CLOSE WINDOW

D2626
བོད་ཡིག

@##/ /rgya gar skad du/ b+ha ga ba ti sarba du rga ti pa ri shod+ha ni te dzo rA dza ta thA ga tA ya ar+ha te samya k+saM bud+d+hA ya mahA ta n+d+ra rA dza byA khya sun+da rA a lang+kA ra nA ma/ bod skad du/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba gzi brjid kyi rgyal po'i rgyud kyi rgyal po chen po'i rnam par bshad pa mdzes pa'i rgyan zhes bya ba/bcom ldan 'das de bzhin gshegs pa dgra bcom pa yang dag par rdzogs pa'i sangs rgyas dpal phyag na rdo rje la phyag 'tshal lo/ /thugs ni rnam dag chos kyi dbyings nas mi bskyod kyang //sku ni rnam par longs spyod rin chen gzhal yas nas/ /thub pa'i 'od zer spros pas 'gro ba'i don sgrub sbyong / /bde gshegs 'khor los sgyur rgyal thabs la phyag 'tshal lo/ /rdo rje'i spyan can khyed ni rin chen bdag nyid 'dzin//dam chos dkar pos 'gro ba ma lus rnams kyi ni/ /las kyi sgrib sbyong sgrol mdzad mdzes pa'i bum pa can/ /shes rab pad+ma lta bu'i chos la phyag 'tshal lo/ / 'gro kun don la sems pas rgyal po ltar bzhugs shing / /pha dang ma ltar chags pas legs pa'i bzhin yang ston/ /rin chen rgyal mtshan btsugs pas nyi ma'i 'od zer khyab/ /bde ba dam pas bzhad pa rnams la phyag 'tshal lo//chos kyi ral gris srid pa'i 'khor lo gcod/ /sngags rnams gsung zhing 'gro ba'i las la brtson/ /dam tshig go bgos 'chi bdag mche ba gcod/ /phyag rnams bsdams par phyar la phyag 'tshal lo//'gro rnams yid 'phrog sgeg pas phreng thogs nas/ /snyan pa'i glu len bde ba'i yan lag bskyod/ /bung ba ltar gnag mun pa'i tshogs sel mdzad/ /ut+pal gzugs dri ldan la phyag 'tshal lo/ /thugs rje lcags kyus bdud kyi zhags 'phrog cing //rdo rje tho bas 'khor ba'i lcags sgrog gcod/ /gsung gi dril bus ma rig gnyid las ni/ /gang dag slong mdzad khyod la phyag 'tshal lo/ /dpa' bar 'gro la sogs pa'i ting 'dzin gyis//zhi las khro bo ngo mtshar dpe med ldan/ /rang sangs rgyas pas nyon mongs dgra bcom zhing / /bde ster bla ma gsum la phyag 'tshal nas/ /rgyal bas gsungs pa'i rin chen gter mdzod las/ /'gro kun snang med mun pas rab bsgribs pas//'dod pa'i dbang gis de nyid ma rnyed par/ /'khrul pa'i dbang gis dug sdong la sogs rnyed/ /longs spyad pa yis bde 'dod sdug bsngal rmongs/ /de rnams mar mes de sgo bstan pa'i phyir/ /rdo rje tshig gis mtshan pa'i zhal snga nas/ /'bad pas drin thob nus pa'i dbang gis brtsam/de la gang dag rgyal bas gsungs pa'i don/ /zab mo'i dgongs pa ji bzhin rtogs sam ci/ /de lta min na phal dang mtshungs pa yi/ /mun pas mun pa bsal bar 'gyur ram ci/ /mar mes mar me snang bar bya mi dgos/ /dang po'i tshig la de ltar rtog skye na//mkha' la sbrang bus mthar phyin mi nus kyang / /'bad pa'i dbang gis rang gi spyod yul bgrod/ /de bzhin rgyal ba'i dgongs pa rgya mtsho la/ /bdag blo dman pas ji bzhin mi nus kyang / /yid ches mtshan mas ji ltar nus rtsom pa/ /rnyed pa'i phyir min grags pa'i phyir ma yin//nga rgyal phyir min bkur sti'i phyir ma yin/ /'gro la phan phyir rgyal ba'i bka' las kyang / /snying po las kyang snying po'i mchog gyur pa/ /'gro kun rgyud sbyong rgyud rgyal 'grel 'di ni/ /rnal 'byor rgyud rnams bla ma dang / /bla med pha rol phyin gzhung dang / /gang 'dir gsungs pa'i gzhung gi don//yid bzhin nor bu rin chen gsum/ /shes rab rdo rjes legs phug nas/ /rig pa'i skud pa grims bkal bas/ /legs par brgyus pa mdzes pa'i rgyan/ /skyes bu gang gi lus la 'dogs/ /de ni rgyan mchog bla na med/ /'gro ba kun gyi gtso bor 'gyur//de la 'dir ni rgyud gsum dang / /rgyud gnyis dag ni rgyal bas gsungs/ /de rgyu de rkyen 'bras bur bcas/ /bsnyen bkur rim gro yan lag ldan/ /dpag bsam shing zhes grags pa yi/ /brtag pa yang dag bshad par bya/ /de la bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa/bde bar gshegs pa/ 'jig rten mkhyen pa/ skyes bu 'dul ba kha lo sgyur ba/ bla na med pa'i ston pa des dang po byang chub mchog tu sems bskyed pa'i gnas skabs na/ sems can thams cad mngon par rdzogs par 'tshang rgya bar bya'o zhes dam bca' ba'i tshig rgya chen po mdzad do//des mngon par rtogs pa las sems can thams cad la mos pa sna tshogs pa dang / dbang po rno rtul gyi tshul dang sbyar nas/ rnam par thar pa'i sgo bsam gyis mi khyab pa zhig gsungs te/ de la kha cig tu longs spyod rdzogs pa'i skus chos ston/kha cig tu sprul pa'i skus chos ston/ kha cig tu sprul pa'i sprul pas chos ston to/ /de la longs spyod rdzogs pa la rnam pa gnyis te/ theg pa thun mong ba dang theg pa khyad par can gyi tshul lo/ /theg pa thun mong ba'i tshul ni dga' ldan gyi gnas su bcom ldan 'das dpal rnam par snang mdzad kyis sa la gnas pa'i byang chub sems dpa' rnams dang /lha dang klu la sogs pa rnams la chos ston pa'o/ /theg pa khyad par can gyi tshul ni de bzhin gshegs pa thams cad kyi sku gsung thugs kyi gsang ba rdo rje'i btsun mo'i b+ha ga la bzhugs te/ bde mchog 'khor lo la sogs pa ston to//de la blo chung ba shes rab zhan pa kha cig ni/ /theg pa chen po gsang sngags zhes pa ni de bzhin gshegs pas gsungs pa ma yin zhing / gnod sbyin dang srin po la sogs pas bshad pa ste/ 'jig rten pa rnams bcom ldan 'das zhes pa la brten nas dpyod de de ltar gnod sbyin la sogs pa la yang 'jig rten na bcom ldan 'das zhes brjod pas na/de rgyal bas gsungs pa'i chos dang 'gal ba'i phyir chos ma yin no zhes pa dang / kha cig ni gnod sbyin la sogs pas kyang ma bshad la/ 'dod chags chen po'i lha gar gyi dbang phyug la sogs pas 'khrig pa'i chos la bsnyen bkur bya ba'i phyir bshad pa ste/de lta ma yin na de bzhin gshegs pa gcig gi zhal nas dam pa'i chos rin po che gsungs pa la chos nyid kyis gsungs pa dang 'gal ba ni thabs mi mkhas pa ste/ the tshom gyi dbang gis sems can grol bar mi 'gyur ba'i phyir dper na smyon pa'i tshig lta bu'o zhes 'dod na de dag ni mi dge ba'i bshes gnyen can du rig par bya ba dang /gzhan du gsang sngags 'ba' zhig la mngon par dpyad pa rnams rgyal ba'i bka' bzhin dag ni drang ba'i don gyi mdo sde yin la gsang sngags ni de bzhin gshegs pa'i bka' yang dag pa'i snying po bsgrub par bya'o zhes 'dod pa dang de dag la sogs pa phan tshun du 'khrul pa'i gzhir gyur cing /kha na ma tho ba'i tshig dang log par lta ba sna tshogs pa 'byung ba yod pa de la 'di ni de bzhin gshegs pas spyir chos thams cad rgyud rnam pa gsum du gsungs so/ /de la sku'i rgyud ni 'dul ba'i mdo la sogs pa'o//gsung gi rgyud ni shes rab kyi pha rol tu phyin pa dang / theg pa chen po'i mdo sde la sogs pa'o/ /thugs kyi rgyud ni theg pa chen po gsang sngags so/ /gang 'dir rgyud rnam pa gsum ni gang zag rnam pa gsum gyi dbang du mdzad nas bka' stsal te/ byis pa rab rib can dang mkhas pa rab rib can dang dag par lta ba'o//yang 'dir de bzhin gshegs pas ni mos pa ji lta ba dang / spyod pa ji lta ba dang / 'dul ba'i zhing ji lta ba dang / de dag gi lam ji lta ba bzhin du thabs sna tshogs kyis chos ston pa ni ci nas kyang sems can thams cad mngon par rdzogs par 'tshang rgya bar mdzad pa'i phyir te/dper na sgyu ma'i mkhan po lta bu'o/ /de ltar bram ze la sogs pa khrus dang gtsang sbra dang / gos kyi cha byad mdzes pa dang / /smyung ba za gcig pa la mos pa rnams 'dul ba'i phyir dam pa'i chos 'dul ba dang bya ba'i rgyud la sogs pa gsungs so/ /yang 'dod chags dang bral ba dang /smra byed kyi mkhan po nam mkha'i gos can la sogs pa 'dul ba'i ched du shes rab kyi pha rol tu phyin pa la sogs pa gsungs so/ /gang du spyod pa thun mong ba bzang po la bsten cing 'dod pa'i yon tan lnga'i phun sum tshogs pa 'khor los sgyur ba'i rgyal po la sogs pa 'dul ba'i ched du gzhung 'di la sogs pa gsungs so//gzhan du 'dod chags chen po'i sems can gzhan gyis 'dul ba'i thabs mi mnga' ba rnams 'dul ba'i ched du spyod pa rlabs po che la brten pa gsang sngags bla na med pa rnams gsungs so/ /de la 'dir kha cig rtog pa rnam pa gnyis skye ste/ 'di ltar thabs kun gyis ni mngon par rdzogs par 'tshang mi rgyal gcig la gzud pa'i ched du gzhan dag kyang gsungs pa yin nam snyam pa dang / lus kyi kun tu spyod pas ni 'tshang mi rgyal sems kyi kun tu spyod pa rgya chen pos 'tshang rgya ba kho na yin pas bdag cag gi thabs su gzhan 'gyur ro snyam pa dang /kha cig ni bde bar gshegs pas ni chos thams cad du 'dod pa la log par g.yem pa bkag pas ni bdag cag gi thabs su gzhan 'gyur ro snyam na de yang 'dus pa rin po che'i mdzod las nad pa'i khams dang sbyar nas/ dug la sogs pa'i gnod pa yang / / sman gzhan rkyen gyis dug bsad nas/ /btang na nad las 'tsho bar 'gyur/ /de bzhin gang du 'gal bstan pa/ /de la chos kyi de nyid rtogs/ /goms pa'i mthu yis rnam par thar/ /zhes bya ba gsungs te/ de bas na gang dang gang gis 'dul ba'i sems can de dag la de dang de nyid zhi bar byed pa dang de dag las mchog tu gyur pa'i chos yongs su gsungs pas sdig pa'i rkyen du mi 'gyur ba nyid do//de la sems kyi kun tu spyod pa 'ba' zhig kyang ma yin pa ni sdong po bkod pa las/ mi rtog rnam par mi rtog kyang / /gang dang gang gi yul dag tu/ /lus spyod la sogs kun bsdams nas//sdig pa'i rgyu ni mi sogs 'gyur/ /zhes gsungs te/ /de bas na bsam pa mchog tu gyur pa'i gang zag rnams kyis kyang yul gang dang gang du spyod pa gang dang gang grogs gang dang gang rnams kyi ched du de dag gi kun tu spyod pa dang mthun par bya ste/ de dag dang rjes su mthun pa las de dag dga' ba'i sems skyes pa nyid dge ba'i mchog go//gzhan du rjes su mi mthun pa las ni de dag zhe sdang bar byed/ 'phya bar byed tshig rtsub po smra bar byed de/ de dag ni ngan 'gro'i rgyu nyid du 'gyur ro/ /de la gang dag theg pa chen po'i gsang sngags bla na med pa la smod pa dang de dag sun 'byin pas ni bskal pa chen po grangs med pa gsum du mnar med pa'i sems can dmyal bar skye ba ste/de yang rnam smin bstan pa las bcom ldan 'das kyis/ gang zhig zab mo'i don dag la/ /rgyal ba'i bka' min zhes brjod pa/ /mnar med pa ru lhung gyur nas/ /yi dags dud 'gro'i 'jig rten du//nges par skye bar the tshom med/ /ces pa dang / shes rab kyi pha rol tu phyin pa brgyad stong pa las bcom ldan 'das kyis bka' stsal pa/ rab 'byor skyes bu gti mug can dag legs par gsungs pa'i chos 'dul ba la rab tu byung nas/ shes rab kyi pha rol tu phyin pa la sogs pa zab mo'i don rnams sun 'byin par sems pa de ni sdig pa'i rtsa ba chen pos ngan 'gror ltung bar 'gyur ro zhes gsungs so//gsang sngags la rab tu spyod pas kyang legs par gsungs pa'i chos 'dul ba sun dbyung bar rnam pa thams cad du rung ba nyid ma yin te/ thar pa chen po'i mdo las kyang / 'dul 'di thar pa 'dod rnams kyi/ /kun gyi yul gyur rtsa bzhi'i zhing / /'di gnas bar du bstan pa gnas/ /de bas 'dul la rab tu 'bad/ /ces pa dang / de kho na nyid bsdus pa'i le'u las kyang / /phyi nang gsang ba theg pa gsum/ /rnal 'byor pas ni spang mi bya//zhes gsungs pa'i phyir ro/ /de la kha cig ni 'dul ba la sogs pa nyan thos kyi theg pa ni rgyu'o/ /pha rol tu phyin pa'i theg pa ni rkyen no/ /sngags kyi theg pa ni 'bras bu'o zhes 'dod na/ de ni rigs pa ma yin zhing lung dang 'gal ba'i phyir/ kla klo dang sred med kyi bu'i tshig bzhin te/lung las kyang / theg pa gang gi sgor zhugs pas/ /de yis de yi 'bras bu mthong / /zhes gsungs so/ /de la gang dag phan tshun du theg pa gsang sngags spyod pa rnams kyis ni legs par gsungs pa'i chos 'dul ba spyad du mi rung ste rtog pa dang bcas pa'i phyir/ dper na rma bya dang shi ri sha'i shing bzhin no zhes pa dang de bzhin du 'dul ba la rab tu byung ba'i dge slong gis bla na med pa'i gsang sngags spyad du mi rung ste dper na sbrul dang phag rgod lta bu'o zhes smra na de dag ni rigs pa ma yin te lung rigs dang 'gal ba'i phyir dper na srin po khyab 'jug gi chung ma bzhin te lung las kyang /dge slong rdo rje 'dzin pa che/ /sngags rnams gsung zhing 'khar gsil bsnams/ /de nyid sgom zhing gso sbyong brtson/ /de ni bde bar gshegs dang 'dra/ /zhes gsungs pa dang / sgyu ma brtag pa'i rgyud las kyang bcom ldan 'das kyis/ so sor thar pa'i sdom pa la//rten bcas gsang sngags sdom pa 'dzin/ de ni shes rab thabs ldan pas/ /chos kyi sku ni mngon du byed/ /ces gsungs pa'i phyir ro/ /de la gang zag gi dngos pos ni chos kyi dngos po rtogs par mi 'gyur te/ dus kyi snyigs ma la sems can gyi snyigs mar gyur pa'i dbang gis gang zag kha cig ni rang nyid nyon mongs pa'i dbang du gyur pas theg pa chen po gsang sngags la tshig bkal nas spyod pa la sogs brlang por spyod pa dang bud med la sogs pa bsten pa yang 'di ni dam tshig gi zhes brjod pa dang /rung ba ma yin pa'i dngos po rnams za ba la dam tshig gi zas su rung ba'o zhes brjod nas longs spyod cing sngags kyi don cung zad kyang mi sgom pa ni bde bar gshegs pas bkag pa ste/dgyes pa'i rdo rje'i rgyud phyi ma las/ rnal 'byor ye shes mi byed par/ /nga nyid sngags pa yin zer ba/ /glang smyon sna la ral btags 'dra/ /zhes gsungs so//de la kha cig ni sems thag pa nas bla na med pa yang dag par rdzogs pa'i byang chub par bya ba'i phyir dad pa'i go cha bgos nas brtson 'grus kyi rta dang / shes rab kyi mtshon thogs te theg pa chen po gsang sngags kyi lam bla na med par zhugs nas bdud kyi tshogs mtha' dag 'joms pa'i rgyal ba'i sras po zhes bod pa ste/de ni skyes bu bla na med pa'o/ /kha cig ni 'jig rten 'di na gsang sngags kyi theg pa la zhugs na bde bar 'tsho'i zer nas rnyed pa dang bkur sti'i phyir nyan pa dang bshad par byed pa yang yod de/ de ni chos kyi 'tshe ba log pa can zhes bya ste/ de yang bcom ldan 'das kyis theg pa chen po mngon par brjod pa'i mdo las/dus 'gyur 'di yi phyi ma la/ /nga yi sras ni rnam pa gsum/ /gcig ni ming thogs gzhan gyi bran/ /gcig ni pha yi gter rnams 'tshong / /gcig ni seng ge'i gdung 'tshob yin/ /zhes 'byung ngo / /de bas na gang zag gi mtshan mas chos kyi ngo bo ni rnam pa thams cad du yang brtag par mi bya ste/'dir legs par gsungs pa'i chos 'dul ba la rab tu byung ba'i dge slong gsang sngags spyod pa rnams kyang gong du bstan pa'i gang zag rnam pa gsum du shes par bya ste/ de la rang nyid nyon mongs pa'i dbang du gyur pa'i dge slong sdom pa dang bral ba la ni chos la dpya bar mi bya ba dang /chos 'tshong ba rnams ni gang zag la dpya bar bya ba'o/ /bsam pa thag pa nas bla na med pa'i byang chub 'dod pa'i dge slong gis ni dang por bla ma brtag par bya ste/ bla ma yang gang zag rnam pa gsum po de las bar ma yongs su bsten te/gsang sngags kyi snod du rung ba dge slong gi sdom pa'ang ma smas par dbang mtha' dag nos pa la yon la sogs pa ji skad gsungs pa bzhin du phul te/ man ngag ji lta ba bzhin du mnos nas yongs su spyod pa ni 'gal ba med pa nyid do/ /de la gang dag 'di skad du gsang sngags kyi dbang ni bud med la kun tu spyod pa'i phyir dge slong gi sdom pa dang 'gal lo zhe na/de ni ma yin zhing bka' mtha' dag ma mthong ba'i phyir bden pa ma yin pa ste/ bud med la sogs pa ni dpe sgrub pa yin la de'i dgos pa ni brtag pa'i rgyal po gnyis pa las/ rang gi g.yas min g.yon min pa'i//mthe bong dang ni srin lag gis/ /longs spyod rtsa gnyis rab mnan na/ /gzhon nu ma dang phrad pa yi/ /bde ba lta bur myong bar 'gyur/ /zhes gsungs te/ dogs pa cung zad kyang med cing dgos pa'i dngos grub kyang 'grub par 'gyur ba ste gang zag tha ma lta bur spyod pa ni gong du gsal ba'o//de bas na dge slong la sogs pa dang yang dag par rdzogs pa'i byang chub thob par 'dod pa rnams ni nyes pa med par blta'o/ /de la 'dir yang gang dag dge ba'i bshes gnyen dam pa dang bcas pa rnams kyis ni dogs pa dag kyang gang dag blo chung ba la sogs pa rnams kyis ni 'khrul pa'i gzhi med cing dge slong gi sdom pa dang shin tu mthun pa'i phyir bag tsha ba med pas/chos 'di la sogs pa la 'bad par bya ste/ rnal 'byor chen po'i rgyud 'bras bu rdo rje'i theg pa la zhugs pas ni yang dag par rdzogs pa'i sangs rgyas 'grub pa'i rgyu bla na med pa nyid do//de la gang dag ci'i phyir sngags kyi theg pa la 'bras bu'i theg pa zhes gdags she na/ sngags kyi theg pa ni 'bras bu'i theg pa yin te/ 'bras bu myur du thob pa'i phyir/ gri rnon po la gcod pa zhes gdags pa bzhin no/ /bcom ldan 'das kyis kyang mkha' 'gro ma rdo rje gur las kyang //bskal pa bye ba grangs med du/ /rnyed dka' ba yi sangs rgyas kyang / /tshe 'di nyid la ster bas na/ /'bras bu can zhes ming btags so/ /zhes gsungs pa'i phyir ro/ /yang 'dir chos ni rnam pa gsum du'ang gsungs te/ de la chos rnam pa gsum ni/ pad+ma lta bu'i chos dang /rin po che lta bu'i chos dang / rdo rje lta bu'i chos so/ /de la pad+ma lta bu'i chos ni 'dul ba'i sde snod la bya ste/ 'khor ba'i 'dam na gnas kyang lus kyi spyod pa kun tu gtsang bar snang ba ni pad+ma lta bu zhes bya ste/ de bzhin gshegs pa sku'i phrin las yongs su rdzogs pa la slob po//rin po che lta bu'i chos ni mdo sde'i sde snod la bya ste/ yid bzhin gyi nor bu rin po che ltar dgos pa thams cad 'grub pa'i chos ston pa ste/ de bzhin gshegs pa'i gsung gi phrin las yongs su rdzogs pa la slob po/ /rdo rje lta bu'i chos ni gsang sngags kyi sde snod la bya ste/sku gsung thugs kyi rdo rje la sogs pa'i rdo rje'i sku mngon par 'grub pa dang / bdud la sogs pas gzhig par mi nus pa'i phyir ro/ /de bzhin gshegs pa'i thugs kyi phrin las yongs su rdzogs pa la slob po/ /der ni gzhan du grags pa'i sde snod gsum yang bsdu ba ste/de dag yongs su 'dzin pa la sde snod gsum pa zhes gdags so/ /yang 'dir ni de bzhin gshegs pas gsungs pa'i chos mtha' dag gong du bstan pa'i rgyud rnam pa gsum du 'dus pa ste/ yang dag pa'i lam la zhen pa'i phyir ro/ /yang na rgyud rnam pa gnyis su 'di ltar gnas pa thams cad 'dus so//de la gang dag sngags kyi theg pa la ni rgyud ces pa kun la grub pa la pha rol tu phyin pa la sogs pa la ci'i phyir rgyud ces bya zhe na/ rgyud ni rnam pa gnyis su shes par bya ste/ de la sangs rgyas kyi rgyud dang / sems can gyi rgyud do/ /gang du bde bar gshegs pas sems can rnams kyi rgyud ji lta ba bzhin du gsungs pa ni sems can gyi rgyud do//de dag rnam par grol bar bya ba'i phyir bde bar gshegs pas dang po thabs ji lta bus nyon mongs pa bcom pa'i chos gsungs pa ni sangs rgyas kyi rgyud do/ de yang rnam pa gsum ste/ rgyu dang thabs dang 'bras bu'o/ /de bas na bde bar gshegs pas gsungs pa'i chos lta zhog gi/ /'di ltar snang ba thams cad gzugs nas rnam pa thams cad mkhyen pa'i bar du rgyud du ma 'dus pa med pa'i phyir dang / thams cad sngags dang ldan pa'i phyir phan tshun du sun 'byin pa'i rigs pa ni cung zad kyang ma yin te/'on kyang 'dod pa'i dbang gis de ltar smra'o/ /de bas na 'dir ni sngags kyang yid skyob par byed pa'i phyir sngags te/ ngan 'gro rnams sam/ nyon mongs pa las yid skyob par theg pa mtha' dag gis bstan pa'i phyir dang yang na skrag par byed pa'i phyir sngags te/ bdud la sogs pa bar du gcod pa rnams skrag par byed 'jigs par byed 'joms par byed pa yang theg pa thams cad du gsungs pa'i phyir/ de dang ldan pa rnams la sngags pa zhes par bod pa ste/ bde bar gshegs pa'i bstan pa la zhugs pa thams cad la bya'o/ /de la thams cad kyang 'dul ba yin te/nyon mongs pa dang sgrib pa dang rang gi rgyud 'dul ba'i phyir ro/ /de'i phyir mkhas pa shes rab dang ldan pa rnams kyis bde bar gshegs pas gsungs pa'i dam pa'i chos rnams phan tshun du 'gal bar mi bsam pa ste/ 'dir ni thabs dang shes rab kyang bsam par bya'o/ de la shes rab dman pa rnams dang / bla ma dam pas ma zin pa rnams dang sdig pa'i grogs po dang bcas pa rnams dang bdud kyi dbang du gyur pa rnams ni theg pa chen po gsang sngags bla na med pa rnams su thabs dang shes rab kyi sgras rmongs par 'gyur te bud med dang skyes bu 'ba' zhig la 'dod do/ / de ni yang dag pa ma yin pa nyid kyis thabs mi mkhas pa'i skyes bur rig par bya ste/ yang dag pa'i bka' bde bar gshegs pa'i dgongs pas ni thabs dang shes rab kyi tshul dpag tu med pa cig yod na'ang 'dir ni re zhig gtso bo gsum du shes par bya ste/ dpe dang rgyu dang 'bras bu'o/ /de la dpe ni chos nyid stong pa nyid la gnyis su med pa'i ye shes kyi rdo rjes mnyam par sbyar zhing reg pa'i gnas skabs na sangs rgyas kyi yon tan dpag tu med pa sangs rgyas kyi zhing mtha' dag tu bgrod par byed pa/bde ba chen po'i ngo bo rtog pa thams cad dang bral ba de mtshon pa'i phyir gsang sngags kyi rgyud bla na med pa rnams su/bcu drug lo lon mig yangs ma/ /zhes pa la sogs pa sbyor ba rnams gsungs te/ rmongs pa dag ni de la yang dag par 'dzin pa yang yod na/ de ni dper na nad pa gang zhig gis bdud rtsi tshol ba'i gnas su bdud rtsi tshol du phyin pa la dug dang bsres pa'i sbrang rtsi dang phrad pa las ro mngar ba'i bde ba bla na med pa nyams su myong ba las bdud rtsi ni nges par 'di'o snyam nas gnas su khyer te zos pa dang sdug bsngal chen pos 'chi ba'i dus byas pa bzhin no//de la rgyu ni 'dir rnam pa gnyis te/ rtsa ba'i rgyu dang las su bya ba'i rgyu'o/ /de la rtsa ba'i rgyu ni byams pa chen po dang /snying rje chen po ste/ byang chub kyi sems las yang dag par byung ba'i snying rje chen pos 'gro ba sems can thams cad 'khor ba'i rgya mtsho las bsgral ba'i phyir rims drag pos gdungs pa lta bu skye ba nyid do/ /de'i dbang gis byang chub kyi sems bla na med pa las yang dag par byung ba'i byams pa chen pos 'gro ba sems can thams cad la chos dang zang zing dang skyabs dang bde ba'i tshig la sogs pas phan gdags pa ni mngon par 'grub pa'i rgyu'o//de lta bu yang dag par chu bo'i rgyun lta bus mnyam par sbyar ba las bde ba rnam pa gnyis 'byung ba ste bdag nyid sems kyi dga' bas dmigs pa med pa'i bde ba chen po dang gzhan du 'phral gyi bde ba mngon par dga' ba'i bde ba chen po skye ba nyid do//las su bya ba ni rnam pa gnyis te/ nang gi bdag nyid can dang kun tu spyod pa'o/ /de la nang gi bdag nyid can bla ma dam pas chos kyi 'khor lo chen pos yang dag pa'i don ma nor bar bstan pa nyid nges pa nyid du byas pas bsgoms shing de la bde ba chen po rnam par rtog pa thams cad dang bral ba'i skad cig gam thang cig gam nyi ma'am zhag gam zla ba'am lo la sogs par skye ba ni rgyu bla na med pa nyid do//kun tu spyod pa ni 'dir rgyal ba'i bka' thams cad las legs par gsungs pa'i chos 'dul ba la rab tu byung ba'am/tshangs par spyod pa'i dge bsnyen gyi sdom pa'am byang chub sems dpa'i sdom pa la sogs pa yongs su 'dzin pa'am/ bram ze'am rgyal rigs sam rje'u rigs la sogs pas rang rang gi kun tu spyod pas ni 'jig rten pa dang rjes su mthun pa nyid du yang dag par spyod pa dang /gsang sngags rdo rje'i theg pa'i don la yang dag par bsgoms pas ni rtog pa dang bral ba'i shes rab skye ste/ de las bde ba chen po rnam pa gnyis 'byung ngo / /de la rang gi rgyud la ni ngo tsha ba dang / mi gtsang ba dang / mi zhim pa dang / 'jigs pa la sogs pas sdug bsngal bar mi 'gyur ba'i bde ba dang / gzhan gyi rgyud la mos pa dang / dga' ba dang yid du 'ong ba la sogs pa'i bde ba bskyed pa nyid ni thabs bla na med pa zhes gsungs so/ /de la 'bras bu ni stong pa nyid la gnyis su med pa'i rdo rjes sangs rgyas pa'i chos thams cad mngon du byas pa'i bde ba chen po thob pa nyid do//yang gsang sngags kyi rgyud bla na med pa rnams su yab dang yum gyi tshul du chags pa chen pos rol pa'i chos bstan pa'am/ sku gzugs la sogs pa mnyam par sbyar ba'i sku mthong ba la gang dag mi shes pa rnams de 'dra ba nyid kyi gzugs su bde bar gshegs pa rnams bzhugs par 'dod na/de lta na ni shes rab kyi pha rol tu phyin pa rgyal ba thams cad bskyed pa'i yum lta bu'i chos kyi mtshan nyid tshad med pa rnam pa bzhi'i gzugs su phyag bzhi pa'i bud med kyi tshul du bris pa yang shes rab kyi pha rol tu phyin pa de bud med de lta bu'i gzugs su yod dam/yang bcom ldan 'das kyis dga' ldan gyi gnas su byams pa rgyal tshab tu bzhag nas mi'i yul du gser gyi glang po che mche ba drug par sprul te/ zas gtsang ma'i btsun mo'i mngal du mir skye ba bzhes te mdzad pa bcu gnyis rim pa bzhin du mdzad nas rdo rje'i gdan la mngon par bzhugs pa'i gnas skabs na lha'i bu'i bdud dga' rab dbang phyug la sogs pas rnam pa thams cad mkhyen pa'i ye shes ma thob par rdo rje gdan la 'dug pa ni rigs pa ma yin no zhes bcom ldan 'das kyis bdud rnams la bka' stsal pa/nga ni dus 'dir ma yin gyi/ /ji srid sa dang chu sogs kyi/ /'byung ba yod pa de srid nas/ /nga ni rdzogs sangs rgyas kyi lha/ /sdig can khyed kyis shes pa min/ /zhes gsungs pa'i gnas skabs na/ bde bar gshegs pa nyid kyi byin gyi rlabs kyis sa'i lha mo dang chu'i lha mo mdog ser ba dang /sngo ba bum pa dang pad+ma 'dzin pa gnyis bcom ldan 'das kyi g.yas g.yon nas rked pa yan chad phyung ste tshig 'di skad ces gsol to/ /kye ma khyed kyis ci la shes/ /gtso bos bka' stsal de bzhin te/ /bdag cag 'byung ba rnam pas kyang / / khyod ni snga bar mngon sangs rgyas/ /zhes pa'i tshig gis bdud rnams skyengs par gyur par byas pa sa la sogs pa 'byung ba bzhis rtsi shing dang nags tshal dang dngos po thams cad skyed pa'i tshul nas bud med kyi gzugs su phyung na de yang bud med de 'dra ba rang gi gzugs su gnas sam/de lta na ni sa la yang kha dog sna tshogs par snang ba'i phyir rigs par mi 'gyur ba nyid do/ /de bas na bde bar gshegs pas chos kyi tshul gyi rtags sku ru bris pa'am/ yang na gong du bstan pa ltar chags pa chen pos 'dul ba'i sems can rnams 'dul ba'i phyir chags pa chen pos chos gsungs te 'gal ba med pa nyid do//gzhan du de 'dra ba nyid du 'dod na ni bde bar gshegs pa yang dag pa nyid dam grol ba nyid dam/ 'jig rten las 'das pa nyid du mi 'gyur te/ nyid kyis gsungs pa'i chos dang 'gal ba'i phyir ro//de bas na 'dir bde bar gshegs pa yang gcig /des gsungs pa'i chos kyang gcig par blta ste/ phan tshun du 'gal ba med pa nyid do/ /yang gzhan du mtshan sna tshogs su bstan pa khrag 'thung chen po dang / dgyes pa'i rdo rje dang 'jam pa'i rdo rje dang / rnam par snang mdzad dang /rdo rje sems dpa' dang / shAkya thub pa la sogs pa de bzhin gshegs pa'i sku gcig pa nyid de/ gdul bya'i dbang gis sna tshogs par btags pa ni 'gal ba med pa nyid kho na ste/ de yang bcom ldan 'das kyis shes rab kyi pha rol tu phyin pa rdo rje gcod pa las/gang dag nga la gzugs su mthong / /gang dag nga la sgrar shes pa/ /des ni log par rtogs pa ste/ /yang dag don du mthong thos med/ /ces pa dang / mngon par rtogs pa'i mdo las kyang / /bsgribs pa'i tshul gyis kun ston yang / /rtog pa spangs pas 'od gsal gang //zhes gsungs pa'i phyir te/ de bas na bde bar gshegs pas kun rdzob kyi tshul du sems can mos pa sna tshogs pa rnams la gzugs dang chos dang spyod pa sna tshogs su bstan pa ni tha na srin bu la sogs pa yan chad kyi gzugs kyis ston kyang / don dam par ni gzugs dang kha dog tu snang ba lta zhog gi /sems can gyi mtshan mar snang ba kun rdzob kyi snang ba tsam yang med pa nyid de/ rtog pa thams cad dang bral ba'i rang bzhin 'od gsal ba'i bdag nyid du blta bar bya'o/ /de'i phyir bde bar gshegs pa'i bstan pa la zhugs pa rnams kyis ni lus kyi spyod pa ni so sor thar pa'i sdom pa la sogs pa rang rang gi kun du spyod pa la bslab par bya ba dang /ngag gi spyod pa rnams ni rin po che'i mdo la sogs pa la bslab par bya ba dang / yid kyi spyod pa rnams ni gsang sngags kyi don rnam par bsgom par bya ste/ de yang bcom ldan 'das kyis dkon mchog brtsegs pa'i mdo las kyang /spyod pa yid 'ong mdzes pa dang / /ngag rnams bram ze'i rig byed 'dra/ /yid ni zla phyed byis pa 'dra/ /de 'dra'i kun du spyod pas na/ /'dir bde pha rol bla na med/ /ces gsungs pa'i phyir ro/ /de la yang gang dag legs par gsungs pa'i chos 'dul ba dang /mdo sde dang / pha rol tu phyin pa dang / bya ba'i rgyud rnams su ni kha zas kyi rnam pa sha dang chang dang sgog pa la sogs pa rung ba ma yin pa'i tha mal pa rnams kyang bkag la/ /gsang sngags bla na med pa rnams su ni/ sha las kyang sems can chen po rnams kyi sha mi sha dang glang po che'i sha la sogs pa dang /'jig rten na shin tu mi gtsang ba'i dngos po bshang ba la sogs pa zas kyi mchog tu byed pa dang / de dag gi snod la yang mi'i thod pa la sogs par za ba ni 'gal ba nyid do zhe na/ de ni 'gal ba med pa nyid de de la kha cig ni log par 'khrul pa'i dbang gis mi la sogs pa'i ro rku ba dang /gson pa rnams gsod pa'ang yod de/ de ni rnam pa thams cad du gzhung dang 'gal bar rig par bya ste/ bde bar gshegs pa'i bka' thams cad nas sems can gyi srog gcod pa ni mtshams med pa lnga dang nye bar bshad pas na/de lta bu'i gang zag chen po ni theg pa chen po la khas 'ches pa lta zhog gi /ya rabs kyi spyod par yang mi rung bas na rigs kyi tha ma shan pa'i rigs su bsdu bar bya ste/ de 'dra ba'i gang zag dang bde bar gshegs pa'i bstan pa la zhugs pa rnams kyis skad cig ma gcig kyang lhan cig gnas par mi bya ba dang /gtam gyi 'brel ba tsam yang bya ba ma yin pa nyid do/ /de la bde bar gshegs pas gang gsang sngags bla na med pa rnams su mi sha la sogs pa bza' bar bya ba'i dgos pa ni ci nas kyang sems can gyi srog la gnod pa spangs pa'i phyir te/de ci'i phyir zhe na/ bdag sha phal pa rnams za ba na ma dang sring mo dang mdza' bo la sogs pas yid du 'ong ba'i phyir/ sems can rnams bsad de/ kha zas bsod pa dag stob par byed pa'i phyir dang / bdag kyang ro la chags pa'i dbang gis gnod sems dang gzhogs kyis bskul ba dang rjes su yi rang ba la sogs pa'i sems skye ba dgag pa'i phyir dang /rnam par rtog pa gzhom pa'i rim pas 'jig rten na mi rnams kyis longs mi spyod cing smad par gyur pa dus thams cad du mod pa rin la sogs pa mi dgos shing sems can gyi srog la mi gnod pa'i sha dag bza' ba nyid do//yang ci nas kyang 'jig rten pa'i dngos po rnams la chags pa chung bar bya ba'i phyir te/ ngan cing smad pa ni chags pa'i yul du ma song ba la 'dod pa'i 'dun pa skye bar mi 'gyur ba ste de ni legs par gsungs pa'i chos 'dul ba rnams su'ang bcom ldan 'das kyis dge slong rnams 'bras chan la rus pa'i 'du shes su bskyed par bya ba dang /tshod ma la rnag khrag gi 'du shes su bskyed par bya ba dang / shing lo la pags pa'i 'du shes su bskyed par bya ba dang lhung bzed la mi'i thod pa'i 'du shes bskyed de/bde bar gshegs pa la bsnyen bkur bya ba dang / bru ba'i nad las bzlog pa'i phyir bza' bar bya'o zhes gsungs pa'i phyir ro/ /yang ci nas kyang rnam par rtog pa gzhom pa'i phyir te/ de la rnam pa gnyis so/ /gcig ni mngon par rtogs pa'i bdag nyid kyi gnas skabs na dngos po'i rnam par rtog pa dang mtshan ma'i rnam par rtog pa spangs pa'i ngo bos thams cad mnyam pa nyid du rtogs te/bzang ba dang ngan pa dang zhim pa dang sdug pa dang mi sdug pa dang snyan pa dang / mi snyan pa dang bde ba dang sdug bsngal la sogs pa 'jig rten pa'i chos brgyad dang bral ba'i rtags su yang dag par bstan pa'o//gcig ni nang du sems pa'i ngo bos dang por thig le dang / de nas a ru ra'i 'bras bu tsam dang / de dag la sogs pa'i rim pas bza' ba nyid du byas na yun ring por goms pa'i mthus khad kyis rnam rtog chung bar 'gyur ba'i phyir slob pa'i gnas skabs na'o//de'i phyir mi la sogs pa'i sha bsten pa la 'gal ba med cing / mthun pa nyid dang / lang kar gshegs pa la sogs par sha thams cad bkag pa ni srin po la sogs pa'i sems can gyi srog 'phrog pa rnams gdul ba'i phyir/sha za shes rab snying rje med/ /rnam par grol la rgyab kyis phyogs/ /zhes pa la sogs pa sha za ba'i nyes dmigs sna tshogs pa cig gsungs so/ /mdo sde mya ngan las 'das pa rnams gsungs pa dang / byang chub sems dpa'i sdom pa'i mad bstan pa la sogs par yang ci nas kyang sems can gyi srog la gnod kyis dogs pa dang /byang chub kyi sems shas chung gis dogs pa'i phyir bkag pa yin par shes par bya ste/ rnam pa thams cad du ma gnang ba ma yin te 'dul ba la sogs par dge slong rnams kyis sha dang nya sha dang khur ba dang 'bras chan dang zan dron la sogs pa bza' bar bya'o zhes gsungs pa'i phyir ro//de la chang ni theg pa chen po'i gsang sngags phal cher dam tshig gi rdzas su gsungs pa yin pa dang gzhung 'di pa rnams su gsal bar bkag pa ste/ de yang dam tshig brjod pa'i skabs nas/nyes pa kun gyi rtsa gzhi'o/ /chang ni btung bar mi bya'o/ /zhes gsungs pa'i phyir ro/ /dur khrod la sogs par gnas pa ni chags pa bskyung ba'i phyir dang / mi rtag pa nyid yid la bya ba'i phyir dang / dam pa'i chos la brtson 'grus bskyed pa'i phyir 'dul ba la sogs par yang bcom ldan 'das kyis dge slong dag /dur khrod song la keng rus ltos/ /de 'dra'i gzugs su gnas 'gyur zhing / /de yi rang bzhin 'di la ni/ /kun nas chags par mi bya'o/ /zhes gsungs pa'i phyir rab tu byung ba dang gsang sngags 'gal ba med pa nyid do//yang 'dir rus pa'i rgyan la sogs pa yang don dam par rnam par rtog pa spangs pa'i rtags dang / kun rdzob tu mi rtag pa nyid ston pa'i phyir 'gal ba med pa nyid do/ /gcer bu yang nyon mongs pa la sogs pa'i sgrib pa spangs pa'i rtags su bstan pa'i phyir mi 'gal zhing bag tsha ba med par bya'o//de la gang dag gsang sngags rnams su ni dbang gi kun du spyod pas mi 'dra ba nyid do zhe na/ de ni mi shes pa'i rang bzhin can yin te/ bcom ldan 'das kyis rdo rje thod kyi rgyud nas/ so so thar dang byang chub sems//gsang sngags rang gi sdom pa yis/ /rnam par grol ba'i lam la brten/ /zhes gsungs pa'i phyir sdom pa yin par rig par bya zhing dbang zhes bya bas rigs pa ma yin pa'i chos logs shig ston par ni mi bsam mo/ /de la gsum ka yang dbang yin par shes par bya ste/ gcig ni legs par gsungs pa'i chos 'dul ba la dbang byed pa'i phyir dang / gcig ni byang chub sems dpa'i chos la dbang byed pa'i phyir dang / gcig ni gsang sngags la dbang byed pa'i phyir dbang zhes bya ste/ dper na mi gang dag rgyal rigs su gyur kyang de'i spyod yul la dbang byar med pa las/stobs dang rkyen gyi dbang gis phyis bram ze la sogs pas yul 'khor thams cad kyi phyir dbang bskur ba las de nas bzung nas rgyal po'i cha byad bzung ste/ spyod yul gyi grong khyer la dbang byed pa dang de las 'dod pa dang / de'i 'bras bu sna tshogs pa 'byung ba bzhin du/ so sor thar pa la sogs pa'i dbang gis de'i byang chub la dbang byed cing de las 'khor ba'i sdug bsngal spangs pa bde ba'i 'bras bu dpag tu med pa 'byung ste/ de la so sor thar pa'i dbang ni nyis brgya lnga bcu zhes gsungs so/ /byang chub sems dpa'i dbang ni bzhi bcu rtsa gnyis zhes gsungs so//gsang sngags la ni spyir rnam pa gsum ste/ rnal 'byor dang bya ba dang spyod pa'o/ /rnal 'byor la'ang rnam pa gsum ste/ rnal 'byor spyi'i rgyud dang / rnal 'byor bla ma'i rgyud dang / rnal 'byor bla na med pa'i rgyud do/ /de la rnal 'byor spyi la ni dbang bcu zhes gsungs so//rnal 'byor bla ma'i rgyud rnams su ni dbang gsum du gsungs so/ /rnal 'byor bla na med pa'i rgyud du ni dbang bzhir gsungs so/ /bya ba la ni bcu bzhi'o/ /spyod pa la ni lnga bcu rtsa bzhi'o/ /de dag thams cad kyang bsdu na gsum ste/ lus dang ngag dang yid kyi dbang ste/ de yang bcom ldan 'das kyis rin po che'i mdzod las/ gang gi lus ngag yid gsum bsdams/ /gzhan du lhod sbyor 'gro don brtson/ /dbang mchog dam pa 'di rnyed na/ /rdzogs sangs rgyas su de 'gyur nges/ /zhes gsungs pa'i phyir dang / yang de dag sku gsum gyi cha lugs su yang dag par gnas pa ste/gcig ni bde bar gshegs pa'i sprul pa'i sku'i cha lugs kyis kun du spyod do/ /gcig ni de bzhin gshegs pa'i longs spyod rdzogs pa'i cha lugs kyis kun du spyod do/ /gcig ni chos kyi sku'i mtshan nyid longs spyod rdzogs pa'i sku khyad par can gyi cha lugs kyis kun du spyod do//de dag thams cad don dam par ni sku gcig pa'i mtshan nyid du blta bar bya ste/ de yang bcom ldan 'das kyis mngon par rdzogs pa'i mdo las/ sku gnyis po yi rang bzhin can/ /chos sku rtag tu bde ba che/ /zhes gsungs so//de bas na 'dir rnam par dag pa'i ngo bos nyan thos kyi theg pa dang / rang sangs rgyas kyi theg pa dang / byang chub sems dpa'i theg pa dag la rim par bslabs te de dag dang yang mi 'gal bar kun du spyod cing bla na med pa yang dag par rdzogs pa'i byang chub bsgrub pa'i phyir theg pa chen po gsang sngags la yang dag par bsnyen te/de'i don rnam par bsgom zhing rnam par rtog pa dang bral ba'i chos kyis rnam par rtog pa dang bral ba'i lam ston cing rnam par rtog pa dang bral ba'i 'bras bu mngon par 'grub par nges pas na mi 'gal ba'i phyir gsang sngags kyi theg pa la mngon par bsgrub par bya ba kho na ste/de yang mtshan yang dag par brjod pa las/ theg pa gsum gyis nges 'byung ba/ /theg pa gcig gis 'bras bur gnas/ /zhes gsungs pa'i phyir ro/ /de bas na gsang sngags kyi spyod pa'i gang zag rnams dang / legs par gsungs pa'i chos 'dul ba la rab tu byung ba'i dge slong rnams dang / byang chub sems dpa'i sdom pa la gnas pa rnams kyis longs spyod rdzogs par bya ba'i phyir rang rang gi 'dod pa rnams mi 'dor zhing zhen par mi bya ba nyid do/ /de la rang rang gi spyod pa ni spyir 'jig rten pa thams cad la spyod pa rnam pa bzhi ste/de la gcig ni bde 'gro mtho ris kyis byang chub 'dod pa'o/ /gcig ni 'jig rten 'di'i 'byor pa dang phun sum tshogs pa 'dod pa'o/ /gcig ni sems can thams cad mngon par rdzogs par 'tshang rgya bar bya ba rtag pa ma yin gyi/yang dag par rdzogs pa'i sangs rgyas kyis kyang mi nus pas na bdag nyid myur du rang byang chub thob par bya'o zhes de la yongs su 'bad cing rtsol bar 'dod pa'o/ /gcig ni sems can thams cad mngon par rdzogs par 'tshang rgya bar bya ba'i phyir bla na med pa yang dag par rdzogs pa'i sangs rgyas thob par 'dod pa'o//de la gang zag de dag ni rigs bzhir shes par bya ste/ de yang bcom ldan 'das kyis snang ba rin po che'i mdo las/ ri bong sram dang chu srin dang / /seng ge lta bur kun spyod pa/ /'di dag gang zag rnam pa bzhi//gnas rnam bzhi la rnam par spyod/ /ces gsungs so/ /yang rnam pa gnyis te/ 'jig rten par 'dod pa dang / 'jig rten las 'das par 'dod pa'o/ /'jig rten las 'das pa la gsum ste/ rang byang chub la gnas pa dang / lam la gnas pa dang /mchog gi go 'phang 'dod pa ste/ de yang bcom ldan 'das kyis ni mngon par rtogs pa'i mdo las/ nga yi bstan la gang zag gsum/ /rgyu shes lam shes 'bras bu rtogs/ /rang nyid snang pas kun du spyod/ /ces gsungs so/ /de bas na 'jig rten las 'das par 'dod pa'i rgyu rnam pa gsum gyis ni rang gi byang chub la zhen par mi bya zhing dor bar yang mi bya ste/thabs mkhas pa sna tshogs pas kun du spyod pa ni skyes bu khyu mchog ces gsungs so/ /de la kha cig ni lam tha dad pa la zhugs te/ 'bras bu ched du bya ba'i gcig pa ni dper na bud med dang skyes pa 'khrig pa'i chos spyod pa na bud med ni skyes pa'i dbang po che bar 'dod la/ skyes pa ni bud med kyi dbang po chung bar 'dod do/ /che bar 'dod pa dang chung bar 'dod pa la khyad par che yang / de gnyi ga'i ched du bya ba'i 'dod pa ni dam pa dang bde bar 'dod pa ste/de yang skyes pa dang bud med gnyi ga'i rlung gi sgo bsdams pa las dam pa dang bde ba 'byung ba bzhin du de bzhin gshegs pa'i bstan pa la zhugs pa rnams kyang / lam gyi khyad par che yang bde ba'i byang chub 'dod par 'dra ste/ de yang gsum la gnas nas gcig gis nges par 'byung bas ni myur du 'khor ba spong bar 'gyur ro//de la phan tshun zhe sdang bar byed pa ni bcom ldan 'das kyis phyag rgya bzhi pa'i mdo las/ gti mug gos can zhe sdang mtshon/ phrag dog 'dod chags chu dag gis/ /pha rol rma dod 'khru byed pa/ / gshin rje'i gnas su skye bar 'gyur/ /zhes gsungs so/ /de bas na 'jig rten gnas pa thams cad lam gyi khyad par che yang bde ba'i byang chub 'dod par 'dra ste/ de la yang dag par rdzogs pa'i sangs rgyas kyis gdung 'tsho ba rnyed pa dang bkur sti la mi lta zhing bu gcig pa'i pha ltar byams pa rnams kyis legs pa'i lam yongs su bstan par bya ba kho na'o//de'i phyir 'di ltar gong du bstan ma thag pa ltar/ de bzhin gshegs pa'i bka' mtha' dag dang / gsang sngags rnal 'byor gyi rgyud chen po rnams kyi gzhung gi dngos po mtshungs pa nyid du rnam par gzhag nas/da ni gzhung 'di nyid kyi don bsdus pa rnam par dgrol bar bya ste/ 'di skad bdag gis thos pa dus gcig na zhes bya ba la sogs pa gsungs te/ de la 'dir brjod par bya ba dang / dgos pa dang dgos pa'i dgos pa dang 'brel pa ni gang zhig yin zhe na/ de ni rnam pa brgyad de/gnyis su med pa'i ye shes chen po dang dam tshig chen por 'brel cing de rtogs par bya ba dang de rtogs pa ni thog ma nyid nas dgos 'brel yongs su rdzogs pa ste/ yang 'dir ngan song thams cad yongs su sbyong ba'i rgyud 'di nyid rjod par byed pa yin la/ de nyid la gdul bya rnams mngon par 'dod pa bskyed pa'i phyir gsungs pa ni dgos pa'o//dad pa la mngon du byas shing des ngan song gsum spangs pa ni dgos pa'i yang dgos pa ste/ de nyid dang nges par 'byed pa'i sgrar 'brel zhing / de'i rgyu dang slong ba po dang /'chad pa po nges par 'brel pa ni brgyad pa'o/ /de nyid 'dir bsdus pa'i don ni phun sum tshogs pa rnam pa gsum bstan nas/ sangs rgyas kyi che ba'i yon tan phul du byung ste/ de la gnas phun sum tshogs pa bstan pa'i phyir/ 'di skad bdag gis thos pa'i dus gcig na zhes pa nas/sangs rgyas dang byang chub sems dpa' thams cad byin gyis brlabs pa na zhes pa'i bar gyis bstan to/ /chos kyi che ba'i bdag nyid phul du byung bas 'khor phun sum tshogs pa bstan pa'i phyir brgya byin dang tshangs pa la sogs pa zhes pa nas/ tshangs pa chen po'i pad+ma'i gdan la bzhugs te zhes pa'i bar gyis bstan te/chos phun sum tshogs pa bstan pa'i phyir/ ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs te zhes bya ba de nyid kyis mdor bstan to/ /de nyid kyi ston pa po bcom ldan 'das rnam par snang mdzad chen po che ba'i bdag nyid cho 'phrul chen po bstan pa'i phyir/ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs nas zhes pa nas/ byang chub spyod pa nyid la gzhag /ces bya ba'i bar gyis bstan te/ de dag gis ni gleng gzhi'i bsdus pa'i don rdzogs so// //thub pa chen po'i chos ngan song thams cad yongs su sbyong ba de nyid gleng bslang ba'i phyir/ de nas lha rnams kyi dbang po brgya byin gyis zhes bya ba nas/ bde bar gshegs pa ngo mtshar che'o zhes pa'i bar gyis bstan to/ / de nyid kyis tshogs rnam pa gnyis bsags pa las pha rol tu phyin pa bcu yongs su rdzogs pa'i 'bras bu nyid do zhes bstan pa'i phyir bcom ldan 'das kyis bka' stsal pa zhes pa nas lha'i dbang po gang de bzhin gshegs pa rnams kyis 'dul bar mi 'gyur ba'i gnas gang yang med do zhes pa'i bar gyis bstan to//lha'i dbang po bdag dang gzhan gyi don phun sum tshogs par 'dod cing dam pa'i chos la gus pa bskyed pa'i phyir/ de nas lha rnams kyi dbang po brgya byin zhes pa nas/ bde bar gshegs pa bdag spobs pa bskyed du gsol zhes pa'i bar gyis bstan to//dus phyi ma'i sems can le lo can nyon mongs pa'i dbang du gyur pa rnams la dpe khyad par can las brtsams te bcom ldan 'das sum cu rtsa gsum gyi lha'i gnas 'di nyid nas zhes pa nas bde bar gshegs pa lung bstan du gsol zhes pa'i bar gyis bstan to/ / mtshams med pa la sogs pa mi dge ba'i 'bras bu nges pa nyid do zhes bstan pa'i phyir/ bcom ldan 'das kyis bka' stsal pa zhes pa nas/ gzhan yang sdug bsngal gcig nas gcig tu brgyud pa myong bar 'gyur ro zhes bya ba'i bar gyis bstan to/ /lha la sogs pa gdung ba dang bcas shing 'jigs pa dang bcas pas de nyid 'grol bar bya ba'i phyir dang /'jig rten pa chen pos skyabs su gsol ba bstan pa'i phyir/ de nas brgya byin la sogs pa'i lha thams cad ces pa nas bla na ma mchis pa yang dag par rdzogs pa'i byang chub thob par bgyi ba'i slad du bshad du gsol zhes pa'i bar gyis bstan to//theg pa chen po rnal 'byor gyi snod du 'khor rnams rung bar bya ba'i phyir de nas bcom ldan 'das kyis zhes pa nas/ oM badzrA tiSh+Tha dz+nyA na sa ma ye hUM zhes pa'i bar gyis bstan to/ /dam pa'i chos phun sum tshogs pa las bde bar gshegs pa lnga'i rtsa ba'i sngags dang /snying po dang sku bskyed pa dang / phyi nang gi bsrung ba ma lus par bstan pa'i phyir snyoms par zhugs pa nas kyang zhes pa nas/ oM b+ha zhes bya ba'i bar gyis bstan to/ /de bzhin gshegs pa'i snying po de dag yongs su 'dzin pa'i phan yon bstan pa'i phyir lha'i dbang po zhes pa nas ngan song du 'ang 'gro bar mi 'gyur ro zhes pa'i bar gyis bstan to//tshe 'das pa'i sems can rnams la thabs 'di lta bus bya'o zhes pa dang / de'i mthu bstan pa'i phyir/ skyes pa'am bud med dam zhes pa nas/ lta'i dbang po mdor na 'jig rten dang /'jig rten las 'das pa'i phan pa dang bde ba thams cad myong bar 'gyur ro zhes pa'i bar gyis bstan to/ /de nyid kyi thabs kyi dkyil 'khor ji lta bu lags pa bstan du gsol zhes zhu ba'i phyir/ de nas lha rnams kyi dbang po brgya byin zhes pa nas/bla na ma mchis pa yang dag par rdzogs pa'i byang chub bde blag tu rtogs par bgyi ba'i slad du bshad du gsol zhes pa'i bar gyis bstan to/ /de dag gis ni rtsa ba'i rgyud kyi bsdus pa'i don rdzogs so// //'dod chags chen pos 'dul ba'i sems can rnams gdul ba'i ched du de nyid kyi sprul pa bcom ldan 'das shAkya thub pas rgyud phyi ma 'di gsungs so zhes bstan pa'i phyir/de nas bcom ldan 'das shAkya thub pas zhes pa nas dkyil 'khor chen po 'di gsungs so zhes pa'i bar gyis bstan to/ /dkyil 'khor gyi ngo bo dang /nges pa'i tshig gi sgo nas dkyil 'khor 'di lta bu'o zhes bstan pa'i phyir/ sangs rgyas kun gyi byang chub sems/ /zhes pa nas/ des ni dkyil 'khor chen por gsungs/ /zhes pa'i bar gyis bstan to/ /thar pa chen po'i grong khyer gnas phun sum tshogs par bya'o zhes bstan pa'i phyir/de nas bcom ldan 'das kyis zhes pa nas/ phyi yi dkyil 'khor bri bar bya/ /zhes pa'i bar gyis bstan to/ /gzhal yas khang 'di lta bu dgod do zhes bstan pa'i phyir/ gru bzhi pa la sgo bzhi pa/ /zhes pa nas/ ming ngam brda'am yang na ni/ /thig le rnams kyang bri bar bya/ /zhes pa'i bar gyis bstan to/ /dkyil 'khor de lta bu mchod pa'i tshogs rgyas pa las bdag nyid 'jug par bya'o zhes bstan pa'i phyir/ de nas mkhas pas dkyil 'khor la/ /zhes pa nas/ de yi gtor ma ji ltar mthun par bya//zhes pa'i bar gyis bstan to/ /rdo rje slob dpon gyi dkyil 'khor chen por slob ma dbang 'di ltar bskur bar bya'o zhes bstan pa'i phyir/ de nas sngags pas bla med byang chub kyi/ /zhes pa nas/ oM badzra sa ma ya hri da ya me pra be sha ya Di Da tiSh+Tha hUM zhes pa'i bar gyis bstan to/dam tshig med na 'grub par mi 'gyur ro zhes bstan pa'i phyir/ de nas 'dis dam tshig bsgrug par bya'o zhes pa nas/ bdag gi de nyid dang ni sngags sogs de bzhin no/ /zhes pa'i bar gyis bstan to/ /de ltar dam tshig dang ldan pa las/dbang dam pa rnams sbyin par bya'o zhes bstan pa'i phyir/ /mos pa brtan dang ldan par dam bcas nas/ /zhes pa nas/ sgrub pa myur du 'grub par 'gyur/ /zhes pa'i bar gyis bstan to/ /de lta bu'i rdo rje slob ma la rdo rje slob dpon gyis dngos grub kyi sgrub pa 'di lta bu byin la bsgrub par bya'o zhes bstan pa'i phyir/de nas bcom ldan 'das kyis zhes pa nas/ blangs nas yongs su spyad par bya/ /zhes pa'i bar gyis bstan to/ /de'i phan yon chen po bstan pa'i phyir/ sems can kun la phan brtson par/ zhes pa nas/ bran bzhin las kun byed par 'gyur//zhes pa'i bar gyis bstan to/ /tshe las 'das pa'i sems can la thabs rgyas par bgyi ba ji lta bu zhes gsol ba'i phyir/ de nas lha rnams kyi dbang po brgya byin gyis zhes pa nas/ sdug bsngal spangs pa'i slad du bsgrub par bgyi zhes pa'i bar gyis bstan to//ro sreg pa'i cho ga dang / de'i yan lag rgyas pa 'di lta bus sems can tshe 'das pa ngan song gi dbang du gyur pa rnams kyi don bya'o zhes bstan pa'i phyir/ bcom ldan 'das kyis bka' stsal pa/ zhes pa nas/ cho ga bzhin du bsdu bar bya/ /zhes pa'i bar gyis rgyas par bstan to//yongs su dag pa'i cho ga 'di lta bus sdig can gang dag /grol ba'i mtshan ma ma byung bar gyur na yang thabs 'di lta bus bya'o zhes bstan pa'i phyir/ thal ba de dang rus pa'i rdul/ /zhes pa nas/ rgya mtshor 'bab pa'i chu klung dor/ /zhes pa'i bar gyis bstan to//cho ga de lta bus dge ba'i lam la zhugs pa spro ba bskyed pa dang / dge ba'i rtsa ba chad pa'i gang zag rnams bla na med pa'i theg pa chen po la ma brten par grol bar mi 'gyur ro zhes bstan pa'i phyir/ de ltar byas na sdig can yang / /zhes pa nas/ bder gshegs rgyal ba nyid kyis gsungs//zhes pa'i bar gyis bstan to/ /de bzhin gshegs pa ngan song thams cad yongs su sbyong ba'i dkyil 'khor chen po'i byin gyis brlabs pa bsgrubs pa las mthong ba'i chos 'di nyid la mthu chen po'i 'bras bu 'di lta bu zhes bstan pa'i phyir/de nas brgya byin la sogs lha/ /zhes pa nas/ bcom ldan 'das dang brgya byin gnyis la bla ma dang bsti stang du byas te de bzhin du dong ngo zhes pa'i bar gyis rgyas par bstan to/ /ma 'ongs pa'i sems can the tshom dang bcas pa rnams the tshom med par 'jug par spro ba bskyed pa'i phyir dang /dam pa'i chos kyi snod khyad par can bstan pa'i phyir/ de nas brgya byin dang tshangs pa la sogs pa zhes pa nas sangs rgyas nyid du 'grub pa'i snod du gyur pa lags so zhes pa'i bar gyis rgyas par bstan to/ /de bzhin gshegs pa ngan song thams cad yongs su sbyong ba'i rdo rje slob dpon des cho ga ji lta ba bzhin byas pas 'gro ba'i don byas pa'i che ba'i yon tan rgyas par bstan pa'i phyir/bcom ldan 'das brtag pa'i rgyal po 'dis zhes pa nas/ lha dang bcas pa'i 'jig rten gyis smos kyang ci dgos zhes pa'i bar gyis rgyas par bstan to/brtag pa'i rgyal po 'di nyid kyis sems can rnams kyi don byed pa'i rdo rje slob dpon de la 'jig rten pa'i lha rnams kyis 'byor ba phun sum tshogs pa 'di lta bu ster bar 'gyur ro zhes bstan pa'i phyir/ de nas brgya byin dang tshangs pa la sogs pa zhes pa nas brtag pa'i rgyal po 'di ni de bzhin du blta bar bya'o zhes pa'i bar gyis bstan to//de nyid la bcom ldan 'das kyis cher gdams so zhes bstan pa'i phyir/ /lha'i dbang po legs kyis zhes pa nas/ yun ring por bag yod par byos la sgrubs shig ces pa'i bar gyis bstan te/de dag gis ni rgyud phyi ma'i bsdus pa'i don yongs su rdzogs so// //bshad pa'i rgyud 'di nyid zhe sdang chen pos 'dul ba'i sems can rnams gdul ba'i phyir/ de nyid kyi thugs kyi sprul pa bcom ldan 'das phyag na rdo rjes gsungs so zhes bstan pa'i phyir/de nas bcom ldan 'das byang chub sems dpa' sems dpa' chen po phyag na rdo rjes bcom ldan 'das kyis thugs brtag pa'i brtag pa phyi ma 'di bshad do zhes pa 'di nyid kyis bstan to/ /de bzhin gshegs pa ngan song thams cad yongs su sbyong ba'i bcom ldan 'das kyi dbu'i gtsug tor nas/thugs kyi cho 'phrul chen po lha brgyad kyi dkyil 'khor bshad pa'i phyir/ dpa' bo gdan la bzhengs nas ni/ /zhes pa nas ngan song thams cad yongs su dgrol bar byed do zhes pa'i bar gyis cho ga thams cad rgyas par bstan to/ /'jig rten las 'das pa'i dkyil 'khor sngar gsungs pa'i gnyis po'i dam tshig gi phyag rgya 'di nyid kyis bsgrub par bya'o zhes bstan pa'i phyir/de nas bcom ldan 'das phyag na rdo rjes zhes pa nas/ de nyid las bskyod pa ni mnyes pa'o zhes pa'i bar gyis rgyas par bstan to/ /gtsug tor dgu'i dkyil 'khor du dbang bskur ba'i slob ma la sgrub pa 'di lta bu sbyin par bya'o zhes bstan pa'i phyir/sku gzugs kyi cho ga yang zhes pa nas las thams cad bya'o zhes bya ba'i bar gyis bstan to/ /sangs rgyas kyi thugs rje chen pos 'gro ba'i don mdzad par gdon mi za ba dang /sngon gyi smon lam gyi mthu che ba nyid dang / dge ba dri ma med pa'i sems kyi skad cig ma'i phan yon dang las kyi rnam par smin pa'i 'bras bu 'byung ba 'di ni 'dra ba nyid do zhes bstan pa'i phyir/ de nas tshangs pa la sogs pa'i lha'i tshogs rnams kyis zhes pa nas/ lha'i 'khor 'di nyid de'i tshe de'i dus na 'khor du gyur to zhes pa'i bar gyis rgyas par bstan to//brgya byin la sogs pas bcom ldan 'das la skad chen po'i dbyangs kla klo'i skad kyis longs spyod phun sum tshogs pa 'di 'dra ba phul bas zhes bstan pa'i phyir/ de nas brgya byin dang tshangs pa la sogs pa zhes pa nas/kA li staM pa zhes pa'i bar gyis rgyas par bstan to/ /bsdus pa la dga' ba'i sems can la phan gdags pa dang / bshad pa bsdus pa'i dkyil 'khor tshe dpag tu med pa khyab pa 'byung ba zhes bya ba'i sngags kyis 'jig rten las 'das pa'i dkyil 'khor thams cad du 'dis dbang bskur bar bya'o zhes bstan pa'i phyir/brgya byin la sogs lha mchog rnams/ /zhes pa nas/ oM badzra A yu Sh+ye a zhes pa'i bar gyis kun rig rtsa ba'i dkyil 'khor las mtshon te cho ga thams cad rgyas par bstan to/ / tshe dpag med kyi dkyil 'khor du dbang bskur ba'i slob ma la cho ga 'dis tshe bsgrub par bya'o zhes bstan pa'i phyir/ de'i sgrub pa ni 'di yin te/ zhes pa nas bdag nyid sbyangs te btung ngam bza' bar bya'o zhes pa'i bar gyis bstan to/ /tshe dpag med sgrub pa dang / sgrub pa'i phan yon 'di 'dra ba nyid do zhes sgrub pa po dad pa bskyed pa'i phyir/mtshan mar ji lta ba bzhin du 'byung ba ni zhes pa nas/ the tshom med pa nyid do zhes pa'i bar gyis bstan to/ /'jig rten pa'i lha la mngon par dad pa'i sems can rnams la bde ba chen po bskyed pa'i phyir/ de nas rgyal po chen po bzhis zhes pa nas/ phyag rgya'i dbang ni bskur bar bya/ /zhes pa'i bar gyis rgyas par bstan to/ /rgyal po chen po bzhi'i dkyil 'khor du dbang bskur ba'i sems can de la de dag gis bkur sti dang rim gro 'di 'dra ba dag byed par dam bcas pa dag go zhes bstan pa'i phyir/de la sogs pa'i go rims kyis/ /zhes pa nas/ phyag na rdo rjes bslus gyur cig /ces pa'i bar gyis bstan to/ /phyogs skyong ba la mngon par dad pa'i sems can la bde ba bskyed pa'i phyir/ de nas phyogs bcu zhes pa nas ci ste nges pa ma lags na bcom ldan 'das rdo rje 'dzin pa nyid bslus par gyur cig ces pa'i bar gyis cho ga dang phan yon thams cad rgyas par bstan to//gza' dang skar ma la dga' ba'i sems can la bde ba bskyed pa'i phyir/ de nas gza' chen po brgyad dang zhes pa nas/ bdag cag gi lus bcom ldan 'das rdo rje 'bar bar gyur cig ces pa'i bar gyis cho ga dang phan yon thams cad rgyas par bstan to//klu la mngon par dad pa'i sems can rnams la bde ba bskyed pa'i phyir/ de nas klu chen po brgyad kyis zhes pa nas/ sbrul mgo'i phyag rgya smos ci dgos pa'i bar gyis cho ga thams cad rgyas par bstan to//'jigs byed chen po la mngon par dad pa'i sems can rnams la bde ba bskyed pa'i phyir/ de nas lha chen po rnams kyi bdag po zhes pa nas/ bdag cag gi spyi bo bcom ldan 'das kyi rdo rjes 'gas par gyur cig ces pa'i bar gyis dkyil 'khor gyi cho ga rgyas par bstan to//dbang phyug chen po rnams la mngon par dad pa'i sems can rnams la bde ba bskyed pa'i phyir/ de nas tshangs pa la sogs pa'i lha chen po rnams kyis zhes pa nas/ bdud rtsi'i zas dang bral bar gyur cig ces pa'i bar gyis cho ga thams cad rgyas par bstan to//sems can tshe thung ba dang bsod nams chung ba rnams tshe dang bsod nams dang ye shes kyi tshogs chen po bskyed pa'i phyir/ de nas bcom ldan 'das phyag na rdo rje zhes pa nas/ dngos grub rnams ni sbyin par bya/ /zhes pa'i bar gyis rtsa ba'i dkyil 'khor las mtshon te cho ga thams cad rgyas par bstan to//slob ma dam pa rnams la don thams cad grub par byed pa'i dngos grub 'di lta bu sbyin par bya'o zhes bstan pa'i phyir/ chos thams cad bdag med par zhes pa nas/ dngos grub gzhan lta smos kyang ci dgos zhes pa'i bar gyis bstan to//dam pa'i chos kyi che ba'i yon tan brjod pa las ma 'ongs pa'i sems can rnams 'jug par spro ba bskyed pa'i phyir/ de nas tshangs pa la sogs pa zhes pa nas/ bcom ldan 'das la rdo rje 'dzin pa bdag cag ni dkyil 'khor du 'jug par spro zhes pa'i bar gyis bstan to//sems can 'das pa dang da lta ba rnams sdig pa'i rgyud las 'di lta bur grol bar bya'o zhes bstan pa'i phyir/ de nas lha de dag gis zhes pa nas/ sdig pa chung ngu byas pa lta smos kyang ci dgos zhes pa'i bar gyis bstan to/ /'das pa'i sems can ngan song du song ba la phrin las rnam pa bzhi'i sbyin sreg 'di lta bus bya'o zhes bstan pa'i phyir/lha'i bu rnams zhi ba'i zhes pa nas/ myur du bde skyid 'grub par 'gyur/ /zhes pa'i bar gyis cho ga thams cad rgyas par bstan to/ /tshangs pa la sogs pa'i 'khor thams cad dam pa'i chos dang /de spyod pa'i sems can rnams la rim gro 'di lta bus byed pa de nyid kyi tshe dam bcas shing de la bcom ldan 'das kyis cher gdams pa 'di lta bus zhes bstan pa'i phyir/ de nas tshangs pa la sogs pa zhes pa nas/gang de dag la rim gro byas pa ni sangs rgyas bcom ldan 'das rnams la rim gro byas par 'gyur ro zhes pa'i bar gyis rgyas par bstan to/ /bcom ldan 'das phyag na rdo rje'i dkyil 'khor gyi phrin las rnam pa bzhi cho ga thams cad rgyas par bstan pa'i phyir/ de nas bcom ldan 'das phyag na rdo rjes zhes pa nas/dngos grub thams cad kyang sbyin no zhes pa'i bar gyis dkyil 'khor gyi cho ga thams cad rgyas par bstan to/ /bcom ldan 'das phyag na rdo rje'i snying po de nyid kyis phrin las bzhi'i lha'i sku phyag rgya chen po bskyed par bya'o zhes bstan pa'i phyir/de nas bde ba bskyed nas ni/ /zhes pa nas/ rdo rje las dang mnyam par 'gyur/ /zhes bya ba'i bar gyis bstan to/ /bde bar gshegs pa lnga dang ye shes kyi sems dpa' bcu drug gi phrin las rnam pa bzhi rigs dang rjes su mthun pa las 'grub par 'gyur ro zhes bstan pa'i phyir/de nas las rnams bshad bya ste/ /zhes pa nas/ de ma thag tu 'bar bar 'gyur/ /zhes pa'i bar gyis rgyas par bstan to/ /bshad pa'i rgyud 'di nyid tshangs pa la sogs pa rjes su yi rang ba 'di lta bu'o zhes bstan pa'i phyir/ de nas tshangs pa la sogs pa zhes pa nas/ brtag pa dam pa 'di bshad pa legs so zhes pa'i bar gyis bstan to/ /phyag rgya'i de kho na nyid yongs su shes pa las 'jig rten dang 'jig rten las 'das pa'i bar gyi phyag rgya thams cad bcing bar bya'o zhes bstan pa'i phyir/ de nas bcom ldan 'das phyag na rdo rjes zhes pa nas/ ut+pal ni sgrol mar dgongs/ /zhes pa'i bar gyis 'jig rten dang 'jig rten las 'das pa'i phyag rgya thams cad rgyas par bstan to/ /dpal rdo rje sems dpa'i rang gi ngo bo las phrin las rnam pa bzhi'i dkyil 'khor gyi las bstan pa dang /ye shes sems dpa' bcu drug gi sa bon dang de dag la phyag rgya bzhi pa'i dkyil 'khor dang ldan pa nyid kyi snying po thams cad 'di nyid kyis bya'o zhes bstan pa'i phyir/ de nas bcom ldan 'das phyag na rdo rjes zhes pa nas/ mngon spyod kyi phur bu brdung ba'i sngags bcu drug pa'i bar gyis rgyas par bstan to//bgegs kyi tshogs ma lus par gzhom par bya ba'i phyir/ rdo rje sems dpa'i khro bo rdo rje ma'i dkyil 'khor 'di lta bus bya'o zhes bstan par 'gyur ro/ /de nas lha rnams kun mgu nas/ /zhes pa nas/rang gi phyag rgya'i mtshan ma can/ /zhes pa'i bar gyis rgyas par bstan to/ /dkyil 'khor de nyid du mchod pa'i tshogs khyad par can 'di lta bu gzhag par bya'o zhes bstan pa'i phyir/ de nas bdud rtsis gang ba'i zhes pa nas/ /dkyil 'khor du ni mang du gzhag/ / ces pa'i bar gyis bstan to/ /khro bo'i dkyil 'khor de nyid du rdo rje slob dpon bdag nyid 'jug par bya'o zhes bstan pa'i phyir/ de nas slob dpon bdag nyid kyang / /zhes pa nas/ tshul du gnas nas 'byung bar bya/ /zhes pa'i bar gyis bstan to/ /drag po'i las la mngon par dad pa'i sems can rnams rdo rje slob dpon gyis slob ma la dbang bskur bar bya'o zhes bstan pa'i phyir/de nas slob ma bsdus nas ni/ /zhes pa nas 'dis dbang bskur ba zhes pa'i bar gyis bstan to/ /gang du tshe dpag med khyab par 'byung ba'i rdo rjer dbang ji tsam bskur ba de srid khro bo'i dkyil 'khor 'dir yang dbang bskur bar bya'o zhes bstan pa'i phyir/de bzhin du dbang bskur bya'o zhes pa'i tshig 'di nyid bstan pa'o/ /khro bo'i dkyil 'khor du dbang bskur ba'i slob ma de la khro bo'i rgyal po rnams 'grub par byed pa'i dngos grub 'di lta bu byin te bsgrub par bya'o zhes bstan pa'i phyir/de nas de dag bsgrub par bshad/ /ces pa nas/ de nas 'grub 'gyur gzhan du min/ /zhes pa'i bar gyis rgyas par bstan to/ /khro bo'i dkyil 'khor du zhugs pa'i gang zag des sems can gyi don bya ba'i phyir/ phrin las rnam pa bzhi ka yang spyad par bya'o zhes bstan pa'i phyir/ khro bo'i rgyal po las dngos su/ /zhes pa nas/ de yi ming nas smos nas ni/ /bzlas pa tshul bzhin bsam par bya'o/ /zhes pa'i bar gyis rgyas par bstan to/ /da ltar gyi/ sems can gyi don du phrin las rnam pa bzhi'i sbyin sreg gi las thams cad rtsa ba'i dkyil 'khor la brten te bya'o zhes bstan pa'i phyir/ de nas sbyin sreg bshad bya ste/ /zhes pa'i tshig de nyid kyis bstan to/ /sems can rnams kyi nad dang gnod pa dang sdug bsngal sna tshogs pa nye bar zhi bar bya ba'i phyir/zhi ba'i sbyin sreg 'di lta bu bya'o zhes bstan pa'i phyir/ de nas zhi ba'i thab khung zhes pa nas/ rgyal po rnams kyis nyis 'gyur tshad/ /ces pa'i bar gyis bstan to/ /de nyid du phyag rgya 'di lta bu bri bar bya'o zhes bstan pa'i phyir/ de nas rnam par sbyangs byas te/ /zhes pa nas/ dkyil 'khor du ni bri bar bya/ /zhes pa'i bar gyis bstan to/ /de nyid mchod pa'i yo byad 'di lta bu dang sreg rdzas 'di lta bu dang rnal 'byor 'di lta bus bya'o zhes bstan pa'i phyir/ dri zhim chus bkang kha dog dkar gyur la/ / zhes pa nas/ gdon mi za bar 'grub par 'gyur/ /zhes pa'i bar gyis rgyas par bstan to/ /de bzhin du sems can rnams kyi tshe dang longs spyod spel ba'i phyir rgyas pa'i sbyin sreg 'di lta bus bya'o zhes bstan pa'i phyir/ 'bras bur ldan pa'i nags tshal lam/ /zhes pa nas/zla ba yar gyi ngo ltar 'phel/ /zhes pa'i bar gyis cho ga rgyas par bstan to/ /sems can rnams kyis 'dod pa'i yon tan dbang du byed par 'dod na dbang gi sbyin sreg 'di lta bus bya'o zhes bstan pa'i phyir/ smad 'tshong khyim mam ma mo 'am/ /zhes pa nas/ rgyal po gtum po'i bran bzhin du//dbang du nges par 'gyur ba yin/ /zhes pa'i bar gyis cho ga thams cad rgyas par bstan to/ /sems can ma rungs pa gdug pa can 'joms par 'dod na/ mngon spyod kyi sbyin sreg 'di lta bus bya'o zhes bstan pa'i phyir/ shan pa'i gnas sam dur khrod dam//zhes pa nas/ tho bas bum pa bcom pa bzhin/ /nges par brlag par 'gyur ba yin/ /zhes pa'i bar gyis cho ga thams cad rgyas par bstan to/ /bcom ldan 'das phyag na rdo rje'i sku nyid kyis dkyil 'khor gyi 'khor la dang dbyer med pa'o zhes bstan pa'i phyir/de nas brgya byin la sogs lha/ /zhes pa nas/ rdo rje kun gtsang phyag 'tshal bstod/ /ces pa'i bar gyis bstan to/ /tshangs pa la sogs pa'i 'khor du 'dus pa thams cad kyis bcom ldan 'das la gus pa chen pos rjes su yi rang zhing brtag pa thams cad kyi mthar bshad pa'i rgyud 'di gyur ba'o zhes nges par bstan pa'i phyir//de nas tshangs pa dang brgya byin dang zhes pa nas bcom ldan 'das kyis gsungs pa la mngon par bstod do zhes pa'i bar gyis cho ga thams cad rgyas par bstan to/ /de dag gis ni bshad pa'i rgyud kyi bsdus pa'i don rdzogs so// //da ni rgyas pa'i don rnam par dbye bar bya ba'i phyir gzhung 'di nyid kyi don dgrol bar bya ste/ 'di skad bdag gis thos pa'i dus gcig na/ bcom ldan 'das lha thams cad kyi dga' ba'i tshal gyi mchog tu yid du 'ong ba nor bu dang gser gyi shing gi yal ga dang lo mar bcas pa dang /bai DUr+ya'i shing gel pa dang / nad thams cad rab tu zhi bar byed pa'i sman sna tshogs pa dang / me tog pad+ma dang / me tog ut+pal dang / me tog kar+Ni ka dang / me tog ba ku la dang / me tog ti la ka dang / me tog mya ngan 'tshang dang /me tog man+dA ra ba dang / man+dA ra ba chen po la sogs pa dang / dpag bsam gyi shing rnams kyis mdzes par byas shing / rgyan sna tshogs kyis brgyan pa/ bya mang po skad 'byin pa/ rnga dang cang te'u dang / ge kor dang gling bu dang rnga bo che la sogs pa'i sgra grag pa/ brgya byin dang tshangs pa lha dang lha'i bu mo sna tshogs pa mang po rnam par rtse ba sangs rgyas dang byang chub sems dpa' thams cad kyis byin gyis brlabs pa na brgya byin dang tshangs pa la sogs pa dang lha dang rig 'dzin dang / lha'i bu mo 'khor bye ba khrag khrig brgya stong du ma dang / gnod sbyin dang /sin po dang / lha ma yin dang / dri za dang / mi 'am ci dang lto 'phye chen po dang / klu la sogs pa'i 'khor du ma dang / gzhan yang dgra bcom pa dang / rgyun du zhugs pa dang rang sangs rgyas dang lan cig phyir 'ong ba la sogs pa khri phrag bcu dang /byang chub sems dpa' sems dpa' chen po bye ba khrag khrig brgya phrag la 'di lta ste/ byang chub sems dpa' sems dpa' chen po blo gros tshad med pa dang / blo gros mi g.yo ba dang / blo gros yangs pa dang / kun nas blo gros dang / blo gros mtha' yas pa dang /blo gros pad+ma dang / blo gros chen po dang / blo gros lha rdzas dang / byang chub sems dpa' sems dpa' chen po blo gros sna tshogs pa la sogs pa phyir mi ldog pa'i byang chub sems dpa' sems dpa' chen po mthar thug pa rnams kyis bsti stang du byed bla mar byed/ mchod cing rjed/ rab tu mchod cing spel te/ 'khor mang po'i nang na tshangs pa chen po pad+ma'i gdan la bzhugs te/ ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs so zhes gsungs pa la/ 'dir kha cig rtog pa rnam pa gnyis skye ste/'di ltar rgyud 'di ni brtag pa zhes gsung la/ de la brtag pa zhes bya ba ni dum bu'o/ /dum bu ni rgyun chags par gsung ba ma yin pas 'di skad bdag gis thos pa dang / bcom ldan 'das kyis gsungs pa la mngon par bstod do zhes pa ni rigs pa ma yin zhing gal te dang po'am zhabs dag yin na yang gang yang rung ba cig dag rigs so snyam pa dang /yang gang dag 'di ni brtag pa thams cad kyi tha ma yin pa'i phyir rdzogs pa'i tshig gsungs pa la/ 'di skad bdag gis thos pa ni 'di la 'dzug pa'i sems can rnams bde bar gshegs pas gsungs pa yin par dad pa bskyed pa'i phyir/slob dpon rnams kyis slad du bris pa'o zhes zer na/ de nas ni gzhung 'di nyid kyi don khong du ma chud par zad do/ /'di ltar bcom ldan 'das kyis ri rab kyi rtse mor rnal 'byor gyi rgyud chen po 'bum phrag bcu gnyis pa gsungs pa'i brtag pa rnam pa gnyis 'dir bkol ba ste/de la brtag pa dang po ni brtag pa thams cad kyi dang po yin pa'i phyir/ 'di skad bdag gis thos pa ni nges pa nyid do/ /brtag pa gnyis pa ni kun gyi tha ma yin pa'i phyir rdzogs pa'i tshig ni nges pa nyid do/ /de la gang dag 'di skad du/ / de lta na ni rnal 'byor gyi rgyud gzhan la'ang 'di skad bdag gis thos pa yod pa nyid do/ /thams cad dang por thal bar 'gyur zhe na/ de ni ma yin te kha cig tu phyogs gnyis pa ltar yang srid pa dang / rdo rje rtse mo la sogs pa med pa nyid kyi phyir ro/ /de la 'di skad bdag gis thos pa'i dus gcig na zhes pa ni sdud pa po'i tshig ste gsang ba pa'i bdag po lag na rdo rje 'khor rnams kyi gtso bor gyur pa des/bcom ldan 'das kyis lha'i gnas su gsungs pa'i dus de'i skad cig ma la gsan pa'i phyir na dus gcig na'o/ /de nas bde bar gshegs pa la gnas gyur pa la sogs pa mi mnga' na yang sems can le lo can dag brtson 'grus bskyed pa'i phyir/sprul pa'i sku mya ngan las 'das nas gsang sngags kyi sdud pa po dpal phyag na rdo rjes sems can rnams la bshad pa'i phyir bdag gis thos pa zhes pa ni chos kyi 'khor lo lan gnyis pa'i sgra'o//yang 'di ltar bcom ldan 'das kyis yum bzhi'i rgyud las/ 'di skad bdag gis thos tshig gis/ /'jig rten rmongs shing 'jig rten sgrol/ /zhes gsungs te/ de bas na 'di ltar e waM ma ya ni spyi'i rnam pa'i cha dang / rang gi ngo bo brjod pa'i chas dang po ni rnam par snang mdzad dang /sangs rgyas spyan no/ /gnyis pa ni rin chen 'byung ldan dang mA ma kI'o/ /gsum pa ni 'od dpag med dang gos dkar mo'o/ /bzhi pa ni don thams cad grub pa dang sgrol ma'o/ /gnyis pa'i thig le ni bcom ldan 'das mi bskyod par shes par bya ste/de dag ni thabs dang shes rab kyi ngo bor nges pa nyid du zhugs shing 'gro ba'i don ma lus par mdzad pa ni mtshan yang dag par brjod pa las kyang / mi mngon mi gsal snang byed min/ /mi 'gyur kun 'gro khyab pa po/ /zhes gsungs so/ /shru ta aka smin sa ma ye ni 'di ltar rang gi ngo bo nyid brjod pa las/dang po ni sgeg mo'o/ /gnyis pa ni glu mkhan ma ste/ de ltar rim pa ji lta ba bzhin du phreng ba ma dang / gar ma dang bdug pa ma dang / me tog ma dang / snang ba ma dang / dri ma rnams so/ / bcom ldan 'das rnam par snang mdzad de/ de lha'i yul thams cad pas mchog tu gyur pa'i gzhal yas khang na gzugs dang sgra dang dri dang ro dang reg bya la sogs pa 'dod pa'i yon tan lnga la dmigs pa med pa'i sku khyad par du 'phags pa longs spyod cing lha dang klu la sogs pa'i sems can thams cad mngon par rdzogs par 'tshang rgya bar bya ba'i phyir/sa la gnas pa'i byang chub sems dpa' blo gros zab mo tshad med pa rnams la ngan song thams cad yongs su sbyong ba'i rgyud gsungs pa dang / sum cu rtsa gsum gyi lha'i yul rnam par rgyal ba'i lho phyogs dpag tshad bcu gnyis na sems can thams cad kyi yid 'phrog pa rin po che'i tshal zhes bya ba yod de/de ni sa la gnas pa'i byang chub sems dpa' rnams kyis brgya byin lha'i dbang po shes rab kyi pha rol tu phyin pa nyan pa la lha ma yin gyi bar chad med par bya ba'i phyir byin gyis brlabs pa ste/de na gser gyi shing gi yal ga dang sman dang me tog dang / rgyan dang / bya dang / rol mo'i rnam pa dang / dpag bsam gyi shing dang / lha dang lha'i bu mo rnam par rol pa sna tshogs pa yod pa'i gnas su bcom ldan 'das kyis gnod sbyin dang srin po la sogs pa thams cad kyi 'khor dang ldan pa rnams la rgyud kyi rgyal po 'di bka' stsal to//de la tshangs pa chen po'i gdan kyang rnam pa gnyis te/ bla na med pa'i thugs rje chen po ni nyes pa'i skyon mtha' dag spangs pa shin tu rnam par dag pa ste/ de nyid la yang dag par bzhugs pa'o/ /'khor mang po ni skye ba rnam pa bzhis bsdus pa'i sems can dpag tu med pa ste/de dag gi dbus ni phyogs cha dang bral ba'i dbus so/ /yang rin po che'i tshal du mi mjed kyi bdag po dpal tshangs pas rang gi gdan ka ba bzhi ni be+e DUr+ya las byas pa 'og gzhi pad+ma rA ga las byas pa kha khyar ni gser las byas te gzhi ni spug las byas pa/mu tig la sogs pa rin po che sna tshogs pas mdzes par spras shing dril bu dang dar dpyangs kyis brgyan pa/ mche ba rnam par gtsigs pa'i seng ge brgyad kyis bteg pa/ rgyar rgyang grags gcig pa la dpangs su rgyang grags phyed pa cig gi steng du sum cu rtsa gsum gyi rdzing nas pad+ma dmar po 'dab ma stong dang ldan pa/reg na ka tsa lin+da ltar bde ba cig brtsigs te phul ba la bzhugs pa'o/ /'khor mang po ni byang chub sems dpa' la sogs pa'o/ /dbus ni de'i dkyil na ste/ de nas yang dag par zhugs pa'o/ /yang de'i tshe ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs so zhes gsungs pa la/ dper na mi gang dag gzhan gyi rdzas rku ba'i sems skyes pa la rkun po zhugs zhes pa dang 'dra bar bcom ldan 'das kyis sems can thams cad ngan 'gro'i rgyu las bsgral ba'i thabs la thugs mnyam par gzhag pa la snyoms par zhugs zhes pa ste/snyoms par ni rnam par rtog pa dang bral ba'i thugs mnyam pa nyid do/ /bzhugs pa ni thabs kyi khyad par gsungs pa la bzhugs pa kho na'o//yang de'i tshe ngan song gi rgyud las rnam par grol ba zhes bya ba byang chub sems dpa' sems dpa' chen po'i ting nge 'dzin sdud pa po'i 'od zer gyi phreng ba mang po nyid kyi dpral ba'i mdzod spu nas phyung ste/ de nas stong gsum gyi stong chen po'i 'jig rten gyi khams 'di thams cad kun du snang bar byas so zhes gsungs pa la ting nge 'dzin de lta bu las 'od zer 'di 'dra ba phyung ste/de la nyid ni bcom ldan 'das so/ /dpral ba ni shangs kyi gong ngo / /mdzod spu ni smin ma'i dbus nyid de/ de nas 'od zer zla ba'i mdog lta bu dpag tu med pa phyung ste/ de dag re re'i sna la byang chub sems dpa' sku mdog dkar po zhi ba'i cha lugs can/ phyag g.yas na rdo rje lcags kyu bsnams pa g.yon skyabs mdzad zhags pa dang ldan pa dag bzhugs pas/ sa 'og dang sa steng dang sa bla'i stong gsum gyi stong chen po'i 'jig rten gyi khams kun nas snang bar byas pa nyid do//de dag gis phrin las ji lta bu zhig mdzad ce na/ 'di ltar kun tu snang bar byas pas sems can thams cad kyi sems nyon mongs pa'i bcings pa las rnam par grol te bde ba so sor thob nas dga' ba'i tshal kun tu snang bar byas te/mchod pa'i sprin sna tshogs kyis mngon par mchod cing lan brgya phrag stong du bskor ba byas nas/ bcom ldan 'das la lan brgya phrag stong du phyag btsal te/ bcom ldan 'das kyi spyan sngar nor bu dri ma med pa'i steng du bkod de/ kye ma'o sangs rgyas kyi sangs rgyas//kye ma'o sangs rgyas mdzad pa legs/ /gang phyir ngan song bdag cag sbyangs/ /byang chub spyod pa nyid la gzhag /ces gsungs te/ de la 'dir kha cig ni sems can rnam par grol bas bde bar gshegs pa la drin du gzo ba'i tshig yin no zhe na/ de ni rigs pa ma yin te/phyi'i rgya mtsho chen po la ku sha'i rtse mo'i thigs pa tsam yang ma grol ba'i phyir gza' phur bu'i tshig bzhin no/ /'di la byang chub sems dpa'i 'od la bcom ldan 'das nyid kyis sems can rnams byang chub la bkod pa'i phyir/ byang chub sems dpa'i 'od zer te/ de rnams kyis sems can thams cad nyon mongs pa'i 'ching ba rnam par bkrol te/bde ba so sor thob pa'i dus kyi mtha'i skad cig mas mngon par byang chub pa la dgongs te gsungs pa/ dper na 'gu tshe'i sa bon la 'gu tshe yin no zhes gdags pa lta bu'o/ /de yang mi grol ba ni ma yin te/ gzhung 'di'i sa yongs su bkrol ba'i phyir 'gal ba ma yin pa nyid do/ /dga' ba'i tshal kun du gang bar byas pa ni byang chub sems dpa' de rnams kyis gang bar byas te/ mchod pa'i sprin kyang sprul bskor ba dang phyag kyang byas pa'o/ spyan sngar ni mdun no/ /nor bu dri ma med pa'i steng du bkod pa ni 'di ltar 'od zer de dag gis lha'i bu nor bu dri ma med pa la brten nas sems can thams cad la phan gdags pa'i phyir lha'i dbang po rang gi longs spyod dang lha ma yin gyi 'tshe bas g.yengs te/mi dran pa dag de'i sems bskul ba'i phyir/ lha'i dbang po brgya byin gyi snying la nor bu dri ma med pa'i 'di dran par byed pa la zhugs pa'o//de la gang dag 'di skad du bcom ldan 'das ni sems can kun la bu gcig pa'i pha ltar snyoms pa yin na sems can ngan song du song ba ji snyed cig yod bzhin du ci'i phyir lha'i bu nor bu dri ma med pa'i 'od kho na la dgongs nas gsungs snyam pa la/sangs rgyas bcom ldan 'das rnams ni 'brel pa'am rgyu ngo mtshar ba dag mi mnga' bar dam pa'i chos mi gsung la/ de yang gnod sbyin nam mi la sogs pa gzhan la gnod pa byed cing srog gcod pa rnams sum cu rtsa gsum gyi lha'i 'dod pa'i yon tan lngas mchog tu tshim zhing bde ba phun sum tshogs pa dang ldan pa rnams kyang 'di ltar 'gyur na/bdag cag lta smos kyang ci dgos snyam pa'i bsam pas brtson 'grus chen po bskyed pa'i phyir/ lha'i bu kho na la brten te gsungs so/ /kye ma sangs rgyas kyi sangs rgyas//kye ma'o sangs rgyas mdzad pa legs/ /zhes pa ni 'dir don rnam pa gsum du shes par bya ste/ de la gcig ni rgyud 'di nyid la ston pa rnam pa gsum gyis bshad de/ bcom ldan 'das rnam pa gsum la mngon par bstod pa'o/ yang 'dir de bzhin gshegs pa'i sku la bstod pa ni sangs rgyas kyi sprul pa'i skus 'gro ba'i don mdzad pa legs so zhes pa dang /sangs rgyas kyi gsung gis ngan song gi rgyud las sems can sgrol ba'i chos gsungs pa legs so zhes pa nas/ sangs rgyas kyi thugs byang chub kyi spyod pa nyid la gzhag pa legs so zhes so//yang 'dir de bzhin gshegs pa'i rgyud rin po che 'di la brten te snga rabs kyi sems can rnams kyang sangs rgyas la/ da ltar yang 'tshang rgya zhing phyi mar yang 'tshang rgya bar 'gyur ba ni legs so zhes dam pa'i chos la yang dag par ston pa nyid de/ de dag ni gleng gzhi ste dam pa'i chos kyi rgyu rnam par dag pa nyid do//de nas lha'i dbang po brgya byin gyis bcom ldan 'das la lan brgya phrag stong du bskor ba byas te phyag btsal nas 'di skad ces gsol to/ /bcom ldan 'das gang gi slad du sangs rgyas kyi 'od zer kun du snang bas ngan song gi rgyud las rnam par bkrol zhing grol ba'i lam la bzhag pas ni bcom ldan 'das ngo mtshar che'o//bde bar gshegs pa ngo mtshar che'o zhes gsungs pa la/ bcom ldan 'das kyis byin gyi rlabs kyi 'od zer gyis lha rnams kyi dbang po brgya byin gyi sems yongs su bskul ba las byang chub sems dpa' rnams kyis ngan 'gro yongs su sbyang ba'i tshig gsungs pa thos pa dang /snga na med pa'i byang chub sems dpa'i 'od zer mang po dag byung ba de 'dra ba'i rtags sam mtshan ma las 'bras bu'i chos dri bar bya ba'i phyir dam pa'i chos la bsnyen bkur bya ba dang /btsun par bya ba ni/ bcom ldan 'das la bskor ba dang phyag btsal te/ gang gi slad du zhes 'dri ba ni bde bar gshegs pa rnams rgyu dang rkyen mi mnga' bar 'dzum pa dang 'od zer mi 'gyed pas na rgyu gang gis slad du zhes 'dri ba'o//rnam par grol ba'i lam la gzhag pa ngo mtshar che ba ni 'jig rten gyi khams kyi sems can dpag tu med pa dag bsgral bar ji ltar spyod snyam pa'o/ /lan gnyis pa'i tshig ni shin tu yang ngo mtshar che ba'i don to/ /de dag ni gleng bslang ba ste/rkyen rnam par dag pa zhes bya'o/ /bcom ldan 'das kyis bka' stsal pa/ lha'i dbang po 'di ni ngo mtshar mi che'o/ /lha'i dbang po'i di ni ngo mtshar mi che ste/ sangs rgyas bcom ldan 'das rnams ni bsod nams kyi tshogs tshad med pa rnams yang dag par bsags pa'o zhes gsungs pa la/'di ni ngo mtshar mi che'o/ /'di ni ngo mtshar mi che ste zhes gsungs pa ni bcom ldan 'das kyis lha'i dbang po'i bsam pa yang dag par mkhyen nas/ de'i bsam pa bsgrub pa'i phyir/ /sangs rgyas kyi yon tan dpag tu med pa yod kyang 'dir rnam pa bcu zhig tu gsungs te/bsod nams kyi tshogs tshad med pa bsags pa'o zhes pa ni sbyin pa'i pha rol tu phyin pa yongs su rdzogs pa'o/ /lha'i dbang po yang dag par rdzogs pa'i sangs rgyas ni tshad med pa'i yon tan rin po che'i 'byung gnas su gyur pa'o zhes pa ni tshul khrims kyi pha rol tu phyin pa yongs su rdzogs pa'o//de ltar thabs tshad med pa yang dag par rdzogs pa'i zhes pa ni thabs kyi pha rol tu phyin pa yongs su rdzogs pa'o/ /shes rab tshad med pa bsags pa ni shes rab kyi pha rol tu phyin pa yongs su rdzogs pa'o//spyod pa tshad med pa spyad pa ni bzod pa'i pha rol tu phyin pa yongs su rdzogs pa'o/ /'dul ba'i skye bo tshad med pa rnams snod du gyur par mdzad pa ni bsam gtan gyi pha rol tu phyin pa yongs su rdzogs pa'o/ /mi mnyam pa dang mnyam pa'i ye shes dang ldan pa ni ye shes kyi pha rol tu phyin pa yongs su rdzogs pa'o//mi mnyam pa dang mnyam pa'i shugs dang ldan pa ni brtson 'grus kyi pha rol tu phyin pa yongs su rdzogs pa'o/ /mi mnyam pa dang mnyam pa'i rdzu 'phrul dang ldan pa ni stobs kyi pha rol tu phyin pa yongs su rdzogs pa'o//mi mnyam pa dang mnyam pa'i smon lam dang ldan pa ni smon lam gyi pha rol tu phyin pa yongs su rdzogs pa ste/ de ltar pha rol tu phyin pa bcu yongs su rdzogs shing rnam pa thams cad mkhyen pa'i ye shes dang ldan pa nyid yin pa'i phyir na mi rigs pa ma yin pa nyid de//dper na wa yis dpung gi tshogs yan lag bzhi po 'joms pa ni nus pa stobs dang mi ldan pas ngo mtshar la/ seng ges dpung gi tshogs 'pham par byed pa de la de'i stobs dang ldan pa'i phyir ngo mtshar mi che ba bzhin du/ de bzhin gshegs pas ni sangs rgyas kyi yon tan dpag tu med pa mnga' ba'i phyir ngo mtshar mi che'o zhes bya ba'i tha tshig go//lha'i dbang po de lta bas na sangs rgyas bcom ldan 'das rnams kyis snod ji lta ba bzhin du sems can gyi don mdzad pa dang / ji ltar 'dul ba bzhin du sems can gyi don mdzad pa dang /mos pa ji lta ba bzhin du sems can rnams kyi don mdzad pa yin par shes par bya ste/ 'di la som nyi dang the tshom dang yid gnyis ma byed cig /gang de bzhin gshegs pa rnams kyis 'dul bar mi 'gyur ba'i gnas ni gang yang med do zhes gsungs pa la//lha'i dbang po'i sems kyi rtog pa thugs kyis mkhyen te/ 'bras bu'i don la 'bad pa nyid du spro ba yang dag par bskyed pa ste/ de la snod ji lta ba bzhin du sems can gyi don mdzad pa ni rigs ji lta ba bzhin te nyan thos kyi rigs can rnams la 'phags pa'i bden pa bzhi la sogs pas don mdzad pa dang /rang sangs rgyas kyi rigs can rnams la rten cing 'brel par 'byung ba bcu gnyis la sogs pas don mdzad pa dang / theg pa chen po'i rigs can rnams la chos thams cad stong pa nyid la sogs pas don mdzad pa nyid dang /rigs ma nges pa rnams la mtho ris dang bde 'gro la sogs pa'i don ston cing don yang dag par mdzad pa nyid do/ /ji ltar 'dul ba bzhin du sems can rnams kyi don mdzad pa ni lha yis 'dul ba rnams la lha'i dbang po brgya byin gyi gzugs kyis chos ston cing 'gro ba'i don mdzad pa lta bu'o//mos pa ji lta ba bzhin du sems can rnams kyi don mdzad pa ni khrus dang / gtsang sbra la mos pa rnams la de la brten nas yon tan dang 'bras bu dang phan yon sna tshogs pa gsungs zhing / sangs rgyas kyi sa la yongs su 'god pa dang /de ltar klag pa la dga' ba rnams la de'i phan yon yang sna tshogs pa gsungs pa dang / bzlas pa la dga' ba dang / sgom pa la dga' ba dang / sbyin sreg la dga' ba dang / 'dod chags chen po la dga' ba rnams la de dag so so'i phan yon yang sna tshogs pa gsungs zhing /de dag la brten nas rnam par grol ba'i thabs yang dag par ston pa'i sems can gyi don mdzad pa nyid do/ /de lta bas na de bzhin gshegs pa dgra bcom pa yang dag par rdzogs pa'i sangs rgyas ni thabs sna tshogs pa dang ldan pa'i phyir 'dul bar mi 'gyur ba'i skye bo gang yang med pas de la som nyi ma byed cig ces pa ni the tshom rnam par gcod pa'i tshig ste/de dag ni lan gyi rgyu rnam par dag pa zhes bya'o/ /de nas yang lha'i dbang po brgya byin rang gi stan las langs nas bcom ldan 'das la mchod pa rgya che zhing bla na med pa dag byas te/phyag 'tshal nas bcom ldan 'das la 'di skad ces gsol to/ /sems can thams cad la phan pa nyid du bgyi ba dang sems can thams cad la snying brtse ba nyid du bgyi ba dang / snying rje chen por bgyi ba dang / bsam pa thams cad yongs su rdzogs par bgyi ba'i slad du/bcom ldan 'das bdag spobs pa bskyed du gsol/ bde bar gshegs pa bdag spobs pa bskyed du gsol zhes pa ni brgya byin gyi rang gi 'khor gyi dbus kyi stan las yang dag par langs te/ rang gi bsam pa bsgrub pa'i phyir de bzhin gshegs pa la lha'i me tog dang /bdug pa la sogs pa bla na med pa'i mchod pa bzang pos yongs su mchod nas bag tsha ba med pa dang zhum pa med par bya ba'i phyir zhu ba yang dag par gsol ba'i tshig ste/ de la sems can thams cad la phan pa nyid du bgyi ba dang zhes pa ni bdag gi don las yang dag par brtsams te/de'i thabs kyis ma 'ongs pa'i sems can thams cad bla na med pa yang dag par rdzogs pa'i byang chub par bya ba'i phyir ro/ /sems can thams cad la snying brtse ba nyid ni las kyi rnam par smin pa'i 'bras bu dag shes pa las 'gro ba thams cad la snying rje'i sems yang dag par bskyed pa nyid do//snying rje can ni ldan pa'i tshig ste/ rgyun mi 'chad par skye ba nyid do/ /snying brtse ba chen po ni byang chub kyi sems bla na med pa skye ba nyid do/ /bsam pa thams cad yongs su rdzogs par bgyi pa ni bla na med pa yang dag par rdzogs pa'i byang chub thob par bya ba'i phyir bdag la skabs dbye bar gsol zhes pa'i tha tshig go//de nyid gus pa dang bcas pa'i tshig ste/ dper na 'khor los sgyur ba'i rgyal po la yul 'khor gyi blon po rnams kyi 'jigs pa dang bcas ngo tsha ba dang bcas/gus pa dang bcas pas lha bdag la zhu ba'i tshig gcig mchis pas gnang 'tshal zhes pa la sogs pa bzhin te/ de dag ni lam gyi rkyen rnam par dag pa zhes bya'o/ /bcom ldan 'das kyis bka' stsal pa/ lha'i dbang po ci ste dus la bab par shes na legs par nyon la yid la zung cig /ngas khyod la ci 'dod pa bshad do zhes gsungs pa ni bcom ldan 'das kyis kye lha'i dbang po zhes snyan pa dang bcas pa'i tshig gis bos nas khyod ci 'dod pa dris pa'i lan ngas legs par bshad cing khyod kyis bsam pa bskang bar bya'o zhes gnang ba legs par byin pa'i tshig ste/de la dus la bab par shes na zhes pa ni dri ba'i rgyu'i dus la bab pa yod na zhes pa'i tha tshig go/ /legs par nyon la yid la zung zhes bya ba ni lus dang ngag gi spyod pa kun nas bsdams te/ sems rtse gcig tu gyis la sems can thams cad la phan pa'i phyir rna ba gtod cig ces pa kho na'o//lha'i dbang pos gsol pa/ bcom ldan 'das 'di ni dus la bab pa lags so/ /bde bar gshegs pa 'di ni dus la bab pa lags te zhes pa ni lha rnams kyi dbang po brgya byin bde bar gshegs pa thabs tshad med pa dang /rdzu 'phrul tshad med pa dang / rnam pa thams cad mkhyen pa'i ye shes dang ldan pas rang gi lha'i bu nor bu dri ma med pa'i 'od yid la gces pa de gang na gnas pa dang bde ba'am sdug bsngal ci 'dra ba zhig myong bar 'gyur ba dang /phyis 'di dang phrad dam mi phrad pa 'dri ba'i dus la bab pa yin pa'i phyir te/ de la dus ni rnam pa gnyis so/ /gcig ni lha'i bu de shi ba'i dus tshod la dus zhes bya ba dang / gcig ni rang kun nas slong bar byed pa'i sems bskyed pa'i dus la dus zhes bya ste/lan gnyis pa'i tshig go/ /ston pa dang bskul ba dang / gzhug pa la sogs pa ni shugs kyis go bar bya ste/ lha'i dbang po ni ma yin no/ /bcom ldan 'das sum cu rtsa gsum lha'i gnas nyid nas lha'i bu nor bu dri ma med pa'i 'od ces bgyi ba zhig shi 'phos te dus las 'das nas dgung bdun lags na/bcom ldan 'das de gang du skyes/ bde ba dang sdug bsngal ni des ci 'dra ba zhig myong bar 'gyur ba bcom ldan 'das lung bstan du gsol/ bde bar gshegs pa lung bstan du gsol zhes bya ba la sum cu rtsa gsum lha'i yul na lha'i dbang po brgya byin gyi blon po rnams kyi nang na mchog tu gyur pa gser 'od kun du snang ba zhes bya ba zhig yod de/de'i btsun mo ni grags ldan sha ri can zhes bya ste/ de dag gi bu lnga bcu rtsa lnga'i nang nas thon bur gyur pa gzugs bzang ba mdzes pa blta na sdug pa/yid du 'ong ba lha thams cad dang yid mthun pa/ lag pa g.yas pa'i rgyab na ri mo dmar po'i yi ge na'i gzugs su snang ba yod pas lha'i dbang po brgya byin gyis dus thams cad du mdun du 'jog pa tha na lha ma yin rnams kyis kyang de mthong na zhe sdang zhi bar 'gyur ba dge ba dri ma med pa'i sems skad cig ma las grub pa lo sum brgya lon pa nor bu dri ma med pa'i 'od ces bya ba de shi nas zhag bdun 'das pa de yid la gces pa'i phyir dri ba ste/de la gang du skyes zhes pa ni gnas 'dri ba'o/ /bde ba'am sdug bsngal ci 'dra ba zhig myong zhes pa ni tshor ba 'dri ba'o//lung bstan du gsol zhes pa ni bshad du gsol zhes bya ba ste/ lan gnyis pa ni nan tan ched cher bya ba kho na'o/ /bcom ldan 'das kyis bka' stsal pa/ lha'i dbang po lha'i bu nor bu dri ma med pa'i 'od ces bya ba de 'di nas shi 'phos nas mtshams med pa'i sems can dmyal ba chen por skyes te/des der lo stong phrag bcu gnyis kyi bar du sdug bsngal ma rungs shing mi bzad pa myong nas/ sems can dmyal ba chung ngu rnams su yang lo brgya phrag brgyar sdug bsngal myong zhing /byol song dang yi dags kyi skye gnas su yang lo brgya phrag brgyar sdug bsngal myong nas/ mtha' 'khob kyi mir skyes nas yang 'on pa dang / dig pa dang / lkugs pa'i rang bzhin can dang / smra mi gsal bar lo stong phrag bcu'i bar du gnas pa dang / lo stong phrag brgyad cu rtsa bzhi'i bar du rnag khrag 'dzag pa dang / mdze dang phol mig rnams kyis gzir ba dang / skye bo mang pos smad pa dang mi yongs kyis smad pa dang / rigs dma' ba'i rigs can rnams rjes su myong zhing sdug bsngal brgyud pa dang gzhan la gnod pa byed pa dang /las kyi sgrib pa bar chad byed pa rnam pa sna tshogs dang / gzhan yang sdug bsngal gcig nas gcig tu brgyud pa myong zhing myong bar 'gyur ro zhes gsungs pa la/ de dag thams cad ni de bzhin gshegs pa'i dgongs pa rnam pa gsum du go bar bya ste/de la gcig ni lha'i bu des lha'i tshe snga rol du mtshams med pa'i sdig pa chen po byas pa'i 'bras bus mtshams med pa'i dmyal ba chen por skyes pa dang / de dang nye ba la sogs pa'i sdig pa byas pa'i 'bras bus byol song dang / yi dags la sogs pa'i gnas su skye ba dang /gzhan la gnod pa byas pa la sogs pa'i 'bras bus lus rnag khrag la sogs pa nad sna tshogs kyis gzir bar skye bar bstan pa'o/ /gcig ni ma 'ongs pa'i sems can nyon mongs pa'i dbang du gyur pa rnams skrag cing sngangs pas bde bar gshegs pa'i bka' rin po che 'di la yang dag par bskyab tu gsol bar bya ba'i phyir ro//gcig ni dri ba po 'di la sogs pa nyid 'dod pa'i yon tan lngas mngon par g.yengs pa rnams skyo ba bskyed pa'i phyir rgyu mi dge ba'i rnam par smin pa'i 'bras bu de dag gsungs pa ste/ de la mtshams med pa ni bar chad med pa zhes bya ste/ der bde ba'i rnam pa skad cig tsam yang mi myong ba'i phyir ro/ /des zhes pa ni lha'i bu ste/ der zhes pa ni mtshams med pa'i gnas su'o/ /lo ni rnam pa lnga ru go bar bya ste/ dmyal ba'i lo dang / yi dags kyi lo dang /byol song gi lo dang / lha'i lo dang / mi'i lo'o/ de la lha la sogs pa rnams kyis ni lha'i lor go ba ste/ de la sum cu rtsa gsum pa'i lha'i lo ni mi'i lo brgya la zhag gcig tu brtsis pa'i sum cu phrag bcu gnyis la lo gcig tu brtsis pa'i lo stong phrag bcu gnyis ni lha'i tshe rabs bcu gnyis su go bar bya'o//dmyal ba chen por skye zhes pa ni dmyal ba'i lor go bar bya ste/ dmyal ba mnar med pa chen po'i lo ni rgyal chen rigs bzhi'i tshe tshad la nyin zhag gcig tu brtsis pa'i bar gyi bskal pa gcig ste der yongs su skye ba nyid do/ / dmyal ba chung ngu rnams su ni ngu 'bod la sogs pa rang rang gi los gnas pa nyid do/ /dud 'gro rnams kyis ni mi las mtshon par bya ste/ nges pa med pa nyid do/ /yi dags kyi skye gnas su zhes pa ni yi dags kyi lo ste/ de dag gi lo ni mi rnams kyi zla ba gcig la nyin zhag gcig tu brtsis pa'i sum cu phrag bcu gnyis lor brtsis pa ste/brgya phrag brgya ni yi dags kyi tshe rabs brgya'o/ /sdug bsngal ni tshor ba mi bde ba ste gdung ba drag po can no/ /de dag las thar nas kyang mi'i 'gro ba mtha' 'khob kyi mir skyes te/ dbang po ma tshang bar yang 'gyur ba'o//de nas ma rabs la sogs pa'i rigs su skyes na yang / de'i lus la nad sna tshogs pa mang pos gzir bar skye ba dang / yan lag med pa dang / gzhan yang gnod pa byed pa ya rabs kyi tshul ma yin pa bya gshor ba dang / ri dgas gshor ba dang /nya gshor ba la sogs pa byed de/ de la skye bo mang pos smod pa ni phal gyis smod pa'o/ /yongs kyis smod pa ni thams cad kyis smod pa ste rigs pa ma yin pa'i las byed do zhes zer ro/ /rigs dma' ba ni shan pa la sogs pa'i rigs su skye bar 'gyur ba ste/ sdug bsngal brgyud pa ni/ lcags sgrog tu bcings ba dang / mtshon gyis phug pa dang / mes tshig pa la sogs pa dpag tu med pa myong bar 'gyur ba ste/ de ni cung zad mtho ba'i rigs la dgongs pa'o/ /de nas brgya byin la sogs pa lha'i bu rnams kyis thos nas shin tu skrag cing sngangs te skyo nas khas bub tu 'gyel lo//zhes bya ba ni dper na mi gang dag rgyal po cig rigs pa ma yin pa'i las kyis bsad pa'i gtam thos nas shin tu skrag cing sngangs te skyo ba bzhin du lha rnams kyi nang na mchog dang 'dra ba yang 'di 'dra ba'i sdug bsngal myong ba 'di ci 'dra ba zhig snyam pas de la chags pa'i gdung ba dang /rang rang gi rgyud la bag tsha ba'i 'jigs pas khas bub tu 'gyel lo/ /de nas yang 'di skad ces gsol to/ /bcom ldan 'das sdug bsngal chen po brgyud pa de las ji ltar na thar par 'gyur/ bde bar gshegs pa ci ltar thar bar 'gyur/bcom ldan 'das ci nas kyang sdug bsngal gyi phung po de 'dra ba las rnam par grol bar 'gyur ba 'di bskyab par gsol/ bde bar gshegs pa 'di rab tu bskyab par gsol/ /zhes pa ni dper na bu yid du 'ong ba dag nad gdug pa can drag pos zin pa la ma brtse ba dang ldan pa dag sman pa mkhas pa rnams la nad 'di las skyes bu chen po khyod kyis bskyab par gsol/'di las thabs ji lta bus thar bar 'gyur ba ni gang lags zhes 'dri ba dang 'dra bar lha rnams kyi dbang po brgya byin gyis bcom ldan 'das lha'i bu de la brtse ba dang gdung ba'i phyir dang /gang dag de 'dra ba'i sdug bsngal gyi 'jigs pa med par bya ba dang / ma 'ongs pa'i sems can la phan gdags pa'i phyir/ sdug bsngal chen po de las thar bar 'gyur ba'i thabs ni ji lta bu dag gis thar bar 'gyur 'di las dus gsum du gnas pa'i sems can rnams bskyab par gsol zhes gdung ba dang bcas pas gsol ba 'debs pa ste/lan gnyis pa ni ches cher bya ba'i tshig go/ /bcom ldan 'das kyis bka' stsal ba/ lha'i dbang po sangs rgyas bye ba phrag brgyad cu rtsa bzhis bshad pa 'di ngas kyang bshad kyis nyon cig ces pa ni bcom ldan 'das kyis dus gsum du gnas pa'i sems can rnams bsgral ba'i phyir dam pa'i chos kyi che ba'i yon tan phul du phyung nas gnang bar spro ba bskyed pa ste de la sangs rgyas bye ba phrag brgyad cu rtsa bzhis bshad pa zhes pa ni 'dir gnyis su go bar bya ba ste/gcig ni dam pa'i chos 'di nyid la mchog tu spro ba dang dang ba dang 'jug pa'i rgyu chen por gsungs so/ /gcig ni dus gsum gyi de bzhin gshegs pa thams cad kyis lus dang ngag dang yid rnam par dag pa las yang dag par rdzogs pa'i byang chub 'grub pa'i chos gsungs te/de bzhin du dam pa'i chos 'di nas gsungs pa'i phyir bshad pa bshad kyis zhes bya ba'o/ /de la nyon cig ces bya ba ni/ rna ba gtod pa'i ched du sgrubs shig ces bya ba'i don to//de nas lha'i dbang po brgya byin gyis yang bcom ldan 'das la lha'i me tog man+dA ra ba dang / man+dA ra ba chen po dang / me tog sna tshogs pa dang / rin po che'i dbu rgyan dang phyag gdub dang / dpung rgyan dang / snyan cha dang / do shal dang / se mo do la sogs pa rgyan gyi khyad par sna tshogs kyis mngon par mchod de lan brgya phrag stong du mar bskor bar byas shing phyag 'tshal nas/ bcom ldan 'das legs so/ /bde bar gshegs pa legs so zhes bya bas mnyes par byas nas/ bcom ldan 'das lha dang bcas pa'i 'jig rten la phan pa dang bde bar bgyi ba dang /ma 'ongs pa'i sems can ngan song gi rgyud gsum las rnam par thar bar bgyi ba'i slad du legs par bshad du gsol zhes bya ba ni lha'i dbang po brgya byin bcom ldan 'das kyis rang gi 'dod pa'i bsam pa skong ba dang /dam pa'i chos rgya chen po gsungs pa la yang dag par rjes su yi rang ba'i dga' bas lha'i mchod pa bla na med pa rnams kyis mngon par mchod de rab tu dga' ba'i tshig phul te/ de la man+dA ra ba dang man+dA ra ba chen po ni lha'i me tog gi khyad par ro//rnam pa sna tshogs pa ni thun mong gi me tog ut+pal la sogs pa'o/ /dbu rgyan ni dbu la'o/ /gdu bu ni phyag gi mkhrig ma la'o/ /dpung rgyan ni dpung pa'i rtsar ro/ /snyan cha ni snyan gyi shal gyi nang du'o/ /do shal ni mgul du'o/ /se mo do ni se ral khar yang dag par phul ba dang /rgyan gyi khyad par sna tshogs pa ni sor gdub dang / rkang gdub dang / chu khor la sogs pas dam pa'i chos dang / ston pa po rnams btsun par bya ba dang / mnyes par bya ba'i phyir mchod pa ste/ legs so zhes pa'i tshig gsum po ni dga' ba dang /rab tu dga' ba dang / mchog tu dga' ba skyes pa'i don to/ /lha dang bcas pa ni mi la sogs pa'i 'jig rten thams cad de/ de dag la phan pa ni sdug bsngal las thar ba'o/ /bde ba ni bla na med pa yang dag par rdzogs pa'i byang chub thob par bya ba'i phyir zhes bya'o//ma 'ongs pa'i sems can ni skye ba phyi ma rnams te/ de dag ngan song gsum gyi rgyu ni dmyal ba dang yi dags dang dud 'gro'o/ /de las rnam par thar bar bgyi ba'i slad du thabs bla na med pa bshad du gsol zhes pa ste/ dus rnam pa gsum ni rgyu la bsams te smras pa'o//de nas tshangs pa la sogs pa mang po rnams kyis 'di skad ces gsol to/ /legs so bcom ldan 'das legs so bde bar gshegs pa ci nas kyang ma 'ongs pa'i sems can rnams kyis mtshan tsam thos pas kyang ngan song gsum gyi lam las rnam par grol te/bde 'gro lha'i 'jig rten nam mi'i 'jig rten du skyes nas bla na med pa yang dag par rdzogs pa'i byang chub thob par bgyi ba'i slad du bshad du gsol zhes pa ni 'dir tshangs pa dang khyab 'jug la sogs pa thams cad 'dus pa'i 'khor mang po rnams kyis dus gnyis la bsams te byin rlabs mchog tu che ba dag gis sdug bsngal gsum las grol te/bde ba dang bde ba bla na med pa yongs su thob par bya ba'i phyir dga' ba'i tshig gis zhu ba gsol ba ste/ de la kha cig ni 'dir 'khor 'dus pa'i tshogs der 'khor rnams kyi gtso bor byang chub sems dpa' rnams kyis ni ma zhus la brgya byin la rgyu yod pa'i phyir zhus te/de la brgya byin gyis zhus pas chog mod tshangs pa la sogs pas zhu ba'i skabs ni ma yin te/ dgos pa med pa'i phyir ro zhes zer na/ de ni 'di ltar byang chub sems dpa' rnams kyis ni de ji lta ba bzhin du mkhyen la/brgya byin ni bcom ldan 'das nyid kyis lha'i bu la rten bca' ba'i phyir 'od zer gyis bskul ba nyid do/ /tshangs pa la sogs pa'ang 'dir dam pa'i chos bla na med pa gsungs pa la ma gus pa med pa'i phyir dang /rjes su yi rang bar bya ba'i phyir dang / skyes bu dam pa rnams legs pa dang snyan pa'i tshig thos na ha cang mi smra bar 'dug pa'i rigs ma yin pas na legs so legs so zhes pa'i tshig gnyis pa ni dga' ba dang / mchog tu dga' ba'o/ /ci nas kyang zhes pa ni rnam pa thams cad kyi sgo nas zhes pa'o//ma 'ongs pa'i sems can ni skye ba phyi ma rnams zhes pa'i don to/ /mtshan tsam thos pas kyang zhes pa ni byin gyis brlabs pa dang / yon tan dam pa'i chos gzhan las khyad par du 'phags pa mnga' ba'i chos te/ dper na sman thams cad kyi mchog tu gyur pa hu lu hu lu zhes bya ba'i ming tsam brjod pa'am thos pas srin bu ma rungs pa kum bi tas zin pa dag de'i sdug bsngal las thar bar 'gyur ba bzhin du de bzhin gshegs pa'i mtshan tsam thos pas kyang ngan 'gro'i sdug bsngal las thar bar 'gyur ba'i byin gyi rlabs khyad par du 'phags pa dag gis ngan song gsum gyi lam las rnam par grol te/bde 'gro'i gnas su dam pa'i chos yongs su spyad pa las bla na med pa yang dag par rdzogs par byang chub par bya ba'i phyir bshad du gsol zhes pa ste/ de dag gis ni rkyen rnam par dag pa zhes bya'o/ /de nas bcom ldan 'das kyis brgya byin dang tshangs pa la sogs pa lha'i bu de dag de bzhin gshegs pa thams cad kyi snying po 'dis byin gyis brlab pa'i phyir/ gdon mi za ba'i rdo rje'i byin gyi rlabs zhes bya ba'i ting nge 'dzin la snyoms par zhugs so//snyoms par zhugs nas kyang gdon mi za bar mi choms pa'i rdo rje'i byin gyi rlabs zhes bya ba'i snying po 'dis byin gyis brlabs so/ /oM badzrA d+hiSh+Tha na dz+nyA na sa ma ye hUM zhes pa ni 'di ltar theg pa chen po gsang sngags bla na med pa'i dkyil 'khor chen po gsungs pas na/de dag snod du rung bar bya ba'i phyir byin gyis rlob pa nyid do/ /de la bcom ldan 'das kyis brgya byin dang tshangs pa la sogs pa'i lha dang klu dang lha ma yin la sogs pa'i 'khor bye ba khrag khrig dpag tu med pa rnams theg pa chen po gsang sngags kyi dbang dam pa bskur ba'i phyir gdon mi za ba'i rdo rje'i byin gyi rlabs zhes bya ba'i ting nge 'dzin la snyoms par zhugs so//de la ting nge 'dzin des lha la sogs pa'i sems can thams cad gsang sngags kyi snod du gdon mi za bar byin gyis rlob cing / de la sku gsung thugs kyi rdo rje nges par 'grub pa dang / sems can thams cad the tshom mi za bar ngan 'gro'i rgyud las thar zhing gnyis su med pa'i ye shes rdo rje lta bu thob par byed pa'i ting nge 'dzin de la gdon mi za bar rdo rjes byin gyi rlabs zhes bya ste/ tshangs pa la sogs pa'i tshig gi 'bras bu'ang de nyid du sbyar ro/ /de la ting nge 'dzin de lta bu las gsang sngags de 'dra ba dag gsungs pa ni de bzhin gshegs pa thams cad kyi snying po gdon mi za bar mi tshoms pa'i rdo rje zhes bya ba'i snying po ste/ oM badzrA d+hiSh+Tha na dz+nyA na sa ma ye hUM zhes pa'o//de la da ni dper na mi gang dag rang gi sems la gang bsams pa dang mthun pa'i tshig smras pa bzhin du de bzhin gshegs pa yang mnyam par gzhag pa dang mthun pa'i snying po gsung pa kho na'o/ /de bzhin gshegs pa thams cad ni phyogs bcu dus gsum na bzhugs pa'i sangs rgyas rnams te/de dag ni phyag rgya bzhi las grub pa'o/ /'dir yang bcom ldan 'das kyis phyag rgya bzhis 'khor du 'dus pa thams cad byin gyis brlabs te/ byin gyis brlabs pa ni rung bar bya ba'i phyir dbang zhes pa kho na'o/ /de la gang dag phyag rgya bzhi ji ltar mngon zhe na 'di ltar/oM dang rdo rje ni phyag rgya chen po'o/ /byin gyis brlabs pa ni las kyi phyag rgya'o/ /ye shes ni chos kyi phyag rgya'o/ /dam tshig dang hUM ni dam tshig gi phyag rgya ste/ de ltar 'khor 'dus pa thams cad phyag rgya bzhis dbang bskur ba nyid do//yang de bzhin gshegs pa thams cad ni sku gsung thugs kyi dbang las sku gsum mngon par 'grub pa ste/ de la oM ni lus kyi dbang ste/ lus rnam par dag pa'i snod du byas pas longs spyod rdzogs pa'i sku mngon par 'grub pa nyid do/ /AHni ngag gi dbang ste/ngag rnam par dag par byas pas sprul pa'i sku mngon par 'grub pa nyid do/ /hUM ni yid kyi dbang ste/ yid rnam par dag par byas pa las chos kyi sku mngon par 'grub pa nyid do/ /yang 'dir de bzhin gshegs pa thams cad ni dbang bcus yang dag par rdzogs pa'i sangs rgyas mngon par grub pa ste/de bzhin du 'dir yang lha la sogs pa la dbang bcus dbang bskur ba nyid do/ /de ltar oM ni ye shes lnga'i ngo bos rigs lngar thams cad la shes par bya la de la badzra ni sangs rgyas kyi dbang ngo / /a ni bum pa'i dbang ngo / /d+hi ni gzugs kyi dbang ngo //Sh+Tha ni phyag rgya'i dbang ngo / /na ni las kyi 'khor lo'i dbang ngo / /dz+nyA ni 'khor lo'i dbang ngo / /na ni bdag po'i dbang ngo / /sa ni gsang ba'i dbang ngo / /ma ni phreng ba'i dbang ngo / /ye ni thabs dang shes rab kyi dbang ngo / /de la hUM ni dam tshig gi dbang ste spyir khyab par bstan to//de ltar 'khor 'dus pa thams cad la de bzhin gshegs pa'i byin gyi rlabs kyis dbang thams cad rdzogs par dbang bskur nas snod du rung bar byas nas/ rig sngags dang gsang sngags thams cad kyi dkyil 'khor chen po yongs su gsungs te/des ni gang dag mi shes pa rnams ngan song sbyong ba'i rgyud 'di ni bcom ldan 'das kyis lha la sogs pa'i 'jig rten thams cad 'khor du bsdus nas gsungs pa'i phyir da ltar yang dbang ma bskur bar thams cad la bshad du rung ngo zhes pa de yang gsal lo/ de nas yang bcom ldan 'das kyis ngan song thams cad yongs su sbyong ba'i rgyal po zhes bya ba/ de bzhin gshegs pa thams cad kyi snying po 'di thugs ka nas phyung ngo / /oM sho d+ha ni sho d+ha ni/ sarbA pA paM bi sho d+ha ni/ shud+d+he bir shud+d+he sar+b+ba karma A ba ra Na bi shud+d+he swA hA/ rig sngags chen po 'di bshad ma thag tu sems can thams cad ngan song gi rgyud kyi 'ching ba thams cad rnam par gcod do//ngan 'gro thams cad rnam par sbyangs so/ /sdug bsngal mi zad pa rnams rab tu zhi ste/ skye bo mang po rnams bde ba dang ldan par gyur to zhes pa ni dang po'i sngags gcig pos dam tshig yongs su bkod do/de nas mngon par rtogs pa la bkod pa'i phyir de bzhin gshegs pa'i rigs kyi de bzhin gshegs pa thams cad kyi rtsa ba'i sngags gsungs pa ste/ de la de bzhin gshegs pa thams cad ni de bzhin gshegs pa'i rigs kyi de bzhin gshegs pa thams cad do//ngan song thams cad yongs su sbyong ba ni sdig pa thams cad yongs su sbyong ba nyid do/ rgyal po ni 'khor los sgyur ba'i rgyal po ste de dag go/ /'khor los sgyur ba ni bcom ldan 'das rnam par snang mdzad nyid do//rang nyid de thugs ka'i nu ma gnyis kyi bar nas bcom ldan 'das nyid ci 'dra ba'i cha lugs can phyogs bzhir zhal bzhi dang ldan pa thams cad nas sku rigs dang mthun par ston cing rig pa chen mo de gsungs shing phyung ste/ de la rig pa ni 'di