CLOSE WINDOW

D2579
བོད་ཡིག

@##/ /rgya gar skad du/ Ar+ya many+dzu shrI nA ma saM gI ti no pi ka /bod skad du/ 'phags pa 'jam dpal gyi mtshan yang dag par brjod pa'i sgrub pa'i thabs/ dpal rdo rje sems dpa' la phyag 'tshal lo/ /gang 'di sku gsung thugs ldan pa'i/ /'jam dpal de la spyi bo yis//kun nas lus ngag dang ba'i yid/ /de la bdag ni phyag 'tshal lo/ /zab cing rgya che'i mtshan bstan pa/ /rnal 'byor rgyud rgyal dag la ste/ /snying rje dga' ba'i sems kyis su/ /kun la phan phyir bshad par bya/ /thig le bcu drug mi shigs dbus/ /yan lag med cing rtsis las 'das//de nyid ldan zhing mi rtog 'das/ /nges 'byung kun gyi lam gang yin/ /don gsum the tshom med pa'i blos/ /lus kyi mtha' ni nges rtog bya/ /byang chub bla na med pa ngo / /gsang sngags don kun bskyed pa bo/ /longs spyod rdzogs sku kun gyi mchog /sangs rgyas sprul pa'i rgyud 'chang ba/ /mchod 'os bstod 'os rim gro'i gnas/ /byang chub sems dpa' rdzu 'phrul ldan/ /lag na rdo rje mthu bo ches/ /nyid la snyan pa'i tshig dag gis/ /bstod nas mtshan gyi rim pa zhus/ /blo gzhan don phyir rim par gsungs/ /dang por rdo rje 'chang chen pos//slob dpon cha lugs ldan byas te/ /bsam gtan dang ni rjes mthun pa'i/ /ri yi phug gam chu yi 'gram/ /rdzing ngam rang dga'i gnas dag gam/ /lha khang mchod rten la sogs par/ /bde ba'i stan la 'dug byas te/ /grogs bzang btsal nas bsnyen pa brtsam/ /bdag dang sa gzhi yongs bsrung phyir//dra ba ra ba mtshams bcad dang / /phyogs dang steng 'og bcings sogs pa/ /rab tu 'bad pas khye bsgom par bya/ /de nas shin tu brtser ldan pas/ /sbyin sreg gis ni mnyes par bya/ /sngon du bsnyen pa rab 'bad de/ /dgyes pa bskyed cing 'khor lo ni/ /nam mkhar bsgom par bya ba ni//mkha' la 'dus pa 'khor dang bcas/ /lag pa'i 'du byed bsgom cing bya/ /'bru lngar ldan pa'i sor mo la/ /mdzub mo chung ngu mdud byas pa/ /'di ni dkyil 'khor sgrub pa ste/ /thams cad 'du ba'i sbyor ba yis/ /lnga dang gcig dang drug dang gsum/ /'khor lo'i gsang sngags las bskyed pa//bla ma dang mnyam sbyor bsdus pas/ /mnyam pa shin tu bstod par bya/ /e ma ho yan lag 'dus pa yi/ /sbyor ba 'di ni gsum las byung / /de ltar mkha' la gsal bkod de/ /dbang po'i mngon sum 'dra mthong nas/ /dga' ba mchod pa glu yis bstod//dang por mchod cing rjes yi rang / /bshags dang gsol gdab phyag 'tshal sogs/ /bcu yi yan lag kun 'dus pa/ /bdag nyid rung bar gyur pa na/ /tshigs bcad glu yis bstod par bya/ /dgyes nas bdag la lha rnams kyis/ /snyan pa'i tshig gis bstod par bsam/ / drin gyi tshul gyis slar bstod pa/ /byang chub sems ni rang byung ba'i/ /'di ltar sangs rgyas bcom ldan 'das/ /don chen yi ge dam pa yin/ /mchog sbyin rdo rje mchog khyod 'dud/ /sangs rgyas rnam par snang mdzad de/ /gti mug blo ste gti mug sel/ /mgon po sa bcu'i dbang phyug ste/ / rdo rje chags pa khyod la 'dud/ /rdo rje 'jigs byed 'jigs par byed/ /gdong drug mig drug lag drug po/ /mche gtsigs gdong brgya kun 'dul ba/ /sangs rgyas rol ston khyod la 'dud/ /yang dag bdag med de bzhin nyid/ /stong nyid smra ba'i khyu mchog ste/ /sum cu rtsa gnyis mtshan 'chang ba//med pa las byung khyod la 'dud/ /'dod pa'i don grub ngan song sbyong / /mgon po nyon mongs dra ba 'joms/ /sa gzhi tshangs nas rkang pas gnon/ /sgyu 'phrul dra ba khyod la 'dud/ /sangs rgyas kun gyi rtogs bya ba/ /thig le chen po yi ge med/ /longs spyod rdzogs sku kun gyi rgyal//sangs rgyas rol ston khyod la 'dud/ /me long ye shes ngo bo nyid/ /a ni yig 'bru kun gyi mchog /khong nas 'byung ba skye ba med/ /sems ma rdo rje mchog khyod 'dud/ /mnyam nyid ye shes ngo bo nyid/ /a ni 'byung ba 'gog pa ste/ /tshig tu brjod pa rnam spangs pa//rin chen 'byung ba khyod la 'dud/ /so sor kun rtog ngo bo nyid/ /a ni brjod pa'i rgyu yin te/ /brjod pa kun gyi rgyu yi mchog /chos kyi rdo rje 'dzum spyod 'dud/ /bya ba nan tan ngo bo nyid/ /a ni tshig 'byung gsal bar byed/ /tshig kun gsal bar byed pa yi//rdo rje dra ba las khyod 'dud/ /stong pa'i rang bzhin 'dod chags che/ /sangs rgyas 'dod la phyag 'tshal 'dud/ /phyi nyid ma grub bde ba che/ /sangs rgyas rol la phyag 'tshal 'dud/ /gnyi ga med pas dga' ba che/ /sangs rgyas chags pa khyod la 'dud/ /bstod pa'i don ldan mgu ba che/ / sangs rgyas dgyes pa khyod la 'dud/ /gzugs chen lus kyang lha che ba ste/ /sangs rgyas 'dzum pa khyod la 'dud/ /kha dog che la gzi byin ldan/ /med pa las byung khyod la 'dud/ /ming che mtshan bzang rgya che ba/ /sangs rgyas thugs la phyag 'tshal 'dud/ /bzhad cing dkyil 'khor yongs khyab pa/ / sangs rgyas bzhad pa khyod la 'dud/ /chos kyi shes rab mtshan 'chang ba/ /sangs rgyas gsung la phyag 'tshal 'dud/ /nyon mongs dra ba gcod pa'i mchog /sangs rgyas 'byung ba khyod la 'dud/ /grags pa rdo rje rgyu yi bdag /nam mkha' las byung khyod la 'dud/ /snang ba chen po gsal ba che/ / ye shes las byung khyod la 'dud/ /mkhas shing sprul 'chang rdo rje las/ /sgyu 'phrul dra ba khyod la 'dud/ /sgyu 'phrul chen po go cha sra/ /sangs rgyas rol ston khyod la 'dud/ /sgyu 'phrul bdag nyid gnod sbyin gtso/ /thams cad thams cad khyod la 'dud/ /sgyu 'phrul khu tshur bstan zhing sdud/ /ye shes sku nyid khyod la 'dud//sbyin bdag chen po gtso bo ste/ /rdo rje sgeg mo khyod la 'dud/ /tshul khrims chen po 'chang ba'i mchog /rdo rje dpal phreng spyod la 'dud/ /bzod chen 'chang ba brtan pa po/ /rdo rje dbyangs mkhan khyod la 'dud/ /brtson 'grus chen po brtul ba yi/ /rdo rje gar mkhan khrod la 'dud//bsam gtan chen po ting 'dzin gnas/ /rdo rje me tog khyod la 'dud/ /shes rab chen po lus 'chang ba/ /rdo rje bdug pa khyod la 'dud/ /smon lam ye shes rgya mtsho ste/ /rdo rje mar me gsal la 'dud/ /stobs po che la thabs che ba/ /rdo rje dag byed khyod la 'dud/ /rdo rje lcags kyu 'dren pa che//rdo rje 'gugs byed khyod la 'dud/ /rdo rje zhags pa rnam par rgyal/ /rdo rje 'dren byed khyod la 'dud/ /rdo rje lcags sgrog 'dzin pa che/ /rdo rje sdom byed khyod la 'dud/ /rdo rje 'bebs pa rnam rgyal zhags/ /rdo rje 'bebs pa khyod la 'dud/ /byams chen rang bzhin dpag tu med/ /snying rje chen po blo yi mchog /shes rab chen po blo chen ldan/ /mkhas pa chen po thabs che ba/ /ye shes cha grub sems