132b5 rgya gar gyi mkhan po d+harma shrI b+ha dra dang / zhu chen gyi lo tsA ba ban+de rin chen bzang pos bsgyur cing zhus te gtan la phab pa'o//[ ]@##/ /rgya gar skad du/ pra tiSh+Tha bi d+hiH/ bod skad du/ rab tu gnas pa'i cho ga /bcom ldan 'das 'jam dpal gzhon
132b6 nur gyur pa la phyag 'tshal lo//nyes pa kun dang rnam bral zhing / /sems can kun la phan bzhed pa/ /rtag tu dngos po kun rtag 'gyur/ /rdo rje sems la phyag 'tshal nas/ /ji ltar sku gzugs la sogs kyi/ /rab gnas rgyas par bshad par bya/ /rdor 'dzin
132b7 chen por dbang bskur ba'i//slob dpon mtshan nyid kun ldan pas/ /rigs lnga'i rab gnas bya'o zhes/ /rdo rje 'dzin pas gsungs pas na/ /de la slob dpon mtshan nyid ni/ /brtan zhing dul la blo gros ldan/ /bzod ldan drang la g.yo sgyu med/ /sngags dang rgyud kyi sbyor
133a1 ba shes//dkyil 'khor 'dri ba'i las la mkhas/ /de nyid bcu ni yongs su shes/ /de dag dang ldan slob dpon te/ /de la de nyid bcu po ni/ /dkyil 'khor dang ni ting 'dzin mchog /phyag rgya stang stabs dag dang ni/ /bzlas brjod sbyin sreg de nyid mchod/ /
133a2 las dang sbyor ba nyer bsdu ba/ /de nyid bcu zhes yongs su grags/ /de la dang por re zhig sngags pa blo dang ldan pa rnams kyis/ tshes grangs dang / skar ma dang / gza' dang nyi ma bzang po yongs su shes par byas la/ gdugs dang / rgyal mtshan dang / ba dan la
133a3 sogs pas gnas brgyan par bya zhing /ba'i rnam lnga la sogs pa la/ rdo rje gnod sbyin yongs su bzlas pas/ gnas dang dkyil 'khor nye bar byug par bya'o/ /oM badzra yak+Sha hU~M/ de'i 'og tu rang nyid chu dang dri la sogs pas khrus legs par byas la/ rgyan btags
133a4 te cho ga thams cad yongs su spyad par bya ba ste/de la dang por rdo rje gnod sbyin gyis bgegs gzhom pa la sogs pa dang gzhal yas khang dang gdan la sogs pa ji lta ba bzhin du byas la/ /'di ltar yid la 'thad pa'i khrus sa'i stegs bu brtsig par bya ba ni/ zur bzhi pa la gru
133a5 bzhi pa'am//khru gang tsam gyi tshad tsam ni/ /med na legs par bri bar bya/ /de ltar phyogs dang mtshams su mtshan ma bris pa'i bum pa brgyad gzhag par bya ste/ rdo rje lcags kyu dang / rdo rje me tog la sogs pa bris la/ phyogs dang mtshams su gzhag par bya zhing / dbus su
133a6 ni rnam par rgyal ba'i bum pa rigs lnga'i mtshan mas mtshan pa bzhag la/de dag gi nang du 'bru lnga dang / sman dang rin po che bcug la/ /dri dang sbyar ba'i chus bkang ste/ /gos kyis mgul pa dkri ba dang / /'dab ma dri zhim pos kha brgyan pa dang / gdugs dang / rgyal mtshan
133a7 dang /ba dan la sogs pas mtshan par bya'o/ /de'i rjes la gos dang dril bu sogs pas bskor ba'i khrus kyi khang par rdo rje slob dpon gyis lha rnams khrus gsol bar bya ste/ lugs ma las gzhan pa ri mo dang glegs bam la sogs pa la ni me long ngam/ de bzhin
133b1 gshegs pa'i sku gdung la sogs pa la/de'i nang du ting nge 'dzin gyis bkug pa la bkru bar bya'o/ /de nas dam tshig sems dpa' la/ /ye shes sems dpa' rdo rje lcags kyu la sogs pa'i sngags dang phyag rgyas dgug pa la sogs pa bya'o/ /de nas oM AH