yin no//de la gsang sngags la sogs pa sngags thams cad kyi slad du/ oM smos pa'i dgos pa ni rnam pa gsum ste/ gcig ni phyogs bcu dus gsum gyi bde bar gshegs pa thams cad la mchod pa'i yo byad rnam pa lngas mchod par bya ba'i phyir te/ dper na bram ze rig byed gdon pa'i dang por rig byed kyi bdag po lha tshangs pa la mchod par bya ba'i phyir/rig byed rnams kyi dang por oM smos pa bzhin no/ /de la gang dag 'di skad du mchod par brjod pa tsam ni 'gal ba yang med na mchod pa'i yo byad lngar nges pa ni ji ltar rigs she na/ 'di ltar oM ni yi ge rnam pa lnga dang ldan pas arga la sogs pa'i mchod pa'i yo byad lnga yod pa kho nas arga la sogs pa ci rigs par sbyar ro/ /gcig ni bde bar gshegs pa rigs lnga'i gtso bo 'byung ba lngas bskyed pa'i sems can rnams kyi don mdzad pa'i phyir dang po oM kho nar nges so//gcig ni bskal pa'i rim pa dang sbyar nas gsungs te de la oM ni bskal pa chags pa dang sbyar ro/ /bar gyi sngags ni bskal par gnas par dgongs te yun ring po'i phyir ro/ /mtha'i swA hA la dgongs pa ni 'jig pa dang sbyar nas gsungs pa ste yongs su rdzogs pa kho na'o//de la 'dir bcom ldan 'das kyi sngags tshig bzhi gsungs pa ni dang pos ni las kyi sgrib pa rnam par dag par byed pa'o/ /gnyis pas ni nyon mongs pa'i sgrib pa rnam par dag par byed pa'o/ /gsum pas ni shes bya'i sgrib pa rnam par dag par byed pa'o//bzhi pas ni skye ba'i sgrib pa rnam par dag par byed pa'i phyir rnam par dag par byed pa'i sngags kyi tshig bzhi kho nar nges pa'o/ /de la 'dir gang dag 'di skad du de bzhin gshegs pa'i thugs ka nas snying po gsungs pa ni gsal la sku phyung ba ni ji ltar shes she na/rnam pa snang mdzad mngon par byang chub pa'i le'u sum cu rtsa gsum pa las/ shin tu zhi ba'i gzugs can mdzes/ /ston ka'i zla ltar rab gsal ba/ /oM sogs sngags ni rab gsung zhing / /snying ga nas byon dbus su bzhugs/ /zhes gsungs pa'i phyir ro//rig pa ni rnam pa gnyis te/ da ltar reg pa dang dus gsum du rig pa'o/ /de la da ltar rig pa ni 'jig rten pa'i lha tshangs pa la sogs pa'o/ /dus gsum rig pa ni rnam pa thams cad mkhyen pa ste/ sngags ni yid skyob par byed pa'i phyir ro/ /che ba ni byin rlabs che ba'o//mo'i rtags ni skyed par byed pas mo ste/ ye shes skyed par byed pa'o/ /de zhes bya ba'i sgra ni 'das ma thag pa ste/ bshad ma thag pa sems can thams cad ngan song gi rgyud kyi 'ching ba thams cad rnam par gcod do/ /ngan 'gro thams cad rnam par sbyangs so//sdug bsngal mi zad pa rnams rab tu zhi ste/ skye bo mang po rnams bde ba dang ldan par gyur to zhes pa ni dgongs pa rnam pa gnyis te/ 'bras bu la dgongs pa dang rgyu la dgongs pa'o/ /de la 'bras bu la dgongs pa ni bshad ma thag pa'i sgras skad cig ma ste/ rdzogs pa'i mtha'i skad cig mar nyon mongs pa thams cad ni spangs 'khor ba'i sdug bsngal ni zhi ste bde ba chen po'i rdo rje 'dzin pa thob par gyur pa la dgongs pa'o//rgyu la dgongs pa ni sems can thams cad spro ba chen po bskyed de/ 'bad pa drag pos yongs su sgrub par byed pa 'jug pa'i yan lag la dgongs pa'o//de nyid kyis ni lha'i dbang po brgya byin gyi tshig gi don yongs su rdzogs par byas pa'o/ /de nas gzhan yang gsang ba'i snying po 'di gsungs so/ /oM sho d+ha ni sho d+ha ne/ sarba a pa yan sarba sa twai b+h+ya hUM/ lha'i dbang po gzhan yang 'di ni de bzhin gshegs pa thams cad kyi snying po'o//oM sarba a pa ya bi sho d+ha ni hUM phaT/ lha'i dbang po gzhan yang 'di ni de bzhin gshegs pa thams cad kyi snying po'o/ /oM tra tha a lha'i dbang po gzhan yang 'di ni de bzhin gshegs pa thams cad kyi ngan song sbyong ba'i snying po'o//oM hUM zhes pa 'dir rigs bzhi'i bde bar gshegs pa'i snying po gsungs pa ste/ de la bcom ldan 'das dpal rnam par snang mdzad kyi spyan gnyis nas rdo rje rigs kyi de bzhin gshegs pa thams cad kyi sku bcom ldan 'das de bzhin gshegs pa ngan song thams cad yongs su sbyong ba'i rgyal po phyung ste/de'i zhal nas snying po gsungs pa ni/ oM sho d+ha ni sho d+ha ya sarba a pa ya na sarba sa twai b+h+ya hUM zhes pa'o/ /de'i don ni 'di ltar tshig rnam pa gsum ste/ de la dang po ni sdig pa thams cad yongs su sbyong bar byed pa'o//gnyis pa ni ngan song thams cad rnam par sbyong ba'o/ /gsum pa ni sems can la bde ba chen po'i sku ster ba kho na'o/ /de la gang dag 'di skad du dang po'i snying po ni thugs ka nas phyung bar gsal la/ 'di spyan gnyis nas phyung bar ji ltar mngon zhe na/ de yang 'di ltar dang por smos pa'i rgyud la/ mtshan rnams kun gyis rab rdzogs shing / /zla ba rgyas dang pad+ma'i mdog /bde gshegs spyan nas phyung nas ni/ /sngags rnams gsung zhing mdun du bzhugs/ /zhes gsungs pa'i phyir ro/ /snying po gnyis pa ni bcom ldan 'das kyi snyan nas rin po che'i rigs kyi de bzhin gshegs pa thams cad kyi sku bcom ldan 'das rin po che'i tog phyung ste/de'i zhal nas snying po gsungs pa ni/ oM sarba a pa ya bi sho d+ha ni hUM phaT ces pa ste/ de la de'i don ni ltar zhe sdang thams cad yongs su sbyong zhing ngan song thams cad yongs su sbyong bar byed pa kho na yin pas na tshig gnyis su rnam par phye ba'o//de la dang po'i lan gyis yongs su 'dre bas rgol ba dag mi 'byung na yang yid ches par bya ba'i phyir khungs dbyung ba ni gong ma bzhin du/ nam mkha'i mdog la dri med rgyas//spyod pa rnam par grol mdzad pa/ /bde gshegs snyan nas phyung nas ni/ /g.yas phyogs su ni rab tu bzhugs/ /zhes gsungs so/ /snying po gsum pa ni bcom ldan 'das rnam par snang mdzad kyi shangs kyi bu ga gnyis nas pad+mo'i rigs kyi de bzhin gshegs pa thams cad kyi sku bcom ldan 'das de bzhin gshegs pa shAkya thub pa phyung ste/de'i zhal nas snying po gsungs pa ni/ oM tra tha a zhes pa'o/ /de la de'i don ni 'di ltar yi ge rnam pa gsum ste/ de la dang pos ni bar du gcod pa'i bgegs thams cad skrag par byed pa'o//gnyis pas ni yang dag par don kho na nyid rtogs par byed pa'o/ /gsum pas ni phyis 'khor ba'i 'dam du mi ltung ba'i don to/ /de yang gong du gsungs pa'i rgyud las/ gser mdog 'od rnams spro mdzad pa/ /skyes bu khyu mchog bla na med/ bde gshegs shangs las phyung nas ni//sngags rnams gsung zhing rgyab phyogs bzhugs/ /zhes gsungs so/ /snying po bzhi pa ni bcom ldan 'das rnam par snang mdzad kyi zhal gyi ljags kyi rtse mo nas las kyi rigs kyi de bzhin gshegs pa thams cad kyi sku bcom ldan 'das me tog chen po rgyas pa phyung ste/de'i zhal nas snying po gsungs pa ni hUM zhes pa ste/ de la de'i don ni 'di ltar rdo rje thod kyi rgyud las/ /hUM las rang 'byung sna tshogs mdog/ /rdo rje bzhi dang yang dag ldan/ /las rnams thams cad byed par brtson/ /phyogs rnams kun du rnam par khyab//ces gsungs te/ de bas na bcom ldan 'das me tog chen po rgyas pas hUM zhes bya ba las 'gro ba'i don ma lus par mdzad cing sku gsung thugs kyi rdo rje 'grub par byed pa'i don to/ /de yang dang po rim pa'i rjes las/ rin chen margad mdog 'dra ba//spyan mig rgyas shing mtshan mchog ldan/ /bcom ldan zhal nas phyung nas ni/ /sngags rnams gsung zhing g.yon phyogs bzhugs/ /zhes gsungs so/ /de la gsang ba ni rtogs par dka' ba ste/ snod dang mi ldan pa la sba bar bya zhes spyir shes par bya'o//de bzhin gshegs pa ni chos thams cad rang bzhin gyis rnam par dag pa las byung la des de bzhin du slar gshegs pas na de bzhin gshegs pa'o/ /thams cad ni ma lus pa ste/ dus gsum na bzhugs pa rnams so/ /snying po ni gnyis su med pa'i ye shes te/de sgrub par byed pa'i sngags la snying po'i sngags zhes bya'o/ /snying po de dang nye ba'i snying po zhes gsungs pa ni snying po ni 'das ma thag pa'o/ /nye ba'i snying po ni 'og ma rnams la dgongs te gsungs pa ste de'i yan lag tu dgongs shing de la nye bar byed pas na nye ba'i snying po'o//lha'i dbang po gzhan yang mdor na dran pa tsam gyis kyang bsod nams chung ba'i sems can rnams ngan song gi rgyud thams cad las bde blag tu rnam par grol bar 'gyur ba ni 'di yin no/ /na mo b+ha ga ba te sarba durga ti pa ri shod+ha ni rA dza ya/ta thA ga ta ya ar+ha te samyak+sa bud+d+hA ya/ tad+ya thA/ oM sho d+ha ni sho d+ha ni sarba pA paM bi shod+ha ne shud+d+he bi shud+d+he sarba karma A ba ra Na/ bi sho d+ha ni swA hA/ zhes gsungs pa ni 'di ltar bcom ldan 'das nyid kyis rigs lnga'i de bzhin gshegs pa thams cad kyi rtsa ba'i sngags gsungs pa ste/de la mdor na zhes pa ni bsdus pa'i don to/ /dran pa tsam gyis zhes pa gnyis su shes par bya ste/ yud tsam dran pa dang rtag par dran pa'o/ /bsod nams chung ba'i sems can rnams ngan song gi rgyud thams cad las bde blag tu grol par 'gyur ba zhes pa ni dran pa gnyis pa la dgongs nas dran pa dang po 'jug par spro ba bskyed pa'o//de yang 'bras bu rnam pa gnyis te/ dang pos ni bde ba thob par byed pa'i 'bras bu'o/ /gnyis pa ni bde ba chen po kun tu bzang po'i sku thob par byed pa ni 'bras bu 'byin pa'o//grol ba ni rnam pa gnyis te/ dang pos ni sdug bsngal mi zad pa las grol bar 'gyur ba dang / gnyis pas ni kun nas sdug bsngal ba las grol bar 'gyur pa'o/ /'di zhes pa ni sngags 'di ste/ 'dir tshangs pa la sogs pa'i tshig gi lan yang sbyar ro/ /'dir sngags kyi don ni rnam pa gnyis te/phyag 'tshal zhing mchod par brjod pa dang gong du bstan pa ltar sgrib pa rnam pa bzhi yongs su dag par byed pa'o/ /rtsa ba'i rig pa zhes pa rtsa ba ni gnyis te gcig ni sdug bsngal gyi rtsa ba gcod par byed pa'i phyir ro/ /gcig las thams cad la sngags rnams kyi dang por 'di brjod par gsungs pa'i phyir rtsa ba'o//rig pa ni ye shes te skyed pa'i phyir rig pa zhes bya zhing / de ni de bzhin gshegs pa rnams kyi rtsa ba'i sngags zhes bya ba kho na'o/ /oM sarba bid sarba A ba ra Na bi sho d+ha ya ha na hUM phaT/oM sarba bid hUM/ oM sarba bid phaT/ oM sarba bid a/ oM sarba bid tra tha/ oM sarba bid oM/ oM sarba bid hUM/ oM sarba bid swa/ oM sarba bid a/ oM sarba bid tra tha/ oM sarba bid sha/ oM sarba bid b+ha/ de dag la sogs pa'i sngags kyi don ni 'di ltar rigs bzhi'i de bzhin gshegs pa rnams kyi nye ba'i snying po dang /sku bskyed pa'i sa bon du shes par bya ste/ de la dang po ni bcom ldan 'das thams cad rigs rnam par snang mdzad kyi nye ba'i snying po nyid do/ /gnyis pa ni bcom ldan 'das ngan song sbyong ba'i nye ba'i snying po'o//gsum pa ni bcom ldan 'das rin po che tog gi nye ba'i snying po'o/ /bzhi pa ni bcom ldan 'das shAkya thub pa'i nye ba'i snying po'o/ /lnga pa ni bcom ldan 'das me tog chen po rgyas pa'i nye ba'i snying po'o/ /yang drug pa ni sku dang po bskyed pa'i sa bon no/ / bdun pa ni sku gnyis pa bskyed pa'i sa bon no/ /brgyad pa ni sku gsum pa bskyed pa'i sa bon no/ /dgu pa ni sku bzhi pa bskyed pa'i sa bon no/ /bcu pa ni sku lnga bskyed pa'i sa bon no/ /bcu gcig pa ni chos thams cad stong pa nyid du bsgom par bya ba ni don gyi sa bon te/ nang gi khrus zhes bshad do//bcu gnyis pas ni bar du gcod pa'i bgegs thams cad las bsrung ba'i phyir srung ba'i 'khor lo rdo rje 'gros kyi sa mtshams bcad pa dang / rdo rje ra ba dang / sa gzhi dang gur la sogs pa bsrung bar bya ba'i don gyi sa bon no/ /de la gang dag 'di skad du snying po'i skabs su tra tha zhes shAkya thub pa'i snying por gsungs la/nye ba'i snying po dang sku bskyed pa'i skabs su tra tha zhes pa me tog chen po rgyas pa'i nye ba'i snying po dang / sku bskyed pa'i sa bon du gzhag pa ni rigs pa ma yin te/dper na sgo nga gcig las bye'u phrug gnyis mi 'ong ba bzhin no zhes zer na de ni ma nges pa nyid do/ /'di ltar kun nas nyon mongs pa ni ma yin gyi rnam par byang ba'i bdag nyid kyi sa bon gcig la de bzhin gshegs pa'i sku dang / brjod pa dpag tu med pa 'byung ba yang yod la/phan tshun du yang 'gal ba med pa nyid yin pas mi 'gal ba nyid do/ /de'i rigs pa ni bdag gis rtsal du mi khyer zhing rnam par snang mdzad kyi rgyud las rig sngags thams cad rgyas par gsungs pa'i skabs su oM bai ro tsa na oM badzra satwa hUM/ rat+na ke tu swa//shAkya mu ne a tra tha A gats+tsha zhes sngags rnams kyi mtha'i yi ge yongs su phye ba nyid dang / 'di nyid gzhung du bcom ldan 'das kyi snying po lnga pa la/ tra tha a zhes gsungs pas na the tshom mi za ba nyid du bya ste nges pa'i don to/ /de nas de dag gi phan yon yang dag par gsungs pa ni lha'i dbang po de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba'i gzi brjid kyi rgyal po'i gsang ba'i snying po 'di rigs kyi bu'am rigs kyi bu mo gang yang rung bas ming tsam nyan tam bcangs sam/bklags sam bris nas kyang mgo bo'am/ gtsug phud dam mgul du btags te 'chang na tshe 'di nyid la dus ma yin par 'chi ba brgyad dam dus ma yin par 'chi ba dag dang 'brel ba ni mi rmi lam gyi rnam pa'am/ ngan song dang 'brel pa'i mtshan ma de dag thams cad rmi lam du'ang mi 'byung na/dkyil 'khor du ji lta ba bzhin du zhugs la zhugs nas kyang dbang bskur te snying po bzlas brjod byed cing / sngags kyi don yang bsgom pa gang yin pa lta smos kyang ci dgos te/ sdig pa gang yang nye bar mi 'gyur zhing / ngan song du yang 'gro bar mi 'gyur ro zhes gsung pa ni da ltar gyi sems can rnams kyis yongs su spyod pa las phan yon dang de dag ni thabs kyi rim pa yang dag par gsungs pa ste/de bzhin gshegs pa ni gong du bstan pa las go bar bya zhing ngan song ni yid du mi 'ong ba ste tshor bas sdug bsngal ba'o//thams cad ni ma lus par yongs su sbyong ba'i pha rol du thar bar byed pa'o/ /gzi brjid 'bar zhing rab tu 'bar ba ste/ nyon mongs pa'i nags tshal sreg cing 'bar bar byed pa'o/ /rgyal po ni nyon mongs pa las rgyal bar byed cing mchog gi bla mar gyur pa nyid de/de bzhin gshegs pa'i rigs lngar bsdus pa thams cad do/ /gsang ba ni nyan thos dang rang sangs rgyas la sogs pas rtogs par dka' zhing phyag rgya bzhis rgyas gdab pa nyid do/ /snying po ni ye shes te/ de skyed par byed pa'i phyir 'bras bu'i ming rgyu la btags pa'o//rigs kyi bu'am rigs kyi bu mos zhes bya ba ni theg pa chen po'i rigs can bla na med pa'i 'bras bu la mngon par 'dod pa rnams te/ des ni rigs rnam pa gnyis gsal lo/ /ming tsam nyan tam zhes pa ni theg pa chen po'i rigs can yin yang khyim pa la sogs pa bya ba mang po la zhugs pa'i rigs pa'i sbyor ba mi shes pa rnams kyis mtshan tsam la brten te/rnam par grol bar bya ba'i phyir gsungs so/ /bcangs sam zhes pa ni glegs bam la brten te rnam par grol bar bya ba'i phyir ro//bklags sam zhes pa ni ngag gi las la brten te rnam par grol bar bya ba dang / bris nas kyang mgo bo'am/ gtsug phud dam dpung pa'am/ mgul du btags te 'chang zhes pa ni snying po la brten te rnam par grol bar bya ba'i phyir te/ de ni 'di ltar gro ga'am shing shun nam/ras la 'khor lo rtsibs bcu gnyis pa bris te lte ba dang rtsibs dang mu khyud du bcas pa tsan+dan dkar pos byugs pa'i steng du bris la de'i steng du gur gum gyis lte ba la rtsa ba'i sngags tshang bar bri'o/ /de nas rtsibs rnams la ni rim pa ji lta ba bzhin sngags bcu gnyis po bri zhing /mu khyud la ni rigs lnga'i phyag rgya dang / ma ma rak+Sha zhes bdag ming 'di bsres la bris te/ cho ga shes pa'i rnal 'byor pas rig pa chen po stong gis mngon par bsngags la rab tu gnas par byas la gser ram dngul lam la cha'am/ras la sogs pa'i nang du gtums te gdags par bya'o/ /de la phan yon ci yod ce na/ dus ma yin par 'chi ba brgyad ni chu la sogs pa ste/ de dag dang 'brel pa ni skrag pa dang / sngags pa la sogs pa'o/ /yang na ngan song dang 'brel pa ni sdig pa'i las byed pa dang sdig pa'i grogs po dang 'grogs pa dang /de dag dang lhan cig tu gnas pa la sogs pa ste/ de dag rmi lam du'ang mi 'byung na zhes pa ni dkyil 'khor du 'jug pa'i yan lag tu yang dag par spro ba skyed pa'i tshig go/ /dkyil 'khor ji lta ba bzhin du gzhug pa ni lha'i dkyil 'khor gzhung las 'byung ba bzhin du dbang bskur nas zhes pa ni dkyil 'khor du zhugs pa'i phan yon gong ma nas khyad par du 'phags pa cig yod par shugs kyis go bar bya'o//de ltar gong nas gong du 'bras bu khyad par du 'phags pa yod pa ni snying po bzlas brjod byed pa dang sngags kyi don yang dag par bsgoms pa gang yin pa lta smos kyang ci dgos te/ngan song du 'gro bar mi 'gyur ro zhes bya bar 'brel te/ sngags kyi don bsgom pa ni 'og nas 'chad par 'gyur bas 'dir ma bshad do//skyes pa'am bud med dam lha'am klu'am gnod sbyin nam srin po'am byol song ngam yi dags sems can dmyal ba la sogs pa ste/ gang yang rung ba shi ba'i lus dkyil 'khor du bcug ste dbang bskur na sems can dmyal bar skyes na'ang /de ma thag tu rnam par thar nas lha'i ris su skye bar 'gyur ro/ /lha yi ris der skyes nas kyang / /de bzhin gshegs pa thams cad kyi chos nyid mngon du byed do/ /de bzhin gshegs pa thams cad la bsnyen bkur la sogs pa'ang byed/ phyir mi ldog par yang 'gyur/rgyud nges pa can du'ang 'gyur/ de bzhin gshegs pa thams cad kyi rigs su'ang skye/ sgrib pa thams cad rab tu spangs nas de bzhin gshegs pa'i rigs sam/ lha'i rigs sam/ gzhan gang yang rung bar bde ba myong bar 'gyur zhing lha'i dbang po mdor na 'jig rten nam 'jig rten las 'das pa'i bde ba thams cad myong bar 'gyur ro zhes gsungs pa ni gong bzhin du bstan ma thag pa'i bdag gi don phun sum tshogs pa 'tsho ba da ltar ba la dgongs te gsungs la/'di ni gzhan gyi don phun sum tshogs pa 'das pa rnams kyi don mdzad pa dang /de dag gi phan yon yongs su gsungs pa yin te/ lha'i bu nor bu dri ma med pa'i 'od 'das ma thag pa la'ang sbyar bar bya'o/ /de la skyes pa'am bud med la sogs pa ni/ skyes pa'am bud med la sogs pa ste/ gang yang rung ba ni shi'o cog gi lus so/ / de cho ga shes pa'i rnal 'byor pas dbang bskur ba ni 'di ltar ngan song thams cad yongs su sbyong ba'i dkyil 'khor 'og nas 'byung ba bzhin du bris te/ rab tu gnas pa la sogs byas la/ ro chu dang dri la sogs pas yang dag par bkrus te/ rgyan dang cha lugs ji lta ba bzhin du brgyan nas snying gar thal mo sbyar ba'i rtse mo la me tog gam rin po che la sogs pa thogs su bcug ste/pha'am ma la sogs pas de'i tshig ji lta ba bzhin du gsol ba gdab cing dbang bcu yongs su rdzogs par bskur bar bya ba ni ting nge 'dzin gyis de'i rnam par shes pa bkug pa la'o//de nas lus de gang la bab pa'i rigs kyi lhar rab tu gnas par bya ste/ mchod pa rnams kyis rtag tu mchod cing khang bu la sogs pa'i nang du gzhag par bya'o/ /cho ga zhib mo ni 'og nas 'chad par 'gyur ro/ /de la gang dag 'di skad du lha dang mi la sogs pa la ni cho ga 'di rigs la gzhan dag la ni mi'i spyod yul du ma gyur pas 'gal ba nyid do zhe na/de ni bde bar gshegs pa'i bka' yongs su mi shes pa'i dbang gis rmongs pa yin te/ 'di ltar mi tha mal ba'i spyod yul kho nas byed pa na lha'ang mi'i spyod yul du 'gyur ram/yang na 'di ltar lha'i bu nor bu dri ma med pa'i 'od kyi lus la dbang bskur ba la sogs pa byas pas ngan 'gro las yongs su thar ba de yang mi rnams kyis byas pa las ngan 'gro las thar bar 'gyur ram/ de bas na de'i rigs pa ma yin zhing 'di ltar lha dang klu la sogs pa shi ba'i lus la dbang bskur ba la sogs pa bya zhes gsungs pa ni/bcom ldan 'das kyis 'khor der 'dus pa rnams la byin gyis brlabs pas nus pa dang ldan pa ste/ de dag nyid kyis de dag gi rigs rnams la bya zhes sbyar bar bya'o//de la dud 'gro mi'i 'jig rten du spyod pa rnams ni mi rnams kyis bya bar gsungs te mi 'gal ba nyid do/ /de la cung zad bag tsha ba'i gnas su gyur pa ni dmyal ba dang yi dags rnam pa gnyis te/ de yang 'di ltar mngon par shes pa lnga dang ldan pa ting nge 'dzin khyad par du gyur pas thob pa'i gang zag rnams kyis mchog gi snying rje chen pos dus gsum du mnyam par gzhag ste bltas la/de nas dmyal ba la sogs pa rang gi tshe'i tshad zad pa rnams sdug bsngal chen po las thar bar bya ba'i phyir ting nge 'dzin dang /rdzu 'phrul gyis de dag gi gnas su de dag gi gtso bo'i gzugs kyis phyin la shi ba'i ro la dbang bskur bar bya ba nyid de/ de yang bcom ldan 'das kyis theg pa chen po mdo sde rin po che'i mdzod las/ rab dga' la sogs sar gnas pa'i/ / rigs kyi bu des dmyal gnas su/ /dam pa'i chos 'di sgrogs pa dang / de dag sdug bsngal zhi bar byed/ /ces gsungs pa'i phyir ro/ /de ltar dbang bskur ba las bde ba'i mchog rnam pa gnyis thob par 'gyur ba kho na ste/ de la dmyal ba'i gnas su skyes na'ang zhes pa ni rnam pa gnyis la dgongs pa ste/rnam par smin pa la dgongs pa dang / dus 'das pa la dgongs pa'o/ /de ma thag tu rnam par thar nas zhes pa ni de'i stobs kyis de'i skad cig ma la thar ba'o/ /lha'i rigs su skyes nas zhes pa ni/bde 'gro'i thar pa thob pa dang / /der skyes nas kyang de bzhin gshegs pa thams cad kyi chos nyid mngon sum du byed/ de bzhin gshegs pa thams cad la bsnyen bkur la sogs pa'ang byed pa'i phyir mi ldog par 'gyur/ rgyud nges pa can du'ang 'gyur zhes pa ni byang chub sems dpa' rnams su skyes nas des de bzhin gshegs pa'i chos nyid la slob pa nyid do//sgrib pa rnams rab tu spangs nas de de bzhin gshegs pa thams cad kyi rigs su skye bar 'gyur ro zhes pa ni rdzogs pa'i mtha'i skad cig ma la rdo rje lta bu'i ting 'dzin gyis nyon mongs pa thams cad bcom nas bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro//gzhan yang lha'i rigs sam gang yang rung bar bde ba myong bar 'gyur ba dang zhes pa rigs chad pa'i gang zag rnams la dgongs te de dag sdug bsngal chen po mi zad pa las thar te/bde 'gro lha dang mi dang lha ma yin gyi 'jig rten du skye bar 'gyur ro/ /lha'i dbang po mdor na 'jig rten nam 'jig rten las 'das pa'i phan pa dang bde ba thams cad myong bar 'gyur ro zhes pa ni bsdus pa'i don te/ phan pa ni sdug bsngal las thar ba'o//bde ba ni de'i mtha'i skad cig ma de'i 'bras bu ste yongs su rdzogs pa'o/ /de nas lha rnams kyi dbang po brgya byin gyis bcom ldan 'das la de bzhin du bskor ba byas te phyag byas nas 'di skad ces gsol to/ /bcom ldan 'das ngan song thams cad kyi dbang du gyur pa rnams la phan pa dang bde bar bgyi ba dang /ci nas kyang sems can de dag ngan song thams cad la rgyab kyis phyogs par bgyi ba dang bla na ma mchis par yang dag par rdzogs pa'i byang chub bde blag tu rdzogs par bgyi ba'i slad du bshad du gsol zhes pa ni 'dir lha'i dbang po brgya byin bcom ldan 'das kyis gsung gi sa bon yang dag par bskyed par bya ba'i phyir gsol ba 'debs pa ste/de la lha ni 'jig rten pa'i lha ste dbang po ni de dag thams cad kyi bdag po'am gtso bo zhes bya ste/ brgya byin ni 'di ltar rnam pa gnyis te/ skye ba'i dus su mchod sbyin brgya btang ba'i phyir dang de drang srong rgyas pas mig brgyar btags pa'i phyir brgya byin te/bcom ldan 'das ni rnam par snang mdzad do/ /de bzhin du ni sngar byas pa bzhin du ston pa po dang dam pa'i chos la gus par bya ba'i phyir phyag dang bskor bas bsnyen bkur byas te/dper na bram ze dag gis grong khyer ba rnams la gza' dang skar ma dang gnas kyi bye brag gis phyung ba dang nad nyung bar 'gyur ro zhes brjod nas/ de dag tsam gyis phan par mi 'gyur zhing mi shes pa'i phyir gza' ni gang skar ma ni gang dus sam gnas ni ji lta bur byas na phan par 'gyur zhes 'dri ba dang 'dra bar dang por dkyil 'khor gsungs pas na/dkyil 'khor ji lta bu zhig dbang ni ji ltar bskur bar mi shes pa'i phyir 'dri ba ni shugs kyis go bar bya'o/ /de la ngan song thams cad kyi dbang du gyur pa ni mtshams med pa lnga la sogs pa'o//phan pa ni sdug bsngal dang bral ba'o/ /bde ba ni bde 'gro lha dang mi'i 'jig rten du skye bar bya ba'o/ /ci nas kyang zhes pa ni rnam pa thams cad kyi sgo nas zhes bya bar sbyar zhing ngan song la rgyab kyis phyogs par bgyi ba ni bla na ma mchis pa yang dag par rdzogs pa'i byang chub bde blag tu rtogs par bgyi ba nyid de/de'i slad du dkyil 'khor dang dbang ji lta bu lags pa bshad du gsol zhes bya bar sbyar ro/ /de dag gis ni ngan song thams cad yongs su sbyong ba'i rtsa ba'i rgyud ces bya ba'i bshad pa dang po rdzogs so// // de nas bcom ldan 'das shAkya thub pas de bzhin gshegs pa thams cad kyi ngan song thams cad yongs su sbyong ba'i ye shes rdo rje zhes bya ba'i ting nge 'dzin la snyoms par zhugs te/ de bzhin gshegs pa thams cad kyi ngan song thams cad yongs su sbyong ba'i gzi brjid kyi rgyal po zhes bya ba'i dkyil 'khor 'di gsungs so zhes pa ni 'dir dkyil 'khor dang dbang dang de dag gi bya ba'i rim pa'am thabs rgyas par gsungs par shes par bya ste/de la bcom ldan 'das rnam par snang mdzad kyi thugs ka nas/ bcom ldan 'das shAkya thub pa sku gser gyi mdog lta bu na bza' ngur smrig gis brgyan cing /rgyan rnams kyis stong pa/ phyag g.yon pa ting nge 'dzin du bsnol zhing g.yas pa chos 'chad kyi phyag rgya mdzad pa cig phyung ste/ des rgyud phyi ma 'di gsung bar 'gyur ba kho na'o/ /de la gang dag 'di skad du rtsa ba'i rgyud dang rgyud phyi ma ni 'gal ba med do//dang po'i ston pa po rnam par snang mdzad la/ de'i thugs ka nas shAkya thub pa phyung bar cis mngon zhe na/ 'di ltar brtag pa rnam pa 'di nyid kyi 'og ma 'brug sgra chen po'i brtag pa las/ de ltar sku ni rnam gsum ste//'gro don las dang dam tshig dang / /ye shes bdag po nyid kyis ni/ /shAkya thub pa thugs kyi sprul/ /zhes gsungs pa'i phyir ro/ /de la de bzhin gshegs pa thams cad ni dus gsum gyi de bzhin gshegs pa thams cad de/ de dag thams cad kyi ngan song yang gsang sngags chen po 'di nyid kyis sbyangs shing gnyis su med pa'i ye shes rdo rje lta bu thob bo//'dir yang gsang sngags chen po de nyid gsung ba'i phyir de nyid la thugs mnyam par gzhag par la de bzhin gshegs pa thams cad kyi ngan song thams cad yongs su sbyong ba'i ye shes rdo rje zhes bya ba'i ting nge 'dzin to/de la ting nge 'dzin ni 'dir thog ma med pa nas zhi ba'i ngang la gnas pa'i phyir ting nge 'dzin te chos kyi dbyings zhes bya'o/ /snyoms par zhugs pa ni mnyam par gzhag pa'i don te dkyil 'khor chen po 'di gsungs so zhes bya bar 'brel to//sangs rgyas kun gyi byang chub sems/ /rgyal bas gsungs pa'i ye shes gang / /bla na med pa rtogs 'gyur ba/ /de ni dkyil 'khor chen por gsungs/ /zhes pas ni bcom ldan 'das kyis dang por dkyil 'khor rang gi ngo bo dang nges pa'i tshig gnyis gsungs pa ste/de la ngo bo ni byang chub kyi sems yid bzhin gyi nor bu rin po che dang 'dra bar dus gsum gyi sangs rgyas thams cad kyi yon tan phun sum tshogs par ster bar byed pa'o/ /nges pa'i tshig ni 'dir maN+Da ni snying po ste/ de nyid kyi rgyal ba rnams kyis gsungs pa ni bla na med pa gnyis su med pa'i ye shes so//la ni len pa zhes bya ste/ des thabs 'di la brten nas rtogs par byed pa'i phyir dkyil 'khor zhes pa'o/ /de zhes bya ba'i sgra ni ma ning gi rtags te/ gnyi ga ston par byed pa'i sgra'o//chen po'i sgra ni mang po la 'jug na'ang 'dir ni thabs dang shes rab dang zab cing rgya che ba la go bar bya ste ting nge 'dzin rnam pa gsum mo/ /de la gzhung bstan par bya ba ni mkha' 'gro ma rdo rje gur las kyang / sangs rgyas mgon po thams cad kyi/ /snying po 'di yis len pas na//snying po yongs 'dzin dkyil 'khor te/ /de nyid kyis ni dkyil 'khor brjod/ /ces gsungs pa'i phyir ro/ /de nas bcom ldan 'das kyis sems can thams cad la thugs brtse bar bya ba'i phyir/ phyi'i dkyil 'khor chen po 'di gsungs so zhes pa ni/bcom ldan 'das shAkya thub pas sems can thams cad la bu gcig pa dang 'dra ba'i thugs rje chen pos gzigs nas thams cad dpal rdo rje 'dzin pa'i go 'phang thob par bya ba'i phyir phyi'i dkyil 'khor gsungs pa ste/ de la phyi zhes bya ba'i sgra ni skad chen po'i dbyings te nang dang gsang ba dang de kho na nyid la sogs pa mang por yod pa'i sgra'o//de ni dper na rin po che'i mdzod na gser gyi za ma tog bskrang zhes bya ba'i sgras mu tig dang / margad dang / dung dang / byi ru la sogs pa'i za ma tog kyang yod par mtshon pa bzhin no//gtsug lag khang dang skyed mos tshal/ /mchod rten lha khang kun dga' sogs/ /ji bzhin pa yi cho ga yis/ /gnas ni byin gyis brlabs pa brtsam/ /byin gyis brlabs pa'i gnas der ni/ /phyi yi dkyil 'khor bri bar bya/ /zhes pas ni phyi'i dkyil 'khor gyi gnas phun sum tshogs pa bstan pa ste/de la 'jam dpal gyi rgyud chen po la sogs pa nas ni/ gtsug lag khang dang skyed mos tshal/ /mchod rten byang chub sems dpa'i gnas/ /dge 'dun kun dga' ra ba dang / /rgyal po yi ni khab sogs su/ / sa ni byin gyis brlab mi dgos/ /zhes gsungs pas na 'dir yang de rnams su ni sa byin gyis brlab pa mi dgos pa dag ste/ dang por byin gyis brlabs pa'i phyir ro/ /de la de dag kho na ci'i phyir smos she na/ de dag ni yid du 'ong ba'i gnas te/ sogs pa'i sgras ni 'bab chu'i 'gram la sogs pa rang yid dang mthun pa'i phyogs su bya ba nyid do//gong du smos pa ma yin pa de dag rnams su byin gyis brlabs pa ni 'di ltar dang por phyogs brtag par bya ste rgyal po gdug pa can dang / chom po dang / stag dang / sbrul dang / dred la sogs pa'i bar du gcod pa'i sa phyogs dang /shing tsher ma can dang / skra shad dang / gyo mo dang / rus pa la sogs pa gdug pa'i gnas su mi bya ba nyid do/ /de nas sa bslang bar bya ste rgyal po'am/ blon po'am/ khyim bdag 'ga' zhig la bdag sems can gzhan la 'tshe ba dang /gnod pa'i las byed pa ni ma yin gyi bla na med pa yang dag par rdzogs pa'i byang chub bsgrub pa'i phyir/ dkyil 'khor chen po bzhengs par khyed kyis bdag la sa phyogs 'di byin cig ces bsgo bar bya'o/ /de nas byin par gyur pa dang rang nyid stan bde ba la 'dug la skyil mo krung bcas te/mdun du rdo rje gzhag la 'og tu a las zla ba'i dkyil 'khor bsam mo/ /de'i steng du hrI bsams te/ de gyur pa las ut+pa la ser po/ /de dag gyur pa las bdag nyid bcom ldan 'das shAkya thub pa sku mdog ser po/ phyag g.yon pa lte ba'i khung du brkyang pa phyag g.yas pa sa gnon pa'i tshul gyis sa la sbyar te/oM hu lu hu lu swa hA/ zhes brjod nas tshig 'di brjod par bya'o/ /thog mtha' med pa'i bcom ldan 'das/ /shAkya thub pa blo gros che/ /'gro la phan phyir dkyil 'khor 'di//bdud rnams kun las rgyal gyur cig/ /ces brjod par bya'o/ /de nas bgegs bskrad par bya ste/ rang nyid rgyan cha lnga yis legs par brgyan cing / raM las nyi ma'i dkyil 'khor bsams te/ de'i steng du hUM las gyur pa'i rdo rje sngon po'o/ /de dag yongs su gyur pa las bdag nyid khro bo chen po hUM mdzad du bsgoms te/mdog sngon po mche ba rnam par [(]gartsigs [,]gtsigs [)]pa sbrul gyi rgyan cha lngas brgyan pa/ rdo rje dang dril bu dang / rdo rje khu tshur sdigs mdzub kyi phyag rgya bcas pa cig bsams te/dbus phyogs su 'khor lo rtsibs bcu gnyis pa'i rdo rje 'gros kyis zhe sdang chen po bskyed de/ oM badzra kro d+ha hUM ka ra sarba bi g+h+nAn ha na ha na hUM phaT ces pa'i sngags zlos pas bgegs bskrad par bya'o/ /de nas song bar gyur pa dang / mtshams gcad par bya ba ni shar phyogs su raM las nyi ma'i dkyil 'khor de'i steng du hUM nag po'o//de gyur pa las tho ba'o/ /de dag yongs su gyur pa las bdag nyid khro bo chen po shes rab mthar byed sku mdog dmar ser zhal gcig pa phyag bzhi pa g.yas kyi dang pos b+ha ma ya 'dzin pa/ g.yon gyi dang pos rdo rje tho ba 'dzin pa/'og ma gnyis kyis rdo rje dang dril bu 'dzin par bsams te/ rdo rje rtse gsum pa'i gom pas ji tsam 'dod pa'i rgyar bya zhing / oM sum+b+ha ni sum+b+ha hUM hUM hUM zhes pa'i sngags bzlas zhing mtshams gcad par bya'o/ /lho phyogs su raM las nyi ma'i dkyil 'khor ro//de'i steng du phaT nag po yongs su gyur pa las dbyug pa'o/ /de dag yongs su gyur pa las bdag nyid khro bo chen po gshin rje mthar byed sku mdog nag po zhal gcig phyag bzhi pa'i dang po gnyis kyis dbyug pa dang zhags pa 'dzin pa/ lhag ma gnyis kyis rin po che dang be con 'dzin par bsams te/rin po che 'bar ba'i gom pas 'gro zhing gr-ih+Na gr-ih+Na hUM hUM hUM zhes pa'i nga rgyal gyis mtshams gcad par bya'o/ /nub phyogs su raM las nyi ma'i dkyil 'khor de'i steng du hrIHdmar po las pad+ma'o/ /de yongs su gyur pa las bdag nyid khro bo chen po pad+ma mthar byed sku mdog smug nag tu bzhugs pa'i zhal gcig pa phyag bzhi pa'i dang po gnyis kyis khu tshur dang sdigs mdzub mdzad pa/lhag ma gnyis kyis me long lta bu'i mtshon cha dang 'khor lo 'dzin par bsams te/ pad+ma 'dab ma drug pa'i gom pas 'gro zhing oM gr-ih+NA pa ya gr-ih+NA pa ya hUM hUM hUM zhes pa'i nga rgyal gyis mtshams gcad par bya'o/ /byang phyogs su ni raM las nyi ma'i dkyil 'khor gyi steng du AH las dril bu bsams te/ de dag yongs su gyur pa las bdag nyid khro bo chen po bgegs mthar byed sku mdog ljang gu zhal gcig phyag bzhi pa dang po gnyis kyis rdo rje dang dril bu 'dzin pa/lhag ma gnyis kyis rdo rje rgya gram pas mtshan pa'i dbyug pa 'dzin pa cig tu bsams te rdo rje rgya gram gyi gom pas 'gro zhing oM A na ya hoH b+ha ga bAn badzra rA dza hUM hUM hUM zhes pas mtshams gcad par bya'o//mtshams rnams su ni shar lho la sogs par rim pa ji lta ba bzhin du sgeg mo la sogs pa'i phyag rgyas rdo rje lu gu rgyud kyi gom pas 'gro bar bya zhing / rang rang gi sngags brjod par bya ste 'di ltar oM badzra lA s+ye badzra sr-ing kha la hUM/oM rat+na mA le badzra sr-ing kha la trAM/ oM pad+ma gI ti badzra sring kha la hrIHoM karma nI rti badzra sring kha la aHzhes brjod cing mtshams gcad par bya'o/ /de la gang dag 'di skad bgegs rnam par gzhom pa'i skabs su khro bo kho na las byas pa yin te lha mo ni 'grel pa med do zhe na/de ni ma yin te 'di ltar khro bo lnga la mchod par bya ba'i phyir dang / phrin las rnam bzhis bgegs rnams gdul bar bya ba'i phyir 'gal ba ni med pa ste/ 'jam dpal gyi rgyud las kyang / rigs lnga'i phyag rgya khro bo'i gzugs//lha mo bzhi dang mdzes ldan pas/ /dbang du bsdus nas brlag par mdzad/ /ces gsung ba'i phyir ro/ /de nas sa gzung bar bya ste/ 'di ltar rang nyid sems can thams cad kyi don du sems bskyed la/ dkon mchog gsum la mchod pa rnam pa lngas yang dag par mchod de/me tog dkar pos lag pa bkang zhing thal mo sbyar te tshig 'di skad brjod par bya'o/ /phyogs bcu dus gsum gyi de bzhin gshegs pa thams cad bdag la dgongs su gsol/ bdag sa phyogs 'dir dkyil 'khor chen po bzhengs par 'tshal bas dngos grub dang rtags ji lta ba bzhin du gyur cig ces brjod nas sa de'i khar me tog dor bar bya'o//de nas der khru gang tsam du brkos pa dang / de'i 'og nas sa dkar zhing 'tsher ba snum zhing 'jam pa dag byung ba na dngos grub tu shis pa'i rtags te/sa phyogs der las bya ba nyid do/ /gal te skra shad dang rus pa dang / sa tsha sgo can dang / thal ba dang / sol dum la sogs pa byung na/ sa phyogs de spang bar bya ba nyid do//de nas rin gzhal bar bya ste/ gser ram dngul la sogs pa'i bum pa'i nang du 'o ma dang spos dang dri dang / rin po che sna lnga la sogs pas bkang ste/ sa bdag dang sa'i lha mo la gtor ma re re dang / phyogs skyong rnams la gtor ma byin te/ bdag la dngos grub kyi bar du gcod pa rnams khyed kyis de bzhin gshegs pa'i spyan sngar dam bcas pa bzhin du srungs shig ces pa brjod do//bum pa sa'i nang du bcug la kha bcad de slar sa de nyid kyis dgang bar bya ste/ de la mthon por gyur na ni phyag rgya chen po'i dngos grub tu 'gyur ro//cung zhig mtho ba ni sngags kyi dngos grub tu 'gyur ro/ /mnyam par gyur pa ni thun mong gi 'jig rten pa'i dngos grub tu 'gyur ro/ /de bas dma' ba las ni ring bar 'gyur bar shes par bya'o/ /de nas sa brtan par bya ba'i phyir phur bu gdab par bya ste/seng ldeng gi phur bu sor brgyad pa la rtsa ba'i sngags brgya rtsa brgyad mngon par bsngags te bum pa'i steng du oM badzra satwa hUM/ sarba maN+Dal dri ti ku ru swa hA/ zhes brjod pas gzug par bya'o/ /de nas byin gyis brlab par bya ste/ /bdag nyid dpal rnam par snang mdzad kyi ting nge 'dzin du zhugs la byang chub mchog gi phyag rgya bcas te/oM sarba mu kha ti b+ha ba ti hUM/ oM sarba su pa ra na b+ha ba ti hUM/ oM sarba pad+ma rA gA b+ha ba ti hUM/ oM sarba marga ti b+ha ba ti hUM/ oM sarba tsin+ta ma ni b+ha ba ti hUM/ zhes pa'i sngags kyis rin po che rnam pa lnga'i rang bzhin du byin gyis brlab par bya ste/de dag thams cad kyang 'jam dpal gyi rgyud las/ brtag dang bslang dang bgegs bskrad dang / /gzung dang brtan par bya ba dang / /rin dang sbyar ba'i bya ba rnams/ /sa kun gyi ni cho gar nges/ /zhes gsungs pa'i phyir ro//de nas stegs bu brtsig par bya ste/ de yang brtag pa dang po 'di nyid kyi 'og ma las/ rab la khru ni brgyad cu ste/ /'bring ni bzhi bcu rtsa brgyad de/ tha ma sum cu rtsa gnyis su/ /dkyil 'khor chen por bshad pa yin/ /zhes gsungs pas na de bzhin du brtsig par bya'o//gru bzhi pa la sgo bzhi pa/ /ka ba brgyad dang yang dag ldan/ /rta babs bzhi yis mdzes brgyan cing / /them skas bzhi yi phreng ba dang / /seng ge glang chen sogs kyis brgyan/ /dar gyi lda ldi do shal phreng / /dril bu dang ni rnga mas brgyan//rdo rje rin chen pad+ma dang / /sna tshogs rdo rje'i phyag rgyas brgyan/ /srad bu brgyad dang ldan pa la/ /phyi yi sgo khyud rnams kyis brgyan/ /dgu yi char ni bgos pa la/ /sgo dang sgo khyud gsum char bya/ /rdo rje srad bus thig gdab bo/ /zhes pa ni thig gdab pa dang /dkyil 'khor bri ba yang dag par gsungs te/ de la gru bzhi pa ni zur bzhi pa'o/ /ka ba brgyad ni phyogs re rer ka ba gnyis gnyis kyis bteg pa'o/ /sgo bzhi ni phyogs bzhi re re'o/ /rta babs bzhi zhes pa ni sgo'i phyi rol du ka bas bteg pas brgyan pa ste/ them skas bzhi ni stegs bu bzhi'o/ /phreng ba ni mu tig gi phreng bas brgyan pa'o/ /de la skabs 'dir ma gsungs na'ang shugs kyis rin po che sna lnga'i rtsig pa dang / rin chen pha gu la sogs pas kyang yongs su brgyan par shes par bya'o/ /seng ge glang chen sogs kyis brgyan//zhes pa ni rnam pa bcu gnyis su go bar bya ste/ gcig ni gdan no/ /gcig ni rta babs kyi them skas kyi sna la nyon mongs pa'i tshogs ye shes kyi seng ges 'joms pa'i rtags glang po che'i steng na seng ges za ba ngos rer gnyis gnyis so/ /de la dar gyi lda ldi ni nang dang phyi rol gnyis ka na 'phyang ba'o//do shal ni mu tig gi do shal te rin po che'i pha gu las mar 'phyang ba'o/ /phreng ba ni me tog gi phreng ba ste nang dang phyi rol gnyi ga na 'phyang ba'o/ /dril bu ni grwa bzhi la ba dan gi sna la btags nas 'khrol ba'o//rnga ma ne rta babs kyi ya phubs su btags pa'i bla re'i grwa bzhi nas dpyangs pa'o/ /rdo rje rin chen pad+ma dang / /sna tshogs rdo rje phreng bas brgyan/ /zhes pa ni phyogs bzhi'i ka ba brgyad la rim pa ji lta ba bzhin gyi mtshan mar shes par bya'o/ /srad bu brgyad dang ldan pa la//zhes pa la sogs pas thig gdab pa'i cho ga gsungs te/ de la yang rnam pa bzhi'o/ /de la dang por bdag nyid kyis stegs bu'i steng du sa bon bcu gcig pa'i don gyis chos thams cad rnam par rig pa tsam du bsams te oM shU n+ya tA dz+nyA na badzra swa b+hA wa At+ma kou0f85haM zhes pa dang /yang chos thams cad stong pa nyid du bsgoms nas/ oM swa b+hA wa shud+d+haHsarba d+harmAHswa b+hA ba shud+d+hou0f85haM zhes brjod pa ni rang bzhin rnam par dag pa chos nyid kyi thig ces bya'o/ /de nas rang nyid de bzhin gshegs pa mi bskyod pa'i gzugs su b sam/slob ma rdo rje dbyings kyi dbang phyug mar bsams te/ oM dz+nyA na su tra sa ma ye hUM zhes pa'i sngags kyis 'og nas steng du rdo rje bsgreng ba lta bu'i thig gdab par bya'o/ /de nas rim pa ni lta ba bzhin du 'og nas steng du gdab cing thig bzhi legs par gdab ste/ steng gi bar snang la mu tig gi phreng ba lta bur bsams pa ni rig pa ye shes kyi thig ces bya'o/ /de nas bdag nyid rnam par snang mdzad du bsams te/ slob ma bzhi phyogs bzhir bzhag ste/ rang nyid dbus su 'dug la kha dog sna lnga'i srad bu la rang gi thugs ka nas byang chub kyi sems las yang dag par byung ba'i ye shes lnga'i ngo bor spros te slob ma dag gi snying gar bzung ste/sems can thams cad ye shes lnga'i ngo bo la gnas par byin gyis brlab cing / oM tsakra su tra a d+hi Sh+Tha na oM/ oM badzra su tra a d+hi Sh+Tha na hUM/ oM rad+na su tra a d+hi Sh+Tha na swa/oM pad+ma su tra a d+hiSh+Tha na hrIH/ oM karma su tra a d+hi Sh+Tha na AHzhes brjod pa ni byin gyis brlab pa'i cho 'phrul chen po'i thig ces bya'o/ /de nas ras bal sar pa la rdo rje slob dpon bdag nyid kyis rig pa chen mo rgyun mi chad par zlos shing bu mo lo bcu gnyis lon pa khrus legs par byas te/dri la sogs pa'i byugs pas bkal ba bdag nyid kyis bsnyod pa'i thig skud 'jur ma med pa lnga sgril lam sum sgril du byas te/ ba'i rnam lngas stegs bu byugs pa'i steng du 'o ma dang dri dang sa dkar bsres pa'am/ tsan+dan dkar po'i chur bcug ste/ bdag nyid rnam par snang mdzad du bsams te/ slob ma rdo rje las su bsams nas/ rdo rje khu tshur gyis bdag nyid shar phyogs su kha bltas te/ slob ma nub tu bltas pas dang por tshangs pa'i thig gdab par bya zhing / de nas rim pa ji lta ba bzhin du thig bdun gdab par bya'o//dgu yi char ni bgos pa las/ /zhes pa ni dang po cha chen po drug tu bgos te/ de nas cha gnyis bus su bzhag la mtha'i cha gnyis la bzhi bzhir bgos pa ni lha'i cha la dgongs pa'i phyir bcu ru snang yang dgu zhes bya'o//de nas nang du chos kyi 'khor lo rtsibs bcu drug pa lte ba dang mu khyud du bcas pa'i thig gdab pa ni 'og ma la snyags so/ /de'i nang du sgo dang sgo khyud dang sgo 'gram gsum char gyi thig gdab pa ni/ sgo dang sgo khyud gsum char bya/ /zhes bya bar 'brel to/ / rdo rje ni mi 'jig pa'i phyir te srad bu ni skud pa'o/ /de dag gis ni sa la gdab pa'i srad bu'i thig ces bya'o/ /de yang 'jig rten mgon po'i rigs kyi rgyud tshigs su bcad pa stong phrag bcu gnyis pa las/ rgyud 'dir thig ni rnam pa bzhi/ /chos dbyings ye shes byin rlabs dang //sa la las kyi thig tu 'gyur/ /zhes gsungs pa'i phyir ro/ /dbus kyi dkyil 'khor thig gdab pa/ /chos kyi dkyil 'khor 'dra ba las/ /lte bar bcas cing rtsibs bcu drug/ /rim pa gsum dang ldan pa la/ /rtsibs ni nyis 'gyur nyid du bya//zhes gsungs pa ni 'di ltar cha dang po la cha bzhir bgos te/ dbus kyi cha gnyis la chos kyi 'khor 'dra ba lte ba dang mu khyud du bcas pa rtsibs bcu drug pa cig thig gdab par bya ste/ chos kyi 'khor lo 'dra ba ni dang po bcom ldan 'das sprul pa'i sku byang chub kyi shing drung du rdo rje'i gdan la mngon par rdzogs par sangs rgyas te/dgung bdun gyi bar du cang mi gsung bar bzhugs te/ de nas shing ta ra pri k+Sha'i drung du byon nas tshong pa ga gon dang bzang po la shis par brjod pa'i mdo bka' stsal pa dang /de nas mi mjed kyi bdag po dpal tshangs pas gser gyi 'khor lo rtsibs bcu drug pa cig phyag tu phul nas chos kyi 'khor lo bskor bar gsol ba gdab pa'i phyir phul ba dang 'dra ba la chos kyi 'khor lo 'dra ba la zhes bya'o/ /rim pa gsum dang ldan pa la//zhes pa ni gzhal yas khang rdzogs pa'i phyi rol du 'khor lo ni rim pa gnyis bya ba nyid de/ de la/ rtsibs ni nyis 'gyur nyid du bya/ /zhes pa ni de'i phyi rol gyi cha gnyis pa la dang po ni rtsibs sum cu rtsa gnyis pa'o/ /gnyis pa ni rtsibs drug cu rtsa bzhi bya ba kho na'o//thig gi cho ga rgyas par ni dkyil 'khor gyi cho gar bstan pas 'dir ma bshad do/ /dbus kyi phyogs su kun rig ni/ /dung dang kun+da zla 'dra la/ /zhal bzhi pa la rdo rje dang / /seng ge'i gdan la bzhugs pa dang / /ting 'dzin phyag rgyar ldan pa dang //rgyan rnams kun gyis brgyan pa bri/ /de yi spyan sngar ngan song kun/ /sbyong ba'i rgyal po bri bya ste/ /phyag gnyis ting nge 'dzin du bsnol/ /zla ba rgyas dang pad+ma'i mdog/ /rgyan rnams kun gyis legs rdzogs pa/ /rgyan mchog skyes bu gang ba bri//rgyab tu shAkya'i rigs dbang po/ /gtso bo thub pa bri bar bya/ /g.yas dang g.yon gyi phyogs su ni/ /rgyal mchog rin chen me tog ste/ /sangs rgyas spyan dang mA ma kI/ /de bzhin dkar mo sgrol ma rnams/ /grwa bzhi yi ni phyogs dag tu/ /rang gi rtags kyis mtshan pa bri//rtsibs kyi nang ni thams cad du/ /rdo rje sems sogs sems dpa' mchog/ /rdzu 'phrul che ba'i sems dpa' rnams/ /go rims bzhin du bri bar bya/ /mkhas pas sgeg mo la sogs pa/ /mchod phyir grwa yi phyogs su bri/ /sgo yi phyogs ni thams cad du//sgo ba bzhi po bri bya zhing / /rta babs khyams ni thams cad du/ /byams pa la sogs bri bar bya/ /zhes gsung pa ni dkyil 'khor bri ba yang dag par gsungs pa ste/ de la sta gon gyi rjes la thig gi cho ga rdzogs par byas la/ nang par nyi ma rtse shar la rin po che 'am/'bru'am sa la sogs pa'i tshon gyi phye ma la bdag nyid rnam par snang mdzad du bsams te/ rin po che'i phyag rgya bcas la gong du smos pa'i sngags rnams kyis rim pa ji lta ba bzhin du dkar po dang / ser po dang / dmar po dang / ljang gu dang / sngon po rnams la mu tig dang gser dang / byu ru dang / margata dang mu men rnams su byin gyis brlab par bya zhing rdo rje lcags kyu'i phyag rgya'am/ khu tshur gyi phyag rgya g.yas phyogs nas bskor zhing rig pa chen mo rgyun mi 'chad par zlos par bya ba ni dbus su chos kyi 'khor lo rtsibs bcu drug pa'i lte ba la rdo rje la sogs pas mtshan pa'i ka ba brgyad dang gdung du bcas pa'i dbus su bcom ldan 'das kun rig rnam par snang mdzad sku mdog dung la sogs pa dang 'dra ba'i dkar po zhal bzhi phyogs bzhir gzigs pa seng ge'i khri'i zhabs la rdo rje rtse lnga pa bsgreng ba'i steng na bzhugs pa dbu rgyan la sogs pa'i rgyan gyis yongs su brgyan pa'i ting nge 'dzin gyi phyag rgya dang ldan pa bri bar bya'o//de'i shar phyogs kyi gling la bcom ldan 'das ngan song thams cad yongs su sbyong ba'i rgyal po glang po che'i gdan la bzhugs pa sku mdog dmar skya skyes bu chen po'i mtshan sum cu rtsa gnyis la sogs pas yongs su brgyan cing rgyan cha lngas brgyan cing mnyam pa nyid kyi phyag rgya dang ldan pa bri bar bya'o//lho phyogs su bcom ldan 'das rin po che'i me tog rta'i khri la bzhugs pa sku mdog mthing ka rgyan thams cad kyis brgyan pa/phyag g.yon pa lte ba'i khung bu brten cing g.yas pa mchog sbyin gyi phyag rgya mdzad pa bri bar bya'o/ /nub phyogs su bcom ldan 'das shAkya thub pa sku mdog dmar po rma bya'i khri la bzhugs pa rgyan thams cad kyis brgyan pa/phyag g.yon pa gong ma lta bu la g.yas chos 'chad pa'i phyag rgya mdzad pa bri bar bya'o/ /byang phyogs su ni bcom ldan 'das me tog chen po rgyas pa nam mkha' lding gi khri la bzhugs shing sku mdog ljang gu rgyan thams cad kyis brgyan pa/phyag g.yon pa gong ma'i tshul la g.yas skyabs sbyin gyi phyag rgya can bri bar bya'o/ /de dag gi zur gyi re mig bzhi la shar lho mtshams su ni mA ma kI sku mdog dmar mo pad+ma'i gdan la bzhugs shing phyag g.yon dku ru brten zhing g.yas pa rdo rje thugs kar 'dzin pa bri bar bya'o//lho nub mtshams su sangs rgyas spyan sku mdog dmar ser pad+ma'i gdan la bzhugs shing phyag g.yon pa snga ma'i tshul la g.yas pa pad+ma'i steng na rin po che 'dzin pa bri bar bya'o/ /nub byang mtshams su gos dkar mo sku mdog dmar mo pad+ma'i gdan la bzhugs shing g.yon pa snga ma'i tshul la/g.yas pa pad+ma 'dzin pa bri bar bya'o/ /byang shar mtshams su ni sgrol ma sku mdog ljang gu pad+ma'i gdan la bzhugs shing phyag g.yon pa snga ma'i tshul la g.yas pas ut+pal 'dzin pa bri bar bya'o//lte ba'i mu khyud la rdo rje'i phreng bas bskor bar bya'o/ /rtsibs bcu drug pa'i steng rnams su ni sems dpa' bcu drug rnams bkod pa ste/ de la shar gyi rtsibs bzhi la rdo rje sems dpa' dang / rdo rje rgyal po dang / rdo rje chags pa dang / rdo rje legs pa bzhi rang rang gi mtshan mas mtshan cing pad+ma'i steng du bzhugs pa bri bar bya'o//lho phyogs kyi rtsibs bzhi la rim pa ji lta ba bzhin du rdo rje rin chen dang / rdo rje nyi ma dang / rdo rje rgyal mtshan dang / rdo rje bzhad pa bzhi pad+ma'i steng na rang rang gi phyag rgyas mtshan pa bri bar bya'o//nub phyogs kyi rtsibs bzhi la rdo rje chos dang / rdo rje rnon po dang / rdo rje 'khor lo dang / rdo rje gsung rnams pad+ma'i steng du bzhugs shing rang rang gi phyag rgyas mtshan pa bri bar bya'o/ /byang phyogs kyi rtsibs bzhi la rdo rje las dang / rdo rje go cha dang / rdo rje gnod sbyin dang / rdo rje khu tshur bzhi pad+ma'i steng na rang rang gi phyag rgyas mtshan pa bri bar bya'o/ /de la 'khor lo ni dkar po'o/ /de la mu ran ni rin po che'i phreng bas bskor bar bya'o/ /de nas gru bzhi pa'i rnam par bcad pa las/ de'i grwa bzhir gsang sngags mkhas par shes pa rnams kyis shar lho mtshams su ni sgeg mo dang spos ma gnyis pad+ma'i steng du bzhugs shing rang rang gi phyag rgyas mtshan pa bri bar bya'o//lho nub mtshams su ni phreng ba ma dang / me tog ma gnyis pad+ma'i steng na rang rang gi rtags kyis mtshan pa bri bar bya'o/ / nub byang mtshams su ni glu mkhan ma dang / snang ba ma gnyis pad+ma'i steng na rang rang gi phyag rgyas mtshan pa bri bar bya'o/ /byang shar mtshams su ni gar mkhan ma dang dri chab ma gnyis pad+ma'i steng na rang rang gi phyag rgyas mtshan pa bri bar bya'o/ /sgo bzhi na pad+ma'i steng du rdo rje lcags kyu dang zhags pa dang /lcags sgrog dang dril bu rnams rang rang gi rtags kyis mtshan pa bri bar bya'o/ /rta babs kyi khyams zhes pa ni sgo'i nang rol gyi stegs bu'i steng du yin la mchod pa'i khyams kyi nang ngos su bzhugs pa ni rgyud las gsal ba'i phyir te/ de yang rim pa bzhin du/ shar phyogs su ni dpa' bar 'gro ba dang / kun du bzang po dang / zla 'od gzhon nu dang / bzang skyong bzhi rang rang gi rtags kyis mtshan pa bri bar bya'o/ /lho phyogs su ni dra ba can gyi 'od dang / nam mkha' mdzod dang / rdo rje snying po dang / 'od dpag med bzhi rang rang gi mtshan mas mtshan pa bri bar bya'o/ /nub phyogs su ni ngan song kun 'joms dang / ye shes tog dang / blo gros mi zad pa dang / spobs pa brtsegs pa bzhi rang rang gi rtags kyis mtshan pa bri bar bya'o/ /byang phyogs su ni byams pa dang /ngan song kun 'dren dang / spos kyi glang po dang / don yod grub pa bzhi rang rang gi rtags kyis mtshan pa bri ste/ de dag thams cad sku mdog ni rigs bzhi'i bye brag las shes par bya zhing / gdan pad+mar kun gcig pa kho na'o//nyan thos rgyal ba thams cad dang / /de bzhin rang rgyal gtso bo rnams/ /khro bo mngag gzhug pho nya'i tshogs/ /bri bya yang na ming yang rung / /phyi yi dkyil 'khor phyi rol du/ /gling bzhi po ni bri bya ste/ /'dzam bu'i gling du tshangs pa bri/ /byang phyogs su ni dbang phyug che//shar dang nub kyi gling dag tu/ brgya byin khyab 'jug thams cad kyang / /'khor dang bcas pa bri bar bya/ /gzhan dag kyang ni de bzhin te/ /lha min dri za nam mkha' lding / /gnod sbyin srin po lto 'phye che/ /'byung po yi dags 'dre rnams dang //klu rnams sbrul dang ri dgas dang / /rgyal po bzhi rnams bri bar bya/ /gza' dang skar ma rgyu skar rnams/ /khro bo ma rungs 'tshe ba yi/ /gnod pa byed dang de bzhin du/ /bgegs dang log 'dren drag po dang / /sems can kun la phan byed pa/ /drang srong skal ba chen po rnams//mkha' 'gro ma dang bud med dang / /de bzhin srin po rnal 'byor ma/ /'byung ba bzhi yi lha chen po/ /khyim dang ri la gnas pa dang / /shing dang kun dga'i gnas la sogs/ /dur khrod grong khyer gnas pa rnams/ /ming dang brda tsam yang na ni//thig le rnams kyang bri bar bya/ /zhes pa la sogs pa ni 'dir 'gro ba drug gi sems can dgod par gsungs pa ste/ de la 'khor lo rtsibs sum cu rtsa gnyis pa la ni shar la sogs pa'i rim pa ji lta ba bzhin du pad+ma'i steng du 'phags pa kun dga' bo//shA ri'i bu dang / rab 'byor dang / 'od srungs dang / 'od srungs chen po dang / cang shes dang / nye ba 'khor dang / mau dgal gyi bu rnams lhung bzed dang / 'khar gsil bsnams pa rnams dgod par bya'o/ /lho phyogs kyi rtsibs brgyad la 'phags pa rang sangs rgyas ser skya dang /'od mdzes dang / kun 'grogs dang / lag brkyang dang / nyi ma'i tog dang / shAkya 'od dang / pad+ma can dang legs bzangs rnams bde bar gshegs pa'i cha lugs kyis pad+ma'i steng du bzhugs pa bri'o/ /nub phyogs kyi rtsibs brgyad la ni khro bo chen po stobs po che dang /mi g.yo mgon dang / gshin rje gshed dang / rta mgrin dang / bdud rtsi 'khyil pa dang / dbyug pa sngon po dang / gzhan las rgyal ba dang / khams gsum rnam par rgyal ba rnams pad+ma'i steng du mche ba rnam par gtsigs shing sku la sbrul gyi rgyan cha lngas brgyan pa/stag gi pags pas smad dkris pa/ rang rang gi phyag rgyas mtshan pa rnams bri par bya'o/ /byang gi rtsibs brgyad la ni de dag gi pho nya'i tshogs brgyad de/ seng ge'i mgo dang / stag gi mgo dang /'ug pa'i mgo dang / bya rog gi mgo dang / khyu mchog gi mgo can dang / sbrul mgo can dang / sha ba'i mgo can dang / phag gi mgo can rnams bri bar bya'o/ /de dag gi phyi rol gyi 'khor lo rtsibs drug cu rtsa bzhi la shar gyi rtsibs dang po dang /de bzhin du lho dang nub dang / byang gi rtsibs dang po rnams su ni yul 'khor srung dang / 'phags skyes po dang / mig mi bzang dang / rnam thos sras rnams rang rang gi phyag mtshan dang ldan pa bri bar bya'o/ /de nas de dag gi g.yon phyogs rnams su ni sa bdag dang /gshin rje dang / chu lha dang / gnod sbyin dang / me lha dang / srin po dang / rlung lha dang / srin po dang / rlung lha dang / bde byed rnams rang rang gi bzhon pa dang / kha dog dang mtshan mas mtshan pa bri bar bya'o/ /de nas yang de dag gi g.yon phyogs rnams su nyi ma dang / zla ba dang / gza' lhag dang / mig dmar dang / phur bu dang / pa sangs dang / spen pa dang / sgra gcan rnams rang rang gi gdan dang mtshan mas mtshan pa bri bar bya'o/ /de nas yang shar phyogs la sogs pa'i rim pa ji lta ba bzhin du smin drug dang / snar ma dang / mgo dang / lag dang / nam so dang / rgyal dang / skag dang / mchu dang / gre dang / dbo dang / me bzhi dang / nag pa dang / sa ri dang / sa ga dang / lha mtshams dang / snon dang / snubs dang / chu stod dang / chu smad dang / gro bzhin dang / phyi bzhin dang /mon gre dang / mon gru dang / khrums stod dang / khrums smad dang / nam gru dang / tha skar dang / bra nye rnams rang rang gi mtshan mas mtshan pa bri bar bya'o/ /de nas yang de dag gi g.yon phyogs su drang srong chen po rgyas pa dang / b+ha ra d+h+wa dza dang / ser skya dang /skye dgu'i bdag po dang / rgyun shes dang / gnas mchog dang / nag po dang / gzegs zan rnams rang rang gi mtshan mas mtshan pa dgod par bya'o/ /yang de dag gi g.yon phyogs su 'jig rten pa rnams kyi gtso bo brgyad dgod de/ de la rim pa ji lta ba bzhin du/lha ma yin gyi rgyal po thags bzangs ris dang / dri za'i rgyal po zur phud lnga pa dang / nam mkha' lding gi rgyal po gser mig can dang / gnod sbyin gyi rgyal po lus ngan po dang / klu'i rgyal po dga' bo dang / srin po'i rgyal po lang ka mgrin bcu dang / lto 'phye'i rgyal po sbrul mgo can dang / 'byung po'i rgyal po tshogs bdag chen po dang / yi dags kyi rgyal po kha la me 'bar ma rnams rang rang gi mtshan ma dang / cha lugs kyis yongs su dgod par bya'o/ /de nas cha bzhi pa la de'i mtha' ma zlum por bskor te/ gling bzhi par byas la/ shar phyogs su shar gyi lus 'phags po zla ba phyed pa 'dra ba gling g.yog dang bcas pa bris la de'i dbus su brgya byin 'khor dang bcas pa bri bar bya'o/ /lho phyogs su ni lho'i 'dzam bu'i gling sog ka 'dra ba/ gling g.yog dang bcas pa bris te/de'i dbus su tshangs pa 'khor dang bcas pa bri bar bya'o/ /nub phyogs su nub kyi ba lang spyod nyi ma shar ba dang 'dra ba zlum po gling g.yog dang bcas pa bris te de'i dbus su khyab 'jug 'khor dang bcas pa bri bar bya'o/ /byang phyogs su ni byang gi sgra mi snyan gru bzhi pa'i gzugs la kha dog ser po gling g.yog dang bcas pa bris te/de'i dbus su dbang phyug chen po 'khor dang bcas pa bri bar bya'o/ /de nas cha lnga la gling drug tu bcas pa der 'gro ba rigs drug dgod par bya ste/ lha'i gnas su lha'i dbang po brgya byin nam bdud rtsi'i bum pa'am/lha lha zhes pa'i phreng ba dgod par bya'o/ /lha ma yin gyi gnas su lha ma yin gyi rgyal po thags bzangs ris sam/ ral gri'am/ lha ma yin lha ma yin zhes bya ba'i phreng ba dgod par bya'o/ /mi'i gnas su mi'i rgyal po 'khor los sgyur ba'i rgyal po'i cha lugs sam 'khor lo'am mi mi zhes bya ba'i phreng ba bri bar bya'o//dud 'gro'i gnas su ni dud 'gro'i rgyal po mtha' yas sam/ seng ge'am dud 'gro dud 'gro zhes bya ba'i phreng ba dgod par bya'o/ /yi dags kyi gnas su ni yi dags kyi rgyal po kha rab tu 'bar ba lcags kyi thu lum rab tu 'bar ba'am yi dags yi dags zhes pa'i phreng ba bri bar bya'o//dmyal ba'i gnas su ni dmyal ba'i rgyal po chu srin gdong can shAl ma li'i sdong po'am/ dmyal ba dmyal ba zhes bya ba'i phreng ba bri bar bya'o/ /de la sring mo bzhi dang /mkha' 'gro ma dang / rnal 'byor ma rnams ni gling bzhi po rnams kyi bar bar du bud med kyi gzugs su cung zad khros pa dang / rab tu khros pa'i bzhin gyis bri bar bya'o/ /srid pa'i 'khor lo rnams kyi bar du ni ri dang shing dang 'bab chu dang khyim dang dur khrod dang nya dang /gtsug lag khang la sogs pa bri bar bya'o/ /de la gzhal yas khang gi phyi rol du rdo rje dang pad+ma dang / 'bar ba'i phreng bas kun nas 'khor bar bskor bar bya'o/ /'phags pa rnams kyi 'khor lo ni me tog gi phreng bas bskor bar bya'o/ / 'jig rten pa'i gtso bo'i 'khor lo ni dpag bsam gyi shing gis bskor bar bya'o/ /gling bzhi'ang de bzhin du byas te/ srid pa'i 'khor lo ni rten 'brel bcu gnyis kyis bskor bar bya'o/ /de'i phyi rol du ni rlung dang gser dang chu'i phreng bas bskor bar bya ste/ lha de dag thams cad kyi kha dog dang /mtshan ma dang / gdan la sogs pa ni dkyil 'khor gyi cho gar blta bar bya ste/ 'dir ni ma bshad do/ /de la gang dag 'di skad du sa la gnas pa'i byang chub sems dpa' 'dra ba la rdo rje sems dpa' la sogs pa ni dkyil 'khor gyi nang du bkod la/byams pa la sogs pa rta babs kyi khyams su dgod pa ni rigs pa ma yin no zhe na/ de ni shin tu rmongs par gyur pa yin te/ bde bar gshegs pa'i bka' nges pa'i don gyi mdo rnams la the tshom za ba rnams la lan gyi tshig sbyin par bya ba yang ma yin na 'on kyang 'dir rdo rje sems dpa' la sogs pa ni 'khor los sgyur ba lnga la dgongs nas byang chub sems dpar btags kyi thog ma med pa nas yang dag par rdzogs pa'i sangs rgyas yin la/byams pa la sogs pa ni bskal pa bzang po 'di nyid kyi byang chub sems dpa' yin te/rgyud 'dir yang / rdo rje sems sogs sems dpa' mchog/ /rdzu 'phrul che ba'i sems dpa' rnams/ /zhes khyad par gyi tshig gsungs pa dang / rta babs khyams ni thams cad du/ /byams pa la sogs dgod par bya/ /zhes khyad par phye ba nyid kyis yon tan gyi khyad par yod par shes par bya ste/shes rab kyi pha rol tu phyin pa brgyad stong pa las kyang / bcom ldan 'das kyis bka' stsal pa/ rab 'byor mi bskyod pa'i drung na gnas pa'i byang chub sems dpa' de dag de bzhin gshegs pa 'ba' zhig 'dus pa yin par rig par bya'o zhes gsungs pa'i phyir ro//de nas mkhas pas dkyil 'khor la/ /bla re rgyal mtshan lhab lhub dang / /gdugs dang rnga ma lda ldi dang / /'phan dang sna tshogs na bza' mchog/ /gser la sogs pa'i bum pa mchog/ / brgyad dang bcu drug lhag kyang rung / /dbang bskur rin chen chus bkang ba'i/ /bum pa lnga ni gzhag par bya/ /mar me gtor ma'i bum pa dang / /mdzes pa'i bshos rnams gzhag bya ste/ /gza' dang btung ba sbyar legs dang / /bca' ba sna tshogs gzhag par bya//gnod sbyin srin po'i kha zas su/ /gtor ma rnam pa sna tshogs gzhag/ /'byung po kun dang lha dang klu/ /mi dang mi min de bzhin te/ /me tog dri rnams sna tshogs gzhag/ /'o ma mar dang kha rar bcas/ /rnam rgyal bum pa dri yi chus/ /rab tu bkang ste gzhag par bya//zhes gsungs pa ni 'dir mchod pa'i yo byad phun sum tshogs pa bsags par gsungs pa ste/ de la rnam pa gnyis te/ dmigs pa dang bcas pa dang / dmigs pa med pa'i mchod pa'o/ /dmigs pa dang bcas pa'i mchod pa la gsum ste/lus dang ngag dang rdzas so/ /dmigs pa med pa la gnyis te/ thun mong dang khyad par can gyi mchod pa'o/ /de dag la dbye ba ni dpag tu med pa cig yod de 'dir ma bshad do/ /de la 'dir re zhig dmigs pa dang bcas pa rdzas kyi mchod pa gsungs te/gsang sngags la sogs pa'i rdo rje slob dpon gyis dkyil 'khor gyi steng logs su bla re dbub pa dang / de'i zur bzhi la rnga yab gser gyi yu ba can gdags pa dang / dkyil 'khor gyi zur bzhir chu srin la sogs pa'i rgyal mtshan gzugs pa dang /de dag gi bar bar du gdugs dang / lda ldi dang ba dan dang / dar la sogs pa'i na bzas brgyan par bya'o/ /de nas dkyil 'khor gyi mtha' logs su gser ram dngul lam/ zangs sam sa la sogs pa'i bum pa rtsa ba'i lha'i grangs dang sbyar ba'am/bcu drug gam brgyad la sogs pa'i nang na dri dang sman dang 'o ma dang / me tog la sogs pas bkang ba/ gos dang kha rgyan du bcas pa gzhag par bya ste/ de dag ni mchod pa'i bum pa zhes bya'o/ /dbang bskur rin chen chus bkang ba'i//bum pa lnga ni gzhag par bya/ /zhes pa ni slob ma dbang bskur ba'i phyir/ bum pa'i kha dog dkar po lnga la pad+ma'i steng du bde bar gshegs pa lnga'i phyag rgya 'khor lo dang / rdo rje la sogs pas mtshan par bris la/ nang rin po che sna lnga dang / dri dang 'o mas bkang ba gzhag par bya ste/de dag ni dbang gi bum pa zhes bya'o/ /de nas rang gi mdun du sngar bsnyen pa'i skabs su bgegs mthar byed kyi snying po bzlas pa'i bum pa dri'i chus bkang ba bzhag ste/ de ni las thams cad pa'i bum pa zhes bya'o//de nyid kyi tshe gzhal yas khang gi nang du lha bskyed pa ni rnam par rgyal ba'i bum pa zhes bya'o/ /lha grangs bstun la lha re re la snod re/ de nas dkyil 'khor gyi mtha' logs su bla na med pa'i lha dang bla mar gyur pa'i lha gnyis kyi grangs dang sbyar ba'am/ bla na med pa'i grangs dang sbyar ba'am/ drug cu pa la sogs pa'i zhal zas dang / rgun 'brum la sogs pa'i btung ba dang / kha ra la sogs pa'i bca' ba dang a mra la sogs pa'i 'bras bu dang / ut+pal la sogs pa'i me tog dang / a ka ru la sogs pa'i bdug pa dang /ga bur la sogs pa'i dri dang / rin po che la sogs pa'i snang ba dang / gur gum la sogs pa'i byug pa gzhag par bya'o/ /de nas bdag nyid chen pos lha la sogs pa'i yo byad du'ang de bzhin du gzhag par bya ba'o/ /lha ma yin dang /klu la mngar gsum dang dkar gsum du sbyar ba'i gtor ma chen po gcig dang / gnod sbyin dang srin po la sogs pa la sha dang khrag dang chang la sogs pa sbyar ba'i gtor ma chen po gcig dang / gzhan yang snying rje bskyed pa'i sems can thams cad la mi rnams kyis longs spyod pa'i kha zas sna tshogs pas bkang ba'i gtor ma chen po gcig gzhag par bya zhing me tog gi phreng ba sna tshogs pas kyang dkyil 'khor dang rdzas thams cad brgyan par bya'o//de nas khrus sogs rab byas la/ /dri dang rgyan mchog phreng ba can/ /dri zhim kha bkang mchog mdzes pa//rdo rje 'dzin mas zhugs nas kyang / /me tog thogs te sgo phyogs 'dug/ /gtso bo rgyal ba sras kyi 'khor/ /mang po rnams ni spyan drangs te/ /phyag rgya sngags dang bdag ldan zhing / /lcags kyu la sogs rnal 'byor gyis/ / dzaHhUM baM hoHthugs rje'i bdag/ /tshur gshegs kyis ni brjod nas kyang / /gsang ba'i bcing bas bcings nas ni/ mdzub gnyis lcags kyu'i tshul du bya/ /zhags pa bzhin du sbyar nas kyang / /de nyid lcags sgrog tshul du bya/ /mtheb gnyis nang du bkug nas kyang //bskyod par gyur na dbang du 'gyur/ /zhes gsungs pa ni 'dir rnal 'byor phun sum tshogs pa gsungs pa ste/ de la 'dir ting nge 'dzin gsum gyi tshig mang bas 'jigs pas ma bris shing tshegs chung ba bsgrub pa'i phyir thams cad dkyil 'khor gyi cho gar byas so//'dir ni rgyud kyi tshig drang thang du bkrol ba ste/ de la rnam pa gnyis so/ /bdag nyid phun sum tshogs pa dang / las phun sum tshogs pa ste/ de la bdag nyid phun sum tshogs pa ni 'di ltar/ de nas khrus sogs rab byas la/ /dri dang rgyan mchog phreng ba can//dri zhim kha bkang mchog mdzes pa/ /rdo rje 'dzin mas zhugs nas kyang / /me tog thogs te sgo phyogs 'dug/ /ces gsungs te/ de la dang por dri dang 'o ma la sogs pa 'jig rten las 'das pa'i ched du khrus legs par byas la gur gum la sogs pas lus legs par byugs te/gser la sogs pa'i dbu rgyan dang / rna cha dang / mgul rgyan dang / gdu bu dang / ut+pal dang / dar dpyangs dang do shal la sogs pas lus brgyan la/ gos dkar po gyon la me tog gi phreng bas mgo la brgyan cing / 'o ma la sogs pas kha bkang la ci nas kyang shin tu mdzes pa yid du 'ong bar byas nas rdo rje 'dzin mas 'jug par byas te/ de nas rdo rje 'dzin ma ni rnam pa gnyis so/ /gcig ni bdag nyid kyi 'og tu a las zla ba'i dkyil 'khor de'i steng du hrIHlas ut+pal/ / de dag gyur pa las bdag nyid de bzhin gshegs pa thams cad mchod pas dgyes shing dbang du byed pa/ las thams cad kyi rdo rje 'dzin ma zhes bya ba'i lha mo sku mdog dkar mo shin tu mdzes pa cig tu bsam mo/ /gcig ni de bzhin gshegs pa thams cad kyi yum rdo rje dbyings kyi dbang phyug ma zhes bya ba'i phyag rgya lag pa gnyis pad+ma ltar byas la mthe'u chung gnyis nang du bkug mthe bong gnyis brkyang ste mdzub mo gnyis kyi rin chen dang srin lag gnyis pad+ma'i tshul du byas la gung mo gnyis ngos sbyar te bsgreng la de'i rtse mo la me tog gi phreng ba bkal te/shar gyi sgor 'dug par bya ba nyid do/ /de la gang dag 'di skad du rnal 'byor gyi dang por ni chos thams cad bdag med par sgom pa ste/ de yis rnam par dag pa las khrus dang rgyan la sogs pa ni dgos pa med do zhe na de ni ma yin te/bde bar gshegs pas 'di nyid yang gsungs pa/ ci nas kyang yid du 'ong zhing mdzes pa rnams kyis bde bar gshegs pa la mchod pa dang de dag gi spyan sngar mi mdzes pa spang ba'i phyir dang / de bzhin du 'dul ba'i mdo rnams su'ang bcom ldan 'das kyis nye ba 'khor la bka' stsal pa/nye ba 'khor dge slong rnams kyis nang par sngar langs la gdong dang so'i dri ma dag par bkrus la bla gos dang snam sbyar tshul bzhin du bgos te/ lus dang ngag dang yid kyi spyod pa kun nas bsdams shing mdzes pa nyid kyis ston pa dang bla ma dag la phyag bya'o zhes gsungs pa'i phyir ro//yang gang dag 'di skad du mchod pa'i skabs su ni bsod nams kyi tshogs sogs pa yin pas bdag nyid tha mal pa'i gnas skabs nyid kyis mchod par bya ba yin zhing / lha'i skur bsgom pa ni ye shes kyi tshogs sogs pa yin pas na/lha mo'i skur bsam pa ni 'brel ba med do zhe na/ de ni 'di ltar bcom ldan 'das kyis sangs rgyas thams cad kyi rgyud chen po las/ rnal 'byor rnam pa gsum yin te/ /yid mdzes pa yi rnal 'byor 'ang / /'jigs pa yi ni gzugs can dang /sna tshogs pa ni lha yi sku/ /las rnams ma lus byed par 'gyur/ /zhes gsungs pa'i phyir ro/ /bde bar gshegs pa rnams la mchod pa'i khyad par yid du 'ong bas bya ba dang / dbang du bya ba'i las kyi lha mo'i gzugs su bya ba kho na'o//de bas na lha mo'i tshul du gnas pa las sems can rnams kyi don du sems bskyed la chos thams cad bdag med par bsams te/ oM shU n+ya tA dz+nyA na badzra swa b+hA ba At+ma kou0f85haM zhes brjod par bya'o/ /de nas chos thams cad rang bzhin gyis rnam par dag pa d ri ma dang bral ba stong pa nyid du bsams te/oM swa b+hA ba shud+d+haHsarba d+ha rmAHswa b+hA ba shud+d+hou0f85haM zhes brjod par bya'o/ /de nas gong du smos pa'i rnal 'byor dang / sngags kyis bgegs bskrad par bya ba dang / rdo rje'i sa gzhi la sogs pa'am/ rdo rje lu gu rgyud k yi sngags kyis rim pa ji lta ba bzhin du mtshams gcad par bya'o//de nas bdag nyid khro bo stobs po cher bskyed la gnas dang bdag nyid dang mchod pa'i rdzas rnams la/ oM badzra kro d+ha ma hA ba la rak+Sha rak+ShaHswA hA/ zhes bya bas bsrung bar bya ste/ de yang rdo rje thod kyi rgyud las/dang por yungs kar dri chu yis/ /gnas dang bdag nyid rnal 'byor bsrung / /zhes gsungs so/ /de nas mgrin pa'i nang du hrIHbsams te/ de gyur pa las pad+ma 'dab ma brgyad pa cig tu bsam mo/ /de nas pad+ma'i nang du lce la yi ge hUM bsams te/de gyur pa las rdo rje rtse gsum pa cig bsam par bya ba dang / lag pa gnyis su a dang ma las nyi ma dang zla ba bsams te/ de dag gi steng du yang hUM bsams la/ de gyur pa las lag pa gnyis rdo rje rtse lnga pa re re bsgom par bya'o/ de nas bdag gis gsum la skyabs su 'gro ba dang /sdig pa bshags pa dang / sdom pa gzung ba dang / bsod nams la rjes su yi rang ba dang / bsod nams yongs su bsngo ba dang / byams pa la sogs pa tshang med pa bzhi bsgom pa dang / sems can thams cad lam la gnas par bya ba la sogs pa byas te/rang gi snying gar a las zla ba'i dkyil 'khor bsams la de'i steng du hUM bsams te/ de las 'od zer kha dog rnam pa lnga nam mkha'i phyogs su 'phros pa las/ de bzhin gshegs pa'i gtso bo dang 'khor du bcas pa rnams spyan drangs la mdun gyi nam mkha' la bzhugs par bsams te/mchod pa rnam pa lngas mchod cing phyag byas la dang po'i phyag rgya bcas la bla na med pa'i sems bskyed par bya'o/ /phyag rgya sngags dang bdag ldan zhing / / lcags kyu la sogs rnal 'byor gyis/ /zhes pa la sogs pa ni 'di ltar shar phyogs kyi khro mo bskyed la/ rdo rje bsdams pa las mthe bong gnyis 'dud de/ mdzub mo gnyis lcags kyu'i tshul du bkug ste/ dzaHzhes brjod pas/ bde bar gshegs pa rnams dgug par bya ba dang /de bzhin du lho phyogs la sogs pa'i khro mor bskyed de/ rim pa ji lta ba bzhin du rdo rje bsdams pa las lag pa g.yon pa'i mtheb mo dang mdzub mo rtse sprad de de'i nang du g.yas pa'i mthe bo bcug la mdzub mo zhags pa ltar brkyang ba la hUM zhes brjod nas gzhug par bya ba dang /de nyid las lcags sgrog gi tshul du mtheb mdzub bzhi rtse sprad la baM zhes brjod nas brtan par bcing ba dang / mthe bong gnyis nang du bkug la mdzub mo gnyis gru bzhi par byas pas lan gsum gyi bar du bskor zhing hoHzhes brjod pa ni dgyes par bya ba nyid do//de nas rtags byung dgyes nas ni/ /dbus mtha' med par mngon sum blta/ /arga la sogs lha rdzas dang / /dbyangs snyan pa yis bstod pa dang / /mchog gi dam pa rnams kyis mchod/ /ces gsungs pa ni 'dod pa'i yon tan lnga mchog tu gyur pas yongs su mchod par gsungs pa ste/de la rtags ni 'dir rnam pa gsum du shes par bya ste/ nang du yid kyi rnam par shes pa khyad par can du gyur pa dang phyi rol du 'byung ba'i ngo bo khyad par can du gyur pa dang / de nyid kyi gzugs rnams g.yo bar gyur pa'o//de la rtags de dag nyid kyis bde bar gshegs pa dgyes par bya ste/ dbus mtha' med par mngon sum lta ba ni dkyil 'khor ste de nyid du blta ba'o/ /de nas der byon pa dang / gong du smos pa'i tshul gyis dang por me tog dbul ba dang / de nas ar+g+has zhabs bsil ba dang / de nas phyag bya ba dang / de nas rim pa ji lta ba bzhin du 'khor los sgyur ba'i rgyal po'i tshul gyis bdug pa dang snang ba dang / zhal zas dang dri dang na bza' rnams kyis mchod par bya'o/ /mchog gi dam pa rnams kyis mchod/ / ces pa ni dmigs pa med pa'i mchod pa gsungs pa/ de la dmigs pa med pa thun mong gi mchod pa ni rang gi snying gar a las zla ba'i dkyil 'khor bsam/ de'i steng du raM dmar ser las yid bzhin gyi nor bu rin po che zur brgyad pa sngon po 'bar ba cig bsams la/de las byung ba'i mchod pa rta dang glang po dang / skyes pa dang / bud med dang / ral gri dang / 'khor lo dang / me long dang / rol mo dang / rnga dang / cang te'u dang / pi wang dang / bdud rtsi la sogs pa lha dang mi rnams kyi mchod pa'i mchog tu gyur pa dpag tu med pas mchod par bya ba nyid do//de la dam pa zhes bya ba'i sgras ni dmigs pa med pa khyad par gyi mchod pa gsungs te/ de la 'dir ngan song sbyong ba'i thugs ka nas sangs rgyas spyan phyung ste/ rnam par snang mdzad kyi thugs kar phul nas bde ba dam pa'i ros rgyas par mchod pa dang /de nas slar rnam par snang mdzad kyi thugs ka nas sangs rgyas spyan ngan song sbyong ba'i thugs kar phul ba dang / de nas rim pa ji lta ba bzhin du bcom ldan 'das rnam par snang mdzad kyis rin po che tog dang / shAkya thub pa dang / me tog cher rgyas rnams la gos dkar mo la sogs pas bde ba dam pa'i mchod pas rgyas par bya ba dang /yang rim pa ji lta ba bzhin du sangs rgyas spyan dang sgeg mo dang / spos ma dang / lcags kyu ma bzhis rdo rje sems dpa' la sogs pa shar phyogs kyi sems dpa' bzhi la mchod pa dang /de bzhin du lho'i lha mo bzhis rdo rje rin chen la sogs pa la mchod pa dang / nub kyi sems ma bzhis rdo rje chos la sogs pa la mchod pa dang / byang gi sems ma bzhis rdo rje las la sogs pa la mchod pa bya ba dang / rang rang gi phyag rgya chen pa'i gzugs kyis dam tshig gi phyag rgya rdo rje bsdams pa las kyi phyag rgyas snying po dbul bar bya ba nyid do//de la gang dag 'di skad du/ /lha mo rnams kyis bde ba dam pa'i mchod pa 'bul ba ni rnal 'byor bla ma dang rnal 'byor bla na med pa'i rgyud rnams yin te/'dir ni de dag 'brel pa med do zhe na/ de ni bde bar gshegs pa'i bkas rmongs par gyur pa yin te 'di ltar 'brel pa nyid ci'i phyir 'brel pa med de bzhin gshegs pa la phyi dang nang dang / rung ba dang mi rung ba zhig mnga' 'am/ 'on te rnal 'byor gyi rgyud 'di nyid du bcom ldan 'das kyis rung ba ma yin gsungs sam/'on te bla na med pa'i rgyud gzhan nas 'dir 'gog gam/ de bas na de bzhin gshegs pa la ni sku gcig pa'i rang bzhin dang / gsung gcig pa dang / thugs gcig pa dang / sangs rgyas kyi yon tan gcig pa yin te/de bzhin gshegs pa la 'dod pa'i yon tan lngas mchod kyang de dag gis longs spyod pa'am/ ro nyams su myong ba la sogs pa mi mnga' yang bdag nyid kyi bsod nams bsags pa'i phyir dang / sems can mtha' dag bsgral ba'i phyir 'khor los sgyur ba'i rgyal po'i longs spyod kyi tshul gyis yongs su mchod par bya ba nyid de/de yang sangs rgyas rol pa'i rgyud rnal 'byor spyi'i rgyud las kyang / rnam par snang mdzad rdo rje dbyings/ /'dod yon lnga yi mchod pa dag/ / 'gro ba'i don la rab sbyar nas/ /rang nyid kyis ni dgyes pa mdzad/ /ces gsungs pa'i phyir ro/ /dbyangs snyan pa yis bstod pa dang / /zhes pa ni 'di ltar rdo rje snying gar bsgreng ste/ dril bu gnas gsum du dkrol bas mtshan brgya rtsa brgyad kyis bstod pa ni ngag shin tu ring ba dang snyan pas rdo rje glu dang bstod pa bya ba nyid de/rang bzhin 'od gsal rnam dag kyang / /bde chen sangs rgyas chen pos ni/ /'gro kun tshul bzhin sgrol mdzad pa/ /rnam snang mdzad la phyag 'tshal bstod/ /ces pa la sogs pas bstod pa nyid dang /rdo rje sgeg mo la sogs pa'i rdo rje'i glu blang ba ni mchod pa thams cad kyi mtshams su blang bar bya ste/ de yang de kho na nyid bsdus pa'i rgyud las/ rdo rje sems dpa' bsdus pas ni/ /rdo rje rin chen bla na med/ /rdo rje chos kyi glu blangs pas/ / rdo rje las kun 'grub par 'gyur/ /zhes pa la sogs pa'o/ /de la mchod pa'i sngags dang phyag rgya dang bstod pa'i tshig la sogs pa ni tshig mang ba'i skyon du 'gyur gyis dogs nas 'dir ma smos te/ dkyil 'khor gyi cho gar blta bar bya'o/ /de nas 'byung po kun gyi gtor ma bya//sems can bkres shing skom pas gdungs pa dang / /phyogs na gnas pa rnams la rnam par brtag /de yi gtor ma ji ltar mthun par bya/ /zhes gsungs pa ni 'dir snying rje bskyed pa'i lha rnams la gtor ma sbyin par gsungs te/ de la gtor ma rnams kyi 'og tu yaM las rlung gi dkyil 'khor bsams la/de'i steng du raM las me'i dkyil 'khor bsam/ de'i steng du traM las rin po che'i snod rgya che ba rin po che sna bzhi las grub par bsam mo/ /de nas de'i steng du hUM las rdo rje bsams te/ de'i lte ba la hUM bsams la/de nas rdo rje dang las kyi me 'bar bas rdzas thams cad lha'i bdud rtsi dkar zhing 'tsher bar gyur pa dang / rdo rje'i lte ba la gnas pa'i hUM las 'od zer nam mkha'i phyogs su spros pa la ye shes kyi bdud rtsi blangs te/ rdo rje dang lhan cig zhu bar gyur pa ni rdo rje bdud rtsi zhes bya'o//de nas oM swa b+hA ba shud+d+ha sarba d+harmAHswa b+hA ba shud+d+hou0f85haM zhes pa dang / oM shUn+ya tA dz+nyA na badzra swa b+hA ba At+ma kou0f85haM zhes brjod do/ /de nas rang gi snying ga'i sa bon las 'od 'phros pas gang la dmigs pa'i mgron thams cad bkug st e/thams cad rnam par snang mdzad du gyur pa las de dag gi rkan la a las zla ba'i dkyil 'khor bsam/ lce la hUM las gyur pa'i rdo rje rtse gsum pa bsams te/ de'i rtsa'i bu ga dag gis bdud rtsi la zug pas 'thungs par bsams nas sngags dang tshigs su bcad pa rnams bton te gtang par bya'o//de nas sngags pas bla med byang chub kyi/ /gnas su slob ma yongs su smin par bya/ /'gro la phan phyir myur du byang chub par/ /de dag byang chub sems mchog bskyed du gzhug /de nas byin brlab byang chub smon lam gdab//zab cing rgya che dam pa'i chos bsgrags la/ /bsrung ba byas nas brtul zhugs sdom gnas pa/ /rab zhi kha nas sngags brjod gzhug par bya/ /dar la sogs pas mig gnyis g.yogs nas ni/ /rdo rje 'dzin pa'i phyag rgyar lag gnyis bya//me tog rin chen la sogs de brgyan la/ /g.yon gyi lag pa bkang ste gzhug par bya/ /zhes gsungs pa ni/ 'dir slob ma dbang bskur ba gsungs te/ de la 'di ni 'das pa dang da ltar ba gnyi ga la thun mong bya ba nyid do/ / de la dang po blo dang ldan pa rnams kyis bde bar gshegs pa rnams la gsol ba gdab pa dang / rang nyid bde bar gshegs pa rnams las rim pa ji lta ba bzhin du dbang mnos te/ yang dag par gnang ba blang bar bya'o/ /de nas gnang ba legs par byin pa dang / snying ga dang dpral ba dang lkog ma gsum du zla ba la gnas pa'i yi ge 'bru gsum las sku gsum du bsams te/oM sarba ta thA ga ta tsit+ta badzra swa b+hA ba At+ma kou0f85haM/ oM sarba ta thA ga ta bA ga badzra swa b+hA ba At+ma kou0f85haM/ oM sarba ta thA ga ta kA ya badzra swa b+hA ba At+ma kou0f85haM/ zhes brjod nas lus dang ngag dang yid gsum byin gyis brlab par bya'o/ /de nas nus pa dang ldan pa las slob ma dbang bskur bar bya ba ni/ rang lhar gsal la slob ma rnams rnam par snang mdzad du bsams te/ las thams cad la bya ba nyid do/ /de nas sngags pas bla med byang chub kyi//gnas su slob ma yongs su smin par bya/ /zhes pa ni bla na med pa thar pa chen po'i grong khyer yin pa'i phyir gnas zhes bya ste/ der slob ma yang dag par rdzogs pa'i byang chub tu smin par bya ba nyid do/ /'gro la phan phyir myur du byang chub par//de dag byang chub sems mchog bskyed du gzhug /ces pa ni dang por sdig pa bshags pa dang / gsum la skyabs su 'gro ba dang / bla na med pa yang dag par rdzogs pa'i byang chub tu sems bskyed du gzhug pa dang / rdo rje theg pa la khas yang dag par 'ches su gzhug par bya ste/de dag gi tshig rgyas pa ni dbang gi rim par blta bar bya'o/ /de nas byin brlab byang chub smon lam gdab/ /zab cing rgya che dam pa'i chos bsgrags la/ /zhes pa ni byin gyis brlab pa ni rnam par snang mdzad du byin gyis brlab par 'brel to//dam pa'i chos bsgrags pa ni/ deng nas khyod ni bder gshegs kyi/ /kun gyi rigs su zhugs pas na/ /ngas ni khyod kyi ye shes bskyed/ /ye shes de yi stobs dag gis/ /sangs rgyas kun kyang 'grub 'gyur na/ /dngos grub gzhan lta smos ci dgos//zhes pa la sogs pa'i tshig bsgrag par bya ba nyid de/ de yang 'dir tshe 'das pa'i gang zag rnams la ni gdon mi za bar rnam par dag pa zhes bya ba'i ting nge 'dzin gyis de'i rnam par shes pa bkug ste tshig rnams dang / yang na ma dang pha la sogs pas brjod par bya'o//bsrung ba byas nas brtul zhugs sdom gnas pa/ /rang bzhin kha nas sngags brjod gzhug par bya/ /zhes pa ni bsnyen pa'i skabs su bgegs mthar byed kyis bzlas pa'i bum pa nas chu blangs te/ oM badzra krod+ha sarba big+hA na ha na ha na hUM phaT/rak+Sha rak+ShaHswA hA/ zhes pas chu gtor bar bya ba dang / oM badzra pra be sha hUM zhes pa'i sngags brjod pas 'dir zhugs shig ces brjod nas gzhug par bya'o/ /dar la sogs pas mig gnyis g.yogs nas ni/ /zhes pa ni de'i snga rol du mig g.yogs par bya ba'o//rdo rje 'dzin ma'i phyag rgyar lag gnyis bya/ /zhes pa ni slob ma de gong du smos pa'i phyag rgyar byas pa'o/ /me tog rin chen la sogs de brgyan la/ /zhes pa ni phyag rgya de'i rtse mo la me tog gi phreng ba'am/ rin po che'i phreng bas brgyan te/de yang slob ma'i bye brag rgyal po la sogs pa dang sbyar bar bya ba nyid do/ /g.yon gyis lag pa bkang ste gzhug par bya/ /zhes pa ni gser la sogs pa'i yon gyis lag pa bkang ste gzhug par bya ba nyid do/ /de la sngags ni 'di rnams yin no//oM badzra ad+hi tiSh+Tha na hUM/ oM badzra sa ma ya hUM/ oM badzra pra be sha hUM/ a sa me/ tri sa me/ ma hA sa ma ye hUM zhes pa'i sngags rnams ni rim pa ji lta ba bzhin du rnam par snang mdzad du byin gyis brlab pa dang / snying gar rdo rje gzhag la/'di ni khyod kyi dam tshig go/ /zhes pa la sogs pa'i tshig brjod cing / sngags gnyis pa bzlas par bya'o/ /gsum pa ni gzhug pa'i sngags so/ /bzhi pa ni mna' bsgag pa'i sngags te 'di ltar/ 'di ni khyod kyi dmyal ba'i chu/ /dam tshig 'das na sreg par byed//dam tshig bsrungs na 'grub 'gyur ba'i/ /rdo rje bdud rtsi'i chu 'thungs shig /ces brjod nas dri chu blud pa'i sngags so/ /de nas sngags 'dis me tog la sogs pa dor bar bya'o/ /sangs rgyas dngos grub thob bya'i phyir//bdag la thugs brtser dgongs nas ni/ /'gro la phan phyir gtso chen gyis/ /sman par dgongs te bzhes su gsol/ /oM badzra pra ti gr-ih+na hUM/ oM badzra pra tits+tsha badzra sa ma ya hUM swaM/ me tog rin chen la sogs pa/ /gang la bab pa rigs kyi lha/ / nges pa'i rigs te bsgrubs na ni/ /dngos grub 'gyur te the tshom med/ /ces gsungs pa ni phra dbab pa'i cho ga gsungs pa ste/ de la gong ma'i tshig dang sngags ji lta ba bzhin du brjod de/ me tog gzung ba dang dor bar bya'o/ /de las dngos grub mtshon par bya ste de la sangs rgyas rnams kyi spyan dang zhal du phog pa ni sngags kyi dngos grub tu 'gyur ro//mchog gi yan lag ni mchog tu 'gyur ro/ /de nas lha de dag gi bar du song na yang 'dor du gzhug go/ /yang der lhung na gang du nye ba'i rigs su bsdu bar bya'o//rdo rje ra ba'i phyi rol du lhung na ni dngos grub 'grub par mi 'gyur bas lan gsum gyi bar du bor ba las shes par bya'o/ /de nas oM badzra pa shod g+ha Ta ya hUM zhes pas gdong g.yogs dgrol bar bya'o/ /de nas 'dis gsal bar bstan par bya'o/ / oM badzra pA sha hoH/ de nas gtso bo nas sgo srung gi bar du lha rnams kyi mtshan dang pho brang bstan par bya ste/ gang du bab pa'i lha la khyod kyi yi dam gyi lha 'di zhes bya ba yin par the tshom mi za bar bsgrub par bya'o zhes bsgo bar bya'o/ /de nas sngags la mkhas pa yis//sngags 'dis dam tshig sbyin par bya/ /oM badzra sa ma ya hUM phaT/ oM badzra sa ma ya hr-i da ya me pra be sha hr-i da tiSh+Tha hUM/ de nas 'dis dam tshig bsgrag par bya'o/ /'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs na 'grub 'gyur ba'i//rdo rje bdud rtsi chu 'thungs shig /rdo rje sems dpa' nyid kyang ni/ /deng nas khyod kyi snying la gnas/ /gal te dam tshig 'das gyur na/ /de ma thag tu bkas nas gsheg/ /rdo rje 'dzin rgyal khros nas ni/ /bdun brgyud rigs ni brlag par mdzad//de bas rtag tu bu khyod kyis/ /rgyal bas gsungs pa'i dam tshig dang / /sdom pa dang ni bla ma'i bka'/ /shin tu mos pas bsrung bar bya/ /zhes pa la sogs pa ni mig ma phye ba'i snga rol du bya ba'i cho ga ste/ mna' bsgag pa dang dam tshig bsgrag pa'i tshig dang sngags te/de la bshad du med pas 'dir ma bshad do/ /khyod kyis srog chags gsang mi bya/ /ma byin par yang blang mi bya/ /brdzun dang 'dod log spyod pa rnams/ /dngos grub 'dod pas bya ba min/ /chang ni btung bar mi bya zhing //sha la sogs pa bza' mi bya/ /sems can gnod par sbyor ba ni/ /nam yang bya ba ma yin te/ /dkon mchog gsum ni yongs mi spang / /dus kun du ni byang chub sems/ /snying po sngags dang phyag rgya dang / /lha dang bla ma de bzhin no//sdig la sogs pa gang yin dang / /bla ma'i bka' las 'da' mi bya/ /lha la phul ba'i rnying pa dang / /de yi grib ma 'gom mi bya/ /phyag rgya'i gzugs la'ang de bzhin te/ /sngags dang lha la smad mi bya/ /gdon gyi las sogs bya ba min//mu stegs can la smad mi bya/ /mdor na yid gnyis som nyi the tshom mi bya ste/ /bdag gi de nyid dang ni sngags sogs de bzhin no/ /zhes pa la sogs pa ni 'dir sdom pa dbog par gsungs pa ste/ de nyid skabs 'dir dam tshig ces bya'o/ / de la ci'i phyir dam tshig ces bya zhe na/ dus thams cad du bdag gis de las yang dag par mi 'da' bar dam bcas pa'i phyir te/ ngo bo mi sdom pa'o/ /khyod kyis srog chags gsad mi bya/ /zhes pa la sogs pa'i tshig bzhi ni rtsa ba'i dam tshig ces bya ste/ dus thams cad du yang dag par bsrung bar bya ba nyid do//de ci'i phyir zhe na/ dngos grub la gegs byed pa dang / sdug bsngal chen po'i rgyur 'gyur ba'i phyir yongs su bsdams pa'o/ /de la 'dod log ces pa'i sgras ni legs par gsungs pa'i chos 'dul ba la gnas pa'i dge slong las/khyim pa'i byang chub sems dpa' dmigs kyis bkar ba ste/ mi tshangs par spyod pas ni thar pa'i lam mi 'gegs la 'dod pa log par spyod pas ni 'gegs zhes gsung ngo / /de la ci'i phyir mi tshangs par spyod pas ni mi 'gegs zhe na/de ni kun nas chags pa'i bsam pa spangs shing snying rje chen pos 'gro ba'i don byed pa'i phyir/ de bzhin gshegs pas kyang khyim pa'i byang chub sems dpa' rnams kyis 'phags pa'i 'bras bu thob par gsungs pa'i phyir ro/ /'dod pa log par spyod pa ni 'dir bdag nyid kyis reg bya'i bde ba 'ba' zhig la chags pas 'jig rten 'di'i 'bras bu bsgrub pa'i phyir 'dir bkag pa nyid do//chang ni btung bar mi bya zhing / /sha la sogs pa bza' mi bya/ /sems can gnod pa'i sbyor ba ni/ / nam yang bya ba ma yin te/ /zhes pa ni yan lag gi dam tshig yid kyis bsdam par bya ba zhes bya ba ste/ de la chang ni bde bar gshegs pa'i bka' mtha' dag las bkag pas na bag med par 'gyur ba'i rgyu yin pa'i phyir rnam pa thams cad du btung bar bya ba ma yin pa'o//sha la sogs pa zhes pa ni sha dang sgog pa dang / ke'u dang / ma da na'i khu ba la sogs pa ste/ de dag ni byang chub sems dpa'i sdom pa la gnas pa rnams kyis snying rje shas chung bar 'gyur ba'i phyir dang / bde bar gshegs pa'i spyan sngar dri nga ba dang /mi mdzes pa spang ba'i phyir dang / bag med pa spang ba'i phyir te/ bdag med pa la gnas pa'i gang zag la ni ma yin no/ /sems can gnod pa'i sbyor ba rnams/ /zhes pa ni lus kyi sgo nas mtshon brtsams pa dang / rdo dang dbyug pa la sogs pa tsam gyis kyang sems can rnams kyi lus la gnod par 'gyur bar mi bya ba dang /ngag gi sgo nas gzhan la gnod par 'gyur ba'i tshig dag smra bar mi bya ba dang / yid kyi sgo nas bsam pa ngan pa dang gnod par 'gyur ba la rjes su yi rang bar mi bya ba nyid de/de dag las rtsa ba'i bzhi ni rang gi srog la bab kyang mi gtang bar bya ste/ bdag gi srog gcod pa ni/ /sdug bsngal cung zad cig yin la/ /rtsa ba'i dam tshig nyams pa ni mnar med pa'i dmyal bar sdug bsngal mi bzad pa myong bar 'gyur ba'i phyir ro/ /yan lag gi dam tshig bzhi ni rkyen gyi dbang gis nyams par gyur kyang bsnyen pa nas sgrub pa chen po'i bar du mi spyad par bya zhing /nyes pa byung nas kyang bde bar gshegs pa rnams kyi spyan sngar yi ge brgya pa la sogs pas bshags pa bya ba nyid do/ /dkon mchog gsum ni yong mi spang //zhes pa nas/ bdag gi de nyid dang ni sngags sogs de bzhin no/ /zhes pa'i bar du ni shes par bya zhing / spyad par bya ba'i dam tshig bcu gsum gsungs te/ de la dkon mchog gsum mi spang ba ni de la khyad par du gsod pa dang ma gus pa la sogs pa nyid mi bya ba nyid do//dus kun du byang chub kyi sems mi btang ba ni skabs 'dir rnam pa gsum ste/ kun rdzob dang sgyu ma dang don dam pa'o/ /de la kun rdzob byang chub kyi sems ni bdag gis sems can thams cad kyi don du byang chub tu sems bskyed pa ji srid mngon par rdzogs par sangs ma rgyas kyi bar du mi gtong ba'o//sgyu ma byang chub kyi sems ni rgyu bla na med pa ste/ rang gi sa bon yongs su mi spang bar bya ba nyid do/ /don dam pa byang chub kyi sems ni rnam par rtog pa thams cad dang bral zhing chos thams cad rang bzhin gyis rnam par dag pa'i sems rgyun du mi gtong ba nyid do//de yang bcom ldan 'das kyis/ byang chub sems ni rnam gsum dang / /nam yang bral bar mi bya'o/ /gal te bral na sngags kyi ni/ /rtsa ba'i ltung ba nyams par 'gyur//zhes gsungs pa'i phyir ro/ /snying po sngags dang phyag rgya dang / lha dang bla ma de bzhin no/ /zhes pa la snying po ni ye shes te/ de skyed par byed pa'i nang gi rnal 'byor bsgom par bya'o/ /sngags ni sngags kyi bzlas pa ste/ de rgyun du bya ba nyid dang / phyag rgya ni rtags te de dang 'brel par mchod pa la sbyor ba'o/ /lha ni dkyil 'khor gyi lha'o/ /bla ma ni rdo rje slob dpon te de dag la rgyun du mchod cing mi gtong ba nyid do/ /sdig pa la sogs gang yin dang / /bla ma'i bka' las 'da' mi bya/ /zhes pa ni sdig par gyur pa'i lus dang ngag dang yid kyis kun du spyod pa dag mi bya ba nyid dang bla mas ji ltar gsungs pa'i bka' las 'da' bar mi bya ste/bdud kyis byin gyis brlabs pa la sogs pa'i bla ma'i bka' ni ma gtogs so/ /lha la phul ba'i rnying pa dang / / de yi grib ma 'gom mi bya/ /phyag rgya'i gzugs la'ang de bzhin te/ /sngags dang lha la smad mi bya/ /zhes pa la lha la phul ba'i rnying pa ni me tog gi phreng ba dang / mchod pa'i rdzas thams cad de/ de la mi 'gom pa nyid do/ /de la 'goms pa las sdig par cir 'gyur snyam pa la bde bar gshegs pa rnams kyi sku dang dbu dang phyag la sogs pas reg pa dang /rnam par grol ba'i dbang po rnams kyis longs spyod rnams ni de'i dbang po rnams su blta bar bya ba ste/ de dag la 'gom pa ni de nyid la 'gom pa'i sdig pa dang 'dra bar gsungs so//grib ma ni lha la sogs pa'i grib ma ste/ de yang de nyid dang dbyer med pa nyid yin pas na sdig par 'gyur ba dang phyag rgya'i gzugs ni rdo rje dang dril bu dang phreng ba la sogs pa ste/ de dag lha'i ngo bo yin pa'i phyir de bzhin mi 'gom pa nyid do//sngags dang lha la smad par mi bya ba ni 'di ltar lha 'di la brten pas dngos grub tu mi 'gyur zhes pa dang sngags 'dis ni 'bras bu mi 'byin no zhes pa la sogs pa mi smra ba nyid de/ de yang gang dag rang gis ma grub pa la brten nas gzhan dad pa bzlog par mi bya ste/rang ni sgrib pa dang bcas pa yin la/ gzhan 'grub par 'gyur ba'ang srid do/ /de yang bde bar gshegs pa rnams ni 'di la dngos grub sbyin la 'di la mi sbyin pa la sogs pa'i rtog pa mi mnga' zhing bdag nyid sgrib pa dang bcas pa las byung ba ste/ de yang phal po che'i mdo las/ji ltar sa ni ro gcig kyang / /sa bon tshul bzhin myu gu ston/ /byams dang sdang ba'i sems pa dang / /sangs rgyas yon phul de bzhin no/ /zhes gsungs pa'i phyir ro/ /gdon gyi las sogs bya ba min/ /mu stegs can la smad mi bya/ / zhes pa ni 'di ltar mi la sogs pa gzhan gyi ched du gdon dang mi ma yin pa la sogs pa brdung ba dang / gsad pa dang / gcad pa dang / bskrad pa dang / bcings pa la sogs pa mi bya ba ste/ de yang sems can du 'dus pa'i phyir ro/ /mu stegs can la mi smod pa na 'di ltar snang ba thams cad ni lha'i 'khor du 'dus pa'i phyir na smad pa mi bya ba nyid do//mdor na yid gnyis dang ni the tshom mi bya ste/ /bdag gi de nyid dang ni sngags sogs de bzhin no/ /zhes pa ni 'dir dngos grub thams cad kyi bar du gcod pa bdag gis 'di bsgrub pa las 'grub par 'gyur ram mi 'gyur snyam pa dang /de bzhin gshegs pa'i bka' 'di bden pa zhig yin nam brdzun pa zhig yin snyam pa la sogs pa'i the tshom dang yid gnyis mi bya ba nyid do/ bdag gi de nyid dang ni sngags sogs de bzhin no//zhes pa ni the tshom mi bya ba'i gzhi ste/ bdag gi de kho na nyid la sogs pa de kho na nyid bcu la the tshom mi bya zhes par 'brel to/ /de yang yid ches par 'gyur ba las dngos grub dang 'bras bu 'byung ba ni 'di ltar gtsug tor chen po 'byung ba'i mdo las/ yang dag dad pas zin gyur na//cho ga gang dang thabs gang gis/ /mkhas pa yid du 'ong ba yis/ /'bras bu nges par 'byin par byed/ /ces gsungs so/ /mos pa brten dang ldan pas dam bcas nas/ /sarba bid kyis ji ltar dbang bskur te/ /bum pa la sogs ji snyed mang thogs pas//bcu po rnams kyis dbang bcu ci dgar bskur/ /de nas lag tu dril bu rdo rje sbyin/ /'khor lo la sogs rin chen bdun thogs la/ /mi yi dbang phyug 'khor los sgyur ba bzhin/ /sdig pa gzhom phyir dbang ni bskur bar bya/ /zhes gsungs pa ni 'dir dbang phun sum tshogs pa bskur bar gsungs te/de la/ mos pa brtan dang ldan pas dam bcas nas/ /zhes pas ni gong du bstan pa'i dam tshig rnams kyis mos pa dang ldan pa'i slob ma dam pa legs par 'char bcug nas de'i mthar dbang bskur bar bya ste/de la sarba bid kyis ji ltar dbang bskur te/ /zhes pa ni spyi gtsug dang dpral ba dang lkog ma dang snying ga dang gsang ba'i gnas rnams su/ oM sarba bid A ba ra Na bi sho d+ha ya ha na hUM/ oM bud+d+ha a b+hi Shiny+tsa oM zhes pa dang / oM sarba bid hUM/ oM badzra a b+hi Shiny+tsa hUM zhes pa la sogs pa'i sngags kyis rim pa ji lta ba bzhin du rnam par snang mdzad dang /ngan song sbyong ba dang / rin chen tog dang / shAkya thub pa dang / me tog chen po rgyas pa rnams kyis dbang bskur ba ste/ de yang rang nyid de'i bdag nyid dang ldan par byas pas dbang bskur ba ni de bzhin gshegs pa'i dbang zhes bya'o//bum pa la sogs ji snyed mang thogs par/ /bcu po rnams kyis dbang bcu ci dgar bskur/ /zhes pa ni/ dang por bum pa'i khongs su gtogs pa'i chu dang cod pan dang rdo rje dang dril bu dang ming la sogs pa'i dbang bskur la/de nas bde bar gshegs pa'i rtsa ba'i bum pa lnga po rigs pa'i lha mo lngar bsams te/ spyi bo dang mtshogs ma dang / rna ba g.yas pa'i kha dang / ltag pa'i kha dang / rna ba g.yon pa'i kha rnams su rim pa ji lta ba bzhin du 'di nyid kyi bshad pa'i rgyud nas 'byung ba'i sngags/oM bud+d+ha ka la sha a b+hi Shiny+tsa oM zhes pa la sogs pa'i sngags kyis dbang bskur ba ni rig pa bum pa'i dbang zhes bya'o/ /de nas bo di tse dang mu tig dang mu men dang tsan+dan dmar po'i sa bon dang / a sho ka'i 'bras bu rnams kyi phreng ba la rang gi yi dam gyi lha'i sngags bzla zhing rim pa ji lta ba bzhin du/oM bud+d+ha mA la a b+hi Shiny+tsa oM/ zhes pa la sogs pa'i sngags kyis dbang bskur ba ni phreng ba'i dbang zhes bya'o/ /de nas rnam par snang mdzad byang chub mchog gi phyag rgya dang / mnyam pa nyid dang / mchog sbyin dang chos 'chad dang / skyabs mdzad kyi phyag rgya bcings la/ mig la sogs pa'i gnas ji lta ba bzhin du/ oM bud+d+ha mu dra a b+hi Shiny+tsa oM zhes pa la sogs pa'i sngags kyis dbang bskur ba ni mtshon pa phyag rgya'i dbang bskur zhes bya'o//de nas lag tu rdo rje dang dril bu byin la 'khor lo dang rdo rje dang rin po che dang pad+ma dang las kyi rigs rnams su khyod kyis 'gro ba'i don gyis shig ces pa la sogs pa'i tshigs su bcad pa bton la/ oM bud+d+ha karma a b+hi Shiny+tsa oM/ oM badzra karma a b+hi Shiny+tsa hUM zhes pa la sogs pa'i sngags kyis dbang bskur ba ni bya ba las kyi dbang zhes bya'o//de nas rnam par mi rtog pa kun du snang ba zhes bya ba'i ting nge 'dzin dang / bdud kyi tshogs kyis mi shigs pa zhes bya ba'i ting nge 'dzin dang / yon tan thams cad kyi mdzod ces bya ba'i ting nge 'dzin dang /dam pa'i chos kyi tog ces bya ba'i ting nge 'dzin dang / srid pa 'khor lo skyong ba zhes bya ba'i ting nge 'dzin rnams la snyoms par zhugs te/ rim pa ji lta ba bzhin du oM sarba ta thA ga ta d+hA ra ni a b+hi Shiny+tsa oM zhes pa la sogs pa'i sngags kyis snying ga'i thig le lnga la dbang bskur ba ni rig pa 'dzin pa gzugs kyi dbang zhes bya'o//de nas gsang ba don gyi phyag rgya bcings la/ rang gis yang dag par rig par byas nas mu tig gi phreng ba lta bu'i thig le dkar po lngas rdo rje'i rtse mos gdong gi pad+mar gtad par bya zhing rim pa ji lta ba bzhin du/oM sarba ta thA ga ta gu h+ya a b+hi Shiny+tsa oM zhes pa la sogs pa'i sngags kyis dbang bskur ba ni sbas pa gsang ba'i dbang zhes bya'o/ /de nas thabs dang shes rab kyi phyag rgya mdzes shing yid du 'ong ba bcings la/oM pra dz+nyA+o pa ya ta sa ma yo gi a b+hi Shiny+tsa hUM a zhes pa'i sngags kyis dbang bskur ba ni bde ba chen po thabs dang shes rab kyi dbang zhes bya'o/ /de nas sgrib pa thams cad gcod par byed pa'i 'khor lo rin po che dang / sangs rgyas kyi zhing thams cad bgrod par byed pa'i rta rin po che dang /sangs rgyas kyi yon tan thams cad ster bar byed pa'i nor bu rin po che dang / rtog pa dang bral ba'i ye shes ster bar byed pa'i bud med rin po che dang / bdud kyi dpung thams cad 'joms par byed pa'i glang po rin po che dang / nyon mongs pa'i nyes pa thams cad kyis mi brdzi ba'i dmag mi rin po che dang / legs pa'i yon tan thams cad sgrub par byed pa'i skyes pa rin po che rnams kyis spyi bor gzhag cing oM badzra tsakra a b+hi Shiny+tsa hUM b+h+rUM zhes pa la sogs pas 'khor los sgyur ba'i rgyal po ji lta ba bzhin du dbang bskur bar bya ste/de dag ni 'khor los sgyur ba bdag po'i dbang zhes bya'o/ /de dag ni sbyin pa dang / tshul khrims dang / bzod pa dang / brtson 'grus dang / bsam gtan dang / shes rab dang / smon lam gyi pha rol tu phyin pa nyid kyi rang bzhin du rig par bya'o//de nas de'i spyi bor rdo rje bzhag ste/ 'og nas 'byung ba'i tshig brjod pa dang / khyod kyis sems can smin pa'i phyir/ /dam pa'i chos ni bsgrag pa dang / /dkyil 'khor la sogs bzhengs pa ni/ /rgyud las 'byung ba bzhin du bsgrub/ ces bya ba la sogs pa'i tshig brjod cing /oM sarba ta thA ga ta A dz+nyA te dA si mi grih+na badzra su sid+d+ha ye oM badzra tiSh+Tha hUM zhes brjod nas dbang bskur ba ni gnang ba sbyin pa bka'i dbang zhes pa ste 'og ma la snyags so/ /de la dbang gi ngo bo ni nus pa'o/ /nges pa'i tshig ni bdag 'khru bar byed pa'i phyir dang /chos kyi dbyings la dbang byed pa'i phyir te/ de yang dang pos ni sa dang po rab tu dga' ba gnon to/ /gnyis pas ni dri ma med pa gnon to/ /gsum pas ni 'od 'phro ba can gnon to/ /bzhi pas ni sbyang dka' ba gnon to/ /lnga pas ni 'od byed pa gnon to//drug pas ni mngon du gyur pa gnon to/ /bdun pas ni ring du song ba gnon to/ /brgyad pas ni mi g.yo ba gnon to/ /dgu pas ni legs pa'i blo gros gnon to/ /bcu pas ni chos kyi sprin dang kun du 'od gnon par 'gyur ba ste/ de yang rdo rje thod kyi rgyud las/ dbang bcus sa bcu bgrod nas ni/ /de yi bde bas sangs rgyas 'gyur/ /zhes gsungs pa'i phyir ro/ /de bas na 'dir gong du gyur pa'i tshul dang dbang 'di dag ni legs par gsungs pa'i chos 'dul ba la rab tu byung ba'i dge slong dang shin tu mthun pa'i phyir dge slong rnams kyis the tshom mi za bar spyad par bya ste/de dag gis ni/ de yi lag tu rdor dril sbyin/ /zhes pa nas/ sdig pa gzhom phyir dbang ni bskur bar bya/ /zhes pa'i sho lo ka gcig bsdus so/ /sngags bsgrub phyir ni mos ldan slob ma la/ /sngags pas bka' ni rab tu bsgo bar bya//des kyang mos pas spyi bos phyag 'tshal te/ /ci ste nor yod bla ma dag la phul/ /nor dang 'bru dang gter dang dbyig dang gser/ /bzhon dang khyim dang bu pho bu mo dang / /bran dang bran mo yang na chung ma dang / /grong dang grong khyer de ltar ci bzhed rnams//rang gi sems ni rab tu dad pa yis/ /yon gyi mchog ni dbul ba nyid du bya/ /myur du 'grub phyir mos pas bla ma la/ /mdor na rang gi lus ni dbul ba nyid du bya/ /zhes pa la sogs pa ni 'dir yon dbul bar bya ba yin no/ / de dag ni bde bar gshegs pas gsungs pa de bzhin du dbul bar bya ba nyid de bla ma la ma brten par yang dag par rdzogs pa'i sangs rgyas 'thob par mi 'gyur ba ni bde bar gshegs pa'i bka' mtha' dag nas gsungs pas de bzhin du bya ba nyid de go sla ba'i phyir 'dir ma bshad do//phyag rgya 'di yi rnal 'byor gyis/ /sangs rgyas nyid kyang thob 'gyur na/ /tshe 'di'i bde ba ma lus dang / /'jig rten phyi ma'i bde mchog dang / /lha yi bde ba smos ci dgos/ /sangs rgyas kun dang bla ma mnyam/ /des na slob dpon brnyas mi bya//rdo rje slob dpon brnyas na ni/ /rtag tu sdug bsngal thob par 'gyur/ /rdo rje spun dang sring mo dang / /rdo rje ma rnams nyid la ni/ /rnal 'byor can gyis brnyas mi bya/ /rtag tu 'khon dang gcugs mi bya/ /dkon mchog gsum la gnod byed pa/ / bzod pa bsgom par mi bya ste/ /bla ma smod brtson ma rung dang / /dam tshig 'das la'ang de bzhin te/ /de la sogs pa'i byed ldan la/ /'grub 'gyur zhes ni kun rig gsungs/ /sems can kun la snying brtser chags/ /dngos grub myur du 'grub par 'gyur//zhes gsungs pa ni 'dir rdo rje slob dpon gyis slob ma la bka' bsgrag par bya ba'i tshig ste/ de la/ phyag rgya 'di yi rnal 'byor gyis/ /zhes pa ni de bzhin gshegs pa ngan song thams cad yongs su sbyong ba'i dkyil 'khor 'dir zhugs pa'i rnal 'byor te/de yis yang dag par bsgrubs pa las yang dag par rdzogs pa'i sangs rgyas kyang 'grub par 'gyur na/ tshe 'di'i bde ba nad nyung ba dang / 'byor pa dang ldan pa dang 'jig rten phyi ma'i bde ba mchog 'khor los sgyur ba'i rgyal po dang / lha'i gnas su skye ba la sogs pa'i bde ba ni smos kyang ci dgos zhes pa ni gdon mi za ba'i tshig go/sangs rgyas kun dang bla ma mnyam/ /zhes pa ni bla ma'i che ba brjod pa'i tshig ste/ de yang sangs rgyas rnams kyis ni bdag la chos ston pa la sogs pa mdzad kyang bdag gi rgyud la phan par mi 'gyur te/bla mas ni bdag bla na med pa yang dag par rdzogs pa'i byang chub thob par nges pa kho na ste/ de la sangs rgyas thams cad kyi ngo bo ni dpal rdo rje 'dzin pa yin la de'i ngo bo dang bla ma gnyis bdag gi rgyud la chos kyi tshul gyis mnyam zhing 'dra bas na/sangs rgyas kun dang bla ma mnyam/ /zhes bya'o/ /de bas na de la brnyas pa ni ma gus pa ste/ de la ma gus pa ni de'i thugs dang 'gal bar 'gyur ro/ /de'i thugs dang 'gal ba'i skad cig ma la ni mar me bsad pas skad cig la snang ba'i tshogs 'gags nas mun pa'i tshogs skye ba bzhin du bdag gi bsod nams kyi tshogs dang ye shes kyi tshogs 'gags shing sdig pa mi dge ba'i tshogs chen po skye ba ste/de'i 'bras bu ni mnar med pa la sogs pa'i sdug bsngal thob par 'brel to/ /de bas na rnam pa thams cad du bla ma'i thugs dang mi 'gal bar bya ba ni mchog tu rtsa bar gyur pa'i dam tshig chen po zhes rgyal ba rnams kyis gsungs so//rdo rje spun dang sring mo ni bla mas bsdus pa'i dam tshig gcig pa'i rdo rje'i spun dang sring mo'o/ /rdo rje ma zhes bya ba ni gzhan du shes rab ma la sogs pa la 'dod na'ang /'dir ni bla ma'i chung ma ste/ de dag la brnyas pa ni de dag khyad du bsad pa ste/ de dag la brnyas par mi bya ba ni bde bar gshegs pas rtsa ba nye ba'i dam tshig ces gsungs so/ /rtag tu 'khon dang gcugs mi bya ba ni gzhan du ni dge 'dun 'dus pa'i dbyen byed pa zhes gsungs la/'dir ni dam tshig 'byed pa ste/ rdo rje spun dang sring mo la sogs pa'i bar du tshig phra ma la sogs pa mi bya ba nyid do/ /dkon mchog gsum la gnod byed pa/ /bzod pa bsgom par mi bya ste/ / zhes pa la sogs pa ni 'di ltar bla na med pa'i dkon mchog gsum gyi rten bde bar gshegs pa'i bstan pa bshig pa dang / dge 'dun gyi gtsug lag khang 'dral ba rgyal po dang mu stegs pa la sogs pa la ni byad dang / dug dang stobs dang / sman gyi sbyor ba la sogs pas sems can de la snying rje chen po bskyed de de nyid gsad par bya ba nyid do/ /de bzhin du bla ma la smod pa dang / bla ma'i sku la bsdo ba dang / dam tshig nyams pa rnams dang / ma rungs pa'i sems can 'gro ba thams cad kyi srog gcod pa la sbyor ba la sogs pas ni snying rje chen pos don rnam pa gnyis byed pas bsad pa la nyes par mi 'gyur ba ni bcom ldan 'das rnam par snang mdzad kyis gsungs zhes bya bar 'brel to//sems can kun la snying brtser chags/ /dngos grub myur du 'grub par 'gyur//zhes pa ni thabs dang shes rab tu 'brel pa'i yang dag par rdzogs pa'i sangs rgyas 'grub pa ste/ de la byang chub kyi sems bla na med pa ni shes rab ma tshig gi snying rje chen po ni thabs te/ de yis dus