CLOSE WINDOW

D2502
བོད་ཡིག

slob dpon sangs rgyas gsang bas mdzad pa rdzogs so// //lo tsA ba 'jam dpal go chas bsgyur ba'o//[ ]@##/ /rgya gar skad du/ tan+tAr+tha a ba tA ra byA khyA naM/ bod skad du/ rgyud kyi don la 'jug pa'i 'grel bshad/ dpal rdo rje sems dpa' la phyag 'tshal lo//sangs rgyas bcom ldan 'das thabs mkhas la thugs rje chen po mnga' bas dang por byang chub tu sems bskyed nas bdag gzhan gyi don mthar phyin pa'i dgongs pa mnga' ba dang ldan pas/ sgrib pa zad cing tshogs yongs su rdzogs par gyur te/ rdo rje lta bu'i sku brnyes nas nam mkha' chen po dang 'dra bar thams cad la khyab cing mi dmigs pa'i ngo bo rnam par mi rtog pa chen po'i ngang la bzhugs so//de lta na'ang sngon byang chub kyi spyod pa la gnas pa'i dus na 'gro ba yongs su smin par dam bcas pa'i bag chags kyi mthu stug po dag rkyen gyis slong bar byed pa'i smon lam gyi dbang gis ye shes rim par brgyud pa'i sku mtshan ma'i rnam par bstan pa dang /mtshan ma med pa dang / gnyi ga 'brel pa lta bu ston pa'i tshul gyis dam pa'i chos kyi sgo rnam pa mang po dag 'gro ba skal ba can rnams la rim pa dang /cig car gyi rnam par bstan nas gdul bya'i rgyud smin cing grol zhing smin pa dang / rang rang gi lta ba'i 'bras bu mthar phyin pa thob par mdzad do/ /gzhan dag na re de ltar chos ston par mdzad pa'i ston pa ni ji lta bu chos ni gang kho na dag bstan/ 'khor ni su la bstan/ gnas ni gang du bstan/tshul lam thabs ni ji ltar bstan/ ce na/ smras pa/ ston pa ni rnam pa gsum ste/ chos kyi sku dang / longs spyod rdzogs pa'i sku dang / sprul pa'i sku'o/ /chos kyang rnam pa gsum ste/ mtshan nyid kyi theg pa dang / phyi'i theg pa dang / nang gi theg pa'o/ / 'khor yang rnam pa gsum ste/ rten 'brel las skyes pa dang / smon lam las skyes pa dang / ye shes las skyes pa'o/ /chos bstan pa'i gnas kyang rnam pa gsum ste sa steng / sa bla/ bar snang gsum gyi grong khyer dang / gzhal med khang dang / pho brang dag tu bzhugs nas bstan to//chos bstan pa'i tshul yang rnam pa gsum ste/ la lar ni chos kyi skus bstan pa yang yod/ /la lar ni longs spyod rdzogs pa'i skus bstan pa yang yod/ la lar ni sprul pa'i skus bstan pa yang yod de/ 'gro ba ji ltar mos pa dag la de lta bu'i tshul du chos ston to/ / de la rnal 'byor gyi rgyud chen po dpal de kho na nyid bsdus pa la sogs pa rnams ni longs spyod rdzogs pa'i skus ye shes las skyes pa'i 'khor rnams las bla yan chad kyi gnas rnams su bstan ces grag go/ /de nas de dag rim gyis lha'i gnas rnams nas 'dzam bu'i gling gi mi las 'phro dang skal bar ldan pa 'di nyid kyi sgo nas nges par 'byung ba'i skyes bu skal ba can rnams la ston pa'i byin gyis rlabs dang /sdud pa po'i mthus byin gyis brlabs te/ de'i gnas su babs shing lag na rdo rje 'chang gi dbang thob pa dag byung bar gyur to/ /de las kyang bdag gis 'chad pa'i 'gro ba rnams la grags par 'dod pa'i 'phags pa rnams kyis rtogs par nus pa'i dngos grub byin te/de ltar byin gyis brlabs pa'i gdul bya rnams la 'chad cing ston par mdzad de/ rgyud 'di dag gis gdul bya'i rigs mthun phyogs gcig tu skyes pa rnams la rim gyis grags par 'gyur te/phal gyis lta ba dang spyod pa'i dbang thob nas de dag gis kyang tshul bzhin du nyams su blangs nas gzhung bzhin du bsgrubs pas dang po ni rtags dang mtshan ma byung / bar du ni sgrib pa thams cad zad par gyur/ tha mar ni phyag rgya chen po mngon du gyur te tshe gcig gis 'bras bu thob par gleng ngo //de nas de dag gi sgrub thabs dang / don dgrol ba la sogs pa'i yi ge rnams ni yon tan gyi khyad par du gyur nas gzhung bzhin 'phags par nges pa dang / 'phags pa'i sar chud pa dang / grub pa'i khyad par brnyes pa'i mkhan po rnams kyis slad kyis mi yul kho nar mdzad ce'o//de dag gi rjes su mthun par 'jug pa ye shes sems dpa' mnyes par bya ba'i sgrub thabs kyi cho ga rim par phyogs gcig tu byas pa 'di ni slob dpon sangs rgyas gsang ba nyid kyi dgongs pa'i dpogs tshad kyis sngags kyi theg pa 'di'i sgo nas nges par 'byung ba'i ma 'ongs pa'i gdul bya rnams kyi dbang po'i rim pa la ji ltar 'tsham pa bzhin du sbyar nas/phan gdags pa'i phyir rnal 'byor gyi rgyud chen po yo ga 'bum sde dang / de dag gi zhal lce gcod pa yo ga 'bum sde dang / spyi'i dgongs pa 'grel par byed pa rtog pa bsdus pa la sogs pa rnams kyi nang nas 'byung ba'i don mthun par ston pa'i gtan tshigs rnams phyogs gcig tu bsdus te dpal de kho na nyid bsdus pa las dkyil 'khor chen po bzhi dang las bzhi la sogs pa ston pa'i nang nas dum bu dang po rdo rje dbyings rtsa ba'i dkyil 'khor chen po 'ba' zhig gi sgrub thabs tsam zhig glegs bam du byas te/skyes bu mkhas pa rnams kyis gzigs na dgyes pa skye ba'i rgyur 'gyur ba tsam zhig brtsams pa yin zhe'o/ /rnam cig tu slob dpon sangs rgyas gsang bas mdzad pa'i sgrub thabs kyi yi ge 'di rtsa ba'i rgyud chen po'i nang nas gces pa'i don rnams phyogs gcig tu bsdus nas rgyud gzhan gyi gtan tshigs kyis snon btab nas ma 'ongs pa'i rnal 'byor pa dpal de kho na nyid bsdus pa la sogs pa'i rnal 'byor gyi rgyud kyi don la 'jug cing de nyid las gsungs pa'i lha rnams kyi don du mchod pa'i sgron ma lta bu bzhag pa yin zhe'o//'di bshad pa'i lugs kyis don rnam pa gsum gyis bshad de mgo mjug tu khyab par ston te/ gang zhe na/ rtsa ba'i don la bsnyegs te khog dbub pa dang /sgrub thabs kyi rang gnyer gyis dkyus mgo mjug gis bcad pa dang / tshig gi don rim par gzhom pa'i thabs bstan pa'o/ /de la rtsa ba'i rgyud kyi don la bsnyegs te khog dbub pa ni rtsa ba'i rgyud chen po dpal de kho na nyid bsdus pa'i mgo mjug tu bsdus pa'i don ni de kho na nyid sum cu rtsa bdun gyis ston cing gsal bar byed la/de kho na nyid sum cu rtsa bdun po dag kyang rtsa ba'i rgyud chen pos mtshon par byed pas gcig gi rgyus gcig gsal bar byed pa dang 'dra bar rtsa ba'i rgyud chen po de'i sgrub thabs su gyur pa'i yi ge 'di mgo mjug tu yang de kho na nyid sum cu rtsa bdun gyis gsal bar ston cing 'byed par byed la/de kho na nyid sum cu rtsa bdun po de dag kyang sgrub thabs 'dis mtshon par byed nus so/ /de la de kho na nyid sum cu rtsa bdun du brjod pa de dag kyang gang zhe na/ snying po dang / phyag rgya dang / sngags dang / rig pa dang / byin gyis brlab pa dang /dbang bskur ba dang / ting nge 'dzin dang / mchod pa dang / bdag gi de kho na nyid dang / lha'i de kho na nyid dang / dkyil 'khor dang / shes rab dang / thabs dang / rgyud dang / 'bras bu dang / rnal 'byor dang / shin tu rnal 'byor dang / rnal 'byor chen po dang / gsang ba'i rnal 'byor dang /thams cad rnal 'byor dang / bzlas pa dang / sbyin sreg dang brtul zhugs dang / dngos grub dang / dngos grub sgrub ba dang / bsam gtan dang / byang chub sems dang / stong pa nyid kyi ye shes dang / me long lta bu'i ye shes dang / mnyam pa nyid kyi ye shes dang / so sor rtog pa'i ye shes dang / bya ba grub pa'i ye shes dang / chos kyi dbyings rnam par dag pa'i ye shes dang / dgug pa dang / gzhug pa dang / bcings pa dang / dbang du bya ba rnams so/ /de la dang po bzhi po 'di dag ni spyir sum cu rtsa bdun du bgrang ba 'di dag spro na yang de bzhi las spros pa yin la/bsdus na yang de bzhi bo dag tu bsdus pa yin zhes bshad do/ /kha cig na re 'di dag kyang mngon par byang chub pa lnga po dag gi khongs su 'dus la/ lha gcig gi ngo bo gang la yang tshang bar btub po zhes gleng ngo / /kha cig na re bzhi po 'di dag kyang ngo bo gcig pa nyid la dkyil 'khor gyi bye brag gis so sor gyur te/rtsa ba'i rgyud chen po'i gnas skabs na dkyil 'khor chen por gsungs pa ni snying bo dam tshig gi dkyil 'khor du gsungs pa ni phyag rgya/ chos kyi dkyil 'khor du gsungs pa ni sngags/ las kyi dkyil 'khor du gsungs pa ni rig pa'o zhes bshad la/'di nyid las kyang de ltar ston pa na rgyud so so'i bzhed pa mi mthun pa'i dbang dang mkhan po chen po dag gi shes rab kyis dpogs tshad mi mthun pa'i dbang gis de dag so so na gsal bar snang ba bzhin yod la gsal bar snang ba bzhin du gnas skabs kyis 'gyur bar bshad pa yang yod/kha cig na so so na gsal bar mi snang ba las mkhan po dag gi dgongs pas gsal bar phye ste so sor bstan pa dag kyang yod pas gcig ltar snang ba yang gcig ltar ma brtag la/ so so na gsal bar snang ba yang so sor ngos mi bzung ste/mgo mjug gi don dang bla ma'i man ngag las dpyad par bya'o/ /de ltar bya ba ci'i phyir zhe na/ sngags kyi dgongs pa rnams ni shin tu zab par gyur pas phal gyi shes rab kyis dpag par dka' zhing rtogs par mi nus pa'i phyir ro/ /de la snying po zhes bya ba ni rnam pa gnyis te/mtshan ma yod pa dang / mtshan ma med pa'o/ /de la mtshan ma med pa ni chos kyi sku la bya ste/ de ni thams cad kyi snying po'i don shin tu gsang bar gyur pa'i ngo bo de la yang de skad brjod do/ /mtshan ma yod pa ni rigs so so'i snying po bcu gcig pa la sogs par gsungs pa gang yang rung ba dag go//gzhan dag na re'o na de ltar mtshan nyid mi mthun pa gnyis ming gcig tu 'dod par gyur na yang 'gal te/ de lta na ni 'khor ba mtshan mar snang ba dang / mya ngan las 'das pa mtshan ma med pa gnyis gcig tu brjod par 'gyur la/rnam par rtog pa mi mthun pa gzhan dag kyang de bzhin du 'gyur ro/ /zhe na/ smras pa/ de'ang bden pa ltar snang mod kyi/ 'on kyang de bzhin du mi 'gyur te/ mtshan mar snang ba'i sngags kyi snying po 'bru gcig pa la sogs pas kyang chos kyi sku mtshon cing rtogs par byed la/chos kyi sku che ba'i byin gyis brlabs las brgyud pa'i gzugs sku rnam pa gnyis su snang ba dag gis kyang snying po 'bru gcig ba la sogs pa mtshan mar snang ba'i snying po la sogs pa'i tshig gi tshogs rnams rtogs par byed pas sa dang pha rol tu phyin pa'i tshul tu gcig gi rgyur gcig gyur pa'am/gcig gi 'bras bur gcig gnas pa'i phyir na de ltar brjod na 'gal ba med de/ dper na kun rdzob mtshan mar snang ba dang don dam pa mtshan ma med pa gnyis chos can dang / chos nyid rtog pa mi mthun pa gnyis lta bur snang yang bden pa zhes ming mtshungs par btags pa la 'gal ba med pa bzhin no//phyag rgya ni mgu bar byed pa'am/ 'degs par byed nus pa'i don dang ldan pas phyag rgya zhes bya ste/ 'phags pa rnams mnyes par byed nus pas na mgu ba zhes bya'o/ /gzhan gyis gzhig par mi nus shing 'dod pa'i dngos po myur du 'grub pa'i phyir rgyas 'debs par 'byed pas na phyag rgya zhes bya'o//ye shes las mtshan mar snang ba'am/ mtshan ma'i rnam par rtog pas na mtshan ma zhes kyang bya'o/ /ye shes chen po'i bdag nyid dam byin gyis brlabs las 'byung ba'i rtags yin pas na rtags zhes kyang bya'o//ye shes dang nye ba'i mtshan nyid dam/ de'i sgo nas ye shes nyid chud par mdzad pas na nye ba'i mtshan nyid ces bya ste/ phyag rgya dang / mtshan ma dang / rtag dang / nye ba'i mtshan nyid ces bya ba ni ming bsgyur ba'i rnam grangs te don gcig go/ /de la yang rgyud kyi gzhung so so'i 'dod stangs kyi tshig mi mthun par gleng ba yang yod de/kha cig las ni gzugs brnyan gyi ngo bor gyur pa dang / de kho na nyid gang zag dang chos la bdag med pa'i mtshan nyid gnyi ga la phyag rgyar 'dod pa yang yod/ gzhung kha cig las rnam par rtog pa don dam pa nyid la lha zhes kyang bya la/de'i mtshan mar byin gyis brlabs pa dag la yang phyag rgyar 'dod de/ de la gzhan dag na re de ltar rtog pa mi mthun pa dag ming gcig tu brjod par rung ngam zhe na/ smras pa/ de la yang bde na mdo kyi 'on kyang de gnyis 'brel pa'i mtshan nyid can yin te/don dam par de'i byin rlabs las kyang mtshan ma'i phyag rgya 'byung ba yin la mtshan ma'i phyag rgya des kyang don dam pa nyid rtogs par byed pas de gnyis la yang don dam pa zhes kyang gdags la phyag rgyar brjod pa la yang 'gal ba med do/ /de ltar bstan pa'i phyag rgya de la yang sku gsung thugs la sogs pa'i bye brag gis dbye na rnam pa bzhir 'gyur te/sku phyag rgya chen po dang / dam tshig gi phyag rgya dang / chos kyi phyag rgya dang / las kyi phyag rgya'o/ /de la phyag rgya chen po ni lha'i sku'i gzugs brnyan pas lha rnams kyi tshul bstan pa ste/lus kyi sgo nas lha'i tshul gsal bar bsgom pa'i rgyur che bas na phyag rgya chen po zhes bya'o/ /de la yang gnyis te/ yongs su rdzogs pa'i sku dang / phyag rgya'i sku'o/ /de la yongs su rdzogs pa'i sku ni rigs dang rigs kyi gtso bo la sogs pa rnams te phyag rgya bzhi rdzogs shing cha lugs dang rgyan gyis mdzes par snang ba'o//phyag rgya'i sku ni gzugs kyi lha mo la sogs pa dag gdul bya ji lta bu de 'dul ba'i don du rang gi cha lugs su gyur pa'i gzugs sbas nas mchod rten khri la bzhugs pa la sogs par bsten par bya'o//de dag la yang phyi nang gi bye brag gis rnam pa gnyis su shes par bya ste/ bris ba dang brtsams pa la sogs pa'i gzugs brnyan byas pa rnams ni phye'o/ /nyid kyis bsam pa pa ni nang gi ste/ de dag gi phyag rgya chen po zhes bya'o/ /dam tshig gi phyag rgya ni lha rnams kyi sems kyi tshul bstan pa ste/yon tan phun sum tshogs pa dang ldan pa'i ye shes de nyid dam tshig gi phyag rgya byin gyis brlabs nas bstan pa ste/ sems kyi rnam par thar pa'i phyag rgyar bstan pas lha rnams de las mi 'da' bas na dam tshig gi phyag rgya zhes bya'o/ / kha cig las de bzhin gshegs pa rnams kyi thugs kyi gsang ba ni dam tshig gi sgrar brjod pas de rgyas par bshad pas yang dag pa'i don thob cing rtogs par 'gyur la mi 'da' ba'i phyir yang dam tshig go/ /la la nas gang bsgrub par 'dod pa'i lha de nyid kyi dam tshig gi phyag rgya bcings la snying gar bzhag la snying ga'i zla ba'i dkyil 'khor gyi steng du dam tshig gi phyag rgya rdo rje rtse lnga pa bsam par bya'o zhes zer ro//gzhan dag las sku phyag rgya chen po yongs su rdzogs par gyur pa la dam tshig gi phyag rgyar 'dod pa yang yod do/ /chos kyi phyag rgya ni lha rnams kyi tshig gi tshul du bstan pa ste/gsung rnam par dag pa'i rang bzhin gyi mtshan ma'am rtags su gyur pa'i chos kyi yi ge badzra dz+nyA na dang / sa ma ya s+t+waM zhes bya ba la sogs pa'i mtshan nyid de/ lha rnams kyi tshig gi don dam pa'i chos thams cad ston par byed pa'o/ / las kyi phyag rgya ni lha rnams kyi spyod pa'i tshul bstan pa ste/ de la yang gnyis te/ 'ching ba dang / bsam pa'o/ /de la 'ching ba ni phyag rgya rdo rje khu tshur gnyis su phral ba dang / byang chub mchog gi phyag rgya la sogs pa'i mtshan nyid do/ /bsam pa ni lha gang yang rung ba dag bsgrub pa'i tshe phrin las thams cad ni rang bzhin kun las khyab par bstan pa'i ngo bo rdo rje kha bzhi pa rang gi snying gar bsam mo//sngags ni shes pa dang skyob par ldan pa ste/ don ma nor bar shes pas 'khor ba dang ngan song las skyob par byed pas sngags so/ /gzhung kha cig las ni bskul ba'i tshig dang bcas pa dag la sngags zhes bya bar yang bshad do//de yang lha'i gzugs skyes pa'i tshul bzung nas gsungs pa'i tshig rnams so/ /rig pa ni ma rig pa'i mun pa thams cad bsal ba'i phyir ro/ /de yang 'khor ba dang mya ngan las 'das pa dang /yod pa dang med pa la sogs pa'i mtha' rig pas na de skad ces brjod de/ lha'i gzugs bud med kyi tshul du bzhugs pa'i tshe na gsungs pa'i tshig rnams so/ byin gyis brlabs pa ni gang ltar 'dod pa de bzhin bya ba'i thabs te/ de la yang gnyis te/ rang bzhin byin gyis brlabs pa dang / mthus byin gyis brlabs pa'o/ /byin gyis brlab par bya ba'i cho ga ni bdag lha gang bsgom par 'dod pa'am/ gang la mos shing goms par gyur pa de'i sku phyag rgya chen por gsal bar bsgoms nas ye shes dbab pa la sogs pa lha gnas par byas nas rgyud phyi ma las gsungs pa'i/rdo rje dbyings dbang phyag rgya ni/ /rab mnyam gzhag pa bcings nas kyang / /snying ga mdzod spu mgrin spyi bor/ /bzhag nas sangs rgyas byin gyis rlobs/ zhes bya ba la sogs pa mthar thug gi bar du gsungs pa de dag rigs gang gi lha bsgom pa de bzhin du rim par sbyar cing byin gyis brlab par bya'o//dbang bskur ba ni thams cad kyi bdag nyid la dbang thob par bya ba'i thabs su gyur pa ste/ de yang gnyis te/ bskur ba'i don du dbang bskur ba dang / mthu bskyed pa'i phyir dbang bskur ba'o/ /de la sangs rgyas bcom ldan 'das rnams ni shes bya rdzogs shing yon tan mthar phyin pa yin pas de dag la ni gzhan gyis mchod pa'i phyir me tog gi phreng ba dang /rin po che'i phreng ba la sogs pas dbang bskur ba'o/ /byang chub sems dpa' rnams ni da dung du shes bya ma rdzogs shing yon tan gyi rnam pa mthar ma phyin pas de dag ni shes bya dang yon tan rdzogs shing mthar phyin par bya ba'i phyir/rigs lngas ye shes lnga'i dbu rgyan la sogs pa dbang bskur ba'am/ rnam gcig na rnal 'byor pa nyid gang la mos pa'i lha'i phyag rgya chen por bsgoms nas rgyud phyi ma las gsungs pa'i/rin chen rdo rje bcings nas ni/ /dpral bar rab tu bzhag byas nas/ /rgyal ba rdo rje rin chen gyis/ /dbang bskur bar ni de 'gyur ro/ /zhes bya ba la sogs pa mthar thug gi bar du gsungs pa'i rnam pa de dag gis rigs dang lha ji lta ba bzhin du dbang bskur bar bya'o//ting nge 'dzin ni/ rnam par rtog pa'i rgyu ba gzhan bkag nas dmigs pa'i don la sems rtse gcig par gnas nas rang gi rnam par thar pa'i sgo yid la byed pa'o/ /de la yang gnyis te/ rang bzhin gyi ting nge 'dzin dang /rjes su mthun pa'i ting nge 'dzin to/ /rang bzhin gyi ting nge 'dzin ni de bzhin gshegs pa dang sems dpa' chen po rnams kyi rnam par thar pa'o/ /rjes su mthun pa ni sngags spyod pa'i rnal 'byor pa nyid de dang rjes su mthun par bsgrub pa ste/ de'i thabs gsal bar bstan pa yang rgyud phyi ma las gsungs pa/rgyal ba kun gyi dbyings su ni/ /phyag rgya mnyam par gzhag pas bcing / /zlos shing sngags kyi rim pa ni/ /myur du dngos grub 'thob par 'gyur/ /zhes sangs rgyas bcom ldan 'das kyis gsungs so zhes bya ba la sogs pa mthar thug gi bar du gsungs pa'i tshig de dag gis rigs gang yin pa'am/gang la mos pa dag gi ting nge 'dzin la gnas par bya'o/ /mchod pa ni phun sum tshogs par ldan pa'i yo byad kyis bdag gzhan mnyes par bya ba'i thabs te/ de la yang rnam pa gnyis te/phyi'i mchod pa dang nang gi mchod pa la sogs pa'am/ rnam gcig las kyi dkyil 'khor du gsungs pa'i tshul gyis gzhan bskul bar bya'o/ /de yang rgyud phyi ma las gsungs pa'i/ rab mnyam gzhag pas dang por ni/ /bdug pa la sogs mchod byas 'di/de nas dngos grub 'dod pa yis/ /bsgrubs na dngos grub thob par 'gyur/ /zhes bya ba la sogs pa mthar thug gi bar du gsungs pa de dag gi tshul gyis rigs so so mchod par 'dod pa gang yin pa de la mchod par bya'o/ /bdag gi de kho na nyid ni rang bzhin gyis phyin ci ma log pa ste/bems po'i mtshan nyid dang bral bas bdag med pa'i rang bzhin skye 'gag med pa ston pa nyid du shes pa'o/ /lha'i de nyid ni rang bzhin gyis gnas pa'i mtshan nyid can te/ de la yang gnyis te/ don dam pa dang kun rdzob ste/ don dam pa ni lha'i rang bzhin dang stong pa nyid du mi gnyis te dbyer med pa'i mtshan nyid can no//kun rdzob tu ni skyes pa dang / bud med dang / khro bo dang zhi ba'am gtso bo dang 'khor du gyur pa sangs rgyas dang byang chub sems dpa' la sogs pa gang yang rung ste/ yan lag dang nying lag rdzogs shing rgyan dang cha lugs phun sum tshogs pa dang ldan par gyur pa'o//dkyil 'khor ni dkyil 'khor du ldan pas dkyil 'khor te/ dbyibs rnam par dag pa'i dkyil 'khor la/ rig pa'i ye shes kyi 'khor gyis bskor ba'i phyir na dkyil 'khor zhe'am/ dbus kyi gtso bo dkyil 'khor la rigs kyi gtso bo la sogs pa'i 'khor gyis bskor ba'i phyir na dkyil 'khor te/mang nyung gi rnam pa dang / dbyibs dang / kha dog ji lta bu dag na yang rung ste/ de la yang rnam pa gnyis te/ don dam pa dang kun rdzob bo/ /don dam pa ni byang chub sems rtogs par gyur pa dang ldan pa'i rig pa'i ye shes kyi ngo bo ste/ngan song sbyong ba las kyang gsungs pa/ sangs rgyas kun gyi byang chub sems/ /bla na med pa rtogs gyur pa/ /rgyal bas gsungs pa'i ye shes gang / /de ni dkyil 'khor snying por gsungs/ /zhes bya ba lta bu kho na'o/ / kun rdzob kyi dkyil 'khor la yang gnyis te rang bzhin gyi dkyil 'khor dang / gzugs brnyan gyi dkyil 'khor gyis bsdus pa'o/ /shes rab ni chos rab tu 'byed pa ste/ thams cad la 'bigs par byed pa'i mtshan nyid can pas de kho na nyid sum cu rtsa bdun la sogs pa thabs la mkhas pa'o//thabs ni sems can ji lta bus 'dul ba la de lta bu'i gzugs su ston cing / rjes su 'dzin pa dang dgos pa ji lta bus 'grub pa de lta bu'i rgyus bsgrub pa la mkhas pa'o/ /rgyu'i de kho na nyid ni gong ma gong ma thob pa'i rgyur gyur pa ste/ sa dang bo thob pa'i rgyu ni sbyin pa'i pha rol tu phyin pa rdzogs pa yin zhe'am/sangs rgyas kyi sa thob pa'i rgyu ni byang chub sems dpa'i sa yin zhes bya ba lta bu ste gang 'dod pa thob par byed pa'i gzhi'o/ /'bras bu ni rgyus bsgrubs nas don du gnyer bar bya ba de lag tu thob pa ste/ rgyu byang chub phyogs su spyad pas/ 'bras bu stobs dang mi 'jigs pa dang / gzungs dang ting nge 'dzin thob pa'am/ rgyu pha rol tu phyin pa spyad pa'i 'bras bu sa bcu thob pa lta bu ste/ 'di'i gnas skabs na/ rgyu ni sngags kyi 'bras bu gang 'thob par byed pa'i rgyu ste/ rdo rje'i tshig la sogs pas sngags bzlas pa dang /sems brtags pa la sogs pa lha bsgoms pas 'bras bu grub ba rab 'bring la sogs pa 'grub pa'o/ /'bras bu ni de las byung ba'i 'bras bu ste/ rig 'dzin la sogs pa grub pa dang / phyag rgya chen po mngon du gyur pa dang /zhi ba dang rgyas pa la sogs pa'i las kyis gzhan la phan gdags par nus pa'o/ /rnal 'byor zhes bya ba ni/ ye shes kyis chos kyi dbyings la sbyor ba'i phyir na rnal 'byor te/ 'di dag rim par sbyar na/ rnal 'byor ni de bzhin gshegs pa la sogs pa dkyil 'khor gyi lha rnams kyi rjes su sgrub cing /gsang sngags kyi don nyams su len par byed pa'i dam tshig sems dpa'i bsam gtan la gnas pa ste/ gang zag sngags spyod pa'i skal ba dang ldan pa gang yang rung ba rnams so/ /shin tu rnal 'byor ni/ brtson ba rtse gcig pas/ rdo rje phra mo'i ting nge 'dzin las su rung ba rnams so//rnal 'byor chen po ni phrin las rnam pa bzhi la dbang thob pas 'phags pa dang sems can gyi don byed par nus pa'i mtshan nyid can no/ /gsang ba'i rnal 'byor ni rig 'dzin la sogs pa'i go 'phang chen po thob nas de'i 'bras bu mngon du gyur pa'o//thams cad rnal 'byor ni rnal 'byor chen po'i don mngon du gyur nas thams cad mnyam pa chen po'i bdag nyid du rtogs pa ste/ 'di dag gi rim pa'i rnam par dbye ba yang rgyud 'di nyid las gsungs pa'i dngos grub dang dngos grub bsgrub pa'i rim pa rnam pa tha dad pa bstan pa dag gis bye brag las rig par bya'o//kha cig na re rnal 'byor ni sngags kyi don la 'jug pa'i gang zag rnams dang / 'jig rten pa'i lha chen po rnams so/ /shin tu rnal 'byor ni 'jig rten las 'das pa'i 'khor byang chub sems dpa' chen po la sogs pa lha dang lha mo'i tshogs rnams so//rnal 'byor chen po ni rigs lngas bsdus pa'i sangs rgyas so/ /gsang ba'i rnal 'byor ni bcom ldan 'das rdo rje dbyings so/ /thams cad rnal 'byor ni bcom ldan 'das rnam par snang mdzad chen po'o//rnam gcig tu byang yul ba na re/ rnal 'byor ni b+ha ga bAn rdo rje dbyings chen po'o/ /shin tu rnal 'byor ni de'i 'khor du gyur pa'i sems dpa' chen po bcu drug go/ /rnal 'byor chen po ni mi bskyod pa la sogs pa'i sangs rgyas so/ /gsang ba'i rnal 'byor ni phyi nang gi lha mo brgyad la sogs pa'o//thams cad rnal 'byor ni 'jig rten pa la sogs pa'i 'khor lor gyur pa'i gtso bo dang / chung ma dang 'khor dang / g.yog tu bcas pa'o zhes bshad de/ de dag tshig gi sdebs mi mthun par snang yang don gang du yang thal ba med pas 'gal ba med do//bzlas pa ni sngags bzlas shing snying po brjod pa'i sgo nas lha mnyes par bya ba'i thabs te/ rtsa ba'i rgyud dam 'di nyid las gsungs pa'i rdo rje bzlas pa la sogs pa rigs so so'i bzlas pa gsum pa'o/ /sbyin sreg ni sbyin zhing sreg pa'i don gyis 'phags pa mnyes shing dngos grub ster ba'i thabs te/de la yang gnyis te/ nang gi ye shes kyis nyon mongs pa sreg cing dngos grub sbyin pa'o/ /phyi ma'i ni rdul tshon gyi dkyil 'khor du sngags kyis btab pa'i rdzas bsregs pas 'phags pa mnyes shing dngos grub ster ba'o//brtul zhugs ni mi mthun pa'i phyogs brtul nas bsgrub bya'i don la zhugs pa dang / sngags kyi gzhung dang 'gal ba rnams spangs nas sngags pa thams cad kyis bsrung bar bya ba ste/ de la yang gnyis te/ spyi dang khyad par gyi dam tshig go//de la spyi'i dam tshig ni bdun/ khyad par gyi dam tshig ni lnga'o/ /dngos grub ni kun gyis smon par bya ba'i gnas te/ de la yang rnam pa gnyis te/ 'jig rten dang 'jig rten las 'das pa'i dngos grub rnam pa gnyis so/ /dngos grub bsgrub pa ni de thob par bya ba'i thabs te/lig bu mig dang / srod any+dza na la sogs pa'i rdzas la brten nas lha bsgom zhing 'dzab bzlas te/ gang 'dod pa de thob par bya ba'o/ /bsam gtan ni rgyud kyi don la sogs pa thos shing mthong ba dang / sgrub pa'i thabs kyi bye brag ji lta bu yin pa dag sems par byed pa'o//byang chub sems ni stong pa nyid dang snying rjer ldan pa ni byang chub kyi sems te/ de la yang gnyis te/ don dam pa dang / kun rdzob bo/ /kha cig na re gnyis su med pa'i byang chub kyi sems dang gsum mo zhes kyang zer to//stong pa nyid kyi ye shes ni thams cad rang bzhin med par rtogs pa'o/ /me long lta bu'i ye shes ni snang la rang bzhin med par rtogs pa'o/ /mnyam pa nyid kyi ye shes ni bdag gzhan du mi 'byed par rtogs pa'o/ /so sor rtog pa'i yi shes ni spyi dang rang gi mtshan nyid rang bzhin med par rtogs pa'o//bya ba grub pa'i ye shes ni bdag gzhan du mi 'byed par don mdzad pa'o/ /chos kyi dbyings rnam par dag pa'i ye shes ni/ de dag gi ngang du yang gnas pa ste/ de dag gi yul du gyur pa'o/ /rnam gcig tu 'di nyid kyi gzhung ltar sbyar na stong pa nyid ni mi dmigs par bsgom pa ste/sarba d+harmA zhes bya ba'i sngags kyi don dang ldan par bsgoms pas phyi nang rnam par dag par bya ba'o/ /dbyings dang chos kyi skur mnyam zhing gsal bar rtogs pa ni me long lta bu'i ye shes so/ /ma g.yos pa de nyid mnyam pa nyid kyi ye shes so//yul rnam lngar ye shes lngar rtogs pa ni so sor kun du rtog pa'i ye shes so/ /de rnams chos kyi dbyings su lhun gyis grub pa ni bya ba grub pa'i ye shes so/ /de nyid mya ngan las 'das pa chen po yin pas chos kyi dbyings rnam par dag pa'i ye shes so//de ltar bshad pa de nyid kyang tshig mi mthun bar snang yang don tha dad pa med pas nyes par mi 'gyur ro/ /dgug pa ni mchod cing spyan drangs pa ste/ de la yang gnyis te 'og min gyi gnas chos kyi dbyings kyi pho brang nas spyan drang ba dang / phyogs bcu'i 'jig rten gyi khams nas dgug pa'o//gzhug pa la yang gsum ste gzugs brnyan gyi dkyil 'khor du gzhug pa la/ 'khor du gzhug pa dkyil 'khor rnam pa gnyis gcig tu bya ba dang / dam tshig sems dpa' la bcug nas sems dpa' rnam gnyis gcig tu bya ba dang /snod du gyur pa'i slob ma la bcu gnas ye shes dbab par bya ba'o/ /bcing ba ni sgrub pa dang bsgrub bya ba gnyis tha mi dad par bcing ba'o/ /dbang du bya ba ni dgyes pa bsgrub pa ste mnyes pa bya ba'o/ /gzhan dag na re tshig sum cu rtsa bdun po de dag la ci'i phyir de kho na nyid ces bya zhe na/smras pa de kho na nyid ces bya ba ni kun rdzob dang don dam rnam pa gnyis te/ chos thams cad kyi chos nyid rang bzhin gyis phyin ci ma log cing brjod du med pa'i ngo bo ni don dam pa'i de kho na'o/ /de lta mod kyi kun rdzob kyi tha snyad dang sbyar na mi slu bar dgongs pa grub par byed pas na de kho na zhes bya ste/sum cu rtsa bdun yod pa de rnams kyis ji ltar rigs par don grub par byed pa'i phyir na de kho na nyid ces bya'o/ /de ltar de kho na nyid sum cu rtsa bdun po de dag gis rtsa ba'i rgyud chen po'i mgo mjug gi don yang gsal bar ston la/de'i sgrub thabs su gyur pa'i yi ge 'di'i mgo mjug gi don yang 'dis gsal bar byed pas na/ 'di ltar bstan to/ /rgol ba po na re/ rtsa ba'i rgyud chen po'i glang nas ni de bzhin gshegs pa thams cad kyi de kho na nyid bsdus pa chen po zhes gsungs na/ de dang sbyar na rgyud mgo mjug gi bar du 'byung ba kun de kho na nyid kyi ngo bor gnas pa yin pas de kho na nyid ces brjod pa las ma gtogs pa sum cu rtsa bdun du yang bgrang du med la/ gal te de ltar bgrang du yod par gyur na ni rtsa ba'i rgyud chen por tshig gis tshogs mang po gsungs pa dag yod pas de dag sum cu rtsa bdun du yang mi chud pas nyung ba'i skyon du thal bar 'gyur ba yang yod na ci'i phyir 'di ltar bstan ce na/smras pa de yang bden te/ rtsa ba'i rgyu ba chen po'i glang nas de skad gsungs pas de bzhin du gyur pa de bkag pa yang med mod kyi/de las gsungs pa'i tshig gi tshogs de dag kyang 'di ltar bstan pa 'di dag gi nang du 'dus ba'i phyir na/ 'dir ma 'dus pa'i skyon du yang mi 'gyur la/ 'di ltar brjod pa'i dbye ba 'dis rgyud 'di'i mgo mjug kun du khyab par nus bas grangs nyung bar yang mi 'gyur te/rgyud kyi rang gnyer du sbyar nas de ltar bstan pa'o/ /rgol ba po na re 'o na de ni de ltar rung na/ rtsa ba'i rgyud chen por dkyil 'khor bzhi phrin las dang bcas pa dang / las bzhi'i sgrub thabs dang bcas par bstan pa'i rgyud rnam pa gsum po mjug gi kha bskangs pa dang bcas pa shin tu mang zhing rgya che bar 'gyur ba yin pas de la ni 'di dag bstan par rung la/sgrub thabs kyi yi ge 'khor dum bu bzhi las kyang rdo rje dbyings kyi dkyil 'khor gyi dum bu 'ba' zhig gi sgrub thabs kyi dbang du byas nas tshig dang yi ge nyung shos tsam zhig bstan pa la de kho na nyid sum cu rtsa bdun gyi don tshang bar ston pa 'gal te/de lta na ni rtsa ba'i rgyud chen po ni tshig mang la don nyung sgrub thabs kyi yi ge 'di ni tshig nyung la don mang ba mi mtshungs pa mtshungs pa'i skyon du thal bar 'gyur ro zhe na/ smras pa de ltar snang ba bden mod kyi 'on kyang de ltar snang yang 'gal bar mi 'gyur ba'i gtan tshigs ston pa nyid kyis gsungs te/ dper na shes rab kyi pha rol tu phyin pa sha lo ka 'bum yod pa de sdud pa tshigs su bcad pa sha lo ka sum brgya yod pa'i nang du bsdus na yang 'bum mang nas lhag ces bor rgyu med la/sdud pa nyung nas ma chog zhes bsnan rgyu med pas tshig kyang mnyam la shes rab kyi pha rol tu phyin pa 'bum la yang spyi don dgu dang bcur yar mi mang la sdud pa tshigs su bcad pa yang spyi don drug dang bdun du mar mi nyung ste/ spyi don brgyad kho nar nges pa'i gtan tshigs 'phags pa mi pham pas bshad pa thogs med kyis mnyan nas rab tu byed pa brtsams pa las kyang /shes rab pha rol phyin pa ni/ /dngos po brgyad kyis yang dag bshad/ /ces bya ba la sogs pa dag rgyas par gsungs so/ /de dang 'dra bar 'di nyid kyi skabs su yang rtsa ba'i rgyud chen po'i mgo mjug gi don de kho na nyid sum cu rtsa bdun du bsdus na yang don nyung nas ni ma chog pa med la tshig mang bas ni lhag pa med do//sgrub thabs kyi yi ge 'dir de dag 'dus par bstan na yang ma shong ba dang lhag pa yang med la/ ma chog pa dang bsnan rgyu yang med de/ mang nyung mi mnyam ba'i skyon du yang mi 'gyur ro/ /rgol ba po na re/ 'o na ni sems can dang sangs rgyas su yang mnyam la rgya mtsho chen po dang ba lang gi rmig rjes kyi chur yang mnyam zhing mtshungs pa'i skyon du 'gyur ro zhe na/ smras pa sems can yang de bzhin gshegs pa'i snying po can bas sangs rgyas pa'i sa bon dang ldan pas don dam par sangs rgyas dang sems can du mnyam pa la 'gal ba yang med pas/kun rdzob tu de bzhin gshegs pa ni tshogs chen po gnyis rdzogs pa'i rgyu las 'bras bu sku gsum brnyes shing rdo rje lta bu'i sku la thun mong dang thun mong ma yin pa'i mtshan dang dpe byad kyis legs par brgyan cing mdzes par snang bas bde ba chen po'i lhums la bzhugs pa yin la sems can rnams ni rgyu las dang nyon mongs pa las 'bras bu sdug bsngal gyi ngo bor smin pas 'khor ba'i yan lag bcu gnyis kyis kun du 'khor zhing 'phyan par byed pas sdug bsngal gyi phung po 'ba' zhig po thob ste/'byung ba bzhi cha rags pas bskyed pa'i lus sha khrag gi gdos pa can dang ldan pas kun rdzob tu mnyam zhing mtshungs par yang mi 'gyur la/ rgya mtsho chen po dang ba lang gi rmig rjes kyi chu yang rgyu chu'i rdul phran las grub pas ni mnyam yang 'gal ba med la/ 'bras bu che chung gi khyad par dpag yas pas mnyam par yang mi 'gyur te/ de bzhin du yi ge 'di'i gnas skabs su yang / rgyud dang sgrub thabs kyi bye brag gis dkyus mi mnyam na yang 'gal ba med la/che ba'i yon tan gyi khyad par gyis mnyam na yang skyon du mi 'gyur mod kyi/ spyir ston pa nyid kyis gdul bya'i dbang po'i rim pa dang sbyar nas spyir yang theg pa'i bye brag mang po dag tu gsungs la rgyud dang mdo sde'i gnas skabs su yang /la lar ni tshig nyung ngu'i nang du don mang po bsdus te bka' stsal/ la la'i nang du ni don nyung la tshig rgyas par gsungs pa yang yod de/ rtsa ba'i rgyud kyi gnas skabs su yang bcom ldan 'das rdo rje dbyings chen po nyid kyis gang zag dbang po rnon po don mgo smos pas go ba rnams la ni rgyud kyi mtshan nyid de de bzhin gshegs pa thams cad kyi de kho na nyid bsdus pa zhes bya ba de tsam bstan/gang zag dbang po 'bring po tshig lhur len pa rnams la ni/ rgyud bshad pa'i khyad par gyi gleng gzhi dang shes par bya ba'i dmigs bstan pas go bar dgongs nas 'di skad bdag gis thos pa'i dus gcig na zhes bya ba'i 'og na/de nas bcom ldan 'das rnam par snang mdzad chen po nam mkha'i dbyings bzhin du mnyam par bzhugs shing zhes pa nas/ bcom ldan 'das byang chub chen po'i thugs byang chub sems dpa' chen po kun du bzang po/de bzhin gshegs pa thams cad kyi thugs la gnas so zhes bya ba'i bar du nyung shas tsam zhig bstan pa de'i nang du rgyud mgo mjug gi don kun tshang zhing rdzogs par bstan/ gang zag dbang po rtul po tshig lhur len pa rnams kyi don du thun mong gi gleng gzhi dang yongs su shes par bya ba'i dngos po bstan te/de nas de bzhin gshegs pa thams cad kyis sangs rgyas kyi zhing 'di til gyi gang bu bzhin du yongs su gang bar gyur to/ /zhes pa nas rgyud phyi ma'i yang phyi ma'i mjug rdzogs pa yan chad kyis bstan te/'on kyang der yang ston pa nyid kyis de ltar bstan pa dang sgrub thabs 'dis kyang de kho na nyid sum cu rtsa bdun gyi don dang ldan par bstan pa la 'gal ba med de/ de kho na nyid kyi don de dag kyang lha dang dkyil 'khor dang phrin las la sogs pa gcig la yang kun tshang du btub la/gcig las kyang mang por spror rung bas gang du yang 'gal ba med do/ /de la de kho na nyid 'di dag dkyus la sbyar thabs ni rnam pa gnyis su sbyar te/ bsdus te spyi khyab du sbyar ba dang / khyad par rkang thon tu sbyar ba'o/ /de la bsdus te spyi khyab tu sbyar ba ni 'di ltar bstan pa 'di dag kyang don dam pa'i de kho na nyid dang /kun rdzob kyi de kho na nyid rnam pa gnyis su 'dus te/ sgrub thabs 'di las 'byung ba'i rnam pa 'di dag kyang don dam par ni rang bzhin mi dmigs pa yin la/ de ltar yin yang kun rdzob tu de bzhin du bsgrubs na 'grub par shes par bya'o//khyad par gyis rkang thon du sbyar ba ni 'di ltar bstan pa 'di dag rang rang gi gnas skabs gang du babs bar rim par sbyar te/ 'og nas zhib tu 'chad do/ /de ni rgyud kyi don la bsnyegs te bshad pa'o/ /don gnyis pa sgrub thabs kyi gnyer kyis dkyus mgo mjug tu sa bcad pa ni rnam pa gsum ste/dang por shes rab dang ldan pa'i gdul bya rtog pa can chos kyi rjes su 'brang ba rnams kyi rtog pa bsal ba'i phyir dgos 'brel gyi don gyis gzhan yid ches bar bya ba'i thabs bstan pa dang / sgrub thabs rnam par gzhag pa'i gzhung bstan pa dang / dge ba'i rtsa ba bsngo bar bstan pa'o/ /dgos 'brel gyi don gyis gzhan yid ches par bya ba la yang don rnam pa bzhi ste/ phyag 'tshal ba dang / ma bca' ba dang / brtsams pa'i dgos pa dang / rgyud kyi don bstan pa'o//sgrub thabs rnam par gzhag pa'i gzhung bstan pa la yang rnam pa gsum ste/ bsgom pa dang / bsgrub pa dang / phrin las so/ /bsgom pa la yang rnam pa gnyis te/ gtso bo de bzhin gshegs pa rnams kyi sku phyag rgya chen po la sogs pa yan lag dang bcas par bsgom pa dang /'khor de'i rigs kyi ye shes kyi sems dpa' chen po rnams kyi sku phyag rgya chen po yan lag dang bcas par bsgom pa'o/ /bsgrub pa la yang rnam pa gnyis te/ thun mong gi dngos grub la sogs pa 'jig rten pa'i rnal 'byor pa rnams bsgrub pa dang /mchog gi dngos grub 'jig rten las 'das pa'i khyad par ye shes sems dpa'i sku phyag rgya chen po yan lag dang bcas pa'i dngos grub bsgrub pa'o/ /phrin las la yang rnam pa gnyis te/ 'phags pa mchod pa dang / sems can gyi don bya ba'o//de la yang dbye ba rnam pa bzhi ste/ zhi ba dang / rgyas pa dang / dbang dang mngon spyod do/ /dge ba'i rtsa ba bsngo ba la yang rnam pa gnyis te bdag gi rgyud la bsngo ba dang gzhan gyi rgyud la bsngo ba ste/ de dag kyang dkyus [(]gyi [,]kyi [)]rim pa dang / gnas skabs ji lta ba bzhin du sbyar bar bya'o//don gsum pa sgrub thabs kyi mgo mjug gi don bshad pa ni dkyus kyi rim pa rnam par gzhag pa'i don ji lta ba bzhin du re re nas mthar gyis bshad cing gtan la 'bebs par byed pa ste/ ji ltar/ rnam snang mdzad chen ye shes ni/ /zhes bya ba nas brtsams te/dpal ldan rdo rje sems pa'i thugs/ /yongs su mnyes pa nyid du gyur/ /zhes bya ba la mthar thug gi bar du de dag rim gyis bshad cing yig 'bru 'dus pa'i tshig rnams 'joms par byed pa'o/ /de ltar spyi don rnam pa gsum du smras pa yang ci dgos she na/ smras pa de yang dgos pa med pa ma yin te/dang pos ni sgrub thabs kyi lus rnam par gzhag pa'o/ /gnyis pas ni yan lag gi dbye ba bstan pa'o/ /gsum pas ni lus dang yan lag gi mtshams sbyor cing / tshig gi don mtha' dag 'byed par byed pas na de ltar bstan to/ /da ni de dag gi don rim par skabs dang sbyar na/phyag dang zhe sa la sogs pa'i tshul shis pa dag ni ma rabs phal pa dag la med de/ ya rabs gong ma rnams kyi rkyen du gyur pa yin pas slob dpon sangs rgyas gsang ba yang mkhyen rab dang thugs rjer ldan pa 'phags pa 'jam dbyangs kyi zhal mthong zhing thams cad phyag rgya'i dkyil 'khor du byin gyis rlob par spyod pas kun gyis phyag bya ba'i gnas su gyur pa yin mod kyi 'on kyang des kyang ci mdzad ci spyod kyang /dang por phyag dang zhe sa sngon du btang nas gdod rtsom par mdzad pas na/ sgrub thabs kyi yi ge 'di mdzad pa la dang por chos kyi sku la bstod nas de'i zhar la gzugs sku rnam pa gnyis la yang bstod pa mdzad de/de yang dang por rang gi don phun sum tshogs pa'i sgo nas chos kyi sku'i rang bzhin la bstod pa'i don gsungs pa/ rnam snang mdzad chen ye shes ni/ /bde bar gshegs pa'i thugs la gnas//rdo rje dbyings la sogs pa'i gzugs/ /sangs rgyas la sogs 'khor lo bskor/ /zhes bya ba la sogs pa'i tshig gsungs so/ /de la rnam snang mdzad ces pa ni/ chos kyi sku dang mi gnyis par gyur pa'i ye shes nyid la bya ste/ don dam par ye shes de nyid rang bzhin gyis 'od gsal ba dang / kun rdzob tu 'gro ba ji ltar 'dul ba bzhin du sku gsung thugs khams gsum thams cad du sna tshogs pa'i rnam par snang bar mdzad pas na/ rnam par snang mdzad ces bya'o/ /yon tan de lta bu de dag sa bcu'i byang chub sems dpa' la yang yod mod kyi/de dag las khyad par du gyur pas na rnam snang mdzad chen zhes bya ste/ rnam par snang mdzad chen po zhes bya ba'o/ /ye shes zhes pa ni chos kyi sku ye shes lnga'i rang bzhin gang gi mthu rnam pa sna tshogs dang ldan pa nyid kyi yon tan rnams me long lta bu'i ye shes la sogs pa rnams su bstan pa yin la/ye shes de dag gi ting nge 'dzin gyi sgo rigs dang / rigs kyi sems pa la sogs par ston par byed nus pa'o/ /bde bar gshegs pa'i thugs la gnas/ /zhes pa ni/ bde bar gshegs pa rnam par snang mdzad chos kyi sku'i rang bzhin gong ma lta bu'i yon tan gyi bye brag rnam pa mang po dang ldan pa de ni/de lta bu'i dus gsum gyi bde bar gshegs pa thams cad kyi ting nge 'dzin gyi rang bzhin la gnas so zhes pa'i don te/ thugs zhes pa ni yang dag pa nyid phyin ci ma log pa'i ting nge 'dzin gyi rang bzhin zhes bya ba'i tha tshig go//chos kyi sku'i rang bzhin gyi sgo nas bdag gi don phun sum tshogs pa bstan to/ /de ltar chos kyi sku mi gnyis pa'i ye shes de nyid don dam par rang bzhin gyi gnas so/ /zhes bya ba'i rang bzhin gyis 'od gsal ba'i ngo bor gnas mod kyi/sngon gyi smon lam gyi mthu dang / thugs rje chen po'i shugs kyis/ ye shes kyi rnam par thar ba dang / yon tan gyi sgor gyur pa longs spyod rdzogs pa'i sku dang / rigs bzhi dang rigs kyi gtso bo la sogs par bstan nas gzhan gyi don phun sum tshogs par mdzad pa'i phyir na/gzugs kyi sku la bstod pa gsungs so/ /gzhan dag na re gzugs kyi sku'i tshul du rnam par sangs rgyas par mdzad pa yang cha lugs rnam pa mang po dag yod na 'dir ji lta bu'i tshul du bstan te sangs rgyas pa yin zhe na/smras pa rdo rje dbyings la sogs pa'i gzugs zhes bya ba la sogs pa gsungs te/ de bzhin gshegs pa rdo rje dbyings zhes bya ba'i rnam pa dang ldan pa'i gzugs su ston cing rang gi 'khor byin gyis rlob pa'i tshul gyis sangs rgyas par bstan par mdzad pa'o/ / sogs zhes pa ni de'i rim pa dang 'khor gyi rnam pa dag der sbud par mdzad pa'o/ /de la 'dir rdo rje dbyings zhes brjod pa ni rigs bzhi la sogs pa'i de bzhin gshegs pa rnams kyis rdo rje dbyings zhes bos nas rdo rje ming gi dbang bskur ba'i tshig ste/ 'di ltar brjod pa'i don ni 'khor ba'i dbang du ma gyur te/ye shes chen pos 'khor ba la dmigs nas/ thugs rjes nyan thos ltar mya ngan las 'das pa la mi gnas pa'i ye shes rdo rje ltar cis kyang mi tshugs pa'i rang bzhin gyi sku yin pa'i phyir don de'i rjes su 'brang ba'i tshig tu 'di skad brjod do//sangs rgyas zhes pa ni don de dang ldan pa'i tshul dang cha lugs 'dzin pa'i gzugs su bstan pa'i sangs rgyas par mdzad pa'o/ /la sogs zhes pa ni sangs rgyas pa dang bdud btul ba la sogs pa sangs rgyas pa'i mdzad pa'i tshul gyis rnam pa ma lus shing mthar thug pa dag sdud par byed pa'i tshig go//de bas na 'khor lo bskor zhes pa ni/ rigs mthun pa'i 'khor rnams kyis 'khor lo'i tshul du bskor nas/ 'di'i gzhung nyid 'chang par mdzad pas na de skad brjod do/ /de yan chad kyis sku gsum gyi rang bzhin dang yon tan gyi khyad par ji snyed pa thams cad rnam par dbye ba'i tshul du bstan nas/da ni de dag gi don rnam par sdud pa'i sgo nas bstan pa'i dga' ba'i tshig bsdu ba'i rnam pa gsungs pa/ de ltar chos kyi sku dang ni/ /zhes bya ba la sogs pa smos te/ chos kyi sku ni mi gnyis pa'i ye shes chen po rang bzhin gyis 'od gsal ba'i ngo bor gyur pa ye shes kyi dbyings la khyab pas gnyis su med par gnas par gyur pa'i rgyu'i ngo bo nyid du 'dod pa'i bdag nyid do//longs spyod rdzogs pa'i sku ni nyon mongs pa can gyi yid dang yid kyi rnam par shes pa las gyur pa'i mnyam pa nyid kyi ye shes dang so sor kun du rtog pa'i ye shes kyi ngo bo las sangs rgyas nas/rgyud dag pa'i gdul bya rnams yongs su smin par mdzad pa'o/ /sprul pa'i sku zhes pa ni sgo lnga'i rnam par shes pa las gyur pa bya ba grub pa'i ye shes kyi ngo bo las sangs rgyas pa ste/mtshan nyid dang sngags rnam pa gnyis kyi sgo nas mngon par byang chub pa'i tshul bstan nas/ lha dang mi la sogs pa'i gdul bya skal ba can rnams yongs su smin par mdzad pa'o/ /de bas na de'i don gsal bar bstan pa'i phyir/ rnam snang mdzad dang thub pa yang / /rgyud 'di'i ston pa zhes smos te//rang bzhin gyis grub pa dbang phyug chen po'i gnas su ni sa bcu pa'i byang chub sems dpa' rnams la ting nge 'dzin gyi sgo nas de kho na nyid bsdus pa'i rgyud la sogs pa 'chad par mdzad la/ lha'i rgyal po dbang sgyur gyi gnas dang ri rab ri'i rtse mo la sogs par ni lha'i gtso bo rigs mthun pa'i 'khor dang bcas pa rnams la rgyud 'di nyid 'chad par mdzad pa dang /'dzam bu'i gling gi mi'i 'gro ba skal ba mnyam pa rnams la yang de bzhin du 'chad par mdzad pas na rgyud ston pa dang 'gro ba 'dren pa'i ngo bor gyur pas na de skad brjod do//de dag bstod nas zhes bya ba ni/ de rgyud ston par mdzad pa'i sangs rgyas dang sangs rgyas de dag gi 'khor du gyur pa dag la rang bzhin dang yon tan gyi sgo nas mngon par bstod pa'i tshig brjod pa'i 'og tu gdod/ sgrub thabs kyi rim pa brtsam par mdzad pa'o/ / nas zhes bya ba ni mtshams 'brel par byed pa'i tshig gi gzugs so/ /la la na re/ rnam snang mdzad chen ye shes ni/ /zhes bya ba 'di rnam par snang mdzad chen po dang de'i ye shes zhes sbyar te/ rnam par snang mdzad chen po ni rang bzhin gyi lhun gyis grub pa'i gnas na bzhugs pa'i rnam par snang mdzad chen po zhes bya bar 'khor los sgyur ba'i rgyal po'i cha lugs su bzhugs nas rang gi 'khor smin par byed la yid nyon mongs pa can dang /rnam par shes pa'i yid yongs su dag pa las gyur pa mnyam pa nyid dang / so sor kun du rtog pa'i ye shes kyi ngo bo las gyur pa'i sgo gzugs kyi sku rnam par snang mdzad pa'o//de yang de'i cha lugs 'dzin pa gzhan dag yod pa las khyad par du gyur pa'i phyir na chen po zhes bya ste/ longs spyod rdzogs pa'i sku'o/ /ye shes ni de'i ye shes te/ dbyings rnam par dag pa'i don la 'bigs par byed pa'i ye shes shin tu rnam par dag pa ste/kun gzhi rnam par shes pa yongs su dag pa las gyur pa me long lta bu'i ye shes kyi ngo bo dbyings dang 'dren mar gyur pas sku ltag 'og rnams 'byung ba'i gzhir gyur pa ste/ ye shes gzhan dag yod pa'i nang na gzhi dang rtsa ba nas kun gyi rgyu'i ngo bo'i phyir na ye shes zhes bya'o//de ni dus gsum gyi de bzhin gshegs pa rnams kyi thugs kyi rang bzhin bas na ting nge 'dzin la gnas pa'i phyir na bde bar gshegs pa'i thugs la gnas zhes bya'o/ / rdo rje dbyings la sogs pa zhes pa ni lha'i gzhal med khang dang mi'i grong khyer la sogs par sangs rgyas pa'i tshul ston cing lha khyad par can dang mi bsod nams can dag yongs su smin par mdzad pa ste/ sgo lnga'i rnam par shes pa rnam par dag pa las gnas gyur pa bya ba grub pa'i ye shes kyi ngo bo las skur snang ba ste/bcom ldan 'das rdo rje dbyings zhes bya ba'i de bzhin gshegs pa dang / sogs zhes bya ba'i sgras 'khor mi bskyod pa la sogs pa'i de bzhin gshegs pa bzhi dang / sems dpa' chen po rnams dang / phyi nang gi lha mo dang /sgo srung bar byed pa bzhi la sogs pa 'khor cha lugs rnam pa tha dad par bstan pa'i sgo nas 'phags pa mnyes par mdzad pa dang / sems can gyi don la brtson par dgongs pa dag bsdu'o/ /sangs rgyas zhes pa ni/ 'dzam bu'i gling rdo rje gdan la mngon par byang chub pa'i tshul bstan pa bcom ldan 'das shAkya thub pa dang /sogs pa'i sgras de'i 'khor du gyur pa dag sdud par byed pa'o/ /'khor lo bskor zhes pa ni/ de dag rang gi 'khor gyis 'khor lo dang 'dra bar bskor ba yang yin la 'khor de dag dang de'i char gyur pa rnams la bsam pa dang mos pa ji lta ba bzhin du chos kyi 'khor lo chen po rgyun mi 'chad par bskor bar mdzad pas ni/'di ltar brjod do/ /rnam gcig gzhan dag na re/ /rnam snang mdzad chen ye shes ni/ /bde bar gshegs pa'i thugs la gnas/ /zhes bya ba rnam par snang mdzad dang /rnam par snang mdzad chen po dang / de'i ye shes zhes bya bar sbyar te/ de la rnam snang mdzad ces bya ba ni/ chos nyid kyi longs spyod rgyun mi 'chad pa la longs spyod cing byang chub sems dpa' sa dang pha rol tu phyin pa yongs su rdzogs pa'i cha la gnas pa rnams dang /thabs gcig tu bzhugs nas ting nge 'dzin gyi sgo 'bum phrag la dbang bsgyur nas rang gi 'khor de dag tshim par mdzad pa dang / the tshom gyi dra ba gcod cing brtag par dka' ba'i sgrib pa sel ba'i mthu mnga' ba'o/ /rnam par snang mdzad chen po zhes pa ni/ che ba'i yon tan thams cad sdud cing 'dzin par byed pa'i gzhir gyur pa mngon sum pa'i sangs rgyas zhes bya ba ste/rnam par snang mdzad la mi mnga' ba'i rnam par thar pa ji snyed pa dag kyang ston par mdzad pa yin zhe'o/ /de'i ye shes zhes bya ba ni/ sangs rgyas thams cad kyi ye shes rdo rje lta bu'i chos kyi dbyings dang mnyam pa nyid tshogs chen po yongs su rdzogs pa'i ngo bo nam mkha' lta bu'i thams cad la khyab pa'i bdag nyid du gyur pa ye shes lnga dang ldan pa'i sku'o//'o na de dag gang la gnas sam gang nas byung ba yin snyam pa rnams kyi don du/bde bar gshegs pa'i thugs la gnas/ /zhes bya ba gsungs te/ gcig gnas pa'i zlas kun gyi zla brjod par bya ste/ 'og ma 'og ma rnams kyi gnas su gyur pa ni gong ma gong ma'i sku rnams te/ de dag gi gzhir gyur pa'i ye shes chen po ye shes lnga dang ldan pa'i sku de'i gnas su gyur pa ni/dus gsum gyi bde bar gshegs pa thams cad kyi thugs kho na bas de la gnas pa'i phyir na/ bde bar gshegs pa'i thugs la gnas/ /zhes bya'o/ /ci'i phyir zhe na/ de ni gnas thams cad dang bral bas gang gi mthar yang ma gyur bas gnas pa med pa'i mtshan nyid can yin mod kyi/'on kyang de bzhin gshegs pa thams cad kyi thugs kyi bdag nyid dam ngo bor gyur pas thugs la gnas zhes bya ste/ thugs zhes bya ba ni ting nge 'dzin zhes bya ba'i tha tshig go/ /'o na de dag la che ba'i yon tan du bzhag pa'i rnam pa gzhan dag dang yang ldan pa yin nam/'on te de dag kho na'i ngo bor gnas pa zhig yin snyam pa rnams kyi don du/ rdo rje dbyings la sogs pa'i gzugs zhes bya ba la sogs pa smos te/ de dag gi thugs rje dang ye shes kyi shugs las byung ba mngon par byang chub pa rnam pa lngas rdo rje dbyings zhes bya ba'i sangs rgyas su mngon par bstan nas//'khor rigs dang rigs kyi gtso bo dang / sems dpa' dang sems ma la sogs pa'i tshogs mngon par sprul nas dkyil 'khor de nyid du phrin las rnam pa bzhis gdul dka' ba'i 'gro ba rnams yongs su 'dul bar mdzad pa'i gtso bor gyur pa'o//'o na 'dzam bu'i gling du dam pa'i chos ston par mdzad pa de ji lta bu zhig yin snyam pa rnams kyi don du/ sangs rgyas la sogs 'khor lo bskor/ /zhes bya ba smos te/ de dang dus mnyam pa nyid du 'dzam bu'i gling rdo rje gdan byang chub kyi shing drung du bden pa gnyis ji lta ba bzhin du mngon par sangs rgyas pa'i tshul bstan nas/lha dang mi'i don mdzad pa'i phyir nye gnas kyi 'khor du gyur pa la sogs pa rnams la chos kyi 'khor lo chen po bskor bar mdzad pa ste/chos kyi sku yon tan khyad par du gyur pa de ni thams cad kyi bdag nyid du gnas la de'i yon tan dang ye shes kyi khyad par las byung ba'i gzugs kyi sku la sogs pa'i rigs rnams te/ de ltar 'brel pa can du gyur pas bdag gzhan gyi don mthar phyin par byed pa ni/ dper na mar me la 'od 'byung ba dang nyi ma las zer 'byung bas gzhan la gsal ba'i go 'byed par byed pa bzhin no/ /'o na chos kyi sku de lta bu'i mtshan nyid can de ni gcig gi ngo bo las du ma'i rnam par yang ston la du ma'i rnam pa las gcig gi ngo bor yang gnas te/ phyogs gcig tu chad pa ma yin pas gang du yang mi dmigs par gyur pa yin na/de dag gi nang nas rgyud 'di ston pa ni gang yin/ tshul lam thabs ni ji ltar ston par mdzad snyam pa rnams kyi don du/ de ltar chos kyi sku dang ni/ /longs spyod rdzogs dang sprul pa'i sku/ /rnam snang mdzad dang thub pa yang //rgyud 'di ston zhes bya ba 'di smos te/ de dag gis de kho na nyid bsdus pa zhes bya ba'i rgyud 'di spros pa dang bcas pa dang / spros pa med pa dang rang bzhin gyis rnam par so so'i zhing ji lta bu dag la de bzhin du go bar ston par mdzad pa'o/ /dag bstod nas zhes pa ni gong ma'i tshig kun gyi mjug la bsnyegs pa ste/de bzhin gshegs pa'i sku rnams la yon tan tshad med pa dag mnga' bas grangs bgrang zhing brjod par mi nus mod kyi/ 'on kyang 'dir rang bzhin dang / yon tan dang / phrin las kyi rnam pa tsam du mdor bsdus pa'i sgo nas bstod pa'o//de la bstod pa'i don ni phyag 'tshal ba nyid de/ de ci'i phyir zhe na/ phyag 'tshal bas kyang bstod par 'gyur la bstod pa'i khongs nas kyang phyag 'tshal ba'i don 'byung bas de nyid gcig la gcig khyab pa'i mtshan nyid can du gnas pa ni til dang til mar ram/ dung dang dkar ba'i tshul ji lta ba de bzhin du shes par bya'o/ /slob dpon la la dag na re/ glad kyi tshig 'di dag sku rnam pa lnga de kho na nyid bsdus pa'i gzhung dang sbyar nas bshad par 'dod de/ ci'i phyir zhe na/ rtsa ba'i rgyud chen po nyid las/ bcom ldan 'das rnam par snang mdzad chen po de bzhin gshegs pa thams cad kyi rdo rje byin gyis brlabs dang /zhes pa nas de bzhin gshegs pa'i sku re re las kyang sangs rgyas kyi zhing tshad med pa grangs med pa dag snang ngo / /sangs rgyas kyi zhing de dag na yang chos kyi tshul 'di nyid 'chad do zhes pa'i bar gyis ni/rnam snang mdzad ces bstan to/ /de nas bcom ldan 'das rnam par snang mdzad chen po nam mkha'i dbyings thams cad ji lta ba bzhin du/ rtag par bzhugs shing zhes pa nas/ thabs chen dang ni mchog chen mchog /kun mkhyen mchog dang gnas dbang po//zhes bya ba'i bar gyis ni chen po zhes pa bstan to/ /de nas yang byang chub sems dpa' sems dpa' chen po kun du bzang po de bzhin gshegs pa thams cad kyi thugs la gnas so zhes bya bas ni/ ye shes ni bde bar gshegs pa'i thugs la gnas zhes bya ba bstan to//de ni mi dmigs pa'i ye shes chen po rdo rje sems dpa'o/ /de nas de bzhin gshegs pa thams cad 'dus te/ byang chub sems dpa' chen po don thams cad grub pa zhes bya ba byang chub kyi snying por bzhugs pa gang na bder gshegs te zhes bya ba nas/ri rab ri'i rtse mo'i khang bu brtsegs pa'i nang du de bzhin gshegs pa thams cad kyi seng ge'i gdan la zhal kun du bstan te bzhugs par gyur to zhes bya ba'i bar gyis ni/ rdo rje dbyings la sogs pa'i gzugs zhes bya ba bstan to/ /dum bu bzhi'i dkyil 'khor gyi sems dpa'i 'byung lugs kyis ni/sangs rgyas la sogs 'khor lo bskor/ /zhes pa bstan to/ /phyi ma rnams kyi don bshad pa ni/ snga ma bzhin du shes par bya'o/ /des ni sku gsum la phyag 'tshal zhing bstod pa'i don bshad zin to/ /de ltar na phyi rol pa'i gtsug lag la sogs pa'i gzhung rnams ni rang thad du dran pa'i tshig gi phreng bas 'brel pa can gyi tshig yin du zin kyang phyin ci log spangs pa'i gtan tshigs dang /yang dag pa'i don du 'brel pa'i mtshan nyid dang mi ldan pas gzhan dag yid ches par mi 'gyur te sgrub thabs 'di yang de lta bu dag ma yin nam snyam du dogs pa dag gi rtog pa bsal ba'i phyir rgyud gang las mdzad pa'i khungs dang /gang gi phyir brtsams pa'i don gsungs pa/ de nyid bsdus pa'i rgyud las ni/ /zhes bya ba la sogs pa gsungs te/ de la de nyid bsdus pa zhes bya ba ni sgrub thabs 'di mdzad pa'i khungs bstan pa ste 'di mdzad pa'i khungs ni gang yin mtshan ni ji lta bu zhig ce na/ 'di ni rnal 'byor gyi rgyud chen po ste/ de bzhin gshegs pa thams cad kyi de kho na nyid bsdus pa zhes bya ba'o/ /de la 'dir de bzhin gshegs pa zhes ma smos kyang rgyud kyi don la bsnyegs pa'i phyir bshad par bya dgos te/dus gsum gyi de bzhin gshegs pa rnams kyis theg pa so so'i sgor zhugs nas byang chub tu sems bskyed de/ mthar gsang sngags kyi bla na med pa'i don rtogs nas/ rdo rje lta bu'i ting nge 'dzin gyis sgrib pa thams cad ma lus par bcom ste/ lam de nas sangs rgyas kyi sar gshegs par mthun pas de bzhin gshegs pa thams cad ces bya'o/ /de yang skad cig ma phyi ma la chos kyi sku lhun gyis grub pa ye shes lnga'i ngo bo la ni don dam pa'i de kho na nyid ces bya'o//ye shes de nyid kyi rtags kyi phyag rgyar snang ba de bzhin gshegs pa lnga dang de re re las kyang rigs so sor 'phros pa'i sems dpa' chen po dang phyi nang gi lha mo la sogs pa phyag rgya dang bcas pa'i lha'i tshogs rnams la ni kun rdzob kyi de kho na nyid ces bya'o//de'i bye brag dang tshig dang yi ge'i tshogs mang po rtsa ba'i rgyud chen por bsdus pa'i phyir na de nyid bsdus pa zhes bya'o/ /de'i dkyil 'khor dang phrin las dang / dam tshig dang sgrub thabs la sogs pa rnams rim pa'am dkrugs pa'i tshul gyis brgyus te ston pa'am rgyud ma chad par ston pa'i phyir na rgyud ces bya'o//de lta bu'i don dang ldan pa'i rgyud de'i nang na ni dkyil 'khor gyi dbyibs dang phrin las kyi rnam pa dang sgrub thabs kyi rim pa de kho na nyid sum cu rtsa bdun la sogs pa'i don rgyas par 'byung mod kyi/ 'on kyang de'i nang nas don mang po 'byung ba de dag de kho na nyid gnyis su bsdus te/bsgom pa'i rim pa mdo tsam zhig bsdus te yi ger byas zhes so/ /'o na de la dgos ched ji lta bu zhig yod snyam pa'i don du smras pa/ mkhas pa dga' ba bskyed pa'i phyir/ /zhes smras te/ de la mkhas pa ni chos rnam par 'byed pa'i shes rab dang ldan pas thams cad la thogs pa med pa'i spyod yul can du gyur pa/ spang blang gi bye brag shes bzhin du blang dor dang bral ba'i lta ba dang ldan pa/ don bsgrub par bya ba dang las kyi 'bras bu ji ltar 'gyur ba la mkhas pas gzhan gyi bdog pa don du mi gnyer zhing rang gi bdog pa la ma chags pas phyi rol gyi dngos por gyur pa zang zing gi rnam pa thams cad yongs su btang ba/khe dang grags pa spang ba nga rgyal dang phrag dog chung zhing bsgrub par bya ba nyams su len pa la brtson par mdzad pa'i mtshan nyid can te/de dag yongs su mnyes par bya ba'i phyir rtsa ba'i rgyud chen por bkram ste/ gsungs pa'i don rnams 'dir phyogs gcig tu bsdus te bshad ces pa'i don to/ /de yang gang nas gang zhig gang gi phyir tshul lam thabs ji ltar bshad ces sbyar bar bya'o//de nas ni nyan pa po'i the tshom bsal cing gzhan yid ches pa'i khungs bstan to/ /gang zag mngon pa'i nga rgyal can sems la nges par rtogs pa ma thob pa dang / phyi rol pa'i ston par gyur pa lha chen po la sogs pa rnams ni 'bigs pa'i shes rab yod kyang phyin ci ma log pa'i don rtogs pa'i skal ba dang mi ldan pas/dri ma can gyi shes rab kyis brgyal ba'i phyir na bdag nyid la bstod pa'i khe grags dang ldan pa'i mtshan nyid can pas khe'u bskyung bar mi byed kyi slob dpon chen po sangs rgyas gsang ba'i zhal snga nas ni chos rnam par 'byed pa'i mkhyen rab dang thugs rjer ldan pa 'phags pa'i zhal mthong zhing dngos grub brnyes pas sgrib pa'i gos bsrabs shing lta ba'i ri bo thams cad bcom nas thams cad la dman pa'i tshul 'dzin pa'i dgongs pa can yin pas sgrub thabs 'di'i skabs su yang /zab cing rgya che bar gyur pas rgyud nyid kyi don rtogs par dka'o zhes nyid kyi zhal bskyung ba'i tshig gsungs pa/ rgyud 'di shin tu zab ches la zhes pa la sogs pa'i tshig gsungs te/ de kho na nyid bsdus pa'i rgyud 'di nyid don zab bas ni rtogs par dka' la tshig rgya che bas khong du chud par mi nus te/phal gyis rtogs shing nyams su lon par dka' zhes so/ /gtan tshigs ci'i phyir zhe na/ mtshan ma tha dad rab tu bstan/ /zhes smos te/ snying po dang / phyag rgya dang / sngags dang / rig pa dang lha'i gzugs la sogs pa mi 'dra ba'i rnam pa mang po dag /bcom ldan 'das kyis bstan par mdzad pa'i phyir ro/ /de bas na de dag gi don kun tshang zhing rdzogs par bstan pa'i shes rab kyi spobs pa dang ldan pa ma yin pas/ rgyud kyi don chen po la 'jug par 'gyur ba'i sgrub thabs kyi rim pa nyi tshe tsam zhig slob dpon sangs rgyas gsang ba bdag nyid kyis phyogs gcig tu bsdus nas tshig dang yi ge'i glegs bam du bgyis te bshad ces so//des ni rgyud kyi don zab cing rgya che ba nyid kyis rtogs par dka' bas spyod yul ma yin no zhes zhal bskyung ba'i tshig gsungs nas/da ni rgyud kyi don la 'jug pa'i sgrub thabs kyi rim pa gsungs te/ de la sgrub thabs 'di mgo mjug tu de kho na nyid kyi don kun tshang bar ston mod kyi/ khyad par du de kho na nyid rnam pa gnyis kyi tshul du bya dgos pa yin pa'i phyir/ don dam pa'i de kho na nyid dang kun rdzob kyi de kho na nyid rnam pa gnyis bstan to//de la dang por don dam pa'i de kho na nyid gsungs pa/ mi mnyam ye shes spyod yul ba/ /tshig gi spros pa ma lus grol/ /dus kun du ni de bzhin bas/ /de nyid ces ni bcom ldan gsungs/ /zhes bya ba smos te/ rnam par dag pa chen po'i rang bzhin gzung 'dzin gyi rtog pa spangs shing spros pa thams cad nye bar zhi ba rang bzhin gyis 'od gsal ba'i ngo bor gnas pa thams cad la khyab pa'i mtshan nyid dang ldan pa de ni gnyis su med pa'i ye shes 'ba' zhig kho na'i spyod yul du gyur pa yin par bstan pa'i phyir na mi gnyis ye shes spyod yul ba zhes bya'o//tshig dang brda la sogs pa'i rnam pas gzhan la bstan tu med cing mtshan ma'i spros pa las dben pa'i phyir na/ tshig gi spros pa ma lus grol/ /zhes bya'o/ /dus thams cad du gzhan du mi 'gyur zhing de'i rang bzhin du gnas pa'i phyir na/dus kun du ni de bzhin pas/ /zhes bya'o/ /mtshan nyid de lta bu'i ngo bor gnas pa de kho na nyid yin par bstan pa de la gzhan dag the tshom za bar 'gyur ba'i dogs pa bsal ba'i phyir/ de nyid ces ni bcom ldan gsungs/ /zhes brjod do//'o na de gang gis rtogs pa'i spyod yul du gyur zhe na/ de'i phyir yang gsungs pa/ de phyir ye shes gang 'jug pa/ /de la'ang de nyid ces su bsgrags/ /zhes gsungs te/ gong du smos pa'i de kho na nyid kyi chos nyid rnam par dag pa la dmigs par byed pa'i ye shes de la yang de kho na nyid ces bya'o//de bzhin gshegs pas 'khor 'dus pa'i nang du bsgrags la zhal nas gsungs pa'i rgyud yang bsgrags so/ /'o na ci'i phyir de la yang de skad brjod ce na/ smras pa/ gang phyir ye shes spyod yul ba/ /nam yang slu bar mi 'gyur phyir//zhes gsungs te/ de kho na nyid rnam par dag pa'i chos nyid la dmigs pa'i ye shes te yul de las gzhan du mi 'gyur zhing nam du yang slu bar mi byed pa'i phyir na de la yang de nyid ces brjod de/ dper na 'jig rten na che bar grags pa dag gi chung ma la yang chen mo zhes zer ba bzhin te/des ni don dam pa'i de kho na nyid dang de'i char gyur pa'i mtshan nyid bshad zin to/ /da ni kun rdzob kyi de kho na nyid kyi mtshan nyid bstan pa yang khungs rgyud nyid las gsungs pas bsgrub par 'dod pa rnams kyis mnyam par bya dgos so par bskul ba'i tshig smras pa/de nyid bsdus pa'i rgyud las ni/ /kun rdzob bden pa la gnas nas/ /de nyid mtshan nyid gzhan bstan pa/ /de dag mnyam pa nyid du gyis/ /zhes bya ba la sogs pa gsungs te/ de kho na nyid bsdus pa'i rgyud las kyang byung ba ni/ /kun rdzob kyi bden pa la brten nas de'i mtshan nyid don dam pa'i de nyid las mi mthun pa'i rgyur gyur pa'i mtshan nyid gzhan dag kyang bstan pas/de dag kyang sngags la 'jug par 'dod pa'i rnal 'byor pa rnams kyis rtogs par bya dgos pas mnyan par gyis shig ces bstan to/ /de ltar rtogs par bya ba'i kun rdzob kyi de kho na nyid ces bya ba de yang gang zhe na/de'i don yang brjod pa/ rang gi ye shes mthu yi mtshan/ /rdo rje dbyings la sogs mtshan nyid/ /'gro ba'i don la mi slu bas/ /de nyid ces ni rgyal bas gsungs/ /zhes bya ba smos te/ rang gi ye shes rnam par dag pa glo bur ba'i dri ma dang bral ba de'i mthu'am byin gyis brlabs las byung ba'i mtshan nyid ni rdo rje dbyings la sogs pa'i sku rnam pa tha dad pa'i ngo bor snang ba'i mtshan nyid kyang de yin te/de gnyis ni tha mi dad cing gnyis su med pa'i ngo bor gnas pa yin no zhes bstan to//'o na don dam pa'i de nyid de lta bu yin na 'di lta bur bstan pa'i mtshan nyid de dag la ci'i phyir de nyid ces bya/ de ltar brjod pa mi 'gal lam zhe na/ de'i phyir yang smras pa/ 'gro ba'i don la mi slu bas/ /de nyid ces ni rgyal bas gsungs/ /zhes bya ba'i tshig smos te/de ltar bstan pa des kyang tshig 'di mi 'gal pa'i gtan tshigs 'di grub pa yin par shes par bya'o/ /de ltar de yan chad du de kho na nyid rnam par gzhag pa'i don tshigs bcad kyis bstan nas da ni don de nyid tshig lhug pa'i sgo nas mthar gyis bstan pa/ ji lta zhe na/ bde bar gshegs pa thams cad kyis sngags kyi spyod pa la mos pa'i sems can gyi tshogs rnams kyi don rnam pa mang po gzigs nas zhes bya ba la sogs pa gsungs te/ ji ltar zhes pa ni/ gong du gsungs pa'i don de'i gtan tshigs 'byin par byed pa'i tshig ste/ci'i phyir zhe na/ de ltar ma yin zhes pa'i don to/ /bde bar gshegs pa zhes pa ni/ dbyings rnam par dag pa'i glo bur gyi dri ma dang bral ba'i ngang du rtogs pa'i ye shes phyin ci ma log par gyur pa'i ngo bo de bde blag tu gshegs pa'i phyir na/ bde bar gshegs pa zhes bya'o//thams cad kyis zhes pa ni/ de lta bu'i don dang ldan pa'i bde bar gshegs pa ma lus pa kun gyi zhes bya ba'i don yin mod kyi/ 'on kyang 'di'i gnas skabs su ni rigs lngas bsdus pa thams cad kyis gzigs pa'o/ /'o na rigs lnga zhes smos pa ci'i phyir zhe na/'og nas/ rigs ni rnam pa brgyar bshad pa/ /mdor bsdus na ni rnam pa lnga/ /zhes gsungs pa'i phyir ro/ /sngags kyi spyod pa la mos pa'i sems can zhes pa ni/ sems can gyi rigs ci snyed pa dag bsam pa dang / mos pa dang / khams dang bag la nyal bsam gyis mi khyab pa dang ldan pa dag yod mod kyi//de dag gi nang nas 'bras bu'i theg par gyur pa'i gsang ba'i de kho na nyid kyis nges par 'byung bar 'dod pa'i sems can da ltar dang ma 'ongs pa'i dus na 'byung bar 'gyur ba mang po dag gi don dang bsam pa ji ltar 'dod pa de dag yongs su grub par gzigs nas/da 'di lta bu'i spyod pa'i sgo nas sangs rgyas pa'i tshul ston par mdzad de/ gang zhe na/ sangs rgyas kyi zhing stug po ni byang chub sems dpa' chen po don thams cad grub pa sprul pa byang chub kyi snying po la bzhugs pa la zhes bya ba la sogs pa gsungs te/'di dag ni rgyud kyi don la bsnyegs pa ste/ byang chub sems dpa'i don thams cad grub pa zhes bya ba yum gyi lhums nas bltams nas/ gzhon nu rol pa mdzad pa dang / 'phong dang / rtsis dang / yi ge dang rkyal 'gran pa dang / gyad rnams dang gyad bkye ba dang /khab gzhes nas sras bltams pa dang / rab tu byung ba dang / dka' ba spyod pa la sogs pa mdzad pa'i rim gyis pha rol tu phyin pa'i sgo nas mngon par byang chub pa bstan pa dang / yang sngags kyi sgo nas mngon par byang chub pa bstan pa'i phyir sangs rgyas kyi zhing stug po na mi g.yo ba'i ting nge 'dzin la snyoms par zhugs nas bzhugs pa ste/de la sangs rgyas kyi zhing stug po zhes bya ba ni/ theg pa 'og ma pa'am rtog ge pa rnams kyis rtogs shing phigs par dka' ba'i phyir na de skad brjod do/ /byang chub sems dpa' zhes pa ni nam mkha' dang 'dra ba rnam par dag pa'i ngo bo bas na de'i don la sems dpa' ni byang chub sems dpa' ste/ji ltar rgyud las/ byang chub nam mkha'i mtshan nyid de/ /rtog pa thams cad spangs pa yin/ /gang zhig don de thob 'dod pa/ /sems dpa' zhes ni de la bya/ /zhes gsungs so//gzhan du na spangs pa phun sum tshogs pa'i don dang ldan pas sgrib pa'i tshogs ma lus pa bcom pa dang 'joms par mdzad pas na byang zhes bya'o/ /ye shes phun sum tshogs pa'i don dang ldan pas shes bya ma lus pa'i don las goms shing chud par mdzad pa'i phyir na chub ces bya/thugs rje'i bdag nyid dang ye shes phun sum tshogs pa gzhan las khyad par gyur pas bdag gzhan gyi don phun sum tshogs pa/ yongs su grub pa mdzad pa'i dgongs pa dang ldan pas 'khor ba ji srid pa de srid du 'gro ba'i don mdzad pa dang /chos kyi rgya mtsho chen po'i ro 'thungs par 'dod pa'i phyir na sems dpa' zhes bya'o/ /chos rnam pa mang po'i khyad par dang ldan pa'i phyir na chen po zhes bya'o/ /bdag gzhan gyi bsgrub pa'i 'bras bu phun sum tshogs pa'i don chen po grub cing mthar phyin pa'am/ 'jig rten dang 'jig rten las 'das pa'i don thams cad grub cing mthar phyin par mdzad pa'i phyir na/ don thams cad grub pa zhes bya'o/ /rnam pa de lta bu'i don dang ldan pas ji lta bu'i ngo bor sgyur du btub pa'am/ 'di lta bu'i ngo bor gyur pas sprul pa zhes bya'o/ /byang chub kyi snying po na bzhugs zhes bya ba ni rdo rje'i gdan de nyid kyi nye 'khor du gyur pa'o//kha cig na re yul mnyam dka' chu bo nai rany+dza na'i 'gram zhes kyang zer ro/ /gzhan dag na re chos kyi sku rnam par mi rtog pa'i ngang la gnas pa'o zhes kyang gleng na de dag gang ltar yang 'gal ba med de/de bzhin gshegs pa nyid gang du bzhugs pa de rdo rje'i gdan gyi rang bzhin bas na yul mnyam dka' chu bo nai rany+dza na'i 'gram rdo rje gdan la chos kyi sku mtshan ma rnams par spangs pa'i tshul 'dzin par gnas zhes bya bar sbyar na yang rigs par mthong ngo / /ji ltar bzhugs she na/ma le pa'am mi g.yo ba'i ting nge 'dzin la snyoms par zhugs te zhe'o/ /de la ma le pa'am mi g.yo ba'i ting nge 'dzin zhes bya ba ni/ phyag rgya yongs su rdzogs par byas pa'i sngon rol tu sems mnyam par gzhag pa'i phyir/ dbang po rnams yul la 'phro ba dang /dbugs phyi nang du bag yangs su rgyu ba bsdus nas/ mi g.yo bar 'jog pas na mi g.yo ba'i zhe 'am/ rnam gcig rtog pa gzhan mi 'byung ba'i phyir ma le ba'i ting nge 'dzin ces bya'o/ /mngon par byang chub pa lnga bstan zhes pa ni/ de yang don dam par mi shes pa ni ma yin mod kyi/kun rdzob tu 'gro ba 'dul ba'i dbang du mdzad nas bstan to/ /de la mngon par byang chub pa rnam pa lnga ni rang gi sems/ so so rab tu rig pa las mngon par byang chub pa dang / byang chub tu sems bskyed pa las mngon par byang chub pa dang / chos kyi skur gnas pa las mngon par byang chub pa dang /brtan par byas pa las mngon par byang chub pa dang / sangs rgyas kyi skur gyur pa las mngon par byang chub pa'o/ /de la rang gi sems rab tu rig pa las mngon par byang chub pa ni rang gi sems so sor brtags na/ sems ji bzhin ma mthong nas/zla ba'i dkyil 'khor gyi rnam par mthong ste/ de ni sa dang po nas sa bcu pa'i bar gyi rgyu'i ye shes de ma thag pa'i lam gyi rang bzhin no/ /byang chub kyi sems bskyed pa nas mngon par byang chub pa ni byang chub kyi sems kyi rang bzhin zla ba'i dkyil 'khor chen po nya gang zhing yongs su rdzogs par gyur pa'i ngo bo ste/de ni rnam par grol ba'i lam mo/ /chos kyi skur gnas pa las mngon par byang chub pa ni ye shes lnga'i rang bzhin gyi rdo rje rtse lnga pa lta bur gyur nas/ de'i rang bzhin du gnas pa ste/ de ni rnam par thar pa'i ye shes mthong ba'o/ / brtan par byas pa las mngon par byang chub pa ni ye shes lnga la sogs pa spros pa thams cad snying gar bsdus te rang bzhin gcig tu byas pa'o/ /sangs rgyas kyi skur gyur pa las mngon par byang chub pa ni ji ltar sangs rgyas pa de ltar bdag go/ /zhes pa ste sku phyag rgya chen po nyams su bstar nas de'i cha lugs ji lta ba bzhin du gyur pa'o//rgol ba pa na re 'o na de ltar gyur pa'i mngon par byang chub pa lnga po de dag sus bstan zhe na/ smras pa de lta bu'i ting nge 'dzin la snyoms par zhugs te gnas pa las/ mi mjed kyi 'jig rten gyi khams 'di de bzhin gshegs pa rnams kyis til gyi gang bu zhin du gang bar gyur te/de nas de bzhin gshegs pa thams cad 'dus te don thams cad grub pa'i byang chub sems dpa'i gnas su byon nas ched du longs spyod rdzogs pa'i sku bstan te/ mgrin gcig tu smras nas mngon par byang chub pa rnam pa lnga bstabs so//rgol ba po na re 'o na de dag gis mngon par byang chub pa rnam pa lnga po stobs pa ci'i phyir zhe na/ smras pa/ sngon gyi skabs su btul zhing snod du rung bar byin gyis brlabs par yang dgongs/ nyan thos zhi ba phyogs gcig pa'i mur ltung ba rnams sngags kyi mkhan pos dbang mi bskur gyi bar du 'tshang mi rgya bar dgongs nas 'di ltar mngon par byang chub pa rnam pa lnga po dag bstabs par gyur to//rgol ba po na re/ 'o na tshul lam thabs ji ltar bstabs she na/ smras pa rigs kyi bu de bzhin gshegs pa thams cad kyi mngon par byang chub pa'i de kho na nyid mngon du mi byed pas sangs rgyas par bya snyam zhes gsungs pa dang /des gsol pa/ de bzhin gshegs pa rnams kyi de kho na nyid ces bgyi ba de ji lta bu lags/ ji ltar bsgrub par bgyi zhes gsol pa dang / rigs kyi bu rang gi sems rtogs shig ces gsungs so//de nas des rang gi sems brtags pa las thog ma dang tha ma med pa'i ngo bo ji lta bur yang ma mthong ngo / /'on kyang sems kyi rang bzhin zla ba tshes gcig pa lta bur mthong ngo / /de ltar gsol pa dang / rigs kyi bu 'o na sems de nyid byin gyis brlab pa'i phyir/tsit+ta pra ti be d+haM ka ro mi zhes brjod cig ces gsungs so/ /de nas de ltar sngags 'di brjod cing ji ltar mthong ba de dag gsol pa dang / de bzhin gshegs pa rnams kyis bka' stsal pa/ de legs kyis de las kyang de bzhin gshegs pa rnams kyi kun tu bzang po byang chub kyi sems yongs su bskyed par byos la/sngags 'dis kyang byin gyis rlobs shig /oM bo d+hi tsit+ta ut+pA da yA mi zhes bya ba gsungs pa dang rang rang gi sems de nyid bsod nams dang ye shes kyi tshogs kyi bag chags kyis yongs su bsgos la zla ba'i dkyil 'khor nya gang zhing yongs su rdzogs pa lta bur mthong ngo //de nas yang zla ba'i dkyil 'khor de ni zla ba'i dkyil 'khor nyid du mthong ngo zhes gsol ba dang / de bzhin gshegs pa rnams kyis bka' stsal pa/ ye shes kyi tshogs yongs su rdzogs par gyur pa'i mtshan nyid rang gi sems nyid rdo rje rtse lnga pa'i ngo bor gnas par gyis la/de brtan zhing byin gyis brlabs pa'i phyir oM tiSh+Tha badzra zhes bya ba'i sngags brjod cig ces gsungs pa dang / de bzhin du mthong nas gsol pa dang / de bzhin gshegs pa rnams kyis bka' stsal pa/de las kyang de bzhin gshegs pa rnams kyi sku gsung thugs rdo rje dbyings ji lta ba'am ji snyed pa rnams kyis bstabs shing byin gyis brlabs par byas la/ de nyid brtan par byin gyis brlab pa'i phyir/ oM badzra At+ma kou0f85haM zhes bya ba'i sngags brjod cig ces g sungs pa dang /de bzhin du gyur nas gsol ba dang / yang de bzhin gshegs pa rnams kyis bka' stsal pa/ de legs kyis de las kyang de bzhin gshegs pa thams cad mkhyen pa'i ye shes kyi sku phyag rgya chen po mngon du gyis la/ de brtan zhing mi nyams par byin gyis brlab pa'i phyir sngags oM ya thA sarba ta thA ga taSh+Ta au0f85haM zhes bya bas byin gyis rlobs shig ces bka' stsal pa dang /de bzhin du gyur nas gnas par gyur to/ /rgol ba po na re rgyal bu don thams cad grub pa de de ltar ma le ba'i ting nge 'dzin la snyoms par zhugs nas bzhugs pa ci ltar dgos she na/smras pa de yang ma 'ongs pa'i dus na 'byung bar 'gyur ba'i 'gro ba rnams phyag rgya chen po la 'jug cing sgrub par byed na/ sngar sems kyi rgyu ba rtsing zhib mang po 'byung ba rnams bkag nas sems mnyam par gzhag la gdod sku phyag rgyar bsgrub pa la 'jug dgos pa'i phyir ni 'di ltar bstan to//yang rgol ba po na re/ rgyal bu don thams cad grub pa de/ de ltar ma le pa'am mi g.yo ba'i ting nge 'dzin la snyoms par zhugs pa'i tshe/ mi mjed kyi 'jig rten gyi khams 'di dag de bzhin gshegs pa thams cad kyis til gyi gang bu bzhin du gang bar gyur to zhes 'byung ba 'di/de bzhin gshegs pa rnams ni thog ma med pa'i dus nas mngon par rdzogs par sangs rgyas pas sangs rgyas kyi zhing 'di gang ba 'ba' zhig tu ma zad de/ tshad med grangs med par gyur pa'i sangs rgyas kyi zhing rnams gang bar bzhugs pa yin na 'dir mi mjed kyi 'jig rten gyi khams 'di gang bar bstan pa ci dgos she na/smras pa de yang bden mod kyi/ 'on kyang rgyal bu don thams cad grub pa bcom ldan 'das rdo rje sems pa'i chos kyi sku'i rang bzhin de nyid sngon gyi smon lam gyi shugs sam rnam par mi rtog pa'i rgyal las skyes pa'i ye shes kyis don thams cad grub ba'i byang chub sems dpa' byang chub pa rnam pa lnga'i tshul gyis sangs rgyas par mdzad pa'i tshul mi mjed 'di nyid du bstan par mdzad pas kyang de ltar bstan la/gnyis su na sangs rgyas kyi zhing de dpal rdo rje sems dpa'i byin gyi rlabs kyis 'byung ba'i sems can rnams kyis gang bar gyur pa yin zhe'o//yang rgol ba po na re/ 'jig rten gyi khams tshad med par gyur pa dag na/ de bzhin gshegs pa grangs med pa bzhugs pa las/ 'dir 'dus pa rnams ni de ltar yin la gzhan rnams ni de ltar ma yin pas ma 'dus sam zhe na/ smras pa/ gzhan rnams kyis zhing 'di dag gang bar ma bstan cing rdo rje sems dpa'i byin gyi rlabs kyis ma byung ba ma yin mod kyi/ 'on kyang 'dir ni de bzhin gshegs pa gang gis sngon don thams cad grub pa'i byang chub sems dpa' de btul zhing dge ba'i bshes gnyen du mdzad pa de dang de rnams 'ba' zhig skabs 'dir 'dus pa yin par bstan pa'i phyir na/tshad nges par bstan pa yin no/ /yang rgol ba po na re/ de bzhin gshegs pa rnams 'dus nas don thams cad grub pa'i byang chub sems dpa' de ga la bar gshegs te/ched du longs spyod rdzogs pa'i sku bstan nas/ rigs kyi bu khyod kyis gang gi phyir de bzhin gshegs pa thams cad kyis de kho na nyid mngon par ma rtogs par dka' ba spyod pa la spro ba skyed cing ji ltar mngon par rdzogs par bya snyam zhes gsungs pa de de bzhin gshegs pas til gyi gang bu bzhin du sangs rgyas kyi zhing de gang bar gyur pa kun gyis mgrin gcig tu dus gcig tu gsungs na/de lta na ni 'dug pa'i go skabs kyang med par 'gyur ro//zhe na smras pa/ de lta yin mod kyi/ 'on kyang de bzhin gshegs pa rnams ni skra tsam gyi khyon la yang sangs rgyas kyi zhing grangs med pa dag gnas par ston pa'i mthu mnga' ba'i phyir 'du ba'i go skabs med pa'i skyon du thal bar mi 'gyur ro/ /'o na mi bskyod pa la sogs pa bzhi rnams 'dus nas kyang zer na/de ltar rung ngam zhe na/ de bzhin gshegs pa sku gsum ye shes lnga brnyes pa'i rang bzhin can du 'dra bas ni mi bskyod pa la sogs pa bzhi rnams 'dus par brjod par yang mi 'gal lo/ /yang rgol ba po na re/ 'o na rgyal bu don thams cad grub pa la ched du longs spyod rdzogs pa'i sku bstan nas zhes ba 'di ltar ston pa cha lugs gzhan dag gis rnam par ston du mi rung ngam zhe na/smras pa longs spyod rdzogs pa'i skur ston pa yang yongs su dag pa'i slob ma byang chub sems dpa' de yongs su rdzogs par bya ba'i phyir/ yongs su dag par gyur pa'i slob dpon longs spyod rdzogs pa'i skur bstan pa ste/ 'di ltar bstan pa ni ma 'ongs pa'i dus kyi slob ma rnams tshul de ltar bya dgos par bstan pa'i phyir ro/ /yang rgol ba po na re/ de bzhin gshegs pa de dag 'dus nas de skad ces bka' stsal pa dang /don thams cad grub pa'i byang chub sems dpa' ting nge 'dzin de las langs nas/ de bzhin gshegs pa de dag la phyag 'tshal zhes 'byung ba de/ phyag 'tshal bar gyur na yang nyes pa ni med par 'os na/ ji lta bu'i skyon du 'gyur dogs nas de ltar phyag 'tshal zhe na/ smras pa/ phyag 'tshal na 'ang skyon du 'gyur ba ni med mod kyi/ 'on kyang de ltar phyag 'tshal ba'i dgos ched na/ slob dpon dang slob ma'i tshul bzung ba'i phyir dang / ma 'ongs pa'i 'gro ba sngags kyi sgor 'jug pa rnams kyang tshul de dag mthun par bya dgos pa'i phyir ro/ /yang rgol ba po na re/ de bzhin gshegs pa rnams kyis don thams cad grub pa'i byang chub sems dpa' la gsung gcig tu gdams ngag bka' stsal zhes zer ba de/ gsung tha dad pa'i sgo nas gdams ngag kyang tha dad pa'i ngag ston par 'os na/ gsung gcig kho nas bka' stsal pa ci'i phyir zhe na/smras ba/ de ni bstan par bya ba'i don gcig pa dang / ye shes gcig la ston pa dang / dus gcig tu ston par mdzad pa'i phyir na/ de bzhin gshegs pa thams cad kyis gsung gcig kho nar bka' stsal to/ /de ltar brgal ba dang lan btab pa'i sgo nas gzhan dag the tshom za ba'i dogs pa bsal nas sgrub thabs kyi don du gsungs pa/rdo rje dbyings de bzhin gshegs pa'i gzugs su byin gyis brlabs nas/ zhes bya ba la sogs pa gsungs te/ de la tshig 'di dag ni don thams cad grub pa'i byang chub sems dpa' la mngon par byang chub pa rnam pa lnga ba stabs pa'i 'bras bu bstan pa ste/de ltar don thams cad grub pa'i byang chub sems dpa' de mngon par byang chub pa lnga'i rim gyis phyag rgya chen po yongs su rdzogs par gyur pa dang / de bzhin gshegs pa 'dus pa de dag la phyag 'tshal nas byin gyis rlobs shig par gsol ba dang /rigs bzhi'i de bzhin gshegs pa de dag de'i gnas bzhir bzhugs par gyur te gnas bzhi po de dag tu yang rang rang gi yang rigs kyi mtshan ma gnas par byas te/ rdo rje dbyings zhes bya ba'i tshig gis lan gsum du bos nas rdo rje'i ming gis dbang bskur ba'i tshig ste/de ltar byin gyis brlabs nas rang gi ye shes rtogs pa'i khyad par de nyid kyi yon tan gyi rnam pa gzhan dag kyang ston par mdzad do/ /rgol ba po na re/ 'o na yon tan gyi rnam pa 'di dag ni rnam par bkod pa'i tshig bsgrags pa 'di las thos na gzhan ji lta bu dag ston bar byed ce na/smras pa/ rang gi ye shes kyis rtogs pa'i gnas skabs kyi khyad par byang chub sems dpa'i bsod nams dang ye shes kyi tshogs ma lus pa dpag bsam gyi shing dang yid bzhin gyi nor bu rin po che lta bu 'bras bu'i ngo bo bla na med pa kun du bzang po'i sems zhes bya ba rdo rje ltar mi shigs pa de rgyu'i gnas skabs na gnas pa/de'i rigs kyi sems kyi bdag nyid dang bcas par 'jig rten dang 'jig rten las 'das pa thams cad kyi sems kyi rgyal pos rang gi sems kyi bdag nyid bstan to/ /zhes bya ba la sogs pa gsungs te/ de la rang gi ye shes zhes pa ni de lta bur bstan pa'i ye shes de'o/ /de rtogs par gyur pa'i gnas skabs na yon tan gyi khyad par 'di lta bu dag yod par bstan to/ /ma lus pa zhes bya ba ni lus pa med pa ste/ tshogs rnam pa gnyis mthar phyin pa'o/ /dpag bsam gyi shing dang yid bzhin gyi nor bu zhes pa ni mthu sna tshogs dang ldan pas yon tan thams cad 'byung ba'i gnas su gyur cig bdag gzhan la phan 'dogs nus pa'i dpe'o//'bras bu'i ngo bo zhes pa ni de lta bu dag mngon du gyur cing nyams su myong ba'o/ /kun du bzang po zhes pa ni dus gsum gyi sangs rgyas thams cad kyi rgyu mthun pa'i ngo bo bas na nam du yang dman par mi 'gyur pa'o//gzhan gyis gzhig par mi nus pa'i phyir na rdo rje zhes bya'o/ /de'i rgyu'i gnas skabs na gnas pa zhes pa ni rdo rje ltar mi shigs par bstan pa'i sems de'i'o/ / rgyu'i gnas skabs na gnas pa'i zhes pa ni slob pa med pa'i dus na ni thog ma dang tha ma med pa ji lta bur yang ma grub pa'i ngo bor gnas la/ yongs su bslang ba'i dus na ni gang ltar 'dod pa de bzhin du btub pa'o/ /de'i rigs zhes pa ni de bzhin du nges par gsungs pa'i don to//sems kyi bdag nyid dang bcas par zhes pa ni/ de lta bu'i mtshan nyid dang ldan par bstan pa'o/ /de lta bu'i don dang ldan par gnas pas 'jig rten dang 'jig rten las 'das pa thams cad kyi zhes pa ni 'phags pa dang sems can zhes ming du btags pas bsdus pa'i rang gi sa la gnas pa thams cad kyi sems kyi mchog tu bstan pas na sems kyi rgyal po zhes bya'o//de yang stes dbang ngam skyes bu lta bu byed pa por 'don pa ma yin gyi rtogs pa'i khyad par las gyur par bstan pas de las bzlog pa'i phyir na rang gi sems kyi bdag nyid bstan to/ /zhes bya'o//de ltar yin mod kyi 'on kyang rnam pa gzhan dag kyang du ma'i tshul du ston par byed pas na de nas yang zhes bya ba la sogs pa gsungs te/ bcom ldan 'das kun du bzang po de nyid rang gi ngo bo'i bye brag gis zhes pa ni byang chub sems dpa' de nyid rang gi ngo bo mi mthun par ston pa'i bye brag gis so//mi bskyod pa dang zhes pa la sogs pa ni bde bar gshegs pa bzhi po 'di dag gi kha dog dang dbyibs kyi bye brag rgyud so so la ji ltar grags pa dang mthun par dmigs pa mngon du byas pa'o/ /brtags nas zhes bya ba ni de ltar dmigs par byas zhes pa'i tha tshig go/ /de rnams las kyang zhes pa ni/dmigs pa mngon du byas pa'i ting nge 'dzin gyi bye brag de zhes bya ba dang / ji ltar gnas pa'i rim bzhin du zhes pa ni bde bar gshegs pa bzhi po de dag phyogs dang snga phyi ji ltar gnas pa'i rim pa bzhin du'o/ /rang gi rtogs pa mthu'i khyad par gyi ngo bo zhes pa ni/ dmigs pa mngon du byas pa'i ting nge 'dzin las su rung ba'i mthu 'am ngo bo las ye shes rnam pa lnga po dag gi rnam grangs su bstan pa'o/ /rang gi ngo bo tha dad par bstan zhes pa ni/ kha cig na re byang chub sems de nyid kyi ngo bo nyid ye shes kyi rnam pa tha dad pa'i 'di ltar bstan pa yin zhes zer na/'di ni ye shes de dag rang rang gi ngo bo sku tha dad par sprul nas/ bstan pa ste bde bar gshegs pa 'di nyid 'di dag tu snang bar byas pa'o/ /de nas yang zhes pa ni de nyid dngos po gzhan du bsgyur ba'i mtshan nyid bstan pa'o/ /bcom ldan 'das de bzhin gshegs pa thams cad kyi zhes pa ni/rigs lnga bsdus pa'i de bzhin gshegs pa thams cad de ma lus pa rnams kyi'o/ /byang chub kyi bdag nyid ces pa ni de bzhin gshegs pa thams cad kyi byang chub sems kyi bdag nyid yin par bstan pa'i phyir kun du bzang po'i sems bskyed pa zhes smos te/sems de nyid de bzhin gshegs pa thams cad kyi snying ga na gnas pa zhes ni/ de bzhin gshegs pa thams cad kyi byang chub sems rnam par dag pa de nyid thugs kyi ngo bo bas snying ga na gnas pa zhes bya'o/ /brtags pa sngon du byas zhes pa ni sems de nyid de ltar gnas so bar dmigs pa'i bsam pa sngon du btang ba'o//dbyibs ji lta bur gnas she na/ zla ba'i dkyil 'khor nya gang zhing yongs su rdzogs pa lta bu'i ngo bor gnas pa ste/ de la zla ba'i dkyil 'khor ni byang chub sems kyi ngo bo'o/ /nya gang zhing yongs su rdzogs pa ni tshogs gnyis rdzogs pa'i bag chags kyis zhen pa'o//dkar ba ni skyon gyis ma gos pa'o/ /'o na de la ji lta bu dag gis las byed pa yin zhe na/ smras pa/ ji ltar 'dod pa'i sems dpa' chen po rnams bskyed pa dang zhes bya ba la sogs pa gsungs te/ de la ji ltar 'dod pa zhes pa ni/rtogs pa dang phrin las kyi khyad par gyis gzugs dang kha dog la sogs pa gang ltar mos pa bzhin du sngags la sogs pas rim gyis bskyed pa dang / rjes su mthun pa zhes pa ni/ bde bar gshegs pa'i ting nge 'dzin gyi dbang gis ji ltar 'dod pa'i rjes su mthun pa'i sems dpa' chen po rnams kyi mtshan ma rnams byang chub kyi sems de las byung nas go rims bzhin du rdo rje sems dpa' la sogs pa'i sems dpa' chen po bcu drug po rnams rang gi ming dang /snying po'i sngags kyi tshig dang de dag dang rjes su mthun pa'i dam tshig gi phyag rgyas rang rang gi phyag gnyis mtshan pa/gzhan las khyad par du gyur pas dpe bstan du med pa'i sku'i cha lugs mi mthun pa'i rnam pa 'dzin pa/ sems dpa' rang rang ci 'dra ba'i bye brag tu byin gyis brlabs te gnas par gyur to/ /de nas yang de nyid kyi che ba'i yon tan dang ting nge 'dzin gyi sgo dngos po gzhan du ston par mdzad pa'i don gsungs pa'o//de rnams las kyang bcom ldan 'das kun du bzang po rnal 'byor gyi dbang phyug chen po zhes bya ba la sogs pa gsungs te/ rdo rje sems dpa' byang chub kyi sems de nyid bde bar gshegs pa thams cad 'gugs pa'i mtshan nyid rdo rje lcags kyu la sogs pa'i bye brag rnams su bstan to//sogs pa'i sgras ni phyi nang gi lha mo la sogs pa rnams sdud par byed do/ /de dag las so so'i rigs su gyur pa'i don gsungs pa/ de nas yang zhes bya ba la sogs pa ste/de dag ces pa ni phyag rgya chen po'i mi mthun pa'i mtshan nyid du bstan pa'i lha de dag go/ /dang po nyid du zhes pa ni de dag dang por de bzhin gshegs pa nyid las byung bar snang ba'i phyir na rgyal ba'i rigs zhes bya bar grags so/ /yang de nyid las rigs bzhi pa'i lha sems dpa' la sogs pa'i mtshan ma dang dkyil 'khor gyi rnam pa gzhan du bsgyur nas bstan pa'i don gsungs pa/bcom ldan 'das rdo rje sems dpa' skye dgu'i bdag po zhes bya ba la sogs pa dag ste/ bcom ldan 'das ni ting nge 'dzin gyi dbang phyug de nyid rang gis brtags pa sngon du byas pa'i ting nge 'dzin gyi khyad par gyis sku'i bye brag tha dad pa'i rnam par bstan te/gdug pa can gyi sems can mang po rnams 'dul ba'i phyir 'jig rten gsum las rnam par rgyal ba rdo rje 'dzin pa zhes bya ba dang / rnam par dag pa'i chos la gzigs pas gzhan dag grol bar mdzad pa'i phyir/'jig rten dbang po las rdo rje sems dpa'i phyag rgya chen po 'thon par gyur pa'o/ /skye bo phongs pa rnams kyi bsam pa yongs su rdzogs par mdzad pa'i phyir/ nam mkha'i snying po la sogs pa rnams kyang rang gis brtags pa'i sku la snying por gnas par bstan nas/de'i rjes su mthun par sku'i tshogs du mar gyur te/ rang gi dam tshig gi phyag rgyas lag pa mtshan nas gnas pa la sogs pa bde bar gshegs pa thams cad kyi yon tan gyi khyad par mtha' yas pa'i rang bzhin rnams kyang khyad par med par yang dag par bskyed par mdzad do//rdo rje dang pad+ma dang / rin po che'i rigs la sogs pa yang zhes pa ni de ltar bcom ldan 'das kyis byang chub kyi sems rin po che lta bu de dag 'di ltar bstan pa yang / 'dul ba'i 'gro ba 'dod chags dang ldan pa dang /zhe sdang dang ldan pa dang / gti mug dang ldan pa rnams dang / nga rgyal dang ldan pa rnam pa bzhi'i gnyen por rigs bzhir phye nas bstan pa 'di dag ste/ 'dod chags su spyod pa'i gnyen por ni rdo rje sems dpa' 'khor dang gnas phun sum tshogs par bstan to//zhe sdang du spyod pa'i gnyen por rdo rje'i rigs drag shul dang mthu chen por ldan pa rnams bstan to/ /gti mug tu spyod pa rang gi tshul khrims dang brtul zhugs bsnyems pa dang mur 'khrugs pa la dga' ba'i sems can rnams kyi gnyen por pad+mo 'dam las skyes kyang 'dam gyi nyes pas mi gos pa'i mtshan nyid pad+mo'i rigs rnams bstan to//phyug cing btsan pa dang ngar 'dzin pa la sogs pa'i sems can rnams kyi gnyen por rin po che'i rigs 'byor pa phun sum tshogs pa rnams su bstan to/ /sogs pa'i sgras ni bcu bdun dang brgyar brjod pa dag sdud par byed do//rdo rje la sogs pa las byung ba'i phyir de dag rnam par bkod do zhes pa ni de las de dag gi dbyibs rnams byung ba las gyur pa'i phyir so so'i rigs zhes rnam par bkod do/ 'o na de ltar brjod pa'i rigs de rnams rgyu gcig gi ngo bo las gyur pa'i phyir gcig tu brjod par 'os na so sor brjod pa ci'i phyir zhe na/smras pa/ rigs de rnams kyang gang de bzhin gshegs pa'i snying po las byung ba ni de bzhin gshegs pa'i rigs so/ /rdo rje las byung ba ni rdo rje'i rigs so/ /gang pad+mo las byung ba ni pad+mo'o rigs so//gang nor bu las byung ba ni nor bu'i rigs so zhes gsungs pa'i phyir na so so'i rigs su bstan to/ /de dag kyang rgyas par rgyud 'di nyid du rigs so so'i dkyil 'khor gyi lha sems dpa' 'byung ba las bstan to/ /zhes pa ni/ de dag kyang sgrub thabs 'di'i skabs su ni nyung shas tsam du mdor bsdus te bstan par zad kyi/zhib tu rtsa ba'i rgyud chen po dpal de kho na nyid bsdus pa nyid kyi nang nas rigs bzhi'i so so'i sems dpa' la sogs pa 'byung ba bstan pa'i le'u las rgyas par bstan te/ de bzhin du rgyud 'dir gtogs pa'i zhes pa ni/rigs so so rnams kyi sems dpa' rnams 'byung ba rgyas par bstan pa de bzhin du rtsa ba'i rgyud 'dir gtogs pa'i rigs bzhi'i dkyil 'khor zhes pa ni/ rdo rje dbyings kyi dkyil 'khor dang / khams gsum rnam par rgyal ba dang / 'gro ba 'dul ba dang / don thams cad grub pa'i dkyil 'khor ro//de dag gi lha ni dpal rdo rje sems dpa' la sogs pa'i ye shes kyi sems dpa'i mtshan nyid ces pa la sogs pa ste/ sems dpa' la yang gnyis te/ dam tshig gi sems dpa' dang ye shes kyi sems dpa'o/ /dam tshig gi sems dpa' ni sbyor ba'i brtson 'grus drag po dang /nan tan dang ting nge 'dzin rtse gcig pa'i stobs kyis lha'i gzugs brnyan la sbyor ba'o/ /ye shes kyi sems dpa' la yang gnyis te/ pha rol tu phyin pa las skyes pa dang / ye shes las skyes pa'i sems dpa'o/ /pha rol tu phyin pa las skyes pa'i sems dpa' ni sa dang pha rol tu phyin pa'i sgo nas gong ma'i rim pa tshol ba'i phyir bkod pa'o//ye shes kyi sems dpa' las skyes pa ni byang chub kyi sems rnam par dag pa de rtogs pa las byung ba'i gtso bo dang 'khor gyi skur snang ba'o/ / phyag rgya chen po dang zhes bya ba la sogs pa ni/ yan lag rdzogs par gyur pa dang / dam tshig gi phyag rgya rdo rje dang rin po che la sogs pa dang / chos kyi phyag rgya badzra dz+nyA na zhes bya ba la sogs pa'i sngags rnams dang / las kyi phyag rgya snying gar sna tshogs rdo rje bsam pa dang / sor mo so sor phral ba la sogs pa ste/ de dag kyang bsgrub par bya ba'i ting nge 'dzin rgyud las bstan pa las 'dir gtan tshigs de dag blangs te bshad pa'o/ /de yang gang nas bshad ce na/ rgyud bshad par khyad par gyi gleng gzhi shes par bya ba'i dmigs bstan pa'i skabs nas phyag rgya chen po bzhi bsgrub pa'i ting nge 'dzin bstan pa las gsungs so//ji skad du gsungs she na/ de nas bcom ldan 'das rnam par snang mdzad chen po zhes bya ba la sogs pa gsungs te/ sku dang gsung dang thugs rdo rje zhes pa sku gsung thugs kyi rang bzhin bstan te/gzhan gyis bshigs par mi nus pa'i phyir na sku rdo rje/ 'gro ba rnams kyis so so'i skad du don go bar nus pas na gsung rdo rje'o/ /de bzhin nyid kyi ye shes rang bzhin gyis 'od gsal ba'i ngo bor gnas pas na thugs rdo rje'o/ /nam mkha'i dbyings thams cad na rtag tu khyab par gnas pa zhes pa ni/sku gsung thugs kyi rang bzhin rdo rje ltar sra zhing brtan pa gzhan gyis bshigs par mi nus pa'i mtshan nyid des kun la khyab par bstan pa'o/ /de bzhin gshegs pa thams cad dang mnyam par 'jug pa zhes pa ni rigs bzhir bsdus pa'i sangs rgyas thams cad kyi dgongs pa dang mnyam par 'jug pa'o//rdo rje dbyings rtogs pa'i ye shes kyi sems dpa' zhes pa ni/ rdo rje ltar 'dus ma byas pa'i ye shes kyis chos kyi dbyings rtogs pa las byung ba'i sems dpa' rnams la ye shes sems dpa' rnams zhes brjod do//sogs zhes pa ni tshig de dag mthar thug gi bar du sdud par byed pa'o/ /kun du bzang po byang chub sems dpa' chen po zhes pa ni snga ma bzhin no/ /de bzhin gshegs pa thams cad kyi thugs la gnas so zhes bya ba'i bar du zhes pa ni rgyud kyi nang nas 'byung ba'i tshig rdzogs par gyur pa'i 'jug ste/de bzhin gshegs pa'i thugs la gnas zhes pa ni don dam par yang thugs kyi rang bzhin pas thugs la gnas so bar bstan la kun rdzob tu yang de bzhin gshegs pa'i thugs ka na zla ba dang / rdo rje la sogs par brtag pa las ji ltar brtags pa bzhin du de'i mtshan ma thams cad 'byung ba ste/ji ltar sems can gyi lus kyi yan lag gi gtso bo de snying ga na gnas pa bzhin no/ /de'i bar skabs de nas ni gong du gsungs pa'i don de nyid 'dis kyang de ltar gsal bar bstan mod kyi/ yang 'dir tshigs su bcad pa'i sgo nas don de nyid mdor bsdus te bstan to//tshigs bcad kyi don gsungs pa/ bcom ldan sems dpa' de nyid ni/ /zhes bya ba la sogs pa gsungs pa ste/ bcom ldan sems dpa' de nyid ni/ zhes pa rnam par rtog pa bcom pas mi rtog pa'i don dang ldan pa'i sems dpa' de nyid ni byang chub kyi sems kyi rang bzhin te/de yang / rdo rje sems dpa' kho na bas/ /rdo rje sems dpa' bdag nyid gtso/ /zhes pa ste/ byang chub sems kyi bdag nyid pas thams cad kun gyi gtso bor gyur pa'i phyir ro/ /sku dang gsung dang thugs rdo rje ste zhes pa ni gong du bstan zin pa dang mthun no//sems dpa' bstan pa rang byung ba/ /zhes pa ni byang chub sems rnam par dag pa'i rang bzhin de ma nges pa'i sems lta bu ma yin gyi brtan zhing mi 'gyur bas na sems dpa' brtan pa zhes bya'o/ /'jig rten pa ltar pha ma la brten te yang ma byung la theg pa ltar lus sems kyi 'bad pa bskyed pa'i rtsol ba las byung ba yang ma yin la/mu stegs pa ltar rang gi gzhung gis 'byung bar 'dod pa ma yin pa'i phyir na rang byung zhes bya'o/ /sems dpa' rnams kyi sems dpa' mchog /ces pa ni de lta bu'i don dang ldan pa'i sems dpa' de ni sems dpa' bcu drug tu bstan pa rnams kyi gtso bo bas na mchog go//thugs kar rdo rje bsgoms nas ni/ /zhes pa ni/ de yang thugs kyi rang bzhin bas na thugs kar rdo rje lta bu rnam par dag pa'i ngo bor bsgom pa las ji ltar bsgoms pa'i ye shes de nyid kyi tshul gyis de ltar gyur pa dang de'i sgo nas rdo rje sems dpa' zhes bya ba de'i phyag rgya chen por gyur pas so//de nyid ye shes tshul gyis ni/ /zhes pa ni/ ye shes pa nyid kyang de ltar bsgoms pa'i tshul gyis so/ /rdo rje de la rab tu gnas/ /zhes pa ni/ de ltar rdo rje sems dpa'i skur bsgoms pa de las de nyid kyi tshul gyis rdo rje de la gnas pa'am/rnam gcig rdo rje sems dpa'i skur bsgoms pa'i thugs ka na yang ye shes lnga'i rang bzhin rdo rje rtse lnga par gnas par snang ba'i phyir ro/ /sangs rgyas rnams ni 'od mnyam med/ /ces pa ni/ ye shes de nyid kyi tshul gyis sangs rgyas pa ni gang gis kyang 'gran du med cing mi mnyam pa yin pa'i phyir ro/ /rnam gcig ye shes de nyid kyi tshul gyis sangs rgyas par byed pa'i ye shes dpe zla med pas gang gis kyang 'gran du med pa'i don dang ldan pa'i phyir ro/ /thugs las sna tshogs byung nas ni//zhes pa ni/ thugs ka'i ye shes lnga'i rang bzhin rdo rje rtse lnga par gyur pa'i ngo bor gnas pa de las 'od rnam pa sna tshogs pa mang po dag 'byung bar byed pa'i phyir ro/ /sems can kun gyi rdul snyed kyi/ /zhes pa ni/ 'od de las sku phra mo mang po 'byung ba'i dpe'o//de nyid gsal bar bstan pa/ sna tshogs gzugs su gyur pa yang / /zhes te/ gcig gi cha lugs 'chang ba ma yin gyi/ du ma tha dad pa'am/ sna tshogs mang po'i gzugs phra mo dag byung nas bdud 'dul ba dang / mngon par byang chub pa la sogs pa sangs rgyas kyi mdzad pa bcu gnyis kyi tshul gyis 'gro ba'i don mdzad pa'o//rgyal ba nyid du de nyid gyur/ /zhes pa ni/ sku phra mo de dag kyang gcig tu 'dus pa'i ngo bor rgyal ba'i sku phyag rgya chen por skyed par byed pa'i phyir ro/ /ji lta bu'i rgyal bar gyur zhe na/ rdo rje'i sku ni de rnams las/rdo rje sems dpa' yang dag byung / /zhes te/ sku phra mo de dag gcig tu 'dus par gyur pa rnams las so/ /de las dang po'i sems dpa'i zhes pa ni/ sems dpa' bcu drug gi dang por byung bas na/ dang po'i sems dpa' zhes bya'o/ /mtshan ma thams cad rab tu byung //zhes pa ni/ dam tshig gi phyag rgya'i mtshan mar gyur pa'o/ /kha cig na re de las dang po'i sems dpa' bya ba ni rdo rje sems dpa' ste/ de'i mtshan ma dag dam tshig gi phyag rgya chen po la sogs pa ji ltar byung ba'i rim pa de bzhin du byung ba yin zhes zer ro/ /gzhan dag na re/ de nas dang po'i sems dpa'i zhes bya ste/ de las dang por sems dpa' bcu drug po rnams kyi mtshan ma dam tshig gi phyag rgya rdo rje lcags kyu la sogs pa byung la/ mtshan ma las kyang sems dpa' che/ /zhes pa ni/ sems dpa' de dag so so'i dam tshig gi phyag rgya byung ba la de las kyang sems dpa' chen po'i sku phyag rgya chen po yongs su rdzogs pa byung ngo //de rnams las ni tshul 'di kun/ /zhes pa ni/ dkyil 'khor dang sgrub pa la sogs pa'i rim pa bstan pa'i rgyud kyi tshul 'di lta bu dag byung zhes sam/ rnam gcig tshul de rnams las sems dpa' rnams 'di ltar bstan ces bya ba'i don to//de kho na nyid bsdus pa chen po yo ga 'bum sde nyid las kyang gsungs pa/ rnal 'byor bcom ldan de nyid ni/ /rdo rje sems dpa' don chen stsol/ /zhes bya ba la sogs pa gsungs te/ byang chub kyi sems rnal 'byor gyi rang bzhin de nyid ni bcom ldan 'das rdo rje sems dpa' ste/des ni sems can thams cad la dngos grub kyi don chen po stsol bar mdzad pa'o/ /rigs lnga yi ni khyad par gyis/ /spyod dang mi spyod bcas par rol/ /zhes pa ni/ rdo rje sems dpa' byang chub kyi sems de las rigs lnga la sogs pa'i phyag rgya chen po yang 'byung zhing ston par byed la rigs lnga por bstan pa de dag gi khyad par gyis kyang g.yo ba dang mi g.yo ba la sogs pa'i rang bzhin nam/ngo bo lta bur yang ston par byed ces pa'i don to/ /gzhan yang dpal mchog dang po las kyang don de nyid 'di ltar bstan te/ gang zhe na/ sngon mtha' med pa'i sems dpa' ni/ /rdo rje sems dpa' dga' ba che/ /zhes bya ba la sogs pa gsungs te/ de la byang chub sems dpa' de ni thog ma dang tha ma'i mtha' gzung du med de/ mi dmigs pa'i phyir na sngon mtha' med pa'o/ /de lta bu'i sems dpa' de ni dpal rdo rje sems dpa'o//de ni chos kyi dbyings rnam par dag pa'i ro myong ba'i dga' ba chen po dang ldan pa la/ de'i sgo nas 'gro ba'i don mdzad pa la dgyes pa'i dga' ba dang yang ldan pas na dga' ba che zhes bya'o/ /byang chub sems kyi rang bzhin de nam yang dman par mi 'gyur te/rnam pa thams cad du bzang zhing kun gyi ngo bo'am bdag nyid du gyur pa'i phyir na kun du bzang po zhes bya'o/ /'jig rten pa'i lha rnams la yang rdo rje sems dpa' lta bu'i cha lugs 'dzin cing rdo rje 'chang ba bdag yod mod kyi/ de dag gi gtso bo'am bdag po yang rdo rje sems dpa' bsnyems pa'i tshul bstan pa'i phyir/rdo rje bsnyems tshul bdag po'i bdag /ces bya'o/ /sems can kun gyi sems gang ni/ zhes pa ni sems can gyi sems gong du smos pa'i tshul du gong ltar 'dod pa'i tshul du bsgoms nas de bzhin du brtan par 'gyur ba'i phyir na/de la ni sems dpa' zhes bya'o/ /de yang sems mi g.yeng bar dmigs pa'i don la rtse gcig par gnas pa'i ting nge 'dzin las grub par gyur pas ni ting nge 'dzin gnas zhes bya'o/ /de ltar brtan par byas shing rtse gcig par gnas pa de las rdo rje'i de bzhin du bsgoms pa dang /yang de bzhin du 'gyur bar nges pa'i phyir na rdo rjer gyur zhes bya'o/ /sems dpa'i byin brlabs tshul gyis ni/ /zhes pa ni/ de lta bu'i tshul dang rim pas rdo rjer bsgom pa de'i sbyor bas skur bskyed par bya'o/ /sku gang zhig ce na/ bdag nyid rdo rje sems dpar gyur/ zhes pa de ni de kho na'o/ /de nyid ces pa ni dang po'i don la bsnyegs pa'o/ /bcom ldan sna tshogs pa zhes pa ni 'gro ba'i don thabs sna tshogs par mdzad pa'i mthu dang ldan pa'am/ kha cig na re las kyi rigs so/ /zhes kyang 'chad do/ /rnam gcig byang chub spyod pa'i rjes su mthun pa zhes bya ba la sogs pa 'og nas 'byung ba'i tshig rnams la mar yang sbyar te/'gro ba sems can gyi don mdzad pa'o/ /gzhan du na 'og nas 'byung ba de lta bu'i tshul gyi so so nas don mdzad par yang sbyar ro/ /byang chub spyod pa'i rjes mthun pa/ /zhes pa ni mdzad pa bcu gnyis lta bu'i tshul du ston pa'o//bdud dang bdud las rgyal ba nyid/ /ces pa ni/ bdud lta bus 'dul ba'i 'gro ba rnams la bdud lta bu'i cha lugs su ston par mdzad pa'am/ /rnam gnyis nyan thos dang rang rgyal ba la sogs pa theg pa 'og ma dag gis lta ba gcod par mdzad pas na/bdud ces bya'o/ /bdud bzhi po dag 'joms par mdzad pas na bdud las rgyal ba zhes bya'o/ /de bzhin du byang chub ba'i rim par sangs rgyas pa'i tshul ston pa yang de nyid do/ /rdo rje drag po mthar byed pa/ /zhes pa/ rdo rje drag po lta bur bstan nas thams cad mthar 'jig cing med par byed pa yang de nyid do//phyag na rdo rje lta bur bstan nas mthu stobs kyis gzhan zil gyis gnon par mdzad pa yang de nyid do/ /de bzhin gshegs pa dang / rdo rje dang pad+ma dang / nor bu'i rigs lta bur brjod cing ston pa yang de nyid do/ /de nyid chags pa'i sgo ru bstan/ / zhes pa ni/ rigs so sor brjod pa de dag gi thugs rjes sems can gyi don la chags par mdzad pa'i phyir na 'di skad brjod de gong ma kun la yang sbyar bar bya'o/ /'dod dang zhes pa ni 'dod pa lnga'i rang bzhin du ston pa ni de nyid do/ /grol dang zhes pa ni/ de dag spangs pa lta bur bstan pa ste/rnam par grol ba yang de nyid do/ /dus gsum zhes pa ni dus gsum du ston pa'o/ /srid gsum zhes pa ni skye ba dang / 'chi ba dang bar mdo'i srid par ston pa'o/ /mchog gsum zhes pa ni 'jig rten pa'i mchog ste/ lha chen po tshangs pa dang / khyab 'jug dang /dbang phyug chen po'i rang bzhin du ston pa dang / 'jig rten gsum ni sa 'og sa bla bar snang ngo / /de'i mchog ni gtso bo'am bdag po lta bur gyur pa khro bo 'jig rten gsum las rnam par rgyal ba'o/ /rnam gcig gzhan dag na re 'jig rten gsum gyi mchog ni dkon mchog gsum mo zhes zer ro//khams gsum zhes pa ni/ 'dod khams dang / gzugs khams dang / gzugs med pa'i khams so/ /de nyid gnas pa zhes pa ni/ snod kyi 'jig rten te/ de'i mchog kyang rdo rje sems dpa'o/ /brtan pa zhes pa ni gzhan gyis bskyod par mi nus pa'o//sra ba zhes pa ni gzhan gyis gzhig par mi nus shing / mi tshugs pa'o/ /che zhing sdug pa zhes pa ni/ rgya che zhing gzhan gyis phigs par dka' ba'i phyir ro/ /de dag kun gyi ngo bor snang ba yang rdo rje sems dpa' byang chub kyi sems de nyid do/ /'gro ba sems ni 'dus byas pas//zhes pa ni/ 'gro ba'i sems 'dus byas pas bsgrubs na yang byang chub sems de de bzhin du 'grub par 'gyur te/ gong du smos pa thams cad byed nus so/ /kha cig na re 'gro ba sems 'dus byas pas kyang bya bar 'os pa thams cad 'grub par 'gyur na/ thams cad kyi bdag nyid rnam par dag pa'i ngo bo de rtogs par gyur pa'am/de bzhin du thams cad byed nus pa'am 'grub par 'gyur ba lta smos kyang ci dgos zhes zer ro/ /gzhan dag na re de ltar bstan pa'i sems de ni 'gro ba sems 'dus byas pa las grub pas de bzhin du thams cad byed par 'gyur te/'gro ba sems 'dus byas pa ni thams cad kyi bdag nyid der 'gyur ro zhes kyang bshad do/ /de dag gis ni rdo rje sems dpa' kun du bzang po byang chub kyi sems de nyid g.yo ba dang mi g.yo ba dang / 'khor ba dang mya ngan las 'das pa kun gyi ngo bo/ bsdus te bstan to/ /de bas na zhes pa ni gong ma'i gtan tshigs de'i don la bsnyegs pa ste mtshon par byed pa'o/ /de bzhin gshegs pa thams cad ces pa ni/ ma lus pa'i don te dus gsum gyi de bzhin gshegs pa thams cad do/ /rdo rje sems dpa'i rigs so zhes pa ni rigs gsum dang /bzhi dang / lnga dang / bcu bdun dang / nyi shu rtsa gcig dang / brgya'o zhes grangs du mar bstan pa thams cad kyang rdo rje sems dpa' kun du bzang po byang chub kyi sems de rtogs pa'i khyad par las byung ba'i phyir na/ de dag thams cad ni rdo rje sems dpa'i rigs yin pas de gcig pu kho nar nges pas mang por dbyer med do//zhes kyang rnal 'byor gyi tshul zhes bya ba'i rgyud las zhib tu bstan to/ /de nyid las zhes pa ni rnal 'byor gyi tshul zhes bya ba'i rgyud de nyid las/ rdo rje sems dpa' de bzhin gshegs pa thams cad kyi gtso bo yin par yang bsgrags te/zhes pa ni don 'di gsal por ston pa'o/ /theg pa chen por mngon par rtogs pa chung ngu las kyang zhes pa ni/ theg pa chen po zhes bya ba zhig kyang bzhugs te/ de dgag pa'i phyir chung ngu zhes smos so/ /de bzhin gshegs pa thams cad kyis zhes pa ni/de bzhin gshegs pa thams cad 'dus par gyur pa'o/ /bcom ldan 'das rdo rje sems dpa'i bdag nyid che ba bstan pa zhes pa ni/ dpal rdo rje sems dpa' la yon tan sna tshogs kyi sgo nas bstod pa byas pa'o/ /de ltar bstod pa byas pa de yang rgyud de'i nang nas 'di skad ces bshad do//de bzhin gshegs pas phyag byas shing / /zhes bya ba la sogs pa gsungs te/ rdo rje sems dpa' de la ni de bzhin gshegs pa thams cad kyis gus pa'i tshul gyis phyag 'tshal ba dang / phyi nang gi lha mo'am/ dri dang me tog la sogs pa'i rnam pas mchod pa dang /yon tan phun sum tshogs pa'i sgo nas bstod pa dang / phu dud dang rim gro'i sgo nas bskur sti dang bla mar bya bar rigs shing 'bad pa'am 'os pa yin no/ /gang gi phyir de ltar bya zhe na/ thams cad mkhyen pa'i sems zhes te/ rnam pa thams cad mkhyen pa'i ye shes kyang khyod yin/byang chub sems dpa' rnam par dag pa yang khyod la bya/ mngon par rdzogs par byang chub pa yang khyod la brten nas thob/ de'i phyir na khyod kyi rang bzhin rtogs par gyur pa las che ba'i yon tan kun skye bas na/ khyod ni thams cad gzigs pa'i yab bo//byung dang 'byung bar gyur pa yi/ /zhes pa ni/ dus gsum gyi de bzhin gshegs pa snga nas byung bar gyur zin pa dang ma 'ongs pa'i de bzhin gshegs pa dag gzod 'byung bar 'gyur ba rnams kyang khyod la brten te 'byung zhes dang / de yang rten par 'gyur zhes pa'i tha tshig go//sems dpa' rnam pa thams cad mkhyen/ /zhes pa ni/ byang chub sems dpa'i ye shes dang / rnam pa thams cad mkhyen pa'i ye shes kyang brtan zhing mi 'gyur ba'i sems de las byung ba'am/ rnam gcig sems dpa' rnams kyis rnam pa thams cad mkhyen pa'i ye shes thob par 'gyur ba yang /brtan zhing mi 'gyur ba'i bdag nyid khyod las byung bas na/ dus gsum gyi de bzhin gshegs pa rnams kyis khyod kyi mtshan rdo rje sems dpa' zhes bshad do/ /zhes bya ba'i don to/ /thams cad gzigs pa'i snying po zhes pa ni/ de bzhin gshegs pa'i thugs rnam pa thams cad mkhyen pa'i ye shes so/ /de bzhin gshegs pa kun de nyid/ /ces pa ni/de bzhin gshegs pa rnams de de las byung ba'i phyir ro/ /de bas na sangs rgyas ye shes bla na med pa'o/ /dad pa gang zhig dad de yang / /zhes pa ni/ dad pa can gyi 'gro ba gang la la zhig gis dpal rdo rje sems dpa' de la dad cing mos pa'i sgo nas sgom zhing sgrub par byed pa na/ de ltar byed pa de la yang de bzhin gshegs pa rnams kyis phyag 'tshal bar 'os pa yin te/ de ci'i phyir zhe na/ yon tan de lta bu dag nyams su len cing rtogs par byed pa ni shin tu dkon pa'i phyir ro//de ltar de bzhin gshegs pa nyid rnam pa du mas de kho na nyid ces bya bar 'gro ba'i don mdzad pa'i phyir bzhugs par zhes pa ni/ rgyud kyi khungs las gsungs pa'i gtan tshigs bstan pa de ltar don dam pa'i de kho na nyid byang chub sems kyi rang bzhin phyin ci ma log par rtogs pa de la/de bzhin gshegs pa nyid ces bya ste/ mi dmigs pa yin na yang / kun rdzob tu rdo rje dbyings kyi lha ji snyed pa rnams mtshan ma mi mthun pa'i rnam par bstan nas/ thabs du mas 'gro ba'i don la mi slu ba zhes bya ba bstan pa de'i sgo nas 'gro ba'i don mdzad pa'i phyir/cha lugs de bzhin du bzhugs par shes par bya'o zhes pa'i tha tshig go/ /de yang gang gis shes par bya zhe na/ blo gros rab tu dri ma med pa zhes pa la sogs pa ste thabs dang shes rab nyes pas ma gos pa ni blo gros dri ma med pa ste/sgrib pa thams cad dang bral ba'o/ /bdud rtsi'i bcud ces pa ni/ byang chub sems dpa' rnam par dag pa'i rang bzhin mi 'gyur ba'i ngo bor gnas pa de thob par 'dod pa'am/ rigs dang rigs kyi gtso bo la sogs pa'i lha gang 'dod pa bsgrub par 'dod pa'o//sems can dam pa zhes pa ni khyad par can du gyur pa ste des de bzhin du rig par bya'o/ /mdor na thabs dang shes rab kyi blo gros su ldan pas sgrib pa'i dri ma bsal ba byang chub sems rang bzhin gyis rnam par dag cing mi 'gyur ba'i bdud rtsi'i bcud dang 'dra ba de nyams su len cing lag tu thob par 'dod pa'i sems can dam pa khyad par can du gyur pa rnams kyis don de bzhin du shes par bya ba bstan to//de ltar gong du 'phags pa'i rigs pa'i ye shes don dam pa'i de kho na nyid ces bshad pa de 'gro ba phal gyis reg pa'i spyod yul du mi 'gyur bas/kun rdzob kyi bden pa la gnas pa'i sgo nas rang gis rtogs pa'i ye shes de nyid las kun rdzob kyi de kho na nyid du rdo rje dbyings la sogs pa'i lha rnams su snang bar bstan la/ de rnams 'gro ba gang yang rung ba rnams kyis bsgrubs na de bzhin du 'grub par 'gyur bas na/'gro ba'i don la mi slu'o/ /zhes bshad pa ste de yang rdo rje dbyings de bzhin gshegs pa las sems dpa' rnams ji ltar 'byung ba'i tshul go rims bstan pa de yang slob dpon nyid kyis rang bzor byas pa ma yin pa'i gtan tshigs zhal nas gsungs pa'i rgyud las bstan te/de ltar sems dpa' ji ltar grub cing 'than pa sngar bshad pa de dag ji ltar grub pa'i thabs gsungs pa/ gang gi phyir dngos grub khyad par can ji ltar 'dod pa'i bde ba 'byung ba rnams kyang de dag dang / mnyam par ldan na bde ba de nyid kyis de'i go 'phang myur du 'thob ste zhes bya ba la sogs pa'i rim pa brjod pa dag ste/gang gi phyir zhes pa ni de'i don gyi phyir zhes bya'o/ /dngos grub khyad par can ji ltar 'dod pa'i bde ba 'byung ba rnams kyang zhes pa ni sbyor ba'i rgyud 'di ni gzhan las kyang khyad par du bla na med par 'grub pas dngos grub sgrub pa'i thabs mang po yon tan dang ldan par bstan to/rdo rje dbyings chen po la sogs pa lha gang 'dod pa'i dngos grub bo/ /de dag thabs gang gis 'grub par 'gyur zhe na/ bde bar 'byung ba de dag dang mnyam par ldan na zhes pa ste/ lha'i sku gsung thugs dang bdag gi sgo gsum gnyis su med par sbyor bar nus pas ting nge 'dzin dang mnyam par ldan pa po de nyid kyis dngos grub gang 'dod pa de'i go 'phang myur du thob par 'gyur te/ de la bde ba zhes bya ba ni/ sngags spyi'i dka' thub dang brtul shugs drag po 'byung ba'am mu stegs pa'i brtul shugs drag po lta bu spyad pas 'grub par ston pa de dgag pa ste/lha dang mnyam par ldan pa de kho na la bde ba zhes bshad do/ /bdag nyid chen po sras dang bcas pa zhes pa ni byang chub sems kyi rang bzhin dang ldan pa thams cad kyi bdag nyid bcom ldan 'das rdo rje dbyings chen po nyid dam de'i ye shes rnam par dag pa'i yon tan las byung ba'i 'khor dpal rdo rje sems dpa' la sogs pa'i lha du ma tshang ba'am/gcig kyang rung ste gang 'dod pa de yongs su bzung nas de dag rang gi sbyor bas mnyes par byas nas sems can thams cad la phan 'dogs nus pa'i dbang phyug chen po'i dngos grub stsol bar mdzad de/dbang phyug chen po zhes pa ni/ 'jig rten pa'i dbang phyug ni 'khor los sgyur ba'i rgyal po la sogs pa yang yin mod kyi/ 'dir ni 'jig rten las 'das pa'i dbang phyug sangs rgyas bcom ldan 'das te/ de dag gi dngos grub dang / de bas na gang bdag nyid che ba zhes pa ni/ sgrub pa po tshogs rnam pa gnyis bsags pa rdo rje dbyings kyi dkyil 'khor du 'jug cing bsgrub pa la dad pa dang mos pa che zhing brtson 'grus dang ldan pa'o//rang bzhin gyis rlabs che ba zhes pa ni 'og ma'i theg pa'am 'jig rten pa'i lam bsgrub pa ltar rang gcig pur thar pa 'dod pa ma yin gyi 'gro ba mang po la phan pa bsgrub pa'i bsam pa 'chang ba'o/ /phan 'dogs zhes pa ni 'jig rten dang 'jig rten las 'das pa'i longs spyod phun sum tshogs pa slob par byed pa'i dngos grub de bsgrub pa'i phyir ro//yon tan rin po che zhes pa ni/ nus pa dang ldan pa'i gzhi de bzhin gshegs pa rnams la mnga' ba'i che ba'i yon tan rnams thob par 'dod pa ste/sgrub pa po des yon tan gyi khyad par 'di lta bu mang po dag rjes su dran par byas nas sgrub par byed de/ yon tan nyid rin po che dang 'dra ba mang zhing rgya che ba'i tshogs la gnas pa ni thob pa'o/ /'jig rten gsum po thams cad kyi dbang phyug ces pa ni/ de'i dbang phyug tu gyur pa ni lha chen po yin mod kyi/de'i yang mthu 'joms pa'i khams gsum gyi mnga' bdag chos kyi rgyal po chen po sangs rgyas bcom ldan 'das yin pas de la mtshan de skad bya ste/ 'gro ba ma lus pa de dag rnams ji lta bus 'dul ba de lta bu'i rjes su mthun pa'i cha lugs dag ston par mdzad pa'o//de la rgyun mi 'chad ces pa ni/ rtag par zhes pa'am breng chags pa ste/ chu'am me'i rgyun bzhin ston pa'o/ /ring por mi thogs par zhes pa ni mtshan nyid kyi gnas skabs su 'grub par 'gyur ba'i dus tshad de dgag pa ste/tshe gcig kho nas bsgrubs na 'grub par bstan pa'o/ /de la zhes pa ni sgrub pa po de la'o/ /de'i phyir zhes pa ni de lta bu'i don gyi rnam pa yon tan chen po dag bsgrub pa'i phyir ro/ /sangs rgyas sras dang bcas pa zhes pa ni/ de bzhin gshegs pa dang / de las byung ba dang / byin gyis brlabs las 'dus par gyur pa'o/ /de dag thob par byar rung ba nyid du dgongs zhes pa ni/ sras dang bcas pa'i sangs rgyas de dag gis yon tan rin po che'i tshogs dang dngos grub kyi rnam pa gang 'dod pa de dag thob par 'gyur bar dgongs pa chen por mdzad do//de rnams kyis kyang de'i phyir de sgrub pa'i thabs su zhes pa ni sras dang bcas pa'i sangs rgyas de dag gis sgrub pa po de'i don nyams su len par 'dod pa'i dngos grub la sogs pa rnams sgrub pa'i thabs su rang gis brtags pa'i 'dod pa'i ngo bo de ston par byed de/ji lta zhe na/ lha'i ngo bo nyid kyi bye brag tu gyur pa phyag rgya chen po la sogs pa dpe bzhi 'dir bstan te zhes bya ba dag ste/ sogs kyi sgra dang bzhis ni lhag ma sdud par byed pa ste/ mdor na lha de rnams kyis kyang sgrub pa po'i gang zag de'i phyir lha dang dngos grub de lta bu sgrub pa'i thabs rgyu'i ngo bor rang gis brtags shing nyams su blang bar bya ba'i rdo rje dbyings la sogs chen por lha'i ngo bo nyid kyi cha lugs su byung ba dang /'khor du gyur pa'i sems dpa' dang sems ma la sogs pa'i bye brag mi mthun par gyur pa'i phyag rgya chen po bzhi po dag sgrub thabs 'dir bstan te zhes bya ba'i don to//gzhan dag na re bdag nyid chen po sras dang bcas pa de dag mnyes par byas na/ gzhan la phan 'dogs nus pa'i dbang phyug thob par gyur pas na/ sgrub pa po bdag nyid dad pa dang brtson 'grus che ba rang bzhin gyis bsam pa dang spyod pa rlabs che ba dang ldan pas sems can gyi tshogs rgya chen po la chos dang zang zing la sogs pa ji ltar don du 'gyur ba'i thabs rnam pa thams cad kyis phan 'dogs pa bsgrub pa'i phyir/de bzhin gshegs pa rnams che ba'i yon tan rin po che dang 'dra ba mtha' yas pa'i tshogs mang po la gnas par 'dod khams la sogs pa'i 'jig rten gsum po thams cad kyi dbang phyug chen por gyur nas/sku dang thabs dang thugs rje'i rgyun mi 'chad par 'jig rten gsum gyi 'gro ba mtha' dag gi don mdzad pa'i bde ba de theg pa 'og ma bltar dus ring po mi thogs par tshe gcig kho nas bdag nyid kyis thob par 'dod nas sgrub pa de dag de lta bu'i don gyi phyir dus gsum gyi'am/rgyud 'dir gsungs pa'i sangs rgyas sras sems dpa' dang sems ma'i tshogs su bcas pa rnams kyis gong ma lta bu'i yon tan dang dngos grub kyi rnam pa de dag thob par byar rung ba nyid du byin gyis rlob cing dgongs pa chen po mdzad do zhes bshad do//de ltar bstan pa de yang rang bzor brtsams pa ma yin pa'i phyir na khungs nges par rgyud las gsungs te/ de'ang ji skad du zhes pa ni 'di skad du zhes pa'i don te gang zhe na/ji ltar 'jig rten 'dul 'gyur ba/ /zhes bya ba la sogs pa'i tshig rnams te/ de la/ ji ltar 'jig rten 'dul 'gyur ba/ /zhes pa ni de bzhin gshegs pa rnams kyis ni 'jig rten pa rnams thabs gang dang gang gis 'dul ba de bzhin du sku ston cing gsung 'chad pa'i thabs dang ye shes mnga'o//de bzhin du sngags spyod pa'i rnal 'byor pa rnams kyis kyang de'i rjes su bsgrub dgos pa'i phyir na de skad brjod do/ /de la ji ltar 'jig rten 'dul 'gyur ba zhes pa ni 'jig rten pa rnams ci ltar 'dul ba de bzhin du bsgrub par bya'o//de ltar dngos grub myur du bstan/ /zhes pa ni 'jig rten pa rnams 'dul ba'i thabs tha dad pa'i sgo nas lha tha dad pa dang de dag gi sgrub thabs kyang tha dad par bstan la de bzhin du bsgrubs na'ang myur du 'grub par bstan pa'o/ /de yang rgyu ji lta bu dag gis 'grub ce na/de la thabs ni phyag rgya che zhes pa ste/ thabs zhes bya ba'i sgra mang du yang bod pa yod mod kyi/ 'di'i gnas skabs su ni rgyu'i don te/ de ltar bsgrub pa'i rgyu ni phyag rgya ste/ phyag rgya la yang rnam pa bzhi la sogs pas gsungs pa yod mod kyi 'dir ni phyag rgya chen po bsgom pa kho nas 'grub par bstan te/bcings pa ni ma yin no/ /'o na des de dag kho na 'grub bam/ 'on te gzhan gyi rnam pa dag kyang 'grub par 'gyur snyam pa la/ dngos grub thams cad rab bsgrub pa/ /zhes gsungs te/ 'jig rten dang 'jig rten las 'das pa'i dngos grub rnam pa gnyis kyis bsdus pa rnams grub par 'dod na yang 'di dag gis 'grub par bstan pas ni 'di skad smos so//ji ltar phyag rgya 'grub 'gyur ba/ /zhes pa ni/ ji ltar phyag rgya sgom pa grub cing mngon du gyur na/ dngos grub gang 'dod pa de dag 'grub par bshad do//'o na phyag rgya bsgoms pa kho nas 'grub kyi gzhan gyis ma yin nam zhe na/ de ltar byang chub kyi spyod lam sogs zhes bya ba gsungs te/ de la byang chub kyi spyod pa yang kun du 'gro ba yin mod kyi/ 'on kyang 'dir ni rgyu'i theg pa'i gnas skabs su gsungs pa'i dka' ba sna tshogs spyad pas 'grub par bstan pa dag go//thabs kun cho ga rim pas kyang / /zhes pas ni/ byang chub kyi phyogs kyis 'jig rten pa'i lam spong zhing / 'jig rten las 'das pa'i lam thob par byed pa dang / 'phags pa'i lam gyis yan lag la gnas shing sa dang pha rol tu phyin pa'i rim pa dag kyang spyad nas sangs rgyas kyi sa thob par 'dod pa ste/thabs ni rgyu'i don la cho ga ni 'bras bu la sbyor bar byed pas na rgyus 'bras bu la sbyor ba'i thabs su bstan to/ /kyang zhes pa ni nges pa'am 'gyangs par bsnyad pa'i tshig the tshom can no//sangs rgyas sems can don mi 'grub/ /ces pa ni de dag gis sangs rgyas pa nas sems can gyi don bya bar mi nus zhes sam/ sangs rgyas mnyes par bya ba dang sems can smin par bya ba'i don mi 'grub ste zhes pa'i tha tshig go/ / rnam gcig tu 'gro ba rnams ji ltar 'dul bar 'dod pa dang dngos grub rnam pa gnyis thob cing 'grub par 'dod na/ de dag 'grub cing 'thob par bya ba'i thabs ni/ phyag rgya chen por bsgom pa ste/ ji ltar phyag rgya mngon du grub par gyur na/ de ltar dngos grub gang 'dod pa de dag kyang myur du 'grub par bstan gyi/pha rol tu phyin pa'i sgo nas dka' ba spyad pas ni de ltar mi 'grub ces gsungs so/ /rgol ba po na re/ 'o na de ltar yin na rgyu'i theg pa pa'i mdo sde mang po rim par gsungs pa de dag ci dgos/ 'on te ston pas ma gsungs sam zhe na/smras pa de yang bden te de bzhin gshegs pas kyang gsungs la/ gsungs pa bzhin mi 'grub pa yang ma yin mod kyi/ ston pa dang theg pa'i khyad par gyis de dag ni grub pa shin tu 'gyangs par bstan la/ 'di ni de ltar ma yin pas na myur ba dang 'gyangs pa'i bye brag la 'di skad ces gdags te/dper na phra bar snang ba'i rdzas la med ces brjod pa lta bu'o/ /'o na rigs so so'i dbye bas phyag rgya yang rnam pa mang po dag gsungs pa yod na/ 'dir brjod pa ji lta bu zhe na/ smras pa/ phyag rgya chen po la sogs pa mnyes par bya ba de dag kyang zhes bya ba la sogs pa dag ste/de ltar gsungs pas ni phyag rgya chen po bsgom pa dang / sogs pa'i sgras lhag ma gsum po dag sdud par byed de/ phyag rgya bzhi dang ldan par bsgom pa'i sgo nas lha rnams ji ltar mnyes par bya ba'i thabs dang cho ga de dag kyang rigs bzhi po dag tu brjod pa las de bzhin gshegs pa'i rigs la mnyes par bya ba'i thabs rdo rje dbyings kyi dkyil 'khor du gtogs par gsungs pa'i phyag rgya chen po la sogs pa bsgrub pa nyi tshe sgrub thabs kyi skabs 'dir mdzad mkhan gyis gleng bar rig par bya ste/gzhan ni ma yin no/ /de la de bzhin gshegs pa'i rigs zhes bya ba ni rigs gzhan las bgar ba'i tshig go/ /rdo rje dbyings kyi dkyil 'khor du gtogs pa zhes pa ni/ der gsungs pa ste/ dkyil 'khor dum bu bzhi las logs su phye ba ste/ rtsa ba'i dkyil 'khor gyi dbang du byas pa'o//gsungs pa nyi tshe zhes pa ni der gsungs pa rnams bstan gyis/ gzhan ni ma yin no zhes pa'i don to/ /skabs 'dir zhes pa ni sgrub thabs kyi skabs 'dir ro/ /gling bar rig par bya ste zhes pa ni mdzad mkhan bdag gis 'di kho na gleng bar gzhan gyis shes pa'am/rig par bya'o ste zhes pa ni/ lhag ma can te 'og ma'i 'phro la mchod par byed pa'o/ /rgol ba po na re/ 'o na gtan tshigs gang gi phyir 'di dag kho na bstan nas gzhan dag ma gsungs she na/ smras pa/ de dag nyid mnyes par bya ba'i phyir/'dir cho ga 'di ltar 'di dag bsdus pa yin la/ gzhan dag ni de dag rang gis mnyes par bya ba'i sgrub thabs yod pa der ston par byed pas ni 'dir ma bris so/ /yang rgol ba po na re/ 'o na rtsa ba'i rgyud chen po las lha dang dkyil 'khor rnam pa mang po dag gsungs pa yod na/'dir rdo rje dbyings kyi dkyil 'khor gyi lha rnams kho na'i sgrub thabs brtsams pa ci'i phyir zhe na smras pa/ de yang bden mod kyi/ 'on kyang 'dir bstan pa ni don rnam pa gnyis kyi phyir te/ rdo rje dbyings kyi dkyil 'khor ni rgyud thams cad kyi rtsa ba yin pa dang / shin tu bsod nams chen por 'byung bas/ thams cad la mnyam snyoms par nus pa'i phyir 'di ltar bstan te/ de la rdo rje dbyings kyi dkyil 'khor rgyud thams cad kyi rtsa bar gyur pa ni dang por rgyal bu don thams cad grub pas tshogs chen po rnam pa gnyis bsags shing /dka' ba mthar phyung nas 'dzam bu'i gling du skye ba bzhes shing ngo mtshar gyi cho 'phrul bstan pa ni/ mtshan nyid kyi sgo nas sangs rgyas par bstan pa yin la/ sngags kyi sgo nas sangs rgyas par bstan pa'i phyir sangs rgyas kyi zhing sdug po na/ mi g.yo ba'i ting nge 'dzin la mnyam par bzhag nas bzhugs pa las rigs bzhi'i de bzhin gshegs pa la sogs pa rigs mthun pa rnams phyogs gcig tu 'dus