CLOSE WINDOW

D2625
བོད་ཡིག

/[ ]@##/ /rgya gar skad du/ Ar+ya sarba durga ti pa ri sho d+ha ne te dzo rA dzA nA ma kalpa rA dza s+ya TI kA/ bod skad du/ 'phags pa ngan song thams cad yongs su sbyong pa gzi brjid kyi rgyal po zhes bya ba cho ga zhib mo'i rgyal po chen po'i rgya cher 'grel ba/dkon mchog gsum la phyag 'tshal lo/ /dpal rdo rje sems dpa' la phyag 'tshal lo/ /dpal lha mo skul byed ma la phyag 'tshal lo/ /gang gis thugs rje dpag med dang / /shes rab dpag med stobs kyis ni/ /'gro ba phongs pa kun skyob pa//bsam yas mthu mnga' der bdag 'dud/ /'gro ba'i ngan 'gro ma lus zad mdzad mtho ris bde stsol ba/ /gang 'dir rdo rje'i rigs 'khrungs de la'ang rab tu dang bas phyag 'tshal te/ /dpal ldan rgyud chen cho ga mang po'i rin chen mdzod gyur pa/ /ngan song kun sbyong zhes bya 'di ni bdag gis 'bad pas dbye//rgyud chen rab zab mtsho chen 'dra ba 'di la bdag 'dra'i blos/ /gting dpag rab tu dka' zhing 'khrul ba'i dgra tshogs rab mang yang / /rang gis dad dang dman pa'i mi rnams dga' ba bskyed pa'i phyir/ /gzhung gi rgya mtshor bdag 'jug 'di la brtser ldan rnams kyis skyobs/deng sang 'gro rnams shes rab zhan cing mngon pa'i nga rgyal ldan/ /de dag rnams kyis rin chen rgyud 'di ma rungs byas par mthong / /de phyir log par smra ba tshar gcod mkhas pa dga' skyed 'di/ /blo ldan lung dang rigs pas 'jal rnams gus pas nyon//de la yang dag par rdzogs pa'i sangs rgyas rnams ni/ brgya lam na res 'ga' zhig 'jig rten du 'byung ba ni shing u du m+bA ra'i me tog dang 'dra ste/ ji skad du rnam par snang mdzad mngon par byang chub pa'i rgyud las gsungs pa/ 'jig rten du ni kun mkhyen rnams//u du m+WA ra'i me tog bzhin/ /brgya lam na ni lan 'ga' zhig /'byung 'gyur yang na mi 'byung ngo / /zhes so/ /de bzhin du 'phags pa gzhi thams cad yod par smra ba'i sde pa'i so sor thar pa'i mdo las kyang / sangs rgyas zhes bya'i sgra 'di yang / /'jig rten dag na rab tu dkon//zhes gsungs so/ /brgya lam na 'byung ba'i dus ni bzhi ste/ rdzogs ldan gyi dus dang / gnyis ldan gyi dus dang / gsum ldan gyi dus dang / rtsod pa'i dus so/ /de la bdag cag gi bla ma yang dag par rdzogs pa'i sangs rgyas shAkya'i skyes mchog 'di ni thugs rje chen pos bskul ba'i smon lam gyi mthus/snyigs ma lnga dang ldan pa'i rtsod pa'i dus su 'dam gyi pad+ma bzhin du 'byung ste/ ji skad du 'phags pa lang kar gshegs pa las/ nga dang gzhan dag byas dus de/ /shAkya seng ge rtsod pa'i dus/ /zhes gsungs so/ /rtsod pa'i dus 'di ni lta ba'i snyigs ma la gnas pas/lta ba tha dad pa drug cu rtsa gnyis kyis glags pa yin pa'i phyir/ theg pa sna tshogs pas gdul bya dag 'dul gyi/ rdzogs ldan la sogs pa'i dus kyi sems can ltar/ theg pa gcig gis ni 'dul bar mi nus te/ rta cang shes dang / dmu rgod dag lta bu'o/ / de'i phyir yang dag par rdzogs pa'i sangs rgyas kyis/ mdo sde dang gsang sngags kyi lam ston pa'i gzhung rab tu mang po gsungs la/ 'jig rten pa'i lam gyi ngo bo bstan pa'i gzhung yang rab tu rgya cher gsungs mod kyi/ de dag gis 'dul ba ma yin pa lha'i bu nor bu dri ma med pa la sogs pa'i ched du/yang 'phags pa ngan song thams cad yongs su sbyong ba zhes bya ba'i rgyud kyi rgyal po chen po 'di sum cu rtsa gsum gyi gnas su dga' ba'i tshal der gsungs so/ /der gsungs pa'i rgyud 'di ni dbang po'i rim pa gsum gyis nyan pa la sogs par byed de/'di ltar sngon gyi byed pas kyang dbang po tha dad de/ nye rgyal dang pang nas skyes lta bu mgo smos pas go ba dang 'phags pa cang shes kauN+Di n+ya la sogs pa'i lnga sde bzang po la sogs pa don rnam par phye bas go ba dang / sa nu la sogs pa don rnam par spros pas go ba dag dang /'phags pa lam bstan la sogs pa tshig lhur len pa'i gang zag dag srid pa'i phyir ro/ /rkyen gyis kyang de tha dad de/ ji skad du/ ma ga d+hA pa zur gyis go/ /ko sa la pa yig phyed kyis/ /pany+tsa la pa brjod na shes/ /nub mi ma smras ni shes so/ /zhes brjod pa lta bu ste/de'i phyir dbang po rno ba dang 'bring dang / dbang po rtul po de dag gi dbang du byas te/ rgyud 'di tshul gsum gyis bshad par bya'o/ /mgo smos bas go ba'i dbang du byas te/ don dang ldan pa'i mtshan rnam par gzhag pa dang / don rnam par phye bas go ba'i dbang du byas te/ rgyud kyi don rnam par dbye ba dang / rnam par spros pas go ba'i dbang du byas te/ yan lag lngas gzhung bshad pa'o/ /tshig la 'chi bdag kyang / thugs rje'i dbang gis mtshan 'dzin pa la sogs pas sbyor bar dgongs pa nyid ji lta bar yul du byas pa'o/ /ji skad du/ mkhas pa 'jig rten 'das sam mya ngan 'das kyang rung //chos nyid skyon med chos rnams ston pa 'di gnas te/ /byang chub sems dpa' de bzhin nyid 'di rjes su rtogs/ /de'i phyir de bzhin gshegs shes sangs rgyas mtshan gsol to/ /zhes gsungs pa dang / gzhan yang / 'du shes tsam yang spangs pa'i phyir/ /rang gi ngo bor bstan du med/ /ye shes rang gcig ces bya ba/ /'di ni de bzhin gshegs shes bya/ /zhes gsungs te/ de bas na tshig 'di gnyis kyis ni me long lta bu'i ye shes bstan la/ ye shes de yi mtshan nyid ni/ /mdo sde'i rgyan las ji skad du//me long ye shes mi g.yo ste/ ye shes gsum po de la brten/ /mnyam pa nyid dang so sor rtog /bya ba grub pa kho na'o/ /me long ye shes nga yi med/ /yongs su ma chad rtag tu ldan/ /shes bya kun la ma rmongs la/ /rtag tu de la mngon phogs min/ /ye shes kun gyi rgyu mtshan phyir/ /ye shes 'byung gnas chen po 'dra//longs spyod rdzogs pa'i sangs rgyas nyid/ /ye shes gzugs brnyan 'byung phyir te/ /zhes so/ /de'i phyir yang dag par rdzogs pa'i sangs rgyas kyi ye shes ni chos kyi dbyings dang dbyer med pa'i tshul gyis yul du mdzad la/ kun rdzob pa'i dngos po ji ltar snang ba yang skad cig la ma lus par snang zhing snang ba la mngon du phyogs pa yang med de/de'i phyir sangs rgyas kyi yul bsam gyis mi khyab pa'o/ /gal te ye shes 'di de lta bu ma yin du zin na/ /rnam pa thams cad mkhyen pa ma yin par 'gyur la/ ye shes 'di lta bu sgyu ma tsam du mi gnas ni/gal te bdag gcig med du zin na ni/ de yi spyod yul zhi ba stong pa'ang med/ /rang 'byung rdul rnams shin tu bsal ba yi/ /bder gshegs rnams kyi sku yang ji ltar 'byung / /zhes 'phags pa sdong po bkod pa las gsungs pa'i nyes par 'gyur ro/ /bskal pa mang por de lta bur goms par byas pa'i phyir/rgyu'i byed pa'i mthu las rjes su dpag par bya'o/ /dgra bcom pa zhes bya ba ni/ gzung ba dang 'dzin pa la sogs pa'i rnam par rtog pa byang chub sems dpa' rnams kyi lam skye ba'i bar chad ji snyed pa ni dgra zhes bya ste/ dgra dang chos mthun pa'i phyir ro//ye shes gang gis spangs pa de ni bcom pa ste/ 'dis ni mnyam pa nyid kyi ye shes bstan la/ ye shes de'i mtshan nyid kyang / mdo sde rgyan las/ bsgom pa dag pas sems can la/ /mnyam pa nyid kyi ye shes 'dod/ /mi gnas zhi bar zhugs pa ni/ / mnyam nyid ye shes yin par 'dod/ /dus rnams kun du byams pa dang / /thugs rje chen po dag dang ldan/ /sems can rnams la mos pa bzhin/ /sangs rgyas sku ni nges par ston/ /zhes gsungs so/ /yang na ye shes 'di dang ldan pa ni mchod par bya ba yin pas na/ a ra had ces bya ba ni mchod par bya ba'am/yang na ye shes 'di dang ldan pa ni chos kyi rgyal por 'os na a ra had ces bya ba ni 'os pa'o/ /yang dag pa'i sangs rgyas zhes bya ba la/ chos rnams kyi dngos po ji lta ba bzhin du mkhyen pa la yang dag par ro/ /saM zhes bya ba ni saM pur+Na ste rdzogs par ro//de'i phyir saM ni chos rnams kyi dngos po ji snyed pa mkhyen par ro/ /sangs rgyas zhes bya ba ni/ rab tu rtogs pa ste skyes bu legs par sad pa bzhin no/ /de'i phyir yang dag par zhes bya ba dang rdzogs par zhes bya ba ni sangs rgyas zhes bya ba 'di nyid 'chad pa'o//yang na sangs rgyas zhes bya ba ni/ rab tu rgyas pa ste/ me tog pad+ma rab tu rgyas pa lta bu'o/ /'dis ni so sor rtog pa'i ye shes bstan te/ ye shes de'i mtshan nyid ni mdo sde rgyan de nyid las/ so sor rtog pa'i ye shes ni/ /shes bya kun la rtag mi thogs//ting nge 'dzin dang gzungs rnams kyi/ /gter dang 'dra ba kho na yin/ /'khor gyi dkyil 'khor rnams su ni/ /'byor pa thams cad ston mdzad pa/ /the tshom thams cad gcod pa yin/ /chos chen char ni rab tu 'bebs/ /zhes gsungs so/ /ngan song thams cad yongs su sbyong ba zhes bya ba la/ngan song ni dmyal ba dang dud 'gro dang yi dwags rnams so/ /thams cad ces bya ba ni ma lus par ro/ /yongs su zhes bya ba ni mthar thug par ro/ /sbyong ba zhes bya ba ni/ rgyu dang 'bras bu'i bdag nyid dag par bya ste/ ji skad du 'di nyid las/ ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs nas zhes bya ba la sogs pa gsungs so/ /'dis ni bya ba grub pa'i ye shes bstan te/ ye shes de'i mtshan nyid kyang mdo sde rgyan nyid las/ bya ba grub pa'i ye shes ni/ /khams rnams kun du sna tshogs shing //dpag med bsam yas sprul pa yis/ /sems can kun don sgrub pa'o/ /sangs rgyas sprul pa der rtag tu/ /mdzad pa grub pa'i bye brag dang / /grangs dang zhing gi rnam kun du/ /bsam mi khyab par shes par bya/ /zhes gsungs la/ ye shes bzhi char gyi don bsdus pa yang /de nyid las/ 'dzin pa'i phyir dang sems mnyam phyir/ /yang dag chos rab ston phyir dang / /bya ba grub pa nyid kyi phyir/ /ye shes bzhi po yang dag 'byung / /zhes gsungs so/ /ye shes de dag bdag nyid gcig tu gyur pa ni gzi brjid kyi rgyal po zhes bya ste/shin tu rnam par dag pa'i chos kyi dbyings chung zad kyang dbye ba med pa'i phyir ro/ /de'i phyir chos kyi dbyings de nyid tha dad pa'i chos rnams zil gyis gnon pa'i mchog yin pas ming de skad ces bya'o/ /ye shes de dag gi rang bzhin gyi gzugs kyi sku ni/ 'dir phyir mi rtog pa'i phyir bzlog pas bstan pa'am rtog pa zhes bya ste/gdul bya rnams kyis de la kha dog dang dbyibs mtshan ma mang por rtogs pas so/ /de ltar yang 'phags pa de kho na nyid 'dus pa'i rgyud phyi ma'i phyi ma las/ sangs rgyas rnams kyi ye shes ni/ /rtag tu rnam mi rtog las byung / /mi rtog pa yi ye shes la//de phyir rtog pa zhes brjod do/ /zhes bya ba la sogs pa dang / mi rtog gang la rtog nyid du/ /brtags pas rtog las byung ba ni/ /rdo rje sems dpa' sems dpa' che/ /de phyir rtog pa zhes brjod do/ /zhes bya ba la sogs pa gsungs so/ /de ltar na 'bras bu'i rgyud bstan te/rgyu de'i 'bras bu'i rgyud bstan to/ /rgyu de'i 'bras bu de rkyen gang gis bskyed ces phyogs snga ma la/ rtog pa zhes bya ba la bzlas nas brjod de/ kalpa ti kalpa zhes bstan pa'i dbang gis/ dam tshig dang dbang dang bsnyen pa dang sgrub pa zhes bya ba'i tshogs kyi bdag nyid lam zhes bya ba ni/'dir rtog pa zhes bya ba'i sgras brjod la/ de bas na 'dir rtog pa zhes bya bas ni/ cho ga rgyas pa nyid bstan la/ cho ga rgyas pa'i ngo bo dam tshig la sogs pa yan lag bzhi ni/ 'dir sangs rgyas nyid kyi thabs te/ de bas na kalpa zhes bya ba ni/bi d+hi bi d+ha ra zhes bya ba'i tha tshig go/ /'di ni thabs kyi rgyud do/ /de ltar na dbang po rnon po dag la rgyu dang 'bras bu dang thabs kyi rgyud kyi mtshan tsam zhig bstan pa byas pa'o/ /da ni bsdus pa'i don rnam par dbye ba dang / rnam par spros te bshad pa la 'jug par bya ste/ de lta 'di skad bdag gis zhes bya ba nas brtsams te/ mngon par dga' ste rjes su yi rang ngo zhes bya ba'i mthar thug pa'i rgyud kyi don ma lus pa ni/ dgos pa dang bsdus pa'i don/ tshig gi don dang / mtshams sbyar ba dang / brgal ba'i lan rnams kyis legs par bshad par bya'o//de yang 'dir ming dang tshig dang yi ge'i tshogs su snang ba rnam par shes pa bstan/ chos kyi ngo bo nyid brjod par byed pa'o/ /des bstan par bya ba'i don ma lus pa ni brjod par bya ba'o/ /de dag rgyu 'bras kyi bdag nyid kyis gnas pa ni 'brel pa ste/'brel pas don blos rtogs pa ni dgos pa'o/ /ngan song la sogs pa dang bral ba nas brtsams te/ mi gnas pa'i mya ngan las 'das pa thob pa'i bar du dgos pa'i dgos pa'o/ /de lta na 'dir ni 'jug par rung ba nyid du ston to/ /de yang bcom ldan 'das de bzhin gshegs pa dgra bcom pa zhes bya ba la sogs pa'i mtshan yon tan dang ldan pas brjod par bya ba dang /dgos pa'i dgos pa dngos su brjod cing 'brel pa la sogs pa yang don gyis drang bar bya'o/ /da ni bsdus pa'i don bstan par bya ste/ de yang rgyud kyi rgyal po 'di la glegs bam mi mthun pa mthong zhing /gtsug lag dang rig pa'i bstan bcos sngon byung ba gzhan la yang de ltar snang ba ni klog pa'i slob dpon la sogs pas rab tu nyams par zad do/ /de las 'dir ni glegs bam bar ma'i dbang du byas pa ste/ de la bsdus pa'i don ni rnam pa bzhi'o/ /ji lta zhe na 'di skad bdag gis zhes bya ba nas brtsams te/bzhugs te bya ba'i bar gyis ni gleng gzhi bstan to/ /ngan song gi rgyud thams cad ces bya ba nas brtsams te/ gang de bzhin gshegs pa rnams kyis 'dul bar mi 'gyur ba ni ma yin no zhes bya ba'i bar gyis ni gleng bslang ba bstan to/ / de nas lha rnams kyi dbang po brgya byin stan las langs nas zhes bya ba nas brtsams te/ phyag na rdo rje 'dra bar 'gyur/ /zhes bya ba'i bar gyis ni yongs su shes par bya ba rgyud kyi dngos po bstan to/ /bcom ldan 'das kyis de skad ces bka' stsal pa dang zhes bya ba nas brtsams te/ mngon par dga' ste rjes su yi rang ngo zhes bya ba'i bar gyis ni/mngon par bstod pa bstan pa'o/ /da ni bsdus pa'i don de dag zhib tu brjod par bya ste/ blo dang ldan pa rnams kyis bla ma'i gdams ngag ston te/ rgyud kyi rgyal po dang sbyar bar bya'o/ /de la gleng gzhi gang yin pa ni/ sdud pa po dang / dus dang / bstan pa dang / ston pa dang / gnas dang / 'khor dang / mchod pa brnyes pa dang / zhus pas phun sum tshogs pa'o/ /gleng bslang ba gang yin pa de yang bcom ldan 'das kyis nye bar 'jug pa dang / lha rnams kyis yang dag par bstan pa zhus pa'i dbye ba rnam pa gnyis su 'gyur ro/ / rgyud kyi ngo bo gang yin pa de yang 'di rtsa ba dang phyi ma'i bye brag gis gnyis su bstan cing rtsa ba'i rgyud gang yin pa der ni/ rtsa ba'i dkyil 'khor chen po cho ga rab tu rgya cher bstan pa'i phan yon dang / /rtog pa yang dag par gzung bar bstan pa dang bcas pa'o/ /rtog pa phyi ma gang yin pa der yang sngar ji ltar bstan pa'i bcom ldan 'das rdo rje gtsug tor rnams kyi dkyil 'khor dang /yang bcom ldan 'das tshe tshad med pa'i dkyil 'khor nas brtsams te/ gang yang lha'i bdag po bcom ldan 'das phyag na rdo rje mtha' yas kyi rang bzhin gyi dkyil 'khor bstan pa'i mthar thug pa'o//rtog pa phyi ma las byung ba'i rang bzhin phyi ma'i phyi ma der ni/ ma lus par mdor bsdus pa'i rang bzhin dkyil 'khor chen po gnyis dang / gang dag rtsa ba dang / phyi ma'i dum bu dag tu ma bstan pa'i brjod par bya ba/ las kyi tshogs dang / phyag rgya dang / gsang sngags dang / zhi ba la sogs pa'i rol mo'i cha byad brdung ba rnams dang / 'byung bar 'gyur ba'i slob ma gang dag dkyil 'khor du 'jug pa'am/ yang gang dag rgyud kyi rgyal po 'di nyan pa don du gnyer ba de dag la legs par bslab pa dang sngar ji ltar bstan pa'i dbang gis rtog pa khyad par can skyes pa'i dbang las byas pa shes pa'i ngo bor bstan pas/lan du mchod pa'i bdag nyid ni/ /de nas brgya byin zhes pa la sogs pas bstod pa mchod pa sngon du 'gro ba bstan te/ de ltar na rnam par dbye ba'i rim pa/ gleng gzhi dang / gleng bslang ba dang / rtsa ba'i rgyud dang / rgyud phyi ma dang / phyi ma'i phyi ma dang / mngon par bstod pa ni 'di'i lus zhes bya'o/ /de la ston pa po la mngon par bstod pa ni/ gang gis bstod pa dang / ji ltar bstod pa dang / gang la bstod pa dang / sems kyi khyad par gang gis bstod pa dang / yon tan ji lta bus bstod pa dang / bstod pa'i yon tan bstan pa'o//de la yon tan ji lta bus bstod pa ni/ 'jig rten dang 'jig rten las 'das pa'am/ mi slob pa dang slob pa'am/ spangs pa dang brnyes pa'am/ bdag dang gzhan gyi don gyi dbang gis bstod pa byas la/ rgyas par ni ci rigs par shes par bya'i/tshig mangs pas 'jigs pa'i phyir 'dir ma brjod do/ /de las kha cig na re rdo rje khro bo la sogs pa'i dkyil 'khor du/ ci'i phyir drag shul spyad pa ma gsungs she na/ thugs rje'i dbang gis so zhes zer te/ de ltar na sngar bstan pa ji ltar drang / kha cig na re sdud pa pos thugs brtse bas ma bsdus so zhes zer te/ de yang nyes pa snga ma bzhin no/ /bdag gis ni de'i lan sngar btab zin to/ /de ltar bsdus pa'i don bstan nas/ tshig gi don dang / mtshams sbyar ba dang / brgal ba'i lan dag ni gang dang gang du bab pa de nyid rjod par byed do//chos yang dag par bsdu ba la 'di skad bdag gis zhes bya ba la sogs pa nges pa skyed pa sbyin dgos pa'am/ rtag tu rgyud la sogs pa la/ ston pa la sogs pa yid ches pas byed pa sbyin dgos pas na/ gleng gzhi ste/ de yang 'dir sdud pa pos bdag nyid ji lta ba bzhin dam bcas pas tshad mar gyur pa dang /ston pa'i mngon sum gyi slob mar gyur pa dang / nga rgyal spangs pa dang / thos pa che bar bstan pa'i phyir/ 'di skad bdag gis thos pa'i dus gcig na zhes bya ba smos so/ /dus phun sum tshogs pa yang / dus gcig na zhes bya bas bstan te/ji lta zhe na dper na dpyid kyi dus rnams kyi mchog tu gzhag pa ni/ shing la sogs pa rnams rang rang gi myu gu la sogs pa rnams skyed par phyogs shing gso ba'i dus can yid dga' bar byed pa'i dbang gis yin pa ltar/ bde ba'i myu gu skyed par byed pa'i rgyud dpag bsam gyi shing chen po myu gu lta bu'i 'byung ba'i dus de yang dus gzhan pas mchog nyid de/de'i phyir 'gran zla med pa'i don gyis na/ dus gcig na zhes bya ba ni/ dus gcig pu na zhes zla med pa'i tshig tu sbyar ro/ /'di zla ba dang / tshes grangs dang / snga blo la sogs pa'i nges pa ci'i phyir mi smos/gzhan du na gnas kyang sum cu rtsa gsum mam lha yul na zhes pa tsam smos par rigs so zhe na/ rtsod 'gyur mtshams 'phra mi mthun dang / /mchog tu bstan la mi rigs phyir/ /dus ni gnas ltar nges min nam/ /gnas kyang dus dang 'dra bar mthong //zhes gzhan dag tu bstan pa kho nar zad do/ /de bzhin du dus gcig na zhes bya ba 'dis ni/ shin tu dkon pa'i ngo bo nyid kyis/ chos dkon mchog 'di ni bstan pa gzhan nas mchog tu yang dkon te/ bcom ldan 'das mi yul du lo brgyad cu rtsa gcig 'tsho ba las/'di ni dus gcig gi tshe kho na zhig gsungs kyi/ yang dang yang du ni ma yin te/ ji skad du/ 'jig rten du ni kun mkhyen rnams/ /u dum+WA ra'i me tog bzhin/ /brgya lam na ni lan 'ga' zhig/ /byung 'gyur yang na mi 'byung ngo / /gsang sngags spyod pa'i tshul 'byung ba/ / de bas kyang ni shin tu dkon/ /zhes gsungs te/ de bas na dus gcig na zhes bya ba ni/ rnyed par dka' ba bstan la de bzhin du don chen po byed pa nyid dang / snang bar byed pa nyid dang / rin che ba nyid dang / gnod pa 'joms pa nyid dag kyang 'dis mtshon par bya ba nyid do/ /de bas na 'di skad bdag gis thos pa'i dus gcig na zhes bya bas ni rab tu yang 'jug par bya ba nyid du ston te 'og ma rnams kyang de bzhin no//bcom ldan 'das zhes bya ba ni/ /bdud bcom shes ldan ye shes ldan/ /'jigs bral srid dang zhi ba bral/ /srid 'gro las 'das gang yin 'di/ / bcom ldan 'das zhes nges pa brjod/ /ces ji skad bshad pa lta bu'o/ /de bzhin du tshangs pa chen po zhes bya ba yang 'di drangs te/ 'di chen po'i chen po'am/ cher bsil bar 'gyur bas na tshangs pa chen po'o/ /'di nyid gang zhe na/ rje btsun shAkya thub pa nyid yin te/ ji ltar rdo rje gtsug tor gyi dkyil 'khor 'byung ba rtsom pa dang / dpa' bo gdan las bzhengs nas ni/ /dgyes shing rdo rje gsor nas kyang / /shAkya'i bdag po dgyes mdzad pa/ /thub pa'i gtso la phyag 'tshal nas/ /zhes gsungs pas so/ /'o na 'dir rtsa ba'i rgyud kyi dkyil 'khor gyi bdag po bcom ldan 'das rnam par snang mdzad nyid ci'i phyir ston pa por mi brjod ce na/'dzam bu'i gling la sogs pa'i 'dod pa'i mi slob pa dang / 'jig rten pa dang 'jig rten las 'das pa rnams te/ mtshan nyid 'di dag las gzhan pa'i lha rnams las/'di rnams mchog tu 'gyur bas na 'dir drug pa'i mang po'i tshig bsdu ba'o/ /'di la kha cig ni bsdu ba gzhan brda sprod pa ltar 'dod de/ sgra rnams ni don gyi mthus nus pa gcig tu med do/ /de la dkyil 'khor bcu gnyis ni gang dag de rnams su gtogs pa'i lha rnams ni gang rnams she na/rab tu rgyas pa la dga' ba'i sgrub pa po dang / slob dpon dang / slob ma dag gi phyir/ rtsa ba'i rgyud du gzhag pa'i bcom ldan 'das thams cad rig pa'i dkyil 'khor ni rtsa ba'i dkyil 'khor te dang po'o/ /gang dag mos pa dman pa'am/ lag mi bzo ba'am/ 'byor ba chung ba la sogs pa'i slob ma la sogs pa'i tshad du ni/ dkyil 'khor gnyis pa rdo rje gtsug tor zhes bya ba gsungs pa'o/ /gang dag rnam par smin pa las byung ba'i 'chi ba dang / dus ma yin pa'i 'chi ba bzlog pa dag gi ched du/ snga ma gnyis las gzhan pa'i dkyil 'khor tshe dpag tu med pa 'byung ba zhes bya ba gsungs so//de nas yang gdul bya dman pa la mos pa rin po cher bor nas mching bu'i nor bu len pa lta bu de dag gi ched du/ 'jig rten pa'i lha'i dkyil 'khor drug gsungs te/ de yang dang po ni rgyal po chen po bzhi'i dkyil 'khor ro//de nas phyogs skyong ba'i dkyil 'khor ro/ /de nas gza' chen po dag gi dkyil 'khor ro/ /de nas klu chen po dag gi dkyil 'khor ro/ /de nas 'jigs byed chen po'i dkyil 'khor ro/ /de nas lha chen po rnams kyi dkyil 'khor ro/ /de nas ni 'jig rten las 'das pa'i dkyil 'khor gsum ste/kha cig las dang rnam par smin pa las byung ba'i 'chi ba'am/ dus ma yin par 'chi ba las thar bar 'dod pa bde bzhin gshegs pa tshe mtha' yas la dad pa de dag gi phyir ni/ tshe dpag tu med pa 'byung ba gnyis pa de bzhin gshegs pas bdag po mdzad pa'i dkyil 'khor gsungs so//de dag ni rgyud phyi mar gyur pa'i dkyil 'khor dgu'o/ /de nas ni rtsa ba dang phyi ma'i rtog par ma gsungs pa'i cho ga lhag ma rnams bstan pa/ rgyud phyi ma'i phyi mar rigs ma lus pa bsdus pa'i bdag nyid kun tu bzang po la sogs pa gtso bor byas pa bzhi pa'i mchog bsdus pa'i dkyil 'khor dang /shin tu 'jigs par byed pa khro bo'i dkyil 'khor nyi ma me rdo rje zhes bya ba gnyis gsungs so/ /de la kha cig na re dkyil 'khor bcu gnyis po 'di dag gi go rims nges par brjod dgos la/ 'jig rten las 'das pa'i dkyil 'khor gsum gyi sngon du 'jig rten pa'i dkyil 'khor drug bstan pa'i sgrub par byed pa yang brjod dgos so zhes zer te/ dkyil 'khor chen po ni 'dir rtsa ba'i dkyil 'khor yin pas thog mar brjod par rigs la/ nus pa dman pa dag gi ched du dkyil 'khor chen po nyid bsdus te bstan pa ni rdo rje gtsug tor yin no//dkyil 'khor lhag ma bcu ni/ de ltar gzhag pa la gnod pa med pa nyid go rims nges pa'i rgyu mtshan ni mtshan nyid yin no/ /'jig rten pa'i dkyil 'khor sngon du brjod pa ci'i phyir zhes zer ba yang de dag sngags dbul ba'i bsam pa de ltar skyes pa nyid kyi rgyu mtshan te/gzhan ci zhig dgos 'di dag 'jig rten las 'das par gzhag pa yang gnod pa ci zhig yod/ gzhan yang 'dri ba 'di la ni mtha' med par 'gyur te/ 'dir ming po gsum gyi dkyil 'khor la sogs pa yang ci'i phyir ma bstan/lha 'di dag gi sngags dang phyag rgya rnams gzhan yang yod na 'di ltar ston pa ci'i phyir zhes bya ba la sogs pa'i glags su 'gyur ro/ /de'i phyir de ni don med pa'i rtog pa tshegs dang bcas par gzhag par bya'o/ /gal te nges par byed pa'i sgrub par byed pa nus na su zhig 'gog pas smra la rag go//da ni lha rnams brjod de/ de la rtsa ba'i dkyil 'khor gyi dbus su seng ge brgyad phyogs su bltas pa'i steng du pad+ma'i rgyal po seng ge'i dbus kyi sa las 'thon pa'i 'dab ma sna tshogs seng ge rnams khebs pa'i 'dab ma'i bar nas rdo rje rtse mo lnga pa brgyad 'dab ma ltar 'thon pa'i lte bar zla ba'i dkyil 'khor chen po'i dbus su rje btsun thams cad rig pa/zhal thams cad du tha le ba/ sku mdog dkar po ting nge 'dzin gyi phyag rgya 'khor lo rtsibs brgyad pa'i mtshan ma 'chang ba 'khor los sgyur ba'i rgyal po ltar sku brgyan pa/mtshan dang dpe byad 'bar ba/ 'od zer tshad med pa lnga lang long du 'khrugs pa'i dbus na skyil mo krung du bzhugs pa dar dkar po la'i stod g.yogs dang smad g.yogs bsnams pa spyan yid tsam 'dzum pa 'di lta bur bzhugs pa'o/ /shar du glang po che gnyis kyi steng du pad+ma rdo rje dang bral ba'i steng gi zla ba la/rje btsun ngan song thams cad yongs su sbyong ba'i rgyal po sku mdog dkar po ting nge 'dzin gyi phyag rgya rdo rje dkar po rtse lnga pas mtshan pa 'dzin pa'o/ /lhor ni rje btsun rin chen sku mdog sngon po phyag g.yas g.yon mchog sbyin dang ting nge 'dzin du mdzad pa la rin po che margata cha dgu pas phyag g.yon pa mtshan pa/rta gnyis kyi steng du pad+ma rdo rje dang bral ba'i zla ba la bzhugs pa'o/ /nub tu ni rje btsun shAkya thub pa gser btso ma lta bur gsal ba/ phyag g.yas mchog sbyin nam ting nge 'dzin la/ phyag g.yon pa'i mthil na lhung bzed 'dzin pa/rma bya gnyis kyi steng gi pad+ma rdo rje dang bral ba la bzhugs pa'o/ /byang du rje btsun me tog kun du rgyas pa rin po che margata lta bu/ phyag g.yas pa skyabs sbyin pa g.yon pa ting nge 'dzin du gnas pa'i dbus na rdo rje kun du rtse 'dzin pa/ nam mkha' lding gnyis kyi steng gi pad+ma rdo rje dang bral ba la bzhugs pa ste/sangs rgyas bzhi po 'di rnams dge slong gi cha lugs ngur smrig dmar po gser gyi ngang ris can tshul du shis par bsnams pa/ rdo rje skyil mo krung du bzhugs pa'o/ /kha cig na re lnga char dge slong gi cha lugs sam/ yang na 'khor los sgyur ba'i rgyal po ltar bya'i/ khyim na gnas pa'i 'khor du rab tu byung ba'i cha lugs su byas pa gnas pa ni rab tu mi bsngags pa'i phyir ro zhes zer ro/ /shar lho dang / lho nub dang / nub byang dang / byang shar du ni/ spyan dang bdag nyid mA ma kI dang gos dkar mo dang sgrol ma/lha'i rgyal po'i btsun mo'am bud med rin chen ltar bcas pa lo bcu drug lon pa/ mdog dkar po dang / sngon po dang / dmar po dang / ljang gu dag la/ g.yas pa rnams na mig gi 'bras bu dang / rdo rje rtse lnga dang / pad+ma dang / ut+pal rang rang gi mdog dang 'dra ba 'dzin pa/g.yon pa rnams mchog sbyin pa/ gtso bo la mngon du bltas pa/ pad+ma sna tshogs pa'i zla ba la sems dpa'i skyil mo krung gis 'khod pa ste/ 'di ni snying po rim pa'o/ /de nas 'khor lo rtsibs bcu drug la/ shar nas brtsams te rdo rje sems dpa' nas rdo rje khu tshur gyi bar du/shar phyogs pa bzhi ni dkar ba/ lho phyogs pa bzhi ni sngo ba/ nub phyogs pa bzhi ni dmar ba/ byang phyogs pa bzhi ni ljang ba/ g.yas rnams na/ rdo rje lcags kyu mda' gzhu dang / /rin chen nyi ma rgyal mtshan mdzub/ /pad+mo ral gri 'khor lo ljags/ /las dang 'jigs byed go cha bcangs//zhes bya ba rnams 'dzin pa/ g.yon pa rnams ting nge 'dzin du gnas pa'am/ yang na lag pa gnyis kas rang rang gi mtshan ma 'dzin par brtson pa/ sna tshogs pad+ma'i zla ba la sogs par skyil mo krung gis 'khod pa/ 'khor los sgyur ba'i bu thu bo brgyan ltar/dar la ba bcing bcas pa rab tu dpa' zhing spro spro ltar gnas so/ /de nas rtsibs mchan gyi shar lho dang / lho nub dang / nub byang dang / byang shar du sna tshogs pad+ma'i zla ba rnams la/ dkar ba dang / sngo ba dang / dmar ba dang / ljang gu'i mdog can lag na rdo rje rtse lnga pa dang / rin po che'i phreng ba dang / pi wang dang / gar gyi lag pa can sgeg mo la sogs pa bzhi sems dpa'i skyil mo krung la na tshod la sogs pa spyan la sogs pa lta bu'o/ /de nas gru chad bzhi la shar lho nas brtsams te/ me tog la sogs pa bzhi ste/ lag na me tog gi gzhong bu dang / pog phor dang /dri'i dung phor dang / mar me'i mchod sdong 'dzin pa/ stan dang mdog dang na tshod la sogs pa spyan la sogs pa lta bu bzhin no/ /de nas sgo bzhir sna tshogs pad+ma'i zla ba bzhi la shar nas brtsams te/ lcags kyu ma la sogs pa mdog spyan la sogs pa dang 'dra ba/ rab tu khro ba mig gsum pa zlum zhing 'bur ba/stag gi pags pa dang / sbrul gdug pas brgyan pa/ g.yon brkyang bas gnas pa/ bgegs chen po la rnam par 'tshe zhing khang pa brtsegs ma'i sgor srung ba la mngon par brtson pa/ lag pa g.yas rnams lcags kyu dang / zhags pa dang /lcags sgrog dang / dril bu 'dzin pa/ g.yon pa rnams bgegs ma rungs pa la bsdigs pa'o/ /kha cig na re 'di rnams kyang zhi ba'i sku can no zhes zer ro/ /de ni mi rigs te/ rgyud phyi ma las/ sgo ba rnams kyang khros pa la/ /khros pa'i dbang du gyur par bris/ /zhes gsungs pa ni kun du drang bar rigs pa'i phyir ro//de nas shar phyogs kyi khyams la byang shar nas brtsams te/ pad+ma sna tshogs pa'i lte ba'i zla ba la byams pa dang / 'jam dpal dang / spos kyi glang po che dang / ye shes tog rnams dkar po rdo rje 'dzin pa'o/ /'dir bskal pa bzang po pa rnams thams cad kyang pad+ma dang zla ba la gnas par brtag go//de nas sgo khyud kyi rtsar pad+ma'i zla ba la 'phags pa gshin rje gshed sngon po g.yon brkyang bas ma he la brdzis pa/ g.yas na be con gdengs pa/ g.yon sdigs mdzub can spyan gsum pa rab tu khros pa stag pags dang / thod pa dang /sbrul gyis brgyan pa/ hUM gi nga ros skrag par byed pa me'i 'od 'phro ba ste/ khro bo lhag ma rnams kyang cha lugs de dang 'dra'o/ /de nas sgo khyud cig ngos kyi rtsa nas bzung ste/ pad+ma'i 'dab ma re re ba drug la dang por rang sangs rgyas 'jigs med dang snang ba la sogs pa'o/ /de nas 'phags pa nyan thos kauN+Di n+ya dang /shA ri'i bu dang / maud gal gyi bu dang 'od srungs rnams so/ /de bzhin du lho phyogs su ni byang chub sems dpa' bzang skyong dang / blo gros rgya mtsho dang / blo gros mi zad pa dang / spobs pa brtsegs pa dang / khro bo gzhan gyis mi thub pa dang /rang sangs rgyas dpa' bo 'dul ba dang / gdung ba sel ba dang / 'phags pa nyan thos rab 'byor dang / kun dga' bo dang / gyad bu nor dang / 'char ka rnams bri'o/ /nub phyogs su ni byang chub sems dpa' mthu chen thob pa dang / ngan song thams cad spong dang / mya ngan gyi mun pa thams cad nges par 'joms pa'i blo gros dang / dra ba can gyi 'od dang / khro bo chen po rta mgrin dang / rang sangs rgyas shes rab mgyogs chen dang / dug gsum sel ba dang / 'phags pa nyan thos chu klung 'od srungs dang / lteng rgyas 'od srungs dang / sgra gcan 'dzin dang /nye ba 'khor rnams so/ /byang phyogs su byang chub sems dpa' zla 'od dang / 'od dpag med dang / nam mkha'i mdzod dang / sgrib pa thams cad rnam par sel ba dang / khro bo chen po bdud rtsi 'khyil pa dang / rang rgyal smra ba chen po dang / 'jigs med seng ge dang /'phags pa nyan thos ga ya 'od srungs dang / ba lang bdag dang ma 'gags pa dang / dga' bo rnams so/ /de ltar lho phyogs pa ma lus pa sngon po'o/ /nub phyogs pa dmar po'o/ /byang phyogs pa ljang gu'o/ /'phags pa nyan thos rnams ni lhung bzed lag pa gnyis kyis lte bar 'dzin pa'o//rang sangs rgyas rnams ni ting nge 'dzin gyi phyag rgya'o/ /byang chub sems dpa' rnams rin po che pad+ma dang rdo rje sna tshogs pa'o/ /khro bo lhag ma gsum ni ral gri dang / pad+ma dang / rdo rje g.yas na 'dzin pa'o/ /g.yon rnams sdigs mdzub kyis bgegs la bsdigs pa'o//'di ni phyi'i dkyil 'khor la gnas pa'i lha rnams so/ /de nas phyi rol gyi rim pa dang po la/ shar du brgya byin ser po rin po che'i go rgyan can/ sa srung dkar po la zhon pa/ g.yas pas rang gi rdo rje 'dzin pa/ g.yon pas mchog sbyin pa de la sogs pa'i 'khor gyis bskor ba'o//lhor tshangs pa dkar po ngang pa la zhon pa gdong bzhi pa g.yas na phreng ba dang bdug spos kyi yu ba nas 'dzin pa/ g.yon pad+ma dang spyi blugs 'dzin pa/ shi ri dang dbyangs can ma dang shAn+ta la sogs pas bskor ba'o/ /nub tu khyab 'jug nag po rin po che'i cod pan can nam mkha' lding la zhon pa/nub tu lha ma yin dang nam mkha' lding dang klu chen dkar po sbrul mgo bdun bdun gyi gdengs ka byas pa/ pad+ma dkar po'am sbrul gnyis 'khril ba la 'dug pa/ ut+pal g.yon na 'dzin pa/ g.yas mchog sbyin pa/ chung ma sbrul mgo gsum pas mgul nas 'khyud pa/'khor los sgyur ba chas pa lta bu'o/ /yang na mtha' yas ser po rin po che 'dzin pa/ 'jog po ser po ut+pal 'dzin pa/ stobs kyi rgyu sngon po sprin 'dzin pa/ rigs ldan dkar po rin po che'i sdong bu 'dzin pa/ nor rgyas kyi bu ser po rin po che'i phreng ba 'dzin pa/dung skyong ljang gu dung 'dzin pa/ pad+ma dkar po pad+ma 'dzin pa/ chu lha dkar po zhags pa 'dzin pa dag dang / dga' bo dang / nye dga' dkar po de dag dang 'dra ba las/ sprin 'dzin pa gnyis dang / klu'i rigs lnga dang / gsang ba rnams so/ /byang du ni gnod sbyin rnams so//de nas rang rang gi phyogs kyi bdag po 'khor dang bcas pa'o/ /de nas rim pa gsum pa la/ shar du pa ba sangs dmar po rgyan thams cad kyis brgyan pa lag pa na ku mu da thogs pa'o/ /lhor phur bu mdog dkar po zla ba la gnas pa/ dar la ser po'i stod g.yogs bgos pa/g.yon pa glegs bam thogs pa/ g.yas pa chos 'chad pa 'dra ba'o/ /nub tu zla ba dkar po ngang pa la zhon pa/ lag na pad+ma thogs pa/ drung na bud med rnga yab thogs pa'o/ /byang na gza' lag rgyan thams cad kyis brgyan pa/ g.yon na ut+pal thogs pa/ g.yas dam pa sbyin pa'o//shar lhor mig dmar dkar po byis pa'i gzugs can g.yas g.yon mchog sbyin can no/ /lho nub tu nyi ma snga ma bzhin no/ /nub byang du spen pa nag po gos dmar po bgos pa lag na ral gri thogs pa'o/ /lho nub bam byang gi stod du/ sgra gcan dud ka dmar nag lte ba man chad sbrul/lte ba yan chad skyes pa/ gdong phal che ba/ sma ra dang ag tshom 'bar ba skra gyen du brdzes pa 'jig rten gsum za bar byed pa/ mche ba bzhi pa brang gi g.yon phyogs su thal mo sbyor ba'o/ /de nas phyogs kyi gza' re re rtsa na rang gi 'khor rgyu skar bdun bdun gnas pa ni/shar phyogs na smin drug dmar po bum pa'i steng na 'dug pa/ snar ma ljang gu khyu mchog dkar po la zhon pa dang / mgo ser po ri dwags sha ba la zhon pa dang / lag dmar po sbrul 'khyil pa la zhon pa dang / nab so ser po pad+ma la 'khod pa dang / rgyal ljang gu bum pa la gnas pa dang /skag ljang gu pho rog chen po la zhon pa rnams so/ /lho phyogs na mchu ser po ma he la zhon pa dang / gre dkar po pad+ma la 'khod pa dang / dbo ljang ser rin po che'i khri la 'dug pa dang / me bzhi ser po glang po che la 'khod pa dang / nag pa ljang gu rma bya la zhon pa dang /sa ri dmar po srad bu la gnas pa dang / sa ga ljang gu ra skyes dkar po la zhon pa rnams so/ /nub phyogs na gnas pa rnams ni/ lha mtshams ser po bya rog dkar po la zhon pa dang / snron dmar po stan nang tshangs can la 'khod pa dang / snrubs ljang gu rus sbal la 'khod pa dang /chu stod ser po la phug la gnas pa dang / chu smad ljang gu mi la zhon pa dang / byi bzhin ser po stan nang tshangs can la 'khod pa dang / gro bzhin ser por bal gyi skon bu la 'khod pa rnams so/ /byang phyogs na gnas pa rnams ni/ mon gru dmar po stan nang tshangs can la 'khod pa dang /mon gre ljang gu khyu mchog dkar po la zhon pa dang / khrums stod ljang gu gser gyi khri la 'khod pa dang / khrums smad ser po gser gyi khri la 'khod pa dang / nam gru dmar po rta la zhon pa dang / tha skar ljang gu mi la zhon pa dang / bra nye sngon po 'khor lo'i steng na 'khod pa rnams te/ 'dir 'di dag 'od zer kha dog lnga pas bskor ba thal mo sbyar ba'am/ ji ltar dga' ba'i lag ca 'dzin pa rnams so/ /rim pa bzhi pa las shar la sogs pa'i phyogs bzhir sa dang chu dang me dang rlung gi lha dpag tu med pa dang / mtshams rnam pa bzhir khyim dang ri dang lo tog gi lha dag dang / sprin dang shing dang / kun dga' ra ba'i lha dag dang / nags dang chu klung dang / sman gyi lha dag dang / rgya mtsho dang / dur khrod dang / grong khyer gyi lha dpag tu med pa shar lho la sogs par kha dog dang / dbyibs dang / lag ca sna tshogs par gnas pa'o/ /'dir dkyil 'khor chen por gsungs pa tsam zhig smos su zad de/rnal 'byor pa'i rnal 'byor gyi dus dang / chos bstan pa'i tshe ni 'khor dpag tu med pa 'dus par shes par byas te/ ji skad du/ 'phags pa rdo rje gtsug tor las/ /gsang sngags la sogs ldan pa yi/ /rig sngags khro bo mang po kun/ / rgyal ba'i sku la mngon phyogs par/ /bsam gtan ngoms phyir rtag tu gnas/ /zhes gsungs so/ /dkyil 'khor thams cad du sangs rgyas dang byang chub sems dpa' rnams ni tshogs yongs su rdzogs pas pad+ma dang zla ba'am/ nyi ma la bzhugs par bya la/ 'phags pa nyan thos dang rang sangs rgyas rnams ni ye shes dang tshogs phyogs gcig pa yin pa'i phyir/ de dag ni pad+ma 'dab ma ya re zhig la 'khod par bya zhing tshangs pa la sogs pa 'jig rten pa'i lha de dag ni/ tshogs ma lus par bsags par 'dod cing / khams gsum la chags pa dang bral ba'i phyir pad+ma dmar po la 'khod par bya la/'jig rten pa phal pa rnams ni yon tan de dag dang yang mi ldan pas rang gi stan smos pa med na/ sa nyid la 'khod par bya ste/ ji skad du rnam par snang mdzad mngon par rdzogs par byang chub pa las gsungs pa/ sangs rgyas rnams ni thams cad dang //de sras blo can rnams kyi gdan/ /pad+ma yid las 'byung ba'i mchog /bkra shis 'jig rten rnams kyis bsngags/ /rang sangs rgyas dang dgra bcom pa/ /phyogs gcig shes rab gang grags pa/ /de dag stan du shes par bya/ /pad+ma las byung 'dab ma pa'o//'jig rten gyi ni lha rnams gang / /tshangs sogs pa yi 'jig rten grags/ /de dag stan ni pad+ma dmar/ /rgyal po rnams kyis bsngags pa'o/ /phal pa rnams ni ci rigs par/ /sa yi bye brag dag la bsam/ /zhes so/ /de bzhin du gang du kha dog dang dbyibs dang / tshad nges par ma gsungs pa der/ rang gi yid la ji ltar dga' bar bsgom par bya'i 'di lung gsal po med do zhes yid gnyis mi bya ste/ de ltar yang rnam par snang mdzad mngon par rdzogs par byang chub pa de nyid las/ gzugs ni gnyis su shes par bya/ /bud med dag ni skyes pa nyid//yang na kun du thams cad kyi/ /kha dog dbyibs dang gzugs rnams te/ /bsam pas ye shes las byung bas/ /de bas de rnams bsam yas te/ /ye shes mkhyen pa'i ye shes ni/ /sems can don phyir tha dad gyur/ /yid kyi rgya ni ji tsam par/ /stan dang phyag rgya dag dang ni//lha yi tshad kyang go rims bzhin/ /de tsam du ni shes par bya/ /zhes gsungs so/ /rim pa bzhi po de nyid la sngags pa de'i snying rje rab tu bskyed pa dang bcom ldan 'das khams gsum rnam par rgyal bas ngan 'gro bkug par ston pa'i bdag nyid/ shar du sems can dmyal ba rnams dang /lhor dud 'gro rnams dang / nub tu yi dwags rnams dang / byang du phug ron dkar po dang / sbrul nag po dang / rtsangs pa nag po dang / phag rnams las phag gis gsum po za ba ltar gnas par shes par bya'o/ /de ltar rtsa ba'i dkyil 'khor gyi lha rnams bstan nas/da ni rdo rje gtsug tor gyi lha rnams ston te/ dbus su ni rje btsun dam pa shAkya thub pa gser btso ma lta bu phyag g.yas g.yon dag mchog sbyin dang / ting nge 'dzin mdzad pa/ dge slong gi cha lugs can seng ge khri'i pad+ma dang zla bas brgyan pa la rdo rje skyil krung gis bzhugs pa'o/ / shar gyi rtsibs la phyag na rdo rje mdog ljang gu dpa' bo g.yas dang g.yon na rdo rje dang dril bu 'dzin pa'o/ /lhor rgyal ba'i gtsug tor mdog sngo bsangs la/ phyag g.yas g.yon rdo rje dang rgyal mtshan 'dzin pa'o/ /nub tu 'khor los sgyur ba mdog ser po phyag gnyis na gser gyi 'khor lo rtsibs brgyad pa 'dzin pa'o//byang du rnam par rgyal ba mdog ser po phyag g.yas g.yon gnyis na dam pa sbyin pa dang / pad+ma gtsug tor gyis mtshan pa can no/ /shar lhor gzi brjid kyi phung po mdog dmar skya la phyag gnyis nyi ma rin po ches mtshan pa 'dzin pa'o/ /lho nub tu rnam par 'joms pa mdog sngo bsangs phyag g.yas g.yon be con dang sdigs mdzub 'dzin pa'o//nub byang du rnam par 'thor ba mdog dmar ba phyag g.yas g.yon na ral gri dang sdigs mdzub can no/ /byang shar du gdugs dkar po can mdog dkar po/ phyag gnyis gdugs dkar po gser gyi yu ba can 'dzin pa ste/'di dag ni rdo rje sems dpa' la sogs pa'i cha lugs bshad pa dang 'dra ba las rgyal ba'i rigs 'ba' zhig yin pas na gtsug tor gyi ming gis mtshan pa'o/ /lha lhag ma rnams ni sngon bzhin no/ /phyag na rdo rje tshe dpag tu med pa'i dkyil 'khor du ni dbus su phyag na rdo rje sku mdog dkar po/phyag gnyis rdo rje dang dril bu thugs kar 'dzin pa dpa' bo'i cha byad can rgyan ma lus pas brgyan pa'o/ /phyogs bzhir rgyal po bzhi 'khor los sgyur ba'i cha lugs can te/ rtsa ba'i dkyil 'khor du ji skad du bshad pa las/'dir gdan pad+ma dang zla ba 'ba' zhig la lhag ma ni snga ma bzhin no/ /rgyal po chen po bzhi la sogs pa'i dkyil 'khor gyi bdag po khams gsum rnam par rgyal ba ni/ ji ltar rdo rje gtsug tor du bstan pa'i phyag na rdo rje nyid las cung zad khro ba'i ngang tshul can nam/ yang na hUM gi phyag rgya rdo rje dang dril bu bcang bar bya'o//phyogs lhag ma ni bshad zin to/ /phyogs skyong ba'i dkyil 'khor du yang de bzhin te lhag ma ni bshad zin la/ cung zad du ni nyi ma dang phyag gnyis mdun du shar stod dang shar smad du'o/ /gza'i dkyil 'khor du yang de bzhin te/ lhag ma rnams bshad zin to//klu chen po rnams kyi dkyil 'khor du yang de bzhin te/ lhag ma rnams ni bshad zin to/ /'jigs byed chen po rnams kyi dkyil 'khor du ni/ dbus su khams gsum rnam par rgyal ba de nyid 'phags pa de kho na 'dus pa'i rgyud las/ ut+pal cher sngo 'tsher ba'i mdog /rdo rje hUM mdzad bsdus pa ni/ /khro dang bcas par 'dzum pa'i zhal/ /g.yon brkyang tshul du gnas pa ste/ /'bar ba'i phreng bas 'khrigs pa'i 'od/ /g.yon pa'i zhabs kyi mthil gyis ni/ /dbang phyug chen po mnan par bya/ /g.yas pa'i zhabs kyis dka' zlog gi//nu ma'i steng du gnon pa bri/ /zhes gsungs pa gnas pa ste/ 'di ni rab tu drag po'i dkyil 'khor yin pa'i phyir ro/ /de'i mdun du ni 'jigs byed chen po ste khyu mchog la zhon pa nag po g.yas dang g.yon rtse gsum dang cang te'u thogs pa rab tu 'jigs su rung ba/'jigs byed ma de dang 'dra ba dang bcas pa'o/ /lhor khyab 'jug mthing ga /g.yas dang g.yon na 'khor lo dbyug pa can nam mkha' lding la zhon pa/ nub tu tshangs pa ngang pa la zhon pa gdong bzhi pa g.yas dang g.yon na spyi blugs dang bgrang phreng can no/ /shar du dbang po dkar po sa srung gi bu la zhon pa'o//rdo rje dang sdigs mdzub g.yas dang g.yon pas 'dzin pa'o/ /byang shar du tshogs kyi bdag po dmar ba glang po'i gdong can dgra sta dang / la phug g.yas dang g.yon na 'dzin pa byi ba la zhon pa'o/ /byang du lus ngan sngon po rta la zhon pa ne'u le dang rin po che'i dbyug to 'dzin pa'o//nub byang du b+h+r-ing+gi ri ti lus sha med pa/ keng rus su gnas pa g.yas dang g.yon na phreng ba dang ting nge 'dzin du gnas pa'o/ /lho nub tu gshin rje nag po be con dang / sdigs mdzub g.yas dang g.yon na 'dzin pa'o/ /'dir khyab 'jug la sogs pa thams cad kyang rang rang gi phyogs 'dra ba'am/yang ci dga' ba'i chung ma rnams kyi mgul nas 'khyud pa thams cad kyang rab tu 'jigs pa'i gzugs can du gnas pa'o/ /lhag ma ni snga ma bzhin no/ /lha chen po rnams kyi dkyil 'khor du dbus su snga ma bzhin no/ /shar du lha chen po dkar po mig gsum pa/g.yas dag na tri shU la dang khri rkang 'dzin pa/ g.yon dag na thod pa 'dzin pa/ zla ba phyed pa dang thod pas mgo la mtshan pa khyu mchog la zhon pa'o/ /lhor dbang po ljang sngon sa srung gi bu la zhon pa g.yas dang g.yon dag rdo rje rtse gsum pa dang mchog sbyin no/ /nub tu tshangs pa dmar po g.yas dag na pad+ma dang tri shU la 'dzin pa'o//g.yon dag na phreng ba dang dbyug pa 'dzin pa ngang pa la gnas pa'o/ /byang du khyab 'jug sngon po g.yas dag na 'khor lo dang dung 'dzin pa/ g.yon dag na rdo rje dang dbyug pa can nam mkha' lding la zhon pa/ byang shar du tshogs kyi bdag po dmar skya g.yas dag na dgra sta dang la phug /g.yon dag na la du can byi ba la zhon pa'o/ /shar lhor 'dod pa'i lha dmar po mda' dang gzhu thogs pa'o/ /nub byang du b+h+r-ing+gi ri ti dkar po g.yas na tri shU la/ g.yon na nor bu can no/ /lho nub tu smin drug gi bu mgo gsum pa lag gnyis mdung thogs pa'o//phyi rol du shar du nag po chen po mig bgrad pa thor tshugs can zla ba tshes pa dang thod pa skam pos mgo la mtshan pa'o/ /lag pa g.yas dang g.yon dang po gnyis na nyi ma dang zla ba 'dzin pa/ 'og ma gnyis rtse gsum pas mtshan pa/seng ge'i khri la sku rten bcas te 'khod pa/ stag lpags kyis smad dkris pa mtshan bgreng ba'am/ yang na lag pa drug pa las g.yas g.yon tha ma seng ge dang khrag gis bkang ba'i thod pa 'dzin pa'o/ /lhor ni stobs bzangs ljang ser sdang mig tu lta ba dang lag pa gnyis tri shU la'am bshol thogs pa'o//nub tu dge ba'i dbang phyug ste kha dog dmar ba gsus pa che ba nag po chen po'i mtshan ma can no/ /byang du ni stobs chen te stobs bzangs lta bu las 'khor lo thogs pa lta bu'o/ /'di ltar yang rang 'dra ba'i chung mas mgul nas 'khyud pa'o//kha cig na re 'jig rten pa'i dkyil 'khor 'di dag gi lhag ma lus pa rang rang dang 'dra ba'i chung mas 'khyud pa'o zhes zer ro/ /lhag ma rnams ni snga ma bzhin no/ /de bzhin gshegs pa tshe dpag tu med pa'i dkyil 'khor ni dbus su bcom ldan 'das tshe mtha' yas sku mdog dkar po phyag g.yon dang g.yas gnyis ting nge 'dzin dang skyabs sbyin mdzad pa/'khor los sgyur ba'i rgyal po chas pa lta bu'o/ /shar du phyag na rdo rje sngon bzhin te ljang gu'am dkar po/ byang du khro bo rnam par rgyal ba mdog sngo smug g.yon pa sdigs mdzub can/g.yas rdo rje kun du rtse gdengs pa'o/ /g.yas su 'phags pa nam mkha'i snying po phyag g.yas g.yon dag na ral gri dang rin po che 'dzin pa/ nub tu 'phags pa 'jig rten dbang phyug dmar po phyag g.yon pas pad+ma'i yu ba nas 'dzin cing g.yas pas thugs kar 'byed pa'o//lhag ma rnams ni sngon bzhin no/ /de nas rgyud phyi ma'i phyi mar kun du bzang po la sogs pa'i dkyil 'khor du ni/ dbus su phyag na rdo rje sngon bshad pa lta bu'am/ khams gsum rnam par rgyal ba sngon bshad pa lta bu'o/ /yang na rdo rje sems dpa' rdo rje dang dril bu thugs kar 'dzin pa mdog dkar ba bsam/kun du bzang po ting nge 'dzin gyi phyag na rdo rje rin po ches mtshan pa'am/ bde ba chen po dmar ba phyag dang po na rdo rje dang dril bu 'dzin pa/ phyag 'og ma gnyis na mda' gzhu 'gengs pa dag gang yang rung ba'o/ /mdun du phyag na rdo rje ste ljang gu la sngon bzhin no//g.yas dang nub dang byang du rdo rje rin chen dang / rdo rje chos dang rdo rje las rnams sngon bzhin no/ /rim pa gnyis pa las sangs rgyas rnam par gzigs dang / thams cad skyob dang / gtsug tor can dang / 'khor ba 'jig dang / gser thub dang / 'od srungs dang / mar me mdzad dang / shAkya'i tog dag shar nas brtsams te/ dge slong gi cha byad can spyod lam mdzes pa gser btso ma'i mdog can mnyam pa'i skyil krung la ting nge 'dzin gyi phyag rgya can no/ /rim pa gsum pa la rdo rje sems dpa' la sogs pa sngon bzhin no/ / rim pa bzhi pa la byams pa la sogs pa sngon bzhin no/ /rim pa lnga pa la nyan thos dang rang sangs rgyas rnams sngon bzhin no/ /rim pa drug pa la lha chen po bzhi dang / rgyal po chen po bzhi dang phyogs skyong ba bcu gcig ste sngon bzhin no/ /rim pa bdun pa la gza' dang rgyu skar dang /sa'i lha nas phag gi bar du ste sngon bzhin no/ /rdo rje khro bo'i dkyil 'khor du ni/ dbus su khro bo me'i nyi ma 'jigs byed kyi dkyil 'khor bdag po lta bu'o/ /'jig rten gsum snang ni sngon po g.yas dang g.yon rdo rje rtse lnga pa dang nyi ma 'dzin pa'o/ /'jig rten gsum 'dul ni ser po g.yas dang g.yon na ral gri dang sdigs mdzub bo//'jig rten gsum 'joms ni dmar po g.yas dang g.yon na dgra sta dang sdigs mdzub bo/ /'jig rten gsum 'ching ni lcags kyu dang lcags sgrog go/ /rdo rje bdud rtsi ni sngo ba phyag gnyis dpung par bsnol ba'o//dbyug pa sngon po ni sngo skya g.yas dang g.yon na be con dang sdigs mdzub zhags pa can no/ /mi g.yo ba ni smug nag g.yas g.yon rdo rje dang sdigs mdzub can no/ /rta mgrin dmar po g.yas g.yon be con dang sdigs mdzub can no/ /dus kyi lcags kyu ni dkar ba g.yas g.yon lcags kyu dang sdigs mdzub ste/'og ma dag gis kyang g.yon pa rnams sdigs mdzub bo/ /dus kyi zhags pa sngon po g.yas na zhags pa can no/ /dus kyi 'ching ba dmar ba lcags sgrog can no/ /dus kyi chags pa ljang gu g.yas dril bu'o/ /dus kyi srin po ni nag po g.yas g.yon be con dang sdigs mdzub can no//dus kyi dbyig pa ni smug nag g.yas g.yon be con dang sdigs mdzub bo/ /dus kyi gnod sbyin mo ni smug nag g.yas g.yon mche ba dang skyabs sbyin can no/ /dus kyi mtshan mo ni nag mo g.yon dgra sta dang sdigs mdzub can no//'di rnams kyis ji lta ba 'dod pa'i ma rungs pa rnams g.yon brkyang bas brdzis pa la/ g.yon pas sna tshogs pad+ma'i nyi ma mnan pa ste/ shar gyi rtsibs nas gzung ste'o/ /dus kyi srin mo la sogs pa ni lha'i snam bu'i gra bzhir shar lho nas brtsams te'o/ / yang na phyag ni brgya phrag du mar ldan zhing bya ba dang / rgyu ma thogs shing dbu mtha' yas/ /zhes gsungs pas/ dbyibs nges pa ci zhig bya ste/ blo la ji ltar nus pa'i dbu dang phyag dang cha lugs mi bzad par bsgom zhing bri bar bya'o/ /kha cig dgod pa gzhan du byed pa ni mi rigs te/ che ba'i cho ga ste/ rtsibs bcu gnyis zhes gsungs pa'i phyir ro/ /de bzhin du dbyibs nges pa yang bsal zin to/ /sgo skyong rnams ni sngon bzhin no/ /de ltar lha'i tshogs 'di snyed kyi gnas su gyur pa'i phyir/ /lha'i mchog thams cad kyi dga' ba'i tshal yid du 'ong ba zhes bya ba gsungs te/bcom ldan 'das thugs rje chen pos 'gro ba la phan pa'i phyir zhugs pa ni kha dog dang dbyibs dang / rang bzhin spyod lam dang / skyes pa dang bud med dang / 'gro ba rigs sna tshogs su snang bas ji ltar rigs par 'gro ba rnams 'dul bar mdzad pa ste/ ji skad du zla gsang thig le zhes bya ba rnal 'byor gyi rgyud las kyang /res 'ga' 'dod dbang rgyal po ste/ /res 'ga' 'dod pa rgyab kyis phyogs/ /res 'ga' zhi ba res 'ga' drag /res 'ga' gdon chen bgegs mdzad de/ /de la sogs te mtha' yas pa/ /phyag rgya 'di yis rgyas btab pas//ci dga' dngos grub 'dod pa la/ /bdag gi ngo bor ston par byed/ /ces gsungs te/ de'i phyir yang dag par na bcom ldan 'das nyid 'khor phun sum tshogs par yang snang ste/ 'chad pa por ste de ni chos so/ /rang yon tan ldan pas nyan pa'ang nga zhes gsungs pa lta bu'o//de ltar lha'i mchog thams cad ces bya ba'i bshad pa mchog ma brjod nas/ da ni yang tha mal pa nyid la 'jug par bya ste/ lha rnams nyid mchog yin la de rnams thams cad dga' ba'i tshal lam/ yang na sum cu rtsa gsum gyi lha rnams kyi nang na mchog ni dga' ba'i tshal na gnas pa rnams te/de rtag tu yid dga' ba'i phyir ro/ /ci de rnams la yang tha dad pa yod dam zhe na/ los kyang ste sum cu rtsa gsum zhes bya ba nyid kyang chos bzang na gnas pa la sogs pa sum cu rtsa gsum nyid/ 'phags pa dam pa'i chos dran pa nye bar gzhag pa las gsungs pa ni bstan bcos las grags pa yin/drag po bcu gcig la sogs pa sum cu rtsa gsum ni/ 'jig rten la grags pa'o/ /dga' ba'i tshal zhes bya ba ni/ grong khyer chen po blta na sdug ces bya ba'i byang phyogs dpag tshad nyi shu 'das pa na/ skyed mos tshal dga' ba zhes bya ba chur dpag tshad nyis brgya lnga bcu/rgyar dpag tshad nyis brgya lnga bcu/ mtha' skor du dpag tshad stong yod pa ste/ gser gyi ra bas bskor ba bla gab can/ 'dod pa thams cad sbyor ba/ bdud rtsi rnam pa bzhi dang / shing dang rdzing dang / me tog phun sum tshogs pa/gser gyi bye ma bdal ba yod de/ de bas na yid du 'ong ba zhes bya ba nas/ lha dang lha'i bu mo sna tshogs pa rnam par rtse ba zhes bya ba'i bar du smos pa yin no/ /de ltar na dga' ba'i tshal ni ha cang ches la/ 'khor dang bcas pa bcom ldan 'das rab tu yang rgya che ba ji ltar 'dzin nus she na/de ni sangs rgyas kyi byin gyi rlabs kyis bsnyung gi rtse tsam gyi sa phyogs kyang rab tu yangs la yid du 'ong bar 'gyur zhing / rgyal ba zhi bar gshegs nas ni dman zhing kho re chung bar 'gyur te/ ji skad du 'phags pa sdong po bkod pa las/ gang tshe rgyal ba mya ngan 'das gyur pa//de tshe de yi zhing rnams 'grib par 'gyur/ /zhing gi rgya mtsho de yang nyon mongs ldan/ /sems can rnams kyang kun nas nyon mongs 'gyur/ /zhes gsungs la/ yang gzhan du gsungs pa/ skra tsam khyon la sangs rgyas mang po ni/ /gang+gA'i klung gi bye ma ji snyed pa//rgyal ba de rnams zhing yang de snyed de/ /de yang skal ba mi mnyam mtshan nyid bcas/ /skra tsam khyon 'dir 'gro ba lngar gtogs pa/ /dmyal ba rnams dang dud 'gro'i 'gro ba dang / /gshin rje'i 'jig rten lha dang mi rnams kyang / /dogs pa dag dang nye bar gtser ba'ang med//de ltar rgyal ba'i chos de bsam mi khyab/ /ces so/ /de bas na 'phags pa sdom pa gsum bstan pa las/ ri'i rgyal po bya rgod kyi phung po de ni mtho ba zlum pa gnas 'phang dang rgyar yangs pa zhes bya ba la sogs pa bstan pa yang sdud pa pos legs par smras pa ste/ri de yang sangs rgyas bzhugs shing 'tsho ba de na de ltar bden la/ deng sang na ni ri rab tu chung bar snang bas so/ /yang chos thams cad gzugs brnyan ltar ma shes shing / bsod nams ma byas pa la dman zhing tha gru chung la/ de dag bsod nams byas pa dang /chos thams cad gzugs brnyan ltar shes pa dag la/ rab tu yangs shing bzang la 'byor bar snang ba ni/ ji ltar 'phags pa dri ma med par grags pas bstan pa zhes bya ba'i mdo las/ tshangs pa ral pa can gyis/ 'phags pa shA ri'i bu la smras pa/ btsun pa shA ri'i bu de bzhin gshegs pa'i sangs rgyas kyi zhing 'di yongs su ma dag go zhes ma zer cig /btsun pa shA ri'i bu bcom ldan 'das kyi sangs rgyas kyi zhing yongs su dag pa 'di lta ste/ dper na btsun pa shA ri'i bu gzhan 'phrul dbang byed kyi lha'i gnas bkod pa bzhin du/ bcom ldan 'das shAkya thub pa'i sangs rgyas kyi zhing bkod pa yang nged kyis de 'dra bar mthong ngo zhes gsungs pa lta bu'o//de ltar na dga' ba'i tshal de'i me tog la sogs pa ma lus pa bcom ldan 'das kyi byin gyi rlabs yin nam zhe na/ lha de dag gi rang gi las las byung ba yang yod de/ ji skad du 'phags pa kun nas sgo'i le'u zhes bya ba'i mdo las/ rnam rtog dge las byung ba yi/ /las dge'i 'bras bu lha rnams te/ /rab tu dang ba'i yid kyis ni/ /mdzes pa'i lha rnams mngon par 'grub/ /gzhal med khang pa nyams dga' ba/ /de dag gzhan sus byas pa min//me tog man+dA ra ba yang / /de dag gzhan sus bskyed pa min/ /sgyu ma'i las las kun 'byung ste/ /byung ba rnams kyang bsam du med/ /ces gsungs pas/ de la yid du 'ong ba zhes bya ba ni mdor bstan pa yin la/ rnam par rtsen pa zhes bya ba'i bar du lhag ma rnams kyis ni rgyas par bstan pa'o//de la nor bu dang gser gyi zhing zhes bya ba la nor bu ni/ pad+ma rA ga la sogs pa'o/ /gser ni gser dang sa le sbram mo/ /shing ni a mra la sogs pa'i ljon pa'o/ /de dag kyang rab tu yid du 'ong ba'i yal ga dang / lcug mar bcas pa dang zhes bya ba ste/yal ga ni rang gi yal ga dang yal ga phre'u yin la/ lcug ma ni sdong po gcig las grub cing gsar bur 'thon pa/ yan lag med pa'i ldum bu rnams so/ /de yang gser gyi shing rnams kyi yan lag ni nor bu lcug ma'i dngul/ nor bu'i shing rnams ni yal ga ni gser/lcug ma ni be+e DUr+ya zhes bya ba la sogs pa mdo sde gang dag lha'i yul gyi bde ba ston pa de dag las rgyas par drang ngo / /shing gel pa dang zhes bya ba la/ shing gang zhig rang bzhin