dpa'i tshogs/ /stong pa nyid kyi sgor gnas pa/ /bag la nyal ba byang sems ldan/ /shes rab snying rjer ldan la 'dud/ /rdzu 'phrul chen po stobs dang ldan/ /shugs chen mgyogs pa chen po ste//rdzu 'phrul chen po cher grags pa/ /stobs chen pha rol gnon pa po/ /stobs bcu rdzu 'phrul bzhir ldan pa'i/ /goms shugs ye shes bzhir grags pa/ /stobs po che la bdud dpung 'joms/ /tshogs gnyis rdzogs pa khyod la 'dud/ /srid pa'i ri bo chen po 'joms//mkhregs shing rdo rje chen po 'joms/ /drag po chen po mun pa 'joms/ /'jigs chen 'jigs par byed pa po/ /phung po lnga dag lha chen 'dul/ /mi shes ri 'joms sra ba po/ /mya ngan kun sel drag po ste/ /che bas che ba khyod la 'dud/ /mgon po rigs mchog chen po che//bla ma gsang sngags che ba'i mchog /theg pa chen po'i tshul la gnas/ /theg pa chen po'i tshul gyi mchog /'khor ba mya ngan skyob pa'i mchog /theg pa tshul mchog lam gnas pa'i/ /phyag rgya mchog tu grub byed pa'i/ /pha rol sa bcu gtso la 'dud/ /de ltar bstod par byed pa de'i//'khor lo 'dus pa'i gtso mchog grub/ /de dag mchog gi rgyal po'i sbyor ba'i 'khor lo dang po'i ting nge 'dzin to/ /de nas rim pa 'dir ldan pas/ /thams cad nam mkha'i 'khor lo'i tshogs/ /ma lus mnyes par bya ba'i phyir/ /phyag lngas tshom bu lnga mnyes bya//de ltar mnyes byas 'og tu ni/ /yes shes sems dpa' mngon 'dod pas/ /sems can yongs bsgral bsam pa dang / /byang chub dam par smon par bya/ /de nas 'di dag tshig tu brjod/ /sangs rgyas byang chub sems dpa' rnams/ /ji tsam du ni gzung nas su/ /ma lus bdag la dgongs su gsol//nam zhig byang chub snying po la/ /yongs su gnas [(]gyi [,]kyi [)]bar dag tu/ /bdag gis byang chub mchog gi sems/ /ma lus par ni bskyed par bya/ /ji ltar dus gsum mgon po rnams/ /byang chub tu ni nges mdzad pa'i/ /byang chub sems ni bla med pa'i/ /dam pa bdag thugs bskyed par bgyi/ / sangs rgyas rnal 'byor sdom pa la/ /tshul khrims kyi ni bslab pa dang / /dge ba'i chos ni sdud pa dang / /sems can don byed tshul khrims gsum/ /bdag gis brtan por gzung bar bgyi/ /sangs rgyas chos dang dge 'dun dang / /bla na med pa'i dkon mchog gsum/ /deng nas brtsams te gzung bar bgyi//nam du yang ni mi spong ngo / /rdo rje rigs mchog chen po yis/ /rdo rje dril bu'i phyag rgya yang / /yang dag nyid du gzung bar bgyi/ /slob dpon dag kyang gzung bar bgyi/ /rin chen rigs mchog chen po yi/ /dam tshig yid du 'ong ba la/ /nyin re zhing du dus drug tu/ /sbyin pa rnam bzhi rtag tu sbyin//byang chub chen po las byung ba'i/ /pad+ma'i rigs mchog dag pa la/ /phyi nang gsang ba'i theg pa gsum/ /dam pa'i chos ni gzung bar bgyi/ /las kyi rigs mchog chen po yi/ /sdom pa thams cad ldan par ni/ /yang dag nyid du gzung bar bgyi/ /mchod pa'i las kyang ci nus bgyi//byang chub sems ni bla na med/ /dam pa bdag gis bskyed bgyis nas/ /sems can kun gyi don gyi phyir/ /bdag gis sdom pa ma lus gzung la/ /ma grol ba ni dgrol bar bgyi/ /ma bsgral ba ni bsgral bar bgyi/ /dbugs ma phyin pa dbugs dbyung rdu zhing / / sems can mya ngan 'das la dgod/ /de ltar sdom pa 'dzin byed pa/ /kun rdzogs rim par dbang bskur nas/ /thabs dang shes rab gnyis med par/ /spyi gtsug don dam lha bsnyen bya/ /de nas nam mkha'i 'khor lo'i tshogs/ /ma lus bdag la bsdu bar bya/ /bdag gi snying ga'i dkyil nyid du//thim pa'i ye shes me 'bar te/ /rnam smin phung po bsregs byas nas/ /slar sos ye shes lus su bya/ /de nas byang chub lnga bsgom pa/ /ji ltar yongs su dag pa yi/ /me long gsal ba'i dkyil 'khor la/ /yul dang dngos bo'i rig rnams kun/ /ma lus so sor snang ba bzhin//thams cad yongs su dag pa yi/ /me long lta bu'i ye shes la/ /'dris par de la blta bar bya/ /de nas snying rje bskyed bya ba/ /sems can rnams ni mgon skyabs bral/ /dpung gnyen med cing sdug bsngal ba/ /'khor ba'i rgya mtshor bying ba yi/ /sems can rnams kyi don dag tu//thams cad sdug bsngal las bsgral bsam/ /ji ltar chos rnams stong pa dang / /mnyam pa nyid du rab sbyor bas/ /bdag kyang stong pa bdag med cing / /sems can rnams kyang de 'dra bar/ /chos rnams kun kyang rab tu shes/ /chos la dmigs pa'i snyeng rje yang / / bdag med rang bzhin rig pa las/ /mnyam nyid ye shes bskyed par bya/ /de nas sngags 'di ched du brjod/ /o a kA ro mu khaM sarba d+har+m+mA NAM/ Ar+ya nuta pan+da twA ta/ sngags 'di tshig tu brjod byas nas/ /sngags pas sngags don bsgoms nas su/ /lhan cig dmigs pa med pa dang //gnyis med chos la rab gzung phyir/ /de nyid yul du bya ba'i phyir/ /chos bdag med pa bsgom par bya/ /dmigs med snying rje so sor brtag /de nas snying rje'i rjes 'gro ba/ /gzung 'dzin kun dang yongs bral ba'i/ /ngo bo nyid kyis 'od gsal ba'i/ /yan lag kun dang yongs bral ba'i//rang bzhin yongs su dag pa yi/ /chos dbyings rgyu mthun dngos bral don/ /stong nyid ngang la de gnas nas/ /chos dbyings ye shes bsgom par bya/ /de ltar sems can thams cad kyi/ /don byed bral ba'i rnal 'byor pas/ /sngon gyi smon lam dbang thob cing / /sems kyi rgyun gyi dbang sgyur bas//sems can don ni rab rdzogs phyir/ /khams gsum 'byung gnas khyad par gyis/ /don dam kun rdzob mya ngan 'das/ /nan tan ye shes mngon gsal bya/ /de ltar rnam lnga'i ngo bo yi/ /snying rje nam mkha'i rang bzhin gyis/ /thams cad rang bzhin med shes nas//'gro ba'i don la 'jug brtson bya/ /de dag ni yongs su dag pa'i ting nge 'dzin to/ /de nas de la dngos 'byung gzugs/ /'phrul pa'i tshul kyis nam mkha' las/ /rang bzhin gyis ni 'od gsal ba'i/ /skar ma'i tshogs ni rab bsgoms te/ /de las byung ba'i khro phreng tshogs/ /sngon po'i mdog can 'od zer ni//brgya phrag stong gis yongs bskor ba'i/ /hUM zhes grags pa bsgom par bya/ /de las 'od zer rab byung bas/ /'od kyi rtse lnga sangs rgyas sogs/ /rdul snyed grangs ni rab sprul nas/ /sprul pa de dag thams cad kyis/ /sangs rgyas zhing du rab gshegs te/ /sems can khams rnams dag byas shing //byang chub sems ni rab bskyed dang / /sdom pa gzung dang rjes yi rang / /gsol btab bsgul ba sogs byas nas/ /sangs rgyas rdzu 'phrul rab bstan te/ /phyir la hU~M der 'du byas nas/ /hU~M de nyid la zhugs par bsam/ /de las yongs 'gyur kha dog ni/ / sngon po la sogs drug ldan zhing / /de yi 'od kyis zhing khams drug /khyab