nas ched du longs spyod rdzogs pa'i sku bstan pa la sogs pa sngar gsungs pa'i rim gyis rdo rje dbyings chen po zhes bya ba'i sangs rgyas kyi sku bstan par mdzad pa ni lha thams cad kyi rtsa ba'o//de las ye shes kyi sems dpa' chen po rnams nyid kyi sku las 'thon nas/ 'khor du bskor ba dang / gzugs brnyan gyis dkyil 'khor du de dag sgrub pa'i thabs dang bcas par bstan pa ni dkyil 'khor thams cad kyi rtsa ba'o//rnal 'byor gyi rgyud chen po gsungs pa dag las dang por gsungs pa ni dpal de nyid bsdus pa 'di kho na yin pas rgyud thams cad kyi rtsa ba'o/ /de la dkyil 'khor mang po dag bstan pa las kyang dang por dkyil 'khor 'di bstan nas/bskal pa can gyi 'gro ba rgyud dag pa dang ldan pa rnams dar bcug cing dbang bskur nas las dang sgrib pa zad par byas te/ rigs nges pa'i sa la btsud par mdzad pa yin pa dang / 'dis yang sngags kyi nges par 'byung ba'i skal ba can gyi 'gro ba rnams de bzhin du bsgrub par bya ba'i phyir sgrub thabs 'di brtsams so//shin tu bsod nams chen por gyur pas thams cad la mnyam snyoms par nus pa'i phyir 'di ltar bstan pa ni rgyud gzhan las dkyil 'khor du 'jug pa dag yod na yang snod du rung ngam mi rung brtags nas 'jug par byed la 'dir ni de lta ma yin te/sems can sdig pa byed pa dang / nor dang kha zas la sogs pa la chags pa dang / glu gar dang rtse 'jo la dga' ba dang / chos dang tshul khrims dang ting nge 'dzin la sogs pa la 'bad par byed pa dag 'dir 'jug nas yang de rnams kyi re ba yongs su rdzogs par 'gyur ba dang /sdig pa chen po byed pa'i sems can dag kyang snod ma yin zhes mi spang bar dkyil 'khor du bcug nas phyag rgya bstan na slob ma dam par mi rung yang sngon byas pa'i sdig pa thams cad byang nas ngan song las thar cing snod du rung bar 'gyur ba dang /nor dang zas skom la sogs pa 'dod pa lnga la chags shing dam tshig mi bsrung ba rnams kyang de dag ci bde bar spyod du gnang bar byas nas dkyil 'khor du bcug cing lha'i sbyor ba goms par byas na de dag kyang rim gyis mngon par 'byung ba dang / ma lus pa'i bde ba thob pa'i sgo nas mthar re ba yongs su rdzogs par 'gyur ba'i phyir de dag kyang dkyil 'khor du bzhugs par 'os par gsungs pa dang sems can gang dag glu gar dang rtse 'jo la dga' zhing sred pa rnams de bzhin gshegs pa'i theg pa chen po'i don khong du ma chud nas rdo rje dbyings kyi dkyil 'khor 'di ni glu gar dang rtse 'jo la sogs pa yod par mi shes shing bslab pa'i tshig gis 'jigs skrag nas mi 'jug la/phyi rol gyi lha gzhan gyi dkyil 'khor glu gar la sogs pa yod pa rnams su ni 'jug par byed de/ lam ngan par kha bltas pa dag de las bzlog pa'i phyir dkyil 'khor 'dir bcug na sgeg mo la sogs pa'i glu gar rnams mthong bas 'phral du dga' ba dang /mgu ba bskyed pa dang / de dag gi don bsgoms shing mchod pas yul du byang chub kyi dga' ba la sogs pa'i yon tan thob par bya zhes rtsa ba'i rgyud nyid las gsungs te/de lta bu'i yon tan chen po dang ldan pa de'i sgrub thabs brtsams na yang yon tan chen po de dag yod par dgongs pas sgrub thabs 'di kho na brtsams par shes par bya'o/ /yang rgol ba po na re/ 'o na rgyud gzhan gyi nang nas kyang yon tan gyi rnam pa mang po 'byung na/'di de dag pas yon tan che ba yin nam zhe na/ smras pa/ rgyud gzhan las ni snod brtag par 'byung la/ 'di la ni de ltar ma yin te thams cad shong bar bstan pa de kho na yon tan gzhan las che bar bstan pa yin no/ /de bas na phyag rgya chen po dang zhes pa ni de dag mnyes par 'gyur ba'i thabs kyi phyag rgya chen po la sogs pa bzhi'i rnam pa dag sgrub pa po rnams kyis ji lta ba bzhin du bsgoms nas lha rnams mnyes shing dngos grub gang 'dod pa 'thob par 'gyur bas na/dang por sku phyag rgya chen po dang / thugs dam tshig gi phyag rgya dang /gsung chos kyi phyag rgya dang / phrin las las kyi phyag rgya'i sgrar brjod pa rnams spyi dang rang gi mtshan nyid ji lta bu yin pa'i lo rgyus rgyud nas bshad cing dbye bar bya'o zhes pa'i don to/ /de dag la yang rnam pa bzhir shes par bya ste/ gang zhe na/ phyag rgya de dag rgyu gang las byung ba dang / bcing ba'i thabs dang / dgrol ba'i tshul dang / las su rung ba'i tshad dang / bcings pa'i 'bras bu'o/ /de la 'byung ba'i rgyu yang kha cig na re gsung chos kyi phyag rgya ste/ de ci'i phyir zhe na/ snga ma las rim gyis phyi ma rnams 'byung ba'i phyir ro zhes zer na/de yang 'gal te ji ltar zhe na/ chos kyi phyag rgyar brjod pa yang phyag rgya chen pos gsungs pa dang / de'i ngag las sgom pa'i phyir/ de skad brjod par zad kyi/ de ltar ma yin na 'byung ba'i gzhi yin pas de skad brjod pa'i ming de nyid kyang 'grub par mi 'gyur bas na/de ltar na de mi rigs so/ /gzhan dag na re sku phyag rgya chen po las byung ngo zhes zer na de yang yin mod kyi/ 'on kyang de yang 'thad pa ma yin te/ ci'i phyir zhe na/ phyag rgya gsum po dag gi rgyur brjod na ni de ltar yin na/ bzhi zhes brjod pas na 'di ltar glengs na yang rang gi rgyu smos su med pa'i phyir na de skad mi 'thad do//mkhan po 'di'i dgongs pas ni phyag rgya chen po ni sku'i byin rlabs so/ /dam tshig gi phyag rgya ni thugs kyi byin rlabs so/ /chos kyi phyag rgya ni gsung gi byin rlabs so/ /las kyi phyag rgya ni lus ngag yid gsum gyi spyod pa'i byin rlabs so zhes zer na de yang yin mod kyi/'on kyang rgyu mngon par grub pa'i dus na de dag 'bras bu yin pas de'i yang rgyu'i mu tshol ba gzod rtsol dgos pas 'dir sbyar bar dka' bas rigs par ma mthong ngo / /'o na ji ltar 'dod ce na/byang chub kyi sems las ni sku phyag rgya chen po 'byung la/ de'i ye shes kyi yon tan las ni gzhan du snang ba'am bstan pa yin pa'i phyir na/ 'dir ni de kho na yin par 'dod de/ 'gal ba'i skyon du yang mi 'gyur ro/ /de la yang gnas skabs kyis bshad na chos kyi phyag rgya ni rang sngags kyi yi ge gsal ba las so//dam tshig gi phyag rgya thams cad ni sor mo rdo rje bcings pa las so/ /'jig rten pa'i dam tshig gi phyag rgya ni rdo rje khu tshur bcings pa las so/ /las kyi phyag rgya thams cad ni phral ba'i khu tshur so sor bcings pa las 'byung ngo //bcing ba'i thabs ni sku phyag rgya chen po ni zla ba'i dkyil 'khor gyi steng du rang gi chos kyi phyag rgya de las dam tshig gi phyag rgya de las phyag rgya chen po rdzogs par 'gyur ba'o/ /chos kyi phyag rgya ni lce la gnas pa'i zla ba la/ rdo rje dge ba bsgoms te bum pa la chos kyi yi ge bzhag pa'o//dam tshig gi phyag rgya ni snying ga'i zla ba'i dbus na rdo rje rtse lnga pa gnas par brtags na rang rang gi mtshan ma gang yin pa de'i tshul du bcing ba'o/ /las kyi phyag rgya ni snying gar zla ba'i dkyil 'khor du rdo rje kha bzhi pa bzhag nas rang rang gi mtshan ma'i gnas su lag pa 'jog cing ji lta bu'i tshul du 'dzin par byed pa de bzhin du ston pa'o//dgrol ba'i tshul ni mtha' mar gsal ba de'i rim gyis dang por bsgoms pa'i bar du dgrol la/ shin tu phra ba'i rnam pas rang bzhin med par mos par bya'o/ /las su rung ba'i tshad ni phyag rgya de dang mnyam par khong du chud pa ni ngag dang yid kyi bya ba yang yid kyis byed/lus dang ngag gi bya ba yang sems kyis byed lus dang sems kyi bya ba yang ngag gis byed de/ de ltar bya ba mtshungs par byed pa ni phyag rgya thams cad las su rung ba'i tshad dang mnyam par khong du chud pa'i rtags so//bcings pa'i 'bras bu ni/ gang la dmigs pa bzhin du bsgoms pa de'i 'bras bu thob cing nyams su myong ba'o/ /kha cig 'chad pa'i phyag rgya'i don rnam pa bzhi ste/ nges pa'i tshig dang du yod pa'i dbye ba dang / bcing zhing bsgom pa'i thabs dang / de ltar byas pa'i yon tan te/ de dag kyang dkyus kyi gnas skabs las shes par bya'o zhes bshad do/ /de la re zhig 'di na mar ni dang por phyag rgya'i mtshan nyid ji lta bu yin pa'i don du gsungs pa/ de la lha nyid kyi rang bzhin nyid dam/ de'i cha shas kyis gang rang bzhin med par brtags pa de ni phyag rgya zhes bya ste zhes bya ba la sogs pa dag ste/de la lha nyid kyi rang bzhin nam zhes pa ni/ lha nyid kyi sku'i ngo bor snang ba ste/ byang chub sems kyi rang bzhin phyag rgya chen po yongs su rdzogs pa'o/ /de'i cha shas kyis zhes pa ni/ phyag rgya chen po de'i ye shes kyi yon tan rnams kyi ngo bo las gyur pa ni/rdo rje dang lcags kyu la sogs pa'i dam tshig gi phyag rgya rnams su bstan pa yin par shes par bya'o/ /gang khyad par med par bstan pa zhes pa ni de ltar de dag mtshan nyid mi 'dra bar snang mod kyi/ 'on kyang khyad par med par rgyud las gsungs te/dper na sku gsung thugs dang ldan pas 'gro ba rnams kyi don bya bar nus she'am/ sku gsung thugs dang ldan par spyod ces bya ba la sogs pa bstan te/ sku gang na yod pa de ni gsung dang thugs med pa yang mi srid la/ gsung dang thugs yod pa de la sku mi mnga' ba yang mi srid de/gang na gcig yod pa de na gzhan yang yod la/ yod bzhin du bya ba mi byed par 'dug pa yang mi srid de/ sku gsung thugs gsum po de dag dang yang ldan la phrin las kyang 'gro ba ji ltar 'dul ba bzhin mdzad pas na/ de dag so so'i yon tan gyi sgor gyur pa'i ngo bor phyag rgya'i rnam par dbye ba mi mthun pa ltar bstan la/ mtshan nyid kyang mi mthun pa ltar snang mod kyi/ gang yang khyad par med par brtags pa de'i spyi'i ming ni phyag rgya zhes bya ste/ mtshan ma zhes kyang bya'o/ /khyad par med ces bya ba ni yon tan mnyam pa yin par ston pa'o//rnam gcig tu na lha nyid kyi rang bzhin phyag rgya chen po nyid dam de'i cha shas kyis brtags na/ mtshan nyid mi mthun par snang ba'i dam tshig dang / chos dang / las kyi phyag rgya bstan pa yang mtshan nyid mi mthun par zad kyi/ yon tan gang yang khyad par med de mnyam par brtags pa de la ni spyi'i ming du phyag rgya zhes bya ste/ ming gi rnam grangs mtshan ma zhes kyang bya ba'i don to zhes zer te/ de gnyis tha mi dad par bstan to/ /rgol ba po na re/ 'o na sku phyag rgya chen por snang ba dag gis gzhan gyis mthong ba tsam gyis kyang 'gro ba grol nus pa la sogs pa'i yon tan gyi rnam pa mang po dag dang ldan pa yin na/lhag ma rnams kyang de ltar yin na/ lha mnyam par brjod du rung na/ de ltar ma yin no zhe na/ smras pa/ 'brel pa can gyi gzugs rnams kyis de de ltar nus pa yin na ni 'brel pa'i mthus de ltar nus par zad kyi gzugs dngos kyis ma yin la/'brel pa med pa'i gzugs kyis de ltar nus par gyur na ni chu'i zla ba la sogs pa ri brag gi gzugs brnyan dang shes pas ma zin pa'i gzugs can dag gis kyang de ltar nus par 'os na/de ltar ma yin no/ /gal te nus su zin kyang byin gyis brlabs pa'i mtshan nyid can du zad pas rang gi yon tan du mi gzhag go/ /phyag rgya chen po de yang de bzhin du blta ste/ 'brel pa can gyis de ltar nus na ni 'brel pa'i mthu yin la 'brel pa can ma yin na ni gzhan las khyad par brjod du med de/de gcig po'i yon tan gyi rnam par gyur pa dag gi zla ni lhag ma rnams la yang de las lhag par ldan zhing gnas te/ dam tshig gi phyag rgya'i gnas skabs na'ang de bzhin gshegs pa'i thugs ye shes kyi khyad par las byung ba'i dgongs pa bsam gyis mi khyab pa dang ldan pa dag /dam tshig gi phyag rgya'i mtshan nyid tha dad par bstan zhing snang ba dag gis mtshon par byed de/ gang zhe na/ dam tshig gi phyag rgya'i dbyibs rdo rje lta bur bstan pa ni ye shes lngas nyon mongs pa la sogs pa'i dngos po'i chos can thams cad 'joms shing 'jig pa dang /tshur mi tshugs par bstan pa'o/ /'khor lor snang ba ni rten cing 'brel par 'byung ba sbyor zhing chos kyi 'khor lo bskor nas 'khor ba'i 'khor lo rgyun gcod par byed pa'i mtshan nyid du bstan to/ /rin po cher bstan pa ni bdag gzhan gyi dgos 'dod bskang ba'i mtshan nyid du bstan to//pad+mar bstan pa ni 'khor ba na gnas kyang 'khor bas ma gos shing ye shes dang thugs rjes chos nyid dang 'khor ba la chags pa'i mtshan nyid du bstan to/ /sna tshogs rdo rjer bstan pa ni phrin las sna tshogs pa'i sgo nas 'gro ba ris mi mthun par gyur pa dag 'dul bar mdzad pa'i mtshan nyid du bstan to//lcags kyu lta bur snang ba ni 'phags pa ni 'phags pa rnams spyan 'dren cing sems can rnams 'gugs par byed pa'i mtshan nyid du bstan te phyi ma yang de bzhin du yon tan gyi rnam pa mang po rnams dang ldan pa'i mtshan nyid du bstan pa yin par shes par bya'o//chos kyi phyag rgya rdo rje dge ba ni kha gyes pa la chos kyi sa bon gnas par snang ba yang gsung rnam pa gnyis kyis 'gro ba'i rgyud grol bar mdzad pa'i mtshan nyid du bstan to/ /las kyi phyag rgya yang 'gro ba ris dang kha dog dang /khams dang / bag la nyal ba tha dad pa/ thabs mi mthun pas 'dul bar gyur pa dag la phrin las de dag dang mthun pa'i rnam pa'i sgo nas btang snyoms su ma 'jog cing don mdzad pa'i mtshan nyid du bstan te/ dper na du ba las me shes pa'am/me'i rtags su du bar snang ba bzhin no/ /de bas na phyag rgya chen po la yon tan ji lta bu mnga' ba de las mi zhan par gyur pa'i yon tan gyi rnam pa dag kyang phyag rgya lhag ma rnams la yod la/ der yang ma zad de phyag rgya chen po la mnga' ba'i yon tan ni lhag ma rnams la yang mnga' la/lhag ma rnams la yod pa'i yon tan ni phyag rgya chen po la mi mnga' ste/ ci'i phyir zhe na/ phyag rgya chen po'i yon tan rnams ni lhag ma rnams dang 'brel pa las byung bar zad kyi/ de dang ma 'brel na de lta ma yin la/ lhag ma rnams kyi yon tan rnams ni de la brten pa ma yin pa las byung ba yang yod pa'i phyir na de dag la khyad par med par brjod do//phyag rgya dang mtshan ma zhes bya ba la sogs pa 'di dag ni/ phyag rgya'i ming gi rnam grangs brjod pa ste/ don tha dad pa ma yin te/ zhes pa ni/ phyag rgya chen po bzhi po la sogs pa 'di dag la ming gi rnam grangs 'di ltar 'dogs te/gong du btags kyang don gcig las gzhan du mi 'gyur te/ gcig ces bya ba'i don to/ /ci lta zhe na zhes pa ni/ gtan tshigs 'byin pa'i tshig ste/ ci lta'am ci'i phyir zhe na/ ming gi rnam grangs mi mthun par ston pa dag don gcig ce'am/don gcig la ming gi rnam grangs 'di ltar 'dogs pa ci'i phyir zhes bya ba'i tha tshig go/ /lha'i ngo bo nyid dam de'i cha shas kyis bye brag med par brtags te zhes pa ni/ gong du bstan pa'i don de nyid slar bsnan te bstan pa bshad pa ni snga ma bzhin no/ / sgrub pa pos zhes pa de bas na sgrub pa po 'phags pa'i dngos grub bsgrub par 'dod pa zhig yod par gyur na des lha gang rjes su dran par 'dod pa de la dmigs nas de'i sku phyag rgya chen por bsgoms na lha'i sku'i sbyor ba yin no bar dran pa skye bar 'gyur te/ de bas na dran pa skye bar 'gyur ba la bya'o//de'i phyir na phyag rgya chen po'i sgom pa 'di lha de nye bar dran pa'i rgyu yin pa'i phyir na nye ba'i mtshan nyid ces bya'o/ /de bas na don de rgyud 'di nyid dang zhes pa de bas gong du bshad pa'i don de nyid mdzad mkhan gyis rang bzor byas pa ma yin pa'i gtan tshigs de kho na nyid bsdus pa'i rgyud 'di dang /'jig rten gsum las rnam par rgyal ba'i rtog pa nyid gsal bar bstan te/ ji skad du zhe na zhes pa ni/ 'og nas 'byung ba 'di skad du zhes pa'i don to/ /re zhig 'di nyid las zhes pa ni/ de kho na nyid bsdus pa'i rgyud 'di nyid las 'di skad du bstan to//'da' dka' de bzhin mi shigs pa/ /zhes pa ni gang gis kyang 'da' bar dka' zhing gzhig par mi nus pa'o/ /gang yin zhe na/ rgyal po phyag rgya mchog gi rtag /ces bya ba dag ste/ 'khor los sgyur ba'am sa bdag gis rgyal po chen pos khrims su bcas pa'i gtsigs kyi phyag rgyas btab pa gang yin pa de'o//bdag nyid chen po mtshan ma'i gzugs/ /zhes pa ni de bzhin gshegs pa khams gsum gyi rgyal po mchog gi phyag rgya rnams ni/ bdud dang mu stegs la sogs pa gang gis kyang gcog cing nyams par bya ba dang /'da' zhing gzhigs par mi nus zhes pa'i don to/ /bdag nyid chen po ni de bzhin gshegs pa rnams so/ /de'i ye shes kyi mtshan ma'i gzugs la sogs pa rnams la phyag rgya zhes bsgrags te/ bstan pa'i phyir ro/ /gzhan yang 'jig rten gsum las rnam par rgyal ba'i rtog pa las kyang gsungs pa/sku gsung thugs kyi rdo rje yi/ /zhes pa la sogs pa ste/ lus ngag yid gsum rdo rje lta bu'i tshul du sbyor ba las phyag rgya bzhi 'byung bar bstan pa ste/ sku gsung thugs kyi rdo rje zhes bya ba ni/ye shes kyis byin gyis brlabs te/ tshur cis kyang mi tshugs shing dngos po gzhan par 'jig par byed pa'o/ /gzugs brnyan gyi ni sbyor ba yis/ /zhes pa ni/ lha'i cha lugs mngon du dmigs la ngag gi mtshan ma lce la rang gi chos kyi phyag rgya bzhag pa dang /snying gar zla ba'i dkyil 'khor la rang gi ye shes kyi phyag rgya bzhag nas bdag gang sgrub par dad pa'i lha'i cha lugs su bsgyur la/ nga rgyal bskyed pa la bya ste/ de lta bu'i sbyor bas phyag rgya thams cad khyad par 'di zhes pa ni/ phyag rgya thams cad ces pa ni ma lus pa'i don te/phyag rgya bzhi po dag gi khyad par yang tshul 'di ltar bskyed par rab tu bsgrags pa yin no zhes bshad do/ /rnam gcig tu/ sku gsung thugs ni rdo rje yi/ /zhes bya ba ni/ sku rdo rje ni brtan zhing mi 'gyur ba ste/ gzhan gyis bshigs par mi nus pa'o//gsung rdo rje ni ji skad gsungs pa de bzhin du mi 'gyur ba'o/ /thugs rdo rje ni gzung 'dzin dang bral ba'i de bzhin nyid kyi ye shes te/ sku gsung thugs kyi rang bzhin de las phyag rgya chen po la sogs pa'i gzugs brnyan rnams su bstan pa'o/ / gzugs brnyan gyi ni sbyor ba yi/ /zhes pa ni ye shes de'i yon tan dang rjes su mthun pa'i phyag rgya'i mtshan ma'i gzugs brnyan rnams su bstan pa'o/ /phyag rgya thams cad khyad par 'di/ /ces pa ni/ de bzhin gshegs pa'i rigs kyi gtso bo dpal rdo rje sems dpa' la sogs pa ye shes kyi sems dpa' la sogs pa rnams sam/lha so so'i phyag rgya bzhi char gyi khyad par 'di kho na las bskyed par rab tu bsgrags pa yin zhes bshad nas/ yang rtog pa de nyid las don dam pa de kho na nyid phyag rgya yin no zhes kyang bshad do zhes pa ni don dam pa'i mtshan ma mi slu ba'i phyir na de la yang de skad bshad do//rgol ba po na re/ 'o na don dam pa rang bzhin mi dmigs pa dang phyag rgya gzugs su gyur pa gnyis ming gcig tu brjod pa mi 'dra ba'i skyon du mi 'gyur ram zhe na/ smras pa/ don dam pa de nyid las phyag rgya'i mtshan mar byin gyis brlabs te byung ba yin la/phyag rgya mtshan ma de'i sgo nas de mtshon nas rtogs par byed pa'i phyir na de'i mtshan nyid ma rdzogs pa'i nyes par mi 'gyur ro/ /'dir gzugs brnyan no zhes smos pa ni/ phyag rgya la bya ste gang zhe na/ lha'i mtshan ma'i mtshan nyid du bstan pa ste zhes pa ni/ mtshan ma ni mngon du snang ba'i cha lugs so/ /mtshan nyid ni phyag rgya rnam pa bzhir bstan to/ /de'i phyir mi 'dra ba'i mtshan ma la yang gzugs su bshad pas na zhes pa ni/ phyag rgya bzhi po de dag dbyibs dang mtshan nyid mi 'dra ba yang thun mong du ming gzugs brnyan no zhes bshad na 'gal ba med pas na/'dir de kho na nyid la phyag rgya zhes brjod pa yang mtshan nyid ma rdzogs pa'am mi mthun pa'i skyon gyi nyes par yang mi 'gyur ro zhes bshad do/ /rgol ba po na re/ 'o na don dam par 'dod pa la yang rnam grangs mang du yod na/'dir don dam pa de kho na nyid phyag rgyar 'dod pa de gang yin zhe na/ smras pa/ don dam pa zhes bya ba yang 'dir gang zag dang chos la bdag med pa'i mtshan nyid yin par blta'o zhes gsungs so/ /de'i gtan tshigs sbyor ba'i rgyud du gtogs pa'i gzhung gzhan dag las kyang gsungs pa/don dam pa'i lha'i mtshan ma'i mtshan nyid phyag rgya yin par bstan zhes bya ba ste/ rnam par mi rtog pa don dam pa'i ngo bo la yang phyag rgya zhes bya'o/ /de'i mtshan mar byin gyis brlabs pa'i mtshan nyid la yang phyag rgya yin par bstan to//chos kyi dbyings la mdo ru ni/ /phyag rgya mtshan ma che zhes bya/ /zhes pa ni/ mdor na chos kyi dbyings sam de nyid mtshan ma'i phyag rgyar byin gyis brlabs nas bstan pa ste/ chos kyi dbyings dang phyag rgya chen po gnyis 'brel par bstan pa'i don gsal bar gsungs pa/de la chos kyi dbyings zhes bya ba'i sgra ni don dam pa dang / de dang 'brel pa'i lha'i khyad par rnams la bya ba ste zhes pa ni/ chos kyi dbyings su brjod pa'i sgra de ni rnam pa gnyis su sbyar te/ don dam pa nyid la yang bya ba'i chos kyi dbyings de dang 'brel pa'i lha'i khyad par rigs dang rigs kyi gtso bo sems dpa' la sogs par snang ba rnams la bya ste/dper na gnas skabs kha cig tu rgyal po zhes bya ba'i sgras rgyal po dang de dang 'brel pa'i 'khor la bya ba bzhin no zhes pa ni rgyal po nyid la yang de skad ces bya la de dang 'brel bar gyur pa'i 'khor rnams la yang rgyal po zhes 'dogs pa bzhin no zhes bstan to//de la chos kyi dbyings dang 'brel par brjod pa de yang gang yin zhe na/ gang dag gis de rtogs nas rnam par dag ste zhes bya ba dag ste/ sgrub pa po gang dag gang yang rung bas ji ltar chos kyi dbyings las phyag rgya chen po la sogs pa mtshan mar bstan pa'i cha lugs dang /don ji bzhin bar bsgoms pa las/ sgrib pa'i tshogs thams cad zad par gyur nas chos kyi dbyings rtogs shing rnam par grol ba'i 'bras bu thob par gyur pa'i tshe/bdag gzhan gyi don phun sum tshogs pa bsgrub par 'dod pa dag kyang ji ltar rigs par byed nus pa'i rtsol ba 'byung bar gyur pa la ni/ don dam pa dang 'brel pa zhes bya'o/ /de ltar yin pa'i gtan tshigs kyang mdo sde las gsungs te/ dper na mdo sde las kyang 'dus ma byas las 'byung ba ni 'phags pa'i gang zag go zhes bya ba 'byung ba de yang don dam pa dang 'brel pa de nyid la bya'o//rgol ba po na re/ 'o na dkyil 'khor du 'god pa'i 'jig rten las 'das pa'i lha rnams mnyes par byed pa'i thabs ni phyag rgya chen po bzhi la sogs pa'i cho ga de ltar bstan pas byar rung ni/'jig rten pa'i lha rnams ji ltar mnyes par byed pa yin zhe na/ smras pa/ yongs su ma dag pa'i lhar snang ba rnams kyang zhes bya ba la sogs pa dag ste/ de las yongs su ma dag pa'i lhar snang ba ni tshangs pa dang /brgya byin dang / lha chen po la sogs par snang ba dang / de'i cha lugs 'dzin pa dang / 'khor du bsdus pa dag go/ /de dag la ci'i phyir yongs su ma dag pa zhes brjod ce na/ smras pa mthu dang bsod nams chen po dang ldan du zin kyang de dag 'khor ba ma spangs shing rnam par grol ba'i 'bras bu ma thob pa lta bu'i tshul du gnas pas de skad brjod do//'o na de ltar snang ba de dag de ltar gnas pa yin nam bsgyur ba yin zhe na/ smras pa/ yang na ni de lta bus 'dul ba'i skye bo rnams la phan gdags pa'i phyir de bzhin gshegs pa'i byin gyis brlabs pa nyid dam zhes te/tshangs pa dang / brgya byin dang / lha chen po dang / 'jig rten skyong ba la sogs pa'i cha lugs 'dzin par snang ba 'di dag kyang gcig tu nges par mi blta ste/ de bzhin gshegs pa rnams ni sngon gyi smon lam gyi dbang gis gdul bya gang dang gang gis 'dul ba de dag dang rjes su mthun par ston cing don byed par spyod de/'gro ba gang dag de lta bus 'dul par 'gyur ba'i skye bo rnams la phan gdags par bya ba'i phyir de bzhin gshegs pa nyid de ltar byin gyis brlabs te/ bstan pa'am/ yang na de bzhin gshegs pa'i sprul pa yin yang srid la/gal te de ltar ma yin na 'jig rten pa'i lha dngos yin par gyur na yang chos kyi dbyings la phyogs kyi goms par byas pa las zhes te mi rtag pa dang sdug bsngal ba dang / stong pa dang / bdag med pa'o snyam pa'i 'du shes sngon du btang ba'am/bsod nams bskyed ces pa ni/ lha dang mi'i theg par gyur pa/ lus dang / ngag dang / yid las yongs su dag par bya ba'i ngo bo dge ba bcu la sogs pa rnam par dkar ba'i chos rnams la 'dun pa bskyed cing de dag goms par bya ba'i 'bras bu lha lta bu'i skye ba thob par snang ba yin pas/de yang don dam pa chos kyi dbyings dang 'brel pa yin pas/ phyag rgya chen po la sogs pa'i chos gang mnyes par byar rung ngo / /yong ye shes de rnams kyang zhes pa ni/ yongs su dag pa dang yongs su ma dag pa'i lha gang yang rung ba dang de dag gi phyag rgya bzhi la sogs pa yang chos kyi dbyings dang 'brel pa nyid du shes par bya ste//ma 'brel pa dag cha lugs 'di lta bur gnas pa dang / thob pa mi srid ces bya ba'i tha tshig go/ /de bas na thams cad du phyag rgya bzhi'i tshogs mnyes par bya ba'i mtshan nyid ni mthun par byas kyang 'gal ba med de/'thad pa 'am rigs par 'gyur ro zhes bshad do/ /de ni phyag rgya chen po'i rnam par dbye ba'i grangs gsungs pa/ phyag rgya de yang 'di sku la sogs pa'i bye brag gis zhes bya ba la sogs pa dag ste/ de ltar bstan pa'i phyag rgya de yang gnas skabs 'dir sku dang gsung dang thugs dang spyod pa'i bye brag gis rnam pa bzhir bstan to//de la phyag rgya chen po'i mtshan nyid gsungs pa/ de la lha'i gzugs brnyan ni phyag rgya chen po ste zhes pa ni/ lha gang la dad pa dag gis skur sgom pa ni sku'i gzugs brnyan te/de ni phyag rgya chen po zhes bya'o/ /ci'i phyir zhe na/ 'dra ba'i phyir lha de dran pa'i rgyur che bas na zhes pa ni/ don dam pa nyid kyi phyag rgya chen po ltar lha'i cha lugs su snang ba de ltar bsgoms na de 'dra ba'i rtog pa 'jug pa'i phyir lha de dran par byed pa'i rgyur che bas na/phyag rgya chen po zhes bya'o/ /de la rgyu zhes pa ni phyag rgya chen po rdzogs pa'i lha'i gzugs de cha lugs ji lta ba bzhin du dran pa'i rgyu la bya'o/ /che ba ni des mtshon pa'i sgo nas de rtogs shing chud par gyur pa'o/ /de'i mtshan nyid kyang zhes pa ni/ phyag rgya chen po bsgom pa de'i mtshan nyid kyang de kho na nyid bsdus pa'i rgyud 'di dang sbyor ba'i rgyud gzhan las phyag rgya chen po'i cho ga 'byung ba'i le'u las kyang bstan te/dang por de kho na nyid bsdus pa'i rgyud 'di nyid las gsungs pa/ sku gsung thugs ni rdo rje yi/ /zhes bya ba dag ste/ don dam pa las phyag rgya'i mtshan ma byung ba gang du bstan pa de bzhin du sgrub pa pos bsgoms na de'i sgo nas de kho na nyid rtogs pa'am/chud par gyur pas na/ don de ltar shes pas bsgoms na/ gang 'dod pa de 'grub par 'gyur ro zhes bstan to/ /de bzhin du rgyud gzhan las kyang gsungs pa/sku gsung thugs ni rdo rje dag /ces pa ni rdo rje dbyings dang de'i 'khor du gyur pa'i ye shes kyi sems dpa' chen po rnams kyi gzugs dang / cha lugs bris pa'am/ lugs su blugs pa'am/ byas pa'am/ ji lta ba bzhin du gnas pa de bzhin du sgrub pa pos phyag rgya bzhi'i mtshan ma dang ldan par bsgoms pa'i sems dpa' chen po la sogs pa de nyid 'grub par 'gyur ro zhes gsungs so//don de nyid slar rgyas par bshad pa/ gzugs brnyan ji ltar bris pa zhes pa ni phyag rgya chen po'i sku'i gzugs brnyan ji ltar 'dod pa bzhin bris nas mtshan mar brtags pa sngon du byas te zhes pa ni mdun du bzhag pa'o//de'i rjes su mthun par zhes pa ni mdun du bzhag pa'i lha'i gzugs brnyan de'i rjes su mthun par sgrub pa po'i yid kyis lha'i sku'i gzugs brnyan nyid ji lta bur rigs par sgrub pa po bdag dang lha'i gzugs de bye brag med par bsam mo//rgol ba po na re/ lha'i gzugs brnyan bstan pa yang rgyud so so'i 'dod kyis grangs dang bye brag mi mthun par 'byung ba dag yod na/ 'di'i skabs su de kho nar shes par bya zhe na/ smras pa/ lha'i sku'i gzugs kyang gnas skabs 'dir ni rnam pa gnyis su shes par bya ste/gcig tu ni phyag rgya bzhi la sogs pa'i lha'i cha lugs rdzogs pa'i sku'o/ /de las gzhan pa ni gzugs kyi dkyil 'khor du gsungs pa'i rdo rje dbyings kyi dbang phyug ma la sogs pa ste/ phyag rgya'i lha'i sku zhes pa ni/dam tshig gi phyag rgya mchod rten gyi khri'u la bzhag pa dang / lag pas bcings pa'i rnam pa 'byung ba rnams so/ /rgol ba po na re/ 'o na dkyil 'khor gzhan du ni 'di ltar ma yin na/ gzungs kyi dkyil 'khor gyi skabs su 'di kho na ltar bstan pa ci dgos she na/ smras pa/ de gnyis las gzungs kyi lha mo rnams ni de lta bus 'dul ba'i 'gro ba'i dbang gis phyag rgya la sogs pa yan lag mang po'i mtshan nyid bud med kyi gzugs spangs nas zhes bya ba la sogs pa rnams te/ gzungs kyi lha mo rnams ni de lta bus 'dul ba'i zhes pa ni gzungs kyi dkyil 'khor du lha mo rnams sku 'god pa ni de lta bus 'dul ba'i 'gro ba rnams kyi ched du de ltar bstan te/rtsa ba'i rgyud nyid las kyang gsungs pa/ e ma'o gang phyir byang chub sems/ sems can kun la phan bzhed pa/ /'dul ba'i dbang gis dpa' bo gang / / bud med gzugs su mdzad par 'gyur/ /zhes gsungs so/ /phyag rgya la sogs pa yan lag mang po'i mtshan nyid bud med kyi gzugs spangs nas zhes pa ni/ yan lag rdzogs par gyur pa'i lha mo de nyid kyi gzugs mi snang bar byas nas/ dam tshig gi phyag rgya dgod pa'o/ / de'i brdar gyur pa zhes pa ni/ gzungs kyi dkyil 'khor du lha mo de dag nyid yin pa'i phyag rgya'i mtshan ma'am brdar gyur pa/ mchod rten khri la bzhugs pa la sogs pa'i phyag rgya'i gzugs rnams su 'dir bstan te/ rtsa ba'i rgyud nyid las kyang gsungs pa/ mchod rten khri la legs 'dug pa/ /rdo rje dbyings kyi dbang mor bshad/ /ces 'byung ngo / /rgol ba po na re/ 'o na mgor ni bud med kyi gzugs cha lugs rdzogs par bstan la/ 'dir ni 'di ltar ston pa mi mthun par bya ba ci dgos she na/ smras pa/ de yang don gyi gnas skabs kyi de ltar bstan te/mgor ni bud med kyis 'dul ba yang yod/ /mgor ni de la snyad 'dogs par byed pa yang yod pas de dag gis kha na ma tho ba spang ba'i phyir 'di lta bu'i phyag rgya bstan te/ ji skad du/ rtsa ba'i rgyud nyid kyi rgyud phyi ma'i yang phyi ma'i rgyud las/ mu stegs rnams la phan gdags phyir/ /de bzhin gshegs pa'i btsun mo sba/ /zhes gsungs pa'i phyir ro/ /de bas na rdo rje dbyings kyi dbang phyug ma la sogs pa'i phyag rgya zhes bya ba bris pa'am zhes bya ba la sogs pa 'di bzhin du shes par bya'o/ /yang na rdo rje dbyings kyi dbang phyug ma la sogs pa zhes pa ni/gzungs kyi dkyil 'khor du gsungs pa'i lha mo de dag gi phyag rgya rgyud nyid las ji skad 'byung ba bzhin du lag pa gan rkyal dang kha sbub tu bsgyur te so so'i phyag rgya bcang ba dag kyang gzungs kyi lha mo de dag nyid kyi sku phyag rgya chen po yongs su rdzogs pa'i rang gi ngo bo ston par byed pa yin te/de'i rjes su mthun par lha mo de rnams kyi zhes pa ni/ ji ltar lag pa'i phyag rgya bcings pa de nyid de'i rjes su mthun par gzungs kyi lha mo de rnams kyi sku rdzogs par dran par skyed pa'i phyir phyag rgya de dag bstan par rig par bya'o/ / zhes bshad do/ /rgol ba po na re/ de ltar bstan pa'i phyag rgya de dag la de ltar shes par bya'am 'on te dbye ba'am bsdu ba gzhan yang yod ce na/ smras pa/ phyag rgya chen po de dag thams cad kyang phyi nang gi bye brag gis rnam pa gnyis su shes par bya ste zhes bya ba dag go/ /de la bris pa dang /brtsams pa dang / brkos pa la sogs pa shes pas ma zin pa'i tshul can rnams ni phyi rol gyi'o/ /de las gzhan pa lha so so gang la 'dod pa dag gi gzugs brnyan rnal 'byor ba'i yid kyis bsams pa ni nang gi yin te/ de dag ni phyag rgya chen po'i mtshan nyid bstan par rig par bya'o//phyag rgya chen po'i mtshan nyid dang dbye ba bshad zin to/ /de ni de bzhin gshegs pa rnams kyi thugs ye shes kyi mtshan mar bstan pa de la dam tshig gi phyag rgya'i don bshad par bya ba gsungs pa/ de la dam tshig gi mtshan ma phyag rgya ni sor mo bkod pa'i bdag nyid ni dam tshig gi phyag rgya ste zhes pa ni/thams cad mkhyen pa'i ye shes de nyid kyi mtshan ma ni/ dam tshig gi phyag rgya lag pas bcings pa'i tshul lam thabs su bstan to/ /bdag nyid chen po zhes pa ni/ de bzhin gshegs pa rnams so/ /thugs gsang ba zhes pa ni/yon tan phun sum tshogs pa dang ldan pa gzung 'dzin dang bral ba'i ye shes so/ /de ni dam tshig ces bya ba'i sgrar brjod de/ rgyud nas bshad ces pa ni/ rnam grangs dang mtshan nyid ji lta bu yin pa dag gsal bar ston pa ste/ de la rnam grangs bshad pa ni/yang dag par thob pa'am zhes bya ba la sogs pa rim par ston te/ de la thob pa zhes pas sa samyaka bya ba ni yang dag pa kun zhes zer te/ ya a yang zhes bya bas ni thob pa zhes zer te/ 'jig rten pa'i 'dod pa'i 'bras bu gzugs sgra la sogs pas ni 'ching bar byed pas yang dag pa ma yin la/dus gsum gyi de bzhin gshegs pa rnams kyi che ba'i yon tan kun gyi mchog yin pas thams cad dgrol bar byed pa'i ngo bo ste/ yang dag pa yin pas yang dag pa ste/ kun thob par byed pas na de skad brjod do/ /rtogs par bya ba'i phyir ram zhes pa ni/sa samya ka dz+nyA na zhes bya bas rtogs shing khong du chud pa'i phyir na dam tshig ces bya ba ste chos can gyi rnam pa chos nyid du chud pa'am/ shes bya thams cad ye shes su chud pa'i phyir na de skad brjod do/ /mi 'da' ba'i don du dam tshig ces bya ba ni sa sam ya bya bas mi 'da' ba'i don gyis dam tshig ces bya ste/de yang sgrub par byed pa'i rnal 'byor pa rnams kyis nam yang 'da' bar bya ba ma yin pa dang / de bsgrubs na 'grub par 'gyur ba las mi 'da' ba'i phyir dang / thams cad mkhyen pa'i dam tshig de nyid dam tshig gi phyag rgyar byin gyis brlabs te/bstan pas ye shes de nyid don dam par dmigs pa las mi 'da' bas/ des de kho na nyid mtshon pa'am chud par byed pas de skad brjod do/ /de rang gi yul de kho na nyid las mi 'da' ba'i ngo bo zhes pa ni/ thugs ye shes kyi mtshan mar gyur pa/dam tshig ces brjod pa de'i yul ni phyin ci ma log pa'i chos nyid yin te/ de las gzhan du mi 'da' ba'i phyir ro/ /sngar bshad pa yin no zhes pa ni de'i don yang gong nyid du/ de phyir ye shes gang 'jug pa/ /de la 'ang de nyid ces bsgrags so/ /zhes bstan pa las shes par bya'o//de bas na lha'i thugs gsang ba zhes pa ni thams cad mkhyen pa'i ye shes de nyid shin tu zab cing phra bar gnas pas gzhan pa zhes bya ste/ de'i mtshan mar gyur pa la ni dam tshig ces bshad do/ /de bas na de lta bu dag la dam tshig gi phyag rgya zhes bya bar rgyud 'di nyid dang gzhan las kyang bstan te/dam tshig gi phyag rgya sgrub pa na zhes pa ni don de lta bu dag dang ldan pa de'o/ /bsgrub par bya ba'i dam tshig gi phyag rgya bcings te zhes pa ni/ bsgrub par 'dod pa lha gang yin pa de'i dam tshig gi phyag rgya de nyid de sgrub par byed pa'i rnal 'byor pa'i lag pas bcings te/rang gi snying ga'i phyogs su bzhag la/ rang gi snying ga'i sems rdo rje bsam mo zhes pa ni/ rang gi snying gar zla ba'i dkyil 'khor la dam tshig gi phyag rgya rdo rje gnas par bsam mo zhes bshad do/ /de bas na dam tshig gi phyag rgya sgrub pa'i skabs su rang gi snying gar bcings te bsgrub cing 'byung ba dang sbyar na/thams cad mkhyen pa nyid dam tshig gi phyag rgyar byin gyis brlabs te/ bstan pa yin par mngon no/ /rgol ba po na re/ de ltar bstan pa'i dam tshig gi phyag rgya de gcig gi ngo bor shes par bya'am/tha dad par shes par bya zhe na/ smras pa/ gdul bya rnams kyi ngo bo gang la mtshan nyid tha dad par bstan pa yang thugs ye shes kyi khyad par nyid de ltar snang bar zad kyi tha dad par gnas pa yang ma yin la/ gang gi yang mthar ma gyur pas/ gcig tu yang ma nges mod kyi/'on kyang gnas skabs kyi dbye ba rnam pa gnyis su shes par bya ste/ 'chang ba dang 'ching ba'o/ /'chang ba ni rdo rje dang pad+ma la sogs pa dngos su 'chang ba'o/ /'ching ba ni de dag gi tshul du lag pas 'ching ba ste/ 'dra ba dang mi 'dra ba zhes kyang bshad do/ / kha cig na re 'dzin pa dang 'ching ba dang / bsam pa dang / gnas pa dang / brtsams pa'i bye brag gis rnam pa lngar 'gyur ro zhes kyang bshad do/ /de kho na nyid ltar yin pa'i mtshan nyid kyang gzhung chen por gyur pa'i rnal 'byor gyi rgyud yo ga 'bum sde las zhib tu bshad pa/ rang gi sems ni rab rtogs pas/zhes bya ba la sogs pa gsungs te/ de'i don ni 'og nas zhib tu bshad do/ /thugs kyi mtshan ma gang yin pa zhes pa ni dam tshig ste/ don dam pa sems lta bu pas shes pa dang sbyar ro/ /de'i don du zhes pa ni de nyid kyi don du'o/ /de'i gnas kyi mtshan ma ni/don dam pa de'i gnas kyi mtshan ma dam tshig gi phyag rgya lus lta bu yin pas shes pa dang sbyar te/ de gnyis tha mi dad par bstan to/ /rig pa dang rig bya'am/ mdzod dang mdzod can bzhin no/ /de bzhin du/ dpal dam pa dang po la sogs pa sbyor ba'i rgyud gzhan las kyang gsungs pa/sku gsung thugs ni rdo rje rnams/ /zhes pa ni snga ma bzhin no/ /sor mo sbrel ba bstan pa ste/ zhes pa ni sor mo bsnol ba ni dam tshig gi phyag rgya ste/ brtan zhing mi 'gyur bas gzhan gyis bskyod par mi nus pas na brtan pa zhes brjod do/ / dam tshig sems dpa' las shes par bya zhes pa ni de nyid do/ /las kyi phyag rgya gnyis su bya/ /zhes pa ni/ 'di'i zhar la bstan pa'i tshig ste/ dam tshig gi phyag rgya de las gnyis su byas pa ni phyag rgyar gyur te/ de nyid kyi don 'og nas 'chad do/ /rgol ba po na re/ 'o na sku gsung thugs kyi mtshan ma gsang ba dag so sor dbye ba la dgos pa ci yod ce na/smras pa/ sku dang gsung dang thugs gsang ba rnam par dbye ba ni zhes pa ni/ don dam pa'i lha'i sku'i gsang ba'i mtshan mar bstan pa ni phyag rgya chen po ste/ lha'i sku'o/ /gsung gi gsang ba'i mtshan mar bstan pa ni chos kyi phyag rgya'o//thugs kyi gsang ba'i mtshan mar bstan pa ni dam tshig gi phyag rgyar bstan pa'o/ /las kyi phyag rgya ni de rnams 'dus pa las byung ba ste/ slob dpon sangs rgyas gsang bas mdzad pa'i 'grel ba de kho na nyid snang ba las kyang phyag rgya chen po'i sku'i byin rlabs so//dam tshig gi phyag rgya ni sems kyi byin rlabs so/ /chos kyi phyag rgya ni gsung gi byin rlabs so/ /las kyi phyag rgya ni lus dang ngag dang yid gsum gyi spyod pa'i byin rlabs so zhes gsungs so/ /de'i mtshan ma dang brda zhes pa ni sku gsung thugs gsang ba rnam par dbye ba'i de'i mtshan ma'am brda ni phyag rgyar bstan pa de dag go//gzhung 'di nyid du rnam par bkod ces pa ni/ dpal de kho na nyid bsdus pa'i rgyud 'di nyid du de ltar bkod nas bstan pa'o/ /de ltar bstan pa de yang sems can gang dag de lta bus 'dul ba rnams kyi rgyud la gzigs nas de ltar bstan to//rgyud gzhan dag las ni sku la sogs pa bsdus pa nyid la sogs pa ni rnal 'byor gyi rgyud gzhan dag la ni/ sku dang gsung dang thugs gcig tu bsdus pa'i sku yongs su rdzogs pa nyid la dam tshig gi phyag rgya zhes bya bar brtags pa dag snang ngo //yang na sems dpa' chen po rnams de las mi 'da' bas na zhes pa ni dam tshig gi phyag rgyas bcings nas/ sems dpa' rnams de las 'da' bar mi mdzad pa'o/ /mi 'da' ba'i mtshan nyid kyi dam tshig dang ldan pa'i phyir zhes pa ni phyag rgya de bcings pa de las lha rnams 'da' bar mi mdzad pa'i phyir/dam tshig dang ldan pa'i phyag rgya de la dam tshig gi phyag rgya zhes gsungs so/ /yang na de gnyid mi 'da' ba yin pas na de nyid la dam tshig ces bya ba'i sgrar brjod ces pa ni/ dam tshig gi phyag rgya de kho na nyid 'da' bar mi mdzad pas ni yang dam tshig ces bya ba ste/ci'i phyir zhe na/ dam tshig gi phyag rgya des don mtshon par byed pa las mi 'da' ba'i phyir yang dam tshig ces bya ste/ de ltar cis mngon zhe na/ rgyud nyid las kyang 'di skad ces gsungs te/ sku gsung thugs ni brtan pa'i phyir//zhes bya ba la sogs pa'i tshig gsungs te/ phyag rgya 'di dag ni byang chub sems kyi bdag nyid las 'byung bas gzhan gyis bskyod par mi nus par bstan pa'o/ /de bzhin gshegs pa kun gyis kyang / /zhes pa ni/ de bzhin gshegs pa rnams kyis kyang phyag rgya de las gzhan du 'da' bar mi mdzad pas na/dam tshig gi phyag rgya de nyid las dam tshig ces bshad do zhes pa'i don to/ /'o na rgol ba po na re/ de ltar gzhi gcig gi ngo bo la mtshan nyid mi mthun pa'i rnam pa du ma dag tu de ltar ston na/ 'di nyid kyi gnas skabs su ji ltar shes par bya zhe na/smras pa/ phyogs 'di la ni/ dam tshig nyid phyag rgya yin pas na dam tshig gi phyag rgya'o/ /zhes pa ni phyogs 'di la zhes pa ni sgrub thabs kyi phyogs 'di la'o/ /dam tshig nyid phyag rgya yin pas na zhes pa ni/ dam tshig nyid dam dam tshig gi phyag rgya bas na/dam tshig gi phyag rgya zhes bshad do/ /grags pa'i sgra ni yul so sor nges pa shes par bya ste zhes pa ni/ sku la sogs pa la dam tshig gi phyag rgya zhes 'dogs pa yang yod mod kyi/ 'on kyang 'dir ni de ltar mi bshad de/ phyag rgya chen po la sogs pa bzhi'i yul rnams la ming gang dang gang du btags pa'i grags pa de dang de so sor nges par shes par bya ste/de bas na phyag rgya chen po la sogs pa la dam tshig gi phyag rgyar gdags zhes pa ni/ gnas skabs la la dag na phyag rgya chen po la sogs pa la dam tshig gi phyag rgya zhes 'dogs pa yang yod de/de ltar gdags su rung gis kyang de la dam tshig gi phyag rgya zhes mi bya'o/ /thugs kyi mtshan nyid la dam tshig gi phyag rgya zhes brjod do/ /rgol ba po na re/ gzhung dag las sku phyag rgya chen po la sogs pa la dam tshig gi phyag rgya zhes zer ba yang yod na 'dir 'di ltar bstan pa ci'i phyir zhe na/smras pa/ gdags pa'i rgyu srid du zin kyang zhes pa ni/ de ltar gdags su rung du zin kyang de la mi bya zhes pa'i tha tshig go/ /rgol ba po na re/ 'o na de ltar bstan pa'i dam tshig gi phyag rgya de dag mtshan nyid ji lta bu la 'du bar shes par bya zhe na/smras pa/ dam tshig gi phyag rgya de dag kyang rdo rje dang / lcags kyu dang / mda' dang / mnyes pa la sogs par 'du shes pa ste/ dngos grub 'di dag la dam tshig gi phyag rgya zhes bya'o/ /rgol ba po na re/ dam tshig gi phyag rgya'i mtshan nyid 'di lta bu dag 'dzin ba ci dgos she na/smras pa/ rdo rje la sogs pa'i sgras de rnams kyi dgos pa bshad pa rgyud 'di las bshad ces pa ni/ lha rnams kyis dam tshig gi phyag rgya rdo rje la sogs pa phyag na bsnams pa yang dgos pa med cing don dang mi ldan par mi bsnams kyi/ dgos pa dang bcas shing don dang ldan par phyag na bsnams pa'i phyir/de kho na nyid bsdus pa'i rgyud 'di las/ de dag gi yon tan dang dgos pa rnams bshad de/ ji skad du gsungs she na/ bcom ldan sems dpa' de nyid ni/ /rdo rje sems dpa'i thugs kar gnas/ /de bzhin gshegs pa'i ting 'dzin ni//sangs rgyas byang chub sgrub pa po/ /zhes bya ba la sogs pa gsungs te/ de la bcom ldan 'das sems dpa' de nyid ni zhes pa ni/ byang chub sems kyi de kho na nyid la bya ste/ de nyid don de dang ldan pas na/ rdo rje sems dpa'i thugs kar gnas/ /zhes pa ni de nyid rdo rje sems dpa' ste/thugs ye shes kyi rang bzhin yin pas thugs la gnas zhes bya'o/ /de bzhin gshegs pa'i ting nge 'dzin/ /zhes pa ni de nyid de bzhin gshegs pa'i ting nge 'dzin te/ chos kyi sku rnam par mi rtog pa'i ngo bo'o/ /sangs rgyas byang chub sgrub pa'o/ /zhes pa ni/de nyan thos dang rang sangs rgyas la sogs pa'i theg pa dman pa dag sgrub pa ma yin gyi/ sangs rgyas dang byang chub sems dpa' kho na sgrub par byed pa'o/ /shin tu 'bigs pas rdo rje'o/ /zhes pa ni/ byang chub kyi sems de rtogs pa'i gnas skabs na/ chos nyid kyi don mngon du gyur cing phyin ci log gi mthar gyur pa rnams 'joms shing 'dral bar byed pas so//mchog tu sbyor bas lcags kyus so/ /zhes pa ni/ byang chub sems de ni sems thams cad kyi nang nas gtso bo'am rgyal po lta bu yin pas/ 'phags pa rnams spyan 'dren cing / sems can rnams 'gugs par byed pa'o/ /phra bas 'bigs pa mda' yin no/ /zhes pa ni 'gro ba'i don mdzad cing gang 'dod pa dag ston par mdzad pa ste/ dper na 'dod khams kyi lha'i rgyal po kA ma de ba la me tog gi mda' lnga yod pas 'dod pa thams cad skul bar byed pa dang 'dra bar don mdzad pa'o//mgu bas dga' bar byed pa ste/ /zhes pa ni/ bdag gzhan gyi don phun sum tshogs pa la mnga' brnyes pas bdag kyang mgul/bsdu ba rnam pa bzhi po dag gis gzhan la phan 'dogs pas gzhan yang dga' zhing dge ba la 'god par mdzad pa'o//spras pas rin po che ru bshad/ /ces pa ni byang chub sems yon tan de lta bu dang ldan pa dag gis spras shing brgyan pa'am/ rnam gcig tu rin po che la yon tan gyis spras shing brgyan pa ltar/ de la yang mtshan dang dpe byad rnams kyis spras shing brgyan pa'o/ /nyi ma gzi brjid ces su brjod//ces pa ni/ dper na nyi mas mun pa thams cad sel bar byed pa bzhin du ye shes nyi ma dang 'dra ba'i gzi brjid kyis nyon mongs pa dang sgrib pa'i mun pa thams cad sel bar byed pa'o/ /bsgreng bas rgyal mtshan cher bstan te/ /zhes pa ni/ dper na 'jig rten na/rgyal po'i rgyal mtshan bsgreng bas dgra'i phyogs 'joms pa dang 'dra bar/ byang chub sems rgyal mtshan dang 'dra ba des mi mthun pa'i phyogs rnams 'joms par byed pa'o/ /bzhad pas gad mo zhes su grags/ /zhes pa ni/ bdag gzhan gyi don phun sum tshogs pa mthar phyin par spyod pas mnyes pa'i gad mos sgrogs par byed pa'o//kha cig na re pad+ma kha phye ba bzhin du blo rgyas shing rdzogs pa'i sgo nas bzhad pa'i gad mo sgrogs par byed ces kyang zer ro/ /'dod chags dag pas pad+ma ste/ /zhes pa ni/ pad+ma 'dam las skyes kyang 'dam gyi nyes pas mi gos pa ltar/thugs rje chen pos 'gro ba'i don mdzad na'ang 'khor ba'i skyon dang nyes pas ma gos pa'o/ /nyon mongs dgra gcod ral gri'o/ /zhes pa ni dper na 'jig rten pa'i mtshon cha ral gris dgra dang mi mthun pa'i srog gcod par byed pa dang 'dra bar/ye shes ral gri lta bu des nyon mongs pa'i sgrib pa dang / lta ba'i dra ba dgra lta bu dag gcod par byed pa'o/ /dkyil 'khor tshul bas 'khor lo ste/ /zhes pa ni sems bskyed ma thag tu chos kyi 'khor lo bskor bar byed pa ste/ 'gro ba'i rgyun la chos kyi 'khor lo bskor bas rten cing 'brel pa spyod zhing 'khor ba'i 'khor lo rgyun gcod par mdzad pa'o//tshig tu brjod pas smra zhes bya/ /zhes pa ni/ gdul bya'i rgyud dang sbyar te/ lung dang rigs pa'i chos bstan nas gzhan grol bar byed pa'o/ /sna tshogs thams cad rdo rje'i phyir/ /zhes pa ni/'phags pa mchod cing sems can gyi don byed pa la sogs pa'i phrin las mdzad pa'i phyir sna tshogs rdo rje kha bzhi pa bsnams pa'o/ /mi tshugs sbyor bas go cha'o/ /zhes pa ni/ bdud dang mu stegs la sogs pa phas kyi rgol ba gang gis kyang mi tshugs par bya ba'i phyir byang chub sems dang ldan pa'i go cha bgos so//'jigs par sbyor bas mche ba ste/ /zhes pa ni grags pa can gyi bdud dang mu stegs la sogs pa ma rungs pa dag 'dul zhing tshar gcod par mdzad pa'i phyir byang chub sems rdo rje gnod sbyin du sprul pa'o/ /bcing pa'i phyir ni khu tshur ro//zhes pa ni/ de bzhin gshegs pa thams cad kyi sku gsung thugs gcig tu bsdus pa ni rdo rje khu tshur te/ sku gsung thugs gcig gi nang nas yang gsum char dang ldan la gsum char yang gcig gi ngo bor ston spyod pa'o/ /ji ltar bcom ldan sems dpa' ni//zhes pa ni/ rdo rje sems dpa'o/ /rdo rje sems dpa' thams cad du/ /zhes pa ni/ thams cad du rdo rje sems dpa' ni byang chub sems las byung ste/ byang chub sems kyi rang bzhin de nyid rdo rje sems dpa' yin no bar bstan pa'o/ /de bzhin rdo rje la sogs mtshan//zhes pa ni rdo rje sems dpa' ji lta ba bzhin du/ rdo rje sems dpa' la sogs pa'i dam tshig gi phyag rgyar rdo rje la sogs pa bstan pa ni/ 'dir gsung gi bdag nyid kyi lha ni bshad pa'i chos nyid la bya'o zhes pa ni/ gsung gi rang bzhin gyi lha ni chos kyi yig 'bru la bya bar 'dod do//gang gi phyir bdag nyid chen po rnams kyi zhes pa ni de bzhin gshegs pa dang ye shes kyi sems dpa' chen po rnams so/ /gsung thams cad ni zhes pa ni/ de dag gi gsung ste/ de yang thugs thams cad mkhyen pa'i ye shes des gsung rab yan lag bcu gnyis la sogs pa gnyen po dang dbye ba dang bsdu ba'i don gyi chos kyi lung dang rigs pas bsdus pa rnam pa mang po dag ston par mdzad ces pa'i don to//de ltar bstan pa de yang rnam pa gnyis te/ gang zhe na/ don dam pa'i chos ston pa dang zhes pa ni/ don dam pa'i sgo nas spros pa dang bral ba'i chos ston pa ste de ni don gyi gsung ngo //gzhan la phan pa ston pa'i ngo bo bas na zhes pa ni/ kun rdzob kyi sgo nas 'gro ba la ji ltar phan pa dang / gang la mos pa dag ston par mdzad pa ste/ de ni gzhan la phan 'dogs pa'i ngo bo bas na/ dngos su bshad pa'i chos kyi bdag nyid yin par shes par bya'o//de'i phyir phyag rgyar gyur pa zhes pa ni/ gsung de dag kyang mdor bsdus te chos kyi phyag rgyar bstan pa ni/ badzra dz+nyA na zhes bya ba la sogs pa gsung rnam par dag pa'i mtshan mar bstan pa de'i rtags su gyur pa ye shes kyi sems dpa' rnams kyi so so'i chos kyi phyag rgyar brjod pa'i tshig rnams la ni chos kyi phyag rgya zhes bshad do//de bas na chos kyi phyag rgya zhes sgrub pa'i tshe zhes pa ni/ sgrub pa po rnams kyis chos kyi phyag rgya sgrub pa'i tshe/ rang gi lce'i steng du zla ba la rdo rje bsams nas/ de'i bum pa la rang gi chos kyi yi ge bzhag ste/de ltar sgrub ces rgyud las gsungs so/ /rgol ba po na re/ 'o na gong du chos kyi phyag rgya'i mtshan nyid badzra dz+nyA na zhes bya ba la sogs pa sems dpa' so so'i chos kyi yi ge'o zhes bshad na/ 'dir ni de las mtshan nyid bskyur ba'i ngo bo 'di ltar bya zhes bstan pa mi 'gal lam zhe na/smras pa/ 'di ltar bstan pa yang 'gal ba med de/ ci'i phyir zhe na/ lce ni rjod par byed pa'am/ smra bar byed pa'i rang bzhin bas na gsung rnam par dag pa'i chos kyi phyag rgya'i yig 'bru bstan pa yang de dang mthun pa'i phyir lce la bsam zhing bsgrub par bya ba'i rigs pa yin pas 'gal ba med do//de ltar chos kyi phyag rgya de yin no bar bshad pa de yang rang bzo ma yin par bstan pa'i phyir khungs gsungs pa/ 'di ltar gzhan dag las kyang gsung gi gsang ba bshad pa ni chos kyi phyag rgya nyid du ston te zhes bya ba la sogs pa ste/de la gsung gi gsang ba zhes pa ni/ gsang ba ni tshig kyang gzhan la don kyang gzhan du ston pa lta bu'i mtshan nyid la ni gsang ba zhes bya ste/ chos kyi sku'i rang bzhin las mtshan nyid gzhan du ston pa la yang gsang ba zhes bshad do//gnas skabs 'dir ni gsung gi rang bzhin rnam par dag pa de las chos kyi phyag rgya zhes bya ba'i yig 'brur byin gyis brlabs nas bstan pa de la de skad brjod do/ /rdo rje tshig gi sbyor ba yis/ /zhes bya ba la sogs pa'i don ni 'og nas bshad do/ / lha'i gsung gi brdar bstan pa'i yi ge zhes pa ni badzra dz+nyA na zhes bya ba la sogs pa'o/ /de'i rang bzhin gyi phyag rgya zhes pa ni chos kyi yig 'bru nyid la chos kyi phyag rgya zhes gsungs so/ /'dir yang smra ba po dang zhes pa ni gsung rnam par dag pa'i rang bzhin te de ni smra ba po lta bu'o//tshig ces pa ni chos kyi phyag rgya'i yig 'bru rnams te de ni smra ba lta bu ste/ de gnyis tha mi dad pas na/ de'i rang bzhin gyi mtshan ma zhes pa ni gsung rnam par dag pa'i rang bzhin gyi mtshan ma'am rtags su gyur pa ni chos kyi yig 'bru'o/ /don du na yan lag dang bcas pa'i lha'i ngo bo nyid byin gyis rlob par bstan pa yin no zhes pa ni/don du na yig 'bru de las kyang yan lag dang bcas pa'i lha'i ngo bo'i phyag rgya chen po cha lugs yongs su rdzogs pa'i lha'i ngo bo nyid byin gyis rlob par 'gyur du btub pa'am de ltar nus par bshad do//rgol ba po na re/ 'o na de dag de bzhin du 'grub par cis mngon zhe na/ smras pa/ de bzhin du phyag rgya gzhan rnams la yang phal cher bstan te zhes pa ni/ rnal 'byor gyi rgyud gzhan dag las chos kyi phyag rgya gcig pu las phyag rgya chen po'i sku la sogs par byin gyis rlob par 'gyur ro zhes 'byung ba yang yod do//de la la na re phyag rgya chen po la sogs pa bzhir gsungs pa de dag re re'i nang du bzhi char 'dus par bstan pa yang yod do zhes zer ro/ /de ltar bstan pa 'di ni chos kyi phyag rgya'i rgyud nas bshad pa yin par shes par bya'o//de yan chad du chos kyi phyag rgya bshad zin to/ /da ni las kyi phyag rgya'i don dang mtshan nyid dang rnam par dbye ba bshad par bya'o/ /de la gzhan dag na re/ phyag rgya de ltar brjod pa de dag ni bstan zin na las kyi phyag rgyar brjod pa 'di'i don ji lta bu yin zhe na/ smras pa/ las kyi phyag rgya'i sgra'i don yang brtag par bya ste zhes bya ba la sogs pa ste/ las kyi phyag rgya'i mtshan nyid bstan pa'o/ /de la lha'i las kyi mtshan ma ni las kyi phyag rgya ste zhes pa ni/ 'jig rten pa'i las su brjod pa lta bu ma yin gyi/ de bzhin gshegs pa rnams kyi phrin las ni/'phags pa mchod pa dang sems can gyi don byed pa ste/ de'i mtshan mar bstan pa'i phyag rgya la ni las kyi phyag rgya zhes bya ste/ de dag gi mtshan nyid kyang ji lta bu zhe na/ byang chub mchog la sogs pa'i phyag rgya'i mtshan nyid do zhes bya ba ste/ byang chub mchog gi rtag pa'i las kyi phyag rgyar brjod pa ste/sogs kyi sgras ni gzhan pa rnams kyi las kyi phyag rgya dag bsdus par bya'o/ /rgol ba po na re/ 'o na de dag sgom zhing sgrub na gnas skabs ni gang du bsgrub par bya/ tshul lam thabs ni ji lta bur bcing zhing bsam pa yin zhe na/ smras pa/ de bzhin du de sgrub pa'i tshe zhes bya ba la sogs pa dag ste/ de bzhin du de sgrub pa'i tshe zhes bya ba ni 'phags pa'i dngos grub rab 'bring la sogs pa sgrub pa dang / las rnam pa bzhi po dag rtsom par byed pa de'i tshe bsgrub par bya'o/ /tshul lam thabs ji lta bur bcing zhing bsam pa'i thabs ni/las sna tshogs pa'i rang bzhin rdo rje rtse mo thams cad ces bya ba la sogs pa ste/ las sna tshogs la zhes pa ni sku gsung thugs kyi rang bzhin phrin las sna tshogs pa'i sgo nas 'gro ba grol bar mdzad pa'o/ /rdo rje rtse mo thams cad pa las thams cad bsgrub pa zhes pa ni/rdo rje kha bzhi pa ste de ni phrin las la snyom las med par kun la khyab par mdzad pa'i mtshan mar bstan to/ /lus kyi snying ga'i phyogs su zhes pa ni sgrub pa po'i snying gar bsam par bshad pa'o/ /'di'ang las nye bar bstan pa'i sgo nas zhes pa ni/'di ni las nyid nye bar mtshon pa'i phyir las kyi phyag rgya bstan par zad kyi/ des yan lag dang bcas pa'i sku phyag rgya chen po cha lugs yongs su rdzogs pa'i ngo bo nyid nye bar ston nus par don gyis shes par bya'o/ /de ci'i phyir zhe na/ las dang byed pa po tha mi dad pa'i phyir ro zhes gsungs pa'i phyir ro//de la las ni las byed pa'i ngo bo las kyi phyag rgya'i mtshan ma rnams te/ de'i rang bzhin lha rnams kyi sku gsung thugs rnam par dag pa'i mtshan nyid dang las kyi phyag rgyar gyur pa tha mi dad pa'i phyir na de skad brjod do/ /phyag rgya bzhi'i ngo bo nyid bye brag ces pa ni phyag rgya bzhi por bstan pa de dag gi sgra dang don gyi bye brag ji lta bu yin pa dag go//de yan chad phyag rgya rnam pa bzhi'i mtshan nyid bshad zin to/ /da ni phyag rgya bsdu ba'i mtshan nyid bshad par bya ste/ de la gzhan dag na re/ de ltar phyag rgya bzhi por bstan pa de dag de ltar nges sam gzhan du yang shes par byar rung ba yin zhe na/smras pa/ de dag thams cad kyang rnam pa gnyis te zhes bya ba la sogs pa gsungs te rnam pa gnyis te zhes bya ba ni phyag rgya bzhi po la sogs par bstan pa de dag kyang spyir rnam pa gnyis su shes par bya ste zhes pa'i don to//lhar brtags pa'i rang bzhin dang zhes pa ni/ thams cad mkhyen pa'i ye shes las byung ba'i lha ste/ ye shes kyi sems dpa' rnams so/ /dam tshig can gyi skye bos brtags pa zhes pa ni/ sgrub pa pos bdag nyid lha gang yang rung ba'i cha lugs su bsgyur nas rang nyid nges par mos pa'i ting nge 'dzin gyis brtags pa'o//gang yang lha'i lung dang rjes su mthun pa'i dam tshig can gyis bskyed pa zhes pa ni/ sbyor ba'i rgyud las rjes su bshad pa'i rnam pa de dang rjes su mthun par dam tshig sems dpas bdag nyid kyi rnam par smin pa'i phung po bshigs nas ting nge 'dzin gyi ye shes kyi lhar bskyed pa'o//gang lha'i ngo bo nyid dam zhes pa ni cha lugs yongs su rdzogs pa'o/ /de'i cha shas su bye brag med par mos pa zhes pa ni/ rdo rje dang lcags kyu la sogs dam tshig gi phyag rgyar btags pa'i cha shas te/de dag bye brag dang khyad par med par shes pa de ni dam tshig can gyi skye bos btags pa'i lha zhes bya'o/ /de la lha rnams kyi sprul pa'i mtshan mar gyur pa gang yin pa zhes pa ni/ lha rnams kyis ye shes las sprul pa'i mtshan mar gyur pa gang yin pa de ni ye shes sems dpa' rnams so//gang lha'i ngo bo nyid dam zhes pa ni de'i sku phyag rgya chen po cha lugs yongs su rdzogs par gyur pa'i sku'o/ /de'i cha shas su bye brag med par shes pa ni/ de dag gi dam tshig gi phyag rgyar gyur pa rdo rje dang lcags kyu la sogs pa rang rang gi yon tan gyi sgo mtshon par byed pa ste/de dang bye brag med par shes pa ni ltar btags pa'o/ /de ltar brtags pa'i phyag rgya'i lha'i mtshan nyid ces pa ni dam tshig can gyi skye bo des lhar btags pa'i sku phyag rgya chen po'i lha'i bdag nyid du sngags pas bsgoms shing bsgrubs na las rnam bzhi dang dngos grub rab 'bring la sogs pa gang dgos pa'i don du bsgrub pa de 'thob cing 'dus par byin gyis rlob par mdzad do zhes phal cher rnal 'byor gyi rgyud rnams las bshad de//phal cher zhes pa ni shas cher zhes pa'i tha tshig go/ /gang gi phyir zhe na zhes pa ni gtan tshigs gang gi phyir de ltar byin gyis rlob par mdzad pa yin zhes bya ba'i don to//dam tshig can gyi skye bos btags pa zhes pa ni/ dam tshig can gyi skye bos lha'i skur bsgoms shing / dam tshig can gyi phyag rgya bcings nas de la de bzhin gshegs pa rnams kyis kyang 'gro ba gang dag ji ltar 'dod pa rnams kyi dgos pa bsgrub par bya'o zhes sngon byang chub kyi spyad pa spyod pa'i dus na dam tshig tu mdzad pa de'i rjes su dgongs nas ye shes kyi lha rnams kyis de la byin gyis rlob par mdzad de/de yang rgyud las 'di skad du/ gang dag bcings pa tsam gyis ni/ /rdo rje sems dpa' la sogs tshogs/ /dam tshig nyams kyis 'jigs pas na/ /byin gyis rlob pa nyid du 'gyur/ /zhes bya ba gsungs te/ gang dag bcings zhes pa ni/ sgrub po gang dag gis lha'i skur bsgoms shing / phyag rgya gang 'dod pa'i bcings pa'am/phyag rgya gang dag sgrub pa pos bcings shing bsgoms pa tsam gyis so/ /rdo rje sems dpa' la sogs tshogs/ /zhes pa ni/ dpal rdo rje sems dpa' la sogs pa'i ye shes kyi sems dpa'i tshogs rnams so/ /dam tshig nyams kyis 'jigs pa zhes pas ni/sngon dam bcas pa dam tshig de las 'da' bar dgos pa'o/ /byin gyis rlob pa zhes pa ni/ de ltar phyag rgya bsgom zhing 'ching ba'i sgrub pa po de la de ltar byin gyis rlob par gsungs so/ /dam tshig can gyi skye bos zhes pa ni don de bzhin du dam tshig dang ldan pa'i sgrub pa pos gang ltar mos pa de bzhin du brtags pa'o//yi ge'i rang bzhin zhes pa ni/ gang la mos pa'i lha de'i chos kyi phyag rgya'i yig 'bru rnams so/ /rang bzhin gyi lha'i ngo bo nyid dam zhes pa ni/ yi ge'i rang bzhin rnams las rim gyis lha'i sku rdzogs par 'gyur bar bsgoms na/yang de bzhin du 'gyur te/ dngos su lhar brtags pa'i ngo bo nyid kho nar byin gyis rlob par mdzad pas yi ge'i rang bzhin la lha'i ngo bo nyid ces bya ste/ de gnyis kyang don tha mi dad par blta'o/ /de bzhin du 'gyur ba cis mngon zhe na de ltar 'gyur ba'i gtan tshigs rgyud gzhan rnam par snang mdzad kyi rgyud las kyang gsungs pa bdag lhar byin gyis brlab pa'i phyir zhes bya ba la sogs pa gsungs te/sgrub pa po bdag nyid dam gzhan dag kyang rung ste/ lha'i rang bzhin du byin gyis rlob par 'dod na/ de sgrub pa'i phyir yi ge'am/ phyag rgya'am rnam par rtog go zhes pa ni/ chos kyi yi ge las dam tshig gi phyag rgya dang phyag rgya chen por gyur par brtag pa'am/ rnam gcig tu chos kyi yi ge las sku rdzogs par gyur pa'am/ phyag rgya bcings pa tsam gyis lha'i rang bzhin du bsgyur ba ste/dper na mdzod spu'i phyag rgya kho na bcings pa tsam gyis sku rdzogs par 'gyur ro zhes 'byung ba lta bu'o/ /yang ji skad du/ rgyud de nyid las gsungs pa/ de nas phyag rgya'am yi ge yis/ /rdo rje'i lus su bsgrub par bya/ /zhes gsungs te/ de'i don yang gong ma bzhin du shes par bya'o//de bzhin du gzhan yang rgyud de nyid las gsungs pa/ yi ge lnga'am yi ge gsum mam/ yi ge'i phyi mo'am yi ge mang por bkod pa tsam gyis zhes bya ba la sogs pa gsungs te/ de la yi ge lnga'am zhes pa ni/ rnal 'byor gyi rgyud kyi dbang du byas nas gsungs pa ste/rnam par snang mdzad la sogs pa'i chos kyi yi ge lnga po dag spyi bo nas ltag pa'i bar du rim par bkod pa las so so'i sku phyag rgya chen po rdzogs par bskyed nas yang de bzhin du 'byung bar bstan pa'o/ /yi ge gsum mam zhes pa ni bya ba'i rgyud kyi dbang du byas nas gsungs pa ste/sku gsung thugs kyi dbang du byas nas rigs gsum gyi chos [(]gyi [,]kyi [)]yi ge 'bru gsum po dag spyi bo'am smin mtshams la sogs pa'i gnas gsum po dag tu bkod nas/ de las so so'i skur bskyed na yang de bzhin du 'gyur bar bstan to//yi ge'i phyi mo 'am zhes pa ni/ mtshan rnams kyi sa bon dbyangs kyi yi ge bcu gnyis dang / ma ning gi yi ge bzhi ste bcu drug po dag las bsgoms na yang de bzhin du 'gyur ro/ /yi ge mang po bkod pa tsam gyis zhes pa ni/ ka pi wang lhag dgye 'dra bar la sogs pa dpe byad kyi yi ger gsungs pa'i ka nas k+Sha'i bar du gsungs pa'i yi ge mang po bkod pa'i chos kyi phyag rgya rnams bsgoms na yang de bzhin du 'grub par 'gyur bar bstan te/de bas na de bzhin gshegs pas byin gyis rlob par 'gyur bas na zhes bya ste/ gang 'dod pa de bzhin du 'grub par de bzhin gshegs pa rnams kyis byin gyis rlob par mdzad do//bde bar gshegs pa nyid du bshad do zhes pa ni/ chos kyi phyag dang / yi ge la sogs pa de dag bsams pa tsam gyis ji ltar 'dod pa de bzhin du 'grub par 'gyur zhes pa'i don to/ /da ni phyag rgya'i don bshad par bya ste/de la phyag rgya zhes bya ba yang ci'i phyir de ltar brjod pa yin zhe na/ smras pa/ phyag rgya yang mu dra na mu dra ste/ mgu bas na phyag rgya zhes bya ste/ bud med dag la yang phyag rgya'i sgra brjod de/ dper na 'jig rten dag na ji ltar bud med kyi dbang bos skyes pa'i dbang po mgu bar byed pa dang 'dra bar phyag rgya de dag bcings shing bsgoms pas 'phags pa thams cad mnyes pa dang /'gro ba dag la phan btags na de dag de'i sgo nas mgu bar byed pa na yang phyag rgya zhes bya'o/ /mu dra na mu dra ste phyag rgyas 'debs pas na zhes bya ba ni/'dod pa'i dngos po rgyas 'debs pas na/ phyag rgya zhes bya bar bshad de/ gang gi phyir zhe na zhes pa ni/ gtan tshigs sam don gang gi phyir de skad brjod ces pa'i don te/ gtan tshigs kyi don 'byin par byed pa'i tha tshig go/ /des srog chags rnams bsrung ba'i phyir zhes pa ni/phyag rgya des srog chags rnams 'jigs pa las yongs su bsrungs nas de dag mgu bar byed pa'i phyir na phyag rgya zhes brjod ces pa'i don to/ /phan gdags pa dang zhes pa ni 'jigs pa las skyob pa dang / 'jigs pa chen po las skyob par byed pa'i phan gdags pa'o//'dod pa'i dngos po myur du 'grub/ /ces pa ni gang 'dod pa'i dngos por gyur pa'i don te bsgrub na 'grub par byed pa'i phyir rgyas 'debs pa yang de ltar 'dod do/ /de'i gtan tshigs kyang rgyud las gsungs pa/ ji ltar rgyal po rang gi rgyal zhes bya ba la sogs pa gsungs te/rgyal po'i gtsigs ni btab pa ltar/ /zhes pa ni/ ji ltar rgyal po nyid kyi mgu rtags kyi phyag rgyas btab pa'i gtsigs dang bka' khrims su bcad pa dag la 'bangs su gyur pa'i mi rnams kyis 'da' bar mi byed do/ /de bzhin du/ bdag chen nyid kyi phyag rgyas kyang / /zhes pa ni bdag nyid chen po bcom ldan 'das rnams kyi phyag rgya chen po bzhi po dag gis kyang / skye bo'i tshogs gang dag bsgrub byar gyur pa dag la btab na gzhan gyis 'gal ba'am bshigs par mi nus so zhes gsungs so/ /de bzhin du gzhan dag la yang zhes pa ni gong du bstan pa de bzhin du rnam par snang mdzad kyi rgyud las kyang gsungs pa/gsang ba'i bdag po zhes pa ni/ phyag rgya rdo rje ste de ni gsang ba'i mdzod 'dzin par gnyer gtad cing gnod sbyin gsang ba pa dag gi bdag por gyur pas de la de skad brjod do/ bcom ldan 'das rnam par snang mdzad kyis de la bos pa'i tshig go//de bzhin gshegs pa'i rgyun du gyur pa zhes pa ni/ 'jig rten pa'i rgyun dang / brgyan pa lta bu ma yin gyi de bzhin gshegs pa rnams kyi rgyun du gyur pa ni/ che ba'i yon tan phun sum tshogs pa mnga' zhing / de dag gis rgyan du gyur pa bzhin du gnas pa'i phyir na de skad brjod do//de gang las byung ba yin zhe na/ chos kyi dbyings rtogs pa'i mtshan ma zhes gsungs te/ chos kyi dbyings rtogs pa las byung ba'i mtshan ma ni phyag rgya'o/ /lha dang klu dang zhes pa ni nag bo'i phyogs kyi rigs can du gyur pa'i gdug pa can rnams te de dag gis kyang tshul gnod pa mi tshugs shing phar bsgos pa thams cad bran bzhin du bka' nyen par 'gyur ba ste/dper na phyag na rdo rjes 'khor lha ma srin gyi sde rnams bsgos pa bzhin du 'gyur ro/ /rgol ba po na re/ 'o na de ltar de bzhin du phyag rgyas 'grub par gsungs na/de lta na ni de'i rjes su mthun par 'jug pa'i gdul bya kun yang de lta bu'i yon tan dang ldan par 'os na de ltar ma gyur pa ci'i phyir zhe na/ smras pa/ phyag rgyas de ltar byin gyis rlobs/ /de yang zhes bya ba la sogs pa gsungs te/ skyes bu'i skal ba zhes pa ni skal ba yang gcig tu zad pa ma yin pas mi mnyam par gsungs te/rab 'bring dang tha mar gyur pa dag yod par bstan pa'o/ /mos pa zhes pa ni/ dad cing 'dun pa ste/ de yang gcig tu zad par bstan pa'o/ /mnyam par gzhag pa zhes pa ni ting nge 'dzin to//rnam pa gsum zhes pa ni rab 'bring tha ma'i bye brag go/ /chung ngu dang 'bring po dang chen po'i bye brag ces pa ni de'i dbang gis byin gyis brlabs pa dang dngos grub kyang de bzhin du rnam pa gsum du 'gyur ro/ /de bas na dam tshig can gyi skye bos brtags pa'i zhes pa ni dam tshig can gyi skye bos ting nge 'dzin gyis brtags pa'i phyag rgya bzhi'i sgo nas lhar bsgoms pa yang goms pa dang ldan pa nga rgyal chen po dang 'bring po dang chung ngu'i bye brag gis dgos pa'i don dang /byin rlabs dang / dngos grub stsol ba yang rnam pa gsum du grub par 'gyur bar bshad de/de dag kyang sgrub pa po nyid kyis ji ltar sgrub pa la rag las par bstan to/ /phyag rgya'i nges tshig gzhan dag kyang ston par byed pas na yang zhes smos so/ /srid pa dang mya ngan las 'das pa so sor bcings pa zhes pa ni/ srid par bcings pa ni srid pa gsum du gtogs pa'i sems can rnams so//mya ngan las 'das par bcings pa ni nyan thos zhi ba'i mthar lhung ba rnams te/ de gnyis ka grol bar byed pa'am/ dngos grub sgrub pa'i don chen po la bar chad byed pa'i bgegs rnams 'jig par byed pa'i phyir phyag rgya zhes bya bar bshad do//'o na de ltar ci mngon zhe na/ phyag rgya la mu dra zhes bya bar 'dod pa de'i don gyis de ltar 'dod par bshad de/ de yang mu zhes bya ba'i sgra ni muk+ta te/ grol ba la bya ste/ gang grol zhe na/ srid pa dang mya ngan las 'das par bcings pa de dag las grol bar byed pa'o//tra zhes bya ba'i sgra ni tra ba na ste/ 'jig pa zhes bya ste/ gang 'jig ce na/ don chen po la bar chad byed pa'i bgegs rnams 'jig par byed de de bas na de lta bu'i don dang ldan pas na phyag rgya zhes bya bar bshad do/ /gzhung gzhan dag las kyang rgyud nas bshad pa 'di rnam pa gzhan du bstan pa zhes bya ba la sogs pa dag ste/rgyud nas bshad pa zhes pa ni phyag rgya'i gtan tshigs lo rgyus nas sam/ rgyud nas bshad de rgyas par bstan pa'i don to/ /'di rnam pa gzhan du zhes pa ni de ltar bstan pa'i mtshan nyid de las kyang ci mi 'dra ba gzhan dag ston par byed pa'o//'di ni dam tshig rtsa ba ste zhes pa ni phyag rgya chen po la sogs pa phyag rgya bzhi po dag gi sgrar brjod pa'i bar rang bzhin du tshul ji lta ba bzhin du goms par byas pas sangs rgyas thob par 'gyur ba'i rgyu chen po'i yin pas rtsa ba zhes bya'o//dbu rgyan bcings pa rgyu yi mchog /ces pa ni/ de bas na dbu rgyan lngas brgyan pa'i sangs rgyas kyi sku thob par byed pa'i rgyu'i mchog kyang phyag rgya goms par bsgoms pa yin no zhe'o/ /rnam pa gcig tu la la na re dam tshig thams cad kyi rtsa ba ni phyag rgya chen po ste/ de goms par byas pas dbu rgyan lnga dang ldan pa'i sangs rgyas de dag 'grub pa'i rgyu'i mchog ni phyag rgya chen po'i yin no zhe'am/ gang gis lus kun brtan pas na/ /zhes pa ni phyag rgya goms par bsgoms pas na gang gis lus kun du brtan pas na rdo rje dang 'dra bar gyur pa'o//de bas phyag rgyar rab tu bsgrags/ /zhes pa ni don de lta bu dang ldan pas na de ming de skad ces bsgrags pa'o/ /de bas na 'phags pa rnams kyi sku rdo rje dang 'dra ba dag 'grub cing thob par byed pa'i phyir phyag rgya zhes brjod cing brtags so zhes gsungs so/ /de kho na nyid rab tu dbye bas bsdus pa zhes pa ni/de kho na zhes pa ni don dam pa'i de kho na nyid la bya'o/ /rab tu dbye ba zhes pa ni/ don dam pa de las kun rdzob tu rdo rje dbyings la sogs pa'i lha dang phyag rgya bzhi bstan pa ni/ don dam pa dang kun rdzob kyi mtshan nyid dbye ba'o/ / bsdus pa ni de dag 'dir phyogs gcig tu bsdus te rim par bkod nas bshad pa'o/ /de yan chad du de kho na nyid ces brjod pa de'i rang bzhin dang mtshan nyid rnam par dbye ba bshad zin to/ /da ni slob dpon rang gi lhag pa'i lha gzung ba'i thabs kyi lung mnod pa dang / bsrung ba dang /spang ba dang / blang bar bya ba'i dam tshig rnams kyi don bshad par bya ste/ de bas na bdag nyid chen po des de rig par byas nas zhes pa ni/ de bas na zhes bya ba ni gong du bstan pa'i don la bsnyems pa'i tshig ste rgyud dam sgrub thabs 'di lta bur zhugs pa'i skal ba yod pa'i sgrub pa po dag ni bsod nams kyi tshogs chen po dang /de la thun mong ma yin pa'i las 'phro dang skal bar ldan pa yin pas bdag nyid chen po rnams kyi go 'phang thob par 'gyur ba la dgongs nas de skad brjod do/ /de rig par byas nas zhes pa ni/ rnam pa thams cad mkhyen pa'i ye shes chen po de las/sngon gyi smon lam gyi shugs dang thugs rje chen po'i dbang gis kun rdzob tu rdo rje dbyings la sogs pa'i lha rnams sprul te bstan pa de'i sgo nas/ sgrub pa po de bzhin du bsgrubs na 'grub par 'gyur ro zhes gsungs pa de dag bsgrubs na myur du 'grub pa'i thabs phyag rgya chen po la sogs pa bzhi bstan te/de dag gi mtshan nyid de bzhin khong du chud par byas nas zhes bya ba'i tha tshig go/ /de ltar sgrub pa po des gong du phyag rgya bzhi la sogs pa'i mtshan ma la sogs pa bstan pa de dag khong du chud par byas nas/de'i 'og tu slob dpon las rang gi lhag pa'i lha'i gzung zhing bsgrub par bya ba'i thabs kyi cho ga bstan pa dang / de dag gi dam tshig mnod cing bsrung bar bya ba'i rnam grangs bshad par bya ste/ de yang gang zhe na/ nges par sems can gyi tshogs chen po la phan gdags pa'i phyir zhes bya ba la sogs pa gsungs te/sems can gyi tshogs chen po la phan gdags pa'i phyir zhes pa ni/ sgrub pa'i rnal 'byor pa des gdon mi za bar 'gro ba mang po rnams la phan gdags par bya ba'i phyir/ gang 'dod pa'i 'phags pa rnams kyi dngos grub sgrub par bya'o snyam pa'i bsam pa 'chang bar byed pa'o//go 'phang dam pa 'thob par 'dod pas zhes pa ni/ theg pa 'og ma pa'i rigs can dag gis bdag kho nas mya ngan las 'das pa'i bde ba 'thob par bya'o snyam pa'i bsam pa can ma yin gyi/ bla na med pa'i byang chub kyi go 'phang dam pa de thob par byas la/'gro ba mang po la phan gdags par bya'o snyam pa ni thob par 'dod pa'o/ /bde bar gshegs pa sras dang bcas pa zhes pa ni/ dus gsum du 'byung ba'i de bzhin gshegs pa rnams ni sems can rten 'brel gyis 'khor ba rnams skye gnas rnam pa bzhir skye ba lta bu ni ma yin gyi/sku gsung thugs rnam par dag pas chos kyi dbyings rtogs pa las byung ba dang / de'i rigs can gyur pa'i sras mnga' bas na sras dang bcas pa'o/ /bdag nyid phul nas zhes pa ni/ de lta bu'i don dang ldan pa'i bde bar gshegs pa ma lus pa thams cad la don de nyid thob par 'dod pas nye bar bsgrub pa'i phyir sgrub pa po des bdag nyid kyi lus ngag yid gsum phul bar bya ste/de'i thabs ni 'og nas 'byung ba nyid du shes par bya'o/ /bdag gi lhag pa'i lha zhes bya ba ni/ bdag gis bsgrub par bya ba'i lha'o/ / de la 'jig rten pa'i gtso bor gyur pa mthu dang longs spyod dang rdzu 'phrul rnam pa mang po dag 'char zhing che ba dang / dregs pas rgyags pa rnams kyang lha yin mod kyi/ theg pa chen po'i sgor zhugs pa rnams kyis ni de dag sgrub par mi byed kyi mtshams cad ba'i rim pa nyid de dag dgag pa'i phyir na/sems dpa' zhes bya ba smos so/ /gang yang rung ba zhes pa ni 'jig rten las 'das pa dang / de'i phyogs su gtogs pa kun kyang rang gi lhag pa'i lha yin mod kyi/ de dag gi nang nas gdam ka med pa gcig kho na bsgrub par bya ba ste/ rang gang 'dod pa'i lha'o//yongs su bzung ba zhes pa ni/ bzung ba'i thabs ni gang la dad pa'i phyogs kyi lha'i dkyil 'khor du me tog dor nas gang la 'bas pa'i lha de nyid ltar gzung ste bsgrub par bya'o/ /mnyes par byed pas zhes pa ni/ dam tshig srung zhing sgom pa ni lha mnyes par byed pa'i rgyu yin pas de'i sgo nas de ltar bya'o//gang 'dod pa'i dngos grub ces pa ni 'jig rten pa dang 'jig rten las 'das pa'i dngos grub ste/ 'jig rten pa'i grub pa phra mo yan chad dang / bla na med pa'i sangs rgyas kyi sku dang ye shes man chad gang 'dod pa de bsgrub par bya ba ste de'i don yang 'og nas gsungs pa kho na'o//da ni de ltar gsungs pa'i sgrub pa de dag gi yan lag dang dam tshig bsrung ba'i bye brag rnams bshad par bya ste/ mnyes par bya ba'i yan lag ces pa ni/ de dag bsrung bar bya ba'i yan lag tu gyur pa ni rtsa ba dang yan lag gi dam tshig la sogs pa bstan pa'i cho ga ste/de dag gi bye brag ji lta bu yin pa dag bshad par bya ste/ de dag kyang rang bzo ma yin te/ 'dir phal cher rnal 'byor gyi rgyud rnams las rgyas par gsungs pas/ lung de dag gi tshig bltas la de bzhin du bsrung bar bya'o zhes par bstan to//de'i phyir thabs kyi cho ga shes pa zhes pa ni dngos grub bstan pa de dag gi phyir de dag thob par bya ba'i rgyur gyur pa'i thabs kyi cho ga shes pa ni/ bla ma rin po che'i yin pas de bas de mnyes par bya'o bar bstan pa ste/ de la bla ma rin po che ni rdo rje slob dpon te/ dper na yid bzhin gyi nor bu rin po che las gang dpags pa'i 'dod pa 'byung ba bzhin du bla ma de la brten na yang gang 'dod pa'i dngos grub thob par byed pas na/rin po che dang chos mthun pa'i phyir de skad ces brjod do/ /bla ma mnyes par byas pa de/ zhes pa ni/ bla ma rdo rje slob dpon mnyes par bya ba'i slob ma de'o//des bstan pa zhes pa ni rdo rje slob dpon des ji skad bstan pa'i dkyil 'khor bzhi la sogs pa'o/ /dkyil 'khor chen po zhes pa ni rdo rje dbyings kyi dkyil 'khor te sku'i bdag nyid yin pas des phyag rgya chen po yongs su rdzogs par gyur pa'i phyir na de skad ces brjod do//dam tshig dang zhes pa ni thugs kyi dkyil 'khor khams gsum rnam par rgyal ba ste/ thugs kyi sgo nas che ba bstan pas lha chen po la sogs pa rnams btul nas/ de dag la dam tshig byin pa'i phyir na de skad ces brjod do/ /chos dang zhes pa ni gsung gi dkyil 'khor 'gro ba 'dul ba ste/gsung gi sgo nas chos bstan pas gdul dka' ba'i 'gro ba rnams 'dul bar mdzad pas na de skad ces brjod do/ /las kyi dkyil 'khor zhes pa ni phrin las kyi ngo bo bstan pa ni las kyi dkyil 'khor don thams cad grub pa ste/ 'phags pa mchod pa dang sems can gyi don bya ba la sogs pa'i phrin las kyis bdag dang gzhan gyi don thams cad grub par byed pas na de skad ces brjod do//cho ga ji lta ba bzhin dbang bskur ba zhes pa ni/ de dag gang yang rung bar zhugs pa'i thabs dang rim pa ji ltar 'byung ba de bzhin du dkyil 'khor du gzhug cing sngags dang phyag rgya la sogs pas dbang bskur ba'o//theg pa chen po mngon par rtogs pa'i cho gas zhes pa ni rgyud kyi mtshan nyid de/ 'di las gsungs pa'i cho ga'i rim pas sdom pa gzung ba'o/ /la la na re rnal 'byor pa'i rgyud bzhugs so 'tshal thams cad la mtshan de skad ces bya ste/de dag gi nang nas 'byung ba'i cho ga'i rim pas sdom pa gzung bar bya ba yin zhes zer na/ gang yang phan tshun du 'gal ba med pas de bzhin du bshad do/ /yongs su bsrung bar bya ba'i dam tshig dang 'dul ba zhes pa ni/ rnal 'byor gyi rgyud rnams las kyang rgya cher gsungs mod kyi/khyad par du yang legs par bsgrub pa'i rgyud chen po'i bsrung bar bya ba'i dam tshig rim par phye ba'i le'u las gsungs pa'o/ /de nas gzhan yang gang zhig la/ /gnas na zlos pa po rnams kyis/ /dngos grub myur du thob 'gyur ba'i/ /gsang sngags zlos pa'i 'dul bar bshad//sgrub pas gsang sngags thams cad dang / /lha rnams dag ni thams cad dang / /zlos pa bdag nyid chen po la/ /mkhas pas zhe sdang mi bya'o/ /zhes pa la sogs pa mthar thug gi bar du gsungs pa'i tshig dang / rgyud gzhan las gsungs pa'i dam tshig gi bye brag rnams so//spyod pa zhes pa ni 'jug par bya ba'i thabs te/ bsnyen pa dang / sgrub pa'i las dang / bya ba rim par phye ba'o/ /spyod yul zhes pa ni bsgrub par bya ba'i gnas rnams te/ de yang bya ba'i rgyud chen po de nyid las gsungs pa'o/ /de nas gzhan yang sgrub pa po//yul gang dag tu gnas na ni/ /dngos grub myur du thob 'gyur ba'i/ /gnas kyi mtshan nyid bshad par bya/ /zhes pa la sogs pa'i mthar thug gi bar du gsungs pa de dag de lta bu gzhan dag la bya'o/ /cho ga bzhin du mkhas par byas/ /zhes pa ni/bsrung ba'i dam tshig dang las dang bya ba'i rim pa dang / gnas kyi mtshan nyid rnams la mkhas pa'am/ goms par byas pa'o/ /de phyin chad dam tshig la sogs pa ji ltar blangs pa bsrung ba'i phyir zhes pa ni/ gong du gsungs pa'i dkyil 'khor du zhugs shing dbang bskur phyin chad dam tshig gi bye brag la sogs pa ji ltar khas blangs pa bzhin du bsrung ba'i phyir/rtag tu spro ba mi slong bar bya ste zhes pa ni/ dam tshig bsrung ba dang / sngags bzlas pa la sogs pa la dga' bar bya zhing sgrin par bya ste/ le lo dang snyom las su mi gzhag pa'o//ci'i phyir klod par mi bya zhe na/ bdag dang gzhan gyi don ma lus par grub pa la de thog mar 'gro ba'i phyir ro zhes gsungs te/ de ltar bya ba ni bdag gi don du 'phags pa rnams kyi sku gsung thugs kyi dngos grub sgrub pa dang gzhan gyi don du 'gro ba rnams la phan gdags par bya ba yang dam tshig bsrung ba la sogs pa de dag thog mar 'gro ba yin pa'i phyir na de ltar bya'o zhes bshad do//dam tshig kyang skabs 'dir ni 'bras bu 'dod pa rnams kyis mi 'da' bar byas pas zhes pa ni/ dam tshig ces brjod pa yang theg pa gzhan gyi gnas skabs su don ji ltar bshad pa yang yod mod kyi sngags kyi gnas skabs 'dir ni sangs rgyas dang byang chub sems dpa' rnams kyi sku gsung thugs kyi dngos grub thob par 'dod pa'i sgrub pa po rnams kyis ji ltar khas blangs pa de las mi nyams par bsrung ba ni mi 'da' bar bya ba yin pas des rang gi lhag pa'i lha mnyes par 'gyur ba dang rjes su mthun pa'i zhes pa ni lha de dang rjes su mthun pa'am/rnam gcig tu dge ba'i phyogs dang rjes su mthun pa'o/ /lus dang ngag dang yid kyi spyod pa zhes pa ni/ sgo gsum gyi spyod pa dge ba bcu dang / mi dge ba bcu dang /sogs kyi sgras de gnyi ga'i phyogs na rigs mthun par gyur pa'i las gzhan rnams sdud par byed pa'o/ /'jug pa dang ldog pa'i mtshan nyid de zhes pa ni/ lha dang rjes su mthun pa dang dam tshig khas blangs pa dang rjes su mthun par dge ba la 'jug cing mi dge ba la sogs pa'i mtshan nyid de/de ltar bya ba ni ston pas gsungs pa'i tshul gyis khyad par ro zhes bdud rtsi dpung bzangs kyi rgyud las gsungs so/ /kun thob cing grol ba'am/ 'dis kun rtogs shing chud par 'gyur bas na zhes pa ni/ gong du bshad pa bzhin no//de ltar bstan pa'i dam tshig de dag kyang rnam pa gnyis su bshad de/ gang zhe na dam tshig bstan pa de yang lha thams cad dang thun mong ba dang zhes pa ni/ dkyil 'khor gyi lha thams cad spyir sgom pa'i dam tshig go/ /khyad par du 'jug pa zhes pa ni/ dkyil 'khor gyi lha de dag gi nang nas rigs gang yang rung ba'i sems dpa' gcig kho na sgom na spyi'i dam tshig las khyad par du bstan pa dang gnyis la bya ste/rgyud 'di dang zhes pa ni rtsa ba'i rgyud chen po dpal de kho na nyid bsdus pa'i rgyud do/ /de las gzhan pa zhes pa ni de dang cha mthun par gyur pa'i rgyud gzhan te/dpal mchog dang po dang rdo rje rtse mo zhes pa ni/ rgyud nyid kyi mtshan no/ /sogs kyi sgras ni rtog pa bsdus pa la sogs pa gzhan dag sdud par byed do/ /de rnams las bshad par rig par bya'o/ /de gnyis las zhes pa ni/ spyi dang khyad par gsungs pa'i dam tshig ste/de gnyis las rgyud gzhan las gsungs pa zhes pa ni/ rtsa ba'i rgyud las gzhan du gyur pa'i rgyud yin pas na de skad bya'o/ /lha thams cad thun mong ba de re zhig bshad par bya ste zhes pa ni/ lha thams cad kyi thun mong ba'i dam tshig de sngar je la bstan par bya'o zhes so//rgol ba po na re/ de kho na nyid bsdus pa ni rtsa ba'i rgyud chen po yin pas/ sbyor ba'i rgyud chen po thams cad kyi don 'dus par bstan pa yin pas/ dam tshig thams cad kyang der 'dus par mngon na/ ci'i phyir rgyud gzhan dag gi dam tshig rnams 'dir sbyar nas ston pa mi 'gal lam zhe na/smras pa/ de ltar bstan pa 'gal ba med do/ /gang gi phyir zhe na/ de yang don gyi rjes su brtags na zhes bya ba la sogs pa dag ste 'di ltar rgyud gzhan las dam tshig gsungs pa de yang don gyi rjes su brtags na/ 'di nyid kyi nang du 'dus par mngon te zhes pa ni/de kho na nyid bsdus pa nyid kyi nang du gsungs pa'i dam tshig gi nang du 'dus par mngon te/ de bas na 'di ltar 'di dag spyi'i dam tshig 'byung ba dpal mchog dang po las gsungs pa/ dam tshig sdom pa grub pa 'di/ /rtag tu khyed kyis bsrung bar bya/ / sangs rgyas kun gyis mthun par gsungs/ /dam pa rtag pa'i bka' yin no/ /zhes bya ba la sogs pa gsungs te/ de la dam tshig sdom pa grub pa 'di zhes pa ni rdo rje dbyings la sogs pa'i dkyil 'khor ji lta ba bzhin du bris nas slob ma dkyil 'khor du bzung cing dam tshig bstan pa'i tshe sgom pa'i tshig ste/dam tshig ni dam tshig gi phyag rgya la sogs pa'o/ /sdom pa ni lus ngag yid gsum gyi sgo nas bsrung dgos par bstan pa'o/ /grub pa ni don de dang 'gal na dngos grub pas rtag tu khyed kyis dam tshig bsrung bar bya dgos so//sangs rgyas rnams kyis mthun par gsungs/ /zhes pa ni/ de ltar dam tshig bsrung ba'i tshig bstan pa de yang gyi na'i tshig ma yin gyi/ sangs rgyas kyi zhal nas gsungs pa yin la/ sangs rgyas kyang gcig pu kho nas gsungs pa ma yin gyi/ dus gsum gyi sangs rgyas kun gyis mthun par de skad gsungs te/dam pa rtag pa'i bka' yin no/ /zhes pa ni de bzhin gshegs pa rnams la bya'o/ /dam tshig bsrung ba'i rnam grangs te/ /byang chub sems ni gtang mi bya/ /zhes pa ni/ rnam par snang mdzad kyi rgyud las gsungs pa/ lag na rdo rje chos thams cad kyi rang bzhin gang yin pa de ni chos nyid do/ /chos nyid gang yin pa ni ma skyes pa'o/ /ma skyes pa gang yin pa de ni byang chub kyi sems yin no zhes bshad pa lta bu la bya ste/ de la yang rnam pa gnyis te/ don dam pa dang kun rdzob byang chub kyi sems so//kun rdzob byang chub kyi sems la yang rnam pa lnga ste/ rtsom pa dang rtsol ba dang 'jug pa dang / gnas pa dang / ldang ba'o/ /de la rtsom pa ni bdag bla na med pa'i byang chub 'dod pa'i phyir de lta bur gyur cig par smon pa'o/ /rtsol ba ni lung dang rigs pa la brten cing bsam pa'i shes rab kyis chos bdag med pa la mos pa ste stong pa nyid du rtsol ba'o//'jug pa ni chos bdag med pa de ni rang gis nyams su myong bar 'jug pa'o/ /gnas pa ni nyams su myong ba de'i don de la mi g.yo bar rtse gcig tu gnas pa'o/ /ldang ba ni gnas pa'i don de las langs nas 'gro ba'i don la 'jug par byed pa ste/don de dag gtang bar mi bya zhes pa'i don to/ /gzhan dag na re de ltar yin mod kyi 'on kyang 'di'i skabs su ni bdag nyid sku phyag rgya chen po'i ngang du brtags pa'i spyod yul lha'i dkyil 'khor du snang ba'i ba spu'i bu ga rnams nas sprul pa mang po'i tshogs byung bas 'gro ba'i don byed pa ni byang chub kyi sems so//de yang phyag rgya mtshan mar gsal ba ni kun rdzob bo/ /de rang gi ngo bos stong ste mtshan ma med pa las ma g.yos te gnyis su dbyer med pa ni don dam pa byang chub sems te/ de lta bu dag gtang bar mi bya zhes zer na de gnyis gang du'ang 'gal ba med de/tha mi dad pas ni de dag la gnas par bya zhes pa'i tha tshig go/ /phyag rgya rdo rje gang yin pa/ /zhes pa ni/ byang chub sems dpa' de'i gzugs brnyan thams cad mkhyen pa'i thugs ye shes kyi mtshan ma ni ye shes rdo rje'i gzugs phyag rgya rdo rjer bstan pa ste/de yang gong du cha mthun pa zhes bshad pa'i don gyis byang chub sems kyi mtshan ma 'di yin par shes par bya'o/ /de'i yon tan ji lta bu zhe na/ 'di ltar shes par bya ste/ gang dag bskyed pa tsam gyis su/ /zhes pa ni/byang chub sems kyi mtshan nyid de lta bu de la bskyed pa tsam gyis gdon mi za bar bla na med pa'i byang chub thob par bstan pas na/ sangs rgyas nyid du nges par 'grub/ /ces pa'o/ /dam pa'i chos ni mi smad cing / /zhes pa ni/ ma rtogs pa dang / ma gus pa dang / dbang za ba'i bsam pas chos dang chos kyi gzugs brnyan du gyur pa la smad par mi rung zhes/gzhan du na 'bras bu rdo rje'i theg par gsungs pa'i don zab cing rgya che ba rnams phal gyis rtogs par dka' ba'i phyir/ de dag la smad pa dang skur ba mi bya'o/ /nam yang gtang bar mi bya'o//zhes pa ni dam pa'i chos dang de'i gzugs brnyan du gyur pa dag la smad par mi rung zhes bshad na gtang ba lta ci smos te/ /de bzhin gshegs pa'i bstan pa la zhugs pa'i brtul zhugs gtang nas gzhan gyi lta ba 'dzin par byed pa'am/ gsang sngags kyi don de kho nyid bor nas theg pa dman pa la 'jug pa'i blo skyed pa dag spang bar bya'o//mi shes pa'am rmongs pa yis/ /zhes pa ni/ snying po dang / phyag rgya dang / sngags dang rigs pa la sogs pa de kho na nyid kyi don mi shes pa'am rgyud mnyan pa la sogs pa'i thos pa ma skyes pas dam tshig dang sdom pa'i bye brag la rmongs pa/sngags dang phyag rgya la sogs pas dbang ma bskur bar slob dpon du khas 'che ba dag gis so/ /tshul chen bstan par mi bya'o/ /zhes pa ni/ sngags dang phyag rgya dang dam tshig dang dkyil 'khor la sogs pa 'byung ba'i rgyud bstan par mi bya'o//rnam pa gcig tu dam tshig med pa la sogs pa'i gang zag gzhan la mi bstan te gsang bar bya'o/ /bdag nyid yongs su spangs nas su/ /zhes pa ni/ phyag rgya chen po la sogs pa bsgrub pa'i sgrub pa pos des bdag nyid kyis lus kyi bde ba spangs te/dka' thub dang brtul zhugs drag pos lus gdung zhing nyon mongs par mi bya bas na/ dka' thub kyis kyang ma gdung shig /ces bya'o/ /'o na ji ltar bya zhe na/ ci bde bar ni bde bar gzung / zhes te/ kha na ma tho ba med pa'i zas skom dang /sman la sogs pa ci bde ba'i yo byad rnams kyis rang gi lus bde bar gnas par bya ba la ni gzung zhes bya'o/ /'di ni ma byon rdzogs sangs rgyas/ /zhes pa de ltar byed pa'i sgrub pa po 'di ni dus phyi ma la sangs rgyas par 'gyur bas na/ de skad brjod do/ / slob dpon smad par mi bya zhing / /'di ni sangs rgyas kun dang 'dra/ /zhes pa ni/ de bzhin gshegs pa rnams kyis gdul ba'i zhing tha dad pa rnams la rang rang gi skal ba ji lta ba bzhin du rim dang cig car gyi ngo bos rnam par grol ba'i sgo ston par mdzad pa dang 'dra bar slob dpon gyis kyang bdag nyid la yang dag pa'i don dang sgrub pa po'i dmigs pa dang /las dang bya ba'i thabs dang / rim pa ston par byed pa de gnyis chos mthun pa'i phyir na de skad ces bshad do/ /sangs rgyas kun mtshungs bla ma yi/ /slob dpon la ni gang smod pa/ /zhes bya ba la sogs pa'i tshig rnams ni slob dpon la smod par byed pa'i skyon bstan pa'o//dug dang dbyig dug ces pa la/ dug ni ha la ha la dang / nag po brtsegs pa dang / be'u lta bu'i dug go/ /dbyig dug ni thabs gzhan dang gzhan sbyar ba dang / rkyen mi mthun pa dang phrad pa las gyur pa ste/nye ba'i dug gi mtshan nyid do/ /rnam gcig la dug la sogs pa dang / sbyor ba'i dug gi bye brag gis dug dang dbyig dug ces bshad do/ /de bas na thams cad kyis zhes pa ni/ shes rab dang ting nge 'dzin gyi nan tan gyis rdo rje slob dpon de nyid bdag gang bsgom pa'i lhag pa'i lha dang tha mi dad cing bye brag med par blta'o//dge ba rab tu mi spyoms pa/ /zhes pa ni/ rdo rje slob dpon de'i yon tan gyi rnal 'byor pa dag ni brjod cing bsgrags la/ skyon du gzung ba dag yod pa dag ni spa zhing bcab par bya ba yin pa las de las bzlog pa la ni mi spyoms pa zhes bya'o//rtag tu bdag gi dam tshig bsrung / /zhes pa ni/ gong du bstan pa ltar bya ba'i las de spang ba'o/ /gzhan yang dpal mchog dang po'i rgyud de nyid las/ dpal rdo rje sems dpa' bdag nyid chen po'i dam tshig gi rang bzhin dang / de bsgom par bya ba'i thabs gsungs pa/bcom ldan 'das rdo rje sems dpa' srid pa rnam par dag pa zhes pa ni/ dpal rdo rje sems dpa' nyid thugs rje chen po'i dbang gis khams gsum gyi srid pa ni 'gro ba'i don mdzad kyang srid pa gsum gyi skyon dang nyon mongs pas ma gos pas srid pa rnam par dag pa ni dpal rdo rje sems dpa'o//rgol ba po na re/ de bzhin gshegs pa dang / byang chub sems dpa'i gang gis 'khor ba ni 'gro ba'i don mdzad na yang de dag 'khor ba'i skyon gyis mi gos so zhes 'byung na/ 'dir dpal rdo rje sems dpa' kho na 'di skad brjod pa gzhan gyis de ltar ma yin nam zhe na/smras pa gzhan gyis kyang de ltar nus so zhes 'byung ba de bden mod kyi/ 'on kyang de dag thams cad ni dpal rdo rje sems dpa' de'i rang bzhin dang khyad par las de ltar shes par bya ste/ ci'i phyir zhe na/ 'di nyid dang gzhan rnams kyi rgyud nas de ltar rgya cher ston pa dag 'byung ba'i phyir ro//thabs kyi mchog ces pa ni/ dpal rdo rje sems dpa' dam tshig gi rang bzhin du ston pa nyid thabs yin la/ sgo de nas sna tshogs 'dul bar mdzad pa'i mthu mnga' bas na mchog go/ / rtog pa thams cad kyi zhes pa ni/ chos kyi dbyings rnam par dag pa rtog pa med pa'i rang bzhin las dkyil 'khor dang phyag rgya bzhi la sogs par brtags te bzhag pas na rtog pa ste/ de yang ji ltar brtags she na/ rnam par mi rtog pa'i chos nyid ni rigs pas rtogs pa'i yul yin la/rtog pas brtags par gyur pa las ni de bzhin gshegs pa'i che ba'i yon tan gyi bdag nyid rgyud kyi rnam pa 'di lta bu dag 'byung ba yin la/ rgyud rtog pa med pa'i don la ni rnal 'byor pas rtogs pa'i bya ba'i yul yin te/ rgyud kyi don rtog pas brtags pa las 'jig rten las 'das pa'i dngos grub dang yon tan gyi rnam pa mang po dag thob cing 'grub pa'i phyir na/'di skad brjod de rtog pa'i cho ga zhib mo zhes bya ba'i don to/ /gsang ba chen po zhes pa ni/ don gzhan la tshig gzhan du ston pa ste/ 'gyur ba can du gyur ba'i ngo bo bas phal gyis go zhing dpags par dka' ba'i mtshan nyid dang ldan pa ste/de yang byang chub kyi sems rdo rje sems dpa'i dam tshig gi rang bzhin la gsang ba chen po zhes brjod de/ rtag tu bsgom par bya'o zhes pa ni gzhan du ma yengs par rtag tu brtson par bya'o zhes pa'i tha tshig go//rab tu gsang ba zhes pa ni/ dus gsum gyi de bzhin gshegs pa thams cad kyi rab tu gsang ba ni dpal rdo rje sems dpa'o/ /de'i gong na gzhan med pas na bla na med pa'o/ /theg pa chen po zhes pa ni theg pa chen po rgyur gyur pa ste/ de yang 'di kho na yin la de nyid thugs kyi rang bzhin yon tan kun gyi gzhir gyur pas na/dam tshig chen po zhes bya'o/ /rnal 'byor zhes pa yang de nyid do/ /bcom ldan 'das ni dam tshig go zhes pa yang de nyid yin te bsgom par bya'o zhes pa'i don to/ /de ji lta zhes pa ni de ci'i phyir zhes pa'i don to//dpal mchog dang po las kyang gsungs pa/ de bzhin gshegs pa kun gyis kyang / /zhes pa ni ma lus pas so/ /'da' ba ru ni mi mdzad pas/ /zhes pa ni dam tshig las 'da' bar mi nus pa'o/ /phyag rgya dam tshig ces su bshad/ /ces pa ni/ phyag rgya bzhi dag dang ldan par bsgom zhing gnas pa la 'di ltar bshad do//yid kyis lus ni brtan pa'i phyir/ /zhes pa ni/ de bzhin gshegs pa rnams kyi thugs la bya ste/ de nyid gzhan du mi 'gyur bas na brtan pa zhes bya'o/ /srid pa bde ba chung ngu zhes pa ni/ 'jig rten pa dag kha na ma tho ba dang bcas pa'i las kyis 'tsho bar byed pa'i yo byad phra mo tsam gyi bde ba la brten pa'o//sdug bsngal chen po zhi ba'i phyir/ /zhes pa ni/ de'i rnam par smin pa nyams su myong ba'i sdug bsngal bzod par dka' ba nyams su myong ba chen po ste/ de zhi bar bya ba'i phyir ro//shin tu bzang shing bde ba'i thabs/ /zhes pa ni/ shin tu bzang zhing bde ba ni mya ngan las 'das pa'o/ /bde ba chen po de thob pa'i thabs sam rgyur gyur pa ni dam tshig go/ /zhi bar mdzad pa'i dam tshig ces pa ni nyon mongs pa dang rtog pa thams cad zhi bar byed pa ni dam tshig gi rang bzhin 'di yin pas/de bas thams cad 'dod longs spyod/ /ces pa ni/ don de lta bas na sgrub pa po thams cad kyis byang chub kyi sems dga' ba de la ji ltar 'dod pa bzhin longs spyod pa'o/ /ji ltar 'dod pas de bzhin du spyad nas 'di ltar bya bar gsungs te gang zhe na/rang gi lha ni rnal 'byor gyis/ /bdag dang gzhan la mchod par bya/ /zhes pa ni/ sgrub pa po rang gi ji ltar 'dod pa'i dam tshig sems dpar bskyed de/ lha'i rnal 'byor du gnas pa'i ting nge 'dzin gyis mchod pa'i lha mo rnams kyis bdag nyid la yang mchod cing bdag gi mdun na ye shes sems dpa'i tshogs gnas par brtag pa mdun du byas pa la yang mchod par bya zhes gsungs so//gzhan dag na re 'o na 'dod pa zhes brjod pa ste/ 'jig rten pa dang 'phags pa'am theg pa so so'i 'dod pa ni mthun pa'i dbang gis ming gcig la dngos po tha dad par 'dod pa dag yod na/'dir gang la gzung bar bya zhe na/ smras pa/ 'dod pa zhes bya ba'i sgra yang zhes pa ni/ rnam pa mang por 'dod pa yang yod mod kyi zhes pa'i tha tshig go/ /skabs 'dir zhes pa ni/'on kyang zhes pa'i don te/ sgrub thabs 'di'i 'dod gzhung ngam/ rnal 'byor gyi rgyud 'di dag gi gzhung gis ni gzhan la mi bya ste/ rang gi lha nyid ces pa ni/ dpal rdo rje sems dpa'o/ /byang chub kyi sems 'dod pa chen po nyid ces pa ni rang bzhin byang chub kyi sems 'dod pa chen po las gyur pa'i ngo bo bas de'i mtshan nyid la 'di skad ces brjod do//'dod pa byang chub kyi sems de bsgrub cing thob par bya ba yin pas ni de la 'dod pa zhes kyang bya'o/ /byang chub kyi sems kyi rang bzhin nyid rdo rje sems dpa'o/ /de'i longs spyod ni rnam pa bzhi ste 'og nas gsungs so//byang chub kyi sems la dga' ba'i mtshan nyid rdo rje la gsang zhes pa ni/ me long lta bu'i ye shes kyis chos nyid dpal rdo rje sems dpa' yang chos kyi dbyings byang chub kyi rang bzhin las 'khor bar yang mi ldog mya ngan las 'da' bar yang mi 'gyur te/byang chub kyi sems de las gzhan du mi phyogs pa'i gzugs su gyur pas byang chub kyi sems la dga' ba'i chos nyid rdo rje la gsang zhes bya ba'i lha mor bstan pa ste/ 'dir byang chub sems dpa' dga' ba zhes brjod pa ni chos kyi dbyings ye shes kyis rtogs pa nas gnyis su med pa'i mtshan nyid do//de bzhin gshegs pa thams cad kyi ting nge 'dzin dang zhes pa ni/ mnyam pa nyid kyi ye shes kyis chos thams cad bdag gzhan du 'byed pa med cing mnyam pa nyid du rtogs te/ mnyam pa nyid kyi ye shes kyis chos thams cad stong pa nyid du dmigs pa las gyur pa'i mtshan nyid dpa' bar 'gro ba la sogs pa ting nge 'dzin gyi sgo mang po dang /stong pa nyid dang / mtshan ma med pa dang / smon pa med pa'i rnam par thar pa dang tshig gi gzungs dang chos kyi gzungs la sogs pa gzungs kyi sgo mang po rnams kyang zhi gnas dang /lhag mthong zung du 'brel pa'i don ston pa byang chub kyi yan lag bdun gyi ngo bo me tog gi phreng ba dang / gsung rab sgrogs pa'i mtshan nyid ces pa ni so sor kun du rtog pa'i ye shes kyis chos thams cad kyi mtshan nyid ji lta ba bzhin du rtogs nas ji ltar rtogs pa'i don de gsung rab yan lag bcu gnyis la sogs pa'i rnam par grol ba'i dbyangs kyis sgrogs par mdzad pa'i mtshan nyid rdo rje glu zhes bya bar bstan pa dang /sems can thams cad kyi don mdzad pa zhes bya'o/ /nan tan gyi ye shes kyis g.yeng sgrib mi mnga' ba'i brtson 'grus phun sum tshogs pas de bzhin gshegs pa rnams la mchod pa dang sems can thams cad kyi don mdzad pa dag /ji ltar gar mkhan gyis gar bsgyur ba'i mtshan nyid ci la yang thogs pa med pa bzhin du bdag gzhan gyi don brgya lhag phrad par mdzad pa'i mtshan nyid rdo rje gar rnams so//gzhan dag na re bcom ldan 'das kyi yon tan de rnams tshul gzhan gyis rnam par ston par mi mdzad nas/ ci'i phyir lha mo la sogs pa'i gzugs su ston pa mdzad/ de lta na ni 'dod chags dang bral ba gzhan gyis dpyas 'dogs shing nyid kyis gsungs pa'i don dang yang 'gal bar 'gyur ro zhe na smras pa/de yang bden mod kyi 'on kyang 'dod pa'i khams kyi dbang phyug chen po nyid 'dod pa'i yon tan gyi lha mo rnams la zhen cing bud med 'dus pa'i 'khor na gnas te 'dod pa'i khams su gtogs pa 'di ni bdag gi longs spyod las khyad par du gyur pa 'chang ba ni su yang med do ba'i nga rgyal sngon du gtong zhing gzhan dag khyad du gsod pa'i bsam pa dang ldan pas gzhan dag gis 'dul bar mi nus pa de gdul ba'i phyir dang /gzhan yang gnas de nyid kyi lha rnams sngon du bsags pa las grub pa'i longs spyod phun sum tshogs pa dang ldan pas gzhan las khyad 'dzud pa'i bsnyengs pa 'chang zhing phyis myong bar gyur pa'i rnam par smin pa'i bag chags stug po sog par byed pa de dag rang gi 'khor rnams la sun dbyung bar bya ba dang mi'i yul dag na yang ka bi na la sogs pa 'dod chags kyis myong ba'i bsam pa can gyi 'gro ba rigs mthun pa rnams gzhan gyis 'dul bar dka' ba dag la/sgo de nas 'dul ba'i thabs bstan pa'i phyir/ bcom ldan 'das kyis nyid kyi ye shes dang yon tan gyi sgo 'di lta bu'i lha mo'i skur bstan nas nyid kyi 'khor du bskor te bstan par zad kyi/sems can lta bu'i srid pa'i bdag nyid kyis chags pa ma yin pas na nyes pa dang 'gal ba med do/ /sku dang gsung dang thugs gsang ba/ /zhes pa ni sku de bzhin gshegs pa rnams la mnga' ba'i sku gsung thugs kyi gsang ba ste/de la sku'i gsang ba ni/ 'gro ba ji lta bur 'dul ba de lta bu'i gzugs su ston par spyod pa ni sku'i gsang ba ste/ dper na mdo sde las kyang tshangs pas 'dul ba dang / brgya byin gyis 'dul ba dang / 'khor los sgyur ba'i rgyal pos 'dul ba dang /dbang phyug chen pos 'dul ba dang / rab tu byung bas 'dul ba dang / drang srong gis 'dul ba dang / skyes pas 'dul ba dang / bud med kyis 'dul ba dang / bram zes 'dul ba dang / khyim bdag gis 'dul ba dang / glang po ches 'dul ba dang /rta cang shes kyis 'dul ba dang / tha na ri bong gis 'dul ba dag gis kyang de bzhin gshegs pa de lta bu'i tshul dang rnam par mthong zhes bya ba lta bu'o/ /gsung gi gsang ba ni 'gro ba rigs dang skal ba tha dad pa dag la de bzhin du so sor go ba'i bgo skal gyi chos ston pa ste/dper na mdo sde las/ /lha yi skad dang klu dang gnod sbyin skad/ /grul bum dag dang mi yi skad rnams dang / /'gro ba kun gyi sgra rnams ji bzhin par/ /thams cad skad du bdag gis chos bstan to/ /zhes gsungs pa lta bu'o/ /thugs thams cad mkhyen pa'i ye shes de nyid bzhed na ni dam tshig gi phyag rgya la sogs pa'i gzugs rnams su yang byin gyis rlob cing ston par mdzad la/mi bzhed na ni ji lta bu'i ngo bor yang mi gnas la/ mtshan ma med pa'i bdag nyid du zhugs pa'am/ rnam gcig phyi nang gi rnam pa dang shes pa'i rgyud ji lta ba bzhin du mkhyen pa ni thugs kyi gsang ba ste/dper na mdo sde las rigs kyi bu de lta bu de'i sems kyi rtog pa de bzhin gshegs pa'i thugs kyis mkhyen to/ /rigs kyi bu che ge mo zhig 'dul ba'i dus la bab nas der gshegs shing de lta bu mdzad pa lta bu dag go/ /mkhas pa yis ni bsrung bar bya//zhes pa ni sgrub pa po rnams kyis de dag de bzhin du bsgom par bya ba'i tha tshig go/ /de ltar bsgoms na ci 'grub ce na/ de bzhin du 'grub par gsungs so/ /de dag kyang rgyas par bshad do/ /de la dang po sku'i gsang ba'i mtshan nyid gsungs pa/ gang dag du ma rgyu chen po/ /zhes pa ni/ sna tshogs pa mnga' zhing rgya che bdag ston par mdzad pa'o/ /kha dog dang ni dbyibs dang gdan/ /zhes pa ni/ gser dang zangs lta bu la sogs pa'i kha dog dang / bram ze la sogs pa'i rigs su ston pa dang / rab tu byung ba dang khyim bdag la sogs pa'i cha lugs dang dbyibs che chung du ston pa dang /pad+ma dang / zla ba dang / seng ge la sogs pa'i gdan la bzhugs pa'o/ /phyag rgya bskyod pa la sogs gzugs 'di ni/ /zhes pa ni dam tshig dang las kyi phyag rgya 'dzin pa dang / 'chang ba dang / bskyod pa dang /zhabs mnyam pa'i skyil krung la sogs pa'i stang stabs dang ldan pa ste/ sna tshogs pa'i tshul du bzhugs zhes bya ba'i tha tshig ste/ de lta bur gzugs gcig las dngos po gzhan dang gzhan du ston par mdzad pa 'di ni sku'i gsang ba'o/ /gsung gi gsang ba'i mtshan nyid gsungs pa/rdo rje tshig gi sbyor ba yis/ /zhes pa ni/ so dang sor mchu dang mchur sbyar ba'o/ /smra ba zhes pa ni lces khrol bar smras pa'o/ /'di ni gsal bar gsung gsang ba/ /zhes pa ni/ mchu gnyis chung zad bsgul zhing yid la gsal bar brjod pa'o/ /rdo rje tshig ni sgra med pa//zhes pa ni/ bdag la gsal gyi gzhan gyis mi thos par brjod pa ste/ 'di ni gsung gi gsang ba'o/ /da ni thugs kyi gsang ba'i mtshan nyid gsungs pa/ rang gi sems ni rab rtogs nas/ /zhes pa ni rang gi sems rnam par brtags pa'i mthus/ glo bur gyi dri ma thams cad bsal nas/chos dang gang zag la bdag med par rtogs pa'i mtshan nyid sems nyid zla ba'i dkyil 'khor du snang ba'i steng na/ ye shes lnga'i rang bzhin rdo rje rtse lnga pa la sku gsung thugs kyi yig 'brus mtshon pa 'am/ rnam gcig gsum char tshang ba'i mtshan nyid dang ldan par bstan pa'o//de la zla ba dang rdo rje brtsegs mar bstan pa ni thabs dang shes rab kyi ngo bo yang yin la tshogs rnam pa gnyis rdzogs pa'i rtags su bstan te/ zla ba ni gzung 'dzin la sogs pa'i skyon dang bral zhing spros pa thams cad las dben pa'i ngo bor bstan to//rdo rje ni mi shes pa'i lta ba'i dra ba thams cad 'joms par byed pa'i mtshan nyid can te 'di ni thugs kyi gsang ba'o/ /rgol ba pa na re/ 'o na don de lta bu dag tshul ji ltar bsgrub par bya ste/ smras pa/ de dag de nyid mchog chen po/ /zhes pa ni/ de dag ni sku gsung thugs kyi gsang ba gsum po de dag go/ /de gnyis ni phyin ci ma log pa'i mtshan nyid de kho na ltar sgom pa ste/ nor ba dgag pa'o/ /mchog ni 'jig rten las 'das pa kun gyi mchog tu gyur pas so/ /chen po ni nyan thos dang rang rgyal ba rnams las khyad par du gyur pa ste/de lta bu'i don dang ldan pas de ltar brjod do/ /rtag tu yang dang yang bsgoms na/ /zhes pa ni/ de ltar bstan pa'i don de dus rtag tu yang dang yang du bsgoms na 'grub par bstan pa ste/ 'dis ni le lo dgag pa ste/ cung zad tsam gyis mi 'grub par bstan to//gsum gyi sbyor bas 'grub par 'gyur te zhes pa ni/ sku gsung thugs kyi sbyor ba de'i tshul du bsgoms pa kho nas 'grub par bstan pa ste/ thabs gzhan gyi tshul du bsgrub pa dgag pa'o/ /gzhan du ma yin kun mkhyen gsungs/ /zhes pa ni/ de kho na ltar bya'i de las gzhan du byas na mi 'grub kyi 'di bzhin du bsgrub par bya'o zhes yid ches pa'i khungs bstan pa'o//da ni de dag gi yon tan gsungs pa/ gsang ba gsung gi cho ga yis/ /zhes pa ni gong du bstan pa'i don de cho ga ni las dang bya ba dang bsgom pa'o/ / phyag rgya thams cad shin tu bsdus/ /zhes pa ni/ las kyi phyag rgya la sogs pa bzhir bstan pa de dag rgyu 'bras bu bcas pa thams cad gsang ba gsum po der 'dus par bstan to/ /de bas rnam pa thams cad du/ /zhes pa ni spyod lam rnam pa bzhir de dag dang ldan par lha'i rnal 'byor du bsgom pa'o//rnam par spa zhes pa ni gzhan gyis mi rtogs par tshul de bzhin bsgom pa la ni spa ba zhes bshad do/ /rgol ba pa na re/ 'o na de dag de ltar ma nus shing gzhan la bstan na cir 'gyur zhe na/ smras pa/ rdo rje chen po mchog 'dzin pa/ zhes bya ba la sogs pa dag ste/ye shes rdo rje lta bu'i mchog 'dzin pa'o/ /mgon po chen pos byin gyis brlabs/ /zhes pa ni bcom ldan 'das phyag na rdo rje'o/ /blo ngan gang zhig 'da' ba ni gsang ba gsum gyi don dang mi ldan pa ste/ mnos nas nyams par byas pa'o/ /rdo rje 'dzin pas mod la stong //zhes pa ni/ de ltar nyams par byas ma thag tu byin gyis rlob par mi mdzad pa'o/ /rnam gcig rdo rje po'i mchog 'dzin cing / mgon po chen pos byin gyis brlabs pa ni gsang ba kun gyi don dang ldan pa'i sgrub bo'o/ /blo ngan gang zhig 'da' ba ni de dang bral bar gyur pa ste/de ni rdo rje 'dzin chen pos de nyid du mod la spong bar gsungs so/ /'o na spangs su zad nyes pa gzhan du cang 'gyur zhe na/ spangs pa'i sems can chen po de/ /zhes bya ba la sogs pa'i tshig gsungs so/ /'o na de ltar sba bar bya ba yin nam/'on te gzhan dag la bstan par bya ba'i snod kyang yod ce na smras pa/ thad kar sba bar bya ba yang ma yin gyi bstan par snang ba'i snod gsungs pa/ rdo rje dbyings ni dga' chen por/ /zhes bya ba la sogs pa dag ste/ rdo rje dbyings kyi dkyil 'khor chen po ni shin tu bsod nams chen po dang ldan pas snod dang ldan mi ldan brtag mi dgos te/gang zhig gang yang rung ba dag zhugs par gyur pa slob dpon la sgrib par mi 'gyur zhing zhugs pa de yang 'jig rten dang 'jig rten las 'das pa'i dga' ba rnam pa gnyis dang ldan bar 'gyur bas mtshan dga' ba chen po zhes brjod do//mngon par dbang bskur mkhas pa gang / /zhes pa ni/ der bcug cing bum pa la sogs pa'i dbang gi rim pa rgyud gzhan las gsungs pa dang / 'di nyid las rdo rje dbyings dbang la sogs pa phyag rgya'i phreng ba yis zhes bya ba la sogs pa'i tshig dang don du ldan pa'i sngags dang phyag rgyas mngon par dbang bskur ba las dang bya ba dang /rgyud kyi las la mkhas pa rtag tu gsang ba gsum gyi don dang ldan pa'i mtshan nyid can de la/ dge ba'i bshes gnyen mkhas pa dag gis bstan cing bshad par bya'o//de la gsang ba'i mchog dang ldan/ /zhes pa ni/ gong gi yon tan dang ldan pa yang yin la/ gsang ba gsum dpog tu rung ba'i mtshan nyid dang ldan pa la de skad brjod do/ /rgol ba po na re/ 'o na sgo gsum gyi yon tan dang mi ldan pa ni 'ga' tsam du zad kyi/ phal du de dang de'i cha shas su 'brel pa dag yod na/ de dag la ni gsang ba zhes mi brjod na 'di dag la gsang ba zhes brjod pa ci'i phyir zhe na/ smras pa sgo gsum gyi mtshan nyid dang ldan pa dag yod na yang yon tan de lta bu mnga' ba ni bdag nyid chen po rnams las ma gtogs pa gzhan na nyung bas gang gis kyang de lta bu dag rtogs par mi nus na nyams su myong zhing mngon du gyur pa lta ci smos te/gang dang yang thun mong du ma gyur pas na gsang ba zhes brjod do/ /ji skad du gsungs pa'i dam tshig la gnas pa ni zhes pa ni gong du bstan pa'i don de kho na dang ldan pa'o//rtag tu nang ni sbyangs pa'i phyir/ /zhes pa ni/ gsang ba gsum dang ldan pa'i rnal 'byor la gnas pa ni nyes pa gzhan dang mi ldan pas na nang sbyangs pa'o/ /phyi rol gyi khrus la sogs pa zhes pa ni/ 'jig rten pa'i lam sgrub pas bdag ces bya ba'i rdzas can kha lo sgyur ba'i byed pa por lta ba de dag par 'dod pa'i phyir khrus byed pa dang /theg pa 'og ma pa ltar brjod pa gzhan zhig yod par 'dod pa de mnyes par bya ba'i phyir khrus dang gtsang sbra byed pa dang / dka' spyad ces pa ni/ theg pa 'og ma pa dang 'jig rten pa dag ni dka' thub dang brtul shugs drag pos 'tsho zhing sbyangs pa'i yon tan gyi grangs su bgrang bas gnas pas rang gi lus ngal zhing nyon mongs pa'i gdung ba pa gnod par gyur pa'i de dag dgag pa ste/sogs kyi sgras ni brtul zhugs kyi rnam grangs gzhan ji snyed yod pa dag bsdu'o/ /de ltar yang rtog pa bsdus pa las gsungs pa/bsdam dang gtsang sbra 'dir mi dgos/ /zhes pa ni/ lus ngag gi sgo bsdam pa dang / khrus la sogs pas gtsang sbra byed pa dag lha'i rnal 'byor sgom pa'i skabs 'dir mi dgos te dgag go/ /dka' thub drag po spyod pa yang dgag go//'o na cis 'grub ce na/ sangs rgyas kun dang sems dpa' che/ /zhes pa ni/ sangs rgyas lnga dag dang ye shes kyi sems dpa' bcu drug po dag go/ /bdag tu sbyor bas 'grub par 'gyur/ /zhes pa ni/ de dag kun las gcig gzung yang rung ste/ lha'i sku gsung thugs kyi gsang ba gsum dang ldan par bdag gi lus ngag yid gsum bsgom pa la ni bdag tu sbyor ba zhes bya ste/des 'grub par 'gyur zhes gsungs so/ /yang rtog pa thams cad bsdus pa nyid las 'di skad gsungs te/ byang chub sems dpa' thabs dang shes rab kyi bdag nyid rdo rje dril bu dang /dkon mchog gsum dang / khrims dang ldan yang rung ral yang rung ste/ dad cing 'dun pa mi gtong ba dang / sdom pa rnam pa gsum po dag mi gtong zhing dka' thub la sogs pas ni bdag gdung bar mi bya'o zhes bshad do/ /rgol ba pa na re/ 'o na gong du ni sdom pa mi gtong bar bshad la/ 'dir ni bdag gdung bar mi bya bar bshad pa 'di gdung ba'i rgyu ni sdom pa yin na 'di ltar bshad pa ci'i phyir zhe na/ smras pa/ dgag par bstan pa ni 'jig rten pa'i dka' thub lta bu don med pa de dag kyang dgag la/ theg pa 'og ma pa lta bu'i rang don lhur len pa'i phyir 'bad rtsol byed pa de dgag pa dang /gnyis can du 'dzin pa'i lta ba can de dgag pa dang / sems kyi dbang btang nas lus ngag gi dbang du 'dod pa de dag spangs te 'dir de dag las bzlog cing sems kho na gtsor bstan pa yang yin la/ gnyis sun mi gtong bar bstan la de dag kho na sdom pas de ltar byas na gzhan spyad mi dgos par bstan pa'i phyir 'di ltar bshad de nyes pa med do//slob dpon la ni ma smod cig /ces bya ba la sogs pa 'di na mar yang bsrung bar bya ba'i rnam grangs te/ slob dpon sangs rgyas dang 'dra bas de la smad par mi bya'o//ma gus pa dang dbang zos pa'i skyon du 'gyur bas/ sngags dang phyag rgya mi smad pa dang / 'khor lo dang rdo rje dang pad+ma dang sogs kyi sgras de las gzhan pa dbyibs gang yang rung bar byas pa'i phyag rgya'i dbyibs dang mtshan mar byas pa dag mi bgom pa dang /bca' ba'i rnam pa las byas pa'i gzugs brnyan mthong na mi bza' ba dang / dman ma zhes pa ni me tog gi phreng ba rnying pa la mi 'gom pa dang / lha'i grib ma la mi 'gom pa dang / slob dpon gyi stan la mi 'dug pa dang / rkang pas 'gom par bya ba dang / sgo gsum nas mi dge ba bcu spang zhing dge ba bcu la gnas par bya'o zhes gsungs so//yul dang dus kyi dbang gis zhes pa ni/ yul sgrub la dmigs pa dang 'phags pa mchod pa'i dus so/ /rgol ba pa na re/ 'o na de dag de ltar bsrung ba yin nam 'on te gnang ba'i dbye bas yang yod ce na/smras pa/ yang yul dang dus kyi dbang gis mi 'gom pa 'gom pa'i dang zhes bya ba la sogs pa gsungs te/ rdo rje shugs kyi sngags rjod par byed pa dang / rdo rje sems dpa' la sogs pa'i phyag rgya chen po'i rnal 'byor la gnas pa'i sgrub pa po dag ni gnang ste/ de dag gi dbang gis byas na rnal 'byor la nyes par mi 'gyur ro/ /de ltar yang gtan tshigs rgyud las gsungs pa/ mi shes pa dang gti mug dang / de bzhin le lo'am mi dran pas/ rdo rje ri mo la sogs brdzis/ /nges par dam tshig nyams par 'gyur/ /zhes gsungs te/ rdo rje shugs kyi sngags mi shes pa dang / phyag rgya chen po'i don sgom pa dang / sngags zlos mi shes pa'i gti mug can dang / shes bzhin du le lo byed pa dang / bag med pa dag gis brdzis pa dang / 'goms par gyur na dam tshig nyams par 'gyur ro zhes gsungs so/ /de bas nan tan thams cad kyis zhes pa ni/dkyil 'khor 'bri dang / phyag rgya 'god cing las rtsom pa'i tshe/ nan tan gyis rdo rje shugs dang ldan par bya'o/ /brtag par bya zhes pa ni/ shes rab can gyis bsrung dgos par bstan to/ /khyad par du ni dkyil 'khor du'o zhes pa ni/ dkyil 'khor 'bri ba dang /dkyil 'khor du 'jug pa'i tshe lha'i mtshan ma la mi 'gom pa'i phyir khyad par du yang rdo rje shugs kyi sngags dang / phyag rgyar ldan par bya dgos par bstan to/ /rdo rje shugs ldan nyes mi 'gyur/ /zhes pa ni/ rdo rje shugs kyi yon tan te/ de dang ldan na nyes par mi 'gyur bar bshad do//phyag rgya'i rnal 'byor gyi dbang du byas nas kyang de bzhin du gsungs te zhes pa ni/ lha gang yang rung ba'i phyag rgya'i rnal 'byor la gnas pa dag gis ni brdzis pa dang / bgom pa byas kyang nyes par mi 'gyur te/ rdo rje shugs dang ldan pa dang 'dra'o/ / rdo rje shugs zhes bya ba'i sgra'i gnas su phyag rgya'i rnal 'byor zhes bya ba'i sgra brjod par bya'o zhes pa ni/ gong du shugs zhes bya ba'i sgrar brjod pa bzhin du phyag rgya'i rnal 'byor yang de bzhin du shes par bya'o/ /ri mo'am rdo rje srad bu'ang rung / /zhes pa ni dkyil 'khor 'dri ba dang der 'jug par 'gyur na rdo rje shugs kyi sngags dang phyag rgya bcing zhing brjod pas ri mo dang thig dang tshon gyi srad bu dag yid kyis gyen tu bteg par bsams la 'byung 'jug byas na dam tshig nyams par mi 'gyur ro zhes gsungs so//badzra be ga a kra ma zhes pa ni rdo rje shugs kyi sngags te/rdo rje shugs kyis gnon zhes pa'i don to/ /rgyud gzhan las ni badzra badzra zhes smra zhes bya ba 'di ltar yang bshad do/ /phyag rgya'i sbyor ba gzhan dag kyang / /zhes pa ni/ de yang de kho na nyid bsdus pa'i gzhung 'di las grags pa ni phyis zhes te/ 'og nas bshad do//dpal mchog dang po la sogs pa/ gzhung gzhan las spyir smos pa ni 'di dag ste/ rang gi lha yi rnal 'byor gyis/ /zhes pa ni de bzhin gshegs pa lnga dang ye shes kyi sems dpa' chen po rnams las gang yang rung ba gcig rnal 'byor du byas nas lha thams cad kyang rnal 'byor du byas par 'gyur bas na/bdag nyid sangs rgyas thams cad dang byang chub sems dpa' nyid du 'gyur zhes bya'o/ /dper na byang chub kyi rang bzhin rdo rje sems dpa' kho na bsgoms pas kyang lha thams cad bsgoms par 'gyur ro/ /de bas 'di ni rab tu brtag /ces pa ni de bas lha'i rnal 'byor 'di ni rab tu brtag par bya ste/ rtag tu bsgom pa'i yin no/ /phyag rgya thams cad kyi sbyor ba rab tu gsang ba'o zhes pa ni ye shes kyi lha rnams bsgom par bya ba ni thabs phyag rgya chen po'i rnal 'byor spyir bstan pa 'di ni snod du ma gyur ba'i 'gro ba rnams dang /lha'i kha dog dang / dbyibs dang / mtshan ma la sogs pa de kho na nyid kyi sprul pa yin par mi shes pa rnams la gsang bar gsungs so/ /rnal 'byor gyi sgra yang de nyid du gtso bor bstan te zhes pa ni/ rnal 'byor zhes brjod pa'i sgras de yang dngos po de ltar bstan pa de kho na yin par 'dod de/dper na rdzas mang po bsdus pa la sbyor ba grub pa de bzhin du zhes pa ni/ dper na sman gyi rnam pa la sogs pa'i rdzas mang po bsdus pa la dngos po gcig tu grags pa dag yod pa de bzhin du phyag rgya thams cad bdag tu sbyor bas zhes pa ni/ phyag rgya bzhi'i tshul gyis de'i rang bzhin du bsgoms pas phyag rgya thams cad kyi rnal 'byor du byas pa yin te/ de'i dam tshig gi rnal 'byor zhes bya bar rgyud las gsungs so/ /phyag rgya kun du bdag sbyor bas/ /zhes pa ni/ phyag rgya bzhi'i rang bzhin du bdag sbyor ba byas pa'o/ / dbyibs dang cha lugs ni 'dra bar/ /zhes pa ni kha dog gi bye brag dang dbyibs kyi khyad par ro/ /bdag nyid la ni bdag nyid du/ /zhes pa ni bdag nyid ni bdag nyid dam tshig sems dpar bsgoms pa la bya'o/ /bdag nyid du zhes pa ni/ ye shes sems dpa' de gzhug par bya'o/ / yang dag bkod de rjes su bsgrub/ /ces pa ni/ bcug nas gnyis su med par byas la de'i rjes su bsgrub pa ste/ de yang gzhug pa'i thabs ni lcags kyu la sogs pa'i phyag rgya dang sngags su ldan pa'i cho ga'i rim pas bya bar gsungs so/ /sbyor ba'i rgyud gzhan las kyang gsungs pa/rdo rje sems dpar bdag sbyor ba/ /zhes pa ni/ bdag nyid rdo rje sems dpa'i ting nge 'dzin du sbyor ba'o/ /dbyibs dang cha lugs ci 'dra bar/ /zhes pa ni/ sku mdog dang phyag mtshan dang cha lugs so/ /phyag rgya kun du zhes pa ni phyag rgya bzhi po dag go/ /mi 'gyur dam pa zhes pa ni rdo rje sems dpa' mi 'gyur ba'i rang bzhin de 'grub par mi 'gyur ro zhes gsungs so//rjes su sgrub pa de yang de nyid las zhes pa ni/ gang nas rjes su bkod de rjes su bsgrub ces bstan pa de yang rgyud 'di nyid las rgyas par bshad de/ lha nyid gang dang gang dag gi//phyag rgya gang dang gang bcings pa/ /de dang de yi rnal 'byor gyis/ /phyag rgya de dang de 'grub bo/ /zhes gsungs pa ni/ /lha gang dang gang bsgrub par 'dod pa de nyid kyi phyag rgya gang dang gang yin pa bcings shing bsgoms na/ gang ltar bcings shing bsgoms pa'i lha de dang de'i rnal 'byor gyis gang 'dod pa de bsgrub ces bstan to//spyi'i dam tshig mdor bsdus pa zhes pa ni lha kun gyi thun mong gi dam tshig de gcig tu bsdus nas bstan pa'o/ /spyi'i dam tshig bshad zin to// //da ni khyad par gyi dam tshig gi don bshad par bya ste//de la yang rgol ba pa na re/ lha gang grangs med cing brjod kyis mi lang ba dag yod na de dag kun gyi dam tshig brjod na ni ji srid 'tsho ba'i bar du brjod pas kyang mi rdzogs par 'gyur la/ gal te 'ga' tsam kho na'i brjod na ni de'i sgra yang mi 'jug par 'gyur na/'di ltar brjod pa ji ltar ston par byed ce na/ smras pa/ gzhung 'di ltar lha so sor nges pa'i dam tshig bstan pas na/ dam tshig kyang rnam pa lngar gsungs so zhes brjod do/ /lha ji snyed po dag kyang grangs 'di ltar nges pa dam tshig kyang 'dir bzhin du gsungs so/ / yang rgol ba pa na re/ 'o na 'dir dam tshig lngar bstan pa 'di lha yang de ltar shes par bya ba yin nam zhe na/ smras pa/ gang gi phyir 'di la lha rnam pa lnga ste zhes bya ba la sogs pa gsungs te/ thams cad kyi bdag po bde bar gshegs pa zhes pa ni/ bde bar gshegs pa lnga gcig tu bsdus pa'i bdag nyid de bcom ldan 'das rnam par snang mdzad do//de las byung ba'i rigs zhes pa ni/ de bzhin gshegs pa'i rigs dpal rdo rje sems dpa' la sogs pa rnams te/ de dag ni de bzhin gshegs pa'i thugs ka nas byung ba'i phyir de las byung ba'i rigs zhes bya'o//rdo rje dang pad+ma dang rin po che'i rigs kyang de dag las byung ba'i phyir de ltar grags so/ /de ltar na lha rnam pa lngar bstan pa'i bye brag gis 'di ni bsdus te bstan par rig par bya'o/ /'o na rnam par snang mdzad la sogs pa la rigs lngar 'dod pa de dag dang mi mthun par ston pa ci'i phyir zhe na/smras pa/ de'ang mi mthun pa med de/ de rab tu phye ste bshad na zhes bya ba la sogs pa gsungs te/ de bzhin gshegs pa lnga rnams gcig tu gyur pa zhes pa ni bcom ldan 'das rnam par snang mdzad do/ / don lngar bshad pa rnam pa lngar brtags pa ste zhes pa ni/ rigs lnga'o zhes gong du bshad pa bzhin no/ /rgol ba pa na re/ 'o na de dag de ltar brjod pa ltar yin gyi gzhan du ni ma yin nam/ 'o na gzhan du 'dod pa dag kyang yod ce na/ smras pa/ de rnams so so las kyang rigs su gyur pas na/zhes bya ba la sogs pa gsungs te/ de bzhin gshegs pa'i rigs gcig pu las kyang rigs rnam pa lngar gyur pa yod do/ /rgol ba pa na re/ 'o na 'dir ni 'di ltar yang bstan la gzhan dag nas rigs mtha' yas so zhes kyang zer na/ de ltar ston pa ci'i phyir zhe na/smras pa/ gzhung chen po las ni de bzhin gshegs pa mtha' yas pa'i phyir de dag gi rigs kyang mtha' yas par srid do zhes gsungs te/ de kho na nyid bsdus pa'i 'bum sde stong phrag brgya pa las ni/ de bzhin gshegs pa mtha' yas bsam gyis mi khyab pas de dag gi rigs kyang grangs gcig dang du mar nges pa med de mtha' yas so zhes 'byung ngo //rgol ba pa na re/ 'o na de nyid las rigs lnga'o zhes kyang bshad na/ de gnyis mi mthun par ston pa 'gal bas skyon du 'gyur ro zhe na/ smras pa/ rigs sngar bshad pa yang bsdus te bshad pa nyid du bstan te zhes bya ba la sogs pa gsungs te/rigs rnam pa brgya'o zhes tshig tu brjod kyang don du rnam pa lnga las med do zhes bshad do/ /rgol ba pa na re/ 'o na de dag de ltar nges par brtag gam 'on te gzhan du 'gyur zhe na smras pa/ rdo rje dang pad+mo dang /rin po che'i rigs kyang re re las kyang dkyil 'khor rnam pa bzhi ste zhes bya ba la sogs pa gsungs te/ rdo rje'i rigs la yang dkyil 'khor rnam pa bzhir 'gyur la/ phyi ma'ang de bzhin du 'gyur bar shes par bya ste/ de la rdo rje'i rigs kyi dkyil 'khor bzhin 'jig rten gsum las rnam par rgyal ba dang /zhes par rdo rje rigs kyi dkyil 'khor chen por mi bskyod pa'i gnas na khams gsum rnam par rgyal ba zhes bya ba bzhugs nas khams gsum gyi sems can ma rungs pa'i gdug pa can dang / khams gsum gyi bdag po 'khor dang bcas pa 'dul ba'i phyir bstan pa'o//rdo rje dbang sgyur dang zhes pa ni/ rin chen 'byung ldan gyi gnas na rdo rje dbang sgyur zhes bya ba bzhugs nas chos kyi rgyal po chen po'i longs spyod la longs spyod par mdzad pa'o/ /rdo rje sde zhes pa ni snang ba mtha' yas kyi gnas na rdo rje sde zhes bya ba bzhugs nas gong du smos pa'i bde ba la longs spyod cing de dag gi mgon du gyur par mdzad pa'o//rdo rje dbab pa zhes pa ni/ gdon mi za bar grub pa'i gnas na rdo rje 'bebs pa zhes bya ba bzhugs nas bya ba nan tan gyi ye shes kyi rang bzhin/ lha ma rungs pa dang sems can thams cad 'dul bar mdzad pa ste/ 'di dag ni rdo rje'i rigs su gsungs pa'o/ /pad+ma'i rigs su bzhi gsungs pa la/ 'gro ba 'dul ba zhes pa ni pad+ma'i rigs kyi 'gro ba 'dul ba'i dkyil 'khor chen por mi bskyod pa la sogs pa'i sangs rgyas de dag ming dang mtshan ma gzhan du bstan pa ste/mi bskyod pa'i gnas na 'gro ba 'dul ba zhes bya ba bzhugs nas lha mi la sogs pa 'gro rnams 'dul bar mdzad pa'o/ /sangs rgyas thor tshugs zhes pa ni/ rin chen 'byung ba'i gnas na sangs rgyas thor tshugs zhes bya ba bzhugs nas rab tu dga' ba la sogs pa bcu pa rnams kyi gtso bo sangs rgyas kyi sar mdzad pa'o//ting nge 'dzin gyi pad+ma zhes pa ni/ snang ba mtha' yas kyi gnas na pad+mo'i ting nge 'dzin zhes bya ba bzhugs nas/ mnyam pa nyid kyi ye shes kyis chos thams cad rnam par dag par rtogs pa'i ye shes kyi rang bzhin du gyur pa'o//sna tshogs kyi pad+ma zhes pa ni gdon mi za bar grub pa'i gnas na sna tshogs kyi pad+ma'i mdung rtse zhes bya ba 'di bzhugs te/ sgo gsum gyi spyod pa sbyin pa la sogs pa pha rol tu phyin pa'i tshul du spyod par mdzad pa'o//rin po che'i rigs su bzhi gsungs pa la/ don thams cad grub pa zhes pa ni rin po che'i rigs don thams cad grub pa'i dkyil 'khor du mi bskyod pa'i gnas na 'gro ba 'dul ba zhes bya ba bzhugs nas 'gro ba ji ltar 'dul ba bzhin du don mdzad pa'o//rin chen lta ba zhes pa ni/ rin chen 'byung ba'i gnas na rin chen lta ba zhes bya ba bzhugs nas/ 'gro ba phongs pa rnams la re ba yongs su skong bar mdzad pa'i spyan gzigs pa'o/ /rin po che pad+ma zhes bya ba ni snang ba mtha' yas kyi gnas na rin chen pad+ma zhes bya ba bzhugs nas 'gro pa phongs par gyur pa'i nyes pa sel bar mdzad pa'o//rin chen dbab pa zhes pa ni/ gdon mi za bar grub pa'i gnas na rin chen 'bab pa zhes bya ba bzhugs nas dgos pa thams cad 'bebs par byed pa'o/ /rgol ba pa na re/ 'o na rigs bzhi dang dkyil 'khor bzhir bshad pa ci'i phyir zhe na/smras pa/ bsdus te bshad na ni rigs bzhir bshad de zhes bya ba la sogs pa gsungs te/ las kyi rigs ni rin po che'i rigs su 'dus par bstan to/ /rgol ba pa na re/ /'o na ci'i phyir der 'dus par ston zhe na/smras pa/ bla na med pa'i mtshan dang dpe byad rin po che sna tshogs pa'i mtshan nyid ces bya ba la sogs pa gsungs te/ de bas na de ltar bstan to/ /rgol ba pa na re/ 'o na gong du rigs kyi dbye ba rgyas par bstan zin na/ yang 'dir 'di ltar ston ci dgos she na/smras pa/ rdo rje rtse mo las ni ji ltar brtags pa'i bye brag de la brten nas zhes bya ba gsungs te/ ji ltar yo ga 'bum sde las gsungs pa de'i gzhung bzung nas las dang rin po che gnyis rigs so sor phye ba bstan pas rigs lnga zhes grags so/ /rgol ba pa na re/ 'o na bdud rtsi 'byung ba las ni rigs bzhi zhes 'byung bas de dang de dag kyang mi mthun par gyur pa ci'i phyir zhe na/smras pa/ bdud rtsi 'byung ba las ni de ltar brtags pa nyid las zhes bya ba la sogs pa gsungs te/ rdo rje'i rigs ni de bzhin gshegs pa'i rigs su 'dus par bstan pa ni rigs bzhir brjod do//rgol ba na re de ltar rigs bzhir bsdu ba ci dgos she na/ smras pa/ de ltar rnam pa des rgyud 'dir rigs bzhir bsdus pa'i de bzhin gshegs pa rnams kyi zhes bya ba la sogs pa gsungs te/ de ltar rigs mang por bshad pa'i rnam pa des ni rtsa