gyis phra zhing drung rab tu stug pa/ me tog dang 'bras bu rab tu rgyas pas rang gi lcug ma'i rtse mo g.yur za ba/ched du bris pa ltar gnas pa de dag ni/ shing gel pa ste ji ltar rgun shing rab tu smin pa dag bzhin te/ ji skad du slob dpon zhi ba'i lha'i zhal snga nas/ shing gang 'bras bzang yal ga 'dud pa dang / /zhes smos pa lta bu'o/ /sman dang zhes bya ba ni/ lha yul gyi shing gel pa la sogs pa de dag gi rtsa ba dang /'bras bu dang / lo ma la sogs pa ji snyed pa de dag ni sman yin te/ lha rnams yid rab tu dul ba'i dbang las gnas der smin pa'i rtsa la sogs pa ni dug med pa 'jam pa reg na bde ba gnod pa med pa dag yin te/ de yang srog gcod pa gnod sems dang bcas te spangs pa'i rgyu las grub pa'o//me tog ka ma la dang zhes bya ba la sogs pa ni go sla'o/ /sogs pa sna tshogs pa dang zhes bya ba ni/ 'jig rten gyi khams gzhan gyi me tog byang chub sems dpa' rnams kyi 'ongs pa dang / sprul pa las byung ba la sogs pa bsdu'o//dpag bsam gyi shing gis mdzes par byas shing zhes bya ba la/ rang gi rtog pa dang rjes su mthun pa'i 'dod pa ster ba'i shing dkar po dang / ser po dang / dmar po dang / sngon po bzhi'i phreng bas nyams dga' shing mdzes par byas so/ /rgyan sna tshogs kyis brgyan pa zhes bya ba ni/zla ba kham pa lta bu dang / me long dang / rgyan mdongs lta bu dang / gzhan yang rgyan snang ba dang mi snang ba rab tu mang pos spras pa'o/ /bya mang po sna tshogs skad 'byin pa zhes bya ba la/ ngang pa dang bzhad la sogs pa rin po che'i 'dab ma dang / mchu sder can ri mor bris pa ltar mdzes pa/lha rnams yid du dga' ba der 'debs pa'i bzhon par gyur pa/ yid du 'thad cing rnar snyan pa'i tshigs su bcad pas lha rnams la gdams pa smra ba/ lha'i longs spyod la mtshungs par spyod pa/ tshul khrims dang bral bas dud 'gro'i 'gro bar 'gyur ba/bde ba'i dbang po las mtho ris par bgrang ba'i bya de rnams kyis yid du dga' bar byas rnga dang cang te'u dang / kerko dang / gling bu dang / rnga mo che la sogs pa'i sgra bsgrags pa zhes bya ba la/ kerko ni 'jig rten na di mug kha zhes grags pa'i rnga'o/ /lhag ma ni go sla ste/ de dag kyang kha cig ni yid las byung ba/kha cig ni dpag bsam gyi shing las byung ba/ kha cig ni ched du byas pa dag ste/ yid las byung ba dag ni gzugs med pa sgra tsam grag pa/ lha rnams bag med pa las bzlog pa'i tshigs su bcad pa mang po sgrogs pa/ phal cher brgya byin gyi yid las byung ba yin te/rgya cher ni 'phags pa dam pa'i chos dran pa nye bar gzhag pa la sogs pa lha yul gyi bde ba rgyas par ston pa'i mdo sde rnams las drang ngo / /brgya byin dang tshangs pa la sogs pa lha dang lha'i bu mo mang po sna tshogs rnam par rtse ba zhes bya ba la/ 'dis mchod sbyin brgya byin pa'am/rang gi srid thub pas na brgya byin te/ lha'i sde dpon rgyun du zhugs pa srid pa lan bdun pa 'phags pa'i khongs su gtogs pa dang / tshangs pa zhes bya ba rang gi sa las gzhan pa bas che ba'am/ 'dod pa'i 'dod chags kyi gdung ba zhi bas bsil bar 'gyur bas tshangs pa ste de dang /sogs pa zhes smos pa ni lha'i sde dpon tsan+dan dang / lha chen po dang khyab 'jug dang / smin drug gzhon nu la sogs pa gang dag dbang che bar grags pa rnams dang / gzhan yang lha dang lha'i bu mo sna tshogs pa zhes bya ba la/ 'di dag ni mdzes pa dang ldan pa ste/de yang 'dod pa'i khams pa yin pas na/ pho dang mo'i dbang po dang ldan pa/ na tshod dang / bong sa dang ming dang / dbyibs sna tshogs pa de rnams bgad pa dang / chu la rkyal ba dang / me tog 'phen pa dang / khrus byed pa la sogs pa byis pa'i spyod pa grangs med pas mngon par rtse zhing dal bar gyur gyi bar du yongs su mi gtong bas na/khyad par du rtse ba ni/ rnam par rtse ba zhes bya ste/ lha rnams ni bag med pa'i dbang las rtsed mo la rab tu zhugs pas/ sngon nye gnas su gyur pa'i lha'i bu zhig gis 'phags pa maud gal gyi bu mkhan por gyur pa sor mo bsgrengs pa'i gus pa la mchog tu smras so zhes gsungs pa lta bu'o//'o na ci'i phyir rgyud kyi rgyal po 'di dag dga' ba'i tshal der gsungs she na/ nor bu dri ma med pa la phan gdags par bzhed pas de'i 'phel bar gyur pa'i gnas der bshad par shes par bya'o/ /de yang zhu bar gyur pa'i rkyen du gzigs nas 'dzam bu'i gling nas der gshegs pa ltar bstan pa ste/rab tu thugs rje che ba'i phyir ro/ /kha cig na re rgyud 'di mchog yin pa'i phyir gnas mchog tu gsungs so zhes zer te/ de ltar na 'di gzhan 'phrul dbang byed la sogs par ci'i phyir mi gsungs so//sum cu rtsa gsum gyi ris ni lha'i ris gong ma gong ma'i drung na phyag dar gyi phung po dang 'dra'o zhes 'phags pa rgya cher rol pa las gsungs te/ de bas na de ni mi rigs so/ /sangs rgyas dang byang chub sems dpa' thams cad kyis byin gyis brlabs pa na zhes bya ba ni/ de dag gis lhag par brten cing longs spyad pa nyid kyi byin gyis brlabs pa ste/ji skad du/ yon tan gang dag rgyan ltar dam pa ni/ /gang dang gang du skyes par gyur pa dag /de dag de ni bkra shis ldan bshad de/ /'bab stegs de yin dka' thub gnas de yin/ /zhes bshad pa dang /yang gsungs pa/ gnas gang dag tu 'gro ba'o/ /mig gis rtag par khyod mthong zhing / /gang zhig khyod kyi zhal lta ba/ /'jig rten de nyid bsod nams ldan/ /zhes nges par gnas kyang byin gyis brlabs par zur gyis bstan par 'gyur ro/ /'dir gzugs bor na byin gyis brlabs pa zhes bya ba yang /sa phyogs de rdo rje ltar sra zhing 'jig pa'i mes kyang mi gnon la/ de na gnas pa rnams la bdud dang bdud kyi ris pa'i yi dwags la sogs pas mi tshugs par byas pa/ dus rab tu ring po'i bar du yang dngos grub 'byung ba'i gnas su byin gyis brlabs pa byas pa ste/de yang 'phags pa rab tu grub par byed pa las ji skad du gsungs pa/ de nas gzhan yang bshad pa ni/ bsgrub pa'i gnas kyi mtshan nyid de/ /gang gi yul du gnas na ni/ /dngos grub myur du thob 'gyur ba'o/ /gang du bdud bzhi btul nas ni//bcom ldan mngon par sangs rgyas la/ /dngos grub mang po kun gyi mchog /rmad byung go 'phang thob gyur pa/ /chu bo nai rany+dza na'i 'gram/ /yid du 'ong zhing 'tshe med pa/ /dngos grub zhing ni dam pa ste/ /bcom ldan 'das ni nyid kyis gsungs/ /der ni bdud rnams mang pos kyang //gnod par bya bar mi nus te/ /de bas der ni las rnams kun/ /sgrub pa pos ni bsgrim ste brtsams/ /gang du chos rnams bstan pa dang / /thub pa zhi bar gyur pa dang / /dam pa smin par bya ba'i phyir/ /skye ba gang du bstan pa yi/ /gnas de rnams su dngos grub ni//rnam pa gsum dag kun du bstan/ /nges shing myur la rgya che zhing / /bgegs med par yang der 'gyur ro/ /bsod nams can gyi gnas rnams gang / /sangs rgyas rnams dang de'i slob ma/ /bskal pa chen po bzhugs bzhugs pa/ /de dag tu yang 'grub par bsgrags//zhes so/ /de'i phyogs gang du yang bzhugs pa de lhag par yon tan dang ldan par gnas pas/ sangs rgyas dang byang chub sems dpa' phyir mi ldog pa rnams kyis byin gyis brlabs pa'o/ /gal te byin gyis rlob pa po nyid kyi don ma rtogs so zhe na/ de'i phyir sangs rgyas zhes bya ba ni ji skad du/ gang gis sa bcu bsgrubs nas ni/ /dbang bcu legs rtogs khong du chud/ /stong pa sgyu ma 'dra ba'i chos/ /rnam pa thams cad mkhyen cing 'dir/ /'jig rten kun gyi tshul mkhyen pa/ /sangs rgyas zhes ni bya ba yin/ /zhes gsungs so//byang chub sems dpa' zhes bya ba ni bshad zin to/ /brgya byin dang zhes bya ba nas/ phyir mi ldog pa'i byang chub sems dpa'i dge 'dun mtha' thug pa med pa rnams kyis zhes bya ba'i bar gyis ni/ 'jig rten dang 'jig rten las 'das pa'i 'khor mchog bstan to/ /tshig gi don ni 'di lta ste/brgya byin dang tshangs pa zhes bya ba ni/ snga ma bshad pa lta bu'o/ /lha dang zhes bya ba la/ rnam rtog dge las byung ba yi/ /las dge'i 'bras bu lha rnams te/ /rab tu dang ba'i yid kyis ni/ /mdzes pa'i lha rnams mngon par grub/ /gzhal med khang pa nyams dga' ba//de dag gzhan sus byas pa min/ /me tog man+dA ra ba yang / /de dag gzhan sus bskyed pa min/ /sgyu ma'i las lam kun 'byung bas/ /'byung ba rnams kyang bsam du med/ /bzang por snang ba'i be+e DUr+ya/ /log par sgrub pa rnams kyang brdzun//yang dag min las kun bskyed pas/ /lha rnams brdzun par shes pas na/ /ting 'dzin zhi ba brjod pa ni/ /lha yi gzugs kyis bstan pa yin/ /zhes so/ /rig 'dzin zhes bya ba la/ gsang sngags la sogs pa'i mthus nam mkha' la 'gro bar nus pa rig sngags kyi thabs 'dzin par 'dod pa thams cad 'byor pa ni rig 'dzin te/ji skad du 'phags pa rab tu grub par byed pa las gsungs pa/ blo can grub nas nam mkha' la/ /ci bde bar ni 'gro bar bya/ /grub pa rnams dang lhan cig tu/ /'o na cis kyang mi tshugs 'gyur/ /pha rol gnod pa byed pa ni//sdang ba rnams kyis yongs mi tshugs/ /rtag tu bdag gi lha nyid ni/ /yid kyis yongs su bzlas par bya/ /bdag gi grub pa'i rdzas la yang / /rtag tu dran zhing blta bar bya/ /rig sngags rgyal po bzlas nas ni/ /sgrub pa rnams kyis mchod par 'gyur/ / rigs kyi rig sngags bzlas na ni/ /grub pa 'jigs pa kun las thar/ /phan tshun dag tu mthong na ni/ /dam tshig rigs kyi phyag rgya dang / /grub pa'i rdzas kyang bstan pa dang / /mkhas pa legs par smras par bya/ /legs par 'ongs sam bde'am zhes/ / thog mar mthong nas mngon par brjod/ /gang nas 'ongs zhes zer na yang / /dri ba'i lan ni gdab par bya/ /lha yi gnas ni thams cad dang / /shing gcig lam ni bzhi mdo dang / /dka' thub nags dang byin can nas/ /mchod sbyin gnas dang bram ze'i gnas/ /mu stegs la sogs grub pa des//nam yang 'da' bar mi bya'o/ /nga rgyal gyis ni 'das gyur na/ /'khrugs nas mod la lhung bar 'gyur/ /bag med dam tshig nyams na ni/ /rig sngags rgyal po yid kyis bzlas/ /lhung ngam ltung bar gyur kyang rung / /de nas de ma thag tu ldang / / nam mkha' dag la gzugs med pa'i/ /'phrul gyi mig can lam rnams ni/ /rab tu grub pa dag gis rig /rnal 'byor can rnams 'gro ba bzhin/ /de las 'gro ba 'ong ba dag /sngon chad sprul pa'i lam nas 'gro/ /bsod nams dbang gis gnas pa'i phyir/ /khyim yang ji ltar 'dod pa 'byung //kun du ljon shing mang por ldan/ /bya rnams du ma phan tshun rgyu/ /lha yi bud med rgyu ba yi/ /rgyan gyi sgra ni rab tu grags/ /de yi glu gar sil snyan gyi/ /mngon par dga' ba'i yon tan gsal/ /me tog bzang po'i bsrung gis khyab/ /mar me'i 'od ni rab tu gsal//gang dang gang du kun brtags pa/ /der ni dpag bsam ljon shing che/ /'dod pa thams cad kun 'byor pa/ /rmad du byung ba'i mtshan nyid 'byung / /rin chen rdo leb la sogs phyir/ /rin chen bzhi las 'bab pa'i chu/ /ne'u seng dag dang ldan pa'i sa/ /thams cad du yang mngon par 'byung //rgyan rnams dang ni gos rnams dang / /rtsed mo'i yo byad rnams dang ni/ /bdud rtsi'i 'bras bu sogs ldan pa'o/ /dpal gyi shing yang de las skye/ /de ltar grub par 'dod pa'i rnams/ /ji ltar 'dod pa thams cad 'grub/ /grub par gyur nas de nas ni//srung ba la ni 'bad par bya/ /skyed mos tshal ni gtsang ma'am/ /ri rnams kyi ni rtse mo'am/ /rgya mtsho yi ni gling dag gam/ /'bab chu yi ni 'gram yang rung / /rang gi 'phrul gyis sprul pa dang / /grub pa dka' phyir sprul pa byed/ /grub pa gzhan dang lhan cig tu/ / sngon du grub nas gnas su'ang rung / /zhes pas te/ 'dir rgya cher brjod pa ni 'og nas rig 'dzin gyi tshul brjod pa la dgos pa blo la bzhag nas brjod par zad do/ /de yang / rig pa 'dzin pa'i gtso bo ni/ /rig sngags 'chang gi rgyal po yang / /kuny+dzar zhes bya ba dang / / tsi tam+ka dang ki ri ti/ /ma mo'i lus su lo tsa na/ /tsi tra b+ha na su sid+d+hA r+tha/ /rig sngags 'chang gi bdag po ste/ /bdun po de dag rigs kyi gtso/ /sngon po grub ste mthu chen rnams/ /dkyil 'khor dag ni thams cad la/ /lho yi phyogs su tha dad dgod/ /ces bya ba gsungs pa rnams yin la/de dag nyid 'khor lha'i bu mo 'khor bye ba khrag khrig brgya stong du ma dang bcas pa'o/ glegs bam la la las ni/ brgya byin dang tshangs pa la sogs pa dang / lha'i rig 'dzin 'khor lha'i bu mo bye ba khrag khrig brgya stong du ma dang zhes 'don te/ /der ni lha'i 'khor gtso bo smos pas bsdus la/'di lha yang yin la rig 'dzin yang yin zhes gzhi mthun pa'i bsdu ba bya'o/ /gnod sbyin dang zhes bya ba ni/ 'phags pa kun nas sgo'i le'u zhes bya ba'i mdo las gsungs pa/ sems ni rnam par gyur pa las/ /'jigs pa'i gzugs ni mngon grub pa//lus kyi bong tshod che ba yang / /sems gcig gis ni kun du bskyed/ /sems la 'jigs pa yod min te/ /tshogs pa dag las 'jigs pa skye/ /yod pa min pa'i las rnams las/ /mi sdug rnam pa bsam yas ltos/ /mi sdug rnam pa bsam yas pa/ / shin tu stongs par shes pas na/ /ting 'dzin zhi ba brjod pa ni/ /gnod sbyin gzugs kyis bstan pa yin/ /zhes so/ /srin po dang zhes bya ba la/ /bdag bsrung ba las sdug bsngal 'grub/ /bdag nyid nye bar mi dmigs pas/ /gzhan bsrung ba las kun brtson pa//de tshe bde ba rgya chen 'grub/ /ces bya'o/ /lha ma yin zhes bya ba la/ /a yis rgyas btab lha min te/ /skye ba med las yang dag 'byung / /'gag med 'byung ba yod min pas/ /lha ma yin gyi ting 'dzin bstan/ /zhes bya'o/ /dri za dang zhes bya ba la/ chos de shin tu 'gro med kyang //'gro ba'i sgrar ni brjod pas ni/ /'gro bas 'gro ba med shes pas/ /dri za'i ting 'dzin bstan pa yin/ /zhes bya'o/ /mi'am ci dang zhes bya ba la/ byas min byas pa'i las kyis ni/ /mi'am ci nyid kun du bskyed/ /'di dag skye ba med shes pas/ / mi'am ci yi ting 'dzin bstan/ /zhes bya'o/ /lto 'phye chen po zhes bya ba las/ ming gang gis ni chos 'di dag /'jig rten dag tu sna tshogs gzhag /chos de 'di la yod ma yin/ /med pas thams cad kun du brtags/ /kun du brtags par kun shes na/ /ngo bo nyid kyi kun rtog med//ting 'dzin zhi ba brjod pa ni/ /lto 'phye chen po'i gzugs kyis bstan/ /zhes bya'o/ /klu zhes bya ba la/ mi bzod bskyed pa byas nas ni/ /yod min sprin gyi gzugs ston cing / /char pa'i rgyun dag rab 'bebs pa/ /de dag nang na mi gnas kyang / /'dzam bu'i gling 'dir rgya mtsho dang //klung dang dug can yongs su 'gengs/ /sngon gyi mtha'a'am phyi ma'i mtha'/ /chu ni 'byung bar yod ma yin/ /de dang mtshungs pa'i sems can kun/ /rtsom pa sna tshogs bslabs pa rnams/ /las rnams sna tshogs ston byed kyang / /las de 'byung ba yod ma yin/ / mkhas pas byis pa rmongs byed pa'i/ /rgyu 'di ma byung shes pas na/ /bde ba ma yin bden snang bas/ /klu yi ting nge 'dzin du bstan/ /zhes bya'o/ /de ltar 'phags pa kun nas sgo'i le'u'i mdo'i rjes su 'brangs te bshad pa 'di ni 'khor mchog ston pa yin par rang rang gi longs spyod dang /gzugs dang / ming gis rnam par thar pa skyed nus shing rtogs pa ston pa'i bshad pa mchog tu 'gyur ba'o/ /sogs pa 'khor du ma dang zhes bya ba ni mkha' 'gro ma dang / ma mo dang / gza' dang rgyu skar dang / sha za dang 'dre la sogs pa rab tu mang por 'dus par ston pa ste/dkyil 'khor chen po 'chad par 'gyur ba las/ smos pa rnams 'dir yang 'dus par 'thad pa'i phyir ro/ /da ni 'jig rten las 'das pa'i 'khor bstan pa'i phyir/ byang chub sems dpa' sems dpa' chen po bye ba khrag khrig phrag brgya la 'di lta ste/ byang chub sems dpa' sems dpa' chen po blo gros tshad med pa dang zhes bya ba la sogs pa smos te/de la byang chub ni chos kyi dbyings kyi rang bzhin ji lta ba bzhin du gnas pa dang mthun pa ni rnam par mi rtog pa'i ye shes sangs rgyas kyis kun du bzang po'o/ /de rtogs par bya bar sems pa ni sems dpa' ste/de ltar yang rnam par snang mdzad mngon par byang chub pa la sogs pa smos te/ byang chub nam mkha'i mtshan nyid de/ /kun du rtog pa thams cad spangs/ /gang zhig de rtogs 'dod pa de/ /byang chub sems dpa' zhes bya'o/ /zhes gsungs so/ /de nyid 'gro ba'i tshogs chen po'i don la sems pas na sems dpa' chen po'o//blo gros mi g.yo ba dang zhes bya ba la/ 'di ni blo gros chos kyi dbyings las mi g.yo bas blo gros mi g.yo ba'o/ /blo gros yangs pa dang zhes bya ba la/ chos kyi dbyings kyis klas pa'i bden pa gnyis 'di'i blo gros skad cig ma gcig gi yul du byed byed pas na blo gros rgya che ba'o//kun du blo gros dang zhes bya ba la/ 'gro ba ji snyed pa de snyed du 'di'i blo gros kun du gnas pas na kun du blo gros so/ /blo gros mtha' yas pa dang zhes bya ba la/ 'di'i blo gros mtha' yas pas 'khor ba'i mtha' dang mnyam pas blo gros mtha' yas pa'o//blo gros pad+ma dang zhes bya ba la/ 'di'i blo gros pad+ma ltar gnas kyi nyes pas mi gos pas na blo gros pad+ma'o/ /blo gros chen po dang zhes bya ba la/ 'di'i blo gros 'bras bu chen po sangs rgyas nyid skyed pas na blo gros chen po'o/ /blo gros lha rdzas dang zhes bya ba la/'di'i blo gros bum pa bzang po la sogs par ston par byed pas na blo gros lha rdzas so/ /byang chub sems dpa' sems dpa' chen po zhes bya ba ni snga ma bzhin no/ /blo gros sna tshogs zhes bya ba ni/ 'di'i blo gros ni shes bya sna tshogs pa ltar skye bas na blo gros sna tshogs so//sogs pas smos pa ni byang chub sems dpa'i tshogs pa lhag ma rnams bsdu'o/ /phyir mi ldog pa'i byang chub sems dpa'i dge 'dun zhes bya ba ni/ drod thob pa yang can sha stag yin te/ nges 'byed yan lag nas gzung ste/ /mthong dang goms pa'i sa dag la//byang chub sems dpa' gang dag gnas/ /de 'dir phyir mi ldog pa'i tshogs/ /zhes gsungs pas so/ /de nyid mi phyed pas na dge 'dun te/ ji skad du/ sangs rgyas chos dang dge 'dun rnams/ /bdud rnams bye ba brgya yis kyang / /bskal pa brgyar yang mi phyed de//de nas dge 'dun zhes brjod do/ /zhes gsungs so/ /mtha' thug pa med pa rnams kyis zhes bya ba ni/ rab tu yang mang bas so so'i skye bos grangs kyi mi rtogs pas so/ /'o na nyan thos kyi dge 'dun ci'i phyir ma smos she na/ 'dir theg pa chen po kho na ston pas de dag snod du ma gyur pas ma 'dus so zhes kha cig zer ro//de lta na theg pa chen po 'ba' zhig ston pa'i rgyud gzhan las kyang mi smos par rigs na smos pa yod do/ /kha cig na re 'di ni rtsa ba'i rgyud bshad ma thag tu gsungs pas/ sprul pa'i skus don mdzad pa'i gang yin pas/'phags pa nyan thos kyi dge 'dun med do zhes zer te/ de ni rang gi rtog pa'i dri ma stug pos khyab par zad do/ /'dir gtsor theg pa chen po bstan pa'i skabs yin pas na/ 'phags pa nyan thos rnams ma smos kyang nyes pa med pa la dgongs nas ma smos par zad kyi/dgra bcom pa chen po rnams kyang nges par 'dus par blo dang ldan pa rnams kyis shes par bya'o/ /de la 'dir ci'i phyir 'jig rten pa'i 'khor dang por smos she na/ sdud pa po thugs rje che bas 'jig rten pa rnams spro ba skyed pa'i ched du'o zhes kha cig zer te/ de lta na gzhung gzhan du/sdud pa po'i thugs rje chung bar 'gyur ro/ /kha cig na re rgyud 'di ni gzhan gyi don lhur len pa yin la/ 'jig rten pa'i 'khor dang smos pa yang thugs rjes gzhan gyi don gtsor byed pa'o zhes zer te/ 'jig rten las 'das pa dang smos na/ gzhan gyi don bya ba la gnod pa ci yod de 'di ni gyi nar zad do//kha cig na re 'jig rten pa'i lam la brten nas 'jig rten las 'das pa'i lam skye'o zhes go rims nges par shes par bya ba'i phyir ro zhes zer ro/ /de yang cung zad mi 'thad de/ 'dir lam gyi go rims kyi skabs la ma bab pas so//'di ni dbang po la sogs pa'i lha gnyug mar gnas pa de dag dang lam brjod par glo bur ba'i byang chub sems dpa' rnams smos na/ lha'i bu bden par ma mthong ba rnams yid mi dga' bar 'gyur ba'i ngo bsrung ba'i phyir/ gnyug mar gnas pa rnams dang por smos so zhes lo rgyus kyis bshad do//de ltar na 'gro ba tha dad pa de dag ci'i phyir dang por bya zhe na/ de ni 'jig rten pa'i 'khor du 'dra bas/ lha'i rnams kyi zhar la bstan par rigs pa'i phyir ro/ /bsti stang du byed ces bya ba ni lus kyi las kyis so/ /bla mar byed ces bya ba ni yid la gcags par lta ba'o//mchod cing zhes bya ba ni rnyed pa'i ngo bo me tog la sogs pas so/ /brjod ces bya ba ni ngag gi las kyi bstod pa don dang mthun par byed pa'o/ /rab tu mchod cing zhes bya ba ni bka' bzhin du byed pa ste 'di ni mchod pa'i mchog yin pas so/ /spel te zhes bya ba ni mchod pa'i dge ba rnams byang chub thob pa'i rgyur yongs su bsngos pa ste/'di'i ni mi zad cing 'phel ba'i mchog yin te/ 'phags pa byang chub sems dpa'i sde snod kyi mdo las/ rgya mtsho chen por 'pho ba'i chu ni bar ma dor zad par mi 'gyur ba de bzhin du byang chub tu bsngos pa'i dge ba'i rtsa ba yang bar ma dor zad par mi 'gyur te zhes gsungs pas so//'khor mang po'i dbus na zhes bya ba ni/ sngar 'das ma thag pa rnams kyi dkyil na'o/ /tshangs pa chen po zhes bya ba ni bshad zin to/ /pad+ma'i gdan la zhes bya ba ni/ 'dir bcom ldan 'das 'khor ba na bzhugs kyang de'i nyes pas mi gos par ston pa'i phyir pad+ma'i gdan la bzhugs pa ste/rten gyis brten pa bstan pa'i phyir ro/ /de yang ji ltar dpal mchog dang po las gsungs pa/ ji ltar pad+ma rab dmar yang / /tshon gyi nyes pas mi gos pa/ /de bzhin gnas pa'i nyes pas kyang //'gro phan rnams la mi gos so/ /zhes so/ /bzhugs zhes bya ba ni 'phags pa dang tshangs pa dang / lha'i bzhugs pa las ni 'dir tshangs pa'i bzhugs pa ste/ thugs rje chen pos ngan song gi rgyud sbyong ba'i phyir ro/ /spyod lam dang nang du yang dag 'jog dang /chos 'chad pa'i bzhugs pa las ni/ chos 'chad pa'i bzhugs pa ste/ 'dir de gtsor gyur pa'i phyir ro zhes bya ba ni/ 'das pa ston pa ste/ yang dag pa bsdus pa'i dus las/ de sngon yin pa'i phyir ro/ /gleng gzhi rgya cher bshad pa'o/ /de ltar nges pa bskyed pa'i gleng gzhi brjod pas/yid ches par 'gyur ba'i rjes las rgyud kyi don ji ltar nye bar phye snyam pa'i rtog pa zlog par byed pa/ gleng bslang ba bstan pa/ ngan song gi rgyud thams cad yongs su sbyong ba zhes bya ba'i ting nge 'dzin la snyoms par zhugs nas/ ngan song gi rgyud las rnam par grol bar byed ces bya ba la byang chub sems dpa' sems dpa' chen po'i ting nge 'dzin gyi 'od zer sdud pa mang po'i phreng ba nyid kyis dpral ba'i mdzod spu nas phyung nas zhes bya ba la sogs pa smos te/ 'dir ting nge 'dzin dang po ni de bzhin gshegs pa ngan song thams cad sbyong ba'i gzugs mngon du mdzad pa yin la/gnyis pa ni byang chub sems dpa' ngan song thams cad yongs su sbyong ba zhes bya ba khams gsum rnam par rgyal ba'i ngo bo mngon sum du mdzad pa yin te/ 'od zer gyi 'phro ba dang 'du ba ni 'dra bar ngan song thams cad yongs su sbyong bar byed pa la sogs pa yin no//de bas na rnal 'byor pa bdag gis kyang dang por de bzhin gshegs pa'i skur gyur pas sbyin sreg dang po bya la/ khams gsum rnam par rgyal ba'i skur gnas te/ sbyin sreg gnyis pa bya'o zhes bya ba ni spyi'i don te/yan lag gi don ni ngan song zhes bya ba ni sngar brjod pa rnams so/ /de dag gi rgyud ni rang gi las kyi 'bras bu ma zad kyi bar mi chad par 'jug pa'o zhes bya ba ni tshig gi mtshams sbyor ba dang / ming gi mtha' phrad do/ /ting nge 'dzin la zhes bya ba ni/ thugs rtse gcig par gnas pa la'o//gdul ba zhi ba dag gi ched du/ sangs rgyas kyi ting nge 'dzin la snyoms par zhugs nas/ gang dag ma rung ba 'dul ba de dag gi don ni rdo rje khro bo nyid kyis ni mdzad par rigs pas na/ ngan song gi rgyud las zhes bya ba la sogs pa smos te sngar bshad pa bzhin no/ / rnam par grol bar byed pa ste/ sangs rgyas su'am yang na sna tshogs par grol bar byed pa ni rnam par grol bar byed de/ re zhig rigs nges pa 'phags pa rnga bo che'i mdo las gdul ba'i rim pas gsungs pa bzhin no zhes bya ba ni sngar bstan pa lta bu'o/ /byang chub sems dpa' sems dpa' chen po zhes bya ba ni bcom ldan 'das 'jig rten gsum las rnam par rgyal ba ste/tshig gi don ni sngar bshad pa bzhin no/ /ting nge 'dzin zhes bya ba ni sngar bshad pa bzhin te/ snyoms par zhugs nas zhes 'dir yang sbyar bar bya'o/ /'od zer sdud pa mang po'i phreng ba zhes bya ba la/ye shes las byung ba'i snang ba'i 'od zer yin la/ bems po las byung ba'i snang ba ni 'od do/ /yang na lus las byung ba'i snang ba ni 'od yin la/ sems las byung ba'i snang ba ni 'od zer yin te/ de bas na 'dir 'od ces bya ba smos so/ /ngan song rnams mtho ris la sogs par sdud pas na/sdud ces smos te/ 'chad par gyur pa las dga' ba'i tshal thams cad kun du snang bar byas te zhes bya ba la sogs pa smos pas so/ /phreng ba zhes bya ba ni phreng ba ltar mdzes pa'am/ 'od zer de dag phreng bar sbrengs shing bar chad med pa'o//nyid kyi zhes bya ba ni bcom ldan 'das byang chub sems dpa' bdag nyid kyi'o/ /mdzod spu nas zhes bya ba ni smin mtshams nas dung dang kha ba ltar dkar ba'i spu sngon bla ma'i skye bo rnams gnas ji lta bar bkod pa las grub pa'i mtshan yod de/ de nyid 'od zer las byung ba mi zad pa'i mdzod yin no//gdul bya rnams phyir mi ldog par 'god par mdzad pa'i 'od zer ni gnas 'di nas 'byin to/ /byung nas zhes bya ba ni mngon par 'thon pa ste/ 'dir slar bsdu ba'i gnas kyang de nyid yin par shes par bya'o/ /des stong gsum gyi stong chen po'i 'jig rten gyi khams zhes bya ba nas/byang chub spyod pa nyid la gzhag /ces bya ba'i bar du ni 'od zer gyi las bstan pa ste/ sangs rgyas kyi byin gyi rlabs kyi rmi lam ltar yud cig grol ba la/ yun rings su grol bar 'du shes pa'am/ skal ba dang ldan pa dag gtan grol ba'o/ /tshig gi don ji lta bu zhe na/ de la stong gsum gyi stong chen po'i 'jig rten gyi khams zhes bya ba ni/ ji skad du chos mngon pa las/ gling bzhi pa dang nyi zla dang / /ri rab dang ni 'dod lha dang / /tshangs pa'i 'jig rten stong la ni/ / stong ni spyi phud yin par 'dod/ /de stong la ni stong gnyis pa/ /bar ma'i 'jig rten khams zhes bya/ /de stong la ni stong gsum mo/ /mnyam du 'jig cing 'byung ba yin/ /zhes bshad ste/ skye bo blo chung dag gi ngor rje btsun shAkya thub pa'i zhing ni de tsam zhig tu zad do zhes bstan pas zhing rgya chen ma smos so//kun du snang bar byas so zhes bya ba ni/ gang na mun nag smag gis khyab pa'i nyi ma dang zla ba gnyis kyang mi rgyu ba'i khor yug gi bar de dag mun pa'i g.yung drung ste/ ji skad du 'jig rten gdags pa las/ rgya mtsho 'di yi pha rol na/ /gang gis rgya mtsho bskor ba yi//khor yug dpag tshad sum brgya dang / /dpag tshad phyed dang gsum yod do/ /de ni khor yug rir bshad de/ /'jig rten bar mtshams tshun chad du/ /nyi zla de bzhin skar ma dang / /rgyu skar tshogs ni rgya chen kun/ /khor yug mi 'da' 'jig rten gyi//bar mtshams phan chad mun par 'dug /ces gsungs pas so/ /de yang snang bar byas pas sems can de dag 'di skad du/ kye ma 'dir sems can gzhan skyes so zhes smra bar 'gyur bar byas pa'o/ /ci mun pa gsal ba tsam las mi 'da' byas sam snyam pa las/kun du snang bar byas nas sems can thams cad kyi sems nyon mongs pas bcings pa las rnam par bkrol te zhes bya ba gsungs te/ nyon mongs pa nyid bcings pa ste lhag ma ni go bar sla'o/ /ci'i de tsam du zad snyam pa las/ bde ba so sor thob nas zhes gsungs te/so sor thob nas zhes bya ba ni/ rang rang gi 'dod pa ji lta ba bzhin du rdzogs zhes bya ba'i don to/ /de dag las gang dag lhar skyes pa de dag ni sngon gyi gnas dang lhar skye ba'i rgyu dran nas/ sangs rgyas la byas pa shes par bya ba'i phyir mchod pa byed du lhags pas na/dga' ba'i tshal zhes bya ba la sogs pa smos te go sla'o/ /nor bu dri ma med pa'i steng du 'khod de zhes bya ba la dga' ba'i tshal de'i gzhi nor bu gser dri ma med pa'i bye ma bdal ba yin pas de la 'khod nas so/ /gser ni nor bu ma yin gyi/ rin po che yin no zhe na/ yid dga' bar byed pa'i phyir nor bu zhes bya ba la/ gser yang yid dga' bar byed pa'am nor bu'i rgyur gnas pa'i phyir de skad ces bya'o/ /yang na nor bu dri ma med pa'i zhes bya ba ni/ lha'i bu 'das nas zhag bdun lon pa gang yin pa'o/ /steng du zhes bya ba ni de lha'i gnas su skyes pa'i sngon du de dag gi gnas su skyes nas der 'khod pa ste/de bas na bcom ldan 'das lha'i bu nor bu dri ma med pa'i ched du der bzhugs kyang / de nyid kyi las kyi 'bras bu nges par myong bar bya ba cung zad tsam pa de dus ma rdzogs par ston pas/ 'gro ba rnams las la 'dzem par bstan pa ste/rgyal po ma skyes dgra stong pa nyid chen por rtogs kyang mtshams med pa'i las kyi dbang gis dar gyi pho long brdabs pa tsam zhig mnar med par gnas par gsungs pa bzhin no/ /de bas na bcom ldan 'das brgya byin dang bcas pa ni re zhig lha'i bu de 'dren pa'i rkyen tsam du zad de/'gro ba rnams ni las bdag gir bya ba la/ las kyi bgo skal la spyod pa'o/ /gzhan du 'gro ba ma lus pa thugs rje'i dbang gis ji ltar mi gnas pa'i mya ngan las 'das pa la mi 'god/ de ltar na 'brel ba med pa'i phyir dang /ma byas pa dang phrad pa'i ni med la byas pa ni chud mi za'o zhes gsungs pas/ rkyen nyid kyang bya bar mi nus so zhe na/ 'di'i don ni 'og nas brjod par bya'o/ /'di skad ces gsol to zhes bya ba ni ched du brjod pa ste/ rab tu ngo mtshar che bas na spro ba'i tshul gyis/e ma sangs rgyas zhes lan gsum bos ba'o/ /mdzad pa legs zhes bshad pa ni/ gang phyir ngan song thams cad sbyangs/ /zhes bya ba dang / byang chub spyod pa nyid la gzhag ces bya'o/ /de nas/ lha yi dbang po brgya byin gyis/ /zhes bya ba'i bar nas/bde bar gshegs pa ngo mtshar che'o/ /zhes bya ba'i bar du ni go sla'o/ /bcom ldan 'das kyis bka' stsal pa/ /zhes bya ba nas/ 'di ni ngo mtshar mi che'o/ /zhes bya ba'i bar yang go sla'o/ /lha'i dbang po sangs rgyas bcom ldan 'das rnams ni tshad med pa'i bsod nams kyi tshogs yang dag par bsags pa'o zhes bya ba ni bskal pa grangs med gsum du/sbyin pa dang / tshul khrims dang / bzod pa la bslabs pa'o/ /lha'i dbang po yang dag par rdzogs pa'i sangs rgyas rnams ni/ yon tan rin po che tshad med pa'i 'byung gnas su gyur pa'o zhes bya ba ni/dbul po rnams nor dang ldan pa dang / gcer bu rnams gos thob pa dang / bkres pa dang skom pa rnams zas dang skom thob pa dang / nad pa rnams nad sos pa la sogs pa pha rol tu phyin pa gsum gyi 'bras bu 'byung ba rgyun mi chad pa'o//lha'i dbang po yang dag par rdzogs pa'i sangs rgyas rnams ni/ tshad med pa'i thabs mkhas pa yang dag par rdzogs pa'o zhes bya ba ni thabs dang / stobs dang / smon lam dang / ye shes kyi pha rol tu phyin pa bskal pa grangs med pa gsum du bsags pa'o//lha'i dbang po sangs rgyas bcom ldan 'das rnams ni spyod pa tshad med pa'o zhes bya ba ni/ bsdu ba'i dngos po bzhi dang / brtson 'grus dang / bsam gtan gyi pha rol tu phyin pa la bskal pa grangs med pa gsum du bslabs pas so/ /lha'i dbang po sangs rgyas bcom ldan 'das rnams ni/'dul ba'i skye bo tshad med pa rnams snod du gyur par mdzad pa'o zhes bya ba ni/ tha na rigs chad pa rnams kyang mtho ris su dgod par spyod pas so/ /lha'i dbang po sangs rgyas bcom ldan 'das ni/ mi mnyam pa dang mnyam pa'i ye shes dang ldan pa'o zhes bya ba ni/chos kyi dbyings mtha' dang dbus med pa dang mnyam pa'i ye shes mnga' bas so/ /lha'i dbang po sangs rgyas bcom ldan 'das rnams ni mi mnyam pa dang mnyam pa'i rdzu 'phrul dang ldan pa'o zhes bya ba ni/ nyan thos dang rang sangs rgyas rnams dang thun mong ma yin la/sangs rgyas rnams nyi tshe dang mnyam pa'i rdzu 'phrul mnga' bas so/ /lha yi dbang po sangs rgyas bcom ldan 'das rnams ni/ mi mnyam pa dang mnyam pa'i smon lam gyi stobs dang ldan pa'o zhes bya ba ni/ sa bcu'i byang chub sems dpa'i yang yul ma yin gyi/sangs rgyas rnams kho na'i yul du gyur pa'i smon lam lhun gyis grub ste/ ji skad du dpal sangs rgyas thams cad mnyam par sbyor ba las/ smon lam grub pas 'gag pa med pa'i chos mchog can/ /zhes gsungs so/ /de bzhin du 'phags pa sdong po bkod pa las kyang /sngon chad smon lam mdzad pas gzugs kyi skur yang snang / /zhes gsungs so/ /lha'i dbang po de lta bas na/ sangs rgyas bcom ldan 'das rnams kyis snod ji lta ba bzhin du sems can gyi don mdzad pa dang / ji ltar 'dul ba bzhin du sems can gyi don mdzad pa dang / mos pa ji lta ba bzhin du sems can gyi don mdzad pa yin par shes par bya ba ste zhes bya ba ni dbang po'i rim pa dang /skye ba tha dad pa la dga' ba dang / gzugs tha dad pa la dga' ba rnams de bzhin du sbyor ba ste/ de ltar yang rnam par snang mdzad mngon par rdzogs par byang chub pa las gsungs pa/ de nas yang bcom ldan 'das la/gsang ba'i bdag po phyag na rdo rje 'khor 'dus pa de nyid na 'dug pas 'di skad ces gsol to/ /bcom ldan 'das ji ltar de bzhin gshegs pa dgra bcom pa yang dag par rdzogs pa'i sangs rgyas rnams kyis rnam pa thams cad mkhyen pa'i ye shes brnyes nas thams cad mkhyen pa'i ye shes de sems can rnams 'phye ste/tshul sna tshogs dang bsam pa sna tshogs dang thabs sna tshogs dag gis ston cing / kha cig la ni nyan thos dag gi theg pa'i tshul/ kha cig la ni rang sangs rgyas kyi theg pa'i tshul/ kha cig la ni theg pa chen po'i tshul/kha cig la ni mngon par shes pa lnga'i tshul/ kha cig la ni lhar skye bar bya ba dang / kha cig la ni mir skye bar bya ba nas/ kha cig la ni lto 'phye chen po dang / klu dang / gnod sbyin dang / dri za dang / lha ma yin dang / nam mkha' lding dang / mi'am cir skye bar bya ba'i bar du chos ston la/ de la sems can la las sangs rgyas kyis gdul bar bya ba dag gis ni/ sangs rgyas kyi gzugs su mthong / la las ni nyan thos kyi gzugs su mthong / la las ni rang sangs rgyas kyi gzugs su/ la las ni byang chub sems dpa'i gzugs su/la las ni dbang phyug chen po'i gzugs su/ la las ni tshangs pa'i gzugs su/ la las ni sred med kyi bu'i gzugs su/ la las ni rnam thos kyi bu'i gzugs su/ la las ni lto 'phye chen po dang / mi dang mi ma yin bar du mthong ste/ rang rang gi tshig brjod pa'i tshul dag dang spyod lam sna tshogs su mthong la/ thams cad mkhyen pa'i ye shes de yang 'di ltar de bzhin gshegs pa'i rnam par grol ba'i ror ro gcig pas lags zhes bya ba la sogs pa gsungs so/ /'di la the tshom dang som nyi dang yid gnyis ma byed cig ces bya ba ni tshad ma rnam gsum gyi yul la'am/thos pa la sogs pa'i shes rab gsum gyi dus sam/ 'jug pa la sogs pa'i spyod pa gsum gyi bdag nyid la the tshom la sogs pa spangs shig ces bya'o/ /yang na 'dir the tshom ni bstan pa yin la/ som nyi dang yid gnyis ni rnam grangs kyi bshad pa'o//ci'i phyir the tshom la sogs pa mi bya snyam pa la/ gang de bzhin gshegs pa rnams kyis 'dul bar mi 'gyur ba ni gnas ma yin no zhes bya ba smos te/ de'i rgyu mtshan yang rnam pa du ma sngar bshad zin to/ /de ltar gleng bslang ba bshad nas/da ni gleng ba slar mgo drangs pa'i yongs su shes par bya ba rgyud kyi dngos po bshad de/ de nas lha rnams kyi dbang po brgya byin zhes bya ba nas brtsams te 'di skad ces gsol to zhes bya ba'i bar du smos te go sla'o/ /nyan thos la sogs pa'i rigs can rnam pa lnga'i dbang ngam yang na las dang po dang /ye shes cung zad babs pa dang / ye shes la dbang thob pa dang / ye shes yang dag par dbang thob pa rnams gong nas gong du sangs rgyas kyi sa thob par zhes bya ba'i phyir ram/ dmyal ba dang dud 'gro dang / yi dwags dang / mi rnams dang lha rnams la phan gdags pa'i phyir/sems can thams cad la phan pa nyid du bgyi ba dang zhes pa nas/ bde bar gshegs pa bdag spobs pa bskyed du gsol zhes bya ba'i bar du smos te/ de ltar las spobs pa bskyed pa ni/ shes rab kyi 'bras bu so sor smra ba la thogs pa med par bya'o/ / bcom ldan 'das sum cu rtsa gsum gyi lha'i ris 'di nyid na zhes bya ba nas/ kha bub tu 'gyel zhes bya ba'i bar la dus las 'das nas dgung bdun lags na zhes bya ba ni/ 'dzam bu'i gling kho na'i zhag bdun te/ tha snyad rnams ni gling 'dis rnam par gzhag pa yin la/ 'di nyid nas kyang 'dzam bu'i gling na gnas pa'i sems can sdig pa'i chos la kun du spyod pa zhes bya ba la sogs pa gtsor byas pa'o/ /gang dag lha'i zhag bdun dang / mi'i lo khyud 'khor bdun du smra ba dang / mi'i zhag bzhi bcu rtsa dgur smra ba rnams ni/ rang gi rtog pa ngan pa'i dri ma ngan pa kho nas dri ma can du byas par zad de lhag ma ni go bar sla'o//gnas skabs 'dir ni rgyud phyi ma las/ de nas tshangs pa la sogs pa'i lha'i tshogs rnams kyis/ bcom ldan 'das phyag na rdo rje la 'di skad ces gsol to zhes bya ba nas/ 'khor gyi dkyil 'khor gang yin pa de ni gzhan yin par mi lta ste lha'i 'khor 'di nyid yin no zhes bya ba'i bar du gsungs pa sbyar te tshig gi don ni go sla'o//'o na ci'i phyir rgyal po de mtshams med pa byas bzhin du/ shi ma thag tu lha'i gnas su skyes/ de lta na ni nges par skye gnas myong bar ma gyur to zhe na/'di ni 'gyod cing rab tu bshags pa'i mthu dang rigs la gnas pa'i mthu yin te/ las ma rungs pa byas pa yang 'gyod cing bshags pas dag cing byang bar 'gyur te/ ji skad du gsungs pa yang / shin tu mi bzad pa yi las rnams byas pa dag /bdag la rnam par smad pa bsrabs par 'gyur//rab tu bshags dang sdoms pa byas pas na/ /de dag rtsa nas 'don par ngas bshad do/ /zhes so/ /thob pa'i rigs las gzhan pa/ lhan cig skyes pa'i mthu yod pa yang / sdig pa'i 'bras bu rab tu stobs chung ste/ ji skad du mdo sde rgyan las/ ring mo zhig nas ngan song du/ /'gro zhing myur du thar pa dang / /de na'ang sdug bsngal chung ngu myong / /skyo bcas sems can yongs smin byed/ /ces gsungs te/ de bas na rgyal po lus med bde ste/ mtshams med pa byas su zin kyang / las de lan grangs gzhan la myong bar 'gyur gyi/ skyes ma thag tu ma yin la/ lan grangs gzhan la yang mi'i zhag bdun kho nas rnam par smin pa dang bral bar 'gyur te dga' ldan du skyes par gyur to/ /kha cig na re zhag bdun yang srid pa bar ma do'i gnas skabs yin no zhes zer te/'di la ni lung dang sgrub par byed pa ci yang med do/ /srid pa bar ma dor ni ring du gnas pa dus ma yin pa shi ba kho na'i dbang du byas pas/ 'phags pa de bzhin gshegs pa bdun gyi sngon gyi smon lam gyi khyad par rgyas pa zhes bya ba/ theg pa chen po'i mdo las rab tu gsal bar gsungs pa/lha'i bu de ni dus ma yin par shi ba zhes bya ba 'di ga las shes/ de'i phyir 'di lung nges pa dang / bla ma'i man ngag med pa rang gi yid kyi spyod pa'i shes pa kho na smras par zad/ de bas na sems can dmyal bar mi'i zhag bdun skyes/ji ltar lung bstan pa'i lo 'bum dang / drug khri dang / drug stong gi lhag ma ni gsang sngags kyi mthus bcom par zad do/ /de nyid kyi phyir/ gsang sngags yon tan sna tshogs bsam mi khyab/ ces lha'i bu de nyid kyis smras pa/ gal te de med kyang sngar brjod pa'i mthu nyid kyis yun cung zad cig tu sdug bsngal bar zad de/sems can dmyal ba'i tshe tshad mthar phyin pa ni shin tu ring ste/ chos mngon par ji skad du bshad pa lta bu'o/ /des na de nas sangs rgyas nas kyang 'di skad ces gsol to zhes bya ba nas/ bla na ma mchis pa yang dag par rdzogs pa'i byang chub thob par bgyi ba'i slad du bshad du gsol zhes bya ba'i bar du ni go sla'o//de nas bcom ldan 'das kyis zhes bya ba nas phan pa dang bde ba thams cad 'byung bar 'gyur ro zhes bya ba'i bar du smos pa ni/ gang sngags rnams bstan pa ste/ de la de nas bcom ldan 'das kyis zhes bya ba nas/sa ma ya hUM zhes bya ba'i bar du ni/ 'khor dam tshig can du byin gyis brlabs te/ rig sngags 'chang gis kyang slob ma rnams sngags 'di sta gon la gnas pa'i dus su/ thun mong gi dam tshig mnos ma thag tu/ dam tshig can du byin gyis brlabs pa'o//snyoms par zhugs nas kyang zhes bya ba la sogs pas ni bdag po'i sngags ston te/ gdon mi za bar 'joms pa ni rnam par rtog pa'i ye shes ni de nyid mi phyed pas na rdo rje ste/ de byin gyis brlabs pa ni des gzhan yang gsang sngags de'i snod du byas pa'o//ngan song gi rgyud kyis bcings pa ni/ las dang nyon mongs pa 'bras bu dang bcas pa ste de chad pa ni spangs pa'o/ /ngan 'gro ni de dag gi lus yin la/ de dag thams cad sbyangs pa ni bor bar gyur pa ste/ de'i phyir sdug bsngal mi bzad pa rnams rab tu zhi ste zhes bya ba smos so//de nas bral ba thob pa ni skye bo mang po bde ba dang ldan par 'gyur ro zhes bya ba ste/ lha dang mi'i lus thob pa'o/ /de nas gzhan yang gsang ba'i snying po 'di gsungs so zhes bya ba ni snying po nyid gsang ba ste/ gsang sngags nyid ming gzhan gyis bstan pa yin la/de yang man+t+ri gup+ta b+ha Sha ne zhes 'dud pa'i phyir ro/ /snying po la sogs pa'i don yang 'og nas 'chad par byed do/ /lhag ma ni go sla'o/ /snying po dang nye ba'i snying po zhes bya ba ni/ 'dir snying po ni lha ste snying por bsgrub par bya ba'i phyir ro/ /de dang nye bar byed pa'i snying po ni de thob par byed pa ste/oM traT ces bya ba ste lhag ma ni go sla'o/ /rtsa ba'i rig pa'o zhes bya ba la/ 'di nyid rgyud kyi bdag po'i sngags yin pas/ 'di bzlas pas lha thams cad kyi sngags bzlas par gyur pas na rtsa ba'o/ /de yang slob ma dbang bskur ba la sogs pa'i tshe/'di nyid dang po dang bcas pa la 'bum 'bum dang lhag ma rnams la khri khri bzla'o/ /yang na 'di gnyis la 'bum bzlas pas las thams cad bya'o/ /oM sarba bit+sarba a ba ra Na zhes bya ba la sogs pa la/ 'dis ni dbang bskur ba dang /ro byin gyis brlab pa dag bya'o/ /de la kha cig na re sngags dang po ni dkyil 'khor mthu skyed pa'o/ /gnyis pa lngas ni dkyil 'khor byin gyis brlab pa'o/ /gsum pa ni dkyil 'khor gdon pa'o/ /bzhi pa bcus ni dkyil 'khor du phyag rgya dgod pa'o zhes zer ro//oM sha oM b+ha zhes bya ba 'di gnyis ni mngon par byang chub pa'i rim brjod par byed pa ste/ de yang dang po ni stong pa nyid ston par byed pa yin la/ gnyis pa ni zla ba'i cha la sogs pa lhag ma rnams 'dren par byed pa ste/ de yang rgyud 'dir dam tshig sems dpa' gnyis te/de bzhin gshegs pa dang sems dpa' rnams te/ de la de bzhin gshegs pa'i dam tshig sems dpa' bya bar 'dod na de'i rim pa ni 'di yin te/ dang por snod du gyur pa'i sngags pa mkhas pas mal nas langs te shes rab kyi pha rol tu phyin pa bklags pa'am cung zad bzlas te/de nas ji ltar rigs par lus kyi bya ba byas la gtor ma byin te/ mchod pa'i yan lag bkod nas stan 'jam zhing bde ba la 'dug ste/ bdag gi lus skad cig gis rdo rje khro bo mdog sngon po rdo rje dang sdigs mdzub zhags pa can 'jigs su rung bar bsams te/oM AHbig+h+nAM ta kr-ita hUM phaT ces bya bas chu'am thal ba'am yungs kar la bzlas te gtor bas/ bdag dang gnas dang rdzas rnams bsrung bar byas te/ las kun byed pa'i gsang sngags kyi/ /yang na bgegs kyi dgras kyang rung //nges par yungs kar la sogs pas/ /dang po kun du gsal bar bya/ /zhes gsungs la/ sgrub pa pos ni dang po ru/ /khro bo'i rgyal pos bskrad par bya/ /zhes gsungs pas 'dir bskrad pa dang / bsrung ba'i las thams cad de nyid kyis bya'o//kha cig na re 'phags pa de kho na nyid 'dus pa las/ rdo rje sems dpa'i mtshan tsam zhig /lan cig tsam yang brjod gyur na/ /'di ni bsrung ba rtag chen po/ /skad cig dngos grub thob 'gyur zhes/ /bcom ldan rdo rje 'dzin pas gsungs/ / zhes bya ba la sogs pas rgyud 'dir bsrung bar bya'o zhes zer ro/ /kha cig na re lag pa gnyis thal mo khong stong du sbyar la/ mdzub mo gnyis dang srin lag gnyis nang du bkug la bcug ste/ mthe bong dang mthe'u chung cung zad bkug /gung mo dang srin lag phyung la bsgreng ngo //phyag rgya 'di dang gsang sngags 'dis byin gyis brlab cing / namaHsa man+ta bu d+d+hAnaM/ be la lu bu ri/ bi ku ru ri bi ku la swA hA/ de nas phyag rgya de nyid la gnas bzhin du namaHsa man+ta bu d+d+hA naM/ sarba tre+e a nu ga d+he ban+d+ha ya sI sI nan/ ma hA sa mA ya ni ra dza te sma ra ni ar te ha te/d+ha ka d+ha ka/ tsa ra tsa ra/ ban+d+ha ban+d+ha/ da she di shi nan/ sarba ta thA ga ta/ a nu dz+nyA de/ pra ba ra d+harma la ba dA/ bi dza ye b+ha ga ba te/ bi ku ri bi ku li/ le'u bu ri swA hA zhes lan bcu brjod pas mtshams bcad pa'am/ rab tu rgya che ba'i mtshams la sogs pa'i cho ga sbyar ro zhes zer te/rgyud 'di las de lta bu'i bsrung ba ni ma gsungs kyi/ 'jig rten gsum las rnam rgyal gyis/ /bdag bsrung la sogs byas nas kyang / /zhes gsungs pas/ bsrung ba dang po nyid bya bar shis la/ gzhan yang gnod pa ni med do/ /bsrung ba dang po yang / namaHsa man+ta badzra NAM ha ha ha bi sma ye/ sarba ta thA ga ta/ bi sha ya saM b+ha ba/ trai lo kya bi dza la hUM dza swA hA zhes bya ba sbyar bar sngags so/ /de nas swa b+hA wa bi shud+d+ha sarba d+har+m+mAHswa b+hA wa shud+d+ho nya haM zhes brjod cing / de ltar mos par byas la/ lag pa gnyis mdun du rtse sprad de bzhag la/ gnyis ka'i mthil du yang a las zla ba'i dkyil 'khor la/g.yas dang g.yon du hUM dang a sngon po dang dkar po dag bsams te/ gnyis ka dbyangs kyi yi ge bcu drug gis gang bar byas la/ mthe bong la sogs par oM hUM hrIH tAM AHzhes bya ba'i mdog ji lta bar bkod la yi ge de dag nyid de bzhin gshegs pa rnams yin par mos shing /mthe bong la sogs par yin par mos la/ lag pa g.yas g.yon skye ba dang mya ngan las 'das pa yin par mos pas/ chos kun phan tshun rjes su 'jug /chos kun tha dad rjes su 'jug /chos kun rjes su zhugs pa ste/ /mtha' bral rjes su 'gro ba'o/ /zhes bya bar mos pas/ sor mo rnams rtse bsnol te/ oM a n+yo n+yA nu ga ta sarba d+harmA zhes brjod cing bsdams la/ yang phye ste zla ba'i yig 'bru gnyis rdo rjer gyur par bsams la/ oM tiSh+Tha badzra zhes brjod pas/lag pa la thim par byas te ci bder bya'o/ /de nas yang mgrin par yi ge hrIHdmar po las byung ba'i pad+ma dmar po 'dab ma brgyad pa'i lce'i 'dab ma la hUM las rdo rje bsams te/ badzra dzi hwa zhes brjod pas thim par bya'o/ /de nas phyogs bcu na bzhugs pa'i sangs rgyas la sogs pa la phyag bzhi bya ba dang /yon chab dang bcas pa'i mchod pa lnga 'og nas 'byung ba lta bus mchod pa dang / sdig pa bshags pa dang / bsod nams la rjes su yi rang ba dang / bskul ba dang / gsol ba gdab pa dang / bsngo ba dang / byang chub tu sems bskyed pa byas la/'phags pa de kho na nyid 'dus pa las bshad pa'i byams pa la sogs pa cung zad bsgoms pas bsod nams kyi tshogs bsags te/ de nas ye shes dbab pa'i dbang gis ye shes kyi tshogs rdzogs par byas te/ oM a we sha ya a zhes badzrA ny+tsa li oM badzra ban+d+ha ban+d+ha oM badzra ban+d+ha traT/'dir chos rnams ni bden pa gnyis phan tshun brten pa dang / de yang don dam pa gtsor gyur pas/ des bcings pa dang / de shes na kun rdzob dral cing mi dmigs par byas pa ste/ de nyid rab tu brten par bya ba'i phyir/oM A be sha ya AHzhes bya bas lhag par skye ba med pa las kun du gnas par bya'o/ /de nas slar de las langs te/ rnam par smin pa'i lus su gnas pas/ oM sha zhes bya bas bstan pa'i stong pa nyid la sogs pas mngon par byang chub pa bsgoms te/ de yang bdag nyid de ltar tshogs rnam pa gnyis rdzogs pas de'i rnam par smin pa'i gnas 'og min nyid du skyes shing / sa bcu pa la gnas pa dang / dbang bskur ba thob par bsams la/ 'og min nas dga' ldan du babs par bsams te/ de nas kyang 'dzam bu'i gling du babs la/gzhon nu'i spyod pa rdzogs par byas nas mngon par byung ste/ dka' ba spyod pa'i lus des mi lcogs pa med pa dang / bsam gtan dang po dang / bsam gtan khyad par can dang / bsam gtan gnyis pa nas srid pa'i rtse mo'i bar du/ rim gyis snyoms par zhugs la/ rim bzhin du babs te/ slar thod rgal du 'jug pa dang babs pa'o/ /de nas yang mi lcogs pa med pa nas bsam gtan bzhi pa'i bar du rim gyis zhugs te/ de nas bsam gtan bzhi pa'i che 'bring dgu las/ chen po'i chen po la gnas pa las/yid kyi lus kyis slar 'og min du song ste/ der yang mi g.yo ba'i ting nge 'dzin la gnas pa las/ sangs rgyas thams cad kyis lung byin pas/ sems so sor rtog pas na/ zla ba'i cha dang rdo rje dang / sku rdzogs pa rnams bsgoms te/ 'dir zla ba'i cha dang po ni tshes gcig pa dang nya gang yang rung ba'o/ /de nas oM sarba ta thA ga ta ma hA sa ma ya satwa haM zhes bya ba dang / byang chub chen por mos pa dang / sku gsung thugs byin gyis brlabs pa dang / de dag gcig tu mos pa dang / oM sa ma ya haM zhes bya ba dang /sa ma ya ho yang sa you0f85haM zhes bya ba dang / cho ga lhag ma gnyis kyis kyang byin gyis brlab pa'o/ /de nas badzra rat+na brjod cing dbang bskur la/ phyag rgyas te gsang ba'i mchod pa brjod do/ /de ltar don 'di snyed cig sha dang bas mtshon pas na/ gsang s ngags kyi lam 'di ni/bla ma'i kha nas rtogs par bya'i/ gzhan du ma yin no/ /da ni de bzhin gshegs pa'i rigs kyis dam tshig sems dpa'i bya ba bshad de/ de yang ye shes dbab pa'i rim pa ni/ chos mnyam pa nyid kyi ngang las rjes la thob pa'i ngo bo'i snying rjes mtshams sbyar nas zla ba'i ngo bor byas te/gsal bar byas la de'i dbus su bris pa ltar gnas pa'i rang gi snying po bsams la/ oM sa ma ya s+t+waM zhes brjod do/ /oM badzra satwa AHzhes pas phab la/ rang gi lha'i mtshan mar gyur pa dang / oM badzra At+ma kou0f85haM zhes bya ba la sogs pa'i nga rgyal byas te/de nas dzaHhUM baM hoHzhes brjod do/ /rang gi sems dpa'i gzugs su gyur par bya ba ni/ oM ma hA sa ma ya s+t+waM haM zhes bya bas me lce mang po 'khrugs pa'i sbyor ba las/ rang gi lha'i skur gyur par brtag cing / oM ma hA sa ma ya s+t+waM zhes bya ba dang /oM sa ma ya s+t+waM zhes bya ba dang / rgyab tu zla ba grub par bya ste/ de nas oM su ra ta s+t+waM zhes bya ba dang / oM sa ma yA haM/ oM sa ma ya satwa a d+hi tiSh+Tha swa mAM zhes bya ba dang / de na oM badzra muSh+Ti zhes brjod la/ oM satwa badzri Ni sta naM zhes pa dang / gnas pa grub par byas la/oM badzra d+hA twI shwa ri hUM/ badzra rat+na a b+hi Shiny+tsa mAM zhes brjod de/ oM badzra d+hA tu zhes pa dang / oM badzra badzri Ni hUM a b+hi Shiny+tsa mAM/ oM rat+na badzri Ni hUM a b+hi Shiny+tsa mAM/ oM d+harma badzri Ni hUM a b+hi Shiny+tsa mAM/ oM karma badzri Ni hUM a b+hi Shi ny+tsa mAM/ oM a k+Sho b+h+ya/ oM rat+na saM b+ha ba/oM a mi ta b+hA/ oM a mo g+ha sid+d+hi/ oM badzra d+hA tu zhes/ dpa' bo'i nga rgyal bya ba dang / de nas gsang ba'i mchod pa brjod de/ de ltar na bstan pa ni rgyud 'di nyid las/ /chos rnams thams cad dngos med par/ sems kyis bsam pa byas nas ni/ /a las zla ba'i dkyil 'khor bsam//zhes bya ba la sogs pa ston to/ /de ltar na dam tshig sems dpa' gnyis las gang yang rung ba cig tu bdag nyid bsams te dang por oM thams cad rang bzhin gyis dag go zhes brjod de/ de'i don gyis chos thams cad stong pa nyid du mos pas bdag nam mkha' la gnas te/bdag gi sems kyi dbang tsam las/ dang po rlung dang chu dang dbang chen nag po dang / sngon po dang / dkar po dang / ser po yi ge yaM dang baM dang laM dag las byung bar bsams te/ de'i dbus su kaM gi yi ge ser po las byung ba'i rus sbal gyi rgyab nas yi ge sa ser po las byung ba'i pad+ma ser po tshad med pa'i lte bar yi ge suM dkar po las ri rab chen po rin po che sna bzhi/rin po che thams cad kyis spras pa/ rtse mo brgyad pa lhun stug cing gzi mdangs bzang por bsams la/ de'i steng du dga' ba'i tshal nyid du mos par byas la/'chad par byed pa las gsungs pa'i gzhal yas khang chen po sngar lha rnams bshad pa'i skabs su bstan pa'i gdan dang gnas nges par bsams te/ de'i shar phyogs kyi sgo la brten par bdag nyid gnas la/ lha rnams ma lus pa'i rang rang gi sku grub par bya zhing /de nas mchod pa'i skabs nas bshad pa ltar/ dgug pa la sogs pa byas te/ khang pa brtsegs ma'i nye 'khor du byon pa legs par brtags pa dang bcas pa ni phyag rgya chen po'o/ /snying gar las kyi rdo rje bsgom pa ni las kyi phyag rgya'o//ljags la yi ge hrIHnyid bsgom pa rdo rje dang bcas pa ni chos kyi phyag rgya'o/ /rgyud 'di las ji skad gsungs pa'i rtsa ba'i lha'i phyag rgya ni dam tshig gi phyag rgya'o/ /kha cig ne re de dag nyid las so zhes zer ro/ /rim pa yang phyag rgya chen po dang dam tshig dang chos dang las dag go//de bas na rgyud 'di'i phyag rgya ni 'di tsam du zad la/ 'di tsam kho nar rnal 'byor gyi rgyud gzhan las kyang gsungs pa snang bas 'di la mi 'thad par mi brtag go/ /phyi rol dang shin tu phyi rol gyi lha rnams ni/ mchod pas tshim par bya ba'i nges par rang gi lha'i cho ga ma lus par spyad pa med do//de nas mchod pa'i tshul ni 'chad par byed pa las gsal lo/ /mchod pa byas nas thams cad bdag gi rjes su spyad pas/ gsang sgrib pa rnams rim gyis spangs nas so/ /de bzhin gshegs pa thams cad kyi rigs sam zhes bya ba ni/bram ze dang rgyal rigs te/ rigs gzhan du ni de bzhin gshegs pa mi 'khrung bas so/ /lha'i rigs sam zhes bya ba ni/ rgyal po chen po bzhi'i rigs la sogs pas so/ /gzhan gang yang rung bar bde ba myong bar 'gyur ro zhes bya ba ni gang du skye bar 'dod pa der skye ste/ji skad du/ mi mchog gang zhig kun spyod pa/ /sdig pa thams cad rnam dag bdag /de bzhin gshegs pa'i sa thob cing / skye dang skye bar bde gshegs kyi/ rigs 'gyur chos ldan rgyal por 'gyur/ /zhes pa dang / yang ji skad du/ yang na gsang sngags rgyal po'i mthus/ /gnas ni gang du bsams pa dag /de dang der ni de yi tshe/ /skye bar 'gyur bar dogs pa med/ /ces gsungs pa lta bu'o/ /de dag gis ni de ltar na rigs kyi bu dngos grub gnyis bstan to/ /lhag ma ni go sla'o//de nas lha rnams kyi dbang po brgya byin gyis zhes bya ba nas/ dkyil 'khor chen po 'di gsungs so/ /zhes bya ba'i bar du yang go sla'o/ /sangs rgyas kun gyi byang chub sems/ /bla na med pa rtogs gyur pa/ /rgyal bas gsungs pa'i ye shes gang / / de na dkyil 'khor snying por gsungs/ /zhes bya ba ni nang gi dkyil 'khor dam pa ste/ 'dir sangs rgyas kun gyis zhes bya ba ni/ dus gsum du bzhugs pa rnams kyi'o/ /byang chub ni chos kyi dbyings te/ byang chub nam mkha'i mtshan nyid de/ /kun du rtog pa thams cad spangs//zhes bya ba gsungs so/ /de nyid sems te 'jig rten dang 'jig rten las 'das pa'i yon tan sna tshogs pa'i gzhir gyur pas so/ /nyan thos dang rang sangs rgyas rnams kyi spyod yul ma yin pas na bla na med pa'o/ /de thabs gang gis rtogs par 'gyur ba'i rnam par mi rtog pa'i ye shes gang yin pa/rgyal ba sangs rgyas bcom ldan 'das kyis gsungs pa/ de ni ming don dang ldan pa/ /dkyil 'khor zhes bya ba brjod do/ /ming gi don nyid ci zhe na/ snying por gsungs zhes bya ba ste/ mar gyi dam pa ni mar gyi snying po bzhin no/ / 'di phye ste brjod na ni dkyil ni rnam par mi rtog pas snying por bstan la/ 'khor ni rdzogs par skad kyi dbyings las 'don te/ de bas na rnam par snang mdzad mngon par byang chub pa'i rgyud las/ dkyil ni snying po'o/ /'khor ni rdzogs pa'o zhes gsungs pa legs par drangs pa yin no//de bas na dkyil 'khor ni gang don dam pa'i bden pa'i ngo bo gang la sems rgyu ba yang med na yi ge rnams lta smos kyang ci dgos zhes gsungs pa 'di nyid yin no/ /lhag ma ji lta ba bzhin sprul pa dang / gzugs brnyan dag ni brtags nas dkyil 'khor nyid du rnam par gzhag go//don 'di nyid dkyil 'khor yin par ni/ zla gsang thig le'i rgyud las kyang / /yan lag thams cad bsgom las 'das/ /rtog dang mi rtog kun spangs la/ /'dren dang tshig las yang dag 'das/ /'di ni dkyil 'khor mchog ces bya//zhes gsungs so/ /'o na 'di lta bu'i nang gi dkyil 'khor 'dir bstan pa ci la dgongs she na/ 'di ni phyi'i dkyil 'khor la mi ltos par bya ba dang / slob dpon dang slob ma dmigs pa can phyi'i dkyil 'khor la stong pa de dag kyang / dang po nas byang chub sems yid la byed cing sa sbyang ba la sogs pa'i phyi'i dkyil 