CLOSE WINDOW

D2572
བོད་ཡིག

/[ ]@##/ /rgya gar skad du/ Ar+ya many+dzu shrI nA ma saM gI ti bi d+hi sU tra pi tri tra/ bod skad du/ 'phags pa 'jam dpal gyi mtshan yang dag par brjod pa'i cho ga mdo dang bsres pa/ 'jam dpal gzhon nur gyur pa la phyag 'tshal lo/ /ye shes lus can gtsug gi nor bus mtshan//dus gsum sangs rgyas gzugs gnas kun la khyab/ /lam mchog dam pa ston pa sman pa'i mchog /sdug bsngal bdud 'dul 'jam mgon phyag 'tshal te/ /mtshan brjod bdud rtsi gsang spyod rtogs dka' ba/ /bdag blo mun pas dgrol bar mi nus kyang //dad pas phyogs bzung thigs par nor bu cig /lung dang man ngag dag la brten nas bshad/ /theg mchog rnams kyi gzhir gyur pa/ /dus gsum rnams kyi lam mchog 'di/ /dkyil 'khor chen po'i tshul dang ni/ /slob dpon rnams kyi dgongs pa yis/ /theg pa sna tshogs thabs tshul gyis//dpag bsam shing chen phyogs 'di brtsam/ /ye shes lus can 'jam dpal gcig pu sgrub/ /mdo dang bsres pa'i cho ga'i rim pa ste/ de la dang po sgrub pa po rigs dang mthun pa'i mtshan nyid bstan pa'i phyir yon tan las/ gzhan yang dam tshig ji lta ba bzhin zhes pas mtshan nyid dang dbang thob pa ston to//gzhan yang / gsang sngags rig sngags 'chang ba'i rigs/ /zhes pa dang / bden par smra zhing tshig mi 'gyur/ /ji skad smras pa de bzhin byed/ /ces pas sgrub pa po snod du rung bar ston to/ /yon tan las ri dang klung nags tshal tshang tshing nang na 'dug kyang rung zhes pas gnas rigs dang mthun pa'am yid dga' ba ston to//bzang ngan shes shing dus shes pa/ /zhes pas/ gza' dang rgyu skar dang nyi ma shis pa la bya ba'i rim pa ston to/ /dpal ldan 'byor pa kun byed pa/ /zhes pa sgrub pa po'i rdzas don rab tu gnas par bya ba dang / maN+Dal gsum dang /me tog dang dri dang byug pa dang / mchod pa'i khyad par mang po dang / glod gdan dang / yo byad kyi tshogs bya ba'i rim pa ston to/ /yon tan las ma rungs pa 'dul ba'i rgyal po zhes pa dang / gshin rje gshed po bgegs kyi rgyal/ /zhes pas mtshams kyi rim pa hUM gis mtshan pa las khro bo'i rgyal po gshin rje gshed mdog nag po zhal gcig phyag gnyis pa dbyug to dang sdigs mdzub byed pa/sbrul dang thod pas brgyan pa bskyed la/ ya mAn+ta ka hUM phaT/ ces pas mig tu ma dang Ta bkod de/ 'od zer gyis rdo rje'i rab dang dra ba bya bar bstan to/ / snying rje chen po blo yi mchog /ces pa dang / phan 'dogs sems can mnyes gshin pa/ /zhes pas sems can gyi don du bdag gis 'jam dpal thob par bya'o zhes sems bskyed pa bstan to/ /gnyis med gnyis su med par ston/ /zhes pa dang / a ni yig 'bru kun gyi mchog / ces pas thogs pa med pa'i byang chub kyi sems thabs dang shes rab kyi brdar gyur pa'am snying gar ye shes sems dpa' bsam par bya ba bstan to/ /bla ma gsang sngags che ba'i mchog /ces pa dang / mchod 'os bstod 'os phyag gi gnas/ /rtag tu ri mor bya ba'i 'os/ /bkur 'os rjed par bya ba'i mchog /phyag byar 'os pa bla ma'i rab/ /ces pas 'di ston to/ /bdag gi snying gar a 'am hUM bsams te/ de las 'od 'phros pas bla ma dang dkon mchog gsum dang / rje btsun 'jam dpal dang dkyil 'khor gyi lha rnams spyan drangs nas bdag gis bltas te/ lus kyi bkod pas lan gsum bskor ba byas te phyag