CLOSE WINDOW

D2595
བོད་ཡིག

/rtog med rgyud gcig bla ma dang / /'jam pa'i dpal la mos pa yis/ /khro med sngags dang rgyud la mkhas/ /thos ldan rgyud 'dir dbang thob pas/ /dam tshig gsum la gnas pa des/ /dang po 'phags pa 'jam dpal gyi lha rnams sgrub pa'i thabs las 'byung ba bzhin du bsnyen pa bya ste/sngags kyi phreng ba 'bum du bzlas pa ni sngon du bsnyen pa'o/ /gzhung las/ bsam gtan dang ni rjes mthun pa'i/ /ri yi phug gam chu yi 'gram/ /rdzing ngam rang dga'i gnas dag gam/ /lha khang mchod rten sogs par/ /zhes gsungs pas na//de lta bu'i gnas der song la/ /ci tsam 'byor ba'i tshad kyis byas la/ /sa yongs su brtag pa der/ /bdud rtsi 'khyil pa'i sngags bzlas pa'i chus gtor/ dkyil 'khor gyi rnam pa byas nas/ /der mchod pa dang gtor ma bshams la/ sa'i lha mo las bslang ba ni//skyob pa sangs rgyas thams cad kyi/ /spyod pa'i tshul dang khyad par dang / /sa dang pha rol phyin pa la/ /lha mo khyod ni dpang du gyur/ /skyob pa shAkya seng ge yis/ /ji ltar bdud kyi sde bcom pa/ /de ltar bdag gis bdud bcom nas/ /bdag gis dkyil 'khor bri bar bya//zhes brjod nas/ thal mo sa la brdabs pas/ sku phyed tsam sa las 'thon pa dang / /sems can thams cad kyi don du dkyil 'khor byed pas bdag la byin zhes brjod pas/ khyod kyi dkyil 'khor gyi bdag po gyis shig ces brjod nas sa la thim par bsam mo/ / sa slong ba'o/ /de nas drag po'i sbyin sreg gis bgegs bzlog pa/ /de nyid du bdag dang blo zhi ba'i phyir sbyin sreg byas la der sa sbyang bar bya ste/ 'dom gang tsam la sogs pa brkos la sa'i ro lnga bsal te/ de rin po che lnga dang ldan pa'i bum pa bcug la slar sas dgang ngo //de bzhin gshegs pa'i ras ris la sogs pa ji tsam 'byor pa yang bris la dkyil 'khor nyis 'gyur la spos kyis chag chag btab ste/ lag pa sa la reg par bya'o/ /rje btsun gyi yi ge brgya pa lan bdun bzlas par bya'o/ /sa bzung ba'i rim pa'o/ /de nas bdag nyid ji snyed pa'i rgyan dang ldan par byas te/bkra shis pa'i dus su dkyil 'khor gyi dbus su 'dug la/ sgrub pa'i thabs las 'byung ba bzhin du/ /bdag bsrung ba nas bgegs gzhom pa la sogs pa bya ba dang / de nas rten sprul pa nas tshogs bsags pa nas/ ye shes par gyur pa'i bar du byas la/ der gong gi dang 'dra ba'i lha mo sta gon byas la/ de nas spro ba bskyed de/ deng du bdag tshe 'bras bu yod/ /bdag ni gson pa 'bras bur bcas/ /lha dang dam tshig mnyam pa ru/ /gyur par bdag ni som nyi med/ /byang chub sems dang sems gcig las//mi ldog par ni bdag gyur te/ /'jam pa'i dbyangs kyi rigs su ni/ /deng bdag skye bar the tshom med/ /deng bdag nyi ma dam pa ste/ /mchod sbyin 'di ni bla na med/ /phyogs bcu'i sangs rgyas spyan 'dren pa/ /deng bdag 'dus pa'i mchog yin no//de nas phyag byas spos thogs la/ /kye dbang ni nges te bla na med/ /phyogs bcur bzhugs pa'i sangs rgyas kun/ /ma lus bdag la dgongs su gsol/ /bdag ming 'di zhes bya ba yis/ /'jam pa'i dbyangs kyi dkyil 'khor bri/ /deng 'dir sangs rgyas kun gshegs te//dngos grub 'di ni stsal du gsol/ /zhes brjod la dang po'i sbyor ba dang / dkyil 'khor rgyal mchog dang las kyi rgyal po mchog rnam par bsgoms la/ yang sgo dbye ba la sogs pa sngon du 'gro ba nas bdag nyid ye shes pa'i gnas su 'dug pa'i bar du bya ste/phreng ba'i sngags zlos pa la sogs pa'i rnal 'byor pa'i sgrub pa'i grogs lha'i nga rgyal dang ldan pas dkyil 'khor bri ba'i phyir 'dud kyis bstod de/ de nas/ rgyud chen sgyu 'phrul dra ba las/ /rdo rje 'chang chen gsang sngags 'chang / /dpag med rnams kyi bka' bzhin du//dkyil 'khor dam pa bshad du gsol/ /zhes gsol ba btab la/ de nas langs te/ lha rnams la phyag byas nas/ bdag ni rang nyid ral gri can/ /dang po'i sangs rgyas bdag rang nyid/ /nga ni sangs rgyas rgyal po ste/ /stobs chen ral gri can bdag nyid//de nas mig dang rkang pa byin gyis brlabs te/ bsgoms pa'i dkyil 'khor steng du bteg la/ byang shar mtshams nas bskor ba byas te/ hUM ye shes zhi ba'i ngang las ma g.yos kyang / /sku yi cha lugs za byed rngam stabs can/ /gsung gi nga ro 'brug stong ldir ba'i sgras/ / ma lus dbang du sdud la phyag 'tshal lo/ /gzhan yang tsham rngam gyi dbyangs brjod la/ hUM dkyil 'khor chen po'i sa gzhi la gnas pa'i/ lha la sogs pa'i bgegs tshogs kun nyon cig /gnas 'dir 'jam dpal dkyil 'khor ngas 'dri yis/ /bgegs kyi rigs tshogs gang yin 'byer bar gyis//ci ste nga yi bka' las 'das gyur na/ /ye shes can gyi ral gri 'bar ba yis/ /mgo bo tshal pa brgyar ni 'gas byed cing / /rnam par 'jig par 'gyur bar gdon mi za/ /deng sa phyogs nam mkha' ltar dri ma med pa 'di/ /deng rnal 'byor gyi dbang phyug chen po zhes bya bas/sems can thams cad rdzogs pa'i byang chub la dgod pa'i phyir/ 'jam dpal gyi dkyil 'khor 'dri yis/ hUM lha klu gnod sbyin dri za dang / /'byung po sha za srin po'i tshogs/ /'byung po thams cad sar song zhig /'jam dpal bka' thos myur du song //gang dag mi 'gro de la ni/ /ral gri dang ni kha T+wAM gas/ /spyi bo tshal pa brgyar 'gas 'gyur/ /lan gsum du brjod do/ /bskal pa me lta bu'i 'og nas byung nas/ gdug pa can thams cad bsreg par bsam mo/ /de nas dkyil 'khor gyi lte bar 'dug ste/ bskal pa'i me lta bu'i khro bo'i 'byin pas gdug pa can thams cad bskrad par bya'o/ /de nas dag pa yongs su bskor ba'i tshul gyis shar du 'gro bar bya'o/ /de nas g.yon brkyang bas bgegs bskrad do/ /de nas gnod sbyin gyi 'gros kyis lhor song la/ /g.yas brkyang bas bgegs bskrad do//de nas rdo rje 'gros kyis nub tu