CLOSE WINDOW

D2504
བོད་ཡིག

/[ ]@##/ /rgya gar skad du/ badzra d+hA tu ma hA maN+Dal de ba sarba bya bas+thA na nA ma/ bod skad du/ /rdo rje dbyings kyi dkyil 'khor chen po'i lha rnams kyi rnam par gzhag pa zhes bya ba/'jam dpal gzhon nur gyur pa la phyag 'tshal lo/ /'dod chags zhe sdang la sogs pa/ /rnam par rtog pa rnam spangs pa'i/ /sku ni bde bas kun nas gang / /rdo rje 'chang chen phyag 'tshal lo/ /'di yi rigs kyi 'dod pa pos/ /phyag rgya chen po rtogs pa'i phyir//rdor dbyings dkyil 'khor chen po yi/ /rnam par gzhag pa bdag gis bri/ /de la 'dod chags la sogs pa'i dri ma ma lus pa dang bral ba nyid de/ de las gzhan pa'i khyad par can gyi rgyur gyur pa nyid kyis na me long lta bu'i ye shes kyi ngo bo nyid dang / dbye ba ma lus pa'i rang bzhin dang bral ba nyid kyis na mnyam pa nyid kyi ye shes kyi ngo bo nyid dang /phyin ci log ma lus pa dang bral ba'i rang bzhin nyid kyis na so sor rtog pa'i ye shes kyi ngo bo nyid dang / 'gro ba ma lus pa la phan pa skyed pa'i rgyur gyur pas bya ba grub pa'i ye shes kyi ngo bo nyid dang / gzung ba dang 'dzin pa rnam pa gnyis dang bral bas chos kyi dbyings shin tu rnam par dag pa'i ngo bo nyid yin no/ /de bas na me long lta bu'i ye shes la sogs pa'i bdag nyid can yang de nyid yin pas sangs rgyas thams cad kyi ngo bo nyid yin no/ /de nyid ni nye bar dmigs pa rnams las ldog pa'i stong pa nyid kyi bdag nyid can yin pa'i phyir rdo rje sems ma'o//mtshan ma ma lus pa las ldog cing mtshan ma med pa'i bdag nyid can ni rin chen sems ma'o/ /log pa'i rmi lam las ldog cing smon pa med pa'i bdag nyid can yin pas na chos kyi sems ma'o/ /phyin ci log gi smon par byed pa las bzlog cing mngon par 'dus pa'i bdag nyid can yin pas na las kyi sems ma'o//rdo rje sems ma la sogs pa rigs kyi yum bzhi ni go rims bzhin du stong pa nyid la sogs pa rnam par thar pa'i sgo bzhi'i ngo bo nyid yin pa'i phyir ro/ /de bzhin du de nyid ni snod kyi 'jig rten gyi mthar rtog pa las ldog cing /chen po stong pa nyid kyi ngo bo nyid du gyur pa byang chub kyi sems skyed pa'i rgyur gyur pas na rdo rje sems dpa'o/ /mig la sogs pa nye bar dmigs pa las ldog cing nang stong pa nyid kyi ngo bo nyid du gyur pa dang / byang chub tu sems bskyed pa rnams 'gugs pa'i rgyur gyur pas rdo rje rgyal po'o//gzugs la sogs pa nye bar dmigs pa las ldog pas phyi stong pa nyid kyi bdag nyid can du gyur pa dang / dgug pa rnams kyi rjes su chags pa'i rgyur gyur pas rdo rje chags pa'o/ /phyi nang gi skye mched dang lus dang gnas su nye bar dmigs pa las bzlog pas phyi nang stong pa nyid kyi bdag nyid can du gyur pa dang /chags par gyur pa'i sems kyi yid bde ba skyed par 'gyur pas rdo rje legs pa'o/ /mig dang gzugs la sogs pa'i bag chags kyi gnas yongs su gyur pa dag gis me long lta bu'i ye shes de'i rgyur gyur pa chen po stong pa nyid la sogs pa bzhi'i ngo bo nyid ni rdo rje