thams cad du 'gro ba'i don byed pa dang dkyil 'khor gyi 'khor lo bsgrub pa ni nges par las thams cad 'grub par 'gyur ba nyid de/de yang thabs dang shes rab rol pa'i rgyud las/ mkhas pa thabs dang shes rab ni/ /skad cig tsam yang bral mi bya/ /gal te bral na mi de yis/ /phyag rgya chen po thob mi 'gyur//zhes gsungs pa'i phyir te/ des ni bcom ldan 'das kyis gzhan gyi don phun sum tshogs pa bstan to/ /de nas bcom ldan 'das kyis lha'i dbang po brgya byin dang / lha'i 'jig rten du bcas pa rnams kyi don dang phan pa dang / bde ba'i phyir sgrub pa 'di gsungs so zhes pa na bdag gi don phun sum tshogs pa ston pa yin par shes par bya ste/de la bdag gi don phun sum tshogs pa la gnyis so/ /gcig ni bsdus pa la dga' ba'i sems can dbang po rtul po rnams kyis don du gsungs so/ /gcig ni zab cing rgya che ba la dga' ba dbang po rnon po'i sems can rnams kyi don du gsungs te/de la 'dir ni bcom ldan 'das kyis re zhig dbang po rtul po bsdus pa la dga' ba'i sems can gyi don du gsal bar gsungs pa ni ras la bcom ldan 'das thams cad rig pa de bzhin du bris la/g.yas su ni de bzhin gshegs pa ngan song thams cad yongs su sbyong ba'i rgyal po'o/ /g.yon phyogs su ni shAkya thub pa bri bar bya'o/ /de nas ngan song sbyong ba'i 'og tu ni/ spyan ras gzigs dbang phyug mdog zla ba lta bu la phyag na pad+mo bsnams par bya/shAkya thub pa'i 'og tu ni phyag na rdo rje'o/ /de gnyis kyi bar du ni sman gyi bla mdog sngon po la phyag g.yas na a ru ra'i 'bras bu 'dzin pa phyag g.yon pa mchog sbyin du bya/ rta mgrin dang khams gsum rnam par rgyal ba ma rungs pa 'dul ba la brtson pa gnyis ni rang gi lha la brten par bri'o//de gnyis kyi dbus su lo tsA na dang / mA ma kI dang / gos dkar mo dang / sgrol ma rnams rang gi phyag mtshan thogs pa bri'o/ /de'i 'og tu pad+ma'i rdzing bu dang / chu srin dang / nya dang / rus sbal dang / sbal pa dkar po dang /nya 'phar ba la sogs pa dang / chu las skyes pa'i me tog rnam pa du mas yongs su gang ba bri'o/ /de'i 'og tu bdug pa dang / mar me dang / dri dang / phreng ba dang / lha bshos dang / me tog dang / 'bras bu rnam pa sna tshogs pa bri zhing de'i 'og tu sgrub pa po nyid thal mo sbyar te phyag 'tshal zhing 'dug pa bri bar bya'o zhes pa la sogs pa gsungs pa ni dbang po rtul po'i gang zag gis ras ris la sgrub par gsungs pa ste/de la ras bal gsar pa la dri chus bran te tha ga pa bsnyen gnas la gnas par byas la zheng du khru do chur khru gsum pa btags te/tsan+dan dkar po la sogs pa'i lde gus bskus nas ri mo mkhan bsnyen gnas la gnas pas bri bar bya ba ni gong du gsungs pa'i rim par ji lta ba bzhin du sku mdog dang phyag mtshan dang phyag rgya la sogs pa bri bar bya ste go sla ba'i phyir 'dir ma bshad do//de la gang dag 'di skad du ci'i phyir dkyil 'khor chen po la lha mang po zhig yod pa las lha bcu gnyis po 'di kho na nges pa ci yod ce na/ de ni 'di ltar de bzhin gshegs pa thams cad ni sku gsung thugs su yang dag par bsdus pa ste/de la rnam par snang mdzad ni de bzhin gshegs pa thams cad kyi thugs su yang dag par gzhag pa'o/ /ngan song sbyong ba ni sku'o/ /shAkya thub pa ni gsung ngo / /bcom ldan 'das phyag na rdo rje dang / spyan ras gzigs kyis ni byang chub sems dpa'i rigs bsdus so//sman gyi bla ni nyon mongs pa'i rims nad thams cad sel bar byed pa'i phyir bris pa'o/ /khro bo gnyis kyi khro bo'i rigs bsdus so/ /rig pa'i lha mo rnams kyis ni lha mo'i tshogs bsdus so/ /pad+mo'i rdzing bu dang nya la sogs pa ni bkra shis pa'i rdzas so//gdugs la sogs pa ni mchod pa'i yo byad do/ /sgrub pa po ni thugs rje chen pos gzung ba'i phyir ro/ /de yang dang po ni bdag po'o/ /gnyis pa ni sprul pa'o/ /gsum pa ni pho nya'o/ /bzhi pa ni gzungs so/ / lnga pa ni 'khor ba'i 'dam nas 'byung ba'o/ /drug pa ni dran pa nyid du shes par bya'o/ /de nas ri mo'i gzugs su de la mngon par mchod de/ bdag nyid kyis spyan dbye ba bya zhing bden pa'i byin gyi rlab la dmigs par bya'o/ /de nas ci ste mtshan ma zhig mthong ba ni myur du dngos grub thob par 'gyur ro//'on te ma mthong na ni ring po zhig nas dngos grub tu 'gyur te/ bzhad pa dang ni rnga sgra dang / /dril bu sgra dang de bzhin 'brug/ /dge slong bram ze bu mo dang / /rtags de mthong na myur du ni/ /mchog dang 'bring dang tha ma 'grub//ces gsungs pa ni 'dir spyan dbye ba las rtags mtshon pa gsungs te/ de la ri mo'i gzugs de mngon par mchod de/ bdag nyid kyis spyan dbye ba bya zhing bden pa'i byin gyis brlabs la dmigs par bya'o zhes pa ni 'di ltar dang po bsnyen pa la sogs pa rim pa ji lta ba bzhin du bya ste/mchod pa'i tshogs dpag tu med pas mchod nas kun rdzob kyi lha de sug pa la sogs pas phyi'i khrus bya ba dang / chos thams cad stong pa nyid du bsam pas nang gi khrus yang dag par byas te/ khro bo la sogs pa'i sngags kyis yongs su bsrungs la/don dam pa'i ting nge 'dzin gyis spyan drangs la/ mchod pa rnams kyis yang dag par mchod de/ sngags dang phyag rgyar ldan pas bstim par bya'o/ /de nas spyan dbye ba dang / chos kyi 'khor lo bskor bar gsol ba gdab pa la sogs pa byas nas sems can thams cad kyi don du sems bskyed de/me tog thogs nas phyogs bcu dus gsum gyi de bzhin gshegs pa thams cad bdag la dgongs su gsol lo/ /gsang sngags dang phyag rgya dang ting nge 'dzin gyi bden pa dang bden pa'i byin gyi rlabs kyis bdag la dngos grub tu 'gyur na sku 'di la rtags sna tshogs pa 'ong bar gyur cig ces brjod de/de'i thugs kar gnyis su med pa'i bde ba chen pos yun ring bar dmigs par bya'o/ /de nas rtags dang mtshan ma mthong ba na dngos grub nye bar 'gyur la/ ma mthong na ni dngos grub ring ba ni nges pa nyid do/ /de la rtags dang mtshan ma ji lta bu zhig 'byung zhe na/ bzhad pa dang ni rnga sgra dang / /zhes pa la sogs pa gsungs te/ de la sgra'i rnam pa gsum dang gzugs kyi rnam pa gsum mo/ /bzhad pa ni sku nyid bzhad pa ste phyag rgya chen po'i dngos grub tu 'gyur ro//dril bu ni dbu'i steng na grag pa ste/ 'jig rten pa'i dngos grub tu 'gyur ro/ /rnga sgra dang 'brug sgra ni phyi rol na grag pa ste/ sngags kyi dngos grub tu 'gyur ro/ /gzugs kyi rnam pa gsum ni/ mig gi rnam par shes pa'i snang ba'i cha'am yid kyi rnam par shes pa'i snang ba'i cha la dge slong la sogs par snang bar 'gyur te/de la dge slong mthong ba ni phyag rgya chen po'i dngos grub tu 'gyur ro/ /bram zer snang ba ni ral gri la sogs pa'i 'jig rten pa'i dngos grub tu 'gyur ro//bu mo snang ba ni sngags kyi dngos grub tu 'gyur bar shes par bya'o/ /de nas gzugs de bdag gis ni/ /sngags dang phyag rgyas byin brlabs te/ /ci 'byor pas ni mchod par bya/ /rtag tu mngon sum dmigs byas la/ /khro bo khams gsum rnam rgyal gyis//bdag bsrung la sogs byas nas kyang / /bdag gi de nyid dran byed cing / /'bum phrag gsum mam yang na drug/ /dngos grub mtshan ma byung bar du/ /mnyam par gzhag pas tshang bar bya/ /zhes gsungs pa ni/ 'dir bsnyen sgrub yan lag bzhi yang dag par gsungs te/de la/ de nas gzugs de bdag gis ni/ /sngags dang phyag rgyas byin brlabs te/ /ci 'byor pas ni mchod par bya/ /zhes pa ni gong du smos pa'i rtags dang mtshan ma byung yang rung ste/ bdag gis de bzhin gshegs pa la sogs pa'i phyag rgya bcings la/rang rang gi sngags dang mtshan du bcas pas de dag gi gzugs su byin gyis brlabs te/ mchod pa rgya chen po bya ba nyid do/ /rtag tu mngon sum dmigs byas la/ /zhes pa la sogs pa ni 'di ltar bdag gis de bzhin gshegs pa'i sku gzugs de bdag gi mdun du rtag tu bzhugs pa la de bzhin gshegs pa nyid du bsams te/dang po rang nyid khams gsum rnam par rgyal bar bsgom pa nas bgegs bskrad pa dang / bdag nyid dang gnas dang mchod pa'i yo byad la sogs pa rnams bsrung bar byas te/mchod pa dang gtor ma la sogs pa bya zhing / rang nyid de bzhin gshegs pa'i dkyil 'khor dang dbyer med par byas te/ de bzhin gshegs pa'i zhal nas de bzhin gshegs pa'i zhal dang / lte ba nas lte bar oM la sogs pa'i 'od zer dkar po dang ldan pa'i phreng bas lu gu rgyud du byas te/rtsa ba'i sngags 'bum phrag gsum mam drug gam/ yang na gtsor ni dngos grub kyi mtshan ma byung gi bar du phyi rol gyi dngos po rnams la yid mi g.yeng bar mnyam par gzhag pas bzlas pa ni bsnyen pa zhes bya'o/ /de nas dben pa'i gnas su ni/sngags ni 'khral 'khrul med pa yis/ /brgya rtsa brgyad du tshang bar bya/ /zhes gsung ba ni bde bar gshegs pa sras dang 'khor du bcas pa rnams kyi snying po rnams gnas shin tu dben pa'i sa phyogs su dri dang ba'i rnam lnga la sogs pas sa gzhi byugs la/me tog bkram ste mchod pa la sogs pa byas pas lha re re la brgya rtsa brgyad du sngags zur ma chags pas tshang bar bzla ba ni nye ba'i sgrub pa zhes bya'o/ /de nas bzlas pa'i mjug tu ni/ /dkyil 'khor snga ma bzhin bsams la/ /mchod pa rgya chen byas nas kyang /mtshan gcig thog thag mi nyal bzlas/ /zhes gsungs pa ni nye ba'i sgrub pa rdzogs pa dang / ngan song thams cad yongs su sbyong ba'i rtsa ba'i dkyil 'khor chen po'i ting nge 'dzin rnam pa gsum gyis bskyed de/ yang dag par bsams nas mchod pa rgya chen po dang /gtor ma la sogs pa sngar gsungs pa bzhin du byas te/ de bzhin gshegs pa la sogs pa rnams kyi nye ba'i snying po grangs ci rigs par nyi ma rgas nas skya rengs ma shar gyi bar du bzlas par bya ste/ de ni sgrub pa zhes bya ba'o/ /ci ste gtso bo'am de yi sras//yang na lha rnams mthong 'gyur na/ /bsod nams snod las ci dga' bar/ /dngos grub mchog ni gsol ba gdab/ /lha yi dngos grub 'bras bu ni/ /de la rtag tu dgyes nas stsol/ /phyag 'tshal nas ni dngos grub blang / /bla ma dkon mchog gsum dag la//skal ba re re phul nas ni/ /de nas rtag tu bdag spyod cig/ /med na mkhas pa bdag nyid kyis/ /blangs nas yongs su spyad par bya/ /zhes gsungs pa ni sgrub pa rdzogs pa'i 'og tu mchod pa rgya chen po byas te/ /mi 'gyur ba yongs su dag pa'i ting nge 'dzin zhes bya bas de bzhin gshegs pa'i thugs kar zla ba'i dkyil 'khor la bla na med pa'i dbang po lnga'i yul gyi rang bzhin dpal ldan dkyil 'khor gyi 'khor lo bsgom pa'i rab kyi mtha' las byung ba'i rang rig pa'i phung po chen po spro zhing rgyun mi 'chad pa'i bde ba chen po lnga'i ro'i rgya mtsho chen po las rlabs stong gis yang nas yang du dbang bskur zhing rang dang gzhan gyi rnam pa'i cha mtha' dag nub par gyur pa de ni mchog gi dga' ba'i sdong po las byung ba'i rang rig pa myu gu dpal rje btsun ngan song thams cad yongs su sbyong ba'i rgyal po'i ngo bo ste/de ni rim pa ji lta ba bzhin du bde ba chen po dang / chos dang sprul pa dang / ngo bo nyid kyi sku bzhi'i rten du gyur pa rnam par snang mdzad longs spyod rdzogs pa'i sku'i ngo bo yin zhing 'bras bu'i gnas skabs kyi bdag nyid do/ /ci ste gtso bo'am de'i sras zhes pa la sogs pa ni de ltar bsgoms pa'i mthar bde bar gshegs pa nyid dam/de'i sras bcom ldan 'das dpal phyag na rdo rje la sogs pa'am/ khro bo'am lha'i gzugs la sogs par bsod nams kyi snod sgrub pa po'i drung du mthong bar byon te/ de la bdag gis dga' ba chen pos mchod pa la sogs pa byas la/rang ji ltar 'dod pa ltar phyag rgya chen po la sogs pa'i dngos grub gsol ba gdab par bya'o/ /de la dad pa dang dam tshig tu 'brel bas bde bar gshegs pa rnams kyis dgyes bzhin du dngos grub kyi 'bras bu stsol ba ste/de la dngos grub ni 'dir gnyis so/ /gcig ni dmigs pa'i rig byar ma gyur pa byin gyis rlabs pa chen po dang ldan pa'o/ /gcig ni dmigs pa'i rig byar gyur pa rdzas la sogs pa'i gzugs su 'ongs te/ de la 'dir ni rdzas la sogs pa 'ong ba dgongs nas/bla ma dkon mchog gsum dag la/ /skal ba re re phul nas ni/ /zhes gsungs te/ de la bdud rtsi'am/ mi gtsang ba'am bza' ba'i rnam pa la sogs pa rgyu dang rkyen med par snang bar gyur na the tshom dang rtog pa la sogs pa mi bya bar blangs te bla ma dang dkon mchog gsum la skal ba'i phud bcad de/bdag nyid kyis bla na med pa'i sems chags pa chen po bskyed la srung ba la sogs pa byas nas bza' ba la sogs la longs spyod par bya ba'o/ /med pa mkhas pa bdag nyid kyis/ /blangs nas yongs su spyad par bya//zhes pa ni bla ma la dgongs pa ste/ bla ma la yul gyis bskal pa'am/ dus kyis bskal pa yin na bdag rang gis spyad par bya ba nyid de de dag ni sgrub pa chen po zhes bya'o/ /sems can kun la phan brtson par/ /bskal pa du mar gnas par 'gyur/ / ji ltar dngos grub ma grub na/ /las rnams ma lus nus 'gyur te/ /gnod sbyin skar ma'i gdong la sogs/ /chad pa bcad cing bka' tsam gyis/ /zhi ba la sogs las kun ni/ /bran bzhin las kun byed par 'gyur/ /zhes gsungs pa ni 'dir dkyil 'khor chen po gsum la rnal 'byor pa tshe bsring ba'i cho ga gsum gsungs te/de la 'og ma gnyis po ni tshe 'di nyid kho na bsgrub pa yin la/ 'di ni tshe dang yang dag pa'i byang chub gnyi ga sgrub par gsungs so/ /de grub pa las 'bras bu ci zhig 'ong snyam pa la/sems can kun la phan brtson par/ /zhes pa la sogs pa gsungs te/ sems can thams cad bla na med pa yang dag par rdzogs pa'i byang chub thob par bya ba'i phyir bskal pa grangs med par 'gro ba'i don byed par 'gyur ro zhes par 'brel to/ /ci ste dngos grub ma grub na//zhes pa ni gal te'am brgya la dngos grub ma grub par gyur kyang zhi ba la sogs pa'i phrin las rnam pa bzhi 'grub par gsungs so/ /gnod sbyin skar ma'i gdong la sogs/ /zhes pa ni bdag nyid 'jig rten pa'i dngos grub tu 'gyur ba las shin tu gdul bar dka' ba'i cha gzung ba ste/gnod sbyin skar ma'i gdong la sogs pa bdag nyid kyis ming bos pa tsam gyis kyang drung du 'ongs te/ bdag gis bsgo ba'i las thams cad byed par 'gyur ba ni nges pa ste the tshom mi bya ba nyid do/ /de dag gis ni bcom ldan 'das kyis dbang bo rtul po'i sems can rnams kyi don du bsdus pa'i sgrub pa 'di gsungs so//zab cing rgya che ba'i blo dang ldan pa dbang po rnon po'i gang zag rnams kyi don dang / theg pa chen po'i rgyud 'di nyid sngar gsungs pa rnams kyi tshul ji lta ba yin pa ni 'di ltar gtsug tor chen po'i brtag pa las/khams gsum ma lus 'di dag ni/ /dkyil 'khor chen po'i ngo bo yin/ /zhes gsungs pas na de la de bzhin gshegs pas ni gsang sngags rnams skye ba bzhis bsdus pa'i sems can gyi tshul dang sbyar nas gsungs te/de la dgyes pa'i rdo rje la sogs pa ni mngal nas skyes pa'i tshul du gsungs so/ /bde mchog 'khor lo la sogs pa ni rdzus te skyes pa'i tshul dang sbyar nas gsungs so/ /gsang ba 'dus pa la sogs pa kha cig skye ba bzhi'i tshul lta bur snang yang phal cher sgo nga las skyes pa'i tshul dang sbyar nas gsungs so//gzhung 'di pa la sogs pa ni drod gsher las skyes pa dang sbyar nas gsungs par shes par bya zhing / de la 'dir ni shes pa thams cad rang gi ngo bo tsam du mthar thug pa ste/ gzhan la yongs su 'dzin pa ni med do//de bas na yul med pa'i phyir tha snyad la sogs pas bye brag tu mi phyed pa nyid de/ de'i phyir rnal 'byor pa rnams kyis 'di ltar snang ba re re la'ang mi mthun pa'i phyogs mtha' dag las log pa'i dkyil 'khor gyi lta thams cad rang gi sems las byung ba'i ngo bor brtag par bya'o//de la rang gi ting nge 'dzin rnams yang dag pa ji lta ba bzhin du phyin ci log la dmigs par mi 'gyur zhing / sems gang tha mal ba 'dzin pa la sogs pa'i rnam par bral ba ni chos kyi dbyings kyi ngo bor 'gyur te/ de nyid glo bur gyi dri ma dang bral ba'i phyir 'od gsal ba'o//de la 'dir ni 'di ltar snang ba thams cad dkyil 'khor lngas 'dus pa ste/ snod kyi dkyil 'khor dang / rgyu'i dkyil 'khor dang / thabs kyi dkyil 'khor dang / lam gyi dkyil 'khor dang / 'bras bu'i dkyil 'khor ro/de la snod kyi dkyil 'khor ni rten pa ste/ dbus kyi ri bo mchog rab ni de bzhin gshegs pa rnam par snang mdzad dang / ngan song sbyong ba dang / rin chen tog dang / shAkya thub pa dang / me tog cher rgyas so/ /gnya' shing 'dzin ni rdo rje sems dpa'o//de ltar rim pa ji lta ba bzhin du/ gnya' shing 'dzin dang / gshol mda' 'dzin dang / seng ldeng can dang / blta na sdug ri dang / rta rna dang / rnam 'dud dang / mu khyud 'dzin dang / de dag gi bar gyi rol mtsho bdun dang / lcags sbas dang / 'khor lo can ni/rdo rje sems dpa' la sogs pa sems dpa' bcu drug gi ngo bo nyid do/ /'dzam bu'i gling dang / ba lang spyod dang / sgra mi snyan dang / lus 'phags po rnams ni sangs rgyas spyan dang / mA ma kI dang / gos dkar mo dang / sgrol ma rnams so/ / lus dang / lus bsrung dang / sgra mi snyan dang / sgra bsrung dang / rnga yab dang / rda yab gzhan dang / g.yo ldan dang / lam mchog 'gro rnams ni sgeg mo la sogs pa'i lha mo brgyad do/ /shing chen po lus brgyad dang / 'dzam bu shing dang / ba lang sna dang / sgra 'byin rnams ni rdo rje lcags kyu la sogs pa'i sgo skyong bzhi'o//phyi'i lcags ri nag po dang / sa dang / chu dang / me dang / rlung dang / nam mkha' la sogs pa ni rin po che'i gzhal yas khang du shes par bya'o/ /rgyu'i dkyil 'khor ni bskyed pa nyid de/ de la gzugs kyi phung po ni ngan song sbyong ba'o//tshor ba'i phung po ni rin chen tog go/ /'du shes kyi phung po ni shAkya thub pa'o/ /'du byed kyi phung po ni me tog cher rgyas so/ /rnam par shes pa'i phung po ni rnam par snang mdzad de/ /sa'i khams ni sangs rgyas spyan no/ /chu'i khams ni mA ma kI'o//me'i khams ni gos dkar mo'o/ /rlung gi khams ni sgrol ma'o/ /mig gi khams ni rdo rje sems dpa'o/ /gzugs kyi khams ni rdo rje rgyal po'o/ /mig gi rnam par shes pa'i khams ni rdo rje chags pa'o/ /rna ba'i khams ni rdo rje legs pa'o/ / sgra'i khams ni rdo rje rin chen no/ /rna ba'i rnam par shes pa'i khams ni rdo rje nyi ma'o/ /sna'i khams ni rdo rje rgyal mtshan no/ /dri'i khams ni rdo rje bzhad pa'o/ /sna'i rnam par shes pa'i khams ni rdo rje chos so/ /lce'i khams ni rdo rje rnon po'o/ /ro'i khams ni rdo rje 'khor lo'o//lce'i rnam par shes pa'i khams ni rdo rje gsung ngo / /lus kyi khams ni rdo rje las so/ /reg bya'i khams ni rdo rje'i go cha'o/ /yid kyi khams ni rdo rje gnod sbyin no/ /chos kyi khams ni rdo rje khu tshur ro/ /mig gi skye mched ni sgeg mo'o/ /sna'i skye mched ni phreng ba'o//rna ba'i skye mched ni glu ma'o/ /lce'i skye mched ni gar mkhan no/ /gzugs kyi skye mched ni bdug pa ma'o/ /ro'i skye mched ni me tog ma'o/ /sgra'i skye mched ni snang ba ma'o/ /dri'i skye mched ni dri chab ma'o/ /lus kyi skye mched ni lcags kyu ma'o//reg bya'i skye mched ni zhags pa ma'o/ /yid kyi skye mched ni lcags sgrog ma'o/ /chos kyi skye mched ni dril bu ma'o/ /rkang lag gi dum bu brgyad ni ka ba brgyad do/ /bu ga bzhi ni sgo bzhi pa'o/ /sa bon la sogs pa lnga ni rin po che sna lnga'i rtsig pa'o/ /sgal tshigs ni rin po che'i pha gu'o//rtsib ma dang rtsib bu thung ni dra ba dang dra ba phyed do/ /smin ma la sogs pa bu ga bzhi'i phyi rol na gnas pa ni rta babs bzhi'o/ /skra dang ba spu la sogs pa ni ba dan dang lda ldi rnams su shes par bya'o/ /thabs kyi dkyil 'khor ni sgrub pa nyid do/ /de ni rnam pa gnyis te nang gi bdag nyid can gyis bsdus pa dang /phyi'i bdag nyid can gyis bsdus pa'o/ /de la nang gi bdag nyid can la gnyis te/ dmigs pa'i rkyen gyis bsdus pa dang / bdag po'i dbang gis bsdus pa'o/ /dmigs pa'i rkyen gyis bsdus pa la drug ste/ mig dang rna ba dang sna dang lce dang lus dang yid do//de dag la ni phyag rgya bzhi pa'i dkyil 'khor kho nar gsungs te/ de yang mig la ni gzugs dang kha dog gi bye brag gis mtshon to/ /rna ba la ni ngag rtsub mo la sogs pa yid kyi rnam par shes pas kun nas bslang ba'i sgra'i bye brag gis mtshon to//sna la ni dri zhim pa la sogs pa dri'i bye brag gi sgo nas mtshon te lce la ni ro mngar ba la sogs pa ro'i bye brag gi sgo nas mtshon to/ /lus la ni 'jam pa la sogs pa reg bya'i bye brag gi sgo nas mtshon to/ /yid la ni zhe sdang la sogs pa sems kyi khyad par gyis mtshon to//bdag po'i dbang gis bsdus pa la gnyis te/ phyi rol du dmigs pa dang / nang du dmigs pa'o/ /phyi'i bdag nyid can gyis bsdus pa la bzhi ste/ lugs su blugs pa dang / 'bur dang / tshon dang byug pa'o/ /tshon la gnyis te/ chu tshon dang rdul tshon no/ /de dag gis gzhan du gsungs pa'i sku dang gsung dang / thugs dang / ngo bo nyid dang / gzugs brnyan dang / dam tshig la sogs pa'ang bsdus so/ /lam gyi dkyil 'khor ni bgrod pa yin la de ni rnam pa gnyis te/ sbyin pa la sogs pa'i pha rol tu phyin pa lnga la zang zing la sogs pa'i dbye bas lha'i ngo bo ni gzhan du bshad la/'di ni byang chub kyi phyogs kyi chos la nye bar sbyar bar bya ste/ de la dad pa'i stobs ni de bzhin gshegs pa rnam par snang mdzad do/ /dran pa'i stobs ni ngan song sbyong ba'o/ /ting nge 'dzin gyi stobs ni rin chen tog go//shes rab kyi stobs ni shAkya thub pa'o/ /brtson 'grus kyi stobs ni me tog cher rgyas so/ /lus dran pa nye bar gzhag pa ni sangs rgyas spyan no/ /sems dran pa nye bar gzhag pa ni gos dkar mo'o/ /chos dran pa nye bar gzhag pa ni mA ma kI'o//tshor ba dran pa nye bar gzhag pa ni sgrol ma'o/ /dad pa'i dbang po ni rdo rje sems dpa'o/ /dran pa'i dbang po ni rgyal po'o/ /ting nge 'dzin gyi dbang po ni chags pa'o/ /shes rab kyi dbang po ni legs pa'o/ /brtson 'grus kyi dbang po ni rin chen no//dran pa yang dag byang chub kyi yan lag ni nyi ma'o/ /btang snyoms yang dag byang chub kyi yan lag ni rgyal mtshan no/ /ting nge 'dzin yang dag byang chub kyi yan lag ni bzhad pa'o/ /brtson 'grus yang dag byang chub kyi yan lag ni chos so/ /dga' ba yang dag byang chub kyi yan lag ni rnon po'o//shin tu sbyangs pa yang dag byang chub kyi yan lag ni 'khor lo'o/ /chos rnam par 'byed pa yang dag byang chub kyi yan lag ni gsung pa'o/ /'dun pa rdzu 'phrul gyi rkang pa ni las so/ /brtson 'grus rdzu 'phrul gyi rkang pa ni go cha'o//spyod pa rdzu 'phrul gyi rkang pa ni gnod sbyin no/ /sems kyi rdzu 'phrul gyi rkang pa ni khu tshur ro/ /yang dag pa'i ngag ni sgeg mo'o/ /yang dag pa'i dran pa ni phreng ba ma'o/ /yang dag pa'i ting nge 'dzin ni glu mkhan ma'o/ /yang dag pa'i lta ba ni gar mkhan ma'o//yang dag pa'i 'tsho ba ni bdug pa ma'o/ /yang dag pa'i las kyi mtha' ni me tog ma'o/ /yang dag pa'i rtog pa ni snang ba ma'o/ /yang dag pa'i rtsol ba ni dri chab ma'o/ /sdig pa mi dge ba'i chos skyes pa rnams 'jig par byed pa ni rdo rje lcags kyu'o//sdig pa mi dge ba'i chos ma skyes pa rnams mi skyed pa ni zhags pa ma'o/ /dge ba'i chos ma skyes pa rnams skyed pa ni lcags sgrog ma'o/ /dge ba'i chos skyes pa rnams yang dag par bsrung ba ni dril bu ma'o/ /byams pa la sogs pa tshad med pa bzhi ni sgo ba bzhi'o//ting nge 'dzin bzhi ni rta babs bzhi'o/ /rnam par thar pa brgyad ni ka ba brgyad do/ /'phags pa'i bden pa bzhi ni logs bzhi'o/ /bsam gtan bzhi ni rin po che'i pha gu'o/ /mthar gyis snyoms par 'jug pa dgu ni dra ba dra phyed du yang dag par shes par bya'o//'bras bu'i dkyil 'khor ni gnyis te chos kyi sku'i tshul dang / longs spyod rdzogs pa'i sku'i tshul lo/ /de la 'dir chos kyi sku'i tshul ni 'di ltar rang bzhin rnam par dag pa ste/ 'jig rten las 'das pa'i ye shes thams cad kyi rgyur 'gyur ba chos kyi dbyings kyi ye shes kyi bdag nyid ni rnam par snang mdzad kyi bdag nyid do//shes rab kyi mtha' las byung ba'i rgyu mtshan me long lta bu'i ye shes ni ngan song thams cad yongs su sbyong ba'i bdag nyid do/ /dmigs pa med cing bdag nyid dang dbyer mi phyed pa'i mnyam pa nyid kyi ye shes ni rin po che tog gi bdag nyid do//shes bya thams cad la phyin ci ma log par rtog pa so sor rtog pa'i ye shes ni shAkya thub pa'i bdag nyid do/ /'gro ba mtha' dag gi don byed pa bya ba grub pa'i ye shes ni me tog chen po rgyas pa'i bdag nyid do/ /rnam par thar pa'i sgos chos kyi dbyings la dmigs te/ting nge 'dzin thams cad bskyed pa'i rgyu stong pa nyid ni sangs rgyas spyan no/ /mtshan ma med pa ni mA ma kI'o/ /smon pa med pa ni gos dkar mo'o/ /mngon par 'du mi byed pa ni sgrol ma'o/ /de bzhin du log pa'i chos re re las bral ba'i nang stong pa nyid ni rdo rje sems dpa'o//phyi stong pa nyid ni rdo rje rgyal po'o/ /phyi nang stong pa nyid ni rdo rje chags pa'o/ /chen po stong pa nyid ni rdo rje legs pa'o/ /stong pa nyid stong pa nyid ni rdo rje rin chen no/ /don dam pa stong pa nyid ni rdo rje nyi ma'o/ /'dus byas stong pa nyid ni rdo rje rgyal mtshan no//'dus ma byas stong pa nyid ni rdo rje bzhad pa'o/ /mtha' las 'das pa stong pa nyid ni rdo rje chos so/ /thog ma dang tha ma med pa stong pa nyid ni rdo rje rnon po'o/ /dor ba med pa stong pa nyid ni rdo rje 'khor lo'o/ /rang bzhin stong pa nyid ni rdo rje gsung ngo / / rang gi mtshan nyid stong pa nyid ni rdo rje las so/ /chos thams cad stong pa nyid ni rdo rje srung ba'o/ /dngos po med pa stong pa nyid ni rdo rje gnod sbyin no/ /dngos po med pa'i ngo bo nyid stong pa nyid ni rdo rje mtshams sbyor ro/ /de bzhin du 'dir yang phyin ci log gi chos re re'i gnyen po bdag dang gzhan du dmigs pa chos kyi sku'i ting nge 'dzin rgyun chen po dmigs pa med pa'i sbyin pa'i pha rol tu phyin pa ni sgeg mo'i bdag nyid do//bdag dang gzhan du rlom sems med pa'i tshul khrims kyi pha rol tu phyin pa ni phreng ba ma'o/ /dus thams cad du srog la bab kyang khro ba'i sems mi skye ba'i bzod pa'i pha rol tu phyin pa ni glu mkhan ma'o//gnas skabs thams cad du bar chad med pa'i brtson 'grus kyi pha rol tu phyin pa ni gar mkhan ma'o/ /de bzhin du rtog pa dang bral ba'i shes rab kyi pha rol tu phyin pa ni bdug pa ma'o/ / nang dang phyi rol gyi rnam par g.yang ba thams cad dang bral ba'i bsam gtan gyi pha rol tu phyin pa ni me tog ma'o/ /bsam pa phyin ci log gis bskyed pa'i smon lam ngan pa dang bral ba'i smon lam gyi pha rol tu phyin pa ni snang ba ma'o/ /thabs phyin ci log thams cad dang bral ba'i thabs kyi pha rol tu phyin pa ni dri chab ma'o//'gro ba'i sdug bsngal la mngon par gzigs pa'i snying rje ni lcags kyu ma'o/ /de nyid sgrol ba la mngon par brtson pa'i byams pa ni zhags pa ma'o/ /de dag la mngon par dgyes pa'i dga' ba ni lcags sgrog ma'o//thams cad du dmigs pa med pa'i btang snyoms chen po'i ting nge 'dzin ni dril bu ma'i bdag nyid do/ /longs spyod rdzogs pa sku'i tshul ni gong du bcom ldan 'das rnam par snang mdzad chen po rin po che thams cad kyi mchog lha dang mi rnams las khyad par du gyur pa chos kyi sku las byung bas ye shes lnga'i tshul dang /sprul pa'i skus 'gro ba'i don mdzad pa'i 'dod pa'i yon tan lngas gdul bya'i sems can rnams gdul ba'i ched du rin po che'i gzhal yas khang na 'dod pa'i yon tan lnga phun sum tshogs pa dang / theg pa chen po rnal 'byor chen po'i rgyud dpal ngan song thams cad yongs su sbyong ba nyid kyis longs spyod pa'i sangs rgyas 'ba' zhig nyid do//de ltar kun nas nyon mongs pa can gyi phung po dang khams dang skye mched spangs pa las rnam par byang ba'i phung po dang / khams dang skye mched kyi mtshan nyid can du rig par bya ste/de bas na ji srid sems kyi kun du rtog pa mtha' dag spangs pa nas/ de kho na nyid kun rtog gi bar du de kho na nyid la brten nas de'i ngo bo lhag par zhen pa'i phyir dang / de bas byung ba la brten te rnal 'byor pa rnams kyi shes pa rdzogs pa las de rnams skye bar 'dod do//de ltar bdag nyid dang dngos po thams cad dbyer med par bltas te/ gzugs la sogs pa thams cad yul med par gsal bas yul du byas nas bdag nyid la yang dag par mchod par bya'o/ /de la gang dag gzugs la sogs pa nyams su myong ba thams cad bkag nas bdag nyid la mchod pas mchog tu ji ltar 'gyur zhe na/de ni rigs pa ma yin te/ 'di ltar sems las ma gtogs pa'i gzhan du lha'i bdag nyid yod pa ma yin pas na/ bdag nyid kho na mchod par bya ba nyid do/ /de bas na sems las gzhan du mchod par bya ba gang yang med de/sku gzugs la sogs pa yang rang gi sems kyis lhar bskyed pa'i btags pa tsam las gzhan du dngos po med pa nyid do/ /de bas na bdag nyid lhar bskyed pa las dug med cing bla na med pa'i 'bras bu thob pa ni nges pa nyid de the tshom mi bya ba nyid do//gang dag nyams su myong ba bkag pa las mi skye ba ni khyad par spyir zhugs pa'i tshig ste/ khyad par du bya ba dang ldan pa'i phyir ro/ /yul gcig la ni byed pa 'gag par 'gyur te/ yul sna tshogs la ni ma yin no/ /de la gang dag gi ngo bo yul du byed na ni yul sna tshogs par yang 'thad par 'gyur ro zhe na/de ni ma yin te/ tshogs pa'i khyad par la 'dod pa'i 'bras bu skye ba ni rjes su mthun pa'o/ /las gang las mi 'dod pa'i 'bras bu 'byung ba ni dgag par bya ba'i yul yin zhing de'i ngo bo lhag par zhen pa tsam gyis ni thams cad du de ltar mi 'gyur te/dper na dug la sngags la sogs pas byin gyis brlabs pa zos kyang 'chi ba la sogs pa'i nus pa med pa bzhin no/ /lus kyi la sogs pa spyir yang bkag pa de dag kyang nges pa med de/ 'di ltar snying rje la sogs pas bslang ba'i las kyis phyogs gzhan du mi 'dod pa'i 'bras bur 'gyur ba'ang yod de/kha cig tu tsha pa'i nad kyis btab pa rlung g.yab pa las de dang mi mthun pas gang zag de 'chi ba'i rgyu bskyed pa nyid dang / yang kha cig tu bud med kyi 'gro ba chu yis khyer ba la sa'i 'du shes kyis bton pa lta bu'o//byang chub sems dpa' rnams kyis ni snying rje la sogs pa dge ba yid la byed pa'i stobs kyis las gang dang gang byas pa thams cad gnang ba'i yul yin zhing byang chub sems dpa' rnams kyi lam gyi mtshan nyid yin pa'i phyir te/de yang byang chub sems dpa'i sdom pa bshad pa'i mdo las/ dge ba'i sems kyis byams bskyed nas/ /snying rjes don gzhan ston pa la/ /gnang ba byin pas sdig mi 'gyur/ /zhes pa nas gzhan yang / byang chub sems dpa'i rtog pa yis//dge dang mi dge gang byas kyang / /de dag yid kyi dbang byas phyir/ /thams cad dge bar 'gyur ba yin/ /zhes gsungs pa'i phyir ro/ /de bas na thabs mkhas pa ma yin pas kyang srog gcod pa las phyir ldog par gzhag par bya ste/thabs mkhas pa yin pa la gnang ba byin pa'i phyir ro/ /de yang 'di ltar rnam par snang mdzad mngon par byang chub pa sum cu rtsa gsum pa las/ 'dir byang chub sems dpa' rnams kyis srog gcod pa las phyir ldog par bya ba yin te/ ji srid dkon mchog gsum la gnod pa byed pa mthong ba'i bar du'o//de bzhin du ma byin par len pa spang ba'i phyir te/ ji srid du ser sna can dag mthong ba'i bar du'o/ /de bzhin du 'dod pa'i dbang gis gzhan gyi bud med spyad par bya ba ma yin te/ ji srid gter la sogs pa ster ba'i par du'o zhes gsungs te/de dag la sogs pa bslab pa'i gzhi thams cad ni gzhan du'ang rgyas par blta bar bya'o/ /yang 'dir rnyed pa la sogs pas bslang ba'i lus dang ngag dang yid kyi las ni mi dge ba nyid yin te/ mi 'dod pa'i 'bras bu ster ba'i phyir ro/ /de la de'i rang gi ngo bo ni lung du ma bstan pa yin zhing gang du gzhan la phan par byed pa'i bsam pa las byung ba ni byang chub sems dpa'i bslab pa'i rang gi ngo ba yin te bla na med pa'i 'bras bu 'dren par byed pa'i phyir ro//yang byang chub sems dpa' rnams kyis ni bdag nyid kyi spyod pas yongs su spyod pa la ni kha na ma tho ba dang bcas par mi 'gyur te de yang shes rab kyi pha rol tu phyin pa bdun brgya pa las/chos dang yon tan byang chub lung bstan shes gyur pa/ /de ni tshul khrims nor dang chos dang yang dag ldan/ /gang zhig chos dang byang chub yon tan smod byed pa/ / de ni gtso bo'i tshul khrims 'chal zhes rab tu bshad/ /ces gsungs pa'i phyir dang / 'phags pa blo gros mi zad pa'i mdo chen po las kyang thabs mkhas pa dang ldan pa dag gis dngos po thams cad smad par mi bya'o zhes gsungs pa'i phyir ro/ /de la 'dir gzugs la sogs pa'i yul rang gi bsam pas longs spyod par mtshungs kyang /kha na ma tho ba dang kha na ma tho ba med pa'i 'bras bur rnam par gzhag par bya ste/ nyon mongs pa'i bsam bas ni nyon mongs pa'i yul la spyod do/ /nyon mongs pa med pa ni nyon mongs pa med par longs spyod pa'o//de yang rnam pa gsum ste/ 'jig rten pa'i 'bras bur mthun pa dang / rang mya ngan las 'das pa'i 'bras bur mthun pa dang bla na med pa'i 'bras bur mthun pa'o/ /de la dang po ni mtho ris la sogs pa'i 'bras bu 'dod pas lha la sogs pa la mchod pa'i nges par 'byung ba yid la byed pa'o//gnyis pa ni nyan thos la sogs pa'i byang chub kyi don du gzugs la sogs pa la nges par 'byung ba'i rnam pas so sor rtog pa ste/ ji ltar yang dag pa mtshungs par ldan pa'i mdo las/ dge slong dag 'dir gang mig gis gzugs rnams mthong ba na gzugs de dag nye bar dmigs par mi bya ba ni mi rtag pa la sogs pa'i bar la gnas te/gzugs la sogs pa la nye bar dmigs par mi bya'o zhes gsungs pa lta bu'o/ /gsum pa ni rnam pa bzhi ste/ smon lam gyi stobs kyis rnam par grol ba bsgom pa dang de kho na nyid 'ba' zhig la so sor rtog pas bsgom pa dang /bdag med pa tsam la dmigs pas bsgom pa dang / zab cing rgya che ba la bsgom pa'o/ /de la dang po ni gzugs la sogs pa 'di ltar snang zhing nyams su myong ba rnams kyi rjes su 'brangs te 'gro ba mtha' dag la phan par byed pa'i sems mngon du bsgom pa ste/ji ltar spyod yul yongs su dag pa'i mdo las/ byang chub sems dpa' rnams kyis gnas gang du gzugs yid du 'ong ba dag mthong na/ sems can thams cad de bzhin gshegs pa'i mchog gi gzugs thob par gyur cig ces de ltar sems bskyed par bya ba dang /gnas gang du gzugs yid du mi 'ong ba dag mthong ba na/ sems can thams cad 'di 'dra ba'i 'khor ba'i sdug bsngal las thar bar gyur cig ces pa de ltar sems bskyed par bya ba dang / gnas gang du btang snyoms kyi gzugs mthong ba na/ sems can thams cad sems mnyam pa nyid du gyur cig ces de ltar sems bskyed par bya ba la sogs pa rgya cher gsungs pa dang /de bzhin du mdo sde rgyan las kyang / dbang po'i spyod yul sna tshogs ji lta ji lta bar/ /de lta de ltar rig pas mnyam nyid go 'phang la/ / sems can rnams la phan pas mngon par 'du byed cing / /snying rje'i bdag nyid zhugs pas spyod yul yongs su brjod/ /ces gsungs pa'i phyir ro/ /gnyis pa ni sems can gyi khams la snying rjes rnam par bltas te bdag med pa la so sor rtog pa yid la byed pas yul mtha' dag la nye bar longs spyod pa nyid do/de yang shes rab kyi pha rol tu phyin pa nyi khri lnga stong pa las rigs kyi bu chos smra ba'i dge slong de la bdud sdig can bar chad bya ba'i phyir yid du 'ong ba'i gzugs dang sgra dang dri dang ro dang reg bya rnams kyi stobs te/ de la thabs mkhas pa'i shes rab kyis bshigs nas yongs su longs spyod par bya'o zhes rgyas par gsungs so//de bas na de kho na nyid yid la byed pa ni nyes pa mtha' dag gi gnyen po yin pa'i phyir/ gang du mi 'dod pa'i las skyes pa rnams kyang de kho na nyid la so sor rtog pas zad par 'gyur te/de'i dbang gis mi 'dod pa'i 'bras bu bskyed pa'i nus pa la gegs byed pa'i phyir ro/ /gang la so sor rtog pa'i bdag nyid kyis gzugs la sogs pa yongs su shes pa de la nyon mongs pa dang las kyi sgrib pa ji ltar 'gyur te/ phyin ci log gi sems kyi khyad par las byung ba'i las dang nyon mongs pa dang bdag med pa la so sor rtog pa 'gal ba'i phyir lhan cig tu ni skye bar mi 'gyur ro//de yang mdo sde rgyan las/ gang la 'jig rten du mar snang bar 'dod pa min/ /skyes bus chags par bltas pa 'dod pa ste/ /sna tshogs de yis 'khor bar gnas 'gyur bas//des na byang chub sems dpa' 'dul bar 'dod pa yin/ /zhes gsungs pa'i phyir ro/ /gsum pa ni bdag med pa las dmigs pa nyid kho nas gzugs la sogs pa'i tha mal gyi ngo bo la lhag par zhen pa'i gnyen po ste/ des ni gong nas gong du brgyud pas yang dag par rdzogs pa'i sangs rgyas kyi go 'phang la gnas par byed pa'i rgyu yin zhing yang dag par rdzogs pa'i sangs rgyas kyi tshul ji lta ba bzhin du nga rgyal gyis gzugs la sogs pa nyams su myong bar 'gyur ba nyid do//de la gang dag 'di skad du de lta na ni gang zag de dus yun ring bzhig na nges par 'byung ba'i phyir don dam par yang dag par rdzogs pa'i sangs rgyas kyi rang gi ngo bo ma yin no zhe na/de lta na tha mal du longs spyod pa 'ang med par 'gyur te/ de kho na nyid la gang zag la sogs pa med pa'i phyir ro/ / de la ji ltar lhag par zhen pas gzugs la sogs pa mthong ngo zhes yul du byed pa dang / de kho na nyid la ni gzugs la sogs pa med par ni sngar smras zin to/ /de bas na lhag par zhen pa ni de kho na nyid la ltos pa med pa ste/ kha cig tu mi 'dod pa'i 'bras bu 'byung ba ni mi dge ba'i dbang las byung ba'o//gzhan du skyes bu mchog gi don du sbyor ba ni dag bar bcom ldan 'das kyi gzhung du mthong ngo / de bas na de'i ming tsam gyis kyang sangs rgyas kyi nga rgyal bya ba ste/ da ni bla na med pa yang dag par rdzogs pa'i byang chub kyi rgyur bcom ldan 'das kyis rnam par gzhag go//de bas na thams cad bdag nyid kyis nye bar longs spyod pas ni dge ba'i bdag nyid du mi 'gyur ro zhes bya bar ni rnam par gzhag par mi nus te/ de ni bsam pa'i dbang gis dge ba'i bdag nyid yin pa'i phyir te/ de yang dkon mchog bkod pa'i mdo las/byang chub sems dpa' gang gis stong phrag brgyad cu re re la yang dge slong stong phrag brgyad cu'i 'khor dang bcas pa la bskal pa du mar bde ba'i yo byad thams cad kyis bkur sti byas pa bas/ byang chub sems dpa' gzhan gang zhig gis dam pa'i chos yongs su gzung ba'i phyir bdag nyid rnam par dag pas longs spyod par byed pa ni sngar gyi byang chub sems dpa' bas ches bsod nams khyad par du 'phags par 'gyur ro zhes gsungs pa'i phyir ro//yang 'dir bzhi pas btsal bar bya ba'i bde bar gshegs pa'i sku'i bdag nyid ni rang bzhin gyis rtog pa'i dri ma dang bral ba yin te/'di ltar 'od zer dpag tu med pa'i tshogs 'byung zhing sprul pa sna tshogs bkye bas 'gro ba ma lus pa'i don byed pa'i nus pa dang ldan pa yin gyi gzugs la sogs pa thams cad de'i ngo bor mthong zhing sngar smras pa'i rnam pas dngos po mtha' dag mnyam pa nyid du lta bar byed de/phan tshun du ltos pa med pas rang gi ngo bo la bsgrub pa mngon du dmigs pa'i phyir ro/ /de bas na gzugs la sogs pa 'dod pa'i yon tan thams cad kyis bdag med pa'i sku la mchod pas sangs rgyas la mchod par ji ltar 'gyur snyam pa'i dogs pa ni kha na ma tho ba'i rgyun chen por 'gyur ba nyid do//de bas na de dag ni tha mal gyi gnas skabs phyin ci log yid la byed pa'i gnyen po lhag pa'i tshul khrims kyi bslab pa yin pa'i phyir/ mig la sogs pa'i yul rnams la bden pa ma yin pa yid la byed pa spangs pas mchog gi mya ngan 'das pa thob cing don chen po bla na med pa'i sdom pa ste/mig la sogs pa'i yul thams cad la'ang phyag rgya bzhi pa'i dkyil 'khor gyi lhar bskyed par bya zhing / de'i sngags dang phyag rgyas dag par bya ba nyid de/de yang mdo sde nyis brgya lnga bcu pa las kyang / mig gi sdom pa legs pa ste/ /rna ba'i sdom pa'ang legs pa yin/ /sna yi sdom pa legs pa ste/ /lce yi sdom pa legs pa yin/ /lus kyi sdom pa legs pas na/ /yid kyi sdom pa legs pa ste//kun du bsdams pa'i dge slong ni/ /sdug bsngal kun las rab tu grol/ /zhes gsungs pa'i phyir ro/ /de bas na rang dang gzhan thams cad yang dag par rdzogs pa'i sangs rgyas su dmigs pa nyid kyis byang chub kyi bslab pa sems kyi bslab pa rang gi ngo bo dang /rang gi ngo bo la phyin ci ma log par rtogs pa nyid kyi bslab pa shes rab kyi bslab pa nyid do/ /yang 'di ltar ser sna la sogs pa las bzlog nas sbyin pa la sogs pa'i pha rol tu phyin pa mtha' dag kyang de'i khongs su 'dus pa ni sngar gyi rjes su 'brangs pa las blta bar bya'o//thabs de lta bu'i sems las yang dag par byung ba'i gzugs la sogs pa'i rang gi ngo bo dang rjes su mthun pa las bzlog pa ni bla na med pa'i rgyu bsal bas na yang dag par rdzogs pa'i byang chub kyi snod ma yin pa dang / skrag pa'i gnas ma yin par skrag pa ni sdug bsngal gyi phung po 'byung ba'i rgyu yin pa'i phyir ro//de yang phyin ci log bzhi bstan pa'i mdo las/ gnas ma yin par skrag pa ni/ /'gro ba 'ching ba'i rgyu yin te/ /bsod nams ma yin phung po che/ /'byung bar byed pa'i gzhi dag dang / /rigs min dam tshig ring ba dang //bshes med bya ba ma yin byed/ /dge sems snga na med gyur pas/ /dam chos 'di yis skrag pa ni/ /don chen po las ltung bar 'gyur/ /zhes gsungs so/ /de bas na yang dag par rdzogs pa'i byang chub thob par byed pa'i thabs ni 'di yin pas skyo ba med cing gzhan la mi g.yeng bar gzhung 'di kho na la 'bad par bya ba nyid do//de dag ni bla na med pa'i sgrub pa chen po zhes bya ste/ da lta ba'i skyes bu rnams kyis spyad par bya ba'o/ /da ni tshe 'das pa'i sems can rnams la phan gdags par bya ba gsungs te/ de nas lha'i dbang po brgya byin gyis bcom ldan 'das la 'di skad ces gsol to/ /bcom ldan 'das sdig pa bgyis pa'i sems can dmyal ba la sogs pa'i dbang du gyur pa rnams/ ji ltar na sems can dmyal ba la sogs pa'i dbang du gyur pa'i sdug bsngal spangs pa'i slad du bsgrub par bgyi zhes pa ni de yan chad du gsal bar ma gsungs pa nyid kyis ni don rgyas par zhu ba'i tshig ste/de la lha'i dbang po brgya byin sems can thams cad la phan pa dang / rang gi lha'i bu nor bu dri ma med pa'i 'od sems can dmyal ba'i gnas nas thar ba thabs ji lta bus bsgrub par bya zhes zhu bar 'brel to//bcom ldan 'das kyis bka' stsal pa/ lha'i dbang po sems can gang dag sdig pa chen po byas pa'i dbang gis sems can dmyal ba la sogs pa'i dbang du gyur pa de dag ci nas kyang sems can dmyal ba la sogs pa'i sdug bsngal las thar bar 'gyur ba nyon cig ces gsungs pa ni nan tan du gyis la sgrubs shig ces par go bar bya ste go ba'i phyir ma bshad do//de bzhin dkyil 'khor bris nas ni/ /de ltar yang ni bum pa la/ /brgya rtsa brgyad du bzlas nas ni/ /dbang bskur bar ni rab tu brtag//ces pa ni mdor bstan pa ste/ gong ma la snyegs so/ /de nas sdig pa kun byang ste/ /dmyal ba la sogs sdug bsngal las/ /de ni myur du rnam par thar/ /sdig las rnam grol bdag nyid de/ /dag par gyur pa'i lha rnams kyi/ /rigs su skye bar gyur nas kyang //de ni rtag tu sangs rgyas dang / /chos dang dge 'dun mthong bar 'gyur/ /phyir mi ldog pa'i sa la gnas/ /rim gyis byang chub thob par 'gyur/ /zhes gsungs pa ni de'i 'bras bu yongs su gsungs pa ste/ de la sdug bsngal mi bzad pa las kyang thar nas lha dang mi'i rigs chen po rnams su skyes te/bla na med pa'i dkon mchog gsum dang rtag tu mi 'bral zhing phyir mi ldog pa'i sa la gnas te mthar bla na med pa'i byang chub 'thob par gsungs pa'o/ /de yi gzugs brnyan bri ba'am/ /gur gum gyis ni ming yang rung //ngan song gsum gyi 'jigs chen las/ /sems can rnams ni dgrol ba'i phyir/ /sngags mkhan gzhan la phan brtson zhing / /snying rje can gyis de la ni/ /sngags dang phyag rgyas dbang bskur te/ /lha yi gzugs su brtags nas kyang //rang gi lha'am gzhan gyi lha/ /snying po snying gar bris byas nas/ /lha 'dra bar ni sems bskyed de/ /mchod rten dbus su gzhag pa'am/ khyim sogs nang du gzhag par bya/ /zhes gsungs pa ni 'dir sgrub pa'i thabs phyogs gcig gsungs pa ste/ de la gzugs brnyan bri ba'am/ /zhes pa ni tshe 'das pa'i gang zag de'i lus med pa la dgongs pa ste/ de'i lus med na ras la sogs pa la/ de'i gzugs brnyan bri ba'am yang na de'i ming la sogs pa bris te/ ngan song gsum gyi sdug bsngal las thar bar bya ba'i phyir rnal 'byor pas byang chub kyi sems bla na med pa bskyed nas sngar smos pa'i rim pa ji lta ba bzhin du dkyil 'khor du gzhug cing sngags dang phyag rgya la sogs pas dbang bskur bar bya'o//lha yi gzugs su brtags nas kyang / /zhes pa la sogs pa ni 'di ltar dbang bskur ba'i rjes la rang gi rigs kyi lhas de la rab tu gnas pa la sogs pa byas nas lha de yang bde bar gshegs pa'i snying po la sogs pa'i snying po dang mtshan ma snying gar bris te lha dang gnyis su med pa bsams nas/mchod rten nam gtsug lag khang ngam khyim la sogs pa skye bo mang pos phyag dang mchod pa byed pa'i sar gzhag par bya'o//de ci'i phyir zhe na snyam pa la/ de la brten nas skye bo rnams grol bar 'gyur te/ skye bo rnams grol ba las de yis 'gro ba'i don byas pas de nyid grol bar 'gyur ba kho na'o/ /de'i ming nas smos nas ni//gur gum bzang pos sngags bris la/ /sdig can sdig ni zad bya'i phyir/ /rim gyis 'bum mam bye ba yi/ /grangs ni rab tu tshang ba ru/ /mchod rten las ni rab tu bya/ /de ni nges par dmyal gnas las/ /'di byas pa yis grol bar 'gyur/ /yi dags byol song sdug bsngal las//grol te lha yi gnas su skye/ /zhes gsungs pa ni/ yang mchod rten la sgrub pa phyogs gcig gsungs pa ste/ /de la/ de yi ming nas smos nas ni/ /gur gum bzang pos sngags bris la/ /zhes pa ni 'di ltar ras sam shing shun la 'khor lo rtsibs bcu pa bris la/de'i lte ba la gdon mi za ba'i rdo rje'i byin gyi rlabs zhes bya ba'i snying po dang po gur gum gyis bris pa'o/ /de nas rtsibs lnga la ngan song thams cad yongs su sbyong ba'i rgyal po zhes bya ba de bzhin gshegs pa thams cad kyi snying po dum bu lngar bri'o/ / de dag gi bar bar du tshe 'das pa de'i ming bris la/ /de nas 'khor lo de legs par dril te/ bye ma'am 'jim pa'am pa so'am zangs sam rin po che la sogs pa'i mchod rten 'bum mam bye ba'i grangs thim par bya ba kho na'o/ /de ni nges par dmyal gnas las/ /'di byas pa yis grol bar 'gyur//zhes pa la sogs pa ni mi de cho ga de'i stobs kyis dmyal ba'i sdug bsngal chen po dang yi dags dang dud 'gro'i sdug bsngal las thar te lha dang mi'i yul du skye ba dang / bla na med pa'i byang chub thob par 'gyur ba ni nges pa nyid de the tshom mi bya ba nyid do/de yi ming nas brjod nas ni/ /ji skad gsungs pa'i gzungs sngags rnams/ /'bum phrag stong ngam yang na ni/ /brgya phrag stong du tshang ba dang / /bye ba snyed du rab bzlas na/ /lha yi gnas su nges par skye/ /zhes gsungs pa ni 'dir yang sngags kyi sgrub pa gsungs pa ste/de la bcom ldan 'das ngan song thams cad yongs su sbyong ba'i rgyal po yid la byas nas bla na med pa'i sems bskyed de/ de'i ming dang por brjod do/ /de nas de bzhin gshegs pa'i rtsa ba'i sngags gong du smos pa'i grangs su rdzogs par byas na nges par lha'i gnas su skye ba nyid do//de yi ming nas brjod nas ni/ /mkhas pas 'bum phrag brgya'am ni/ /yang na brgya phrag stong / /snyed du/ /sbyin sreg byas par gyur na ni/ /sdig pa de las thar bar 'gyur/ /ji srid 'bar ba'i gnas su ni/ /mtshan ma ma mthong bar dag tu//til dang yungs kar 'bras rnams dang / /ra yi 'o mar ldan pa dang / /dri yis bskus pa'i yam shing gis/ /cho ga bzhin du sbyin sreg bya/ /zhes gsung ba ni 'dir phyogs gcig sbyin sreg la sgrub pa gsungs pa ste/ de la 'dir ni re zhig zhi ba'i sbyin sreg kho nar gsungs so//de la 'di ltar zhi ba'i thab khung 'og nas 'byung ba bzhin du brkos te/ tshe las 'das pa de'i ming ras la sogs pa la bris pa dang / til la sogs pa'i srig rdzas rnams dang bsres nas thab khung du dkyil 'khor gyi 'khor lo bsam zhing de'i ming nas kyang brjod de/gong du gsungs pa'i grangs ji lta ba bzhin du bya ba nyid do/ /de la sreg rdzas dang rnal 'byor pa la sogs pa ni 'og nas rgyas par ston pa'i phyir 'dir ma bshad do/ /de na de ni nges par yang / /lha yi gnas su skyes gyur nas/ /mtshan ma dag ni ston 'gyur ba//lha yi gzugs su 'ong ba dang / /yang na hom khung nang du ni/ /me yi ltas ni ston byed de/ /lha yi gnas su skyes pa dang / /sdig pa bcom pa'i mtshan ma ni/ /dkar po nyid dang g.yas su 'bar/ /steng du drang zhing dri ma med/ /zlum zhing rnam par mi 'phro la/ /brtan la glog bzhin mdangs dang ldan//yang na me lha nyid kyis ni/ /bdag gi gzugs ni ston byed de/ /zla ba dri med dkar 'dra la/ /bzhin mdog dkar zhing lhang nger 'bar/ /de ni mtshan ma de dag gis/ /dmyal sogs gnas nas rnam grol zhing / /sdig pa bcom nas bde 'gror ni//skyes dang skye bar shes par bya/ /zhes gsungs pa ni 'dir me'i rtags rnams gsungs pa ste/ de la rtags 'di dag ni rdzas kyi sbyin sreg rdzogs pa'i mtha'i rtags dang / ro'i sbyin sreg byed pa'i skabs gnyis su shes par bya'o/ /de nas de ni nges par yang / lha yi gnas su skyes gyur nas/ /zhes pa'i tshig bzhis ni rdzas kyi sbyin sreg grangs su rdzogs pa'i rjes su shes par bya'o/ /yang na hom khung nang du ni/ /me yi ltas ni ston byed de/ /zhes pa la sogs pa ni ro'i sbyin sreg dang rdzas kyi sbyin sreg gnyi ga la shes par bya ste/ de la bde 'gro'i gnas su skye ba la sogs pa'i rtags ni/ dkar po nyid dang g.yas su 'bar/ /zhes pa la sogs pa ste/ de la dkar po ni dung lta bu'o/ /g.yas su 'bar ba ni g.yas phyogs su 'khyil pa'o/ /gyen du drang ba ni steng gi phyogs su mar me ltar drang ba'o/ / dri ma med pa ni du ba dang ma 'dres pa dang mdog sngo nag la sogs pa med pa'o/ /zlum pa ni me lce gzhan du mi 'phro ba'o/ /brtan pa ni mi g.yo ba'o/ /glog bzhin du mdangs dang ldan pa ni dkar la gsal ba'o/ /yang na me'i nang du rnal 'byor pa la kha bltas te 'dug pa'i me lha nyid mthong bar 'gyur ba nyid do//de dag las bzlog pa gnag pa dang 'phro ba dang / sgra dang ldan pa dang / 'tshegs pa la sogs pa ni sdig pa las ma grol ba'i rtags te/ phyis yang brtson 'grus drag pos 'bad par bya ba kho na'o/ /de ni mtshan ma de dag gis/ / dmyal sogs gnas nas rnam grol zhing / /sdig pa bcom nas bde 'gror ni/ /skyes dang skye bar shes par bya/ /zhes pa ni rtags de dag gis rdzas kyi sbyin sreg rdzogs pa'i mthar ni skyes par 'brel to/ /ro'i sbyin sreg gi skabs su ni skye bar shes par bya'o//khru bzhi pa yi tshad du ni/ /cho ga bzhin du khung brkos la/ /rdo rjes mtha' ma bskor ba'o/ /'khor lo dbus su bri bar bya/ /rigs lnga yi ni phyag rgya rnams/ /ji bzhin pa yis phyogs su bri/ /de bzhin sems dpa' rnams dang ni/ /'jig rten gtso la sogs pa bri//zhes gsung ba ni 'dir sbyin sreg bya ba'i cho ga gsungs pa ste/ de la/ khru bzhi pa yi tshad du ni/ /cho ga bzhin du khung brkos la/ /zhes pa ni 'di ltar dur khrod la sogs par sa'i cho ga la sogs pa rim pa ji lta ba bzhin du byas te stegs bu khru bzhi brtsigs te/ba'i rnam lnga dang dri la sogs pas byugs la de'i dbus su rgyar khru bzhi pa zabs su khru do pa'i khung bu brus te dri la sogs pas byugs nas de'i steng du thig gdab par bya'o/ /de nas khru gang ni lte bar bya'o/ /sor mo bcu gnyis ni rtsibs su bya'o/ /sor gnyis ni mu khyud du bya'o//sor bcu ni sgo ru bya'o/ /sor mo bcu ni rta babs su bya'o/ /sor mo drug ni phreng ba gsum du bya'o/ /de nas lte ba la rdo rje la sogs pas mtshan pa'i ka ba brgyad dang ldan par bris la de dag gi dbus su pad+ma'i steng du oM zhes bya ba bri'o/ /shar du ni hUM zhes bya ba'o//lhor ni trAM zhes bya ba'o/ /nub tu ni hrIHzhes bya ba'o/ /byang du ni aHzhes bya ba'o/ /shar lhor ni laM zhes bya ba'o/ /lho nub tu ni maM zhes bya ba'o/ /nub byang du ni paM zhes bya ba'o/ /byang shar du ni tAM zhes bya ba'o/ /de bzhin du 'khor lo'i rtsibs rnams la ni rim pa ji lta ba bzhin du hUM dang dzaHdang hoHdang /d+hu dang / trAM dang raM dang b+h+ri dang ha dang hrIHdang d+hIHdang / kruM dang b+ha dang kaM dang raM dang k+ShaM dang / saM rnams bri bar bya'o/ /de bzhin du grwa rnams su ni d+hU dang pu dang A dang ga dang lA dang mA dang gI dang nA rnams dgod par bya'o/ /sgo rnams su ni dzaH dang hUM dang baM dang hoHrnams bri bar bya'o//rta babs kyi khyams rnams su ni rim pa ji lta ba bzhin du su dang sa dang tsa dang ba dang dza dang g+ha dang b+ha dang a dang sho dang dz+nyA dang ma dang ku dang tre dang du dang dza dang sri rnams bri bar bya'o/ /phreng ba gsum gyi phyi rol gyi steng du snam bu sor gsum pa gcig la ni shar la sogs par rim pa ji lta ba bzhin du i dang ya dang bA dang ku dang a dang ra dang bA dang ra rnams bri bar bya ba dang /de'i phyi rol gyi snam bu la ni 'gro ba rigs drug gi dkyil 'khor ci rigs par bri bar bya'o/ /bya dang bum pa gang ba dang / /gtor mas snod rnams bkang ba dag//brgya rtsa brgyad du gzhag pa'am/ /yang na bcu drug nyid du gzhag/ /bza' ba dang ni bca' ba'i bshos/ /me tog phreng sogs de bzhin te/ /bla re rgyal mtshan lhab lhub dang / /gdugs mchog rnams kyis legs brgyan te/ /mkhas pas dkyil 'khor dam pa ni//sbyin sreg rab tu bya ba yin/ /zhes gsungs pa ni mchod pa'i yo byad bsags pa gsungs pa ste/ de la 'dir/ bya ni yid du 'ong ba'i sgra 'byin pa rma bya'am shang shang ngam kar bi ta la sogs pa gzhag par bya ba'am yang na de dag gi gzugs bris la dkyil 'khor gyi stegs bu'i steng du gzhag par bya'o//de bzhin du gser la sogs pa'i bum pa dri dang 'o ma la sogs pas bkang ba kha rgyan dang mgul chings su chas pa brgya rtsa brgyad dam yang na bcu drug las mi nyung bar gzhag pa dang de bzhin du bshos dang / 'bras bu dang gur gum dang / me tog gi phreng ba dang bdug pa dang snang ba dang dri la sogs pa gzhag par bya ba dang bla re dang gdugs dang rgyal mtshan dang dar la sogs pa'i lhab lhub rnams kyis dkyil 'khor mdzes par brgyan la sbyin sreg bya ba nyid do/ /cho ga shes pas bri bar bya//lha rnams mang po spyan drangs la/ /phyag rgya sngags dang rab bstun pas/ /ar+g+ha dbul bar shes nas ni/ /mchod pa rnam pa lngas mchod nas/ /lha yi tshul du rab gnas la/ /ga bur gur gum la sogs pas/ /mar dang 'o ma til bsgos la/ /til dang yungs kar 'bras rnams la'ang //dri yi chu yis legs btab ste/ /'bras chan yos dang la du dang / /sbrang rtsi sha khar ldan pa la/ /brgya phrag du mar yongs bzlas te/ /sreg shing dang ni yam shing la/ /rang gi sngags kyis rab btab nas/ / khung bu'i nang du gzhag par bya/ /zhes gsung ba ni bsreg rdzas bsag pa dang rnal 'byor gyi cho ga gsungs pa ste/ de la/ cho ga shes pas bris nas kyang / /zhes pa la sogs pa ni 'di ltar dang por bdag nyid khro bor bskyed pa las bdag nyid dang mchod rdzas dang gnas rnams bsrung bar bya ste/sems can thams cad tshe 'das pa'i don du sems bskyed de rang gi snying ga'i sa bon las 'od zer spros pas bde bar gshegs pa sras dang bcas pa spyan drangs la/ zhabs bsil dang 'thor 'thung dang gdan rnams phul te/ yan lag bdun rnam par dag par byas nas rdo rje lcags kyu la sogs pa'i rnal 'byor dang phyag rgyas dzaHhUM baM hoHzhes pas dgug pa dang gzhug pa dang bcing ba dang dgyes par byas la dang po mchod pa'i yo byad rnams kyis legs par mchod par bya'o//lha yi tshul du rab gnas la//zhes pa ni bsreg rdzas thams cad la bdag nyid de bzhin gshegs pa ngan song thams cad yongs su sbyong ba'i rgyal por bskyed de rtsa ba'i sngags brgya rtsa brgyad la sogs par gdab par bya ba nyid do/ /ga bur gur gum la sogs pas/ /mar dang 'o ma til rnams bsgos//zhes pa nas/ sbrang rtsi sha khar ldan pa la/ /zhes pa'i bar ni bsreg rdzas bsag pa ste de yang rnam par snang mdzad kyi brtag pa las/ rdzas ni bcu gcig bdag nyid kyis/ /zhi ba'i sbyin sreg rab tu bsngags/ /zhes gsungs pa'i phyir/ 'di ltar me tog dang spos dang zhun mar dang til dang yungs kar dang 'o thug dang 'bras chan dang 'bras yos dang mngar gsum dang la du dang nge ba da ru dag ste de dag ga bur dang gur gum la sogs pa'i dri zhim pos bsgo bar bya ba nyid do//brgya phrag du mar yongs bzlas te/ /zhes pa ni gong ma la snyegs so//sreg shing dang ni yam shing la/ /rang gi sngags kyis rab btab nas/ /khung bu'i nang du gzhug par bya/ /zhes pa ni 'di ltar bsreg shing ni brtsegs pa'i shing de/ pad+ma ka la sogs pa'o/ /yam shing ni me sbar ba'i shing ste/ tsan+dan dkar po la sogs pa'o//rang gi sngags zhes pa ni de las byung ba'i mes sreg par byed pa'i sngags te oM da ha da ha sarba na ra ga te he tu hUM phaT ces pa la sogs pa'i sngags kyis gdab par bya ba'o/ /khung bu'i nang du gzhug par bya/ /zhes pa ni lugs rnam pa bzhir shes par bya ste de la 'di'i gzhung gis ni dkyil 'khor dang bcas pa'i nang nyid du ras dkar pos dkyil 'khor g.yogs la de'i steng du shing rnams mchod rten nam gzhal yas khang lta bur brtsig par gsung ngo //rnam par snang mdzad kyi brtag pa nas ni/ khung bu kha bkab 'thas byas nas//steng du 'bar ba'i sreg khang brtsig /ces gsungs pa ni khung bu shing la sogs pas kha bkab nas zhal zhal gyis 'thas par byas te/ de'i steng du shing brtsig par gsung ngo / /yang 'jam dpal gyi rgyud nas ni/ ka ba bzhi dang ldan byas la//khru do pa yis 'phangs su ni/ /sor mor bcu gnyis stegs bu brtsig/ /de ni kha khyer ldan byas nas/ /de steng shing brtsig 'og tu ni/ /bla re nges par dbub par bya/ /zhes gsung ngo / /yang rdo rje khro bo'i rgyud nas ni/ nyis thog tu ni brtsig byas la/ /steng du shing brtsig bar du ni//dkyil 'khor dam pa bri bar bya/ /'og ni 'dzag pa'i khung bu ste/ /dngul la sogs pa'i snod dag gzhag/ /ces gsungs te/ de bzhi ka yang gang zag rnam pa bzhi la dgongs pa ste/ gang zag ni rnal 'byor pa dang dge slong dang tshangs par spyod pa'i dge bsnyen dang 'jig rten phal pa dang bzhi'o//de la dang po ni phal pa ste bcom ldan 'das kyis lha'i bu la dgongs nas gzhung 'dir gsungs pa'o/ /gnyis pa ni dge bsnyen no/ /gsum pa ni dge slong ngo / /bzhi pa ni rdo rje slob dpon la sogs pa rnal 'byor pa rnams kyi'o//yam shing ni sor nyi shu rtsa bzhi pa la rtse mo ral gri ltar bya/ rtsa ba phyed man chad zlum por byas la rtse mor mar gyis byugs la me tog gi phreng ba gdags par bya ste rtsa ba ni dri'i chus bsku ba'o/ /ro la sngags kyis btab nas kyang //chu mchog gis ni bkrus nas ni/ /bzlas pa'i dri yis byug par bya/ /gos dang rgyan gyis brgyan nas ni/ /sngags kyis btab pa'i bdug pas bdugs/ /me tog phreng la sogs pa gdags/ /de bzhin bde bar gshegs rnams kyis/ /sngags bris pa ni gdags bya ste//snying ga lkog ma kha phyogs dang / /dpral ba mdzod spu rna ba gnyis/ /mgo bo gtsug phud dpung pa gnyis/ /sna dang rked pa pus mo dang / /long bu gru mo'i rtse mo dang / /mig gnyis dang ni gsang ba yi/ /dbang po rnams kyi gnas rnams su//sarba bid kyis byin gyis brlab/ /de ltar gzhan du'ang yi ge sngags/ /mchog tu dge ba rnams gzhag go/ /zhes gsung ba ni ro byin gyis brlab pa gsungs pa ste/ de la mi shi nas zhag bdun 'das nas srin bu la sogs shi ba dang dang por rang nyid khro bo'i ting nge 'dzin gyis stangs stabs dang bcas pas bgegs bskrad par bya'o//de nas 'o ma dang dri chu la sogs pa la rtsa ba'i sngags bzlas la bkru bar bya'o/ /de nas ga bur la sogs pa'i dri'i byugs pas byug par bya'o/ /gos dang rgyan ni gang zag rnam pa bzhi'i rang rang gi cha lugs ji lta ba bzhin du brgyan par bya'o//de nas bde bar gshegs pa'i snying po'i sngags brgya la sogs pa btab pa'i bdug pa dang me tog gi phreng ba gdags par bya ba nyid do/ /snying ka lkog ma kha phyogs dang / /zhes pa nas/ mchog tu dge ba rnams gzhag go//zhes pa'i bar ni 'di ltar snying gar ni oM sarba bid A ba ra Na bi sho d+ha ya ha na hUM phaT ces pa shing shun la sogs pa la pad+ma 'dab ma bzhi pa tsan+dan dkar pos bris pa de'i lte ba la gur gum gyis bris la gdags par bya'o/ /de bzhin du mig gnyis su ni oM sarba bid hUM zhes pa'o//rna ba gnyis su ni oM sarba bid phaT ces pa'o/ /sna'i rtse mo la ni oM sarba bid a zhes pa'o/ /ko skor ni oM sarba bid tra tha zhes pa'o/ /dpral bar ni oM sarba bid oM zhes pa'o/ /spyi bor ni oM sarba bid hUM zhes pa'o/ /dpung pa gnyis su ni oM sarba bid swa zhes pa'o//gru mo gnyis su ni oM sarba bid a zhes pa'o/ /long bu gnyis su ni oM sarba bid tra tha zhes pa'o/ /gsang ba'i dbang po la ni oM sarba bid pa zhes pa'o/ /rked par ni oM sarba bid sha zhes pa'o/ /gtsug phud la ni oM badzra a d+hi tiSh+Tha dz+nyA na sa ma ye hUM zhes gdags par bya'o//de ltar gzhan du zhes pa ni mchan 'og gnyis su ni rnam par snang mdzad kyi snying po gdags par bya'o/ /brla gnyis su ni ngan song sbyong ba'i snying po'o/ /byin pa gnyis su ni rin chen tog gi snying po'o/ /pus mo gnyis la ni shAkya thub pa'i snying po gdags par bya'o//bol gong gnyis la ni me tog cher rgyas kyi snying po gdags par bya'o/ /de nas ro de yongs su dag pa'i cho ga ji lta ba bzhin du yon dang bcas pas dkyil 'khor der gzhug par bya zhing dbang rdzogs par bskur bar bya ba kho na'o/ / de nas ngan song sbyong ba'i phyir/ /stan dang bcas te dbus su ni/ /brtan pa nyid du gzhag bya zhing / /gsang sngags rnams kyis btab pa yi/ /gos kyis de la g.yogs par bya/ /zhes gsung ba ni dbang rdzogs pa'i rjes la rang gi lha'i gzugs su bskyed de/ zhun mar la sogs pas bskus pa'i stan gyi steng du pad+ma 'dab ma brgyad pa bris la/ de'i steng du oM tiSh+Tha badzra sa ma ya s+t+waM zhes brjod cing gzhag par bya'o/ /de'i steng du bde bar gshegs pa'i rtsa ba'i sngags brgya rtsa brgyad btab pa'i ras kyis g.yogs par bya ba kho na'o/de nas/ /byin za dge ba spar bar bya ba'i phyir/ /me lce phung po dpag med dkyil 'khor la/ /zla dkar kun da zhi ba'i cha lugs can/ /mtha' yas pa yi gzugs kyis me bkug la/ /ar+g+ha dbul bar brtags nas de bzhin du/ /blo mchog ldan pa'i mdun du gzugs sogs gzhag//de ltar de bzhin gshegs tshogs spyan drangs la/ /ar+g+ha la sogs brtags te de bzhin du/ /ji ltar gsung bzhin 'dod pa'i yon tan gyis/ /mnyam par gzhag pas mchod pa gang yin bya/ /zhes gsungs pa ni las su bya ba'i rim pa gsungs pa ste/de la byin za dge ba spar ba'i phyir/ /zhes pa nas/ blo mchog ldan pa'i mdun du gzugs sogs gzhag/ /ces pa'i bar ni me sbar bar bya ste/ de ni 'di ltar dang po rang gi snying ga'i sa bon las 'od zer dpag tu med pa nam mkha'i phyogs su spros te/de yis ye shes kyi me lha khro bo khams gsum rnam par rgyal ba sku mdog dkar po la cung zad khros pa zhi ba'i cha lugs can phyag bzhi pa la g.yas pa gnyis na rdo rje dang zhags pa bsnams pa/ g.yon pa gnyis na pad+ma dang sdigs mdzub mdzad pa rgyan thams cad kyis brgyan pa mi bskyod pa'i dbu rgyan can zhabs gnyis kyi gang zag de'i sdig pa gnon pa phyogs bcu dus gsum gyi bde bar gshegs pa rnams kyi ye shes kyi me'i phung po can cig spyan drangs te/ar+g+ha sa zhabs bsil nas pad+ma'i gdan la rang gi mdun du bzhugs par bsam mo//de nas las kyi me lha drang srong chen po spyan drangs te/ kha dog dmar ser la phyag bzhi pa ra la zhon pa phyag g.yas pa gnyis kyis phreng ba dang blugs gzar 'dzin pa/ g.yon pa gnyis kyis ril ba dang dgang gzar 'dzin pa/drang srong gi cha lugs can spyan drangs te/ me sbar bar bya ba ni zhun mar gzar bu ldas yam shing la blugs te bcug nas oM de ba shAkya b+hU ta si shAkya rA dza ta thA ga ta ya ar+ha te samyak+saM bud+d+ha oM ha bya ka bya dz+wa la raM swA hA zhes byas la/ mar khu gzar bu gsum blugs par bya'o//de nas oM ag+na ye raM raM da ha da ha shI g+h+raM ku ru swA hA zhes brjod de mar khu gzar bu gsum blugs par bya ba nyid do/ /de nas bde bar gshegs pa rnams snga ma'i sbyor bas spyan drangs la bzhugs te/ ar+g+ha sa zhabs bsil te 'thor 'thung la sogs pa byas nas gzhal yas khang du bzhugs su gsol la mchod pa'i tshogs gong du gsungs pa bzhin du bya ba kho na'o//de nas byin za la ni rab brtags nas/ /bsreg rdzas bkang ste lan gsum dbul bar bya/ /de nas bsreg byas bkang ste rim gyis ni/ /rgyal ba'i tshogs la brgya rtsa brgyad du brtag//de nas sbyong ba'i sngags kyi rgyal po la/ /bsreg par bya ba nyi shu rtsa gcig brtag/ /ces gsungs pa ni 'dir mchod par bya ba'i rim pa ste/ de la dang por ye shes kyi byin za la rang gi sngags kyis bsreg rdzas thams cad lan gsum dbul bar bya'o//de nas dkon mchog gsum la dbul bar bya'o/ /de nas las kyi me lha la lan gsum dbul bar bya ste/ de'i rjes la oM bai ro tsa na oM pA paM shIn+taM ku ru swA hA/ oM sarba durga ti pa ri sho d+ha ya hUM pA paM shIn+taM ku ru swA hA/ oM rat+na ke tu ya swa pA paM shIn+taM ku ru swA hA/oM shAkya mu ni a pA paM shAn+tiM ku ru swA hA/ oM bi ka si ta ku su me tra tha A gats+tsha pA paM shIn+taM ku ru swA hA/ zhes pa la sogs pa'i rang rang gi sngags dang phyag rgyas bde bar gshegs pa sras dang 'khor du bcas pa rnams la brgya rtsa brgyad dbul bar bya'o//de'i rjes la ngan song thams cad yongs su sbyor ba'i rgyal po'i rtsa ba'i sngags kyis de bzhin gshegs pa de nyid la lan grangs nyi shu rtsa gcig dbul bar bya'o/ /de yang dang por dbu rgyan dang / rna cha dang / mgul rgyan dang / gdu bu dang / sor gdub la sogs pa'i rgyan thams cad kyis brgyan te/ gos dkar po gon la/ kha shar phyogs su bltas te snying rje chen po bskyed la/ sreg rdzas dbul bar bya ba ni dang por me tog go/ /de nas spos so/ /de nas zhun mar ro/ /de nas de ba da ru'o/ /de nas 'bras chan no//de nas 'o thug go/ /de nas mngar gsum mo/ /de nas la du'o/ /de nas 'bras yos so/ /de nas til dang yungs kar te/ de dag thams cad kyang lag pa pad+ma'i phyag rgyas gar dang ldan pas dbul bar bya ba kho na'o/ /de nas gang zag de nyon mongs pa dang nye ba'i nyon mongs pa thams cad bsams te/zhi ba'i phur bu tsan+dan dkar po las sor brgyad pa mgo bo rgya mdung du 'dug la rtse mo zlum por byas te/ de'i ngos la bde bar gshegs pa sras dang bcas pa bsams nas/ oM badzra kI li kI la ya sarba pA paM shAn+tiM ku ru swA hA/zhes brjod de gdab par bya'o/ /de nas yu ba tsan+dan dkar po las byas pa mgo bo dngul las byas pa'i tho ba zlum po khru gang ba byas te/ de'i steng du oM shaM pa ta zhes pa'i sngags kyis brdung bar bya ba kho na'o/ /de nas de ni spyan drangs la//ar+g+ha la sogs mchod pa dang / /yo byad rnams ni lan gsum dbul/ /khams gsum rnam par rgyal ba'i gzugs/ /phyag na rdo rje pad+ma dang / /zhags pa sdigs mdzub 'jigs par phyar/ /zhabs kyi pad+mas sdig mnan zhing / /rgyan rnams kun gyis rab rdzogs pa//rdzogs sangs rgyas ni dbu rgyan mtho/ /bsams sam yang na bris kyang rung / /de yi snying pos de bzhin du/ /brgya phrag stong ngam yang na ni/ /bye ba'i tshad du sbyin sreg bya/ /gal te mtshan ma la sogs byung / /de bzhin sdig can rgyud ces bya/ /zhes gsung ba ni 'dir bsdus pa pho nya'i sbyin sreg bya bar gsungs te/de la de nas de ni zhes pa ni khro bo khams gsum rnam par rgyal ba ste/ de gong du smos pa ni gzugs ji lta ba bzhin du ting nge 'dzin gyis me'i nang du bzhugs su gsol la/ a r+g+ha la sogs pa'i mchod pa'i yo byad kyis yang dag par mchod de/de nas sreg rdzas thams cad gcig tu bsres la bdud rtsir byin gyis brlabs la sngags 'dis gdab par bya'o/ /oM a mi te/ a mi te/ a mi te/ a mi tod b+ha ba/ a mi te sam+b+ha be/ a mi te bi krA n+te/ a mi te ga mi ni/ sarba karma kle sha k+Sha yaM ka ri swA hA/zhes pas btab ste/ mthe'u chung gnyis lu gu rgyud du sbrel nas khu tshur bsnol ba'i sdigs mdzub gnyis snying gar sbyar bar bya zhing / oM badzra kro d+ha trai lo kya bi dza ya da ha da ha sarba na ra ga ti he tu hUM phaT/ oM pa tsa pa tsa sarba pre ta ga ti he tu hUM phaT/ oM ma tha ma tha sarba tir+ya ka ga te he tu hUM phaT/ces pa'i snying pos brgya phrag stong ngam bye ba'i tshad dam yang na stong gi grangs su de'i ming byang dang bsres pas bya ba nyid do/ /phyag na rdo rje pad+ma dang / /zhes pa nas/ rdzogs sangs rgyas ni dbu rgyan mtho/ /zhes pa'i bar sh+lo ka phyed dang gnyis ni gong du bshad pa la snyegs so//bsams sam yang na bris kyang rung / /zhes pa ni ting nge 'dzin gyis bzhugs su gsol ba dang / de'i gzugs brnyan bsreg khang gi nang du bzhugs su gsol ba'o/ /de'i snying po de bzhin du zhes pa la sogs pa ni bshad zin to/ / gal te mtshan ma la sogs byung / /de bzhin sdig can rgyud ces bya/ /zhes pa ni gong du gsungs pa'i me'i rtags sam yang na me lha nyid kyis gzugs ston pa la sogs pa/ de dag byung bar gyur pa ni sdig pa can gyi gang zag de nyon mongs pa las grol bar shes par bya ba dang / de las bzlog pa'i rtags rnams kyis ni mi grol bar shes par bya ba nyid do/ /de dag gi rjes la bstod pa la sogs pa thams cad rdzogs par byas la/ bzod par gsol bas gshegs su gsol bar bya ba ste/ de yang ye shes kyi dkyil 'khor ni ting nge 'dzin gyis gshegs su gsol bar bya'o//gzugs brnyan gyi dkyil 'khor ni chos thams cad bdag med par bsams te/ chos gang rgyus byung de dag gi/ /rgyu dang de 'gog gang yin pa/ /de bzhin gshegs pas bka' stsal te/ /de skad gsungs pa dge sbyong che/ /zhes pa'i sngags kyis bzla zhing me tog gi phreng ba bsams pas bsdus te rgya mtsho la sogs pa'i nang du gtor ma dang bcas pas dor bar bya'o//de la gang dag 'di skad du las thams cad kyi rjes la yang / khro bo la phul ba la dgos pa ci yod ce na/ de ni 'di ltar dper na mi gang dag rgyal po dang phrad 'dod pa las/dang por pho nya la mgu ba la sogs pa byas te/ de yis rgyal po dang brda sbyar ro/ /de nas phrad pa dang rang gi dgos pa'i don rnams zhus pa las phyis kyang rgyal pos pho nya mngags te/ chad pas gcod pa la sogs pa'i las byed do//de bzhin du 'dir yang de bzhin gshegs pa dang / khro bo gnyis don dam par dbyer med kyang 'gro ba'i don dang sbyar nas gtso bo dang pho nya'i tshul du gsungs so/ /de bas na 'dir dang por khro bo'i me sbar ba dang mjug tu tshe 'das pa'i gang zag de'i ngan 'gro rnam pa gsum gyi rgyud gcad par bya ba'i phyir khro bo la phrin las bcol ba kho na ste/de yang sangs rgyas thams cad pa'i rtsa ba'i rgyud chen po las/ 'di ltar chos rnams thams cad ni/ /gdod nas rang bzhin rnam dag pas//sangs rgyas byang chub sems sogs dang / /khro bo mngag gzhug pho nya yi/ /sna tshogs su ni dbyer med kyang / /'gro don tshul dang rab sbyar nas/ khro bos las kun byed par 'gyur/ /zhes gsungs pa'i phyir ro/ /de nas thal bar gyur pa dang / /rdo rje bsdu ba'i sngags kyis ni//cho ga bzhin du bsdu bar bya/ /zhes gsungs pa ni thal ba bsdu ba'i cho ga ste/ de la dang por khro bo'i ting nge 'dzin gyis bgegs bskrad par byas la/ de nas rang nyid de bzhin gshegs pa ngan song thams cad yongs su sbyong ba'i skur bsgoms te/rtsa ba'i sngags brgya rtsa brgyad btab la rin po che sna lnga'i phyi mar byin gyis brlabs te/ rdo rje rtse lnga pa'i phyag rgyas bcings la oM badzra satwa hUM tiSh+Tha badzra saM gra ha hUM zhes pa'i sngags kyis ras dkar po gtsang ma'i nang du bsdu bar bya ba nyid do/ /thal ba de dang rus pa'i rdul//sngags kyis btab pa'i dri chu dang / /ba skyes 'o ma la sogs lngar/ /sbyong ba'i sngags ni blo ldan gyis/ /'bum du bzlas pas brdzis nas ni/ /ga bur dri dang bsgos pa'i sa/ /'jim pa dang ni bsres nas kyang / /gzugs su bya ba'am yang na ni//mchod rten du ni rab byas la/ /gcig gam gnyis sam gsum mam lnga/ /yang na brgya rtsa brgyad dag tu/ /sngags dang phyag rgyas btab nas kyang / /'bum phrag nyis brgya'i bar du bzlas/ zhes gsungs pa ni 'dir thal ba bsgyur ba'i cho ga gsung ba ste/ de la dang por thal ba dang rus pa phye mar btags pa la ga bur la sogs pa'i dri chu la rtsa ba'i sngags kyis btab ste/ba'i 'o ma dang mar dang zho dang chu dang lci ba la sogs pa la rtsa ba'i sngags 'bum du bzlas pas brdzis te/ de dang sa kha dog dkar po la ga bur la sogs pa'i dris bsgos pa dag legs par bsres nas dkyil 'khor gyi lha'i gzugs su bya ba'am yang na mchod rten gyi gzugs su byas te/rab tu gnas pa byas nas de bzhin gshegs pa'i rtsa ba'i sngags/ lo bzhi'am lnga la sogs par nang par re rer mchod pas mchod cing 'bum phrag nyis brgya'i bar du bzlas par bya'o//sngags dang phyag rgyas btab nas kyang / /zhes pa ni zhag re bzhin du mchod rten nam gzugs la bde bar gshegs pa lnga'i sngags dang / phyag rgya dang bcas pas gnas ji lta ba bzhin du dbang bskur bar bya ba nyid do//de nas mchod rten 'bar gyur tam/ /yang na gzugs kyi zhal 'dzum mam/ /dri dang bdug pa'i 'od kyang rung / /snang ngam yang na dri ldang ngam/ /lha la sogs pa'i rnam pa ni/ /sna tshogs par ni snang 'gyur ram/ /rdzu 'phrul rnam par 'phrul ba dang / /me tog la sogs dor ba dag//dung dang rnga la sogs pa'i sgra/ /gling bu pi wang la sogs rnams/ /rgyu med par ni mthong ba dang / /thos par gyur na rnam par grol/ /zhes gsungs pa ni rtags bstan pa ste/ de la mchod rten 'bar ba dang / gzugs yin na 'dzum pa dang /gsung ba dang / ga bur la sogs pas dri'i thig le skud pa dang / bdug pa'i 'od snang ba dang / yang na de dag gi dri mnam pa dang / lha'i gzugs su 'ong ba dang sku gdung la sogs pa 'phar ba dang / sa g.yo ba dang / me tog dang / rgyan la sogs pa mchod rten la sogs pa'i steng du 'dor ba dang /de'i drung na dung dang rnga dang gling bu dang / pi wang dang cang te'u la sogs pa'i sgra la sogs pa'i rtags snang ba dang / thos pa na gang zag de ngan song las grol bar shes par bya ste/ de ni the tshom mi za ba nyid do/ /de la yongs su dag pa'i rnal 'byor pas ni srid pa bar ma do'i cho ga rdzogs par bya ba ni 'di ltar shi nas zhag bdun 'das pa dang ro bsregs pa dang /bdun gnyis pa la dmyal ba'i gnas nas bsgral ba dang / gsum pa la yi dags kyi gnas nas bsgral ba dang /bzhi pa la dud 'gro'i gnas nas bsgral ba dang / lnga pa la lha ma yin gyi gnas nas bsgral ba dang / drug pa la mi'i gnas nas bsgral ba dang / bdun pa la lha'i gnas nas bsgral zhing de nyid kyi tshe srid pa bar ma do'i sems can gyi kun gzhi rnam par shes pa 'khor ba la ldog pa'i rgyus 'dzug pa yin te/de'i tshe de'i dus kyi rigs kyi gtso bos rgyal po la sogs pa pha dang ma'i gzugs byas la/ gzugs de'i snying gar bris pa'i ming dang tsan+dan dkar po dang dmar po bsres pa'i sbyor bas pha dang ma 'chos pa'i tshul du byas la de bzhin gshegs pa'i bden pa'i byin gyi rlabs la dmigs pas/de skad cig ma la snyoms par 'jug pa'i sbyor ba la dmigs pas yongs su dag pa'i ting nge 'dzin la zhugs nas thabs dang shes rab kha sbyor ba'i rnal 'byor gyis rang gi pad+mar bcug nas dkyil 'khor du dbang bcu rdzogs par bskur la/phyag rgya chen po'i gzugs su brtags la me tog gi phreng ba thogs te phyogs bcu dus gsum gyi de bzhin gshegs pa thams cad la phyag 'tshal lo/ /bcom ldan 'das de bzhin gshegs pa thams cad la phyag 'tshal lo/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba'i rgyal po la phyag 'tshal lo//oM tad+ya thA sa ma yo ga te sid+d+hi swA hA/ zhes brjod nas de bzhin gshegs pa'i ting nge 'dzin gyis rab tu gnas pa bya ba nyid do//gal te mtshan ma de dag ni/ /sdig can blos ni ma mthong na/ /'bum gyi phrag ni brgya stong ngam/ /ji srid mtshan ma byung bar du/ /de bzhin gshegs pa mchod nas ni/ /mnyam par gzhag pas bzlas par bya/ /de yi mtha' ni mkhas pa yis/ / mtshan gcig thog thag mi nyal bzlas/ /de nas de yi sdig pa ni/ /dag pa nyid du nges par mthong / /lha yi lus su gnas gyur kyang / /rang gi gzugs su ngo shes 'gyur/ /zhes gsungs pa ni gong du gsungs pa'i cho gas grol bar ma gyur na/ phyis bskyar ba'i cho ga gsungs pa ste/de la/ gal te mtshan ma de dag ni/ /sdig can blos ni ma mthong na/ /zhes pa ni 'dir mtshams med pa la sogs pa sdig pa chen po byas pa'i gang zag de bde blag tu grol bar ma gyur par gong du gsungs pa rtags la sogs pa mthong bar ma gyur na ji ltar bya snyam pa la/'bum gyi phrag ni brgya stong ngam/ /ji srid mtshan ma byung bar du/ /zhes pa la sogs pa gsungs te/ de yang rnal 'byor pas mchog gi snying rje chen po bskyed la/ de bzhin gshegs pa ngan song thams cad yongs su sbyong ba'i rgyal po'i dkyil 'khor bzhengs su gsol te/mchod pa rgya chen po bya zhing de bzhin gshegs pa'i rtsa ba'i rig pa'am/ de bzhin gshegs pa thams cad kyi snying po zhes bya ba'i snying po 'bum phrag brgya 'am/ 'bum phrag stong ngam/ yang na ji srid mtshan ma ma byung gi bar du de bzhin gshegs pa yid la byed pa'i sems mnyam par gzhag pas bzlas par bya ba nyid do//de yi mthar ni mkhas pas kyang / mtshan gcig thog thag mi nyal bzlas/ /zhes gsungs pa ni 'dir gnyis te/ bzlas pa'i grangs su thim pa dang /rtags byung ba'i mtshan mo thog thag mi nyal bar bzlas pa ste/ de ni las su bya ba'i dngos grub kyi sgrub pa zhes bya'o/ de nas de yi sdig pa ni/ /zhes pa la sogs pa ni gsang sngags bla na med pa'i stobs kyis sdig pa chen po'i gang zag de nges par grol bar 'gyur zhes gsungs te/de yang gang zag de lha'i gnas su lha'i lus su yod kyang rnal 'byor pa la sngar gyi gzugs ji lta ba bzhin du ston par 'gyur ba dang / cho 'phrul la sogs pa'i rtags sna tshogs ston par 'gyur ba nyid do/ /de la rtags sam gzugs dag mthong ba ni ji ltar bya snyam pa la/mtshan ma 'di dag shes nas ni/ /rnam par mi rtog sems kyis kyang / /byams dang snying rje ldan pa yis/ /las rnams thams cad bcol bar bya/ /zhes gsungs te/ de'i gzugs rnal 'byor pa'i mngon sum du mthong ba ni 'di lha yin no snyam pa dang /'di bdag gis thar bar byas so snyam pa la sogs pa'i rtog pa dmigs pa dang / bcas pa shes bya'i sgrib pa zhes gsungs pas na/ dang por 'di ltar snang ba thams cad thog ma tha ma med pa nas/rang bzhin gyis rnam par dag pa rtog pa dang bral ba ci'i ngo bor yang ma grub pa mtha' bzhi dang bral ba cig bsam par bya'o/ /de ci'i phyir zhe na snyam pa la/ 'di ltar dag pa can gyi rgyud mthong zhing dri ma dang bcas pa la ni ma yin te/ de yang sangs rgyas phal po che las//'di ni 'jig rten 'di sangs rgyas/ /'di ni rang rgyal dgra bcom zhes/ /'jig rten dag na rtog pa yod/ /yang dag de ni rab shes na/ /sangs rgyas med cing chos kyang med/ /'khor ba med cing thar ba'ang med/ /ces gsungs pa'i phyir te/de bas na de'i gnas skabs gnyis su shes par bya'o/ /byams dang snying rje ldan pa yis/ /las rnams thams cad bcol bar bya/ /zhes pa ni gnas skabs mang ste/ gang zag de 'dod pa'i khams kyi lha'i gzugs su 'ong bar gyur na/ bdag gi chags pa dang rnyed pa'i phyir ma yin zhing 'gro ba sems can thams cad la byams pa dang snying rje chen por bskyed de/ de dag gi don du zhi ba dang rgyas pa dang dbang la sogs pa'i las dri ba bcol bar bya ba kho na'o/ /yang na med par gyur na yang / /bzlas shing bsgom pa'i tshul gyis ni//ming rus legs par bris nas kyang / /mchod rten phreng ba bya ba dang / /yang na gzugs su bris kyang rung / /sbyin sreg mngon par dbang bskur na/ /gdon mi za bar bde 'gror skye/ /zhes gsungs pa ni rnal 'byor pa yid skyo bar gyur pa las kyi gzhug brtul ba gsungs pa ste/de la rnal 'byor pas 'bad pa drag po dang bcas pas gong du gsungs pa'i cho ga ji lta ba bzhin du byas kyang rtags la sogs pa med par gyur na/ rang nyid lha'i dkyil 'khor du bsams nas snying po'i sngags zlos shing de'i ming bris la mchod rten gyi nang du gzhug cing mchod rten gyi phreng ba brgya rtsa brgyad dam stong ngam 'bum la sogs pa bya ba'am/yang na de'i gzugs brnyan bris te gong du smos pa'i de bzhin gshegs pa'i snying po rnams gnas rnams su rim pa ji lta ba bzhin du bris la/lte ba'i khung bu de'i ming bris la dkyil 'khor du gzhug cing dbang bskur la ro'i sbyin sreg tshul ji lta ba bzhin du byas na gdon mi za bar gang zag de bde 'gro'i gnas su skye bar 'brel to/ /thal ba nyungs kar bye ma sogs/ /rang gi ming smos sngags btab nas//bzlas pa byas te song ni/ /rgya mtshor 'bab pa'i chu klung dor/ /zhes gsungs pa ni sbyin sreg byas pa'i thal ba dang bye ma bsres la de'i ming smos te/ yungs kar la de bzhin gshegs pa'i rtsa ba'i sngags stong la sogs pa btab nas/de dag gi rdul re re la de bzhin gshegs pa ngan song thams cad yongs su sbyong ba'i rgyal po re re bsgoms te/ de'i sngags dang phyag rgyas byin gyis brlabs nas phyogs bcu dus gsum gyi bde bar gshegs pa thams cad la phyag 'tshal lo/ /de bzhin gshegs pa'i bka' yang dag pa'i bden pa dang bden pa'i byin gyi rlabs dang /sngags dang phyag rgya'i bden pa dang bden pa chen po'i byin gyi rlabs kyis rdul 'di dag thams cad de bzhin gshegs pa'i skur gyur nas/ 'di gang du gnas pa dang / 'dis reg pa'i sems can thams cad sdig pa'i lam las grol te/ dge ba'i lam la zhugs nas bla na med pa yang dag par rdzogs pa'i byang chub thob par gyur cig ces smon lam btab ste/ gtor ma dang bcas bas rgya mtshor 'bab pa'i chu klung ngam mtshe'u 'am 'bab chu la sogs pa'i nang du dor bar bya ba nyid do//de ltar byas na sdig can yang / /ngan song gsum las thar 'gyur na/ /dge ba'i mchog ni bskyed pa dang / /byang chub sems dang ldan pa dang / /sangs rgyas 'bras bu'i rgyud ldan zhing //sbyin pa'i pha rol phyin pa ldan/ /tshul khrims rgyu dang rab ldan zhing / /bzod pa brtson 'grus mnyam gzhag dang / /shes rab thabs kyi rgyu sgom pa'i/ /bsod nams ldan ni ci smos te/ /myur du de yi ngan song ni/ /bcom par gyur te the tshom med/ /ces gsungs pa ni 'di ltos pa dang bcas pa'i 'bras bu gsungs pa ste/de la/ de ltar byas na sdig can yang / /ngan song gsum las thar 'gyur na/ /zhes pa ni mtshams med pa la sogs pa byas pa'i sdig pa chen po dang bcas pa'i gang zag de lta bu yang gong du gsungs pa'i cho ga de lta bu byas na ngan song gsum las nges par thar bar 'gyur na zhes dman par ltos pa'i tshig go//dge ba'i mchog ni bskyed pa dang / zhes pa nas/ /bsod nams ldan ni ci smos te/ /zhes pa'i bar ni 'di ltar dge ba'i mchog bskyed pa ni bla na med pa'i 'phags pa dkon mchog gsum la skyabs su gsol ba'o//byang chub sems dang ldan pa ni theg pa chen po'i gang zag sems can thams cad kyi don du dge ba'i phung po la sbyor ba'o/ /'bras bu sangs rgyas kyi rgyu ni bla na med pa'i sems de nyid dang ldan pa'o/ / sbyin pa'i pha rol tu phyin pa'i mchog ni sems can dga' bar byed pa'o/ /tshul khrims kyi pha rol tu phyin pa'i mchog ni lus dang ngag dang yid kun nas bsdams pa'o/ /bzod pa'i pha rol tu phyin pa'i mchog ni gzhan la khong mi khro ba'o/ /brtson 'grus kyi pha rol tu phyin pa'i mchog ni don du gnyer ba'o//bsam gtan gyi pha rol tu phyin pa'i mchog ni sems mi g.yeng ba'o/ /shes rab kyi pha rol tu phyin pa'i mchog ni rtog pa dang bral ba ste/ de ltar ci nas dge ba'i rtsa ba dang ldan pa'i gang zag gong du gsungs pa'i cho ga dang pos kyang myur du rtags la sogs pa ston zhing ngan song gi rgyud bcom par the tshom mi za ba nyid do//de dag ni khyad par du byung ba'i cho ga'o/ /dge ba'i rtsa ba ma bskyed la/ /chad par lta ba gang yin dang / /byang chub lam las log pa dang / /bstan la zhe sdang gnod byed cing //sdig pa'i rang bzhin mi shes pas/ /pha dang ma la snying ring zhing / /byang chub sems la brten pa dang / /'dod chags bral ba bsad pa rnams/ /ci ste lha rnams med gyur tam/ /sangs rgyas dge 'dun chos de bzhin/ /sngags dang phyag rgya'i tshogs la sogs//shes rab thabs rnams med na ni/ /sdig can de dag mi thar zhes/ /bde gshegs rgyal ba nyid kyis gsungs/ /zhes gsungs pa 'dir rkyen bla na med pa med na 'bras bu smin par mi 'gyur ba gsungs pa ste/ de la dge ba'i rtsa ba ma bskyed pa ni bla na med pa'i dkon mchog gsum la skyabs su ma song ba'o//chad pas lta ba ni sangs rgyas kyang med chos kyang med dge 'dun yang med 'jig rten 'di la bde bar 'tsho ba zhig las 'jig rten phyi mar skye ba dang 'byung ba ni ga la srid de rnam par shes pa nam mkha' la zhe'o zhes 'dod pa'o//byang chub kyi lam las log pa ni gsum ste/ de la gcig ni legs par gsungs pa'i chos 'dul ba la rab tu byung nas phyis sdom pa dang bral ba'o/ /gcig ni byang chub kyi sems sdom pa dang ldan pa las byang chub kyi sems spangs pa'o//gcig ni theg pa chen po'i gsang sngags kyi dam tshig nyams pa'o/ /bstan la zhe sdang byed pa ni de bzhin gshegs pa'i bstan pa bshig pa'o/ /sdig pa'i rang bzhin mi shes pa ni las rgyu 'bras mi shes pa ste/ de'i rkyen gyis pha dang ma bsad pa dang brdung ba la sogs pa byed pa de ni mtshams med pa gcig go//byang chub sems la brten pa ni mi gang dag snying rje chen po dang ldan pa bla na med pa'i sems kyis sems can thams cad kyi don byed pa bsad pa'o/ /'dod chags dang bral ba ni 'phags pa dgra bcom pa bsad pa ste/de dag la sogs pa mtshams med pa lnga dang de dang nye ba lnga la sogs pa byas pa'i sdig pa chen po dang ldan pa'i gang zag ni sangs rgyas dang chos dang dge 'dun la skyabs su ma song ba dang / bdag la skyob par byed pa'i rang dad pa'i lha med pa dang /sngags dang phyag rgya la sogs pa la skyabs su ma song ba dang / rnam par rtog pa dang bral ba'i chos nyid bde ba chen po mi bsgom pa dang / byang chub tu sems bskyed de snying rje chen pos 'gro ba'i don mi byed pa'i sdig pa can de dag ni ngan song gsum gyi sdug bsngal gyi btson ra dam po nas mi thar bar de bzhin gshegs pa thams cad kyis gsungs so zhes bya bar sbyar te/de dang ldan pa ni skyabs dam pa la skyabs btsal bas 'jigs pa'i bag tu mi 'gyur ro zhes bya bar 'brel to/ /de nas brgya byin la sogs lhas//pad+ma lta bu'i mig phye nas/ /legs zhes bya bas mnyes byas te/ /rab tu mgu bas mchod byas nas/ /brgya byin gzhan la phan brtson pas/ /ji ltar gsol ba'i bka' bzhin du/ /shAkya'i gtso bos bka' stsal pa/ /bden pa nyid du byas gyur nas/ / de nas de ni dmyal ba yi/ /sdug bsngal las ni thar nas kyang / /dga' ldan gnas su 'gro kun la/ /phan phyir bde gshegs 'dra bar skyes/ /zhes gsungs pa ni 'bras bu yongs su smin pa gsungs pa ste/ de la/ de nas brgya byin la sogs lhas/ /pad+ma lta bur mig phye nas//zhes pa ni dper na pad+ma mtsho'i nang na gnas pa rnams 'dab ma rgyas pa'i dus su phyin nas kyang mtshan mo kha zum nas gnas te/ de la nyi ma'i 'od zer phog pa dang pad+ma'i kha dang 'dab ma rgyas par bye ba bzhin du brgya byin la sogs pa'i lha rnams ma rig pa'i mun pas bsgribs pa na ngan song gsum las thar bar bya ba'i thabs med de/yid kyi rnam par shes pa'i pad+ma kha zum pa las/ de bzhin gshegs pa'i thugs kyi nyi ma'i dkyil 'khor las gsung gi 'od zer spros pas lha la sogs pa'i yid kyi rnam par shes pa'i pad+ma la phog ste/de dag yid kyi rnam par shes pa'i pad+ma rgyas par phye ba'o/ /de la pad+ma lta bur mig phye nas zhes pa ni 'bru mang po pa skad chen po'i dbyings te/ dus gsum zhes pa'o/ /de la u ni dpe med pa'i don to/ /pa ni sa ma ya u ta b+hi zhes bya ste dus so//ma ni rang gi ngo bo spangs shing tsheg drag gnyis su u lu tas bcas pas a nyid do/ /a ni a dang por bton pas 'das pa'i sgra'o/ /ya ma ni rang gi ngo bo zhabs su btags pas de ltar nyid do/ /yang a ni dang por bton te na dang rjes su 'brel pa la ma 'ongs par 'gyur bas phye zin to zhes pa dang /bye zhes pa dang / phye bar 'gyur bar go bar bya'o/ /legs zhes bya bas mnyes byas nas/ /rab tu mgu bas mchod byas te/ /zhes pa ni bde bar gshegs pa la yongs su mnyes par bya ba'i phyir mchod pa'i tshogs dpag tu med pas yang dag par mchod de legs so zhes gsol ba ste/dga' ba dang bcas pa'i tshig go/ /brgya byin gzhan la phan brtson pas/ /ji ltar gsol ba'i bka' bzhin du/ /shAkya'i gtso bos bka' stsal pa/ /bden pa nyid du byas gyur nas//zhes pa ni lha'i dbang po brgya byin lha'i bu nor bu dri ma med pa la phan par brtson pa nyid kyis gdung ba dang bcas pa las cho ga brtson pa ste/ de ni 'di ltar lha'i thun tshod phyed dang gnyis srid pa bar mdor gnas nas zhag drug dang thun tshod phyed dang gnyis nas ngan song gsum gyi gnas su skyes so//de nas dam pa'i chos 'di ni lha rnams kyi thun tshod gcig la lha'i dbang po brgya byin la sogs pas thos so/ /de nas lha'i dbang po brgya byin gyis lha'i bu nor bu dri ma med pa'i 'od kyi ro bsdus nas lha rnams kyi nyi ma phyed la bcom ldan 'das kyi 'khor gyi dkyil 'khor ma gyes par bde bar gshegs pa shAkya thub pas gong du ji skad gsungs pa bzhin du ro bsreg pa dang /dbang bskur ba la sogs pa cho ga'i rim pa drug tshang bar byas te/ de la lha'i bu de mi rnams kyi lo bzhi brgya ni mnar med pa'i sems can dmyal bar skyes so//de nas gsang sngags kyi byin gyi rlabs kyis lo brgya ni yi dags kyi lus su skyes so/ /lo brgya ni dud 'gro'i lus su skyes so/ /lo brgya ni mtha' 'khob kyi mi ru skyes so/ /lo lnga bcu ni yul dbus su bram ze'i lus su skyes nas/mdze dang phol mig dang 'bras dang rims la sogs pas sdug bsngal ba lus la rnag dang khrag 'dzag pa cig tu skyes so/ /de nas tshe 'das pa dang gsang sngags kyi bden pa'i byin gyi rlabs kyis dga' ldan gyi gnas su lha'i bu gzugs bzang ba mdzes pa blta na sdug pa cig tu skyes so//lha rnams kyi spyod yul du ma gyur pa'i phyir mi ldog pa'i sa la gnas pa'i byang chub sems dpar gyur pa ni/ dga' ldan gnas su 'gro kun la/ /phan phyir bder gshegs 'dra bar skyes//zhes bya bar 'brel to/ /de nas dbang por bcas pa yi/ /grags chen lha rnams gar byed cing / /mchod pa'i sprin ni thams cad kyis/ /de bzhin gshegs la mngon par mchod/ /ces pa ni de bzhin gshegs pa la bka' drin yang dag par gzo ba ste/de yang dbang por bcas pa'i lha rnams ci'i phyir gar byed ce na/ lha'i dbang po brgya byin gyis de'i nyin par de nyid la lha'i bu de'i gzugs brnyan 'dzum pa dang me tog la sogs pa 'dor ba'i gong du gsungs pa'i rtags thams cad mthong ste/ de yis dga' ba dang bcas pa nyid kyis gar byed pa dang / mchod pa'i sprin gyis de bzhin gshegs pa la mngon par mchod pa nyid do/ /de la lha gzhan rnams ci'i phyir byed ce na snyam pa la de dag kyang bde bar gshegs pa'i bka' yang dag pa 'di bden pa kho nas bdag ni ngan song du ltung ba'i 'jigs pa mi 'byung ngo snyam pa'i dga' ba dang bcas par gar byed pa nyid do//de nas lha yi bu de yis/ /byang chub tu'ang sems bskyed nas/ /tshe 'di nyid la mchod pa'i phyir/ /lha rdzas rnam pa sna tshogs dang / /me tog bdug pa byug pa dang //gdugs dang rgyal mtshan 'phan la sogs/ /rgyan la sogs pa rab mdzes dang / /na bza' rin chen char la sogs/ /dga' ba'i tshal ni gang bar byas/ /zhes gsungs pa ni 'bras bu mngon du 'dod pa nyid du gsungs pa ste/ /de la/ de nas lha yi bu de yis/ / zhes pa ni lha'i bu nor bu dri ma med pa'i 'od de nyid do/ /byang chub tu'ang sems bskyed nas/ /zhes pa ni bla na med pa yang dag par rdzogs pa'i byang chub thob par bya ba'i phyir sems can thams cad la yid du 'ong ba'i sems mngon du byas pa'o/ /tshe 'di nyid la mchod pa'i phyir//zhes pa ni/ mthong ba'i chos 'di nyid la bde bar gshegs pa dang / rang gi bla ma lha'i dbang po brgya byin la mchod pa'i tshogs sprul pa nyid do/ /lha rdzas rnam pa sna tshogs dang / /zhes pa nas/ dga' ba'i tshal ni gang bar byas/ /zhes pa'i bar ni lha'i rdzas rnam pa sna tshogs pa dang /mchod pa'i yo byad khyad par du gyur pa dpag tu med pas lha thams cad kyi mchog tu dga' ba'i tshal yongs su gang bar byas pa'o/ /de nas ngo mtshar cher gyur to/ /lha rnams kyis kyang phyag 'tshal nas/ /dga' ba'i tshal ni yid 'ong bas//kun nas gang bar gyur pa dang / /sna tshogs 'byung ba 'di ci lags/ /zhes pa ni lha la sogs pa thams cad rdzu 'phrul sna tshogs par mthong bas ngo mtshar rmad du gyur pas bcom ldan 'das shAkya thub pa la phyag 'tshal nas/ /dga' ba'i tshal 'di ltar yid du 'ong ba'i rdzas kyis kyang gang /rdzu 'phrul sna tshogs pa dga' ba 'di ci'i rgyu ci'i rkyen las yang dag par byung zhes 'dri ba'o/ /bcom ldan 'das kyis bka' stsal pa grogs po dag shes par gyis shig /rdzu 'phrul rnam par 'phrul pa 'di ni lha'i bu nor bu dri ma med pa'i 'od ces bya ba de yin no zhes gsungs pa ni gsal ba ston pa'i tshig ste de la grogs po dag ces pa ni brtse ba dang bcas pa'i tshig yongs su dag pa'i 'bras bu'o//shes par gyis shig ces pa ni skad cig gi dbyings kyis rnam pa gnyis la 'jug ste/ da ltar ba//mtshungs pa dang ma 'ongs pa mtshungs pa de yang rnam pa bzhi ste/ rgyu mtshungs pa dang 'bras bu mtshungs pa dang gnas mtshungs pa dang rkyen mtshungs pa nyid de lhag ma ni go sla ba'i phyir ma bshad do/ /lha rnams kyis gsol pa/ bcom ldan 'das mnar med pa'i sems can dmyal ba'i dbang du gyur nas sdug bsngal yang myong zhing mthong ba'i chos 'di nyid la bde 'gro'i dbang du gyur pa gang lags pa de ni bcom ldan 'das ngo mtshar lags so//bde bar gshegs pa ngo mtshar lags so zhes pa ni dga' ba dang bcas pa rmad kyi tshig ste/de la mnar med pa'i sems can dmyal ba'i sdug bsngal chen po'ang myong ba mthong ba'i chos nyid la bde 'gro'i gnas su skyes pa de nyid ngo mtshar che'o/ /de ci'i phyir ngo mtshar che zhe na/ lha rnams kyis bde bar gshegs pa'i 'khor du 'dus pa de'i dus de nyid du sdug bsngal dang bde ba thob pa'i phyir ngo mtshar ba ste lan gnyis pa'i tshig ni gnas gnyis la bsams nas smras pa'o//de nas brgya byin la sogs pa lha thams cad kyis mgrin gcig tu tshig 'di skad ces gsol to/ /sangs rgyas 'dra ba'i ston pa med/ / chos dang 'dra ba'i dge ba med/ /dge 'dun 'dra ba'i snod med de/ /sngags dang 'dra ba'i 'dren pa med/ /bla med bzhi la bdag skyabs mchi/ /zhes pa ni dga' ba dang bcas pas bstod pa ste/ de la 'dir ni rnam pa gnyis su shes par bya'o/ /gcig ni spyir bsams pa dang /gcig ni 'di nyid la bsams nas bstod pa ste/ de la/ sangs rgyas 'dra ba'i ston pa med/ /ces pa ni 'jig rten pa'i ston pa chen po lha tshangs pa la sogs pas bstan pa'i rig byed dang / sngags la sogs pas ni dug zhi ba tsam yang mi 'grub la/ bde bar gshegs pa rnam pa thams cad mkhyen pa'i ye shes dang ldan pas mthong ba'i chos 'di la ngan song gi sdug bsngal las thar te/ bde 'gro'i gnas su skye ba'i stobs dang ldan pa'i phyir na/ sangs rgyas 'dra ba'i ston pa med/ /ces pa'o/ /de bzhin du/ chos dang 'dra ba'i dge ba med/ /ces pa yang 'dir dge ba ni bzang po'o/ /bzang po ni yid du 'ong ba ste/ lha la sogs pa'i 'dod pa'i yon tan gyi longs spyod bzang pos ni 'bras bu yid du mi 'ong ba 'byin la/ dam pa'i chos bla na med pas ni yid du 'ong ba'i 'bras bu 'byin pa'i phyir na/chos dang 'dra ba'i dge ba med/ /ces pa'o/ /dge 'dun 'dra ba'i snod med de/ /zhes pa la/ de la snod ni zhing ngo / /zhing ni skyed par byed pa ste/ lha tshangs pa la sogs pa mchod pas yun ring por shin tu dka' ba zhig na ji srid mtho ris kyi 'bras bu 'byin la 'phags pa'i dge 'dun la yang dag par mchod pas myur du mtho ris dang /bde 'gro thob cing bde ba chen po bla na med pa yang dag par rdzogs pa'i 'bras bu'ang 'byin pa'i phyir/ dge 'dun 'dra ba'i snod med de/ /zhes pa'o/ /sngags dang 'dra ba'i 'dren pa med//ces pa ni 'dir rig byed la sogs pa bzlas pas thar pa'i gnas su 'dren par mi nus la gsang sngags bla na med pa 'di bzlas pa las myur du bde 'gro dang thar pa chen po'i gnas skabs su 'dren par byed pa'i phyir na/ sngags dang 'dra ba'i 'dren pa med/ / ces pa nyid do/ /yang skabs 'di nyid la bstod pa ste/ de la/ /sangs rgyas 'dra ba'i ston pa med/ /ces pa ni bde bar gshegs pa rnams te rgyu'o/ /chos dang 'dra ba'i dge ba med/ /ces pa ni ngan song thams cad yongs su sbyong ba'i rgyud de/ rkyen no/ /dge 'dun 'dra ba'i snod med pa//zhes pa ni dkyil 'khor gyi lha dang / lha mo'i tshogs rnams te zhing ngo / /sngags dang 'dra ba'i 'dren pa med/ /ces pa ni bde bar gshegs pa'i snying po rnams te 'bras bu'o/ /de dag ni bla na med pa'i khyad par du 'phags pa'i dkon mchog bzhi zhes bya ste/de 'dra ba'i bla na med pa'i dkon mchog bzhi la bdag cag lha dang bcas pa'i 'jig rten skyabs su mchi zhes par 'brel to/ /de nas lha'i bu de dag gis bcom ldan 'das la 'di skad ces gsol to/ /bcom ldan 'das bcom ldan 'das kyis byin gyis brlabs pa'i dga' ldan gyi lha'i rjes su skyes pa'i lha'i bu nor bu dri ma med pa'i 'od ces bgyi ba de ci 'dra ba zhig mchis/de'i rdzu 'phrul dang mthu ji lta bu lags pa bdag cag blta bar 'tshal lo zhes pa ni sum cu rtsa gsum gyi lha'i bu rnams kyis lta bar 'dod pa ste/de la bcom ldan 'das kyis byin gyis brlabs pa zhes pa ni 'dir gnyis su go bar bya'o/ /byin gyis brlabs pa ni gsung gi 'od zer gyis byin gyis brlabs pa dang / thugs kyi 'od zer gyis byin gyis brlabs pa ste/ de la gsung gi 'od zer gyis byin gyis brlabs pa ni bcom ldan 'das kyis gsungs pa'i sngags dang phyag rgya dang snying po dang chos rnams kyis grol bar gyur pa nyid la byin gyis brlabs zhes bya'o//thugs kyi 'od zer gyis byin gyis brlabs pa ni dang po bcom ldan 'das kyis lha'i dbang po brgya byin lha'i bu nor bu dri ma med pa'i 'od dran par byed pa'i 'od zer gyis bskul ba gang yin pa de ste/lhag ma ni go sla ba'i phyir 'dir ma bshad do/ /de nas bcom ldan 'das kyis lha rnams kyi snying skul bar byed pa zhes bya ba'i 'od zer gyi phreng ba nyid kyis zhabs kyi mthe bong gnyis nas phyung ngo //phyung nas kyang nor bu dri ma med pa'i 'od kyi lus thams cad snang bar byas nas snying gar zhugs te bskul nas de nyid du mi snang bar gyur to zhes gsungs pa ni lha'i bu de nyid yang dag par ston par byed de/ de la lha rnams kyi snying skul bar byed pa zhes bya ba'i 'od zer ni 'od de nyid kyis lha'i snying skul bar byed pa zhes bya'o//phreng ba zhes pa ni mang po ste tshogs la'o/ /gnas ni zhabs kyi mthe bong gnyis nas phyung ngo / /phyung nas kyang nor bu dri ma med pa'i 'od kyi lus thams cad snang bar byas so zhes pa'i lha'i bu de nyid bar snang la yongs su gnas pa ste der lha'i bu nor bu dri ma med pa'i 'od kyi lus de 'od zer des lha de nyid la snang bar mthong ba'o//snying gar zhugs te bskul nas de nyid du mi snang bar gyur to zhes pa ni lha'i bu de'i sems dga' ba'i tshal du 'ong bar 'dod par bskul te 'od zer de dag lha'i gnas de nyid du mi snang bar gyur te phyis bcom ldan 'das kyi zhabs kyi mthe bong la thim par mngon zhes par 'brel to//lha'i bu de nyid rab tu dga' bar gyur nas lus kyi 'od zer gyis dpag tshad brgya phrag tshun chad kyi nam mkha'i ngos thams cad gsal bar byas te/lha'i bu stong phrag du ma'i 'khor gyis bskor zhing mdun du byas nas lha'i rdzu 'phrul chen pos mi snang bar byas te 'ongs nas dga' ba'i tshal thams cad gsal bar snang bar byas nas/ bcom ldan 'das dang brgya byin gnyis ma gtogs par lha rnams kyi 'od zer zil gyis mnan to zhes pa ni bcom ldan 'das kyi drung du yang dag par 'ong ba ste/de la lha'i bu de nyid rab tu dga' bar gyur pa ni 'od zer de'i stobs kyis 'ong bar dga' ba'o/ /lus kyi 'od zer gyis dpag tshad brgya phrag tshun chad kyi nam mkha'i ngos thams cad gsal bar byas pa ni lha'i bu de nyid kyi lus kyi 'od kyis gsal bar byas pa'o//lha'i bu de stong phrag du ma'i 'khor gyis bskor ba ni gnas gtsang ma'i lha rnams kyis bskor ba ste/ che ba dbyung ba'i phyir ro/ /lha'i rdzu 'phrul chen pos lus mi snang bar byas pa ni sum cu rtsa gsum pa'i lha la sogs pa la mi snang ba'o//'ongs nas dga' ba'i tshal thams cad gsal zhing snang bar byas pa ni lus kyi 'od kyis gsal zhing snang bar byas pa'o/ /bcom ldan 'das dang brgya byin gnyis ma gtogs pa'i lha rnams kyi 'od zer zil gyis mnan to zhes pa ni bla ma yang dag par bskul ba dang sngags kyi che ba'i yon tan dbyung ba'i phyir ro//de nas lha'i bu des bcom ldan 'das kyi zhabs gnyis la spyi bos phyag btsal nas ched du brjod pa 'di ched du brjod do/ /kye ma shAkya mgon po yi//sangs rgyas mdzad pa ngo mtshar che/ /gang phyir ngan song ltung ba yi/ /sems can glog bzhin myur du grol/ /zhes pa ni 'dir drin du gzo ba'i tshig ste/ de la bcom ldan 'das kyi zhabs gnyis la spyi bos phyag btsal ba ni bcom ldan 'das dang brgya byin gnyis kyis gzigs pa dang mthong ba'o//ched du brjod pa ni bstod pa ste/ de la/ kye ma shAkya mgon po yi/ /zhes pa ni bde bar gshegs pa'o/ /sangs rgyas mdzad pa ngo mtshar che/ /zhes pa ni de nyid la bsams pa'o/ /gang phyir ngan song ltung ba yi//sems can glog bzhin myur du grol/ /zhes pa ni gtan tshigs so/ /glog bzhin zhes pa ni myur ba'i dpe'o/ /de nas de'i skad cig ma de nyid kyi tshe shing rta'i 'phang lo tsam gyi pad+ma thams cad rin po che las byas pa/ dpag tshad brgya phrag stong tshun chad du dri dang ldan pa dang lha'i glu snyan pa'i sgra grag pa ngo mtshar gyi chos du ma yang dag par ston pa lha'i glu dang gar dang rol mo dang gling bu dang /rnga dang ke kor rnams kyi sgra snyan pa 'byin pa zhig bcom ldan 'das kyi spyan sngar 'dug go zhes pa ni 'dir lha'i bu de nyid de/ de la shing rta'i 'phang lo tsam gyi pad+ma thams cad rin po che las byas pa ni dpag tshad brgya phrag stong tshun chad du yid du 'ong ba'i dri dang ldan pa ni nam mkha'i ngos thams cad dang bcom ldan 'das kyi nye 'khor du lha rnams kyis mthong ba'o//de bzhin du lha'i glu snyan pa'i sgra grag pa dang / ngo mtshar gyi chos du ma yang dag par ston pa dang / lha'i glu dang gar gyi sgra dang rol mo'i sgra dang gling bu dang / rnga dang ke kor la sogs pa'i sgra snyan pa 'byin pa yang lha rnams kyis thos pa ste/ spyan sngar 'dug pa ni de dag la sum cu rtsa gsum gyi lha la sogs pas rjes su dpag pa'o//de dag ni ched du brjod pa la sogs pa'i sngon rol du yang dag par shes par bya'o/ /de nas lha'i bu rnams kyis de mthong nas kyang shin tu ngo mtshar skyes te 'di skad ces smras so/ /de bzhin gshegs pa'i mthu ni bsam mi khyab/ /sngags kyi yon tan sna tshogs bsam mi khyab//byang chub brten pa rnams kyang bsam mi khyab/ /tshangs spyod tshul khrims dri med skye mtha' yas/ /zhes pa ni sum cu rtsa gsum pa'i lha rnams kyis ngo mtshar ba'i tshul gyis yang dag par bstod pa ste/ de la de bzhin gshegs pa'i mthu ni bsam mi khyab//ces pa ni bcom ldan 'das shAkya thub pa la yang dag par bstod pa yin zhing sems can rnams la tshul ji lta ba bzhin du yang dag par 'dul ba dang lha'i bu de nyid lha gzhan rnams pas khyad par du 'phags par gyur pa nyid kyi phyir na mthu bsam gyis mi khyab ces bya'o//sngags kyi yon tan sna tshogs bsam mi khyab/ /ces bya ba ni theg pa chen po gsang sngags la yang dag par bstod pa ste/ de la lam khyad par can bla na med pa'i dkyil 'khor du sngags dang phyag rgyas rnam par shes pa dang bcas pa'i lus lta zhog gi rnam par shes pa gzhan du gnas pa'i lus rdo rje lta bu la dbang bskur bas kyang skad cig tsam gyis sems can dmyal ba'i sdug bsngal chen po las kyang thar nas bla na med pa 'di 'dra ba 'byin pa ni/sngags kyi yon tan bsam gyis mi khyab ces bya bar 'brel to//byang chub brten pa rnams kyang bsam mi khyab/ /ces pa ni gsang sngags spyod pa'i gang zag la bstod pa ste/ de yang skabs 'dir ni lha'i dbang po brgya byin la go bar bya zhing bla na med pa yang dag par rdzogs pa'i byang chub tu sems bskyed de theg pa chen po gsang sngags pa'i gang zag gi mthu yang bsam gyis mi khyab ces pa'o//tshangs spyod tshul khrims dri med skye mtha' yas/ /zhes pa ni lha'i bu de nyid la yang dag par bstod pa ste/ de la lha'i bu de dga' ldan gyi gnas su skyes nas kyang byang chub tu sems bskyed de tshangs par spyod pa nyid kyis lha gzhan pas khyad par du 'phags par gyur pa dang /phyir mi ldog pa'i sa la gnas pas na tshangs par spyod pa'i tshul khrims dri ma med pa'i yon tan bsam gyis mi khyab ces bya bar 'brel to/ /yang na 'dir dkon mchog gsum la bstod pa ste/de la tshig dang po ni sangs rgyas la bstod pa'o/ /tshig gnyis pa ni chos la bstod pa'o/ /tshig gsum pa ni byang chub sems dpa'i dge 'dun la bstod pa'o/ /tshig bzhi pa ni dge slong gi dge 'dun la bstod par shes par bya'o//de nas lha'i bu de dag gis de blta bar 'dod nas bcom ldan 'das la 'di skad ces gsol to/ /lha'i bu de dang de'i dkyil 'khor de blta bar 'tshal lo/ /bcom ldan 'das blta bar 'tshal lo/ /bde bar gshegs pa blta bar 'tshal lo zhes pa ni sum cu rtsa gsum gyi lha'i bu rnams kyis ngo mtshar khyad par du gyur pa de lta bar 'dod pa ste/de la de dang zhes pa ni nor bu dri ma med pa'i 'od do/ /de'i zhes pa ni nor bu dri ma med pa'i 'khor na gnas pa'i gnas gtsang ma'i lha'i bu rnams gzugs sam cha lugs sam kha dog ci 'dra ba zhig yod snyam pas blta bar 'dod pa nyid do//de lan gnyis pa'i tshig ni shin tu ched du brjod pa'i yon tan de dag thams cad kyang bcom ldan 'das nyid kyis gsang sngags kyi che ba'i 'bras bu la 'jug pa'i rgyur yang dag par bstan par shes par bya'o//de nas yang bcom ldan 'das kyis yang mthe bong gnyis nas 'od zer phyung nas 'od zer dri ma med pa des/ lha'i bu de dag kun du snang bar byas te bskul nas de nyid du mi snang bar gyur to