song la/ zlum pa'i stangs stabs byas la bgegs bskrad do/ /de nas byang du rdo rje 'gros kyis song ba der sa ga'i 'dug stangs kyis bgegs bskrad la/ de nas 'gying 'gros kyis shar du 'gro bar bya'o/ /yang rdo rje 'gros kyis dkyil 'khor gyi lte ba bskor la phur bu'i 'gros bya'o//dbus der hUM sgra rgyun mi bcad do/ /der phyed pas 'dug la rdo rje'i lta bas bgegs bsnun la/ bsreg pa bcing ba phyogs dang mtshams ra ba dra ba byas la/ oM badzra dz+wa la a na lArka hUM/ hUM badzra a na la ha na da ha pa tsa ma tha b+hany+dza ra Na hUM/badzra ne tri ban+d+ha sarba big+haM/ oM dr-i D+ho me b+ha ba/ rak+Sha sarba swA hA/ oM hu lu hu lu hUM phaT/ oM druM ban+d+ha hUM/ oM badzra pA sha hri/ oM badzra pA taM ke pA taM ke ni ra Ta/ hri badzra ka li ru Ta ma Ta/ oM badzra shi kha ri ru Ta ma Ta/ hUM badzra karma badzra ban+d+ha baM/ sarba maN+Dal hUM dza/ gsang ba 'dug la/ ma hA tsakra maN+Da si a ti si ta hUM gis byin gyis brlabs la/de nas seng ldeng las byas pa'i phur bu la/ tsan+dan dmar pos byugs la/ srad bu dmar po dang me tog dmar pos bcings la stod khro bo la smad rdo rje rtse gcig pa'i dbyibs su 'dug la hUM las sprin sgra la sogs pa bskyed la/oM badzra kI li kI la ya sarba big+h+nAM ban+d+ha hUM phaT/ ces brgya rtsa brgyad bzlas pas/ g.yon pa khu tshur gyis bzung ste/ g.yas pa rdo rje tho bas dbus dang gru bzhir brdung ngo / /d+ha ma d+ha ma/ da ma da mas na tsun+d+ha ya tsan tsur+Na ya badzra ut+ma ka ra hUM phaT/ rdo rje tho ba lan brgya rtsa brgyad bzlas la brdung bar bya'o//de nas rdo rje go cha bskon/ /rdo rje'i rtse mo bzlas pa'i spos chus byugs la gur gum dang / a ka ru dang / du ruSh+ka dang / tsan+dan dang ga bur dang gla rtsi la sogs pa'i dri rnams kyis sngags gdab pa'i lha'i grangs dang mnyam pa'i dri'i thig le zlum po byas la der me tog gi tshom bu la sngags bzlas te dam tshig sems dpa' bskyed la/nam mkha'i de bzhin gshegs pa rnams dgug pa dang gzhug pa la sogs pa byas la mchod pa'i bye brag sna tshogs pas mchod la/ bstod pa byas gsol ba gdab ste/hUM bcom ldan 'jam dpal rdo rje ni/ /rig sngags rgyal po phyag 'tshal bstod/ /snying rje'i yid kyis dkyil 'khor bri bar 'dod/ /de bas byin brlabs mdzad par gsol/ /dgongs shig sangs rgyas sde dang tshogs/ /gang gzhan sngags kyi lha tshogs dang / / lha rnams bstan la mngon dga' ba/ /dkyil 'khor byin rlob dngos grub stsol/ /zhes lan gsum du'o/ /de nas dngul lam gser gyi bum pa la kha dog dkar por bsgyur la/ lha'i grangs dang mnyam pa'am/ yang na rnam par rgyal ba'i bum pa'am las thams cad pa'i bum pa ste/las kyi bum pa la sna tshogs rdo rje bri'o/ /rnam par rgyal ba'i bum pa la lha kun gyi mtshan ma dang / gtso bo'i mtshan ma bri'o/ /gtso bo'i bum par sman lnga dang 'bru lngas bkang la mgul chings nyis rim du bya'o/ /me tog gi phreng ba dang gdugs dkar po re res g.yogs par bya'o//yang na bum pa bcu dgod zer te 'thad do/ /gtso bo'i bum par gong gi gsum las lha tshang bar bskyed la/ dgug gzhug dang mchod bstod dang bzlas pa bya'o/ /las kyi bum par rdo rje gnod sbyin du bskyed pa dang gzhug pa dang / mchod bstod dang bzlas pa bya'o//rnam rgyal bum pa ni bzhu bar bya'o/ /las bum ni mi bzhu'o/ /yang na kun mi bzhu zer te/ de nas bum pa rnams gtsang sar sba'o/ /bum pa lhag par gnas pa'o/ /de nas bar chad thams cad zhi ba dang / dngos grub thams cad bsgrub pa'i phyir/gzhung bzhin du sbyin sreg bya/ de nas phyi rol du gtor ma btang ste/ lha la mchod pa slob ma sta gon du gzhug pa bya ste/ shar ngos su maN+Dal byas pa'i rtsar 'dug ste/ bla ma la gsol ba gdab ste/ ston pa khyod la bdag dga'o/ /byang chub sems dpa'i tshul bstan pa//mgon po chen po bdag 'tshal lo/ /de nyid dam tshig rig pa dang / /byang chub sems kyang bdag la gsol/ /thar pa chen po'i grong mchog tu/ /mgon po bdag ni 'jug par mdzod/ /de nas bla mas/ rtog pa rnams ni legs par bsdus pa yis//shin tu bsam pa bzang por ldan pas nyon/ /brjed ngas blo la 'jam pa'i dbyangs sogs rnams/ /bde bar gshegs pa rnams kyis byin mi rlob/ /bag med bdag gis mi dge bgyis pa dang / /bgyid stsal rjes su yi rang gang yin pa/ /de dag thams cad byang chub mchog gi ni//spyan sngar ma lus da ltar so sor bshags/ /bde gshegs sras kyi tshogs gnyis zab pa dang / /rgya che 'gro ba ma lus pa yi don/ /sgrub par byed pa de las gzhan pa la/ /rtag tu bdag ni rjes su yi rang ngo / /thugs rjes khyab pa'i thugs dang ldan gyur pa//blo gros sdig bral gti mug tshogs kun bcom/ /ma lus pad+ma'i rigs kyi nang bzhugs pa/ /bde bar gshegs pa rnams la skyabs su mchi/ /blo mchog rnams kyi kun dga' ra ba ste/ /dman pas 'jigs pa rnams kyi skyabs byed 'tshal//srid pa'i sbyor ba zil gyis mnan pa'i mchog/ /gsung mchog chos la bdag ni skyabs su mchi/ /'dod chags la sogs sbrul gyi dug bcom zhing / /blo gros rnam rgyal thugs rjer ldan pa yi/ /brtul zhugs bzang po'i tshogs la skyabs su mchi//srid dang bral ba rnams la bdag phyag 'tshal/ /rgyu yi rjes la bdag po'i lus bdag nyid/ /'bras bu'i stobs kyis dag las rgyal 'gyur ba/ /snying rje'i rtsa ba zug cing yang dag rtogs/ /mnyam med byang chub bdag gis gzung bar bgyi/ /de nas slob ma'i gnas gsum du dri'i thig le byas la/rdo rje dang 'khor lo dang pad+ma dang / oM AHhUM gis bskyed de gzhag go/ /de nas spos dang me tog la sogs pa re re byin la/ de nas brtsams te bde ba thams cad nye bar gnas par gyis shig ces brjod do/ /da nas so shing