'khor gyi las bya bar dgongs pas na 'di gsungs so//ci 'o na nang gi dkyil 'khor 'di rtogs na/ phyi'i dkyil 'khor la mi ltos pa yin nam zhe na/ mi ltos pa yin te stong pa nyid la goms pa dag la phyi rol gyi dkyil 'khor bya ba dag gis ci zhig bya ste/rdul tshon la sogs pa'i bya ba ni dmigs pa can dag gi ngo bor gyur pa ste/ de ltar yang rnam par snang mdzad mngon par rdzogs par byang chub pa'i rgyud las gsungs pa/ de nas phyag na rdo rjes bcom ldan 'das kyi zhabs la gtugs te/bcom ldan 'das la 'di skad ces gsol to/ /sangs rgyas mtshan ma mi mnga' ste/ /chos kyi sku la rnam par bzhugs/ /mtshan med 'dus ma byas pa ni/ /mtshungs pa med pa'i chos ston na/ /dpa' bo chen po ci slad du//mtshan mar bcas pa'i cho ga 'di/ /gsang sngags spyad la ston par mdzad/ /'di ni chos nyid tshul ma lags/ /de skad gsol nas bcom ldan 'das/ /rnam par snang mdzad chen po yis/ /de tshe phyag na rdo rje la/ /chos kyi mtshan nyid 'di nyid gsungs/ / chos ni rtog dang bral ba ste/ /kun rtog thams cad spangs pa yin/ /de la sems dang sems byung gi/ /rtog pa rab tu spang ba yin/ /nga yis chos sngon sangs rgyas pa/ /de ni mkha' las byung ba ste/ /legs par rtogs pa'i spyod yul ba/ /byis pa rnams kyis mi shes so//yul dus mtshan ma la sogs pa/ /mun gyis bsgribs pa rnams 'dod do/ /de dag gzung bar bya ba'i phyir/ /cho ga 'di yang brjod pa dag /yul med dus kyang med pa ste/ /bya ba med cing byed pa'ang med/ /chos rnams kun la yod med de/ /chos rnams nyi tshe 'ba' zhig go//gsang ba'i bdag po 'on kyang / sems can dag gi blo zhan cing / /bya ba tsam gyis rmongs pa dag /dngos po'i don la chags pa rnams/ /ma 'ongs dus na 'byung 'gyur te/ /'di lta'i tshul ni mi shes pas/ /yul dang dus dang bya ba las//dge dang mi dge'i mtshan ma yis/ /rmongs pa 'bras bu 'dod byed de/ /sems dpa' chen po de dag phyir/ /cho ga 'di ni brjod pa yin/ /zhes so/ /stong pa nyid la gnas pa la dngos grub rnams 'dod pa tsam gyis 'byung bar yang de nyid las gsungs te/ gsang ba'i bdag po nam byang chub sems dpa' mtshan ma med pa'i ting nge 'dzin la gnas par gyur pa de'i tshe/de la de bzhin gshegs pa'i gsang sngags rnams mngon du phyogs shing gzhol bar 'gyur ro zhes so/ /de bzhin du sa sbyong ba la sogs pa dkyil 'khor gyi las ma lus pa yang /byang chub kyi sems yid la byed pas bya ste/ de nyid las gsungs pa/ sa ni dang por shes byas te/ /sems kyi sar ni gsungs pa yin/ /sbyang ba sngar ni bstan pa ste/ /de yis de ni yongs su sbyang / /nam zhig nyes dang bral ba yi/ /sems kyi sa ni mi 'jigs pa//de tshe de ni dag pa ste/ /nyes pa thams cad rnam par spangs/ /mngon par byang chub mthong bas na/ /de lta bas ni bstan shes bya/ /de las gzhan du sa sbyong ba/ /de ni dag par mi 'gyur ro/ /sngags pa rtog la gnas nas su/ /gang zhig sa sbyong byed pa ni//byang chub sems ni rnam spangs pas/ /gsang ba'i bdag po de mi dag /de bas rtog pa rnams spangs nas/ /sa kun rnam par sbyang bar bya/ /nga yis dkyil 'khor rnams kyi ni/ /cho ga rgyas par gang bstan pa/ /de dag thog mar bstan pa ni/ /rmongs pa rnams kyis mi shes te//rtog pa sdug bsngal rgyur gyur pa/ /ji srid ma spangs bar du ni/ /'jig rten 'di na sangs rgyas min/ /kun mkhyen zhes kyang mi bya'o/ /slob ma rnams ni nan tan du/ /byang chub sems kyis sbyang bar bya/ /zhes so/ /yang de nyid las gsang ba'i bdag po gzhan yang byang chub sems dpa' gsang sngags kyi sgo nas byang chub sems dpa'i spyad pa spyod pa rnams kyis byang chub kyi sems kyi yid kyis de bzhin gshegs pa'i sa la gnas te/dkyil 'khor bri bar bya'o/ /gzhan du byas na sangs rgyas dang byang chub sems dpa' dang byang chub kyang bslus par 'gyur ro//dam tshig las 'das pa nges par ngan song du 'gro bar 'gyur ro zhes gsungs so/ /de bas na nang gi dkyil 'khor spros pa med pa 'di/ phyi'i dkyil 'khor gyi dang por nan tan du gsungs pa'o/ / de nas yang zhes bya ba la sogs pa ni go sla'o/ /kun dga' la sogs zhes bya ba la sogs pa ni sa mdor bstan pa ste/ rgyas par ni ji skad du gsungs pa'o/ /de nas gzhan yang bshad par bya/ /gang tshul mthong na dge ba yi/ /sa dang mi dge bsgrags pa yi/ /sa yi cha yi mtshan nyid do//mthon dman dang ni tsher mas gang / /thod pa yis ni 'thabs pa dang / /gdab pa dong dang nag por gnas/ /sbrul dang grog tshang thal ba'i steng / /gseg ma rdul dang sgra dang ni/ /'bru dang srin 'bu 'khrug pa ste/ /'di 'dra'i sa ni mkhas pa yis//las kun la ni rnam par spangs/ /cha mnyam shin tu gtsang zhing 'jam/ /gting zug skyon ni rnams spangs pa'i/ /byang shar du ni shar nyid kyi/ /sa ni kun la bsngags pa yin/ /dang por pus nub tsam brkos la/ /sa de nyid kyis dgang bar bya/ /gal te de nyid lhag gyur na//de ni grub par 'gyur bar bstan/ /'di las bzlog na sgrub pa pos/ /las ni brtsam par mi bya ste/ /brtsams na sdug bsngal thob 'gyur zhing / /dpal du yang ni mi 'gyur ro/ /skye bo bzang po mang ba dag /dkyil 'khor sa ni gang yin par//de bsngags dngos grub byed pa ste/ /chu med pa ni mkhas pas smad/ /chu dang ljon shing sna tshogs dang / /lo ma me tog 'bras bu dang / /'o ma can gyi shing yod pa/ /de ni dkyil 'khor sa ru bsngags/ /yon tan kun dang ldan pa'i sa/ /bzang po shing dang bcas pa dang //chu dang nye ba'i sa la ni/ /dkyil 'khor las de de ru'o/ /zhi bar byed pa'i las kyi sa/ /kha dog dkar por yongs su brtag /dmar dang ser la rgyas pa'i don/ /nag po la ni mngon spyod do/ /gang+gA'i 'gram dang pad+ma'i tshal/ /chu bo che dang nye ba'ang rung / / ne'u sing dang ni nyams dga' bar/ /zhi ba'i dkyil 'khor bri bar bya/ /ma mo'i gnas sam dur khrod dam/ /skye bo med dang khang stong dang / /gang yang mngon par mi 'dod pa'i/ /phyogs de rnams su mngon spyod de/ /ri rtse ba men ba lang gi/ /lhas dang mchod rten gdung bcas khyim//'di lta bu la sogs phyogs su/ /rgyal po'i dkyil 'khor bri bar bya/ /mchod rten che dang nyams dga' dang / /rnam par dben pa'i khang pa dang / /ri rtse rnams su rgya chen po/ /grub par bya phyir dkyil 'khor bri/ /ri dang gling ma mkhar dang ni//ma thos dang ni phug thag tu/ /dpal gyi sgo ni 'dod pa yis/ /sa 'og rdo rje dkyil 'khor bri/ /chu skyes rgyas pa'i nags tshal ni/ /ngang pa'i tshogs kyis sgra sgrogs skad phyung bar/ /rgyal srid 'dod dam nor 'dod pas/ /dpal 'byor kun gyi dkyil 'khor bri//ma mo'i gnas dang lha rten nam/ /lha yi khang pa'ang rung bar ni/ /rdo rje lcags kyus gzung dbab dang / /gzhom pa'i dkyil 'khor bri bar bya/ /lam chen bzhi mdo mchod rten dang / /phyag na rdo rje'i spyan snga ru/ /khro bo'i rgyal po bgegs kyi ni/ / dkyil 'khor sgrub pa po yis bri/ /de bzhin gshegs pa'i bzhugs gnas dang / /gtsug lag can dang mdzes pa ni/ /mkhas pa yis ni khyad par du/ /dkyil 'khor thams cad bri bar bya/ /rab gnas la sogs thams cad kyi/ /dkyil 'khor rnams kyi tshul nyid la//pad+ma'i tshal dang nye ba ru/ /mkhas pas khyad par bri bar bya/ /gsal ba la sogs thams cad ni/ /mkhas pas ri yi rtse mo ru/ /dkyil 'khor rnams la khyad par du/ /thig gi cho ga nyid kyis bri/ /khyed la gnas ni rnam nges pa'i/ /khyad par rgyas par ston pa ste//thams cad du ni sa rnam gsum/ /nan tan gyis ni yongs su brtag /ces pa dang / bla gab med dang dogs par ni/ /bsgrub pa'i dkyil 'khor ma gtogs pa/ /slob dpon gyis ni gzhan mi bri/ /bris na 'phral du 'chi bar 'gyur/ /zhes pa dang / phug tu yang ni bsgrub pa yin/ /sa phyogs dogs par mi bya'o/ /khang rul gang du blo can gyis/ /bsgrub pa brtsam par mi bya'o/ /zhes gsungs so/ /'dir yang gnas chen po pa ni phyag na rdo rje mngon par dbang bskur ba las shes par bya'o/ /tshig gi don ni go sla'o//ji bzhin pa yi cho ga yis/ /gnas de byin gyis brlabs brtsam pa/ /zhes bya ba 'dir/ /ji bzhin pa yi cho ga 'di/ /ji ltar rigs pa'i cho ga ste/ /gal te gtsug lag khang la sogs pa sngar longs spyod pa zhig yin na/ bdud rtsi 'khyil pas bzlas pa'i spos chus gtong ba tsam gyis sbyangs la/sngar longs ma spyad pa zhig na ni sbyang ba'i cho ga rgyas par bya'o/ /da ni 'dir/ ji bzhin pa yi cho ga yis/ /zhes bya ba la brten te/ bsnyen pa dang sa'i rim pa rgyas par bstan te/ dang por slob dpon yon tan dang ldan pa la/slob mas slob ma dbang bskur ba'i phyir/ lan gnyis lan gsum du gsol ba btab pa na/ slob dpon gyis ci khyod yo byad rnams tshogs sam ci ste ma yin zhes dri bar bya'o/ /gal te ma tshogs so zhes zer na/ re zhig de la yo byad tshogs su gzhug par bya'o//gal te ma lus par rnyed do zhes zer na/ bag yod pa'i bsgo ba dang bsrung bar bya'o ste/ kha cig ni tshogs la kha cig ni ma yin no zhes zer na ma tshogs pa btsal ba dang / bag yod par bsgo ste bsrung bar bya'o/ /de la bsrung ba'i cho ga ni/slob ma'i lte bar raM las byung ba'i nyi ma la hUM 'od zer drag po dang bcas pa'o/ /de'i snying gar yang yi ge kaM nag po las byung ba'i sdig pa sha za lta bu/ mi sdug pa skra kham pa grol ba mche ba can/ mi'u thung gcer bur bsams te/ de nas lte ba'i hUM las drag po'i 'od zer byung bas sdig pa'i ngo bo de gzir nas sna'i rtse mo nas 'thon te/slob ma'i mdun du bltas la/ de nas lte ba'i nyi ma hUM dang bcas pa snying gar song zhing / hUM rdo rje gnod sbyin nag po 'jigs su rung ba/ lag pa g.yas dang g.yon na/ mche ba dang sdigs mdzub 'dzin par bskyed la/slob ma'i snying ga nas mdun du 'thon par bsams te/ de nas slob dpon gyis oM badzra yak+Sha krod+ha pA paM n+ye sa khA da khA da hUM phaT ces bskul bas khro bo des sdig pa de ma lus par zos te/ slar slob ma'i snying gar thim par bsams la/ de nas stong pa nyid las slob ma kun du bzang por gyur pa'i snying gar zla ba la yig khaM las sna tshogs rdo rje bsams la/ rang gi lha'i sngags sam/ bdud rtsi 'khyil pa'i sngags brgya rtsa brgyad kyis gsungs te/ ji srid dkyil 'khor chen po dbang ma bskur gyi bar du sdig pa'i las dang srog gi bar chad du 'gyur ba'i las ma byed cig ces bsgo la/gnas gcig nyid du slob dpon gyi sngar bstan pa'i tshul nyid kyis lhag pa'i lha'i sngags 'bum mam/ rtsa ba'i sngags 'bum dang / dkyil 'khor so so'i sngags khri khri bzlas te/ gal te lhas gnang ba thob na ni de nyid kyi tshe na'o//de ltar bsnyen pa bya ba ni/ rnam par snang mdzad mngon par byang chub pa las/ dkyil 'khor gyi ni sngon rol du/ /bya ba rnams ni nges pas nyon/ /so so'i las rnams 'dod pa yis/ /tshul shes pas ni ci rigs par/ /rang gi ting 'dzin la gnas te//rig sngags rgyal po stobs po che/ /yan lag bcu gnyis tshig 'byung ba/ /go rims bzhin du bzlas brjod bya'o/ /zhes gsungs so/ /'dir yan lag bcu gnyis pa'i tshig ni mtshon pa'o/ /de bzhin du 'phags pa rab tu grub par byed pa las kyang /sngags pa rnams ni mthu shes nas/ /bsnyen pa las ni dngos grub btsal/ /zhes gsungs so/ /'di ni sngon du bsnyen pa'i cho ga'o/ /de nas bdag gir bya ba ni/ gang du dkyil 'khor la sogs pa byed par 'dod pa'i sa de'i bdag po/ rgyal po la sogs pas gnang bar bya'i gzhan du ma yin te/ ji skad du dkyil 'khor gyi spyi'i cho ga gsang ba'i rgyud las/ sa yi bdag pos gnang na ni/ /slob dpon gyis ni dkyil 'khor bri/ /zhes gsungs so/ /de nas sa'i bdag po mngon sum zhes bya ba las gnang ba thob nas/gang du dkyil 'khor bya bar 'dod pa der song ste/ de na gnas pa'i mi ma yin pa la gtor ma bzang po byin la/ sa 'di bdag la bslang shig ces bslang ste/ chos bsgrags pa 'phags pa sa'i mdo las brjod pa/ lto 'phye la ni mi gnod par//dgun zla 'bring po la sogs nas/ /brtsams te zla ba gsum gsum du/ /lto 'phye lho dang nub dang byang / /shar du de yi mgo bo ste/ /g.yon pa'i zur gyis nyal ba yin/ /'di ltos shes par byas la brko/ /mgo bo rgyab phyogs nas brkos pa'i//skyon no rgyas pa las shes bya/ /zhes gsungs pa'i rim pas dong khru gang tsam la dbus nas brtsams te/ rgya la mtho gang zhig brkos te/ chus gang bar bkang la/ slob dpon gom pa brgya myur bar phyir song ste/ myur du log pa nas chu de dma' bar ma gyur na sa'i bdag po des byin pa'o//yang na der gtor ma sbyin pa dang / chos bsgrags pa byas la/ mtshan mo nyal te/ rmi lam gyi mtshan ma thob par bya'o/ /de dag gis ma byin par ni der dkyil 'khor mi bya ste/ ma byin par len pa'i nyes pa dang bar chad spang pa'i phyir ro//'di ni sa bdag gir bya ba'o/ /de nas lha ma yin ma rungs pa la sogs pa dang / lha'i bu'i bdud dang log 'dren la sogs pa ched du sa'i bgegs byed pa de dag gzhom pa'i phyir/ der mngon spyod kyi sbyin sreg gi cho gas mi rus kyi phye ma khrag dang /dug dang bcas par bsreg ste mchod pa lnga dang gtor ma bkod la/ slob dpon gyis rang gi snying ga'i 'od zer ram/ 'chad par byed pa'i rdo rje lcags kyu'i phyag rgya dang sngags kyis sa'i lha mo mdog ser mo rab tu mdzes pa/ lo bcu drug lon pa'i na tshod can/lag pa gnyis na gser gyi bum pa 'dzin pa bkug la/ yon chab dang bcas pa'i mchod pa lnga dang / gtor ma oM pr-i thi wI de wI che ge mo pra tIts+tsha swA hA zhes pas phul te/ skyob pa sangs rgyas zhes bya ba la sogs pa'i tshigs su bcad pa gnyis kyis gsol ba btab la/de nas mkha' la bteg ste/ dngos grub kyi bye brag las/ lkog ma dang / snying ga dang / lte ba'am/ sta zur dang pus mo nub tsam du dong ste de dang 'tsham pa'i rgyar brkos te/ skra dang rus pa dang / rdo la sogs pa bsal te/ dri zhim po'i chu rdo rje khro bo'i sngags kyis btab pa gtor te/gtor ma byin la zhi ba'i sbyin sreg bya ste/ dong gi gting du rin po che lnga dang 'bru lnga dang / sman lnga ras dkar pos so sor phur te/ bum pa sar pa'i nang du bcug ste bzhag la/ dong des de nyid kyis dgang ste/ gal te mtho bar gyur na rab tu 'grub par ston cing /thad kar khengs kyang brtsam par bya'o/ /kha ma khengs na brtsam par mi bya ste/ sngar lung gis kyang bstan to/ /mkhas pas rin chen la sogs pas/ /sa gzhi snying po ldan par bya/ /thang bu la yang ci rigs par/ /sa rdzas gzhag pa'i 'og tu ste//cho ga de ni phyi rol du'o/ /zhes pa dang / yang / 'bras so ba dang mon sran gre'u/ nas dang gro dang til dang lnga/ /'bru rnams kun zhes bya ba ni/ /las rnams kun la 'di dag gsungs/ /sid+ha bya kr-i kri ka ni/ /ha sa de ba ha sa ste/ /sman rnams kun zhes bya ba la//lnga po 'di rnams shes par bya/ /byi ru dang ni sa le sbram/ /dung dang mu tig nor bu ste/ /rin chen kun zhes bya ba la/ /lnga po 'di dag shes par bya/ /zhes so/ /de nas rdul tshon ji tsam du dgye bar 'dod pa'i nyis 'gyur du/ sa gzhi de rab tu 'thas par bcags pas/lag mthil ltar mnyam par byas te/ de nas ba'i rnam lnga dri zhim po'i chus byug par bya ba ni/ ji skad du/ dkyil 'khor bri ba'i sa gzhi ni/ /byi dor legs byas legs par byugs/ /khro bo chen po'i bzlas pa yi/ /spos chus bsang gtor byas pa la//zhes pa lta bu'o/ /sa'i bye brag kha cig la ni de ltar bya ba mi sbyar te/ ji skad du/ sa gzhi gang na 'thas pa dang / /khang thog dang ni rdo leb dang / /mchod rten drung dang 'bab chu'i 'gram/ /mtsho rnams kyi ni 'gram dag tu/ /sa gzhi sbyang zhing brtag pa dag /nan tan du ni bya mi dgos/ /der ni zug rngu dbyung mi dgos/ /'thas pas bcag kyang der mi dgos/ /mthon dman la sogs skyon rnams kyang / /der ni dogs pa bskyed mi dgos/ /rang bzhin gnas pa'i sa gzhi la/ /byi dor legs par byas nas su//lag pas bya bas nas gsang sngags bzlas/ /de yi sbyang ba de yin no/ /zug rngu'i nyes pa thams cad ni/ /gal te dbyung bar mi nus na/ /de ni gsang sngags nyid kyis su/ /sbyang ba legs par byas par 'gyur/ bsad pa yi ni las rnams dang / /gdon rnams tshar gcod la sogs dang //drag shul spyod pa dag la yang / /sa ni rab tu sbyang mi dgos/ /khro bo kI li kI la yis/ /bsang gtor byas na sbyangs bar 'gyur/ /zhes pa dang / yang / khang pa'am dri gtsang khang du ni/ /bsang gtor byas pas dag par bshad/ /de bas der ni sa mi brko/ /zhes gsungs pas so//de nas sa'i lha mo bstims la/ sa'i dbus su pad+ma dang zla ba dang sna tshogs rdo rje'i steng gi hUM las byung ba'i rdo rje phra mo spros pas/ sa phyogs de rdo rjer gyur par bsams la/ sna tshogs rdo rje nas rim gyis sa la bstims la/ oM me di nI badzra'i b+ha ba badzra ban+d+ha hUM zhes bzlas te/'di ni phyi'i sa sbyang ba'o/ /de nas slob dpon gyi dkyil 'khor gyi dbus der stan 'jam zhing bde ba la 'dug ste/ gtor ma byin la bdag nyid gzengs bstod par bya ste/ deng du bdag tshe 'bras bu yod/ /bdag gi gson pa 'bras bur bcas//lha dang dam tshig gis mnyam par/ /gyur par bdag ni som nyi med/ /byang chub sems dang sems gcig par/ /de bzhin gshegs pa'i rigs su ni/ /deng bdag skye bar the tshom med/ /deng bdag nyi ma dam pa ste/ /bdag gi mchod sbyin bla na med/ / sangs rgyas thams cad spyan 'dren pas/ /deng bdag 'dus pa'i mchog yin no/ /zhes pas so/ /de nas yan lag thams cad kyis phyag byas la/ spos snod lag tu thogs te/ sangs rgyas rnams la gsol ba gdab pa ni/ /mgon po thugs rje'i bdag nyid can/ / thams cad bdag la dgongs su gsol/ /sras bcas lnga ni gdugs 'das nas/ /sa gzhi yongs su gzung bar mdzod/ /na maHsa man+ta bud+d+hA nAM/ sarba ta thA ga ta/ a d+hiSh+ThA na ad+hiSh+Thi te/ a tsa le bi ma le/ pra kr-i te pa ri shud+d+ha swA hA zhes pas so/ /de nas de rnams kyi spyan sngar/phyag 'tshal ba nas bzung ste/ cho ga ma lus par byas la/ de nas rdo rje sems dpa' la sogs pa bzhir dmigs pa'i slob ma'am/ mi bskyod pa la sogs pa bzhir dmigs pa'i slob mas/ phyogs bzhi nas rnal 'byor gyi rgyud thams cad kyi rtsa ba lta bu/dpal gsang ba 'dus pa las gsungs pa'i tshigs su bcad pa 'di dag gis/ shar nas brtsams te gsol ba gdab par bya'o/ /de bzhin gshegs pa kun zhi ba/ /de bzhin gshegs pa kun gyi gnas/ /chos kun bdag med pa yi mchog / dkyil 'khor dam pa bshad du gsol/ /mtshan rnams thams cad yang dag rdzogs/ /mtshan min thams cad rnam spangs pa/ /kun du bzang po sku yi mchog /dkyil 'khor dam pa bshad du gsol/ /zhi ba'i chos ni mchog las byung / /ye shes spyod pa rnam sbyong ba//kun du bzang po gsung gi mchog /dkyil 'khor dam pa bshad du gsol/ /sems can kun gyi sems chen po/ /rang bzhin dag pa dri ma med/ /kun bzang thugs mchog kha los sgyur/ /dkyil 'khor dam pa bshad du gsol/ /zhes pa'am/ yang na tshigs su bcad pa dang po nyid bzlas shing brjod par bya'o/ /yang na rgyud 'di nyid las ji ltar gsungs pa nyid lan gsum brjod do/ /de nyid kyis ni rdo rje gzung / /chos kyi dril bu dkrol bar bya/ /dam tshig gis ni phyag rgya cher/ /byin gyis brlabs nas snying po bzlas//'khor lo kun gyi cho ga ni/ /rdo rje dril bu 'dzin pas bya/ /dkyil 'khor thams cad sgrub byed pa'i/ /rtog pa kun la yang dag 'jug /dam tshig che gsum zhes bya ba/ /rgyal 'di sangs rgyas sgrub byed yin/ /dngos grub kun gyi cho ga la/ / rdo rje dril bu rab tu bskul/ /cho ga lhag ma ma tshang yang / /'grub 'gyur smad par mi bya'o/ /zhes bya ba sbyar bar bya'o/ /de nas bdag nyid gzengs bstod de/ bdag ni rang nyid rdo rje can/ /rdo rje sems dpa' bdag rang nyid/ /bdag ni sangs rgyas rgyal po che/ / stobs chen rdo rje can bdag yin/ /rnal 'byor dbang phyug rgyal po bdag /phyag na rdo rje brtan bdag ste/ /bdag po rdo rje chen po bdag /byin gyis brlab pa mi 'dor ro/ /zhes brjod de/ hUM badzrod tiSh+Tha zhes brjod pas ji ltar bskyed pa'i dkyil 'khor nam mkha' la bteg ste/stan las langs nas bdag nyid khams gsum rnam par rgyal bar gyur pa'i mig gnyis su ma dang Ta las mig g.yas g.yon nyi zla ser por byas te/ bgegs la bka' bsgo nas/ /rkang mthil gnyis su hUM las byung ba'i sna tshogs rdo rje me'i 'od 'phro ba bsams te/rkang pa gang dang gang du bor ba de dang der rdo rje kun du rtse mo 'bar bas 'khrigs par bsams te stang stabs bya'o/ /de ni ji skad du rnam par snang mdzad sgyu 'phrul dra ba las gsungs pa/ dang po kho nas yongs su gzung bar bya ste/ slob dpon gyis lha nyid kyi stang stabs la 'dug la/lag pa g.yas pas bsgrims te/ rdo rje gsor zhing / lag pa g.yon pas dril bu gsil nas/ rdo rje'i dkyil 'gros kyi dkyil 'khor gyi sa gzhi 'gying bag gis yongs su bskor bar bya'o/ /rgyan thams cad kyis brgyan pa'i khro bo'i nga rgyal gyis hUM zhes brjod cing /dkyil 'khor gyi sa gzhi 'gying bag gis bskor nas kyang / khro bo'i skur bsgoms pas/ sdang ba'i lha dang lha ma yin dang / gsang ba pa rnams la tshig 'di brjod par bya'o/ /slob dpon ming 'di zhes bya bas/slob ma che ge mo zhig gi rdzogs pa'i byang chub rdzogs par bya ba dang / sems can thams cad bla na med pa'i ye shes thob par bya ba'i phyir/ sa phyogs 'dir dkyil 'khor gyi rgyal po mtshan 'di zhes bya ba 'di yis/ lha dang / lha ma yin dang / gnod sbyin dang /dri za dang / srin po dang / yi dwags dang / sha za dang / brjed byed dang / 'byung po dang / mkha' 'gro ma dang / gnon po dang / nam mkha' lding dang / mi'am ci dang rig sngags 'chang grub pa rgan po'am rgan mo'am/ g.yog dang 'khor du bcas pa gang dag 'khod pa rnams dengs shig /'di ltar rdo rje 'chang gi bka' thos nas myur ba nyid du dengs shig /gang dag mi 'gro ba de dag ni/ phyag na rdo rje hUM zhes bya ba rab tu khros pa'i bzhin 'bar ba can gyis ye shes kyi rdo rje chen po 'bar rab tu 'bar bas mgo bo tshal pa brgyar 'gas par 'gyur ro zhes lan gsum brjod nas/stang stabs la gnas bzhin du sa gzhi rdo rje'i rang bzhin du byin gyis brlab par bya'o/ /g.yas brkyang ba dang g.yon bskum pa dang / sa ga'i 'dug stangs dang / zlum po'i 'dug stangs dang / mthun pa'i rkang stabs dang /rus sbal gyi rkang stabs dang / rdo rje gdengs pa dang / rdo rje 'jo tshul dang / rkang pa ya gcig gi stangs dang / seng ge'i stangs dang / seng ge glal ba dang / bung ba 'phur ba'i stangs dang / rdo rje'i sgrog dang / rdo rje gsor ba dang / rdo rje'i stang stabs dang /rdo rje gar dang / rdo rje 'jigs su rung ba dang / rdo rje ro langs dang / rdo rje tho ba dang / sgo bzhi byin gyis brlab pa dang / rdo rje gdu bu dang / bud med kyi sgyu 'phrul gyi stang stabs dang / rdo rje bral ba dang / stobs chen gdengs pa dang / rdo rje mche ba dang / rdo rje gad mo dang / rdo rje sgra dang / ral gri'i thabs dang / rdo rje'i thabs dang / 'khor lo'i thabs dang / gtun shing gi thabs dang / ba dan gyi thabs dang / gzhu'i thabs dang / zhags pa'i thabs dang / pad+ma'i tshul dang / be con gyi tshul dang / mi 'jigs pa'i tshul dang / lcags kyu'i thabs dang / gshol ba'i tshul dang / mdung gi thabs dang / mda' gzung ba'i thabs dang / mda' 'phang ba'i thabs dang / thag mdung bskor ba'i thabs dang / mchog sbyin pa'i tshul dang / mdung thung gi thabs dang / mtshon rtse gcig pa'i thabs dang / phyag 'tshal ba'i tshul dang /rdo rje'i 'dug stangs dang / ting nge 'dzin gyi 'dug stangs dang / pad+ma'i 'dug stangs dang / sems dpa'i skyil mo krung dang / dpa' bo'i 'dug stangs dang / bzang po'i 'dug stangs dang / tsog bu'i 'dug stangs dang / brtse ba'i stang stabs dang / mdun du bsnur ba dang / phyir 'gyed pa dang / mtha' yas dang / rnam par rgyal ba dang / sprin sgra dang / gsus po che dang / rgyal po'i phur bus gnas lngar bcing ba dang / phur bu brdung ba dang / dra ba dang ra bas mtshams bcad pa dang / phyogs bcing ba de lta bus sa gzhi rdo rje'i rang bzhin du 'od 'bar bas 'khrigs par bsgoms te gtan la dbab par bya'o zhes gsungs pa'i tshul gyis bya ste/'di ni sa yongs su gzung ba'i cho ga'o// //de nas mtshan mo nang gi sa sbyang bar bya ste/ oM b+hU khaM zhes brjod pas sa gzhi nam mkhar byas te/hUM laM hUM zhes brjod pas gser gyi rang bzhin du byas la/ de'i dbus su pad+ma nas badzra ban+d+ha hUM zhes ci nus bzlas pa'i bar du bya ste/ de nas yang sa gzhi dri dang ba'i lci bas byugs la/ phyogs mtshams brgyad du mar me brgyad dang bdug spos du ba 'thul ba brgyad bkod de/dkyil 'khor gyi sa la lag pa reg bzhin du/ bdag gi bdag po'i sngags brgya rtsa brgyad dang yi ge brgya pa lan brgya bzlas te/ de nas de'i nub mo ni slob dpon rmi lam blta zhing / sta gon la gnas pa'i nub mo slob ma rmi lam blta'o/ /de ltar yang rnam par snang mdzad mngon par byang chub pa las/de nas sngags pas langs nas su/ /snying rjer gyur pa'i yid kyis ni/ /nub kyi phyogs su gnas nas su/ /nang gi bdag nyid rnam dag pas/ /byang chub sems ni dran byed cing / /de nyid du ni nyal bar bya//de nas sngags pas rmi lam blta/ /byang chub sems dpa' grags chen nam/ /yang na sangs rgyas bcom ldan 'das/ /sems can rnams la phan bya'i phyir/ /dkyil 'khor bri ba'i las rnams la/ /bdag nyid kun rtsom 'bad pa'am/ /bdag nyid la ni 'di skad du//sems can chen po bu khyod legs/ /dkyil 'khor myur du bris shig ces/ /spro ba skyed pa mthong yang rung / /gal te mtshan ma ngan pa zhig mthong na/ /byang chub kyi sems bsgoms pa la sogs pa bsrung ngo / /slob ma rmi lam lta ba 'og nas 'chad do//'di ni nang gi sa sbyang ba'i cho ga'o// //byin gyis brlabs pa'i gnas der ni/ /zhes bya ba nas/ rta babs bzhi dang ldan pa dang / /zhes bya ba'i bar ni go sla'o/ /them skas bzhi yi phreng ba dang / /zhes bya ba ni/ sgo'i nye 'khor ri mo'i phyi rol cha chung gcig la tshon nag po ma yin pa'i ri mo bzhi bris te/kha cig na re mda' yab kyi phyi rol cha chung gcig la'o zhes zer na/ gzhan dag ni bsgom pa'i dbang du bya'o/ 'di bri ba ma yin no zhes zer te/ seng ge ban glang rnams kyis brgyan/ /zhes bya ba ni rta babs kyi cha dang po'i phyi rol gyi cha chung gnyis la mchod rten yin la/de'i 'og tu cha 'bring po gnyis la g.yas g.yon du/ seng ge dang glang po che cha chung re res mchod rten dang ma 'brel bar bya'o/ /kha cig na re rta babs kyi sar nges par bzhon pa las 'bab pa yang / rje btsun mchod rten gyi dbang las so zhes zer te/ de ni ma yin te/ sgo thams cad la de med kyang rta babs yod na nges par 'bab par rigs pa ni/ 'jig rten nye bar spyod pa las yin la/ blo dang ldan pa gus shing nga rgyal spangs pa ni/ de gnyis ka med kyang de bas ches ring ba nas babs te/'dir ni ma lus par myur du 'bab pas na/ twa ra na ti ru ri ya tsa lan+ti zhes grags so/ /dar dang lda ldi do shal phreng / /zhes bya ba la/ dar dkar po srid du khru nyi shu rtsa lnga zheng du khru gang ba 'phyangs pa yin la/ lda ldi ni de nyid kha dog sna tshogs par rab tu gcus shing rtsibs la btags pas gzhal yas khang gi 'gul pa 'khor ba'o//do shal gyi phreng ba ni mu tig gi do shal dbus na rin po che yod pa dang med pa'am dbus dang mtha' na yod pa spel du 'phyang ba ste/ do shal gyi do shal phyed pa yang mtshon pa'o//de yang de dag gi bar na dar dang lda ldi dang / dril bu dang ni rnga yab brgyan/ /zhes sbyar te/ de la dril bu ni sngar smos pa'i dar gyi rtse mo la btags pa'o/ /rnga ma ni rnga yab dkar po gser gyi yu ba can no/ /rdo rje rin chen pad+ma dang / /rgya gram pa yi phyag rgyas brgyan//zhes bya ba ni/ phyogs bzhi'i dbus kyi do shal bzhi'i dbus su/ phyag rgya re re ste rang rang gi rigs phyogs der brten par ston pa'o/ /kha cig na re de dag nang du'o zhes zer ro/ /srad bu brgyad dang ldan pa dang / /zhes bya ba ni phyogs dang dbus dang grwa rnams kyi cha la 'dres par bya ba'i phyir ro//phyi yi sgo khyud rnams kyis brgyan/ /zhes bya ba ni/ 'gram zhes bya ba 'phyar ba'i ngo bo ni/ 'dir phyi'i sgo khyud yin la/ sgo khyud nang ma ni gang du khyams kyi mtha' thug pa'o/ /dgu yi char ni dgos pa la/ /sgo dang sgo khyud sum char bya//zhes bya ba la/ 'khor lo rtsibs tshun chad la cha chen po dgur byas pa las sgo phyi'i sgo khyud dang bcas pa la ni cha chen po gsum ste/ cha chung bcu gnyis btang ngo / /de yang phye na sgo la ni cha chen phyed dang gnyis yin la/ phyi'i sgo khyud la ni cha chen phyed dang gnyis las/logs re la cha chung gsum gsum yin te/ de nas dkyil 'khor 'di ni thig gi bya ba lugs gzhan kho na yin pas/ gang du yang gzhan du drang bar mi bya'o/ /rdo rje srad bus thig gdab bo/ /zhes bya ba ni ye shes kyi thig ma btab par sa'i thig 'ba' zhig 'debs pa srid pa dang /sa la thig ma btab par dkyil 'khor 'dri ba srid pas de bzlog pa'i phyir/ rdo rje'i rang bzhin du byas pa'i srad bus nam mkha'i thig gdab par ston cing / srad bu phal bas sa la thig gdab par yang ston la/de dag kyang rab tu 'bad pas bag yod par byas te/ de ltar yang dkyil 'khor spyi'i cho ga gsang ba'i rgyud las/ dkyil 'khor gyi ni gsang sngags kun/ /snang bar rjes su dran byed cing / /gos dkar bgos shing ma yengs par/ /dkyil 'khor gyi ni nang du 'gro//las kun byed pa'i gsang sngags kyis/ /thog ma nyid du bsang gtor bya/ /tshon sna lnga yi srad bu la/ /de dag nyid kyis brgyar bzlas te/ /sar pa shin tu gtsang ba dang / /mdzes shing shin tu ran pa dang / /dri zhim reg na bde ba dang / /legs par bkal dang sra ba dang //sbom phra la sogs bkal nyes dang / /'dzur mdud med par gyur ba yi/ /thig skud me tog spos mchod pas/ /shes rab can gyis thig gdab po/ /bzang po'i rtags ni brtags nas su/ /mkhas pas dkyil 'khor thig gdab bo//dkar po dmar po de bzhin ser/ /sngon po dang ni gnag dang lnga/ /tshon sna lnga yi srad bu bzhin/ /phye ma'i tshon rtsi de bzhin bya/ /dkon mchog gsum la mchod byas shing / /lha rnams la yang phyag byas nas/ /mkhas pas srad bu bre bar bya/ /nang par nyi ma shar ba'i tshe//blo yis phyogs cha legs brtags la/ /dang por shar nas brtsams te gzung / /slob dpon byang du kha bltas te/ /srad bu 'dzin pa de la blta/ /de nas phyogs bskor byas nas ni/ /bdag nyid kyis ni bri bar bya/ /de yi 'og tu byang phyogs su//mkhas pas srad bu bre bar bya/ /dang po bdag nyid me phyogs su/ /'dug nas phyogs gnyis brtag par bya/ /de yi 'og tu rlung phyogs nas/ /phyogs gnyis su ni sred bu bre/ /bden bral dbang ldan grwa gnyis nas/ /srad bu 'dzin pa blta bar bya/ / grwa bzhi lham pa bsnyams nas su/ /rgya gram du ni srad bu bre/ /rgya gram thams cad bsnyams par bya/ /de ltar srad bu gtan la dbab/ /de nas dbus kyi dkyil 'khor du/ phur bu gcig kyang gdab par bya/ /grwa bzhir phur bu bzhi gdab bo/ /zhes pa dang yang / mchod sbyin shing gi phur bu dag /thur du rtse bstan mngon bsngags pa/ /dkyil 'khor bri ba'i cho ga la/ /phyogs cha bzhin du gdab par bya/ /ltas ngan byung na dngos mi grub/ /srad bu chad na bla ma 'chi/ /ring thung khyer na na bar 'gyur/ /phyogs 'khrul slob ma myos par 'gyur//de bas thams cad nan tan bya/ /mkhas pas legs par thig gdab bo/ /zhes gsungs so/ /de ltar spyir gyur par lung gis brjod nas/ da ni rang gi gzhung gis ye shes rim gyi thig ji ltar gdab ce na/ de bshad pa/ gdul bya'i dbang las dkyil 'khor dag /khru gang sogs gsungs ji skad du/ /rgyang grags dpag tshad la sogs mthar/ /tshad nges pa ni med par bstan/ /de dag tu yang slob dpon gyis/ /ye shes thig bral bri mi bya/ /de phyir ye shes thig gdab rim/ /mkhas pas dga' skyed byed par bshad//de la ye shes kyi thig 'debs par 'dod pa'i bla mas dang por ras bal dang bal la sogs pa gtsang ma blangs te/ grong gi chos kyis sma ma bab pa'i bu mos 'khal du gzhug pa'am/ bdag nyid kyis bkal te/ srid du dkyil 'khor las nyis 'gyur la/sboms su sgo'i nyi shu cha yod par ro/ /de yang lnga sgril lam nyi shu rtsa lnga sgril lam/ dkyil 'khor de nyid lha mo ji snyed yod pa de snyed du bsgril ba'o/ /de nas so sor dri zhim po'i phye ma dang / yungs kar gyi phye ma dang ldan pa'i tshon dkar po dang /ser po dang / dmar po dang / ljang gu dang / nag po rnams bsgos pa'i dru bur byas la/ bdag nyid mnyam par gzhag pa'i phyag rgya bzhag ste/ de nas snga ma'i mdog gi rim pas dru bu de dag rtag pa dang / rin chen 'byung ldan dang /tshe dpag med dang / don yod par grub pa dang / mi bskyod pa rnams bsgrub ste/ de yang dang por oM shU n+ya tA dz+nyA na badzra swa b+hA wa At+ma kou0f85haM zhes pas/ de dag stong pa nyid du byas la/ de nas snga ma'i gnas su pad+ma dang zla ba la gnas pa'i yi ge b+h+rUM AM d zrIM khaM hUM zhes pa lnga/dkar po dang / ser po dang / dmar po dang / ljang gu dang nag po rnams kyi mdog can rnams bsam mo/ /de nas de las 'od zer spro ba dang / bsdu ba'i rim pas rnam par snang mdzad la sogs pa lngar rim bzhin du bskyed de/ de nas rang gi snying ga'i sa bon las 'od 'phros pas snang bar byas pa'am/nam mkha' la bzhugs pa'i de bzhin gshegs pa lnga'i thugs kar yang b+h+rUM la sogs pa'i sa bon lnga bltas te/ de dag yongs su gyur pa las rang rang gi mdog dang mthun pa'i ye shes kyi srad bu gnas par bsams te/de'i 'og tu de dag la ye shes kyi srad bu sngags 'dis bslang bar bya'o/ /oM badzra a satwa badzra sU traM me pra yats+tsha ma hA maN+Dal sU tra na ya hUM zhes pa dang / de bzhin du ming gi gzhi brje ba'i sngags lngas bslang zhing / de ltar bslang ma thag tu rang gi phyag la gnas pa'i de bzhin gshegs pa lnga srad bu lngar gyur par bsam mo//de nas rang gi mig gnyis su dza las byung ba'i nyi ma zla ba g.yas dang g.yon du bkod de/ rab tu g.yo zhing 'bar ba'i mig gi lta stangs las byung ba'i 'od kyi lcags kyus/ de bzhin gshegs pa lnga'i thugs ka nas gnas pa'i ye shes kyi srad bu rnams bkug ste/ phyag rgya la gnas pa'i srad bu la sogs so sor bstim mo/ /de nas rnam par snang mdzad la sogs pa'i gzugs can gyi slob ma cig gis srad bu lnga'i sna nas bzung ste/ slob dpon gyis kyang sna lnga nas bzung la bsnyams te/'jur bu dang mdud pa med par byas la/ oM chos kun tha dad rjes su 'jug /chos kun phan tshun rjes su 'jug /chos kun rjes su zhugs pa ste/ /mtha' bral rjes su 'gro ba'o/ /hUM zhes brjod de bsgrim mo/ / bsgrims nas dri zhim po'i chus sbangs te/ yi ge gsum nang bsres la/ gser la sogs pa snod du bzhag ste/ me tog dang dri la sogs pas mchod la lag pas bkab ste/ oM AHbig+h+nAM ta kr-ita hUM phaT ces pas mang du bzlas te/ de nas srad bu de rdo rje la dkris la/ slob dpon bdag nyid kyis lte ba'i thad kar bzung la/ slob ma de nyid kyis lhan cig gdab bo/ /'debs na oM badzra sU tra sa ma ya mA ti kra ma hUM/ bcom ldan 'das 'di ni sems can gyi don byed pa'i dus lags so zhes brjod cing gdab bo/ /des kyang sangs rgyas thams cad bskul te byin gyis brlab pa'i phyir byon par bsam mo//de la bdag cag gi bla ma'i zhal snga nas ni/ ye shes kyi thig la tshangs thig gcig tsam mam/ tshangs thig dang zur thig tsam gyis chog par gsungs so/ /gzhan dag ni phyogs thig dang rdo rje ra bas bskor ba yang bzhed do//de dag gi lugs las ni/ thig bskor ba dang / 'gro ba dang / btang ba la sogs pa yang bya'o/ /sa'i thig ni gzhung rgyas par gzhan du rtogs par sla bas bdag gis 'dir mi bsam mo/ /ye shes kyi thig de ni oM AHhUM muHbya bas gshegs su gsol bar bya'o//re zhig rgyud 'di nyid kyi dbang du byas te/ sa'i thig ji lta ba zhig yin pa cung zad dpyad de/ de la 'di'i tshul ni/ dkyil 'khor de'i tshad ji tsam pa la phyogs re re la yang cha chung brgyad cu rtsa brgyad par bya zhing / de la rim pa gsum par bya'o//de'i phyir/ dbus kyi dkyil 'khor thig gdab pa/ /zhes bya ba ni 'khor lo rtsibs tshun chad kyi thig gdab pa'o/ /chos kyi 'khor lo 'dra ba la/ /zhes bya ba ni/ bslab pa gsum ston par byed pa'i lte ba dang / rtsibs rten dang / rtsibs rnams dang ldan pa'o//de nyid gsal bar bstan pa'i phyir/ /lte bar bcas shing rtsibs bcu drug rim pa gsum dang ldan pa la/ rtsibs ni nyis 'gyur nyid du bya/ /zhes bya ba smos te/ lte ba dang rtsibs rten dang / rtsibs ni rim pa gsum mo/ / de dang ldan par bya ba ni bslab pa gsum mtshon pa yin pas so/ /rtsibs ni zhes bya ba ni 'khor lo'i lte ba la 'byar ba rtse mo zhum pa'o/ /nyis 'gyur nyid du bya ba ni lte ba'i phyed kyi phyed la cha chung drug yod pa bas/ nyis 'gyur te phyed kyis chung bar byas te/ de bzhin du rtsibs rten kyang de dang 'dra bar bya'o//des na rtsibs rten dang rtsibs dag la/ cha chung gsum gsum gtang zhing / lte ba la cha chung nyi shu rtsa bzhi gtang zhes bya ba'i don to/ /'dir slob dpon kha cig na re lugs gzhan du/ dkyil 'khor nyis rim sum rim mam//bzhi'am mang por bya ba la/ /phyi rim gang yin de la ni/ /sgo gcig pa dang rgya cher bya/ /gzhan gyi phyogs kyi cha bzhin du/ /sgo bzhi sgo khyud bcas par bya/ /yang na thams cad dogs med par/ /sgo re re zhig bya ba yin/ /snying po'i dkyil 'khor nges par ni//rab tu bzang por sgo bzhir bya/ /zhes bya ba gsungs pa la brten pas/ rim pa gsum pa lung tha ma 'dod do/ /dbus kyi phyogs su kun rig ni/ /zhes bya ba la sogs pa ni/ ma lus par brjod zin mod kyi/ rdul tshon gyi dbang du byas te yang brjod par bya'o//de la 'di'i tshul ni/ rdul tshon ji srid du dgye bar 'dod pa'i sa'i cha la phyogs thams cad du cha chen po'i nyi shu rtsa gnyis gnas par re zhig de snyed kyi mtshan ma tsam gdab par bya'o/ /de rnams re re la yang cha bar ma re re'i ri mo bya'o//de rnams re re la yang cha chung re re'i ri mo bya ste/ de ltar phyogs re re la yang cha chen po nyi shu rtsa gnyis dang / cha bar ma bzhi bcu rtsa bzhi dang / cha chung brgyad cu rtsa brgyad du yang 'gyur ro/ /de yang nang gi dkyil 'khor ni cha chen po dgu'o/ /ri mo'i sa nas bzung ste/me 'od kyi bar du ni/ cha chen po lnga dang cha chung gcig go/ /phyi'i dkyil 'khor khor yug chen po dang bcas pa la ni/ cha chung bzhi dang yang cha chung gcig go/ /de la snying po la ni cha chung nyi shu rtsa bzhi ste/ de nas cha chung gsum rtsibs rten du bskor zhing /cha chung gsum la rtsibs bya'o/ /de'i phyir/ dbus kyi dkyil 'khor thig gdab pa/ /chos kyi 'khor lo 'dra ba la/ /lte bar bcas shing rtsibs bcu drug /rim pa gsum dang ldan pa la/ /rtsibs ni nyis 'gyur nyid du bya/ /zhes gsungs te sngar bzhin du dpyad do//de nas cha chung gcig la rdo rje phreng bas khor yug chung ngu ltar bskor ro/ /de'i ri mo phyi ma la gru chad byas la/ dbus su sgo dang phyi rol gyi sgo khyud bcas pa la zheng du cha chen po gsum sbyin te/ de nas/ dgu yi char ni bgos pa la/ /sgo dang sgo khyud sum char bya//zhes gsungs te/ sngar zhib tu dpyad de de yang ri mo'i sa cha chung gcig go/ /de nas khyams la cha bar ma gcig ste/ rta babs khyams ni thams cad du/ /byams pa la sogs mchog chen rnams/ /zhes bya ba gsungs so/ /de nas rin po che'i rtsig pa la cha chung gcig go//de'i phyi rol du dra ba dang / dra ba phyed pa la cha bar ma gcig go/ /de'i phyi rol du mda' yab la cha chung gcig go/ /de nas cha chung dor ba'i cha chen po gcig la rta babs te/ bang rim tha ma la cha chen po gsum las lhag ma la re re bri'o//de nas cha chung bzhi la 'khor lo dang gdugs dag go/ /de nas de'i phyi rol du shin tu nye bar ma yin par me 'od dang pad+ma dang rdo rje cha gsum mo/ /de nas cha chung bzhi po rim pa re re'o/ /des na cha chung gcig la khor yug chen po'o/ /ka ba yang dbus dang mthar cha chung re re la'o//sgo'i zheng du cha chung drug go/ /phyi'i sgo khyud kyi cha chung drug go/ /dbu ma'i dbu mar cha chung brgyad do/ /de ltar mtshan ma la zhib par dpyad de/ ma 'khrul ba ltar na tshangs thig dang / de nas phyogs thig dang / de nas zur thig dang /de nas ma lus par dbus nas gdab bo/ /de ltar thig btab nas rdul tshon dgye ba bstan pa'i phyir/ dbus kyi phyogs su zhes bya ba nas yang na ming yang rung zhes bya ba'i bar du gsungs te/ khro bo ni gshin rje gshed do/ /mngags pa ni gzhan gyis mi thub pa'o//pho nya ni rta mgrin no/ /sogs zhes bya ba ni bran zhes bya ba 'phags pa mi g.yo ba'o/ /de las gzhan gyi tshig gi don ni sngar bshad zin te/ de la dkyil 'khor rnams kyi rdul tshon dgye ba ji lta bu yin pa 'dir lung la 'jug par bya ste/ dkyil 'khor bdag gi cho ga ni//rnam pa gsum po ma lus pa/ /lha rnams thams cad dgod pa ni/ /rnam pa gsum du shes bya ste/ /dang po gzugs su bri bar bya/ /gnyis pa phyag rgya'i gzugs su bri/ /gsum pa gnas dang rten dag tu/ /bri ba'i cho ga yongs su bsgrags//mi mkhas pa ni phyag rgya'i gzugs/ /cho ga bzhin du dgod par bya/ /mkhas pas kyang ni phye ma yis/ /yan lag rdzogs pa rab tu dga'/ /yan lag rdzogs shing rgyas byas nas/ /cho ga'i las la ring du thogs/ /gzugs rnams legs par bsgrubs na ni//mang po rnams ni zin mi 'gyur/ /yan lag nyams na byin mi rlob/ /dngos mi 'grub par rab tu bshad/ /de lta bas na mkhas pa yis/ /phyag rgya'i gzugs su lha rnams dgod/ /ces pa dang / yang gsungs pa/ gang du lha rnams gzugs dag tu//dgod par bshad pa de yang ni/ /phyag rgya'ang gnas su nges par bya/ /de la sogs pa'i phyag rgya rnams/ /ji skad bshad pa'i cho ga bzhin/ /dkyil 'khor dag tu ma smos kyang / /cho ga bzhin du bri bar bshad/ /de ltar phyag rgya dgod pa 'di//dgod pa gnyis par bshad pa yin/ /stan du dgod pa'i cho ga ni/ /'di las gzhan pa gsum par bshad/ /dkyil 'khor dag gi nang du ni/ tshon rtsi phye mas thig le bri/ /dkyil 'khor dag ni tshad las ni/ /kho ra khor yug rgya cher bskor/ / rigs kyi bdag po lha rnams ni/ /go rims bzhin du de ltar bya/ /lha rnams gzhan gyi gdan rnams kyi/ /phyi yi cho ga bshad pa ni/ /zlum po'am yang na gru bzhi ru/ /thog mar stan ni dgod par bya/ /de la de yi sngags bzlas shing / /de yi steng du mkhas pas dgod//phyi rol du ni thig le la/ /lha rnams ming gis smos te dgod/ /thams cad thig ler gnas byas nas/ /spyan drangs pa ni brtsam par bya/ /'di ni stan du dgod pa ste/ /gsum par yongs su bsgrags pa yin/ /rings sam yang na mi nus na/ / stan du dgod pa'i dkyil 'khor bya/ /rigs kyi bdag po gsum rnams kyi/ /gsang sngags thog mar bkod nas su/ /dkyil 'khor nang du mkhas pa yis/ /lhag ma rnams ni phyag rgya bri/ /phyi rol tu ni stan rnams bri/ /'di ni spyi bo'i cho ga yin/ /gzugs rnams legs par ma lcogs na//nyes pa sngar ni bshad pa yin/ /lha rnams bstod par 'gyur bas na/ /cho ga tha ma'ang mi shes so/ /phyag rgya rnams su gang bkod pa/ /bar ma rab tu bsgrags pa ni/ /khyad par du ni de bsngags te/ /de la byin gyis rlob par 'gyur//phyag rgya bris na'ang bde bar 'gyur/ /phyag rgya yang na de nyid lta/ /de bas mkhas pas nan tan du/ /dkyil 'khor du ni phyag rgya bri/ /zhes so/ /yang gsungs pa/ tshogs pa bsrung bar byas pa rnams/ /phyogs gcig tu ni bkod nas su/ /shes rab pha rol phyin pa bklag /gus par yang ni phyag byas nas/ /'phags pa'i tshogs kun bsams nas ni/ /de nas dkyil 'khor bri ba ni/ /lcags ni sna lnga'i phye ma ste/ /mkhas pas dkar po la sogs pa la'o/ /dad cing yon tan ldan pa yis/ /slob mas rin chen phye ma bri//rin chen lcags rnams ma 'byor na/ /sA lu btags pa'i 'bras phyes bya/ /tshon rtsi zhib mo sngar bshad pas/ /'byung khung nas phyung phye ma'am/ /rdo yi khams ni sna tshogs kyang / /phye ma'i gor ni sbyar bar bya'o/ /de ltar rnam pa bzhi po ni//phye ma'i gor ni bsgres pa yin/ /lcags rnams kun dang rin chen dang / /'byung khungs pa dang 'bras btags pa/ /dkyil 'khor kun gyi las rnams dang / /phyi ma'i don du sbyar bar bya/ /dam tshig la ni lcags kyis shes/ /rin chen las byung dbang bskur ba//sA lu'i phye ma zhib pa la/ /khams las byung ba rgyas pa la/ /drag shul spyod pa khyad par du/ /thal ba la sogs bya bar shis/ /phye ma rnams kyi bye brag gis/ /cho ga'i rim par bstan pa 'di/ /byang shar mtshams nas brtsams nas ni/ /phye ma dag ni dgye bar bya//rdo rje khu tshur sbyor ba'am/ /yang na lcags kyu'i phyag rgya'am/ /lhung bzed phyag rgya'i sbyor ba 'am/ /yang na rig byed lag pas bri/ /dkar po dang ni dgye bar bya/ /de yi 'og tu dmar po dgye/ /de nas ser po dgye bar bya/ /de yi 'og tu ljang gu dgye//sngags pas kun gyi phyi rol du/ /tshon rtsi nag po dgye bar bya/ /g.yas su bskor zhing rgyun mi 'chad/ /thams cad mnyam zhing bar chad med/ /ngan pa dang ni nyams pa dang / /ma snyoms pa dang bar chad na/ /gnod pa mang po 'byung bar 'gyur/ /de bas nan tan bskyed de bya//mkhas pas phye ma dgye bar bya/ /phyogs rnams kun du mkhas pa yis/ /dbus su sgo ni gdod par bya/ /ngos gnyis su ni cha dag kyang / /bzhi bzhi dag ni dor bar bya/ /chab sgo chen po stegs bur bcas/ /cung zad cig ni lhag par bya//chab sgo gzhan rnams gcad pa ni/ /phye ma dkar po dag gis su/ /sgo yi dbus kyi cha dag tu/ /ri mo phra mo bri bar bya/ /dang por tshon rtsi sna lngas bri/ /dkyil 'khor gnyis pa sna gsum gyis/ /gsum pa phye ma dkar po yis/ /chig rkyang du ni bri bar bshad/ / gzhan yang gang dag kha cig tu/ /ri mo gcig pa'ang de bzhin te/ /phal cher gang dag bshad pa ni/ /de dag thams cad ri mo gcig /ces gsungs pa la/ yang rnam pa gzhan du/ sems can khams ni zhen byed cing / /'di ni chos dbyings ro yin par/ / sangs rgyas rnams kyis sngon gsungs te/ /de phyir 'di ni tshon zhes bya/ /tshon ni nang nas dgye bar bya/ /phyi rol nas ni tshon mi dgye/ /dkar po thog mar gtang bar bya/ /de yi 'og tu dmar po ste/ /de nas ser po gtang bar bya/ /de yi 'og tu ljang gu btang / /kun gyi nang rol nag po ste//tshon gyi cho ga de ltar bshad/ /ces gsungs pa'o/ /de la tshon byin gyis brlab pa'i rim pa ni/ thig skud byin gyis brlabs pa'i rim pa lta bu las/ oM badzra tsi tra sa ma ya ma ti kra ma hUM zhes bya ba lag pa gnyis khu tshur bcas te/ mdzub mo gnyis bsgreng ste/sbyar ba'i phyag rgya dang bcas pas byin gyis brlab cing / /tshon bkye nas/ tshon gyi cha lhag ma yang oM AHhUM muHzhes bya bas gshegs su gsol bar bya'o/ /de la 'dir lung dang rjes su mthun par phyag rgya dgod par 'dod pa na/ snying po'i dbus su sna tshogs pad+ma la 'khor lo dkar po'o//de bzhin du nang gi dkyil 'khor du lha thams cad kyi gnas su sna tshogs pad+ma la/ sngar bshad pa'i mdog dang mthun pa'i rang rang gi mtshan ma bri ste/ shar gyi re'u mig la rdo rje'am ting nge 'dzin gyi phyag rgya'o/ /lhor rin po che ma rgad cha dgu pa'o//nub tu lhung bzed do/ /byang du sna tshogs rdo rje'o/ /grwa bzhir ni mig gi 'bras bu dang / rdo rje rtse gsum pa dang / pad+ma'i yan lag dang / ut+pa la'o/ /shar nas brtsams te rtsibs bcu drug la/ rdo rje lcags kyu mda' gzhu dang //rin chen rgyal mtshan nyi ma 'dzum/ /pad+ma ral gri 'khor lo gsum/ /las dang go cha 'jigs byed bcas/ /zhes pa rnams so/ /rtsibs mchan gyi grwa bzhi la rdo rje rtse lnga pa dang / rin po che'i phreng ba dang / pi wang dang / gar gyi lag pa dag go/ /phyi rol gyi grwa bzhir dri'i dung phor dang /me tog gi gzhong bu dang / pog phor dang / mar me'i mchod sdong dag go/ /sgo bzhir ni lcags kyu dang / zhags pa dang / lcags sgrog dang dril bu dag go/ /de nas khyams la dgod pa ni/ /shar sgo dang 'brel sna tshogs pad+ma la tho ba'o//de'i rjes su sna tshogs pad+ma bzhi la/ rdo rje dkar po bzhi'o/ /ngos gcig tu pad+ma'i 'dab ma drug la lhung bzed drug go/ /de dag dang 'dra ba las/ be con dang / rin po che dang / pad+ma dang / ral gri dang / sna tshogs rdo rje dang bye brag go/ /de dag gi bar bar du mchod pas lag pa brel ba'i lha mo rnams so//kha cig na re dkyil 'khor 'di sgo gsum lha'i snam bu dang bcas par bya ba las/ 'di rnams sgo gnyis pa yin la/ de nyid du rdo rje la sogs pa'i phyag rgya dgod do zhes zer ro/ /de nas phyi rol du rim pa dang po'i phyogs bzhir/gling ri rab kyi mdog dang mthun pa bzhir/ rdo rje dang pad+ma dang rtse gsum pa dang / 'khor lo rnams so/ /rim pa gnyis pa la dbang ldan du/ /rtse gsum dkar po gnyis so/ /shar stod du pi wang ngam/ zhags pa dkar po ste/ de dang 'brel par cang te'u dkar po dang /gdengs ka dkar po dang / rdo rje dkar po dang / shar lhor me thab ste/ de nyid du gos so/ /lho stod du dbyug to sngon po ste/ de nam mkha'i phyag rgya dang / dra ba rdo rje can no/ /de nas be con sngon po ste/ de'i rjes su thod pa dang / tog dang zhags pa dang /tri shU la dang / pad+ma dang / 'khor lo dang / mdung thung dang / tho ba dang / thod pa dang / rdo rje dang / dbyug to'am/ yang na sor mo bcu bsnol ba 'ba' zhig bri'o/ /de'i rjes nyid du dbyug to dang / pad+ma dang / 'khor lo dang / rdo rje bsnams te/ sring mo bzhi'o/ / de nyid thod pa'am/ lce rdo rje can te/ 'di dag ni dbang phyug chen po'am/ chos kyi rgyal po gshin rje'i 'khor du yang rung bar bri'o/ /de nas lho nub tu ral gri'o/ /de nyid du yang ral gri dang lce'o/ /nub stod du rdo rje'am zhags pa ste/ de nas dbyug to dang / gshog pa dang ut+pal dang /sbrul mgo dang / zhags pa dang / bum pa'am mche ba'o/ /nub byang du ba dan dkar po dang / rtse mo can gyi ri dud ka'o/ /byang stod du dbyug to ste/ de nas mche ba rdo rje can dang / yang dbyug to'o/ /de nas rim pa gsum pa la/ phyogs bzhi dang /mtshams bzhir dbyug pa brgyad dang / phyogs bzhir yon chab kyi phyag rgya bdun bdun phyogs kyi dbyug pa re re'i rjes su bri'o/ /rim pa bzhi pa la sngar bstan pa rnams ming du bri zhing / /sngar gzugs dngos su smras pa rnams ni gzugs nyid du'o/ /'dir bstan pa dang kha dog dang dbyibs dang tshad kyi man ngag kyang bstan zin to//phyi rol gyi grwa rnams pad+ma'i tshal dang shing dang mtsho dang bya bkra shis pa rnams bri'o/ /phyi rol gyi cha chung la ni khor yug chen po ltar rdo rje phreng ba bri'o/ /de ltar dkyil 'khor chen po dgod pa byas nas dkyil 'khor gyi yo byad rnams nye bar dgod pa'i phyir/de nas mkhas pas dkyil 'khor la/ /bla re rgyal mtshan lhab lhub dang / /gdugs dang rnga yab lda ldi dang / /'phan dang sna tshogs na bza' mchog /ces bya ba la sogs pa smos te go sla'o/ /gser las byas pa'i bya rnams ni//brgyad dam bcu drug lhag kyang rung / /dbang bskur rin chen chus bkang ba'i/ /bum pa lnga ni gzhag par bya/ /zhes pa dang / 'og nas/ rnam rgyal bum pa dri yi chus/ /rab tu bkang ste gzhag par bya/ /zhes bya ba smos pa ni rnam par rgyal ba dang /rigs bzhi'i bzhi dang / lha mo bzhi'i bzhi dang / sems dpa' bcu drug gi bzhi dang / sgeg mo la sogs pa bzhi'i gcig dang / bdug pa la sogs pa'i bzhi'i gcig sgo skyong rnams kyi gcig ste/ de ltar bum pa bcu drug gam/ de ma 'byor na rnam par rgyal ba dang rigs bzhi lha mo dang bcas pa'i bzhi dang /sems dpa' rnams kyi gcig dang / mchod pa rnams kyi gcig dang / sgo skyong rnams kyi gcig dang brgyad do/ /de yang ma 'byor na ni/ spyir rigs re re la re re ste lnga'o/ /de yang gal te ma 'byor na/rnam par rgyal ba'i bum pa gcig pus dbang bskur la/ las kyi bum pa ni thams cad du bzhag ste des na bum pa gnyis ni med par nam yang mi rung ngo / /mar me me tog bum pa dang / /zhes bya ba'i bum pa 'di ni bkang ba'i bum pa ste/ ji snyed 'byor ba gzhag par bya'o//de la dbang bskur ba'i bum pa rnams ni/ dang po stong pa nyid las yi ge paM dkar po las zhabs gdub sor re ba/ ltor chu yul ma ga d+hA'i bre gang shong ba/ mgrin pa sor bzhi pa la phra rab pa/ kha khyer sor gnyis 'phyang ba/ sor gcig gdong la yod pa/dpag bsam gyi shing gi yal ga can/ sngar smos pa'i rin po che dang / 'bru dang sman dang ldan pa/ ras dkar pos mgul pa bcings pa/ spos kyi chu nyung zad dang ldan pa las/ chu la sogs pa stong par byed pa la yang der sa bon lha ji snyed pa bskyed de/ ye shes kyi lha rnams bstims la/mchod pa lngas mchod de/ de ji ltar nus pas bzlas te/ mjug tu dri'i chu blugs pas reg pa las chur gyur par byas la/ bya ba la bab kyi bar du thun mtshams gsum du bzlas so/ /mdzes pa'i bshos rnams gzhag par bya/ /zhes pa'i bshad pa/bza' dang btung ba sbyar legs dang / /bca' ba sna tshogs gzhag par bya/ /zhes bya ba'o/ /gnod sbyin srin po kha zas su/ /gtor ma rnam pa sna tshogs gzhag /'byung po pa dang klu dang lha/ /mi dang mi min de bzhin te/ /me tog dri rnams sna tshogs dang //'o ma mar dang kha rar bcas/ /zhes bya ba la/ phyogs kyi gtor ma ni/ rgyu sna tshogs las byas te/ rang rang gi 'dod pa dang mthun par byas la/ 'byung po la zhes bya ba la/ 'byung po thams cad pa'i gtor ma cig car sbyin pa ste/ de bas na 'og nas de nas 'byung po kun gyi gtor ma zhes bya ba dang sbyar te/de yang 'byung po pa'i gtor ma ni/ sa ye li dang / ling+ga li dang / sran chan til gyi pis ta ga/ /rtsa ba 'bras bu 'bras chan zho/ /cung zad sngon las cung zad dang / /me tog 'bras yos chur bcas pa//'dab mar bcas pa'i gtor ma ste/ /phyi rol 'byung po thams cad la/ /de ming 'byung po kun gyi'o/ /zhes 'phags pa rab tu grub par byed pa las gsungs pa'i gtor ma'o/ /sems can bkres shing skom la btung ba dang / /zhes bya ba ni/ 'di'i ming dang zhes bya ba smos pa dang sbyar ro//phyogs la gnas pa rnams la rnam par brtag /de yi gtor ma rjes su mthun par bya/ /zhes smos pa dang / 'di yi gnod sbyin srin po'i kha zas su/ /zhes bya ba la sogs pa'i lhag ma rnams sbyar ro/ /de la rjes su mthun pa'i gtor ma ni 'di lta ste/shar du me tog phreng dmar de bzhin spos/ /'bras chan dmar po'ang de bzhin te/ /ba dan dmar po'ang sbyin par bya/ /tsan+dan dmar po nyid dag dang / /skud pa dmar po dag dang ni/ /de dag thams cad sbyin par bya/ /zhes pa'o/ /steng du ni/me tog dri dang me tog phreng / /mar me yang ni de la sbyin/ /pad+ma ut+pal pu shel tse/ /chang dang 'bras chan sbyin du gzhug /gdugs dkar bsang byed srad bu dang / /de bzhin me tog phreng dkar rnams/ /zhes pa'o/ /lhor ni kri sa ra dang byugs pa'i zas//sha btsos de bzhin rjen pa dang / /me tog spos dang gtor ma dang / /me tog phreng ba sna tshogs pa/ /gtor ma de dag bsdus nas ni/ /lho phyogs su yang sbyin par bya/ /zhes so/ /lho nub tu ni/ khur ba zas dang de bzhin spos/ /de bzhin sha btsos rjen pa dang //zas dang skom dang kri sa ra/ /sdig med khrag gi gtor ma bya/ /dri zhim po yi me tog rnams/ /kha dog sna tshogs rnams kyis bsres/ /zhes pa'o/ /nub tu/ bkra shis 'bras yos bu ram dang / /sa nag kyang ni de bzhin te/ /me tog phreng ba bdug pa dang //nA ga puSh+pa sbyin par bya/ /dri dmar dang ni de bzhin du/ /skud pa dmar po sbyin par bya/ /gu gul dang ni thang shing gi/ /bdug pa de la sbyin par bya/ zhes bya'o/ /'og tu ni de dag nyid dang / me tog kun dang spos kun dang / /me tog phreng ba sna tshogs dang //pad+ma ut+pal pu shel tse/ /ut+pal sngon po'i 'dab ma dang / /sha btsos dang ni rjen pa'i sha/ /zhes pa'o/ /byang du ni/ zas kun dang ni spos kun dang / /de bzhin me tog thams cad dang / /shing thog kun dang kri sa ra/ /de bzhin 'bras kyi 'o thug dang //sha btsos dang ni rjen pa dang / /til zan dang ni 'byung po'i zas/ /gdugs ser dang ni mchod phyir thogs/ /de bzhin skud pa ser po dang / /'gron bu dag dang gser dag dang / /rin chen rnam pa sna tshogs rnams/ /tshul bzhin du ni sbyin par bya//zhes pa'o/ /byang shar du ni/ rdzas rnams dang ni 'bras yos dang / /bum pa ba dan sngon po dang / /sha btsos dang ni rjen pa dang / /de bzhin khur ba zas rnams dang / /dri dang me tog dkar po dang / /'bras kyi 'o thug de bzhin sbyar/ /zhes pa'o/ /shar lho dang /nub byang du ni/ swa ti ka dang u lo ba'i/ /bza' ba ci 'byor bu ram can/ /lag pan rtsa ba 'bras bu dang / /'o thug dag ni 'dod pa ste/ /de ni thams cad 'dod ces bya/ /zhes pa thams cad 'dod pa'i gtor ma bya ste/ 'di gnyis la nges pa'i kha zas ma gsungs la/gtor ma 'di nyid snga ma thams cad kyi go sbyar du yang rung ngo / /'byung ba 'di nyid