zhes gsungs pa ni 'dir sum cu rtsa gsum gyi lha la sogs pa la lha'i bu nor bu dri ma med pa'i 'od de gsal bar ston pa ste/de la bcom ldan 'das kyis yang mthe bong gnyis nas lha'i lus snang bar byed pa zhes bya ba'i 'od zer dri ma med pa rnam par dag pa zhig phyung ste/ de yis lha'i bu nor bu dri ma med pa la sogs pa gnas gtsang ma'i lha'i bu rnams sum cu rtsa gsum gyi lha la sogs pa kun nas snang zhing gsal bar mthong bar byas pa nyid do//bskul nas de nyid du mi snang bar gyur to zhes pa la bskul ba ni lha'i bu nor bu dri ma med pa'i 'od bsnyen bkur byed par yang dag par bskul ba'o//de nyid du mi snang bar gyur to zhes pa ni 'od zer de zhabs kyi mthe bong de nyid du mi snang bar thim par 'brel to/ /de nas gdod sum cu rtsa gsum gyi lha la sogs pas lha'i bu nor bu dri ma med pa'i 'od la sogs pa mthong bar shes par bya'o//de la gang dag 'di skad du sum cu rtsa gsum pa'i lha rnams kyis rnam pa thams cad mkhyen pa'i ye shes dang ldan pa'i bde bar gshegs pa dang / phyir mi ldog pa'i byang chub sems dpa' rnams kyang mthong du rung na lha nyid yang dag par ci'i phyir mi mthong zhe na/de ni 'di ltar rnam pa thams cad mkhyen pa'i bde bar gshegs pa dang / phyir mi ldog pa'i byang chub sems dpa' rnams ni bde bar gshegs pa nyid kyis yang dag par byin gyis brlabs nas thabs cig tu bzhugs pa nyid do//sum cu rtsa gsum gyi lhas lha'i bu nor bu dri ma med pa'i 'od la sogs pa mi mthong ba 'di yang bcom ldan 'das kyis gsang sngags kyi byin gyi rlab chen po khyad par du dbyung bar mdzad pa'i phyir/ lha rnams kyi spyod yul du ma gyur par mdzad par shes par bya'o//de nas lha'i bu nor bu dri ma med pa'i 'od ces bya ba de la sogs pa gnas gtsang ma'i lha'i bu rnams kyis bcom ldan 'das dang brgya byin gnyis kyi gdan ma gtogs pa dga' ba'i tshal thams cad g.yos par byas te lan brgya stong du mar bskor ba byas nas 'di skad ces gsol to//kye ma sangs rgyas rnams kyi ni/ /sngags kyi byin rlabs ngo mtshar che/ /gang phyir mtshams med lhung ba yi/ /sems can lha gnas myur du skyes/ /zhes pa ni lha la sogs pa rnams kyis the tshom yang dag par bsal ba'i tshig ste/de la lha'i bu nor bu dri ma med pa'i 'od ces bya ba la sogs pa gnas gtsang ma'i lha'i bu rnams kyis/ bcom ldan 'das dang brgya byin gnyis kyi gdan ma gtogs pa dga' ba'i tshal thams cad g.yos par byas pa ni 'di ltar rdzu 'phrul chen po dang ldan par ston pa yin zhing bcom ldan 'das kyi gdan ni sus kyang bskyod par mi nus la brgya byin gyi gdan ni lha rnams kyi rgyal po yin pa'i phyir dang rang gi bla ma la yang dag par che ba gdon pa'i phyir ma g.yos pa'o//lan brgya stong du mar bskor ba byas pa ni/bcom ldan 'das dang brgya byin gnyis la bskor ba byas pa'o/ /kye ma sangs rgyas rnams kyi ni/ /sngags kyi byin rlabs ngo mtshar che/ /gang phyir mtshams med lhung ba yi/ /sems can lha gnas myur du skyes/ zhes pa ni drin du gzo bas dga' ba dang bcas pa'i tshig gis bcom ldan 'das la yang dag par bstod pa nyid do//yang dang yang ni lan grangs du mar brjod de shin tu ngo mtshar ba'am shin tu drin gzo ba'i don to/ /de dag gis ni lha la sogs pa la blo chung zhing shes rab zhan pa the tshom dang bcas pa kha cig gi the tshom yang bsal to//de nas lha'i bu nor bu dri ma med pa'i 'od ces bya ba dang / lha'i bu de dag gis bcom ldan 'das la nor bu dang gser dang dngul dang do shal dang se mo do dang gdu bu dang dpung rgyan dang snyan cha la sogs pa rgyan gyi khyad par sna tshogs pa du ma dang gdugs dang rgyal mtshan dang ba dan dang lda ldi dang rnga ma la sogs pa yo byad kyi khyad par rnam pa sna tshogs pa dang /seng ge'i gdan dang gzims cha dang pho brang dang gzhal yas khang dang / khang pa brtsegs pa la sogs pa gnas kyi khyad par rnam pa sna tshogs pa dang me tog la sogs pa mchod pa'i khyad par sna tshogs pa dang /rang gi lus dang sems dang ngag kyang phul lo/ gzhan yang glang po che dang ba glang dang rta dang seng ge dang stag dang / spre'u dang dgo ba dang thug re dang ma he dang bong bu dang rnga mo dang chu srin dang phag rgod dang ra dang glang dang ba dang /'dod pa'i bzhon pa la sogs pa 'dod pa'i khyad par du ma yang phul nas/ bcom ldan 'das kyi 'khor gyi dkyil 'khor rnams kyang mchod/ lha rnams kyi dbang po brgya byin gyi 'khor gyi dkyil 'khor rnams kyang mngon par mchod de legs so zhes bya bas gsol nas bcom ldan 'das dang brgya byin gnyis la bla mar bya ba dang /bsti stang du bya ba ste/ phyag 'tshal nas de bzhin du dong ngo zhes pa la sogs pa 'dir bde bar gshegs pa'i bka' la gus par byas pa'i phyir rtsa ba'i tshig tshang bar bris su zad kyi de ji lta ba bzhin du yin zhing go sla ba'i phyir ma bshad do//de la de dag ni dper na mi gang dag btson ra dam po nas mi 'ga' zhig gis thar bar byas nas/ phyis mi des mi de la drin gyi lan gzo bgos dang rgyan dang rin po che la sogs pas bsnyen bkur du byed pa bzhin du lha'i bu des bcom ldan 'das dang /lha'i dbang po brgya byin gnyis la sems can dmyal ba'i sdug bsngal chen po las thar bar mdzad pa'i phyir drin du gzo bas bkur stir byas pa nyid do/ /de la rang gi lus dang ngag dang yid kyang phul ba ni/'dir lus ni gar la sogs pa phul ba'o/ /ngag ni glu la sogs pa phul ba'o/ /yid ni dad pa dang dang ba'i sgo nas yang dag pa'i gus pa nyid do/ /de dag ni lus dang ngag dang yid kyang phul zhes bya bar 'brel to/ /de nas brgya byin dang tshangs pa la sogs pa mchog tu ngo mtshar du gyur nas bcom ldan 'das la yang dang yang du legs so zhes gsol bas bstod cing mchod de phyag 'tshal nas 'di skad ces gsol to//bcom ldan 'das gang gi slad du ma 'ongs pa'i byis pa so so'i skye bo rnams 'chang ba dang klog pa dang spro bar bgyi ba'i slad du de bzhin gshegs pa'i mtshan nas brjod pa'i yon tan bshad du gsol zhes pa ni phan yon yang dag par zhu ba ste/de nas brgya byin dang tshangs pa la sogs pa rnams rang rang gi de bzhin gshegs pa'i bka' yang dag par ngo mtshar ba'i gzhir gyur pas bden pa kho nar 'dzin pa la dus phyi ma'i sems can thams de bzhin gshegs pa'i bka' 'di la yang dag par 'jug la spro ba bskyed pa'i phyir ngan song thams cad yongs su sbyong ba'i rgyal po 'di 'chad pa dang /nyan pa dang /rnal 'byor du byed pa dang / snying po yongs su zlos pa'i mi de la phan yon dang 'bras bu ji lta bu 'byung ba yang dag par bshad du gsol zhes pa'o/ /bcom ldan 'das kyis bka' stsal pa/ brgya byin dang tshangs pa la sogs pa lha'i bu rnams ngas bshad kyis legs par nyon la yid la zung shig ces gsung ba ni/ngas de bzhin gshegs pa ngan song thams cad yongs su sbyong ba'i rgyal po'i phan yon dang 'bras bu bshad kyis yid gnyis the tshom mi za bar gyis la gzhan la yang dag par sgrogs shig ces par 'brel to//de ni sems can thams cad la dgongs te gsungs pa'o/ /lha'i bu rnams dge ba bcu dang ldan pa rnams kyi rna lam du thos par 'gyur gyis sems can ma rabs rnams kyi ni ma yin no/ /pha rol tu phyin pa bcu la mos pa'i sems can rnams kyi rna lam du 'gro bar 'gyur gyi sems can phal pa rnams kyi ni ma yin no//sems can bsam pa nges pa rnams dang phyir mi ldog pa'i yon tan mang po la mngon par 'dod pa rnams kyi rna lam du grag par 'gyur te/ mdor na rnam pa thams cad mkhyen pa'i ye shes la brten pa'i sems can rnams kyi rna lam du 'gro bar 'gyur zhing gzhan du ma yin no zhes gsungs pa ni 'dir snod khyad par can gyi phan yon gsungs pa ste/de la mdor na de bzhin gshegs pa'i sku mngon du mthong ba'i gang zag rgyu mthun pa'i las bsags pa'i ting nge 'dzin khyad par can dang ldan pa dbang po rnam par dag pa rnams kyis mthong bar 'gyur ba las sems can phal pa rnams kyis mi mthong ba bzhin du de de bzhin gshegs pa ngan song thams cad yongs su sbyong ba'i rgyal po 'di'ang rnam pa thams cad mkhyen pa'i ye shes skyed par byed pa'i yul yin la rnam pa thams cad mkhyen pa'i ye shes ni gong du gsungs pa'i gang zag khyad par can de rnams kyis 'thob par 'gyur ba las dmigs kyis bsal ba'i gang zag rnams kyis rnyed par mi 'gyur ba ni nges pa nyid do//de ci'i phyir zhe na mnyam pa la/ dper na me long rang bzhin gyis dag pas gzugs brnyan thams cad ston par byed pa zhig yin yang me long gi ngo mun pa la bstan nas rang gi ngo de la mngon du phyogs pa'i snang ba la bstan na bzhin gyi gzugs brnyan gsal bar 'gyur gyi me long gi ngo snang ba la bstan pas bdag gi ngo de la mngon du phyogs pa'i mun pa la bstan na bzhin gyi gzugs brnyan gsal bar mi 'gyur ba nyid do//de bzhin du 'dir yang rnam pa thams cad mkhyen pa'i ye shes ni gdod nas dri ma dang bral zhing 'od gsal bar chos kyi sku'i gzugs brnyan thams cad 'byin par byed pa yin yang pha rol tu phyin pa lnga la sogs pa'i bsod nams kyi tshogs kyis ni dri ma dag par byas te shes rab kyi pha rol tu phyin pa dang /ye shes rnam pa lnga la sogs pa ye shes kyi tshogs kyi snang ba la ni phyir chos kyi dbyings la mngon du phyogs pa rnams kyis rnam pa thams cad mkhyen pa'i ye shes mthong bar 'gyur gyi rang gi rgyud ni gti mug la sogs pa nyon mongs pa'i mun pa la bstan nas chos kyi dbyings rang bzhin gyis rnam par dag pa la mngon du phyogs par 'dod pas ni rnam pa thams cad mkhyen pa'i ye shes nam du yang gsal bar mi 'gyur ba kho na'o//de nas brgya byin dang tshangs pa la sogs pa lha'i bu de dag yang dag par dga' ba skyes nas 'di skad ces gsol to//bcom ldan 'das bdag cag ni snod du gyur pa'o/ /bde bar gshegs pa bdag cag ni snod du gyur pa ste/ gang gi slad du bdag cag gis de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba'i gzi brjid kyi rgyal po zhes bgyi ba'i mtshan brjod pa 'di/bcom ldan 'das kyi zhabs kyi pad+ma nyid nas thos pas bdag cag ni ngan song gis 'jigs par mi 'gyur/ dus ma lags pa'i 'chi bas 'jigs par mi 'gyur zhing 'chi ba dang ltung ba dang rnam par 'thor ba dang /rnam par 'jig pa la sogs pas 'jigs par mi 'gyur te/ bcom ldan 'das bdag cag ni gdon mi 'tshal bar sangs rgyas nyid du 'grub pa'i snod du gyur pa lags so zhes pa ni 'dir lha rnams rang nyid de bzhin gshegs pa'i bka' dga' ba dang bcas pa'i nga rgyal skyes pa'i tshig ste/de la de bzhin gshegs pa'i bka' yang dag par bden pa 'di snod kyi khyad par de lta bu dang ldan pas thos par 'gyur la sems can phal pa rnams kyis ma yin pa ni bdag cag lha la sogs pa 'di rnams ni nges par rnam pa thams cad mkhyen pa'i ye shes la brten pa yin par nges te de bas na snod du gyur pa'o zhes bya bar 'brel to//lan gnyis pa ni shin tu dga' ba dang bcas pa'i tshig go/ /gang gi slad du zhes pa ni lha'i bu nor bu dri ma med pa'i slad du bdag cag gis thos so zhes par 'brel to//de'i phyir na bde bar gshegs pa'i bka' byin gyi rlabs chen po dang ldan pa 'di bdag cag gi snying la gnas pas bdag cag la sogs pa'i 'khor 'dir 'dus pa rnams dus ma yin par 'chi ba la sogs pa'i 'jigs pa dang bral zhes nges par yang dag par rdzogs pa'i sangs rgyas su 'grub pa'i snod dang ldan par gyur to zhes bya bar sbyar ro//bcom ldan 'das brtag pa'i rgyal po 'dis sems can rnams kyi don bgyid pa gang lags pa'i skyes bu dam pa de dag gi 'bras bu cir 'gyur rnam par smin pa ji ltar 'gyur zhes pa ni yang gzhan gyi don phun sum tshogs pa'i 'bras bu dang phan yon yang dag par zhu ba ste/de yang ma 'ongs pa'i sems can rnams 'di la 'jug par spro ba bskyed pa'i phyir zhu bar shes par bya'o//bcom ldan 'das kyis bka' stsal pa/ lha'i dbang po de dag ni skyes bu dam pa 'ba' zhig tu ma zad kyi yang dag par rdzogs pa'i sangs rgyas nyid du blta bar bya ste/ de ci'i phyir zhe na/ lha'i dbang po gang gi phyir 'jig rten pha rol du song nas mtshams med pa la sogs pa'i sems can dmyal ba chen por skyes pa'i sems can rnams kyi sdug bsngal rnam pa sna tshogs pa rab tu zhi bar byed pa dang byang chub la gdon mi za bar brten pa dang /byang chub sems dpa'i sa la phyir mi ldog pa rab tu 'jog pa'i phyir te/ lha'i dbang po dper na khyod kyis lha'i bu nor bu dri ma med pa'i 'od ces bya ba mtshams med pa'i sems can dmyal ba chen por skyes pa'i don byas pa bzhin no zhes gsungs pa ni rigs pa dang bcas pas 'bras bu dang phan yon yang dag par ston pa ste/de la lha'i dbang po de dag ni skyes bu dam pa 'ba' zhig tu ma zad kyi yang dag par rdzogs pa'i sangs rgyas nyid du blta bar bya ste zhes pa la skyes bu dam pa ni 'jig rten pa rnams kyi mchog tu gyur pa yin la/'di ni skyes bu dam pa las kyang 'phags pa yang dag par rdzogs pa'i sangs rgyas nyid du blta bar bya ba nyid do//de ci'i phyir zhe na/ zhes pa ni las su bya ba 'bras bu'i gtan tshigs te/ gang gi phyir ni rgyu sdig pa chen po byas pa'i phyir ro/ /de mtshams med pa'i sems can dmyal ba la sogs pa'i sdug bsngal nyams su myong ba la des yang dag par zhi bar byas te/bla na med pa yang dag par rdzogs pa'i byang chub la sogs pa'i 'bras bu yang dag par 'byin par byed pa'i phyir te/ de yang 'dir sems can rnams kyi don byed pa'i mi de ni yang dag par rdzogs pa'i sangs rgyas yin te/ sems can gang dag dmyal ba la sogs pa'i sdug bsngal las bsgral te/ bde 'gro la sogs pa'i gnas su smin par byas pa'i phyir sangs rgyas nyid lta bu'o zhes pa ni chos mthun pa nyid can gyi sbyor bar yang dag par shes par bya'o/ /byang chub la gdon mi za bar brten pa dang zhes pa ni 'dir rgyu'i gtan tshigs su go bar bya ste/mi de nyid kyis 'gro ba'i don byas pa dang bla na med pa'i sems dang ldan pa'i phyir ro/ /byang chub sems dpa'i sa la phyir mi ldog pa 'jog pa'i phyir zhes pa yang rgyu'i gtan tshigs su go bar byas te/yongs su dag pa'i bya ba dang ldan pa'i phyir dper na 'phags pa rtag tu ngu lta bu'o/ /lha'i dbang po dper na khyod kyis nor bu dri ma med pa'i don byas pa bzhin no zhes pa ni skabs su bab pa dper blangs pa zhes bya ste/ las su bya ba mthun pa la dgongs nas gsungs pa nyid de/de yang dag par mtshungs par ldan pa'i mdo las/ cis kyang thabs rnams sna tshogs kyis/ /rnam par rtog dang mi nye zhing / /'gro rnams smin pa'i thabs ston pa/ /de la sangs rgyas zhes su brjod//ces gsungs pa'i phyir dang / yang shes rab kyi pha rol tu phyin pa brgyad stong pa las kyang / shA ri'i bus gsol pa/ bcom ldan 'das shes rab kyi pha rol tu phyin pa ni kun nas nyon mongs pa ni ma mchis pa'o/ /bcom ldan 'das kyis bka' stsal pa/shA ri'i bu rnam par dag pa'i phyir ro zhes pa la sogs pa gsungs te/ de bas na rgyu rnam par dag pa las 'bras bu rnam par dag pa skye ba la dgongs pa ste/ yang dag par rdzogs pa'i sangs rgyas nyid ces gsungs te yin pa kho na'o/ / lha'i dbang po de ltar gzhan yang ma 'ongs pa'i sems can rnams kyi don byed pa'i sems can de dag ci so so'i skye bo yin snyam pa'am/ gsol pa bcom ldan 'das ma lags so/ /bde bar gshegs pa ma lags so zhes pa ni 'dir so so'i skye bo'i rgyud dang mi ldan pa la dgongs te/de yang mi gang dag de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba'i rgyal po'i dkyil 'khor du zhugs shing rtag par rgyud gong du smos pa 'di ltar snang ba'i dngos po thams cad lha'i dkyil 'khor du gnas pa'i phyir dang rang nyid 'dod pa'i yon tan lnga la longs spyod kyang chags pa med par lha'i rnal 'byor dang ldan pa'i phyir dang /sems can ma lus pa la phan par byed pa'i sbyor ba dang ldan pa'i phyir na so so'i skye bo ma yin zhes par 'brel to//gsol pa bcom ldan 'das ma lags so/ /bde bar gshegs pa ma lags so zhes pa ni nges pa nyid du ma yin par bstan pa ste/ de yang shes rab kyi pha rol tu phyin pa brgyad stong pa las/ bcom ldan 'das kyis bka' stsal pa/ rab 'byor 'di lta ste/ skyes bu zhig mi rgod kyi gnas dgon pa'i nang du song ba la zas kyi bya ba byed kyang skrag pa'i 'du shes kyis 'di nas nam thar snyam pa'i zas kyi ro la mi chags pas za ba bzhin du phyir mi ldog pa'i byang chub sems dpas kyang 'dod pa'i yon tan la ma chags par yang dag par longs spyod do zhes gsungs pa'i phyir ro//lha'i dbang po de bas na sems can de dag ni skyes bu dam pa chen po gzhan la phan 'dogs pa ste/ de bzhin gshegs pa rnams kyis kyang phyag bya ba dang / mchod pa dang brjed pa dang bsti stang du bya ba dang phrag pa la bkur bar bya ba yin na/lha dang bcas pa'i 'jig rten gyis lta smos kyang ci dgos zhes gsungs pa ni 'dir gang zag de'i che ba yang dag par dbyung ba ste/ de la de bas na zhes pa ni gtan tshigs dang 'brel pa'o/ / sems can de dag ni zhes pa ni gang de dang ldan pa'i gang zag go/ /skyes bu ni mi la sogs pa'i 'gro ba'o/ /dam pa ni bla na med pa'i ye shes kyi rnal 'byor dang ldan pa'i phyir/ chen po ni bla na med pa'i sems rgya chen po dang ldan pa'i phyir te/ de bzhin gshegs pa rnams kyis phyag dang mchod pa dang bsti stang dang phrag pa la bkur ba la sogs pa mdzad pa nyid do//de ci ltar na phyag la sogs pa mdzad ce na/ 'di ltar de bzhin gshegs pa'i dgongs pa gang zag des bskangs pa'i phyir de bzhin gshegs pa rnams kyis phyag mdzad pa la sogs pa ni nges pa kho na ste/de dag ni shin tu khyad par du phyung bas gzhan dag gus par bya ba'i phyir gsungs pa'o/ /lha dang bcas pa'i 'jig rten gyis lta smos kyang ci dgos zhes pa ni shin tu'ang bya dgos par bstan par shes par bya'o//de nas brgya byin dang tshangs pa la sogs pa lha'i bu rnams dang / rgyal po chen po bzhi dang 'jig rten skyong ba brgyad dang gnod sbyin gyi sde dpon chen po nyi shu rtsa brgyad dang gnod sbyin chen po nor bu bzang po dang / nor bu bzang po chen po la sogs pa byang chub sems dpa' chen po'i sa la rab tu gnas pa rnams dang /klu'i rgyal po dga' bo dang bsnyen dga' bo dang 'phrog ma'i bu lnga brgyas bskor ba rnams dang / gnod sbyin chen po lnga rtsen dang lnga rtsen chen po la sogs pa dang / gzhan yang rgya che ba'i lha dang klu dang gnod sbyin dang srin po dang lha ma yin dang nam mkha' lding dang dri za dang mi'am ci dang /lto 'phye chen po dang 'byung po dang / yi dags dang 'dre dang / rims dang gza' dang dug dang skar ma la sogs pa thams cad kyis mgrin gcig tu 'di skad ces gsol to//bcom ldan 'das bdag cag 'dus shing tshogs pa thams cad kyis skyes bu chen po de'i rkang pa gnyis mgo bos blangs par bgyi zhing mdor na rtag par rgyun du dus thams cad du bsrung ba dang bskyab pa dang sba bar bgyi'o/ /bcom ldan 'das gang du brtag pa'i rgyal po 'di rigs kyi bu'am rigs kyi bu mos dad pas 'chang ngam klog gam gzhan la rgya cher yang dag par 'chad par 'gyur ram/gdugs dang rgyal mtshan dang ba dan la sogs pas mchod par 'gyur ram/ rgyal rigs sam bram ze'i rigs sam rje'u'i rigs sam/gzhan yang rgyal po'am rgyal po'i bu'am/ rgyal po'i bu mo'am rgyal po'i btsun mo'am rgyal po'i 'khor pho'am rgyal po'i 'khor mo'am/ gang su dag rung bas 'chang zhing klog pa nas gzhan la rgya cher yang dag par 'chad pa'i bar du bgyid na/ bcom ldan 'das bdag cag 'dir 'dus shing tshogs pa thams cad de'i bran du gyur pa lags so/ /gzhan yang mi de'i rang gi skye bo dang gnyen gyi skye bo dang grong dang grong khyer dang / grong rdal dang ljongs dang rgyal po'i pho brang 'khor rnams su'ang bskyang bar bgyi'o//dus dus su char dbab par bgyi'o/ /'bru la sogs pa bskyed par bgyi'o/ /skye bo mang po la phan pa dang bde ba'i slad du rjes su bsgrub par bgyi'o/ /pha rol gyi dmag gzhom par bgyi'o/ /sems can ma rungs pa gnod cing 'tshe ba po rnams kyis mi de la mi phan pa'i sems bskyed pa gang lags pa de dag brlag par bgyi ba'i slad du bsgrub par bgyi'o//ma rungs par bgyi'o/ /de la bdud kyi las kyang bgyi'o/ /gnod par yang bgyi'o/ /bcom ldan 'das mdor na ma 'ongs pa'i sems can rnams la brtag pa'i rgyal po 'di ni sangs rgyas kyi mdzad pa lta bur gnas pa lags pas bdag cag gi bu bzhin du bskyang bar bgyi'o zhes pa la sogs pa ni bla na med pa'i chos la lha dang bcas pa'i 'jig rten 'khor du 'dus pa rnams de dag thams cad kyis bsnyen bkur dang bsrung bar bya bar khas yang dag par blangs pa ste/de ji lta ba bzhin du byed cing yongs su bsrung ba kho na yin pas na go sla ba'i phyir ma bshad do/ /de yang rkang pa gnyis spyi bos blang bar bgyi'o zhes pa dang / bran du gyur pa lags so zhes pa ni bsnyen bkur bya ba'i tha tshig go//bsrung ba dang bskyab par bgyi'o zhes pa dang / bu bzhin du bskyang bar bgyi'o zhes pa rnams ni bsrung bar bya ba'i tha tshig go/ /dus dus su char dbab par bgyi'o zhes pa nas bde ba'i slad du rjes su bsgrub par bgyi'o zhes pa'i bar ni/ 'byor pa ster ba'i tshig go/ /de la 'tshe ba'i sems can ma rungs par bgyi'o zhes pa la sogs pa ni las su bya ba'i tshig go/ /bcom ldan 'das mdor na ma 'ongs pa'i sems can rnams la brtag pa'i rgyal po 'di ni sangs rgyas kyi mdzad pa lta bur gnas pa lags pas zhes pa ni 'di ltar ma 'ongs pa'i sems can ni da ltar gyi sems can te/de dag la sangs rgyas kyi mdzad pa dang 'dra bar ro/ /ji ltar 'dra zhe na/ yang dag par rdzogs pa'i sangs rgyas kyis kyang 'gro ba sems can sgrol bar mdzad pa cig tu zad la brtag pa'i rgyal po 'dis kyang yongs su bsgrubs na 'gro ba sems can rnams grol bar nges te/bde bas na sangs rgyas kyi mdzad pa dang 'dra bar sbyor ro/ /de yang da ltar gyi sems can rnams la ni yang dag par rdzogs pa'i sangs rgyas kyis chos bstan kyang sgrib pa rnam pa gsum gyis bsgribs pas thos par mi 'gyur la/brtag pa'i rgyal po 'dis ni da ltar nyid du 'bras bu mngon sum du 'byin pa'i phyir yang dag par rdzogs pa'i sangs rgyas pas kyang lhag par shes par bya'o/ /lha'i dbang po khyod kyis ji ltar smras pa de bzhin te brtag pa'i rgyal po 'di ni de bzhin du blta bar bya'o//lha'i dbang po legs kyis 'dzam bu gling du gnas pa'i sems can sdig pa'i chos la kun du spyod pa sems can dmyal ba'i dbang du gyur pa 'khor ba'i mi gtsang ba'i 'dam du bying ba'i sems can rnams la phan pa dang bde bar bya ba'i phyir yun ring por bag yod par gyis la sgrubs shig ces gsungs pa ni 'dir bcom ldan 'das kyis lha la sogs pa la ched cher gdams pa'i bka' ste/de la lha'i dbang po khyod kyis ji ltar smras pa de bzhin te/brtag pa'i rgyal po 'di ni de bzhin du blta bar bya'o zhes pa ni/ de kho na bzhin no/ /yang dag par rdzogs pa'i sangs rgyas dang 'dra ba kho nas the tshom mi bya'o zhes pa'i don no/ /lha'i dbang po legs kyis zhes pa ni rjes su yi rang ba gsungs pa ste/de bzhin du gyis shig ces gsungs pa'i don no/ /'dzam bu'i gling du gnas pa zhes pa ni gtsor gzung ba ste/ dper na yul gang na sman gyi sbyor ba byed pa de nyid ni nad pa dang 'chi ba la sogs pa mang bar 'gyur te/ de ci'i phyir zhe na snyam pa la sman gyi sbyor ba log par sbyar ba dang /sman gyi sbyar ba gzhung bzhin du ma byas pa las byung ba ste/ de bzhin du 'dir yang bcom ldan 'das kyis sems can thams cad kyi don du gsungs kyang dam pa'i chos ni lho'i 'dzam bu'i gling na phal cher spyod pa'i phyir de nyid bde bar gshegs pa'i bka' ji lta ba bzhin du ma spyad cing bka' log par spyod pa las de nyid na sems can dmyal ba'i dbang du gyur pa 'am sdig pa'i chos kun du spyod pa mang bas na/'dzam bu'i gling du gnas pa zhes gsungs pa'o/ /'khor ba'i mi gtsang ba'i 'dam du bying ba ni rnam pa gsum ste/'das pa dang da ltar dang ma 'ongs pa'o/ /de dag 'khor ba'i 'dam du bying ba de la ye shes kyi lcags kyu chen pos drang ba'i phyir yun ring por bag yod par gyis la sgrubs shig ces te/ de la de nyid lha'i dbang po 'ba' zhig tu ma zad kyi ma 'ongs pa'i sems can gang dag 'khor ba'i rgya mtsho las brgal nas thar pa'i grong khyer chen por 'gro bar 'dod pa thams cad la yang dag par gdams pa'o//de la yun ring por zhes pa ni skyo ba med par gyis la zhes pa'i don to/ /bag yod par zhes pa ni de bzhin gshegs pa'i bka' yang dag pa ji lta ba bzhin du gyis la sdom pa rnam pa gsum dang ma bral zhing nyon mongs pa'i mtshon gyis ma rmas par sgrubs shig ces bya ba shes par bya ste/de dag gis ni de bzhin gshegs pa ngan song thams cad yongs su sbyong ba'i rgyal po rgyud phyi ma zhes bya ba'i bshad pa gnyis pa rdzogs so// //de nas bcom ldan 'das byang chub sems dpa' sems dpa' chen po phyag na rdo rjes bcom ldan 'das kyi thugs brtag pa zhes bya ba'i brtag pa'i rgyal po phyi ma 'di bshad do zhes pa ni 'di ltar bcom ldan 'das shAkya thub pa'i dbu'i gtsug tor nas/bcom ldan 'das dpal phyag na rdo rje sku mdog nam mkha' dngas pa ltar snang ba bzhin khros shing 'bar ba phyag g.yas pa na gser gyi rdo rje rtse dgu pa bsnams pa g.yon pa skyabs mdzad kyi phyag rgya can rgyan thams cad kyis brgyan pa cig phyung ngo //de'i dbu'i gtsug tor nas lha rgyan thams cad kyis brgyan pa bdun phyung nas bcom ldan 'das kyi gdan gyi mdun rol du bzhugs te/ bzhugs nas cung zad cig na yang gdan las bzhengs nas bshad pa'i rgyud 'di gsungs par shes par bya'o//de la gang dag 'di skad du/ /de ltar gang gi sgo nas shes par 'gyur zhe na/ de ni 'di ltar brtag pa dang po'i phyi ma 'brug sgra chen po'i brtag pa las/ 'di yi skad cig de nyid la/ /sku ni sum brtseg sku yi thabs//'gro ba'i don la rab sbyar nas/ /dpa' bo stobs chen mngon par sprul/ /zhes gsungs pa'i phyir ro/ /yang de la bde bar gshegs pa rnam par snang mdzad kho nas rgyud 'di mi gsung bar ston pa rnam pa gsum gyis bshad pa'i dgongs pa ni ji lta bu zhig yin snyam pa la/'di ltar gong du smos pa'i tshig /'di ltar sku ni rnam gsum ste/ /'gro don las dang dam tshig dang / /ye shes bdag po nyid kyis ni/ /shAkya thub pa thugs kyis sprul/ /zhes gsungs te/de bas na 'di ltar 'gro ba rnams kyi rgyud la thabs ji lta bus 'dul bar snang bas mngon par rdzogs par sangs rgyas par bya ba bstan pa nyid de/ de la 'gro ba sems can rnams kyi rgyud la ni sku rnam pa gsum gyi mtshan nyid yang dag par shes pa'am/ de la yang dag par bslabs pa las yang dag par rdzogs pa'i sangs rgyas thob par 'gyur ba ste/de la bcom ldan 'das rnam par snang mdzad ni ye shes kyi sku'i ngo bor yang dag par bstan pa'o/ /bcom ldan 'das shAkya thub pa ni dam tshig gi sku'i ngo bor yang dag par bstan pa'o//bcom ldan 'das phyag na rdo rje ni las kyi sku'i ngo bor yang dag par bstan pa'o/ /de la ye shes kyi sku ni 'gro ba sems can rnams kyi rnam par rtog pa dang bral zhing chos kyi dbyings las yang dag par byung ba thog ma dang tha ma med pa nas yongs su grub pa'i sku'i rang bzhin gyis 'od gsal ba'i bdag nyid la byed pa de'o//dam tshig gi sku ni bla na med pa byang chub kyi sems las yang dag par byung ba mngon par brtson pa'i bdag nyid ye shes rnam pa lngas mngon par byang chub pas 'gro ba sems can thams cad kyi don phun sum tshogs pa byed pa'i bdag nyid la byed pa de'o//las kyi sku ni rten cing 'brel par 'byung ba bcu gnyis las yang dag par byung ba sdug bsngal gyi rgyud yang dag par gcod cing 'dod pa'i yon tan lngas mngon par dga' ba la chags pa med par kun du spyod pa de'o/ /da dag rtag par rgyun du chu bo chen po'i rgyun lta bur 'brel pa dang bcas pa las 'gro ba rnams yongs su grol bar 'gyur ba de nyid de/de'i phyir bsgrub par bya ba'i phyir chos rgyud gcig la ston pa rnam pa gsum gyis bshad de de ni thabs la dgongs pa zhes bya'o/ /de nyid dam tshig gi phyag rgya dang las kyi phyag rgya dang /chos kyi phyag rgya dang / phyag rgya chen po 'ang yin la/ sprul pa dang longs spyod dang chos kyi skur yang shes par byas te/ de ni 'bras bu la dgongs pa zhes bya'o/ /yang 'dir bde bar gshegs pa rnam pa gsum ni 'gro ba'i rgyud rnam pa gsum la dgongs nas bshad pa ste/de la gti mug chen po'i sems can rnams gdul ba'i phyir bcom ldan 'das rnam par snang mdzad kyis bshad pa dang 'dod chags chen po'i sems can rnams 'dul ba'i phyir ni bcom ldan 'das shAkya thub pas gsungs pa dang /zhe sdang chen po'i sems can rnams 'dul ba'i phyir ni bcom ldan 'das phyag na rdo rjes gsungs pa ste/ de dag ni zhing la dgongs pa zhes bya'o/ /de nyid dbang po rab dang 'bring dang rtul po'i sems can rnams la dgongs nas ston pa rnam pa gsum gyis rgyud rnam pa gsum gsungs pa ni dbang po la dgongs pa zhes bya'o//dpa' bo gdan las bzhengs nas ni/ /dgyes pa'i rdo rje gsor nas kyang / /shAkya'i dbang po dgyes mdzad pa/ /thub pa'i gtso la phyag 'tshal nas/ /sgrib pa thams cad rnam par dag pa'i rdo rje zhes bya ba'i ting nge 'dzin la snyoms par zhugs nas ngan song thams cad yongs su sbyong ba'i snying po 'di rang gi thugs ka nas phyung ngo zhes gsungs pa 'di ni 'dir dag pa 'bras bu don gyi sgrub pa yongs su gsungs pa ste/de la/ dpa' bo gdan las bzhengs nas ni//zhes pa ni bcom ldan 'das phyag na rdo rje de skad cig de nyid la gdan las yongs su bzhengs pa ste/ de yang bcom ldan 'das rnam par snang mdzad nyid kyis der yongs su sprul par shes par bya'o/ /dgyes shing rdo rje gsor nas kyang / / zhes pa ni 'di ltar sems can thams cad kyi ngan song gi rgyud mtha' dag gcod pa ste/ de yang sngon gyi byang chub kyi sems las yang dag par byang zhing byang chub tu zhugs pa'i gnas skabs na bsngo ba yongs su dag pa'i stobs las byung ba'o/ / shAkya'i bdag po dgyes mdzad pa'i/ /thub pa'i gtso la phyag 'tshal nas/ /zhes pa ni don dam par bde bar gshegs pa'i sku yang gcig ste/ bcom ldan 'das shAkya thub pa dang / bcom ldan 'das phyag na rdo rje dbyer med pa yin yang 'gro ba 'dul ba'i tshul dang sbyar nas gtso bo dang 'khor gyi tshul gyis gus pa yongs su phul ba ste/nyid la nyid do/ /de ci'i phyir zhe na snyam pa la/ 'di ltar dper na sgyu ma mkhan gyi mkhan pos bud med dang skyes pa dang glang po che la sogs pa'i gzugs byas nas/ skye bo rnams kyi mdun du smra ba dang 'gro ba dang 'chag pa la sogs pa byed kyang de nyid gcig smra ba'i gnas skabs tsam na gcig mi smra la/gcig 'gro ba'i gnas skabs tsam na gcig mi 'gro bas de dag thams cad gzugs tha dad pa'i tshul du gnas kyang 'gro ba dang smra ba la sogs pa thams cad ni sgyu ma mkhan gyi mkhan po kho na'o//de bzhin du 'dir yang de bzhin gshegs pa gcig gsungs pa'i gnas skabs tsam na/ de bzhin gshegs pa gcig mi gsungs pa'i phyir de bzhin gshegs pa shAkya thub pa/ bcom ldan 'das rnam par snang mdzad la/bcom ldan 'das phyag na rdo rje yang bcom ldan 'das rnam par snang mdzad yin par shes par bya ste/ de yang sangs rgyas phal po che las/ bzang po dpal gyis 'jam dpal la smras pa/ chos kyi rgyal po'i chos nyid ni//'jam dpal rtag tu gcig pa ste/ /sgrib pa med pas gzigs pa'o/ /'byung ba de yang gcig pu yi/ /sangs rgyas thams cad sku gcig ste/ /de bzhin gshegs pa'i chos kyi sku/ /shes rab thabs kyang gcig pa ste/ /mi 'jigs stobs kyang de bzhin no//sngon chad byang chub bzhugs pa'i tshe/ /ji ltar yongs su bsngo mdzad pa/ /'khor du chos rnams ston pa dang / /de bzhin zhing yang de bzhin 'gyur/ /zhes gsungs pa'i phyir ro/ /sgrib pa thams cad rnam par dag pa'i rdo rje zhes bya ba'i ting nge 'dzin la snyoms par zhugs nas zhes pa ni 'di ltar sems can thams cad kyi sgrib pa yongs su dag par mdzad pa'i thugs rgya chen po bskyed nas/mi rtog pa'i ngang la rtse gcig pa la sgrib pa thams cad rnam par dag pa'i rdo rje zhes bya ba'i ting nge 'dzin to//snyoms pa ni mnyam pa ste/ sems can du dmigs pa lnga mi mnga' ba'o /zhugs pa ni smon lam gyi stobs las yongs su grub pas dam pa'i chos yang dag par gsungs pa'o/ /ngan song thams cad rnam par sbyong ba'i rang gi snying po 'di nyid kyi thugs ka nas phyung ngo zhes pa ni 'di ltar rang ni nyid de/de bzhin gshegs pa thams cad do/ /snying po ni ye shes de de las byung ba'i gzhi yang dag par gsungs pa'o/ /nyid ni rang ste chos kyi dbyings so/ /ngan song rnam par sbyong ba zhes pa ni khyad par du sbyong ba ste/ bla na med pa'i 'bras bu 'byin par byed pa'i phyir ro//oM badzra sarba pA paM ha na da ha badzra hUM phaT/ oM hrIHsarba a pA ya bi sho d+ha na badzra hUM phaT/ oM hUM sarba karma A wa ra Ni me ba shiM ku ru hUM phaT/ oM b+h+rUM ba ni sha ya A ba ra Na ni hUM phaT/ oM druM bi shod+d+ha ya A ba ra ni hUM phaT/ oM tra dz+wa la dz+wa la d+ha ka d+ha ka ha na ha na A ba ra Na ni hUM phaT/ oM sruM sA ra sA ra pra sa ra pra sa ra sarba/ A ba ra Na ni hUM phaT/ oM hUM ha ra ha ra sarba A ba ra Na ni hUM phaT/ oM phaT phaT sarba A ba ra Na ni bi s+pho Ta ya hUM phaT/ oM b+h+ri ta b+h+ri ta sarba A ba ra Na ni hUM phaT/ oM tra tha tra tha sarba A ba ra Na ni hUM phaT/oM tshin+da tshin+da sarba A wa ra Na ni hUM phaT/ oM tsa la tsa la sarba A ba ra Na ni hUM phaT/ oM da ha da ha sarba nA ra ka ga ti he tun hUM phaT/ oM pa tsa pa tsa rba pre ta ga te he tun hUM phaT/ oM ma tha ma tha sarba tir+ya ka ga te te tun hUM phaT/ de nas mchod pa'i yo byad rnams kyi sngags bshad do/ /oM sarba a pA ya bi shwa d+ha ni d+ha ma d+ha ma d+hU pa ya hUM phaT/ oM sarba durga ti pa ri shod+ha ni puSh+pa bi lo ki ni hUM phaT/ oM sarba a pA ya bi sho d+ha ni dz+nyAn A lo ka kA ri hUM phaT/ oM sarba a pA ya gan+d+ha nA bi nA sha na u pa ya gan+d+he hUM phaT/sgo ba rnams kyi sngags la/ oM sarba na ra ka A kar ni hUM phaT/ oM sarba na ka u ta d+ha ra ni hUM phaT/ oM sarba a pA ya ban+d+ha na mo tsa ni hUM phaT/ o sarba a pA ya g+haN+Da bi sho d+ha ni hUM phaT/ ces pa la sogs pa'i sngags ni 'di ltar/ dang po ni bde bar gshegs pa'i snying po ste/sdig pa thams cad 'joms shing sreg par byed pa'i don to/ /gnyis pa ni bcom ldan 'das phyag na rdo rje'i snying po ste/ ngan song thams cad rnam par sbyong ba'o/ /gsum pa ni rgyal ba'i gtsug tor gyi snying po ste/ las kyi sgrib pa thams cad dbang du byed pa'o/ /bzhi pa ni gtsug tor 'khor los sgyur ba'i snying po ste/ sgrib pa thams cad 'jig par byed pa'o/ /lnga pa ni rnam par rgyal ba'i snying po ste sgrib pa thams cad rnam par sbyong ba'o/ /drug pa ni gzi brjid phung po ste sgrib pa thams cad tsha zhing rab tu 'bar bar 'joms par byed pa'o//bdun pa ni gdugs dkar po'i snying po ste sgrib pa thams cad 'jig cing rab tu 'jig par byed pa'o/ /brgyad pa ni rnam par 'thor ba'i snying po ste sgrib pa thams cad 'phrog cing 'phrog par byed pa'o//dgu pa ni rnam par 'joms pa'i snying po ste sgrib pa thams cad gsheg cing 'joms par byed pa'o/ /bcu pa ni sgeg mo'i snying po ste sgrib pa thams cad 'thor bar byed pa'o/ /bcu gcig pa ni phreng ba ma'i snying po snye sgrib pa thams cad grol bar byed pa'o//bcu gnyis pa ni glu mkhan ma'i snying po ste sgrib pa thams cad skrag par byed pa'o/ /bcu gsum pa ni gar mkhan ma'i snying po ste sgrib pa thams cad g.yo zhing gzhan du skyod par byed pa'o/ /bcu bzhi pa ni bde bar gshegs pa'i tshogs kyi snying po ste/ de dag gis dmyal ba'i 'gro ba thams cad kyi rgyu sreg cing sreg par byed pa'o/ /bco lnga pa ni yi dags kyi 'gro ba thams cad kyi rgyu 'jil zhing 'jil bar byed pa'o/ /bcu drug pa ni dud 'gro'i 'gro ba thams cad kyi rgyu gdon cing gnon par byed pa'o/ /bcu bdun pa ni bdug pa ma'i snying po ste ngan song thams cad 'chu zhing rnam par sbyong bar byed pa'o//bco brgyad pa ni me tog ma'i snying po ste/ ngan song thams cad rnam par sbyong zhing rnam par gzigs pa'o/ /bcu dgu pa ni snang ba ma'i snying po ste/ ngan song thams cad phug nas ye shes kyi snang bas gsal bar byed pa'o//nyi shu pa ni dri chab ma'i snying po ste/ ngan song thams cad kyi dri nga ba thams cad bsal bas chos kyi dri dang ldan par byed pa'o/ /rtsa gcig pa ni lcags kyu ma'i snying po ste/ sems can dmyal bar song ba rnams dgug par byed pa'o//rtsa gnyis pa ni zhags pa ma'i snying po ste/ dmyal bar 'gyur ba thams cad 'dzin par byed pa'o/ /rtsa gsum pa ni lcags sgrog ma'i snying po ste/ ngan song thams cad 'ching zhing sdom par byed pa'o/ /rtsa bzhi pa ni dril bu ma'i snying po ste/ ngan song thams cad kyi tshang tshing sel cing skrod par byed pa ste/de dag thams cad kyi sngags 'bru rnams ni gnyis pa dang / bco lnga pa dang bcu gcig pa dang bcu gnyis pa dang / bcu drug pa dang brgyad pa dang / bdun pa dang / bcu pa rnams ni lha bskyed pa'i sa bon du rig par bya ste/tshig gsum po 'di ni ma gtogs so/ /de nas dkyil 'khor bshad bya ste/ /'khor lo 'dra ba'i dkyil 'khor la/ /shin tu mdzes pa rtsibs brgyad can/ /lte bar bcas shing mu khyud ldan/ /nang gi rim par bris nas ni/ /lte ba'i nang du shAkya yi//bdag po thub pa gzhag par bya/ /phyag na rdo rje stobs chen ni/ /dpa' bo de yi spyan sngar bri/ /rgyab tu 'khor los sgyur ba ste/ /g.yas phyogs rgyal ba'i gtsug tor la/ /g.yon par rnam par rgyal ba bri/ /gzi brjid phung po me yi phyogs//dbang ldan phyogs su gdugs dkar mo/ /rnam par 'thor ba rlung gi phyogs/ /rnam par 'joms pa bden bral du/ /bris nas phyi rol bri bya ste/ /gru bzhi pa la sgo bzhi pa/ /seng ge rta babs brtan par bya/ /dpa' bo lcags kyu zhags pa dang //lcags sgrog dril bu snyan rnams gzhag /grwa yi phyogs ni thams cad du/ /bdug pa la sogs bri bar bya/ /zhes gsungs pa ni 'dir de dag gi dkyil 'khor yang dag par gsungs pa ste/ de la/ 'khor lo 'dra ba'i dkyil 'khor la//zhes pa ni 'di ltar rang yid du 'ong ba'i gnas rnams su/ sa byin gyis brlabs pa la sogs pa gong du bstan pa ltar byas la stegs bu tha ma'i tshad du brtsigs te/ 'khor lo rtsibs brgyad pa ser po lte ba dang mu khyud du ldan pa bri'o/ /de'i dbus su pad+ma 'dab ma brgyad pa'i steng du bcom ldan 'das shAkya thub pa sku mdog gser btso ma lta bu lan bza' ngur smrig gsol pa mnyam pa nyid kyi phyag rgya dang ldan pa bri'o//de'i shar phyogs kyi rtsibs su bcom ldan 'das phyag na rdo rje sku mdog sngon po la phyag g.yas pa na rdo rje bsnams pa/g.yon pa sa gnod kyi phyag rgya dang ldan pa bri'o/ /lho phyogs su ni rgyal ba'i gtsug tor sku mdog ser po phyag g.yas pa mchog sbyin pa la/ g.yon pa ni rin po che 'bar ba bsnams pa bri'o/ /nub tu gtsug tor 'khor los sgyur ba sku mdog dmar po phyag g.yas pa chos 'chad kyi phyag rgya can la/g.yon pa ni pad+ma'i steng na 'khor lo bsnams pa bri'o/ /byang phyogs su gtsug tor rnam par rgyal ba sku mdog ljang gu la phyag g.yas pa mi 'jigs pa sbyin pa la/ g.yon pa sna tshogs rdo rje bsnams pa bri'o//shar lhor gtsug tor gzi brjid phung po sku mdog sngo skya la phyag g.yas pa na nyi ma'i 'khor lo 'od dang bcas pa 'dzin pa/ g.yon pa na ut+pal yu ba dang bcas pa bsnams pa bri'o/ /lho nub tu gtsug tor rnam par 'joms pa sku mdog sngo skya la phyag g.yas pa na seng ge'i rgyal mtshan bsnams pa/g.yon pa ut+pal dang lcags kyu bsnams pa bri'o/ /nub byang du gtsug tor rnam par 'thor ba sku mdog dmar ser la phyag g.yas pa na ral gri 'bar ba bsnams pa g.yon pas ku mu ta dang ldan pa bri'o//byang shar du gtsug tor gdugs dkar po can sku mdog dkar ser la phyag g.yas pa na gdugs dkar po bsnams pa/ g.yon du u dum wA ra bsnams pa bri'o/ /de'i 'khor lo'i zur bzhir ni sgeg mo dang phreng ba dang glu mkhan ma dang /gar mkhan ma dang bdug pa ma dang / me tog ma dang snang gsal ma dang dri chab ma rnams rang rang gi phyag rgya dang ldan par bri bar bya'o/ /rta babs kyi khyams su byams pa la sogs pa rang gi kha dog dang phyag mtshan gyis mtshan pa bri'o/ /sgo bzhir ni lcags kyu la sogs pa'i sgo ba bzhi bri'o//mtha' ma'i phreng ba gsum gyi phyi rol du ni brgya byin la sogs pa phyogs skyong ba brgyad bri'o/ /de'i phyi rol du ni dmyal ba la sogs pa ngan 'gro rnam pa gsum gyi dkyil 'khor bri bar bya ba nyid do/ /gru bzhi pa la sgo bzhi pa/ seng ge'i rta babs brtan par bya/ /zhes pa ni 'di ltar sgo bzhi'i phyi rol du glang po'i steng du seng ge dang ldan pa'i rta babs yang dag par bya ba dang mchod pa'i snam bu dang rin chen pha gu dang dra ba dra phyed la sogs pa'i rgyan ni shugs kyis go bar bya'o/ /de nas dri zhim dri la sogs//rang gi lus ni bskus nas kyang / /rdo rje 'dzin mas zhugs nas ni/ /oM dzaHhUM baM hoHe h+ye hi b+ha ga bAn ma hA kA ru Ni ka dr-i sh+yahoHsa ma ya s+t+waM zhes brjod do/ /lha rnams thams cad spyan drang ngo zhes gsungs pa ni 'dir slob ma dbang bskur ba gsungs pa ste/de la bdag nyid sems can thams cad kyi don du sems bskyed la ga pur dang 'o ma la sogs pas rang gi lus khrus legs par byas te/ rgyan cha lnga la sogs pas legs par brgyan nas gong du bstan pa'i rdo rje 'dzin ma'i sku dang phyag rgya bcings te/ me tog gi phreng ba thogs la lcags kyu la sogs pa'i rnal 'byor dang phyag rgyas dgug pa dang gzhug pa dang bcing ba dang dgyes pa sngags dang sbyar ba nyid do//de la sngags kyi don ni kye bcom ldan 'das thugs rje chen po dang ldan pa rnams dam tshig gsum la dgongs te gshegs su gsol zhes pa ste/de nas byon pa dang zhabs bsil ba la sogs pa drang ba dang bdag nyid dbang nod pa la sogs pa'i cho ga zhib mo ni gong du ma bstan pa dang ting nge 'dzin gsum ni dkyil 'khor gyi cho gar blta bar bya'o/ /de nas gshegs par mos pa bskyed de/mchod pa byas nas de bzhin du bcug ste dbang bskur na ngan song thams cad las rnam par grol te/ bde 'gro mtho ris kyi 'jig rten dang / gong nas gong du sa rnams su'ang skye bar 'gyur ro/ /dngos grub thams cad kyang 'grub par 'gyur ro//sangs rgyas rnams su yang gdon mi za bar 'grub par 'gyur ro/ /snga ma bzhin du las thams cad kyang byed cing thams cad la thogs pa med par 'gyur ro/ /bya ba byas pas rims thams cad dang gdon dang dug la sogs pa las kyang thar bar 'gyur ro/ / phyag na rdo rje hUM zhes bya bas las thams cad byed par 'gyur ro/ /brtag pa gzhan gyi cho gas kyang 'grub par 'gyur ro zhes gsungs pa ni 'dir dbang bskur ba la sogs pa bya bar gsungs te/ de la de bzhin du bcug ste dbang bskur nas zhes pa'i tshig gis ni gong ma la bsnyegs pa ste/dbang bskur ba'i rim pa dang / rdzas la sogs pa gong du bshad pa ltar bya bar gsungs shing 'dir ni rgyas par ma bshad do/ /de la dbang bskur ba'i 'bras bu ni sdig pa can gyi gang zag rnams ngan song thams cad las thar ba dang lha la sogs pa'i bde 'gror skye ba dang de'i rkyen gyis dam pa'i chos spyad pa las byang chub sems dpa'i sa rnams gnon par 'gyur ba dang /'jig rten dang 'jig rten las 'das pa'i dngos grub thams cad thob par 'gyur ba dang / yang dag par rdzogs pa'i sangs rgyas nyid du nges par 'gyur ba la sogs par 'brel to//phyag na rdo rje hUM zhes bya bas las thams cad byed par 'gyur ro zhes pa ni 'dir rnam pa gsum ste rgyu dang lam dang 'bras bu'o/ /de la rgyu ni rnam par shes pa ste/ de las yang dag par byung zhing rang nyid lha'i sku phyag rgya chen por bskyed la/rtag par dus thams cad du mnyam par gzhag pa'i sbyor bas hUM zhes bya bas las thams cad byas nas 'jig rten 'dir rims dang dug dang gdon la sogs pas mi 'jigs shing bla na med pa'i 'bras bu yang dag par bskyed pa kho na'o//de bas na rnam par shes pa hUM yin pa'i phyir bde bar gshegs pas kyang rang gi sa bon las 'od zer spros te zhes sems can thams cad la dgongs pa'o/ /lam nyid de yin la 'bras bu ni rtags lnga'i ngo bos chos kyi sku ye shes rnam pa lnga'i bdag nyid hUM ste//des 'gro ba sems can thams cad kyi don mdzad pa nyid do/ /brtag pa gzhan gyi zhes pa ni rgyud phyi ma'i brtag pa ste/ de yis kyang de bzhin du 'bras bu yongs su smin par byed ces pa'i don to/ /lha dang klu dang gnod sbyin dang srin po la sogs pa'i ngan song gi rgyud kyi dbang du gyur pa rnams kyi shi ba'i ro'am gzugs brnyan nam ming la sogs pa bris te/bzlas pa dang sbyin sreg dang dbang rnams snga ma bzhin du byas na ngan song thams cad las yongs su grol bar byed do zhes gsungs pa ni snga ma bzhin gzhan don byed pa la brtson pa'i rnal 'byor pas mngon par shes pa lnga dang ldan pa'am/de dag 'dus pa'i lha la sogs pa nyid kyis sngar rtsa ba'i dkyil 'khor chen por ji ltar bstan pa'i lhar dbang bskur ba la sogs pa byas na ngan song las yongs su thar bar 'gyur ba kho na'o//de la gang dag 'di skad du/ /de lta yin na/ sngar du gsungs pas gcig pus chog med kyi bde bar gshegs pa ni yang yang gsung pa ni rigs pa ma yin no snyam pa la/ de ni 'di ltar bcom ldan 'das de bzhin gshegs pa dgra bcom pa yang dag par rdzogs pa'i sangs rgyas phyag na rdo rje gtsug tor dgu'i dkyil 'khor 'di gsungs pa la dgos ched rnam pa gsum yod de/de la gcig ni gong du gsungs pa'i dkyil 'khor chen po ni rgyas pa la dga' ba'i gang zag rnams kyi don du gsungs pa 'di ni bsdus pa la dga' ba'i gang zag rnams kyi don du gsungs pa dang /yang 'di ni dag pa don gyi sgrub pa zhes bya ste gong du gsungs pa'i rtsa ba'i dkyil 'khor chen po ni nyon mongs pa dang las kyi sgrib pa thams cad yun ring por dbang dang bzlas pa dang rnal 'byor dang gtor ma dang sbyin sreg dang mchod pa la sogs pas sdig pa rnams yang dag par sbyangs te/rnam par dag pa las shes bya'i sgrib pa sbyang zhing dngos grub la nye bar bya ba'i phyir gsungs so/ /yang 'di ni de bzhin gshegs pa'i dbu'i gtsug tor rab tu brtag pa zhes bya ste/de la de bzhin gshegs pa'i gtsug tor lta bu'i gnas rnal 'byor pa'i sgo rnam pa dgu byin gyis brlab pa'i phyir gsungs par shes par bya'o/ /de nas byang chub sems dpa' sems dpa' chen po phyag na rdo rje seng ge'i lta stangs kyis bcom ldan 'das kyi zhal du bltas te phyag btsal nas 'di skad ces gsol to//bcom ldan 'das bdag gis phyag rgya dam pa'i mtshan nyid bshad par bya'o/ /thugs rjes bskul ba'i thugs mnga' ba'i/ /rgyal ba kun gyis byin gyis rlobs//zhes gsungs pa ni 'di ltar phyag rgya yongs su gsungs pa ste/ de la seng ge'i lta stangs zhes pa ni 'di ltar dper na gcan gzan gyi rgyal po seng ge ni bag tsha ba'i bsam pa thams cad dang bral bas phyogs gzhan na ri dgas la sogs pa la nga rgyal chen po dang bcas pa'i mig gyen du bzlog ste/rgyas par bgrad pa'i lta bas ri dgas la sogs pa thams cad skrag par byed pa bzhin du 'dir yang bcom ldan 'das phyag na rdo rjes rnam par rtog pa thams cad dang ni bral/ gnyis su med pa'i ye shes chen po'i rtsal ni rdzogs/sangs rgyas kyi yon tan thams cad kyis ni brgyan pas nyon mongs pa dang ngan song thams cad skrag par byed pa'i spyan gyis bcom ldan 'das la yongs su gzigs pa'o/ /phyag btsal ba ni lus la sogs pas phyag btsal ba ste/ phyag rgya dam pa'i mtshan nyid bshad par bya'o zhes par 'brel to//de la gang dag 'di skad du bde bar gshegs pa nyid dang dbyer med na ci'i phyir phyag 'tshal zhe na/ de ni 'di ltar ma 'ongs pa'i sems can thams cad yang dag pa'i dge ba'i bshes gnyen la ma brten par bla na med pa'i byang chub thob par mi 'gyur bas na/dge ba'i bshes gnyen la tshul 'di lta bus gus par bya ba'i phyir ngo bo gcig kyang gtso bo dang 'khor gyi tshul gyis gus par phyag 'tshal ba'o/ /thugs rjes bskul ba'i thugs mnga' ba'i/ /rgyal ba rnams kyis byin gyis brlabs//zhes pa ni rnam pa gnyis te/ phyogs bcu dus gsum gyi bde bar gshegs pa thams cad la gsol ba 'debs pa dang / bcom ldan 'das shAkya thub pa la gsol ba 'debs pa'o/ /de la bde bar gshegs pa rnams ni 'gro ba sems can gyi don la thugs rje chen pos thugs bskul ba ste/de dag thams cad kyis phyag rgya dam pa 'di dag gis 'gro ba sems can ngan 'gro las grol bar 'gyur bar byin gyis rlobs shig pa'o/ /de yang byin gyi rlob mkhan gyi sangs rgyas ni gzhan na med kyang 'gro ba'i don la sbyar nas byin gyi rlabs chen po dang ldan par go ba bskyed par shes par bya ste/de la phyag rgya ni rtags so/ /rtags kyi 'bras bu ni rtags te/ dper na me dang du ba lta bu'o/ /de nyid sku'i khyad par gyi mchod pa yin pa'i phyir 'dir phyag rgya bshad pa kho na'o//mnyam par gzhag pas dpral bar ni/ /phyag 'tshal ba yi thal mo sbyar/ /sangs rgyas bde gshegs thams cad kyi/ /phyag 'tshal ba yi phyag rgyar bshad/ /ces pa ni gang du las su bya ba'i skabs su bab pa dang /bde bar gshegs pa'i rigs thams cad la ting nge 'dzin gyis mnyam par gzhag la sor mo rnams rtse snyams te thal mo sbyar nas dpral ba'i steng du gzung bar phyag bya ba ste/ de ni de bzhin gshegs pa'i rigs kyi phyag 'tshal ba'i phyag rgya zhes bya'o//rnal 'byor rigs pas mgrin phyogs su/ thal mo snyim par sbyar ba ni/ /rtag tu pad+ma'i rigs nyid kyi/ /pad+ma'i phyag rgya yin par bshad/ /rdo rje thal mo sbyar byas nas/ /snying gar gung mo mtha' sbyar nas//rdo rje rigs kyi phyag rgya 'di/ /dam tshig thams cad 'dzin byed pa'o/ /zhes gsungs pa ni 'dir sku gsung thugs kyi dam tshig yongs su 'dzin pa'i phyag rgya ste/ de la gong du bstan pas ni sku'i dam tshig yongs su 'dzin pa ste/ dkyil 'khor du 'dug pa'i gong du bya ba'o//gnyis pa ni thal mo pad+ma kha 'bu ba ltar sbyar nas lkog ma'i 'og tu gzung ba ste/ de ni gsung gi dam tshig yongs su 'dzin pas sngags la sogs pa brjod pa'i skabs su shes par bya'o/ /gsum pa ni rdo rje bsdams pa las gung mo gnyis lto sbyar te/rdo rje rtse gcig pa lta bur bya/ gzhan rnams sor mo bsnol te bsdams la snying gar gzung ba ste/ de ni thugs kyi dam tshig yongs su 'dzin pas na rnal 'byor pas gsang sngags dang rig sngags thams cad ni sku gsung thugs kyi de kho na nyid du grub pa'o//lag pa g.yon pa'i thal mo gan rkyal du pang du gzhag la/ de'i steng du g.yas pa gzhag ste mthe bong gi rtse mo gnyis sprad la zhi ba'i lta stangs kyis lta ba 'di ni de bzhin gshegs pa'i rigs kyi ting nge 'dzin gyi phyag rgya ste/ dam tshig yin par bshad do zhes pa ni go sla ste lha la sogs pa'i mnyam par gzhag pa'i rnal 'byor byed pa'i skabs su shes par bya'o//de nyid las bzlog ste steng 'og bsnol ba mthe bong dang mthe'u chung gnyis gcig la gcig lu gu rgyud kyi tshul du bsnol la snying gar gzhag pa 'di ni rdo rje rigs kyi dam tshig gi phyag rgya'o zhes pa ni lag pa gnyis lto sbyar ba g.yas pa'i mthe bong g.yon pa'i srin lag dang mthe'u chung gi bar du gzhug /g.yon pa'i mthe bong g.yas pa'i srin lag dang mthe chung gi bar du bcug la snying gar gzung ba ste de ni bsgrub pa yongs su brtsam pa'i skabs su shes par bya'o//thal mo rdzogs par byas pa las mthe bong dang mthe'u chung gnyis bsnyams la lhag ma rnams brkyang ba 'di ni pad+ma'i rigs kyi dam tshig gi phyag rgya'o zhes pa ni thal mo sbyar ba las mthe bong gnyis dang mthe'u chung gnyis te bzhi rtse sprad la bsnyams pas dkyil du pad+ma'i snying po ltar bya lhag ma rnams pad+ma'i 'dab ma ltar brkyang ste lkog ma'i 'og tu gzung bar bya ste/de ni dam pa'i chos sgrogs pa'i skabs su shes par bya'o/ /de la gang dag 'di skad du ci'i phyir dam tshig ces bya zhe na/de ni 'di ltar bde bar gshegs pa rnams kyis dang por mngon par rdzogs par sangs rgyas pa'i gnas skabs na sems can thams cad kyi lus dang ngag dang yid rnam par dag pa las mngon par rdzogs par 'tshang rgya bar mdzad pa'i dam bca' ba'i dam tshig gi phyag rgya chen po mdzad de/de la sems can rnams kyi lus dang ngag dang yid rnam par dag par byed pa ni/ bde bar gshegs pa rnams kyis gang du dad pa las byung ba'i sa bon la de ji bzhin pa'i dam tshig gi cho gas bskyed pa'i phyir dam tshig gi phyag rgya zhes bya ste/rdo rje bsdams pa las gung mo gnyis rdo rje 'dra bar bsnyams la mthe bong dang mthe chung gnyis brkyang ba 'di ni phyag na rdo rje'i phyag rgya'o zhes pa ni gung mo gnyis lto sbyar la bsgreng ste mthe bo dang mthe chung gnyis so sor brkyang nas lnga ru byas pa ste/de ni 'jig rten pa'i dkyil 'khor mchod pa'i skabs su shes par bya'o/ /de nyid las mthe bong dang mthe'u chung gnyis de bzhin du byas la mdzub mo gnyis dang srin lag gnyis pad+mo 'dra bar bkug pa ni ngan song thams cad yongs su sbyong ba'i rgyal po'i phyag rgya'o//de nyid las zhes pa ni thams cad du rdo rje bsdams pa las zhes par sbyar ro/ /mthe bong dang mthe'u chung ni phyag na rdo rje ltar byas la gung mo'ang de bzhin du byas te/ mdzub mo dang srin lag gnyis rtse sprad la pad+ma'i 'dab ma ltar bya ba ste/de ni de bzhin gshegs pa'i rtsa ba'i sngags bzlas pa'i skabs su shes par bya'o/ /de nyid las mdzub mo dang srin lag gnyis rin po che 'dra bar byas pa ni dbang bskur ba'i phyag rgya'o zhes pa ni gung mo dang mthe'u chung dag ni snga ma ltar byas la mdzub mo dang srin lag rtse sprad de tshigs bar ma bcag pa ste/de ni sarba bid kyi dbang bskur ba'i skabs su shes par bya'o/ /mthe'u chung dang mthe bo so sor bsnyams la lhag ma rnams brkyang ba ni sdig pa thams cad sreg par byed pa'i phyag rgya'o zhes pa ni mthe bo dang mthe chung bzhi so sor lto sbyar la gzhan ma rnams phan tshun du bsnol nas 'od zer 'dra ba ltar bya ba ste/de ni ngan song rnam pa gsum gyi sngags bzlas pa'i skabs su shes par bya'o/ /lag pa g.yon pas de bzhin du bsgyur zhing bya ba ni las thams cad pa'i phyag rgya'o zhes pa ni lag pa g.yon pa'i mthe bong dang mthe'u chung gnyis lto sbyar la sor mo gsum brkyang ste/g.yas nas g.yon du bsgyur zhing bya ba ste/ de ni mchod pa la sogs pa'i mtshams thams cad du bya zhing g.yas pas 'ju bar bya'o//snyim pa gzed la gyen du 'thor ba'i bdug pa ma'i phyag rgya'o/ /de nas 'og nas gyen du 'thor ba ni me tog gi phyag rgya'o/ /de nyid las mthe bong gnyis gyen du bsnyams nas mdun na 'dzin pa ni mar me'i phyag rgya'o/ /de nyid las dung 'dra bar byas pa ni dri'i phyag rgya'o zhes pa ni 'di ltar mthe bo dang mthe'u chung gnyis bsnyams la lhag ma rnams rtse sprad tsam du bzung nas spos khang gi tshul du byas pa'o//de nyid las sor mo rnams brkyang ba 'og nas gyen du me tog 'thor ba'i tshul du byas pa ste/de ni me tog gi dam tshig gi phyag rgya'o/ /rdo rje khu tshur bsdams pa las mthe bong gnyis bsgreng ba ste/ mdun na 'dzin pa ni mar me'i'o/ /dung 'dra bar shes pa ni lag pa gnyis srin lag dang mthe'u chung bzhi bsnol la bskams te gung mo gnyis lto sbyar la brkyang nas mthe bong gnyis brkyang ba'i rtse mo la mdzub mo gnyis bkug pa'i rtse mo sprad de/de dag ni yongs su 'brel pa'i dam tshig go/ /de nyid las rab tu brkyang ste 'dzin pa ni gtor ma'i phyag rgya'o/ de nyid las gung mo gnyis nang du bkug pa ni/ / ar+g+ha'i phyag rgya'o zhes pa ni sor mo rnams so sor sbyar nas bar phye ste brkyang pa ni gtor ma gtong ba'i skabs su shes par bya'o/ /de nas mdzub mo dang srin lag dang mthe'u chung rnams ngos sbyar la rtse sprad de/ mthe bong gnyis mdzub mo'i tshigs bar ma la brten nas gung mo gnyis mthe bong gi ngal mo gnyis la bkug ste sbyar ba ste de ni ar+g+ha dbul ba'i skabs su shes par bya'o//rdo rje bcings pa las gung mo gnyis bsnyams te/ tshigs bcag pa la sor mo gzhan brkyang ba ni rnam par 'thor ba'i phyag rgya'o//de nyid las mthe bong dang mthe'u chung gnyis bkug pa ni rnam par 'joms pa'i phyag rgya'o/ /de nyid las 'od zer 'bar ba ni gzi brjid phung po'i phyag rgya'o/ /de nyid las spyi bor bskor ba ni gdugs dkar po'i phyag rgya'o/ /rdo rje khu tshur gnyis las mdzub mo gnyis dang mthe'u chung gnyis bsnol te mdud pa gyen du bskor ba ni 'khor los sgyur ba'i phyag rgya'o//rdo rje bsdams pa las gung mo gnyis rdo rjer byas la/ mdzub mo gnyis rin po che ltar byas te lhag ma rnams 'od zer 'dra bar byas pa ni rgyal ba gtsug tor gyi phyag rgya'o//de bzhin du mdzub mo gnyis rdo rje byas la sor mo lhag ma rnams bsdams pas rdo rje 'dra bar byas pa ni rnam par rgyal ba'i phyag rgya'o/ /g.yas pa mchog sbyin du byas la/ g.yon pa mi 'jigs pa sbyin pa ni de bzhin gshegs pa'i phyag rgya yin no zhes pa la sogs pa la/de la dang po rdo rje bsdams pa las gung mo gnyis rtse sprad la tshigs bar ma bcag ste/ lag pa gnyis kyi mthil sbyar la lhag ma rnams so sor brkyang ba'o/ /gnyis pa ne mthe bong gis mthe'u chung mnan te/nang du bcug la gung mo snga ma bas rgya che bar byas la mdzub mo dang srin lag gnyis de la brten te lto sbyar ba'o/ /gsum pa ni mthe bong dang mthe'u chung gnyis so sor bsnol la nang du bcug ste/ sor mo drug phan tshun bsnol ba brkyang ba'o//bzhi pa ni mthe bong dang mthe'u chung so sor rtse sprad la brkyang ste/ sor mo drug phan tshun du bsnol bas brkyang la lag pa kha sbub ste spyi bo'i steng du bskor bar bya'o/ /lnga pa ni lag pa gnyis rgyab sprad la mdzub mo dang mthe'u chung so sor mdud te/lhag ma rnams kyang de bzhin du rtse mo bsnol la mthe bong gnyis lag pa g.yas pa'i mthil du rtse sprad pas gyen du bskor bar bya'o/ /drug pa ni gung mo gnyis lto sbyar la bsgreng ste rdo rje rtse gcig pa'i tshul du byas nas mdzub mo gnyis rtse sprad la tshigs par ma bcag la rin po che'i tshul du byas te/lhag ma rnams bsnol te brkyang ba'o/ /bdun pa ni sor mo rnams bsnol te bsdams nas gung mo gnyis lto sbyar nas bsgreng ba ste/ brgyad pa ni go sla bas ma bshad do/ /rdo rje bsdams pa las mdzub mo gnyis brkyang ste/rdo rje 'dra bar byas pa ni rdo rje'i phyag rgya'o/ /de nyid las mdzub mo g.yas pa bkug pa ni lcags kyu'i'o/ /de nyid las me tog 'dra bar byas pa ni mda'i phyag rgya'o/ /de nyid las slar bkug ste mthe bong gi rtse mo gnyis rtse sprad pa ni/blo gros legs pa'i 'o/ /de nyid las tshigs bar ma bcag pa ni rin po che'i'o/ /de nyid las sor mo rnams 'od zer 'dra bar byas pa de gzi brjid kyi'o/ /de nyid las spyi bor gzhag pa ni me tog gi'o/ /de nyid las mdun du gzhag pa ni bzhad pa'i 'o//de nyid las pad+ma 'dra bar byas pa ni pad+ma'i 'o/ /de nyid las rtse mo yid tsam bkug pa ni ral gri'i 'o/ /de nyid las gdugs 'dra bar byas pa ni 'khor lo'i 'o/ /de nyid las pad+ma'i 'dab ma 'dra bar byas pa ni lce'i 'o/ /de nyid las rtse mo yid tsam bskyed pa ni rgya gram gyi'o//de nyid las shin tu bskyed pa ni bsrung ba'i 'o/ /de nyid las rtse mo gnyis slar bkug pa ni gnod sbyin gyi'o/ /de nyid las dam du bkug pa ni bsdams pa'i 'o zhes pa la sogs pa la/ de la dang po ni sor mo rnams bsnol te dam par bsdams pa las mdzub mo gnyis lto sbyar te bsgreng ba'o//gnyis pa ni thams cad bsdams pa las mdzub mo g.yas pa phyung ste bkug pa'o/ /gsum pa ni gong ma'i tshul las mdzub mo gnyis rtse sprad de tshigs gnyis yid tsam rgu ba'o//bzhi pa ni mthe bong gnyis gshibs te brkyang la mdzub mo gnyis kyi sen mo dang tshigs dang po sprad la mthe bong gi rtse mo nas mnan nas gru bzhi pa'i tshul du byas ba'o/ /lnga pa ni rdo rje bsdams pa las gung mo gnyis kyi tshigs bar ma bcag pa'o/ /drug pa ni sor mo rnams phan tshun du bsnol nas brkyang ba'o//bdun pa ni sor mo rnams bsdams pa las gung mo gnyis ka rtse sprad de tshigs gnyis yid tsam rgur bar byas nas spyi bor gzhag pa'o/ /brgyad pa ni gung mo gnyis bsgreng nas bkyed de kha'i thad kar gzhag go//dgu pa ni srin lag gnyis rtse sprad la tshigs dang po dang bar ma gnyis rgur bar byas te brtan por gzung ba'o/ /bcu pa ni srin lag rtse sprad la tshigs dang po bcag pa lto sbyar ba'o/ /bcu gcig pa ni mthe bong gnyis rtse sprad nas steng du brkyang la g.yon pa bkug pa de mdzub mo gnyis rtse sprad nas zlum por byas pa'o//bcu gnyis pa ni srin lag gi rtse mo gnyis rtse sprad nas tshigs gnyis yid tsam rgu bar byas pa'o/ /bcu gsum pa ni gung mo gnyis lto sbyar te bsgreng la mdzub mo gnyis sna tshogs rdo rje'i tshul du sna bkyed la gzung bar byas pa'o//bcu bzhi pa ni gung mo gnyis rtse sprad pa bsgreng ste mthe bo gnyis rtse sprad la bsgreng nas shin tu bskyed pa'o/ /bco lnga pa ni mdzub mo gnyis rtse mo rgu bar byas la mthe bong gshibs pa'o/ / bcu drug pa ni mthe bong dang mthe chung gnyis nang du bcug la lhag ma rnams phan tshun du bsnol te dam du bsdams pa'o/ /khu tshur las mthe bong bsgreng ba ni sgeg mo'i 'o/ /de nyid las bskyed pa ni phreng ba ma'i 'o/ /de nyid las sor mo rnams brkyang ba ni glu mkhan ma'i 'o/ /de nyid las bskor nas bskyod pa ni gar mkhan ma'i 'o//bsdams pa de nyid mdun du gzhug la mdzub mo bsgreng ba ni bdug pa ma'i 'o/ /de nyid gyen du bskyed pa ni me tog ma'i 'o/ /mdun du mthe bong gnyis bsgreng nas bskor ba ni mar me ma'i 'o/ /byug pa ltar byas pa ni dri chab ma'i 'o//de nyid las mdzub mo gnyis bkug pa ni lcags kyu'o/ /de nyid las rtse mo gnyis sprad pa ni zhags pa'i 'o/ /de nyid la gcig tu mdud pa ni lcags sgrog go/ /de nyid las bskyod pa ni mnyes pa'i 'o zhes pa la sogs pa ni de la dang po ni rdo rje bsdams pa las mthe bong gnyis bsnyams te bsgreng ba'o//gnyis pa ni de nyid las mthe bong gnyis phyir bskyed pa'o/ /gsum pa ni lag pa gnyis kyi sor mo rnams bsnol te brkyang nas brtan por gzung ba'o/ /bzhi pa ni de las yang nas yang du bskyod pa'o//lnga pa ni sor mo rnams bsdams pa las g.yas pa'i mdzub mo bsgreng nas spos kyi reng bu'i tshul du byas pa'o/ /drug pa ni de nyid las bskyed la me tog 'thor ba'i tshul du byas pa'o/ /bdun pa ni sor mo rnams bsdams pa las g.yon pa'i mthe bong dang mdzub mo gnyis rtse sprad de kong bu'i tshul du byas nas g.yas pa'i mthe bong mar me'i sdong bu'i tshul du byas pa de'i dkyil nas de'i steng du dang por bsgreng ba'o//brgyad pa ni de nyid las brkyang ba ni thugs kar dri 'byung ba'i tshul du byas pa'o//dgu pa ni mdzub mo gnyis bkug pa'o/ /bcu pa ni de nyid las g.yon pa'i mthe bong dang mdzub mo gnyis rtse sprad pa'o/ /bcu gcig pa ni de nyid las g.yas pa'i mthe bong dang mdzub mo sbyar ba'o/ /bcu gnyis pa ni mdzub mo gnyis kyi sen mo rtse sprad de bkug nas mthe bong gnyis nang du bkug ste yang nas yang du bskyod pa ste/de dag ni dam tshig gi phyag rgya zhes bya'o/ /'dir ni bcom ldan 'das kyis thugs las sku gsung gi las mtshon pa'i phyir dam tshig gi phyag rgya 'ba' zhig tu gsungs la/ las ni gar las byung ba dang / chos dang phyag rgya chen po ni gzhan du bstan pa las shes par bya'o/ /sku gzugs kyi cho ga yang 'dir de bzhin du shes par bya ste/ cung zad du na bcom ldan 'das 'jig rten gsum las rnam par rgyal ba'i gzugs bri'o/ /yang na sku gzugs ni dkyil 'khor gyi tshul du bris la me tog la sogs pas mchod de de'i spyan sngar 'bum tsam zhig sngar bsnyen pa byas nas las thams cad bya'o zhes gsungs pa ni 'di ltar ras bal gsar pa la ga bur la sogs pas btab nas sngags nyi shu rtsa gcig pos lan grangs brgya rtsa brgyad du btab ste/tha ma bsnyen gnas la gnas pas ras zheng du khru phyed dang gnyis pa chur khru do pa btags nas ri mo mkhan bsnyen gnas la gnas par byas la mchod pa'i tshogs kyis mchod cing bri bar bya ba ni de bzhin du zhes pa ste/de la de bzhin du zhes pa ni sngar gsungs pa'i lha de bzhin du zhes pa'i don to/ /de ni 'di ltar lugs gsum du bshad do/ /de la lugs gcig ni bcom ldan 'das shAkya thub pa gong du gsungs pa'i cha lugs kyis dbus su bris la/ de'i g.yas phyogs su bcom ldan 'das phyag na rdo rje bri'o//g.yon phyogs su ni rgyal ba'i gtsug tor bri'o/ /de'i 'og tu dbus su ni 'khor los sgyur ba bri'o/ /g.yas phyogs su ni rnam par rgyal ba bri'o/ /g.yon phyogs su ni gzi brjid phung po bri'o/ /de'i 'og tu dbus su ni gdugs dkar po can bri'o//g.yas phyogs su rnam par 'thor ba bri'o/ /g.yon phyogs su rnam par 'joms pa bri'o/ /de'i steng gi mtha' logs gnyis su bdug pa ma dang me tog ma bri'o/ /'og gi mtha' logs su ni snang ba ma dang dri chab ma bri'o/lha de dag thams cad kyang rang rang gi phyag mtshan dang sku mdog dang ldan pa bri'o/ /de'i 'og tu chu bo dang bya dang nya dang sbal pa dang me tog dang shing la sogs pa bri'o/ /de'i 'og tu me tog dang spos dang mar me dang /dri dang zhal zas dang rnga ma dang me tog gi phreng ba dang bum pa dang me long la sogs pa bri'o/ /de'i mtha' logs su sgrub pa po thal mo sbyar nas steng phyogs su mig lta ba bri bar bya'o/ /yang na cung zad du ni bcom ldan 'das khams gsum rnam par rgyal ba'i gzugs bri bar gsungs pa ni 'di ltar snga ma lta bu'i ras la bcom ldan 'das khams gsum rnam par rgyal ba'i sngar mos pa'i cha lugs dang kha dog la sogs pa ji lta ba bzhin du bris la de'i dbu'i gtsug tor nas pad+ma 'dab ma drug pa cig sdong po dang bcas par bri'o//de'i 'dab ma drug la gtsug tor drug bkod la steng gi snying po la ni gcig bris te mchod pa'i yo byad la sogs pa ni snga ma ji lta ba bzhin du bri bar bya'o/ /yang na sku gzugs ni sngar gsungs pa'i dkyil 'khor ji lta ba bzhin du dkyil 'khor gyi tshul du bri bar gsungs pas de bzhin du bri bar bya'o//de nas bdag nyid kyis rab tu gnas pa dang spyan dbye ba'i cho ga rim pa ji lta ba bzhin du byas la dkyil 'khor gyi lha la mchod pa'i tshogs rgya chen pos yang dag par mchod par bya'o//de nas yar gyi ngo'i tshes gcig nas zug nas zla ba nya'i bar du'am/ des kyang ma thon na gnam stong gi bar du 'am des kyang ma thon na yang nya'i bar du bde bar gshegs pa rnams kyi snying po dgu pa re re la 'bum 'bum du tshang bar gnas dben par bzlas shing mchod pa la sogs pa'ang snga ma bzhin du yang dag par bya ba nyid do//de nas dkyil 'khor gyi stegs bu'i rtsibs la dri'i thig le bkod de mchod pa'i tshogs kyis mchod cing stong du bzlas par bya'o/ /de nas rang nyid rim pa ji lta ba bzhin du mngon par byang chub pa lngas lha'i dkyil 'khor du bskyed la/bde ba chen po'i mchod pas yang dag par mchod cing rdo rje lu gu rgyud kyi sngags bzlas par bya'o/ /de nas rtags la sogs pa mthong ba dang / dkyil 'khor snga ma bzhin du bsams la mchod pa rgya chen po byas te zla ba nya'i nub mo srod kyi cha dang po nas gzung ste skya rengs shar gyi bar du bde bar gshegs pa'i snying po yongs su bzlas par bya'o//de nas dngos grub la sogs pa byung ba dang rnam par rtog pa med pa'i sems kyis bsrung ba la sogs pa byas la bdag gi bla ma dang dkon mchog gsum la skal ba bcad la rang nyid kyi chags pa med pa'i bsam pas yang dag par longs spyad par bya ba kho na ste/de ni dag pa don gyi sgrub pa zhes bya'o/ /de nas mnyam par gzhag pa'i rnal 'byor ni 'di lta ste/snying gar tsa las bskyed pa yi/ /zur brgyad pa la shing rta'i dbyibs/ /gser gyi mdog ldan 'od dang bcas/ /yid kyi mun pa sel mdzad gter/ /sgo dgu nas ni rnam par rgyu/ /lus can rnams ni gang la yang / /hUM zhes bya ba rdo rje 'dzin//rtag par dbang po'i phyogs su gnas/ /de ni hUM du rab bsgyur nas/ /snying po la ni rab tu gnas/ /yang ni hUM gi bdag nyid can/ /mdun phyogs su ni rab tu bzhugs/ /swa zhes bya ba g.yas phyogs te/ /hri zhes bya ba rgyab tu gzhag/ /a zhes bya ba g.yon phyogs gnas//b+h+rUM zhes bya ba de gnyis par/ /kruM zhes bya ba bzhag nas ni/ /hUM dang tra gnyis grogs dang bcas/ /sku yi bdag nyid lus kun la/ /ye shes chen po yongs su khyab/ /ye shes lnga yi bdag nyid las/ /longs spyod rdzogs pa'i cha lugs can//'jig rten 'di dang gzhan dag go/ /'dod pa'i yon tan mngon dga' bas/ /mchod pa'i tshogs ni ma lus gsol/ /sdig bshags la sogs bde gshegs ni/ /nyid la nyid ni rnam par brtson/ / lus kyi bde mchog bla na med/ /dam pa'i chos ni ma lus gsungs/ /'gro don brtson pas bzhes nas ni/ /sgo dgu nas ni rang byung nas/ /sa dgu ru ni yang dag gshegs/ /sems can zhing ni sdug bsngal ba/ /las dang dam tshig chos phyag rgya/ /phyag rgya chen pos dag mdzad de//til gyi gong bu bzhin du ni/ /sku la yongs su rdzogs mdzad nas/ /dang po'i lam nas yongs zhugs te/ /gzhal yas khang du brtan par bzhugs/ /mchod pa'i tshogs ni rab bgyis te/ /kun du 'od ni rnam par gsal/ /rim pa'i rjes la gshegs nas ni//sku gsung thugs ni mngon par bsdus/ /shes rab pha rol phyin zhes pa/ /rnam par rtog bral chos kyi sku/ /dri med 'od gsal ston ka yi/ /zla 'dra bas ni yongs su gang / /sprin dang chu bo'i rgyun lta bur/ /lha yi sku ni bsgom par bya//des ni sdig pa'i tshogs rnams ni/ /zla ba mar gyi ngo bzhin bri/ /shes rab ye shes yon tan tshogs/ /zla ba yar gyi ngo ltar 'phel/ /de nas mnyam las langs pa dang / /gnas rnam dgu ru lha yi ni/ /skus ni byin gyis brlab byas nas//mi 'jigs seng ge bzhin du spyod/ /de ltar rtag tu rab bsgoms na/ /'tshang rgya ba la the tshom med/ /ces 'brug sgra chen po'i brtag pa las gsungs pas na/ de bzhin gshegs pa yang dag par bsgom par bya ste/ /de dag ni sgo dgu byin gyis brlabs pa zhes bya'o//de nas brgya byin la sogs pa lha'i tshogs rnams kyis bcom ldan 'das phyag na rdo rje la 'di skad ces gsol to/ /bcom ldan 'das las kyi rnam par smin pa gang gis lha'i bu nor bu dri ma med pa'i 'od ces bgyi ba de dmyal ba la sogs pa'i sdug bsngal gyi dbang du gyur lags pa bcom ldan 'das bstan du gsol/bde bar gshegs pa bstan du gsol zhes pa ni/ 'di ltar skabs 'dir lha'i dbang po la sogs pas lha'i bu nor bu dri ma med pa'i sdug bsngal gyi rgyu 'dri ba ste/ de yang rtsa ba'i rgyud du ni lha'i bu sems can dmyal ba'i gnas su song ba'i gleng bslang ngo //rgyud phyi mar ni sdug bsngal nas bton nas bde ba'i lam la bkod do/ /'di ni de dag gi bshad pa'i rgyud yin pa'i phyir de'i phyag rgya dang sngags dang snying po dang sa bon dang las kyi rnam par smin pa la sogs pa 'chad pa'i skabs yin pa'i phyir lha'i dbang po la sogs pa skabs 'di kho nar zhus par shes par bya'o//de nas bcom ldan 'das phyag na rdo rjes bcom ldan 'das shAkya thub pa'i byin gyi rlabs kyis 'di skad ces bka' stsal to zhes pa ni gus pa yang dag par bskyed pa'i tshig ste/de la byin gyi rlabs ni 'dir sgra'i dbyings kyis dang po nas gnas pa zhes bya ba ste/ de ni rnam pa gsum ste/ nus pa'i byin gyi rlabs dang las su bya ba'i byin gyi rlabs dang rang gi ngo bo byin gyi rlabs so//de la nus pa byin gyi rlabs ni/ /rgyal po la sogs pa'i drin no/ /las su bya ba byin gyi rlabs ni rkyen glo bur pas bskyed pa ste/ de dag lta bu'i byin gyi rlabs ni 'di ma yin zhing 'di ni rang gi ngo bo'i byin gyi rlabs zhes bya ste/ dbyer med pa las yongs su byung ba yin zhing dam pa'i chos la gus pa bskyed pa'i phyir/bcom ldan 'das shAkya thub pa'i byin gyi rlabs kyis zhes bya bar 'grel to/ /lha'i dbang po nyon cig /'di ni sngon gyi sgrib pa las yang dag par gyur pa yin te/ 'di ltar 'dzam bu gling 'di nyid ni sngon mtha' 'khob tu gtogs pa'i rgyal po zla ba'i tog ces bya ba'i bu lus mi sdug pa zhes bya ba zhig yod do/ /de mi shes pa'i dbang gis mi dge ba'i bshes gnyen la brten pas rgyal srid 'dod pa'i phyir rang gi pha 'tsho ba dang phral bar gyur pa dang pha mya ngan gyis gzir bas de'i ma'ang dus las 'das so//lan cig ji zhig gi rkyen gyis nags tshal sdug pa gzhan zhig tu rtse zhing dga' ba'i phyir nye bar 'ong ba dang / de na yang drang srong dogs pa med pa zhes bya ba zhig gnas te/de mthong ba dang rgyal po shin tu ngo mtshar skyes nas kye ma seng ge dang stag dang ri dgas dang phag rgod dang ba lang dang ma he la sogs pa dang sbrul dang sre mo dang sbrang bu dang sbrang bu mchu ring dang sbrul gdug pa rnams kyis 'tshe ba dang bza' ba dang btung ba dang bgo ba dang longs spyod rnams dang rnam par bral ba rlung dang grang bas yongs su gdungs shing 'tshe ba 'di ni bdag nyid chen po 'di gnas so snyam par sems cing rnam par brtags nas/de'i drung du nye bar song ste phyin pa dang / de la 'di skad ces smras so/ /drang srong chen po ci'i phyir rlung dang tsha ba la sogs pa'i sdug bsngal gyis bdag nyid la gnod par byed drang srong gis smras pa/skyes bu chen po bskal pa brgya phrag du mar nyon mongs pa'i sdug bsngal myong bar gyur pas sdug bsngal gyi khur cung zad tsam cig blangs na bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ba 'di ni sdug bsngal ma yin gyi sangs rgyas dang chos dang dge 'dun yongs su mi shes pas skad cig tsam mam yud tsam zhig gi yul gyi bde ba rjes su myong bar 'dod pa'i phyir pha ma la sogs pa'ang gsod par 'dod par 'gyur na/srog chags gzhan lta ci smos te/ de dag la sogs pa'i sdig pa'i las byas pa las bskal pa brgya stong phrag du ma mthar thug pa med par dmyal ba la sogs pa'i sdug bsngal mi bzad pa chen po rjes su myong bar 'gyur ba ni shin tu sdug bsngal ba'o zhes smras so//de nas drang srong gis smras pa'i tshig de thos pa dang shin tu 'jigs skrag skyo ste sdug bsngal thams cad kyis gzir nas 'di skad ces smras so/ /dka' thub chen po sangs rgyas dang chos dang dge 'dun zhes bya ba de ci zhig de'i rang bzhin ni ji lta bu zhig yin pa smros shig dang /de la kho bo skyabs su mchi'o/ /yang pha ma la gtses pa dang srog chags rnams kyis srog bcad na sdig pa'i 'bras bu ji lta bu zhig thob par 'gyur sangs rgyas dang chos dang dge 'dun yongs su shes pa ni bsod nams ji lta bu zhig thob/pha ma bsad pa dang srog chags rnams bsad pa na/ rnam par smin pa'i 'bras bu ci 'dra ba zhig thob/ 'dod pa'i longs spyod spangs na bsod nams dang 'bras bu ci 'dra ba zhig thob pa bdag la smros shig smras pa dang /de nas drang srong chen po des 'di skad ces smras so/ /ci ste sems can chen po khyod/ /nga yi tshig 'di nyan 'dod na/ /thal mo sbyar te phyag 'tshal la/ /gus par nyon dang bshad par bya/ /de bzhin bgyi zhes bskul ba ni//ci yod pas ni mchod byas nas/ /sangs rgyas spyod yul sangs rgyas kyi/ /zab mo'i chos ni nyan par 'gyur/ /sangs rgyas chos dang tshogs dag pa/ /thos nas kyang ni skyabs su song / /sangs rgyas rnams kyi sgrib med chos/ /rgyal pos thos na dga' bar 'gyur//yi dags byol song dmyal ba rnams/ /sdig pa kun gyi 'bras bu ste/ /der gnas pa dang glad 'gems dang / /gsod cing shin tu mi bzad pa/ /pha ma gtses pa'i rgyu las byung / /bskal pa du mar rab sdug bsngal/ /dmyal ba'i sdug bsngal mi bzad pa//mgon med skyabs kyang med pa ste/ /thos nas mya ngan zug rngu yis/ /rang gi yid la gcags gyur nas/ /ji ltar rlung gis mar me bzhin/ /de nyid du ni dus las 'das/ /las kyi rnam smin de yis ni/ /dga' dang ldan pa'i lhar skyes nas//brgya byin lha yi dbang po yis/ /blon po gzugs dang ldan pa la/ /lha rnams kun dang yid mthun zhing / /rab dga' bde dang ldan par skyes/ /bde ba'i bde mchog myong 'gyur nas/ /ngan song gsum du'ang lhung bar 'gyur/ /zhes pa la sogs pa ni de bzhin du yin zhing go sla ba'i phyir ma bshad do//lan grangs gzhan la myong bar 'gyur ba'i rnam par smin pa bstan pa dang / mtshams med pa'i las kyi 'bras bu bstan pa dang / /'gyod pa dang bcas pa'i dge ba'i sems kyi phan yon bstan pa nyid du shes par bya'o//de nas da ltar lha dbang po/ /khyod kyi thugs kyang de nyid kyi/ /yid la gcags pas gsol btab pa/ /dga' ldan gnas ni dga' ba'i mchog /bde mang kun gyi gnas su skye/ /zhes pa ni 'dir dam pa'i chos kyi 'bras bu yongs su gsungs pa ste/de la/ de nas da ltar lha dbang po/ /zhes pa la/ de nas zhes pa'i sgra ni ma ning gi rtags de dus gnyis kar 'brel pa'o/ /de ji ltar 'brel zhe na/ 'di ltar dus da ltar ni dam pa'i chos 'di'i stobs kyis dga' ldan gyi gnas su skyes so zhes par 'brel pa dang 'das pa'i dus na khyod dang lha'i bu de dang bde bar gshegs pa'i 'brel pa'i stobs kyis de nas khyod gsol ba 'debs par 'gyur ba nyid do zhes par 'brel to//lha'i dbang po khyod nyon cig gang gi tshe 'das pa'i dus na drang srong du gyur pa de ni gzhan yin par khyod kyis blta bar mi bya'o//bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa 'di nyid yin par rig par bya'o/ /de'i phar gyur pa gang yin pa de/ gzhan yin par khyod kyis mi blta ste/ lha'i dbang po khyod nyid de'i dus na phar gyur to/ /ma gang yin pa de ni gzhan yin par mi blta ste/ sha ri can nyid de'i dus na de'i mar gyur to/ /'khor gyi dkyil 'khor gang yin pa de ni gzhan yin par mi blta'i da ltar gyi lha'i 'khor de nyid yin no zhes gsungs pa ni 'dir dgongs pa rnam pa gsum du go bar bya ste/de la gcig ni lha la sogs pa rnams da ltar gyi tshe 'di nyid la dge ba'i las la 'bad pa'i spro ba yang dag par bskyed pa'o/ /gcig ni sngon gyi rgyu mthun pa'i smon lam gyi stobs las yang dag par byung bar gsungs pa'o//gcig ni de bzhin gshegs pa'i sprul pa'i sku dpag tu med pa ci nas kyang 'gro ba sems can thams cad kyi don mdzad par gsungs pa ste/ dper na nags tshal chen po la me shor ba ni la las ni me 'bar bar snang /la las ni 'chi kha mar snang / la las ni shi zin pa'i thal bar snang / la las ni mched par snang ba bzhin du de bzhin gshegs pa'i sprul pa'i sku dpag tu med pas 'gro ba'i don mdzad pa ni stong gsum gyi stong chen po'i 'jig rten gyi khams la lar ni sku mya ngan las 'das pa'i tshul ston/'jig rten gyi khams la lar ni mngon par rdzogs par byang chub par ston/ 'jig rten gyi khams la lar ni mdzad pa bcu gnyis kyi tshul du ston/ 'jig rten gyi khams la lar ni chos kyi 'khor lo bskor bar ston/'jig rten gyi khams la lar ni drang srong dang rig 'dzin dang khye'u dang bu mo dang sring mo la sogs pa'i tshul gyis 'gro ba sems can rnams la chos yang dag par ston par shes par bya ste/ de ni bde bar gshegs pas skye ba thog ma med pa nas thugs rje chen po'i stobs kyis 'gro ba sems can rnams kyi don mdzad pa nyid ngo bor shes par bya ste/yang dag par ni de dag gi tshul du 'brel pa ma yin pa nyid do/ /de nas brgya byin dang tshangs pa la sogs pa lha'i bu rnams kyis yid dga' mgu rangs te/ba spu'i bu ga nas spu langs shing rgyal ba rgyal ba rgyal ba zhes skad cher bos nas/ bcom ldan 'das phyag na rdo rje la mtshan bcu pa 'di mngon par bstod de gsol ba btab pa/ ko ta k+Sha ka ko ta bi ka ko ta ka ta/ ka ti sh+la ka/ ko laM sh+la ru/ ko la bi ka/ko la bar sh+la/ ka tong ka shA/ ka ling ka/ sta pA zhes pa la sogs pa ni 'di ltar tshangs pa dang lha'i dbang po brgya byin la sogs pa lha thams cad rang rang gi bsam pa phun sum tshogs pa ni yongs su rdzogs/ bde bar gshegs pa'i bka' rin po che ni thos pas shin tu dga' ba drag po yang dag par skyes pas rgyal ba rgyal ba rgyal ba zhes pa'i tshig skad chen pos bos pa ste/de la skad chen po nyid dga' ba drag po'i stobs las yang dag par byung ba'o/ /rgyal ba rgyal ba rgyal ba zhes pa ni don gsum du go bar bya ste/de la gcig ni bcom ldan 'das rnam par snang mdzad dang / bcom ldan 'das shAkya thub pa dang / bcom ldan 'das phyag na rdo rje gsum la dga' bas drag pos rgyal ba'i skad lan gsum pa'o/ /gcig ni bcom ldan 'das phyag na rdo rje nyid kyi sku gsung thugs la dga' ba drag po'i bsam pas bos pa'o//gcig ni dam pa'i chos rin po che 'dis snga rabs 'das pa'i sems can rnams kyang ngan song rnam pa gsum las rgyal/ da ltar 'tsho ba'i sems can rnams kyang ngan song rnam pa gsum las rgyal/ma 'ongs pa'i sems can rnams kyang 'di la brten pas ngan song gsum las rnam par rgyal bar 'gyur ba'i phyir dam pa'i chos la dga' ba drag pos skad lan gsum du bos par shes par bya'o/ /de la bstod pa ni 'dir bcom ldan 'das phyag na rdo rje la kla klo'i skad gsang ba'i dbyings zhes bya bas bstod pa ste/de la kha cig tu ni sha za'i skad du go'o/ /kha cig tu ni skad zur chag pa'i skad du go'o/ /kha cig tu ni klu'i skad du go'o/ /kha cig tu ni srin po'i skad du go'o/ /de dag kyang sha zal ni dang po dang drug pa'i 'brel pas pho mo 'khrig pa spyod par go bar 'gyur ro//zur chag pa'i skad la ni bzhi pas 'dod ces par ston to/ /klu la ni lnga pa dang bdun par 'brel pas nam mkha' lding byung ngo bar ston to/ /srin po la ni bzhi pa dang dgu par 'brel pas rgya mtsho lud do bar ston to//de dag la sogs pa ni mi'i gnas rnams su yang rang rang gi skad kyi bye brag gis dpag tu med pa'i don ston par 'gyur ba nyid do/ /de la gang dag 'di skad du lha rnams ni legs par sbyar ba'i skad smra ba yin na/ 'dir ci'i phyir legs par sbyar ba'i skad kyis bcom ldan 'das phyag na rdo rje la mngon par mi bstod par skad rnams kyis tha chad du gyur pa kla klo'i skad 'di lta bus yang dag par bstod par byed ce na/de ni 'di ltar gsang ba'i don rgya chen pos mngon par bstor pa ni lha las bskal pa rnams kyis mi go bar bya ba'i phyir de skad smras pa'o//de la gang dag yang 'di skad du gsungs pa nyid ci'i phyir gsang zhe na/ de ni 'di ltar yon tan rgya chen po phul du dbyung bar bya ba'i phyir dang / yang gang dag bstod pa'i don de dag gis log par 'khrul ba'i gzhir 'gyur ba'i phyir dang /lha rnams kyi che ba'i yon tan dbyung ba'i tshig nyung la don che bar ston pas yang dag par bstod pa ste/ de la de dag gi don ni 'dir sgra sbyar ba la sogs pa ni tshig mangs pa'i skyon du 'gyur ba'i phyir/ phan tshun du sbyar ba ma byas la ji lta bur ston pa ni 'dir tshigs su bcad par 'gyur te/'di ltar/ khyod ni glang po'i rna ba can/ /dus gsum dus rnams thams cad kyi/ /bde bshegs bka' dang sems can gyi/ /ma lus gtan gsan phyag 'tshal bstod/ /khyod ni shes rab spyan dang ldan//dus gsum dus rnams thams cad kyi/ /bde bar gshegs dang sems can gyi/ /las mdzad gzigs la phyag 'tshal bstod/ /khyod ni brtson 'grus zhabs dang ldan/ /dus gsum dus rnams thams cad du/ /sangs rgyas zhing dang sems can zhing //kun gshegs zhabs la phyag 'tshal bstod/ /khyod ni tshul khrims shangs dang ldan/ /dus gsum dus rnams thams cad du/ /bde bar gshegs dang sems can gyi/ /dri rnams tshor la phyag 'tshal bstod/ /khyod ni ye shes ljags dang ldan//dus gsum dus rnams thams cad du/ /bde bar gshegs dang sems can gyi/ /bde sdug ro myong phyag 'tshal bstod/ /khyod ni sbyin pa'i phyag dang ldan/ /dus gsum dus rnams thams cad du/ /'jig rten 'das dang 'jig rten 'di'i//gter rnams stsol la phyag 'tshal bstod/ /khyod ni smon lam gsung dang ldan/ /dus gsum dus rnams thams cad du/ /sangs rgyas zhing du sems can rnams/ /grol mdzad gsung la phyag 'tshal bstod/ / khyod ni thabs kyi sku dang ldan/ /dus gsum dus rnams thams cad du/ /sems can zhing rnams kun du ni/ /sna tshogs sprul la phyag 'tshal bstod/ /khyod ni bsam gtan thugs dang ldan/ /dus gsum dus rnams thams cad du/ /zhing rnams kun du gshegs mdzad kyang //rtog bral rtse gcig phyag 'tshal bstod/ /khyod ni stobs ni rdo rje ldan/ /dus gsum dus rnams thams cad du/ /sems can rnams kyi bdud dpung tshogs/ /ma lus 'joms la phyag 'tshal bstod/ /sangs rgyas kun bas sngar sangs rgyas//rdo rje rdo rje 'dzin rgyal po/ /dang po'i sangs rgyas mngon byang chub/ /thog ma'i ston pa phyag 'tshal bstod/ /dus gsum sangs rgyas thams cad kyi/ /mnga' bdag rdo rje skyob pa'o/ /rnam par rtog pa'i 'ching gcod pa/ /ye shes che la phyag 'tshal bstod//sangs rgyas byang chub sems rnams kyi/ /kun gyi bla mar gyur pa ste/ /sangs rgyas dbang rnams rdzogs mdzad pa/ /slob dpon chen po phyag 'tshal bstod/ /mkha' ltar dri ma med mod kyi/ /med phung 'bar ba'i sku yis ni//'gro rnams ma lus skrag mdzad pa/ /'jigs byed chen po phyag 'tshal bstod/ /ston ka'i zla ltar 'od gsal bas/ /btsun mo'i pad+mar gzigs mdzad nas/ /gsang ba'i rdo rje chen po yis/ /rtag tu 'khrig pa'i chos bsten pa/ /'dod chags chen po phyag 'tshal bstod//ces yang dag par bstod pa ste/ de dag ni bcom ldan 'das phyag na rdo rje la sku gsung thugs kyi sgo nas bstod pa dang / chos kyi mtshan nyid kyi sgo nas yang dag par bstod pa'o/ /yang 'dir dkyil 'khor gyi lha la bstod pa ni 'di ltar/dang po dang ni bzhi pa dang / /lnga pa dang ni brgyad pa dang / /dgu pa dang ni bcu gcig pa/ /bcu gsum pa dang bcu drug pa/ /bcu bdun pa dang nyi shu gcig /rtsa gsum pa dang rtsa bzhi pa/ /rtsa dgu pa dang sum cu gcig /so bzhi pa dang so lnga pa//dbus su dang po'i dang po nas/ /de yi sgra yi sbyor mchog gis/ /sangs rgyas bder gshegs sras rnams la/ /yongs su bstod pa bla na med/ /gsum pa dang ni bco lnga dang / /bcu dgu pa dang rtsa brgyad dang / /sum cu rtsa gnyis grangs kyi char//dbus su 'gro ba'i dang pos gnas/ /bcom ldan 'khor los sgyur gtso la/ /de yi sgra yi sbyar mchog gis/ /yongs su bstod pa bla na med/ /bco brgyad pa dang nyi shu gnyis/ /rtsa drug pa dang sum cu bzhi/ /de yi dbus su gnas pa ni/ /mthar gnas pa ni gsum pa ste//de yi sgra yi sbyor mchog gis/ /sangs rgyas rnams kyi yum gyur pa/ /yongs su bstod pa bla na med/ /gnyis pa dang ni drug pa dang / /bcu pa dang ni bcu gnyis dang / /bcu bzhi pa dang nyi shu dang / /sum cu pa dang sum cu drug/ dbus su gsum pa'i dang po ste/ /de yi sgra yi sbyor mchog gis/ /sangs rgyas sras mo ro ldan la/ /yongs su bstod pa bla na med/ /bdun pa dang ni nyi shu gsum/ /nyi shu bdun dang sum cu bdun/ /de yi dbus su gnas pa ni/ /bzhi pa rnams kyi dang po ste//de yi sgra yi sbyor mchog gis/ /sangs rgyas rnams kyi pho nya mo/ /khro bo'i gzugs su rab gnas la/ /yongs su bstod pa bla na med/ /de nyid la 'dir brgya byin la sogs pas rang gi yul dbul bar ni 'di ltar/ dang po rnams kyi dang pos ni/ / karma sa ra zhes bya phul/ /gsum pa rnams kyi dang pos ni/ /tis sma ba zhes bya ba phul/ /lnga pa rnams kyi dang pos ni/ /pad+ma can zhes bya ba phul/ /mthar gnas pa yi gsum pa yis/ /lam pa'i tog ces bya ba phul/ /dro bar gyur pa'i dang po yis/ / shi ri Sha'i tshal mchog phul/ /yang ni btsun mo dam pa rnams/ /phul ba nyid du byas pa ste/ /dang po rnams kyi dang pos ni/ /ka ma de bi zhes bya phul/ /gsum pa rnams kyi dang pos ni/ /ti le ka zhes bya ba phul/ /lnga pa rnams kyi dang po yis//pad+ma'i mig ces bya ba phul/ /mthar gnas pa yi gsum pa yis/ /lin+da ba ti zhes bya phul/ /dro bar gyur pa'i dang po yis/ /shi ri can zhes bya ba phul/ /de bzhin glang po'i mchog gyur pa/ /las kun byed ces bya ba dang / /phyogs las rgyal zhes bya ba dang //zhi byed mchog ces bya ba dang / /ma lus skrag ces bya ba dang / /lang ka 'joms zhes bya ba phul/ /de bzhin rta yi mchog gyur pa/ /rtsub 'gyur srung zhes bya ba dang / /pun+Da rI ka ltar dkar dang / /lto stong stobs chen zhes bya dang / /rab tu 'jog dang lam+pa ka//rab tu dbul ba nyid du byas/ /de ltar phul nas bde gshegs la/ /sdom pa'i mchog ni rab blangs te/ /'dod pa'i longs spyod bsrung ba dang / /'khrig pa'i chos ni mi ston dang / /sdig pa'i tshogs ni zhi bya dang / /de kho na ni bsgom pa dang //mdzes la chags par mi bya zhes/ /brgya byin lha yi dbang po sogs/ /lha rnams kun gyis tshig mthun par/ /da ltar 'di na rab gnas kyang / /bcom ldan bdag cag 'khor ba yi/ /chos 'di spang bar bya ba'i phyir/ /'dod pas chags par mi bgyi zhing //rnam par dag pa'i sems kyis ni/ /longs spyod ma lus 'di dag la/ /rdzing gi pad+ma lta bu dang / /go shi sha ni chu gcig bzhin/ /gos pa med par sbyad bgyi yis/ /gtso bos bdag cag 'khor bcas la/ /gsang sngags sdom pa bla na med//sdom pa kun gyi mchog gyur zhing / /thar pa'i rgyu ni bla na med/ /yongs su dag pa stsal du gsol/ /de skad sdom pa'i gsol btab nas/ /brgya byin la sogs lha chen rnams/ /dam pa'i chos ni ma lus nyan/ /de dag ni bcom ldan 'das phyag na rdo rje de nyid kyi sku gsung thugs rgya chen po la mngon par bstod pa ste/brtag pa 'di nyid kyi 'og ma las kyang bshad do/ /de bas gong du bshad pa de dag gis ni lha'i dbang po la sogs pas bcom ldan 'das phyag na rdo rje la mtshan bcu pas yongs su bstod pa bshad pa ste/de la bshad pa dang pos ni pha rol tu phyin pa bcus bcom ldan 'das kyi sku gsung thugs la bstod pa'o/ /bshad pa gnyis pas ni chos kyi mtshan nyid kyi sgo nas bstod pa'o/ /bshad pa gsum pas ni de bzhin gshegs pa ngan song thams cad yongs su sbyong ba'i rtsa ba'i dkyil 'khor gyi lha sum cu rtsa bdun la bstod de/de ni yi ge phan tshun du sbyar ba dang phyi ba dang / gzhan du bsgyur ba las 'grub kyang 'dir ni yi ge grangs kho na nyid du 'dod do/ /bshad pa bzhi pas ni yi ge ka dang pa dang sha dang ta dang la dang lnga'i sgra'i sbyor bas bcom ldan 'das la lha rnams kyi yul gyi mchog lnga phul ba dang /de bzhin du bshad pa lnga pas lha rnams kyi btsun mo'i mchog lnga phul ba dang / bshad pa drug pas ni glang po che'i mchog lnga phul ba'o/ /bshad pa bdun pas ni rta'i mchog lnga phul bar shes par bya'o//de bas na yi ge nyung la don rgya chen po ston pa'i phyir kla klo'i skad gsang ba'i dbyings zhes bya ba dang / lha rnams kyi brda'i skad ces bya ba nyid do/ /de la gang dag 'di skad du yi ge brda'i mtshon pa de'i ji ltar na mchod pa'i yo byad de dag phul bar 'gyur zhe na/de ni 'di ltar lha rnams kyi sems kyis rab tu brtags kun du brtags nas yi ge'i tshogs 'byung ba'i skad cig la de'i mchod pa'i dngos po la sems dmigs nas bcom ldan 'das phyag na rdo rje la phul te/ don lha rnams kyi sems kyi bsam pa'i skad cig la/bcom ldan 'das phyag na rdo rje rnam pa thams cad mkhyen pa yin pa'i phyir/ phul bar thugs kyis dgongs pa nyid do/ /de nas/ brgya byin la sogs lha chen rnams/ /sems can kun la phan pa dang / /tshe dang nad med spel ba'i phyir//mgon po khyod la gsol ba 'debs/ /bcom ldan 'das sems can tshe thung ba dang / skal ba chung ba rnams kyi don dang / phan pa dang tshe bsring ba'i slad du bshad du gsol/ gsang ba'i bdag pos bshad du gsol/ /zhes pa ni 'di ltar brgya byin la sogs pa'i lha rnams kyi snga ma lta bu'i mchod pa'i tshogs kyis yang dag par mchod de/sems can thams cad la phan par bya ba dang / gsang sngags bsgrub ba'i gang zag rnams dus kyi snyigs ma'i dus na dad pa dang brtson 'grus drag po yod kyang / tshe la long med pa'i phyir rnal 'byor pa tshe bsring ba'i cho ga yang dag par zhu ba ste/de la brgya byin la sogs ni brgya byin la sogs pa'o/ /sems can kun ni sems can thams cad de/ 'di la 'jug pa zhes bya bar sbyar ro/ /tshe dang nad med ces pa ni rnam pa gnyis te/ tshe thung ba ring bar bya ba dang / 'jig rten 'di na nad dang rims dang dug la sogs pas 'tshe ba nyung bar bya ba'i phyir dang /tshe ni srog ste/ yun ring por gnas par bya ba dang / nad ni rnam par rtog pa ste/ gnyis su med pa'i ye shes thob par bya ba'i phyir zhes par sbyar ro/ /yang 'dir tshe 'di nyid la nad ni bkres pa dang skom pa la sogs pa dbul ba'i sdug bsngal te/de dang 'bral bar bya ba'i phyir bshad du gsol zhes par 'brel to/ /de la skal ba chung ba zhes pa ni gong ma la snyegs so/ /de yang 'dir gnyis su go bar bya ste/ gang zag thun mong ba'i ched dang gang zag khyad par can gyi ched de/de la gang zag thun mong ba'i ched ni sems can mir gyur pa la sngon gyi las kyi rnam par smin pa'i stobs kyis tshe thung ba bsring ba dang dbul po rnams 'byor pa dang ldan par bya ba'i phyir ro/ /gang zag khyad par can ni sems can thams cad kyi don du bla na med pa yang dag par rdzogs pa'i byang chub bsgrub pa ni yun ring pos bsgrub dgos pa'i phyir dus ma yin par 'chi ba dang /tshe thung ba rnams bsring ba'i phyir lha'i dbang po brgya byin la sogs pa gsol ba 'debs par 'brel to/ /gsang ba'i bdag po bcom ldan 'das phyag na rdo rje phyogs bcu dus gsum gyi bde bar gshegs pa thams cad kyi sku gsung thugs kyi gsang ba sngags kyi de kho na nyid thams cad kyi bdag po yin pa'i phyir gsang ba'i bdag po zhes bya ba'o//de nas bcom ldan 'das phyag na rdo rjes brgya byin dang tshangs pa la sogs pa'i 'khor mang po de dag la gzigs nas zhes bya bas mgu bar byas te/tshangs pa la sogs pa'i lha'i bu rnams ni gang khyed kyis 'di lta bu'i spobs pa yang dag par bskyed pa de ni legs so legs par sgrubs shig dang ngas bshad par bya'o//zhes gsungs pa ni spro ba yang dag par bskyed pa'i tshig ste/ de la gzigs pa ni sems can thams cad la mnyam pa nyid kyis yang dag par dmigs pa'o/ /legs so zhes pa ni ci nas kyang sems can gyi don la yang dag par brtson pa legs so zhes pa'o/ / gang khyod kyis 'di lta bu'i spobs pa yang dag par bskyed pa legs so zhes pa ni blo dang shes rab rgya chung ba ma yin gyi sems can thams cad mngon par rdzogs par byang chub par bya ba'i phyir sems bskyed pa legs so legs so zhes bya bar 'brel to/ /legs par sgrubs shig dang ngas bshad par bya'o zhes gsungs pa ni 'di ji lta ba bzhin du sems can thams cad kyi don du sgrubs shig gdon mi za bar 'grub pa'i thabs bshad par bya'o zhes par 'brel to//de nas bcom ldan 'das phyag na rdo rjes de bzhin gshegs pa thams cad kyi tshe dang ye shes dpag tu med pas khyab par 'byung ba'i rdo rje zhes bya ba'i ting nge 'dzin la snyoms par zhugs nas/tshe dang bsod nams dang ye shes kyi tshogs dpag tu med pa 'phel ba zhes bya ba de bzhin gshegs pa thams cad kyi snying po 'di nyid kyi thugs ka nas phyung ngo zhes bya ba ni 'di ltar 'das pa'i de bzhin gshegs pa thams cad dang /ma 'ongs pa'i de bzhin gshegs pa thams cad dang / da ltar gyi de bzhin gshegs pa thams cad kyis byin gyis brlabs pa'i phyir dang / de bzhin gshegs pa thams cad snga rabs su 'khor bar bzhugs pa'i tshe/tshe dang bsod nams dang ye shes thams cad sgrub pa 'di la brten te yang dag par byung ba dang / sngags dang sgrub pa 'di nyid la dus gsum gyi de bzhin gshegs pa thams cad kyis khyab pa'i phyir dang /de nyid rdo rje rnam pa gnyis dang ldan pa'i phyir tshe dpag tu med pa khyab par 'byung ba'i rdo rje zhes bya ba dang / yang khyab pa ni 'dir gsungs pa'i dkyil 'khor dang gsang sngags dang las thams cad la 'dis khyab pa'i phyir khyab pa 'byung ba zhes bya ba'o//ting nge 'dzin la snyoms par zhugs pa ni de lta bu gsungs pa la thugs mnyam par gzhag pa'o/ /tshe dang bsod nams dang ye shes kyi tshogs dpag tu med pa 'phel ba zhes bya ba ni skyed par byed pa'o/ /de bzhin gshegs pa thams cad kyi snying po zhes bya ba ni de bzhin gshegs pa thams cad kyis byin gyis brlabs pa nyid do//snying po ni ye shes te de skyed par byed pa ste/ de nyid kyi thugs ka nas zhal du phyung ba'o/ /oM pu N+ye pu N+ye a pA ra mi ta A yu dz+nyA na saM b+ha ro pa tsa ya a ri ni swA hA/ zhes pa ni bcom ldan 'das phyag na rdo rje'i snying po ste/tshe dang bsod nams dang ye shes thams cad skyed par byed cing / nyon mongs pa'i dgra ma lus par 'joms par byed pa'o/ /de bzhin gshegs pa thams cad kyi snying po 'di bshad ma thag tu ngan song thams cad rab tu zhi ste/sems can dmyal ba dang byol song dang yi dags rnams su skyes pa'i sems can thams cad grol bar bdag nyid kyis rab tu shes so zhes pa ni 'di ltar don rnam pa gnyis su go bar bya ste/ de la de bzhin gshegs pa thams cad kyi snying po 'di bshad ma thag tu zhes pa ni rgyu rab tu grol ba dang 'bras bu rab tu grol ba ste/rgyu rab tu grol ba la gsum mo/ /rdo rje lta bu'i dmigs pa la mnyam par gzhag pa dang / nam mkha' lta bu'i dmigs pa la mnyam par gzhag pa dang / dbu ma lta bu'i dmigs pa la mnyam par gzhag pa'o//de la rdo rje lta bu'i dmigs pa la mnyam par gzhag pa ni bde bar gshegs pa'i gsung rab rin po che las yang dag par byung ba'i shes rab kyi 'khor los rjod par byed pa'i dmyal ba dang / kun du 'jug pa'i dud 'gro dang /'tsho bas gdungs pa yi dags rnams las bdag nyid kyis yongs su 'grol bar byas bdag nyid la yongs su grol bar shes so/ /nam mkha' lta bu'i dmigs pa la mnyam par gzhag pas ni de las byung ba'i dmyal ba dang / de nyid sems pa'i yi dags dang / gnyis kas stong pa'i dud 'gro gsum gyi sdug bsngal bdag nyid la yang dag par grol bar shes so/ /dbu ma lta bu la dmigs pa la mnyam par gzhag pas ni brtan par 'dzin pa'i dmyal ba dang / las su byed pa'i dud 'gro dang / 'dod pas gdungs pa'i yi dags gsum bdag nyid kyis grol bar yang dag par shes so/ /'bras bu rab tu grol bar bcom ldan 'das kyis yongs su rdzogs pa'i skad cig ma la ngan song gi rgyud bcad nas bla na med pa yang dag par rdzogs pa'i byang chub tu mngon par rdzogs par byang chub par dgongs pa'o//'jig rten gyi khams thams cad du yang snang bar byas te/ snang bar byas nas kyang sangs rgyas kyi mdzad pa bcu gnyis kyi tshul du byas nas de bzhin gshegs pa thams cad kyi thugs kyi yi ge de nyid du zhugs par gyur to zhes gsung ba ni yang rnam pa gnyis su go bar bya ste/rgyu'i bdag nyid la dgongs pa dang / 'bras bu'i bdag nyid la dgongs pa'o/ /rgyu'i bdag nyid la dgongs pa la rnam pa gnyis te/ las las byung ba la dgongs pa dang /thabs las byung ba la dgongs pa'o/ /thabs las byung ba la gnyis te phyi rol du dmigs pa dang / nang du dmigs pa'o/ /de la 'bras bu'i bdag nyid la dgongs pa ni 'di ltar sems can rnams la dam pa'i chos 'dis mngon par rdzogs par sangs rgyas nas 'gro ba'i don byed pa'i gnas skabs ni gang gi dus su rigs gang btsun pa'i bur skye ba blangs nas sangs rgyas kyi mdzad pa bcu gnyis kyi tshul ji lta ba bzhin du mdzad nas yang chos kyi sku'i ngang du bzhugs pa nyid dang /yang bcom ldan 'das phyag na rdo rje nyid kyi thugs ka nas de bzhin gshegs pa'i snying po de nyid las bde bar gshegs pa'i sprul pa'i tshogs yang dag par bkye ste/ da ltar sems can gyi don du sangs rgyas kyi mdzad pa bcu gnyis kyi tshul du mdzad pa yod pa nyid do//rgyu'i bdag nyid la dgongs pa ni skyed par byed pa'i rgyu'o/ /de'i dbye ba las las byung ba'i rgyu ni nang rten cing 'brel par 'byung ba bcu gnyis las yang dag par byung la slar rtog pa med pa'i lus su song ba ste/ de ni skyo ba skyed pa'i don to/ /thabs las byung ba ni sems can gyi khams yang dag par sbyong ba la zhugs pa'o//de'i dbye ba phyi rol du dmigs pa ni 'di ltar ting nge 'dzin rnam pa bcu gnyis kyis yongs su bskyed de/ de la ting nge 'dzin rnam pa bcu gnyis ni bar chad med pa zhes bya bar ting nge 'dzin la ni lhums su zhugs nas bltams pa nyid do//skyed par byed pa zhes bya ba'i ting nge 'dzin la ni rtsal 'gran byas pa nyid do/ /gzi brjid phung po zhes bya ba'i ting nge 'dzin la ni rkyal 'gran byas pa nyid do/ /thams cad 'byung zhes bya ba'i ting nge 'dzin la ni rtsis 'gran byas pa nyid do//bdud kyi tshogs kyis mi shigs pa zhes bya ba'i ting nge 'dzin la ni yig 'gran byas pa nyid do/ /kun du rtog pa zhes bya ba'i ting nge 'dzin la ni 'phong 'gran byas pa nyid do/ /kun du snang ba zhes bya ba'i ting nge 'dzin la ni khab bzhes pa nyid do//yongs su rdzogs pa zhes bya ba'i ting nge 'dzin la ni mchod rten rab tu brtsegs pa'i rtsar rab tu byung ba nyid do/ /nye bar brtan pa zhes bya ba'i ting nge 'dzin la ni dka' thub lo bdun mdzad pa nyid do/ /rnam par grol ba zhes bya ba'i ting nge 'dzin la ni bdud kyi tshogs yang dag par bcom pa'o//de nyid gcig pa zhes bya ba'i ting nge 'dzin la ni rdo rje gdan la mngon par rdzogs par sangs rgyas pa nyid do/ /mngon par grol ba zhes bya ba'i ting nge 'dzin la ni chos kyi 'khor lo bskor ba nyid do/ /nang du dmigs pa yang ni 'di ltar bar chad med pa zhes bya ba'i ting nge 'dzin la ni lhums nas bltams pa nyid do//thams cad du dmigs pa med pa zhes bya ba'i ting nge 'dzin la ni rkyal 'gran byas pa nyid do/ /dpa' bo grub pa zhes bya ba'i ting nge 'dzin la ni rtsal 'gran byas pa nyid do//thugs las grub pa zhes bya ba'i ting nge 'dzin la ni rtsis 'gran byas pa nyid do/ /de dag ni sbyor ba dang po'i ting nge 'dzin to/ /yi ge brtag pa zhes bya ba'i ting nge 'dzin la ni yig 'gran byas pa nyid do/ /rten pa rdzogs pa zhes bya ba'i ting nge 'dzin la ni 'phong 'gran par byas pa nyid do//ye shes snang ba zhes bya ba'i ting nge 'dzin la ni khab bzhes pa nyid do/ /rnam par gnas pa zhes bya ba'i ting nge 'dzin la ni rab tu byung ba ste/ de dag gis ni dkyil 'khor rgyal mchog gi ting nge 'dzin rdzogs pa'o//rims nad rtog pa zhes bya ba'i ting nge 'dzin la ni bka' thub mdzad pa nyid do/ /bdud rtsi gong bu zhes bya ba'i ting nge 'dzin la ni bdud kyi tshogs yang dag par bcom pa'o/ /rang bzhin gcig pa zhes bya ba'i ting nge 'dzin la ni rdo rje'i gdan la mngon par rdzogs par sangs rgyas pa nyid do//rnam par mi rtog gsal ba zhes bya ba'i ting nge 'dzin la ni chos kyi 'khor lo bskor ba ste/ de dag gis ni las kyi rgyal po mchog gi ting nge 'dzin yongs su rdzogs pa'o/ / de bas ni gong du gsungs pa'i de bzhin gshegs pa'i thugs kyi chos kyi yi ge de nyid du zhugs par gyur to zhes pa'ang 'bras bu'i skabs su ni 'di ltar snang ba'i chos thams cad rang bzhin gyis rnam par dag cing dngos po rnam par rtog pa dang / mtshan ma'i rnam par rtog pa dang bral ba yod pa dang med pa dang yod pa'ang ma yin med pa'ang ma yin pa dang yod pa dang med pa ma yin pa'ang ma yin pa'i mu bzhi'i skye mched dang bral ba yin zhing /de la sngon gyi smon lam gyi stobs las yang dag par byung bas 'gro ba'i don mdzad de/slar mnyam pa'i ye shes kyi dang la bzhugs pa'i phyir chos kyi yi ger bzhugs pa zhes bya'o/ /yang yi ge ni mi 'gyur ba ste/ chos ni chos thams cad kyi spyi'i mtshan nyid du zhugs par gyur pa nyid do/ /de nyid de nas byon nas de bzhin gshegs pa'i phyir de bzhin gshegs pa zhes bya'o//yang gcig ni bcom ldan 'das phyag na rdo rje'i thugs mi 'gyur ba'i rdo rje nas snying po dang bcas pa'i de bzhin gshegs pa'i tshogs dpag tu med pa sprul nas 'gro ba'i sems can rnams ngan song gsum las yang dag par grol bar mdzad pa'i ting nge 'dzin gyis rnam par sbyangs nas slar bcom ldan 'das nyid kyi thugs ka'i mi 'gyur ba'i rdo rjer zhugs pa ste/de yang de bzhin gshegs pa nyid do/ /thabs las byung ba'i phyi rol du dmigs pa'i bdag nyid ni thams cad 'byung ba zhes bya ba'i ting nge 'dzin las yongs su rdzogs pa zhes bya ba'i ting nge 'dzin dpag tu med pa spros te/'gro ba sems can thams cad kyi ngan song rnam pa gsum yongs su sbyangs nas slar thams cad 'byung ba zhes bya ba'i ting nge 'dzin du zhugs pa ste/de nyid snying ga nas spros pa'i phyir thugs ka'o/ /de bzhin gshegs pa thams cad kyi thugs kyi yi ge yin pa'i phyir dang / chos rnams 'byung ba'i phyir thugs kyi chos yi ger zhugs zhes bya bar 'brel te/ de yang de bzhin gshegs pa yin par shes par bya'o//nang du dmigs pa'i bdag nyid kyang 'di ltar thams cad dmigs pa med pa zhes bya ba'i ting nge 'dzin las ye shes snang ba zhes bya ba'i ting nge 'dzin gyi tshogs kyis ngan song gsum dang der skye ba'i rgyu nyon mongs pa thams cad yang dag par sbyangs te/slar de nyid du zhugs pa'i phyir de bzhin gshegs pa zhes bya'o/ /de nyid thugs kun gnas pa'i phyir thugs kyi'o/ /de nyid mi 'gyur bar bsgom pa'i phyir yi ge'o/ /de nyid chos thams cad stong pa nyid kyi ngo bo yin pa'i phyir chos te de'i phyir de bzhin gshegs pa thams cad kyi thugs kyi chos kyi yi ge de nyid du zhugs par gyur to zhes bya ba nyid do//yang de nyid bla na med pa'i sems 'byin pa'i phyir na sbyin pa'i pha rol tu phyin pa dang / rnam par g.yeng ba'i dri ma dang bral ba'i phyir na/ tshul khrims kyi pha rol tu phyin pa dang / phyi rol gyi rnam par 'tshe ba la sogs pa bzod pa'i phyir na bzod pa'i pha rol tu phyin pa dang / le los bar mchod pa'i phyir na brtson 'grus kyi pha rol tu phyin pa dang / mnyam pa nyid kyi rtse gcig pa'i phyir bsam gtan gyi pha rol tu phyin pa dang /rnam par rtog pa dang bral ba'i phyir shes rab kyi pha rol tu phyin pa dang / dge ba'i rtsa ba yongs su bsngo ba'i phyir smon lam gyi pha rol tu phyin pa dang / kun nas nyon mongs pa 'joms pa'i phyir stobs kyi pha rol tu phyin pa dang / bla na med pa'i byang chub bsgrub pa'i thabs bla na med pa yin pa'i phyir thabs kyi pha rol tu phyin pa dang /ye shes rnam pa gnyis bskyed pa'i phyir ye shes kyi pha rol tu phyin pa zhes bya ba ste/ de nyid phyogs bcu dus gsum gyi bde bar gshegs pa sras dang bcas pa thams cad bskyed pa yin pa'i phyir bka' thams cad nas 'byung ba'i yum shes rab kyi pha rol tu phyin pa zhes bya ba kho na ste/de yang shes rab kyi pha rol tu phyin pa brgyad stong pa las/ bcom ldan 'das kyis bka' stsal pa/ kau shi ka chos thams cad dmigs pa med pa gang yin pa de ni shes rab kyi pha rol tu phyin pa ste/nam du 'du shes dang kun shes pa dang / brtags pa dang / tha snyad mi 'byung ba de'i shes rab kyi pha rol tu phyin pa zhes bya'o zhes gsungs pa'i phyir ro/ /de nas bcom ldan 'das kyis tshe dpag tu med pa'i rdo rje'i 'od byed pa zhes bya ba'i ting nge 'dzin la snyoms par zhugs nas/de bzhin gshegs pa thams cad kyi tshe dpag tu med pa zhes bya ba'i gzungs 'di bshad do/ /oM a mi te a mi ta a mi tod b+ha ba/ a mi te saM b+ha be a mi ta bi krA n+te/a mi ta bi kra n+te/ ga mi ni/ sarba karma kle sha k+Sha yaM ka ri swA hA/ de