me tog gi phreng bas bdud rtsi 'khyil pa'i sngags bzlas te byin la/slob ma rang gi so brud maN+Dal gyi steng du bor te/ ltas lta ba so shing mdun drang por bor la/ de tshe bdag la lta ba dang / /rtse mo gyen du 'dren gyur na/ /de tshe dngos grub mchog thob 'gyur/ / de tshe shar du kha bltas na/ /de tshe dngos grub 'bring du 'gyur/ /mtshams dang byang du kha bltas na/ /'jig rten pa yi dngos grub thob/ /so shing bor ba rgya zhig la/ /thur du bltas nas sa 'og go/ /de nas ku sha sar pa la rdo rje rnon po bzlas te/ stan dang sngas su sbyin no//de nas srung skud la sngags kyi phreng ba de'i dpung pa g.yon par gdags so/ /de brtan pa'i phyir yang rje btsun gyi yi ge brgya pa yang brjod do/ /de nas zab pa dang rgya che ba'i chos kyi gzengs bstod la bzhin bzangs rnams longs shig dang / dkyil 'khor chen po mthong bar 'gyur ro//nang par ji lta ba'i rmi lam zlos shig brjod la btang ngo / /de nas nang par rmi lam dri bar bya'o/ /de nas 'dzem pa med par bzlas te/ rmi lam sangs rgyas mthong ba dang / /yon tan rgya mtsho mngon sum bzhin/ /mchod rten dang ni sku gzugs mthong //de la mchod pa rtsom pa dang / /dge slong dag dang chos nyan rnams/ /zhes bya ba la sogs pa'i rmi lam brtags la ngan par gyur na sbyin sreg bya/ de nas dkyil 'khor yang dag mchod pa bzlas pa dang / bsgom pa la sogs pa ci nus par mchod bstod la sogs pa byas la/de nas sngags dang phyag rgyas dkyil 'khor steng du bteg la/ de bzhin gshegs pa de rnams dang / shel lta bu'i khang pa brtsegs pa'i nang du zhugs par kha sbyar byas la gzhag go/ /de nas slob ma'i gtso bo dang lhan cig tu bsam gtan la mnyam par nyal bar bya'o//de nas bdag nyid skye rengs shar ba'i dus su lha'i sbyor ba byas la/ nyi ma 'char kar bdag nyid rgyan thams cad dang ldan par byas nas/ dkyil 'khor dris nye bar byugs te/ tshon sna lnga'i skud pa so sor bkal la rim pas bzhag ste/ oM hUM trAM hrIHa rang gi sa bon rnams la mi bskyod pa la sogs pa/ rang gi phyogs na bzhugs pa rnams kyi gnas su btang la/ 'bar ba'i lcags kyus drangs te/ lag pa g.yas pa'i srad bu bkal la/ a na la sogs pa'i sngags kyis bsgrims la/ tsan+dan la sogs pa bsgos pa'i snod du bzhag la mchod de/bzlas pa byas la/ de nas rang nyid rnam par snang mdzad du gyur pa'i snying ga nas/ grogs po rdo rje 'dzin la dza dza zhes pa phyung la/ ma dang Ta las nyi ma dang zla ba ser po'i snang ba bskyed la/ dza zhes pas sgrub pa'i grogs kyi lag tu gtad la/g.yon khu tshur gyis srad bu bzung la ci bder gdab par bya ste/ de yang tshangs dang logs dang zur dang logs thig rnams la/ de bzhin phyi dang nang gi cha chen po nyi shu brgyad du nam mkha' la gdab par bya'o/ /oM badzra sa ma ya sU tra ma ti kra ma hUM/ zhes nga gyen du btab pa'i sgras de bzhin gshegs pa rnams bskul/yang na cha chen po bcu drug tu bya/ de nas kha dog gcig pa'i skud pa las thams cad pa'i skud par byin gyis brlabs la/ sa thig gdab ste/ kha cig na re rdo rje dbyings bzhin du thig gdab bo zhes zer/ kha cig na re cha chen po brgyad du thig gdab bo zhes zer/ 'dir ni nges pa kho nar cha chen po nyi shu rtsa brgyad du gdab bo zhes phyi nang du phye ste/ 'khor lo rim pa gsum gyis gdab bo/ /phyi dang nang du bcas pa'i sgo/ /phyi 'jig rten pa'i sgo rkyang ba bya'o/ /rdo rje ra ba dang me ri la sogs pa'i thig gdab bo//de nas dkyil 'khor na gnas pa'i phur bu hUM bzhis bton la/ tshon sna lngas bkang la/ thig bzhin du byin gyis brlabs te/ oM sa ma ya tsi tra hUM/ zhes pa 'dis sba bar bya'o/ /des byang shar mtshams su tshon sna rnams mdzub gang ba lag pa g.yon pas drangs te/chos kyi dbyings de dag pas ni/ /sems can khams ni rang grol byas/ /rgyas pas 'jam dbyangs rdo rje nyid/ /de bzhin gshegs pa kun gyi gnas/ /zhes brjod la phur bus gdab bo/ /de nas dbus nas rim pas bris te/de yi rim pa 'di yin te/ /sngon po ser po dmar po dang / /ljang gu dkar po rim pas dgye/ /de yang shar du sngo la lho ru ser/ /nub tu dmar po byang ni ljang / /dkar po dbus su shes par bya/ /gsungs pas na de ltar bri'o/ /de ltar bris la mtshan ma dgod pa ni/sku'am gsung ngam thugs su dgod pa ste/ dbus su dpal rnam par snang mdzad do/ /'khor lo'i phyogs bzhir bde bar gshegs pa rigs bzhi'o/ /mtshams su yum bzhi'o/ /de'i phyi rol du 'khor lo rtsibs bcu drug pa grwa bzhi sgo dang bcas pa'o//rtsibs bcu drug la byang chub sems dpa' bcu drug go/ /grwa la lha mo brgyad do/ /sgo la sgo ba bzhi'o/ /de'i phyi rol du 'jig rten pa'i yon tan brjod pa las dgod par bya'o/ /de nas dgongs ka'i dus su bab pa dang / yo byad dang dkyil 'khor gyi rgyan rnams dgram par bya ste/mchod pa lnga dang rgyan thams cad dang / de bzhin du phur pa dang mda' dang / tshon skud kyi dra ba dang / ral gri la sogs pa dang me long la sogs pas dkyil 'khor brgyan pa/ mtshan yang dag par brjod pa'i glegs bam bzhi yang phyogs bzhir gzhag go//phyogs mtshams su spos snod brgyad la sogs pas bdug par bya'o/ /de ltar dkyil 'khor gyi rgyan cha zin nas/ de nas rje btsun gyi yi ge brgya pa zlos shing / dkyil 'khor de dbang ldan nas brtsams te bsang gtor bya'o/ /dkyil 'khor byin gyis brlab pa'i phyir/rdo rje 'khor lo'i phyag rgya dang sngags bzlas so/ /de nas bdag nyid rgyan gyis brgyan pa khyams su 'dug ste/ dang por bdag med pa nas sgrub pa'i thabs las 'byung ba bzhin du/ gtso bo'i sku bskyed cing ye shes sems dpa' dang gnyis su med par byas la rgyas gdab ste/dbang bskur