ba'i rgyud 'dir rigs bzhir bsdus te/bstan pas de bzhin gshegs pa de dag gi sku mi zad par bkod pa dang / gsung mi zad par bkod pa dang / thugs mi zad par bkod pa dang / sbyor ba mi zad par bkod pa dag bstan pa'i phyir de skad brjod do/ /rgol ba pa na re/ 'o na rigs bzhi zhes brjod pas chog mod/de dag gi dkyil 'khor yang rnam pa bzhir ston pa 'phel 'grib tu gyur na ci 'gal zhe na/ smras pa/ de bzhin du rigs bzhi rnams la yang zhes bya ba la sogs pa gsungs te/ de ltar rigs bzhir brjod pa yang dkyil 'khor chen po bzhi 'byung ba dang /rim bzhin du sbyar te/ gzugs kyi skur bkod pa'i phyir zhes pa ni/ dang po rdo rje dbyings kyi dkyil 'khor bstan pa ni gzugs kyi sku phyag rgya chen po yongs su bkod pa'i phyir/ sku mi zad par bkod pa'i mdzod dang / rnam par sprul pa grangs med pa dag bsdus nas bstan pa ste/de bzhin gshegs pa'i rigs te sku'i dkyil 'khor dang sbyar ro/ /dam tshig gi dkyil 'khor ni zhes pa ste/ dam tshig gi dkyil 'khor bstan pa ni/ rdo rje'i rigs khams gsum rnam par rgyal ba'i dkyil 'khor te/ thugs ye shes kyis ji ltar rtogs pa'i rnam par grol ba'i sgo mtshon par byed pa'i dam tshig gi phyag rgya rnams der rnam par bkod pa'i nye ba'i mtshan nyid thugs mi zad pa rnam par bkod pa'i mdzod rnam par sprul pa grangs med pa dag bsdus nas bstan pa ste/thugs kyi dkyil 'khor dang sbyar ro/ /chos kyi dkyil 'khor zhes pa ni pad+mo'i rigs 'gro ba 'dul ba'i dkyil 'khor te gsung mi zad pa'i chos nyid rtogs pa'i don gzhan la ston pa'i thabs mtshon par byed pa'i chos kyi phyag rgya'i yig 'bru rnams su bkod pa ste/de bzhin gshegs pa'i gsung gi bdag nyid bsdus te bstan pa'o/ /de la thabs spyod pa zhes pa ni chos ston pa'i rgyu mtshon pa'o//mnyam par gzhag pa zhes pa ni chos kyi yi ge'o/ /rnam par bkod pa'i gnas pa zhes pa ni/ lha rnams kyi ngag la gnas pa yin la/ chos kyi dkyil 'khor gyi rgyu bkod pa'i gnas pa yang yin no/ /lha zhes pa ni de dag nyid do//de bzhin du las kyi dkyil 'khor yang zhes pa rin po che'i nang du las kyi rigs bsdus te/ de'i dkyil 'khor ni don thams cad grub pa'i dkyil 'khor te 'phags pa mchod pa dang / 'gro ba'i don byed pa'i lha dag bkod dmas/ de bzhin gshegs pa'i phrin las kyi bdag nyid bsdus nas bstan pa'o//rgol ba pa na re/ 'o na rnam pa 'di lta bu'i bye brag tu ston par byed pa 'brel pa can gyi mtshan nyid du mi rung ba yin nam/ de ni sems can yang de bzhin du 'gyur bar 'os na/ de ltar ma yin la/ gal te 'brel pa can gyi mtshan nyid du rung ba zhig yin par 'gyur na ni/'di ltar ston par mdzad ci'i phyir zhe na/ smras pa/ rim pa 'dis ni sku la sogs pa rnam pa bzhi'i gtso bor gyur pa'i phyir zhes bya ba la sogs gsungs te/ de la rim pa 'dis ni zhes pa ni sku la sogs par bstan pa'i rim pa 'di'o/ /sogs kyi sgras ni lhag ma gsum bsdu'o//dkyil 'khor rnam pa bzhir zhes pa ni/ de bas na dkyil 'khor yang rnam bzhi kho nar gsungs so/ /mod kyi zhes pa ni/ ma nges pa'i tshig go/ /'on kyang zhes pa ni de la sogs pa'i tshig ste/ lus med pa'i sems kyang mi srid la zhes bya ba dag go/ / dkyil 'khor so sor la yang zhes pa ni/ gong du bstan pa'i sku'i dkyil 'khor dang / gsung gi dkyil 'khor dang / thugs kyi dkyil 'khor dang / phrin las kyi dkyil 'khor so sor phye nas bstan pa de dag re re la yang so so nas sku gsung thugs dang phrin las bzhi char dgos par blta'o/ / rgol ba pa na re/ 'o na de ltar yin na/ de'i gtan tshigs ji lta bu yin pa de brjod dgos so zhe na/ smras pa/ de bas na rigs kyi dkyil 'khor thams cad du yang zhes bya ba la sogs pa gsungs te/ de la rigs kyi zhes pa ni so so'i rigs kyi dkyil 'khor thams cad do/ /sku la sogs pa'i zhes pa ni de dag tshang bar mnga' ba'i rtags sam/mtshan mar sku la sogs pa'i rim pa ji lta ba bzhin du phyag rgya chen po la sogs pa'i rim bzhin sgrub thabs 'dir 'chad do/ /rgol ba pa na re/ 'o na de lta bu'i rigs kyi dbye ba dang bsdu ba de dag rnam grangs su gleng bar byed ci dgos she na/smras pa de bas na sku la sogs pa'i lha rnams rigs bzhir gsungs pa de bzhin gshegs pa la sogs pa rnams mnyes par bya ba'i phyir/ rigs so so'i dam tshig spyod pa'i mtshan nyid rigs kyi bye brag las bsdus te bshad par bya'o zhes gsungs so/ /de la sku la sogs pa'i lha rnams zhes pa ni/sku phyag rgya chen po dang / gsung chos kyi phyag rgya dang / thugs dam tshig gi phyag rgyas bsdus pa'i lha rnams so/ /rigs bzhir gsungs pa zhes pa ni de nyid do/ /de bzhin gshegs pa la sogs pa'i zhes pa ni/ rigs bzhi'i de bzhin gshegs pa'o//sogs kyi sgras ni 'khor gzhan du sdud par byed pa'o/ /spyod pa'i mtshan nyid ces pa ni/ sgo gsum nas bsdam zhing bsrung bar bya ba yin pas de yang lus la sogs pa'i spyod pa'i mtshan nyid du bstan to/ /rigs kyi bye brag las zhes pa ni/ rigs bzhi bstan pa de dag gi so so'i dam tshig rgyud las ji skad gsungs pa de 'dir phyogs gcig tu bsdus te bshad par bya'o zhes gsungs te/ de dag gsal bar bstan pa'i phyir/ rigs kyi rnam par dbye ba yang bsdu ba dag rnam grangs su rgyas par gleng ba yin par rig par bya'o//'o na de ltar bstan par 'dod pa'i rigs so so'i dam tshig gi bye brag de dag ji lta bu kho nar 'dod ce na/ smras pa/ de la de bzhin gshegs pa rnams kyi dam tshig ni/ zhes bya ba la sogs pa gsungs te/ de bzhin gshegs pa rnams kyi dam tshig ces pa ni/de bzhin gshegs pa lngar brjod pa las dang por de bzhin gshegs pa'i rigs bzhi sngar ston pa'i dang por de bzhin gshegs pa'i rigs kyi dam tshig bstan pa/ gang dag 'dod chags snyoms 'jug pa/ /zhes pa ni sgrub pa po gang dag bden pa gnyis kyi byang chub kyi sems kyi don la gzhol zhing snyoms par 'jug pa'o//de ni 'dod chags nyid kyis sbyang / /zhes pa ni/ byang chub sems rnam gnyis la goms par byed cing de la rjes su chags pas 'gro ba smin pa dang / grol bar byed pa la ni sbyang zhes bya'o/ /'di ni sangs rgyas phyag rgya ste/ /zhes pa ni/ bden pa gnyis kyi don de kho na nyid thob cing rtogs par bya ba'i mtshan ma'am/ rtags sam brda la sogs pa'i mtshan nyid de lta bu dag bstan to/ /ye shes dam tshig yin par bshad/ /ces pa ni/ de ni ye shes kyi rang bzhin pas de bzhin gshegs pa rnams kyi dam tshig yin par bshad do//'dir 'dod chags la snyoms par 'jug pa zhes bya ba'i sgra ni zhes bya ba la sogs pa ni/ slob dpon gyis gong ma de'i don slar bkrol ba'i tshig ste/ chags par nan tan bya'o zhes pa ni snying rjes chags par bya zhing gzhan gyi don bya ba de dag la nan tan bya ste/de kho na sbyang ba yin par bshad do/ /de bzhin gshegs pa'i rigs kyis zhes pa ni de bzhin gshegs pa'i rigs rdo rje sems dpa' la sogs pa'i bshad pa'o/ /rnam gcig la la na re rdo rje dbyings kyi dkyil 'khor lha rnams kyi dam tshig yin zhes kyang zer ro//de yang gang zhe na/ 'dod la skyo bar mi bya ste/ /zhes pa ni/ nyan thos la sogs pa'i 'dod pa sdug bsngal ba dang / 'tshe ba dang / zug rngu dang 'dra ba'o zhes zer zhing spong bar byed de/ zhi ba phyogs gcig pa'i mthar gyur pa lta bu la mi bya ste/ byang chub kyi sems brtan ba dang /rjes su chags pa dang / 'gugs pa la sogs pa'i yon tan dang ldan pa 'og nas bshad pa'i mtshan nyid de la chags par bya ba'i dam tshig gi tshul chen po dang / de bzhin gshegs pa'i rigs kyi rnam par dag pa'i rang bzhin gyi dam tshig de lta bu la rgyal ba rnams kyang 'da' bar mi mdzad ces pa'i don to//'dod pa zhes bya ba'i sgra yang 'dir ni byang chub kyi sems nyid bstan pa dang zhes pa ni bden pa gnyis kyi byang chub sems mi 'gyur ba de sems can thams cad kyis 'thob par bya ba dang / bsgrub par bya ba'i mtshan nyid yin te/ de yang byang chub kyi sems mi 'gyur ba'i mtshan nyid rdo rje sems dpa' la sogs pa shar phyogs kyi gtso bo bzhi la bya'o//de la sogs pa'i sgra yang gong mas ni yon tan sdud par byed la 'og mas ni grangs kyi mtshan nyid sdud de/ 'dod cing mngon par 'dod par bya ba yin zhes pa ni/ de rnams la 'gro bas 'dod cing dad pa dang thob par bya ba yin zhes bya ba'i don to//sgra zhes pa ni sgra'i rnam pa du mar 'dod pa las 'dir ni byA ka ra Na'i sgras de ltar 'dod de/ sgra'i don gzhan du byung ba la yang de bzhin du sbyar bar bya'o/ /de bas na byang chub sems kyi rang bzhin zhes pa ni gzung 'dzin dang bral ba rnam par dag pa'i mtshan nyid do//bdag gi rnam par grol ba'i rjes su zhes pa ni/ de la zhen cing goms par bsgoms pa'o/ /rang gi lha'i ting nge 'dzin la skyo bar mi bya zhes pa ni/ de ltar bsgoms pa'i don de yang rang gi lhag pa'i lha'i ting nge 'dzin la bsgoms pas skyo bar mi bya ste/ji ltar bya zhe na/ nyin mtshan du zhes pa dag ste/ nyin mtshan du dus bzhi 'am spyod lam rnam pa bzhir ci nus par bsgom ste/ gal te dub par gyur na yang ngal bso zhing byang chub kyi sems dang lha'i ting nge 'dzin der bsam pa brtan par bya'o zhes bstan to//de ltar 'dod pa bcom ldan 'das rdo rje sems dpa' byang chub sems kyi rang bzhin yin par bshad pa de yang mdzad mkhan gyis rang bzor bstan pa ma yin te/ rgyud las 'di skad du 'dod pa bcom ldan zhes pa ni bcom ldan 'das rdo rje sems dpa' la bya ste/ byang chub kyi sems mi 'gyur ba'i rang bzhin du gnas pas rtag pa zhes brjod do/ /sems can thams cad bde ba stsol/ /zhes pa ni des ni sems can thams cad la 'jig rten dang / 'jig rten las 'das pa'i dngos grub stsol bar mdzad pa'i mtshan nyid can yin pas so//rdo rje sems dpa' bdag nyid ces/ zhes pa ni de ltar sems can la bde ba stsol ba de rdo rje sems dpa' bdag nyid yin zhes bstan to/ /bsgom pa ni rab tu 'grub par 'gyur/ /zhes pa ni/ de yang ting nge 'dzin gyis 'grub pa yin gyis gzhan ni ma yin par bstan pa'o/ / 'dod la sogs pa'i bde ba kun/ /zhes pa ni 'dod pa ste/ dpal rdo rje sems dpa' la sogs pa de dag bde ba thob pa'i rgyur gyur pa yin pas na de skad ces bya'o/ /rtag tu bdag nyid snying gar gnas/ /zhes pa ni/ de yang thugs kyi bdag nyid pas/ rtag tu bdag gi snying gar bsgom par bya ba yin pas so//bsgoms pas ci 'grub ce na/ e ma'o sems can don gyi phyir/ /zhes pa ni/ e dang 'o'i bar du ma bzhag pa ni don zhig ngo mtshar che bar ston pa ste/ lha la sogs pa'i sems can de dag khams gsum gyi nyon mongs pa las grol zhing //ma chags pa yang chags par bshad/ /ces pa ni mya ngan las 'da' ba'i rang bzhin ma chags pa'i ngo bor gyur kyang sems can gyi don du chags pa'i bdag nyid sku la sogs pa'i sna tshogs tshul du ston pa de ngo mtshar che'o/ /zhes pa'i don to/ /don 'di nyid ces pa ni de ltar ston pa'i don 'di nyid do//dam tshig chen po de kho na nyid kyi rtog pa las zhes pa ni/ de la 'di ltar bshad pa'i phyir 'dir yang 'di ltar bstan zhes pa'i don to/ /gzhung 'dis gsal bar bstan zhes pa ni/ 'og ma 'dis brda phrad par ston pa'o/ /sgrub pa po'i phyag rgya chen po dang ldan par bya ste zhes pa ni/sgrub pa'i rnal 'byor pa nyid phyag rgya chen po'i sbyor ba dang ldan par bya'o/ /'dod pa rnams la mi skyo bas so zhes pa ni/ bsgrub par bya ba ste/ de ni dpal rdo rje sems dpa' lha rnams skyo zhing yid 'byung bar mi byed pa'o/ /ci'i phyir skyo bar mi byed ce na/'dod pa zhes bya ba ni dpal rdo rje sems dpa'o zhes rgyud las rgya cher bstan pa'i phyir ro/ /rdo rje rigs kyi dam tshig bstan pa/ sems can don phyir mi khro ba/ /zhes bya ba la sogs pa gsungs te/ khong khro ba dang zhe sdang gi kun nas dkris pa'i mnar sems dang bral ba/de bzhin gshegs pa rnams ni 'gro ba la phan pa'i don ji lta bu dag mdzad na yang khro ba mi mnga' bas mdzad pa yin mod kyi/ 'on kyang gnas skabs kha cig tu khro bo chen po'i cha lugs 'jigs su rung ba dang / pha rol gnon par byed pa'i stobs dang ldan par rab tu ston cing 'gro ba rnams kyi don bsngags pa'i sgo nas mdzad pa yang yod de/de ni rdo rje rigs kyi dam tshig tu bshad do/ /'jig rten gsum las rnam par rgyal ba'i phyag rgya chen po'i zhes pa ni/ khro bo chen po 'jig rten gsum las rnam par rgyal ba'i sku phyag rgya chen po'i cha lugs yongs su rdzogs pa'i bdag nyid la bya ste/ji ltar rgyud las de bzhin gshegs pa thams cad gcig tu 'dug nas/ bcom ldan 'das de bzhin gshegs pa'i bdag po phyag na rdo rje la mtshan brgya rtsa brgyad pas bstod pa dang / phyag na rdo rjes de bzhin gshegs pa rnams kyis bstod pa'i tshig thos nas/phyag mtshan rdo rje'i bdag nyid kyis thugs kar bzhag nas/ bcom ldan 'das bdag gis ma 'tshal to zhes gsol ba dang / de bzhin gshegs pa thams cad kyis bka' stsal pa/ ci'i phyir zhes gsungs pa dang /bcom ldan 'das dbang phyug chen po'i la sogs pa khro zhing mthu che ba'i sems can ma rungs pa dag kyang mchis te de bzhin gshegs pa rnams kyis zhi bas 'dul bar mi spyod na/ bdag gis ji ltar bsgrub par bgyi zhes gsol ba dang / bcom ldan 'das rnam par snang mdzad mi bskyod pa la sogs pa'i de bzhin gshegs pa thams cad kyis byin gyi rlabs kyis/de bzhin gshegs pa thams cad kyi thabs chen bo rdo rje zhes bya ba'i ting nge 'dzin la snyoms par zhugs nas/ sangs rgyas bzhi la sogs pa phyogs bcur spros nas/de bzhin gshegs pa'i chos la bdag med pa'i ting nge 'dzin la dmigs nas/ rnam par snang mdzad kyi thugs ka'i dpal be'ur zhugs so/ /de rnams rnam par snang mdzad kyis sangs rgyas bzhi pa'i thugs dang bdag gi thugs tha mi dad par byin gyis brlabs te/sems can thams cad ngan song las bskyab pa dang / tshe 'di la phan pa dang / phyi ma la bde ba dang / bla na med pa'i byang chub tu 'grub par bya ba'i phyir/ de bzhin gshegs pa'i snying rje chen po'i thabs kyi ting nge 'dzin la dmigs te/ de bzhin gshegs pa'i snying rje chen po'i thabs kyi khro bo dam tshig rdo rje zhes bya ba'i ting nge 'dzin la snyoms par zhugs so//zhugs ma thag tu rnam par snang mdzad kyi thugs kar de bzhin gshegs pa mang po zhugs te/ gcig tu gyur nas de bzhin gshegs pa'i rdo rje dam tshig ces bya ba'i snying po hU~M zhes brjod pa las hU~M des phyag na rdo rje'i thugs byang chub kyi sems de bskul nas phyag na rdo rje'i skur gyur la/phyag na rdo rje'i thugs de las kyang sems dpa' chen po bcu drug po rnams byung nas/ de dag kyang bcom ldan 'das kyi thugs byang chub sems kun du bzang po rdo rje 'dzin pa de nyid sems dpa' chen po bcu drug por gyur te/kun du 'bar zhing me dpung 'bar ba chen po'i nang na bzhugs pa khro gnyer can gyi smin ma gcum zhing dpral ba bsnyer ba/ mche ba lhag ger byung zhing so gtsigs pa/ bcom ldan 'das 'jig rten gsum las rnam par rgyal ba de mdog in+d+ra nI la lta bu la phyag bzhi pa/phyag dang po gnyis hU~M mdzad kyi phyag rgya bcings te/ rdo rje dang dril bu 'dzin pa/ 'og ma gnyis na mda' gzhu bsnams te/ thabs dang shes rab kyi zhabs kyis 'dod chags dang zhe sdang dbang du mdzad pa'i phyir ma hA de ba dang / u ma'i snying ga dang nu ma'i bar du brdzis pa/sems dpa' de dag kyang rang rang gi phyag mtshan thogs pa/ rnam pa du ma'i kha dog dang sbrul la sogs pa rgyan sna tshogs kyi cha lugs can/ snying rje'i bdag nyid can sems dpa' chen po bcu drug po dag gi sku phyag rgya chen po byung nas/ 'jig rten gyi khams thams cad tu shin tu ma rungs pa rnams btul nas ri rab kyi rtse mo khang bu brtsegs pa'i nang nas/rnam par snang mdzad kyi phyogs kun du zla ba'i dkyil 'khor gyi steng du 'khod do/ /lha chen po la sogs pa ma rungs pa'i sems can rnams thabs kyis 'dul bar mdzad do/ / zhes rgya cher gsungs pa'i mtshan nyid de kho na las shes par bya'o/ /sogs kyi sgras ni chos dang las kyi dkyil 'khor la sogs pa gsungs pa'am/ de nyid kyi skabs nas 'byung ba'i chos kyi phyag rgya dang / dam tshig gi phyag rgya dang / las kyi phyag rgya dag sdud par byed do/ / khro bo 'chol pa dang bcas pa zhes pa ni de lta bu'i khro bo'i cha lugs su bsgom par bya ba'i ngo bo nyid du de ltar gnas pa ni ma yin no/ /ci'i phyir zhe na/ rgyud nyid las/ e ma thabs kyis 'dul ba yi/ /thabs chen ldan pa bdag yin te/ /gang phyir sems can 'dul thabs kyis//dri ma med pa khro bor gyur/ /zhes gsungs pa'i phyir ro/ /pad+ma'i rigs kyi dam tshig gsungs pa/ rang bzhin dag par shes nas ni/ don dam pa stong pa nyid kyi rang bzhin du bsgoms nas dngos po thams cad rnam par dag par shes par bya'o/ /dgos pa de dang de dag byed//ces pa ni/ kun rdzob de las langs nas phyag rgya chen po'i skur sbyor bar byed pa la sogs pa bya ste/ 'gro ba la ji ltar phan zhing bde ba'i don dang dgos pa gang yin pa de dang de dag byed pa'o/ /chos thams cad rnam pa med par mos pa ste zhes la ni/ lung dang rigs pa'i gtan tshigs sam gnyen po'i sgo nas de ltar mos par bya'o/ /de sngon du byas nas zhes pa ni/ don dam pa'i byang chub sems kyi ngo bo rnam par mi rtog pa'i bsgom pa de'o/ /rin po che'i rigs kyi dam tshig gsungs pa/ nyung ngam yang na mang yang rung / / zhes bya ba ni/ sbyin pa'i rnam pas gzhan sim par bya ba ste/ zas dang gos la sogs pa'i rim pa ci yod kyang rung ba'o/ /ji ltar 'dod pa zhes pa ni/ zhing so sos ji ltar 'dod pa bzhin sbyin pa'o/ /tshad ji tsam du zhe na/ rgyud gzhan las nyin re bzhin du dus drug tu'o/ /zhes gsungs so//gzhan dag na re 'o na 'di ltar bstan pa'i dam tshig 'di dag gcig gi ngo bo bsgom pa la kun bsrung dgos pa yin nam/ 'on te rang gi ngo bo bsgom pa dag la de bzhin du bsrung ba yin zhe na/ smras pa 'di dag ni dam tshig rnam pa lnga ste zhes bya ba la sogs pa dag ste/sngar gong du gnyis bstan pa dang 'og tu gsum bstan pa la/ rnam grangs lnga yod pas de ltar brjod do/ /lha rnam lngar mos pa'i phyir ro zhes pa ni de ltar bstan pa ni 'dir lha ni rnam pa lnga'o zhes bshad pa de dbang du byas nas de dang rjes su mthun par dam tshig kyang so so'i lnga kho na gtso bor bstan mod kyi/rigs de dag las gang yang rung ba zlos par 'dod pas kyang de lnga tshang bar bsrung dgos te/ bde bar gshegs pa las gzhan pa zhes bya ba la sogs pa ni bde bar gshegs pa las gzhan du phye ba'i rigs gzhan dag ji skad du gsungs pa'i lha'i bye brag rnams de ltar bstan yang de bzhin gshegs pa nyid kyi ngo bo kho na yin pas/rigs so sor bstan pa de dag gi dam tshig thams cad kyang bde bar gshegs pa'i dam tshig ngo bo yin pas na/ bde bar gshegs pa'i tshul gyi gsang sngags zlos pa rnams kyis kyang /dus gsum gyi rgyal ba thams cad la sgrub pa po bdag nyid kyi lus phul la lus phul ba des mnyes par gyur nas rgyal ba des gsungs pa de bzhin bya bar bdag nyid kyis khas blangs te/ don de dang mthun par bya ba la 'jug dgos pa'i phyir te/ de ltar bstan to zhes bshad do/ /rgol ba pa na re/ 'o na de bzhin gshegs pa rnams ni 'gro ba 'dul bar mdzad pa'i thabs mkhyen pa'i sgo nas rnam pa tha dad pa'i tshul kyis kyang 'gro ba 'dul bar mdzad pa yin na/ 'dir tshul 'di kho na ltar ston pa mdzad cing gzhan dag gis 'dul bar gyur pa'i thabs ston par mi mdzad pa ci'i phyir zhe na/smras pa/ de bzhin gshegs pa thams cad kyang / /zhes bya ba la sogs pa gsungs te/ dus gsum gyi de bzhin gshegs pa thams cad kyang sngon byang chub sems dpa'i spyad pa spyod pa na/ 'gro ba ma lus pa 'di dag sgrib pa rnam pa gnyis kyi dri ma stug pos yog cing sgrib pa de dag las byung ba'i 'dod chags la sogs pa dus gsum gyi nad kyis gzir ba gzigs nas/thugs rje'i dbang du zhes pa thugs rje'i zhing yin par dgongs pa'i thugs kyis sems can la la dag 'dod chags la sogs pa dus gsum gyi nyes pa'i skyon dang ldan pa kha cig ngo bo nyid kyis nyes pa'i skyon rnam par dag pa/thabs sam tshul 'di lta bus 'dul ba'i mngon du gyur pa'i yid dang ldan pa rnams la nyes pa'i skyon rab tu zhi ba nyid kyi cho ga 'dis yongs su dag par mdzad pa'i phyir 'di ltar bstan to//'o na rdo rje'i rigs kyi dam tshig khro bo chen po'i tshul du bstan zhes pa ci dgos/ thabs gzhan gyis byar mi rung ngam zhe na/ smras pa/ de yang 'dod chags la sogs pas sems shin tu dbang du byas pa kha cig la ni zhes te/ gong ma de las mtshan nyid gzhan du ston pa'i phyir na yang zhes smos so//sems can kha cig 'dod chags la sogs pa dug gsum gyis kun nas dkris pas rang dbang med par sems lhag par dbang du byas te/ ma rungs par gyur cig gzhan gyi ngag gi nyan te/ shin tu 'dul bar dka' ba'i 'gro ba kha cig la'o//bdag nyid rnam pa thams cad du/ /zhes pa ni de bzhin gshegs pa bdag nyid rnam pa thams cad du nyes pa'i skyon dang bral te khong khro ba la sogs pa mi mnga' na yang byang chub sems kyi rang bzhin la 'dod pa zhes bya ba dang / rang gi ngo bo las khro ba la sogs pa zhes bya ba'i ming dang cha lugs rnam pa gzhan du bsgyur zhing gdul bya so so dang mthun par bstan nas 'dod chags la sogs pas sems shin tu dbang du byas pa'o//nyes pa de dang de dag ji ltar 'tsham zhing rigs pa bzhin du yongs su spong bar byed du 'dzud do/ /'di ni de dag spyi'i don gyi mjug sdud par byed pa ste/de bas na rnal 'byor pa bde bar gshegs pa'i go 'phang thob par 'dod pa rnams kyis kyang zhes pa ni/ sgrub pa po bdag nyid la rdo rje sems dpa' la sogs pa de dag ji lta ba bzhin du bdag nyid kyis thob par 'dod pa rnams kyis kyang sems can gyi khams mtha' yas pa rnams kyi sgo gsum gyi nyes pa dang de las byung ba'i sgrib pa dang /bag la nyal gyi kun nas dkris pa rnams rnam par byang ba'i thabs dang / dpal rdo rje sems dpa' la sogs pa ye shes kyi sems dpa' rnams kyi mtshan nyid 'dod pa'i yon tan rnams la gzhan gyis mi 'phrogs shing brtan par chags pa'am/de dag gi rjes su chags shing zhen par bya ba'i nyan thos la sogs pa'i bsam pa de dag ni dgag par bstan to/ /rab tu bsdigs par bya'o zhes pa ni/ zhe sdang gis gzhan 'jigs pa bskyed par bya ba ma yin gyis/snying rje chen pos gzhan gyi nyes ba zad par bya ba'i phyir bsdigs par bya'o/ /byams pa'i yid du zhes pa 'di yang snying rje dang mi 'bral bar bya bar bstan pa'o/ /de bas na don de nyid bstan te gsungs pa/ las thams cad la yang chos thams cad kyi ngo bo nyid yang dag par bltas nas ma chags par bya'o zhes pa ni 'phags pa mchod cing sems can gyi don bya ba'i phyir las rnam pa bzhi po dag rtsom pa'am phyag rgya chen po la sogs pa bsgom na yang dang por chos thams cad dam pa de dag nyid rang gi ngo bo nyid rang bzhin gyis rnam par dag pa ste/bdag med pa stong pa nyid kyi tshul du bsgom par bya'o/ /de ni shes rab kyis don dam pa'i tshul du shes par bya'o/ /thabs kyis kun rdzob kyi bden pa mos pa zhes pa ni/ thabs thugs rje chen pos kun rdzob kyi bden pa la brten te/ mtshan ma'i phyag rgya'i rnam par gsal bar brtags la/'gro ba ma lus pa'i don bya ba dang / bsgrub pa'i don de la chags par byas te/ de ni thabs thugs rje chen pos kun rdzob kyi tshul du shes par bya'o/ /rnam gcig kun rdzob tu de ltar sgom yang don dam par rang gi ngo bo nyid rnam par dag pa'o snyam du yid ches par byas nas 'gro ba'i don spyod pa'o//'di na mar na rin po che'i rigs kyi dam tshig de nyid rnams ston pa ste/ bdag la sbyin par bya'o/ /dngos po mang du mi bdog pa'o/ /zhes pa ni/ sems zhum par mi bya zhing bdog pa chung bar gyur kyang yongs su gtang bar bya bar bstan pa'o//de bas na gang yang rung ba'i rigs la zhes pa ni/ rigs bzhi bor brjod pa de dag gang yang rung ba'o/ /rang gi lha zhes pa ni/ rang gis bsgrub par 'dod pa'i lha gang yang rung ba'o/ /rigs kyi rjes su mthun par zhes pa ni de dag bsgrub na gang sgrub pa de'i rigs de dang mthun pa'i rigs kyi dam tshig bsrung bar bya dgos so zhes bya bar bstan to//dam tshig 'di yang dam tshig gi phyag rgya sgrub pa'i tshe ni zhes pa ni/ de ltar bstan pa'i dam tshig gi bye brag 'di dag kyang spyir ni dus thams cad du bsrung dgos pa yin gyis kyang / khyad par du ni dam tshig gi phyag rgya sgrub pa'i tshe lhag par dam tshig rnams yid la bya zhing mi nyams par bsrung dgos so//'di dag ni dam tshig gi bye brag bsdus pa'o zhes pa ni/ lha rnam pa lnga yod par bshad pa'i so so'i dam tshig gi bye brag bstan pa rnams 'dir phyogs gcig tu bsdus nas ston par byed pas na 'di skad brjod do//de yan chad du spyi dang khyad par gyi dam tshig ji lta bu dag yin pa'i mtshan nyid rim par bshad zin to// //da ni ji ltar de bzhin gshegs pa'i dkyil 'khor du gsungs pa'i lha de dag bsgom zhing bsgrub pa dang / bzlas brjod kyis mnyes par bya ba'i thabs bshad par bya ste/de la yang gzhan dag na re/ de ltar phyag rgya dam tshig la sogs par bsgrub pa'i bye brag bstan pa ni de ltar rung na/ de dag nyams su len par byed par 'dod pa dag gis tshul lam rim pa ji lta bu dag tu bsgrub par bya zhe na/ smras pa/ de ltar de la sogs pa gzhan yang de bzhin gshegs pa'i rigs kyi dkyil 'khor chen por bshad pa'i lha sgrub pa pos/rgyud dang mthun par bla ma'i man ngag las bzlas brjod byed pa'am/ bsgoms pas bsgrub pa'i yan lag rnams nges par byas nas/ de la nan tan bya bar yid la shin tu brtan par bya ste/ grogs po mthun pa dang lhan cig pa'am/yang na gcig pu rtsol ba dang / gnyis kyis bzlas brjod byed pa dang / bsgom pa la sogs pa la 'jug par bya'o zhes bya ba la sogs pa gsungs te/ de la de ltar de la sogs pa zhes pa ni/ gong ma'i don la snyegs par byed pa ste/ spyi dang khyad par gyi dam tshig gi mtshan nyid so sor bshad pa dag go//gzhan yang zhes pa ni de ltar dam tshig la gnas nas bsgrub pa la 'jug pa'i rnal 'byor pas mchod pa'i yo byad la sogs pa bsgrub pa'i rkyen du gyur pa'i dgos pa rnams bshad nas/ bzlas brjod dang /ting nge 'dzin la sogs pa'i rim pa brtsam dgos par bstan pa ste/ 'og ma'i mgo 'dren par byed pa'o/ /de bzhin gshegs pa'i rigs kyi dkyil 'khor chen por bshad pa zhes pa ni/ rdo rje dbyings kyi dkyil 'khor chen po ste/ de bzhin gshegs pa'i rigs kyi dkyil 'khor kho nar 'dod de/der bshad pa'i lha ni sum cu rtsa bdun du bgrang ba dag go/ /sgrub pa pos rgyud dang mthun par bla ma'i man ngag las bzlas brjod byed ces pa ni/ de rnams sgrub pa pos de bzhin gshegs pa'i zhal nas gsungs pa'i rgyud dang mthun par bla ma dge ba'i bshes gnyen grub pa thob pa chos kyi mig dang ldan pa rnams kyis nyams kyi man ngag las thos pa bzhin bzlas brjod dang bsgrub par bya'o zhes bshad pa ste/bzlas brjod byed pa'am zhes pa ni/ bzlas brjod kyi bsgrub pa ste/ de yang rdo rje bzlas pa la sogs pa rigs so so'i bzlas brjod kyi thabs rgyud las ji skad gsungs pa bzhin du byed pas lha mnyes par bya ba'am/rnam gcig yid kyi bzlas pa dang / shu bur bzlas pa dang / gsal bor bzlas pa dang / gsum du bstan pa dag go/ /bsgom pas bsgrub pa zhes pa ni/ ting nge 'dzin gyi dbang du byas nas bsgrub pa ste/de yang rgyu'i ris kyis sku phyag rgya chen por rdzogs par bsgom pa'am/ rnam gcig stong pa nyid du bsgom pa dang / zla ba'i dkyil 'khor du bsgom pa dang / sku phyag rgyar bsgom pas de dag sgrub pa ste/ de yang sgrub pa gang rung ste/ rgyud dang mthun pa'i bla ma'i man ngag mnos nas de lta ba bzhin du bsgrub po//yan lag rnams nges par byas nas zhes pa ni/ sgrub pa'i rkyen du gtogs pa'i mchod pa'i yo byad la sogs pa rnams ni yan lag ste/ snga nas gtan la dbab cing bshad pa la ni nges par byas nas zhes bya'o/ /de la nan tan bya bar yid la shin tu brtan par bya ste zhes pa ni/sgrub pa de la yid nan tan du bya zhing sems gzhan gyis mi bskyod par yi dam du bcas te/ srog gi phyir yang gtang bar bya ba ma yin pas na le lo dang som nyi dgag par bya ba'o/ /grogs po mthun pa dang zhes bya ba ni/ bdag dang mthun zhing yid la 'bab pa zhi ba dang /des pa dang / rgyud mnyen pa la sogs pa'i yon tan dang ldan pa ste/ ji ltar rgyud las/ gtsang zhing dul la brtan dang ldan/ /ma 'jungs blo ldan g.yer bag che/ /smra mkhas mi 'jigs bshes gnyen can/ /bzod ldan drang la g.yo sgyu med/ / ces bya ba la sogs pa mthar thug gi gsungs pa de lta bu'i mtshan nyid dang ldan pa bdag dang lhan cig tu gnas nas sgrub pa'am/ yang na gcig pu rtsol ba dang / /zhes bsgrub pa po bdag nyid bsgom pa la 'jug pa rtsol ba dang / spro ba dang / ting nge 'dzin gyi 'bad rtsol dang ldan pa'o/ / gnyis kyis bzlas brjod byed pa dang / /zhes pa dang / lhur dad pa'i rtsol ba dang ldan pa'i sems dang gnyis kyis bzlas brjod dang phyag rgya chen por bsgom pa la 'jug par bya ste/ sogs kyi sgras 'jig rten dang 'jig rten las 'das pa'i bsgrub bya'i rigs pa gzhan yang rung ba dag kyang sdud par byed do//rgol ba pa na re/ 'o na de ltar bya ba de dag gi thabs dang rim par 'jug pa'i mtshan nyid ji ltar bya ba yin zhe na/ smras pa de'i rim pa yang 'di lta ste/ zhes bya ba la sogs pa ste/ langs nas nyal ba'i bar du bya ba'i rim pa'o/ /dang por re zhig nang bar gyi dus la bab pa dang zhes pa ni/tho rangs kyi skya rengs shar bar gyur pa'i dus de dag la bya ba'i dus la bab pa yin pas so/ /khri la sogs pa med pa zhes pa ni/ ba so dang gser dngul la sogs pa rin po ches brgyan pa'i khri dang dar zab la sogs pa'i mal cha dag med par gyur na legs/yod par gyur na yang spangs la/ rang gi rnal 'byor dang rjes su mthun pa'i mal bde ba la gnas pa las langs la yi dam bklag par bya ste/ de la rang gi rnal 'byor dang rjes su mthun pa'i mal bde ba zhes pa ni/ ras bal la sogs pa'i stan nang tshangs can 'bol zhing bde ba'am/de'i char gyur pa'i mal na gnas par bya la/ langs te zhes pa ni mal der nyal ba las langs te/ tsog bu la sogs te gang bde bar 'dug nas dam pa'i chos bklag pa zhes pa ni/ rgyud las kyang zab cing rgya che ba'i chos gleng la gsungs te/zab pa ni shes rab kyi pha rol tu phyin pa'i mdo sde lta bu'o/ /rgya che ba ni sdong pos brgyan pa la sogs pa'i mdo'o/ /rnam pa gcig gnyis ka'i don dang ldan pa nyid shes rab kyi pha rol tu phyin pa'i mdo sde de dag dang de las gzhan pa'i mdo sde gang yang rung ba dag kyang bklag par bya'o/ / sogs kyi sgras ni kha ton dang / sngags zlo ba dang / gdams ngag dbog pa la sogs pa gzhan dag kyang sdud par byed do/ /gzhan dag na re 'o na khri stan mthon po dang / bzang po spang ba ni theg pa 'og ma pa'i gzhung gi 'dod pa yin te/ ji ltar le'ur byas pa lnga bcu pa las kyang / / shing khri khru gang mtho ba dang / /ba so la sogs brgyan pa'i khri/ /nam yang mal khri mthon po la/ nyal la sogs pa mi bya'o/ /zhes zer na/ 'dir yang de dang mthun par ston na ni de gnyis kyang bye brag med par 'gyur la gzhan du/ dka' thub dka' spyod mi dgos so/ /zhes gsungs pa de dang 'gal bar 'gyur na 'di ltar ston pa ci'i phyir zhe na/smras pa/ de yang bden mod kyi/ 'on kyang bsrung ba'i bye brag gis spyod pa cha mthun par spyod pa yang yod do/ /sngags kyi rgyud las kyang / /khri rnams dang ni khri'u dag la/ /sgrub po blo ldan mi gtsang ba/ /gzhan dang nyal bar mi bya ste//gan rkyal kha sbub tu yang min/ /zhes gsungs te/ gzhan dang nyal bar mi bya zhes gsungs pa'i sgras/ /bdag kyang nyal bar mi bya bar yin par mngon pas na/ spyod pa mthun par ston pa de lta bu dag yod kyang lta ba'i khyad par 'dres pa dpag yas pa med pas de dag de dang mnyam par yang mi 'gyur la dka' thub ni dka' ba spyad pas 'grub par lta ba yin la/rnal 'byor pa ni lha'i spyan snga na bag bya ba'i phyir/ /'di ltar bstan pas phan tshun 'gal bar yang mi 'gyur bar shes par bya'o/ /mi brjed pa'i chos nyid mngon par bya ba'i phyir zhes pa ni/rnam par mi rtog pa de kun gyi gzungs su bya ba yin pas so/ /rnam gcig shes pas mi brjed par bya ba'i yul ni chos kyi dbyings pas de la dmigs pa 'phel bar bya ba'i phyir 'di ltar bya'o/ /mtshan mo dang nyin par legs par spyad pa'i yi dam ji ltar blangs pa zhes pa ni/nyin zhag gcig la dus gsum du gzhig ste/ bdag gis legs par blangs pa'i sdom pa nyams par gyur ram ma gyur/ dge ba'i las dag gang ni 'grib par 'gyur/ gang ni 'phel bar 'gyur snyam du rjes bcad cing gzhigs nas de dag ji lta bur gyur pa dran par byas la/nyes pa yang phyi nas mi bya bar sems bskyed la zhes pa ni/ gal te dge ba'i phyogs 'gribs shing dam tshig dang sdom pa la sogs pa nyams pa dang / mi dge ba'i phyogs dag 'phel bar 'gyur na/ de la 'gyod pa bskyed cing dam tshig dang sdom pa la sogs pa nyams pa dag gso zhing blang ba dang /sdig pa mi dge ba'i phyogs 'grib par bya ba'i brtson pa bskyed pa'i bsam pa sngon du btang zhing rjes su 'bad rtsol skyed pa'o/ /dge ba la 'bad rtsol skyed pa'i thabs kyang 'di lta ste/ dkyil 'khor chen po na bzhugs pa zhes pa ni/ rdo rje dbyings kyi dkyil 'khor chen po na bzhugs pa'i lha rnams so//bde bar gshegs pa la sogs pa zhes pa ni bcom ldan 'das rdo rje dbyings chen po'o/ /sogs kyi sgras ni phyogs kyi sangs rgyas bzhi po dag bsdu'o/ /sems dpa' chen po rnams zhes pa ni/ dpal rdo rje sems dpa' 'am ye shes sems dpa' rnams te/spyir na rdo rje dbyings kyi dkyil 'khor du gsungs pa'i lha rnams mdun gyi nam mkha' la bzhugs par thang cig yud tsam cig dran pa mngon du byas nas/ mngon sum du dmigs la phyag 'tshal lo zhes pa yang mi gnyis pa'i 'dus pas sam/rnam gcig 'og nas gsungs pa'i phyag bzhi po des phyag btsal bar bya'o/ /la la na re mdun gyi nam mkha' la myur ba'i ting nge 'dzin gyis rdo rje dbyings kyi dkyil 'khor ji ltar gsungs pa bzhin du bskyed la/ bdag gi thugs ka'i zla ba'i dkyil 'khor las ji zhes pa'i 'phro 'du las ye shes kyi lcags kyu spros pas rdo rje dbyings kyi lha ji snyed pa sngon nas lhun gyis grub pa'i gnas na bzhugs pa rnams spyan drangs la/'og nas gsungs pa'i tshul gyis phyag 'tshal la/ de'i rjes su mthun pa'i mchod pa'i yan lag rnams kyis mnyes par byas shing bdag gi yi dam nyams par gyur pa dag kyang gso bar mdzad pa'i gnang ba byin par bsams la/gdod 'og nas 'byung ba bzhin du bya zhes zer ro/ /ji skad du gsungs pa'i rang gi rigs kyi srung ba zhes pa ni/ rang gi rigs kyi srung ba gang yin pas bdag nyid bsrung bar bya ba'i sbyor ba la gnas par bstan pa ste/srung ba yang tha dad mod kyi 'dir ni de bzhin gshegs pa dang de'i rigs kyi srung ba kho nas bya bar gsungs so/ /nan tan byas te zhes pa ni/ rang gi rigs kyi srung ba bstan pas sngar srung ba nan tan byas la gdong bsang ba dang /bkru ba dang / 'chag pa la sogs pa'i dgos pa dag bya ba'i phyir/ phyi rol gyi sa la sogs par 'gro bar bya'o/ /de las gzhan pa'i dus dang spyod pa'i tshe zhes pa ni rnam grangs gzhan du ston pa ste/ gong ma'i tshig dgag pa'o/ / dam tshig sems dpa'i nga rgyal yongs su ma btang du zin kyang zhes pa ni/ de ltar bstan pa'i spyod lam kun du rang gi lha'i ting nge 'dzin la gnas te/ de'i nga rgyal ma btang du zin kyang gzhan du 'gro ba'i tshe/ rang gi rigs dang rjes su mthun pa'i srung ba'i cho ga la gnas par bya dgos/de mi byar mi rung bas nan tan du mi gtong ngo / /'o na ci'i phyir de ltar bya ba btang du zin kyang ci skyon zhe na/ smras pa/ dngos po'i ngo bo nyid kyis rab tu sbyor ba la zhes bya ba dag gsungs te chos nyid rang bzhin gyis ting nge 'dzin du gnas su zin kyang / srung ba'i cho ga ma byas na bgegs dang ngan khrid rnams kyis skabs tshol zhing bar du gcod par byed pas na/rang gi rigs kyi srung ba'i cho ga la gnas na de dag gis mi tshugs shing lha rnams dgongs pa dang byin gyis rlob par mdzad pa'i phyir 'di ltar bya'o/ /de bas na dngos po bdag nyid rang gi ngo bo nyid kyi lha'i sku phyag rgyar sbyor ba la rab tu gnas su zin kyang gnas pa de lta bu'i dus nyid kyi tshe/dam tshig gis 'di ltar bsrung ba nges par bya bar shin tu rigs so zhes bshad do/ /'o na srung ba'i bye brag dang rnam pa yang rgyud las mi mthun zhing mang dag gsungs pa yod na/ 'di'i skabs su ji ltar shes par bya zhe na/ smras pa/ de la de bzhin gshegs pa mnyes par bya ba rnams kyi dbang du bya zhes bya ba de dag ste/ de ltar bstan pa de'i nang nas 'di dag bstan te/ de bzhin gshegs pa zhes pa ni bud+d+ha lngar 'dus pa'i ngo bo de bzhin gshegs pa rtag pa'am/rnam gcig sangs rgyas lnga las gang bsgom yang rung ba la dgongs pa'o/ /sems can thams cad yongs mi gtong / /zhes pa ni/ bdag gis khams gsum gyi sems can 'di dag bla na med pa'i byang chub tu bsgrub la mya ngan las 'das pa chen po'i thang bde ba la dgod par bya'o zhes yi dam chen po 'cha' zhing de bsgrub pa la brtson par byed pa ni/sems can thams cad yongs su mi gtong zhes bya'o/ /rtag tu sangs rgyas mchod pa'i bdag /ces pa ni/ gang bdag dang gzhan la dgos par gyur pa'i rin thang chen po'i rdzas rnams dang /bza' ba dang btung ba dang / bgo ba dang rgyan gyi rnam pa ji snyed yod pa'am/ phyi nang gi lha mo rnams kyi rnam par grol ba'i yon tan las byung ba'i mchod pa la sogs pa rgyud las ji skad gsungs pa'i mchod pa'i rnam pa dang / de'i thabs 'byung ba kho na bzhin du mnyes par byed pa la sogs pa'o//rtag tu sangs rgyas yid la byed/ /ces pa ni/ don dam pa'i sgo nas chos nyid kyi dang ngam/ chos kyi sku la dmigs pa dang / kun rdzob kyi sgo nas gzugs kyi sku la dmigs shing de'i bdag nyid du sbyor ba dang / yon tan gyi bdag nyid ston par byed pa mdo klog cing 'don pa la sogs pa sku gsum dang de dag gi yon tan yid la byed pa dang brjod pa'o//srung ba 'di ni dam pa mchog /ces pa ni/ don de lta bu dang ldan pa srung ba 'di ni dam pa bas na srung ba thams cad kyi nang na mchog yin no zhes gsungs so//'o na de ltar gsungs pa'i srung ba des mchog par gzung gi gzhan gyi de bzhin gshegs pa'i rigs su gsungs pa rnams la yang de ltar yin nam zhe na/ smras pa/ de ltar yin bar bstan pa'i phyir na/ de bzhin gshegs pa'i rigs kyi srung ba yang zhes bya ba la sogs pa gsungs te/de bzhin gshegs pa'i rigs ni dpal rdo rje sems dpa' la sogs pa'i ye shes kyi sems dpa' rnams te/ de srung ba'i sbyor ba yang 'di skad du gsungs te/ rdo rje sems dpa' lan cig zhig /ces pa ni dpal rdo rje sems dpa' lan cig tsam dran pa yang phan yon chen por bstan pa ste/ming yang yongs su 'dzin pa spang / /zhes pa ni/ de'i mtshan lan cig tsam rjod par byed pa'o/ 'di ni srung ba chen po ste/ /zhes pa ni/ de ltar bya ba 'di ni srung ba rnams kyi nang na che bar gyur pas so/ /nges par 'grub ste skad cig gis//zhes pa ni/ skad cig gis srung bar mdzad pa'i byin rlabs nges par gsol bar mdzad pa ste/ dngos grub thob par byed pa la ni mi sbyor zhes bya'o/ /de bas na lha'i rnal 'byor la gnas shing srung ba'i bsam pa dang ldan pa lta ci smos kyi/ chung ngu na mtshan lan cig tsam brjod pas kyang 'di ltar 'grub par bstan to//gzhan dag na re 'o na dpal rdo rje sems dpa' kho nas de ltar gyi gzhan rnams kyis ni de ltar ma yin nam zhe na/ smras pa/ dpal rdo rje sems dpa' ni ye shes sems dpa' rnams kyi dang po ste/ rgyud nyid las kyang //rdo rje dang po kun du bzang / /zhes gsungs pas ni/ /'dir yang mtshon pa'i sa 'dzin du 'di ltar bstan par zad kyi/ sems dpa' gzhan pa rnams kyis kyang de bzhin du 'grub par 'gyur nges pas na gang la dad pa'i sems dpa' rnams la dmigs na yang de bzhin du 'grub par gsungs so//bya ba byas nas zhes pa ni/ bsang ba dang 'chag pa la sogs pa'i gang 'dod pa'i bya ba de bsgrubs zin nas so/ /gtsang sbra ji lta ba bzhin byas te/ /zhes pa ni khrus la sogs pa'i lag byad kyis gzhan gyi kyal ka spang bar bya ba'i thabs so//srung ba'i sbyor ba yang rjes su dran zhes pa ni gang gi rigs gang gi yin pa de'i srung ba'i cho ga'i sbyor ba la gnas par bya'o/ /chos thams cad spros pa dang bral bar snga nas bsgoms pa zhes pa ni/ shes rab rnam gsum gyi sgo nas chos thams cad la so stong pa nyid dang mtshan ma med par gzhig cing gtan la phab nas/dper na sgyu ma dang smig rgyu dang / rmi lam dang / brag ca la sogs pa rnams nges pa ma yin bzhin du ngo gang la snang du btub pa dang 'dra bar 'jig rten grags pa'i phyi nang gi dngos po rnams kyang de bzhin du shes par bya'o//kha cig na re shes rab rnam gsum gyi sgo nas chos thams cad stong bar bshig pa de yang ji ltar bya zhe na/ phyi snod kyi 'jig rten ni sgyu ma lta bur shes par bya/ /nad bcud kyi 'jig rten ni smig rgyu lta bur shes par bya/ de dag gi spyod pa ni rmi lam dang brag ca la sogs pa'i tshul du shes par bya'o zhes zer ro//de ltar chos thams cad spros pa dang bral bar bsgoms nas/ 'jig rten na grags pa'i lus dang / longs spyod dang shes pa dang / shes bya'i mtshan nyid de lta bu yin par brtags nas phyi rol pa'i khrus dang gtsang sbras dag par lta ba'i dngos gzhi de dag spang ngo //ci'i phyir zhe na/ de kho nas thams cad dag par 'gyur gyi/ gzhan gyis ni de ltar ma yin te/ ji ltar gzhung las kyang / ye shes chu bo khrus kyi mchog /ces gsungs te/ rnam par mi rtog pa de kho na gtso bor bstan to/ /'o na 'di'i gzhung nyid las kyang khrus dang gtsang sbras dag par bya'o zhes bshad pa yod la/rgyud gzhan las kyang khrus byas yan lag dris bskus zhes bya ba la sogs pa'i rnam pa mang po dag ston pa yang yod na/ de dag de ltar ma yin na ni de gsung bar yang mi 'os la/ 'on te de ltar na ni 'dir slob dpon gyis ci'i phyir 'di skad ston par byed ce na/smras pa/ gzhan du na de lta bu'i 'jig rten dang mthun par bya ba dang / rang gi lus la phan zhing bde bar bya ba'i phyir ni/ gtsang sbra spyad pa'i cho ga ji ltar bstan pa bzhin bya'o zhes gsungs te/ 'jig rten na gang dag gtsang sbrar spyod pa can dag gdul bar bya ba'i phyir/de dang rjes su mthun par bya ba dang / rang gi lus kyi khams brtas pa dang / nad dang gnod pa dag zhi bar bya ba'i phyir ni gtsang sbra la sogs pa bya bar gnang ste/ bkag pa med do/ /gzhan dag na re de ni de ltar rung na rang gi lha'i rnal 'byor la gnas pa dag gis khrus dang gtsang sbra la sogs pa byas na/rigs par gleng ba yang yod/ kha cig na re de ltar ma yin no zhes kyang zer na/ de'i don ji ltar bur shes par bya zhe na/ smras pa/ yang na rang gi lha'i dam tshig sems dpa'i nga rgyal mngon du byas pa ni phyi rol gyi gtsang sbra la sogs pa mi dgos pa'i rgyud bshad do//zhes bya ba la sogs pa gsungs te/ gong du de'i tshul du bstan mod kyis de dang mi 'dra ba'i cha shas su phye ba gzhan dag ston par byed pa'i phyir na yang zhes smos te/ rang gi lhag pa'i lha gang yang rung ba'i phyag rgya chen po mngon du byas te/ gnas pa'i rnal 'byor pa dag gis ni khrus dang gtsang sbra la sogs pa mi dgos pa'i rgyur bshad de/sgo gsum lha'i ngang nyid du gnas pa la ma dag pa'i dri ma mi mnga' ba'i phyir ro/ /de'i phyir ni rjes su dran pa'i yid la bya ba bskyed par bya ste/ zhes pa ni lha'i phyag rgya chen po la gnas pa'i rnal 'byor rtag tu yid la bya'o//de bas na rgyud las kyang / ji skad du/ gtsang sbra bsdam pa 'dir mi dgos/ /zhes bya ba la sogs pa gsungs so/ /de ltar dag par kun du rtogs pa legs par byas nas zhes pa ni/ chos thams cad spros pa dang bral bar gzhig pa dang /rang gi lha'i phyag rgya dam tshig sems dpa'i ngo bor gnas pas dag par yid ches par byas pa'o/ /da ni gnas phun sum tshogs par dam tshig sems dpa' bsgom pa la sogs pa'i thabs bshad par bya ste/ de la rgol ba pa na re/ 'o na phyag rgya chen po sgrub pa la sogs pa yang rgyud gzhan dag las mtshan nyid dang rim pa gcig tu nges par gsungs pa dag yod na/de dag gi rjes su 'brang ba las shes par bya ba'am/ 'on te 'di las kyang rang gnyer gyis 'dod pa'i gnas kyi rim pa dag nges par bstan pa yod ce na/ smras pa/ bdag gi yid dang mthun pa'i yul gyi bye brag gang yang rung ba'i zhes bya ba la sogs pa gsungs te/rgyud gzhan dag la phyogs gcig tu 'chad cing nges par gsungs pa yod kyang 'di'i skabs su ni de ltar mi blta ste/ sgrub pa po bdag nyid kyis 'jug cing dag par gyur pa'i gnas gang yang rung ba de kho na brtag par gsungs te/de nyid gsal bar bstan pa/ lha khang la sogs par gnas te zhes bya ba dag ste/ lha khang dang / gnas khang dang kun dga' ra ba dang / ne'u gsing dang brag phug dang / ri khrod la sogs pa gang yang rung bar gsungs te/ de lta bu'i gnas su 'dug nas phyogs dang dus na bzhugs pa'i bde bar gshegs pa zhes pa ni phyogs bcu na bzhugs shing dus gsum du gshegs pa'i sangs rgyas te/sogs pa'i sgras ni de'i sras dang 'khor du gyur pa rnams kyang sdud par byed mod kyi/ 'dir ni gnas skabs kyis ni rdo rje dbyings la sogs pa'i dkyil 'khor chen por gnas pa'i lha rnams so//sogs pa'i sgras ni der gsungs pa'i yongs su ma dag pa'i lha rnams kyang bsdu'o/ /bla ma'i bla zhes pa ni lha thams cad kyang bla mar gyur pa yin mod kyang / de'i nang nas rgyud 'di'ang rgyud thams cad kyi rtsa bar gyur ba'i phyir/'dir gsungs pa'i lha rnams kyang kun gyi nang na bla ma yin par mngon no/ /kha cig na re gzhan gyi lha dag ni pha rol tu phyin pa las skyes pas bla mar mi gzhag pa/ 'dir gsungs pa'i lha ni ye shes kyi bdag nyid las skyes pa'i phyir/ de dag gi bla mar gzhag go zhes zer ro/ / phyag 'tshal lo zhes pa ni rgyud 'di nyid las gsungs pa 'og nas 'byung ba dag gi phyag 'tshal ba des phyag 'tshal bar bya ba ste/ de yang gang gi phyir/ tshul lam thabs ji ltar zhes bya bar sbyar te/ gang gi phyir zhe na/ ye shes rnam pa bzhi thob cing cho 'phrul rnam pa bzhi dang ldan par bya ba'i phyir/de yang gzhan dag na re ni 'di ltar gsungs pa'i lha rnams dkyil 'khor gyi tshul du bkod pa las sgo bzhi nas bskor zhing phyag 'tshal lo zhes zer na/ 'di nyid mdzad pa'i slob dpon na re ni/ de ltar bya ba 'thad par ma nges te/ ci'i phyir zhe na/ don thams cad grub pa'i byang chub sems dpa' rigs bzhi'i de bzhin gshegs pa rnams la phyag 'tshal ba yang phyogs su bskor nas phyag byas zhing mi grag la/rnal 'byor bas kyang de dang mthun par bya ba'i phyir ro/ /gzhan du na sngags spyod pa'i rnal 'byor pas ni ting nge 'dzin kho na gtso bor bstan gyi spyod pa gtso bor ma gsungs pa'i phyir ro//de ltar phyag 'tshal nas kha 'di ltar blta ba yang don rnam pa gnyis kyi phyir gsungs te/ de yang bdag dang gzhan gyi don la dmigs pa'i tshul ni kha nub phyogs su blta zhes smos la/ de bzhin gshegs pa'i yon tan la dmigs pa'i phyir ni phyogs thams cad mnyam pa nyid du dmigs zhes smos te/nub phyogs su bltas pas ni bsgrub par bya ba'i phyir dang / sems can rnam par byang ba la rgyas bstan cing mun pa chen por 'khyams pa rnams la ye shes kyi snang ba bskyed pa'i phyir ro//phyogs thams cad mnyam pa nyid du dmigs pa ni/ de bzhin gshegs pa de dag la phyogs dang rigs su chad pa mi mnga' ste/ thams cad mnyam pa nyid du dmigs pas gang du bltas kyang de bzhin gshegs pa kun kyi mdun na gnas par gyur pas na 'di ltar bstan to//ji ltar bde ba'i stan la 'dug nas zhes pa ni/ bya ba'i rgyud las gsungs pa'i rtsa dang shing stan la 'dug par bya zhing gcig tu chad par bstan pa de dgag pa ste/ ras dang mon dar la sogs pa las shing bal la sogs pa dro zhing 'jam pa'i nang tshangs can du byas te/ 'bol zhing bde ba'i stan ji lta bu'i lus dang mthun pa de lta bu la gnas par bya'o/ /de bzhin du srung ba'i sbyor ba rjes su dran nas zhes pa ni gang bsgom par 'dod pa'i rigs kyi srung ba'i sbyor ba 'di nyid las ji skad du gsungs pa de bzhin du rjes su dran par byas nas/ rnal 'byor pa bdag dang grogs po dang yo byad kyi rnam par dgos pa ji snyed pa rnams ting nge 'dzin gyis srung ba'i sbyor ba bya'o//de nas rang gi dam tshig sems dpa'i rnal 'byor zhes pa ni/ rang gi lha'i phyag rgya'i rnal 'byor du bsgom pa'i cho ga 'og nas ji skad 'byung ba'i rim pa bzhin du byas la/ de'i 'og tu gang la dad pa'i yi dam gyi lha rnams la/ phyi nang gi mchod pa'i bye brag ji skad gsungs pa'i cho gas mchod zin ma thag tu lha'i bsgom pa dang bzlas brjod la 'jug par byas te/ de ltar yang cis mngon zhe na/ zhal nas gsungs pa'i rgyud las gtan tshigs gsungs pa/ ji skad du/bdag nyid lha yi rnal 'byor pas/ /bdag dang gzhan la mchod par bya/ /zhes gsungs pa'i phyir na/ 'di ltar bya dgos par mngon no/ /'dir yang mchod par dgos pa dang / /zhes pa ni ji skad gsungs pa'i phyir nang gi lha mo rnams kyis mchod pa dang / de'i tshe de dag so so'i sngags brjod dgos pa'o//rang gi lha'i sgrub pa'i snying po rnams zhes pa ni/ lha mngon par byang chub pa'i rim pas rang nyid lhar bskyed pa'i snying po tsit+ta pra ti bya ba la sogs pa ji ltar lcogs pa bzhin brjod nas/ don de ltar dmigs nas/ rang gi dgos pa 'grub par byed/ /ces pa ni lha gang bsgoms pa bzhin du 'grub par gsungs pa'o//rnal 'byor gyi tshul gyis cho ga la ting nge 'dzin gtso bor gyur pa'i phyir ro zhes pa ni/ sbyor ba'i rgyud 'di dag sgrub par byed pa'i skabs 'dir ni ting nge 'dzin kho na gtso bas de la gnas par 'grub par bstan gyi/ bzlas brjod la sogs pa'i yan lag rnams 'di snyed cig mi byar mi rung zhes dpyad par bya ba med do//ji ltar lcogs pa tsam du brjod pas 'grub par bshad de/ de ltar yang gsungs pa/ rdo rje sems sogs sems dpa' rnams/ /zhes pa ni/ rdo rje sems dpa' la sogs pa'i ye shes kyi sems dpa' rnams so//sgrub dang las rnams thams cad la/ /zhes pa ni/ phyag rgya chen po sgrub pa dang / mchod pa la sogs pa'i las so/ /rnam shes pa dang thams cad ces pas ni rnam grangs mang po dang ma lus pa dag sdud par byed de/ 'dir ni bzlas brjod ci 'dod pa//zhes bya ba ni/ ji ltar bya ba'i rgyud las bzlas brjod mang du brjod pa las 'ga' tsam gyis ma them par rkyen gzhan gyis bar du chod na gzhi nas zlos par bya ba dang / gnas nas gnas gzhan du phyed du bzlas na don med par gsungs pa dang / brgya dang stong zhes pa la sogs pa grangs nges par gsungs pa de dgag pa ste/'dir ni ting nge 'dzin gtso bor zad kyi/ bzlas brjod la ni ci 'tsham par brjod pas ma chog pa med par bstan pa'o/ /rtog pa kun la dngos grub stsol/ /zhes pa ni/ de ltar byas pas tshig kun de bzhin du 'grub ste/grub par thob par byed ces bshad do/ /rgol ba pa na re/ 'o na de dag gis de ltar grub par gsungs na lha yang rnam pa mang po dag yod na rdzogs par ni 'dir chud par yang mi 'gyur la/ phyogs gcig bzung na ni grub pa dang rjes su mthun par 'gyur bar yang ma nges na/'dir de dag gi rim pa gang thob kho na sgrub par bstan zhe na/ smras pa/ mang po dag las rnam par phye ba'i phyir na re zhig ces bya ba'o/ /de bzhin gshegs pa rnams dang zhes pa ni/ de bzhin gshegs pa lnga'am gcig gang yang rung ba ste/ ci'i phyir zhe na/ gcig gi nang du yang kun 'dus par bstan pa yin la lnga por brjod na yang 'gal ba med pa'i phyir ro//de'i rigs zhes pa ni ye shes kyi sems dpa' rnams sam/ /de las gang yang rung ba'i bzlas brjod dang sgrub pa'i thabs kyi cho ga'i rim pa 'dir bstan par bya'o/ /zhes bshad do/ / 'o na bzlas brjod kyi thabs dang rigs dang rgyud kyi bye brag gis rnam pa du mar bgrang ba dag yod na 'dir ji ltar bya zhe na/ smras pa/ da 'dir de bzhin gshegs pa dang de'i rigs kyi bzlas brjod ces glengs pa nyid kyi bar mngon no/ /'o na bzlas brjod dang mchod pa la sogs pas mnyes par bya ba'i rim pa de dag ji ltar bya ba yin zhe na/smras pa/ dang por re zhig ces bya ba la sogs pa gsungs te/ de dag la mchod par bya ba'i phyir zhes pa ni/ de dag mchod pas mnyes par bya ba'i phyir ro/ /dam tshig sems dpar byin gyis brlab par bya'o zhes pa ni bdag nyid gang la dad pa'i lha mnyes par 'dod pa de'i ting nge 'dzin du gnas par byas la gdod ye shes sems dpa' la mchod par bya dgos pas na 'di ltar brjod do//'o na de ltar ma byas par mchod pa dang bzlas brjod kyi las rtsom par byas na mnyes par mi 'gyur ram zhe na/ smras pa/ de yang de ltar 'gyur mod kyi/ 'on kyang sems can las dang nyon mongs ba'i dbang gis sdug bsngal gyi ngo bor smin pa'i phung po rten 'brel gyi dbang gis khams gsum du 'khor zhing mngal gyi skye gnas mi gtsang ba nas skyes pas mi gtsang ba'i dri ma can du gyur pa des/ mchod pa ni mdzes shing rigs pa ma yin pas/de nyid rnam par brtags nas lha'i rang bzhin du byin gyis brlabs nas/ shin tu dag par gyur pa'i phyag rgyar rang nyid gnas par byas nas mchod pa ni shin tu mdzes shing rigs par gyur bas na/ 'di ltar bstan to/ /de bzhin gshegs pa'i dam tshig sems dpa' zhes pa ni brjod pa'i rnam par dbye ba'i tshig gis bsgrub par bya ba'i rim pa ston par byed pa'i tshig ste/de la sngar de bzhin gshegs pa'i dam tshig sems dpa' gang yang rung ba'i cho ga dang rim pa bstan pa 'di lta ste zhes so/ /de ltar bya ba'i thabs dang rim pa ni 'di kho na ltar bya ste dang por sngags 'di brjod do//oM swa b+hA wa bi shud+d+haH sarba d+harmAHswa b+hA ba shud+d+hou0f85haM zhes pa ni/ oM mgo la smos pa ni de bzhin gshegs pa'i sku gsung thugs rnam par bkod pa'i yon tan gyi bdag nyid de tshang bar ston p a'o//lhag ma rnams kyis ni/ chos kun rang bzhin dag pas na/ /bdag kyang rang bzhin rnam par dag /ces gsungs pa ste/ snod bcud bdag gzhan gyi dngos po rnams rang bzhin gyis rnam par dag ste/ chos kyi dbyings dang tha mi dad cing dbyer med par bstan pa'o/ /'o na de ltar sngags de tshig tu brjod pas don de lta bu dag 'grub par 'gyur bar cis mngon zhe na smras pa/sngags ni rang bzhin gyis 'grub pa'i mthu dang ldan pas brjod pa tsam gyis kyang de bzhin du 'gyur te/ dper na mtshon pa bstan pas mtshon bya rtogs par nus pa bzhin no/ /'o na 'di ltar ma byas na cir 'gyur du dogs pa'i phyir 'di ltar mos ba bskyed ce na/smras pa/ 'di ltar ma byas pas kyang nyes par 'gyur ba ni med mod kyi 'on kyang chos kyi dbyings rnam par dag pa glo bur gyi dri ma dang bral ba ni che ba'i yon tan thams cad 'byung ba'i rgyur gyur pa yin pas na/ 'dir yang 'di ltar byas pas de thob par bya ba'i phyir/ 'di ltar bstan te nyes pa med do/ /rdo rje thal mo snying gar bcings la/ zhes pa ni de ltar brtags shing mos par byas pa'i rting thogs su rdo rje thal mo la sogs pa'i phyag rgya 'di dag rim par bcings shing sngags bzlas par bya'o//de la rgol ba pa na re/ de ltar bdag gzhan rnam par dag phan chad phyag rgya bcings pa'i gnas kyang mngon par ma grub na ci'i phyir 'di ltar ston ce na/ smras pa/ don dam par rang bzhin med par brtags pas dngos por ma grub pa yang bden mod kyi/'on kyang kun rdzob kyi sgo nas bdag nyid dam tshig sems dpar bsgom pa'i thabs rdzogs par bya ba'i phyir 'di ltar bya ba la nyes pa med de/ dper na de bzhin gshegs pa rnams rnam par mi rtog pa la dmigs bzhin du dag pa 'jig rten pa'i ye shes kyis 'gro ba'i don mdzad pa bzhin no//de la phyag rgya la sogs pa bcing ba'i rim pa yang 'di ltar gsungs par 'gyur te/ dang por lag pa'i sbyor ba bya ste/ dang po lag pa g.yas pa'i mthil du ma las nyi ma'i dkyil 'khor gyi steng du hUM zhes pa'i yi ge gzhag par bya'o/ /lag pa g.yon pa'i mthil du Ta las zla ba'i dkyil 'khor gyi steng du a gzhag par bya'o//de gnyis las thabs dang shes rab kyi bdag nyid rdo rje dang dril bu bsam par bya'o/ /de bzhin du sor mo rnams la yang nyi ma'i dkyil 'khor bsams la de'i steng du oM zhes pa dang / hU~M zhes pa la sogs pa'i rigs dang rigs kyi yum rnams so so'i sa bon gyi yi ge rnams rim par dgod de thabs dang shes rab kyi bdag nyid du mos par byas la lag pa thal mo sbyar bar bya'o//'o na ci'i phyir de lta bur ston par byed/ ma byas na ji lta bur 'gyur zhe na/ smras pa/ dper na 'jig rten pa'i 'gro ba rnams pha ma gnyis la brten nas skye zhing 'byung ba dang 'dra bar de bzhin gshegs pa rnams 'jig rten du 'byung ba ni yab thabs la mkhas pa dang yum shes rab kyi pha rol tu phyin ma la brten te byung gi/rang thad dang stes dbang gis byung ba ma yin no/ /de bzhin du de dag gi ye shes kyi phyag rgya rnams kyang de lta bu'i tshul gyis 'grub pas na phyag rgya dag 'byung ba dang brtas par bya ba'i phyir de ltar bsgyur zhing dmigs par bya ste/de ni rdo rje thal mo'i mtshan nyid de/ phyag rgya thams cad 'byung ba'i gzhi'o/ /de ltar na rgyud las kyang / /thal mo rab tu dam sbyar ba//rdo rje thal mos bka' stsal pa/ /zhes bya'o/ /oM badzra any+dza li zhes pa ni/ de'i sngags te rdo rje thal mo ste yum mo/ /oM badzra ban+d+ha zhes pa ni/ rdo rje bcing ba'i sngags te yab bo/ /oM badzra ban+d+ha traT ces pa ni rdo rje brad pa'i sngags te sras so/ /de ni thang gcig brad pas kyang sdig pa thams cad ma lus par sel bar byed do//snying ga'i phyogs su sgra dang bcas par 'grol zhes pa ni snying ga'i thad kar sngags 'di nyid phyag rgya sgra dang bcas par lan gsum bkrol bas kun gzhi gnas ngan lan gyi sgrib pa rnam par dag par dmigs so//len gsum brjod pa ni bdag gi sems kyi ngo bo nyid rang bzhin gyis rnam par dag pa yin na yang / glo bur bla thabs kyi nyon mongs pa'i dri ma dang rdul gyis khebs shing g.yogs par gyur te/ ma rungs par gnas pa la dang por bkrol bas ni snga ma 'das pa'i dus na bsags pa de dag bsal la/gnyis pas ni da ltar gyi dus kyi tshe 'di la byas pa bsags pa de dag ma lus par bsal/ gsum pas ni ma 'ongs pa'i dus na bsag cing byed par 'gyur ba de dag bsal te/ dus gsum gyi nyon mongs pa dang sgrib pa thams cad sel cing zad par byed pa'i don to//de ltar sgrib pa thams cad zad byas nas/ dus gsum gyi ye shes thams cad kyi gnas su rung bar gyur pa dang / gnas der dbab par bya ba'i dbang du byas te gsungs pa/ de nas rdo rje dbab pa'i phyag rgya bcings te zhes bya ba la sogs pa dag go / de la dbab pa la yang gnyis te/ ye shes dbab pa dang zhes pa ni/ dus gsum gyi sgrib pa zad par byas pa'i gnas de/ dus gsum gyi sangs rgyas rnams kyi ye shes thams cad spyan drangs te bcug pas shin tu gzi byin dang ldan par dmigs so/ /phyag rgya chen po dbab par bya/zhes pa ni/ de bzhin gshegs pa'i sku phra mo nam mkha'i dbyings kyi snying po gang ba rnams bkug ste/ sgrib pa zad par byas pa'i rang bzhin lus kyi gnas su zhugs pas ye shes dang sku rnam par dag pa'i rang bzhin du 'gyur bar bsam mo/ /'o na de ltar ma byas na ci nyes she na/smras pa/ de ltar ma byas par 'phags pa'i spyod pa rgya chen po la 'jug na/ bdag nyid kyi lus la byin dang mi ldan pas bgegs la sogs pa 'jug cing bar du gcod par byed la/ de ltar byas na bsgrub par bya ba'i las rtsol ba la bar chad kyi rkyen bgegs kyis mi tshugs par 'gyur ro//oM badzra a be sha a a a zhes pa ni dbab pa de'i sngags so/ /de ltar nyon mongs pa dang sgrib pa zad par byas shing ye shes dang phyag rgya dbab pas bdag nyid gzi byin can du byas nas ting nge 'dzin gyis bsgrub par bya ba'i rim pa gsungs pa/ de'i 'og tu rang gi sems brtag pa la sogs pa mnyam par gzhag pa'i mtshan nyid/de bzhin gshegs pa thams cad kyi mngon par rdzogs par byang chub pa la mos par byas la de bzhin gshegs pa'i skur bdag nyid byin gyis brlab po zhes bya ba la sogs pa gsungs te/ /de'i 'og tu zhes pa ni gong ma lta bu'i sbyor ba sngon du btang ba de'i rting thogs su bya ba'o//rang gi sems brtag pa zhes pa ni/ rang gi sems nyid yang dag pa ji lta ba bzhin du phyin ci ma log pa bdag med cing skye 'gag med pa nyid du mos par bya'o/ /sogs kyi sgra de las byang chub tu sems bskyed pa dang /yig 'bru thugs phyag mtshan du gnas pa dang / de brtan par gyur cing de las yang phyag rgya chen por sbyor ba dang / de'i yan lag thams cad yongs su rdzogs par 'gyur ba'i bar gyi thabs rim pa sna tshogs par gsungs pa'i don sdud pa'o/ /mnyam par gzhag pa'i mtshan nyid ces pa/dngos po de lta bu'i don la dmigs pa rtse gcig par byed pa'o/ /mngon par byang chub pa zhes pa de bzhin gshegs pa thams cad sngags kyi sgo nas sangs rgyas pa'i tshul ston par mdzad pa'i thabs kyi mtshan nyid mngon par byang chub pa lnga zhes ming gi tha snyad du btags pa 'di nyid las gsungs pa de'i don la 'dun par byas nas de bzhin gshegs par sgrub pa'o//skur bdag nyid byin gyis brlabs zhes pa ni/ mngon par byang chub pa zhes bya ba'i rim pa des rang gi lus ngag yid gsum de bzhin gshegs pa'i sku gsung thugs rdo rje rnam par bkod pa'i bdag nyid du bsgyur te/de kho na yin par dmigs pa la ni byin gyis brlabs zhes bya'o/ /mdor na rang gi sems brtag pa la sogs pa mnyam pas mnyam pa'i mtshan nyid ni/ de bzhin gshegs pa'i mngon par rdzogs par byang chub pa zhes bya ste/ de la mos pa ni/ mnyam par 'jog pa'o/ /de nas de bzhin gshegs pa'i skur bdag nyid gnas par bya ba'o/ /de ltar yang rtsa ba'i rgyud chen po las gsungs pa/ de bzhin gshegs pa'i dam tshig chen po'i sems bsgrub pa bstan pa las zhes pa ni mtshan nyid de kho na skad bya ba'i rim par phye ba'i le'u ste/skabs kyi ming ngo / /sems shes pa nas brtsams nas ni/ /zhes pa ni/ /dang por rang gi sems yang dag pa ji lta ba bzhin phyin ci log par brtags shing gzhig par bya'o/ /rdo rje nyi ma bsgom par bya/ /zhes pa ni/ de ltar sems nyid ji lta bu'i ngo bor yang ma grub par brtags pa'i don te/de ltar rtogs par rig pa'i blo skyes par gyur pa dang / de'i byang chub tu sems bskyed pa'i ngo bo thabs dang shes rab kyi bdag nyid 'brel pa can du gnas pas nyi ma zhes brjod pa dang de'i zlas zla ba yang smos par bya dgos te/ de gnyis gang yang rung ba'i dkyil 'khor bsgom par bya'o//bdag nyid sangs rgyas skur bsgyur te/ /zhes pa ni/ de'i steng du snying po dang ldan pa gsal bar gnas pa las/ bdag nyid sangs rgyas kyi skur gyur par bsgom par bya ba ste/ de ni sngar sems can las phyis 'di lta bu'i skur gyur pas mtshan nyid 'gyur ba la dgongs nas bsgyur zhes bya'o//rdo rje dbyings ni zlos byed cing / /zhes pa ni/ rdo rje dbyings chen po'i phyag rgya bsgom par 'dod na ni badzra d+hA tu zhes brjod la/ 'di ni gtso bos 'di skad bstan par zad kyi/ gzhan gang bsgom par 'dod pa'i snying po yang de bzhin du zlos shig /de'i sku'i yan lag dang / nying lag tu gtogs pa rdzogs par bsgom mo/ /de yang gang zhe na/ rdo rje nyi ma bsgom par bya/ /zhes gsungs pa 'di kho na ste/ dam tshig sems dpar bsgom pa'i sku phyag rgya rdzogs par bsgom pa dang /rgyab tu nyi ma'i dkyil 'khor gyi rgyab rten 'od 'bar ba can bsam par bya zhes pa'i bar du de mtshon par byed pa'o/ /'o na sems brtag par bya ba'i rnam pa yang tha dad pa dang bye brag mi mthun pa'i rnam grangs ji snyed pa dag yod na 'dir ji ltar bya ba yin zhe na/ smras pa rang gi sems brtag pa la sogs pa'i rim pa yang 'di lta ste/zhes bya ba la sogs pa gsungs te/ sems brtag pa'i thabs de lta bu ji snyed pa dag yod par mngon du zin gyis kyang / 'dir rtsa ba'i rgyud chen po der gsungs pa'i don dang mthun pa dag bshad par bya ste/ dang por re zhig ces pa ni/ji ltar bya ba'i rim pa grangs su dgong bar byed pa'i tshig gi skabs 'dzin pa'o/ /yid bdag gi snying gar bsdus la zhes pa ni/ /yid kyi rnam par shes pa bya byed mang po can de dbang po dang yul gang gis kyang rjes su 'brang du mi gzhug par dgag pa'o/ /lus thams cad kyi srog slar bsdu ba'i tshul gyis zhes pa ni/ji ltar bya ba'i rgyud rnams las/ srog ces bya ba rlung du bshad/ /rtsol ba dran pa zhes bya'o/ /zhes gsungs te/ de la srog ces bya ba ni mig dang rna ba dang / sna dang kha dang / lte ba dang / skyes pa dang / bud med kyi dbang po dang /mi gtsang ba'i khung bu dang / skra dang ba spu'i bu ga nas 'byung ba dang / 'jug pa'i mtshan nyid kyi rlung ste/ de bsdam pa yang skabs 'dir 'byung ba dang 'jug pa dgag pa ste/ rlung 'byung ba dang 'jug pa rnams dgag pa ste gyen du 'dren pa'i rlung gis rus sgal gyis lus bskum pa/ lce'u yis chu btung ba'i tshul gyis bsdu ste/ting nge 'dzin dang bzlas brjod ma rdzogs [(]gyi [,]kyi [)]bar du'am/ ci nus par gzung ngo zhes bshad do/ /de'i bzlas brjod rtsol ba yang dgag par 'byung ste/ rtsol ba ni dran pa ste/ de bsdam pa yang bzlas brjod ma rdzogs kyi bar du'am/ ci nus par ji ltar bsams pa'i lha nyid kyi gzugs las gzhan pa gud du dmigs pa dgag pa ste/bsdam pa de kun du bsdams pa rgyun bcad cing 'gog pa ni srog rtsol ba rab tu bsdams pa'o/ /skabs 'dir bdag ces bya ba'i sems bsdams pa nyid kyis dran pa bsdams par rig par bya'o//de ltar ci mngon zhe na/ sems rgyal po dang 'dra ba dran pa dang / ting nge 'dzin dang / yid la byed pa la sogs pa'i 'khor gyis bskor ba srog gi rta zhon pa nyid du 'dod de/ srog gi rta de nyid bzung na sems rgyal po'i 'khor dang / bcas pa nges par gzung bar 'gyur ro//'dir gzhan dag las kyang srog rtsol ba ni srog 'gog pa ste/ de bkag pas dran pa dang / blo dang yid la byed pa dang sogs pa dang bcas pa'i bdag gi sems nges par gzung bar 'gyur ro zhes gsungs so/ /srog ni dbus su bshad pa yin/ /zhes gsungs pas ni/ gnas skabs kyis ni 'dir yang lus kyi srog tu 'dod pa ni dbugs kho na ste ji ltar yid bsdu ba bzhin du dbugs kyang bsdu la yid bsdus pa dang dbugs kyang bsdu bar 'gyur bas mi g.yeng bar bya ba'i phyir te/ dbugs phyi nang du rgyu ba yin par mi gtong bar bdag gi dbang du gyur par dgug cing yan par mi gtong ste/de yang dbugs kyi rlung gang nas ji ltar rgyu ba dang / ji ltar bsdam pa dang / dus ji srid du bsdam pa dang / dpe ci 'dra ba dag bshad par bya dgos te/ de la gang nas rgyu zhe na/ kha dang sna dang / dbang po rnams kyi bu ga dang / ba spu'i bu ga thams cad nas phyi nang du rgyu'o//ji ltar rgyu zhe na/ sems g.yeng zhing lhod pa'i tshe na ni ring du rgyu la dam pa'i tshe na ni thung du rgyu ba ste/ phyir ni 'dom gang tshun chad nang du ni lte ba'i thad ka yan chad du 'jug pa'o/ /ji ltar bsdam pa ni rus sbal gyi yan lag nang du sdud pa dang / lce'i chu btung ba'i tshul du bzung ba ni yan lag nang du sdud pa dang /lce'u yis chu bzhir pa ltar dbugs nang du brngub par mi bya ste/ bsdam pa dang lhod pas nyal log pa'i dbugs ltar mi bya bar bzung zhing mnyam mo/ /dus ji srid du bsdam pa ni/ dang por ting nge 'dzin du gtad nas bags kyis bsdams te/ting nge 'dzin dang bzlas pa nam zin gyi bar du bya'o/ /de ltar ma byas pa'i skyon ni/ rlung 'khyil nas/ snying ga na ba dang / lus lci ba dang / sngangs shing sems 'khrugs par 'gyur ro/ /dbugs bsdam pa drags na yang skyon 'dir 'gyur te/ de las bzlog pas ni ting nge 'dzin mi 'grub par bstan to//phyugs bzhin srog bsdams pa med pa la ni ting nge 'dzin 'grub pa med do zhes bshad do/ /de ni lus thams cad kyi srog slar bsdu ba ste/ de lta bu'i thabs kyis de ltar lus kyi srog slar bsdu pa'i tshul ni thabs te//de lta bu'i tshul gyis dbang po lnga dang / ba spu'i bu ga thams cad dbugs nang du bsdu bar bsam pa ni dbang po mtha' dag ni rgyun nang du dmigs par byas pa dang / nang du phyogs pa zhes bya ba ni dbang po rnams yul la 'phro bar byed pa dgag pa ste/ yid kyis nang du phyogs par byas pa'o//snying po dbugs mi 'byung bar brjod/ /ces pa ni/ sems brtag pa'i snying po 'og nas 'byung ba 'di'i tshig tu brjod pa ma yin gyi yid kyis bzlas par bya ba'o/ /lus dang sems las su mi rung ba spangs zhes pa ni bsam gtan gyi mi mthun phyogs te snyoms pa dang / gnyid dang rmugs pa dang /g.yeng ba dang / rgod pa dang / bying ba dang / 'phyar ba la sogs pa ji ltar mkhan po dag gis mdzad pa'i bsam gtan la 'jug pa'i lugs rnams las lus sems kyi mi mthun pa'i phyogs ting nge 'dzin gyi gegs su gyur pa rgya cher bshad pa de dag dgag par bya'o/ /de gnyis mthun par 'jug par bya'o zhes pa ni/de gnyis rkyen mi mtshungs na sems kyi bsam gtan rnal du mi phebs te/ /dmigs pa la 'jug tu mi btub pas na sems de gnyis kyi rkyen mnyam zhing mtshungs par bsnyams nas/ de gnyis tshe mthun par gyur pas tshul 'di la 'jug par bya'o/ /rang bzhin gyis 'grub pa'o zhes pa ni/ba ti ta sid+d+hi zhes bya ba'i sgra 'di ltar 'dod de/ sngags 'di brjod pas rang gi sems ji ltar brtags pa de bzhin du rtogs par 'gyur nus pa'am/ sngags de'i mthus ji ltar 'dod pa de bzhin du 'grub par nus pa'i don te/ sngags thams cad la yang de bzhin du sbyar bar bya'o//rgol ba ba na re/ 'o na de ltar sems brtag par bya ba de yang sngags dang mdo sde'i khyad par rim pa grangs su btub par yod pa dag dga' na'i gzhung ltar na/ kha cig ni thal bar gyur ba dang / kha cig ni lus par 'gyur bas gcig gi tshad dang mthun pa gzhan dang 'gal la/gzhan dang mi 'gal ba gcig gi tshad dang mi mthun pa yod pas/ rnam pa de dag kyang phan tshun du gnod pa skyel bar byed pa yin na/ 'di'i skabs su gang la gzung bar bya zhe na/ rang gi sems brtag pa yang skabs 'dir ni/ chos dang gang zag la bdag med par bstan pa'i gtan tshigs kyis/bdag dang bdag gir 'dzin pa dang / phung po dang khams dang / skye mched dang / gzung ba dang / 'dzin pa'i dri ma spangs te/ zhes bya ba la sogs pa gsungs te/ gnas skabs 'dir ni zhes bya ba ni theg pa 'di'i gzhung dang rgyud kyi don la snyags pa yang yin la/sgrub thabs 'di nyid kyi dkyus su sbyar bar bya ba'i tshig kyang yin no/ /gang zag dang chos la bdag med par bstan pa'i gtan tshigs shes pa ni sngon gyi slob dpon dag gis mdzad pa'i bstan bcos dang rab tu byed pa'i gtsug lag las gsungs pa dang / de dag gi khungs su gyur pa'i mdo dag las ji skad bstan pa'i yod par blta ba bzhin dang /med par blta ba bzhin mtshan nyid ji skad du bstan pas gcig gi gzhung sgrub cing gcig 'joms par byed pa'i gtan tshigs kyi mtha' rnams pa gnyis bsal ba'i rim pa bkod pa las chos dang gang zag la bdag med par 'dod pa gang yin pa des gzung 'dzin dang bral bar mos pa'o//bdag dang bdag gir 'dzin pa zhes pa ni/ nang gi chos rnams la gzung 'dzin du rtog pas brtags pa'o/ /phung po zhes pa ni 'bru'i phung po dang chos mthun pa ste/ gzugs kyi phung po dang / tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po'o/ /skye mched ni rnam pa bcu gnyis te/ gzung ba ni yul tha dad pa yid la byed pa'o/ /'dzin pa ni sems te/ de ltar rtogs pa nyid dri ma spangs te/ de mi dmigs par bya bar ston te/ cung zad cig nam mkha' dang 'dra bar dmigs nas zhes pa ni snga ma'i gzung 'dzin mi rtog pa'i dri ma spangs pa'i sems de nyid kyi mtshan nyid de/ ji ltar nam mkha' brtag pa yod na yang rdzas su ma grub ste/ spros pa'i mtha' thams cad las dben pa bzhin du rnam par mi rtog pa'i ting nge 'dzin de nyid rtog pa thams cad nye bar zhi ba'i mtshan nyid can du gang gi mthar yang ma gyur pa'i sems de nyid nam mkha' lta bur mos par bya'o//de ltar mos par bya ba'i ting nge 'dzin de dag gal te skyo'am g.yeng bar gyur na/ 'di lta bu'i rnam par bsgyur ba'i bsam gtan sngon du bya ba ste/zla ba tshes gcig gi shas 'dra ba zhes pa ni sems nyid de ltar brtag pa'o/ /nang stong pa la zhes pa ni tshes gcig pa'i mtshan nyid pas khams gang bar gnas pa'i zla ba'i dkyil 'khor gyi rnam par mos par bya ba'o/ /kha cig na re/ yi ge a'i rnam par gsal ba las zla ba'i dkyil 'khor du mos par bya'o zhes zer na/lhag par 'dir ni de ltar nges pa yang med do/ /ci'i phyir zhe na/ a'i don skye ba med pa yin pa dang / gang du chos dang gang zag la bdag med pa'i rnam par brtag pa'i bsam gtan la des khyab par gnas pa las/'dir skye ba'i cho 'phrul 'di lta bu rnam par bstan pa'i phyir te/ bdag med pa'i ngo bo de las 'di kho na rnam par mos par bya ba nyid rigs par mthong ngo / /gzhan dag na re/ 'di ltar bstan pa yang zla ba'i dkyil 'khor zhes bstan par zad kyi/ nang stong pa dang nang gang bar gyur pa'i bye brag gang du yang phye ba med na/ci'i phyir 'di skad ce na/ gang gi phyir bcom ldan 'das don thams cad grub pa'i byang chub sems dpa' sems dpa' chen pos mngon par rtogs pa'i tshe na zhes bya ba la sogs pa gsungs te/ de'i don ni ji ltar gong du gsungs pa bzhin te/don thams cad grub pa'i byang chub sems dpa' chen po mi rnams kyi nang du shAkya'i rigs rgyal po'i sras su sku skye ba bzhes nas/ bzo dang rig byed la sogs pa skyes bu'i rtsal chen po bstan nas/ phyogs gcig tu skyes pa'i rigs kyi na tshod mthun pa rnams las khyad par du gyur pa'i phrin las bstan nas sngags kyi sgo nas sangs rgyas par bya ba'i tshul bstan pa'i phyir/sangs rgyas kyi zhing sdug po na stong pa chen po mi g.yo ba'i ting nge 'dzin la snyoms par zhugs nas bzhugs pa'i tshe/ de bzhin gshegs pa thams cad gcig tu 'dus nas de'i gang du gshegs te ched du longs spyod rdzogs pa'i sku bstan nas byang chub sems dpa' de la mgrin gcig tu gsung mthun par 'di skad ces gsungs so//rigs kyi bu gang gi phyir de bzhin gshegs pa thams cad kyi de kho na nyid mngon par rtogs pa ma byas par/ dka' ba spyad pa thams cad la spro ba bskyed cing ji ltar bla na med pa yang dag par rdzogs pa'i byang chub tu mngon par rdzogs par bya snyam zhes bka' stsal pa dang /byang chub sems dpa' don thams cad grub pa de bzhin gshegs pa de dag gis bskul ba'i mthus ting nge 'dzin de las bzhengs te de bzhin gshegs pa de dag la phyag 'tshal nas 'di skad ces gsol to//bcom ldan 'das rnams de bzhin gshegs pa thams cad kyi de kho na nyid ni ji lta bu lags/ bdag gis ni de dag ji lta bur bsgrub par bgyi zhes gsol ba dang / de bzhin gshegs pa de dag gis 'di skad ces bka' stsal to//rang gi sems rtogs shing mnyam par zhog la/ rang bzhin gyis grub pa'i sngags 'di ci dgar bzla zhing yid la gyis shig /ces gsungs pa'i rim gyis rang gi sems rtogs par gyur pa'i tshe'am dus na/ dang por rang gi sems nyid zla ba lta bu'i rnam par gnas par mthong ba la sogs pa'i rnam pas rdo rje dbyings zhes bya ba de bzhin gshegs par sangs rgyas pa'i tshe'o//'og nas 'byung ba'i cho ga zhes pa ni de ltar sangs rgyas pa'i 'jug pa'i go rims la cho ga zhes bya ste/ ji ltar 'og nas 'byung ba'i rim pa'o/ /de bzhin gshegs pa rnams la 'di skad ces gsol to//bcom ldan 'das de bzhin gshegs pa rnams bdag nyid kyi snying ga na rang gi sems nyid zla ba'i dkyil 'khor gyi rnam pa lta bur gda' bar mthong ngo zhes gsol ba dang / de bzhin gshegs pa rnams kyis bka' stsal ba/ rigs kyi bu sems 'di nyid rang bzhin gyis 'od gsal bas ji ltar sbyangs pa bzhin du 'gyur ba ste/dper na ras dkar po tshon gyis bsgyur ba bzhin no zhes gsungs so/ /byang chub sems bskyed nas zhes pa ni/ de nas yang de bzhin gshegs pa de dag gis 'di skad ces bka' stsal to/ /rigs kyi bu de las kyang de bzhin gshegs pa rnams kyis kun du bzang po byang chub tu sems skyed cig ces gsungs pa dang /byang chub sems dpa' des de bzhin du sems bskyed pa dang / rang gi sems nyid zla ba'i dkyil 'khor nya gang zhing yongs su rdzogs pa lta bu'i rnam par mthong nas 'di skad ces gsol to//de bzhin gshegs pa rnams zla ba'i dkyil 'khor gyi rnam pa gang yin pa de ni zla ba'i dkyil 'khor du mthong ngo zhes gsol ba dang / yang de bzhin gshegs pa rnams kyis de bzhin du mngon par byang chub pa rnams yongs su rdzogs par bstabs nas/byang chub sems dpa' des rang gi sems rtogs pa'i rim pas 'bras bu mngon du gyur pa ni bcom ldan 'das rdo rje dbyings zhes bya ba'i de bzhin gshegs par grags pa de'i sku phyag rgya chen po mngon du byas par gyur to/ /de bas na 'dir yang de'i gtan tshigs kyi dgongs pa'i don gsal bar mtshon pa ste/byang chub tu sems bskyed nas zhes pa ni zla ba'i dkyil 'khor nang stong pa snang ba de nyid rdzogs par byas pa'o/ /de bzhin gshegs pa rnams la zhes pa ni de'i dus su 'dus pa'i de bzhin gshegs pa de dag go/ /zla ba'i dkyil 'khor gyi rnam pa gang yin pa de ni zla ba'i dkyil 'khor nyid du mthong ngo zhes pa ni byang chub sems dpa' des rang gi rtogs pa'i ye shes kyis nyams gsal ba'i tshig go//de la zla ba'i dkyil 'khor gyi rnam pa gang yin zhes pa ni/ zla ba tshes pa'i mtshan nyid de kha ma gang ba'i rnam pa'o/ /zla ba'i dkyil 'khor nyid mthong ngo zhes pa ni nya gang zhing yongs su rdzogs pa'i mtshan nyid do//'dir zla ba'i dkyil 'khor gyi rnam pa zla ba'i dkyil 'khor nyid du mthong ngo zhes pa'i tshig gis ni/ zla ba'i dkyil 'khor gyi rnam pa zhes brjod pa dang / dkyil 'khor nyid du zhes bstan te bstan pa'i tshig de'i tshul gyis so//zla ba'i dkyil 'khor du mthong ba'i rnam pa zla ba'i dkyil 'khor ma rdzogs pa yin par mngon te zhes pa ni gong ma de tshes pa kho na yin par ston pa'o/ /de ltar ci mngon zhe na/ gtan tshigs gang gi phyir zla ba'i dkyil 'khor nyid du mthong ngo zhes phyis smras pa'i phyir ro zhes te/de'i ltar phyis bstan pa'i don 'dis ni de ltar mngon no/ /rgol ba pa na re/ 'o na de dag cig car du ston par mi mdzad nas/ 'di ltar rim du snang ba ci'i phyir sems dpa' yin zhe na/ de dag gi dgongs pa ni 'di lta ste zhes bya ba la sogs pa gsungs te/ 'khor ba'i bag chags kyi rdul gyi khug rna thams cad spangs pas zhes pa ni/de ltar gong du gtan tshigs kyis chos dang gang zag la bdag med par rtogs pas bdag dang bdag gir 'dzin pa la sogs pa'i 'khor ba'i bag chags kyi rdul gyi khug rnas yongs su khebs par gyur pa ste/byang chub sems dpa' des sems rtogs pa'i rim pas yongs su spangs te/ dang bar byas su zin kyang yongs su rdzogs par gyur pa'i rgyu ma bsags par gang bar mi 'gyur te/ thog ma med pa'i dus nas bsags pa'i dkar po'i chos kyi bag chags yongs su ma rgyas pa dang ldan pas zhes pa ni/thog ma med pa'i dus nas byang chub tu sems bskyed cing 'gro ba'i don la 'jug pa la sogs pas de'i bag chags stug por gyur pa dag bsags nas de bzhin du gyur pa'i rgyur gsungs pa las thog ma med pa'i dus nas bsags pa'i rnam par byang ba dkar po'i chos kyi bag chags bsod nams dang ye shes kyi tshogs shin tu bsags par dka' ba dag ma bsags shing de dag yongs su rdzogs par ma gyur pa'i phyir zla ba de yongs su ma rdzogs par snang ngo //bsod nams dang ye shes kyi tshogs rdzogs par ma byas kyi bar du zhes pa ni/ de bas na tshogs chen po gnyis yongs su rdzogs par ma byas kyi bar du zla ba'i dkyil 'khor cig car du rdzogs par snang du mi btub po//de la tshogs rnam gnyis rdzogs par bya ba'i thabs kyang theg pa 'og ma pa ltar dka' bskyad pa'i sgo nas ni ma yin te/ sems bskyed pa de nyid rtogs pa gong nas gong du 'phar pa'i rim pas goms pa mngon du gyur pa la bya'o//'dis kyang 'bras bu dang bcas pa'i ye shes kyis zhes pa ni/ zla ba tshes pa lta bu ma rdzogs par bstan pa'i rnam pa 'dis kyang 'bras bu byang chub sems dang bcas pa'i rgyu'i byang chub kyi sems te/ rgyu dang bcas pa'i ye shes kyis 'bras bu'i chos 'dzin par bstan pa'o//dkar po thams cad kyi bag chags kyi gnas shes pa ni/ 'bras bu ye shes thob par byed pa dang bcas pa'i rgyu'i byang chub sems te/ ye shes des de thob par byed pa'i sa bon tshogs rnam pa gnyis kyi bag chags thog ma med pa'i dus nas bsags pa rnams 'dzin par byed pa'i gnas su nus par bstan pa'o//thog ma med pa'i dus nas 'byung bar bstan to zhes pa ni/ de ltar nus par bstan pa'i phyir na zla ba yongs su ma rdzogs par bstan te/ dper na chu'i khams dang / nam mkha'i dang gser bzhin du yod par bstan pa'o//zla ba ma rdzogs par bstan pa 'dis kyang 'bras bu byang chub dang bcas pa'i rgyu'i byang chub kyi sems te/ rgyu dang bcas pa'i ye shes kyi 'bras bu 'thob par 'gyur ba'i sa bon chos dkar po thams cad kyi bag chags tshogs gnyis rdzogs par bya ba'i gnas 'dzin nus par bstan te/thog ma med pa'i dus nas 'byung bar bstan zhes pa ni thog ma med pa'i dus nas de dag 'dzin par nus zhes pa'i don to/ /de nas byang chub sems gnyis la/ de nas rang bzhin gyis 'od gsal ba'i zhes bya ba la sogs pa gsungs te/ rang bzhin gyis 'od gsal ba zhes pa ni glo bur gyi dri ma thams cad dang bral ba'o//ye shes kyi zla ba de zhes pa ni/ ye shes bdag nyid zla ba tshes pas snang ba de'o/ /yongs su rdzogs par 'gyur ba'i zhes pa ni/ ma rdzogs par snang ba de yongs su rdzogs par bya ba'o/ /mtshan nyid bstan par byed pa'i rgyu//zhes pa ni zla ba yongs su rdzogs par byed pa'i mtshan nyid dam brtan par byed pa'i rgyu ni byang chub kyi sems so/ /rang bzhin gyis grub pa'i snying po zhes pa ni/ de ltar byang chub sems des rgyu byas nas 'byung ba'i zla ba'i dkyil 'khor rdzogs par bskyed pa'i thabs rang bzhin gyis grub pa'i sngags 'di brjod pas de bzhin du 'gyur ba na/snying po 'dis skyed cig ces bya'o/ /de ltar byung nas zla ba'i dkyil 'khor gyi rnam pa 'od zer mang po 'phro ba'i sbyor bas zhes pa ni/ de lta bur gyur pa'i sngags brjod cing bsams pas zla ba'i dkyil 'khor ma rdzogs pa'i rnam pa de las 'od zer mang po 'phro zhing 'du ba'i sbyor bas 'di lta bur 'gyur te/ston ka'i zla ba'i dkyil 'khor nya ba ltar rnyog pa med par mos par byas te zhes pa ni/ dper na/ ston ka'i nam shin tu gsal bar gyur pa'i dus su zla ba'i dkyil 'khor nya gang zhing yongs su rdzogs par snang ba ni gsal ba dang rgya che ba dang dri ma med pa bzhin du ye shes kyi zla ba de yang de bzhin mos par snang ba byas te/shin tu yun ring du rab tu gsal bar snang bar zhes pa ni/ de yang skad cig tsam gyis ma yin gyi ji srid las su rung bar ma gyur pa de srid kyi las su yun ring du yid la bya'o/ /dran pa dang srog nyid bsdams nas zhes pa ni/sngon byas pa'i bag chags yid la rgyu ba dang / dran pa gzhan rgyu ba dang / dbugs nyid shin tu bsdams pa yid la bya ba'o/ /ji srid 'dod par bsam mo/ /de yang dus ni ji srid 'dod pa de srid du bsam par bya ba ste/ sems skyo bar ma gyur gyi bar du yid la bya'o/ /'dis ni rgyu'i gnas skabs su bsdus pa zhes pa ni/zla ba'i dkyil 'khor yongs su rdzogs par bstan pa 'di ni sa gnyis pa nas bzung ste/ sa bcu pa dang / 'bras bu sangs rgyas kyi sa'i mthar thug pa'i tshogs rnam pa gnyis yongs su rdzogs pa'i bdag nyid du byin gyis brlab pa yin par rig par bya'o/ /rgol ba pa na re/'o na 'dir zla ba'i dkyil 'khor gyi rnam pa 'di kho na ltar bstan na/ rgyud dang dgongs 'grel gzhan dag las zla ba'i dkyil 'khor gcig gi steng du gcig brtsegs par bsgom mo zhes zer ba yod na/ /'di ltar tshul mi mthun par ston ba ci'i phyir zhe na/ rtog pa thams cad bsdus pa las ni zla ba'i dkyil 'khor yongs su rdzogs pa'i steng du zla ba yongs su rdzogs pa gnyis pa bsgom par bshad pa gang yin pa de ni zhes bya ba la sogs pa gsungs te/rnam pa 'di dag 'di ltar bstan pa ni slob dpon rgyud la mkhas pa nyid kyis de'i slob mar gyur pa rnams kyang rgyud la mkhas par bya ba'i phyir bstan pa ste/zla ba'i dkyil 'khor rdzogs pa'i steng du zla ba yongs su rdzogs pa gnyis pa zhes pa ni/ de la dang por zla ba'i dkyil 'khor du bsgoms pa'i steng du rdo rje bzhag pa las lha'i sku phyag rgya chen por bskyed par rigs na/ rtog pa bsdus pa las zla ba'i dkyil 'khor rdzogs pa brtsegs mar bsgom pa bshad pa gang yin pa de ni/der mngon par rdzogs par byang chub pa'i byin gyi rlabs bshad pas zhes pa ni rgyu'i byang chub kyi sems tshogs rnam pa gnyis rdzogs pa'i zla ba la/ 'bras bu byang chub kyi sems zla ba gang ba gzhag pa de ni/ rtog pa bsdus pa der zla ba de ltar gnyis rdzogs par bshad pas 'dul ba'i don du bstan pa ste/'dul ba'i skye bo'i dbang gis gzhan du brtags zhes pa ni/ sngags spyod pa'i skye bo kha cig de lta bus 'dul bar 'gyur ba'i dbang gis gong ma las gzhan du brtags te/ zla ba nyis brtsegs su bstan te/rgyu dang 'bras bu'i sems gnyi ga'i mtshan nyid kyi tshul 'di ltar bstan to/ /der ni rang gi sems rtogs pas/ /zhes pa ni rtog pa bsdus pa'i nang der rang gi sems chos dang gang zag la bdag med par brtags pas so/ /bag chags thams cad rnam par dag cing zhes pa ni/ de ltar rtog pa gzung 'dzin la sogs pa dri ma thams cad dang bral ba'o/ /sa dang pha rol phyin pa'i bag chags yongs su rdzogs pa'i gnas skabs zhes pa ni/ de'i sgo nas bsod nams dang ye shes kyi tshogs yongs su rdzogs pa de nyid zla ba'i dkyil 'khor du snang ba'o/ /'dir snga mas byin gyis brlabs so zhes pa ni rgyu'i rang bzhin te/zla ba snga ma der byin gyis brlabs so/ /zla ba gnyis pa ni de bzhin gshegs pa rnams kyis mngon par rtogs pa thob pa'i zhes pa ni/ zla ba snga ma'i steng du phyi ma brtsegs mar bstan pa ni zla ba gnyis pa ste/ de ni de bzhin gshegs pa rnams kyis chos dang gang zag rnam pa gnyis la bdag med par rtogs nas/sangs rgyas kyi sa thob pa'i byang chub sems kyi rang bzhin thugs kyi mtshan mar gyur pa ste/ de bas na byang chub sems kyi ngo bo nyid sems kyi mtshan mar bstan to zhes bya'o/ /rgol ba pa na re/ /'o na de ni de ltar rung na de la gnas pa'i rdo rje des ci ston par byed pa yin zhe na/de la gnas pa'i rdo rje ni/ /zhes bya ba la sogs pa gsungs te de'i 'og tu 'byung ba'i/ ye shes rnam pa lnga rnams su/ /zhes pa ni zla ba de la gnas pa'i rdo rje rtse lnga pa ni mngon par byang chub pa'i de ma thag pa'i thams cad mkhyen pa zhes bya ba'i ye shes gzung 'dzin gyi dri ma dang bral ba'i ye shes de gnas pa ste/lnga ni me long lta bu'i ye shes la sogs pa'o/ /da ni 'di skad du yang de nyid las zhes pa ni/ de ltar bstan pa ni slob dpon gyi tshig yin te/ de yang cis mngon zhe na/ khungs rtog pa thams cad bsdus pa de nyid las 'di ltar bstan te/snying po blo can gyis blangs nas/ /zhes pa ni sems brtag par bya ba'i snying po tsit+ta pra ti bed+hAM ka ro mi zhes bya ba'i sngags kyi tshig de bzhin gshegs pa rnams kyis gnang ba 'di blo can don thams cad grub pa'i byang chub sems dpa' ste/ khyod kyis blangs shing gzhan dag kyang rim par de bzhin du bsgom du gzhug pa'i don ni/rang gi sems bdag med par brtag par bya'o zhes bstan pa'i phyir na/ rang gi sems ni brtag par bya/ /zhes so/ /de ni skad cig mnyam gzhag la/ /zhes pa ni sgrub pa po des skad cig bdag med pa'i chos nyid de lta bu'i don la sems mnyam par ga zhag pa'i bsam gtan la gnas par byas la/de nas 'gro ba'i don la 'jug par 'dod pas byang chub sems bskyed par bya ste/ zla ba'i dkyil 'khor bzhin du blta/ /zhes pa ni/ de ltar bdag med par brtags pa'i sems kyi chos nyid zla ba gang ba lta bur bsam pa'o//de ni sems kyi rang bzhin nam/ /zhes pa 'di dag ni sems de lta bu'i rang bzhin snang ba de la slar rtog pa skyes pa'i bsam pa ston pa'i tshig ste/ ji ltar rtog pa skyes she na/ ji ltar zla ba rdzogs pa'i rnam pa lta bur snang ba de dag gi sems kyi rang bzhin yin par brtags pa dang /kun nas nyon mongs sa bon yin/ /zhes pa ni rang gi rnam par rtog pa las byung ba'i phyir/ kun nas nyon mongs pa'i sa bon dang bcas pas bskyed pa'i sa dge ba dang mi dge ba dang / lung du ma bstan pa'i ngo bo'am/ de 'dzin pa yin nam snyam rtog pa dang / 'di ni kun gzhi sa bon yin/ /zhes pa ni/ kun gzhi sa bon yin nam snyam du rtog pa ste/ de ni 'di yin par brtag gi de lta bur rtog pa dang 'dres pa de dag ni da rung rang gi sems nyid ma rtogs pa kho na'i rnam pa ste/ ci'i phyir zhe na/ de lta bu'i rtog pa mang po dag skye bar byed pa'i phyir ro//'o na ji lta bu'i rnam par shes na rtogs par gyur pa'i tshad yin zhe na/ smras pa/ chos kyi mthar ni rtogs nas ni/ /zhes bya ba la sogs par shes pa ste/ gang gis bdag med pa'i rnam pa gnyis kyi don rtogs nas gzung 'dzin gyi dri ma dang bral bar gyur pa ni chos kyi mthar rtogs pa yin te/tshogs rnam pa gnyis rdzogs par byas pa'i bag chags gnas pa'i rang bzhin no/ /de bas na pha rol phyin drug bag chags bsags pa ni/ sa dang po nas sa bcu pa'i bar du sbyin pa la sogs pa rgyu mthun pa'i sa bon ni bag chags te/ de yang dag pa gsum dang ldan pas na/pha rol tu phyin pa'o/ /rnam pa drug dang ldan pas phyin drug ste/ de'i bag chags bsags pa ni/ rtas par byed pa'am/ gnas par byed pa'am/ 'dzin par byed pa ste/ chags zhes bya ba'i don to/ /yongs su dag pa'i sems can zhes pa ni/ bdag med par rtog pa'i nyes pa thams cad bral bas na dag pa yang yin la/'jig rten dang 'jig rten las 'das pa'i sems can ji snyed pa'i nang na mchog pas na chen po ste/ de nyon mongs kun gzhi ma yin gyi zhes pa ni/ yongs su dag pa'i sems chen po de ni/ gong ma ltar bshad pa de ma yin gyi/ tshogs rnam pa gnyis yun ring po nas bsags pa'i ngo bo de de lta bur snang ba'o/ /de bas na/ bsod nams ye shes tshogs chen po/ /zhes pa ni/ tshad gzung du med do/ /yun rings dus nas bsags pa ste/ /zhes pa ni/ bskal pa grangs med pa'i sngon rol nas 'khor ba ji srid pa de'i bar du bsag go//ji ltar zla ba gang ba bzhin/ /zhes pa ni/ ji ltar zla ba'i dkyil 'khor yongs su rdzogs pa bzhin du rang bzhin gyis 'od gsal ba'o/ /dag cing dang la dri ma med/ /ces pa ni sgrib pa rnam pa gnyis dang bral bas so/ /de ltar tshogs ni rdzogs pa'i phyir/ / zhes bya ni/ tshogs rnam pa gnyis yongs su rdzogs par 'gyur ba'i phyir na/ 'di ltar bstan te/ rang sems zla ba gang ba bzhin/ /zhes pa ni/ tshogs rnam pa gnyis yongs su rdzogs par 'gyur ba las byung bas na/ rang gi sems nyid zla ba'i dkyil 'khor chen po yongs su rdzogs shing rgyas pa ltar bstan nas/snang ba yin par zad kyi/ 'jig rten pa'i zla ba ltar dngos por yod pa'i mtshan nyid can ni ma yin te/ ci'i phyir zhe na/ yod pa ma yin dngos med phyir/ /zhes te/ chos thams cad rang bzhin gyis dben pas na/ mtshan ma'i rnam pa dang bral zhing dngos po med pa'i phyir ro//de bas na/ zla ba ltar yang mi bshad de/ zhes pa ni/ zla ba ltar dngos por snang ba'i mtshan nyid can dmigs pa'am thogs pa dang bcas pa ma yin pas de ltar mi blta ste/ tshogs rnam pa gnyis rdzogs pa dang chos mthun pas na/ bsod nams ye shes tshogs chen dag /rdzogs pas zla ba lta bur bshad/ /ces bya'o/ /rang sems zla ba'i dkyil 'khor la/ /zhes pa ni/ don thams cad grub pa'i byang chub sems dpa' chen po des tshogs rnam pa gnyis legs par bsags pas legs par byas pa'i tshogs rnam pa gnyis kyis bsgos pa'i ngo bo/rang gi sems zla ba'i dkyil 'khor 'dra bar mthong nas dga' zhing mgu bar gyur pa'i sems brod pa skyes nas/ 'di skad smras so/ /gang smras she na/ mgon po bcom ldan bdag gis ni/ /zhes bya ba la sogs pa ste/ nyon mongs pa dang bdud kyi phyogs thams cad bcom nas legs pa phun sum tshogs pa dang ldan pas thams cad kyi mgon du gyur pas so//bdag gis thog ma med pa'i dus nas bsags pa'i nyon mongs pa'i dri ma glo bur ba rnams rnam par dag ste gzung ba dang 'dzin pa'i skyon dang bral nas rang gi sems zla ba'i dkyil 'khor chen por mthong ngo zhes smras pa dang /de bzhin gshegs pa thams cad kyis slar lan gsungs pa/ de nas sangs rgyas kun gsungs pa/ /zhes bya ba la sogs pa ste/ snga nas ma skyes sems bzang 'di/ /zhes pa ni/ sems kyi rang bzhin thog ma nas ma skyes pa rgyu rkyen tshogs pa'i dbang gis 'byung ba ma yin te/kun du bzang po'i sems kyi ngo bo nyid mod kyi/ 'on kyang glo bur gyis nyon mongs zhes pa ni/ 'on kyang glo bur ba'i nyon mongs pa'i bag chags kyis bsgribs par byas pa'o/ /rdzogs pa byang chub sems sbyangs pa'i/ /zhes pa ni/ rgyu'i byang chub sems rnam par dag pa la glo bur ba'i nyon mongs pas ma rung bar byas pa de bdag med pa la mos pa gtsor byas pa'i goms pa mngon du gyur pa'i dbang gis sbyangs nas/de nyid tshogs su gyur pa yongs su rdzogs pa zla ba'i dkyil 'khor du snang ba'i dbus su 'bras bu byang chub sems bsgom par bya bas na/ nyes pa thams cad rnam spangs pa/ /zhes pa ni/ 'bras bu byang chub sems kyi ngo bo nyes pa shin tu phra ba'i yang phra bar gyur pa shes rab phal pas brtag cing spang bar dka' ba'i sgrib pa thams cad gtan nas spangs te/ zad pa'am/ ma lus par byas pa'i sems de rtogs pa mngon du gyur par bya dgos pas na/ byang chub sems kyang rnam par rtogs/ /zhes pa ni de ltar sgrib pa spangs pa'i 'bras bu'i byang chub sems rnam par dag pa'i ngo bo de yang /zla ba'i dkyil 'khor snga ma de'i dbus su rtogs shig pa'o/ /kun du dag pa'i snying po 'dis/ /zhes pa ni/ de ltar brtags pa 'di'ang rtogs par bya ba'i thabs kyi snying po/ oM bod+hi tsit+ta ut+bA da yA mi zhes pa 'dis zla ba'i dkyil 'khor snga ma'i dbus su zla ba'i dkyil 'khor chen po phyi ma gnas par rtogs shig pa'o//de bzhin gshegs pa thams cad kyis de skad ces bka' stsal pa dang / don thams cad grub pa'i byang chub sems dpas de bzhin gshegs pa thams cad kyis de skad gnang ba'i snying po de mnos pas na/snying po dag pa blangs la zhes bya ste/ nyes pa thams cad mi 'byung bas snying po de ni dag pa zhes brjod do/ /zla ba'i dbus su rnam brtags ni/ /zhes pa ni/ snying po brjod nas zla ba snga ma'i steng du rnam par brtags na/ de bzhin du 'gyur ba'o/ /zla ba'i dkyil 'khor gnyis pa yang / /zhes pa ni/zla ba'i dkyil 'khor phyi ma'o/ /zla ba'i dkyil 'khor dbus na mthong / /zhes pa ni snga ma'i dbus su brtags pa de bzhin du zla ba'i dkyil 'khor phyi ma yang de na 'dug par mthong ngo / /de nas sangs rgyas kun gsungs pa/ /zhes pa ni/ de ltar gsol ba dang yang de bzhin gshegs pa thams cad kyis de la slar bka' stsal ba'o//byang chub sems 'di brtan pa'o/ /zhes pa ni de ltar mthong bas na byang chub sems dpa' khyed kyis byang chub kyi sems 'di ni shin tu brtan par 'gyur ro zhes gsungs pa ste/ de la brtan zhes bya ba ni/ gzhan gyis bskyod par mi nus te/ bsgyur bar dka' ba'i don to zhes bya ba la sogs pa rgya cher gsungs so zhes pa ni 'di gcig pu tsam zhig gsungs pa ma yin gyis//de la sogs pa mthar thug gi bar du rgyas par gsungs pa dag rgyud de na yod par bstan pa'o/ /de bas na rtag pa thams cad bsdus pa las gsungs pa'i zhes pa ni/ de ltar zla ba mi mthun pa de las 'dul ba'i skye bo la dgongs nas bstan par zad kyi/nyes pa med do/ /mngon par rdzogs par bya ba'i zhes pa ni/ rim pa 'di ltar bstan pa 'di kho na'o/ /bsdus par bstan pa yang zhes pa ni zla ba gang zhing rdzogs par gyur pa gnyis brtsegs mar bstan pa'o/ /yang zhes bya ba'i sgras ni/dgongs pa gzhan du ston par byed pa'i don de 'chad par byed pa'o/ /'dir yang gzhan du dgongs pa na/ /zhes pa ni/ de kho na nyid bsdus pa chen po zhes bya ba rtsa ba'i rgyud 'dir ni/ zla ba'i dkyil 'khor chos pa de nyid las gang zhing rdzogs par gyur pa gcig bur bstan pa de gnyis kyang mtshan ma'i sgo nas 'dul ba'i dbang gis mi 'dra ba tsam du bstan par zad kyi/don du mi 'dra ba med de gang la dad pa de bzhin du mos par byas na nyes pa med de/ de bas na de ltar rnam pa mi mthun par bstan pa de 'gal ba med par shes par bya'o/ /de ni gong ma'i mtshams sbyar bar bya ste/ de kho na nyid bsdus pa las gsungs pa'i zla ba'i dkyil 'khor rkyang par bsgom pa'am/rtog pa bsdus pa las gsungs pa'i zla ba'i dkyil 'khor brtsegs mar bsgom pa de gnyis gang la dad pa bzhin du bsgoms pa'i zla ba'i dkyil 'khor de las rim kyis brtag par bya ba'i bsam gtan gyi thabs gsungs pa/de nas kun du bzang po byang chub kyi sems bskyed pa zla ba'i dkyil 'khor de la zhes bya ba la sogs pa gsungs pa ste/ de la de nas zhes pa ni skabs kyi tshig go/ /kun du bzang bo'i zhes pa ni/ rnam pa thams cad du bzang por gnas pa'i byang chub kyi sems las byung ba'i zla ba de gang bsgoms pa'i steng du zhes pa'i don to//phyi ma de nyid kyi don dang ldan pas de skad do/ /de la zhes bya ba ni de'i steng du gzhag par bya ba mtshon pa'i tshig go/ /rdo rje tshig gis snying po 'di brjod la/ /zhes pa ni/ sgra med pa'i tshig gis 'og nas 'byung ba'i snying po tiSh+Tha badzra zhes bya ba 'di brjod la/dam tshig gi phyag rgya mos par bya ba'o/ /rdo rje rtse lnga kha gnyis pa/ /zhes pa ni/ ye shes lnga'i bdag nyid pas rdo rje'o/ /gzi byin dang 'od med pa las bzlog pas na/ snang ba dang gsal bar bya'o zhes bstan to/ /snying po tiSh+Tha badzra zhes bya ba'i don ni zla ba'i dkyil 'khor la rdo rje brtan par 'dug shig pa'o//'dis kyang zhes pa 'di ltar sngags dang bcas par bsam pa 'dis kyang 'bras bu thob par bstan pa dang 'brel pa'o/ /mngon par byang chub pas thob par bya ba'i zhes pa ni/ rgyu byang chub sems dpa'i sa bcu rdzogs par byas nas 'bras bu sangs rgyas kyis la sbyor zhing bla na med pa'i byang chub de thob pas na/thams cad mkhyen pa mngon du 'gyur bar bstan te/ thams cad mkhyen pa zhes pa ni shes bya ma lus par khong du chud pa ste/ snod dang bcud du bcas pa'am 'khor ba dang mya ngan las 'das par bsdus pa'i chos thams cad mngon sum du mkhyen pa ste/ dper na shing tog skyu ru ra'i 'bras bu mnyams pa'am/ shel dwangs pa lag mthil du blangs pa bzhin du gyur pas na de skad brjod do/ /yan lag lnga'i mtshan nyid spyod dam mtshon pa zhes pa ni ye shes lnga'i rang bzhin rdo rje rtse lnga par bstan pa ste/ dper na lag pa dang rkang pa'i lus rdzogs pa'i rgyu byed pas na/yan lag ces 'bod pa bzhin/ ye shes lnga po 'dis kyang sku yongs su rdzogs par byed pas na/ yan lag ces bya ste/ de bas na de bzhin gshegs pa'i sa la gnas pa bstan to zhes bya'o/ /rgol ba pa na re/ 'o na 'jig rten na rdo rje zhes ming mthun par grags pa mang po dag yod na/de dag mtshan nyid mi mthun zhing dbyibs tha dad par gnas pa sha stag tu snang na/ 'dir bstan pa 'di dbyibs 'di ltar 'dod pa ci dgos she na/ /smras pa/ 'jig rten du grags pa'i rdo rje zhes ming mthun pa las mtshan nyid mi mthun pa dang / dbyibs tha dad par so so na gnas par snang yang de dag chos mthun pas na de skad du brjod la 'dir rdo rje zhes brjod pa 'di ltar bstan pa 'di'i don ni 'di ltar shes par bya ste/gang zhe na/ 'di ni log par lta ba'i ri thams cad 'joms pa la mkhas pa'i ye shes zhes bya ba la sogs pa gsungs te/ de ltar 'di ni zhes pa ni de ltar bstan pa'i rdo rje brjod pa 'di'o//log par lta ba ni phyin ci log bzhi la sogs pa yang yin mod kyi/ 'dir ni khyad par du yang bdag tu lta ba'i rnam pa gnyis po kho na'o/ /de ni shin tu brtsan par 'gyur te/ ri dang mthun pa ni ri zhes brjod do/ /de 'joms shing 'jig par byed pa la thabs khyad par du gyur pa'i mtshan nyid dang ldan pa'i ye shes te/rtse mo lnga dang ldan pa nyid ye shes lnga'i bdag nyid du bstan pa ste/ rtse mo dbu ma ni chos kyi dbyings rnam par dag pa'i mtshan mar bstan pa'o zhes pa ni/ che ba'i yon tan gyi 'byung gnas dbyings rnam par dag pa de la ni chos kyi dbyings kyi ye shes brjod de/de'i mtshan mar ni dbus ma de bstan to/ /de las gzhan pa'i bzhi rnams ni/ /zhes pa ni/ de phyogs bzhi nas 'dud pa'i rwa ste/ me long lta bu'i ye shes zhes pa ni/ kun gzhi rnam par dag pa'i ngo bo las gyur pa'i chos thams cad gsal bzhin du rtogs pa med pa mkhyen pa'o//mnyam pa nyid kyi ye shes zhes pa ni nyon mongs pa can gyi yid rnam par dag pa las gyur pa'i ngo bo thams cad mnyam par rtogs pa las/ bdag gzhan du mi 'byed pa'o/ /so sor rtog pa zhes pa ni yid kyi rnam par shes pa dus gsum la gsal bar gcod pa de rnam par dag pa las gyur pa'i ngo bo chos thams cad gsal zhing ma 'dres pa rtogs pa yang mi 'byung bzhin du de ltar rig par bya'o//bya ba grub pa'i ye shes zhes pa ni/ sgo lnga'i rnam par shes pa rnam par dag pa las gyur pa'i ngo bo bdag gzhan gyi don la brtson par byed pa ste/ de lta bu'i rnam pa bstan to/ /kha cig na re/ ye shes de la yang don rnam pa lnga ste/ rgyu dang rkyen dang / rang bzhin dang / 'bras bu dang / nges pa'i tshig go zhes bshad do/ /kha gnyis kyis zhes brtse lnga pa gnyis yin man du byung ba'o/ /ye shes kyi snang ba zhes pa ni ye shes lnga po de'i snang ba phyogs bcur rgyas shing khyab par byed pas khyad par bstan pa'o//oM badzra ma ka s+t+waM/ zhes pa ni/ sngags 'di brjod pa'i don ni de lta bu'i don dang ldan pa'i rdo rje de nyid de bzhin gshegs pa'i sku gsung thugs dang ldan pa'i bdag nyid du mos pa bskyed par bya'o/ /rdo rje de la zhes pa ni zla ba'i dkyil 'khor la gnas pa'i rdo rje ye shes lnga'i bdag nyid dang ldan pa de'o//sku gsung thugs rdo rje dbyings zhugs/ /zhes pa ni/ phyogs bcu'i 'jig rten ji snyed pa na bzhugs pa'i de bzhin gshegs pa rnams kyi sku gsung thugs rdo rje dbyings ma lus pa dag 'dus nas de la zhugs par mos pa'o/ /de yang ma rig pa'i mun pa dang lta ba'i thibs po thams cad bcom pas na/gsal ba zhes bya'o/ /gzhan gyis bskyod par mi nus shing mi mthun pa'i dbang du mi 'gro bas brtan pa zhes bya'o/ /bdag yin no zhes pa ni/ ye shes kyi bdag nyid rdo rje bdag yin pa'o/ /sku gsung thugs kyi rdo rje dbyings zhes brjod pa de ji lta bu dag la bya zhe na/smras pa/ sku'i dbyings kyang zhes bya ba la sogs pa gsungs te/ sku gsung thugs kyi rdo rje dbyings ji snyed pa dag rdo rje la 'jug pa'i mtshan nyid ni 'di dag kho nar shes par bya ste/ dbyings zhes bya ba yang 'dir ni rang bzhin kho na la shes par bya ste/ sku mang po rnams so zhes pa 'di dag kyang sku shin tu phra ba'i mtshan nyid can dag tu shes par bya zhes pa kha cig 'chad do//kha cig na re phra bar nges pa med kyi gong ltar dad pa'am ting nge 'dzin gyis ji ltar lcogs pa bzhin no zhes zer ro/ /gsung bkod pa'i rgyan so sor snang ba zhes pa ni/ 'gro ba rigs mi mthun pa sde mang por gyur pa rnams la de dang ji ltar 'tsham pa bzhin du skad do cog gis rnam pas so sor chos ston pas grol bar mdzad pa'i gsung ngo //rnam pa gcig tu na gsung gcig phyung bas 'gro ba rigs mi mthun pa bsam pa tha dad pa dag la gang la mos pa bzhin du rang rang gi skad dang mthun par don gyis go bar nus pa ste/ ji ltar mdo sde las de bzhin gshegs pa'i gsung gcig gis 'gro ba so so'i skad du chos ston par nus pa ni de bzhin gshegs pa'i chos kyi dung bsgrags zhes bya ste/ bsod nams chen po bsags pa'i mthu las grub pa yin gyi/ ji tsam gyis bsod nams tshod gzung du yod pa'am/ theg pa 'og ma bdag gi bsam pas 'grub pa ma yin no zhes gsangs ba'i don de dang mthun pa ste/'di'i phyi ma yang don de bzhin du shes par bya'o/ /mi gnas pa'i mya ngan las 'das pa zhes pa ni byis pa so so'i skye bo'am/ nyan thos dang rang sangs rgyas lta bur gang gi mthar yang ma byung ba'i bde ba chen po gya nom pa de la ni mi gnas pa'i mya ngan las 'das pa zhes bya ste/de'i mtshan nyid du byin gyis brlabs par rig par bya'o/ /de nas snying po 'di brjod pas zhes pa ni de ltar gnas pa'i rdo rje'i mtshan nyid 'dzin pa de las 'og nas 'byung ba'i snying po 'di brjod pas sku phyag rgya la sbyor ba mngon du bya ba ste/'od zer 'phro ba dang 'du ba'i tshul gyis zhes pa ni/ ye shes kyi rdo rje tshogs rnam pa gnyis rdzogs par zla ba'i dkyil 'khor na gnas pa de las 'od zer gyi 'phro 'du 'byung ba ste/ de las de bzhin gshegs pa'i sku 'jig rten gyi rdul phra mo dang mnyam pa'i grangs snyed 'byung zhing 'phros pas phyogs bcu'i 'jig rten gyi khams rab 'byams ji snyed pa rnams su gshegs te/zhing de dag na gnas pa'i 'gro ba de dag gi bsam pa dang / skal ba dang / mos pa ji lta ba bzhin du sangs rgyas kyi mdzad pas don mdzad nas de dag slar 'dus te/ ye shes kyi rdo rje de nyid la thim pa las 'od kyi gong bu gcig tu gyur pa las sku phyag rgya chen po'i bdag nyid du gyur te/sku yang ji lta bu zhig ce na/ gang ltar mos pa de bzhin du gyur pa'i phyir bcom ldan 'das rnam par snang mdzad kyi sku'am/ bcom ldan 'das shAkya thub pa'i sku nyi ma'i 'od kyi dkyil 'khor gyis 'jig rten gyi khams mtha' yas bar khyab pa'i bdag nyid du gyur par rab tu brtag go zhes gsungs te/de nas bcom ldan 'das rnam par snang mdzad ces pa ni bcom pa dang ldan pa'i don gyis na/ bcom ldan 'das te/ skal ba dang ldan pa'i 'gro ba rnams la ci mos pa'i rnam par snang ba'i sku ston par mdzad pas na/ rnam par snang mdzad de/ dngos su na bcom ldan 'das rdo rje dbyings zhes brjod pa'i sangs rgyas so/ /sangs rgyas bcom ldan 'das shAkya thub pa zhes pa ste/ 'di yang nyon mongs pa'i mun pa dang bral zhing shes bya'i yul che ba'i yon tan gyi rnam pas khams rgyas par 'gyur te/ mi mthun pa'i phyogs 'joms shing legs par gyur ba'i yon tan rnam pa drug la sogs pa dang ldan pa'i phyir ro//shAkya thub pa zhes pa ni/ shAkya'i rigs rgyal po'i sras su sku skye ba bzhes shing shAkya rnams kyis thub par mdzad pa'i gzi mdangs mnga' bas na/ shAkya thub pa ste/de'i sku thabs kyi bdag nyid nyi ma'i dkyil 'khor gyis bskor ba ste/ ma rig pa'i mun pa 'joms par byed pa'i don dang ldan pas na/ 'di ltar bstan to/ /gzhan dag na re ji ltar sbyor ba'i rgyud rnams ni bcom ldan 'das rnam par snang mdzad kho nas gsungs par zad kyi/ gzhan gyis gsungs pa ma yin la/ de dag gi nang nas kyang bcom ldan 'das rnam par snang mdzad kho na rim pa 'di dag gis gsal bar bsgom zhes gsungs na/ 'dir 'di ltar ston pa ci dgos she na/ smras pa/ de ltar sbyor ba'i rgyud rnams bcom ldan 'das rnam par snang mdzad kho nas gsungs shing /de'i cha lugs gsal bar bsgom/ /zhes gsungs par zad kyi/ gzhan dag ma gsungs pa yang bden mod kyi 'on kyang bcom ldan 'das shAkya thub pa 'di nyid kyis kyang / sbyor ba'i rgyud 'chad pa'i ston pa yang mdzad la/ 'di gnyis thams cad du rang bzhin gyis 'brel ba'i mtshan nyid can bas 'di ltar bstan pa yang yin la/'dzam bu gling du mi rnams kyi ston par gyur pa 'di kho na bas 'dzam bu'i gling pa'i mi 'di dag gi rjes su sgrub par 'dod pa la phan gdags pa'i phyir slob dpon gyis 'di ltar bstan pa la 'gal ba med do/ /kha cig na re/ 'jig rten du byung ba'i de bzhin gshegs pa rnams la yang cha lugs rnam pa gnyis mnga' la/ de'i rjes su sgrub pa'i 'gro ba rnams kyang mos pa mi mthun pa'i dbang gis cha lugs rnam pa gnyis kho nas sgrub par byed cing / de'i spyod yul la 'jug par byed de/ gang zhe na/ rab tu byung ba dang /khyim pa'o/ /de la khyim ba'i cha lugs 'dzin pa'i lha la dad pa'i gang zag rnams kyi don du ni/ bcom ldan 'das rnam par snang mdzad kho nas bstan la/ gsang sngags spyod pa'i 'gro ba de dag la yang gang dag rab tu byung ba'i tshul can gyi lha la dad pa yod pa dag gi don du ni shAkya thub pa smos par rig par bya'o zhes zer ro//gzhan dag na re/ rnam par snang mdzad kyi tshul 'di nyid kyis sku phyag rgya yang 'di bzhin du bstan pa yin te/ shAkya thub pa rab tu byung ba'i tshul can 'di gsang sngags sgrub pa'i skabs su bstan pa dgos pa ci yang med de/ de lta na ni nyan thos la sogs pa'i tshul theg pa 'og ma ba rnams kyang gsang sngags kyi don la 'jug pa dang /nyams su len pa'i gtso bor thal ba'i skyon 'byung bar 'gyur bas 'di mi rigs so zhe na/ smras pa/ rnam par snang mdzad chen po yang bden mod kyi/ 'on kyang shAkya thub pa 'dzam bu'i gling du mi rnams kyi ston par gyur pa bden gyis kyang /lha bsod nams can dag rigs nges pa'i sa la 'god par mdzad pa dang / lha sdug bsngal gyis gdungs pa rnams de las dbugs dbyung ba dang / gang dag ngan song gi 'dam du bying ba rnams de las gdon par bya ba'i phyir/ mtho ris lha rnams kyi gan du gshegs nas gsang sngags kyi rgyud chen po ston par mdzad cing de'i dkyil 'khor chen po'i bdag por bzhugs nas/'khor rnams la snying po dang nye ba'i snying po dang / rig pa dang / dam tshig dang / phyag rgya dang / dkyil 'khor gyi don yongs su 'chad par mdzad na/ ci 'dir sgrub thabs kyi nang du 'di ltar mos pa'i dbang du bsam gtan gyi sbyor ba bya bar bstan pa 'gal lam/de lta na ni de bzhin gshegs pa rnams kyang tha dad par 'gyur te/ sku gsum dang ldan yang bshad pa dang / mnyam pa dang / mi mnyam pa'i rnam par dbye ba gsungs pa'i don yang de ltar ma yin zhing rnam pa gzhan du 'grub pa'i rgyur gyur na/de ltar ma yin te/ de bzhin gshegs pa rnams kyis 'dul ba'i zhing mi mthun pa'i dbang gis sku du ma dang / rnam par thar pa tha dad pa dang / cha lugs mi mthun par ston pas rang bzhin gzhan du 'gyur ba med de/ ji ltar dper na shes rab kyi rang bzhin gyis bsgyur ba bzhin pas ji ltar bstan pa la 'gal ba med par shes par bya'o//oM ya bat+ta thA ga ta sh+ya thA AHhU~M zhes bya ba'i sngags 'di brjod pa'i don ni 'bras bu'i don sdud par byed pa ste/ kyang zhes bya ba ni de ltar grub tu zin gyis kyang / 'dis kyang 'og ma 'di ltar grub par byed ces pa'o/ /ye shes kyis kun du 'od ces pa ni/sangs rgyas kyi ye shes mngon du gyur pa'i sa mtshan kun du 'od ces bya'o/ /rgyu mthun par gyur pa zhes pa ni/ sa de'i rgyu mthun par gyur pa'i 'bras bu ste/ gang zhe na/ de bzhin gshegs pa'i sku dang / gsung dang thugs rnams sdud par blta'o zhes bya ba 'di kho na'o//de ltar mngon par byang chub pa'i rim pas sku phyag rgya chen po yongs su rdzogs pa la sbyor bar byed pa'i thabs slob dpon gyis gsungs pa de yang / rgyud 'ga' nas gsungs par ma zad kyi rgyud mang po dag las don mthun par gsungs te/ de dag kyang 'dir slob dpon gyis phyogs gcig tu bsdus te bstan pa/dgos pa 'di thams cad kyang rdo rje rtse mo theg pa chen po mngon par rtogs pa rab tu dbye ba las gsal bar bstan te zhes bya ba la sogs pa gsungs te/ de la dgos pa 'di thams cad ces pa ni/ 'di ltar bshad pa'i lnga byang chub pa'i rim bas lha'i sku phyag rgyar sbyor ba'i thabs ston pa'i dgongs pa'o//rdo rje rtse mo zhes pa ni/ rgyud kyi mtshan te rnal 'byor gyi rgyud thams cad kyi phyi mor gyur pa the tshom thams cad gcod par byed pa'i zhal mchu ba ste/ dper na rdzas kyi rdo rje rtse mos rdzas kyi rnam pa thams cad 'bigs par byed pa dang 'dra bar/rgyud 'di'i don gyis kyang gzhan las byung ba'i the tshom gyi ri bo dang / gzhan gyi dra ba gcod cing sdug pa'o/ /chos nyid la 'bigs par byed pa'i mtshan nyid dang ldan pas na'o/ /theg pa chen po zhes pa ni/ de kho na nyid de'i don dang ldan pas so/ /mngon par rtogs pa ni gsal ba'i ngo bor rig pa'o//rab tu dbye ba zhes pa ni/ yan lag gi rab tu dbye ba ste/ rdo rje rtse mo zhes bya ba'i theg pa chen po'i gsang sngags kyi rgyud yan lag rab tu dbye ba'i don gsal bar rtogs par byed pa de las 'di ltar bstan te/ sra zhing sdug la rab tu dag /ces pa ni dang por rang gi sems brtag pa'i mtshan nyid brtan pa gang zag dang chos la bdag med par rtogs pa'i sems de ni bdud dang mu stegs la sogs pas mi tshugs pa'i phyir na sra zhes bya'o//tshogs chen po gnyis rdzogs pas na sdug ces bya'o/ /sgrib pa rnam pa gnyis dang bral ba'i rang bzhin bas na rab tu dag ces bya'o//de yang dper na nam mkha' dang 'dra bas na/ nam mkha' dang ni mtshungs mnyam pa/ /zhes bya'o/ /gnas ngan len gyi bag chags dang bral bas na/ gnas ngan len pa kun las grol/ /zhes bya'o/ /gnas ngan len pas grol zhing gnyen pos sgrib pa'i rnam par rtog pa bsam bas na/rnam par rtog pa spangs pa'i zhes bya'o/ /nyan thos la sogs pa theg pa 'og ma pa la yang thabs de yod mod kyi de bas khyad par du gyur pas mchog ces bya'o/ /de kho na nyon mongs pa'i dri ma zad pa'i mtshan nyid pas/ nyon mongs dri ma thams cad dag /ces bya'o/ /nyon mongs pa'i dri ma dag pa'i byang chub kyi sems rang bzhin med pa de nyid dang po zla ba lta bur mthong ba dang /zla ba gnyis las dang por mthong bas na/ zla ba lta bur mngon mthong ba/ /zhes bya'o/ /nyan thos ltar zhi ba la gnas pa ma yin gyi/ chos nyid rtogs pa'i byams pa dang / snying rje'i ngo bo las byung bas na/byams dang snying rje las byung ba/ /zhes bya'o/ /bdag gcig pu bsgo ba de bya ba'i phyir ma yin pas na/ sems can la ni phan mdzad pa/ /zhes bya'o/ /sems can la phan pa mdzad pa'i byang chub chen po de/ zla ba lta bur snang bas so/ /dri ma dang bral bas na/ /byang chub sems chen rab tu dag /ces bya'o/ /byang chub sems rnam par dag pa nyid sangs rgyas dang byang chub sems dpa' thams cad kyi rgyu'i ye shes kyi sems 'bras bu'i ngo bo dang bcas pas nyes pa'i skyon med pas na/ sangs rgyas byang chub skyon med pa/ /zhes bya'o/ /sa dang pha rol phyin pa la sogs pa rnam par dkar ba'i phyogs yon tan gyi cha rdzogs pas na/dge ba'i phyogs rnams kun rdzogs shing / /zhes bya'o/ /de kho na nyon mongs pa dang bral ba'i ngo bo bas na/ nyon mongs thams cad rnam par grol/ /zhes bya'o/ /chos kyi dbyings gzhan gyis phigs par dka' ba'am/ tshogs rnam pa gnyis rdzogs pas stug por gyur pa las byung bas de nyid kyi dkyil na zla ba yongs su gang ba ltar gnas par mthong bas/stug po'i dbus na zla chen po/ /zhes bya'o/ /de ni byang chub las byung ba'i zla ba brtsegs ma las phyi mar gyur pas na/ byang chub sems ni gnyis pa ste/ /zhes bya'o/ /bskal pa grangs med pa gcig ste/zla ba'i dkyil 'khor gnyis pa de bskal pa grangs med pa gsum du bla na med pa'i byang chub bsgrub pa'i thob pa las byung bas na bskal pa grangs med gsum du byang chub bsgrubs pas thob pa ste zhes bya'o/ /stobs dang mi 'jigs pa dang / ma 'dres pa la sogs pa'i chos rnams ni phyi rol pa las dam par gyur cing 'og ma rnams kyi mchog pas na/dam pa'i chos mchog grangs med pa/ /zhes bya'o/ /de'i 'gro ba'i don du bdag gis spyod cing gzhan la ston pa dang / gzhan spyod du 'jug pa ni/ smra ba por grags pa ji snyed pa rnams kyi nang na mchog /zla ba ni zla ba ltar snang ba de yin pas na/ spyad pa spyod pa mchog yin te/ /zhes bya'o/ /de bzhin gshegs pa rnams kyis dang / nyan thos dang mu stegs pa la sogs pa lta ba tha dad pa'i rtog pa can gyi shes rab kyis brtags pa'i cha la snang ba'i sa dang / sa ma yin pa thams cad rig pas na//sa dang sa min shin tu mkhyen/ /zhes bya'o/ /sgrib pa rnam pa gnyis dang bral bas/ ye shes dag pas sgrib pa med/ /ces bya'o/ /de lta bu'i yon tan gyi rnam par rdzogs pa'i zla ba'i steng du ye shes kyi bdag nyid thugs kyi mtshan ma rdo rje gnas par brtags pa la ni/ zla ba'i dkyil 'khor dbus su ni/ /zhes bya'o/ /rtse lnga pa'i rdo rje gnas par brtags pa la ni/ rdo rje'i gzugs ni blta bar bya/ /zhes bya'o/ /de ni sangs rgyas kun gyi dang / gzugs brnyan gyi sku las ye shes lnga'i rang bzhin du gnas pa'i rdo rje 'di ni chos kyi sku'i ngo bo bas na/ sangs rgyas kun gyi rang bzhin sku/ /zhes bya'o/ /de na rang bzhin dmigs su med cing phyogs gang na yang mi gnas pas na/ snang ba med cing gnas med pa/ /zhes bya'o/ /rgyu rkyen gyis ma bskyed cing phywa dang dbang phyug la sogs pa'i byed pa pos ma byas te/ rang bzhin gyis sgrib pa dag pa'i mtshan nyid can pas na/ma skyes ma byas pa dag ste/ /zhes bya'o/ /yod med la sogs pa'i mtha' thams cad dang bral bas na/ dngos dang dngos med rnam par spangs/ /zhes bya'o/ /mtshon cha la sogs pas gcad par mi nus shing mu stegs la sogs pa'i lta ba ngan pas mi shigs shing mes tshig par mi nus pas na/mi chod mi shigs mi tshig pa/ /zhes bya'o/ /gzugs la sogs pa'i phung po lnga dang bral ba zag pa med pa'i chos kyi sku bas na/ phung po med pa chos kyis/ /zhes bya'o/ /chos kyi sku de lta bu de ni rdo rje'i rang bzhin las byung ba'am/ rnam gcig chos kyi sku rdo rje dang 'dra ba las byung bas na/ rdo rje bdag nyid las byung ba//zhes bya'o/ /ma skyes pa'i ngo bo zla ba'i steng na gnas pa'i rdo rje de ni rdo rje'i sku ste de'i steng du gzhan gzhag tu med pas/ rdo rje'i sku ni bla med pa'o/ /zhes bya ba la sogs pa gang gsungs pa zhes pa ni/ de dag mthar thug gi bar du rnam pa mang po dag rgyas par gsungs so zhes bya ba'i tha tshig go//de ltar bstan pa'i lnga mngon par byang chub pa'i rim pa bstan pa 'di yang / slob dpon kha cig na re dang por rang gi sems brtags pas bdag med pa rnam pa gnyis kyi don rtogs pa ni stong pa chen po'i ye shes so/ /gnyis pa byang chub tu sems bskyed pa zla ba'i dkyil 'khor du snang ba ni me long lta bu'i ye shes so//gsum pa zla ba la thugs mtshan rdo rje gzhag pa ni chos kyi sku'i ngo bo ste so sor kun du rtog pa'i ye shes so/ /bzhi pa de bzhin gshegs pa rnams kyi sku gsung thugs rdo rje'i dbyings ji snyed pa'i byin rlabs kyis brtan zhing mi g.yo bar byas pa ni mnyam pa nyid kyi ye shes so/ /lnga pa sku phyag rgya chen po yongs su rdzogs pa'i mtshan nyid du gnas par gyur pa ni bya ba grub pa'i ye shes so zhes zer na/sngar sku gsum dang ye shes lnga thob bzhin pa las phyis sngags kyi che ba'i bdag nyid de'i sgo nas sangs rgyas bar bya ba'i thabs bstan pa'i phyir mngon par byang chub pa'i rim pas sems kyi bdag nyid gong nas gong du rtas par byed pa'i bsam gtan gyi sku phyag rgya chen po rdzogs par bstan te de ltar snang bzhin du sems rtogs pa'i rim pa lnga dang /ye shes lngar sbyar ba de yang de ltar ni yin mod kyi/ 'on kyang rtsa ba'i rgyud chen po dpal de nyid 'dus pa las don thams cad grub pa'i byang chub sems dpa' lnga mngon par rdzogs pa'i rim pas de bzhin gshegs pa mngon par rdzogs par sangs rgyas nas/de bzhin gshegs pa rnams la phyag 'tshal nas byin gyis brlab par gsol zhes zhus pa dang de bzhin gshegs pa thams cad gnas rnam pa bzhir bzhugs pas ye shes rnam pa lnga dang ldan par gyur to/ / zhes gleng ba dang sbyar na sku phyag rgya chen po rdzogs pa'i cho ga'i yan lag tshang bar gyur pas ye shes lnga thob par brtags na rung bar mngon no/ /gzhan dag na re gong gi skabs rnams su ye shes lnga dang ldan zhing rdzogs par gyur pa'i tshig nges pa gsungs bzhin du phyi nas gdod thob par bya ba yang 'gal la lnga mngon par byang chub pa'i rim pa dang /sbyar ba yang rigs pa ma yin no zhe na/ smras pa/ de ltar yang sngon du ye shes lnga dang ldan par brjod kyis kyang sku yan lag rdzogs par ma gyur pas ye shes lnga dang ldan pa'i sangs rgyas zhes mi brjod la phyis sku yongs su rdzogs par gyur nas gdod ye shes lnga dang ldan pa'i sangs rgyas zhes brjod pas na/phyis bstan par rigs par mngon te/ ji ltar dper na rgyal po'i sras rgyal rigs su skyes pa yin gyis kyang / rgyal srid kyi dbang ma bskur gyi bar du rgyal chos kyang mi mdzad na/ rgyal po zhes bya ba'i ming yang mi thob ste/ de dag dang ldan na de bzhin du 'gyur ba bzhin no//gzhan dag na re/ lnga mngon par byang chub pa'i rim pa 'di dag las dang po ni chos kyi sku thob par byed pa'i rgyu'o/ /gnyis pa ni bsod nams kyi tshogs so/ /gsum pa ni ye shes kyi tshogs so/ /bzhi pa ni chos kyi sku gnas pa'o/ /lnga pa ni de las gzugs kyi skur bstan nas 'gro ba'i don la 'jug pa'o zhes zer ro//de la smras pa/ de ltar bstan pa yang 'gal ba med mod kyi/ 'on kyang rgyu bsod nams kyi tshogs nyid 'bras bu ye shes kyi tshogs su gyur pas de gnyis gcig gi ngo bor gcig gnas pas/ de gnyis las byung ba'i 'bras bu'i sku yang de bzhin no zhes zer ro/ / de la lan btab pa/ de ltar yin gyis kyang rnam par dbye ba brtsams pa yang 'gal ba med do/ /bsod nams kyi rgyu mthun pa gzugs kyi sku la ye shes kyi tshogs kyi rgyu mthun pa ni/ chos kyi sku ste ji ltar mdo sde las zag pa dang bcas pa'i dge ba'i rtsa ba las byung ba ni gzugs kyi sku la zag pa med pa'i dge ba'i rtsa ba las byung ba ni chos kyi sku'o zhes bshad do//de bas na 'di ltar bstan pa yang 'gal ba med par dgongs pa'o zhes zer ro/ /de ltar bstan pa'i lnga mngon par byang chub pa'i rim pa de yang lam rnam pa gsum dang / ye shes rnam pa gsum dang sbyar bar bya ste/ dang por rang gi sems yang dag par rig pas sems kyi chos nyid rtogs pa dang /gnyis pa byang chub tu sems bskyed pa zla ba'i dkyil 'khor du snang ba gnyis ni rgyu'i ye shes zhes bya ste/ mthong ba'i lam dang bsgom pa'i lam yongs su rdzogs pas dang po nas sa bcu'i mthar phyin par gyur pa man chad kyi lam gyi rang bzhin du rig par bya'o//de las ye shes kyi bdag nyid rdo rje rtse lnga par gyur pa zla ba'i dkyil 'khor la gnas pa ni 'bras bu ye shes zhes bya ste/ sa bcu mthar phyin pas sangs rgyas kyi sa la rnam par grol ba'i lhun gyis grub pa chos kyi sku dang sbyar ro/ /brtan par byas pa dang sangs rgyas kyi skur gyur pa gnyis kyis ni rgyu mthun pa'i 'bras bu'i ye shes zhes bya ste/sngon gyi smon lam ji ltar btab pa de bzhin du grub pa'i mthu brnyes te/ sngon rgyu'i gnas skabs su ji ltar bsgoms shing spyad pa de dang mthun pa'i 'bras bu'i yon tan gyi rnam pa mchog thams cad dang ldan pa sangs rgyas kyi skur bdag nyid gyur pa'o//de ltar lnga mngon par byang chub pa'i rim pas sku phyag rgya chen po yongs su rdzogs pa'i ngo bor gnas pa de ni sangs rgyas kyi gdung 'tshob cing dam pa'i chos kyi rgyal srid 'dzin par byed pa ste/ dper na rgyal rigs su gyur pa'i 'khor los sgyur ba'i rgyal po'i sras kyis rgyal po'i gdung 'tshob cing srid 'dzin pa dang 'dra bar shes par bya'o//de ltar sku phyag rgya chen po'i bsam gtan mthar thug pa dang / de ni brtan zhing mi g.yo ba dang / mda' dbang dam pa dang ldan pa dang / bsam gtan rnam pa gzhan du mi 'gyur ba dang / longs spyod phun sum tshogs pa dang ldan par bya ba'i phyir rigs bzhi'i de bzhin gshegs pa rnams la gsol ba btab la rigs bzhi pa de dag gi rnam par thar pa'i mthu las byung ba'i byin gyi rlabs dang /dbang bskur ba dang / ting nge 'dzin dang / mchod pa'i cho ga rnams yongs su rdzogs par bya ste/ de la dang por de bzhin gshegs pa'i rigs kyi rnam par thar pa'i mthu las byung ba'i byin gyis brlab pa'i cho 'phrul gsungs pa/de ltar de bzhin gshegs pa'i ting nge 'dzin shin tu bsgoms nas zhes bya ba la sogs pa gsungs te/ de la de ltar zhes bya ba ni gong ma'i don la bsnyegs pa'i tshig ste/ gong du lnga mngon par byang chub pa'i rim pas de bzhin gshegs pa'i sku phyag rgya chen po yongs su rdzogs pa'i ting nge 'dzin shin tu gsal bar bsgoms nas de bsam gtan de'i yan lag rnams rdzogs par bya ba'i phyir/dam tshig sems dpar byin gyis brlab pa bstan te/ snying po 'dis dam tshig sems dpa' zhes pa ni/ sems dpa' la yang rnam pa gsum ste/ pha rol tu phyin pa'i sems dpa' dang / ye shes kyi sems dpa' dang / dam tshig gi sems dpa' gsum las 'dir ni dam tshig gi sems dpa' byin gyis brlab pa ste/ snying po 'di brjod pas dam tshig sems dpa' chen po gang yin pa de ni bdag go zhes nga rgyal bskyed par bya'o//oM sarba ta thA ga ta ma hA sa ma ya satwa s+t+waM/ zhes pa ni de bzhin gshegs pa thams cad kyi dam tshig sems dpa' chen po dag go zhes pa'i don to/ /de nas bdag dang mi gnyis pa'i sangs rgyas kyi sku de la zhes pa ni bdag dang rang bzhin tha mi dad par brtag pa'i bsam gtan gyis bskyed pa'i sku phyag rgya chen po la de la byang chub chen por mos par bya ste zhes pa ni/sangs rgyas kyi dam tshig sems dpa' la ni byang chub chen po zhes bya ste/ sangs rgyas kyi sa la gnas par mos par bya ste/ ji skad du/ rgyud las kyang de'i gtan tshigs gsungs pa/ rdo rje sems dpa'i ting 'dzin gnas//zhes pa ni/ dang por bdag gi sems brtag pa'i rim pas bdag med pa'i bsam gtan la mos par bya ba dang / zla ba'i dkyil 'khor du mthong bar mos pa bskyed pa dang / zla ba la rdo rje gnas par brtag pa'o/ /sangs rgyas rjes su dran de bzhin/ /zhes pa ni/ de ltar sems brtag pa'i rim pa mngon du byas na/zla ba dang rdo rje las de bzhin gshegs pa'i skur gyur par mos pa bskyed pa la ni/ de skad brjod do/ /byang chub chen po'i ye shes 'di/ /zhes pa ni de ltar sangs rgyas rjes su dran pa de nyid la ni byang chub chen po'i ye shes zhes bya'o/ /de nas 'og nas 'byung ba'i rdo rje khu tshur gyi phyag rgya bcings la zhes pa ni sku gsung thugs kyi mtshan ma mi mthun pa ri snang ba las sku gcig gi ngo bor gyur pa bstan pa'i phyir sgo gsum gcig tu bsdus par bstan pa rdo rje khu tshur gyi phyag rgya 'di bcings bas lus ngag yid gsum don dam par gcig tu mos par bya'o//de ltar byas nas yang de'i rting thogs su 'di ltar bya ste/de nas rdo rje dbyings chen po'i dam tshig gi phyag rgya zhes pa ni/ lha re re la phyag rgya bzhi bzhi dang ldan pa las 'dir rdo rje dbyings nyid kyi dam tshig gi phyag rgya bcings te gang zhe na/ sems ma rdo rje ma'i phyag rgya 'og nas 'byung ba'o/ /de las gzhan pa'i de bzhin gshegs pa rnams zhes pa ni/bcom ldan 'das de las mtshan nyid gzhan du gyur pa ste/ mi 'khrugs pa la sogs pa'i de bzhin gshegs pa bzhi po rnams so/ /rdo rje sems ma gnyis po la sogs pa zhes pa ni sems ma lhag ma rnams te/ sogs kyis ni gnyis pa'i zlas drangs pa'i gsum pa dang /bzhi pa dag bsdu bar bya ste/ phyag rgya de dag bcings la/ dam tshig gi phyag rgya sems dpar zhes pa ni dam tshig gi