las snga ma rnams lhag par bya'o zhes kha cig rtogs/ gal te sgrub pa po gtor ma rab tu rgyas par sbyin par 'dod pa na/ /rig pa mchog gi rgyud las gsungs pa ltar/gdon chen po bco brgyad la yang gtor ma ma 'dres par sbyin par bya ste/ de yang dang po ni gnod sbyin gyi gtor ma bya ste/ bar chad drag po spang ba'i phyir ro/ /de nas 'byung po thams cad la ste/ bar chad spang ba dang / de dag gi brnab sems dgag pa'i phyir ro/ / de nas ni phyogs kyi bdag po'i gtor ma ste/ tshogs rdzogs par bya ba dang / las grub pa'i phyir ro/ /de nas zhes bya ba ni don gyi dbang gis na rdul tshon bkye ste/ nye 'khor ba'i rnam pa lngas byugs nas mchod pa dang yo byad bkod ma thag tu'o/ /khrus sogs bya la zhes bya ba ni/ji skad du 'phags pa dpung bzang gis zhus pa las gsungs pa/ lus la dril phyis byas nas ni/ /chu chen rnyog pa med par zhugs nas kyang / /ji tsam 'dod pa'i bar du khrus byas te/ /byung nas shar ram byang du kha bltas te/ /chu yis lag pa brkyang pa bkrus nas ni//pus mo phyi rol du ni bstan byas te/ /bar du lag gzhag tsog tsog por 'dug nas/ /sgra med dbu ba med par nye reg bya/ /lan gsum bar du chu ni 'thungs nas kyang / /mchu la lan gnyis yongs su phyi bar bya/ /so la chags pa lce yis reg pa dang //sbrid par gyur nas kha yang bkru bar bya/ /zhes pa dang / yang de nyid las/ sa phung bshang sgo lnga ste mtshan ma gsum/ /g.yon pa gsum ste lag pa gnyis la bdun/ /yang na sa dang chu yi ji srid du/ /dri ma dri bral de srid bar du bya/ /zhes gsungs pas so//gal te rnal 'byor pa chos thams cad rang bzhin gyis dag par mos pa zhig yin na ni/ de nyid khrus yin pas/ 'jig rten pa dang mthun par bya ba'am/ lus la phan pa'i ched ma yin par/ phyi rol gyi khrus la ched du mi bya ste/ ji skad du 'phags pa de kho na nyid 'dus pa las kyang /mu stegs can rnams gzhom pa'i phyir/ /'byung ba che las thams cad byung / /mi gtsang zhes ni gang las bya/ /thams cad grub par byed pa'i mchog /ces gsungs te/ sogs pa byas la zhes bya ba ni/ ci nas kyang phyis bar chad du mi 'gyur bar/ bza' ba dang btung ba longs spyad pa'am/gtam gyi bsgo ba la sogs pa bya ba ma lus pa rdzogs par byas pa'o/ /dri dang zhes bya ba ni/ lus tsan+dan dkar po'i 'de gus ci rigs su byug cing / ma 'byor pas kyang bzhin tsam byug par bya'o/ /phreng mchog phreng ba can zhes bya ba ni/ ut+pal la sogs pa'i phreng ba bzang po mgo bo la bcings shing mgul du yang 'phyang bar byas pa'o/ /dri zhim kha bkang zhes bya ba ni/ gla rtsi bzang po ci rigs cig khar bzung ngam/ zhal kha bsgo ba'i byug pa'i sbyor ba byas pas kha bsgo ba'o/ /mchog mdzes pa zhes bya ba ni/stod g.yogs dang smad g.yogs dar dmar po gyon pa/ sor gdub dang / mgul rgyan dang / rna cha dang / mu tig gi do shal la sogs pas mdzes par byas shing / gtsug tor dang / dbu rgyan dang / dar dpyangs kyis sgeg pa'o/ / gal te rab tu byung ba zhig na yang / chos gos snam sbyar la sogs pa rab tu mdzes pa/ rang gi 'dul ba'i cho ga dang mi 'gal bar byas pa'o/ /de nas dkyil 'khor gyi mtha' yol ba chen pos bskor la/ bdag nyid dkyil 'khor gyi shar du stan nang tshangs can la 'dug ste/sngon bzhin du dam tshig sems dpa'i rnal 'byor rdzogs par byas la/ bris pa'i dkyil 'khor de yang yid kyis sprul pa'i dkyil 'khor ji lta bar bskyed de/ bdag nyid dbus su gnas pas sgo dbye ba'i phyag rgya/ rdo rje sor mo gnyis kyi rtse mo yang dag par bsdams shing /bsnyams la bkan te oM badzrod g+ha Ta ya sa ma ya pra be sha ya hUM zhes brjod cing rab tu khros la/ g.yas brkyang ba la sogs pa'i 'dug stangs la brten te/ sgo thams cad dam shar gyi sgo dbye bar bya'o/ /de nas badzra badzra hUM zhes brjod cing phyir 'byung bar bya ste/yid dang phyag rgyas ri mo dang / /rdo rje thig kyang gdab bya ste/ sangs rgyas ri mo dri med pa/ /ldan pa 'gongs kyang nyes pa med/ /ces gsungs te/ 'dir yang ri mos bskor ma thag tu sbyor ba 'di byas la/ yang na phyag rgya ma bkod par bya yang rung ngo //de nas rang rang gi sngags brjod pas/ lha'i tshogs sum cu rtsa bdun 'grub par blta ste/ byang chub sems dpa' byams pa la sogs pa ni/ ched du bskyed pa dang spyan drang mi dgos kyi/ gang du dkyil 'khor chen po gnas pa der/ rang bzhin kho nas byon no//de nas/ /gtso bo rgyal ba sras kyi 'khor/ /mang po rnams ni spyan drangs te/ /zhes bya bar sbyar ro/ /gtso bo zhes bya ba ni sangs rgyas rje btsun rnams so/ /rgyal ba'i sras zhes bya ba la byang chub sems dpa' dang lha mo la sogs pa'o/ /'khor mang po rnams ni zhes bya ba ni/phyi'i dkyil 'khor la sogs pa'o/ /spyan drangs te zhes bya ba ni bod pa ste/ ji ltar spyan drangs she na/ de'i phyir/ phyag rgya sngags dang bdag ldan zhing / /lcags kyu la sogs rnal 'byor gyis/ /zhes bya ba gsungs te/ de la phyag rgya ni 'og nyid nas/ gsang ba'i bcing bas bcings nas ni/ /zhes bya ba la sogs pas ston te/ gsang ba'i zhes bya ba ni/ phyag rgya bcings pa de nyid rab tu gsang zhing sba bar bya ste/ ji skad du 'phags pa de kho na nyid 'dus pa las/ slob dpon ma yin gzhan dang ni/ /slob ma ma yin bu yin pa'i//mdun du phyag rgya mi brjod de/ /de dag gsang ba phyag rgyas 'grub/ /ces gsungs la/ zla ba gsang ba'i thig le las kyang / /dam tshig ma yin mi shes la/ /sngags rig pas ni bstan mi bya/ /phyag rgya thams cad gsang ba ste/ /dam tshig phyag rgya gsang ba yin//zhes gsungs so/ /bcings pa zhes bya ba ni rdo rje thal mo'o/ /bcings nas ni zhes bya ba ni rdo rje bsdams pa ste/ ji skad du 'phags pa de kho na nyid 'dus pa las/ dam tshig phyag rgya thams cad ni/ /rdo rje bsdams las byung bas na/ /zhes gsungs te/dam tshig gi phyag rgya nye bar mtshon pa'o/ /mdzub gnyis zhes bya ba la sogs pa ni go sla'o/ /sngags ni e h+yi hi b+ha ga bAn ma hA ka ru Ni ka At+ma kou0f85haM dzaHhUM baM hoHzhes bya ba ste/ lcags kyu la sogs pa'i rnal 'byor ni yud tsam gyis bdag nyid der mos pa'o/ / 'dir don ni bris pa'i dkyil 'khor bskyed cing sgo phye nas bdag shar sgo la phyogs par gnas te/ sngags snga ma brjod pas lha rnams khang pa brtsegs pa'i nye 'khor du byon par bya ste/ 'phags pa de kho na nyid bsdus pa'i rgyud du/ rdo rje bsdu ba'i tshul lta bu'o/ /de nas rdo rje lcags kyu la sogs pa'i phyag rgya chen por bdag nyid yid la byed cing de dag gi phyag rgya bcings nas/oM sarba na ra ka ga t+ya ka sha ni hUM phaT/ oM sarba na ra gA b+hUd da ra ni hUM phaT/ oM sar+b+ba a pA ya ban+d+ha na mo tsa ni hUM phaT/ oM sarba a pA ya ga ti b+ha ga wA na bi nA sha ni hUM phaT ces brjod la nang du byon pa dang /gnyis su med par bya ba dang / bcing ba dang mnyes par byas nas mchod pa la sogs pa bya'o/ /de nas mtshan ma skyes te zhes bya ba ni 'od zer dang / /mi las 'das pa'i dri la sogs pa mthong nas so/ /mgu nas ni zhes bya ba ni/ bdag gis nges par slob ma smin par byed nus so zhes bsams te yid spro ba byas nas so//thog ma tha ma med par zhes bya ba ni/ dang po dang bar ma dang tha mar bye brag med par ro/ /mngon sum mthong zhes bya ba ni/ dbang po'i mngon sum dang 'dra bar lha rnams gsal bar bltas te/sems rtse gcig tu bya zhes bya ba'i don to/ /slob dpon kha cig na re/ thog ma bcom ldan 'das thams cad rig pa nas/ tha ma shin tu phyi rol gyi lha rnams kyi bar du byon pa'i tshe bye brag med par mthong bar 'gyur te/ 'di nyid mtshan ma skyes zhes bya ba yin la/de ltar mthong bas mgu nas ni mchod pa bya ba ste/ de ltar yang lha chen po dgu'i dkyil 'khor las/ de nas byon pa mthong ba dang / /dga' ba chen pos mchod par bya/ /zhes gsungs so/ /de ltar sngon bzhin du phyag rgya bzhis rgyas btab ste mchod pa bya'o//'dis nam mkha'i dkyil 'khor la 'og min nas spyan drang ba bstim zhing / des bris pa la thim par bya ba ni man ngag go/ /da ni mchod pa ston par bzhed nas ar+g+haM mchog phul zhes bya ba la sogs pa gsungs te/ 'dir mchod yon gyi mtshan nyid 'phags pa rab tu grub par byed pa las gsungs pa/gser dang dngul dang zangs ma dang / /rdo ba dang ni shing gi'am/ /kham sa'am dung ngam nya phyis sam/ /de bzhin lo ma'i snod kyang rung / /zhi dang rgyas dang drag spyod dang / /rab dang 'bring dang tha ma yi/ /las dang dngos grub dag la ni//rigs pa'i snod rnams sbyar bar bya/ /kha dog yon tan bshad pa las/ /gzhan dang gzhan yang ci rigs pa'i/ /snod rnams ji ltar 'dod pa ru/ /mchod yon phyir ni rab tu sbyar/ /zhi ba'i mchod yon nas dang bcas/ /til dang bcas pa rgyas pa la/ / thams cad dang ni 'gal ba'i phyir/ /ko tra bar bcas drag spyod la/ /zhi ba'i mchod yon 'o ma can/ /rgyas pa la ni zho can no/ /ba yi gcin nam yang na khrag /drag shul spyod pa'i don du shis/ /rab dang 'bring dang tha ma dang / /las rnams kun la 'bras yos shis/ / spos dang me tog ku sha til/ /chu rnams bye brag med par bshad/ /zangs kyi snod ni mchod yon phyir/ /las rnams kun la rab tu shis/ /'di dag bdag gis ma 'byor gyis/ /bdag la bzod par mdzod ces nas/ /yang na ci 'byor pas kyang rung / /zhes pa las zhi ba la bsngags pa'i mchod yon ni/'dir ar+g+haM mchog ste de phul bas mchod pa lhag ma rnams bya/ glegs bam la la las ar+g+haM mchog brtags zhes 'don te/ de yang snga ma lta bu zhi ba'i mchod yon ni mchog tu brtag par bya ba'am rung ba zhes bya ba'o/ /gsang ba la sogs pa zhes bya ba la/gsang ba'i mchod pa ni sgeg mo la sogs pa bzhi ste/ 'di dag gi snying po'i dkyil 'khor gsang ba mchod par bya ba'i phyi rol gyi lha rnams ma yin pas so/ /sogs zhes bya ba ni rdo rje me tog la sogs pa bzhi bsdu ba'o/ /de ltar mchod pa gus mchod nas//mnyam med mi g.yo zhes bya ba la sogs pa'i dbyangs kyis bstod pa'i phyir/ dbyangs kyis snyan pa'i bstod pa dang / /zhes bya ba smos te/ rol mo'i cha byad dam pa dang sbyar ba drug ldan la sogs pa'i ros bstod par bya ste/ ji skad du zla ba gsang ba'i thig le'i rgyud las/pi wang gling bu ya mtshan sgra snyan gyi/ /glu blangs dngos grub rgya chen thob par byed/ /ji snyed yid du 'ong ba'i glu dag ni/ /'jig rten grags pa'i bden pa'i bde ba dag /bden pa'i sgra yis bskyed pa rnams bsgyur ba/ /de dag mthun pa'i dbyangs 'dis sgrub par byed//sha ta pa dang sha dza'i dbyangs/ /glu ru blangs pas pad+mo gnas/ /dngos grub myur du thob par 'gyur/ /yid kyis byin rlabs dag pa dang / /'di yis byin rlabs bde ba rnams/ /sbyor ba 'di yi sbyor ba yis/ /'dod byed thams cad thob par 'gyur//zhes gsungs so/ /de nas/ lha yi gtso bo thams cad la/ /ras ni zung re dbul bar bya/ /sems dpa' chen po phal rnams la/ /ya re phul bar rab tu bsgrags/ /zhes gsungs pa'am/ yang na lha thams cad la ras zung 'bul ba'am/ma 'byor na re re'am/ de yang ma 'byor na thams cad la zung gcig gam/ rab tu 'byor ba dman na thams cad la gcig dang / 'byor pa yod na ba lang dang rta dang / rnga mo dang ra lug la sogs pa'i khyu rab tu brtags pa dang / rin po che'i tshogs dang /bza' ba dang bca' ba dang / bldag pa dang / btung ba gya nom pa mang po dang / dril bu g.yer ka btags pa'i rta babs dri zhim po dang / rin po che bdun dang / nye ba'i rin po che bdun dang / bkra shis kyi rdzas bcu drug dag kyang rab tu yid du 'thad pa 'bul bar ston pa ni/lha rdzas dam pa rnams kyis legs par mchod/ /ces gsungs pa'o/ /de la mchod pa'i cho ga ni bya ba'i rgyud kyi dbang du mdzad de/ 'phags pa rab tu grub par byed pa las/ thal sbyar mchod yon blos mchod dang / /cho ga'i yan lag nyid dang bzhi//ji ltar rigs pa nye bar sbyar/ /zhes gsungs la/ spyod pa'i rgyud kyi dbang du mdzad de/ rnam par snang mdzad mngon par byang chub pa las/ mchod pa rnam bzhir shes bya ste/ /phyag 'tshal ba yi thal sbyar dang / /de bzhin byams dang snying rje dang //me tog bdug spos 'jig rten pa'i/ /sor mo las byung me tog rnams/ /skyob pa kun la dbul bar bya/ /zhes gsungs so/ /rnal 'byor gyi rgyud dag tu ni/ mchod pa rab tu mang po dag bstan te/ lha mo ku ru kul+le 'byung ba las ni/ me tog la sogs pa mchod pa bco brgyad gsungs so//'phags pa de kho na nyid 'dus par ni/ mchod pa phyi dang nang dang gsang ba dang rab tu gsang ba rnams bstan te/ de bas na mchod pa rnams ni sgrub pa po'i bsam pa'i dbang gis rab tu mang mod kyi/ 'dir ni mchod pa dgu yan chad dang bcas pa'o//de yang ji skad bshad pa'i yon chab thogs te/ e h+ye hi b+ha ga wAn ni ha wa k+te na sa ya me tsa ma ar+g+haM puSh+paM d+hU paM pra tIts+tsha maM pU dza nir dza t+ya pra sid+d+hi me/ A ha ra A ha ra sarba bid+h+ya d+ha ra pU dze te swA hA zhes bya ba'am/ oM badzra ar+g+haM pra tI ts+tsha AH hUM zhes pas dbul lo//mchod yon ni sgrub pa po'i spyi bor bzung ste dbul lo/ /me tog la sogs pa yang snying ga'am lte ba'i thad kar bzung ste dbul lo/ /de yang dang po phyag bzhi byas la/ de nas mchod yon dbul te/ de nas bdug pa dang me tog dang mar me dang dri rnams sarba d+harma swa b+hA wa shud+d+ha zhes bya ba rab tu dag par mos par byas la/rab tu mang zhing mchog tu bya ba dang / ji ltar bsngos pa bzhin du 'byung bar bya ba'i phyir/ oM sarba a pA ya bi sho d+ha ni d+harma tA d+hU pa ya de hUM phaT/ oM sarba durga ti pa ri sho d+ha ni puSh+pa bi lo ka ni hUM phaT/oM sarba a pA ya bi sho d+ha ni dz+nyA nA lo ka ka ri hUM phaT/ oM sarba a pA ya ga ti gan+d+ha A sha ni gan+d+ha ba ti hUM phaT ces bya ba rnams snyim pa zed pa las gyen du 'thor ba dang / de nyid las mthe bong gnyis gyen du bsnyams nas mdun du 'dzin pa dang / de nyid las dung dang 'dra bar byas pa'i phyag rgya rnams bcings te phul bas/ rab tu rgyas par tshim par bsam mo/ /de nas gsang ba'i mchod pa bya ste/ rang gi dam tshig sems dpa'i rnal 'byor du rab tu gsal bar byas la/ rdo rje'i gar gyi bya ba rdo rje'i khu tshur gnyis dku g.yas g.yon gnyis su sgeg pa'i tshul gyis bzhag la/byang chub kyi sems yid la byed cing de la rab tu dga' bas spyi bos g.yon du cung zad btud de/ oM badzra lA s+ye/ oM badzra satwa su sang+g+ra ha/ oM badzra rat+na ma nut+ta raM/ oM badzra d+harma gA ya ne/ oM badzra karma ka rong+b+ha be zhes glur blang ngo //de nas rdo rje khu tshur gnyis kyis bdag nyid kyi spyi bor phreng ba 'dzin pa'i tshul du byas la/ sangs rgyas kyi yon tan bdag dang sems can thams cad la 'byung bar smon pas/ /oM badzra mA le zhes bya ba la sogs pa brjod do/ /de nas 'gro ba thams cad la mdo sde zab mo la sogs pa bshad pa 'byung ba yid la smon pas/rdo rje khu tshur gnyis rang gi kha nas tshig 'thon pa ltar byas te/ oM badzra gI ti zhes bya ba la sogs pa brjod do/ /de nas yang rdo rje gar gyi tshul gyis thal mo spyi bor sbyar te/ 'gro ba la nges pa'i tshig tu chos ston pa dang /spyod lam sna tshogs kyis 'gro ba'i don la mkhas par gyur cig ces smos pas/ oM badzra nr-i ti zhes bya ba la sogs pa brjod par bya'o/ /yang na de dag gi phyag rgya bstan pas de dag nyid kyis de dag nyid la rang rang gi mchod par mos par bya'o/ /yang na dang po yon chab phul la/de nas gsang ba'i mchod pa brjod de/ gsang ba'i mchod pa de dag gi yon tan yang / 'phags pa de kho na nyid bsdus pa las/ rdo rje 'jom byas nas kyang / /rdo rje phreng ba 'ching byed cing / /de nas rdo rje glur blangs la/ /rdo rje gar gyis mchod byas nas//'dod pa'i dga' ba dbang bskur mchod/ /glu dang gar gyi bde ba las/ /bde ba gzhan ni yod min te/ /de phyir gsang mchod 'di bla med/ /ces gsungs pa lta bu'o/ /de nas bdug pa la sogs pas mchod pa yang rung ngo / /de nas oM badzra ba Ta hUM zhes brjod pas ras phul la snyim pa mdzes pa rab tu brkyang ba'i phyag rgyas bshos rnams/oM a kA ro zhes bya ba la sogs pas dbul lo/ /sngar bshad pa'i yon chab ni rdo rje thal mo brkyang ba las gung mo gnyis nang du bcug pas dbul lo/ /oM sarba bid pu ra pu ra a brta ya ho zhes 'don cing nam mkha' mdzod kyi phyag rgya bcings la/rta babs la sogs pa dbul lo/ /gal te mchod pa rnams dngos su ma 'byor na/ de'i tshe mchod pa'i gzugs brnyan rnams gro ga la sogs pa la bris te/ dngos yin par lhag par mos par mchod yon tsam du dbul lo//de ltar ni 'phags pa rab tu grub par byed pa las/ che ge mo 'di bzhes shig ces/ /rdzas kyi ming nas phyung ste dbul/ /ma 'byor na yang gzugs brnyan rnams/ /byas nas mchod yon dbul bar bya/ /sngags dang mchod pa phul ba yi/ /cho ga thams cad tshogs par 'gyur//zhes gsung so/ /de bzhin du mchod pa ji ltar 'byor pa tsam yid kyis mchod pa dang bcas nas mchod pa yang / de nyid las/ rnam pa kun la mkhas pa yis/ /rtag tu ci 'byor pas kyang rung / /yid kyi mchod pa khyad par can/ /yang dag nyid du brtsam par bya//chos kyi thog mar yid 'gro zhes/ /thub pa chen pos bka' stsal to/ /yid ni rab tu mnyam gzhag nas/ /cho ga lhag ma bya bar bshad/ /ces gsungs so/ /de nas rdo rje dang dril bu 'dzin cing / mnyam med mi g.yo mnyam nyid mchog gi chos nyid can//thugs rje'i bdag nyid 'gro ba'i sdug bsngal sel bar mdzad/ /yon tan mtha' yas dngos grub thams cad sbyin mdzad pa/ /dri med mi g.yo mnyam med dag pa'i chos nyid can/ /yon tan shin tu phra ba'i cha la'ang tshad med de/ /dpe ni nam mkha' dang yang bsgrun du yod ma yin//dngos grub mtha' yas mnyam med dpe dang bral ba rnams/ /sems can khams la dngos grub nges par stsol mdzad pa/ /rtag tu dri ma med pa'i thugs rje'i shugs las byung / /smon lam grub pa 'gag pa med pa'i chos nyid can/ / 'gro ba'i don sgrub rab tu brtson pa mtha' yas pas/ /thugs rje chen po'i bdag nyid rtag tu rnam par snang / /tshad med tshad dang bral bar shin tu yongs rdzogs pa'i/ /bde bar gshegs pa'i go 'phang dam pa brnyes 'gyur dang / /khams gsum rnams la dngos grub mchog stsol mdzad pa yi//thugs rje'i spyod pa mi g.yo 'gag par yod mi 'gyur/ /e ma'o shin tu bzang po'i chos nyid mchog dang ldan/ /mchog sbyin rnams kyi nang na go 'phang mchog brnyes pa/ /khams gsum kun la rtag tu dngos grub mchog stsol mdzad/ /mgon po dus gsum sgrib pa med par rab mkhyen pa//dam tshig mchog gsum dngos grub dam pa bdag la stsol/ /zhes glus bstod cing / nus na 'phags pa de kho na nyid 'dus pa'i rtsa ba dang / phyi ma phyi ma'i rgyud nas gsungs pa'i rje btsun rnam par snang mdzad kyi mtshan brgya rtsa brgyad pa dbyangs su blangs pas bstod cing mnyes par bya/byang chub sems dpa' phyag na rdo rje yin na/ rgyud 'di nyid las gsungs pa'i mtshan brgya rtsa brgyad pas bstod do/ /de nas yi ge brgya pa brjod do/ /sgrub pa'i grogs mchog dkyil 'khor du bzhag la/ phyi rol du gtor ma rab tu rgyas pa 'chad par byed pas sbyin no//de nas nang du 'ongs pa bdag nyid 'jug pa bstan pa'i phyir/ rdo rje 'dzin ma zhugs nas ni/ /me tog thogs te sgo phyogs 'dug /ces gsungs pa yang 'dir drangs te/ sems dpa' rdo rje ma'i phyag rgyas me tog gi phreng ba bzung bar bya ba mdun du bzhag la/oM sarba ta thA ga ta kA ya wAka tsit+ta pra Na me na badzra ban+da naM ka ro mi zhes brjod cing / dkyil 'khor la yan lag brgyad dang ldan pa'i phyag lan gsum byas la phreng ba de blangs te/ dkyil 'khor la lan bdun bskor bas/ yang phyag snga ma ltar byas la/me tog de bdag po la phul te blangs la rang gi spyi bor gdags so/ /de nas pusti'i phyag rgya dang a zhes pa stong gis bdag gam gzhan la phab la/ rdo rje ye shes thob byed pa'i/ /de bzhin gshegs pa thams cad kyi/ /pho brang dkyil 'khor snying po 'dir/ / bdag gis slob ma gzhug par bgyi/ /zhes bka' mnos nas/ bdag dang gzhan des smin par mdzad par bsams la/ slob dpon du bdag por gyur pa las/ sdom pa dang dbang ma lus pa blo yis blangs te/ de nas/ chags chen las byung de kho na/ /'khor lo'ang gzugs brnyan dag dang mtshungs//oM nam mkha' las byung mtshan ldan phyir/ /thog ma tha ma med pa'i mchog /sems dpa' rdo rje che rang bzhin/ /rdo rje sems dpa' rab grub mdzod/ /kun mchog dngos grub chen po ste/ /dbang phyug chen po lhag pa'i lha/ /rdo rje 'dzin pa kun gyi rgyal//mi 'gyur mchog tu bdag grub mdzod/ /nyes pa mi mnga' rtag pa'ang khyod/ /'dod chags kun gyis rjes su mnyes/ /'dod chags chen po dga' ba che/ /bcom ldan 'das nyid kyis grub mdzod/ /shin tu dag pa kun gyi mchog /gdod nas grol ba de bzhin gshegs//kun du bzang po kun bdag nyid/ /byang chub sems dpa' bdag grub mdzod/ /dngos grub chen po kun gyi mchog /dbang phyug che sogs phyag rgya yis/ /grub pa'i rdo rje cher bstod pas/ rdo rje snyems bdag bdag mdzod cig /sems can kun gyi yid khyab cing //sems can kun gyi snying la gnas/ /sems can kun gyi pha yin te/ /chags pa'i mchog ste dam tshig mchog /thabs shes bdag nyid dkyil 'khor te/ /ye shes yin pa'i bden gang gis/ /bden pa 'di yis dkyil 'khor kun/ /gzugs brnyan gsal ba'i slob ma yis//skyon dang bral bar kun mthong shog /ces bya ba rnams kyi de kho na nyid bden pa dang / dam tshig gsum gyi glu dang / yang de kho na dang bden pa bsgrags so/ /gal te zhag du mar dkyil 'khor gyi las byed pa'i tshe na/ gnas skabs der dge 'dun la mchod ston gsol ba dang /chos smra bar mchod par bya ste/ ji skad du rnam par snang mdzad mngon par rdzogs par byang chub pa'i rgyud las/ slob ma de bos bsgo ba ni/ /'di ni bsod nams zhing yin zhes/ /sems can kun gyi don gyi phyir/ /skyob pa rnams ni kun gyis gsungs//rnam dag yon tan rgyas pa yi/ /dge 'dun la ni kun gyis phul/ /dge 'dun la phul 'bras bu che/ /skyes bu mkhas pa gang zhig gis/ /dge 'dun la ni yon phul na/ /longs spyod chen po mi zad pa/ /'jig rten 'thad par skye bar 'gyur/ /de bas thams cad mthun par ni//sems la dga' ba bskyed nas su/ /sangs rgyas bsngags pa'i dge 'dun la/ /ci nus pas ni mchod ston bya/ /zhes gsungs la bya ba'i rgyud gzhan dag las kyang / /de nas bla ma'i ci 'byor pas/ /'phags pa dge 'dun mchod ston gsol//yang na slob ma byed du gzhug /gal te mi 'byor par gyur na/ /dge 'dun gyis ni bskos pa yin/ /dge slong dag la mchod ston gsol/ /yang na sangs rgyas mchod pa'am/ /dge 'dun dag la yon yang dbul/ /zhes gsungs so/ /phyogs bzhir chos klog bzhi bzhag nas//de la shar gyi phyogs su ni/ /shes rab pha rol phyin pa gzhag /byang gi phyogs su gzhag pa ni/ /gser 'od dam pa'i mdo sde yin/ /nub kyi phyogs su gzhag pa ni/ /de bzhin gshegs pa'i gsang ba'i mdo/ /theg pa chen po sdong po bkod//lho yi phyogs su bzhag nas su/ /gus par de dag mchod par bya/ /zhes gsungs te/ gal te dkyil 'khor gyi las kyi dus tha ma zhag gsum du byed na de dag 'jug pa'i nyi ma snga dro bya'o/ /yang na chos bsgrags pas bsrung ba ni/ phyi'i sa sbyang ba nas bzung ste/dkyil 'khor bsdus pa'i bar du bya'o/ /de nas 'og nas 'byung ba ltar slob ma gzhug par bya'o/ /de ltar slob dpon dkyil 'khor bsgrub par byas nas gtor ma sbyin pa'i phyir/ de nas 'byung po kun gyi gtor ma bya/ /sems can bkres shing skom la gdung ba dang //phyogs la gnas pa rnams la rnam par brtag /de yi gtor ma rjes su mthun par bya/ /zhes smos te/ de yang dang po ni bza' ba dang btung ba mang pos mi'i 'gro ba ji ltar nus pa tshim par bya ste/ khyad par du ni khye'u dang bu mo gzhon nu 'khrig pa bsten mi nus pa rnams tshim par bya'o//de nas 'byung po kun gyi gtor ma la sogs pa bya ste/ gtor ma'i tshul ji lta bu zhe na/ da ni gtor ma rgyas pa'i cho ga bdag gis 'dir brjod par bya ste/ ji skad du bshad pa'i gtor ma shing rta gang la'ang nyung zad kyang rung ste/ ji ltar 'byor pa phyi rol du khyer la bsgrub pa'i grogs mchog dkyil 'khor du gzhag ste/ slob dpon bdag nyid kyis sbyin no/ /dang por sgrub pa pos 'phags pa bdud rtsi 'khyil pa'i sngags lan bdun gyis bsrungs te/ de nas gtor ma der mar me dang me tog dang / bdug pa dang byug pa dang bshos rnams btsal la lag tu spos thogs te/ pus mo g.yas pa'i lha nga sa la btsugs la/ yid don la bsdus te tshigs su bcad pa 'di brjod do/ /lha dang lha min gnod sbyin lto 'phye grul/ /nam mkha' lding dang 'dab bzangs lus srul po//dri za srin po gdon gyi rigs rnams dang / /gang dag sa la gnas pa'i rdzu 'phrul can/ /bu smad bcas shing g.yog 'khor bcas rnams la/ /bdag ni pus mo sa la btsugs nas su/ /thal mo sbyar nas khyed la gsol 'debs kyis/ /gsan nas phan gdags phyir ni 'dir spyon cig /'byung po gang dag ri rab steng gnas dang / /dga' ba'i tshal dang lha yi gnas rnams dang / /shar nub ri dang nyi zla'i khyim rnams dang / /ri bo kun la gang dag gnas pa dang / /chu bo kun dang chu yi mdo rnams dang / /rin chen gnas na lhag pa gang gnas dang //mtsho dang rdzing dang lteng ka chu ngogs dang / /g.ya' chu gsil ma can na gang gnas dang / /grong dang phyugs lhas grong khyer stong pa dang / /khang stong dang ni lha yi khang pa dang / /gtsug lag khang dang mchod rten gnas dag dang / /dka' thub gnas dang glang chen bres dang ni//rgyal po'i dkor khang dag na gang gnas dang / /lam srang mdun khang dang ni bzhi mdo dang / /gang dag lam po che dang shing gcig drung / /dur khrod chen po nags tshal chen po dang / /seng ge dred dang gcan gzan gnas dag dang / /'brog chen 'jigs su rung bar gang gnas dang //gang dag gling mchog rnams la gnas pa dang / /lhun po dur khrod dag na gnas pa rnams/ /rab tu dgyes shing go bar gyur nas su/ /bstod dang gtor ma mar me gus phul ba/ /'di dag bzhes te btung zhing bsnams su gsol/ / las 'di rnams kyi 'bras bu mchis par mdzod/ /ces brjod la gtor te/ de phyogs kyi gtor ma bya'o/ /de yang / de ltar gdon la mchod pa byas nas su/ /de dag phyogs skyong rnams la mchod par bya/ /zhes gsungs pas so/ /snga ma ltar pus mo btsugs te/ spos snod thogs la/ dbang po 'byung po'i gdon dang bcas pa yis/ /gtor ma phul ba 'di dag bzhes su gsol/ /me dang gshin rje srin po chu bdag dang / /rlung dang lus ngan 'byung po gdon dang bcas/ /steng gi nyi zla tshangs pa chen po dang / /lha rnams kun dang sa yi klu rnams dang //ri yi lha dang gnod sbyin tshogs rnams la/ /rab tu dgyes pa yis ni bzhes nas kyang / /rang rang phyogs su legs par bzhugs nas su/ /rang gi bu smad mdza' bshes gnyen 'dun dang / /nang mi dmag dang dpung bcas thabs cig tu/ / me tog dri dang byug pa gtor ma bcas/ /'di rnams btung zhing legs par gsol nas kyang / bdag gi las 'di 'bras bu mchis par mdzod/ /ces pas so/ /de nas bstod pa yang bya ste/ dbang po rdo rje 'chang ba'i lha/ /lha yi rgyal po gdon gyi bdag /shar phyogs gdon gyi tshogs bcas la/ /mchod pa bgyid cing phyag kyang 'tshal/ /me ste bsreg bya za ba'i lha/ /'byung po'i rgyal po gdon gyi bdag /phyogs mtshams gdon gyi tshogs bcas la/ /mchod pa bgyid cing phyag kyang 'tshal/ / gshin rje be con thogs pa'i lha/ /lha yi rgyal po gdon gyi bdag /bdag gis gdon gyi tshogs bcas la/ /mchod pa bgyid cing phyag kyang 'tshal/ /bden dang bral ba legs ldan lha/ /srin po'i rgyal po gdon gyi bdag /sna tshogs gdon gyi tshogs bcas la//mchod pa bgyid cing phyag kyang 'tshal/ /zhags pa thogs pa chu yi lha/ /bden pa bsrung ba gdon gyi bdag /nub phyogs gdon dang bcas pa la/ /mchod pa bgyid cing phyag kyang 'tshal/ /rlung ste srog kyang 'dzin pa'i lha/ /tshig srung gdon gyi bdag po ste//rlung gi gdon gyi tshogs bcas la/ /mchod pa bgyid de phyag kyang 'tshal/ /gnod sbyin lag na dbyug to thogs/ /nor srung gdon gyi bdag po ste/ /byang phyogs gdon dang bcas pa la/ /mchod pa bgyid cing phyag kyang 'tshal/ /dbang dang ldan pa 'dren pa'i lha//bgegs kyi rgyal po gdon gyi bdag /dbang ldan phyogs kyi gdon bcas la/ /mchod pa bgyid cing phyag kyang 'tshal/ /'og gi klu ste sa yi lha/ /sa 'dzin lag pa chen po ste/ /dam tshig shes pa'i gdon bcas la/ /mchod pa bgyid cing phyag kyang 'tshal//steng gi lha tshogs thams cad dang / /zla ba nyi ma gza' chen po/ /gza' dang rgyu skar bcas pa la/ /mchod pa bgyid cing phyag kyang 'tshal/ /zhes so/ /de ltar gtor ma phul ba'i yon tan ni 'phags pa dpung bzangs kyis zhus pa'i rgyud las/ de ltar gang zhig mtshan mo rgyu ba la/ /gtor ma gtong ba'i las rnams byed pa de/ /dngos grub shin tu myur zhing gegs kyang med/ /yid du 'ong ba'i 'dod pa'ang thob par 'gyur/ /zhes gsungs so/ /de nas gtor ma de dag rang rang gi phyogs su gtor te/ spos chu lag pa g.yon pa'i mthil du blugs la mig gis bltas te/bdud rtsi 'khyil ba lan bdun bzlas pas rang gi spyi bor blugs pas bsangs te/ dkyil 'khor du 'gro bar bya'o/ /yang na tshul 'dis gtor ma sbyin te/ de nas phyi rol byung nas su/ /mnyam par gzhag pas gtor ma sbyin//'bras yos til dang chur bcas shing / /'bras chan dang ni me tog bcas/ /sran chen dag kyang mang du blugs/ /snum dang lo ma dag dang bcas/ /de ltar slob ma slob dpon gyi/ /lag pa gnyis kyis blangs nas su/ / dga' zhing phyogs rnams kun du gtor/ /bdug spos mchod yon bcas pa sbyin/ /dang po dbang ldan phyogs song nas/ /cho ga bzhin du gtor ma bya/ /dbang dang ldan pa gzhu can ni/ /tshogs dang bcas la sbyin par bya/ /de nas dbang po'i tshogs bcas la/ / gsang sngags zhes pas sbyin par bya/ /sngags pa gtor ma la mkhas pas/ /me yi phyogs su gtor ma sbyin/ /de nas gshin rje'i phyogs dag tu/ /sngags pa mkhas pas sbyin par bya/ /de nas bden bral tshogs bcas la/ /gsang sngags zhes pas sbyin par bya//chu yi phyogs su klu rnams ni/ /bdag por bcas la de bzhin du/ /cun+di gnas la gnas pa yi/ /sngags rigs pas ni tshul bzhin sbyin/ /de nas rlung gi phyogs song nas/ /rlung gi phyogs dang bcas pa la/ /rang gi ming nas smos nas su/ /sngags pas gtor ma sbyin par bya//byang gi phyogs su song nas ni/ /dngos grub dam pa 'dod byas la/ /yid ni rab tu dang bcas nas/ /gnod sbyin rnams la gtor ma sbyin/ /srin po rnams dang sha za dang / /'byung po sha rjen za ba dang / /sems can rnam pa sna tshogs la//mkhas pas gtor ma gtong bar bya/ /blo las gang dang gang dran pa/ /de na gnas pa'i sems can ni/ /ljon shing gel pa la gnas pa/ /de dang de la rab tu sbyin/ /dbang ldan gyi phyogs su ru dra ya swA hA/ dbang po'i phyogs su Sha kra ye swA hA/ me'i phyogs su ag+na ye swA hA/ gshin rje'i phyogs su ba ya bai ya swa ta ye swA hA/ srin po'i phyogs su rAk+Sha sa a d+hi pa ta ye swA hA/ chu'i phyogs su me ka da sha na ye swA hA/ rlung gi phyogs su ba ya be+e swA hA/ lus ngan gyi phyogs su yak+Sha bid+ya d+ha ra ya swA hA/ srin po rnams la kraM ka re swA hA/sha za rnams la pi tsi pi tsi swA hA/ 'byung po rnams la gung gung swA hA/ kun du gtor ma byin nas ni/ /lag pa legs par bkrus nas su/ /nye reg tshul bzhin byas nas ni/ /de nas nang du 'jug par bya/ /zhes so/ /yang na 'byung po thams cad pa'i gtor ma phyi rol du khyer la/oM a kA ro mu khaM sarba d+harma NAM ad+ya nut+pan+na twA ta oM AHhUM phaT swA hA zhes sgra chen po lan gsum brjod la/ 'gro ba thams cad la bsngos te gtor ro/ /yang na lugs 'dis gtor ma sbyin te/ dang por maN+Dal zlum po khru gang yan chad bcu phyogs brgyad du byed du bcug la/maN+Dal re re'i steng du gtor ma sngar bshad pa bzhag la/ de nas dang por spyan drangs ste/ de nas dam tshig bstan cing mchod yon phul te/ dri dang me tog dang bdug pa dang / mar me dang byug pa phul la a kA ro zhes bya ba la sogs par shar phyogs nas brtsams te gsum gtor la/yang mchod yon la sogs pa phul te slar gtang ngo / /de la sngags dang phyag rgya 'di rnams yin te/ shar phyogs su kha bltas te/ rkang pa g.yas pa brkyang ba'i tshul gyis 'dug nas/lag pa g.yon pa rdo rje'i phyag rgya la/ g.yas pa rdo rje'i phyag rgya sta zur logs su bzhag ste/ g.yas pa'i mdzub mo lcags kyus spyan drang ba ni brgya byin spyan drang ba'i phyag rgya'o/ /de la mdzub mo lcags kyur ma byas pa ni/ brgya byin gyi dam tshig gi phyag rgya'o/ /rkang pa g.yon brkyang ba'i tshul gyis 'dug la/spyan drang ba'i phyag rgya las/ mdzub mo brkyang ba ni slar btang ba'i phyag rgya'o/ /de nas 'di'i sngags ni na mo badzra sa tsa di shi badzra pA Ni rak+Sha rak+Sha swA hA/ me'i phyogs su kha bltas nas/ lag pa g.yas pa'i mdzub mo zlum por bkug ste/gung mo'i tshigs gsum par btsugs la/ mthe bo lag mthil du gzhag pa ni me lha spyan drang ba'i phyag rgya'o/ /dgug pa'i phyag rgya las mthe bong ngos la mdzub mo btsugs pa ni/ me lha'i dam tshig gi phyag rgya'o/ /phyag rgya de nyid la mdzub mo mthe bo'i ngos la btsugs te phyir drag tu brkyang ba ni slar btang ba'i phyag rgya'o//de'i sngags ni ag+ne a ha ka pa li dz+wa la dz+wa la/ da ha ni khi tho li bi rU pA k+Sha swA hA/ gshin rje'i phyogs su bltas nas snyim pa mdun du bzhag ste/ sor mo phan tshun bsnol la khu tshur bcangs nas/srin lag gnyis bsgrengs te gshibs la g.yabs te/ nang du gzhug pa ni gshin rje dgug pa'i phyag rgya'o/ /srin lag gnyis phyi rol du shin tu gshibs te bsgrengs la snying gar gzhag pa ni dam tshig gi phyag rgya'o/ /'di nyid las srin lag sbyar ba ni slar btang ba'i phyag rgya'o//sngags ni sa ma ya swA hA/ bden bral gyi phyogs su rkang pa mnyam par 'dug la/ lag pa g.yas kyi khu tshur bcangs pa las/ mdzub mo dang gung mo ral gri 'dra bar gshibs la bsgreng ste gzhag /lag pa g.yon pa'ang de ltar byas te sta zur phyogs su bzhag la g.yon pa'i mdzub mo bkug ste g.yab pa ni bden bral dgug pa'i phyag rgya'o//phyag rgya de nyid las lag pa g.yon pa sta zur phyogs su ral gri 'dra bar gzhag pa ni bden bral gyi dam tshig gi phyag rgya'o/ / dgug pa'i phyag rgya las mdzub mo brkyang ba ni slar btang ba'i phyag rgya'o/ /sngags ni sarba b+hud+d+ha ba ya ka ya ku ru swA hA/ chu lha'i phyogs su rkang pa mnyam par 'dug la/ lag pa g.yas pa khu tshur bcangs la mthe bo dang / mdzub mo gcig tu sbyar la/ zhags mig ltar byas te g.yon pa'i khu tshur yang de ltar byas la snying gar bzhag ste/g.yon pa'i mdzub mo lcags kyu 'dra bar byas pa ni dgug pa'i phyag rgya'o/ /phyag rgya de nyid la g.yon pa'i mdzub mo khu tshur gyi tshul du bzhag pa las zhags mig ltar byas pa ni chu lha'i dam tshig gi phyag rgya'o//g.yon pa'i phyag rgya las mdzub mo slar btang ba ni slar btang ba'i phyag rgya'o/ /sngags ni ti ti ba ti ti ti shi khi tu li bi rU pAk+Sha ya swA hA/ rlung lha'i phyogs su bltas te 'dug la/ lag pa g.yon pa khu tshur bcangs te/ gung mo bsgreng ba'i tshigs dang mdzub mo bsgreng ba'i thor to btsugs la lag pa g.yas pa de bzhin du byas te/sta zur logs su gzhag cing mthe bong bsgul ba ni rlung lha spyan drang ba'i phyag rgya'o/ /de nyid las mthe bo snga ma bzhin du gzhag pa ni rlung lha'i dam tshig gi phyag rgya'o/ / spyan drang ba'i phyag rgya las mthe bong brkyang ba ni slar btang ba'i phyag rgya'o/ /sngags ni oM swa sa kha kha kha khu khu khu swA hA/ lus ngan la mngon du bltas te 'dug nas lag pa gnyis thal mo sbyar la rdo rje bcing pa nang du bzlog ste/ mthe'u chung gnyis gshibs la brkyang /de'i rgyab tu srin lag gnyis so sor bzhag nas gung mo gnyis de ltar bkug ste g.yab pa ni lus ngan spyan drang ba'i phyag rgya'o/ /phyag rgya de nyid las gung mo gnyis nang du rdo rje bcing ba'i tshul du gzhag pa ni/ lus ngan gyi dam tshig gi phyag rgya'o/ /'gugs pa'i phyag rgya las gung mo gnyis brkyang ba ni slar btang ba'i phyag rgya'o//sngags ni ku bi rA ya swA hA/ dbang ldan gyi phyogs su bltas te 'dug la/ lag pa thal mo gcig tu sbyar ba byas la/ srin lag dang mthe'u chung nang du bkug ste bsnol/ gung mo gshibs te bsgreng ba'i rgyab logs su mdzub mo gnyis rdo rje 'dra bar bya/mthe bong gnyis bar du gshibs te bzhag la/ de nyid la mdzub mo gnyis phan tshun rtse mo sprad nas nang du g.yab pa ni dbang ldan dgug pa'i phyag rgya'o/ /de nyid las snga ma ltar mdzub mo rdo rje'i tshul du gzhag pa ni dbang ldan gyi dam tshig gi phyag rgya'o//dgug pa'i phyag rgya las mdzub mo brkyang ba ni slar btang ba'i phyag rgya'o/ /sngags ni dzruM dzruM shi ba swA hA/ g.yon brkyang ba'i gnas pas 'dug pas/ lag pa thal mo khong stong du sbyar te bzhag la/ steng du bltas te mdzub mo gnyis kyi lcags kyus tshangs pa la sogs pa dgug par bya'o//de nyid las snga ma ltar gzhag pa ni dam tshig gi phyag rgya'o/ /dgug pa'i phyag rgya las mdzub mo gnyis brkyang ba ni slar btang ba'i phyag rgya'o/ /sngags ni 'di yin te a dar ya pra ha ma ne swA hA/ sUR+Ya gra ha a d+hi pa ta ye swA hA/ tsan+d+ra ya na k+Sha tra a d+hi pa ta ye swA hA/ rkang pa mnyam par gnas pas 'dug la/ lag pa gnyis gcig tu sbyar te sor mo rnams bar mtshams med par rtse mor phan tshun sbyar te/ mthe bo zlum por byas la 'og tu bltas te sa'i lha mo la sogs pa mdzub mo lcags kyu lta bur bkug pa ni 'og gi lha dgug pa'i phyag rgya'o//dgug pa'i phyag rgya las snga ma bzhin du mdzub mo gzhag pa ni dam tshig gi phyag rgya'o/ /mdzub mo gnyis btang ba ni slar btang ba'i phyag rgya'o/ /sngags ni a d+hi pa ti b+h+yaHswA hA/ a su re b+h+yaHswA hA/ na ge b+h+yaHswA hA/de nas rang rang gi sngags de nyid kyis 'thor 'thung phul la/ bdag dang slob ma'i tshogs su bcas pa la bgegs med par mdzod cig /las dang dngos grub rnams bdag cag la stsol cig ces brjod cing slar gtang ngo / /de ltar bdag gis rgya cher bkod pa'i gtor ma 'di dag ni gang dga' bas slob ma dbang bskur ba dang /ro yongs su sbyang ba la sogs pa'i tshe sbyin no/ /de nas sngags pas bla med byang chub kyi gnas su slob ma yongs su smin par bya zhes bya ba la sogs pa la slob ma sta gon la gnas pa ston te/de nas zhes bya ba ni don gyis na bum pa sta gon la gnas ma thag tu'am slob ma smin par bya ba'i dbang du byas pa zhes so/ /sngags pas zhes bya ba ni mtshan nyid dang ldan pa'i slob dpon gyis so/ /bla med byang chub ces bya ba ni/ mi gnas pa'i mya ngan las 'das pa'o//de nyid 'khor ba ji srid du gnas par bya bas na gnas su'o/ /slob ma zhes bya ba ni bla ma la gus pa'i yon tan dang ldan pa'o/ /smin par bya zhes bya ba ni dngos grub kyi myu gu 'byin nus par byas zhes pa'o/ /ji ltar bya zhe na/ 'gro la phan phyir myur du byang chub par//de dag byang chub sems mchog bskyed du gzhug /ces smos so/ /slob ma sta gon la gnas par bya ba ni/ 'phags pa dkyil 'khor spyi'i bya ba las kyang / de nas slob ma legs brtags nas/ /sta gon gnas la tshul bzhin du/ /de yi nub mo ci nus par//de bzhin sdom pa 'dzin du gzhug /gtsang ma'i gos dkar bgos pa yis/ /slob ma de lta bu dag ni/ /shar phyogs kha bltas 'khod pa la/ /sta gon gnas pa brtsam par bya/ /dang por gsum la skyabs su btang / /de nas bla mas byang chub sems/ / ma bskyed pa ni bskyed par bya/ /bskyed pa dag kyang dran par bya/ /zhes gsungs pas so/ /de la 'di slob ma sta gon la gnas pa'i rim pa rgyas pa 'di yin te/ dang por slob ma legs par brtags pa smyung ba la gnas pa/ rgyan gyis brgyan pa rnams dkyil 'khor gyi gnas su shar du blta bar rgan pa'i rim gyis dgod de/lag na me tog thogs pa rnams la slob dpon gyis chos bstan te/ de ltar yang / yid dga' spro chen byas pa gzo/ /ngar 'dzin mi 'byed rigs mtho zhing / /yon tan dang ldan dad dang bcas/ / gzugs dang kha dog lang tshor ldan/ /bde bar gshegs pa'i gsang ba ni/ /sgrub pa don gnyer mngon brtson pa'am/ /gzugs ngan yon tan med pa'am/ /dman pa'am ni lhag par bya/ /rang gi bslab dang legs ldan zhing / /theg chen la dga'i bdag nyid can//'khor ni rnam pa bzhi char la'ang / /dkyil 'khor cho ga rjes su gnang / /kha cig gsang sngags bsgrub pa'i phyir/ /'di ni dkyil 'khor 'jug par byed/ /bsod nams 'dod pa de las gzhan/ /'jig rten pha rol don gnyer gzhan/ /'jig rten pha rol gnyer ba yi//dad pa mang du byed pa 'di/ /blo ldan dkyil 'khor 'jug par bya'i/ /'di yi 'bras bu 'dod pas min/ /'di la 'dod par gyur pa yis/ /'jig rten pha rol don mi 'gyur/ /'jig rten pha rol don gnyer pa'i/ /skyes bu de yi 'bras bu rgyas//zhes so/ /de nas shes rab kyi pha rol tu phyin pa ci nus kyis bshad do/ /de nas de bzhin gshegs pa thams cad kyis slob ma la dbang bcu gsum bskur la/ de dag slob ma'i lus la bsdu'o/ /de nas slob ma rnams kyis bla ma'i zhabs la phyag 'tshal te/dga' chen khyod bdag ston pa bas/ /slob dpon khyod ni bdag la dgongs/ /byang chub chen po'i tshul bstan pa/ /mgon po chen po bdag 'tshal lo/ /dam tshig de nyid bdag la stsol/ /byang chub sems ni bdag la stsol/ /sangs rgyas chos dang dge 'dun te//skyabs gsum de ni bdag la stsol/ /thar pa chen po'i grong mchog tu/ /mgon po bdag ni 'jug par 'tshal/ /zhes lan gsum gsol ba gdab par bya'o/ /de nas slob ma gcig tsog tsog por byas te/ de'i ming nas brjod la thams cad gzengs bstod par bya ste/khyod ni tshul chen snod yin te/ /bu tshur theg pa chen po yi/ /gsang sngags spyod tshul cho ga ni/ /khyod la yang dag de bstan bya/ /rdzogs pa'i sangs rgyas gang 'das dang / /de bzhin gang dag ma byon dang / /da ltar byung ba'i mgon po rnams//'gro la phan phyir bzhugs pa dag /de dag kun gyis gsang sngags kyi/ /cho ga mchog bzang 'di mkhyen nas/ /dpa' bo byang chub shing drung du/ /thams cad mkhyen pa mtshan med brnyes/ /gsang sngags sbyor ba mnyam med de/ /shAkya seng ge skyob pa yis//bdud sde shin tu mi bzad pa/ /dpung chen dag kyang de yis bcom/ /'jig rten mthun 'jug thugs chud nas/ /'khor lo bskor te mya ngan 'das/ /de bas kun mkhyen thob bya'i phyir/ /bu yis blo gros 'di gyis shig /ces pa dang gzhan rab tu rgya cher brjod de/snying rjer gyur pa'i yid kyis ni/ /de ltar lan mang gzengs bstod de/ /zhes gsungs pas so/ /de nas slob ma rnams dkyil 'khor gyi lha rnams la phyag 'tshal ba la sogs pa yan lag bdun byas la/ ji ltar dus gsum mgon po rnams//byang chub tu ni nges mdzad pa'i/ /bla na med pa'i byang chub sems/ /dam pa bdag gis bskyed par bgyi/ /ma bsgral ba ni bsgral bar bgyi/ /ma grol ba ni grol bar bgyi/ /dbugs ma phyin pa dbugs dbyung zhing / /sems can mya ngan 'das la dgod/ / ces lan gsum brjod do/ /'di ni/ 'gro la phan phyir myur du byang chub par/ /de dag byang chub sems mchog bskyed du gzhug /ces bya'o/ /de nas/ dkon mchog gsum la skyabs su mchi/ /sdig pa thams cad so sor bshags/ /'gro ba'i dge la rjes yi rang //sangs rgyas byang chub yid kyis gzung / /zhes lan gsum brjod do/ /'di ni byang chub smon lam gdab/ /ces bya ba dang / brtul zhugs gnas zhes bya'o/ /de nas dpral ba dang / mgrin pa dang snying gar thal mo sbyar bas/ slob ma'i gnas de gsum du bzhag la/oM b+h+ri ta b+h+ri ta sarba A ba ra NA ni hUM phaT/ oM tra Ta tra Ta sarba A ba rA NA ni hUM phaT/ oM tshin+da tshin+da sarba A ba rA NA ni hUM phaT ces bya ba'i rim pa sbyar te lan bdun brjod la/ rdo rjes kyang reg par byas la me tog dang / bdug pa dang / dri dang / mar me dang spyi bo dang mdun du rang re'i sngags kyis sbyin/de nas byin gyis brlab ces bya'o/ /de nas so shing dor ba dang dri chu sbyin te/ /ji skad du/ so shing u dum+WA ra dang / /a shwat+tha ni rma med pa/ /ha cang mi phra mi sbom zhing / /sor grangs bcu gnyis tshad du byas/ /spos kyi chus ni legs par bkru//skud pa dag gis rnam par bkris/ /spos kyis bkru zhing bdug pas bdugs/ /lag pas bran zhing bzlas pa ni/ /rigs kyi snying po mang du bzlas/ /yang na lan bdun bzlas par bya/ /slob ma rnams kyi grangs las ni/ /so shing la sogs bsags par bya//so shing mgo zhabs gcig byas nas/ /rtse mo nas ni bca' bar bya/ /de nas bdag dang slob ma dang / /gnas bsrung ba yang brtan byas nas/ /lha rnams thams cad legs mchod de/ /zhes pa dang yang gsungs pa/ slob ma mthun zhing tshogs pa rnams/ / byang phyogs su ni kha bltas shing / /thal mo sbyar te 'khod pa la/ /so shing go rims bzhin du sbyin/ /slob ma shar du kha bltas te/ /mi smra bar ni so shing bca'/ /bca' ba zin nas mi dga' shing / /phan tshun du yang mi dor ro/ /so shing mdun du drang por dor/ / de tshe bdag la lta ba dang / /rtse mo gyen du bsgreng gyur na/ /des ni dngos grub mchog ces bya/ /de bzhin shar du bltas na ni/ /de yi dngos grub 'bring du bshad/ /mtshams dang byang du kha bltas na/ /'jig rten gyi ni rig sngags 'grub/ /so shing bor ba brgya zhig la//gal te thur du kha bltas na/ /des ni nges par sa 'og gi/ /dngos grub thob par gdon mi za/ /zhes te/ gal te ba lang ko ba tsam du lan gsum ma babs na/ de la dbang ni mi bskur ro/ /slob ma nye reg byas nas ni/ /snga ma bzhin du 'khod pa la//las kun byed pa'i gsang sngags kyis/ /spos chu bla mas blud pa ni/ /re re la yang btung ba yi/ /khyor bar blugs la lan gsum blud/ /der ni 'thungs nas langs nas ni/ /phyi rol du ni kha bkru bya/ /zhes te/ 'dir ni oM hrIHsu bi shud+d+ha d+harma sarba pA paM ni bi sho d+ha ya swA hA/sarba bi kAlpa ni ya hUM zhes pa'i sngags so/ /de nas bdud rtsi 'khyil ba bzlas pa'i ku sha stan dang sngas su byin la/ de bzlas pa'i srad bu mdud pa bdun bor ba/ /dpung pa g.yas par gdags so/ /de nas/ 'phags pa sgyu 'phrul dra ba las/ / ku sha lag tu gtad nas su/ /g.yas su skud pa bcings nas ni/ /zhes gsungs pa ste/ dor ba bca' ba byas nas ni/ /zhes smos pa'o/ /de nas rdo rje sems dpa'i snying po yi ge brgya pa lan mang du bzlas nas de dag brtan par bya'o/ /de nas chos bshad par bya ste/zab cing rgya che'i chos bsgrags la/ /zhes gsungs pa'o/ /'di lta ste/ kun mkhyen rnams ni 'jig rten du/ /'byung 'gyur yang ni mi 'byung ngo / /gsang sngags spyod pa'i tshul 'byung ba/ /de bas kyang ni dkon pa ste/ /gang gi mnyam med sems can don//mya ngan mi 'da' byed par nus/ /bskal pa bye ba du ma ru/ /sdig pa bgyis par gyur pa gang / /de kun dkyil 'khor 'di 'dra ba/ /mthong bas 'byung bar gyur lags na/ /grags pa mtha' yas sngags spyod pa'i/ /tshul la gnas na smos ci 'tshal//skyob pa'i gsang sngags bzlas na ni/ /go 'phang bla na med par 'gyur/ /gang dag spyad pa mchog 'di la/ /blo gros shin tu mi g.yo ba/ /'di dag gis ni ngan 'gro'i rgyun/ /sdug bsngal kun 'byung rab tu gcad/ /bdag nyid chen po khyed rnams kyis//rnyed pa mnyam med de ring rnyed/ /gang phyir rgyal ba sras bcas pa/ /bdag nyid chen po kun gyi ni/ /bstan pa 'di la khyed rnams kun/ /yongs su bzung ste skye bzhin pa/ /de phyir khyed rnams theg chen la/ /sang ni rab tu skye bar 'gyur/ /theg pa chen po cher 'byung ba'i//lam mchog 'di ni dpal dang ldan/ /khyed rnams der ni dong bas na/ /rang 'byung skal ba chen po pa/ /'jig rten thams cad mkhyen pa yi/ /de bzhin gshegs pa rnams su 'gyur/ /yod dang med las rnam par 'das/ /nam mkha' bzhin du dri ma med//zab mo rtog ge thams cad kyis/ /rab tu mi rtog gnas med pa/ /spros pa kun dang bral ba ste/ /spros pa rnams kyis ma spros pa/ /las dang bya ba la sogs bral/ /bden pa gnyis la gnas pa yi/ /theg pa rab kyi mchog 'di ni/ /tshul la gnas na thob par 'gyur//zhes so/ /de nas slob ma slob dpon du 'os pas/ bla ma'i zhabs la phyag 'tshal te/ /gtso bo bdag la sdom pa stsol/ /zhes bya ba'i bar du khyad par gyi sdom pa gsol ba btab la/ slob dpon gyis de rnams la rmi lam ji ltar mthong ba nga la nang par zlos shig ces brjod do//de nas rmi lam gyi mtshan nyid ni/ 'dod chags bral dang ldan pa'i chos/ /slob ma rnams la bshad nas ni/ /ku sha bting ba'i sa la ni/ /shar phyogs kha bltas nyal du gzhug /de nas nang par nam langs nas//rmi lam ci mthong dri bar bya/ /mthong na bzang ngam mi bzang ngam/ /the tshom med par bshad par bya/ /rmi lam rgyas pa mthong na ni/ /yon tan rgya mtsho mngon sum bzhin/ /mchod rten dang ni sku gzugs mthong / /de la mchod pa rtsom pa dang / /dge slong dag la chos nyan tam//yang na gzhan la nyan kyang rung / /chos ni rnam par dpyod pa dang / /de bzhin glegs bam klog pa dang / /rmi lam dge 'dun mthong ba dang / /yang na dge slong gcig bu mthong / /de dang 'grogs shing gtam zer dang / /yang na dge slong dngos por gyur//gtsug lag khang dag mthong ba dang / /de bzhin dge slong ma dag mthong / /rgyal ba'i sras rnams mthong ba dang / /de bzhin pha ma bla ma dang / /mdza' bo rnams ni sna tshogs rnams/ /rmi lam dag tu mthong na ni/ /rigs rnams dang ni dngos grub thob//de bzhin bslab pa 'dzin pa dang / /kan dga' rnam pa sna tshogs dang / /'bab chu rnams dang rgya mtsho dang / /ri dang glang po che dag kyang / /mthong na yang ni bzang bar bsgrags/ /rgyal mdog dang ni mthong na yang / /bde gshegs spyod dang ldan pa yi/ / dka' thub dang ni bram ze dang / /phyug po skyes bu dam pa dang / /ba lang rta dang glang po dang / /seng ge dang ni ri dwags kyang / /rmi lam du ni mthong na shis/ /bkra shis pa yi bya rnams dang / /gser dag dang ni gter rnams dang / /rin po che dang dngul rnams dang / / nor ni rnam pa sna tshogs dang / /mdor na 'byung khungs rnam pa dang / /mtshon cha rnams dang 'bru rnams dang / /'bras bu rnams dang me tog dang / /rgyan ni rnam pa sna tshogs dang / /kha zas dang ni gos rnams dang / /byis pa dang ni gzhon nu dang / /bud med gzugs ni bzang po dag /rmi lam du ni mthong ba bzang / /yang na thob cing reg pa smra/ /rmi lam na ni dbang bskur dang / /rgyal por gyur cing 'byor pa dang / /dmag dpon du ni gyur pa dang / /g.yul las rgyal zhing dgra gsod dang / /gnyen dang lhan cig 'grogs pa dang //lha rnams kyang ni mthong ba dang / /theg pa dang ni shing rta zhon/ /de bzhin ri dang khang thog 'dzeg /ngo mtshar rnam pa sna tshogs kyang / /rmi lam du ni mthong na dge/ /yam shing me la sbyin sreg byed/ /bya ba bzang po dag la 'bad/ / chu la rkyal zhing pha rol brgal/ /rkun po dag ni tshar gcod dang / /stobs 'gyed pa las rgyal ba dang / /gyad stangs rdo bcing 'gying ba dang / /rtsed mo sna tshogs rmi ba dang / /de bzhin mthu rtsal gzi byin che/ /bkra shis rnams ni thams cad kyang / /mthong na rab tu dge bar bshad//gsang sngags cho ga nyan pa dang / /dga' ston dge ba mthong ba dang / /sgrub la brtson zhing bsngags pa dang / /sgrub pa po rnams mthong ba dang / /de la sogs pa'i lha rnams ni/ /dge ba rnam pa du ma dag /blo yis rnam par dpyad nas ni/ /de nas bzlog pa spang bar bya//dge ba yi ni ltas rnams ni/ /rab dang 'bring dang tha ma la/ /dge ba rnams ni 'grub par 'gyur/ /mi dge ba ni mi 'grub bo/ /mi dge ba dag shes nas su/ /de dag mkhas pas spang bar bya/ /gsang sngags dngos grub gsum 'grub pa//rab dang 'bring dang tha ma'o/ /mi dge ba la zhi ba yi/ /sbyin sreg zhi ba'i gsang sngags kyis/ /ba yi mar las brgya rtsa brgyad/ /cho ga bzhin du zhi bar bya/ /zhes gsungs pa ste/ de ltar rmi lam bshad nas de'i 'og tu bdud rtsi 'khyil pa'i sngags brgya rtsa brgyad kyis de dag bsrung ste/dkyil 'khor gyi mthar thams cad nyal bar bya ba ni tshul bzhin ma yin pa yid la mi bya bar glo g.yas pa phab ste'o/ /de nas nang par rmi lam gyi tshul shes par byas te/ 'dod pa'i rgyal pos dkyil 'khor gyi sa'i dbus su phyogs skyong ba rnams bkug ste/oM badzra kI li zhes bya ba la sogs pa'i sngags kyi phur pas gdab bo/ /'dis don gyis drangs pa'i sta gon la gnas pa gzhan ni re zhig dang po nyi ma shar ba'i dus su/ dkyil 'khor gyi dbus su dri zhim pos maN+Dal khru gang yan chad byas la/ sngon bzhin du sa'i lha la mchod pa dang tshigs su bcad pa gnyis kyis gsol ba btab la sa'i lha de nyid du yang thim par bya'o//de nas rtsa ba'i lha rnams kyi nang du dri zhim pa'i thig le byas la der lha rnams bstims te/ mchod pa dang bstod pa dang bskor ba byas la gsol ba gdab par bya'o//ji skad du/ sa gzhi steng du byug spos kyis/ /dkyil 'khor sor grangs bcu gnyis bya/ /dkyil 'khor gyi ni rig sngags kyis/ /lag pas brab cing lan bdun bzlas/ /de nas gtso bo'i lha rnams ni/ /ming gis yid la bsams nas su//byug spos me tog la sogs pas/ /snying po ci rigs mchod par bya/ /lha bshos dag kyang dbul bar bya/ /bdug spos mngon par bsngags pa'ang dbul/ /der ni mchod pa yang byas nas/ /bdug spos lag tu thogs nas ni/ /blo gros can gyis lha rnams la//gus par gsol ba gdab par bya/ /gang gi dkyil 'khor yin pa'i sngags/ /de la thog mar gdags par gsol/ /de yi go rims sbyar ba yi/ /lha rnams kun la gdags par gsol/ /'di zhes bya ba bcom ldan 'das/ rig sngags rgyal la phyag 'tshal lo//bdag ni brtse bar gyur nas su/ /slob ma rnams la brtse ba dang / /khyed rnams la yang mchod pa'i phyir/ /sang ni dkyil 'khor bri bar 'tshal/ /bcom ldan bdag ni gus pa la/ /de nas gnang ba mdzad pa'i rigs/ /sangs rgyas mgon po brtser ldan pa/ / byang chub sems dpa' dgra bcom dang / /gang yang gsang sngags lha rnams dang / /'jig rten skyob pa'i lha rnams dang / /gang yang 'byung po mthu chen dang / /gang yang lha yi spyan mnga' ba'i/ /sems can bstan la dga' ba rnams/ /bdag la dgongs pa mdzad du gsol//bdag gi ming ni 'di zhes bya/ /sang ni gdugs la dkyil 'khor ni/ /bzang po ming ni 'di zhes bgyi/ /yo byad ci yod pas 'dri na/ /bdag dang slob mar bcas pa la/ /thugs ni brtse bar dgongs nas su/ /tshogs pa thams cad dkyil 'khor du//byin gyis rlob pa mdzad du gsol/ /de skad lan gsum brjod nas ni/ /bsam pa thag pas phyag byas te/ /bstod pa'i tshig kyang brjod nas su/ /de nas slar ni gshegs su gsol/ /zhes gsungs pa lta bur bya'o/ /de nas bum pa rnams sngon du bstan pa ltar ram//yang na 'di dag ni rang gi sems snang ba tsam mo zhes mos pas/ zla ba'i dkyil 'khor la rang rang gi yi ge las mtshan ma dang de las skur grub cing / de bzhin gshegs pa thams cad bzhugs nas bum par gyur par byas la/ grangs dang po'i mtshan ma dang 'brel par gzhag pa'ang rung ste/bum pa ni rab tu ma rnyed na rnam par rgyal ba dang las thams cad pa gnyis kyis byas la/ rnam par rgyal ba yang 'dir lha thams cad kyi bdag nyid yin la rdo rje sems dpa'i gnas su gzhag go/ /de la kha cig na re/ rnal 'byor gyi rgyud du ni/sa'i lha sta gon la gnas pa med do zer te/ 'di ni bla ma'i lung tha dad pas nges pa med do/ /sta gon la gnas pa'i cho ga'o/ /da ni sdom gnas zhes bya ba la sogs pa slob ma 'jug pa ston te/ sdom ni 'dir thun mong gi sdom pa la gnas pa ste/ khyad par gyi sdom pa ni gdong dbog par bya ba yin pas so//de yang legs par sta gon la gnas pa'i slob ma de dag dkyil 'khor chen por gzhug pa'i tshul ni/ sta gon la gnas pa'i phyi de nang par dri'i thig le'i lha rnams la mchod pa dgus mchod nas nam mkha' la bteg la/sngar bshad pa ltar nang dang phyi'i thig gdab la/ tshon bkye ste khrus byas la dkyil 'khor gyi yo byad bkod nas bum par bcug ste/ dkyil 'khor gyi bsgrub pa byas la/ sngon bzhin du phyi rol du gtor ma sbyin te nang du bdag nyid zhugs la/ de nas yol bas bcad pas slob ma re re nas bos la/'jug pa'i rim pa bya ste/ bla mas slob ma gcig pu ni/ /dkyil 'khor dag tu dbang bskur bya/ /mkhas pas cig car slob ma gnyis/ /dbang bskur bar ni yongs mi bya/ /gnyis sam gsum mam bzhi yang rung / /thams cad so sor bya ba ni//yo byad sar pa gzhan rnams kyis/ /dbang bskur ba yi bla mas bya/ /rig sngags dbang ni thob pa la/ /bsgrub pa'i dkyil 'khor dbang bskur bya/ /dbang bskur ba yi cho ga dang / /bsgrub pa'i cho ga'ang de bzhin sbyar/ /zhes gsungs pas 'jug pa ni dbang bskur ba'i dang po nyid du gyur pas so//de ltar bos la/ las kyi bum ba'i chu mchod yon gyi snod du blugs pa ku sha'i bam pos bdud rtsi 'khyil pa'i sngags nyi shu rtsa gcig gis bsrung ngo / /de ltar yang slob