la dkyil 'khor de sngags dang phyag rgyas blang ba la/ sku dang yig 'bru phyag mtshan gang yin pa'i cho ga gsum gyis bskyed la/ kha sbyar gyi sbyor ba bsams la phab ste gnyis su med par bya'o/ /de nas bdag nyid dkyil 'khor lan gsum du bskor zhing lhag pa dang ma tshang ba zhi bar bya ba'i phyir/rje btsun gyi mtshan yang dag par brjod pa dang / sngags kyi phreng ba brgya rtsa brgyad bzlas la me tog dbul lo/ /de nas rdo rje 'jigs byed du byas la dbus su 'dug nas sgo dbye'o/ /yang na bar 'dir lha'i rnal 'byor byas la/bum pa dang yo byad rnams nang du gzhug go/ /bum pa rnams la bzlas pa byas la gnas su gzhag go/ /de nas mchod pa byas la bdag nyid dbang dang dam tshig can du bya ba'i phyir/ rje btsun gyis mchod pa byas pas dbang dang / dam tshig dang ldan par bsam mo/ /de nas mchod pa la sogs pa byin gyis brlabs la/ de nas sgo phye la sangs rgyas rnams spyan drangs la/ nam mkha' la byon pa la bgegs bskrad pa la sogs pa byas la dgug gzhug bya ste/ rgyas gdab pa dang dbang bskur ba dang mchod yon la sogs pa phul la/mchod pa lnga dang nyi shu la sogs pas mchod la/ rje btsun gyi mtshan brgya rtsa brgyad pas bstod do/ /rje btsun gyi sngags kyi phreng ba brgya rtsa brgyad bzlas pa la/ gsol ba btab la de nas 'byung po dang chos skyong rnams la gzhung nas 'byung ba bzhin du gtor ma byin la/de nas dkyil 'khor gyi 'gram du sbyin sreg rgyas par bya'o/ /dus 'di ru phyag rgya dang glu la sogs pa bya'o/ /de nas lha la phyag byas la/ bdag ming 'di zhes bya ba yi/ /rdo rje slob dpon dka' thub che/ /sems can kun la phan pa'i phyir/ /slob ma rnams ni 'jug par bgyi//de nas gang zag gi rim pas zhu phul la bslab pa'i gzhi lnga dang ldan pa'i slob ma gang yang rung ba'i rgyan dang ldan par bya ste/ yol ba'i phyi rol du bla ma la gsol ba gdab bo/ /dga' chen khyod bdag ston pa bas/ /slob dpon khyod ni dgongs su gsol//byang chub sems dpa'i tshul bstan pa/ /mgon po chen po bdag 'tshal lo/ /dam tshig de nyid stsal du gsol/ /sdom pa rnams kyang bdag la gsol/ /de nas slob ma la/ rdo rje bsrung ba bzlas pa yis/ /stod g.yogs smad g.yogs bskon byas la//sgo srung gi sngags bzlas la g.yogs te/ me tog thogs te phyag bzhi 'tshal/ /bshags dang rjes su yi rang dang / /bskul ba dang ni gsol ba bya/ /slob dpon 'dod na 'di skad brjod/ /gtso bo bdag la sdom pa gsol/ /thub pa nyi ma ma lus pa//sangs rgyas rnams ni bdag la gsol/ /bdag ming 'di zhes bya ba yi/ /slob dpon dpang du gnas pa la/ /sangs rgyas rol mo las byung ba/ /mi ldog pa yi 'khor lo 'byor/ /thar pa'i rang bzhin grong khyer che/ /gsang ba chen por 'jug par bgyi//gsang ba thams cad bsdus par ni/ /slob dpon chen po bdag 'jug 'gyur/ /mi ldog pa yi dbang bskur ba/ /skal ba chen po bdag la gsol/ /mtshan rnams kun gyis rgyas btab cing / /dpe byad rnams dang yang dag ldan/ /sangs rgyas kun gyi yid 'ong ma//slob dpon chen po bdag la gsol/ /dbang chen po ni rmad byung ba/ /sems can kun gyi don gyi phyir/ /bdag ni rtag tu slob dpon 'gyur/ /slob dpon chen po bdag la gsol/ /de nas bla mas lha rnams la/ che ge zhes bya 'di nyid ni/ /byang chub chen po 'di nyid ni//dam tshig mchog dang gsang ba yi/ /dkyil 'khor 'dir ni 'jug par 'tshal/ /yang ni bla mas 'di skad brjod/ /gsang ba chen po'i rigs pa yi/ /gsang ba yongs su 'dzin pa ni/ /bdag nyid chen po khyod 'dod dam/ /de yang 'tshal zhes brjod par bya//de nas bla mas 'di skad brjod/ /sangs rgyas chos dang dge 'dun te/ /dkon mchog gsum la skyabs su song / /'di ni sangs rgyas rigs dag la/ /dam tshig brtan par gyur pa'o/ /rdo rje dril bu phyag rgya yang / /blo chen khyod kyis gzung bar gyis//byang chub sems gang rdo rje che/ /shes rab dril bu zhes bshad do/ /slob dpon dag kyang gzung bar bgyi/ /bla ma sangs rgyas kun dang mnyam/ /'di ni rdo rje'i rigs dag pa'i/ /sdom pa dam tshig yin par gsungs/ /rin chen rigs mchog chen po la/ / nyin dang mtshan mo lan gsum du/ /zang zing mi 'jigs chos dang byams/ /sbyin pa rnam bzhi rtag tu sbyin/ /phyi nang gsang ba'i theg pa gsum/ /dam chos khyod kyis gzung bar bya/ /'di ni pad+ma'i rigs dag pa'i/ /dam tshig sdom pa yin par gsungs/ /las kyi rigs mchog chen po la//sdom pa thams cad ldan par ni/ /yang dag nyid du gzung bar bgyi/ /mchod pa'i las kyang ci nus bgyi/ /gzhan yang bcu bzhi 'di dag ni/ /phas pham par ni rab tu bshad/ /spang zhing dor bar mi bya'o/ /rtsa ba'i ltung bar shes par bya//nyin dang mtshan mo lan gsum du/ /nyin re bzhin du bzlas par bya/ /gal te nyams na rnal 'byor pa/ /kha na ma tho sbom por 'gyur/ /khyod kyis srog chags gsad mi bya/ /ma byin par yang blang mi bya/ /'dod pas log par mi spyod cing / /brdzun du smra bar mi bya'o//phung khrol kun gyi rtsa ba ni/ /chang ni yang dag spang bar bya/ /sems can gdul phyir ma gtogs par/ /bya ba ma yin thams cad spang / /dam pa nye bar bsten bya zhing / /rnal 'byor pa rnams bsnyen bkur bya/ /lus kyi las ni rnam gsum dang //ngag gi rnam pa bzhi dag dang / /yid kyi rnam pa gsum dag ni/ /ci nus par ni rjes su skyong / /theg pa dman pa 'dod mi bya/ /'khor ba dag kyang yongs mi spang / /rtag tu mya ngan 'das mi chags/ /lha dang lha min gsang ba la/ /khyod kyis brnyas par mi bya'o/ /phyag rgya bzhon pa mtshon cha dag /mtshan ma bgom par mi bya'o/ /'di dag dam tshig yin par bshad/ /khyod kyis rtag tu bsrung bar bya/ /des/ slob dpon 'dir ni bdag la gsol/ /gtso bos ji ltar bka' stsal