par byas nas 'bar ba yis/ /bdud 'jigs mi thub zhal drug pa/ /ye shes rdo rje rtse lnga bsgom/ /ye shes rdo rje'i bum nang du/ /dkar po'i yi ge b+h+rAM bsams te/ /de las gyur pas rin po che'i/ /stong gsum tsam gyi mchod rten bsgom//de nang hrIHyi yi ge las/ /gru gsum chos 'byung bsam par bya/ /de nang yi ge rdzogs pa las/ /sna tshogs rdo rje bsgom par bya/ /de las yang ni b+hUM las ni/ /rdzogs pa'i gzhal yas rnam par bsgom/ /gru bzhi pa la sgo bzhi pa/ /twa ra rnam bzhis rnam brgyan cing / /dril bu dar dang 'phan la sogs//me tog phreng dang rnga yab klubs/ /grwa rnams dang ni thams cad dang / /sgo rnams dang ni khyams su yang / /rdo rje rin chen rnams dang ni/ /zla gam chun 'phyang rnams kyis brgyan/ /dra ba dra phyed bkod pa la/ /sna tshogs rgyan gyis klubs pa'o/ /rdul tshon kha dog rnam lnga yis//phyi'i dkyil 'khor bri bar bya/ /dkyil 'khor de dang 'dra ba ru/ /zhugs nas nang gi gzhal yas khang / /'khor lo'i tshogs zhes rab bstan cing //phreng ba bzhi dang ldan pa yi/ /rdo rje dbyings zhes brjod pa ni/ /de nas phyi rol dgod par bya/ /rdo rje phreng bas yongs bskor ba/ /ka ba brgyad dang ldan pa la//rdul tshon lnga po nyid kyis ni/ /dra ba dra phyed nyid kyis klubs/ /dkyil 'khor kyi ni phyi rol du/ /ji ltar gsungs pa'i rtags thams cad/ /khyad par du ni mdor gsungs nas/ /de yi de yis thams cad bya/ /sgo yi mtshams dang twa ra na/ /shin tu gcig nyid mi bya'o/ / de phyir de yi sgo rnams ni/ /twa ra na rnams gdags pa yin/ /go rims bzhin du lha rnams kyi/ /gdan ni phyi nas dgod par bya/ /de nas dbus su dgod pa nyid/ /gtso bo yi ni gdan yin no/ /shar la sogs pa'i phyogs kun tu/ /mi bskyod pa la sogs pa'i gdan/ /rang gi sa bon gyis bskyed pa//de ni spyor bas rig par bya/ /gdan gyi ngo bo bsam pa ni/ /dbus su saM las seng ge'o/ /haM las shar du glang po che/ /lho ru rta ni i las so/ /rma bya nub tu yi las bsam/ /khaM las mkha' lding byang du bsgom/ /de steng paM las pad+ma dang / /dar gyi glod stan dag dang ldan/ /rdo rje sems dpa' nas brtsams te//rdo rje 'bebs pa'i mthar thug par/ /gdan ni a las bskyed pa yi/ /zla ba'i dkyil 'khor lta bu yi/ /steng na sems dpa'i stabs su zhugs/ /de ltar bsgom pa'i bya ba ni/ /yid kyi yul te goms par bya/ /de dag ni gzhi'i ting nge 'dzin to/ /de nas rkyen gyis slong ba ni/ / de dbus 'khor lo'i bdag po ste/ /pad+ma seng ge'i zla steng du/ /a las bskyed pa'i rtag pa ni/ /gtso bo rnam par snang mdzad che/ /rnam thar bzhir ldan kun du zhal/ /mdog dkar ral pa'i dbu rgyan can/ /byang chub mchog gi phyag rgyar ldan/ /byis pa'i rgyan gyis mi bzhugs shing / /'khor lo bskyed pa rgyu bsgom mo//rtag pa'i sangs rgyas bsgom pa ni/ /ting 'dzin 'di ni mchog tu'o/ /de nas snang mdzad chen po yi/ /thugs kar zla ba'i dkyil 'khor gyi/ /dkyil du yi ge d+hIHdkar las/ /dang po'i sangs rgyas zhal lnga pa/ /byis pa'i rgyan gyis rnam brgyan cing / /rin chen sna tshogs na bza' can//phyag brgyad mnga' ba'i phyag mtshan ni/ /g.yas pa bzhi ni go rims bzhin/ /shes rab kyi ni ral gri bsnams/ /de bzhin g.yon pa'i phyag bzhi na/ /shes rab pha rol phyin pa yi/ /po ti re re bsnams pa'o/ /dang po'i sangs rgyas bsgom pa'i ting nge 'dzin no/ /dang po'i sangs rgyas thugs ka ru//shes rab 'khor lo rnam bsgom pa/ /sa mchog bcu gnyis dang ldan pa'i/ /'khor lo lte ba'i rtsibs dang ldan/ /rtsibs rnams lte ba la gnas pa/ /rten cing 'brel par 'byung sbyor bas/ /bcu gnyis pa dang ldan pa yin/ /'khor lo 'dir ni gyur pa'o/ /de yang 'khor lo bsgom bya ba//yi ge a las yongs bskyed pa'i/ /lce drug kha dog drug dang ldan/ /mu khyud bzhi yis bskor ba yi/ /'khor lo de yi dbus nyid du/ /yi ge a dkar bsam bya ste/ /de nyid 'phros pas phyogs bcu yi/ /don byas slar 'dus gzhi la thim/ /thim pa'i byin brlabs las bsam pa/ / bcom ldan ye shes sems dpa' yi/ /rtsa ba'i sngags sogs 'khor lo yi/ /mu khyud bzhi la gsal bar bsgom/ /dang bo'i mu khyud la bsam pa/ /oM sarba d+har+m+ma a b+ha ba swa b+ha ba/ bi shud+d+ha badzra a A saM aH/ de yi phyi rim mu khyud ni/ /gnyis pa la ni bsam bya ba/ /sa mchog bcu gnyis rdzogs rtags su//sgra yig bcu gnyis dgod pa ni/ /a A i yI u U e ai o au aM aH/ 'khor lo lce la bsam pa ni/ /dang po lce nas bsam byas te/ /sngags ni ji tsam bkod pa ni/ /rigs kyi mdog dang sbyar bar bya/ /dang po lce la bsam bya ba/ /oM badzra tIk+Sha ya te na maH/gnyis pa la ni dgod bya ba/ /oM duHkhats+tshe da ya te na maH/ gsum pa nges par dgod pa ni/ /oM pradz+nyA dz+nyA na rmUr+t+ta ye ta na maH/bzhi pa rtag tu rig bya ba/ /oM dz+nyA na kA yA ya te na maH/ lnga pa la ni nges bsgom pa/ /oM bA gI shwa ra ya te na maH/ drug la mtha' ste bsam pa ni/ /oM a ra pa tsa na ya te na maH/'khor lo mu khyud gsum pa la/ /bcom ldan bde gshegs thams cad kyi/ /ye shes sems dpa' sku yi sngags/ /phreng ba dgod pa 'di dag go/ /a A sar+b+ba ta thA ga ta tr-i da ya/ ha ra ha ra/ oM hU~M hrIHb+ha ga bAn/ dz+nyA na mUr+t+ti/ bA gI shwa ra ma hA pA tsa/ sar+b+ba d+ha r+m+ma ga ga na a ma la su pa ri shud+d+ha/d+har+m+ma d+hA tu dz+nyA na gar+b+ha AH/ phyi rol mu khyud tha ma la/ /yi ge ka sogs ha yi mthar/ /thug pa'i yi ge rnams bkod pa/ /'khor lo sngags kyi rim pa'o/ /'khor lo de dag thams cad kyang / /bri'am bsam pa byas na ni/ /nyes par mi 'gyur legs pa 'thob/ /de ni shes rab 'khor lo'o//shes rab kyi 'khor lo'i ting nge 'dzin to/ /de nas 'khor lo de dbus su/ /a las bskyed pa'i bcom ldan 'das/ /ye shes sems dpa' zhal drug pa/ /ston ka'i zla ba ltar gsal zhing / /in+d+ra nI la'i gtsug phud can/ /nyi ma 'char ka'i 'od 'dras bskor/ /zhi ba'i ngang tshul dang ldan zhing //g.yas dang g.yon gyi phyag gnyis kyis/ /ut+pal dmar po g.yas pa ni/ /g.yon pa na ni sngon po nyid/ ut+pal de gnyis steng nyid na/ /shes rab po tis mdzes pa'o/ /de'i thugs kar zla ba bsam/ /de dbus thams cad kun ngo bo/ /yi ge a ni gsal bkod de/ /de nas 'khor lo la gnas sngags//ji ltar bstan pa'i kha dog dang / /de bzhin ldan par rnam bsam ste/ /mi shes ri 'joms 'od dang ldan/ /'od des rang gi lus nyid la/ /snang ba byed pa bsgom par bya/ /snang bar gyur ma thag tu ni/ /zhal bzhi'i sgo nas dbyung bya ste/ /'jig rten khams kun snang