byas la bstod do//bum pa bzang po che ba'i mchog /ces pa dang / dpag bsam shing chen rgyas pa ste/ /zhes pas mchod pa'i khyad par nam mkha' dang mnyam par bsgrubs la snying ga'i lha mos dbul lo zhes ston to/ /sbyin bdag chen po gtso bo ste//tshul khrims chen po 'chang ba'i mchog /bzod chen 'chang ba brtan pa po/ /brtson 'grus chen po brtul ba yin/ /zhes pas 'di ston to/ /sngags dang phyag rgya dang ldan pas bdag gi snying ga nas lha mo bzhi spros te gnas rnams su mchod par bya'o/ /de bas na/ dbugs 'byin chen po dga' ston che/ /dga' chen rol mo chen po ste/ /bkur sti rim gro phun sum tshogs/ /zhes pas bstan to/ /bsam gtan chen po ting 'dzin gnas/ /zhes pa nas/ /smon lam ye shes rgya mtsho ste/ /zhes pa'i bar dang / byang chub yan lag me tog spos/ zhes bya bas phyi'i lha mo bzhi dang / snying ga nas gong gi tshul du sngags dang / phyag rgya dang bcas pas gnas su dbul lo/ /mchod pa chen po 'dod chags che/ /zhes pa nas/ dga' ba chen po mgu ba che/ /zhes pa'i bar gyis gsang ba'i lha mo bzhis mchod par bstan to/ / oM rdo rje sems dpa' bsdus pa na/ /rdo rje rin chen bla na med/ /rdo rje chos kyi glu blangs pa/ /rdo rje las kun byed par shog /ces bya ba 'di rkang pa dang gsang ba'i mchod pa byed pa'i dus su sgeg mo la sogs pa dang rim pa ji lta ba bzhin du rkang pa bzhi glur blang bar bya'o/ /gzhan yang mchog tu gsang ba'i mchod pa dang /chags pa la sogs pas dbul te rgyas par ma phye'o zhes bstan to/ /de nas 'dud nyi shus bstod de/ yang na ni thams cad kyis bstod par shes par bya'o/ /de nas sdom pa bzung ba'i bar de nyid kyis shes par bya'o/ /byams pa dang snying rje ni shin tu gsal bar ston par tshad med pa bzhi bsgom zhes so//rnam par mi rtog dbyings mi zad/ /chos dbyings dam pa zad mi shes/ /yang dag bdag med de bzhin nyid/ /yang dag mtha' ste yi ge med/ /ces pa'i don bsgom pa ni rang bzhin dag pa'i sngags brjod de/ phyi dang nang gi dngos po stong par bsgom zhes bstan to//stong pa nyid dga' 'dod chags blo/ /srid pa'i 'dod chags spangs pa ste/ /zhes pas pad+ma'i steng na chos kyi 'byung gnas/ de'i mtha' 'od zer lngas bskor ba'i nang du pad+ma dang zla ba'i steng du muM dmar skya'i de bzhin gshegs pa'i phreng ba de gyur pa las/ sprin dkar dag pa bzhin du dkar/ /'od bzang ston ka'i zla ba'i 'od/ /nyi ma 'char ka'i dkyil ltar mdzes/ /sen mo'i 'od ni shas cher dmar/ /cod pan bzang po mthon ka'i rtse/ /skra mchog mthon ka chen po pa/ /nor bu chen po 'od chags dpal/ /sangs rgyas sprul pa'i rgyan dang ldan/ / zur phud lnga ba me tog thod/ /sdug gu 'jig rten gsum na mdzes/ /shes rab ral gri mda' gzhu thogs/ /rdo rje skyil krung rdzogs sangs rgyas/ /dpal ldan blo dang sgeg par ldan/ /sum cu rtsa gnyis mtshan 'chang ba/ /nyon mongs g.yul du gcig dpa' ba/ /zhes pa la sogs pa rnams kyis rje btsun gyi sku sprul pa'i cha lugs su bstan pa yin no//phyag rgya bzhi yi don ston pa/ /zhes pas yum bzhi'i phyag rgya 'phro 'du dang bcas pa'i byin brlabs bstan pa yin no/ /phyogs bcur sprul pa sna tshogs 'gyed/ /ces pas sangs rgyas dang byang chub sems dpa' dang khro bo dang khro mo dang lha mo rnams thugs