phyag rgya dam tshig gi sems dpar byin gyis brlabs pa dam tshig gi phyag rgya'i sems dpa' ste/ yid kho na yin no bar nges par byed pa'i snying po 'dis bdag gi dam tshig gi sems dpa' yin no bar bsgom mo//oM sa ma ya haM zhes pa ni dam tshig gi phyag rgya'i sems dpar byin gyis rlob pa'i snying po'o/ /de nas dam tshig gi phyag rgya de nyid rang gi snying ga'i phyogs su gzhag ces pa ni/ sems ma rdo rje ma'i phyag rgya de nyid dam tshig sems dpa' bdag gi snying gar gtang pa'o//de bzhin gshegs pa dam tshig gi sems dpa'i zhes pa ni/ gong du de bzhin gshegs pa'i dam tshig gi sems dpar bsgom par bya'o zhes smras pas 'dir yang de dang mthun par ston pas 'di ltar brjod de/ dam tshig sems dpar byin gyis brlab pa'i snying po ni 'di kho na ste/ oM sa ma ya satwa a d+hi tiSh+Tha maM zhes pa yang don gong du bshad pa de bzhin du shes par bya'o/ /'di bskyed par bya ba'i snying po zhes pa ni sems ma rdo rje ma'i phyag rgya bstan pa 'di bskyed pa'am brtan par byed pa ni sngags 'di'o/ /kha cig na re phyag rgya de legs par bcings pas yang dag par gnas par 'gyur ba'i sngags 'di'o zhes zer ro//oM sa ma ya s+t+waM zhes pa dam tshig ni khyod do zhes pa'i don to/ /de ltar bya ba'i gtan tshigs kyang rgyud las 'di skad du gsungs te/ sa ma ya s+t+waM zhes smras na/ zhes pa ni sngags 'di de skad du brjod pa'o/ /phyag rgya'i rigs ni kun la yang / /zhes pa ni phyag rgya ma lus pa ste/rigs bzhi'am/ gang yang rung ba'i rigs bsgom pa'i phyag rgya kun la 'dis bskul ba ste/ gnad la 'bab par byed pa'o/ /de bas na/ de nyid bskul bas bdag chen rnams/ /zhes pa ni/ sngags de brjod pas rigs de'i de kho na'i rang bzhin bskul bas gnad la 'bab par 'gyur te/lha bdag nyid chen po rnams dam tshig las 'gal bar mi mdzad de/ lha'i skur gnas pa'i ngo bo ston par mdzad pas na/ nyid kyis bsdams nas bstan par 'gyur/ /zhes te nyid dang dam tshig la gnas nas sngon gyi dam tshig bcas pa'i smon lam bstan par byed ces pa'i tha tshig go//badzra hUM zhes pa ni ji ltar gzungs kyi dkyil 'khor las gsungs pa'i rdo rje dbyings nyid sku 'gyur ba bstan pa'i phyir/ byin gyis brlab pa'i sngags gsungs pa'i sna la smos pa de brjod par bya'o/ /rnam par snang mdzad kyi phyag rgya zhes pa ni/ rnam par snang mdzad kyi phyag rgya chen po rdo rje dbyings kyi dbang phyug mar gnas gyur ba'i mtshan ma de bcing bar bya'o//de yang gang zhe na/ rtsa ba'i rgyud chen po de kho na nyid bsdus pa nyid las gsungs te/ rdo rje thal mo las byung ba/ /zhes pa ni/ sngar rdo rje thal mo las phyag rgya thams cad 'byung bar bstan pa de'o/ /gsang ba chen mor rab tu grags//zhes pa ni/ rnam par snang mdzad kyi sku phyag rgya chen por snang ba sbas nas/ rdo rje dbyings kyi dbang phyug mar mtshan mar bstan pa la ni gsang ba chen mo zhes bya bar grags so/ /de kho na rnam par snang mdzad kyi phyag rgya chen po mdor bsdus pa'i ngo bo yin pas na/ phyag rgya chen po mdor bsdus te zhes bya'o//de bcing ba'i thabs ni 'di ltar shes par bya ste/ mthe bo gnyis ni skyil mo krung / /zhes pa ni rdo rje thal mo las sor mo rnams rgyab tu phan tshun bsnol te bsdams la mthe bong gnyis kyang bsnol te skyil mo krung bcas pa 'dra bar byas pa'o/ /gung mo'i rtse mo bsnyams pa ste//zhes pa ni/ gung mo gnyis rtse sprad de bsgreng ba'o/ /mdzub mo dag ni rtse mo dgug /ces pa ni/ mdzub mo gnyis rtse sprad de zlum por dgug pa gung mo'i ngos la bcar ba'o/ /de ni rdo rje dbyings kyi dbang phyug ma'i 'o/ /sngags 'di yang de dang sbyar la brjod par bya ste/ de ltar yang rtsa ba'i rgyud las gsungs pa/rdo rje dbyings phyug phyag rgya ni/ /rab mnyam gzhag pas bcings nas kyang / /snying ga mdzod spu mgrin spyi bor/ /bzhag na sangs rgyas byin gyis rlob/ /ces bya'o/ /byin gyis brlab pa dang / dbang bskur ba dang / ting nge 'dzin dang / mchod pa dang / bzhis phyag rgya chen po'i yan lag yongs su rdzogs par 'gyur ba las de yan chad byin gyis brlab pa bshad zin to//da ni dbang bskur ba'i don gsungs te/ de ltar de bzhin gshegs pa'i bdag nyid du byin gyis brlab pa de ni thams cad la dbang bskur bar nus pa'i mthu yod par bya ba'i phyir dbang bskur dgos te/ de nas bdag nyid de bzhin gshegs par gyur pa zhes pa ni gong du gsungs pa'i byin gyis brlab pa'i rim pa des byin gyis brlabs pas bdag nyid de bzhin gshegs pa gang la mos pa bskyed pa de'i skur gyur pa de gdan seng ge'i khri la bzhugs par brtag go//seng ge'i gdan khri la bzhugs shing / /zhes pa ni/ 'jigs pa mi mnga' ba brnyes pa'i rtags su yang bstan la gang dag thos pa mang pos khams rgyas par 'dod pa dag 'di lta bu'i tshul 'dzin par byed pa yin no zhes kyang gleng ngo //'og nas 'byung ba'i mchod pa'i zhes pa 'og nas mchod pa bshad pa'i skabs nas 'byung ba'i rin po che'i gzhal med khang ka ba brgyad dang ldan pa rta babs kyis mdzes par byas pa la sogs pa'i yon tan rnam pa mang po dang ldan pa/rgyan tha dad pa dag gis brgyan pa de bzhin gshegs pa rnams kyis yongs su bsngags pa'i yon tan gyi tshogs rgya chen po du ma 'dus pa gzhan dang thun mong du gyur pa ma yin pa bzang po khyad par can du mos par byas la sa ma ya s+t+waM zhes brjod de rdo rje rin po che'i dam tshig gi phyag rgya 'og nas 'byung ba rang gi spyi bor bzhag la de'i snying po oM badzra rat+na zhes pa brjod la ji ltar rin po che'i cod pan gyis 'jig rten pa'i rgyal po dbang bskur ba de bzhin du rin po che'i myu gu'i phyag rgya 'dis/rin po che'i myu gu'i dbang bskur bar mos par bya'o//de ltar dbang bskur ba yang rtsa ba'i rgyud chen po de kho na nyid bsdus pa las 'di skad du gsungs te/ rdo rje rin chen dpral ba ru/ /zhes pa ni/ rdo rje rin po che'i phyag rgya bcings la dpral bar bzhag pa'o/ /rab tu gnas par bsams nas ni/ /zhes pa ni/ dpral ba'i gnas de ni brtan par gnas par brtag pa'o//rdo rje rin chen zhes byas nas/ /zhes pa ni badzra rat+na zhes brjod par bya'o/ /rgyal ba rnams kyis dbang bskur 'gyur/ /zhes pa ni phyogs bcu dang dus gsum gyi rgyal ba rnams kyis dbang bskur ba'i gnas de la dgongs par 'gyur ba'i tha tshig go/ /de la dpral ba zhes smos pa ni dbang bskur pa'i gnas so//dbang bskur ba'i gnas ni rnam pa gnyis te/ sems dpa' chen po rnams la ni sangs rgyas lngas dbu brgyan cing dpral bar rin po che'i dbang skur ba'o/ /de bzhin gshegs pa'i bsam gtan la gnas pa'i rnal 'byor pa la ni spyi bor ni rin po ches dbang bskur bya'o/ /ci'i phyir 'di ltar bye brag tu ston zhe na/sems dpa' chen po rnams ni da dung du shes bya ma rdzogs pa'i tshul 'dzin pas de dag ye shes mthar phyin cing shes bya rdzogs par bya ba'i phyir 'gro ba'i don la mnga' brnyes pa 'grub pa'i don du'o/ /de bzhin gshegs pa rnams ni shes bya mthar phyin cing ye shes rdzogs pa dang ldan pas 'gro ba smin par mdzad pa las dgongs pa gzhan mi mnga' ba'i phyir ro//de ltar dbang bskur ba'i phyag rgya ni/ rdo rje bcings pa las zhes bya ba la sogs pa gsungs pa ste/ lag pa gnyis sor mo rdo rje bcings pa bsdams pa las mthe bong gnyis bsnyams te/ gshibs la rtse mo can du byas la mthe bo rtse mo thad ka de'i steng tsam du mdzub mo gnyis phan tshun rtse sprad de/cung zad tshigs kyi dang por bcag nas rin po che'i rtse mo 'dra bar byas pa ni/ rdo rje rin po che'i phyag rgya'o/ /de'i snying po 'di'o/ /oM badzra rat+na zhes pa ni rin po che'i rigs kyis dbang bskur bar mdzod ces pa ste/ 'di ni dbang bskur ba'o//dbang bskur ba bshad zin to// //da ni ting nge 'dzin gyi don gsungs te/ de ltar dbang bskur cing thams cad la mnga' brnyes par gyur pa de ni/ bsam gtan med pa'i sems 'phyan pa ma yin gyi/ yang dag pa'i ting nge 'dzin gyi don nges par gtan la 'bebs pa'i bsam gtan la gnas par bya dgongs pa'i phyir na ting nge 'dzin bstan to//ting nge 'dzin gyi bsam gtan de yang ji lta bu zhe na/ de nas chos kyi phyag rgya rab tu 'grub pa zhes bya ba la sogs pa gsungs te/ rang gi lce'i steng du zla ba'i dkyil 'khor dmigs pa'i dbus su thugs kyi mtshan ma rdo rje rtse lnga pa nas 'bru'i tshad tsam bsams la/rdo rje de'i bum pa'i dbus su de bzhin gshegs pa thams cad kyi chos kyi phyag rgya'i sngags badzra dz+nyA na zhes bya ba shin tu chung ba gzugs brnyan lta bur bsam par bya'o/ /kha cig na re rdo rje 'greng bur bsams pa'i rtse mo la chos kyi phyag rgya'i sngags gnas par bsam mo zhes kyang zer na/'dir ni rdo rje mchu rings su bsams pa'i bum pa la chos kyi phyag rgya'i sngags gnas par 'dod do/ /las kyi phyag rgya rdzogs par byed pa yang snying gar sna tshogs rdo rje bsams la zhes bya ba la sogs pa gsungs te/ byang chub mchog gi phyag rgya la sogs pa ni las kyi phyag rgya'i mtshan nyid de brjod pa ste/de dag bskyed pa dang rdzogs pa dang / 'byung bar byed pa yang snying gar zla ba'i dkyil 'khor gyi steng na sna tshogs rdo rje ste rgya gram ljang gur bsams la/ de bzhin gshegs pa rnams phrin las gang dang gang mdzad pa'i phyag rgya 'og nas 'byung ba'i mtshan nyid byang chub mchog la sogs pa'i las kyi phyag rgya bcings te/de bzhin gshegs pa gang yang rung ba'i zhes pa ni de bzhin gshegs pa lnga po rang brjod pa dag las gang la mos par byas pa'i bsam gtan la gnas pa de'i skur mos par byas la/ de dang bdag tu mi gnyis par gyur par brtags pa de legs par shin tu yun ring du mngon par zhen par sems rtse gcig tu bsam mo//yun ring du zhes pa ni/ yang yud tsam gyis mi 'grub par gsungs pas na yun thung ba dgag pa'o/ /mngon par zhen pa zhes pa ni ras dri ma med pa la tshon 'dzin sla ba bzhin du yun ring du gnas pa'i bsam gtan la de'i bag chags 'dzin par 'gyur ba'i phyir ro//de ltar yang rtsa ba'i rgyud chen po dpal de kho na nyid bsdus pa las 'di skad du gsungs te/ ting nge 'dzin bshad pa'i skabs te rgyud phyi ma las so/ /rgyal ba kun gyi rnam pa yis/ /zhes pa ni/ 'di yang gong ma'i tshig la bsnyegs pa ste/ sems rtogs par bya ba la sogs pa'i rim gyis tshogs rnam pa gnyis rdzogs par byas nas/sangs rgyas kyis phyag rgya chen por sku'i cha lugs dang kha dog ci 'dra ba bzhin du bdag nyid gnas par bsgrub ste/ rdo rje nyi ma'i bar la thug gi bar du byin gyis brlab pa la ni/ rgyal ba kun gyi rnam pa zhes bya'o/ /phyag rgya mnyam gzhag bcings nas ni//zhes pa ni/ phyag rgya rnam pa bzhi dang ldan par bya ba la ni mnyam gzhag ces bya ste/ bcings pa dang bsams pa'i rim pas de'i ngang la gnas par bya'o/ /rang gi sngags dang rig pa bzlas/ /zhes pa ni bdag nyid kyi dkyil 'khor las gsungs pa'i sngags dang rig pa bzlas nas de ltar gnas par bya ba ste/des ni/ myur du dngos grub thob par 'gyur/ /zhes bya ba de 'grub pa ste/ dngos grub rnam pa gnyis dang gsum du bgrang ba'am/ tshul 'di nyid kyi sbyor ba 'grub par bstan pa'o/ /ting nge 'dzin bshad zin to/ /da ni mchod pa'i don gsungs te/ de ltar dbang dang ting nge 'dzin gyi bsam gtan rtse gcig pa dang ldan pa de ni yid du 'ong ba'i bdog pas mnyes shing khams rgyas par bya ba'i 'os yin pas phyi nang gi mchod pas mchod par bya ba bstan to//de la mchod pa yang mtshan nyid ji lta bu zhig ce na/ de nas gsang ba'i mchod pa brjod cing zhes bya ba la sogs pa gsungs pa ste/de la gsang ba zhes pa ni/ bsnyems pa can gzhan zil gyis mnan pa'i thabs su gyur pa'i rang gi yon tan gyi ngo bor ye shes kyi rnam par 'phrul pa las brtan pa'i 'khor lha mo'i tshul 'dzin par snang ba 'di dag bdag nyid kyi rnam par thar pa dang / rdzu 'phrul gyi stobs kyis de ltar 'grub par zad kyi gzhan rnams kyis de ltar nus pa dang /rtogs par byed pa'i shes pa dang mthu med de/ kun dang thun mong du gyur pa ma yin pas na gsang ba zhes bya'o/ /de yang gang zhe na/ rdo rje la gsang ba la sogs pa gsang ba'i mchod pa bzhis mchod par bya'o zhes pa ste/ rdo rje la gsang ba la sogs pa'i lha mo de dag gsang ba'i don dang ldan pas de dag gi rgyan cha lugs gsal bar dmigs nas de'i phyag rgya bcings nas mchod pa ni gsang ba'i mchod pa bzhis mchod par bya'o//de ltar yang rtsa ba'i rgyud las gsungs pa/ gsang ba'i mchod pa rnam pa bzhis/ /zhes pa ni/rdo rje sgeg mo dang phreng ba ma dang / dbyangs dang gar ro/ /mchod pa gsang ba mchod cing bya/ /zhes pa ni/ badzra satwa saM gra ha zhes bya ba la sogs pa'i sngags dang / de dag gi glu tshig /rdo rje sems dpa' bsdus pa nyid/ /ces bya ba la sogs pa brjod par bya ba'o/ /yang na bdag 'bul la sogs pa'i/ / zhes pa 'dis ni rnam pa bcu drug gi mchod pa gyis shig ces zur gyis ston par byed pa'i tshig smos pa ste/ byang chub sems kyi mchod pa rnam pa bzhi dang phyag 'tshal ba'i mchod pa rnam pa bzhis bdag dbul bar bya ba dang / chos kyi mchod pa rnam pa bzhi dang / gsang ba'i mchod pa rnam pa bzhi ste bcu drug go//de la dang por ni gsang ba'i mchod pa rnam pa bzhis mchod par bya'o/ /de nas phyi ma rnams ni rim bzhin du ste/ de nas theg pa chen po mngon par rtogs pa'i rtog pa bsdus pa'i las kyi dkyil 'khor du mchod pa rnam pa bcu drug gsungs pa las shes par bya'o/ /de bas na mchod pa rnams ni rab tu bya//zhes gsungs so/ /de la cho 'phrul rnam pa bzhi po 'di dag kyang rigs bzhi'i de bzhin gshegs pa rnams kyi mthu las byung ba ste/ byin gyi brlabs pa ni shar phyogs kyi de bzhin gshegs pa rnam kyis thugs kyi bdag nyid bde bar gshegs pa'i sras kyi gtso bor byin gyis rlob par mdzad pa ste/dper na 'khor los sgyur ba'i rgyal po'i sras mtshan dang ldan par gyur pa lta bu'o/ /dbang bskur ba ni lho phyogs kyi de bzhin gshegs pa rnam par thar pa'i sgos dbang bskur ba ste/ dper na 'khor los sgyur ba'i rgyal po rgyal thabs spyi bo nas dbang bskur ba lta bu ste/chos thams cad la dbang thob par bya ba'i phyir ro/ /ting nge 'dzin ni nub phyogs kyi de bzhin gshegs pa rnams kyi thugs kyi bdag nyid du byin gyis rlob par mdzad pa'i ting nge 'dzin dang ldan par mdzad pa ste/ dper na 'khor los sgyur ba'i rgyal po chos dang ldan pa lta bu ste/ sems g.yo ba las bzlog pa'i don dang ldan pa'o//mchod pa ni byang phyogs kyi sangs rgyas kyi phrin las kyis mnyes par bya ba'i thabs sbyin par bya ba'i mthu stobs pa ste/ dper na 'khor los sgyur ba'i rgyal po rgyal po'i longs spyod kyi 'khor 'du long mang po dang ldan pa lta bu ste/ chos kyi longs spyod chen po dang ldan par 'gyur ba'o//de ltar gsang ba'i mchod pa la sogs pa 'dir zhib tu ma smos pa ni phyi rol gyi mchod pa'i cho ga zhes rgyas par 'byung ba 'og gi skabs las 'byung ba las bshad par shes par bya'o/ /de yan chad du de bzhin gshegs pa'i dam tshig gi sems dpa' chen por bdag nyid bsgrub pa'i rnal 'byor bshad zin to//de ltar gong du de bzhin gshegs pa rnams kyi dam tshig sems dpa' chen por bsgrub pa'i rnal 'byor dang / de bzhin gshegs pa'i rigs kyi dam tshig sems dpa' chen po rnam pa gnyis kyi phyag rgya yongs su bsgrub par bya'o zhes 'byung ba las de bzhin gshegs pa'i dam tshig gi sems dpa' dang bcas par bshad nas/da ni de'i rigs su gyur pa'i de bzhin gshegs pa'i rigs kyi dam tshig sems dpa' chen po rnams kyi rnal 'byor bshad par bya ste/ de bzhin gshegs pa'i rigs kyi sems dpa' rnams kyi gtso bo ni/rdo rje sems dpa' yin la de nyid de bzhin gshegs pa'i rigs pas ni/ de bzhin gshegs pa'i rigs kyi sems dpa'o/ /de gang zhig gis rnal 'byor gyis rtogs par byed pa'i thabs ni/ de bzhin gshegs pa'i rigs kyi dam tshig gi sems dpa' chen po dang /bsgrub par bya ba de 'og nas 'byung ba 'di ltar bshad par bya'o/ /de la rdo rje sems dpa' sgrub pa'i phyag rgya chen po'i mtshan nyid bshad pa ni zhes pa la rdo rje sems dpa' ni ye shes kyi sems dpa' bcu drug po rnams kyi dang po yang yin la/ byang chub sems kyi rang bzhin pas thams cad 'byung ba'i rgyu byed pa yang yin pa dang /rnal 'byor gyi rgyud thams cad kyi ston pa phyi mar gyur pa yang yin pas de'i bsgrub pa'i mtshan nyid dang por bshad do/ /gang zhe na/ bsnyems tshul bcas pas rdo rje bsor/ /zhes bya ba la sogs pa ste/ rdo rje sems dpa' ni snyems tshul dang bcas pa'i phyag rgyas rdo rje 'dzin pa ste/de'i don ni lag pa g.yon pa khu tshur bcas pa dkur brten nas/ phyag g.yas kyis rdo rje bsor thabs su gyen du 'phang bstod de/ thugs kar 'dzin cing ldan pa g.yon du 'dud pa'o/ /rdo rje bsnyems ma'i tshul byed cing / zhes pa yang / cha lugs dang tshul de lta bu dang ldan pa de kho na la ldan par shes par bya'o/ /sku gsung thugs ni rdo rje yis/ /zhes pa ni/ cha lugs dang tshul de dag gis sems rtogs pa la sogs pa'i rim pas lus ngag yid gsum rdo rje dang 'dra ba'i skur bsgoms pa'i cha lugs de lta bu dang ldan par gyur pas na/ rdo rje sems dpa' nyid du 'gyur//zhes bya'o/ /sems dpa' chen po gzhan rnams kyi yang gsungs pa/ rdo rje rgyal po la sogs pa/ /zhes bya ba la sogs pa dag ste/ rdo rje sems dpa' ji lta ba de bzhin du/ rdo rje rgyal po dang / rdo rje chags pa dang / rdo rje legs pa la sogs pa sems dpa' chen po bcu drug po gzhan rnams kyi phyag rgya chen po'i mtshan nyid ni 'di ltar shes par bya ste/sku gsung thugs ni rdo rje yis/ /zhes pa ni/ sems rtogs pa la sogs pa'i sngar gsungs pa'i tshul gyis ji ltar bris pa'i tshul bzhin du zhes te/ sems dpa' de dag so so'i cha lugs gzhung dang mthun pa bzhin du ji ltar bzo bo mkhas pas gzugs bris pa'i tshul ji lta ba bzhin du mtshan ma'i phyag rgya dang ldan pa zhes pa ni so so'i phyag mtshan dang ldan par bsgoms na/sems dpa' chen po nyid du 'gyur/ /zhes bya ste/ sems dpa' chen po gang la mos par sbyor ba byas pa de bzhin du bdag 'gyur ro zhes gsungs so/ /'o na de ltar sems dpa' chen po de dag gi dam tshig gi rnal 'byor du bsgom pa'i rim pa ji ltar bya ba yin zhe na/smras pa/ de la re zhig dang por rnal 'byor pa rdo rje sems dpa' la sogs pa zhes bya ba la sogs pa gsungs te/ sogs pa'i sgras ni sems dpa' chen po bcu drug rnams sdud par byed pa'o/ / gang yang rung ba zhes pa ni sems dpa' de dag las gang la mos pa de'i dam tshig gi sems dpa' chen po'i rnal 'byor mngon du bya bar 'dod pas 'di ltar bya'o zhes bshad pa ste/ sngar bshad pa'i rim pa nyid kyis zhes pa ni/ gong du de bzhin gshegs pa'i dam tshig gi sems dpa' chen po sgrub pa'i skabs nas bshad pa'i'o//oM swa b+hA wa shud+d+hou0f85haM zhes pas chos kyi dbyings su byin gyis brlab pa dang / oM badzra any+dza li zhes bya ba rdo rje thal mo sbyar ba dang / oM badzra ban+d+ha haM zhes rdo rje bcing ba dang / oM badzra ban+d+ha traT/ ces pas bcings pa bsdams pa dang / de dag gi phyag rgya'i rim par b cing ba'o//rdo rje dbab pa'i dam tshig gi phyag rgya bcings la de'i snying po oM badzra A be+e sha aHaHaHzhes bya ba'i snying pos sems dpa' rnams kyi ye shes kyi byin gyi rlabs dbab pa'i bdag nyid la bya'o/ /de la ye shes dbab pa'i rim pa ni 'di'o zhes pa de ltar gsungs nas bsam gtan mngon du bya ba'i thabs 'og nas 'byung ba'i rim pa 'di dag ltar ston zhes pa'i don to//rgol ba pa na re/ dbab pa la sogs pa'i rim pa gong du rgyas par bstan zin na/ da yang 'dir ji ltar bya zhes bsdams te/ bstan pa ci dgos she na/ de yang de bzhin gshegs pa'i dam tshig gi sems dpa' dang /sems dpa' chen po rnams kyi bsam gtan gyi rnal 'byor la bye brag tu dbye bar bya ba'i phyir 'di ltar bstan to/ /dran pa dang srog bsdams pa'i sgo nas zhes pa ni/ dran pa ni sems pa/ srog ni rlung ste dbugs su 'dod pas dbugs kyi rlung gis sems g.yeng bar byed pa de zhi bar bya ba'i phyir dran pa dang srog bsdams pa zhes bya ba gsungs te/de'i sgo nas/ yid rang gi lus la dmigs par bya ste zhes pa ni yid kyi phyi rol du 'jug pa dgag ste nang du phyogs par bya ba'i phyir bsdu ba la ni yid rang gi lus la dmigs par bya ste/ de'i ngang la cung zad cig gnas nas/ gang zag dang chos ngo bo nyid med par mos pa'i zhes pa ni/yod par lta ba rnam pa bzhi las bzlog pa'i phyir na/ 'di skad bstan to/ /de yang sngar nyan pa la sogs pa'i sgo nas shes rab kyis dpyad cing phug nas/ rang bzhin med pa'i don mngon du byas la/ chos thams cad stong pa nyid do snyam du ting nge 'dzin gyis rtogs pa ni rnam par rtog pa mngon du byas la zhes bya'o//de yang zhi gnas kyi mthus spangs te zhes pa de ltar dmigs pa de yang bsam gtan la 'jog pa'i dus su 'phral du shes rab kyis 'bigs par bya ba'i rtog pa gzhug pa ma yin gyi snga nas gnas la phebs par byas nas bsam gtan la gnas pa'i dus su mi dmigs pa nyid kyi ngang du smos pas spang bar byas la nam mkha' dang dbyer med par shin tu brtan par bya'o zhes ston to//de ltar bya ba yang rgyud las gsungs te/ rang gi dbang po bshig nas su/ /zhes pa ni/ mig la sogs pa'i dbang po dag shes rab kyis bdag med par gzhig pa'o//rdo rje bcings pa 'dzin pas gzung / /zhes pa ni/ de ltar shes rab kyis dngos po bshig nas mi rtog par bya ba'i bsam gtan la gnas pa ni bcing ba zhes bya bar bshad de/ ji ltar dper na/ sor mo rnams kyi rtse mo rdo rje bcing ba de bzhin du stong pa nyid kyi rdo rje rnam par mi rtog pa ste/ ting nge 'dzin rtse gcig pas bsam gtan du bya ba la de skad brjod ces gsungs so/ /'o na de lta bu'i ting nge 'dzin de'i ngang la thad kar gnas par bya ba yin nam zhe na/ stong pa nyid kyi ngang la gnas na yang 'gro ba rnams kyi don bya bar mi 'grub pas ji ltar de bzhin gshegs pa rnams chos kyi sku las bzhengs nas gzugs kyi sku'i ngo bor ston pa'i sbyor bas phyag rgya chen po mngon du byas nas/'gro ba'i don spyod pa ltar stong pa nyid kyi ngang du gnas pa de las langs nas/ phyag rgya chen po la sbyor ba'i thabs kyis 'gro ba rnams kyi don bya ba'i phyir/ de nas skye bo mtha' dag gi sdug bsngal dang / yid mi bde ba bsal ba yum snying rje chen po dran pa'i lam mngon du byas te zhes pa la sogs pa gsungs te/skye bo 'khor ba'i ngo bo khams gsum gyi bcud du gyur pa thams cad do/ /sdug bsngal ni gsum dang brgyad do/ /yid mi bde ba ni mya ngan chen po khong nas ldang ba la sogs pa ma rung bar byed pa'i rgyu'o/ /bsal ba ni de dag dang bral bar byed pa'o//yum snying rje chen po dran pa'i lam mngon du byas te zhes pa ni ma dang chos mthun pa'i phyir na snying rje la yum zhes brjod de/ dper na 'jig rten na ma las brten te/ bu mang po 'byung bar 'gyur bas/ bu'i gzhir gyur pa ma yin pa dang 'dra bar de bzhin gshegs pa rnams 'gro ba'i don du 'jig rten du 'byung ba yang snying rje chen po la 'jig rten pa'i sgo nas 'byung bar 'gyur bas na/de bzhin gshegs pa rnams 'byung ba'i gzhir gyur pa/ snying rje chen po bas na yang 'di ltar bstan la/ ji ltar ma'i bde ba bu la stob par byed pa bzhin du/ snying rje chen pos kyang bde ba sems can thams cad la stob par byed pas na de skad ces bya ste/de dran pa'i lam mngon du byas pa ni gsal bar dmigs pa'o/ /rnam par mi rtog pa'i chos nyid kyi rang gi ngo bo zhes pa ni/ rnam par mi rtog pa'i chos kyi rang bzhin rang gi sems kyi ngo bo zla ba'i dkyil 'khor skyon rnam par dag pa 'od rab tu 'phro bas phyogs bcur khyab par byas te/rab tu gsal zhing dang bar bsam mo/ /de nas rdo rje sems dpa' la sogs pa zhes pa ni/ de bzhin gshegs pa'i rigs kyi sems dpa' chen po bcu drug po dag ste/ de dag ye shes kyi rang bzhin pas na ye shes kyi sems dpa' ste/ gang 'dod pa zhes pa ni/ bdag nyid gang la dad pa'o//de dang rjes su mthun par zhes pa ni/ de lus dang cha byad dang rgyan dang cha lugs mthun par bdag dam tshig gi sems dpa' chen por gyur par brtags te/ de'i snying po zhes pa ni/ bdag nyid gang la dad pa'i bsgrub pa'i lha de'i snying po rdo rje'i tshig gis brjod pa ni/ 'di skad du rgyud kyi gtan tshigs 'og nas gsungs pa bzhin du brjod pa'am/yang na zhes pa ni/ de las rnam pa gzhan du ston pa'i tshig ste/ oM sa ma ya s+t+wi zhes pa ni phyag rgya thams cad sgrub par byed pa'i spyi'i snying po bas na/ de rjod par byed cing rang gis rtogs pa'i ye shes kyi zla ba de nyid ces pa ni/ rang gi sems kyi chos nyid rtogs par gyur pa'i gzugs brnyan te/'jig rten gyi zla ba yang yod mod kyi de las khyad par du gyur par bstan pa'i phyir na ye shes kyi zla ba'o/ /de nyid 'od zer 'phro ba dang 'du ba'i sbyor bas zhes pa ni/ zla ba de nyid 'od zer 'phro ba dang 'du ba'i tshul gyis dam tshig gi phyag rgyar gnas par brtag pa skad zer mod kyi/'on kyang 'dir ni zla ba'i dkyil 'khor gyi steng na rang gi rigs kyi snying po bzhag pa las/ 'od zer 'phro ba dang 'du ba'i tshul gyis dam tshig gi phyag rgya'i mtshan nyid gang 'dod pa der brtag par bya'o/ /la la na re rang 'dod pa'i lha'i snying po brjod pa tsam gyis zla ba nyid las 'od zer 'phro ba dang 'du ba'i tshul gyis sbyor bas dam tshig gi phyag rgya gang 'dod pa rang gi rigs dang mthun par bsam mo zhes kyang zer ro//rdo rje dang zhes pa ni sems dpa' chen po rdo rje sems dpa'i dam tshig gi phyag rgya'i mtshan nyid de mi mthun pa'i phyogs thams cad 'joms par byed pa'i mthu dang ldan pa'o/ /rin po che dang zhes pa ni/sems dpa' chen po rdo rje rin chen gyi dam tshig gi phyag rgya ste/ 'gro ba ji snyed pa rnams kyi dgos 'dod skong nus pa'i mthu dang ldan pa'o/ /pad+ma dang zhes pa ni/ sems dpa' chen po rdo rje chos kyi dam tshig gi phyag rgya ste/ thugs rje chen pos 'khor ba na gnas nas 'khor ba ji snyed pa dag gi don mdzad na yang /ye shes chen pos 'khor ba'i skyon gyis mi gos pa'i mthu mnga' bar bstan pa'o/ /sna tshogs rdo rje zhes pa ni/ sems dpa' chen po rdo rje las kyi dam tshig gi phyag rgya ste/ phrin las sna tshogs pa'i sgo nas 'phags pa thams cad mnyes pa dang / sems can yongs su smin par mdzad pa'i mthu dang ldan par bstan pa ste/sogs pa'i sgras ni sems dpa' chen po lhag ma rnams kyi dam tshig gi phyag rgya rnams bsdu bar bya'o/ /rang gi rigs las gsungs pa'i zhes pa ni/ sems dpa' de dag rang rang gi rang gi rigs gang yin pa de'i kha dog dang 'od mdangs la sogs pa'i rnam pa 'og nas 'chad pa de bzhin du gsal bar brtag pa ste/soms shig ces pa ni/ de ltar gzhal ba dang / 'dris par bya dgos zhes pa'i don to/ /'o na sems de dag mthar gyis mi ston par 'dir bzhi po dag thod rgal du ston pa ci dgos she na/ 'dir de dag gi gtso bor gyur pa rang rang gi rigs kyi 'khor los sgyur ba bzhi kho na'i bstan te/de bstan pas sems dpa' phyi ma rnams kyang mtshon par byed de/ 'dir rgyas par bstan pa ni 'og nas gdong ston dgos pas/ du mar bldabs na mangs par 'gyur bas na/ 'dir ni 'di kho na dag bstan to/ /'o na de dag gi snying po gzhag pa dang / brjod par bya ba yang ji lta bu zhig ce na/ smras pa/ de rnams kyi snying po yang zhes bya ba la sogs pa dag ste/ badzra satwa zhes pa ni/ rdo rje sems dpa'i snying po'o/ /badzra rA dza zhes pa ni sems dpa' chen po rdo rje rgyal po'i snying po ste/ sogs pa'i sgras ni/ sems dpa' chen po lhag ma rnams kyi snying po sdud par byed pa ste/rang gi lha'i bye brag ji lta ba bzhin du brjod par bya'o/ /'o na snying po de dag las dam tshig gi phyag rgyar bsam pa yang mtshan nyid ji lta bu'i phyag rgya dag bsam par bya zhe na/ smras pa/ dam tshig gi phyag rgya rnams kyi rang gi ngo bo yang bya ba la sogs pa dag ste/ rdo rje rtse lnga ni rdo rje sems dpa'i dam tshig gi phyag rgya'o//rdo rje lcags kyu ni rdo rje rgyal po'i dam tshig gi phyag rgya'o/ /sogs pas ni sems dpa' lhag ma rnams kyi dam tshig gi phyag rgya'i mtshan nyid dang rnam grangs sdud par byed pa ste/ de dag gi kha dog dang gzugs dang zhes pa ni/ rdo rje sems dpa' la sogs pa'i ye shes kyi sems dpa' chen po dag gi sku mdog dang /gzugs dang rgyan dang / na bza' la sogs pa rnams kyang / rigs kyi rim pa las zhes pa ni/ rigs mi gcig pa'i rim pas cha lugs mi mthun par bstan pa ste/ 'og nas lha bsam pa rgyas par 'chad pa las bltas la rig par bya'o//de nas ji ltar/ bsam pa'i rdo rje la sogs pa/ /zhes pa ni/ dang por sbyor ba ji ltar bsam pa'i rdo rje dang lcags kyu la sogs pa'i dam tshig gi phyag rgyar brtag par bya'o/ /gang yang rung ba'i dam tshig ni rdo rje bdag go zhes pa ni/ dam tshig gi phyag rgya ji ltar brtags pa'i mtshan nyid de dang bdag dbyer med par dmigs te/bdag gang yin pa yang dam tshig gi phyag rgya gang ltar brtag pa'i mtshan nyid du snang ba de la dam tshig gi phyag rgya gang yin pa de yang bdag kho na ste/ bdag dang dam tshig gi phyag rgya de ni so so ma yin pa tha mi dad par mos par bya ba ste/dam tshig rdo rje bdag go zhes pa ni/ dang po'i rdo rje bzung ba ste/ des phyi ma yang mtshon par byed pas lhag ma dag bsam gtan du byed na yang de bzhin du brtag par bya'o/ /dam tshig gi pad+ma bdag go zhes pa yang de bzhin du shes par bya'o/ /de ltar dam tshig gi phyag rgya rdo rje la sogs pa'i mtshan nyid rnams las so so'i gzugs su bsgyur ba'i thabs bstan pa de yang rgyud 'di nyid dang gzhan dag las gsungs te/ji skad du/ /sems can kun gyi sems gang yin/ /zhes pa ni thog ma med pa'i dus nas rnam pa sna tshogs su rtog pa'i sems las dang nyon mongs pa'i bag chags kyi dri ma can du byas pa'i sems dpa' chen po brtan pa'i phyir na sems dpar brjod ces pa ni dri ma de dag shes rab rnam gsum gyi sgo nas sbyangs te/rtog pa dang rnam par rtog pa thams cad spangs nas/ chos kyi ngo bo nyid mi rtogs par gyur na mi g.yo ba ste/ gzhan gang gi rnam pas kyang bskyod par mi nus pas na brtan pa ste/ de nyid la sems dpa' zhes bya'o//mnyam par gzhag pas ting nge 'dzin/ /zhes pa ni de mi g.yo zhing brtan pa de nyid bying rmugs la sogs pa'i skyon dang bral bas mnyam par gzhag pa kho na la gnas pa ni ting nge 'dzin to/ /nges par gyur pas rdo rjer 'gyur/ /zhes pa ni/ de ltar ting nge 'dzin nges par gyur pa las/ ye shes lnga'i rang bzhin rdo rje rtse lnga par snang ba la ni rdo rjer 'gyur zhes bya'o//sems dpa'i byin rlabs rnal 'byor gyis/ /zhes pa ni rdo rje las 'od zer 'phro ba dang 'du ba'i tshul gyis byin rlabs dang rnal 'byor gyis rdo rje sems dpa'i sku phyag rgya chen po yongs su rdzogs pa'i ngo bor gyur pas na/ rdo rje sems dpar yang 'gyur ro/ /zhes bya'o 'o na sems dpar byin gyis brlabs pa'i rnal 'byor gyis rdo rje sems dpar 'gyur bar bya'o zhes gsungs pa de'i rnam pa ji lta bur shes par bya zhe na/smras pa/ de la sems dpar byin gyis brlabs pa'i rnal 'byor ni 'di lta ste zhes bya ba la sogs pa dag ste/ thams cad bdag nyid sems dpa' che/ /zhes pa ni rdo rje sems dpa' byang chub sems kyi rang bzhin pas/byang chub sems de'i nang du thams cad 'dus la/ thams cad 'byung bar 'gyur bas kun gyi ngo bo bas na bdag nyid ces bya'o/ /bdag kyang bdag la yang dag gnas/ /zhes pa ni/ rnal 'byor pas bdag kyang rdo rje sems dpa' byang chub kyi sems kyi ngo bo thams cad kyi bdag nyid de la gnas la/ des kyang bdag la khyab pa'i ngo bo bas na dbyer med par bstan pa'o//de nas yid kyis dzaHhUM baM hoHzhes brjod de zhes pa ni/ dzaHni 'gugs pa/ hUM ni gzhug pa/ baM ni bcing ba/ hoHni dbang du bya ba ste/ de dag gis gang de bzhin du byed ce na/ dam tshig gi phyag rgya de la de bzhin gshegs pa 'jig rten gyi rdul ji snyed pa tsam gyi grangs yod pa rnams sku gsung thugs rdo rje dbyings kyi byin rlabs zhugs par ston te/de yang gang 'gugs she na/ 'jig rten gyi khams kyi rdul ji snyed kyi de bzhin gshegs pa rnams so/ /gang la gzhug ce na/ dam tshig gi phyag rgya'i mtshan nyid du gnas par brtags pa'i ngo bo de la'o/ /gang bcing zhe na/ de gnyis tha mi dad par bcing ngo //ji ltar dbang du byed ce na/ chu dang 'o ma 'dres pa'i tshul du so so ma yin tha mi dad par mtshan nyid dbyer mi phyed pa'i ngo bor dbang du byed de/ de bas ni de'i don du gsungs pa/ bdag dang mi gnyis par gyur pa'i phyag rgya'i gzugs de la zhes pa ni/ bdag dang dam tshig gi phyag rgya zhes dbyer med pa'i ngo bo bas na/bdag dang mi gnyis pa ste/ dam tshig gi phyag rgya gang gi ngo bor brtags pa'i gzugs de la de bzhin gshegs pa'i tshogs spyan drangs nas gzhug par bya ba ste/ grangs ji tsam zhe na/ 'jig rten gyi khams thams cad kyi rdul dang mnyam pa zhes bya ba ste/ 'jig rten mtshan nyid la 'jig pa'i chos can brten pas na 'jig rten te/thams cad ces bya ba ni/ de lta bu ma lus pa dag gis don bsdus te grangs bgrang du med pas na/ de'i rdul ji snyed pa de dang mnyam pa ste/ dngos po gang zhe na/ de bzhin gshegs pa thams cad ces bya ste/ de'i sku rdo rje dbyings dang / gsung rdo rje dbyings dang / thugs rdo rje dbyings ji snyed pa de dag dam tshig gi phyag rgya de la zhugs pas sngar bstan pa bzhin du/mngon du dran par byas te/ bdag gi lha'i dam tshig gi phyag rgya'i gzugs zhes pa ni/ bdag nyid mos par gyur pa'i lha ni bdag gi lha'o/ /de'i dam tshig gi phyag rgya'i gzugs ni rdo rje dang / rin po che dang / pad+ma dang / sna tshogs rdo rje la sogs pa'i thugs mtshan no/ /de bdag dang dbyer med pas na mi gnyis par gyur pa ste/ 'di ni rdo rje'i rdul phra rab las gyur pa'o zhes pa ni/ ji ltar 'byung ba bzhin rdul phra mo dag rten 'brel gyis bsdus nas gzugs can rnams kyi lus su 'gyur ba bzhin du/ de bzhin gshegs pa'i rdul snyed po thams cad kyi sku gsung thugs kyi rdo rje dbyings 'dus pa las de bzhin gshegs pa'i rigs kyi dam tshig gi sems dpa' chen po rnams kyi sku 'grub par gyur to snyam du nga rgyal bya'o//'o na 'dir dzaHhUM baM hoHzhes bya ba'i sngags brjod pas 'di bzhin du bya'o zhes smos pa/ gong du ting nge 'dzin gyis 'grub par gsungs na/'dir ngag tu brjod par ston pa ci'i phyir zhe na/ smras pa/ gong du ting nge 'dzin gyis 'grub par gsungs pa dang / 'dir sngags brjod pas 'di ltar bya ba ni/ de bzhin gshegs pa rnams dang / de'i rigs kyi sems dpa' chen po rnams sgrub par byed pa la bye brag tu phye ba'i tshig ste/ ji ltar de bzhin gshegs pa rnams kyi thams cad kyi nang na mchog dang gtso bo bas na/byin rlabs dam pa dang ldan pas bsam gtan gyi sgo nas de bzhin du 'grub par 'gyur la/ de'i rigs kyi sems dpa' rnams kyang de dang dbyer med pa ni yin gyis kyang / ming gi cha shas kyis tshod ltar ma yin pas na/ bsam gtan dang /smra brjod du bcas pa tshogs pa'i sgo nas 'di bzhin du 'grub par bstan to/ /gnyis su na de bzhin gshegs pa rnams ni ye shes gtso bor gyur pas ting nge 'dzin gyis 'grub na/ de'i sems dpa' rnams ni phrin las la gtsor gyur pas de'i bsam gtan la ni sngags brjod par bya bas 'grub par gsungs te/de la sngags brjod pa ni ngag tu bzlas par ma zad/ yid kyis brjod na yang mi rung ba med ces zer ro/ /de nas de bzhin gshegs pa'i rigs kyi dam tshig gi sems dpa' chen po sku phyag rgya chen po yongs su rdzogs par bya ba'i phyir sbyor ba 'di ltar bya ba ste/ oM sa ma ya s+t+waM zhes brjod pa ni dam tshig gi sems dpar sku bskyed pa'i sngags so//ji ltar bsams pa'i dam tshig gi phyag rgya de nyid ces pa ni/ sems kyi chos kyi ngo bo dkar po'i chos kyi bag chags kyis rgyas pa'i zla ba'i dkyil 'khor gang zhing rdzogs par snang ba'i dbus na gnas pa'i dam tshig gi phyag rgya rdo rje la sogs pa gang yin pa'i mtshan nyid gnas par mos par byas pa de nyid do//me lce mang po 'phro zhing 'du ba'i sbyor bas zhes pa ni/ ji ltar zla ba la gnas pa'i dam tshig gi phyag rgya brtan par gyur pa de las 'od zer 'byung bar gyur pa de ni 'tsher ba dang / 'bar ba dang / gsal ba dang / 'phro bar byed pas gzhan 'joms par byed pa'i mtshan nyid can pas rdo rje'i me lce dang /chos mthun pas rdo rje'i me lce mang po 'phro zhing 'du ba'i sbyor bas rang gi lha sems dpa' gang yin pa'i gzugs su gyur par shin tu gsal bar brtag go/ /rnam gcig rdo rje me lce zhes pa ni/ thugs ye shes chen po'i bdag nyid kyi mtshan mar gyur pa ni dam tshig gi phyag rgya pas/de las ye shes kyi 'od zer me lce chen po ste 'phro zhing 'du bar byed pas na ye shes kyi me lce'o/ /'phro 'du'i tshul ni dang por 'od zer 'phro ba'i dus na sku mang po dag phyogs bcur 'phros nas de na gnas pa'i 'gro ba ji snyed pa dag gi don mdzad pa bcu gnyis sam nyi shu rtsa gcig dang ldan pa'i tshul du mdzad nas/sku de dag slar 'dus pa las dam tshig gi phyag rgya la thim pa las/ dam tshig gi phyag rgya dang bcas par 'od du zhugs pa las kyang phyag rgya chen po yongs su rdzogs pa'i skur gyur par brtag go/ /shin tu mngon par zhes pa ni/ lhag par ram lhag par gsal bar brtag go zhes pa'i don to//de ltar bya ba'ang cis mngon zhe na/ rtsa ba'i rgyud chen po nyid las kyang phyag rgya chen po dam tshig sems dpa' rjes su dran par byas te zhes bya ba la sogs pa gsungs so/ /de bas rang gi lha'i dam tshig gi phyag rgya las zhes pa ni/ rang gang la mos pa'i sems dpa' chen po ni rang gi lha ste/de'i dam tshig gi phyag rgya ni/ ji skad du gsungs pa'i rdo rje la sogs par bstan pa ste/ de las gyur pa'i de nyid kyi lha'i gzugs su de ltar mos par byas na de bzhin du 'gyur te/ de bas na mtshan nyid las sems dpa' chen po ste zhes pa ni/ so so'i dam tshig gi phyag rgya'i mtshan nyid las sems dpa' chen po rnams kyi skur gyur pa ste/de lta bu'i tshul dag 'byung bas na/ de las tshul 'di thams cad do zhes bya ba'i rgyud kyi tshig 'di yang de bzhin gshegs pas rgyud nyid du legs par bshad la 'dir yang de'i gtan tshigs su 'di ltar bshad par gyur to/ /de bzhin gshegs pa'i rigs kyi dam tshig gi sems dpa' chen po'i sku phyag rgya'i sbyor ba bshad zin to//da ni sku de nyid brtan pa dang mi g.yo bar bya ba'i phyir/ byin gyis brlab par bya ba'i thabs bshad par bya ste/ de yang gong du gsungs pa'i sems ma rdo rje ma'i phyag rgya bcings la/ oM sa ma ya s+t+waM zhes brjod pas bdag nyid kyi rgyab na/byang chub sems kyi gzugs brnyan zla ba'i dkyil 'khor chen po gnas pa dmigs pa de la rgyab brten par mos par bya'o/ /'dir yang tshig bshad 'di zhes pa ni/ sa ma ya s+t+waM zhes smras na/ bya ba'i tshig bshad de/ dam tshig khyod ni bdag go zhes pa'i tshig bshad 'di'o/ /phyag rgya chen po bsgrub pa'i zhes pa ni/dam tshig gi phyag rgya chen po sgrub pa'i phyir dam tshig gi sems dpa' sbyor ba byas pa'o/ /ye shes kyi sems dpa' gzhug pa ni/ dam tshig gi sems dpa' de la ye shes kyi sems dpa' gzhug par bya ba ste/ sems dpa' rnam pa gnyis gcig tu bya ba'o/ /de yi 'og tu bshad mod kyi/ / zhes pa ni de ltar byas pa'i 'og tu gdod 'di bya bar bshad de/ mod kyi zhes pa the tshom za ba'i tshig ste/ de ltar ma nges par ston pa'o/ /'on kyang zhes pa ni/ de ltar bshad kyang gal te 'di ltar yin zhes bya ba'i tha tshig ste/ don de gnas skabs gzhan du ston par byed pa'i tshig go/ /dam tshig sems dpa' nga rgyal bya ba'i 'og tu zhes pa ni/gnas skabs 'di kho na ste/ 'dir sbyar bar rigs par slob dpon snga rabs kyi mkha' pa rnams 'chad do/ /de bas na/ bdag nyid kyis kyang 'di ltar 'dod/ /ces pa'i don to/ /ci'i phyir zhe na zhes pa ni gtan tshigs ci'i phyir na 'dir sbyor bar byed pa'i rigs pa yin zhes gzhan gyis brgal ba'i tshig go//sa ma ya s+t+waM zhes bya ba'i snying po 'di ni dam tshig khyod ni nga'o zhes 'byung ba yin te/ don de dang sbyar na dam tshig sems dpa' nyid la 'di ltar bya bar rigs kyis/ ye shes sems dpa' la sbyar bar rigs pa ma yin no/ /de bas na tshig 'di dag gnas skabs 'di dag tu bstan to/ /de nas rang gi phyag rgya'i sems dpar bsgom par bya ste/oM su ra ta s+t+waM zhes pa ni/ khyod kyi dga' ba'o zhes ston pa ste/ chos thams cad kyi mtshan nyid kyi ngo bor chud kyang thugs rje chen pos khams gsum gyi sems can yongs su mi gtong bar mdzad pa ni/ dga' ba zhes bya bar 'dod do/ /rang gi lha'i dam tshig gi phyag rgya bcings te zhes pa ni/ rang gang gi bsam gtan mngon du byas pa de'i dam tshig gi phyag rgya ste/ji ltar ye shes kyi sems dpa' chen po rnams kyi dam tshig gi phyag rgya 'og nas 'chad pa las gang yin pa de bcings nas rang gi phyag rgya'i sems dpar mos par bya ste/ snying po a 'di yang brjod do/ /oM sa ma you0f85haM zhes pa ni/ dam tshig khyod ni bdag go zhes pa'am/ bdag ni dam tshig go zhes pa ste/ de gnyis dbyer med par ston pa'i tshig go/ /de nas rang gi phyag rgya'i dam tshig gi sems dpar bdag nyid bsgoms nas zhes pa ni/ gang du bstan pa'i sngags dang phyag rgyas bdag nyid dam tshig gi sems dpar bsgoms nas/ oM sa ma ya sarba a d+hi tiSh+Thi mAM zhes bya ba 'di brjod pas de bzhin du gyur par dmigs so//rang gi phyag rgya sems dpa' bdag bsgoms la zhes bya ba la sogs pa ni rgyud kyi gtan tshigs so/ /gzhan dag na re rnam pa lnga'i tshul gyis sku phyag rgya chen po yongs su sbyor bar byas pa kho nas chog ste/ ji ltar don thams cad grub pa'i byang chub sems dpa' yang sku phyag rgya chen po'i sbyor ba mngon du byed pa na rigs bzhi la sogs pa'i de bzhin gshegs pa thams cad gyi mngon par byang chub pa lnga la sogs pa'i rim pa brtag pa'i bsam gtan gyi sbyor bas sems yongs su rtogs par gyur pa dang /rtogs pa'i don la 'dris shing goms par byas pa las yongs su rdzogs pa'i sku phyag rgya chen po mngon par grub par zad kyi/de la 'di lta bu dag gis byin gyi rlabs byas so nyes ma bsnyad na de bzhin du kun gyis mchod par bya ba'i gnas su gyur pa'i sku blta bas chog mi shes pa thob par gyur pa yin na/ 'dir 'di ltar bstan pa ci dgos she na/ smras pa/ don thams cad grub pa'i byang chub sems dpar rnam pa lngas sangs rgyas pa'i tshul bstan pa'i dus na yang /de bzhin gshegs pa rnams la phyag 'tshal nas bdag la byin gyis brlab tu gsol zhes bya ba'i sgras/ byin gyis brlab pa la sogs pa'i yan lag rnams kyang yongs su rdzogs par byas par gyur la/ ma 'ongs pa'i sngags spyod pa'i gdul bya rnams kyi don du 'di ltar bya'o zhes kyang rgyud nyid las rgya cher bshad pa'i phyir ni 'di ltar bstan to//'o na yang rgol ba pa na re/ 'o na da ltar dang ma 'ongs pa gnyis ka'i don dang mtshungs par 'jug pa la thabs mi mthun par ston pa ci'i phyir/ 'on te de gnyis gcig gis mtshungs par mi rung ba'i phyir ram/ 'on te 'di ltar ston pa dgos ched gzhan dag yod pa yin zhe na/ smras pa/ 'di gnyis gang ltar byas kyang 'gal ba med la/ don la 'jug par 'dra mod kyi/ 'on kyang 'phags pa dang sems can du gyur pa'am/ sgrub par byed pa dang / grub par gyur zin pa'i bye brag las dgongs nas 'di ltar bstan to//'o na 'dir 'di ltar byin gyis brlabs pa la yon tan nam dgongs pa'i rnam pa ji lta bu dag yod par 'gyur zhe na/ smras pa/ bdag rang lha'i rnal 'byor du bya ba 'di yang dngos grub kyi rgyu'i gtso bo yin par rig par bya ste zhes bya ba la sogs pa dag smos te/ de ltar rnam pa du ma'i sgo nas bdag nyid lha'i rnal 'byor dam tshig sems dpa'i bsam gtan du bya ba'i nan tan smos pa gang yang /dngos grub gang sgrub kyang gtso bor phyag rgya chen po'i sbyor ba goms pas thob par 'gyur bas/ de ltar dngos grub bsgrub pa'i rgyu'i gtso bo 'di ltar bya ba 'di kho na yin par rig par bya zhes pa'i don to/ / de ltar yin pa gtan tshigs gang gi phyir mngon pa yin zhe na/ rang gi lha'i dam tshig gi sems dpa' bdag nyid bsgom pas zhes bya ba dag smos te/ rang gi lha gang yin pa'i dam tshig sems dpa'i phyag rgya chen por bdag nyid gsal bar bsgoms pas/ yongs su dag par 'gyur ba'i sngags pa zhes pa ni/bsam gtan dang mi mthun par gyur pa'i rnam par rtog pa dang / sgrib pa'i tshogs thams cad dang bral bar gyur pa'i sngags pa yin pas so/ /de bas na bgegs kyi tshogs shin tu rgyang ring du spangs te zhes rnam par rtog pa dang / sgrib pa'i tshogs kyis ni phyag rgya chen po de kho na nyid mthong ba la bar du gcod pas na bgegs zhes brjod de/bgegs kyi tshogs de dag ring du spangs pa yin no/ /bya ba'i las thams cad shin tu yongs su rdzogs shing zhes pa ni/ phyi rol gyi khrus dang gtsang sbra la sogs pa rnams ma byas kyang byas pa dang 'dra bar 'gyur bas na/ byas pa'i las yongs su rdzogs pa'o//legs par byed pa zhes pa ni/ stong pa chen po'i dang las thams cad dag pa nyid du shes shing phyag rgya chen po gsal bar byed pa'i bsam gtan la gnas pa ni/ phyi rol gyi gtsang sbra dang dka' thub dang sdom pa dang / dka' ba spyod pa'i las dag bya mi dgos te/ring po mi thogs par myur ba nyid du phyag rgya chen po'i kho na nyid lha'i rnal 'byor du 'grub par 'gyur ro ston to/ /bsdam par bya ba la 'bad pa ni yid 'byung bar byed pa zhes pa la/ gtsang sbra dang dka' thub la sogs pa'i las mngon du byed pa dag gis yid mi bde bar byed pas sems mnyam par 'jog tu mi ster te/sems mnyam par gzhag pa dang 'gal te zhes pa ni/ dka' thub kyi sdom pa spyad pa la gnas pas/ sems las su mi rung bar byed de/ sdom pas yid mi bde bas sems mnyam par mi btub na/ ting nge 'dzin dang 'gal bar 'gyur bas/ de bas na yun ring zhig na zhes pa ni/dka' ba spyad pas ni grub pa zhig thob na yang yun ring po zhig 'gyangs pa'i 'og tu thob par 'gyur ba'am/ yang na mi thob par 'gyur ro zhes pa ni/ lus ngag gdungs par gyur pa'i mtshan mas sems g.yengs te mi 'grub par 'gyur ro zhes kyang bshad pa dang / de bas na kha na ma tho ba dang bcas pa ma gtogs pa zhes pa kha na ma tho ba dang bcas pa ni/sgo gsum gyi las ma dag pa spyod par 'gyur ba ni/ kha na ma tho ba dang bcas pa ste/ de las bzlog pa ni kha na ma tho ba med pa ste/ kha na ma tho ba med pa'i thabs gzhan ni chos thams cad kyi spyi lugs dang mthun pa'am/ yang ni sbyor ba'i rgyud rnams las gsungs pa'i gos dang yo byad kyis 'tsho ba ste/ de yang 'dod chags dang / zhe sdang dang / gti mug gis mdangs dang stobs dang khams rgyas par bya ba ma yin gyi/ lus 'tsho bar bya ba la lha'i rnal 'byor nyid rtag tu nan tan bya ba ste/ ji ltar rab tu byed pa las kyang /kha zas sman dang 'dra ba'i tshod rigs pas/ /zhes bya ba la sogs pa gsungs pa bzhin no/ /rdo rje rtse mo'i rtog pa chen po las kyang / dka' thub sdom pa mi bzad pas/ /zhes bya ba la sogs pa gsungs so/ /gang du ji ltar der de bzhin/ /zhes pa ni/ bya ba'i rgyud las gsungs pa ltar/gnas gcig tu chad par bya ba ma yin te/ ji ltar bdag gnas gang du dad cing bde ba der de bzhin du bsam gtan la gnas par bya ba'am/ ji ltar gnas yid du 'ong zhing mtshan dang ldan pa der de bzhin du bsgrub pa'i rnal 'byor la gnas par bya'o//dkyil 'khor du ni ma zhugs pa'am/ /zhes pa ni/ rigs so so'i dkyil 'khor du zhugs shing de lta bu'i sgrub pa thams cad sgrub ma myong ba'o/ /sgrib pa kun dang ldan pa yang / /zhes pa ni/ yang dag pa'i don de kho na nyid mthong ba la sgrib pa ste/ mtshams med pa lnga la sogs pa'i las kyi lam la gnas pa'i 'gro ba'o//rang gi lha yi rnal 'byor bdag /ces pa ni/ ting nge 'dzin gyi rim pas phyag rgya chen por sbyor zhing cho ga bzhin du bsgrub par mi nus na yang gang la dad pa'i lha de nyid kyi ngo bo ni nga'o snyam du tshig tsam gyis brjod cing de'i gzugs su bsgom par bya bas na/tshig tsam gyis kyang rtag tu bya/ /zhes bya'o/ /mdor na zhes pa sngar gsungs pa lta bu'i tshig mang po dag gang du thal zin par gyur pa'i 'og nas bzung ste/ mdor bsdus nas ston par byed pa'i tshig go/ /de nyid rnal 'byor 'di yis ni/ /zhes pa ni/ bdag rang lha de nyid kyi rnal 'byor la gnas pa'i sbyor ba 'di yis ni/rnam pa thams cad sgrub pa na/ /zhes pa ni/ de lta bu'i rnal 'byor gyis 'jig rten dang 'jig rten las 'das pa'i dngos grub kyi rnam pa thams cad bsgrub pa na/ rnam gcig de lta bu'i rnal 'byor gyi dngos grub thams cad grub pa na zhes bya/bza' nyes spyad nyes thams cad kyang / /zhes pa ni/ zas kyi rnam pa gzhung dang mi mthun pa dag zos pa dang / mi 'tsham pa'i spyod pa rags pa dag spyad kyang dngos grub kyi bar chad dang bgegs su mi 'gyur bas na/ yong ye skyon du mi 'gyur zhes bya'o/ /de ltar yang ngan song thams cad rnam par sbyong ba'i rgyud las gsungs pa/rdo rje sems dpa'i gnas 'dug na/ /thams cad kun byas kun zos kyang / /'grub 'gyur nyes par mi 'gyur na/ /snying rjer ldan pas smos ci dgongs/ /zhes gsungs pa lta bu'o/ /de nyid las 'di 'bras bu bstan/ / zhes pa ni/ de skad du ston pa'i rgyud de'i don la/ rnal 'byor gyi phyag rgya chen po goms par byed pa'i 'bras bu bstan pa ste/ gang zhe na/ sangs rgyas byang chub sems dpa' yang / /zhes pa dag smos te/ dngos grub gzhan lta smos kyang ci dgos zhes pa ni/ 'jig rten las 'das pa'i go 'phang chen po de yang 'grub par dka' ba ma yin na/gter la sogs pa dang sgyu ma la sogs pa'i 'jig rten pa'i dngos grub lta ci zhig smos te zhor la 'grub ces ston to/ /las mchog rab tu mang po yang / /zhes pa ni/ 'phags pa mchod pa dang / sems can gyi don bya ba la sogs pa ste/zhi ba la sogs te rnam pa bzhi po dag kyang 'grub cing de dag gi mchog tu gyur pa'o/ /phyag rgya'i mchog kun 'grub pa po/ /zhes pa ni/ ji skad du gsungs pa'i de bzhin gshegs pa'i rigs kyi gtso bo dpal rdo rje sems dpa' la sogs pa'i phyag rgya'i mchog kun thob pa'i rgyu yin par ston to/sgrub pa po de ni/ sdug bsngal kun spong dpal dang ldan/ /zhes pa ni/ rnal 'byor gyi bsam gtan bsgoms pas sdug bsngal thams cad zad par byed cing / de'i byin rlabs kyis 'jig rten las 'das pa'i dpal phun sum tshogs pa 'byor par gyur te/de bas ni/ rnal 'byor 'di ni mchog rtag pa/ /zhes gsungs te/ de lta bu'i don chen po mngon du byed pa'i rnal 'byor 'di ni thams cad kyi nang na yang mchog tu gyur/ dka' thub kyi sdom pa drag pos lus sems nyon mongs pa med cing bde ba la gnas pa'i ting nge 'dzin gyis 'grub pa'am/chos nyid las mi 'gyur ba'i rtag pa chen po'i ngang la gnas pas na de skad bstan to/ /de nas rang gi lha'i ting nge 'dzin de la zhes pa ni/ dam tshig sems dpa'i sbyor ba la gnas pa'i bsam gtan no/ /byang chub chen por mos par bya'o zhes pa ni/de kho na byang chub chen po ste/ de la gnas par byed pa la ni/ byang chub chen por mos par bya'o zhes bstan to/ /de ltar yang rgyud las gsungs pa/ de bzhin gshegs pa'i rigs kyi zhes pa ni/ ye shes kyi sems dpa' chen po rnams so/ / byang chub chen po ye shes kyi dbang du byas nas zhes pa ni/ de'i phyag rgya chen po'i sbyor ba mngon du byas pa'i ye shes dang bcas pa de'i dbang du byas nas/ rdo rje sems dpa'i ting 'dzin gnas/ /zhes pa ni/ dang por byang chub sems stong pa nyid rdo rje lta bu'i ngang du gnas par bya ba'o//phyag rgya chen por bsgoms nas su/ /zhes pa ni/ de las langs pa'i ngang las byung ba'i zla ba dang rdo rje la sogs pa las phyag rgya chen po 'grub par byed pa'o/ /byang chub chen po'i ye shes 'di/ /zhes pa ni/ lha gang la dmigs pa de'i phyag rgya chen por gyur par dmigs pa la ni/byang chub chen po zhes te/ de'i ye shes 'di rnal 'byor pas bsgoms na/ myur du 'grub par 'gyur zhes gsungs so/ /rdo rje khu tshur zhes pa ni/ de bzhin gshegs pa rnams kyi sku gsung thugs kyi yon tan gcig tu 'dus par bstan pa ni rdo rje khu tshur te/ de ni byang chub sems dpa' chen po rdo rje khu tshur gyi las kyi phyag rgya 'og nas 'byung ba ste/phyag rgya de bcings la/ oM badzra muSh+Ti zhes bya ba'i snying po brjod de lus ngag yid gsum gcig tu dbyer med par bsgom mo/ /lha'i rjes su mthun par bsgrubs la zhes pa ni/ lha'i gzugs dang / kha dog dang / phyag mtshan ni ji lta ba bzhin de'i rjes su mthun par bdag nyid bsgrubs la/ sngags 'di brjod pas/ gong du smos pa'i zhes pa ni/ gong du rdo rje dbyings chen po bsgom pa'i skabs su gsungs pa'i rdo rje sems ma'i phyag rgyas gnas bzhir byin gyis brlab par bya'o/ /de ltar byin gyis brlabs pa yang rgyud las/rdo rje sems dpa'i ting 'dzin gyis/ /zhes bya ba la sogs pa gsungs so/ /de yan chad du de bzhin gshegs pa'i rigs kyi dam tshig gi sems dpa' rnams sgrub pa'i ting 'dzin bshad zin to// //da ni de dag la dbang bskur bas thams cad la dbang bskur ba thob pa'i don dang ldan par bya ba'i phyir dbang bskur ba'i thabs gsungs pa/de nas bdag dang mi gnyis par gyur pa'i zhes bya ba la sogs pa gsungs so/ /rin chen dbu rgyan gyis dbang bskur ro zhes pa ni/ de bzhin gshegs pa rnams ni rin po che dang chos mthun pa'i phyir na/rin po che ste/ de'i dbu rgyan gyis dbang bskur ba ni rin po che'i dbu rgyan gyis dbang skur ba'o zhes brjod do/ /de ltar yang rgyud las/ rdo rje dbyings kyi dbang phyug ma la sogs pa zhes pa gsungs te/ rdo rje dbyings kyi dbang phyug ma ni rnam pa lngar brjod pa de'o/ / phyag rgyas spyi bo nas brtsams zhes pa ni/ spyi bo nas brtsams te dpral ba nas mthar thug gi bar du rim bzhin du bcing bar bya ba'o/ /phreng bas de ni dbang bskur ro/ /zhes pa ni/ ji ltar phreng ba'i mtshan nyid ni brgyus te rim pa'i tshar du 'dug pa bzhin du rigs lnga'i de bzhin gshegs pa rnams kyang phreng ba'i tshar bzhin du rim par dbu la 'khor bar gnas par byas pas dbang bskur ba la ni de skad ces bya'o//gzungs kyi dkyil 'khor las gsungs pa zhes pa ni rdo rje dbyings kyi gzungs kyi dkyil 'khor nas gsungs pa'i phyag rgya bcings pa rang gi klad pa'i spyi bor bzhag la/oM badzra d+hA twI shwa ri hUM/ zhes pa ni/ phyag rgya de'i sngags so/ /badzra a b+hi Shiny+tsa mAM/ badzra d+hA tu zhes pa ni/ dbang bskur ba ste/ de ltar phyag rgya bcings shing sngags bzlas pas spyi gtsug tu zla ba'i dkyil 'khor gyi steng du yi ge a kha dog ser po bsgoms pa las/ bcom ldan 'das rnam par snang mdzad dam shAkya thub pa'i gzugs gser gyi kha dog can shin tu mdzes pa la mtshan dang dpe byad kyis brgyan pa las phyag rgya dang bcas pa 'od kyi dkyil 'khor 'ja' tshon sna lnga'i nang nas/seng ge'i gdan la bzhugs pa zhig mngon du byung nas bzhugs par dmigs so//de la snying po ni 'di'o/ /badzra d+hA tu zhes pa ni/ de bzhin gshegs pa de'i snying po ste/ dang por dbang bskur ba'i sngags kyi mjug la rigs so so'i snying po brjod pa ste/ 'og ma la yang de bzhin du shes par bya'o/ /rdo rje dbyings kyi dbang phyug ma'i mtshan nyid ni/ gong du de bzhin gshegs pa bsgom pa'i byin gyi brlabs kyi gnas skabs su bris pa las shes par bya'o/ /der mi 'khrugs pa bsgom pa zhes pa ni/ oM badzra badzri Ni hUM/ ak+Sho b+h+ya a b+hi Shiny+tsa mAM zhes pa'i sngags dang / de'i phyag rgya dpral bar bcings pa las/ dpral bar zla ba'i dkyil 'khor gyi dbus su yi ge hUM kha dog dkar po dmigs pa las mi 'khrugs pa'i gzugs kha dog dkar po dang ldan pa la/rgyan rnam pa sna tshogs dang ldan pa/ ba lang gi gdan la bzhugs pa zhig gnas par dmigs so/ /rdo rje dbyings kyi dbang phyug ma nyid las zhes pa ni/rdo rje dbyings kyi dbang phyug ma'i phyag rgya nyid las/ gung mo gnyis gshibs te bsgreng ba na/ mi 'khrugs pa'i gnas kyi phyag rgya'o zhes pa ni/ phyag rgya des mi 'khrugs pa dpral bar gnas par byed pas ming yang de skad du bya'o/ /de nyid las gung mo gnyis nor bu lta bur byas pa ni/rin chen 'byung ba'i phyag rgya ste/ de bcings la/ oM rat+na badzri NI hUM/ rat+na sam+b+ha ba a b+hi Shiny+tsa mAM zhes brjod pas rna ba g.yas pa'i steng du zla ba'i dkyil 'khor la yi ge trAM sngon po gnas par brtags par gyur pa/ rin chen 'byung ba mdog mthing ga / rgyan gyi rnam pas yongs su brgyan pa/ rta sngon po'i gdan la bzhugs pa gnas par dmigs so/ /de nyid las gung mo dang srin lag gnyis rtse sprad pad+ma ltar dbyibs zlum por byas la/ oM d+harma badzri Ni hUM/ oM lo ke shwa ra rA dza a b+hi Shiny+tsa mAM zhes brjod la ltag par bzhag pas/ ltag par zla ba'i dkyil 'khor gyi steng du yi ge hUM dmar po bsgoms pa las/'od dpag tu med pa sku mdog dmar po pad+ma rA ga lta bu chags pa'i mtshan nyid can rgyan gyi rnam pa dang ldan pa ting nge 'dzin gyi phyag rgya can rma bya'i gdan la bzhugs pa dmigs so/ /de nas yang mthe bong dang mdzub mo gnyis snga ma bzhin du bsnol la/gung mo dang srin lag dang / mthe'u chung rnams sor mo so sor phye ste brkyang la rna ba g.yon gyi gong du bzhag ste/ oM karma a b+hi Shiny+tsa mAM hUM/ oM a mo g+ha sid+d+hi a b+hi Shiny+tsa mAM zhes brjod pas rna ba g.yon pa'i gong du zla ba'i dkyil 'khor gyi nang du yi ge a kha dog ljang gu las don yod grub pa mdog ljang gu rgyan gyi rnam pa dang ldan pa nam mkha' lding gi gdan la bzhugs par dmigs so//de bzhin gshegs pa bzhi po de dag bzhugs par bya ba'i snying po yang zhes pa ni/ rigs bzhi'i sangs rgyas de dag dbang bskur ba'i gnas so sor bzhugs par bya ba'i snying po yang 'di lta ste/so so'i mtshan gyi thog ma la/ oM bzhag pa nyid yin par shes par bya'o zhes pa ni/ dbang bskur ba'i sngags brjod pa'i mjug la/ sangs rgyas bzhi po de dag gi mtshan gyi thog ma la/ oM zhes brjod pas so so'i gnas su/ cha lugs rnam pa ji lta ba bzhin du bzhugs par brtag go//oM ak+Sho b+h+ya zhes bya ba la sogs pa ste gong du bris zin to/ /'o na de ltar dbang bskur ba'i rnam pa bstan pa'i phyag rgya de dag rdo rje sems ma la sogs pa'i phyag rgya bcings pa'i rim pas bya'o zhes zer ba yang yod na/ 'dir 'di ltar bstan pa ci'i phyir zhe na/ smras pa/ dkyil 'khor chen po 'di las gsungs pa'i zhes bya ba la sogs pa dag ste/rdo rje dbyings kyi dkyil 'khor chen po 'di las gsungs pa'i phyag rgyas sangs rgyas dang byang chub sems dpa' bcu drug mnyes par byed pa'i dbang bskur ba'i cho ga'i rim pa 'di/ gzungs kyi dkyil 'khor las gsungs pa'i rdo rje dbyings kyi dbang phyug ma la sogs pa'i phyag rgya lnga 'byung ba 'dis bya bar bshad de/'di ltar bya ba dpal mchog dang po dang / 'jig rten gsum las rnam par rgyal ba dang / dam tshig chen po'i de kho na nyid dang / sogs pa'i sgras ni rnal 'byor gyi sngags kyi rgyud ji snyed yod pa bsdus te/de dag las kyang gzungs kyi dkyil 'khor las gsungs pa'i rdo rje dbyings kyi dbang phyug ma la sogs pa'i phyag rgya 'di dag nyid kyis ji ltar rigs pa bzhin du byin gyis brlab pa dang / dbang bskur ba'i cho ga bshad do/ /gang yang rdo rje dbyings kyi dkyil 'khor las gsungs zhes pa ni/rdo rje dbyings kyi dkyil 'khor las gsungs ba rdo rje sems ma la sogs pa'i dam tshig gi phyag rgya rnams kyis dbang bskur bar byed pa de dag ni/ dpal mchog dang po la sogs pa'i rgyud las gsungs pa'i mtshan nyid dang yang mi mthun la/ de kho na nyid ni bsdus pa'i rgyud 'di nyid kyi tshig dang yang 'gal bar 'gyur te/ji ltar 'gal zhe na/ rgyud nyid las/ rdo rje dbyings phyug la sogs pa'i/ /phyag rgya'i phreng bas de dbang bskur/ /zhes gsungs par zad kyi/ rdo rje sems mas dbang bskur ro/ /zhes kyang ma gsungs la/ rdo rje sems ma la sogs pa la rdo rje dbyings kyi dbang phyug ma'i ming gi sgras btags pa yang med la rgyud 'dir gzungs kyi dkyil 'khor las gsungs pa/rdo rje dbyings kyi dbang phyug ma la sogs pa'i phyag rgya chen po de nyid la de skad du bshad pa'i phyir 'di bstan to/ /'o na sngags dang phyag rgya'i mtshan nyid gzhan gyis ni bya bar ma brjod na/sngags dang phyag rgya 'dis 'di bzhin du dbang bskur bar bstan pa ci'i phyir zhe na/ gzhan yang dbang bskur ba'i las ni/ rin po che'i rigs kyis mdzad de zhes bya ba la sogs pa gsungs te/ rigs bzhi la de bzhin gshegs pa rnams kyis phrin las sa pa na mnga' ste/de bzhin gshegs pa'i rigs kyis ni byin gyis brlabs par mdzad la/ rin po che'i rigs kyis ni dbang bskur ba'i las mdzad de/ de gtsor byas nas zhes pa ni/ dbang bskur ba gtsor byas nas/ rin po che'i rigs kyis gzungs kyi dkyil 'khor mdzad de/de bas na sku'i phyag rgya zhes pa ni/ de la bzhugs pa'i rdo rje dbyings kyi dbang phyug ma la sogs pa'i sku'i phyag rgya mchod rten khri la bzhag pa lta bur yang bstan pas na/ phyag rgya de lag pas byas pa rnams kyis spyi bo nas dbang bskur ba ni rigs so zhes bshad do//de'i 'og tu zhes pa ni/ de ltar dbang bskur ba'i 'og tu/ rang gi lha'i skur zhes pa ni/ bdag nyid gang la dad pa'i ye shes kyi sems dpa' rnams las gang yang rung ba'o/ /bdag nyid ji ltar bsams pa zhes pa ni/ gang la dad pa'i sems dpa' de'i gzugs dang kha dog tu ldan pa'i cha lugs su bsams pa'o//rnam pa thams cad du zil gyis mi non zhes pa ni/ dper na ji ltar rgyal po'i bu gser gyi cod pan la sogs pa'i rdzas khyad par can rnams kyis spyi bo nas dbang bskur ba byas pa de la ni/ rgyal phran dang blon po dang /shor ba la sogs pa gzhan gyis zil gyis mnan pa dang / dbang 'phrog par mi nus pa bzhin du/ de bzhin gshegs pa'i rigs kyi dam tshig sems dpa' chen po'i rnal 'byor mngon du byas nas rigs lnga ye shes lnga'i rgyal thabs spyi blugs kyis dbang bskur bar gyur pa de la ni/bdud la sogs pa'i phas kyi rgol bas zil gyis mi non cing / theg pa 'og ma pa'i skyes bur gzhag pa'i gzhan gyis dbang 'phrog par mi nus pa'i nga rgyal rim pa 'di ltar bsgom par bya zhes bshad do/ /de bzhin gshegs pa'i rigs kyi dam tshig gi sems dpa' chen por sgrub pa la rigs lnga'i sangs rgyas kyis dbang bskur bar bya ba'i don de yan chad du bshad zin to//da ni de ltar dbang bskur bas thams cad la dbang thob par gyur pa de yang dag pa'i bsam gtan dang ldan par bya ba'i phyir/ ting nge 'dzin gyi don bsgom pa'i thabs bshad par bya ste/dang por rang gi lce la rdo rje rtse lnga pa bsams pa la zhes pa ni/ rang gi lce nyid hrIHlas bskyed pa'i pad+ma 'dab ma brgyad par gyur pa'i 'dab ma lcer gnas pa'i steng du/ zla ba'i dkyil 'khor bsams pa'i dbus su hUM las rdo rje rtse lnga ba bsams la/ de'i bum pa'i dkyil du sems dpa' gang bsgom pa'i chos kyi phyag rgya'i sngags kyi yi ge sngar bshad pa bzhin du bsam mo//snying gar zhes pa yang snying gar zla ba'i dkyil 'khor du bsgom pa'i steng du/ sna tshogs rdo rje ste las sna tshogs par mdzad pa'i mtshan nyid rdo rje rgya gram rtse gyen du lta ba'i mtshan nyid 'og nas 'byung ba bsams te/las kyi phyag rgya bcings te zhes pa ni/ lha gang bsgom pa de'i las kyi phyag rgya gang yin pa de bcings la 'og nas 'byung ba 'di ltar yid la bya'o/ /rang gi lha'i dam tshig sems dpa' zhes pa ni/ rang gi lha gang bsgom pa'i dam tshig sems dpa'i sku rdzogs par bdag nyid gyur te/des bgegs dang log 'dren zhes bar du gcod pas bgegs te/ ji ltar bya ba'i rgyud las gsungs pa'i khwa dang ne'u le rnam par 'jig /rigs gcig pa las zhes pa ni/ stong phrag brgyad cu rtsa bzhi'o zhes rgya cher gsungs pa de dag dang /'gro ba'i sems dang grub pa'i phun sum tshogs pa log par 'dren pa'i mtshan nyid can yin pas log 'dren yang de'i rnam par bshad de/ ma lus pa de dag gis mi tshugs shing / chos thams cad ngo bo nyid kyis rnam par dag pa zhes pa ni/gzung 'dzin dang bral ba'i ngo bo nyid du nam mkha' ltar mos par bya'o/ /'khor ba na gnas kyang zhes pa thugs rjes su 'khor ba na gnas kyang shes rab kyis de lta bur rtogs pa dang ldan pas 'khor ba'i skyon gyis mi gos te/ rdo rje chos kyi pad+ma bzhin du zhes pa ni/ting nge 'dzin pad+ma'i rigs pas ji srid 'khor ba na bzhugs kyang 'khor ba'i bag chags kyi nyes pas mi gos pa ni/ sems dpa' chen po rdo rje chos kyi phyag na bsnams pa'i pad+ma bzhin te/ nyon mongs pa la sogs pa zhes pa ni/ rtsa ba'i nyon mongs pa drug dang / nye ba'i nyon mongs pa nyi shu'o//rnam pa gcig tu rten cing 'brel bar 'byung ba las/ dang po brgyad dang dgu nyon mongs/ /zhes gsungs pa'i rnam pa de dag go/ /sogs kyi sgras ni las dang sdug bsngal gnyis bsdus te/ gnyis dang bcu pa las yin te/ lhag ma bdun yang sdug bsngal yin/ /zhes gsungs pa de dag bsdu'o//don dam par mi gos zhes pa ni kun rdzob dang 'brel par bstan pa ste/ kun rdzob tu dngos po'i snang bas 'khor bar gnas kyang don dam par ngo bo nyid kyis dag par rtogs pas mi gos so snyam du brtag par bya'o/ /dpa' bo zhes pa de lta bu'i don dang ldan pas so/ /rgyal ni lta ba de'i ngang la gnas pa ste/de ltar gsal bar bsgom pa'o/ /'di ni ting nge 'dzin te zhes pa ni/ de ltar bstan pa'i tshul 'di ni ting nge 'dzin yin te/ de ltar bya ba'i gtan tshigs rgyud las kyang gsungs te/ rdo rje chos kyi ting nge 'dzin zhes pa ni chos kyi rigs kyis ting nge 'dzin gyi las mdzad pas na rdo rje chos kyi ting nge 'dzin zhes bya'o//rnam gcig la la na re/ ye shes kyi rdo rje rtse lnga pa bzung ba ste/ de nyid rdo rje chos pas na rdo rje chos te de'i ting nge 'dzin to zhes zer na/ rdo rje chos ni spyan ras gzigs kyi dbang po ste/ chos thams cad la bdag med cing / ngo bo nyid kyis dag pas rang bzhin gyis stong par rnam par dag pa'i ngo bor gyur pas na/de'i ting 'dzin zhes bya zhes zer/ sems dpa'i byin rlabs rnal 'byor gyi/ /zhes pa ni/ phyag rgya chen po rdzogs par gyur pa'i snying ga na gnas pa'i zla ba'i dkyil 'khor ro/ /rdo rje chos de zla ba'i dkyil 'khor gyi sems dpa' de'i byin gyis rlob par byed pas so//rnam gcig sems dpa' rnams la gang 'dod pa'i ting nge 'dzin dang ldan par byed pas so/ /gsang sngags rig sngags bsgrubs na ni/ /zhes pa ni/ gsang sngags dang rig sngags kyi mtshan nyid bzla ba ste/ de bzlas shing bsgrub par 'gyur na gang 'dod pa'i dngos grub myur du 'grub par 'gyur bas na myur du dngos grub thob par 'gyur//zhes gsungs so/ /de bzhin gshegs pa'i rigs kyi dam tshig gi sems dpa' chen po rnams kyi ting nge 'dzin de yan chad du bshad zin to/ /de ltar ting nge 'dzin gyi bsam gtan dam pa dang ldan pa de ni/ gzhan gyis mchod pa'i gnas su gyur pa yin pas mchod pa dang ldan par bya ba'i phyir mchod pa bshad par bya ste/de nas gsang ba'i mchod pa brjod/ /ces bya ba la sogs pa gsungs so/ /rdo rje lA s+ye la sogs pa/ /zhes pa ni sgeg mo la sogs pa gsang ba'i lha mo rnams dang / badzra satwa saM gra ha zhes bya ste/ rdo rje sems dpa' bsdus pa nyid/ / ces bya ba la sogs pa rab tu gsang ba'i mchod pa rnams kyis mchod par bya ba 'og nas 'byung ba ste/ gsang ba'i mchod pa brjod cing zhes pa ni sngar bshad pa bzhin no/ /de bzhin gshegs pa rnams dang zhes pa ni rnam par snang mdzad la sogs pa'i sangs rgyas lnga rnams so/ /dpal rdo rje sems dpa' la sogs pa zhes pa ni/dpal rdo rje sems dpa' la sogs pa ye shes kyi sems dpa' bcu drug po rnams so/ /de dag ni sangs rgyas dang byang chub sems dpa' thams cad kyi gtso bo bas so/ /rnam gcig rgyud 'di'i dkyil 'khor du gsungs pa'i lha rnams kyi gtso bo ni 'dir smos pa 'di rnams yin pas so//kha cig na re rdo rje dbyings kyi dkyil 'khor las 'byung ba'i lha rnams thams cad kyi mtshan ni gtso bo zhes bya ste/ ci'i phyir zhe na/ sbyor ba'i rgyud du gsungs pa gzhan rnams kyi nang na 'di dag gtso bo bas na gtso bo rnams zhes bya ste/ dam tshig gi sems dpa' zhes pa ni/ sngar bshad pa bzhin no//rnal 'byor zhes pa ni mtshan ma dang mtshan ma med pa phan tshun gyi ngor du 'byor pa ste/ de'i mtshan nyid kyang sngar bshad pa bzhin no/ /de bzhin gshegs pa rnams dang de'i rigs kyi sems dpa' rnams kyi dam tshig sems dpa'i rnal 'byor bshad zin to// //da ni de ltar dam tshig gi sems dpa'i rnal 'byor du bsgom pa'i lha'i de dag mnyes par bya ba'i phyir/de dag gi mchod pa'i cho ga'i rim pa bshad par bya ste/ de la mchod pa'i rnam pa'i bye brag kyang / grangs ming mthun par ston pa'i rnam pa du mar 'dod pa dag yod na/ 'dir tshul ji lta bur ston zhe na/ smras pa/ de nas de ltar dam tshig gi sems dpa'i rnal 'byor du byas te zhes bya ba la sogs pa gsungs so//de la dam tshig gi sems dpa'i rnal 'byor ni/ de bzhin gshegs pa rnams dang / de'i rigs su gtogs pa'i sems dpa' rnams kyi rnal 'byor rang byas zin par bstan pa de'o/ /de bzhin gshegs pa rnams dang zhes pa ni/ snga nas grub pa'i rang bzhin gyi de bzhin gshegs pa ste/sangs rgyas lnga rnams so/ /rdo rje sems dpa' la sogs pa/ /zhes pa ni ye shes kyi sems dpa' rnams kyang tshul de bzhin du shes par bya ste/ phyi rol gyi mchod pas mnyes par bya'o zhes pa ni/ de rnams dam tshig sems dpa'i mdun du bzhugs par mos par brtags nas mchod pa'i bye brag gis mnyes par bya ba'i thabs bshad par bya ba'o//mchod pa'i cho ga yang rgyud 'di las zhes pa ni/ de ltar mchod pas mnyes par bya ba'i thabs kyang rtsa ba'i rgyud chen po de kho na nyid bsdus pa 'di'i nang nas ni 'di ltar 'byung ste/ dkyil 'khor chen po la sogs par bkod pa'am zhes pa ni/dkyil 'khor chen po ni rdo rje dbyings kyi dkyil 'khor te/ sku'i dkyil 'khor ro/ /sogs pa'i sgras ni ji skad du gsungs pa'i dkyil 'khor rnam pa gsum sdud par byed pa ni/ de ni rgyas pa'i sgo nas so/ /phyag bzhi pa'i dkyil 'khor zhes pa yang rigs so so'i phyag rgya bzhi pa'i dkyil 'khor brjod pa'o//rgyas pa dang zhes pa ni/ so so la dga' ba rnams so/ /bsdus pa zhes pa ni/ nyung ngu la dga' ba rnams kyi don bshad pa'o/ /ras dang zhes pa ni/ dkyil 'khor de dag bri ba'i gzhi ste/ ji skad du gsungs pa'i rtswa du gu la'i ras dang / be'u ras dang / shing bal gyi ras mo la sogs pa rnams kyi nang nas gang bri bar bya ba'i 'os su gyur pa de la bri bar bya ba ste/ de yang ri mo mkhan gso sbyong la gnas pas khrims kyi dngos gzhi mnyams par bsrungs te/ rtsa rgyus dang / khrag la sogs pa'i nyes pa spangs pa'i rtsis 'byes par byas pa'i tshon kha dog dang ldan pas ji ltar 'dod pa'i rnam par bri bar bya ba'o//thang bu zhes pa ni/ sa gshin pa'i thang bu la dang por sa bslang ba dang / bgegs bskrad pa la sogs pa sbyor ba mngon du byas nas 'jim pa legs par sbyar ba la/ dri dang ldan pa'i lci bas gung lto tsam du byugs pa la/thig gis re'u du bgos nas tshon 'byes par dgyes pa'o/ /nam mkha' la sogs pa'i phyogs su'am zhes pa ni/ nam mkha' la yid kyis bsams pa'am/ rtsig ngos la sogs pa'i ngos su rtsig pa la bri bar bya'o/ /byas pa'am zhes pa ni 'ji ba dang tsan+dan la sogs pa'i rnam pa la brtsams pa'o//lugs su blugs pa'am zhes pa ni/ gser dngul la sogs pa'i rnam pa la/ shin tu sbyangs pa'i mgar ba mkhas pas mtshan dang ldan par blugs pa'o/ /bsam pa la zhes pa ni/ mdun gyi nam mkha' la rnam par dag pa'i pho brang rgyan chen po rgyan thams cad dang ldan pa'i dkyil 'khor dmigs nas/de'i nang na bzhugs par brtags pa la/ mnyes par bya ba'am zhes pa bsgrub par bya ba'i lha/ de bzhin gshegs pa rnams dang lhan cig tu zhes pa ni/ dkyil 'khor gyi lha dang thabs cig tu ji ltar rigs pa bzhin du gnas pa'am/bcom ldan 'das sangs rgyas dang byang chub sems dpa' zhes pa ni dkyil 'khor chen po'i tshul lam/ phyag rgya bzhi pa'i dkyil 'khor kho na bsams te mchod do/ /khyad par du zhes pa ni/ de las kyang rim par phye ba'i tshig go/ /theg pa chen po mngon par rtogs pa'i bsdus pa'i sku rdo rje zhes pa ni/theg pa chung ngu las bzlog pas na chen po ste/ mngon par rtogs pa ni byang chub sems rnam par dag pa'i ngo bo la bya ste/ de rdo rje sems dpa'i ye shes kyi mngon par rtogs pas ni/ mngon par rtogs pa ste/ de'i nang du thams cad 'dus pas na bsdus pa zhes bya ste/ don dam pa'i rang bzhin chos kyi sku rdo rje sems dpa' zhes bya ste/ye shes lnga'i ngo bo'i sku bas na sku rdo rje'o/ /de yang don dam par bstan pa dang / kun rdzob tu bstan pa ste/ don dam par ni chos kyi skur bstan la/ kun rdzob tu ni gzugs kyi sku'i rnam par ston pa'o/ /gzhan du ni kun rdzob tu ni 'jig rten pa'i sku'i ngo bor ston pa'o//don dam par ni 'jig rten las 'das pa'i lhar ston pa ste/ 'jig rten dang 'jig rten las 'das pa'i lha thams cad ni dpal rdo rje sems dpa'i rang bzhin las byung bas 'thon pa yang de las 'thon la/ bsdu na yang der bsdus pas na thams cad bsdus par gyur pas zhes bya ste/ dper na chu thams cad rgya mtshor 'dus pa bzhin no//de bzhin gshegs pa'i rigs kyi 'khor los sgyur ba zhes pa ni/ rigs bzhi la so so na 'khor los sgyur bar 'bod pa dag yod pa'i nang nas/ dpal rdo rje sems dpa' ni de bzhin gshegs pa'i rigs kyi 'khor los sgyur ba zhes bya ste/ de'i don ni sems can ma grol ba grol ba dang / dbugs ma phyung ba dbugs dbyung ba dang / ma smin pa smin par bya ba dang / mya ngan las ma 'das pa dag mya ngan las 'das pa'i gnas su 'jog pa'i 'khor los sgyur ba'am/ gcig tu na rigs kyi sgo nas de bzhin gshegs pa mchod pa dang / sems can gyi don mdzad pa la thogs pa med pa ni/ dper na 'khor los sgyur pa dang 'dra bas so//kha cig na re 'khor los sgyur ba'i rgyal po dang chos mthun pa'i phyir te/ 'khor los sgyur ba zhes bya bar bshad de/ de ni dngos su na dpal rdo rje sems dpa' ste/ de'i phyag rgya gcig pa'i dkyil 'khor gyi tshul gyis mchod do/ /de ltar bya ba yang phyi ma'i yang phyi ma'i rgyud las gsungs te/ las mang po bya ba'i mtshan nyid rnams snang ste zhes pa ni/las ni 'phags pa mchod pa dang / sems can gyi don bya ba'i mtshan nyid de zhi ba la sogs pa rnam pa bzhi dang / sgrub pa'i bye brag tha dad pa dag de bzhin du byas nas 'grub par de'i nang na snang ste/ ji ltar ras dang thang bu dang zhes bya ba la sogs pa gsungs so/ / rgol ba pa na re/ 'o na rnal 'byor gyi rgyud rnams ni ting nge 'dzin gtso bas/ sems ting nge 'dzin gyi bsam gtan la gnas pas/ thams cad 'thob par bstan pa yin na/ 'di ltar bya ba la sogs pa'i gzhung dang mchod pas mchod pa'i rnam pa dag brtsam zhes zer ba ci'i phyir zhe na/ smras pa/ mchod pa'i dgos pa yang 'di nyid las zhes pa ni/de ltar mchod pa bya ba yang rgyud 'di nyid las kyang 'di ltar bstan te/ dkon mchog gsum la mchod pas/ /zhes bya ba la sogs pa gsungs so/ /de bzhin du rgyud gzhan las kyang gsungs te/ mchod pa rnam bzhi byas pas ni/ /zhes pa bdug pa la sogs pa bzhis mchod pa yin la/rnam gcig zang zing gi mchod pa dang / gsang ba'i mchod pa dang / yid kyi mchod pa dang / nan tan gyi mchod pa ste/ bdag nyid lha'i rnal 'byor du gnas pa'i sgo nas bsod nams chen po thob par gsungs so/ /da ni rgyas pa'i sgo nas mang po la dga' ba rnams kyi don du gsungs pa ni/ dkyil 'khor chen po'i tshul gyis mchod pa'i cho ga bshad par bya'o zhes gsungs pa dag ste/sangs rgyas dang byang chub sems dpa'i gnas su 'os pa zhes pa ni/ yid du 'ong zhing dang bar gyur pa ste/ gang zhe na/ rdo rje nor bu'i rtse mo khang pa brtsegs pa byin gyis brlab par bya ste zhes bya ba dag ste/ 'di ni 'dod khams kyi lha'i rgyal po'i gnas te/ rdo rje nor bu zhes pa ni/rin po che'i mtshan rdo rje'i nor bu zhes bya ba ste/ khang pa'i rtse mo des spras pas na rdo rje nor bu'i rtse mo zhes bya'o/ /brtsegs ma zhes pa ni/ yang thog gi rim pa rnam pa du ma dag gcig gi steng du gcig brtsegs mar gyur pas na'o/ /yang na ma ra ka ti la sogs pa'i rin po che'i rigs rnam pa du ma dang / mu tig gi rigs rnam pa du ma dang /'phra 'bur ba la sogs pa lha'i rgyan du ma dag gis brtsegs mar g.yogs pas na de skad ces bya ste/ de ltar byin gyis brlab bo/ /'o na de ltar de kho na dmigs par bya ba yin gyi/ gzhan dmigs par bya ba ma yin nam 'di ltar bstan pas ci 'grub ce na/ smras pa/ gang gi phyir gsang sngags gang du bshad pa'i gnas der mos par byas na zhes bya ba'i tshig gsungs te/gang gi phyir de kho na nyid bsdus pa'i rgyud du rdo rje dbyings kyi dkyil 'khor chen po la sogs pa bshad pa dang / gsang sngags kyi rgyud ji snyed pa rnams ni/ ri rab ri'i rtse mor gzhal med khang 'dir bstan pa yin pas gnas de kho na bsams na/gang 'dod pa'i sgrub pa po de myur du 'grub bo zhes spyir gsang sngags kyi rgyud las zhib tu 'byung ba'i tshig slob dpon snga rabs rnams 'chad pa'i phyir na 'di ltar bsgom par bstan to/ /'o na gnas de dag bskyed pa'i thabs dang po'i rim pa bzhin du'am/ 'o na de kho na nyid bsgom par bya zhe na/ de'i rim pa yang 'di'o zhes bya ba la sogs pa gsungs so//oM swa b+hA ba shud+haH sarba d+harmA zhes pa ni chos thams cad rang bzhin gyis rnam par dag par byin gyis brlab pa ste/ stong pa nyid du bya ba'i sngags so/ /ngo bo nyid yod pa zhes pa ni dngos por snang ba'i mtshan ma bas ma dag pa'o/ /dang bral bas mos pa'o zhes pa ni/ ngo bo nyid med pa ni mtshan ma dang bral ba ste/dag pa bas na de ltar brtag par bya ba ni mos par bya'o/ /de nas 'og tu zhes pa ni/ 'og gi phyogs su'o/ /'jig rten gyi khams ma lus pa zhes pa ni phyogs bcu na ji snyed yod par gyur pa'i 'jig rten gyi khams de dag ston cing 'dzin par nus pa ste rgya che ba'o//rlung gi dkyil 'khor chen pos gzhi byas pa/ /zhes pa ni/ yaM las rlung gi dkyil 'khor chen por bskyed pa ste/ rgya dang rngams tshad med pa/ sred med kyi bu'i rdo rjes kyang phigs par mi nus pa sra zhing sdug par gyur pa dag bsgom mo/ /bdud rtsi'i rgya mtsho zhes pa ni rlung gi dkyil 'khor de'i steng du baM las chu'i rgya mtsho chen po'i rlung gis gar khyab pa de'i tshad du gyur par bsgom mo//de lta bu nas byung ba'i phyir ri rab de skad bshad mod kyi/ 'on kyang 'dir chu'i phung po de las laM las gser gyi sa gzhi chen por gyur te/ rgya che zhing sdug par rab tu gyur par bsgom mo/ /de nas gdod de'i dbus su suM las ri rab bsam par bya ste/gzi mdangs bzang po dang ldan pa/ /zhes pa ni rin po che sna bzhi las grub pas kha dog mi mthun pa'i gzi mdangs khyad par can dang ldan par bsgom par bya'o/ /gser gyi sa gzhi zhes ba ni de'i steng gi sdings su gser gyi sa gzhi sra ba'i tshad rdo rje ltar cis kyang mi shigs pa dbyibs gru bzhi lham par gyur pa rgya shin tu chen por gyur pa sems kyis ji tsam du dpags pa'i tshad kyi rgya de tsam/kho ra khor yug gi tshad sems kyis ji tsam du mos pa'i mthas klas pa tsam du gyur pa la/ steng bai DUr+ya bzhu bas mig mangs ris su bris pa/ mtha' tshon rtsi brgya rtsa gcig gis mdzes par bskor bar mos par bya'o/ de ltar brtags pa'i steng du/ phyogs bzhir yang sgo dang rta babs dang zhes pa gzhal yas khang brtag par bya ba ste/ de yang dbyibs gru bzhi pa la sgo dang twa ra Na dang / sgo khyud dang / sgo khang dang / ka ba brgyad dang ldan pa rdo rje'i phreng ba dang / chu skyes kyi me tog dang / dra ba dang dra ba phyed pa dang / nyi ma dang / zla ba dang / me tog gi phreng ba dang /dar gyi chun po dang / 'phan dang / dril bu dang / rnga ma rlung gis bskyod pa la sogs pa sgo khyud dang / the ma skas dang / stegs bu la sogs pas brgyan pa ste/ de'i dbyibs gru bzhir gnas pa ni/ tshad med pa rnam pa bzhi'i ngo bos thams cad la snyoms par mdzad pa ste/ byams pa dang / snying rje dang / dga' ba dang / btang snyoms rnam par zhen par gyur ba'i ngo bo ste/ de yang mnar sems pha rol gnon par 'dod pa las bzlog par 'dod pa'i phyir na byams pa'o/ /gzhan rjes su 'dzin pa las bzlog pa'i phyir na snying rje'o/ /gzhan gyis sems 'joms pa las bzlog pa'i phyir na dga' ba'o/ /mi mnyam par 'dod pa'i yid las bzlog pas na btang snyoms so//tshad yod pa las bzlog pas na tshad med pa ste/ yul dang sems can tshad med pa la dgongs pa'i mthu mnga' bas na tshad med pa ste/ de'i ngo bor gyur pa'o/ /byang chub kyi phyogs kyi chos sum cu rtsa bdun yongs su rdzogs par spyad pa'i ngo bo yongs su smin par gyur pas sgo bzhi sgo khang dang bcas pas brgyan pa ste/de la shar phyogs kyi sgo ni dran pa nye bar gzhag pa bzhi'i rang bzhin te/ lus dran pa nye bar gzhag pa dang / tshor ba dran pa nye bar gzhag pa dang / sems dran pa nye bar gzhag pa dang / chos dran pa nye bar gzhag pa'i mtshan ma'i mtshan nyid do/ /lho phyogs kyi sgo ni yang dag par spong ba bzhi'i rang bzhin te/sdig pa mi dge ba'i chos rnams mi bskyed pa'i phyir 'dun pa skyed pa dang / sdig pa mi dge ba'i chos skyes pa rnams spong ba'i phyir 'dun pa skyed pa dang / dge ba'i chos ma skyes pa rnams skyed pa'i phyir 'dun pa skyed pa dang / skyes pa rnams gnas pa dang / phyir zhing 'byung ba dang / nyams par mi 'gyur ba dang /yongs su rdzogs par bya ba'i phyir 'dun pa skyed pa'i mtshan nyid do/ /nub phyogs kyi sgo ni rdzu 'phrul gyi rkang pa bzhi'i rang bzhin te/ 'dun pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang / sems kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang /brtson 'grus kyi ting nge 'dzin spong ba'i 'du byed dang ldan pa'i rdzu 'phrul gyi rkang pa dang / dpyod pa'i ting nge 'dzin spong ba'i 'du byed dang ldan pa'i rdzu 'phrul gyi rkang pa dang ldan pa'i mtshan nyid do/ /byang phyogs kyi sgo ni dbang po lnga'i ngo bo ste/ dad pa'i dbang po dang / brtson 'grus kyi dbang po dang /dran pa'i dbang po dang / ting nge 'dzin gyi dbang po dang / shes rab kyi dbang po'i mtshan nyid de/ de ni bsam gtan bzhi'i ngo bo ste/ rtog pa dang / dpyod pa dang / dga' ba dang / bde ba dang / sems rtse gcig pa'i mtshan nyid/ bsam gtan dang po dang / nang yongs su dang ba dang /dga' ba dang bde ba dang / sems rtse gcig pa'i mtshan nyid/ bsam gtan gnyis pa dang / btang snyoms dang / dran pa dang / shes bzhin dang / bde ba dang / sems rtse gcig pa'i mtshan nyid/ bsam gtan gsum pa dang / btang snyoms yongs su dag pa dang /dran pa yongs su dag pa dang / bde ba yang ma yin sdug bsngal ba yang ma yin pa'i tshor ba'i mtshan nyid bsam gtan bzhi pa'o/ /sgo khyud bzhi ni dpa' bar 'gro ba'i ting nge 'dzin dang / nam mkha' mdzed kyi ting nge 'dzin dang / rin chen phyag rgya'i ting nge 'dzin dang / seng ge rnam par bsgyings pa'i ting nge 'dzin gyi ngo bo'o//ka ba brgyad ni rnam par thar pa brgyad kyi ngo bo ste/ gang zhe na/ gzugs can gzugs rnams la lta ba 'di ni rnam par thar pa dang po'o/ /nang gzugs med par 'du shes pas phyi rol gyi gzugs rnams la lta ba 'di ni rnam par thar pa gnyis pa'o/ /sdug pa'i rnam par thar ba lus kyis mngon sum du byas te/rdzogs par byas nas gnas pa 'di ni rnam par thar pa gsum pa'o/ /rnam pa thams cad du gzugs kyi 'du shes las yang dag par 'das te/ thogs pa'i 'du shes rnams nub par gyur cing / sna tshogs kyi 'du shes yid la mi byed pas nam mkha' mtha' yas so snyam nas/nam mkha' mtha' yas rdzogs par byas te/ gnas pa 'di ni rnam par thar pa bzhi pa'o/ /de rnam pa thams cad du nam mkha' mtha' yas skye mched las yang dag par 'das te/ rnam par shes pa mtha' yas so snyam nas/ rnam shes mtha' yas rdzogs par byas pa 'di ni/rnam par thar pa lnga pa'o/ /de rnam pa thams cad du rnam des mtha' yas skye mched las yang dag par 'das te/ ci yang med do snyam nas ci yang med pa'i skye mched rdzogs par byas te gnas pa 'di ni rnam par thar pa drug pa'o/ /de rnam pa thams cad du ci yang med pa'i skye mched las yang dag par 'das te/'du shes med 'du shes med min skye mched rdzogs par byas nas gnas pa 'di ni rnam par thar pa bdun pa'o/ /de rnam pa thams cad du 'du shes med 'du shes med min gyi skye mched las yang dag par 'das te/ 'du shes dang tshor ba 'gog pa lus kyis mngon sum du byas pas gnas pa 'di ni rnam par thar pa brgyad pa'o zhes gsungs pa'o/ /phreng ba dang / dra ba dang / dra ba phyed pa dang / dar dpyangs ni byang chub kyi yan lag bdun gyi ngo bo ste/ gang zhe na/ dran pa yang dag byang chub kyi yan lag dang / chos rnam par 'byed pa yang dag byang chub kyi yan lag dang /dga' ba yang dag byang chub kyi yan lag dang / btang snyoms yang dag byang chub kyi yan lag dang / shin tu sbyangs pa yang dag byang chub kyi yan lag dang / ting nge 'dzin yang dag byang chub kyi yan lag dang / brtson 'grus yang dag byang chub kyi yan lag go zhes gsungs pa'o//'phan dang / dril bu dang / rnga ma dang / me long dang / rnga ma rlung gis bskyod pa ni gsung rab yan lag bcu gnyis kyis 'gro ba'i yid g.yo zhing g.yengs par byed pa'i ngo bo ste/ gang zhe na/ mdo'i sde dang / dbyangs kyis bsnyad pa'i sde dang / lung du bstan pa'i sde dang /tshigs su bcad pa'i sde dang / ched du brjod pa'i sde dang / shin tu rgyas pa'i sde dang / skyes pa'i rabs kyi sde dang / rmad du byung ba'i sde dang / gtan la phab pa'i sde'o zhes gsungs pa'o/ /nyi ma dang zla ba ni thabs dang shes rab zung du 'brel ba'i ngo bos 'gro ba yongs su smin par mdzad pa'i mtshan nyid do//them skas dang stegs bu ni ye shes kyi rtogs pa'i khyad par gyis theg pa 'di dag gong ma la rim gyis 'jug pa dang / ting nge 'dzin du bstim par byed pa'i mtshan nyid do/ /nang gi dbyibs 'khor lo'i tshul du gnas pa ni rten cing 'brel par 'byung ba'i tshul dang mthun par bstan nas de sbyong ba ste/gang zhe na/ ma rig pa dang 'du byed dang / rnam par shes pa dang / ming dang gzugs dang / skye mched drug dang / reg pa dang / tshor ba dang / sred pa dang / len pa dang / srid pa dang / skye ba dang / rga shi rnams so/ /rnam gsum du phye ba ni/ las dang / nyon mongs pa dang / sdug bsngal du bsdus pa'i mtshan nyid dang / mthun par bstan nas/ de rnam par sbyong ba dang 'joms par byed pa'o/ /mtha' ma'i mu khyud rdo rje phreng bas bskor ba ni/ theg pa gzhan las khyad par du gyur pa/ rdo rje theg pas 'gro ba yongs su smin par mdzad pa'i tshul bstan pa'o/ /'gro ba ma lus pa'i bsam pa yongs su rdzogs par mdzad pa'i ngo bo bas/ rin po che sna tshogs las byas shing spras pa'i mtshan nyid can gyi gzhal yas khang ngo /gzhan gzhal yas khang de'i mtha' ma dad mtshams kyi tshom bu'i bar rnams ni/ rin po che'i ljon shing lo 'dab yongs su smin par gyur pa dag skyes pa'i rtse la bya ka la ping ka la sogs pas yid du 'ong ba'i dbyangs kyis don dang ldan pa'i tshigs su bcad pa brjod cing /nam mkha' la 'phur ba dang yan lag brgyad pa'i mtsho gya gyu rnams ni nang na me tog gi rnam pa/ man+dA ra ba dang ku mu da chen po la sogs pa'i gcal gyis 'dab 'byor du gang ba/ bu sha ra dang in+d+ra nI la sogs pa gcal du bkram pa dag las 'od rnam pa mang po 'phro bas thams cad yongs su gsal bar byed pa'i go 'byed pa/gos kyi ljon shing rnams kyi 'phrul pa las byung ba'i na bza' mang pos yongs su gtibs pa/ tshul khrims kyi dri phun sum tshogs pa dang ldan pa'i bdug spos kyi du ba rgyun mi 'chad pa dang / byug pa'i dris kun du tshim par byed cing thams cad la khyab pa'i sprin chen po 'khrigs pa phyi nang gi lha mo rnam pa mang po dag rigs tha dad par gnas pas/mchod pa'i bye brag bsam gyis mi khyab pa dang ldan pa'i rnam pa 'dzin pa'i cha lugs sna tshogs kyis gzhan mnyes par byed pa la sogs pa ting nge 'dzin gyi khyad par gyi mthu las grub pa/ yid las byung ba'i rdzas khyad par can rnams kyis yongs su brgyan pa/ lha dang lha mo dang lha'i bu mo sangs rgyas kyi zhing gi rdul phra mo snyed kyis glu dang gar dang sil snyan dang /pheg rdob ba dang / 'phyo ba dang / lding ba dang / bskor ba dang / bro rdung ba dang / sgeg pa dang / 'jo ba la sogs pa'i tshul dang ldan pas/ 'phags pa yongs su mnyes par byed pa'i mtshan nyid 'dzin pa dag bsam par bya ba ni/ dper na de bzhin gshegs pa nyid lha'i rgyal po'i pho brang na/rgyud kyi rgyal po chen po dpal de kho na nyid bsdus pa la sogs pa rnams kyi don 'chad par mdzad pa rnams kyi dus na byung bar gyur ba'i phun sum tshogs pa de lta bu dang ldan par mos par bya'o/ /de bas na phyogs bzhir yang / sgo dang rta babs dang zhes bya ba la sogs pa'i tshig 'di gsungs so/ /der bzhugs par gyur ba'i lha rnams kyi gdan gyi rnam pa ji lta bu dag yin snyam pa rnams kyi mgo rmongs pa bsal ba'i don du smras pa/ji ltar bsams pa'i 'khor lo'i nang du yang / /zhes bya ba la sogs pa gsungs te seng ge'i gdan zhes pa ni/ mi 'jigs pa bzhi'i bsnyems pa'i rtags te/ sogs pa'i sgras ni glang po che dang / rta dang / rma bya dang /nam mkha' lding dang / nyi zla dang pad+ma'i gdan rnams yongs su sdud par byed pa ste/ de dag gi don dang tshig rnams ni/ rgyas par 'og nas bshad pa las shes par byas la/ de bzhin du brtag go/ /'o na de ltar gnas kyi rnam pa khyad pa can de lta bu'i mtshan nyid dang ldan pa de rgyu gang las grub pa yin zhe na/ kha cig na re de ltar rnam par bkod pa mngon du snang ba'i rgyu de ni/tshogs rnam par rdzogs pa'i rgyu mthun pa las byung pa'i 'bras bu zhes zer ro/ /la la na re rgyu'i dus nas dang pha rol tu phyin pa la sogs pa ma lus par spyad nas/ tshogs rnam pa gnyis rdzogs par gyur pa'i 'bras bu ni mngon par rdzogs par 'tshang rgya zhes gsungs par zad kyi/'di ltar 'gyur zhes mi gsung ngo / /lan btab pa/ /ci tshogs rdzogs pa las byung ba'i 'bras bu'i sku la 'di lta bu'i rnam pa dang bcas pa'i gzhal yas khang yod par mi rung ngam/ smras pa de yang bkag pa lta med kyi/ 'on kyang de lta na ni bdag gis spyad pa gzhan gyi rgyud la smin pa lta bur 'gyur bas gzhung nyams pa'i phyir na/de skad mi rigs so/ /yang smras pa mi dge ba bcu po dag lus kyis spyad pas kyang lus kyis mi bzad pa'i 'bras bu yang nyams su myong bar 'gyur la/ yul ma rungs pa dag ni skye bar 'gyur ba yang thob par byed na/ 'dir 'di ltar spyad pa'i 'bras bus 'brel ba can gyi rnam par smin pa nyams su myong bar 'gyur du mi rung ba yang med la/gcig gis spyad pa'i las gzhan la smin pa'i 'bras bur gyur pas gsal ba yang med do/ /ji ltar 'bras sA lu 'dod pa'i mis sa gshin pa la sa bon btab cing lag byad kyis bskyed nus par byas na/ 'bras bu 'dod pa dag de bzhin du 'thob par 'gyur la/de'i zla mi 'dod pa'i phub ma dang / sog ma la sogs pa zhor la 'byung ngo / /ci'i phyir zhe na/ de gnyis 'brel par 'gyur ba'i phyir ro zhes gsungs pas na/ gzhal yas khang mngon par grub par bya'o snyam du yid la ma byas kyang 'bras bu mngon du gyur pa'i gnas na 'brel ba'i mtshan nyid du gyur pa'i gzhal yas khang dang ldan pa la 'gal ba med do//des rgyu 'bras mi gcig pa la smin par yang mi 'gyur te/ ji ltar bstan bcos las dka' ba'i sems kyis spyad pa'i bde ba lus kyis myong zhes bshad pa bzhin no zhes zer ro/ /'dir smras pa/ de yang bden te/ gnas skabs kyis na de ltar yang yin la ma yin pa yang ma yin par 'dod do//de la smras pa/ de ltar gnas skabs kyis de ltar yin la ma yin pa yang ma yin par 'dod na/ de'i rnam par dbye ba'i gtan tshigs brjod dgos so zhe na/ /smras pa/ de yang de ltar yin mod kyi/ 'on kyang tshul gnyis su shes par bya ste/ de bzhin gshegs pa rnams kyi gnas skabs na ni de ltar yin la/ dam tshig sems dpa' bsam gtan mngon du bya ba'i gnas skabs su ni de ltar ma yin par shes par bya'o/ /smras pa/ 'o na dam tshig sems dpa'i bsam gtan gyi go skabs su rgyu'i rnam pa ji lta bu las 'byung bar shes par bya zhe na/lan btab pa/ gdan la sogs pa gnas par bkod pa 'di dag thams cad grub pa ni zhes bya ba la sogs pa gsungs te/ rnam pa 'di dag 'di ltar mngon par grub pa'i rgyu ni sgrub pa po dam tshig sems dpa'i lha'i rnal 'byor gsal ba las gyur pa'i ting nge 'dzin khugs pa'i mthu las byung bas na/dam tshig sems dpa'i rnal 'byor dang ldan pa'i sems nyid do zhes bshad pa'i phyir ro/ /'o na de kho na'i sbyor bas rnam pa 'di bzhin du 'grub par 'gyur ba yin gyi/ gzhan gyis 'di ltar 'gyur ba'i thabs med dam zhe na/ rnam pa gzhan dag kyang yod par bstan pa'i phyir smras pa/yang na rang gi lce la rdo rje rtse lnga bsams te/ las sna tshogs kyi phyag rgya brjod pa'o zhes smras te/ rang gi lce la ye shes lnga'i bdag nyid rdo rje rtse lnga pa bzhag nas chos kyi phyag rgya brjod de/ las kyi rdo rjer bsgyur nas lha'i gnas bskyed par byas na de bzhin du 'grub bo//'o na ting nge 'dzin gyi sbyor ba rnam pa mang po dag yod pa las/ sgo 'dis 'di bzhin du 'grub pa ci'i phyir gzhan gyi rnam par gzhag pa'i bsam gtan gyis de ltar ma yin zhe na/ smras pa/ bsam gtan gyi sbyor ba gzhan gyis kyang 'grub par 'gyur ba'i rnam pa gzhan du bstan pa dag yod mod kyi/'on kyang 'di'i skabs su ni 'di kho na phrin las thams cad kyi ngo bo bas/ 'di ltar byas pas don 'di dag mngon du 'gyur bar gsungs so/ /'o na de ltar bstan pa'i chos kyi phyag rgya'i mtshan nyid las thams cad pa zhes bya ba de ji lta bu zhig yin zhe na/smras pa/ de la chos kyi phyag rgya ni/ su ba shi twaM zhes bya ba 'di yin par bshad do/ /lha rnams kyi gnas bsam gtan gyi sbyor bas gzhal yas khang bskyed pa'i thabs de yan chad du bshad zin to// //de ltar gnas phun sum tshogs pa dang ldan par byin gyis brlabs pa der/ mchod pas mnyes par bya ba dang /bsgrub par 'os pa'i 'phags pa rnams dgod cing bzhugs su gsol bar bya ste/ de'i thabs dang rim pa'i rnam pa ji ltar brtsam par bya ba yin zhe na/ da ni 'dir ji ltar rigs par mchod par bya ba'i lha'i sku bsam pa de dag shin tu byin gyis rlob pa dang rjes su mthun par bshad par bya'o zhes gsungs te/gnas phun sum tshogs pa 'byor ba'i bsam gtan mngon du byas nas/ mchod par 'os pa rnams bzhugs par mos par bskyed pa'i dus la bab pas na da ni zhes bya'o/ /dkyil 'khor chen po dang / phyag rgya bzhi dang /phyag rgya gcig pa la sogs pa'i gzhung gang ltar rigs pa'i tshul du bsam par bya bas na/ lha gang ltar rigs pa zhes bya'o/ /mchod par bya ba'i lha'i sku bsam par bya ba yang / rang rang gi rig pa dang / sngags brjod pas phyag rgya chen po la sogs pa sku'i cha lugs ji lta ba bzhin so sor nges par bsam na gang ltar 'dod pa bzhin du byin gyis rlob par mdzad pas na/de dang rje su mthun par bshad par bya'o/ /de ltar bya ba'i don de nyid bstan te bsal bar ston pas na/ de yang zhes bya ba la sogs pa smos te/ bsam par bya ba'i lha rnams zhes pa ni/rdo rje dbyings chen po de bzhin gshegs pa la sogs pa rnams so/ /so so'i snying po ni badzrA d+hA tu zhes bya ba la sogs pa'i sngags kyi tshig rnams so/ /de'i don rtogs par bya bar rig par bya'o zhes pa ni/ lha so so'i snying po de dag gi don ji lta bur ston pa yang rig par byas nas/de nas lha de dag so so'i sku phyag rgya chen po yongs su rdzogs par bskyed par bsam pa'o/ /rdul tshon gyi dkyil 'khor du/ tsa ka li dgod cing 'jog pa'i tshe na yang / snying po so so brjod cing gzhag par bya ste/ de'i tshe yang bden pa gnyis ji lta ba'i don ston pa'i mtshan nyid du rig par bya'o//de ltar bya ba'i gtan tshigs kyang / rtsa ba'i rgyud chen po de kho na nyid kyi rgyud phyi ma las gsungs te/ snying po'i don gyis bdag nyid sangs rgyas kyi sku zhes pa ni/ badzra d+hA tu zhes bya ba la sogs pa lha so so'i snying po brjod pas don gyi rnam pa gang ston pa de nyid rig par byas nas/bdag nyid gang ltar mos pa'i lha'i bsam gtan du mos par byas nas mdun du de bzhin gshegs pa la sogs pa gang bsgom pa bsam par bya ba yang so so'i snying po gang yin pa tshig tsam gyis brjod la/ mdun na gnas par brtag par bya bar gsungs so//'o na de ltar tshig gi bzlas brjod kyi rnam pa mngon du byas pas 'grub par 'gyur ram zhe na/ bzlas brjod la sogs pa'i tshe/ bsgom pa gtso bo yin par bstan to zhes bya ba la sogs pa gsungs so/ /ci'i phyir 'di ltar bstan zhe na/bsgom pa'i dbang gis zhes bya ba gsungs te/ bdag nyid lha'i bsam gtan du mos pa mngon du byas nas mdun du yang de bzhin du bsams na/ spyan drangs pa'i sbyor ba ma byas kyang byon zhing byin gyis rlob par mdzad pa'i phyir na/ bsgom pa gtso bor bstan to//de la lha bsgom pa dang / bsam pa dang / dgod par bya ba'i rim pa ji ltar rnam par gzhag par bya ba yin zhe na/ ji ltar brtags pa'i khang pa'i nang gi zhes bya ba la sogs pa gsungs pa ste/ ji ltar brtags pa'i zhes pa ni gong ma'i don la bsnyegs pa ste/de ltar brtags pa'i khang pa ste/ lha'i gzhal yas khang mngon du bsam pa de'o/ /'khor lo dbu ma'i gnas zhes pa ni gzhal yas khang gi dbus 'khor lo lta bu'i zlum po'i re'u cha dbus ma/ seng ge'i gdan chen po zhes pa ni/ gzhan zil gyis gnon par byed pa'i mtshan nyid can te/mi 'jigs pa bzhi dang ldan pa'i rtags su bstan pa'o/ /de'i steng du 'gro ba'i don la chags shing 'khor ba'i nyes pas mi gos pa'i rtags kyi pad+ma dang / byang chub sems kyi bdag nyid zla ba'i dkyil 'khor chen po bsam par bya'o/ /lha'i phun sum tshogs pa zhes pa ni/ der gnas par 'os pa'i 'phags pa rnams kyi byin rlabs dang /rnam par thar pa las byung ba'i yon tan phun sum tshogs pa'i gzhi'am/ ngo bor gyur pa'o/ /de'i steng du bcom ldan 'das rtag pa zhes pa ni/ 'jig rten dang 'jig rten las 'das pa'i yon tan phun sum tshogs pa dang ldan pas lha'i bu la sogs pa'i bdud bzhi dang /de'i char gtogs pa'i mi mthun pa'i phyogs 'joms par mdzad pa'i don dang ldan pas/ gang gi ngo bor yang mi gnas par 'das pa'i phyir na/ bcom ldan 'das zhes bya'o/ /glo bur mi rtag pa'i rnam pa las bzlog pa'i phyir na/ rtag pa zhes bya ste/rtag pa chen po'i dang las bzhugs shing / chos nyid kyi longs spyod chen po la sogs pa yon tan gyi rnam pa mang po la mnga' brnyes pas rtag pa zhes bya ste/ ci'i phyir zhe na/ chos kyi dbyings rnam par dag pa ye nas gnas pa'i ngo bo las byung zhing 'thon pas na de skad ces brjod do//mtshan dang dpe byad yang dag par ston pa zhes pa ni/ mtshan dang dpe byad kyis brgyan pa'i ngo bo mdzes par snang ba'i sku ston pa'o/ /phal pa dag las khyad par du bstan pas na/ bdag nyid dam pa'o/ /nyi ma'i dkyil 'khor chen po srin bu me khyer gyis gnon par mi nus pa bzhin gyi du gzhan gyi 'od kyis zil gyis mi non pas na/zil gyis mi non pa'o/ /'jig rten gyi khams ma lus pa yongs su drang ba zhes pa ni 'od zer chen po 'phro ba dang sdud par mdzad pas/ 'jig rten gyi khams thams cad du khyab par mdzad de/ de na gnas pa'i sems can dbang po ma tshang ba rnams dbang po dang ldan par mdzad la/sdug bsngal can rnams bde ba la 'god pa dang / bde ba la gnas pa dag ni bde ba de dang mi 'bral zhing gong du 'phar ba'i rim pas byang chub chen po la spyod par byed pa ste/ ji ltar mdo sde las de bzhin gshegs pa'i sku'i gnas rnams nas 'od zer bye ba phrag drug cu drug cu phyung bas/'jig rten gyi khams thams cad du khyab par mdzad do/ /'od zer des gang la phog cing reg pa'i 'gro ba de dag kyang / long ba rnams kyis ni gzugs mthong bar gyur to/ /'on pa rnams kyis ni sgra thos par gyur to/ /lkugs pa rnams kyis ni smra shes par gyur to//zha grum rnams ni yan lag dang ldan par gyur to/ /smyon pa rnams ni dran pa dang ldan par gyur to zhes bya ba la sogs pa rgya cher gsungs pa bzhin no/ /mtshan ma dang zhes pa ni/ dge sbyong dang / bram ze dang / gcer bu dang / tshangs pa dang / brgya byin dang / 'khor los sgyur ba dang /skyes pa dang / bud med dang / rta dang / glang po che dang / dung 'gro la sogs pa'i mtshan ma sna tshogs kyi rnam par ston pa'i/ spyod lam dang zhes pa ni khro ba dang / zhi ba dang / 'jigs su rung ba dang / gzhan 'jigs par byed pa dang / dpa' ba dang / skrag pa la sogs pa bzang ngan dang / 'jam rtsub kyis rnam pa mi mthun pa'i tshul du ston pa'o//sku mang po zhes pa ni/ longs spyod rdzogs pa'i sku dang / sprul pa'i sku mdog dang dbang dang rigs la sogs pa tha dad pa mang por ston pas na rnam pa sna tshogs dang ldan pas so/ /mos pa tha dad pa zhes pa/ sems can dbang po rab dang 'bring dang tha mar gyur pa dag rim gyis sku dang gdams ngag la sogs pa gang la mos pa de bzhin du ston pa dang snang bar mdzad pa'o//thub pa'i skye bor bcas pa zhes pa ni 'jig rten pa'i dka' thub la gnas pa'i sdom pa 'dzin pa ste/ bram ze dang drang srong la sogs pa dag go/ /kha cig na re/ 'jig rten gyi drang srong rnams kho na thub pa'i skye bo zhes zer ro//de ltar 'jig rten pa'i gtso bo rnams zil gyis mnan te bzhugs pa'o/ /bde bar gshegs pa la sogs pa'i 'khor rnams mngon du phyogs pa zhes pa ni/ mi bskyod pa la sogs pa rigs kyi bdag po de bzhin gshegs pa bzhi dang /rdo rje sems dpa' la sogs pa rigs kyi sems dpa' chen po lha mo dang bcas pa rnams gtso bo la 'dud pa'i tshul 'dzin pas zhal du blta ba'o/ /zhal kun du gzigs pa zhes pa ni/ dbus kyi gtso bo de nyid phyogs kun du zhal gzigs par snang ba ste/ 'khor rnams kyis gang nas bltas pa des/bdag kho na la de bzhin gshegs pa gzigs so snyam du rtog pa 'jug pa'i tshul dang ldan pa ste/ ci'i phyir de ltar 'gyur zhe na/ rtsa ba'i rgyud chen po nyid las rigs bzhi'i de bzhin gshegs pa rnams kyi byang chub tu sems bskyed par gsungs pa'i phyir dang / de kho na nyid snang ba las/ de bzhin gshegs pas ni phyogs thams cad mnyam pa nyid du dmigs pas/gang du 'dug pa de'i mdun du 'gyur ro zhes gsungs pa bzhin no/ /de ltar bsam pa'i snying po ni/ /oM badzra d+hA tu zhes bya'o/ /de nas bcom ldan 'das de'i mdun rgyab dang /g.yas g.yon phyogs bzhir pha rol tu phyin ma bzhi'i ngo bo/ sems ma rdo rje ma la sogs pa bzhi'i mtshan ma bsam pa ni/ rdo rje rtse lnga pa chen po'i gzugs dang / nor bu rin po che 'od 'bar ba dang / pad+ma dmar po 'dab ma brgyad pa dang /rdo rje rgya gram chen po'i gzugs rnams zla ba'i dkyil 'khor gyi steng na gnas par bsam mo/ /rgol ba pa ni/ rdo rje dbyings kyi dkyil 'khor chen por rdo rje dbyings kyi lha ji snyed pa dag gnas pa las/ kun phyag rgya chen po'i tshul du bzhugs pa las/yum bzhi po 'di dag dam tshig gi phyag rgya'i gzugs su gnas shing / phyag rgya chen po'i tshul mi ston pa ci'i phyir zhe na/ smras pa 'di dag ni shes rab kyi pha rol tu phyin ma'i tshul bas rags pa'i lus spangs pa'i phyir 'di ltar bstan pa dang /dam tshig nyams pa gso ba'i phyir dang / mu stegs pa dang / nyan thos rnams kyi skur pa 'debs su dogs pa bsal ba'i phyir yang / dam tshig gi phyag rgyar gnas par bstan te/ de yang dam tshig nyams pa'i tshad rnam pa gsum las cher nyams pa/rdo rje dbyings kyi dkyil 'khor chen por zhugs pas gso'o/ /'bring du nyams pa ni/ rdo rje dbyings kyi dbang phyug ma la sogs pa'i dbang bskur bas gso'o/ /chung ngu ral pa ni rigs kyi yum 'di bzhi'i phyag rgyas dpral ba dang / kha dang / snying ga'i gnas bzhi por gtugs shing sngags brjod pas sos shing bskongs par 'gyur bas na 'di ltar bstan to//'o na 'di dag 'di ltar rnam par snang mdzad kyi phyogs bzhir gnas par byed kyi/ gzhan du mi 'god pa ci'i phyir zhe na/ smras pa/ 'di ltar bstan pa yang mi bskyod pa la sogs pa de bzhin gshegs pa rnams kyis yum bzhi po 'di dag dam tshig gi phyag rgyar byin gyis brlabs te/rnam par snang mdzad kyi sems dpa'i chen po rnams kyi gnas bzhi po rnams su byin gyis rlob par mdzad pa'i phyir de'i phyogs bzhir gnas par bstan to//de bas na rtsa ba'i rgyud chen po de kho na nyid bsdus pa las/ de bzhin gshegs pa thams cad kyis ye shes la phyag rgyas byin gyis rlob pa'i phyir zhes gsungs te/ rnam par snang mdzad kyi sems dpa' bcu drug po rnams la/ mi 'khrugs pa la sogs pa'i rigs bzhi las byung ba'i yum dam tshig gi phyag rgya bstan pas/byin gyis rlob par mdzad pa ni/ ye shes la phyag rgyas byin gyis rlob pa'o/ /'o na de ltar byin gyis ma brlabs na cir 'gyur/ 'di ltar byin gyis brlabs pas ci 'grub par 'gyur zhe na/ smras pa/ rdo rje rtse lnga pa de nyid dam tshig ste/ de sangs rgyas 'byung bar byed pa zhes bya'o/ /gzhan du na byA ka ra Na'i sgras mnyam par byed ces 'byung ste/ de ltar de dag des byin gyis brlabs pas/ sangs rgyas rnams dang mnyam par 'gyur/ /zhes bshad pa'i phyir 'di ltar bstan to/ /de bzhin du rigs kyi bdag po bzhi dang /sems dpa' chen po rnams bsam gtan gyis dgod par gsungs pa/ de nas mdun logs nas brtsams te zhes bya ba la sogs pa gsungs te/ dbus kyi gtso bo rnam par snang mdzad dmigs pa de'i mdun logs nas g.yas phyogs su rim gyis bskor ba'o//brtags pa'i gnas bzhi zhes pa rigs kyi bdag po dang sems dpa' de dag gi bzhugs gnas phyogs bzhi na yod pa'i re'u bzhi po rnams so/ /de bzhin gshegs pa mi 'khrugs pa dang zhes pa la sogs pa ni shar phyogs nas rim bzhin du dge slong gi gzugs 'dra ba la/kha dog ji skad gsungs pa bzhin du brtags pa'am/ shAkya thub pa lta bu'i yon tan dang ldan pa'o/ /gdan la bzhugs pa'am zhes pa yang / gong gi don la bsnyegs pa'i phyir na/ bzhi ka seng ge'i gdan la bzhugs pa'am/ gzhung gzhan dag las grags pa zhes pa ni/ glang po che la sogs pa'i rim pas bsam pa ste/ stobs bcu dang ldan pa dang / rdzu 'phrul gyi rkang pa bzhi dang ldan pa dang / shes bya gang la yang thogs chags mi mnga' ba'i yon tan brnyes pa'i rtags su bstan te/ go rims bzhin du sbyar bar bya'o/ /las kyi phyag rgya rnam par bkod pas zhes pa ni/phrin las ci mdzad pa de dang mthun par phyag rgya yang de bzhin du 'ching ba'o/ /so so'i las kyi khyad par dang / /zhes pa ni sangs rgyas de dag so so'i phrin las kyi khyad par dang / dgongs pa ji lta bu la mnyam par gzhag pa'i rtags dang ldan par rab tu'am gsal bar brtag go//de dag thams cad kyi las kyi phyag rgya zhes pa ni/ sangs rgyas de dag gi phrin las kyi phyag rgya'i mtshan nyid do/ /de dag gi snying po yang zhes pa ni rtag pa la sogs pa'i sangs rgyas de dag go/ /rang gi ming nyid la oM zhes bya ba thog mar gzhag pa zhes pa ni/sangs rgyas brjod pa de dag rang rang gi mgor oM zhes bya ba bzhag nas de dang ldan par brjod pa ste/ rtag pa oM bud+d+ha shrI bai ro tsa na zhes pa ni/ mi 'khrugs pa'i oM ak+Sho b+h+ya zhes bya ba la sogs pa'i tshul du brjod pa'o/ /'o na de lta de ltar rang rang gi snying po kho na dang ldan pas sam/gzhan gyis kyang de bzhin du 'grub par nus she na/ yang na rdo rje dbyings kyi snying po sngar gsungs pas zhes bya ba gsungs pa ste/ rdo rje dbyings nyid kho na 'ba' zhig gi snying po kho na brjod pas kyang de dag bzhugs par nus par rig par bya'o/ /de nas de bzhin gshegs pa de dag gi rigs kyi sems dpa' chen po rnams bzhugs su gsol bar bya ba'i gnas de nyid kyi nye 'khor du'am/rim par phye ba'i gnas gzhan du dgod par bya ba yin zhe na/ de nas mi 'khrugs pa la sogs pa bde bar gshegs pa de dag nyid kyi mdun dang zhes bya ba la sogs pa gsungs te/mdun dang g.yas g.yon dang zhes bya ba ni sangs rgyas bzhi po de dag so so'i phyogs bzhi po rnams so/ /khang pa de nyid kyi nang du zhes pa ni/ sangs rgyas bzhi po bzhugs pa'i re'u so so de nyid kyi nang du'o/ /re re zhing yang zhes pa ni/ sangs rgyas re re zhing yang rigs kyi sems dpa' chen po bzhi bzhis 'khor du byas pa ste/de bas na rdo rje sems dpa' la sogs pa zhes bya ba gsungs te/ de la mi 'khrugs pa la ni zhes pa kun gzhi rnam par shes pa lus dang longs spyod dang / gnas su snang ba las yongs su gyur pa ni/me long lta bu'i ye shes te/ de'i sgor gyur pa ni sangs rgyas mi 'khrugs pa'o/ /de'i 'khor du gyur pa sems dpa' chen po bzhi po dag dgod par bya ba ste/ gang zhe na/ dpal rdo rje sems dpa' dang zhes bya ba dag ste/ 'di ni mdun du bsam par bya ba ste/ de yang ye shes de'i yon tan gyi sgor gyur pa/stong pa chen po bzhi ni rang bzhin sems dpa' chen po bzhi ste/ 'di lta ste/ mi bskyod pa de bzhin gshegs pa me long gi ye shes kyi rang bzhin de las slar mi ldog cing bstan pa'i yon tan rdo rje sems dpa' bstan to/ /rdo rje rgyal po zhes pa ni g.yas phyogs su bsam pa ste/thams cad dgug cing sdud nus pa'i yon tan dang ldan pa'i mthur bstan to/ /'dod pa'i dbang phyug ces pa ni rgyab tu gnas pa ste/ de bzhin gshegs pa rnams mnyes pa dang / sems can yongs su smin pa dang / /rnam par grol ba la rjes su chags pa'i yon tan dang ldan pa'i mthur bstan pa'o//rdo rje mgu bzhes pa ni g.yon phyogs su gnas pa ste/ de bzhin gshegs pa rnams mnyes par byed pa dang / sems can rnams gzengs bstod cing rab tu dga' bar byed pa'i yon tan gyi mthur bstan pa'o/ / so so las kyi phyag rgya rnam par bkod pa zhes pa ni sems dpa' de dag rang rang gi las kyi phyag rgya dang ldan pa ste/ dam tshig gi phyag rgya dang yang de bzhin du ldan par bya ba ste/ kha cig la las dang / dam tshig gi phyag rgya gnyi ga gcig par 'dod pa yang yod de/ dper na rdo rje legs pa lta bu'o//gang zhe na rdo rje dang lcags kyu zhes bya ba la sogs pa'o/ /de dag gi snying po yang oM badzra satwa zhes bya ba la sogs pa ste/ phyi ma la yang de bzhin du sbyar bar bya'o/ /rin chen 'byung ba zhes pa ni/ nyon mongs pa can gyi yid kyi rnam par shes pa bdag sdug bsngal ba la sogs par lta ba la sogs par gyur pa ni mnyam pa nyid kyi ye shes te/ye shes de'i ting nge 'dzin gyi sgor byin gyis brlabs pa ni rin chen 'byung ba ste/ ci'i phyir zhe na/ rin po che dang chos mthun par sems can rnams kyi re ba rdzogs pa'i rgyu 'byung bas na'o/ / de'i 'khor du gyur pa'i sems dpa' chen po bzhi 'byung ba ni/ rdo rje rin chen dang zhes bya ba la sogs pa ste/ rdo rje rin chen ni rin chen 'byung ba de bzhin gshegs pa mnyam pa nyid kyi ye shes kyi rang bzhin chos kyi rgyal po thams cad kyi mchog /thams cad kyi dam par gyur pa'i chos nyid kyi yon tan gyi mthu ni/rdo rje rin chen chos kyi rgyal po dbang bskur ba'i rang bzhin du byin gyis brlabs te bstan pa'o/ /nyi ma dang zhes pa ni chos kyi rgyal por dbang bskur ba de'i gzi brjid gzhan dang mi 'dra bar bstan pa'i mthu sems dpa' 'dir byin gyis brlabs te bstan pa'o/ /rgyal mtshan dang zhes pa ni sems can thams cad sbyin pa'i pha rol tu phyin pas re ba yongs su rdzogs par byed pa'i mthu sems dpa' 'dir byin gyis brlabs te bstan pa'o//bzhad pa dang zhes pa ni/ skyes bu chen po'i 'dzum pa yis sems can rnams la lung ston par mdzad pa'i mthur sems dpa' 'di bstan pa'o//thub pa 'od dpag tu med pa zhes pa ni/ yid kyi rnam par shes pa las gyur pa so sor kun du rtog pa'i ye shes te/ ye shes de'i ting nge 'dzin gyi sgor byin gyis brlabs te bstan pa ni/ 'od dpag tu med pa'i de bzhin gshegs pa ste/ ci'i phyir zhe na/tshe dang 'od dpag tu med pa dang ldan pas na'o/ /de'i 'khor du gyur pa'i sems dpa' chen po bzhi 'byung ba ni/ rdo rje chos dang zhes bya ba la sogs pa rnams te/ rdo rje chos ni snang ba mtha' yas de bzhin gshegs pa so sor kun du rtog pa'i ye shes kyi rang bzhin chos kyi dbyings la dmigs shing /so sor rtog pa'i yon tan ni rdo rje chos spyan ras gzigs dbang po zhes bya ba'i sems dpa' 'dir bstan pa'o/ /'jam dbyangs dang zhes bya ba ni/ chos kyi dbyings ji lta ba bzhin du rab tu chud nas/ shes bya dang nyon mongs pa'i sgrib pa rab tu gcod pa'i yon tan ni/rdo rje rnon po 'jam dbyangs zhes bya ba'i sems dpa' 'dir bstan to/ /sems bskyed ma thag tu chos kyi 'khor lo bskor ba dang zhes pa ni gsung mi zad pa'i rdo rje rgyan gyis khams gsum thams cad du khyab pa'i rgyur gyur ba'i yon tan ni rdo rje rgyu zhes bya ba'i sems dpa' 'dir byin gyis brlabs te bstan pa'o//dgongs pa smras pa zhes bya ba ni/ gsung mi zad pa'i rgyud kyis khams gsum thams cad du khyab par chud pa dang / gsung gi chos rab tu sgrogs pa'i yon tan gyi mthu ni rdo rje smra ba zhes bya ba'i sems dpa' 'dir bstan to/ /bcom ldan 'das don yod grub pa zhes pa ni/sgo lnga'i rnam par shes pa las gyur pa'i bya ba sgrub pa'i ye shes te/ de'i ting nge 'dzin gyi sgor byin gyis brlabs te bstan pa ni/ da ni don yod grub pa ste/ ci'i phyir zhe na/ 'jig rten dang 'jig rten las 'das pa'i bsgrub par bya ba'i don thams cad gdon mi za bar grub par mdzad pas na'o//de'i 'khor du gyur pa'i sems dpa' chen po bzhi 'byung ba ni/ rdo rje las dang zhes bya ba la sogs pa ste/ rdo rje las ni gdon mi za bar grub pa de bzhin gshegs pa bya ba nan tan gyi ye shes kyi rang bzhin de bzhin gshegs pa rnams mchod cing bsnyen bkur mdzad pa dang /sems can rnams yongs su smin pa dang / thar par mdzad pa'i mthu rdo rje las su byin gyis brlabs te bstan pa'o/ /go cha dang zhes pa ni/ gdug pa la sogs pa'i 'jigs pa'i sems can rnams mi 'jigs pa sbyin zhing bsrung ba'i yon tan rdo rje go cha'i sems dpa' 'dir bstan to//gnod sbyin dang zhes pa ni/ gdul dka' ba'i sems can rnams 'dul bar mdzad pa'i yon tan gyi mthur sems dpa' chen po 'dir byin gyis brlabs te bstan pa'o/ /rdo rje khu tshur zhes pa ni/ lus ngag yid gsum dbyer med cing gcig par gyur pa'i yon tan gyi mthur sems dpa' chen po 'dir byin gyis brlabs te bstan pa'o//zla ba'i dkyil 'khor la bzhugs shing / /zhes pa ni/ byang chub sems kyi so so bas/ /gzhan gyi nyon mongs pa'i gdung ba sel ba'i phyir/ gdan de la bzhugs shing rgyab kyang brten par mdzad pa'o//lha'i dbang po'i cha lugs can/ /zhes bya ni/ 'jig rten pa phal ba rnams las khyad par du gyur pa'i rgyan gyis brgyan pa'o/ /dbu la rigs lnga'i dbu rgyan pa zhes pa ni/ ye shes lnga rdzogs pa'i bdag nyid du 'gyur ro/ / rgol ba pa na re/ sems dpa' chen po 'di dag byang chub sems kyi rang bzhin ye shes rnam par dag pa'i ngo bo las gyur pa zhes 'dod na/ de ltar na byang chub sems kyi zla ba la rgyab brten cing bzhugs pa dang / ye shes lnga can gyi dbu rgyan gyis dbang bskur zhing / mgo la yod pa ci dgos na/smras pa/ byang chub sems kyi rang bzhin las byung ba yin gyis kyang / de'i rtogs pa dang ldan par ston la/ ye shes lnga'i ngo bo las gyur pa yin yang / 'di bzhin du gnas pa la 'gal ba med de/ dper na zla ba nam mkha' la 'gro ba'i rtags/ chu dang ba na gzugs brnyan snang ba'am/rgyal po chen po yin pa'i rtags sngon mtshon dang ldan pa bzhin no/ /de las gzhan du bstan pa yang 'gal ba med de/ ji ltar don thams cad grub pa'i byang chub sems dpa' chos kyi sku brnyes kyis kyang / 'dul ba'i skye bo gzhan la dgongs pa'i phyir/sangs rgyas pa dang / dbang bskur ba la sogs pa'i yan lag gis ye shes rdzogs par gyur pa'i tshul gyis ston par mdzod pa bzhin no/ /rgol ba pa na re/ 'o na de ltar byang chub sems kyi ngo bo las gyur pa/ ye shes kyi yon tan sems dpar 'dod pa ni rung na/ de dag so na gnas pa dang /gzhan du 'gyur bar mi mdzad kyi/ 'di lta bu'i sems dpa' chen po'i tshul du ston pa ci'i phyir zhe na/ bde bar gshegs pa nyid skye bo thams cad kyi mchog tu gyur cing zhes bya ba la sogs pa gsungs te/ bcom ldan 'das nyid rnam pa'i mchog thams cad kyi yon tan gyi khyad par can dang ldan pas/skye bo thams cad kyi na dan mchog gya nom pa bla na med par 'gyur zhing ji ltar 'dul ba bzhin du 'gro ba'i don mdzad pa'i dbang gis sems dpa' de dag bstan pa yang de bzhin gshegs pa nyid kyi yon tan gyi cha shas cung zad nyung shas tsam 'di ltar ston pa nyid du gnas par shes par bya ste/dper na dpal rdo rje sems dpa' byang chub kyi sems bstan pa tsam gyis yon tan gyi rnam pa 'di lta bu dag tu bstan par rig par bya'o/ /'o na grwa'i phyogs mtshams la ji lta bu dag gnas par bya ba yin snyam pa rnams kyi don du/lha mo rnams dgod par bya ba'i mtshan nyid gsungs pa/ 'khor lo'i grwa dang shar lho la sogs pa bzhi rnams su yang zhes bya ba la sogs pa dag gsungs te/ 'khor lo'i grwa ni nang gi grwa bzhi po rnams so/ /rdo rje lA s+ya dang zhes pa ni lha mo bzhi ste/ de yang 'khor ba'i sems can 'khor ba las gzhan du mi phyogs par 'gyur ba'i gzungs bud med kyis byas pa de bzhin du/ me long gi ye shes kyi chos nyid rdo rje sems dpa' yang chos kyi dbyings byang chub kyi rang bzhin las 'khor bar yang mi ldog /mya ngan las 'das par yang mi 'gyur te/byang chub sems de las gzhan du mi phyogs pa'i gzungs su gyur pa'i byang chub kyi dga' ba'i chos nyid kyi yon tan ni/ rdo rje 'dzum pa zhes bya ba'i lha mo 'dir byin gyis brlabs te bstan pa'o/ /phreng ba dang zhes pa ni/ mnyam pa nyid kyi ye shes kyi rang bzhin chos thams cad stong pa nyid du dmigs pa'i mtshan nyid de yang /dran pa byang chub kyi yan lag la sogs byang chub kyi yan lag bdun dang mi ldan na/ zhi gnas dang / lhag mthong zung du mi 'brel te/ de bas byang chub kyi yan lag bdun dang ldan pa'i yon tan lha mo 'dir byin gyis brlabs te bstan pa'o/glu dang zhes pa ni so sor kun du rtog pa'i ye shes kyang chos nyid rab tu chud nas/ sngon gyi smon lam gyi shugs kyis mdo sde la sogs pa gsung rab yan lag bcu gnyis rab tu sgrogs pa'i yon tan lha mo 'dir byin gyis brlabs te bstan pa'o/ /gar zhes bya ba zhes pa ni bya ba nan tan gyi ye shes de bzhin gshegs pa rnams la mchod pa dang /bsnyen bkur ba dang / sems can yongs su smin pa dang / rnam par thar pa'i gzugs su gyur pa'i yon tan lha mo 'dir byin gyis brlabs te bstan pa'o/ /lha mo chen mo zhes pa ni/ lha mo 'di dag gi tshul 'dzin pa dag 'jig rten na yang yod mod kyi/de dag las khyad par du bstan pa'i phyir ro/ /lus dang cha lugs dang rgyan zhes pa ni/ bong che chung gi tshad dang / kha dog ci 'dra ba'i mtshan nyid dang / cha lugs gang dang mthun par gnas pa dang / rgyan chas kyi rnam pa ji lta bu dag gis lus gang ltar brgyan pa dag mtshon pa ste/lha'i rgyal po'i btsun mo rang dang 'dra bar bsam/ /zhes pa ni/ ji ltar lha'i bud med rnams pas khyad par du gyur pa ni/ lha'i rgyal po'i btsun mo bas tshul de bzhin du bsam pa'i don te/ /smin ma 'degs pa dang zhes bya ba la sogs pas ni/ de dag gi phyag mtshan ji lta bu yin pa nges par ston par byed pa'o//sgo bzhi na gnas par byed pa dag gi mtshan nyid gsungs pa/ rdo rje lcags kyu dang zhes bya ba la sogs pa dag ste/ de la rdo rje lcags kyu ni bsdu ba rnam pa bzhis sems can rnams sdud pa'i yon tan du byin gyis brlabs te bstan pa'o//zhags pa zhes pa ni tshig snyan pas sbyin pa'i du bsnan te/ de bas kyang nye bar 'du bya ba'i yon tan du byin gyis brlabs te bstan pa'o/ /lcags sgrog dang zhes pa ni/ 'di ltar byin gyis tshig 'jam pos mnyes par byas nas de'i don byed pas rab tu 'jar bar gyur pa ni yon tan du byin gyis brlabs te bstan pa'o//'debs pa zhes pa ni/ de ltar 'jar bar gyur nas bdag gi don bzhin du pha rol gyi don byed pa don mtshungs par spyod pa'i yon tan du bstan pa'o/ /da ni phyi'i grwa rnams su ji lta bu dag gzhag par bya ba'am/ gnas par gyur pa yin snyam pa rnams kyi don du/phyi'i lha mo rnams dgod pa'i bsam gtan gyi mtshan nyid gsungs pa/ grwa rnams su zhes bya ba la sogs pa dag ste/ de la grwa rnams su zhes pa ni/ 'khor lo lta bu'i pha rol gyi grwa bzhi po rnams su'o/ /bdug pa la sogs pa zhes pa ni/ phyi'i lha mo rnams te/ ji ltar 'jig rten pa rnams rang gi bud med pas kyang pho brang slas rnams kyis rab tu dga' zhing mgu bar 'gyur te/ gzugs su 'gyur ba bzhin du ye shes de rnams kyang byang chub de las mi spang bar lhag par gzungs su gyur pa'i yon tan rnams mchod pa'i lha mo bzhir byin gyis brlabs te bstan pa ni 'di dag ste/bdug pa dang zhes pa ni/ me long gi ye shes ni rdo rje bdug pa lus dang ngag dang sems tshim zhing dang bar byed pa'i rang bzhin du byin gyis brlabs te bstan pa'o/ /me tog gi phreng ba zhes pa ni/ mnyam pa nyid kyi ye shes kyi 'bras bu nye bar gyur pa'i mtshan nyid du byin gyis brlabs te bstan pa'o/ /mar me dang zhes pa ni so sor kun du rtog pa'i ye shes ni chos kyi dbyings la dmigs pa'i snang ba'i mtshan nyid du byin gyis brlabs te bstan pa'o/ /byug spos zhes pa ni bya ba nan tan gyi ye shes ni/dge ba'i chos la sogs pas sems can gyi don byed pa'i phyir tshul khrims dri mang po'i mtshan nyid du byin gyis brlabs te bstan pa'o/ /sogs pa'i sgras phyi ma rnams sdud par byed do/ /'o na phyi'i gnas gzhan rnams su ji lta bu dag bzhugs pa yin snyam pa'i don du/bskal pa bzang po'i byang chub sems dpa' rnams dgod pa'i thabs gsungs pa/ gnas lhag ma rnams su zhes bya ba la sogs pa gsungs te/ byams pa la sogs pa zhes pa ni/ byams pa ni ma 'ongs pa'i chos kyi rgyal tshab tu dbang bskur ba skye ba gcig gis thogs pa ste/dga' ldan gnam gyi gnas na bzhugs nas de'i ris kyi lha rnams kyi ston pa mdzad pa'o/ /'di sna la smos pa ci'i phyir zhe na/ 'di ni sangs rgyas kyis la bsnyen cing phyis 'byung ba'i sems dpa' rnams las dang por 'tshang rgya bas na/ sems dpa' chen po de dag gi gtso bor bstan te/ji skad du rgyud las kyang byams pa la sogs pa sems dpa' rnams zhes gsungs par zad kyi/ gzhan gyi ming ma brjod pas na/ de dag dang mthun par bya ba'i phyir/ rim pa 'dir smos so/ /sogs pa'i sgras ni bskal pa bzang po'i byang chub sems dpa' lhag ma rnams sdud par byed do//gzhung gzhan dag las grags pa zhes pa ni/ de dag gi mtshan ma dang / cha lugs rnams 'di nas gsal bar ma gsungs kyang / gzhan gyi rgyud las gsal bar bstan pa'i go 'byed par byed pa'i tshig go/ /mtshan dang cha lugs zhes pa ni so so'i phyag mtshan dang sku'i cha byad kyi rim pa'o//rnam pa sna tshogs pa 'dzin pa zhes pa ni/ bskal pa bzang po'i byang chub sems dpa' de dag kyang / phyag mtshan gyi bye brag dang / rgyan dang cha lugs tha dad pas na rnam pa sna tshogs te/ rgyud las ji skad gsungs pa'i phyag rgya'i mtshan ma dang cha lugs 'chang ba rnams so//lam zhes bya ba'i sgras ni/ rnam pa gzhan du ston pa ste/ mi 'khrugs pa la sogs pa'i sa'i phyogs kyi sa'i bye brag las shes pa ni/ mi 'khrugs pa dang / rin chen 'byung ba dang / 'od mtha' yas dang / gdon mi za bar grub par dag gi phyogs phyogs nas 'khod pa'i bye brag gis phyag mtshan dag kyang so so'i rigs dang mthun par ston pa ste/ji skad du rdo rje dang zhes pa ni/ shar phyogs mi 'khrugs pa'i logs kyi sa la 'khod pa rnams ni/ rdo rje rigs pas mdog dkar po la bzhi kas rdo rje 'dzin pa'o/ /nor bu dang zhes pa ni lho phyogs rin chen 'byung ba'i logs kyis la 'khod pa rnams ni mdog mthing ga la phyag na rin chen bsnams pa'o//pad+ma dang zhes pa ni nub phyogs 'od mtha' yas kyi logs kyis la 'khod pa rnams ni mdog dmar po la phyag na pad+ma 'dzin pa'o/ /rdo rje kun du rtse zhes pa ni byang phyogs gdon mi za bar grub pa'i logs kyi sa la 'khod pa rnams ni mdog ljang gu la rdo rje rgya gram 'dzin pa dang /byang chub sems dpa' 'di dag kyang pad+ma'i gdan la sems dpa'i skyil mo krung gis bzhugs par brtag par bya'o zhes ston to/ /rgol ba pa na re/ 'o na sems dpa' 'di dag don ci'i phyir gcig la mtshan nyid mi mthun par ston pa ci'i phyir zhe na/smras pa 'dul ba'i zhing mi mthun pa'i dbang gis rgyud tha dad par gsungs pa dag gi gnyer du 'di ltar bstan to/ /'o na de dag tu yang dang por gsungs pa'i ngo bo bzhin du mthun du mi rung ngam zhe na/ smras pa de yang 'dul ba'i zhing mos pa mi mthun pa dang /rtog pa can gyi 'gro ba dag ci 'di ltar sems dpa' chen po 'di dag cha lugs gcig tu nges na rgyud gcig bstan pas/ thub pa la ci'i phyir rgyud kun du mthun pa dag yang dang yang du ston par byed snyam pa de gcod pa dang / ye shes thogs pa med pa dang /tshad med pa dang ldan pa dang / rdzu 'phrul gyi cho 'phrul zad mi shes pa mnga' bas cha lugs gcig tu nges pa ma yin gyi/ du ma'i rnam par ston par nus pa'i mthu mda' ba'i phyir yang 'di ltar bstan to/ /'o na byams pa la sogs pa'i byang chub sems dpa' 'di dag sngar gsungs pa'i rdo rje sems dpa' la sogs pa 'di dag gi bye brag ji lta bu dag tu shes par bya zhe na/smras pa 'di dag kyang don tha dad pa ni ma yin mod kyi 'on kyang ye shes las skyes pa dang / pha rol tu phyin pa las skyes pa'i bye brag gis rnam pa gnyis su shes par bya'o//'o na pha rol tu phyin pa la skyes pa'i byang chub sems dpa' rnams ni yi dam gyi lhar gzung zhing me tog dor ba'i 'os ma yin zhes glengs na/ ci'i phyir dkyil 'khor du 'god par byed/ smras pa de dag dgag par zad kyi/ gzhan ni bkag pa med de/ci'i phyir zhe na/ 'di dag spyan drang ba dang / mchod pas mnyes par byas nas/ byin gyis rlob cing dngos grub ster/ /zhes 'byung ba dang / rgyud thams cad kyi nang nas kyang dkyil 'khor du dgod ces gsungs te/ 'on kyang dkyil 'khor du bkod phan chad mchod pas mnyes par byed pa'i rang bzhin pas na 'di ltar bstan to//'o na 'di dag yig 'bru las bskyed par bya'am/ 'on te spyan drang ba kho nar gsungs pa yin zhe na/ smras pa/ 'di dag phal du ni spyan drang zhing mchod pas mnyes par byas pas chog pa skad du gsung mod kyi/'on kyang rigs kyi yig 'bru bzhi po dag gi dbye bas bskal pa bzang po'i byang chub sems dpa' 'di dag bskyed par bya zhes gsungs pa 'di dag yod pas gang ltar byas na yang 'gal ba med la/ gong du phyag mtshan phyag rgya bzhi 'dzin pa bstan pa yang 'gal ba med par mngon no//'o na de ltar dkyil 'khor du rnam par gzhag pa'i lha de dag gi kha dog gi dbye ba'i rim pa ji lta bu dag tu brtag par bya zhe na/ ji ltar bsam