bar byas//de nas rdo rje sgo drug nas/ /kha dog drug ldan 'od phyung ste/ /nam mkha'i khams kun khyab byas nas/ /sangs rgyas zhing khams gsal bar 'gyur/ /las gnyis byas nas slar 'dus pas/ /ye shes rdo rje de nyid la/ /lan gsum bskor nas khar zhugs te/ /shes rab ye shes de bkug nas//bdag med ma la rab bcug nas/ /snying ga zla ba la gnas pa'i/ /sngags dang gcig tu 'dres gyur nas/ /de nyid brtan par bdag gis bsgom/ /de ltar spyod pa'i sems dpa' yis/ /ye shes sku yi rnam pa dang / /zla ba'i sgo nas gzugs bsams nas/ /a yi rnam pas gzugs bsgom pa//gsum pa sprul pa'i gzugs kyi sku/ /ring por mi thogs 'dul dbang gis/ /nye bar bzung nas mngon snang ngo / /de dag gis ni byang chub pa'i sgyu 'phrul dra ba'i dang po sbyor ba'i ting nge 'dzin to/ /de nas rigs kyi 'khor lo drug /rim pa bzhin du bshad byas te/ / gtso bo'i gnas su hrIHlas ni/ /mtha' yas dmar po'i mdog ldan pa/ /ting 'dzin sbyor ba la gnas te/ /de yi snying gar dang po yi/ /sangs rgyas gong dang mthun par bsgom/ /de'i thugs kar 'khor lo ni/ /lce brgyad mu khyud bzhir ldan pa/ /sngags dang ldan par bsgom par bya//brgyad dang ldan pa'i sa bon ni/ /oM badzra tIk+Sha ya te na maHzhes pa'i sngags ni dgod byas nas/ /'khor lo'i lte ba'i dbus nyid du/ /yi ge d+hIHlas yongs gyur pa'i/ /rdo rje rnon po mdog dmar po/ /gtsug phud lnga yi dbu rgyan can/ /gzhon pa'i rgyan dang ldan pa yi/ / sna tshogs dar gyi gos dang ldan/ /g.yas na shes rab ral gri bsnams/ /de bzhin g.yon na pad+ma 'dzin/ /de'i snying ga zla stengs na/ /yi ge d+hIHni rnam bsgoms te/ /spro dang bsdu ba sngon bzhin bya/ /de bzhin dkyil 'khor de dbus su/ /hUM gi yi ge las bskyed pa'i/ /mi bskyod sa gnon phyag rgya can//sngon po'i mdog can de bzhin bsgom/ /de yi snying gar dang po yi/ /sangs rgyas bsgom pa sngon bzhin bya/ /de yi snying gar sngon bzhin du/ /lce brgyad pa yi 'khor lo bsgom/ /sngon bzhin de bzhin sngags dgod bya/ /rim pa bzhin du lce la bsgom/ /oM duHkhats+tshe da ya na maH/zhes pa'i sngags ni dgod bya ste/ /lte ba'i dbus su bsgom bya ba/ /yi ge hUM las bskyed bya ba/ /rdo rje ral gri zhes kyang bya/ /sngon po gzhon nu'i gzugs dang ldan/ /zur phud lnga la cod pan can/ /g.yas g.yon rdo rje ral gri 'dzin/ /de yi snying ga zla steng na/ /yi ge hUM bsgom sngon bzhin du//spro dang bsdu ba sngon bzhin bya/ /de nas sngon gyi sbyor ldan pas/ /de bzhin 'khor lo'i dbus nyid du/ /a las bskyed pa'i rnam snang mdzad/ /dkar po'i mdog ldan phyag rgya ni/ /byang chub mchog dang rab ldan pa'i/ /'khor lo bsgoms te de snying gar/ /dang po'i sangs rgyas bsgom bya ste//snying gar lce bcur ldan par bsam/ /oM pradz+nyA dz+nyA na mUr+t+ta ya na maH/ zhes pa'i sngags ni dgod byas te/ /de yi lte ba la bsgom pa/ /yi ge a las yongs gyur pa'i/ /bcom ldan shes rab ye shes can/ /mdog dkar sngon gyi cha lugs can/ /g.yon na 'khor lo rab 'dzin cing / / g.yas na ral gri de bzhin no/ /de yi snying gang zla dkyil bsgom/ /de steng yi ge a bsgoms te/ /spro dang bsdu ba sngon bzhin bya/ /de bzhin dkyil 'khor dbus nyid du/ /yi ge a las rab byung ba/ /mdog ljang don grub mi 'jigs pa/ /phyag rgyar ldan pa bsgom byas te/ /de yi snying gar dang po yi//sangs rgyas bsgom pa sngon bzhin te/ /de yi thugs kar lce brgyad pa'i/ /'khor lo bsgom pa sngon bzhin bsgom/ /de yi thugs kar dgod bya yis/ /sngags kyi rgyal po 'di dag go /oM dz+nyA na kA ya ya te na maH/ zhes pa'i sngags ni dgod bya ste/ /'khor lo lte ba'i dbus nyid du/ / a las gyur pa'i bcom ldan 'das/ /ye shes sku can mdog ljang ba/ /gzhon nu'i gzugs can zur phud ni/ /lnga pas rab brgyan dar gyis klubs/ /g.yon gyis sna tshogs rdo rje 'dzin/ /g.yas kyis shes rab ral gri 'dzin/ /de yi thugs kar zla ba yi/ /dkyil 'khor de yi dbus su ni//yi ge a ni rnam bsgoms te/ /sngon bzhin spro dang bsdu ba bya/ /de nas sngon bzhin dkyil 'khor gyi/ /dbus u i las byung ba yi/ /rin chen 'byung ldan mdog ser po/ /mchod sbyin phyag rgya ldan par bsgom/ /de yi thugs kar dang bo yi/ /sangs rgyas de bzhin bsgom byas te//sngon bzhin lce brgyad rnams la ni/ /sngags dang ldan par rnam bsgom pa/ /oM bA gI shwa ra ya te na maH/ zhes pa'i sngags rnams dgod byas te/ /'khor lo de yi lte ba la/ /oM las bskyed pa'i bcom ldan 'das/ /ngag gi dbang phyug ces bya ba/ /sku mdog ser po rgyan dang ldan/ / zud phud lnga pa sna tshogs kyi/ /na bza' rnams kyis rab klubs pa/ /g.yon gyi phyag na rin po che/ /g.yas na shes rab ral gri 'dzin/ /de bzhin de yi thugs ka ru/ /zla ba'i steng na yi ge oM/ /zhes ni bya ba bsgom byas te/ /'jo sgeg ldan par rab mdzes pa/ /yi ge 'bru dang ldan pa de/ /sngon bzhin spro dang bsdu ba'o//de nas sngon bzhin dkyil 'khor gyi/ /dbus nas yi ge las gyur pa/ /skye med pa byung a bsgoms te/ /de las gyur pa'i bcom ldan 'das/ /byang sems rdo rje zhes grags pa/ /sku mdog dkar po gzhon tshul can/ /rigs lnga'i dbu rgyan dag dang ldan/ /rgyan ni sku dang rab ldan zhing //g.yas dang g.yon gyi phyag gnyis na/ /rdo rje dang ni dril bu 'dzin/ /de yi snying gar bcom ldan 'das/ /dang po sangs rgyas bsgom byas te/ /de yi thugs kar 'khor lo ni/ /lce brgyad pa ni bsgom par bya/ /sngags dgu gcig la gnyis dgod bya/ /oM a ra pa tsa na ya te na maH/zhes pa'i sngags ni dgod byas te/ /de yi lte ba'i dbus nyid du/ /a las bskyed pa'i bcom ldan 'das/ /a ra pa tsa zhes bya ba/ /mdog dkar byis pa'i rgyan gyis klubs/ /zur phud lnga dang rab ldan zhing / /sna tshogs dar gyi na bzas brgyan/ /g.yas dang g.yon na bsnams pa ni//bo ti dang ni ral gri bsnams/ /de yi snying gar bsam bya ba/ /zla ba'i steng na yi ge a/ /sngon bzhin spro dang bsdu byas te/ /gnas su brtan par der 'gyur nas/ /bzlas dang bsgom pa gtang bar bya/ /rigs phye ba'i 'khor lo'i rim pa'i ting nge 'dzin no// //de dag ni rigs kyi dbang gis 'khor lo'i rim pa bstan pa yin no//de nas da ni dkyil 'khor gyi lha dag gi ngo bo gsang sngags kyi sgo nas de dag gi rim pa bskyed par bya ste/ dang po'i sangs rgyas bstan pa yi/ /bdag nyid gsal ba'i thugs ka ru/ /ye shes zla steng a gnas las/ /spro dang bsdu ba'i bye brag gis/ / gsang sngags 'di ni ched brjod bya/ /a A sar+b+ha ta thA ga ta hri da ya/ ha ra ha ra/ o hUM hrIHb+ha ga bAn/ dz+nyA na mUr+t+ti/ bA gI shwa ra/ ma hA pA tsa/ sarba d+harmA/ ga ga na/ a ma la/ su pa ri/ shud+d+hA d+har+m+mA d+hA tu dz+nyA na gar+b+ha AH/ zhes pa'i gsang sngags brjod byas pas/ /so so'i sku rnams gsal bar bsgom/ / gsang sngags de yi 'og nyid du/ a yi 'phro 'du gnas skabs su/ /bcu gnyis mdzad pa rdzogs byas te/ /sangs rgyas mdzad pa rdzogs nas su/ /slar log yi ge'i mtshan ma kun/ /rang gi mdog ltar gsal 'gyur te/ /so so'i gnas su bkod pa las/ /zla ba la gnas cho ga gsum/ /sku rdzogs shar la sogs pa ru//go rims bzhin du bzhugs par bsgom/ /de dag ni lha bsgom zhing 'byung ba'i ting nge 'dzin to/ /de nas lha rnams so so yi/ /mtshan ma'i bye brag bstan par bya/ /dang po shar gyi 'khor lo yi/ /lce la zla gnas de nyid du/ /yi ge hUM las gyur pa yi/ /mi bskyod pa ni bsgom par bya//rab tu dkar ba'i dbu rgyan can/ /'jigs byed bdud gnon skyil krung bzhugs/ /lho ru trAM las yongs bskyed pa'i //rin chen 'byung ldan de bzhin gshegs/ /shin tu ser ba margata 'dra//cod pan dang ldan mchog sbyin mdzad/ /nub tu hrIHlas bskyed pa yi/ /bskyed pa bde gshegs snang mtha' yas//rA ga'i mdog 'dra ting 'dzin rgyal/ /dbu rgyan dang ldan ye shes ldan/ /byang du mtshan rdzogs don yod grub/ /nI la'i mdog 'dra skyabs dang ldan/ /dbu rgyan mnyam pa'i stabs kyis bzhugs/ /sangs rgyas de dag thams cad kyang / /spyi dang khyad par rgyan rnams kun/ /'khor lo'i skabs las shes par bya//shar lho zla ba'i gdan stengs su/ /sems ma rdo rje zhes pa dkar/ /a las byung ste rdo rje'o/ /lho nub zla steng bsam bya ba/ /a las bskyed pa'i rin chen ma/ /sngo bsangs mdzes ma'i thabs tshul can/ /rang gi rigs kyi mtshan ma 'dzin/ /nub byang zla dkyil steng bsgom pa//mos pa i las byung ba ste/ /dmar po'i mdog ldan pad+ma 'dzin/ /brjod pa'i tshul can bsgom par bya/ /byang shar zla steng bsgom bya ba/ /las mchog ma ste mdog ljang mo/ /gsal ba'i bdag nyid chen mo ste/ /sna tshogs rdo rje 'dzin pa'o/ /sems ma rdo rje la sogs kyang / / rang gi rigs kyi mtshan ma yis/ /dbu rgyan sku la sna tshogs pa'i/ /byis pa'i rgyan gyis brgyan pa po/ /de yi phyi rim 'khor lo ni/ /lca steng zla ba bsgom bya ba/ /dbyangs kyi yi ge bye brag las/ /so so'i sems dpa' bcu drug bskyed/ /dang po'i 'khor lo nas brtsams te/ /de la thug pa'i zla stengs su//rigs kyi sems dpar chen po ni/ /rigs las skyes te rim bzhin brtag /dang po'i 'dod pa sems dpa' che/ /gnyis pa rgyal po bde ba che/ /gsum pa chags pa dga' ba che/ /bzhi pa legs la mgu ba che/ /yi ge d+hIHlas de dag bskyed/ /a A i I/ stong bzhi bdag nyid chen pos 'joms/ /rim bzhin rdo rje mda' gzhu dang / /lcags kyu tog par ldan pa ste/ /'gying dang ldan zhing rigs kyis brgyan/ /shar steng zla ba la gnas bsgom/ /lho yi 'khor lo'i steng bsam pa/ /gzugs che lus che rin chen dpal/ /kha dog che gsal nyi ma'i dpal//ming yang che la tog gi dpal/ /dkyil yangs rdo rje bzhad pa'i dpal/ /gsal de don ldan 'di las skyes/ /u U e ai/ de ltar stong ldan dpal mchog rnams/ /rin chen nyi ma rgyal mtshan tshems/ /rim bzhin thogs nas gtso la blta/ /nub kyi 'khor lo'i steng nyid du//sems dpa' rim bzhin bsam bya ba/ /shes rab mtshon can ma chags chos/ /nyon mongs che ba sems dpa' gcod/ /grags ldan sems dpa' kun gyi rgyud/ /snang gsal sems dpa' gsal bar smra/ /'dod ldan tshogs pa de dag kyang /chags pa 'joms rnams 'di las skyes//o au aM aH/ bdag nyid de dag stong pa'i dpal/ /'dzin tshul pad+ma ral gri dang / /'khor lo lce dag so so yi /phyag char 'dzin pa zur la blta/ /byang phyogs 'khor lo'i steng bsgom pa/ /sgyu ma mkhas pa rdo rje las/ /don grub pa ni sems dpa' bsrung / /dga' ba la dga' gnod sbyin te//mi 'phrul kun ldan sdud pa po/ /rim bzhin gsang sngags 'di las skyes/ /a A e ai/ 'di las rim bzhin bskyed pa ni/ /sna tshogs rdo rje go cha dang / /mche ba khu tshur rnam bzung nas/ /las dag yin te gtso la 'dud/ /de dag ma lus sems dpa' yang / /ji ltar gsung rab las byung ba//a la byung ste mtshan gyi sngags/ /tshig dang yan lag kun ldan nas/ /'khor lo de yi byi nyid du/ /mchod pa'i tshogs dag bsgom bya ba/ /sbyin pa tshim byed rdo rje 'gying / /sdom pa srung ba tshul khrims phreng / /bzod pa 'dzin pa dbyangs len ma/ /dge ba la brtson gar mdzad ma//lha mo'i tshul ni 'di bzhi yang / /ming gi yi ge dang pos bskyed/ /lA mA gIr dang nI ra las te/ /'gying dang phreng thogs 'dzin pa dang / /dbyangs dang gar dag byed pa yi/ /tshul dang ldan te byis pa'i tshul/ /de 'og phyi yi lha mo bzhi/ /rim par 'thon te gzhung tshig ldan/ /shes rab lus can bdug pa ma//bsam gtan dang can me tog 'dzin/ /smon lam ldan pa gsal ba me/ /thabs ldan lha mo dag pa'i chu/ /ye shes stobs dang ldan pa yi/ /dad brtson dran dang ting 'dzin ldan/ /'di yang ming las bskyed par bya/ /spos dang me tog gzhong pa dang / / gsal byed dag pa'i chu 'dzin pa'i/ /tshul ldan 'gying mdzes bsgom par bya/ /de yi phyi rim bsgom bya ba/ /byams pa 'jam dpal spos glang po/ /ye shes tog zhes grags pa bzhi/ /byams pa dpag med snying rje che/ /shes rab che zhing thabs che ba/ /so so'i rigs las skyes pa ste/ / rim bzhin yi ge a las skye/ /phyi lta nang lta sems dpa'i stabs/ /de nas de 'og bsgom bya ba/ /bzang skyong blo yi rgya mtsho dang / /blo gros mi zad spobs pa brtsegs/ /rim pa 'di bzhin bsgom par bya/ /rdzu 'phrul stobs dang shugs dang ldan/ /rdzu 'phrul ldan zhing stobs kyis gnon/ / 'di dag kyang ni a las te/ /rim pas rgyan yod sems dpa'i gzhung / /de yi 'og tu bsgom bya ba/ /mthu chen thob dang ngan song 'dren/ /mya ngan 'joms pa dra ba'i 'od/ /rim pa bzhin du bsgom par bya'o/ /phung po 'joms shing nyon mongs 'dren/ /khro bo'i tshul ston drag shul che//lha chen 'jigs byed la sogs pa'o/ /a las de dag rim bzhin bskyed/ /'jo sgeg khro tshul ldan pa'o/ /de yi 'og tu bsgom bya ba/ /zla 'od gzhon nu 'od dpag med/ /nam mkha'i mdzod dang sgrib kun sel/ /rim bzhin a las bskyed par bya/ /de dag bye brag rigs kyi mdog /sngags chen theg pa'i tshul la gnas/ /theg pa kun gyi nang na mchog /lha byed la sogs ldan pa'i mchog /rim gyis rta babs khyams nang du/ /mkhas pas rtag par rim bzhin bsgom/ /sgo nas sngags pas dgod bya ba/ /'gugs