ba/ /de dag bdag ni bgyid par 'tshal/ /de nas sdom pa gzung bar brjod//sdom pa mi 'dod gang zag la/ /'jug pa tsam zhig ni bya'o/ /dbang bskur ba ni mi bya'o/ /bo d+hi tsit+ta ut+pA da ya mi/ /byang chub sems ni bla med pa/ /dam pa bdag gis bskyed nas su/ /de yi snying gar snying pos ni/ /rdo rje rab tu gzhag par bya/ / su ra te sa ma ya s+t+waM ho badzra sid+d+hi ya thA su khaM/ dang po'i sangs rgyas byin gyis rlobs/ /mchod pas mchod de yon blangs nas/ /las kyi bum pas dbang bskur ro/ /sems mas bcings te sgo bzhir gzhug /de nas shar sgor 'dug byas la/ /dus 'di nyid du khyod nyid ni//sangs rgyas rigs su chud pas na/ /nga yi rdo rje ye shes sbyin/ /sangs rgyas rigs su 'grub par gsungs/ /gang zhig 'di nyid ma mthong ba'i/ /mdun du smra bar ma byed cig /bag med smras na nyams par 'gyur/ /de bas nan tan smra bar bya'o/ / snying gar rdo rje gtugs la smra'o/ /de nas rdo rje mgor bzhag la/ /'di ni khyod kyi dam tshig ste/ /'ga' la smras na glad pa 'gas/ /tsan+dan gur gum la sogs pa'i/ /mna' chu byin la 'di skad brjod/ /'di ni khyod kyi dmyal ba'i chu/ /dam tshig 'das na sreg par byed//dam tshig bsrungs na dngos grub 'grub/ /'thung zhig rdo rje'i chu la 'thung / /oM badzra ya tha hUM/ mna' bor ro/ /de nas 'di skad smras te/ dus 'di nyid nas bu khyod kyi/ /rdo rje 'dzin pa nga yin gyis/ /nga yis ji ltar bka' stsal te/ /khyod kyis skyo ba med par gyis//gang yang nga la ma mos min/ /de bzhin mos par ma byas na/ /bdud kyis bcom nas myos par 'gro/ /de bas dam tshig gnas par gyis/ /de nas/ yi ge brgya pa mnyam gzhag bstan byas la/ /bdag lus gang yin snod kyi sgo phye ste/ /snying la gnas pa'i rdo rje'i dbus su blta//sngags kyi bdag po yi ge a gzugs dmar/ /brjod pas yang dag pas g.yo ba lta bu'i/ /slob ma'i lus 'di sgo nas dbye bar bya/ /zhugs nas rdo rje byams pa'i snying la gnas/ /ma lus kun la kun du gang nas su/ /rkang pa g.yon pas g.yas pa mnan nas su//sngags pas slob ma'i rkang pa de la dbab/ /kun du dril bu'i sgras ni yang dag dkrol/ /lag pa pad+ma 'dab ma'i phyag rgya bca'/ /mi bskyod rin chen la sogs bde gshegs rnams/ /rang gi phyogs rtogs las byung 'di phab pas/ /legs phab gyur bar rang nyid lus la blta//gang zhig des kyang babs par ma gyur na/ /lag pa g.yas pas til gyi sa bon gzhag /dbus su yi ge hUM yang rnam bkod do/ /rdo rje 'od 'bar bar ni rnam par bsam/ /g.yon pa'i mtheb mdzub phyag rgyar bcas pa yi/ / bslang bar byas la sdig pa bsreg par bya/ /lus ni thal bar byas pa rnam dag pa/ /bsod nams lus la sngags kyis dgang / /ye shes dbab pa nyid du bsam/ /rdzas bzhin dbab pa nyid du rab tu 'gyur/ /de nas babs par gyur pa dang / /sku gsung thugs kyi rtags gsum 'byung //gar dang gar gyi lan dang ni/ /glu dang glu len yang dag bya/ /brtan par byas la 'di skad brjod/ /'di ltar bdag gi slob ma 'di/ /dkyil 'khor du ni legs btsud nas/ /lha yi rigs kyi rim pa dang / /'di yi bsod nams ci 'dra bar//de bzhin du ni 'bab par 'gyur/ /'dis ni dngos grub gang grub dang / /rigs rnams gang gi snod gyur dang / /bsod nams mthu ni gang yod pa/ /dkyil 'khor 'dir ni de bzhin 'gyur/ /pra tIts+tsha badzra ho/ /phreng ba bor te ltas rnams blta/ /gal te bcom ldan dbu la babs//dbu yi gtsug tor 'grub par 'gyur/ /zhabs la babs na sngags rnams 'grub/ /stod dang smad dang bar du babs/ /dngos grub rab 'bring gsum du shes/ /lha yi gzugs las ring du gyur/ /de la dngos grub rim pas 'grub//mchod pa'i 'gram pa tshun chad nas/ /de yi de rigs de yin te/ /me tog btang ste de yi rigs/ /lha gnyis kyi ni bar dag tu/ /babs na gang du nye ba yin/ /gal te dkyil 'khor las thal na/ /lan gsum bar du bskyar du gzhug /de las rgal na re thag chad//de nas phreng ba blangs te 'di skad do/ /sems ni stobs chen 'di long shig /oM pra ti gr-ih+NA s+t+waM mi maM satwa ma hA ba la/ brjod la mgo la bcing bar bya'o/ /de nas mig gis ci mthong dri/ /dkar po mchog ni dngos grub la/ /ser po don 'byung dngos grub ste//dmar po thugs rje chags pa'o/ /nag po mngon spyod las su bshad/ /sna tshogs dngos grub thams cad do/ /gdong g.yogs bkrol te/ /rdo rje chags pa deng khyod kyi/ /mig 'byed par ni brtson par mdzad/ /rdo rje'i mig ni bla na med//he badzra pA sh+ya/ gdong g.yogs bkrol la dkyil 'khor bstan/ /shar phyogs sgo nas lcags kyu ma'o/ /lho phyogs nas zhags pa ser po/ /nub phyogs nas lcags sgrog dmar skya'o/ /byang sgo nas dril bu ljang gu'o/ /shar khyams nas rim pas/byams pa dkar po'o/ /'jam dpal/ spos kyi glang po/ ye shes tog /lho'i khyams la rim pas/ zla 'od/ bzang skyong / blo gros rgya mtsho/ spobs pa brtsegs pa bzhi sku mdog ser po/ nub kyi khyams la/ mthu chen thob/ ngan song kun 'dren/ mya ngan kun 'joms/ dra ba can gyi 'od sku mdog dmar po/ byang gi khyams la/ zla 'od gzhon nu/ 'od dpag med/ nam mkha' mdzod/ sgrib pa kun sel sku mdog ljang gu'o/ /grwa la shar lhor bdug pa ma dkar mo/ lho nub tu me tog ma ser mo/ nub byang du mar me ma dmar skya/byang shar du byug pa ma ljang gu/ shar gyi 'khor lo la rim pas/ rdo rje sems dpa' dkar po/ rgyal po ser ba/ chags pa dmar ba/ legs pa ljang gu'o/ /lho'i 'khor lo la rim pas rdo rje rin chen ser ba/ gzi brjid dmar ba/ rdo rje rgyal mtshan sngo ba/rdo rje bzhad pa dkar po/ nub kyi 'khor lo la rdo rje chos dkar dmar/ rdo rje rnon po sngo ba/ rdo rje rgyu ser ba/ rdo rje smra ba dmar ba'o/ /byang gi 'khor lo la rdo rje las khra bo/ /rdo rje