133b2 hUM zhes bya ba'i yi ge gsum mam/lha de'i sa bon gyi yi ge rnam par dgod cing bsam par bya'o/ /de nas mchod yon dang zhabs bsil la sogs pa phul la/ sarba pA paM da ha na badzrA ya swA hA/ zhes bya bas 'dir sbyang ba la sogs pa bya ste/ de'i rjes la kun rdzob kyi lha de
133b3 dang por dar ram ras dkar po gtsang ma lag pur gyis bsgos pa blang bar bya'o//de nas de bkru ba'i 'dag chal dang / yo byad rnams ni 'di dag ste/ /sug pa dang ni sran phye dang / /ku sha ba yi rnam lnga dang / /de ltar so phag la sogs pas/ /khrus ni bya bar gsungs pa ste/ /
133b4 yungs kar dang ni me dag gis/ /sems can kun la phan bde ba'o/ /sbyang ba la sogs rnams bya zhing / /rgyal 'gyur bkra shis tshigs bcad gdon/ /yang dang yang du bstod bya zhing / /rol mo'i sgra ni sna tshogs dang / /ngo mtshar gyur pa'i rol mo'ang bya/ /las kun byed
133b5 dang rigs snying dang //rang gi rigs bdag gsang sngags ni/ /yongs bzlas sngar bshad bum pa'i chus/ /mkhas pas lha rnams khrus gsol lo/ /de nas gtsang ba mi yis ni/ /las kun byed pa'i gsang sngags kyis/ /bzlas byas stan ni bzang po la/ /
133b6 rigs pa rang gnas bzhugs su gsol/ /de nas rigs kyi bdag po'i gsang sngags dang / de bzhin du rigs kyi rig pa yongs su bzlas nas bzhugs su gsol nas/ sngags pas yang rang gi gsang sngags dang / /bskyed pa'i rim pas de rang gi gnas su
133b7 sprul la sgo dbye ba byas te/rdo rje bsdu ba bya'o/ /oM badzra sa mA ya dzaHdzaHdzaHde nas mtshan brgya rtsa brgyad pas bstod la/ phyag rgya bstan nas/ gsang sngags mngon par bya ste/ oM badzra satwa hU~M/ rigs kyi bdag po'i snying po'o/ /oM b+ha ga wa ti ru ru s+phu ru dz+wa la
134a1 tiSh+Tha sing+b+ha lo tsa ni sarba a r+tha sA d+ha ne swA hA/zhes bya ba ni rigs kyi yum gyi rig pa'o/ /oM dzi na dzika swA hA/ zhes pa ni rigs kyi snying po'o/ /de bzhin du/ oM shaM ka re shIn+taM ka re g+hu Ta g+hu Ti ni g+hU Ta ya g+hA Ta ya g+hu Ti ni swA hA/ oM badzra d+h+r-ika swA hA/ oM
134a2 ka Te bi ka Te ni ka Te ka TaM ka Te ka ro Ta bi r+ye swA hA/oM A ro l-i ka swA hA/ oM rat+na d+h+r-ika swA hA/ oM tA re tut+tA re tu re swA hA/ oM pradz+nyA d+h+r-ika ces bya ba ni/ rim pa ji lta ba bzhin du rigs so/ /so so'i rig pa dang snying po'o/ /de nas cod pan dang dar dpyangs bcing ba dang / go cha
134a3 bskon pa la sogs pa byas la/me tog la sogs pa mchod pa thams cad kyis yang dag par mchod la/ yongs su bzlas pas gus pas phyag byas la mchod yon phul te/ lhag par gnas par bya'o/ /de nas phyir rol du gtor ma byin la sbyin sreg bya ste/ dang
134a4 por bgegs zhi bar bya ba'i sbyin sreg bya'o//tshim par bya ba'i phyir ni/ rang gi sngags kyis so/ /dgongs par bya ba'i phyir ni rigs kyi sngags kyis so/ /'byor par bya ba'i don du ni rigs kyi bdag po'i snying pos bya'o/ /de ltar sbyin sreg byas nas/