sems dpa' la sogs pa yin no//stong pa nyid du nye bar dmigs pa las ldog pas stong pa nyid stong pa nyid kyi bdag nyid can du gyur pa dang / byang chub kyi sems mngon par 'phel ba rnams kyi rgyal mtshan du dbang bskur ba'i rgyur gyur bas rdo rje rin chen no//don dam par nye bar dmigs pa las ldog cing don dam pa stong pa nyid kyi bdag nyid du gyur pa dang dbang bskur ba rnyed pa rnams la mi 'jigs pa rab tu sbyin pa'i mtshan nyid can du gzi brjid kyi rgyur gyur pas rdo rje gzi brjid do//'dus byas pa'i bsod nams kyi tshogs su nye bar dmigs pa las ldog pas 'dus byas stong pa nyid kyi bdag nyid can du gyur pa dang / gzi byin thob pa rnams la byams pa'i mtshan nyid kyi rgyur gyur pas rdo rje dpal lo/ /'dus ma byas pa'i byang chub kyi tshogs kyi nye bar dmigs pa las ldog pas 'dus ma byas stong pa nyid kyi bdag nyid can du gyur pa dang /byams pa'i rgyal mtshan bsgreng ba'i mtshan nyid rnams la chos kyi sbyin pa bla na med pa'i yid bde ba'i rgyur gyur pas na rdo rje bzhad pa'o/ /nyon mongs pa can gyi yid gnas gyur pa nyid kyis mnyam pa nyid kyi ye shes de'i phyin ci log spong ba'i mnyam pa nyid kyi rkyen du gyur pas stong pa nyid la sogs pa bzhi'i ngo bo nyid ni rdo rje rin chen la sogs pa bzhi yin no//sgro btags pa dang skur ba btab pa'i mthar nye bar dmigs pa las ldog pas shin tu stong pa nyid du gyur pa dang /chos kyi sbyin pa la yid bde ba la zhugs pa rnams kyi ting nge 'dzin skyed pa'i rgyur gyur pas na rdo rje chos so/ /'khor bar dmigs pa las ldog pas thog ma dang tha ma med pa stong pa nyid can du gyur pa dang / ting nge 'dzin rdzogs pa rnams kyi de kho na nyid kyi ye shes skyed pa'i rgyur gyur pas rdo rje rnon po'o//dge ba'i phyogs yongs su mi gtong ba'i nye bar dmigs pa las ldog pas dor ba med pa stong pa nyid kyi bdag nyid can du gyur pa dang / chos kyi 'khor lor zhugs pa de rnams gdul bya'i skye bo rnams kyi ngor chos ston du 'jug pa'i rgyur gyur pas rdo rje smra ba'o/ /yid kyi rnam par shes pa gnas gyur pa'i ngo bo nyid kyis so sor rtog pa'i ye shes ji skad du bshad pa'i phyin ci log las rnam par dben pa'i ngo bo nyid kyi de'i 'khor du gyur pas shin tu stong pa nyid la sogs pa bzhi'i ngo bo nyid du gyur pa ni rdo rje chos la sogs pa nyid do//stobs dang mi 'jigs pa la sogs pa chos kyi skur nye bar dmigs pa las ldog pa'i chos thams cad stong pa nyid kyi bdag nyid can du gyur pa dang /don dam pa'i stong pa nyid skal ba can rnams kyi rgyur gyur pas na rdo rje las so/ /rang dang spyi'i mtshan nyid nye bar dmigs pa'i mtshan nyid las ldog pa'i rang gi mtshan nyid stong pa nyid kyi bdag nyid can du gyur pa dang /las la rab tu zhugs pa rnams kyi bsdu ba'i rgyur gyur pas rdo rje srung ba'o/ /nye bar dmigs pa med pa dang nye bar dmigs pa las ldog pas mi dmigs pa stong pa nyid kyi bdag nyid can du gyur pa dang srung pa la sogs pa rnams kyi bgegs zhi bar