pa'i rgyud mtha' dag mnyan pa dang / bsams pa'i sgo nas don khong du chud par 'gyur bas bsdus pa'i don kun nas bsdus pa 'dir de dag la gdul ba'i tshig lhur len pa de dag gis khong du chud par bya ba'i phyir thabs rab tu bsgrags par byas pa ni ma yin no zhes bya bar rig par bya'o//rnam par snang mdzad mngon par rdzogs par byang chub pa'i rgyud kyi bsdus pa'i don/slob dpon shrI bud+d+ha gu h+yas mdzad pa rdzogs so// //rgya gar gyi mkhan po shI len+d+ra bo d+hi dang / zhu chen gyi lo tsA ba dge slong dpal brtsegs rak+Shi tas bsgyur cing zhus te gtan la phab pa'o/ /'di la sha lo ka ni nyis stong sum brgya yod do/