srung ba ser ba/ rdo rje gnod sbyin nag po/ rdo rje khu tshur ser po/ gru chad la/ shar lhor sgeg mo dkar mo/lho nub tu phreng ba ma ser mo/ /nub byang du glu ma dkar dmar/ byang shar grwa la gar ma ljang gu/ de nas 'khor lo'i shar du mi bskyod pa sngon po/ rin chen 'byung ldan ser ba/ snang ba mtha' yas dmar ba/ don yod grub pa ljang gu'o/ /mtshams kyi 'khor lo la/rdo rje sems ma dkar ba/ rin chen ma sngo bsangs ma/ chos ma dmar mo/ las ma ljang gu'o/ /dbus su rnam par snang mdzad dkar ba/ dang po'i sangs rgyas sku mdog sna tshogs pa'o/ /ye shes sems dpa' dkar/ de ni dkyil 'khor bstan pa'o/ / kha cig 'dir rnam dag gsum ston te mi 'thad do/ /de nas dbang bskur te/ sgrub pa dang / slob dpon no/ /de la grub pa ni/ de nas shar ngos zla ba'i dkyil 'khor la/ slob ma yi dam du bskyed pa la byin gyis brlabs la/ las kyi bum pas dbang bskur la mchod pa dang / bkra shis brjod cing gdugs dang rgyal mtshan la sogs pas mchod la/ bum pa'i dbang bskur te/ oM na mo many+dzu shrI badzra a b+hi Shiny+tsa/ zhes pas dbang bskur te/ rigs kyis dbu brgyan par bya'o/ /de nas dbu rgyan stong nyid sngon du 'gro bas yig 'bru las lhar bskyed la/ de bzhin bcug la slob ma'i mgo la bskon la/oM rat+na ku la mu ku Ta a b+hi Shiny+tsa/ zhes pas dbu rgyan dar dpyang dang bcas pas dbang bskur ro/ /de nas rdo rje stong pa nyid las 'od dpag med du bskyed la ye shes bcug la/ de gyur pa las rdo rjer gyur te/ sangs rgyas rnams kyi rdo rje'i dbang //de ring khyod la bskur bar bya/ /sangs rgyas kun du rab bsgrub phyir/ /rdo rje 'di ni khyod kyis long / /oM badzra a ti pa ti twaM a b+hi Shiny+tsa mI tiSh+Tha badzra sa ma ya hUM/ de nas dril bu yang a mo ka si bskyed la/ ye shes bcug pas dril bur gyur pa de byin te/ oM a kA ro mu khaM sarba d+harmA NAM/A d+ya nut+ba n+na twA ta/ zhes pas byin no/ /de nas rdo rje dril bu spyi bor bzung la mi dbang rnam snang chos kyi ngo bo sbyin/ oM na ma a b+hi Shiny+tsa/ zhes pas byin te/ lha gang la babs pa'i ming sbyin no/ /de nas mchod pa rnams kyis mchod la/ sngags dang phyag rgya'i ye shes blang ba dang /mchod pa dang brtul zhugs kyi dbang sbyin la/ slob mas thal mo bskor te/ bla ma la yon dbul ba la sogs pa bya'o/ /rig pa'i dbang bskur ba'o/ /de nas slob dpon du 'os pa'i slob mas yon phul la/ gsol ba gdab ste/ bdag dang gzhan don byed pa yi//slob dpon gyi ni dbang byin pas/ /thugs rje'i bdag pos gsol te zhu'o/ /de nas slob ma rje btsun rnam par snang mdzad bskyed la/ dbang rtags shar ngos su gru bzhi pa sgo nub tu bltas pa tshon sna lngas pad+ma 'dab ma brgyad bris la/ de'i steng du/ seng ge bla re dang dar dang gdugs/me tog gi phreng ba dang rgyal mtshan la sogs rol mo'i cha byed glu gar sogs/ de ltar brgyan pa'i slob ma rnams la/ rnam rgyal bum pa nas bzung ste/ sgo'i bar du dbang bskur ro/ /'jam dbyangs sku gzugs nas bzung ste/ oM many+dzu shrI ma hA su kha badzrad sa twa dzaHhUM baM ho/su ra te sa ma ya s+t+waM/ zhes pas slob dpon chen por gyur/ bkra shis brjod de/ shes rab yan lag 'dus pa'i ral gri las byung ba/ /byang chub sems kyi 'jam dbyangs byang chub de dbang bskur/ /'jam dbyangs lha tshogs rnams kyis legs gsung gang yin pa//de ni dbang bskur mchog la dus kun bkra shis shog /'grub na lha kun la sbyar ro/ /byang sems rdo rje la sogs dkyil 'khor la 'jug cing / /srid pa'i snying po rnam grol sgeg mo la sogs pa/ /bde byed rab mchog legs par glu blangs pa yi bkra shis gang / /di ring khyod kyi dbang mchog 'di la bkra shis shog /shin tu zhi ba'i mdzad pa phul byung ma lus pas/ /sems can bde gshegs rtogs 'dzin dbang bskur ba/ /dpag med lha'i tshogs kyis legs gsung bkra shis gang / /de ni khyod kyi dbang bskur mchog la bkra shis shog /dpal ldan khams gsum rnam rgyal dkyil 'khor rab mchog la//'jig rten gsum gyi rgyal mchog dbang bskur ba/ /lha yi tshogs kyis btud de dbang bskur gang / /de ni khyed kyi dbang bskur mchog la bkra shis shog /'gro ba sna tshogs 'dul phyir phyag na pad+ma bsnams/ / rdzogs pa'i rin chen cod pan bdud rtsi'i chus dbang bskur/ /pad+ma'i 'dod chags legs gsung bkra shis gang / /de ni khyed kyi dbang bskur mchog la bkra shis shog /nam mkha'i snying po nor bu rin chen 'byor pas nyams dga' ba'i/ /don rnams kun grub bde byin dbang bskur chen po la//dge ba phun sum tshogs mdzad legs gsung bkra shis gang / /de ni khyed kyi dbang bskur mchog la bkra shis shog /de nas dbu rgyan dang rdo rje dang dril bu dang rdo rje dbang bskur byin la/ me tog la sogs pas mchod de/ de nas dam tshig la sogs pa'i dngos grub byin te/rdo rje byin la de kho na nyid bstan te/ thog mtha' med pa'i sems dpa' ni/ /rdo rje sems dpa' dga' ba che/ /kun du bzang po thams cad bdag /rdo rje snyems tshul bdag po'i bdag /ho las dril bur bskyed la/ 'di ni sangs rgyas thams cad kyi/ /shes rab dbyangs kyi rjes 'gror 'dod//rtag par khyod kyis gzung ba yin/ /rgyal ba'i byang chub mchog rab kyi/ /srid pa'i ngo bo nyid bdag mdzod/ /phyag rgya chen pos gzhag la/ srid pa'i bde ba shin tu chung / /sdug bsngal chen po dag bya'i phyir/ /shin tu bde ba dam pa'i thabs/ /de bas dam tshig srung bar gyis//'dod pa'i longs spyod thams cad ni/ /ci 'dod par ni bsten bya bzhin/ /rang gi lha yi sbyor ba yis/ /bdag dang gzhan la mchod par bya/ /sku yi dam tshig go/ /de nas mchod pa rnams kyis mchod la/ gsang ba'i dbang bskur te/ dkyil 'khor dang lha rnams