byed pas rdo rje gnod sbyin no//dngos po med pa las bzlog pas dngos po med pa'i ngo bo nyid stong pa nyid kyi bdag nyid can du gyur pa dang / de ltar bya bsgrub pa 'jug pa rnams sku gsung thugs rdo rje byed pas dngos grub thams cad rdzogs pa'i rgyur gyur pas na rdo rje khu tshur ro/ /mig la sogs pa'i rnam par shes pa gnas gyur pa'i ngo bo nyid kyi bya ba grub pa'i ye shes ji skad du bshad pa'i phyin ci log rnams las dben pa'i ngo bo nyid de'i 'khor du gyur pas chos thams cad stong pa nyid la sogs pa'i ngo bo nyid de rdo rje la sogs pa'o//de bzhin du ser sna dang / 'chal pa'i tshul khrims dang //khro ba dang / /le lo la sogs pa'i nye bar dmigs pa las ldog cing / de'i gnyen po nyid kyi sbyin pa dang tshul khrims dang bzod pa dang / brtson 'grus kyi pha rol tu phyin pa'i bdag nyid can du gyur pas phyag rgya chen po gnyis su med pa'i ye shes kyi ngo bo nyid kyi rnal 'byor gyi dbang phyug de ni gsang ba'i mchod pa bzhi'i ngo bo nyid de rdo rje sgeg mo dang /phreng ba dang glu ma dang gar ma'i bdag nyid can no/ /rdo rje sgeg mo la sogs pa ni sbyin pa'i pha rol tu phyin pa'i ngo bo nyid yin pas na de bzhin du shes rab 'chal pa dang / rnam par g.yeng ba dang log pa'i nga rgyal dang thabs med pa las log pas shes rab dang bsam gtan dang smon lam dang thabs kyi pha rol tu phyin pa'i bdag nyid can du gyur pa'i phyag rgya chen po gnyis su med pa'i ye shes kyi ngo bo nyid kyi dbang phyug de nyid ni phyi'i mchod pa'i rang bzhin rdo rje bdug pa dang me tog dang mar me dang dri'i ngo bo nyid yin te/rdo rje bdug pa ma la sogs pa rim pa bzhin du shes rab kyi pha rol tu phyin pa la sogs pa bzhi'i ngo bo nyid yin no/ /de nyid theg pa chen po la sogs pa la yid ches pas ma dad pa las ldog pas dad pa'i bdag nyid can de thabs chen po'i ngo bo nyid yin pas rdo rje lcags kyu'o//theg pa chen po la 'jug pa las ldog pa'i brtson 'grus kyi bdag nyid can gyi spyod pa'i ngo bo nyid du gyur pas na rdo rje zhags pa'o/ /brjed ngas pa las ldog cing dran pa'i bdag nyid can du gcod pa'i dgos pa las ldog pa'i bdag nyid can yin pas na rdo rje lcags sgrog go//chos rnams mi shes pa las ldog pa'i ting nge 'dzin gyi bdag nyid can yin zhing chos thams cad ma skyes par ston pa'i ngo bo nyid du gyur pas na rdo rje 'bebs pa'o/ /des na thabs dang shes rab kyi bdag nyid can gyi rnal 'byor chen po de nyid ni dad pa dang brtson 'grus dang dran pa dang ting nge 'dzin gyi ngo bor gyur pas na rdo rje lcags kyu la sogs pa'o//sa'i go rims nges pa gang zhe na tshogs kyi lam du byang chub tu sems skyed pa dang gdams ngag 'bogs pa'o/ /sbyor ba'i lam du de kho na nyid la rjes su chags pa skyed pa dang rjes su chags pa'i yid bde ba skyes pa'o//mthong ba'i lam du chos kyi mthong ba rgyun mi 'chad par bya ba'i phyir dbang bskur ba'o/ /sa gnyis pa la dbang mi 'phrogs par bya ba'i phyir mi 'jigs pa skyed pa'o/ /sa gsum pa la byang chub sems dpa' de la bde bar gshegs pa'i thugs rje'i dbang gis/byams pa'i rgyal mtshan bsgreng ba'o/ /sa bzhi pa la byang chub sems dpa'i de la bde bar gshegs pas chos kyi 'khor lo bskor ro/ /lnga pa la chos kyi 'khor lo de nyid ting nge 'dzin gyi stobs so/ /drug pa la ni ting nge 'dzin de nyid rdzogs par byed pa'i ye shes skyed do/ / bdun pa la byang chub sems dpa' de nyid sems can la snying rje skyed do/ /brgyad pa la de nyid kyis chos kyi 'khor lo bskor ro/ /dgu pa la zag pa med pa'i mchod pas mchod do/ /bcu pa la chos kyi rgyal mtshan du dbang bskur ro/ /bcu pa'i chos kyi ye shes chen pos bcu gcig pa la bgegs nye bar zhi bar byed do//rmongs pa dang gnas ngan len pa la sogs pa'i bag la nyal rnams spong ngo / /bcu gnyis pa la sku gsung thugs rdo rje ltar mi shigs pa ste rdzogs pa'i sangs rgyas su mthar phyin to/ /de nas chos kyi dbyings kyi ye shes dang / me long lta bu'i ye shes dang /mnyam pa nyid kyi ye shes dang / so sor rtog pa'i ye shes dang / bya ba grub pa'i ye shes kyis stong pa nyid dang mtshan ma med pa dang smon pa med pa dang 'dus ma byas pa dang de rnams ni gzung 'dzin du ma zhen par bde ba nyams su myong ngo / /rjes las thob pa'i skabs su ni sbyin pa dang /tshul khrims dang / bzod pa dang / brtson 'grus dang / bsam gtan dang / shes rab dang / smon lam dang / thabs dang / dad pa'i dbang po dang / brtson 'grus kyi dbang po dang / dran pa'i dbang po dang / ting nge 'dzin gyi dbang po la spyod do/ / grangs nges pa ni 'og nas shes par bya'o/ /de bas na rdo rje dbyings kyi lha rnams ni kun rdzob tu go rims nges pa'o/ /rdo rje dbyings kyi dkyil 'khor chen po'i lha rnams kyi rnam par gzhag pa las don dam pa'i rnal 'byor bstan pa ste le'u dang po'o// //de nas yang / gzhan yang brjod par bya ba ni/ /rtsa ba'i bzhir gyur lha rnams kyi/ /kun rdzob dag gi nges pa ni/ /cung zad bsdus te bdag gis bri/ /de la re zhig rnam par snang mdzad ni zhal bzhi par nges te/ rdo rje sems ma la sogs pa ni dam tshig gi phyag rgyar nges so/ /mi bskyod pa la sogs pa ni rtag pa la zhal gcig pa'o//rdo rje sems dpa' ni zhal gnyis pa dang ldan pa'o/ /rdo rje legs pa ni zhal re re dang ldan pa'o/ /sgeg mo la sogs pa ni bud med kyi cha lugs 'dzin pa'o/ /lcags kyu la sogs pa ni khro bo'i cha lugs 'dzin pa'o/ /dris pa rnam par snang mdzad ni ci'i phyir zhal bzhir nges she na/de ni rdo rje slob dpon la bsnyen bkur ba ste de yang bum pa las/ bde gshegs slob dpon dgyes pa'i phyir/ /rnam par snang mdzad phyogs bzhir gzigs/ /zhes gsungs pa'i phyir ro/ /rdo rje sems ma la sogs pa ni dam tshig gi phyag rgyar rig pa ma yin no zhe na/de ni gdul bya'i ngor bstan pa ste/ de yang de kho na nyid bsdus pa'i rgyud las/ mu stegs pa la phan don du/ /sangs rgyas btsun po phyag rgyar bcas/ /zhes gsungs pa'i phyir ro/ /de lta na ni mi bskyod pa la sogs pa rnam par