nas 'di bshad ma thag tu de bzhin du sems can thams cad kyi sdug bsngal rab tu zhi'o zhes gsungs pa ni 'di ltar bcom ldan 'das phyag na rdo rjes gong ma ni nyid kyi snying po rtsa ba'i sngags las thams cad du 'jug pa bdud rtsi bskyed pa gsungs la/'di ni bdud rtsi bsgrub pa bcud kyis len te/ bcom ldan 'das 'od dpag med kyi snying po'o/ /tshe dpag tu med pa rdo rje'i 'od byed pa ni sems can rnams kyi tshe dpag tu med par 'tsho ba ste/de nyid rdo rje lta bur mi 'jig pas na rdo rje zhes bya'o/ /'od byed pa ni ma rig pa'i mun pa thams cad bsal bar byed pa ste/ de gsungs pa la thugs mnyam par gzhag pa la snyoms par zhugs zhes pa rgyu kun nas slong ba zhes bya'o/ / de bzhin gshegs pa thams cad ni dus gsum gyi de bzhin gshegs pa thams cad de/ de dag dang por 'khor ba na zhugs pa tsam na rig sngags chen mo 'di la brten nas tshe yongs su bsgrub pa'i phyir dang / gsang sngags 'di la phyogs bcu dus gsum gyi de bzhin gshegs pa thams cad kyis byin gyis brlabs pa'i phyir/de bzhin gshegs pa thams cad kyi tshe dpag tu med pa zhes bya'o/ /gzungs ni 'dzin pa ste/ tshe yongs su 'dzin par byed pa'o/ /sngags kyi don ni lha la sogs pa'i bdud rtsi bas kyang khyad par du 'phags pa'i phyir dang /nad rnam pa gnyis zhi bar byed pa'i phyir na bdud rtsi'i bdud rtsi zhes pa dang / de nyid las bdud rtsi bskyed pa'i phyir bdud rtsi bskyed pa zhes pa dang / de nyid kyis yang dag par mi 'chi bar 'gyur ba'i phyir yang dag par mi 'chi ba zhes pa dang /mi 'chi bas 'chi ba gnon par byed pa'i phyir mi 'chi bas rnam par gnon pa zhes pa dang / sngags 'di nyid bdud rtsir byed pa'i phyir bdud rtsir rnam par byed pa zhes pa dang / de las 'khor ba'i pha rol tu 'gro zhing las dang nyon mongs pa thams cad zad par byed pa'i phyir 'gro ba'i sgrib pa dang /las dang nyon mongs pa thams cad zad par gyis shig ces pa'o/ /de bzhin du sems can thams cad kyi sdug bsngal rab tu zhi'o zhes pa ni sngar gyi dgongs pa bshad pa las shes par bya'o/ / de nas bcom ldan 'das kyis gdon mi za bar sgrib pa rnam par 'joms pa zhes bya ba'i ting nge 'dzin la snyoms par zhugs nas de bzhin gshegs pa thams cad kyi sgrib pa gcod pa zhes bya ba snying po'i gzungs 'di nyid kyi thugs ka nas phyung ngo / oM kaM ka ni kaM ka ni/ro tsa ni ro tsa ni/ tro Ta ni tro Ta ni/ trA sa ni trA sa ni/ pra ti ha na pra ti ha na/ sarba karma a pa ra Na/ pa raM pA ra Ni me sarba satwa nany+tsa swA hA/ 'di bshad ma thag tu 'ang de bzhin du gyur to zhes gsungs pa ni 'di ltar bcom ldan 'das phyag na rdo rjes sems can thams cad kyi las dang nyon mongs pa'i sgrib pa thams cad gdon mi za bar gcod par byed pa'i snying po gsung ba la thugs mnyam par gzhag pa la snyoms par zhugs zhes pa'o//ting nge 'dzin mnyam par brtan pa ste/ rnam par rtog pa med par rtse gcig pa nyid do//de bzhin gshegs pa thams cad kyi sgrib pa gcod pa zhes pa ni 'dir don gnyis su go bar bya ste/ gcig ni dus gsum gyi de bzhin gshegs pa thams cad kyi sgrib pa'ang rig sngags 'dis yongs su bcad pa nyid dang / gcig ni da ltar gyi sems can rnams yongs su rdzogs pa'i mtha' bla na med pa yang dag par rdzogs pa'i byang chub tu mngon par rdzogs par 'tshang rgya ba la dgongs nas sems can thams cad la de bzhin gshegs pa zhes pa'o//yang 'dir de bzhin gshegs pa ni rnam pa gnyis te/kun nas nyon mongs pa'i de bzhin gshegs pa dang / rnam par byang ba'i de bzhin gshegs pa'o/ /de la rnam par byang ba'i de bzhin gshegs pa ni sngar bshad zin la/ kun nas nyon mongs pa'i de bzhin gshegs pa ni sems can thams cad de gti mug la sogs pa nyon mongs pa'i rgyu las yang dag par byung zhing /da ltar yang 'dir 'dod chags la sogs pa'i nyon mongs pa'i rjes su 'brang ba'i phyir de bzhin gshegs pa ste de dag thams cad kyi sgrib pa gsang sngags 'dis yongs su gcod pa zhes bya'o//snying po ni ye shes te de skyed par byed pa'i phyir ro/ /gzungs ni 'dzin pa ste ngan song du 'gro ba rnams yang dag par 'dzin pa nyid do/ /thugs ka nas phyung ba ni thugs ka nas zhal du phyung ba'o//de la 'dir snying po ni 'dir de bzhin gshegs pa mi bskyod pa'i snying po yin te/ de'i don yang 'di ltar sol cig sol cig ces pa dang / non cig non cig ces pa dang / shig cig shig cig ces pa dang / skrag par gyis shig skrag par gyis shig ces pa dang /rab tu chom shig rab tu chom shig ces pa ste/ de dag gi las su bya ba'i gzhi ni sems can thams cad kyi las kyi sgrib pa brgyud pa thams cad de/ de dag yang dag par sol cig ces pa la sogs par go bar bya ba'o/ / 'di bshad ma thag tu yang thams cad de bzhin du gyur to zhes pa ni gong du bshad pa'i tshul las yang dag par shes par bya'o/ /de nas yang bcom ldan 'das kyis sgrib pa thams cad dri ma med cing rnam par dag pa'i rdo rje zhes bya ba'i ting nge 'dzin la snyoms par zhugs nas/de bzhin gshegs pa thams cad kyi sgrib pa rnams ma lus par 'joms pa zhes bya ba'i snying po'i gzungs rang gi thugs ka nas phyung ngo / /oM rat+ne rat+ne/ rat+na saM b+ha be/ rat+na ki rat+ne/ rat+na mA le bi shud+d+h+ya/ sho d+ha ya shod+ha ya sarba pA paM hUM tra Ta/ de nas 'di bshad ma thag tu bdud kyi gnas thams cad bcom par gyur to zhes gsungs pa ni 'dir bcom ldan 'das phyag na rdo rje sems can thams cad kyi sgrib pa dang / bag chags kyi dri ma med cing rnam par dag par byed pa'i snying po gsungs pa la thugs mnyam par gzhag pa ste/de la rdo rje ni gnyis su med pa'i ye shes skyed par byed pa'i phyir te/ ting nge 'dzin ni mnyam par gnas par byas pa nyid do/ /de bzhin gshegs pa thams cad kyi sgrib pa rnams ma lus par 'joms pa ni gong du smos pa'i bshad pa rnam pa gsum du shes par bya'o//snying po ni ye shes so/ /gzungs ni yongs su 'dzin par byed pa'o/ /de la sngags ni 'dir bcom ldan 'das rin chen 'byung ldan gyi snying po ste/ de dag gi don ni lha dang mi rnams kyi rin po che las khyad par du 'phags pa 'jig rten 'di'i bde ba dang 'jig rten las 'das pa'i bde ba phun sum tshogs pa ster ba'i phyir na rin po che zhes pa'o//de las 'dod pa'i dgos pa thams cad 'byung ba'i phyir na rin po che yang dag par 'byung ba zhes bya ba'o/ /de nyid las ye shes kyi 'od zer chen po 'byung ba'i phyir na rin po che'i 'od zer zhes bya ba'o//de nyid thugs rje chen po'i rgyun phreng ba lta bur 'byung bas na rin po che'i phreng ba zhes bya ba'o/ /de nyid kun nas nyon mongs pa'i skyon dang bral ba'i phyir na rnam par dag pa zhes bya ste/ de dag gis las ci lta bu zhig mdzad ce na/ sems can thams cad kyi sdig pa thams cad sbyong bar byed pa nyid do/ /de nas 'di bshad ma thag tu bdud kyi gnas thams cad bcom par gyur to zhes pa ni bcom par gyur pa dang / bcom pa dang / 'joms par 'gyur ba la dgongs nas gsungs par shes par bya'o//de nas yang bcom ldan 'das kyis gdon mi za bar choms pas sgrib pa thams cad 'joms pa'i ting nge 'dzin la snyoms par zhugs nas/ de bzhin gshegs pa thams cad kyi snying po'i gzungs 'di nyid kyi thugs ka nas phyung ngo //oM a mo g+ha a pra ti ha ta sarba karma A ba ra Ni bi na sha ni ha ra ha ra hUM phaT/ gsang sngags 'di bshad ma thag tu 'jig rten gyi khams thams cad g.yos rab tu g.yos/ 'khrugs rab tu 'khrugs/ 'gul rab tu 'gul zhing rmad kyi ngo mtshar sna tshogs pa snang bar gyur to zhes gsungs pa ni 'di ltar bcom ldan 'das phyag na rdo rje sems can rnams kyis gsang sngags las byung ba'i ye shes kyi rdo rje ni bdud kyi tshogs thams cad kyis gdon mi za bar mi choms pas las la sogs pa'i sgrib pa thams cad ma lus par 'joms pa'i gsang sngags gsungs pa la thugs mnyam par gzhag pa de la snyoms par zhugs pa'o//ting nge 'dzin ni rtse gcig pa ste chos kyi sku'o/ /de bzhin gshegs pa thams cad kyi snying po'i gzungs 'di nyid kyi thugs ka nas phyung ngo zhes pa la/de bzhin gshegs pa ni kun nas nyon mongs pa'i de bzhin gshegs pa'am/ rnam par byang ba'i de bzhin gshegs pa ste/ de la snying po ni gnyis kar ye shes la bya'o/ /gzungs ni rnam pa gnyis te/shes rab phun sum tshogs pa'i bdag nyid kyis ni chos kyi dbyings la yang dag par 'dzin to/ /thabs phun sum tshogs pa'i bdag nyid kyis ni sems can rnams ngan 'gro rnam pa gsum las yang dag par 'dzin pa'i phyir gzungs so zhes bya ba'o/ /'di zhes pa'i sgra ni dmigs pa nye bar ston pa ste/nyid kyi thugs ka nas phyung ba ni thugs ka nas zhal du phyung zhes par 'brel to/ /de la sngags ni bcom ldan 'das don yod grub pa'i snying po ste/ de dag gi don ni bsod nams phun sum tshogs pa dang / ye shes phun sum tshogs pa'i don yod cing zhes pa'o//ngan song rnam pa gsum the tshom mi za bar spong bar byed pa'i phyir gdon mi za bar zhes bya ba'o/ /de la gdon mi za bar gang mdzad ce na/ sgrib pa thams cad rnam par 'joms shing 'phrog cing 'phrog par mdzad pa zhes bya ba nyid do//gsang sngags 'di bshad ma thag tu 'jig rten gyi khams thams cad du g.yos rab tu g.yos zhes pa la sogs pa ni 'dir don rnam pa gsum du go bar bya ste/ de la gcig ni gzungs 'di bshad ma thag tu 'jig rten gyi khams rnams de bzhin du 'khrugs pa la sogs par gyur pa ste/de ni sems can gang dag dam pa'i chos gsang sngags rin po che 'di la brten nas yongs su rdzogs pa'i mthar bla na med pa yang dag par mngon par 'tshang rgya ba'i skad cig la/ 'jig rten gyi khams rnams rab tu g.yo ba dang rab tu 'gul ba dang ngo mtshar gyi chos sna tshogs pa yang dag par byung ba'i phyir 'bras bu'i chos rgyu las byung bar yang dag par brtags pa'o//gcig ni sems can gang dag gsang sngags rin po che 'di'i sgor zhugs nas/ byang chub kyi sems bla na med pa skyes pa'i skad cig la ni 'jig rten gyi khams rab tu g.yo ba la sogs pa 'byung ba'i phyir dang /gcig ni 'di ltar 'jig rten gyi khams ni sa 'og dang sa steng dang sa bla rnam pa gsum ste/ de la sa bla ni sgra'i gnas so/ /sa steng ni 'jug pa'i gnas so//sa 'og ni bskyod pa'i gnas te de dag la brten pa ni 'dod chags dang zhe sdang dang gti mug la sogs pa ste/ de dag rnal 'byor pa'i rig pa chen pos yang dag par 'khrug par byed gnas gzhan du skyod par byed dga' ba dang bde ba dang zhi ba la sogs pa'i ngo mtshar sna tshogs pa'i chos yang dag par ston pa'i phyir 'jig rten gyi khams thams cad du g.yos rab tu g.yos zhes pa la sogs pa yongs su gsungs pa nyid do//de nas dkyil 'khor bshad bya ste/ /gru bzhi pa la sgo bzhi pa//ka ba brgyad dang yang dag ldan/ /rta babs bzhi dang rab ldan zhing / /them pa dang ni sgo khyud ldan/ /de yi dbus su 'khor lo ni/ /dkyil 'khor pad+mar bri bya ste/ /rtsibs bzhi pa dang ldan pa la/ /lte ba'i dkyil 'khor ldan par bya/ /zhes gsungs pa ni 'di ltar sngar bstan pa'i rim pas sa byin gyis brlab pa la sogs pa rim pa ji lta ba bzhin du byas la/stegs bu khru drug pa brtsigs te/ dri dang ba'i rnam lnga la sogs pas legs par byugs nas thig gdab la/ de'i dbus su 'khor lo dmar po rtsibs bzhi dang ldan pa cig bri bar bya'o//de'i mu khyud ni pad+ma'i phreng bas yang dag par bskor zhing 'khor lo'i rtsibs kyi bar du ni bdud rtsi'i bum pa bzhi bri bar bya'o/ /de la 'khor lo ni 'od zer sna tshogs pa 'bar bas yongs su 'khor bar bya'o//de'i phyi rol du sgo bzhi dang rta babs dang sgo khyud dang sgo 'gram dang / ya phubs dang dra ba dang dra ba phyed pa dang mchod pa'i snam bu dang rin chen pha gu dang mda' yab la sogs pa'i rgyan thams cad kyis yongs su brgyan par bya ba nyid do//de yi dbus su gtso bo ni/ /phyag na rdo rje stobs chen ldan/ /phyag na rdo rje dril bu bsnams/ /zla ba rgyas pa'i zhal 'dzum bri/ /shar gyi rtsibs kyi steng du ni/ /mgon po mi bskyod bri bar bya/ /lho phyogs su ni rin chen bri/ /nub phyogs gzi brjid dpag med la//byang phyogs su ni gdon mi za/ /dpa' bo stobs chen bri bar bya/ /de bzhin gshegs pa thams cad ni/ /'khor los sgyur bar chas pa dang / /zla ba'i dkyil 'khor mdog 'dra zhing / /rgyan rnams kun gyis brgyan pa dang / / phyag ni mchog sbyin mi 'jigs skyabs/ /rdo rje skyil mo krung bzhugs bri/ /grwa yi phyogs ni thams cad du/ /de bzhin gdugs sogs bri bya ste/ /sgo rnams su ni sgo skyong ba/ /khros pa'i bzhin dang ldan pa bri/ /zhes pa la sogs pa 'di ltar 'khor lo'i lte ba la pad+ma 'dab ma brgyad pa'i steng du bcom ldan 'das phyag na rdo rje skabs 'dir sku mdog dkar po la phyag gnyis pa phyag g.yas pas rdo rje rtse lnga pa thugs kar bsnams shing /g.yon pas dril bu dkur 'dzin pa rgyan thams cad kyis brgyan pa bzhin shin tu 'dzum pa dang ldan pa bri'o//de'i shar phyogs kyi rtsibs la ni bcom ldan 'das mi bskyod pa sku mdog dkar po rgyan thams cad kyis brgyan pa'i ting nge 'dzin gyi phyag rgya dang ldan pa bri'o/ /lho phyogs kyi rtsibs la ni bcom ldan 'das rin chen 'byung ldan yang sku mdog dkar po la rgyan thams cad kyis brgyan pa phyag g.yon pa ting nge 'dzin du bsnol nas g.yas pa mchog sbyin du mdzad pa bri bar bya'o//nub phyogs kyi rtsibs su ni bcom ldan 'das gzi brjid dpag med sku mdog snga ma lta bu la phyag gnyis chos kyi 'khor lo bskor ba'i tshul du bri bar bya'o//byang phyogs su bcom ldan 'das gdon mi za bar grub pa sku mdog dang rgyan cha snga ma lta bu la phyag g.yon pa ting nge 'dzin du bsnol zhing g.yas pa skyabs sbyin mdzad pa'i phyag rgya dang ldan pa bri'o//'khor lo'i mtha' logs grwa bzhir ni sgeg mo dang / phreng ba ma dang / glu mkhan ma dang / gar mkhan ma dang / bdug pa ma dang / me tog ma dang / snang ba ma dang / dri chab ma dang brgyad bri bar bya'o/ /sgo bzhir ni lcags kyu dang / zhags pa dang /lcags sgrog dang / dril bu la sogs pa khro bo'i cha lugs su gnas pa bri bar bya ba nyid de/ de dag gi sa bon rnams ni snying po lnga'i dang po rnams las mtshon par bya'o/ /de nas rnal 'byor can nyid gzhug /sngags kyi lha rnams spyan drangs te/ dzaHhUM baM hoHb+ha ga bAn badzra e h+ye hi sa ma ya s+t+waM/ de nas gtso rnams byon pa dang / mchod pa'i tshogs ni rab byas te/ /'chi bdag sbrul gyis zin pa rnams/ /'chi bdag gzhom phyir gzhug par bya/ /zhes pa la sogs pa ni 'di ltar sems can thams cad kyi don du sems bskyed de//stong pa nyid bsgoms pa'i mthar rang gi snying ga'i sa bon las 'od zer spros pas bde bar gshegs pa 'khor dang bcas pa spyan drangs te/ rdo rje lcags kyu la sogs pa'i rnal 'byor dang / sngags dang phyag rgya rnams kyis dgug pa dang gzhug pa dang bcing ba dang dgyes pa rnams byas te/gzugs brnyan gyi lha dang gnyis su med par byas nas zhabs bsil la sogs pa drangs te/ phyag 'tshal ba dang sdig pa bshags pa la sogs pa'i yan lag bdun rnam par dag pa yongs su rdzogs par byas la/mchod pa rnam pa lngas yang dag par mchod par bya'o/ /de nas bdag nyid rdo rje 'dzin ma'i phyag rgyas zhugs la dge ba'i las rnams yang dag par bya ba ste/ de la sngags kyi don ni kye ma bcom ldan 'das rdo rje can bdag la dam tshig gis yongs su gzung du gsol zhes pa'o//de nas bdag nyid dang por rim pa ji lta ba bzhin du bde bar gshegs pa rnams la dbang yongs su mnos te/ gnang ba legs par blangs nas 'chi bdag gis nyen pa'am/ bsod nams dang skal ba chung ba'am/ye shes chen pos stong pa rnams dkyil 'khor du gzhug par bya ste/ de yang dang por/ rdo rje slob dpon dgongs su gsol/ /thog ma tha ma med pa nas/ /mi dge'i dbang du gyur pas na/ /lus kyi sdig pa'i las rnams bshags/ /zhes pa la sogs pa'i tshigs su bcad pas sdig pa bshags par bya'o//de bzhin du tshigs su bcad pa rnams kyis gsum la skyabs su 'gro ba dang / rdo rje theg pa la khas yang dag par 'ches pa la sogs pas byas te/ dar la sogs pas mig bkab nas gzhug par bya'o//badzra ma ya hUM/ rdo rje ti rin+ti ri bcing / /lag na rin chen thogs te gzhug /yang na me tog phreng ba ste/ /de ni dkyil 'khor nyid du dor/ /oM pra tIts+tsha badzra hUM/ de nas dam tshig sbyin par bya ste/ oM badzra sa ma ya hUM/ de nas 'dis gdong g.yogs dgrol bar bya'o//oM badzra hA s+yod g+ha Ta ya hUM/ de nas 'dis bsal bar bya'o/ /oM badzra pA sh+ya hoH/ zhes pa la sogs pa ni 'di ltar bdag khro bo ti ri n+ti ri'i rnal 'byor gyis phyag rgya sor mo rnams nang du bsnol la mthe bong gnyis bsgreng ste/sngar bzlas pa'i bum pa nas chu blangs la de'i bgegs bskrad par bya'o/ /de nas sngags dang pos ni dam tshig gi mna' bsgrag par bya'o/ /de nas sngags gnyis pas ni rin po che dang me tog la sogs pa dor bar bya'o/ /sngags gsum pas ni gdong g.yogs dgrol bar bya'o//sngags bzhi pas ni bsal bar byas la lha'i go rims ji lta ba bzhin du bstan par bya ba nyid do/ /de nas 'dis dbang bskur bar bya'o/ /oM bud+d+ha a b+hi Shiny+tsa oM/ /oM badzra a b+hi Shiny+tsa hUM/ oM rat+na a b+hi Shiny+tsa trAM/oM pad+ma a b+hi Shiny+tsa hrIH/ oM karma a b+hi Shiny+tsa aH/ de nas 'dis bum pa'i dbang bskur bar bya'o/ /oM bud+d+ha ka la sha a b+hi Shiny+tsa oM/ oM badzra ka la sha a b+hi Shiny+tsa hUM/ oM rat+na ka la sha a b+hi Shiny+tsa trAM/ /oM ka rma mA la a b+hi Shi ny+tsa aHhrIH/ oM karma ka la sha a b+hi Shi ny+tsa aH/de nas 'dis phreng ba'i dbang bskur bar bya'o/ /oM bud+d+ha mA la a b+hi Shiny+tsa oM/ oM badzra mA la a b+hi Shiny+tsa hUM/ oM rat+na mA la a b+hi Shiny+tsa trAM/ oM pad+ma mA la a b+hi Shiny+tsa hrIH/ oM karma mA la a b+hi Shiny+tsa aH/ oM bud+d+ha mu dra a b+hi Shiny+tsa oM/ oM badzra mu dra a b+hi Shiny+tsa hUM/ oM rat+na mu dra a b+hi Shiny+tsa trAM/ oM pad+ma mu dra a b+hi Shiny+tsa hrIH/ oM karma mu dra a b+hi Shiny+tsa aH/ oM bud+d+ha karma a b+hi Shiny+tsa oM/ oM badzra karma a b+hi Shiny+tsa hUM/ oM rat+na karma a b+hi Shiny+tsa trAM/ oM pad+ma karma a b+hi Shiny+tsa hrIH/ oM bi shwa karma a b+hi Shiny+tsa aH/oM badzra tsa kra a b+hi Shiny+tsa hUM b+h+rUM/ oM badzra tsa kra a d+hi pa ti s+t+waM a b+hi Shiny+tsa hUM/ oM badzra nA ma a b+hi Shiny+tsa hUM/ oM oM oM/ hUM hUM hUM/ trAM trAM trAM/ hrIHhrIHhrIH/ aHaHaH/ oM sarba ta thA ga ta d+ha ra Ni a b+hi Shiny+tsa oM/ oM badzra d+ha ra Ni a b+hi Shiny+tsa hUM/oM rat+na d+ha ra Ni a b+hi Shiny+tsa trAM/ oM pad+ma d+ha ra Ni a b+hi Shiny+tsa hrIH/ oM karma d+ha ra Ni a b+hi Shiny+tsa aH/ oM sarba ta thA ga ta gu h+ya a b+hi Shiny+tsa oM/ oM badzra gu h+ya a b+hi Shiny+tsa hUM/ oM rat+na gu h+ya a b+hi Shiny+tsa trAM/ oM pad+ma gu h+ya a b+hi Shiny+tsa aH/ oM pra dz+nyo pa ya sa ma yo ga a b+hi Shiny+tsa oM AHhUM/zhes pa la sogs pa'i sngags 'di ltar dbang bcu yongs su rdzogs par bskur bar gsungs te/ de la 'di ni bshad pa'i rgyud yin pa'i phyir dang / khyab par 'byung ba'i rdo rje'i ting nge 'dzin gyis dkyil 'khor thams cad du khyab par gsungs pa'i phyir 'di gsungs pa'i phyir 'di gsungs pa'i sngags dang rnal 'byor dang bya ba la sogs pa rnams ni rgyud kyi rgyal po chen po 'dir gsungs pa'i dkyil 'khor bcu gnyis po thams cad la khyab par bya ba nyid do//de la dang po ni bdag nyid rnam par snang mdzad dang /ngan song sbyong ba dang / rin chen tog dang / shAkya thub pa dang / me tog chen po rgyas pa la sogs pa'i rnal 'byor dang ldan par byas la/ slob ma'i dpral ba dang / lkog ma dang / snying ga dang / lte ba dang gsang ba'i gnas rnams su de dag gi sa bon dang /ting nge 'dzin gyis dbang bskur bar bya ste/ de ni bde bar gshegs pa'i dbang zhes bya ba'o/ /gnyis pa ni lo tsa nA dang / mA ma kI dang / gos dkar mo dang / sgrol ma rnams su bum pa lnga byin gyis brlabs la/spyi bo dang / dpral ba dang / rna ba g.yas dang / rna ba g.yon dang / ltag pa rnams su dbang bskur bar bya ste/ de dag ni bum pa'i dbang zhes bya'o/ /gsum pa ni mu tig dang gser dang / byi ru dang / rdo'i snying po la sogs pa'am/ yang na de dang rigs mthun pa'i shing 'bras la sogs pa'i phreng ba bde bar gshegs pa lnga'i snying po dang /rang gi lha'i snying po rnams zlos shing sbyin pa ste/ de dag ni phreng ba'i dbang zhes bya'o/ /bzhi pa ni bde bar gshegs pa lnga'i phyag rgya bcings la/ mig dang / rna ba dang /sna dang / kha dang / spyi bo rnams su dbang bskur bar bya ba ste/ de dag ni phyag rgya'i dbang zhes bya'o/ lnga pa ni lag tu rdo rje dang dril bu byin la/ oM khyod kyis dbus su rang song nas/ /sems can smin par bya ba'i phyir/ /bde bar gshegs pa'i bka' bzhin du//sangs rgyas chos kyi 'khor lo bskor/ /zhes pa la sogs pa'i tshigs su bcad pa lngas dbang bskur bar bya ste/ de dag ni las kyi dbang zhes bya'o/ /drug pa dang bdun pa ni gcig ste 'khor lo rin po che la sogs pa rin po che sna bdun gyis 'khor los sgyur ba'i rgyal po bzhin du dbang bskur bar bya ste/de dag ni 'khor los sgyur ba'i dbang zhes bya'o/ /brgyad pa ni bum pa'i dbang gi khongs su 'dus pa ste/ chu la sogs pa dbang bskur ba'i rjes la rang gi rigs dang mthun pa'i ming gdags par bya ba ni dpal che ge mo rdo rje zhes bya ba la sogs pas dbang bskur bar bya ba ste/de ni ming gi dbang zhes bya ba'o/ /de la de dag gi 'og tu gsungs pa'i yig 'bru bco lnga po ni sngags gsum po rnams la'ang bde bar gshegs pa dang / rdo rje dang rin po che dang /pad+ma dang / las lnga'i tshig mtshon par bya bar gsungs pa ste/ gong ma ji lta ba bzhin du bya ba'o/ /dgu pa ni rnam par mi rtog pa snang ba zhes bya ba la sogs pa gong du smos pa'i ting nge 'dzin rnams kyis snying ga'i thig le lnga la dbang bskur bar bya ba ste/de dag ni gzungs kyi dbang zhes bya ba'o/ /bcu pa ni gsang ba'i don gyi phyag rgya bcings la rang gis yongs su rig par bya ste/ mu tig lta bu'i thig le dkar po lngas gdong gi pad+mar gtang bar bya ba ste/ de ni gsang ba'i dbang zhes bya'o/ /bcu gcig pa ni thabs dang shes rab kyi phyag rgya mdzes pa bcings la ting nge 'dzin gyis bde ba chen po'i ngo bor rig par byas la/dbang bskur bar bya ba ste/ de ni thabs dang shes rab mnyam par sbyor ba'i dbang zhes bya'o/ /de nas 'dir ma gsungs na'ang gong du gsungs pa'i phyir 'dir bka'i dbang yang dran par bya ste/de dag gi rim pa dang rnal 'byor dang / tshigs su bcad pa la sogs pa dang / mtshan nyid bshad pa rnams ni tshig mangs pa'i skyon du 'gyur gyis dogs nas 'dir ma bris te/ dbang gi rim par blta bar bya'o/ /de nas dbang bskur nas tshe bsring ba'i rim pa 'di sbyin par bya'o//oM badzra A yu She b+h+rUM hUM AHzhes pa ni skabs 'dir dbang rnams rdzogs pa'i rjes la snying po de brgya rtsa brgyad la sogs pa'i grangs su sbyin par bya ba ste/ gzhan du ni ma yin no/ / de'i sgrub pa 'di yin te/ bcom ldan 'das rdo rje tshe zla ba'i 'od can zla ba'i dkyil 'khor la zhugs shing phyag gnyis pa la mi 'jigs pa dang mchog sbyin du mdzad pa las bdud rtsi 'dzag pa bri'o/ /de'i 'og tu sgrub pa po'i lag pa thal mo brkyang la gdong gyen du bcom ldan 'das la blta bar bris la mchod pa rnam pa lngas mchod de de'i spyan sngar 'bum bzlas par bya'o zhes pa ni 'di ltar 'dir gsungs pa'i dkyil 'khor ni rgyud gzhan las gsang sngags thams cad 'dus pa'i dkyil 'khor zhes gsungs te/tshegs chung bas rgyud kyi rgyal po 'di nyan pa dang bshad pa dang / sgrub pa la sogs pa'i gang zag rnams kyi don du gsungs pas tshe dpag med kyi bsgrub pa'i dkyil 'khor ni 'og nas ston par 'gyur bas de'i skabs su 'dir bshad pa rnams shes par bya zhing /'di ni dkyil 'khor thams cad kyi las bshad pa ste/ 'dir gsungs pa'i bris sku'ang 'og tu shes par bya'o/ /de la mi gang dag tshe bsgrub par 'dod pa la dang por rtsa ba'i yan lag bzhi dgos te/ bla na med pa'i byang chub kyi sems dang ldan pa dang /dam tshig dang sdom pa ma nyams pa dang / bla na med pa'i 'phags pa dkon mchog gsum la gus shing phyogs bzhi'i dge 'dun dang yid mthun pa dang / rnam par rtog pa shas chung ba'o/ /de dang ldan pa'i gang zag rnams kyis bcom ldan 'das tshe dang bsod nams dang ye shes dpag tu med pa'i dkyil 'khor 'dir zhugs la rim pa ji lta ba bzhin du dbang mnos nas/bla ma yongs su mnyes par byas la sbyin pa la sogs pa rgya chen por bya ste/ smon lam btab nas ras bal gsar pa la ga bur la sogs pa'i dris yongs su bsgos la tha ga mo bsnyen gnas la gnas pas dkyus su khru do pa zheng du khru phyed dang do btags te/ri mo mkhan bsnyen gnas la gnas par bya ba ni bcom ldan 'das rdo rje lta bu'i tshe ster bar byed pa tshe dang bsod nams dang ye shes dpag tu med pa zhes bya ba zla ba'i dkyil 'khor la bzhugs shing zla ba'i 'od dang ldan pa sku mdog dmar skya gsal zhing 'tsher ba dang /de bzhin gshegs pa'i cha lugs su bzhugs pa phyag g.yas pa skyabs mdzad kyi phyag rgya mdzad pa/g.yon pa mchog sbyin du brkyang ba'i rtse mo las ye shes kyi bdud rtsi 'o ma lta bu 'dzag pas sgrub pa po'i lag mthil du 'bab pa bri zhing / de'i g.yon phyogs su sgrub pa po'i lag pa g.yas brkyang ba g.yon pa phyag 'tshal ba bri'o//de'i mdun du me tog dang spos la sogs pa'i mchod pa'i tshogs ci rigs pa bri bar bya'o/ /de nas ri mo'i gzugs de rab tu gnas pa dang spyan dbye ba la sogs pa byas nas/ de mchod pa rgya chen po rnams kyis mchod nas de'i spyan sngar gong du gsungs pa'am/'og nas 'byung ba'i sngags 'bum bzlas par bya'o/ /de nas gnas dben par 'og nas 'byung ba'i dkyil 'khor ji lta ba bzhin du bris te/ mchod pa la sogs pas mchod cing gsang sngags khri bzlas par bya'o/ /de nas bdag nyid bcom ldan 'das tshe dpag med mngon par byang chub pa rnam pa lngas bskyed la/gsang sngags stong bzlas par bya'o/ /de nas yang dkyil 'khor bzhengs la sbyin sreg 'bum dang gtor ma rgya chen po sbyin pa la sogs pa byas nas dkyil 'khor dang bcom ldan 'das kyi spyan sngar yi ge brgya pa'i snying po khri'am stong du bzlas shing sdig pa ma lus pa bshags par bya ba nyid do//de nas zla ba nya ba dang mchod pa chen po byas la ba dmar ser gyi mar snod sar par bcug la/ rdo rje dang bcas pa'i lag pa g.yon pas mnan la/bcom ldan 'das rab tu sems zhing mtshan thog thag tu bzlas par bya'o/ /de nas dri mnam zhing sngon ma byung ba'i dri'i ngad ldang la rlangs pa'am du ba'am me byung ngam 'od zer ram me sgron nam 'od byung ngam/ de lta bu la sogs pa'i mtshan ma byung na mar me'am mar sar pa'am til mar ram chu'am 'o ma'am chang ngam khrag gam zhag gam klad pa'am sha'am gang yang rung ba la rab tu bsgrubs te/nang par sngar bsrung ba la sogs pa byas nas/ bdag nyid kyis sbyang ba la sogs pa byas te/btung ngam bza' bar bya'o zhes gsungs pa ni 'di ltar gong du smos pa'i cho ga rnams kyi mthar ji skad gsungs pa bzhin du gnas shin tu dben par dkyil 'khor bzhengs te/ mdun rol du bris sku bkram la ston zla ra ba'i nya la gza' phur bu skar ma rgyal gyi nyi ma nas brtsams nas ston zla 'bring po'i nya'i bar du bya ste/de la gser ram dngul lam zangs sam lcags la sogs pa'i snod gtsang ma lnga dkyil 'khor gyi zur bzhir dbus dang lngar gzhag go/ /bum pa 'o ma dang dri'i chus bkang zhing kha rgyan dang mgul chings su bcas pa lnga phyogs bzhi dbus su gzhag go//de bzhin du sa gzhi ba'i rnam lnga la sogs pas legs par byugs te/ me tog dri zhim pos bkram la gdugs dang bla re dang / rgyal mtshan dang / ba dan la sogs pa'ang yongs su bris la/bgegs bskrad pa la sogs pa byas te/ de la dbus kyi snod du ni ba dmar ser gyi mar bzhu ba dri ma dang ngar ba med pas dgang bar bya'o/ /shar phyogs kyi snod du ni mu tig dang dngul dang byang chub kyi sems dang / lhang tsher nag po dang / a ru ra rnam par rgyal ba dang / bye ma ka ra dang / a ren da'i sa bon dang / rkang mar dang / tsan+dan dkar po dang / ga phur la sogs pa srang re bar cha bsnyams la phye mar byas pas dgang bar bya'o/ /lho phyogs kyi snod du ni gser dang / rnam par snang mdzad dang /tsi tra ka'i rtsa ba dang / skar 'od dang / a ru ra 'jigs med dang / zhag dang / gze ma btsos pa'i khu ba dang / gi wang dang / gur gum dang / sbrang rtsi rnams srang re bar cha bsnyams la phye mar byas pas dgang bar bya'o/ /nub phyogs kyi snod du 'od dpag med dang /byi ru dang / a ru ra stobs chen dang / til nag po dang / klad pa dang / bu ram dang / tsan+dan dmar po dang / sa ta pa ri dang / rgya spos dang / shi lany+dza du rnams srang re bar cha bsnyams la phye mar byas pas snod bkang bar bya'o/ /byang phyogs kyi snod du ni rdo'i snying po dang /mi bskyod pa dang / 'gu ru tse'i ngar ba dang / tshil dang / gla rtsi dang / a ru ra rnam par 'dren byed dang / shing mngar dang / sbur len dang / sha dang / nim pa'i 'bras bu rnams srang re bar cha bsnyams la phye mar byas pas snod dgang bar bya'o//de la mar ni bre gang ngo / /de yang chu bre bzhi'i nang du bskol ba ste/ de ni mar gyi nying gu zhes brjod do/ /de la sman de dag 'thag pa ni bu mo lo brgyad lon pa rigs dang gzugs byad du ldan pa skyes pa dang ma phrad pas khrus legs par byas te/ dbang bskur ba nyi ma rtse shar ba dang kha shar phyogs su bltas nas gos dkar po bgos pas btags par bya'o//de nas phye mar gyur pa dang dar la sogs pas tshags nas btsags nas dgang bar bya'o/ /de nas mchod pa la sogs pa rgya chen por byas te/ sman rnams dang mar la ras dkar pos kha bcad nas mi dang ma phrad par sha dang chang dang sgog pa dang bud med la sogs pa spangs te/zas dkar gsum bza' zhing bcom ldan 'das tshe dang bsod nams dang ye shes dpag tu med pa'i snying po bcom ldan 'das rab tu sems zhing bzlas par bya'o//de bzhin du mchod pa rnam pa lngas ni nang nub thams cad du mchod cing rang nyid khrus la sogs pa'ang de bzhin du bya ba nyid do/ /de nas dri mnam pa sngar nyams su ma myong ba'i dri ngad ldang ba'am rlangs pa'am du ba'am/ me 'bar ba'am 'od dam snang ba'am/snod 'gul ba'am mar 'khol lam sa g.yo 'am gzhan yang de dag la sogs pa'i mtshan ma bdag nyid kyis mngon sum du mthong ba ni shin tu khyad par du gyur pa'o/ /gzhan yang lus rngul ba'am/ shin tu 'jigs pa bag tsha ba spu ldang ba dang /gnas kyi phyi rol rnams su sgra khyad par can drag pa la sogs pa'ang rtags 'bring du bshad pa yin pas 'jigs pa'i rnam par rtog pa la sogs pa mi bya bar bcom ldan 'das rab tu sems pas dga' ba dang bcas pa'i spro ba chen po bskyed par bya'o//gzhan yang bdag gi rmi lam du/ /ma 'am sring mo'am sru mo'am bram ze'am khye'u gtsang ma'am rgyal rigs sam/ mkhan po'am/ slob dpon nam/ bla ma la sogs pas mar ram/ zhun mar ram/ chang ngam 'o ma'am zho 'am kha zas kyi rnam pa ro dang ldan pa byin pa bdag gis zos sam/'thungs pa rmi na ni mtshan ma tha mar shes par bya'o/ /de nas ston zla 'bring po'i zla ba nya ba'i skabs su bab pa dang bdag nyid khrus legs par byas te mchod pas yongs su mchod nas bsrung ba la sogs pa byas la mtshan thog thag de bzhin gshegs pa tshe dpag tu med pa'i snying po lag pa g.yon pas mar gyi steng du rdo rje dang bcas pas mnan la nam langs kyi bar du bzlas la nam langs pa dang bdag gis mar de nyid btung bar bya'o//'thungs nas kyang mchod pa'i tshogs kyis yongs su mchod la bde bar gshegs pa rnams gshegs su gsol bar bya ba nyid do//de nas mtshan ma ji ltar bzhin du byung ba na/ nam nyi ma dang zla ba gnas kyi bar du tshe ring zhing rdo rje dang mtshungs par 'gyur ro/ /tha mas ni tha ma 'grub par 'gyur bas 'di la the tshom med do//mtshan ma ma byung na'ang 'jig rten na nad med lob skyen lus la skra dkar dang gnyer ma med par 'gyur/ lus brtan zhing tshe lo brgya thub par 'gyur ro/ /gzhan yang zhi ba dang / rgyas pa dang dbang la sogs pa'i las rnams brtag mi dgos par 'gyur te 'di la the tshom med do zhes gsungs pa ni/de'i phan yon yongs su gsungs pa ste/ de la gong du gsungs pa'i mtshan ma me 'bar ba dang / 'od byung ba dang du ba byung ba na mar de nyid 'thungs la gzhan sman gyi phye ma rnams ni bsod nams chung ba dang /nad mang ba dang / tshe thung ba la sogs pa'i sems can rnams la sbyin par bya'o/ /de nas ni nges par 'jig rten na zla ba dang nyi ma gnas kyi bar du de srid du gnas par 'gyur ba ni nges pa'o/ /tha mas ni tha ma 'grub po zhes pa ni me 'bar ba la sogs pa'i mtshan ma mngon sum du ma byung na ba spu ldang ba dang /bag tsha ba la sogs pa byung bas ni 'jig rten du gnas kyi bar du dus ma yin par mi 'chi ba dang / mthu dang stobs dang dbang phyug la sogs pa snga na med pa skyed par byed pa nyid do//de nas rmi lam gyi mtshan ma rnams byung bas kyang 'jig rten du gnas kyi bar du rims dang nad dang dug dang mtshon la sogs pas mi tshugs pa dang / mdog bzhin mdangs dang ldan pa dang / skra dkar dang gnyer ma med pa dang / rgas sra ba dang / rta ltar mgyogs pa dang /shes rab che ba dang / mi rnams kyi yid du 'ong ba dang / zhi ba'i las dang / rgyas pa dang / dbang dang / mngon spyod la sogs pa'ang nges par 'grub par 'gyur ro/ /de'i rnam par dbye ba ni 'di ltar rtags dang mtshan ma de rab kyi tshad du byung na ni mar gcig pu tsam btung bar bya zhing /gal te rtags 'bring po dang tha ma byung ba na ni mar de'i sum cha dang bsnyams pa'i 'bras bu gsum dang / mar de'i sum cha dang bsnyams pa'i bu ram dang / mar de'i sum cha dang bsnyams pa'i tsha ba gsum dang / sngar gyi sman gyi phye ma rnams yongs su bsres nas ri lu a shwa ka'i 'bras bu tsam byas te/lo gcig gi bar du nang re lto stong la zos na tshe lo brgya bdun cu thub cing sa bon rab tu 'phel lus kyi sha rnams byis pa gzhon pa dang 'dra bar rgyas zhing 'jam par 'gyur ba dang / gzhan yang bud med la grangs dpag tu med pa nus pa dang /nyam shed dang ldan pa/ stobs dang ldan pa dang pad+mo'i mdog ltar 'gyur ba dang / dngos grub la sogs pa mang po 'grub par 'gyur ba ni the tshom mi za ste/ bdag gis mngon sum mthong ba'i phyir ro//gzhan yang so brje ba dang / sen mo brje ba dang / dri gla rtsi la sogs pa'i dri dang ldan pa dang / rkang mgyogs kyi dngos grub thob par 'gyur ba dang mi ma yin pa dang / yi dags dang / 'dre dang / gdon dang / klu rnams dang / sha za dang / srin po rnams kyis lha'i dbang po brgya byin lta bur mthong zhing de la dngos grub la sogs pa ster ba dang rang rang gi gzugs ston pa dang /phyag 'tshal ba la sogs pa'i bsnyen bkur byed pa dang lus 'od 'dom gang dang ldan par 'gyur ba ste/ de dag ni bcom ldan 'das kyis kyang the tshom mi za ba'i tshig lan gnyis su gsungs na 'di ni nges par 'grub par 'gyur ba kho na yin pas 'bad par bya ba nyid do//de nas rgyal po chen po bzhis bcom ldan 'das phyag na rdo rje la phyag btsal nas 'di skad ces gsol to/ /bcom ldan 'das bdag cag kyang sems can thams cad kyi don dang phan pa dang bde ba'i slad du rang rang gi snying po bshad par 'tshal gyis bcom ldan 'das kyis bka' stsal du gsol/rdo rje 'dzin pa bka' stsal du gsol/ rgyal po chen po dag legs kyis shod cig dang ngas kyang rjes su yi rang zhing byin gyis brlab par bya'o zhes gsungs pa ni 'dir rnam pa gsum du go bar bya ste/de la gcig ni rgyal po chen po bzhi la sogs pa 'jig rten pa'i lha rnams kyis dam pa'i chos la bsnyen bkur bya ba'i phyir rang rang gi snying po phul ba'o//gcig ni bcom ldan 'das phyag na rdo rje'i byin gyi rlabs kyis rnal 'byor pa la 'jig rten pa'i dngos grub phun sum tshogs par bya ba'i phyir de dag gis snying po phul nas de dag gi dkyil 'khor gsungs pa'o/ /gcig ni dam pa'i chos 'di spyod pa dang bde bar gshegs pa'i bstan pa rab tu brtan par bya ba'i phyir srung ma'i tshogs su yang dag par bkod pa yin par shes par bya ste/de nyid 'dir tshe bsgrub pa la bgegs kyi tshogs bar gcod byed pas na de zhi bar bya ba'i phyir 'jig rten pa'i dkyil 'khor skabs 'dir gsungs pa nyid do//de la bcom ldan 'das bdag cag kyang sems can thams cad la phan pa dang bde ba'i slad du zhes pa ni 'jig rten na de dag gi 'khor rnams kyi gtso bor gyur pa rnams la dkyil 'khor 'dir zhugs pa dpon po'am rje bo lta bur mthong ba'i phyir 'tshe ba la sogs pa med par 'gyur ba ni phan pa dang bde ba zhes bya'o//rang gi snying po bshad par 'tshal gyis bcom ldan 'das kyis bka' stsal du gsol zhes pa ni rnam pa gnyis te/ de la gcig ni spobs pa bskyed du gsol zhes pa'o/ / gcig ni bdag cag gi snying po la bcom ldan 'das kyis byin gyis brlab cing dkyil 'khor gsung du gsol zhes par sbyar ro/ /de la gang dag 'di skad du rgyal po chen po rnams kyi snying po byin gyis brlabs pa la dgongs pa ji lta bu zhig yod ce na/ de ni 'di ltar 'di 'jig rten pa'i snying po rnam par ma dag pa'i phyir de bzhin gshegs pa'i snying po dang rnal 'byor thabs cig tu byar mi rung ste/dam tshig nyams par 'gyur ba'i phyir ro/ de'i phyir de dag gi snying po bcom ldan 'das phyag na rdo rjes yang dag par byin gyis brlabs pa dang de dag gi dkyil 'khor yongs su gsungs pa ste/dper na chu ma bskol ba dang / mar khu 'drer mi btub pa bzhin no/ /rgyal po dag shod cig dang ngas kyang rjes su yi rang zhing byin gyis brlab par bya'o zhes gsungs pa ni de bzhin du mdzad pa yin par shes par bya ste gnang ba byin pa nyid do//de nas gnod sbyin gyi rgyal po lus ngan pos bcom ldan 'das kyis gnang zhing rjes su yi rang ste byin gyis brlabs pas rang gi snying ga nas phyung ngo / oM b+hiH// de nas dri za'i rgyal po yul 'khor srung gis snying po 'di bshad do//oM d+hi/ de nas grul bum gyi rgyal po 'phags skyes pos kyang rang gi snying po 'di bshad do/ /oM b+hi/ de nas klu'i rgyal po mig mi bzang gis kyang rang gi snying po 'di phyung ngo / /oM k+Sha zhes pa la sogs pa ni 'di ltar bcom ldan 'das phyag na rdo rjes rgyal po bzhi'i snying po yongs su dag par byin gyis brlabs shing gnang ba byin pas rgyal po bzhis snying po phul ba ste de la gnod sbyin gyi rgyal po lus ngan pos dang por smos pa'i tshig ni bcom ldan 'das phyag na rdo rje ni gnod sbyin rnams 'dul ba'i phyir gnod sbyin gyi cha lugs su bzhugs pas gnod sbyin gyi rgyal po lus ngan po rang nyid gtso bo la spobs pa bskyed nas dang por zhugs pa yin pa'i phyir gnod sbyin gyi rgyal po lus ngan po zhes dang la smos pa'o//bcom ldan 'das kyis gnang zhing zhes bya ba la sogs pa ni gong ma la bsnyegs so//rang gi snying po ni rang skyed par byed pa dang rang gi ming dang mthun pa'i phyir rang gi snying po zhes pa dang / de la snying po ni skabs 'dir srog la bya ste/ srog gi snying po phul ba nyid do/ /de bzhin du dri za'i rgyal po yul 'khor srung dang / grul bum gyi rgyal po 'phags skyes po dang /klu'i rgyal po mig mi bzang rnams kyis kyang rang rang skyed par byed pa dang / rang rang gi ming dang mthun pa'i phyir dang / rang rang gi srog gi snying po rnams phul ba ni d+hi dang / b+hi dang / k+Sha rnams su shes par bya'o/ /de nas dkyil 'khor bshad de/gru bzhi pa la sgo bzhi pa/ /dkyil 'khor lnga ni brgyan pa ste/ /de yi dbus su gtso bo ni/ /phyag na rdo rje 'gying bcas bri/ /g.yon phyogs su ni lus ngan po/ /lag na ne'u le be con thogs/ /rin chen rgyan gyis brgyan pa dang / /sbom zhing seng ge'i gdan la bzhugs//gser mdog gzi brjid ldan pa bri/ /mkhas pas bum pa bzang la sogs/ /rin chen chu bo 'bab pa bri/ /mdun du gnas srung de nyid ni/ pi wang byed la brtson pa dang / /mdzes pa'i kha dog dkar po ste/ /rgyan rnams kun gyis brgyan pa bri//g.yas phyogs su ni lus 'phags po/ /ral gri lag na thogs pa dang / /kha dog sngon po 'od 'bar bri/ /nub phyogs su ni mig mi bzang / /rdo rje zhags pa 'dzin pa'i mchog/ /sbrul mgo bdun gyis bskor ba la/ /mig kyang shin tu 'bur ba la//g.yas su cung zad lta ba bri/ /sgo yi phyogs ni thams cad du/ /sgo ba rnams kyang de bzhin no/ /zhes gsungs pa ni de dag gi dkyil 'khor yang dag par gsungs pa ste/ de la/ gru bzhi pa la sgo bzhi pa/ /dkyil 'khor lnga ni brgyan pa ste/ /zhes pa ni 'di ltar gnas yid du 'ong ba rnams su stegs bu khru bcu drug pa brtsigs la thig legs par gdab ste/gru bzhi dang ldan pa ka ba brgyad kyis nye bar mdzes pa/ dra ba dang dra ba phyed pa dang rin po che pha gu dang / do shal dang mda' yab dang rta babs la sogs pas legs par brgyan pa de'i dbus su pad+ma dmar po 'dab ma brgyad pa cig bri bar bya'o//de'i mu khyud la rdo rje phreng bar bya zhing phyogs bzhir rin po che'i phreng bas bskor bar bya'o/ /de'i dbus su bcom ldan 'das dpal phyag na rdo rje sku mdog ljang nag la dbu skra kham par 'khyil bas stod khebs pa cod pan la sogs pa rgyan thams cad kyis brgyan pa/phyag g.yas pas rdo rje rtse lnga pa bsnams pa thugs kar bsgreng ba la g.yon pa dkur dril bu 'dzin pa/ sems dpa'i skyil mo krung du bzhugs shing mche ba cung zad gtsigs pa spyan rgyas par dmar ba nga rgyal chen po dang bcas pa'i 'gying bag dang ldan par bri bar bya'o//de'i pad+ma'i 'dab ma la shar la sogs par rim pa ji lta ba bzhin sgeg mo dang phreng ba ma dang / glu mkhan ma dang / gar mkhan ma dang / bdug pa ma dang / me tog ma dang /snang ba ma dang / dri chab ma la sogs pa bri bar bya'o/ /de'i shar phyogs kyi gling la pad+ma 'dab ma brgyad pa'i steng du yul 'khor srung kha dog dkar po la phyag gnyis pa rgyan thams cad kyis brgyan pa lag pa gnyis kyis gser gyi pi wang bsgreng ba shin tu mdzes pa'i bzhin dang ldan pa bri'o//lho phyogs kyi gling du ni 'phags skyes po kha dog sngon po la phyag gnyis pa rgyan thams cad kyis brgyan zhing mig cung zad rgyas shing mche ba cung zad gtsigs pa lag pa g.yas ral gri 'bar ba 'dzin pa/ g.yon pa dku ru me tog ut+pal 'dzin pa bri'o/ /nub phyogs su ni mig mi bzang kha dog dmar po la phyag gnyis pa/ mig dmar po shin tu 'bur ba mgo la sbrul mgo bdun gyis bskor zhing rgyan thams cad kyis brgyan pa lag pa g.yas pas rdo rje dang ldan zhing zhags pa 'dzin pa/g.yon pas me tog pad+ma dkur 'dzin pa bri bar bya'o/ /byang phyogs su ni rnam thos sras kha dog ser po la lag pa gnyis pa gsus pa zlum pa sbom zhing rags pa rgyan thams cad kyis brgyan pa mig 'bur ba lag pa g.yas pas rin po che'i dbyug to 'dzin pa g.yon pas ne'u le'i rgyal pa rin po ches bkang ba 'dzin pa bri bar bya'o//de'i g.yas g.yon gnyis su bum pa bzang po dang / gang ba bzang po gnyis kyis rin po che'i rgyal pa nas rin po che ldugs pa bri bar bya'o/ /de'i mtha' ma mu khyud ni sna tshogs pad+mar bskor bar bya zhing zur bzhir ni bum pa rgyan dang chas pa bri bar bya'o//de'i sgo bzhir ni rdo rje lcags kyu la sogs pa sgo skyong ba bzhi bri bar bya ba nyid do/ de dag gi sa bon ni rang rang gi snying po las shes par bya'o/ /de nas rdo rje'i phyag rgya zhes bya bas sngags mkhan de ni zhugs pa dang /bcom ldan 'das ni spyan drangs te/ de nas rgyal po spyan drangs so/ /spyan drangs nas ni mkhas pas mchod/ /cho ga bzhin du mchod pa 'bul/ /de nas mkhas pas sngags 'di dang / /rdo rje 'dzin pa'i phyag rgya 'dis/ /slob ma rgyal rigs rje'u rigs sam//bram ze la sogs de bzhin te/ /me tog rin chen thogs te gzhug/ /oM badzra sa ma ye hUM/ zhes gsungs pa ni 'di ltar dang por bdag nyid khrus la sogs pa byas la gong du bsnyen pa byas pa'i bum pa lnga la yul 'khor srung la sogs pa rang rang gi snying po stong ngam brgya rtsa brgyad du phyin par bzlas te/rgyan dang chas pas brgyan pa bzhi grwa bzhir gzhag par bya'o/ /bum pa gcig ni khro bo bgegs mthar byed kyi sngags kyis btab la gzhag par bya'o/ /de nas rang gi sa bon las 'od zer spros pas bcom ldan 'das rig pa'i tshogs dang bcas pa spyan drangs la zhabs bsil la sogs pas mchod de rdo rje lcags kyu la sogs pa'i rnal 'byor gyis 'gugs pa la sogs pa byas la gnyis su med par bya'o//de bzhin du rgyal po bzhi yang spyan drangs la gnyis su med par byas nas mchod pa'i tshogs kyis mchod la/bdag nyid gong du gsungs pa'i rdo rje 'dzin ma'i phyag rgya bcings la rim pa ji lta ba bzhin du dbang mnos la gnang ba legs par thob pa dang slob ma rgyal rigs sam rje'u rigs la sogs pa dbang dang ldan zhing stobs dang 'byor pa dang ldan par 'dod pa dag dbang bskur bar bya ba ste/de la slob ma des rgyal po chen po bzhi dang phyag na rdo rje la yon dbul bar bya ba ni/ rin chen me tog thogs te gzhug /ces pa ste/ de la 'byor pa dang ldan pas ni gser la sogs pa'i rin po che dbul ba dang /'byor pa dang mi ldan pa rnams kyis ni me tog la sogs thogs la gzhug par bya'o/ /de yang ras la sogs pas gdong dgab pa la sogs pa ni gong du gsungs pa las shes par bya'o/ /oM badzra sa ma ya hUM zhes pa ni gzhug par bya ba'i sngags so/ /de ni me tog dang rin po che 'dir dor bar bya'o//oM badzra pra tits+tsha baM ma hod ta ma/ gang la bab pa'i rgyal po ni/ /'grub 'gyur de las gzhan du min/ /de nas grwa na bzhag pa yi/ /bum pa bzhis ni dbang bskur te/ /lnga pa phyag na rdo rje yi/ /phyag rgyas de yi dbang bskur bya//de la sogs pa'i go rims kyis/ /dkyil 'khor nyid du dbang bskur na/ /zhes bya ba la sogs pa gsungs pa ni dbang bskur ba'i rim pa gsungs pa ste/ de la dang por me tog dor ba dang / rgyal po chen po bzhi gang la phog pa de dag gi dngos grub tu 'gyur ba las gzhan du 'grub par mi 'gyur ba pra dbab pa'o//de nas zur bzhir gzhag pa'i bum pa rang gi mtshan mas mtshan pa bzhis rang rang gi snying po dang bcas pas dbang bskur ba ni so so'i rnal 'byor dang ldan pas so/ /de nas bcom ldan 'das phyag na rdo rje'i phyag rgya gong du gsungs pa yin pas dbang bskur bar bya ba ni rgyas gdab pa dang /dam tshig dang ldan par bya ba dang / brtan par bya ba'i phyir dbang bskur bar bya'o/ /de la sogs pa'i go rims kyis/ /dkyil 'khor nyid du dbang bskur na/ /zhes gsungs pa ni rgyal po chen po bzhi'i phyag rgya pi wang la sogs pas dbang bskur ba dang /mda' gzhu dang / go cha dang / bkra shis kyi rdzas brgyad dang / 'khor lo rin po che la sogs pa dbang bskur bar bya ba ste/ bde bar gshegs pa'i dbang la sogs pa ni ma gtogs so//rgyal po ma yin rgyal por 'gyur/ /rgyal po yin na che bar 'gyur/ /'dzam bu'i gling dbang dpal dang ldan/ /lan bzhir dbang ni bskur ba dang / /lan bzhir gzhug pa byas nas ni/ /gling bzhi pa la dbang ba dang / /de la rdo rje 'dzin rgyal bdag/ /bu sdug bzhin du bskyang bar bya//bdag cag rgyal po chen po bzhi'i/ /'bangs dang 'khor du bcas pa dang / /pho brang nang gi 'khor bcas pa/ /rgyal po rtag tu bskyang bar bgyi/ /zhes gsungs pa ni de'i phan yon yang dag par gsungs pa ste/ de la rgyal po chen po bzhi'i dkyil 'khor 'dir zhugs shing dbang rim pa bzhin du mnos na rgyal po chen por 'gyur ba dang /rgyal po ma yin pa rnams kyang rgyal por 'gyur ba dang / gzhan yang mthu dang ldan pa dang / nus pa dang ldan pa dang / dbang phyug dang ldan pa dang / longs spyod dang ldan par 'gyur ba nyid do//lan bzhir dbang ni bskur ba dang / /zhes pa la sogs pa ni lan bzhir dbang bskur zhing dkyil 'khor du bcug na gling bzhi la dbang ba'i 'khor los sgyur ba'i rgyal por 'gyur ba ste/ de ni ma 'ongs pa'i dus la dgongs pa'o/ de la rdo rje 'dzin rgyal bdag//bu sdug bzhin du bskyang bar bya/ /zhes gsungs pa ni spro ba yang dag par bskyed pa'i tshig go/ /bdag cag rgyal po chen po bzhis/ /zhes pa la sogs pa ni de skad gsungs pa de bzhin du yang dag par skyong ba ste/ nges pa kho na'o/ /de gnod gzhan gyi dpung tshogs dang //de yi nad dang 'chi bdag dang / /'jigs dang mu ge la sogs pa'i/ /gnod pa rnams ni gzhom par bgyi/ /lus ngan pos ni rgyas par bgyid/ /yul 'khor srung gis zhi bar bgyi/ /phyugs dang gnyen bcas dus min pa'i/ / 'chi bdag lus 'phags po yis 'joms/ /mig mi bzang gis bkra shis shing / /mu ge la sogs rnam par 'joms/ /'di ni bdag gi de yi ni/ /re dang bsam pa kun bgyi ste/ /ci ste nges pa ma lags na/ /phyag na rdo rje bslus gyur cig/ /ces pa la sogs pa gsungs pa ni 'dir las su bya ba yang dag par gsungs pa ste/de la rgyal po chen po bzhis rgyal po chen po bzhi'i dkyil 'khor du zhugs pa'i mi de la rim gro yongs su byed pa ni de la gnod par byed pa'i dgra'i tshogs rnams ma rungs par byed pa dang / chu dang me la sogs pa'i dus ma yin par 'chi ba las zlog par byed pa dang /gzhan yang bkra mi shis pa'i tshogs thams cad ma lus par 'joms par byed pa'o/ /lus ngan pos ni rgyas par bgyid/ /ces pa la sogs pa ni phrin las rnam pa bzhis yongs su sbyong ba ste/ de la rnam thos sras ni gnod sbyin gyi gter gyi bdag po yin pa'i phyir ni rdzas dang nor rnams spel bar byed pa'o/ /yul 'khor srung ni dri za'i tshogs kyis zhi ba'i las byed pa'i phyir nad dang mu ge la sogs pa zhi bar byed pa'o/ /'phags skyes po ni grul bum gyi tshogs kyis drag po'i las byed pa'i phyir phyi rol gyi dpung dang dgra dang 'chi bdag dang bgegs la sogs pa 'joms par byed do//mig mi bzang ni klu rnams kyis dbang du sdud pa dang lo tog smin par byed pa'i phyir dus rtag tu bkra shis pa dang / rgyal po la sogs pa bdag gi dbang du 'gyur ba dang /char la sogs pa 'bebs par byed pa nyid de/ de la sogs pa bsam pa thams cad nges par 'grub pa ste/ 'jig rten pa'i lha yin pas dngos grub nye ba nyid do/ /ci ste nges pa ma lags na/ /phyag na rdo rje bslus gyur cig /ces pa ni rang rang gis bcom ldan 'das phyag na rdo rje dpang por gsol te mna' bskyal ba yin par shes par bya ste/ de ni mna' dam pos yang dag par dam bcas pas na nges par 'grub par shes par bya zhing bstod pa la sogs 'di nyid kyi sgrub thabs su blta bar bya'o//de nas phyogs skyong ba bcu rnams kyis bcom ldan 'das phyag na rdo rje la phyag 'tshal nas 'di skad ces gsol to/ /bcom ldan 'das bdag cag rnams kyang sems can thams cad la phan pa dang bde ba'i slad du rang rang gi snying po dbul bar 'tshal gyis bcom ldan 'das kyis byin gyis brlab tu gsol zhes pa ni gong du gsungs pa las shes par bya ste/de dag rnams kyi snying po ni rnam par ma dag pa yin pa'i phyir dang / nus pa khyad par can du bya ba'i phyir byin gyis brlab tu gsol zhes par sbyar ro//bcom ldan 'das kyis bka' stsal pa/ 'jig rten skyong ba rnams legs so legs so/ /legs kyis ngas byin gyi rlabs kyis phul cig ces gsungs pa ni yang dag par byin gyis brlabs nas rnam par dag par byas nas gnang bar byin pa'o//de nas 'byung po rnams kyi bdag po dbang ldan la sogs pas rang rang gi snying po phul ba/ oM I/ oM I/ oM A/ oM ya/ oM rA/ oM baM/ oM ya/ oM ku/ oM A/ oM b+ha/ zhes pa la sogs pa'i snying po ni rang rang gi snying po rnams phul ba ste/ de la dang po ni dbang ldan chen po bde byed kyi sa bon no//gnyis pa ni brgya byin gyi'o/ /gsum pa ni me lha'i 'o/ /bzhi pa ni gshin rje'i 'o/ /lnga pa ni srin po'i 'o/ /drug pa ni chu lha'i 'o/ /bdun pa ni rlung lha'i 'o/ /brgyad pa ni gnod sbyin gyi'o/ /dgu pa ni nyi ma'i 'o/ /bcu pa ni sa bdag gi ste/de dag ni skyed pa'i sa bon du yang shes par bya'o/ /de nas de dag gi dkyil 'khor bshad de/ dkyil 'khor snga ma bzhin bris la/ mgon po dbus su de bzhin gzhag /phyogs skyong rang gi phyogs gnas su/ /gzhag bya mdun du nyi ma dang //sa bdag phag gi gzugs su gzhag/ /sgo rnams kyang ni de bzhin no/ /zhes gsungs pa ni dkyil 'khor yongs su gsungs pa ste/ de la dang por sa phyogs yid du 'ong ba rnams su sa byin gyis brlabs pa la sogs pa byas la/ stegs bu khru nyi shu rtsa bzhi brtsigs te/thig la sogs pa legs par btab nas dkyil 'khor bri bar bya ste/ de la dbus su ni pad+ma dmar po snying po dang ze'u 'brur ldan pa'i 'dab ma brgyad pa cig bri bar bya'o/ /de'i mtha' ma'i mu khyud ni rdo rje ra bas bskor te/ khru bzhi pa'i rnam par gcad par bya'o//de'i dbus su ni bcom ldan 'das dpal phyag na rdo rje gong du smos pa lta bu'i cha byad dang ldan pa bri bar bya zhing / pad+ma 'dab ma brgyad la ni sgeg mo la sogs pa snga ma bzhin du dgod par bya'o/ /de'i grwa bzhir ni bum pa dkar po rgyan dang bcas pa bzhi bri bar bya'o//de'i phyi rol du snam bu gru bzhi pa cig la pad+ma'i gdan la shar phyogs su ni brgya byin kha dog dkar po dbu rgyan rtse gcig pas brgyan cing glang po che la zhon pa lag pa g.yas pa na rdo rje gdengs pa thogs pa g.yon pa dku ru btsugs pa bri bar bya'o/ / lho phyogs su ni gshin rje kha dog sngon po la bzhin khros pa skra kham pa gyen du brdzes pa ma he la zhon pa lag pa g.yas pas thod pa dang bcas pa'i dbyug pa 'dzin pa g.yon sdigs mdzub byed pa bri bar bya'o/ /nub phyogs su ni chu lha kha dog dkar po la sbrul mgo bdun gyis brgyan pa bzhin 'dzum pa chu srin gyi steng du gnas shing lag pa g.yas pas sbrul gyi zhags pa 'dzin pa g.yon pas pad+ma 'dzin pa bri bar bya'o//byang phyogs su ni gnod sbyin kha dog ser po bzhin 'bar ba gsus pa che ba rta'am seng ge'i steng na lag pa g.yas pas rin po che dang ldan pa'i dbyug tho 'dzin pa/g.yon pas ne'u le'i rkyal pa 'dzin pa bri bar bya'o/ /byang shar du ni bde byed kha dog thal skya la bzhin 'dzum pa ral pa'i cod pan can spyi bo la zla ba phyed pas brgyan pa/ glang khyu mchog la zhon pa lag pa g.yas pas mtshon rtse gsum pa 'dzin pa g.yon pas ril ba 'dzin pa bri'o//shar lho'i mtshams su ni me lha kha dog dmar ser du 'dug pa shin tu rid pa ral pa'i thor tshugs can ra skyes la zhon pa lag pa g.yas pas dgang gzar dang phreng ba 'dzin pa g.yon pa blugs gzar dang ril ba 'dzin pa bri bar bya'o//lho nub mtshams su ni srin po mi ro la zhon pa kha dog dmar nag tu 'dug pa bzhin khros pa lag pa g.yas pas ral gri 'dzin pa g.yon pas mi mgo 'dzin pa bri bar bya'o/ /nub byang mtshams su ni rlung lha kha dog dud ka la sha ba'i steng na zhon pa lag pa g.yas pas ba dan 'dzin pa g.yon pa rlung gi rkyal pa 'dzin pa bri bar bya'o//brgya byin gyi mdun du ni nyi ma rta la zhon pa kha dog dmar po la lag pa g.yas pas pad+ma 'dzin pa g.yon pa dku ru btsugs pa bri bar bya'o/ /chu lha'i mdun du ni sa bdag kha dog nag po la phag pa'i steng na zhon pa/lag pa g.yas pas lcags kyu 'dzin pa g.yon pa bum pa 'dzin pa bri bar bya'o/ /sgo rnams su ni lcags kyu la sogs pa rang rang gi kha dog dang phyag mtshan gyis mtshan pa bri bar bya'o/ /de bzhin du sgo la sogs pa'i rta babs dang /dra ba dang dra ba phyed pa la sogs pa ni gong du smos pa las shes par byas la/ gong du bsnyen pa byas pa'i rnam par rgyal ba'i bum pa dang / phyogs skyong bcu rnams kyi bum pa la pad+ma'i steng du rang rang gi phyag rgya rnams bris pa dri dang sman dang 'o ma la sogs pas brgyan pa bcu gzhag par bya ba nyid do//de nas spyan drangs de kun la/ /mchod pa kun gyis mchod par bya/ /de nas bdag nyid bzhugs nas kyang / /phyogs skyong rang gi sngags btab pa'i/ /bum pa rnams kyis dbang bskur ro/ /zhes gsungs pa ni dbang bskur bar gsungs pa ste/de la dang por bsnyen pa la sogs pa'i cho ga rim pa bzhin du byas te/ bdag nyid khrus legs par byas la gos dkar po gon te/ mchod pa dang gtor ma'i tshogs bzang por bshams nas rang gi sa bon las 'od zer spros pas bcom ldan 'das rig pa'i tshogs dang bcas pa spyan drangs la ar+g+ha la sogs pas zhabs bsil te/lcags kyu la sogs pa'i rnal 'byor dang sngags dang phyag rgyas gnyis su med par byas la mchod pa'i tshogs kyis mchod par bya'o/ /de bzhin du brgya byin la sogs pa yang gnyis su med par byas la mchod pa'i tshogs kyis mchod nas/bdag nyid dang po'i phyag rgya bcas la dkyil 'khor du zhugs te/ rim pa ji lta ba bzhin du dbang mnos la/ gnang ba legs par thob pas slob ma rnams dbang bskur bar byas te/ de la dang por ras la sogs pas mig bkab pa dang rnam par rgyal ba'i bum pa nas chu blangs pas de'i bgegs bskrad par bya'o//de nas gong du gsungs pa bzhin du me tog dang rin po che la sogs pa thogs te/ bcom ldan 'das dang phyogs skyong rnams la skyabs su gsol ba byas nas oM badzra di kA pA la sa ma ye hUM zhes pa'i sngags kyis gzhug par bya'o//oM badzra di ka pA la pra tits+tsha ho zhes pas me tog dor bar bya'o/ /de nas me tog blangs la gang la bab pa'i mgon po de 'grub par 'gyur ro zhes pa'i tshig brjod de spyi bor bcings nas phyogs skyong ba rnams kyi bum pas rim pa bzhin du dbang bskur bar bya'o//de nas 'dir ni phyogs skyong ba rnams kyi dam tshig gi rdzas sman gi wang dang / rtsa ku sha dang / 'o ma dang / chu dag dang / khrag dang / chang dang / sha dang / shing thog dang / a ru ra dang / sbrang rtsi rnams kyis/ oM in+d+ra sa ma ya sarba karma sid+d+hi hUM zhes pa la sogs pa'i sngags kyis dbang bskur bar bya'o/ /de nas phyogs skyong ba rnams kyi bum pa rnams la rim pa ji lta ba bzhin du de'i ting nge 'dzin dang ldan par byas la/ oM in+d+ra ka la sha a b+hi Sh-iny+tsa hUM/ zhes pa la sogs pa'i sngags kyis dbang bskur bar bya'o//de nas yang de dag brtan par bya ba rang dam tshig la gnas par bya ba'i phyir bcom ldan 'das phyag na rdo rje'i phyag rgya dang sngags kyis dbang bskur bar bya'o/ /de nas gong du bstan pa ltar 'khor lo la sogs pa rin po che sna bdun dang /bkra shis kyi rdzas gi wang la sogs pa'i dbang bskur te/ de dag gi dam tshig go/ /de na phan par 'dod pa yis/ /bsgrub phyir snying po sbyin par bya/ /phyogs skyong rang gi phyogs gnas rnams/ /bstan mi dgos par 'grub par 'gyur/ /zhes gsungs pa ni dang por me tog gang la bab pa'i phyogs skyong de nges par 'grub pa yin pas na de slob ma la phan par 'dod pas de bsgrub pa'i phyir slob dpon gyis slob ma la de'i snying po brgya rtsa brgyad dam stong la sogs pa bzlas pa sbyin par bya ba ste/de bsgrub pa las nges par 'grub par gsungs te/'jig rten pa'i lhas 'jig rten pa'i dngos grub ster ba ni myur ba nyid do/ /de nas de dag mgu nas ni/ /'di skad ces ni tshig gsol to/ /bcom ldan 'das rgyal rigs spyi bo nas dbang bskur ba'i rgyal po'i dkyil 'khor 'dir zhugs te/ dbang bskur ba thob pa'am/ gzhan yang rigs kyi bu 'am rigs kyi bu mo dad pa de dag bcom ldan 'das bdag cag gis rtag par dus thams cad du bsrung ba dang bskyab pa dang sba bar bgyi'o/ /pha rol gyi dmag tshogs thams cad gzhom par bgyi'o/ /dus dus su char dbab par bgyi/ /'bru dang / me tog dang /'bras bu rnams bskyed par bgyi'o zhes pa ni brgya byin rang gi nus pa dang sbyar nas/ chos dang gang zag la rim gro dang bsnyen bkur yang dag par byed pa ste nges pa nyid do/ /de nas chos kyi rgyal po chen po gshin rjes kyang bcom ldan 'das la 'di skad ces gsol to//bcom ldan 'das bdag gis kyang rgyal bo chen po de'i tshe bsring bar bgyi'o/ /dus ma lags par 'chi ba brgyad po so sor dgag par bgyi'o/ /de nas srin po rnams kyi rgyal po ni ri tis kyang 'di skad ces gsol to/ /bcom ldan 'das bdag gis kyang rgyal po de dang rgyal po de'i bu dang /bram ze dang / rgyal rigs dang / mi dang / bran dang / phyugs dang / gzhan yang gang yang rung ba dag lnga nad dang yi dags dang / 'dres mi 'jigs par bgyi/ srin po la sogs pas mi 'jigs par bgyi/ dus ma lags pas 'chi bas 'jigs par mi bgyi ste/dus thams cad du bsrung ba dang / bskyab pa dang sba bar bgyi'o/ /de nas klu'i rgyal po chu lhas kyang 'di skad ces gsol to/ /bcom ldan 'das bdag cag gis kyang dus thams cad du rgyal po de dang de'i yul 'khor thams cad so sor bskyab par bgyi'o//kun du bsrung bar bgyi/ 'bru rnams bskyed par bgyi/ klu'i nyes pa rnams mi 'byung bar bgyi/ dug dang ser ba rnams mi 'bab par bgyi/ dus ma yin par 'chi ba rnams so sor dgag par bgyi'o/ /de nas rlung gi bdag pos kyang 'di skad ces gsol to//bcom ldan 'das bdag gis kyang sems can chen po de la rlung gi 'jigs pa mi 'byung bar bgyi/ 'bru dang / me tog dang / 'bras bu thams cad bskyed par bgyi/ 'jigs pa thams cad so sor dgag par bgyi'o/ /de nas gnod sbyin gyi rgyal po las ngan pos kyang bcom ldan 'das la phyag btsal nas 'di skad ces gsol to//bcom ldan 'das bdag gis kyang gnod sbyin gyi sde dpon chen po nyi shu rtsa brgyad dang lhan cig tu mchis te/ stobs dang ldan pas sems can chen po de la dus thams cad du 'jigs pa thams cad so sor dgag par bgyi'o//nor dang 'bru thams cad bskyed cing legs par spel bar bgyi'o/ /rang gi ngo bo dang / /yongs kyi skye bo dang / yul dang / gnas dang / bran dang / snag gi gnyen mtshams dang / grogs dang / bu dang / bu mo dang / chung ma la sogs pa bsrung bar bgyi'o//de bzhin du glang dang / ba dang / bong bu dang / rnga mo dang / lug dang / ma he dang / ba lang dang / rta dang / ra la sogs pa la'ang bsrung bar bgyi'o/ /de nas 'byung po thams cad kyi bdag po dbang byed kyis kyang bcom ldan 'das la phyag 'tshal nas 'di skad ces gsol to/bcom ldan 'das bdag gis kyang rgyal po de dang / rgyal po de dag gi bu dang / rgyal rigs dang / bram ze'i rigs rnams kyi bran la sogs pa la pha rol tu bskyab par bgyi'o/ /phan gdags par bgyi/ yongs su bskyab pa dang / zhi ba dang / bkra shis pa dang / chad pa spang ba dang / mtshon cha spang ba dang / dug gzhil ba dang / dug gzhom pa dang / mtshams gcad pa dang / sa 'og gi mtshams gcad pa dang / phyogs kyi mtshams gcad pa dang / rdo rje ra bas bskor ba dang / rdo rje phur bus gdab pa dang / rdo rje'i dra ba rnams bri bar bgyi'o/ /dgos pa thams cad la nye bar gnas par bgyi'o/ /dgos pa dang dgos pa ma lags pa rnams kyi mtshams nye bar bsten par bgyi'o/ /dge ba dang mi dge ba thams cad rmi lam du yang bsgo bar bgyi'o/ /bsgrub na'ang bgegs ma mchis par dngos grub thams cad stsal bar bgyi'o//de nas yang nam mkha'i bdag po nam mkha' la spyod pa rnams kyis kyang bcom ldan 'das la phyag btsal nas 'di skad ces gsol to/ /bcom ldan 'das bdag cag gis kyang dus thams cad du rgyal po dang / rgyal po de'i bu dang /rgyal po de'i blon po dang / bram ze dang / rgyal rigs rnams 'jigs pa thams cad las bdag nyid 'khor dang bcas par mchis la bsrung ba dang / bskyab pa dang sba bar bgyi'o/ /mchog thams cad rab tu brtan par bgyi/ nad thams cad rab tu zhi bar bgyi/ dus thams cad du phyi bzhin 'brang bar bgyi'o/ /de nas sa 'og gi bdag po sa bdag chen pos kyang bcom ldan 'das la phyag btsal nas 'di skad ces gsol to/ /bcom ldan 'das bdag cag kyang mi'i bdag po chen po de dang / de'i bu dang / chung ma dang / tsha bo dang / yang tsha dang /zhe tsha dang / rgyal rigs dang / rje'u rigs dang / bram ze'i rigs dang / dmangs rigs dag gzhan yang rigs kyi bu dang / rigs kyi bu mo la sogs pa rnams la bdag cag gis dus thams cad du bsgrub par bgyi'o/ /'jigs pa thams cad las dus thams cad du bsrung bar bgyi'o//bdag nyid kyis kyang dus thams cad du rgyal po chen po de'i phyi bzhin du 'brang bar bgyi'o/ /de nas brgya byin la sogs pa phyogs skyong ba bcus bcom ldan 'das la mgrin gcig tu 'di skad ces gsol to/ /bcom ldan 'das bdag cag gis dkyil 'khor 'dir zhugs pa'i mi de la de bzhin du bsrung ba la sogs pa ma bgyis na bcom ldan 'das rdo rje 'dzin pa bslus pa lags so zhes pa la sogs pa ni 'byung po'i bdag po dbang ldan la sogs pas rang rang gi las dang bya ba dang /nus pa'i stobs rnams kyis dam pa'i chos la gus par bya ba'i phyir dam pa'i chos 'dzin pa dang /rang cag gi dkyil 'khor du zhugs shing rang cag gis dbang bskur ba'i gang zag de la yongs su bskyab pa dang / bsrung ba dang sba ba dang / rim gro la sogs pas bsnyen bkur byas pa ste/ de dag ni de bzhin du yin zhing /nges pa kho nas go sla ba'i phyir ma bshad do/ /bcom ldan 'das bdag cag gis dkyil 'khor 'dir zhugs pa'i mi de la de bzhin du bsrung ba la sogs pa ma bgyis na bcom ldan 'das rdo rje 'dzin pa bslus par 'gyur ba lags so zhes pa ni rang rang gis bcom ldan 'das phyag na rdo rje dpang por gsol te mna' 'dor ba yin pas mna' ni dam pa kho nas nges pa nyid du shes par bya'o//de nas gza' chen po brgyad dang / 'khor rgyu skar du bcas pa rnams kyis kyang 'di skad ces gsol to/ /bcom ldan 'das bdag cag 'khor dang bcas pa rnams kyis kyang rang rang gi sngags dang snying po rnams dbul bar 'tshal na de dag bcom ldan 'das kyis byin gyis brlab par gsol/bcom ldan 'das kyis bka' stsal pa/ legs so legs so ngas kyang byin gyis brlabs kyis gza' chen po rnams shod cig ces gsungs pa ni 'di ltar gza' chen po rnams dam pa'i chos yongs su bsrung bar bya ba'i phyir rang rang gi snying po dbul bar bcom ldan 'das la zhu ba gus par zhu ba dang /rnam par dag pa'i byin gyis brlab tu gsol ba nyid do/ /bcom ldan 'das kyis bka' stsal pa/ legs so/ / legs so/ /ngas byin gyis brlabs kyis gza' chen po rnams shod cig ces gsungs pa ni nus pa khyad par can du byin gyis brlabs nas gnong ba legs par byin pa'i tshig go/ /de nas nyi ma la sogs pa'i gza' chen po rnams kyis bcom ldan 'das la phyag btsal nas 'di skad ces gsol to//oM A/ oM so/ oM a/ oM bu/ oM bri/ oM shu/ oM sa/ oM ra/ zhes pa la sogs pa'i snying po ni 'di ltar spyir dngos po thams cad la legs par sbyar ba'i skad kyis rnam par phye na yon tan gyi sgo nas ming btags pa dang /skyon gyi sgo nas ming btags pa dang / las kyi sgo nas ming btags pa dang / kha zas kyi sgo nas ming btags pa la sogs pa dpag tu med pa re re yod kyang dngos po thams cad la rang skyed par byed pa'i sa bon zhes bya ba'i yi ge'i rnam pa ni kun rdzob tu nges pa yin te/de la rang skyed par byed pa zhes bya ba ni chos rang gi mtshan nyid 'dzin pa ste/ rang gi mtshan nyid ces pa ni dngos po gzhan du bsgyur du mi btub pa yin zhing / kun rdzob tu rtag pa nyid do/ /de bas na gza' rnams kyis kyang rang rang bskyed pa'i sa bon phul ba ste/ de nyid srog yin pa'i phyir na snying po'o//de nyid 'gro ba gzhan la skyob par byed pa'i phyir sngags te/ 'di dag ni rim pa ji lta ba bzhin du dang po ni nyi ma'o/ /gnyis pa ni zla ba'o/ /gsum pa ni mig dmar ro/ /bzhi pa ni gza' lag gi'o/ /lnga pa ni phur bu'o/ /drug pa ni pa wa sangs kyi'o//bdun pa ni spen pa'o/ /brgyad pa ni sgra gcan 'dzin gyi snying por shes par bya'o/ /de nas de dag gi dkyil 'khor bshad do/ /dbus su ni bcom ldan 'das phyag na rdo rje khams gsum rnam par rgyal ba'i gzugs bri bar bya'o/ /ngos rnams su ni phyag rgya chen po bzhi bri'o//pa ba sangs ni mdun du la/ /zla ba rgyab tu bri bar bya/ /g.yas su phur bu bri bya zhing / /g.yon par gza' lag bri bar bya/ /me yi phyogs su mig dmar dang / /rlung gi phyogs su nyi ma ste/ /dbang ldan phyogs su spen pa'o/ /bden bral phyogs su sgra gcan 'dzin//dkyil 'khor phyi rol khor yug tu/ /rgyu skar thams cad bri bar bya/ /sgo sgor de bzhin sgo ba rnams/ /khros pa'i gzugs su bri bar bya/ /zhes gsungs pa ni gza' dang rgyu skar rnams kyi dkyil 'khor gyi cho ga yongs su gsungs pa ste/ de las phyogs yid du 'ong ba rnams su byin gyis brlab pa la sogs pa rim pa ji lta ba bzhin du byas la/stegs bu khru nyi shu rtsa bzhi pa bri bar bya'o/ /de la thig la sogs pa legs par btab pa dang / dkyil 'khor bri bar bya ste/ de la dbus su ni pad+ma 'dab ma brgyad pa'i snying po dang /ze'u 'brur ldan pa cig bri'o/ /de'i dbus su ni bcom ldan 'das phyag na rdo rje'i sprul pa khro bo khams gsum rnam par rgyal ba gong du smos pa gzugs ji lta ba bzhin du bri bar bya'o/ /de'i 'dab ma brgyad pa ni sgeg mo la sogs pa rang rang gi cha lugs dang phyag mtshan gyis mtshan pa bri'o//de'i phyi rol du ni rdo rje'i phreng bas bskor ba bri'o/ /de'i gru bzhi pa'i rnam par bcad pa dang grwa bzhir ni gshin rje gshed po'i phyag rgya dang / khams gsum snang byed kyi phyag rgya dang / rta mgrin gyi phyag rgya dang / bdud rtsi 'khyil pa'i phyag rgya rnams bri bar bya'o//de'i mtha' ma me tog gi phreng bas bskor la de'i phyi rol du snam bu gru bzhi pa phyogs kyi kha dog dang bcas pa cig la pad+ma'i steng du shar phyogs su pa wa sangs mdog dkar po la pad+ma dmar po 'dab ma bcu drug pa'i steng na gnas pa bzhin 'dzum pa lha'i rgyan dang cha lugs kyis brgyan pa lag pa g.yas pa na mu tig gi phreng ba thogs pa/g.yon pas ril pa spyi blugs bdud rtsis bkang ba 'dzin pa bri'o/ /lho phyogs su phur bu pad+ma'i steng na gnas pa kha dog ser po bzhin rgyas pa lag pa g.yas pa ni lcags kyi mda' me tog gi phreng ba dang bcas pa 'dzin pa/g.yon pa ut+palas mtshan pa'i gzhu thogs pa bri bar bya'o/ /nub kyi phyogs su zla ba kha dog dmar po dang pa la zhon pa bzhin 'dzum pa lag pa g.yas pas pad+ma'i steng na zla ba 'dzin pa g.yon pas ut+pal yu ba dang bcas pa 'dzin pa bri par bya'o//byang phyogs su ni gza' lag kha dog ser po pad+ma'i steng na gnas pa bzhin 'dzum pa lag pa g.yas pa gser gyi phreng ba snying gar 'dzin pa/ g.yon pa ga bur gyis bkang ba'i bya ma bum 'dzin pa bri bar bya'o//shar lho'i mtshams su ni mig dmar kha dog shin tu dmar ba ra skyes kham pa la zhon pa lag pa g.yas pas gri gug 'dzin pa/ g.yon pa mi mgo 'dzin pa bri bar bya'o/ /lho nub mtshams su ni sgra gcan 'dzin kha dog dmar nag tu 'dug pa rked pa yan chad mi'i gzugs la rked pa man chad sbrul du 'dug pa skra kham pa gyen du 'phags pa mche ba gtsigs pa mig 'bur ba shin tu khro bo'i cha lugs can lag pa g.yas pas nyi ma 'dzin pa/g.yon pas zla ba 'dzin pa bri bar bya'o/ /nub byang mtshams su ni nyi ma kha dog dmar po la bzhin 'dzum pa shing rta la zhon pa lag pa g.yas pas pad+ma'i steng na nyi ma 'od dang bcas pa 'dzin pa/g.yon pas pad+ma yu ba dang bcas pa 'dzin pa bri bar bya'o/ /byang shar mtshams su ni spen pa kha dog nag po rus sbal la zhon pa/ shin tu 'jigs pa'i cha lugs can lag pa g.yas pas dbyug pa 'phyar ba/g.yon pas sdigs mdzub byed pa bri bar bya'o/ /sgo bzhir ni lcags kyu la sogs pa'i sgo ba bzhi khro bo'i gzugs su bri bar bya'o/ /de'i phyi rol du rta babs dang khyams dang / sgo la sogs pa gong du gsungs pa ji lta ba bzhin bri bar bya'o//de nas phyi rol du ni pad+ma'i phreng bas bskor ba/ de'i phyi rol du snam bu sor bzhi pa zlum po cig la pad+ma'i steng du rim pa ji lta ba bzhin du rgyu skar rnams dgod par bya ste/ de la smin drug ni kha dog dkar po pad+ma dmar po la gnas pa mgo drug pa la lag pa bzhi pa/g.yas pa gnyis kyis me tog ut+pal dang phreng ba 'dzin pa/ g.yon pa gnyis kyis lhung bzed dang bdug pa 'dzin pa bri'o/ /de'i 'og tu snar ma kha dog dkar mo la lag pa gnyis pa shin tu mdzes pa nu ma 'bur ba glang khyu mchog la zhon pa lag pa g.yas pas me tog 'dzin pa/g.yon pas skyabs sbyin byed pa bri bar bya'o/ /de'i 'og tu mgo kha dog dkar mo bzhin mdzes ma kha sha dmar mo la zhon pa lag pa g.yas pas ut+pal yu ba dang bcas pa 'dzin pa/ g.yon pas skyabs sbyin pa bri bar bya'o//de'i 'og tu lag pa kha dog dkar po sbrul la zhon pa lag pa g.yas pas me tog 'od dang bcas pa 'dzin pa/ g.yon pas tshig sbyin pa'i phyag rgya can bri bar bya'o/ /de'i 'og tu nam so kha dog dmar po pad+ma'i gdan la 'dug pa lag pa g.yas pas phreng ba 'dzin pa g.yon pas tshig sbyin pa'i phyag rgya can bri bar bya'o//de'i 'og tu rgyal kha dog dmar po zla ba'i gdan la 'dug pa lag pa g.yas pas pad+ma 'dzin pa/ g.yon pas skyabs sbyin pa bri bar bya'o/ /de'i 'og tu skag kha dog dkar mo sha ba la zhon pa lag pa g.yas pas rtse gsum 'dzin pa g.yon pas dkur brten pa bri bar bya'o//de'i 'og tu mchu kha dog dmar po sram la zhon pa lag pa g.yas pas bum pa 'dzin pa g.yon pas skyabs sbyin pa'i phyag rgya can bri bar bya'o/ /de'i 'og tu bre kha dog ser mo bzhin mdzes pa brag gi steng na 'dug pa lag pa g.yas pas ral gri 'dzin pa g.yon pas tshig sbyin pa'i phyag rgya can bri bar bya'o//de'i 'og tu dbo kha dog dmar ser glang po che la zhon pa/ lag pa g.yas pas zhags pa 'dzin pa/ g.yon pas skyabs sbyin pa'i phyag rgya can bri bar bya'o//de'i 'og tu me bzhi kha dog ser mo rma bya la zhon pa lag pa g.yas pas shing tog a ru ra 'dzin pa/ g.yon pa dar dpyangs phyar ba bri bar bya'o/ /de'i 'og tu nag pa kha dog ser mo ra skyes la zhon pa lag pa g.yas pas mar me 'dzin pa/g.yon pas skyabs sbyin pa bri bar bya'o/ /de'i 'og tu sa ri kha dog ser po ngang pa la zhon pa lag pa g.yas pas zhags pa 'dzin pa/ g.yon pa dkur brten par btsugs pa bri bar bya'o/ /de'i 'og tu sa ga kha dog ser mo kun bid da la zhon pa lag pa g.yas pas be con 'dzin pa g.yon pas skyabs sbyin pa'i phyag rgya byed pa bri bar bya'o//de'i 'og tu lha mtshams kha dog ser mo la phug gi steng na lag pa g.yas pas me tog 'od 'phro ba dang bcas pa 'dzin pa g.yon pa zhags pa 'dzin pa bri bar bya'o//de'i 'og tu snon kha dog dmar mo 'do la'i steng na gnas shing lag pa g.yas pas skyabs sbyin pa g.yon pas dung phor 'dzin pa bri bar bya'o/ /de'i 'og tu snrums kha dog dmar mo zla ba'i steng na gnas pa lag pa g.yas pas ku mu ta yu ba dang bcas pa 'dzin pa g.yon pas tshig sbyin pa bri bar bya'o//de'i 'og tu chu stong kha dog dmar mo mi la zhon pa lag pa g.yas pas pad+ma 'dzin pa g.yon pas skyabs sbyin pa bri bar bya'o/ /de'i 'og tu chu smad kha dog dmar mo pi na ti la gnas pa lag pa g.yas pad+ma'i steng na rin po che 'bar ba 'dzin pa g.yon pas skyabs sbyin pa'i phyag rgya byed pa bri bar bya'o//de'i 'og tu gro zhun kha dog dmar mo glang la zhon pa lag pa g.yas pas skar ma 'od dang bcas pa 'dzin pa g.yon pa dkur btsugs pa bri bar bya'o/ de'i 'og tu byi bzhin kha dog dmar mo brag gi steng na gnas pa lag pa g.yas pas pad+ma dkar po 'dzin pa g.yon pas skyabs sbyin pa bri bar bya'o//de'i 'og tu mon gre kha dog ljang gu lcags kyi gdan la 'dug pa lag pa g.yas pas mda' 'dzin pa g.yon pas gzhu 'dzin pa bri bar bya'o/ /de'i 'og tu mon gru kha dog ljang dmar stan nang tshangs can la 'dug pa'o//khrums stong ni mdog ljang gu gser khri la 'dug pa bri/ khrums smad mdog dmar ser khri la 'dug pa'o/ /nam gru ni mdog dmar rta la zhon pa bri/ de'i 'og tu tha skar kha dog ljang gu ri dgas la zhon pa lag pa g.yas pas rdo rje 'dzin pa g.yon pas tshig sbyin pa bri bar bya'o//de'i 'og tu bra nye kha dog ljang nag yi dags la zhon pa lag pa g.yas pas lcags kyu 'dzin pa g.yon pas zhags pa 'dzin pa bri bar bya'o/ /de'i phyi rol du ni 'od zer gyi phreng ba kun du 'khor bar bskor bar bya'o//de nas dbang bskur ba ni 'di ltar dang por bum pa brgyad la kha dog dkar pos yongs su bsgos la pad+ma'i steng na nyi ma la sogs pa'i gza' rnams kyi phyag mtshan ji lta ba bzhin du bris te/ dri dang sman dang 'o ma la sogs pas yongs su bkang la/dkyil 'khor gyi mtha' logs su gzhag par bya/ de nas dang por khams gsum rnam par rgyal ba'i snying pos yongs su bsngags pa'i bum pas gcig ni rang gi mdun du gzhag par bya'o/ /gza' rnams kyi bum pa la ni dang por bsnyen pa'i dus su rang rang gi snying pos yongs su bzlas par bya'o//rgyu skar rnams kyi bum pa ni kha dog dkar po gcig la nyi ma'i 'od dang ldan pa bri bar bya'o/ /nang du ni 'o ma dang ga bur gyis dgang bar bya zhing de bzhin du gos dang kha rgyan la sogs pas legs par mdzes par bya ba nyid do//rdo rje 'dzin mas zhugs nas ni/ /rdo rje lcags kyu la sogs pas/ /bcom ldan khro bo spyan drang ngo / /gza' rnams thams cad spyan drang ngo / /de nas slob ma gzhug bya ba/ /sngags 'di dag gis rnam par nges/ /oM badzra ha na hUM phaT/ oM badzra gra ha na sa ma ye hUM phaT/oM badzra gra ha pra tits+tsha sa ma ye hUM/ de nas gza' brgyad sngags btab pa'i/ /bum pa brgyad kyis dbang bskur ro/ /de nas rdo rje'i phyag rgyas ni/ /dbang bskur bar ni brtags nas kyang / /gza' rnams thams cad bsgrub par bya/ /zhes gsungs pa ni gza'i dkyil 'khor du dbang bskur bar gsungs pa ste/de la dang por bdag nyid khrus la sogs pa legs par byas te/ gos dkar po gyon la rgyan thams cad kyis legs par brgyan te/ stobs nyid bsgoms pa'i mthar rang gi snying ga'i sa bon las 'od zer nam mkha'i phyogs su spros pas bcom ldan 'das rig pa'i tshogs dang bcas pa spyan drangs te/rdo rje lcags kyu la sogs pa'i rnal 'byor gyis dgug pa la sogs pa byas nas gnyis su med par byas te/ de la ar+g+ha dang nye reg dang 'thor 'thung sogs pa phul te bzhugs su gsol bar bya'o//de bzhin du gza' dang skar ma la sogs pa yang gnyis su med par byas pa dang / bdag nyid gong du gsungs pa'i rdo rje 'dzin ma'i phyag rgya bcings te zhugs la/ dbang rim pa ji lta ba bzhin mnos la gnang ba legs par thob pa dang slob ma gzhug par bya ste/de la dang por rnam par rgyal ba'i bum pa nas rdo rje dang bcas pa'i chu'i slob ma'i bgegs bskrad par bya'o/ /de nas ras la sogs pas mig bkab ste/ me tog gam rin po che la sogs pa thogs la khrus legs par byas la/oM badzra gra ha sa ma ye hUM zhes pa'i sngags kyis gzhug par bya'o/ /de nas oM badzra gra ha pra tits+tsha sa ma ye ho zhes pas me tog la sogs pa dor bar bya'o/ /de nas gong du gsungs pa'i sngags kyis mig phye la gza' gang la bab pa'i me tog mgo la bcings te/bcom ldan 'das la sogs pa'i rim pa ji lta ba bzhin du bstan par bya'o/ /de nas nyi ma la sogs pa'i bum pas rim pa ji lta ba bzhin du so so'i rnal 'byor dang ldan par byas la/ oM badzra A dit+ya ka la sha a b+hi Shiny+tsa hUM zhes pa la sogs pa'i sngags kyis dbang bskur bar bya'o//de'i rjes la de dag gi snying po byin gyis brlabs la brgya rtsa brgyad la sogs pa sbyin par bya'o/ /de nas gang la bab pa'i gza' de'i nyi ma la gar phyin kyang 'jigs pa la sogs pa mi 'ong zhing don dang dgos pa thams cad 'grub par 'gyur ba dang /gzhan yang gza'i nyes pa thams cad dang bral bar 'gyur ba nyid do/ /de nas rdo rje'i phyag rgyas ni/ /dbang bskur bar ni rab tu brtag /ces pa ni gong du gsungs pa'i bcom ldan 'das phyag na rdo rje'i phyag rgya dang sngags kyis dbang bskur bar bya ste/des ni gza' rnams dam tshig la gnas shing brtan par byed pa nyid do/ /de'i 'og tu rgyu skar rnams kyis bum pas ni khrus bya bar gsungs so/ /de nas gong du gsungs pa bzhin du 'dir yang bkra shis kyi rdzas dang / 'khor lo rin po che la sogs pa'i rin po che sna bdun gyis dbang bskur bar bya ba la sogs pa ni las thams cad du shes par bya'o//gza' rnams thams cad du bsgrub par bya/ /zhes pa ni de'i rjes la rang 'dod pa'i dngos grub zhi ba dang rgyas pa dang dbang dang mngon spyod la sogs pa'i dngos grub bsgrub par bya ba ste/de la pa ba sangs kyis ni rgyas par byed do/ /de bzhin du nyi ma dang lag rnams kyis kyang zhi bar byed do/ /mig dmar dang / phur bu dang sgra gcan gyis ni mngon spyod 'grub bo/ /zla bas ni dbang du byed do/ /spen pas ni mngon spyod 'grub par 'gyur bas na bdag gis yang dag par 'grub par bya ba nyid do//de nas gza' chen po de dag gis bcom ldan 'das la phyag btsal nas 'di skad ces gsol to/ /bcom ldan 'das bdag cag gza' chen po brgyad kyis kyang rgyal po chen po de dang rgyal po'i bu dang / rgyal po'i chung ma dang /bran la sogs pa rtag par dus thams cad du bsrung ba dang bskyab pa dang sba ba la sogs pa bgyi'o/ /de nas rgyu skar dang / skad cig dang yud tsam dang / thad cig dang / dus dang / zla tshigs dang sbyor ba dang / khyim dang / dus 'byor pa dang / 'jug phod la sogs pa'i dkyil 'khor gyi lha rnams kyis kyang de bzhin du phyag btsal nas 'di skad ces gsol to//bcom ldan 'das bdag cag gis kyang dus thams cad du sems can chen po de'i bka' mi gcog ste/ dpon bzhin du bskyang bar bgyi'o/ /grong dang / grong khyer dang /ljongs dang / rgyal po dang / rgyal po'i pho brang 'khor dang / rgyal po'i pho brang gi gnas thams cad du so sor bskyang bar bgyi'o/ /'jigs pa chen po byung ba'i tshe'ang mi des bdag cag mchod na gdon mi za bar 'jigs pa mi 'byung ngo / /bcom ldan 'das bdag cag gis dam bcas pa las 'gal bar gyur na bdag cag gi snying bcom ldan 'das kyis rdo rjes 'gas par gyur cig ces bya ba la sogs pa dam pa'i chos la rim gro dang sri zhu yang dag par byed pa'i tshig ste/de la bcom ldan 'das kyi phyag rgya dang sngags kyis rgyas btab pa'i phyir te nges par byed par 'gyur zhing gza' rnams kyis ni khyim gzugs pa dang /gtsug lag khang brtsig pa dang / gnas gzhan du spo ba la sogs pa byed pa na mi des gza' rnams la mchod pa la sogs pas mchod na de'i dus su 'jig rten pa gzhan la gza' ngan pa rnams kyang mi de la bzang por 'gyur zhing las thams cad nges par 'grub par 'gyur ba ste/bya ba la 'jug pa'i dus su gza' rnams kyi snying po brgyad kha don du gdon par bya'o/ /rgyu skar dang / skad cig dang yud tsam dang / thang cig dang / dus tshod dang zla tshigs dang /sbyor ba dang / khyim dang / dus 'byor dang / 'jug phod la sogs pa zhes pa la rgyu skar ni skar ma'o/ /skad cig ni se gol gtogs pa'i tshad la lha rgyu ba'o/ /yud tsam ni de bas cung zad dus ring ba ste/ de la lha rgyu ba'o/ /thang cig ni chu tshod la sogs pa ste/de la 'jig rten pa'i lha rgyu ba'o/ /dus tshod ni thun tshod de de la lha rgyu ba'o/ /zla tshigs ni rang skyes pa'i zla ba yar ngo dang mar ngo la sogs pa la lha rgyu ba'o/ /sbyor ba ni rdzas dang lo dang dus rnams kyi sbyor ba'o/ /khyim ni srang dang bu mo la sogs pa ste de la lha rgyu ba'o//dus 'byor pa ni de dag gi dus 'byor pa'o/ /'jug phod ni gnas dang 'brog dang ri la sogs pa la rgyu ba'i gnas skabs na mkha' 'gro ma la sogs pa rgyu ba ste/ de dag thams cad kyang rang gi skyes pa'i dus la sogs pa rtsis btab nas/ ngan pa dang bzang ba dang rgyas pa dang /nad la sogs pa'i 'bras bu 'byin pa'i lha ste/ de dag ni kun rdzob tu rten cing 'brel par 'byung ba'i mthu yod pa nyid do/ de dag gis kyang dus thams cad du srung ba la sogs pa byed cing de dag nyes pa la sogs pa med par 'gyur ba nyid do/ / bcom ldan 'das bdag cag gis dam bcas pa las 'gal bar gyur pa na bdag cag gi snying bcom ldan 'das kyis rdo rjes 'gas par gyur cig ces pa ni bcom ldan 'das gzu bor gsol te mna' bskyal ba yin pas na nges pa snying du byed par blta bar bya'o/ /de nas klu chen po brgyad kyis phud ces bya ba'i sgras ni bcom ldan 'das la mnyes par byas nas phyag btsal te 'di skad ces gsol to//bcom ldan 'das bdag cag gis rang rang gi gsang ba'i snying po 'bul bar 'tshal gyis bcom ldan 'das kyis byin gyis brlab tu gsol/ klu chen po rnams legs kyis gsang ba'i snying po phul cig ngas byin gyis brlabs so zhes gsung ba ni klu chen po rnams kyis bcom ldan 'das la rang rang gi snying po dbul bar gus pa dang bcas pas zhus pa dang khyad par du bya ba dang rnam par dag par bya ba'i phyir zhus pa'o//ngas byin gyis brlabs so zhes pa ni gnang ba legs par gnang ba dang / rnam par dag par byin gyis brlabs pa'o/ /de nas de dag mgu nas bcom ldan 'das la phyag 'tshal te 'di skad ces gsol to/ /oM phuH oM phaH oM phuM/ oM ph+ha/ oM phi/ oM phe/ oM phai/oM phU zhes pa la sogs pa ni rim pa ji lta ba bzhin du mtha' yas dang / 'jog po dang / karko Ta dang / rigs ldan dang / nor rgyas dang / dung skyong dang / pad+ma dang / chu lha la sogs pa'i snying po ste/ skyed pa'i sa bon yang de dag nyid du blta bar bya'o/ /de nas de dag gi dkyil 'khor bshad de//pad+ma chen po 'dab brgyad pa/ /kha dog dkar po bri bar bya/ /de yi dbus su gtso bo ni/ /phyag na rdo rje rab gnas te/ /sbrul mgo mtha' yas gdengs pa yi/ /ltos 'gro chen po sdig pa bri/ /de bzhin shar phyogs la sogs su/ /mtha' yas dang ni 'jog po dang //karko Ta dang rigs ldan dang / /nor rgyas bu dang dung skyong dang / /pad+ma dang ni chu lha rnams/ /dpa' bo brjid dang ldan pa la/ /sbrul mgo gdengs dang bcas pa bri/ /sbrul nag mdun du chung ma yis/ /mgul nas 'khyud dang bcas pa bri/ / zhes gsungs pa ni de dag gi dkyil 'khor yang dag par gsungs pa ste/ de la rgya mtsho 'am chu mig gam rdzing bu 'am mtshe'u la sogs pa rang yid du 'ong ba'i gnas rnams su sa byin gyis brlab pa la sogs pa byas la stegs bu khru bcu gnyis pa brtsigs te thig legs par btab la dbus su pad+ma kha dog dkar po 'dab ma brgyad pa snying po dang ze 'brur ldan pa bri bar bya'o//de'i mtha' mar sbrul gyis bskor bar bris la/ de'i phyi rol du mtsho bris la de'i nang du nya dang pad+ma dang ut+pal dang / sbal pa dang / rus sbal dang /lcong mo dang / mi dang glang dang bya la sogs pa bri bar bya'o/ /de'i phyi rol du ri'i tshul du bris la shing sna tshogs dang / 'bras bu sna tshogs dang / lo tog dang / spre'u thu la sogs pa bri bar byas la/ de'i phyi rol gru bzhi bar bcad pa dang ri bo chen po bzhi bri bar bya ste/de la yang / shing dang / ri dgas dang / bya la sogs pa mang po gnas pa bri bar bya'o/ /de'i pad+ma'i snying po la bcom ldan 'das phyag na rdo rje sku mdog dang phyag mtshan snga ma lta bu la sbrul gyi gdan la bzhugs shing sbrul mgo bdun gyis dbu la brgyan pa 'jigs pa'i gzugs dang ldan pa bri bar bya'o//de'i shar phyogs kyi 'dab ma la ni mtha' yas kha dog dkar po la sbrul gyi gdan la 'dug pa sbrul mgo lngas brgyan pa lag pa g.yas pas pad+ma yu ba dang bcas pa 'dzin pa/ g.yon pas sbrul 'dzin pa bri bar bya'o//chung mas kyang mgul nas 'khyud pa bri bar bya'o/ /de'i lho phyogs kyi 'dab ma la 'jog po kha dog sngon po la lag pa g.yas pa ut+pal sngon po 'dzin pa/ lag pa g.yon pa rus sbal thogs pa sbrul mgo lngas mgo la brgyan pa rang gi chung mas mgul nas 'khyud pa dang bcas pa bri bar bya'o//nub phyogs kyi 'dab ma la ni karko Ta ka kha dog dmar po la mgo la sbrul mgo lngas brgyan pa/ lag pa g.yas pas ku mu ta 'dzin cing g.yon pas rdo rje 'dzin pa/ rang gi chung mas mgul nas 'khyud pa bri bar bya'o/ /byang phyogs kyi 'dab ma la ni rigs ldan kha dog ser po mgo la sbrul mgo lngas brgyan pa lag pa g.yas pa ni pad+ma dkar po 'dzin pa/g.yon bum pa 'dzin cing / rang gi chung mas mgul nas 'khyud pa bri bar bya'o/ /shar lho mtshams su ni nor rgyas kyi bu kha dog sngo skya la mgo la sbrul mgo lngas brgyan zhing sbrul gyi gdan la 'dug pa lag pa g.yas yid bzhin gyi nor bu rin po che 'dzin pa/g.yon pas ut+pal 'dzin pa/ rang gi chung mas mgul nas 'khyud pa bri bar bya'o/ /lho nub mtshams su ni dung skyong kha dog dkar po dbu la sbrul mgo lngas brgyan cing lag pa g.yas pas sbrul 'dzin pa/g.yon pas dung 'dzin pa sbrul gyi gdan la 'dug pa/ rang gi chung mas mgul nas 'khyud pa dang bcas pa bri bar bya'o/ /nub byang mtshams su ni pad+ma kha dog dmar skya la mgo la sbrul mgo lngas brgyan pa sbrul gyi gdan la 'dug pa lag pa g.yas pas pad+ma 'dzin zhing /g.yon pas shing tog 'dzin pa/ rang gi chung mas mgul nas 'khyud pa bri bar bya'o/ /byang shar mtshams su ni chu lha kha dog dkar po la sbrul gyi gdan la 'dug cing sbrul mgo lngas brgyan cing lag pa g.yas pas sbrul gyi zhags pa 'dzin pa/g.yon pas ut+pal 'dzin pa rang gi chung mas mgul nas 'khyud pa bri bar bya'o/ /pad+ma'i lte ba la ni bcom ldan 'das kyi mtha' logs su sgeg mo la sogs pa sbrul mgos brgyan cing rang rang gi phyag rgyas mtshon pa bri bar bya ba nyid do//klu de dag thams cad kyang mig 'bur ba skra dmar ba dbu rgyan la sogs pa'i rgyan cha lngas kun nas brgyan par bri bar bya ba nyid do/ /de la gang dag 'di skad du gong du gsungs pa'i 'jig rten pa'i dkyil 'khor dang / 'og nas gsungs pa'i dkyil 'khor thams cad la gzhal yas khang dang bcas pa la 'dir klu'i rgyal po rnams la gzhal yas khang med pa ci'i phyir zhe na/ de ni 'di ltar rin po che'i gzhal yas khang ni lha dang mi'i 'khor los sgyur ba'i rgyal po la yod pa nyid kyi klu la sogs pa la med pa ni gzhung thams cad nas gsungs so//de bas na gong du gsungs pa dang 'og nas gsungs pa thams cad ni lha'i 'jig rten pa yin la/ klu ni dud 'gro'i ris su gtogs pa'i phyir gzhal yas khang med pa nyid do/ /bcom ldan 'das phyag na rdo rje sbrul mgos brgyan pa'ang /sgeg mo la sogs pa sbrul mgo lngas brgyan pa'ang bde bar gshegs pa rnams sprul pa'i skus sems can 'dul ba ni gang dang gang gis de dang de dag gi gzugs kyis yang dag par 'dul ba ste/ dper na 'khor los sgyur ba'i rgyal po ni shar phyogs la sogs pa'i yul du spyod pa la bgrod pa na yul de dang de dag gi cha lugs kyis gshegs pa bzhin no//bum pa brgyad dang gtor ma dang / /bshos mdzes pa dang 'byung po yi/ /mar dang 'o ma sbrang rtsir bcas/ / byas pa rnams ni gzhag par bya/ /de nas rdo rje bdag nyid zhugs/ /sbrul mgos sbrul mgo can rnams dgug /phud ces bya ba'i lhan cig tu/ /dzaHhUM baM hoHzhes brjod de/ /de nas su ni rgyal po dang / /rgyal rigs thams cad rab bcug nas/ /dug gi nyes pa bsal ba'i phyir//phud ces bya bas dbang bskur ro/ /de nas ming tsam brjod pas kyang / /klu rnams de dag thams cad 'grub/ /ces gsungs pa ni klu rnams kun gyi dkyil 'khor du dbang bskur ba gsungs pa ste/ de la dang por klu rnams kyi bum pa kha dog dkar po cig la ras dkar pos brgyan pa pad+ma la sogs pa'i kha rgyan gyis brgyan cing ga bur dang gur gum dang tsan+dan dang 'o ma dang 'bras dang shu dag la sogs pas bkang ba'i bum pa gcig dang /khams gsum rnam par rgyal ba'i bum pa gcig la bsnyen pa 'bum la sogs pa byas la/bsnyen pa yongs su rdzogs pa dang dkyil 'khor gyi mtha' mar bum pa kha dog dkar po brgyad la pad+ma'i steng du mtha' yas la sogs pa rang rang gi mtshan ma legs par bris la ras dang kha rgyan la sogs pas legs par brgyan cing dri la sogs pas bkang ba gzhag par bya'o//gzhan yang bde bar gshegs pa rigs pa'i tshogs dang bcas pa rnams la ni zhal zas dang bdug pa dang me tog dang me tog phreng ba dang snang ba dang dri dang rin po che la sogs pa dbul ba'i phyir gzhag par bya'o//de bzhin du klu'i rgyal po rnams la'ang mchod pa'i yo byad lngas nye bar gnas par bya ba dang / de dag gi 'khor rnams la ni gtor ma brgyad mar dang 'o ma dang sbrang rtsi dang bu ram dang / kha ra dang / shu dag dang / shing thog la sogs pas bkang ba gzhag par bya'o//de bzhin du de dag thams cad la me tog gi phreng ba dang spos kyi reng bu dang dri la sogs pas yongs su khyab par bya ba ste/ sha dang chang la sogs pa'i rdzas ni dam tshig nyams par 'gyur ba'i phyir sa phyogs su 'ang bsnyen par mi bya ba nyid do/ / de nas rdo rje bdag nyid bzhugs/ /zhes pa la sogs pa ni dbang bskur bar bya ste/ de la dang por bdag nyid khrus la sogs pa byas la gong du gsungs pa'i rdo rje 'dzin ma'i phyag rgya bcings la me tog gi phreng ba bkal te/ rang gi sa bon las 'od zer spros pas bcom ldan 'das rigs pa'i tshogs dang bcas pa spyan drangs la rdo rje lcags kyu la sogs pa'i rnal 'byor gyis dgug pa la sogs pa byas te/gnyis su med par byas la zhabs bsil la sogs pas nye bar gnas par bya'o/ /de bzhin du klu'i rgyal po rnams kyang spyan drangs la sbrul mgo'i phyag rgya dang oM phud ces pa'i sngags kyis gnyis su med par bya ba ste/de ni sa 'og gi ting nge 'dzin gyis bya ba'o/ /de nas mchod pa'i tshogs dang gtor ma dang sman la sogs pas legs par mchod nas bcom ldan 'das la bdag nyid kyis dbang mnos shing gnang ba thob pa dang slob ma rnams dbang bskur bar bya ba ni me tog la sogs pa thogs su bcug la ras dmar pos mig bkab la/oM badzra sarba nA ga sa ma ye hUM zhes pas gzhug par bya'o/ /de nas oM nA ga pra tI ts+tsha phuH zhes pas me tog dor bar bya'o//de nas gang la bab pa'i me tog mgo la bcings la bcom ldan 'das dang klu'i rgyal po rnams rim pa bzhin du bstan par bya'o/ /de nas dbang bskur bar bya ba ni/ sbrul mgo'i phyag rgya bcings la so so'i rnal 'byor dang ldan pas bum pa brgyad kyi chu yis oM a nan ta ka la sha a b+hiShiny+tsa phuHzhes pa la sogs pa'i sngags kyis dbang bskur bar bya'o//de nas yang sbrul mgo'i phyag rgya bcings la snying ga'i thig le brgyad la yig 'bru rnam pa brgyad bsam zhing oM a nan ta bi sha ha na ya phuHzhes pa la sogs pa'i sngags kyis dbang bskur bar bya'o//de nas rma bya'i sgro'i cod pan la bcom ldan 'das phyag na rdo rje'i snying po brgya rtsa brgyad sngags la rdo rjer byin gyis brlabs te/ gong du gsungs pa'i phyag rgya dang sngags kyis dbang bskur bar bya ste/ de ni dam tshig la gnas pa dang klu rnams brtan par bya ba'i phyir nges par bya ba nyid do/ /de nas 'dir bkra shis kyi rdzas rnams ni rung gi /'khor lo la sogs pa'i dbang rnams ni ma gtogs te/ bya ba khyab chub pa'i phyir ro/ /de nas ming tsam brjod pas kyang / / klu rnams de dag thams cad 'grub/ /ces pa ni klu rnams kyi dkyil 'khor du zhugs pa'i gang zag de klu rnams la bcom ldan 'das phyag na rdo rje'i gzugs su mthong ba'i phyir mi nges rang gi bya ba rnams la klu rnams ming tsam bton te/ bsgo bas kyang bya ba ma lus par byed cing don dang dgos pa thams cad 'grub par 'gyur ba ni nges pa nyid do//de nas de dag kun mgu nas/ /bcom ldan 'das la phyag 'tshal te/ /spyan sngar thal sbyar 'khod nas ni/ /dam tshig rab tu 'chang bar 'gyur/ /bcom ldan 'das bdag cag gis bcom ldan 'das kyi bstan pa la mngon par dga' ba rnams dang /gal te dkyil 'khor 'dir zhugs shing dbang bskur ba thob pa rnams la bslus par gyur na de'i tshe bcom ldan 'das la bslus par gyur cig /yang de'i tshe bdag cag gi gnas bye mas bsregs par gyur cig /rdo rje kun du 'bar bas bdag cag gi mgo 'gas par gyur cig /rtag par dus thams cad du sems can chen po de la bdag cag gis bsrung ba dang bskyab pa dang / sba bar bgyi'o/ /byin chen po dang stobs dang brtson 'grus bskyed par bgyi zhing de'i dug thams cad dug ma mchis par bgyi/dus dus su char dbab par bgyi/ pha rol gyi yul thams cad la dug dang / ser ba dang / dus ma lags par char dbab par bgyi/ 'jigs pa thams cad rnam par 'joms par bgyi'o//rgyal po de'i bka' dang / rdo rje 'dzin pa'i bka' bdag cag gis mtshungs pa nyid du bsgrub par bgyi'o zhes pa la sogs pa ni klu'i rgyal po rnams kyis dam pa'i chos dang gang zag de dag la rim gro dang bsnyen bkur bya ba'i phyir bcom ldan 'das phyag na rdo rje dpang por rang gsol nas dam tshig gi mna' shin tu gdug pas mna' bskyal ba ste/de dag go sla ba'i phyir ma bshad cing nges pa nyid du blta bar bya'o/ /de nas bsgrub pa bshad de/ lha rdzas 'od zer dkar po yis/ /dbu la sbrul mgo bzhin bskor ba'i//rdo rje 'dzin gtsor bsams nas kyang / /phud ces bya ba 'bum bzlas la/ /de nas dug la'ang phud ces pa'i/ /dkyil 'khor rab tu bsams nas kyang / /lha rdzas 'od zer phreng bas dgang / /de la'ang phud ces bya ba bsam/ /lag pa sbrul gyi zhags 'dra dang //phud ces bya ba'i rlung gis gtor/ /pags pa sha dang rus gnas pa'i/ /dug rnams thams cad ma lus par/ /phud ces bya ba lag pas drangs/ /de nas las rnams kun byed cing / /dug rigs dug sbyar la sogs pa/ /khu tshur gyis kyang kun 'byin na//sbrul mgo'i phyag rgya smos ci dgos/ /zhes gsungs pa ni 'dir bsgrub pa rnam pa gnyis su gsungs la/ dug zhi bar bya ba la gnyis su go bar bya'o/ /de la gcig ni rdzas kyi dug gi cho ga'o/ /gcig ni byin gyis brlabs pa'i dug zhi bar byed pa ste/ de gang la yang bsgrub pa 'di yis yang dag par gnas par bya ba ni/ lha rdzas 'od zer dkar po yis/ /dbu la sbrul mgo bzhin bskor ba'i/ /rdo rje 'dzin gtsor bsams nas kyang / /phud ces bya ba 'bum bzlas pa/ /zhes bya ba gsungs te/ de nas dang por rang gi snying gi dkyil du raM las nyi ma'i dkyil 'khor bsams la de'i steng du hUM yig sngon po bltas te/de gyur pa las rdo rje rtse lnga pa gcig bsam mo/ /yang de'i dbus su hUM bsams la de dag yongs su gyur pa las bdag nyid bcom ldan 'das dpal phyag na rdo rje sku mdog sngon po gsus pa che ba dbu skra kham pa'i ral pas stod khebs pa spyan dmar la dod pa mche ba cung zad gtsigs pa/phyag g.yas pa rdo rje bsnams pa/ g.yon pa dkur brten pa dbu la sbrul mgo dang 'dra ba'i 'od zer dkar po'i tshogs dpag tu med pas brgyan pa cig tu bsams te/rdzas kyi dug zhi bar bya ba'i phyir oM na mo badzra pA Na ye nir tsi sha phud/ bi sha nan ya phud/ bi shi hi ri phud ces pa'i sngags kyis dang po bsnyen pa 'bum du bzlas par bya ba nyid do/ /de la rdzas ji lta bu la bsgrub par bya snyam pa la/de nas dug la'ang phud ces pa'i/ /dkyil 'khor rab tu bsams nas kyang / /lha rdzas 'od zer phreng bas bkang / /de la'ang phud ces bya ba bsam/ /zhes gsungs te/ rdzas kyi dug gi sdong po gcig la klu chen po brgyad kyi dkyil 'khor rim pa ji lta ba bzhin du bkod de/rang gi thugs ka nas 'od zer dkar po'i tshogs spros la de'i rtse mo re re la yi ge phud dkar po re re bsam pas dug gi sdong po la khebs par dgab par bya'o/ /de nas phyag rgya ji lta bu bya snyam pa la/ lag pa sbrul mgo zhags 'dra dang //phud ces bya ba'i rlung gis gtor/ /zhes gsungs te/ de la lag pa g.yon pa'i sor mo lnga sbrul mgo'i tshul du byas la/ g.yas pa'i mthe bong dang mdzub mo gnyis zhags pa'i tshul du bya zhing chang bar rma bya'i sgro bcug pas rdzas kyi dug de la gnas pa'i dug byabs shing kha nas phud kyi 'od zer rlung lta bu spros pas gtor bar bya ba nyid de/de yan chad kyis ni dug zhi bar bya ba'i thabs gsungs so/ /rang ngam mi gang dag dug la sogs pas zin pa na bsgrub pa byas pa'i dug de'am/ yang na snga ma'i rnal 'byor la sogs pas nges bar 'joms par 'gyur ba nyid do//pags pa sha dang rus gnas pa'i/ /dug rnams thams cad ma lus par/ /phud ces bya ba'i lag pas drang / /zhes pa ni byin gyis brlabs pa'i dug gi cho ga gsungs pa ste/ de la mi gang dag klu yis zin pa rkang pa dang rus pa la sogs pa khol ba sha mdog mi sdug pa rnams ni dang por gong du gsungs pa'i cho ga ji lta ba bzhin du klu chen po rnams kyi dkyil 'khor du bcug la dbang bskur te/de nas gnas dben par bcom ldan 'das phyag na rdo rje snga ma lta bu'i gzugs su bdag nyid bsams la gong du bum pa la oM na mo badzra pA Na ye sarba bi Sha ha na ha na phud ces pa'i snying po brgya phrag stong ngam 'bum phrag gnyis la sogs pa bzlas te/de nas dkyil 'khor snga ma bzhin du bris la mchod pa la sogs pa byas nas de'i thal mo sbyar ba'i rtse mo nas rma bya'i sgro la thag pa btags te/bdag gi lag pas bzung zhing snying po stong du bzlas par bya'o/ /de nas grangs su thim pa dang de'i snying gar pad+ma 'dab ma brgyad pa bsams te/ bcom ldan 'das dang klu'i rgyal po 'khor dang bcas par bzhugs su gsol la bcom ldan 'das kyi thugs ka'i hUM dang /klu'i rgyal po rnams kyi rang rang gi lus las 'od zer spros pas mi de'i lus la kun du khyab pas de'i lus la gnas pa'i nad dang dug la sogs pa thams cad bsregs shing tshig par bsam mo//de nas yang bdag gis sbrul mgo'i phyag rgyas de rnams kyi rtse mo la yi ge phud kha dog dkar po lcags kyu 'dra ba bsams la gong du gsungs pa'i sngags dang / klu'i rgyal po rnams kyi snying pos rim pa ji lta ba bzhin du de'i pags pa dang sha dang rus pa'i nang na gnas pa'i dug thams cad byab cing drang bar bya'o//de nas rma bya'i sgro'i 'od la phud ces pas bskor la de'i lus la byab cing sbrul la dbab par bya'o/ de'i rjes la bum pa'i chus khrus legs par byas te/ gos snga ma rnams bor la gos dkar po gsar ba gon nas zhag drug gi bar du tshwa la phud kyi sngags btab la btung bar bya ste/de dag gi rim pas ni byin gyis brlabs pa'i dug kyang nges par 'joms par 'gyur te the tshom mi za ba nyid do/ /de nas las rnams kun byed cing / /dug rigs dug sbyar la sogs pa//khu tshur gyis kyang kun 'byin na/ /sbrul mgo'i phyag rgya smos ci dgos/ /zhes pa rdzas kyi dug dang rnal 'byor pa'i nus pa'i stobs gnyis kyi yon tan gsungs pa ste/ de la rdzas kyi dug sngar bsgrubs pa des phyis dug gis zin pa dang / dug sbyar mas zin pa dang /mche ba'i dug dang / lce'i dug dang / 'jug pa'i dug dang / rwa'i dug dang mchu'i dug dang / sha dug dang / mda'i dug la sogs pas zin pa thams cad sngar bsgrubs pa'i dug de zas la sogs pa la btang na/ dug gi nad thams cad dang 'bral bar 'gyur ba nyid do//de bzhin du rnal 'byor pa de'i stobs kyis kyang gong du smos pa'i rnal 'byor dang sngags dang phyag rgya rnams kyis dug gi rigs thams cad khu tshur gyis bsnun pa tsam gyis kyang zhi bar nus na sbrul mgo'i phyag rgya bcas nas drangs pa la sogs pa byas na smos kyang ci dgos te/nges par dug la sogs pa'i rigs thams cad zhi bar 'gyur ba nyid do/ /de ni khyad par du dbyung ba'i cho ga'o/ /de ltar gong du gsungs pa'i cho ga dag gis ni dug gi rigs thams cad dang / klu'i nyes pa thams cad ni sel bar nges te the tshom mi za bas bsgrub par bya ba nyid do//de nas lha chen po rnams kyi bdag po 'jigs par byed pa chen po bud med chen po brgyad kyis bskor bas bcom ldan 'das la phyag btsal nas 'di skad ces gsol to/ /bcom ldan 'das bdag cag gis skrag pa dang /bud med rnams kyis lha dang klu la sogs pa thams cad skrag rnam par skrag ste/ kha bub tu 'gyel te gos dang bral nas sems kyang stor te/ kun du 'khyams pa de dag la phan gdags pa'i slad du bdag cag gi snying po 'bul bar 'tshal gyis bcom ldan 'das kyis de dag legs par byin gyis brlab tu gsol/bcom ldan 'das kyis bka' stsal pa 'jigs par byed pa chen po legs so legs so/ /ngas byin gyis brlabs kyis 'jigs par byed pa rang nyid lha'i bud med dang bcas pa thams cad kyi snying po rnams shod cig ces gsungs pa ni 'di ltar 'jig rten pa'i lha thams cad kyi bdag po tshangs pa'i pho bo zhes grags te shin tu 'jigs shing skrag pa'i gzugs can rengs par byed pa rmongs par byed pa yin te/des bcom ldan 'das kyi bstan pa la mngon par dad pa'i phyir sems bzang po dang bcas pas rang rang gi snying po phul ba ste/snying po de dag rnam par dag pa'i phyir bcom ldan 'das phyag na rdo rje la snying po 'bul bar gus pa dang bcas pas zhu ba dang rnam par dag par byin gyis brlab par zhu ba'o//bcom ldan 'das kyis bka' stsal pa zhes pa la sogs pa ni gnang ba yang dag par byin zhing snyan pa dang bcas pa'i tshig gis byin gyis brlab pa nyid do/ /de nas 'jigs byed chen pos 'jigs par byed pa'i sgra phyung nas 'di skad ces gsol to//oM b+hai ra b+hai ra swA hA/ oM b+ha b+hi swA hA/ oM b+hAHswA hA/ oM b+hIHswA hAHoM b+hUHswA hA/ oM b+h+raM swA hA/ oM b+hai swA hA/ oM b+h+rUM swA hA/ oM b+haM swA hA/ oM b+haHswA hA/ zhes pa la sogs pa'i sngags ni lha chen po 'jigs byed kyis rang rang gi srog gi snying po rnams bcom ldan 'das la phul te/de dag ni bskyed pa'i sa bon yang yin te/ rim pa ji lta ba bzhin du 'jigs byed chen po dang 'jigs byed srin mo dang / 'jigs byed yan lag brgyad pa dang / 'jigs byed gtum mo dang / 'jigs byed smyo byed pa dang / 'jigs byed 'khor los sgyur dang /'jigs byed lag brkyang dang / 'jigs byed khro bo dang / 'jigs byed thod pa can dang / 'jigs byed srog 'joms la sogs pa'i snying po nyid do/ /de nas de dag gi dkyil 'khor bshad de/ 'khor lo chen po rtsibs brgyad pa/ /bris nas dbus su rdo rje 'dzin//khro rgyal 'jig rten gsum las ni/ /rnam rgyal zhes bya gzhag par bya/ /de yi zhabs drung 'jigs byed pa'i/ /bdag po chen po khros pa ni/ /'jigs byed ma dang bcas pa bri/ /rtsibs kyi nang ni thams cad/ / gzhan yang 'jigs byed brgyad po dag /bud med rnams dang ldan pa la/ /khros pa'i bzhin dang yid 'khros par/ /ci bde bar ni bri bar bya/ /'dir ni sgo sgor de bzhin du/ /sgo ba shin tu khros ldan bri/ /zhes gsungs pa ni de dag gi dkyil 'khor yongs su gsungs pa ste/de la dur khrod dam/ ma mo'i gnas sam/ shan pa'i bsha' sa la sogs par/ stegs bu khru bcu gnyis pa brtsigs la mi'i khrag gis thig btab ste/ mi'i rus pa dang / sol ba dang / 'bru la khrag gis bsgos pa dang / da du ra'i sa bon nam lo ma la sogs pas 'khor lo kha dog nag po rtsibs brgyad pa bri bar bya'o//de'i phyi rol gyi mu khyud ni mtshon rtse gsum pa'i phreng ba dang thod pa'i phreng bas bskor bar bya'o/ /de'i grwa bzhir ni thod pa khrag gis bkang ba bzhi bri bar bya'o/ /de'i phyi rol du sgo dang rta babs dang dril bu la sogs pa'i rgyan thams cad kyis brgyan la phyi rol gyi phreng gsum ni keng rus dang mi'i mgo bo dang rtse gsum gyis rim pa bzhin du bskor ba'i nang du 'khor lo'i lte ba la ni bcom ldan 'das dpal phyag na rdo rje'i sprul pa khro bo'i rgyal po chen po khams gsum rnam par rgyal ba gong du gsungs pa'i gzugs dang kha dog dang cha byad 'dzin pa ji lta ba bzhin du rdo rje brag gi steng na pad+ma'i gdan la bzhugs pa bri bar bya'o//de'i zhabs drung du bcom ldan 'das la kha bltas pa'i 'jigs byed chen po kha dog nag po mgo lnga pa rkang pa bzhi pa lag pa bcu pa lag pa g.yas pa lngas rtse gsum pa dang ral gri dang 'khor lo dang bum pa dang thod pa khrag gis bkang ba thogs pa'o//g.yon pa lngas zhags pa dang lcags kyu dang / dgra sta dang mi mgo dang sdigs mdzub byed pa 'jigs byed dus mtshan mas mgul nas 'khyud pa skra kham pa gyen du 'phags pa