ma re re nas bkug ste/ bsang gtor snga ma bzhin byas nas//byug spos la sogs byin nas kyang / /snying pos mngon par bsngags nas ni/ /zhes gsungs so/ /dar la sogs pas mig gnyis g.yogs nas ni zhes bya ba ni/ las kun byed pa'i gsang sngags kyis/ /btab pa'i gos kyis gdong g.yogs te/ /zhes gsungs pa'o//rdo rje 'dzin mas dpal gyi pad+mor lag gnyis bya/ /me tog rin chen la sogs de brgyan la/ /zhes bya ba ni de nyid las sngar bstan pa'i phyag rgya la/ me tog dag ni bzhag nas su/ /de nas dkyil 'khor bdag pos sngags/ /phyag rgyar bcas pas spyi bor gzhag /gsang sngags lan gsum bzlas par bya/ /zhes gsungs pa lta bu'o/ /de la rdo rje 'dzin ma'i phyag rgya bcing ba'i sngags ni/ oM badzrA d+hi tiSh+Tha hUM zhes bya ba'o/ /de nas slob dpon gyis bu khyod su yin khyod gang la dga' zhes dri'o/ /slob mas kyang / bdag ni skal ba bzang po ste//sangs rgyas nyid du gyur la dga'o/ /zhes smra'o/ /de nas sa ma ye hUM zhes lan gsum bzlas te/ yan lag bdun sngon du byas nas byang chub tu sems bskyed do/ /de nas deng khyod de bzhin gshegs pa thams cad kyi rigs su zhugs par gyur gyis khyod kyis de bzhin gshegs pa thams cad kyi dkyil 'khor gsang ba chen po 'di dkyil 'khor ma mthong ba su la'ang ma smra shig ces brjod la/oM badzra pra be sha hUM badzra hUM zhes brjod la yol ba bsal te/ 'di ni rgyud kyi dang por/ rab zhi kha nas sngags brjod gzhug par bya//zhes bya ba ste/ rab zhi zhes bya ba ni slob ma nges pa'o/ /de nas/ nga yis di ring de bzhin gshegs/ /kun gyi rigs su khyod bcug gis/ /gang gis shes na de bzhin gshegs/ /kun gyi dngos grub thob byed na/ /dngos grub gzhan lta ci smos te/ /de phyir rdo rje ye shes bskyed//khyod kyis dkyil 'khor ma mthong ba'i/ /mdun du brjod par mi bya ste/ /brjod pa tsam gyis dam tshig nyams par byas par 'gyur ro zhes brjod la rdo rje spyi bor bzhag ste/ 'di khyod kyi dam tshig rdo rje ste/ /gal te tshul 'di smras na ni/ /rdo rje 'dzin rgyal khros nas ni//bdun rgyud rigs rnams brlog par mdzad/ /oM badzra sa ma ya hUM phaT ces brjod do/ /de nas rdo rje dral ba'i phyag rgyas slob ma'i snying ga'i bu ga phye la slob mas/ oM badzra sa ma ya hr-i da ya me pra be sha dr-i D+ha tiSh+Tha hUM zhes lan gsum brjod la/ slob dpon gyi snying ga'i ye shes kyi sku dang ye shes sems dpa' las de dang 'dra ba'i tshul 'thon te/slob ma'i snying gar gnas par bsams la bu ga med par bsams te/ rdo rje sems dpa' deng khyod kyi/ /snying la kun du gnas par mdzad/ /ci ste dam tshig 'das nas ni/ /de ma thag tu bkas nas bzhud//ces brjod do/ /de nas dri zhim po'i chu la oM badzrod da ka ThaHzhes lan mang du bzlas te/ 'di ni khyod kyi dmyal ba'i chu/ /dam tshig 'das na sreg par byed/ /dam tshig bsrungs na dngos grub ni/ /rdo rje bdud rtsi chu 'dis 'grub/ /ces brjod la blud do//de bas/ de nas gsang sngags mkhas pa yis/ /sngags 'dis dam tshig sbyin par bya/ /zhes bya ba dang / de nas 'dis dam tshig bsgrag par bya'o zhes gsungs so/ /de nas der phan chad khyod kyi phyag na rdo rje nga yin gyis/ gang ngas smras pa'i bya ba de khyod kyis byos shig gal te ma byas na khyod ya nga ba ma spangs par 'chi ba'i dus byas nas sems can dmyal bar ltung bar gyur ta re zhes brjod do//de nas/ che ge zhes bya 'di nyid ni/ /byang chub sems ni yongs 'dzin pa/ /dam tshig mchog dang gsang ba yi/ /'khor lo 'dir ni 'jug par 'tshal//zhes rigs thams cad la bsgrags la/ /gsang ba chen po'i rigs dag pa'i/ /gsang ba yongs su 'dzin pa ni/ /bdag nyid chen po khyod 'dod dam/ /des kyang 'tshal zhes brjod par bya/ /de nas de bas rtag tu zhes bya ba nas/ bdag nyid de nyid dang ni sngags sogs de bzhin no//zhes bya ba'i bar du khyad par gyi sdom pa thun mong pa phog la/ de nas rtsa ba'i ltung ba bcu bzhi yan lag dang bcas pa'i slob dpon du 'os pa la sbyin te dbab pa'i cho gas gdab bo/ /de la dbab pa'i cho ga ni rang dang slob ma'i snying ga sgo dbye ba'i phyag rgyas phye la rang gi snying ga nas yi ge a byung ste/slob ma'i snying ga la gnas pa'i ye shes sems dpa'i sgong skyes la yid kyis bzhag la/ de'i 'od kyis lus thams cad kun du gang bar bsams te/ sarba ta thA ga ta a d+haSh+Thi ne na twaM/ badzra satwa me a bi sha du zhes brjod do/ /de nas slob dpon gyis ti rIn+ti ri'i phyag rgya myur du bcings la/'di ni rdo rje dam tshig ste/ /rdo rje sems dpa' 'ang yin par grags/ /rdo rje ye shes bla med na/ /de ring nyid du 'bab par shog /ces slob mas brjod do/ /de nas oM badzra A be sha a aHzhes bcu nas bzung ste/ nyi shu'am/ sum cu'am/ bzhi bcu'am/ lnga bcu'am/ drug cu'am/ bdun cu'am/ brgyad cu'am/ dgu bcu'am/ brgya rtsa brgyad kyi bar du bzlas nas rdo rje hUM mdzad dmar po kun du 'khrugs pas yongs su gang bar bsams na nges par 'bebs so/ /gal te ma babs na/rdo rje 'bebs pa'i dam tshig gi phyag rgya dril bu dang bcas pa bcings la/ rkang pa g.yon pas de'i rkang pa g.yas pa mnan nas de nyid la dbab par bya ba'i phyir/ steng gi nam mkha'i phyogs su rnam par snang mdzad rdo rje hUM mdzad kyi steng na khros pa'i yig hUM gi 'od zer gyis gnon par mdzad pa dang /'og nas kyang rdo rje rlung gi dkyil 'khor yi ge hUM las 'degs par gyur pa/ de bzhin gshegs pa mi bskyod pa la sogs par bzhugs pas/ hUM trAM hrIHa zhes bya ba rang gi sa bon gyi 'od kyi tshogs yang dag par 'bebs par mdzad par bsam zhing /hUM A be sha aH zhes lan brgya zlos shing de la dbab par bya'o/ /gal te shin tu sdig pa chen pos 'bab par ma gyur na sdig pa dral ba'i phyag rgyas sdig pa dral bar bya'o/ /de nas/ yam shing dmar po rnams kyi me/ /raM sbar rdo rje khro bo'i me/ /mnyam par gzhag pas snyoms zhugs la//til bsregs pas ni sdig bsregs shing / /oM sarba pA paM da ha na badzrA ya swA hA zhes bya ba ni/ lag pa g.yas pa'i mthil du til nag po las sdig pa'i gzugs brnyan byas la dbus su hUM bsam pa'i mdzub mo dang mthe bos sbyin sreg bya'o/ /de nas sbyin sreg gi thab khung las byung ba'i 'bar ba'i phreng ba kun du 'khrugs pa'i rdo rje'i lus la babs pas sdig pa rnams bsreg par bsam par bya'o//de nas yang rdo rje 'bebs pa'i phyag rgya de bzhin du bcings pa/ dbab pa byas na nges par 'bebs par 'gyur ro/ /de lta bus kyang ma phebs na/de la dbang mi bskur ro/ /babs na skad cig ma de nyid la mngon par shes pa lnga la sogs pa rdzogs par 'gyur ro/ /gal te babs pa de 'bar bar 'gyur la de mi 'dod na/ de'i spyi bor ri rab dang dbang chen dang rdo rje dang yi ge a dang bcom ldan 'das rnam par snang mdzad rnams kha dog ser por bsam mo//de nas nges par babs pas na/ oM badzra satwa su saM gra haM zhes bya ba la sogs pa glur blangs la/ phyag rgya dang phyag rgya'i lan gyis byin gyis brlab par bya'o/ /de nas brtan par byas la lce la rdo rje bsams te/ b+h+rUM hi badzra zhes brjod na/'das pa dang ma 'ongs pa dang da ltar gyi dngos po rnams don dang ldan par ma lus par smra'o/ /dgongs pa yongs su rdzogs nas ni bzhud par gyur te/ 'di ni dbab pa'i cho ga'o/ /de nas dkyil 'khor la dmigs te/ slob mas yan lag bdun dang ldan pa'i cho ga byas la/a sa me tri sa me ma hA sa ma ye swA hA zhes pa phyag rgya dang ldan par byas la bdag dam tshig can du mos par bya'o/ /rdo rje 'dzin ma zhes pa nas gzhug par bya zhes bya ba'i bar te/ de nas slob dpon gyis bden pa bsgrags te/ bdag la bden pa'i byin brlabs pa/ / bdag gis slob ma dkyil 'khor du/ /legs par btsud par gyur pas ni/ /lha yi rigs kyi rim pa dag /'di yi bsod nams ci 'dra las/ /de bzhin du ni 'bab par 'gyur/ /'dis ni grub pa gang 'grub dang / /rigs ni gang gi snod du 'gyur/ /bsod nams mthu ni ci yod pa//dkyil 'khor 'dir ni de bzhin 'gyur/ /de skad brjod nas de 'og tu/ /sgo yi phyogs su de bzhag nas/ /de nas me tog 'thor du gzhug /ces gsungs pas so/ /de nas sngags 'dis me tog dor bar bya'o/ /sangs rgyas dngos grub thob bya'i phyir//bdag la thugs brtser dgongs nas ni/ /'gro la phan pa'i gtso mchog gis/ /sman par dgongs nas bzhes su gsol/ /oM pra ti gr-i h+na hUM zhes pas dor ro/ /me tog rin chen la sogs pas/ /gang la bab pa rigs kyi lha/ /gtso bo'i rigs de bsgrubs na ni/ dngos grub myur du the tshom med/ /ces bya ba ni ji skad du/ gang du me tog babs 'gyur ba/ /de ni de yi rigs kyi lha/ /zhes gsungs pa lta bu'o/ /de la me tog dor ba'i tshul rgyas pa la ni/ ji skad du/ dngos grub rab 'bring rnam gsum ni/ /me tog bab pa rnams la brtag /lha rnams kyi ni khyad par ni/ /gnas kyi khyad par las kyang brtag /gang tshe sangs rgyas bcom ldan gyi/ /dbu la me tog babs gyur na/ /de tshe gtsug tor mdzod spu dag /grub par 'gyur bar gdon mi za/ /spyan la sogs pa'i sngags rnams kyang / / zhal du babs na 'grub par 'gyur/ /stod du babs na mchog rnams 'grub/ /rked par babs na 'bring rnams 'grub/ /ro smad phyogs su bab pa ni/ /dngos grub phal rnams 'grub par 'gyur/ /bar gyi dku la babs na ni/ /snying po la sogs 'grub par 'gyur/ /smad du babs par gyur na ni//mngag gzhug la sogs 'grub par 'gyur/ /rim pa de dag thams cad ni/ /pad+ma rdo rje 'dzin rigs la/ /go rims bzhin du shes byas la/ /de bzhin lha rnams gzhan la yang / /dngos grub rnam pa gsum du bshad/ /gal te lha yi gzugs dag las//ring du me tog lhung gyur na/ /de yis dngos grub yun ring grub/ /nye na dngos grub myur du 'grub/ /gsang sngags rnams ni mchod pa dag /gang du bkram pa tshun chad ni/ /de yi nye 'khor de yin te/ /me tog der lhung de yi rigs/ /lha gnyis kyi ni bar dag tu//gal te me tog lhung gyur na/ /gal te nye bar gyur pa ni/ /de ni de yi yin par bshad/ /gal te dkyil 'khor 'das nas su/ /la la'i me tog lhung gyur na/ /de la dngos grub phal 'grub cing / /'di ni dad pa'ang rab tu chud/ /gal te me tog dor ba dag//ra ba'i ri mo la babs na/ /zhi ba byas nas de nas gdod/ /nan tan bskyed de 'dor du gzhug /de tshe the tshom gyur na ni/ /mkhas pas bzlas te dor mi bya/ /der ni gar yang nges med pas/ /des ni dngos grub thob mi 'gyur/ /gnyis kyi bar du mnyam pa dang / /don med phyi rol ltung na ni//zhi ba'i sbyin sreg byas nas ni/ /de nas me tog 'dor du gzhug /snying por me tog babs na ni/ /rtag tu don med mi 'gyur na/ /srad bu dag gis cho ga bzhin/ /de yi nye 'khor shes par bya/ /rigs gsum la yang cho ga bzhin/ /dkyil 'khor rnam pa gsum du brtag /ji ltar grags pa'i tshul dag las/ /gtso bo rnams kyi rigs kyi bskyed/ /gal te me tog dor ba dag /mchod pa'i steng du bab gyur na/ /de ni rgyas pa'i sgrub pa dag /khyad par du ni shes par 'gyur/ /dkyil 'khor gyi ni bdag po la/ /gang gi me tog bab gyur na//de ni de yi las rnams kun/ /myur du 'grub cing mchog tu gyur/ /sangs rgyas bcom ldan 'das la ni/ /gang gi me tog babs na ni/ /de la rigs gsum gsang sngags kun/ /gdon mi za bar 'grub par 'gyur/ /pad+ma la ni rigs gnyis 'grub//rdo rje 'dzin la rang rig nyid/ /gal te gnyis las 'das nas su/ /gang gi gsum pa la babs na/ /dkyil 'khor de nas dbyung bar bya/ /yang na dkyil 'khor gzhan du gzhug /de la sogs pa'i rnam pa yis/ /me tog rnams ni dor ba las/ /bdag gi mdun du mang lhung ba//de la zhi ba brtsam par bya/ /sbyin sreg gis ni zhi byas nas/ /der ni slar yang 'dor du gzhug /lan gsum spogs te bor na yang / /gal te legs par ma babs na/ /re thag bcad de slar btang ngo / /zhes gsungs pa'o/ /de nas sngar yon gyis lag pa bkang ste zhes gsungs pa'o//yon bla ma la dbul te/ oM pra tIts+tsha badzra sa ma ya s+t+waM zhes brjod pa'o/ /lhag pa'i lha'i dbang gi ngo bo me tog de slob ma'i spyi bor bzhag ste/ sems dpa' stobs chen po/ 'di khyod bzhes shig brjod pa'o/ /de nas/ oM rdo rje sems dpa' deng khyod kyis//mig 'byed par ni brtson pa ste/ /mig ni thams cad 'byed par mdzad/ /rdo rje mig ni bla na med/ /oM badzra tsak+Shu ut+ka ta ya ti zhes brjod cing / gdong g.yogs dgrol lo/ /de nas gdong g.yogs bkrol nas ni/ /slob ma de la 'di skad bsgo/ /dkyil 'khor bzang po 'di lta ltos//da ni dad pa rab tu bskyed/ /khyod ni sangs rgyas rigs su skyes/ /sngags dang phyag rgyas byin gyis brlabs/ /'byor pa thams cad mngon du 'gyur/ /rten dang dngos grub thams cad kyang / /khyod la mngon du phyogs gyur gyis/ /dngos grub thob phyir dam tshig skyongs//gsang sngags la yang brtson par gyis/ /zhes so/ /de nas slob mas dkyil 'khor la phyag gsum byas la bskor ba gsum byas te/ rang gi lha la me tog snyim pa gsum dbul lo/ /de nas slob dpon gyis de'i sngags lan bdun me tog la bzlas te/ slob ma'i lag tu byin la slob mas kyang lan bdun de'i sngags bzlas te/lha khyod bdag gis mnos so zhes lan gsum bzlas so/ /de nas zhi ba'i sbyin sreg bya ste/ mtha' ma nas brtsams la dkyil 'khor bstan te/ de nas de la dkyil 'khor ni/ /rab tu rgyas pa bstan par bya/ / phyag rgya chen po dag kyang bstan/ /zhes gsungs so/ /de lta bu'i slob ma gzhug pa'i cho ga ste/ the tshom la sogs mi bya ste/ /zhes bya ba'i bar gyi dam tshig rnams ni go sla bas ma phye'o/ /bdag gi de nyid dang ni sngags sogs de bzhin no/ /zhes bya ba la/ bdag gi de kho na nyid ni rnam par mi rtog pa'i ye shes te de tsam la 'dir bdag tu gdags par zad do//sngags zhes bya ba ni de kho na zhes tshig lhag ma can du byas te/ 'dod pa'i lha rang bzhin gyis grub pa rnams so/ /sogs zhes bya ba ni mngon par byang chub pa'am/ sems dpa' 'byung ba'i rim pas bdag nyid lhar byas pa lha'i de kho na nyid do//de bas na 'dir ye shes dbab pa dang / mngon par byang chub pa dag ni bdag gi de kho na nyid yin la/ mngon par byang chub pa bzhi yan lag dang bcas pa ni lha'i de kho na nyid yin no/ /de bzhin zhes bya ba ni/ de kho na nyid gsum po 'di la yang yid gnyis la sogs pa dang smad par mi bya'o zhes bya ba'o//mos pa brtan dang ldan pas dam bcas nas/ /zhes bya ba ni/ mos pa dang ldan pa nyid brtan pa ste/ mos pa ni mi 'phrogs pa'i las can yin pa'i phyir ro/ /de yang dam bcas nas dbang bskur na mos pa med pa dad pa tsam gyis 'jug pa rnams lta smos kyang ci dgos te/de bas 'phags pa de kho na nyid 'dus pa las/ de nas gsang ba thob pa yin pas/ /de las dang por mna' 'di'i snying po brjod par bya ste zhes gsungs pa/ de nyid kyi rgya cher bshad pa las kyang / gsang ba thub pa yin par zhes bya ba ni/ gsang bar bya ba'i don gang yin pa srog gi phyir yang su la'ang mi smra ba ste/ de lta bu'i brtan pa dang ldan pa'i sems can ni gsang ba thub pa zhes bya'o/ /de la dang por mna'i snying po brjod par bya ste zhes bya ba ni 'di skad ston te/ de lta bu'i sems can la yang gya tshom du bstan par mi bya'i/mna' yang bsgrags te bstan par bya'o zhes bshad do/ /de bas na gsang ba bla na med pa'i lam 'di ni rab tu yang 'bad pas brtags shing bstan par byas la sbyin no/ /de bas na/ gsang ba zla ba'i thig le las/ /de bzhin gshegs pa thams cad la//gsang ba yi ni dkyil 'khor 'di/ /ci ste rmongs pas smras byas na/ /slob dpon gyi ni dam tshig nyams/ /myur du zla ba phyed tshun chad/ /bstan pas rnam par 'jog par 'gyur/ /dang por dam tshig gzhag bya ste/ /gsang ba'i dkyil 'khor bstan par bya//gzhan du byas na dpa' bo rnams/ /dmyal bar bskal pa grangs med smin/ /zhes gsungs so/ /de nas dbang bskur bar bya ste/ dkyil 'khor chen po'i nub tu bar du khru dos chod par dbang bskur ba'i dkyil 'khor chen po'i snying po'i phyed kyi tshad la lte ba'i lha'i mtshan ma bkod pa/me'i 'od kyi bar du rdzogs par byas pa der/ khri'am khri'u la stan bzang po bting bar slob ma rgyan ma lus pas brgyan la bzhag ste/ rgyal ba dang bkri shis pa byas la dbang bskur ro/ /de ltar yang / slob ma la la brtags pa dag /gal te dbang bskur 'dod pa la//dbang bskur ba yi dkyil 'khor ni/ /phye ma dkar pos bri bar bya/ /dkyil 'khor dag dang rjes mthun par/ /stegs bu gru bzhir byas nas su/ /de yi dbus su tshon sna lngas/ /pad+ma yongs su rdzogs par bri/ /bkra shis la sogs mtshan ma rnams/ / der ni ji ltar 'dod pa bri/ /bkra shis phyir ni gang bstan pa/ /yang na dngos su dgod par bya/ /zhes gsungs la/ yang gsungs pa/ slob ma dbang bskur 'os rigs nas/ /cho ga 'dis ni nan tan du/ /dbang bskur ba yi cho ga bya/ /las kun byed pa'i gsang sngags kyis/ /btab pa'i stan ni gsar gzhag ste//bkra shis la sogs kun byas nas/ /bsrung ba nan tan cher bya ste/ /dkyil 'khor gyi ni sngags zlos shing / /gdugs ni dkar po bzang po la/ /me tog phreng ba bzang pos brgyan/ /ras phran dkar po 'phyangs pa gcig /spyi bo'i steng du gzung bar bya//slob mas yon ni cher 'bul zhing / /bla ma bsnyen bkur byas pa dag /stan de la ni bzhag nas su/ /sngags kyis skyon bsal bkra shis bya/ /bdug spos legs par sbyar ba yis/ /bdug pa khro bo'i rgyal pos bdug /rnga yab la sogs dag kyang gzung / /rnga ma'i bsil yab bdug spos dang //zho dang 'o ma gos kyis bkang / /'di rnams kun kyang bshams te dgod/ /de bzhin bum pa bzhi rnams dgod/ /glu dang sil snyan rnga sgra bsgrags/ /shin tu bkra shis tshigs bcad bsgrags/ /de bzhin bkra shis ched du brjod/ / cho ga rgyas pa byas nas ni/ /de la sogs par 'dod byas nas/ /yid kyis dkyil 'khor lha kun la/ /mkhas pas gsol ba btab nas ni/ /bum pa bzlas brjod brgya byas pa/ /de ni legs par blangs nas su/ /dkyil 'khor dal bus lan gsum bskor/ /rtsa ba'i gsang sngags kun 'don cing //blo dang ldan pas dbang bskur bya/ /de nas phyag rgya bcings nas su/ /gsang sngags zlos shing spyi bos gtugs/ /zhes gsungs pa ste/ 'dir sdom pa gang yang mi 'dzin pa de ni/ 'jug pa tsam bya'i dbang gang yang mi bskur ro/ /thun mong gi sdom pa 'dzin pa la ni gsang ba'i dbang gi mthar thug pa bskur la khyad par gyi sdom pa 'dzin pa la ni thabs dang shes rab kyi dbang gi bar du bskur zhing /dbang dam pa de thob pa'i bya ba yang lung de nyid las gsungs pa/ de ltar dbang bskur byas nas ni/ /de ltar sar pa'i gos rnams bskon/ / me tog dri la sogs pas mchod/ /mchod phyir thogs dang gdu bur bcas/ /de nas bla ma bdag nyid kyis/ /de yi spyi bor gdugs kyang bzung / /thal mo sbyar ba byas nas ni/ /dkyil 'khor legs par bskor du gzhug /gdugs dang bcas par sgo phyogs su/ /spyi bos btud de phyag 'tshal gzhug /slob ma 'di ni phul ba lags/ /gsang sngags rgyud ni 'dzin par 'gyur/ /mkhan pos de skad smras nas su/ /gdugs bzhag nas ni slob ma de/ /lag pas legs par blang bar bya/ /de nas 'di skad bsgo bar bya/ /da ni dkyil 'khor slob dpon gyur/ / sangs rgyas byang chub sems dpa' dang / /lha rnams kyang ni kun gyis bkur/ /sems can rnams la brtse ba'i phyir/ /khyod kyis dkyil 'khor cho ga bzhin/ /nan tan bskyed de bri bar byos/ /sgrub pa po yang rgyud la sbyor/ zhes so/ /de nas rdo rje'i brtul zhugs sbyin te/ hUM las byung ba rdo rje 'dod pa'i rgyal pos lha rnams bstims pa 'di sbyin te/'di ni sangs rgyas thams cad de/ /rdo rje sems dpa'i lag na gnas/ /khyod kyis kyang ni rtag tu bcang / /phyag na rdo rje'i brtul zhugs brtan/ /de slob mas lag tu bzung la/ oM sarba ta thA ga ta sid+d+hi badzra sa ma ya tiSh+Tha e Sha s+t+waM d+har ya mi hi hi hi hi hi hUM/thog mtha' med pa'i sems dpa' ni/ /rdo rje sems dpa' dga' ba che/ /kun du bzang po kun bdag nyid/ /rdo rje bsnyems tshul bdag po'i bdag /ces brjod do/ /de nas AHlas byung ba'i dril bu 'dod pa'i rgyal pos sangs rgyas thams cad bstims pa 'di sbyin no//'di de sangs rgyas thams cad kyi/ /shes rab sgra yi rjes 'gror bshad/ /khyod kyis kyang ni rtag tu bcang / /byang chub mchog tu rgyal ba bzhed/ /ces pas so/ /des bzung la/ srid pa ngo bo nyid kyis dag /ngo bo nyid kyi srid bral byas//rang bzhin dag pa'i sems dpa' mchog /srid pa mchog ni byed pa yin/ /zhes pas gsil lo/ /de nas/ srid pa'i bde ba shin tu chung / /sdug bsngal chen po dag bya'i phyir/ /shin tu bde ba dam pa'i thabs/ /dam tshig 'di ni rtag tu bsrungs/ /'dod pa'i longs spyod thams cad ni//ci 'dod par ni brten bzhin du/ /rang gi lha yi sbyor ba yis/ /rang dang gzhan la mchod par bya/ /ji srid 'khor ba'i gnas su ni/ /mkhas mchog 'dug par 'gyur ba'i tshe/ /de srid mtshungs med sems can don/ /mya ngan mi 'da' byed par nus//shes rab pha rol phyin pa'i thabs/ /bsod nams byin rlabs kyis bsgrubs pa/ /dngos grub kun gyi dbang phyug 'grub/ /sems can don rnams brtan par byed/ /yid kyi gzugs ni brtan pa'i phyir/ /phyag rgya dam tshig yin par bshad/ /gang phyir gzugs kun brtan gyur pa//de nas phyag rgya rab tu bsgrags/ /zhes pas phyag rgya'i dam tshig sbyin no/ /de nas tshul ji lta ba dang ldan pas/ oM 'dir ni ngas khyod lung bstan te/ /rdo rje sems dpa' de bzhin gshegs/ /srid pa shin tu grub pa'i phyir/ /srid pa'i ngan 'gro rnams las bton//kye rdo rje zhes bya de bzhin gshegs/ /grub pa srid pa gsum gyi bdag/ /'di yis lung bstan byas pa yis/ /sngags pa 'gro ba kun bdag yin/ /zhes pas lung bstan to/ /yan lag de dag ni gsang ba'i dbang gi bar du thob pa la bya zhing / de nas dbang dam pa thob pa'am ma yin yang rab tu snod du rung ba la dbugs 'byung ste/mchog gsang dkyil 'khor dam pa ni/ /mthong ba dang ni zhugs gyur pas/ /sdig pa kun las nges grol bar/ /khyed rnams deng nyid legs par gnas/ /bde chen theg pa 'di la ni/ /slar khyed 'chi ba yod min te//mi tshugs pa dang mi gsod pas/ /cis kyang mi 'jigs dga' bar gyis/ /srid pa shin tu dag pa'i phyir/ /srid pa'i sdug bsngal las khyed 'das/ /srid pa shin tu grub pa'i phyir/ /ston pa'i mchog tu gyur pa yin/ /dam tshig sdom pa grub pa 'di//rtag tu khyod kyis bsrung bar bya/ /sangs rgyas kun gyis mthun par gsungs/ /dam pa rtag pa'i dka' yin no/ /gang zhig bskyed pa tsam gyis ni/ /sangs rgyas nyid du dogs med pa'i/ /rdo rje bdud rtsi'i phyag rgya gang / /byang chub sems ni gtang mi bya/ /dam pa'i chos ni nam du yang //dor ba dag tu mi bya'o/ /mi shes pa'am rmongs pa yis/ /rnam par dbye ba bya ba min/ /bdag nyid yongs su spangs nas su/ /dka' thub kyis ni mi gdungs shing / /ci bde bar ni rab tu gzung / /'di ni ma byon rdzogs sangs rgyas/ /rdo rje dril bu'i phyag rgya rnams//nam yang yongs su mi 'dor zhing / /slob dpon smad par mi bya ste/ /'di ni sangs rgyas kun dang 'dra/ /sangs rgyas kun mtshungs bla ma ni/ /slob pa'i dpon la gong smad pa/ /de ni sangs rgyas kun smad pas/ /rtag tu sdug bsngal 'thob 'gyur te//rims dang gdon dang yams nad dang / /nyer 'tshe chom rkun la sogs pas/ /bla ma'i zhabs la smod pa yi/ /rmongs chen de ni gsod par byed/ /rgyal po'i gyod dang me dang sbrul/ /rkun po chu dang mkha' 'gro dang / /bgegs dang log 'dren gtum po yis/ /bsad nas sems dmyal ltung bar 'gyur//de bas nan tan thams cad kyis/ /rdo rje slob dpon bla ma che/ /dge ba rab tu mi spyoms par/ /nam yang smad par mi bya'o/ /bla ma de la gus pas yon/ /rjes su mthun par dbul bar bya/ /des ni rims sogs gnod pa rnams/ /phyin chad 'byung bar mi 'gyur ro//rtag tu rang gi dam tshig bsgrubs/ /rtag tu de bzhin gshegs rnams mchod/ /rtag tu bla ma la yang dbul/ /'di ni sangs rgyas kun dang 'dra/ /de phul bsod nams tshogs yin pas/ /tshogs las byang chub bla med pa'o/ /de phul sangs rgyas thams cad la//rtag tu phul ba nyid du 'gyur/ /gang phyir 'di ni legs gnas pas/ /deng khyod skye ba 'bras bur bcas/ /dam tshig lha rnams kun mnyam par/ /gnas par gyur par the tshom med/ /sangs rgyas rdo rje 'dzin bcas pa/ /kun gyis tshe ldan dbang bskur te/ /khams gsum rgyal po'i srid che yis//rgyal po bdag po brtan pa yin/ /de ni bdud las rnam rgyal te/ /grong khyer mchog tu rab tu zhugs/ /khyed rnams kyis ni sangs rgyas nyid/ /deng nyid thob par the tshom med/ /de ltar yid ni rab dang rdo rje nyid du gyis/ /rang gi dam tshig mi bzad bde skyid bsten par gyis/ / 'gro ba myur du bde ba 'dod pa thams cad la/ /rdo rje sems dpa' dang mtshungs rtag par rtogs par 'gyur/ /zhes pas so/ /de nas chos bstan par bya ba ni/ snying po bsnyen pa sogs grags pas/ /phyag rgya che la gnas bya zhing / /dam tshig 'dod chags gzugs sogs pas/ / gsang sngags bzang po bzlas par bya/ /rang lhag lha yi sbyor ba yis/ /rang rig de yi rang bzhin gyi/ /phyogs dus kun na bzhugs pa yis/ /gzhan dang rang la'ang mchod par bya/ /dka' thub smyung ba bud med rnams/ /bsten pas grub par mi 'gyur te/ /mi snang mngon shes mkha' spyod kyi//dngos grub lus sems dag las byung / /de bas sangs rgyas byang chub sems/ /sngags kyi spyad mchog spyod pa rnams/ /'dod pa kun la nyer bsten cing / /chos kyi yi ge mchog brnyes yin/ /zhes pas so/ /de nas dkyil 'khor gyi de kho na nyid ni/ dkyil 'khor ye shes snang ba ste//gru bzhi byams sogs bzhi thig ni/ /chos rjes dran pa lta ngan spangs/ /ngo tsha khrel yod dang dbang sogs/ /ra bar bshad de rnam thar sgo/ /yang dag spong bzhi rta babs te/ /dran bzhi khyams te rdzu 'phrul rkang / /bzhi po sgo khyud byang chub lam/ /me tog phreng ba lam gnyis ni//dra ba dra ba phyed bshad cing / /de bzhin gshegs lam rnga mo gos/ /rtse dril gsung rab yan lag ston/ /ka ba 'phags lam bum pa tshogs/ /gdung sel smin byed nyi zla ste/ /pad+ma ma chags chos 'khor lo/ /rdo rje ra ba me 'od ni/ /gdug pa srung ba yin par shes/ /zhes pas so/ / lha'i de kho na ni bdag bsgrub pa la 'jug par shes par bya ste/ phyi rol dang ni shin tu phyi rol gyi lha rnams la ni/ de kho na phye ste ma gsungs so/ /de ltar gzhung gzhan la brten pas dbang gi bya ba spyir bstan nas/ da ni rang gi gzhung gi dbang bstan pa'i phyir/ sarba bid kyis ji ltar dbang bskur te//zhes bya ba ni/ sarba bid bcus yungs kar dkar po gser gyi snod du gnas pa la mang du bzlas te slob ma'i spyi bor byin pas/ de'i 'od zer gyis lus khyab pas ma rig pa dang bral te/ ye shes bzhi thob par bsam mo/ /'di ni thams cad rig pa'i dbang ma rig pa 'joms pa ste dang po'o//bum pa la sogs ji snyed mang thogs par/ /bcu po rnams kyis ci dgar dbang bcu bskur/ /zhes bya ba ni brdungs pa'am brkos pa'am/ bris pa'i dbu rgyan la/ zla ba'i steng du sa bon lnga bo brUM hUM AM dzrIM khaM zhes pa las byung ba'i de bzhin gshegs pa lnga po ji ltar dga' ba'i mdog dang dbyibs can rang rang gi rigs kyi mtshan ma las byung ba rnams la/de dang 'dra ba'i de bzhin gshegs pa rnams bstims la/ ji skad gsungs pa'i sngags lngas byin gyis brlabs te/ dbu rgyan du gyur par bsams la/ slob ma'i mgo la bcing ngo / /de nas sngar ji ltar byin gyis brlabs pa'i bum pa la sogs pa rnams las brtsams te/rang rang gi sngags brjod pa'am/ bum pa lnga'am gcig las med na ji ltar bstan pa'i sngags kyis bya ste/ dbu rgyan gyi gnas lngar bum pa'i chu cung zad blugs shing btung ba yang bya'o/ /bum pas kyang reg par bya ste/kha cig na re bum pa ji snyed yod kyang bum pa rnams mi bteg gi /mchod yon gyi snod du chu bsdus la des sngags lnga zlos shing dbang bskur ro zhes zer te/ 'di la yang bla ma'i lung gis ma gnang ba med do/ /de nas rin po che'am me tog gi phreng ba zla ba dang / trAM las byung ba'i rin po che de la/ de dang 'dra ba mang po bstims te mthar phreng bar byas la rang gi sngags bzlas pas sbyin no/ /de yang dbus kyi cha bas dma' ba tsam du bcing ngo / /de nas dar dkar po sngon bstan pa lta bu zla ba dang trAM las las rin chen tog tu bskyed la/ de dang 'dra ba rnams bstims te/mjug tu dar nyid du gyur pas dbu rgyan gyi rtsa ba nas lan mang du sngags zlos shing bcings la/ rna ltag gnyis su mdud pa sor bzhi bzhi tsam gyen du drangs la/ rtse mo 'phyang bas sta zur gnyis nas byin par slebs pa tsam du 'phyang du gzhug go/ /de nas rigs lnga'i las kyi phyag rgya slob ma'i spyi gtsug dang /mtshogs ma dang rna ltag g.yas pa dang ltag pa dang / rna ltag g.yon pa dag tu reg cing rang rang gi sngags bzlas so/ /de nas slob dpon gyis rdo rje dril bu slob ma'i mgo la bzhag ste/ lha gang la me tog babs pa de'i mtshan ma dang kye rdo rje zhes bya bas drangs la rang gi sngags rjes su bzlas pa bya'o//de nas sna tshogs rdo rje zla ba dang khaM las byung ba'i don yod grub pa la de dang 'dra ba rnams bstims te/ mjug tu gyur pa las byung ba rang gi sngags kyis slob ma'i lag tu sbyin no/ /de nas rin po che sna bdun thogs la pha rol phyin pa rtags 'byung 'khor lo yin te glang po mngon par shes pa mchog /ye shes rdzu 'phrul rta ste chags med 'gro ba shes rab nor bu dam pa yin/ /spyod pa btsun mo bzang mo bsdu ba rnam pa bzhi po khyim bdag dam pa'o/ /thabs la shin tu mkhas pa blon po yin te mkhas pa de dag 'khor los sgyur//zhes 'phags pa sdong pos bkod pa las gsungs pa'i yon tan rnams thob par bya ba'i phyir/ slob ma'i lag tu rang rang gi sngags kyis sbyin par bya'o/ /de nas 'khor lo rkang pa'i bar du'o/ /dung g.yas kyi lag tu'o/ /dril bu dang shes rab kyi pha rol tu phyin pa'am rgyud 'di nyid kyi glegs bam lag pa g.yon du byin la rang gi sngags brjod do//de nas rdo rje dbyings dbang la sogs pa'i lha mo lnga'i phyag rgya bcings te slob ma'i snying ga dang mgrin pa dang dpral ba dang mtshogs ma dang spyi gtsug tu rig pa la rang rang gi sngags brjod do/ /de nas sangs rgyas lnga'i dam tshig gi phyag rgya slob ma'i gnas lngar bcings la/rang rang gi sngags brjod do/ /de la dbang bcu gcig nyid la/ ji ltar na dbang bcu bskur zhes gsungs she na/ bden mod kyi 'on kyang 'khor los sgyur ba gnyis so so yin du zin kyang 'khor los sgyur ba zhes bya bar gcig pas bsdus te gcig tu bstan pas bcu'o//kha cig na re 'khor los sgyur ba'i sngags gong ma ni/ rgyal po dbang bskur ba rin po che bdun po phal pa'i sngags yin te gnas ma yin par sngags bstan pa'i skabs su zhar las bstan pa ste/ de ltar na dbang bcu zhes zer ro/ /kha cig na re bcu la sogs pa ni bcu'o zhes zer ro//de nas lag tu dril dang rdo rje sbyin/ /zhes bya ba ni hUM dang AHlas byung ba'i rdo rje dang dril bu rang rang gi sngags bzlas pa slob ma'i lag tu byin la/ tshigs su bcad pa lngas rjes su gnang ba sbyin te/ rang rang gi sngags bzlas so/ /'di ni phyir mi ldog pa'i dbang ste/dbang 'di nyid la sangs rgyas thams cad bsdu ba dang / byang chub rdo rje zhes bya ba la sogs pa'i bla ma'i lung gis/ dbang por byas la gnang ba sbyin pa la sogs pa bya'o/ /kha cig na re tshig 'di ni rdo rje brtul zhugs ston pa'o zhes zer ro/ /ci dngos grub 'dod pa'i sngags 'ba' zhig dbang bskur ram snyam pa la/'khor lo la sogs rin chen bdun thogs te/ /mi yi dbang phyug 'khor lo thogs pa dang / /sdig pa gzhom phyir dbang ni bskur bar bya/ /zhes gsungs te/ khams kyi rgyal pos 'khor los sgyur ba thob par bya ba'i phyir yang slob dpon gyis rin chen sna bdun gyi gzugs brnyan thogs la/dang po rnam rgyal bum pa thogs pa dang bkra shis brjod do/ /de nas bum pa bzang pos dbang bskur ba'i khrus byas la/ de yi 'og tu rin po che sna bdun dang / nye ba'i rin po che sna bdun ni lham dang / ral gri dang pags pa dang khyim dang /skyed mos tshal dang / gos dang / stan rnams dang / dpal be'u dang / pad+ma dang / nya dang / dung dang / bum pa dang / gdugs dang / rgyal mtshan dang / 'khor lo dang / yang yungs kar dang / zho dang / rtsa dUrba dang / li khri dang / me long dang / shing bil ba'i 'bras bu dang gi wang dag kyang sbyin te 'jig rten na bkra shis par grags pa rnams so//der yang bkra shis brgyad pa 'don zhing / 'dir gsum la skyabs su 'gro ba dang mchod pa la sogs pa'i yan lag bdun dang / byang chub tu sems bskyed pa byas nas 'jig rten pa'i dbang 'di dag bskur gyi gzhan du ni ma yin pas na 'di la yang sdig pa gzhom phyir zhes gsungs so//kha cig na re tshig 'di ni dbang bcu bskur zhes pa'i rjes su sbyor ro zhes zer ro/ /'dis 'jig rten las 'das pa'i dbang gi skabs su/ kha cig na re 'phags pa de kho na nyid bsdus pa las/ de'i 'og tu dbang bcu gnyis rnams sbyin no zhes zer ro//'di las ni sgrub par byed pa med de 'di ni lugs gzhan kho na yin pas so/ /rgyud rnams las rang rang gi lugs kyi dbang bskur ba mi 'dra ba rab tu mang ba 'byung ba yang gcig tu mthun par bya dgos par 'gyur la/ rtsa ba'i rgyud du yang phyi ma'i rgyud du gsungs pa'i dbang rab tu mang po bsnan pa yin par yang gsungs so//'dir dbang dang po ni sangs rgyas kyi sa'i chos yid la byed pa'i rgyu dang / de'i rgyu rgyud la yod par mtshon pa'o/ /gnyis pa ni de thob ba'i rgyu tshogs gnyis la sbyor ba'o/ /gsum pa ni tshogs sogs pa ni 'gro ba'i spyi bos bkur ba'o zhes bsngags pa'o//bzhi pa ni tshogs sogs pa rnams mi zhum par bya ba dbugs dbyung ba'o/ /lnga pa ni ma zhum pa de rgyal ba'i phrin las byed par ston pa'o/ /drug pa ni yan lag de dag gis bdag nges par mtshan 'di zhes bya ba'i de bzhin gshegs pa la sogs par 'gyur ro zhes yid ches par byed pa'o//bdun pas ni sangs rgyas su gyur nas rdzu 'phrul dang kun brjod pa'i cho 'phrul gyis gdul bya gdul bar mtshan pa'o/ /brgyad pas ni rjes su bstan pa'i cho 'phrul gyis 'dul bar byed pas mtshan pa'o/ /dgu pas ni bla na med pa'i 'khor los sgyur ba chen po ni de nyid yin no zhes 'jig rten gyi rgyal srid la sred pa chad par byed pa'o//bcu pas ni mtha' gnyis su ma lhung ba'i mi gnas pa'i mya ngan las 'das pa la gnas par ston pa'o/ /bcu gcig pas ni de'i tshe gsang ba gsum bsam gyis mi khyab par shes par byed pa'o//bcu gnyis pas ni slob pa dang mi slob pa'i dus kun du thabs dang shes rab tu 'brel par bstan pa ste/ des na 'di dag tsam gyis don yongs su rdzogs pa yin pas lugs gzhan gyis 'di gang du yang drang bar mi bya'o/ /dbang ji snyed pa de dag yongs su mi nyams pa ni lhag pa'i lha yin pas na/rgyud gang du yang dbang lhag ma rnams kyi rten du gyur pa dang lhag pa'i lha'i dbang me tog gi phreng ba'i dbang ni dang po nyid du sbyin no zhes bya ba 'di ni re zhig thun mong ba'o/ /de'i phyir dbang ni 'di rnams go rims dang grangs rgyud las ji skad gsungs pa kho na ltar bya'o//rang gi rnam par rtog pa'i dbang tsam gyis lung gi don zab mo gud du drang bar mi bya ste/ yid ches lung dang mi ldan par/ /chos rnams ston par byed pa na/ /mtshan nyid rnam par rtog pa yis/ /bdag kyang chud gson gzhan chud gson/ /zhes gsungs pas so//'jig rten las 'das pa'i dbang gi skabs su rin po che dang nye ba'i rin po che dang / bkra shis dang nye ba'i bkra shis rnams mthar sbyin no zhes slob dpon kha cig smra ste/ gdul bya spros pa spyod pa dag gi ngor ni/ de dag mi dgag cing thams cad du nges par sbyin pa yang ma yin te ci rigs su sbyar ro//sngags grub phyir ni mos ldan slob ma la/ /zhes bya ba la mos ldan zhes bya ba ni yon tan ma lus pa'i mtshon pa ste/ ji skad du gzhan las/ slob ma yang bdag nyid kyis dbang bskur ba'am gzhan dag gis dbang bskur ba gcig yin na yang /ji skad du gsungs pa'i tshul gyis dad pa dang ldan pa/ theg pa chen po'i chos la mngon par brtson pa/ gsang sngags spyod pa'i tshul la the tshom med pa/ glags kyi skabs mi tshol ba slob mar khas len pa/ cang shes pa'i tshul gyis nga rgyal spangs pa/ bsam pa la g.yo sgyu med pas gus pa dang ldan pa ste/slob ma de yang rnam pa 'di lta bu'i yon tan dang ldan pa zhig yin na/ de'i mdun du phyag rgya bstan par bya'i gzhan du ni ma yin no zhes rnam par gnas so zhes bshad de phyag rgya ni 'dir mtshan pa'o/ /mos pa la sogs pa'i yon tan de lta bu dang ldan pa la/yon blangs na dad pa med par 'gyur bas na mos ldan zhes gsungs so/ /sngags pas bka' yi rab tu bsgo bar bya/ /zhes bya ba ni yon bslang ba ste/ ji ltar rigs par de dag ni re re la yang yon bslang ngo / /yang na yid la gang 'dod pa/ /de ni bde bar dbul bar bya/ /zhes gsungs pas so//des kyang mos pa'i spyi bos phyag 'tshal te/ /ci ste nor yod bla mar dbul bar bya/ /zhes bya ba la ci ste nor yod ces bya ba ni med na bsnyen bkur bya ba ste/ slob ma dbul pos bla ma la/ /bkur sti dag gis mnyes par bya/ /slob dpon dag ni thams cad la/ /bkur sti bya ba yon du bshad//ces gsungs te/ yon ni dad pa'i bye brag yon las shes par bya'i gzhan du ma yin no/ /nor dang gter dang zhes bya ba la sogs pa ni yon dbul ba phan yon dang bcas nas bstan pa ste go sla'o/ /slob dpon des yon rnyed pa dag ji ltar bya zhe na/ de ni bya ba'i rgyud kha cig las gsungs pa ltar bya ste/bza' ba dang ni bca' ba rnams/ /phongs pa rnams la sbyin par bya/ /khyi dang bya rog la sogs la/ /cung zad tsam yang mi sbyin no/ /yo byad rdzas rnams thams cad ni/ /slob dpon dag gis bsdu par bya/ /bdag rang nyid kyis spyad par bya/ /slob ma dag la bgor mi rung //dkyil 'khor gyi ni yo byad kun/ /slob dpon bdag nyid dbang bar bshad/ /gal te slob mas spyad na ni/ /dam tshig las ni 'das par 'gyur/ /gang zhig spyad par mi 'dod na/ /de'i cho ga'i go rims 'di'o/ /dkon mchog gsum gyi yo byad du/ /de dag cho ga bzhin du dbul//gdugs dang rnga yab dril la sogs/ /sangs rgyas nyid la dbul bar bya/ /gdan dang bdug spos dri la sogs/ /dam pa'i chos la dbul bar bya/ /gos dang yo byad snod la sogs/ /dge 'dun rnams la dbul bar bya/ /de dag las ni slob ma yis/ / cung zad tsam yang mi bkur ro/ /dge 'dun med na dge slong sbyin/ /yang na dge slong ma la sbyin/ /gal te bdag nyid mi 'dod na/ /dge bsnyen dag la sbyin par bya/ /zhes so/ /yang gzhan las/ rig sngags yon gyi rdzas rnams ni/ /dkon mchog gsum la dbul ba ste/ rang gis zos na dngos grub mchog /de yang 'byung bar mi 'gyur ro/ /zhes 'byung ste/ bdag la mi dgos pa dag zhing dam pa la dbul gyi/ mchog las rnyed pa mchog ma yin pa la mi sbyin zhing bdag gis kyang rab tu lhag par mi spyod do/ /sangs rgyas kun dang bla mar mnyam/ /zhes bya ba la sogs pa ni/yon gyi mtha'i dam tshig bsgrags pas te/ de nas bla mas slob ma rnams/ /ma yengs legs par bkod nas su/ /shes rab pha rol phyin bklags nas/ /dam tshig 'di dag bsgo bar bya/ /zhes gsungs pa lta bu'o/ /sangs rgyas kun dang bla mar mnyam//rdo rje slob dpon brnyas na ni/ /rtag tu sdug bsngal 'thob 'gyur bas/ /slob dpon la ni brnyas mi bya/ /zhes bya ba la 'dir rdo rje'i rang bzhin nam rdo rjes mtshon pa'i bla ma ni rdo rje'i slob dpon te/ de yang / gang zhig dam chos klog pa dang / /'chad dang man ngag ston pa dang / /dbang bskur ba dang las byed dang //slob dpon zhes ni bya ba yin/ /zhes pa ste 'di dag kyang bsdu ba dang nges par rnam par gzhag pa ni/ ji skad du gzhan las/ slob dpon yang gang gis dbang bskur ba dang / rgyud bstan pa dang / gang gi thad nas las kyi man ngag mnos pa de yang / slob dpon yin te/gsum po 'di dag dang / phrag dog med cing phan par 'dod pa ni/ slob dpon yin te zhes bshad do/ /yon tan de dag dang ldan pa'i slob dpon ni bsnyen bkur bya bar 'os pas na bla ma ste/ sangs rgyas rnams dang phan 'dogs par mtshungs pas na/ sangs rgyas dus gsum du bzhugs pa kun dang mnyam zhes bya'o//de dag las kyang gtsor gyur pa ni gang las dbang thob pa ste/ de ltar yang rdo rje slob dpon ni gang gis dbang bskur ba'o/ /de la bsti stang med pa ni drod 'dzin cing brnyas thabs byed pa'o zhes bshad la/ 'phags pa rab tu grub par byed pa las kyang /bla ma'i dkyil 'khor ston pa ste/ /spyod pa ngan par gyur pa la'ang / /lus sam yang na yid kyis kyang / /shes nas nam yang smad mi bya/ /zhes gsungs la gzhan las kyang bla ma gang las gdams ngag la sogs pa mnos nas/ da ni gdams ngag thob pas 'dis ci zhig bya zhes bsnyen bkur mi byed pa ni/snying nas slob dpon smod pa'o/ /zhes bshad do zhes bstan to/ /rdo rje ma rnams nyed la ni/ /zhes bya bas ni/ bcom ldan 'das ma skul byed ma dang ral pa gcig ma dang / mA ma kI dang / sgrol ma la sogs pa ye shes rdo rje lta bur mi byed pas rnal 'byor ma nyid du bstan pa rnams la'o//rnal 'byor can gyi zhes bya ba ni sngags so/ /brnyas ma yin zhes bya ba ni bud med du gnas pas smod pa srid pas dgag pa ste/ bud med shes rab rang bzhin pas/ /de la brnyas pa bcu bzhi pa/ /zhes rtsa ba'i ltung bar yang 'di dag la brnyas pa nyid gzhag go//brnyas na ni rtag tu sdug bsngal thob 'gyur te/ brnyas mi bya zhes 'dir sbyar te/ sdug bsngal ni sngar bstan pa rnams so/ /lhag ma ni go sla ste slob ma dag gis kyang phyag 'tshal te gus pas spyi bos nod do/ /de nas kha lag bkrus nas ni/ /lha la mchod yon phul nas su//go rims bzhin du thams cad la/ /bdug spos cho ga bzhin du 'bul/ /de nas dkyil 'khor rig sngags kyis/ /sbyin sreg brgya rtsa brgyad du bya/ /zhi ba'i sngags kyis brgya rtsa brgyad/ /snying pos kyang ni nyi shu gcig /ji skad bstan pa'i gsang sngags kyis/ / mar gyi sbyin sreg so sor bya/ /de yi 'og tu rang sngags kyis/ /sbyin sreg ji tsam 'dod pa bya/ /de nas phyogs kyi gtor ma sbyin/ /bsdams shing kha lag yang bkrus nas/ /slob ma dang ni bcas pa yis/ /me tog dri la sogs pas mchod/ /slob ma dang bcas ma yengs par//mgo bos gus par phyag 'tshal te/ so so'i sngags kyis ci rigs par/ /de nas slar ni gshegs su gsol/ /dman pa rnams ni phyags nas su/ /mtsho chen rnams su dor bar bya/ /zhes pa sbyar ro/ /de nas bcom ldan 'das kyis zhes bya ba la sogs pa rnams kyis bris sku'i cho ga ston te/de la 'dir nus pas ni bris sku'i dkyil 'khor chen po'i tshul du bya ste rgyud phyi ma las/ yang na sku gzugs ni dkyil 'khor gyi tshul du bris la zhes gsungs pa de ni/ thun mong du drang bar bya ba yin pa'i phyir ro//'on kyang de ni dbul po la sogs pas 'byor pa yang dag la sba ba yang dag ste/ glegs bam dang ni bris sku rnams/ /rmongs pa rnams la bstan byas ni/ /skye ba 'di la dngos grub med/ /tshe rabs gzhan du'ang 'grub mi 'gyur/ /zhes gsungs pas rab tu yang sba bar bya ba yin pas so//de'i phyir dkyil 'khor las gzhan du bstan pa'o/ /bris sku'i skabs 'dir lha mtshungs par bya ba'i 'thad pa de lta bu yin du chug na/ ci'i phyir lha'i rnam pa gzhan du bstan/ /gtso bo lnga la sogs pa bri bar rigs so zhe na/ /mchog tu thugs rje che bas sgo sna tshogs nas sgrub pa po la dngos grub sbyin par brtson par bstan pa'i phyir ro//'o na sangs rgyas sman gyi bla 'dir ci'i phyir bri zhe na/ bcom ldan 'das 'di ni mchog tu thugs rje chen pos sems can la mnyes gshin cing / khyad par du sngon gyi sngon lam gyi dbang gis bcud kyis len la sogs pa'i sman sna tshogs byin gyis rlob pa ste/ji skad du/ gang zhig sangs rgyas sman gyi bla 'di yi/ /mtshan rnams dran nam mchod dang bsnyen bkur byed/ /de yi nad rnams 'byang zhing sman rnams ni/ /lhag par mthu dang ldan par 'dis nges 'gyur/ / zhes bshad pa lta bu'o/ /'dir ni bris sku'i spyan sngar rdzas bsgrub par rab tu gsal la/ rdzas kyi bsgrub pa las kyang bcud len ni mchog yin par gsungs pas/ bcud len rab tu 'grub par bya ba'i phyir sangs rgyas 'di bri'o/ /'dir bcud len gyi bsgrub par gang las gsal zhe na/phyag 'tshal dngos grub la sogs blang / /bla ma dkon mchog gsum dag la/ /skal ba cha re phul nas su/ /de nas rtag tu bdag spyod cig /ces pas dngos grub bgo ba gsungs la/ bgo ba'i cho ga ni rdzas rnams la yin pas so//rgyud phyi ma las pa dmar ser gyi mar zhes smos pa dang / mar de'am mar sar pa'am til mar ram chu'am/ 'o ma'am zho'am chang ngam khrag gam/ zhag gam klad pa'am/ sha 'am gang yang rung ba lon pa smos pa'i bcud len gyi rdzas rnams ni 'dir yang sbyar bar rigs pas so//tshig gi don rnams ni go sla bas ma phye'o/ /sgrub pa po bdag nyid ces bya ba la sogs pa la/ bdag nyid dbyibs dang sha tshugs dang / /kha dog dang cha lugs ci 'dra ba de ltar bri'o zhes gsungs pa lung gi man ngag go/ /de nas rim pa'i sku gzugs de mchod de zhes bya ba ni rab gnas kyi dus so//bdag nyid kyis zhes bya ba ni nus na ste/ mi nus na slob dpon gzhan bzang po 'ga' zhig gis so/ /spyan dbye zhing zhes bya ba ni rgyal po dbang bskur ba'i lugs ltar go 'phang brtan po la bzhag ste/ de la 'dir spyan dbye ba'i cho ga ji lta bu bya zhe na/de'i phyir nges pa'i tshig dang rnam par dbye ba dang cho ga rim pas phye ste rab gnas bshad/ de la nges pa'i tshig ni pra ka ra na sha ne na tiSh+Tha pra tiSh+Tha zhes pa ste/ mchog tu gnas pas na rab gnas so/ /de yang yun ring bas mchog dang khyad par du gyur pas mchog go//de la yun ring ba ni thams cad do/ /khyad par du gyur pa ni mchod pa'i gnas rnams te/ ye shes sems dpa'i rang bzhin du byas pa'i phyir ro/ /rnam par dbye ba ni gnyis te gzhi rnam par dbye ba dang / cho ga rnam par dbye ba'o//de la gzhi rnam par dbye ba la gsum ste/ sku'i bdag nyid du rab tu gnas par bya ba dang / gsung gi bdag nyid du rab tu gnas par bya ba dang / rigs so so'i bdag nyid du rab tu gnas par bya'o/ /de la sku'i bdag nyid du rab tu gnas par bya ba ni/ mchod rten dang gtsug lag khang dang rdo rings dang shing ljon pa dang /khron pa dang chu mig dang / lteng ka dang rta babs dang / shing rings rnams so/ /gsung gi bdag nyid du rab tu gnas par bya ba ni phreng ba dang 'jig rten pa'i glegs bam dang / 'jig rten las 'das pa'i glegs bam rnams so//rigs so so'i bdag nyid du rab tu gnas par bya ba ni sku gzugs rnams rang gi sku gang yin pa de nyid du rab tu gnas par bya ba'o/ /cho ga rnam par dbye ba ni cho ga rgyas par bya ba dang mdor bsdus pa gnyis so/ /da ni cho ga rim par phye ste bshad par bya'o//de la rab gnas byed par 'dod pa'i slob dpon gyis/ zla ba dang / tshes grangs dang / gza' dang rgyu skar shis pa la bya ste/ de yang / zla ba drug dang gza' bzhi dang / /rgyu skar bcu bzhi gang yin dang / /tshes grangs bdun gyi grangs nyid la/ / rgyal ba'i rab gnas la sogs nyid/ /ces pa rnams so/ /dus de dag la gnas yid du 'ong bar/ mda' dar dang bla re dang 'phan la sogs pas brgyan cing me tog bkram ste dri zhim por byas la/ gnas der stegs bu dpangs su khru do yod pa/ rgyar khru bzhi pa/ gru bzhi lham pa/mdzes pa/ 'jam pa/ zur phyin pa/ ma yo ba zhig/ /rdo'am/ so phag gam/ sa'am/ pha gu las byas la rdo thal gyis dkar por byug go/ /stegs bu de'i khar rab gnas bya ba'i lha la/ sku khrus gsol ba dang mchod pa la sogs pa bya'o/ /de la cho ga'i rim pa ni dang po stegs bu'i khar sku gzugs shar du mngon par phyogs par bzhugs la/ras ser po sku la gsol te/ oM badzra bas+t+ra hUM zhes bzlas pas so/ /yungs kar dang / chu mer dor ba gsum gyis nges par sbyang ngo / /de nas ba'i rnam lnga dang bdud rtsi lngar bcas pa kham phor du gzhag pa dU R+Wa'i pir gyis blangs shing sngags 'di zlos pas bkru'o//oM sarba ta thA ga ta kA ya bi sho d+ha na swAhA/ de nas dag par gyur na ni til mar dri zhim pos bsgos pa khar ba'i snod du bzhag pa dUR+Wa'i pir gyis blangs shing / sngags 'di zlos pas legs par khyab par byugs te/oM hUM trAM trIHkhaM/ de nas yang til mar bsal ba'i phyir/ shun lpags lnga po'i phye ma dang sbyar ba'i chus bkru ste/ u dum+WA ra dang / shi ri sha dang / a shwad+tha dang / n+ya gro d+ha dang / bar ka ta'i shun pa dag gis so/ /de nas yang skyu ru ra la sogs pa 'dag tshul gyi 'di gus byugs la/bum pa chu gtsang ma dri zhim pa bdud rtsi lnga dang sbyar bas dbang bskur ba'i khrus gsol te/ rgyal ba dang bkra shis pa'i tshigs su bcad pa 'don cing / dril bu gsil la glu dang gar dang sil snyan du ma sgrogs shing chu bum par blugs so/ /de'i tshe slob dpon gyis nam mkha' la sangs rgyas dang /byang chub sems dpa' dang / grub pa'i rig 'dzin dang / lha dang lha mo mang pos kyang bdud rtsi'i chu blugs par bsams la/ tshigs su bcad pa dang sngags 'di zlos shing dbang bskur ba'i khrus bya'o/ /ji ltar bltams pa tsam nyid ni//de bzhin gshegs pa khrus gsol ltar/ /lha yi chu ni dag pa yis/ /de bzhin bdag gis khrus gsol lo/ /oM sarba ta thA ga ta a b+hi She ka ta sa ma ya shri ye hUM AHswAhA/ de nas ras 'jam pos sku la chags pa'i chu legs par phyis te 'di ni khrus kyi cho ga'o//de nas tsan+dan gnyis dang gur gum dang / la gu dang gan+d+ha ka ste dri lnga'i lde gu lha'i thugs kar byugs te/ sngags 'dis so/ /oM badzra gan+d+he AHhUM swA hA/ de nas me tog dang / spos dang / mar me dang / dri chab dang / lha bshos rnams rang rang gi sngags kyis phul la/thugs ka dang mgur dang / spyi bo dang 'phrag ka rnams su rdo rje dang bcas pa'i lag pas lan gsum reg ste/ lag par spos me thogs nas pus mo g.yas pa'i lha nga sa la btsugs te/ lce hUM las rdo rjer byas nas sta gon la gnas par bya ba'i phyir 'di skad ces lan gsum brjod do//bcom ldan 'das che ge mo rdo rje pad+ma rig pa'i rgyal po la phyag 'tshal lo/ /slob ma la ni brtse ba dang / /khyed rnams la yang mchod pa'i phyir/ /mgon po thugs rje chen po bdag /sang ni rab gnas bgyid lags na/ /gus pas bdag dang de la ni/ /bcom ldan bka' drin mdzad pa'i rigs//'gro la 'khor lo'i bya don sbyin/ /sangs rgyas rnams ni bdag la dgongs/ /dgra bcom byang chub sems dpa' rnams/ /gang yang sngags kyi lha gzhan dang / /lha dang 'jig rten skyong ba dang / /bstan pa la ni mngon dga' zhing / /byang chub la brten 'byung po dang / /rdo rje'i spyan ldan sems can gzhan//rdo rje 'chang chen che ge bdag/ /rig pa'i rgyal po 'di yi ni/ /ji ltar nus pa'i mchod pa dang / /'gro ba zhi bas rab gnas bgyid/ /slob ma mchog dang bdag la ni/ /khyed kyis thugs brtse nyer bzung nas/ /rab gnas 'di la thams cad kyis//thugs brtser ldan par gnas par mdzod/ /de skad ces brjod pas/ phyogs bcu'i sangs rgyas la sogs pa thams cad rab gnas kyi gnas de'i nam mkha' la byon par bsam mo/ /de nas gang la rab gnas bya ba'i gzhi de stong pa nyid du bsgoms la/pad+ma dang zla ba la sogs pa'i rim gyis sam yang na yig 'bru las yud tsam gyis lhar bskyed do/ /de nas rang gi snying ga'i sa bon las 'od zer byung bas ye shes sems dpa' bkug ste/ mdun du byon par bsams la/ oM pra tIts+tsha ar+g+haM hUM zhes pas yon chab phul te/oM nI rI khaM hUM zhes pas zhabs bsil dbul lo/ /oM sarba saM sho d+ha ni hUM phaT ces pas zhal bsil dbul lo/ /yang me tog dang spos dang mar me dang dri dang bshos dang / dril bu'i sgra dag phul la/ dzaHhUM baM hoH/ zhes brjod pas dam tshig sems dpa' la bstims te/dbang bskur pa la rgyas btab ste/ yang me tog dang spos dang mar me dang dri dang bshos dang sil snyan rnams phul la/ lha de'i sngags mang du bzlas ste/ de nas yi ge brgya pa muH'i mtha' can gyis gshegs su gsol lo/ /'di ni sta gon la gnas pa'i cho ga'o//de nas nang par stegs bu'i gnas der/ mchod pa ci 'byor pa dang / gser gyi thur ma any+dza na dang bcas pa bshams la rab gnas bya ste/ de yang dang por slob dpon gyis lag tu spos snod thogs la/ pus mo g.yas pa'i lha nga sa la btsugs te/lce hUM las rdo rjer byas pa/ bcom ldan 'das zhes pa nas bzung ste/ thugs brtser ldan pas gnang bar mdzod/ /ces pa'i bar du brjod pas lha rnams bskul te/ de yang / sang ni rab gnas bgyid lags na/ /zhes bya ba la rab gnas bgyid par 'tshal lags na//zhes brjod do/ /de nas ye shes sems dpa' yang spyan drangs la/ yon chab dang zhabs bsil dang zhal bsil dang / mchod pa'i tshogs phul la lha thams cad sku gzugs la bstims te/ yang mchod pa byas la/ oM badzra a ba ra Na big+hu sha ne swA hA/ zhes pas rgyan ci 'byor pa dbul lo/ /de nas yang bstod pa byas la gser gyi thur ma any+dza na byugs pas spyan dbye ste/ sngags 'dis so/ /oM tsak+Shu tsak+Shu sa man+ta tsak+Shu bi sho d+ha na badzra swA hA/ zhes zlos shing ngo / /de nas di bya a ka ne sa mA d+hi b+h+ya ne na pra na ne swA hA/ zhes brjod cing bza' ba bzang po cung zhig nal zer sku la dbul lo//de nas bdud rtsi 'khyil pa bzlas shing sku'i zhabs dang sked pa dang / dbu la lag pa g.yas pas gcus la rdo rje bzung la lan gsum bskor te brtan par byas la/ stegs bu'i steng du sku'i cha gsum pa'i khri la/ ha cang mdud pa dang ma dgye ba dang ma yo bar ci mdzes su bzhugs par bya ba ni/su pra tiSh+Tha badzra swA hA/ zhes brjod de'o/ /de nas slob ma la brjod pa ni/ khyod kyis nga la gsol btab pa'i/ /sku gzugs dag ni khyad par du/ /ji skad gsungs bzhin spyan dbye ba/ /de ni ngas kyang byas gyur te/khyod kyis de ni kun rdzogs pas/ /ci bde bar ni mchod pa byos/ /zhes so/ /de nas slob mas kyang sku la mchod pa ci 'byor pa phul la bstod pa yang bya ste/ lan du mar bskor ba yang bya'o/ /de nas slob dpon gyis phyogs kyi gtor ma byin la/ sku gzugs byin che zhing bkra shis pa dang /yun ring du bzhugs par bya ba'i phyir chos skyong ba'i srung ma rnams la gsol ba gdab par bya'o/ /'byor pa yod na nal zer zas phul ba'i rjes la rgyas pa'i sbyin sreg bya'o/ /'di ni rab gnas rgyas pa'o/ /mdor bsdus pa ni sta gon la gnas pa mi bya bar nyi ma gcig nyid la khrus la sogs pa'i bya ba kun rdzogs par bya'o//de la glegs bam dang bris sku dang lder so la sogs pa ni me long la khrus bya'o/ /lugs ma la sogs pa ni dngos su bkru'o/ /lha khang ni lha'i sku ji snyed pa de snyed la rab gnas bya'i spyir dril te ni ma yin no//mchod rten dang rdo rings dang rta babs dang shing ljon pa dang / /gtsug lag khang dag ni rnam par snang mdzad du bsgrub po/ /chu mig dang khron pa la sogs pa ni/ rnam par snang mdzad du rab gnas su byas pa las/mjug tu de gyur pas chu mig la sogs par gnas par bya'o/ /bzlas pa'i phreng ba dang / glegs bam dag ni 'od dpag med du'o/ /rab gnas kyi ched du dkyil 'khor bri na rab gnas gang la bya ba'i lha de gtso bor bya'o/ /lha khang zhig sku mang du bzhugs pa de la ni rnam par snang mdzad gtso bor gyur pa'i dkyil 'khor bri'o//gal te de ltar spyan dbye ba ma byas na ci nyes par 'gyur zhe na/ sku gzugs rab gnas ma byas par/ /phyag 'tshal ba dang mchod byed pa/ /sngags med pas ni thal ba la/ /sbyin sreg byas bzhin 'bras bu med//ces pa'i nyes pa'o/ /rnal 'byor kha cig gi dbang du byas te/ rab gnas rab tu rgya chen po sngags dang phyag rgya'i bya ba rab tu rgyas pa dag ni 'dir ma brjod de/ gzhung mangs pa la mi sred pa dang / phyi rol gyi bya ba ha cang mang ba ni rab tu g.yeng ba nyid yin pas rnal 'byor gyi rgyud 'dir mi 'dod pa'i phyir//nang gi bya ba gtsor byas te brjod pa'o/ /bden pa'i byin rlabs dmigs par bya/ /zhes bya ba ni rab gnas byed pa'i dus su sangs rgyas dang chos dang dge 'dun yon tan mtha' yas pa yin pa'i bden pa'i byin gyi rlabs des/bdag gi ri mo 'di spyan dbye ba'i dus 'di nyid du/ dngos grub myur du thob pa la lta na mtshan ma 'ga' snang bar gyur cig ces bya ba la sogs pa'o/ /de nas ci ste zhes bya ba la sogs pa ni go sla'o/ /gal te mtshan ma byung na de shes par bya ba'i phyir/bzhad pa dang ni zhes bya ba la sogs pa gsungs te/ bzhad pa dang ni rnga sgra dang / /dril bu'i sgra dang 'brug bzhin te/ /zhes pa ni dngos grub rab [(]gyi [,]kyi [)]mtshan ma'o/ /dge slong bram ze'i bu mo dang / /zhes pa ni dngos grub 'bring gi mtshan ma'o/ /'bras bu zhes pa ni dngos grub tha ma'i mtshan ma'o//mthong na zhes bya ba ni ma 'khrul pa'i shes pas so/ /myur du zhes pa ni mtshan ma'i dbang gis dus myur ba nyid du'o/ /kha cig na re spyan 'byed pa na mtshan ma 'byung bar 'dod pa dang / myur du zhes gsungs pas dang po 'og nas 'chad pa ltar bsnyen pa byas la/bsnyen pa khel ba na bris sku bri zhing de nas bsnyen pa khyad par can de'i spyan sngar bya'i zhes zer ro/ /mtshan ma 'di dag ni mdor bstan pa ste/ rgyas par ni ji skad