134a5 lhag par gnas par byas la/ de nas mchod pa sna tshogs kyis mchod la/ mngon par 'dod pa'i dngos grub kyi phyir gsol ba gdab ste/ gshegs su gsol bar bya ba'i phyir 'dis bskul bar bya'o/ /oM khyed kyis 'gro ba'i don kun mdzad/ /dngos grub tshul bzhin
134a6 stsal lags kyis//sangs rgyas yul du gshegs nas kyang / /slar yang gshegs par mdzad du gsol/ /de nas bsrung ba'i phyir yi ge brgya pa lan bdun bzlas par bya'o/ /de nas de nyid du ku sha bting la nyal bar bya/ /de nas mal nas langs pa dang / ba'i rnam pa
134a7 lnga dang /spos chus lus kun dang gnas kun byugs la/ lha'i rnal 'byor byas la/ bgegs bskrad pa la sogs pa bya'o/ /de nas gzhal yas khang dang / rten la sogs pa bsams la/ de'i 'og tu zangs ma'i snod la sogs par mchod pa la sogs bshams
134b1 te sngags kyis gdab po//de nas lha rnams dgug pa dang / gzhug pa dang / bcing ba dang / dbang du byas la bsgrub par bya'o/ /spyan drangs nas mchod pa dang zhabs bsil la sogs pa phul te/ sngar bshad pa'i rigs kyi sbyang ba byas la/ de'i 'og tu dU ra ba'i pir
134b2 dang /til mar gyi sbyang ba byas te/ de'i sngags ni oM sarba ta thA ga ta kA ya bi sho d+ha ne swA hA/ dbang bskur ba'i cho gas khrus kyang gsol bar bya ste/ ji ltar bltams pa tsam gyis ni/ /lha rnams kyis ni khrus gsol ba/ /de bzhin bdag gis lha yi chus/ /dad pas
134b3 khrus ni gsol bar bya//oM sarba ta thA ga ta a b+hi She ka ta sa ma ya shri ye hUM/ de nas na bza' dbul bar bya ste/ oM badzra b+ha Sha ne swA hA/ de nas rgyan la sogs pa thams cad rang rang gi sngags/ oM badzra mu ku Ta swA hA/ zhes pa la sogs pas dbul bar bya'o/ /de'i 'og tu
134b4 dbang bskur bar bya ste/mthe bong gnyis ni bsnol byas la/ /mdzub mo rtse mo bkug nas ni/ /gung mo bsnyams pa'i tshigs su sbyar/ /rdo rje dbyings kyi dbang mor bshad/ /oM b+hu khaM zhes bya ba dang / a b+hi Shiny+tsa swa mAM zhes pa dang / de bzhin du oM badzra satwa hUM/ badzra rat+na
134b5 trAMH badzra d+harma hrIH/badzra karma aH/ zhes bya ba thams cad la a b+hi Shiny+tsa swa mAM zhes byas la/ so so'i phyag rgya dang ldan pas gnas ji lta ba bzhin du dbang bskur ro/ /de nas oM hUM/ zhes bya ba phyag rgya dang bcas pas gnas ji lta ba bzhin du bsrung ba dang / dar dpyangs dang
134b6 cod pan gyi dbang bskur ba la gnas par bya'o//de nas mnyam pa'i thal mos mnyes par bya ste/ oM badzra tu Sh+ye ho/ /de nas sgeg mo la sogs pas mchod par bya'o/ /de'i rjes su sngags 'dis gser ram rin po che'i thur ma la mig sman bskus la mig dbye bar bya'o/ /
134b7 oM tsa k+Shu sa man+ta tsak+Shu pi sho d+ha ne swA hA/ de nas bshos la ni/ oM di bya i n+ni sa mA d+hi d+h+yA nAM Na nai swA hA/ zhes pa'o/ /de nas me long dang / 'khor lo dang / rin po che bdun dang / ral gri dang / gdan dang / zhal zas dang / sna tshogs pa la mchod pa'i sngags kyis