pa'i de bzhin gshegs pa la sogs pa zhes bya ba dag gsungs te/ de bzhin gshegs pa ni bcom ldan 'das rdo rje dbyings chen po'o//sogs kyi sgras ni mi 'khrugs pa la sogs pa phyogs kyi sangs rgyas bzhi sdud par byed do/ /lha'i 'khor 'di dag ces pa ni/ de dag gi 'khor lhag ma rnams so/ /rgyal ba dang rdo rje dang zhes bya ba la sogs pa ni rigs bzhir 'dod pa'o/ / rjes su mthun par zhes pa ni/ rigs bzhir brjod pa de dag gi kha dog dang mthun pas slob dpon dang slob ma'i gos kyi kha dog kyang de bzhin du shes par bya ste/ gcig gis gcig mtshon par bstan pa'o/ /'dir de bzhin gshegs pa la sogs pa'i zhes pa ni/ dpal de kho na nyid bsdus pa'i rgyud 'dir gdong g.yogs pa dang /stod g.yogs ji lta bu la bya ba dag kyang rigs kyi bye brag gis go rims bzhin du shes par bya ste/ dmar po dang zhes pa ni de bzhin gshegs pa'i rigs kyi'o/ /dkar po dang zhes pa ni pad+ma'i rigs kyi 'od mtha' yas kyi'o/ / kha dog thams cad pa zhes pa ni las kyi rigs don yod grub pa'i'o/ /de bas na de'i rigs rnams kyang zhes pa ni rigs rnam par phye ba de dag go/ /de'i kha dog nyid du zhes pa ni/ gos kyi kha dog tha dad pa nyid du 'dod pa las/ de bzhin du mkhas pa rnams kyis shes par bya'o/ /de bas na rtsa ba'i rgyud chen po de kho na nyid bsdus pa las kyang /dmar po de bzhin gshegs pa'i rigs/ /zhes bya ba la sogs pa gsungs te/ dmar po ni sems can gyi don mdzad pa la chags par spyod pa'i bdag nyid do/ /sngon po ni drag po'i phrin las kyis gzhan 'joms shing zil gyis gnon pa'o//dkar po ni skyon gyis ma gos pa ste/ rang bzhin gyis gsal zhing dag par bstan pa'o/ /kha dog thams cad pa ni ljang gu ste/ phrin las kyi ngo bo'o/ /'dir rin po che zhes smos pa ni/ las dang rin po che tha mi dad pas gcig tu bsdus pa'i tshig go/ /de'i rjes su bsnyegs na zhes pa ni/dkyil 'khor chen po bzhi'i stod g.yogs dang smad g.yogs dang / gdong g.yogs kyi kha dog bye brag de ltar bstan pa sbyar ba ste/ rjes su bsnyegs pa ni rjes su sbyor ba'i don to/ /rigs kyi bdag po yang zhes pa ni/ mi 'khrugs pa la sogs pa'i rigs kyi bdag po bzhi yang de dang 'dra ba nyid du rig par bya'o zhes bstan te/rgol ba pa na re/ lha rnams kyi kha dog la sogs pa rnams ting nge 'dzin gyi bye brag gis de rnam par bsgyur du btub pa ste/ gang dga' bar byar rung ngo zhes zer na/ de dag de ltar ma yin nam zhe na/smras pa/ yang na lha thams cad kyi kha dog gi bye brag ces bya ba la sogs pas rnam pa gzhan du bsgyur ba'i don gsungs te/ lha rnams kyi kha dog gi bye brag la sogs pa/ sngags pas bdag nyid ji ltar 'dod pa bzhin du bsgyur du rung ste 'dir kha dog dang rgyan rnams ji ltar 'dod pa bzhin du bya'o zhes pa ni/de kho na nyid bsdus pa'i rgyud 'dir de bzhin du rig par bya'o zhes gsungs pa'i phyir gang du yang rung bar bstan to/ /rgol ba pa na re/ ci'i phyir 'di ltar bye brag tha dad pa dag tu gsungs she na/ 'jig rten gyi khams rgya chen po dag na/'dul ba'i zhing bsam gyis mi khyab pa dag gnas pa'i/ yul dang dus dang bsam pa dang / mos pa mi mthun pa dag tshogs pa'i dbang gis/ ji ltar 'dod pa bzhin du rung bar bstan te/ kha dog gcig tu chad pa med par brjod do/ /gzhung chen po las ni zhes pa ni/ gzhan yang yo ga 'bum sde stong phrag brgya pa las/ rigs bzhi dag gi rgyal ba'i rigs 'ba' zhig gi kha dog rnam par dbye ba bshad pa/ rtag pa'i 'khor lo ser po yin/ /zhes bya ba la sogs pa gsungs so/ /kha dog sna tshogs zhes pa ni/ gdon mi za bar grub pa'o/ /rgya chen mchog ces pa ni/bdag gzhan gyi phun sum tshogs pa rdzogs par mdzad pa'i ye shes rgya chen po mnga' ba'o/ /'od kyi phreng ba zhes pa ni/ 'od zer sna tshogs par 'phro zhing sdud pa'i phreng ba dang ldan pa'o/ /ngo mtshar che zhes pa ni yon tan phun sum tshogs pa la gzhan ngom par byed pa'i rgyur gyur pa'o//rdo rje chen po don yod pa/ /zhes pa ni/ sku gsung thugs rdo rje'i rang bzhin ye shes lnga dang ldan par mdzad pa thams cad don yod par mdzad pa'o/ /rdo rje 'dzin pas rtag tu bsam/ /zhes pa ni sngags mkhan nyid ye shes lnga 'dzin par 'dod pa yang yin la rdo rje 'dzin pa'i tshul rjes su srung bar byed pas na de skad ces bya ste/sgrub pa po nyid kyis rtag tu bsam gtan du bya zhes pa'i tha tshig go/ /rdo rje rtse mo las kyang zhes pa ni kha dog gi rnam pa 'di lta bu dag ston te/ de bzhin gshegs pa'i rigs kyi kha dog rnam par phye ste zhes pa ni/ mi mthun par ston pa dag so sor 'byed pa'o//mi 'khrugs pa ni sa reg go/ /zhes pa ni kha dog rnam par phye ba'i zhar la/ las kyi phyag rgya rnams kyang ston par byed pa ste/ phrin las kyis bdud la sogs pa bar du gcod pa'i byin gyi rlabs dang ldan par bstan te/ gang zhig ming mthun par rgol ba rnams la/sa'i lha mo dpang du btsugs nas de dmigs dbye bar bya ba ste/ bdud 'dul ba'i phyag rgya'o/ /rin chen de bzhin mchog sbyin no/ /zhes pa ni/ sbyin pa thams cad kyi nang na ni dbang bskur ba mchog pas mchog sbyin zhes bya ste/ phyag rgya de dang ldan par bstan pa'o//tshe dpag med pa'i ting nge 'dzin mchog ces pa ni dran rtogs thams cad kyi nang na ni/ rtse gcig pa'i ting nge 'dzin mchog pas/ phrin las bsam gtan gyi ting nge 'dzin mdzad pa'i phyir phyag rgya 'di bstan to/ /don yod pa ni mi 'jigs sbyin/ /zhes pa ni 'gro ba rnams la mi 'jigs pa sbyin pa ni snying rje'i nang na mchog ste/'phags pa mchod cing sems can gyi don mdzad pa dang / 'gro ba 'jigs pas nyen pa rnams de las skyob par mdzad pas na/ phyag rgya yang 'di ltar bstan to/ /rnam par snang mdzad kyi phyag rgya ma smos pa ni/ byang chub mchog gi phyag rgyar mngon te/bsgrub bya thams cad kyi nang na ni/ bla na med pa'i byang chub chen po mchog pas de dang ldan zhing gzhan skal ba can ji snyed pa yang ster bar mdzad pa'i phrin las kyi mtshan nyid can pas phyag rgya yang 'di ltar bstan to/ /sngon po ser po de bzhin dmar/ / sngo bsangs zhes pa ni/ mi 'khrugs pa dang / rin chen 'byung ba dang / 'od dpag med dang / gdon mi za bar grub pa dang / rim bzhin du sbyar bar bya'o/ /sangs rgyas rigs bzang zhes pa ni/ rnam par snang mdzad pa las rigs thams cad 'byung bas na/ rigs bzang zhes bya ste/de bzhin gshegs pa de'i rigs su gyur pa dag skyed par byed kyi/ rigs gzhan skyed par mi mdzad pas na rigs bzang zhes bya ste/ de ni kha dog dkar zhes gsungs so/ /rgol ba pa na re/ de bzhin gshegs pa rnams ni thabs tshad med pa mnga' bas/ye shes thogs pa med pas yul thams cad la myur bar 'jug pa shes bya thams cad la ma chags ma thogs bzhin du mkhyen pa/ rdzu 'phrul gyi cho 'phrul dang / rnam par 'phrul pa bsam gyis mi khyab pas 'gro ba'i don la 'jug pa'o zhes gsungs na/ kha dog rnam pa tha dad par bstan pa gdul bya mos par byed kyi/kha dog gcig kho na'i ngo bo bstan pas/ de ltar nus pa ma yin nam zhe na/ smras pa/ kha cig gcig gi ngo bos gdul bya rnams kyi don mdzad par yang mi nus pa yang ma yin mod kyi/ 'on kyang mos pa mi mthun pa dag gi dbang du 'di ltar bstan zhes gong du bshad pa bzhin te/de bas na gdul bya'i skye bo'i dbang gis de dag kha dog dang dbyibs du mar snang bar gyur pas de dag gi kha dog gi khyad par ni so sor nges pa med par rig par bya'o zhes gsungs pa'i phyir ro/ /gzhan dag na re/ 'dir rgyud 'di nyid las ji skad gsungs pa'i kha dog de bstan pas chog mod/rgyud gzhan las gsungs pa'i kha dog gi rnam pa ji snyed pa dag bstan pa ci dgos she na/ smras pa/ de yang bden mod kyi/ 'on kyang 'dir slob dpon gyis rgyud so so nas 'byung ba'i kha dog mi mthun par 'byung ba rnams 'dir bsdus te bstan pa ni/sgrub pa po bdag nyid lha'i bsam gtan mngon du byed pa rnams gang la mos gtol med pas na/ de dag gang la mos pa de bzhin du kha dog de dang sbyar la 'jug tu yod par bstan pa'i phyir ro/ /gzhan du na gang zag thos pa chung ba rnams kyis mi mthun pa'i rnam pa du ma mthong na/the tshom za zhing mgo rmongs par dogs pa bsal ba'i phyir 'di ltar bsdus pa yin par shes par bya'o/ /da ni de bzhin gshegs pa la sogs pa'i bzlas brjod byed pa dang zhes pa ni bsdus pa dang / rgyas par phye ba las rgyas par bstan pa 'di ni/ de bzhin gshegs pa bzhi dang sogs kyis de'i 'khor du gyur ba rnams kyi bzlas brjod pas/ de dag mnyes par 'dod pa dang / rnam gcig tu bsgom pa la brtson pa rtse gcig tu byed pa'i rnal 'byor pa rnams kyis bde bar gshegs pa rtag pa la sogs bzhi dang / de'i 'khor du gyur pa thams cad la mchod pa'i cho gas tshim zhing mnyes par bya ba'i phyir/rdo rje dbyings kyi dkyil 'khor chen po la sogs pa'i tshul du rnam par bkod nas bstan pa'o/ /de yan chad du dkyil 'khor chen po'i tshul du 'phags pa mchod pa dang / mnyes par bya ba'i thabs bstan pa bshad zin to// //da ni de ltar rdo rje dbyings kyi dkyil 'khor chen por 'phags pa mnyes par bya ba'i cho ga bstan pa de dag mi lcogs pa rnams kyi don du phyag rgya bzhi pa'i dkyil 'khor gyi tshul gyis mnyes par bya ba'i thabs gsungs te/ gang zhe na/ bsam gtan 'di ni rab tu rgya che ste//zhes bya ba la sogs pa gsungs te/ bsam gtan 'di ni zhes pa ni rdo rje dbyings kyi dkyil 'khor chen po rgyas par bris pa'i bsam gtan 'di ni/ lha dang dkyil 'khor dang sgrub thabs rab tu rgya che ba mang po dag 'byung bas so/ /de mi 'dod pa zhes pa ni/ kha cig sems rgya chung ba dang /brtson 'grus zhan par gyur bas don 'di dag nyams su len par mi nus pa rnams kyi don du phyag rgya bzhi pa'i dkyil 'khor bstan te/ de bas na phyag rgya bzhi pa'i dkyil 'khor gyi tshul gyis zhes bya ba smos te/ kyang zhes bya ba ni/ 'dis kyang gong ma lta bu'i dngos grub de dag thob par nus zhes bya ba'i tha tshig go//de bzhin gshegs pa la sogs pa la mchod pa zhes pa ni phyag rgya bzhi pa'i tshul gyis sbyor bas/ de bzhin gshegs pa dang / dkyil 'khor gyi lha rnams la phyi nang gi lha mo la sogs pas phyir mchod pa'o/ /mnyes par bya ba'i sems dpa' zhes pa mnyes par bya ba'i dngos grub sgrub par 'dod pa'i sems dpa' bdag gang la mos pa de'o//bzlas brjod byas pa las byung ba ni/ bzlas brjod kyis mnyes par bya ba'i sgo nas de las byung ba'i dngos grub thob pa'am/ bsgom pa'i rnal 'byor las byung ba'i zhes pa ni/byang chub kyi sems stong pa nyid kyi ngo bo las/ lha'i rnal 'byor mtshan ma'i rnam pa can du gsal bar bsgom pa'i bsam gtan gyi sgo nas de las byung ba'i dngos grub 'dod par bya ba ste/ 'dod par bya ba ni thob par bya ba'o zhes pa'i tha tshig go//rgol ba pa na re/ 'o na rdo rje dbyings kyi phyag rgya bzhi pa'i dkyil 'khor du brjod pa'i de'i tshul dang rim pa dag 'dir ji lta bur bya ba yin zhe na/ smras pa/ rdo rje dbyings kyi phyag rgya bzhi pa'i dkyil 'khor ni/ /zhes bya ba la sogs pa gsungs te snga ma bzhin du ji ltar bsams pa'i khang pa'i nang du zhes pa ni rdo rje dbyings kyi dkyil 'khor chen po sngar ji ltar bsams pa'i khang pa de'i nang du rdo rje dang rin po che la sogs pa zhes pa ni/rdo rje dang rin po che dang pad+ma dang rdo rje kha bzhi pas brgyan pa'i dkyil 'khor bsam pa'o/ /de'i dbus su zhes pa ni/ de ltar brgyan pa'i dbus kyi re'u mig gi nang du bsam pa ni/ bcom ldan 'das rdo rje dbyings chen po bsam par bya ste/ kha dog dang dbyibs la sogs pa ni gong du bshad pa lta bur bsam par bya'o/ /de'i shar la sogs pa'i phyogs su zhes pa ni/ dbus kyi re'u de'i shar dang lho dang nub dang byang gi phyogs kyi re'u bzhi po rnams kyi nang du g.yas nas bskor zhes pa ni/shar phyogs nas lho phyogs su mthar gyis bskor ba'o/ /rdo rje dang zhes pa ni sngar bshad pa'i phyag rgya bzhi rnams zla ba'i dkyil 'khor gyi steng na gnas par bsam pa'o/ /phyi rol gyi dkyil 'khor na gnas pa zhes pa ni/lha mo brgyad dang / sgo ba bzhi dang / bskal pa bzang po'i byang chub sems dpa' rnams dgod pa'i thabs dang rim pa ni sngar bshad pa bzhin shes par bya'o/ /rgol ba pa na re/ 'o na rnam par snang mdzad kyi phyag rgya bzhi dag bsam pa dang / bri ba'i thabs dang / rim pa ni 'di ltar rung na de las gzhan pa rnams kyi phyag rgya bzhi po'i rim pa dag bsam pa dang / bri ba'i rnam pa ji lta bur bya ba yin zhe na/ mi 'khrugs pa la sogs pa'i zhes bya ba gsungs te/ dkyil 'khor bzhi rnams kyi mtshan nyid kyang 'di nyid do zhes pa ni/mi 'khrugs pa dang / sogs kyi sgras rin chen 'byung ba dang / 'od mtha' yas dang / gdon mi za bar grub pa bzhi'i dkyil 'khor gyi mtshan nyid ji lta bu yin pa yang gong ma las khyad par 'di ltar shes par bya ste/ gang zhe na/ khyad par ni rdo rje dbyings kyi gnas su zhes bya ba gsungs te/rdo rje dbyings bzhugs pa'i re'u dbus ma la de bzhin gshegs pa gang gi phyag rgya bzhi'i dkyil 'khor yin pa de bsam pa ste/ dper na mi 'khrugs pa'i phyag rgya bzhi'i dkyil 'khor yin na/ rnam par snang mdzad kyi gnas su mi 'khrugs pa bsams te/ phyi ma la yang de bzhin du sbyar ro/ /de'i 'khor du gyur pa sems dpa' chen po bzhi rnams zhes pa ni/ rdo rje sems dpa' la sogs pa bzhi'o/ /rdo rje sems dpa' la sogs pa'i gnas su dgod do zhes pa ni sems dpa' chen po bzhi'i phyag mtshan rdo rje dang lcags kyu la sogs pa rnams sems ma rdo rje ma la sogs pa'i yum rnams kyi gnas su dgod pa'o//de bas na rgyud las kyang 'di skad gsungs te/ dkyil 'khor chen po'i tshul du ni/ /zhes pa phyag rgya bzhi pa'i dkyil 'khor bri zhing bsam pa yang rdo rje dbyings kyi dkyil 'khor chen po ji lta bu'i tshul du srad bu bre ba dang /thig gdab pa dang / re'u bgo bar bya'o/ /dang por sangs rgyas sku bzhag nas/ zhes pa ni rigs gang sgrub pa'i phyag rgya bzhi po gang yin pa de'i sku bzhag pa'o/ /phyag rgya rnam bzhi bri bar bya/ /zhes pa ni/ de nas rigs gang yin pa de'i sems dpa' bzhi'i phyag rgya gzhag pa'o//rdo rje grub pa'i phyag rgya bzhi ji lta ba bzhin du zhes pa ni/ rnam par snang mdzad kyi phyag rgya bzhi ji lta ba bzhin du mi 'khrugs pa la sogs pa sangs rgyas bzhi po dag gi dkyil 'khor rnams kyang 'khor rang rang gi sems dpa'i phyag rgya bzhi rnams dang ldan par bri'o zhes rgyud las gsungs par bstan to//oM sarba ta thA ga ta muSh+Ti baM zhes pa ni/ bcom ldan 'das rnam par snang mdzad kyis mi bskyod pa la sogs pa'i phyag rgya bzhi ba'o/ /sngar rdo rje dbyings kyi dkyil 'khor du bkod pa rnams dkyil 'khor 'dir bsdu pa'i don du brjod pa ste/sngags 'di'i don ni de bzhin gshegs pa thams cad gcig tu 'dus shig pa'i don to/ /rdo rje dbyings dang rdo rje sems ma zhes brjod pa ni/ sangs rgyas lnga po de dag rang bzhin gzhan du 'gyur ba'i mtshan no/ /sngags lhag ma 'di bzhi ni mi bskyod pa la sogs pa'i sangs rgyas bzhi po rnams kyis kyang /so so rang rang gi rigs rdo rje sems dpa' la sogs pa bzhi po sdud pa'i phyag rgya rnams byin gyis rlob pa'i sngags gsungs pa ste/ de la mi 'khrugs pa'i rdo rje rigs kyi sems dpa' rnams bsdu ba'i sngags gsungs pa ni/ oM badzra sarba muSh+Ti a zhes bya ba ste/ rdo rje rigs thams cad gcig tu 'dus shig pa'i don to/ /rin chen 'byung bas rin po che'i rigs kyi sems dpa' rnams bsdu ba'i sngags gsungs pa ni/ oM rat+na muSh+Ti trAM zhes bya ba ste/ rin chen chen po'i rigs thams cad gcig tu 'dus shig pa'i don to//'od mtha' yas kyis pad+ma'i rigs kyi sems dpa' rnams bsdu ba'i sngags gsungs pa ni/ oM d+harma muSh+Ti khaM zhes bya ba ste/ pad+ma'i rigs thams cad gcig tu 'dus shig pa'i don to/ /gdon mi za bar grub pas las kyi sems dpa' rnams bsdu ba'i sngags gsungs pa ni/oM karma muSh+Ti haM zhes bya ba ste/ las kyi rigs thams cad gcig tu 'dus shig pa'i don to/ /rgol ba pa na re/ 'o na de ltar sngags brjod pas gsungs pa ni rung na/ tshul ji lta bur 'dus she na/ smras pa/ mi bskyod pa la sogs pa bzhi rnams ni/bcom ldan 'das bai ro tsa na rdo rje grub pa zhes bya bar 'dus te/ rdo rje sems dpa' la sogs pa bzhi ni/ phyag rgya rdo rje rtse lnga par 'dus/ rdo rje rin chen la sogs pa bzhi ni/ phyag rgya rin po cher 'dus/ rdo rje chos la sogs pa bzhi ni/ phyag rgya pad+mor 'dus/rdo rje las la sogs pa bzhi ni/ phyag rgya rdo rje rgya gram du 'dus/ de dag gi rigs kyi lha mo rnams kyi so so'i bka' 'khor du 'dus par rig par bya'o/ /phyi'i mchod pa'i lha mo bzhi rnams dang / sgo ba bzhi rnams ni snga ma bzhin du bri bar bya'o/ / rgol ba pa na re/ 'o na gzhan rnams kyi dkyil 'khor du dgod pa'i tshul dang rim pa ji ltar bya ba yin zhe na/ mi 'khrugs pa la sogs pa'i phyag rgya bzhi'i dkyil 'khor du dgod pa ni zhes bya ba la sogs pa gsungs te/ de las gzhan pa'i rnam pa yang byar rung bar bstan pa'i phyir na yang zhes bya'o//gzungs kyi dkyil 'khor gyi phyag rgya'i skabs su gsungs pa zhes pa ni/ rdo rje dbyings gzungs kyi dkyil 'khor du bstan pa'i skabs nas 'byung ba'o/ /rdo rje sems dpa' la sogs pa'i phyag rgya dgod pa'i zhes pa ni/ rdo rje sems dpa' la sogs pa thams cad kyi so sor phyag rgya dgongs pa'i skabs su gsungs pa'i sngags kyis 'god do//phyag rgya zhes bya ba'i sngags kyi tshig rnams zhes pa ni/ ji ltar gzungs kyi dkyil 'khor las/ rnam par snang mdzad ni badzra d+hA twI shwa ri'i zhes bya ba nas rigs bzhi po rnams ni/sarba badzri Ni hUM dang / rat+na badzri Ni hUM dang / d+harma badzri Ni hUM dang / karma badzri Ni hUM zhes bya ba'i sngags rnams dang / de bzhin du rigs kyi sems dpa' chen po rnams dang / lA s+ye la sogs pa'i lha mo bzhi dam tshig gi phyag rgya'i mtshan mar bstan pa'i sngags/oM badzra gu h+ya da ri pU dza sa ma ye/ sarba pU dza sa ma ra ha ya hUM zhes bya ba la sogs pa'i sngags rnams kyis/ lha rnams rang rang gi gnas su dgod par bya'o/ /sngags de dag la ci'i phyir phyag rgya zhes bya ba'i sngags su brjod ce na/ smras pa/ sngags kyi rnam pa gnyis ye shes kyi rang bzhin gyi mtshan pas phyag rgya zhes bya'o//de la yang spyir sbyar ba dang / khyad par du sbyar ba gnyis kyi bye brag gis snying po dang sngags dang phyag rgya dang / rig pa zhes bya bar 'dod de/ spyir ni rtsa ba'i rgyud chen po'i dkyil 'khor dum bu bzhi la sbyar na/ rdo rje dbyings kyi dkyil 'khor du gsungs pa ni snying po'o/ /khams gsum rnam par rgyal ba'i dkyil 'khor du gsungs pa ni phyag rgya/ 'gro ba 'dul ba'i dkyil 'khor du gsungs pa ni sngags/ don thams cad grub pa'i dkyil 'khor du gsungs pa ni rig pa zhes bya bar 'dod do//khyad par du sbyar na/ dkyil 'khor dum bu bzhi'i rang rang gi mtshan ril bzhi char tshang bar 'dod de/ ci ltar zhe na/ dkyil 'khor chen por gsungs pa ni snying po/ dam tshig gi dkyil 'khor du gsungs pa ni phyag rgya/ chos kyi dkyil 'khor du gsungs pa ni sngags las kyi dkyil 'khor du gsungs pa ni rig pa'o zhes zer te/'on kyang gzungs kyi dkyil 'khor ni dam tshig gi dkyil 'khor pas/ de nyid dam tshig de las gsungs pa'i sngags ni phyag rgya zhes bya bar 'dod pa'i don gyis 'di ltar bstan te/ sngags de dag gis lha'am/ phyag rgya de dag dgod par bya'o/ /'o na 'di ltar bstan pa 'di dag rnam grangs 'di la sbyar bar bya ba yin nam/ gzhan du yang sbyar du rung zhe na/ smras pa/ de bzhin du phyag rgya chen po dang / dam tshig gi phyag rgya dang / chos kyi phyag rgya dang / las kyi phyag rgya dang / byin gyis brlab pa dang /dbang bskur ba dang / ting nge 'dzin dang / mchod pa zhes bya ba de dag phan tshun du gcig gi ngo bo'i ming du gcig 'dod par bshad pa yang yod de/ ci'i phyir zhe na/ zhes bya ba ni/ 'o na ci'i phyir phyag rgya bzhi pa'i dkyil 'khor du dgod par bya ba'i sngags gzungs kyi dkyil 'khor nas 'byung bar byed/de lta na ni las dang dkyil 'khor rnam pa tha dad par gsungs pa dag kyang gcig las 'byung ba'i bya ba gcig gis byed par 'gyur ro zhe na/ mi 'khrugs pa la sogs pa'i zhes bya ba la sogs pa gsungs te/ rdo rje sems dpa' la sogs pa'i phyag rgya dgod pa'i snying po ma gsungs zhes pa ni/'dir rdo rje sems dpa' la sogs pa'i ni gsungs mod kyi rdo rje sems dpa' la sogs pa'i sngags ma gsungs pas dkyil 'khor chen por bsam pa'i skabs su gsungs pa'am/ gzungs kyi dkyil 'khor du so so'i phyag rgya dgod pa'i snying po gsungs pa 'dis dgod par bya ba bstan to//rgol ba pa na re/ 'o na 'di la la la na re ni/ dkyil 'khor 'di'i ming rdo rje dang dngos grub ces bya bar 'bod pa ci'i phyir zhe na/ smras pa/ phyag rgya thams cad kyi nang na/ rdo rje'i phyag rgya lnga la dkyil 'khor 'di yang phyag rgya thams cad 'dus par ston mod kyi/'on kyang gtso bo rdo rje'i phyag rgya pas na rdo rje grub pa'am/ dngos grub ces bya ste/ gzhung nyid las/ rdo rje dngos grub ces kyang grags/ /zhes gsungs pa'i phyir ro/ /rgol ba pa na re/ 'o na dkyil 'khor 'dir phyag rgya thams cad 'dus par bstan/phyag rgya 'dus pa zhes bya ba'i mtshan du ming brjod nas/ phyag rgya bzhi pa zhes brjod pa ci'i phyir zhe na/ smras pa/ phyag rgya thams cad 'dus par gyur pa yang bden mod kyi/ 'on kyang de'i 'bras bu phyag rgya bzhi kho nar snang bas na/ phyag rgya bzhi pa'i dkyil 'khor zhes brjod do/ / rgol ba pa na re/ 'o na tshul 'di ltar ston pa'i dkyil 'khor mdzad pa na/ 'di ci'i phyir ram gang gi don du bstan ce na/ 'di ltar bya ba'i dkyil 'khor 'di ni/ log par lta ba dang sdig pa'i las byed pa dang / brtson 'grus chung ba dang / sbyor ba mi byed pa dang / ri mo mi shes pa'i don du bstan zhes gsungs pas ni/'dir yang bsam gtan 'di ni rab tu rgya che ste de mi 'dod pas ni zhes brjod pa yin no/ /'o na dkyil 'khor 'di ltar sla la bsod nams che ba 'di gzhan la bstan cing bshad pa'i rigs pa yin na ci'i phyir ston par mi byed ce na/ smras pa/rtsa ba'i rgyud nyid las dkyil 'khor 'di gzhan la ma smra shig ces gdams shing bsgo pa'i phyir ro/ /rgol ba pa na re/ 'di gsang ba ci'i phyir gzhan dag bsod nams thob tu mi rung ngam zhe na/ smras pa/ dad pa dang brtson 'grus chen po rnams la mdor bsdus pa'i dkyil 'khor 'di bstan par mi bya ste/ci'i phyir zhe na/ gal te 'di bstan par gyur na/ rdo rje dbyings kyi dkyil 'khor la sogs pa 'dri zhing rtsol ba dang / sgrub par byed pa btang nas de dag la mi rtsol bar cho ga nyung ngu 'di lta bu la 'jug par gyur nas bsod nams chen po bkag par gyur du dogs pa'i phyir ni 'di ltar bstan to//phyag rgya bzhi pa'i dkyil 'khor gyi tshul gyis lha rnams mnyes par bya ba'i mtshan nyid bshad zin to// //da ni de ltar phyag rgya bzhi pa'i tshul gyis nyams su len par mi nus pa rnams kyi don du phyag rgya gcig pa'i tshul gyis mnyes par bya ba'i cho ga bshad par bya ste/gang zhe na/ de la rdo rje sems dpa' bzlas brjod byed pa'am zhes gsungs te/ dpal rdo rje sems dpa' ni byang chub sems kyi ngo bo thams cad kyi bdag nyid dam ngo bor gyur pas de kho na bzlas brjod kyi sgo nas mnyes par byed pa'am/ bsgom pa la sogs pas zhes pa ni/ sems kyi sgo nas ting nge 'dzin gyi bsam gtan gyis bsgrub par 'dod pas/ phyag rgya gcig pa'i dkyil 'khor gyi mchod pa'i cho ga bya bar yang rtsa ba'i rgyud chen po nyid las gsungs so/ /khang pa brtsegs pa'i dbus su zhes pa ni sngar bstan pa'i khang pa brtsegs pa'i dbus der ro zhes pa ni rdo rje dbyings la sogs pa'i thig gdab pa la sogs pa byas nas dkyil 'khor gyi nang du rdo rje 'khor lo zlum por byas pa'i nang du zla ba'i dkyil 'khor bsams la/de'i dbus su dpal rdo rje sems dpa' bzhugs par bsam mo zhes pa ni/zla ba'i dkyil 'khor de'i dbus su dpal rdo rje sems dpa' kha dog dang cha lugs ji lta bu dang ldan par bzhugs par bsam pa'o/ /la la na re phyag rgya zhes brjod pa'i tshig gis ni phyag rgya gcig pa'i dkyil 'khor 'di bri ba'i tshe ni rdo rje sems dpa'i gzugs su mi gzhag pa'i dbus su chos kyi phyag rgya'am/dam tshig gi phyag rgya gzhag par byas la/ bsam zhing bsgom pa'i dus na ni/ phyag rgya chen po'i cha lugs dang ldan par bsgom zhes zer ro/ /de ltar phyag rgya gcig pa'i dus na yang dkyil 'khor chen po ji lta bu'i tshul du bya ba'i gtan tshigs rtsa ba'i rgyud chen po nyid las/dkyil 'khor chen po'i tshul gyis ni/ /zhes bya ba la sogs pa gsungs so/ /de ltar gzhag pa'i snying po ni oM badzra satwa zhes bya ba ste/ bcom ldan 'das rnam par snang mdzad kyis rdo rje dbyings la sogs pa'i dkyil 'khor chen po rnams/phyag rgya gcig pa'i dkyil 'khor du bsdu ba'i phyir nyid kyis thugs ka nas phyung ba'o/ /sngags 'di bstan pa yang ji ltar dkyil 'khor gong ma rnams su lha rnams gnyer zhing byin gyis brlab pa'i phyir 'di nyid kyi snying po gsungs pa bzhin du 'dir yang rdo rje sems dpa'i dkyil 'khor gyi bdag por byin gyis brlab pa'i phyir 'di nyid kyi snying po gsungs so//ji ltar dkyil 'khor chen po dang / /zhes pa ni/ 'di dag nam mkha'i phyogs su bsams te/ bzlas brjod dang sgom pa'i cho gas mchod par byas pa bzhin du/ ras dang thang bu la sogs pa la bri bar byas pa la sogs pa rnams kyang mchod par bya ba ste/cis mngon zhe na/ dpal de kho na nyid bsdus pa las phyag rgya bzhi'i dkyil 'khor bstan pa'i skabs su de ltar ras rtsig pa dang zhes bya ba gsungs te/ ji ltar nam mkha' la bsams pa bzhin ras la sogs pa la bris par byas pas kyang dngos grub ster ro zhes gsungs so//de bzhin du phyag rgya gcig gi dkyil 'khor gyi skabs su zhes pa 'dir yang de bzhin du ston pa ste/ rdo rje dbyings kyi dkyil 'khor chen po'i cho gas rgyas pa zhes pa de bzhin du grub par gyur ba'i khungs te/ 'di las dkyil 'khor chen po dang /phyag rgya bzhi pa'i dkyil 'khor du bsgom pa dang / bzlas pa byas pas dngos grub gang 'dod pa ster ba bzhin du phyag rgya gcig po bsgoms pas kyang dngos grub thams cad sbyin par byed do zhes bshad do/ /ras kyi cho ga gsungs pa yang / /zhes pa ni/ rgyud phyi ma'i yang phyi ma las sems can bsod nams chung ba dag gi don ras la bris pa'i cho ga gsungs pa'o//ras la bcom ldan 'das zhes pa ni/ ras byi dor legs par byas pa la ri mo mkhan gso sbyong la gnas pas kha dog phun sum tshogs pa'i tshon gyis bcom ldan 'das de bzhin gshegs pa rnams 'khor gyi rigs kyi lha mo dang bcas par bri bar bya ste/de la de bzhin gshegs pa zhes pa ni de bzhin gshegs pa lnga las bdag gang la mos pa ste/ gang yang rung ba'o/ /phyag rgya bzhi pa'i dkyil 'khor gyi tshul du zhes pa ni/ de dag re re'i 'khor na rdo rje sems dpa' la sogs pa sems dpa' chen po bzhi bzhi gnas pa gang bsgom pa'i dkyil 'khor du phyag rgya'i tshul du dgod pa'o//rigs kyi lha mo zhes pa ni phyi nang gi lha mo brgyad po dag go/ /snying po la sogs zhes pa ni/ lha lnga po de dag go/ /sogs kyi sgras ni sngags dang phyag rgya gzhan yang bsdu'o//de la brten pa'i sems dpa' chen po zhes pa ni/ de bzhin gshegs pa de dag so so la brten pa'i rang rang rigs kyi sems dpa'i rnams so/ /de dag bzlas brjod dang bsgom pas mnyes par bya ba'i phyir 'di ltar bstan to/ /de yan chad phyag rgya gcig pa'i cho ga dang /ras la bri ba'i cho gas mjug bsdus te mnyes par byas pa'i cho ga ba shad zin to/ /de ltar bsam gtan gyi sbyor bas lha mnyes par bya ba'i sbyor ba bshad nas/ de dag spyan drang ba dang / mchod ba'i cho ga bshad par bya ste/ gang zhe na/ de ltar lha'i bsam gtan la sogs pa sngar byas nas zhes bya ba gsungs so//rgyas pa'i sgo nas dkyil 'khor chen po bstan pa dang / bsdus pa'i sgo nas phyag rgya bzhi pa'i dkyil 'khor bstan pa dang / phyag rgya gcig pa'i tshul gyis rdo rje sems dpa' mnyes par bya ba'i bsam gtan gyis/lha dang gnas bsam pa sngar byas nas gdod spyan drang bar bya'o/ /sogs kyi sgras ni de dag gi yan lag rnams sdud par byed do/ /lha'i rnal 'byor ji ltar byas pa mngon du byas te zhes pa ni/ sngar dam tshig sems dpar bsgyur ba'i bsam gtan mngon du byas zin gyis kyang /bar du rtog pa'i glo bur ba dag gi g.yengs pa'i dbang gis mi gsal bar gyur du dogs pas gong du sems dpa'i rim pa bzhin du slar gsal bar bsgoms la rang gi snying gar rdo rje sna tshogs la zhes pa ni/ rang gi snying ga'i zla ba'i dkyil 'khor la phrin las thams cad pa'i bdag nyid rdo rje rgya gram kha bzhi'i rtse mo can bsams pa'o//rdo rje bsdu ba'i snying po rdo rje tshig gis brjod cing zhes pa ni/ ji ltar rtsa ba'i rgyud chen po dpal de nyid bsdus pa bstan pa'i dus na/ bcom ldan 'das rnam par snang mdzad chen pos phyag gnyis se gol gyi sgras gtogs shing oM badzra sa mA dzaHdza hUM zhes brjod pas/phyogs bcu na bzhugs pa'i de bzhin gshegs pa sras dang bcas pa thams cad kun nas yongs su 'du bar mdzad par gyur pa de dag rjes su mthun pa'i sgo nas 'phags pa'i go 'phang 'thob par 'dod pa'i sgrub pa po'i rnal 'byor pa dag gis kyang de bzhin gshegs pa sras dang bcas pa rnams spyan 'dren na/de'i sngon rol du rdo rje bsdu pa'i sngags brjod cing phyag rgya 'ching bar rigs pas na/ 'di ltar rdo rje khu tshur gnyis dpung mgor bsnol la g.yon gyi steng du g.yas phyung ste/mdzub mo gnyis lcags kyu ltar byas nas rang gi gung mo dang mthe bong gnyis kyis se gol mi drag par gtogs shing / se gol gyi sgras de bzhin gshegs pa rnams bslang zhing sbran te/ lcags kyu'i phyag rgyas rang rang gi gnas nas bskul te/ yongs su 'du bar mdzad pa'i sbyor bas mngon du byas pas/de bzhin gshegs pa rnams rang rang gi 'khor sems dpa' chen po dang bcas pa rnams bsdu bar bya'o/ /de nas so so'i bya ba'i rnam par grol ba la mnyam par gzhag pa zhes pa ni/ de dag so so nas phrin las ci mdzad pa'i rnam par grol ba bstan par mdzad pa'i mtshan ma mnyam pa nyid dang /bdud btul ba dang / mchog sbyin pa dang / ting nge 'dzin dang skyabs sbyin gyi phyag rgya dang ldan pa kha dog dang / cha lugs kyi rgyan chos yongs su rdzogs pa'o/ /ji ltar bsams pa'i mchod pa'i gnas/ /zhes pa ni gong ma lta bu'i gnas kyi rnam pa de las ji ltar bsams pa'i gnas de'i kho ra khor yug tu zhugs par mos par bya'o//de nas ji ltar brtags pa'i gnas kyi shar phyogs su bltas te zhes pa ni sngar bsams pa'i gnas de'i shar phyogs su bltas nas rdo rje lcags kyu sgo srung las kyi phyag rgya phyis 'byung ba de bcings la der yang zhes pa ni/ji ltar bsams pa'i gnas kyi sgo de nyid phyogs su'am/ phyag rgya bcings pa de lcags kyur bsams la/ oM badzra aM gu sha dzaHzhes brjod pas dgug pa'i tshul gyis bde bar gshegs pa sras dang bcas pa de dag so so rang rang gi bzhugs pa'i phyogs kyi sgor phyogs par bsam mo//de nas lcags kyu'i phyag rgya de nyid sngar bcings pa'i rang gi khams su bkrol te sgrub pa'i rnal 'byor pa nyid lho phyogs kyi sgor bltas la rdo rje zhags pa'i las kyi phyag rgya bcings te/ snga ma bzhin du bsams la/oM badzra pA sha hUM zhes brjod pas drangs pa'i tshul gyis de bzhin gshegs pa sras dang bcas pa de dag rang gi sgo'i nang du zhugs par brtags la/ phyag rgya de yang rang gi gnas su dgrol lo/ /de nas yang nub phyogs kyi sgor bltas te rdo rje lcags sgrog pho nya'i phyag rgya bcings shing snga ma bzhin du bsams nas oM badzra s+pho Ta baM zhes brjod pas de bzhin gshegs pa sras dang bcas pa de dag sgrub pa'i rnal 'byor pa bdag nyid ji srid 'dod pa de srid du gzhug par bya ba'i phyir/ston pa'i bka'i mtshan nyid rdo rje lcags sgrog gi phyag rgya de bstan to//de nas phyag rgya de yang rang gi gnas su bkrol la/ rdo rje dbab pa bran gyi las kyi phyag rgya bcings la der yang shes rab kyi pha rol tu phyin pa'i mtshan mar gyur pa dril bu'i phyag rgya bsams nas oM badzra A be sha hoHzhes brjod pas dril bu bskyod pa'i tshul gyis de bzhin gshegs pa sras dang bcas pa de dag yongs su mnyes par byas te/phyag rgya rang gi gnas dang por bcings pa'i sa der bkrol lo/ /de ltar rdo rje bsdu ba'i sngags brjod cing se gol gyi sgras de bzhin gshegs pa de dag so so rang rang gi gnas nas bskul zhing bsdu ba dang phyag rgya bzhi pa'i sngags dang ldan par bcings pa'i sbyor bas 'di bzhin du bya ba'i don kyang /sgo rnams dag ni thams cad du/ /zhes bya ba la sogs pa gsungs so/ /ji ltar srid pa rnams zhes pa ni phyag rgya gcig pa'i rnam pa ji ltar bsgoms pa rnams so so'i gnas su dgod pa'i phyir lha so so'i las kyi phyag rgya bcings te/so so'i snying po brjod la sngar bsams pa'i gzugs rnams kyi gnas su bstan to/ /de ltar byas na spyan drangs pa rnams so so'i gnas su bzhugs par 'gyur ro/ /de ltar yang gzhungs las/ lus kyi phyag rgya mchog chen po/ /zhes bya ba la sogs pa gsungs so/ / dam tshig rnams ni dgod par bya/ /zhes pa ni/ lha rnams rang rang gi gdan la bzhugs su gsol ba'o/ /de nas de rnams kyi dam tshig gi phyag rgya bcings te zhes pa ni de ltar las kyi phyag rgya bcings pa'i rting thogs su yang lha dag so so'i dam tshig gi phyag rgya bcings la so so'i snying po brjod pa'i rting la/dzaHhUM baM hoH/ zhes pa'i sngags 'di yang gdags te brjod pas de dag so so'i gnas na bzhugs pa zhes pa ni yang dag par gnas pa bstan par 'gyur te/ rdo rje'i lta ba ji skad du phyis 'byung bas so/ /gsal bar blta zhes pa ni rab rib tsam ma yin par shes rab kyi mig gis gsal bar blta'o//de ltar dam tshig gi phyag rgya bcing zhing dzaHhUM baM hoHzhes bya ba'i sngags brjod pa yang rgyud 'di nyid las dzaHhUM baM hoH/ zhes brjod de zhes bya ba la sogs pa gsungs te/ dam tshig phyag rgya mchog chen po/ /zhes pa ni yon tan dam pa dang ldan pas so//sems ma rdo rje zhes pa ni sems ma de yang dam tshig gi rang bzhin pas de dag gi phyag rgya bcing bas so/ /sems dpa' chen po sgrub ces pa ni de dag yang bstan par bya bar gnas pa'o/ /de nas de dag gi so so'i lce la zhes pa ni brtan par gnas par bya ba'i lha ji snyed pa de dag gi lce la zla ba'i dkyil 'khor gyi steng du rdo rje rtse lnga pa dkar po bsams te/de'i dbus su so so'i chos kyi phyag rgya badzra dz+nyA na la sogs pa'i zla ba'i dkyil 'khor la gnas par bsam mo/ /de ltar phyag rgya bzhi po'i sbyor ba dang ldan par byas na/ sgrub pa'i rnal 'byor pa la byin gyis brlabs par 'gyur ro zhes slob dpon mkhas pa dag gis bstan to//rgol ba pa na re/ 'o na sngags spyod pa'i rnal 'byor pa rnams kyang blo'i khyad par mtha' yas pas gcig tu nges par gzhag pa ma yin na/ 'di ltar mi lcogs pa dag gis kyang 'di ltar bya dgos par zad pa yin nam/'on te gzhan dag bya ba'i thabs kyang yod ce na/ yang na sngar bshad pa'i rim pa nyid kyis zhes bya ba la sogs pa gsungs te/ gnas dang / gdan dang / rgyan phun sum tshogs pa dag snga ma bzhin du bsams la/ mchod par bya ba'i lha rnams phyi rol du bsam pa ma byas par zhes pa ni/dang por rdo rje bsdu ba byas pa'i bsam gtan gyis gzhal yas khang gi khor yug tu byon pa'i sbyor ba de bya mi dgos par rdo rje bsdu ba de'i rting thogs su dgug pa la sogs pa'i phyag rgya rnams don dang ldan par byas la/ so so'i las kyi phyag rgya rnams kyis so so'i gnas su bzhugs par bya'o//de nas yang so so'i dam tshig gi phyag rgya bcings la so so'i las kyi phyag rgya dang ldan pa dang / phyag mtshan gyi mtshan mas legs par mtshon pa/ snga ma bzhin du mos par bya'o/ /'di ni mdor bsdus pa ste zhes pa ni/cho ga phyi nas bstan pa 'di ni sngar gyi rgyas par bstan pa las mdor bsdus pa ste/ cho ga gzhan no zhes pa ni rgyas pa las gzhan du bstan pas de skad bya'o/ /da ni de ltar bsgoms pa'i bsam gtan gyi sbyor ba la gnas pa de dag phyag rgya bzhi dang ma ldan na mngon du snang ba'i gzugs 'grub par mi 'gyur bas/de mngon du bsgrub par bya ba'i phyir phyag rgya bzhi pa rnams bsgom par bya ba bshad de/ phyag rgya chen po'i mtshan nyid ni/ /zhes bya ba la sogs pa gsungs so/ /sngar lha rnams kyi phyi rol du bsam pa'i tshe bstan pa'o zhes pa ni gong du so sor byas pa'i rnam par grol ba la mnyam par gzhag pa zhes bya ba'i tshig gis bstan to//'dir yang dam tshig gi phyag rgya thams cad ni sngar bshad pa'i rdo rje bcing ba nyid las zhes pa ni rgyud 'dir gsungs pa'i lha so so'i dam tshig gi phyag rgya 'byung ba thams cad kyi mtshan/ nyid ni sngar dam tshig sems dpa'i bsgrub pa'i tshe bshad pa'i rdo rje bcing ba las 'byung bar shes par bya ste/ dpal de kho na nyid bsdus pa nyid las kyang / dam tshig gi phyag rgya thams cad rdo rje bcing ba las 'byung ngo zhes gsungs so/ /phyag rgya thams cad kyang snying po 'dis bcing ngo zhes pa ni/de bzhin gshegs pa lnga rnams dang / de dag gi 'khor sems dpa' chen po la sogs pa rnams kyi so so'i dam tshig gi phyag rgya bcing ba'i tshe lha re re la yang sa ma ya s+t+waM zhes pa'i snying po lan re brjod cing / de nas gdod bcing bar bya ste/ de ltar yang de la de kho na nyid bsdus pa las/sa ma ya s+t+waM zhes brjod nas/ /zhes bya ba la sogs pa gsungs te/ phyag rgya'i rigs ni thams cad la/ /zhes pa ni rigs lnga la sogs pa'i dam tshig gi phyag rgya'i rigs thams cad bcing ba'i tshe phyag rgya de dag la sngags des bskul bas steng ngam gdan du 'bab par byed pas so//mthu chen rnams rang gis bcings nas 'grub ces pa ni/ dam tshig gi phyag rgya mthu chen po dang ldan pa rnams sgrub pa'i rnal 'byor pa bdag nyid kyis bcings nas bsgrubs na de bzhin du 'grub par 'gyur zhes gsungs so/ /de bas na snying po 'dis phyag rgya thams cad bcings la zhes pa ni sngags de'i yon tan chen po dang ldan pas dam tshig gi phyag rgya 'grub par byed pas na/sa ma ya s+t+waM zhes pa'i snying po 'di brjod pas so so'i dam tshig gi phyag rgya thams cad bcings la/ sems dpa' gang gi phyag rgya yin pa de zhes pa ni/sems dpa' so so gang gi dam tshig gi phyag rgya gang yin pa de bcing ba'o/ /rang gi las la de'i snying pos bcing bar bya'o zhes pa ni/ dam tshig gi phyag rgya gang yin bcings pas/ so so'i phrin las mdzad pas so so'i snying po rnams kyang phyag rgya dang sbyar la brjod par bya'o//gzhan dag na re/ 'o na dam tshig dang las kyi phyag rgya'i mtshan nyid 'dir/ 'di ltar bstan pa dang / gzhan las mthong ba dag mtshan nyid mi mthun par 'gyur ba yod na/ de tshul 'di ltar bstan pa ci'i phyir zhe na/ dam tshig gi phyag rgya dang las kyi phyag rgya'i mtshan nyid kyang zhes bya ba la sogs pa gsungs te/dam tshig gi phyag rgya dang las kyi mtshan nyid kyang kha cig tu mi mthun par ston pa yang yod pa bden mod kyi 'on kyang 'dir ni bla ma'i man ngag zhal nas gsungs pa'i rgyud kyi lung las thos pa ji lta ba bzhin du ma brjed par rjes su dran par byas nas/slob dpon sangs rgyas gsang ba bdag nyid kyis tshig dang yi ge'i rnam pas phyogs gcig tu bsdus nas glegs bam du bris te/ de bas na mtshan nyid gzhan du srid ces pa ni phyag rgya de dag mtshan nyid mi mthun par ston nam 'byung srid kyang rnam par brtag par mi bya zhes pa ni the tshom gyi rnam par rtog pa za bar mi bya ste/byas par 'gyur na rnam par rtog pa la/ mtha' thug pa med pa'i phyir ro zhes te rnam pa rtog pa la zad pa dang thug pa med par 'gyur bas na/ the tshom za bar ma byed cig ces pa'i don to/ /ji lta zhe na zhes pa na/ de ltar mtshan nyid mi mthun par ston pa la ci'i phyir the tshom dang rnam par rtog pa mi skye bar bya zhes pa'i tha tshig go//smras pa/ lha'i rnal 'byor la gnas pa'i zhes bya ba la sogs pa gsungs te/ lha'i rnal 'byor la gnas pa'i rnal 'byor pa ni lha'i sku gsung thugs kyi ngang du bdag nyid kyi sgo gsum sbyor ba ste/gnyis su med par sems pa'o/ /de kho na nyid la mos pa ni/ don dam pa byang chub kyi sems stong pa nyid kyi ngo bo rnam par mi rtog pa nyid kun rdzob tu lha'i sku'i phyag rgyar gnas pa ste/ de ltar de kho na nyid la gnas pa des ni/ lus dang ngag yid thams cad lhar byin gyis brlabs pas zhes pa ni/sgo gsum lha'i rang bzhin las mi zhan par byas so/ /phyag rgya la sogs pa'i rang bzhin du 'gyur zhes pa ni sgo gsum phyag rgya bzhi'i rang bzhin du gnas par gyur pas/ lus kyi sgo nas bsgul bskyod byas so cog thams cad ni phyag rgya la/ngag gi sgo nas smra brjod byas so cog thams cad ni sngags/ sems kyi sgo nas dran rtog cing rgyus so cog thams cad ni ting nge 'dzin te/ sgo gsum gyi spyod pa thams cad kyang bdag gzhan gyi don phun sum tshogs pa 'grub pa'i rgyur 'gyur te/ de bas na mtshan nyid nyes pa'i dogs pa mi bskyod do zhes pa ni mi mthun pa ltar snang ba de la 'gal bar 'gyur ba'i dogs pa bskyed par mi bya'o zhes ston to//da ni sangs rgyas lnga po dag gi dam tshig gi phyag rgya bcing ba'i thabs bshad par bya ste/ gang zhe na/ rtag pa'i dam tshig gi phyag rgya ni zhes bya ba la sogs pa gsungs te/bcom ldan 'das rnam par snang mdzad ni thams cad rtag pa dang ldan pa'i ngo bo bas na/ rtag pa zhes bya ste/ de'i dam tshig gi phyag rgya ni sems ma rdo rje ma zhes bya ba'i mtshan nyid de de nyid gnas 'gyur ba'i gnas skabs las ming du btags pa'o//mi 'khrugs pa ni de kha thur du bstan pa ste zhes pa ni/ rtsa ba'i rgyud de kho na bsdus pa las gsungs te/ phyag rgya de la ni ming rdo rje sems ma gnyis pa zhes bya ste ci'i phyir zhe na/ rdo rje sems ma'i dam tshig gi phyag rgya ste/ rtag pa dang mi 'khrugs pa gnyis ka yin pa'i phyir ro//de bzhin du sangs rgyas gnyis pa zhes pa ni/ mi bskyod pa ste/ rnam par snang mdzad dang por smos pa'i 'og tu byung ba'o/ /'jig rten dbang phyug rgyal po 'od mtha' yas la bya ste/ ci'i phyir zhe na/ 'jig rten dbang phyug ni spyan ras gzigs kyi dbang po'o//de'i rgyal po ni dbu la bskur ba ste 'od mtha' yas so/ /de bas na de la de skad bya'o/ /sangs rgyas lnga pa zhes pa ni gdon mi za bar grub pa la bya ste/ ci'i phyir zhe na/ sangs rgyas bzhi po dag gi 'og tu brjod pas na/ grangs kyi sgo nas lnga pa zhes brjod do/ /de la gzhan gyis brgal ba/gang dag rdo rje sems ma la sogs pa'i/ /zhes bya ba la sogs pa gsungs te/ rdo rje sems ma la sogs pa bzhi ni/ phyag rgya rnam pa bzhi ji skad du 'byung ba'i rim pa bzhin du/ mi 'khrugs pa la sogs pa'i sangs rgyas bzhi rnams kyi dam tshig gi phyag rgyar sbyar nas/tha ma'i phyag rgya lnga pa mdzub mo bskum pa de rtag pa'i dam tshig gi phyag rgyar 'chad pa'o/ /rtag pa dang por smos pa des go rims bsnor te bstan pa'i dgos pa brjod dgos na/ ji ltar 'di ltar ston par byed ce na/ 'di nyid las gzungs kyi dkyil 'khor la sogs par zhes bya ba la sogs pa gsungs te/de kho na nyid bsdus pa'i rgyud 'di nyid las 'byung ba'i gzungs kyi dkyil 'khor la sogs par rdo rje dbyings kyi dbang phyug ma dang / sems ma rdo rje ma la sogs pa'i phyag rgya lnga rnams go rims su bshad pa/rtag pa la sogs pa'i sangs rgyas lnga'i phyag rgya yin par bcom ldan 'das nyid kyis bstan pa ni/ sgrub thabs kyi skabs 'dir dgos pa ci yang med par khyed kyis go rims bsnor te bstan par 'dod pa'i dgongs pa de dag gis ni ma rig go zhes te/don ci yin ma rtogs so zhes pa'i tha tshig go/ /gzhan yang de ltar bshad na zhes pa gzhan yang khyed kyis de ltar bsnor te bshad par gyur na/ de kho na nyid bsdus pa chen po yo ga 'bum sde stong phrag brgya pa'i gzhung dang yang 'gal bar 'gyur te/ de las sangs rgyas kyi phyag rgya'i bye brag 'di ltar snang ste/rdo rje bcing ba bsdams nas su/ /zhes bya ba la sogs pa'i tshig gsungs te/ gal te 'dir rtag pa'i phyag rgya phyi ma'i lnga par dgongs par gyur na zhes pa gal te sgrub thabs 'dir rtag pa'i phyag rgya phyi nang gsungs pa de yin par 'dod na/las kyi phyag rgya'i mchog ces bya ba'i tshig 'di bshad par mi bya ste/ las kyi phyag rgya'i mchog ces bya ba 'di ni rdo rje las ma'i phyag rgya'i mtshan nyid de/ phyag rgya'i ming rdo rje las ma zhes gdags par mi rigs te/ ci'i phyir zhe na/ las ma'i phyag rgya brjod pa de ni bcom ldan 'das don yod grub pa'i rigs kyi dam tshig gi phyag rgyar bstan pa yin pa'i phyir na mi rigs so//de bas na sangs rgyas lnga'i dam tshig gi phyag rgya lnga po rnams rgyud las ji skad 'byung ba'i rim pa bzhin du sbyar bar bya ba yin par nges pas khyed de la the tshom skye bar ma byed cig ces pa'i don to//da ni ye shes kyi sems dpa' chen po bcu drug po rnams kyi dam tshig gi phyag rgya bshad pa de gang zhe na/ dang por shar phyogs kyi sems dpa' bzhi'i dam tshig gi phyag rgya ni/ dang por rdo rje sems ma nyid las zhes bya ba la sogs pa gsungs pa'o//lho phyogs kyi sems dpa' bzhi'i dam tshig gi phyag rgya ni rdo rje bcings pa las mthe bong gnyis rtse mo can du byas te zhes bya ba la sogs pa gsungs pa'o/ /nub phyogs kyi sems dpa' bzhi'i dam tshig gi phyag rgya ni rdo rje bcings pa las mthe bong dang mdzub mo gnyis rtse mo can du byas te zhes bya ba la sogs pa gsungs pa'o//byang phyogs kyi sems dpa' bzhi'i dam tshig gi phyag rgya ni rdo rje bcings pa las mthe bong dang mthe'u chung ngos sbyar ba ni zhes bya ba la sogs pa gsungs pa'o/ /da ni lha mo brgyad kyi dam tshig gi phyag rgya bshad par bya ste/de la gsang ba'i lha mo rnams kyi dam tshig gi phyag rgya ni/ mthe bong gnyis rtse mo can du byas la snying gar gzhag ces bya ba la sogs pa gsungs pa'o/ /phyi'i mchod pa'i lha mo bzhi'i dam tshig gi phyag rgya ni/ rdo rje bcings pa kha thur du bstan te zhes bya ba la sogs pa gsungs pa'o//da ni sgo ba rnams kyi dam tshig gi phyag rgya ni/ rdo rje bcings pa'i mdzub mo g.yas pa lcags kyu lta bur byas zhes bya ba la sogs pa gsungs pa'o/ /dam tshig gi phyag rgya bsdus pa zhes pa ni/ rgyud kyi nang nas bkram pa dang / mi gsal bar 'byung ba de gsal bar byas te phyogs gcig tu bsdu ba ni bsdus pa'o//dam tshig gi phyag rgya bcing ba'i thabs bshad zin to/ /da ni las kyi phyag rgya bshad par bya ste/ de la las kyi phyag rgya zhes pa ni de bzhin gshegs pa la sogs pa mnyes par bya ba dang / sems can ji snyed pa rnams yongs su smin pa dang / grol bar bya ba'i phrin las mdzad pa ni las kyi phyag rgya zhes bya'o/ /sngar bshad pa'i rdo rje khu tshur gyi dam tshig gi phyag rgya gnyis su phye la zhes pa ni/ ji skad du gong du bshad pa'i rdo rje khu tshur gyi dam tshig gi phyag rgyar bstan pa de las so sor phral la/lag pa gnyis rdo rje khu tshur so sor bcing bar bya ste/ de la gdod so so'i las kyi phyag rgya bcing bar bya'o/ /ci'i phyir zhe na/ ji skad du rgyud las dam tshig gi phyag rgya thams cad ni rdo rje bcing ba pad+ma bsdams pa las byung la/ las kyi phyag rgya thams cad ni rdo rje khu tshur so sor phral ba las 'byung ngo zhes gsungs pa'i gtan tshigs gang du bshad pa'i phyir ro//de la dang por de bzhin gshegs pa lnga po rnams kyi las kyi phyag rgya ni/ skyil mo krung bcas la g.yon pa rdo rje khu tshur snying ga'i phyogs su reg par byas te zhes bya ba la sogs pa gsungs pa'o//da ni sems dpa' chen po bcu drug po rnams kyi las kyi phyag rgya bshad par bya ste/ dang por shar phyogs kyi sems dpa' bzhi'i las kyi phyag rgya ni/ rdo rje khu tshur glo g.yon par bzhag la zhes bya ba la sogs pa gsungs pa'o/ /lho phyogs kyi sems dpa' bzhi'i las kyi phyag rgya ni/rdo rje khu tshur gnyis rang gi dbang bskur ba'i gnas su bzhag la zhes bya ba la sogs pa gsungs pa'o/ /nub phyogs kyi sems dpa' bzhi'i las kyi phyag rgya ni/ rdo rje khu tshur g.yon pa snying gar gzhag la zhes bya ba la sogs pa gsungs pa'o//byang phyogs kyi sems dpa' bzhi'i las kyi phyag rgya ni/ /rdo rje khu tshur g.yon pa mdun du bkan te zhes bya ba la sogs pa gsungs so/ /da ni lha mo brgyad kyi las kyi phyag rgya bshad de/ de yang dang por gsang ba'i lha mo bzhi'i las kyi phyag rgya ni/ rdo rje khu tshur gnyis mtha' ltag gnyis su gzhag ces bya ba la sogs pa gsungs pa'o/ /phyi'i mchod pa'i lha mo rnams kyi las kyi phyag rgya ni/ rdo rje khu tshur gnyis kha thur du bstan te zhes bya ba la sogs pa gsungs pa'o/ /sgo bzhi'i las kyi phyag rgya ni/ rdo rje khu tshur g.yas pa'i mdzub mo lcags kyu ltar byas pas zhes bya ba la sogs pa gsungs pa'o//las kyi phyag rgya bcing ba bshad zin to/ /da ni chos kyi phyag rgya bshad par bya ste/ de la chos kyi phyag rgya zhes pa ni/ de bzhin gshegs pa rnams kyi bstan pa gzhag pa gsung rab yan lag bcu gnyis bsgrags shing bstan pa'i yi ge bkod pa la chos kyi phyag rgya zhes bya/de yang de kho na nyid bsdus pa las/ sangs rgyas rdo rje ye shes ni/ /zhes bya ba'i tshig gsungs te/ dper na rdzas kyi rdo rjes rdzas kyi rnam pa gzhan rnams 'joms pa dang 'dra bar/sangs rgyas kyi ye shes rdo rje lta bu nyon mongs pa thams cad 'joms par byed pa'o/ /rdo rje dbyings ni brtan byed pa'o/ /zhes pa ni don dam par rdo rje dbyings ni chos kyi dbyings yin la/ kun rdzob tu rnam par snang mdzad dang / shAkya thub pa'i ngo bo'o/ /badzra dz+nyA na zhes pa ni sangs rgyas de dag gi ljags la sku yongs su rdzogs par 'gyur ba ste sangs rgyas lnga char gyi chos kyi phyag rgya'o//da ni sems dpa' chen po bcu drug gi chos kyi phyag rgya bshad de/ dang por shar phyogs kyi sems dpa' bzhi'i chos kyi phyag rgya ni 'di dag ste/sa ma ya s+t+waM zhes pa ni dam tshig khyod ces bya ste gang zhe na/ dpal rdo rje sems dpa' la bya'o/ /a na ya swa zhes pa ni/ khug shig ces pa ste gang zhe na/ 'phags pa dang sems can 'gugs par byed pa ste rdo rje rgyal po/ a ho su kha zhes pa ni/ a la la ho zhes dam pa'i don te gang la zhe na/nyan thos kyi mya ngan las 'das pa'i bde ba lta bu ma yin/ thugs rjes su 'gro ba la chags pa'i bde ba chen po de la dam par byed pa rdo rje chags pa'o/ /sa zhes pa ni/ legs so legs so zhes 'byung ste gang zhe na/ 'phags pa mchod pa dang / 'gro ba'i don mdzad pa ste rdo rje legs pa'o//da ni lho phyogs kyi sems dpa' bzhi'i chos kyi phyag rgya bshad par bya ste/ su ma had staM zhes pa ni/ shin tu chen po'am rab tu chen po zhes 'byung ste gang zhe na/ thams cad la mnga' mdzad pa'i dbang chen po sbyin par mdzad pa ste/ rdo rje rin chen no//rU bo d+yo ta/ zhes pa gzugs gsal zhes 'byung ste gang zhe na/ nyi mas mun pa'i tshogs bcom nas/ gzugs kyi dngos po thams cad gsal bar byed pa bzhin ye shes kyi nyi mas ma rig pa'i tshogs bcom nas/ yang dag pa'i don gsal bar byed pa ste/ rdo rje nyi ma'o/ /ar+tha pra b+hA zhes pa ni/ don thob pa zhes 'byung ste/ gang zhe na/ yid bzhin gyi nor bu rin po che'i rgyal mtshan gyis bdag gzhan gyi re ba rdzogs par byed pa'i don thob par byed pa ste/ rdo rje rgyal mtshan no/ /ha ha hUM ha zhes pa ni/ bzhad pa zhes zer te/ gang zhe na/ gzhan dag sangs rgyas pa thob pa'i rgyu la dgongs nas bzhag pa ste/ rdo rje bzhad pa'o/ /da ni nub phyogs kyi sems dpa' bzhi'i chos kyi phyag rgya bshad par bya ste/ sarba ka ri zhes pa ni/ thams cad byed pa zhes 'byung ste/ gang zhe na/ 'gro ba sems can gyi don mdzad na yang / pad+ma 'dam gyis ma gos pa bzhin 'khor ba'i nyes pas mi gos la/ 'gro ba ji ltar 'dod pa bzhin don mdzad pa ste/ rdo rje chos so/ /duHkhats+tshe da zhes pa ni/ gcod byed ces 'byung ste/ gang zhe na/ shes rab kyi ral gris sdug bsngal thams cad gcod par byed pa ste/ rdo rje rnon po'o//bud+d+ha bod+hi zhes pa ni/ sangs rgyas dang byang chub ces 'byung ste/ sems bskyed ma thag tu chos kyi 'khor lo bskor ba'i sgo nas 'gro ba mtha' dag dang / sangs rgyas dang byang chub sems dpa'i go 'phang la 'jog par byed pa ste/ rdo rje 'khor lo'o/ /pra ti sha pA da zhes pa ni/ sgra brnyan brag ca zhes 'byung ste/ gang zhe na/ rdo rje tshig gis gsung rab yan lag bcu gnyis kyi sgra mthar stong pa'i tshul du sgrogs pa ste/ chos thams cad gzugs brnyan dang brag ca lta bu'i tshul du ston pa ste/ rdo rje smra ba'o/ /da ni byang phyogs kyi sems dpa' chen po bzhi'i chos kyi phyag rgya bshad par bya ste/su ba shi s+t+waM zhes pa ni/ shin tu dbang bsgyur zhes 'byung ste de bzhin gshegs pa thams cad mnyes pa dang sems can rnams smin cing grol bar 'gyur ba'i las mdzad pas/ thams cad dbang du gyur pa ste/ rdo rje las so/ /ni r+b+ha ya s+t+waM zhes pa ni/mi 'jigs pa zhes 'byung ste/ dper na go cha bgos pa'i skyes bu la gzhan gyis 'jigs pa med pa bzhin du bdud la sogs pa bar du gcod pa rnams kyis mi 'jigs pa ste/ rdo rje go cha'o/ /sha hUM b+hak+Sha zhes pa ni/ dgra zo shig 'byung ste/ gang zhe na/ lha'i bu'i bdud la sogs pa bdud bzhi dang /rtsa ba'i nyon mongs pa dang / nye ba'i nyon mongs pas bsdus pa thams cad gtan nas ma lus par bya ba ni/ zo shig ces pa'i don te zos pa nyid zad par byed pa yin pa'i phyir ro/ /sarba sid+d+ha zhes pa ni/ don thams cad grub ces 'byung ste/ sor mo rnams gcig tu bsdus na khu tshur du gyur pa bzhin du/ sku gsung thugs kyi yon tan gcig tu bsdus pa ni/ bsod nams kyis brgyan pa'i sku ste rdo rje khu tshur ro/ /da ni gsang ba'i lha mo rnams kyi chos kyi phyag rgya bshad par bya ste/ ma tA ra tI zhes pa ni/ dga' ba mo zhes 'byung ste gang zhe na/'jo ba dang steg pa'i tshul gyis sangs rgyas dang byang chub sems dpa' rnams kyi rnam par grol ba'i dbang po g.yo zhing dgyes pa skyed pa ste/ lha mo sgeg mo'o/ /rU ba sho d+he zhes pa ni/ mdzes pa zhes 'byung ste gang zhe na/ me tog dang rin po che'i phreng bas 'phags pa la mchod pa bdag gzhan gyi lus brgyan pas mdzes par byed pa ste phreng ba mo'o//shro ta mye shug khye zhes pa ni/ snyan pa thos zhes 'byung ste/ gang zhe na/ dbyangs yid du 'ong ba dag don dang ldan pa'i tshig tu sgrogs pas/ 'phags pa mchod pa dang 'gro ba smin par byed pa ste/rna ba'i dbang pos thos pa ni snyan pa skye ba ste/ lha mo dbyangs mkhan ma'o/ /sarba pU dze zhes pa ni/ mchod pa thams cad bdag ces gang zhe na/ phyi nang gi mchod pas 'phags pa mnyes pa dang / sems can tshim par byas pas bdag don du gyur par ston la/rnam gcig thogs med ces bya ste/ bdag gzhan gyi don brgya lag par mdzad pas thams cad la thogs pa med pa ste lha mo gar mkhan ma'o/ /da ni phyi'i mchod pa'i lha mo rnams kyi chos kyi phyag rgya bshad par bya ste/ si h+la da ni zhes pa ni gcig tu grub pa zhes sam/tshim byed ces 'byung ste/ tshul khrims kyi dri phun sum tshogs pa'i ngo bo bdug spos kyi sprin chen pos lus yongs su tshim par byas nas/ bde ba gcig tu grub pa'am/ yongs su tshim par gyur pa ste lha mo spos me ma'o/ /pha la ga mo zhes pa ni 'byung ba zhes bya ste/gang 'byung zhe na/ me tog las 'bras bu 'byung ba bzhin du rgyu rnam par dkar ba'i phyogs yongs su dag par spyad pa la 'bras bu mya ngan las 'das pa 'byung ba ste/ lha mo me tog ma'o/ /su te dzA gri zhes pa ni rab tu gzi brjid dam/ gzi brjid 'bar ba zhes 'byung ste/gang zhe na/ nyi ma la sogs pa ni rang bzhin gyis 'od dang ldan pas gzi brjid can du gnas pa bzhin du ye shes kyi sgron ma chen pos thams cad la snang bar byed pa'i gzi brjid dang ldan pa ste/ lha mo mar me ma'o/ /su gan+d+ha gi zhes pa ni rnam par dag byed ces 'byung ste gang zhe na/tshul khrims kyi dri phun sum tshogs pas yongs su tshim par byas pas tshul khrims nyams pa la sogs pa'i skyon dang bral nas rnam par dag par gyur ba ste lha mo byug pa ma'o/ /da ni sgo srung bar byed pa bzhi po rnams kyi chos kyi phyag rgya bshad par bya ste/ a ya hi dza zhes pa ni/'gugs byed ces bya ste gang zhe na/ 'phags pa dang sems can rnams rang rang gi gnas nas 'gugs par byed pa ste rdo rje lcags kyu ma'o/ /a ya hi hUM hUM zhes pa ni bcug byed ces 'byung ste gang zhe na/ gang gis 'dod pa'i dngos po de de la 'dzud par byed pa ste rdo rje zhags pa ma'o//he sbo Ta baM zhes pa ni yongs su 'ching byed ces 'byung ste gang zhe na/ sgrub pa dang bsgrub bya gnyis su med par 'ching ba ste rdo rje lcags kyu ma'o/ /g+haM Ta a a zhes pa ni 'bebs pa'am dga' byed ces zer te gang zhe na/ sgrub pa la bsgrub bya'i dngos po phab nas dbang du byed pa'am/yongs su dga' ba skyed pa ste rdo rje 'bebs pa'o/ /de bzhin gshegs pa la sogs pa'i chos kyi phyag rgya bsam pa bshad zin to/ /de yan chad du phyag rgya rnam pa bzhi bcing zhing bsgom pa'i thabs bshad zin to/ / da ni lha de dag la mchod pa dang bzlas brjod kyi sgo nas mnyes par bya ba'i thabs dang rim pa bshad par bya ste/ gang zhe na/ 'di ni de bzhin gshegs pa las bya ba la sogs pa ste/ de bzhin gshegs pa la sogs pa zhes pa ni/ bde bar gshegs pa lnga'o/ /sems dpa' zhes pa ni/sems dpa' chen po bcu drug la sogs pa ma lus pa sdud par byed do/ /snying pos bzlas brjod byed pa ni gong du gsungs pa'i lha de dag so so'i snying po gang yin pa rnams so/ /dkyil 'khor chen po ni rdo rje dbyings kyi dkyil 'khor ro/ /phyag rgya chen po la sogs pa zhes pa ni/phyag rgya chen po bzhi'o/ /mchod pa'i cho ga rgya chen por 'dod pa zhes pa ni rdo rje dbyings kyi dkyil 'khor yongs su rdzogs shing rgyas par bsam nas de dag mchod cing mnyes par 'dod pa rnams la ni rdo rje dbyings kyi dkyil 'khor chen po'i skabs su gsungs pa'i phyag rgya bzhi bstan pa yin no//rgol ba pa na re/ 'o na 'dir ni phyag rgya bzhi pa 'di dag kun sbyar dgos pa yin la/ smras pa/ de bas na gang dkyil 'khor chen por bkod pa'i zhes bya ba la sogs pa ste/ dkyil 'khor chen por bkod pa'i de bzhin gshegs pa lnga dang / sems dpa' dang lha mo la sogs pa kun mchod pa'i rnal 'byor ba des de dag mchod par 'gyur na/ lha de dag la so sor phyag rgya bzhi dang ldan par byin gyis brlab dgos pas na/ phyag rgya bzhi po'i rnam pa ji snyed 'byung ba de dag sbyar dgos so/ /'o na gzhan dag la ni 'di ltar gsungs pa'i phyag rgya 'di dag sbyar dgos sam zhe na/smras pa/ gang yang phyag rgya bzhi'i dkyil 'khor la sogs par bkod pa zhes bya ba la sogs pa dag ste sogs kyi sgras ni/ phyag rgya gcig pa'i dkyil 'khor sdud par byed pa ste/ de dag la mchod pa dang mnyes par byed 'dod pa la ni phyag rgya bzhi po'i rnam pa 'di kun mchod pa'i tshe sbyar mi dgos so//de bas na phyag rgya bsdus pa 'di las zhes pa ni/ phyag rgya bzhi'i rnam pa bstan pa 'di dag phyag rgya bzhi pa dang gcig pa'i dkyil 'khor la kun sbyar bar mi bya'o/ /so sor brtags la nges pa gang yin pa de so so la sbyar bar bya'o//rgol ba pa na re/ ci phyag rgya 'di dag gcig gis kyang kun byin gyis rlob la/ kun kyang gcig gis byin gyis rlob tu mi rung ngam/ ci'i phyir 'di ltar bstan zhe na/ phyag rgya 'di rnams ni zhes bya ba dag ste/ phyag rgya bzhi pa dang gcig po dag gang gis phyag rgya gang yin pa des de la byin gyis rlob par mdzad kyi thams cad kyis ni ma yin no//rgol ba pa na re/ 'o na lha yang gang gi ngo bo yin pa de la mchod par bya ba yin gyi rnam pa gzhan la ma yin nam zhe na/ khyad par du ni phyag rgya bzhi dang zhes bya ba la sogs pa dag gsungs te/ de'i khyad par ni phyag rgya bzhi pa dang /gcig pa'i dkyil 'khor bsam gtan du byas sam bris nas mchod par byed na/ rdo rje dbyings kyi lha ji snyed pa thams cad der bsam ste mchod par bya'o/ /rgol ba pa na re/ ci'i phyir de ltar bsam par byed ce na/ phyag rgya bzhi pa dang / phyag rgya gcig pa'i sbyor ba dang bri ba ni rdo rje dbyings kyi dkyil 'khor chen po mdor bsdus pa'i mtshan nyid do//sogs pa'i sgras ni khams gsum rnam par rgyal ba la sogs pa'i dkyil 'khor lhag ma rnams kyang de bzhin du shes par bya bar ston pa'o/ /de bas na phyag rgya bzhi pa dang / gcig pa'i dkyil 'khor na gnas pa'i gzugs gang yang rung ba la yang lha tshang bar bsams te/ phyi nang gsang ba'i mchod pa kun bya'o/ /rgol ba pa na re/ 'o na de ltar mos pa'i bsam gtan gyis mchod pa bya ba des 'grub par 'gyur zhe na/ de ltar byas na 'di ni de bzhin gshegs pa thams cad ces bya ba la sogs pa gsungs te/de ltar byas na zhes pa ni gong du bstan pa ste/ mchod pa'i dam tshig ces pa ni las kyi dkyil 'khor las gsungs pa gzugs gcig la yang de bzhin gshegs pa thams cad kyi rang bzhin bsams te mchod pa byas na sangs rgyas thams cad la mchod pa byas pa ni mchod pa'i dam tshig ste/de las mi 'da' bas ni de ltar brjod do/ /de bas na khyod kyis zhes pa ni/ de bzhin gshegs pas 'khor la gsungs pa'i tshig ste/ slob dpon gyis slob ma la bsgo ba'o/ / nyin re mchod pa bcu drug ces pa ni/ phyi dang / nang dang / gsang ba dang / bdag dbul ba ste bcu drug po 'di rnams bya'o zhes las kyi dkyil 'khor las gsungs pa'i don de 'dir byas par 'gyur ba yin no/ /gang yang rung ba'i rim pas zhes pa ni/ phyag rgya bzhi pa dang / phyag rgya gcig pa gang 'dod pa'o//de bzhin gshegs pa la sogs pa zhes pa ni lha tshang bar sdud pa'i tshig go/ /gtso bor gyur pa mnyes par byed pa'i lha zhes pa ni de bzhin gshegs pa'i gtso bo'o/ /phyag rgya gcig pa na ni bdag nyid gang bsgom pa de gtso bo'o/ /rnam gcig gang yang rung ba la bdag gang mos par gyur pa de gtso bo bas so//byin gyis brlab pa sngar byas te zhes pa ni lha gang dmigs pa de la sngar phyag rgya bzhis byin gyis brlab pa byas la/ de nas mchod pa dang / bzlas brjod kyis mnyes par bya ba'i cho ga bya'o/ /rgol ba pa na re/ 'o na dkyil 'khor gyi bsam gtan mngon du bya ba'i thabs ni/de ltar byar rung na mchod par gsungs pa'i rnam pa 'di dag re re la cig car dbul lam/ 'on te so sor dbye ba'i rnam pas sbyar te dbul ba yin zhe na/ mchod pa yang rgyud 'dir bya ba la sogs pa dag gsungs te/ de kho na nyid bsdus pa'i rgyud 'dir mchod pa bcu drug tu bstan pa dag tshang bar mchod dgos pa yang yod la/kha cig da ltar mi mos pa rnams la mi dgos pa yang yod pas 'dul ba'i skye bo de lta bu'i dbang gis bsdus pa dang / rgyas pa du mar bstan te/ de bas na skabs 'dir ni zhes pa/de kho na nyid bsdus pa'i rgyud kyi skabs 'dir ni bri ba dang bsam pa gang yang rung ba'i bcom ldan 'das la mchod pa rnam pa bzhi'am bcu drug dang / phyi'i mchod pa kun gyis mchod par bya'o zhes bcom ldan 'das nyid kyis gsungs so/ /rgyud phyi ma las ni/ de bzhin gshegs pa rnams la ni bdug spos la sogs pa rnam pa bzhis mchod la/de bzhin gshegs pa'i rigs kyi sems dpa' rnams la ni gsang ba'i mchod pa bzhi dang / bdag dbul ba la sogs pa bcu drug gis mchod par gsungs so/ /rgyud phyi ma'i yang phyi ma las ni/bdug spos la sogs pa'i mchod pa bzhis mchod kyi/ gsang ba'i mchod pa ni mi rigs par bshad de/ lta ba ngan dang chags med pa/ gsang ba 'di ni mi rigs so/ /zhes gsungs te/ ci'i phyir bdug pa la sogs pas mchod cing / gzhan gyis mchod par mi byed ce na/lta ba ngan pa dang / 'dod chags dang bral ba dag la gsang ba'i mchod pas mchod par gyur na rab tu mi dad par gyur pa'i phyir 'di ltar bstan to/ /gnas ji lta ba bzhin du zhes pa ni/ bdag nyid gar dga' ba'i gnas so/ /theg pa chen po mngon par rtogs pa las gsungs pa zhes pa ni/kha cig na re/ rgyud kyi mtshan 'di ltar 'dogs pa gcig gi nang nas 'byung ba'i mtshan brgya rtsa brgyad pas bstod zer ba yang yod na/ de kho na nyid bsdus pa'i rgyud 'di nyid du shes par bya'o/ /phyag rgya bzhi pa'i sbyor bas phyag 'tshal zhing zhes pa ni/sgrub pa po bdag nyid rnam pa bzhi dang ldan par bsgom pa'i sbyor bas phyag 'tshal zhing bdag dbul ba la sogs pa'i mchod pas mchod par bya ba ste/ sngags rnam pa bzhi po 'dis zhes pa ni/ oM sarba ta thA ga ta pu dzo pas+thA na AtA nAM nir+yA ta yA mi zhes phyag 'tshal ba'i sngags su brjod pa 'di'o//rgol ba pa na re/ 'di ltar lta ba ngan pa dang / chags pa dang bral ba ni mu stegs pa dang / nyan thos dag yin na de dag ni dman par gyur pa dang / phyi rol pa'i dngos po pa theg pa 'di la 'jug par mi rigs na/ 'di ltar ston pa ci'i phyir zhe na/smras pa/ de dag la ni mi bya'o/ /'dir ni de kho na nyid bsdus pa las gsungs pa'i rim pas phyag rgya bzhi dang ldan par bsgom mi nus pa de dag lta ba ngan zhing chags pa med par dgongs pa ste/ ci'i phyir zhe na/ phyag rgya chen po la sogs pa dang /byang chub kyi sems la 'dzin cing chags par mi byed pa'i phyir te/ de dag ni bzlas pa 'ba' zhig nan tan byas pas 'grub par 'dod pa de dag nyid kyis ni bdug pa la sogs pa phyi'i mchod pa nyi tshe bya bar mngon gyis/ 'on kyang phyag rgya bzhi dang ldan par bsgom pa rnams kyis kyang /bdug spos la sogs pa'i phyir mchod pa rnams bya'o/ /de ltar yang cis mngon zhe na/ 'di ltar rtsa ba'i rgyud las/ bya ba la sogs pa gsungs so/ /rgol ba pa na re/ 'o na mchod par bya ba de dag gi rim pa 'on te cig car du bya bar 'dod ce na/ smras pa/de la dang por mchod pa'i cho ga rdzogs par 'dod pas zhes bya ba la sogs pa gsungs te/ dang po nas mchod pa 'ba' zhig brtsam pa ma yin gyi/ bcom ldan 'das kyi spyan sngar sdom pa sngar mnos su zin kyang / sems brtan par bya ba'i phyir yang nas yang du mnod par bya ste/de la sems brtan par bya ba ni sdom pa mnos pa'i sems de mi rnyings shing dran pa rtse gcig par 'gyur bar bya'o/ /de la sdom pa mnod pa'i rim pa ni 'di'o zhes pa ni de bzhin gshegs pa lnga po rnams kyi sdom pa rim par gzung ba'i tshig brjod pa ste/ de la dang por rigs thams cad kyi sdom pa gsungs pa/ji ltar dus gsum mgon po rnams/ /zhes pa ni/ dus gsum du 'byung ba'i de bzhin gshegs pa rnams kyis ni sems can rnams yongs su skyob par mdzad pas na mgon po zhes bya ste/ ji ltar mdo sde las kyang / mgon med pa rnams kyi mgon/ skyabs med pa rnams kyi skyabs/ dpung gnyen med pa rnams kyi dpung gnyen/ 'khra sa med pa rnams kyi 'khra sa zhes bya ba la sogs pa rgya cher gsungs pa'i phyir ro/ /de bzhin gshegs pa lnga'i sdom pa gzung ba la dang por de bzhin gshegs pa rtag pa'i sdom pa ni/sangs rgyas rnal 'byor sdom pa la/ /zhes bya ba la sogs pa'o/ /rdo rje rigs kyi sdom pa gzung ba ni/ rdo rje rigs mchog chen po la/ /zhes bya ba la sogs pa'o/ /rin po che'i rigs kyi sdom pa gzung ba ni/ rin chen rigs mchog chen po yis//zhes bya ba la sogs pa gsungs so/ /pad+ma'i rigs kyi sdom pa ni/ pad+ma'i rigs can dag pa la/ /zhes bya ba la sogs pa gsungs so/ /las kyi rigs kyi sdom pa gzung ba ni/ las kyi rigs mchog chen po la/ /zhes bya ba la sogs pa'o//de nas sdom pa ji ltar mnos pa'i don grub par bya ba'i phyir zhes pa ni/ sdom pa ji ltar mnos pa de dag rdzogs shing mthar phyin par bya ba'i phyir bcom ldan 'das rnams la mchod pa dang / sogs kyis bzlas brjod la sogs pa'i las gzhan sdud par byed de/ de ltar rigs so zhes slob dpon sngar byung ba'i mkhas pa rnams kyis gsungs so/ /bdug spos la sogs pa mchod pa'i yan lag ces pa ni/ dri dang me tog dang byug pa la sogs pa'i phyi rol gyi rdzas kyi ngo bo rnams ni gang du gsungs pa'i mchod pa de dag gi yan lag tu gyur pas na yan lag ces bya ste/mchod pa'i yo byad ji ltar bshams pa rnams byin gyis brlab pa la sogs pa byas nas rim par dbul bar bya ste/ byin gyis brlab pa'i cho ga chos nyid rnam par dag pa'i sngags oM swa b+hA wa bi shud+d+haHsarba d+harmA zhes bya ba'am/ las thams cad pa'i snying po'o//sarba ka ri zhes bya ba rigs thams cad mchod par mdzad pa'i sngags 'di gnyis gang yang rung ba brjod pas yo byad de dag yongs su dag par byas te/ bdug pa la sogs pa'i phyi'i lha mo rnams kyi snying po dang / de dag gi las kyi phyag rgya dang ldan par byas pas de dag gtugs te rgyal ba sras dang bcas pa rnams la zhes dang gus pa bskyed de/so so'am yang na cig car du mchod par bgyi'o zhes tshig tu brjod cing mchod par bya'o/ /de la mchod pa'i rim pa ni/ dang por bdug spos/ de'i 'og tu me tog /de'i 'og tu mar me/tha mar byug pa dbul bar bya'o/ /de dag gi bsam rgyud kyang ji skad du gsungs pa'i phyir lha mor brjod pa lta bu'i cha lugs la gnas pa 'jig rten gyi rdul snyed kyis yongs su mnyes par byed pa'i rdzas kyi rnam pa khyad par can 'di dag bzung nas 'dud pa'i tshul dang ldan par mchod par byed par brtag go//de nas de dag dngos su ma 'byor na yang de dag gi gzugs dbul lo/ /de yang thams cad du ma 'byor na/ lha mo de dag so so'i las kyi phyag rgya bcings te snying po dang ldan par brjod pas rab tu dri zhim zhing mchod gnas rnams kyi thugs su byon pa'i char gyis nam mkha'i khams thams cad bar mtshams med par khyab pas tshim par mos pa bya'o//rgol ba pa na re/ mchod pa'i rnam pa 'di dag dngos su bshams te/ mchod pas ni bsod nams kyi 'bras bu rgya chen po yongs su smin pa nyams su myong bar byed ces thos na/de dag ma 'byor na thabs 'di dag byas pas ji lta bur 'gyur zhe na/ 'di dag pas lhag pas kyang nges par dbul lo zhes bya ba la sogs pa gsungs te/ de dag gis dngos su mchod pa dang yon tan 'dra bar bshad do/ /de ltar mchod pa'i rjes la bstod pa ste/de la bstod pa'i mtshan nyid kun kyang mnyes par byed pa'i rgyur gsungs pa yin mod kyi/ khyad par du yang phyi ma'i yang phyi ma'i rgyud las gsungs pa'i mtshan brgya rtsa brgyad pas ni de bzhin gshegs pa rnams la bstod par bya'o/ /yang na de bzhin gshegs pa'i rigs kyi lha ye shes kyi sems dpa' rnams mnyes par byed par 'dod pa ni theg pa chen po mngon par rtogs pa'i nang nas 'byung ba'i mtshan brgya rtsa brgyad pas bstod par bya'o//de bzhin gshegs pa gtso bor byas/ /zhes bya ba ni/ gtsor de bzhin gshegs pa rnams smos la rang gi lha zhes pa rang gang bsgom zhing bsgrub pa'i lha dang /de'i 'khor du gyur pa rnams la bstod par bya'o/ /mtshan brgya rtsa brgyad 'di gnyis kyang / /zhes pa ni de bzhin gshegs pa rnams la bstod pa dang / de'i rigs kyi sems dpa' rnams la bstod pa rnam pa gnyis po 'di yang de kho na nyid bsdus pa'i rgyud de nyid las 'byung bar shes bar bya'o//da ni rang gi dgos pa yongs su grub par bya ba'i phyir rigs bzhi'i 'khor los sgyur ba bzhi la bstod cing phyag 'tshal bar bya ba ston te/ de la rgol ba pa na re/ ci de bzhin gshegs pa dang / de bzhin gshegs pa'i rigs kyi lha kun la bstod pa dang /phyag 'tshal bar byas pas dgos pa thams cad 'grub par mi 'gyur ram/ 'gyur ba zhig yin na ni de'i don kun du brjod par byas zin la/ gal te de ltar ma zin na ni kun gyis bya bar mi nus pa de 'di dag kho nas 'grub par 'gyur ram zhe na/smras pa/ de yang bden mod kyi/ 'on kyang lha de dag gis rnam par thar pa dad pa'i sgo nas gang la dmigs pa des de bzhin du gang 'dod pa 'grub par byed pa'i phyir 'di ltar bstan te/ gang zhe na/ skabs 'dir yang rang gi rgyud kyi dam tshig ces bya ba la sogs pa gsungs te/rang gi rgyud kyi dam tshig ces pa ni/ bdag nyid dam tshig sems dpar bsgyur ba la bya ste/ zil gyis mi non cing zhes pa ni bdag nyid dam tshig sems dpa' de gzhan gyi zil gyis mi non par bya ba'i phyir/ ma 'khrug pa'i rigs kyi 'khor los sgyur ba'i dpal rdo rje sems dpa' la phyag bya ba dang /de bzhin du chos kyi rgyal por dbang bskur ba thob par bya zhes pa ni/ rin po che'i rigs kyis ni dbang bskur ba'i phrin las mdzad pa ste/ 'jig rten dang 'jig rten las 'das pa'i chos thams cad la mnga' mdzad pa dang / dbang bsgyur ba'i bdag nyid chos kyi rgyal po chen po de bzhin gshegs pa rnams kyis dbang bskur ba thob par bya ba'i phyir dang /zab cing rgya che ba'i mdo sde bshad pa zhes pa ni mdo'i sde la sogs pa gsung rab yan lag bcu gnyis sam/ shes rab kyi pha rol tu phyin pa la sogs pa lung dang rigs pa'i chos thams cad gzhan la 'chad par byed nus pa'i mthu bdag la bskyed par bya ba'i phyir dang sems can thams cad kyi don bya ba'i mthu zhes pa ni/khams gsum gyi sems can rnams la ji ltar phan pa bzhin du don bya ba'i mthu grub par bya ba'i phyir rigs bzhi'i 'khor los sgyur ba 'di dag la phyag 'tshal bar bya ste/'og nas 'byung ba'i tshogs zhes pa ni de dag la de ltar phyag bya ba'i sngags dang phyag rgya 'og nas 'byung ba'o/ /mchod pa sngar bya zhing zhes bya ba ni dang por phyag rgya bzhis sngar phyag byas la de nas rang gi lus dbul te de nas dgos pa'i don bsam pa de grub par gsol ba gdab po//rgol ba pa na re/ ji phyag rgya chen po dag gong du bstan pa'i rim par bstan cing yon tan gyi nus pa yang brjod par byas zin na/ yang 'dir ston par byed pa ci la dgos pa'i phyir ston par byed ce na/ smras pa/ 'dir phyag rgya bzhi'i spyor zhes bya ba la sogs pa gsungs te/ 'dir phyag rgya bzhir brjod pa ni gong du smos pa de dag la ni mi bya ste/ rdo rje thal mo brkyang ba la sogs pa lus kyi gnas bzhir gzhag pa'i mtshan du bstan pa la bya ste/ 'dir bstan pa ni byin rlabs bzhi po dag thob par 'dod pa'i phyir 'di ltar bstan to//'dir rdo rje thal mo brkyang ste zhes pa ni/ lag pa g.yas g.yon gnyis la zla ba'i dkyil 'khor gnas pa'i sbyor ba byas la/ de dag gi steng du yang hUM las gyur ba'i rdo rje che phra gnas par brtags nas thal mo sbyar ba ni rdo rje thal mo zhes bya ste/rdo rje thal mo ni ye shes lnga'i rang bzhin te/ de nyid sbyar ba ni dbyings dang ye shes sam thabs dang shes rab kyi rang bzhin du rig par bya'o/ /brkyang ba ni ye shes lnga po de'i 'od zer gyis phyogs bcu khyab pa'am/ rnam gcig dbyings dang ye shes dbyer med pa'i don gyis 'khor ba las thag bsrings par bstan pa'o//sngags 'di brjod cing lus thams cad kyis phyag bya'o zhes pa ni lus yan lag dang bcas pas 'dud pa bskyed cing / dag gis sngags sgra dag cing gsal bar brjod do/ /oM zhes pa ni skye ba med pa dang / 'tshe ba med pa dang / stong pa nyid kyi don du ston to/ /sarba ta thA ga ta zhes pa ni/ de bzhin gshegs pa thams cad ces bya'o/ /pU dzo zhes pa ni pU dza zhes pa'i don to/ /u pas+thA na ya zhes pa ni gong gi sna ru'i don gyis u pa zhes bya ste nye ba'o/ /pas+thA ni zhes pa ni gnas pa'o//A taM naM zhes pa ni bdag nyid kyi lus so/ /nir+yA ta yA mi zhes pa ni/ 'bul bar dam bca' ba ste/ mdor na de bzhin gshegs pa thams cad mchod pa nye bar gnas pa'i phyir bdag nyid kyi lus 'bul bar dam bca' yis zhes pa'i don to/ /sarba ta thA ga ta zhes pa ni de bzhin gshegs pa thams cad do//badzra swa twa zhes pa ni rdo rje sems dpa'o/ /a g+hiShA naM zhes pa ni/ bdag lhag par brtan par byin gyis rlobs shig pa ste/ mdor na de bzhin gshegs pa thams cad rdo rje sems dpar bdag lhag par brtan par byin gyis rlobs shig pa'i don to//sngags phyi ma'i don yang rang rang gi sgra zlos pa'i rang gnyer gyis de bzhin du rig par bya'o/ /rgol ba pa na re/ slob dpon gzhan dag na re ni kha nub phyogs su blta ba la sogs pa'i rim gyis langs shing phyag 'tshal ba dang sngags brjod par bya zhes zer na/ 'dir de dang mthun par mi ston pa ci'i phyir zhe na/ gzhan dag de skad zer ba yod mod kyi/ 'on kyang ting nge 'dzin gyi dkyil 'khor bsam gtan gyis gsal bar brtags pa la/ yid kyis phyag 'tshal bar byed kyi/ rdzas kyi ngo bo mdun du bzhag pas mchod pa la langs 'dug gis bskor bar bya ba lta bu ma yin pas/bdag gis ni de ltar yang mi 'dod pas 'di bzhin du bris te/ nyes pa dang mchog pa med do/ /rgol ba pa na re/ sngags bzhi po 'di dag kyang sgrub thabs gzhan gyi gzhung las dang por ting nge 'dzin gyis bsgrub par bya ba'i dgos pa de yongs su rdzogs pa thob par bya ba'i phyir dang por bya dgos zhes zer na 'dir 'di'i skabs su ston pa ci'i phyir zhe na/smras pa/ gzhan dag de ltar smra ba de mi bden pa ma yin pas/ bdag gis kyang don de mthun par 'dod mod kyi/ 'on kyang sgrub thabs kyi skabs su 'di ltar sbyar yang ting nge 'dzin nyams su len pa rnams kyis dang por bya ba yang bkag pa med do//gnyis su na gong du ting nge 'dzin gyi bsam gtan mngon du byas pa'i dus de ni 'di'i bsgrub par bya ba'i don te/ de'i skabs su thob par gyur na legs/ gal te der sngon thob par ma gyur na 'di ltar byas pas thob par 'gyur la/gal te gong du thob par gyur du zin kyang / 'di ltar phyi nas byas pas de nyid brtan zhing byin dang ldan pa'i nus mthu can du mdzad pa'i phyir 'di ltar bstan zhes so/ /mchod pa bcu drug gi lha mo'i rig sngags kyis kyang de bzhin du mchod par bya'o//rgol ba pa na re/ ci rtag tu mchod pa'i rnam pa 'di dag gis gnas skabs thams cad du mchod par 'byung ba de bzhin gshegs pa rnams dang de'i rigs rnams la mchod pa ltar rab tu bsod nams che bar 'gyur ba'i gtam gleng ba thos na/ bdag nyid la de bzhin gshegs pa'i yon tan gyi ngo bor gyur pa'i mchod pa 'di dag gis mchod cing brjod pa 'gal ba med par mngon pas ni/ de ltar bstan pa yin grang na/ 'bras bu mngon du gyur pa thob pa ci yang yod par 'gyur ba yin nam zhe na/ de ltar byas na ji ltar spyan drangs pa'i bcom ldan 'das dang zhes bya ba la sogs pa gsungs te/mchod pa de dag byas na rang bzhin gyi dkyil 'khor na bzhugs pa'i bde bar gshegs pa sras dang bcas pa rnams lhun gyis grub pa'i gnas nas spyan drangs pa dang / bdag rnal 'byor pa zhes pa/ rnal 'byor pa bdag nyid dam tshig sems dpa'i bsam gtan gyi rnal 'byor mngon du byas pa gnyis yul gcig la spyod pa yin par dgos pa nye bar bzhag nas/sems mthun pa'i sgo nas dngos grub 'dod pa stsol bar mdzad do/ /yul ni lha mo bzhi po dag ste de la gnyis kas spyod pa rnam pa mthun par dgongs pa'o//rjes su chags pa zhes pa ni mthun par gzigs nas gcig la gcig chags shing gtong mi phod par gyur nas/ dngos grub gang 'dod pa de rang bzhin gyis stsol bar mdzad do/ /ji ltar yul bzhi ldan gyur na/ /zhes pa ni/ lha dang bdag gnyis ka'i thun mong du gyur pa'i yul de dang ldan par bya'o//rdo rje sems dpa' bsgrub par bya/ /zhes pa ni yul de bzhin dang ldan pas de bsgrub par byas na 'grub par 'gyur bas de ltar bya ba yin gyis/ gzhan gyis mi 'grub par ston to/ /de nyid bskul bas myur ba ru//zhes pa ni/ yul bzhi po de nyid kyis bskul nas/ /gdan du bab pa bzhin du gyur nas myur bar rjes su chags par byas nas myur du 'grub par 'gyur bas/ rjes su chags nas myur du 'grub/ /ces gsungs so/ /rgol ba pa na re/ de ltar byas pas de kho na 'ba' zhig gi dngos grub 'grub par zad kyi/gzhan rnams kyis ni 'grub par mi 'gyur ram/ de lta na ni gzhan rnams kyis thabs ji ltar byas pas 'grub par 'gyur/ de ltar ma yin na ni 'di kho na rjod par byed kyi/ gzhan rnams kyis mi brjod pa ci'i phyir zhe na/ smras pa/ rdo rje sems dpa' zhes bya ba 'di ni nye ba'i mtshan nyid kyi tshig ste zhes bya ba la sogs pa gsungs te/ 'di ltar brjod pa ni thams cad kyi sgrub pa nye bar mtshon pa'i tshig ste/ de ni byang chub sems kyi rang bzhin thams cad kyi bdag nyid pas bsgrub pas yongs su mnyes par bya ba'i sems dpa' chen po de dag thams cad kyang rdo rje sems dpa' de las gyur pa yin pa'i phyir sems dpa' gzhan ji snyed pa rnams kyang rdo rje sems dpa' de'i ngo bo'am mtshan nyid du gzung ste/de bas na thams cad la yang tshul de bzhin du bsgrub par bya'o/ /rgol ba pa na re/yul gzugs sgra la sogs pa rnams ni thams cad du 'ching ba'i bdag nyid can du brjod pa yin na/ 'di dag la spyad pas de bzhin du 'gyur du rung ngam zhe na/ smras pa yul bzhi por brjod pa ni de dag gi ma yin gyi 'di dag kho na la shes par bya ste/ gang zhe na/ de la rdo rje lA s+ye ni/ /zhes bya ba la sogs pa gsungs te/ byang chub kyi sems 'dod pa'i dga' ba'o zhes pa ni/ 'khor ba dang mya ngan las 'das pa gang gi mthar yang mi gnas par gyur pa'i byang chub sems so/ /gzungs la sogs pa rnam par grol/ / zhes pa ni/ gzungs kyi sgo ni rnam pa bzhi ste/ bzod pa thob pa'i rgyur gyur pa'i gzungs dang sngags kyi gzungs dang / chos kyi gzungs dang / don gyi gzungs so/ /sogs kyi sgras ni dpa' bar 'gro ba'i ting nge 'dzin la sogs pa'i sgo rnams sdud par byed pa'o//dam pa'i chos 'chad pa'i rang bzhin no zhes pa ni/ mdo sde la sogs pa lung dang rigs pa'i chos ston pa'i mtshan nyid do/ /sems can gyi don bya ba yang ston la 'di bzhin du yang brjod cing mi mthun pa'i rnam par ston pa'i tshig smra ba ci'i phyir zhe na de dag kyang rnal 'byor gyi tshul kha cig la mi gnang bar bstan pa'i phyir ro zhes gsungs so//gang las she na/ rdo rje rtse mo la sogs pa theg pa chen po mngon par rtogs pa las gsal ba nyid du gsungs te/ dgongs pa 'di dag thams cad ces pa ni spyad do zhes bstan pa yod kyang mi gnang bar 'byung bar glengs pa'i rnam pa de dag go//ji skad du gsungs she na/ byang chub sems 'dzin gyur nas su/ /zhes pa ni/ ji skad du rang gis sgrub cing bzung ba dang don du gnyer bar bya ba'i lhag pa'i lha gang yin pa'am/ dkon mchog gsum po dag ni thams cad kyi nang na mchog dam pa bas de dag mchod cing rten par byed kyi/de las gzhan pa rnams mchod pa dang rten par mi byed pa'o/ /khyim pa'i tshul du gnas nas ni/ /zhes pa ni/ sgrub pa po khyim pa'i tshul du gnas nas yang khrims lnga po de dag bsrungs la rig sngags dang gsang sngags bsgrub par bya'o//rig 'dzin rang gi sdom pa'o/ /zhes pa rig 'dzin rnam pa mang po dag tu brjod pa yang yod mod kyi/ 'on kyang 'dir ni gsang sngags sam rig sngags kyi sgrub pa po nyid la bya ste ci'i phyir zhe na/ de'i rigs yongs su 'dzin par byed pas de skad bya ste/de'i sdom pa gsum po 'di yang yin mod kyi/ 'on kyang bdag nyid gang la zhugs pa'i gzhung de las ji skad gsungs pa'i sdom pa de dag bsgrub par bya'o/ /gtsang zhing gos kyang gtsang ba yin/ /zhes pa ni/ rnam par mi rtog pa'i ting nge 'dzin dang ldan pas rtog pa las dben pa dang /dri la sogs pa phyi rol gyi khrus kyis yid mi 'dag par gyur pa gsal ba'o/ /kha cig na re nang rnam par mi rtog pa dang ldan pa dang / phyi rol kha na ma tho ba phra mo la 'jigs par lta zhing 'dzin pa'o zhes zer/ gtsang ma'i grogs zhes pa yang don de lta bu dang ldan pa'am/rnam gcig nyams pa'i kha na ma tho ba med pa'o/ /rdo rje sdom pa dam pa yi/ /zhes pa rdo rje theg pa'i gzhung las 'byung ba'i dam tshig ni/ sdom pa thams cad kyi nang na dam par gyur pas so/ /phyag rgya de la gzhol bar bya/ /zhes pa ni/ phyag rgya bzhi'i sbyor ba la rtag par gnas par bya ba'o/ /sdom pa gsum la gnas pa zhes pa ni/ nyan thos kyi 'dul ba la so sor thar pa'i gzhung dang / byang chub sems dpa'i sdom pa rgya mtsho dang / sngags kyi dam tshig rtsa ba dang yan lag tu phye nas bstan pa ste/ de dag bsrung ba ni de la gnas pa'o//bshags dang gsol ba la sogs pa/ /zhes pa ni/ yan lag bdun po thams cad yongs su bsdu bar bya'o/ /phyag rgya dgrol ba gsum pa'o/ /zhes pa ni/ dgrol zhes brjod pas bcing bar mngon te/ dang por phyag rgya bzhi dang ldan par bsgoms nas/de bzhin du tha mar yang dgrol bar bya'o/ /sdom pa rnams la gnas pa zhes pa ni/ ji skad gsungs pa'i sdom pa gsum po dag dang mi 'bral bar bya'o/ /khrel yod ngo tsha shes pa ni/ /zhes pa ni/ bdag gzhan gyi dbang du byas nas de bzhin du byed pa'o/ / thub pa'i gos rnams zhes pa ni/ de bzhin gshegs pa rnams kyis ni sgo gsum bsrung ba med pa'i ngang la thub pa/ gang zag rnams kyis ni gnyen po dang ldan pa'i sgo nas srung bas thub pa ste/ bya ba'i rgyud kyi gos la mi gzhag ste/ 'di dag la ni 'di'i skabs su gos bshad de/ci'i phyir gos zhes bya zhe na/ dper na 'jig rten dag na gos bgos pas nang gi lus kyi sha tshugs mi mngon pa bzhin du rnam pa 'di dag dang ldan na nyes pa'i skyon mi mngon par 'gyur bas na de skad brjod do/ /mi bza' ba rnams spangs zhes pa ni gzhung rnams nas ma gnang ba'i kha zas dang btung ba rnams dang /yid du 'ong yang blang bar mi bya'o/ /dri mi zhim dang mi gtsang ba/ /zhes pa ni/ sems can rnams kyis zhim pa dang dag par lta yang de gzhung rnams nas khyad par du smad par 'byung ba rnams so/ /sems kyis kyang ni mi bya'o/ /zhes pa ni sems kyi sgo nas kun nas mnar sems dang ldan pa la sogs pa'i dug lnga po dag gis bdag gzhan la gnod cing ma rung bar byed pa de spang bar bya'o//g.yem pa bdun gyi sbyor ba rnams/ /zhes pa ni/ ji ltar de bzhin gshegs pa rnams kyis yongs su smad par gsungs pa 'dod pa'i yul bud med la chags pa dag yan lag dang bcas par rnal 'byor la brtson pa rnams kyis kyang rab tu spang bar gsungs te/gang zhe na/ thams cad du gnyis ka la 'jo ba'i skyes pa dang / bud med la dus 'debs pa'i tshig gis phrad par bya ba'i phrin spring pa dang / mthong nas bre mo'i gtam gyis steg pa'i tshig gling ba dang /bzung nas yan lag reg par yongs su 'ju zhing 'khyud pa dang / ngo'i bzhin bltas nas kha sprad cing 'o byed pa dang / chags pa'i yul de la rab tu zhen pa'i phyir mtshams sbrel nas dbang po sgo sprad cing reg pa'i bde ba myong par byed pa dang /de'i rting thogs su rjes su dran pa'i rtog pa dang bcas pa'i yid la byed pa dang / phrad par yang dang yang du smon pa'i bsam pa sngon du gtong ba dang bdun ni rnal 'byor gyi rgyud las mi gnang bar dbye ba'i tshig tu gsungs pa ste/ thams cad du spang bar bya bar bshad do//mi sdug bsgoms nas spang bar bya/ /zhes pa ni/ gal te chags par gyur na mi gtsang ba sum cu rtsa drug gi gnas su gyur par bsgoms nas yongs su spang bar bya ba ste/ ji skad du rab tu byed pa las kyang / gzhan gyi chung ma mi blta mthong gyur na/ /ma dang sring mo bu mor na tshod mthun//'du shes bskyed par bgyis nas chags gyur na/ /mi gtsang nyid du yang dag bsam par bya/ /zhes 'byung ba bzhin du rig par bya'o/ /bsod nams byed la rtag tu brtson/ /zhes pa ni/ 'dus byas las byung ba'i dge ba'i rtsa bas dang pha rol tu phyin pa nyams su len pa yin mod kyi/'on kyang 'di'i skabs su ni sems yang dang yang du rtogs pa'i goms pa mngon du byed pa la brtson pa'o/ /theg pa chen po'i don sems pa/ /zhes pa ni/ pha rol tu phyin pa'i mdo sde chen po la sogs pa nyams su len par byed pa yang yin mod kyi/'on kyang 'dir ni rdo rje theg pa 'di'i don ci lta ba bzhin du nyams su len par byed pa'o/ /byang chub sems dpa'i tshul rgya che/ /zhes pa ni/ byang chub sems dpa'i spyod pa rgya chen pos gzhan la phan gdags pa yang yin mod kyi/ 'dir ni ting nge 'dzin gyi bsam gtan mngon du byas pa'i sems kyis gzhan la phan 'dogs pa'o//shes rab pha rol phyin la mkhas/ /zhes pa ni/ 'khor gsum yongs su dag pa'i tshul dang ldan pa ni shes rab kyi pha rol tu phyin pa'i tshul te/ don de la mkhas par gyur pas de bzhin du spyad pa'o/ /yang dang yang du gsol zhes pa ni/don rnam pa gsum ste/ sangs rgyas gang dag chos kyi tshul 'dzin par mdzad pas/ dam pa'i chos mi ston pa rnams la ni 'gro ba ma lus pa la phan gdags pa'i phyir dam pa'i chos ston par mdzad pa'i 'khor lo yongs su bskor bar gsol ba dang /'gro ba gang dag g.yung drung gi mtha' la zhen par 'dod pa rnams de ltar ma yin par sun dbyung ba'i phyir rdo rje'i sku bshig nas yongs su mya ngan las 'da' bar bzhed pa'i dgongs pa nye bar 'jog pa rnams la yongs su mya ngan las mi 'da' zhing dam pa'i chos ston par mdzad pas 'gro ba smin par mdzad pa'i don du bskal pa'am bskal pas lhag pa'am/bskal pa mtha' klas pa'i bar du bzhugs su gsol zhes zhu zhing / sangs rgyas zhes bya ba thob par dka' ba thob par mdzad pa'i sku bya ba ji snyed pa dag ma rdzogs par 'da' bar mi rigs par brjod pa dang /de bzhin gshegs pa la sogs pa rang gi lhag pa'i lhar 'dod pa'i dngos grub kyi rigs ci 'dod pa rnams ji snyed par gsol ba'o/ /dgra dang zin dang tha ma la/ /zhes pa ni/ dgra dang zin phyogs su 'bab ba la yongs su snyoms pa'i sems bskyed pa'i rim gyis snying la sdug pa dag la sems mnyam par nus par bya'o//zhe sdang 'joms pa zhes pa ni 'di'i phyogs rnams la gnyen pos thog tu phebs par byed pa'o/ /chos dang gang zag la bdag med pa zhes pa ni/ mu stegs dang nyan thos kyi lta ba dang bral bas theg pa chen po'i rigs su nges pa'i lta ba dang ldan pa'o//'dus byas rnams kyang 'khrul pa tsam/ /zhes pa ni/ 'khrul pa'i dbang gis med bzhin du yod par rtogs pa'i dbang gis de ltar snang bar rig pa'o/ /mngon sum blo can brtan pa zhes pa ni/'dus byas 'khrul par shes nas gzhan gyi dbang du mi 'gyur ba'o/ /'dus byas kun gyis mi rmongs zhes pa ni/ 'dus byas kyi rnam pa las byung ba 'dod pa'i yon tan gyi dbang du song nas bsam gtan g.yel bar mi 'gyur ba'o/ /byang chub sems gang rdo rje zhes pa ni/de gnyis chos mthun par gyur pas na'o/ /shes rab dril bu zhes pa ni sgra'i rjes su 'brang bar mtshungs pas na'o/ /slob dpon smad par mi bya zhes pa ni/ sangs rgyas thams cad dang 'dra bas na'o/ /sbyor ba lhod par ma gyur zhes pa ni/ byang chub sems dpa' phyag rgya chen po'i sbyor ba mi g.yel bar gyur pa ni go cha chen po bgos pa'o//pha rol phyin pa drug spyad pa/ /zhes pa ni/ sbyin pa la sogs pa mthar thug gi bar du ji skad gsungs pa de bzhin du goms par mngon du byed pa'o/ /byang chub sems dpa'i tshul zhes pa ni byang chub kyi spyod pa rgya chen po de lta bu dag la 'jug na yang kha na ma tho ba phra mos kyang phog par mi 'gyur ba'o//rab tu byung dang khyim pa yi/ /zhes pa ni/ 'di gnyis kyi so sor longs spyod kyis g.yengs par gyur pa'i bsam gtan gyi mi mthun pa'i phyogs de spangs ba'o/ / bu dang chung ma dag la yang / /zhes pa ni/ srid pa'i bcings pa las grol zhing thams cad la ma chags pa'i mtshan nyid pas bu dang chung ma la sogs pa yang yongs su gtong bar byed pa'o/ /brkam dang chags la 'dug pa med/ /ces pa ni/ pha rol gyi nor la rlom sems pa dang / bdag gi bdog pa gtong mi phod par chags pa'i sems dang bral ba'o/ /rmongs pa dang ni le lo med/ /ces pa ni/ sems dang lus mi mthun pa'i dbang du mi gtong ba'o/ /bag yod spyod cing brtson 'grus che/ /zhes pa ni/ thams cad la bya ba'i mtshan nyid dang ldan zhing le lo spangs pa'o//rnal 'byor bsgrub pa grub par bya/ /zhes pa ni/ rnam pa de dag gis gdod rnal 'byor nyams su myang bar bya'o/ /lta ba kun las rnam par grol/ /zhes pa ni/ 'jig tshogs kyi lta ba dang / mthar 'dzin pa la sogs pa dag gi dbang du ma gyur pa'o/ /yang dag nyid kyi lam ston pa//zhes pa ni/ dgongs pa'i tshig la rab tu mkhas/ /zhes bya ba ni 'di lta ste ldem po ngag dang dgongs pa'i tshig gi bye brag la mkhas pas don gyi thog tu phebs par byed pa'i shes rab dang ldan pa ste/ des ni don chen po dngos grub la sogs pa gang yin pa'i don ni rtogs par 'gyur ba'o//tshul dang tshul min cho ga shes/ /zhes pa ni/ don dang ldan pa'i tshul nyams su blang bar bya ba dang / don dang mi ldan pa'i tshul yongs su spang bar bya ba'i rim pa dang bye brag shes pa'o/ /de nyid rnal 'byor rab tu mkhas/ /zhes pa ni/ don dam pa'i byang chub sems kyi rnal 'byor la goms pa'o//byang chub spyod pa'i don sems pa/ /zhes pa ni/ ji ltar byang chub sems dpa' rnams kyi bla na med pa'i byang chub chen po don du gnyer ba'i phyir/ byang chub kyi spyod pa dka' zhing nyams su lon par dka' ba dag spyad nas 'phags pa mnyes par bya ba dang /'gro ba yongs su smin pa'i thabs rtsom pa de bzhin du bdag nyid kyang sems shing 'dun pa bskyed pa'o/ /grol ba dang ni dngos grub thob/ /ces pa ni/ nyon mongs pa bcing ba las grol zhing rig 'dzin la sogs pa'i dngos grub rab 'bring tha mar gyur pa de thob par 'gyur ro//phyogs dang gos dang zas rnams la/ /zhes pa ni/ gong du mi mthun pa'i phyogs su gyur pa dag la chags par gyur na yang nyes pas mi gos pa'am/ rnam gcig rgyud las ma gnang bar gsungs pa'i zas dang gos la sogs pa spang bar bya'o//lha rnams smad par mi bya zhing / /zhes pa ni/ 'jig rten pa'i lha chen po rnams so/ /rnam pa yang ni spang bar bya/ /zhes pa ni gzugs kyi rnam pa gtod pa'i kha zas rnams so/ /nyi ma re re rab bsdams shing / /zhes pa ni/ ji ltar blangs shing yi dam du bcas pa'i sdom pa dang /dam tshig gi bye brag bsrung bar bya ba'i rigs pa rnams nyi ma re re la yang ji lta bur gyur pa gcig pa'i phyir lan re rjes su dran par bya ba'o/ /srung ba'i cho ga byas pa la/ /zhes pa ni/ byang chub sems dang phyag rgyar ldan pa la ni gzhan gyis klan ka btsal bar mi nus pas na/srung ba'i cho ga chen po yin par 'dod do/ /bgegs ni cung zad med snyam pas/ /zhes pa ni/ rnam par rtog pa'i rgyu ba rnams yongs su bkag nas rang gi sbyor ba la the tshom med par gnas par byed pa ni/ bgegs kyi sbyor bas mi brdzi zhing dag par gyur pa'o//rang gi sems ni bdud ces gsungs/ /zhes pa/ bdud dang bgegs su brjod pa dang / /rten dbang du byung nas bar du gcod par byed pa ma yin gyis/ rang gi rnam par rtog pa dang bcas pa'i the tshom can sems kho na las byung bas/ / gdul ba'i sems de yongs su gdul la 'dod pa lnga la sogs pa yul gyi rjes su mi 'brang bar bya'o/ /sngon gyi rjes dran nas brtsams te/ /zhes pa ni/ bdag nyid dam tshig sems dpa'i ting nge 'dzin gyi bsam gtan mngon du byed pa'i tshe/ chos nyid rnam par dag pa'i sngags don dang ldan par bsgom pa nas mngon par byang chub pa'i rim pas phyag rgya chen po rdzogs par bskyed nas yan lag yongs su rdzogs par gyur pa'i cho ga dang ldan pas/rdo rje sems dpa' bsgom par bya/ /zhes gsungs so/ /cho ga bzhin du kun spyad kyang //zhes pa ni/ cho ga'i rim pa ji skad 'byung ba bzhin du spyad kyang grub pa thob dka' bar ston pa'o/ /byang chub sems ni ma bskyed dang / /zhes pa ni byang chub sems rnam pa gnyis dang mi ldan pa'o/ /the tshom yod pa nyid dang ni/ /zhes pa las dngos grub dang / sngags la rtog pa za ba'o/ /ma dad pas ni mi 'grub po/ /zhes pa ni/ las dang 'bras bu dang bden pa dang dkon mchog la yid ma ches pa ste/ khe grags can du 'jug par byed pa'o/ /gzhan du sems can thams cad phyir/ /zhes pa ni/ byang chub chen po la sbyor ba'i sku phyag rgya chen po mngon du bya ba la sogs pa'o//mi g.yo bar ni nges par byas/ /zhes pa ni mi mthun pa'i phyogs kyi dbang du mi 'gyur zhing byang chub sems dang phyag rgya chen po'i ngang du gnas pa'o/ /nyes pa byas kyang rab tu bzod/ /ces pa ni/ sdug bsngal la ji mi snyam pa'i bzod pa ste/chos thams cad rang bzhin med pa la dmigs pa dang / las dang las kyi rnam par smin pa la 'jog pa'o/ /rig sngags mtshon dang de bzhin mtshan/ /zhes pa ni/ ji skad du rig sngags bsgrub pa las gsungs pa'i ral gri dang / 'khor lo la sogs pa dang /lha'i phyag rgyal sogs pa mtshon pa'i thugs mtshan gyis gzugs yod pa'o/ /dman ma dang ni lha yi grib/ /ces pa ni/ lha la phul ba'i rnying ba dang / lha'i grib ma la sogs pa mi 'gom pa'o/ /phal cher ji skad du grags pa'i don las gzhan du rang gi brdas de ltar bshad pas zhes pa ni/thams cad bza' zhing thams cad spyad/ /ces pa dang / yul bzhi po la chags par bya ba la sogs pa'i tshig mang po 'byung ba rnams gsang ba rnam pa gsum dang ldan pa'i tshig gis don gzhan du bshad de/ rang gi brdas 'di ltar bstan pa ni 'di lta bus 'dul ba'i 'gro ba de dag la phan par bya ba'i phyir 'di ltar bstan to/ /rgol ba pa na re/ 'o na de ltar bcom ldan 'das kyis gsungs pa'i don kun de lta bur bstan pa yin nam/ yin na thams cad sgra'i rjes su mi 'brang bar ji ltar rig par bya/de ltar ma yin na ni 'di dag gi dbye ba'i mtshams ngo shes par bya dgos na/ ji ltar shes par bya zhe na/ smras pa/ de rnams kyi nang nas kyang tshig gang rnal 'byor la sogs pa'i skabs ji lta ba dang zhes bya ba la sogs pa gsungs so/ /rgol ba pa na re/ 'dir 'di dag ston par byed pa ni/ skabs su ma bab pa'i tshig gleng bar byed pa yin na/ tshig 'chal pa'i skyon du thal bar mi 'gyur ram zhe na/ smras pa/ 'dir ni zhar la bshad pa ste/ /zhes pa dag ste/ 'di ni gong du de ltar byas na ji ltar spyan drang ba'i bcom ldan 'das dang bdag rnal 'byor pa yul gcig la spyod par gzigs nas/sems cha mthun pas rjes su chags nas/ dngos grub myur du stsol 'gyur zhes gsungs te/ yul de dag kyang rdo rje la gsang ba la sogs pa'i mtshan nyid la bya'o/ /gzugs sgra la sogs la ni mi bya'o zhes bshad pa dang /gzhan dag na re/ ci dgar 'dod cing ci dgar spyod/ /ces bya ba la sogs ba'i tshig rgyud nyid las gsungs pa de ji lta bu zhes dris pa dang / bag yangs kyi tshig de dag dka' bar spyod pa la dga' ba'i bzlas brjod byed pa la dgongs te zhes pa nas/de yang nges par mi byar mi rung ba nyid du gsungs pa ni ma yin te/ ci'i phyir zhe na/ de rnams kyang rnal 'byor gyi tshul kha cig las ni gnang bar bstan pa'i phyir ro zhes rdo rje rtse mo dang rtog pa bsdus pa'i khungs las bshad pa'i tshig glengs pa ni/ 'phros pa'i tshig las zhar la bshad pa zhes 'dod do//skabs nyid bshad par bya'o zhes pa de dag ni zhar las 'phros par bas so/ /da ni yul bzhi po de dag rdo rje la gsang ba la sogs pa bzhi'i mchod pa yin par 'dod pa'i skabs de bshad par bya'o zhes ston to/ /gang zhe na/ gsang ba'i mchod pa'i rnam pa bzhi'i cho ga bya ba dang zhes bya ba la sogs pa gsungs pa 'di dag go/ /phan yon dran pa sngar byas te/ /zhes pa ni/ kun du bzang po'i 'dod pa'i bdag /ces gsungs pa'i phan yon de yongs su dran par byas nas brtsam pa'o/ /dga' ba bskyed cing dang ba spel ba dad ba spu ldang ba zhes pa ni/'di ltar mchod pa'i dus na sems yongs su 'dun pa'i dga' ba bskyed pa dang / ting nge 'dzin gyis rnam pa mang por spro ba dang / yid gdung ba bskyed par bya ba dang / sogs pa'i sgras gus pa dang zhes bskyed pa la sogs pa de'i char gyur/gzhan bsdu ba sngon du btang bar bya ba'o/ /oM badzra satwa su saM gra ha zhes pa ni/ rdo rje sems dpa' bsdus pa nyid/ /ces bya ste/ gang zhe na/ 'jig rten dang 'jig rten las 'das pa'i bde ba dang / yon tan phun sum tshogs pa yongs su sdud cing der 'dus par byed pa'o//badzra rat+na ma nut+ta ra zhes pa ni/ rdo rje rin chen bla na med/ /ces bya ste/ gang zhe na/ yon tan gyi bdag nyid bla na med pa na/ rdo rje rin po che bas khyad par du gyur pa'i phyir ro/ /badzra d+harma ga ya na/ /zhes pa ni/ rdo rje chos kyi glu blangs pas/ / zhes bya ste/ gang zhe na/ rtogs pa dang lung gi chos rnams gnyis kyi dbyangs sgrogs shing tshig smra bar byed pa'o/ /badzra karma ka rod+b+ha ba zhes pa ni/ rdo rje las ni byed par 'gyur/ /zhes bya ste/ gang zhe na/ 'phags pa mchod pa dang sems can gyi don bya ba'o/ /gsang ba'i mchod pa bzhi char la yang zhes pa/badzra lA s+ye la sogs pa bzhi la yang dang por rang gi snying po smos pa'i rjes la/ badzra satwa saM gra ha zhes bya ba la sogs pa'i sngags brjod par bya'o/ /phyi ma yang de bzhin du shes par bya'o/ /gzugs dang rnam par thar pa la sogs pa zhes pa mi brjod pa'i mtshan nyid shes rab ste/shes rab kyis thams cad stod par chud de/ chud pa'i don de mi brjed pa ni gzungs te/ des 'phags pa'i yon tan kun yongs su 'dzin cing gnas par byed pa'o/ /de nyid kyis nyon mongs pa'i bcing ba las grol bar byed pas na/rnam par thar pa zhes 'dod do/ /sogs kyis ni de dang cha mthun pa'i rigs su gyur pa dang / 'bras bu bla na med pa'i byang chub chen po bsdu bar bya'o/ /ci'i phyir zhe na/ dper na me tog las 'bras bu 'byung ba bzhin du gzungs dang rnam par thar pa las byung ba'i 'bras bu ni bla na med pa'i byang chub pas ni de skad brjod do//zab cing rgya che'i mdo sde bshad/ /ces pa ni dgongs pa nges par 'grel pa dang / ting nge 'dzin gyi rgyal po dang / shes rab kyi pha rol tu phyin pa dang / sangs rgyas phal po che la sogs pa'i mdo rnams ni zab pa dang rgya che ba gnyis ka'i don dang ldan pas so//sogs pa'i sgras ni bsgom pa dang / bsgrub cing nyams su blang bar bya ba'i don sdud par byed pa'o/ /mtshan ma dang spyod lam rnam pa sna tshogs zhes pa ni/ 'khor los sgyur ba'i rgyal po dang /rgyal rigs shing sA la chen po lta bu dang / dge sbyong dang / bram ze dang / brgya byin dang / tshangs pa la sogs pa'i cha byad dang / zhi ba dang / rgyas pa dang / dbang dang / drag po dang / sgeg pa dang / dpa' ba la sogs pa 'gro ba ji ltar 'dul ba de bzhin ston pa dang /nges pa'i tshig tu smra ba la mkhas shing zhes pa ni/ 'gro ba so so'i skad du gang la dad pa'i tshig gis gdams ngag sgrogs shing 'doms par byed pa la mkhas pa'o/ /ral gri la sogs pa zhes pa/ ral gris ni nyon mongs pa'i dra ba gcod par byed pa'i don du bstan pa ste/de bzhin du dam tshig gi phyag rgya mtshan nyid sna tshogs pa'i dbyangs can dang ldan pa phyag na bsnams pa'o/ /mchod pa rnam brgyad mdor bsdus zhes pa ni/ phyi nang gi mchod pa'o/ /rnal 'byor pa thams cad kyi spyir bstan pa'o zhes pa ni rnal 'byor pa'i phrin las dang dngos grub gang 'dod pa bsgrub pa la dgongs par bstan pa'o//lha'i dam tshig sems dpar bdag nyid bsgrubs te gong du gsungs pa'i cho ga'i rim pa bstan pa bzhin du bya'o/ /rang gi lha bzhin du cis kyang mi tshugs zhes pa ni/bdag nyid kyi lhag pa'i lha rnams la gzhan gyis brgal bar mi nus pa bzhin du bdag kyang lha'i tshul ji lta ba bzhin du bsgyur nas/ bdud dang bgegs la sogs pas bar du gcod par mi nus par 'gyur ro/ /skabs 'dir yi ge brgya ba'i sngags bzlas zhes pa ni/ ci dgongs she na/ bzlas brjod dang bsam gtan la sogs pa byed pa'i tshe zhes bya ba la sogs pa'i nyes pa 'di dag byung bar gyur na sems brtan par bya ba'i phyir brjod dgos so/ /oM badzra satwa sa ma ya/ ma nu pA la ya zhes pa ni/ rdo rje sems dpa'i dam tshig rjes su srungs shig ces pa ste/gang zhe na/ ji skad du gsungs pa'i don dang tshig tu 'brel pa de'o/ /badzra satwa twe no pa tiSh+Tha zhes pa ni/ rdo rje sems dpa' nye bar gnas par mdzod cig ces pa ste/ gang zhe na/ rnal 'byor ba dam tshig sems dpar bsgoms pa'i rgyud la dus thams cad du'o//dr-i D+ho me b+ha ba zhes pa ni/ bdag la brtan par mdzod cig ces pa ste/ gang las she na/ mi mthun pa'i phyogs rnams las te/ gzhan gyis bskyod par mi nus par ro/ /su to Sh+yo me b+ha ba zhes pa/ bdag la rab tu dga' bar mdzod cig ces pa ste/gang gis she na/ bsam gtan yan lag dang bcas pa'i khyad par gyis so/ /a nu rak+tA+o me b+ha ba zhes pa ni/ bdag la chags par mdzod cig ces pa ste/ gang zhe na/ de bzhin gshegs pa la sogs pa'i sku gsung thugs kyi bdag nyid ye shes chen po de'o//su poSh+yo me b+ha ba zhes pa ni/ bdag rab tu gsos shig ces pa ste/ gang las she na/ 'khor ba dang mya ngan las 'das pa'i mtha' rnam pa gnyis su mi 'ching bar ram/ rnam gcig 'khor ba'i mtha' 'ching ba las so//sarba sid+d+hi m+me pra yats+tsha zhes pa ni/ dngos grub thams cad bdag la rab tu stsol cig ces pa ste/ ci lta bu zhe na/ thun mong dang mchog tu gyur pa'i dngos grub rab 'bring rnams so/ /sarba karma su tsa me tsi t+taM shri yaH ku ru hUM zhes pa ni/ las thams cad las bdag sems spro bar mdzod cig ces pa ste/ gang la zhe na/ de bzhin gshegs pa'i phrin las ci snyed pa mngon du gyur pa de la'o/ /ha ha ha ha hoH zhes pa ni dgyes pa dang / dam pa'i don te/ gang la zhe na/ de bzhin gshegs pa'i mdzad spyod dang /rnal 'byor pas gsol bar byed pa'i don dang ldan pa'i sngags 'di nyid la'o/ /b+ha ga bA na sarba ta thA ta badzra mA me muny+tsa zhes pa ni/ bcom ldan 'das de bzhin gshegs pa thams cad kyi rdo rjes bdag mi gtong du gsol zhes pa ste/ gang zhe na/ de bzhin gshegs pa thams cad kyi rdo rje zhes pa ni/ de bzhin gshegs pa thams cad kyi thugs kyi bdag nyid ye shes rnam pa lnga'o/ /des bdag nyid la dgongs par mdzad pa ni mi gtong ba'o/ /badzrI b+ha ba zhes pa ni rdo rjer bdag mdzad du gsol zhes pa ste/gang zhe na/ bdag nyid ye shes su mdzad du gsol zhes pa'o/ /kha cig na re/ gu gu las ma'i don 'byung ste/ ma bu'i tshul du gzung du gsol zhes bshad do/ /sa ma ya satwa A zhes pa ni/ dam tshig sems dpa' chen po la skye ba med pa'i don gyis khyab par mdzad du gsol zhes pa'i don to//da ni de'i yon tan gsungs pa/ 'di brjod pas mtshams med pa byas pa dang zhes bya ba la sogs pa gsungs so/ /rdo rje sems dpa' brtan par gyur pas zhes pa ni/ chos thams cad kyi bdag nyid rdo rje sems dpa' de bdag nyid la yongs su gnas shing dgongs par gyur pa'o//ji ltar 'dod pa'i dngos grub thams cad ces pa ni/ 'jig rten dang 'jig rten las 'das pa'i dngos grub rab 'bring gang ltar 'dod pa rnams so/ /rdo rje'i dngos grub bam zhes pa ni/ rig 'dzin zhes zer na/dngos grub tu shes par bya'o/ /rdo rje sems dpa'i dngos grub ces pa ni/ de bzhin gshegs pa'i rigs kyi sems dpa' rnams kyi'o/ /de bzhin gshegs pa'i dngos grub ni dngos grub thams cad kyi mchog go/ /thabs dang shes rab tu ldan pa'i rnal 'byor pa zhes pa ni/phyag rgya chen po dang byang chub sems su ldan pa yon tan chen po mnga' bas na mchog go/ /rgol ba pa na re/ cho 'phrul rnam pa bzhi po de yang don rnam pa gnyis te/ gong du ni khyad par gyi sgo nas bstan la/ 'dir ni spyi'i sgo nas bstan to/ /rnam gcig bsdus pa dang rgyas pa'i sgo nas te/gcig gi don gyis gcig gsal bar bya ba'i phyir 'di ltar bstan to/ /mchod pa'i cho ga yan lag rgyas par bshad zin to// //da ni de ltar mi nus pa rnams kyi don du rnam pa gzhan gyis de dang 'dra ba'i rjes su sgrub pa bshad par bya ste/ de la rgol ba pa na re/ rnal 'byor pa dbang po rab dang ldan pa rnams kyis lha de ltar byar rung na/ dbang po zhan pa rnams kyis phyogs gcig la yang 'jug par mi nus na/ kun gyi don nyams su len pa lta ci smos po rnams la/ 'di ltar byas pa'i rtsol ba dang mi ldan na gzhag gam gzhan dag la 'jug par bya ba yin zhe na/smras pa/ cho ga de byed mi nus pa des ni zhes bya ba la sogs pa gsungs te/ lnga mngon par byang chub pa'i rim pas dam tshig sems dpa'i sku yongs su rdzogs par bsgom pa'i bsam gtan mngon du bya bar mi lcogs pa'i shes rab zhan pa rnams bzlas brjod bya ba'i lha gang yin pa de'i snying po kho na tshig tsam gyis brjod pa las bdag nyid kyang rang nyid mos pa'i lha gang yin pa de'i gzugs su gyur par bsams la/mdun du yang lhag pa'i lha'i bdag nyid ye shes sems dpa'i sku mngon du bzhugs par bsams la bzlas brjod bya'o//de ltar yang rgyud las gsungs pa lta ngan zhes pa ni/ dbang po rtul po byang chub sems dang phyag rgya chen po 'brel bar ldan pa'i don bsgom par mi nus pa'o/ /chags pa med pa zhes pa ni/ 'gro ba'i don la chags pa'i snying rje dang mi ldan pa'o//gsang ba 'di ni mi rigs so zhes pa ni/ lnga mngon par byang chub pa'i rim pas sku phyag rgya chen po bsgom pa 'di ni gsang bar brjod pa ste/ blo zhan pa de dag la mi rigs par gsungs so/ /de bas ni snying po'i don gyis zhes pa de dag la 'di ltar brjod pas mi rung ba snying po'i don tshig tsam du brjod pas 'di kho na ltar gyur par bsgom zhing /ji ltar 'dod par byed pas zhes pa/ ji ltar lha'i dngos grub 'dod par byed pa ci nus tshad du bzlas brjod bya ste/ mang du brjod par mi nus na yang / nyin mtshan gang yang rung ba la dus mtshams rnam pa bzhir bcad nas rdo rje tshig gis lha re re la yang /grangs brgya rtsa brgyad du bzlas brjod bya'o/ /rgol ba pa na re/ ci 'di ltar bya ba de bzhin gshegs pa rnams kho na'am/ de'i rigs kyi sems dpa' rnams dang bcas pa kun la bya ba'i thabs su dgongs/gcig kho na'i don du na ni gzhan dag gi don du ji ltar 'gyur ba brtsam/ kun gyi don du na ni cha shas su phye bas 'di ltar ston par byed pa ci'i phyir zhe na/ smras pa/ 'di yang nye ba'i mtshan nyid kyi tshig tu zad de zhes bya ba la sogs pa gsungs te/'dir sangs rgyas kyi skur bsgom zhes bya ba ni/ de bzhin gshegs pa rnams kyi dkyil 'khor du 'khod pa'i lha rnams kyi nang na gtso bor gyur pas/ dang po brjod pa'i rigs pa ste/ 'di dag brjod pas kun brjod par 'gyur bas gzung bar zad kyi/ de las gzhan pa'i lha rnams kyi yang cho ga 'di nyid kyis 'grub par rig par bya'o/ /rgol ba pa na re/ 'o na tshul 'dis 'di ltar bya bas chog par zad kyis/ ji skad du gsungs pa'i byin gyis brlab pa la sogs pa 'dir bya bar mi dgos sam/ da 'dir de ltar yin na ni gong du yang de bzhin du 'os la/'on te 'dir de ltar ma yin na ni ji ltar 'gyur ba'am thabs brjod dgos so zhe na/ smras pa/ des don 'di ltar 'gyur te zhes bya ba la sogs pa gsungs te/ rang gi dam tshig sems dpa'i rnal 'byor byed mi nus pa zhes pa ni/ lnga mngon par byang chub pa'i rim pas yan lag yongs su rdzogs pa'i bsam gtan mngon du byed mi nus pa'i sngags pa'o//bzlas brjod bya ba'i snying po brjod pa tsam nyid dang zhes pa 'di ltar bya ba dang de'i don gyis bdag nyid dam tshig gi sems dpa' chen po gang yin pa de ni byin gyis brlab pa dang /dbang bskur ba la sogs pa yang de bzhin du grub par dmigs la mdun du yang de nyid de bzhin du bzhugs par bsam par 'dod do zhes ston to/ /rgol ba pa na re/ 'o na 'di lta bu'i rnam pas de bzhin du 'grub par 'gyur na/ de ni tshig dang byang chub nyung ngus rgya chen po'i don thob par byed pa ni/shin tu rigs pa yin na 'di kho na'i thabs dang rim pa ston par mi byed nas/ rab tu dka' bar gyur pa'i rnam pas gzhan 'chad cing 'dom pa ci dgos she na/ smras pa/ snying po'i don ni tshig tsam gyis kyang / dam tshig sems dpa' bsgrub pa'i zhes bya ba la sogs pa gsungs te/ phyogs gnyis pa 'di yang zhes pa bsdus pa dang rgyas par bstan pa las rgyas par bya ba'i rim pa gong du bstan nas/ bsdus pa'i thabs 'dir bshad pa ni gong ma las bgrangs pa'i gnyis par 'gyur ba ste/'di yang shes rab zhan pa 'di dag la bstan par zad kyi/ shes rab chen po lnga mngon par byang chub pa la sogs pa'i rim pas phyag rgya chen po'i yan lag yongs su rdzogs pa dang bcas par bsgom pa'i thabs kyis bla na med pa'i byang chub bsgrub par 'dod pa rnams la ni bstan pa ma yin no//ji lta zhe na/ phyi ma'i yang phyi ma'i rgyud las 'di kho na bzhin du gsungs pa'i phyir ro/ /rgol ba pa na re/ 'di ltar phyogs gnyis pa 'di phyi ma'i yang phyi ma'i rgyud 'ba' zhig pas gsungs par zad kyi/ gzhan rnams ni 'di ltar go phye ba ma yin na/dus bstan pa kho nar rigs par zad kyi/ 'dir rigs pa steng du 'bab par yang nges pa med na/ 'di ltar byas pas kyang 'di bzhin du 'grub par gal te mngon pa med bzhin du 'di ltar 'dod na byas pa de nyid grong khyer ba'i skyon du'ang 'gyur la/'on te 'di kho na ltar yin pa'i skabs yod na gtan tshigs gzhan dag brjod pas khong du chud par bya dgos na/ ji ltar shes par bya ba yin zhe na/ smras pa/ gang gi phyir gzhan dag las kyang byin gyis brlab pa la sogs pa rim pa rgyas par gsungs pa de mi nus pa rnams la gsang sngags kyi che ba'i bdag nyid bstan pa'i phyir zhes bya ba la sogs pa gsungs te/gsang sngags che ba'i bdag nyid bstan pa ni/ snying po bzlas brjod 'ba' zhig byas pas yan lag dang bcas par yongs su rdzogs pa'i skur bsgrub par bstan pa ni/gsang sngags rang bzhin gyis grub pa'i mthu dang yon tan khyad par can yod par 'dod pas de bzhin du bstan pa'o/ /dam tshig chen po de kho na nyid kyi rtog pa zhes pa ni/ rnal 'byor gyi rgyud ci snyed pa las rang gi mtshan nyid phyogs gcig tu gzung ba'o//gang gi phyir 'dir ni zhes pa ni/ dam tshig chen po kho na nyid kyi rtogs pa 'di'i nang du'o/ /hUM zhes bya ba'i snying po zhes pa ni/ snying po'i mtshan nyid ji snyed pa rnams 'byung ba las hUM zhes bya ba'i snying po 'di ni bcom ldan 'das rdo rje sems dpa' nyid kyi snying po gzung ba ste/cis mngon zhe na/ 'jig rten gsum las rnam par rgyal ba rtog pa chen po'i rgyud las kyang bcom ldan 'das rdo rje sems dpa' snying po hUM zhes bya ba'i snying po brjod pas thams cad grub par 'dod pa'i gtan tshigs rgya cher gsungs pa'i phyir ro//bde ba chen po zhes pa 'dir yang de nyid kyi mtshan nyid du rig par bya ste/ rdo rje sems dpa' ni 'jig rten las 'das pa'i dus gsum gyi de bzhin gshegs pa rnams kyi byang chub sems kyi ngo bo bde ba chen po rang bzhin du gnas pas na'o//rdo rje dam tshig ces bya ba yang de nyid do/ /ye shes lnga'i rang bzhin thams cad 'joms pa'i mthu dang ldan pas de'i ngang las gzhan du mi 'da' ba'i mtshan nyid can no/ /mthu bstan pa'i sgo nas zhes pa de lta bu'i don dang ldan pa de'i mthu bstan pa ste rgyud las de ltar gsungs pa'o//'dir 'dod chags med pa'i 'khor lo gzhom mi dgos so zhes pa/ 'dod chags med pa ni lta ba ngan zhing chags pa dang bral ba dag ste/ de'i 'khor lo gzhom pa ni/ de'i don sun 'byin pa yin na/ rgyud 'dir de sun dbyung mi dgos te/de'i don du bshad pa yang yod pas de bzhin du byar rung zhes ston pa'o/ /rjes su dran pa nyid kyis zhes pa ni/ snying po brjod pa'am/ yang na lha nyid kho na rjes su dran pa'o/ /de ltar don rnam pa gnyis kyi rim pa'i rnam pas dam tshig sems dpa' bdag nyid lha'i rang bzhin du byin gyis brlab pa la sogs pa'i cho ga tshang bar byas nas/rang gi sems yongs su gdul ba dang sbyar bar dka' ba de dbang du bya ba'i phyir thabs kyi rnam par bshad par bya ste/ de la sems sbyar ba'i thabs kyang rnam pa du ma dag tshul mi mthun par ston pa yod na/'dir ji lta bur sbyar bar 'dod pa yin zhe na/ smras pa/ dang por re zhig rang gi sems dbang du gyur par bya ba'i phyir rdo rje phra mo'i ting nge 'dzin bsgom mo zhes bya ba'i tshig 'di dag ste/ ting nge 'dzin goms par gyur pa'i mthus sems gang du gtad pa de bzhin du gnas su btub pa ni sems dbang du gyur pa'o//rdo rje'i 'du shes cha phra mo mngon du byed pas na/ rdo rje phra mo'i ting nge 'dzin to/ /'dir yang de kho nas sems yongs su sbyang bar gsungs so//gnas skabs sam rim pa ji ltar rnam par gzhag par 'dod ce na/ smras pa/ gong du gsungs pa de bzhin du brtags pa mang por nus pa'i rtsol ba med pa rnams kyis dus mtshams bzhir bcad nas grangs brgya rtsa brgyad kho nar rdo rje tshig gis bzlas pa'i rjes la sbyor ba 'di bslab par bya ste/bdag gi nam gyur gyi bar du bya ba'am rnam gcig slob par ma byas pa'i sngon rol du ting nge 'dzin gyi sbyor ba 'di goms par byas nas sems gang du gtad par btub pa'i dbang thob par gyur pa dang / gdod bzlas pa ji ltar 'dod pa'i grangs bzhin du bya bar brtsams nas 'gal ba med do//'o na ting nge 'dzin gyi sbyor ba 'di mngon du bya ba la yon tan gyi rnam pa mngon du 'gyur ba'am/ dgos ched ji lta bu yod pa yin zhe na/ smras pa/ ji skad du 'dir rdo rje phra mo'i phan yon bstan pa las zhes bya ba la sogs pa gsungs te/de phyin chad ni gang cung zad ces pa ni/ rdo rje phra mo'i ting nge 'dzin gyi sbyor ba 'di goms par byas nas/ sems bying rgod du 'gyur ba'i skyon dang bral phyin chad byang chub sems rnam par dag pa dang phyag rgya chen po mngon du bya ba'i sbyor ba la sems rtse gcig pas mnyam par gzhag pa'i don bsgom pa de bzhin du 'grub par 'gyur te/de bas na ting nge 'dzin ye shes kyis brtags pa'o zhes pa ni/ rdo rje phra mo'i ting nge 'dzin mngon du byas pa'i ye shes kyis brtags pa'i sbyor ba ni 'grub par ston pa'o//'o na de ltar bstan pa'i ting nge 'dzin gyi ming rdo rje phra mo zhes brjod pa de ji lta bu'i ngo bor shes par bya ba yin zhe na/ smras pa/ rdo rje phra mo yang 'dir dngos su na rang gi sems gnas pa'i rlung nyid ces bya ba la sogs pa gsungs te/sems gnas pa'i rlung yongs su rgyu bar byed pa ste/ /sems dang 'brel ba'i rlung la rdo rje phra mo zhes bya bar 'dod de/ ci'i phyir zhe na/ 'di'i skabs su sems dang rlung ni gcig rten dang brten pa can gyi rnam par gnas par 'dod pas 'di ltar brjod do//'o na de kun du rgyu bar byed pa'i 'byung 'jug gi gnas ji lta bu zhe na/ smras pa/ sna nas dbugs 'byung zhing 'jug pa'i mtshan nyid du 'dod de zhes gsungs so/ /tshad ji tsam zhe na/ smras pa/ phra ba ni skra'i rtse mo tsam zhes bya ba la sogs pa gsungs so//'o na dbyibs ji lta bur brtag par bya zhe na/ smras pa/ de lta bu'i rdo rje phra mo nas 'bras 'dra ba'am zhes bya ba gsungs so/ /'o na kha dog ji lta bur shes par bya zhe na/ smras pa/ rang gi lha'i kha dog dang mdangs 'dra ba zhes gsungs so//'o na gnas skabs gang du bsam zhe na/ smras pa/ sna'i thog mar zhes gsungs so/ /'o na 'di ltar gang gis sems par byed ce na/ smras pa/ rnal 'byor la mkhas pa rnams sems so/ /ji tsam gyi bar du bsam par bya ba yin zhe na/smras pa/ gang gi phyir sems pa'i dbang gis zhes bya ba la sogs pa gsungs so/ /'o na 'di ltar bya ba'i gtan tshigs sam mngon par grub pa gang las yid ches pa gzhag ce na/ 'di skad du phyag rgya bzhi ba'i dkyil 'khor bshad pa'i skabs su yang zhes bya ba la sogs pa gsungs so zhes gsungs so//'o na 'di ltar bsgom pa'i sbyor ba 'di'i go rims ji lta bur bya zhe na/ smras pa/ rdo rje phra mo'i rim pa yang 'di lta ste/ dang por re zhig ces bya ba la sogs pa gsungs so/ / 'o na 'di ltar bya ba'i snying po gang gis she na/ smras pa/ oM su k+Sha ma badzra zhes bya bas so/ /tshul ji ltar spro bar bya ba yin zhe na/ smras pa/ dbugs dal bus phyung la zhes bya ba la sogs pa gsungs so/ /'o na tshad ji tsam du spro bar bya zhe na/ smras pa/ ji ltar mthong zhing thos pa yi//zhes bya ba la sogs pa gsungs so/ /de bzhin du slar bsdu ba dang / gnas par bya ba dang / de bsnyen pa'i phyir de las gyur cing zhes pa ni/ srog dang 'brel bar gnas pa'i dbugs de 'byung zhing 'jug pa'i gnas kyang rnam pa gnyis te/sna'i bu ga dang ba spu'i bu ga thams cad du shes par bya ba yin mod kyi/ 'on kyang 'di'i skabs su ni sna'i bu ga gnyis kho na la shes par bya'o/ /de bsnyen pa'i phyir de las gyur cing zhes pa ni sems dang rlung du 'brel bar 'dod pa'i mtshan nyid can gyi ting nge 'dzin gyi sbyor ba goms par byas pa la rlung de las rdo rje phra mor gyur cing /rlung dang rdo rje phra mor 'brel ba phra rags kyi bye brag skra'i rtse mo tsam la sogs pa'i tshad dang dbyibs dang / kha dog 'di 'dra ba dag sna'i gnas su brtag par bya'o/ /de bsam pa'i dbang gis sna nas byung ba'i rlung zhes pa ni gang gi phyir rdo rje phra mo de ltar bsams pa'i dbang gis sna nas 'byung ba'i rlung de phyi nang du bag yangs su rgyu ba'i rang bzhin btang nas mi rgyu bar gnas te/rdo rje phra mor gyur pas sna'i bu ga gnyis yongs su bkang ste sna'i bu ga de na gnas par brtags pas sems khugs shing dbang du gyur pa'i mthus sna'i nang na rdo rje phra mo gnas par tshor ba'i rig pa'i khyad par sems de bzhin du mnyam par gnas pa dang rjes su mthun par bskyed par bya'o//de la sems mnyam par gnas pa'o zhes pa ni/rdo rje phra mo de'i ting nge 'dzin de yongs su khugs par gyur pa las sems mnyam par gnas par 'gyur bas na/ de la de skad ces bya'o/ /rjes su mthun pa kun bskyed pa/ /zhes pa ni/ de lta bu'i rdo rje phra mo'i ting nge 'dzin khugs par byed pa la ni/mnyam par gnas pa dang rjes su mthun pa zhes bya'o/ /ting nge 'dzin las byung ba'i dngos grub ces pa ni/ byang chub sems rnam par dag pa/ phyag rgya chen po'i sbyor ba goms par byas pa las byung ba'i dngos grub bo/ / rdo rje phra mo'i cho ga zhes pa ni/ ting nge 'dzin 'di goms par bya ba'i thabs kyi rim pa mngon du bsgrub par bya ba'o/ /ye shes phyag rgya bcing bar bya/ /zhes pa ni/ rnam par dag pa'i byang chub kyi sems mngon du byas pa'o/ /cho ga 'di'i rnal 'byor gyis//zhes bya ba ni byang chub sems rnam par dag pa mngon du bya ba'i bsam gtan goms pa mngon du byas pa'o/ /ye shes phyag rgya dbang du bya/ /zhes pa ni/ sbyor ba de lta bu des bla na med pa'i byang chub chen po thob par byed pa'i byang chub sems rnam par dag pa de bdag gis bya ba'o//phyag rgya chen po la sogs pa bsgrub pa'i zhar la don 'di phal cher bstan zhes pa ni/ rgyud gzhan las phyag rgya bzhi po dag brtag pa'i thabs rgya cher 'byung ba'i zhar la yang sems sbyang ba'i thabs rdo rje phra mo'i ting nge 'dzin sngar bsgom pa'i rnam pa'i thabs 'di phal cher bya dgos par ston pas don de brtag par bya zhes ston te/ji ltar bsgrub pa rjes su dran par byas la zhes pa ni/ sngar dam tshig sems dpa' bsgom pa'i sbyor ba mngon du dran par bya ba'o/ /mnyam par gzhag pa'i rim pa zhes pa ni/sems rtse gcig pa'i ngang du gnas par bya ba dang / lus drang por bsrang zhing mgul pa cung zad bkug pa la sogs pa'i rim pas snying ga nas dbugs mnyam du rgyu ba dang / rdo rje phra mo de lhan gcig tu rgyu bar bya ba'i thabs kyis rdo rje phra mo'i ting nge 'dzin bsgom pa'i tshad ji skad gsungs pa'i tshad dang /mtshan nyid can de'i snying po yid kyis brjod cing sna'i rtse mor gnas par brtag ste/ mi g.yo ba'i rdo rje phra mo'i ting nge 'dzin rlung gi bde bar reg pa myong ba zhes pa ni/ rlung nyid mi g.yo ba las rdo rje phra mo'i rang bzhin du gyur pas lus rab tu sim zhing dga' ba'i reg pa byung ste/rdo rje phra mo'i ting nge 'dzin gyi ro nyams su myong ba ste/ lus sems las su rung ba zhes pa ni/ ting nge 'dzin las su rung bas sems rtse gcig tu gyur pa zhes bya'o//rjes su mthun pa nyams su myong ba zhes pa ni/ rtags de nyid dang ldan par gyur pa'i tshor ba'o/ /de nas reg pa myong ba'i 'og tu zhes pa ni/ 'di lta bu'i ting nge 'dzin las su rung ba'i ro bde ba myong bar gyur pa'i 'og tu 'phro 'du'i rim pa bya ste/ de yang snying po 'di nyid kyis brjod cing sna'i bu ga nas dbugs mnyam par rgyu ba las/ sna'i nang rlung gis rdul gtor ba ltar gcig gnyis nas mang du 'phel te rdo rje phra mo'i mtshon cha mang por gtor bar gyur pa'i rim pas je mang je mang du gyur te/ bdag gi lus kyis khor yug tu khyab par gyur pa dang /de las kyang ji ltar mthong zhing thos pa'i sems kyis gar khyab pa'i srid pa gsum po'i gnas kyi nang thams cad du khyab par bya ste/ de'i rjes su song ba'i yid kyis bsgom zhes pa ni/ rdo rje phra mos gar khyab pa'i rjes su sems kyis kyang ma yengs par de bzhin du 'jug par bya'o//rdo rje phra mos bde reg pa/ /zhes pa ni/ ting nge 'dzin las su rung ba ste/ sems khugs par gyur ba'i mtshan ma byung ba'o/ /mtshan ma de ni 'phro bya zhing / /zhes pa ni/de yang rgya je che je cher mched du gzhug pa'o/ /sems de kun du 'phros par bya/ /zhes pa ni/ rdo rje phra mos gar khyab pa der de'i rjes su sems kyis kyang 'jug par bya ba'o/ /ji ltar 'dod pas sems spros pa/ /zhes pa ni/ rdo rje phra mo dang de'i rjes su 'gro ba'i sems de gnyi gas khams gsum du khyab par bya'o//rgol ba pa na re/ sems dang rlung dang rdo rje phra mo gsum tha dad pa zhig tu 'dod na lta 'dir 'di ltar dbyer rung na/ 'di dag tha mi dad par bstan pas sems dang rlung du yang dbyer med la rlung dang sems nyid kyang rdo rje phra mo'i ngo bo yin na/de'i rjes su sems 'jug par bya zhes smos pa ci'i phyir zhe na/ smras pa/ de ltar de dag tha mi dad cing dbyer med pa yang bden mod kyis/ 'on kyang rnal 'byor pas rdo rje phra mo'i ting nge 'dzin mngon du byed du zin kyang de la dmigs pa rtse gcig pas mi zin du dogs pa'i phyir 'di ltar nan gyis rim pa lta bur bstan pa yang nyes pa med do//sA ra Na badzra zhes pa rdo rje 'phros shig ces pa'o/ /'o na de ltar bya ba de tshad ji tsam du bsam par bya zhe na/ smras pa/ de nas de ltar yun ring du bsams te zhes bya ba la sogs pa gsungs so//snying po 'di yang zhes pa ni gong du smos pa'i sngags de'o/ /reg pa myong bar byed pas zhes pa ni/ dbugs spros pa de dag slar dal bus bsdus par bsams nas sna'i nang du cung zad tsam gyis tshad du gnas pa nyams su myong bar byed pa'o//rdo rje gcig pur rnam par rtog pa de dag slar 'dus pa las rdo rje phra mo gcig gi ngo bor rjes su rtogs par byas pa'i rnal 'byor pas slar sna'i rtse mor 'dus kyi bar du de bzhin du bsgom mo/ /oM saM gra ha ra Na badzra zhes pa ni/ rdo rje slar 'dus shig pa'o/ /de'i 'og tu zhes pa ni/ sngags de brjod pa'i 'og tu badzra driSh+Ta zhes pa'i snying po 'di yid la brjod pa sems de rab tu brtan par bya'o/ /'di ni re zhig ces pa ni/ rgyud thams cad las so so'i 'dod yon gyis sems sbyang ba'i thabs yod kyis kyang /ta twa saM gra ha'i rgyud 'di'i gzhung gis ni rdo rje phra mo'i ting nge 'dzin spyir bstan pas rang gi sems sbyar bar bya bar bstan to/ /'o na rgyud gzhan la ji ltar 'dod ce na/ rdo rje rtse mo las ni/ rdo rje phra mo bstan pa'i skabs su mi rtag pa dang zhes bya ba la sogs pa gsungs te/rdo rje rtse mo'i rgyud chen po las rang gi sems sbyang ba'i thabs su gsungs pa/ mi rtag pa zhes pa ni rtag pa dang ther zug tu lta ba'i gnyen po'o/ /mi gtsang ba zhes pa ni/ 'dod chags can gang dag gtsang bar lta ba'i gnyen po'o//stong pa nyid ces pa ni dngos po can du 'dod pa'i gnyen po'o/ /zla ba'i gzugs brnyan mang po zhes pa ni/ phyogs gcig tu rnam par bcad pa rnams kyi gnyen por bstan pa'o/ /sogs kyi sgras sgyu ma dang / smig rgyu la sogs pa gzhan yang bsdu ste/gzhan yang nyon mongs pa ji lta bu dag la de dang rjes su mthun pa'i gnyen po rnams bstan nas/ 'dul bar byed pa'i rgyu ci sems mnyam par gnas par byed pa'i rgyu rdo rje phra mo lta bu'i ting nge 'dzin gyi rnam pa gzhan dag gsungs