dang 'dren pa 'ching ba dang / /mnyes pa rnams ni rim pa bzhin//lcags kyu zhags pa lcags sgrog dril/ /rim bzhin thogs nas tshad med ldan/ /a las bskyed de sgo bzhir gnas/ /de dag ni rgyal ba mchog gi dkyil 'khor gyi ting nge 'dzin no// //de nas las kyi khyad par yang / /bskyed pa'i zhar la byung bas te/ /sgra las 'phel te rgyas bshad pas//'di ru bdag gis ma bshad do/ /las kyi khyad par gyi ting nge 'dzin to/ /de nas spos kyi chu dag la/ /sngags bzlas pa yis bsangs byas te/ /phung po bsdus pa'i mchod pa lngas/ /rim bzhin byin rlabs mdun gzhag nas/ /'di dag rim pa'i go rims kyis//se gol rim par ldan byas pas/ /rim bzhin bsdu ba'i phyag rgya ni/ /dzaHhUM baM hoHldan byas te/ /mdun na mngon sum bzhin mthong nas/ /sa mA dzaHzhes brjod bya zhing / /'khor lo'i tshogs mchog de dag la/ /mnyam med la sogs bstod pa bya//de nas gtso bo'i sngags rings la/ /dr-i sh+ya zhes kyang brjod bya zhing / /a haM zhes dang ldan pa ni/ /bzhi yis rgyas btab don mchog 'grub/ /de nas mchod pa'i bye brag gis/ /mchod nas phyag bzhi bya ba ni/ /dang po'i sangs rgyas la sogs pa'i/ /gnas su bya ba'i rim pa'o/ / de dag ni sngon du bya ba'i cho ga'i ting nge 'dzin to/ /de nas rang dga'i gnas nyid du/ /gzugs brnyan dkyil 'khor bri bar bya/ /sa de gzhung bzhin sbyong ba dang / /gzhung dang ldan par gzhung bzhin du/ /bya ba'i bye brag gzhan na'o// //de nas mchod pa'i bye brag rnams/ /sngon du bstan pa bzhin byas te//spro ba'i sems ni rab bskyed de/ /tshig ldan phyag byas spos thogs la/ /tshig tu brjod pa'i sngags ldan pas/ /bstod de langs la 'gying bcas pas/ /bgegs bsal don du rab tu bskor/ /de nas phur bus gdab par bya/ /de nas phyag rgya bzhi bkug la/ /mchod de sbyin sreg ming rus la//bzlas te bya ba bstan pa yin/ /de la gzugs brnyan bshad pa ni/ /'khor lo rim gsum ldan pa la/ /snam bu mu khyud rnams kyis brgyan/ /rta babs dang ni twa ra na/ /shin tu mdzes pa'i rgyan dang ldan/ /ba dan gdugs dang rnga mas brgyan/ /dril bu ras 'phen rgyal mtshan tshogs//de la sogs pa'i rgyan rnams ni/ /shin tu mdzes pas brgyan pa'o/ /zhes pa la sogs rgyan mchog ni/ /'di yi skabs su rim pas bstan/ /de dag ni gzugs brnyan gyi ting nge 'dzin to/ /gzhan yang sbyin sreg byed pa na/ /las bshad de dag gzhan du med/ /bdag gi las dang gzhan dag ste//gshin dang gson pa'i las su bstan/ /de la bdag gis las bstan pa/ /shin tu dge ba'i shing bu ni/ /tsan+dan shug pa la sogs te/ /dri zhim ngad ldan mdzes pa'i shing / /khru gang khru do zhi ba la/ /rgyas dang dbang dang dgug pa dang / /drag shul spyod pa la sogs kyi//shing ni rim pas shes par bya/ /zlum pa'i dbyibs su brtsigs byas la/ /dang po'i sangs rgyas bsgom par bya/ /sangs rgyas de yi thugs ka ru/ /ye shes lnga yi bdag nyid gtso/ /'jam dpal ye shes sems dpa' ni/ /thugs la gnas te zla steng bsam/ /de yi thugs kyi zla ba la//a las byung ba'i 'od 'phros pas/ /phyogs bcu'i gdug pa btul byas te/ /slar bsdus bdag nyid bsreg byas la/ /zhu ba de las bskyed pa ni/ /thabs shes rang bzhin med pa'i gzugs/ /kha dog las dang mthun pa la/ /shin tu rid pa brang rus can/ / dbu la ye shes sems dpas brgyan/ /de yi thugs kar zla steng du/ /a las bskyed pa'i yi ge b+h+rU~M/ /shin tu legs pa'i gzhal yas khang / /gong du bstan dang mthun pa la/ /shin tu legs pa sgo bzhi pa/ /shar phyogs gre ba'i sgo yin te/ /de dbus gsum las lha rnams bskyed//de la a yis byin rlabs te/ /sku gsung thugs dang ldan par bstan/ /de la sreg blugs dbul ba ni/ /mar dang til dang yam shing dang / /mngar gsum lde gu dkar gsum ni/ /zhi ba'i rdzas la bshad pa'o/ /rgyas dang dbang dang drag dang dgug /'di las gsungs pa'i rdzas rnams ni//'di las ma gsungs gzhan dag la/ /rgyas par bstan te der shes bya/ /de nas gang dag zhi 'dod la/ /spyi bor zla stengs a bsgoms te/ /de nyid zhu bar gyur pa la/ /bya ba de nyid zhu 'gyur la/ /slar sos gzhon nu'i gzugs byas la/ /de la lhag par gnas par bya/ / de ni bdag gi don bya ba la sogs pa'i ting nge 'dzin to/ /gzhan don bya ba'i rim pa yang / /na dang shi ba gnyis yin te/ /de la na ba'i las bya na/ /gang dag yid ni mi dran pa'i/ /bgegs kyi sbyor ba yod pa na/ /ting 'dzin 'di dag dran par bya/ /dang po'i sangs rgyas bdag bsgoms te/ /de'i snying la zla ba bsam//de stengs a dang muM dang raM/ /de las gyur te rab 'phros pas/ /phyogs bcu'i gdug pa kun btul te/ /mdzad pa'i las ni dran par byas/ /slar log bzhi yi gnas su thim/ /thim pas ye shes me 'bar te/ /gnod pa'i bgegs ni dran pa las/ /yungs kar brgya rtsa brgyad du bsreg /des kyang sos par ma gyur na/ /srin bus zos pa'i shing bu la/ /'bar ba'i me ni bus byas te/ /brgya rtsa brgyad du mar las ni/ /sbyin sreg 'bum mam stong du bya/ /des ni nad las thar bar 'gyur/ /na ba las thar pa zhes bya ba'i ting nge 'dzin to//de nas shi la phan gdags na/ /dang por gnod pa'i bgegs bsal nas//ro la phan pa'i cho ga ni/ /a yig kun khyab spyi steng bsam/ /lhar gyur lha ni sngon bzhin bsam/ /a las ye shes lnga yis gang / /phan pa'i gnod sbyin chus btab pas/ /dang por bkru ba'i las yin no//de nas a yi 'phro 'du bya/ /de ni sngon gyi cho ga'o/ /de nas gnas pa'i cho ga bshad/ /shi ba'i dkyil 'khor dbus bzhag ste/ /zhag gsum slob dpon smyung gnas la/ /bgegs bskrad la sogs byas nas ni/ /'khor los lha rnams mdun bsam ste/ /phyag 'tshal spro bskyed la sogs bya//de nas tshig 'di ched brjod bya/ /tshe 'di dang por 'bras bu ni/ /bdag gi gson 'di 'bras bur gcig /dam tshig lha dang mnyam par ni/ /bdag nyid gyur par som nyi med/ /byang chub sems dang sems gcig par/ /phyir mi ldog par bdag 'gyur te//de bzhin gshegs pa'i rigs su ni/ /deng bdag skye bar the tshom med/ /'di ni bdag nyid dam pa ste/ /mchod sbyin 'di ni bla na med/ /phyogs bcu'i sangs rgyas spyan 'dren pas/ /ding 'di bdag 'dus mchog yin no/ /de nas phyag byas spros thogs la/ /spyan drang tshig 'di brjod par bya//kye dbang ni nges te bla na med/ /phyogs bcur bzhugs pa'i sangs rgyas kun/ /ma lus bdag la dgongs su gsol/ /bdag ming 'di zhes bya ba yis/ /'di la phan gdags don ched du/ /gnas 'dir sangs rgyas kun gshegs te/ /'di la dbang ni stsal du gsol/ / de nas sbyor ba'i ting 'dzin dang / /rgyal