135a1 mngon par mchod de/gong du gsungs pa'i bum pa rnams bu mo mdzes pa gzhon nu ma brgyad dam gcig gis mchod par bya'o/ /de nas la lar slob ma dag gnas pa na yongs su gzung ba'i cho gas/ slob ma bsnyen pa rim pa bzhin du dbang
135a2 bskur la/mchod pa gyis zhes bya'o/ /de'i rjes la yang sreg blugs 'bum du tshang ba'am/ yang na brgya rtsa brgyad du bya'o/ /de la dkyil 'khor gyi lha la ni dkyil 'khor bri bar bya'o/ /gcig la sogs pa rnams la ni sangs rgyas thams cad pa'i yum gyi dkyil
135a3 'khor bris la bya'o//de bzhin du gtsug lag khang dang / sku gdung dang glegs bam thams cad la yang sangs rgyas thams cad pa'i yum gyi dkyil 'khor bya ba ste/ de yang mchog tu gsang ba'i rgyud las bcom ldan 'das kyis/ dkyil 'khor la ni dkyil
135a4 'khor te//de yi bsdus pa de nyid do/ /gzhan du rab gnas thams cad la/ /sangs rgyas kun yum dkyil 'khor bri/ /zhes gsungs pa'i phyir te/ de la sangs rgyas kun gyi yum gyi dkyil 'khor ni/ rigs lnga'i lha mo dang / rigs lnga'i bde bar gshegs
135a5 pa lnga dang /sgo ba dang phyogs skyong du bcas pa'o/ /gtsug lag khang la ni sangs rgyas dang byang chub sems dpa' dang nyan thos dang rang sangs rgyas dang thams cad kyi bzhugs gnas ting nge 'dzin sna tshogs kyi gzhal yas khang chos kyi dbyings ltar yangs par ting
135a6 nge 'dzin dang sngags 'dis bskyed do//oM hU~M hrIHsu pra tiSh+Tha badzre swA hA/ oM hU~M hrIHb+h+rUM khaM badzrI b+ha ba dr-i D+ha tiSh+Tha b+h+rUM khaM zhes bya'o/ /de nas sangs rgyas dang byang chub sems dpa'i gnas de la bum pa lnga'am/ bcu drug la sogs pa'i nang spos chus yongs su gang
135a7 ba dag la mngon par bsngags pas bsang gtor bya'o//de'i sngags ni/ oM badzro da ka sarba shud+d+he bi shud+d+he swA hA/ de'i rjes la gong ma'i sngags dang ting nge 'dzin gyis bcom ldan 'das rnam par snang mdzad kyi ngo bo/ sangs rgyas dang byang chub sems dpa'i thams cad kyi
135b1 dbyings su gyur pa khang pa brtsegs pa chen po 'og min nas bkug ste/ngo bo nyid gcig par rab tu gnas par bya'o/ /de nas yang mchod pa'i tshogs byas la/ gtsug lag khang gi srung ma pany+tsi ka'am/ nag po chen po la sogs pa dgug pa'am/ gzhug
135b2 pa dang /bcing ba dang / dbang du byas nas/ rdo rje hU~M mdzad kyi sbyor ba dang ldan pas lung bsgo bar bya ste/ ji srid gtsug lag khang gnas pa de srid kyi bar du khyod kyis srungs shig /'phags pa'i dge 'dun gyi bka' yang khyod kyis sgrubs shig ces
135b3 bsgos la/mchod par bya ba dang / gzugs brnyan gzhag par bya'o/ /de bzhin du 'phags pa'i mchod rten la rab tu gnas pa yang / mchod pa legs par bya zhing bkrus la yi ge b+h+rUM las rnam par snang mdzad dang / rdo rje dbyings kyi dbang phyug ma
135b4 yongs su gyur pa las mchod rten gyi gzugs su bskyed cing /de nyid sangs rgyas thams cad kyi skur bsam par bya ste/ khrus dang bkra shis dang byin gyis brlab pa dang / sngags la sogs pa cho ga thams cad ni gong du gsungs pa dang mthun par bya