pa yod par bstan to/ /rgol ba pa na re/'o na rtsa ba'i rgyud chen po las gsungs pa dang / 'dir brjod pa 'di dag mi mthun par snang ba la ci'i phyir mi mtshungs par 'dod ce na/ de rnams kyis kyang sems mnyam par gnas par bya ba/ ji ltar 'dod par byas na 'gal ba med do zhes gsungs te/de la thabs mi mthun par snang na yang sems dbang du bya ba'i don du gsungs par 'dra bas na mi mthun pa ltar snang na yang nyes pa med do/ /de bas ni de rnams las gzhan yang phan yon 'di 'byung ste/ gang gi phyir de la/ ting nge 'dzin de la la nyon mongs pa'i gnyen por gyur pa dang /sems mnyam par gnas pa'i rgyur yang 'gyur ro zhes gsungs te/ de ltar bstan pa yang gzhung de nyid las 'di skad du/ bdag ni rdo rje phra mo'i chos/ /bdag nyid bsam pa shes par ldan/ /bdag de dmigs su med pa ste//'byung ba chen po bzhi yi lus/ /zhes bya ba la sogs pa gsungs te/ bdag ni rdo rje phra mo'i chos zhes pa ni/ gzung 'dzin dang ldan pa'i sems nyid rdo rje phra mor bsgom pa'o/ /bdag nyid bsam pa shes rab kyi rang bzhin can bdag nyid la gzhag cing bsam par bya ba'o//bdag de dmigs su med pa ste/ /zhes pa ni/ des gtan la phab ste/ nang gi sems de nyid rang bzhin dmigs su med par rtogs pa'o/ /'byung ba chen po bzhi yi lus/ /zhes pa ni/ de'i zhor la phyi'i yul rnams kyang ma grub par rtog pa ste/ji ltar zhe na/ 'byung ba chen po rnams ni gang las byung zhes pa chen po bzhi nyid kyang / so sor rtog pa'i shes rab kyis brtags shing so sor gzhigs te gtan la phab na/ dngos su grub pa ga la yod de gang ltar yang ma grub pa'i don to/ / yang na lus 'di thams cad ni/ /zhes pa ni/ gtsang ba kho nar 'dzin pa'i gnyen por bstan pa ste/ mi gtsang rkyen las byung bas na/ /zhes pa ni/ rgyu las dang nyon mongs pa yang 'khor ba skyed par byed pas mi gtsang la/ rkyen pha ma las byung ba'i khu khrag rab tu mi gtsang ba las byung bas na/spyi bo nas brtsams rnal 'byor pas/ /zhes te/ mi gtsang ba sum cu rtsa drug gis lus khyab par gnas shing de'i gnas su gyur pas na/ rkang mthil bar du khyab par bsam/ /zhes bya ste/ rnal 'byor pas zhes pa ni rnal 'byor pa'i shes rab kyis de ltar rtogs par bya zhes pa'i tha tshig go//zla ba'i dbus su mi 'jigs pas/ /zhes pa ni/ dngos po can du lta ba'i gnyen po ste/ chu'i zla ba ni nges pa med pa'i rang bzhin te/ mi 'jigs pa'i shes rab yod pa ste des de ltar bsgom pa'i don to//yang na bdag nyid rdo rjer bsam/ /zhes pa ni/ rdo rje ni stong pa chen po'i ye shes kyi rang bzhin dang dbyer med pa ste/ zla ba las gyur pa'am/ zla ba la gnas pa'am/ zla ba nyid dang tha mi dad par bsam pa ste/ gang ltar yang nyes pa med do//yang na snying gi dbus su ni/ /zhes pa ni/ phyogs gcig tu rnam par bcad pa rnams kyi gnyen po ste/ rang gi sems de nyid shin tu phra ba'i zla ba'i dkyil 'khor brtag par bya'o/ /yang na zla ba gnyis ldan pa/ /zhes pa/ zla ba brtsegs ma ste tshogs rnam gnyis rdzogs pa'i rgyur dgongs pa'o//dbus su rdo rje bsgom par bya/ /zhes pa ni zla ba rkyang pa dang brtsegs ma gang yang rung ba bsgoms pa'i dbus na/ rdo rjes mtshan pa ste/ ye shes lnga'i rang bzhin te tshogs gnyis rdzogs pa'i 'bras bur dgongs pa'o/ /yang na dbus kyi rdo rje yis//zhes pa ni/ sems rdo rjer bsgoms pa des lus thams cad la khyab ste/ lus kyang de bzhin du brtag par bya ba ste/ de bas na/ rang gi lus ni khyab par bya/ /zhes gsungs so/ /rgya cher zhes pa ni rnam pa mang po dag gsungs zhes bya ba ste/'di nye bar mtshon pa tsam du gzhag pa'i tshig go/ /de ltar gang yang rung ba'i rim gyis zhes pa ni/ rdo rje phra mo dang stong par bsgom pa dang / mi gtsang bar bsgom pa dang / zla bar bsgom pa dang / thams cad rdo rjer bsgom pa'i rnam grangs de las gang yang rung ba gcig bzung ba'i rim gyis ci tsam 'dod kyi bar du bsgom pa ste/dus ji srid 'dod par bsgom zhes pa ni/ zhag dang zla ba dang lo ji tsam du bya bar 'dod pa'am/ yang na dus mtshams bzhi las gang 'dod pa de'i bar du bsgom par bya'o/rtse gcig tu dmigs pa'i mtshan nyid du zhes pa ni de ltar sems rtse gcig tu dmigs nas gang ltar dmigs pa de bzhin bsgrub pa ni/ sems dbang du gyur pa yin te/ de ltar shes na gzod gang 'dod pa'i bsgrub pa de brtsam par bya dgos te/ sa pa'i dngos grub la sogs pa/zhes pa ni/ sa pa ni sa las byung ba'i gter bsgrub pa'o/ /sogs kyi sgras ni chu la 'gro ba la sogs par phyis 'byung ba'i tshul gyis dngos grub gzhan bsdu bar bya'o/ /de bas ni sa pa'i dngos grub la sogs pa 'jig rten pa dang 'jig rten las 'das pa'i phyag rgya chen po la sogs pa dngos grub bsgoms pa las byung ba rnams bsgrub par bya'o zhes gsungs te/phyag rgya chen po la sogs pa/ /zhes pa ni/ phyag rgya chen po dang de las byung ba'i dngos grub po/ bsgoms pa las byung ba zhes pa ni/ gang ci'ang rung ba'i dngos grub gang ltar 'dod pa thams cad ni/sems mngon du khugs par byas pa'i sbyor ba las byung bas na/ bsgom pa ni dngos grub kyi rgyur bshad do/ /rnal 'byor sgrub pa po gnyis te/ /zhes pa ni/ sngon sbyangs pa'i 'phro yod pa dang / de ma yin pa'i bye brag gis gnyis su 'dod do//de la gcig ni zhes pa ni/ dkyil 'khor du gnas nas ye shes thob ma thag tu ye shes babs par gyur la/ de dag ni sa pa la sogs pa 'jig rten pa'i dngos grub rnams kyi don la sems sbyang ba'am/ sngags bzlas brjod byas pa tsam gyis 'bras bu grub pa ste/sngon sbyangs pa'i 'phro yod pa'o/ /de las gzhan pa'i rnams ni zhes pa ni/ dkyil 'khor du zhugs shing ye shes dbab pa byas nas kyang / nam mtshan ma ma byung gi bar du bsgoms shing bzlas brjod byas nas gang 'dod pa de grub par 'gyur ba ste/de ni sngon sbyangs pa'i 'phro dang mi ldan par rig par bya'o/ /rgol ba pa na re/ 'o na phyag rgya chen po la sogs pa'i dngos grub sgrub par 'dod pa dag dkyil 'khor du zhugs shing ye shes dbab par byas pas kyang ma grub la/ bsod nams dang mthu ci yod pa dag gis kyang myur du mi grub na/ji ltar bya zhe na/ 'jig rten las 'das pa phyag rgya chen po la sogs pa dam tshig dang / chos dang / las bzhi'i dngos grub rnams ni bsod nams ci yod pa las dkyil 'khor du zhugs pa'i tshe/ mthus kyang ma thob pa de rnams ni 'og nas 'byung ba'i mtshan nyid bsgoms pas thob par shes par bya'o zhes gsungs te/kha cig bsod nams dang las 'phror ldan pa dag ni dkyil 'khor du zhugs shing ye shes phab pa tsam gyis thob la/ gzhan de ltar ma yin pa rnams ni/ phyag rgya bzhi ji ltar bsgom pa'i thabs dang mtshan nyid 'og nas 'byung ba bzhin du bsgoms shing bsgrubs na 'grub par shes par bya zhes bshad do//'o na 'jig rten dang 'jig rten las 'das pa'i dngos grub bsgrub pa dang / phyag rgya bzhi po dag 'grub par bya ba'i thabs gcig gam tha dad pa yin zhe na/de la 'jig rten pa dang 'jig rten las 'das pa'i dngos grub rnams ni rang gi lha'i dam tshig sems dpa'i rnal 'byor ji skad bstan pa nyid kyis bsgrub par bya'o zhes gsungs pas dngos grub 'di dag bsgrub pa la ni dam tshig sems dpa'i sgrub pa kho na'i sbyor ba mngon du bya la/ye shes kyi sems dpa' mdun du bsam gyis/ khong du gzhug par bya mi dgos/ /zhes bstan to/ /phyag rgya chen po la sogs pa bzhi rnams bsgrub pa la ni zhes pa ni/ phyag rgya bzhi rnams bsgrub pa la rang gi lha'i dam tshig sems dpa'i rnal 'byor byas nas/rang gi lus kyi nang du rang gi ye shes sems dpa' gzhug par byas la bsgrub ste/ de la sbyor ba ni khyad par bya ba 'di shes par bya ste zhes pa ni/ 'jig rten dang 'jig rten las 'das pa'i dngos grub rnam pa gnyis sgrub pa'i thabs las phyag rgya bzhi bsgrub pa la ni/ye shes sems dpa' khong du gzhug pa'i sbyor ba 'di khyad par du bya ba yin pas 'di shes par bya ste gang zhe na/ 'di ltar rang gi lha zhes bya ba la sogs pa dag go /rang gi lha'i dam tshig sems dpa' zhes pa la sogs pa ni rdo rje dbyings la sogs par gsungs pa'i phyag rgya chen po nyid bsgrub pa ni/ye shes kyi sems dpa' dam tshig sems dpa'i rnal 'byor byas pa'i khong du gzhug go/ /phyag rgya chen po bsgrub pa'i lhas de bzhin du ji ltar rigs par rdo rje dang sogs pa'i sgras lcags kyu dang / mda' dang /se gol la sogs pa sems dpa' so so'i dam tshig gi phyag rgya bsgrub pa la ni/ rdo rje la sogs pa rang gis gang bsgrub par bya ba'i dam tshig gi phyag rgya snying gar gzhag go /chos kyi phyag rgya bsgrub pa la ni/ gang bsgrub pa'i rang gi lha dam tshig sems dpar bsgoms pa'i rang gi lce la bsgrub par bya ba'i lha'i lce steng du rdo rje chos yi ges mtshan pa bsam mo//rdo rje rgya gram la sogs pa las kyi phyag rgya bsgrub pa la ni rang gi snying gar las kyi rdo rje kha bzhi pa sbyar bar bya'o/ /de ltar phyag rgya bzhi bsgrub pa las gzhan dman pa la sogs pa'i dngos grub ji snyed po dag rtsa ba'i rgyud de kho na nyid las gsungs pa dang /de'i phyi ma'i yang phyi ma'i rgyud las gsungs pa thams cad ni/ ye shes sems dpa' mdun du bsam par zad kyi khong du gzhug mi dgos te rang gang bsgrub pa'i lha'i dam tshig sems dpa'i rnal 'byor nyid kyis 'grub par gsungs so//rgol ba pa na re/ 'o na gzhan dag na re/ dngos grub bsgrub pa dang / phyag rgya bzhi bsgrub pa gnyis ka la khyad par med par ye shes sems dpa' dbab cing mdun du bsam pa dang / rang la gzhug par bya dgos zer ba yod na/ de ltar ma yin nam zhe na/ gang yang 'jig rten pa'i dngos grub dang / 'jig rten las 'das pa'i dngos grub bzlas brjod dang / bsgom pa goms par byas pa las ji ltar rigs par 'byung ba thams cad bsgrub pa'i phyir phyag rgya bzhi bsgrub pa dang /khyad par med par bdag nyid rang gi lha'i dam tshig sems dpa'i rnal 'byor byas pa la/ ye shes sems dpa' khong du gzhug pa sngar byas te bsgom pa'am/ bzlas brjod bya bar 'chad pa'i slob dpon de rnams kyis ni rdo rje dbyings kyi dkyil 'khor gyi skabs su phyag rgya chen po la sogs pa bzhi bcing bar bstan pa'i thabs de dag legs par ma rtogs pa'i phyir gzod legs par brtag dgos te zhes gsungs te/slob dpon kha cig na re/ gang yang 'jig rten pa'i dngos grub dang 'jig rten las 'das pa'i dngos grub bzlas brjod dang /phyag rgya chen po bsgom pa goms par byas pa las de dag ji ltar rigs par 'byung ba thams cad bsgrub pa'i phyir de gnyis la khyad par med pa dang por bdag nyid gang bsgrub par 'dod pa'i rang gi lha'i dam tshig sems dpa'i rnal 'byor mngon du byas pa'i lus la ye shes sems dpa' gzhug pa sngar byas te/de nas gdod bsgom pa dang bzlas brjod bya bar 'chad pa'i slob dpon de rnams kyis ni/ rdo rje dbyings kyi dkyil 'khor gyi skabs su phyag rgya chen po la sogs pa phyag rgya bcing bar bstan pa de legs par brtags dgos te 'og nas 'byung ba 'di ltar rdo rje dbyings kyi dkyil 'khor bstan pa'i skabs der ni de bzhin gshegs pa la sogs pa'i dam tshig sems dpar gang bsgom pa'i phyag rgya chen por bdag nyid byin gyis brlab par byas nas/phyag rgya chen po bsgrub pa'i rnal 'byor pa de nyid la ye shes kyi sems dpa' gzhug par bstan te/rgyud de nyid las/ de nas 'dir/ phyag rgya chen po bsgrub par bshad/ /ces bya ba la sogs pa'i rim gyis bstan nas/ phyag rgya chen po'i dngos grub kyi 'bras bu bstan pa'i mtha'i par gyis gzhung gis bshad do//de'i 'og tu gdod rdo rje sems dpa' la sogs pa dam tshig gi phyag rgya bsgrub pa'i mtshan nyid bstan nas/ rang gi phyag rgya snying gar gnas/ /rdo rje sems dpa'i ting 'dzin gyis/ /zhes bya bas de rnams bsgrub pa gsungs te/de la/ rang gi phyag rgya snying gar gnas/ /zhes pa ni/ rdo rje la sogs pa gang bsgrub par 'dod pa dam tshig gi phyag rgya'i mtshan ma'o/ /rdo rje sems dpa'i ting 'dzin gyis/ /zhes pa ni/ zla ba'i dkyil 'khor la gnas pa'i dam tshig gi phyag rgya rdo rje'i mtshan nyid gnas pa la bya ste/de yang rim pa ni/ dam tshig sems dpa'i sbyor ba mngon du byas pa'i snying ga'i zla ba'i dkyil 'khor la gang bsgrub par 'dod pa de'i dam tshig gi phyag rgya ste/ 'dir rdo rje zhes brjod pa ni nye bar mtshan pa'i tshig go/ /de bzhin du chos kyi phyag rgya dang / las kyi phyag rgya'i mtshan nyid kyang rgyud de nyid las gsal bar bstan nas/ lce dang snying ga na gnas par bstan to/ /'on tang de ltar rdo rje dbyings kyi dkyil 'khor gyi skabs der brtags na/ 'jig rten dang 'jig rten las 'das pa'i dngos grub bzlas brjod goms par byas pas bsgrub pa dang /phyag rgya chen po la sogs pa bsgrub pa gnyi ga la khyad par med pas ye shes sems dpa' dam tshig sems dpa' lags par bya ba ga la yod de med do zhes rgyud kyi don rtogs pa la mkhas pa'i slob dpon mkhas pa rnams kyis bstan to zhes bya'o/ /de las gang la yod ces bya ba ni/rgyud las ga la 'byung ste mi 'byung ba la khyed kyis de ltar rtog pa nor bar rtogs pa yin pas de ltar ma byed cig ces dgag par bstan pa'o/ /gzhan yang dpal rdo rje sems dpa' la sogs pa zhes pa ni/ de bzhin gshegs pa las logs su phye ba'i phyir na gzhan zhes smos te/ye shes kyi sems dpa' bcu drug po rnams so/ /rdo rje dbyings la sogs pa'i dkyil 'khor bzhi rnams su zhes pa ni/ rdo rje dbyings dang / khams gsum rnam par rgyal ba dang / 'gro ba 'dul ba dang / don thams cad grub pa dang /bzhi po phyag rgya chen po la sogs pa'i rang bzhin rnams kyis gnas zhes pa ni/ spyi dang khyad par gnyis ka'i dbang du phyag rgya bzhi po'i ngo bo'am/ yang na gnas skabs kyis 'gyur ba'i tshul du gnas te/ de rnams ji ltar rigs par rang gi lha dang mthun pa nyid du de'i nga rgyal bskyed nas bsgom pa la ni/rang gi lus kyi nang du ye shes kyi sems dpa' gzhug pa'am/ bsam pa'i rigs so/ /de las pa la sogs pa'i dngos grub sgrub pa yi ni rim pa yang 'di lta ste zhes pa ni/ gter sgrub pa ste/sogs kyi sgras ni de las gzhan pa'i dngos grub phyis 'byung ba rnams bsdu'o/ /de'i rim pa yang 'di'o zhes pa ni de sgrub pa'i thabs kyi go rims kyang 'di ltar bya ste/ gang zhe na/ dang por sems sbyang bar bya ba'i phyir sngar bstan pa'i rdo rje phra mo ting nge 'dzin dang / sogs kyi sgras mi gtsang bar brtag pa dang /mi gtsang bar bsgom pa'i thabs bsdu ste/ de dag la rab tu goms par byas nas las su rung bar gyur pa dang / bdag nyid lha gang bsgom pa de'i dam tshig sems dpa'i rnal 'byor du byas nas byin gyis brlab pa la sogs pa'i cho ga 'di dag dang ldan par byas te/de bzhin du ye shes sems dpa' mdun du bsams la ci nus su mchod par byas nas/ rdo rje phra mo'i ting nge 'dzin skad cig gis khugs par byas la/ ting nge 'dzin de btang nas 'og nas 'byung ba'i cho ga'i rim pas/ rdo rje sems dpa'i phyag rgya dral ba sngar byas te/dbab pa'i snying po/ oM A be sha aHzhes pa/ phyag rgya dang sbyar la bya ba dang / ye shes dbab pa yang mngon du bstan par bya'o/ /de ltar bya ba la 'di ni phal cher 'jig rten dang 'jig rten las 'das pa'i dngos grub thams cad bsgrub pa la thabs shes rab ldan pa'i rnal 'byor pa rnams kyis 'di dag sngon gyi dus su dang po la bya ba'i cho ga ste/de nas gdod dngos grub bsnyen pa'i cho ga bya'o/ /de la dngos grub rnams kyi nang na 'dod pa'i dngos grub rnams bsgrub sla bas na/ rgyud las dang por bshad de/ de la gang 'dod pa'i dngos grub de grub par bya ba'i phyir slob dpon gyi man ngag dag dang /bsgom pa dang / rdzas ji ltar blang ba'i thabs dang / rim pa sgrub thabs kyi skabs 'dir yang 'di ltar bstan to/ /de yang ji skad du rgyud las/ gter la rdo rje gzugs gnas pa/ snying gnyid du bsgom par bya//bsgoms pas sa la gnas pa yi/ /gter gyi rnam pa'ang thob par 'gyur/ /zhes gsungs te/ de'i don yang 'di lta ste/ snga ma bzhin du thams cad spyi'i dam tshig sems dpa'i rnal 'byor la sogs pa'i ye shes dbab pa'i mtha'i bar du sngon gyi dus su bya rnams byas nas zhes pa sngar bstan pa bzhin du dam tshig sems dpa'i rnal 'byor dang /ye shes dbab pa la sogs pa'i rim par bya ba'o/ dus bzhir ci nus bsam pa ni/ 'di lta ste zhes pa ting nge 'dzin rim pa bstan pa ste/ rang gi snying gar gter gyi bum pa'i nang du gnas pa'i zhes pas/bdag de bzhin gshegs pa mi bskyod pa'am/ de'i rigs kyi sems dpa' gang yang rung ba'i dam tshig sems dpa'i sbyor ba mngon du byas la/ de'i snying gar gter gang la yod pa'i gter gyi bum pa bsam pa'i nang na zla ba'i dkyil 'khor la rang gi rigs dang mthun pa'i rdo rje rtse lnga pa bsams nas/badzra ni d+hi zhes pa'i snying po 'di/ rdo rje tshig gis brjod cing bsgom mo/ /de nas sems de las su rung zhing de'i mi mthun pa'i phyogs rnams bcom ste/ rdo rje dang ldan pa'i bum pa la dmigs pa'i ting nge 'dzin rab tu gsal bar snang zhing ting nge 'dzin thams cad grub pa'i spyi'i mtshan ma'i mtshan nyid dang rjes su mtshan nyid ma yang byung la/snying gar brtags pa'i bum pa dang rdo rje yang snang bar gyur gyi bar de srid du bsgom mo/ /de nas ting nge 'dzin thams cad grub pa'i mtshan ma'i mtshan nyid kyang 'og nas 'byung ba'i bzhin snang la/bum pa'i rdo rje yang mngon du gyur pa dang / bdag dang gnas bsrung ba dang / phyi nang gi mchod pa'i cho ga bya ste/ gter kho na la dmigs pa'i ting nge 'dzin de nyid kyis mtshan gcig tu gnas te/ de'i 'og sa gnas brtag pa'i phyir zhes pa/ de ltar bsgoms pa'i 'og tu phyi de nub mo des pa'i gnas brtag pa'i phyir sngar gsungs pa de bzhin du mchod pa'i cho ga byas la/der zhor la 'byung po rnams la yang so so rang rang gi dam rdzas ci tshogs pa bsags pa'i gtor ma snga nas bshams pa byin te/ sa pa'i zhes pa gter gang na yod pa'i re ba'i gnas de nyid dam/yang na gang yang rung ba'i gnas su 'dug la/ ji ltar sngar bsgom pa goms pa'i ting nge 'dzin de nyid goms pa mngon du byas te/ ji srid du ting nge 'dzin mnyam par gzhag pa la gnas pa'i sems las su rung ba nyid kyis sa la gnas pa'i gter gang na yod pa mngon sum du mthong bar gyur pa de srid kyi bar du bsgom par bya'o//de ltar snang bar gyur pa dang / blang ba'i thabs ni de nas rdo rje dral ba'i phyag rgya bcings te/ sa brkos la blang bar bya'o/ /de ltar gong nas 'byung ba'i sbyor ba gnas zhes pa gong du bstan pa de ltar rin po che dang /pad+ma dang / las kyi rigs kyi gter bsgrub pa yang spyi'i cho ga sngar bstan pa 'di ltar bya'o/ /de rnams kyi bye brag gang yin pa de ni 'dir bshad par bya ste zhes pa gter lhag ma gsum po de dag ji ltar bsgrub pa'i bye brag gang ltar yin pa de ni skabs 'dir bshad de/de la sbyor ba gnyis pa zhes pa ni/ rdo rje rigs kyi gter bsgrub pa ste/ de la ni snying po ra t+na ni d+hi zhes pa 'dis nam mkha' la rdo rje bsgom par bya'o/ /de ltar yun ring du bsgoms nas sems las su rung ba dang / nam mkha' la gnas pa'i rdo rje de gter gang na yod pa'i steng du lhung par brtag go//de ltar yang rgyud las 'di skad du/ rdo rje gzugs ni bris nas su/ /zhes bya ba la sogs pa gsungs te/ rdo rje ni rdo rje'i nor bu rin po che ste/ yid kyis gsal bar brtag gi mdun gyi nam mkha' la bsam par bya'o//sbyor ba gsum pa zhes pa ni/ pad+ma'i rigs kyi gter sgrub pa ste/ rang gi lce la d+ha rmA ni d+hi zhes pa'i snying po 'dis ji skad du/ rigs dang mthun par bya zhes gsungs pa'i don gyis rdo rje kha dog dmar por bsgoms te/ ji srid rang gi gter 'di na yod do zhes smra bar gyur gyi bar du bsgoms te/de ltar gyur pa dang / nub gcig brtag pa de bsrung ba dang / mchod pa la sogs pa byas nas/ nub gcig rtag par bzlas shing gsal bar brtags nas gang na yod pa bslang bar bya'o/ /de'i don yang rgyud las/ lce la yang ni rdo rje'i gzugs/ /zhes gsungs pa yin no//sbyor ba bzhi pa zhes pa ni/ las kyi rigs kyi gter bsgrub pa ste/ dang por bdag gi lus stong par bshig pa la rdo rje rgya gram rdul phra mo'i tshad tsam slar bdag gi lus su gyur te/ bdag gi lus rdo rje rgya gram gyi ngo bor gyur pas/ karma ni d+hi zhes pa'i snying po 'di bsgoms te/bsgrub pa'i tshe rtag par de ltar bsgoms pas bdag gi lus de nyid gter gang na yod pa'i gnas su lhung bar gyur pa de srid kyi bar du bsgom par bya'o/ /de nas snga ma lta bu'i sbyor ba dang ldan par byas nas gter blang bar bya ste/ 'di skad du rgyud las/ lus dang ngag dang yid rnams kun//zhes bya ba la sogs pa gsungs so/ /snying po rnam pa bzhi po 'di yang rigs kyi bye brag las bstan te zhes pa rigs so so'i gter bsgrub pa'i dbang gis so so'i rigs kyi bye brag dang mthun par bstan zhes pa'i don to/ /de bas na rang gi rigs su gtogs pa'i lha thams cad kyi so so sgrub pa'i bye brag las bshad par bya'o zhes pa de bzhin gshegs pa'i rigs kyi bum pa bsgrub par gyur na/de bzhin gshegs pa'i rigs kyi sems dpa' rdo rje sems dpa' la sogs pa gang yang rung bas bya'o/ /de bzhin du rigs lhag ma gsum gyi gter bsgrubs na yang de dag gi so sor de bzhin du bsgrub par bya'o//rdo rje rdzu 'phrul la sogs pa/ /zhes pa rdo rje'i rdzu 'phrul bas na/ rdo rje'i rdzu 'phrul te/ sogs kyis lhag ma gsum bsdus te/ rigs bzhi so so'i dngos grub bzhi'i sbyor ba'i mtshan nyid gzhan bstan pa dag la yang phal cher sngar bstan pa'i rim pa dang thabs de bzhin du bya'o zhes spyir bstan to//de ltar bstan pa de la 'og nas 'byung ba 'di ni rdo rje rdzu 'phrul bsgrub pa'i man ngag go / gang zhe na rgyud las/ rdo rje bab par gyur nas su/ /chu la rdo rje'i gzugs bzhin du/ /bsgoms na myur du grub pa ni//chu yi steng na'ang 'chag par 'gyur/ /zhes gsungs te/ dang por re zhig sngon gyi dus su bya ba'i cho ga thams cad byas la zhes pa ni/ 'dir yang sngar gsungs pa bzhin du/ dang por dam tshig sems dpa' bsgom pa dang / ye shes dbab pa la sogs pa'i rim pa byas la/ de nas rdo rje sems dpa'i phyag rgya bcings la/dang por sngags an twa ta zhes pa'i sngags brjod/ de'i rjes la rdo rje dbab pa'i snying po oM badzra A be+e sha aHzhes pa ni rdo rje tshig gis brjod do/ /de nas rdo rje sems ma'i phyag rgya de gnyis su byas la/ zhes pa'i phyag rgya bcings la/ yi ge brgya pa sngar gsungs pa'i/ / zhes pa'i sngags 'di yang rdo rje tshig gis ji tsam nus kyi bar du brjod par bya'o/ /de ltar byas na ye shes dbab par 'gyur te/ de bas na zhes pa ye shes dbab par 'gyur bas na de'i rtags ni lus dang ngag dang sems mnyam par gnas pa dang / rjes su mi mthun par gyur pa'i mtshan ma lus 'dar ba dang ngag 'chol ba la sogs pa 'byung bar mi 'gyur zhing snga ma kho dmigs pa bzhin du gnas par 'gyur ro//dngos grub bshad zin pa dang ma bshad pa'i sbyor ba zhes pa/ 'jig rten dang 'jig rten las 'das pa'i dngos grub sngar bshad zin pa dang / sngar ma bshad pa gdod phyi nas bshad pa'i sbyor ba thams cad la 'dir bstan pa'i rdo rje dbab pa'i cho ga 'di sbyar bar bya'o//de la skabs 'dir bshad pa 'di ni chu'i steng na sa la bya ba bzhin du 'chag pa'i rdzu 'phrul bskyed pa'i sbyor ba ste/ 'di'i sbyor ba yang dang por re zhig rnal 'byor pa bdag nyid rdo rje rdzu 'phrul bsgrub par 'dod pa de mtsho dang rgya mtsho dang lu ma dang /sogs kyi sgras chu bran dang lteng ka yang bsdu ste/ gang yang rung ba'i ngogs su gnas la de dag tu yang gnas rab tu dben par byas sam ting nge 'dzin gyi rnal 'byor rab tu dben par byas kyang rung / yang na khang pa dang / sbra gur la sogs pa ji ltar 'dod pa'i gnas su 'dug ste/ gnas der kham pa dang zangs ma la sogs pa las byas pa'i snod kha yangs pa dag na chus bkang ba bzhag ste/ phyi nang gi mchod pa la sogs pa sngon du byas pa nas ye shes dbab pa'i bar du dgongs pa'i cho ga thams cad byas te/ chu'i gzhi de mig gis mngon sum du mthong bar byas nas/ badzra dza la zhes pa'i snying po 'di yid la gnas par yang nas yang du brjod cing /chu'i rdul phra rab ji snyed pa yod pa thams cad rdo rje'i gzugs mang por gyur nas 'phro zhing 'du ba'i tshul gyis gcig la gcig 'byar nas chu de ltar 'dod pa'i bzhin du khyab pa rdo rje'i gzugs gcig pu rang gi rigs kyi lha'i kha dog dang mthun par gyur pa'i mtshan ma byung gi bar du yid kyis brtag go//de ltar snang nas kyang dus bzhir dngos grub thams cad ci grub pa'i mtshan ma 'og nas 'byung ba de mngon du ma gyur bar du bsgom mo/ /de nas sems ting nge 'dzin de kho na la mnyam par gzhag pa nyid kyis nang gi yid kyi rnam par shes pa la dngos grub de'i rnam par snang ba'i rnam par rtog pa ma btang bar chu de nyid sra bar gyur cing rkang lag gis reg par byar rung zhing /chu de rdo rje dang 'dra bar sra bar gyur par snang gi bar du bsgom par bya ste/ de nas de ltar gyur pa dang / rigs gang yang rung pa bsgrub pa de'i dkyil 'khor gang yang rung ba cig chu de'i steng du bris te/sngon gyi dus su bya ba'i cho ga rnams byas nas zhes pa ni/ bsrung ba dang / mchod pa la sogs pa bsgrub pa gzhan la bstan pa'i cho ga rnams sngar byas nas/ nub gcig phyag rgya chen po dang / chu nyid rdo rjer snang ba'i ting nge 'dzin de nyid kyi ngang gis gnas so//de nas nam chu'i steng du 'gro bar 'dod pa de na/ chu de'i drung du ting nge 'dzin 'di'i cho ga bzhin du mngon du byas te/ de bzhin du mnyam par gzhag pa'i ting nge 'dzin de nyid kyis langs nas/ chu de'i steng nas 'gro ba dang / 'ong ba dang / sogs kyi sgras 'chag pa dang /'dug pa dang / nyal bdag bsdu ste de dag ting nge 'dzin ma btang gi bar du byed nus par 'gyur ro/ /'dod pa'i gzugs ston pa'i sbyor ba ni zhes pa 'gro ba gang la gzugs ji ltar 'dod pa bzhin du ston par nus pa'i ting nge 'dzin ni 'dod pa'i gzugs ston par nus pa'i sbyor ba ste/rgyud las ji skad du/ de bzhin rdo rje dbang byas nas/ /zhes bya ba la sogs pa gsungs pa ste/ sngon gyi dus su bya ba'i cho ga zhes pa ni/ phyag rgya chen po bsgom pa nas ye shes dbab pa'i bar du ste/ de dag de bzhin du byas nas bdag nyid gang 'dod pa'i gzugs su brtags nas/snying po badzra rU pa zhes bya ba yid kyis rim gyis bzlas shing / brgya byin dang tshangs pa la sogs pa ji ltar 'dod pa'i gzugs gang yang rung ba cig tu bdag nyid bsam pa ste/ ji srid bar du gsal zhing bdag nyid la snang bar gyur te/ tha na gzhan gyis kyang mthong gi bar du bsam mo//de nas de las gzhan pa'i gzugs su bsam zhes pa de las su rung ba dang / de las gzhan pa'i gzugs gang yang rung bar bsam mo/ /de las su rung ba dang de las kyang gzhan pa'i gzugs bsgyur te bsam mo/ /de ltar bsgyur ba dang sems dbang du gyur nas de bzhin du snang du btub pa dang /ting nge 'dzin de'i ngang la nub gcig la gnas nas nam 'dod pa na bdag nyid de'i gzugs su bsams te/ nam ting nge 'dzin las ma langs kyi bar du bdag nyid de ltar snang bar rang gis mthong zhing gzhan gyis kyang mthong ba de srid kyi bar du bsgom mo/ /de ltar bsgoms na gang lhar 'dod pa'i gzugs ston nus par 'gyur ro//mi snang ba'i rnal 'byor zhes pa ni gzhan gyi dbang po'i spyod yul du mi 'gyur bar bya ba ni/ mi snang ba'i dngos grub ste rnal 'byor gyi mthu yang byung bas na rnal 'byor zhes brjod do/ /de yang rgyud las/ de bzhin bdag la babs nas su/ /zhes bya ba la sogs pa gsungs te/rang gi lus rdul phra rab tu bshig pa'i rim gyis rang bzhin med pa nam mkha' lta bur brtags pa/ snying bo badzra A kA sha zhes yid la brjod cing bdag nyid nam mkha' dang 'dra bar gyur pa'i ting nge 'dzin gyis mtshan ma ma byung gi bar du bsgom mo/ /de gyur pa dang de'i ngang las sems mnyam par bzhag na thad na 'khod pa rnams kyis kyang mi mthong bar gyur to//de ltar gyur pa dang gang ltar bsgrub pa de'i dkyil 'khor bris te/ nub gcig ji ltar 'dod pa'i ting nge 'dzin la gnas te/ yul dang dus zhes pa ni dbyar dgun ston dpyid dam dus snga phyi gang ltar 'dod pa de bzhin du brtag cing gnas pa'o//de nas ting nge 'dzin de la gnas nas sus kyang mthong bar mi 'gyur ba de srid du rnal 'byor la gnas par bya ste/ de ni sus kyang mthong bar mi 'gyur ro/ /nam mkha' la 'phar ba'i sbyor ba'i mtshan nyid ces pa/ nam mkha' la 'gro ba'i ting nge 'dzin ni/ nam mkha' la 'phar pa'i sbyor ba ste/de'i mtshan nyid kyang rgyud las/ bdag rang rdo rje dbab byas nas/ /zhes bya ba la sogs pa gsungs te/ gzugs rnam par ma bshig pa nyid du zhes pa ni/ gzugs snga ma kho nyid las/ gtan tshigs kyis ma bshig pa'am/ yang na rang gang la mos pa'i rigs kyi lha'i ting nge 'dzin ma bshig par de nyid las/bdag rdo rje rtse lnga pa shing skam po lta bur rab tu yang ba/ dbugs khong nas gyen du 'dren pa'i rlung gis gyen du 'degs shing / ji srid sa las sor gcig dang sor gnyis la sogs pa'i rim gyis je mtho je mthor 'phags nas bdag gyen du 'gro bar 'gyur ba de srid du bsgom mo//de nas sems de las su rung ba de bzhin du nus pa dang / dkyil 'khor bris nas nub gcig gi ting nge 'dzin de'i ngang la gnas te de nas ji ltar 'dod pa'i khang pa la sogs pa'i steng du 'dzegs nas/ ji ltar gyen du 'gro bar bsams/ nam mkha' la 'phar ba'i ting nge 'dzin mngon du byas nas ji ltar 'dod pa de tsam du nam mkha' la 'phar zhing ting nge 'dzin ma btang ba de srid du nam mkha'i dkyil na gnas nus par 'gyur ro//rig sngags 'chang ba grub pa'i rim pa yang zhes pa/ rig sngags 'chang ba bsgrub pa'i ting nge 'dzin gyi rim pa ste/ de la rig sngags 'chang ba la yang rnam pa gnyis te/'jig rten pa dang 'jig rten las 'das pa'o/ /de la yang rnam pa gnyis te/ rig sngags 'chang gi rgyal po dang / rig sngags 'chang phal pa'o/ /de yang bsgrub pa'i dus na dang por mngon pa dang / rdo rje phra mo'i ting nge 'dzin gyis sems las su rung bar bsgom pa dang /ye shes dbab pa la sogs pa byas nas/ rigs bzhi'i rig sngags 'chang gang bsgrub par 'dod pa'i snying po/ badzra d+ha ra zhes bya ba la sogs pa gang yang rung ba yid la brjod cing / bdag nyid rigs bzhi gang bsgom pa'i kha dog dang ldan pa/ gzi mdangs dang / gdu bu dang / dbu rgyan dang / snyan cha la sogs pas brgyan pa/ zla ba'i dkyil 'khor la gnas nas lag pa g.yas pa na rdo rje la sogs pa rang gi rigs kyi phyag mtshan thogs te/ rang gi snying po'i don du rjes su mthun par sems shing / bdag nyid gang bsgom pa'i rigs su nga rgyal byas nas/ ji srid zla ba'i dkyil 'khor dang / phyag mtshan rdo rje la sogs pa dang / rigs dang mthun pa'i cha lugs mngon du snang gi bar du ting nge 'dzin la gnas shing sems khugs par byas te/ mig phye nas bltas nas rang gis rang rig sngags 'chang gi gzugs su snang bar gyur gyi bar du bsgom par bya'o//de nas zla ba la 'dug bzhin du sor gcig la sogs pa'i rim gyis gyen du 'phar bar bsgoms shing / nam mkha' la gnas nus par brtag go/ /de ltar nus par gyur pa dang / nub gcig dkyil 'khor gang bsgrub pa dang / rjes su mthun par bris nas/ rang gi dad pa'i lha la mchod pa byas nas ting nge 'dzin 'di la gnas na rang gi lha ye shes sems dpa' gshegs na/ji ltar bsgom pa'i rig sngags 'chang rang gi lus la zhugs nas dngos grub bsgrub pa'i phyir mchod do/ /de ltar bya ba yang ji skad du rgyud las/ nam mkha' la ni zla ba'i gzugs/ / zhes bya ba la sogs pa gsungs te/ de dag gi 'bru 'joms pa ni/ brda phrad par sla bas zhib tu ma bkrol lo/ /de yan chad du nam mkha' la 'gro ba dang / rig sngags 'chang bsgrub pa rnams bshad zin to/ /da ni rang gi lha'i nga rgyal du gnas pa'i rnal 'byor pa zhes pa ni/ rang gi lha dam tshig sems dpa'i rnal 'byor du gnas nas de'i ngang du nga rgyal bskyed pa ni/rang gi lha'i nga rgyal du gnas pa zhes bya'o/ /ting nge 'dzin rnam pa bzhi'i go rims zhes pa ni/ 'og nas 'byung ba'i nam mkha' la 'gro ba la sogs pa bzhi go rims bzhin du bsgom pa'i rim pas so so'i 'bras bu thob par byed pa ni go 'phang thob pa'i sbyor ba ste/de bshad par bya'o zhes pa'o/ /de la ting nge 'dzin dang po zhes pa ni/ nam mkha' la 'phar ba ste/ de bsgrub pa'i rim pa ni/ sgrub thabs snga ma las gsungs pa bzhin du sngon gyi dus su bya ba'i cho ga dam tshig sems dpar bsgom pa dang /mchod pa dang ye shes dbab pa la sogs pa byas nas/ badzra dz+wa la dz+wa la zhes brjod pas/ nam mkha'i phyogs na gnas pa'i khams thams cad rdo rje rgya gram gyi rdul gyis gang bar bsams la/ de 'phro zhing 'du ba'i rim pas gong bu gcig tu gyur pa las/ nam mkha'i nang khyab pa'i rdo rje rin po che'i them skas dang ldan pa dag rkang lag gis dmigs su rung ba goms par dmigs te/de ltar gyur pa dang snga ma bzhin du dkyil 'khor bris shing mchod pa'i cho ga byas la rdo rje rgya gram gyi ting nge 'dzin las ri them skas dang bcas par gyur pa de la sems mnyam par gzhag pa nub gcig byas nas gnas par bya'o//de nas ji ltar bsams pa'i rdo rje ri them skas dang bcas pa de la/ bdag nyid lha'i rnal 'byor la gnas pas 'dzegs te ting nge 'dzin ma btang gi bar du 'og min gyi gnas la thug gi bar du yang goms par nus par gyur te/ de ltar yang rgyud las 'di skad du/thams cad rdo rje'i ting 'dzin du/ /zhes bya ba la sogs pa gsungs so/ /lha'i mig la sogs pa bsgrub pa'i rnal 'byor pas sbyor ba snga ma bzhin du byas te rang nyid kyi lha'i rnal 'byor la gnas nas shud+d+ha shud+d+ha zhes pa'i snying po brjod cing rang gi sems nyid rnam par rtog pa thams cad dang bral ba/nam mkha' ltar mnyam pa nyid du gyur pa'i mtshan nyid las/ bcom ldan 'das spyan ras gzigs dbang phyug gi ting nge 'dzin mngon du byas te/ lha'i mig la sogs pa mngon par shes pa lnga'i yul gang yin pa de shes par bya ba'i phyir mngon par shes pa de dag gi so so'i yul gang yin pa so sor rjes su dran par byas la/yid kyi rnam par shes pas gang bsgom pa'i yul de dag mngon sum du mthong ba'i ting nge 'dzin las su rung ba'i bar du bsgoms nas ji ltar 'dod pa'i yul gzhan rnams mngon du mthong bar gyur pa dang / dkyil 'khor la sogs pa byas nas nub gcig de bzhin du mnyam par bzhag nas lha'i mig la sogs pa'i sbyor ba bya'o//de ltar yang rgyud las/ ji skad du/ thams cad dag pa'i ting 'dzin mchog /ces bya ba la sogs pa gsungs so/ /mngon par shes pa yang zhes pa'i tshig rnams ni 'og nas 'byung ba las rig par bya'o//rdo rje sems dpa' rjes su dran pa'i ting nge 'dzin zhes pa ni/ rdo rje sems dpa'i ting nge 'dzin du gnas na de bzhin du 'grub par 'gyur ba ni rdo rje sems dpa' rjes su dran pa'i ting nge 'dzin du de'i rim pa yang sngar gsungs pa de bzhin du mchod pa dang / bsgom pa dang /ye shes dbab pa thams cad ma lus par byas nas/ satwa satwa zhes bya ba'i snying po brjod cing rdo rje sems dpa'i cha lugs rgyud 'di nyid las ji skad gsungs pa de lta bu'i gzugs rnams kyis nam mkha'i nang thams cad gang bar bsams nas de ltar snang ba'i mtshan ma ma byung gi bar du bsgom mo//de nas de bzhin du ting nge 'dzin la mnyam par gzhag pa'i mig gis bltas nas/ nam mkha'i khams na ji ltar bsams pa'i rdo rje sems dpa'i gzugs mang pos gang bar snang ba'i bar du ting nge 'dzin brtag go/ /de ltar gyur pa dang snga ma bzhin du dkyil 'khor dang mchod pa byas ste/mtshan gcig ting nge 'dzin de'i ngang la mnyam par bzhag nas dus phyis ji ltar 'dod par ting nge 'dzin yid la byas nas/ nam mkha'i khams rdo rje sems dpas gang bar bdag gis mthong ba dang / gzhan la bstan du btub pa nas rdo rje 'dzin gyi go 'phang 'thob kyi bar du ting nge 'dzin goms par bya'o//de bzhin du sangs rgyas kyi sku mthong bar 'dod na yang / snga ma bzhin sbyor ba byas te/ bud+d+ha bud+d+ha zhes bya ba'i snying po brjod cing / nam mkha'i nang thams cad sangs rgyas kyi skus gang bar bsgoms te/ phyi ma'i rtsis mgo snga ma bzhin du byas nas de bzhin du 'grub par 'gyur ro/ /ting nge 'dzin de gnyis ka yang rgyud las/nam mkha'i dbyings ni thams cad du/ /zhes bya ba la sogs pa gsungs pa yin no/ /de ni las rnam pa bzhi'i ting nge 'dzin bsgrub pa gsungs pa/ da ni dbang du bya ba dang / dbab pa dang / gzhig pa dang / sdug bsngal thams cad sel ba'i mtshan nyid kyi sbyor ba bzhi bsgom pa goms par bya ba gang gsungs pa de bshad par bya'o zhes gsungs te/gzhan mi mdza' ba dag dbang du bya ba dang / bdag la rig pa dbab pa dang / gzhan yang dbang med par smrar gzhug pa'i dbab pa dang / dngos po can gyi lus gzhig par bya ba dang / nad dang gnod pas nyen pa'i sdug bsngal thams cad bsal bar bya ba'i mtshan nyid kyi ting nge 'dzin ni sbyor ba bzhi zhes bya ste/de goms par bsgoms pa las de bzhin du 'grub par 'gyur ba de rtsa ba'i rgyud nyid las ji skad gsungs pa bzhin du 'dir bshad par bya'o zhes ston to/ /de la sbyor ba bzhi gang byed kyang rung ste spyi'i cho ga ni/bsgrub par bya ba'i gdul bya de skyes pa dang / bud med gang yin yang rung ba'i lus kyi bu ga nas bdag nyid 'jug pa sngar byas te/ rang gi yid kyis de'i lus kyi nang du khyab nas gcig tu 'gyur ba'i sbyor ba ston to/ /de ltar yang rgyud las ji skad du/ skyes pa'am bud med dag gi ni//zhes bya ba la sogs pa gsungs te/ mchod pa nas rdo rje phra mo'i mthar thug gi bar du sbyor ba sngar bstan pa bzhin du byas la/ rang gang la mos pa'i ting nge 'dzin du bsgoms te/ rang gi lha rjes su dran pa sngar byas la rdo rje sems dpa'i phyag rgya dang ldan pas badzra A be sha zhes brjod cing rdo rje dbab pa byas la/thog mar rdo rje thal mo bcings la/ sa'am shing ngam rdo ba la sogs pa gang yang rung ba la dbang du bya bar 'dod pa'i gdul bya de'i gzugs brnyan byas la bdag gi mdun du bzhag ste/ yid kyis de'i lus kyi bu ga nas rang gi yid dang bcas pa'i lus zhugs la/de'i yan lag dang bcas pa'i lus kyi nang thams cad ma lus par bdag gi lus kyis khyab par byas te/ rdo rje thal mo mthil phye la mnyam par gzhag pa'i ting nge 'dzin ma nyams par dal nas brdab po/ /de nas dbugs slar bsdu ba'i tshul gyis slar byung nas/ bdag gi lha dang bdag mi gnyis par rjes su dran par byas la de bzhin du yang de'i lus la zhugs te/ de nyid kyi tshul gyis de'i lus la khyab par bya ba'i tshul du spro ba dang / slar bsdu ba'i spro ba dang / slar bsdu ba'i sbyor bas lha rjes su dran pa'i sbyor ba la sogs pa snga ma bzhin du bya'o//de ltar bya ba'i rim pa de'i ting nge 'dzin dbang du gyur cing mtshan ma byung nas de ltar gyur par mngon du snang gi bar du bsgoms la de nas dkyil 'khor byas te/ nub gcig snga mkho bzhin du ting nge 'dzin du gnas par bya'o/ /de ltar byas nas skyes pa dang / bud med gang dbang du bya bar 'dod pa de yid la mdun du 'dug par bsams te/bdag kyang lha'i skur bsgyur nas rdo rje dral ba dang dbab pa byas te/ dbang du bya ba'i snying po yang de bzhin du bzlas shing / bu ga nas nang du 'jug pa la sogs pa'i las snga ma bzhin du byas te/ ring po mi thogs par dbang du 'gyur ro zhes dbang du bya ba'i sbyor ba 'di slob dpon mkhas pa dag gis bshad do//da ni dbab pa byas pa yang rgyud las 'di skad du/ rdo rje dbab pa kun bskyed nas/ /zhes bya ba la sogs pa gsungs te/ de la dbab pa dang / gzhig pa dang sdug bsngal thams cad sel ba gsum ka yang gzhan gong ma bzhin du byas la khyad par du yang dbab pa'i sbyor ba la ni/badzra A be sha aHaHzhes pa'i snying po 'di brjod cing rdo rje bcings pa'i mthil brdab bo/ /rgyud las kyang ji skad du/ rdo rje dbab pa'i cho ga sbyar/ /zhes bya ba la sogs pa gsungs so/ /gzhig pa'i sbyor ba la ni/badzra ha na zhes pa'i snying po brjod cing rdo rje bcings pa brkyang ba'i sor mo rnams drag tu dgrol lo/ /de ltar bya ba yang rgyud las ji skad du/ de bzhin dbab pa'i cho ga yis/ /zhes bya ba la sogs pa gsungs te/ rigs brgya zhes pa ni/ de bzhin gshegs pa dang de bzhin gshegs pa'i rigs dang /'gugs pa la sogs pa rnams re re la yang sku dang gsung dang thugs dang / yon tan dang phrin las gcig tu bsdus pa dang bzhi bzhir phye na/ bzhi phrag nyi shu rtsa lnga po bzhi la brgyar 'gyur te/ lha mo rnams ni yon tan gyi bdag nyid pas gzhan du ma phye'o/ / de bas na tshul des rigs brgya kho nar rig par bya'o/ /sdug bsngal thams cad bsal ba'i khyad par ni zhes bya ba 'di lta ste/ rang gi rigs kyi lha'i ting nge 'dzin du gnas nas/ badzra ha ra zhes pa'i snying po brjod do/ /rdo rje bcing ba bkrol ba'i phyag rgya bya ste/ rgyud las kyang ji skad du/ dal bus brdab pa'i cho ga sbyar//zhes bya ba la sogs pa gsungs so/ /de bzhin gshegs pa'i rigs kyi dkyil 'khor ni/ rdo rje dbyings kyi dkyil 'khor te/ de'i skabs su gsungs pa'i ting nge 'dzin gyi dngos grub sgrub pa'i thabs 'dir bstan pa bshad zin to/ /da ni de bzhin gshegs pa la sogs pa'i dngos grub rnams bshad par bya'o//zhes pa de bzhin gshegs pa rnams zhes bya ba dang / de'i rigs kyi zhes bya ba dang / phyag rgya chen po la sogs pa zhes bya ba dang / de bzhin gshegs pa la sogs pa'i dngos grub ces pa la de dag gi don ni brda phrad par zad do//'dir yang snga ma bzhin du zhes pa ni/ sngar bstan pa bzhin du de bzhin gshegs pa dang / sogs kyis bsdus pa'i sems dpa' lhag ma rnams te/ rang gi lha gang bsgom pa'i dam tshig sems dpar bsgom pa dang / de la gnas bzhir byin gyis brlab pa dang / mgo'i gnas lngar dbang bskur ba dang /de nyid ting nge 'dzin dang ldan par bya ba dang / phyi nang gi lha mos mchod pa dang ldan pa'i rnal 'byor la gnas pas rdo rje phra mo'i bsgom pa goms pa dang bcas par de bzhin du bya'o/ /bsgrub pa gong ma las khyad par du ni rdo rje phra mo'i ting nge 'dzin ni bsgoms pa'i 'og tu phyag rgya chen po la sogs pa bzhi grub pa'i rnal 'byor pa bde ba dang /yid bde ba la gnas shing de'i mi mthun pa'i phyogs mi 'byang du zin gyis kyang byams pa la sogs pa la tshad med pa bzhi snga nas bsgom pa goms par byas pa'i dbang gis sems las su rung ba de nyid lhun gyis grub pa nyid du byas nas gdod sems can gyi don bya ba'i phyir der bya ba'i thabs 'gro ba 'dul ba chos kyi dkyil 'khor du gsungs pa'i rim pas byams pa dang /snying rje dang / dga' ba dang / btang snyoms la sogs pa bsgom par byas te/ de ni tshangs pa'i gnas bzhi thob par byed pa'i rgyu yang yin la/ tshangs pa'i gnas bzhi thob pa yang mtshan nyid de dang ldan pas na tshangs pa'i gnas bzhi bsgom par bya'o zhes bstan to//da ltar tshad med pa bzhi bsgoms pa'i 'og tu rang gi lha bskyed pa'i rgyu'i gnas skabs kyi byang chub sems bsdus par gyur pa ni rgyu'i byang chub kyi sems te/ gang zhe na/ zla ba'i dkyil 'khor du bsgom pa goms par bya'o zhes bstan to//de la bsdus te zhes pa ni/ sa dang po nas bcu pa'i bar gyi byang chub sems kyi ngo bo de dag gcig tu bsdus pa'i ngo bo ni zla ba'i dkyil 'khor du sang ba'o/ /zla ba zhes brjod pa ni/ ji ltar zla ba dkar ba dang / dang ba dang / bsil ba dang / sim pa dang /nyes pas ma goms pa bzhin du/ byang chub kyi sems de yang dkar ba dang / dang ba dang / bsil ba dang / sim pa dang / nyes pas ma gos pa dang / gong nas gong du skyer btub pas na de gnyis chos mthun par gyur pa'i phyir na ming zla ba zhes brjod do/ /de ltar gyur par nus pa dang / de nas yang zla ba de nyid las sam/ byang chub kyi sems de nyid rang gi lha nyid kyi rnam par grol ba'i ye shes kyi phyag rgya rdo rje dang lcags kyu la sogs pa ji ltar rigs par so so'i dam tshig gi phyag rgya rnams su gyur pa'i sbyor ba goms par bya'o/ /de'i 'og tu phyag rgya de dag las de'i 'od zer mang po 'phro ba dang /'du ba'i tshul gyis ji ltar 'dod par bdag dang mi gnyis par gyur pa dang / phyi rol na gnas pa'i rang gi lha ye shes sems dpa' mdun na bzhugs pa'i gzugs dbu la sangs rgyas lnga'i dbu rgyan gyis dbu la brgyan pa/ thugs ka na dam tshig gi phyag rgya dang / lce la chos kyi phyag rgya dang /so so'i 'dul thabs kyi las kyi phyag rgya dang ldan pa 'og na zla ba'i dkyil 'khor gyi gdan dang / zla ba'i dkyil 'khor gyi rgyab brten cing bsgom par bya'o/ /de ltar rang gi lha'i bsgrub pa'i yan lag rnams re re nas rim gyis bsgoms pas zhes pa/ de ltar rang gi lha gang 'dod pa'i rigs su bsgrub pa yang dang po nas cig car du bsgom pa ma yin te/yan lag rnams re re nas bsgom zhing las su rung bar gyur pa dang / rim gyis rdzogs par bsgoms pa'i yon tan gang bsgom par bya ba de'i cha lugs rab tu gsal bar bya ba sngags kyi rgyud las 'byung ba dang / mthun par rgya cher yun ring du goms par byas nas rang gi lha gang la goms pa'i rigs kyi phyag rgya chen po la sogs pa bsgrub pa'i phyir rnal 'byor pas nan tan dang ldan par bya'o zhes bstan to//'jug pa'i rim pa 'di dag kyang / /zhes pa bsgrub pa'i rim pa gong du bstan pa ltar bya ba'i thabs 'di dag thams cad kyang slob dpon gyis rang bzor mdzad pa ma yin te/sngags kyi rgyud de kho na nyid bsdus pa nyid las/ de bzhin gshegs pa'i rigs kyi chos kyi dkyil 'khor ltag 'og bsnor zhing kha cig thod rgal du 'byung ba dang / kha cig lhag 'og ma bsnor bar rim bzhin 'byung ba'i rim pas 'di ltar gsal bar bstan te/de yang rang gi sems yongs su byang zhing las su rung bar bya ba'i phyir/ phyag rgya chen po'i ye shes bslab bo zhes bya ba la sogs pa rgya cher gsungs pa dang / sngar gsungs pa'i rdo rje phra mo'i bsgom pa'i rim pa dang po bstan nas tha mar yang / sems can gang la byams pa ni//zhes bya ba la sogs pa gsungs pas na de'i rim pa dag 'dir yang 'di bzhin du go rims su byas nas bstan pa yin te/ de ltar bsgom pa'i snying po ni/ ma hA mer+ya spa ra zhes bya ba pa sogs pa gsungs pa yin no/ /de ltar tshad med pa bzhis sems sbyang ba'i gtan tshigs bstan nas/ rdo rje la sogs pa bsgom pas sems sbyang ba'i thabs bstan pa yang rgyud 'di nyid las/de nas de bzhin gshegs pa thams cad rjes su dran pa la sogs pa'i ye shes bslab par bya ste zhes bya ba la sogs pa gsungs pa yin te/ nam mkha'am yang na phyogs gzhan du/ /zhes bya ba la sogs pa yang rgyud las 'byung ba'i gtan tshigs bstan pa ste/'di nyid du bstan pa'i rim pa las rig par bya'o/ /de ltar phyag rgya chen po la sogs pa bsgrub pa'i phyir zhes pa ni/ sngar bstan pa'i don de ltar phyag rgya chen po la sogs pa phyag rgya bzhi po dag bsgrub par bya ba'i phyir/ dang po rang gi sems sbyang ba legs par byas nas/de nas gdod phyag rgya chen po la sogs pa bsgrub par bya ba de'i don la nan tan bya'o/ /de nas de bzhin gshegs pa rnams kyi zhes pa ni/ de bzhin gshegs pa lnga ni de bzhin gshegs pa rnams zhes bya ste/ de bzhin gshegs pa lnga rnams kyi phyag rgya chen po'i dngos grub bsgrub pa'i rim pa ni 'di lta ste/'dir yang re zhig dang por snga ma bzhin du/ rdo rje sems ma'i phyag rgya ji skad bstan pa bcings la dgrol/ badzra d+hA tu AHzhes pa'i snying po 'di brjod pas de bzhin gshegs pa'i ye shes dbab par bya'o/ /de nas sngar gsungs pa'i tshul gyis bdag dam tshig sems dpa'i rnal 'byor ji ltar byas pa de bzhin du 'dir yang gsal bar mngon du byas te/de bzhin gshegs pa thams cad kyi longs spyod rdzogs pa'i sku rnam par snang mdzad dam sprul pa'i sku shAkya thub pas nam mkha'i khams thams cad til 'brus til gyi gang bu gang ba'am/til mar gyis til 'bras la khyab pa bzhin du nam mkha'i khams thams cad khyab la/ gcig la gcig kyang sgrib pa med par gang bar bsams la de ltar bzhugs pa'i de bzhin gshegs pa'i tshogs de rnams dang por rdo rje lcags kyu'i las kyi phyag rgyas spyan drangs pa'i tshul du bkug ste/phyag rgya lhag ma rnams kyis kyang 'di bzhin du byas te/ badzra tu Sh+ya hoHzhes brjod par bya'o/ /de rnams kyi phyag rgya bcing ba dang sngags bzlas pa 'dir ma bstan pa ni sngar mchod pa'i skabs su bstan pa las rig par bya'o/ /yang na sngags bzla ba dang phyag rgya dngos su bcing ba 'di dag gis sems g.yeng bar gyur du dogs na ni/sems mnyam par gzhag pa las ma nyams par bya ba'i phyir rdo rje lcags kyu la sogs pa'i las kyi phyag rgya rnams dngos su mi bcing bar de'i snying po dzaHhUM baM hoHzhes smra zhing zhes bya ba la sogs pa'i gsungs pa yin te/ bsgrub pa chen po gzhan yin no zhes pa ni/ yid kyis bya ba de ni sems mnyam par gzhag pa'i ting nge 'dzin las mi nyams par bya ba'i phyir na sgrub pa chen po zhes bya ste/ thabs gong ma las gzhan yin no bar gsungs so/ /de bzhin gshegs pa'i phyag rgya chen por byin gyis brlab pa bshad zin to//de ltar de bzhin gshegs pa'i phyag rgya chen po'i byin gyis brlab pa'i thabs bstan nas de bzhin gshegs pa'i rigs kyi phyag rgya chen por byin gyis brlab ba'i thabs bstan pa'i phyir na de la 'di ni de bzhin gshegs pa'i rigs rdo rje sems dpa' la sogs pa'i sems dpa' chen po rnams kyi phyag rgya chen por byin gyis brlabs pa ste zhes bya ba la sogs pa gsungs te/bzlas brjod bya ba dang / phyag rgya chen por bsgom pa gnyis las/ phyag rgya chen por bsgom pa las dngos grub thob par bya ba'i skabs 'chad pa las/ sngar de bzhin gshegs pa'i phyag rgya chen po bsgrub pa bstan nas/da ni de'i rigs kyi sems dpa' chen po bcu drug po rnams kyi phyag rgya chen por byin gyis brlab cing bsgrub pa bstan te/ gang zhe na/ sngar gong du gsungs pa'i rim gyis/ sems ma rdo rje ma'i phyag rgya dral ba sngar byas te/ snying po badzra satwa AHbadzra rA dza AHzhes bya ba la sogs pa nas badzra san+d+hi AHzhes pa la thug gi bar du gang bsgom zhing rang gi lus la gzhug par 'dod pa de'i mtshan dang bcas pa'i snying po brjod pas dbab pa'i snying po brjod par bya'o//de ltar byas ma thag tu sems dpa' chen po'i rjes su dran pa'i snying po/ badzra satwa dr-i sh+ya zhes bya ba brjod do//de la sems dpa' chen po rjes su dran pa zhes pa ni/ sems dpa' chen po mdun na gnas par dran pa de kho na rjes su dran par bya'o/ /dran pa de'i sbyor ba ni sngags 'di'o/ /badzra sarba zhes brjod pa'i sngags 'di yang don nye bar mtshon pa'i sa 'dzin tsam du zad de sems dpa' de dag las gcig gam tshang bar gang bsgrub pa de'i mtshan gyi sngags dang /snying por bcas pa brjod/ zla ba'i dkyil 'khor la gnas shing zla ba'i dkyil 'khor gyis rgyab rten byas pa zhes bya ba de ltar sems dpa' chen po rjes su dran pa'i snying po brjod pa tsam gyis gang bsgrub par bya ba'i sems dpa' chen po de gdan zla ba'i dkyil 'khor la gnas shing zla ba'i dkyil 'khor gyis rgyab rten byas pa/sku rnam par dag pa zla ba ltar gsal zhing 'od 'phro ba/ rang gi sku zla ba lta bu 'od dang ldan pas phyogs bcu mtha' yas pa'i dkyil 'khor snang bas khyab pa/ rgyan dang cha lugs la sogs pa ni sngar phyi rol gyi chogs pa'i cho ga las gsungs pa'i so so'i rigs dang rjes su mthun pa'i kha dog gi bye brag kha dog dkar po dang /bya ba la sogs pa'i kho dog dang / de lta bu'i mdangs dang / gzi can nam/ 'dul ba'i 'gro ba mngon par dga' ba'i kha dog gi skabs rnyed pa zhes pa yang na/de bzhin gshegs pa dang / ye shes kyi sems dpa' chen po rnams ni 'gro ba ci la dga' zhing gang gis 'dul ba de bzhin du sku ston par mdzad pa ste/ brgya byin dang tshangs pa dang / mi'i skye dgu nas gang dud 'gro'i rnam pa dag tu yang snang bar mdzad cing gcig tu ma nges par ston pa mdzad pas na/sku'i mdangs 'gro ba mtha' dag gi yid du 'ong ba zhes bya'o/ /de bzhin gshegs pa'i sku rin po ches dbu la brgyan pas na/ de bzhin gshegs pa'i sku rin po che las byas pa'i dbu rgyan gyi 'od kyis dbu brgyan pas na steng gi phyogs brgyan pa zhes bya/ phyag gnyis pad+ma lta bur dri ma med pas rgyud las ji skad gsungs pa'i las kyi phyag rgya mdzad pas na phyag pad+ma gnyis pa zhes bya'o//zhabs dri ma med pa g.yas pa bskum pa'i mthil brla gong g.yon par gzhag par mdzad pas na zhabs pad+ma zhes bya'o/ /de bzhin du zhal pad+ma rgyas pa'i 'dab ma rangs pa ltar 'dzum pa dang /rab tu dgyes pa'i spyan ut+pa la'i 'dab ma ltar phra zhing dkyus ring ba dang / dkar gnag 'byes pa'i mdangs kyis 'dul ba'i 'gro ba la rjes su chags pa'i tshul bstan pas gzigs pa 'gro ba ji ltar 'dul ba bzhin du don mdzad pa'i phyir so so'i phrin las kyi phyag rgya bstan pa/ gdul bya la ji ltar dgongs pa'i ngo bo nyid ston pa la mkhas pa/ de lta bu la sogs pa yon tan gyi rnam pa rin po che ltar 'byung ba mang po'i gter dang ldan pa/ bdag nyid ji ltar 'dod cing gang la dad pa'i rdo rje sems dpa' la sogs pa ye shes kyi sems dpa' bcu drug po mnyes par bya ba rnams 'gul ba dang /g.yo ba dang / gzhan pa la sogs pa srog dang bcas pa'i 'gro ba lta bur gsal bar mdun du mngon sum pa bzhin bzhugs par brtags la/ de lta bu'i sku la rang gi sems rab tu dga' ba dang bcas shing sku de la rjes su chags pas shin tu yun ring du rtse gcig pa'i bsam gtan gyis rab tu gsal bar snang bar bya ste/shin tu chags pa'am/ kun du zhes pa'am/ lhag par chags pas rab tu dga' ba'i 'dod chags kyi mig gdangs pa'i mtshan nyid rdo rje lta ba khro bos mi 'dzums par brtag cing / rang gi lha'i rnal 'byor dang / sems dpa' chen po de dag mi gnyis par gyur pa'i sbyor bas rang gi lus su gzhug go//de la 'di ni ji ltar bsams pa'i zhes pa 'og nas 'byung ba'i sbyor ba 'di ni ji ltar bsams pa'i ye shes kyi sems dpa' de dag rang gi lus la gzhug cing bsgom pa'i rim pa bshad pa'o/ /de yang ji ltar zhe na/ dang por re zhig rdo rje sems dpa' la sogs pa zhes bya ba la sogs pa gsungs te/rdo rje sems dpa' la sogs pa ye shes kyi sems dpa' chen po rnams las rang gi lha'i rnal 'byor ji ltar byas pa de rjes su dran par byas nas/ bdag rang gi sna'i bu ga la sogs pa ba spu'i bu ga thams cad nas byung ba'i rlung yid dang bcas par 'phro ba dang /tshur bsdu ba'i tshul gyis sna'i thor to'i bar du dbugs 'byung zhing rngub pa rnams kyi rgyu'i mtshan nyid zhib tu btags nas sems byang zhing las su rung bar bya'o/ /de ltar bya ba yang ci'i phyir zhe na/ sdug bsngal gyi me 'bar bas khebs ba'i 'gro ba zhes bya ba dag ste/ sdug bsngal gsum dang brgyad kyi mtshan nyid me 'bar ba dang 'dra bas lus sems kyi rgyud yog cing khebs pa'i 'gro ba rnams de las thar pa dang /grol bar bya ba'i mgon med pa de dag la brtags te/ de dag gi mgon dang skyabs dang / dpung gnyen bya zhing sdug bsngal de las bsgral ba'i phyir de lta bu'i sems mnyam par gzhag pa'i sbyor ba bya zhing /de ltar byas pas sems las su rung bar 'gyur ba dang / rang gi snying ga'i dbus su a zhes pa las zla ba'i dkyil 'khor bsams pa'i dbus su sna tshogs rdo rje rgya gram bsams te/ de ma thag tu zhes pa de ltar bsams pa de ma thag tu rdo rje'i lcags kyu sngar mchod pa'i skabs su gsungs pa'i las kyi phyag rgya bcings pa'i lcags kyus drangs pa'i tshul gyis ji ltar 'dod pa'i bcom ldan 'das ye shes sems dpa' gtso bo gang bsgrub pa de rang gi lus la reg pa'i spyod yul ba spu'i sgo phrad pa tsam du bsams la/yang de bzhin du dbugs slar bsdu ba'i tshul gyis/ sems can thams cad la byams pa'i mtshan nyid/rdo rje zhags pa'i las kyi phyag rgya sngar gsungs pa ba spu'i sgo phrad pa tsam du gnas pa de las kyang drangs te/ dper na mar dkar bye ma'i nang du thim par gyur pa de bzhin du/ ye shes sems dpa' de nyid rang gi snying gar thim par bya'o/ /de'i 'og tu ji srid 'dod pa'i bar du sgrub pa po'i lus la gnas shing gzhug par bya ba'i phyir ston pa'i bka'i mtshan nyid rdo rje lcags sgrog gi las kyi phyag rgya sngar gsungs pa bcings te/rang gi lus kyi nang du lta ba'i ting nge 'dzin gyis chu dang 'o ma 'dres pa bzhin du ting nge 'dzin gyi bcing bas rab tu bcings shing so so ma yin tha mi dad dbyer med par bya'o//de nas bcom ldan 'das ji ltar rang bzhin gyis 'od gsal ba'i zhes pa/ ji ltar bcom ldan 'das ye shes kyi sems dpa' de dag dang / rang bzhin gyis 'od gsal ba'i ye shes tha dad pa ma yin zhing dbyer med pa de bzhin du/ bdag kyang bcom ldan 'das ye shes kyi sems dpa' 'di dag dang tha dad pa ma yin zhing dbyer med pa'i ngo bor gnas pa yin pa la/glo bur gyi nyon mongs pa'i dri ma dang / nye ba'i nyon mongs pa'i rnam par rtog pa sgyu ma tsam du snang zhing don dam yod pa ma yin pa rnams kyis bsgribs nas dri ma can du gyur te tha dad par byas so snyam du tshul de ltar rjes su dran par byas nas/shes rab kyi pha rol tu phyin pa'i byin gyi rlabs su gyur pa zhes pa/ shes rab kyi pha rol tu phyin pas kyang chos thams cad stong pa nyid du ston par byed la/ dril bu'i sgras kyang chos thams cad stong pa nyid du sgrogs par byed do/ /ji ltar rgyud 'di nyid las kyang / shes rab sgra yi rjes 'brang ba/ /zhes gsungs pa'i don gyis/ shes rab kyi pha rol tu phyin pa'i byin gyi rlabs su gyur pa ni dril bu yin par 'dod pas na/ de ltar chos nyid dang dbyer med par shes rab kyi pha rol tu phyin pa'i byin gyi rlabs su gyur pa rdo rje dril bu'i las kyi phyag rgya bcings te/ de'i snying po brjod cing bskul la/bdag dang dbyer med par gyur pa'i bcom ldan 'das ye shes kyi sems dpa' de'i rang gi ngo bo nyid mnyes par bya'o/ /de ltar bstan pa de las mi mthun pa'i rnam pa bzhin du byas na'ang nyes pa med pas na yang na zhes bya ba smos te/ phyag rgya rnams dngos su ma bcings par yid kyis sngags brjod nas de bzhin du bsgrubs na'ang nyes pa med do//de nas rang gi lha ye shes sems dpa' sngar bshad pa zhes pa ni/ rang gi bsgrub par bya ba'i ye shes sems dpa' cha lugs sngar bstan pa de'o/ /de bzhin gshegs pa'i mtshan nyid dam/ rdo rje sems dpa' la sogs pa sems dpa' chen po'i mtshan nyid gcig pa 'gro ba ji ltar 'dul ba bzhin du sku ston par mdzad pas na de bzhin gshegs pa'i cha lugs lta bu'am/rdo rje sems dpa' la sogs pa sems dpa' bcu drug po rnams rang gi cha lugs su snang ba yang rung ste/ rang gi lus kyi nang du zhugs pa ji ltar rigs pa bzhin du bsgoms nas rang dang tha mi dad par byas pa de rab tu gsang ba'i mchod pa rnam pa bzhi ting nge 'dzin du byas pas dus dang rnam pa thams cad du tha dad par mi gyur cing /bdag dang mi gnyis par gyur par rab tu'am lhag par bsgoms la/ sems dpa' chen po gang yin pa de nyid bdag go snyam par bsam zhing so sor dbyer med par gyur pa'i nga rgyal gyis sems dpa' chen po de'i gzugs su bdag nyid mos par bya'o//de la rab tu gsang ba'i mchod pa zhes pa ni/ nyan thos dang kri ya ba dang / dam pa med pa dang / mu stegs pa la sogs pa gzhan gyis 'di'i don bstan kyang rtogs par mi nus pas kyang gsang ba la/de dag la bstan par bya ba ma yin pas de dag gi spyod yul du mi snang bar bya ba'i phyir na gsang ba'o/ /kha cig 'di lta bu'i don thos par rung ba'i skal ba yod kyang thos nas dad par mi 'gyur ba dag yod pas de dag la gsang ba ste/ rab tu gsang ba zhes pa ni de dag la mi bstan pa rnams kyi nang na yang lhag par 'di gsang dgos pas ni rab tu gsang ba'i mchod pa zhes bya'o//sems ma rdo rje la sogs pa bzhi'i mtshan nyid kyi mchod pa 'dis gnod dam steng du phebs par byed pa ste/ mchod pa 'dis mchod na chos nyid de'i steng du 'bebs par byed cing /gzhan gyis rig par dka' ba'i phyir na rab tu gsang ba'i mchod pa zhes bya'o/ /de lta bu'i don dang ldan pa de gang zhe na/ de la rab tu gsang ba'i mchod pa rnam pa bzhi ni 'di'o zhes bya ba la sogs pa gsungs te/ dbang po dang bcas pa'i sems mi brtan pa/ nang du bkag ces pa ni dbugs slar bsdu ba'i tshul gyis dbang po dang bcas pa'i rnam par shes pa yul gzugs sgra la sogs pa'i rjes su 'brang du mi gzhug par nang du bsdu ba ste/g.yeng ba'i yul de dag ni rtag pa ma yin pas na/ mi brtan pa zhes bya'o/ /de de ltar de dag bkag nas oM ra ti badzra zhes bya ba'i snying po brjod de/yongs su 'khyud pa rjes su myang bar bya ba'i phyir zhes pa ni/ de ltar byas pa'i ting nge 'dzin gyi ro nyams su myang bar bya'o/ /de'i yan lag rnams dang zhes pa ni/ ye shes sems dpa' de'i sku'i yan lag rnams so/ /bdag gi lus thams cad kyi rdul phra rab ces pa ni/bdag gi lus la yod pa'i 'byung ba bzhin du rdul phra mo rnams so/ /chu dang 'o ma lta bur zhes pa ni/ don dam par ni rang bzhin med par mnyam la/ kun rdzob tu lha'i sku zag pa med pa dang / bdag gi lus zag pa dang bcas pa'i rdul phra rab gnyis dbyer med par bsgom pa'o//de la mngon par dga' ba zhes pa de ltar dmigs pa'i ting nge 'dzin gyi ro nyams su myong ba'i dga' ba dang yid bde ba'o/ /bde ba yongs su bsngo ba zhes pa ni/ ting nge 'dzin gyi ro myong ba'i bde ba de sangs rgyas rnams la bsngo bar byas pa 'di'o/ /'og nas 'byung ba'i mchod pa gsum po zhes pa ni/rA ga zhes bya ba la sogs pa phyi nang gsang ba gsum po dag kyang de bzhin du sangs rgyas rnams la dbul bar bya'o/ /'di ltar bya ba 'di ni rab tu gsang ba'i mchod pa bzhi'i dang po ste/ ji skad du rtsa ba'i rgyud nyid las/ lus kun yongs su 'khyud pa yi/ / zhes bya ba la sogs pa gsungs so/ /de nas yang na rA ga badzra zhes bya ba'i snying po 'di rjes su dran pa kun du sbyor ba zhes bya ste/ de mi nyams pa ni de las gzhan du mi 'gyur bar bya'o/ /ji ltar rtogs pa'i yon tan mngon du byas pa zhes pa ni/ stobs dang / mi 'jigs pa dang / gzungs dang ting nge 'dzin la sogs pa de bzhin gshegs pa'i che ba'i yon tan gyi rnam pa yid la gsal bar dran par byed pa'o//rjes su chags pa zhes pa ni de bzhin gshegs pa'i yon tan rjes su dran pa de la chags shing zhen te dmigs pa mi gtong ba'o/ /yang dang yang du mi gnyis pa/ /zhes pa ni/ ye shes sems dpa' dang /dam tshig sems dpa'o/ /sangs rgyas rnams la phul na zhes pa ni 'di yang sangs rgyas rnams la snga ma bzhin du phul na zhes bya ba'o/ /dam por 'dzin zhes bya ba ni mi shor bar 'dzin pa la bya'o zhes pa gnyis su med par byas nas yon tan rjes su dran par byas pa'i ting nge 'dzin brtan par gyur pa la bya'o//ji ltar bdag gi ye shes rnam par grol ba'i sgo zhes pa ni/ rnam par grol ba ni nam mkha' dang chos mthun pa ste/ byA ka ra Na'i sgras nam mkha' dang rnam par grol ba gnyis ka la mu ka zhes bya ste/ ji ltar nam mkha' rang bzhin gyis 'od gsal zhing rnyog pa med pa ltar bdag gi rnam par grol ba'i sgo 'di'ang rang bzhin gyis 'od gsal ba nam mkha' 'dra ba yin du zin kyang nam mkha' la sprin la sogs pas bsgribs pa ltar bdag gi rnam par grol ba la yang glo bur gyi nyon mongs pa'i mun pas khebs te rnam par grol ba mi snang bar byas mod kyi/'on kyang nyon mongs pa'i dri ma glo bur ba ste don dam par brtags nas rang bzhin med pas bdag gi ye shes snang ba'i sgo 'di yongs su dag cing nyes pa med pa nyid de/gtan tshigs de bas na rang gi ye shes rnam par dag pa'i sgo de rang gi lha'i ye shes yongs su dag pa chags pa med pa rnam par grol ba'i sgo dang cha mnyam pas ro gcig pa yin no snyam du bsams nas/de ltar rnam par grol ba gnyis gcig tu mos pa'i mtshan nyid rnam par grol bar sprad pa zhes pa ni/ rnam par grol ba gnyis tha mi dad par rig pa'o/ /de bas na 'di gnyis kyi dbang po gzugs yod pa dang / gzugs med pa zhes pa bdag gi dbang po gzugs can mig la sogs pa dang /lha'i rnam par grol ba'i dbang po spyan la sogs pa lnga dang / bdag gi dbang po gzugs med pa rnam par shes pa'i tshogs brgyad dang / lha'i dbang po gzugs can ma yin pa ye shes rnam pa lnga thams cad du mnyam pas gcig tu gyur cing tha mi dad par gyur par rig pas/bdag gi lus dang / ye shes sems dpa'i sku gcig pur gyur pa'i rgyal ba sgom pa 'di ni rab tu gsang ba'i mchod pa bzhi pa'o/ /mod kyi zhes pa ni mchod pa 'di dag rigs bzhi'i bye brag ji lta ba bzhin du bsgoms nas dam tshig sems dpa' dang mi gnyis par byas pa de la so sor go rims bzhin du sbyar bar bya ba skad glong mod kyi/kyang zhes pa'i don gyis gang rung ba'i rigs su gtogs pa'i lha gang yang rung ba bsgoms nas de'i sems dpa' chen po dang gnyis su med par byas pa la yang mchod pa 'di bzhi char byar rung bar bstan to//gang gi phyir zhe na zhes pa ni/ dkyus nyid kyis brda phrad par zad do/ /khyad par du ni zhes pa ni/ khyad par du ni rang gi rigs gang bsgom pa de la bdag dang gnyis su med par gyur pa de la rang gi rigs su gtogs pa'i rab tu gsang ba'i mchod pa de lhag par bya'o zhes rnal 'byor gyi rigs la mkhas pa'i slob dpon mkhas pa rnams kyis 'chad do zhes slob dpon gyis gsungs so//de nas de ltar rang gi lha'i bdag gi lus la chu 'o ma dang 'dres pa ltar gyur pa la zhes pa ni/ dper na 'o ma dang chu legs par 'dres par gyur na 'di ni chu/ 'di ni 'o ma zhes so sor dbye bar mi nus te/gcig gi ngo bor gcig gyur pa ltar/ de ltar gsang ba'i mchod pa rnam pa bzhi byas pa'i de ma thag tu bdag gi lus ngag yid gsum dang / ye shes sems dpa' rnams kyi sku gsung thugs gcig gi ngo bor dbyer med par gyur pa dang / oM su ra ta s+t+waM zhes bya ba'i snying po 'di brjod cing ye shes sems dpa' dbang du gyur par bya ba'i phyir ji srid 'dod par bsgom mo//de la dbang du gyur par zhes pa ni bdag gir gyur pa ste/ ji ltar 'dod pa bzhin du bsgyur du btub pa'o/ /ji srid 'dod par zhes pa ni/ ji srid sems mi skyo'am dngos grub ma thob kyi bar du bsgom pa'o//'dod pa brten pa bde ba'i bdag /ces pa ni/ sangs rgyas dang byang chub sems dpa' thams cad ni 'dod cing bsten par bya ba'i gnas yin te/ bsgrub cing ma btang bar gyur na 'jig rten pa'i bde ba 'dod pa'i yon tan gyi rnam pa dang / 'jig rten las 'das pa'i bde ba mya ngan las 'das pa'i bdag nyid du 'gyur pas de thob par mdzad pa'o//rab tu dga' ba khyod ces smras/ /zhes pa ni su ra ta s+t+waM zhes bya ba'i sngags khyod ni rab tu dga' ba'am dga' bar spyod pa yin te/ 'dod pa bsten pas bde ba'i bdag nyid thob par byed pa'i rgyu zhes bstan pa'o//rdo rje sems dpa' bsgrub bya ba/ /zhes pa ni/ thabs gang dam tshig ji skad smras/ rdo rje sems dpa' bsgrub par bya/ /zhes pa'i tha tshig ste/ de nyid bskul bas dbang du byas/ /zhes pa ni su ra ta s+t+waM zhes pa'i sngags de nyid kyis bskul bas dbang du byed cing ro gcig par 'gyur te/ ci'i phyir zhe na/sngags des ni gnad la 'bab pa'am steng phyogs par byed pas ni de nyid ces bya ba yang de yin te/ de'i phyir de ltar byed ce'o/ /'dir 'dod cing thar par byas pas na zhes pa ni/ tshigs su bcad pa nyid slar bkrol ba'i tshig ste/ 'dir 'dod cing thar par zhes pa ni bsgrub par bya ba'i dngos grub 'dod cing khams gsum 'khor ba las thar bar bya bas na/'dod cing thar bar bya ba zhes bya ste/ dngos su na rang gis bsgrub par bya ba'i ye shes sems dpa' nyid la bya ste/ gong du sangs rgyas dang byang chub sems dpa' thams cad ces smos pa las dgar bar byas nas bstan pa'o//de la gzhan dag gis 'dod pa zhes bya ba lha la bya bar nges pa ci yod snyam pa rnams kyi phyir/ de yang rgyud las ji skad du/ dam tshig gi dkyil 'khor phyi ma'i rgyud las/ rab tu dga' ba khyod ces smras/ /rdo rje sems dpa' bsgrub bya ba/ /zhes bya ba la sogs pa gsungs te/ rab tu dga' ba zhes bya ba ni su ra ta s+t+waM zhes bya ba'i sngags brjod par bya'o/ /de brjod pa ci'i phyir zhe na/ rdo rje sems dpa' bsgrub bya ba/ /zhes gsungs pa ste/ rdo rje sems dpa' bsgrub par bya ba'i phyir gsungs so/ /de'i rang bzhin ji lta bu zhe na/ da ni 'dod pa kun du bzang / /zhes bya ba smos te/ da ni mtshon pa'i phyir smos pa ste/dpal rdo rje sems dpa'o/ /de ni 'gro ba rnams kyi 'dod cing don du gnyer ba'i rigs pa ste/ g.yo ba dang mi g.yo ba'i bdag nyid byang chub sems kyi ngo bo bas kun du bzang zhes bya'o/ /de bas na de'i 'dod pa'i 'bras bu ni/ /sems can kun la bde ba sbyin/ /zhes bya ba ste/gang zhig gang 'dod pa'i sems can yod na/ des ji ltar 'dod pa'i bde ba sbyin par bya zhes gsungs so/ /'dod pa dang bde ba sbyin pa de rgyu gang las brten nas thob ce na/ rdo rje sems dpa'i ting 'dzin gnas/ /zhes gsungs pa 'di kho na dang / su ra ta s+t+waM zhes pa'i sngags brjod pa dang /mchod nas grub pa thob par 'gyur/ /zhes gsungs pa 'dis 'thob par 'gyur par rig par bya'o/ /gzhan dag na re/ ci rdo rje sems dpa' kho nas 'di ltar 'gyur gyi gzhan gyis ni ma yin nam snyam pa rnams kyi phyir/ rdo rje sems dpa' zhes bya ba ni/ 'dir phal cher nye ba'i mtshan nyid kyi tshig ste/zhes gab gsungs te/ 'dir nye ba'i mtshan nyid du rdo rje sems dpa' dang por gyur pas de gzung bar zad kyi/ rdo rje rgyal po la sogs pa'i sems dpa' gzhan rnams bsgrubs na yang de bzhin du 'grub par 'gyur bar bstan pa'o/ /de bzhin gshegs pa'i rigs kyi sems dpa' chen po rnams kyi phyag rgya chen po bsgrub pa bshad zin to// //de ltar de bzhin gshegs pa dang / de'i rigs kyi sems dpa' chen po rnams kyi phyag rgya chen po bsgrub par bya ba ji lta ba bzhin du bstan nas/ da ni de'i zlas byung zhing bsgrub par bya ba'i thabs su gyur pa/ nor bsgrub pa dang /rdo rje dang / rig 'dzin dang / phyag rgya chen po bzhi la sogs pa sgrub pa'i thabs rgyud las gsungs pa'i don rnams 'dir bshad de/ de la dang por nor bsgrub par bya ba gsungs pa/ de ltar de bzhin gshegs pa rnams dang zhes pas mgo drangs pa nas/ mnyes par bya ba'i mgon po gang 'dod pa cig gi phyag rgya bsgom pa goms pa las ji ltar 'dod pa'i dngos grub sgrub bo zhes bya ba la sogs pa smos te/mnyes par bya ba'i mgon po gang 'dod pa zhes pa ni/ de bzhin gshegs pa dang / de bzhin gshegs pa'i rigs su gsungs pa'i lha ji snyed brjod pa de las/gang las mos pa de'i phyag rgya chen po la sogs pa bsgom pa goms pa las ji ltar 'dod pa'i dngos grub 'og nas 'byung ba rnams las gang 'dod pa'i dngos grub de bsgrub par bya'o zhes bstan te/ phyag rgya chen po las 'byung ba'i dngos grub de rnams kyang zhes pa ni/ ji skad du lha rnams kyi phyag rgya chen po bsgom pa goms pa las gang 'dod pa'i dngos grub 'byung bas/gang la dad pa de bsgrub par bya'o zhes rgyud nyid du gsungs pa de rnams kyang slob dpon sangs rgyas gsang ba bdag nyid kyis byas pa'i sgrub thabs 'dir gsal bar bshad par bya ste/ de la phyag rgya chen po bsgoms pa las byung ba'i zhes pa ni/de ltar rnam par bkod do zhes bstan pa de la bsgrub pa gang phyag rgya chen po bsgom pa goms par byas pa las byung ba'i dngos grub bstan pa rnams las nor gyi dngos grub bsgrub par 'dod pa des/ dang po nyid du sngon gyi dus su bya ba'i cho ga ye shes sems dpa' dbab pa'i mtha'i bar du rgyas par sngar bshad pa'i tshul de bzhin du byas nas/ar+tha sid+d+hi zhes bya ba'i snying po brjod cing / ji ltar gang la dad pa'i rang gi lha'i gzugs dang / bdag mi gnyis shing tha mi dad par bsgom pa ni nor bsgrub pa'i ting nge 'dzin te/ bsgom pa'i tshad ni/ji srid nor bsams pa de zhes bya ba dag ste/ rin po che dang gser dngul la sogs pa'i rnam pa ji snyed po rnams las ji srid rang gis 'dod pa'i nor mngon du bsams pa de rang gi mngon du snang bar gyur gyi bar de srid du bsgom par bya ste/ ma btsal bar ga las 'byung gtol med par 'byung zhes pa ni/bdag gis de snga dngos su gang du yang btsal ba'i bya rtsol ma bskyed pas/ sa 'og sa bla bar snang ngam/ sa dang chu'i gseb gang na yod gtol med bzhin du rang gi sems kyis gang 'dod pa de ting nge 'dzin gyis mngon du snang bar dmigs pa dang / nam ting nge 'dzin las su rung bar gyur pa'i dus na/mngon sum du snang bar gyur pas de ltar ma gyur gyi bar du bsgom par bya'o zhes bstan pa'o/ /de nas mtshan ma byung nas zhes pa de ltar bsgoms nas 'dod pa'i nor nyid mngon du snang ba ni mtshan ma byung ba ste de ltar rang gis 'dod pa'i mtshan ma snang bar gyur nas/ snga ma bstan pa'i tshul bzhin du mtshan gcig rang gi nyams su lon pa'i ting nge 'dzin gyi phyag rgya de nyid shin tu goms shing gsal bar bsgom par bya ste/ nor bsgrub pa'i snying po sngar bstan pa de kho na yid la gsal bar 'dod cing gnas so/ /de ltar gnas pa dang / de'i rting thogs su rang gis gang bsgom pa'i lha byon nas rang ji ltar bsams shing bsgoms pa'i nor gyi dngos grub kun bdag la stsol bar mdzad do//de ltar bya ba yang rgyud las ji skad du/ de la re zhig nor bsgrub par 'dod pa des zhes bya ba la sogs pas gsungs so/ /de nas rdo rje'i dngos grub bstan par bya ste zhes pa ni/rang gi lus ngag yid gsum rdo rje lta bur bsgrubs nas/ pha rol 'joms shing tshur gzhan gyis mi tshugs par bya'am/ yang na rdo rje nyid bsgrubs pas ji ltar 'dod pa bzhin du byed par nus pa ni rdo rje'i dngos grub ste/ de bsgrub par bya ba'i thabs bstan par bya ste/ zhes bya'o/ / 'di dag gi rtsis mgo yang sngar bstan pa las rig par bya ste/ ji ltar mos pa'i rang gi phyag rgya mtshan ma byung gi bar du zhes pa gang bsgoms pa'i lha de'i dam tshig gi phyag rgya la sogs pa'i mtshan nyid mngon du snang ba'i bar ro/ /de bzhin du badzra bidA ra zhes pa ni rig 'dzin bsgrub pa ste/ rang gi lha de bzhin du rig sngags 'dzin ster ro zhes pa ni rang gi lha gang bsgoms pa de mngon sum du byon nas rig sngags 'dzin gyi dngos grub gang 'dod pa de sbyin par mdzad do//byin gyis brlab pa'i phyag rgya dang sngags dang / ye shes sems dpa' dang / bdag dbyer med par byas pa ni byin gyis brlab par bya'o//rang gi phyag rgya'i sems dpa'i gzugs su zhes pa ni/ rang gang la dad pa'i phyag rgya'i sems dpa' chen po'i gzugs su bdag nyid bsgrub cing snang bar bya ba'o/ /de'i tshe zhes pa ni/ de ltar bsgrub pa de'i tshe rdo rje dbyings kyi dkyil 'khor chen po'i skabs su gsungs pa'i de bzhin gshegs pa dang /de bzhin gshegs pa'i rigs la sogs pa rnams las rang gi lha gang sgrub cing bsgom pa de'i snying po brjod cing rang ji ltar mos pa'i lha'i phyag rgya chen po'i rang bzhin du bsgom par bya'o/ /de yang rgyud nyid las ji skad du/ de nas dngos grub kyi mchog ni//zhes bya ba la sogs pa gsungs te/ de la dngos grub kyi mchog ces pa ni/ phyag rgya chen po nyid dngos grub ci snyed pa rnams las khyad par du gyur pa ni dngos grub kyi mchog ste/ de bsgrub par 'dod na rang gi lha'i sku phyag rgya dang / phyag rgya de'i snying po bsgrub par bya ste/de la yang dag par rdzogs pa'i sangs rgyas kyis zhes pa yang dag pa'i sangs rgyas ni/ 'jig rten pa'i 'bras bu mthar phyin pa rnams las khyad par du gyur pas na yang dag pa ste/ ji ltar 'jig rten pa'i 'bras bu mngon du thob pa rnams ni grub pa che bar gyur pa yin kyang zad pa'i mtshan nyid can bas yang dag par rdzogs pa ma yin la/de bzhin gshegs pa'i sku thob pa'i 'bras bu ni zad pa med pa'i g.yung drung gi bdag nyid pas yang dag pa yang yin la yang dag par rdzogs pa yang yin pas/ yang dag pa'i sangs rgyas kyi dngos grub rnams kyi nang na dam par gyur pa ste/de bsgrub pa'i rim pa'ang 'di bzhin bya'o/ /de bzhin gshegs pa lnga las gang la dad pa'am/ bcom ldan 'das rdo rje dbyings de bzhin gshegs pa'i phyag rgya chen po'i gzugs su bdag nyid ji lta ba bzhin mngon du byas te/ sna'i thog ma'i bu ga'i nang du 'byung ba'i dbugs dgag pa'i rim pa snga ma bzhin du byas te/badzra d+hA tu zhes brjod cing dbugs 'byung ba'i dus nam mkha'i nang thams cad yang dag par rdzogs pa'i sangs rgyas kyi sku phra mo rnams kyis khyab pa dag rab tu gsal bar snang bar gyur par rnal 'byor gyis bsams te/ sna'i bu ga'i thog ma nas dbugs bag yangs su 'byung ba'i sbyor bas dbugs kyi rjes su 'brang ba'i yid kyis/de bzhin gshegs pa'i skur nam mkha' gang bar brtags pa de dag dbugs slar sdud pa'i dus na de dag kyang slar bsdus te yan lag gi rlung rang gi lus la 'jug pa'i tshul gyis mar sar pa bye ma'i nang du thim pa bzhin du rang gi snying gar gzung cing lus la thim par bya'o//de ltar bya ba yang rgyud nyid las/ ji skad du de bzhin gshegs pa'i phyag rgya chen po bcings te zhes bya ba la sogs pa gsungs te/ rab tu zhi ba'i mchog sangs rgyas par 'dod ces pa ni zhe ba ni nyan thos dang rang rgyal la sogs pa yang yin mod kyi de dag rab tu zhi ba'i mchog ma yin te rab tu zhi ba'i mchog ni bla na med pa'i sangs rgyas la bya ste/bskal pa du mas 'grub par dka' ba'i rab tu zhi ba'i mchog de tshe 'di kho na la 'grub par 'dod pas sbyor ba 'di bya'o/ /min na zhes pa ni de bsgrubs pas gal te ma grub tu zin kyang nor grub pa la sogs pa sngar bstan pa'i dngos grub de dag 'grub par 'gyur ro zhes gsungs so//las gzhan med par bsgom pa la brtson zhing bya ba gzhan btang ste/ rtag par de bzhin gshegs pa'i phyag rgya chen po 'ba' zhig la gnas shing lus ngag yid gsum gyi gnas ngan len 'joms pa dang / 'dul ba ni gang 'dod pa'i dngos grub de 'thob par 'gyur te/ bsgom pa'i tshad ni ji ltar bsgoms pa'i de bzhin gshegs pa'i zhes pa dag ste/ bdag nyid kyis ji ltar bsgoms pa'i de bzhin gshegs pa'i phyag rgya chen po grub pa'i mtshan ma bdag gzhan gyis mthong gi bar du bsgoms nas nam mtshan ma byung bar gyur pa dang /dkyil 'khor bri ba la sogs pa snga ma bzhin du byas te bsgrubs pas yang dag par rdzogs pa'i sangs rgyas kyi gzungs 'dzin pa'i byang chub sems dpa'i rig sngags 'chang du 'gyur te/ sangs rgyas kyi gzungs 'dzin pa'i byang chub sems dpa' zhes pa ni/de bzhin gshegs pa'i phyag rgya chen po mngon du gyur pa'o/ sangs rgyas kyi gzungs 'dzin pa ni byang chub sems dpa'i rig sngags zhes bya'o/ /sems dpa'i byin gyi rlabs rnal 'byor gyis zhes pa ni/ dang por bsgom pa goms par byed pa'i tshe sems brtag pa la sogs pa mngon par byang chub pa lnga'i rim pas rang gi lus phyag rgya chen por bsgoms nas/sems ma rdo rje ma'i phyag rgyas byin gyis brlabs nas/ bsgrub par bya ba'i sangs rgyas kyi gzugs su bdag nyid bsgom par bya ste/ ye shes sems dpa' dang dam tshig sems dpa' gcig tu byas te ye shes sems dpa'i ngang du bsgom pa'i ting nge 'dzin la ni ye shes rnal 'byor zhes bya ste/'dis ni de bzhin gshegs pa'i dngos grub phyag rgya chen po de snang bar 'gyur ro/ /nam de bzhin gshegs pa'i skur snang zhes pa/ de ltar phyag rgya chen po yun ring du bsgoms nas/nam de bzhin gshegs pa'i skur snang ba'i mtshan nyid phyag rgya chen po goms te ting nge 'dzin sgrub tu rung ba de'i tshe/ sems ma rdo rje bsgom pa'i tshe/ nyid na zhes pa sems ma rdo rje mas byin gyis brlabs te phyag rgya chen por bsgom pa'i dus de'i tshe nyid na/ phyag rgya chen por bsgom pa'i de'i rnam par rtog pa med kyang de bzhin gshegs pa'i phyag rgya chen por bdag nyid kyi lus mngon du snang bar 'gyur ro//sems dpa' yang ni thams cad bdag /ces pa ni/ dpal rdo rje sems dpa' ni byang chub sems kyi rang bzhin te/ g.yo ba dang mi g.yo ba thams cad kyi ngo bor gyur pa'o/ / bdag kyang bdag la kun du gnas/ /zhes pa ni/ thams cad la khyab pa dang / rnal 'byor goms pa'i mthus bdag nyid kyang de la de nyid kyang bdag ste/ tha dad pa ma yin zhing dbyer med pas na/ gcig gi ngo bor gcig gnas par bstan pa'o/ /de bas na yid la bya ba ste bdag rang phyag rgya chen po mngon du byed pa gang yin pa'o zhes bstan pa yin no//de bzhin gshegs pa'i phyag rgya chen po sgrub pa'i thabs bshad pa'o/ /da ni ye shes sems dpa' rnams kyi phyag rgya chen po bsgrub pa bshad par bya ste/ de yang ci lta zhe na/ de'i rigs dpal rdo rje sems dpa' la sogs pa gang yang rung ba'i phyag rgya chen po sgrub pa'i rim pa 'di'o zhes bya ba la sogs pa gsungs te/bcom ldan 'das rnam par snang mdzad de'i rigs su gyur pa dang / dpal rdo rje sems dpa' la sogs kyi sgras bsdus pa rdo rje rgyal po la sogs pa'i sems dpa' lhag ma rnams te/ de las gang la mos pa gcig gam du ma yang rung ba'i sku phyag rgya chen po bsgrub par 'dod pa'i rim pa 'og nas 'byung ba 'di ltar ston to zhes bya ba'i don to//de yang tshul ji lta bu zhe na/ dang por re zhig mchod pa la sogs pa'i cho ga ye shes dbab pa'i mtha'i bar du byas la zhes pa ste/ 'di ltar sgrub par 'dod na thog ma nas sku phyag rgyar bsgoms pa las mi gzung bar/gzhan gyi las kyis mtshams sbyor dgos pas na re zhig ces bya ste/ mchod pa nas brtsams te ye shes dbab pa'i bar du sngar bstan pa'i rim pa bzhin du ma lus par byas la/ de nas gdod rang gis ji ltar sgrub cing byin gyis brlab par 'dod pa'i rang gi lha'i phyag rgya chen po'i gzugs su bdag nyid gsal bar bsgom par byas te/ji ltar rdo rje dbyings kyi dkyil 'khor chen po bka' stsal pa'i skabs su gsungs pa'i mnyes par bya ba'i 'os su gyur pa/ rdo rje sems dpa' la sogs pa'i ye shes kyi sems dpa' rnams las gang yang rung ba so so'i snying po rdo rje'i tshig gis rang gi yid la gsal bar brjod cing sna'i bu ga'i nang nas phyi nang du rim par rgyu ba'i dbugs bkag nas dbang po'i tshogs mig nas bzung ste de dag yid kyi dbang ba'i nang du 'dus par byas shing yang dag pa'i 'dun pa dag po'i rjes su chags pas/rang gis gang bsgrub pa'i lha'i phyag rgya chen po'i cha lugs ji lta bu'i gzugs su gsal bar bsgrubs la/ ji skad du/ yid la gnas pa'i cho ga yis/ /yid la gang 'dod bsgrub par 'gyur/ /ting 'dzin sgrub pa'i snying la gnas/ /de phyir snying po zhes bya'o/ / zhes gsungs pa'i don gyis/ ji skad du gsungs pa'i lha thams cad kyi snying po ni/ ting nge 'dzin gyi rang bzhin te thugs dang dbyer med pa'i ngo bo bas na/ de bzlas pa'i sbyor ba byas pas ni yid kyis ji ltar 'dod pa'i dngos grub de de bzhin du thob par 'gyur ro zhes gsungs pa'i don gyis 'dir yang rdo rje sems dpa' la sogs pa lha gang yang rung ba bsgrub pa de'i snying po de thugs byang chub sems dang dbyer med pa'i ngo bor rig par byas nas/de brjod pa'i tshul gyi bsgrub par 'dod pa'i sems dpa' de'i sku phyag rgya'i cha lugs kyi gzugs ji lta ba de bdag dang so so ma yin tha mi dad par bsams pa'i nga rgyal du nyi ma re re bzhin du bsgoms te sgo gsum nas dug gsum las gyur pa'i nyes pa thams cad dag cing mi 'byung ba'i tshul gyis de ltar bya'o//bar skabs su dbugs dbyung ba zhes pa de ltar rtag tu ting nge 'dzin du gnas pas skyo zhing lus dub ste dbugs bsdu ba ma thub nas slar gtong ba'i dus na yang ting nge 'dzin 'di ltar bya ste/dbugs nang nas slar 'byung ba tsam gyis rang gi lha'i gzugs rnams kyis phyogs bcu'i nam mkha'i khams rnams rab tu gang zhing khyab par mos par bya'o/ /'o na dbang po dang shes pa'i yul du gyur pa thams cad ji lta bur rig par bya snyam pa rnams kyi don du khyad par du yang gang dbang po dang dran pa'i spyod yul du 'ong ba de thams cad mnyes par bya'o//phyag rgya chen po sems dpa'i gzugs bsgom mo zhes gsungs te/ snga ma bzhin du bsgoms nas/ de las kyang khyad par du yang gang dang gang gzugs sgra la sogs pa dbang po dang rnam par shes pa'i spyod yul du gyur pa snga na spyad pa dang mthong ba dang rjes su dran pa dang da ltar dang /phyis nyams su myong ba dang / myong bar gyur pa'i cha de dag thams cad gang yang rung ba kun rang gis bsgrub cing mnyes par bya ba'i sems dpa' chen po de'i phyag rgya chen po'i gzugs su bsgom par bya'o//de bas na de lta bu'i yul gyi bya ba de dag yid la 'byung ngam sems dpar gyur na'ang / 'og nas 'byung ba yid la bya ste/ gang zhe na/ 'di rnams thams cad ni bdag gi rnam par rtog pa las byung ba ste zhes bya ba la sogs pa gsungs te/ rang gi sems 'khrul pa'i rnam par rtog pa mthu brtas pa'i dbang gis 'di dag 'byung zhing 'di lta bur snang bar zad de/ji ltar gzugs sgra la sogs pa'i yul 'di dag ni rang gi shes pas ji ltar rnam par rtog pa de bzhin du so sor snang du btub par gyur pa yin mod kyang / 'on kyang 'di dag yod du zin na ni/lung dang rigs pa'i gtan tshigs dang 'gal bas na/ 'di rnams ni sems 'khrul pa'i dbang gis yul du snang bar zad kyi don dam par 'di rnams kyi ngo bo nyid ni yod pa ma yin no snyam du rig par bya'o/ /de nas rlung dang bcas pa'i yid de slar bsdus te zhes pa ni/ de ltar rig par byas nas rang gi yid dbugs kyi rlung dang bcas pa de slar 'dus nas bdag rang gi phyag rgya'i sems dpar dmigs par bya'o//thabs de dag thams cad rang bzo ma yin te/ dpal de kho na nyid bsdus pa'i rgyud 'di las/ de nyid chen por gnas zlos shig /phyag rgya chen por mnyam gzhag ste/bdag nyid sems dpa'i rnal 'byor gyis/ gnas der thams cad rtag tu bsgom/ /zhes gsungs te/ de nyid chen po ni/ byang chub sems dpa' rnam par dag pa'o/ /de'i gnas ni ting nge 'dzin de'i rang bzhin du gnas pa ni/ snying po'i sngags zlos pa'o/ /phyag rgya chen por mnyam gzhag ces pa ni sems dpa' chen po'i phyag rgya rdzogs pa'i cha lugs su sems rtse gcig tu gnas pa'o//bdag nyid sems dpa'i rnal 'byor gyis/ /zhes pa ni/ ting nge 'dzin de lta bu la gnas pa'i sems dpa'i rnal 'byor pa des gnas der thams cad rtag tu bsgom mo zhes pa ni de lta bu'i ting nge 'dzin du dus thams cad du bsgom par bya zhes gsungs so//gzhan dag na re/ bdag nyid sems dpa' chen po gang bsgom par 'dod pa de'i phyag rgya mnyam par bzhag nas de nyid chen po'i snying po'i sngags kyi gnas su gyur pa'i ting nge 'dzin gyis zlos shing de'i dbang po dang shes pa'i yul du gyur pa'i gnas der phyag rgya chen po'i sems dpa'i gzugs kyi rang bzhin gnas par dus thams cad du sems dpa'i rnal 'byor pa bdag nyid kyis bsgom mo zhes bshad na/de dag gang ltar yang phan tshun 'gal ba med par mthong ngo / /rim pa 'dis bsgom zhing zhes pa shes pa dang lha'i rang bzhin du bsgom par bstan pa'i cho ga'i rim pa 'dis lha'i phyag rgya'i rnal 'byor du bsgom zhing ji srid de bzhin gshegs pa'i rigs kyi sems dpa' gang bsgrub pa de'i phyag rgya chen po'i dngos grub kyi mtshan ma byung ba de srid kyi bar du ting nge 'dzin goms par bya'o//de la 'di ni phyag rgya chen po'i dngos grub nye bar 'gyur ba'i mtshan ma gsungs te zhes pa 'og nas 'byung ba 'di ni de bzhin gshegs pa'i rigs kyi sems dpa' chen po'i phyag rgya chen po'i dngos grub sgrub pa nye bar 'gyur ba'i mtshan mar smras pa yin te gang zhe na/ nam mkha' 'am yang na phyogs gzhan du/ /dkyil 'khor dkar po ser po dang / /rang gi phyag rgya sems dpa' dag /mngon sum bzhin du mthong bar 'gyur/ /zhes gsungs te/ rang gi mdun gyi nam mkha' 'am de las phyogs gzhan du'ang rung ste/ lha gang bsgom pa de'i rigs kyi dkyil 'khor dang bcas pa kha dog dkar po'am/ser po ji ltar bsgom pa'am/ yang na rigs kyi kha dog ji lta ba bzhin du rang gi sems dpa'i phyag rgyar yid dang dbang po'i mngon sum dang 'dra bar mthong bar 'gyur ro zhes gsungs so/ /de bzhin du dngos grub sgrub pa de khyad par du thob tu nye bar gyur pa ni/de'i mtshan ma gzhan yang 'di skad du gsungs te/ rdo rje sems dpa' la sogs pa/ /zla ba'i dkyil 'khor 'od bcas pa/ /dngos grub dus na rang gi gzugs/ /bdag la thog mar ston par mdzad/ /ces gsungs te/ de ltar bsgoms pa'i ting nge 'dzin gyi sbyor ba dang ldan pa'i dam tshig sems dpa' de la ni/ji skad du gsungs pa'i dpal rdo rje sems dpa' la sogs pa ye shes kyi sems dpa' chen po rnams las gang mngon du byas pa de'ang zla ba'i dkyil 'khor lta bu dang bcas pa dag dngos grub sgrub pa'i dus na lha rang gi gzugs gang mngon par bsgrubs pa de bdag nyid la dang por ston par mdzad ces gsungs so//de bzhin du mchod pa'i cho ga bya ste zhes pa ni/ de ltar sngar bsnyen pa byas nas nam mtshan ma snang bar gyur pa dang ji lta ba bzhin du de'i dkyil 'khor bris te/ mchod pa'i rnam pas de bzhin du mchod pa byas nas/mtshan gcig yal nangs su lha'i ting nge 'dzin du gnas nas bzlas brjod byas na/ rang gi lha grub par gyur pa gang yin pa'i sems dpa' chen po de mngon du byon nas rang gi phyag rgya chen po'i cha lugs kyi gzugs ston cing / gang 'dod pa'i grub pa de la stsol bar mdzad do/ / de ltar byas nas kyang ma grub na spogs pa'i cho ga bstan pa'i phyir de bzhin du bsgoms pa las gal te nam zhig de bsgom pa'i lam gzhan pas rang gi phyag rgya chen po grub pa mngon du gyur pa'i mtshan ma med par gyur na yang zhes bya ba la sogs pa gsungs te/ gong ma'i tshul bzhin du bsgoms pa las rnal 'byor pa de dbang po zhan cing shes rab rtul ba 'am/brtson pa dang ting nge 'dzin stobs zhan nas sgrib pa stug pos bsgribs pa'i dbang gis yun ring du bsgrubs su zin kyang rang gi lha'i phyag rgya chen po mngon du ston pa dang / grub pa mngon du gyur pa'i mtshan ma bstan cing med par gyur na yang /bsgom pa dang bzlas brjod de dag don med par mi 'gyur te de ltar sgrub pa'i dus de'i tshe sngar bshad pa'i lnga mngon par shes pa'i ye shes dang / tshe ring ba dang / stobs che ba dang / lus bzang po dang / sogs pa'i sgras thun mong gi dngos grub brgyad po dag bsdu ste/ de las gang 'dod pa zhig dngos grub dag nan tan gyis ma bsgrubs kyang bzlas brjod ting nge 'dzin de las 'byung zhing 'thon par 'gyur te ji skad du gzhung las kyang /phyag rgya chen po bsgoms pa'i phan yon bsngags pa'i skabs su gsungs pa/ tshe 'di nyid la dam pa yi/ /mkhas pa'i go 'phang gang 'dod pa//des ni bdag gis 'di bya'o/ /min na dngos grub gong ma bzhin/ /zhes gsungs te/ dam pa dang mkhas pa ni ye shes kyi sems dpa' chen po ste/ de'i dngos grub kyi go 'phang tshe 'di nyid la thob par 'dod pa'i rnal 'byor pa des ni bdag nyid kyis bsgom pa dang bzlas pa bya'o/ / de ltar byas nas de ma grub tu zin kyang gong du gsungs pa'i lnga mngon par shes pa la sogs pa'i dngos grub gzhan thob par 'gyur ro zhes gsungs so/ /de bzhin du 'gyur ba'i gtan tshigs ngan song thams cad yongs su sbyong ba'i rtog pa la sogs pa sbyor ba'i gzhung gzhan las kyang zhib tu gsungs pa yin no//de bzhin gshegs pa'i phyag rgya chen po bsgrub pa sngar gsungs pa la yang de bzhin du shes par bya'o zhes pa ni de bzhin du sngar bstan pa'i de bzhin gshegs pa'i phyag rgya chen po bsgrub pa'i tshe na yang ting nge 'dzin dang bzlas pa byas bzhin du de dag ma grub na yang / rnam pa 'di dag 'grub par 'gyur bar rig par bya'o zhes bstan to//'di ni de bzhin gshegs pa la sogs pa zhes pa la sogs pa gong mas ni/ de'i rigs kyi sems dpa' rnams bsdu la/ sogs pa 'og mas ni phyag rgya lhag ma gsum bsdu ste/ 'di ltar bstan pa'i tshul 'di ni de bzhin gshegs pa dang /de'i rigs kyi sems dpa' rnams kyi phyag rgya chen po dang / chos kyi phyag rgya dang / dam tshig gi phyag rgya dang / las kyi phyag rgya sgrub pa'i cho ga rdo rje dbyings kyi dkyil 'khor chen po'i skabs su gsungs pa ste/ de ji lta ba bzhin du bya ba'i thabs bstan pa'o/ /bshad zin to zhes pa ni de ltar bya ba'i thabs ma lus par 'dir bstan to zhes bya ba'i tha tshig go//der gsungs pa'i dam tshig dang las kyi phyag rgya rnams sgrub pa'i rim pa ni 'di'o zhes pa ni rdo rje dbyings kyi dkyil 'khor gyi skabs der gsungs pa'i dam tshig gi phyag rgya dang / chos kyi phyag rgya dang /las kyi phyag rgya rnams bsgrub pa'i rim pa ni 'og nas 'byung ba 'di nyid ltar bya zhes pa ston to/ /'bras bu'ang phal cher 'di nyid do/ /zhes pa ni gong du bu gsungs pa'i 'bras bu yang gzhan yang yod mod kyi phal cher 'di kho na yin la/ 'og nas 'byung ba dag gi yang 'di nyid du rig par bya ste/ khyad par du ni dam tshig gi phyag rgya dang /sogs kyi sgras sdud pa'i phyag rgya lhag ma gnyis spyir phyag rgya gsum rnams bsgrub par bya ba la sngar gong du gsungs pa'i rim pas dam tshig sems dpa'i rnal 'byor du bsgom pa dang / ye shes dbab pa la thug gi bar du byas te/ de nas gang bsgrub par bya ba'i dam tshig dang / chos dang las kyi phyag rgya bcings la bsgrub par bya'o/ /de la dam tshig phyag rgya sgrub pa na/ zhes pa phyag rgya gsum pa de las kyang dang por dam tshig gi phyag rgya sgrub par 'chad de/ gang zhe na/ rang gi lha gang yin pa de'i dam tshig gi phyag rgya bcings te/ dam tshig gi phyag rgya de nyid kyi rang gi gzugs bdag nyid kyi snying gar bsams te/sngar gong du gsungs pa'i badzra sarba zhes bya ba la sogs pa'i sems dpa' so so'i snying po gang brjod par 'dod pa de nyid brjod cing / bdag gi lha'i dam tshig phyag rgya 'di ni zhes pa de ltar bsams pa'i bdag gi lha bsgrub par bya ba gang yin pa'i dam tshig gi phyag rgya 'di ni de bzhin gshegs pa'i thugs ye shes rdo rje lta bu las gyur pa'i gzugs nyid lta bu'i rnam par bstan pa yin te/gtan tshigs de lta bas na de bzhin gshegs pa thams cad kyi thugs byang chub sems dpa' rnam par dag pa'i bdag nyid bcom ldan 'das rdo rje sems dpa' de bzhin gshegs pa'i thugs ye shes kyi phyag rgya don dang dbyings rdo rje lta bu'i mtshan nyid dang bcas pa gzhan gyis mi shigs shing bcad pas mi chod pa de bzhin du/bdag nyid kyi mi shigs mi chod pa'i mtshan nyid can yin no bar sems rtse gcig pa'i ting nge 'dzin gyis bsams zhing / de ltar nyi ma re re zhing dus rtag par sbyor ba dang mi 'bral bar bsgom mo/ /lhag ma rnams ni zhes pa snying po brjod pa dang /dbugs bsdu ba dang / 'byung ba dang / 'od zer 'phro ba dang / 'du ba'i sbyor ba rnams ni sngar bstan pa'i rim pa ji bzhin du skabs 'dir yang sbyar la bya bar yang bstan te/ de ltar bya ba yang rgyud las ji skad du/ ji ltar rdo rje 'dzin grub pa/ /de bzhin bdag ces bsgoms na ni//sangs rgyas mkhas pa thob par 'gyur/ /min na dngos grub gong ma bzhin/ /zhes gsungs te/ de'i don 'di lta ste/ ji ltar rdo rje 'dzin grub pa'i 'bras bu mngon du grub pa de bzhin du bdag nyid kyang ye shes kyi phyag rgya'i mtshan nyid ji lta ba bzhin du bsgoms na sangs rgyas mkhas pa dang 'dra ba'i sems dpa' chen po gang 'dod pa'i de'i dngos grub thob par 'gyur la/gal te de ma grub par gyur pa na'ang / sngar bstan pa'i lnga mngon par shes pa la sogs pa'i dngos grub gzhan pa rnams grub par 'gyur ro zhes gsungs pa yin no/ /de bzhin du chos kyi phyag rgya bsgrub pa'i khyad par yang 'di'o zhes pa/dam tshig gi phyag rgya ji ltar bsgrub pa de bzhin du chos kyi phyag rgya bsgrub pa'i khyad par ram rim pa'ang 'og nas 'byung ba 'di'o/ /snga ma bzhin du zhes pa gong ma'i bstan pa bzhin du/ bdag gi lha sems dpa' gang sgrub par 'dod pa'i cha lugs su bsgoms pa'i lce la rdo rje rtse lnga ba bsgom mo/ / de'i bum pa la yang rang gi lha'i chos kyi phyag rgya'i sngags kyi ye shes sngar gong du bshad pa de bsgoms te/ de'i don yang chos thams cad ma skyes pa'o zhes bya ba/ spyi'i chos kyi phyag rgya'i don la mos par bya ste zhes pa/ chos thams cad ni ma skyes pa yin la/ ma skyes pa'i don de mtshon par byed pa'i sgor gyur pa ni/chos kyi phyag rgya 'di dag yin par chos kyi phyag rgya spyi'i don de ltar rig par byas nas/ 'dir yang don de bzhin du mos par byas la de nyid kyi snying po ji lta ba bzhin du brjod la/ ji srid chos kyi phyag rgya 'di rnams tshang ba'am/ gcig kyang rung ste gang sgrub pa rnams grub par gyur pa'i mtshan ma 'di nyid las/ji skad du gsungs pa byung gi bar du bsgom zhing bzlas par bya'o/ /lhag ma ni zhes pa dbugs bsdu ba dang / btang ba dang / 'phro 'du'i bye brag ste/ de'i rim pa ni snga ma bzhin du rig par bya'o/ /de ltar bya ba yang rgyud las ji skad du/ chos kyi phyag rgya sgrub pa'i skabs su/chos rnams thams cad rang bzhin gyis dag pa zhes pa'i tshig smras na/ sangs rgyas mkhas pa thob par 'gyur/ /min na dngos grub gong ma bzhin/ /zhes gsungs te/ de'i don ni brda phrad par zad do/ /rang gi las kyi phyag rgya sgrub pa yang zhes pa phyag rgya rnam pa bzhi las rang gi las kyi phyag rgya mngon par bsgrub cing bcing bar bya ba'i khyad par ram bye brag kyang chos kyi phyag rgya sgrub par bstan pa de bzhin du thog mar rang gi lha'i dam tshig sems dpar nga rgyal byas te/rang gi las kyi phyag rgya gang yin pa de bcings te/ snying gar rdo rje rgya gram kha bzhi pa bsgoms te/ de'i don yang 'di ltar bsams te/ chos thams cad kyi mtshan nyid ni thog ma nas ma skyes pas na/ rang gi mtshan nyid kyis dngos por ma grub pa'i phyir rang bzhin gyis rnam par dag pa ste/ gtan tshigs de bas na 'phags pa mnyes par bya ba dang / sems can gyi don bya ba'i las kyi rnam par bstan pa'i mtshan nyid thams cad kyang don dam par rang bzhin gyis ma skyes pa ste/rnam pa gzhan du na kun rdzob tu sgyu ma'i mtshan nyid tsam du rnam par brtags pas snang ba'o/ /de lta bu'i gtan tshigs de bas na/ ji ltar ting nge 'dzin gyis rnam par brtags pa de bzhin du las kyi dngos grub gang 'dod pa rnams sems las su rung na 'byung bar 'gyur ro zhes de ltar yid la yod par bya ste/lha so so'i sngags las rang gis gang bsgrub par 'dod pa'i rang gi snying po de rdo rje dam tshig gis brjod cing bsgom par bya'o/ /lhag ma rnams ni zhes pa 'dir yang las kyi phyag rgya spro ba dang / bsdu ba'i rim pa ni sngar bstan pa'i rtsis mgo bzhin du sbyar bar rig par bya ste/de yang rgyud nyid las ji skad du/ thams cad kun du dag pas na/ /las kun rnam par sbyangs nas ni/ /sangs rgyas mkhas pa thob par 'gyur/ /min na dngos grub gong ma bzhin/ /zhes gsungs te/ de'i don yang 'di lta ste/ chos thams cad gdod nas ma skyes shing rang bzhin gyis kun du rnam par dag pa ste/de bzhin du las kyi ngo bo nyid kyang rnam par dag pa'o snyam sbyangs te kun rdzob sgyu ma'i mtshan nyid tsam du so so'i bye brag tu snang bar mos par byas nas/ sangs rgyas mkhas pa dang 'dra ba'i las kyi phyag rgya'i dngos grub thob par 'gyur la/ / gal te ma thob tu zin kyang gong du bstan pa'i lnga mngon par shes pa la sogs pa thob par 'gyur ro zhes gsungs so/ /ji ltar dam tshig gi phyag rgya dang / chos kyi phyag rgya dang / las kyi phyag rgya 'di dag sgrub pa'i bar du sbyor ba ni/ de bzhin gshegs pa rnams dang / de'i rigs kyi sems dpa' rnams dang 'dra ste bye brag gam khyad par du so sor dbye ba med pa'i phyir ro//de bas na gcig tu bstan pa nyid du 'dir gsungs so/ /de ltar sgrub pa de'i 'bras bu ni/ sangs rgyas mkhas pa thob bo zhes bya ba yin no/ /khyad par du ni zhes pa khyad par du rang gi lha de bzhin gshegs pa'i phyag rgya thams cad sgrub pa la 'jug pa ni ji ltar 'dod pa'i cha lugs su bsgoms pa'i de bzhin gshegs pa'i gzugs nyid du bsgyur ba'am/yang na mdun du bsams te/ mtshan yal nangs su zhes pa mtshan gcig la rgyun mi 'chad par phyag rgya'i snying po gang yin pa zlos shing bsgrub par bya ste/ rgyud las ji skad du/de bzhin gshegs pa'i dngos grub mchog sgrub pa'i skabs su gsungs pa/ bdag la'am yang na mdun du ni/ sangs rgyas rjes dran sgom pa po/ /phyag rgya thams cad bcings nas ni/ /de nas de ma thag tu 'grub/ /ces gsungs te/ de'i don yang 'di lta ste/ phyag rgya chen por bdag bsgyur ram/yang na mdun du bsams nas bsgrub par bya ba'i lha rjes su dran par byas shing de'i phyag rgya bcings par gyur na/ de ma thag kho nar de 'grub par 'gyur nges so zhes sangs rgyas bcom ldan 'das nyid kyis gsungs so zhes rgyud las 'byung bar bstan to/ /de bzhin gshegs pa'i rigs kyi sems dpa' chen po zhes pa ni/de bzhin gshegs pa'i rigs kyi sems dpa' chen po rnams kyi so so'i phyag rgya chen po la sogs pa bzhi 'chang ba'am/ gcig gam gang yang rung ba dag sgrub pa la ni/ dam tshig sems dpa' bsgom pa nas rdo rje dbab pa la thug gi bar du sbyor ba'i cho ga de dag sngon du byas la/bdag ni 'dod pa'o zhes bsgom zhing zhes pa/ de lta bu'i sbyor ba la gnas nas bdag ni 'dod pa'o zhes yid la bsam zhing phyag rgya mngon du byas la mtshan mo rtog par snying po bzlas par bya'o/ /de yang ji skad du rgyud 'di nyid kyi de bzhin gshegs pa'i dngos grub mchog gi rgyud kyi skabs su bshad pa/phyag rgya thams cad bsgrub pa ni/ /bdag ni 'dod pa'o zhes bsgom zhing / /rdo rje zlos pa'i sbyor ba yi/ /dngos grub mchog ces rab tu bsgrub/ /ces gsungs te/ de'i don yang 'di lta ste phyag rgya chen po la sogs sa pa'i rim pas dam tshig sems dpa'i rnal 'byor du byas nas bdag gi 'dod pa'o zhes pa'i bsam pa dang bcas pas/rdo rje tshig gi snying po bzlas pa'i sbyor ba byas nas phyag rgya bzhi'i dngos grub sgrub par 'gyur ro zhes bcom ldan 'das rdo rje sems dpas rgyud nyid du gsungs so zhes pa ni slob dpon gyis gtan tshigs su byas pa'i tshig go//de la 'dod pa zhes pa ni don du gnyer ba gang yin pa de thob par 'dod pa zhes bya bar brjod par rig par bya'o/ /de bzhin gshegs pa dang de bzhin gshegs pa'i rigs kyi phyag rgya bzhi sgrub pa'i thabs dang / de'i khyad par gyi dbye ba bshad zin to// // da ni lha'i mig la sogs pa mngon par shes pa rnams kyi rang gi yul brtags pa'i sbyor ba rnams bshad par bya'o zhes pa ni de bzhin gshegs pa la mngon par shes pa drug mnga' ba las lnga ni thun mong du gyur pas na kun gyis thob tu rung la/ zag pa zad pa'i mngon par shes pa ni de bzhin gshegs pa 'ba' zhig las ma gtogs pa gzhan gyis rig cing thob par bya ba'i yul ma yin pas na 'dir yang mngon par shes pa lnga nyams su lon par bya ba'i thabs bstan te gang zhe na/de la rnal 'byor pa grub pa dang ma grub pa yang rung ste zhes bya ba la sogs pa dag ste/ lha'i mig gi mngon par shes pa sgrub par 'dod na dang por bdag nyid kyis rdo rje phra mo'i ting nge 'dzin bsgoms shing dbang du byas te sems las su rung bar gyur nas rang gi lha'i dam tshig sems dpa'i rnal 'byor ye shes dbab pa'i mthar thug gi bar du snga ma bzhin du mngon du byas nas/gzugs gang yul gzhan gyis bar du chod pa'am zhes pa/gzugs gang ri rab dang / rgya mtsho dang / lha'i yul la sogs pa thag ring bar gyur pas mig gi yul gzhan gyis bar du bcad de/ blta bar mi nus pa'am/ gzhan yang yul dang rgyal khams sam grong dang grong khyer dang / grong rdal dang / rtsi shing dang / nags tshal dang / ri brags la sogs pa blta 'dod pa dag khang pa dang / rtsig pa dang / yul dang / rgyal khams gzhan gyis bar du bcad cing bsgribs nas mthong bar dka' ba rnams lha'i mig gis mngon sum du mthong bar 'dod pa'i rnal 'byor pa ste/ de mdun na gnas pa bzhin du/ gzugs kyi rnam par rtog pa mos par byas nas zhes pa sngar bstan pa'i sbyor ba dang ldan pas gzugs gang yang rung ba mthong bar 'dod pa de bzhin gyis bar du ma bcad par mdun na gnas pa bzhin du ting nge 'dzin gyis gzugs kyi rnam par rtog pa gsal bar yid la mos par byas nas mngon sum du mthong ba'i yid la bya ba bsgom par bya ste/shes par bya ba'i gzugs kyi dngos po zhes pa ri rab la sogs pa gang shes par 'dod pa'i gzugs kyi dngos po gang 'dod pa ste/ sgrub pa po bdag nyid de la bar cis kyang ma chod par mngon du snang ba dang 'dra bar bcas pa'i mig gi dbang pos so sor snang zhing mthong ba'i rnam par rtog pa 'jug par bya'o//de la rnam par rtog pa 'jug /ces pa ni/ de ltar ting nge 'dzin brtas par bya'o zhes pa'i tshig go/ /de nas de'i rnam par rtog pa nyid kyi zhes pa de ltar ting nge 'dzin mi dmigs pa nan tan gyi bar du mos par byas pa dang / rnal 'byor pa de'i de ltar brtags pa'i rnam par rtog pa nyid kyi yid lha'i mig gi rnam par shes pa zhes bya ba'i de ma thag pa'i rkyen de'i rting thogs su nye bar skye ste/gang la ji ltar 'dod pa'i gzugs zhes pa/ rnam par rtog pa'i ting nge 'dzin las su rung ba'i rting thogs su nye bar skyes pa'i lha'i mig gi rnam par shes pa'i yid tsam 'byung bar gyur pas des gang la ji ltar 'dod pa'i yul ri rab dang /rgya mtsho dang / lha dang / lha'i grong khyer la sogs pa'i gzugs ji lta ba bzhin du rig cing rab tu gsal bar snang ba de'i kha dog gi rnam pa/ sngon po dang / ser po dang / dkar po dang / stsogs kyi sgras bsdus pa'i le brgan dang /ljang gu la sogs pa gang yin pa dang / gang ltar 'dod pa'i gzugs kyi rnam par shes pa skye zhing / rnal 'byor pa la mi snang ba dang / phyin ci log tu snang ba'i dogs pa med par 'byung zhing mthong bar 'gyur ro/ /gang de lta bu'i rgyu rkyen tshogs pa mngon du bya zhing / zhes pa gang de lta bu mthong bar 'dod pa'i rnal 'byor pas ting nge 'dzin dang / bzlas brjod dang snang bar rnam par brtags pa'i ting nge 'dzin gyi rgyu rkyen tshogs pa mngon sum du byas shing / yun ring du bsgoms pa'i bsgom pa goms pa dang / sems las su rung ba'i ting nge 'dzin gyi mthu brtas pa las byung ba'i dbang gis mig gi rnam par shes pa skye ba dang /de ma thag pa'i yid kyi rnam par shes pa nye bar skye zhing de bzhin du mthong bar 'gyur ba lta ci smos kyi/ gang de lta bu'i rgyu rkyen tshogs pa mngon du byas shing bsgoms pa'i mthu bskyed cing goms par byas pa la/ gal te de ltar ma grub pa'i rnal 'byor pa la yang rang gis mthong bar 'dod pa'i yul ri rab la sogs pa'i thag ring po na gnas pa'i gzugs la sogs pa tha dad pa'i dngos po rnams mdun du 'dug pa bzhin du/rnal 'byor dang ting nge 'dzin rtse gcig tu byas pa'i dbang gis gang 'dod pa'i yul de'i rnam par snang ba'i rnam par shes pa skye bar gyur pa de lta bu ni/chos nyid kyis de lta bu srid do/ /tha na de lta bu'i rnam par rtog pa dang ldan pa'i rnal 'byor gyi gnyid las kyang zhes pa de lta bu'i ting nge 'dzin yun ring du byas pa'i rnal 'byor pa des ni/ tha na rmi lam du ci rmis pa'i snga ltas bzang ngan gyi mtshan ma rnams kyang slu bar mi 'gyur zhing ji ltar rmis pa de bzhin du rtogs shing mthong ba dang /nyams su myong bar 'gyur te/ de ltar na ma yin pa'i dogs pa med par 'gyur ro/ /lha'i mig gi mngon par shes pa bskyed pa'i cho ga 'di dag ces pa/ lha'i mig gi mngon par shes pa bsgrub pa/ ting nge 'dzin dang / bzlas brjod dang / brtag par bya ba'i sbyor bas yul ji lta ba bzhin du mig gi rnam par shes pa de ma thag pa'i yid skyes nas gang ltar 'dod pa de bzhin du rig par 'gyur ba'i cho ga 'di dag thams cad ji lta ba bzhin du/ lha'i rna ba'i mngon par shes pa la sogs pa lhag ma rnams kyi sbyor ba yang de bzhin du byas na 'grub par 'gyur bar shes par bya ste/khyad par du ni lha'i rna ba'i mngon par shes pa la zhes pa/ de las khyad par du bya na lha'i rna ba'i mngon par shes pa sgrub par gyur na ni/ gtsor rna ba'i rnam par shes pa kho na mngon du bya'o/ /yul ni yul gzhan la sogs pas bar chod pa dang zhes pa lha'i rnam par shes pa thob pa'i yul ni/yul gzhan bsgrub par bya ba'am/ thob par 'dod pa ma yin pa'i sgra skad kyis bar du chod par gyur kyang des mi 'phrogs par gang thob par 'dod pa'i sgra de thos par gyur pa dang / tha na phra bar gyur pa grog mo dang / sbur pa la sogs pa'i rna sgra dang /rting sgra dang / skad ji lta ba yin pa dag grag pa'am/ sgrogs pa dang thos par nus pa'o/ /de ltar gyur pa'i gtan tshigs rgyud las ji snyed du/ lha'i mig dang / lha'i rna ba'i mngon par shes pa gnyis kyi yul ji lta bu yin pa'i bye brag 'byung ngo / /phyag rgya chen po mnyam gzhag ste/ /mig gi rnam par shes pa gtang //de yis cung zad gang bsams pa/ /rab tu ring ba'ang mthong bar 'gyur/ /zhes gsungs te/ de'i don yang 'di lta ste/ bdag nyid kyi lus sems phyag rgya chen po'i rnal 'byor du mnyam par bzhag nas gnas par bya ste/ yul gang mthong bar 'dod pa de mngon sum du snang bar brtags na de ltar yun ring du rnal 'byor byas pa dang /ting nge 'dzin pa las su rung ba'i dbang gis gang bsams shing yid la byas pa'i gzugs de rgyang ring ba na 'dug kyang rung ste/ mngon sum du mthong bar 'gyur ro/ /de bzhin du lha'i rna ba'i mngon par shes pa'ang sgrub pa'i don yang gsungs pa/phyag rgya chen por mnyam gzhag ste/ /rna ba'i rnam par shes pa btang / /de yis dgos pa gang bsams pa/ /rab tu ring ba nas kyang thos/ /zhes gsungs te/ gang lha'i rna ba'i mngon par shes pa thob par 'dod pa'i rnal 'byor pas lus sems phyag rgya chen po'i ngang du mnyam par gzhag pa'i ting nge 'dzin la gnas te/sngar bstan pa lta bu'i cho ga'i sbyor ba la gnas par byas nas sgra gang thos par 'dod pa de mngon sum du gsal bar thos par brtags pa'i ting nge 'dzin la yun ring du gnas pa dang / ting nge 'dzin las su rung ba dang / sgra thos par 'dod pa de sgra rigs mi mthun zhing thos par mi 'dod pa'i rnam pa gzhan gyis bar du chod kyang de mi sgrib par rna ba'i dbang pos mngon sum du gsal bar thos par 'gyur ba'i rna ba'i rnam par shes pa de ma thag pa'i yid skye bar 'gyur te/ji ltar sgra mi snyan na gnas pa'i mi'am/ sum cu rtsa gsum pa'i gnas kyi gnas pa'i lha rnams kyi skad thos par 'dod na'ang de dag gang na smra ba'i sgra bzhin du thos par 'gyur ro zhes pa'i don to//gzhan gyi sems shes pa'i rnal 'byor pas kyang zhes pa pha rol gyi sems shes pa bsgrub par 'dod pa'i rnal 'byor pas kyang dang por bdag nyid lha'i phyag rgya chen por bsgom pa dang ye shes dbab pa la thug gi bar du cho ga snga ma bzhin du byas nas/lha dang mi dang de las ris mi mthun pa'i 'gro ba yang rung ste/ gang gi sems shes par 'dod pa de dpag tshad dang rgyang grags du mas bar du chod pa'i yul khams sam yul bar du thag ring po na gnas kyang rung bdag gi mdun na gnas pa bzhin du ting nge 'dzin gyis brtag cing mos par byas te/sems yongs su shes par 'dod pa de'i sems de 'dod chags dang bral ba zhig ces pa la sogs pa'i mtshan nyid ji lta ba bzhin du rnam par rtog na ting nge 'dzin rtse gcig pa'i rnal 'byor gyi mthus pha rol po de'i bsam pa ji lta ba bzhin du de dang rjes su mthun pa'i yid kyi rnam par rtog pa'i rang bzhin du gsal ba'i shes pa rnal 'byor pa las byung ste/gang las gzhan gyi sems kyi rnam par rtog pa gang dge ba dang / mi dge ba dang / nyon mongs pa dang / nyon mongs pa med pa dang ldan pa'i sems kyi rnam par rtog pa dag kyang ji lta ba bzhin du mi rtogs pa'i dogs pa med par rtogs shing mngon du 'gyur te/de ltar mthong ba ci'i phyir zhe na/ gang gi phyir bsam gtan pa rnams kyi yul ni bsam gyis mi khyab pa zhes gsungs te/ gang gi phyir bsam gyis mi khyab pa bzhi zhes brjod pas bsam gtan pa rnams kyi ting nge 'dzin gyis brtags pa'i yul ni bsam gyis mi khyab pas na/de'i phyir de'i sems las su rung ba'i ting nge 'dzin gyi dbang gis de bzhin du rtogs par rung bas na/ 'dir rigs pa mi brtag go zhes pa 'dir 'di ltar 'grub tu rung bar brtag pa'i rigs pa las gzhan gyis 'grub bam mi 'grub snyam du phyin ci log gi blos the tshom gyi rtog pa skye bar mi bya ste/ci'i phyir zhe na/ bsam gtan pa rnams kyi yul bsam gyis mi khyab ces gsungs pa'i phyir dang / de ltar bya ba yang rgyud las ji skad du/ phyag rgya chen por mnyam gzhag ste/ /yid kyi rnam par shes pa btang / /de yis sems can gang brtags pa/ /de yi sems ni de yis rig /ces gsungs pa'i phyir te/ de'i don yang 'di lta ste/ gang pha rol gyi sems shes par 'dod pa'i rnal 'byor pas lus sems phyag rgya chen po'i ngang du mnyam par gzhag pa'i ting nge 'dzin la gnas te/gang pha rol gyi sems shes par 'dod pa'i 'gro ba de'i sems kyi mtshan nyid ji lta ba bdag rang gi mngon sum du snang bar brtags pa'i ting nge 'dzin las su rung bar byas pa'i sems nye bar gzhag nas/ pha rol po de'i sems ji lta ba bzhin du rnal 'byor pa des rig cing rtog par 'gyur ba'i shes pa skyed par 'gyur ro//de bzhin du bdag dang gzhan gyi tshe rabs snga ma shes par 'dod pa'i rnal 'byor pas zhes pa ni sngon gyi gnas shes par 'dod pa'i shes pa ste/ pha rol gyi sems shes pa'i mngon par shes pa sgrub pa de bzhin du bdag dang 'gro ba gzhan dag tshe rabs snga ma la yul dang rigs dang lus gang du ji lta bur skyes pa dang /las ji lta bu dag spyad par gyur pa shes par 'dod pa'i rnal 'byor pas/ phyag rgya chen po sngar gsungs pa de bzhin du bcings te/ yid kyis bdag gam pha rol gyi gzugs rtag ces pa dang /bdag ting nge 'dzin du gnas pa'i yid kyis bdag gam pha rol gyi gzugs la brtag cing / tshe 'di'i sngon rol lam tshe rabs bgrangs pa dag tu bdag dang sems can de'i tshe dang / spyod pa dang las dang / rigs ji lta bu blangs par gyur zhes bsgom pa'i rnal 'byor kyis brtag par byas na ting nge 'dzin de grub cing las su rung ba'i rnal 'byor gyis bdag dang gzhan la brtags pa de 'ba' zhig gi sngon gyi gnas rjes su dran par 'gyur ba 'ba' zhig lta ci smos te/de ltar ma yin gyi gal te rnal 'byor gyi mthus ma grub pa yang sems rtse gcig pa'i ting nge 'dzin de lta bu sbyor ba'i mthus ji ltar mtshan mo rmi lam rmis pa nang par gsal bar dran pa bzhin du/sngar 'das ma thag pa'i tshe rabs snga ma dang / yang snga la sogs pa la ji lta bur gyur cing spyad pa dag ming dang nang gi spyod yul bzhin du mngon sum kho nar so sor snang bar 'gyur te/ji skad du rgyud las kyang / phyag rgya chen por mnyam gzhag ste/ /bdag gam yang na gzhan yang rung / /yid kyis gzugs ni mthong na yang / /gang nas tshe 'ongs de ru btang / /zhes gsungs te/ de'i don yang 'di lta ste/ sngon gyi gnas rjes su dran par 'dod pa'i rnal 'byor pas lus sems phyag rgya chen po'i ngang du mnyam par gzhag ste/yid kyis gzugs mthong ba gzhan yid la mi bya bar/ tshe rabs snga ma bdag dang gzhan pha rol po gang la dmigs pa de gang nas 'ongs pa'am/ ji lta bu zhig tu 'gyur zhes legs par brtags shing mngon sum dang 'dra bar yid la byas nas/ting nge 'dzin gyi mthus de bzhin du mthong bar 'gyur ro zhes gsungs pa'o/ /rdzu 'phrul gyi mngon par shes pa'i bye brag ni zhes pa/ rdzu 'phrul nus par bya ba ni/ gcig tu bcad pa ma yin te tha dad pa dag shes par bya dgos pa ste/ gang zhe na/ nam mkha' la 'gro ba dang /mi snang ba dang / gzugs sna tshogs pa dang zhes bya ba la sogs pa'i bye brag rnams gsungs te/ nam mkha' la 'gro ba ni nam mkha' yang rang gi spyod yul du byas nas bya bzhin du thogs pa med par spyad pa'o/ /mi snang ba zhes pa ni/ sa 'og la sogs par 'gro ba dang / rang gi lus 'gro ba gzhan gyi mngon sum du 'dug kyang pha rol gyis mthong bar mi nus pa dang / gzugs sna tshogs pa la zhes pa ni/ dgos pa la la dag yod na/ de'i phyir gzugs rnam pa sna tshogs pa'i ngo bor ston nus pa'o/ /bsgrib pa zhes pa ni yul gzhan gyis bar du bcad pa'o/ /ma bsgribs pa zhes pa ni yul gzhan gyis bar mi chod pa'o//nam mkha' la rgyang ring du myur du 'gro ba zhes pa ni/ dper na dpag chen gyi mda' nam mkha' la 'phangs na thogs pa med par myur du 'gro ba bzhin du bdag nyid kyang thogs pa med par nam mkha' la myur bar rgyang ring bar 'gro zhing gzhan gyi mig gi dbang po'i spyod yul las kyang gzhan du 'das par byed pa'o//ri dang grong khyer la sogs pa'i phyi rol gyi dngos po rnams sprul par spyod pa zhes pa ni/ ji ltar sa gshin pa ri med pa dag tu/ ji lta bu yod par ston pa dang / sa stong pa dag tu grong khyer la sogs pa yod par ston pa'i sprul pa byed pa'o//'jim pa la sogs pa'i rdzas las gser la sogs pa'i dngos grub por bya ba dang zhes pa ni/ rgyu gcig la 'bras bu mi 'dra bar ston pa ste/ ji ltar 'jim pa'i gong bu'am/ rdo ba dang gyo mo la sogs pa'i rdzas las gser dang / dngul dang / zangs ma dang / lcags dang / rin po che'i rigs kyi rnam par bsgyur zhing ston nus pa'i sprul pa'o/ /mi gnas pa'i dngos po la'ang lo du mar 'dug tu rung bar bya ba zhes pa ni/ ji ltar rig sngags 'chang ba nam mkha' la gnas shing me tog dang 'bras bu dag nam mkha' la skyed par byed pa ltar/ nam mkha' dmigs pa med pa la gzhal yas khang byas nas lo du mar gnas pa ltar ston pa'am/ zho dang 'o ma la sogs pa cung zad tsam gsher ba'i bag yod pa yun ring du brtag par mi rung ba dag lo du ma'i bar du gang du bzhag pa'i snod na de bzhin du gnas par ston pa dang / sogs pa'i sgras gcig la mang por bya ba dang /mang po gcig tu bya ba dang / stod nas me 'bar ba dang / smad nas chu 'byung ba dang / sa la chu la bya ba bzhin dang / chu la sa la bya ba bzhin dang / ri brags la thogs pa med par 'gro ba la sogs pa'i rnam pa rnams bsdu bar bya'o/ /rdzu 'phrul gyi rnam pa dang bye brag de lta bur grub cing nyams su lon par 'dod pa'i rnal 'byor pas snga ma bzhin du lha'i phyag rgya chen po bcings shing mnyam par gzhag ste/nam mkha' la 'gro ba la sogs pa gang yang rung ba'i rdzu 'phrul gyi yul mngon du byas te zhes pa rdzu 'phrul de dag kyang dus gcig kho nar kun mngon du byas nas sgrub pa ma yin gyi/nam mkha' la 'gro ba'am mi snang ba'am/ gang bsgrub par 'dod pa de mngon du byas te/ nam mkha' la 'gro ba la sogs pa'i rdzu 'phrul gang bsgrub pa de'i rnam pa bsgom pa yun ring du byas te ji srid ji ltar 'dod pa'i rdzu 'phrul yang dag par 'byung bar 'gyur zhing byed nus par 'gyur la/ma grub kyi bar de srid kyi bar du dmigs pa'i ting nge 'dzin rtse gcig pas gzhan du mi 'gyur bar gnas par bya'o/ /de ltar byas dang gang 'dod pa'i rdzu 'phrul bsgrub cing nyams su lon par 'gyur te/ ji skad du rgyud las kyang / phyag rgya chen por mnyam gzhag ste/rdzu 'phrul gang dang gang 'dod pa/ /gang dang gang du de nyid ni/ /mnyam par gzhag pas blta bar bya/ /zhes gsungs te/ de'i don yang 'di lta ste/ rdzu 'phrul gyi mngon par shes ba thob par 'dod pa'i rnal 'byor pa des rang gi lus sems phyag rgya chen po'i ngang du mnyam par gzhag pa la sogs pa byas te/rdzu 'phrul gyi rnam pa gang dang gang du 'dod pa'i rnam pa de ting nge 'dzin gyi rtsol ba mngon du blta bar bya ste/ de mngon du gyur pa de srid du byas na 'thob par 'gyur ro bar bstan to/ /de ltar mngon par shes pa lnga mngon par sgrub pa rim par bstan nas/gzhan gyi sems shes pa bsgrub par bya ba'i thabs gzhan yang bstan pa'i phyir na/ gzhan gyi sems kyi rang bzhin yongs su shes par bya ba'i sbyor ba gzhan yang 'di lta ste zhes bya ba la sogs pa gsungs te/ gang zhe na/ de la de bzhin gshegs pa'i phyag rgya chen po bcings nas zhes bya ba dag ste/de bzhin gshegs pa lnga las gang yang rung ba'i phyag rgya chen por bdag nyid gnas par byas nas 'di ltar byin gyis brlab par bya ste/ gang pha rol gyi sems shes par bya ba'i sems can de'i sems kyi rang bzhin ci 'dra ba de/ de 'dra ba'i gzugs nyid du bdag gis snying ga'am mdun du dpal rdo rje sems dpa' ston par gyur cig ces ting nge 'dzin gyis de ltar bsams la/rang gi snying ga'am yang na mdun gang yang rung bar rdo rje sems dpa' mthong bar bsam pa ni ji srid du sems can de'i dge ba dang mi dge ba la sogs pa'i mtshan nyid ci 'dra ba de'i rnam par dpal rdo rje sems dpa' nyid rab tu snang bar mdzad par ma gyur gyi bar du rgyun bsrings la lhag par bsgom par bya'o//de'i mtshan ma ni 'di dag ste/ de la rdo rje sems dpa' man shel bzhin du dag par snang ba zhes bya ba la sogs pa ste/ rnal 'byor pa de'i shes pa la nam rdo rje sems dpa' cha lugs shel bzhin du dag par snang bar gyur na de'i tshe brtag par bya ba'i sems can de'i sems dag bdag gzhan la gnod pa byed pa'i rnyog pa la sogs pa'i nyes pa med par rig par bya'o//gzhan yang nam du yang rung ste dung dang me tog kun+da la sogs pa'i rnam par dpal rdo rje sems dpa'i ting nge 'dzin snang bar gyur pa de'i tshe/de'i sems dang zhing nyon mongs pa dang nye ba'i nyon mongs pa thams cad dang bral bar shes par bya'o/ /de ltar me tog man+d+ra ka zhes bya ba la sogs pa'i rnam par rdo rje sems dpa'i ting nge 'dzin snang bar gyur na/de'i tshe gzhan gyi sems de rjes su chags pa dang bcas pa'i rnam par shes par bya'o/ /'o na rdo rje sems dpa'i ting nge 'dzin de kha dog nag por snang na/ de'i tshe sems can de'i sems khros pa yin par shes par bya ste/ ji skad du rgyud las kyang / rdo rje sems dpa'i ting 'dzin gnas/ / zla ba'i kha dog rab sbyor bas/ /de yi kha dog ci 'drar rig /de bzhin 'jig rten de yis rig /dag na skye bo dag par shes/ /dkar ram yang ni rab tu dang / /dmar nag rab tu zhen cing khro/ /kha dog ci 'dra de 'dra'i bdag /ces gsungs te/ de'i don yang 'di lta ste/ rang de bzhin gshegs pa gang yang rung ba'i phyag rgya chen por gnas nas de'i mdun nam snying gar rdo rje sems dpa' gnas par bsams te/des sems can pha rol po'i sems ji lta ba bzhin bdag la cha lugs kyis rtags ston par gyur cig ces pa'i bsam pa dang ldan par yun ring du rnal 'byor bya ste/nam dpal rdo rje sems dpa'i cha lugs ji ltar bstan pa de bzhin du pha rol gyi sems shes par bya'o zhes gsungs so/ /de bzhin gshegs pa'i rigs la yang zhes pa de bzhin gshegs pa'i rigs dpal rdo rje sems dpa' la sogs pa ye shes kyi sems dpa' rnams la yang cho ga 'di nyid kyi tshul gyis bya ste/de ltar yang rgyud nyid las ji skad du/ phyag rgya chen por mnyam gzhag pa/ /zla ba'i dkyil 'khor 'od dang bcas/ /rang gi lus de ji ltar shes/ /de ltar 'gro ba'i yid shes pa'o/ /zhes gsungs te/ de'i don yang 'di lta ste/bdag nyid de bzhin gshegs pa'i rigs kyi rdo rje sems dpa' la sogs pa sems dpa' gang yang rung ba'i phyag rgya chen po'i ngang du sems mnyam par gzhag la 'od dang gdan zla ba'i dkyil 'khor la gnas par byas nas/ rang gi snying gar gang yang rung ba'i sku bsams kyang rung /rang gi lus nyid la brtags kyang rung ste/ ji ltar 'dod pa dmod dor nas/ /rang gi lus sam snying ga'i lha de ji ltar snang ba bzhin/ /'gro ba gzhan gyi yid shes par rig par bya'o/ /zhes gsungs so/ /de bzhin du gal te 'ga' zhig 'gro'am 'ong ba shes par 'dod pa zhes pa gzhan gyi sems shes par 'dod pa'i sbyor ba bstan pa de bzhin du/gal te dgos pa la la'i phyir 'gro ba 'ga' zhig phar 'gro ba'am/ tshur 'ong ba'i bsam pa shes par 'dod na de'i tshe de dang rjes su mthun par smon lam btab nas de ltar sgrub cing don de shes par 'dod pa de'i tshe 'gro ba de lta bu zhig phar 'gro ba dang /tshur 'ong ba'i sems ji lta ba bzhin shes par gyur cig ces smon lam btab nas/ ji srid phyag rgya chen po'i ngang du sems mnyam par gzhag pas 'gro ba de'i lag pa g.yob pa dang / lus 'gul ba dang / rkang pa 'dor ba dang / skad 'byin pa la sogs pa'i rnam pas phar la 'gro ba dang /tshur 'ong ba'i sbyor ba ston par byed pa'am/ rnam gcig bdag rang gi lus nyid de lta bur g.yo bar snang bar gyur pa de srid kyi bar du bsgom par bya ste/ de nas mtshan ma de dag mngon du snang ba las brtags na/ pha rol po'i 'gro ba de phar 'gro ba dang /tshur 'ong ba gang yin pa'i sems shes par 'gyur ro/ /de yang rgyud las ji skad du/ mnyam par 'jog pa 'di dag ni/ /'gro ba dang ni 'ong ba'am/ /g.yo ba dag kyang byed par ni/ /ji ltar mthong ba de ltar 'ong / /sems can gang dang gang dag ni/ /mnyam par bzhag ste bsams na ni//de dang de dag de bzhin du/ /sems ni thams cad rig 'gyur zhes/ /bcom ldan rdo rje sems dpas gsungs/ /zhes gsungs te/ de'i don yang 'di lta ste/ ji ltar phyag rgya chen po la mnyam par gzhag cing dmod 'dor ba'i dus na/ 'gro ba dang 'ong ba dang /g.yo ba ltar snang bas/ 'di ltar mthong ba de bzhin du 'gyur te/ sems can gang dang gang dag gi 'gro ba dang 'ong ba'i sems ji lta ba de bzhin du shes par 'dod na'ang phyag rgya chen por bdag nyid gnas par byas nas/ 'di'i don ji lta ba bzhin du rtogs par gyur cig ces bsams nas/sems rtse gcig pa'i ting nge 'dzin gyi bsam gtan la yun ring du gnas par gyur na/ 'gro ba de dang de dag gi sems ji lta ba de bzhin du shes pa thams cad rig par 'gyur ro zhes pa/ b+ha ga wAn badzra satwa sa gsungs so zhes pa de ltar bstan pa la sogs pa/ dum bu dang po rdo rje dbyings kyi dkyil 'khor chen po'i skabs su gsungs pa'i bsgoms pa las byung ba'i dngos grub rnams gsungs pa ste/rgya cher zhib tu ni rtsa ba'i rgyud chen po de kho na nyid bsdus pa nyid las 'byung bar rig par bya ste/ sgrub thabs kyi skabs 'dir ni/ sgrub par byed pa'i rnal 'byor pa rnams dga' ba skyed pa'i phyir ro//sgrub pa'i rnam pa mang po 'byung ba de rnams las cung zad tsam zhig slob dpon sangs rgyas gsang ba bdag gis 'dir bsdus nas bstan par rig par bya'o/ /de la rtog ge pa gzhan dag na re/ ci rnal 'byor pa rnams dga' bar bya ba ni de bzhin gshegs pa de dang de'i rigs kyi sems dpa' rnams bsgrub par bya ba'i thabs bstan pa de nyid yin la/de dag grub par gyur na rnam pa 'di dag zhar la rang bzhin gyis 'grub par 'gyur bar zad pas 'di dag 'dir 'di ltar bkod nas bstan mi dgos so snyam pa yod na/ de ltar mi blta ste/'gro ba mos pa tha dad pa dag yod pas kha cig 'di lta bu la dad pa yod pa de dag gi don du tshul 'di dag bstan pas de dag gis 'di dag bsgrubs shing nyams su lon par gyur pa dang / de las dpags nas dngos grub gzhan rnams kyang 'grub par 'gyur du rung ngo snyam nas rim gyis 'jug par byed pa dang /gzhan dag rgyud dang sgrub thabs 'dir ni/ de bzhin gshegs pa dang / de bzhin gshegs pa'i rigs 'ba' zhig gi sgrub pa gsungs par zad kyi/ sgrub thabs gzhan ma gsungs pa dang sbyar nas 'dis ni thams cad 'grub pa ma yin no snyam pa rnams kyang don dang / ji ltar phyag rgya chen po'i sgrub pa ni mchog pas de'i zhar la thun mong ba'i sgrub pa gzhan zhar la 'byung bar bstan pa'i phyir na 'dir 'di ltar bstan pa la nyes pa med do/ /de bzhin gshegs pa'i rigs kyi bsgom pa'i dngos grub mdor