mchog la sogs bsgom byas te/ /sgo dbye la sogs gnas 'dir bshad/ /de rjes gsang sngags 'di brjod bya/ /a A sarba ta thA ga ta hr-i da ya/ ha ra ha ra/ oM hUM byAHb+ha ga bAn/ dz+nyA na mUr+t+ti/ bA gI shwa ra ma hA pA tsa/ sarba d+har+m+ma ga ga na/ a ma la su pa ri shud+ha d+han+d+ra d+hA tu dz+nyA na gar+b+ha AH/ zhes ni brjod pa'i sngags bzlas so/ /dang po'i sangs rgyas nga rgyal dang / /ldan pas dkyil 'khor bri ba'i phyir/ /tshigs bcad 'di yis bstod par bya/ /sangs rgyas kun la bstod bya ba/ /rang la bstod de nges pa'i mchog /'bras bu 'byin pa'i sangs rgyas kyis//shi la phan gdags don ched du/ /mchog sbyin rdo rje mchog khyod 'dud/ /yang dag mtha' gyur khyod la 'dud/ /stong nyid las byung khyod la 'dud/ /sangs rgyas byang chub khyod la 'dud/ /sangs rgyas chags pa khyod la 'dud/ /sangs rgyas 'dod la phyag 'tshal 'dud//sangs rgyas dgyes pa khyod la 'dud/ /sangs rgyas rol la phyag 'tshal 'dud/ /sangs rgyas 'dzum pa khyod la 'dud/ /sangs rgyas bzhad pa khyod la 'dud/ /sangs rgyas gsung nyid khyod la 'dud/ /sangs rgyas thugs la phyag 'tshal 'dud/ /med pa las byung khyod la 'dud//sangs rgyas 'byung ba khyod la 'dud/ /nam mkha' las byung khyod la 'dud/ /ye shes las byung khyod la 'dud/ /sgyu 'phrul dra ba khyod la 'dud/ /sangs rgyas rol ston khyod la 'dud/ /thams cad thams cad khyod la 'dud/ /ye shes sku nyid khyod la 'dud//de nas gsol ba btab byas nas/ /phyogs bcu'i sangs rgyas nam mkha' la/ /mngon sum 'dra bar gang bar bsgom/ /de nas gang shi de nyid la/ /dmigs la a A zhes bkod de/ /de la phyogs bcu rgyal ba dang / /dang po'i sangs rgyas la sogs pa/ /nam mkha' gang bar 'dir gshegs pa//deng 'dir 'dus par bde gshegs te/ /deng bdag 'dus pa'i mchog yin no/ /de nas rnam rgyal chus bkang ba'i/ /bum pas bkrus te bgegs bskrad la/ /de nas de la bsrung bar bya/ /de nas til gyis de la ni/ /bskor te sbyin sreg dbul bar bya//shi ba sta gon la gnas pa'i ting nge 'dzin to/ /de nas sngon gyi sbyor ba yis/ /cho ga rnams ni spyad par bya/ /dang po'i cho ga rim pa nas/ /'khor lo'i rim pa 'di gsungs te/ /phyi rol byung ste gtor ma sbyin/ /de nas khrus byas mchod pa'i tshogs/ /ma lus par ni 'dir bshad do//de nas phyi yi rim ldan pas/ /sngags pas chas gos ldan pa yi/ /shin tu 'gying bas brgyan byas te/ /zhag bdun nang par sbyin sreg bya/ /mi nyid shi ba'i gnas byas te/ /shi la phan pa'i dkyil 'khor ldan/ /gzhal yas khang pa de 'dra ba//'di las gsungs te gzhan du min/ /'di ltar gsungs pa'i cho ga ni/ /bdag gis rang bzor byas min te/ /'jam dpal sgyu 'phrul dra ba dang / /cho ga 'dus pa'i rgyud las te/ /de nas 'dir ni 'os pa yin/ /'di ni shi ba'i cho ga'o/ /shi ba la phan gdags pa'i ting nge 'dzin to// //de nas de la lam bstan bya/ /tshogs bsags dge ba'i don la sbyor/ /de mthar de nyid rtag bsgom dang / /de nyid mnyam shes ci mi tshugs/ /de la rtag gnas bde ldan te/ /rim pas a yi ngang nyid do/ /de yang bdag lus as khyab ste/ /de nyid a yis byin brlabs pas//a nyid dbyings kyi ngang nyid du/ /thams cad nam mkha' dang 'dra'o/ /rim pa'i ting nge 'dzin to// //de nas 'khor lo bstan par bya/ /bcu drug phyed phyed thig le can/ /yan lag med pa'i rtsis las 'das/ /bsam gtan bzhi pa'i rtse mo can/ /zhes pa 'di yi don bshad na//lus la 'khor lo bzhi gnas te/ /lte bar shes rab 'khor lo ste/ /bcu gnyis rtsibs dang ldan pa la/ /a A aM AHrim bzhin dgod/ /dbus na yi ge a mchog go/ /snying gar shes rab 'khor lo ste/ /bcu gnyis rtsibs dang yang dag ldan/ /de la sngags rnams dgod pa ni/ / a A/ i I/ u U/ e ai/ o au/ a~M aHzhes pa 'di dag rim bzhin du/ /'khor lo'i lce la dgod par bya/ /mgrin par shes rab 'khor lo ni/ /bcu gnyis ldan pa'i rtsibs ldan la/ /oM a ra pa tsa na/ bA gI shwa ra pradz+nyA na maHzhes pa rnams/ /rim bzhin yang dag dgod par bya//de nas mtshog mar bsam pa ni/ /bcu gnyis ldan pa'i lce can la/ /sku yi sngags kyi phreng ba dgod/ /oM A sarba ta thA ga ta hr-i da ya/ ha ra ha ra/ oM hUM hrIHb+ha ga bAn dz+nyA na mUr+t+ti bA gI shwa ra/ ma hA pA tsa sarba d+har+m+mA ga ga na/ a ma la su pa ri shud+d+ha d+har+m+mA d+hA tu dz+nyA na gar+b+ha AH/ zhes pa'i sngags kyi phreng ba 'di//shes rab 'khor lo grags pa yin/ /'di ltar rtag tu gang bsgom pa/ /gzhon nu gzugs can bde ba 'thob/ /grags 'dzin lus dang bde ldan lus/ /de dag spangs nas gzhan don du/ /rab dga'i lus su bskyed par nges/ /de ni bcu gnyis sa rdzogs te/ /kun tu 'od kyi sa chen po//de ni nyi ma'i dkyil 'khor 'dra/ /bdud rtsi 'od ni gnyis pa ste/ /shin tu 'od gsal zla ba 'dra/ /nam mkha'i 'od ni gsum pa ste/ /nam mkha'i bzhi bzhin so sor gsal/ /rdo rje'i 'od ni bzhi pa ste/ /sa de nyid ni bzhi pa'o/ /bsam pa nang gi brtan spyor bas/ / rdo rje zhes ni yongs su brtag /lnga pa rin chen 'od ces pas/ /dbang bskur ba la rab tu gnas/ /pad+ma'i 'od ni drug pa ste/ /pad+ma bzhin du rab tu skye/ /rang bzhin dag pa'i chos nyid phyir/ /dri ma med pas yongs su bzung / /bdun pa las kyi 'od ces pas/ /sangs rgyas 'phrin las byed par 'dod//brgyad pa dpe med byed pa ni/ /de la dpe ni yod ma yin/ /dpe ldan zhes pa dgu pa ste/ /thams cad dpe ni so sor gcig /bcu pa shes rab 'od ces pas/ /sangs rgyas sa ni bla na med/ /bcu gcig thams cad mkhyen pa nyid/ /sa chen rab tu 'od gsal ba//bcu gnyis so so rang rig pa/ /rnal 'byor ye shes rab tu rdzogs/ /zhes pa 'di ni rang rig pa'o/ /'khor lo rdzogs pa'i rim pa'o/ /de dag ni shes rab kyi 'khor lo bsgom pa'i ting nge 'dzin to/ /de nas 'dir dbang dam pa gsungs/ /dbang bskur med na 'grub pa med/ / yon tan ldan pa'i sngags pa yis/ /de la dbang byin yon tan grub/ /dang por khrus gsol brgyan pa ste/ /rgyal ba'i cha lugs 'dra ba dang / /bud med lta bu'i tshul ldan pa/ /slob dpon bla mar gyur pa la/ /dbang rnams nod pa rab tu gsungs/ /dang por sdig pa bsreg byas nas//de la dbang dang dral bar bya/ /de dag kun gyi rim pa yang / /rtsa ba'i rgyud las gsungs pa ltar/ /'dir yang de dag bya ba yin/ /mchod pa'i las dang sbyin pa dang //rim par ldan pas dbang bskur te/ /de nas de la chu dbang bskur/ /gzhan yang phyag rgya'i dbang dang ni/ / cod pan dar dpyad rdo rje dang / /bdag po'i ming la sogs pa dang / /dbang rnams