mig me mdag gi phung po 'dra ba gsus pa che ba sbrul rnams kyis lus la brgyan pa stag gi pags pas rnam par dkris pa rkang pa bzhis rlung lha la sogs pa 'byung po mnan pa bri bar bya'o//de'i 'khor lo'i rtsibs shar phyogs su ni 'jigs byed yan lag brgyad pa kha dog nag po lag pa gnyis pa g.yas pas ral gri 'dzin pa g.yon pas thod pa khrag gis bkang ba thogs pa/ shin tu 'jigs pa'i gzugs can rang gi chung ma dang bcas pa stag gi steng na gnas pa bri bar bya'o//lho phyogs su ni 'jigs byed gtum mo kha dog nag po lag pa gnyis pa g.yas pas gri gug 'dzin pa/ g.yon pa mi'i mgo bo 'dzin pa 'jigs pa'i gzugs can stag gi pags pas rnam par dkris pa skra kham pa gyen du 'phags pa rang rang gi chung ma dang bcas pa seng ge'i steng na gnas pa bri bar bya'o//nub phyogs su ni 'jigs byed smyo byed nag po lag pa gnyis pa la g.yas pas rtse gsum pa 'dzin pa g.yon pas thod pa khrag gis bkang ba thogs pa/ skra kham pa gyen du 'phags pa 'jigs pa'i gzugs can rang gi chung ma dang bcas pa ri dgas kyi steng na gnas pa bri bar bya'o//byang phyogs su ni 'jigs byed 'khor los sgyur ba kha dog nag po skra kham pa gyen du 'phags pa mig dmar la zlum pa lag pa g.yas pas lcags kyu 'dzin pa g.yon pas thod pa khrag gis bkang ba thogs pa stag gi pags pas rnam par dkris pa/bzhin 'bar ba rang gi chung ma dang bcas pas phag rgod kyi steng na 'dug pa bri bar bya'o/ /shar lho mtshams su ni 'jigs byed lag pa brkyang ba kha dog nag po skra kham pa gyen du 'phags pa stag gi pags pas rnam par dkris pa/'jigs pa'i gzugs can lag pa g.yas pas dgra sta 'dzin pa g.yon pas thod pa khrag gis bkang ba thogs pa rang gi chung ma dang bcas pas khyu mchog gi steng na 'dug pa bri bar bya'o//lho nub mtshams su 'jigs byed khro bo kha dog nag po shin tu 'jigs par byed pa'i gzugs can skra kham pa gyen du 'phags pa stag gi pags pas rnam par dkris pa/ bzhin 'bar ba/ gsus pa che ba lag pa g.yas pas lcags kyi tho ba 'dzin pa g.yon pas thod pa khrag gis bkang ba thogs pa/rang gi chung ma dang bcas pas srin mo'i steng na gnas pa bri bar bya'o/ /nub byang mtshams su ni 'jigs byed thod pa can kha dog dang cha byad snga ma dang 'dra ba la/ lag pa g.yas pas gri gug zhags pa dang bcas pa 'dzin pa g.yon pas thod pa khrag gis bkang ba thogs pa/rang gi chung ma dang bcas pas ma he'i steng na gnas pa bri bar bya'o/ /byang shar mtshams su ni 'jigs byed srog gcod kha dog dang cha byad snga ma lta bu la/ lag pa g.yas pas rtse gsum pa 'dzin pa g.yon pas mi'i rgyu ma 'dren pa rang gi chung ma dang bcas pas rnga mo'i steng na gnas pa bri bar bya'o//lha de dag thams cad kyang thod pa lnga yis mgo la brgyan pa/ mi mgo'i phreng bas lus la brgyan pa rus pa'i rgyan gyis kun du brgyan pa bri bar bya'o//sgo rnams su ni rdo rje lcags kyu la sogs pa'i sgo ba shin tu khros pa'i bzhin dang ldan pa bri bar bya ba nyid do/ /de nas lcags kyu la sogs pas/ /bkug ste mgo yi thod pa ni/ /khrag gis bkang ste mchod nas kyang / /sha chang gtor ma bzang po dang //snod rnams khrag gis bkang ba dang / /mgo thod mgo yi dum bu dang / /khrag gam chang ngam bum pa brgyad/ /dkyil 'khor der ni gzhag par bya/ /de nas khams gsum rnam rgyal ba'i/ /gzugs kyis slob ma gzhug par bya/ /bum pa'am mgo yi thod pa ni//de ltar brgyad kyis dbang bskur ro/ /zhes gsungs pa ni 'jigs byed chen po'i dkyil 'khor du slob ma dbang bskur bar gsungs pa ste/ de la dkyil 'khor mtha' mar bum pa kha dog nag po dgu dang dang por bsnyen pa byas pa'i rnam par rgyal ba'i sngags kyis bzlas pa'i bum pa dang bcu gzhag par bya'o//de la 'jigs byed rnams kyis bum pa ni khrag dang chang dang sha la sogs pas bkang bar bya'o/ /de'i steng du mi'i thod pa khrag gis bkang ba brgyad gzhag par bya'o/ /mgul chings ni mi'i pags pas dkri zhing kha rgyan ni mi'i skra la sogs pas bya ba nyid do//rnam par rgyal ba'i bum pa ni ras dmar pos dkri zhing nang dug gi chus dgang bar bya ste/ kha rgyan ni shing tsher ma can la sogs pas bya'o/ /de nas mchod pa'i tshogs ni mi'am glang po che la sogs pa'i sha dang khrag dang rus pa dang tshil gyi zhun mar dang 'bras chan dang chang dang mgo'i dum bu dang /pags pa la sogs pas yang dag par gnas par bya ba dang / bcom ldan 'das khams gsum rnam par rgyal ba mchod pa'i phyir thun mong gi mchod pa'i yo byad lngas nye bar gnas par byas la rang gi sa bon las 'od zer spros pas bcom ldan 'das spyan drangs la gnyis su med par bya'o//de bzhin du 'jigs byed 'khor dang bcas pa'ang bkug la lcags kyu la sogs pa'i rnal 'byor gyis gnyis su med par byas la mchod pa'i tshogs kyis yongs su mchod par bya'o//de nas mgo bo'i thod pa'i phyag rgyas rang nyid zhugs la bcom ldan 'das la rim gro ji lta ba bzhin du dbang mnos te/ gnang ba legs par thob pa dang slob ma dkyil 'khor du gzhug par bya ba ni rang nyid bcom ldan 'das khams gsum rnam par rgyal ba'i gzugs su bsams te rnam par rgyal ba'i bum pa nas chu blangs pas bgegs bskrad par bya'o//de nas slob ma des sha chen la sogs pa thogs pas gzhug par bya ste/ oM badzra b+he ra ba sa ma ye hUM zhes pa'i sngags kyis gzhug par bya'o//de nas oM badzra ma hA b+hai ra ba pra tIts+tsha ho zhes pas dor bar bya'o/ /de nas gdong g.yogs bsal te bcom ldan 'das la sogs pa rim pa ji lta ba bzhin du bstan te/ dang por 'jigs byed chen po'i sngags/ oM badzra ma hA b+hai ra ba ka pA la ka la sha a b+hi Shiny+tsa hUM zhes pa gtso bo'i bum pas dbang bskur bar bya'o//de bzhin du oM a taM ge b+hai ra ba ka pA la ka la sha a b+hi Shiny+tsa hUM zhes pa la sogs pa'i sngags kyis rim pa ji lta ba bzhin du 'jigs byed brgyad po'i bum pas dbang bskur bar bya'o//de nas de dag gi dam tshig gi rdzas sha chen dang tshil chen dang khrag la sogs pa la 'jigs byed chen po'i sngags stong ngam brgya bzlas pas btab la zar gzhug par bya'o/ /de nas mtshon rtse gsum po la srid pa gsum po 'bigs par byed par bsams nas sngags dang bcas pas lag pa g.yas pas gtang bar bya'o//de nas thod pa khrag gis bkang ba gcig lag pa g.yon par gtad de srid pa gsum pa'i srog gi khrag thams cad 'thung bar bsams la sngags dang bcas pas dbang bskur bar bya'o/ / de nas de nyid 'jigs byed chen po dang gnyis su med par dbang bskur te/ de'i rjes la bcom ldan 'das khams gsum rnam par rgyal ba'i phyag rgya dang sngags kyis dbang bskur bar bya ste/ de ni dam tshig brtan par bya ba'i phyir bya ba nyid do/ /de nas las rnams sbyin bya ste//ma mo'i khyim mam shing gcig gam/ /dur khrod kyi ni gnas dag tu/ /'jig rten gsum ni 'dul ba'i mchog /tshul bzhin du ni mchod nas kyang / /'bum phrag bzhir ni bzlas par bya/ /zhes gsungs pa ni de'i bsgrub pa gsungs pa ste/ de la ma mo'i khyim zhes pa ni khang stong la sogs pa'o//shing gcig pa ni skye shing zla med par gcig pu gnas pa dang / dur khrod la sogs pa gnas mi bzad pa rnams su gong du smos pa'i tshul gyis 'jigs byed 'khor dang bcas pa bsams nas mi rus kyi phreng ba la rtsa ba'i sngags 'bum phrag bzhis gtor ma dang mchod pa'i tshogs kyis ji lta ba bzhin du mchod cing bzlas par bya ste de ni bsnyen pa zhes bya'o//de nas dngos grub tu gyur pa dang thabs ji lta bus bya snyams pa la/ de nas 'jigs par byed pa yi/ /bdag nyid chen po'i sgra thos nas//mi 'jigs par ni mgo thod pa/ /khrag gis bkang ste ar+g+ha dbul/ /de nas khro bo 'jigs byed pa/ /ma rungs yid can bud med kyi/ /tshogs kyis bskor zhing 'jigs byed pa/ /brgyad kyis bskor ba mthong bar 'gyur/ /de mthong 'jigs pa med byas la//hUM zhes bya ba dran byed cing / /sha'am yang na chang mchog gis/ /thod pa bkang ste sbyin par bya/ /de nas 'jigs byed ma lus 'joms/ /mgu nas rab tu grub gyur nas/ /ci 'dod ces ni smras nas kyang / /mgu ba'i yid kyis de ster te/ /sa rnams sbyin pa ma gtogs pa//bde chen hUM gi gsol ba gdab/ /ces pa gsungs te/ de la sngags kyi bzlas pa grangs su thim pa dang 'jigs byed chen po 'khor dang bcas pa dngos grub tu 'gyur te/ de la dang po rtags ni shin tu 'jigs pa'i sgra drag po stong gsum thams cad g.yos pa'i sgra sgrog par byed de/de la bdag gis 'jigs pa dang bag tsha ba'i sems mi bskyed par dga' ba dang bcas pa'i sems kyis de dag drung du 'ongs par bsams la thod pa'i phyag rgyas khrag gis bkang ba'i thod pas zhabs bsil dbul bar bya'o//de nas de'i skad cig gis mthar 'jigs byed chen po 'khor dang bcas pa shin tu 'jigs shing skrag par byed pa bdag la srog gcod pa dang 'dra ba'i tshul du mthong ste/ de ni de'i rang bzhin gyis gnas pa yin par bsams la bdag nyid de'i skad cig de nyid la bcom ldan 'das khams gsum rnam par rgyal ba'i gzugs su bsgoms te/hUM zhes bya ba brjod nas sha dang chang dang khrag la sogs pas thod pa bkang la dbul bar bya ba nyid do/ /de nas de rab tu mgu bar gyur pa las khyod dngos grub ci 'dod ces smra bar 'gyur te gang 'dod pa ster zhing 'grub par nges la byang chub sems dpa'i sa la gnas par bya ba la sogs pa ni rnam par dag pa'i lha ma yin pa'i phyir mi nus la 'jig rten 'di'i dngos grub sna tshogs pa ster ba yin pas de la bdag nyid bcom ldan 'das khams gsum rnam par rgyal ba'i gzugs su bsgoms pas hUM zhes bya ba brjod cing gang 'dod pa gsol ba gdab par bya ba nyid do//de la dngos grub ji lta bu zhig ster bar 'gyur snyam pa la/ khu ba bro ba'i btung ba dang / /lha rdzas ral gri 'khor lo dang / /rtse gsum pa dang mtho ris dang //me dang sa 'og rgyal po dang / /gling dang gling bzhi brgya byin dang / /gnod sbyin dbang phyug srin po nyid/ /rig 'dzin nyid dang rig 'dzin gyi/ /'khor los sgyur dang 'jig rten ni/ /gsum gyi bdag nyid bka' nyan dang / /rang gi 'khor dang bud med kyi/ /dngos grub gang yang rung ba ni//ci dga' bar yang sbyin par byed/ /byin nas rgod cing 'gro byed de/ /skrag na de ma thag tu gsod/ /ces gsungs te/ de la khu ba bro ba'i btung ba zhes pa ni lha'i bdud rtsi ro mchog brgya dang ldan pa lus 'od dang ldan par byed pa nyid do/ /rdzas dang ral gri 'khor lo zhes pa ni rdzas ni ri lu la sogs pa'o//ral gri dang 'khor los ni pha rol gyi dpung 'joms par byed pa'i dngos grub 'grub par 'gyur ba dang / a ra sha'i dngos grub la sogs pa 'grub par 'gyur ba nyid do/ /rtse gsum pa ni gzhan gyi dpung 'joms pa'o//mtho ris ni nam mkha' la gsod pa rgyal po zla 'od lta bur 'gyur ba'o/ /mi ni sa steng la spyod pa thams cad bdag gi bran bzhin du 'gyur ro/ /sa 'og ni klu'i dngos grub 'grub par 'gyur ba ste/ dper na 'phags pa klu sgrub ltar 'gyur ba'o/ /rgyal po ni gling gcig la dbang ba dang gling bzhi la dbang ba'i 'khor los sgyur ba'i rgyal por 'gyur ba'o//brgya byin gyi dngos grub ni lha rnams dbang du byed pa'o/ /gnod sbyin gyi dngos grub ni 'tsho ba bde bar byed pa'o/ /dbang phyug gi dngos grub ni phun sum tshogs par byed pa'o/ /srin po'i dngos grub ni dgra'i tshogs thams cad 'joms par byed pa'o//rig 'dzin gyi dngos grub ni drang srong gi tshogs kun gyis bsnyen bkur byed pa'o/ /'khor los sgyur ba'i rgyal po ni gser la sogs pa'i 'khor los sgyur ba'i rgyal por 'gyur ba'o/ /'jig rten gsum gyi bdag po ni sa 'og dang sa steng pa dang sa bla rnams kyi bdag por 'gyur ba dang /de dag la sogs pa 'gro ba sems can thams cad la bdag gi tshig mnos pas kyang las thams cad bran bzhin du byed par 'gyur ba dang / 'jigs byed brgyad po la sogs pas rgyal po bzhin du khur ba la sogs pa 'jig rten du dngos grub sna tshogs pa mthong bar 'gyur ba nyid do//skrag pa de ma thag tu gsod ces pa ni 'jigs byed chen po 'khor dang bcas pa mthong nas 'jigs pa'am skrag pa'i sems skyes pa la dus ma yin par 'chi bar 'gyur ba ste/de yang 'jigs byed chen po la sogs pas ni gsod par mi 'gyur la bdag nyid de dag gi dam tshig nyams pas phyir 'chi bar 'gyur ba nyid do/ /de nas 'jigs byed chen po 'khor dang bcas pa rnams kyis bcom ldan 'das la phyag btsal nas 'di skad ces gsol to//bcom ldan 'das bdag cag gi dkyil 'khor 'dir zhugs pa'i rgyal po chen po de la bdag cag gi 'khor dang bcas pa rnams kyis bsrung ba dang skyabs pa dang sba bar bgyi'o/ /de'i sgra'i tshogs thams cad gzhom par bgyid de de la gnod par sems pa dang dgra bya bar sems pa dang mi mdza' ba dang 'gran 'dzugs pa'i lha dang mi dang gnod sbyin dang srin po la sogs pa thams cad kyi srog [(]bzhom [,]gzhom [)]par bgyi'o//rgyal po chen po de'i drung du bdag cag gi 'khor rnams kyis dus thams cad du bka' mnod par bgyi'o//las dang bya ba dang dngos grub thams cad kyang bde blag tu stsal bar bgyi'o/ /bcom ldan 'das mdor na bdag cag gis bcom ldan 'das rdo rje 'dzin pa'i spyan sngar dam bcas pa bzhin du ma bgyis na bcom ldan 'das kyi rdo rje 'bar bas bdag cag gi tshogs thal ba bzhin du brlag par gyur cig ces pa la sogs pa ni 'jigs byed chen po 'khor dang bcas pa rnams kyis chos dang gang zag la rim gros kun du bsnyen bkur bya bar bcom ldan 'das kyi spyan sngar dam bcas nas mna' bor ba ste/mna' ni shin tu dam par gyur pa nyid dngos grub la sogs pa'ang nye zhing nges par 'grub par 'gyur ba nyid do/ /de nas tshangs pa la sogs pa lha chen po rnams kyis bcom ldan 'das la phyag 'tshal nas 'di skad ces gsol to//bcom ldan 'das bdag cag kyang bcom ldan 'das kyis gnang zhing bka' stsal na rang gi cho ga zhib mo bshad par 'tshal gyis/ bcom ldan 'das kyis thugs brtse bar dgongs te/ byin gyis brlab tu gsol zhes pa ni tshangs pa la sogs pa lha chen po rnams bcom ldan 'das phyag na rdo rje la gus pa dang bcas pas snying po 'bul bar zhus te/de la bcom ldan 'das kyis gnang zhing bka' stsal nas zhes pa ni de dag gi dkyil 'khor gyis yongs su gnang zhing dkyil 'khor gyi cho ga bka' stsal nas 'chad par 'dod pa yin zhing rang cag gis bcom ldan 'das kyi spyan sngar dkyil 'khor la sogs pa bshad pa'i spobs pa med pa nyid do//de nyid shin tu gus pa'i tshig yin zhing thugs brtse bar dgongs te/ byin gyis brlab tu gsol zhes pa ni snying po rnam par ma dag pa dag par byin gyis brlab tu gsol zhes pa'o//thugs brtse ba ni 'di ltar tshangs pa la sogs pa'i lha chen po rnams rtag par nga rgyal chen po dang ldan pa nyid kyis na dogs pa dang bcas/ gnod pa dang / bcas pas bcom ldan 'das ni thugs rje chen po'i 'od zer gyis sems can thams cad la khyab pa yin pas na bdag cag la thugs brtse bar dgongs su gsol zhes gus par zhu ba'i tshig go/ /bcom ldan 'das kyis bka' stsal pa/ lha chen po rnams legs so legs so//ngas gnang zhing byin gyis brlab kyis sems can thams cad la phan pa dang / bde ba'i phyir rang rang gi srog gi snying po rnams legs par phul cig ces gsungs pa ni/ tshangs pa la sogs pa lha chen po rnams la snyan pa dang / bcas pa'i gsung gis bos nas gnang ba legs par byin pa ste/ de la ngas gnang zhing zhes pa ni lha chen po rnams kyi dogs pa bsal ba'o/ /byin gyis brlab kyis zhes gsungs pa ni/ nus pa khyad par du byas pa'o/ /sems can thams cad la phan pa dang bde ba'i phyir zhes gsungs pa ni lha chen po rnams byang chub kyi sems bla na med pa de'i skad cig la bskyed pa'o//rang rang gi snying po rnams legs par phul cig ces gsungs pa ni lha chen po rnams nga rgyal dang bcas pa'i sems rnam par spangs te/ sems mnyam par gzhag pa nyid kyis rang rang gi snying po rnams phul cig ces gsungs par shes par bya'o/ /de nas tshangs pa la sogs pa lha chen po rnams kyis rang rang gi snying po rnams bshad do/ /oM oM oM b+hi/ oM ru/ oM i/ oM kaM/ oM gA/ oM b+hi/ oM ka zhes pa la sogs pa ni tshangs pa la sogs pa lha chen po rnams bcom ldan 'das kyis legs par gnang bas dga' ba dang bcas pas rang rang gi snying po rnams phul ba ste/ de la dang po ni tshangs pa'i 'o/ /gnyis pa ni khyab 'jug gi'o/ /gsum pa ni drag po'i 'o//bzhi pa ni brgya byin gyi'o/ /lnga pa ni gzhon nu ma'i 'o/ /drug pa ni dkar mo'i 'o/ /bdun pa ni b+h+r-ing gi ri ti'i 'o/ /brgyad pa ni 'dod pa'i lha mo'i snying po rnams te/ gang du bskyed pa'i sa bon yang de dag nyid du shes par bya'o/ /de nas de dag gi dkyil 'khor bshad de//dkyil 'khor snga ma bzhin bris la/ /dbus su khams gsum rnam rgyal te/ /de yi mdun du dpa' bo ni/ /dbang phyug rtse gsum thogs pa bri/ /rgyab tu tshangs pa bri bya ste/ /g.yon pa lag na 'khor lo thogs/ /g.yas pas dbang po rang gi ni//phyag rgya'i mtshan ma lag thogs bri/ /de g.yon rang rang chung ma la/ /'dir yang sgo ba de bzhin te/ /bya dang bum pa gang ba gzhag/ /dkyil 'khor gyi ni phyi rol tu/ /stobs bzangs la sogs mthu chen gzhag/ /ces gsungs pa ni lha chen po de dag gi dkyil 'khor yongs su gsungs te/de la skyed mos tshal lam/ 'bab chu'i 'gram la sogs pas phyogs yid du 'ong ba rnams su sa byin gyis brlab pa la sogs pa rim pa ji lta ba bzhin du byas la stegs bu khru nyi shu rtsa bzhi pa brtsigs te/spos dang dri dang / ba'i rnam lnga la sogs pas legs par byugs la/ thig legs par btab ste/ rin po che la sogs pas dkyil 'khor bri bar bya ba ni gos kha dog dkar po gyon la/ 'khor lo kha dog dkar po rtsibs brgyad pa gcig dbus su bri bar bya'o//de'i phyi rol gyi mu khyud ni pad+ma'i phreng bas bskor bar bya'o/ /de'i grwa bzhir ni bum pa kha dog dkar po rgyan dang bcas pa bzhi bris la/ de'i phyi rol du ni sgo dang rta babs la sogs pa'i rgyan sna tshogs pas yongs su brgyan pa/ de'i phyi rol gyi khor yug tu ni pad+ma'i phreng ba dang /rin po che'i phreng ba dang / 'od zer dkar po phyogs bcur 'phro ba bri bar bya'o/ /de'i phyi rol du ni dpag bsam gyi shing dang / rdzing bu dang / me tog dang / bya dang / spre'u dang / pad+ma dang / ut+pal dang / gos kyi rnam pa sna tshogs pa dang / rgyan gyi rnam pa sna tshogs pa dang /lha'i bu dang / bu mo rol mo la sogs pa mang por bri bar bya'o/ /de nas 'khor lo'i dbus su ni bcom ldan 'das khams gsum rnam par rgyal ba gong du smos pa'i cha lugs ji lta ba bzhin du rdo rje brag gi steng du pad+ma'i gdan la bzhugs pa bri bar bya'o//de'i 'khor lo'i rtsibs shar phyogs su ni lha chen po kha dog nag po lag pa bzhi pa glang khyu mchog la zhon pa sbrul se ral khar thogs pa/ dpral ba'i steng na zla ba tshes pa 'dzin pa/ thal bas lus la byugs pa/ lag pa g.yas kyi dang pos ral gri 'dzin pa g.yon gyi dang pos mtshon rtse gsum pa 'dzin pa/g.yon gyi gnyis pas dkur btsugs shing / g.yas kyi gnyis pas dam pa sbyin pa 'jigs pa'i gzugs su 'dug pa bri bar bya'o/ /lho phyogs kyi rtsibs la ni brgya byin kha dog dkar po la glang po che'i steng na zhon pa/mig gsum pa/ lag pa gnyis pa la g.yas pas rdo rje rtse gsum gdengs pa 'dzin pa/ g.yon pas rma bya'i sgro 'dzin pa gser gyi cod pan gyis mgo la brgyan pa bri bar bya'o/ /nub phyogs kyi rtsibs la ni tshangs pa kha dog dmar ser la pad+ma dmar po 'dab ma bcu drug pa'i steng na gnas pa/mgo gsum pa ral pa'i cod pan gyis brgyan pa/ lag pa bzhi pa la g.yas kyis dang pos ril ba spyi blugs 'dzin pa/ g.yon gyi dang pos phreng ba 'dzin pa/ 'og ma gnyis kyis snying gar thal mo sbyar ba/ bzhin 'dzum pa dang bcas pa bri bar bya'o/ /byang phyogs kyi rtsibs la ni khyab 'jug kha dog sngon po nam mkha' lding la zhon pa lag pa bzhi pa g.yas kyi dang pos 'khor lo thogs pa/ g.yon gyi dang pos rin po che'i be con thogs pa/ g.yon 'og mas dung phor thogs pa/g.yas 'og mas dam pa sbyin pa'i phyag rgya dang ldan pa bri bar bya'o/ /shar lho mtshams kyi rtsibs la ni pad+ma'i steng du dbang phyug chen po'i chung ma b+h+r-ing gi ri ti kha dog nag mo la bzhin mdzes pa lag pa g.yas pas rma bya'i rdul yab 'dzin pa/ /g.yon pa dku ru btsugs shing rgyan thams cad kyis brgyan pa ldem bag dang bcas pas dbang phyug chen po la chags pa'i mig gis lta ba bri bar bya'o//lho nub mtshams kyi rtsibs la ni pad+ma'i steng du brgya byin gyi chung ma kha dog dkar po 'dod pa'i lha mo zhes bya ba mig gsum pa lag pa g.yas pas rdo rje 'dzin cing /g.yon pas pad+ma 'dzin brgyan thams cad kyis brgyan cing nu ma 'bur ba chags pa'i mig gis brgya byin la lta ba bri bar bya'o/ /nub byang gi mtshams su ni tshangs pa'i chung ma kha dog dang cha byad tshangs pa nyid dang 'dra ba lag pa gnyis pa g.yas pas ril pa spyi blugs 'dzin pa/g.yon pas phreng ba 'dzin cing nu ma 'bur ba la rgyan thams cad kyis brgyan pa chags pa'i mig gis tshangs pa la lta ba bri bar bya'o/ /byang shar mtshams kyi rtsibs la ni khyab 'jug gi chung ma dkar mo kha dog sngon mo la lag pa gnyis pa g.yas pas 'khor lo 'dzin cing /g.yon pas rtswa ku sha 'dzin pa rgyan thams cad kyis brgyan cing chags pa'i mig gis khyab 'jug la lta ba bri bar bya ba nyid do/ /bya dang bum pa gang ba gzhag /ces pa la sogs pa ni mchod pa'i yo byad bsham par dgongs pa ste/de la zur bzhir ni bum pa kha dog dkar po sman dang / dri dang 'o ma dang 'bras thug la sogs pas bkang ba kha rgyan dang / mgul chings su bcings pa pad+ma'i steng na rang rang gi phyag rgyas mtshan pa bzhi la gong du so so'i sngags rnams yongs su bzlas pa gzhag par bya'o//de'i phyi rol du ni ngang pa dang ngur pa la sogs pa'i bya'am gzugs la sogs pa dang mchod pa'i bum pa'i dri dang gtor ma la sogs pas bkang ba brgyad dam bzhi la sogs par gzhag pa dang /ra dang lug dang bya la sogs pa'i sha bzang po rnams dang zho dang mar dang 'o ma dang ka ra dang / sbrang rtsi la sogs pa mchod pa'i yo byad sna tshogs pa gzhag par bya'o/ /gzhan yang me tog gi phreng ba dang / dri'i chu la sogs pa yang yongs su gzhag pa ste/bcom ldan 'das la mchod pa'i phyir mchod pa'i yo byad lngas nye bar gnas par bya ba dang / sngon du bsnyen pa byas pa'i rnam par rgyal ba'i bum pa kha dog dkar po dri dang / sman dang 'o ma la sogs pas bkang ba'i rgyan gyis brgyan pa gcig ni rang gi mdun du gzhag par bya'o//de bzhin du gdugs dang rgyal mtshan dang / ba dan la sogs pas kyang brgyan la/ mchod pa'i tshogs rgya chen po bsham par bya ba nyid do/ /de nas zhugs nas lha rnams ni/ /mkhas pas bun nas dkug par bya/ /dzaHhUM baM hoHlha thams cad//dkyil 'khor dam par zhugs par mdzod/ /de nas 'ongs par mthong ba dang / /dga' ba chen pos mchod par bya/ /zhes gsung ba ni/ las su bya ba gsungs pa ste/ de la dang po rang nyid khrus la sogs pa legs par byas la/ gos gtsang ma dkar po gon la rgyan gyis brgyan te/gong du gsungs pa'i rdo rje 'dzin ma'i phyag rgya bcas la/ me tog gi phreng ba bkal te zhugs nas/ snying ga'i sa bon las 'od zer spros pas/ bcom ldan 'das khams gsum rnam par rgyal ba spyan drangs te/ lcags kyu la sogs pa'i rnal 'byor gyis bkug la/ gnyis su med par byas la bzhugs su gsol te/ zhabs bsil la sogs pas mchod par bya'o/ /de bzhin du dbang phyug chen po la sogs pa'i lha rnams kyang spyan drangs nas gnyis su med par byas la/zhabs bsil la sogs pas mchod pa byas nas bde bar gshegs pa rnam par rgyal ba la ni mchod pa'i yo byad lngas yang dag par mchod par bya'o/ /lha la sogs pa la ni sha dang / zho dang 'jig rten pa'i yo byad 'byor pa thams cad kyis yongs su mchod nas bcom ldan 'das la dbang ji lta ba bzhin du mnos la gnang ba legs par thob pa dang /slob ma dbang bskur bar bya ba nyid do/ /de la dbang ji lta bus bskur bar bya snyam pa la/ de nas rdo rje 'dzin pa'i phyag rgyas slob ma gzhug par bya ste/ oM pra tIts+tsha staM/ ma hA satwa badzra d+hA ra/ A dz+nyA pa ya ti ha ha ho/ me tog cho ga bzhin du dor/ /mig phye nas ni brtag par bya/ /de nas sngags kyis btab pa yis/ /bum pa'i chu yis dbang bskur ro/ /zhes gsungs te/ de la slob ma rgyal rigs la sogs pa dbang dang stobs dang mthu dang ldan par 'dod pa rnams me tog la sogs pa thogs su bcug la ras kha dog dkar pos mig bkab ste/oM tsa tur ma he shwa re sa ma ye hUM zhes pas gzhug par bya'o/ /de nas slob ma de nyid rdo rje 'dzin ma'i phyag rgya bcings pas me tog dor bar bya ba ni/oM pra tIts+tsha s+t+waM ma hA satwa badzra d+ha ra A dz+nyA pa ya ti ha ha ho zhes pas dor bar bya'o/ /de nas oM badzra tsa k+Shu pA sh+ya ho zhes pas mig phye ste/ oM ma he shwa ri tiSh+Tha badzra hUM zhes pas brtan par bya'o/ /de nas rnam par rgyal ba'i bum pa nas chu blangs bas bgegs bskrad do//dbang phyug chen po bzhi'i bum pa bzhi la so so'i rnal 'byor dang / phyag rgyar ldan par byas la/ oM ru dra ka la sha de bA a b+hi Shiny+tsa hUM zhes pa dang / oM in+d+ra ka la sha de bA a b+hi Shiny+tsa hUM/ oM brah+ma ka la sha de bA a b+hi Shiny+tsa hUM/oM biSh+Nu ka la sha de bA a b+hi Shiny+tsa hUM zhes pa rnams kyis rim pa ji lta ba bzhin du dbang bskur bar bya'o/ /de nas de dag dam tshig gi rdzas rtse gsum pa dang / rdo rje dang ril ba dang / 'khor lo la sogs pas dbang bskur te brtan par byas nas bcom ldan 'das phyag na rdo rje'i phyag rgyas dam tshig la gnas par bya ba'i phyir dbang bskur nas/de'i rjes la bkra shis kyi rdzas brgyad dang 'khor lo la sogs pa'i rin po che sna bdun gyis dbang bskur te/ yongs su rdzogs par byas nas lha rnams kyi snying po rab tu gtad par bya ba nyid do//de nas lha rnams gang dga' ba'i/ /dngos grub rtag tu sbyin par bya/ /'bum gcig gam ni 'bum gnyis sam/ /dang po bsnyen pa byas nas kyang / /dbang phyug la sogs lha mchog rnams/ /rab tu 'dod pas bsgrub bya ste/ /shing gcig la sogs gnas sam ni//phyag na rdo rje'i pho brang ngam/ /yang na de bzhin gshegs gnas sam/ /ring bsrel ldan pa'i mchod rten du/ /lha rnams thams cad cho ga bzhin/ /bsgrubs pas rtag tu bsgrub byas na/ /nam phyed na ni lha 'ongs nas/ /khyod kyi 'dod pa gang yin pa//de ni ci bder sbyin bya yis/ /bzang po myur du soms te smros/ /gang phyir mchog ni khyod la sbyin/ /de nas sngags shes dngos grub phyir/ /lha la mchog gi gsol ba gdab/ /lha rdzas khu ba bro btung dang / /mi snang ba dang mkha' 'gro dang / ri lu rdzas dang rgyal la sogs/ /yid 'dod tshad med gsol ba gdab/ /ces pa la sogs pa gsungs pa ni lha rnams kyi bsgrub pa yongs su gsungs pa ste/ de la dang por me tog gang la babs pa'i lha'am rang gang la mos pa'i lha bsgrub par bya ba'i phyir slob dpon des slob ma la de dag ci ltar sgrub pa'i thabs sbyin par bya ba ni/'bum gcig gam ni 'bum gnyis sam/ /dang por bsnyen pa byas nas kyang / /zhes gsungs pa ste/ de la rang gi gnas sam gnas yid du 'ong ba rnams su lha gang 'dod pa'i gzugs bris la/mchod pa dang gtor ma byas te/ bcom ldan 'das dpal phyag na rdo rje dpang por gsol nas mchod pa dang skyabs su gsol ba byas nas/ /de dag gi snying po 'bum phrag gcig gam gnyis bzlas par bya ba nyid do/ /de la snying po ni oM pa ti ni ka la bo tha u ma pri ya swA hA/zhes pa la sogs pa dang / oM shuHzhes pa ni rtsa ba'i sngags dang nye bar bcas la bzlas la/ de nas grangs su them pa dang bsgrub par bya ba ni/ shing gcig la sogs gnas sam ni/ /zhes pa la sogs pa gsungs so/ /de la de dag ni gnas yid du 'ong ba bstan pa ste/shing gcig ni shing gcig pur skyes pa'i sa phyogs so/ /phyag na rdo rje'i pho brang zhes pa ni gnas gang na bcom ldan 'das phyag na rdo rje bzhugs pa'i sa phyogs so/ /yang na/ de bzhin gshegs gnas sam/ /zhes pa ni gtsug lag khang ngam dge 'dun gyi kun dga' ra ba la sogs pa de bzhin gshegs pa'i tshogs bzhugs pa'i sa phyogs so//ring bsrel ldan pa'i mchod rten zhes pa ni de bzhin gshegs pa'i gdung sha ri ram bcug pa'i mchod rten gang na yod pa'i sa phyogs te/ de dag rnams su ni dbang phyug chen po la sogs pa'i lha rnams bsgrub par bya ba nyid do//de la gnas de dag kho na dmigs su bstan pa la dgos pa ci yod snyam pa la/ gnas de dag ni mchog tu bkra shis pa'i gnas yin pas na dngos grub nye ba nyid dang / tshangs pa la sogs pa'i gnas bkra shis pa dang /gnas gtsang zhing khyad par can rnams su rgyu ba las dur khrod la sogs pa'i gnas mi gtsang ba rnams su mi 'ong ba'i phyir de dag kho nar yongs su bsgrub par gsungs so/ /de nas lha chen po rnams grub par gyur na rtags sam/ mtshan ma'am 'bras bu ji lta bu 'grub snyam pa la/nam phyed na ni lha 'ongs nas/ /zhes pa la sogs pa gsungs pa/ de la nam phyed na lha gang bsgrub pa de 'ongs nas rigs kyi bu khyod gang 'dod pa de smros shig dang ngas sbyin par bya'o zhes smras te/ de la cho ga shes pa'i rnal 'byor pas ar+g+ha la sogs pas yang dag par mchod nas/rang gang 'dod pa'i dngos grub rnams gsol ba gdab par bya'o/ /de la dngos grub ji lta bu dag gsol ba gdab snyam pa la/ lha rdzas khu ba bro btung dang / /zhes pa la sogs pa gsungs te/lha rdzas khu ba bro btung zhes pa ni bdud rtsi'i khu ba grub par gsol ba gdab pa'o/ /mi snang ba ni mig sgrib kyi dngos grub gsol ba gdab par bya'o/ /mkha' 'gro ni nam mkha' lding dang lha'i rdzu 'phrul gyi dngos grub gsol ba gdab par bya'o//ri lu ni khams gsum rnam par rgyal ba'i ri lu la sogs pa gsol ba gdab par bya'o/ /rgyal po ni gling bzhi la dbang ba dang / sa 'og la dbang ba dang / sa stengs la dbang bar gsol ba gdab pa nyid do/ /de nas/ dbang phyug chen po la sogs pas/bcom ldan 'das la phyag 'tshal nas 'di skad ces gsol to/ /bcom ldan 'das 'jig rten dang 'jig rten las 'das pa'i dkyil 'khor 'dir zhugs pa gang lags pa de dag bcom ldan 'das bdag cag lha rnams kyis sgrib pa thams cad rnam par sbyong ngo //mtho ris kyi lam bstan par bgyi'o/ /bde 'gro'i lam bstan par bgyi'o/ /ngan song ma lags pa'i lam bstan par bya'o/ /sgrib pa ma mchis pa'i lam bstan par bgyi'o/ /dben pa'i lam bstan par bgyi'o/ / rnam par dben pa'i lam bstan par bgyi'o/ /'byung ba'i lam bstan par bgyi'o/ /mya ngan las 'das pa'i lam bstan par bgyi'o/ /dam pa'i chos kyi lam bstan par bgyi'o/ /bde 'gro'i lam bstan par bgyi'o/ /spong ba'i lam bstan par bgyi'o//nyon mongs pa med pa'i lam bstan par bgyi'o/ /sangs rgyas nyid du 'grub pa'i lam bstan par bgyi'o/ /byang chub sems dpa' nyid du 'grub pa'i lam bstan par bgyi'o/ /rdo rje 'dzin pa nyid du 'grub pa'i lam bstan par bgyi'o/ /dus thams cad du 'jigs pa thams cad las bsrung ba dang /bskyab pa dang / sba bar bgyi'o/ /bdag nyid kyi bu bzhin yongs su bskyang bar bgyi'o/ /de'i pha rol gyi dgra kun gzhom par bgyi'o/ /grong dang grong 'dab dang / ljongs dang / rgyal po dang / rgyal po'i pho brang dang /rgyal srid rnams bsrung bar bgyi'o/ /yul dang / phyogs dang / grong khyer dang / 'khor rnams bsrung bar bgyi'o/ /rgyal srid kyang stsal bar bgyi'o/ /rgyal srid thob pa rnams ni rgyal srid rgyas par bgyi'o/ /gling gcig pa dang / gnyis pa dang / gsum pa dang / bzhi pa dang / bde 'gro dang / mi'i gnas dang / sa 'og dang / 'khor los sgyur ba rnams kyang stsal bar bgyi'o/ /mdor na brgya byin dang / tshangs pa nyid dang / khyab 'jug dang / dbang phyug chen po nyid kyang stsal bar bgyi ste/ bcom ldan 'das mdor na bdag cag gis dam bcas pa de las 'gal bar gyur na bcom ldan 'das nyid bslus par gyur cig ces pa la sogs pa ni dbang phyug chen po la sogs pa'i lha chen po rnams bde bar gshegs pa'i bstan pa la mngon par dga' ba nyid kyis dam pa'i chos dang gang zag rnams la rim gro dang bsnyen bkur yang dag par byed pa nyid do//de la dbang phyug chen po la sogs pa dbang phyug chen po bzhi ni/ /'jig rten pa'i lha rnams kyi gtso bor gyur pa mchog tu gyur pa khyad par gyur pa dam par gyur pa yin pas nus pa'i stobs chen po dang ldan pa ste/de dag gis rnam par byang ba'i lam ston par 'gyur nyid do/ /de la de dag ni 'jig rten pa'i lha yin la 'jig rten pa'i lhas ni srid pa'i rtse mo man chad las 'thob par mi 'gyur bas na de dag gis rnam par byang ba'i lam ji ltar ston par 'gyur snyam pa la/de ni 'di ltar dang por lha chen po rnams kyis kyang bcom ldan 'das 'jig rten dang 'jig rten las 'das pa'i dkyil 'khor 'dir zhugs pa gang lags pa de dag ces smos te/ de bas na 'jig rten pa'i dkyil 'khor du zhugs pas ni mtho ris la sogs pa'i lam ston pa nyid do//de la bdag cag lha rnams kyis sgrib pa thams cad rnam par sbyang ngo zhes pa nas mya ngan las 'das pa'i lam bstan par bgyi'o zhes pa'i bar ni 'jig rten pa'i lam ste/ de dag gi ngan 'gro rnam pa gsum la bsams nas ni sgrib pa thams cad ma mchis pa dang /mtho ris dang bde 'gro'i lam bstan par bgyi'o zhes smras te/ sgrib pa ni skye ba'i sgrib pa zhes bya ba la ltos nas lha'i gnas su yod pa nyid de/ de la sgrib pa thams cad ces pa'i tshig ste/'jig rten las 'das pa ma yin pa'i phyir nyon mongs pa'i sgrib pa la sogs pa ni ma gtogs so/ /de nyid bde 'gro'i yin pa'i phyir ngan 'gro la sogs pa'i lam dang / sgrib pa ma mchis pa'i lam zhes bya'o/ /de ni 'jig rten pa rnams kyi bden pa yin pa dang /sdug bsngal las rnam par dben pa'i phyir dben pa'i lam dang rnam par dben pa'i lam zhes bya'o/ /de nyid 'jig rten pa rnams kyi bde ba'i 'byung gnas yin pa'i phyir dang / ngan song gsum gyi mya ngan las 'das pa'i phyir 'byung ba'i lam dang / mya ngan las 'das pa'i lam bstan par bgyi'o zhes bya ba nyid de/ de dag ni 'jig rten pa'i lam zhes bya'o/ /dam pa'i chos kyi lam bstan par bgyi'o zhes pa nas/ rdo rje 'dzin pa nyid du 'grub pa'i lam bstan par bgyi'o zhes pa'i bar ni 'jig rten las 'das pa'i lam ste/de nyid rnam pa bzhi'o/ /dam pa'i chos ni zag pa med pa'i dam pa'i chos te/ de'i lam ston par 'gyur ba'o/ /bde 'gro ni rnam pa gnyis te/ cung zad bde ba'i bde 'gro dang / bde ba chen po'i bde 'gro'o/ /de la lha la sogs pa ni cung zad bde ba'i bde 'gro yang yin la/'di ni bde ba chen po'i rnam par rtog pa thams cad dang bral ba'i bde 'gror 'gro ba'i lam ston pa nyid do/ /de nyid 'khor ba'i sdug bsngal mtha' dag spong ba'i phyir na spong ba'i lam bstan par bgyi'o zhes par 'brel to/ /de nyid rnam pa bzhi ste/nyan thos dang rang sangs rgyas dang / byang chub sems dpa' dang / rnam pa thams cad mkhyen pa'i sangs rgyas so/ /de la nyon mongs pa med pa'i lam bstan par bgyi'o zhes pa ni 'phags pa dgra bcom pa rnams kyis nyon mongs pa thams cad spangs pa'i phyir nyon mongs pa med pa'i lam ston pa'o//sangs rgyas nyid ni rang sangs rgyas kyi lam ston par 'gyur ba'o/ /byang chub sems dpa' zhes smos pa ni byang chub sems dpa'i lam ston par 'gyur ba'o/ /rdo rje 'dzin pa nyid du zhes pa ni/ yang dag par rdzogs pa'i sangs rgyas nyid du 'grub pa'i lam ston pa nyid do//de la gang dag 'di skad du ci theg pa chen por sems bskyed nas kyang phyis lam rnam pa bzhir 'gro ba'i rgyur 'gyur ram snyam pa la/ de ni bden te rkyen gyi dbang gis theg pa chen por zhugs nas sems bskyed kyang rang nyid rigs ma nges par gyur pa'i dbang gis phyis ldog par 'gyur ba'ang yod de/dper na rgyal po dpal gyi 'khor lo lta bu'o/ /de bas na de dag yongs su bsrung ba'i phyir lam so sor ston pa la ni 'gal ba med pa nyid do/ /de la yang gong du 'jig rten pa'i lam rnams ni 'jig rten pa'i lha yin pa'i phyir ston par nus la/'jig rten las 'das pa'i lam ston par ji ltar byed snyam pa la/ de la 'di ltar 'bras bu ster bar byed pa ni ma yin gyi/ dam tshig dang ldan pa nyid kyis rnam par grol bar bya ba'i phyir sprul pa la sogs pa'i gzugs sam bsam pa bsgyur ba'am/rmi lam la sogs par lam ji lta ba ston par byed pa nyid de/ de ni mi 'gal ba nyid do/ /lhag ma ni go sla ba'i phyir ma bshad do/ /mdor na brgya byin dang / tshangs pa nyid dang / khyab 'jug chen po nyid dang / dbang phyug chen po nyid kyang stsal bar bgyi'o zhes pa ni de dag gi nus pa dang /'byor pa ji snyed yod pa de snyed kyi dngos grub ster ba nyid du shes par bya'o/ /bcom ldan 'das mdor na bdag cag gis bcom ldan 'das kyi sras kyi dam pa de la bsrung ba dang / bskyab pa la sogs pa ji skad gsol ba bzhin du ma bgyis par gyur na/bdag gi gnas lha ma yin gyis bshig par gyur cig /dpag bsam gyi shing skams par gyur cig /bdud rtsi'i zas dang bral bar gyur cig /bcom ldan 'das kyi bka' bcag par gyur cig / ces pa la sogs pa ni de dag gis bcom ldan 'das phyag na rdo rje dpang por gsol te/ dam tshig gi mna' dam por bskyal bar shes par bya ste/ mna' ni shin tu mi bzad pa yin pa'i phyir rim gro la sogs pa'ang ji skad gsol ba bzhin du byed cing / dngos grub la sogs pa'ang nye bar 'gyur ba nyid do//de ltar 'jig rten pa'i dkyil 'khor du 'jig rten pa'i dngos grub sgrub pa la dga' ba rnams la 'jig rten pa'i dkyil 'khor bstan nas/ da ni 'jig rten las 'das pa'i tshe sgrub pa'i dkyil 'khor bstan pa'i phyir/ de nas bcom ldan 'das phyag na rdo rje nyid kyi 'khor gyi dkyil 'khor la kun du gzigs nas 'dzum pa mdzad pa dang /'khor gyi dkyil 'khor de dag g.yos/ yang dag par g.yos 'gul rab tu 'gul yang dag par 'gul/ 'bar rab tu 'bar/ yang dag par rab tu 'bar/dgod rab tu dgod/ yang dag par rab tu dgod/ rtse rab tu rtse/ yang dag par rab tu rtse zhing rmad kyi ngo mtshar du ma'i 'jig rten du yang dag par rab tu snang bar gyur to zhes gsungs pa ni lha la sogs pa'i 'jig rten pa rnams dam pa'i chos la spro ba chen po bskyed par bya ba dang /'bras bu'i chos rgyu la nye bar bstan pa yin par shes par bya ste/ de la bcom ldan 'das kyis nyid kyi dkyil 'khor la gzigs nas zhes pa ni dga' ba'i tshal du 'dus pa lta zhog gi /sems can thams cad la ye shes kyi spyan gyis kun du gzigs pa'o//nyid ces mos pa bdag po dang bcas pa'i tshig ni sems can thams cad mngon pa rdzogs par 'tshang rgya bar mdzad par dam bcas pa'i phyir zhal gyis bzhes pa'i zhing rnams so/ /'dzum pa mdzad pa ni rnam pa gnyis te/ zhal gyi 'dzum pa mdzad pa dang /thugs rdo rje la dam pa'i chos rgya che ba zab mo yang dag par ston par 'gyur ba nyid do/ /de la zhal gyi 'dzum pa mdzad pa ni dam pa'i chos 'di la sems can rnam grol bar 'gyur ba la dgyes pa nyid do/ /'khor gyi dkyil 'khor de dag yongs su dag par g.yos zhes pa la sogs pa ni dam pa'i chos 'di la brten pa'i gang zag de dag yongs su rdzogs pa'i mthar mngon par rdzogs par 'tshang rgya ba'i skad cig la 'jig rten gyi khams rnams yang dag par g.yo ba la sogs pa dang /'bar ba la sogs pa dang / bdud kyi tshogs rnams dgod pa dang /lha dang lha'i bu mo la sogs pa'i mchod pa'i tshogs kyis rol pa dag/ gzhan yang sgra dang / 'od dang skar mda' la sogs pa'i ngo mtshar chos sna tshogs pa yang dag par 'byung ba las dgongs pa'o/ /yang dga' ba'i tshal du 'dus pa'i 'khor de dag nyid g.yos pa la sogs pa 'byung ba ste de ni phyogs dang por shes par bya'o//de nas tshangs pa la sogs pa lha'i tshogs rnams shin tu ngo mtshar du gyur nas bcom ldan 'das la 'di skad ces gsol to/ /bcom ldan 'das sangs rgyas dang / byang chub sems dpa' rnams ni rgyu ma mchis par 'dzum pa mi mdzad ni 'dzum pa mdzad pa'i rgyu ci lags/ bcom ldan 'das de'i slad du 'dzum pa mdzad pa'i rgyu gang lags pa/ lung bstan du gsol zhes pa ni tshangs pa la sogs pa'i lha rnams the tshom yongs su gcod pa'i phyir zhu ba ste/de la ngo mtshar khyad par can dag 'jig rten du bstan pa dang / bcom ldan 'das kyis 'dzum pa mdzad pa la nges par gdon mi za bar rgyu bla na med pa cig yod pa'i phyir sangs rgyas bcom ldan 'das dang / byang chub sems dpa' rnams rgyu'am rkyen ma mchis pas 'dzum par mi mdzad pas/ci la dgongs te 'dzum pa mdzad ces yang dag par zhu ba'o/ /de nas bcom ldan 'das phyag na rdo rjes lha rnams kyis gsol ba'i tshig gsan nas 'di skad ces bka' stsal to/ /tshangs pa la sogs pa'i lha rnams sngon gyi sangs rgyas thams cad kyis bshad pa'i 'chi bdag zhi bar byed pa dang /dus ma yin par 'chi bdag 'joms par byed pa'i rig sngags gzi brjid chen po gang yin pa thos sam zhes gsungs pa ni lha la sogs pa'i 'jig rten pa rnams dam pa'i chos khyad par can la myur du 'jug par bya ba'i phyir gsungs pa ste/de la sngon gyi sangs rgyas thams cad kyis bshad pa ste/ da ni yon tan khyad par can du bya ba'i phyir gsungs pa'o/ /'chi bdag zhi bar byed pa ni dam pa'i chos sgrub pa'i phyir ji srid nyi ma dang /zla ba 'jig rten du gnas kyi bar du 'tsho ba dang ldan par byed pa'o/ /dus ma yin par 'chi bdag 'joms pa ni tha mal gyi gnas skabs na mi la sogs pa rang gi tshe'i tshad du mi phyin par rkyen gyi dbang gis 'chi ba la sogs pa yun ring du gnas par byed pa ste/de ni bsgrub pa nyams su len pa dang / skyabs su gsol ba'i bye brag tu shes par bya'o/ /rig pa ni ye shes so/ /sngags ni ngan song thams cad las yongs su skyob par byed pa nyid do/ /gzi brjid ni stobs te/ bdud kyi dpung thams cad ma lus par 'joms par byed pa nyid dang /chen po ni yon tan gyi tshogs rgya chen por 'byung bar byed pas ni chen po ste/ thos sam zhes pa ni 'jug par spro ba bskyed par shes par bya ba nyid do/ /de nas tshangs pa la sogs pa'i lha chen po de dag yang dag par rab tu mgu ste/ ba spu langs nas bcom ldan 'das phyag na rdo rje la phyag 'tshal te/legs so zhes bya ba ni gsol to bcom ldan 'das legs so legs so rdo rje 'dzin pa legs so legs so/ /gang gi slad du tshe thung ba'i sems can rnams tshe bsring bar bgyi ba dang / dus ma lags par 'chi bdag gis nyen pa rnams dang /gang gi dus ma lags par 'chi ba las rnam par grol bar bgyi ba dang / ngan song du skyes pa rnams ngan song gi rgyud thams cad las ci nas kyang rnam par grol bar bgyi ba dang / 'khor ba'i 'jigs pas skrag par sems can rnams bde blag tu 'khor ba las rgyab kyis phyogs par gyur nas myur du bla na ma mchis pa yang dag par rdzogs pa'i byang chub tu mngon par rdzogs par 'tshang rgya bar bgyi ba'i slad du gzi brjid chen po'i stobs dang /mthu chen po'i rig sngags bshad du gsol zhes pa la sogs pa ni tshangs pa la sogs pa'i lha rnams rang dang gzhan gyi don phun sum tshogs par bya ba'i phyir/dam pa'i chos la yang dag par zhugs pa ste/ de la yang dag par mgu nas ba spu langs pa ni 'bras bu'i chos la mngon par dga' ba'o/ /phyag 'tshal nas legs so'i tshig bzhi mngon par bstod pa ni 'bras bu'i chos bzhi la yang dag par bstod pa'o//gang gi slad du zhes pa ni rnam pa gnyis te/ de bzhin gshegs pa rnams kyi dam tshig bstan par bya ba'i phyir dang / sems can rnams mngon par rdzogs par 'tshang rgya bar bya ba'i phyir zhes pa ste/rgyu'am gtan tshigs brjod pa'o/ /tshe thung ba rnams tshe bsring bar bgyi ba dang zhes pa ni sgrub pa'i rjes su 'brang ba rnams so/ /dus ma lags par 'chi bdag gis nyen pa rnam par grol bar bgyi ba ni skyabs su gsol ba'i gang zag rnams te/de dag ni tshangs pa la sogs pas de'i byed pa'i rgyu byed par nges so/ /ngan song du skye ba rnams ngan song gi rgyud las ci nas kyang rnam par grol bar bgyi bar zhes pa ni/ 'dir 'das pa'i sgra tsam zhig smos na'ang ma 'ongs pa dang da ltar gsum ka la shugs kyis go bar bya'o//sems can phal pa la bsams nas smras pa yin pas na/ de ni gzhan gyi don phun sum tshogs pa brjod par bya'o/ /'khor bas skrag pa'i sems can rnams bde blag tu 'khor ba la rgyab kyis phyogs par gyur nas myur du bla na med pa yang dag par rdzogs pa'i byang chub mngon par rdzogs par 'tshang rgya bar bgyi ba'i slad du zhes pa ni lam la zhugs pa'i sems can khyad par can dag la bsams nas smras pa ste/de ni bdag gi don phun sum tshogs par shes par bya'o/ /gzi brjid chen po'i stobs dang / mthu chen po'i rig sngags bshad du gsol zhes pa ni de bzhin gshegs pa'i gsang sngags dang /rig sngags rnams kyis nyon mongs pa dang / bdud kyi tshogs ma lus par yang dag par 'joms pa'i phyir/ gzi brjid chen po'i stobs zhes bya'o/ /mthu chen po'i rig sngags zhes pa la de la 'dir mthu ni nyams su myong ba la mthu zhes zer te/nyams su myong ba'i gnyis su med pa'i ye shes rnam par rtog pa thams cad dang bral ba bde ba chen po'i sku mngon par grub pa nyid do/ /de la gang dag 'di skad du ci nyams su myong ba zhes pa ni tshor ba yin pa'i phyir rnam par rtog pa yin na/gnyis su med pa'i ye shes ni rnam par rtog pa thams cad dang bral ba'o zhes brjod pa 'gal bar 'gyur ro zhe na/ de ni ma yin te/ 'di ltar 'jig rten na sngar gyi gnas skabs las 'das nas gnas skabs gzhan zhig thob par 'gyur ba la 'di las nyams su myong ngo zhes zer te/de bzhin du 'dir yang tshor ba bde ba la sogs pa nyams su myong zhing de la 'di ni bde ba'o/ /bdag gi bde ba dang ldan no zhes bya ba la sogs pa rnam par rtog pa med de/ sngar gyi 'khor ba'i chos las 'das nas phyis bla na med pa yang dag par rdzogs pa'i byang chub tu mngon par rdzogs par sangs rgyas pa nyid gnas skabs snga ma las gnas skabs phyi mar gyur pa'i phyir nyams su myong ba zhes bya'o//de nyid 'khor ba'i sdug bsngal spangs pa'i phyir bde ba chen po zhes brjod de/rgya che zhing zab mo mi 'gyur ba nyid do/ /de yang snang ba rin po che'i mdo las bcom ldan 'das kyis/ su ni yang dag ye shes te/ /kha ni mkha' ltar dri med pas/ /mi rtog ye shes bde ba che/ /skad cig dus dang gnas skabs ni//'og nas gong du gyur pa las/ /bde chen nyams su myong zhes brjod/ /ces gsungs pa'i phyir ro/ /de nas bcom ldan 'das phyag na rdo rjes tshangs pa la sogs pa'i lha rnams kyis gsol ba'i tshig gsan nas/ de bzhin gshegs pa thams cad kyi snying po'i rig sngags 'di nyid kyi sku gsung thugs kyi rdo rje las phyung ngo //oM pu N+ye pu N+ye ma hA pu N+ye a pa ri mi ta a yuHpu N+ye dz+nyA na saM b+ha ro pa tsi te swA hA/ zhes gsungs pa ni de sngon gyi sangs rgyas thams cad kyis bshad pa'i 'chi bdag zhi bar byed pa zhes bya ba'i snying po yongs su gsungs pa ste/de la de bzhin gshegs pa thams cad kyi snying po'i rig sngags zhes pa ni rnam pa gnyis te/ de la gcig ni rnam par byang ba'i de bzhin gshegs pa thams cad kyi rang gi ngo bo bcom ldan 'das phyag na rdo rje nyid yin la/ de'i snying po ni ye shes so/ /de nyid kyis chos kyi dbyings rnam par rig pa'i phyir rig sngags te/ de yang dag par gsungs pa'o/ /gcig ni kun nas nyon mongs pa'i de bzhin gshegs pa thams cad de/ de'i snying po ni gti mug go/ /de nyid yang dag par rig par byed pa'i phyir rig sngags te/de yang dag par gsungs pa'o/ /sku gsung thugs kyi rdo rje las phyung ngo zhes pa ni bcom ldan 'das phyag na rdo rje'i sku gsung thugs kyi rdo rje ste/ de la sku rdo rje ni mtshan bzang po sum cu rtsa gnyis dang / dpe byad bzang po brgyad cus yang dag par brgyan pa nyid yin la/de ni nyon mongs pa'i tshogs 'joms pa'i phyir rdo rje zhes bya'o/ /gsung rdo rje ni tshangs pa chen po'i sgras 'jam zhing yid du 'ong ba/ dam pa'i chos bla na med pa'i bdud rtsi yang dag par spro ba yin la/ de nyid kyis sems can thams cad nyon mongs pa dang /rnam par rtog pa thams cad 'joms pa'i phyir rdo rje zhes bya'o/ /thugs rdo rje ni rnam par rtog pa thams cad dang bral ba rang bzhin gyis 'od gsal zhing / zab mo'i don dang ldan pa de yin la/ de nyid dus gsum du sems can thams cad la khyab pa'i phyir dang /ngo bo nyid las mi 'gyur ba'i phyir rdo rje zhes bya'o/ /nyid ni rang ste sku la brten pa'i chos dang gsung gis gsungs pa dang / thugs kyis mnyam par gzhag pa'i phyir sku gsung thugs kyi rdo rje las phyung ngo zhes bya ba nyid do/ /de ji lta bu'i don dang ldan pa zhig phyung snyam pa la oM zhes pa la sogs pa gsungs te/de la oM ni gong du bshad zin la/ 'jig rten 'di'i bsod nams las bsod nams kyi tshogs chen po bskyed pa'i phyir bsod nams kyi bsod nams zhes bya'o/ /de nyid bdag nyid chen po dang ldan pa'i phyir bsod nams chen po zhes bya'o//de nyid kyi tshe yongs su 'dzin pa'i phyir tshe'i bsod nams zhes bya'o/ /de nyid las me long lta bu'i ye shes la sogs pa bskyed pa'i ye shes zhes bya'o/ /de nyid kyis tsha'i skad cig la yun ring bar gnas pa'i phyir tshe'i bsod nams zhes bya'o//tshe ring bar gnas pa la rgyu bsod nams kyi tshogs zhes bya ba dang rgyu bsod nams kyi tshogs las 'bras bu ye shes kyi tshogs thob pa'i phyir ye shes kyi tshogs zhes bya ba dang / de dag brjod kyis mi lang zhing gzhal ba las 'das par 'phel ba'i phyir dpag tu med pa zhes bya ba dang /de lta bu'i tshogs bskyed pa'i phyir zhes bya ba nyid do/ /de dag gi sngags ni gnyis su med pa'i ye shes snying po dang 'dra ba skye ba yin pa'i phyir snying po'i rig pa zhes bya bar shes par bya'o/ /oM traM swA hA/ nye ba'i snying po'i rig pa'o//oM b+h+rAM swA hA/ snying po nye ba'i snying po'i rig pa'o/ /oM kruM swA hA/ snying po yang dag par bskul ba'i rig pa'o/ /oM traM swA hA/ snying po dam pa'o/ /oM d+hAM swA hA/ gsang ba'i snying po'o zhes gsungs pa ni dkyil 'khor dang las dang / bya ba la sogs pa'i rim pa'i sngags rnams gsungs pa ste/de la 'di dag ni bsnyen pa dang / nye ba'i bsnyen pa dang / sgrub pa dang / sgrub pa chen po rnams kyi bye brag dang / bum pa'i las su bya ba'i rim pa dang / sman dang / rin po che'i sod rnams su bskyed pa'i phyir yig 'bru'i dbye ba dang /mnyam par gzhag pa'i rnal 'byor gyi gnas skabs na spro ba dang bsdu ba la sogs pa'i rim pa yongs su gsungs pa ste/ de la bsnyen pa'i skabs su ni sngags dang po dang gnyis pa sbrel te zlos pa'i phyir snying po dang / nye ba'i snying po zhes pa'o/ / nye ba'i sgrub pa'i skabs su ni gnyis pa dang gsum pa sbrel nas zlos pa'i phyir nye ba'i snying po zhes pa'o/ /sgrub pa'i skabs su ni gsum pa dang bzhi pa sbrel nas zlos pa'i phyir snying po yang dag par bskul ba'o zhes pa'o/ /sgrub pa chen po'i skabs su ni bzhi pa dang lnga pa sbrel nas zlos pa'i phyir snying po dam pa zhes pa'o//de nas dngos grub yang dag par len pa'i skabs su ni sngags drug zlos pa'i phyir gsang ba'i snying po zhes pa'o/ /bum pa'i bya ba'i skabs su dbus su ni 'od dang pad+ma'i dbus su b+h+rUM zhes bya bas bskor ba'o/shar phyogs kyi bum pa la ni traM zhes bya bas bskor ba'o/ /lho phyogs kyi bum pa la ni traM zhes bya bas bskor ba'o/ /nub phyogs kyi bum pa la ni d+h+raM zhes bya bas bskor ba'o/ /byang phyogs kyi bum pa la ni kruM zhes bya bas bskor ba'o/ /yang mar gyi snod la ni b+h+rUM zhes bya bas bsgyur bar bya ba dang /mu tig la sogs pa'i sman dang / rin po che la ni traM zhes bya bas bsgyur ba dang / gser la sogs pa'i sman la ni traM zhes bya bas bsgyur ba dang / byi ru la sogs pa'i sman la ni hraM zhes bya bas bsgyur ba dang / rdo'i snying po la sogs pa'i sman la ni kruM zhes bya bas bsgyur bar shes par bya'o//mnyam par gzhag pa'i rnal 'byor gyi gnas skabs na ni b+h+rUM zhes bya ba'i snying po ni snying gar bskyed pa'i phyir dang / traM zhes bya ba'i snying pos ni mgrin par bskyed pa dang / traM zhes bya ba'i snying pos ni lte bar bskyed pa dang /hraM zhes bya ba'i snying pos ni gsang ba'i gnas su bskyed pa dang / kruM zhes bya ba'i snying pos ni rkang ba'i mthil du bskyed par bya ba nyid kyi phyir nye ba'i snying po zhes pa la sogs pa rim pa gsungs pa nyid de/ de la dang po ni bcom ldan 'das phyag na rdo rje'i sku bskyed pa'i sa bon no//gnyis pa ni bcom ldan 'das tshe dang bsod nams dang ye shes dpag tu med pa'i sku bskyed pa'i sa bon no/ /gsum pa ni khro bo khams gsum rnam par rgyal ba bskyed pa'i sa bon no/ / bzhi pa ni nam mkha'i snying po bskyed pa'i sa bon no/ /lnga pa ni spyan ras gzigs dbang phyug bskyed pa'i sa bon du shes par bya'o/ /de nas de dag gi dkyil 'khor bshad de/ 'khor lo rtsibs bzhi par byas la/ de'i dbus su ni de bzhin gshegs pa tshe dang bsod nams dang ye shes kyi tshogs dpag tu med pa'i gzi brjid kyi rgyal po zhes bya ba'i ming bris te/b+h+rUM zhes bya ba'i snying po'o/ /de'i spyan sngar ni bcom ldan 'das phyag na rdo rje ste/ traM zhes bya ba'i snying po'o/ /g.yon pa khro bo ste/ kruM zhes bya ba'i snying po'o//g.yas par ni nam mkha'i snying po ste/ traM zhes bya ba'i snying po'o/ /rgyab tu ni 'phags pa spyan ras gzigs dbang phyug ste/ hraM zhes bya ba'i snying po'o/ /da bzhin gshegs pa'i 'od kyi dkyil 'khor la ni rig sngags rnams bri'o/ /sgo rnams su ni lcags kyu la sogs pa'i sgo skyong ba rnams rang rang gi snying po dang bcas pa bri bar bya'o zhes gsungs pa de dag dkyil 'khor yongs su gsungs pa ste/de la dang po gnas yid du 'ong ba rnams su sa byin gyis brlab pa la sogs pa byas la/ thig legs par btab ste/dbus kyi 'khor lo kha dog dkar po rtsibs bzhi pa lte ba dang mu khyud du ldan pa gcig bri bar bya'o/ /de'i bar bzhi ni bdud rtsi'i bum pa kha dog dkar po rin po che'i kha rgyan dang bcas pa bzhi bri bar bya'o/ /'khor lo'i mtha' ma ni pad+ma'i phreng bas bskor zhing de'i phyi rol du 'od zer kha dog dkar po phyogs bcur 'phro ba bri bar bya'o//de'i phyi rol ni sgo dang rta babs la sogs pa rgyan rnam pa sna tshogs pas legs par brgyan cing mdzes pa dang yid du 'ong bar bya'o/ /de'i phyi rol du ni rdo rje la sogs pa'i phreng ba gsum gyis bskor bar bya'o//de'i phyi rol du ni zho la sogs pa bkra shis kyi rdzas brgyad dpag bsam gyi shing dang bcas pa bri bar bya ba dang / gzhan yang rdzing bu dang 'bab chu dang nya dang rus sbal dang sbal pa dkar po dang pad+ma'i tshal dang ut+pa la'i tshal sman gyi 'bras bu la sogs pa bri bar bya'o//de'i dbus su ni pad+ma 'dab ma bcu drug pa'i steng du bcom ldan 'das tshe dang bsod nams dang ye shes dpag tu med pa sku mdog dkar po de bzhin gshegs pa'i cha lugs can/ skyes bu chen po'i mtshan sum cu rtsa gnyis dang ldan pa dpe byad bzang po brgyad cus legs par brgyan pa/phyag g.yas pa mi 'jigs pa sbyin pa g.yon pa mchog sbyin du mdzad pa bri bar bya'o/ /de'i g.yas g.yon gnyis su ni bcom ldan 'das sman gyi bla bai DUr+ya 'od kyi rgyal po dang / yum rig 'dzin ma gnyis pa pad+ma'i steng du shing thog a ru ra 'dzin pa dang /bdud rtsi'i bum pa thogs pa bri bar bya'o/ /de bzhin gshegs pa'i pho brang gi kha dog dmar ser du byas pa'i steng du rtsa ba'i sngags rnams bri bar bya zhing rin po che'i phreng bas bskor ba nyid do/ / de'i 'khor lo'i rtsibs shar phyogs su ni pad+ma'i steng du bcom ldan 'das phyag na rdo rje sku mdog dkar po shin tu zhi ba'i cha lugs can rgyan thams cad kyis brgyan pa/ phyag g.yas na rdo rje bsnams pa/ g.yon pas mchog sbyin pa bri bar bya'o/ /lho phyogs kyi 'khor lo'i rtsibs la ni 'phags pa nam mkha'i snying po sku mdog sngon po la bzhin 'dzum pa'i rgyan thams cad kyis brgyan pa/phyag g.yas pas ral gri 'dzin pa g.yon pa mchog sbyin pa pad+ma'i steng du bzhugs pa bri bar bya'o/ /nub phyogs kyi rtsibs la ni 'phags pa spyan ras gzigs dbang phyug sku mdog dmar po rgyan thams cad kyis brgyan pa/bzhin 'dzum pa phyag g.yas pas mchog sbyin pa las bdud rtsi 'dzag pa la g.yon pas pad+ma dmar po yu ba dang bcas pa 'dzin pa bri bar bya'o/ /byang phyogs kyi rtsibs la ni khro bo khams gsum rnam par rgyal ba gong du smos pa'i cha lugs ji lta ba bzhin du bri bar bya'o//'khor lo'i phyi rol gyi grwa bzhir ni sgeg mo la sogs pa rang rang gi kha dog dang mtshan mas mtshan pa bri bar bya'o/ /sgo bzhir ni rdo rje lcags kyu la sogs pa'i sgo skyong ba bzhi dgod par bya ba nyid do//bum pa lnga'am brgyad 'khor los sgyur ba'i sngags kyis btab la bzhag go/ /bdug pa la sogs pa mchod pa'i yo byad thams cad la ni las thams cad pa'i khro bo'i sngags kyis btab la gzhag par bya ba nyid do zhes gsungs pa ni mchod pa'i rdzas bsag par bya ba gsungs pa ste/de la dang por bsnyen pa byas pa'i bum pa kha dog dkar po gcig la rgyan thams cad kyis brgyan cing sman dang spos la sogs pas bkang ba gcig ni rang gi mdun du gzhag par bya'o//de'i mtha' ma rnams su ni bum pa kha dog dkar po lnga la pad+ma 'dab ma bcu drug pa 'od dang bcas pa bris la/ de'i lte ba la lha so so'i phyag rgya bris nas pad+ma'i 'dab ma la yig 'bru'i rnam pa b+h+rUM dang dz+hi la sogs pa bcu drug tu 'khor bar bri bar bya'o//de'i phyi rol gyi 'od la ni khyab par 'byung ba rdo rje'i skabs su gsungs pa'i gsang sngags rnams rang rang gi rig pa ji lta ba bzhin pas bri bar bya'o/ /gzhan yang 'dir ni mchod pa'i tshogs bsag pa ni bum pa de dag gi nang du dri dang / 'o ma dang /sman gyi rnam pa 'byor tshad dang / 'bras dug dang snying po la sogs pas rdzogs par bya ba dang / ras la sogs pa kha dog dkar po rnams kyis mgul bcings pa dang / pad+ma la sogs pa'i 'bras bu dang / me tog dang lo mar ldan pa rnams kyis kha rgyan legs par byas pa dang /me tog dang bdug pa dang dri dang zhal zas dang snang ba dang / btung ba'i rnam pa dang / bca' ba'i rnam pa rnams ni brgya rtsa brgyad du yang dag par bsngags pas rgyud gzhan nas yongs su gsungs pa'o/ /mtha' 'khob la sogs par shin tu dka' bar gyur na 'ang lnga'am bcu las nyung du mi rung bas kho nas mi bya ba nyid do//de la bdug pa la sogs pa la ni khro bo bdud rtsi 'khyil pa'i sngags kyis btab la gzhag par bya ba dang / bum pa rnams la ni gong du gsungs pa'i rtsa ba'i rigs brgya rtsa brgyad la sogs par bsngags la gzhag par bya ba nyid do//de nas sngags mkhan bdag nyid zhugs la/ bde bar gshegs pa sras dang bcas shing rig pa dang lhan cig spyan drangs la bdag nyid dbang bskur bar bya'o/ /de nas skyil mo krung bcas la 'dug la mnyam par bzhag la stong ngam brgya bzlas par bya ste/de nas de bzhin gshegs pa'am/ de nas rdo rje 'dzin pa'am/ 'phags pa spyan ras gzigs dbang phyug la sogs pa mngon sum du mthong ba na ci 'dod pa'i mchog so sor thob par 'gyur ro/ / ci ste mnyam par ma bzhag na'ang de'i tshe yid kyi las nus pa dang stobs dang ldan par 'gyur ro zhes gsungs pa ni nye ba'i sgrub pa gsungs pa ste/ de la dang po bdag nyid dri dang / 'o ma dang / ba'i rnam lnga la sogs pas khrus legs par byas la ga bur la sogs pas lus byugs te/gos dkar po kha dog gtsang ma gyon nas/ dbu rgyan dang rna cha dang / gdu bu dang / mgul rgyan dang / sor gdub rnams kyis legs par brgyan te/ sems can thams cad kyi don du blo bskyed nas rang gi sa bon las 'od zer spros nas bde bar gshegs pa sras dang rig par bcas pa spyan drangs la/ar+g+ha la sogs pas zhabs bsil te/ lcags kyu la sogs pa'i phyag rgyas dgug pa dang / gzhug pa dang bcing ba dang dgye ba rnams byas la/ gnyis su med par byas nas/ mchod pa'i tshogs kyis yongs su mchod de/gong du gsungs pa'i rdo rje 'dzin ma'i phyag rgyas zhugs la/ bcom ldan 'das la dbang rim pa ji lta ba bzhin du nod par bya'o/ /de nas gnang ba legs par thob pa dang / stan bde ba la 'dug ste/ snying po dang nye ba'i snying po'i bar du dbyangs kyi yi ge gnyis pa dang /mthar gnas kyi dang po la dbyangs kyi yi ge lnga pa btags pas 'bum phrag gcig gam khri phrag gcig gi bar du dag gi spyod yul las 'das shing / pad+ma'i dkyil 'khor nas pad+ma'i dkyil 'khor du bzlas par bya ste de ni rdo rje bzlas pa zhes bya'o//de nyid 'od zer kha dog dkar po shin tu gsal shing 'tsher ba stong gsum gyi stong thams cad du rab tu khyab pa'i 'od dang ldan pas rin po che'i phreng ba'i tshul du bsgom par bya'o/ /de nas yid kyi rnam par shes pa snang ba'i cha'am/mig gi rnam par shes pa'i spyod yul du de bzhin gshegs pa'am/ bcom ldan 'das phyag na rdo rje'am/ 'phags pa spyan ras gzigs dbang phyug gam sman gyi bla bai DUr+ya 'od kyi rgyal po la sogs pa snang bar gyur pa ni bdag dang gzhan gyi don ma lus par grub pa'i dngos grub thams cad 'grub par 'gyur ba ni nges pa nyid do//de nyid las gzhan pa gzugs g.yo ba'am sems kyi bde ba la sogs pa rang gis yang dag par rig par gyur pa na'ang dngos grub la sogs pa nye bar gyur pa dang byin gyi rlabs chen por gyur pa'o//ci ste mnyam par ma bzhag pa zhes pa ni/ phyi rol du dmigs pa'i bzlas pa bya ba ste/ des kyang grangs su them par 'gyur ba ni phyis dbang bskur ba dang / bsam pa'i khyad par thams cad gus pa dang ldan/ stobs dang ldan byin gyi rlabs dang ldan par 'gyur ba ste/de ni sngags kyi mthu las byung bar shes par bya'o/ /de nas rdo rje 'dzin ma'i phyag rgya bcings nas/ oM badzra d+ha ra/ rat+na d+ha ra/ pad+ma d+ha ra/ bi shwa d+ha ra/ ta thA ga tas ma ya ma ti kra ma ta thA ga ta sa ma ya At+ma kou0f85haM z hes nga rgyal bskyed la slob ma rnams gzhug par bya'o zhes pa ni sgrub pa'i rim pa gsungs pa ste/de la rang gi snying gar pad+ma dmar po 'dab ma bcu drug pa'i steng du sngags gnyis pa'i yig 'bru bskyed la/ de gyur pa las rdo rje rtse gsum par gyur te/ de dag yongs su gyur pa las bcom ldan 'das phyag na rdo rje bsams la/oM badzra d+ha ra sa ma ya At+ma kou0f85haM zhes nga rgyal bskyed par bya ba dang / de bzhin du dpral bar snying po lnga pa las rin po che bsams la de dag gyur pa las nam mkha'i snying po'i nga rgyal b skyed pa dang /lkog mar snying po drug pa las pad+ma bsams pa las de gyur pa las spyan ras gzigs dbang phyug tu nga rgyal bskyed pa dang / lte bar snying po bzhi pa las ral grir bsams la de gyur pa las khams gsum rnam par rgyal bar bskyed pa dang / yan lag thams cad la snying po gsum pa rtsa'i sbubs su zhugs pa las 'khor lo bsams la de gyur pa las bcom ldan 'das 'khor los sgyur ba'i rgyal por nga rgyal bskyed par bya ba nyid dang / rdo rje 'dzin ma'i phyag rgya ni gong du gsungs pa'i rim pa ji lta ba bzhin du byas la bsam pa dang mthun par sngags rnams kyis byin gyis brlab par bya ba nyid do//de nas 'dis me tog dor bar bya'o/ oM sarba ta thA ga ta pra tIts+tsha ho sa ma ya s+t+waM/ de nas phreng ba nyid kyis mgo la bcings te/ dbang bskur bya'o/ /oM sarba ta thA ga ta a b+hi Shiny+tsa badzra d+ha ra A dz+nyA pa ya hUM b+h+rUM/oM badzra badzra a b+hi Shiny+tsa hUM dzraM/ oM rat+na rat+na a b+hi Shiny+tsa hUM traM/ oM pad+ma pad+ma a b+hi Shiny+tsa hUM hraM/ oM karma karma a b+hi Shiny+tsa hUM kruM/ zhes pa la sogs pa ni dbang bskur ba'i rim pa gsungs pa ste/ de ni sgrub pa chen po zhes bya ba'o/ / de la dang po slob ma de khrus la sogs pa legs par byas la/ rgyan gyis brgyan nas sdig pa bshags pa dang / gsum la skyabs su 'gro ba dang / byang chub tu sems bskyed pa rnams byas nas/ ras la sogs pas mig bkab ste/ rin po che'am me tog rnams//oM sarba ta thA ga ta pra tIts+tsha ho sa ma ya s+t+waM zhes me tog dor bar bya'o/ /de nas pra'i mtshan ma legs par gyur pa dang / gong du gsungs pa'i sngags kyis gdong g.yogs bkrol la/ bcom ldan 'das 'khor dang bcas pa rim pa ji lta ba bzhin du bstan te/sdom pa gzung ba dang rdo rje theg pa la khas yang dag par 'ches par byas nas/ me tog gi phreng ba de nyid mgo la bcings te/ chu la sogs pa'i dbang rim pa ji lta ba bzhin du bskur bar bya'o/ /de'i rjes la gong du gsungs pa'i bum pa lngas dbang bskur bar bya'o//de'i rjes thogs su bdag nyid gong du gsungs pa'i lha'i nga rgyal dang ldan par byas pa las/ oM sarba ta thA ga ta a b+hi Shiny+tsa badzra d+ha ra A dz+nyA pa ya hUM b+h+rUM zhes pa la sogs rim pa ji lta ba bzhin du dbang bskur bar bya'o/ /de nas khyad par 'byung ba'i rdo rjer gsungs pa'i dbang phreng ba dang phyag rgya dang las dang /gzungs dang gsang ba dang thabs dang shes rab dang / 'khor lo rin po che la sogs pa'i dbang bcu rdzogs par bskur bar bya ba nyid do/ /de yang 'dir ni de bzhin gshegs pa'i snying po la rigs kyi mtshan lan gnyis smos pa ni sprul pa la dgongs nas gsungs pa ste/sprul pa ni de bzhin gshegs pa thams cad kyang chos kyi sku'i sprul pa yin du zin kyang / 'bras bu'i sa la gnas pa dang / lam gyi sa la gnas pa la dgongs nas byang chub sems dpa' rnams sprul pa'i sprul par 'dod do//de bzhin gshegs pa'i dbang la rdo rje'i rigs kyi mtshan smos pa ni 'dir tshe dpag med kyi sgrub pa yin pa'i phyir tshe rdo rje dang 'dra bar byed pas na rdo rje'i tshig smos pa nyid du shes par bya'o/ /de nas dam tshig dang bka'i dbang bskur bar bya'o//de la dam tshig ni/ dkon mchog gsum dang byang chub sems/ /bla ma dam pa mi spang zhing / /srog chags rnams ni gsad mi bya/ /ma byin par yang mi blang zhing / /brdzun du smra bar bya ba min/ /pha rol bud med spyad mi bya/ /nyes pa kun gyi gzhir gyur pa'i//chang ni btung bar mi bya zhing / /bla ma smad par mi bya ste/ /de yi grib ma'ang mi 'gom zhing / /slob dpon ma yin mi gzung la/ /rdo rje slob dpon mtshan mi brjod/ /sngags dang phyag rgya'ang mi smad na/ /lha rnams la lta smos ci dgos/ /gal te glen pas smad na ni//'dir ni nad kyis 'chi 'gyur zhing / /pha rol mnar med mi bzad pa'i/ /dmyal bar skye bar the tshom med/ /snying dang lha yi grib ma dang / /'jig rten 'jig rten 'das pa yi/ /phyag rgya yi ge mtshan ma rnams/ /gom pas 'gom par mi bya'o/ / mkhas pas dkon mchog gsum sogs dang / /sangs rgyas bstan la gnod byed dang / /bla ma smod brtson la sogs rnams/ /snying rjes bsgral te gsad par bya/ /chos min ldan dang sdig spyod dang / /rtag tu sems can gnod brtson dang / /dam tshig nyams rnams mkhas pas ni//sngags dang mthu dang sbyor bas bsad/ /rdzas dang ldan zhing ser sna can/ /shin tu 'chums pa'i nor blangs la/ /sems can phongs la sbyin pa bya/ /bla ma la ni mchod pa dang / /de ltar dam tshig bsgrub pa dang / /dkyil 'khor phyir dang spun rnams dang //de bzhin rgyal ba'i sras rnams la/ /mchod phyir mi yi bdag po'am/ /phyug po rnams kyi nor phrog go/ /sems can rnams la phan spyod dang / /de bzhin bla ma'i nor rnams dang / /srog chags srog ni bsrung ba'i phyir/ /brdzun gyi tshig ni smra bar bya/ / sangs rgyas rnams ni mnyes bya dang / /dam tshig yongs su bsrung ba dang / /sngags mkhan gyis ni sgrub pa'i phyir/ /gzhan gyi bud med bsten par bya/ /rdo rje sems dpa'i gnas 'dug nas/ /thams cad spyad cing kun zos kyang / /'grub 'gyur nyes par mi 'gyur na//snying rje ldan la smos ci dgos/ /zhes pa la sogs pa gsungs pa ni dam tshig gi dbang bskur ba gsungs pa ste/ de la de dag las dkon mchog mi spang ba dang / byang chub kyi sems mi spang ba dang / bla ma dam pa mi spang ba dang / srog gcod pa las slar ldog pa dang /ma byin par len pa las slar ldog pa dang / 'dod pas log par g.yem pa las slar ldog pa dang / brdzun du smra ba las slar ldog pa dag ni rtsa ba'i dam tshig bdun zhes bya ste/ de dag nyams par gyur pa ni theg pa chen po'i lam las ltung bar gyur pa dang /mnar med pa'i sems can dmyal ba chen por skye bar nges pas na/ de las gso bar bya ba'i thabs ni de bzhin gshegs pa ngan song thams cad yongs su sbyong ba'i dkyil 'khor du lan nyi shu rtsa gcig gi bar du zhugs shing dbang mnos nas sbyin sreg 'bum dang /gtor ma dang yi ge brgya pa'i snying po 'bum dang / de bzhin gshegs pa ngan song thams cad yongs su sbyong ba'i snying po la sogs pas yongs su dag par bya ba nyid do/ /des na sdig pa'i rgyud las rnam par thar bar 'gyur te/gzhan du ni ma yin no/ /de la dkon mchog gsum mi spang ba ni de dag la ma gus pa dang / rgyab kyis phyogs par mi bya ba nyid do/ /byang chub sems mi spang ba ni gong du smos pa'i byang chub kyi sems rnam pa gsum mi spang pa'o/ /bla ma mi spang ba ni bla ma dam pa rnams la ma gus pa dang /khyad du gsod pa la sogs pa mi bya ba nyid do/ /srog gcod pa ni rnam pa gnyis te/ bsams bzhin du gdug pa'i sems dang ldan pas mi'i 'gro ba bsad na ltung bar 'gyur ba'o/ /dud 'gro'am sprul pa la sogs pa ni nyes pa sbom po yin te/de ni gtor mas 'dag par gsungs so/ /ma byin par len pa ni rnam pa bzhi ste/ bla ma'i rdzas dang / phyogs bzhi'i dge 'dun gyi rdzas dang / 'phags pa'i dkor dang sbyin pa'i bdag po rnams kyi rdzas te/ de dag gi nyes pas ni gong du smos pa rnam par sbyang ngo //sems can gzhan dang dud 'gro la sogs pa'i rdzas ni nyes pa sbom por 'gyur ro/ /pha rol gyi bud med mi spyad pa ni gnyis te/ 'khor ba'i longs spyod reg bya'i bde ba la chags pa dang / gzugs la chags pas bdag po dang bcas pa'i bud med la spyod pa dang /rnyed pa dang bkur sti'i phyir bdag po dang bcas pa'i bud med la spyod pa ste/ gzhan gyis bdag gir ma byas pa'i bud med la rnyed pa dang bkur sti la sogs pa'i ched du spyod pa ni nyes pa sbom por 'gyur ro/ /brdzun du smra ba ni gnyis te/dam pa'i chos log par ston pa dang / bdag nyid yon tan gyi tshogs dang mi ldan par gzhan gyi rnyed pa bsdu ba'i phyir rang gi yon tan gyi tshogs dang ldan par smra zhing gzhan bslu ba ste/ de las gzhan pa'i brdzun ni nyes pa sbom por 'gyur ro/ / rtsa ba'i dam tshig ni gong du smos pa las shes par bya ba nyes pa sbom po ni gtor ma dang yi ge brgya pa dang / sbyin sreg la sogs pa gang yang rung bas bshags par bya ba nyid do/ /chang ni nyes pa sbom po rnams kyi nang na lci ba ste/ de ni rnam pa gsum mo/ nyes pa sbom po rnams shor ba dang /gzhan gyi sems 'khrugs par byas pa dang ji srid 'jig rten pa mos par ma gyur gyi bar du yan lag tshang ba ste/ cung zad bsten pa la sogs pa ni yan lag gi dam tshig yin pas de'i skad cig la lha'i rnal 'byor nyid kyis 'dag par 'gyur ba ste/de yang bcom ldan 'das kyis 'jam dpal gyi rgyud las/ bsams bzhin gdug pa'i sems ldan pas/ /mtshams med rgyu min mi gsod na/ /srog gcod pa yi yan lag tshang / /bla ma dam tshig 'brel pa dang / /phyogs bzhi'i dge 'dun 'phags pa'i dkor//sbyin bdag la sogs mi rnams rdzas/ /de mi shes par blangs nas ni/ /sbyin sems med cing 'khrugs gyur na/ /rdo rje 'dzin pa'i sdom pa zhig /reg bya bde ba gzugs dag dang / /rnyed pa la sogs bkur sti'i phyir/ /gzhan gyis bdag byas bud med la//spyad nas pha rol 'khrugs gyur na/ /'dod pas log spyod rnams smin che/ /sems can dad dang ldan pa la/ /dam chos logs par ston pa dang / /rnyed dang grags pa'i phyir dag tu/ /med bzhin yon tan tshogs smra ba/ /dmyal ba'i rgyu ni mi bzad 'thob/ /nyes pa'i tshogs rnams shor ba dang //gzhan gyi sems nad 'jig rten dpya/ /chang btung ba yi yan lag tshang / /zhes gsungs pa'i phyir ro/ /bla ma smad par mi bya ste/ /zhes pa nas/ gom pas 'gom par mi bya'o/ /zhes pa'i bar du yan lag gi dam tshig shes par bya ba drug ces bya ba ste/de la bla ma mi smad pa ni bla ma'i skyon mi brjod pa'o/ /de'i grib ma la mi 'gom pa na de nyid rdo rje 'dzin pa'i sku'i ngo bo yin pa'i phyir bde bar gshegs pa'i sku bcom pa dang 'dra bar gsungs pa'o/ /slob dpon ma yin pa mi bzung ba ni rang nyid kyi bla ma la yod bzhin du rnyed pa'am/kha zas sam/ gcam gsag gi phyir/ mi gzhan la bla ma zhes pa la sogs pa che ba'i yon tan gyi tshig mi brjod pa dang / bsnyen bkur la sogs pa mi bya ba ste/ de ni bla ma'i thugs la rag las pa nyid do//rdo rje slob dpon gyi mtshan mi brjod pa ni mi phal ba'i ming nas brjod pa bzhin du rdol thabs kyi bla ma'i mtshan mi brjod pa ste/ gang dag mos pa dang dad pa'i phyir 'dri na ni gang du yon tan bstod pa'i tshig brjod de/ zhal snga nas ldan par byas pas smra ba nyid do//sngags dang phyag rgya dang lha la mi smad pa ni/ lha 'di nyid dang / sngags 'di nyid dang / phyag rgya 'di la brten nas ni dngos grub 'grub par mi 'gyur ba nyid do zhes pa la sogs pa'i tshig mi brjod pa ste/ de ni bla na med pa'i dkon mchog gsum la skur pa 'debs shing log par lta ba zhes bya ba ste/ngan song du ltung ba'i rgyu chen por 'gyur ba nyid do/ /rnying dang lha yi grib ma dang / /zhes pa ni lha la phul ba'i rnying pa ste/ mchod pa'i rdzas thams cad do/ /grib ma ni lha'i grib ma'o/ /de la 'goms pa ni lha nyid bshig pa dang 'dra ba'i sdig par bcom ldan 'das kyi gzhung du mthong ngo //'jig rten pa'i phyag rgya dang mtshan ma ni 'jig rten pa'i lha tshangs pa la sogs pa'i rim pa'am/ oM la sogs pa ste de yang bcom ldan 'das kyis dam tshig tu bsdus pa'i phyir rung ba ma yin pa nyid do//'jig rten las 'das pa'i phyag rgya dang mtshan ma ni de bzhin gshegs pa'i 'khor rnams bzhis bsdus pa'i rgyan dang / rdo rje dang dril bu dang / phreng ba dang / yig 'bru la sogs pa thams cad de/ de dag ni de bzhin gshegs pa'i gzugs kyi ngo bo nyid yin pa'i phyir dang bdag gi ye shes bskyed pa'i phyir ma dang 'dra ba nyid kyis sdig par 'gyur ba nyid do//de bas na de dag lam kha la sogs pa gzhan sdig pa sogs pa'i gnas na'ang gnas gtsang ma rnams su bzhugs su gsol ba ni de bzhin gshegs pa rnams la gzhal yas khang phul ba dang 'dra bar de bzhin gshegs pas gsungs so//gzhan du na de dag la ma gus pa ni de bzhin gshegs pa la ma gus pa nyid du thal bar 'gyur ro/ /mkhas pas dkon mchog gsum sogs dang / zhes pa nas/ sngags mkhan gyi ni bsgrub pa'i phyir/ /gzhan gyi bud med bsten par bya/ /zhes pa'i bar du ni gnang ba spyad par bya ba'i dam tshig bzhi zhes bya ba gsungs te/ de la de'i dgongs pa ni rnam pa gnyis su go bar bya ste/ phyi rol du sgra ji bzhin pa ma yin par gsungs pa dang /nang du sgra ji bzhin ma yin par gsungs pa'o/ /de la phyi rol du sgra ji bzhin pa gsungs pa ni/ mkhas pas dkon mchog gsum sogs dang / /sangs rgyas bstan la gnod byed dang / /zhes pa la sogs pa gsungs te/ mi gang dag rgyal po'am mu stegs la sogs pa bla na med pa'i dkon mchog gsum la zhe sdang ba dang /bde bar gshegs pa'i bstan pa la yongs su bshig par brtson pa dang / bdag gi theg pa chen po'i bla mar gyur pa zhe sdang gis smod par byed/ srog la sdo bar byed pa rnams ni 'jig rten 'di ru sdig pa'i rgyu chen po bsags pa las mnar med pa'i sems can dmyal ba chen por ltung ba'i phyir/rnal 'byor pa mchog gi snying rje chen po dang ldan pas de nyid du sdug bsngal las yun thung bar bya ba dang / bde bar gshegs pa'i 'khor rnams dang /bla ma la sogs pa bde blag tu byang chub sgrub tu gzhug pa'i phyir/ zhe sdang gi sems spangs la snying rje chen po bskyed pa'i mthu dang stobs la sogs pas gsad par bya ba ste/ de ni ting nge 'dzin gyi khyad par dang ldan pa srog gi rnam par smin pa'ang mi 'ong bar/bde ba chen po'i gnas su skye bar nus pa'i rnal 'byor pas bya ba nyid do/ /de bzhin du gzhan yang / chos min ldan dang sdig spyod dang / /zhes pa la sogs pa gsungs te/ de la chos min pa dang sdig pa spyod pa ni gcig tu shes par bya'o//de ji lta bu yin zhe na/ 'di ltar de bzhin gshegs pas phyogs gzhan du don gzhan la dgongs nas skye ba bdun pa dang ldan pa dang / dpral bar ut+pal lta bu'i ri mo mchog tu snang ba dang / dri sogs ldan pa'i mi la sogs/ /sha zos na ni thar bar 'gyur//zhes gsungs pa rnams la gti mug gi dra bas kun nas bcings shing shes rab kyi kha phyir phyogs bltas te/ kho na bzhin du dpral ba'i steng na ut+pal 'dra ba'i ri mo yod pa dang / ga bur la sogs pa'i dri zhim pa yod pa rnams kyi mi dang / dud 'gro la sogs pa bsad nas sha za ba la sogs pa yod de/de ni mi dge ba'i bshes gnyen la brten pa dang / log par rtog pa'i bdag nyid kyis/ de ni dus thams cad du de grol bar 'dod na/ de ltar mi la sogs pa skye ba bdun dang ldan pa dang / ut+pal 'dra ba'i ri mo dpral ba'i steng na yod pa'i sems can gang yin pa de'i sha zos pas grol bar 'gyur ba zhig na/de ni dngos grub kyi rdzas chen po khyad par can yin pa'i phyir lan cig zos pas ci ste grol bar mi 'gyur ba de la'ang yid ches pa med par spyod pa dag ni dam pa'i chos ma yin pa dang /sdig pa'i las thams cad la spyod pa'i phyir chos min ldan dang sdig spyod ces bya ste/ de dag la gong du gsungs pa bzhin du snying rje chen po bskyed pas gsad par bya ba nyid do/ /rtag tu sems can gnod brtson ni/ /de nyid dang / nya pa dang /shan pa dang / bya pa dang / ri dgas pa la sogs pa ste/ de dag kyang las shin tu mi bzad pa chen po byed pa na/ snying rje'i sems kyis gsad par bya ba nyid do/ /dam tshig nyams pa ni 'dir rnam pa gnyis te/ bla ma gang rdo rje 'dzin pa dang dbyer med pa dang gnyis dam tshig nyams pa las phyis yang bla ma gsod par 'dod pa'i sems can sdig pa'i dbang du gyur pa dag sdig pa'i rgyu gzhig pa'i phyir snying rje'i sems kyis gsad par bya ba dang /yang rnal 'byor pa gang dag gsang sngags kyi dam tshig nyams nas/ da ni bdag la rtsa ba chad pa'i phyir/ yan lag skye bar mi 'gyur bas na bdag gi sdig pa'i las ci dgar bya'o snyam nas dmag dpon dang / gshed mi dang / nye ba la sogs pa sdig pa'i tshogs dpag tu med pa spyod pa yod do/ /de dag lta bu'i gang zag ni ting nge 'dzin khyad par can gyis mnyam par gzhag la/da ltar gyi tshe srog 'di bshad pa las sdig pa'i rgyur mi 'gyur zhing / de nyid rnam par grol ba'i lam du shes pa na snying rje chen pos gsad par bya ba nyid do/ /de ni byang chub kyi sems kyi bslab pa zhes bya ba'i grangs su 'gro'o//rdzas dang ldan zhing ser sna can/ /shin tu 'chums pa'i nor blangs la/ /sems can phongs la sbyin pa bya/ /zhes pa 'dir gsum ste/ de la gcig ni mi gang dag rin po che la sogs pa'i rdzas kyi rnam pa ni dpag tu med pa zhig yod la/ shin tu ser sna'i dbang du gyur nas bla na med pa'i dkon mchog gsum la mchod par mi byed cing /sems can rnams la sbyin pa la sogs pa'i las mi byed pa ni shin tu 'chums par 'gyur ba ste/ de'i rdzas ni sngags dang sman gyi mthu dang / stobs la sogs pas blangs la rang 'dod pa'i phyir ma yin par sems can gzhan la snying rje'i sems bskyed pa dang /mi de nyid la snying rje bskyed la gzhan la sbyin par bya ste/ de yang yul gang la snying rje'i sems rnam pa gnyis skye ba'i byang chub sems dpa'i bslab pa'i rang gi ngo bo nyid do/ /gcig ni rgyal po la sogs pa dbang dang ldan stobs dang ldan pas rang nyid la'ang rdzas kyi rnam pa dpag tu med pa yod bzhin du chags pa'i dbang gis sems can gzhan gyi rdzas 'phrog par byed sdom par byed chad pa gcod par byed pa dang /sbyin pa'i sems dang mi ldan pa rnams kyi rdzas ni bdag gis 'phrog pa dang /rku ba la sogs pas blangs nas chags pa med pa'i sems kyis gzhan la sbyin par bya ba nyid do/ /bla ma la ni mchod pa dang / /zhes pa nas/ phyug po rnams kyi nor 'phrog go/ /zhes pa'i bar ni 'di ltar yang bdag ni ser sna'i rgyu las grub pas yo byad dang mi ldan la bla ma dam pa la mchod pa dang /rnal 'byor gyi bya ba bsgrub pa dang / dkyil 'khor chen po bzhengs pa'i mchod pa'i yod byad bya ba dang / rdo rje spun la sogs pa la mnyes par bya ba dang / bla na med pa'i 'phags pa dkon mchog gsum la sogs pa la mchod pa'i khyad kyis bsod nams kyi tshogs bsags pa'i phyir/rgyal po'am phyug po rdzas dang yo byad kyis brel bar ma gyur pa rnams kyi rdzas phrogs la longs spyod par bya ba nyid de/ de yang ji srid sems can de dag gi sems dang 'gal bar ma gyur pa de srid du bsgrub pa ste/de dag las gzhan du sems dang 'gal ba ni ma gtogs so/ /sems can rnams la phan spyod dang / /rtag tu bla ma'i nor rnams dang / /srog chags srog ni bsrung ba'i phyir/ /brdzun du yang ni smra bar bya//zhes gsungs pa ni 'di ltar rnam pa gsum ste/ de la mi gang gis sems can gang dag brdung ba dang / rdzas 'phrog pa dang / 'dzin pa dang / chad pas gcod pa la sogs pa'i las byed pa na gnas gzhan dang gzhan dag tu shin tu 'jigs shing skrag pas bros nas 'dug pa la/de la gzhan dag 'dri ba zhig na ni rnal 'byor pa sems can thams cad la snying rje chen po dang ldan pa de nyid kyis ma mthong ba zhes pa dang / med ces pa dang / ma yin zhes pa la sogs pa ni brdzun du smra bar bya ba nyid dang /yang phyogs gzhan du bla ma la dgra sdang bar gyur pa dag nor la sogs pa dag 'phrog par 'gyur na 'di ni bdag gi zhes pa la sogs pas bla ma'i nor bsrung bar bya ba dang / yang phyogs 'ga' zhig tu gshed ma la sogs pas brdas pa'i mi dag nags tshal lam/grong khyer la sogs par bros nas gzhan dag 'dri bar gyur pa na phyogs log par gzhan du lam bsten par bya ba ste/ de ni rnam par grol ba'i rgyu'i brdzun du smra ba zhes bya'o/ /sangs rgyas rnams ni mnyes byas dang / /zhes pa la sogs pa ni 'di ltar rnam pa gnyis te/bdag gis mchod pa'i tshogs byed pa'i gnas skabs su rdo rje'i sring mo la sogs pas dga' ba chen pos lung ston par 'gyur ba ni de nyid dam tshig yin pa'i phyir/ gzhan gyis bdag tu byas kyang / 'dod pa'i chags pa'i bsam pa ni ma yin gyi/bde bar gshegs pa'i tshogs la bde ba chen po'i ros mchod pa'i phyir dang / longs ma spyod par gyur na rdo rje'i srin mo 'khrugs shing zhe sdang bar gyur te/ dam tshig nyams par gyur pa bsrung ba'i phyir/ gzhan gyi bud med bsten pa dang / /yang sgrub pa gzhan dag tu bud med mtshan dang ldan pa lo'i grangs dang kha dog dang /gzhon byad dang / rang bzhin dang / phyag rgya la sogs pas mtshon pa'i bud med dag dgos par gyur la/ de dang mi ldan na ni dam tshig nyams shing dngos grub 'grub par mi 'gyur ba zhig na/ gzhan gyi dbang du byas kyang sngags dang sman la sogs pas bkug la longs spyad par bya ba ste/ de ni lhag pa'i tshul khrims kyi bslab par bya ba yin pa'i phyir ro/ /de yang bdag po dag gis shes par ma gyur pa de srid du bsgrub par bya ba ste/ gzhan dag zhe sdang las nan gyis sgrub pa ni sdig pa'i rgyur gyur pa nyid do//de dag rnams kyang rab tu byung ba'i dge slong rnams kyis ni bsgrub pa'i dus su lus la reg par bya ba dang / de'i gzugs brnyan bris la bsten pas byas kyang 'grub par gsungs te/ de la theg pa chen po nam mkha' mdzod kyi rgyud las/gang du khyim pas bsgrub bya ba'i/ /phyag rgya mchod rdzas bud med sogs/ /tshangs par spyod pa'i dge slong gis/ /chos kun sems las grub pas na/ /mi 'gal bar ni yid kyis brtag /ces gsung pa'i phyir ro/ /yang de dag gi don nang du sgra ji bzhin ma yin par bstan par ni/'di ltar bdag nyid kyi rnam par rtog pa'i rgyud yongs su gcad par bya ba ste/ de ni de yis 'tsho ba'i phyir srog ces bya ste/ de nyid dam tshig nyams pa'i rgyu yin pa dang / yang dag pa'i chos ma yin pa dang / sdig pa'i las la kun du spyod pa'i phyir dang /de bzhin gshegs pa'i bstan pa'i snying po la gnod par byed pa'i phyir gsad par bya ba nyid do/ /de ji lta bus gsad par bya zhe na/ shes rab chen po'i mtshon bde bar gshegs pa'i bka' la brdar te/ thar pa chen po'i grong khyer gsang sngags bla na med pa'i khyim du khrid la/bla ma dam pa'i rtsal dang bsdongs te/ ske gcad par bya ba nyid do/ /ma byin par len pa ni 'di ltar bdag nyid kyis chos dang zang zing dang / skyabs kyi sbyin pa la sogs pas sems can thams cad la dus gsum du gtang bar bya ba ste/ci'i phyir zhe na/ sems de nyid las bsams pa'i 'bras bu sna tshogs pa 'byung ba dang / de nyid sngar rus sbal khog pa'i nang du 'khums pa bzhin du bsam pa chung ngu dang ldan par 'jug pa dang / rgyal po lta bur rnam par shes pa thams cad kyi gtso bo yin pa'i phyir phyug po zhes bya ba dang /'chums pa zhes bya ba dang / mi'i bdag po zhes bya ba ste/ de ni nor dbrog pa'o/ /de ma byin par len par ji ltar 'gyur snyam pa la/ de ni bdag las sus kyang ma byin par gang las kyang ma thob cing bdag gis blangs nas gtong ba'i phyir ma byin par len pa nyid do//yang 'dir brdzun du smra ba ni bdag gis sems can thams cad kyi don du sems bla na med pa bskyed nas/ bla na med pa'i yang dag par rdzogs pa'i byang chub bsgrub ba ste/ de nyid bla na med pa byang chub kyi nor tshol ba dang /gsang sngags kyi dam tshig la mngon par spyod pa dang / bdag nyid kyi yid kyi rnam par shes pa nyon mongs pa'i gshed ma las bsrung ba dang sems can thams cad kyi don du spyod pa'i phyir sems can la phan par spyod pa dang / bla ma'i nor bsrung ba dang /srog chags rnams kyi srog bsrung ba zhes bya'o/ /de la brdzun gyi tshig tu ji ltar 'gyur snyam pa la/ de ni 'di ltar sems can rnams ni skye ba thog ma med pa nas log par rtog pa'i dbang gis 'khor ba'i rgya mtsho'i gting mtha' med par gang ba de la bskal pa chen po brgyad khri bzhi stong du 'ang bdag gis grol bar mi 'gyur ba'i brdzun gyi tshig ces bya ba kho na'o//yang 'di ltar gzhan gyi bud med bsten pa ni me long lta bu ye shes la sogs pa la mngon par sbyor ba ste/ de ni 'di ltar bde bar gshegs pa rnams mngon par byang chub pa rnam pa lnga dang /cho ga rnam pa gsum gyis dgyes par byed pa dang / de nyid dam tshig chen po dang ldan pa dang / yang dag pa'i rnal 'byor sgrub pa'i phyir/ /sangs rgyas rnams mnyes par bya ba dang dam tshig bsrung ba dang sngags mkhan gyi bsgrub pa'i phyir zhes bya bar sbyar ro//de la ci'i phyir bud med ces bya snyam pa la/ de ni rnam par rtog pa dang bral ba'i bde ba ster ba'i phyir dang / 'gro ba ma lus pa la phan par byed pa'i yon tan dpag tu med pa'i tshogs bskyed pa'i phyir bud med ces bya'o//de la gzhan gyi ji ltar yin zhe na/ bdag nyid nyon mongs pa dang bcas pa'i rgyud las gzhan pa/ rnam par grol ba'i lam pa rnams kyis spyod pa'i phyir/ gzhan gyi bud med ces pa nyid do/ /rdo rje sems dpa'i gnas 'dug nas/ /thams cad spyad cing kun zos kyang //'grub 'gyur nyes par mi 'gyur na/ /snying rje ldan pa smos ci dgos/ /zhes gsungs pa ni rnal 'byor pa sems kyi khyad par bsdus pa'i don gsungs pa ste/ de la de'i dgongs pa ni rnam pa gsum du go bar bya'o/ /de la gcig ni dpal rdo rje sems dpa'i gnas dam par 'gyur ba thar pa'i grong khyer chen po theg pa chen po gsang sngags kyi sgor zhugs pa'i gang zag des sgor zhugs pa tsam gyis kyang 'dod pa'i yon tan lnga la longs spyod pa dang /bza' ba la sogs pa thams cad kyang zos kyang sdig pa'i lam du 'jug par mi 'gyur na/der zhugs shing zhugs nas kyang / snying rje chen pos 'gro ba'i don byed pa lta smos kyang ci dgos par yang dag par rdzogs pa'i byang chub kyi rgyur 'gyur zhing nyon mongs pa'i skyon gyis ma gos par 'gyur ro zhes pa ste/de ni gzhan dag tu gzhug pa'i yan lag tu lam gyi phan yon bstan par shes par bya'o/ /gcig ni 'di ltar dpal rdo rje sems dpa'i gnas ni rnam par rtog pa thams cad dang bral ba'i chos nyid stong pa nyid yin zhing de la yang dag par gnas par byas nas chos thams cad rang bzhin gyis rnam par dag pa'i 'du shes kyis chags pa dang 'dod pa'i sems spangs nas/'dod pa'i longs spyod la mngon par spyad kyang / yang dag par de kho na nyid 'grub par 'gyur zhing nyes par mi 'gyur ba de las kyang khyad par du lha'i rnam par dag pa'i rnal 'byor gyis 'dod pa'i yon tan lnga la longs spyod pa smos kyang ci dgos te/yang dag par rdzogs pa'i byang chub kyi 'bras bu myur du 'thob par bya ba nyid de zhes sbyar bar bya'o/ /gcig ni rang nyid dpal rdo rje sems dpa'i gnas longs spyod rdzogs pa'i skur mngon par bskyed pa gcig pu la gnas nas 'dod pa'i longs spyod la longs spyad kyang yang dag pa'i de kho na nyid 'grub par 'gyur na/de las kyang snying rje chen pos 'gro ba'i sems can thams cad kyi don byed pa lta smos kyang ci dgos te/de yang dag par rdzogs pa'i sangs rgyas nyid du 'grub par 'gyur ba kho na'o zhes bya ba nyid do/ /de dag gis ni theg pa chen po gsang sngags pa'i gang zag rnams kyi lhag pa tshul khrims kyi bslab pa dang / lhag pa sems kyi bslab pa dang /lhag pa shes rab kyi bslab pa rnam pa gsum dang / theg pa chen po gsang sngags kyi grub pa'i mtha' yang bshad pa nyid du shes par bya'o/ /yang de dag la ni sbyin pa la sogs pa'i pha rol tu phyin pa drug dang / tshad med pa rnam pa bzhi dang / dran pa nye bar gzhag pa bzhi dang yang dag par spong ba bzhi dang lam bzhi la sogs pa'i chos rnams kyang thams cad tshang bar ldan pa ste/tshig mangs pa'i skyon du 'gyur gyis dogs nas 'dir ni ma bris pas ci rigs su sbyar bar bya ba nyid do/ /de yan chad kyis ni dam tshig gi dbang bskur ba bstan nas/de ni bka'i dbang bskur bar bya ba gsungs te/ de nas 'dis bka'i dbang bskur bar bya'o/ /oM sarba ta thA ga ta a dz+nyA te/ rA hA si me gr-ih+Na badzra su sid+d+ha ye/ oM badzra tiSh+Tha hUM zhes pa ni gong du gsungs pa'i cho ga las shes par bya ste/ de la/ oM khyed kyis sems can bsgral ba'i phyir/ sngags kyi rgyud rnams bshad pa yang / /dkyil 'khor rab gnas sbyin sreg rnams/ /rgyud nas gsungs pa bzhin du bsgrub/ /ces pa la sogs pa'i tshigs su bcad pa rnams bsgrag par bya ba nyid do/ /'dis lag tu rdo rje byin la las kyi dbang bskur bar bya'o//oM sarba karma Ni ku ru b+hU ta ma re hUM/ de nas/ sangs rgyas bsgrub phyir bla ma la/ /khyod kyi lus mchog sbyin par bya/ /nor dang dbyig dang 'bru rnams dang / /stan dang bzhon pa de bzhin te/ /bran gyi mchog dang khang pa dang //rgyal po rgyal srid de bzhin te/ /bu dang bu mo chung ma dang / /ma dang sring mo tsha mo dang / /gzhan yang ci bdog thams cad ni/ /dad pas bsams nas bla ma la/ /dbul ba nyid du bya ba yin/ /de nas byang chub bar du ni/ /sangs rgyas nyid dang gzhan dag dang //'jig rten pa yi mthu chen rnams/ /gang 'dod pa dag sgrub 'dod pas/ /dngos grub rnams ni gsol ba gdab/ /ces gsungs pa ni sngags gnyis pa dang / /khyod kyis shar phyogs song nas ni/ /rdo rje chos kyi 'khor lo bskor/ zhes gsungs pa la sogs pa'i tshigs su bcad pa rnams kyis ni las kyi dbang bskur ba gsungs pa ste/khyab pa 'byung ba rdo rje'i skabs su gsungs pa'i sngags/ oM bud+d+ha karma a b+hiShiny+tsa oM zhes pa la sogs pa'i sngags rnams kyis kyang rim pa ji lta ba bzhin du dbang bskur bar bya ba nyid do//sangs rgyas 'grub phyir bla ma la/ /khyod kyi lus mchog sbyin par bya/ /zhes pa la sogs pa ni slob ma'i bya ba gsungs pa ste/ de la 'jig rten 'dir skyabs dang / gling la sogs pa yud tsam gyi bde ba ster bu la'ang rdzas dang kha zas la sogs pas yang dag par mgu bar byed na/bskal pa grangs med par 'khor ba'i sdug bsngal mi zad pa las thar bar byed pa'i bla ma la nor dang / dbyig dang / 'bru dang / chung ma dang / bu dang bu mo dang / sring mo dang / yul la sogs pa dbul bar bya ba nyid do//rgyal po rgyal srid ces pa ni/ /slob ma gang dag rgyal po yin na'ang rgyal srid kyang dbul bar bya ba nyid dang / gzhan yang bla ma'i thugs su ji ltar 'ong ba'i rdzas dbul bar bya ba dang / tha na rang gi srog gis kyang bla ma la mchod par bya ba ste/bla ma la gus par bya ba ni/ theg pa chen po rgyal ba'i bka' thams cad nas rgyas par gsungs pas 'dod pa'i yon tan thams cad kyis yongs su mnyes par bya ba kho na'o/ /de la yang dag par rdzogs pa'i sangs rgyas ster bar lta ba ma yin gyi/phyi rol gyi bstan bcos dbang phyug chen po'i rgyud la brten pa shin tu mchog tu gyur pa'ang / srid pa'i rtse mo las mi 'thob pa la yang / bla ma dang mnyam pa yang min/ bla ma dang mnyam ma yang min/ /'khor ba rgya mtsho rgal dka' ba'i/ /sdug bsngal de las de dag kun//zhes zer na/ yang dag par rdzogs pa'i sangs rgyas ster ba la bka' drin gyi lan gzhan gyis mi 'khor ba yin pas na/ 'jig rten pa'i mchog thams cad kyis mchod par bya ba yin no/ /de yang bsam pa ji lta bus bya snyam pa la/'dod pas bsams nas zhes bya ba la sogs pa gsungs te/ grags pa dang / snyan pa dang gzhan la 'gran pa'i phyir ni ma yin gyi/ bdag gis bla na med pa yang dag par rdzogs pa'i byang chub bsgrub par bya ba'i phyir sems rnam par dag pa dang bcas pas dbul bar bya ba nyid do//de nas byang chub bar du ni/ /zhes pa la sogs pa ni rgyu'i drin mnod par gsungs pa ste/ de la dang po bla ma dam pa la yang dag par bsnyen pas dbang dam pa rnams bskur bas snod du byas pa'o/ /de nas bskyed par bya ba'i rgyu gsol ba gdab par bya ba ni/yon la sogs pas gong du smos pa bzhin du phul la/ 'jig rten pa'i dngos grub ral gri dang / dril bu dang rtse gsum pa la sogs pa sna tshogs pa gsol ba gdab pa dang / gzhan yang bdag nyid zhi ba dang / rgyas pa la sogs pa'i dngos grub gang yin la 'dod pa rnams gsol ba gdab pa dang /de bzhin du ji srid du yang dag par rdzogs pa'i sangs rgyas nyid du 'grub pa'i bar du dngos grub rnams gsol ba gdab pa bya ba nyid do/ /de nas slob dpon gyi las su bya ba ji lta bu zhig snyam pa la/de nas bu la phan pa'i phyir/ /sngags mkhan ser sna med sems kyis/ /dad pas dad pa'i sems ldan la/ /dngos grub rnams ni sbyin par bya/ /zhes gsungs pa ste/ de la dang po slob dpon gyis slob ma'i snod brtag par bya ste/snod brtag pa ni rnam pa gnyis so/ /dang por lo gcig gi bar du phyag tsam blangs la/ tshig mi sbyin par bya ba dang / de nas lo gnyis kyi bar du tshangs par spyod pa dge bsnyen gyi sdom pa 'bogs pa dang / lo gsum pa la dkyil 'khor du gzhug pa dang /de nas de srid kyi bar du'ang dang po skyo ba med cing 'phags pa rtag tu du lta bur gnas pa na/ lo bzhi pa la dbang rdzogs par bskur la/ lnga pa la man ngag sbyin par bya ba ni/ bu de la phan pa'i phyir rdo rje slob dpon dam pa'i chos la ser sna med pas bdag nyid dad pa dang ldan pas slob ma dad pa dang ldan pa la dngos grub rnams ji ltar sgrub pa yang dag par sbyin no//gcig ni yun thung bar gnas pa yin yang 'jig rten na 'jig rten pa rnams rdzas dang yo byad dang / longs spyod la chags shing gtong mi bra bar gyur pa ste/de la mi gang dag gong du gsungs pa ltar mchog tu dad pa chen pos bla na med pa yang dag par rdzogs pa'i byang chub bsgrub pa'i phyir yul dang bu dang chung ma dang / rgyal srid la sogs pa yang gtong zhing 'bul bar gyur pa na de ni gdon mi za bar dam pa'i chos kyi snod du gyur pa yin pas na rnal 'byor pas ser sna med pas dad pa chen pos dad pa dang ldan pa'i bu la dngos grub 'grub pa'i rgyu bla na med pa sbyin par bya ba nyid do//de la dngos grub kyi rgyu ji lta bu zhig yin snyam pa la/chos rnams thams cad bdag med par/ /sems kyis bsgom par byas nas kyang / /a las zla ba'i dkyil 'khor bsam/ /rang gi sa bon de dbus su/ /bsams nas dam tshig phyag rgya yang / /bsams bzhin de bzhin de nyid du/ /sgrub pa po ni bsgyur bar bya//lha yi rnal 'byor tshul gnas te/ /de nas rang gi sa bon dang / /phyag rgya sngags kyis de byin brlab/ /rim pa'i rjes las ji bzhin du/ /sangs rgyas rnams kyi dbang bskur ro/ /de nas nga rgyal bskyed nas kyang / /mkhas pa yis ni bsgrub byas nas//de bzhin gshegs kyang 'grub 'gyur na/ /dngos grub gzhan lta smos ci dgos/ /zhes gsungs pa ste/ de la tshigs su bcad pa 'di dag ni/ rnam par snang mdzad kyi rgyud las yid bzhin gyi nor bu rin po che'i tshig ces gsungs so/ de ji ltar yid bzhin gyi nor bu rin po che'i tshig tu 'gyur snyam pa la/ de ni 'di ltar dper na yid bzhin gyi nor bu rin po che ni sems can rnams kyis gang dang gang bsam pa thams cad 'byung bar byed pa ste/ de bzhin du 'di la'ang dam pa'i chos kyi don mtha' dag ma lus par ston pa dang /'jig rten dang 'jig rten las 'das pa'i dngos grub thams cad thob par byed pa'i phyir yid bzhin gyi nor bu rin po che'i tshig ces bya'o/ /de la dam pa'i chos kyi don mtha' dag ji ltar ston snyam pa la/ de ni 'di ltar dam pa'i chos mtha' dag ni rgyu rnam par dag pa dang /lam rnam par dag pa dang / 'bras bu rnam par dag pa dang gsum du 'dus te/ de la rgyu rnam par dag pa ni gong du smos pa'i byang chub kyi sems rnam pa gsum mo/ /lam rnam par dag pa yang gsum ste/ gzhan la brten pa'i mtshan nyid dang //bdag la brten pa'i mtshan nyid dang / /rten pa spangs pa'i mtshan nyid do/ /'bras bu rnam par dag pa ni/ /chos kyi sku dang / longs spyod rdzogs pa'i sku dang / sprul pa'i sku gsum mo/ /de dag gi mtshon pa'i phyag rgya ni tshigs su bcad pa bzhi po 'di yin te/de la lam rnam par dag pa gzhan la brten pa'i mtshan nyid kyi skabs su ni don rnam pa gnyis kyis ston te/ dmigs pa dang bcas pa'i dbang dang / dmigs pa med pa'i dbang ngo / /de la dmigs pa dang bcas pa'i dbang ni dang po bdag nyid chos thams cad stong pa nyid du bsams te/de'i rjes la rang gi snying gar a las zla ba'i dkyil 'khor bsam mo/ /de'i steng du hUM bsams la de gyur pa las rdo rje bsam mo/ /yang de'i dbus su hUM bsams la/ de dag gyur pa las bdag nyid bcom ldan 'das rdo rje sems dpar bskyed do//slob ma'i mig la sogs pa gnas ji lta ba bzhin du rnam par snang mdzad la sogs pa'i sngags dang phyag rgya dang snying po rnams kyis byin gyis brlabs nas/ yang cho ga rnam pa gsum mam/ mngon par byang chub pa rnam pa lnga las bde bar gshegs pa rnams bskyed la dbang bskur bar bya ba ste/des ni slob ma bde bar gshegs pa rang gi ngo bor byin gyis brlabs pas/ nus pa dang / stobs dang / dngos grub 'grub pa'i rgyu chen por 'gyur ba'i phyir ro/ /gzhan dag na re rgyud gzhan na gnas pa de 'dir shes par bya ste/de ci'i phyir zhe na snyam pa la/ dmigs pa med pa'i dbang 'dis ni 'jig rten dang 'jig rten las 'das pa'i dngos grub thams cad yongs su rdzogs par byed pa yin pa'i phyir de la de ni sku'i gnas dang / gsung gi gnas dang /thugs kyi gnas dang / srid pa'i gnas dang / rlung gi gnas rnams su sgyu ma byang chub kyi sems dmigs par byas la/ de dag tu zla ba'i dkyil 'khor la gnas pa'i sku'i gnas su ni de nyid kyi gzugs su mu tig gi chun po lta bu las rnam par bskyod pa'i skad cig la gang zag gi nus pa dang /stobs dang sbyar nas yungs kar tsam dang / sran chung tsam dang mu tig rnam par rgyal ba tsam du 'ong bar 'gyur te/ de ni dri ma dang bral zhing kha dog dkar pos rnam par rgyu ba'i phyir me long lta bu'i ye shes zhes bya'o//de nas gsung gi gnas su ni dngul chu lta bur 'bar ba dang / 'bros pa la sogs pa med par rnal du 'dug pas gnas pa'i phyir na mnyam pa nyid kyi ye shes zhes bya'o/ /de nas thugs kyi gnas su ni de'i 'khor du gyur pa lus kyi yan lag thams cad nas 'dus pa'i byang chub kyi sems dang lhan cig tu 'dug pa'i phyir/so sor rtog pa'i ye shes zhes bya'o/ /de nas srid pa'i gnas nas rlung gi gnas kyi bar du ni btsal ba las byung ba'i bya ba grub pa'i phyir bya ba grub pa'i ye shes zhes bya ba'o/ / de nas gzhal yas khang gi nang du rta babs kyi phyi rol du ma gyur pa'i skad cig la ni 'di ltar snang ba'i chos thams cad rnam par rtog pa dang bral zhing 'od gsal ba'i phyir chos kyi dbyings kyi ye shes zhes bya'o/ /de nas gsang ba 'dus pa dang 'khor lo sdom pa dang gsang sngags bla na med pa rnams su ni lhan cig skyes pa'i ye shes zhes gsungs so//de la ye shes lnga'i ngo bo de nyid bcom ldan 'das ngan song thams cad yongs su sbyong ba'i rgyal po la sogs pa bde bar gshegs pa lnga'i ngo bo yin te/ de bas na rdo rje slob dpon gyis slob ma stan bde ba la bzhag la rang la mngon du phyogs pas byang chub kyi sems kyi nang du bcom ldan 'das ngan song thams cad yongs su sbyong ba'i rgyal po'i dkyil 'khor gyi 'khor lo thams cad rgyas par bskyed la/phyogs bcu dus gsum gyi de bzhin gshegs pa thams cad spyan drangs la gnyis su med par byas te gnas par bya'o//de la byang chub kyi sems nyid bdag nyid 'dod pa'i lhar bsams la/ de'i nang du yongs su rdzogs par 'dod do/ /de nas byin gyi rlabs chen po nyams su myong ba dang /stong gsum gyi stong chen po'i 'jig rten gyi khams thams cad bde ba chen po gnyis su med pa dpal ngan song thams cad yongs su sbyong ba'i dkyil 'khor gyi ngo bor bsams par byas te/ de dag gi skad cig la ni sbyor ba dang po'i ting nge 'dzin dang / dkyil 'khor rgyal mchog dang / las rgyal mchog gi ting nge 'dzin yang yongs su rdzogs par gyur pa nyid do/ /de ltar slob ma'i nyon mongs pa/ che 'bring dang sbyar nas/ yud tsam mam/ thang cig gam/ mtshan mo'am/ zhag gi bar du gnas par bya'o/ / des ni 'jig rten pa thams cad skad cig ma gcig gis bgrod pa yin te/ de yang mtshan yang dag par brjod pa las/ 'jig rten gsum po gom gcig bgrod/ /mkha' ltar mtha' med rnam par gnon/ /gsum rig gtsang ma dag pa ste/ /phyag byar 'os pa bla ma'i rab//ces gsungs so/ /de dag ni sku 'bebs pa dang / gsung 'bebs pa dang / thugs 'bebs pa zhes bya ste/ gsang ba 'dus pa la sogs pa rnams su ni bdag byin gyis brlab pa zhes bya bar gsungs so/ /de nas nyams su myong bar gyur pa dang /slob ma gang yin pa des bla mas ji ltar bstan pa ltar yongs su goms par bya ste/ de yang rnam pa gnyis so/ /bdag dang gzhan gyi sbyor ba las byung ba dang / bdag gi sbyor ba las byung ba'o/ /bdag dang gzhan nyid kyi sbyor ba las byung ba ni gnyis te/las dang po pas ni gzhal yas khang gi nang na rta babs kyi phyi rol du ma gyur pa de srid du byin gyi rlabs skye'o/ /de bas khyad par du gyur par ni rlung gi gnas su byin gyi rlabs skye'o/ /bdag gi sbyor ba las byung ba la las dang po pas gsung gi gnas su skye ste/de ni bdag gi lus kyi sbyor ba dag byung ba'o/ /de bas khyad par du gyur pas ni sems kyi sbyor bas thugs kyi gnas su skyes nas yun ring zhig dngos po thams cad la rnam par rtog pa dang bral ba'i ye shes skye bar 'gyur ba nyid do//de ltar dus thams cad du gnyis kyi sbyor ba las byung ba dang / bdag gi sbyor ba las byung ba thams cad du sgyu ma byang chub kyi sems rnam par ma spangs par gyur pa la ni nus pa dang ldan pa las 'jig rten dang 'jig rten las 'das pa'i dngos grub thams cad 'grub par 'gyur bas na/tshigs su bcad pa tha ma'i don yongs su rdzogs pa nyid do/ /de nyid slob mas bsgrub pa'i dbang du byas nas ni/ bdag la brten pa'i mtshan nyid ces bya bar 'dod do/ /de nyid las rnam pa thams cad dang bral ba'i dbang du byas nas ni/brten pa spangs pa'i mtshan nyid ces bya ba kho na'o/ /de ltar rgyu rnam par dag pa byang chub kyi sems kyi rdo rje lta bu bdud kyi tshogs thams cad 'joms pa'i phyir sngags pas rdo rje dang bral du mi rung bar gsungs te/ de ni mi brjed par bya ba'i rtags su bstan par shes par bya'o/ /bdag la brten pa'i mtshan nyid kyi dbang du byas nas tshigs su bcad pa bzhi po 'dis ni bcom ldan 'das ngan song thams cad yongs su sbyong ba'i rgyal po'i rgyud 'dir gsungs pa'i dkyil 'khor thams cad la khyab par 'jug pa ste/de yang skabs kyi bye brag gis rang nyid dang po rdo rje 'dzin ma'i phyag rgyas zhugs nas/ bde bar gshegs pa thams cad la dbang mnod pa las gnang ba thob kyi bar du shes par bya'o/ /rten pa spangs pa'i dbang du byas nas ni gong du bshad ma thag pa'i rim pas sku gsung thugs dbab par shes par bya'o//de ltar sgyu ma byang chub kyi sems ni sprul pa'i sku'i rgyu rnam par dag pa'o/ /kun rdzob byang chub kyi sems ni longs spyod rdzogs pa'i sku'i rgyu rnam par dag pa'o//don dam pa byang chub kyi sems ni chos kyi sku'i rgyu rnam par dag pa'o/ /de bzhin du lam rnam par dag pa gzhan la brten pa'i mtshan nyid ni sprul pa'i sku'i lam rnam par dag pa'o/ /bdag la brten pa'i mtshan nyid ni longs spyod rdzogs pa'i sku'i lam rnam par dag pa'o//rten pa spangs pa'i mtshan nyid ni chos kyi sku'i lam rnam par dag pa nyid do/ /de ltar pha rol tu phyin pa'i gzhung gis kyang chos kyi sku ni shes rab kyi pha rol tu phyin pa bsgoms pa las thob par 'dod do/ /longs spyod rdzogs pa'i sku ni bsam gtan gyi pha rol tu phyin pa dang /bzod pa'i pha rol tu phyin pa las thob par 'dod do/ /sprul pa'i sku ni sbyin pa'i pha rol tu phyin pa dang / tshul khrims dang / brtson 'grus kyi pha rol tu phyin pa las thob par 'dod do/ / 'dir ni rgyu dang lam rnam pa gsum gyis sku gsum bsgrub par 'dod do/ /gsang sngags bla na med pa rnams su ni ting nge 'dzin rnam pa gsum gyi sku rnam pa gsum bsgrub par 'dod de/ de ni 'dir yang tshang ba kho nas mi 'gal ba nyid do/ /pha rol tu phyin pa drug kyang 'di nyid las tshang bas na thams cad mnyam pa nyid du shes par bya'o//yang 'dir lam rnam pa gsum gyi skabs su ni gsang sngags yongs su zlos pa'i phyir dril bu zhes bya ba dang / phyag rgya bzhis kun du spyod pa'i phyir/ phyag rgya zhes bya ba dang / byang chub kyi sems mi brjed pa'i phyir rdo rje zhes bya ba dang /slob dpon gyi bya ba la zhugs pa'i phyir slob dpon zhes bya ste/ de dag dang ldan pa la rnal 'byor pa zhes bya ba nyid do/ /de'i phyir de kho na bsdus pa'i brtag pa las kyang / rdo rje dril bu'i phyag rgya yang //yang dag nyid du gzung bar bgyi/ /zhes sdom pa 'bogs pa'i skabs su gsungs so/ /de la gang dag 'di skad du chos kyi sku gcig la pha rol tu phyin pa'i gzhung du ni chos kyi sku la rab tu zhi ba'i 'od gsal ba'i ngo bo zhes brjod la/ theg pa chen po gsang sngags su ni gnyis su med pa'i bde ba chen po zhes gsungs pa'i phyir zhe na/de ni 'di ltar theg pa chen po gsang sngags ni 'dod chags chen pos 'dul ba'i sems can la dgongs nas bde ba chen po'i ro gnyis su med pa zhes gsungs la/pha rol tu phyin pa ni 'dod chags dang bral ba'i sems can 'dul ba la dgongs nas bde ba chen po zhes sbas te/ rab tu zhi ba 'od gsal ba/ /zhes bya ba ste/ de gnyis ka la yang gcig tu rab tu zhi ba'am/ rtog pa