bsdus pa bshad zin to// //de ltar bsgom pa'i dngos grub sgrub pa'i rim pa bstan nas/da ni bzlas brjod kyi sgo nas dngos grub sgrub cing mnyes par bya ba'i thabs bstan pa'i phyir/ da ni bzlas brjod kyi sbyor ba'i dngos grub rnams bshad par bya ste zhes bya ba la sogs pa gsungs te/ bzlas brjod bya ba'i sbyor bas gang ltar 'dod pa'i dngos grub thob par byed pas na/bzlas brjod kyi sbyor ba'i dngos grub ste/ de bshad par bya'o zhes ston to/ /'dir yang de bzhin gshegs pa'i rigs kyi rdo rje dbyings kyi dkyil 'khor chen po'i skabs su gsungs pa'i zhes pa ni/ sgrub thabs kyi skabs 'dir yang rtsa ba'i rgyud las dkyil 'khor dum bu bzhi so so'i sgrub thabs dang bcas par 'byung ba las de'i nang nas de bzhin gshegs pa'i rigs rdo rje dbyings kyi dkyil 'khor gyi dbang du byas nas sgrub thabs 'dir bsdus la/de las kyang dngos grub rnam pa gnyis bshad mod kyis zhes pa/de'i skabs kyang bsgom pa dang / bzlas pa'i dngos grub rnam pa gnyis 'byung bas bdag gis kyang 'dir de gnyis bstan par bya bar 'os pa ma yin mod kyi/ 'on kyang bzlas brjod kyi skabs su bshad pa'i dngos grub kyi cho ga 'di la/ de las gzhan pa'i rigs rnams kyi/ /zhes pa/rdo rje dbyings su gsungs pa'i rigs de las gzhan pa'i rdo rje rigs la sogs pa lhag ma gsum gyi skyil mo krung la sogs pa dag 'dir bshad pa'i skabs su bab pa ni ma yin na yang 'dir bshad par bya dgos te ci'i phyir zhe na rnal 'byor pa rnams mkhas par bya ba'i phyir ro zhes smos te/rdo rje dbyings kyi skabs su 'dug thabs ma gsungs pa de 'dir bstan nas 'di'i don la 'jug pa rnams mgo ma rmongs pa'i phyir dga' ba skye ba dang / da ltar dang ma 'ongs pa'i rnal 'byor pa gang dag 'di nyams su lon par byed pa dag gis kyang 'di mthong ba tsam gyis rtsa ba'i rgyud chen po las ji skad 'byung ba'i don gyi bye brag de dag rtogs shing sems su chud par bya ba'i phyir 'di ltar bstan to//'dug stangs 'di dag 'dir bshad pa yang skabs su 'bab pa ma yin na yang 'di dag gi don la mkhas par bya ba'i phyir yang 'di ltar bstan to/ /'dug stangs 'di dag dkyil 'khor gyi sgrub thabs 'di'i lha rnams bsgom pa'i tshe na yang 'di ltar bya dgos pa'i phyir na 'dir bstan to//de la gal te gang yang rung ba'i rigs kyi snying po la sogs pa bzlas brjod byed pa la brtson pa zhes pa rigs bzhi po dag las gang yang rung ba'i lha rnams kyi snying po dang /sogs kyi sgras phyag rgya la sogs pa gzhan dag bsdu ste/ rigs so so'i snying bo zhes pa ni/ 'bru gcig po la sogs pa'o/ /phyag rgya zhes pa ni rnam pa bzhis bsdus pa'o/ /sngags zhes pa ni pho'i tshul dang gzugs kyis smras pa'i tshig go/ /rig sngags zhes pa ni mo'i gzugs dang tshul 'dzin pas gsungs pa'i tshig ste/rgyu nyid la sbyar na snying po ni rdo rje dbyings su gsungs pa'i sngags rnams so/ /phyag rgya ni 'jig rten gsum las rnam par rgyal bas gsungs pa'i sngags rnams so/ /sngags ni 'gro ba 'dul bas gsungs pa'i sngags rnams so//rig sngags ni don thams cad grub pas gsungs pa'i sngags rnams te/ /de rnams kyi so so'i bzlas brjod gang byed pa'i gnas skabs su gsungs pa'i dngos grub de dag 'dod pa'i rnal 'byor pa gang yin pa des/ rang gang la mos pa'am/ gang bsgom pa'i rigs dang mthun pa'i lha de'i dam tshig sems dpa'i rnal 'byor du nyid rang byung ba'i ting nge 'dzin mngon du byas te/ji ltar 'dod pa'i rigs gzhan dang rjes su mthun pa'i skyil mo krung la sogs par 'dug pa'i rigs gzhan gyi zhes pa ni/ rigs gsum po dag las so so gang la dad pa'i de'i 'dug stangs dang rjes su mthun par byas la/lus kyi cha lugs dang / ngag gi sngags brjod pa dang / yid kyi sbyor ba ting nge 'dzin gyi khyad par yang gang sgrub par 'dod pa'i de dang mthun par byas la/ sgo gsum gyi sbyor ba des skabs 'dir rang gi rigs su gtogs pa'i lha gang yin pa de'i snying po la sogs pa bzlas brjod bya'o//de la rgyal ba'i rigs kyi snying po la sogs pa rnams kyi 'dug pa'i bye brag gsungs pa zhes pa/ rgyal ba'i rigs zhes pa ni/ de bzhin gshegs pa'i rigs te/ rdo rje dbyings kyi dkyil 'khor du gsungs pa'i lha rnams te/de'i bzlas brjod byed pa'i rnal 'byor pa'i 'dug stangs gsungs pa ni/ ji ltar bris pa'i rjes mthun bar/ /gang yang rung ba'i skyil mo krung / /'dug nas rab tu bsgrubs na ni/ /sems dpa' chen po rab tu 'grub/ /ces gsungs te/ de bzhin gshegs pa'i rigs kyi lha 'di dag gang sgrub ba'i dus na ni/gang yang rung ba'i skyil mo krung du 'dug la/ bsgrubs na yang nyes pa med de/ gang sgrub par 'dod pa'i sems dpa' chen po de'i dngos grub sgrub par 'gyur ro zhes gsungs la/ rnam gcig de bzhin gshegs pa'i rigs la ni sems dpa'i skyil mo krung du 'dug la bya'o zhes rgyud gzhan las gsungs pa/rang gi rkang g.yas rtse mo ni/ /rkang pa g.yon pa'i steng du gzhag/ /'di ni sems dpa'i skyil mo krung / /dngos grub kun la 'os pa yin/ /zhes gsungs pa 'di bya'o/ /de bzhin du rdo rje'i rigs sgrub pa la ni/ji ltar bris pa'i rjes mthun par/ /g.yon brkyang tshul du rab gnas te/ /rab tu khros pas bsgrubs na ni/ /dogs pa med par grub par 'gyur/ /zhes gsungs te/ khro bo rnams ni phal cher brkyang bskum du gnas pa la/ 'dir gsungs pa'i rdo rje'i rigs kyi lha khro bo rnams ni/g.yon brkyang gi tshul du gnas pa ste/ rkang pa ji lta ba bzhin du lag pa yang de phyogs su brkyang nas gnas par bya zhes gleng ba'i tshul de lta bu la bzhin rab tu khro ba dang ldan pa'i tshul du gnas pas bsgrubs na/ the tshom med par 'grub bar 'gyur//zhes gsungs so/ /pad+ma'i rigs zhes pa 'gro ba 'dul ba'i sgrub pa'i dbang du byas pa'i 'dug stangs ni/ rdo rje skyil mo krung 'dug la/ /lag gnyis rdo rje bcings pa ste/ /ting nge 'dzin gyi lus byas nas/ /pad+ma las byung bsgrub par bya/ /zhes bya ba gsungs te/ rkang pa gnyis kyi mthil brla gong du mngon par byung ba lag pa gnyis ting nge 'dzin gyi tshul du bsnol nas/lus drang por bsrang ste/ bzlas pa byas nas pad+ma'i rigs kyi dngos grub bsgrubs na 'grub par 'gyur bar gsungs so/ /rin po che'i rigs zhes pa ni las kyi rigs dang tha mi dad pa'i phyir/don thams cad grub pa'i dkyil 'khor sgrub pa'i dbang du byas pa ni/ langs sam yang na 'dug kyang rung / /'chag gam ji ltar gang yang rung / /rdo rje snying po dbang bsgyur bas/ /'grub par 'gyur ba dogs pa med/ /ces gsungs te/ langs pa dang / 'dug pa dang / 'chag pa dang / nyal ba gang yang rung ste/ rang gi lha'i rnal 'byor du zhugs nas rigs lnga'i dbu rgyan gyis dbu la brgyan par mos pa bskyed nas bzlas ba dang bsgrub pa byas na dogs pa med par 'grub bar 'gyur ro zhes gsungs so/ /'di ni rigs bzhi'i bzlas brjod dang / /zhes pa de ltar bstan pa'i 'dug stangs 'di ni rigs bzhir phye ba'i so so'i lha rnams kyi bzlas brjod dang /rang gang la mos pa bsgom pa la brtson pa'i rnal 'byor ba rnams kyi rang gi rigs kyi lha'i bye brag ji lta ba las lus kyi dbyibs kyi 'dug stangs kyi mtshan nyid so sor phye nas gsal bar bstan pa ste/rigs bzhi cig car gyi lha rnams kyi sbyor ba'i thabs spyir bshad nas bstan pa'o/ /de bzhin du rdo rje dang khro bo dang / 'bar ba dang / byams pa'i lta ba dang / lta ba bzhi'i spyi'i mtshan nyid kyang 'di lta ste/ zhes pa 'dug stangs ji ltar bshad pa de bzhin du/ rdo rje'i lta ba la sogs pa lta stangs bzhi po spyi la bsdus nas/bshad pa'i mtshan nyid kyang 'di lta ste/ de la 'di ni rdo rje'i lta ba'i mtshan nyid do zhes pa gang zhe na/ rdo rje'i lta ba chags pas su/ /rab tu dga' ba gdangs pa'i mig /de yis bud med la bltas na/ /dbang du 'gyur ba nges pa'o/ /zhes gsungs te/rang gi lha gang yin pa'i rnal 'byor du gnas te/ mig rab tu gdangs nas pha rol la 'bru tshugs su lta ba ni rdo rje'i lta ba ste/ sngags badzra dr-iSh+Ti zhes brjod na lha la sogs pa dbang du byed par 'gyur te/ 'dir bud med ces brjod pa'i sgra ni lha la gzung bar rig par bya'o/ /'bar ba'i lta ba ni zhes pa gang zhe na/rab tu myur bar g.yo ba'i mig /mig gi rdzi ma 'dren pa ni/ /'bar ba'i lta ba zhes su gsungs/ /thams cad 'dug pa'o zhes gsungs so/ /rang gi lha'i phyag rgya chen po'i rnal 'byor du gnas la/ 'di ltar mig rab tu g.yo bar sgrub cing rdzi ma bteg bteg por bsnyer nas snying po/badzra dr-i sh+yaM ku shi dzaHzhes brjod pas ni/ lha la sogs pa 'gro ba gang brjid pa kun rang dbang med pas 'gugs par 'gyur ro/ /khro bo'i lta ba ni zhes pa gang zhe na/ khro gnyer bsnyer ba rab tu 'jigs/ /khro bo'i lta ba kun du 'dzums/ /khro bo lta bar mnyam bzhag na//khams gsum dag kyang 'jig par byed/ /ces gsungs te/ rang gi lha'i phyag rgya chen po'i rnal 'byor du gnas la/ gdong khro ba'i bzhin du byas nas mig khro gnyer bsnyer zhing mig gi grwa gnyis zur gsum du 'dzums par byas te/ /khro bo'i lta ba'i snying po dr-iSh+Ti hi zhes brjod na khams gsum po'i snod bcud dam gzhan gyi lugs dang sbyor ba thams cad 'jig par byed do//byams pa'i lta ba ni zhes pa gang zhe na/ ri rab lhun po'i brag chen ltar/ /brtan zhing mi 'dzums pa yi mig /byams pa'i lta ba yin par bshad/ /ces gsungs te/rang gi lha'i phyag rgya chen po'i rnal 'byor du gnas nas rab brtan zhing mi 'dzums pa'i mig ni/ dper na ri rab lhun po'am/ brag chen po ltar brtan par byas nas brtan pa'i snying po dap+tidr-iSh+Ti maT zhes brjod na gdon dang rims la sogs pa sel bar 'gyur ro/ /snying po dang /phyag rgya dang / gsang sngags dang / rig sngags rnams kyi tshig gi bye brag ces pa ni de dag gi don ji lta bu yin pa'i mtshan nyid kyi bye brag so sor bshad pa'o/ /cho ga bzhin du ji ltar bshad pa'i mtshan nyid kyang zhes pa ni/ de dag so so'i gzhung ltar sgrub ba'i thabs ni cho ga ste/ cho ga de'i tshul gyis bzlas brjod bya ba dang / mtshan nyid kyang rnam pa gnyis su shes par bya ste/ de bzhin du gsang sngags yid la brjod pa dang / tshig tu brjod pa rnam pa gnyis so/ /zhes pa ni tshig gi bye brag so sor phye nas bstan pa 'di dag gi brjod thabs ni 'di ltar rnam pa gnyis su shes par bya'o//gang zhe na/ gsang sngags yid la brjod pa dang / tshig tu brjod pa rnam pa gnyis so/ /zhes pa 'di la yang so sor dbye ba yid la brjod pa la yang rnam pa gnyis te/ mtshan ma dang bcas pa dang mtshan ma med pa'o/ /de la 'og nas 'byung ba'i mtshan nyid ting nge 'dzin gyi tshig gi rang bzhin zhes pa ni/dbugs med rab tu phra ba'i tshig /ces bya ba la sogs pa gsungs pa'i mtshan nyid ni mtshan ma dang bcas pa'i bzlas brjod du rig par bya'o/ /de las gzhan pa'i yid la brjod pa'i mtshan nyid ni mtshan nyid rnam par spangs te/ shes rab kyi pha rol tu phyin pa'i rnal 'byor las 'byung ba'i bshad pa las rig par bya'o//tshig tu brjod pa ni rigs bzhi'i bye brag gi tshig bzhis zhes pa tshig tu brjod pa'i bzlas brjod kyang de bzhin gshegs pa'i rigs la sogs pa bzhi yod pa'i bye brag gis de dag gi bzlas pa'i tshig kyang so so'i rnam par phye bas rnam pa bzhi yod par shes par bya ste/rigs bzhi'i bye brag ces pa ni/ de bzhin gshegs pa'i rigs la sogs pa rnam pa bzhi'i bye brag so sor bstan pa'o/ /tshig rnam pa bzhi zhes pa ni rdo rje bzlas pa la sogs pa bzhir bstan pa'o/ /rnam pa bzhi ste zhes pa ni de ltar rigs bzhi dang de'i bzlas pa rnam bzhir phye nas bstan pas na/tshig tu brjod pa la rnam pa bzhi yod do zhes bstan pa ste/ gang zhe na/ de la de bzhin gshegs pa'i rigs kyi ni zhes bya ba la sogs pa gsungs pa ste/ lce'i thog ma cung zad g.yo/ /so dang mchu gnyis sbyar nas su//rtog pa thams cad bsgrub par bya/ /rdo rje'i tshig ni sgra med pa'o/ /zhes pa 'di'i don ni 'di lta ste/ rang gi lha'i phyag rgya chen por gnas par byas nas bzlas brjod kyis mnyes par byed pa'i tshe/ so dang sor sbyar/ mchu dang mchur sbyar/ lce'i rtse mo cung zad tsam 'gul bas sngags kyi sgra mi 'byung bar bzlas par bya ba ni rdo rje tshig ces bya ste/de ni rtog pa thams cad la rigs pa'i man ngag yin pas nges rtog pa thams cad bsgrub par bya'o zhes bstan to/ /rtog pa zhes bya ba'i don gang la shes par bya snyam pa rnams kyi don du/ rtog pa thams cad ces bya ba yang 'dir sangs rgyas dang rdo rje 'dzin la sogs pa rigs thams cad du gtogs pa'i lha'i bye brag la bya ste/zhes bya ba la sogs pa gsungs te/ sangs rgyas zhes pa ni/ rtag pa la sogs pa'i de bzhin gshegs pa rnams so/ /rdo rje 'dzin pa zhes pa ni/ rdo rje sems dpa' la sogs pa de'i rigs kyi ye shes kyi sems dpa' rnams so//rigs thams cad du gtogs pa'i lha'i bye brag ces pa ni/ rigs bzhi zhes brjod pa'i nang du gtogs pa'i lha thams cad kyi bye brag la rtog pa zhes bya ste/ ci'i phyir zhe na/ sems can gyi don grub par byas pa'i phyir zhes te/de bzhin gshegs pa dang / de bzhin gshegs pa'i rigs kyi lha rnams te/ thams cad rnam par spangs shing mi rtog pa chen po'i ngang la bzhugs pa yin gyis kyang / sems can 'khor ba'i dong du bying ba rnams la phan gdags shing / de dag gi bsam pa yongs su rdzogs par bya ba'i phyir/sangs rgyas thams cad kyis rang gi sku gsung thugs kyi rnam pa sngags dang phyag rgya la sogs pa'i tshul du brtags nas bstan cing snang bar mdzad pa'i phyir na rtog pa zhes bya'o/ /de ltar bstan pa'i don 'di yang rgyud nyid las/ de la mi rtog rtog pa'i bdag /rtog pa brtags pa las byung ba/ /rdo rje sems dpa' sems dpa' che/ /de bas rtog pa zhes bya'o/ /zhes gsungs te/ de'i don yang 'di lta ste/ rnam par mi rtog pa ni chos kyi sku'o/ /rtog pa'i bdag ces pa ni de las 'gro ba'i don du gzugs kyi skur bstan pa'o//rtog pas brtags pa ni/ sangs rgyas la sogs pas brtags pa las byung ba'i sngags dang phyag rgyar brtags pa'o/ /de las byung ba ni/ rdo rje sems dpa' sems dpa' che/ /zhes bya ba la sogs pa 'byung ba'o/ /de'i brtags pa las kyang slar sngags dang phyag rgya'i rnam par snang ba ste/mdor na chos kyi sku las ni gzugs kyi skur byung la/ de las sngags dang phyag rgya la sogs pa rnam par bstan pa las kyang rdo rje sems dpa' la sogs pa ye shes kyi sems dpa' rnams su snang la/ de dag gi sku gsung thugs kyi rnam pa yang sngags dang phyag rgya la sogs par byin gyis brlabs shing snang bar mdzad pas kyang /gtan tshigs de lta bas na rtog pa zhes gsungs so zhes bya'o/ /de ltar bstan pa'i gtan tshigs de bas na/ rdo rje sems dpa' nyid de bzhin gshegs pa la sogs pa thams cad kyi rigs kyi lha rnams su gyur nas zhes pa ni/rdo rje sems dpa' byang chub sems kyi ngo bor gnas pa de las kyang de bzhin gshegs pa la sogs pa rigs bzhir brjod pa thams cad kyi lha rnams byung nas/ sems can rnams kyi skal ba ji lta ba bzhin du 'dul ba'i dbang gis de lta bu'i cha lugs dang tshul tha dad pa 'dzin pa lta bur gnas par snang ste/gtan tshigs de lta bas na/ de bzhin gshegs pa thams cad dang / de bzhin gshegs pa'i rigs kyi lha rdo rje sems dpa' la sogs pa ye shes kyi sems dpa' chen po rnams la thams cad la rtog pa zhes bya ba'i sgrar brjod par nges so zhes pa stan to//de la gnas zhes pa ni de lta bu'i tshul du bzhugs zhes bya'o/ /thams cad ces pa ni ma lus pa'i don to/ /de bas na rdo rje'i tshig ni lha thams cad kyi spyi'i yin no zhes bstan to zhes pa de ltar lha thams cad rdo rje sems dpa' byang chub kyi sems de las byung bas na/lha thams cad rdo rje sems dpa' kho na'i rang bzhin yin pa'i phyir na/ rdo rje'i tshig bzlas brjod bya ba dang / lha thams cad kyi spyi thun mong du gyur pa yin no zhes bstan to/ /de'i rigs thams cad kyi spyi rgyud bstan pa las kyang zhes pa ni/ 'di yang gong ma ltar bstan pa 'gal ba med pa'i gtan tshigs kyi don du gsungs pa ste/rigs gcig dang / bzhi dang / lnga dang / bcu bdun dang / nyi shu rtsa gcig dang / brgya la sogs par bstan pa las 'di ltar 'byung ste gang zhe na/ phyag rgya chen por sbyor ba ni/ /rang gi sems dpa'i ting 'dzin gyi/ /rdo rje tshig dang lta ba yi//dngos grub mchog ni myur du thob/ /ces gsungs te/ de'i don yang 'di lta ste/ /phyag rgya chen por sbyor ba ni/ /rang gi dam tshig sems dpa' ting nge 'dzin du gnas pa ste/ phyag rgya chen po'i ting nge 'dzin dang ldan pa'o/ /dngos su rang gi sems dpa'i ting nge 'dzin gyis zhes bya ba 'di lta ste/rang bsgrub cing mos pa'i sems dpa'i ting nge 'dzin du gnas nas rdo rje lta ba dang / rdo rje tshig tu ldan pa'i bzlas brjod byed pa yis/ /dngos grub mchog ces pa gang sgrub par byed pa de ni dngos grub mchog ces bya ste/ de myur du thob par 'gyur ro zhes gsungs so//'dir yang de bzhin gshegs pa'i rigs la tshig gzhan 'dir ma bstan pas zhes pa ni/ rtsa ba'i rgyud de kho na nyid bsdus pa 'dir yang de bzhin gshegs pa'i rigs kyi bzlas brjod kyi tshig gzhan 'di ltar bya'o zhes khyad par du ma bstan pas rdo rje tshig ces brjod pa de dang sbyar la bzlas brjod bya'o zhes bstan to//de las gzhan pa'i rigs rnams la ni/ /zhes pa ni/ rdo rje dang / pad+ma dang / las kyi rigs te rigs lhag ma de gsum la ni/ rdo rje tshig ces bzlas brjod dang 'dir las gzhan pa'i bzlas pa'i tshig bye brag mi mthun par gleng ba 'og nas 'byung ba'i mtshan nyid kyis bzlas brjod bya'o zhes bstan to//de bzhin gshegs pa rnams kyi yang rang gi rigs spyi'i chos dang 'brel cing bye brag tu ma bstan pas zhes pa/ de bzhin gshegs pa rnams kyi bzlas brjod gud du phye nas ma bstan pa yang de bzhin gshegs pa'i lha rnams 'brel pa'i phyir rdo rje tshig kho nas gnyi ga'i bya bar bshad de ci'i phyir zhe na/de gnyis ni tha dad pa ma yin zhing dbyer med pa'i phyir na so sor ma phye zhe'o/ /de bas na de bzhin gshegs pa dang bcas pa'i rigs ni de bzhin gshegs pa'i rigs te zhes pa de dag de las byung ba'i tha dad pa ma yin pa'i gtan tshigs kyis ni/de bzhin gshegs pa dang de las byung ba'i sems dpar bcas pa'i rigs ni/ gnyi ga de bzhin gshegs pa'i rigs zhes bya ste/ ci'i phyir zhe na/ de bzhin gshegs pa dang / de las byung ba'i rigs rnams tha mi dad pas na/ de de bzhin gshegs pa'i rigs zhes bshad par bya ste/'o zhes pa'i sgras gzhan du rnam par dbye bar mi bya'o zhes bstan to/ /de bas rigs zhes bya ba'i sgrar bye brag tu ma phye yang zhes pa/ de bzhin gshegs pa rnams shes bya'i sgrar phye nas ma brjod kyang de bzhin gshegs pa rnams dang / de bzhin gshegs pa'i rigs rnams mi 'brel pa ma yin pas na nye bar gyur pa nyid kyi phyir gcig tu gzung bar bya'o//de ltar na ta thA yang tshig gis bskul pa nyid kyis/ rdo rje tshig dang 'brel zhes pa ni/ de bzhin gshegs pa'i rigs zhes brjod pa ni bskul pa ste/ de skad brjod pa dang / de bzhin gshegs pa'i rigs de las de bzhin gshegs pa yang gzhan ma yin pas na/rdo rje tshig gis bya zhes brjod pa dang 'brel pa'i phyir 'di ltar bstan par byas par 'gyur ro/ /gzhan dag las zhes pa rgyud gzhan dag las de bzhin gshegs pa rnams kyi ldem po ngag gi ting nge 'dzin gyi tshig rdo rje tshig ces 'byung bas de las dpags na bde bar gshegs pa rnams kyi tshig gzhan rnams kyang yod par mngon te/ji ltar zhe na/ ldem po dag ces gsungs pas na/ ldem po dag ma yin pa'i tshig kyang yod par mngon la/ de bzhin gshegs pa las gsung mtha' yas bsam gyis mi khyab pa mnga' ba'i phyir ro//tshul de bzhin du de bzhin gshegs pa'i rigs kyi yang rgyud gzhan las gong du bstan pa'i bye brag de lta bu'i sngags bzlas brjod bya ba'i tshig rjes su mthun pa'i tshig gzhan du bye brag tu phye nas gsungs pa yod de gang zhe na/ rnga ltar zab pa'i sgra 'byin pa//de bzhin gshegs pa'i rigs su bshad/ /ces bya ba dag ste/ de'i don yang 'di lta ste/ ji ltar rnga ni grag pa dang / 'ber che ba dang / gsal ba yin pa dang / 'di'i tshul du bsgom pa'i phyag rgya'i sems dpas kyang lce dang / mchu dang so dang / rkan rnams la sgra grag pa dang /che ba dang / gsal bar bzlas brjod byed pa'i mtshan nyid la ni/ 'di ltar brjod do/ /tshul 'di bzhin du bcom ldan 'das rab tu dga' ba'i bsgom pa gtsor byed pa la yang rgyud gzhan du rdo rje sems dpa'i sngags hU~M zhes bya ba la sogs pa brjod cing bsgom pa'i phyir de'i tshig gi mtshan nyid gsungs pa/sna glu ru ni glu kun gyis/ /gsang ba rab tu dga' ba'i tshig/ /ces bya ba gsungs te/ de'i don yang 'di lta ste/ glu'i gnas sna nas 'byung ba'i tshig brjod pa ni/ rdo rje sems dpa' rab tu dga' bar byed pa'i tshul tshig ste/ thams cad thun mi mong ba dang / phal gyis shes pa dang / rtogs par nus pa'i yul ma yin pas na gsang ba zhes bya'o zhes bstan to/ /de'i gtan tshigs bsnan te gsungs pa/ glu sna 'dren ma la sogs pa/ /glu rnams kyis ni ci dga' bar/ /rdo rje dga' ba'i tshig gis ni/ /glu mkhan dang pos blang bar bya'o//zhes bya ba dag gsungs te/ sna nas 'byung ba'i glu ni sna glu zhes bya ste/ 'dren ma zhes smos pas ni/ ngag nas 'byung ba dang 'dren mar bya ba yang rung bar bshad de/ sogs kyi sgras ni shad pa dang / b+han ga d+ha ra dang / drug ldan la sogs pa'i glu'i rigs rnams bsdu bar bya'o//glu rnams kyis ni ci dga' bar/ /zhes pa ni/ glu'i rnam grangs gang 'dod pa rnams kyis ji ltar dga' ba bzhin du rdo rje sems dpa' mnyes par bya ba'i glu'i tshig gis/ hUM zhes pas mgo drangs la blang bar bya'o/ /glu mkhan dang po zhes pa'i tshig 'di nyid rgyud gzhan dag las ni glu'i tshig ces gong ma dang mi mthun pa'i tha snyad du 'byung ste ci skad ce na/'dren ma la sogs dang po'i rnams/ /blangs nas glu yi tshig ces bsgrags/ /zhes 'byung ste/ 'dren ma la sogs pa'i glu'i rigs ji snyed pa rnams ji lta ba bzhin du blangs na/ de'i mtshan nyid la ni glu'i tshig ces kun du bsgrags she'o//bye brag tu bya na khyad par du yang gnas skabs 'dir phyag na rdo rje'i glu bzlas par bya bar bstan to/ /rdo rje'i rigs las bzlas brjod byed pa rnams kyi bzlas brjod kyi tshig gi mtshan nyid ji ltar yin pa'i khyad par bshad zin to/ /pad+ma'i rigs la ni zhes pa pad+ma'i rigs bzlas brjod bya ba ni/dbugs med rab tu phra ba'i tshig /rab tu yongs su gsal ba ste/ /bzlas brjod thams cad de bzhin 'grub/ /ting 'dzin ye shes las byung ba'o/ /zhes gsungs te/ rgyud gzhan dag las sgra med pa'i ting nge 'dzin gyi tshig ni pad+ma'i rigs kyi yin no zhes bshad pas 'dir yang de bzhin du sbyar ro//ra ta na ku la'i bzlas brjod bya ba ni/ /rab tu gsal ba'i tshig gis ni/ /phyag 'tshal ba la 'dun pa yi/ /cho ga 'di yi bzlas pa ni/ /sgra yi tshig ces kun du grag /ces gsungs te/ de'i don yang 'di lta ste/ bzlas pa'i mgo dang /skabs skabs su phyag 'tshal ba'i yi ge gzhug cing de'i cho ga 'dun pa dang bcas par bya zhing / tshig gsal zhing zur phyin la gzhan gyis mi thos pa tsam du bzlas par ta na ku la'i bzlas pa ste/ 'di la ni sgra'i tshig ces kyang rab tu grag ce'o/ /rdo rje la sogs pa'i rigs kyi bdag po zhes pa ni/de bzhin gshegs pa dag ste/ sogs kyi sgras pad+ma dang / las kyi rigs dang / rigs dag bsdus na rigs bzhir bsdus pa'i de bzhin gshegs pa rnams smos pa yin te/ de dag rang rang gi rigs la dbang byed pas na/ rigs kyi bdag po zhes bya ste/ rdo rje la sogs pa'i rigs kyi bdag po rnams kyi bzlas pa 'dir gsal bar mi smos kyang /de bzhin gshegs pas de bzhin gshegs pa'i rigs dang dbyer med cing gcig tu bsdus pa ltar 'dir yang so so rang gi rigs kyi bzlas brjod kyi tshig nyid kyi nang du rang gi rigs kyi bdag po rnams kyi bzlas brjod kyang 'dus par shes par bya ste/rigs so so dang / rigs kyi bdag po'i lha'i brjod pa'i lha'i bye brag tu phye ba yongs su gzung ba las so so'i bzlas brjod kyi tshig gi bye brag rnams shes par bya ste/ rang gi lha gang yin pa'i rigs de'i tshig gis bzlas brjod bya bar bstan te/ rigs dang bzlas brjod kyi bye brag rnams ji lta ba bzhin du sbyar bar rig par bya'o/ /de ltar rgyud gzhan las grags pa bzhir las zhes pa ni/ de ltar rgyud gzhan las grags pa'i bzlas brjod kyi thabs bzhi gsungs pa/ de las lhag pa'i tshig gi bye brag mang du ston pa rnams kyi de kho na nyid bsdus pa'i tshul 'dir gsungs pa'i rigs bzhi'i tshul du bstan pa'i nang du gtogs shing 'dus te/bzlas pa'i tshig rnam pa bzhi'i grangs su bstan pa'i phyir bzlas brjod kyi thabs des bsgrub pa'i bzlas brjod bya ba yang rnam pa bzhir bshad de ci'i phyir zhe na/ rgyud 'di ni sbyor ba'i rgyud thams cad kyi rtsa bar gyur pa yin pas na/'di las ni rigs bzhi dang / dkyil 'khor bzhi dang / las bzhi la sogs par bstan pas na/ gzhan las de bas mang ba dang / nyung bar byed pa'i cho ga dag 'byung na yang / de dag 'dir bstan pa 'di kho nar 'dus par rig par bya'o/ / 'dir yang khro bo dang phra ba dang sgra'i tshig rnams zhes pa/ khro bo'i bzlas pa dang / pad+ma'i rigs las bzlas pa dang / de ltar bye brag tu byas pa'i sgra'i tshig ni sgra'i tshig rnams te/ 'di ltar bstan pa'i sgra'i tshig 'di rnams kyis ni/ rdo rje'i rigs dang / rin po che dang / pad+ma'i rigs la sbyar nas bzlas brjod byas na/gang bsgrub pa de myur du 'grub par 'gyur bar 'dir khyad par du bkod de bkod ces pa ni/ rim par phye nas gsal bar bstan pa'i tha tshig go/ /rdo rje'i tshig ni rigs rnams gang la sbyar na yang thun mong bas nyes pa med do/ /ci'i phyir zhe na/de yon tan khyad par med de mtshungs par thob pa'i phyir ro/ /rdo rje'i bzlas pa de bas kyang yid kyi bzlas pa lhag par ram/ rab tu rigs kun dang thun mong pa ste/ ci'i phyir zhe na/ 'di'i bzlas pa'i thabs zhes rigs gar gtogs pa'i khyad par ma bshad pa'i phyir ro/ / de bzhin du yang tshul gzhan las zhes pa/ don de ltar gsungs pa de bzhin du rnam par snang mdzad mngon par byang chub pa'i rgyud las kyang / yid kyis su ni bzlas pa byas/ /gal te yang na shu bur bzlas/ /zhes gsungs te/ rgyud 'di las ni bzlas pa rnam pa gnyis su bstan te/yid kyis bzlas pa dang / shu bur bzlas pa gnyis bstan pas rigs thams cad la sbyar bar gsungs so/ /spyir bshad ces pa ni/ rigs kun gyi thun mong du bshad ces pa'i don to/ /de yang mtshan nyid 'dir ma gsungs kyang zhes pa ni/ phyag rgya bzhi dang ldan par bsgoms nas/so so'i snying po rnams yid kyis bzlas pas dngos grub thob par 'gyur bar de ltar bya zhing rnam par snang mdzad mngon par byang chub pa'i rgyud 'dir ma gsungs kyang / rgyud gzhan las gsal bar 'byung bas/ don gyis tshul de bzhin du bya bar rig par bya'o/ / gang gi phyir zhes pa dgos pa gang gi phyir phyag rgya chen po gsal bar bsgom pa de'i tshe/ ji skad du zhes pa ni/ ji skad du rgyud las gsungs pa'i rdo rje bzlas pa la sogs pa'i thabs kyi tshig bstan pa'i bye brag rnams kyis lha gang bsgom pa'i so so'i rang gi snying po rnams brjod par bya ba zhes bstan pa'i zhor gyis/rgyud las ji skad du gsungs pa'i sngags kyi tshig de dag la gu gu dang zhabs skyed dang / tshig drag dang / dbyug pa dang / na ro dang / ring thung la sogs pa yang gsal zhing zur phyin pa dang / de la zhen pa'i ni gcig kho nar gnas par bsgom par bya'o/ /gzhan du mi g.yeng bar bya ste/de ltar gnas pa de'i sems la ni de las gzhan pa mi mthun pa'i dngos po gzhan dag cung zad tsam yang 'byung bar mi 'gyur na rags par gyur pa dag rab tu gsal bar lta ga la 'gyur te mi 'gyur ro zhes dgongs so zhes bshad do/ /rgol ba pa na re/ ci'i phyir rigs so so'i bzlas brjod bya ba'i thabs rnams bye brag tu phye nas smos she na/gang yang rigs kyi bye brag las/ tshig gi mtshan nyid rnam pa bzhir phye nas gsungs pa 'di ni dngos grub sgrub pas bzlas par bya ba'i skabs su gces par gtsor bstan par rig par bya'o/ /gang gi tshe rnal 'byor gyi tshul gzhan las gsungs pa'i mtshan nyid ces pa/gang gi tshe rgyud gzhan du gsungs pa'i ting nge 'dzin gyi tshig ces 'byung ba de 'dir gsungs pa'i rdo rje tshig yin no zhes de gnyis tha mi dad par sbyar na/ de ltar sbyar ba de'i tshe de bzhin gshegs pa rnams kyi yid kyi bzlas brjod du bshad par rig par bya'o//ji ltar de bzhin du sbyar zhe na/ sems mnyam par gzhag pa'i ting nge 'dzin gyi tshig ni/ nang gi brjod pa nyid du rnal 'byor la mkhas pa'i slob dpon rnams 'chad do zhe'o/ /de bas na A tsar+yas kyang / /rgyal ba rnams kyi yid kyis bshad/ / tshig tu de yi rigs la sogs/ /rdo rje khro bo sgra chung ba'i/ /tshig rnams kyis ni phal cher bzlas/ /zhes bya ba gsungs te/ des ni bsdus nas tshigs su bcad par bstan pa'o/ /de'i don yang 'di lta ste/ rgyal ba'i rigs rnams ni ting nge 'dzin gyi bzlas par bya/ de bzhin gshegs pa'i rigs kyi ni rdo rje tshig gis bzlas par bya ste/thabs de gnyis tha dad pa ma yin par 'dod do/ /rdo rje'i rigs rnams la ni sgra grag pa tsam du bzlas/ rigs phal rnams la ni nyan na rna bas thos pa tsam du bzlas te/ 'di ltar bstan pa yang gong du rgyas par smos pa rnams mdor bsdus te/bstan pa'i tshig tu rig par bya'o/ /rnal 'byor pa rnams kyi tshig gi yul gyi bye brag ces pa ni/ tshig gi don gang la dmigs pa de nyid tshig gi yul te/ de'i bye brag ni mi mthun par ston pa dag gsal bar byed pa'o/ /de bas na rnal 'byor pa rnams kyi tshig gi yul gyi bye brag rnams zhes bya ste/bshad zin to zhes pa ni/ go bar byas zin pa'i don to/ /de ltar lus kyi 'dug stangs ji ltar bya ba dang / tshig gi bzlas pa ji ltar bya ba'i thabs bshad nas/ da ni yid kyi bsam pa ji ltar bya ba'i thabs dang mtshan nyid bstan pa'i phyir na/yid kyi bye brag kyang re zhig de bzhin gshegs pa rnams kyi ni zhes bya ba la sogs pa gsungs te/ gang zhe na/ 'dod pa la sogs bde ba kun/ /rtag tu bdag gi snying la gnas/ /e ma'o sems can don zhes pa/ /gang phyir chags dang bral ba'ang chags/ /zhes bya ba dag ste/ de'i don yang 'di lta ste/ 'dod pa zhes bya ba ni/ don du gnyer zhing thob par bya ba'i yul yin te/ bcom ldan 'das rdo rje sems dpa' la sogs pa rnams te/ de ni sim pa dang bde ba kun gyi ngo bor gyur pa yin pas so/ /de lta bu de dag gang las btsal bar bya ba yin zhe na/ rtag tu rang gi snying la gnas//zhes gsungs te/ de ni don dam pa byang chub sems kyi rang bzhin kun rdzob thugs rje chen po 'byung ba'i rgyu thugs ye shes chen po'i bdag nyid ting nge 'dzin gyi ngo bo bas na/ rang gi snying la gnas zhes gsungs so/ /de'i yon tan gyi rnam pa ji lta bu zhe na/ e ma'o sems can don zhes pa/ /gang phyir chags dang bral ba'ang chags/ /zhes gsungs te/ sems can thams cad kyi don mthar phyin par mdzad cing / kun gyi dam par gyur pa dang / khams gsum pa'i 'dod chags thams cad dang bral na'ang sems can thams cad bde bar bya ba'i phyir de'i don la thugs brtse bas chags par mdzad pa ste/de lta bu'o zhes bstan to/ /rgyal ba'i rigs la ni/ 'dod pa gcom ldan rtag pa ste/ /sems can kun la bde ba stsol/ /rdo rje sems dpa' nyid bdag ces/ /bsgoms na grub pa nyid du 'gyur/ /zhes bya ba dag ste/de'i don yang 'di lta ste/ 'dod pa byang chub kyi sems ni bcom pa dang ldan pa'i don dang 'grogs pa yang yin la/ thog ma dang tha ma med pa'i bar du chos nyid phyin ci ma log pa las gzhan du mi 'gyur bas na rtag pa zhes bya'o/ /de'i yon tan ji lta bu zhe na/ sems can kun la bde ba stsol/ /zhes bya ste/ sdug bsngal thams cad sel bar byed/ /ces pa'i yon tan dang ldan pa'o/ /dngos gang zhe na/ rdo rje sems dpa' bdag nyid ces/ /zhes bya ste/ bdag nyid chen po rdo rje sems dpa' ste/ de dang bdag nyid kyang tha mi dad pa'i tshul du 'brel bar bstan to//ji ltar tha mi dad cing 'brel ce na/ bsgoms na grub pa nyid du 'gyur/ /zhes gsungs pas na/ de'i phyir 'brel cing tha mi dad par rig par bya'o/ /rdo rje'i rigs la ni/ sems can kun la phan don phyir/ /gdug pa rnams ni gzhig phyir dang / / sangs rgyas bstan pa bsrung ba'i phyir/ /khro bo grub par byed pa'i mchog /ces bya ba dag ste/ de'i don yang 'di lta ste/ khro bor snang bar mdzad pa yang sems can zhi bas mi 'dul ba'i rigs rnams la/ khro bo'i cha lugs kyis phan gdags pa dang / gdug pa can gyi tshogs rnams kyi sbyor ba gzhig cing tshar bcad pa dang /de bzhin gshegs pa'i bstan pa yun ring du gnas par bya ba'i phyir khro bor snang bar byed pa ste/ de lta na khro bo grub pa ni/ grub pa dang / grub par byed pa thams cad kyi nang na mchog go zhes gsungs pa'o/ /pad+ma'i rigs la ni/ pad+ma 'dam gyi nyes pa yis//ma gos rab tu chags dang ldan/ /de bzhin gnas kyi nyes pas bdag /srid la chags pas 'grub par 'gyur/ /zhes bya ba dag ste de'i don yang 'di lta ste/ ji ltar pad+ma 'dam nas skyes kyang 'dam gyi nyes pas ma gos la/ 'dam na gnas pa ltar yang snang ba de bzhin du de bzhin gshegs pa 'khor bar 'khrungs pa'i tshul bstan na yang 'khor ba'i nyes pas kyang ma gos la/'khor ba la gnas shing chags pa lta bu'i tshul gyis don mdzad par bstan pa ste/ gang su yang rung ba dag gis kyang tshul de bzhin du byas na 'grub par 'gyur ro zhes bstan to//nor bu'i rigs la ni nam zhig sems can thams cad kyi dgos pa'i don kun bsgrub pa'i phyir/ de bzhin rin chen char 'bab ces/ /legs par bsgoms na 'grub par 'gyur/ /zhes bya ba dag ste/ de'i don yang 'di lta ste/ sems can thams cad kyi don du dgos pa bsgrub pa'i phyir legs par bsgoms na ji ltar 'dod pa de bzhin du rin po che'i char 'bab par byed nus pa ltar/'gro ba gang dag gi don du ting nge 'dzin la mnyam par bzhag na/ yon tan rin po che'i tshogs kyis gzhan la phan 'dogs par nus pa'i ting nge 'dzin grub par 'gyur te/gang zhig gis bsgrubs na'ang de bzhin du 'grub par 'gyur ba'o zhes bstan to/ /rigs bzhi'i lha rnams kyi bzlas brjod byed pa'i tshe zhes bya ba ni/ rigs bzhi'i bstan pa de dag gis bzlas brjod kyi bye brag so sor gsungs pa de dag de bzhin du byed pa'i dus na rnal 'byor pas ting nge 'dzin du bya ba ni bsam pa ste bshad zin to//rdo rje la sogs pa'i rigs zhes pa ni/ rdo rje dang rin po che dang / pad+ma dang las kyi rigs su bzlas brjod rnam pa bzhi'o/ /de'i rigs kyi bdag po rnams kyi ni phal cher bzlas brjod kyi tshig gi bye brag ji ltar bstan pa bzhin du/rang gi dam tshig sems dpa'i lus dang ngag dang / yid kyang gang bsgoms pa de'i lus dang / ngag dang / yid kyi tshul ji lta ba bzhin du dbyer med par bsgoms la bzlas brjod bya'o/ /rigs thams cad ces pa ni/ rigs kyi rnam pa ma lus par brjod pa'o/ / rab tu dbye ba bsdus pa zhes pa ni/ rigs thams cad kyi sgo gsum spyod pa'i bya ba'i bye brag so sor gsal bar bya ba rnams gcig tu de ltar rigs bzhi po rnams kyi bzlas brjod byed pa'i tshe sngags kyis ji ltar yid la bsam par bya ba'i khyad par bstan nas/ da ni rigs bzhi bo rnams kyi snying po la sogs pa bzlas brjod bya ba'i thabs bstan pa'i phyir na/de bzhin gshegs pa la sogs pa rigs bzhi rang gi lha dam tshig sems dpa'i rnal 'byor pas zhes bya ba la sogs pa gsungs te/ de la de bzhin gshegs pa rigs bzhi'i zhes pa ni/ rdo rje dang pad+ma dang / las kyi rigs so//rang gi lha'i dam tshig sems dpa' zhes pa ni rigs bzhi las gang la mos pa'i lha dang gnyis su med par bsgom pa'i rnal 'byor la gnas pa'o/ /bzlas brjod dang bsgom pa'i rjes su mthun pa'i zhes pa ni/ gang la bsgom pa dang bzlas par 'dod pa'i lha de dang mthun par gnas par bya ba'o//lus dang ngag dang yid kyi sbyor ba la mkhas pa zhes pa ni gang bsgom zhing bzlas pa'i lha'i lus kyi cha lugs dang lta ba'i bye brag dang / bzlas pa rnam pa bzhi las gang yang rung ba'i ngag gi sbyor ba dang / gang la mos pa bzhin du sgrub pa'i ting nge 'dzin dang ldan pa'i yid kyi sbyor ba de lta bu la mkhas pa'o//so so'i snying po dang phyag rgya dang gsang sngags dang / rig sngags rnams las zhes pa ni rigs bzhi po dag gi spyi'i dbang du gsungs pa dang / khyad par gyi dbang du gsungs pa'i snying po la sogs pa rnams so/ /ji lta ba bzhin du gang yang rung ba'i zhes pa de dag tshang ba dang gcig kho na yang rung ba'i don ji lta ba bzhin du bzlas pa'o//bzlas brjod kyi skabs su gsungs pa'i dngos grub 'dod pas zhes pa ni/ de kho na nyid bsdus par bzlas brjod bya ba las dngos grub 'dod pa'i skabs su gsungs pa de 'thob par 'dod pa'o//snying po la sogs pa gang yang rung ba cig bzlas so/ /zhes pa ni/ snying po la sogs pa bzhi las gang la mos pa cig bzlas brjod bya'o/ /rigs bzhi'i gsungs pa'i zhes pa ni rdo rje sems dpa' la sogs pa ste/ so so'i lha'i snying po rnams la zhi ba dang /rgyas pa dang / dbang dang / drag po gang yang rung ba'i las byed par 'dod pa'am/ rnam gcig las ni dngos grub la bya ste/ rigs bzhi so so'i dngos grub sgrub par 'dod pa'i rnal 'byor pas ji ltar sgrub pa rang gi lha dang / bdag dang mi gnyis par gyur pa'i dam tshig sems dpa'i gzugs ji ltar bsgrub pa'i cha lugs gsal bar bsgom par bya'o//khyad par du ni rigs ji lta bu'i gzugs rnams bsgrub pa'i nang na zhes pa khyad par du bya na rigs gang bsgom pa'i lha'i cha lugs su bdag bsgom par bya ste/ de'i nang nas kyang de bzhin gshegs pa'i rigs kyi ni/ lha'i gzugs ji ltar bsams pa ste/ dam tshig gi phyag rgya dang / chos kyi phyag rgya dang las kyi phyag rgya dang / phyag rgya chen po bzhi char dang yang ldan pa'i gzugs mngon du bya'o/ /rdo rje'i rigs la ni zhes pa 'di yang ye shes dbab pa la sogs pa'i rim gyis phyag rgya chen po bzhi dang ldan par bya ba yang yin mod kyi/de'i nang na dam tshig gi phyag rgya kho na lag na 'dzin par bsgom mo/ /pad+ma'i rigs las byung ba zhes pa ni 'di yang phyag rgya bzhi dang ldan pa'i nang nas snying gar rang gi chos kyi phyag rgya gzhag par bya'o//rin chen 'byung gnas las byung ba la zhes pa la ni/ rin po che dang las kyi rigs gcig tu bsdus pa la ni/ phyag rgya bzhi dang ldan pa'i nang nas khyad par du rang gi las kyi phyag rgya dang ldan pa gtsor byas la bsgom par bya'o/ /mdun du yang de lta bu nyid ji skad gsungs pa'i zhes pa mdun du yang rang nyid ji lta bur bsgom pa'i cha lugs de lta bu 'dzin pa'i lha ji skad du gsungs pa'i gdan la bzhugs shing sngar gsungs pa'i kha dog gi rnam pa dang /dbyibs kyi bye brag gsal bar yun ring du gnas shing bltar snang la/ gang bsgom pa'i rigs dang rjes su mthun par bltas pa tsam gyis ngoms par nus par bsam mo//de ltar yang cis mngon zhe na/ bde bar gshegs pa'i snying po bzlas brjod byed pa'i skabs su gsungs pa/ phyag rgya chen por byas nas ni/ /de bzhin gshegs pa rjes dran zhing / /bsgrubs na myur du 'grub pa ni/ /sangs rgyas byang chub brtan pa yang //zhes bya ba gsungs te/ de'i don yang 'di lta ste/ ye shes dbab pa la sogs pa'i rim gyis phyag rgya chen po gsal bar bskyed nas/ de ji lta ba'i rang gi lha rjes su dran par byas nas bsgrubs na bdud bzhi bcom zhing gzhan gyis mi bskyod pas brtan par gyur pa'i sangs rgyas dang byang chub sems dpa' rnams kyang myur du 'grub par 'gyur na/de las gzhan pa'i dngos grub rnams lta ci smos zhes bstan pa yin no/ /de bzhin gshegs pa'i rigs la yang / rdo rje sems dpa' phyag rgya che/ /bcings nas yongs su bsgom par bya/ /mdun du rdo rje sems dpa' bsgom//dngos grub nyis 'gyur nyid du 'gyur/ /zhes gsungs te/ de'i don yang snga ma dang 'dra bar rig par bya'o/ /dngos grub nyis 'gyur zhes pa ni/ /'jig rten pa'i dngos grub las khyad par gyur pa'o/ /de bzhin du/ dam tshig mchog ni bcings nas su/ / zhes pa ni/ bdag phyag rgya chen por bsgoms pa'i lag na rang gi dam tshig gi phyag rgya thogs pa'o/ /rdo rje sems dpa'i ting nge 'dzin/ /zhes pa ni/ rang nyid dam tshig sems dpa'i cha lugs gsal bar bsgom pa'o/ /rdo rje sems dpa' bsgoms nas ni/ /zhes pa ni de ji lta ba bzhin du mdun du yang bsgom par bya'o//dngos grub nyis 'gyur zhes pa ni/ /sngar bstan par rig par bya'o/ /chos kyi phyag rgya bcings nas su/ /zhes pa ni/ phyag rgya chen por bsgoms pa'i snying gar chos kyi yi ge gzhag pa'o/ /'jig rten dbang phyug ting 'dzin gyis/ /zhes pa ni 'jig rten dbang phyug ni spyan ras gzigs kyi dbang po ste/de'i ting nge 'dzin du bsgyur la bsgom pa'o/ /'jig rten mgon yang bsgoms nas ni/ /zhes pa ni/ bsgom pa ji lta ba bzhin du mdun du yang bsam par bya'o/ /las kyi phyag rgya mnyam gzhag ces pa phyag rgya chen por bsgoms nas las kyi phyag rgya bcings pa'o//rdo rje snying po bsgoms nas ni/ /zhes pa ni/ bsgom pa ji lta ba bzhin du mdun du yang bsam par bya'o/ /de nas de bzhin gshegs pa rnams kyi thugs la dngos po grub par shog ces bsngags nas zhes pa ni de ltar rigs bzhi gang bsgom pa'i ting nge 'dzin gsal bar bsgoms te/phyag rgya chen po bzhi dang ldan pa la khyad par du bstan pa'i phyag rgya rnams dang ldan par byas nas/ rang gi bsgom pa ji lta ba bzhin gyi cha lugs dang ldan pa mdun du bsams te/ smon lam gdab par bya'o/ /de la spyod lam yang rnam pa gnyis te/'phags pa thams cad mnyes par bya ba dang / sems can thams cad kyi don bya ba ste/ de grub par gyur cig ces smon lam gdab par bya'o/ /sngar bshad pa'i rigs kyi rjes su mthun pa zhes pa ni/ sngar bshad pa'i rigs bzhi po de dag gang ltar mos pa bzhin du rigs kyi rjes su mthun pa'i cha lugs yid la bsam pa rjes su dran par bya ste/sngar gsungs pa ltar dbugs slar bsdu ba'i tshul gyis dbang po'i tshogs mtha' dag yin par mi gtong ste/ nang phyogs par byas la rgyud dam 'di nyid du/ ji skad gsungs pa'i rigs dang rjes su mthun pa rang gi lha'i snying po bzlas brjod bya ba'i don bdag nyid kyi blo la gsal bar bsgom zhing /de bzhin gshegs pa la sogs pa rigs bzhir brjod pa'i lha gang yang rung ba las gang 'dod pa'i rigs kyi lha'i snying po bzlas brjod bya'o/ /yang na zhes pa bzlas brjod kyi rnam pa gzhan du ston pa ste/dran pa dang srog gi rjes su 'brangs pa'i yid ces pa ni dran pa dang dbugs slar rgyu ba'i dus na/ de'i rjes su 'brang ba'i yid kyi rang gi mdun na gnas pa'i lha la rigs mthun pa'i lta bas blta zhing dbugs phyir 'byung ba'i tshe sngags kyi mgo gdon cing dbugs 'byung ba'i mtha' bar du bzlas brjod bya'o//de nas yang dbugs slar bsdu ba'i tshul gyis sngags kyi mjug bsdu zhing / yid nang du phyogs par byas nas/ srog dang dbang po bsdu bar bkag ste/ bdag nyid dang mi gnyis par bsgoms pa'i lha la dmigs te/rang gi lha'i snying po bzlas brjod bya'o/ yang na tshul 'dis rang gi lha la brtag cing dbugs 'byin pa dang / rngub pa nyid kyi tshul gyis bzlas brjod bya'o/ /de'i don kyang zhes pa ni de ltar lha mdun du bsams la bzlas brjod bya bar bstan pa'i don kyang rang bzor byas pa ma yin te/mdo las 'byung ngo zhes gtan tshigs bstan pa'o/ /rigs so sor nges pa'i ngag dang zhes pa ni rigs gang bsgrub pa'i bzlas brjod do/ /yid dang zhes bya ba ni de'i ting nge 'dzin bya'o/ /lta ba zhes pa ni rnam pa bzhi las gang rigs pa dang sbyar nas lta ba'o/ /phyogs 'dir zhes pa gong ma ltar bstan pa las phyogs 'dir bshad pa ni rang gi las kyi phyag rgya dang zhes bya ba dag go//bzlas brjod kyi sbyor ba 'di gnyi ga la yang zhes pa/ mdun du lha bsam pa dang / mi bsam par bzlas brjod bya ba'i thabs bstan pa gnyis las zhes bya'o/ /bdud ni bye ba ston rnams dang //zhes pa ni bar du gcod pa'i bdud kyi grangs so/ /rab tu dga' bas myur du 'joms/ /zhes pa ni/ bzlas brjod dang ldan pa'i stabs kyi rang bzhin gyis 'jig par byed ces pa'o/ /lha dang gzugs dang rnal 'byor dag /ces pa ni/ lta ba rnam pa bzhi dang /so so'i gzugs kyi cha lugs su ldan par byas pa'i rnal 'byor ma btang bar gyur na dus myur du 'grub par 'gyur ro zhes gsungs so/ /rim pa 'dis kyang nyin re bzhin lha'i rnal 'byor gtsor byas la/ nyin gsum dang mtshan gyi gung ste dus bzhir grangs brgya rtsa brgyad du bzlas brjod bya'o zhes gsungs so//bgrang phreng gi cho ga yang rgyud 'di las ma gsungs pas zhes pa ni/ de ltar bzlas brjod byed pa yang grangs bgrang phreng la gzung ba yin mod kyi/ 'on kyang rtsa ba'i rgyud 'di las ni bgrang phreng ma gsungs pas grangs ci tsam du bzlas brjod byed pa de yid kyis mi nor bar bgrang ba'i grangs gzung bar bya'o zhes bstan to//yang na rdo rje rtse mo las gsungs pa'i cho gas bgrang phreng blangs te/ bzlas brjod kyi rnal 'byor bya'o zhes pa ni de kho na nyid bsdus pa las ma gsungs kyang / rdo rje rtse mo'i rgyud las gsungs pas des bya bar bstan to//sangs rgyas rnams kyi mdzub mos bgrang / /zhes pa ni/ sangs rgyas rnams kyi bzlas brjod byed na ni/ mdzub mo'i steng du bgrang phreng bzhag la drang bar bya'o/ /sangs rgyas rnal 'byor bo de tse/ /zhes pa ni/ rigs gang ni bgrang phreng gang yin pa bstan pa ste/sangs rgyas rnal 'byor du byed pa rnams kyi bgrang phreng gi rigs ni bo de co la bya'o zhes pa bya'o/ /yang na kun gyi gtso bo ni/ /zhes pa ni/ rigs bzhi kun gyi spyi ni bo de tse ste/ srog dang 'dra bar bshad do/ /zhes so/ /lcags kyi bzlas brjod nyis 'gyur ro/ /zhes pa ni/ bgrang phreng med par bzlas pa las bgrang phreng 'di dag bcangs na yon tan 'di lta bu 'phel bar 'gyur te/lcags kyi bgrang phreng 'dzin pas bzlas na ni/ bgrang phreng med par bzlas pa bas nyis 'gyur du bsod nams che bar 'gyur te phyi ma yang de bzhin du rig par bya'o/ /lag pa g.yon pa phyag rgyar byas//zhes pa ni bgrang phreng 'dzin pa'i phyag rgya ste/ lag pa g.yas pa rdo rje khu tshur byas pa las bgrang phreng gzung gsungs so/ /gsang ba'i phyag rgya/ khu tshur g.yon pa las 'byung ba/ /zhes pa 'di ni gzhan la mi bstan cing sba bar bya ba yin na gsang ba zhes bya'o/ /de la de kho na nyid bsdus pa'i rgyud las ni/lag pa g.yon pa'i khu tshur la gsang ba'i phyag rgya zhes brjod do/ /spyod lam rnam bzhir gsang ba'i phyag rgya 'dzin par bya zhes bstan to/ /phyi ma yang de bzhin du so so'i tshul du rig par bya'o/ /'dir g.yogs te zhes pa ni/gzhan la mi bstan pa la bya ba yin par rig par bya'o/ /rigs bzhir gsungs pa'i snying po rnams bzlas brjod byed pa'i rnal 'byor gyi cho ga bshad pa bkral zin to// //phyag rgya dang gsang sngags dang rig sngags zhes pa ni/ rigs lhag ma gsum la sbyar bar bya'o//de'i bzlas brjod bya ba'i rnal 'byor gyi cho ga yang 'di nyid ces pa ni 'og nas 'byung ba la 'di nyid de snying po'i bzlas brjod kyi cho ga sbyor ba las khyad par du zhes pa snying po'i bzlas brjod bya ba sngar bstan pa las khyad par du bya ba ni 'di lta ste/ dang por phyag rgya thams cad bdag la dgyes par gyur cig ces smon lam btab nas de nas gdod rang gi lha bsgom pa'i dam tshig gi phyag rgya gang yin pa bcings te/rig sngags la sogs pa'i bzlas brjod kyi cho ga bya'o/ /de ltar yang ji skad du/ rgyud phyi ma'i yang phyi ma las phyag rgya thams cad bdag la dgyes par gyur cig ces smras te zhes bya ba la sogs pa gsungs pa yin no//de bzhin du gsang sngags dang rig sngags gnyis kyi bzlas brjod la ni/ zhes pa gsang sngags dang rig sngags bzlas brjod byed par 'dod pa'i cho ga la ni khyad par du spros pa ni med pa'i tshig grub par gyur cig de bzhin gshegs pa thams cad kyi dngos grub bdag gis thob par gyur cig ces dang por smras nas gdod bzlas par bya'o//rang gi bag chags kyis lha'i gzugs la dmigs nas zhes pa/ dus dang rnam pa kun du spyod lam rnam pa bzhi lha'i ting nge 'dzin goms par bya ba ni bag chags te de lta bu'i tshul gyis lha'i gzugs la dmigs nas lha dang tha mi dad pa'i bya ba'i thabs te/de kho na nyid bsdus pa las gsungs pa'i bzlas brjod bye brag 'dir/ so sor phye nas gsal bar bshad pa'o/ /da ni rigs bzhi'i bzlas brjod bstan pa de las bzlas brjod kyi tshul gzhan yang bstan pa'i phyir na/rnal 'byor gyi rgyud thams cad kyi lhag mar gyur pa rdo rje rtse mo'i rgyud las ni zhes bya ba la sogs pa gsungs te/ rnal 'byor gyi rgyud ces pa ni/ rnal 'byor gyi don dang gang ldan pa'i rgyud ni rnal 'byor gyi rgyud de lhag mar gyur pa zhes pa ni phyi mar gyur pa ste gzhan ni mi gsal ba gsal bar byed pa'i don ston pa dang /gzhan nas brda ma phrad pa gsal bar byed pa dang / gzhan du ma 'dus pa'i don gzhan ston par byed pas na/ lhag ma'am phyi ma zhes bya ste/ de yang rang gi lhag ma ni rang gi rgyud kyi mjug nas ston pa yin la/spyi'i lhag ma ni rdo rje rtse mo'i rgyud 'di'o/ /de las ni rigs bzhi'i bzlas pa la mi gtogs pa'i bzlas pa'i thabs gzhan pa'i bye brag kyang bshad de ci'i phyir zhe na/ 'dul ba'i skye ba'i mos pa la gzigs nas gsungs so//de yang 'dir de la mos pa'i skye bo rnams zhes pa de ltar bstan pa ni/ de ltar rigs bzhi'i bzlas pa las gzhan pa'i bzlas brjod la mos pa'i skye bo rnams rdo rje rtse mor bstan pa'i tshul 'dis sam/ yang na rgyud 'dir bsdus pa'i phyir bstan to/ /de la rigs bzhi'i bdag po rnams kyi ni zhes pa de ltar bstan pa de la yang rigs bzhi'i bdag po rnams kyi bzlas pa byed par 'dod na ni rigs bzhi so so'i gtso bo'i skur bsgyur ba'i rnal 'byor gyis bya bar bshad do//de las gzhan pa'i dam tshig gi sems dpa' chen po rnams kyi ni zhes pa/ sems dpa' chen po bcu drug po rnams kyi bzlas brjod bya bar 'dod na ni/dpal rdo rje sems dpa' la sogs pa rang gi rigs kyi 'khor los sgyur ba gang 'dod pa rigs kyi bdag po'i skur bsgyur ba'i rnal 'byor gyis rigs so so'i sems dpa'i gang bzla bar 'dod pa'i sems dpa' rnams kyi sngags bzlas par bya ba bstan te/gang gi phyir de las ni zhes pa/ gang gi phyir rdo rje rtse mo'i rgyud las ni de bzhin gshegs pa'i rigs la bzlas brjod byed pa'i sbyor ba ni/ zhes bya ba la sogs pa gsungs pa'o/ /de bzhin gshegs pa'i rigs bzang la/ /zhes pa de bzhin gshegs pa'i rigs ni nyes pa thams cad dang bral ba'o//bzlas brjod bya ba'i mchog yin te/ /zhes pa ni/ de'i bzlas brjod bya ba ni/ bzlas brjod thams cad kyi nang na gong na med par bstan pa'o/ /bkra shis skyil mo krung bcas te/ /zhes pa ni/ 'dug thabs bstan pa'o/ /sangs rgyas dmigs pa'i sems kyis su/ /zhes pa ni sangs rgyas rnal 'byor du bya ba'i ting nge 'dzin bskyed par bya ba'o/ /bdag nyid bsam pa shes rab can/ /zhes pa/ bsgom pa'i shes rab la gnas pa de ltar bya ba ste gang zhe na/ kun mkhyen sangs rgyas rtag tu bdag /ces te/ thams cad mkhyen pa'i sangs rgyas rtag tu bdag gi lus la bsams nas tha mi dad par bya zhes pa'o/ /gtsug tor la sogs rang gi mtshan/ /zhes pa ni cha lugs bstan pa ste/ dbu'i gtsug tor bltar mi mthong ba la sogs pa mtshan bzang po sum cu rtsa gnyis dang ldan par dmigs pa'o//sangs rgyas snying por bdag 'dug ste/ /zhes pa ni/ byang chub kyi ngo bo la gnas par brtag pa'o/ /sangs rgyas bdag go zhes bsam pa/ /zhes pa ni sangs rgyas bdag go zhes nga rgyal bskyed pa ste/ de'i don ni 'di lta ste/ bdag nyid bkra shis kyi skyil mo krung du 'dug ste/bsam pa'i shes rab la gnas nas bdag nyid sangs rgyas kyi skur dmigs pa'i sems bskyed la/ rtag tu bdag rang gi lus thams cad mkhyen pa'i sangs rgyas yin par bsams nas mtshan dang dpe byad kyis brgyan cing de bzhin gshegs pa'i thugs dang bdag gi sems dbyer med par nga rgyal bskyed la bzlas brjod bya ba ni bzlas pa thams cad kyi nang na mchog go zhes bstan pa'o//gar mkhan 'khor lo byed pa ni/ /zhes pa ni/ phrin las kyi dpe ste/ rgyu rkyen tshogs pa las nus mthu byung bar bstan pa'o//sangs rgyas rnams kyi gar las byung / /zhes pa ni don te/ byang chub chen po mngon rtogs dang / /zhes pa ni/ nyan thos dang rang rgyal ba'i byang chub kyi slar gyur pas ni byang chub chen po ste de nyid mngon par rtogs zhes bya'o/ /chos kyi 'khor lo bskor ba dang / /zhes pa ni/ don bzhi dang ldan pa lan gsum du bzlas nas bcu gnyis dang ldan par bskor ba'am/ chos kyi khams la dgongs nas rnam pa gsum du bskor ba'o/ /'dul ba'i 'gro ba longs spyod ces pa ni/ 'dul ba'i 'gro ba rnams chos kyi longs spyod la mkhas pa'i spyod pas bsdu ba ste/tshad med pa bzhi dang / bsdu ba rnam pa bzhis bsdus nas grol bar mdzad pa'o/ /gnas ni yongs su gyur pa yang / /zhes pa ni de'i rgyu'i ngo bo'i gnas bstan pa ste/ de dag kyang gzhan nas 'byung ba ma yin te/ kun gzhi rnam par shes pa legs par sbyangs pa las byung zhes bstan to//bsod nams ye shes rab rdzogs pa/ /zhes pa ni/ tshogs rnam pa gnyis te/ de rdzogs pa'i rtags ni rang gi sems kyi ngo bo/ zla ba rdzogs par rnam par brtag /ces bya ste/ gnas gang du zhe na/ snying ga'i dbus su 'jigs med pa/ zhes bya ste/chos ji lta ba mngon par rtogs pa'i sgo nas bag tsha ba med pa'i don du gsungs te/ 'di dag ni bzlas brjod kyi tshul bstan pa'o/ /zla ba'i dkyil 'khor dbus su ni/ /rigs lnga'i yi ge rnam par bsgom/ /zhes pa ni/ zla ba de'i dbus su rigs lnga char ram/ yang na gang bsgom par 'dod pa de'i rig sngags kyi yi ge gsal bar brtag go bar bstan te/de'i don yang 'di lta ste/ sngar bstan pa ltar phyag rgya chen po gsal bar 'gyur ba de las byang chub chen por mngon par rtogs pa dang / chos kyi 'khor lo bskor ba dang / gdul ba'i 'gro ba longs spyod par mdzad pa'i phrin las 'khor lo dang gar gyi rtsol ba lta bu de yang gzhan nas byung ba ma yin gyi/bsod nams dang ye shes kyi tshogs rnam pa gnyis rdzogs pa'i ngo bo las gyur pa/ rang gi sems brtag pa las gyur pa'i kun las 'byung bas ni/ tshogs rnam pa gnyis rdzogs pa'i ngo bo sems nyid zla ba'i dkyil 'khor lta bur snying gar gnas par bsams la/ de'i steng du rigs lnga'am gcig gang rung ste/ gang bsgrub par 'dod pa de'i rig sngags kyi yi ge gzhag pa ci tsam mtshan ma byung gi bar du bsgom mo/ / zhes gsungs pa'o/ da ni de ltar byas pa'i yon tan bstan pa'i phyir/ 'di 'dra ba yi tshul bzang pos/ /zla ba phyed kyis 'grub par 'gyur/ /zhes bya ba la sogs pa gsungs te/ 'di ltar bya ba ni tshul bzang po ste/ de ltar byas na zla ba phyed las phyir mi 'gyangs par 'grub par 'gyur ro//mtshams med pa lnga dang ldan pa zhes pa ni sgrub pa'i tshul dang mi ldan pa ste/ pha bsad pa la sogs pa'o/ /des kyang bsgrubs na lo gcig las mi 'chi bar 'grub par 'gyur/ gzhan de lta bu'i kha na ma tho ba med pa rnams kyis bsgrubs na lta smos kyang ci dgos zhes bstan pa'o//yun ci tsam zhe na/ rnal 'byor pa ni chen po yis/ /ngal bar ma gyur bar du bzlas/ /zhes pa dag ste de lta bu'i tshul dang ldan pa dag ste/ de ni rnal 'byor chen po zhes bya ba yin te/ ji srid lus ngal zhing dub par ma gyur gyi bar du ci nus pa'i tshad du bzlas so//ngal bar gyur na ji ltar bya zhe na/ lus ni ngal bar gyur na yang / /phyag rgya dgrol bar brtsam par bya/ /zhes gsungs te/ gal te lus ngal zhing dub pa'am/ ting nge 'dzin gyis skyo bas sam/ bya ba gzhan dag gi phyir gtong 'dod na 'di nyid kyi phyir ji skad du gsungs pa bzhin du phyag rgya dgrol bar brtsams la/ci rigs pa'i cha lugs gzhan du gnas par bya'o zhes gsungs so/ /rdo rje'i rigs kyi bzlas brjod ni/ /phyag na rdo rje bdag nyid du brtags na zhes pa ni/ bdag nyid rdo rje sems dpa'i cha lugs gsal bar byas pa'i ngo bor gnas par byas nas de'i ngang du sems mnyam par gzhag pa'o//sangs rgyas snying por bdag gnas shing / /zhes pa ni/ chos kyi sku la bya ste/ rdo rje sems dpa'i cha lugs su bsgom pa de yang chos kyi sku la gnas pa las ma g.yos bzhin du de ltar snang bar rig par bya'o//phyag na rdo rjer bdag brtan zhing / /zhes pa sems gzhan gyi rjes su 'brangs pas mi 'phrogs par de kho na'i nang du bsgom pa ste/ lha dang bdag gnyis su med pa'i rtog pa bskyed pa'o/ /rang gi snying po 'od gsal ba//zhes pa ni bla na med pa'i byang chub kyi snying po chos kyi sku'i ye shes kyi ngo bo sgrib pa'i tshogs thams cad dang bral bas 'od gsal ba ste zla ba'i dkyil 'khor lta bur gnas par brtags pa yin pas na zla ba'i dkyil 'khor gyis yongs su brgyan/ zhes bya ste de'i don ni ji ltar rgyan gyis brgyan na mdzes par 'gyur ba dang 'dra bar sku bdag dang gnyis su med pa'i rdo rje sems dpa'i sku chos kyi sku'i ngo bo las ma g.yos bzhin du phyag rgya'i mtshan ma gsal bar snang ba de las thugs rnam par dag pa'i ngo bo zla ba'i dkyil 'khor gyis yongs su brgyan pa'i tshul du thugs ka na gnas te/zla ba'i dbus na yang ye shes lnga'i ngo bo rdo rje rtse lnga pa/ rdo rje de'i chang zungs kyi bum pa'i nang du yang rang gi chos kyi yi ges mtshan par bsams te/ 'di lta bu'i rnal 'byor la gnas nas rdo rje'i rigs chen po'i bzlas brjod bya'o zhes bstan to//dmigs pa dang bcas pa'i bzlas brjod bya ba'i thabs rdo rje rtse mo las gsungs pa'i don bshad zin to/ /yid kyi bzlas brjod gnyis las mtshan ma'i bzlas brjod bshad zin to// //da ni mtshan ma med pa'i bzlas brjod kyi mtshan nyid bstan pa'i phyir na/rnal 'byor pa chos la bdag med par shes pa'i blo can rnams la ni don dam pa'i shes rab kyi rnal 'byor de kho na nyid bsdus pa dang / rdo rje rtse mo las bzlas brjod kyi bye brag gzhan bstan pa de yang 'dir bshad par bya'o zhes bya ba la sogs pa gsungs te/rnal 'byor pa chos thams cad bdag med par shes pa'i blo can zhes pa ni rnal 'byor pa blo yang rab tu gyur pas lung dang rigs pa'i gtan tshigs kyi chos thams cad la theg pa 'og ma bas brtags pa'i bdag gtan nas med par shes pa'i blo can rnams kyis ni mtshan ma med ba gtsor byed kyi mtshan ma dang bcas pa la gtsor mi byed pas ni don dam pa'i shes rab kyi ngo bo mtshan ma med pa'i rnal 'byor pa de kho na nyid bsdus pa'i rgyud 'di dang /rnal 'byor rgyud kyi lhag mar gyur pa rdo rje rtse mo'i rgyud las gsungs pa'i bzlas brjod kyi bye brag mtshan mar bcas pa las gzhan du gyur pa mtshan ma med pa bstan pa de yang /sgrub thabs 'dir bshad par bya'o zhes slob dpon gyis gsungs so/ /de la 'di ni re zhig ces pa de ltar rgyud rnam pa gnyis las 'byung ba'i bzlas brjod bstan par bya'o zhes smras pa de las re zhig 'dir ni dang por de kho na nyid bsdus pa las gsungs pa'i bzlas brjod kyi thabs de bstan par byas te/gang zhe na/ dang po re zhig rnal 'byor pas snga ma bzhin du/ bdag dam tshig sems dpar byin gyis brlab par byas te zhes bya ba la sogs pa dag gsungs te/bdag nyid dam tshig sems dpar bsgom pa'i rim pa sngar bstan pa bzhin du bya ste/ phyi nang gi mchod pa'i bye brag gis mchod la mdun du'ang rang gang bsgom pa'i lha'i gzugs bsams te/ de dag gi thugs kar yang zla ba dang /dam tshig gi phyag rgya dang / chos kyi yi ge bzhag la de nas lung dang rigs pa'i gtan tshigs kyis rnam par gzhigs shing brtags te/ bdag nyid dam tshig sems dpar bsgom pa de dag gi mdun du lha ye shes sems dpa' dang / de dag gi thugs kar bzlas brjod bya ba'i zla ba dang /dam tshig gi phyag rgya dang chos kyi yi ge ji ltar bsam pa de rnams ma skyes shing rang bzhin med par bsgom pa'i chos thams cad stong pa nyid du mos pa mngon du byas la zhes pa bdag dang lha yan lag dang bcas pa ma skyes pa'i sgo nas/ phyi nang gi chos thams cad kyang ma skyes pa nyid du mos pa mngon du byas la/rang gi sems kyi gnas srog dang rtsol ba gnyis yan par mi gtong zhing nang du bkag ste/ bdag dang lha dang phyi nang gi gzugs la sogs pa'i rnam par snang ba dang bral ba'i sems kyis bdag dam tshig sems dpa' dang /lha ye shes sems dpa' mdun du bsam pa dang / bzlas brjod bya ba'i yi ge rnams nam mkha' dang 'dra bar yid la bya zhing / de ltar mtshan nyid med par dmigs pa de'i ngang la gnas bzhin du rang gi rnal 'byor 'od gsal ba'i ngo bo tsam du cha phra ba'i ngo bor brtags nas yid la gnas pa'i rnam pa tsam du brjod pa'i mtshan nyid nye bar bzung ba'i yid kyis bzlas brjod ji ltar bya ba'i mtshan nyid sngar ji skad gsungs pa dang rjes su mthun par bzlas brjod bya'o//de la yid la nang du brjod pa'i mtshan nyid yid kyi bzlas brjod ces bya ba ni/cung zad 'od gsal ba'i ngo bo tsam du cha phra bar snang bar rtag pa'i mtshan nyid la ni yid la bzlas brjod ces bya'o/ /rigs dang rjes su mthun pa'i ji skad du gsungs pa'i tshig gi mtshan nyid kyi zhes pa ni rigs bzhi'i bzlas brjod bya ba'i mtshan nyid sngar gsungs pa'i so so'i snying po sgra tsam la gnas te bzlas brjod bya'o//rang gi lha'i chos kyi sku la mos pas zhes pa ni/ chos kyi sku ni mtshan ma med pa ste/ de dang rjes su mthun pa'i mtshan ma med pa'i ting nge 'dzin la yang nas yang du 'dris pa dang / goms par byed pa la mtshan ma med pa'i bzlas brjod ces gdags so//dbugs 'byin na yang zhes pa ni/ ting nge 'dzin de lta bu la gnas nas dbugs 'byin na'ang sna'i nang na gnas pa'i rlung phra mo byung ba tshor bar byas la phyi rol du btang ste/ ji ltar mos pa rang gi lha sngar mdun du bsams pa de yang glog 'byung ba tsam gyi ngo bor yid kyis brtag cing rjes su dran pa mngon du byas la yang /de bzhin du bags kyis srog dang dbugs slar bsdus pa'i tshul du rtsol ba'i dran pa dang / srog gi rlung du bcas pa'i sems kyi rta nam mkha' dang mnyam par mi dmigs par ting nge 'dzin gyis bcings shing /nang du rang bzhin gyis zhi bar byas nas de bzhin du so sor snang ba thams cad dang bral ba zhes pa/ mtshan ma'i rnam par rtog pa dang bral zhing mtshan ma med pa la 'dris shing goms par bya ba kho nas bzlas brjod bya bar bshad do//yang na bdag dang lha dang zhes pa gang gi rnam pa las gzhan du bstan pa ste/ sems rtag pa la sogs pa lnga mngon par byang chub pa'i rim pas rang lha'i phyag rgyar bsgom ste/ mdun du yang rang gi lha nyid bsams la/ de dag gi cha lugs dang snying gar gnas pa'i zla ba dang /dam tshig gi phyag rgya dang yi ge la sogs pa gsal bar bsams nas/ de ltar gsal ba dang / de rnams shes rab kyi pha rol tu phyin pa'i ngo bo ltar bdag med par mos pa'i rnal 'byor mngon sum du byas la/ gal te de la sems skyo bar gyur na snying rje chen pos 'gro ba mi gtong ba'i sems kyis stong pa nyid kyi ting nge 'dzin las langs te/sngar bstan pa de bzhin du bdag dang mi gnyis par gyur pa/ rang gi lha mdun na gnas pa dran par byas te/ lha de'i snying po bzlas shing / bzlas pa'i don des lha'i sku phyag rgyar bsgoms shing dbugs 'byin pa yang sna'i nang na gnas pa'i rlung phra mo 'byung ba'i rim pa myang bar byas te/phar btang ba yang mdun gyi lha rjes su dran par byas te/ slar bsdu ba yang snga ma'i tshul du byas pas na/ rnal 'byor snga ma'i rim pa nyid kyis bzlas brjod bya'o zhes so//rgol ba pa gzhan dag na re 'di ltar bzlas brjod kyi rnam pa'i mtshan nyid mi mthun par ston pa la dgos pa ci yod ce na/ don dam pa'i shes rab sbyor ba 'di tha dad pa med kyi/ 'on kyang rgyud 'di la mos pa'i 'dul ba'i skye bo rnams gzung ba'i phyir tha dad pa bzhin du snying po dang phyag rgya dang gsang sngags dang rig sngags rnams sgrub pa'i phyir so sor gsungs par rig par bya'o zhes gsungs te/don dam par shes rab kyi sbyor ba mi dmigs pa'i tshul du byed pa 'di la stong pa nyid kyi ngo bor mtshungs pa'i phyir tha dad pa ma yin mod kyi/'on kyang 'di ltar mi mthun pa'i rnam pa ltar bstan pa ni gdul bya'i khams dang bag la nyal dang mos pa tha dad pa dag yod pas na/ de dag rang gi rtog pa dang mthun pa'i sgo nas gzung pa'i phyir snying po dang phyag rgya la sogs par rnam par phye nas kyang bstan la/de dag gi bzlas pa'i bye brag kyang tha dad pa'i tshul du bstan par rig par bya ste/ nyes pa med do zhe'o/ /re zhig snying po sgrub pa'i rnal 'byor gyi skabs su zhes pa rtsa ba'i rgyud chen po de kho na nyid ces bya'o/ /kha zhes bya ba de'i don kyang 'di kho nar rig par bya'o/ /bdag dang mi gnyis par gyur pa'i dam tshig sems dpar snang ba gsal te/zhes pa yi ge a'i don gyis dam tshig sems dpar bsgom pa'i gzugs snang ba mi dmigs par byas te/ mdun na bsams pa'i ye shes sems dpa' snang ba yang mi dmigs par bya ste/ tshul 'di ltar bya ba yang bdag dang lha dang rig sngags dang /gsang sngags bzlas brjod byed pa'i yi ge rnams kyang stong par bsgom zhing / zla ba'i mtshan nyid de shes rab kyi sgo rtogs pa'i don de nyid do/ /khyad par du snying po shes rab kyi lung ni zhes pa/ khyad par du snying po mi dmigs par bzla ba ni/snying po shes rab kyi lung ste/ a'i don gyis zhes pa/ a stong pa nyid kyi don gyis bdag dang lha dang bzlas brjod bya ba'i sngags kyi yi ge rnams stong par bsgom par bya bar bshad pa dang / ting nge 'dzin gyi sgra'i bye brag ces pa de ltar/ a yi don gyis stong pa bsgom//zhes brjod par zad kyi de'i rjes la ting nge 'dzin 'di ltar bya zhes pa'i tshig gi bye brag tu phye ba'i sgra yang ma smos pa ji ltar don 'di dag blos gzhigs na zhes pa/ ji ltar lha la sogs pa'i rnam pa 'di shes rab kyi blos rnam par gzhigs na/ mtshan ma'i rnam pa med pa ni nang stong pa yin pa de bzhin du/ phyi nang gi chos phung po dang / khams dang skye mched dag g.yo ba dang mi g.yo ba/ gzung ba dang 'dzin par rtog pa'i chos thams cad kyang rang bzhin gyis stong zhing dmigs pa med de/ de lta bur stong pa'i ngo bor rtogs pa la/'jug pa'i rim pa la ni rnam par rtog pa zhes bya ste/ rnam par rtog pa de gcig nas gcig tu bsgyur ba'i mtshan nyid dang / a la sogs pa'i ji skad du gsungs pa'i zhes pa a stong pa nyid kyi don gyis/ bdag dang lha dang / phyi nang gi chos thams cad sngar ji skad gsungs pa'i rang bzhin med pa stong pa nyid du rnam par 'byed pas de bzhin du rtogs par byas pa'i shes rab skye zhing mchod par byed pas 'bar ba'i me snga mas rtog pa 'das shing phyi ma phyi mas rjes su 'byung bas phyi nang gi dngos po rnams kyi mtshan nyid rnams la so sor 'jug pa'i rnam par rtog pa'i rig pa ma zhi bas/ma rig pa'i mun pa sel bar byed pa ste/ de lta bu'i 'dul ba'i 'gro ba zhes pa de lta bu'i tshul gyis 'dul bar 'gyur ba'i 'gro ba rnams dbang du byas te/ rnam par rtog pa dang bcas pa'i shes rab nyid ces pa/snying po bsgrub pa shes rab kyi lung rnam par rtog pa dang bcas pa'i shes rab nyid gtsor gsungs pas de ltar bstan pa rig par bya'o/ /phyag rgya dang gsang sngags dang rig sngags rnams sgrub pa'i shes rab kyi lung ni zhes pa/ snying po sgrub pa'i shes rab kyi lung ji lta ba bzhin du phyag rgya sgrub pa shes rab kyi lung dang gsang sngags sgrub pa shes rab kyi lung dang /rig sngags sgrub pa shes rab kyi lung ni/ ting nge 'dzin gyi tshig khyad par smos pas zhes pa ni snying po shes rab kyi lung las ting nge 'dzin gyi khyad par du smos pas/chos bdag med pa'i mtshan nyid don dam pa stong pa nyid kyi ngo bo la rtse gcig tu dmigs pa'i sgo nas rnam par rtog pa mi 'byung ste/ rnam par mi rtog pa'i phyir/ zhi gnas dang lhag pa nyid du bstan to zhes slob dpon mkhas pa rnams kyis bshad do/ / de bzhin du yang phyag rgya dang gsang sngags bzlas brjod bya ba'i bsdus pa las de bzhin gshegs pa'i rigs sgrub pa ni snying po sgrub pa ste/ de rang bzhin med par ston pas na/ shes rab kyi rnal 'byor zhes bya ste/ de bshad pa'i skabs su/ yi ge a la 'jug pa yis/ / yi ge thams cad rnam par bsgom/ /rang gi kha nas gzhan gyi khar/ /bsgoms na dngos grub thob par 'gyur/ /zhes gsungs te/ de la yi ge a ni chos thams cad ma skyes par don mtshon pa ste/ sarba d+harma/ a a nud pa taM/ zhes bya ba'i sgras chos thams cad stong pa nyid ces zer te/a'i don ni skye ba med pa yin pas yi ge a la ni skye ba med pas khyab la/ a skye ba med pas kyang chos thams cad la khyab la/ ma skyes pa'i phyir na a ni chos thams cad kyi sgo'o zhes gsungs so/ /yi ge thams cad rnam par bsgom/ /zhes pa ni/ de ltar yi ge a ni yi ge thams cad la yang khyab ste ji ltar yi ge a ma skyes pa bzhin du yi ge thams cad kyang ma skyes pa yin par ston to//de bas na bzlas brjod bya ba'i yi ge rnams/ chos bdag med par bya ba'i rigs pas stong par bsgom zhing / rang bzhin med par gzhig pa dang / mi snang bar bya'o zhes ston to//de ltar yi ge a ma skyes pa'i don gyis yi ge thams cad mi dmigs pa 'ba' zhig ma yin gyis bdag dang lha'i rnam par snang ba'i rtog pa dag kyang stong par bsgom par bya ste/ de la ni de bzhin du klog par bya zhes bya'o/ /rang gi kha nas gzhan gyi khar/ /zhes pa ni kha ni 'jug pa dang sgo zhes bya bar don gcig pa ste/de bas na rang gi kha ni rang gi 'jug pa'o zhes bya ba'i don to/ /'di ltar gyur te zhes pa/ yi ge a'i 'jug pa zhes pa ni/ a'i don ma skyes pa yin la/ yi ge a'i 'jug pa ma skyes pas bdag kyang 'jug cing snang ba med de/ ma skyes par rtogs par bya'o//de nas bdag gi 'jug pa zhes bya ba bdag nyid ma skyes pa'i mtshan nyid kyis 'jug pas/ bdag ji lta ba bzhin du rang gi lha la sogs pa mtshan mar snang ba'i rtog pa yang / yi ge a 'jug pa nyid kyis rang bzhin med pa'am ma skyes par ston pas na gzhan gyi zhes bya'o//a'i don gyi bdag rnam par bsgom pa'i de ma thag tu/ rang gi lhar snang ba med par bya'o zhes pa a rang bzhin med cing ma skyes pa'i don gyis yi ge la khyab la/ a dang yi ge thams cad ma skyes pa'i sgos bdag kyang ma skyes shing stong la/ bdag stong par gyur pa'i sgo nas rang gi lha mdun du bsgom pa'am/lhar snang ba med pa stong pa nyid kyi ngo bor rtogs par bya'o zhes bstan pa'o/ /'di ni re zhig snying po bzlas brjod byed pa'i lung ngo zhes pa snying po bzlas brjod byed pa mi dmigs pa'i sgo nas mtshan ma med pa'i tshul du ston pas na shes rab kyi lung zhes bya'o//yang na kha zhes bya ba dpal rdo rje sems dpa' la sogs pa zhes pa/ mu kha zhes bya ba'i sgras/ rdo rje sems dpa' la sogs pa lha rnams kyis rnam par grol ba'i sgo phyag rgya chen po'i rang bzhin du gyur la yin par 'dod pas na/ skabs 'dir de yin par gzung ngo /de yang gang zhe na/ dam tshig sems dpa'i mngon par byang chub pa lta ba'i tshul du bskyed pa dang / de dang 'du ba'i ye shes sems dpa'i phyir rol du bsgom pa la ni/ bdag gi kha dang gzhan gyi kha skabs su shes rab kyi lung yang zhes pa ni snga ma bstan pa de bzhin du phyag rgya bsgom zhing bcing ba dang /gsang sngags bzlas brjod byed pa'i skabs su shes rab kyi lung 'di ltar shes par bya ste gang zhe na/ shes rab nges par 'bigs zhes bya/ ting nge 'dzin zhes grags pa ste/ /zhes bya ba la sogs pa gsungs te/ de'i don yang 'di lta ste/shes rab nges par 'bigs zhes bya/ /zhes pa ni rab tu shes pa'i phyir na shes rab ste/ shes rab des don dam pa la 'bigs par byed pas na nges par 'bigs pa zhes bya ste/ stong pa nyid du mos pa la dmigs pa rtse gcig pas stong pa nyid ji lta ba bzhin rtogs pa'i mtshan nyid du bstan pa'o//phyag rgya sgrub pa'i shes rab de yang de las gzhan pa'i shes rab kyi lung gsum las khyad par du bstan te/ zhes pa ni phyag rgya sgrub pa shes rab kyi lung ni snying po dang / gsang sngags dang rig sngags sgrub pa'i shes rab lung dang gsum las khyad par bshad de/ji ltar nges par 'bigs zhes pa ni/ rtogs pa de chos thams cad bdag med par rtogs pa'i mtshan nyid don dam pa la dmigs pa'o zhes pa ni chos thams cad stong pa nyid du rtogs nas de'i ngang la gnas pa la dmigs pa bzhin du mi 'gyur ba'o/ / de las gzhan pa rnal 'byor pa rnams kyi ni zhes pa ni phyag rgya las gzhan pa snying po dang gsang sngags dang / rig sngags sgrub pa'i shes rab kyi lung ste/ de kho na nyid ma rtogs par dmigs pas zhes pa ni de dag gi lhag mthong dang / mtshan ma che bar dmigs pas de kho na nyid stong pa chen po mi 'gyur ba'i chos kyi dbyings su ma rtogs pas chos thams cad bdag med pa'i rigs pa dang lung las 'gal zhes pa de ltar mtshan ma can du rtogs pa de ni lung dang rigs pas chos thams cad bdag med par rigs pa dang /lung las 'gal zhes pa de ltar mtshan ma can du rtog pa de ni lung dang rigs pas chos thams cad stong pa nyid bdag med pa'i rigs pa dang 'gal te mi mthun par gyur pa'i phyir na/lus gsum las 'di khyad par du bstan to/ /de bas na phyag rgyas bzlas brjod byed pa zhes pa/ de ltar khyad par du bstan pa'i gtan tshigs de bas ni/phyag rgya bzlas brjod byed pas bdag dang lha dang bzlas brjod kyi yi ge gsum bdag med pa ste/ stong pa nyid kyi ngo bor mos par bya ste nam mkha' dang mnyam zhing dbyer med par dmigs nas/ rab tu rnam par phye ba'i rnam par rtog pa zhes pa/ chos thams cad rab tu rnam par 'byed pa'i rtog dpyod can gyis shes par bkag nas/ thig le zad cing mnyam par gzhag /ces pa ni rtog dpyod can pas na/ nam mkha' dang mnyam rnal 'byor gyis/ /zhes gsungs pa yin no/ /des ni mtshan ma rnam par spangs pa na blang ba dang dor ba'i skabs dbye ba med de/grub dang ma grub pa zhes cha shas su bya ba med pas na/ thams cad myur du 'grub par bya/ /zhes gsungs so/ /de lta bu'i rnal 'byor pas bsgrubs na grub pa'i 'bras bu chud mi za zhing gang 'dod pa de bzhin du thob pas na/ don yod par ni grub pa'i mchog /ces bya ste/ 'dir mchog ces smos pa ni grub pa'am ma grub pa rnams kyi nang na rab tu gyur pa bstan pa'o/ /de la phas kyi rgol ba rnams kyis skabs mi phyed cing / gzhan gyi sbyor ba thams cad rang bzhin gyis 'jig par 'gyur nus pas na dug thams cad zil gyis gnon zhes bya'o//theg pa 'og ma ltar nyon mongs pa thams cad gnyen po bsten pas rim gyis 'joms pa ma yin te/ 'phral dag tu gyur la dpal dam pa sbyor ba'i yon tan thob par 'gyur bas na/ sdug bsngal kun sel dpal dang ldan/ /zhes bya'o/ / de lta bu'i mtshan ma spangs pa'i rnal 'byor gyi ngang la gnas pa de ni yon tan slob mi dgos par dgongs pa thams cad rang bzhin gyis grub par gyur pas ni/ rnal 'byor 'di ni las kun byed/ /ces bya'o/ /rnam par mi rtog pa'i ting nge 'dzin la gnas pa'i ngang de las ma 'gyur bzhin du/gang 'jig rten dang 'jig rten las 'das pa'i dngos grub dang / dgongs pa gang yang rung ba de dag las mi 'grub pa ji tsam mi 'grub pas na/ de bas na mi 'grub ci yang med ces bya'o/ /de bas na rnam par mi rtog pa'i ting nge 'dzin dang ldan pa'i rnal 'byor pa des/thun mong dang mchog gi dngos grub bam/ 'jig rten dang 'jig rten las 'das pa'i las dang bya ba'i rigs pa thams cad bsams pa tsam gyis mngon du gyur te rnam par mi rtog pa'i ting nge 'dzin dang bzlas brjod ni bya ba thams cad kyi nang na dam pa bas/ gang mi grub pa de ni go skabs ma yin pas na/dngos grub las rnams ci bde bar/ /ma lus lus pa med par 'grub/ /ces bstan to/ /de ltar sgrub pa de yang phyogs 'ga' tsam gyi rigs grub par ma zad kyi che ba gang 'dod pa ji snyed yod pa'i las kyi rnam pa grangs med pa dag 'grub par 'gyur bas na/rab 'byams las rnams myur du 'grub/ /ces gsungs pa yin no/ /rdo rje rtse mo'i rgyud las ni/ rim pa bzhin du yang ston pa'i shes rab kyi man ngag gnang ste zhes pa ni/ rdo rje rtse mo'i rgyud kyi le'u gong 'og nas ni/ 'dir bstan pa de dag gi tshul la rnam pa gzhan du ston pa'i tshig gis rang bzhin med par ston pa'i shes rab kyi man ngag ste/sangs rgyas kyi skur bdag byin gyis brlabs nas zhes bdag nyid mngon par byang chub pa lnga'i rim pas dam tshig sems dpar bsgoms nas/ rang gi lha ye shes sems dpa' mdun du bsams pa dang /lha'i snying gar bzlas brjod bya ba'i sngags kyi yi ge rnams bkod nas ji ltar bsams pa'i zhes pa ni de ltar gsal bar bya ba'i rnam pa de dag de ma thag tu bdag med par stong pa nyid mi dmigs par mos par byas nas/ gzugs la sogs pa so sor snang ba med par zhes pa de'i sgras phyi rol gyi yul gzugs sgra la sogs pa yang mi dmigs par byas nas/de ltar mi dmigs bzhin du stong pa nyid kyi don de la yang dang yang du 'dris shing goms par bya ba'i ting nge 'dzin la gnas par bya ste/ de la ni don dam pa'i bzlas brjod ces bya'o//rnam pa gcig tu mi dmigs bzhin du yid kyis gsal bar dran zhing / cha phra bar 'dzin pa tsam du bya'o/ /de bas na/ de bzhin gshegs pa'i rigs bzlas pa/ sangs rgyas bdag nyid bkra shis gnas/ stong gsum gyi ni 'jig rten 'dir/sangs rgyas sku ni bsgom par bya/ /zhes bya ba la sogs pa gsungs te/ de bzhin gshegs pa'i rigs bzlas pa/ /zhes pa ni/ de bzhin gshegs pa'i rigs la sogs pa bzlas brjod byed pa'o/ /sangs rgyas bdag nyid bkra shis gnas/ / zhes pa ni sangs rgyas rnams ni 'jig rten dang 'jig rten las 'das pa la bkra shis phun sum tshogs pa la mnga' brnyes shing dbang bsgyur bas na sangs rgyas bkra shis zhes bya'o/ /bdag nyid kyi lus sangs rgyas gang bsgom pa de'i cha lugs su gnas par bya'o/ /stong gsum gyi ni 'jig rten 'dir//sangs rgyas sku ni bsgom par bya/ /zhes pa ni de bzhin gshegs pa'i sprul pas stong gsum gyi stong chen po'i 'jig rten gyi khams gang bar mos par byas la/ de dag slar 'dus te gcig tu gyur pa las mdun du yang de bzhin gshegs pa'i gzugs ye shes sems dpa' bzhugs par bsgom par bya'o//sangs rgyas de yi snying gar ni/ /rig sngags yi ge rnam par bsgom/ /zhes pa ni/ sangs rgyas mdun du bzhugs pa de'i thugs kar yang rang gi bzlas pa'i sngags yi ge bsgom par bya'o/ /rang gi lus ni bdag med pa//chos dang gang zag stong pa nyid/ /ces pa ni de ltar bsgoms ma thag du yang bdag nyid chos dang gang zag la bdag med pa'i ngo bo stong pa nyid du bsgom par bya'o/ /sangs rgyas de yi sku gang yin/ /de yang bdag med par bsam mo/ /zhes pa ni bdag de ltar bsgoms ma thag tu mdun na bzhugs pa'i sangs rgyas kyi sku bsams pa de yang stong pa nyid kyi ngang du bsgom par bya'o//sangs rgyas gzugs 'di ci zhig yin/ /de yi rang bzhin yod ma yin/ /zhes bya ba la sogs pa 'di dag kyang stong pa nyid du 'grub pa'i gtan tshigs te/ sangs rgyas gzugs 'di'i mtshan nyid ji lta bu zhig yin zhes rnam par gzhig ste de'i rang bzhin yod pa ma yin no zhes brtag go/ /de yang tshul gang gi sgo nas she na/ gang zag ces bya ba'i sangs rgyas med ces pa ni/ mu stegs kyis brtags pa'i gang zag lta bu tshul du yang sangs rgyas thar zug pa med ce'o//'o na nyan thos kyi tshul du yod dam zhe na/ phung po dang ni khams ma yin/ /'phags pa nyan thos kyis brtags pa ltar/ phung po dang khams dang skye mched chos rnams kyi tshul du yod par 'dod pa bzhin du/ sangs rgyas yod pa yang ma yin no/ /'o na rnam par shes pa spre'u'i tshul du yod pa yin nam zhe na/ gzung dang 'dzin par sangs rgyas med/ /ces bya ste/ gzung ba dang 'dzin pa'i ngo bor yang med la gzung ba dang 'dzin pa spangs pa'i ngo bor med ce'o/ /de ltar med pa ste/gtan 'gags su gyur pa zhig yin nam zhe na/ sangs rgyas med pa yang ma yin te/ /zhes gsungs te/ phyi rol pa'am 'og ma bdag gis brtags pa ltar med par zad kyi/ don dam par shis pa'i rang bzhin rang rig pa'i ngo bo'am/ stong pa nyid kyi mtshan nyid tsam du yod par 'dod de/tshul ji lta bu zhe na/ pha rol phyin drug sa bon yin/ /shes rab kyis ni rnam par sbyangs/ /zhes smos te/ ji ltar pha rol phyin pa drug dngos su spyad pas ming mi thob kyi 'khor gsum yongs su dag par rtogs nas rang bzhin med par gyur pa de la/ pha rol tu phyin pa zhes bya ba'i ming thob par gyur pa dang 'dra bar sangs rgyas rnams kyang lta ba tha dad pas so so nas brtags pa las dben bzhin du/ rig pa'i ngo bo skad cig ma'i tshul du yod pa la sangs rgyas zhes bya ste/ /'o na de ltar kun rdzob sgyu ma'i mtshan nyid du med pa yang ma yin la/don dam pa'i mtshan nyid du yod pa yang ma yin pa zhig tu 'dod dam zhe na/ kun gzhi gnas med rnal 'byor pa/ /de nyid byang chub bdag nyid 'dzin/ /zhes smos so/ /kun gzhi gnas med bzhin du 'khor ba'i bag chags 'dzin pa'i gnas su gyur pa'i stong pa nyid kyi gnas rnal 'byor gyis brtags te/'khor ba'i bag chags sbyangs shing byang chub bdag med pa nam mkha' lta bu de 'dzin par byed pa las sangs rgyas par 'gyur zhes bya'o/ /de bas na/ de 'dra ba yi rnal 'byor gyis/ de bzhin gshegs pa'i rigs bzlas na/ bskal pa chen po myur ba ru/ /rab tu dga' ba grub par byed/ /ces gsungs te/ 'di lta bu'i rnal 'byor la gnas nas ting nge 'dzin yang nas yang du goms par byas nas/ theg pa 'og ma dag gis bskal pa grangs med pa du mar bsgrub par bstan pa de tshe gcig kho nas grub par 'gyur ro zhes gsungs pa yin no//rdo rje'i rigs la yang zhes pa/ rdo rje'i rigs la ni bdag rdo rje sems dpar bsgoms nas mdun du la'am nam mkha'i dkyil khyab pa'i rdo rje rtse lnga pa'i gzugs bsams la/ de'i bum pa'i dbus su bzlas par bya ba'i sngags kyi yi ge badzra satwa zhes bya ba'i snying po 'dug par brtags pa/'di ltar bsams pa 'di yang snga ma bzhin du ngo bo nyid med par byed pa bdag dang rdo rje dang sngags kyi yi ge rang bzhin med par bsams te/ bzlas brjod bya'o/ /de la bzlas brjod bya zhes pa ni/ ting nge 'dzin de la goms par bya ba kho na la bzlas brjod du 'dod pa yin te/de ltar bya ba yang / rgyud las ji skad du/ de nas rdo rje'i rigs bzlas pa/ /bdag nyid rdo rje sems dpa' bya/ /zhes bya ba la sogs pa gsungs pa yin te/ rdo rje de yang dngos po med pa'i byang chub sems kyi 'bras bu yin zhes pa ni/mdun du bsams pa'i rdo rje yang dngos po rdzas can gyi gzugs su snang ba ma yin/ byang chub sems mtshan ma med pa goms par byas pa'i ting nge 'dzin gyi 'bras bu ste/ stong pa nyid mtshon par byed pa'i rtags/ ye shes lnga'i gzugs brnyan gyis ngo bor snang ba yin zhe na/ci ste rdo rje zhes bya'am/ de nyid gang gi mi 'gyur ba/ /zhes pa ni/ ci ste rdo rje de thogs pa dang bcas pa'i rdo rje zhig yin nam zhe na/ don dam pa'i de kho na nyid stong pa chen po'i rang bzhin dus rtag tu mi 'gyur ba'i ngo bo cis te de nyid ces brjod dam/gang stong chos nyid ces su brjod/ /ces gsungs te/ de ji lta bu zhes pa'i don ni/ de nyid ces pa'i don dang ldan par brjod pas stong pa nyid kyi ngo bor 'dod do zhes bstan to/ /'o na phyi ma'i yul gzhan ji ltar 'dod ce na/ gzugs la sogs pa'i chos rnams kun/ /stong pa'i rnam par bsgom bya ste/ /gzugs ni rdul du rnam gzhigs na/ /rdul ces bya ba yod ma yin/ /zhes gsungs te/ gzugs sgra la sogs pa yul du snang ba de dag kyang so so'i rdul phra mor bshigs la/ phyogs drug gis rnam par bshig na dngos por ma grub ste/rdul tsam zhes bya ba yang yod pa ma yin pas na/ stong pa'i rnam pa kho na bas de ltar bsgom par bya'o zhe'o/ /gzugs ni stong pa zhes bshad do/ /de yang rdo rje zhes su bya/ /zhes pa ni/ gzugs kyi mtshan nyid kyang stong pa kho na la rdo rje'i rang bzhin yang stong pa nyid de/de bas na de gnyis ni stong pa nyid kyi ngo bor gcig pa'i phyir/ gzugs la sogs pa nyid kyang rdo rje'i ngo bo yin la rdo rje yang dngos po med par 'gyur ba'i ngo bo bas na/ tha dad pa ma yin te/ rdo rje'i rang bzhin de lta bur rig par bya'o//de bas na/ de ltar rnal 'byor 'di yis ni/ /rab tu dga' ba myur du 'grub/ /ces gsungs te/ stong par rnam par bshigs nas mi rtog par bsgom pa'i rnal 'byor gyis/ mtshan ma rnam par spangs pa'i byang chub kyi sems de la ni/ rab tu dga' ba zhes bya ste/ rnal 'byor des de myur bar 'grub par 'gyur zhes gsungs so/ /rin po che'i rigs la bzlas brjod byed pa ni zhes pa ni/ mngon par byang chub pa rnam pa lngas bdag nyid bcom ldan 'das rdo rje rin chen du bsgoms te/ nam mkha' la rig sngags kyi yi ge badzra rat+na zhes bya ba bsgoms la/snga ma bzhin du chos thams cad stong pa nyid du gzhigs nas/ mnyam pa nyid du mos par byas la rang gi lha chos kyi sku'i ngo bor gnas pa la/ dmigs pa'i sems kyi ting nge 'dzin yang nas yang du 'dris shing goms pa'i bzlas brjod kyis rnal 'byor rtse gcig pa la 'jug par bya ste/de ltar bya ba yang rgyud nyid las/ de nas rin chen rigs bzlas pa/ /zhes bya ba la sogs pa gsungs te/ chos kun dngos po med ces pa/ /zhes pa ni/ chos thams cad ni dngos po med pa ste/ stong pa nyid do/ /stong nyid de bzhin nyid ces bya/ /zhes pa ni/ stong pa nyid de ni ming gi rnam grangs su de bzhin nyid ces kyang bya'o//phyi dang nang kun rnam brtags pa'i/ /gzugs ni re zhig ma skyes te/ /zhes pa ni/ bdag dang lha dang sngags su brtags pa ni/ phyi nang du brtags pa ste/ gzugs de dag kyang ma skyes te stong pa nyid kyi ngo bo'o/ /gang na gzugs ni yod med pa//zhes pa ni/ gang na gzugs kyi rnam pa ni thams cad du yod pa ma yin te/ gzugs med par gyur pa dang / de la rtog par byed pa'i mig kyang med de ma grub ste med do/ /yul gzugs can mig gnyis dngos po ma grub ste/ yod pa ma yin phan chad de'i rjes la 'jug pa'i rnam par shes pa mi skye'o//ji ltar mig la de bzhin kun/ /zhes pa ni gzugs dang mig dang rnam par shes pa gang yang ma grub ste/ rang bzhin med pa de bzhin du/ rna ba dang sgra dang rna ba'i rnam par shes pa nas/ yid dang chos dang yid kyi rnam par shes pa'i bar du yang de bzhin te/de bas na gzung ba dang 'dzin pa rnam par spangs pa ste/ stong pa nyid kyi ngo bo'o/ /rnal 'byor tshul ni 'di yis su/ /rab tu dga' bar 'grub par 'gyur/ /zhes pa ni snga ma bzhin no/ /lhag ma rnams la yang de bzhin du rig par bya'o//de bzhin gshegs pa'i snying po 'di/ /ci zhes pa ni/ de bzhin gshegs pa'i snying bo chos kyi sku zhes bya ba 'di ngo bo ji lta bu zhe na zhes pa ste/ gang 'di stong pa'i chos nyid de/ /zhes pa ni de bzhin gshegs pa'i snying po chos kyi sku zhes bya ba'i rang bzhin ni/ stong pa nyid kyi chos kyi ngo bo rnam par dag pa'i ye shes skad cig ma tsam du gnas pa las gdags par rig par bya'o zhe'o/ /gzugs la sogs pa chos kun gyi/ /zhes pa ni/ chos kyi sku ji lta ba bzhin du gzugs sgra la sogs pa'i chos kun gyi chos nyid kyang de bzhin nyid stong pa nyid kyi ngo bo ste de bzhin nyid ces bya'o//de ltar na chos thams cad kun rdzob tu snang zhing bya ba byed nus mod kyi/ don dam pa rang bzhin dmigs su med de chos kyi sku'i ngo bo las gzhan ma yin par rig par bya'o/ /rnal 'byor chen po dka' thub che/ /zhes pa ni/ 'di lta bu'i rnal 'byor la gnas pa de'i ngang du ni dka' ba thams cad ma bsrungs kyang thub ste/ nam yang nyes pa 'byung bar mi 'gyur ro/ /rgol ba pa na re/ 'o na 'di ltar stong pa nyid du bsgom pa la ni bzlas brjod kyang dmigs la/ gal te bzlas brjod dmigs su zin na ni stong pa nyid ces bya bar yang mi 'gyur na/'di ltar mtshan ma med pa la mtshan ma'i rnam pa tha dad du 'dogs pa ci'i phyir zhe na/ smras pa 'dir bzlas brjod bya bar brjod pa ni/ dper na nam mkha' nyid gos su gyon bya ba dang 'dra bar stong pa nyid du gnas pa'i don yang dang yang du 'dris shing goms par bya ba la gdags pa yin mod kyi/'on kyang de la bzlas brjod par gdags pa ni/ rtog pa can gyi 'gro ba gzhan dag dkri zhing gzung ba'i phyir 'di ltar bstan par zad de nyes pa med do/ /de ltar dmigs pa dang bcas pa zhes pa ni sngar bshad pa'i phyag rgya bzhi dang rigs bzhi'i bzlas pa bye brag tu byas nas bstan pa dag go//dmigs pa med pa'i sbyor ba zhes pa ni/ don dam pa'i shes rab kyi lus bsgom pa'i rigs bstan pa'o/ /de bzhin gshegs pa la sogs pa/ /zhes pa ni/ rdo rje dang pad+ma dang las kyi rigs rnams zhes bya ba'i don to//rig sngags bzlas brjod las byung ba'i/ /zhes pa ni/ phyag rgya chen po bsgoms pa las byung ba'i dngos grub dang / bzlas brjod bya ba las 'byung ba'i dngos grub kyi rim pa ste/ sngar bshad pa'i cho ga'i rim pa'o/ /rigs bzhi'i mtshan ma med pa'i bzlas brjod kyi bye brag bshad zin to// //da ni sngar gsungs pa'i phyag rgya'i rim pa de dag dgrol bar bya ba'i cho ga'i rim pa bstan pa'i phyir/ cho ga 'dis kyang bzlas brjod byas sam/ sngar gsungs pa'i rim gyis phyag rgya chen po la sogs pa grub pa'i phyir bsgom pa byas nas/phyag rgya chen po la sogs pa bzhi ji lta ba bzhin du dgrol ba'i rim pa 'dis bya'o zhes gsungs te/ bzlas brjod byas sam zhes pa ni/ mtshan ma med pa kho nas bzlas brjod bya'o/ /sngar gsungs pa'i rim gyis zhes pa ni/ gong du bstan pa'i rim pa ste/ phyag rgya chen po la sogs bsgrub pa'i phyir zhes pa ni phyag rgya chen po dang dam tshig dang /chos dang las kyi phyag rgya sngar sgrub pa'i thabs bstan pa'o/ /phyag rgya chen po la sogs pa bzhi ji lta ba bzhin du dgrol zhes pa ni/ phyag rgya bzhi po dag sngar bsgoms pa ji lta ba bzhin du 'dzab stong khar yang dgrol bar bya'o//de'i don ni 'di lta ste/ mtshan ma med pa'i bzlas brjod 'dis bzlas brjod byas sam/ sngar gsungs pa'i rim gyis phyag rgya bzhi sgrub pa'i phyir ji lta ba bzhin bsgom par byas nas lus dub cing skyo'am/ las dang bya ba ched che ba bzhin la 'jug dgos par gyur te ting nge 'dzin gtong bar 'dod na phyag rgya bzhi la sogs pa ji ltar bsgoms pa de dag dgrol bar bya'o zhes bstan pa ste/de la rim pa ni 'di lta ste zhes pa ni/ phyag rgya dgrol ba'i rim pa ni/ 'og nas 'byung ba 'di ltar bya'o zhes pa'i don to//dang por re zhig rnal 'byor pas zhes pa ni sgrub pa po bdag nyid dag bzlas brjod la sogs pa la dmigs pa'i ting nge 'dzin las langs te zhes pa ni/ rang gang la dmigs pa'i ting nge 'dzin de las ldang bar byas pa'o/ /ji ltar bsams shing zhes pa ni ting nge 'dzin gyi rim pa gsal bar bsgoms pa dag go//spyan drangs pa'i rang gi lha zhes pa ni rang bzhin gyi gnas nas spyan drangs pa ste/ rang bzhin gyi gnas pas bstan pa la sogs pa'o/ /dran pa'i spyod yul tsam du byas te zhes pa ni/ bskyed pa dang spyan drang ba'i lha 'khor dang bcas pa de dag gsal bar snang ba'i skad cig ma'i sems kyis mngon du byas pa'o//legs par byin gyis brlab pa'i phyir/ de dag bdag la thugs nas dgongs shing byin gyis brlab par mdzad par bya ba'i phyir te/ yi ge brgya pa sngar gsungs pas gsol ba gdab pa'o//de ltar bya ba yang rgyud nyid las ji skad du/ nam phyag rgya'i byin gyi rlabs g.yol bar gyur tam zhes pa ni/ ting nge 'dzin bya ba la sems kyis mi 'jug par gyur pa'o/ /bdag nyid gtong bar 'dod dam zhes pa ni/rang lha'i ngo bor gnas pa'am/ rigs so so'i bzlas pa byed pa'i 'phro de 'jog par sems pa'o/ /brtan par bya ba'i phyir zhes pa ni/ rang la byin gyis brlab cing dngos grub mi yal bar bya'o/ /bskul bar bya'o zhes pa ni/ rang gi lha dpal rdo rje sems dpa' la sogs pa la bskul bar bya'o zhes rgyud nyid las gsungs pas ni/de dang rjes su mthun par bya ba'i phyir na 'dir yang yi ge brgya ba'i sngags brjod do/ /de nas ni bdag dang mi gnyis par gyur pa zhes pa ni/ gnyis su med par bsgoms pa'i lha de phyag rgya bzhi dang ldan par dam tshig sems dpa'i sku'o//phyag rgya bzhi rnams gang dang gang nas byung ba zhes pa ni/ phyag rgya bzhi dang ldan pa bsgom pa'i tshe/ de dag dang po ji ltar bcings pa'i rim pa'i gnas de dag slar dgrol ba ste/ dgrol ba'i snying po ni/ badzra muHzhes pas dgrol bar bya'o//sbyor ba 'dir dgrol bar bya ba'i phyag rgya zhes pa ni/ de kho na nyid bsdus pa'i rgyud 'dir dgrol bar bya ba'i phyag rgya ni bzhi po dag go/ /ji ltar srid pa bcings sam bsams te zhes pa ni/ phyag rgya bzhi po de dag bcing bar 'os pa ni bsam pa'o/ /dgrol ba'i bsam pas de'i sbyor ba btang la zhes pa ni/de ltar bsam pa dang bsgom pa yang phyag rgya de dag gang dang gang las byung ba dgrol bar bya ba'i bsam pas de dag bsgom pa dang bsam pa'i sbyor ba gtang ba'o/ /de bzhin du ji ltar bcings shing phyag rgya rnams so sor dgrol bar bya'o zhes pa ni/phyag rgya bzhi po 'di dag dang por ji ltar bcings pa bzhin du tha mar yang so sor dgrol bar bya'o zhes pa'o/ /de chos kyi phyag rgya 'byung ba'i gnas ni zhes pa ni/ dang po chos kyi phyag rgya gang nas byung ba'i gnas bshad pa ste/ rang gi lce la rdo rje rtse lnga pa gnas pa'o//zhes pa ni lce la rdo rje bsams pa'i bum pa la lha so so'i chos kyi yi ge badzra dz+nyA na/ zhes bya ba la sogs pa'i sngags bsams pa las dgrol lo/ /las kyi phyag rgya ni/ rdo rje khu tshur sems dpa' chen po'i phyag rgya'o zhes pa ni/ byang phyogs kyi sems dpa' chen po rdo rje khu tshur gyi phyag rgya ni//las kyi phyag rgya 'byung ba'i gnas de las dgrol lo/ /dam tshig gi phyag rgya thams cad ni rdo rje bcings pa las so zhes pa ni/ sor bsnol bstan pa dam tshig ste/ /zhes 'byung bas dam tshig gi phyag rgya'i gnas ni sor mo rtse gcig pa ste de las dgrol bar bya ba'o//phyag rgya chen po ni rdo rje la sogs pa dam tshig gi phyag rgya zla ba'i dkyil 'khor la gnas pa la'o zhes pa ni phyag rgya chen po 'byung ba'i gnas ni zla ba'i dkyil 'khor gyi steng na rdo rje rtse lnga pa gnas pa ste/ dam tshig gi phyag rgya chen po ni de las dgrol bar bya'o/ /rdo rje phyag rgya yang phyag rgya chen po sgrub pa'i snying po'i sgra las so zhes pa ni/dam tshig gi phyag rgyas rdo rje la sogs pa dang / thugs ye shes ni rdo rje dang tha mi dad cing chos mthun par gyur pas na rdo rje'i phyag rgya zhes bya ste/ dam tshig gi phyag rgya rdo rje la sogs pa 'byung ba'i gnas ni/ phyag rgya chen po bsgom pa'i so so'i snying po badzra satwa zhes bya ba dang badzra rat+na zhes bya ba'i sngags kyi sgra ste/de las dgrol bar bya'o/ /de yang bzlas pas so zhes pa ni/ lha so so'i snying po'i yi ge 'byung ba'i gnas kyang zla ba'i dkyil 'khor yin pas de las dgrol bar bya'o/ /de las bdag med par mos pa las so zhes pa ni/zla ba'i dkyil 'khor 'byung ba'i gnas kyang don dam par byang chub kyi sems te/ chos thams cad bdag med par rtogs pa las 'byung ba'i dgrol bar bya'o/ /de yang rdo rje dbab pa'i phyag rgya las so zhes pa ni don dam par byang chub kyi sems stong pa nyid du bsgoms pa de yang rdo rje dbab pa'i sngags dang /phyag rgya las 'byung ba de las dgrol bar bya'o/ /de yang rdo rje bcing ba dang dral ba'i phyag rgya las so zhes pa ni/ rdo rje dbab pa'i phyag rgya de yang rdo rje bcing pa dang / rdo rje dral ba'i sngags dang phyag rgya las 'byung bas na/de las dgrol bar bya'o/ /rdo rje dral ba'i phyag rgya yang rdo rje bcing ba las so zhes pa ni/ rdo rje dral ba'i sngags dang phyag rgya yang rdo rje bcing ba las byung bas de las dgrol bar bya'o/ /de yang rdo rje thal mo las so zhes pa ni rdo rje bcing ba de yang rdo rje thal mo las 'byung bas na de las dgrol bar bya'o//rdo rje thal mo yang rnam par smin pa'i lus su mos pa ste zhes pa ni/ rdo rje thal mo yang dang po rnam par smin pa'i lus tha mal pa las 'byung ba yin pas slar rnam par smin pa'i lus su mos par byas pa las dgrol bar bya'o//de ltar bcing ba'i phyag rgya dgrol ba'i rim gyis zhes pa ni gong du bstan pa'i tshul de ltar dang po ji ltar bcings pa'i phyag rgya rnams ni tshul de bzhin tha mar yang dgrol to/ /bdag dang mi gnyis par gyur pa'i dam tshig sems dpa' dang /ye shes sems dpar byin gyis brlabs pa btang ste zhes pa ni/ bdag nyid ltar gyur pa dang mdun du bsams pa'i lha'i ting nge 'dzin rnam pa gnyis kyang btang ste bdag nyid kyi lus tha mal pa 'ba' zhig tu gnas par bya'o/ /rdo rje snying po 'di brjod cing / /zhes pa ni de ltar byas ma thag tu 'og nas 'byung ba'i snying po/oM badzra rat+na a b+hi Shiny+tsa zhes bya ba'i sngags 'di brjod cing / rin chen gyi dam tshig gi phyag rgya zhes pa ni/ sems dpa' chen po rdo rje rin chen gyi phyag rgya rdo rje bcings pa las mthe bong gnyis gzhibs te/ bsgrengs nas rtse mo can du byas la de'i steng du mdzub mo gnyis phan tshun bsnol la rtse sprad de/rtse sbyar nas tshigs dang po bcag nas rin po che'i rtse mo 'dra bar bya'o zhes sngar bshad pa bcings la dpral bar gtugs te rdo rje khu tshur gyi mdzub mos mgo la phreng ba bcing ba'i tshul du bya'o/ /oM badzra rat+na a b+hi Shiny+tsa zhes pa ni dbang bskur zhing phreng ba bcing ba'i sngags so//sarba mu dra me tri zhes pa ni mgo la go cha bcing ba'i sngags so/ /snying po 'di brjod cing snga ma bzhin go cha bcing bar bya'o zhes pa ni/ ltag pa dang brang dang rgyu zhabs dang dpral ba dang / lte ba la sogs pa bgegs 'jug tu dogs pa'i gnas sam/tshigs mdo chen po drug tu mdud cing bsrung bar bya'o/ /go cha mtha' gnyis rnam pa gnyis kyi steng nas phyung dar sna 'phyang ba'i tshul du lag pa gnyis brkyang la brlab po zhes pa ni go cha'i phyag rgya de dgrol ba'i thabs so/ /rgol ba pa na re/dbang bskur ba dang / go cha'i bcing ba gnyis so sor mi ston na 'brel par ston pa ci'i phyir zhe na/ dbang bskur ba'i snying po dang go cha'i snying po gnyis rgyun gcig tu rgyud 'dir bshad de/ tha mi dad pa 'dra bar snang gi 'on kyang sbyor ba'i tshe 'di gnyis tha dad pa ji skad gsungs pa'i rim gyis rnam par sbyang bar bya zhes gsungs te/'di dag de kho na nyid bsdus pa las gsungs te/ tha mi dad pa ltar snang na yang de lta ma yin te/ gnyi ga la bya'o zhes gsungs la de ltar yin pa'i gtan tshigs kyang / 'di ltar theg pa chen po mngon par rtogs pa'i bye brag gi gzhung las bshad pa/phyag rgya thams cad dgrol nas su/ /bdag nyid mngon par dbang bskur la/ /mdzub mo'i rtse mo gnyis kyis ni/ /phreng ba bzhi'am yang na gsum/ /zhes gsungs te/ de'i don yang 'di lta ste/ phyag rgya bzhi po bsgoms pas thams cad snga ma bzhin du rang gi gnas rnams su rim par dgrol rdo rje rin chen gyi dam tshig gi phyag rgya bcings te bdag nyid la dbang bskur te/de nas rdo rje khu tshur gyi lag pa'i mdzub mo de nyid kyis go cha bgo zhing phreng ba bcing bar bya ste/ phreng ba bzhi'am yang na gsum//zhes pa ni/ phreng ba bcing ba de dag lan grangs kyis bsnan pa skad kyang gleng na/ nam lhar bsgom pa'i dus de'i tshe bya ba yin zhes bshad do/ /de'i rjes la go cha'i phyag rgya bcing ba zhig gi bgo ba yang de nyid las/ shes rab can gyis go cha 'ching / /bdag nyid mthu dang ldan par bya//phyag rgya thams cad brtan par bya/ /snying po yang ni 'di yis so/ /zhes gsungs so/ /de'i don yang 'di lta ste/ bdag nyid kyang go cha bcings la mthu dang ldan zhing / gzhan gyis glags mi rnyed pa dang phyag rgya thams cad brtan par bya'o zhes gsungs pas na/de gnyis kyang tha mi dad pa yang ma yin la 'dir phyogs gcig tu bstan pa la nyes pa'ang med par rig par bya'o/ /de nas thal mo gnyis mnyam par gdab pa'i sbyor ba las snying po badzra tu Sh+ya hoHzhes brjod pas mnyes par bya'o zhes pa ni 'di lta bu'i sngags dang phyag rgya 'dis ni lha thams cad dgyes pa bskyed par bya'o//de ltar bstan pa de las tshul mi mthun pa gzhan du 'dod pa yang yod pas de dag gi bye brag kyang 'dir bstan par bya ba'i phyir/ yang na phyag rgya thams cad dgrol ba'i dbang bskur ba'i mtha'i bar du byas nas/zhes bya ba la sogs pa gsungs te/ 'di ltar phyag rgya thams cad dgrol ba dang / dbang bskur ba dang de'i rjes la bya ste/ go cha'i phreng ba ni skabs de ru mi bcing bar dang po bdag bsrung ba'i bsams pa dang / ji ltar bcing ba dang bcings pa dgrol ba'i phyag rgya de dag bdag la brtan par yod pa'i bsam pa bskyed nas/yi ge brgya pa lan cig brjod la/ de'i 'og tu snga ma bzhin du phreng ba bcing ba dang / thal mo brdeg pa brdab cing sngags bzlas pas mnyes par gyur pa'i sbyor ba bya'o/ /rgol ba pa na re/ de ltar phyag rgya dgrol ba dang /dbang bskur ba la sogs pa'i rim pa de dag bya ci dgos/ ma byas kyang 'gal ba med do zhe na/ phyag rgya dgrol ba la sogs pa 'di dag thams cad kyi don yang rgyud las/ gzhung 'di las bstan par bya ste zhes bya ba la sogs pa gsungs te/ 'di dag ni rgyud kyi gtan tshigs bsnan te bstan par zad do//'di dag gi don ni sngar rgyas par bshad zin to/ /cho ga 'dis phyag rgya rnams dgrol ba dang zhes pa ni/ gong du bshad pa'i cho ga'i rim pas phyag rgya bzhi dang po bsgoms pa rnams tha ma dgrol ba'o/ /bcing ba dang zhes pa ni phyag rgya thams cad bcing ba'i rjes la dbang bskur ba dang go cha dang phreng ba bcing ba'o//mnyes par byas nas zhes pa ni/ thal mo rting pa brdab cing sngags brjod pa ste/ 'di ltar byas na bdag nyid lus dang ngag dang sems rdo rje lta bur bsgyur te cis kyang mi tshugs par 'gyur ro//yang na rdo rje sems dpas kyang / /rdo rje sems dpa' bde ba'i bdag /ji ltar 'dod pa bde ba'i bdag /bzlas brjod tsam gyis 'grub par 'gyur/ /phyag na rdo rje'i bka' bzhin no/ /zhes pa ni/ 'dis kyang phyag rgya dgrol ba dang dbang bskur ba dang phreng ba dang go cha'i bcing ba'i mjug bsdu ba'i tshe gang bstan par rig par bya ste/de'i don yang 'di lta ste/ bdag nyid lha gang yang rung ba'am/ rdo rje sems dpa'i ting nge 'dzin nam/ gang bsgrub pa de nyid gsal bar byas nas/ yi ge brgya pa'i sngags bzlas te/ 'di lta bu'i tshul du gnas na gang 'dod pa thams cad lhag par don du gnyer mi dgos te/gang bsgrub pa'i lha de'i sngags bzlas brjod byas pa tsam gyis de dang de 'grub par 'gyur ba ni/ dper na phyag na rdo rjes bka' stsol ba bzhin no zhes gsungs so/ /de nas de bzhin gshegs pa la sogs pa'i 'khor zhes pa ni/de ltar phyag rgya thams cad dkrol ba'i sbyor ba byas pa'i rjes la de bzhin gshegs pa dang / de bzhin gshegs pa'i rigs kyi 'khor ji snyed pa dang bcas pa spyan drangs pa rnams mdun du bsams pa yang / rjes su dran par bya zhes pa ni/skad cig gam thang cig gam/ yud tsam cig gis so so'i cha lugs gsal bar mdun du bzhugs par yid kyis dran par byas la/ de bzhin mchod pa gsang brjod pa/ /zhes pa ni/ rdo rje sems dpa' bsdus pa nyid/ /ces bya ba la sogs pa'i tshig dang sngags su ldan par brjod pa'o//gsang ba'i mchod pa bzhi dang zhes pa ni sgeg mo la sogs pa'i lha mo bzhi'i sngags dang phyag rgyas mchod pa'o/ /bdug pa la sogs pa zhes pa ni me tog ma la sogs pa'i phyir lha mo bzhi po rnams kyi las kyi phyag rgya dang sngags su ldan pas mchod pa ste/de dag gis rim par mchod cing mtshan brgya rtsa brgyad pa la sogs pas bstod de sgo gsum gyis mi gnyis pa'i tshul du 'dud pa'i sngags dang bcas pas kyang phyag 'tshal ba byas la/ bzlas pa dang bsgom pa ji tsam byas pa las byung ba'i dge ba'i rtsa ba de dag bar ma dor chud mi za bar bya ba'i phyir dge ba'i rtsa ba bsngo bar bya'o//de yang ji ltar bsngo bar bya zhe na/ bcom ldan 'das de bzhin gshegs pa rnams dge ba'i rtsa ba ji ltar bgyis pa 'dis/ bdag sangs rgyas su gyur nas sems can thams cad 'khor ba'i rgya mtsho las bsgral bar bya'o zhes bya ba la sogs pa gsungs pa de bzhin du bsngo bar bya ste/bla na med pa yang dag par rdzogs pa'i sangs rgyas kyi go 'phang de ma thob kyi bar du'ang zhes bsgrub par bya ba'i yul 'di myur du thob par bya ba yin gyis kyang /gal te myur du thob par ma gyur pa'i bar gyi skye ba der yang de dang rjes su mthun pa'i skye ba len pa las ma gtogs pa'i skye ba gzhan len par ma gyur cig pa'i don to/ /de la lus dang zhes pa ni/ dbang po ma tshang ba la sogs mi khom pa rnams dang bral ba'i lus so//longs spyod dang zhes pa ni/ dbul por ma gyur pa ste/ 'khor los sgyur ba'am/ khyim bdag shing sA la chen po lta bu'i longs spyod phun sum tshogs pa'o/ /rigs dang zhes pa ni/ rigs ngan par mi 'dzin pa ste/ bram ze'i rigs dang /rgyal rigs dang / rje'u rigs so/ /rus dang zhes pa ni/ rigs de dag gi nang na yang dam par gyur pa'i rus 'dzin pa ste/ phun sum tshogs pa zhes pa ni/ de ltar bstan pa de dag dang ldan pa ni phun sum tshogs pa ste/ de dag dang ldan par gyur cig ces pa'am/ de las gzhan du'ang ci nus pa las zhes pa ni/ de las gzhan pa'i smon pa'i gnas yid la brnags pa dag yod na yang de grub par gyur cig smon lam gdab bo/ /de nas ji ltar byas pa'i dge ba'i rtsa ba 'di la 'khor gsum yongs su dag par bya ba'i phyir zhes pa ni/ de ltar bstan pa'i dge ba'i rtsa ba 'di yang dmigs pa can du bsngos na ni/dug dang 'dres pa'i zas lta bur gyur pas 'jig rten 'di'i 'dod pa'i bde ba tsam grub nas/ zad par gyur du 'ongs pas de dag shes rab kyi pha rol tu phyin pa las gsungs pa de bzhin du bdag dang gzhan dang /brnag cing brjod par bya ba'i dge ba'i rtsa ba bsngo ba de dag kyang tshig tu brjod pa'i tha snyad du yod du zad kyi don dam par rang bzhin med par nam mkha' lta bu'o zhes bsams nas rnam par mi rtog pa'i ting nge 'dzin stong pa chen po'i byang chub kyi sems rin po che gsal bar dran par byas la bdag brgyan te/ting nge 'dzin las langs la zhes pa ni/ de nas stong pa chen po'i ting nge 'dzin gyi ngang la gnas pa de las shugs kyis langs la/ sngar spyan drangs pa'i bcom ldan 'das de bzhin gshegs pa 'khor byang chub sems dpa' dang bcas pa rnams sngar dang po'i gnas lhun gyis grub pa'i pho brang du gshegs su gsol bar bya ba'i phyir/rdo rje sems dpa'i dam tshig gi phyag rgya sngar gsungs pa bcings nas/ kha gyen du bstan te dgrol la/ oM kro d+ha badzra satwa ar+tha sid+d+hi ka ra ta d+ya thA/ A gats+tshan+tu bud+d+ha bi Sha yaM pu narga ma na ya tu/oM badzra sarba muHzhes brjod de de'i don yang 'di lta ste/ khyed kyis sems can don kun mdzad/ /dngos grub tshul bzhin stsal lags kyis/ /sangs rgyas yul du gshegs su gsol/ /de nas slar yang gshegs par ro//zhes gsungs pa yin no/ /de ltar byas na zhes pa ni/ tshigs bcad dang sngags kyi don de lta bu de brjod na/ de bzhin gshegs pa thams cad dang / de bzhin gshegs pa'i rigs dpal rdo rje sems dpa' 'khor dang bcas pa gzhal yas khang bkod pa ji ltar bsams pa dang bcas pa rnams slar lhun gyis grub pa'i gnas su gshegs par 'gyur ro zhes bstan to//rdo rje rigs la sogs pa la bzlas brjod byed pa rnams kyi phyag rgya dgrol ba'i rim pa dang lha rnams gshegs su gsol ba yang 'di nyid de zhes pa ni de dag kyang phul du sngar bstan pa'i 'di kho nar zad pas des bya'o zhes bstan pa'o//de dag gi khyad par gyi cho ga zhes pa ni/ rdo rje rigs kyi phyag rgya dgrol ba la sogs pa de dag gi khyad par du bya ba'i cho ga ni/ rdo rje rigs kyi rnal 'byor byed pa rnams kyis de kho na nyid bsdus pa'i rgyud 'di las rig par bya'o zhes bstan to//rigs bzhi po rnams kyi phyag rgya dgrol ba dang / dbang bskur ba dang / go cha bcing ba dang / grub pa'i lha slar gshegs su gsol ba'i sbyor ba bstan pa bshad zin to/ /de ltar phyag rgya bkrol zhing lha slar gshegs su gsol nas de'i 'og tu ji lta bu dag la gnas par bstan pa'am/ji lta bu'i bya ba dag brtsam par bya snyam pa rnams kyi don du/ de nas bdag dang bdag gi gnas dang khang pa dang yul la sogs pa'i dngos po ji ltar gnas pa rnams sgyu ma la sogs par snang zhing snang bar yang dag par brtags te zhes bya ba la sogs pa gsungs te/ji ltar sgyu ma'i sogs pa ni gzhi med pa las rgyu rkyen gyis rkyen tsam tshogs pa'i dbang gis tha dad pa'i rnam par yang snang la so so'i don byed nus par ltar yang ston mod kyi/'on kyang rigs pa mi bzod cing gang gis ngo bor grub pa med pa bzhin du/ bdag dang bdag gi gnas dang longs spyod 'di dag kyang thog ma nyid nas dge ba'i bag chags blo la gnas pa'i dbang gis gnas mtho dman la sogs par rtog pas brtags pa'i rigs mthun pa'i tshogs pa'i dbang gis 'di lta bu'i rnam par snang bar zad kyi/'di dag kyang so sor rtog pa'i shes rab kyis brtags na/ gang gi ngo bor grub pa yang med de/ sgyu ma dang smig rgyu la sogs pa'i rnam pa lta bu'o snyam du brtag par bya'o//rang gi rigs dang mthun pa'i srung ba'i sbyor bas bzlas brjod la sogs pa'i tshe/ dgos pa'i yo byad rnams bsrung ba nan tan bya ste zhes pa ni/ rang gang bsgom zhing sgrub par byed pa'i lha de dang mthun pa'i rigs kyi bsrung bas bdag nyid bzlas brjod dang ting nge 'dzin byed pa'i dus na/rang gi lus dang gnas dang yo byad la sogs pa bsrung bar bya'o/ /langs la rtag tu rang gi lha'i dam tshig sems dpa'i nga rgyal nyid du gnas par bya'o zhes pa ni/ ting nge 'dzin las langs nas kyang spyod lam rnam bzhi rang gi lha'i ting nge 'dzin gyi ngang las gnas pa las mi nyams par bya'o//rgol ba pa na re/ ci phyag rgya thams cad bkrol te lha'i sbyor ba btang ba bshad bzhin du 'dir yang 'di ltar ston pa 'gal lo zhe na/ smras pa/ yang kha cig na re/ phyag rgya bkrol bar 'dod pa'i dus na dang po'i ting nge 'dzin ji lta ba de slar gsal bar yud tsam gyis dran par byas la/gdod phyag rgya dgrol bar bya ba yin zhes gleng ba yod na/ spyir dngos grub yal bar mi gtong ba'i phyir phyag rgya dgrol bar bstan par zad kyi/ phyag rgya bkrol ba'i 'og tu yang spyod lam rnam bzhi dus thams cad du lha'i rang bzhin du gnas pa'i rnal 'byor las mi nyams par bya ba ni rigs pa ste/'di la 'gal ba med do/ /skabs skabs su yang zab cing rgya che ba'i mdo sde dang zhes pa ni/ shes rab kyi pha rol tu phyin pa'i mdo'am/ sdong pos brgyan pa'i mdo'am/ ting nge 'dzin gyi rgyal po lta bu'o//gsang sngags spyad pa'i tshul du bklag /ces pa ni/ theg pa chen po mngon par rtogs pa'i rgyud dam/ 'jig rten gsum las rnam par rgyal ba'i rtog pa chen po lta bu ste de dag bklag par bya'o/ /sogs kyi sgras ni/ sAts+tsha gdab pa dang bskor ba bya ba la sogs pa lus ngag gi dge ba'i las gzhan dag bsdu bar bya'o//de ltar gsung rab dang / sngags kyi tshul bklag pa la sogs pa yang lha la sogs pa la chos kyi sbyin par bsams pa'i sems kyis bya'o zhes te/ lha'i 'gro ba dang sogs kyis klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po la sogs pa mi dang mi ma yin pa la sogs pa ji snyed pa'i rnam pa rnams la gang dag de bzhin gshegs pa'i zhal mthong zhing bslab pa'i sdom pa mnos pa dang / gang dag de bzhin gshegs pa'i zhal ma mthong na'ang /chos la dga' ba'i dad pa yod pa dag la/ chos kyi sbyin pas sim par bya ba dang / gang dag nag po'i rigs su gyur pa chos la ma dad pa dag la yang mdo sde dang / gsang sngags kyi tshul bklags pas bden pa'i byin gyi rlabs bya ste/gdug pa gzhil cing sbyor ba gzhom pa'i phyir/ skabs skabs su zhes pa ni/ phyag rgya bkrol nas kyang bzlas brjod nus nus su byas la/ bzlas brjod bya ba gzhan gyi skabs su'ang / 'di lta bu dag bya zhes pa'i don to/ /mi 'dod pas ni bya ba gzhan nyung du bya ste zhes pa ni/bklag pa dang 'don pa dang sAts+tsha gdab pa la mi mos pa'am/ de dag mi lcogs pa rnams kyis ni/ rtag par rang gi lha'i rnal 'byor kho na la gnas par bya'o/ /zas za ba'i tshe na yang rigs pa las 'byung ba'i kha zas ma smad cing mi 'gal ba blangs la zhes pa ni/rnal 'byor pas za ba'i rigs pa'i kha zas kyang rgyud las dgag pa dang / smad pa dang dam tshig dang 'gal ba'i zas mi gnang bar gsungs pa'i rigs la ma gtogs pa'i kha zas dang btung ba'i rigs pa longs spyod par gnang ba rnams blangs pa/kha zas 'di dag nyes pa'i spyon dag cing lus sra ba dang brtan pa dang brtas par gyur nas/ de la brten te dge ba'i tshogs yongs su 'phel ba'i yon tan phun sum tshogs pa'i yon tan dang ldan par byed pa'i nus pa grub par gyur cig pa'i bsam pa dang / bcas pa'i tshig tu'ang brjod cing za ba'i dus na/ gang gi lce la rdo rje rtse lnga pa bsams nas/ sarba ka ri sarba sid+d+hi zhes brjod pa ni/ nyes pa thams cad dag par bsam mo/ /sarba sid+d+hi zhes brjod pas ni ji ltar 'dod pa'i yon tan thams cad grub par bsams la bza' bar bya'o//rnal 'byor gyi rgyud gzhan las ni/ kha zas za ba'i rnal 'byor 'di ltar gsungs te/ gang zhe na/ thams cad nam mkha'i mtshan nyid de/ /nam mkha' la yang mtshan nyid med/ /nam mkha' dang mnyam rnal 'byor pas/ /thams cad bza' ba nyid du bya'o//zhes bya ba la sogs pa ste/ thams cad nam mkha'i mtshan nyid de/ /zhes pa ni/ phyi nang gi chos thams cad do/ /nam mkha' la yang mtshan nyid med/ /ces pa ni/ nam mkha'i mtshan nyid dmigs su med pa bzhin du/ chos de dag kyang rnam par gzhigs na dmigs su med de nam mkha' dang tha mi dad par bstan pa'o//nam mkha' dang mnyam rnal 'byor pas/ /zhes pa ni/ chos thams cad nam mkha' lta bu bas na/ rnal 'byor pa bdag kyang nam mkha' dang mnyam pa yin no zhe'am/ rnal 'byor don dam pa yid la byed pa yang nam mkha' dang mnyam zhing yid la dbyer med pa yin no zhes bstan pa'o//thams cad bza' ba nyid du bya/ /zhes pa ni/ stong pa nyid kyi rnal 'byor la gnas pas kha zas la yang rigs kyi rtog pa mi skye bar bza' bar bya'o zhes pa'o/ /thams cad nam mkha' sbyor ba yis//zhes pa ni/ chos thams cad nam mkha' lta bur rtogs pa'i ting nge 'dzin gyi sbyor ba la gnas pa'o/ /thams cad nam mkha' zhes smra zhing / yid la ji ltar bsam pa bzhin du yang brjod par bya'o zhes bstan pa'o/ /rdo rje phyag rgya nyid kyis gdab//ces pa ni ting nge 'dzin de lta bu la gnas pa ni rdo rje'i phyag rgya zhes bya ste/ kha zas kyi rnam pa yang de lta bu'i ngo bor gnas la bza' bar bya'o zhes bstan to/ /'dod pa kun gyi longs spyod rnams/ /zhes pa ni/ sems can rnams kyi 'dod pa ni gzugs sgra la sogs pa 'dod pa lnga'i yul yid du 'ong ba dang 'dra bar/rnal 'byor gyi 'dod pa ni byang chub kyi sems de rtogs pa las 'byung ba'i longs spyod ni/ sgeg mo la sogs pa'i lha mo rnams so/ /ji ltar 'dod par longs spyod cing / /zhes pa ni byang chub sems ji lta ba'i ngang la gnas shing /lha mo de dag gi cha lugs la ji tsam 'dod par spyod pa'i ting nge 'dzin la gnas pa'o/ /thams cad nam mkhar sbyor ba yis/ /zhes pa de yang dngos po can du snang ba'am grub pa ma yin/ byang chub sems kyi rang bzhin du snang bar rig par bya'o//dngos grub thams cad thob par 'gyur/ /zhes pa ni/ dngos por spyad pas 'ching ba yin/ dngos po med par rig pa'i ting nge 'dzin gyi spyod pas ni/ dngos po thams cad thob pa'i rgyur 'gyur ro/ /zhes bstan pa'o/ /de ltar mngon par bsngags pa dang / / zhes pa ni/ sngar bstan pa'i sngags rnam pa gnyis kyis btab pa'o/ /mtshan ma med pa'i rnal 'byor gyis/ /zhes pa ni/ 'dir bstan pa 'di kho na'o/ /mngon par 'dus byas pa'i kha zas zhes pa ni/ de lta bu'i cho ga gnyis kyi sbyor ba dang ldan par byas pa ni/legs par byas te mngon par 'dus byas pa'i kha zas so/ /de bzhin gshegs pa rnams dang zhes pa ni/ rtag pa la sogs pa'o/ /de'i rigs la sogs par gtogs la zhes pa ni/ rdo rje sems dpa' la sogs pa dang / de'i dkyil 'khor du 'dus so 'tshal gyi lha rnams so//ci 'byor pa yi phud gsol te/ zhes pa bza' ba dang btung ba ji tsam yod pa'i phud dpags la de dag la dbul lo/ /sems can rnams la yang ci nus par stsol la zhes pa ni/ de'i 'og tu 'byung ba las skyes pa'i sems can rnams la yang so so'i bsngo bas sbyin par bya'o//rang gi lha yi rnal 'byor ram/ /zhes pa ni/ rang gang la mos shing sgrub pa de'i ting nge 'dzin to/ /de'i bdag po'i rnal 'byor du gnas te zhes pa ni/ yang na rigs kyi bdag po'i ting nge 'dzin du gnas par bya'o/ / rang gi lha'am zhes pa ni/ rang gi bsgrub par bya ba'i lha gang yin pa de'o/ /dkon mchog gsum la zhes pa ni/ sangs rgyas dang chos dang dge 'dun te/ de la sangs rgyas ni/ chos [(]gyi [,]kyi [)]sku dang / longs spyod rdzogs pa'i sku dang / sprul pa'i skus bsdus pa'o/ / chos ni lung dang rigs pa ste rgyu'i chos dang / 'bras bu'i chos dang / lam gyi chos dang / bstan pa'i chos te/ lung dang rigs pas bsdus pa'o/ /dge 'dun ni nyan thos dang / rang sangs rgyas dang / byang chub sems dpa' ste/ slob pa dang mi slob pa dang /phyir ldog pa dang phyir mi ldog pas bsdus pa'o/ /mchod pa bya'o snyam du bsems te zhes pa ni/ de ltar bstan pa ni/ lha dang dkon mchog gsum po de dag gzhan yod pa las bdag gi kha zas zos pas mnyes par gyur par bstan pa ma yin te/ bdag nyid lha'i rnal 'byor du gnas pa kho na dkon mchog gsum gyi rang bzhin bas na gong du yang thams cad mtshan ma med par bsgom pa'i dus na ni/nam mkha'i mtshan nyid du mnyam la/ mtshan ma'i rnam par bsgoms na ni/ sku gsung thugs dang lus ngag yid gsum mnyam par gsungs pa'i don gyis bdag nyid kho na dkon mchog gsum gyi rang bzhin te/de bas na bdag gis kha zas kyi bya ba byas pas rang gi lha dang dkon mchog gsum po yang mnyes par gyur pas na 'di ltar bstan to/ /rigs pa dang ran par bza'o zhes pa ni/ thabs legs pa dang /bkres 'drangs kyi tshod zin par 'tsham tshad du bza' bar bya'o/ /de ltar byas na lha sim par byas na lha sim par byas pa'i don chen po gzhan yang byas par 'gyur ro zhes pa ni/ de ltar kha zas kyi bya ba byas pa'i yon tan bstan pa'o/ /de nas sngar bshad pa'i yid la bya ba yid kyi ngal bso ste zhes pa ni/de ltar kha zas zos pa'i 'og tu yang / mdo sde dang sngags kyi tshig bklag pa dang / sAts+tsha gdab pa la sogs pa'i las kyis cung zad tsam ngal bso bar bya'o/ /nyi ma gung dang phyed kyi dus na yang / /zhes pa ni/ de ltar ngal bso nas yang dus 'di dag la bzlas brjod bya ba la mos par bya ste mi mthun pa'i phyogs su gyur pa nyid dang 'du 'dzi dang rnam par rtog pa ngan pa thams cad spangs la nyes pa dang bral ba'i rnal 'byor gyis bzlas brjod bya'o//phyag rgya thams cad bkrol ba'i 'og tu bya ba bstan pa bshad zin to//snying po dang phyag rgya dang gsang sngags dang / rig sngags rnam pa thams cad kyi bzlas brjod bstan pa bsdus pa bshad pa'o/ /da ni sngon du bsnyen pa bya ba'i cho ga la sogs pa'i rim pa bstan pa'i phyir na/ de ltar na dkyil 'khor du zhugs pa'i tshe nyid na/ye shes dbab pa'i mngon rtags kyi mtshan nyid thob kyang / dngos grub ma thob pa'i rnal 'byor pas cho ga 'di re zhig de bzhin gshegs pa'i snying po'am/ zhes bya ba la sogs pa gsungs te/ de ltar dkyil 'khor du zhugs pa'i tshe zhes pa ni/sngar bstan pa'i bsgom pa dang / bzlas pa la sogs pa'i cho gas rdo rje dbyings kyi dkyil 'khor ram/ khams gsum rnam par rgyal ba'i dkyil 'khor ram/ 'gro ba 'dul ba'i dkyil 'khor ram/ don thams cad grub pa'i dkyil 'khor gang yang rung ba bris nas/der zhugs par gyur pa'i tshe ye shes dbab pa'i mngon rtags kyi mtshan nyid thob kyang dngos grub ma thob pa'i rnal 'byor pas zhes pa ltar/ dkyil 'khor bris pa der zhugs pa'i dus na/ rgyud las gsungs pa'i mtshan nyid dang ldan pa'i slob ma la/ slob dpon mthu dang byin rlabs dam pa dang ldan pas ye shes dbab par bya/ ye shes dbab pa la sogs pa'i mtshan ma dang rtags rgyud las ji skad gsungs pa bzhin du 'byung bar gyur du zin kyang / dngos grub ma thob tu dogs na rnal 'byor pa des 'og nas 'byung ba 'di ltar bsnyen par bya'o//cho ga 'dis zhes pa ni/ 'og nas 'byung ba'i rim pa'i cho ga 'di re zhig de bzhin gshegs pa'i snying po'am zhes pa ni/ bcom ldan 'das rtag pa nyid dam mi bskyod pa la sogs pa gzhan rnams kyi snying po brjod pa'o/ /dpal rdo rje sems dpa' la sogs pa zhes pa ni/ye shes kyi sems dpa' chen po bcu drug po rnams so/ /gang yang rung ba'i snying po zhes pa ni/ sems dpa' chen po de rnams las kyang gang yang rung ba cig gi snying po brjod pa'am/ gang mnyes par bya bar bsam pa de nyid ces pa ni/rang gang la mos shing grub pa'i lha de nyid kyi snying po brjod pa'o/ /de nyid nyin re snga dro dang gung gi dus dang / phyi dro dang nam phyed kyi dus su zhes pa ni/ lha de rnams la gang yang rung ba'i snying po de nyid mtshan gyi dus bzhi la brjod par bya ste/ dus re re yang zhes pa ni/grangs kyi tshad ni dus bzhi pa'i dus re re la yang brgya rtsa brgyad du bzlas par bya'o/ /dus bzhir ji skad gsungs pa'i sngon du bsnyen pa rdzogs kyi bar du bsnyen par bya'o zhes pa ni/ rgyud las ji skad gsungs pa dang mthun par dus bzhir bsnyen pa ji tsam bya bar 'dod pa de tsam par sngar bya ba'o//phyi ma'i yang phyi ma'i rgyud las/ zhes bya ba la sogs ni de ltar bya ba yang rang bzor ma yin gyi/ rgyud las 'byung ngo zhes gtan tshigs kyi khungs bstan pa'o/ /ji ltar 'dod pa zhes pa ni/ bya ba'i rgyud las phyogs gcig tu brtsad pa'i las ma gtogs pa gzhan ma gnang ba lta bu ma yin gyi/'dir ni ji ltar 'dod pa bzhin du byas kyang nyes pa med par bstan pa'o/ /rdo rje tshig gis bzlas brjod byas na/ /zhes pa ni/ bzlas brjod kyi bye brag mang du bstan pa dag las skabs 'dir rdo rje'i tshig gis bzlas brjod byas na/ dngos grub myur du thob par rgyud las gsungs so//de ltar sngon du bsnyen pa byas nas zhes pa ni/ de ltar sngon du bsnyen pa byas nas dngos grub 'dod pa des sbyor ba gzhan yang bya dgos par bstan te/ snying po rnams gang yang rung ba bzlas pa las 'byung ba zhes pa ni/ de bzhin gshegs pa'am/sems dpa' chen po'am rang gang la mos pa'i snying po gang yang rung ba brjod par bya'o zhes bstan pa bzhin du/ bzlas pa byas pa las 'byung ba dngos grub kyi rnam pa'am/ las bzhi'i dngos grub po/ /mchog la sogs pa'i dngos grub ces pa ni/rab dang 'bring dang tha ma gsum mo/ /las rnams byed par 'dod pa zhes pa ni/ las bzhi ste/ gzhan gyi rgyud zhi bar bya ba dang / dpal dang bsod nams rgyas par bya ba dang / pha rol po rang dbang med par bdag gi dbang du bya ba dang / mngon spyod kyis gtan spong ba'i las grub par 'dod pa'i rnal 'byor ba'o//rang gi lha'i ri mo'i gzugs kyi spyan sngar zhes pa ni las dang dngos grub 'dod pa'i rnal 'byor pa des sngar dus bzhir bzlas pa byas nas/ yang rang gi lha'i gzugs bris pa'i mdun du 'dug ste/ 'og nas 'byung ba'i cho ga'i rim pas sngon du bsnyen pa byas nas/ri mo'i gzugs de nyid kyi spyan sngar las dang dngos grub gang 'dod pa de ji lta ba bzhin du sgrub bo/ /re zhig dngos grub mchog grub par 'dod pas zhes pa dngos grub rnam pa gsum dang las rnam pa bzhi sgrub par bstan pa'i nang nas re zhig ces pa ni/dang por zhes pa'i don te/ re zhig dang por dngos grub mchog grub par 'dod pas rang gi lha'i ri mo'i gzugs kyi spyan sngar snga ma bzhin du zhes pa ni/ bzlas pa snga ma bzhin du bstan par bya ba ste/ dus bzhir re re la yang brgya rtsa brgyad brgya rtsa brgyad kyi grangs su zla ba bzhi bzlas brjod bya'o//de nas nyi ma bzang po la rab tu shis shing / dben pa'i phyogs su rigs dang mthun par gnas pa la sogs pa bsrung bar bya ste zhes pa ni/ de ltar bsnyen pa byas nas/ bsnyen pa rdzogs par byas pa'i 'og tu/ dus dang tshes grangs dang gza' dang skar ma bzang po la sgrub pa'i gnas dur khrod dang dman pa la sogs pa ma yin pa/ rab tu bkra shis par gyur pa'i rtags dang ldan pa/ 'du 'dzi'i rnam pa las dben par gyur pa'i phyogs su rang gi rigs gang yin pa dang mthun pa'i sngags dang phyag rgya dang bdag dang gnas dang yo byad la sogs pa bsrung bar byas te/de'i gang bsrung bar 'dod pa'i dkyil 'khor bris nas sngar bshad pa'i ting nge 'dzin gyi rim pas rang gi lha'i dam tshig sems dpa'i dbang du grub par byas nas mi gnyis par bsgoms pa la sngar bshad pa bzhin du mchod pa la sogs pa legs par byas te/de bzhin du rang gi rigs dang rjes su mthun pa'i zhes pa rang gi rigs kyi lha'i sku gsung thugs dang rang gi lus ngag yid gsum dbyer med par bsgom pa dang / lta ba rnam pa bzhi sngar bshad pa dang rjes su mthun par lta ba'i sbyor ba gsal bar byas/de 'dod pa bsngags pa byas la zhes pa ni dngos grub gang 'dod pa de myur du grub par gyur cig ces gsol ba dang / smon lam btab pa'o/ /srod kyi dus nas brtsam zhes pa ni/ de nas srod kyi dus nas bzlas brjod la bzung ste/mtshan mo de la rtag par yang dang yang du sems rtse gcig par bzlas brjod bya zhing / ji ltar 'dod pa'i dngos grub grub par gyur par rnam par brtag cing bzlas pa brtsam mo/ /de nas nang par zhes pa ni/ de ltar byas ma thag tu nam langs pa dang /de bzhin gshegs pa'am/ de'i rigs kyi sems dpa' dang / lha gang la mos pa'i dngos grub mchog grub par 'dod pa de thob par 'gyur ro/ /ji skad du phyi ma'i yang phyi ma'i rgyud las/ zhes bya ba la sogs pas ni/ de ltar bya bar rgyud nyid las gsungs pa'i gtan tshigs bstan pa'o//rang gi rigs kyi dam tshig gi phyag rgya zhes pa ni/ rang gang la mos shing bsgrub pa'i lha de'i dam tshig gi phyag rgya'o/ /ji ltar 'dod pa'i ting nge 'dzin/ /zhes pa ni/ bskyed pa dang / byin gyis brlab pa dang / dbang bskur ba dang / mchod pa dang phyag rgya rnam pa bzhi'i ngang la gnas par bya ba'i cha lugs gsal bar yid la 'dzin pa ni ting nge 'dzin to//las rnams sgrub pa zhes pa ni/ 'phags pa mchod pa dang sems can gyi don bya ba'i thabs de las rnam pa bzhi'o/ /rim pa 'di thams cad la sbyar bar bya'o zhes pa ni/sngar bya ba'i bzlas pa'i cho ga de ni las dang bya ba 'di dag grub par byed na de dag la yang de bzhin du sbyar bar bya dgos par bstan pa'o/ /khyad par du rang gi rigs kyi dam tshig gi phyag rgya sgrub pa la zhes pa ni/ 'di dag bya ba la gong ma las khyad par du bstan pa ni/rang gi rigs kyi lha gang yin pa'i dam tshig gi phyag rgya sgrub pa la/ snga ma bzhin du dus bzhir bsnyen pa byas nas snga ma bzhin du yang rang gi lha'i ri mo'i gzugs byas pa mdun du byas pa'i spyan sngar de bzhin gshegs pa'i rigs kyi rdo rje sems ma'i phyag rgya sngar bstan pa bcings te/phyag rgya mi dgrol bar sngar bstan pa de bzhin du dus bzhir bzlas brjod bya ba'i sbyor bas rang gi lha'i snying po grangs lan 'bum bzlas so/ /de nas tha mar zhes pa de ltar bsnyen pa byas zin nas kyang ri mo'i gzugs de'i