dang slob dpon la brlabs te/dkyil 'khor ni mi mnyam med par zur bzhi ste/ dran dang dbang po'i sgo bzhi dang / /bsam gtan rnams ni rta babs bzhi/ /ting 'dzin kha khyer shes par bya/ /kha khyer la brten rdo rje'i mchog /gzugs rnams lha mos mchod pa yin/ / rgyan rnams kun gyis bkram pa yang / /bsam pa thams cad rdzogs byed pa'i/ /gdul bya bskyod pa sna tshogs mchog /dar 'phan dril bu sgrogs pa yin/ /me long ye shes rtag me tog /byang chub yan lag me tog phreng / /dra ba dra phyed rin chen mchog /nyi ma zla bar yang dag bshad//kun grub mi zad bde ba ste/ /bde ba chen po zhes grags so/ /de yi nang gi dkyil 'khor gyi/ /ka ba dkyil 'khor dra ba yin/ /dngos grub bde ba kun ster ba/ /rnam thar brgyad po de nyid yin/ /theg pa chen po'i byang chub sems/ /'di des 'khor lo bskor bar ni//rdo rje'i thig gis yongs bskor zhing / /chos kyi 'khor lo bskor bas na/ /'khor lo rnams dang ldan pa yin/ /gang du 'jug pa tsam gyis na/ /mi mtshungs pa dang mi ldog pa/ /bde ba chen po rab sgrub phyir/ /de dag dang por yang dag 'gyur//de nas lha'i rnam par dag pa ni/ rang rig pa'i sgyu ma gnyis su med pa'i ye shes de nyid lha lnga bcu rtsa gsum yin te/ de yang gzugs dang gti mug dag pa chos kyi dbyings kyi ye shes/ spyi'i cha nas 'jam dpal rnam par snang mdzad do/ /'di la sku gsum du brtsi'o//rnam par shes pa'i phung po dang / zhe sdang rnam par dag pa me long lta bu'i ye shes ni mi bskyod pa'o/ /tshor ba'i phung po dang ser sna dag pas/ mnyam pa nyid kyi ye shes ni rin chen 'byung ldan no/ /nga rgyal gyi sgrib pa 'du shes kyi phung po dang 'dod chags dag pa/so sor rtog pa'i ye shes ni snang ba mtha' yas so/ /sgrib pa dang / 'du byed kyi phung po dang / khro ba dag pa bya ba nan tan don yod grub pa'o/ /dang por 'dzin pa la sogs bzhi bkag pa'i rnam thar bzhi'o/ /mi bskyod pa'i me long lta bu'i ye shes des/ dgag bya nang dang phyi dang /phyi dang nang snod bcud du zhen pa bkag pa'i rig pa'i cha me long lta bu'i me long / me long lta bu'i mnyam pa nyid/ /me long lta bu'i so sor rtog pa/ /me long lta bu'i bya ba nan tan no/ /shar gyi 'khor lo ser po bzhi'o/ /de bzhin stong pa'i cha bzhi byang chub sems dpa' bzhi'o//des 'gre'o/ /dgag bya bkag pa'i rim pa'o/ /ye shes sems dpa' la/ stong pa'i cha nas byang chub sems dpa'o/ /ser sna dag pa sbyin pa ste sgeg mo'o/ /tshul khrims 'chal pa spangs ba phreng ba ma/ 'khor ba spangs pa glu mkhan ma//phrag dog spangs pa gar mkhan ma/ /brnab sems spangs pa me tog ma/ /shes rab 'chal ba spangs pa bdug spos ma/ /log pa'i smon lam spangs pa mar me ma/ /shes bya'i sgrib pa dang / phung po'i bdud spangs pa dad pa'i stobs lcags kyu ma/ 'dod pa'i sgrib pa dang /nyon mongs pa'i bdud bcom pa brtson 'grus kyi stobs sgo ba zhags pa ma/ las kyi sgrib pa dang 'chi bdag gi bdud bcom pa dran pa'i stobs sgo ba lcags sgrog ma/ skye ba'i sgrib pa dang / lha'i bu'i bdud spangs pa ting nge 'dzin gyi stobs sgo ba dril bu'o/ /lha'i rnam par dag pa'o//de nas slob dpon rnam par dag pa rnams kyang ji ltar bslab pa'o/ /gsang ba'i dbang bskur ba'o/ /mchod pa gser thur thogs la/ ji ltar mig mkhan mkhas pa yis/ /'jig rten ling thog bsal ba ltar/ /bu khyod kyis ni mi shes pa'i/ / rab rib rgyal ba rnams kyis bsal/ /oM badzra nai tra a pa ha ra pa Ta laM hri/ me long blangs la/ chos kyi dbyings nyid bstan te/ chos rnams gzugs brnyan lta bu ste/ /dag cing gsal la rnyog pa med/ /gzung du med cing brjod du med/ /rgyu dang las las kun du 'byung / / ngo bo nyid med gnas med pa/ /de ltar chos rnams shes nas su/ /sems can don ni mnyam med byos/ /'on kyang sangs rgyas sras su skye/ /de nas dril bu dkrol te/ chos rnams nam mkha'i mtshan nyid de/ /nam mkha' dang mnyam sbyor ba yis/ /kun kyang mnyam pa nyid du gsal//a zhes pas dril bu'i snying po sbyin no/ /de nas ta thA mnyes par gyis zhes pa dang ho zhes pas gzhu byin la/ phyogs bzhi steng 'og tu 'phan du gzhug go/ /yang me long bstan la/ rdo rje sems dpa' me long bzhin/ /dag cing gsal la rnyog pa med/ / sangs rgyas kun bdag rang bzhin gyi/ /bu khyod kyi ni snying la gnas/ /me long 'dzin pa oM many+dzu shrI a/ rkang pa'i bar du 'khor lo bzhag la/ lag par dung byin la/ de ring 'jig rten thams cad la/ /skyob pa rnams kyis 'khor lo skor/ /chos kyi dung ni blang med pa//kun du ma lus gang bar gyis/ /som nyi yid gnyis mi bya zhing / /dogs pa med pa'i sems kyis su/ /gsang sngags spyad pa'i tshul gyi mchog /'jig rten 'di la rab tu sgrogs/ /de ltar byas na sangs rgyas la/ /phan thogs drin du gzo bar la gyur/ / rdo rje 'dzin pa de kun yang / /khyod la rtag tu srung bar byed/ /'khor lo dang po 'di byin yang / /'jig rten kun la khyad par du/ /sems can kun la phan pa'i phyir/ /ji ltar sna tshogs 'dul 'gyur ba/ /chos kyi 'khor lo rab tu bskor/ /de bzhin du rdo rje dang khro bo dang /pad+ma dang nor bu'i 'khor lo bskor zhes rjes su gnang ba byin no/ /de nas gzengs bstod la lung bstan te/ oM nga yis khyod la lung bstan yin/ /rdo rje sems dpa' de bzhin gshegs/ /srid pa kun du rab sgrub phyir/ /srid pa'i ngan 'gro rnams las bton//rdo rje che ge mo b+hur b+hu swa/ zhes pas gzengs bstod de/ de bzhin gshegs pa'i khu tshur bcings la/ g.yon pas chos gos 'dzin pa ltar byas la brjod do/ /ngan song phyir mi ldog ces bya'o/ /de nas gsang ba'i ye shes bslab ste/ 'dod chags bral ba lta bu yi//khams gsum na ni sdig med de/ /de bas 