dang bral ba'i phyir bde ba yin pa la bde ba chen po'ang spros pa dang bral ba'i phyir zhi ba kho nas mdor na rnam par rtog pa thams cad dang bral ba zhes bya ba nyid do//phan tshun du mi 'gal ba nyid do/ /de ltar na dad pa dang ldan pa'i slob ma la slob dpon gyis dngos grub yang dag par 'dzin pa ste/chos de dag dang ldan pa'i phyir na tshigs su bcad pa bzhi pos de la yid bzhin gyi nor bu rin po ches bya ba kho na'o/ /da ni de dag gi phan yon yang dag par bstan pa'i phyir/ /tshangs pa la sogs pa'i sems yang dag par bskul nas zhu ba'i tshul du ston pa nyid do//de nas tshangs pa la sogs pa lha chen po rnams kyang bcom ldan 'das la phyag btsal nas 'di skad ces gsol to/ /bcom ldan 'das rgyal po dang rgyal po'i bu dang / rgyal po'i blon po dang / rgyal rigs dang / bram ze dang / rje'u rigs dang / dmangs rigs dang / gzhan yang rigs dman zhing bsod nams chung ba phyag dar ba dang / mtha' 'khob pa'i rigs ngan gyi skye bo la sogs pa rnams dkyil 'khor rgyal po 'dir zhugs na/ de dag gi rnam par smin pa ji lta bur gyur pa lags zhes pa la sogs pa de la dkyil 'khor gyi rgyal po zhes pa ni de bzhin gshegs pa ngan song thams cad yongs su sbyor ba'i rgyal po'i rgyud du gsungs pa'i 'jig rten las 'das pa'i dkyil 'khor thams cad la bya ste/'jig rten pa'i dkyil 'khor las khyad par du 'phags pa'i phyir ro//sogs pa zhes pa'i sgras ni dud 'gro la sogs pa'i sems can thams cad bsdus so/ /de la de dag de bzhin gshegs pa ngan song thams cad yongs su sbyong ba'i dkyil 'khor du zhugs pa las 'bras bu ji lta bu zhig thob par 'gyur zhes zhu bar sbyar ro//bcom ldan 'das kyis bka' stsal pa/ ma 'ongs pa'i sems can rnams la phan pa'i phyir nga la zhus pa de ni legs so legs so/ /lha'i bu rnams dkyil 'khor gyi rgyal po chen po 'dir zhugs pa dang / dbang bskur ba dang / bris pa dang / 'dir 'jug pa dang / rjes su yi rang ba dang / phyag byas pa dang / mchod pa rnams kyi 'bras bu dang / rnam par smin pa nyon cig /lha'i bu rnams mdor na nga la'ang de'i phan yon bshad pa'i spobs pa med do/ /nga'i bsod nams kyi phung po gang yin pa de brgya phrag stong du mar brgyud kyang grangs su yang mi chog /bgrang bar yang mi chog /dper yang mi bzod de/ de bzhin gshegs pa thams cad kyi bsod nams kyi phung pos kyang mi bzod do zhes gsungs pa ni 'dir der zhugs pa'i phan yon yang dag par gsungs pa ste/de la sems can thams cad la phan pa'i phyir rang la zhus pa legs so legs so zhes gsungs pa ni sems can thams cad kyi dkyil 'khor du 'jug par spro ba bskyed pa'i phyir zhus pa legs so legs so/ /lha'i bu rnams dkyil 'khor gyi rgyal po 'dir zhugs pa dang zhes pa la sogs pa ni de la mngon par dad pa rnams kyi gang zag bstan pa'o//nga la de'i yon tan bshad pa'i spobs pa med de zhes gsungs pa ni 'dir don gnyis su go bar bya ste/ de la gcig ni 'di la brten pa'i gang zag yongs su rdzogs pa'i mthar gnyis su med pa'i ye shes thob pa'i gnas skabs na gnyis su med pa de ye shes de'i bde ba dang /ngo bo 'di lta bu'o zhes pa bsten par ma nus shing brjod par dka' ba la dgongs nas/ de'i yon tan bshad pa'i spobs pa med do zhes gsungs pa'o//gcig ni yon tan chen po phul du byung bas sems can rnams dad pa chen pos zhugs par bya ba'i yan lag tu gsungs par shes par bya'o/ /nga'i bsod nams kyi phung po gang yin pa de zhes pa nas/de bzhin gshegs pa thams cad kyi bsod nams kyi phung pos kyang mi bzod do zhes pa'i bar ni don gsum du go bar bya ste/ de la skad cig ni nga zhes pa'i sgra 'jig rten pa'i lta ba la mngon par dad pa bdag dang bdag gir lta ba la sogs pa'o/ /de dag gis 'jig rten pa'i lha la mchod pa'i yo byad thams cad kyis bskal pa grangs med pa brgyad khri bzhi stong du bsnyen bkur byas pa'i bsod nams de brgya phrag stong du bsgyur kyang /sems can gang dag ngan song thams cad yongs su sbyong ba'i rgyal po'i dkyil 'khor du zhugs pa'i gang zag de'i bsod nams la grangs su mi chog /bgrang bar yang mi chog /dper yang mi bzod do zhes bya ba'o/ /de bzhin gshegs pa thams cad kyi bsod nams kyi phung pos kyang mi bzod do zhes pa ni kun nas nyon mongs pa'i de bzhin gshegs pa thams cad de/de dag thams cad kyi bsod nams kyi phung po brgya phrag stong du bsgyur bas kyang / sems can gang dag ngan song thams cad yongs su sbyong ba'i dkyil 'khor 'dir zhugs pa bsod nams kyi phung po la dper yang mi bzod pa'i phyir na/de bzhin gshegs pa thams cad kyi bsod nams kyi phung pos kyang mi bzod ces bya'o/ /gcig ni nga zhes pa'i sgras bcom ldan 'das phyag na rdo rje nyid de/ sa la gnas pa'i byang chub sems dpa'i tshul du bzhugs pa la dgongs nas/ de bzhin gshegs pa'i bsod nams kyi phung po khyad par du phyung ba ste/de ni 'di ltar longs spyod rdzogs pa dang / sprul pa'i sku rnam pa gnyis la dgongs nas de'i chos kyi sku'i yon tan la bgrang bas mi bzod ces pa nyid do/ /gcig ni gong du bstan pa ltar yon tan gyi khyad par dpag tu med pa phul du byung ba las sems can rnams zhugs pa'i yan lag tu phan yon rgya chen po tshad med par gsungs par shes par bya'o//lha rnams kyis gsol pa/ bcom ldan 'das dkyil 'khor gyi rgyal po chen po 'dir zhugs pa'i sems can rnams kyi 'bras bu dang rnam par smin pa gang lags pa de ni ngo mtshar che'o//rdo rje 'dzin pa chen po ngo mtshar che ste/ bcom ldan 'das bdag cag kyang dkyil 'khor gyi rgyal po chen po 'dir 'jug par spro'o/ /bcom ldan 'das rdo rje 'dzin pa 'jug par spre'o zhes pa la sogs pa ni ngo mtshar chen po'i tshig gis bcom ldan 'das la dkyil 'khor du 'jug par zhu ba ste/de la tshangs pa la sogs pa'i lha rnams bcom ldan 'das phyag na rdo rje'i bsod nams dang / de bzhin gshegs pa thams cad kyi bsod nams kyis kyang ngan song thams cad yongs su sbyong ba'i rgyal po'i dkyil 'khor du zhugs pa'i sems can de'i bsod nams la mi bzod par gsungs pas/lha rnams yon tan gyi tshogs khyad par can mthong bas de bzhin gshegs pa ngan song thams cad yongs su sbyong ba'i dkyil 'khor du zhugs par 'dod pa'o//ngo mtshar gyi tshig lan gnyis pa ni shin tu ngo mtshar ba'o/ /'jug par spro ba'i tshig lan gnyis pa ni mchog tu 'jug par spro ba ste/ de dag gi mthar dkyil 'khor chen po'i brtag pa rdzogs nas lha rnams kyi dkyil 'khor du zhugs pa ni lha dbang bskur ba'i brtag pa zhes bya ba zhig bzhugs par rgyud gzhan nas gsungs so//de nas tshangs pa la sogs pa lha de dag gis de bzhin gshegs pa la phyag btsal nas 'di skad ces gsol to//bcom ldan 'das 'dzam bu'i gling gi sems can rnams bsod nams chung zhing tshe thung ba dang / ngan song gi rgyu dang ldan pa dang / sems can dmyal ba dang / yi dags dang byol song rnams su skye ba dag mchis na/ bcom ldan 'das de la bdag cag gis ni ji ltar bsgrub par bgyi zhes pa la sogs pa ni tshangs pa la sogs pa'i lha rnams sems can thams cad kyi don du sems bskyed nas bdag dang gzhan gyi don phun sum tshogs pa zhu ba ste/de la 'dzam bu'i gling gi sems can smos pa ni gang na nad zhi bar byed pa'i sman gyi tshogs mang ba de ni log par gyur pa'i dbang gi nad dang /'chi ba mang bar gyur pa bzhin du/ lho'i 'dzam bu'i gling na dam pa'i chos phal cher sbyong de/ de dag gis mi shes pa dang / log par spyad pa las ngan song gi dbang du gyur pa dang /sems can dmyal ba la sogs pa'i nang du skye ba mang ba'i phyir/ 'dzam bu'i gling gi sems can zhes smos pa'o/ /bsod nams chung ba ni nad mang ba dang / mi sdang ba dang / nor la sogs pa dbul por gyur pa'o/ /tshe thung ba ni 'tsho ba yun thung ba'o//ngan song gi rgyu dang ldan pa ni/ sdig pa mi dge ba'i chos lhag par spyod pa dang / sdig pa chen po'i las byas pa'i sems can te/ de dag gi 'tsho ba dang / lta ba la bsams nas smras pa'o/ /dmyal ba la sogs pa'i nang du skyes pa ni 'tsho ba 'das pa'i sems can rnams la bsams nas smras pas na/de dag la ji ltar bgyi na ngan song du skyes pa rnams ngan song las thar bar bgyi ba dang / ngan song du skye ba rnams ngan song gi rgyu gzhig par bya ba'i thabs zhu ba nyid du shes par bya'o/ /bcom ldan 'das kyis bka' stsal pa/kye lha'i bu rnams sems can de dag dkyil 'khor du chug la dbang bskur cig /chos kyi yi ge yang zlos shig dang / des ni sems can de dag tshe ring bar 'gyur bsod nams dang bral ba rnams bsod nams dang ldan par 'gyur ro/ / ngan song ba'i rgyu dang ldan pa rnams ni ngan song gi rgyud bcad de/ thar pa dang bde 'gro'i rgyu dang ldan par 'gyur ro zhes gsungs pa ni 'tsho ba dang ldan pa'i sems can rnams la dgongs nas gsungs pa ste/ de la sems can gang dag tshe thung ba dang / bsod nams chung ba dang /ngan song gi rgyu dang ldan pa rnams ni ngan song thams cad yongs su sbyong ba'i dkyil 'khor rnam pa gsum du bcug nas/ dbang ji lta ba bzhin du bskur te/ de bzhin gshegs pa'i rtsa ba'i snying po dang / tshe dang bsod nams dang ye shes dpag tu med pa'i snying po'i dus thams cad du bzlas brjod byas na tshe thung ba ring bar 'gyur ba dang /bsod nams chung ba bsod nams dang ldan par 'gyur ba dang / sdig pa'i rgyu dang ldan pa rnams sdig pa'i tshogs thams cad dang bral nas/ bde 'gro dang thar pa'i lam la gnas par gyur pa ni nges pa nyid du shes par bya'o//kye lha'i bu rnams ngan song du skyes zin pa rnams gang yin pa de dag gi ming la dbang bskur cig /gang gzugs brnyan la'ang dbang bskur bar gyis shig /mchod rten la yang dbang bskur bar byos shig /rang gi lha'i gzugs la dbang bskur bar byos shig /chung du na de dang rigs mthun pa dang / de'i bu dang de dang rus mthun pa dang / de'i ming 'dzin pa dang bran la yang dbang bskur bar byos shig /de ltar lan bdun du dkyil 'khor du bcug cing / dbang bskur na gdon mi za bar zhag bdun gyis ngan song gi sgrib pa las rnam par grol bar 'gyur ro zhes gsungs pa ni 'tsho ba 'das pa'i gang zag rnams la dgongs nas gsungs pa ste/de la ngan song du skye bar gyur pa'i sems can rnams kyi ming dang gzugs brnyan la sogs pa ni rnal 'byor pa'i ting nge 'dzin gyis de'i rnam par shes pa bkug la/tshigs su bcad pa dang / sems bskyed pa la sogs pa ni bu'am/ pha'am/ sring mo'am/ phu bo la sogs pas brjod cing yon phul la de dang gnyis su med par byas pas dbang bskur bar bya'o//de ltar lan bdun gyi bar du de bzhin gshegs pa ngan song thams cad yongs su sbyong ba'i rgyal po'i dkyil 'khor du lan bdun du bcug cing dbang bskur nas de dang mthun pa'i 'og nas 'byung ba'i sbyin sreg rnam pa bzhi byas par gyur na nges par ngan song las rnam par grol bar 'gyur ba ni nges pa nyid du shes par bya'o//de la gang dag 'di skad du/ de nyid kyi ro la dbang bskur ba la sogs pa byas pas ngan song las grol bar 'gyur bar rigs na/ de'i ming dang gzugs brnyan dang /bu dang mchod rten la sogs pa la dbang bskur ba de la sogs pa byas pas ni mi de nyid dang ma 'brel te/ rnam par shes pa gzhan na gnas pa'i phyir/ ji ltar grol bar 'gyur zhe na/ de lta na ni ro la dbang bskur bas kyang grol bar mi 'gyur te/ro ni bems po'i rnam pa dang 'dra ba la de'i rnam par shes pa gzhan du song bas 'brel pa med de/ tshe las 'das pa'i gang zag la ni bde bar gshegs pa'i thabs kyis mi zin par thal bar 'gyur ro/ /de bas na de ltar smra ba'i gang zag ni theg pa chen po'i chos la the tshom za ba nyid pas kha na ma tho ba dang bcas pas 'gyur ba ste/de ni 'di ltar ro la dbang bskur ba dang / de'i gzugs brnyan la sogs pa la dbang bskur ba la ni bye brag med pa nyid do/ gnyis ka la rnam par shes pa stong zhing rdo rje slob dpon gyi mthus rnam par shes pa bkug pas byed pa nyid do//de la gang dag ci de'i rnam par shes pa slob dpon gyis 'gugs par nus sam zhe na/ de ltar na ni shi ba thams cad gson por thal bar 'gyur ro zhe na/ de ma yin te/ 'di ltar bde bar gshegs pa'i bka' yang dag pa'i bden pa'i byin gyi rlabs kyis/sems can gyi rnam par shes pa lta zhog gi / dus gsum gyi bde bar gshegs pa rnam par rtog pa thams cad dang bral ba rnam pa thams cad mkhyen pa'i ye shes dang ldan pa rnams kyi yang thugs bskul nas rab tu gnas pa la sogs pa'i skabs su byon par gyur pa kho na'o//de la 'di skad du de yang mos pa yid la byed pa tsam las de nyid byon par mi 'gyur ro zhe na de ma yin te/ 'o na 'di ltar yul dbus kyi de bzhin gshegs pa mar me mdzad grong khyer du gshegs pa'i skabs su de'i tshul bzhin du ma gzugs byad dang ldan pa la rgyan dang mtshon gyis brgyan nas/rdo rje slob dpon rnams kyis rab tu gnas par byas pa'i skad cig la mi de rang gi shes pa nyams shing rtog pa dang bral ba'i shes pa skyes par gyur nas/ji srid gshegs su gsol ba ma byas pa de srid du mi de'i shes pa nyams pa'i byin dang ldan par 'gyur na/ bde bar gshegs pa nyid ma yin na srin po la sogs pas byin gyis brlabs sam/ yang phyogs gzhan du bde bar gshegs pa'i gzugs brnyan rnams la rdo rje slob dpon rnams kyis rab tu gnas pa byas pa na gzugs brnyan de g.yo ba dang /'dzum pa dang / 'od la sogs pa 'byung bar 'gyur na de yang bde bar gshegs pa las ma gtogs pa gzhan zhig yin nam/ de bas na rnam par shes pa bkug ces te/mi gang shi ba'i rnam par shes pa'i ro la bcug pa las phyis mi'i dngos por 'gyur ba ni ma yin te/ sems can gang zhig sdig pa'i 'bras bu sbyong ba ni nus pa kho na'o/ /de la gang dag 'di skad du bde bar gshegs pa rnams ni dad pa dang dam tshig tu 'brel pa'i stobs kyis rab tu gnas pa la sogs pa'i skabs su byon par 'gyur ba la sems can ngan song du gnas pa rnams ni de nyid la nus pa dang mi ldan pa'i phyir rnam par shes pa 'od bar mi 'gyur ro zhe na/de ni ma yin te/ de nyid ni nus pa'i stobs kyis 'ong bar 'gyur na/lha gsang sngags kyi sbyor bas kyang dgos pa yod par mi 'gyur zhing phyogs gzhan du na ngan song gi dbang du song ba'ang med par 'gyur ro/ /de bas na de bzhin gshegs pa'i bka' yang dag par bden pa dang / sngags dang phyag rgya'i byin gyi rlabs kyis/mi gang dag ngan song du gnas pa'i rnam par shes pa gzugs brnyan la bstims te/ dbang bskur ba la sogs pa byas pa las ngan 'gro'i rgyud las rnam par grol bar 'gyur ba ni nges pa ste/ de'i phyir brgya byin la sogs pas kyang lha'i bu nor bu dri ma med pa'i 'od rnam par grol ba'i skabs su/sangs rgyas 'dra ba'i ston pa med/ /chos dang 'dra ba'i dge ba med/ /dge 'dun 'dra ba'i zhi byed med/ /sngags dang 'dra ba'i 'dren pa med/ /ces bstod pa dang / gzhan yang gtsug tor chen po'i brtag pa las kyang /rdzas rnams kyis kyang ri bo sogs/ /g.yo zhing bskyod par nus byed na/ /phyag rgya gang dang sngags gang gis/ /mnar med nang du skyes pa dang / /ngan song dag gi rgyud las ni/ /grol bar 'gyur ba smos ci dgos/ /zhes gsungs pa'i phyir ro/ / de la gang dag 'di skad du rnam par shes pa ting nge 'dzin gyis bkug pa ste/ bde bar gshegs pas ni 'dir ma gsungs pa'i phyir rang gi brtag pa yin no zhe na/ de ni ma yin te/ gtsug tor chen po'i brtag pa las/ brgya byin gyis gsol pa/ bcom ldan 'das ci ltar na ro la dbang bskur bar bgyi/bcom ldan 'das kyis bka' stsal pa/ lha'i dbang po rnam par shes pa bkug pas dbang bskur bar bya'o/ /brgya byin gyis gsol pa/ rnam par shes pa ci lta bus dgug par bgyi/ bcom ldan 'das kyis bka' stsal pa/ting nge 'dzin gyis so/ /brgya byin gyis gsol pa/ ji lta bu'i ting nge 'dzin gyis bkug par bgyi/ bcom ldan 'das kyis bka' stsal pa/ mnar med pa la sogs pa'i dbyings su 'od zer spros pa las/ de'i rnam pa'i cha byad ci 'dra ba bkug pas ro la bcug pas gnyis su med par byas pas dbang bskur bar bya ste/the tshom mi za ba nyid do zhes gsungs pa'i phyir rang gi brtag pa ma yin pa nyid kho na'o/ /de yan chad kyis ni dkyil 'khor du bcug cing dbang bskur ba'i phan yon yang dag par gsungs la/ da ni de'i ming la sngags kyis zlos pa'i phan yon dang /cho ga'i rim pa gsungs pa ste/ lha'i bu rnams de'i ming nas smos te/ 'bum phrag gnyis sam/ 'bum phrag gsum mam/ 'bum phrag bzhi'am/ 'bum phrag brgya stong phrag gi bar du bzlas brjod byas na mtshams med pa lnga byas pa'ang rnam par byang bar 'gyur na/sdig pa chung ngu byas pa dag lta smos kyang ci dgos te/ de myur du ngan song gi rgyud las grol nas bde 'gro lha dang mi'i 'jig rten du skye bar 'gyur ro zhes gsungs te/ de la sems can gang dag ngan song du skyes pa'i ming nas smos la/rang nyid bcom ldan 'das ngan song thams cad yongs su sbyong ba'i rgyal por bskyed de/ rig pa chen po 'bum phrag gnyis su bzlas na ni sdig pa chung ngu byas pa'i gang zag grol bar 'gyur ro/ /'bum phrag gsum mam/ bzhis ni mtshams med pa dang nye ba'i sdig pa byas pa rnam par grol bar 'gyur ro//'bum phrag brgya phrag stong gis mtshams med pa lnga byas pa'i sems can yang nges par rnam par grol bar 'gyur ba ni nges pa nyid du shes par bya'o/ /de la de'i ming nas zhes pa la/ de zhes bya ba'i sgra ni ma ning gi rtags te/tshe 'das pa 'ba' zhig tu ma zad kyi da ltar mi'i yul na gnas pa mtshams med pa la sogs pa'i sdig pa byas pa yang gsang sngags chen po gong du gsungs pa'i cho gas nges par ngan song gi rgyud las rnam par grol bar 'gyur ba'o/ /sdig pa chung ngu byas pa lta ci smos te zhes gsungs pa ni/'og ma las myur du tshegs chung ngus nges pa nyid du grol bar gsungs pa'o/ /de la grol bar 'gyur ba gsang sngags dang snying po la sogs pa bde bar gshegs pa'i bka' thams cad nas ngan song ni rgyud las grol bar 'gyur ba'i las grol bar mi 'gyur ba'i tshig gcig kyang ma gsungs na/'dir yid ches pa'i rtags ci lta bu zhig ston par 'gyur snyam pa la/ de ni 'di ltar gong du sku gdung 'bar ba dang / sbyin sreg gi skabs su me'i ltas ston pa dang / me de nyid kyi gzugs ston pa la sogs pa'ang mang zhig gsungs pa dang /gzhan yang gtsug tor chen po'i rtog pa las/ de yi gzugs brnyan shog bu la/ /byas pas gur gum bzang pos ni/ /snying gar ming dang snying po bri/ mar me'i sdong bu gser la sogs/ rin chen las ni byas nas kyang //bde gshegs snying po bkod nas ni/ /smon lam btab ste rab bsngags na/ /gzugs de mkha' la 'phur ba'am/ /mar me'i sdong bu 'bar bar 'gyur/ /des ni ngan song rgyud las ni/ /grol ba nyid du shes par bya/ /zhes gsungs pa'i phyir/ngan song gi rgyud las grol ba ni yid ches pa'i rtags te/ de dag las yongs su shes par bya ste/ gdon mi za ba nyid do/ /de ji ltar na gdon mi za zhe na/ bde bar gshegs pa'i bka' gzhan dag ni drang ba'i don gyi mdo sde yang yin srid la/ 'di ni mi rnams kyis gsang sngags kyi 'bras bu mang por nyams su myong ba'i phyir nges pa'i don gyi rgyud du shes par bya ba kho na'o/ /de yan chad du ni rtsa ba'i dkyil 'khor rnams gsungs la/ da ni de dag gi yan lag tu gyur pas phrin las rnam pa bzhi'i sbyin sreg gsungs te/de yang sbyin sreg 'di ni 'bras bu las kyi sbyin sreg ces bya'o/ /de ji ltar na 'bras bu las kyi sbyin sreg yin zhe na/ de ni 'di ltar rnal 'byor pa snying rje chen po dang ldan pas sems can gang dag ngan song gi rgyud las rnam par drangs nas bde 'gro lha dang mi'i 'jig rten du skyes par shes pa dang /sems can de bde 'gro'i 'jig rten na nyon mongs pa dang nad dang / sdug bsngal rnams zhi bar bya ba'i phyir zhi ba'i sbyin sreg bya ba dang / de'i tshe dang bsod nams dang / longs spyod spel ba'i phyir rgyas pa'i sbyin sreg bya ba dang /lha dang mi la sogs pa thams cad de'i dbang du bya ba'i phyir dbang gi sbyin sreg bya ba dang / de la gnod par byed pa'i bgegs dang / mi ma yin pa dang / bdud kyi tshogs gzhom par bya ba'i phyir mngon spyod kyi sbyin sreg bya ba kho na ste/ de'i phyir 'bras bu las kyi sbyin sreg ces bya ba nyid do//lha yi bu rnams zhi ba yi/ /hom khung tha ma bar ma mchog/ /khru gang khru do khru bzhi pa'i/ /zlum po nyid du byas nas kyang / /de yi ming dang yungs kar gyis/ /brgya phrag stong du bsregs byas na/ /ngan song kun las thar bar 'gyur//de yi sha dang rus pa dang / /skra dang thal ba la sogs kyis/ /cho ga de dang 'dra bar ni/ /sbyin sreg byas na ngan song yang / /kun nas rnam par thar bar 'gyur/ /zhes gsungs pa ni dang po zhi ba'i sbyin sreg bya bar gsungs te/ de la lha'i bu rnams zhes lha rnams la bos pa ni dang por lha rnams kyis sems can sdig pa'i dbang du gyur pa rnams la//ji ltar bsgrub par zhus pa'i phyir lha rnams la bos te/ sems can thams cad la gsungs pa'o/ /de la sbyin sreg 'di ni ngan song gi rgyud zhi bar bya bar ston kyang 'bras bu'i gnas su yang nad la sogs pa zhi bar bya ba'i sbyin sreg tu shes par bya'o//de ci ltar bya snyam pa la/ hom khung tha ma bar ma mchog /ces pa la sogs pa gsungs te/ tha ma ni khru gang ngo / /bar ma ni khru do'o/ /mchog ni rab ste/ khru bzhi par bya ba'o//dbyibs bstan pa ni/ zlum pa zhes gsungs so/ /rdzas ni ji lta bus bya snyam pa la/ de yi ming dang yungs kar gyis/ /zhes pa la sogs pa gsungs te/ de la rdzas ni rnam pa gnyis so/ /de la brten pa'i rdzas dang / mchod pa'i rdzas te/ mchod pa'i rdzas ni/ 'og nas ston pa'i mar dang 'o ma dang / sbrang rtsi dang zhes pa la sogs pa dang yungs kar rnams so/ /de la brten pa'i rdzas ni de'i ming dang sha dang rus pa dang zhes pa la sogs pa'o/ /grangs ji tsam du bya snyam pa la/ brgya phrag stong du sbyin sreg byas na zhes gsungs pa ste/'bum phrag gcig tu bya bar gsungs pa'o/ /de'i 'bras bu ji lta bu 'ong bar 'gyur snyam pa la/ ngan song las ni thar bar 'gyur/ /zhes gsungs pa ste/ sems can de ngan song rnam pa gsum las nges par grol bar shes par bya'o//de la phyag rgya ci lta bu dag bri bar bya snyam pa la/ de yi dbus su 'khor lo ni/ /rtsibs brgyad 'od zer dkar bar bri/ /'khor yug rdo rje rtse lnga la/ /'od zer dkar dang ldan pa bri/ /de nas rdo rje rgya gram dang / /rdo rje rin chen chu skyes mchog / sdig pa gzhom phyir phyag rgya rnams/ /sna tshogs pa ni gzhag par bya/ /phyi rol rdo rje rigs rnams kyi/ /phyag rgya rnams ni bri bar bya/ /gza' dang skar ma'i mtshan ma dang / /de ltar 'jig rten skyong rnams kyi/ /gtso bo ri mo lugs ma'ang rung / / rdo rje can dang lhan cig gzhag /ces gsungs te/ de la thab khung gi nang du ni 'khor lo kha dog dkar po rtsibs brgyad pa lte ba dang mu khyud du bcas pa bri bar bya'o/ /de'i mu ran la rdo rje'i phreng ba dkar po rtse lnga pa bri bar bya'o/ /de'i mu ran gyi steng du ni me'i 'od kha dog dkar dmar du bri bar bya'o//de nas 'khor lo'i lte ba la ni pad+ma'i steng du bcom ldan 'das rnam par snang mdzad kyi phyag rgya 'khor lo rtsibs brgyad pa gzhag go/ /shar gyi rtsibs la ngan song thams cad yongs su sbyong ba'i phyag rgya rdo rje bri bar bya'o/ /lho'i rtsibs la rin po che tog gi phyag rgya rin po che bri bar bya'o//nub kyi rtsibs la bcom ldan 'das shAkya thub pa'i phyag rgya mtshan ma pad+ma bri bar bya'o/ /byang gi rtsibs la me tog chen po rgyas pa'i mtshan ma sna tshogs rdo rje bri bar bya'o/ /shar lho la sogs pa'i mtshams su ni//sangs rgyas spyan dang / mA ma kI dang / gos dkar mo dang / sgrol ma rnams kyi mtshan ma rdo rje dang re mig dang / pad+ma dang / ut+pal rnams bri bar bya'o/ /de'i phyi rol gyi rtsibs bcu drug pa gcig la ni/ rdo rje sems dpa' la sogs pa'i mtshan ma'am/yig 'bru hUM dang dza la sogs pa dgod par bya'o/ /de'i phyi rol gyi grwa bzhir ni sgeg mo la sogs pa'i mtshan ma'am/ yig 'bru dgod par bya'o/ /rta babs kyi khyams rnams su byams pa la sogs pa'i yig 'bru dgod par bya'o/ /de'i phyi rol gyi khor yug tu ni gong du gsungs pa ltar phyogs skyong ba dang /gza' dang skar ma la sogs pa'i gzugs sam yig 'bru'am thig le yang bri bar bya'o/ /rdo rje can dang lhan cig gzhag /ces pa ni de'i 'khor du gnas pa la lhan cig gnas zhes bya'o/ /de yang skabs 'dir ni rgyud gzhan nas don gnyis su gsungs te/phyogs skyong ba tsam 'khor du gzhag pa dang / phyogs skyong ba dang gza' dang rgyu skar du bcas pa gzhag par bya ba ste/ 'phags pa rang rgyal ba dang / drang srong la sogs pa ni bya ba chung ngus bsgrub pa'i phyir ma gtogs so//bya dang bum pa gang ba dang / /gtor ma zhal zas rab dkar dang / /de bzhin me tog dkar rnams dang / /mdor na thig ni btab nas kyang / /cho ga bzhin du bri bar bya/ /dkar po'i gos ni gyon nas ni/ /sangs rgyas gzugs can mi 'jigs pas//ngan song rgyud las gnas pa yi/ /sems can rjes su dran byed cing / /sdig dang sgrib pa zhi ba'i phyir/ /dag pa'i rgyud las sbyin sreg ni/ /mar dang 'o ma sbrang rtsi dang / /'bras yos yungs kar sreg pa dang / /de yi sha dang rus la sogs/ /yang na ming nas smos la bya//zhes gsungs pa ni mchod pa'i rdzas bsags pa gsungs pa ste/ de la dkyil 'khor gyi phyi rol du ni ngang pa la sogs pa bya'i gzugs dang / bum pa brgyad dam bcu drug la sogs pa gos kha dog dkar pos dkris la gzhag pa dang / gtor ma dang /zhal zas kha dog dkar po brgya rtsa brgyad la sogs pa gzhag par bya'o/ /gzhan yang bdag gis las bya ba ni bdag nyid gos kha dog dkar pos bgo ba dang / rgyan mu tig la sogs pa dkar pos brgyan pa dang / me tog dkar pos dkyil 'khor gyi steng du dgram par bya ba dang /gzar bu ni dngul lam tsan+dan dkar po las byas pa'i gzar bu bzung ba dang / bdag nyid bcom ldan 'das rdo rje sems dpa'i skur bskyed de/ des sbyin sreg bya ba ni/ ngan song gi rgyud la gnas pa'i sems can de'i sdig pa'am/ mtho ris na gnas pa'i sems can de'i nad la sogs pa zhi bar bya ba'i phyir zhi ba'i lta stangs sna'i rtse mor bde bar gshegs pa'i gzugs su bltas la/dbugs drang po nas drangs la sems dpa'i skyil mo krung du gnas pas/ mar dang / 'bras yos dang / ma du dang / til dkar po dang /yungs kar dkar po dang / ga bur la sogs pa dri dkar po dang / de ba da ru'i yam shing dang / rtswa ku sha dang / tsan+dan dkar po'i phye ma dang / zho dang 'o thug dang / 'bras chan la sogs pa'i sbyin sreg bya ba dang / de la brten pa'i rdzas rus pa'am/thal ba'am/ sha'am/ yang na de'i ming byang shi ri sha'i lo ma la bris pas zhi ba'i sngags dang sbyar zhing sbyin sreg bya ba nyid do/ /de ltar 'bum phrag gcig tu byas pa las sems can de'i sdig pa'i tshogs nges par byang bar 'gyur te sdig pa byang ba las/ de'i tshe dang bsod nams dang longs spyod la sogs pa spel ba'i phyir rgyas pa'i las bya ba ni/de ni bde 'gror skyes nas kyang / /mkhas pas rgyas pa bya dgos te/ khru do pa'am khru bzhi pa/ /de ltar rab ni khru brgyad par/ /byas pas hom khung gru bzhi par/ /kun du mu ran ldan par bya//de dbus pad+ma rin chen can/ /'od zer ser po ldan par bri/ /khor yug tu ni rin chen dang / /mu ran rnams la chu skyes bri/ /phyi rol du ni rigs lnga dang / /so so'i phyag rgya bri bar bya/ /de ltar phyi yi lha rnams dang / /lcags kyu la sogs bri bar bya/ gos rnams ser por bsgyur nas ni/ /mtho ris gnas su rjes su dran/ /de la phan zhing rgyas pa'i phyir/ /rgyas pa yi ni las byas na/ /lus can de yi tshe dpal dang / /gzi brjid bde ba'i longs spyod 'phel/ /zhes gsungs te/ de la rgyas pa'i thab khung ni tha ma khru do bar bya'o//'bring ni khru bzhi par bya'o/ /rab ni khru brgyad par byas la/ /dbyibs ni gru bzhi 'am/ zur bzhi'am zur brgyad par byas te/ de'i steng du mu ran ni sor brgyad pa'am/ bcu drug gam yang na sum cu rtsa gnyis pa'i tshad du byas la de'i dbus su pad+ma'i steng du rin po che 'bar ba 'od zer ser po dang ldan pa bri bar bya'o//mu ran gyi steng du rin po che pad+ma'i steng na 'dug par bri bar bya'o/ /de'i phyi rol du ni rim pa gsum du bkod la/ shar la sogs pa'i phyogs rnams su rnam par snang mdzad la sogs pa'i phyag rgya'am/snying po'i tshon dmar ser gyis bri bar bya'o/ /de bzhin du spyan la sogs pa'i phyag rgya dang / de'i phyi rol du ni rdo rje sems dpa' la sogs pa sems dpa' bcu drug gi phyag rgya dang / sgo skyong la thug gi bar du bri bar bya'o/ /de'i phyi rol du ni phyogs skyong rnams kyi phyag rgya bri bar byas la rang nyid gos kha dog ser po gyon te/bcom ldan 'das rin chen 'byung ldan gyi skur bskyed la/ mig mdun drang por blta zhing / /dbugs mdun drang por drang la/ gser ram skyer pa las byas pa'i gzar bu gru bzhi pa thogs te/ bde 'gro'i 'jig rten na gnas pa/de'i bsod nams rgyas par bya ba'i phyir sbyin sreg bya ba ste/ rin po che'i skyil krung du gnas la/ yungs kar gyi mar khu dang / me tog ser po dang / gur gum dang / sman gi wang dang / 'bras bur bcas pa'i shing dang / yungs kar dang /spos ser po dang / 'bras yos dang / ma du la dang / shi ri sha'i shing la sogs pa'i rdzas rnams la/ yang gur gum mam/ dri ser pos bsgos te/ lan 'bum du bya ba nyid de/ des ni mtho ris na gnas pa de'i tshe dang bsod nams dang longs spyod la sogs pa rgyas shing 'phel ba nyid du 'gyur ba kho na'o//de'i rjes la sems can de'i dbang du lha dang mi la sogs pa thams cad bsdu ba'i phyir dbang gi sbyin sreg bya ba ni/ de nas phan phyir nges par yang / /dbang du bya ba'i las bya ste/ /hom khung gzhu yi dbyibs 'dra ba//khru gang pa'am khru do pa/ /khru bzhir byas la de dbus su/ /pad+ma dmar po bri bar bya/ /de yi dbus su mngar byas pa'i/ /gzhu yang de bzhin bri bar bya/ /khor yug tu ni mdar byas pa'i/ /gzhu ni kha dog dmar por bri/ /sngags rdzogs pas na rtag par yang / / phyi rol de dang 'dra bar bya/ /sems can de yang dran byas te/ /dmar por gyur pa'i gos gyon la/ /me tog dmar ram pad+ma'am/ /'bras bu dmar ram tshon bskus pas/ /mar dang gur gum bsres pa'am/ /tsan+dan dmar po'i phye ma yis/ /sbyin sreg byas na lha la sogs/ / thams cad de yi dbang du 'gyur/ /zhes gsungs te/ de la dbang gi thab khung tha ma ni khru gang ngo / /'bring ni khru do pa'o/ /rab ni bzhi pa yin te/ de'i dbyibs ni gzhu lta bu'am/ zla ba tshes pa lta bur bya ba'o/ /de'i dbus su pad+ma dmar po 'dab ma bcu drug par bri bar bya'o//de'i phyi rol du ni ut+pal dmar po'i mda' pad+ma'i gzhu dang ldan pa bkang ba bri bar bya'o/ /de'i mu ran la mda' dang gzhu ru ldan pa la bkang ba dang bcas pa bri bar bya'o/ /de'i mu ran gyi steng du ni 'od zer kha dog dmar po kun nas 'bar ba bri bar bya'o//de'i phyi rol khor yug rnams su ni pad+ma dmar po'i steng du bde bar gshegs pa rigs lnga'i phyag rgya dang / lha mo rnams kyi phyag rgya bri bar bya'o/ /de'i phyi rol du ni sems dpa' rnams dang / mchod pa'i lha mo rnams kyi phyag rgya bri bar bya'o//de'i phyi rol du sgo skyong ba rnams dang / phyogs skyong ba rnams kyi phyag rgya bri bar bya'o/ /de nas bdag nyid gos kha dog dmar po gyon la/ pad+ma'i skyil mo krung du 'dug /mig g.yon du blta zhing dbugs g.yon drangs te/ zangs sam tsan+dan dmar po'i gzar bu zla gam thogs te/rgyan dmar pos brgyan la mtho ris na gnas pa'i sems can de'i dbang du sems can thams cad bya ba'i phyir/ bcom ldan 'das 'od dpag med kyi ting nge 'dzin la snyoms par zhugs te/ dbang gi sngags mthar btags pas bsreg par bya ba ni me tog dmar po'am/pad+ma'am/ 'bras bu dmar po'am/ tshon dmar po bskus pa'i 'bras chan dang / 'bras yos dang / ma du dang / mar dang / gur gum dang / tsan+dan dmar po'i phye ma dang / til mar dang / yungs kar dmar po'i phye ma dang /ka ra bI ra dmar po'i yam shing til dang / e raN+Da'i sa bon la sogs pa'i rdzas rnams la lan grangs 'bum du bsreg par bya'o/ /de ltar byas par gyur pa las ni sems can de'i dbang du lha dang mi la sogs pa thams cad de'i dbang du gyur par nges pa nyid do//de nas de la gnod par gyur pa'i bgegs dang bdud la sogs pa'i tshogs gzhom pa'i phyir mngon spyod kyi sbyin sreg bya ba ni/ de la gdon rnams gzhom bya'i phyir/ /mngon spyod kyi ni las bya ste/ /phyed dang gsum las khru gsum mam//de ltar rab ni khru dgur bya/ /grwa gsum dang ni ldan pa la/ /dbus su rdo rje rtse dgu pa/ /kha dog nag po 'bar ba bri/ /mu ran gyi ni nang dag tu/ /rtse gsum pa dang rgya gram pa'i/ /rdo rje rnams ni bskor bar bya/ /de yi phyi rol mu khyud ni/ /dbyug pa rdo rje rtse gsum dang //dgra sta dang ni ral gris bskor/ /phyi rol du ni rim gsum dang / /snga ma bzhin du brgyan par bya/ /bya dang gtor ma'i bum pa dang / /bshos cha rnam pa mang du gzhag /sha dang khrag gis bkang ba yi/ /mgo bo'i thod pa kun du gzhag /lus can de yi sdig sogs pa//bgegs rnams gzhom par bya ba'i phyir/ /gos nag bgos shing khros nas kyang / /'jig rten gsum rgyal bdag nyid can/ /ting nge 'dzin du snyoms zhugs nas/ /de nas sdig bcom lus de ni/ /bgegs dang bral te ci bde bar/ /mtho ris 'jig rten mi yi nang //khams gsum po na ci dgar spyod/ /ces gsungs te/ de la mngon spyod kyi thab khung tha ma ni khru phyed dang gsum pa'o/ /bar ma ni khru gsum pa'o/ /rab ni khru dgu par bya ste/ dbyibs ni gru gsum du bya'o/ /de'i dbus su rdo rje rtse mo dgu pa kha dog nag po 'od zer nag po dang ldan pa bri bar bya'o//de'i grwa gsum du ni mtshon rtse gsum pa 'bar ba gsum nang du kha bltas pa bri bar bya'o/ /de'i mu ran du ni rdo rje rtse gsum pa dang / rdo rje rgya gram gyi phreng bas bskor ba bri bar bya'o/ /de'i steng du ni dbyug pa dang dgra sta'i phreng bas bskor ba bri bar bya'o//ral gri dang rdo rje ni mtshon rtse gsum pa'i bar du bri bar bya'o/ /mu ran gyi steng du dbyug pa la sogs pa'i phyi rol du ni me 'od 'bar ba dmar nag tu 'dug pa bri bar bya'o/ /de nas mchod pa'i tshogs ni bde bar gshegs pa rnams la mchod pa'i phyir/bya dang bum pa dang bshos la sogs pa 'jig rten pa'i 'byor pa thams cad gzhag par bya'o/ /mu ran gyi phyi rol rim pa gsum pa la ni gong du gsungs pa'i bde bar gshegs pa'i tshogs dang /lta mo'i tshogs dang / byang chub sems dpa'i tshogs dang / phyogs skyong la sogs pa'i phyag rgya thams cad rim pa ji lta ba bzhin du bri bar bya'o/ /de nas gtor ma'i tshogs dang / me tog nag po'am sngon po'i phreng bas brgyan par bya'o/ /de nas bdag nyid rdo rje rtse gcig pa'am/ral gri'i skyil mo krung bcas la gos nag po gyon te/ mi rus kyi rgyan gyis brgyan nas/ bcom ldan 'das khams gsum rnam par rgyal ba'i ting nge 'dzin la snyoms par zhugs la/ mig bgrad pas bgegs la bltas te/ dbugs drag por 'byung ba dang /rngub pa bgegs la byas la lcags sam mi rus kyi gzar bu zur gsum pa khru gang pa thogs te bsreg par bya ba ni/ sha dang khrag dang / lcags phye dang rus phye dang / seng ldeng gi tsher ma dang / dug dang ske tshe dang yungs kar gyi rgyal po dang / dri chen dang / /dri chu dang / me tog sngon po dang / mi'i mar khu'i bdug pa dang / shing tsher ma can la sogs pa'i yam shing gis lan grangs stong ngam 'bum phrag gcig gi bar du bsreg par bya ba nyid do/ /de bzhin du drag po'i las kyi sngags mthar btags pa grangs ji lta ba bzhin du byas pa las ni mtho ris na gnas pa'i gang zag de bgegs dang gnod pa'i tshogs dang bral nas bde 'gro'i gnas na bde ba dang ldan par spyod pa nyid do//go rims 'di dag nyid kyis ni/ /de yi gnas la bya ba ste/ /de nas gang gi phyir bya ba//de yi phyir yang de bzhin 'gyur/ /gzhan dag kyang ni las rnams ni/ /snga ma de bzhin de ltar bya/ /des ni sems can rnams la yang / /myur du bde skyid 'grub par 'gyur/ /zhes gsungs pa ni phrin las rnam pa bzhi'i las spyir khyab par gsungs te/de la go rims 'di dag nyid kyis ni/ /zhes pa ni gong du gsungs pa'i thab khung dang / mchod rdzas dang phyag rgya la sogs pa'i rim pa ste/ de dag gis tshe 'das pa'i don du yang bya la/ gang gzhan dag tu 'tsho ba dang ldan pa'i phyir yang de bzhin du las kyi rim pa rnams bya bar gsungs so//de la sogs pa'i las dang ting nge 'dzin la sogs pa thams cad snga ma bzhin du sems can gang dang gang gi don du byas pa las/ sems can thams cad bde skyid phun sum tshogs pa dang ldan par 'gyur ba nyid do/ /gzhan yang de dag gis rnam par dbye ba ni sangs rgyas rol pa'i rgyud las/phyogs dang ting 'dzin kha dog dang / /grangs dang phreng ba bzlas pa yi/ /rim pa las rnams 'grub 'gyur te/ /gzhan du 'khrugs pas bdag brlag 'gyur/ /zhes gsungs pa ni zhi ba'i las kyi skabs su mchod rdzas dang yo byad thams cad dkar por byas la/kha shar phyogs su bltas la brgya rtsa brgyad pa'i phreng bas mdzub mo la bzlas shing zhi ba'i sems kyis bya'o/ /rgyas pa ni yo byad thams cad ser por byas la kha byang phyogs su bltas te/ brgya rtsa brgyad pa'i phreng ba gung mo la bzlas shing dga' ba chen po'i sems kyis rgyas par bya'o//dbang la ni yo byad thams cad dmar por byas la/ nub phyogs su kha bltas te nyi shu pa'i grangs kyi phreng ba srin lag la bzlas shing chags pa chen po'i sems kyis dbang du bya'o/ /mngon spyod la ni yod byad rnams nag por byas la lho phyogs su kha bltas te drug cu pa'i phreng ba mthe'u chung la bzlas shing zhe sdang chen po'i sems kyis mngon spyod bya'o//phreng ba'i rnam par dbye ba ni zhi ba la ni shel lam dngul gyi ri lu la sogs pas bya'o/ /rgyas pa la ni gser ram gur gum gyi ri lu la sogs pas bya'o//dbang la ni tsan+dan dmar po'i 'bras bu'am/ pad+ma'i sa bon gyi ri lu la sogs pas bya'o/ /mngon spyod la ni mi rus kyi phreng ba nag po'am/ ka rAny+dza'i phreng ba'am/ dug gi ri lu la sogs pas bya'o/ /dus tshod kyi dbye ba ni 'og nas ston pa 'gyur la/'dir yang rgyud gzhan nas ni zhi ba la ni snga dro dang po shis so/ /rgyas pa la ni bza' ba longs spyod pa'i thun tshod gnyis pa la shis so/ /dbang la ni thun tshod gsum pa nas nub kyi bar du shis so/ /mngon spyod la ni srod 'khor nas nam phyed kyi bar du shis par gsungs so//de bas na de ltar yan lag thams cad yongs su mthun zhing tshang bas las rnam par 'grub par 'gyur gyi/ /gzhan du ni rang nyid dam tshig nyams pa dang / rang gi 'tsho ba dang 'bral bar 'gyur/ dper na nad pa gang zhig la nad 'tsho bar byed pa'i sman dag gtong na sman rnams kyi thun dang /drod tshad dang sna grangs 'dzom pa las nad zhi bar 'gyur gyi/ phan tshun du sna grangs ma 'dzom pa dang / thun che chung gyur pa las ni nad pa de'i 'chi ba dang 'brel par 'gyur ba dang / nad slar thu ba la sogs par 'gyur ba bzhin no//de'i phyir rnal 'byor pa rnams kyis bde bar gshegs pas ji skad gsungs pa bzhin du gsang sngags kyi sbyor ba yongs su rdzogs pa las thams cad bya ba nyid do/ /de yan chad kyis ni dkyil 'khor chen po rnams kyi yan lag phrin las bzhi'i sbyin sreg bshad nas/da ni tshangs pa la sogs pa lha'i bu rnams yid tshim par gyur te/ dga' ba chen pos bcom ldan 'das phyag na rdo rje'i spyan sngar dam pa'i chos dang de'i spyod pa'i gang zag rnams la rim gro dang bsnyen bkur bya bar dam bcas te/de nas tshangs pa la sogs pa'i lha rnams yid mgu nas/ bcom ldan 'das la phyag btsal nas 'di skad ces gsol to/ /bcom ldan 'das ngan song du skyes pa'i sems can rnams kyi don dang / sems can thams cad la phan pa dang / bde ba'i slad du brtag pa'i rgyal po chen po 'di 'dri ba dang /'di 'drir 'jug pa dang / 'chad pa dang / gzhan la rgya chen po ston pa dang / 'di rnal 'byor du byed pa dang / rig pa chen po zlos pa dang nyan pa dang / mchod pa dang / bsnyen bkur byed pa rnams kyis rigs kyi bu dang rigs kyi bu mo de dag ni/bdag cag tshangs pa la sogs pa dang / lha dang bcas pa'i 'khor rnams kyi bu bzhin du yongs su bskyang bar bgyi/ gang rgyal po'am rgyal po'i bu'am/ rgyal po'i blon po la sogs pa ji ltar gsungs pa'i rjes su slob na de'i rgyal srid 'phel bar bgyi/yul phyogs dang rang gi skye bo dang yongs kyi skye bo dang / bran la sogs pa bsrung bar bgyi'o/ /nor dang 'bru rnams mang du 'byor par bgyi/ skyes pa dang / bud med dang / khye'u dang / bu mo rnams dang ldan par bgyi'o/ /'byor pa rgyas pa dang /lo legs pa dang / zhi ba rnams su bgyid na/ ji ltar bshad pa'i bsgrub pa la mngon par zhugs pa rnams lta smos kyang ci 'tshal gang gis brtag pa'i rgyal po 'di dad pas rgyal mtshan gyi rtse mo la btags te/ grong dang grong khyer du btsugs la/ bdag nyid kyis bsu ba dang / glang po che'i steng du bzhag la/ grong dang grong khyer la sogs pa thams cad bskor na/ nad dang gnod pa thams cad ma mchis par 'gyur la/ sems can chen po de'i drung du bdag cag bran gyi tshul lam bu'i tshul du gnas par bgyi'o/ / gang du brtag pa'i rgyal po 'di rab tu spyod pa de ni bcom ldan 'das phyag na rdo rje nyid longs spyod rdzogs pa'i sku'am rdo rje sems dpa'i skur bzhugs par 'tshal bar bgyi ba dang / bcom ldan 'das rdo rje sems dpa' kun du bzang po re ba thams cad yongs su skong ba de nyid brtag pa'i rgyal po'i gzugs su bzhugs par 'tshal bar bgyi'o//de bzhin gshegs pa thams cad 'khor dang bcas te bzhugs par 'tshal bar bgyi'o/ /sa phyogs de mchod rten du 'tshal bar bgyi'o/ /mchod par bgyi ste phyag 'tshal bar bgyi'o/ / kun du bsrung bar bgyi'o/ /bdag cag tshangs pa la sogs pa'i lha rnams kyi brtag pa'i rgyal po 'di kun la rgyas par 'chad pa'i rdo rje slob dpon dka' thub chen po de'i g.yog bgyi/ bran gyi tshul du gnas par bgyi'o/ /bka' nyan pa'i tshul du gnas par bgyi'o/ / bsgo ba thams cad mnyan par bgyi'o/ /phan pa dang bde ba thams cad bgyi'o/ /dngos grub thams cad kyang stsal bar bgyi ste/ bcom ldan 'das mdor na de'i rkang pa'i rdul bdag gi spyi bos blang bar bgyi'o/ /bcom ldan 'das la phyag btsal bar bgyi'o//bcom ldan 'das la mchod par bgyi'o/ /bdag cag de'i phyi bzhin 'brang bar bgyi'o/ /bcom ldan 'das kyi dkyil 'khor du zhugs te/ dbang bskur ba gang lags pa de dag thams cad kyang bdag cag gi dpon po lags par 'tshal bar bgyi'o/ / bcom ldan 'das phyag na rdo rje legs par 'tshal bar bgyi'o/ /rdo rje sems dpa' legs par 'tshal bar bgyi'o/ /bde ba chen po kun du bzang po lags par 'tshal bar bgyi'o/ /de bzhin gshegs pa thams cad lags par 'tshal bar bgyi'o zhes pa la sogs pa rtsol ba ni/dam pa'i chos la bsnyen bkur ba dang / rim gror yongs su mchod par dam bcas pa yin par shes par bya ste/ de dag ni dgongs pa ma yin zhing nges pa nyid du ji skad rtsol ba bzhin du byed pa kho na'o/ /de la bcom ldan 'das phyag na rdo rje nyid longs spyod rdzogs pa'i sku'am/rdo rje sems dpa'i skur bzhugs par bgyi ste/ bcom ldan 'das kun du bzang po rdo rje sems dpa'i re ba thams cad yongs su skong ba de nyid brtag pa'i rgyal po'i gzugs su 'tshal bar bgyi'o/ /zhes pa ni 'bras bu'i bdag nyid rgyu las yongs su tshang bar 'dod pas rim gror byed pa ste/de la bcom ldan 'das phyag na rdo rje ni longs spyod rdzogs pa'i sku'o/ /rdo rje sems dpa' ni 'gro don rdo rje sems dpa' zhes bya ste/ sprul pa'i sku'o/ /kun du bzang po rdo rje sems dpa'i chos kyi sku ste/de ltar brtag pa'i rgyal po 'di sku gsum yongs su 'grub par byed pa'i phyir tshangs pa la sogs pa rnams kyi sku gsum gyi rang bzhin du bltas nas rim gror bgyi'o zhes gsol bar shes par bya'o/ /de bzhin gshegs pa thams cad zhes pa dang / mchod rten du 'tshal bar bgyi'o zhes pa brtag pa'i rgyal po 'di nyid la dus gsum gyi de bzhin gshegs pa 'khor dang bcas pa thams cad bzhugs pa'i phyir de bzhin gshegs pa thams cad du bzhugs par 'tshal bar bgyi'o zhes pa dang / mchod rten ni de bzhin gshegs pa'i gdung dang ldan pa'i mchod rten yin la/brtag pa'i rgyal po 'di yang de bzhin gshegs pa'i gdung nyid yin pa'i phyir 'di gang na bzhugs pa de nyid gdung dang ldan pas mchod rten du 'tshal bar bgyi'o zhes pa'o/ /de ltar gong du bstan pa'i bcom ldan 'das phyag na rdo rje lags par 'tshal bar bgyi'o zhes pa la sogs pa'ang sku gsum gyi ngo bor shes par bya ste/lhag ma ni de bzhin du byed par 'gyur zhing go sla ba'i phyir ma bshad do/ /de nas bcom ldan 'das phyag na rdo rjes tshangs pa la sogs pa'i lha rnams la 'di skad ces bka' stsal to//tshangs pa la sogs pa rnams chos la rim gro bya ba dang / de ltar dam bcas par 'gyur ba gang yin pa de ni legs so legs so/ /legs kyis ji skad du smras pa bzhin du brtag pa'i rgyal po 'di la mngon par sbyor ba'i sems can chen po de la bsrung ba dang bskyab pa la sogs pa gyis shig dang /de ni de bzhin gshegs pa thams cad la bsnyen bkur byas pa nyid du 'gyur ba'o zhes gsungs pa ni 'di ltar tshangs pa dang brgya byin la sogs pa'i 'khor thams cad la brtag pa'i rgyal po 'di la mngon par sbyor ba'i rigs kyi bu rnams la rim gror byed pa la bcom ldan 'das kyis nan tan cher gdams pa ste/de la legs pa'i tshig gsum po ni rjes su yi rang ba'o/ /ji skad du smras pa bzhin du'o zhes pa nas/ /bskyab pa la sogs pa gyis shig dang zhes pa'i bar ni cher gdams pa'o//des ni de bzhin gshegs pa thams cad la bsnyen bkur byas par 'gyur ro zhes pa ni/ tshangs pa la sogs pa'i rim gro dang bsnyen bkur byed pa la spro ba yang dag par bskyed pa de/ de la brtag pa'i rgyal po la mngon par sbyor ba'i sems can des ni/sems can rnams rnam par grol ba'i lam la gnas par byed cing / de nyid de bzhin gshegs pa thams cad kyi phrin las mdzad pa yin pa'i phyir/ de bzhin gshegs pa thams cad kyang thugs kyis rjes su yi rang bar mdzad de/de dag mngon par dgyes pa nyid las de bzhin gshegs pa la bsnyen bkur byas par 'gyur ba ni nges pa nyid du shes par bya ste/ de'i phyir de bzhin gshegs pa thams cad la bsnyen bkur byas par 'gyur ba nyid do zhes gsungs pa kho nar shes par bya'o//de nas bcom ldan 'das phyag na rdo rjes sngags dang rig pa dang / snying po thams cad bstan par bya ba'i phyir nyid kyi snying po 'di bshad do/ /oM b+h+rUM trUM/ badzra pA Ni hr-i da tiSh+Tha oM AHhUM/ oM badzra hUM/ oM hr-i da badzra hUM traM hUM/ oM badzra hUM traM sa/ oM badzra hUM a/ zhes pa la sogs pa ni bcom ldan 'das phyag na rdo rje nyid kyi snying po rnam pa gsum ste/de la sngags dang rig pa dang / snying po thams cad bstan par bya ba'i phyir zhes pa ni 'di ltar gong du gsungs pa dang / 'og nas gsungs par 'gyur ba'i dkyil 'khor thams cad du ni phyag rgya chen po'i rnal 'byor ma gsungs la/de thams cad la ni phyag rgya chen po'i rnal 'byor ni gsang sngags dang rig sngags dang / gzungs sngags thams cad skyed par byed pa'i ma dang 'dra ba yin pa'i phyir brtan par bya ba zhes bya'o/ /sngags ni rtsa ba dang nye ba'i snying po la sogs pa'o//rig pa ni lha'i tshogs rnams so/ /snying po ni bde ba chen po'i ye shes te/ de dag yongs su bskyed cing don thams cad 'grub pa'i phyir bstan par bya zhes sbyor ro/ /ji ltar na bstan pa yin zhe na nges pa nyid kyis bya ba bsgrub pa'i phyir bstan pa zhes bya'o/ji ltar na bya ba sgrub ce na/ phyag rgya chen po'i stobs kyis 'gro ba'i don byed nus pa las de dang bral ba las ni ma yin te/ de yang sangs rgyas thams cad pa'i rgyud chen po las bcom ldan 'das kyis/ phyag rgya chen po rnams bral bas/ /gsang sngags bsgrub par 'dod pa dang //'gro don byed par 'dod pa ni/ /rten med mkha' yi bar snang la/ /rgyal mtshan 'dzugs par 'dod pa ste/ /des ni nam du'ang ye shes ni/ /rnyed par mi 'gyur ram sdug bsngal/ /zhes gsungs pa'i phyir ro/ /sngags kyi don ni 'di ltar sku rnams bskyed pa'i sa bon te/de la dang po yig 'bru gcig ni bcom ldan 'das tshe dpag med kyi sa bon no/ /gnyis pa ni go cha bsrung bar bya ba'o/ /sngags gnyis pa ni bcom ldan 'das phyag na rdo rje'i snying pos dkyil 'khor rnams byin gyis brlabs pa'o/ /de'i mtha'i yig 'bru ni bcom ldan 'das kun du bzang po'i snying po'o//gsum pa ni bcom ldan 'das phyag na rdo rje'i'o/ /bzhi pa ni khro bo khams gsum rnam par rgyal ba'i'o/ /lnga pa ni rin chen 'byung ldan gyi'o/ /drug pa ni 'od dpag med kyi'o/ /bdun pa rnams ni don yod grub pa'i snying po rnams te/sku bskyed pa'i sa bon yang de dag nyid du shes par bya'o/ /de nas de dag gi dkyil 'khor bshad de/ dkyil 'khor snga ma bzhin bris la/ /dbus su rdo rje bri bar bya/ /yang na rdo rje sems dpa' 'am/ /kun du bzang po bde chen bris/ /spyan sngar phyag na rdo rje la/ / g.yas phyogs su ni rin chen bsnams/ /nub phyogs 'od dpag med pa ste/ /byang phyogs su ni rgya gram bsnams/ /phyi rol du ni kun bskor bas/ /sangs rgyas thams cad bsdus pa'i gzugs/ /sku bzhi po ni gzhag par bya/ /de yi phyi rol sems dpa' rnams/ /go rims bzhin du bri bar bya//sgo sgor sgo ba de bzhin te/ /de yi phyi rol byams pa sogs/ /bskal pa bzang po'i sems dpa' bri/ de ltar dge slong kun dga' sogs/ /thub rnams de yi phyi rol bri/ /rang gi chung ma bus bskor ba'i/ /tshangs pa la sogs phyi rol bri//de bzhin rgyal po bzhi rnams dang / /'jig rten skyong ba rnams dang ni/ /drang srong rgyal po rgyas la sogs/ /rig pa 'dzin pa bri bar bya/ /de yi phyi rol gza' dang ni/ /skar ma la sogs lha rnams bri/ /de yi phyi rol dmyal ba dang / /yi dags byol song mi rnams dang //de bzhin lha dang lha min sogs/ /'gro ba drug po bris nas ni/ /dri rnams lnga yi chus bkang pa'i/ /gser gyi bum pa 'od can dang / /gtor ma dang ni zhal zas dang / /me tog bdug pa rab mdzes dang / /gdugs dang rgyal mtshan 'phan rnams dang //bla re dang ni rnga yab mchog /dril bu rdo rje nor bu dang / /do shal nyi zla la sogs brgyan/ /'jig rten pa yi mchog gyur pa/ /'dod pa'i yon tan lngar ldan pas/ /dkyil 'khor mchog ni brgyan par bya/ /zhes gsungs pa ni dkyil 'khor dang mchod pa'i yo byad bsags par gsungs te/de la dkyil 'khor snga ma bzhin bris la/ /zhes pa ni gong du thog mar gsungs pa'i rtsa ba'i dkyil 'khor chen po la bsnyags pa ste/ rtsa ba'i dkyil 'khor ji lta ba bzhin du 'khor lo rim pa gsum pa la rtsibs nyis 'gyur du byas pa dang /srid pa'i 'khor lo cha drug pa bri bar bya'o/ /dbus su rdo rje bri ba'am/ /yang na rdo rje sems dpa' 'am/ /kun du bzang po bde chen bri/ /zhes gsungs pa ni 'di ltar bcom ldan 'das phyag na rdo rje'i dkyil 'khor du ni 'khor los sgyur ba'i gtso bo chos kyi sku'i rtags su bri bar bya ba ste/de ci'i phyir zhe na snyam pa la/ bcom ldan 'das phyag na rdo rje nyid longs spyod rdzogs pa'i sku'i cha lugs su zhugs pa'i phyir mchog tu gyur pa chos kyi sku yin pa na 'khor los sgyur ba'i de dag kho na nges pa nyid do//de dag 'di skad du ci kun du bzang po dang / rdo rje sems dpa' yang longs spyod rdzogs pa'i cha lugs su bzhugs pa la/ phyag na rdo rje dang gnyis 'dra ba'i snang ba'i phyir khyad par med do zhe na ma yin te/ 'dir gzugs kyi sku ru bzhugs par 'dra'ang /phyag rgya'i dbye bas chos kyi sku mtshon pa yin pa'i phyir na rdo rje'am rdo rje sems dpa' 'am bde ba chen po kun du bzang po zhes gsungs so/ /de la phyag rgya ji lta bus mtshon snyam pa la/ phyag rgya ni chos kyi dbyings kyi ye shes rnam par rtog pa thams cad dang bral zhing /rang bzhin gyis 'od gsal ba'i phyir/ de'i dbus su phyogs cha dang bral ba'i rdo rje kha dog dkar pos mtshon pa dang / yang chos kyi sku de thabs dang shes rab gnyis su med pa las sku rnam pa gnyis kyi rten du gyur pa'i phyir/ dpal rdo rje sems dpa'i rdo rje dang dril bur ldan pa zhi ba chen po'i skus mtshon pa dang /yang chos kyi sku de chos kyi dbyings la gnyis su med pa'i ye shes kyis reg par byas shing / bde ba chen po'i rnam par rtog pa thams cad dang bral bar 'gyur ba'i phyir/ bcom ldan 'das kun du bzang po thabs dang shes rab kyi phyag rgya bde ba chen po gnyis su med par mdzad pas mtshon pa'o//gzhan du sprul pa'i gzugs kyi 'khor dang ldan pa'i phyir longs spyod rdzogs pa'i gzugs kyi gtso bor bzhugs pa la ni 'gal ba med pa nyid do/ /de la dkyil 'khor ni rtsa ba'i dkyil 'khor dang 'dra ba'i phyir ma bshad de//'khor los sgyur ba bzhi ni bcom ldan 'das phyag na rdo rje dang / rin chen 'byung ldan dang / 'od dpag tu med pa dang / don yod grub pa bzhi ste/ phyag rgya ni ting nge 'dzin du bzhag nas/ g.yas pa rnams na rdo rje dang /rin po che dang / pad+ma dang / sna tshogs rdo rje rnams kyis mtshan pa'o/ /gdan ni 'dir yang seng ge la sogs pa nyid do/ /grwa rnams su ni rdo rje sems ma la sogs pa'i rigs kyi yum bzhi dang ldan pa'o/ /lhag ma ni gong du gsungs pa ji lta ba bzhin du yin zhing yang yang smra ba'i nyes par 'gyur ba'i phyir ma bshad do//dri rnams lnga yis bkang ba yi/ /zhes pa nas/ dkyil 'khor mchog ni brgyan par bya/ /zhes pa'i bar du ni mchod pa'i tshogs yang dag par brgyan pa gsungs pa ste/ de la dkyil 'khor chen po'i mtha' stegs bu la rim pa ji lta ba bzhin du me tog dang /dri dang / bdug pa dang / snang ba dang / bza' ba dang / bca' ba dang / bldag pa dang / myang ba dang / btung ba'i bye brag sna tshogs pa dang / gzhan yang gser ram dngul las rin po che'i bum pa dang / gtor ma'i tshogs sna tshogs pa'ang gzhag par bya'o/ /de bzhin du me long dang / ral gri dang / 'khor lo dang / rnga dang / cang te'u dang / rdza rnga dang / rnga rked nyag dang / dril bu dang / rol mo'i rnam pa sna tshogs pa brdung bar bya ba dang / gzhan yang bla re dang /gdugs dang / rnga yab dang / rgyal mtshan dang / ba dan dang / rdo rje dang / nor bu'i 'phyang 'phrul dang / gser gyi nyi ma dang / dngul gyi zla ba dang ldan pa'i mu tig gi do shal gyis yol ba'i nang du bre ba dang / na bza'i rnam pa dar la sogs pa 'phyang ba dang /me tog gi phreng ba la sogs pas dkyil 'khor dang mchod pa'i rdzas thams cad yongs su brgyan par bya'o/ /'dod pa'i yon tan lngar ldan pas/ /dkyil 'khor mchog ni brgyan par bya/ /zhes pa ni gong du gsungs pa'i rim pa thams cad la khyab par 'jug pa nyid du shes par bya ba nyid do//de nas sngags mkhan bdag nyid kyis/ /spyan drangs nas ni bzhugs nas kyang / /bdag nyid kyis ni dbang bskur bya/ /zhes pa ni slob ma dbang bskur ba'i phyir bdag nyid dkyil 'khor du 'jug pa gsungs te/ de la gong du gsungs pa'i rim pa rdo rje 'dzin ma'i phyag rgya bcas la/gos dang rgyan sna tshogs kyis brgyan nas me tog gi phreng ba thogs te/ dkyil 'khor du zhugs la dbang ji lta ba bzhin du mnos nas gnang ba legs par thob pa dang / slob ma dbang bskur bar bya ba nyid do//sdom gnas dam tshig ldan pa la/ /bla mar mos shing dad par bcas/ /rigs skyes skyon dang bral ba dang / /ser sna ma lus spangs gyur cing / /yon tan mang por ldan gyur dang / /gtong dang tshul khrims mang du thos/ /byams pa dang ni snying rjer ldan/ /dga' dang btang snyoms gnas pa dang //stong pa mtshan ma med pa'i sems/ /smon pa med par yid ldan zhing / /slob ma dam pa sngags 'di yis/ /byang chub tu ni sems bskyed la/ /sngags mkhan gyis ni gzud par bya/ /zhes pa la sogs pa gsungs pa ni slob ma'i snod brtag pa gsungs pa ste/de la thos pa chung ba ni dam pa'i chos go bar ma gyur pa las bla ma gus par mi 'gyur ba dang / ser sna dang bcas pa ni bsod nams kyi tshogs sogs par mi 'gyur ba dang / so sor thar pa la sogs pa'i sdom pa dang bral ba dang / gsang sngags kyi dam tshig nyams pa la ni gsang sngags kyi dngos grub 'grub par mi 'gyur ba dang / bla ma la ma gus pa dang / dad pa dang mi ldan pa las ni dam tshig nyams par 'gyur ba'i phyir dang / yon tan mang po dang ldan pa ni/ lus kyi spyod pa kun nas bsdams pa dang / ngag 'jam pa dang / shes rab che ba dang / bzo la sogs pa'i rnam pa mang po shes pa dang ldan pa ste/ de dag dang mi ldan pas ni dkyil 'khor dam pa bzhengs par mi nus shing shes par mi 'gyur ba dang gtong ba dang mi ldan pa las ni sems can rnams la phan par mi 'gyur ba dang /tshul khrims dang mi ldan pa las ni theg pa chen po'i snod du mi rung ba dang / de bzhin du tshad med pa rnam pa bzhi dang mi ldan pa las ni gsang sngags kyi rnal 'byor par mi 'gyur ba dang / rnam par thar pa'i sgo gsum dang mi ldan pas ni/rnam par rtog pa dang bcas pa las lha'i dngos grub tu mi 'gyur ba'i phyir na sdom gnas dam tshig ldan pa la/ /zhes pa la sogs pa'i tshigs su bcad pa rnams kyis slob ma'i snod brtag par gsungs pa ste/ de'i phyir rnal 'byor pa rnams kyis kyang rnyed pa dang bkur sti la mi lta bar sems can thams cad kyi don du bla na med pa'i sems kyis slob ma'i snod brtags te/dbang la sogs pa bskur bar bya ste/ gzhan du na dam tshig nyams par 'gyur ba'i phyir mi bya ba kho na'o/ /de la gong du rigs skyes gsungs pas ni theg pa chen po'i rigs can du go bar bya ste/'jig rten pa'i rigs la dgongs nas ni sems can thams cad la phan par mi 'gyur ba'i phyir/ de ma yin pa nyid du shes par bya'o/ /slob ma dam pa ni rab tu gyur pa ste/ gang zag rnam pa bzhi las rin po che lta bu zhes bya ba'i gang zag go//de ltar gong du gsungs pa'i yon tan gyi tshogs mang po dang ldan pa'i slob ma ni gong du smos pa'i rig pa ji lta ba bzhin du sdig pa bshags pa dang / gsum la skyabs su 'gro ba dang byang chub tu sems bskyed pa dang /rdo rje theg pa la khas yang dag par 'ches par bya ba dang / sdom pa gzung ba la sogs pa byed du bcug /me tog gam rin po che thogs te/ dkyil 'khor du dbang bskur ba'i phyir zhugs par bya ba nyid do/ /oM badzra hUM ja/ badzra sa ma ya pra be sha hUM/ oM badzra pA Ni pra tIts+tsha badzra satwa ma hA su kha hUM/ha ha ho sa ma ya s+t+waM/ me tog gi phreng ba dor nas/ gang la bab pa'i sngags dang phyag rgyas mgo la bcing bar bya'o zhes gsungs pa ni dkyil 'khor du zhugs pa'i cho ga ste/ de la dang por bsnyen pa byas pa'i bum pa nas chu blangs nas khams gsum rnam par rgyal ba'i sngags kyis bgegs bskrad par bya'o//de nas rdo rje thal mo nas bzung ste/ sngags dang pos gzhug par bya'o/ /de nas sngags gnyis pas me tog la sogs pa'i phreng ba dor te/ rigs kyi rjes su mtshon pa las de'i phyag rgya dang sngags kyi me tog gi phreng ba mgo la bcing bar bya ba nyid do//de nas dam tshig sbyin par bya ste/ oM rigs kyi bu khyod kyis dkyil 'khor 'di ma mthong ba'i mdun du smra bar mi bya'o/ /gal te khyod kyis su dag la smras par gyur na ni bcom ldan 'das phyag na rdo rje nyid kyi rdo rje 'bar ba rab tu 'bar bas khyed kyi mgo 'gas par 'gyur ro//oM badzra sa ma ya hUM phaT tri ta hUM a/ 'dis dam tshig gi chu blud la gdong g.yogs dgrol bar bya'o/ /oM badzra tsak+Shu dr-i sh+ya ho/ /Adz+nyA na pa ta le mo k+ShA ya mi hUM/ de nas bcom ldan 'das phyag na rdo rje dang /sangs rgyas thams cad bstan par bya zhing / bcom ldan 'das kyi spyan sngar dbang bskur bar bya'o zhes gsungs pa ni las kyi rim pa ji lta ba bzhin du gsungs pa ste/ de la dang por dam tshig gis mna' bsgag pa'i phyir tsan+dan la sogs pa'i dri chu la/oM badzra a mr-i ta ta thA ga ta sa ma ya hUM/ zhes pa'i sngags brgya rtsa brgyad la sogs par bsngags la/ gong du gsungs pa'i tshig gi 'og tu de'i mtha'i sngags kyis chu blud par bya ba ni mna' bsgag par bya'o/ /de nas bdag nyid bcom ldan 'das phyag na rdo rjer bskyed pas de'i ma rig pa'i ling tog bsal bar bsams te/oM rdo rje sems dpa' nyid kyang ni/ /de ring khyod kyi mig 'byed mdzad/ /rdo rje'i mig ni bla med pa'i/ /mig rnams thams cad dbye bar bya/ /zhes pa'i tshigs su bcad pa dang / 'og tu bshad pa'i sngags kyis gdong g.yogs dgrol bar bya'o//de nas brtan par byas pa bcom ldan 'das phyag na rdo rje dang / dkyil 'khor gyi lha thams cad rim pa ji lta ba bzhin bstan par bya'o/ /de nas bcom ldan 'das phyag na rdo rje'i spyan sngar dbang bskur bar bya ba ni/ oM badzra pA Ni sa yan te a nu rA ga to a b+ti Shiny+tsa hUM/oM badzra badzra a b+hi Shiny+tsa sarba badzra a b+hi She ka hUM/ oM bud+d+ha a b+hi Shiny+tsa sarba bud+d+ha a b+hi She ka oM hUM/ oM rat+na a b+hiShiny+tsa hUM trAM/ oM pad+ma a b+hiShi ny+tsa sarba pad+ma a b+hiSha ka hrIH/ oM karma a b+hi Shiny+tsa sarba karma a b+hi She ka a zhes gsungs te/de la dang por bcom ldan 'das phyag na rdo rje nyid kyis slob ma'i spyi bor pad+ma dkar po'i steng du gnas par bya ba ni sngags dang por byin gyis brlab pa'o/ /de nas rim pa ji lta ba bzhin gong du smos pa ltar bde bar gshegs pa lnga'i 'khor los sgyur bas gnas ji lta ba bzhin du dbang bskur bar bya'o//de la 'dir ni sngags gnyis pa las rigs kyi mtshan lan gsum du smos pa ni bcom ldan 'das phyag na rdo rje'i dkyil 'khor du dbang bskur ba'i phyir dang / de nyid rdo rje'i rigs kyi gtso bo yin pa'i phyir dang /rdo rje'i rigs kyi 'khor los sgyur ba'i dbang bskur ba'i phyir rigs kyi mtshan lan mang du smos pa'o/ /de bzhin du sngags gzhan rnams la'ang rigs kyi mtshan lan gnyis su smos pa rigs nye bar mtshon pa dang / sangs rgyas dang byang chub sems dpa' thams cad bsdus pa'i phyir ma lus pa'i tshogs dang gnyis su smos pa'o//de la gang dag de bzhin gshegs pa thams cad bsdus pa ni gong du gsungs pa'i dkyil 'khor rnams su mi gsung la 'dir gsungs pa ci'i phyir snyam pa la/de la gong du gsungs pa rnams ni las kyi dkyil 'khor zhes bya la 'di ni de dag thams cad brtan par byed pa'i phyir phyag rgya chen po'i dkyil 'khor zhes bya'o/ /de nas bdag gi lus la sogs pa yon du phul la bka' nod par bya'o/ /oM sarba ta thA ga tA b+hi She ka /e kAn+dA ma s+ya mi gr-i h+na badzra pra sid+d+ha ye swA hA/ de nas las thams cad byed du gzhug cing dngos grub thams cad kyang sbyin par bya'o zhes gsungs pa ni/ 'di ltar bka'i dbang bskur bar bya bar gsungs pa ste/ de la bdag nyid rang 'dod pa'i lha'am/bcom ldan 'das phyag na rdo rjer bskyed la/ thugs kyi sa bon las 'od zer spros pas dus gsum gyi de bzhin gshegs pa thams cad spyan drangs te/ bdag dang gnyis su med par gyur pa la/ lag tu rdo rje byin nas gong du bshad pa'i tshigs su bcad pa rnams bton te/sngags de nyid kyis dbang bskur bar bya'o/ /de la sngags kyi don ni de bzhin gshegs pa thams cad kyi bka' gcig tu gyur pa ste/ bzung ba las rdo rje lta bur grub par gyur cig ces pa'o/ /de las 'dir dbang gzhan rnams rdzogs par ma bstan pa ni gong du khyab par byung ba rdo rje'i skabs su gsungs pa las dgongs nas ma gsungs te/'dir yang gong du gsungs pa'i bum pa'i dbang dang / phyag rgya dang phreng ba la sogs pa thams cad rdzogs par dbang bskur bar bya ba nyid do/ /de la gang dag de lta na ni bde bar gshegs pa'i dbang dang bka'i dbang yang gong du mtshon pa las shes par byas pas chog gi 'dir bstan pa la dgos pa med do zhe na/de ni ma yin te/ gang du dbang gi skabs su bab pa ni dbang thams cad mtshon par bya ba'i phyir dkyil 'khor thams cad kyi dbang la dang por ni bde bar gshegs pa rnams kyi dbang gis mtshon pa ste/dper na gang du 'bras bu gsum gyi sman gtong ba ni/ a ru ra thogs shig ces pa'i sgras skyu ru ra la sogs pa'ang brtag dgos pa bstan pa bzhin no/ /yang 'dir bka'i dbang ni khyab par byung ba'i rdo rjer ma gsungs pa'i phyir/'dir bstan par bya ba kho na ste/ mi 'gal ba nyid do/ /de'i phyir dbang thams cad rdzogs par ston pa'ang yang dang yang sbyor ba'ang nyes pa'i skyon du 'gyur ba dang / dang po tsam ma smos na'ang dbang ji ltar bskur pa mi shes pa'i phyir/dkyil 'khor thams cad rdzogs par ma gsungs shing dang po tsam smos par shes par bya'o/ /de nas las thams cad kyang byed du gzhug cing dngos grub thams cad kyang sbyin no zhes pa ni bka'i rjes thogs su las kyi dbang bskur bar bya ba dang /dad pa dang ldan pa'i slob ma la dngos grub thams cad 'grub par 'gyur ba'i byin gyi rlabs chen pos byin gyis brlab par bya ba nyid de/ tshigs su bcad pa bzhi po'i don bstan par bya'o/ de yan chad ni dkyil 'khor gyi rim pa gsungs nas/ da ni dkyil 'khor gyi las thams cad kyi phyag rgya chen po yang dag par bstan pa'i phyir gsungs pa ni/de nas bde ba bskyed nas kyang / /dkyil 'khor bzhi po'i dbus su ni/ /kun du bzang po bde ba che/ /bdag nyid kyis ni bsgom byas nas/ /snying gar hUM zhes bya bsams na//rdo rje sems dpa' mnyam par 'gyur/ /dpal ldan las rnams kun byed cing / /kun du bzang po bdag nyid 'gyur/ /de ltar gyur pas the tshom med/ /hUM las sangs rgyas gzugs bsgyur la/ /snying gar 'khor lo rab bsgoms nas/ /phyag na rdo rje 'dra bar 'gyur//khro bo stobs chen rnams bsgoms te/ snying gi dbus su phaT ces pa/ /oM zhes bya bas bskor bsams nas/ /khro bo stobs chen bdag nyid 'gyur/ /rdo rje brtan par bdag bsgyur la/ /snying gar oM zhes bya ba yis/ /bskor ba'i trAM zhes bya bsams nas//rin chen 'dzin pa 'dra bar 'gyur/ /rdo rje bsgoms nas snying gi ni/ /dbus su trAM zhes bya ba la/ /oM zhes bya bas bskor bsams nas/ /phyag na pad+mo mnyam par 'gyur/ /'khor lo rgya gram hUM ldan par/ /a zhes bya bas bskyed nas kyang //a zhes bya bas bskor bsams na/ /rdo rje las dang mnyam par 'gyur/ /zhes gsungs te/ de la 'di dag ni lha'i sku phyag rgya chen po bsgom pa'i rim pa yin la/ de nyid phyag rgya gcig pa'i tshul du bzhugs shing las thams cad ni phyag rgya bzhi pa/ phyag rgya chen pos byed par 'gyur ba ste/de yang gang du phrin las bzhi yis bsdus pa'i las kyi sbyin sreg ni phyag rgya gcig pas rnal 'byor du bya ba dang / mchod pa'i tshogs kyi skabs su ni/ phyag rgya bzhi pa'i rnal 'byor gyis byed pa kho na ste/ gzhan du rim pa dang mi ldan pa las ni chos kyi dngos grub tu mi 'gyur ba nyid do//de la/ de nas bde ba bskyed nas kyang / /dkyil 'khor bzhi yi dbus su ni/ /zhes pa ni/ 'dir ni don rnam pa gnyis la 'jug pa ste/ gong du mchod pa'i tshogs kyi skabs su ni/ sangs rgyas spyan la sogs pa'i rigs kyi yum bzhi'i dbus su bcom ldan 'das bde ba chen po kun du bzang po'i sku bsgoms pa las/nyid kyis nyid la mchod pa'i tshogs kyis rgyas par byed pa dang / de bzhin du rdo rje'i rigs kyi mchod pa'i skabs su ni rdo rje sems dpa' la sogs pa sems dpa' bzhi'i dbus su bcom ldan 'das phyag na rdo rje la sogs par bsgoms pas mchod par bya ba dang /rin chen rigs kyi mchod pa'i skabs su ni rdo rje rin chen la sogs pa sems dpa' bzhi'i dbus su/ bcom ldan 'das rin chen 'byung ldan la sogs par bsgoms pas mchod par bya ba dang /pad+ma'i rigs kyi mchod pa'i skabs su ni rdo rje chos la sogs pa sems dpa' bzhi'i dbus su bcom ldan 'das 'od dpag med la sogs par bsgoms pas mchod par bya ba dang / las kyi rigs kyi mchod pa'i skabs su ni rdo rje las la sogs pa sems dpa'i bzhi'i dbus su ni bcom ldan 'das don yod grub pa la sogs par bsgoms pas mchod pa bya ba'i phyir/dkyil 'khor bzhi yi dbus su ni/ /zhes gsungs pa'o/ /bde ba bskyed pa ni sdug bsngal dang bral ba'i rnal 'byor la bya ste/ tshigs su bcad pa bzhi pos bskyed par bya'o//de ci'i phyir snyam pa la/ dang por tshigs su bcad pa bzhi pos slob ma gang la byin gyi rlab chen po bskyed pa dang / yang dag par rdzogs pa'i sangs rgyas kyi rnal 'byor rnam 'grub par 'gyur gyis gzhan du ni nus pa dang mi ldan pa'i phyir/sems can la phan pa'i stobs su mi 'gyur ro/ /de la gang dag 'di skad du phyag rgya bzhi pa nyid dkyil 'khor yin zhing de la 'khor dang mi ldan pa'i phyir rdo rje rigs kyi 'khor los sgyur ba la sogs pa la ni dkyil 'khor bzhi'i dbus su zhes bya ba mi rigs so zhe na ma yin te/de dag thams cad la yang phyag rgya bzhi pa'i dkyil 'khor re re dang ldan pa ni/ yig 'bru drug cu rtsa bzhis 'og nas ston par 'gyur zhing / de'i phyir dkyil 'khor bzhi po'i dbus su zhes bya ba kho na'o/ /mtshams gcod pa la sogs pa'i skabs sam/sgo skyong la sogs pa mchod pa'i skabs su ni 'jig rten snang byed la sogs pa khro bo bzhi'i dbus su khams gsum rnam par rgyal ba'i gzugs su bsgom par bya ba nyid do/ /de nas phyogs gzhan du phrin las rnam pa bzhi'i sbyin sreg byed pa'i skabs su phyag rgya gcig pa'i gzugs su bsgom par bya ba ste/dkyil 'khor bzhi po'i dbus su zhes pa ni bdag nyid rtsa ba'i dkyil 'khor chen po bzhengs su gsol ba dang / de'i yan lag tu gyur pa zhi ba dang / rgyas pa dang / dbang dang / mngon spyod rnams kyi dkyil 'khor te/ de dag gi dbus su gong du bshad pa'i ting nge 'dzin/ bcom ldan 'das phyag na rdo rje dang / rin chen 'byung ldan dang / 'od dpag med dang / don yod grub pa dang / drag po'i skabs su ni khro bo khams gsum rnam par rgyal ba'i gzugs su rnam par bsgom pa las zhi ba la sogs pa'i las bya ba ste/des ni bde bar gshegs pa de dag dang 'dra ba'i phyir las thams cad ma lus par 'grub par 'gyur ba nyid do/ /de la/ kun du bzang po bde ba che/ /bdag nyid kyis ni bsgom pas nas//snying gar hUM zhes bya bsams nas/ /rdo rje sems dpa' mnyam par 'gyur/ /zhes pa ni 'di ltar sku'i ting nge 'dzin zhes bya ba ste/ de yang rnam pa gsum mo/ /gcig ni ltos pa med pa zhes bya ba'i ting nge 'dzin to/ /gcig ni rgyu las grub pa zhes bya ba'i ting nge 'dzin to//gcig ni 'bras bu gnas pa zhes bya ba'i ting nge 'dzin to/ /de la 'dir ni bcom ldan 'das rgyu las grub pa zhes bya ba'i ting nge 'dzin gyi dbang du mdzad nas go rims 'di dag gsungs pa ste/ de la dang por bdag nyid kyi snying gar a las zla ba'i dkyil 'khor bsams la/de'i steng du raM las nyi ma'o/ /de'i steng du hUM bsam mo/ /de ltar gyur pa las rdo rje rtse dgu pa gcig bsam par bya'o/ /de'i lte ba la yig 'bru dgu po oM dang bcas pa bkod la/ de gyur pa las bdag nyid bcom ldan 'das kun du bzang po sku mdog dkar po rgyan thams cad kyis yongs su brgyan pa/thabs dang shes rab gnyis su med pa'i phyag rgya mdzad pa'am/ bcom ldan 'das rdo rje sems dpa' sku mdog dkar po rdo rje dang dril bu rol par bsams te/ des ni sbyin sreg gi dbang du byas nas ni las thams cad pa'i sbyin sreg gi skabs su bya'o//dbang gi skabs su ni bde bar gshegs pa'i rigs kyi dbang bskur ba'am/ de'i bum pas dbang bskur ba'i dus su bya'o/ /'od zer spro ba'i dbang du byas nas/ bde bar gshegs pa'i rigs la dgab par bya'o/ /de ltar byas pa las nges par bcom ldan 'das kun du bzang po nyid dang /khyad par med par 'gro ba'i don byed nus pa ni de bzhin gshegs pas rgyud gzhan du'ang gsungs so/ /hUM las sangs rgyas gzugs bsgyur la/ /snying gar 'khor lo rab bsgoms na/ /phyag na rdo rje 'dra bar 'gyur//zhes pa ni/ 'di ltar rang gi snying gar a las zla ba'i dkyil 'khor bsams la/ de'i steng du raM las nyi ma bsams te/ de'i steng du hUM bsam mo/ /da dag gyur pa las sangs rgyas thams cad kyi sku gsung thugs kyi rdo rje 'khor lo lta bu rtse gsum pa gcig bsam mo//yang de'i dbus su yig 'bru gsum po bsams la/ de dag yongs su gyur pa las bdag nyid bcom ldan 'das phyag na rdo rje sku mdog dkar po bzhin 'dzum pa rgyan thams cad kyis brgyan pa/ phyag g.yas na rdo rje rtse gsum pa 'dzin pa/g.yon skyabs sbyin gyi phyag rgya dang ldan pa bsgom par bya ste/ de ni sbyin sreg byed pa'i dbang du byas nas ni/ zhi ba'i sbyin sreg byed pa'i skabs su shes par bya ba dang / dbang bskur ba'i dbang du byas nas ni/ rdo rje rigs kyi bde bar gshegs pas dbang bskur ba dang /rdo rje rigs kyi bum pas dbang bskur ba'i skabs su shes par bya'o/ /'od zer spros pa'i dbang du byas nas ni/ rdo rje rigs kyi sems can la dgab par bya'o/ /de ltar bsgoms pas las ni bcom ldan 'das phyag na rdo rje dang gnyis dbyer med par gyur pa las zhi ba'i las thams cad 'grub par 'gyur ba ni nges pa kho na'o//rdo rje khro bo rnams bsgoms te/ /zhes pa la sogs pa ni rang gi snying gar a las zla ba'i dkyil 'khor bsams la/ de'i steng du raM las nyi ma'i dkyil 'khor ro/ /de dag gi steng du phaTaHnag po bsams te/de dag gyur pa las ral gri 'bar ba bsam mo/ /yang de'i dbus su yig 'bru bzhi po bsams la/ de dag yongs su gyur pa las bdag nyid khro bo khams gsum rnam par rgyal ba gong du gsungs pa'i kha dog dang cha lugs ci 'dra ba bsgom par bya ste/de ni sbyin sreg gi dbang du byas nas ni/ drag po'i las kyi sbyin sreg byed pa'i skabs su shes par bya'o/ /de dag gi 'od zer la spros pa'i dbang du byas nas ni mtshon cha'i 'od zer spro ba'i skabs su shes par bya'o/ /dbang gi khro bos 'khor los sgyur ba lnga'i dbang bskur du mi gtub pa'i phyir/'og nas bcom ldan 'das don yod grub pa bsgom par shes par bya'o/ /de dag gis ni khro bo khams gsum rnam par rgyal ba dang gnyis dbyer med par gyur pa ste/ de yis ni drag po'i las thams cad 'grub par 'gyur ba kho na'o//rdo rje bstan par bdag 'gyur la/ /zhes pa la sogs pa ni/ 'di ltar rang gi snying gar a las zla ba bsams te/ de'i steng du raM las nyi ma'i dkyil 'khor bsam par bya'o/ /de'i steng du tra ser po bsams te/ de gyur pa las rin po che'o//de'i dbus su yang oM dang bcas pa'i yig 'bru bdun po bsams te/ de dag yongs su gyur pa las bdag nyid bcom ldan 'das rin chen 'byung ldan sku mdog ser po rgyan thams cad kyis brgyan pa'o/ /phyag g.yon pa ni yid bzhin gyi nor bu rin po che 'bar ba bsnams pa/phyag g.yas pas mchog sbyin pa'i phyag rgya mdzad par bsgom par bya ste/ de ni dbang bskur ba'i dbang du byas nas ni rin po che'i rigs kyi bde bar gshegs pas dbang bskur ba dang / rin chen rigs kyi bum pas dbang bskur ba'i skabs su shes par bya'o//sbyin sreg byed pa'i dbang du byas nas rgyas pa'i sbyin sreg byed pa'i skabs su shes par bya'o/ /'od zer spro ba'i dbang du byas nas ni rin po che'i rigs kyi gang zag la dgab par bya ste/ de ni bcom ldan 'das rin chen 'byung ldan dang dbyer med par 'gyur zhing rgyas pa'i las thams cad 'grub par 'gyur ba kho na'o//rdo rjer bsgoms nas snying gi ni/ /zhes pa la sogs pa ni/ /'di ltar rang gi snying gar a las zla ba bsams la/ de'i steng du raM las nyi ma bsgoms te/ de'i steng du hri dmar po bsams la/ de gyur pa las pad+ma dmar po 'dab ma brgyad pa gcig bsam mo//yang de'i dbus su oM dang bcas pa'i yig 'bru lnga po bsams te/ de dag yongs su gyur pa las bdag nyid bcom ldan 'das 'od dpag med sku mdog dmar po rgyan thams cad kyis brgyan pa/ phyag g.yon pa na pad+ma 'dab ma brgyad pa yu ba dang bcas pa 'dzin cing g.yas chos 'chad pa'i phyag rgya dang ldan pa cig bsgom par bya'o//de ni sbyin sreg gi dbang du byas nas ni/ dbang gi sbyin sreg byed par shes par bya'o/ /dbang bskur ba'i dbang du byas nas ni/ /pad+ma'i rigs kyi bde bar gshegs pas dbang bskur ba dang /pad+ma'i rigs kyi bum pas dbang bskur ba'i skabs su shes par bya'o/ /'od zer spro ba'i dbang du byas nas ni/ pad+ma'i rigs kyi sems can la/ dgab par bya ba nyid do/ /des ni bcom ldan 'das 'od dpag med dang gnyis dbyer med par 'gyur zhing dbang gi las thams cad la the tshom mi za bar grub par 'gyur ba kho na'o//'khor lo rgya gram hUM ldan par/ /zhes pa la sogs pa ni 'di ltar rang gi snying gar a las zla ba'i dkyil 'khor bsams la/ de'i steng du raM las nyi ma bsams te/ de'i steng du a hUM gis mtshan pa bsam par bya'o//yang de'i lte ba la oM dang bcas pa'i yig 'bru bsams te/ de dag yongs su gyur pa las ni bdag nyid bcom ldan 'das don yod grub pa sku mdog ljang gu la rgyan thams cad kyis brgyan pa phyag g.yon pa na sna tshogs rdo rje bsnams shing g.yas pa mi 'jigs pa sbyin pa'i phyag rgya mdzad pa gcig bsgom par bya ste/de ni dbang bskur ba'i skabs su las kyi rigs kyi bde bar gshegs pas dbang bskur ba dang / las kyi bum pas dbang bskur bar shes par bya ste/ de ni bcom ldan 'das don yod grub pa dang gnyis dbyer med par gyur pa dang /las thams cad la 'jug par 'gyur ba nyid do/ /de ltar rim pa de dag gis gang du rnal 'byor pas phyag rgya chen po yid la byed pa thams cad du mngon par sbyar bar bya ste/ des ni sems can yid bzhin gyi nor bu rin po che las grub pas na/ bde bar gshegs pa nyid dang dbyer med par byin gyi rlabs dang ldan zhing / bla na med pa yang dag par rdzogs pa'i byang chub myur du 'grub par 'gyur ba kho na yin te/ de la gang gi dus na lha'i rnal 'byor dang ldan pa'i shes pa skyes pa na gzhan du tha mal gyi rnam par rtog pa nyams su myong bar mi 'gyur ro//de la 'dir de'i dus su skye bar mi rtog pa las tha mal gyi ngo bo yod pa nyid do zhe na de lta na ni mi dmigs pa'i dngos po mtha' dag yod par thal bar 'gyur te/ de ni shes par mi nus so/ /de bas na dngos po med pa'i rnam par rtog pa tsam gyis 'ching bar mi nus shing de'i phyir rtog pa dang bral ba'i rnal 'byor kun du bzang po'i ye shes las byung ba'i 'od zer phyag rgya chen po bsgoms pa las byang chub thob par 'gyur te/de yang gsang ba 'dus pa'i rgyud las/ phyag rgya gang gi cho ga yis/ /bskal pa bye ba grangs med du//thob dka' ba yi sangs rgyas te/ /tshe 'di nyid la thob par 'gyur/ /zhes gsungs so/ /de bas na rang gi lha'i rnal 'byor nas brtsams nas/ chos thams cad kyi mtshan nyid yongs su bsgom par bya'o/ /de ltar yang dag pa'i yid la byed pa la ltos nas/ bcom ldan 'das kyi ye shes phul du byung ba'i yongs su rdzogs pa'i sangs rgyas dang de mos pa yid la byed pa'i rnal 'byor pa gnyis sangs rgyas su dbyer med cing mnyam pa nyid du gsungs so/ /gzhan du bye brag tu byed pas ni bde bar gshegs pa yid la byed par mi 'gyur te/bcom ldan 'das kyi bye brag la lhag par zhen pa spangs pa'i phyir ro/ /bde bar gshegs pa'i bdag nyid dang / gzhan gyi rnam pa'i mtshan nyid du rnam par rtog pas ni/ yang dag pa'i ye shes thob par mi 'gyur zhing / kha na ma tho ba'i rgyu chen po dang ldan pa nyid do//de'i phyir sgyu 'phrul dra ba'i rgyud ting nge 'dzin gyi dra ba'i le'u las/ bdag nyid lus 'di dri ma med pa las/ /mtha' yas rgyal ba'i sku rnams yid kyis mngon bcug pas/ /sangs rgyas kun dang mtshungs pa'i blo gros mchog /'gro ba ma lus pa la phan 'dogs bsgrub par 'gyur//zhes gsungs so/ /de bas na de'i 'od zer gyi phreng ba'i tshogs dpag tu med pa spros pa las bdag dang gzhan gyi don phun sum tshogs pa 'grub pa'i rten du 'gyur ba nyid do/ /de la gang dag gis rang gi shes rab kyi btsun mo dang bral ba'i sdug bsngal gyi thabs gzhan du bsgrub pa mngon du byed pas ni mnyam par gzhag pa'i 'bras bu thob par mi 'gyur bas na/shes rab de'i rang gi ngo bo phyin ci ma log pa'i sems kyis bsgom par bya ste/ dri ma dang bral zhing phun sum tshogs pa'i 'bras bu ni yang dag pa'i thabs dang shes rab kyi stobs las byung ba'i phyir ro//de'i phyir de gnyis phyin ci ma log pa las bdag med pa'i shes pa skyes pa na gcig gi mtshan nyid du gyur kyang tha snyad kyi dbye ba las lhag par zhen pas gnyis su med pa nyid do/ /de ltar phyin ci log gi sems kyis phye bas ni/shes rab kyis lhag par zhen cing log pa'i dbang gis rang gi bya ba byed pa'i nus pa med pa ste/ dper na gong bu dang dngos por brtags pa lta bu'o/ /de bas na blo dang ldan pa rnams kyis rang gi shes rab kyi btsun mo la legs par 'khyud cing bde ba chen po'i ro nyams su myong bas rgyun mi 'chad par bsgom par bya ba dang /thabs dang shes rab gnyis su med pa las sprul pa'i mchod pas rang gi lus yang nas yang du mchod par bya'o/ /de bas na ji ltar bshad pa'i rim pas thabs dang shes rab kyi ngo bo mngon du byed pa ni ji srid sprul pa dang /rang gi ngo bo gnyis su dbyer med pa de srid du mngon du byas te/ rang gi shes pa phyin ci ma log pa las byung ba'i rnal 'byor gyi thabs dang shes rab kyi bdag nyid mtshan nyid gcig pa nyid du mthong ba'i phyir ro/ /de la de ni rgyun gyi ngo bo nyid la dbyer med pa dang / sngon dang / sngon gyi kun du rtog pa las byung ba'i rnam par rtog pa thams cad dang rgyun du 'brel pa nyid do/ /de la sprul pa tsam las ma gtogs pa'i gzhan du ni rnam par rtog pa med pa na/ kha dog la sogs pas dbye ba de'i ngo bo sna tshogs pa mthong ba'i phyir te/ bdag med ma'i shes pa dang ji ltar gcig par 'gyur zhe na/de lta na ni gcig ces bya ba rnam pa thams cad du med par 'gyur te/ lha gcig gi sku la rang gi ngo bo cha shas du mar snang ste/ sna tshogs pa'i bdag nyid yin pa'i phyir ro/ /gzhan cha shas med pa ni dmigs pa'i yul du mi 'gyur te/de bas na ji ltar kun rdzob kyi rang gi ngo bo la gcig tu rnam par gzhag pa de bzhin du sna tshogs pa'i gzugs la sogs pa la rang gi ngo bo lhag par zhen pa la ltos nas thams cad bdag gi rang bzhin no zhes par yid la byed pa ni thog ma nas bdag med pa la lhag par zhen pa la rab tu zhugs pa ste/de ni dngos po thams cad mnyam pa nyid du mos par bshad pa yin no/ /de bas na 'dzin pa la sogs pa'i rnam pa dang bral ba ni thams cad mnyam pa nyid du 'gyur ba ste/ yul la lhag par zhen pa la ma gtogs pa'i gzhan du ni dngos po tha snyad med pa nyid do//de dag kyang shes pa rang gi ngo bor cig car du snang bas na tha dad dbye bar mi nus pa ste/ gzhan du mtshan nyid gcig pa med pa ni sngon du bsgrubs zin to/ /de bas na thams cad lha'i dkyil 'khor gyi bdag nyid do zhes pa ni kun rdzob kyi rang gi ngo bo la yang dag pa ji lta ba bzhin du so sor rtog pa'i shes pa 'jug pa ste/des ni rnam pa thams cad mkhyen pa'i lam la rab tu gnas par 'gyur ba nyid do/ /de la gzhan dag na re lha nyid la rnam par rtog pa'o zhes smra ba ni kha na ma tho ba'i rgyun chen por 'gyur te/'bras bu'i gnas skabs la bsams nas rgyun chad par lta ba ni nam du yang dag pa'i byang chub la nye bar mi 'gyur zhing / bcom ldan 'das kyis kyang yang dag par mtshungs par ldan pa'i mdo las/ dmigs bcas rnam par dag pa la/ /brten nas 'bras bu bla na med/ mi dmigs mtha' bzhi rnam bral ba'i/ /rang bzhin 'od gsal chos kyi sku/ /zhes gsungs so/ /de bas na rgyu rnam par dag pa la dmigs pa dang bcas pa lha'i sku las 'bras bu rnam par dag pa chos kyi sku thob par 'gyur ba ste/ de'ang rgyu'i gnas skabs tsam na yang lha'i sku'i de nyid yin zhing /de'i ngo bo dang gnyis su dbyer med par 'gyur ba nyid do/ /de bas na sems yid bzhin gyi nor bu rin po che las grub pa'i mchod pa'i tshogs kyis dkyil 'khor gyi lha la mchod par bya ba ni/ tha mal gyi gnas skabs na yang gzhan du gzugs yid du 'ong ba dag mthong ba na/bdag nyid dkyil 'khor gyi lha ru bsgoms pas longs spyod par bya zhing / oM na ma smarba maN+Dal de ba ta naM rU pa pU dza me g+ha nir+ya ta yA mi hUM zhes pa'i sngags kyis de'i skad cig la gzugs kyi mchod pa bla na med pa spros pas mchod par bya ba dang / gzhan du sgra yid du 'ong ba dag thos pa ni bdag nyid rnal 'byor dang ldan pa las sgra'i mchod pa bla na med pa spros pa las/oM na ma sarba maN+Dal de ba ta naM shab+ta pU dza me g+ha nir+ya ta yA mi zhes pa'i sngags kyis dbul bar bya ba dang / gzhan du dri yid du 'ong ba bdag tshor ba na bdag nyid dang rnal 'byor dang ldan pa las dri'i mchod pa bla na med pa spros te/oM na ma s+sarba maN+Dal de ba ta naM gan+d+ha pU dza me g+ha u0f72nir+ya ta yA mi hUM zhes pas mchod par bya ba dang / gzhan du ro yid du 'ong ba dag nyams su myong ba na bdag nyid rnal 'byor dang ldan pa las ro'i mchod pa bla na med pa spros pa las/ oM na ma s+sarba maN+Dal d e ba tA naM ra sa pU dza me g+ha ni r+ya ta yA mi hUM/zhes pas mchod par bya ba nyid dang / gzhan du reg bya yid du 'ong ba bdag nyams su myong ba na bdag nyid rnal 'byor dang ldan pa las/ reg bya'i mchod pa bla na med pa spros te/ oM na ma s+sarba maN+Dal de ba ta naM par sha nir+ya ta yA mi hUM/ zhes pas mchod par bya ba nyid dang /sbyin pa la sogs pa gtong ba'i skabs su ni sbyin pa'i gnas dkyil 'khor gyi lha ru bsams la sbyin pa'i rdzas dpag tu med pa spros pas mchod par bya ba dang / bla ma las gzhan pa'i sems can rnams la bsnyen bkur la sogs pa byed pa na ni/ de nyid dkyil 'khor gyi lhar bsgoms pa la/ na ma s+sarba maN+Dal de ba ta naM pU dzo pas+tha na At+ma na nir+ya ta yA mi hUM zhes pas mchod pa bya ba dang bdag nyid la gzhan bsnyen bkur la sogs pa byed pa na bdag nyid rnal 'byor dang ldan pa las gong ma'i sngags kyis longs spyod par bya ba nyid do//gzhan du rnal 'byor phyi rol du gyur pa na ni gzugs la ni snang ba ma dang / gar mkhan ma dang / me tog ma dang / phreng ba ma'i lha mor bsams pas mchod par bya ba dang / sgra la ni glu mkhan mar bsams pa las mchod par bya ba dang / dri la ni bdug pa ma dang dri chab mar bsams pas mchod par bya ba dang /reg bya la ni sgeg mor bsams pa las mchod par bya ba nyid do/ /de dag ni chags pa'i yul du gyur pa rnam par dag pas mchod pa ste/ gzhan du de las bzlog pa'i mi 'dod pa'i yon tan lnga nyams su myong ba na'ang /sems kyi bde ba'i rnam par bsgyur te/ lha'i rnal 'byor gyis bde ba chen po'i mchod pas mchod pa bya ba nyid do/ /de ltar rgyun du skad cig ma gcig kyang rnal 'byor dang mi 'bral ba'i phyir/ rang gi shes rab kyi btsun mo la mnyam par 'khyud par bya ba nyid de/shes rab kyi bdag nyid las byung zhing thabs bla na med par gyur pa'i phyir thabs dang shes rab skad cig tsam yang mi 'bral ba nyid du 'dod do/ /de ltar sems las thams cad 'grub par 'gyur te/ de yang dkon mchog brtsegs pa'i mdo las/ sems ni sa dang mtshungs pas na//thams cad khur du khyer bar byed/ /dge ba dang ni sdig pa'ang rung / /'phel ba med cing 'grib pa'ang med/ /sems ni chu dang mtshungs pas na/ /dri ma mi gtsang 'khru byed dang / /'jig rten rnams ni gso byed cing / /nyon mongs gdung ba [(]sal [,]sel[)] par byed//sems ni me dang mtshungs pa na/ /nyon mongs dag ni sreg byed cing / /sgron ma chen po snang ba yis/ /gsal bar mi byed gang yang med/ /sems ni rlung dang mtshungs pa ste/ /gnas pa med cing rten med par/ /tshul khrims thos pa'i dri yis ni/ /dus gsum kun du khyab par byed//sems ni nam mkha' dang mtshungs pas/ /lta ba spangs shing rnam par dag /thams cad kun du khyab gnas kyang / /bdud kyi rjes su 'brang mi byed/ /ces gsungs pa'i phyir ro/ /de nyid rnal 'byor pa'i sbyangs pa'i yon tan lnga zhes bya se/ rgya mtsho lta bu dang / /ri rab lta bu dang / nam mkha' lta bu dang / rlung lta bu dang / rdo rje lta bu'i chos lnga'o/ de ltar yongs su dag pa'i lam la zhugs pa la ni 'khor ba'i 'dam na gnas kyang pad+ma lta bu 'khor ba'i nyes pas gos par mi 'gyur zhing / ston ka'i zla ba ltar gnas pa ste/de nyid yang dag pa'i ting nge 'dzin dang / yang dag pa'i bslab pa dang / yang dag pa'i ye shes dang / yang dag pa'i brtson 'grus dang / yang dag pa'i bzod pa'i rgyu las byung ba nyid do/ /de ltar bdag nyid las thams cad kyi skabs su lha'i rnal 'byor gyi las la yang dag par zhugs pas bya ba byed cing sbyin sreg gi skabs su phyag rgya gcig pa'i rnal 'byor gyi las bya bar gsungs pa ni gong du lha'i sku bskyed nas las bya bar gsungs so//de nas las rnams bshad bya ste/ /zhi ba dang ni rgyas pa'i las/ /de ltar dbang dang mngon spyod rnams/ / bzlas dang sbyin sreg cho ga yis/ /las rnams thams cad bya ba yin/ /zhes gsungs pa ni zhi ba la sogs pa las thams cad la bzlas pa'i sngags kyi yig 'bru'i kha dog dang / de'i las kyi sngags dang rnal 'byor dang / rgyan dang cha byad dang / rdzas dang yo byad dang / kha dog dang dus tshod la sogs pa/ rigs dang rjes su mthun pa las thams cad 'grub par 'gyur te/ gzhan du ni las kyi 'bras bu 'grub par mi 'gyur zhing de dag kyang 'di nyid du bgegs nye bar zhi bar bya ba'i don du'o/ /de dag ji lta bus bya snyam pa la/ rdo rje sems dpa' bdag bsgyur la//zhi ba'i las ni brtsam par bya/ /cho ga shes pas snga dro nyid/ /bzlas dang sbyin sreg nyid byed cing / /'od zer sprin gyis de'i lus la/ /'phros pas yongs su khebs pas dgab/ /rtag tu shar bltas 'od zer gyis/ /nyes pa thams cad sel byed pa//de ni sems can phan dga' bas/ /de bzhin gshegs pa'i rigs la bya/ /zhes gsungs te/ de la rnal 'byor pa bdag dang gzhan gyi don phun sum tshogs par bya ba'i phyir/ bdag nyid gong du gsungs pa'i rim pas dpal rdo rje sems dpa' bskyed la/ nyi ma dang po shar ba'i rtse la gos dang rgyan thams cad dang /rigs dang rjes su mthun pa byas la kha shar phyogs su bltas te/ bzlas pa dang sbyin sreg bya ba nyid do/ /de bzhin du ting nge 'dzin rnam par dag pas sems can gang dag ngan song du gnas pa'i lus la hUM las 'phros pa'i 'od zer kha dog dkar po 'tsher ba dang ldan pa la de'i rtse mo la sdig pa thams cad zhi bar byed pa'i yig 'bru hUM dkar po bltas te/de'i lus la kun du khyab par byas nas rgya mtsho'i lbu ba la rlung gis bshig pa lta bus sdig pa zhi bar bya ste/ de ni 'khor lo rigs kyi 'od zer yin pa'i phyir de bzhin gshegs pa'i rigs la bya ba nyid do//kun du bzang po bde chen nam/ /bde ba chen por bsams nas kyang / /nang par re re nyi shar na/ /snga ma bzhin du las byas te/ /rdo rje rigs kyi sems can gyi/ /sdig can sems ni zhi byed 'gyur//zhes gsungs pa ni/ bdag nyid gong du gsungs pa'i rim pas kyang / bcom ldan 'das kun du bzang po'am/ bcom ldan 'das phyag na rdo rje bskyed de/ rigs dang rjes su mthun pa'i rnal 'byor rim pa yongs su rdzogs par bya ste/ rang gi snying gnas 'od zer mu tig lta bu'i phreng ba'i tshogs la sdig pa thams cad zhi bar byed pa'i yi ge hUM bltas te/rdo rje rigs kyi sems can gyi lus la yongs su khebs par dgab pa dang / sbyin sreg la sogs pa'i las thams cad bya ba nyid do/ /gser 'od mdzes shing 'bar ba yi/ /rin chen 'dzin du bsams nas ni//bza' ba longs spyod nyi ma yi/ /gung la rgyas pa'i las shis te/ /rin chen 'dra bar khung brkos la/ /bzlas dang sbyin sreg bya ba'am/ /yang na sngags pa snga ma bzhin/ /'od kyis lus la rab tu dgab/ /ces gsungs pa ni rgyas pa'i rnal 'byor te/ de la dang po bdag nyid gong du gsungs pa'i rim pas bcom ldan 'das rin chen 'byung ldan du sku mdog ser po bsams te/nyi ma gung la kha byang du bltas pas sbyin sreg la sogs pa bya ba'am/ bdag nyid kyi snying ga nas 'od zer gser gyi kha dog lta bu shin tu 'tsher ba dang ldan pa bsams pa las/de'i rtse mo la tshe dang bsod nams thams cad rgyas par byed pa'i yig 'bru trAM ser po bltas te/ rin chen rigs kyi sems can la dgab par bya ba ste/ des ni tshe dang bsod nams thams cad zla ba yar gyi ngo bzhin du 'phel bar 'gyur ba nyid do/ /cho ga bzhin du khung bu ni pad+ma 'dra bar byas nas kyang //pad+ma 'dzin par bdag bsgyur la/ /rgas dang nya ba'i nyi ma'i mthar/ /bzlas dang sbyin sreg bya ba'am/ /de yi lus la 'od zer gyis/ /kun du bskor bar byas gyur na/ /ma lus de ni dbang du 'gyur/ /zhes gsungs pa ni dbang gi rnal 'byor gyi rim pa gsungs pa ste/de la dang por bdag nyid gong du gsungs pa'i rim pas bcom ldan 'das 'od dpag med du bsams nas rang gi snying ga nas 'od zer dmar po pad+ma rA ga lta bu spros pas de'i rtse mo la 'dod pa thams cad dbang du byed ba'i hri dmar po bsams te/ pad+ma rigs kyi sems can gyi lus la khebs par bkab par bya ba las de'i dbang du sems can thams cad rgyal po gtum po'i 'khor bzhin du 'dus par 'gyur ro//cho ga shes pa'i sngags pa yis/ /gri rtse lta bur khung brkos la/ /skar ma rdzogs pa'i dus su ni/ /rdo rje khro bor bdag bsgyur la//bzlas pa'i rnal 'byor bya ba'am/ /'od kyis de la bkab gyur na/ /de la gnod byed ma lus 'joms/ /zhes gsungs pa ni drag po'i las kyi rim pa gsungs pa ste/ de la dang por bdag nyid gong du gsungs pa'i rim pas khro bo khams gsum rnam par rgyal ba'i skur bskyed da rang gi snying ga nas 'od zer kha dog nag po shin tu sdug pa spros la/de'i rtse mo la ma rungs pa 'joms par byed pa'i yi ge phaT nag po bltas te las kyi rigs kyi sems can gyi lus la dgab par byas pa na/ de la gnod par byed pa'i tshogs thams cad tho bas bum pa bcom pa bzhin du brlag par 'gyur ba nyid do//phyag rgya chen por bshad pa rnams/ /'dren pa kun du bzang po yis/ /zhi ba'i las ni byed par 'gyur/ /rdo rje rin chen rgyas pa ste/ /dbang bskur ba la de bzhin no/ /tog gi rnam rgyal de bzhin du/ /longs spyod dbang phyug dpal mnyam byed//rdo rje nyi ma'i gzi brjid dang / /mdog sdug shin tu 'bar bar byed/ /bzhad cing rmad du mdzes pa yis/ /dga' mgu rangs pa nyid du 'gyur/ /pad+mo mdzes pa'i chos kun gyis/ /rdzogs pa'i sangs rgyas thams cad kyang / /mnyes 'gyur lha bran smos ci dgos/ / gzhan gyi gnod byed tshogs chen rnams/ /rnon pos gcod pa nyid du mdzad/ /gdon dang yi dags 'dre rnams dang / /gnod sbyin srin po'i bka' nyan dang / /gza' mchog brgyad po ma rungs rnams/ /'khor los rtsa nas 'byin par byed/ /lce las dzaM zhes bya ba yis//lkugs rnams lkugs pa ma yin dang / /glen rnams mi smra smra mdzad cing / /ma rungs rnams kyang lkugs par mdzad/ /rgya gram gyis ni mchod pa dang / /sems can don mdzad thams cad ston/ /hUM zhes bya bas 'phrog mdzad cing / /rdo rje srung bas bsrung ba mdzad//hUM zhes bya ba'i so yis ni/ /ma rungs thams cad 'joms byed cing / /rdo rje gnod sbyin nyid kyis kyang / /sdig pa'i tshogs rnams 'joms par mdzad/ /ma rungs snying gar dam du ni/ /baM zhes bya ba bsams nas kyang / /dug dang rims dang gdon la sogs//rdo rje bsdams pas 'ching bar mdzad/ /ces gsungs pa ni 'dir bcom ldan 'das kyis ye shes kyi sems dpa' bcu drug gis phrin las ji lta ba mdzad pa yang dag par gsungs pa ste/ de la phyag rgya chen po bshad pa rnams/ /zhes pa ni lha'i sku phyag rgya chen po dang ldan pas gong du bshad pa'i rim pa rnams yin la/de nyid sems dpa'i ngo bo yang dag par bya ba ste/ de la 'dren pa kun du bzang po ni rdo rje sems dpa' ste/ de'i sdig pa la sogs pa thams cad zhi bar mdzad pa nyid do/ /rdo rje rin chen gyis ni rgyas par byed pa kho na'o//de bzhin du rdo rje rgyal mtshan dang / rdo rje rgyal pos kyang rgyas par longs spyod dang / dbang phyug dpal gyi 'byor pa dang ldan par byed pa'o/ /rdo rje nyi ma dang / rdo rje chags pas ni bdud kyi tshogs thams cad ma lus par dbang du byed par 'gyur ba'o/ / rdo rje bzhad pa dang / rdo rje legs pas ni sems can thams cad dga' ba dang / mgu bar byed pa'o/ /rdo rje chos kyis ni/ yang dag par rdzogs pa'i sangs rgyas kyang mnyes par 'gyur na/ lha la sogs pa lta smos mi dgos par dbang du 'gyur bar gsungs so/ /gzhan du gnod par byed pa'i tshogs thams cad ma lus par ni rdo rje rnon po dang /rdo rje 'khor los rtsa ba ma lus par gcod par mdzad par gsungs so/ /rdo rje gsung pas ni lkugs pa rnams lkugs pa ma yin par mdzad pa dang / klen pa rnams mi smra ba smra bar mdzad pa dang / ma rungs pa rnams lkugs par mdzad pa nyid do/ /rdo rje las kyis ni bde bar gshegs pa rnams la mchod pa'i tshogs kyis yongs su mchod pa dang / sems can gyi don thams cad ma lus par mdzad pa nyid do/ /rdo rje srung bas ni nad dang rims dang gnod pa thams cad las yongs su bsrung bar mdzad pa'o//rdo rje gnod sbyin gyis ma rungs pa'i tshogs dang sdig pa dang ldan pa'i gang zag rnams za bar byed pa'o/ /rdo rje khu tshur gyis ni dug dang rims dang / gdon dang ma rungs pa'i tshogs thams cad kun nas bsdams pas 'ching bar mdzad pa'o//yig 'bru bzhi po ni las su bya ba'i yig 'bru ste/ gang gi lce la dzaM dud kha bsams nas rmugs 'dzin gyi ting nge 'dzin la snyoms par zhugs nas ni lkugs par mdzad do/ /yang phyogs 'ga' zhig tu gang dag gi snying gar haM dmar po bsams te/mkha' 'gro ma'i ting nge 'dzin du snyoms par zhugs pas ni de'i mdangs 'phrog par mdzad pa'o/ /yang phyogs 'ga' zhig tu gang dag gi snying gar hUM nag po bsams te gshin rje'i ting nge 'dzin la snyoms par zhugs pa las ni de'i srog gcod par byed pa dang /yang phyogs gzhan dag tu gang dag gi snying gar baM dmar ser bsams pa las de'i yan lag thams cad rengs par byed pa ste de dag ni sman dang sngags dang rnal 'byor gyis nges par 'grub pa yin pas na las kyi sbyor ba'i cho gar blta bar bya'o/ /rgyud gzhan la sems dpa' 'am/las phrin las rnam bzhir bshad pa ni 'og nas 'chad par 'gyur bas 'dir ma smos so/ /bzlas dang sbyin sreg las rnams kyis/ /dgos pa thams cad bsgrub par bya/ /'od zer gsal ba dkar po la/ /'tsher zhing rgyas pa bsgom byas la//zhi ba'i lha yi rnal 'byor dang / /zhi ba'i sems kyis zhi bar bya/ /rang gi lus 'di gser btsos dang / /nyi ma gsar shar dge 'dra ba/ /bsams la rgyas par bya ba'i phyir/ /'od zer sprin gyis de lus la/ /kun nas gang bar dgab par bya//pad+ma sems dpa'i ting 'dzin gyis/ /hri 'dra'i 'od zer spros pa nas/ /snying la kun du bkod byas na/ /'dod pa thams cad dbang du byed/ /rdo rje hUM gi ting 'dzin gyis/ /khros pas rdo rje mtshon cha'i char/ /sdig spyod lus la dgab byas na//de ma thag tu 'bar bar 'gyur/ /zhes gsungs pa ni gong du gsungs pa'i phrin las rnam pa bzhi'i bsdus pa'i don gsungs pa ste/ de la 'dir 'od zer gyi dbyibs bstan pa ni/ 'jig rten mgon po rigs rgyud las/ /zla ba rgyas dang rin chen dang / /lcags kyu ral gri'i tshul gyis ni//las rnams bzhi la mngon par brtson/ /zhes gsungs te/ de la zhi ba'i 'od zer ni zla ba rgyas pa lta bu 'od zlum po 'phro bar bya ba dang / rgyas pa la ni 'od zer rin po che lta bu zur brgyad pa spro bar bya ba dang / dbang la ni 'od zer lcags kyu lta bu gug pa dang bcas pa spro bar bya ba dang /mngon spyod la ni 'od zer ral gri lta bu'am/ mdung lta bu'am/ mda' lta bu'am/ rtse gsum pa lta bu'i 'od zer rtse mo rno ba zur dang ldan pa spro bar bya ste/ des na gang dang gang la de dang de'i kun du khyab par bskor ba ni zhi ba dang / rgyas pa dang / dbang dang / mngon spyod kyi las thams cad yongs su rdzogs par 'grub par 'gyur ba kho na'o/ /de las dbang du byas na rjes su chags pa dang / gus pa dang bcas pa bzhin ston pa dang / zhi bar byas na ni sdug bsngal dang bral ba'i bde ba 'thob par 'gyur ba dang /rgyas pa byas na ni 'byor pa dang ldan par 'gyur ba dang / drag po'i las byas na ni de ma thag tu nad dang zug rngu 'bar zhing rab tu 'bar bar 'gyur ba de las 'byung ba'i 'bras bu nyid do/ /de ltar cho ga dang rnal 'byor thams cad phun sum tshogs par 'gyur ba las/ phrin las rnam pa bzhi'i las thams cad 'grub par 'gyur ba yin pas na rnal 'byor pa rnams kyis bde bar gshegs pa'i bka' yongs su brtags pa'i las thams cad bya ste/ gzhan du ni 'grub par mi 'gyur bas ni mi bya ba nyid do/ /de nas tshangs pa dang brgya byin la sogs pa thams cad yid mgu rangs par gyur nas bcom ldan 'das la phyag 'tshal te 'di skad ces gsol to//bcom ldan 'das rdo rje 'dzin pa chen pos sems can thams cad la phan pa'i phyir the tshom thams cad rnam par gcod pa/ don thams cad rgyas par ston pa'i ngan song thams cad yongs su sbyong ba'i brtag pa'i rgyal po dam pa phyi ma 'di bshad pa legs so//bcom ldan 'das rdo rje 'dzin pa chen po legs so legs so/ /gang gi phyir de dag gi mtshon par gyur pa'i phyag rgya rnams bshad du gsol zhes gsol ba ni tshangs pa la sogs pa'i lha rnams dam pa'i chos kyis yang dag par mgu bar gyur pa'i tshig snyan pa lan bzhir brjod pa ste/de la sems can thams cad la phan pa'i phyir zhes pa ni de bzhin gshegs pa ngan song thams cad yongs su sbyong ba'i rgyal pos sems can rnams ngan song rnam pa gsum gyi 'dam nas yang dag par 'don pa ste/de nyid rgyud rnam pa gnyis kyi rnal 'byor las byung zhing / rgyud rnam pa gnyis po'i yan lag tu gyur pa'i dbang dang / sbyin sreg dang cho ga la sogs pa'i las su bya ba'i rim pa rnams rgyud rnam pa gnyis por gsal bar ma gyur pa las bcom ldan 'das phyag na rdo rje de nyid gsal bar byed pa'i bshad pa'i rgyud 'di bshad pas sems can rnams la phan par 'gyur bar 'grel to//the tshom thams cad rnam par gcod pa ni dbang la sogs pa ji lta ba mi shes pa gsal bar bstan pa nyid do//de nyid rgyud gnyis kyi don thams cad rgyas par bstan pa yin pa'i phyir na don thams cad rgyas par ston pa zhes bya ba'o/ /brtag pa'i rgyal po don rgyas par ston pa nyid la yon tan gyi sgo nas mtshan btags pa'o/ /phyi mar ni slad mar gyur pa'o//snyan pa'i tshig ni gong du bshad zin to/ /gang gi phyir de dag gi mtshon pa zhes pa ni/ sems can thams cad kyi phyir zhes pa'o/ /de dag gi mtshon pa ni gong du gsungs pa'i bcom ldan 'das nyid kyi dkyil 'khor gyi phyag rgya dang / 'jig rten pa'i dkyil 'khor gyi lha mtshon pa ste de nyid phyag rgya yin par bshad do/ /de dag sngar ma bshad pa'i phyir bshad par gsol ba 'debs pa nyid do/ /de nas bcom ldan 'das phyag na rdo rjes phyag rgya'i le'u 'di bshad do/ /lag pa gnyis mdun du bzhag la/ a las zla ba'i dkyil 'khor du byin gyis brlabs te/ de'i steng du hUM dang a las rigs kyi bdag po rigs lngar bsams nas/ zla ba'i dkyil 'khor de nyid las a la sogs pa dbyangs kyi yi ge bcu drug gis kun nas 'khor zhing 'od zer sna tshogs 'phro ba bsgoms te/mthe bong gnyis la oM zhes bya ba bsam/ mdzub mo gnyis la hUM zhes bya ba bsam/ gung mo gnyis la trAM zhes bya ba bsam/ srin lag gnyis la hri zhes bya ba bsam/ mthe'u chung gnyis la a zhes bya ba bsam/ de ltar yi ge rnams bzhag nas de bzhin gshegs pa rnams yin par mos pa bskyed de/chos thams cad gcig la gcig 'dres par gyur pa dang / bdag dang rjes su mthun par bya'o zhes gsungs pa ni/ 'dir 'jig rten dang 'jig rten las 'das pa'i phyag rgya thams cad kyi mtshan nyid bstan te/ da ni dam tshig gi phyag rgya yin la/phyag rgya'i le'u zhes pa ni dkyil 'khor phyi ma rnams kyi phyag rgya'i le'u ste de yang dag par bshad pa nyid do/ /de la lag pa gnyis mdun du gzhag pa ni phyag rgya bcings pa'i las kyi dus su bab par gyur pa dang / sems can thams cad kyi don du blo bskyed pa las rang gi mdun du dus mo'i khar lag pa gnyis kyi thal mo gan rgyal du gzhag ste/de gnyis kyi mthil du a dkar po 'od dang ldan pa gnyis bsams la/ de gyur pa las zla ba'i dkyil 'khor gnyis pa bsam mo/ /yang de'i steng du hUM dang a gnyis bsams pa las lag pa g.yas pa rdo rje rtse lnga par gyur par bsam mo//g.yon pa ni dril bu rtse lnga par gyur par bsams te der thim pas rdo rje'i lag pa dang / rdo rje dril bu'i lag par byin gyis brlabs la/ der zla ba'i dkyil 'khor gnyis bsams pa ni de dag thabs dang shes rab gnyis su med pa'i rol pa'i phyag rgya'o//de nas zla ba'i dkyil 'khor gnyis kyi steng na'ang rim pa ji lta ba bzhin du a la sogs pa'i dbyangs kyi yi ge bcu drug gis kun nas 'khor bar gyur pa las 'od zer chen po dang ldan par bsgom par bya'o/ /de nas lag pa'i sor mo bcu rdo rje dang rdo rje dril bu rtse lnga pa re re bsams pa'i rtse mo la yang a las zla ba'i dkyil 'khor lnga bsams la/de dag gi steng du rim pa ji lta ba bzhin du mthe bong la bcom ldan 'das rnam par snang mdzad dang / rdo rje dbyings kyi dbang phyug ma'i ngo bo oM dkar po 'od dang ldan pa bsams par bya'o//de bzhin du mdzub mo la bcom ldan 'das ngan song thams cad yongs su sbyong ba dang / mA ma kI'i ngo bo hUM dkar po bsam par bya ba dang / gung mo la bcom ldan 'das rin chen tog dang / sangs rgyas spyan gyi ngo bor trAM ser po bsam par bya ba dang / srin lag la bcom ldan 'das shAkya thub pa dang gos dkar mo'i ngo bo hri dmar po bsam par bya ba dang /mthe'u chung gnyis la bcom ldan 'das me tog chen po rgyas pa dang / sgrol ma'i ngo bo a ljang gu bsams te/ de nas rdo rje bsdams pa las thabs dang shes rab gnyis su med pa'i sbyor ba las 'jig rten dang 'jig rten las 'das pa'i phyag rgya rnams skye zhing lha de dag ngo bo nyid gcig par mos par bya'o//chos thams cad gcig la gcig 'dres pa ni 'di ltar snang ba'i chos spyi dang rang gi mtshan nyid thams cad thabs dang shes rab gnyis su med par bde ba chen po'i bdag nyid lha dang lha mo'i ngo bo nyid du thams cad bsams te/de nyid bdag dang rjes su mthun pa ni chos kyi dbyings dang rjes su mthun pa'o/ /de la 'dir chos kyi dbyings bdag med pa la bdag ces ji ltar bya snyam pa la/ de ni 'di ltar chos thams cad gnyis su med pa'i bde ba chen po'i bdag nyid du ro gcig pa'i phyir chos kyi dbyings la bdag ces bya'o//de la chos thams cad de'i bdag nyid yin pa dang / de las byung ba'i bdag nyid yin pa dang / de'i bdag nyid du shes par byed pa'i phyir bdag ces bya'o//yang na de nyid rnal 'byor pa nyid dang / rjes su mthun zhing dbyer med pa'i phyir na bdag dang yang mthun par bya'o zhes pa ste/ de ni rig pa'i tshogs kyis bla na med pa'i mchod pa dang rjes su mthun pa las de'i bdag nyid la de'i bdag nyid kyis mchod pa byed par 'gyur ba ste/mchod pa dang mchod par byed pa dang mchod par bya ba ni gzhan du med pa kho na'o/ /de la 'dir gzugs kyi mchod pa bla na med pa nyid yin zhing / de'i mchod pa'i las byed pa dang / de dag nyid las 'da' bar dka' zhing lha'i tshogs 'byin pa'i phyir na dam tshig gi phyag rgya zhes bya ba kho na'o//phyag rgya chen po ni rdo rje dang dril bur ldan pa'i sku ru bsams pa nyid yin la/ las kyi phyag rgya ni ting nge 'dzin dang sa gnon la sogs pa'i phyag rgya'o/ /chos kyi phyag rgya ni lha rnams kyi ljags la badzra dz+nyA na la sogs pas bsams pa'o//de dag nyid ji lta bur bya snyam pa la/ lag pa gnyis pad+ma lta bur