135b5 ba nyid do//dam pa'i chos kyi glegs bam rab tu gnas par bya ba ni/ lhag par gnas pa la sogs pa snga ma bzhin du byas la/ shes rab kyi pha rol tu phyin pa ni yi ge'i rnam par yongs su gyur nas/ kun rdzob dang don dam pa ston par byed par bsams la/
135b6 oM pradz+nyA sru taM smr-i ti ma ti bi dza ye swA hA/ zhes pa dang mdo sde la ni/ oM sU tra se na d+harma d+hA tu gar+b+he swA hA/ zhes pas de bzhin gshegs pa'i gsung gi yan lag rgya mtsho'i sgra thams cad bkug ste yi ge rnams la bstims nas/ de nyid kyis sems can rnams la chos
135b7 ston par rab tu gnas par bya'o//gsang sngags kyi rgyud la ni/ rdo rje chos yi ge'i gzugs su gyur pas sngags kyi gzugs kyi skus 'khor ba na 'gro ba ma lus pa'i don mdzad pa dang / byin gyis brlab pa dang / de bzhin gshegs pa thams cad dang / rdo rje
136a1 'chang thams cad kyis kyang de bzhin du byin gyis brlab par bsams te/oM hU~M hrIHsarba gu h+ya d+hA tu ta/ zhes pas rab tu gnas par bya'o/ /khrus la sogs pa ni snga ma bzhin te/ gtsug lag khang dang / mchod rten dang / ras ris dang / glegs bam
136a2 la sogs pa ni/me long nyid la bkru'o/ /mchod pa dang gtor ma'i cho ga la sogs pa ni sngar gsungs pa las shes par bya'o/ /rdo rje la ni yongs su dag par khrus la sogs pa byas la/ lte ba la gnas pa'i hU~M las/ de bzhin gshegs pa'i rdo rje bskyed de/ ting nge 'dzin
136a3 gyis dus gsum gyi de bzhin gshegs pa thams cad kyi thugs ye shes kyi rdo rje thams cad bkug pa de rnams nam mkha'i dkyil du pad+ma dmar po 'dab ma brgyad pa la gser gyi rdo rje chen po 'od sna tshogs dang ldan pa bsams la/de nyid rdo rje lcags kyu la sogs pas bkug pa
136a4 la sogs pa byas la/ngo bo nyid gcig par bsams nas/ oM sarba ta thA ga ta dz+nyA na badzra hU~M/ zhes pas byin gyis brlabs la rab tu gnas par bya zhing / de'i lte ba la rdo rje sems dpa'i bsam par bya'o/ /dril bu rab tu gnas par bya ba ni/ dril bu de a dkar po las
136a5 dus gsum gyi sangs rgyas thams cad kyi gsung chos kyi sgra chen por bskyed la/khrus gsol ba byas nas/ ting nge 'dzin gyis mdun gyi nam mkha'i bar snang la/ pad+ma 'dab ma brgyad pa'i steng du de bzhin gshegs pa thams cad kyi ljags pad+ma chen po las/ gsung gi
136a6 sgra rgya mtsho ji snyed pas 'gro ba ma lus pa la/dam pa'i chos ston pa dang / dus gsum gyi de bzhin gshegs pa thams cad mnyes par byed pa'i rin po che dbyig gi dril bu rdo rje dang / pad+ma mnyam par 'dus pa las byung ba'i gzugs kha dog dmar po
136a7 'od sna tshogs dang ldan pa bsams te/de nyid lcags kyu la sogs pas dgug pa la sogs pa byas nas ngo bo nyid gcig pa las/ oM sarba ta thA ga ta badzra dz+wi hwa a/ zhes pas byin gyis brlab cing / de'i nang du a las rdo rje bsrung ba kha dog dmar po
136b1 bsam par bya'o//phreng ba rab tu gnas par bya ba ni/ rdo rje la sogs par rigs ji lta bu'i rim pa las shes par bya zhing / de nyid kyang bkru ba la sogs pa byas nas bcom ldan 'das rdo rje sems dpar phreng ba'i mdo 'dzin bsams la/ rang gi lha'i