'dod la chags bral ba/ khyod kyis nam yang ma byed cig /ma hA sa ma ya ha na phaT/ de lha'i sngags byin la/ phyag rgya bzhi yang bslab par bya'o/ /de nas khyod kyis mi mkhas pa'i gang zag la sngags dang phyag rgya ma ston cig//de yi spyad na som nyi thos/ /gnyis ka ngan song nyid du lhung / /der khas blangs la/ 'di ni sangs rgyas thams cad kyi/ /rdo rje sems dpa' lag na 'dug /khyod kyis kyang ni rtag tu bcang / /lag na rdo rje brtul zhugs brtan/ /oM sarba ta thA ga ta sid+d+ha badzra sa ma ya tiSh+Tha e Sha twaM d+ha ra ya mi badzra satwa hi hi hi hi hUM/de nas/ 'di ni sangs rgyas thams cad kyi/ /shes rab dbyings kyi rjes 'gro ba/ /khyod kyis kyang ni rtag tu bcang / /byang chub rdo rje rgyal bas gsung / /dril bu byin no/ /rjes gnang mthar thug sbyin to/ slob ma rgyan dang ldan pa la//spyi bor gdugs bzung thal sbyar nas/ /dkyil 'khor legs par bskor du gzhug /gdugs dang bcas pas bskor phyogs su/ /spyi bos btud de phyag 'tshal gzhug /slob ma 'di ni phul ba lags/ /sngags dang rgyud ni 'dzin par 'gyur/ /mkhan pos de skad smras nas su//gdugs bzhag nas bu'i slob ma de/ /lag pas bzung ste 'di skad bsgo/ /dkyil 'khor slob dpon nyid du 'gyur/ /sngags dang rgyud kyang 'dzin par 'gyur/ /sangs rgyas byang chub sems dpa' dang / /lha rnams kun gyis bkur bar 'gyur/ / sems can kun la snying rje'i phyir/ /khyod kyis dkyil 'khor cho ga bzhin/ /nan tan bskyed de bri bar gyis/ /sgrub pa po yang rgyud la sbyor/ /khyod kyis chos la ser sna dang / /sems can rnams la phan pa'o/ /nyams pa che bar gyur kyang ni/ /bu khyod kyis kyang mi bya'o//de nas slob ma re re yi/ /lag pa bzung la sbyin sreg bya/ /de ltar byas la bdag bsrung ste/ /sngags pas yon blang slob ma dag la byin/ /slob mas bskor ba phyag byas bdag nyid dbul/ /bla mas mchod cing yid la gang 'thad dbul/ /dngos grub dam pa 'dod pa yis//de dang de kun bla mar sbyin/ /des ni bsod nams tshogs su 'gyur/ /tshogs las dngos grub chen po 'byung / /de nas bla mas dkyil 'khor gyi lha rnams la/ gsang ba'i mchod pas mchod de/ oM badzra satwa su saM gra haM/ badzra rat+na ma nud+ta raM/ badzra d+harma gI ti naM/badzra karma ka rod+b+ha wa/ d+hU pe la sogs pas kyang mchod la/ thams cad la ci nus pas mchod ces bsgo la byed du gzhug /de nas bza' ba dang btung ba rnams kyis/ bdag dang gzhan ci dga' bas mchod la longs spyod do/ /de nas mna' bsgags la zhugs pa rnams slar btang ngo //de nas lha rnams la mchod pa dang / bstod pa dang gsol ba gdab pa dang / bzod pa gsol la/ nyi ma 'char kar rdo rje sems dpa'i phyag rgya gyen du bkrol te/ oM khyod kyis sems can don kun mdzad/ /rjes su mthun par dngos grub stsol//sangs rgyas yul du gshegs nas kyang / /slar yang 'byon par mdzad du stsol/ /mi bskyod pa la sogs pa sprul pa rnams rang la dzaHhUM baM hoHsa bsdus la/ de nas snying ga nas 'byung ba'i rdo rje rin chen gyi phyag rgyas rang la dbang bskur ba/ mdzub mo gnyis kyis phreng ba bcing ba dang /go cha bcing bar bya ste/ oM badzra rat+na a b+hi Shiny+tsa sarba mu tra me ti ku ru ba ra ka ra brtsen baM/ go cha'i mthar phreng ba bcing la bkrol/ thal mo sbyar te/ mnyam pa'i thal mo dang / oM badzra tuSh+ya hoH/ zhes pa dang / yi ge brgya pa brjod la de dga' bas legs pa sbyin no//de nas/ oM badzra kI li ki lA ya sarba big+h+nAM badzra d+ha rA Na hUM hUM hUM hUM phaT/ ces phur bu bton la 'o mas bkru'o/ /oM a kA ro mu khaM sarba d+harmA NAM/ Ad+ya nut+pan+natwA ta/ zhes pas tshon rtsi rnams bsdus la/ gar dang sil snyan ldan byas la/ /chu klung chen po'am rgya mtshor bya//sdig pas mi gos ya ga med/ /dkyil 'khor ba yi lci bas byug /bza' ba dang ni bca' ba rnams/ /ci dga' bar ni spyad par bya/ /khyi dang bya rog la sogs par/ /cung zad tsam yang mi sbyin no/ /yo byad rdzas rnams thams cad ni/ /slob dpon nyid kyis bsgrub nas su//bdag rang nyid kyis spyad par bya/ /slob ma rnams la bgo mi bya/ /rgyud rnams kun las de skad gsungs/ /slob mas spyad na dam tshig nyams/ /gang zhig spyad par mi 'dod na/ /de yi cho ga'i go rims ni/ /dkon mchog gsum gyi yo byad du//cho ga bzhin du dbul bar bya/ /gdugs dang rnga yab sil snyan stsogs/ /sangs rgyas rnams la dbul bar bya/ /gdan dang bdug spos la sogs pa/ /dam pa'i chos la dbul bar bya/ /gos dang yo byad sgo la sogs/ /dge 'dun rnams la dbul bar bya/ / de dag la ni slob ma yis/ /cung zad tsam yang mi skyer ro/ /gal te bdag nyid mi 'dod na/ /dge slong dge bsnyen rnams la sbyin/ /de nas de yi phyi de nyin/ /nyes byas lhag chad zhi bya'i phyir/ /byams pa chen po bsgom par bya/ /slob mas ma dag zhi bya'i phyir/ /spyan la sogs pa'i sbyin sreg bya//sems can kun la phan pa'i phyir/ /byams pa chen po bsgom par bya/ /dad pa med dang sman la 'jug pa dang / /'dod la chags dang 'khor ba'i dbang phyug dang / /g.yo sgyu can dang ser sna 'jur gegs can/ /rtse gnyis blo zhan rtog pa can//rang gi bu nyid yin yang de la ni/ /sgrub pa'i cho ga 'di ni sbyin mi bya/ /mtshan gyi yang dag brjod pa rgya mtsho lta bu'i don/ /bdag 'dra'i blo yis dpag par mi nus kyang / /bla ma'i man ngag rim pa'i bsrub shing gis/ /cho ga'i rim pa bdud rtsi 'di brtsams pas//'di la dge ba ci thob des/ /'khor ba'i 'dam na bying ba yi/ /sems can rnams dang 'dir bzhugs pa/ /sku gsum sku lnga lhun grub shog /'phags pa 'jam dpal gyi mtshan yang dag par brjod pa'i dkyil 'khor gyi cho ga paN+Di ta shAn+ta gar+b+has mdzad pa rdzogs so/