sbyar nas/ oM zhes bya ba gnyis brkyang nas AHzhes bya ba gnyis bkug la de bzhin du hUM zhes bya ba dang hri zhes bya ba gnyis pad+ma'i 'dab ma 'dra bar byas la/ traM zhes bya ba gnyis gshibs te brkyang ba ni bcom ldan 'das kyi rtsa ba'i phyag rgya las thams cad dang ldan pa'i dam tshig go zhes gsungs pa ste/ de la 'dir dang por lag pa gnyis pad+ma kha 'bus pa ltar byas la/ de nas gung mo gnyis gshibs te lto sbyar la brkyang nas srin lag dang mdzub mo gnyis so sor rtse sprad de/tshigs gnyis bkug la mthe bong brkyang pa byas nas mthe'u chung bkug pa'o/ /gzhan du ni mthe'u chung brkyang bar gsungs te gang yang mi 'gal ba nyid do/ /'di ni bcom ldan 'das kyi rtsa ba'i phyag rgya las thams cad dang ldan par bya ba'i dam tshig go zhes pa ni gong du gsungs pa'i dkyil 'khor thams cad kyi skabs su rdo rje 'dzin pa'i phyag rgya zhes gsungs pa de nyid yin te/de nyid dang por 'jug pa'i phyir na rtsa ba zhes bya ba dang / dkyil 'khor gyi las thams cad la 'jug pa'i phyir thams cad dang ldan pa zhes bya ba dang /de nyid rnal 'byor pa dam tshig rnam pa bcu dang lnga 'dzin pa'i phyir na las thams cad dang ldan pa'i dam tshig gi phyag rgya zhes bya ba kho na'o/ /'di dag phyag rgya'i tshogs yin te/ /de nas rnon por byas pa dang / /de nyid rab tu 'khor lo 'dra//de nyid khar gzhag sgra gcan gyi'o/ /de nyid gsum byas las kyi'o/ /zhes gsungs pa ni/ 'dir lha dbang phyug chen po la sogs pa bzhi'i phyag rgya gsungs te/ de la dang po gung mo lto sbyar la brkyang ste/ mdzub mo gnyis so sor brkyang la rtse mo gsum rnon por byas pa ste 'di ni drag po'i phyag rgya'o//gnyis pa ni bram ze'i rig byed kyi tshig smra ba ltar srin lag gi rtsa bar mthe bong bzhag ste lhag ma rnam brkyang bar bya ste de ni tshangs pa'i phyag rgya'o/ /gsum pa ni lag pa gnyis phan tshun du bsnol ba las gung mo gnyis rtse sprad la mtshon cha'i 'khor lo 'dra ba byas pa ste de ni khyab 'jug gi phyag rgya'o//bzhi pa ni gung mo gnyis rtse sprad de bsgreng la mdzub mo dgu bor byas shing rdo rje 'dra bar byas pa ste/ de ni brgya byin gyi phyag rgya'o/ /de dag ni gzhan du grags pa'i phyag rgya chen po bzhi zhes bya bas na phyag rgya'i tshogs zhes gsungs so//g.yon pa mgo thod thogs 'dra dang / /g.yas pa mdung rtse rtse gsum pa/ /g.yon pa pad+ma kha 'dzum dang / /g.yas pa oM zhes bya bar gzhag /g.yon pa 'khor lo dbyug tho gsum/ /a dang oM gnyis rtse sprad nas//lhag ma gsum ni rdo rje can/ /hUM dang oM gnyis gzhur byas la/ /lhag ma mda' byas mda' can gyi'o/ /zhes gsungs pa ni 'jigs byed chen po dgu'i phyag rgya gsungs pa ste/ de la lag pa g.yon pa thod pa khrag gis bkang ba thogs pa dang 'dra bar sor mo rnams dgu bor byas la snying gar bzung ste/g.yas pa mthe bong dang mthe'u chung gnyis rtse sprad de lhag ma gsum mtshon rtse gsum pa ltar byas te 'di ni 'jigs byed chen po dang / 'jigs byed thod pa can gyi phyag rgya'o/ /gnyis pa ni lag pa g.yon pa pad+ma kha 'bus pa ltar rtse mo bsdus la nu ma'i khar bzung la/g.yas pa tshangs pa'i phyag rgya ltar byas pa ni 'jigs byed gtum po dang / 'jigs byed lag pa brgyad pa'i phyag rgya'o/ /gsum pa ni lag pa g.yon pa'i mthe bong dang mdzub mo gnyis rtse sprad la mtshon cha'i 'khor lo lta bur byas la/lhag ma gsum dbyug to lta bur byas pa ni 'jigs byed srog 'phrog dang / 'jigs byed smyo byed kyi phyag rgya'o/ /bzhi pa ni rtse gsum pa'i phyag rgya ltar byas pa yid dgu bor byas te de ni 'jigs byed khro bo'i phyag rgya'o//lnga pa ni lag pa g.yon pa'i mdzub mo dang mthe bong gnyis gzhu lta bur byas la g.yas pa'i sor mo rnams mda' lta bur brkyang ste/ de ni 'jigs byed lag brkyang gi phyag rgyar shes par bya'o/ /lag pa g.yas g.yon 'khor lor bya/ /thal mo dam sbyar sor mo 'phro//'di ni nyi ma zla ba'i zhal/ /gza' lhag rtag tu se gol gtogs/ /de nyid tshig dbyung gsum pa ste/ mchu la tshig dbyung 'dra bar gzhag /pa ba sangs ni gnyis mnyam sbyar/ /spen pa dbyug pa 'dzin par bya/ /ba lang sna ni chu srin 'dra/ / shes bya rgyud shes me stag 'dra/ /de nyid bskor ba glog phreng ste/ /bla 'og lto sbyar sprin phyag rgya/ /de dag snying po'i phyag rgya ste/ /las kyi phyag rgya'ang de dag go/ /zhes gsungs pa ni/ gza' brgyad kyi phyag rgya yongs su gsungs pa ste/ de la lag pa gnyis rgyab sprad de sor mo rnams phan tshun lto sbyar nas 'khor lo 'dra bar byas pa ni nyi ma'i phyag rgya'o//thal mo dam por sbyar nas sor mo rnams 'od zer 'dra bar byas pa ni zla ba'i phyag rgya'o/ /lag pa g.yon pa'i gung mo dang mthe bong rtse sprad de phyir bstan la/ g.yas pa'i gung mo'i tshigs dang mthe bong gnyis kyi bar du mdzub mo bcug la mchu'i thad kar tshigs dbyung ba ltar byed pa ste de ni gza' lhag gi phyag rgya'o//lag pa gnyis mnyam par sbyar ba las dpung pa g.yon pa'i khar bzhag pa ni pa ba sangs kyi bkra shis kyi thal mo'i phyag rgya'o//lag pa g.yon pa khu tshur bcangs la sdigs mdzub snying gar bsgreng ste g.yas pa'i mdzub mo brkyang pa gzhan rnams bu gur byas la steng du phyar ba ni spen pa dbyug pa 'dzin pa'i phyag rgya'o/ /lag pa gnyis par ba bzed pas chu srin gyi sna 'dra bar byas nas phrag pa gnyis kyi steng du phyar ba ni sgra gcan 'dzin gyi phyag rgya'o//lag pa gnyis sor mo phan tshun du bsnol te lag pa'i zur gnyis sbyar nas mthe bong dang sor mo thams cad me stag byas nas thal mo nang phye la g.yas pas g.yon du bskor ba ni mig dmar gyi phyag rgya'o/ / lag pa gnyis lto sbyar nas mthe bong dang mthe'u chung gnyis phan tshun du rtse sprad de spyi gtsug gi nor bu ltar byas nas gzhan rnams so sor brkyang ba ni phur bu'i phyag rgya'o/ /snying po'i phyag rgya zhes bya ba ni dam tshig gi phyag rgya ste de nyid 'jig rten pa'i lha rnams kyi dam tshig gi phyag rgya zhes bya ba kho na'o//de nyid las srin lag dang mdzub mo gnyis bcings pa ni phyag na rdo rje'i phyag rgya'o/ /de nyid las hUM zhes bya ba'i tshigs par ma bcag pa ni dbang bskur ba sbyin par byed pa'i phyag rgya ste/ de nyid nam mkha'i snying po'i phyag rgya yin no/ /de nyid las hUM zhes bya ba bsdams pa la'ang srin lag pad+ma 'dra bar byas pa 'di ni pad+ma las byung ba'i phyag rgya'o//d+h+ri zhes bya ba gnyis gshibs te bsgreng ba ni rdo rje bsdams pa'i phyag rgya'o/ /de nyid las pad+ma 'dra bar byas pa ni bde ba chen po'i phyag rgya'o/ /de nyid las 'od zer 'phro ba'i tshul du byas pa ni kun du bzang po'i phyag rgya'o//de nyid las de gnyis nang du bkug pa ni khro bo sna tshogs gzi brjid chen po'i phyag rgya'o zhes gsungs pa ni bcom ldan 'das phyag na rdo rje'i dkyil 'khor gyi phyag rgya gsungs pa ste/ de la dang po sor mo rnams rdo rje bsdams pa las gung mo gnyis gshibs nas bsgreng ste rdo rje ltar byas pa ste/'di ni bcom ldan 'das phyag na rdo rje'i phyag rgya'o/ /gnyis pa ni gung mo snga ma ltar byas la de'i ngos la mdzub mo gnyis rin po che ltar byas pa ste/ de ni 'jig rten pa'i dkyil 'khor la phyag rgya 'debs pa'i skabs su shes par bya ste de nyid bcom ldan 'das phyag na rdo rje'i phyag rgyar shes par bya'o//de nyid tshe dpag med kyi snying po'i dkyil 'khor gyi skabs su ni nam mkha'i snying po'i phyag rgyar shes par bya'o/ /gsum pa ni gung mo snga ma ltar byas pa srin lag gnyis rtse sprad de dgu bor byas shing pad+ma'i 'dab ma lta bur byas te de ni spyan ras gzigs dbang phyug gi phyag rgya'o//bzhi pa ni sor mo rnams bsdams pa las srin lag gnyis rdo rje ltar bsgreng ba'o/ /lnga pa ni gung mo snga ma lta bu las srin lag pad+ma ltar rtse sprad de bkug pa de dag ni bcom ldan 'das phyag na rdo rje'i dkyil 'khor gyi skabs su shes par bya'o//drug pa ni sor mo rnams phan tshun du bsnol nas brkyang ste 'od zer 'dra bar byas pa ste/ de ni bcom ldan 'das tshe dpag med kun du bzang po'i phyag rgya'o//bdun pa ni de nyid nang du bkug nas mthe bong gnyis mche ba lta bur bsgreng ba ste de ni khro bo khams gsum rnam par rgyal ba'i phyag rgya'o/ /de nyid las shin tu bsdams pa ni rdo rje bsdams pa'o/ /brkyang ba ni srung ba'i 'o/ /hUM zhes bya ba'i so ni gnod sbyin gyi'o//hUM zhes bya ba gnyis lcags kyu ltar byas pa ni rgyal po'i 'o/ /de nyid mda' ltar byas pa ni 'dod pa'o/ /oM zhes bya ba gnyis sbyor ba ni legs pa'i 'o/ /de nyid dkyil 'khor du byas pa ni gzi brjid kyi'o/ /de nyid nor bu 'dra bar byas pa ni rgyal mtshan gyi'o//de nyid rgya gram du byas pa ni las kyi'o/ /de nyid rin po che ltar bskor ba ni rin chen gyi'o/ /gung mo sbyar la sor mo bzhi brkyang ba ni rdo rje sems dpa'i 'o/ /de nyid khar gzhag pa ni dgyes pa'i 'o/ /thal mo pad+ma ltar bkug pa ni pad+ma'i 'o/ /a zhes bya ba dang oM zhes bya ba gnyis nang du bkug pa ni ral gri'i phyag rgya'o//gcig la gcig sbyar ba ni 'khor lo'i phyag rgya'o/ /snga ma las oM zhes bya ba ni gnyis khar gzhag pa ni tshig dbyung ba ste/ mdor na phyag rgya 'di dag ni las thams cad sbyin par byed pa'o zhes gsungs pa ni 'dir ye shes kyi sems dpa' bcu drug gi las kyi phyag rgya rnams te/de la dang po ni khro bo'i phyag rgya las mthe bong gnyis phan tshun du bsnol nas khu tshur du bsdams pa'o/ /gnyis pa ni go cha'i tshul du sor mo rnams brkyang ba'o/ /gsum pa ni mdzub mo gnyis mche ba ltar byas pa'o//bzhi pa ni mdzub mo gnyis lcags kyu ltar byas pa'o/ /lnga pa ni lag pa g.yas pa'i mdzub mo dang mthe bong gnyis gzhu ltar byas la/ g.yon pa'i mdzub mo de'i steng du mda' gtong ba ltar byas pa'o/ /drug pa ni mthe bong gnyis kyi rtse mo dang mdzub mo'i rtse mo sbyar ba'o//bdun pa ni gung mo gnyis nyi ma'i dkyil 'khor ltar byas pa'o/ /brgyad pa ni mdzub mo gnyis spyi gtsug gi nor bu ltar byas pa'o/ /dgu pa ni mthe'u chung gnyis rgya gram du byas pa'o/ /bcu pa ni gung mo gnyis rin po che'i rtse mo ltar byas pa'o//bcu gcig pa ni mthe bong gnyis dang sor mo rnams phan tshun du bsnol ba las so sor brkyang nas khar gzhag pa'o/ /bcu gnyis pa ni srin lag gnyis rtse sprad de pad+ma'i 'dab ma ltar bkug pa'o/ /bcu gsum pa ni mthe bong dang mthe'u chung gnyis nang du bkug nas sor mo gsum lto sbyar te brkyang ba'o//bcu bzhi pa ni lag pa gnyis rgyab sbyar nas sor mo rnams rtse sprad pa'o/ /bco lnga pa ni mthe bong gnyis gshibs nas bsgrengs nas khar gzhag pa'o/ /bcu drug pa ni gung mo gnyis gshibs nas mthe bong gnyis so sor brkyang ba'o//de dag ni zhi ba la sogs pa las kyi bye brag las 'da' bar dka' ba'i phyir dang lha rnams kyi dam tshig yin pa'i phyir dam tshig gi phyag rgya zhes bya ba nyid do/ /'jig rten las 'das pa'i phyag rgya'i tshogs so/ / de nyid bsdus mdud sbrul mgor gyur/ /dbang po sor gsum rdo rje ste/ /gshin rje gung mo dbyug pa 'dra/ /mthe'u chung bkug la mdzub zhags pa/ /chu lha'i phyag rgya yin par 'dod/ /dbyug to ldan pa gnod sbyin te/ /rtse gsum bde byed yin par 'dod//b+h+r-ing gi ri ti lag brkyang ste/ /srin po yi ni khrag 'phrog pa/ /lag pa bskor ba rlung gi ste/ /bum pa gzhag pa nor gyi'o/ /steng phyogs kun du 'od 'phro zhing / /pi wang g.yon thogs dri za'i 'o/ /de ltar mthe'u chung ral gri 'dra//gung mo zhags par rnam par ldan/ /mthe bong ne'u le'i rna 'drar byas/ /mgo bo thod pa nag po ste/ /lag gnyis 'bar ba me 'bar 'dra/ /rno la khro ba dbang dang ldan/ /rlung gi phyag rgya mtshan ldan yin/ /de la sogs pa'i phyag rgya rnams/ lag pas dgyes pas kun du spyod/ /ces gsungs pa ni 'jig rten pa'i dkyil 'khor gsum gyi phyag rgya gsungs pa ste/ dang po ni lag pa gnyis kyis mthe bong gnyis mdud la/ mdzub mo gnyis rtse sprad pa gcig tu byas te lhag ma rnams so sor sprul mgo bzhin du byas pa ste/de ni klu chen po brgyad kyi dam tshig gi phyag rgya'o/ /gnyis pa ni phyogs skyong bcu'i phyag rgya ste/ de la dang po ni mthe bong gis mthe'u chung mnan la lhag ma gsum rdo rje ltar byas pa'o/ /gnyis pa ni gung mo gnyis thod dbyug ltar byas pa'o/ / gsum pa ni mthe bong dang gung mo zhags mig ltar byas la mdzub mo brkyang ba'o/ /bzhi pa ni mdzub mo dbyug to ltar byas pa'o/ /lnga pa ni gung mo gnyis bsgreng ste mdzub mo gnyis so sor brkyang ba'o/ /drug pa ni sor mo rnams dgu bor 'phyar ba'o/ /bdun pa ni sor mo rnams dgu por byas pas 'phyar ba'o//brgyad pa ni lag pa'i thal mo gnyis rtse sbyar nas yang nas yang du bskor ba'o/ /dgu pa ni lag pa gcig gi steng du gcig gzhag pa bum pa 'dzin pa'i tshul du byas pa'o/ /bcu pa ni sor mo rnams phan tshun du bsnol ba las 'od zer ltar byas pa'o//gsum pa ni rgyal po chen po bzhi'i phyag rgya ste/ de la dang po ni lag pa g.yon pa rna ba'i rtsar bzung la g.yas pa'i gung mo dang mthe bong sbyar bas dku ru gzung ba'o/ /gnyis pa ni mthe'u chung rtse sprad de ral gri ltar byas pa'o/ / gsum pa ni gung mo brkyang ba zhags pa ltar byas pa'o/ /bzhi pa ni mthe bong gnyis tshigs bar ma bcag pas phral te so sor phyar ba'o/ /lhag ma bzhi ni gshin rje dang / me lha dang / dbang ldan dang / rlung gi dam tshig gi phyag rgya ste/ de la dang po ni lag pa'i sor mo rnams yongs su bsdus shing bskor ba'o//gnyis pa ni lag pa'i sor mo rnams bsnol zhing brkyang pa las me stag 'dra bar byas pa'o/ /gsum pa ni gung mo dang srin lag dang mdzub mo rnams rtse gsum pa ltar byas pa'o/ /bzhi pa ni lag pa gnyis kyi srin lag gi rtse sprad la gung mo dang mdzub mo gnyis so sor gshibs pas brkyang ste mthe'u chung gnyis de bzhin du rtse sprad nas ba dan 'phyar ba ltar byas pa'o//de la sogs pa'i phyag rgya rnams/ /lag pa skyes pas kun du spyod/ /ces pa ni/ gzhan yang gang dang gang du phyag rgya'i tshogs kyis mngon par sbyong ba de nyid dang rjes su mthun pa'i phyag rgyas mchod pa dang dgyes par bya ba nyid do//lha rnams kun gyi thun mong du/ /pad+ma'i phyag rgya bkra shis te/ /klu rnams phyag rgya ut+pal/ /de ltar so ni gnod sbyin rnams/ /srin po rnams kyi mgo tshal pa//bud med rnams kyi sor bcu bsnol/ /gza' rnams kyi ni dbyug pa ste/ /ar+g+ha dbul ba rgyu skar rnams/ /mgo bo'i thod pa khar gzhag pa'i/ /phyag rgya 'di ni phra men ma'o/ /mgo thod lce yi phyag rgya ni/ /rdo rje rnal 'byor ma yir bshad//ces gsungs pa ni bcom ldan 'das kyis 'jig rten pa'i lha rnams kyi phyag rgya bsdus nas gsungs pa ste/ de la dang po ni lag pa gnyis phan tshun du sor mo rnams rtse sprad pa las pad+ma dkar po'i tshul du byas pa ste de ni bkra shis kyi rdzas dang lha dang lha'i bu mo thams cad kun rtse zhing rol pa na bdud rtsi pad+ma las longs spyod pa'i phyir na lha thams cad kyi thun mong du pad+ma'i phyag rgya bshad pa'o//gnyis pa ni lag pa gnyis kyi gung mo dang srin lag rtse sprad pa sbyar te bsgreng nas mthe'u chung phyir sbyar te/mdzub mo gnyis gong ma'i tshigs dang po sbyar nas bkug pa ste de ni klu rnams thams cad nam mkha' lding gi 'jigs pa las 'phags pa 'jam dpal la klu'i rgyal po dga' bos ut+pa la'i phreng ba phul nas slar zhus te byin gyis brlabs pa las klu rnams kun du bsrung ba'i phyir klu dang klu'i bu mo rnams dus thams cad du ut+pal 'dzin pa'i phyir/klu thams cad kyi thun mong du ut+pa la'i phyag rgyar bshad pa'o/ /gsum pa ni mdzub mo gnyis bsnol te kha'i thad kar mche ba ltar bya ba dang mthe'u chung gnyis 'og tu mche ba ltar byas pa ste/de ni gnod sbyin rnams sems can rnams kyi srog gcod cing sha rnams za ba'i mche ba gdug pa dang ldan pa'i phyir gnod sbyin thams cad kyi thun mong du mche ba'i phyag rgyar bshad do/ /bzhi pa ni lag pa phan tshun sor mo rnams legs par mdud cing mthe bong gnyis ni mig ltar byas pa ste/de ni srin mo rnams rtag tu mi'i thod pa la longs spyod pa'i phyir/ srin po thams cad kyi thun mong du mgo bo'i thod pa dum bu'i phyag rgyar bshad pa'o/ /lnga pa ni ma mo rnams kyi ste lag pa rnams kyi sor mo bcu phan tshun du bsnol ba ste/de ni ma mo rnams kyi 'khrig pa'i chos la nye bar brten pa'i phyir na bud med thams cad kyi thun mong du sor mo bcu phan tshun du bsnol nas brang du bzung ba'o/ /drug pa ni lag pa'i sor mo rnams bsdams pa las mdzub mo g.yas pa dbyug pa ltar phyar ba ste/de ni gza' rnams lha ma yin gyi 'jigs pa thams cad bzlog pa'i ched du rin po che'i dbyug pa 'dzin pa'i phyir gza' rnams kyi thun mong du dbyug pa'i phyag rgyar bshad pa'o/ /bdun pa ni lag pa gnyis zur sbyar la sor mo rnams rtse sprad de mthe bong gnyis mdzub mo'i ngos la sbyar ba ste/de ni rgyu skar rnams rang rang gi bdag po la zhabs bsil gyi dus kun du bsnyen bkur byed pa'i phyir skar ma'i lha mo thams cad kyi thun mong du ar+g+ha dbul ba'i phyag rgyar bshad pa'o/ /brgyad pa ni sor mo rnams bsnol ba las gung mo dang mthe'u chung gnyis tshigs bkug la mthe bong gis mdzub mo mnan la khar bzhag pa ste/de ni 'jig rten gyi mkha' 'gro ma thod pa khrag gis bkang ba 'thung ba'i phyir/ mkha' 'gro ma thams cad kyi thun mong du mgo bo'i thod pa khar gzhag pa'i phyag rgyar bshad pa'o//dgu pa ni de nyid las srin lag gnyis rtse sprad nas lce 'dra bar byas pa ste de ni rdo rje rnal 'byor ma thams cad mgo rlon pa la longs spyod pa'i phyir mgo rlon pa lce dang bcas pa'i phyag rgyar bshad pa'o/ /de nas kun gyi thun mong du//phyag rgya chen po bshad par bya/ /thal mo brkyang ba byas pa'am/ /yang na thal mo pad+mor bya/ /rdo rje'i khu tshur bcings nas kyang / /aHzhes bya ba lu gu rgyud/ /hUM zhes bya ba gnyis bsgreng la/ /phyag na rdo rje'i phyag rgya yin/ /rdo rje bcings pas bsdams nas kyang //hUM dang aHgnyis gshibs nas bsgrod/ /oM zhes bya bas ngos sbyar ba'i/ /phyag rgya snang bar byed par dgongs/ /de la aHzhes bya bas bcing / /oM zhes bya bas nang du gzhug /hUM zhes bya bas sngon bzhin bya/ /traM yang hUM dang 'dra bar bya/ /gshin rje gshed po'i phyag rgya yin//traM zhes bya ba gshibs nas ni/ /a dang oM gnyis lu gu rgyud/ /lhag ma gshibs pa'i phyag rgya 'di/ /bdud rtsi 'khyil par shes par bya/ /traM zhes bya bar gshibs nas ni/ /hUM zhes bya ba'ang de bzhin no/ /de ltar aHzhes bya ba gshibs//lhag ma 'od zer 'dra bar bya/ /de ni rta mgrin phyag rgya ste/ /de dag las rnams kun la gsungs/ /zhes gsungs pa ni phyag rgya chen po bzhi dang bcom ldan 'das phyag na rdo rje'i phyag rgya gsungs pa ste/ de la dang po ni 'jig rten pa'i lha rnams la phyag rgya chen po med pa'i phyir bcom ldan 'das phyag na rdo rje'i phyag rgyas 'jig rten pa'i lha rnams kyi phyag rgya chen por bsgyur ba ni de dag thams cad kyi lus kyi skabs su lag pa gnyis kyi thal mo brkyang ba'am/pad+ma 'dra bar bya ba ste/ /'di ni bcom ldan 'das kyi lha rnams gus pa dang bcas pa'i mchod pa'i rdzas kyis bsnyen bkur byed pa'i phyir lag pa brkyang ba dang pad+ma 'dra bar byas pa'o//de las mthe'u chung gnyis lu gu rgyud du byas pa las lag pa rgyab sbyar te mthe bong gnyis rtse sprad nas gzhan rnams bkug cing mdzub mo gnyis rgyab sbrad nas bsgreng la snying gar bzung ba'o//gnyis pa ni rdo rje bsdams pa la mdzub mo gnyis dang mthe bong gnyis gshibs la bsgreng ste mthe bong gnyis mdzub mo'i ngos la sbyar la/ thal mo kha bye bar byas pa'o/ /gsum pa ni sor mo rnams bsdams pa las mthe bong gnyis nang du bcug ste/mdzub mo dang gung mo gnyis gshibs la bsgrengs nas ral gri'i tshul du byas pa'o/ /bzhi pa ni lag pa gnyis rgyab sbyar la/ mthe bong dang mthe'u chung gnyis lu gu rgyud du byas nas gung mo gnyis gshibs la bsgreng ba ste/lhag ma rnams tshigs bar ma bcag la bkug pas snying gar gzung ba'o/ /lnga pa ni gung mo dang mdzub mo gshibs la bsgreng ba ste/ mthe'u chung yang de bzhin du gshibs la bsgrengs nas srin lag dang mthe bo gnyis 'od zer 'dra bar byas la rta'i kha gdangs pa ltar byas pas spyi bor gzung ba'o//de dag ni 'dir gsungs pa'i phyag rgya chen po bzhi zhes par 'dod de/ 'jig rten pa'i lha rnams yang dag par 'dul bar byed pa'o/ /de dag las rnams kun las gsungs/ /zhes pa ni 'jig rten pa'i dkyil 'khor gyi skabs su ni phyag rgya chen po bzhis ston par byed pa'i phyir ro//dkyil 'khor rgyas 'debs par byed pa dang / 'jig rten las 'das pa'i dkyil 'khor gyi skabs su ni phrin las rnam bzhi'i pho nya'i tshogs kyi las thams cad byed pa'i phyir/ de dag las rnams kun las gsungs/ /zhes pa nyid do/ /spyan gyi mig dang 'dra par bshad/ /mA ma kI ni rdo rje 'dra/ /dkar mo pad+ma nyid du bshad/ /ut+pa la ni sgrol mar dgongs/ /zhes pa ni rigs kyi yum bzhi'i phyag rgya gsungs pa ste/ de la de dag gi mdzub mo dang gung mo so sor brkyang zhing srin lag mdud pas mig 'dra bar byas pa dang /gung mo rdo rje 'dra bar byas pa dang de nyid pad+ma 'dra bar byas pa dang sor mo rnams bsdus nas brkyang bas ut+pal 'dra bar byas pa'o/ /de nas bcom ldan 'das phyag na rdo rjes sems can thams cad la phan pa'i phyir las thams cad 'grub par byed pa'i sngags kyi yig 'bru rnams nyid kyi thugs ka nas phyung ngo //sa sa sa sa sa sa sa sa sa sa sa sa sa sa sa sa/ ba ba ba ba ba ba ba ba ba ba ba ba ba ba ba ba/ dzra dzra dzra dzra dzra dzra dzra dzra dzra dzra dzra dzra dzra dzra dzra dzra/twa twa twa twa twa twa twa twa twa twa twa twa twa twa twa twa/ hUM dzaM hoM d+huM/ traM raM b+hiM haM/ hri d+hi truM b+h+raM/ kaM paM k+ShaM saM/ oM bud+d+ha lo tsA ni hUM/ badzra mA ma kI traM/ oM pad+ma baN+Da Da ba si ni hriM/ oM karma tA re a/ oM de hi de hi/ sid+d+hi sid+d+hi bid+d+hi ni/ lo ka uta ri ma ma swA hA/ oM tA re tut+tA re hUM hUM hUM hUM hUM swA hA zhes bya ba gsungs pa ni 'dir bcom ldan 'das kyis las kyi tshogs thams cad khyab par 'jug pa'i yig 'bru rnams gsungs pa ste/de sems can thams cad la phan pa'i phyir zhes pa ni sems can thams cad de bzhin gshegs pa ngan song thams cad yongs su sbyong ba'i rgyal po 'dis sdug bsngal gyi rgya mtsho las sgrol zhing de'i dkyil 'khor dang lha rnams ni gong du gsungs pa de'i skyed par byed pa'i yig 'bru dang /las so so'i sngags rnams ma gsungs pa'i phyir gsungs la/ de nyid gang dag la yang dag par rdzogs par byang chub thob par byed pa'i thabs bla na med pa yin pa'i phyir na sems can thams cad la phan pa zhes bya'o//las thams cad grub par byed pa ni dper na srub mkhan gyis bsrubs pa'i lcags lta bus 'jig rten dang 'jig rten las 'das pa'i las dang dngos grub thams cad ma lus par rdzogs par byed pa'i yan lag yin pa'i phyir ro//sngags kyi yig 'bru ni 'brur bkod pa'i tshogs te/ de dag nyid kyi thugs ka nas zhal du phyung ba nyid do/ /de nyid gang yin snyam pa la yig 'bru drug cu rtsa bzhi la sogs pa gsungs te/de la yig 'bru la sogs pa'i drug cu rtsa bzhi po ni bcom ldan 'das rdo rje sems dpa' chos kyi sku spros pa thams cad dang bral ba'i ngo bo ste/ de nyid me long lta bu'i ye shes la mtshon nas yig 'bru dang po gsungs pa dang / mnyam pa nyid kyi ye shes la mtshon nas yig 'bru gsum pa gsungs pa dang /so sor rtog pa'i ye shes la mtshon nas yig 'bru bzhi pa gsungs pa dang / bya ba grub pa'i ye shes la mtshon nas yig 'bru gnyis pa gsungs pa dang / de nyid chos kyi tshul gyi sgo nas rdo rje sems dpa' rnam pa bzhir 'gyur ro//ji lta bur 'gyur snyam pa la/ rnam par snang mdzad kyi rgyud las bcom ldan 'das kyis/ rgyu rkyen lam dang 'bras bu yis/ /rdo rje sems dpa' bzhir 'gyur zhing / /rtog dang bral zhing 'od gsal dang / /gzhig par mi nus kun 'joms phyir//rdo rje sems zhes brjod pa yin/ /zhes gsungs te/ de la tshigs su bcad pa des ni bsgrub par bya ba'i chos mtha' dag gsungs so/ /de la de dag ni ji lta bu zhig snyam pa la/ de ni 'di ltar tshigs su bcad pa phyed kyis ni ngo bo gsungs so/ /phyed kyis ni nges pa'i tshig gsungs te/de yang 'di ltar rgyu rdo rje sems dpa' ni sems can thams cad la phan pa thog ma nas gnyis su med pa'i ye shes kyi sa bon yod pa nyid de/ de la thog ma med pa nas log par rtog pa'i dbang gis log par brtags pa'i dri ma de gzhig dka' ba'i phyir rdo rje zhes bya zhing de nyid sems kyi cha las byung ba'i phyir sems dpa' zhes bya'o//rkyen rdo rje sems dpa' ni gang du byang chub kyi sems bla na med pa bskyed pa de ste/ yang dag pa'i de kho na nyid bsgoms pa las log par rtog pa'i bag chags thams cad 'joms pa'i phyir rdo rje zhes bya ba dang /de nyid byang chub kyi sems dang ldan pa'i phyir sems dpa' zhes bya'o/ /lam rdo rje sems dpa' ni gang du lha'i sku phyag rgya chen po bsgoms pa de ste/ de nyid las rnam par rtog pa dang bral ba'i shes pa skye ba'i phyir na/ rdo rje zhes bya ba dang / de nyid sems kyi khyad par las byung ba'i phyir sems dpa' zhes bya ba nyid do//'bras bu rdo rje sems dpa' ni chos kyi sku ste/ rang bzhin gyis 'od gsal zhing sems can thams cad kyi don du sku rnam pa gnyis la khyab pa'i phyir rdo rje zhes bya ba dang / de nyid las sprul pa sna tshogs byung ba'i phyir sems dpa' zhes bya ba ste/de dag gis ni bdud kyi sgyu ma'i tshogs ma lus par 'dul ba'i phyir rdo rje sems dpa' chen po zhes bya ba kho na'o/ /de nyid las phrin las rnam pa bzhi'i dkyil 'khor dang ldan pa'i phyir yig 'bru bzhi gsungs la/ de dag bcu drug tu gsungs pa ni ye shes kyi sems dpa' bcu drug la phyag rgya bzhi pa'i dkyil 'khor dang ldan par gsungs pa'o/ /de la hUM la sogs pa'i yig 'bru bcu drug po ni rdo rje sems dpa' la sogs pa'i snying po ste/ de nyid kyi mtshan la yig 'bru btags pa'i phyir sngags kyi snying po zhes bya ste/de dag kyang rim pa ji lta ba bzhin du hUM ni sems dpa'o/ /dzra ni rgyal po'o/ /ho ni chags pa'o/ /d+hu ni legs pa'o/ /traM ni rin chen gyi'o/ /raM ni nyi ma'i 'o/ /b+h+ri ni rgyal mtshan gyi'o/ /ha ni bzhad pa'i 'o/ /hri ni chos kyi'o/ / d+hi ni rnon po'i 'o/ /kruM ni 'khor lo'i 'o/ /b+ha ni gsung ba'i 'o/ /kaM ni las kyi'o/ /raM ni srung ba'i 'o/ /k+ShaM ni gnod sbyin gyi'o/ /saM ni dam tshig gi snying por shes par bya ste/ de dag kyang so so la phrin las rnam pa bzhi dang ldan par gsungs pa ni rgyal po dang / rgyal mtshan dang / rnon po dang / gnod sbyin rnams kyis ni mngon spyod kyi las mdzad pa nyid de/ chags pa dang / bzhad pa dang / gsung ba dang / dam tshig rnams kyis ni dbang gi phrin las mdzad do/ /rdo rje sems dpa' dang / rin chen dang / 'khor lo dang / las rnams kyis ni rgyas pa'i phrin las mdzad do/ /rdo rje legs pa dang / nyi ma dang / chos dang / srung ba rnams kyis ni zhi ba'i las mdzad pa nyid do/ /de dag gi mtshan dang sku mdog dang phyag mtshan la sogs pa ni chos thams cad rang bzhin gyis 'od gsal ba las 'gro ba sems can thams cad bla na med pa yang dag par rdzogs par bya ba'i phyir sprul pa'i sku rnams yongs su spros pa ste/de yang rnam par snang mdzad kyi rgyud le'u sum cu rtsa gsum pa las/ mi bskyod rdo rje bcom ldan 'das/ /rang gi 'khor lo rdzogs bya'i phyir//nyi zla kha sbyor 'od ldan pas/ /phyogs bzhi ru ni rnam par spro/ /de steng yig 'bru dkar ldan bzhi/ /de las gyur pa'i mtshan ma bzhis/ /sems dpa' bzhi ni yongs su rdzogs/ /zhes pa la sogs pa rgyas par gsungs te/ de la dang por bcom ldan 'das mi bskyod pa'i phyogs bzhir zla ba'i dkyil 'khor bzhi byung bar gyur to//de'i steng du nyi ma'i dkyil 'khor bzhi byung bar gyur to/ /de'i steng du bcom ldan 'das kyi thugs kyi dkyil 'khor nas hUM la sogs pa'i yig 'bru bzhi spros pa ste/ de dag rdo rje sems dpa'i mtshan ma bzhir gyur to//de'i skad cig la rdo rje sems dpa' la sogs pa'i sems dpa' bzhi yongs su rdzogs par gyur te/ de dag rim pa ji lta ba bzhin du zla ba ni me long lta bu'i ye shes zhes bya'o/ /nyi ma la ni mnyam pa nyid kyi ye shes zhes bya'o//yig 'bru dang mtshan ma la ni so sor rtog pa'i ye shes zhes bya ba'o/ /de dag gcig tu gyur pa ni bya ba grub pa'i ye shes zhes bya'o/ /sku yongs su rdzogs pa ni chos kyi dbyings kyi ye shes zhes bya ste/ de dag ni mngon par byang chub pa rnam pa lnga'i bdag nyid las byung ba'o//de dag ni drod gsher las skyes pa'i tshul dang sbyar ba ste/ dper na gang du rlan dang drod dang / de'i gnas dang dus tshod dang / de'i rgyu las grub pa'i sems can bzhin no/ /de dag gi kha dog ni rdo rje'i rigs la brten pa'i phyir kha dog dkar por nges so/ /mtshan ni de'i skad cig de nyid las sems dpa' rnams kyi rang rang gi tshigs su bcad pa dang snying po rnams gsungs pa ste/de yang rnam par snang mdzad kyi rgyud las/ e ma ho bdag nyid sems dpa' ste/ /mi bskyod rdo rjer byin brlabs shing / /sems can don la mngon sems phyir//rdo rje sems dpa' zhes byar brjod/ /ces pa'i tshigs su bcad pa rnams gsungs pa'i phyir rdo rje sems dpa' zhes bya'o/ /de bzhin du/ e ma ho bdag ni rgyal po ste/ /rdo rje rgyal por byin brlabs shing / /'gro kun bdud las rgyal byed phyir/ / rdo rje rgyal po zhes byar brjod/ /e ma ho bdag ni chags pa ste/ /rdo rje 'dod par byin brlabs shing / /'gro ba'i chags pa rjes chags phyir/ /rdo rje chags pa zhes byar brjod/ /e ma ho bdag ni legs pa ste/ /mdzes pa'i rgyal por byin brlabs shing / /'gro kun ye shes rgyan 'dogs phyir//rdo rje legs pa zhes byar brjod/ /e ma ho bdag nyid rin chen che/ /rin chen rgyal por byin brlabs shing / /'gro kun re ba bskang ba'i phyir/ /rdo rje rin chen zhes byar brjod/ /e ma ho bdag ni nyi ma ste/ /gzi brjid rgyal por byin brlabs shing //'gro kun nyon mongs sel ba'i phyir/ /rdo rje nyi ma zhes byar brjod/ /e ma ho bdag ni rgyal mtshan te/ /seng ge rgyal por byin brlabs shing / /'gro kun spyi gtsug ldan byed phyir/ /rdo rje rgyal mtshan zhes byar brjod/ /e ma ho bdag ni bzhad pa ste/ / dgyes pa'i rgyal por byin brlabs te/ /'gro kun dga' bar byed pa'i phyir/ /rdo rje bzhad pa zhes byar brjod/ /e ma ho bdag ni chos mchog ste/ /dam chos rgyal por byin brlabs shing / /'gro kun dam chos lam bgrod phyir/ /rdo rje chos zhes bya bar brjod/ / e ma ho bdag ni rnon pa ste/ /mtshon cha'i rgyal por byin brlabs shing / /'gro kun rtog pa'i dra gcod phyir/ /rdo rje rnon po zhes byar brjod/ /e ma ho bdag ni 'khor lo ste/ /gtum po'i rgyal por byin brlabs shing / /'gro kun thar pa'i gong bskyod phyir/ / rdo rje 'khor lo zhes byar brjod/ /e ma ho bdag ni tshig yin te/ /tshig gi rgyal por byin brlabs shing / /'gro kun legs pa'i lam ston phyir/ /rdo rje gsung ba zhes byar brjod/ /e ma ho bdag ni las yin te/ /kun mdzad rgyal por byin brlabs shing //'gro ba'i las rnams rdzogs byed phyir/ /rdo rje las zhes bya bar brjod/ /e ma ho bdag ni srung ba ste/ /mi 'jigs rgyal por byin brlabs shing / /'gro kun bdud las bsrung ba'i phyir/ /rdo rje srung ba zhes byar brjod/ /e ma ho bdag ni gnod sbyin te//mche ba'i rgyal por byin brlabs shing / /'gro kun sgrib pa gcod byed cing / /rdo rje gnod sbyin zhes byar brjod/ /e ma ho bdag ni dam tshig ste/ /mi 'gyur rgyal por byin brlabs shing / /'gro kun sdig pa'i tshogs sdom phyir/ / rdo rje dam tshig ces byar brjod/ /ces pa'i tshigs su bcad pa rnams kyis rang rang gi las su bya ba dang / nges pa'i tshig gis mtshan yongs su btags pa'o/ /kha dog ni 'dir rdo rje'i rigs la sogs pa rigs bzhi'i bye brag dang / phrin las rnam pa bzhi dang /ye shes rnam pa bzhi'i bye brag la sogs pa'i dbye bas dkar po dang / ser po dang / dmar po dang / ljang gur nges pa'o/ /phyag mtshan yang gong gi rjes su mtshon pa las shes par bya'o/ /de la sems can rnams gnyis su med pa'i ye shes bskyed pa'i phyir dang ngan song gsum nas 'dren pa dang /bdud kyi tshogs 'bigs par byed pa dang / sangs rgyas kyi zhing du 'jog par byed pa dang / ji ltar bsam pa'i re ba skong bar byed pa dang / ma rig pa'i mun pa'i tshogs bsal bar byed pa dang / yang dag pa'i bka' dang ldan par byed pa dang /nyon mongs pa'i 'dam nas 'don par byed pa dang / tshul khrims kyi dris 'god par byed pa dang / rnam par rtog pa'i dra ba gcod par byed pa dang / chos kyi dbyings su skyod par byed pa dang / de bzhin gshegs pa'i sa la gnas par byed pa dang /dngos grub rnam pa bzhi ster bar byed pa dang / bdud kyi tshogs las skyob pa dang / 'khor ba'i dra ba gcod pa dang / sdig pa mi dge ba'i chos rnams sdom par byed pa'i phyir rang rang gi phyag mtshan rdo rje lcags kyu la sogs pa 'dzin pa nyid de//rnal 'byor pa'i rgyu'i dkyil 'khor gyi skabs su ni sems kyi skad cig ma bcu drug gi rim pas rdo rje sems dpa' la sogs pa bcu drug gi ngo bo nyid du 'gyur ro/ /phyag rgya bzhi pa'i dkyil 'khor ni rdo rje sems dpa' la rdo rje zhi ba la sogs pa'i 'khor bzhi dang /rgyal po la kun du bzang po la sogs pa'i 'khor bzhi dang / chags pa la kun nas 'od zer la sogs pa'i 'khor bzhi dang / legs pa la zhi ba'i blo gros la sogs pa'i 'khor bzhi dang / rin chen la bzang po dpal la sogs pa'i 'khor bzhi dang / nyi ma la bzang skyong la sogs pa'i 'khor bzhi dang / rgyal mtshan la stobs chen la sogs pa'i 'khor bzhi dang / bzhad pa la 'od bzang la sogs pa'i 'khor bzhi dang / rdo rje chos la rgyal ba'i tog la sogs pa'i 'khor bzhi dang / rnon po la rgyal ba'i blo gros la sogs pa'i 'khor bzhi dang /'khor lo la dri med rgyal po la sogs pa'i 'khor bzhi dang / gsung ba la chos kyi rgyal ba la sogs pa'i 'khor bzhi dang / las la de nyid snang ba la sogs pa'i 'khor bzhi dang / srung ba la spyod pa'i blo gros la sogs pa'i 'khor bzhi dang /gnod sbyin la rdo rje snang ba la sogs pa'i 'khor bzhi dang / dam tshig la 'khor lo la sogs pa'i 'khor bzhis bsrung zhing mchod pa dang / sgo skyong bas yang dag par ldan pa ni phyag rgya bzhi pa'i dkyil 'khor zhes bya ba kho na ste/de'i phyir yig 'bru drug cu rtsa bzhi po gsungs par shes par bya'o/ /sangs rgyas spyan la sogs pa'i snying po rnams ni dam tshig gi phyag rgyas bsdus pa yin la/ 'og tu gsungs pa'i sngags ni 'jig rten las 'das pa'i yum bzhi'i dngos grub dam pa byang chub kyi dngos grub tu yang dag par gsol ba 'debs pa'o//de dag kyang rnam par snang mdzad kyi rgyud lha 'byung ba'i le'u las/ kun du sgeg cing mdzes pa'i gzugs/ /dkyil 'khor gnyis dang yang dag ldan/ /sangs rgyas kun gyi yum gyur pa//bde bar gshegs kyis mngon spros pas/ /yongs su rdzogs la rang rang gi/ /mtshan dang sngags su yang dag gsungs/ /zhes pa dang / rim pa'i rnam pa cha byad can/ /mchod pa thams cad rdzogs pa'i phyir/ /ye shes lnga yi ngo bo las/ / gzugs dang ldan par tshig brjod pas/ /sgeg mo la sogs mchod pa brgyad/ /shar la sogs pa'i sgo rnams su/ /de ltar gzugs dang rjes mthun pas/ /rang rang sngags ni gsungs pa yi/ /lcags kyu la sogs phyag rgya bzhis/ /zhes gsungs pas na//de dag kyang dang pos sems dpa' rnams kyi tshul ji lta ba bzhin du bcom ldan 'das kyi mtha' logs su nyi ma dang zla ba bcu drug byung bar gyur pa dang / de dag gi steng du bcom ldan 'das kyi thugs kyi dkyil 'khor nas laM la sogs pa'i yig 'bru rnams spros pa las rdo rje sems dpa' la sogs pa'i mtshan mar gyur cing /de'i skad cig la sku yongs su rdzogs pas rang rang gi tshigs su bcad pa dang / sngags rnams gsungs shing dgyes pa yang dag par phul ba'i phyir/ sangs rgyas spyan zhes pa la sogs pa mtshan du btags pas shes par bya'o//phyag mtshan ni rigs kyi yum yin pa'i phyir rigs bzhi'i phyag rgya 'dzin pa dang gzugs la sogs pa 'dod pa'i yon tan lngas mngon par mchod pa'i phyir sgeg mo la sogs pa'i phyag rgya mdzad pa dang /dgug pa la sogs pa'i dam tshig dang ye shes 'dra bar byed pa'i las bzhi byed pa'i phyir/ lcags kyu la sogs pa'i phyag mtshan 'dzin pa nyid do/ /kha dog ni de'i rigs kyi rjes su mthun pa las byung ba'o/ /de la rigs kha dog gi rjes su 'brang ba ni rigs pa ma yin no zhe na/de ni gzhal yas khang gi 'og gzhi rin po che mu tig la sogs pa las grub pa'i phyir de'i 'od dang ldan pa nyid do/ /gzhan du kha dog gi nges pa med pa ni yon tan gyi sgo nas shes par bya'o/ /de la lha las rin po che'i 'od gsal bar 'gyur ram zhe na/de ni 'di ltar lha las ni don dam par na kha dog dag dang dbyibs kyi rnam pa med cing rang bzhin gyis 'od gsal ba yin la/ 'gro ba rnams kyi bsam pa la dgongs nas de'i rnam par 'gyur ba bstan pa ste/ dper na ri rab kyis nam mkha'i kha dog bsgyur ba bzhin no//zhi ba'i brdung ba'i sngags nas mngon spyod kyi brdung ba'i sngags kyi bar du ni gang dang gang du las byed pa'i skad cig la rigs dang rjes su mthun pa'i phur bus las su bya'i/ spyi bor btab na zhi ba la sogs pa'i lha bsams te rigs dang rjes su mthun pa'i tho bas brdung bar bya ste/lan bcu drug ni sems dpa' bcu drug gi rnal 'byor gyis bya ba'o/ /de nyid zhi bar byed pa'i phyir shaM pa ta zhes brjod pa dang / chos dang longs spyod gong nas gong du 'phel bar byed pa'i phyir g+huM zhes bya ba brjod pa dang /khyod bdag gir shog ces dbang du byed pa'i phyir ho tuM zhes brjod pa dang / tshe dang srog rnams gcod par byed pa'i phyir kha taM zhes brjod par shes par bya'o/ /de nas brgya byin la sogs pa'i lha rnams kyis bcom ldan 'das la phyag btsal nas 'di skad ces gsol to//bcom ldan 'das gang gi phyir gdug pa thams cad gzhig par bya ba dang / ma rungs pa'i tshogs thams cad ma lus par gzhom par bgyi ba'i slad du khro bo chen po rnams kyi dkyil 'khor bshad du gsol/ bcom ldan 'das bshad du gsol/bde bar gshegs pa bshad du gsol zhes pa ni 'dir brgya byin la sogs pas dkyil 'khor bshad par zhus pa ste/ de la phyag btsal ba ni gus pa dang bcas par zhu ba'o/ /gang gi phyir zhes pa ni/ sems can thams cad kyi phyir zhus pa ste/gdug pa thams cad gzhig par bgyi ba dang / ma rungs pa thams cad gzhom par bgyi ba ni srin po 'am gnod sbyin nam/ nam mkha' lding ngam/ mkha' 'gro ma la sogs pa ma rungs pa'i sems dang ldan pa gdug pa'i las kyis sems can la gnod pa byed pa ste de dag gzhig pa ni gdul bar bya ba ste de'i phyir bshad du gsol zhes par sbyar ro//lan gsum ni ched du bya ba'i tshig tu shes par bya ba nyid do/ /de nas bcom ldan 'das phyag na rdo rje nyid kyi sku bor nas rdo rje sems dpa'i skur bzhugs te gnyis su med pa'i mnyam par gzhag pa zhes bya ba'i ting nge 'dzin la snyoms par zhugs nas/rdo rje sems dpa'i khro bo me'i nyi ma zhes bya ba'i snying po 'di nyid kyi thugs ka nas phyung ngo zhes gsungs pa ni khro bo'i dkyil 'khor gsungs pa la snyoms par zhugs pa ste/de la bcom ldan 'das phyag na rdo rje'i sku bor nas rdo rje sems dpa'i skur bzhugs pa ni bdag po dang rjes su mthun pa khro bo'i dkyil 'khor gsungs pa ste/ gcig tu na rdo rje sems dpa' dang phyag na rdo rje ngo bo gcig la sems can rnams kyi bsam pa dang sbyar nas sku bor bar shes par bya'o//gnyis su med par mnyam par gzhag pa ni 'bras bu'i rdo rje sems dpa' dang gnyis su med pa'i mnyam par gzhag pa ste de nyid dang khro bo ngo bo gcig par gsungs pa la thugs mnyam par gzhag pa'o//rdo rje sems dpa'i khro bo ni rdo rje sems dpa'i sprul pa'i ngo bo ste/ de nyid sku gsung thugs kyi rtags sku me'i phung po ltar 'dug pa dang / gsung nyi ma'i 'od zer lta bus mun pa sel bar byed pa dang / thugs rdo rje ltar mi 'gyur ba'i phyir na rdo rje me'i nyi ma'i zhes bya ba kho na'o//snying po ni sngags te de bcom ldan 'das kyi thugs nas zhal du phyung bar shes par bya'o/ /oM badzra satwa kro d+hA na lArka/ badzra kro d+ha dra ba dra ba/ bi dra ba bi dra ba/ sarba a b+ha ya nA sha ya/ nA sha ya/ ha ra ha ra/ pra ha ra pra ha ra hUM phaT/ oM trai lo kya A lo ka ka ra hUM phaT/ oM trai lo kya da ma ka hUM phaT/ oM trai lo kya nA sha hUM phaT/ oM tri b+ha ba ban+d+ha ka hUM phaT/ oM a mr-i toSh+NI Sha hUM phaT/ oM kA la daMSh+Ta hUM phaT/ oM kA la dU ti hUM phaT/ oM tri ta bi ta hUM phaT/ oM kA la aM ku sha hUM phaT/ oM kA la pA sha hUM phaT/ oM kA la ban+d+ha hUM phaT/ oM kA la rA ga hUM phaT/oM kA la rak+Sha si hUM phaT/ oM kA la dan+ti hUM phaT/ oM kA la ra tri hUM phaT/ oM oM kA la ya k+Shi hUM phaT ces pa la sogs pa'i sngags ni khro bo'i dkyil 'khor rnams kyi sngags gsungs pa ste/ de la dang po ni me'i rdo rje nyi ma'i sngags yin pas na de ni 'di ltar rdo rje sems dpa' khro bo me'i rdo rje nyi mas sreg par gyis shig pa dang /rnam par sreg par gyis shig pa dang / sngags lan bzhi gsungs pa dang / 'jigs pa thams cad choms shig phrogs shig rab tu phrogs shig pa'i sngags gsungs pa'o/ /gnyis pa ni khams gsum snang byed kyi'o//gsum pa ni srid gsum gnod byed kyi'o/ /bzhi pa ni khams gsum 'jig byed kyi'o/ /lnga pa ni srid gsum 'ching byed kyi'o/ /drug pa ni bdud rtsi'i gtsug tor gyi'o/ /bdun pa ni dus kyi mche ba'i 'o/ /brgyad pa ni dus kyi pho nya'i 'o/ / dgu pa ni rnam pa gsum rig gi'o/ /bcu pa ni dus kyi lcags kyu'i 'o/ /bcu gcig pa ni dus kyi zhags pa'i 'o/ /bcu gnyis pa ni dus kyi 'ching byed kyi'o/ /bcu gsum pa ni dus kyi chags pa'i 'o/ /bcu bzhi pa ni dus kyi srin mo'i 'o/ /bco lnga pa ni dus kyi so can gyi'o//bcu drug pa ni dus kyi mtshan ma'i 'o/ /bcu bdun pa ni dus kyi gnod sbyin mo yir shes par bya ste bskyed pa'i sa bon yang de dag gi dbus kyi yig 'bru las shes par bya'o/ /de nas dkyil 'khor mi bzad pa/ /che ba'i che mchog rtsibs bcu gnyis/ /lha rdzas 'bar ba'i phreng bas dkris//shin tu 'bar zhing cher 'bar ba/ /de ltar dkyil 'khor bris nas kyang / /rdo rje sems dpa' gzhag par bya/ /'jig rten gsum snang la sogs khro bo kun/ /ma rungs snying gar mnan cing sdigs byed cing / /zhal ni shin tu mche ba gtsigs pas 'jigs 'jigs 'dra//phyag ni brgya phrag du mar ldan/ /sbrul dang mi mgos dbu brgyan cing / /stag gi pags pas rnam dkris shing / /rgyu ma thogs shing dbu mtha' yas/ /mgo thod khrag bkang phyag na bsnams//de ltar byin nas phyi rol du/ /srin mo'i tshogs rnams gzhag bya ste/ /sgo rnams su ni sgo ba rnams/ /rang rang phyag rgyas rnam par gnas/ /zhes gsungs pa ni de dag gi dkyil 'khor gyi cho ga gsungs pa ste/ de la dur khrod dam ma mo'i gnas sam shan pa'i khyim la sogs par stegs bu khru nyi shu rtsa bzhi pa brtsigs te bdud rtsi rnam pa lngas byugs la thig legs par btab la bri bar bya ba ni dbus su 'khor lo sngon po me'i 'od dang bcas pa rtsibs bcu gnyis pa gcig bri bar bya'o// de'i grwa bzhir ni me ri bzhi bri bar bya'o/ /de'i phyi rol du sgo dang rta babs dang / dra ba dang dra ba phyed pa la sogs pas brgyan cing kun nas mdzes par byas pa nyid do/ /de la 'khor lo'i dbus su ni khro bo chen po me'i rdo rje nyi ma sku mdog dmar po zhal gsum phyag drug pa/phyag g.yas pa gsum gyis rdo rje dang ral gri dang 'khor lo 'dzin cing g.yon pa gsum gyis dril bu dang zhags pa dang thod pa bsnams pa/ zhal dang po dmar po g.yas dkar ba la g.yon nag po rdo rje sems dpa'i dbu rgyan can/ lha drag po dkar po snying gar mnan pa bri bar bya'o//de'i mdun gyi rtsibs la khro bo khams gsum snang byed sku mdog nag po zhal gsum pa la zhal dang po nag po/ g.yas dkar ba g.yon dmar ba/ phyag drug pa la g.yas pa gsum gyis mdung dang ral gri dang 'khor lo 'dzin pa/g.yon pa gsum gyis rdo rjes mtshan pa'i tho ba dang rin po che dang thod pa 'dzin pa/ ma he'i steng na nyi ma'i dkyil 'khor la bzhugs pa/ bcom ldan 'das rnam par snang mdzad kyi dbu rgyan dang ldan pa bri bar bya'o/ /de'i rtsibs gnyis pa la khro bo khams gsum gnon byed sku mdog dkar ser la zhal gsum pa dang po dkar ser la g.yas pa nag po g.yon pa dmar po//phyag g.yas pa gsum gyis lcags kyu dang 'khor lo dang ral gri 'dzin pa/ g.yon pa gsum gyis thod pa dang rin po che dang pad+ma 'dzin pa rin chen 'byung ldan gyi dbu rgyan can seng ge'i steng du nyi ma'i dkyil 'khor la bzhugs par bri'o//de'i 'khor lo gsum pa la ni khro bo khams gsum 'jig byed kha dog dmar po la zhal gsum pa'i dang po dmar po/ /g.yas nag po la g.yon dkar po//phyag drug pa g.yas pa gsum gyis rdo rje dang ral gri dang dgra sta 'dzin pa/ g.yon pa gsum gyis rdo rje khu tshur gyi phyag rgya dang pad+ma dang tho ba 'dzin pa/ 'od dpag med kyi dbu rgyan can stag gi steng na nyi ma'i dkyil 'khor la bzhugs pa bri'o//de'i 'khor lo rtsibs gsum pa la ni khro bo srid gsum 'ching byed kha dog sngon po la zhal gsum pa'i dang po sngon po/ /g.yas pa dkar ba la g.yon pa dmar po phyag drug pa'i g.yas pa gsum gyis rdo rje dang sna tshogs rdo rje dang ral gri 'dzin pa/g.yon pa gsum gyis dril bu dang rin po che dang thod pa 'dzin pa/ don yod grub pa'i dbu rgyan can tshogs bdag gi steng na nyi ma'i dkyil 'khor la bzhugs pa bri'o/ /de'i rtsa ba'i 'khor lo la ni khro bo bdud rtsi gtsug tor nag po la zhal gsum pa phyag drug pa zhal dang po nag po g.yas dkar ba/g.yon dmar ba la phyag g.yas pa gsum gyis dbyug pa thod pas mtshan pa dang / ral gri dang / rin po che 'dzin pa/ g.yon pa gsum gyis pad+ma dang rtse gsum pa dang / thod pa 'dzin pa mi bskyod pa'i dbu rgyan can/tshangs pa ser po'i steng na nyi ma'i dkyil 'khor la bzhugs pa bri bar bya'o/ /'khor lo dang po'i rtsar ni khro bo dus kyi mche ba kha dog nag po zhal gsum phyag drug pa/ zhal dang po nag po la g.yas pa dkar ba g.yon dmar ba/ phyag g.yas pa gsum gyis rdo rje dang /ral gri dang be con 'dzin pa/ g.yon pa gsum na rin po che dang pad+ma dang thod pa 'dzin pa mi bskyod pa'i dbu rgyan can log 'dren gyi steng na nyi ma'i gdan la bzhugs pa bri bar bya'o/ /'khor lo gnyis pa'i rtsar ni khro bo dus kyi pho nya sku mdog sngon po la zhal gsum phyag drug pa'i zhal dang po sngon po la g.yas dkar la g.yon dmar por 'dug pa'o//phyag g.yas pa gsum gyis ni ral gri dang tho ba dang zhags pa 'dzin pa/ g.yon pa gsum gyis lcags kyu dang mda' gzhu dang thod pa 'dzin pa/de bzhin gshegs pa lnga'i dbu rgyan can/ zhabs gnyis kyis 'dod pa dang chags ma'i snying gar nyi ma'i gdan la bzhugs pa bri bar bya'o/ /'khor lo gsum gyi rtsar ni khro bo rnam pa gsum rig kha dog dmar po la/ zhal gsum phyag drug pa zhal dang po pad+ma rA ga 'dra ba la g.yas dkar ba la g.yon pa nag por 'dug cing phyag g.yas pa gsum gyis rdo rje dang rin po che dang lcags kyu 'dzin pa/ g.yon pa gsum gyis sna tshogs rdo rje dang pad+ma dang tho ba 'dzin pa/ de bzhin gshegs pa'i dbu rgyan can nag po chen po'i steng na nyi ma'i gdan la bzhugs pa bri bar bya'o//'khor lo gnyis pa'i rtsar ni khro bo dus kyi lcags kyu kha dog dkar po la zhal gsum pa phyag drug pa/ zhal dang po dkar po g.yas nag po g.yon dmar por 'dug pa/phyag g.yas pa gsum gyis lcags kyu dang rnga yab dang tho ba 'dzin pa/ g.yon pa gsum gyis sdigs mdzub dang tho ba dang thod pa 'dzin pa sangs rgyas kyi dbu rgyan can/ 'jigs byed kyi steng na nyi ma'i gdan la bzhugs pa bri'o/ /'khor lo gsum pa'i rtsar ni khro bo dus kyi zhags pa kha dog sngon po//zhal gsum phyag drug pa la dang po sngo ba la g.yas pa dkar ba g.yon pa dmar ba/ de bzhin gshegs pa'i dbu rgyan can/ phyag g.yas pa gsum gyis zhags pa dang ral gri dang 'khor lo 'dzin pa/g.yon pa gsum na dgra sta dang / rin po che dang thod pa 'dzin pa sgra gcan gyi steng na nyi ma'i dkyil na bzhugs pa bri'o/ /'khor lo bzhi pa'i rtsar ni dus kyi 'ching byed kha dog dmar po la zhal gsum pa phyag drug pa/ zhal dang po dmar po g.yas dkar po g.yon nag por 'dug pa la/phyag g.yas pa gsum gyis ral gri dang rdo rje dang lcags sgrog 'dzin pa/ g.yon pa gsum gyis mda' gzhu dang pad+ma dang tho ba 'dzin cing 'od dpag med pa'i dbu rgyan can bde byed kyi steng na nyi ma'i gdan la bzhugs pa bri'o/ / 'khor lo dang po'i rtsar ni khro bo dus kyi chags pa kha dog ljang gu la dbu gsum phyag drug pa zhal dang po ljang gu g.yas dkar ba g.yon dmar ba/ phyag g.yas kyis sna tshogs rdo rje dang dril bu 'dzin cing sdigs mdzub mdzad pa/ g.yon pa gsum gyis 'khor lo dang tho ba dang thod pa bsnams pa/de bzhin gshegs pa'i dbu rgyan can gar gyi dbang phyug gi steng na nyi ma'i gdan la bzhugs pa bri'o/ /de'i zur bzhir ni mi ro'i steng na mchod pa'i khro mo pho nya'i tshogs dus kyi srin mo dang / dus kyi so can ma dang dus kyi mtshan mo dang /dus kyi gnod sbyin mo rnams zhal gcig pa la phyag gnyis pa/ shin tu khro ba'i gzugs can g.yas na byang chub kyi sems la sogs pa'i bdud rtsi lngas gang ba'i thod pa 'dzin pa g.yon pa na thod pa khrag gis bkang ba thogs pa skra kham pa gyen du 'phags pa/mig 'bur ba 'jigs pa'i gzugs can rnams gzhag par bya'o/ /sgo rnams su lcags kyu la sogs pa'i sgo ba rnams gzhag par bya'o/ /khro bo de dag thams cad kyang dbu skra kham pa gyen du 'phags pa/ mche ba rnam par gtsigs pa/ha la ha la gu lu gu lu'i sgra sgrogs pa/ mi mgo'i phreng bas sku la brgyan pa thod pa lngas dbu la brgyan pa stag gi pags pas smad dkris shing sbrul gyi chun po'i cod pan dang / rna cha dang / mgul rgyan dang / dpung rgyan dang / gdu bu dang / rkang gdub dang / ska rags dang / se ral khar thogs pa/ shin tu 'jigs pa'i gzugs bri ba ste/ de dag ni bcom ldan 'das bde bar gshegs pa rnam par snang mdzad dang / mi bskyod pa dang / phyag na rdo rje la sogs pa'i thugs las yang dag par sprul par shes par bya'o//dus kyi srin mo la sogs pa'i khro mo rnams ni sangs rgyas spyan la sogs pa rigs kyi yum bzhi'i thugs kyi sprul par shes par bya'o/ /gdug pa'i tshogs thams cad ma lus par gdul ba'i phyir khro bo'i gzugs su bstan pa yin zhing /de nyid bde ba chen po'i ngo bo las byung ba nyid do/ /gzhal yas khang gi phyi rol du ni dur khrod shin tu 'jigs pa'i gzugs/ ro langs dang ce spyang dang / 'jigs pa'i gzugs sna tshogs pa dang /shing la sogs pas yongs su brgyan pa'o/ /de nas bdud rtsis gang ba yi/ /bum pa bcu drug gzhag par bya/ /bdug pa me tog dri zhim dang / /mar me dang ni bro snod dang / /kha zas bkram pa'i gtor ma dang / /bza' ba bca' ba bdud rtsi ches//mgo thod gang bar gyur pa rnams/ /dkyil 'khor du ni mang du gzhag /ces gsungs pa ste mchod pa'i tshogs bsags pa gsungs pa ste/ de la bdud rtsi rnam pa lngas gang bar gyur pa'i bum pa bcu gnyis sam bcu drug la sogs pa'i steng du sha chen la sogs pas gang bar gyur pa'i thod pa gzhag par bya ba dang /me tog dang / bdug pa dang / dri dang byug pa dang / snang ba la sogs pa'i mchod pa'i yo byad thams cad kyis kun nas rgyas par bya ba dang / 'jig rten pa'i 'byor pa bza' ba'i tshogs la sogs pa mang bar gzhag par bya'o//de nas slob dpon bdag nyid kyis/ /mgo thod phyag rgyas zhugs nas kyang / /phyag rgya de dang de yis ni/ sha rnams kun gyi dam tshig gsol/ /de nas 'dod ldan rnyed nas ni/ /hUM zhes bya bas sgrub par byed//de nas sngags pa sgo sgor yang / /de nyid dran pas bsnyen par bya/ /des ni nges par dngos grub ster/ /yud tsam 'jig rten gsum dbang bskur/ /dkyil 'khor du ni tshogs rnams dang / /rang gi lha yi tshogs rnams la/ /rgyud las byung ba'i dam tshig brjod//de nas mchod de langs nas kyang / /tshogs mchod rdo rje sems dpa' yi/ /tshul du gnas pa dbyung bar bya/ /zhes gsungs pa ni/ bdag nyid dkyil 'khor du gzhug pa'i rim pa gsungs pa ste/ de la thod pa'i rgyan la sogs pas brgyan nas gong du gsungs pa'i phyag rgya bcas te 'jug par bya'o//de nas bdag nyid khro bo'i tshogs rnams la rim pa ji lta ba bzhin du dbang mnos nas gnang ba thob par gyur pa dang / thod pa'i phyag rgya bcas pas bdud rtsi lnga la sogs pa'i dam tshig rnams kyis mchod par bya'o//de nas bdag nyid khro bo rdo rje me'i nyi mar bsams la snying gar hUM bsam zhing / de las gyur pa'i thugs ka'i rdo rje dang gnyis su med par byas la dag par gyur pa'i rnal 'byor bya'o/ /de nas sgo rnams su lcags kyu la sogs pa'i rnal 'byor gyis ye shes kyi dkyil 'khor dgug pa dang gzhug pa la sogs pa byas te ar+g+has mchod nas/slob ma la dam tshig gi tshigs su bcad pa sngar gsungs pa rnams bsgrag par bya'o/ /de'i rjes la bdag nyid sngar gyi rnal 'byor dang ldan pas slob ma la dbang bskur bar bya ba ni/de nas slob ma bsdus nas ni/ /lag na rin chen thogs te gzhug /oM badzra kro d+ha sa ma ya hUM/ oM badzra rAk+Sha si phaT/ oM badzra kro d+hA na lArka spu ra pra tIts+tsha hUM/ oM badzra kro d+ha i k+She hUM pA sha phaT/ oM badzra kro d+ha sa ma ya pi pa hUM phaT/ oM badzra kro d+ha sa ma ya mA ti kra ma hUM phaT/ oM badzra kro d+ha ring sa ma ya a b+hi Shiny+tsa hUM phaT/ 'dis dbang bskur la de bzhin du dbang bskur bar bya'o zhes pa ni slob ma dkyil 'khor du 'jug pa gsungs pa ste/ de la slob ma ras la sogs pas mig bkab la/rin po che la sogs pa thogs su bcug ste/ sdig pa bshags pa la sogs pa rim pa ji lta ba bzhin du byas nas sngags dang pos ni gzhug par bya'o/ /gnyis pas ni brtan par bya'o//gsum pas ni me tog dor bar bya'o/ /bzhi pas ni mig dbye bar bya'o/ /lnga pas ni thod pa'i khrag la oM badzra kro d+ha a mr-i ta a mr-i tod b+ha ba hUM zhes pa'i sngags brgya rtsa brgyad bzlas te dam tshig gi chu blud par bya'o/ /drug pas ni dam tshig bsgrag pa'i sngags so//bdun pas ni dbang bskur ba ste khro bo 'khor los sgyur ba'i phyag rgyas slob ma'i spyi bo nas dbang bskur bar bya ste/ de nas bum pa lnga la khro bo lnga'i rnal 'byor gyis/ oM badzra satwa hUM/ oM badzra kro d+hA na pA rka ka la sha a b+hi Shiny+tsa hUM/oM badzra pA Ni hUM badzra kro d+ha trai lokya A lo ka ka ra ka la sha a b+hi Shiny+tsa hUM phaT/ oM badzra rat+na trAM badzra kro d+ha trai lokya d+harma ka ka la sha a b+hi Shiny+tsa phaT/ oM badzra pad+ma hrIHbadzra kro d+ha trai lokya nA sha na ka la sha a b+hi Shiny+tsa phaT/ oM bi shwa karma aHbadzra kro d+ha kri d+ha ban+d+ha ka la sha a b+hi Shiny+tsa phaT/ces pa la sogs pa'i sngags kyis dbang bskur bar bya'o/ /de bzhin du dbang bskur bar bya'o zhes pa ni gong du gsungs pa'i phreng ba la sogs pa'i dbang yongs su rdzogs par bskur bar bya ba dang de'i rjes la thod pa dang rdo rje ral gri gsum gyis khro bo'i dam tshig la gnas par dbang bskur bar bya ba nyid do//de nas slob ma bdud rtsi rnam pa lnga za ru gzhug go/ /de nas de dag gi sgrub pa bshad de/ bdag nyid khro bor snyoms zhugs nas/ /de yi snying gar nyi ma bsgom/ / rang gi chos kyi yi ge las/ /khros pas yang dang yang spro zhing / /de nyid gcig tu bsgom par bya/ /de nas 'grub 'gyur gzhan du min/ /zhes gsungs pa ni de dag sgrub pa gsungs pa ste/ de la rang gi snying gar b+hUM las 'khor lo rtsibs bcu gnyis pa me'i phung po lta bur bsam par bya'o//de'i rtsibs rnams la khro bo'i tshogs rnams spros nas gnas par bya ba de dag dus kyi srin mo la sogs pa'i khro mo bzhis mchod pa'i khyad par gyis mchod cing de dag gi snying gar yang nyi ma'i dkyil 'khor la gnas pa'i thugs kyi yi ge rnams bsams la de dag thabs dang shes rab tu ldan pa'i yig 'bru gnyis kyis stong gsum gyi stong chen po thams cad khyab par bya'o//de nyid slar 'dus pa las bcom ldan 'das zhe sdang rdo rje'i bdag nyid gyur par byas pa las/ rnam par rtog pa thams cad sreg pa bdud dang log 'dren gyi tshogs thams cad 'joms pa'i me'i phung po chen po rang bzhin gyis 'od gsal zhing 'jigs pa'i nga ro dang ldan pa'i ting nge 'dzin gyis rtse gcig par gnas par bya ste/des ni khro bo'i rgyal po rnams nges pa nyid du 'grub par gyur pa nyid do//khro bo'i rgyal po las dngos su/ /gsod pa yin par bshad mod kyi/ /zhi ba dang ni dbang dang rgyas/ /'grub 'gyur gzhan du gdon mi za/ /rdo rje sems dpa'i ting 'dzin gnas/ /khro bo'i dkyil 'khor bsgom byas la/ / gdug pa'i sems can 'dzin byed cing / /mdor na dug rims gdon la sogs/ /de bzhin de dag thams cad ni/ /bla med thabs kyis mdzes par byed/ /khros nas snying las byung 'gyur bas/ /gsad pa'i las la bsam par bya/ /khros par gyur pas zhe sdang khams//sha dang khrag rnams 'jib byed cing / /de dag 'tsho ba 'phrog byed par/ /bsams na nges par brlag par 'gyur/ /zhes gsungs pa ni las kyi cho ga rnams gsungs pa ste/ de la khro bo'i rgyal po rnams kyi phrin las su gsod par byed pa yin yang //de nyid la mngon par brtson pa'i gang zag rnams kyis bde bar gshegs pa'i sprul pa yin pa'i phyir kha dog dang rnal 'byor gyi bye brag gis zhi ba dang rgyas pa dang dbang la sogs pa nges par 'grub par gsungs so/ /rdo rje sems dpa'i ting 'dzin gnas//zhes pa nas/ bsams na nges par brlag par 'gyur/ /zhes pa'i bar ni 'di ltar drag po'i las la sbyor ba gsungs pa ste/ de la bdag nyid rdo rje sems dpa'i sprul pa'i khro bo bsams nas gong du bshad pa'i khro bo'i dkyil 'khor spros te gang la bya ba'i bsgrub bya ting nge 'dzin gyis bkug la/de'i snying gar khro bo'i dkyil 'khor spros pas de'i sha dang khrag dang / rus pa dang / srog rnams gsol bar bsams pa ste/ de yang snga ma la de'i gzugs brnyan byas la snying gar yig 'bru bkod nas ma du lung ga'i khu bas bsgos nas bdag nyid kyi snying po'i sngags dang de'i ming du bcas pa bzla zhing /yun ring bar gzhibs pa ni thabs bla na med pa zhes bya'o/ /de ltar byas pa las gdon dang rims dang dug dang dgra la sogs pa thams cad nges par zla ba'am zhag gi grangs kyis brlag par 'gyur bar ni nges pa'o//khro bo 'jig rten gsum snang mdzad/ /zla ba 'dra ba'i dge bsam zhing / /'od zer 'byung ba mang po yis/ /de yi lus la dgang byas te//rims dang gdon dang dug la sogs/ /'od zer des ni phyung nas kyang / /de yi nad sogs gnod pa rnams/ /zhi bar bya phyir ring du dor/ /de nas hUM gi tshogs bzhag la/ /rdo rje lta bur lus bsams shing / /ha yis 'khor lo go cha bya/ / 'od zer chu yi dbang bskur na/ /de ni nges par bde bar 'gyur/ /zhes gsungs pa ni zhi bar bya ba'i las gsungs pa ste/ de la dang por bdag nyid khro bo khams gsum snang byed kha dog dkar po la bzhin rgyas pa'i gzugs su bsams nas/ de'i snying gar nyi ma'i dkyil 'khor la gnas pa'i hUM las 'od zer dkar po'i phreng ba spros la de'i rtse mo la hUM bltas te/des gang la bya ba'i phyir lus la khyab par dgab par bya'o/ /de nas 'od zer des nad dang gdon la sogs pa blangs nas dpag tshad la sogs pa'i sar dor bar bya zhing /de'i ming nas smos la sngags kyi snying po zhi ba'i tshig dang ldan pa 'bum la sogs par byas pa na de'i lus la gnod pa dang bral zhing bde ba'i lus su 'gyur ba nyid do/ /de nas phyis mi 'jug par bya ba'i phyir/ de'i snying gar hUM rab tu gnas par byas la de las de'i lus rdo rje lta bur bsam par bya zhing /ha na ha na zhes pa'i yi ge'i phreng ba la yang dang yang du btags pas de'i lus la bskon par bya ba dang / de nas hUM las spros pa'i khro bo'i bum pa bdud rtsis gang ba lngas khro bo'i gzugs su dbang bskur bar bya ste/des ni ji srid 'tsho'i bar du bde ba dang ldan par 'gyur ba nyid do/ /dbang du bya ba ni khro bo khams gsum gnod byed kyi ting nge 'dzin gyi lcags kyu lta bu'i 'od zer dmar pos bsgrub bya'i snying la spros pas drang bar bya ba dang /rgyas pa la ni khro bo khams gsum 'jig byed kyi ting nge 'dzin gyis 'od zer ser po rin po che lta bu spros pas/ 'jig rten gyi khams kyi 'byor pa thams cad blangs te de'i longs spyod du thim par bya ba nyid de de dag gis ni khro bo'i phrin las rdzogs par 'gyur ro//de nas rdo rje 'dzin rgyal pos/ /sbyin sreg yongs su rdzogs bya'i phyir/ /las rnams bzhi yi sbyin sreg bshad/ /zhi ba'i thab khung gsum ni legs byas la/ /zla ba rgyas pa'i 'od zer 'phro 'dra la/ /khru gang tsam mam yang na khru do pa//mi yi rgyal mchog rnams kyi nyis 'gyur tshad/ /de dag rim par legs shing mdzes byas la/ /zhes pa ni sbyin sreg gi cho ga gsungs pa ste/ de la bcom ldan 'das phyag na rdo rjes gong du gsungs pa'i sbyin sreg ni tshe 'das pa'i ched du gsungs la/'di ni 'tsho ba da lta ba la thun mong du gsungs par shes par bya'o/ /de la dang por zhi ba'i thab khung rab 'bring tha ma gsum ni khru gang ba dang do pa dang bzhi par bya ba ste/ de yang rigs kyi bye brag gis mtshon pa ni rgyal rigs la sogs pa la sbyar ro//de shin tu legs shing mdzes par bya ba ni zur la sogs pa kha dog gi khyad par gyis legs par bya ba nyid do/ /'khor lo'i steng du zla ba'i dkyil 'khor gyi/ /dbus su rdo rje rtse lngar gyur pa cig /'od zer dkar po'i phreng ba'i gzi can la//phyag rgya'i tshogs rnams thams cad bri bya ste/ /byams pa la sogs phyag mtshan zur bzhir bri/ /rgyal po bzhi yi ji bzhin phyag mtshan dang / /phyogs kyi bdag po de bzhin phyogs bri/ /khyab 'jug la sogs lha chen phyag rgya rnams//'khor lo lta bu nyid du bri bar bya/ /zhes gsungs pa ni phyag rgya'i tshogs bri ba gsungs te/ de la thab khung gi dbus su 'khor lo rtsibs bcu drug pa dkar po bris nas/ de'i dbus su rdo rje la sogs pa de bzhin gshegs pa lnga'i phyag rgya zla ba'i steng du bri bar bya'o//de bzhin du 'khor lo'i rtsibs la ni rdo rje sems dpa' la sogs pa'i phyag rgya dang / de'i mu ran gyi phyi rol du 'khor lo rtsibs sum cu rtsa gnyis pa la byams pa la sogs pa bcu drug dang / rdo rje sems dpa' la sogs pa lha mo bcu drug gi phyag rgya bri'o//de'i phyi rol du 'khor lo drug cu rtsa bzhi pa la rgyal po chen po bzhi dang lha chen po bzhi chung ma dang bcas pa dang / phyogs skyong bcu dang / gza' chen po brgyad dang / klu chen po brgyad dang / rgyu skar nyi shu rtsa brgyad la sogs pa'i phyag rgya rnams bri bar bya ba nyid do//dri zhim chus bkang kha dog dkar bsgyur la/ /dkar pos legs par dkris pa'i bum pa brgyad/ /dkar gsum gang ba'i gtor ma lha bshos dang / /bdug pa mar me me tog rnams kyang gzhag /mchod par bya ba'i phyir ni bla re dang //gdugs dang rgyal mtshan rnga yab la sogs gzhag /ces gsungs pa ni mchod pa'i yo byad gsungs pa ste de la bum pa kha dog dkar po la gos dkar pos dkris pa brgyad gzhag pa dang / zho dang mar dang 'o ma la sogs pas sbyar ba'i lha bshos dang /gtor ma 'byor tshad du gzhag pa dang / gdugs dang bla re la sogs pa mchod pa'i yo byad sna tshogs pa dang spos dang me tog la sogs pa 'jig rten pa'i longs spyod ci 'byor pa gzhag par bya ba nyid do/ /nang re ga bur dri zhim sna tshogs dang //tsan+dan la sogs byug pas lus byugs la/ /kha ni shar phyogs bltas te sbyin sreg bya/ /de bzhin gshegs pa'i gdan la 'dug bya'am/ /yang na rnal 'byor ldan pas sems dpa'i gdan 'dug ste/ /gos dang phreng mchog dkar pos brgyan par bya//zhes gsungs pa ni bdag nyid phun sum tshogs pa gsungs pa ste/ de la sbyin sreg 'bum ma them gyi bar du nang par re re ga bur la sogs pas lus byugs pa dang / gong du bstan pa'i rnal 'byor phun sum tshogs par bya ba nyid do//de bzhin gshegs pa'i gdan la 'dug pa dang / /zhes pa la sogs pa 'dug pa ni seng ge'i khri'i steng ngam yang na rnal 'byor gyis pad+ma 'dab ma bcu drug pa bsams pa la 'dug par bya ba nyid do/ /mar dang 'o ma sbrang rtsi dang / / nas kyi thug pa la sogs dang / /til dang mar dang kha ra dang / /yungs kar dang ni 'bras yos dang / /'bras chan nas dang gro rnams dang / /me tog shin tu dri zhim rnams/ /ga bur dang ni bsres nas kyang / /tsan+dan dkar pos bsgos pa dang //'dab bdun me tog 'bras bur bcas/ /zho dang ldan pa'i yam shing ni/ /de dag khung bu'i khyad par las/ /rang gi sor gyis gzhal bya ba/ /nyi shu rtsa bzhi yan chad mchog /sor mo bcu drug bar ma ste/ /tha ma bcu gnyis nyid du bshad/ / shin tu chung na sor brgyad de/ /bud shing zho dang ldan pa la/ /dri chus bskus par shes par bya/ /zhes gsungs pa ste/ sreg rdzas rnams gsungs pa ste/ /de la sreg pa'i rdzas gong du smos pa'i tshul gyis mar dang / sbrang rtsi dang / nas kyi thug pa zho dang sbyar ba dang /til dkar po dang / yungs kar dkar po dang / me tog dkar po dang / la du ba dang / mngar gsum dang / 'bras yos la sogs pa dang ga bur dang tsan+dan gyis bsgos pa gzhag par bya ba dang / yam shing ni me spor bar byed pa ste de ba da ru'am kha dog dkar zhing 'o ma dang ldan pa rnams la khung bu rab la ni sor nyi shu rtsa bzhi dang /'bring la ni bcu drug dang / tha ma la ni bcu gnyis dang brgyad du bya ba ste/ de las thung ba ni rnal 'byor gyi rdzas su rung ba ma yin no/ / de dag kyang dbyibs ni rtse mo ral gri ltar byas la rtsa ba zlum por bya ba nyid do/ /bud shing ni ka ma la sogs pa kha dog dkar zhing 'o ma dang 'bras bur ldan pa la ga bur la sogs pas bsgre bar byas pas zlum po nyid du brtsig par bya'o/ /bud shing de las byung ba'i me//sbar nas dri chus gtor nas ni/ /pad+ma dkar po zhal 'dra dge /pad+ma nor bu ril ba thogs/ /lag pa gza' skar mchog thogs pa/ /pad+ma dkar po'i gdan steng 'dug/ /de lta'i me lha bkug nas kyang / /ar+g+ha blangs te dbul bar bya//zhes gsungs pa ni las kyi me lha spyan drang ba ste/ de la dang por rang gi snying ga'i sa bon las 'od zer spros pas las kyi me sbar bar bya ba'i phyir las kyi me lha drang srong chen po kha dog dkar dmar du 'dug pa/ zhi ba'i cha lugs can lag pa bzhi pa la g.yas pa gnyis na gzar bu dang pad+ma'i steng na rin po che thogs pa/g.yon pa gnyis kyis ril ba spyi blugs dang / bgrang phreng thogs pa/ ra skyes kyi steng na pad+ma dkar po'i gdan la bzhugs pa spyan drangs la ar+g+ha phul nas me sbar nas shar lho mtshams su bzhugs su gsol bar bya'o//de nas zla rgyas dkar po la/ /bzhugs pa'i 'gro phan spyan drangs te/ /pad+ma'i steng du shar phyogs su/ /bsams te brtan par bzhugs par bya/ /zhes pa ni ye shes kyi me lha spyan drang ba gsungs ba ste/de yang rang gi sa bon las 'od zer spros pas khro bo khams gsum rnam par rgyal ba pad+ma'i steng na zla ba'i gdan la bzhugs pa sku mdog dkar po dang phyag mtshan gong du gsungs pa spyan drangs nas shar phyogs su bzhugs par bsam pa nyid do/ / de ltar bsams nas de nas ni/ /bsgrub bya rtag tu mdun bzhag ste/ /de yi nyes pa drangs nas ni/ /shin tu bsrings te spar bar bya/ /nang par sngar ni mtshan byas nas/ /dri zhim chu yis lus byugs la/ /bdud rtsi bzhin bsams sbyin sreg bya/ /zhes pa ni rnal 'byor pa gsungs te/de la gang gi bsgrub par bya ba de mdun du dmigs pa de'i nyes pa nad la sogs pa ting nge 'dzin gyis me'i nang du bcug ste/ oM ag+ha ye zhes pa dang / oM ti bi shAkya bud+d+ha si zhes pa la sogs pa'i sngags kyis mar khu blugs te me sbar bar bya ba nyid do//nang par sngar ni gtsang byas la/ /zhes pa ni sbyin sreg gi skabs su lus khrus byas la dri yis lus byugs nas/ rdzas rnams bdud rtsir byin gyis brlabs nas bsreg par bya ba nyid do/ /dam tshig 'di ni las kyi mchog /lha rdzas bdud rtsi bro lnga 'dis//dang por me lha brtag byas la/ /khro bo de ni de lus su/ /spyan drangs nas ni bzhugs par bsam/ /de nas dang por khro bo la/ /bsreg bya lan gsum dbul bar bya'o/ /de nas dkon mchog gsum la gsum/ /de nas me lha nyid la gsum//de nas rdo rje sems dpa' la/ /de nas lha rnams re re la/ /phul te bgegs la'ang de bzhin 'gyur/ /lha rnams yid 'ong mdzes pa yis/ /rnam par dag pas sbyin sreg bya/ /zhes gsungs pa ni gong ma la snyegs shing go sla ba'i phyir ma bshad do//de nas dang por khro bo yi/ /sngags kyis yam shing sbyin sreg bya/ /de nas gcig tu bsres nas ni/ /bdud rtsi'i sngags kyis btab nas kyang / /de bzhin sbyin sreg de 'og tu/ /brgya stong rnyed dam yang na ni/ brgya rtsa brgyad kyi bar du ni/ /khro bo nyid la dbul bar bya/ /zhes gsungs pa ni 'dir pho nya las kyi sbyin sreg gsungs pa ste/ de la khro bo chen po me'i nang du bzhugs su gsol te zhal bsil la sogs pas mchod nas/ rdzas lhag ma rnams gcig tu bsres la de bzhin gshegs pa 'od dpag med kyi sngags kyis bdud rtsir byas nas 'bum mam brgya rtsa brgyad kyi bar du khro bo'i sngags kyis dbul bar byas te/de ni khro bos bsgrub par bya ba'i nyes pa rnams myur du sel bar byed pa'i phyir sbyin sreg bya ba nyid do//de nas lus la dbang bskur zhing / /mnyam par gzhag pas bsrungs nas kyang / /mjug tu mngon par mchod nas ni/ /lha rnams thams cad gshegs su gsol/ /'dis ni zhi ba'i las rnams bya/ /'grub 'gyur 'di la the tshom med//ces gsungs pa ni yo byad rdzogs pa'i cho ga gsungs pa ste de la phyis nyes pas mi gos pa'i phyir bsgrub bya'i lus bum pa'i chus dbang bskur bar bya ste/ bde bar gshegs pa lnga'i sngags dang phyag rgyas gnas ji lta ba bzhin du bsrung bar bya ba nyid do//de nas mchod pa'i yo byad lngas legs par mchod nas rol mo rnam pa mang po dang / ting nge 'dzin gyis lha thams cad la bzod par gsol te/ gshegs su gsol ba byas nas 'gro ba'i don mdzad par zhu ba gsol bar bya ba nyid do//des ni zhi ba'i las the tshom mi za bar 'grub par 'gyur ba nyid do/ /gal te de yi sdig la sogs/ /sems kyis mnyam par ma bzhag pas/ /de tshe dngos grub ma gyur na/ /stong pa nyid du rnam bsgoms la/ /de nas de bzhin las byas na//gdon mi za bar dngos grub 'gyur/ /zhes gsungs pa ni phyis bskyar ba'i cho ga gsungs pa ste de la gang dag sdig pa'am nad la sogs pa zhi bar ma gyur pa na phyis chos thams cad stong pa nyid du bsams pas lha'i skur bskyed de/ snga ma ji lta ba bzhin du zhi ba'i las byas par 'gyur na lan gnyis pa'i stobs kyis nges pa nyid du 'grub par 'gyur ba nyid do//de dag gis zhi ba'i sbyin sreg rdzogs pa'o/ /'bras bur ldan pa'i nags tshal lam/ /yang na skyed mo tshal mchog gam/ /rgyal rigs khyim du rgyas pa ni//dga' ba'i sems kyis bya ba ste/ /khru do yang na khru bzhi 'am/ /de ltar mchog ni khru brgyad de/ /thab khung legs par brkos nas ni/ /rgyas pa'i las ni bya ba ste/ /dkyil 'khor stegs bu brtsig bya ba/ /chung ngu la ni khru brgyad de/ /bar ma la ni bcu gnyis nyid//mchog la bcu drug yang na ni/ /nyi shu rtsa bzhir shes par bya/ /mu khyud sor brgyad bcu drug gam/ /sum cu gnyis su bya ba yin/ /zhes gsungs pa ni rgyas pa'i sbyin sreg gsungs te/ de la gong du gsungs pa'i gnas ji lta ba rnams su stegs bu tha ma ni khru brgyad pa brtsig pa dang /bar ma ni bcu gnyis brtsig pa dang / rab la ni bcu drug gam nyi shu rtsa bzhir brtsigs nas de ji lta ba bzhin du thab khru do pa dang / bzhi pa dang / brgyad pa zur bzhi pa'am/ rin po che lta bu zur lnga pa'am/brgyad par byas la zabs su ni phyed brko bar bya zhing / de'i phyi rol gyi steng du mu khyud sor brgyad pa dang / bcu drug pa dang sum cu rtsa gnyis pa ni gong du gsungs pa'i rab 'bring la sbyar te bya ba nyid do/ /phyi yi dkyil 'khor de yi phyed/ /pad+ma sna tshogs brgyan par bya//dkyil 'khor dbus su rin chen dang / /pad+ma sna tshogs gzhag par bya/ /de yi dbus su bsgo ba ni/ /legs par bltas te phyed kyi tshad/ /khru bzhi pa'am khru brgyad pa/ /yang na dpal ster rin chen 'dra/ /mdor na 'jim pa ser po yis//khung mchog de ni bsgo bar bya/ /zhes gsungs pa ni dkyil 'khor bri bar gsungs pa ste/ de la dkyil 'khor gyi nang du ni pad+ma'i steng du rin po che 'bar ba 'od zer ser po dang ldan pa bri bar bya ba dang / de'i mu ran la rin po che pad+ma'i steng na 'dug pa pri bar bya'o//de'i phyi rol du gru bzhi pa la rim pa gsum pa la ni bde bar gshegs pa sras dang 'khor du bcas pa phyag rgya'i tshogs rnams tshon dmar ser gyis yongs su rdzogs par bri zhing de'i khung bu ni 'jim pa ser pos bsku ba ste lhag ma ni gong du bshad pa la snyegs so//gur gum la sogs bskus nas kyang / /de yi dbus su bri ba ni/ /tshon mchog ser po nyid kyis ni/ /rin chen zur brgyad 'bar ba bri/ /de nas tshon ni dmar ser gyis/ / rin chen pad+ma la sogs pa'i/ /phyag rgya'i dkyil 'khor 'khor yug tu/ /gnas pa nyid du bri bar bya/ /rim gnyis sam ni rim gsum mam/ /yang na rim pa brgyad ldan par/ /der ni sgo ba de dag sogs/ /phyag rgya'i gzugs su bri bar bya/ /zhes pa ni gong du bshad zin to//bum pa kha dog gser 'dra zhing / /dri zhim chu yis bkang ba la/ /shin tu mdzes pa bcu gnyis sam/ /sum cu gnyis sam bcu drug ste/ /dkri ba dar ni ser po la/ /kha rgyan yal ga me tog can/ /dri zhim me tog bdug pa dang //phreng ba mar me rnams dang ni/ /rgyal mtshan 'phan la sogs pa dang / /bla re gdugs rnams ser pos brgyan/ /zhes gsungs pa ni 'dir mchod pa'i yo byad gsungs pa ste/ de la 'dir rgyas pa'i sbyin sreg yin pa'i phyir bum pa la sogs pa kha dog ser pos bsgos pa dang /btsos pa rnams kyis brgyan par bya ba ste/ de la bum pa ni rnam par rgyal ba'i bum pa ma gtogs pa rnams mchod pa'i bum par shes par bya'o/ /bdag nyid gos dang rgyan rnams dang / /me tog la sogs ser pos brgyan//byang phyogs kha bltas 'dug nas ni/ /rin chen rgyal po rgyas mdzad pa/ /btso ma gser gyi mdog dang 'dra/ /yid bzhin nor bu rgyal mtshan mchog /yid kyis rnal 'byor rjes dran pas/ /las 'di dag kyang bya bar bshad/ /ces gsungs pa ni bdag dang rnal 'byor phun sum tshogs pa gsungs pa ste/de la bdag nyid gong du smos pa'i rgyan thams cad gser las byas pa ste gos dang me tog phreng ba yang rigs dang rjes su mthun pa las/ bdag nyid mngon par byang chub pa lngas bcom ldan 'das rin chen 'byung ldan du bskyed de/yid bzhin nor bu rgyal mtshan gyis/ /sems can thams cad kyi bsam pa rdzogs par mdzad pa ni rgyas pa'i las kyi gtso bo ste/ las ni 'di dag bya bar bshad/ /ces bya'o/ /de bzhin nyi zla ku be ra/ / gnod sbyin sde dpon dzam+b+ha la/ /gser gyi char ni rab 'bebs shing / /yid kyi 'dod pa skong mdzad pa/ /mdor na de yi 'od zer gyis/ /nges par dbang ni bskur bar bsam/ /de nas rgyal srid thob par gsungs/ /lus rgyas pa la smos ci dgos//zhes gsungs pa ni 'dir 'tsho ba da ltar ba'i las gsungs pa ste de la slob ma dbang bskur ba'i dus su dpal dang 'byor pa thams cad ster bar byed pa lha'i bu nyi ma dang zla ba dang / rnam thos sras dang / lha mo nor 'dzin dang / dzam+b+ha la rnams gser la sogs pa rin po che'i char gyis lag par 'bebs pa dang /de dag gi 'od zer gyis de'i lus la dpal dang longs spyod rgyas par byed pa sgom pa ni mthong ba'i chos 'di nyid la rgyal srid kyang thob par 'gyur na/ longs spyod rgyas pa lta smos mi dgos pa nyid do//rgyas par byed phyir de'i ming nas/ /smos te brgya phrag brgya rtsa brgyad/ /yang na de bzhin stong phrag ni/ /brgya rtsa brgyad du bzlas par bya/ /zhes gsungs pa ni de bzhin gshegs pa'i rtsa ba'i sngags la las kyi sngags che ge mo puSh+TiM ku ru zhes pa btags te grangs gnyis pa'i tshad du bzlas par bya ba nyid do//de nas sbyin sreg rab byas te/ /byang phyogs su ni seng ge yi/ /gdan gyi steng na rin chen dang / /pad+ma nyi zla'i gdan steng na/ /rdo rje rin chen rin chen mchog /rin chen dbal dang gzi brjid mchog /rdo rje bzhad dang rgyal ba yang / /rgyan rnams kun gyis brgyan nas ni/ /phyag ni mchod sbyin gzhol ba dang / /rin chen char yang 'bebs brtson zhing / /'od zer ser 'phro thams cad kyis/ /de la shin tu khyab byed bsam//zhes gsungs pa ni 'dir ye shes kyi tshogs rgyas par byed pa'i sems dpa' chen po bzhi yang dag par bsams te/ de la rgyas pa'i las yin pas na byang phyogs su seng ge'i gdan gyi steng du pad+ma 'dab ma brgyad pa la de'i steng du a las zla ba'i dkyil 'khor dang /de'i steng du raM las nyi ma'i dkyil 'khor bsams la/ de dag gi steng du rdo rje rin chen dang / rgyal mtshan dang / gzi brjid dang / rdo rje bzhad pa rnams sku mdog ser por snang ba la rgyan thams cad kyis brgyan pa phyag g.yas pa mchog sbyin pa la/g.yon pa dpal dang longs spyod rgyas par byed pa'i nor bu rin po che bsnams pas slob ma la rin po che'i char 'bebs shing de dag gi 'od zer gyis lus la khyab par bsam pa kho na'o/ /dung dang pi wang cang te'u dang / /sil snyan glu dang gar mchog gis//mdor na mchod pa byas nas kyang / /de yi 'og tu las brtsam mo/ /zhes pa ni ting nge 'dzin rnam pa gsum gyi mchod pa ji lta ba bzhin du byas la gong du bshad pa'i rim pa'i sbyin sreg bya ba'o zhes pa'o/ /khung bu'i khyad par nyid las kyang yam shing bud shing khyad par dbye//mdzub gang khu tshur bcangs khru gang / /chung ngu nyid du bshad pa yin/ /bar ma khru dor shes gsungs te/ /khru bzhi pa ni mchog yin pas/ /shing ni me tog 'bras bcas rigs/ /ya thog ma thog mar khu gzhug /'bru rnams thams cad 'byor pa dang / /me tog 'bras bu ser por ldan/ /mar dang sbrang rtsi bsres pa'am/ /phal cher dpal gyi 'bras bur ldan/ /zhes gsungs pa ni/ sreg rdzas yongs su gsungs pa ste/ de yang khung bu rab la sogs pa'i khyad par las dang bud shing khyad par bya ba dang /yam shing ni sor brgyad pa dang / brgyad gnyis dang / nyi shu rtsa bzhi rnams su bya ba ste/ de dag nyid bal po se'u la sogs pa 'bras bu dang bcas pa'i shing las bya ste rtse mo gnyis sbrang rtsir smyugs pa dang /til la sogs pa'i 'bru dang me tog la sogs pa'i mchod pa'i yo byad thams cad la tshon ser pos bsgo ba nyid do/ /mar dang sbrang rtsi bsres pa'am/ /zhes pa ni dpal dang shis pa bskyed pa'i rdzas mar dang sbrang rtsi bsres pa'i ri lu'am/ pa tra ka'i 'bras bu rnams bsres par bya ba nyid du gsungs so//me lha gser dang 'dra ba la/ /phyag bzhi pa ni 'dir de bzhin/ /pad+ma'i gdan bzhugs rnam brgyan pa/ /spyan drangs nas ni sbyin sreg bya/ /zhes pa ni 'dir las su bya ba'i rnal 'byor gsungs pa ste/ de la rang gi snying ga'i sa bon las las kyi me lha drang srong chen po sku mdog ser po la phyag bzhi pa/ phyag mtshan gong du smos pa ji lta ba bzhin du 'dzin pa lus rgyas pa spyan drangs la sbyin sreg bya ba nyid do/ /de yi lus la khro rgyal po/ /gzi can legs par spyan drangs nas//sngon bzhin dran byed de bzhin du/ /sbyin sreg yongs su brtag byas te/ /'bum mam nyis 'bum tsam gyis kyang / /de ni nges par rab tu 'grub/ /ces gsungs pa ni ye shes kyi me lha mchod pa gsungs pa ste/ de la gong du bshad pa ltar khro bo khams gsum rnam par rgyal ba sku mdog ser po gong du gsungs pa'i cha lugs can spyan drangs la 'gro ba gang dag dran par byas la/de'i tshe dang 'byor pa rgyas par bya ba'i phyir/ sbyin sreg grangs kyi tshad du bya ba ste/ de'i tshe dang bsod nams rgyas par 'gyur ba'i don nges par 'grub par gsungs so//'bum phrag brgya ni rgyal srid dam/ /longs spyod phun sum tshogs pa 'grub/ /de nas mjug tu 'od zer gyis/ /de la dbang bskur bsrung bar bya/ /de nas de ni rgyal 'gyur te/ /phyag na rdo rje bka' bzhin no//zhes gsungs pa ni 'dir de nyid kyi phan yon yongs su gsungs pa ste/ de la 'bum phrag brgyas ni mthong ba'i chos 'di nyid la rgyal srid thob par 'gyur ba dang / lha'i dbang po brgya byin dang mtshungs par longs spyod phun sum tshogs par 'gyur ba ni bcom ldan 'das phyag na rdo rjes gsungs so//yang 'dir sbyin sreg de nyid kyi las yongs su rdzogs pa dang / rdo rje rin chen la sogs pa'i rnal 'byor gyis de la dbang bskur ba dang bgegs la sogs pa'i gnod pa nyung ba'i phyir go cha'i bsrung ba byas pas ni de yi gnod pa dang bkren pa thams cad las rgyal bar 'gyur ba ste/de nyid gong du gsungs pa dang 'brel to/ /de dag gis ni rgyas pa'i sbyin sreg yongs su rdzogs pa ste/ da ni dbang gi sbyin sreg bstan pa'i phyir/ dbang ni chags pa'i sems dang ni//chags pa'i ting nge 'dzin gyis bya/ /chags pa bcom ldan rdo rje can/ /rdo rje chags pa de las byung / /khams gsum chags par byed pa'i phyir/ /pad+ma sems dpa' rtag tu chags/ /de bas 'dir ni de dag gi /las grub par ni bshad pa yin//zhes gsungs pa ste/ de la 'dir bdag nyid 'dod chags chen po'i bdag nyid bcom ldan 'das 'od dpag med du yang dag par bskyed de/ de gang la chags pa'i sems chen po dang 'dod pa dbang du byed pa'i ting nge 'dzin gyis bya ba ste/de nyid 'dir bcom ldan 'das kyis khams gsum po thams cad chags par bya ba'i phyir pad+ma rigs kyi bcom ldan 'das rtag tu chags pa chen por bzhugs pa ste/ de'i phyir de'i rnal 'byor gyis dbang gi las yongs su 'grub pa nyid do/ /chags dang mthun pa'i sa phyogs sam//chags par byed pa'i khyim du shis/ /btso blag mkhan nam zla mtshan 'dzag /khyim du chags pa'i las rnams bya/ /yang na rdo rje chags gnas sam/ /phyag na pad+mo'i gnas nyid dam/ /rtag tu rdo rje sems dpa'i gnas/ / bde chen gyi ni gnas nyid dang / /pad+ma ut+pal rdzing bu dang / /me tog tsan+dan tshal dang ni/ /me tog 'bras bu dmar tshal dang / /yid 'ong sems ni chags byed pa/ /zhes gsungs pa ni gnas phun sum tshogs pa bstan pa ste de dag ni bcom ldan 'das kyis dbang gi las la shin tu bsngags pa nyid de de dag ni go sla ba'i phyir ma bshad do//'dir ni stegs bu khru brgyad dam/ /de ltar bcu gnyis bcu drug rnams/ /byas nas de yi dbus su yang / /thab khung dkyil 'khor bya ba ni/ /khru gang yang na khru do'am/ /de ltar khru ni bzhi pa bya//zhes gsungs pa ni stegs bu brtsig pa gsungs pa ste/ de la rgyal po la sogs pa'i rim pas khru bcu drug pa dang thab khung khru bzhi pa la sogs pa bya ba nyid do/ /de nyid kyi dbyibs bstan pa'i phyir/ gzhu 'dra ba'am pad+mo'am/ /yang na rdo rje 'dra bar bya//mda' 'dra zla ba kham pa 'dra/ /zheng du mchu yi phyed kyi tshad/ /zhing gi phyed kyi tshad tsam du/ /thab khung zabs su brko bar bya/ /mu khyud sor mo bzhi par bya/ /nyis 'gyur pa ni nyis 'gyur te/ /tha ma mchog gi khyad par las/ /yam shing so sor nges par bya//zhes gsungs pa ste de la gzhu bdungs pa lta bu'am/ pad+ma'i 'dab ma 'dra ba'am/ rdo rje'i rtse mo ra gcig pa lcags kyu'i rnam pa lta bu'am/ ut+pala'i mda' sgro dang bcas pa lta bu'am zla ba kham pa lta bu la zheng dkyus kyi phyed dang zabs su zheng gi phyed bskor bar bya ste mu khyud phyi dang nang gnyis su sor brgyad du byas la rab 'bring gsum gyi bye brag gis yam shing sor brgyad pa la sogs par bya ba nyid do//yang na yam shing bsreg shing ni/ /zhi ba'i tshad du gsungs pa ste/ /shin tu dmar ba'i tsan+dan nam//yang na shing dmar gzhan yang rung / /me tog 'bras bu dmar po'am/ /btsag dang tsan+dan rgya skyegs sogs/ /le brgan tsi dang gur gum gyis/ /mdor na bud pa'i shing dang ni/ /yam shing la yang bskus nas kyang / /yungs kar kha dog dmar po dang //btsag dang mtshal dang de bzhin du/ /zangs kyi phye dang ske tshe dang / /til dang lan tshwa skyur rtsi dang / /la phug nyung rdog de bzhin te/ /khrag dang rdul ni chen po rnams/ /bsreg pa'i phyir ni bsdus nas kyang / /sngar bshad 'bras bu la sogs pa'i//khu bas yang nas yang bskus nas/ /khro bo'i sngags kyis byin brlabs te/ /ba dang ra las bzhos pa yi/ /bshigs ma thag pa'i mar sar dang / /mar dang til ni rnams kyis dgang / /ga bur la sogs bsgos nas kyang / /bdud rtsi btab ste gzhag par bya//zhes gsungs pa ni/ 'dir sreg rdzas gsungs pa ste/ de la yang na yam shing dang bsreg shing dag zhi ba'i tshad du bya ba dang / sreg rdzas bcu gcig po rgyud gzhan nas bsngags pa thams cad la btsag dang / tsan+dan dmar po dang rgya skyegs rnams kyis dmar por bsgos pa la de dag thams cad khro bo khams gsum rnam par rgyal ba'i sngags kyis btab nas yongs su bsrungs te/de'i rjes la bdud rtsi 'byung gnas kyi sngags kyis bdud rtsir byin gyis brlabs la dkyil 'khor gyi 'gram du gzhag par bya ba nyid do/ /de nas thab khung dmar po ni//byi ru'i sdong po 'dra ba la/ /bsnyams nas spos dmar la sogs dang / /gur gum dmar pos byug par bya/ /de nas kha dog dmar po yis/ /stug po nyid du bskus nas ni/ /gur gum ser po bsres pa yi/ /tshon gyis ri mo bri ba ni//thab khung nang du pad+ma bri/ /de steng mdar bcas gzhu bri ste/ /rtag tu thab khung khor yug ni/ /pad+ma nyid ni bri bar bya/ /gzhu yi dbyibs su rdo rje nyid/ /'khor yug tu ni gzhu yin te/ /gzhu yi phyi rol pad+ma nyid/ /bris nas de steng mda' yin te//lcags kyu mda' bcas gzhu yang bri/ /zhes gsungs pa ni dkyil 'khor bri ba gsungs pa ste de la thab khung byi ru'i sdong po lta bur sa dmar po las byas te rnal 'byor pa mnyam par gzhag pas gur gum mam rgya skyegs la sogs pa'i tshon dmar pos thab khung stug po nyid du bskus nas de'i steng du gur gum ser po dang /tsan+dan dmar po bsres pas bri bar bya ba ni thab khung gi nang du pad+ma 'dab ma brgyad pa bri'o/ /de'i lte ba la me tog gi mda' ltongs pa'i gzhu bris la gzhu'i dkyil mda'i rked par rdo rje rtse gsum bri bar bya'o//de nas thab khung nang gi mu khyud la pad+ma'i phreng ba bris nas de'i phyi rol gyi mu khyud la gzhu bris la de'i steng du pad+ma kha 'bus pa gsum bri ba'o/ /de nyid mde'ur byas pa'i mda' dmar po gzhu la ltongs pa bri bar bya'o/ /da ni phyag rgya'i tshogs dgod pa bstan pa ni/de yi phyi rol rdo rje dang / /lcags kyu mda' bcas gzhu dang ni/ /legs pa'i blo gros ut+pal bri/ /lho phyogs rin chen gzi brjid dang / /rgyal mtshan bzhad pa bzhugs pa ste/ /pad+ma ral gri 'khor lo dang / /gsungs pa rnams ni nub phyogs bri//las rab go cha mche ba dang / /mtshams sbyor rnams ni byang phyogs bri/ /grwa rnams su ni spos la sogs/ /phyag rgya'i gzugs su bri bar bya/ /zhes gsungs te de la pad+ma dmar po'i lte ba la gzhu'i dbus su rdo rje'i lte ba la hUM bris la de nyid 'khor lo'i dbus su chud par 'khor lo ser po bri'o//de bzhin du shar la sogs pa'i phyogs su rdo rje dang / rin po che dang / pad+ma dang / sna tshogs rdo rje rnams bri bar bya'o/ /thab khung gi phyi rol du ni 'khor lo rtsibs bcu drug pa dmar po bris la/ de dag gi steng du rim pa ji lta ba bzhin du shar la sogs par rdo rje dang //lcags kyu dang / mda' gzhu dang / ut+pal rnams bri'o/ /de bzhin du rin po che dang / nyi ma dang / rgyal mtshan dang / pad+ma'i 'dab ma lta bu'i spyan dang / pad+ma dang / ral gri dang / 'khor lo dang / pad+ma'i 'dab ma lta bu'i lce dang / sna tshogs rdo rje dang / ya lad dang / mche ba dang / khu tshur rnams bri bar bya'o/ /de'i zur bzhir ni cod pan dang / phreng ba dang / pi wang dang / dar dpyangs dang / pog phor dang / me tog dang / mar me dang / dung phor rnams bri bar bya'o//sgo rnams su ni lcags kyu la sogs pa'i phyag rgya ci rigs par bri bar bya ba nyid do/ /de nyid du bsreg pa'i rdzas ji lta bus bya snyam pa la/ me tog dmar po la sogs pas/ /shin tu snga ma bzhin mchod de/ /zhes gsungs te me tog dmar po dang /'bras bu dmar po dang / tsan+dan dmar po dang / til dmar po rnams dang gzhan yang rdzas thams cad la rgya skyegs khu bas bsgos par byas pa nyid do/ /rnal 'byor ci lta bus bya snyam pa la/ dpal ldan gos dang phreng ba dang / /dmar po'i dris ni bskus nas kyang //rtag tu thub pa nub bltas la/ /dmar thag ma chad las byas te/ /pad+ma dmar po'i gdan bsams la/ /rab chags phyag na pad+ma bsnams/ /g.yon du rdo rje chags pa la/ /g.yas su bde ba chen po ste/ /de bzhin bsams nas de dbus su//chu srin rgyal mtshan 'dzin pa gzhag /rdo rje gzhu dang g.yon 'gyings ma/ /me tog dmar pos rab brgyan la/ /dri dmar sogs kyis mchod par bya/ /zhes gsungs te/ de la bdag gong du bstan pa ltar gos dmar po la sogs pas brgyan nas nyi ma nub kar kha nub tu bltas te bcom ldan 'das 'od dpag med pad+ma'i gdan la bzhugs par bsams te/de'i g.yas phyogs su bde ba chen po kun du bzang po/ g.yon phyogs su spyan ras gzigs dbang phyug go/ /kun du bzang po'i g.yon du yum kun du bzang mo 'dod pa thams cad dbang du byed pa phyag na chu srin gyi rgyal mtshan 'dzin pa bsam mo//spyan ras gzigs kyi g.yon phyogs su sgrol ma 'dod pa'i mda' gzhu 'gengs pas 'gro ba rnams kyi snying la 'bigs pa gzhag par bya ba ste me tog dmar po la sogs pa mchod pa'i khyad par gyis yang dag par mchod par bya ba nyid do//de nyid du chags pa chen po'i me lha bkug pa ni/ /mda' dang gzhu thogs de bzhin du/ /pad+ma dmar dang dbyug bsnams pa'i/ /me yi lha ni bkug nas kyang / / de yi dbus su khro rgyal po/ /legs par gzhug ste gzhag par bya/ /gsungs pa ste 'di ltar rang gi sa bon las 'od zer dmar pos las kyi me lha kha dog dmar po phyag g.yas pa dang g.yon pa'i dang po gnyis na mda' dang gzhu thogs pa tha ma gnyis na pad+ma dang dbyug pa 'dzin pa bkug ste gzhag par bya'o//de'i rjes la dam tshig gi me lha khams gsum rnam par rgyal ba spyan drangs nas de'i lus la yang dag par bcug ste sbyin sreg gi las thams cad bya'o zhes 'dod do/ /de nyid ji lta bus gzhug par bya ba ni/ de'i lus rdo rje lcags kyu dang / /zhags pa dgug gzhug byas pa ni/ /spyi bo zhabs kyi drung du gzhag /de ltar bsams te snyoms zhugs pas/ /las bya ba ni gang yin pa/ /des ni lha yang dbang gyur na/ /mi dang lha min smos ci dgos/ /zhes gsungs te/de la rdo rje lcags kyu la sogs pa'i sngags dang phyag rgyas dgug pa la sogs pa byas nas bdag nyid kyi spyi bos phyag btsal bar bya'o/ /gong du gsungs pa'i rim pa de dag ni lha dang mi la sogs pa smos mi dgos par 'grub par 'gyur ba ste cho ga rgyas pa ni gong du bshad zin to//de nyid bsam pa 'di lta bus bya'o zhes bstan pa'i phyir chags pa'i sems su byas nas ni/ de yi 'od zer spyi bor dgang / /de bsrungs nas ni gtang bar bya/ /de nas rdo rje 'dod pa yis/ /lha rnams mchod de gshegs su gsol/ /de nas srung ba byas na ni//rdo rje 'dod pas rtag tu bzlas/ /zhes gsungs te/ de la bsgrub bya gang la chags pa chen po'i sems kyis bcom ldan 'das 'khor dang bcas pa'i 'od zer spyi bor 'dod pa thams cad dbang du byed par dbang bskur bar bya'o/ /de'i rjes la rdo rje'i go chas gnas lngar srung ba byas la gtang bar bya ba dang de nyid kyi las la ni/oM badzra rA ga sarba karma ba shaM ku ru zhes pa la sogs pa'i sngags kyis bzlas par bya ba ste bsnyen pa dang dbang bskur ba'i skabs su shes par bya ba dang / de nas rdo rje 'dod pa'i sangs rgyas thams cad 'dod pa chen po'i mchod pas rgyas par byas te chags pa chen po'i don du slar gshegs su gsol bar bya ba nyid de/des ni rgyal po gtum po'i bran bzhin du 'dod pa thams cad dbang du 'gyur ba nyid do/ /de dag gis ni dbang gi las bstan nas/da ni mngon spyod kyi las bstan par bya ba'i phyir/ dur khrod dag dang shan pa yi/ /khyim dang srin po'i gnas rnams su/ /mngon spyod kyi ni las bya ba/ /thab khung tha ma bar ma mchog /phyed dang gsum mam khru gsum mam/ /khru dgu ru ni byas pa las/ /stegs bu de yi tshad brtsigs te//gru gsum pa'am mdung rtse 'dra/ /lcags phye sol phye dug gis ni/ /bskus pa thab khung nag por bya/ /zhes gsungs te/ de la gong du gsungs pa'i gnas ji lta ba rnams su 'dir gsungs pa'i thab khung gi tshad la lcags phye la sogs pas bskus pa nag po dang rtsub par bya ba nyid do//stegs bu de yi tshad brtsigs te/ /zhes pa ni thab khung las mtshon pa'i tshad de/ de la thab khung las nyis 'gyur du stegs bu brtsig par bya ba kho na'o/ /dkyil 'khor 'di lta bus bri bar bya ba kho na zhes bstan pa'i phyir/ dbus su rdo rje rtse dgu pa/ /nag po shin tu 'bar ba bri/ /mu ran steng du rtse gsum dang / /rgya gram pa yi rdo rjes mtshan/ /de yi phyi rol mu khyud la/ /dbyug pa dang ni dgra sta dang / /ral gri shin tu 'bar ba bri/ /de yi phyi rol keng rus te/ /bde gshegs la sogs phyag rgyas mtshan//zhes gsungs pa ste/ de la thab khung nang du rdo rje rtse dgu pa kha dog nag po gcig bri bar bya'o/ /de'i zur gsum du ni mtshon rtse gsum pa gsum bri'o/ /de'i logs gsum la ni rdo rje rgya gram gsum bri'o/ /de'i mu khyud nang ma la ni dbyug pa dang / rdo rje rtse gsum pa dang /dgra sta rnams so/ /de'i mu khyud kyi steng du ni ral gri dang me 'od nag po bri ba dang / de'i phyi rol du ni keng rus kyi steng du rim pa gsum mam bzhi la bde bar gshegs pa la sogs pa'i phyag mtshan rnams rim pa dang po la lnga dang / gnyis pa la bcu drug la sogs pa bri bar bya'o zhes gsungs so//me lha 'di lta bu bya'o zhes bstan pa'i phyir/ dud srin mdog 'dra drang srong mchog /mi ro'i steng bzhugs rtse gsum dang / /gzar bu phreng ba ril bar ldan/ /de lta'i me lha spyan drangs nas/ /lhor bltas khros pa'i sems kyis bsreg /ces gsungs te/ de la las kyi me lha kha dog nag po mi ro la zhon pa phyag bzhi pa rtse gsum pa dang / gzar bu dang ril ba thogs pa spyan drang ba gzhan du bstan pa ltar ye shes kyi me lha spyan drangs pa bcug ste/ khros pa dang bcas pas de nyid kyi rnal 'byor gyis bsreg par bya'o//de nyid kyi rgyu 'di lta bus bya'o zhes bstan pa'i phyir/ /shin tu gdug cing tsher mar bcas/ /bsreg shing yam shing byas nas kyang / /sha dang khrag dang lcags phye dang / /rus phye dug dang ske tshe dang / /dri chen dri chu la sogs pa'i/ / rdzas rnams kun la dug gis ni/ /bsgos pas lan grangs gsum bsregs nas/ /de yi longs spyod 'byor pa dang / /gnyen dang 'khor dang bran rnams dang / /bu dang chung mar bcas pa rnams/ /spangs te srog dang bral nas ni/ /sdug bsngal mi bzad myong bar 'gyur//zhes gsungs te/ de la shin tu gdug pa'i seng ldeng la sogs pa la bsreg shing dang yam shing byas la/ de nyid kyi bsreg pa'i rdzas sha dang khrag dang rus phye dang / seng ldeng gi tsher ma dang / bshang ba dang / gci ba dang / til nag po la sogs pa'i rdzas thams cad la dug gis bskus nas nyi ma phyed nas kha shar lhor bltas te de'i ming rus dang bsres nas bsreg par bya ba nyid do//des ni bsgrub bya gang dag 'jig rten gyi 'byor pa thams cad dang bral nas sdug bsngal chen po nyams su myong bar 'gyur ba ni nges par shes par bya ste de dag gis ni mngon spyod kyi las yongs su rdzogs nas/de ltar bshad pa'i rgyud yongs su rdzogs nas/ da ni de nyid kyi ston pa po bcom ldan 'das phyag na rdo rje la 'khor 'dus pa'i tshangs pa la sogs pas sku gsung thugs kyi yon tan chen po'i sgo nas bstod pa 'di lta bu'o zhes bstan pa'i phyir/de nas brgya byin tshangs sogs lha/ /phyag 'tshal yang nas yang du ni/ /rin chen gdugs sogs mchog gis ni/ /mchod pa sna tshogs byas nas kyang / /phyag na rdo rje rgyal spyan la/ /dga' ba'i bsam pas stod byed pa//zhes gsungs te de la 'dir tshangs pa la sogs pas bcom ldan 'das kyis bdag dang gzhan gyi don phun sum tshogs pa chen po yongs su rdzogs par mdzad pa'i phyir drin chen po de nyid la mchod pa'i khyad par mchod pa ni/ rin po che'i gdugs la sogs pa 'dod pa'i yon tan phun sum tshogs pa thams cad kyis bdag dang gzhan gyi mngon par mchod nas 'gro ba rnams kyi mun pa bsal ba'i spyan gyi rgyal po phyag na rdo rje la bstod pa bya'o//de nyid kyi bstod pa ji lta bu yin zhe na/ sangs rgyas kun pas sngar sangs rgyas//mi shes dri ma kun bcom pa/ /zhes pa la sogs pa gsungs te/ de la 'dir ni sku gsung thugs kyi phrin las rnam pa bzhi mdzad pa nyid de/ de la sangs rgyas kun pas sngar sangs rgyas pa ni thugs de nyid rnam par rtog pa thams cad dang bral ba de bzhin nyid de/ de nyid la gnyis su med pa'i ye shes kyi rdo rje ngag gi yul las 'das pas dmigs pa nyid de/ de nyid sangs rgyas thams cad kyi rdo rje 'dzin pa yang yin la/ rgyal po yang yin pa dang / sku gsum mngon par gsal ba nyid kyi phyir/ rdo rje rdo rje 'dzin rgyal po/ /zhes bya ba la sogs pa'i sh+lo ka gcig tu bsdus so//de nyid las longs spyod rdzogs pa'i sku yan lag 'byung ba'i phyir rdo rje yan lag ces bya'o/ /longs spyod rdzogs pa'i sku de nyid gzi brjid chen po dang ldan pa dang / rnam par rtog pa 'joms pa'i shugs dang ldan pa dang /bdud kyi tshogs 'joms pa'i mtshon cha dang ldan pa nyid dang / phyag rgya chen po'i gzugs su zhugs pa nyid kyis/ rdo rje yan lag rdo rje mchog /ces pa la sogs pa'i tshigs su bcad pa gcig bsdus so/ /longs spyod rdzogs pa'i sku de nyid kyis nyon mongs pa tha ma 'bigs par byed pa de nyid dang /srid pa'i dra ba rab tu gcod pa nyid dang / chos dang zang zing gi longs spyod rgya mtsho lta bur mnga' ba nyid dang / thabs dang shes rab las byung ba nyid kyis/ rdo rje mda' ste rab 'bigs pa/ /zhes pa tshigs su bcad pa gcig bsdus so//de nyid kyi sprul pa'i sku'i sgo nas bstod pa ni sprul pa'i sku nyid smon pa med pa'i ting nge 'dzin las byung ba nyid dang / phyogs bcu dus gsum thams cad du 'gro ba rnams kyi don mdzad pa nyid dang / sna tshogs par sprul pa'i phyir dang / sems can thams cad kyi bdud kyi tshogs 'joms shing ye shes skyed pa'i rgyur 'gyur ba nyid kyi phyir/sangs rgyas byang chub rang byung ba/ /zhes pa la sogs pa'i tshigs su bcad pa gcig bsdus so/ /sprul pa'i sku de nyid kyi thabs shes rab stobs kyis 'gro ba'i don byed pa nyid dang /rigs lnga'i rnam par dbye ba las srid pa'i dra ba 'joms pa dang / 'khor ba'i 'jigs pa chen po las srung ba nyid kyi phyir na/ rdo rje pad+mas rnam sbyong ba/ /zhes pa la sogs pa'i tshigs su bcad pa gcig bsdus so/ /sprul pa'i sku de nyid kyis sems can thams cad dbang du bsdus nas don byed pa nyid dang /'jigs pa chen po'i gzugs kyis gdul bar dka' ba rnams 'dul ba nyid dang / gnod pa chen po'i rnam pas 'jigs pa'i gzugs can 'dul ba nyid kyi phyir/ rdo rje lcags kyu don yod byed/ /ces bya ba la sogs pa'i tshigs su bcad pa gcig bsdus so//sprul pa'i sku de nyid kyis sems can rnams thugs rje chen po nyid kyis yongs su 'dzin pa nyid dang / sems can rnams kyi bdud du gyur pa rnams 'jigs par byed cing de dag nyid dga' bar byed pa nyid dang / 'jigs par byed pa rnams 'jigs par byed pa nyid dang / yongs su sgrub pa nyid la dngos grub kyis dga' bar byed pa nyid kyi phyir/ rdo rje gdon de che ba'i mchog /ces pa la sogs pa tshigs su bcad pa gcig bsdus so/ /sprul pa'i sku de nyid kyis legs pa chen po 'gro ba rnams dga' bar mdzad pa nyid dang /de nyid 'jig rten dang 'jig rten las 'das pa thams cad las mchog tu gyur pa nyid dang / dga' ba chen po nyid dang / de bzhin du zhi bas 'dul ba'i sems can rnams la dga' ba'i bdag nyid kyis dbang du byed pa nyid dang /sangs rgyas kyi 'od zer stug po kun gyis mi shigs pa nyid kyi phyir na/ rdo rje legs pa dgyes mdzad pa/ /zhes pa la sogs pa'i tshigs su bcad pa gcig bsdus so/ /sprul pa'i sku de nyid kyis dam tshig chen pos nam mkha' dang mnyam par thams cad khyab pa nyid dang /de nyid kyis sems can rnams kyi re ba yongs su rdzogs par byed pa nyid dang / rdo rje rin po che'i rgyu las byung bas dbang bskur ba nyid de/ rdo rje rgyal mtshan chen pos sems can thams cad kyi dpal du gyur pa nyid kyi phyir dang nam mkha' dang mnyam pa ste zhes pa la sogs pa'i tshigs su bcad pa gcig bsdus so//de dag gis thugs la bstod pa ste sku gsum dang phrin las rnam pa bzhi yang bsdus so/ /da ni gsung la bstod pa ste/ sprul pa'i sku de nyid kyi ye shes lngas gnyis su med pa'i ye shes rdo rje lta bu bskyed pa las sangs rgyas kyi gsung chen po nyid dang /de nyid la 'jig rten pa'i lha thams cad kyis mchod pa nyid dang / gdug cing skrag par byed pa'i yig 'bru bzhi 'don pa nyid dang / de nyid sgra chen pos gdug pa rnams kyi snying 'joms par mdzad pa'i phyir/rdo rje ye shes ye shes che/ /zhes pa la sogs pa'i tshigs su bcad pa gcig bsdus so/ /gsung de nyid kyis chags pa chen po'i sems can gdul ba'i ched du 'dod pa chen po'i chos gsung ba nyid dang / chags pa chen po'i sems de nyid kyis snyigs ma'i dus ngan gyi sems can nyon mongs pa'i dbang du gyur pa rnams yongs su sbyong ba nyid dang /de nyid kyis rnam par rtog pa'i rgyun gcod pa nyid dang / nam mkha'i glog lta bur myur zhing gsal ba'i las gsung ba nyid kyi phyir/ rdo rje 'dod pa 'dod pa che/ /zhes pa la sogs pa'i tshigs su bcad pa gcig bsdus so//gsung de nyid kyis gdug pa'i tshogs sreg par byed pa'i hUM gi sgra grag pa gsung ba nyid dang / de nyid kyis mun pa'i tshogs snang bar byed pa nyid dang / zhal de las ye shes kyi me dpung chen po 'bar ba nyid dang / zhi ba dang bral ba'i gsung gsung ba nyid kyi phyir/ rdo rje me ste drag po'i zhal/ /zhes pa la sogs pa'i tshigs su bcad pa gcig bsdus so/ /da ni sku'i sgo nas bstod pa ste/ de la sangs rgyas kyi spyan me mdog dang 'dra bas gdug pa rnams 'jigs par mdzad pa nyid dang /zhal khro gnyer sna tshogs ston par mdzad pa nyid dang / phyag na rdo rje rtse dgu pa las sprul pa'i gzugs kyis mtshon cha sna tshogs sprul pa nyid dang / zhi ba la sogs pa'i zhal dang / de dang mthun pa'i sku ston pa nyid kyi phyir dang / dbu skra kham pa gyen du 'khyil pa la rgyan rab tu 'khyil pa nyid kyi phyir/spyan dmar 'jigs par mdzad pa po/ /zhes pa la sogs pa'i tshigs su bcad pa gcig bsdus so/ /bcom ldan 'das kyi dbu skra dmar ser rab tu 'khyil pa la/ chun 'khor la sogs pa'i rgyan rab tu 'khyil pa nyid dang / thugs las sprul pa'i sku sna tshogs pa'i don mdzad pa nyid dang / gdug pa rnams 'dul ba'i phyir khro bo chen po la sogs pa'i skur ston kyang thugs rje mnyam pa nyid kyi rnam par rtog pa ma lus par spangs pa nyid dang / mi shes pa'i rab rib 'joms pa nyid kyi tshangs pa chen po'i gtsug tor ltar bzhugs pa nyid kyi phyir/'khyil zhing rgyan yang 'khyil pa la/ /zhes pa la sogs pa'i tshigs su bcad pa gcig bsdus so/ /nyon mongs pa rnams kyi rtsa bar gyur pa dang 'dod chags dang zhe sdang dang de dang nye ba'i nyon mongs pa rnams rab tu spangs pa nyid dang /brgya byin dang tshangs pa dang khyab 'jug dang drag po rnams 'joms par mdzad pa nyid dang / bcom ldan 'das de nyid sems can rnams la thugs rje chen pos chags shing nyon mongs pa'i tshogs 'joms par mdzad pa la thugs rab tu drag pa nyid de/de nyid gdod ma nas rtog pa dang bral zhing zhi ba'i phyir/ 'dod chags zhe sdang dri mthar mdzad/ /ces pa la sogs pa'i tshigs su bcad pa gcig bsdus so/ /'khor ba dang nyan thos dang rang sangs rgyas kyi mya ngan las 'das pa rnam par sbyang ba nyid dang /bla na med pa'i byang chub chen po la gnas pa nyid dang / sa bcu'i dbang phyug chen po nyid sangs rgyas yin la de nyid la rdo rje 'dzin pa chen po rang gi ngo bor bzhugs pa nyid dang / de nyid dus gsum gyi sangs rgyas thams cad kyi bdag nyid skur bzhugs pa nyid kyi phyir/srid dang srid min rnams sbyong ba/ /zhes pa la sogs pa'i tshigs su bcad pa gcig bsdus so/ /bcom ldan 'das nyid gnyis su med pa'i ye shes kyi rdo rje las skyes pa rdo rje sems dpa'i skur bzhugs pa nyid dang / de nyid thub pa chen po kun du bzang po'i sku nyid dang / mtshan bzang po sum cu rtsa gnyis dang / dpe byad bzang po brgyad cu yongs su rdzogs pa nyid dang / rdo rje 'dzin pa chen po dri ma ma lus pa las rnam par dag pa'i phyir/ rdo rje las skyes rdo rje sems/ /zhes pa la sogs pa'i tshigs su bcad pa gcig bsdus so//de ltar tshangs pa la sogs pas bcom ldan 'das phyag na rdo rje la sku gsum dang sku gsung thugs dang / phrin las rnam pa bzhi'i sgo nas yang dag par bstod nas/ da ni bstod pa'i tshigs de nyid la mngon par sbyor ba'i phan yon yongs su bstan pa ni/gang gis 'di bris bklags gyur tam/ /zhes pa la sogs pa gsungs te/ de la gang bdag gis bstod pa 'di nyid nyan tam/ 'chang ngam/ klog gam/ 'dri'am/ kha ton du 'don pa yang dag par ston pa na de nyid bcom ldan 'das la rab tu dad pa nyid kyis bcom ldan 'das kyi thugs rje chen po las byung ba'i dngos grub thob pa ni bcom ldan 'das phyag na rdo rje nyid 'dra bar gyur pa kho na'o//bcom ldan 'das kyis de skad ces bka' stsal nas zhes pa ni 'di ltar tshangs pa la sogs pas bstod nas mthar thug par gyur kyang /bcom ldan 'das kyis dus phyi mar chos kyi 'khor lo lan gnyis pa bskor ba'i phyir bcom ldan 'das kyis de skad ces bka' stsal nas zhes pa nyid do/ /bshad pa'i rgyud 'di nyid kyis ngan song thams cad sbyong ba'i rgyud yongs su rdzogs pa'i mthar thug par gyur pa ni brgya byin dang /tshangs pa la sogs zhes pa rnams gsungs te/ de la brgya byin dang tshangs pa la sogs pa bcom ldan 'das rnam par snang mdzad chen po'i 'khor du 'dus pa thams cad bcom ldan 'das rnam pa gsum gyis gsungs pa la mngon par dga' ste rjes su yi rang ngo zhes bya ba nyid do//bdag gis mdzes pa'i rgyan mchog bla na med/ /dri med skyon bral 'grel 'di byas pa las/ /bsod nams dri med rgya chen gang thob des/ /'gro kun rdo rje 'dzin pa'i go 'phang myur thob shog /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas ngan song thams cad yongs su sbyong ba'i 'grel pa mdzes pa'i rgyan zhes bya ba slob dpon chen po rdo rje go cha'i slob ma kun dga' snying pos mdzad pa rdzogs so// // 'grel pa 'di yi tshad gyur pa/ /tshigs su bcad pa drug stong dang / /bcu bzhi dag ni yod pa ste/ /yi ge mkhan la phan phyir ro/ /dpal ngan song thams cad yongs su sbyong ba'i rgya cher 'grel pa 'di dpyid zla ra ba'i yar gyi ngo'i gza' phur bu skar ma rgyal gyi nyin par mchog gi rje btsun rgyal po chen po dpal gyi dbang phyug 'od zer go cha'i lha khang du shAkya'i dge slong rin chen 'byung gnas bzang po rang gis bris so/