du/ de nas gzhan yang cho ga las/ /ji skad gsungs pa'i cho ga bshad/ /ngal ba'i nyes par gyur na yang //smyung bar bya ba mi shes so/ /de yi bar du sgrub pa pos/ /bsnyen pa dang ni mchod pa dang / /sbyin sreg cho ga bstod pa dang / /dge ba dag la brtson par bya/ /dkyil 'khor dag ni 'dri ba dang / /bsnyen pa la yang dus mtshams su/ /mig sman lan brgyar bsngags pa yis//thog mar gnyid ni bsal ba dang / /bsgrub pa'i tshe yang mig sman des/ /legs par bkru bar rab tu bsgrags/ /lig bu mig dang sug smel dang / /ga pur shing tsha pi pi ling / /ta ga ra dang sbyar ba dag /rta yi kha chu dang sbyar na/ /gnyid dang snyom pa'i 'jigs pa sel//'thor 'thung yang dang yang byas nas/ /kha gdong bkrus nas mig bsku'o/ /mig sman bskus pa'i mig de ni/ /bsgrubs pa'i tshe na bgegs kyang mthong / /oM dza la lo tsa ni swA hA/ de bzhin gshegs pa'i rigs la'o/ /oM bi lo ki ni swA hA/pad+ma'i rigs la'o/ /oM ban+du ri dwib+ta swA hA/ rdo rje'i rigs la'o/ /rigs gsum la yang rim bzhin mig sman bsku ba'i rig sngags so/ /ngal dang rmya ba bsang ba'i phyir/ /spos kyi chu ni khyor ba gang / /rab tu dri zhim lan bdun bzlas/ /khyor ba nyid kyis btung bar bya//nye reg byas blo can gyis/ /de nas mtshan ma brtag par bya/ /mtshan ma bzang po mthong nas ni/ /bsgrub pa gus par brtsam par bya/ /lcags kyi dung dang 'khor lo nya/ /g.yung drung pad+ma rgyal mtshan dang / /bkra shis bum pa gang ba dang / / dpal be'u rdo rje phreng ba dang / /bu mo rgyan gyis brgyan pa dang / /sbrum mo pang na bu thogs pa/ /gzhon nu dga' zhing rgyas pa ste/ /de dag rab tu 'grub par ston/ /bram ze gos dkar gon pa dang / /shing rta glang po rta rnams dang / /rtsi thog 'bras bu sna tshogs dang //ngo mtshar dag kyang mthong ba dang / /'brug gi sgra ni grag pa dang / /rig byed dbyangs dang rgyal ba'i sgra/ /dung dang rnga dang rdza rnga dang / /sgra rnams grub phyir rab tu shis/ /rma bya khrung khrung ngang mo dang / /ne tso la sogs bya rnams kyi/ /sgra snyan rnams ni kun thob nas//dngos grub phyir ni las brtsam mo/ /smon pa bkra shis thams cad dang / /bsod nams dang ni bde legs tshig /thos nas 'grub par shes par bya/ /yid du 'ong ba'i tshig rnams dang / /'brug dang sprin dang char 'bab dang / /ser bu me tog 'bab pa dang //'ja' dang dri ni zhim po ste/ /'di 'dra'i mtshan ma lha yi'o/ /bar snang las byung mtshan ma ni/ /thams cad 'bring du shes par bya/ /sa las byung ba'i mtshan ma gang / /de dag sa pa'i yin par bshad/ /lha yi dag gis dngos grub mchog/ / bar snang dag gis 'bring du 'gyur/ /sa pa dag gis dngos grub phul/ /gsum pa'ang gsum gsum dag tu dbye/ /de la sogs pa'i mtshan ma rnams/ /dngos grub phyir ni bsgrags pa'o/ /mdor na gsang sngags thams cad la/ /de las bzlog na mi 'grub bo/ / dang por mtshan ma bzung nas ni/ /sems ni rab tu dga' gyur nas/ /yongs su mgu ba'i bsam pa yis/ /de nas bsgrub pa brtsam par bya/ /zhes gsungs pa lta bu'o/ /rab dang 'bring dang tha ma 'grub/ /ces bya ba la/ dngos grub rab dang 'bring dang tha ma'i dbye ba ni/ ji skad du/ gang dag steng du 'gro ba'i las/ /de kun mchog tu shes par bya/ /gang yang cung zad mi snang ba/ /de ni 'bring gi cho gar bstan/ /gang yang 'di la sa pa'i las/ /de dag thams cad tha mar bshad/ /de bas rab 'bring tha ma yi/ /las rnams kyi ni bye brag las/ / steng dang bar snang sa pa dang / /gnas ni rnam pa gsum du bshad/ /rig sngags 'chang dang nam mkha' 'gro/ /sna tshogs gzugs ni grub pa dang / /mngon par shes pa 'thob pa dang / /zhi ba'i blo dang ye shes 'thob/ /bstan bcos thams cad shes pa'i blo/ /smra mkhas thos pa 'dzin pa dang //yid bzhin nor bu rgyal srid dang / /gter chen dag ni rnyed pa dang / /de la sogs pa bstan pa rnams/ /rig sngags dngos grub dam pa yin/ /mi snang stobs dang dngos grub dang / /phug gi dngos grub bcud len dang / /mang du thos dang shes thob dang //rkang mgyogs pa yi dngos grub dang / /de la sogs pa'i dngos grub ni/ /'bring gi rab tu bshad pa yin/ /'gro ba thams cad dga' ba dang / /drag shul spyod pa'i cho ga dang / /gzhan yang cung zad phal gyi rnams/ /mkhas pas tha mar rig par bya/ / 'bar ba'i rdzas las mchog tu 'gyur/ /du ba nyid las 'bring du 'gyur/ /dro las dngos grub tha mar 'gyur/ /de ltar dngos grub rnam gsum mo/ /'phags pa'i gsang sngags mthu chen gyis/ /dngos grub dam pa bsgrub par bsgrags/ /sa blas tha ma grub par gsungs//lha yi sngags kyis 'bring po 'grub/ /de bzhin gshegs pa'i rigs gsungs pa'i/ /sngags kyi dngos grub chen po 'thob/ /pad+ma 'dzin pas gsang sngags kyi/ /dngos grub 'bring po 'thob par bshad/ /rdo rje 'dzin pas gsungs pa yis/ /dngos grub tha ma 'grub par bsgrags//rab kyi tha ma gang yin pa/ /tha ma'i rab tu de mi mnyam/ /dngos grub lhag ma gnyis la yang / /cho ga'i rim pa de nyid do/ /'bras bu yon tan bstan pa yi/ /che ba'i bye brag rnam gsum las/ /rab dang 'bring dang tha ma yin/ /bye brag de dag rab tu bsgrags/ /sangs rgyas byang chub sems dpa' yis//gsungs pa'i gsang sngags gang yin pa/ /de las dngos grub rab 'byung ba/ /tha ma dag la'ang yod par 'gyur/ /rgyal bas gsungs pa'i gsang sngags gang / /kha cig las gcig pa yang yod/ /de nyid de yi las bshad pa/ /rab dang 'bring dang tha ma'o//'dam las pad+ma skyes pa dang / /tsan+dan shing las me 'byung bzhin/ /kha cig de ltar ris med par/ /dngos grub rnams kyang 'byung bar 'gyur/ /lus kyi dngos grub rab yin no/ /rdzas las byung ba 'bring yin no/ /longs spyod dngos grub tha ma yin//rab dang 'bring dang tha ma la/ /tha ma'i gsang sngags bzlas pa ni/ /la las rab tu brnyes byas nas/ /dngos grub gzhan las blangs na ni/ /mchog kyang rab tu ster bar 'gyur/ /rab la'ang la la zhig gis ni/ /ma bsgribs par ni bsnyen byas nas/ /sngags kyang dngos grub tha ma ster//de bas bsnyen pa rab tu gces/ /lha rnams la yang dbul po yod/ /yi dwags la yang mthu chen yod/ /dngos grub la yang de bzhin du/ /rnam pa sna tshogs yod par 'gyur/ /rab 'bring tha ma re re la'ang / /dngos grub rnam pa gsum du dbye/ /gsang sngags rnams kyi mthu shes nas//bsnyen pa las ni dngos grub btsal/ /zhes gsungs la/ yang gzhan las kyang / /de dag 'bras bu'ang rab 'bring dang / /tha mar dbye bas rnam pa gsum du brtag/ /dpal dang phug tu 'gro dang mkha' la 'gro/ /bsam pa bzhin grub mi snang rnam pa dang //gnod sbyin mo yi khyo dang bcud kyis len/ /mig 'phrul sgyu ma mtshan mo rgyu ba ste/ /de dag rab yin 'bring ni sa bdag po/ /grong dang nor dang dbye dang dgug pa dang / /dgar dang bskrad pa dang ni gsad pa dang / /klu yi gdon gyis zin pa gso ba dang / /gang yang 'di lta bu dang mthun pa'i las//de ni mkhas pas phran tshegs yin par bstan/ /bye brag tu ni klu dang gnod sbyin dang / /byis pa gdon gyis zin dang gang dag tu/ /lus can rnams la ngo mtshar sna tshogs dag/ /ston par byed pa phra mo'i phran tshegs yin/ /zhes gsungs la/ de nyid las grub pa chen po brgyad dbye ba la yang gsungs te/bcud kyis len dang gter dang phug 'gro dang / nor bsgyur 'byung khungs sngags dang gser 'gyur rtsi/ /rin thang med pa'i rin chen nor sbyin te/ /brgyad po bstan pa yongs su bsgrags pa yin/ /sngags dang phug tu 'gro dang bcud kyis len//sdig pa spong bar byed pas mchog tu bstan/ /rin chen dang ni gter dang 'byung khungs 'bring / gser 'gyur rtsi dang nor bsgyur tha ma'o/ /mi ni sems stobs ldan zhing chos la brtson/ /dka' thub kyis phyug dang por bstan pa'i snod/ /rdul shas che ba la ni 'bring por gsungs//tha ma la ni mun pa can gyis brten/ /gang zhig mchog tu bstan pa bsten 'dod pa/ /de ni tha mar bstan pa rnam par spang / /gal te nor la sred cing sdug bsngal gyis/ /gdungs na 'bring po la ni brten par bya/ /zhes so/ /yang kha cig las dngos grub chen po brgyad/mig sman dang ni rkang mgyogs dang / /ral gyi sa 'og bsgrub pa dang / /ri lu mkha' la spyod pa dang / /mi snang ba dang bcud kyis len/ /zhes pa dang / /yang gzhan las/ ri lu mig sman sa 'og dang / /ral gyi mkha' 'gro mi snang dang / /'chi ba med dang nad 'joms pa//'di dag grub pa chen po brgyad/ /ces gsungs so/ /de bzhin du dngos grub rnam par dbye ba gzhan du gsungs pa/ /'di bden 'di ni yang dag pa/ /de bzhin du ni mi slu ba/ /ji ltar sangs rgyas bden gzigs pa/ /de bzhin gang sngon ngas mthong ba'i//byang chub sems mthong gang yin de/ /dngos grub de las gzhan ci dgos/ /de las gzhan du'ang dngos grub ni/ /rnam pa dag ni lnga bkod de/ /spyod pa'i rjes su 'jug pa dang / /de bzhin sa ni gnon pa dang / /'jig rten mngon shes lngar 'dod dang / /sangs rgyas nyid dang gang gzhan no//zhes te/ /'di dag la sogs pa lung rab tu gsal ba dang / /bla ma'i man ngag dang / /rang gi blo dri ma med pas dngos grub rnam par dbye ste/ 'di ni sngags spyod pa rnams kyi ngal ba byas pa'i 'bras bu yin pas/ bdag gis rab tu spros par zad do/ / de nas gzugs de byin brlabs la/ /zhes bya ba la/ ji ltar byin gyis brlab ce na/ /sngags dang phyag rgyas byin brlabs nas/ /zhes bya ba smos te/ rab gnas byas nas yang lha de nyid kyi sngags dang phyag rgya lan mang du rang gis de'i spyan sngar bzlas pa nyid kyis de byin gyis brlabs par 'gyur ro//ci bdog pas ni mchod par bya'o/ /zhes bya ba ni/ dus rtag tu thun mtshams dag la bdag nyid la 'byor pa ci yod pas mchod par bya ste/ rnam pa kun la mkhas pa yis/ /rtag tu ci nus pas kyang rung / /zhes gsungs pas so/ / rtag tu mngon sum 'dug nas kyang / /zhes bya ba ni bris sku'i spyan snga kho nar bsnyen pa bya ba bstan pa'o/ /'jig rten gsum las rnam rgyal gyis/ /bdag bsrung la sogs byas nas kyang / /zhes bya ba ni sngar bsrung ba bstan pa ste/ kha cig na re 'phags pa gshin rje gshed kyi sngags kyis bsrung ba bya ba ste/de bzhin gshegs pa'i rigs la ni de shes pas so zhes zer ro/ /bdag gi de nyid dran byed cing / /zhes pa ni/ mngon par byang chub pa'am sems dpa' 'byung ba'i rim pas/ bdag gi rnal 'byor rdzogs par bya ba ste/ 'dir bdag gi de kho na nye bar mtshon pa'o//'phags pa rdo rje gtsug tor la sogs pa bya ba'i rgyud dag las bdag gi de kho na nyid ston pa lhur len pa de dag las 'dir blangs te ci rigs su shes par bya'o/ /de ltar na 'dir dang po ni bsrung ba'o/ /de nas bris sku'i spyan sngar 'dug par bya'o/ /de nas gzugs byin gyis brlab pa'o//de nas bdag gi rnal 'byor ro/ /de nas mchod pa'o/ /de nas bsnyen pa bzla ba bya ba'i phyir/ /'bum phrag gsum mam zhes pa la sogs pa smos te/ sngags pa mchog gi dbang du byas nas 'bum phrag gsum ste/ ji skad du/ bzlas brjod grangs ni sum 'bum du//phal cher ngas ni bstan pa dag/ /lus can sdig dang bral ba yi/ /sngags pa rnam par dag pa las/ /bzlas pa'i grangs ni bstan pa ste/ /gzhan du bya ba ma yin no/ /zhes gsungs pas so/ /sngags pa 'bring gi dbang du byas te/ yang na drug ces bya ba smos te/'bum phrag ces pa tshig lhag ma'o/ /sngags pa sman pa dag gis ni/ /dus yun ring por bzlas pa bya dgos te/ 'di skad du/ lo grangs bcu gnyis dag bsnyen pas/ /las rnams thams cad nus par 'gyur/ /zhes gsungs la/ yang gzhan las/ nyes pa chen po byed pa yang / /lo bcu gnyis kyis 'grub par 'gyur/ /zhes gsungs pas so/ /yang / bye brag sum 'bum bzhi khri rtsod dus sbyar/ /zhes gsungs pas/ /de'i dbang du byas te/ dngos grub mtshan ma byung bar du/ /zhes bya ba gsungs te/ 'di'i tshad ni 'di las gzhan ci yang bya bar mi nus pas so//de la dngos grub kyi mtshan ma mngon sum pa ni/ /sngar rgyas par bstan par zad do/ /rmi lam gyi mtshan ma phra ba ni/ /ji skad du 'phags pa dpung bzangs kyis zhus pa las/ de ltar bzlog pa'i gsang sngags nyer 'gyur na/ / mtshan mo nyal na rmi lam 'di dag mthong / /khang bzangs ljon shing bram ze seng ge rta/ /ri bo shing rta sgra ldan sprin dang ni/ /stag dang bse dang glang chen khyu mchog la/ /rmi lam na ni dga' bas zhon pa dang / /me tog phreng ba dri dang gos dang ni/ /sha chang nya dang 'bras bu glegs bam dang //lha yi gzugs dang ut+pal dmar po dang / /shing rta gang la'am ba bzhon be'u phrug can/ /gdugs dkar bsil yab lham dang ral gyi dang / /rnga yab gser yu can dang phreng ba dang / /nor bu mu tig nya phyis dung dang dngul/ /bud med gzugs bzang ba dang bu mo dang / / rin chen sna tshogs rnams kyis spas pa'i rgyan/ /mal stan dkar po bting ba rnyed pa dang / /tho rangs khar ni chu bo chu klung dang / /'bab chu'am rgya mtsho mtsho dang rdzing bu dang / /lu ma la ni 'thung ngam rkyal rmi dang / /yang na khrag gis lus ni khrus byed dang / /mchod rten lha khang gnas dang rgyal ba'am/ / byang chub sems dpa' mchog dang rang rgyal dang / /zag med dge 'dun dang ni dge slong ma/ /dge bsnyen rnams dang lha dang sa bdag dang / /lha min bram ze yid 'ong skyes pa dang / /mi dang mi mchog phyug cing 'byor dang gnyen/ /tha ma mdza' bshes bu dang gnod sbyin dang / /grub pa'i lha dang na chung tshogs bdag dang //ci ste nyi ma zla ba za ba dang / /sa yi nang 'gro sa bon 'thung ba dang / /me la rdzi zhing sha ni za ba dang / /lus kyi nang du bud med zhugs par mthong / /rmi lam bzang po 'di dag mthong ba gang / /de ni ring por mi thogs 'grub par 'gyur/ / zla ba gcig dang zla phyed nyin zhag dang / /skad cig gis kyang phyi phyir nye bar 'gyur/ /zhes ji skad gsungs pa'o/ /gzhan yang nad med pa la sogs pa'i mtshan mas mtshan par bya'o/ /de lta bas na bsnyen pa phal pa byas kyang / /dngos grub chen po 'dod na ni/ / bsnyen pa khyad par can brtsams te/ /shin tu mchog gi las de ni/ /bsnyen pa khyad par can gyis 'grub/ /ces gsungs la/ gal te dngos grub mchog 'dod na/ /de nas 'di yi brtul zhugs brtsam/ /zhes gsungs so/ /de la bsnyen pa khyad par can yang / /rig pa'i brtul zhugs dang /de dang 'dra ba'i dka' thub bo/ /de las 'dir ni de dang 'dra ba'i dka' thub kyi bsnyen pa khyad par can bstan pa'i phyir/ de nas dben pa'i gnas su ni/ /brgyad brgya nyid du tshang bar bya/ /sngags ni 'khral 'khrul med pa bzlas/ /zhes bya ba gsungs te/ dbang po bsdams pa dang /sems kyi gnas ngan len bkag pa dang / lus dang ngag gi gnas ngan len gang yang med pa dang / zas dang gos dang gnas la sogs pa la chags pa med pa dang / /rab tu yang rtog pas dben pa ste/ des na 'dir bar chad kyi chos kyis dben par gnas pa ni/ dben pa'i gnas su ni zhes tshig gzhan du yang gsungs pa ni/ /nye bar ni 'du 'dzi spangs pa'o/ /de'i phyir 'di brtul zhugs las spyod lam dang cha lugs kyis dman par zad do/ /bsnyen pa las ni dngos grub btsal/ /zhes gsungs pas/ /bsnyen pa rdzogs nas da ni sgrub pa'i dkyil 'khor du slob ma dbang bskur ba'i ched du sngar bstan pa ltar bri bar gsungs pa/de nas bzlas pa'i mjug tu ni/ /dkyil 'khor snga ma bzhin bsams la/ /mchod pa rgya cher byas nas kyang / /zhes bya ba ste/ 'dir cung zad du ni dkyil 'khor gyi dbus su bcom ldan 'das lugs ma la sogs par byas pa/rin po che'i gdan khri la bzhugs pa de dag tu rung bar bya'o/ /de nas nus na bdag nyid kyis mchod pa dang / sdom pa bzung ba dang dbang blang ba rnams rang gis bya'o/ /gal te 'gro mi nus na gang las dam tshig la sogs pa thob pa'i bla ma la sogs pa gang zhig don du gnyer ba de mnyes par byas te/des bdag dbang bskur la gtor ma rgya cher byin te/ de nas dpa' bo bzhi dang sgrub pa'i grogs mchog gam/ yang na sgrub pa'i grogs mchog 'ba' zhig dang sgrub pa la 'jug par bya ste/ dkyil 'khor gyi bdag por gsal la/der bdag nyid 'dug ste/ ji ltar 'dod pa'i dngos grub btsal lo/ /mtshan gcig thog thag bzlas pa brtsam/ /zhes bya ba ni dngos grub chen po'i dbang du byas pa ste/ /ji skad du/ tha ma srod la 'grub 'gyur te/ /'bring po rnams ni nam phyed na/ /rab ni nyi ma 'char ba'i bar//'di ni dngos grub gsum gyi dus/ /zhes bshad pa'o/ /ci ste gtso'am de yi sras/ /yang na lha rnams mthong 'gyur na/ /bsod nams mthu las ci dga' bar/ /dngos grub mchog ni gsol bar bya/ /lha yis dngos grub 'bras bu ni/ /de la rtag tu dgyes nas stsol//phyag 'tshal dngos grub la sogs blang / /zhes bya ba ni 'di'i don ni/ 'phags pa dpung bzangs kyis zhus pa las gsungs te/ seng ge'i gdan gyis mngon par bsngags pa'i gdan/ /de ni dkyil 'khor dbus su gzhag par bya/ /bdag nyid bsrung bar bya ste der 'dug nas//rdzas blangs myur du bzlas brjod byas nas ni/ /sbyin blugs brgya phrag gcig kyang bsreg par bya/ /de nas de ni dri chus bkrus nas su/ /bgegs mang rnams kyang rab tu bsal byas nas/ /byang chub shing lo gsum gyi steng du gzhag/ /bzhi yis bkab nas ji srid bsgrub pa ni//rnam gsum mthong gi bar du gsang sngags bzlas/ /dro dang dud 'thul me bzhin 'bar ba'am/ /rim bzhin bzlog nas byung na'ang 'grub par gsungs/ /dro bas 'gro ba thams cad dbang 'gyur te/ /dud pa 'thul bas mi ni mi snang 'gyur/ /'bar bas mkha' la shin tu 'gro 'gyur te//mi yi lus ni lha ltar gsal bar 'gyur/ /ji ltar lus la grang ba 'jug pa dang / /ji ltar mngal du dri za 'jug pa dang / /nyi zer me shel zhugs nas me 'byung ltar/ /de ltar dngos grub lus la 'jug par 'gyur/ /mar me mched cing shin tu 'bar ba ni//snum zhing dkyus rings gser gyi mdog ltar gang / /'bru mar zad kyang 'bar bar gyur na ni/ /de tshe sngags pas dngos grub thob 'gyur te/ /de dag rdzas las byung ba'i dngos grub bo/ /mis ni ri mo'i sku gzugs 'bar ba'am//phreng ba smin ma mig dang rnga yab bam/ /gal te rgyan rnams g.yo bar gyur pa'am/ /mkha' las me tog char pa rdzi char 'bab/ /sa ni myur du g.yo bar gyur pa'am/ /lus ni snang ba'am mkha' las tshig tu ni/ /bu gcig dam pa ci 'dod slongs shig ce'am/ /lha yi rnga sgra'am skyi bung ba spu ldang //rgyan gyi char chen rab tu 'bab pa'am/ /'jig rten mkha' la lha dang lha min dang / /gsang sngags gzugs ni mngon du mthong na 'grub/ /ma nyams me tog dbyig dang chu bsres shing / /bstod dang bcas nas mchod yon rgyun sbrengs na/ /rtse gcig sems kyis gdong btud phyag byas te//dad dang 'bad pa'i rjes mthun dam pa blang / /dam pa thob nas dga' bas phyag byas te/ /dad pas bstod cing mchod yon phul nas su/ /gsang sngags brjod cing slar yang gshegs su gsol/ /zhes so/ /de ltar blangs nas ma bgos na//slar nyams par gyur te/ de ltar ma byas grub na yang / /de yi rdzas de 'phrogs par 'gyur/ /zhes bgo ba'i rdzas la bstan pas so/ /de bas ni 'dir rdzas bgo ba'i cho ga bstan pa'i phyir/ /bla ma dkon mchog gsum dag la/ /skal ba cha re phul nas ni/ / de nas rtag tu bdag spyod cig/ /med na mkhas pa bdag nyid kyis/ /blangs nas yongs su spyad par bya/ /zhes gsungs te/ 'di yi don yang rgyas pa che/ /bcom ldan 'das kyi sku skal du/ /rdzas kyi cha gcig thog mar dbul/ /blo dang ldan pas bla ma la/ /phyag byas nas ni gnyis pa dbul//gsum pa sngags grub pa rnams la/ /dkyil 'khor phyi rol dbul bar bya/ /bzhi pa grogs po rnams la sbyin/ /lnga pa bdag nyid spyad par bya/ /brtag par bya ba'i rdzas kun la/ /cho ga 'di dag bshad pa yin/ /de la'ang skal ba phyed phyed du/ /bgos nas bdag gis phyed bskur ro//mchod yon phul nas bcom ldan skal/ /bdag nyid kyis ni bskur bar bya/ /sangs rgyas rnams la blu ba'i phyir/ /mchod pa la sogs cho ga bshad/ /bla ma med par gyur na ni/ /bla ma'i skal ba bdag gis blang / /de la gus pas lhag par bya/ / de ni de yi blu ba yin/ /grub pa khyed rnams bdag nyid kyis/ /rdzas kyi skal ba 'di bzhes shig/ /de skad tshig gis lan gsum brjod/ /sgrub pas mchod yon lan gsum dbul/ /sngags grub pa rnams med na ni/ /de yi skal ba sngags zlos pas/ /dogs pa med pa'i sems kyis ni//grogs po rnams la sbyin par bya/ /gsang sngags zlos pa'i grogs po rnams/ /rtag par gus shing don du gnyer/ /dka' thub dang ni grogs byed pas/ /thog ma nyid nas grub pa yin/ /de yis byin pa'i rdzas rnams ni/ /de bas blang bar rigs pa yin//bdag cag snga nas grub pa'o/ /zhes/ mthun par smra zhing blang bar bya/ /bdag rang nyid kyis de rnams la/ /rdzas ni rnam par bgo bar bya/ /grub pa'i rdzas ni de lta bur/ /bgo bar rab tu bsgrags pa yin/ /grub pa'i rdzas rnams kha cig ni/ /bgo ba'i skal ba ci 'drar bya//any+dza na ni thams cad dang / /gi wang la sogs gzhon nu bshad/ /cho ga shes pas la la ni/ /yid kyis bgo ba yongs su brtag/ /de la phan gdags 'dod pa yis/ /ral gri la sogs mthong ba bzhin/ /grub pa'i rdzas rnams kha cig ni/ /gcig pu nyid kyis dpyad par bya//de la phan gdags 'dod pa yis/ /ras la sogs pa mthong ba bzhin/ /sgrub pa'i rdzas kyi bye brag las/ /kha cig mnyam pa nyid du bgo/ /ri lu la sogs mthong ba bzhin/ /de la phyed du bgo ba med/ /rdzas rnams la ni phal cher yang / / gcig pus mang du bskur bar bya/ /man ngag bstan tam nor sbyin nam/ /rgyud las bshad pas yid ches bya/ /'di dag khyod kyis byos shig ce'am/ /'di yang khyod kyi don no zhes/ /bzlas brjod byed pas grogs po la/ /bgo ba dag ni de ltar bya/ /bdag rang nyid kyis ci rigs par//mkhas pa dag gis phan gdags pa/ /grub par gyur na cho ga bzhin/ /gang yang rung bas rab tu bya/ /dngos grub rnam pa mang po dag/ /grub pas rnam par go ba ni/ /bye brag tu ni bdag nyid kyi/ /dri med blos ni shes par bya//skal ba dbang ba mnos nas su/ /zlos pas gsol ba gdab par bya/ /bka' lung grub par shes nas ni/ /de yi 'og tu bgo bar bya/ /thams cad la yang ci rigs par/ /legs par bgo ba bya bar bshad/ /dngos grub dang ni phal pa yang / /mdor na cho ga de ltar bya//gus shing nor dang mchod pa dang / /bka' bzhin byed cing phan 'dogs par/ /rdzas grub bla ma'i skal la sogs/ /blu ba dag ni de ltar bshad/ /bdag gis mchod yon phul nas ni/ /rdzas rnams lung bzhin bgo bar bya/ /gsang sngags lha la gus par ni/ / blo yis bsams la dpyad par bya/ /rig sngags rgyal la phyag byas nas/ /rig sngags rgyal po la yang gus par ro/ /zhes gsungs pa rnams sbyar ro/ /sems can kun la phan brtson par/ /bskal pa du mar gnas par 'gyur/ /zhes bya ba ni/ /rig pa 'dzin par 'gyur ba ste/sngar rgyas par bstan la/ gzhan las kyang / der ni nam gyi phyed dus sam/ /yang na nyi ma 'char ba'i tshe/ /rdzas de yongs su gyur pa ni/ /'bar phreng can gyi gzi brjid bzhin/ /sngags pa rang gis de blangs nas/ /nam mkha' la ni 'gro bar 'gyur/ / bskal par gnas shing gzi brjid che/ /rgyal sras de ni 'khor na 'chi/ /'jig rten khams ni gzhan du'ang 'gro/ /gtso bo sna tshogs gzugs 'chang ba/ /rdzas las byung ba'i sngags grub pas/ /dpal ldan mchod pa rab tu byed/ /'di ni nyams par mi 'gyur ba'i/ / rdzas kyi dngos grub yin par bshad/ /ces gsungs so/ /gsang ba zla ba'i thig le las kyang / /'jig rten thams cad kun du bkur sti byed/ /rig pa stong gis mngon par mchod byed cing / /rig 'dzin dmu sman bud med rnams kyis ni/ /g.yag rnga dkar po'i tshogs kyis g.yob pa yis//'jig rten dbang po bde mchog 'brel pa thob/ /blo ldan nam mkha'i ngos ni thams cad du/ /rdo rje 'dzin gyi dgyes pa'i rnal 'byor ma/ /yid du 'ong ba'i spyan gyis rgyas pa dang / /rnal 'byor spyod pa'i bde ba rtogs pa yi/ /mgul nas 'khyud pa'i rol pas rtse bar byed//ces gsungs shing yang gzhan las/ /sngags pa de yang stobs ni rlung dang mnyam/ /de nyid de la bcud len mchog tu 'gyur/ /de yi tshe yang nye bar lo stong thub/ /lha yi byad gzugs lha yi gzugs dang ldan/ /grub pa de ni skra gnag nad kyang med/ ces bshad de lo stong ni tha ma'i dbang du byas pa'o/ /ci'i phyir rgyud dag las rdzas bsgrub pa 'di gtsor bstan zhe na/ 'jig rten gyi dngos grub la brten nas/ 'jig rten las 'das pa'i dngos grub kyang rim gyis sdug bsngal med par 'thob par bya ba'i phyir te/ gcig tu dpa' bo grub pa las ji skad gsungs pa bzhin no//gzhan las kyang gsang ba'i bdag po/ de la rtag pa 'di rgyu mtshan du mdzad nas/ 'jig rten gyi khams thams cad na bzhugs pa'i de bzhin gshegs pa dgra bcom pa yang dag par rdzogs pa'i sangs rgyas thabs kyi pha rol tu phyin pa rtogs par khong du chud pa rnams kyis rtag pa de nyid rang bzhin gyis stong par mkhyen kyang /thabs kyi pha rol tu phyin pa'i stobs kyis/ 'dus ma byas gdags par brtags te yongs su bsgrub pa'i tshul du/ mthong ba'i chos la bde bar gnas par bya ba'i phyir chos kyi dbyings kyi mthu rlabs sems can rnams la nges par ston te/des de rnams yid rab tu dga' zhing tshe ring po yang thob nas 'dod pa'i yon tan lnga dag gis rtse dga' yongs su spyod pa/ sangs rgyas bcom ldan 'das rnams la mchod par byed cing / 'jig rten thams cad dang mi mthun pa'i lam 'di grub par 'gyur ro//de bzhin gshegs pa dang / byang chub sems dpa' rnams kyis don gyi dbang 'di gzigs nas/ gsang sngags spyod pa'i tshul gyi cho ga thugs dgyes bzhin du 'chad do/ /de ci'i phyir zhe na/ gang bskal pa du mar brtson zhing 'bad de bya dka' ba rnams brtsams kyang thob par mi 'gyur ba de byang chub sems dpa' gsang sngags kyi sgo nas/byang chub sems dpa'i spyad pa spyod pa rnams kyis tshe gcig po 'di kho na la thob par 'gyur bas so zhes gsungs so//de ltar rdzas las rig 'dzin sgrub pa'i skabs 'dir dang por dam tshig blang ba dang / dbang thob par bya ba dang / lha yang dag par gzung ba dang / bsnyen pa dang / sta gon la gnas pa dang / bsnyen pa dang / bsgrub pa'i phyir sta gon la gnas pa dang / lha dbang bskur ba dang /lha tshim par bya ba dang / lha gzi brjid bskyed pa dang / lha nye bar bya ba dang / bsnyen pa khyad par can dang / rdzas kyi mtshan nyid dang / rdzas yongs su bzung ba dang / /rdzas kyi tshad dang / rdzas gzi brjid bskyed pa dang / rdzas sbyang ba dang / rdzas bsgrub pa'o/ /dkyil 'khor du bsgrub pa dang /bgegs bzlog pa dang / rdzas kyi dngos grub bdag gis bya ba dang / mtshan ma dang / rdzas mnan pa dang rdzas ma grub pa spogs pa'i tshul dang / rdzas bgo ba dang / rig 'dzin gyi tshul dag gis rgya cher shes par bya ba yin mod kyi/ 'phags pa rab tu grub pa las rab tu gsal ba dang /'dir gzhung mangs pas 'jigs pas nye bar gyur pa tsam las ma brjod do/ /bsgrub par bya ba'i rdzas rnams kyang / /sman dang mtshon cha dang / pags pa dang / gos dang / lha rdzas rnams te/ rgyud rnams las rab tu gsal lo/ /ci ste dngos grub ma gyur na//zhes bya ba la sogs pa ni go sla'o/ /de ltar 'tsho ba'i rnal 'byor pa rnams la phan pa'i thabs rgyas par bstan nas/ shi ba rnams kyis ji ltar yang dag par rdzogs pa'i sangs rgyas kyis byin gyis brlabs la spyad par 'gyur zhes/ phyogs snga ma rnam par rtog pa la/de nas lha rnams kyi dbang po brgya byin gyis zhes bya ba la sogs pa ni/ shi ba la phan pa'i thabs rgyas par bstan te/ nyon cig ces bya ba'i bar ni zhus pa dang lan te go sla'o/ /de bzhin dkyil 'khor bris nas ni/ /zhes bya ba la sogs pa ni/ sngar slob ma dbang bskur ba'i tshul du ma lus par 'dir bya ste/cung zad du na 'chad par byed pa ltar ro/ /legs par brgyan te rdo rje lcags kyu'i sngags dang phyag rgyas ro'i rnam par shes pa bkug la/ de nas sta gon la gnas pa byas nas dbang bskur bar bya'o/ /de la rdo rje lcags kyu'i sngags dang phyag rgya ni/lag pa gnyis gcig tu sbyar te khu tshur bcangs la mdzub mo bsgreng ste tshigs gsum pa bkug la lhag ma rnams ni gdu bu'i tshul du gnas par bya'o/ /sangs rgyas skyob pa thams cad kyi/ /lcags kyu zhes ni 'dir bshad de/ /byang chub sems dpa' bdag nyid che/ /sa bcu dag la gnas pa dang //sdang bar sems pa gzhan dag kyang / /thams cad rab tu 'gugs par byed/ /ces bya ba ni 'di'i mthu bstan pa ste/ 'di'i sngags ni/ na maHsa man+ta bu d+d+hA nAM a/ sarba tra a pra ti ha ta ta thA ga ta aM ku sha bo d+hi tsa ra ya pa ri pU ri ka swA hA/ zhes pa ste lhag ma ni go sla'o//de yi gzugs brnyan bri ba'am/ /zhes bya ba la sogs pa ni/ gal te ro med na gzugs brnyan la sogs pa bris la/ de nyid yin par bsams la/ tshul snga ma ltar dbang bskur bar bya'o/ /lhag ma ni go sla'o/ /lha yi gzugs su bstan nas kyang / / zhes bya ba ni/ ro'am gzugs sam ming bris pa de bsnyen pa'am/ sta gon la gnas pa'am/ dbang bskur ba'i dus su lhar bskyed pa'o/ /mchod rten dbus su gzhag par bya/ /zhes bya ba ni ro'am gzugs sam ming bris pa ji lta bar mchod rten gyi dbus su gzhag ste 'di ni lha nyid du bya ba'i phyir ro//skye bo dmigs pa can dag ni 'di mchod par bya ba ma yin no snyam du sems pa bzlog pa dang / bsod nams khyad par du 'phel bar bya ba'i phyir ro/ /rang gi lha'am lha gzhan gyi/ /snying po snying gar bris nas ni/ /zhes bya ba gsungs te/ rang gi lha zhes bya ba ni/gal te shi ba de la lhag pa'i lha zhig yod la/ de yang slob dpon la sogs pas shes par nus na'o/ /lha gzhan gyis zhes bya ba ni/ gal te shi ba de la lhag pa'i lha med na dang / yod du zin kyang slob dpon la sogs pas shes par mi nus na/ slob dpon gyis lhag pa'i lha'am/bcom ldan 'das thams cad rig pa la sogs pa'i sngags kyi tshogs bri'o/ /yang na ro la tshim par bya ba'i sbyin sreg byas la/ rus pa rnams mchod rten gyi nang du bzhag ste ji ltar byang chub sems dpa' sems can chen po'i rus pa bzhin no//lha 'dra bar ni sems bskyed de/ /zhes bya ba ni mchod rten nam/ lha'i gzugs kyi nang na gnas pa'i ro la sogs pa de la tha mal pa'i rnam par mi lha'i/ /lha'i rnam pa dang 'dra bar bsams la/ khyim gyi nang du gzhag par bya/ /zhes bya ba ni/ 'di rtag tu phyag byas pa la sogs pas bsod nams bsags pa'i gnas su bya ba'i phyir/ khyim mam kun dga'i ra ba la sogs pa mi mang po 'du ba'i gnas su mchod rten la sogs pa de gzhag par bya'o/ /de ltar yang 'phags pa rten cing 'brel par 'byung ba'i mdo las/ spyan ras gzigs dbang phyug rigs kyi bu'am/rigs kyi bu mo dad pa can gang la la zhig gis mi rnams gnas pa'i phyogs su/ mchod rten ni skyu ru ra'i 'bras bu tsam/ srog shing ni kha ba tsam/ gdugs ni ba ku la'i me tog tsam zhig byas la/ rten cing 'brel par 'byung ba'i chos kyi dbyings kyi tshigs su bcad pa nang du bcug na tshangs pa'i bsod nams skye bar 'gyur te/'di nas shi 'phos shing shi ba'i dus byas nas/ tshangs pa'i 'jig rten du skye bar 'gyur ro/ /de nas shi 'phos te 'chi ba'i dus byas nas/ gnas gtsang ma'i ris kyi lha rnams dang skal ba mnyam par skye bar 'gyur ro zhes gsungs so//de bzhin du rgyud phyi ma las/ sku gzugs dang / bran khol dang / ming mthun pa dang / gnyen du gyur pa la dbang bskur bar gsungs pa rnams/ 'dir yang drang bar bya'o/ /de yi ming nas smos nas kyang / / zhes bya ba ni mchod rten gyis phan par bya ba ston te/ gro ga'am shog shog la rten cing 'brel par 'byung ba'i gsang sngags/ ye d+harmA he tu pra b+ha wA he tun+te ShAn+ta thA ga to h+ya ba data/ te ShAny+tsa yo ni ro d+ha e waM bA dI ma hA shra maNaHzhes bya ba dang / de'i rjes su/ oM na mo b+ha ga wa te/ sarba durga ti pa ri sho d+ha ni rA dzA ya/ta thA ga tA ya/ ar+ha te samyak+saM bud+d+hA/ tad+ya thA/ oM sho d+ha ne/ sho d+ha ne/ sarba pA paM bi sho d+ha ne/ shud+d+he bi shud+d+he/ sarba karma A wa ra Na bi sho d+ha ne che ge mo'i sarba karma A wa ra Na bi sho d+ha ya swA hA/ zhes bya ba bris la/ mchod rten re re'i nang du bcug ste/srog shing dang gdugs dang bcas pa'i mchod rten slob dpon gyi khru gang yan chad pa'am/ ji ltar nus pa'i tshad can bye ba'i bar du bya'o/ /de nas mjug tu rab tu gnas pa'i cho ga sngon bzhin du byas te/ 'di lta bu'i mchod rten gyi las 'di ni bsod nams tshad med pa dang ldan te/de yang 'phags pa rten cing 'brel par 'byung ba'i mdo las/ ji skad du gsungs pa ni bstan zin la/ 'phags pa dpung bzangs kyis zhus pa las kyang / gtsang zhing dben pa'i sa phyogs rnams su ni/ /'jim pa'am ni bye ma las byas pa'i/ /bde gshegs mchod rten rten 'brel snying po can//sdig pa sbyang phyir rtag tu gdab par bya/ /zhes gsungs la/ yang de nyid las/ ji ltar sbyin sreg dang ni bzlas brjod kyis/ /gsang sngags bsgrubs kyang dngos grub ma thob na/ /'jim pa las ni mchod rten 'bum gdab pa'am//yang na chu 'gram bye ma dag la gdab/ /de ni de yi sdig pa srid gzhan la/ /byas pa gang yin de ni zad 'gyur la/ /de ni gsang sngags mthu yis 'di nyid du/ /mthong ba'i chos la bsod nams 'bras bu 'thob/ /ces kyang gsungs so/ /tshig gi don rnams ni go sla bas rnam par ma phye'o//de yi ming nas brjod nas ni/ /ji skad gsungs pa'i sngags bzlas shing / /'bum phrag stong ngam yang na ni/ /brgya phrag stong du tshang bar ni/ /bye ba snyed du rab bzlas na/ /lha yi gnas su nges par skye/ /zhes bya bas ni bzlas pa'i phan gdags pa bstan te/bzlas pa'i grangs mi 'dra ba gsum bstan pa ni/ shi ba de'i sdig pa che ba dang / bar ma dang / chung ba'i dbang du byas pa'o/ /de la don ni/ dkyil 'khor chen po'am bris sku'i spyan sngar/ bdag gi rnal 'byor ji ltar bstan pa las/ sngar bris pa ltar rtsa ba'i sngags bzlas par bya'o//de nas mjug tu smon lam rgya chen po dang / gtor ma dang / dge 'dun mnyes par bya ba ste sngar gsungs pa ltar bya ste/ des ni lha'i gnas su nges par skye ba la sogs pa'i yon tan 'thob ste/ gsang sngags kyi mthu ni bsam gyis mi khyab pa'i phyir/'di las kyang / gsang sngags yon tan sna tshogs bsam mi khyab/ /ces gsungs la/ de bzhin du 'phags pa dpung bzangs kyis zhus pa las kyang / so ga nags me mched pa'i me lce yis/ /ma bsgribs bzhin du tshang tshing kun bsregs ltar//bzlas brjod me la tshul khrims rlung gis sbar/ /brtson 'grus chen po'i me lces sdig pa bsreg/ /ji ltar gangs la nyi ma'i 'od zer gyis/ /gdungs na gzi brjid mi bzod 'ju ba bzhin/ /tshul khrims nyi ma'i 'od zer bzlas brjod kyis/ / gdungs na sdig pa'i gangs kyang 'ju bar 'gyur/ /mun nag smag la mar me byung ba yis/ /mun nag ma lus sel bar byed pa ltar/ /tshe rabs stong na gnas pa'i sdig pa'i mun/ /bzlas brjod mar mes rab tu sel bar byed/ /ces gsungs te/ de bas na gsang sngags kyi mthu'i bye brag bsam gyis mi khyab la/yid ches par bya ba med pa rnams la ni/ /bde ba gang yang med do zhes gzhan las gsungs pas/ /yid gnyis dang bral bas rtag tu gsang sngags kyi rnal 'byor la brtson par byas te/ bdag dang gzhan gyi don yongs su rdzogs par bya'o//de ltar dbang bskur ba dang / mchod rten bya ba dang / bzlas pas phan gdags pa rnams ni/ rab tu gsal bar bstan zin na/ sbyin sreg gis phan gdags pa ni ji lta bu zhig /sbyin sreg ni 'dir rnam pa du zhig ces phyogs snga ma rnam par rtog pa rnams la/de yi ming nas brjod nas kyang / /mkhas pas 'bum phrag brgya'am ni/ /zhes bya ba la sogs pas ni/ sbyin sreg ston te/ sngon bzhin du ji ltar rigs pa'i cho gas sa'i tshul gtan la phab ste/ dkyil 'khor lha'i sta gon du gnas pa yang sngon bzhin du byas la/nang dang phyi'i thig kyang sngon bzhin btab pa las/ snying po'i tshad las sor brgyad phyi rol pa'i nang du thab khung bya ba ni/ khru bzhi pa yi tshad du ni/ /cho ga bzhin du khung brkos la/ /zhes bya ste/ rgyar khru bzhi pa zabs su khru do pa'am/ khor yug tu khru bzhi pa zabs su khru gang pa'i thab khung bya'o//rdo rjes tha ma bskor ba yi/ /zhes bya ba ni/ mu ran gyi phyi rol phyi ma la rdo rje rtse lnga pas bskor la/ nang ma la pad+ma'i phreng bas bskor ba/ 'khor lo dbus su bri bar bya/ /zhes bya ba ni/ thab kyi nang na lhung bzed kyi zhabs lta bur byas pa der/sna tshogs pad+ma 'dab ma brgyad pa'i lte bar zla ba'i steng du 'khor lo rtsibs brgyad bris la/ sdig pa 'joms pa'i sbyin sreg byed na/ rdo rje dang ldan par yang bya ba ste/ dbus sam 'khor lo'i g.yas su'o/ /rang gi sngags kyis btab pa'i shing / /khung bu'i nang du gzhug par bya/ /zhes bya ba ni thab kyi 'khor lo'i mtshams nas phyogs bzhir ka ba bzhi mu ran phyi rol ma las khru gang gis mtho bar btsugs la/de'i steng du shing rlon pa bzhis re'u char byas la/ de'i dbus su yang shing rlon pas bla gab byas te/ de'i steng du 'jim pa bzang pos stug por bdal la/ dbus su 'dzag pa'i bu ga dbus nas mtho gang khor yug tu bzhag la/de'i 'og tu kham pa'i snod bzed par 'dzag pa rnams slar bsreg go/ /de'i steng du shing rnams legs par brtsig ste/ zlum po thags dam pa/ ha cang phra ba dang sbom pa dang / mtho ba dang dma' ba dag ma yin pa/ ro'i tshad las brten te'o/ /shing de dag kyang skya bo med pa dri zhim pa ma rul ba/ rtsa ba'i sngags kyis bsngags pa'i spos chus bsangs pa'o/ /de nas thab khung gi ngos dang ka ba dang / shing rnams kha dog dkar por byug go/ /rigs lnga yi ni phyag rgya rnams/ /ji bzhin pa yi phyogs su bri//zhes bya ba ni/ snying po mu ran dang bcas pa thab tu byas pa ma gtogs pa/ lhag pa thams cad slob ma dbang bskur ba'i dkyil 'khor sngar bshad pa bzhin du bri bar bya'o/ /cho ga shes pas bris nas kyang / /zhes bya ba ni/ rdul tshon bkye ba khrus byas te'o/ /bya dang bum pa gang ba dang //zhes bya ba la sogs pa ni yo byad dgod pa'o/ /de la bya ba rnams ni rang rang gi mtshan ma dang po dang po'i rtsar gzhag cing / rnam par rgyal ba'i bya ba ni/ lho'i sgo 'gram gang yang rung bar ro/ /las kyi bum pa ni shar sgo'i g.yas 'gram du ste/ 'di ni slob ma dbang bskur ba'i dus su yang ngo / /bkang ba'i bum pa ni phyi rol nas sbreng ngo / /lhag ma ni go sla'o/ /ro la sngags kyis btab nas kyang / /zhes bya ba la sogs pa ni go sla ste/ sngags ni 'dir rtsa ba'i sngags nyid do/ /gtsug phud dpung par de bzhin te/ /zhes bya ba la sogs pa la/gtsug phud dang / mgo bo dang / mtshog ma dang / dpung pa g.yas pa dang / snying ga dang / lkog ma dang / kha dang / dpral ba dang / mdzod spu dang / rna ba g.yas pa dang / sna dang / sna rtse dang / rked pa dang / pus mo g.yas pa dang / bol g.yas pa dang /mig g.yas pa dang / gsang ba'i gnas te/ gnas bcu bdun po de dag tu ni/ dang po sarba bid bcu bris la/ de'i rjes su rigs lnga'i sngags bri zhing / de'i rjes su rtsa ba'i sngags bris pa'i shog bu bcu bdun gdags so/ /de ltar gzhan du yi ge sngags mchog tu dge ba rnams gzhag go zhes bya ba ni/lte bar shog bu cig la/ oM b+h+ri ta zhes bya ba la sogs pa gsum dang / oM ha na zhes bya ba la sogs pa gsum yi ge go bzlog pa sprad pa bris la gdags shing / mig g.yon pa dang / rna ba g.yon pa dang / dpung pa g.yon pa dang / pus mo g.yon pa dang /bol g.yon pa dang / long bu g.yon pa rnams su/ oM kaM ka ni zhes bya ba la sogs pa'i sngags bris pa'i shog bu gdags so/ /de nas shog bu gcig la/ rdo rje gtsug tor dang / tshe dpag tu med pa dang / dang po'i dkyil 'khor las gsungs pa'i sngags ma lus pa bris la mgul du btags te/de dag ni dkyil 'khor 'di'i yan lag yin pas so/ /de nas rdo rje lcags kyu'i sngags dang phyag rgyas ro'i rnam par shes pa bkug la bstims te/ de nas slob dpon la gsol ba gdab pa dang / me tog dor ba sbyin pa dang / dbang ma lus pa bskur ba ste/ 'dir me tog kyang slob dpon la dor la/ sngar sta gon la gnas pa'i dus su byin gyis brlabs pa'i bum pas dbang bskur te/ de nas ro sbyang ba'i dkyil 'khor 'di ni mchod pa gtso bor gyur pa'i dkyil 'khor yin gyi dbang bskur ba gtso bor gyur pa ma yin no//de nas ngan song sbyong pa'i phyir/ /zhes bya ba la sogs pa ni go sla'o/ /ga pur gur gum la sogs pas/ /zhes bya ba la sogs pas ni bsreg bya dgod pa ste/ 'dir til ni las grub pa'i rdzas te gtsor bya'o/ /yungs kar ni thugs dam bskul ba'i rdzas so/ / lhag ma rnams ni tshim par bya ba'i rdzas so/ /tshig gi don ni go sla'o/ /de nas byin za dge ba rab spar la/ /zhes bya ba ni dge 'dun gyi yog pa'am/ shing dkar po gtsubs pa las byung ba'i me rlung yab kyis sbar ba/ oM badzra dz+wa la hUM zhes zlos shing / rtswa skam po'i phye ma dang lci skam gyi phye mas cher spar la yam shing til mar gyis byugs pa la spar te/bud shing brtsigs pa'i dbus su gzhag go/ /lha yi sbyor ba rab gnas la/ /zhes bya ba ni/ me sbar ma thag tu lhag pa'i lha'i lus su gnas par bya'o/ /blo mchog ldan pa'i mdun du gzugs sogs gzhag /ces bya ba ni/ dkyil 'khor chen po'i lha rnams bris pa'am/ lugs ma la sogs pa ste/ 'di yang bsrung ba dang / ting nge 'dzin gsal bar bya ba'i phyir ro/ /me lce stong gis dkrigs shing 'bar ba'i lus/ /zla dkar kun+da'i bzhin la zhi ba'i lus/ / mtha' yas gzugs kyis me bkug la/ /zhes bya ba la sogs pa ni me lha spyan drang pa dang mchod pa ste/ de la mtha' yas pa'i gzugs zhes bya ba ni/ re zhig rnam par snang mdzad mngon par byang chub pa las/ me lha 'di snyed cig gsungs te/ lag na rdo rje gzhan yang dus gcig gi tshe na yang /nga byang chub sems dpar gyur te/ byang chub sems dpa'i spyad pa spyod cing tshangs pa'i 'jig rten na 'dug pa dang / tshangs pas nga la/ kye tshangs pa chen po me lha rnam pa du yod par shes par bya zhes dris pa dang / ngas de la 'di skad ces smras so//me nga rgyal can gang yin pa de ni rang byung ba'o/ /de'i 'og tu tshangs pa'i bu ste/ de la sras skyes pa yin no/ /'jig rten pa'i me pa ba ka /tshangs pa'i bu ni dang po yin/ /de'i bu tshangs pa'i zas de'i yang / /pa ra dwa zhes bya bar bshad/ / de'i bu bi shwa na ra dang / /ha ba na dang bsreg bya len/ /ngos srungs a thar ba ni yi/ /bu yin par ni rgya mtshor grags/ /rlung zhes bya ba'i me de ni/ /mngal du 'jug pa'i cho gar bshad/ /de nas me khrus bya ba la/ /de bzhin ba ba ma nar shes/ /bkra shis zhes bya mtshams kyi mtshams//bcas pa'i las la phra gal b+ha'o/ /ming 'dogs me ni barbi ba/ /de bzhin dkan dbab pa la gtsang / /shad pa'i zhes bya gtsug phud la/ /brtul zhugs sbyin la kun 'byung ngo / /nyi ma zhes bya phyug byi ba la/ /bag ma len pa sbyor byed bshad/ / a ni yas ni 'khyil ka bsri/ /nye bar 'bral la me nyid do/ /ba ba ka zhes bya ba'i me/ /sna tshogs lha la sbyar bar bshad/ /khyim bdag la ni tshangs pa'i me/ /de bzhin yon dbul ba la shing / /de bzhin phyugs ni bcing ba la/ /a ba ni ka zhes pa'i me/ /lhung ba la ni bi bi rtsi//btsas byin la ni sa ha sa/ /dus kyi mtshams la ha bir shes/ /de bzhin zla ba gnas la gter/ /mr-i da zhes bya dgang blugs la/ /zhi la da ru nar 'dod do/ /byas mtha' me ni gshin rje'o/ /de bzhin rgyal po stobs sbyin pa'o/ /drag shul spyad pa thams cad la//khro bo'i me ni rab tu bsgrags/ /'dod las skyed ces bya ba'i me/ /de ni dbang po'i don du bshad/ /nags tshal bsregs la pho nya'i me/ /khong pa'i me ni dza ta ra/ /bzang bar bya ba sha thar bshad/ /rgod pa'i kha ni rgya mtsho na'o/ /zad tshe 'jigs pa zhes bya ste//dus mtha'i me ni yang dag bsgrags/ /'di ni me rnams 'od bsdus na/ /nges pa khyod la bshad pa ste/ /rig byed thos pa spyod rnams kyis/ /tshangs pa'i bu dag brjod pa yin/ /bzhi bcu rtsa bzhi 'di dag ni/ /de yi tshe na ngas bstan to/ /gsang ba'i bdag po de la ni//me rnams mtshan nyid mi shes par/ /gang dag sbyin sreg byed pa ni/ /sbyin sreg ma yin legs byas min/ /las kyi 'bras bu'ang yod mi 'gyur/ /ngas byang chub mngon par rdzogs par sangs rgyas nas/ me bcu gnyis bstan te/ de dag kyang gang zhe na/ye shes me ni dang po ste/ /de ni dbang chen zhes su bsgrags/ /kha dog ser po'i mdog can la/ /mdog dang rgyas dang stobs rab ster/ /'bar ba'i phreng can ting 'dzin gnas/ /ye shes rdzogs byed yin zhes bya/ /gnyis pa 'dzin byed ces bya ste/ /ston ka'i zla ba'i 'od dang 'dra//dpal ldan gos ni dmar po gos/ /bgrang phreng ril ba spyi blugs thogs/ /gsum pa rlung zhes bya ba ste/ /mdog ni gnag la rtsub pa'o/ /bzhi pa dmar po zhes bya ste/ /nub ka'i mtshams kyi dmar thag 'dra/ /lnga pa mi ta zhes bya ba/ /spun la kha dog kham pa ste//mgrin pa ring zhing gzi brjid che/ /kun la phan ni 'dogs par byed/ /drug pa khro bo zhes bya ste/ /mig yon dud pa'i kha dog 'dra/ /gyen du skra brdzes sgra cher 'byin/ /mche ba bzhi po stobs po che/ /bdun pa lto ba zhes bya ste/ /rnal 'byor kha dog kun dang ldan//brgyad pa zad pa zhes bya ba/ /glog gi 'od zer 'gyur ba 'dra/ /dgu pa yid las skyes zhes bya/ /sna tshogs gzugs can stobs po che/ /bcu pa 'jig rten 'dzin pa yin/ /sha za me ni de las gzhan/ /rmugs byed ces bya bcu gnyis te/ /sems can thams cad rmugs byed pa'o//gsang ba'i bdag po las ni de ltar/ mi yi gzugs ni byin rlabs te/ /bdag gi sa yi gzugs dang ni/ /rdzas kyang de yi ngo bor bya/ /'di ni phyi yi sbyin sreg ste/ /dngos grub 'dod pas sbyin sreg bya/ /zhes gsungs te/ de dag re re yang sna tshogs par snang bskyed nus pas na//mtha' yas pa yi gzugs kyi ma/ /zhes bya ste/ 'dir ni ye shes kyi me'am mr-i ta'i me de bkug la/ mchod pa la sogs pa bya'o/ /til dang yungs kar zhes bya ba la sogs pa ni/ me la sreg rdzas ci rigs dbul ba dang / phyi nas dkyil 'khor la yang dbul bya'o//me lha la mchod pa sreg rdzas cung zad cig phul nas/ lha rnams spyan drang zhing mchod pa dang / sreg rdzas gsol bar bya ba'i phyir/ /lha rnams mang po zhes bya ba la sogs pa smos te/ lha rnams mang po spyan drangs la/ /zhes bya ba la sogs pa'i bshad pa ni/ji ltar gsungs pa bzhin zhes bya ba la sogs pa'o/ /de ltar yon chab dang / phyi dang gsang ba'i mchod pa byas nas/ sbyin sreg bya ba'i tshad ni ji tsam zhe na/ ji srid mtshan ma shin tu ni/ /'bar ba'i gnas nas skyes 'gyur ba/ /zhes smos te/ shin tu 'bar ba'i gnas ni me'i dbus so//mtshan ma zhe na/ de nas 'di ni nges par yang / /zhes bya ba nas/ skyes pa yin par shes par bya/ /zhes bya ba'i bar du gsungs so/ /me'i mtshan ma de dag ni mdor bstan pa ste/ rgyas pa ni 'phags pa dpung bzangs kyis zhus pa las/ me yi mtshan ma nye bar brtag pa ni/ /me stag du ba me lce sgra rnams las/ /grub pa dang ni ma grub thams cad kyang / /sngags kyis byin rlabs me ni ston par byed/ /du ba med cing gser gyi mdog ltar dwangs/ /rab tu che la me lce g.yas su 'khyil/ /kha dog 'ja' 'dra yang na dkar yang rung //yang na byi ru bcag pa'i kha dog 'dra/ /shin tu zlum pa me lce bkab nas 'phro/ /rab tu 'bar ba'i nyi ma'i 'od zer 'dra/ /dbyibs ni bum pa rgyal mtshan gdugs kyang 'dra/ /dpal be'u dung dang pad+ma blugs gzar 'dra/ /yang na shing rta mchog dang rnga yab 'dra/ /me ri dang 'dra rdza rnga gling bu'i sgra//du ba me lce dri zhim me stag bzang / /yang na me sbar bar yang 'bar 'gyur na/ /de tshe dngos grub rgya chen thob par 'gyur/ /du ba mang zhing me stag rgod pa dang / /'bar bar dka' zhing cung zad cung zad 'bar/ /me lce rnam par chad cing gzi mdangs med/ /rtsub nag sprin dang pA la sha'i mdog /gsal shing 'dra zhing zhib ma'i gzugs kyang 'dra/ /phyugs kyi mgo 'dra sgra yang rab tu rtsub/ /me lce 'phro bas sbyin sreg byed pa tshig /mi ro'i dri nga dngos grub med par ston/ /me yi mtshan ma 'di dag mthong nas ni/ /stobs po che yi mar gyi sbyin sreg bya/ /zhes gsungs par sbyar ro//sbyin sreg dbul ba'i rim pa bstan pa'i phyir/ /de nas byin za la ni brtag bya ba/ /zhes bya ba la sogs pa smos te/ dang por me'i lha la ci bsreg pa'i rdzas rnams las ci rigs cig go/ /de nas dbus kyi gtso bo nas bzung ste/ rdo rje dril bu'i bar la'o/ /de nas lhag pa'i lha la'o//de nas byams pa la sogs pa la'o/ /de nas dbang phyug chen po la sogs pa shin tu phyi rol gyi lha rnams la'o/ /de nas yang mchod pa dang bstod pa byas la/ lha rnams gshegs su gsol bar bya'o/ /de nas me'i lha la mchod pa dang bstod pa byas te/ bsreg bya lhag ma phul la bzod par gsol ba dang /gsol ba gdab par byas la/ de yang gshegs su gsol te/ 'di ni tshim par bya ba'i sbyin sreg go/ /de lta bu'i sbyin sreg gis ni/ srid pa dang zhi ba la mi gnas pa'i mya ngan las 'das pa brnyes pa thams cad tshim par byas par 'gyur te/ji skad du dpal mkha' 'gro ma rdo rje dra ba las gsungs pa/ 'di yis rdo rje can mnyes shing / /ye shes me yang rab mnyes so/ /rgyal ba rtag pa mnyes pa dang / /gser gyi 'od kyang mnyes 'gyur te/ /pad+ma gar dbang mnyes 'gyur zhing / /rta mchog bdag po mnyes par 'gyur//tshangs pa brgya byin dbang phyug che/ /khyab 'jug rlung dang chu chen dang / /'dod pa dang ni chu 'dzin dang / /zla ba nyi ma gza' gzhan dang / /sa dang zhags pa 'dzin pa dang / /lus ngan dang ni ro zan dang / /chos rgyal dang ni klu nyid dang / /dri za lha min mi min dang / /sum cu rtsa gsum gnas lha dang //'og min na ni gnas rnams dang / /rgyal chen ris na gnas rnams dang / /gzhan 'phrul dbang byed pa rnams dang / /'phrul dga' yi ni lha rnams dang / /gtsang ma'i gnas na gnas rnams dang / /'od zer can gyi 'jig rten gyi/ /khams na gnas pa rnams nyid de//khams can po na gnas nyid dang / /sems can gling bzhir gnas rnams dang / /khams gsum na ni gnas rnams dang / /snod dang sems can 'jig rten dang / /lcug ma sdong po sbur ma sogs/ /sa ga ba la gnas rnams dang / /dri med pha rol son pa dang / /'od 'phro ba la gnas pa rnams//mi g.yo ba la gnas byas dang / /chos kyi sprin du rjes zhugs dang / /sbyang dka' bar ni song ba dang / /ring du song ba thob pa rnams/ /'od byed pa la nges gnas dang / /mgon po sa bcu'i dbang phyug dang / /rdzogs pa'i sangs rgyas nyan thos kyi//'phags pa'i gang zag chen po brgyad/ /bse ru lta bu rnams dang ni/ /dmyal ba yi dwags byol song dang / /lha dang lha min mi min rnams/ /sbyin sreg cho gas mgu 'gyur te/ /zhes so/ /de bas na ji ltar bris pa'i dkyil 'khor chen po srid pa dang zhi ba'i ngo bo de/slob dpon gyis me lha'i snying gar bkod de sbyin sreg bya'o/ /de ltar lha rnams tshim par byas nas/ de nas sdig pa gzhom pa'i sbyin sreg bya ba'i phyir/ de nas spyan drangs zhes bya ba la sogs pa smos te/ snga ma'i me lha ni ye shes kyi me lha yin la/ 'dir ni rlung gi me yin pas//mngon spyod kyi bsreg bya rnams bsdus te/ me'i dbus su rlung gi me spyan drangs te/ sngar bshad pa'i drag po'i yon chab phul la/ drag po'i bsreg bya rgyud 'di nyid kyi mngon spyod kyi sbyin sreg las gsungs pa rnams la/ ci rigs re re bsreg par bya'o/ / 'dir pad+ma dkar zhal zhes bya ba ni/ rlung gi me nyid la ma rungs pa grub par 'dod pa dag gi yid du 'ong bas na pad+ma dkar zhal zhes bya'o/ /de nas/ phyag na rdo rje pad+ma zhags pa bsnams/ /zhes bya ba la sogs pa rnams smos te/ me lha'i snying gar spyan drangs pa la snga ma ltar mchod pa dang sbyin sreg bya ste/'dir sdig mnan cing zhes bya ba ni/ shi ba'i ro sdig pa'i gzugs can bsreg par bya ba ste/ zhabs kyis mnan te sreg par mdzad la/ de bsreg pa nyid kyis shi ba'i sdig pa bsregs pa'o/ /'dir man ngag ni til nag po btags pa las/ sha za lta bu'i sdig pa byas la de gtub cing sbyin sreg bya'o//de'i snying pos zhes bya ba ni khro bo me'i sngags bskul ba smos pa nyid kyis so/ /ci ste mtshan ma la sogs 'byung / /de bzhin sdig can rgyud ces bya/ /zhes bya ba ni/ mtshan ma mchog byung na/ sdig pa zad par shes par byas la/ mtshan ma ngan pa byung na ni/ sdig can du shes par bya'o/ /ci ste sdig can gcig yin na ni/ /de nas thal bar gyur pa dang zhes bya ba nas/ las rnams thams cad byed par 'gyur/ /zhes bya ba'i bar du sbyar ro/ /sdig pa med par gyur na rus pa rnams sa stegs la sogs pa byas pa tsam gyis chog go//de ltar na bdag gis sbyin sreg gi skabs 'dir go rims nges par gtsor byas te brjod pa tsam mo/ /da ni sbyin sreg gi cho ga nges pa cung zad brjod de/ thab khung dang bud shing brjod pa dang / dkyil 'khor chen po bri ba dang / khrus kyi bya ba dang / rdzas dgod pa dang / ro byin gyis brlab pa dang / khrus kyi bya ba dang / mig gi rten gzhag pa dang / bsrung ba dang / me sbar ba dang / lha'i rnal 'byor dang / me lha dgug cing rdzas dbul ba dang / lhag pa'i lha bskyed cing spyan drang ba dang / mchod cing sreg rdzas dbul ba dang / bsreg bya'i rim pa dang / lha rnams gshegs par bskul ba dang / ji lta ba bzhin sprul pa'i dkyil 'khor bsdu ba dang / me lha gshegs su gsol ba dang / sdig pa 'joms pa'i sbyin sreg bya ba rnams ni/ 'dir cho ga'i rim pa mdor bstan pa ste/de la thab khung rnams kyang mdor bsdus na gnyis te/ las thams cad pa dang / las so so pa'o/ /de la 'phags pa dpung bzangs la sogs pa'i rjes su 'brangs te las thams cad pa'i thab khung nyid sna tshogs pa yin la/ rgyud phal cher ni zhi ba'i thab khung nyid las thams cad pa'i thab khung du gsungs so//re zhig rgyud 'dir ni las thams cad pa'i thab khung zhes gsungs pa med kyi/ las bzhi pa'i thab khung so sor gsungs so/ /de la ro yongs su sbyang ba'i thab khung ni zhi ba'i thab khung gsum la sngar bstan pa ltar chen po'i tshad du bya'o//de nas bstan pa ltar bud shing brtsigs te/ dkyil 'khor chen po sngon bzhin bris la/ khrus sngon bzhin byas te/ de nas g.yas su dgang blugs kyi mar khu dang / til dkar po dang / nas thug dang / 'bras chan dang / 'bras yos dang / ma du ba dang / ba dang ra'i 'o ma dang / 'bras thug po che dang / nas dang / gro dang / mon sran dang / me tog dri zhim po dang / dUr wa dang / ku sha dang / a shwat+tha la sogs pa'i yam shing dam pa zung re dang bcas pa dag thab khung las dpags te/ sor nyi shu rtsa bzhi man chad sor bcu drug man chad dam/ sor brgyad yan chad pa'i lcug ma ma gas shing mi 'khyog pa/ kha brag ma yin pa/ rtse mo'i cha las byung ba/ gzhan las bzang ba/ bca' ba dang / btung ba rab tu bkang ba/ yungs kar dkar po rnams g.yas su gzhag ste/ji skad sgyu 'phrul dra ba las/ /sbyin sreg la dgos g.yas su gzhag /ces gsungs pas so/ /yon chab dang / me tog dang / bdug pa dang / mar me dang / dri dang bshos dang / bzed phor rnams ni g.yon du ste/ de nyid las g.yon du chu'i snod gzhag go zhes gsungs so//chu'i snod ni yon chab yin pas/ mchod pa'i tshogs gzhan gyis nye bar mtshon pa'o/ /dgang gzar khru re ba dngul lam mchod sbyin gyi shing kha dog dkar po las byas pa yu ba'i rtse mo na rdo rje dang rin po che sor drug pa can rtse mo na rdo rje sor bzhi pa/ de'i rtse mo na sor bzhi gru bzhi pa sor gnyis gting du brkos pa/dbus na rtse mo lnga pa'i rdo rje sor gcig pa'i srid la zheng dang rngams ci rigs su byas pas mtshon pa/ gdong nyid na bcud 'bab pa'i lam mthe'u chung gi zabs kyi srid pa/ mtheb tshigs nub pa'i kha wa can no/ /blugs gzar yu ba sngon bzhin las/ / rtse mo'i dkyus sor gnyis pa'i rgya la/ sor gcig pa'i zabs yod pa pad+ma'i 'dab ma'i dbyibs can/ rtse mo lnga pa'i rdo rje rtse gcig gis dbus nas mtshan pa'o/ /de dag dang rdo rje dril bu dang / dbu rgyan ni mdun du'o/ /de nas sngon bzhin phyogs kyi rgyan dang / steng du bri ba dang /'og tu yang me tog dang 'bru kha dog dkar pos gtor ma dag kyang byas la/ stan bzang po dgod pas ci nas kyang yid nyams dga' ba de ltar byas te/ de nas sngar bshad pa ltar ro byin gyis brlabs te/ ras dkar po la pad+ma 'dab ma brgyad pa dkar po gur kum gyis bris la/de bting ba'i lte bar ro legs par kha shar ram nub bam lhag pa'i lha'i gnas su bltas par gzhag /steng nas kyang ras dkar po la/ pad+ma 'dab ma brgyad pa bris pa'i 'dab ma la/ dpal be'u la sogs pa'i bkra shis kyi mtshan ma bris pas g.yogs la gzhag go//de nas yang khrus byas la/ rje btsun thams cad rig pa'i bris sku'am/ lugs ma'i dkyil 'khor 'jig rten gsum las rnam par rgyal ba'i gzugs dang bcas par/ me dang du bas mi gnod par sgrub pa po'i mig gis ltar rung ba'i phyogs su gzhag go//de nas sngar bshad pa'i bsrung ba'i sbyor ba byas la/ gtsub shing las ni byung ba'i me/ /dge ba'i las la rab tu shis/ /zhes bya