snang mdzad la zhal gzigs par mi rigs so zhe na de ni chos kyi dbyings kyi ye shes kyi dbang du byas pa ste/de khro bo'i rgyud las/ dper na sa gzhi chen po las/ /rtsi shing la sogs 'byung ba bzhin/ /chos kyi dbyings kyi ye shes las/ /ye shes gzhan yang 'byung phyir ro/ /zhes gsungs so/ /rdo rje sems dpa' la sogs pa ni zhal gnyis dang ldan pa dang /rdo rje rgyal po la sogs pa ni zhal gcig tu nges pa brjod de de ni gtso bo'i dbang du mdzad pa ste de yang 'brug sgra rgyas pa'i rtag pa las/ thun mong pa ni ma yin pa'i/ /so so dag la zhal gnyis gzigs/ /thun mong gtso bo nyid gcig ste//rdo rje rgyal po la sogs pa/ /zhal gcig nges zhes bstan pa'i phyir ro/ /sgeg mo la sogs bud med kyi cha lugs 'dzin pa ni mos pa'i dbang du bstan pa ste de yang rnam par snang mdzad kyi rgyud chen po las/ sems can mos pa tha dad pas/ /sangs rgyas sku ni cir yang bstan//zhes gsungs so/ /dris pa rdo rje lcags kyu la sogs pa ni khro bo'i cha lugs su 'dzin pa ji lta bu zhe na de ni nyon mongs pa la sogs pa'i bdud tshar gcod pa dang / dngos grub la sogs pa'i mtshan nyid dang ldan pa ste de ldem por bstan pa ste de yang 'jam dpal gyi rgyud las/ / nyon mongs bdud rnams tshar gcod pas/ /mchog gi dngos grub stsol bya'i phyir/ /rdo rje lcags kyu la sogs ni/ /khro bo'i cha lugs kho nar nges/ /zhes gsungs te de bas na rgyal ba de dag ni bde bar gshegs pa'i bka' dag las smos pas de lta bur rtogs na shin tu 'ang dam tshig nyams pa'i phyir dmus long la 'o ma'i yon tan brjod pa lta bu ste lan brjod par 'os pa ma yin gyi/'on kyang snying rje'i dbang gis cung zhig brjod pa'o/ /dris pa go rims nges pa gang yin de brjod de gzung ba dang 'dzin pa gnyis dang bral ba'i ye shes las de nyid gsal ba'i ngo bor gnas pa dang /bdag dang gzhan gyi rnam par mi 'byed pa dang / bden pa nyams su myong ba dang / /'gro ba'i don byed pa'i rgyur gyur pa dang / de nyid ni kun rdzob mtshan ma rnams las ldog pa ni rim gyis ldog pa'i phyir gtso bo'i nges pa 'khor rnams dang / rang rang gi nges pa de dang des ni ci rigs su sbyar ro//sbyin pa la sogs pa dang ci rigs su sbyar te gzhan dag tu rgya cher bstan pas 'dir mangs kyis dogs nas ma byas so/ /grangs med pa ni phyogs snga ma ltar na ma tshang ba dang mi dgos pa'i phyir dang / phyi ma ltar na ni chos kyi dbyings kyi ye shes bzhi 'byung bas de nyid re re zhing yang yon tan gyi cha bzhi bzhi dang ldan pa'i phyir dang /sgeg mo la sogs pa la ni phyi nang gi mchod pa dang dgug pa dang gzhug pa la sogs pa des chog pa'i phyir te de bas na rdo rje dbyings kyi lha rnams ni don dam par grangs dang go rims nges pa'o//rdo rje dbyings kyi dkyil 'khor gyi lha rnams kyi rnam par gzhag pa las kun rdzob dang don dam gyi rnal 'byor bstan pa'i le'u ste gnyis pa'o// //rdo rje dbyings kyi dkyil 'khor gyi rnam par gzhag pa zhes bya ba slob dpon mu ti ta ko Shas mdzad pa rdzogs so// //