136b2 snying po gang yin pa dang /chos kyi gzungs chen po'i snying po/ oM ma hA pad+me d+ha ra Ni zhes bya ba'i snying por bskyed de/ de nas ting nge 'dzin gyis bcom ldan 'das rdo rje sems dpa' nyid mdun gyi nam mkhar bsams la/ de nyid las bsrung ba'i snying po ni/ rang gi
136b3 lha'i snying po'o//de las rang gi 'dod pa'i lhar bsams nas/ de nyid kyi bsrung ba'i sngags kyi yig 'bru rnams 'od zer dang bcas pa byung ba las/ dgug pa la sogs pa byas nas/ snying po dang yi ge 'bru rnams phreng ba gzhan la bstim/ rang gi lha
136b4 nyid chos kyi gzungs chen por 'gyur ba las/mdo 'dzin la rab tu gnas par byas la/ de bzhin gshegs pa thams cad kyi mi brjed pa'i gzungs su gyur cig ces brjod la/ oM sarba ta thA ga ta mahA d+harmA a mr-i te su pra tiSh+Tha badzre hU~M/ zhes pas rab tu gnas par
136b5 bya'o//rdo rje la sogs pa la ni mchod pa dang / bkra shis la sogs pa ni snga ma ji lta ba bzhin du bya zhing / sku gzugs la sogs pa thams cad la ni/ rab tu gnas pa med par ni zhag 'ga' yang gzhag par mi bya ste/ de yang bcom ldan 'das kyis/ gang
136b6 du sku gzugs zin nas ni//yun rings gnas kyang ma mchod na/ /ji srid rab tu ma gnas par/ /de las mi shis skye bar 'gyur/ /zhes gsungs pa'i phyir ro/ /de bas na mkhas pa rnams kyis sems can rnams kyis bsod nams thob par bya ba'i phyir myur du
136b7 rab tu gnas par bya ba nyid do//de yi yo byad 'di dag ste/ /gang du rdzas ni nyams pa las/ /rdo rje slob dpon nyams gyur pas/ /de bas rdzas la rab tu 'bad/ /dar dang rna cha gdu bu dang / /sor gdub rnams ni gser las byas/ /de nyid kyi ni gnas kyi phyir/ /
137a1 nang tshangs can stan khri dang bcas/ /de bzhin rgyab rten dag dang ni/ /gos bzang pos ni dgab par bya/ /sku gzugs la sogs dang por ni/ /gdan ni shin tu yid 'ong ba/ /mngon sum bya'am bsams nas ni/ /de steng bzhugs su gsol
137a2 bar bya//steng du bla re bre bya zhing / /sna tshogs gos la sogs pas brgyan/ /sa gzhi lhag par gnas bya bar/ /srad bu thod le kor dang bcas/ /dkyil 'khor bri bar bya ba'i phyir/ /dkar dang ser dang dmar dang ljang / /de bzhin nag po lnga dang yang / /'dir
137a3 ni tshon ni bsdu bar gsungs//de la snod ni gang ba brgyad/ /bzhi'am gang yang yid kyis brtag /'bras dkar gyis ni bkang ba la/ /dbyig dag dang ni bcas par bya/ /bsang gtor mchod yon snod nyid dag /zangs ma las byas bum pa dang / /so shing
137a4 so phag dri zhim dang //pir ni dri ma sbyong byed pa/ /ba gcin lci ba 'o ma dang / /zho dang mar sar ku sha'i chun/ /ba yi rnam lnga mnyam bsags la/ /snod gcig gi ni nang du gzhug /ljang dang dmar dang de bzhin ser/ /dkar dang nag po gnyis dag ste/ srad bu lnga
137a5 ni bsgril bar bya//mda' bzhi dag dang yang dag ldan/ /til mar dri bzangs til mar nyid/ /sku gzugs sku dang mar me dag /bya ba'i phyir ni dbul bya zhing / /me long shin tu dri med bsags/ /sku gzugs lhag par gnas pa la/ /ras ser bzang