ba'am/ yang na sngar smos pa lta bu'i snga ma ltar sbyar te/ oM AHhUM zhes brjod nas/ me snod gzhan zhig spros te/ sngar bstan pa'i bya ba la sbyar ro//de nas hUM bdun zlos shing / mar khu gzar bu chen po gang ba bdun blugs te/ sngar gsungs pa'i mtshan ma brtag pa la sogs pa bya'o/ /de la slob dpon yid rab tu bsdams pas rang gi dam tshig sems dpa'i rnal 'byor gsang ba'i mchod pa brjod pa'i bar du byas la/oM badzra satwa hUM zhes zlos shing / ku sha ma nyams pas me'i steng ngam thab khung nyid g.yogs par bya ste/ ji ltar ku sha'i tshogs tshig pa las/ sdig pa'i tshogs tshig pa'o zhes bram ze rnams rtog pa'i lugs nyid dang mthun par byas pa'o/ / kha cig na re ro yongs su sbyang ba'i sbyin sreg la ni/ ku sha dgram mi dgos so zhes zer ro/ /kha cig na re/ thab khung gi ni g.yas phyogs nas/ /ku sha'i rtswa ni rlon pa dgram/ /rtse mo dag kyang rtsa bas dkri/ /rtsa ba dag kyang rtse mos dkri/ /zhes bye brag med par gsungs pas/dgram pa 'dir yang bya'o zhes zer ro/ /de'i rjes la sgyu 'phrul dra ba las/ me yi phyogs nas bod pa ni/ /gsus po che la mig gsum pa/ /gdong bzhi lag pa bzhi dang ldan/ /'od dmar ral pa'i thor tshugs can/ /me yi dkyil 'khor la gnas shing //las kyi 'od zer rnams kyis brgyan/ /lag pa dang po mchog sbyin la/ /gnyis pa la ni sngags nor phreng / /g.yon pa ril ba spyi blugs te/ /gnyis pa na ni be con nyid/ /mdog dmar rgyan ni med pa la/ /drang srong rnams kyis yongs bskor ba//'di lta'i gzugs ni bsams nas kyang / /thab kyi dbus su bzhugs su gsol/ /zhes bya ba'am/ yang na rgyud 'di las/ pad+ma dkar po'i zhal 'dra dge /pad+ma nor bu'i ril ba thogs/ /lag na ldan dkar mchog thogs pa/ /pad+ma dkar po'i stan stengs 'dug /ces pa'i me lha'i lha thams cad kyi dbus su/ yi ge raM dkar po las byung bar bsams pa la/ zhi ba'i mchod yon snying gar bzung ste/ de yang sgyu 'phrul dra ba'i rgyud las/ g.yas pa mi 'jigs mthe bskyod cing / /gsang sngags 'dis ni cho ga bzhin/ /me yi lha ni spyan drang ngo //tshur gshegs tshur gshegs 'byung po che/ /lha yi drang srong bram ze mchog /sreg blugs zhal zas bzhes slad du/ /'di nyid du ni bzhugs su gsol/ /oM ag+na ye A di pyA di bya a bi Sha ma hA shri ye ha bya ka bya ba ha nA ya swA hA/ zhes gsungs pa sbyar ro//de nas dzaHhUM baM hoHzhes brjod pas ji ltar bskyed pa dang / gnyis su med par byas la/ sgyu 'phrul dra ba las/ lag g.yon rdo rje bzang gtor te/ /mchod yon mchod pa rnam lnga dbul/ /zhes gsungs pa dang / yang de nyid las/ de la sbyin sreg la dgos pa/ / kun la lan gsum sreg blugs dbul/ /de nas 'thor 'thung byas nas su/ /'bar ba'i rnam par 'phrul pa byas/ /zhes gsungs pa dang sbyar te/ de nas me 'bar ba'i rnam par gnas pa'am/ de'i dbyibs ma bor ba'i de'i snying gar dkyil 'khor chen po bskyed la/ mchod pa'i cho ga las bstan pa ltar spyan drang zhing bstims te/phyag rgya bzhis rgyas btab la/ yon chab dang bsang gtor bya ste/ mchod pa brgyad yan lag dang bcas pas mchod la/ sreg rdzas rnams las cung zad cig ma lus par bsregs shing / de nas bstod pa brjod la/ yang yon chab la sogs pa phul te/oM kr-i to ba zhes bya ba la sogs pas gshegs su gsol la bskyed pa'i dkyil 'khor bdag nyid la bsdu'o/ /'dis dbus kyi bdag po ni ro de nyid yin par 'dod do/ /de la mchod pa'i sngags rnams ni bstan zin la/ bsreg bya rnams kyi sngags ni/ oM ag+na ye swA hA/ mar gyi'o/ /oM sarba pA paM da ha na badzrA ya swA hA/ til gyi'o/ /oM badzra puSh+Ta ye swA hA/ 'bras thug po che'i 'o/ /oM badzra bi dza ya swA hA/ 'bras kyi'o/ /oM ma hA be+e gA ya swA hA/ nas kyi'o/ /oM badzra g+hasma ri ye swA hA/ gro'i'o/ /oM ma hA ba la ya swA hA/ mon sran gyi'o/ /oM badzra A yu She swA hA/ rtswa dUr wa'i 'o/ /oM a pra ti ha ta badzrA ya swA hA/ rtswa ku sha'i 'o/ /oM badzra ya dz+nyA ya swA hA/ shing u dum+WA ra'i 'o/ /oM bod+hi br-ik+ShA ya swA hA/ byang chub kyi shing gi'o/ /oM badzra la dA ya swA hA/ shing p+lag sha'i'o/ /oM badzra ku be+e rA ya swA hA/ shing a mra'i'o/ /yungs kar la ni rtsa ba'i sngags dang / ngan 'gro gsum bcas pa'i sngags dang / til gyi sngags rnams bzlas te/ mjug rnams su gsol ba gdab cing bsreg go/ /rdzas gang la rang gi sngags med pa der ni/ til gyi sngags sam bdag po'i sngags kyis bsreg go//rdzas rnams kyi rim pa yang / sngar rdzas nyid ji ltar smos pa nas rim pas so/ /de la yon chab ni mdun du'o/ /me tog ni dbu la'o/ /bshos dang / mar khu dang / zho la sogs pa ni zhal cung zad gdangs par te/ drag shul spyad pa la ni/ shin tu gdangs par ro//mar me dang bdug pa mdun du'o/ /dri ni thugs kar ro/ /yam shing ni 'od kyi dkyil 'khor la'o/ /'bras la sogs pa ni phyag tu dbul lo/ /de dag kyang dang po ni me'i lha la'o/ /de nas khro bo'i rdo rje la ste/ gang gis me la sogs pa srung ba'i las byed pa dkyil 'khor chen po'i byang na gnas pa'o//de gnyis la ni gsum gsum mo/ /de nas dkon mchog gsum la'o/ /de nas sngon bzhin no/ /de nas rje btsun ngan song sbyong ba la brgya rtsa brgyad do/ /de nas ni sngon bzhin no/ /sngags rnams ni sngar bstan pa rnams bskul ba smos par bya'o//kha cig na re sngags rnams ni rang rang gi rtsa ba'i sngags kyis bya'o zhes zer ro/ /'dir me'i lhas blangs pa thams cad tshim par 'gyur te/ me ni lha thams cad kyi zhal nas/ 'byung po thams cad kyi kha'i sgo'o zhes grags la/ sgyu 'phrul dra ba las kyang /sbyin sreg de nyid la gnas pa'i/ /me ni lha rnams zhal yin pas/ /sna tshogs las ni grub byed pa'i/ /sbyin sreg las ni rab tu bshad/ /sbyin sreg gis ni lha rnams tshim/ /tshim par 'gyur na dngos grub ster/ /gsang sngags lhag chad gang yin dang //thams cad sbyin sreg dag gis bskangs/ /de phyir sku gsum mkhas mchog gis/ /sbyin sreg rab tu bsngags par mdzad/ /ces gsungs so/ /sbyin sreg thams cad la yang pus mo gnyis cung zad bgrad pa'i bar las ma 'das par rdzas bsreg cing / dgang gzar dang blugs gzar med na/dgang blugs ni khyor bas byas la/ rdzas lhag ma rnams ni pho tshums kyis dbul zhing / mjug tu me'i las kyi rjes su mthun pa'i chus zhi bar bya'o/ /de nas mjug tu me lha slar lha'i dbyibs thob pa la mchod pa dang / bsreg bya cung zad lhag pa rnams phul te/mnyam med mi g.yo zhes bya ba la sogs pa'am/ yang na/ me lha'i rgyal po bram ze rdo rje che/ /'bar ba'i 'phreng 'khrug drang srong tshogs kyis bskor/ /sna tshogs gzugs mnga' las kun sbyong bar mdzad/ /thub mchog mthu chen drang srong mchog khyod 'dud/ / gsus che spyan gsum tshad med bzhi yi zhal/ /'od dmar 'bar ba'i me tshogs dbus na bzhugs/ /ral pa'i thor tshugs che bsgyings bka' thub drag /lus kyi rgyan yang dga' byed srad bu thogs/ /bum pa bgrang phreng dam pa sbyin pa dang / /dbyi gu gsum thogs me yi dngos grub sbyin//'jig rten skyong ba'i nang na lha khyod 'phags/ /khyod ni 'phags dang 'byung po mang tshim byed/ /phyi rol lus kyi gtsug lag don ldan pa/ /drang srong mchog khyed der ni mngon sum ste/ de'i phyir de dag rnams la'ang 'bras bu stsol/ /dngos grub kun sbyin khyod 'dir bdag gis bstod//ces bya bas bstod la/ snga ma ltar gshegs su gsol te/ ji ltar bskyed pa ni rang gi byang chub sems su bsdu'o/ /de nas de ma thag tu g.yas su dgod par bya ba rnams ni g.yon du yin la/ g.yon du dgod par bya ba rnams ni g.yas su dgod pa'i tshul gyis so/ / drag po spyad pa'i yon chab dang / mchod pa lnga dang / bsreg bya rnams rgyud 'di las grags pa sngags snga ma rnams nyid las thams cad pa la che ge mo'i pA pa gra ha na sha ya phaT ces bskul bas bsregs te/ 'dir ni dngos por rlung gi me la bsreg bya phul la/ de'i snying gar phyag na rdo rje khams gsum las rnam par rgyal ba drag po sngon bshad pa las/phyag bzhi pa g.yas g.yon dang po ni hUM gi phyag rgyas rdo rje dang dril bu 'dzin pa/ tha ma gnyis na pad+ma dmar po dang / zhags pa dang bcas pa'i sdigs mdzub can/ ro'i sdig pa brdzis pa/ khro bo'i rgyan ma lus pas brgyan pa'i yi ge hUM dang /rdo rje rtse lnga pa las bskyed pa sngon bzhin du de dang 'dra ba spyan drang ba la sogs pa byas la mchod pa dang / sbyin sreg drag por spyad pa bya ste/ bdag nyid kyang de dang 'dra bar yud tsam gyis bskyed pas so/ /kha cig na re 'dir mchod yon la sogs pas pad+ma dkar zhal mchod ces gsungs pas/'dir yang zhi ba'i sbyin sreg nyid bya'o zhes zer ro/ /de nas mtho ris thob par shes nas 'chad par byed pa ltar las rnam pa bzhi'i sbyin sreg bya ste/ rgyud las rab tu gsal bar ma phye'o/ /phyi rol gyi sbyin sreg la mi mos pa'am/ mi nus pa dag la nang gi sbyin sreg kyang gsungs te/gzhan yang nang gi sbyin sreg ni/ /las dang tshe dag dgag pa ste/ /de ni yid kyis shes par bya/ /gzugs dang sgra la sogs pa spangs/ /mig dang rna ba sna dang lce dang lus rnams ni/ /yid las skyes pa sems kyi rgyal po la gnas te//kun du rtog pas skyes pa 'di dag kyang / /byang chub sems dang yul dang mig la sogs pa dang / /rlung gi me yang 'phro ba med pa yi/ /shes rab kyis ni de bkag ste/ /yid kyis me la sbyin sreg bya'o/ /de ni nang gi sbyin sreg ces/ /nges pas khyod la bstan pa yin/ / zhes so/ /yang na med par gyur kyang rung / /zlos shing bsgom pa'i tshul gyis ni/ /ming tsam legs par bris nas kyang / /mchod rten phreng bar bya ba dang / /zhes bya ba ni ro med par gyur kyang / bzlas pa dang mchod rten gyi bya ba sngon bzhin du bya'o zhes bya ba'o/ /yang na gzugs su bris nas kyang //sbyin sreg mngon par dbang bskur na/ /zhes bya ba ni/ ro med par gyur kyang / dbang bskur ba dang / sbyin sreg rnam pa drug ni bya zhing / de yang ming tsam bri ba ma yin gyi/ gzugs brnyan bris la bya'o/ /de dag 'bras bu chen por bstan pa'i phyir/ gdon mi za bar bde 'gror skye/ /zhes bya ba smos te/ cho ga bzhi char gyi yon tan du sbyar ro/ /thal ba yungs kar phye ma sogs/ /zhes bya ba la sogs pa ni bzlas pa'i rdzas chur dor ba'i cho ga ston te/ rgya mtshor 'bab pa'i chu klung ni/ 'dzam bu'i gling 'di na chu klung stong phrag phyed dang gsum yod de zhes 'phags pa sdong po bkod pa las gsungs la/de dag ni klu'i rgyal po ma dros pa'i smon lam gyis byin gyis brlabs pa'i phyir/ klung gang dag rgyu mtshor mi 'bab cing / dug can dang / char pa'i chu las byung ba rnams las khyad par du 'phags pa dang / 'gro ba mang po'i don du gyur pa'i phyir de kho na bsngags so//lhag ma ni go sla'o/ /de ltar na ni sdig can yang / /zhes bya ba la sogs pa ni/ de'i 'bras bu bstan te go sla'o/ /dge ba'i rtsa ba ma bskyed la/ /zhes bya ba ni/ cung zad kyang dge ba'i las la mos pa ma byas pa'o/ /med par lta ba gang yin dang //zhes bya ba ni 'jig rten rgyang 'phen par khas len pa rnams te/ las med thar pa med kyang rung / /gzhung ngan rgyang 'phen pa yi gzhung / /zhes ji skad bshad pa'o/ /byang chub lam las rnam log dang / /zhes bya ba ni/ gang gis byang chub sems bskyed nas//yang der slar yang btang ba ste/ /mi gang byang chub sems gtang yang / /de dag thar bar mdzad pa ni/ /las tshul bsam gyis mi khyab phyir/ /thams cad mkhyen pa kho nas mkhyen/ /zhes bya ba dang / sems bskyed de ni phas pham pas kyang shin tu lci/ /zhes ji skad gsungs pa lta bu'o//bstan la zhe sdang gnod byed dang / /zhes bya ba ni/ dam pa'i chos kyi stegs 'jig pa ste/ glegs bam chud gson pa dang / chos smra ba la gnod par byed cing 'gal ba dang / chos kyi bar chad byed pa ste/ ji skad du/ mi gang chos kyi stegs 'jig cing //yang dag ma yin lam smra ba/ /mi de dag ni spu gri'i so/ /gtams pa'i lam du 'gro ba yin/ /zhes bshad pa lta bu'o/ /sdig pa'i rang bzhin ma mthong ba/ /zhes bya ba ni/ mi dge ba bcu'i las kyi lam dang / mtshams med pa lnga la sogs pa la yang 'jigs par mi lta ba'i rjes su dpyad pa'o//pha dang ma la snying ring zhing / /zhes bya ba ni/ pha ma la sems byams pas brlan par ma gyur cing / brlang ba'i sems yod pa ste/ 'di dag ni phan 'dogs pas zhing dam pa mthong ba'i chos la myong bar 'gyur ba'i las kyi 'bras bu 'byin pa ste/ khye'u bu mo mdza' bo'i gtam las shes par bya'o/ /gzhan yang 'phags pa bad sa'i rgyal po 'char byed kyis zhus pa zhes bya ba'i theg pa chen po'i mdo las kyang / gang dag pha ma rgas pa gso bar byed pa ni/ /de dag rtag tu bde zhing yid kyang bde 'gyur la/ /'di la lha dang bcas pa dang ni dbang po dang //de bzhin tshangs par bcas pa'i rigs su 'gyur/ /gang dag pha ma rgas pa gso bar byed pa ni/ /de dag song nas phyir 'ong ba yang 'grub 'gyur zhing / /rgya mtsho chen po nas kyang bde zhing legs 'ongs te/ /de ltar byed pa dag ni rab mchog rnyed pa yin/ / gang dag pha ma rgan rgon gso bar byed pa ni/ /tshong pa de dag yon tan kun gyi gtsor 'gyur zhing / /de bzhin zhing las 'bras mchog rnams 'byung ste/ /bsod nams bgrang don brjod par mi nus so/ /gang dag pha ma rgas pa gso bar byed pa ni/ /de dag khur rnams khyer bar byed pa'i rnga mo rnams dang yang //yang na glang dang bong bu dag tu'ang mi 'gyur te/ /mi rnams de dag spu gris so la brdzi mi 'gyur/ /gang dag pha ma rgas pa gso bar byed pa ni/ /de dag chu bo rab med dang ni me mur dang / /spu gri'i so dang ldan pa las kyang mi rgal te/ /de dag zangs khu bskol ba 'thung bar yang mi 'gyur//gang dag pha ma rgas pa gso bar byed pa ni/ /de dag nor dang 'bru ni mi nyung ba dag dang / /chung ma bu dang bu mo dam pa dag dang yang / /bai DUr+ya dang rin chen sa le sbram yang rnyed/ /gang dag pha ma rgas pa gso bar byed pa ni/ /de dag rab 'phrul lha yi pho brang dag dang ni//rtsub 'gyur dang ni 'dras pa'i tshal yang mthong 'gyur te/ /lha rnams du mas rtag tu mdun du bdar bar 'gyur/ /mi yi gtso bor gyur cing lha yi lhar gyur pa/ /thub pa chen po 'di 'dra'i gsung ni thos 'gyur na/ /rgas shing dbang po shin tu nyam chung 'gyur ba yi//pha ma sbyin gnas dam pa su zhig gso mi byed/ /ces gsungs pas/ 'di dag ni 'bras bu 'di lta bu 'byin pa la snying ring bar gyur na rab tu 'jigs su rung bas so/ /byang chub sems la brten pa dang / /'dod chags bral ba bsad pa rnams/ /zhes bya ba ni/ mtshams med pa dang nye bar mchod rten 'jig pa dang /dgra bcom pa sun par byed pa dang / dge 'dun 'du ba'i sgo 'phrog par byed pa rnams mtshon pa'o/ /de lta bu dag thabs 'di rnams med na mi thar ro zhes ston par bzhed nas/ ci ste lha rnams med 'gyur tam/ /zhes bya ba la sogs pa gsungs te/ lha rnams 'jig rten pa dbang po la sogs pa ste/ de dag kyang yongs su 'dren pa yin pa'i phyir/ sangs rgyas dge 'dun chos de bzhin/ /zhes bya ba ni skyabs dam pa'o/ /sngags dang phyag rgya'i tshogs la sogs/ /zhes bya ba la sogs pa smos pa ni/ gtor ma dang sbyin sreg dang / dbang dang dam tshig dang / ting nge 'dzin la sogs pa bsdu'o/ /shes rab thabs rnams med na ni/ /zhes bya ba ni/ stong pa nyid snying rje'i snying po can gyis bsdus pa/ byang chub kyi sems spros pa dang bcas pa dang / spros pa med pa ste/ ji skad du/ dpal gsang ba 'dus pa las/ thabs ni dngos po'i mtshan nyid de/ /shes rab ces bya dngos po med/ /zhes gsungs pa lta bu'o/ /de dag la tshig rkang dang po gnyis kyis ni/ rten gyi stobs kyis sdig pa 'byang bar bstan to/ /tshig rkang tha ma gnyis kyis ni/ gnyen po kun du spyod pas sdig pa 'byang bar bstan to/ / rnam par sun 'byin pa kun du spyod pa dang / sdom pa'i stobs dag kyang 'dir sogs/ zhes bya ba'i sgras bsdus pa'am/ thabs dang shes rab gnyis kyis bsdus pa'o/ /yang na 'dir gsang sngags kyis bdag nyid che ba bstan pa'i phyir/ rdo rje slob dpon gyi thabs mkhas pa'i che ba'i stobs nyid kyis thar pa thob par ston pas na yan lag gnyis smos te/lha'i bu nor bu dri ma med pa nyid lta bu'o/ /de ltar dge slong dag las byas pa ni chud mi za la/ ma byas pa ni phrad pa med do zhes gsungs pa dang / 'gro ba rnams ni rang gi las kyi 'bras bu'i bgo skal la spyod pa'o zhes gsungs pa 'di ji ltar drang zhe na/'di la gnod pa med de/ ji ltar pad+ma kha bye ba ni/ nyi ma'i 'od kyis phye ba na rang bye ba ma yin pa ltar kha cig gzhan gyi rkyen gyis bde ba dang sdug bsngal bar 'gyur ba yang yod la/ gal te rang gis byas pa kho na la rag las na/ sangs rgyas kyis kyang ji ltar phan pa mdzad par 'gyur/de'i phyir/ chos kun tha dad rjes su 'jug /chos kun phan tshun rjes su 'jug /chos kun rjes su zhugs pa ste/ /mtha' bral rjes su 'gro ba'o/ /zhes gsungs te/ ji ltar lcags g.yo ba rang gi byed pa ma yin gyis/ /khab len gyis byed pa dang /shing tshig pa me yis byed pa lta bu chos rnams kyi chos nyid de/ chos nyid ces bya ba yang / dngos po rnams kyi mthu dang / rang bzhin rang dang po nas grub pa med/ rgyu dang rkyen gzhan gyis byas pa ma yin te/ dngos po rnams ni 'di ltar nges la/ de la yang dpyad na snying po'i bag phra rab tsam yang med pas/kun rdzob dang don dam pa gnyi gar/ ji ltar yang dngos po rnams kyi chos nyid la dpyad du med na/ byis pa rnams log par dpyod pa tsam sel ba dpyod pa mkhas pa dag byed par zad do/ /'on kyang byis pa dag rang gis ri mo bris pas rang skrag pa ltar rang gis byas pa la rang spyod par 'dod pas de ltar grub pa phal che bas/las bdag gis bya ba gtsor gsungs so/ /rigs par na rkyen nyid mthu can yin gyi/ las ma yin te de na brten par gnas pa'i las 'ga' yang med de mun pa la snang ba dang / mar me la chu'i thigs pa bzhin no//thub pa'i dbang po rnams kyang chos nyid thob pa la byin gyi rlabs 'jug cing gzhan du ma yin te/ khab len gyi mthu'i chos nyid lcags kyis thob kyi nor bu dang / zangs la sogs pas mi thob pa bzhin no/ /de'i phyir 'di chos nyid kyis snod du 'gyur ba kha cig la gzhan gyis byas pa gzhan la 'byor pa 'di ni chos nyid kho na yin pas gzhan du drang bar mi bya'o//de nas brgya byin zhes bya ba la sogs pa ni go sla'o/ /bder gshegs 'dra bar skyes zhes bya ba ni/ byang chub sems dpa'i sa'i rim par gnas pas byang chub chen po las phyir mi ldog par 'dra ba ste/nges par drod la sogs pa thob par ston pa mthong ba las rjes su dpag par nus pa'i phyir ro/ /ci skal ba du ma la sogs pas sam zhe na ma yin te/ tshe 'di nyid la zhes gsungs te/ lha dang mi'i tshe gcig po de nyid ma zad par zhes bya ba'am ngan 'gro dang de dang 'dra ba'i tshe mang zhig myong bar byas pa las tshe 'di nyid la grol ba ste/gsang sngags rnams kyi 'bras bu ni mthong ba'i chos kho na la 'bras bu 'byin par 'dod kyi/ lan grangs gzhan la sogs pa ni rab tu dman pa'i sgrub pa por zad do/ /ji skad du 'phags pa kun nas sgor 'jug pa'i 'od zer gtsug tor dri ma med par snang ba/de bzhin gshegs pa thams cad kyi snying po dam tshig la rnam par lta ba zhes bya ba'i mdo las/ kye ma sangs rgyas/ kye ma chos/ kye ma dge 'dun/ kye ma rigs sngags/ 'bras bu 'phral du ston pa/ bcom ldan 'das de bzhin gshegs pa shAkya thub pa/thugs rje mchog tu che ba yid bzhin gyi nor bu lta bu de la phyag 'tshal lo zhes gsungs la/ 'di nyid las kyang 'og nyid nas/ /gsang sngags lta bu'i 'dren pa med/ /ces gsungs so/ /de nas dbang por bcas pa yis/ /grags chen lha rnams gang byed cing //zhes bya ba ni/ brgya byin ni mngon par shes pa lnga dang bcas pas/ lha'i bu de thar bar shes nas/ sangs rgyas la mchod pa bya ba'i phyir 'ongs par bstan pa'o/ /tshe 'di nyid la zhes pa la sogs pa ni/ nor bu dri ma med pa mchod pa ste/ go sla bas rnam par ma phye'o//gang dag bsdus pa'i don dang mi 'dra bar bshad pa'am 'chad par byed pa ni gang yang rung ba'i nye bar bstan par shes par gyis shig /rtsa ba'i rgyud kyi snying po rgya cher bshad pa rdzogs so// //de ltar rtsa ba'i rgyud bstan nas/ da ni de nas bcom ldan 'das zhes bya ba la sogs pas rgyud phyi ma ston te/'dir 'chad pa po ni phyag na rdo rje yin la/ ston pa dang rgyud kyi bdag po ni sngon bzhin no/ /kha cig na re rgyud phyi ma dang de'i phyi ma'i bdag po ni phyag na rdo rje'o zhes zer zhing / de nyid kyis na rgyud yongs su rdzogs par nye ba na/ phyag na rdo rje rgyud kyi bdag po la bstod pa'o zhes kyang zer ro//dkyil 'khor gyi bdag po rnams ni gsal bar zad do/ /de la de nas zhes bya ba ni/ rtsa ba'i rgyud bshad ma thag tu'o/ /bcom ldan 'das zhes bya ba ni sngar bshad pa bzhin no/ /byang chub sems dpa' zhes bya ba ni/ bdud rtsi thob phyir lam ni 'di ma yin//lam ngan 'ongs la lam la mnos shig ces/ /lta ngan sems can mthong nas go 'byed de/ /rgyu des byang chub sems dpa' zhes bshad do/ /zhes bya ba'i tshul gyis so/ /de dag nyid nyan thos la sogs pas dmigs pa la sogs pa che bas na/ sems dpa' chen po zhes bya'o//'di'i phyag na rdo rje mnga' bas phyag na rdo rje ste/ des rtsa ba'i rgyud las ltos pa'i brtag pa'i phyi ma 'di bstan te bshad pa'o/ /de yang rang gi mthus ma yin pas na/ bcom ldan 'das kyi mthu zhes smos te/ byin gyi rlabs kyis so/ /de ltar yang tshul gcig tu bstan pa'i mdo las/bcom ldan 'das byang chub sems dpa' rnams ni/ gang ci smra ci sems rjes su ci 'dra yang / de thams cad ni de bzhin gshegs pa'i mthu'o zhes gsungs so/ /de 'dir brtag pa phyi ma zhes bya ba ni mdor bsdus pa dang / yongs su rdzogs par byed pa'i rtog pa yin la/de gnyi ga'i lha rnams kyi dbyibs dang / kha dog dang / gnas nges pa dang / dbang bskur ba dang / dkyil 'khor dang / dngos grub dang / sbyin sreg la sogs pa rnams ni bdag gis dus gcig tu bshad zin la/ gzhung rnam par dbye ba yang bdag gis bsdu ba'i don gyi skabs nyid du dpyad zin te/da ni tshig gi don tsam las ma lus la/ tshig gi don yang go sla bas mi brjod de/ de bas man ngag gi gnas 'ga' zhig las brjod du med do/ /de phyir blo'i nor can rnams kyis sngar bstan pa'i don nyid drangs te cho ga zhib mo phyi ma gnyis su sbyar la/blo dang mi ldan pa dag la ni ji tsam du ngag la sogs pa sbyar kyang de dag gi blo'i pad+ma rgyas par mi 'gyur te/ ji skad du/ 'phags pa nA gA rdzu na'i zhal snga nas/ /gang la rang gi shes rab med/ /de la bstan bcos kyis ci bya/ /mig gnyis med par gyur pa las//me long dgos pa ci zhig yod/ /ces gsungs pa bzhin no/ /oM sarba pA paM da ha na hUM phaT/ ces bya ba la sogs pa la/ sngags dang po dgu ni rje btsun shAkya tog la sogs pa dgu'i rim bzhin no/ /de nas gsum ni sku la sogs pa'i gsum gyi sngags so//de nas gsum ni ro'i ngan 'gro dgag pa dang / slob ma sdig pa can ma phebs pa'i sdig pa gzhig pa'o/ /de nas ni mchod pa dang sgo skyong gi sngags so/ /de nas dkyil 'khor bshad de zhes bya ba nas/ mchod pa byas nas zhes bya ba'i bar du yang go sla'o/ /de bzhin du bcug ste/dbang bskur na zhes bya ba ni rtsa ba'i rgyud la ltos par bstan to/ /ngan song thams cad rnam grol te/ bde 'gro mtho ris 'jig rten dang / /zhes bya ba ni go sla ste/ skye bar 'gyur ro zhes sbyar ro/ /gong nas gong du sa rnams su yang skye bar 'gyur ro zhes bya ba ni/ dngos grub phra mo la brten nas ni/dngos grub chen po thob cing / de nas ni sa rab tu dga' ba nas bcu gcig pa'i bar du rim gyis 'thob ste/ ji skad du/ gcig pu dpa' bo grub pa las/ /gang tshe dngos grub phra grub pas/ /sngags pa'i lus ni dag pa ni/ /snod du 'gyur ba'i lus la ni/ / dngos grub chen po rab tu skye/ /'di yis sa la sogs 'thob pa/ /rim pa 'di yis skyed byed de/ /sngags pas yid bzhin nor bu ltar/ /rtag tu sems can don byed do/ /zhes gsungs so/ /lhag ma ni go sla'o/ /brtag pa gzhan gyi tshogs kyang thams cad bsgrub par bya'o zhes bya ba ni rgyud 'dir ma gsungs pa/bya ba dang rnal 'byor gyi rgyud gzhan du gsungs pa'i las rab 'byams de dag kyang rang gi lha'i sbyor bas 'grub par 'gyur te/ ji skad du/ gang zhig du ni rang nyid kyis/ /las kyi cho ga rnam med pa/ /der ni spyi rgyud las grags pa'i/ /cho ga mkhas pas shes par bya//zhes gsungs pas so/ /lha dang zhes bya ba la sogs pa ni go sla'o/ /byin gyis brlabs zhes bya ba ni gdul bya 'byung bar 'gyur ba rnams la gdams pa'i phyir ro/ /mnyam par bzhag pas zhes bya ba la sogs pa la/ 'dir phyag rgya dang po gsum ni/ sngar sku la sogs pa'i sngags gsungs pa dang sbyar ro//de nas ni rtsa ba'i dkyil 'khor gyi bdag po'i'o/ /de nas ni sems ma rdo rje ma'i ste 'jug pa'i'o/ /de nas ni shAkya'i tog gi'o/ /de nas ni shAkya thub pa dang phyag na rdo rje'i'o/ /de nas ni rgyud kyi bdag po'i'o/ /de nas ni rin chen dpal gyi'o/ /de nas ni dkyil 'khor gnyis par bzhugs pa'i shAkya thub pa'i ste/'di nyid ngan 'gro dgag pa'i sdig pa gzhom pa la sbyar ro/ /de nas ni bsrung ma la sogs pa las thams cad pa'i ste/ kha cig ni 'di nyid me tog rgyas pa'i yin no zhes zer ro/ /de nas bzhi ni rtsa ba'i dkyil 'khor gyi yo byad do//de nas dgu ni go bar zad do/ /de nas me tog rgyas pa'i ste/ kha cig na re de nyid shAkya thub pa'i zhes zer ro/ /lhag ma rnams ni go sla'o/ /'jig rten gsum las rnam par rgyal ba'i gzugs su bri'o zhes bya ba ni 'ga' zhig de la mos pa la dgongs te/ de bas na bdag nyid gang la dad cing me tog lhung ba de nyid bri ba'o//dbus kyi bdag po la me tog lhung ba'am/ dkyil 'khor la mos pa'i dbang du byas te/ dkyil 'khor gyi tshul du bris la zhes gsungs so/ /lhag ma ni go bar sla'o/ /dkyil 'khor dang po'i 'grel pa'o// //da ni de nas brgya byin dang / / zhes bya ba la sogs pa tshe dpag du med pa'i dkyil 'khor ston te/ de nas zhes bya ba la sogs pa ni go sla'o/ /ko Ta k+Sha/ ko ta pa/ kot+ta/ ko tash+tsa/ ko Ta ka ra/ ko la k+Sha/ ko la pa/ ko la/ ko la bash+tsa/ ko la swA hA/ i ti zhes bya ba la/ tshig 'di dag gi don ci zhe na/ ngag 'di ni gnod sbyin rnams kyi yin pas/mi rnams kyis rab tu rig pa dka' ste/ ji skad du rgyal ba skyed ma las/ kye ma gnod sbyin rnams kyis brjod pa dang / skad dang sgra ni shes par rung gi /'phags pa rab 'byor 'di shes rab kyi pha rol tu phyin pa ston pa ni shes par mi rung ngo zhes gsungs so//ci'i phyir lha de dag rang skad legs par sbyar ba bzhag ste/ gnod sbyin gyi ngag gis stod par byed ce na/ bcom ldan 'das 'di ni lcang lo can du gnod sbyin gyi nang du 'khrungs pas de dag gi de nyid las de nyid gyi gsung du bstod pa ste/ ji skad du/ gnod sbyin bdag po nyi ma stong gi gzi//zhes gsungs pa lta bu'o/ /de la tshig 'di dag gis ni/ bcom ldan 'das de sa bcu la shin tu sbyangs pas/ sa yongs su rdzogs te/ sangs rgyas kyi sa kun du bzang po brnyes par ston la/ de nyid kyis sbyin pa la sogs pa pha rol tu phyin pa bcu yongs su sbyang zhing /rdzogs pa'i rkyen yang re re la sbyar ro/ /de bas na ko zhes bya ba ni twa ma zhes bya ba yin la/ TA la sogs pa ni rang rang gi pha rol tu phyin pa dang / sa'i rim pa ston cing / i ti zhes bya ba ni sad dz+wa ta zhes ston pa'o/ /kha cig na re tshig 'di dag ni dpal bde mchog las gsungs pa dang 'dra bas/bcom ldan 'das 'dis gru la sogs pa'i rlung la mnga' thob par ston pa'o zhes zer te/ bde mchog gi rgyud 'di nyid du yang tshul 'di ltar drang ba la gnod pa ci zhig yod la/ 'dir ni rlung gi gnas skabs ci yang ma yin te/ mtshar du ma 'brel pa smra bar zad do/ / mdo dang bsres pa las ni/ bla ma'i man ngag las rag lus par cher ston pa dang / der yang rlung gi tshul 'byung du rung bas/ de ltar dgongs par zad do zhes bya ba nas zhes bya ba la sogs pa ni go sla'o/ /legs par sgrubs shig ces bya ba ni/ legs par nyon la gus nyon te/ / zhes bya ba mtshon pa'o/ /thams cad kyi tshe dpag tu med pa khyab pa zhes bya ba ni/ gsang sngags gtsor gyur pa'i thabs rnams so/ /de ltar 'byung ba'i rgyu ni rnam par mi rtog pa'i ting nge 'dzin rdo rje ltar mi phyed pa nyid yin te/ de la snyoms par zhugs nas ni/ mngon sum du mdzad pa las rang gi thugs ka nas yi ge'i phreng ba/de bzhin gshegs pa thams cad kyi snying po ming gi khyad par tshe dang bsod nams dang ye shes dpag tu med pa 'phel bar byed pa zhes bya ba 'di phyung zhing / de phyung bas ngan song thams cad rab tu zhi ste zhes bya ba la sogs par sbyar ro/ /de nas oM puN+ye zhes bya ba la sogs pa'i gsang sngags rnams ni/bdag po dang / tshe mtha' yas dang / mi g.yo ba dang / rin chen tog dang / don yod grub pa rnams dang / rim bzhin du sbyar ro/ /sangs rgyas kyi mdzad pa bcu gnyis zhes bya ba ni/ sangs rgyas bcom ldan 'das rnams kyis mdzad pa ni dpag tu med pa yin mod kyi/'on kyang 'dzam bu'i gling 'dir rnam par smin pa'i sprul pa'i skus byang chub tu gyur pa'i mdzad pa chen po ni bcu gnyis te/ de ni ji skad du 'phags pa dad pa'i stobs bskyed pa la 'jug pa'i phyag rgya'i mdo las/ dus gcig tu phyogs bcu'i 'jig rten gyi khams rab 'byams thams cad du/dga' ldan gyi gnas mchog na bzhugs pa dang / 'chi 'pho ba dang / skye ba dang / mngon par 'byung ba dang / dka' ba spyod pa'i sbyor ba dang / byang chub kyi snying por gshegs pa dang / bdud bcom pa dang / mngon par rdzogs par byang chub pa dang /chos kyi 'khor lo rab tu bskor ba dang / yongs su mya ngan las 'da' ba dang / chos gnas pa dang / chos nub par ston pa la mkhas pa dang zhes gsungs te/ 'di rnams kyang stobs bcu rnam par gzhag pa las/ de lta bur mchog rnams bstan par shes par bya ste/de'i phyir na 'dir tshig gi don ni bcu gnyis kyis grangs su byas pa'i mdzad pa rnams ni/ mdzad pa bcu gnyis zhes bya ba la gnyis pa'i bsdus pa yin no/ /lhag ma rnams ni go bar sla'o/ /rmad kyi ya mtshan 'jig rten du snang bar gyur to zhes bya ba ni ltas chen po bco brgyad tshang bar 'byung bar ston pa'o//de nas zhes bya ba la sogs pas dkyil 'khor ston te go sla'o/ /khros pa las zhes bya ba ni nang ngo / /khros pa'i dbang du gyur par bri/ /zhes bya ba ni/ phyi rol rab tu mi sdug cing gtum pa bri bar bya'o/ /yang na khros pa'i dbang du ma rungs pa rnams gyur pa ste/skrag nas thal mo sbyor bar bri ste/ sum cu pa'i lha rnams lhung pa dang / bgegs rnams bred nas thal mo sbyor/ /zhes ji skad gsungs pa lta bu'o/ /de nas zhes bya ba la sogs pa ni/ dkyil 'khor sgrub pa la sogs pa ston pa'o/ /'chi bdag nyid ma rungs pas na sbrul lta bu ste/des 'jigs pa dang ldan pa rnams ni shi bas 'jigs pa'o/ /'chi bdag ste gshin rje de dag gzhom pas te/ re zhig dus ma yin par 'chi ba dang rnam par smin pa las byung ba yang / rig pa 'dzin pa'i mthu'i khyad par gyis gzhom par bya ba'i phyir gzhug par bya ste/de bas na dkyil 'khor 'dir ni tshe ring po don du gnyer ba'i slob ma gzhug go/ /ji ltar gzhug ce na/ de'i phyir oM badzra sa ma ya hUM zhes bya ba'i sngags 'dis khro bo rdo rje ti rIn+ti ri zhes bya ba'i phyag rgya rdo rje bsdams pa mthe bo dag ni gshibs pas mnan pa 'di nyid/ phyag rgya gang yin pa de nyid lha zhes bya ba'i tshul gyis rdo rje ti rIn+ti ri ste de bcing bar byas pa'o/ /lhag ma ni go sla'o/ /dkyil 'khor gnyis pa'i 'grel pa'o// //da ni de nas zhes bya ba la sogs pas rgyal po chen po bzhi'i dkyil 'khor ston te/ 'phags pa dpung bzangs kyis zhus pa las/'jig skyong tshangs pa brgya byin khyab 'jug dang / /drag po'am rlung sogs lha la phyag mi bya/ /de yis bshad pa'i chos la mi brten zhing / /de dag dka' thub mi spyad rtags mi mchod/ /de rnams chos la ngan sems mi bya zhing / /de spyod rnams la rnams kyang dga' mi bya/ / de dag bstod pa mi gdon sngags mi bzlas/ /sngags kyang mi bzlas de dag mdo mi bklag /ces gsungs la/ 'jig rten gsum las rnam par rgyal ba'i cho ga zhib mo las kyang / sdug bsngal sdig pa 'jigs 'gyur ba'i/ /'jig rten lha ni yongs mi bsten/ /zhes gsungs pa ma yin nam/'dir de dag ji ltar sgrub par rigs she na/ 'di la lan ni bdag gis sngon du mang du brjod zin na/ gzhan yang der ni lha mo tri pu ra dang tsa muN+Da la sogs pa nyi tshe ba bkag la/ 'dir ni bcom ldan 'das nyid kyis byin gyis brlabs pas cung zad dman par brjod pa'am/ yang na 'di dag ni gdul bya'i dbang las 'jig rten par snang yang / 'jig rten las 'das pa nyid de/ ji skad du 'phags pa de kho na nyid 'dus pa las/ e ma'o sangs rgyas thams cad kyis/ /thabs ni snying rje'i bdag nyid de/ /gang du thabs kyis 'dul mdzad na/ /lha rnams su yang 'gyur ba yin//zhes gsungs la gzhan las kyang / gang dang gang gi gzugs kyis ni/ /lus can rnam par 'dul 'gyur ba/ /thugs rjes non pa de dang der/ /brtse ba'i bdag nyid ston par mdzad/ /ces gsungs so/ /rgya cher ni sngar brjod zin to/ /de bas na 'di la nyes pa med do/ / de la 'dir thun mong du bdag po la mchod pa dgu'am lngas mchod cing / 'jig rten pa rnams la ni mchod pa lnga kho nas mchod do/ /dbang bskur ba yang ji ltar smos pa bdag po bcas pa 'ba' zhig tu zad do/ /dam tshig sems dpa' yang bdag po kho nas bya'i/ 'jig rten pas ma yin la/gang la me tog bab pa de la yang khyad par du bdag po kho na bsgrub par bya'o/ /rgyal po chen po bzhis zhes bya ba la sogs pa ni/ gzhung nye bar gzhag pa ste go sla'o/ /bcom ldan 'das ni spyan drangs te zhes bya ba ni/ oM e h+ye hi zhes bya ba la sogs pas so/ /de nyid kyi mthar ming gi zhi ba gsal te/d+h+r-i ta rASh+TA ya swA hA zhes bya ba la sogs pas rim pa bzhin du de nas rgyal po rnams des spyan drang ngo / /lhag ma ni go sla'o/ /de nas grwa na gzhag pa'i zhes bya ba ni/ pad+ma 'dab ma brgyad pa'i phyogs bzhir ni rgyal po bzhi'o/ /mtshams bzhir bkod pa'i bum pa legs par byin gyis brlabs pa bzhis ni slob ma de gnas bsrung ba'i bum pa nas brtsams te chu'i dbang bskur ro//de nas de dag rab tu brtan zhing nges par bya ba'i phyir/ dbang lnga pa bcom ldan 'das phyag na rdo rje'i rdo rje rtse mo lnga pa'i phyag rgya ras sngon pos g.yogs pa slob mas mchod la/de nas de yis slob ma'i spyi bo dang / mdzod spu dang / mgrin pa dang / snying gar bzhag pas slob ma de dbang ni legs par bskur bar bya ste/ rab tu grub par byed pa ni phyag rgya'i dbang 'di nyid yin no/ /bdag po'i phyag rgya'i dbang de nyid dang por byas te/ de nas ngal sos pa'am/ gnas bsrungs nas brtsams te/ phyag rgya gnas bzhir gzhag pa'i go rims kyis dbang bskur ba'i dkyil 'khor nyid du de ltar dbang bskur na/ mthong ba'i chos 'di nyid la rgyal po ma yin pa rgyal por 'gyur ba la sogs pa'i yon tan 'thob ste/ 'dir rin po che bdun dang /nye ba'i rin po che bdun dang / bkra shis kyi rdzas bcu drug nges par sbyin no/ /lhag ma ni go sla'o/ /lan bzhir zhes gnyis smos pa ni dkyil 'khor lan bzhir bris la/ der lan bzhir 'jug cing dbang bskur gyi dkyil 'khor gcig tu ma yin te/ 'bad pa'i mthu las 'bras bu khyad par can 'byung bas so//re dang bsam pa zhes bya ba la re ba ni 'grub par re ba yin la/ bsam pa ni dogs pa dang bcas pa'am/ nges pa gang yang ma byas par bsams pa'o/ /dkyil 'khor gsum pa'i 'grel pa bshad pa'o// //da ni de nas zhes bya ba la sogs pas/phyogs kyi bdag po rnams kyi dkyil 'khor te/ phyogs skyong ba zhes bya ba la sogs pa ni go sla'o/ /oM aM zhes bya ba ni dbang ldan te/ lhag ma ni rang gi ming dang 'brel pa yin pas go sla'o/ /de nas zhes bya ba la sogs pas ni dkyil 'khor ston te/ 'dir 'khor lo rtsibs brgyad pa la shar gyi rtsibs la lha gsum bkod pa'am/pad+ma 'dab ma brgyad pa'am/ yang na lha'i snam bu dang ldan par bya'o/ /tshig rnams ni go sla'o/ /bum pa rnams kyis dbang bskur ro zhes bya ba ni bum pa bcu ste/ phyag rgya yang thams cad du snga ma bzhin no/ /de nas phan par 'dod pa yis//bsgrub phyir snying po sbyin par bya/ /zhes bya ba ni/ sngon bzhin du lha yongs su bzung ba ste/ 'dir ni bdag po dang gang la me tog bab pa de sbyin la/ bdag po la me tog bab na ni 'jig rten pa'i lha gang 'dod pa zhig bzung ngo / /lhag ma ni go sla'o/ /dus ma yin par 'chi ba brgyad po zhes bya ba ni/nad par rim gro pa dang mi ldan pa'am/ sman pas log par brtsal ba dang / rgyal po'i chad pa dang / mi ma yin pas mdangs 'phrog pa dang mes tshig pa dang / chus khyer ba dang / dud 'gro ma rungs pas brtsal ba dang / g.yang du lhung ba dang / dug dang byad dang /ro langs kyis brtsal ba dang / bkres pa dang skom pas 'chi ba dag ni/ dus ma yin par 'chi ba chen po dgu yin la/ dus ma yin par 'chi ba phra mo dpag tu med do zhes 'phags pa de bzhin gshegs pa bdun gyi sngon gyi smon lam gyi khyad par rgyas pa'i mdo las gsungs te/ de las 'dir ni drug pa dang brgyad pa gcig tu byas te brgyad du bzhag ste/ gdug pa can nyid du 'di dag rab tu 'dra bas so/ /lhag ma ni go sla'o/ /yi dwags dang 'dres ma 'jigs par bgyi zhes bya ba la/ yi dwags ni yi dwags kyi rigs sum cu rtsa drug la bsams la 'dre ni gang sha za rnams te/lhag ma ni go sla'o/ /de nas 'byung po thams cad kyi bdag po dbang byed ces bya ba la sogs pa ni/ sngags bsgrub pa dag la ni lha'i bu'i bdud dang / log 'dren dag phal cher bar du gcod la/ 'di ni de gnyi ga'i bdag por gyur pas na/ 'dir bsrung ba las bya bar dam bcas pa'o//tshig gi don ni go sla'o/ /dkyil 'khor bzhi pa'i 'grel ba'o// //da ni de nas zhes bya ba la sogs pas gza' chen po'i dkyil 'khor ston te/ gza' chen po zhes bya ba la sogs pa ni go sla'o/ /srin po byang stod sgra gcan bri/ /zhes bya ba ni/ srin po'i mtshams sam/yang na byang gi stod de nub byang gi mtshams su gza' lha min dbang po sgra gcan zhes bya ba 'di bri ste/ de ni phyogs de gnyis la brten/ /zhes grag go/ /dkyil 'khor gyi phyi rim lha'i snam bu nyid khor yug tu dgongs la/ der smin drug la sogs pa'i rgyu skar thams cad sngon bzhin du bri bar bya'o//lhag ma ni go sla'o/ /e badzra zhes bya ba la sogs pa la/ sngags dang po ni slob ma la gsang ba bsgo ba'o/ /gnyis pa ni yol ba'i nang du drang ba'o/ /gsum pa ni me tog dor ba'o/ /rgyu skar dang zhes bya ba ni smin drug la sogs pa'o/ /skad cig dang zhes bya ba ni/ de la brten pa'i lha ste/yud tsam dang thang cig kyang de bzhin no/ /kar na zhes bya ba ni zhag gdags pa'o/ /zla tshigs zhes bya ba ni zla ba ril po'o/ /sbyor ba zhes bya ba ni dus mtshams sbyor ba bzhi po gang du khams rab tu 'khrug pa skye ba'o/ /khyim zhes bya ba ni srang la sogs pa'o/ /nyi tshod ces bya ba ni nyi ma ldog pa'i nyin mtshan ring po gnyis so//'jug phod pa zhes bya ba ni/ bzang po'am/ sgra gcan nyid do/ /'jig rten pa rnams ni bde ba dang sdug bsngal phal cher 'di dag gis byas par 'dod de/ 'di dag kyang rang gi ming smos pa'i dngos po la srog gi dbang po gzhan ltar brten pas na/ rten gyi ming brten pa la spyod pa ste/ de'i phyir 'gro ba rnams kyi gnas dang rang bzhin ni bsam gyis mi khyab ste/ bcom ldan 'das kyis kyang / dge slong dag stong gsum gyi stong chen po'i 'jig rten gyi khams na gnas pa'i sems can ni ches nyung gi /ngas shing rta'i 'phang lo tsam la lha'i spyan gyis gzigs pa'i sems can ni rab tu mang ngo zhes gsungs so//'di dag ni byed pa yang ma yin te/ ji skad du/ gang la yang byed pa po gzhan med de/ lus dang ngag dang yid kyi las/ /dge dang mi dge rang byas gang / /de yi 'bras bu 'jig rten spyod/ /ces bstan pa'o/ /'on kyang byis pa dag la de dag byed pa por khas blangs te/ngan 'gro'i dkyil 'khor las bzlog pa'i phyir grong dang zhes bya ba ni/ gang na 'khrig pa ma spangs pa gnas pa'i khyim mo/ /grong khyer dang zhes bya ba ni/ gang la rig pa'i gnas mchog bco brgyad spyod pa'i grong gi tshogs so/ /grong rdal dang zhes bya ba ni/grong khyer rab tu mang po can sgyu rtsal drug cu rtsa bzhi tshang bar spyod pa'o/ /ljongs dang zhes bya ba ni/ chos lugs gcig gis bsdus pa'i dkyil 'khor chen po'o/ /rgyal po'i pho brang zhes bya ba ni/ gang na rtag tu rgyal po bzhugs pa'o/ /pho brang 'khor zhes bya ba ni/ gang na btsun mo gnas pa'i khang pa'o//rgyal po'i pho brang gi gnas glang po che'i ra ba dang / rta'i lhas dang / srang dang / dbang po phur pa la sogs pa'o/ /'jigs pa chen po 'byung ba'i tshe/ /zhes bya ba ni/ 'jigs pa chen po brgyad dang / than pa mu ge la sogs pa'i tshe/ des bdag cag mchod na zhes bya ba ni/dkyil 'khor 'di nyid bris nas de la mchod pa'o/ /dkyil 'khor lnga pa'i 'grel pa'o// //da ni de nas klu chen po brgyad kyi zhes bya ba la sogs pas/ klu chen po brgyad kyi dkyil 'khor ston te/ phuHzhes bya ba'i sgra 'di ni klu rnams kyi rang gi rig pa srog ltar gces pa ste/ de bcom ldan 'das la ser sna med par phul ba nyid kyis/ bcom ldan 'das rdo rje 'chang de mnyes pa nyid du byas pa'o/ /oM phuHzhes bya ba la sogs pa ni/ mtha' yas la sogs pa smos pa dang rim par sbyar ro/ /ltos 'gro chen po sdig par bri/ /zhes bya ba ni mtha' yas la sogs pa nyid do//de bas na bdun pa mang po tshig can bsdus pa'o/ /kha cig na re 'dir mtha' yas la sogs pa las gzhan pa klu ma rungs pa gang yang rung ba cig brdzis par bya'o zhes zer ro/ /chung ma yis zhes bya ba ni sbrul mgo gsum gsum pa rang re dang 'dra ba yis so/ /gtor ma dang zhes bya ba la sogs pa ni/klu rnams yid dga' ba'i kha zas sna tshogs pa gzhag pa'o/ /'byung po mar dang zhes bya ba ni/ til mar dang / sta rga'i mar la sogs pa dgag pa'o/ /sbrul mgos zhes bya ba ni sbrul mgo'i phyag rgyas so/ /sbrul mgo can rnams dgug ces bya ba ni/ lhag ma dgu po rnams te/de yang oM e h+ya hi b+ha ga wAn shrI badzra hUM ka ra ma hA ka ru Ni ka dr-i sh+ya dzaHhUM baM hoHzhes bya ba de nyid las mtshan gsol to/ /yamAn+ta zhes bya ba la sogs pa dang / phu ta dzaHhUM baM hoHzhes bya bas so/ /de nas bu ni zhes bya ba ni slob ma bzang po dang / rang gi bu'o/ /kha cig na re bu zhes bya ba rang gi bu tha mal pa ni ma yin te/pha la ngan du smra ba srid pa'i phyir ro/ /de bas na dpal bde mchog las kyang / spun dang bu gcig lhan cig tu/ /bde dang sdug bsngal kun 'byung bya/ /ye shes der bstan mi bya ste/ /sngags dang phyag rgya de bzhin no/ /zhes gsungs so zhes zer te/ de ni nges pa ma yin te/ gsang ba zla ba'i thig le las/ /gsang sngags rnams dang phyag rgya dang / /de bzhin thabs dang shes rab rnams/ /thabs dang shes rab thams cad kyang / /sngags pas gsang ba'i rnal 'byor gyis/ /dmyal ba ngan song bzlog pa'i phyir/ /bu dang slob ma la sbyin bya/ / zhes gsungs la/ 'phags pa de kho na nyid 'dus pa las kyang / slob dpon ma yin gzhan dang ni/ /slob ma ma yin bu min pa'i/ /mdun du phyag rgya mi brjod de/ /de dag gsang bas phyag rgya 'grub/ /ces gsungs te/ de bas na rang bzhin bzang po 'ba' zhig gtsor bya'i/ rigs nye ba dang /ring ba dang / pho mo la sogs pa ni 'dir mi gzung ngo / /de bzhin du rgyal po dang zhes bya ba la sogs pa gzhan du 'dren pa rnams kyang bsal te mi dgag par byas pa'o/ /lhag ma ni go sla'o/ /de nas bslab pa bshad de zhes bya ba la sogs pas ni/ dug bsal ba'i sgrub pa'i thabs ston te/'di mi rnams la 'tshe ba'i klu ni/ glang po che dang / rta dang / sbrul dang / sbal pa dang / nya dag gi rigs su gnas par gsungs la/ de dag las kyang sbrul gyi rigs ni mi rnams la rab tu 'tshe ba mang ba yin zhing / de yang rigs brgyad cu yod de/ 'phags pa dpung bzangs kyis zhus pa las/sa yi steng ni sbrul ni brgyad cu dag/ /gzhan la gnod pa byed cing rnam par 'khyam/ /zhes gsungs so/ /de la dug med pa'i rigs ni/ bcu gnyis su zad de/ lhag ma rnams ni dug dang bcas pa'o/ /de la dug can de dag kyang rigs rnam pa gsum ste/khro bo dang lus 'khyil pa dang / gdengs ka can rnams so/ /de la gang gi tshe sbrul khro bos zin pa de'i tshe ni/ rma'i sgo skya la skrang pa dang / 'byil zhing snum la khrag 'dzag pa dang / cung zad skam zhing bad kan rgyas par 'gyur ro/ /gal te sbrul lus 'khyil pas zin na/ rma'i srol chen po la/ ser zhing rab tu skrang ste/ mkhris pa rgyas par byed do/ /gal te sbrul gdengs ka can gyis zin na/ rma'i sgo gnag ste rlung 'phel bar byed do/ /klu'i rigs ma lus pa'i dug dbye ba ni lta ba dang / dbugs dang / reg pa dang / so'i dug dang bzhi nyid do/ /de la reg pa ni lus dang /kha chu dang bshang gcis reg pas dug tu gyur te/ lta ba ni mig gdug pa ste/ mthong ba tsam gyis dug tu 'gyur ba'o/ /dbugs ni kha rlangs me lta bur tsha ba'am chu ltar bsil bas reg na dug tu 'gyur ba'o/ /so'i dug ni mche bas btab pa las gyur pa'o/ /de yang dang po gsum ni mdze nad dang /lkugs pa dang / zha ba dang / 'theng ba la sogs pa dang / lto sbo ba la sogs par 'gyur ro/ /so'i dug ni dbyibs lta bur lta ba ste/ sngar bstan pa gsum nyid do/ /de yang rnam pa bzhi ste/ ji skad du/ 'phags pa dpung bzangs kyis zhus pa las gsungs pa/zos pa de yang rnam pa bzhir 'gyur te/ /mche bas zin dang sos bcad gtad pa'o/ /gang gis mche ba gcig gis khrag byung rjes/ /de ni dug byung bas ni zin par bshad/ /gang du mche ba gnyis kyis btab nas su/ /khrag phyung bar ni 'gyur bar zos pa'o/ /gal te mche ba gsum gyis sha bcad na//de ni bcad par gyur pa yin zhes bstan/ /gang du mche ba bzhi yis btab nas so/ /sbrul gyi lus ni bzlog par 'gyur ba de/ /gtad nas zos pa yin zhes bshad pa ste/ /de ni sman rnams kyis kyang bzlog par dka'/ /me yi rang bzhin gnad du 'phen pa'i dug /mtshon dang 'dra zhing mtshungs pa dag /ji ltar sngags kyis rab tu zhi 'gyur ba/ /de bzhin sman gyis zhi bar mi nus so/ /ji ltar me dpung chen po bud shing la/ /nges par bsregs la char 'bab skad cig gis/ /zhi bar 'gyur ba de bzhin dug dag ni/ /me dpung lta bu'ang sngags kyis zhi bar byed//dug gi mthu rtogs shes nas rab bsgrims te/ /gsang sngags cho ga bzhin brlabs bsgrubs na ni/ /ba lang khyu na seng ge ji lta bar/ /dug dang sbrul dang dogs med lhan cig rtse/ /zhes so/ /de dag gi dug dbyung ba'i rgyu yang de nyid las gsungs pa/dug 'phrog khro bo'i dbang gyur skrag pa dang / /de bzhin sngags pa'am bkres pa'i zas phyir ram/ /sha khon yod pa'am gshin rjes bstan pa'am/ /lus la brdzis na de dag za bar byed/ /ces gsungs so/ /byis pa gang dag yul gyi rang bzhin ma shes pa de dag la dug de dag gis gnod par 'gyur te/'di skad du dpal sangs rgyas thod pa las gsungs pa/ tha mal yul rnams sbrul yin te/ /yul rnams kyi ni nyes pa dug /lha rnams yul rnams ma shes phyir/ /thams cad dus su zin pa yin/ /zhes te/ byis pa de lta bu rnams la thugs brtse bas/rgyud kyi rgyal po rnams las dug bsal ba'i cho ga rgyas par gsungs la/ rgyud 'dir yang / mig dang / dbugs dang / reg pa dang / mche ba'i dug rnams bsal ba'i phyir/ bsam gtan dang / sngags dang / phyag rgya'i bya ba bla na med pa gsungs so/ / de la re zhig rnal 'byor pas yid dmigs pa la gnas pa thob par byas la/ /klu'i dkyil 'khor ji skad du gsungs pa las/ cung zad du rdo rje 'chang dbu la sbrul mgo ji snyed pa de snyed kyi 'od zer dkar po kha ba ltar bsil bas bskor ba bskyed la mchod pa'i bar du bya ste/ phud ces bya ba 'bum phrag gcig bzlas te/'di ni sngon du bsnyen pa'o/ /de nas bong la sogs pa'i dbyig dug blangs te/ srang tshad la legs par bcal la/ dkyil 'khor snga ma bzhin bsams la/ bdag gi lag pa g.yas pa'i mthil du yang / phud ces bya ba'i yi ge kha dog dkar po las/pad+ma dkar po 'dab ma brgyad pa'i 'dab ma la/ lha rnams gnas par bskyed la/ dkyil 'khor gnyis las 'od zer dkar po byung bas dug de dag la phog pas/ bdud rtsi'i bdag nyid du bsam zhing / dug de'i steng du yi ge phuHdkar po gnas pa las/ 'od zer dkar po byung bas kyang de ltar bsam mo//yang na dug gi 'og tu yi ge phuHnag po las byung ba'i rlung gi tshogs drag pos gtor bar bya'o/ /yang na lag pa sbrul mgo'i zhags pa'i phyag rgya bcings te/ phuHzhes brjod pa dang phyag rgya'i stobs kyis dug drangs te/ sa dang chu dang me dang ka ba la sogs par spo ste/rnal 'byor 'di gsum gang yang rung bas dug bsal bar gyur pa ni/ dug de srang la bcal ba nyung bar gyur pa na'o/ /de nas de mda' dug gam sbrul gyi dug rnams rnal 'byor gang la goms pa de nyid kyis bsal te/ 'di ni nang gi rnal 'byor kho nas dug bsal ba yin la/phyi rol gyi bya bas dug bsal ba ma gsungs so/ /de la 'dir phyag rgya ni/ lag pa g.yas pa'i mthe bong dang mdzub mo rtse sprad pas zhags mig ltar byas te/ sor mo gzhan brkyang la/ cung zad dgu por byas la/ sbrul mgo'i gdengs ka ltar bya'o/ /pags pa sha dang zhes bya ba la sogs pa ni/rab tu zhe na pa'i dug la sogs pa rnams sel bar ston to/ /phud ces bya ba'i lag pas drang zhes bya ba ni rnal 'byor gsum gyi nye bar mtshon pa'o/ /khu tshur gyis kyang zhes bya ba ni/ phyag rgya dang bral ba'i lag pas kyang zhes bya ba'i don to/ /dkyil 'khor drug pa'i 'grel pa'o// //de ni de nas lha chen po zhes bya ba la sogs pas/ lha chen po rnams kyi dkyil 'khor ston te/ 'di ni lha chen po rnams kyi bdag po yang yin la/ 'jigs par byed pa chen po yang yin la/ de ni lha'i lha chen po zhes zer te/ rang gi gzugs dang lag ca dang / ro phyed tshig pa za bas dur khrod du lhag ma rnams 'jigs par byed pa'am/bcom ldan 'das phyag na rdo rje khams gsum gyi bdag po rnams btul ba na/ 'di 'jigs pa'i gzugs bstan te/ bcom ldan 'das la kwa'i gnod sbyin khyod kyang nga'i bka' nyon cig smras pa'i phyir ro/ /yang na 'di snying rje nyid kyis 'jigs su rung bar sprul te/'gro ba rnams gdul ba'o/ /bud med chen po brgyad kyis bskor/ /zhes bya ba ni/ 'di ni rtag tu dus mtshan dang / tshangs ma dang / khyab 'jug dang / gzhon nu ma dang / phag mo dang / gshin rje ma dang / dbang mo dang / lus ngan ma la sogs pa'i ma mo rang gi chung ma drag mo dang bcas pa'i ma mo rnams kyis bskor ba'o//bcom ldan 'das la zhes bya ba la sogs pa ni go sla'o/ /'jigs par byed pa'i sgra phyung nas/ /zhes bya ba ni/ ha ha zhes drag tu smras nas so/ /'di dag gi gsang sngags rnams ni sngar lha rnams bstan pa dang sbyar ro//bum pa'am mgo bo'i thod pa ni/ /de ltar brgyad kyis dbang bskur ro/ /zhes bya ba ni rang rang gi sngags kyi mthar a b+hi Shiny+tsa maM zhes brjod de dbang bskur la/ yang phyag rgya'i dbang bskur ro/ /de nas las rnams zhes bya ba la sogs pa ni dngos grub ston te/ dkyil 'khor du bsgrub par bya'o//lhag ma ni go sla'o/ /sa rnams sbyin pa ma gtogs par/ /zhes bya ba ni/ 'di dag rab tu mthu dang ldan par ston pa ste/ sa sbyin pa ni rang gi sems rab tu sbyang ba 'ba' zhig la rag las pas de ni mi nus te gzhan sbyin pa ste/ ji skad du/ 'phags pa de kho na nyid 'dus pa las/ de nas bcom ldan 'das kyis lha'i bdag po de dag la/'di skad ces bka' stsal to/ /grogs rnams kho bo la bla na med pa yang dag par rdzogs pa'i byang chub sbyin par sgrubs shig /de nas de dag gis 'di skad ces gsol to/ /bcom ldan 'das bdag cag gis byang chub rtsol bar mi nus so//ci ste bdag cag gis nus par gyur na/ bdag cag nyid yang dag par 'tshang rgya bar bgyid do zhes gsungs pa bzhin no/ /bde chen zhes bya ba ni sgrub pa po la'ang drag po ste nges so/ /hUM gi tshul gyis rtsol zhes bya bas nga rgyal byas la/ blang ba'am/ hUM zhes brjod cing dngos grub ster ba'o//lhag ma ni go sla'o/ /skrag na de ma thag tu gsod/ /ces bya ba ni 'jigs par mi bya ste/ 'phags pa de kho na nyid 'dus pa las kyang / 'jigs pas lhag pa'i bgegs gzhan med/ /ces gsungs la/ rdo rje 'jigs par byed pa las kyang / de la 'jigs pa chen po 'byung bar 'gyur te/ sngags pas de la 'jigs par mi bya'o/ /ji ltar 'jigs pa de ltar bgegs kyi bar chad du 'gyur ro/ /bar chad du gyur na dngos grub med de/ de'i phyir sngags pas 'jigs par mi bya'o zhes gsungs so/ /gal te 'jigs pa na/ hUM hUM zhes 'brug ltar sgrogs shing / rang gi lha'i rnal 'byor dran pas zhi bar 'gyur ro zhes kyang dpal rdo rje 'chang gis gsung ste/ de bas na hUM gi tshul gyis gsol zhes sngar gsungs so/ /ci'i phyir rab tu zhi ba'i lha rnams sgrub pa po la skrag par byed/ thog ma nas rab tu zhi ba'i lus kyis dngos grub mi sbyin zhe na/lha rnams ni rab tu zhi bar gnas te/ sgrub pa po'i bsam pa'i dbang gis las kyi bag chags dang mthun par drag po la sogs par mthong ste/ sngon chad ser sna bstan pa'i phyir/ /bgegs ni rang gi sems las byung / /zhes tshigs su bcad pa gsungs pas so//dkyil 'khor bdun pa'i 'grel pa'o// //da ni de nas zhes bya ba la sogs pa 'jigs byed de dag nyid zhi bar snang ba'i dkyil 'khor ston te/ rang gi dkyil 'khor chung ma rnams/ /zhes bya ba ni sngar bstan pa nyid zhi bar snang bar mgul nas 'khyud pa ste/ 'dir de dag gi don ni sngar smras zin to//mtho ris kyi lam zhes bya ba ni dge ba bcu'o/ /bder 'gro lam zhes bya ba ni bsam gtan bzhi'o/ /ngan song ma lags pa'i lam zhes bya ba ni 'jig rten pa'i yang dag pa'i lta ba'o/ /sgrib pa ma mchis pa'i lam zhes bya ba ni/ tshogs kyi lam phal pa'o//dben pa'i lam zhes bya ba ni thar pa'i cha dang mthun pa'i dge ba'i rtsa ba'o/ /rnam par dben pa'i lam zhes bya ba ni/ sbyor ba'i lam dang po drod ces bya'o/ /'byung ba'i lam zhes bya ba ni rtse mo'i bdag nyid do/ /mya ngan las 'das pa'i lam zhes bya ba ni bzod par 'gyur ba'o/ /dam pa'i chos kyi lam zhes bya ba ni 'jig rten pa'i chos mchog go//bde 'gro'i lam zhes bya ba ni mthong ba'i lam dang / gzugs med pa'i snyoms par 'jug pa bzhi'o/ /spang ba'i lam zhes pa ni/ bsgom pa'i lam nyid do/ /nyon mongs pa med pa'i lam zhes bya ba ni/ bar chad med pa'i lam rdo rje lta bu'i ting nge 'dzin to//bstan par bgyi'o zhes bya ba ni/ dngos dang brgyud pas zhes so/ /tshig de dag kyang rang rang gi lam dang ji ltar 'tsham par dgrol te/ bdag gis ni gzhung mangs pas 'jigs pas ma bkrol lo/ /sangs rgyas nyid kyi 'grub pa'i lam bstan par bgyi'o zhes bya ba ni/mdor na lam dpag tu med pa de dag kyang sangs rgyas la sbyar ro zhes bya'o/ /byang chub sems dpa' nyid ni 'dir bden pa mthong ba yin la/ de'i lam nyid de 'grub par byed de/ pha rol tu phyin pa rnams so/ /bstan par bgyi'o zhes bya ba ni snga ma bzhin no/ / rdo rje 'dzin pa nyid 'grub pa'i las ni dbang bskur ba dang bsnyen pa la sogs pa'i lam ste/ de snga ma ltar bstan par bgyi'o/ /de la byang chub sems dpa' dang / rdo rje 'chang ba 'di gnyis khyad par ci yin zhe na/ pha rol tu phyin pa dang gsang sngags kyi sgo nas sa brgyad pa'i bar du mi 'dra bar bzhugs pa gnyis la de skad ces bya ste/ji skad du/ rgyal ba'i zhing rnams sa 'thob kyang / /yid bstod par ni 'gyur min te/ /ji srid sa brgyad la gnas par/ /theg dman 'jigs pa de la yod/ /gsang ba'i dkyil 'khor chen po 'dir/ /rgyal ba'i sras po rang nges na//yid ches par ni gyur pa na/ /theg chen po la gzhol ba yin/ /zhes gsungs pa ste/ sa dgu pa la ni lam dbyer med pa'o/ /dus thams cad du zhes bya ba nyin mtshan phyed par sngar bstan pa'i 'jigs pa thams cad las tshe 'di la bsrung ba dang skyes nas bskyab pa dang / lan grangs gzhan la yang sba bar bgyi'o/ /lhag ma rnams ni go sla'o/ /dkyil 'khor brgyad pa'i 'grel pa ste/ 'jig rten gyi lha'i dkyil 'khor drug rdzogs so// //da ni 'di nas mar tshe dpag tu med pa'i dkyil 'khor gnyis pa bstan pa'i phyir/ de nas bcom ldan 'das phyag na rdo rjes nyid kyi dkyil 'khor la kun du gzigs pa dang /yang 'dzum pa mdzad pa'i chos gsungs pa'i rtags gnyis bstan to/ /de'i byin rlabs des/ 'khor gyi dkyil 'khor de der rang dbang med par sa gzhi dang bcas par g.yos shing / de'i dbang las lus kyang rab tu g.yos la de nyid kyis de dag gi sems kyang sngon las gyur pas yang dag par rab tu g.yos so//dga' ba'i tshal de yang rim pa de bzhin du chung ngu dang chen po dang chen po'i chen por 'gul/ rab tu 'gul/ yang dag par rab tu 'gul lo/ /der gnas pa'i 'od dang zer de dag kyang rim pa gsum snga