rdzogs par sbyin pa dang / /gsang ba'i dbang dang nges pa'i dbang / /rim pa bzhin du rab tu bskur/ /de nas bkra shis gdon bya zhing / /rgyal po bzhin du 'gying bcas pas/ /g.yog dang ldan pa'i slob dpon la//lan gsum bskor ba tshigs bcad kyis/ /bla ma de ni gzengs bstod bya/ /kye bdag ci rim pas dbugs phyung ste/ /mya ngan 'das pa'i lam la dgod/ /sa la nges pa'i dbang bskur te/ /shin tu gzi ldan bkra shis mchog /ces ni brjod la gshegs su gsol/ /de nas rang yang khyim du 'gro//khyim du phyin nas 'khor dag la/ /slob dpon 'dis ni dam tshig pas/ /bdag kyang dam tshig mchog dang ldan/ /'di la rim gro phun sum tshogs/ /rta dang glang po nor dang 'bru/ /rin po che dang ci bzhed pa/ /khyed kyis nga la ma 'dri bar/ /slob dpon 'di la de phyir dbul/ / sangs rgyas kun dang thabs cig pa'i/ /phyag na rdo rje brtul zhugs brtan/ /shAkya thub pa sangs rgyas la/ /rim pas gsungs pa'i bka' lung ni/ /mtshan brjod pa yi gsung rab 'di/ /shin tu rtogs dka' mngon sum min/ /rang rgyud tsam gyi rim pa dang / /theg pa chen po mngon rtogs pa'i//kun la thugs rje ma ldan pas/ /brtse bar ldan pa'i sems kyis ni/ /yengs med gus pa'i sems kyis bris/ /'jam mgon dpal ldan ye shes sems dpa'i gnas/ /thugs rje ldan pa sku gsung thugs ldan pa/ /bya spyod rnal 'byor rgyud dang ldan pa ni/ /mi dbye dad gtsug sems dang ldan par shog /'phags pa mtshan yang dag par brjod pa'i gsang ba dang ldan pa'i sgrub thabs/ slob dpon chen po dpal ldan byang chub mchog gis mdzad pa rdzogs so// //rgya gar gyi mkhan po smr-i ti dz+nyA na kIrtis bsgyur zhing zhus te gtan la phab pa'o// //thams cad 'di las byung ba'i phyir/ /gzhi yi sangs rgyas skye ba bzhes/ /mu stegs rtsod pa bzlog pa'i phyir/ /smra ba'i seng ge skye ba bzhes/ /thugs rje gnas nas 'dren mdzad pas/ /don yod pa yi skye ba bzhes/ /thugs rje'i 'od zer spro ba'i phyir/ /'od dpag med pa'i skye ba bzhes//skye rgas chu las bsgral ba'i phyir/ /'jam dpal gzhon nu'i skye ba bzhes/ /gang gis gong du ma chod pas/ /dang po sangs rgyas skye ba bzhes/ /sangs rgyas kun kyi thugs yin pas/ /ye shes sems dpa'i skye ba bzhes/ /shes rab gang la thogs med pas/ / 'jam dpal rnon po'i skye ba bzhes/ /zhi ba'i ngang la legs gnas pas/ /a ra pa tsa'i skye ba bzhes// //[ ]@##/ /mtshan yang dag par brjod pa'i bklag pa'i bsgom khog pa zhugs/ /@#/ /'jam dpal ye shes sems dpa' la phyag 'tshal lo/ /bsgom pa 'di ni slob dpon gyi man ngag tu byas pa yin te/'jam dpal ye shes sems dpa' bsgom par 'dod pa'i rnal 'byor pas/ dang por 'jug pa byang chub tu sems bskyed par bya ste/ de la zhugs te 'jam dpal ye shes sems dpa' mngon sum du byas nas kyang / sems can skyabs dang dpung gnyen med pa srid par lhung zhing ma grol ba rnams kyi don bya bar bsam mo//de ltar sems can gyi don bya ba'i thabs kyang bsdu ba'i dngos po bzhis byas te de ni mdo sde'o/ /de nas bsod nams kyi tshogs yan lag bcu bsgoms te/ phyag btsal ba dang / mchod pa dang / sdig pa bshags pa dang / rjes su yi rang ba dang /dge ba'i rtsa ba bsngo ba dang gsum la skyabs su 'gro ba dang / /lam bstan pa dang / byang chub tu sems bskyed pa dang / bcu bsgom mo/ /de la phyag btsal ba ni rang gi snying gar zla ba'i dkyil 'khor gyi steng du yi ge a dkar po bsgom/ /a de las 'od zer phyogs bcur 'phros pas phyogs bcu nas sngon lhun gyis grub pa'i sangs rgyas dang /byang chub sems dpa' chen mo dang / 'phags pa nyan thos dang / rang sangs rgyas thams cad spyan drangs te/ mdun gyi nam mkha' la bzhugs su gsol la/ rang gi rdo rje slob dpon gang yin yang de dag dang lhan cig tu zhugs par bsams la/de dag gi mdun du thal mo sbyar la phyag 'tshal bar bya'o/ /de ltar phyag btsal nas mchod pa dbul te/ rnal 'byor pa dag gi thugs kar yi ge a bsgoms la de las kyang 'od zer spros te/ mchod pa rnam pa lnga me tog gi gdugs dang / ba dan dang / rgyan dang phreng ba la sogs pa dang /spos kyang rang bzhin gyis dri zhim por sbyar ba'i dri mar gyur pa'i dri dang spos rgya dang / mar me'i phreng ba dang / dri chab dang lha bshos dang / gdugs dang rgyal mtshan la sogs pa nam mkha'i sprin phung tsam rgya mtsho ltar gtibs pas mchod par bsgom/ de nas sangs rgyas de dag gi spyan sngar sdig pa bshags te/ dus gsum du bdag gis sdig pa byas pa dang / gzhan byed du stsal pa dang / byed pa la dga' bar sbyor ba dang / dngos gzhi dang 'jug pa dang bcas pa thams cad bshags te/ dran pa ni khas blangs ma dran pa ni bsdus te/ 'gyod pa skyes nas phyis mi bya bar sdom pa blangs nas bshags pa'o//de yang bshags pa'i gnas 'phags pa dang / bshags bya dang / bshags pa po rnams mi dmigs par bsgom mo/ /de nas sangs rgyas dang byang chub sems dpa' rnams dang / 'phags pa nyan thos dang / rang sangs rgyas dang /rnal 'byor pa'i dge ba'i rtsa ba 'dod chags dang zhe sdang dang gti mug gsum gyis ma 'dres pa la/ phrag dog med pa'i dga' ba dang / spro ba ni rjes su yi rang bar bsgom pa'o/ /de nas dge ba'i rtsa ba bsngo ba ni/ /bdag gi dge ba'i rtsa ba ci bgyis pa'i bsod nams kyis sems can thams cad bla na med pa'i byang chub thob par gyur cig par bsngos la bsgom mo//de nas gsum la skyabs su 'gro ba bsgom ste/ sangs rgyas ni 'jam dpal ye shes sems dpa' bsnyen te skyabs su 'gro ba bsgom mo/ /chos ni chos bsgom pa bdag med pa'i chos la brten cing bsgoms la skyabs su 'gro'o//dge 'dun yang nyan thos dang / rang sangs rgyas kyi dge 'dun la skyabs su mi 'gro ste/ sa bcu pa'i byang chub sems dpa' la brten cing bsgoms te skyabs su 'gro ba bsgom mo/ /de la lam bstan pa ni/ bla na med pa'i sangs rgyas grub pa'i lam rdo rje theg pa'i don 'jam dpal sgyu 'phrul dra ba'i ting nge 'dzin bsgom zhing mtshan brjod pa ni lam bstan pa'o//byang chub mchog tu sems bskyed pa ni bdag gis sems can thams cad la bskyab pa'i don du sangs rgyas par bya'o/ /sems can thams cad kyi don bya'o bar bsgom par bya'o/ /sangs rgyas nas kyang sems can rnams ma rgal ba rnams bsgral ba dang /ma grol ba rnams dgrol ba dang / /dbugs ma phyung ba rnams dbugs dbyung ba dang / yongs su mya ngan las ma 'das pa rnams yongs su mya ngan las bzla bar bya'o zhes de ltar bsod nams kyi tshogs yan lag bcu bsgoms nas gsol ba gdab par bya ste/