ka nas spro zhes pa'o//de nas mdun du pad+ma dang zla ba la ye shes sems dpa' spyan drangs te/ dbang bskur ba dang mchod pa dang / bstod pa gong bzhin byas te ye shes sems dpa' de la bltas la/ dgug cing rang lus la gnyis su med par bsgom zhes pas gnyis su med par byas te/rdo rje rin chen dbang bskur dpal/ /sangs rgyas mnga' bdag cod pan can/ /zhes pas snying ga'i 'od kyis bskul te/ bum pa'i chus dbang bskur bas rigs lnga'i dbu rgyan dang ldan pa zhes bstan to/ /sprul pa'i 'khor lo sna tshogs 'chang / /zhes pas rdo rje 'khor lo'i phyag rgya bcas la sngags dang bcas pas dkyil 'khor gyi tshul du sangs rgyas thams cad sprul lo zhes bstan to//de'i don ni 'og nas 'chad do/ /bdag rig gzhan rig thams cad pa/ /shes dang shes bya'i bdag po mchog /ces pas thams cad sems kyi sprul par shes par bya'o//de ltar rdzogs pa dang mtshan sngags bzlas shing mtshan bklag par bya'o/ /de lta bu yon tan las kyang rigs kyi bu'am rigs kyi bu mo gang la gsang sngags kyi spyad pa spyod pa gang la la/ bcom ldan 'das ye shes sems dpa' de bzhin gshegs pa thams cad kyi sku dang gnyis su med pa'i don dam pa'i ming gi gtsug gi nor bu 'di thams cad yongs su rdzogs pa dang mnyams shing lhag chad med par tshigs su bcad pa'i tshig dang /yi ge 'bru 'di dag nyid kyis nyin gcig bzhin du dus gsum du 'chang ba dang /kun chub par byed pa dang / gzhan dag la yang dam tshig ji lta ba bzhin du ston pa dang ming gi don gang yang rung ba re re nas kyang 'jam dpal ye shes sems dpa'i sku la dmigs te zhes bya ba dang / rtse gcig tu bsgom pa de la ni zhes bya ba la sogs pa dang / gzhan yang yon tan las/ nyin gcig bzhin du dus gsum du mnyam par yi dam du lan gsum du 'don tam/ glegs bam du byas pa la kha ton du klog cing brjod pas bcom ldan 'das ye shes sems dpa'i gzugs la dmigs te/ gzugs dang gnyis su mthun par bsam gtan du byed pa ni 'dul ba'i dbang gi phyir ring por mi thogs pas de nyid du sprul pa'i gzugs kyi lus mthong bar 'gyur ro zhes bya ba'i don 'di yin te/mtshan nyid kyi cho ga rdzogs shing dmigs pa la yun ring du gnas pa des rdo rje 'khor lo'i phyag rgya bcas la/ many+dzu shrI d+hIHoM wA gI shwa ri muM/ maN+Da la tsakra hUM/ zhes pas de bzhin gshegs pa thams cad 'phags pa 'jam dpal gyi rnam par sprul la/phyag sngon du 'gro bas mchod pa la sogs pas bdag cag gi lus de dang mnyam par sprul te/ mtshan gyi don re re nas bstod la yon tan rnam pa 'di ltar smos pas bdag dang gzhan la dpag tu med pa 'byung bar 'gyur ro//mdor na rnam pa thams cad mkhyen pa ring po mi thogs par dam pas bsngags pa thob par 'gyur ro/ /yang na gsang sngags kyi rim pa thob par 'gyur ro/ /dam pa brgyud pa'i bla ma'i bdud rtsi 'thungs/ /'gro ba'i sdug bsngal nad kyis gzir gyur la/ /dus gsum sangs rgyas rnams kyi bstod tshig 'di//sman pa'i rgyal po bzhin du bdag gis bshad/ /'phrod pa'i sman bzhin kun la phan gyur nas/ /mi rtog ye shes 'chi med thob par shog/ /'phags pa 'jam dpal gyi mtshan yang dag par brjod pa'i mdo don mdor bsdus pa'i cho ga sgyu 'phrul dra ba'i rgyud le'u khri drug stong pa las rdo rje glur blangs pa'i le'u'i sgrub thabs mdo dang bsres pa/