137a6 po kha tshar bcas//dri med rnam par dag pa dang / /a gar nag pos legs bdugs pa/ /ser dang dmar dang nag dang sngo/ /dkar dang mkha' 'dra sngo bsangs dang / /de bzhin dkar po'i ba dan rnams/ /phyogs mtshams brgyad du gzugs par bya/ /
137a7 dkyil 'khor lha yi grangs las ni/ /bum pa lhag par gnas bya'am/ /bcu'am brgyad dam lnga rnams ni/ /'byor dang 'tsham par bsag par bya/ /gos bzang sna tshogs mdog can gyis/ /bum pa'i mgul pa dkri bar bya/ /gser ram yang na dngul dag
137b1 ni//dkyil 'khor phyogs su gzhag par bya/ /br-i had kaN+Da ka ri dang / /ka ri ka ni ha sa mchog /daN+Da ut+pal dkar po ste/ /sman rnams lnga po bsags nas ni/ /btags te mnyam par sbyar ba yi/ sman rnams kun dang ldan pa la/ /de bzhin gshegs
137b2 sngags bzlas nas ni//bum pa rnams su'ang gzhug par bya/ /rdo rje mthon ka bai DUr+ya/ /pad+ma rA ga rdo rje ste/ /'di dag rin chen mchog gyur yin/ /med na tha mal pa yis bya/ /a mu bil ba se'u star ga dang / /gla gor zho sha dzA ti dang / /de la sogs pa gzhan
137b3 rnams ni//sna tshogs sman ni dbul bar bya/ /'bras yos bzang po dag dang ni/ /yungs kar bzang po so sor dbul/ /zho mar 'o ma sbrang rtsi dang / /'o ma can shing shing la sogs/ /me tog le brgan rtsi dag dang / /bag zan las byas snum khur mchog /spyan 'byed
137b4 kyi ni yo byad de//de dag so sor dbul bar bya/ /de bzhin khrus sa'i stegs bur ni/ /rin chen las byas khrus gzhong dang / /so shing so phag phye ma dang / /phag ze dUr ba'i pir dag dang / /ba yi rnams lnga cha mnyam dang / /sgyu ru la sogs 'dag chal chu/ /sbrang rtsi
137b5 dang sbyar mngar gsum chu//dri dang 'o ma'i chu rnams ni/ /bum pa re re dag tu bya/ /zhal long sku phyis ras yug dang / /gu gul la sogs spos rnams dang / /seng ldeng phur bu sngags gos dang / /tshon skud lnga dang 'dab bzhi dang / /tshon sna lnga yi phye ma dang / /sbrang
137b6 chu sug pa spos chu dang //til mar dang ni sran phye dang / /'bras chan chang bu gnyis dag dang / /lha yi grangs dang rab sbyar ba'i/ /gur gum gyis bris lha yi mtshan/ /bris la bum pa gzhag par bya/ /gser las byas pa'i spu gri dang / /de bzhin so mangs smad tsher
137b7 dang //shel sgong dris bsgos rna cha dang / /gser las byas pa'i thur ma dang / /gser gyi 'khor lo dar dpyangs dang / /gdugs dang rnga ma mchod pa'i tshogs/ /seng ge'i khri dang ku sha dang / /de bzhin yo byad ldan pa yis/ /rab tu gnas byas shis par 'gyur/ /rdo rje
138a1 slob dpon gang zhig la//mtshan mi shes pa'i lha rnams ni/ /rab tu gnas par byed pa ni/ /the tshom gyur pas gzhag bya min/ /de bzhin gshegs kun sangs rgyas kyi/ /thugs kyi ngo bo rdo rje sems/ /yin pas gsal bar mi 'gyur bas/ /rdo rje sems
138a2 dpa' rab gnas bya'o//de bzhin gshegs kun rab gnas pa'i/ /cho ga dri med byas pa las/ /bsod nams cung zad gang thob des/ /'gro ba'i nyes kun dag gyur cig /rab tu gnas pa'i cho ga slob dpon chen po kun dga' snying pos mdzad pa rdzogs so// //