ma ltar 'bar/rab tu 'bar/ yang dag par rab tu 'bar ro/ /ngo mtshar de'i dbang gis 'khor de rim pa gsum du rim gyis dgod pa la sogs pa dang / rtse ba la sogs par byed do/ /gzhan yang ltas chen po bco brgyad 'jig rten du snang bas na/ rmad kyi ya mtshan zhes bya ba la sogs pa smos so//de nas zhes bya ba la sogs pa ni/ zhus pa dang lan te go sla'o/ /de bzhin gshegs pa thams cad kyi snying po'i rig sngags 'di/ sku dang gsung dang thugs rdo rje rnams las phyung ngo zhes bya ba ni de bzhin nyid do/ /gshegs pa zhes bya ba ni/ yi ge bsgyur ba'i tshul gyis gsungs pa ste/ de bzhin nyid gsungs pa'o/ /ji skad du/ stong nyid smra ba'i khyu mchog ste/ /zab cing rgya che'i sgra sgrogs pa/ /zhes gsungs pa'o/ /yang na de bzhin nyid rtogs pa ni gshegs pa ste/ ji skad du/ 'du shes tsam yang spangs pa'i phyir/ / rang gi ngo bo bstan du med/ /ye shes rang rig ces bya ba/ /de ni de bzhin gshegs zhes bya/ /zhes gsungs pas so/ /thams cad ces bya ba ni/ bcom ldan 'das tshe mtha' yas pa nyid de/ tshogs dang chos kyi sku dag dang / /'gro ba'i don ni spyod pa yis/ /sangs rgyas thams cad mnyam pa ste/ / sku tshe rigs dang tshad kyis yin/ /zhes gsungs pas/ sangs rgyas gcig nyid thams cad do/ /snying po zhes bya ba ni/ yi ge 'chad par 'gyur ba rnams snying gar bsgoms pas/ yid rtogs shing yid la 'dod pa sbyin pas snying po ste/ yid la 'dod pa'i cho ga yis/ /yid la gang 'dod 'grub par 'gyur//ting 'dzin sgrub pa snying la gnas/ /de bas snying po zhes bya'o/ /zhes gsungs pa'o/ /snying po de nyid bsgoms pas rig pa skye ba la sogs par byed pas na de nyid rig sngags te/ ji skad du/ ma rig pa nyid gzhig pa dang / /ngag gi rigs mchog bsgrub pa'i phyir/ /dngos grub dam pa yod pa ste//de bas rig sngags zhes bya'o/ /zhes gsungs so/ /'di zhes bya ba ni don nye bar gnas pa 'dren pa'i tshig gi phrad do/ /sku gsung thugs rdo rje las zhes bya ba la/ sku la sogs pa dag dbyer med pa ni rdo rje ste/ sku dang gsung thugs gang dag yin/ /mi phyed stong pa'i dngos phyir na/ / rdo rje zhes ni rab tu bstan/ /de bas dbye ba thams cad 'byung / /zhes bshad do/ /phyung ngo zhes bya ba ni skyes pa ste/ de ltar sngags 'di ni chos kyi dbyings kyi ngo bo nyid las 'byung bar ston te/ gnas de ni gsang sngags rnams kyi thun mong ma yin pa'i phyir ro/ /de ltar yang rnam par snang mdzad mngon par byang chub pa'i rgyud las gsungs pa/'jig rten 'das pa'i sngags rnams kyi/ /thog ma'i byed pa med pa'o/ /zhes pa dang / yang de nyid las/ gsang ba'i bdag po gzhan yang gsang sngags kyi mtshan nyid ni/ sangs rgyas thams cad kyis ma byas/ byed du ma bcug rjes su yi rang ba ma yin no//de ci'i phyir zhe na/ 'di ni chos thams cad kyi chos nyid de/ 'di ltar de bzhin gshegs pa rnams byung yang rung ma byung yang rung / chos rnams kyi chos nyid de ni ye nas gnas pa ste/ de yang 'di ltar gsang sngags rnams kyi gsang sngags kyi chos nyid do/ /gsang ba'i bdag po de la gang gi tshe yang dag par rdzogs pa'i sangs rgyas thams cad mkhyen pa/thams cad gzigs pa 'jig rten du byung ba de'i tshe/ chos nyid tshul sna tshogs dang dgongs pa sna tshogs kyis sems can bsam pa sna tshogs pa rnams la tshig sna tshogs dang / yig 'bru sna tshogs dang / yul gyi nges pa'i tshig tu brjod pa sna tshogs dang /dbyangs sna tshogs su go ba rnams su byin gyis brlabs te gsang sngags kyi tshul 'chad do zhes pa dang / yang de nyid las/ ji ltar nam mkha' chags med spyod yul can/ /'gro ba kun gyi gnas su gyur ba ltar/ /de bzhin rnam par dag pa'i chos nyid de/ / srid gsum ma lus 'byor ba 'byung bar byed/ /ces so/ /sngags phyung ba de gang zhe na/ oM puN+ye puN+ye zhes bya ba la sogs pa ste/ 'dir kha cig na re/ phyag na rdo rje tshe dpag tu med pa'i dkyil 'khor du ni/ saM pa ro pa tsa ya ka ri ni zhes gsungs pa 'dir ni saM pa ro ba tsi te zhes gsungs pas/ slob pa dang / mi slob pa'i bye brag go zhes rtog pas zer te de ni ma yin te/ 'di nyid las/ sangs rgyas kun pas sngar sangs rgyas/ /zhes bstod pa'i phyir ro/ /snying po'i rig pa'o zhes bya ba ni bshad zin to/ /nye ba'i snying po'i rigs pa'o/ /zhes bya ba ni 'dis lha dang 'dod pa'i dngos grub dang nye bar byed cing snying la gnas pas na snying po ste/rig pa ni snga ma bzhin no/ /snying po nye ba'i snying po'i rig pa'o zhes bya ba la/ snying po snga ma lta bu nyid lha la sogs pa dang nye bar byed pa yin la de nyid snying po ste/ snying dga' bar byed cing ma rig pa la sogs pa sel bar byed pa'i phyir rig pa'o/ /snying po yang dag par bskul ba'i zhes bya ba ni/snying po nyid lha rnams yang dag par mngon du phyogs par bya ba'i phyir skul bar byed pa ste 'di yis bskul bas myur du 'grub cing zhes bya ba la sogs pa gsungs pa lta bu'o/ /de nyid rig pa ste snga ma bzhin no/ /snying po dam pa'o zhes bya ba la/ snying po nyid 'dod pa dam pa'i bar du bsgrubs pas na/dam pa'am 'di 'jig rten pa'i lha'i snying po las dam par gyur pas na snying po dam pa'o/ /gsang ba'i snying po'i zhes bya ba ni/ gsang bar bya ba'i snying po yin pas na gsang ba'i snying po ste/ ji srid du/ kha cig gis gsang sngags rnams 'grub pa'i rgyu ni gsang ba nyid yin te zhes bshad pa lta bu'o//'dir snying po dang gsang sngags la tha dad pa ci yod ce na/ snying po ni yi ge 'bru'i ngo bor snying ga la sogs par bsgom par bya ba kho na yin la/ gsang sngags ni brjod pa tsam gyis kyang don de kun 'grub par srid de/ gcig tu bsgom pa kho nar ma nges te dbye ba ni de yin no/ /de bzhin du gsang sngags rnams la yang rig pa dang gzungs dang /gsang sngags zhes gsum du gsungs te/ lha de 'bod pa dang rig pa bskyed pa la sogs pa dang / ngan 'gro la 'dzin par byed pa'i phyir de dag la de skad ces bya ste/ ji skad du/ sangs rgyas byang chub sems dpa' dang / /mkha' 'gro btsun mo bzang mo rnams//'bod cing sngon du byed pa'i phyir/ /gsang sngags zhes ni mngon par brjod/ /dper na mi chen 'ga' zhig gis/ /skad ni drag pos bos gyur na/ /thos pa tsam gyis 'ong ba ltar/ /de bzhin sangs rgyas mod la byon/ /zhes gsungs so/ /ma rig pa ni gzhig pa dang / /ngag gi rigs mchog bsgrubs pa'i phyir//dngos grub dam pa yod pa ste/ /de bas rig sngags zhes bya'o/ /zhes pa dang yang / gzungs ni rnam gsum dag gi phyir/ /tshig dang don dang gnyi ga'i gzungs/ /legs pa las ni nyams pa na/ /'dzin par byed pa de phyir gsungs/ /zhes so/ /'di dag kyang gsungs te/brjod par bya ba yin pa'am/ /thabs dang shes rab 'brel pa dang / /'da' bar bya ba ma yin zhing / /shigs par dka' bas gsang ba nyid/ /gsang ba sgrub phyir bsngags pas na/ /de bas gsang sngags nges par brjod/ /ces bya ba'i mtshan nyid dang ldan pas phal cher gsang sngags kyi sgrar bstan gyi rig pa dang gzungs su ma yin no//'ga' zhig tu rtags tsam la brten te/ lha pho'i ngo bo dang 'brel pa la ni gsang sngags zhes gsungs la/ lha mo dang 'brel pa la ni rig sngags dang gzungs sngags zhes gsungs so/ /phal cher ni sngags gcig nyid dang lha gcig nyid dang 'brel pa las/ming bzhi char brjod do/ /'di dag ni rang gi ngo bo yang shes rab dang ting nge 'dzin ni snying po'o/ /shes rab dang snying rje'i bdag nyid ni gsang sngags so/ /shes rab dang ye shes ni rig sngags so/ /shes rab dang dran pa ni gzungs sngags te/ de ltar ni gzhung gzhan dag las kyang dran pa dang shes rab yang dag par ldan pa'i sems ni gzungs zhes bya ba'i sgrar bshad do zhes bstan to//rang rang gi ngo bo de dag kyang rang rang gi ming kho nas khong du chud par 'gyur ro/ /de bzhin du 'di dag ni bsgrubs par bya ba dang / sgrub pa po dang sgrub par byed pa gsum la yang 'jug cing sgrub par byed pa la sogs pa yang ci rigs su dbye ste zhar la 'ongs pas chog go//de nas de dag gi dkyil 'khor bshad de zhes bya ba la sogs pa ni go sla'o/ /bum pa lnga dang brgyad ces bya ba ni lha lnga dang mchod pa dang sgo skyong dang brgyad la thun mong du bzhi dang / gsang ba'i bum pa dang bcu las/bdag po dang gsang ba'i bum pa ni smos mi dgos pas lhag ma brgyad do/ /de ma rnyed na rigs lnga dang gsang ba'i bum par bcas pa'o/ /kha cig ni dbang bskur pa'i bum pa lnga dang bkang ba'i bum pa brgyad do zhes rtog go/ /'khor los sgyur ba'i sngags kyis zhes bya ba ni bdag po'i sngags gtso bor byas te'o//lhag ma ni go sla'o/ /oM badzra d+ha ra zhes bya ba la sogs pas ni bdag nyid rigs thams cad kyi sems par mos par byas te/ slob ma gzhug pa ste/ 'di ni lugs gzhan du gnas pa'o/ /de nas phreng ba de nyid kyis zhes bya ba la sogs pas ni dbang bskur ba ston to/ /dang po ni lhag ma'i lha'i dbang ngo //gnyis pa ni bum pa'i dbang ngo / /gsum pa ni dam tshig sbyin pa'i dbang ngo / /bzhi pa ni 'chad par rjes su gnang ba'i dbang ngo / /lnga pa ni bsgrub par gnang ba'i dbang ste/ lugs 'di ni dkyil 'khor gzhan dang cung zad mi 'dra ba nyid yin pas gzhan gyis mi drang ngo / /tshig gi don ni go sla'o//de nas bla ma la khyod kyis yon gyi mchog ni dbul bar bya zhing / de yang rnyed pas rnyed pa la sogs pa bsgrub par srid pas/ bla ma kho na'i phyir/ nor dang dbyig la sogs pa dbul te go sla'o/ /de nas zhes bya ba la sogs pas de'i 'bras bu ston te go sla'o/ /de nas bu la zhes bya ba la sogs pas man ngag bstan par ston te/chos rnams thams cad dngos med par/ /sems kyis bsgom par byas nas ni/ /zhes bya ba ni ye shes dbab pa'am/ sems so sor rtogs pa'i skabs so/ /de nas ni a zhes bya ba ma skyes pa'i ngo bo nyid las thabs kyis zla ba'i dkyil 'khor du bsams te/kha cig na re yi ge a dkar po nyid las zhes zer ro/ /de nas rang gi lhag pa'i lha'i sa bon gyi yig 'bru zla ba de'i dbus su 'od zer dang bcas pas bsams nas/ de las 'od zer 'phro ba dang 'du ba'i dbang las rdo rje la sogs pa rang gi lha'i dam tshig gi phyag rgya dag tu gyur par bsam zhing /de nas kyang 'od zer spro ba dang bsdu bas stong pa las zla ba la sogs par gyur pa de bzhin du 'dir yang rang gi lha'i de nyid du phyag rgya de dang de las sgrub pa po bdag nyid kha ni bsgyur bar bya ste/ ni zhes bya ba ni nges par zhes bya ba'i don to/ /gzhan du na don med pa'i phyir ro/ / de ltar sngags pa lha'i rnal 'byor gyi tshul du bsgyur nas/ da ni ci zhig bya zhe na/ de nas de ma thag tu rang gi sa bon dang 'dra ba'i rdo rje sems dpa' rdo rje ma la sogs pa'i phyag rgyas phyag rgya ste rang gi lus phyag rgya chen po de brtan par byin gyis brlabs te/ ji skad du/ rdo rje sems dpa'i ting 'dzin gyis/ /sems dpa' rdo rje dam byas la//snying ga mdzod spu mgrin pa dang / /spyi bor bzhag na byin gyis rlob/ /ces gsungs so/ /ci'i de tsam du zad dam snyam pa las/ lhag ces bya ba dam tshig sems dpa' chen por mos pa la sogs pa yang sngon du bya zhing / 'gro zhes bya ba sku gsung thugs gcig pu mos pa la sogs pa'i bya ba yang bya'o//de dag kyang rtsa ba'i rgyud las ji ltar gsungs pa'i rim pa ji bzhin du ma nor bar bya'o/ /cho ga de dag las gtsor gyur pa ni/ dbang bskur ba yin pas dngos su smos te/ sangs rgyas lnga rnams kyis dbu rgyan du dbang bskur ro zhes bya ba ste/ ji skad du/ rdo rje dbyings dbang la sogs pa//sangs rgyas phyag rgya mdun nas ni/ /brtsam par byas nas ngos bzhir yang / /phreng ba nyid kyis dbang bskur 'gyur/ /zhes gsungs so/ /de ltar smos pa dang ma smos pa dang cho ga ma lus pa'i sgo nas bdag nyid mthu thob par bsams te/ bsnyen pa la sogs pa byas nas 'grub po zhes bstan pa'i phyir/de nas nga rgyal bskyed nas kyang / /zhes bya ba la sogs pa smos te go sla'o/ /de nas tshangs pa la sogs pa zhes bya ba yang go sla ba nyid do/ /de'i sha dang rus pa dang skra dang zhes bya ba ni/ dkyil 'khor 'dir ro nyid legs par gtubs shing sdig pa sbyang ba'i sngags kyis bsregs la/tha ma shi ba de'i rus pa'i thal ba yang bsregs pas na thal ba la sogs pa zhes smos te/ dman pas mchog bsdu'i dkyil 'khor dgu pa'i 'grel pa ste rgyud phyi ma'i 'grel pa rdzogs so// //da ni de nas zhes bya ba la sogs pas/ rtsa ba dang phyi ma'i rgyud du ma gsungs pa'i cho ga ma lus pa bsdus pa'i ngo bo rgyud phyi ma phyi ma ston te/bcom ldan 'das zhes bya ba ni sngon bzhin no/ /phyag na rdo rjes zhes bya ba ni/ ye shes chen po 'dzin pas so/ /sngags dang zhes bya ba ni rdo rje sems dpa' la sogs pa'i 'o/ /rig pa dang zhes bya ba la sogs pa ni spyan la sogs pa'i sngags te/de dag ni rtsa ba'i dkyil 'khor pa yang yin du zin yang rtsa ba dang phyi mar ma bstan pa'i phyir ro/ /snying po zhes bya ba ni/ nye bar gyur pa nyid do/ /oM badzra bruM duM zhes bya ba la sogs pa'o/ /yang na sngags zhes bya ba ni phyag na rdo rje'o/ /rig pa zhes bya ba ni kun du bzang po dang bde ba chen po'i'o//snying po zhes bya ba ni rdo rje sems dpa' la sogs pa'i'o/ /thams cad ces bya ba ni ma lus par ro/ /bstan par bya ba'i phyir zhes bya ba ni gsal bar bya ba'i phyir ro/ /nyid kyi snying po 'di bshad do/ /zhes bya ba ni/ oM bruM duM zhes pa ni/ gal te dbus na phyag na rdo rje tshe dpag tu med pa gnas nas ni/oM bruM zhes bya bas bskyed cing / gal te phyag na rdo rje khams gsum rnam par rgyal bar gnas na/ oM badzra duM zhes bya bas bskyed do/ /oM badzra pA Ni dr-i D+ha tiSh+Tha hUM zhes bya ba ni/ dbus su rdo rje sems dpa' 'jog na'o/ /oM hUM zhes bya ba ni/ gal te dbus su kun du bzang po'am/ bde ba chen po gnas nas ni/de dag bskyed pa'i sngags so/ /oM hUM badzra hUM phaT/ ces bya ba ni rdo rje sems dpa' 'am phyag na rdo rje'i sngags so/ /oM tiSh+Tha badzra hUM phaT/ ces bya ba ni rdo rje rin chen gyi sngags so/ /oM badzra hri swa zhes bya ba ni rdo rje chos dam pa'i sngags so/ /oM badzra hUM a zhes bya ba ni rdo rje las kyi sngags so/ /dbus su rdo rje bri bar bya//zhes bya ba ni sngar bstan pa gnyis kyi'o/ /spyan sngar phyag na rdo rje las/ /zhes bya ba ni/ gal te bdag por kun du bzang po'am/ bde ba chen po zhig bzhag na'o/ /gal te bdag por phyag na rdo rje gnyis las gang yang rung ba zhig bzhag na ni/ de'i tshe ni spyan sngar rdo rje sems dpa' 'o/ / phyag na rdo rje dang rdo rje sems dpa' la 'dir khyad par ci yod ce na/ 'dir phyag na rdo rje gnod sbyin gyi rigs su skyes pa lcang lo can na gnas pa yin la/ rdo rje sems dpa' de ni bcom ldan 'das kyi thugs ka nas byung ba sems dpa'i ngo bo de nyid do/ /dang po ni ma 'ongs pa nas 'tshang rgya bar lung bstan pa yin la/gnyis pa ni sprul pa'i sku ste/ rgyud 'dir ni khyad par 'di tsam du zad cing rgyud gzhan du lugs gzhan yin no/ /'dod chags rnams kyis 'bras bur ni/ /zhes bya ba ni 'dod chags ma spangs pa rnams kyis chags pa'i 'bras bu 'dod pa nye bar gnas pa la sogs pas gsum pa yin pas na der yang me long dang pi wang dang /dri'i dung phor dang / bcud kyi gzhong bu dang / ras ka shi la zhes bya ba'i 'dod pa'i yon tan lngas mdzes par khyams la tshon gyis dgang ngo / /yang na 'gro ba'i don du nyan thos ltar/ 'dod chags ma spangs pa ni sangs rgyas dang byang chub sems dpa' rnams yin la/ de rnams kyis byin gyis brlabs pa'i 'bras bu'i bdag nyid ni 'bras bu ste/'dod pa'i yon tan lngas lag pa 'brel pa'i lha mo'i tshogs kyis khyams la dgang bar bya'o/ /stong pa mtshan ma med pa'i sems/ /smon pa med pa'i yid ldan pa'i/ /zhes bya ba ni/ chos thams cad dngos po med pa dang / de nyid kyi rgyud med pa dang /de'i phyir smon pa ni log par shes pa rnam par thar pa'i sgo gsum ste/ ji skad du/ 'phags pa sdong po bkod pa las kyang / sgyu 'dra yang dag ma yin tshor ba byed med cing / /rmi lam 'dra ba de bzhin mig yor 'dra ba dang / /byis pa bslu ba'i smig rgyu'i rang bzhin mtshungs mnyam pa/ /de ltar bsgom pa mkhas pa stong pa nyid kyi sgo//rkyen rnams med pa de ni mtshan ma med pa ste/ /log par shes pas nam yang smon pa med pa yin/ /zhes gsungs pa la/ slob dpon bud+d+ha shrI dz+nyA na'i zhal snga nas kyang / ngo bo nyid dang bral ba'i phyir log pa ste/ /de bzhin rgyu dang bral phyir mtshan ma med/ /dngos po rtog pa dag dang bral ba'i phyir//ma lus smon pa las ni nges grol ba/ /zhes gsungs te/ dngos grub rnams ni tshad med pa bzhi dang / sgo gsum po 'di las 'byung bas 'di dag par bya'o/ /oM badzra hUM dza zhes bya ba la sogs pa ni/ sngags dang pos ni rdo rje 'dzin pa'i phyag rgya bcing du gzhug cing / gnyis pas ni dkyil 'khor yol ba bsal te gzhug pa'o//gsum pas ni me tog dor ba'o/ /dbang bskur bar bya'o zhes bya ba la sogs pa la 'dir bum pa dang bkas gnang ba dang las sbyin pas te dbang gsum yin la/ de yang phyag na rdo rje gnyis dkyil 'khor gyi bdag po yin na ni/ sngags dang po rnam par rgyal ba'i bum pa yin la/rdo rje sems dpa' 'am kun du bzang po'am/ bde ba chen po dag dkyil 'khor gyi bdag por gyur na ni/ sngags gnyis pa rnam par rgyal ba'i bum pa'o/ /lhag ma bzhi ni ci rigs su sbyar ro/ /bka'i dbang nod par bya'o zhes bya ba la sogs pa ni 'chad pa'am bsgrub pa rjes su gnang ba ste/ gal te 'chad par rjes su gnang bar 'dod na ni/ 'phags pa de kho na nyid bsdus pa'i rjes su 'brangs te/ tshigs su bcad pa lngas rjes su gnang ba sbyin la/ gal te bsgrub par rjes su gnang ba 'dod na ni/ me tog lag tu byin te 'di grub par gyur cig /bla ma dang slob ma gnyi gas brjod de de yang 'dir gtsor gyur pa ni/bsgrub pa nyid yin pas/ de nas las thams cad byed du gzhug cing dngos grub thams cad kyang sbyin no zhes gsungs te/ man ngag dang gnang ba zhes bya ba'i don to/ /de la las dang dngos grub ni phal cher ting nge 'dzin la brten pa yin pas/ ting nge 'dzin rnams mdor bstan par bya ba'i phyir/ bde bas bde ba bskyed nas kyang //zhes bya ba la sogs pa smos te/ bde bas zhes bya ba ni/ gsang sngags kyi lam 'dir ni dka' thub dang sdug bsngal gtsor ma gyur gyi/ rab tu bde bas grub pa yin te/ de bas na/ lag na rdo rje dbang bskur ba las/ /sngags kyi theg pa skyed chen gyi/ /theg pa la ni ma mos pa/ /de dag nam yang gzung mi bya//de dag bstan 'dir skal ba med/ /ces gsungs la/ khyad par yang rnal 'byor gyi rgyud 'dir ni bde ba bsgrub pa yin pas ni/ dka' thub sdom pa mi zad pa/ /bsten pas 'grub par mi 'gyur gyi/ /'dod pa'i longs spyod thams cad la/ /ci 'dod pas ni bsten pas 'grub/ /ces gsungs shing /phyi rol pa'i lam las lam 'di rtogs pa ma lus pa yang rab tu bde ba yin te/ de bas na/ gang phyir khyod kyi bstan pa ni/ /bde bas bde ba thob bgyid pas/ /de bas smra ba'i seng ge ni/ /khyod kyi bstan la mkhas pa dga'/ /zhes bstod pa brjod do/ /bde ba bskyed nas ni zhes bya ba ni/ bde ba chen po'i bdag nyid rdo rje sems dpa' la sogs par byas nas so//ji ltar de rnams la yang bde ba gang yin pa mnga' 'am zhe na/ bde ba zhes bya ba ni sdug bsngal thams cad dang mi ldan pa rnam par mi rtog pa'i ye shes te/ ji skad du/ 'phags pa sdom pa gsum bstan pa las/ bde ba gang zhe na/ gang la kun du rtog pa med pa de bde ba'o//zhes gsungs pa lta bu'o/ /gzhan yang thabs la mkhas pa'i dbang gis lha dang mi'i 'byor pa la lhag par zhen pa kha cig ni de gsal ba'i phyir dmigs pa dang bral bar btsun mo'i 'khor dang / gnas dang gdan la sogs pa'i bde ba gya nom pa 'di dag la mnga' ste/ ji skad du/ rnam par snang mdzad sgyu 'phrul dra ba zhes bya ba rnal 'byor gyi rgyud ma lus pa'i cho ga bsdus pa las/gang du bde chen rang bzhin rjes chags pas/ /na chung dag dang lhan cig bzhad mdzad cing / /g.yas kyi phyag gis rdo rje gsor nas su/ /g.yon gyi phyag gis dril bu sgra snyan 'khrol/ /lha mo mtha' dag btsun mor gyur pa yis//dam tshig rnams kyis bya ba byas par 'gyur/ /gcig gi lag pas kun nas 'khyud pa ste/ /gnyis pa rjes su chags phyir bde ba'i mthu/ /gsum pa mi bzod me tog phreng ba gtor/ /bzhi pa'i bde ba yi ni mda' yang 'phen/ /zhes gsungs la/ gsang ba zla ba'i thig le las kyang / de nas bcom ldan 'das dpal rdo rje sems dpa' kun du bde ba chen po shin tu dgyes pa gdon mi za ba'i dam tshig rdo rje 'dod pa'i dbang mo zhes bya ba'i ting nge 'dzin la snyoms par zhugs te/rnam pa sna tshogs kyi rol pa chen pos/ rab tu rnam par rol pa dang / spro ba chen po'i gar dang / glu dang sil snyan dang / gzugs dang / sgra dang / dri dang / ro dang / reg pa'i bde ba chen po bde bar 'phags par gyur pa dang / rol pa la sogs pa'i reg pa'i bde ba la spyod pa'i gang nye bar ston cing / rnam pa sna tshogs kyi tshul chen pos 'phags par gyur pa dang / rnam pa sna tshogs kyis gnon pa dang / rnam pa sna tshogs kyis 'khyud pa dang rnam pa sna tshogs kyi spro ba dang /rnam pa sna tshogs kyis gar byed pa dang / rnam pa sna tshogs kyis za bar byed pa dang / rnam pa sna tshogs kyis kun du 'jig par byed pa dang / rnam pa sna tshogs kyis kun du mdzes par byed pa dang / rnam pa sna tshogs kyis zlog par byed pa dang / rnam pa sna tshogs kyis zlos par byed pa dang / rnam pa sna tshogs kyis myong bar byed pa dang /rnam pa sna tshogs kyis 'gyur bar byed pa dang / rnam pa sna tshogs kyis 'phrod par byed pa dang / rnam pa sna tshogs kyis brtson par byed pa dang / rnam pa sna tshogs kyis kun du rgyas 'debs par byed pa dang / rnam pa sna tshogs kyis sna tshogs chen po shin tu dgyes pa'i bde ba nyams par stobs shing reg pa'i ro'i bcud kyis bskal pa brgya stong mang po bye ba phrag brgya stong tshad med par nam mkha'i dbyings kyi rdul phran las 'das pa dang /mnyam par 'jug pas nye bar gnas shing 'tsho skyong ste zhes gsungs la/ yang de nyid las/ de nas bcom ldan 'das de bzhin gshegs pa thams cad kyang bzhengs nas/brjod pa'i rdo rje gar gyis mchod cing glu dang / sil snyan dang / gling bu dang / pi wang dang / rdza rnga dang / brtun pa dang / pa na pa dang / bal la ri dang / zhi ba'i thal mo la sogs pa dang / rnam pa sna tshogs kyi kun du brdung ba dang / sil snyan sna tshogs pa'i rnam par rol pas lha'i ro dang bcud kyi zas dang /bza' ba dang / bca' ba dang / btung ba dang / bzhon pa dang / stan dang / gos dang / bldag pa dang / gzhib pa dang / myang ba la sogs pa rnam pa sna tshogs kyis/ bcom ldan 'das bde ba chen po dpal rdo rje 'dzin pa la bstabs nas zhes gsungs te/ 'od kyang 'di lta bu la sogs pa ni thugs rje'i dbang gis gsungs pa kho nar zad kyi sgra ji bzhin pa ma yin te/gang gis nga la sgrar shes shing / /gang gis nga la gzugs su mthong / /log par spong la zhugs pa ste/ /skye bo de yis nga mi mthong / /sangs rgyas rnams ni chos kyi sku/ /'dren pa rnams ni chos nyid blta/ /chos nyid shes par bya min pas//de ni rnam par shes mi nus/ /zhes gsungs te/ rab tu spro bas chog go/ /dkyil 'khor bzhi yi zhes bya ba ni/ re'u cha dbus ma bzhi'i'o/ /dbus su ni zhes bya ba ni/ re'u cha dbus ma'i pad+ma'i steng du'o/ /snying gar hUM zhes bya ba bsams na zhes bya ba ni/ zla ba'i dbus su hUM dang mtha' mar sngon gyi sngags kyis bskor ba lha dang mthun pa'i yig 'bru'i 'od zer spro ba dang bsdu bar bya'o//hUM las sangs rgyas gzugs gyur nas/ /zhes bya ba ni/ phyag na rdo rje tshe dpag tu med par ro/ /snying gar 'khor lo rab bsgoms na/ /zhes bya ba ni/ yi ge'i 'khor lo zla ba la gnas pa ci rigs par ro/ /rdo rje khro bor rab bsgoms te/ /zhes bya ba ni/phyag na rdo rje khams gsum rnam par rgyal ba ste/ 'og nas khro bo stobs chen zhes smos pa yang de nyid do/ /snying ga'i dbus su zhes bya ba ni/ nyi ma'i dkyil 'khor dmar po la'o/ /phaT ces bya zhes bya ba ni nag po nyid do/ /hUM zhes bya bas bskor bsams na/ /zhes bya ba ni/ oM badzra duM hUM hUM zhes bya ba rnams kyis so/ /de ltar gtso bo bzhi'i tshul bstan nas/da ni me tog lhung ba'i dbang las/ rdo rje sems dpa' la sogs pa yang dkyil 'khor gyi bdag por gyur pa srid pas de dag gi dbang du byas te/ rdo rje brtan par bdag bskur la/ /zhes bya ba la sogs pa gsungs te/ rdo rje brtan pa zhes bya ba ni rdo rje sems dpa'o/ /bdag ces bya ba ni bdag gi de kho na'o//bsgyur la zhes bya ba ni/ lha'i de kho nas so/ /snying gar hUM zhes bya ba ni/ /snying ga'i zla ba la'o/ /bskor ba yis zhes bya ba ni/ oM hUM badzra hUM phaT ces pas so/ /oM dang traM ldan par zhes bya ba 'dir traM ni dbus su yin la/ oM dang por bya ste/ Ni Sha badzra hUM phaT ces bya ba ni/ mtha' skor du'o//de bzhin du dang por tshig rkang dang po drang bar bya'o/ /rdo rje bsgoms la zhes bya ba ni rdo rje chos su bsgoms la'o/ /snying gi dbus su ni zhes bya ba ni/ snying ga'i zla ba dmar po la'o/ /haM sa zhes bya ba ni dbus su'o/ /oM zhes bya bas bskor bsams na/ /zhes bya ba ni/ oM badzra hris zhes mtha' skor du'o/ / rdo rje las su bdag bsgyur la/ /zhes lhag par drang ste/ 'khor lo zhes bya ba ni/ yi ge'i 'khor lo bsgom mo/ /ci zla ba 'ba' zhig la'am zhe na/ de'i phyir rgya gram zhes bya ba smos te/ snying gar zla ba la sna tshogs rdo rje gnas pa'i lte ba la'o/ /der yi ge'i 'khor lo gang dag ce na/ de'i phyir hUM ldan par zhes smos te dbus su'o//tshig dang po lhag par drangs pa de'i sa bon gang zhe na/ de bstan pa'i phyir/ a zhes bya bas bskyed nas kyang / /zhes bya ba smos te/ a thung ngu mdog sna tshogs las so/ /oM zhes bya bas bskor bar bsam/ /zhes bya ba ni/ oM badzra hUM a zhes bya ba kha dog sna tshogs pas so/ /'dir yi ge rnams ni rdo leb kyi ngos 'jom po la chu'i chu bur chags pa ltar dang zhing 'bur du dod par bsgom mo//slob dpon kha cig na re/ yi ge rnams ni gser gyi shog bu las be+e DUr+ya la sogs pa brdar bas bris pa ltar bsgoms pa ni lung dang mthun pa'o zhes zer te/ 'di ni ming gi dbye bar zad do/ /de dag ni ting nge 'dzin 'ba' zhig gi las so//da ni sbyor ba gzhan bshad pa/ rdo rje sems dpa' bdag bsgyur la/ /zhes bya ba nas brtsams te/ sdig can sems ni zhi byed 'gyur/ /zhes bya ba'i bar gyis ni dkyil 'khor gyi gtso bo gsum gyis zhi ba'i las bya bar bstan la/ gser 'od mdzes shing zhes bya ba nas/ 'od kyis lus la rab tu dgang / /zhes bya ba'i bar gyis ni rdo rje rin chen gyis rgyas par bya bar ston cing /rnal 'byor ldan pa thab khung ni/ /zhes bya ba nas/ dga' dang nye ba'i nyi ma'i mthar/ /sems can rnams ni dbang du bya/ /zhes bya ba ni/ rdo rje chos kyi dbang du bya ba'i las bstan to/ /da ni rdo rje sems dpa' la sogs pa bcu drug gi las gang dag yin par bstan pa'i phyir/'dren pa kun du bzang po yis/ /zhi ba'i las ni rab tu bya/ /zhes bya ba nas/ rdo rje bsdams pa bcing bar mdzad/ /ces bya ba'i bar du smos te/ de la rdo rje sems dpa' ni kun du bzang po ste/ de bzhin gshegs pa thams cad kyi byang chub kyi sems rdo rje'i bdag nyid yin pa'i phyir ro//'dis ni rdo rje rgyal po la sogs pa gsum yang mtshon pa ste/ 'di dag gis ni zhi ba'i las bya'o/ /yang na rdo rje lcags kyus ni dgug pa'i las bya zhing / rdo rje chos dang cha mthun pas des drangs la/ rdo rje mda' ni rdo rje ral gri dang chos mthun par der drang zhing / rdo rje legs pa yang mgu zhing dga' ba chags pa'i ngo bo yin pas rdo rje chos kyis drangs pa'o//rigs lhag ma'i sems dpa' chen po rnams ni rang rang gi las la go rims bzhin du sbyar te/ sbyin sreg dang bzlas pa'i cho ga la ji ltar 'dod par sbyar ro/ /tshig gi don rnams dang lhag ma rnams ni go bar zad do/ /da ni de nas bcom ldan 'das zhes bya ba la sogs pas rtsa ba dang phyi ma'i rgyud du ma gsungs pa'o//phyag rgya rnams ston te lag pa gnyis zhes bya ba la sogs pa'i don ni bshad zin to/ /'dir phyag rgya dang po ni bcom ldan 'das tshe dpag tu med pa'o/ /gnyis pa ni 'phags pa nam mkha'i snying po ste/ mdzub mo dang gung mo dang / srin lag rtse sprad pa las mthe'u chung dang mthe bong bkug pa ral gri'o//gsum pa ni phyag na rdo rje dang rdo rje khro bo'i ste/ gung mo gnyis bsgreng ste/ srin lag gnyis mthil du bkug pa las mthe'u chung dang mthe bong bsgreng ba'o/ /bzhi pa ni phyag na pad+ma'o/ /de nyid gnyis su byas na las kyi'o zhes bya ba ni/ mtshan nyid gnyis su brtag pa nyid gnyis su byas pa ste dam tshig dang las so//g.yon pa mgo thod thogs 'dra dang / /zhes bya ba ni lha chen po'o/ /g.yas pa mdung rtse zhes bya ba ni smin drug gi bu'i'o/ /rtse gsum pa zhes bya ba ni dbang ldan gyi ste yang na dgra star bya'o/ /g.yon pa pad+ma zhes bya ba la sogs pa ni tshangs pa'o/ / g.yon pa 'khor lo zhes bya ba ni khyab 'jug gi'o/ /dbyug to zhes bya ba ni gshin rje dang lus ngan gyi ste/ cung zad du gshin rje ni thod pas mtshan pa la lus ngan gyi rin chen mtshan pa'o/ /rtse gsum zhes bya ba ni/ stobs bzangs kyi'o/ /a dang oM zhes bya ba la sogs pa ni dbang po'i'o/ /hUM dang oM zhes bya ba la sogs pa ni 'dod pa'i lha'i phyag rgya'o//'di dag ni lha chen po dang 'jigs byed rnams thun mong du bya ba'i phyag rgya'o/ /lag pa g.yas pa 'khor lor bya ba ni nyi ma'i'o/ /g.yon pa 'khor lor bya ba ni zla ba'i'o/ /thal mo dam sbyar sor mo 'phro/ /zhes bya ba ni mig dmar gyi phyag rgya'o/ /gza' lag gi ni lag pa gnyis ka se gol gtogs pa'o//de nyid ces bya ba la sogs pa ni phur bu'i'o/ /pa ba sangs dang spen pa ni go sla ste/ ban glang sna ni sgra gcan no/ /rgyu skar rnams kyi ni lag pa g.yas pa steng du phyung ba las/ gnyi ga bkan te bsnol la sor mo bcu bsdu zhing spros pas me stag 'phro ba 'dra ba'o/ /phyag rgya de nyid myur du yan man du bskor na lto 'phye chen po rnams kyi phyag rgya ste/glog gi phreng ba'o/ /de nyid phral te g.yas pa slar gzhag cing g.yon pa 'og tu gzhag pa ni dga' bo dang nye dga' bo'i sprin gyi phyag rgya'o/ /'di dag nyid ces bya ba la sogs pa ni snga ma ltar gcig nyid la mtshan nyid gnyis su brtag pa'o//de bas na rgyud 'dir ni dam tshig dang las kyi phyag rgya dag tha mi dad do zhes bdag gis sngar smras zin to/ /srin lag rtsa ba zhes bya ba ni phyag na rdo rje tshe dpag tu med pa'i phyag rgya'o/ /nam mkha'i snying po zhes bya ba ni rdo rje rin chen no/ /pad+ma las byung ba zhes bya ba ni rdo rje chos so/ /rdo rje sems dpa' zhes bya ba ni bdag por gnas pa dang sems dpa' dang po'i gnyi ga gzung ngo //bde ba chen po dang kun du bzang po ni go sla'o/ /khro bo sna tshogs kyi phyag rgya gzi can no zhes bya ba ni phyag rgya gcig po de nyid kyis khro bo me nyi ma'i dkyil 'khor gyi khro bo sna tshogs pa'i phyag rgyar bya ba'o/ /bsdams pa'o zhes bya ba la sogs pas ni sems dpa' lhag ma rnams ni phyag rgya bstan te go sla'o//cung zad pad+ma'i 'o zhes bya ba ni/ tshe dpag tu med pa'i dkyil 'khor du sangs rgyas tshe mtha' yas kyi phyag rgya ni sngar pad+ma las byung zhes bya bas bstan zhing rigs lhag ma gsum gyi ni sngar rtsa ba'i rgyud kyi dang 'dra la 'di ni sems dpa' rdo rje chos kyi phyag rgya'o//mdor na zhes bya ba la sogs pa ni 'di yang dam tshig gi phyag rgya nyid las kyi phyag rgyar bstan pa'o/ /bsdus btud sbrul mgor 'gyur zhes bya ba ni lag pa g.yon pa'i thal mo'i rgyab tu g.yas pa'i thal mo lto sbyar la/ sor mo rnams reg par bskyed cing rtse mo cung zad dgug par bya ba ste/ klu rnams sam gsang ba'i'o//mche ba 'dra zhes bya ba ni sor mo bsnol ba'i snyim pa las mdzub mo gnyis mche ba ltar brkyang ba'o/ /khrag 'phrog pa zhes bya ba ni/ sor mo'i rtse mo bsnol ba'i snyim pas mthe bong gnyis bzung ste mthe bong gnyis gshibs pa'o/ /lag pas bskor ba zhes bya ba ni lag pa gnyis kyi thal mo tha dad par thad kar brkyang la bskyod pa ste/rlung gi zhes bya ba ni rlung lha ma lus pa'i'o/ /dbyug tor ldan pa zhes bya ba ni lag pa g.yas pa khu tshur bcangs te phyar ba'am de'i yang mthe bong bsgreng ba ni gnod sbyin no zhes bya ba ni phyogs kyi bdag po lus ngan gyi'o/ /bum pa gzhag pa zhes bya ba ni mthe bong dang mthe'u chung bzhi bsnol la sor mo lhag ma drug rtse sprad de bsgreng ba'o//nor gyi ste zhes bya ba ni bdag gi ste/ de bas na sngar mche ba'i phyag rgya smos pa'i skabs su gser gyi bum pa sbyar du yang rung ngo / /mthe bong ne'u le'i rna 'drar bya/ /zhes bya ba ni mthe'u chung dang mthe'u chung bsnol te sor mo lhag ma rnams gshibs la bsgreng /mthe bo gnyis sor mo phral te bskul ba 'di ni rgyal po chen po rnam thos kyi bu'i phyag rgya ste/ kha cig ni rdo rje bsdams pa las mthe bo gnyis tha dad du brkyang bar rtog go/ /mgo bo thod pa zhes bya ba ni sor mo rtse mo bsnol ba'i snyim pa ste/ nag po zhes bya ba ni dga' byed dbang phyug dang bcas pa'i'o/ / lag pa brkyang ba zhes bya ba ni dam pa sbyin pa'o/ /b+h+r-ing+gi ri ti zhes bya ba ni sngar bstan pa'am yang na 'dis phyag rgyar bya ba ste/ kha cig na re phyi rol du ni stobs bzangs bya ba la sogs pa'i nang du/ b+h+r-ing+gi ri ti bgrang zhing stobs chen ni nang du bzhag ces phyag rgya 'dir bstan pa las dpags te smra'o/ /pi wang g.yon na thogs zhes bya ba ni lag pa g.yon pa bstod cing sor mo bzhi cung zad bkug pas pi wang 'dzin pa ltar bya ste/g.yas pas rgyud sgreng ba ltar byas pa ni/ dri za rnams kyi rgyal po yul 'khor srung gi phyag rgya'o/ /lag pa gnyis 'byar ba'i phyag rgya ste/ thal mo sbyar ba bkan la mthe bo bsgreng ste/ thal mo'i rtse mo cung zad g.yabs pa ni/drang srong chen po me'i 'bar ba'i phyag rgya'o/ /lag pa g.yas pa khu tshur bcangs pa las/ gung mo brkyang ba ni dbyug pa 'dra ba'i phyag rgya ste/ chos kyi rgyal po gshin rje'i'o/ /srin po'i phyag rgya ral gri rno ba la ni khro ba ste gung mo dang dbang mo ste srin lag sbyar ba bsgreng ba'o/ /de yang lag pa g.yas pa'i khu tshur gnyis las so//lag pa g.yas pa khu tshur bcangs pa'i mthe'u chung bsgreng ste/ phyar ba ni ral gri'i phyag rgya ste/ grul bum gyi bdag po 'phags skyes po'i phyag rgya'o/ /lag pa g.yas pa'i khu tshur bcangs pa las/ mdzub mo brkyang ba bkug la zhags mig ltar byas pa ni/ mdzub mo zhags pa 'dra ba ste/ klu'i bdag po mig mi bzang dang chu lha'i phyag rgya'o/ /rgyal mtshan yin zhes bya ba ni sor mo rnams bsnol ba las/ mthe'u chung gnyis bsgreng ba'am/ lag pa g.yas pa'i khu tshur las mdzub mo dang gung mo gnyis gshibs te bsgreng ba 'di ni phyogs kyi bdag po rlung gi phyag rgya'o//ci lha 'di dag gi phyag rgya 'di kho na ltar nges sam 'on te gzhan yang yod ce na/ de la sogs pa zhes bya ba la sogs pa smos te/ phyag rgya rab 'byam dpag tu med pa rnam par snang mdzad mngon par byang chub pa la sogs pa'i rgyud las gsungs pa/ 'dir sbyar yang gnod pa med cing dngos po'i rang bzhin nges par shes pas/ji ltar sbyar ba de chos kyi dbyings dang / rang gi bsam pa'i mthus phyag rgyar 'gyur te/ ji skad du dpal sdom pa las/ sems can rnams kyi ji tsam du/ /lus ni rnam par bskyod 'gyur ba/ /phyag rgya'i 'khor lo 'dzin pa la/ /mdor na thams cad phyag rgyar 'gyur/ / zhes gsungs pas so/ /lha rnams kun zhes bya ba la sogs pa ni thun mong pa ste go sla'o/ /bud med rnams zhes bya ba ni ma mo rnams so/ /sems sgrub pa'o zhes bya ba ni/ sems rang dbang med par sgrub pa pos 'grub pa ste/ ji skad du/ ji ltar rgyal po nyid kyis rgyal/ /rgyal po'i khrims ni bstan pa ltar//bdag chen nyid kyi phyag rgyas kyang / /skye bo rnams la de bzhin btab/ /ces gsungs pas so/ /rdo rje rnal 'byor ma zhes bya ba ni/ sngar grub pa'i bud med rnams so/ /phyag na rdo rje'i phyag rgya yi/ /zhes bya ba 'di ni khams gsum rnam par rgyal ba'i hUM gi phyag rgya'o/ /rdo rje bsdams pa zhes bya ba la sogs pas ni bsrung ba la shis pa'i khro bo gnyis kyi phyag rgya ston to//spyan gyi mig dang 'dra bar bshad/ /ces bya ba la sogs pa ni/ rtsa ba la sogs pa'i rgyud du gsungs pa'i lha mo bzhi'i phyag rgya rdzogs par byed do/ /tshig gi don ni go sla'o/ /a sa sa sa zhes bya ba la sogs pa ni/ badzra satwa hUM/ badzra satwa dza zhes bya ba la sogs par sbyar te/ sems dpa' bcu drug gi sngags su sbyar ro/ /hUM dza zhes bya ba la sogs pa 'ba' zhig pa ni/ de dag gi chos kyi phyag rgya'o zhes la la zer ro/ /oM bud+d+ha zhes bya ba la sogs pas ni/ rigs kyi lha mo bzhi'i sngags ston to/ /de ltar ni 'dir phyag rgya dang sngags ma lus par rdzogs par bya'o//shaM pa ta shaM pa ta zhes bya ba la sogs pa ni/ dkyil 'khor bcu gnyis su/ dri mu ka brdung ba'i nga ro'i brda dang / de byin gyis rlob pa'i gsang sngags te/ phyogs bzhir bzhi bzhi brdungs pa las/ /'od zer rjes su mthun pa byung bas/ des bsgrub bya'i lus la phog pas las gang 'dod pa de 'grub par byed pa'o//dkyil 'khor dang po'i 'grel pa'o// //da ni/ de nas lha rnams kun mgu nas/ /zhes bya ba la sogs pas dkyil 'khor gnyis pa ston te/ rang gi sku bor te zhes bya ba ni gnod sbyin gyi gzugs la 'khor los sgyur ba'i cha lugs can de'o/ /rdo rje sems dpa'i skur zhugs nas//zhes bya ba ni rdo rje sems dpa'i rang bzhin gyi khro bo'i gzugs su gyur pa'o/ /ci 'di la bor ba dang thob pa'i 'du shes mnga' 'am zhe na/ de'i phyir gnyis su mnyam zhes bya ba'i ting nge 'dzin la snyoms par zhugs te zhes bya ba gsungs te/ sngon gyi smon lam dang mi dmigs pa'i thugs rje chen po'i shugs kyis bral ba dang thob pa'i 'du shes mi mnga' zin kyang /ma 'ongs pa'i gdul bya'i dbang las bor ba dang thob pa ston te/ gdul bya gang rab tu drag pos gzhug par bya ba la/ de dag la ni zhi ba'i lus bor nas rdo rje khro bor snyoms par zhugs te bstan pa la 'dzud par ston te/ji skad du/ skyob pa mya ngan 'das gyur kyang / /tshogs dang chos kyi mthu yis ni/ /'khor lo 'khor ba'i tshul du ni/ /sems can don la rab tu 'jug /ces gsungs so/ /rdo rje sems dpa' khro bo zhes bya ba la/ rdo rje sems dpa'i rang bzhin gyi khro bo'am/ yang na rdo rje sems dpa' yongs su gyur pa'i khro bo ste/ji skad du/ e ma'o thabs kyis 'dul ba yi/ /thabs chen ldan pa bdag yin te/ /gang phyir sems can 'dul thabs bzhin/ /dri ma med pa'i khro bor 'gyur/ /zhes bcom ldan 'das nyid kyis gzhan du ched du brjod pas so/ /'dir rdo rje sems dpa' ni chos kyi dbyings mi phyed pa la dbyer med par sems dpa' chos kyi sku yin la/de las ma nyams pa nyid du khro bor snang bar bskyed pa ste/ ji skad du/ nyi ma'i zer gyis gdungs pa'i mtsho chen ltar/ /mnyam pas snying rje chen pos khro byed cing / /nang na kha ba ltar bsil phyi rol du/ /rtsub pa nyid kyis 'gro ba skyong bar byed/ /ces gsungs pa lta bu'o//rdo rje nyi ma zhes bya ba la/ 'dis sdig pa dang 'jigs pa rnams bsreg pa na/ me'i khyad par yang bskal pa tha ma'i nyi ma bdun 'bar ba dang 'dra bas na rdo rje'o/ /de lta bur rab tu mi zad par gnas pa yang chos kyi dbyings las dbyer med pa'i phyir rdo rje zhes pas bstan to/ /lha rdzas 'bar ba'i phreng bas 'khrigs//shin tu 'khor zhing 'tsher 'bar ba/ /zhes bya ba ni khang pa brtsegs pa gang las 'od 'bar ba'i phreng bas 'khrigs pa yod pa de nyid lha'i rdzas te yid du 'ong ba'i phyir ro/ /yang na 'di ni rab tu drag po'i dkyil 'khor yin pa'i phyir me tog dang dri dang / bdug pa la logs pa'i lha rdzas de dag kyang 'od 'bar ba'i phreng ba drag po 'khrigs pa'o//shin tu 'bar zhing zhes bya ba la ni/ lha rnams 'od zer drag po sku las shin tu 'bar zhing gdug pa rnams bsreg pa'o/ /cher 'bar ba zhes bya ba ni khang pa brtsegs ma de yang rab tu ma rungs pa'i 'od rgya cher 'bar ba gdug pa rnams bsreg pa'o/ /ma rungs snying gar mnan nas zhes bya ba ni/rang rang gi phyogs skyong ngam sngar bstan pa bzhin no/ /de nas bdud rtsi gang yin zhes bya ba kha cig na re mar dang / 'o ma dang bu ram dang ka ra dang sbrang rtsi ni bdud rtsi lnga'o zhes zer ro/ /kha cig na re bdud rtsi 'khyil pas byin gyis brlabs pa'i 'bru lnga la sogs pa bum pa'i nang du bzhag pa rnams ni bdud rtsi'o zhes zer ro//kha cig na re shu kra la sogs pa rnal 'byor gyi rgyud gzhan las gsungs pa rnams nyid bdud rtsi zhes zer te/ 'dir rab tu ma zhi ba'i chang ni bdud rtsi zhes dgongs la/ 'og nyid nas/ bza' dang bca' dang bdud rtsi zhes/ /mgo thod gang bar gyur pa rnams/ /zhes gsungs pa yang chang nyid yin te/ sngar 'jigs byed chen po'i dkyil 'khor du yang /sha'am yang na chang mchog gis/ /thod pa bkang ste dbul bar bya/ /zhes gsungs pa'i phyir ro/ /'o ma la sogs pa'i bdud rtsi lnga ni gtsang sbra 'dod pa dag gi dus su yin la/ 'dir gtsang sbra'i dgos pa bya ba med pa'i phyir te/ rdo rje khro bo la ni gtsang sbra gtsor ma gyur par 'phags pa bdud rtsi 'khyil pa'i rtog pa la sogs pa bya ba'i rgyud du yang gsungs la/de bzhin gshegs pa'i rigs la ni/ /gtsang sbra'i bya ba la rnal 'byor gyi rgyud dpal sangs rgyas thams cad dang mnyam par sbyor ba'i rgyud la sogs par gsungs so/ /bdud rtsi 'khyil pas byin gyis brlabs pa'o zhes bya ba la sogs pa smras pa de yang mi rigs te/las kyi bum pa ma yin pa rnams bdud rtsi 'khyil bas byin gyis brlab par bya ba ni nam yang ma yin pa'i phyir dang / 'dir bum pa bcu drug ces dbang bskur ba'i bum pa nyi tshe zhig smos kyi/ bkang ba'i bum pa ni gtsor ma smos pa'i phyir ro//gzhan yang bkang ba'i bum pa'i dbang du byas pa ni ma yin te/ bkang ba'i bum pa ni thos pa kho nar bya bar rigs shing gzhan du ma yin pas so/ /gang yang shu kra la sogs pa zhes smras pa de yang rab tu rigs pa ma yin te/ rnal 'byor gyi rgyud kyi tshul ma lus pa brjod pa/ 'phags pa de kho na nyid 'dus pa las kyang /'di lta bu mi snang la/ zla gsang thig le la sogs pa'i rgyud las/ shu kra la sogs pa smos pa yang / sgra ji bzhin pa ni ma yin te/ bdud kyis smras pa dang 'dra ba'i phyir rab tu mi 'thad par 'gyur ro/ /'o na tshe dpag tu med pa'i dkyil 'khor las/ sangs rgyas rnams ni mnyes bya dang //dam tshig rnams ni bsrung ba dang / /sngags mkhan gyis ni bsgrub pa'i phyir/ /gzhan gyi bud med bsten par bya/ /zhes gsungs la/ 'dir yang bdud rtsi chen po la sogs pa bsten par gsungs pas/ 'di yang rnal 'byor chen po'i gzhung nyid yin no zhe na/ rnal 'byor chen po'i gzhung zhes pa ci la bya/gal te shu kra la sogs pa dngos su bsten pa dang / bud med la sogs pa dngos su bsten pas rnal 'byor chen por 'dod na ni/ rab tu yang mtshar te/ gzhon nu ma 'khrig pas gdungs shing / byang chub sems dpa'i yul la rab tu chags la/ de yang bdag pos ma bsrungs shing /byang chub sems dpa' yang khyim pa zhig yin na/ des bdag ni sems can dmyal bar song yang sla'o/ /gzhon nu ma 'di'i gdung ba zhi bar byas la/ der yang bdag la dga' bar byas te/ dga' ba la sbyor ro zhes bsams te 'khrig pa spyad na/ de bzhin gshegs pa dgyes pa dang /theg pa chen po 'dir ni gtsor gyur pa snying rje yin pas de srung ba dang / rgyu de gnyis nyid kyi phyir/ sngags pa'i dngos grub kyi yan lag tu 'gyur ba zhes bya ba 'di ni rigs pas kyang 'grub la/ rnam par snang mdzad mngon par byang chub pa dang / 'phags pa gsang chen thabs la mkhas pa'i mdo la sogs pa las kyang gsungs so//rnal 'byor gyi rgyud 'dir yang / dam tshig phyag rgya rab gsang ba/ /'di ni bud med sgrar bsten la/ /mchog phyir bdag gcig ma yin phyir/ /gzhan zhes bya ba yi ges brjod/ /ces gsungs pas/ dam tshig ni phyag rgya bcing ba nyid gzhan gyi bud med yin gyi/gal te bud med tha mal pa'i yul bsten pas/ thar pa thob par smra ba ni nges par bdud kyis smras par zad do/ /gzhan yang / rnam dag chos nyid khu ba ste/ /yul rnams bshang ba'i sgrar gsungs la/ /dbang po rnams ni gci ba ste/ /rnam shes rten phyir khrag tu 'dod/ /de las byung ba'i sems byung sogs//tshogs chen phyir ni sha yin te/ /'di dag zos pa stod byas pa'o/ /zhes bshad pas tha mal pa'i shu kra la sogs pa ci'i phyir yon tan du byed/ gal te byin gyis brlabs pa'i phyir ro zhes zer na/ de lta na ni go/ rdo dang chu la sogs pa la ci'i phyir byin gyis mi rlob/ da ni de dag la rang bzhin gyis mthu yod do zhe na/ gal te rang bzhin gyis mthu yod na/ byin gyis brlab pa'i bya bas ci zhig bya/ gzhan yang khyi la sogs pa dag kyang de'i byin gyi rlabs kyis/ ci'i phyir go 'phang bzang po mi 'thob/ de'i phyir rab tu btsog pa'i 'dam du bying nas/ bdag ni 'dir gtsang sbra byed pa'i phyir zhugs so zhes zer ba'i byis pa ltar smras pa 'di ci zhig bya/de'i phyir gang du yang zab pas mi zab pa gzhom gyi/ dman pas gya nom pa mi gzhom pas na/ sgra ji bzhin du 'dod pas dgongs pa de gsungs pa ji ltar smad/ de bas na lta ba ngan pa ni/ sgra ji lta bar don 'dzin pa'o zhes bshad do//rnal 'byor gyi rgyud las gzhan pa'i rnal 'byor chen po'i rgyud ces bya ba ni 'ga' yang med do/ /de ltar na sha dang chang dag kyang 'dir dgag par rigs so zhe na/ gang myos par ma gyur pa dang / rnam pa gsum dag pa'i sha ni/ de ltar su yang smod par mi byed la/ de su la phan 'dogs pa 'jig rten dang mthun zhing rang bzhin gyis kha na ma tho ba dang bcas pa yang ma yin no//de bas na gcig kho na bdag dang gzhan de dag ltar gnod pa mi byed do/ /phyag rgya de dang de yis ni/ /sha rnams kun gyi dam tshig stsol/ /zhes bya ba ni/ phyag rgya de dang de yis ni/ /zhes zlos bur smos pa ni/ yon chab nas bshos kyi bar du rdzas de dang de thod pa'i phyag rgyas dbul ba'i phyir ro//kha cig na re de dang de yis ni zhes zlos bur smos pa ni/ gtsug tor gyi dkyil 'khor du mchod pa'i phyag rgya bstan pa de dang de yis zer ro/ /sha rnams kun gyi zhes bya ba ni/ ma he dang phag dang ra la sogs pa gang 'jig rten rab tu bsngags pas sdig med pa de dag gis so//dam tshig las stsol zhes bya ba ni/ lha bshos kyi dam tshig tu dbul zhing gsol ba'o/ /lha bshos bzang po rtag tu dbul ba de ni dam tshig gi mchog ste/ gang zag bdag gis zas rnams la/ /thog mar de yi phud phul te/ /cho ga shes pas bzlas brjod bya//mchod pa'i bshos rnams smos pa las/ /zas kyi rnam pa ci 'byor pa/ /mkhas pa dag gis phul nas ni/ /nyin re rtag tu bzlas brjod tsam/ /lha bshos phul ba gsang sngags kyi/ /kha zas yin par bshad pa na/ /de ni rtag par khams bzhin du/ /bzlas brjod byed pa dbul bar bya//rtsa ba rdo gu 'bras bu yi/ /lha bshos cung zad ci 'byor pa/ /dus gsum du ni gsang sngags la/ /phul nas dngos grub thob par 'gyur/ /gal te zlos pas gsang sngags la/ /mchod pa bshos rnams ma phul na/ /de tshe rtsub cing mdog ngan la/ /bkres pa dag gis gdungs par 'gyur/ / lha rnams grub par mi 'gyur zhing / /bgegs rnams kyis kyang zil gyis gnon/ /lha bshos med na de yi sems/ /rtog pa dag kyang mang du 'gyur/ /de bas nan tan cher bya ste/ /dus mtshams nyin par ci 'byor pas/ /gsang sngags 'khor dang bcas pa la/ /lha bshos legs par dbul bar bya/ / zhes pa dang / yang / byug spos me tog bdug spos dang / /lha bshos sbyin sreg yo byad rnams/ /phongs par gyur kyang mi dbri ste/ /phri na nges par 'chi bar 'gyur/ /zhes gsungs pa'i phyir ro/ /de nas 'dod ldan rnyed nas ni/ /zhes bya ba la/ 'dod ldan ni slob dpon nyid yin te/ dngos grub 'dod pas so/ /rnyed nas ni zhes bya ba ni/rdzas dang gnas la sogs pa 'tshogs shing rnyed nas so/ /yang na 'dod ldan zhes bya ba ni/ slob mas te dbang bskur bar 'dod pas so/ /rnyed nas ni zhes bya ba ni/ des yo byad rnyed na slob dpon gyis bsnyen par bya'o/ /ma rnyed par ni ma yin no/ /de'i phyir dang po dri ba smos pa'o/ /hUM zhes bya ba las zhes bya ba ni/sa bon yi ge hUM sngon pos so/ /bsgrub par bya ba zhes bya ba ni/ phyag mtshan las sam/ de nyid lha'i gzugs su'o/ /de nas sngags mkhan sgor yang zhes bya ba ni shar sgo'am lho sgor ro/ /hUM zhes bya ba las bsgrub par bya zhes bya ba de nyid bstan pa'i phyir/ de nyid dran zhes bya ba gsungs te/bdag dang lha dang sngags kyi de kho na dran par byed cing / dkyil 'khor de'i spyan snga kho nar slob dpon bdag nyid kyis bsnyen par bya ba'o/ /bsnyen par bya ba'i 'bras bu ni nges par zhes bya ba la sogs te go sla'o/ /dkyil 'khor du ni zhes bya ba la sogs pa ni/ slob ma smin par bya ba ston te/ rgyud las byung ba'i dam tshig ni/ spyi'i lha tshogs dang dkyil 'khor la slob ma gzhug pa gnyis rtsa ba'i rgyud las 'byung ba ltar brjod do/ /de nas mchod de/ slob dpon langs nas kyang / sgrub pa'i grogs mchog bzhag la/ slob ma'i tshogs kyis lhag pa'i spyan dang 'dra ba ste/ rdo rje sems dpa'i sku'i tshul la gnas nas/phyir 'byung bar byas nas gtor ma sbyin no/ /oM badzra zhes bya ba la sogs pa las/ sngags dang pos ni/ phyag rgya bcings la/ gnyis pas ni gzhug cing / gsum pas ni me tog dor ro/ /bzhi pas ni gdong g.yogs bkrol la dkyil 'khor bstan to/ /lnga pas ni mna' chu blud do/ / drug pas ni rdo rje sems dpa'i gsang ba bsgom par bya'o/ /bdun pas ni bdag po'i bum pas dbang bskur ro/ /kha cig na re bdun pas ni/ bdag po'i phyag rgyas mjug tu dbang bskur ro zhes zer ro/ /de bzhin du dbang bskur ro zhes bya ba ni/ bum pa bcu drug gis te/ kha cig na re/ sngon gyi dbang bcu gsum mo zhes zer ba ni mi rigs so//de nas de dag gi zhes bya ba la sogs pa ni spro ba dang bsdu ba gtsor bstan pa ste/ 'di ni rnal 'byor gyi rgyud yin pa'i phyir/ rnal 'byor byas la gzhan du bzlas pa nyi tshes 'grub pa yin no zhes bya ba'i don to/ /de nas hUM gis tshogs bzhag la/ /rdo rje lta bur lus bsam zhing //zhes bya ba ni/ sgrub pa po'i ba spu'i bu ga ma lus pa dang dbang po rnams la yi ge hUM dkar po las 'od zer 'phro ba bkod la/ de'i 'od zer gyi tshogs des de'i lus rdo rje lta bur mi shigs par bsam zhing / yang de'i snying gar yi ge haM dkar po las 'od zer byung ba'i 'od zer des de'i lus skyes bu ya lad gyon pa ltar g.yogs pas bsrungs pa'i/srung ba'i 'khor los bsrungs pa ltar/ /cis kyang mi tshugs pa'i go chas go char bya'o/ /kha cig na re/ haM zhes bya ba ni/ a haM zhes drangs la/ rang gi lha'i 'khrul 'khor bris pas/ gdags pas go cha bya'o zhes zer te/ 'dir dkyil 'khor bya ba bdag gis ni ma rig go/ / kha cig na re/ sbyor ba snga ma nyid rang gi 'khor los go char byas so zhes zer ro/ /lhag ma ni go sla'o/ /dkyil 'khor gnyis pa'i 'grel pa'o// //da ni dkyil 'khor brgyad kyi bdag po la phyag 'tshal ba dang / mchod pa dang bstod pas rgyud bshad pa la/ lan du mchod par bsams pa dang / gdul bya 'byung bar 'gyur ba rnams la yang bslab pa'i phyir/de nas brgya byin zhes bya ba la sogs pa smos pa yin te go sla'o/ /sangs rgyas kun pas sngar sangs rgyas/ /zhes bya ba ni/ bcom ldan 'das phyag na rdo rje 'di ni/ byang chub sems kyi bdag nyid yin la/ sangs rgyas thams cad ni de las 'byung ba yin pas 'di ni 'das pa'i sangs rgyas thams cad kyi yab yin te/de ltar yang 'phags pa de kho na nyid 'dus pa las/ rdzogs pa'i byang chub khyod rag lus/ /kun gzigs yab ni khyod lags te/ /'byung ba dang ni 'byung 'gyur ba'i/ /de bzhin gshegs pa khyod kyis bsgrubs/ /zhes bya ba dang / gang phyir thog ma tha ma med/ / byang chub sems ni khyod yin te/ /khyod la brten te rgyal ba dang / /dpa' bo byang chub sems dpa' kun/ /'byung bzhi yang dag 'byung 'gyur bas/ /sangs rgyas byang chub mchog gi rgyu/ /zhes gsungs so/ /de ltar ngo bo nyid kyi sku'i dbang du byas te bstod pa byas nas/ da ni chos kyi sku'i sgo nas bstod pa mi shes pa ste/nyon mongs pa can ma yin pa'i mi shes pa shes bya'i sgrib pa dang dri ma ste/ nyon mongs pa'i sgrib pa gnyis ka rab tu phra ba yang ma lus pa spangs pas na kun bcom pa'o/ /rdo rje ni rnam par mi rtog pa'i ye shes 'dus byas kyi grong khyer ma lus par rab tu 'jig pa ste/ ji skad du/ bskal pa du mar rab tu goms byas pa'i/ /rgyu dang rigs tshul dang ni sa la mkhas/ /gang gi 'dus byas grong khyer rnam 'jig pa'i/ /ye shes rdo rje bstan te 'phags bdag stsol/ /zhes gsungs pa lta bu'o/ /rdo rje zhes gnyis pa smos pa ni chos kyi dbyings te/ chos kyi dbyings rab tu'am mi phyed pa rdo rje lta bu 'dis rab tu brjod do zhes bshad pas so//de nas rdo rje yis rdo rje 'dzin pa de nyid thob pa'i tshogs kyi rgyal po nyid du bstan to/ /da ni longs spyod rdzogs pa'i sku'i bstod pa/ sku rdo rje dang / gsung rdo rje dang / thugs rdo rje rnam par dbyer med pa'i ngo bor gyur pa'i sku ni de dag 'dzin pa ste/sku snga ma gnyis kyang 'di'i thugs nyid yin la/ sprul pa'i sku yang 'di nyid kyi snang ba skyes pa las gzhan ma yin zhing / de bas na/ sku la sogs pa ji snyed pa/ sku 'di nyid yin pa'i dbang du byas te bstod pa'o/ /da ni rnam par smin pa'i sprul pa'i sku'i dbang du byas te/ rdo rje ltar mi phyed pas na/ zab pa'i sku'i ngo bo ste/ sku de yang chos kyi dbyings las/ gzhan ma yin pa'i phyir te/ chos kyi dbyings las ma gtogs pa/ /gang phyir chos yod ma yin te/ /zhes gsungs pas so/ /sku de yang / la lar me bzhin mya ngan 'da'/ /la lar rdzogs par byang chub ston/ /zhes bya ba la sogs pa'i tshul gyis rab tu yang rgya che bas na sku che ba zhes gsungs te/de ltar sku bzhi'i bdag nyid phyag na rdo rje khyod la phyag 'tshal lo zhes gsungs te/ tshig rkang gnyis po 'di ni tshogs ma lus pa'i mthar sbyar bar shes par bya'o/ /'di ni rnam par smin pa ma yin pa'i sprul pa'i sku'i dbang du phal cher byas te/'gro ba ngan pa'am/ gya nom pa gang du skyes kyang ngo bo nyid kyi sku las mi 'da' bas na/ rdo rje'i yan lag ces bya ba la sogs pas bstod do/ /bcom ldan 'das 'di thugs rje chen pos bskul bas srid pa dang zhi ba thams cad du snang bas ston te/ 'di skad du gsungs pa yang / rdo rje 'chang gi gsung thos lha rnams dang / /tshangs sogs lha min gnod sbyin grub pa dang / /rig 'dzin klu dang gnod sbyin dri za dang / /gsang ba pa dang mtshung dang 'byung po rnams/ /dad pas zhabs la spyi bos phyag 'tshal lo/ /gus pas thal mo sbyar nas tshig gsol ba/ /kye ma srog chags rnams la thugs rjer ldan//kye ma khyod kyi spyod pa sna tshogs pas/ /kha cig gis ni rdo rje 'bar bar mthong / /gzhan gyis dbyig to gzhan gyis 'khor lo dang / /de bzhin gzhan gyis rtse gsum 'bar ba can/ /gzhan gyis ral gyi gzhu dang be con can/ /'jigs pa'i gzugs can mtshon cha kun thogs dang / / gzhan dag kun gyi zhi ba nyid du mthong / /du ma'i sku mnga' dmigs med sku mnga' bar/ /lha dang gnod sbyin gyis mthong de la 'dud/ /lha min lha yis zhabs la phyag bgyis pa/ /byang chub sems dpa' mchog rab khyod la 'dud/ /rig sngags gzhu 'gengs khyod la phyag 'tshal 'dud/ /khyod la bdag cag deng ni skyabs su mchi//zhes pas/ bcom ldan 'das 'di la bstod pa lta bu'o/ /de tsam du snang ba ston par spyod pas na/ rdo rje can khyod ni lha rnams kyi nang na mchog nyid do zhes bya ba la sogs pa bstod pa ste/ tshig gi don ni go sla bas rnam par ma phye'o/ /gang gis zhes bya ba la sogs pas ni/bstod pa bris pa la sogs pa'i yon tan bsdus te bstan pa'o/ /bcom ldan 'das kyis zhes bya ba la sogs pas ni/ rjes su yi rang ba bstan to/ /rab zab rgyud 'di'i snying po ni/ /bdag gis 'dir brjod kho nar zad/ /gang du gzhung don rnam ma phye/ /bla ma mnyes par byas la blang / / 'dir ni 'khrul gyur lha rnams la/ /bzod smra dge ba gang yin des/ /'gro ba rgyal 'gyur ngan 'gro spangs/ /bdag kyang sangs rgyas 'gyur bar shog /'phags pa ngan song thams cad yongs su sbyong ba zhes bya ba/ cho ga zhib mo'i rgyal po chen po'i rgya cher 'grel pa/ snying po rnam par bshad pa zhes bya ba/dzA lan+d+ha ra'i rdo rje slob dpon/ kA ma d+he nu pa zhes bya ba'i zhal snga nas kyis mdzad pa rdzogs so// //A tsAr+ya bi na ya tsan+d+ra dang / bod kyi lo tsA ba dge slong chos kyi shes rab kyis/ 'phan yul rgyal gyi lug lhas su bsgyur cing zhus te gtan la phab pa rdzogs so// //