spyan sngar rdo rje sems ma'i phyag rgya de nyid bcings te/mtshan gcig la rtag par thog thag bzlas brjod bya'o/ /de ltar bzlas brjod byas pa na yang / phyag rgya bcing ba la yun ring du gnas pas sems skyo bar gyur na/ skyo ba bsal ba'i phyir skabs su phyag rgya bkrol te gnas nas nam skyo ba sangs sam/dub pa brtas pa dang yang slar bcing bar bya'o/ /de ltar bzlas brjod byed pa la gal te zhes pa ni/ de ltar yun ring por rtse gcig tu sgrub ste/ bzlas brjod byed pa las sems ma rdo rje ma'i phyag rgya spyi bor bcings te 'bar bar mthong na de'i tshe phyag rgya bcings pa las 'phar bar gyur te/de ltar 'phar ba dang phyag rgya bcings nas stegs byas pa tsam gyis thogs pa med par nam mkha' la 'gro bar nus par 'gyur ro/ /de ste rab tu g.yo zhes pa ni/ sems ma rdo rje ma'i phyag rgya de smin mtshams su bcings nas bzlas brjod byed pa las g.yo bar gyur par mthong na/de ltar g.yo ba de'i phyag rgya de bcings pa tsam gyis bdag nyid gang 'dod pa'i gzugs su gyur cing de lta bur gzhan la ston nus par 'gyur ro/ /de ste snying ga'i phyogs su bzung ste bzlas brjod byed pa las zhes pa ni/ sems ma rdo rje ma'i phyag rgya de snying ga'i phyogs su bzung nas bzlas brjod byed pa las gal te steng du 'bar na/de'i tshe phyag rgya bcings pas mi snang ba'i dngos grub grub ste/ gzhan gyis mi mthong bar byed nus par 'gyur ro/ /des der sgra byung na/ rdo rje sems ma'i phyag rgya bcings pa de las sgra gang yang rung ba dag grag par 'gyur na/rdo rje dbyings su gtogs pa'i de bzhin gshegs pa'i rigs kyi lha thams cad so so'i dam tshig gi phyag rgya gang yang rung ba'am tshang bar bcings la rang rang gi snying po dang ldan par brjod na/ las rnam pa bzhi'i bye brag gang 'dod pa de las so sor gzhung las ji skad gsungs pa bzhin du 'grub cing byed nus par 'gyur ro//ji skad du yang / de nas phyag rgya sgrub pa des/ /zhes bya ba la sogs pas ni/ rgyud las gsungs pa'i gtan tshigs bstan pa'o/ /ji ltar 'dod pa byed cing zhes pa ni/dka' thub la sogs pa'i bya ba bkag ste/ lus mi gdung bar ji ltar bde bar gnas nas bya bar bstan pa'o/ /sngar bzlas brjod bya ba'i thabs bstan pa dang / rang gi rigs kyi dam tshig gi phyag rgya dang / ting nge 'dzin dang las rnam bzhi gang 'dod pa bsgrub pa'i thabs bshad zin to//da ni tshad med pa bzhi bsgrub par bya ba'i thabs bstan par bya ba'i phyir na/ de nas ting nge 'dzin bsgrub par 'dod na zhes bya ba la sogs pa gsungs te/ tshad med pa bzhi'i ting nge 'dzin gang yang rung ba de bsgrub par 'dod na/ rdo rje phra mo'i ting nge 'dzin la sogs pa bsgom pa goms par byas nas sems las su rung bar gyur pa dang /de nas rang gi lha gang yin pa'i snying po bzlas brjod bya'o/ /ji ltar goms par bya ba'i ting nge 'dzin grub par 'dod pa'i khyad par zhes pa ni/ byams pa la sogs pa tshad med pa bzhi'i ting nge 'dzin gang goms pa de 'grub par 'dod pa'i khyad par bshad par bya'o zhes pa'o//de la chos kyi dkyil 'khor du gsungs pa zhes pa ni/ chos kyi dkyil 'khor gyi skabs nas/ byams pa la sogs tshad med pa bzhi ting nge 'dzin bstan pa rnams las/ gang yang rung ba'i ting nge 'dzin thob par bya ba'i phyir/rang gi snying po bzlas brjod byed par 'dod pa'i rnal 'byor pa des dang por re zhig rdo rje phra mo'i ting nge 'dzin gyis sems sbyang ba la sogs pa sngon du bya ba'i las rnams byas nas/ sems khugs par gyur pa dang / byams pa la sogs pa tshad med pa bzhi'i ting nge 'dzin gang bsgrub par 'dod pa de mngon du gsal bar byas nas/rang gang bsgom pa'i lha'i snying po zla ba bzhir dus bzhir sngar bstan pa de bzhin du bzlas brjod bya'o/ /tha mar ting nge 'dzin de nyid la mnyam par gzhag pa de ltar/ sngar bzlas brjod byas zin pa dang / de nas byams pa la sogs pa'i ting nge 'dzin bzhi gang bsgrub par 'dod pa/ de'i ting nge 'dzin la mnyam par gzhag nas/ ting nge 'dzin gang la mnyam par gzhag pa de snying po mtshan gcig thog thag tu bzlas brjod bya zhing 'dug go//de nas nang par ji ltar 'dod pa'i ting nge 'dzin zhes pa ni/ de ltar mtshan gcig rtag par thog thag bzlas brjod byas nas/ mtshan mo de zad de nam langs pa na gang 'dod pa'i ting nge 'dzin de grub par 'gyur ro/ /ji skad du de nas ting nge 'dzin bsgrub par 'dod na zhes bya ba la sogs pas ni/sgrub pa de dag rgyud nyid las gsungs pa'i gtan tshigs bstan par shes par bya'o/ /bsrung ba dang dbab pa dang / las kyi bye brag 'di lta ste/ /zhes pa ni/ don 'di dag bsgrub par bya ba bstan te/ de bsrung ba ni skyes pa dang bud med la sogs pa bsrung ba'o//dbab pa ni mi la sogs pa dang mi ma yin pa la phan gdags pa'i phyir dbab pa dang / ku rer dbab pa'o/ /las kyi bye brag ni sgyu ma sgrub pa dang / dbang du bya ba la sogs pa'o/ /snga ma bzhin du zla ba gcig tu yang zhes pa ni/ snga ma dus bzhir bzlas brjod bya ba dang /ri mo'i mdun du zla ba gcig tu bzlas brjod bya ba dang / tha mar mtshan gcig thog thag ting nge 'dzin dang bzlas brjod bya ba ni sngar bstan pa bzhin no/ /de nas ji ltar rigs par go cha dang dbyug pa dang / skud pa dang / thal ba dang / yungs kar la sogs pa la lan cig bzlas pas/ 'di dag ni bsrung bar bya ba'i sbyor ba'i bye brag ste/ go cha'i phyag rgya bcings shing sngags bzlas sam/ dbyug pa'i phyag rgya bcas nas bsrung ngam/ yang na dbyug pa la sngags kyis btab ste/ lag tu byin nas yungs kar gyi thal ba la sngags kyis btab bam/yungs kar dngos la sngags kyis btab pa'am/ sogs kyi sgras rdo rje dang / phur ba dang mda' dang gzhu dang ral gri dang / byi brun la sogs pa'i rdzas gang rigs pa dag la/ de dag so so'i sngags sam/ yang na rang gi lha'i sngags kyis btab pas skyes pa dang bud med dang khye'u dang bu mo gdon 'byung pos zin pa dang /mi dang mi ma yin pa rnams dang / gdon gyi rigs kyis gnod pa byed du dogs pa dang / gnod pa byed pa dag la bsrung bar byas sam/ lus la btags sam/lag par byin na yongs su bsrung zhing 'jigs pa dang / gnod pa de dag las thar bar 'gyur ro/ /grong dang grong khyer dang yul 'khor la sogs par dgra dang phas kyi rgol ba dang / me dang chus 'jigs pa dang / nad dang yams kyi gnod pa dag 'byung du dogs na yang de dag gis de bzhin du bsrung bar byas na 'jigs pa de dag las thar bar 'gyur ro//da ni dbab pa bstan pa'i phyir/ skyes pa la sogs pa srin po la sogs pas reg pa'am/ zhes bya ba la sogs pa gsungs te/ skyes pa la sogs pa'i zhes pa ni/ sogs kyi sgras ni/bud med dang / khye'u dang bu mo 'gro ba gzhan gang yang rung ba rnams bsdu'o/ /srin po la sogs pa zhes pa ni/ sogs kyi sgras ni mi ma yin pa gdon bgegs kyi rigs ji snyed yod par brjod pa de dag bsdu'o/ /de la skyes pa la sogs pa'i 'gro ba la/ srin po la sogs pa'i gdon rnams kyis reg pa'am zin par gyur cing brlabs pa las gang yin cha med par 'tshor mi btub pa dang / ming nas gzung bar bya ba'am/ yang na mi ma yin pas ma zin bzhin du rang nyams par gyur na yang rung ste/ de dag ngo shes par bya ba dang /yang na de lta bu ma yin bzhin du ku re dang rtsed mo la sogs pa bya ba'i phyir/ tsan+dan dkar po'am/ dmar po'ang rung 'dag pa'i chu dang sbyar te/ lde gur byas pa sngags lan cig bzlas pas dbab pa dang smra bar 'gyur ro/ /rdo rje lcags kyu la sogs pa yang zhes pa ni/rdo rje sems dpa' la sogs pa ye shes kyi dam tshig gi phyag rgya rdo rje la sogs pa 'di dag so so'i phyag rgya ji lta ba bzhin du lag pas bcings pa'am/ lugs ma'am/ byas pa yang rung de bzhin du phab na 'bebs par 'gyur te/ ji ltar 'dod pa'i las gdon zhi ba la sogs pa byed do//bum pa'i snod la sogs pa la phab na zhes pa/ zangs ma dang gyo mo dang shing la sogs pa'i bum pa la snga ma bzhin du byas nas phab na 'bab par 'gyur te/ rdzas stong ba gang na 'dug par 'gro ba'am/ gang gis khyer ba de ston nus par 'gyur ro//ji skad du/ de bzhin du zla ba gcig tu sgrub ste/ zhes bya ba la sogs pa ni/ rgyud las gsungs pa'i khungs bstan pa'o/ /de nas las rnams 'byung ste zhes pa ni/ bsrung ba'i las 'byung ba ste/ lan cig brjod pas zhes pa ni/ bsrung bar bya ba'i gnas ni 'di dag go zhes lan cig tsam brjod nas/go cha'i phyag rgya bcings nas sngags brjod pa la sogs pa'i sbyor ba byas pa tsam gyis bdag dang gzhan dang grong khyer la sogs pa ji tsam 'dod pa'i bsrung ba byas par 'gyur ro/ /dbab pa ni tsan+dan gyi dri zhim pos reg pa dang zhes pa snga ma bzhin du tsan+dan gyi lde gus reg pa dang /rdo rje lcags kyu la sogs pa'i phyag rgya de dag snga ma bzhin du byas nas lan cig brjod pas 'bab par 'gyur ro/ /rdo rje thams cad lan cig bzlas pas zhes pa ni/ phyag rgya de dag ni ye shes kyi ngo bo bas rdo rje dang chos mthun pa'i phyir ro//sgyu ma'i las sgrub pa'i sbyor ba'i khyad par ni zhes pa ni/ sgyu ma'i mig 'phrul sgrub pa'i cho ga bstan pa ste/ 'di yang snga ma bzhin du bzlas brjod dus bzhir bya ba dang / ri mo'i gzugs kyi spyan sngar bya ba la sogs pa sngon du byas nas sgyu ma'i las kyang rma bya'i mjug ma sbams te/thum por byas pa'i nang du shel las byas pa'i rdo rje bcug la de nas dam por bcing ste/ de nas rdo rje sems ma'i phyag rgyas rma bya'i mjug ma de mnan/ de la phyag rgya thams cad babs te/ nam zhugs par gyur gyi bar du bzlas brjod bya'o/ /de nas nam 'bab par gyur pa dang / rma bya'i mjug ma de la gzugs sna tshogs la sogs pa snang ba mthong bar 'gyur ro/ rtags de dag 'byung phyin chad rma bya'i mjug ma des gzugs thams cad rang gi lus la go cha bzhin du bstan to//de bzhin du bdag nyid gzugs thams cad du ston to zhes bya ba la sogs pa'i rnam pa 'di dag 'grub par 'gyur ro/ /dbang du bya ba'i sbyor ba'i khyad par ni zhes pa/ dbang du bya ba'i ting nge 'dzin gyi khyad par ni 'di lta ste/ ri mo'i sku gzugs kyi spyan sngar rang gi lha'i dam tshig gi phyag rgya bcing ste/zla ba gcig tu dus bzhir bzlas brjod brgya rtsa brgyad du bya ste/ sngar bsnyen pa bya'o/ /de nas bsnyen pa zin pa dang / dkyil 'khor bris te mtshan gcig thog thag bzlas brjod byas la/ dam tshig gi phyag rgya bcings pa de 'bar bar mthong bar gyur na phyag rgya de bcings te bzlas brjod byas na/sems can gang dbang du bya bar 'dod pa de'i sems su zhugs shing sems la bab cing de la rjes su chags pa dang ldan pa'i bsam pas rang dbang med par bdag gi dbang du 'gyur ro/ /ji skad du/ dbang du bya bar 'dod pas zhes bya ba la sogs pas ni/ rgyud las 'byung ba'i gtan tshigs gsungs pas so/ /phyin chad phyag rgya bcings pas zhes pa ni/ phyag rgya de 'bar bar gyur gyi bar du bzlas nas nam 'bar bar gyur pa de phyin chad phyag rgya de bcings pa tsam gyis 'jig rten las 'das pa'i lha de bzhin gshegs pa sras dang bcas pa thams cad kyang bdag nyid la chags shing rab tu zhen pa'i thugs skye bar 'gyur na/sems can gzhan phal pa tha mal pa rnams chags shing zhen par gyur pa lta ci smos te/ ngo mtshar mi che zhes gsungs pa yin no//'jig rten pa'i rig sngags 'chang gi dngos grub pa'i khyad par yang zhes pa/ 'jig rten pa'i zhes pa'i sgras ni/ 'jig rten las 'das pa yang yod par ston pa ste/ de las 'dir 'jig rten pa 'ba' zhig gi rig sngags 'chang gi dngos grub sgrub pa'i thabs bstan pa ste/de yang ji ltar zhe na/ ri mo'i gzugs kyi spyan sngar zhes pa/ sngar bstan pa lta bu'i ri mo'i gzugs spyod yul du gzhag pa'i mdun du sngar zla ba gcig gi bar du rang gi lha gang sgrub pa de'i dam tshig gi phyag rgya bcings te sngon du bsnyen pa bya'o//de la bzlas brjod kyi grangs re re zhing grangs stong rtsa brgyad stong rtsa brgyad snyed dus bzhir kho nar bzlas brjod byas la tha mar/ de bzhin mtshan gcig ces pa/ de ltar bsnyen pa byas pa'i mjug tu sgrub pa'i dkyil 'khor tshul bzhin du bris nas snga ma'i tshul de bzhin du mtshan gcig yal nangs su phyag rgya bcings te/thog thag kho nar bzlas brjod bya'o/ /nam phyag rgya 'bar bar gyur pa de'i tshe zhes pa de ltar phyag rgya bcings nas bzlas brjod byas nas phyag rgya bcings pa 'bar bar gyur pa de'i tshe/ phyag rgya de bcings pas 'jig rten pa'i lha dbang phyug chen po la sogs pa gang 'dod pa so so'i gzugs nye bar ston pa'i dngos grub kyi rnam pa rnams dang /de las gzhan la rig sngags 'chang la sogs pa zhes pa/ de ltar sgrub pa de las gzhan pa 'jig rten pa'i lha rig sngags 'chang la sogs pa rnams las gang 'dod pa'i dngos grub 'grub par 'gyur ro//ji skad du zhes bya ba la sogs pa'i tshig gis rgyud las gsungs pa'i gtan tshigs bstan pa ste/ de'i don ni snga ma bzhin pas brda phrad par zad do/ /de bzhin gshegs pa'i rigs las 'byung ba zhes pa ni/dpal rdo rje sems dpa' la sogs pa ye shes kyi sems dpa' rnams so/ /snying po dang phyag rgya zhes pa ni/ de dag gi snying po dang phyag rgya dang / gsang sngags dang / rig sngags rnams zlas brjod par 'byung ba'i skabs su dngos grub gzhan spyir bstan pa rnams sgrub pa'i thabs 'dir ma smos pa ni/rtsa ba'i rgyud de kho na nyid bsdus pa nyid las 'byung ba las shes par bya ste/ 'dir tshig mangs kyis dogs pa'i phyir ro/ /de nas snying po dang phyag rgya dang gsang sngags dang rig sngags grub pa rnams zhes pa ni/'di dag tshul bzhin du bsgrubs na grub ste mtshan ma 'byung ba'o/ /ji ltar srid par 'das pa dang da ltar dang ma 'ongs pa rnams shes pa'i sbyor ba 'byung ste zhes pa'i rig sngags 'grub pa rnams kyis ji ltar 'dod pa bzhin du dus gsum po rnams mngon sum dang 'dra bar shes pa'i thabs sbyor ba ste/de dag kyang 'og nas 'byung ba 'di dag go/ /de la re zhig ces pa ni/ dang por snying por grub pas dus gsum shes pa'i sbyor ba bstan pa ste/ snying po yongs su bzlas nas su/ /zhes pa ni/rgyud 'dir snying bo zhes gang bshad pa ni/ snying po ste/ de yang lha gang la mos pa de'i snying po bzlas pa ste/ bzlas pa'i thabs dang bye brag ni sngar bshad zin pas de las rig par bya'o/ /bdag dang gzhan gyi zhes bya ba ni/ bdag dang pha rol po gzhan gyi sems ji lta ba bzhin du shes par bya'o//'das pa dang da ltar dang ma 'ongs pa zhes pa ni/ bdag dang gzhan ji lta ba bzhin du dus gsum po rnams kyang shes par bya'o/ /de bas na/ /de ni shes shing mthong bar 'gyur/ /zhes bya ba 'dis ni/ 'di dag ni sgra dang spyod yul dang mtshan nyid dbang po'i mngon du snang bar 'gyur ro zhes bstan pa'o//phyag rgya'i lha ni mnyes byas na/ /zhes pa ni/ snying po bzlas pa byas pa'i ji lta ba bzhin du rgyud 'dir phyag rgya zhes brjod pa 'di dag tshang ba'am/ gcig kyang rung ste mnyes par byas nas mtshan ma ma byung gi bar du bsgrubs na des dngos grub sngar bshad pa bzhin du 'grub par 'gyur te/phyag rgya gcig ni bcings nas su/ /zhes pa ni/ lha so so'i sgrub pa de'i dam tshig gi phyag rgya bcing ba'o/ /yid la cho ga bzhi byas nas/ /zhes pa ni/ dus gsum po'i spyod yul gyi mtshan nyid ji lta ba'am/ji ltar 'dod pa bzhin du yid la mngon sum du gsal bar dmigs nas yid la 'byung ba des/ 'jig rten rnams la brtags na ni/ gong ma bzhin du shes par 'gyur/ /zhes te/ snying po grub pa'i skabs bzhin du dus gsum gyi mtshan nyid ji lta ba'am/ ji ltar 'dod pa bzhin du shes par 'gyur ro zhes gsungs so//gsang sngags grub pa'i ye shes 'byung ba ni zhes pa ni/ gsang sngags bsgrubs pa las mtshan ma byung nas snga ma bzhin du dus kyi mtshan nyid ji lta ba'am/ ji ltar 'dod pa bzhin du shes par bya ba'i cho ga bstan pa ste/gsang sngags lan cig brjod na ni/ /zhes pa/ rgyud 'di las gsang sngags su bshad pa de dag 'chad ba'am/ phyogs gcig kyang rung ste mtshan ma ma byung gi bar du bsgrubs nas mtshan ma byung bar gyur pa dang / dus gsum gyi mtshan nyid ji lta ba'am/ ji ltar 'dod pa de bzhin du dmigs nas gsang sngags lan cig tsam brjod na yang dus gsum ji lta ba'am/ji ltar 'dod pa de bzhin du shes shing rang gi lces ji skad smras pa de bden par 'gyur ro zhes gsungs so/ /rig sngags kyi shes pa 'grub pa'i rim pa ni zhes pa rgyud 'di las rig sngags su bshad pa de tshang ba'am/phyogs gcig rung ste ji lta ba bzhin du bsgrubs nas mtshan ma byung bar gyur pa dang / bdag dang gzhan nam dus gsum po mtshan nyid kyi lta ba'am ji ltar 'dod pa dag mngon sum dang 'dra bar yid la dmigs nas rig sngags lan cig tsam brjod na yang de bzhin du don ston cing rig par 'gyur ba dang /rdo rje 'dzin pas bka' stsal pa bzhin pas na/ rdo rje 'dzin pa'i tshig bzhin du/ /zhes gsungs so/ /snying po dang / sogs kyi sgras bsdus pa'i phyag rgya dang gsang sngags dang rig sngags bzhi'i bzlas brjod byas pa las 'byung ba'i dngos grub bsdus pa bshad zin to//de lta bu'i sgrub pa de dag gang byed kyang rung ste/ dang por rang gi sems kyi rtog pa zhi bar bya ba'i phyir dang por khrus bya ste/ de nas gdong gang sgrub pa'i las la 'jug par bya ba yin pas na/khrus kyi bye brag shes par bya dgos te/ de dag gi mtshan nyid kyang sngar bshad zin gyis kyang / da dung bsnan la bstan pa ni/ rigs pa ma yin pas na/ 'dir yang rang gi sems kyi rtog pa bkru ba sngar bya ste/ zhes bya ba la sogs pa gsungs te/ ji ltar rgyud gzhan las khrus dang gtsang sbra gtsor 'byung ba bzhin du de kho na nyid bsdus pa'i rgyud 'dir yang ci byed kyang dang por gtsor khrus dang gtsang sbra bya dgos par bstan pa'o//rgol ba pa na re/ 'o na 'dir khrus la sogs pa'i bye brag ma bstan pa ci'i phyir zhe na/ rang gi lha'i rnal 'byor la gnas pa rtag tu nang gi bsam pa dag pa'i rnal 'byor pas phyi rol gyi gtsang sbra dang spyod pa dang sdom pa la sogs pa gcig kho nar bya dgos pa ma yin pas rgyud 'di las de bya ba'i cho ga dngos su ma bstan te/zhes bya ba gsungs te/ de bas na de dag la mngon par zhen pa mi bya ste/zhes pa ni rtag tu rang gi lha'i rnal 'byor gyis rtag tu nang sbyangs pa kho na gtsor zad kyi/ phyi rol gyi khrus ni gces pa ma yin pas de la mngon par dad par mi bya zhes bstan to/ /rgol ba pa na re/ 'o na rgyud rnams kyi nang nas chu la sogs pa khrus kyi rnam pa dang / bye brag du ma dang rim par phye ste bstan pa ci dgos she na/de la zhen par khrus la sogs pa bya ba ni/ de lta bu'i 'jig rten dang rjes su mthun par bya ba dang / rang gi lus la phab pa dang rjes su mthun par bya ba'i phyir te zhes bya bar gsungs te/ ji ltar 'jig rten pa'i ya rabs rnams ni rang gi bsnyen pa'i lha mgu bar bya ba dang /rang gi lus ngag gi mi gtsang ba dag bsal cing sems nyid kyang dag par 'dod pa'i phyir khrus dang sdom pa kho na gtsor mtshon par byed cing gzhan de ltar byed pa dag la yang bsngags shing ya rabs su 'dzin par byed la/ gang de ltar mi byed pa dag ni smad cing bshung bar byed pas na de dag dang rjes su mthun par bya ba'i phyir rang gi lus la gnod pa dang dri nga ba dag yod pa bsal ba'i phyir khrus byas kyang nyes pa med do//de yang sngar bshad zin to zhes pa ni/ khrus kyi dgos pa dang mtshan nyid kyang sngar gong du bshad zin to zhes bstan pa'o//de bas na/ dgongs pa 'di rdo rje rtse mo las gsal bar bstan pa ni zhes pa ni/ phyi'i khrus dag 'jig rten pa dang rjes su mthun par bya ba dang / rang gi lus la phan gdags par zad kyi don dam par ma byas kyang nyes pa med do zhes bstan pa'i gtan tshigs sam/dgongs pa 'di dag rang bzor bstan pa ma yin gyi/ rdo rje rtse mo'i rgyud las gsal por bstan to/ /mi dge bcu dag spangs nas su/ /dge ba bcu la brten byas nas/ /sems can kun la phan sems pa/ /de ni nang gi khrus zhes bya/ / zhes bya ba la sogs pa ste/ lus ngag yid gsum gyi las kha na ma tho ba dang bcas pa'i mi dge ba bcu po lus kyi gsum dang / ngag gi bzhi dang / yid kyi gsum po dag gtan nas spangs nas lus dang ngag dang yid gsum gyi las yongs su dag par 'gyur ba dge ba bcu la brten nas/sems can mtha' dag la phan par 'dod cing gnod par mi byed pa ni nang gi khrus zhes bya'o/ /bdag nyid phyag rgyas btab nas ni/ /phyag rgya thams cad dgrol bar bya/ /bdag nyid bkru ba'i phyi na ni/ /rnal 'byor khrus zhes bstan pa yin/ /zhes pa ni/bdag nyid lus ngag yid gsum gyi gnas ngan len gyi skyon sbyang ba'i phyir/ bdag nyid phyag rgya rnam pa bzhi dang ldan pa'i sangs rgyas su bstan nas de'i ngang la gnas shing bzlas pa la sogs pa ci nus su byas pas mnyes par byas shing / tha mar phyag rgya bkrol ba yang rnal 'byor gyi khrus su bstan pa yin no//gtsang sbra spyod dang 'brel ba'i lus/ /chu yi khrus zhes bya ba ste/ /las 'di rnam par rtog pa'i khrus/ /slob dpon rnams la bshad ces bya'o/ /zhes bya ba ni phyi'i yin no/ /lus kyi yan lag dang kha gdong bkru ba la sogs pa ni chu'i khrus te/'di ltar bstan pa yang don rnam pa gnyis te/ slob dpon zab cing rgya che ba la mos pas nang gi khrus gtso bar byed pa dag la ni/ khrus snga ma dag bstan la/ slob dpon spyod pa shas che ba phyi'i khrus la dga' zhing gtsor 'dzin pas phyi'i khrus kyis dag par lta ba rnams la ni/chu'i khrus 'di dag bstan par rig par bya'o/ /de la khrus byed par 'dod pa'i rigs kyi bye brag gi bsrung ba sngar gsungs pas bsrung ngo zhes pa ni/ phyi nang gi khrus de dag gang byed kyang rung ste/ rigs bzhi gang bsgom pa de'i bye brag gi sngags dang phyag rgya sngar gong du gsungs pa de dag gis lus bsrungs la gdod khrus bya'o//de nas khrus zin nas kyang bsrung ba de kho na'o/ /yang na thams cad bsrung bar 'dod pas zhes pa ni/ bdag dang gnas dang rdzas dang yo byad la sogs pa'i dgos pa thams cad bsrung bar 'dod pa'i rnal 'byor pas rang gi lha'i rnal 'byor gang yin pa yid la gsal bar dran par bya ste/nang gi khrus kyis bsrung ba dang / khrus la sogs pa phyi rol gyi mtshan nyid kyi gtsang sbra bya bar rgyud 'dir zhes pa/ chu'i khrus la sogs pa'i mtshan nyid kyi gtsang sbra bya bar de kho na nyid bsdus pa'i rgyud 'dir bcom ldan 'das kyis gnang bar mngon te zhes pa ni/rgyud 'dir nang gi khrus bya bar gsungs pa de bzhin du phyi'i khrus dang gtsang sbra yang bkag pa med de/ bya dgos par bcom ldan 'das kyis dgongs pa gnang bar mngon te/ci'i phyir zhe na/ de las gzhan pa'i khrus la sogs pa'i mtshan nyid kyi cho ga ma bstan pa'i phyir te zhes smos te/ phyi'i khrus bya mi dgos so zhes ma bkag pa dang / khrus kyi rnam pa gzhan dag ma gsungs pa'i phyir na de ltar mngon no/ / de bas na rang gi rigs dang rjes su mthun pa'i bsrung ba'am/ zhes pa ni rigs bzhi gang bsgom pa de'i sngags dang phyag rgyas bsrung ba'o/ /'am zhes pa'i sgras ni der yang ma bcad de/ rang gi lha'i dam tshig sems dpa'i nga rgyal gyis bsrung bar bya ste zhes pa de'i dus su rang gi lha'i dam tshig sems dpa'i cha lugs gsal ba'i nga rgyal dang ldan par bya'o//phyi rol gyi khrus la sogs pa'i mtshan nyid ces pa ni/ chu'i khrus dang sa'i khrus la sogs pa'i mtshan nyid/ gtsang sbra thams cad kyang rang gis ji ltar 'dod pa bzhin du bya bar mngon no//rdo rje rtse mo las ni rnal 'byor pa thams cad spyi'i phyi rol gyi khrus kyi cho ga gzhan dag gsungs te zhes pa ni/ rdo rje rtse mo'i rgyud las rnal 'byor pa kun gyis thun mong du phyi'i khrus kyi cho ga 'di las gsungs pa dang mi mthun pa'i rnam pa gzhan dag tu yang ston pa yod do zhes pa ste/de dag kyang gang zhe na/ de'i rim pa yang 'di'o zhes bya ba la sogs pa dag ste/ rang gi lha'i dam tshig sems dpa'i rnal 'byor ji lta ba bzhin du mngon sum du byas te/ rang gi lce la zla ba'i dkyil 'khor gyi steng du chos kyi phyag rgya dang rdo rje rtse lnga pa bsam ste/ oM TuM zhes pa'i yi ge 'bru gnyis po 'di lus thams cad dam yang na gnas rnam pa lnga po dag gam/ gnas lnga po dang yan lag gi tshigs rnams su dgod de/ rdo rje gnod sbyin gyi snying po hUM zhes pa dang / mi 'chi thab sbyor gyi snying po a zhes bya ba yid la brjod pa de de na sngags/oM d+hU pi d+hU bi kA ya d+hU pi badzra d+hU pi swA hA/ zhes pa 'di bzlas shing de'i phyag rgya lag pa gnyis khu tshur bcangs la g.yas pa'i mthe bo dang g.yon pa'i mdzub mo gnyis rtse mo sbyar/ g.yas pa'i mthe bo dang mdzub mo sbyar te/ mthe'u chung gnyis kyang gshibs te/ sbrel nas rtse mo can du byas la bzlog ste/ lag pa'i rgyab bdag la bstan sbyar ba ni rdo rje 'bar ba'i phyag rgya ste sngags dang phyag rgya des bdag rdo rje 'bar ba'i tshogs kyi gzi can du bsgyur bar yid kyis mngon par brtag cing gnas lngar gtug go/ /de nas sa gtsang ma la oM b+hU ra dz+wa la swA hA/zhes pa'i sngags 'dis lan nyi shu rtsa gcig btab la/ chu'i ngogs gtsang ma'i phyogs su cha gsum du bgos nas ri lu gsum bya ste/ bzhag la de nas bdag nyid rang gi lha'i dam tshig sems dpa'i rnal 'byor du bsams na gong du bshad pa'i khro bo'i lta bas chu'i phyogs kun du bltas nas chu'i nang gi bgegs rnams kun du bsal la rdo rje lta ba'i brtag pa de nyid kyis khor yug tu rdo rje dang 'dra bar mtshams bcad cing bgegs mang po thams cad kyis mi tshugs par chu la mngon par brtags te/sa cha gsum du mngon par bgos pa de las cha gcig gis ro smad bkrus la cha gnyis pas mgo man chad lus thams cad bkrus te/dam pa'i chos spyod pa'i cho ga ni rnam par mi rtog pa'i ting nge 'dzin dang ldan pa ste/ ting nge 'dzin de dang ldan par byas nas mi smra bar ji ltar 'dod pa'i khrus byas nas/ sa'i cha gsum pas lag pa brkus la nye reg gi phyag rgya bcings la rdo rje chu'i snying po oM naM zhes bya ba brjod pas nye reg byas te yang dam tshig sems dpar bdag nyid yid la byas la sngar gsungs pa'i tshogs zhes pa nye reg byas pa'i rjes la dam tshig sems dpa'i ting nge 'dzin yid la gsal bar byas nas sngar gsungs pa'i cho ga zhes pa/gong du bshad pa'i cho ga'i rim pa'i sbyor ba dang ldan par byas la/ rdo rje rin po che'i dam tshig gi phyag rgya'i chus bdag gi spyi bo nas dbang bskur la lha la yang chab gsol te zhes pa/ rang gi lha ye shes sems dpa' mdun gyi nam mkha' la bsams pa la yang khrus chab gsol te/gnas bsrung ba ji ltar byas pa bkrol zhes pa sngar mngon sum du byas pa bsrung ba'i ting nge 'dzin rim bzhin bkrol nas chu'i nang nas byung ste/ sngags pa rang gis ji ltar 'dod pa'am/rang la gang yod pa'i gos gtsang ma'am/ rigs gang yin kha dog sngar bshad pa dang ldan pa'i gos kyang rung / 'phags pa mi 'chi thab sbyor gyi snying po sngar bshad pas smad g.yogs dang stod g.yogs la btags nas gsol ba/ gzi brjid phung po'i sngags/ oM na maHsarba ta thA ga toSh+NI Sha te dzo ra shi a wa lo ki ta mUrti hUM hUM dz+wa la dz+wa la d+ha ka d+ha ka pi ka bi ka bi d+har bi d+ha ra hUM phaT/ ces pa'i sngags bzlas brjod byas pas btab pa'i phreng ba mgo la bcing zhing bgo bar bya'o/ /khrus kyi rim pa 'di dag thams cad bya/ /zhes pa ni/ phyi nang gi bye brag tu phye nas bstan pa dang /rigs kyi bye brag gis bsrung ba dang / lha'i rnal 'byor yid la bya ba la sogs pa'i cho ga go rims su bsdebs te bstan pa 'di dag kyang rdo rje rtse mo'i rgyud las khyad par du gsal bar bstan to/ /gang zhe na/ bdag ni dang por go cha bgo/ /khro bo rjes su dran par bya//yi ge 'bru gnyis go cha bgo/ /phung po thams cad 'jig pa'o/ /rdo rje gnod sbyin drag chen dang / /khro bo mi 'chi thab sbyor ro/ /zhes bya ba la sogs pa gsungs te/ bdag ni dang por go cha bgo/ /zhes pa ni/ rang gi lha'i dam tshig sems dpa'i rnal 'byor mngon du byas nas rang gi lce la chos kyi phyag rgya rdo rje rtse lnga pa bsams nas/oM TUM zhes pa'i yi ge 'bru gnyis yan lag thams cad du bkod pa'o/ /khro bo'ang rjes su dran par bya/ /zhes pa ni/ rdo rje gnod sbyin dang mi 'chi thab sbyor te bdud rtsi 'khyil ba la'o/ /yi ge 'bru gnyis go cha mchog /ces pa ni/ de gnyis kyi snying po hUM dang a gnyis so/ /phung po thams cad 'jig pa'o/ /zhes pa ni/ bar du gcod par 'dod pa'i bdud la sogs pa'i sbyor ba thams cad des 'jig par byed pa'o/ /rdo rje gnod sbyin drag chen dang / /khro bo mi 'chi thab sbyor ro//zhes pa ni/ go cha dang ldan pas gzhan gyi sbyor ba 'jig cing bar du gcod pa sel nus pa'i mthu dang ldan pa ni khro bo 'di dag go zhes gsungs pa'o/ /bdag nyid rab 'bar 'jigs pa ste/ /zhes pa ni/ de ltar bsrung ba byas nas yon tan dang ldan par bstan pa ste/bdag nyid rdo rje 'bar ba'i tshogs kyi gzi can du byas par 'gyur ro/ /rdo rje 'bar ba brjod dka' ba/ /zhes pa ni/ rdo rje 'bar bas gzi can du byas pa de ni/ yon tan brjod cing dpag par mi nus pa dang ldan pa yang yin la/ gzhan gyis de'i ming brjod par mi nus na glags btsal bar lta ci smos te/bar chad bya bar ga la nus zhes bstan pa'o/ /'di ni gsang sngags 'di yid kyis/ /zhes pa ni/ de ltar gyur par bya ba dang / oM d+hU pi zhes pa'i sngags 'di yid kyis brjod pa dang / rdo rje 'bar ba'i phyag rgyas so//zhes te sngar bstan pa'i rdo rje 'bar ba'i phyag rgya bcings pa de kho nas de ltar 'gyur bar rig par bya'o zhes bstan to/ sa la nyi shu rtsa gcig tu/ /zhes pa ni/ sa la rig sngags nyi shu rtsa gcig bzlas pas btab pa ste/ rig sngags zhes pa ni/ oM b+hUr dz+wa la swA hA zhes bya'o//mngon par bsngags zhes te/ des grangs nyi shu rtsa gcig tu bzlas te sa la btab pa'o/ /sa des bdag nyid bkru ba ni/ /zhes pas/ de yang cha gsum du bgos la bdag nyid bkru bar bya'o/ /ro stod ro smad rked par ro/ /zhes pa ni/ sas bkrus pa la bkru ba'i thabs bstan pa'o//sogs pa rgya cher bstan pa'o/ /zhes pa ni/ 'dir 'di tsam zhig bstan par zad kyi rgyud der ni 'dir bstan pa la sogs pa rnam pa mang po'am/ rgya chen po dag tu gsungs pa yod mod kyi/ 'dir 'di tsam las de dag kun tshang bar ma bris so/ / zhes pa'i tha tshig go/ /khrus la sogs pa'i gtsang sbra'i bya ba'i thabs bsdus pa bshad zin to// //de ltar khrus dang las dang bya ba dang sgrub pa dang bzlas brjod kyi bye brag rnam pa du mar phye nas bstan gyis kyang / ma 'ongs pa'i rnal 'byor la mkhas pa rnams dga' bar bya ba dang /sgrub pa la brtson pa rnams la phan gdags par bya ba'i phyir dgos pa gzhan dag kyang bstan dgos te/ de la khrus kyi bya ba'i thabs kyi rim pa bstan pa'i de ma thag tu rang gi lha'i bden pa dang / chos dang / las dang / dbang du bya ba la sogs pa ston cing 'chad par byed pas/de nas zhes bya ba de ltar rgyun mi 'chad par rang gi lha mnyes par byed pa la brtson pa'i rnal 'byor pas zhes pa ni/ gong du bstan pa'i sems so sor brtags pa nas brtsams nas phyag rgya chen po'i yan lag dang bcas pa'i sbyor bas phyag rgya bzhi dang ldan par bsgoms pa'i ting nge 'dzin rgyun mi 'chad par rang gi lha ye shes sems dpa' yongs su mnyes par byed pa la brtson pa'i sngags pa'i rnal 'byor ba'o//sngar gsungs pa'i dam tshig bsrung bar bya ste/ zhes pa sngags pa rnal 'byor pa des rigs so so'i spyi dang khyad par gyi dam tshig gi bye brag ji skad du bstan pa de dag bsrung zhing de dag las mi 'da' bar bya dgos te/rang gi lha'i bden pa zhes pa ni/ de bzhin gshegs pa la sogs pa bzhi'i so so'i bye brag gi bden pa bsrung bar bya ba'i mna' 'dor ba'i rim pa bstan pa'o/ /chos dang zhes pa ni/ legs par spyod pas bskyed pa'i 'bras bu yid la 'dod pa'i mthu rgya chen po'o/ /las dang zhes pa ni/ phan pa sgrub par byed pa'i rang bzhin te/ de bzhin gshegs pa la sogs pa mnyes par byed pa'i snying po bye brag rnam pa lnga'o/ /rjes su chags pa dang dbang du bya ba ni rang gi lha rab tu mnyes par bya ba dang /dbang du gyur par bya'o/ /sogs pa'i sgras ni gal te dngos grub de bzhin ma ster zhing lha gnad la dbab cing gsad pa'i las brtsam pa dang / rab mchog pa'i bsod nams dang ye shes la sogs pa'i don snying po la sogs pa'i rgyu mnyes par bya ba'i rgyu bstan pa la sogs pa'i rim pa rting thogs su byung ba rnams bsdus par bya ste/dag pa thob par byed pa'i rgyu de dag ni/ sgrub pa la 'bad par bya'o/ /de bzhin gshegs pa la sogs pa'i rigs kyi bye brag gis zhes pa de bzhin gshegs pa la sogs pa'i rigs bzhi'i bye brag go//bden pa bsrung ba'i mtshan nyid ces pa/ rigs bzhi'i so so'i dam bca' ba'i mna' tshig go/ /'di ltar shes par bya'o zhes pa ni/ 'og nas 'byung ba'i tshig gi don to/ /'di lta ste zhes pa ni/ nye bar mtshon pa'i tshig ste/dgos pa'i skabs su mna' 'dor ba la zhes pa ni/ 'jig rten las 'das pa'i don chen po sgrub pa dang / 'khor ba'i rgya mtsho'i pha rol tu 'gro bar byed pa'i thabs ni dgos pa ste/ de bsgrub pa'i phyir de la 'jug pa'i tshe mna' 'dor ba'i skabs su ba na rigs gang gi de'i mna' 'dor ba'o//rang gi lha rjes su dran par bya ba la zhes pa ni/ de ltar mna' 'dor ba'i dus na'ang rigs so so'i bye brag gi lha'am/ rang gi lha gang yin pa de rjes su dran par byas nas mna' 'dor bar bya ba'o/ /gcig tu gzhol bar bstan pa'i phyir zhes pa ni/ don de lta bu'i phyir mna' 'dor dgos pa'i skabs su bab na rang gi lha rjes su dran par bya ba la mos pa bskyed cing yid gzhan du ma phyogs par bya'o//de rjes su dran pa'i yon tan gyis mna' 'dor ba ste zhes pa ni rang gi lha rjes su dran pa'i bsam pa dang bcas pas mna' 'dor te/ de'i dgos ched kyang bdag gi bden pa bzhi byas na ni/ bsrung ba dang bskyab pa dang 'grub par gyur cig /gal te bden pa bzhi ma byas par gyur na ni/gnyen por gyur cig ces dbang gsol ba'i bsam pa dang bcas pas mna' 'dor ba ste/ de ltar byas na ma na'i dam tshig las mi 'da' zhing rang gi lhas bsdongs pa'i mthus dngos grub myur bar 'gyur ba'i phyir ro/ /bden pa yongs su bsrung bar bya'o zhes pa ni/ de lta bas na mna' 'dor ba'i don khas blangs pa de mi nyams par bya'o//de la 'di ni de bzhin gshegs pa'i bden pa yongs su bsrung ba'i rgyu zhes pa ni de bzhin gshegs pa 'ba' zhig kho na gtsor bsgom pa rnams kyi bden pa bsrung ba'i mna'i mtshan nyid bstan pa'o/ /bden pa'i rjes su 'jug pa'i zhes pa ni 'phags pa rnams kyi tshad mar gyur pas bden pa zhes bya la/de'i rjes su 'jug pa ni sngags pa rnal 'byor ba'o/ /tshig gis mna' 'dor ba zhes pa ni/ rnal 'byor ba des tshig gis mna' 'dor ba'i dus na'ang don gyis lha dran par bya ba'o/ /bden pa chen po bsrungs nas ni/ /zhes pa ni/ 'phags pa'i bden pa dang / de'i zhal nas gsungs pa'i mna' bden pas na bden pa ste/chen po zhes pa ni de la brten te de skye bas na/ rgyu la dgongs pa'i phyir na chen po zhes bya ste/ de ci bzhin bsrungs pa las sku dang ye shes skye bar 'gyur bas sangs rgyas myur du thob par 'gyur zhes bya'o/ /de bzhin gshegs pa bzlas brjod byed pas zhes pa ni/ / de bzhin gshegs pa lnga las gang yang rung ba cig bzlas brjod byed par 'dod pa'i sngags pa'i rnal 'byor ba'o/ /mna'i skabs su bab na dam tshig 'di ltar bya'o zhes pa ni/ mna' 'dor dgos pa'i skabs su bab na/ dam tshig 'og nas 'byung ba 'di ltar bya ste/ bden pa bden nges par zhes pa ni/ bdag gis khas blang zhing bsgrub par bya ba'i dngos grub tshig tu brjod pa ni bden pa'o/ /bden nges pa ni bden pa de bsrungs pa las byung ba'i 'bras bu yang bsrung ba ji lta ba bzhin du nges shing mi slu bas na bden nges pa ste/ thob nges par yang 'gyur la nges pa de thob par yang bya ba'o/ /dngos po 'di zhes pa ni/ don gyi dmigs de yid la gang brnags pa de tshig tu brjod pa'o/ /sogs pa'i sgras ni don gyi dmigs de nyid rgyas par brjod pa'o zhes tshig bsdu ba'o/ /rgyal ba'i rigs la zhes pa ni/ rgyal ba'i rigs zlos pas mna' 'dor ba'i gtan tshigs bstan pa'o/ /dam tshig la ni mna' 'dor ba/ /zhes pa ni/ dam tshig la mna' 'dor ba ni 'da' bar byed pa ste/ de yang gyi na'am rang bzo ma yin pa ni/ de bzhin gshegs pa'i rigs las byung / /zhes bya ste/ gal te bdag 'di ltar mi byed na/ rdo rje sems dpa' la sogs pa dam tshig rnams bslus par gyur cig /de nas de bzhin du bsrungs na dngos grub myur bar thob par gyur cig ces bya ba yin pas na/rdo rje bden pa bsrungs na ni/ /grub pa'i mchog kyang thob par 'gyur/ /zhes gsungs pa yin te/ de bzhin gshegs pa'i thugs kyi bdag nyid tshig tu brjod pa ni/ rdo rje brdeg pa ste dam tshig ni mna'o/ /de bzhin du rdo rje'i rigs la zhes pa ni/rgyal ba'i rigs la ji lta ba de bzhin du rdo rje'i rigs kyi bzlas brjod byed pas mna' 'dor ba'ang 'di lta ste/ rdo rje 'dzin ma mna' 'dor ba/ /zhes pa ni/ rdo rje 'dzin ma ni 'jig rten gsum las rnam par rgyal ba'i 'jig rten gsum gyi 'khor lo phyi'i dam tshig gi phyag rgyas rdo rje 'dzin ma'i phyag rgya bstan pas de bcings la bden pa'i tshig 'di las ma nyams par bsrungs na ni/gdon mi za bar sangs rgyas su grub par gyur cig /gal te 'das par gyur pa na dmyal bar ltung bar gyur cig ces brjod pa ni mna' 'dor ba'o/ /rab tu 'da' bar dka' ba ste/ /zhes pa de ltar mna' 'dor ba'i tshig de ni 'da' bar rab tu nyen che bas na bsrung bar bya'o//zhes bstan pa ste/ gal te dngos grub mchog 'dod na/ /bden pa 'di ni bsrung bar bya/ /zhes gsungs so/ /pad+ma'i rigs kyi bden pa zhes pa ni/ pad+ma'i rigs kyi mna' 'dor ba ste/ pad+ma'i chos kyi mna' 'dor ba zhes pa ni/bdag 'di ltar mna'i dam bcas pa las ma 'das na ni yid la brnags pa'i don 'di dag grub par gyur cig /gal te bdag gis 'di ltar ma byas par gyur na dam pa'i chos bdag gis bslus par gyur cig pa ste/ lhag ma brda phrad par zad do/ /nor bu'i rigs la ni zhes pa/ rin po che'i rigs kyi mna' 'dor ba ste/sangs rgyas mchod pa mna' 'dor ba/ /zhes pa ni/ las kyi rigs kyang rin po che'i rigs kyi nang du 'dus par bshad do/ /de bzhin gshegs pa'i phrin las ni/ sangs rgyas mchod pa dang / sems can gyi don bya ba ste/ gal te bdag gis de ltar mi byed na/sangs rgyas kyi mchod pa gang yin pa thams cad bdag gis bshig par gyur cig ces bya ste/ lhag ma ni brda phrad par zad do/ /de ltar dam tshig legs par rig cing bsrung ba la 'bad par gyur pa zhes pa/ rnal 'byor ba des de ltar gong du bshad pa ltar bden pa'i tshig gi don legs par shes shing don de bzhin du rjes su bsrung ba la 'bad par gyur pa de mnyes par bya ba nyid lha ye shes kyi sems dpa' gang yin pa'i rjes su mthun par chos dang /las dang / chos nyid dang / rjes su chags pa dang / dbang du bya ba la sogs pa legs par bsgrub pa dang / dam tshig bsrung ba la 'bad par gyur pa zhes pa rnal 'byor ba des gong du gsungs pa'i don de ltar rig pa'i dam tshig gis mna' 'dor ba de dag don ci lta ba bzhin du legs par rig cing ma nyams par rjes su bsrung ba la 'bad par gyur pa de rang gi lha mnyes par bya ba'i phyir/de dang rjes su mthun par chos dang las la sogs pa legs par bslabs shing rig par byas nas bsrung bar bya'o zhes ston pa ste/de la chos dang zhes pa ni/ legs par spyod pas bskyed pa yid la 'dod pa'i 'bras bu mthu rgya chen po ni chos te/ de yang 'dir ni bshad pa'i mtshan nyid kyi chos la shes par bya'o/ /las dang zhes pa ni bdag gzhan la phan pa sgrub pa'i rang bzhin yin te/ de yang de bzhin gshegs pa la sogs pa'i snying po mnyes par byed pa'i bye brag rnam pa lngar bstan pa dag go//chos nyid ces pa ni/ lha rnams kyi ngo bo nyid kyi khyad par ni chos nyid de de yang phyag rgya bzhir sbyor ba gtsor gyur pa shes par bya'o/ /rjes su chags pa dang zhes pa ni/ sems can gyi don ji lta ba bzhin du byed cing /bdag nyid rang gi lha la mngon par chags pa'o/ /dbang du bya ba dang zhes pa ni/ rigs bzhi'i lha dbang du bya ba ste/ de dag re re las kyang so so'i khyad par gyis bye brag tu phye nas ston pa dang / rjes su chags pa dang / dbang du bya ba gnyis rang gi lha rab tu mnyes par bya ba dang /dbang du gyur bar bya ba ste/ 'di dag gis rim pa dang rgyas ba dga'o gnas rim bzhin du rgyas par ston pas de bzhin du rig par bya'o/ /sogs pa zhes pa ni/ de dag re re las kyang so so'i khyad par gyis bye brag tu phye nas ston pa dang / rigs bzhir gsungs pa'i lha rnams kyi drag shul sgrub pa'i sbyor ba thabs zhar la 'byung ba'i ngag bsdu bar bya'o//legs par shes par byas nas zhes pa ni/ de dag gis bye brag ji lta ba bzhin du gsal zhing 'byes par blos rig par bya'o/ /ji ltar rigs par bsrung bar bya'o/ /zhes pa ni/ de dag las ji ltar gsungs pa de bzhin du mi 'gal bar bsrung zhing ji ltar rigs pa bzhin du nyams su blang bar bya ba'i don to//de la re zhig rigs bzhi'i lha thams cad kyi snying po rnams zhes pa ni/ de bzhin gshegs pa la sogs pa lnga'i snying po rigs bzhi'i lha thams cad kyi snying po ste/ de la snying po zhes pa ni mtshan ma dang mtshan ma med pa ste/de la 'dir gzung ba ni lha gang bsgom pa'i sngags kyi yi ge 'bru gcig pa la sogs pa'i rnam par rtog pa'i rnam par rab tu goms pa las snying po zhes bya ba'i sems rtogs par gyur bas ni snying po zhes bya'o/ /rnams zhes pas ni ma lus par sdud pa ste/ de bzhin gshegs pa rnams dang /de'i rigs rnams las re re'am tshang ba'ang rung ste/ gang 'dod pa la khyab par dgongs pa yin no/ /ji ltar srid pa zhes pa ni/ ji ltar 'dod pa'am/ ji ltar nus pa bzhin du snying po bzlas brjod bya ba ste/ bzlas brjod ces pa yang rigs gcig gam so so yang rung ba gang yin pa de'i bzlas brjod kyi thabs ji ltar rigs bzhin du brtsam par bya'o//bsgom pa la mngon par brtson pa zhes pa ni/ mtshan ma dang bcas pa dang / mtshan ma med pa'i tshul du bsgom pa dang / gnyi ga 'brel pa can du bsgom pa las/ 'dir ni mtshan ma dang bcas pa dang /mtshan ma med pa gnyi ga 'brel pa can gyi tshul du bsgom pa la bya ste/ mngon par brtson pa zhes pa ni/ gsal bar nan tan du bya ba'o/ /snying po sgrub pa rnams nyid kyi chos dang las zhes pa ni/ de dag las rang gi snying po gang sgrub par 'dod pa de nyid kyi chos dang /las dang rjes su chags pa dang / dbang du bya ba dag kho na bsdu bar bya'o zhes bstan pa'o/ /de la chos gang zhe na/ legs par spyod pas bskyed pa yid la 'dod pa'i 'bras bu mthu rgya chen po ni chos so zhes gsungs pa yin te/ gang 'di'i skabs su legs par spyod pas bskyed pa'i rgyu las byung ba'i 'bras bu yid la 'dod pa gang yin pa de'i mthu rgya chen po thob pa ni chos zhes bya'o zhes ston pa'o//de kho na 'ba' zhig tu'ang ma zad de/ de'i rgyu spyod pa dang / chos bshad pa dag la yang de ltar brtags pas de skad ces bya'o zhes bstan pa yin te/ de la 'dir ni zhes sgrub thabs kyi skabs su 'dir ni bshad pa'i chos kyi mtshan nyid la gzung bar rig par bya ste/de ci'i phyir zhe na/ rigs so so'i rang gi rigs dang rjes su mthun pa'i chos brjod par bya ba'i phyir ro zhes gsungs pas ni/ rigs bzhi po so so rang gi rigs dang / rjes mthun pa'i chos brjod par bya dgos pa'i phyir na 'dir 'di ltar bstan pa yin no//'o na de ltar brjod pa ci dgos she na/ de la brjod pa yang bzlas brjod byed pa dang / bsgom pa dang bsgrub pa'i dus na de mngon par bstan pa'i dus na don ston pa'i rang gi rgyud las 'phel bar bya ba'i phyir ro zhes gsungs te/ de la brjod pa yang zhes pa ni so so'i rigs dang mthun pa'i chos brjod pa yang rigs so so'i snying po bzlas brjod byed pa dang /phyag rgya chen po'i tshul du bsgom pa dang / yid la 'bab pa'i dngos grub bsgrub pa'i dus na chos kyi tshig mngon par bstan pa'i don des rang gi rgyud la rtogs pa 'phel zhing rgyas par bya ba'i dgos pa yod pa'i phyir 'di ltar bstan to//de la rigs so so'i rang gi rigs dang rjes su mthun pa'i chos brjod par bya zhes bstan pa de yang 'di nas mar rim par ston pa las rig par bya ste/ de la dang por de bzhin gshegs pa'i bstan te/ de yang gang zhe na/ de la de bzhin gshegs pa'i snying po bzlas brjod byed pa dang /bsgom pa la brtson pas chos kyi tshig brjod pa/ de'i don chud pas 'di ltar bya'o zhes bya ba la sogs pa dag ste/ de bzhin gshegs pa'i snying po bzlas brjod byed pa dang zhes pa ni/ de bzhin gshegs pa rnams la/ de bzhin gshegs pa'i snying po bzlas brjod byed pa dang /bsgom pa la brtson pas zhes pa ni/ de bzhin gshegs pa bsgom pa la brtson pa'i rnal 'byor pas chos kyi tshig brjod pa de'i don rtogs par 'gyur ba dang / rtogs par 'gyur bar 'dod pa rnams kyis 'og nas 'byung ba'i 'di ltar rig par bya'o zhes ston to/ /de la mdo'i tshig ni sangs rgyas chos zhes bya ste/de ltar chos nyid yi ge brjod/ /sangs rgyas chos kyi phyag rgya chen/ /ye shes kyi ni tshul mchog go/ /zhes bya ba ste/ zhes pa ni mdo las gsungs pa'i tshig ste/ de la sangs rgyas chos zhes bya ba ste zhes pa ni/ slob pa dang mi slob pa'i 'bras bu'i ngo bo nyid la ni sangs rgyas zhes bya ste/chos su brtags pa yang sangs rgyas su brjod pa de nyid kyi ngo bo la bya'o/ /de ltar chos nyid yi ge brjod/ /ces pa ni/ sangs rgyas dang chos su brtags pa'i ngo bo tha mi dad pas na/ chos nyid kyi tshig yi ger brjod pa nyid sangs rgyas so/ /sangs rgyas chos kyi phyag rgya chen/ / zhes pa ni/ sangs rgyas gang yin pa'i phyag rgya chen po de nyid chos yin la chos kyi phyag rgyar brjod pa nyid kyang sangs rgyas so zhes bstan pa yin no/ /ye shes kyi ni tshul mchog go/ /zhes pa ni/ de ltar rig pa nyid ye shes kyi tshul mchog yin par zad kyi gzhan ma yin no/ /sangs rgyas chos zhes bya ba de'i don chud pa ni zhes pa ni/sangs rgyas chos zhes bya bar brjod pa de'i don rtogs shing khong du chud pa ni/ 'og nas 'byung ba 'di lta bur shes par bya ste/ slob pa dang mi slob pa zhes pa ni/ nyan thos kyi ni rgyun du zhugs pa nas dgra bcom pa'i 'bras bu thob pa'i bar la bya mod kyi/ 'dir ni sa dang po rab tu dga' ba nas sa bcu pa chos kyi sprin gyi sa'i bar te/ slob pa dang mi slob pa'i 'bras bu de'i ngo bo nyid sangs rgyas te/ chos kyang de nyid kyi ngo bo nyid la bya/ mya ngan las 'das pa yang de nyid la bya'o/ /de bas na sangs rgyas gang yin pa de nyid chos so zhes pa ni sangs rgyas dang chos dang mya ngan las 'das pa'i ngo bo tha mi dad cing dbyer med par bstan pa'i gtan tshigs de bas sangs rgyas gang yin pa dang /gzhan ma yin la chos gang yin pa yang gzhan ma yin te/ sangs rgyas gang yin pa de nyid chos la/ chos gang yin pa de nyid sangs rgyas te/ de gnyis bye brag med par khong du chud par bya ste/don de lta bu'i tshul du chos kyi tshig brjod par bya'o/ /da ni de bzhin gshegs pa'i rigs rnams bzlas brjod bya ba dang / bsgom par 'dod pa'i bslab par 'dod pa ni/ /de bzhin gshegs pa'i rigs la zhes bya ste/ de yang gang zhe na/ rgyud las/ chags las dag pa'i chos med de/ /bde ba thams cad rab tu stsol/ /de bzhin gshegs pa'i rigs la ni/ /chos 'di 'grub par byed pa'i mchog /ces gsungs te/ de la/ chags las dag pa'i chos med de/ /zhes pa ni/ sems can ma smin pa thams cad smin par bya ba dang / ma grol ba thams cad yongs su grol bar bya ba la chags par bya ba dang /byang chub kyi sems kyi rang bzhin la chags par bya ba las chos gzhan 'jig rten na gud na med do zhes bya'o/ /bde ba thams cad rab tu stsol/ /zhes pa ni/ de lta bu'i chags pa rnam pa gnyis po des bdag gzhan gnyis ka la 'jig rten dang 'jig rten las 'das pa la bde ba thams cad sbyin zhing stob par byed pa yin zhe'o//'o na de dag gi rkyen du 'bab pa gang yin zhe na/ de bzhin gshegs pa'i rigs la ni/ /chos 'di grub par byed pa'i mchog/ /ces bya ste/ de bzhin gshegs pa'i rigs rnams bzlas brjod dang /sgom par byed pa la chos kyi tshig 'di sangs rgyas su grub par byed pa'i mchog yin zhes bstan to/ /bshad pa'i chos nyid kyi tshig de brjod na 'di ltar yid la bya'o zhes pa ni/ skabs su bstan pa'i rgyud las gsungs pa'i tshig de brjod pa'i dus na don 'di ltar gsal bar yid la bya'o/ rdo rje'i rigs la ni rgyud las/sangs rgyas bka' ni bsrung ba dang / /de bzhin sems can bskyab pa'i phyir/ /khros pa kun du gdug pa rnams/ /bsad kyang dngos grub thob par 'gyur/ /zhes gsungs pa ni/ de bzhin gshegs pa'i zhal nas gsungs pa'i bka' mi nyams par bsrung ba dang / sems can gang zhig mgon skyabs dang bral zhing nyam thag pa rnams bskyab par bya ba'i phyir/rgyud khros pa kun du gdug pa rnams phyin ci log gi zhe sdang las bzlog pa'i phyir yang dag pa'i zhe sdang chen po'i sgo nas bsad kyang sgrib par mi 'gyur zhing thabs de nyid kyis dngos grub grub par 'gyur ro zhes bstan pa ste/ 'di dag brjod cing de'i don yang 'di ltar yid la bya'o zhes ston to/ /sems can 'dul ba'i las byed pas na zhes pa ni/ zhe sdang can gyi sems can gzhan la gnod par byed pa'i bsam pa dang sbyor ba ma rungs pa dang ldan pa de mngon spyod lta bus 'dul ba'i las byed par gyur na/ de ltar byas kyang spyod pa de'i kha na ma tho ba dang ldan par mi 'gyur ba ni/dper na sman pa la sogs pa bzhin du ste/ ji ltar sman pa mkhas pas nad pa'i rkyen du 'bab pa'i kha ba sbyar nas nad pa la byin na/ 'phral du nad pa la mi zhim zhing 'khrug pa ltar snang yang nad zhi zhing phan pa sgrub par byed pa'i phyir bas/ sman pa la sgrib par mi 'gyur ba bzhin du/'dir gdug pa can gyi sems can la sbyor ba rtsub mo'i tshul gyis 'dul bar bstan pa yang rtsa ba'i snying rje chen pos bzung la de nyid la phan pa bsgrub par zad kyi/ mnar sems kyis ma yin pas na nyes par mi 'gyur zhing / de nyid bsod nams dam par 'gyur bar dgongs pa ste/ ji ltar mdo sde las rgyal bu tshong dpon gyis tshong pa sdig can la lam du mdung thung bsnun pa bzhin du rig par bya'o/ /pad+ma'i rigs la ni rgyud las/ pad+ma chu yis ma chags pa/ /de bzhin chags pa nyes med do/ /de skad smra zhing mi bya ba/ /byed kyang sdig pas mi gos so/ /zhes gsungs pa la/ pad+ma chu yis mi chags pa/ de bzhin chags pa nyes med do/ /zhes pa ni/ ci ltar pad+ma 'dam nas skyes shing 'dam rdzab nang na gnas kyang 'dam rdzab mi gtsang bar snang ba'i nyes pas ma gos pa bzhin du/ kun rdzob tu thabs thugs rje chen pos 'khor bar mi gtong zhing 'khor bar gnas te/ sems can smin cing grol bar bya ba'i phyir chags na'ang don dam par shes rab chags pa med pa'i ngo bo las gzhan du ma g.yos pas 'khor ba'i nyes pas ma gos par ston pa'o zhes pa ni/ de skad ces bya ba'i sgras/ pad+ma chu yis ma chags pa/ / de bzhin chags pa nyes med do/ /zhes bya ba'i don dang ldan par gnas pa la ni/ 'di skad smra zhing zhes bya ste/ don de dang ldan pas mi bya ba byed pa ni bya bar rigs pa ltar snang ba'i 'khor ba rnams dang rjes su mthun pa'i las spyod pa ste/ des nyes par 'gyur ba ltar snang yang sems shin tu rnam par dag pas sems can smin pa dang /grol bar bya ba'i phyir rjes su mthun pa'i 'dod chags pa'i spyod pa ston par zad pas nyes pas mi gos par bstan pa yin no/ /rin po che'i rigs la ni rgyud las/ sbyin dang mnyam pa'i chos med do/ /sgrub par byed cing smra ba ni/ / nor bu'i rigs chen chos yin te/ /myur du grub par byed pa yin/ /zhes gsungs pa la/ sbyin dang mnyam pa'i chos med de/ /zhes pa ni/ byang chub sems dpa'i phun sum tshogs pa thams cad ni/ sbyin pa'i pha rol tu phyin pa yongs su rdzogs pa las byung bar 'gyur te/ ji ltar shes rab kyi pha rol tu phyin pa'i mdo las kyang / bcom ldan 'das byang chub sems dpa' sems dpa' chen po chos rnam pa thams cad du mngon par rdzogs par 'tshang rgya bar 'tshal bas/ ji ltar shes rab kyi pha rol tu phyin pa la brtson par bgyi zhes gsol ba dang bka' stsal pa/sha ra dwa ti'i bu 'di la byang chub sems dpa' sems dpa' chen po mi gnas pa'i tshul du shes rab kyi pha rol tu phyin pa la gnas te/ sbyin pa dang / gtong ba dang / yongs su len pa mi dmigs pa'i phyir yongs su gtong ba med pa'i tshul gyis sbyin pa'i pha rol tu phyin pa yongs su rdzogs par bya'o zhes gsungs la/slob dpon klu sgrub kyis mdzad pa'i yi ge las kyang / dbul dang bkres pa'i dge sbyong bram ze la/ /sbyin pa tshul bzhin sbyin las ma gtogs pa/ /sbyin las gzhan pa'i gnyen mchog ma mchis so/ /zhes bstan pa yin te/de bas na bdag nyid kyis kyang ci nus shing bdog pas dus drug tu sbyin pa yongs su gtang bar bya la/ gzhan dag la yang de bzhin du bskul bar bya'o/ /sgrub par byed cing smra ba ni/ /zhes pa ni/ mdo las gsungs pa'i cho ga'i skabs skabs su klog cing nyams su blangs nas ji ltar yid la bsgom zhing dpyod pa ni sgrub par byed cing smra ba'o//nor bu'i rigs chen chos yin te/ /zhes pa ni/ rin po che'i rigs dang / chos de gnyis so so ma yin tha mi dad par bstan pa ste/ nor bu'i rigs gang yin pa yang chos la chos zhes bstan pa gang yin pa yang nor bu'i rigs 'di ste/dbyer med pa la bya'o/ /myur du 'grub par byed pa yin/ /zhes pa ni/ tshul 'dis ni theg pa 'og ma ltar 'gyangs pa ma yin te/ myur du 'grub par 'gyur ro zhes bstan pa yin no/ /lhag ma ni brda phrad par zad do/ /las kyang phan pa sgrub pa'i rang bzhin te/zhes pa ni/ sems can las ni phal du mi phan par 'grub par byed pa yin pas phan pa sgrub pa ma yin la/ gal te phan pa zhes 'grub tu zin kyang / bdag 'ba' zhig la phan par zad kyi/ gzhan la phan par nus pa grub pa ni nyung shas tsam du zad kyi mang po med la/de bzhin gshegs pa rnams kyi sku gsung thugs kyi phrin las kyis ni/ 'gro ba thams cad la phan pa sgrub pa dang / de ltar spyod pa'i rang bzhin can yin te/ de yang de bzhin gshegs pa la sogs pa'i snying po mnyes par byed pa'i bye brag las rnam pa lnga ste/de la de bzhin gshegs pa rnams kyi las ni 'di'o zhes pa/ gong du lnga'o zhes bstan pa de las dang por de bzhin gshegs pa rnams kyi las 'chad de/ de yang rgyud las/ sems can thams cad sangs rgyas dang / /byang chub sems dpa' nyid 'grub par//ji lta bar ni 'dul ba nyid/ /las kyi phyag rgyar bsgrub pa ste/ /zhes gsungs pa ste/ sems can thams cad sangs rgyas dang byang chub sems dpa' nyid du 'grub par bya ba'i thabs ni/ sems can gyi rnam pa ji snyed pa rnams sangs rgyas dang byang chub sems dpa' nyid du 'grub par bya ba'i phyir/sems can thams cad la las thabs dang / cha lugs dang / spyod pa dang / skad gang dang gang gis 'dul ba de lta bu'i tshul du ston cing ji ltar 'dul ba de bzhin du mdzad pa ni/ de bzhin gshegs pa'i phrin las 'grub par 'gyur ba ste/de'i rjes su mthun par sngags spyod pa rnams kyis kyang de bzhin du nyams su blang zhing spyad par bya bar bstan pa yin no/ /las kyi phyag rgya rab bsgrubs te/ /zhes pa ni/ phyag rgya zhes pa ni/ de ltar 'gro ba ji ltar 'dul ba'i phyag rgya ste/de bzhin gshegs pa'i phrin las kyi rtags dang / mtshan ma ste/ de rab tu bsgrubs na gtor te thob par 'gyur zhes bya'o/ /de bzhin gshegs pa'i rigs mnyes par byed pa'i las ni/ rgyud las/ mchod pa rnam pa bzhi rnams kyis/ sbyor ba rnam bzhi rnam pa bzhir/ /dus bzhin du ni sbyor ba yis/ /las rnams byed cing bsgrub par bya/ /zhes gsungs te/ bdag dbul ba'i mchod pa dang / rdo rje sgeg mo la sogs pa'o/ /rnam bzhir zhes pa ni/ bstod pa'i mchod pa la sogs pa'o/ /dus bzhin du zhes pa ni/zang zing dbul ba'i mchod pa bzhi ste/ spyir na las kyi dkyil 'khor du gsungs pa'i mchod pa bcu drug gi ngo bos nyin gcig la bcu drug mchod par bya ba'am/ rnam gcig dus bzhi la bcu drug po 'dis mchod par gyur na/ dkyil 'khor gyi lha rnams mnyes par 'gyur ro//de bas na de ni dkyil 'khor gyi lha'am/ gang la mos pa rang gi lha de mnyes pa'i las byed cing / gang 'dod pa'i dngos grub de bsgrub par bya ba'i rgyur gyur pa'o zhes bstan pa yin no/ /rdo rje'i rigs kyi las ni rgyud las/ sems can gdug pa gzhom pa'i phyir//de dang de yi las bsgrubs na/ /sangs rgyas byang chub thob par 'gyur/ /min na dngos grub gong ma bzhin/ /zhes gsungs pa ste/ sems can gdug pa gzhom pa'i phyir/ /zhes pa ni/ kA ma de ba la sogs pa 'dod pa'i khams kyi sems can rab tu gdul dka' zhing ma rungs par gyur pa rnams so//de dang de yi las bsgrubs na/ /zhes pa ni/ ma rungs pa de thabs gang gis gdul ba'i cha lugs dang / de'i spyod yul ji lta bus 'dul ba'i las bsgrubs na/ nyes par mi 'gyur zhing / de nyid kyis rnam par grol ba'i rgyur 'gyur bas na/sangs rgyas byang chub thob par 'gyur/ /zhes bya'o/ /min na dngos grub gong ma bzhin/ /zhes pa ni/ de'i las bsgrubs na sangs rgyas su 'grub par nges pa yin mod kyi/ 'on kyang gal te sangs rgyas su ma grub tu zin na'ang /rig 'dzin la sogs pa'i dngos grub gong du bshad pa de lta bu dag 'grub cing thob nges/ pad+ma'i rigs kyi las sgrub pa yang rgyud las/ 'jigs pa rnams las mi 'jigs sbyin/ /de bzhin gdug pa rnams 'dul ba/ /de ni pad+ma'i rigs kyi las/ /sangs rgyas 'grub pa stsol ba'o//zhes gsungs pa ste/ de la/ 'jigs pa rnams las mi 'jigs sbyin/ /zhes pa ni/ 'khor bar 'jigs pa dang / bdag pas phongs pas 'jigs pa dang / pha rol po'i dgras 'jigs pa rnams la chos dang zang zing / skyabs sbyin par byed cing /de bzhin gdug pa ma lus 'dul/ /zhes pa ni/ gong du gsungs pa de bzhin du gdug pa can gyi rnam pa 'dul bar byed pa ni/ pad+ma'i rigs kyi las te/ sangs rgyas kyi grub pa stsol bar mdzad pa yin te zhes pas ni/ 'di nyid byed pa lta bu'i tshul du yang dgongs pa yin no//nor bu'i rigs kyi las kyang rgyud las/ sangs rgyas rnams dang lus can la/ /dbang bskur de bzhin sbyin pa dang / /re ba thams cad rdzogs byed pa/ /las 'di don kun grub pa'o/ /zhes gsungs pa ste/ de la/ sangs rgyas rnams dang lus can la//dbang bskur de bzhin sbyin pa dang / /zhes pa ni/ rigs kyi yum dang ldan pa'i sngags kyis btab pa'i chu'i bum pas dbang bskur ba dang / rdo rje dbyings kyi dbang phyug ma la sogs pa'i phyag rgya'i phreng bas dbang bskur ba ste/ de la yang / de bzhin gshegs pa rnams la ni/mchod pa'i phyir dbang bskur la 'gro ba rnams la ni/ yon tan gong nas gong du 'phel bar bya ba'i phyir dbang bskur ba sbyin pa ste/ de bas na/ re ba thams cad rdzogs byed pa/ /las 'di don kun grub pa'o/ / zhes bya'o/ /dam tshig dang / chos dang / las zhes pa ni/ de yan chad du rim bzhin du bstan pa dag ste/ kyang zhes pa ni the tshom can gyi tshig ste/ gang zhe na/ bsrung ba dang / brjod pa dang / sgrub pa rnams kyis zhes bya ba dag gi nyams su blangs nas spyad par bya ba'i thabs mi mthun par bstan pa ste/de rnams kyang bsrung ba dang zhes pa ni dam tshig /brjod pa dang zhes pa ni chos/ sgrub pa dang zhes pa ni las kyi ngo bo'o/ /rnams kyis zhes pa ni/ de dag gsum ka'i mjug bsdu ba'i tshig ste/ khyad par du dam tshig la sogs pa'i phyag rgya'i dngos grub mchog myur ba 'grub par 'gyur ro zhes pa ni/de ltar de rnams bsrung ba dang / brjod pa dang / sgrub pa rnams kyi khyad par du dam tshig dang / chos dang las la sogs pa'i phyag rgya'i dngos grub mchog tu gyur pa de myur bar 'grub par 'gyur bar bstan pa yin no/ /lha rnams kyi ngo bo nyid kyi khyad par ni chos nyid de zhes pa ni/lha rnams so so'i rang gi ngo bo nyid gang yin pa'i khyad par la ni chos nyid ces bya ste/ 'di ltar dper na skyes pa rnams kyi chos nyid ni sgyu rtsal dang ldan pa yin la/ 'dzum pa dang / steg pa dang / sgeg pa la sogs pa ni/ bud med rnams kyi chos nyid yin pa dang 'dra bar 'dir yang lha'i ngo bo nyid kyi khyad par ni chos nyid du rig par bya'o//de yang phyag rgya chen po dang / dam tshig dang / chos dang / las kyi phyag rgya gtsor gyur pa las shes par bya ste zhes pa ni/ lha rnams kyi ngo bo nyid kyi khyad par chos nyid du 'dod pa de yang phyag rgya bzhir sbyor ba gang gtso bor gyur pa de las de bzhin du shes par bya ste/gang gi phyir de ltar bstan zhe na/ phyag rgya la lha'i khyad par kha cig la dngos po'i ngo bo nyid kyis gtso bor 'grub par byed par bstan te zhes pa rigs bzhi por brjod pa'i lha'i khyad par du bstan pa/ de dag la so so'i phyag rgya'i dngos po'i ngo bo nyid kyis bsgrubs na gtsor 'grub par 'gyur/de'i phyir phyag rgya bzhir sbyor ba gang gtso bor gyur pa las shes par bya'o/ /de dag kyang gang zhe na/ 'di ltar de bzhin gshegs pa dang / de'i rigs la ni phyag rgya chen po'o zhes bya ba dag gi tshul gyis te/de bzhin gshegs pa dang / de bzhin gshegs pa'i rigs la ni gtsor phyag rgya chen po kho na bsgoms pas myur du 'grub la/ de las gzhan pa gsum ni/ rigs gsum la go rims bzhin te/ de ltar rnam pa lnga'o zhes pa ni/ de las gzhan pa gsum ni/rdo rje'i rigs la sogs pa gsum ste/ de la rdo rje'i rigs la ni/ dam tshig gi phyag rgya bsgoms na lhag par 'grub/ /de bzhin du pad+ma'i rigs la ni/ chos kyi phyag rgya/ las kyi rigs la ni/ las kyi phyag rgya bsgoms na lhag par 'grub par bstan te/ de bas na rigs gsum po de la phyag rgya gsum/ lnga pa gnyis la gcig sbyar te rnam pa lnga'o zhes bya'o/ /de dag gi don 'di na mar rim bzhin du gsal bar ston te/ de la de bzhin gshegs pa'i chos nyid rgyud las/ rdo rje sems dpa'i ting 'dzin ni/ /sangs rgyas rnams kyi chos nyid yin//sangs rgyas kyis ni sangs rgyas 'di/ /gzhan las sangs rgyas mi rnyed do/ /zhes gsungs pa ste/ de la/ rdo rje sems dpa'i ting 'dzin ni/ /zhes pa ni/ sems brtag pa la sogs pa mngon par byang chub pa lnga'i rim pas/ rdo rje sems dpa' la sogs pa'i sku phyag rgya chen por rdzogs shing gsal bar bsgoms la/de'i snying ga'i zla ba'i steng du rdo rje bsgom pa'i ting nge 'dzin te/ sangs rgyas rnams kyi chos nyid yin/ /zhes pa ni/ ting nge 'dzin de ni/ sangs rgyas rnams kyi chos nyid yin par bstan to//sangs rgyas kyis ni sangs rgyas 'di/ /zhes pa ni/ sangs rgyas rnams kyis sangs rgyas su sgrub pa'am/ las bzhir bstan pa ste/ 'di ni phyag rgya chen por bsgoms pa kho nas rnyed par zad kyi gzhan gyi thabs kyis rnyed pa ma yin pas na/ gzhan las sangs rgyas mi rnyed do//zhes bya'o/ /de bzhin gshegs pa'i rigs kyi chos nyid kyang rgyud las/ phyag rgya chen por bsgom zhing ni/ /dngos grub thams cad ma 'grub pa/ /'di ni de bzhin gshegs rigs kyi/ /dngos grub mchog sbyin chos nyid yin//zhes gsungs te/ de'i don yang 'di lta ste/ de bzhin gshegs pa'i rigs kyi chos nyid kyang / sems brtag pa la sogs pa mngon par byang chub pa lnga'i tshul gyis phyag rgya chen por bsgoms la/ de bzhin gshegs pa'i rigs su sgrub pa'i dngos grub dang las la sogs pa bsgrubs na myur du 'grub par 'gyur ba ste/'di ni de bzhin gshegs pa'i rigs kyi zhes pa/ phyag rgya chen po bsgom pa 'di ni/ de bzhin gshegs pa'i rigs kyi dngos grub mchog sbyin par byed pa'i chos nyid yin pas na/ dngos grub mchog sbyin chos nyid yin//zhes bya'o/ /rdo rje'i rigs kyi chos nyid kyang rgyud las/ phyag rgya'i dam tshig mchog rnams ni/ /las rnams kun ni bsgrub par bya/ /phyag rgya chen po sbyor ba yis/ /rdo rje dngos grub thob par 'gyur/ /zhes gsungs pa ste/ de la/ phyag rgya dam tshig mchog rnams kyis//zhes pa ni/ rdo rje rigs kyi chos nyid ni/ sems brtag pa la sogs pa mngon par byang chub pa rnam pa lnga'i rim pas/ sku phyag rgya chen po gsal zhing rdzogs par bskyed pa'i thugs kar zla ba la rang gi dam tshig gi phyag rgya bsams te/ rdo rje rigs kyi dngos grub dang /las thams cad bsgrub par bya'o/ /phyag rgya chen po'i sbyor ba yis/ /zhes pa ni/ dam tshig gi phyag rgya chen po'i sbyor ba'i thabs 'dis/ rdo rje'i dngos grub thob par 'gyur bas na/ rdo rje'i dngos grub thob par 'gyur/ /zhes bya'o/ /pad+ma'i rigs kyi chos nyid kyang //rgyud las ni/ chos kyi phyag rgya'i sbyor ba yis/ /chos kyi phyag rgya brjod par bya/ /'di yis chos rnams sgrub pa ni/ /rdo rje chos kyi chos nyid do/ /zhes gsungs pa ste/ de la/ chos kyi phyag rgya'i sbyor ba yis/ /zhes pa ni/ rdo rje'i sems brtag pa la sogs pa mngon par byang chub pa rnam pa lngas/sku phyag rgya chen po gsal zhing rdzogs par bskyed la/ snying ga'i zla ba la chos kyi phyag rgya bzhag pa'o/ /chos kyi phyag rgya brjod par bya/ /zhes pa ni/ de ltar bsgoms nas chos kyi phyag rgya brjod pas/ chos kyi dngos grub dang /las thams cad grub par byas na/ 'di yis chos rnams sgrub pa ni/ /zhes bya'o/ /de ni pad+ma'i rigs kyi chos nyid yin pas na/ rdo rje chos kyi chos nyid do/ /zhes bya'o/ /rin po che'i rigs kyi chos nyid ni rgyud las/ las kyi phyag rgya'i sbyor ba yis/ / las kyi phyag rgya snying gar gnas/ /chos nyid 'di ni bsgom byas na/ /las kyi mchog ni grub par 'gyur/ /zhes gsungs te/ de la/ las kyi phyag rgya'i sbyor ba yis/ /zhes pa ni/ sems brtag pa la sogs pa mngon par byang chub pa lnga'i rim pas/ sku phyag rgya chen po gsal zhing rdzogs par bskyed pa'i/las kyi phyag rgya snying gar gnas/ /zhes pa ni/ de'i snying gar zla ba la las kyi phyag rgya bsam pa'o/ /chos nyid 'di ni bsgom byas na/ /zhes pa ni/ de ltar byas pa'i nor bu'i chos nyid 'di bsgom par bya'o//nor bu'i rigs kyi dngos grub dang / las bzhi'i mchog grub par gyur pas ni/ las kyi mchog ni grub par 'gyur/ /zhes bya'o/ /'o na 'di ltar sbyar ba ci dgos she na/ chos nyid kyi bye brag lnga po rnams sbyar ba yang / ji ltar rigs par rang gi lha'i dngos grub dang /las thams cad dang / sgrub pa la sbyar bar bya'o zhes gsungs te/ chos nyid kyi bye brag lnga po rnams sbyar ba zhes pa ni/ de bzhin gshegs pa dang / de bzhin gshegs pa'i rigs kyi chos nyid la sogs pa lnga dang / phyag rgya bzhir sbyar ba'o//yang zhes pa ni/ de ltar sbyar ba yang dgos pa med pa ma yin par bstan pa'i cho ga'i don te/ ci rigs par zhes pa ni/ rigs lnga por brjod pa/ de dag ji ltar rigs par ro/ /rang gi lha yi dngos grub dang / /zhes pa ni/ blo rno rtul dang / skal ba che chung gi dbang gis dngos grub rab 'bring rnam gsum 'byung bar bstan pa dag go//las thams cad ces pa ni/ las rnam pa bzhi po rnams so/ /bsgrub par bya'o zhes pa ni/ rigs lnga ji ltar rigs pa bzhin du dngos grub rab 'bring rnam pa gsum dang /las bzhi sgrub pa la chos rnam pa lnga sbyar dgos pas na 'di ltar bstan to/ /rjes su chags pa dang / dbang du bya ba ni zhes pa ni/ lus ngag yid gsum gyis 'bad pa bzlas brjod dang / bsgom pa'i sgo nas lha dgyes pa bskyed pa ni rjes su chags pa'o//dbang du bya ba zhes pa ni/ de ltar dgyes pa bskyed pa tsam du zad kyi dbang du mi bya ba ma yin gyi/ bdag nyid kyi dbang du gyur par bya ba la ni/ dbang du bya ba zhes bya'o/ /de bas na rjes su chags pa dang / dbang du bya ba ni/ rang gi lha rab tu mnyes par bya ba dang /dbang du gyur par bya ba'i zhes bstan te/ rang gi lha dgyes pa bskyed cing mnyes par byas nas/ bdag gi dbang du gyur par bya bar zad kyi/ de ltar ma yin pa'i thabs kyis ni ma yin par rig par bya'o/ /gnyi ga la yang zhes pa ni/ rjes su chags pa dbang du bya ba gnyi ga la yang zhes bya/rigs kyi bye brag las rnam pa lnga lnga ste zhes pa ni/ gnyi ga la yang so sor de bzhin gshegs pa la sogs pa lnga lngar sbyar na/ lnga phrag gnyis te bcur 'gyur bar rig par bya'o/ /de la re zhig rjes su chags pa rnam pa lnga'o zhes pa ni/de ltar gnyi ga 'brel pa ltar bstan pa de las/ dang po rjes su chags pa de brjod par bya ste/ de la yang / rjes su chags pa rnam pa lngar rig par bya ste/ de yang gang zhe na/ de la yang / dang por de bzhin gshegs pa'i rjes su chags par bya ba ste zhes bya ba la sogs pa dag ste/de yang rgyud las/ sems can don ni rab byed cing / /bdag nyid sangs rgyas byang chub 'dod/ /sangs rgyas rjes su dran gyur nas/ /sangs rgyas thams cad chags par bya/ /zhes gsungs pa ste/ de la/ sems can don ni rab byed cing //zhes pa ni/ khyad par du'am mchog tu sems can rnams ma smin pa smin par byed pa dang / ma grol ba grol bar byed par rab tu brtson par byed pa'o/ /bdag nyid sangs rgyas byang chub 'dod/ /ces pa ni/ de ltar sems can gyi don du gnyer ba'i phyir ma yin te/bdag nyid sangs rgyas dang / byang chub sems dpa'i phyag rgya chen po'i go 'phang 'dod pa'i phyir de ltar brtson pa'o/ /sangs rgyas rjes su dran gyur nas/ /zhes pa ni/ de ltar byed de de lta bu 'dod pa des kyang rang thad du bya ba ma yin te/rtag par sangs rgyas rjes su dran par gyur pa'i bsam pa dang ldan pa'i sgo nas bya ba yin par bstan pa'o/ /sangs rgyas thams cad chags par bya/ /zhes pa ni/ tshul de kho nas sangs rgyas thams cad chags par bya'o/ /de las gzhan pa'i thabs kyis ni ma yin no zhes bstan pa ste/sangs rgyas la chags pa de ltar byas na/ bdag la dgyes te chags shing dgongs par 'gyur ro zhe'o/ /de bzhin gshegs pa'i rigs la rjes su chags par 'gyur ba'i thabs kyang / rgyud las/ ji ltar yul dang ldan gyur nas//rdo rje sems dpa' bsgrub par bya/ /de nyid bskul bar myur ba ru/ /rjes su chags nas rab tu 'grub/ /ces gsungs te/ de la/ ji lta'i yul dang ldan par 'gyur/ zhes pa ni/ byang chub sems dpa' dga' ba rdo rje la/gsang ba la sogs pa brten pa'o/ /rdo rje sems dpa' bsgrub par bya/ /zhes pa ni/ de brten pa yang / /rdo rje sems dpa' kho na bsgrub pa'i phyir te/ srid pa'i dgos pa gzhan bsgrub pa'i phyir ni ma yin no zhes bstan pa yin no/ / de nyid bskul bas myur ba ru/ /zhes pa ni/ yul rdo rje lA s+ye la sogs pa brten pa'i tshul lam/ thabs de nyid kyis bskul bas/ lha'i gdan la 'bab cing myur du bdag la lha rnams dgyes shing rjes su chags nas grub par stsol ba mdzad pas na/ rjes su chags nas rab tu 'grub/ /ces gsungs pa yin no/ /rdo rje'i rigs la rjes su chags par 'gyur ba'i thabs ni/ rgyud las/ sangs rgyas bka' bzhin bya ba yis/ /gdug pa rnams la drag spyod pas khro bos sems can sbyang phyir te//'di ni rdo rje chags pa'o/ /zhes gsungs pa ste/ de la/ gdug pa rnams la drag spyod pas/ /zhes pa ni/ gdug pa can gyi sems can rnams la drag po'i spyod pas 'dul bar byed pa'o/ /khro ba'i sems can la/ khro ba'i tshul gyis rjes su mthun par byas nas/de'i rgyud sbyang bar bya ba'o/ /de ni rdo rje'i chags pa'o/ /zhes pa ni/ 'di ltar bya bar bstan pa la mnar sems kyi dbang gis ma yin te/ 'di ltar rab tu khro ba rnams la tshul de nyid kyi sgo nas rgyud sbyang bar bya ba'i phyir/de ltar bstan par zad de/ de ltar bstan pa'i tshul de ni/ /rdo rje'i chags pa yin no zhes bstan te/ /pad+ma'i rigs la rjes su chags par 'gyur ba'i thabs ni/ rgyud las/ chags la lta zhing byams pa dang / /snying rje dang ni chos smra ba/ /mi 'jigs thams cad sbyin pa ste//pad+mo'i sems dpa' chags par byed/ /ces gsungs pa ste/ de la/ chags la lta zhing byams pa dang / /zhes pa ni/ byams pa'i sems dang ldan pa'i sgo nas/ sems can smin cing grol bar bya ba'i don la chags par byed pa'o/ / snying rje dang ni chos smra ba/ /zhes pa ni/ snying rje chen po la gnas pa'i sgo nas/ gzhan la phan gdags pa'i chos kyi phyag rgya la gnas shing gzhan la gzhung dang / rigs pa'i chos bshad pa'o/ /mi 'jigs thams cad sbyin pa ste/ /zhes pa ni/ gang 'jigs pa gsum gyis nyen pa la skyabs rnam pa gsum sbyin par byed pa'o//pad+mo'i sems dpa' chags par byed/ /ces pa ni/ tshul 'dis ni pad+ma'i rigs bdag la dgyes shing chags par 'gyur bar bstan pa yin no/ /rin po che'i rigs la rjes su chags par 'gyur ba'i thabs ni/rgyud las/ dbang bskur rab tu sbyin pa dang / /nor tshogs rab tu sbyin pa ste/ /sangs rgyas sems can don la sbyor/ /'di ni nor bu'i rigs chags pa'o/ /zhes gsungs pa ste/ de la/ dbang bskur rab tu sbyin pa dang //zhes pa ni/ 'phags pa rnams la mchod pa dang / sems can rnams kyi don bya ba'i phyir/ dbang bskur ba sbyin par byed pa'o/ /nor tshogs rab tu sbyin pa ste/ /zhes pa ni/ zang zing 'brel pa rnams la/ nor rin po che'i tshogs la sogs pa'i sbyor ba thams cad yongs su gtong ba'o//sangs rgyas sems can don la sbyor/ /zhes pa ni/ de ltar bya ba yang srid pa gzhan sgrub pa'i phyir ma yin gyi/ bdag nyid sangs rgyas par bya ba'i phyir/ sems can gyi don la sbyor bar byed pa'o//'di ni nor bus chags pa'o/ /zhes pa/ tshul 'di ltar byed pa 'di ni rin po che'i rigs kyi lha bdag la dgyes shing chags pa'o zhes bstan pa yin no/ /da ni dbang du bya ba'i thabs bstan pa'i phyir/ de la rigs bzhi'i lha rnams dbang du bya ba'i sbyor ba bshad de zhes bya ba la sogs pa gsungs pa ste/de la de bzhin gshegs pa lnga char ram gcig kho na bzlas pas dbang du bya ba'i thabs bstan pa'ang rgyud las/ chags pa smad par mi bya'o/ /rnam par dag pa bde mchog stsol/ /de bzhin sems can don la sbyor//'di ni sangs rgyas rjes su sbyor/ /zhes gsungs pa ste/ de la/ chags pa smad par mi bya ste/ /zhes pa ni/ nyan thos ltar rang don lhur len cing 'khor ba spangs pa ma yin te/ thugs rje chen pos 'khor ba la chags shing don mdzad na/yang shes rab chen po'i dbang gis 'khor ba'i nyes pas ma gos pa'o/ /rnam gcig byang chub sems rnam gnyis la chags pa'i mtshan nyid de/ de ni smad par bya ba ma yin pas na mi smad ces bya'o/ /rnam par dag pa bde mchog stsol//zhes pa ni/ de ltar thugs rjes 'gro ba'i don du 'khor ba la chags kyang shes rab kyis srid pa dag par rtogs pa'i srid pas 'ching bar mi 'gyur zhing / mi gnas pa'i mya ngan las 'das pa'i bde ba'i mchog sbyin par mdzad pa'o//de bzhin sems can don la sbyor/ /zhes pa ni/ tshul de bzhin du sems can gyi don la sbyor ba 'di ni/ sangs rgyas rnams bdag la dgyes te/ rjes su chags shing dbang du gyur par bstan pa yin no/ /de bzhin gshegs pa'i rigs kyi dbang du bya ba'i cho ga ni/rgyud las/ rab tu dga' khyod ces smra zhing / /'dod pa'i bde ba'i bdag nyid bstan/ /rdo rje sems dpa' bsgrub par bya/ /de nyid bsgrub pas dbang du bya/ /zhes gsungs pa ste/ de la/ rab tu dga' khyod ces smra zhing //zhes pa ni/ khyod ni chos kyi sku'i ngo bo ste/ rab tu dga' zhes bya bas bstan to/ /'dod pa'i bde ba'i bdag nyid bstan/ /zhes pa ni/ 'jug pa byang chub sems kyi mtshan nyid byang chub kyi sems la bya ste/ de la 'dris shing goms par byed pa ni 'dod pa bsten pa ste/tshe 'di dang phyi ma gnyis la bde bar 'gyur ba'i bdag nyid pas na de ltar bstan to/ /rdo rje sems dpa' bsgrub par bya/ /zhes pa ni/ tshul de ltar 'dod pa bsten pa de yang srid pa'i 'bras bu gzhan 'dod pa ma yin te/rdo rje sems dpa' kho na bsgrub par bya ba'i phyir bsten pa'o/ /de nyid sgrub pas dbang du bya/ /zhes pa ni/ de ltar bstan pa'i tshul de nyid kyis bskul bas bdag nyid la dgyes te/ rang dbang med par dbang du 'gyur bar bstan pa yin no//rdo rje'i rigs kyi dbang du bya ba ni/ rgyud las/ sems can dag phyir sangs rgyas bka'/ /lus can rnams kyang mi 'jigs phyir/ /sangs rgyas bstan pa bsrung ba'i phyir/ /bsad na dbang du gyur pa mthong / /zhes gsungs te/sems can dag phyir sangs rgyas bka'/ /zhes pa ni/ gdug pa ldan pa ma rungs pa'i sems can rnams/ de las gnas bsgyur zhing sems rnam par dag par bya ba'i phyir/ sangs rgyas kyi bka' la gnas te/ lus can 'jigs pas nyen pa rnams la mi 'jigs pa sbyin pa dang /sangs rgyas kyi bstan pa yun ring du gnas par bsrung bar bya ba'i phyir/ ma rungs pa'i gdug pa can de dag bsad par gyur na/ rdo rje rigs kyi lha rnams dgyes te/ rang bzhin gyis dbang du 'gyur ro zhes bstan to/ /pad+ma'i rigs kyi lha dbang du bya ba'i cho ga ni/rgyud las/ chags pa dag pa brtag pa ni/ /pad+ma'i 'dab ma phye ba ste/ /chags sam chags par byed na yang / /'dul ba'i don du dbang byed pa'o/ /zhes gsungs pa ste/ de la/ chags pa dag pa brtag pa ni/ /zhes pa ni/ sems can dngos por brtags pa rang kha chags pa las bzlog nas/ thugs rje dang shes rab kyi dbang gis 'khor ba dang sems can la chags par mdzad pa ni chags pa dag pa ste/ de ltar brtags pa'i rigs pa bas na chags pa dag par bstan pa'o/ /dpe ci zhe na/ pad+ma'i 'dab ma phye ba ste/ / zhes pa ste/ ji ltar pad+ma kha zum pa dag la ni/ dbyibs dang kha dog brtag par dka' la/ pad+ma kha bye ba dag la ni/ dbyibs dang kha dog mngon du gsal bar brtag par sla ba bzhin du/ rA ga zhes bya ba'i sgras pad+ma dang chags pa zhes bya ba sgra mthun par 'dren te/ 'dis sems can rnams kyi chags pa ni pad+ma kha zum pa lta bur mi gsal bar gyur pas thams cad la sgrib pa'i mtshan nyid can du brtag la/de bzhin gshegs pa'i chags pa ni/ pad+ma kha bye ba lta bu ste/ rab tu gsal zhing thams cad la phan 'dogs pa'i ngo bor bstan pa ste/ 'dir 'di ltar bstan pa yang 'gro ba'i don smin par mdzad pa'i mtshan mar bstan pa'o//chags sam chags par byed na yang / /zhes pa ni/ thugs rjes 'gro ba'i don la chags pa dang sems can ltar dngos por chags pa ltar snang yang / gdul bya smin par bya ba'i phyir de ltar chags par zad de/ ye shes chen po chos nyid las ma g.yos pas na/des mnyes par mi 'gyur zhing gdul bya'i don du de ltar chags pa'i thabs kyis lha nyid mnyes shing rang bzhin gyis dbang du gyur pas na/ gdul ba'i don du dbang byed pa'o zhes bya'o/ /nor bu'i rigs kyi lha dbang du bya ba'i cho ga ni/ rgyud las/ sangs rgyas thams cad dbang bskur phyir/ /rdo rje rin chen nyin re bzhin/ /spyi bor bzhag nas dbang bskur na/ sangs rgyas thams cad dbang du bya'o zhes gsungs pa ste/ de la/ sangs rgyas thams cad dbang bskur phyir/ /zhes pa ni/ sangs rgyas thams cad mchod pas mnyes pa bskyed par bya ba'i phyir dbang bskur ba'o//rdo rje rin chen nyin re bzhin/ /zhes pa ni rdo rje rin po che'i dam tshig gi phyag rgya snying ga nas byung ba dpral bar bcings la/ nyin re bzhin ji tsam nus pa bzhin du spyi bor bzhag nas dbang bskur/ sangs rgyas thams cad dbang gi mchod pas mnyes par bya ba'i sgo nas rang dbang med par dbang du 'gyur bas na/spyi bor bzhag nas dbang bskur nas/ sangs rgyas thams cad la dbang du bya'o/ /dam tshig dang / chos dang las dang / chos nyid dang / rjes su chags pa dang / dbang du bya ba'i cho ga bshad zin to// //da ni sogs pa'i sgras bsdus pa'i gsad pa'i cho ga bstan pa'i phyir na/ji ltar 'dod pa'i dngos grub dang 'gal ba'i las kyi lhag ma ma lus par rigs bzhi char la yang snying po dang / phyag rgya dang / gsang sngags rnams las legs par mang du bzlas brjod byas pa dang zhes bya ba la sogs pa gsungs te/ de la/ ji ltar 'dod pa'i dngos grub dang 'gal ba'i las kyi lhag ma ma lus pa zhes pa ni/sa pa la sogs pa ji ltar 'dod pa'i dngos grub de dag bsgrubs kyang thob par mi 'gyur ba'i 'gal ba'i las kyi lhag ma ni sgrib pa stug po byang bar ma gyur pas/ sgrib pa'i lhag ma lus pas 'thob tu mi ster ba yin la/ de'i dbang gis rigs bzhi char la yang snying po la sogs pa rnams legs par grangs mang du bzlas brjod byas pa dang /bsgom pa'i sbyor ba dag gis sems can gyi don bya ba dang / sangs rgyas su sgrub pa'i dngos grub rab 'bring dang / sa pa la sogs pa dngos grub gzhan rnams bdag gis 'thob cing / de 'byung ba'i rgyu bdag la yod par ma mthong na/de'i phyir drag shul gyis bsgrub pa'i rnal 'byor zhes pa ni/ de ltar bsgrubs kyang grub par ma nus pa'i rgyu de'i phyir/ drag shul gyis bsgrub pa'i rnal 'byor dpal de kho na nyid bsdus pa nyid kyi rdo rje'i rigs kyi dkyil 'khor las/ rigs bzhi gsad pa'i skabs nas gsungs pa'i cho gas/rang gi lha la drag shul spyod pa'i las kyi mtshan nyid bstan pas/ dngos grub ji ltar 'dod par grub pa'i thabs su gyur pa'i las grub pa de dag rnal 'byor pas bstan cing brtsam par byas la dngos grub sgrub po zhes bstan to/ /gzhan dag na re/ ci srog chags gzhan gang yang ngan song du ltung bar 'gyur ro zhes gleng na/'dir/ de bzhin gshegs pa la sogs pa/ /bsad pas dngos grub thob par 'gyur/ /zhes bstan pa mi 'gal la ma zhe na/ bsad pa de yang rang gi lha dngos grub ster ba dang 'gal ba'i gnas skabs su drag shul spyod pa'i sbyor bas yongs su stong bar shes par bya'o zhes gsungs te/'dir bsad ces pa yang dngos su gsod pa la mi bya ste/ ji ltar bsgrubs kyang dngos grub mi ster ba'i sems de bsgyur nas/ dngos grub myur du sbyin par mdzad pa la rig par bya'o zhes bstan to/ /'o na de ltar sgrub pa de gang gis sam gang ltar bsgrub par bya ba yin zhe na/de sgrub pa'i rgyu yang rigs bzhi'i bye brag las bstan te zhes bya ba la sogs pa gsungs te/ de la dang por de bzhin gshegs pa la drag shul spyod pa'i rgyu bstan pa yang / rgyud las/ sems can kun don ma mthong zhing / / sangs rgyas de nyid mi sbyor ba/ /lus sam tshig gam yid kyis su/ /bsad na dngos grub thob par 'gyur/ /zhes gsungs te/ de la/ sems can kun don ma mthong zhing / /zhes de bzhin gshegs pas sems can gyi don bya bar ma dgongs pa'o/ /sangs rgyas de nyid mi sbyor ba/ / zhes pa ni bden pa las nyams shing sems can gyi rkyen dang 'tsham par don mi mdzad pa'o/ /lus sam tshig gam yid kyis su/ /zhes pa ni de ltar sangs rgyas gdul bya la dgongs shing sems can gyi don mi mdzad na/ gzugs dngos sam sngags sam/ ting nge 'dzin gyi sgo nas bsad na yang nyes par mi 'gyur zhing gdod dngos grub thob par 'gyur ro zhes bstan pa yin pas na/bsad na dngos grub thob bar 'gyur/ /zhes bya'o/ /de bzhin gshegs pa'i rigs la drag shul spyod pa'i rgyu bstan pa yang / rgyud las/ dngos grub thams cad mi thob cing //rigs kyang stsol bar mi byed na/ /rdo rje kun du ngal ba yis/ /bsad na myur du grub par 'gyur/ /zhes gsungs pa ste/ de la/ dngos grub tshul bzhin mi thob pa/ /zhes pa ni tshul bzhin bsgrubs kyang dngos grub skal ba bzhin du mi ster ba'o/ / rigs kyang stsol bar mi byed na/ /zhes pa ni/ tha na rtags phra mo tsam mam/ sems kyi nyams bde ba tsam yang snang bar mi byed pa'o/ /rdo rje kun du dral ba yis/ /zhes pa ni/ sangs rgyas dgongs pa de lta bu nye bar 'jog na/ rdo rje dral ba'i phyag rgyas bsad na yang / nyes par mi 'gyur zhing gdong dngos grub myur du 'grub par 'gyur ro zhes bstan pa yin pas na/bsad na myur du 'grub par 'gyur/ /zhes bya'o/ /rdo rje'i rigs la drag shul spyad pa'i rgyu bstan pa ni/ rgyud las/ khro bas gdug pa mi 'dul zhing / /de bzhin sems can mi 'dul dang / bdag nyid sdug bsngal byung na yang / /hUM zhes bya bas gsad par bya/ /zhes gsungs te/ de la/ khro bas sems can mi 'dul zhing / /zhes pa ni tshul bzhin bsgrubs kyang ma rungs pa'i sems can rnams mngon spyod kyi las kyis 'dul bar mi mdzad pa'o/ /de bzhin sems can mi 'dul dang //zhes pa ni de bzhin du thabs gzhan gyis kyang sems can rnams 'dul bar byed mi nus pa'o/ /bdag nyid sdug bsngal gyur na yang / /zhes pa ni sgrub pa po bdag nyid lus sems la ngal dub drag po'i sgo nas nyon mongs par bsgrubs kyang rtags dang dngos grub smin par mi mdzad pa'o//na yang zhes pa ni lhag ma dang bcas pa'i tshig ste/ hUM zhes bya bas gsad par bya/ /zhes te/ tshul de ltar bsgrubs kyang grub par ma gyur na/ hUM zhes bya ba'i sngags kyi sbyor bas bsad na yang nyes pa med cing 'grub par 'gyur zhes bstan to/ / pad+ma'i rigs kyi drag shul spyod pa'i rgyu bstan pa ni/ rgyud las/ snying rje med cing byams pa med/ /sems can gdug pa mi sbyor zhing / /bdag kyang bslus par gyur na ni/ /bsad na dngos grub thob par 'gyur/ /zhes gsungs pa ste/ de la/ snying rje med cing byams pa med//ces pa ni/ tshul bzhin du ji ltar bsgrubs kyang grub pa ma ster na/ de bzhin gshegs pa yang snying rje dang byams pa dang bral ba yin no zhes bsnyad pa yin no/ /sems can gdug pa mi sbyor zhing / /zhes pa ni sems can gdug pa can rnams 'dul bar mi nus pa'o//bdag kyang bslus par gyur na ni/ /zhes pa ni/ tshul bzhin du ji ltar bsgrubs kyang dngos grub sbyin par mi mdzad dam/ rtags dang mtshan ma dag sngar byung du zin kyang / phyis dngos grub ma thob par gyur na ni/ bdag nyid bslus par gyur pa yin pa min pas na/bsad na dngos grub thob par 'gyur/ /zhes bya ste de bzhin gshegs pa la sogs pa gang bsgrub pa'i lha de thabs dang cho gas bsad na yang nyes par mi 'gyur zhing / de nyid kyis dngos grub thob par 'gyur ro zhes bya'o/ /na ni zhes pa ni the tshom can gyi tshig ste/srid ni mi srid na yang gal te de ltar srid par 'gyur du zin na ni/ de ltar bya dgos zhes bya ba'i don to/ /rin po che'i rigs la drag shul spyod pa'i rgyu bstan pa ni/ rgyud las/ mi gtong bdag gi don med cing / /nor ster ba dang mi rungs dang //sems can rnams ni dbul 'gyur na/ /bsad na dngos grub thob par 'gyur/ /zhes gsungs pa ste/ de la/ mi gtong bdag gi don med cing / /zhes pa ni/ tshul ji lta ba bzhin du bsgrubs kyang dngos grub mi gtong ba dang bdag nyid la dgos ba ci dang ci yod kyang de dag 'grub par 'gyur ba'i nus mthu med cing mi 'grub pa dang /nor stor ba dang ma rungs dang / /zhes pa ni/ bdag nyid la bdog pa'i nor la sogs pa yal bar gyur pa dang / ci dang ci bya ba thams cad log par 'gyur te/ thog tu mi 'bab pa dang / bdag la brten pa'am/ bdag gi yul gyur pa'i sems can thams cad bdog pas phongs shing dbul bar gyur na/ de bzhin gshegs pa'i rang gi sgrub pa lha des dam tshig las 'gal bar mdzad pa yin pas/ bsad na dngos grub thob par 'gyur//zhes bya ste/ thabs dang tshigs gang gis bsad na yang nyes pa med cing / de kho nas gdod dngos grub 'grub par 'gyur ro zhes bstan pa yin no/ /rigs bzhi'i lha rnams la drag shul spyod pa'i sbyor ba 'di yang zhes bya ba ni/ rgyas par 'byung ba'i khungs bstan pa'i phyir te/sgrub thabs 'dir ni/ nyung shas tsam zhig bstan pa yin/ /zhes pa'i don to/ /dmigs pa dang bcas pa'o zhes pa ni/ mtshan ma dang bcas pa'i sgo nas drag shul spyod pa dang / mtshan ma med pa'i sgo nas drag shul spyod pa gnyis las 'di yan chad bstan pa de ni/mtshan ma dang bcas pa'i sgo nas drag shul spyod pa'i cho ga bstan pa'o/ /da ni mtshan ma med pa'i sgo nas drag shul spyod pa'i cho ga bstan pa ni/ dmigs su med pa'i sbyor bas kyang / /mi 'dod pa yi las sbyang ba'i/ /mtshan nyid drag shul spyod byas na//dngos grub thob par bstan pa'i phyir/ /zhes bya ba la sogs pa gsungs te/ /de la/ dmigs su med pa'i sbyor bas kyang / /zhes pa ni/ rnam par mi rtog pa'i ting nge 'dzin te/ mi 'dod pa'i las spyang ba'i mtshan nyid ces pa ni/ rnam par mi rtog pa'i ting nge 'dzin gyi sbyor bas kyang / dngos grub thob tu mi ster ba'i las ngan sgrib pa sbyang ba'i mtshan nyid drag shul spyod pa'i las byas na/ sgrib pa sel zhing dngos grub thob par 'gyur ba'i thabs bstan pa'i phyir/ dmigs su med pa'i ting nge 'dzin gyi sbyor ba bstan te/de yang rgyud las/ de la/ kha cig thob med rnal 'byor gyis/ /sangs rgyas bsad pa'i rnal 'byor can/ /de rnams rab tu gdon bya'i phyir/ /nged rnams dngos grub myur du stsol/ /zhes gsungs te/ de la thob med rnal 'byor gyis zhes pa ni/rnal 'byor pa kha cig gis rigs bzhi dag bsgrubs kyang dngos grub ma thob pa dag go /sangs rgyas bsad pa'i rnal 'byor can/ /zhes bya ba ni/ ting nge 'dzin de ltar bsgoms pa ni/ sangs rgyas dang byang chub sems dpa' gang dngos grub mi ster ba de bsad pa'i rnal 'byor dang ldan par bya ste/de rnams rab tu gdon pa'i phyir/ /zhes pa ni/ gang dngos grub mi ster bar byed pa'i lha dang / dngos grub mi thob pa'i rgyu sgrib pa de dag gnad la dbab cing zad par byas nas/ gang 'dod pa'i dngos grub thob par bya ba'i phyir/de bzhin gshegs pa de rnams sgrub pa po de dag dngos grub myur bar stsol bar byed do zhes gsungs pas na/ nged rnams dngos grub myur du stsol ba'o/ /zhes bya'o/ /rdzogs pa'i sangs rgyas la sogs pa'i rang gi lha zhes pa ni/ sgrub pa po rang gang sgrub pa'i lha'o//rnam pa med pa'i rjes dran pa'i sgo nas zhes pa ni/ dbyibs dang / cha lugs dang / kha dog gi mtshan mar snang ba'i rnam pa rnams mi dmigs shing stong pa chen po rnam par mi rtog pa'i ting nge 'dzin mngon du byas pa ni/rnam pa med pa'i rjes su dran pa zhes bya ste/ de lta bu'i ting nge 'dzin rjes su dran par bya ba'i sgo nas bsgom pa dang / de bzhin du bdag dang chos thams cad dmigs su med par bsgoms pas zhes pa ni/ rang gi lha'i rnam pa med par bsgoms pa'i tshul de bzhin du/bdag dang phyi nang gi dngos po'i chos phung po la sogs pa g.yo ba dang mi g.yo ba thams cad dmigs su med par bsgoms pas dngos grub mi 'thob pa'i bgegs dang / las dang nyon mongs pa'i sgrib pa thams cad mkhyen par 'gyur bas na/ji ltar 'dod cing gang sgrub pa'i dngos grub gdod thob par 'gyur te/ ci'i phyir zhe na/ mdo sde las kyang chos nyid la ni bgegs mi 'jug la/ me lce'i thor to la sbrang bu mi chags zhes gsungs pa'i phyir te/ de bas na bcom ldan 'das kun du bzang pos de ltar spyod pa'i rnal 'byor pa de rnams la deng dngos grub myur du stsol bar mdzad do zhes rgyud las gsungs pa zhes bstan to//des 'di gsungs par 'gyur te zhes bya ba la sogs pa'i don ni/ gong du bstan pa'i don des ni 'di ston par byed pa yin te/gang zhe na/ gang gi tshe sngags legs par mnyes par byas kyang zhes bya ba la sogs pas te/ gang gi tshe sgrub pa pos gsang sngags kyi cho ga ji lta ba bzhin du brtsams nas/ sgrub pa'i lha rnams mnyes par byas kyang / rnal 'byor pa sgrub pa po des ji ltar 'dod pa'i dngos grub sgrub pa de thob par ma gyur na/thob par gyur pa de'i tshe phyag rgya chen po dang sogs kyis lhag ma gsum yang bsdu ste/ phyag rgya bzhi dang ldan par bsgom pa'i sbyor ba dang snying po la sogs pa bzlas brjod kyi sbyor ba'i sgo nas dngos grub sgrub par byed pa'i snga rol dang /de ltar byas pa'i rjes la yang rang gi lha'i chos kyi sku la lhag par dmigs te/ rnam par mi rtog pa'i ting nge 'dzin dmigs pa spangs pa'i sbyor ba la lhag par brtson zhing / yun ring du dmigs par bya'o zhes bstan to//gal te ji ltar bsgrubs kyang dngos grub ma ster na lha rnams drag shul gyis gsad par bya ba'i thabs dmigs pa dang bcas pa dang / dmigs pa med pa'i sgo nas bsgrub par bstan pa bshad zin to// //da ni lha'i bye brag dang / snying po dang / phyag rgya dang /sngags dang / rig sngags kyi khyad par bstan pa'i phyir na/ de la de bzhin gshegs pa'i snying po'i bye brag las kyang / rab mchog pa'i bsod nams dang / ye shes kyi tshogs la sogs pa'i don lha mnyes par bya ba'i rgyu rnams bstan te/de dag kyang sngags pas shes par bya'o zhes bya ba la sogs pa gsungs te/ de bzhin gshegs pa'i zhes pa ni/ de bzhin gshegs pa lnga po dag go /snying po la sogs pa zhes pa ni/ de dag so so'i snying po dang sogs kyi sgras phyag rgya dang /sngags dang / rig pa dag bsdus pa'o/ /de dag gi bye brag las zhes pa ni/ snying po la sogs pa so sor phye nas ming gzhan du bsgyur te btags pa de dag gi bye brag go /kyang zhes pa ni lhag ma can gyi tshig ste/ rab mchog pa'i bsod nams dang ye shes kyi tshogs la sogs pa'i don zhes bya ba dag ste/rab mchog pa'i zhes pa ni/ sangs rgyas pa'i zhes bya ba'i tha tshig go /bsod nams dang ye shes kyi tshogs la sogs pa ni sangs rgyas pa'i rgyu tshogs rnam pa gnyis te/ de yang bskal pa grangs med pa gsum du bsags pas kun dang thun mong ma yin pa'i phyir rab mchog go /sogs pa ni de'i cha dang mthun pa'i rnam par dkar ba'i bag chags gzhan gang dag yod pa dag go/ /don zhes pa ni/ sangs rgyas kyi rgyu'i tshogs rnam pa gnyis bsags pa rdzogs pa'i don gyis sangs rgyas pa yin pa bzhin du/snying po la sogs pa'i don zhes pa 'dir yang snying po dang / phyag rgya dang / gsang sngags dang / rig pa la sogs pa'i khyad par gyi don ji lta ba bzhin du rig cing brjod pa'i don gyis lha mnyes par bya ba'i rgyu rnams ston to/ /snying po la sogs pa'i khyad par de dag kyang sngags pas bya dgos zhes bstan to//rnam gcig rab mchog ces pa ni/ 'og ma nas sbyar te/ rab tu gyur pa'i bsod nams kyi tshogs dang / mchog tu gyur pa'i ye shes kyi tshogs la sogs pa rdzogs par gyur pa'i don gyis 'bras bu sangs rgyas par gyur pa bzhin du/'dir yang sangs rgyas shing dngos grub thob pa'i rgyu ni/ snying po la sogs pa'i khyad par shes pa ste/ de bas na snying po dang / phyag rgya dang / sngags dang / rig pa rnams kyi khyad par ji lta ba bzhin du rig cing rtogs pa'i don gyis kyang lha mnyes par byas nas/sangs rgyas par 'gyur bar byed pa'i rgyu yin par lha mnyes par byed pa'i rgyu snying po la sogs pa de rnams bstan te/ de rnams kyang sngags pas shes par bya'o zhes pa'i snying po la sogs pa de dag gi don yang ji lta ba bzhin du sngags shes pa'i sgrub pa pos shes shing rig par bya dgos zhes bstan to//gzhan kha cig na re/ tshogs rnam pa gnyis rdzogs pa las kyang sangs rgyas par 'gyur ba yin la/ sangs rgyas par gyur nas kyang tshogs rnam pa gnyis kyi don slar 'chad par mdzad pa bzhin du/snying po la sogs pa'i don yang lha min la/ lha de dag mnyes par bya ba'i rgyu yang snying po la sogs pa'i khyad par rig cing goms par gyur pa kho na bas snying po la sogs pa'i don lha mnyes par bya ba'i rgyu rnams bstan te/ de dag sngags pas shes par bya'o zhes smras pa yin no zhes zer ro//'o na 'di kho na'i rnam pa mngon du byas pas de ltar 'gyur gyis/ gzhan gyi thabs rnams kyis de ltar ma yin nam zhe na/ gang gi phyir/ de rnams shes nas de brtsams na/ /zhes bya ba la sogs pa gsungs te/ gang gi phyir zhes pa ni 'og nas 'byung ba 'di'i phyir zhes bya ba'i don te/don gang gi phyir de rnams kyi khyad par rig par bya ba yin zhe na/ snying po la sogs pa de rnams kyi khyad par rig cing shes nas de dag ji ltar rig pa bzhin du brtsams na de dag 'phel bar byas pas tshogs rdzogs shing sgrib pa zad par 'gyur te/ring por mi thogs par 'grub pa'i snod du 'gyur ba'i phyir na/ de rnams shes par bya dgos pa yin no/ /de bas snying po la sogs pa'i ngo bo nyid kyi khyad par zhes pa de dge shes na/ de ltar 'gyur ba'i gtan tshigs des na/snying po dang / phyag rgya dang / sngags dang rig pa de dag gi ngo bo nyid de/ rang bzhin gyi khyad par yongs su rig cing shes par bya ba'i phyir/ de rnams kyi mtshan nyid bshad par bya'o zhes pa snying po la sogs pa de rnams kyi mtshan nyid ji lta bu yin pa so sor bshad par bya'o zhes pa'i don zhes bshad do//de la bdag nyid kyi rig pas na/ rab mchog pa'i bsod nams dang ye shes kyi tshogs la sogs pa'i don zhes pa/ bskal pa grangs med pa gsum nas bsags pa'i rab mchog pa'i bsod nams dang ye shes kyi tshogs la sogs pa'i don dang /snying po dang / phyag rgya dang / sngags dang / rig pa'i don ni lha yin la/ de lha de mnyes par bya ba'i rgyu bstan te/ lha mnyes par bya ba'i rgyu de dag kyang sngags pas shes par bya'o/ /gang gi phyir zhes pa ni/ de'i phyir zhes bya ba'i don te/gang gi phyir lha mnyes par bya ba'i rgyu rnams shes pa de bzhin du brtsams na shes pa de dag gi don 'phel bar byas na/ goms par 'gyur ba ste/ 'phel bar byas nas ring por mi thogs par 'grub pa'i snod du gyur pa de'i phyir/ de rnams sngags pas shes par bya dgos so bar bstan to//de lta bas na snying po la sogs pa'i zhes pa/ de dag brtsams na de ltar 'byung ba'i gtan tshigs de bas na/ snying po la sogs pa'i ngo bo nyid kyi khyad par yongs su shes par bya ba'i phyir/ lha de rnams kyi mtshan nyid bshad par bya'o zhe'o//de'i phyir yang zhes ni/ gang gi phyir zhe na/ lha rnams kyi rang bzhin nam mtshan nyid bstan pa de'i phyir zhes bya ste/ de dag gi rjes su mthun pa'i lha'i mtshan nyid re zhig 'dir dang por bstan to zhes pa ni/ snying po la sogs pa de dag gi rjes su mthun pa'i lha'i mtshan nyid de 'dir dang por bshad par bya zhes te/gang zhe na ye shes khyad par can dang / mchog gi mthu dang ldan pa sems dpa'i khyad par ni lta ste/ don dam pa yang 'di'o zhes pa dag ste/ ye shes khyad par du gyur pas zhes bya ba'i ji ltar don rig pa dang mthu rab tu chen po dang ldan pas pha rol gnon par byed pas 'jig rten pa'i rigs can dang stobs po cher grags pa thams cad 'joms shing zil gyis mnan pas de dag las khyad par du gyur pa'i yid dang ldan pa sems dpa'i khyad par ni lha zhes bya ba ste/don dam pa zhes bya ba yang 'di kho na'o zhes bstan to/ /de gnyis las sems dpa'i khyad par dang / don dam par bstan pa de gnyis las sems dpa'i lha dang por bstan pa ste sems dpa'i khyad par ni ye shes kyi khyad par dang / mchog gi mthu'i mtshan nyid dag gis zhes pa ni gong du bstan par zad de/de lta bu'i ye shes dang ldan pas de las gzhan pa'i sems can rnams las lhag par 'phags shing / khyad par can du gyur pa bstan pas na lha zhes bya'o zhe'o/ /de la yang gnyis te gang zhe na/de yang yongs su dag pa dang de las gzhan pa ste/ rnam pa gnyis so zhes bya ba dag go /de la/ don dam pa rtogs pa nyes pa'i dri ma dang bral ba zhes pa ni chos nyid dam chos kyi dbyings kyi don ji lta ba bzhin du ma nor bar rtogs pa nas sgrib pa'i dri ma'i bag chags kyi tshogs thams cad ma lus par spangs te de ni yongs su dag pa'o//dri ma dang bral ba zhes pa ni chos nyid dam chos kyi dbyings cung zad ma rtogs shing sgrib pa dang sdig pa'i tshogs rnams ma spangs pa ste de ni de las gzhan pa'o/ /de la yongs su dag pa la yang gnyis te rab mchog por yongs su dag pa dang /rab mchog po ma yin par yongs su dag pa'o/ /de la rab mchog por yongs su dag pa dang ldan pa ni rdzogs pa'i sangs rgyas nyid de zhes pa ni 'di yongs su dag par gyur pa'i yon tan gyi rnam pa rab mchog dang ldan zhing rdzogs par mnga' ba dang sgrib pa'i tshogs thams cad ma lus par spangs pa'i phyir te/de bas rtag par thams cad du thams cad mkhyen cing thams cad kyi dbang phyug tu grags so zhes pa ni/ yon tan ldan zhing sgrib pa spangs te 'khor ba dang mya ngan las 'das pa'i don rig cing snod bcud thams cad sa ler mkhyen pa dang /'jig rten dang 'jig rten las 'das pa'i chos thams cad la dbang bsgyur ba'i phyir phyogs bcu'i 'jig rten thams cad du 'di ltar grags par gyur pas na/ de skad zhes bya'o//rab mchog po ma yin par dag pa zhes pa ni yongs su dag par gyur pa'i yon tan rab mchog tu ni cung zad ma byin pa dang ldan pa ste/ gang zhe na rgyal ba'i sras dang / rang rgyal ba dang / nyan thos rnams so/ /de ci'i phyir zhe na/ byang chub sems dpa' shes bya'i sgrib pa ma spangs pa dang /rang rgyal ba dang / nyan thos kyis chos la bdag med par ma rtogs pa'i phyir ro/ /yongs su ma dag pa ni 'jig rten pa'i lha'i tshogs khyad par can thams cad de zhes pa ni/ 'jig rten pa'i lha rnams kyi sems can phal bas 'phags su zin kyang sgrib pa thams cad spangs pa ma yin pas na/yongs su ma dag pa'i lha zhes bya ste/ de dag kyang gang zhe na/ brgya byin dang / khyab 'jug dang zhes bya ba la sogs pa rnams te/ de dang 'brel ba'i khyad par zhes pa ni/de dag gi btsun mo rnams dang 'khor la bya ste/ btsun mo ni brgya byin gyi btsun mo pan tsi ka la sogs pa'o/ /'khor ni brgya byin gyi 'khor lha dam pa rma shu ka dang / rnam par dag pa'i blo gros dang / rnam par dag pa dang / dri ma med pa'i 'od dang / nye dbang du sum cu rtsa gnyis dag go /khyab 'jug gi 'khor rdug smi dang smi la sogs pa dag go/ /lha chen po'i 'khor nan+te shwa ri dang / b+h+r-ing+gi ri ti dang / ma hA kA la dang / nan+ti kaR+ti ka'o/ /rnam gcig rang gi rigs kyi skye gnas kyi lha rnams so/ /lha'i bye brag 'di dag thams cad las zhes pa ni/don sems pa'i lha dang / don dam pa'i lha las sems pa'i lha la yongs su dag pa'i lha dang / de las gzhan par bstan pa dang / yongs su dag pa'i lha las kyang rab mchog por yongs su dag pa dang ldan pa'i lha dang rab mchog po ma yin par dag pa'i ltar bstan pa dang /yongs su ma dag par bstan pa'i lha rnams su bstan pa ni lha'i bye brag ste/ lha'i bye brag 'di dag las bsdu na rnam pa gnyis su shes par bya ste/ dngos dang sprul pa'i bye brag rnam pa gnyis te zhes pa ni/ de la dngos kyi lha ni bcom ldan 'das rnam par snang mdzad do//sprul pa'i lha ni bcom ldan 'das shAkya thub pa lta bu'o/ /de ltar bye brag du mar gyur pa'i sems can gyi khyad par zhes pa ni/ de ltar yongs su dag pa dang de las gzhan pa la sogs pa mthu dang ye shes khyad par can du sems pa'i bye brag du mar sems kyi khyad par gyis phye zhing rnam par gzhag pa'i mtshan nyid ni 'di lta ste/mtshan ma'i rnam par snang bas na kun rdzob kyi lha zhes kyang bya'o/ /don dam pa'i lha ni de dag nyid kyi rang bzhin gnyis su med pa gang yin pa la bya ste zhes pa de dag rang bzhin gcig tu gyur cing rnam par dbye ba med pa'i ngang la gcig tu gyur pa'i ngo bo ni don dam pa'i lha zhes bya ste/mtshan ma rnam par spangs pa'i mtshan nyid la rig par bya'o/ /de ci'i phyir don dam pa zhes bya zhe na/rnam par dag pa'i ye shes mchog dam pa'i spyod yul yin pa'i phyir ro zhes gsungs te/ rnam par dag pa'i ye shes thogs pa dang / chags pa med pa 'ba' zhig gis rtogs shing dmigs pa'i yul yin par zad kyi/ gzhan gyis rtogs par nus pa'i yul ma yin pas na don dam pa zhes bya ste/gzhan du 'gyur ba med cing brtag pas so na gnas pa'i phyir ro/ /yang na zhes bya ba ni bsnan pa dang don gzhan du ston pa'i phyir smos te/ gang zhe na don 'di thams cad pas khyad par can don dam pa'o zhes bya ba ste/ye shes kyis rtogs pa'i yul lam yul dang yul can dbyer med pa'i ye shes kyi ngo bo des sems pa'i khyad par gyis lha la sogs pa'i 'jig rten las 'das pa'i dngos grub thams cad las 'phags pa'i phyir na don dam pa zhes bya'o//nyes pa thams cad rnam par dag pa dang zhes pa ni/ sgrib pa thams cad dang bral ba'i sems kyi rang bzhin ni ye shes pas de la don dam pa zhes bya'o/ /bla na med pa'i phun sum tshogs pa'i dbang phyug gi mtshan nyid ces pa ni/ chos kyi chos nyid dang sems kyi sems nyid ni rnam par dag cing stong pa'i mtshan nyid du rang bzhin dbyer med par gcig pa ste/bla na med pa'i dbang phyug phun sum tshogs pa'i mtshan nyid dam ngo bor gnas pa yang yin no/ /don dam pa'i dgongs pa khyad par can thams cad bsgrub pa'i phyir zhes pa ni/des don dam pa'i dngos grub gang dang gang 'dod pa de sgrub cing sgrub par byed nus pa'i chos nyid kyi mthu dang ldan pa ste/ de'i phyir na don dam pa zhes bya'o/ /de nyid don dam pa'i bden pa zhes kyang grags te zhes pa ni/ gzhung kha cig las sems kyi rang bzhin rnam par dag pa la don dam pa'i bden pa zhes kyang grags te/de'i ci'i phyir zhe na/ de rtag tu thams cad la mi slu ba'i phyir te/ sems dag pa dang ma dag pa'i dbang gis ji ltar brtags pa de bzhin du btub cing de las gzhan du mi 'gyur ba'i phyir na don dam pa'i bden pa zhes bya'o//sems kyi rang bzhin de'i mtshan nyid kyang / mdo sde las/ rigs kyi bu don dam pa'i bden pa gang zhe na/ gang la sems kyang mi rgyu na/ yi ge rnams lta smos kyang ci dgos zhes gsungs te/ dper na nam mkha' la tha snyad du yod la don du med pa bzhin du sems zhes tshig gi tha snyad du yod pa 'di la kho na'o zhes don du bstan du med cing brtag par mi nus na/ tshig dang yi ge'i rnam par lta smos kyang ci dgos zhes gsungs pa yin no/ /sangs rgyas kyi yon tan ni/stobs bcu dang / mi 'jigs pa bzhi la sogs pa rtsing rims su bgrangs pa'i rgyu bzhi bcu zhes grags pa dang / zhi ba rims su brtags na mtha' yas shing grangs bgrang bar mi nus pa dag go/ /bla na med pa zhes pa ni/ zag pa dang bcas pa dang /zag pa med pa'am/ 'dus byas dang 'dus ma byas sam 'jig rten las 'das par brjod pa rnams kyi nang na gang gi yang 'og tu ma gyur pas na bla na med pa'o/ /phyi ma ni brda phrad par sla bas ma bkrol lo/ /de bzhin du rgyud gzhan las de bzhin gshegs pa zhes bya bar yang grags te zhes pa ni/rnam par snang mdzad mngon par byang chub pa'i rgyud las/ de la de bzhin gshegs pa bya bar brjod de/ ji ltar bya zhe na/ 'di ltar rgyud de nyid las/ 'du shes tsam yang spangs pa yis/ /rang bzhin bstan du med pa ste//ye shes kyis ni rang rig pas/ /de la de bzhin gshegs zhes bya/ /zhes gsungs te/ de'i don slar dgrol ba yang dkyus nyid pas brda phrad sla ba'i phyir ma bkrol lo/ /don dam pa'i lha'i rang bzhin de dang tha dad pa'i spyod pas sems pa'i rang bzhin yang lha zhes bya zhes pa ni/don dam pa'i lha de'i rang bzhin ni/ sngar bstan pa de nyid do/ /de dang tha dad pa'i spyod pas sems pa'i mtshan nyid ni gzugs kyi sku ste/ mtshan ma'i rnam par snang ba rnams te/ de dang de dag kyang lus dang sems bzhin du so sor phye yang tha mi dad pas na de dag la yang lha zhes bya'o//de bas na dngos po dang nye bar brtags par mtshan nyid kyi bye brag las kyang / lha rnams gnyis su med par bya'o zhes pa ni/ dngos dang rang bzhin la bya ste/ don dam pa'i chos kyi sku'o/ /nye bar brtags pa'i rang bzhin la nye bar brtags pa'i mtshan nyid sprul pa'i sku ste/kun rdzob kyi sku'o/ /'o na lha de dag rnam pa de gnyis su 'dus na/ rnam par dbye ba gzhan bya ba ci dgos she na/ yongs su dag pa dang ma dag pa la sogs pa'i lha rab tu dbye ba yongs su bsgrags pa 'di yang de la mkhas par bya ba'i phyir zhor la bshad do zhes gsungs so//'o na skabs 'dir de dag las ji ltar shes par bya zhe na/ gzhung 'di ni rigs bzhi char yang rnam pa thams cad du yongs su bsdus pa ste zhes gsungs pas de bzhin du rig par bya'o//de rnams ni zhes pa ni/ gzhung 'dir rigs rnam pa bzhi yongs su dag pa'i lha'o zhes bstan pa rnams so/ /de rnams ni de bzhin gshegs pa thams cad kyi sku dang gsung dang thugs dang spyod pa rnams las gyur pa'i rang bzhin no zhes gsungs te/ sngar bshad do zhes pa ni/de dag gi don gong du bstan pas na/ yang 'dir ma bkrol te/ de bzhin du rig par bya bar bstan to/ /sangs rgyas kyi sku la sogs pa zhes pa'i sgras ni/ sku dang / gsung dang / spyod pas bsdus te/ nye bar brtags pa'i lha rab tu dbye ba dang zhes pa ni/sku dang gsung dang spyod pa'i yon tan las nye bar brtags pa'i lha 'gro ba 'dul ba'i dbang gi rim pas cha lugs tha dad par snang ba'i bar du dbye ba rnams ni zhes bya ste/ de dag ni rtsa ba'i rgyud chen po dpal de kho na nyid bsdus pa nyid kyi dkyil 'khor chen po nyid la sogs par bkod pa yin no zhes bya ste/sogs kyis ni dkyil 'khor lhag ma gsum bsdu'o/ /khyad par du ni rigs bzhi char yang dkyil 'khor chen po'i tshul du rnam par gnas pa ni zhes pa ni khyad par dbye ba bstan te/ rigs bzhi char yang dkyil 'khor chen po'i tshul du rnam par gnas pa'o//de dag nyid las zhes pa ni/ rdo rje dbyings kyi dkyil 'khor du gnas pa de dag nyid las zhes bya ste/ de las nye bar brtags pa'i lha'i khyad par rnams la ni/ bcom ldan 'das kyi snying po zhes bya bar gsungs so//de bzhin du gzungs kyi dkyil 'khor la gnas pa'i lha de dag nyid de/ der ni de dag la phyag 'tshal zhes bya'o/ /chos kyi dkyil 'khor gyi tshul du gnas pa'ang de dag nyid de/ der ni de dag la sngags zhes bya'o/ / sngar bstan zin zhes pa'i tha tshig go/ /gsang sngags kyi cho ga bshad par bya ste zhes pa ni/ pad+ma'i rigs chos kyi dkyil 'khor du gsang sngags su bstan pa'i lha'i sgrub pa'i yan lag gi cho ga'i bshad pa'o/ /rjes su yi rang ba zhes pa ni/ rang bzhin gyis legs par spyod pa'i dge ba la sems pa dag pas dga' ba skye ba'o//bdag gi lus dbul ba zhes pa ni/ de bzhin gshegs pa la bdag gi lus dbul ba ste/ de'i skabs su lha dang dbyer med par bsgom pa la shes par bya'o/ /gsol ba gdab pa dang zhes pa ni/phyogs bcu'i 'jig rten gyi khams de bzhin gshegs pa gang dag mya ngan las 'da' bar bzhad pa de dag mi 'da' zhing 'jig rten du yun ring du bzhugs shing sems can gyi don mdzad par gsol ba 'debs pa'o/ /bsod nams yongs su bsngo ba zhes pa ni/zag pa dang bcas pa dang / zag pa med pa dang / 'dus byas dang 'dus ma byas las byung ba'i dge ba'i rtsa ba thams cad yid kyis gcig tu bsdus nas sems can thams cad dang thun mong du dmigs nas mi gnas pa'i mya ngan las 'das pa chen po bla na med pa'i byang chub tu bsngo ba'o//dam pa'i chos bklag pa zhes pa ni/ rgyud dang rigs pa'i chos rgyu dang 'bras bu'i theg pas bsdus pa klog cing chos spyod pa rnam pa bcu'i tshul dang ldan par bya'o//bzlas brjod mang du bya zhes pa ni/ rigs so so'i bzlas brjod bya ba'i tshul rnam pa gcig gang la goms pa de bzhin du lha thams cad las gang ltar dga' ba de bzlas brjod ci nus pa bzhin du bya'o/ /de dag ni tshogs kyi cho ga ste/ des gang bsgrub pa de 'grub par 'gyur ba'i rgyu byed pas na/ tshogs zhes bya'o/ /de yang rgyud las 'di skad du/ /rjes su yi rang la sogs pa/ /de bzhin dam chos klog pa dang / /bzlas brjod mang por rab byas pas/ /sngags kyi dngos grub nges par 'thob//ces gsungs pa yin no/ /de bzhin du rdzogs pa'i sangs rgyas kyi mtshan brjod pa dang / zhes pa ni mtshan brgya rtsa brgyad pa la sogs pa don dang ldan pa'i tshigs su bcad pa'am/ lhug pa'i gang yang rung bas de bzhin gshegs pa rnams la sku dang gsung dang thugs dang yon tan dang phrin las kyi sgo nas bstod par byed pa'o//rjes su dran pa dang zhes pa ni/ ji ltar mdo sde las/ de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa/'jig rten mkhyen pa/ skyes bu 'dul ba'i kha lo sgyur ba lha dang mi rnams kyi ston pa zhes bya ba la sogs pa'i tshig gis/ yon tan lhun po rjes su dran pa dang / mtshan dang dpe byad rjes su dran par byed pa'am/'di'i skabs su rigs bzhi'i de bzhin gshegs pa rnams kyi sku mdog phyag mtshan rgyan cha lugs snying po phyag rgya la sogs pa'i bye brag ji lta ba bzhin du zhib rims su brtag cing dpyad pa'i don rang gi sems la bkra bar byed pa'o//dam pa'i chos rab tu bstan pa zhes pa ni rgya che ba'i gsung tshig gi sgo nas ji ltar 'dul zhing 'tsham pa bzhin du so so'i skad du ston pa dang / zag pa'i gsung brjod pa med par bsgom pa'i sgo nas don gyis bstan pa ste/ de dag ni 'dir bsod nams kyi tshogs te/ci'i phyir zhe na/ de kho na bsod nams kyi tshogs kyi ngo bo yin pa dang / gang zhig gis de dag gi de ltar spyad pas bsod nams kyi tshogs yongs su rdzogs par 'gyur ba'i phyir na/ las kyi dkyil 'khor du bkod pa yang de dag nyid de/ don ni rig sngags zhes bya'o//de bas na lha'i ngo bo gcig las gnas skabs kyi ming gzhan du 'gyur ba'i phyir na snying po la sogs par brjod pa yin par rig par bya'o/ /snying po zhes bya ba la sogs pa'i nges pa'i tshig ni zhes pa'i snying po dang / phyag rgya dang sngags dang / rig pa'i nges tshig ni/dpal de kho na nyid bsdus pa'i rgyud phyi ma las gsal bar bcom ldan 'das nyid kyis bstan te/ de la dang por snying po'i nges tshig bstan te/ gang zhe na rgyud las/ yid la 'dod pa'i cho ga yis/ /yid la gang 'dod 'grub par 'gyur/ /ting 'dzin sgrub pa'i snying la gnas/ /de bas snying po zhes bya'o//zhes gsungs te/ de'i don ni yid la gang 'dod pa'i lha dag grub par gyur na/ yid la gang 'dod pa de bsgrub pa'i las dang cho ga ma nyams par brtsams na/ yid la gang 'dod pa'i dngos grub de 'grub par 'gyur ro/ /snying po zhes bya ba ni/ lha rnams kyi ting nge 'dzin gyi rang bzhin yin pas ting nge 'dzin gyi sgrub pa ni/de bzhin gshegs pa thams cad kyi rang bzhin pas thugs la gnas pa'i phyir na/ snying po zhes bya ba'i yi ge'i rnam par rtog pa'i rnam pa rab tu goms pa las snying po zhes bya ba'i sems rtogs par 'gyur pa'i snying po zhes bya ba ni/lha gang dang gang bsgom zhing bsgrub par 'dod pa de'i sngags kyi yi ge 'bru gcig pa dang 'bru mang po pa yang rung ste/ ji lta ba'i rnam par rtog pa'i bye brag de dag zhib mor rtogs shing goms par byas pa las snying po zhes bya ba'i sems rtogs par 'gyur bas na snying po zhes bya'o//'o na gnas 'dir gang gi ngo bo la rig par bya ste/ de yang skabs 'dir rdo rje dbyings kyi dkyil 'khor chen por gsungs pa/ badzra satwa/ badzra rA dza zhes bya ba'i ming du brjod pa de bzhin gshegs pa rnams dang / rdo rje sems dpa' la sogs pa sems dpa' chen po rnams kyi ting nge 'dzin ston pa la snying po zhes bya'o zhes gsungs so/ /'o na snying po de dus ji srid du sems par 'gyur zhe na/ snying po de yang dus gnyis shig tu snying po zhes bya ba'i sems rjes su rtogs par 'gyur te zhes bya ba la sogs pa gsungs te/de la gnyis ni 'di ltar ji ltar 'dod pa'i dngos grub pa'i dus dang / rang gi lha'i ting nge 'dzin bsgom pa'i dus na'o zhes pa ni/ 'di ltar gang 'dod pa'i dngos grub sgrub pa'i dus na 'di nyid las gsungs pa'i sa la sogs pa dngos grub gang 'dod pa 'di ltar sgrub pa'i dus de'o//rang gi lha'i ting nge 'dzin bsgom pa'i dus zhes pa ni/ gang 'dod pa'i dngos grub sgrub pa'i dus na gang du sngar bsnyen pa bya ba'i dus dang bsgom pa'i ting nge 'dzin gyi dus de la bya'o/ /de'i gnas dang lus dang kha dog la sogs pa dang ldan pa'i mtshan nyid ces pa ni/ting nge 'dzin gang bsgom pa'i lam/ ting nge 'dzin de'i gnas kyang tshe dang lus dang kha dog la sogs pa dang ldan pa'i yid la gang 'dod pa'i dngos grub bsgrub par 'dod pa de'i tshe/ badzra satwa zhes bya ba la sogs pa'i snying po brjod cing sems la zhen pa'am/'dris par sla nas bzlas brjod byas na snying po la gnas zhes bya'o/ /de bzhin du phyag rgya'i nges tshig kyang zhes pa ni/ snying po nges pa'i tshig bshad pa de bzhin du/ phyag rgya'i nges tshig kyang bshad par bya ste zhes pa ste de yang rgyud las/'da' dka' de bzhin mi shigs pa/ /rgyal po'i phyag rgya mchog gi rtags/ /bdag nyid chen po mtshan ma'i sku/ /de bas phyag rgya zhes su bsgrags/ /zhes bya ba gsungs te/ de la/ 'da' dka' de bzhin mi shigs pa//zhes pa ni/ gzhan gyis de la 'da' bar dka' zhing rgol ba rnams kyis bshig par mi nus pa'o/ /gang zhe na/ rgyal po'i phyag rgya mchog gi rtags/ /zhes bya ste/ rgyal po nyid kyis btab pa'i bka' rtags kyi phyag rgya ste/ ji ltar rgyal po'i phyag rgyas btab pa ste/rgyal po nyid dam blon po dra ma rnams kyis kyang 'da' zhing bshig par mi nus na/ gzhan gyis smos kyang ci dgos pa bzhin du/ /bdag nyid chen po mtshan ma'i sku/ /de bas phyag rgya zhes su bsgrags/ /zhes bya ste/ bdag nyid chen po'i mtshan ma'i sku phyag rgyar bstan pa de yang /bdag nyid chen po rnams kyis kyang bshig cing 'da' bar mi spyod na/ bdud dang mu stegs gzhan gyis bshig cing 'da' bar bya bar lta ci smos zhes gsungs pa yin te/ de dag gi don slar dgrol ba ni/ 'dir bdag de nyid chen po mchog ma'i sku zhes bya ba la sogs pa brjod pa yin no//sngags kyi nges tshig rgyud las bshad pa'i skabs su gsungs pa/ 'da' bar bya ba ma yin zhing / /shigs par dka' la gsang ba nyid/ /gsang bar bsgrub phyir bsngags pas na/ /de bas sngags pa zhes par brjod//ces gsungs te/ de la/ 'da' bar bya ba ma yin zhing / /zhes pa ni gang gis kyang 'da' bar bya ba'i yul ma yin pa'o/ /shigs par dka' la gsang ba nyid/ /ces pa ni/ bdud dang mu stegs la sogs pa'i rgol bas bshig par mi nus shing rtogs par dka' bas na gsang ba'o//gsang ba bsgrub phyir bsngags pas na/ /zhes pa ni de sgrub pa yang snod ma yin zhing skal ba dang mi ldan pa rnams la gsang nas bsgrub par bya ba yin pas na sngags zhes bya'o zhes bstan to/ /de dag gi don slar dgrol ba 'dir bsngags shing gsang ste smras pas nges pa'i tshig dang sbyar na zhes bya ba la sogs pa gsungs pa yin no//rig sngags kyi nges tshig kyang rgyud las/ ma rig pa ni bshig pa dang / gang gi rig mchog sgrub pa'i phyir/ dngos grub dam pa yod pa ste/ /de bas rig sngags zhes bya'o/ /zhes gsungs te/ de la/ ma rig pa ni bshig pa dang / /zhes pa ni/ ma rig pa'i mun nag bcom pa dang / sgrib pa'i tshogs thams cad zad par byed pa'o/ /gang gi rig mchog bsgrub pa'i phyir//zhes pa ni/ zhal nas gsungs pa'i sngags la sogs pa gsung rab kyi tshogs rnams mngon du rtogs shing grub par byed pa'o/ /dngos grub dam pa yod pa ste/ /zhes pa ni/ 'jig rten dang 'jig rten las 'das pa'i dngos grub ni dam pa ste/ sku mchog gi dngos grub mi gnas pa'i mya ngan las 'das pa'i go 'phang thob pa de yod pa'o//mdor na sgrib pa rnam pa gnyis sel ba dang / 'di dang pha rol gyi don rig pa'i mngon par shes pa dang ldan pa dang / 'jig rten dang 'jig rten las 'das pa'i don phun sum tshogs pa thob par 'gyur bas na rig sngags te/de bzhin gshegs pa'i phrin las kyis byin gyis brlabs par 'gyur ba'i phyir na rig sngags so zhes sngar bstan pa yin no/ /lha dang snying po dang / phyag rgya dang / sngags dang / rig sngags kyi rang bzhin dang mtshan rnam par dbye ba bshad zin to//da ni rigs bzhi dang dkyil 'khor bzhi'i khyad par gyi snying po la sogs par brjod pa dang / bsgrub cing bzlas brjod bya ba la grub pa myur bar 'gyur ba'i rgyu yan lag gi cho ga bstan par bya ba'i phyir da ni rigs bzhi char la yang snying po dang phyag rgya dang zhes bya ba la sogs pa gsungs te/bzlas brjod la sogs pa yan lag tshogs gzhan yang spyir bstan pa zhes pa ni/ snying po la sogs pa so so'i bye brag las bzlas brjod dang sgom par byed pa'i yan lag gi gzhan gyi tshogs dang /bsod nams dang / thabs dang phan par bsngags pa dang / shes rab kyis 'grub par 'gyur ba dag ste/ de dag kyang rgyud las ni spyir bstan pa ste/ sgrub thabs kyi dbang du ni/ skabs 'dir bsdus la bstan par bya'o/ / de la 'dir bsdu ba yang 'di dag bsdus pa la grub pa myur bar bya ba'i phyir bsdus te/ de bas na 'dir yang dngos po'i rang bzhin gyis cho ga las kyi bye brag kha cig gtsor sbyor ba la sogs pa 'grub pa'i rgyu ste zhes pa ni/ rgyud 'dir yan lag gi cho ga'i las kyi bye brag kha cig dngos po'i rang bzhin gyis gtsor snying po dang /phyag rgya dang / sngags dang / rig sngags dag bsgrubs na 'grub par byed pa'i rgyur gyur pa yin te/ de bas na snying po la sogs pa zhes pa ni/ yan lag gi cho gas snying po la sogs pa grub pa'i rgyu yin par bstan pa'i gtan tshigs de bas na snying po dang /phyag rgya dang / sngags dang / rig pa so so'i bye brag gi sgo nas cho ga'i lhag ma yan lag gi cho ga rnams kyang so sor phye nas bstan te/ de la re zhig snying po sgrub pa'i tshogs la sogs pa bstan par bya'o zhes pa ste/de la dang por snying po bsgrub pa'i yan lag gi cho ga tshogs pa la sogs pa'i rim pa bshad par bya'o zhes pa de la tshogs zhes pa ni/ bsod nams dang ye shes kyi tshogs rdzogs par spyad pa ni sangs rgyas pa'i rgyu yin pa dang 'dra bar 'dir yang tshogs 'di spyad pas dngos grub thob pa'i phyir na tshogs zhes bya'o//sogs pa'i sgras ni bsod nams dang / ye shes thabs dang phan par sngags dang shes rab kyi tshogs rnams spyad pa yang bsdu bar bya'o/ /tshogs zhes brjod pa de yang dngos po gang zhe na/de la 'og nas 'byung ba'i mtshan nyid phyi'i mchod pa'i cho ga tshogs kyi cho ga zhes gsungs te/ phyi'i mchod pa na spos dang / me tog dang / mar me dang / byug pa la sogs pa'o/ /de yang ji skad rgyud las/ mchod pa'i cho ga kun byas na//dge ba'i chos rnams thams cad kyi/ /tshogs ni rnam par 'phel bar 'gyur/ /de nas nges par 'grub par 'gyur/ /zhes gsungs te/ de la/ mchod pa'i cho ga kun byas na/ /zhes pa ni/ spos dang / me tog dang / mar me dang / byug pa'i sngags dang / phyag rgyar ldan pas mchod pa ni mchod pa'i cho ga kun byas pa'o/ /dge ba'i tshogs rnams thams cad kyi/ /tshogs ni rnam par 'phel bar 'gyur/ /zhes pa ni/ mchod pa de dag gis tshang bar dus rtag tu mchod na/ zag pa dang zag pa med pa'i tshogs khyad par du'am/rab tu 'phel bar 'gyur zhes bya ste/ de la tshogs zhes bya ba ni/ rgyu'i don yin la 'phel ba ni sems 'dris shing goms par 'gyur ba kho na ste/ mchod pa'i rgyud sems 'dris shing goms par gyur nas/ rgyu des dngos grub gang 'dod pa 'grub par 'gyur bas na/de bas na nges par grub par 'gyur zhes bya'o/ /'dir yang 'di ltar dgongs te zhes pa ni/ gnas skabs 'dir bstan pa'i don ni 'di lta bu yin te zhes pa'i don to/ /sngags dang phyag rgya dang zhes pa ni/ sngags dang phyag rgya dang rig sngags sgrub cing bzlas brjod byed pa la phyi'i mchod pa'i cho ga 'dis dngos grub 'grub pa'i rgyu dang / yan lag tu mi 'gyur ba yin te/ 'gyur ba mod kyi 'on kyang dngos po'i rang bzhin gyis zhes pa/ 'on kyang cho ga dngos po'i rang bzhin gyis gtsor snying po bsgom pa dang /bzlas brjod byed pa'i brtson pa la myur du dngos grub stsol ba'i stobs byed de/ de bas de la brtson rnams kyis/ /zhes pa ni snying po bsgom pa dang / bzlas brjod byed pa la brtson pa rnams kyis khyad par du tshogs [(]gyi [,]kyi [)]cho ga de la 'bad cing lhag par mngon par brtson par bya'o//de bzhin du bsod nams kyi tshogs la yang sogs pa la yang zhes pa ni/ tshogs kyi mchod pa'i cho ga'i don bstan pa de bzhin du bsod nams kyi tshogs mchod pa rnam pa bzhi byas na zhes pa dang / sogs kyi sgras thabs dang /phan par bsngags pa dang / shes rab kyi tshogs rnams bsdu'o/ /thams cad du sbyar bya'o zhes pa ni/ tshogs ji lta ba bzhin du lhag ma rnams kyang de bzhin du bsgrub pa dang bzlas pa la thams cad du brtson par bya'o bar bstan pa yin no/ /de bzhin du sgrub pa'i zhes pa ni/tshul de bzhin du sgrub pa'i rnal 'byor pa dang / mchod pas bsod nams kyi tshogs skyed pa ni/ ji skad du rgyud las/ mchod pa rnam bzhi byas nas ni/ bsod nams chen po thob par 'gyur/ /sangs rgyas mchod pas sdig can yang / /grub pa nyid du dogs pa med/ces gsungs te/ de la/ mchod pa rnam bzhi byas pas ni/ /zhes pa ni/ las kyi dkyil 'khor du gsungs pa'i mtshan nyid byang chub kyi sems dang / tshogs dang / chos dang / bsgom pa'o/ /bsod nams chen po thob par 'gyur/ / zhes pa ni/ de dag kyang spyad cing nyams su blangs na bsod nams chen po ste/ 'jig rten pa dang / nyan thos dang / rang sangs rgyas dang thun mong ma yin pa'i bsod nams gya nom pa mi gnas pa'i mya ngan las 'das pa'i go 'phang thob pa'i rgyur gyur pa ni bsod nams chen po ste/de 'thob par 'gyur ro/ /sangs rgyas mchod pas sdig can yang / /grub pa nyid du dogs pa med/ /ces pa ni/ lha chen po dang / tshangs pa dang / khyab 'jug dang / brgya byin dang / drang srong dang / dge sbyong dang / bram ze dang / nyan thos dang / rang sangs rgyas rnams la mchod pas ni de ltar ma yin gyis/ sangs rgyas rnams la nan tan gyis mchod pas ni/ dogs pa med par 'dir gsungs pa'i dngos grub thob par 'gyur zhes bstan pa yin te/ des ni sangs rgyas mchod par 'gyur bar bstan pa yin no//'dir mchod pa rnam pa bzhi ni las kyi dkyil 'khor du gsungs pa'i mtshan nyid ces pa ni/ mchod pa rnam pa bzhi bstan pa 'di ni/ dpal de kho na nyid bsdus pa'i las kyi dkyil 'khor du gsungs pa'i mtshan nyid de/ byang chub tu sems dang zhes pa ni/ stong pa nyid dang thugs rje'i ngo bo badzra satwa zhes bya'o//tshogs dang zhes pa ni/ bsod nams dang ye shes kyi tshogs kyi bdag nyid de/ rat+na badzri'o/ /chos dang zhes pa ni gzhung sgrub pa'i dngos grub de thams cad 'grub pa'i mchog gi rgyu ni de yin no bar bstan pa yin no//phyag rgya sgrub pa rnams kyis phan par bsngags pa dang / shes rab kyi cho ga dag kyang bzlas brjod kyi skabs su blta bar bya'o zhes pa ni bsod nams kyi tshogs zhes bya'o/ /de yang ji skad du rgyud las/ sangs rgyas mtshan sogs brjod pa yis//bsod nams chen po thob par 'gyur/ /bsod nams med na'ang chos sbyin pas/ /dngos grub myur bar thob par 'gyur/ /zhes gsungs pa'o/ /chos thams cad spros pa med par bsgom pa goms par byed pa zhes pa ni/ phyi nang gi chos thams cad gtan tshigs dang gnyen po'i sgo nas rnam par gzhigs te/gang gi ngo bor yang ma grub cing gang ltar yang mi dmigs par gtan la phab nas/ spros dang bral ba stong pa chen po'i rang bzhin du yang dang yang du brtags pas de ltar 'dris shing goms par byas pa ste/de la thabs kyi cho ga zhes bya ste/ de ci'i phyir zhe na/ de bas na gsang sngags myur du grub par byed pa'i rgyu'am thabs su gyur pa'i phyir na/ thabs kyi cho ga zhes bya'o/ /de ltar yang ji skad du rgyud las/ gsang sngags dngos grub mi thob pa/ /'jig rten 'di ni bden la nyams//thabs ni spros pa med pa ste/ /thams cad grub par byed pa'i mchog /ces gsungs pa ste/ de la/ gsang sngags dngos grub mi thob pa/ /'jig rten 'di ni bden la nyams/ /zhes pa ni/ gsang sngags bsgrubs kyang dngos grub mi thob pa'i rgyu ni 'jig rten 'di dag bden pa las nyams pa ste/gang tshig dang yi ge brjod pa ni bden pa ma yin la/ tshig dang yi ge brjod pa med pa ni bden pa las/ 'jig rten pa ni rtag par tshig dang yi ge brjod pa la dga' bas spros pa med pa'i don la mi gnas pa'i phyir bden pa las 'jig rten 'di nyams pas ma thob pa yin zhes bya'o//thabs ni spros pa med pa ste/ thams cad grub par byed pa'i mchog /ces pa ni/ sngags kyi dngos grub thob par bya ba'i thabs ni/ spros pa med pa'i ngang la gnas par bya ba ste/ gsang sngags sam/gsang sngags kyi dngos grub thams cad sgrub par byed pa'i thabs kyi dam pa'am mchog yin zhes bstan to/ /gsang sngags mnyes par byed pa rnams kyi phan par bsngags pa dang / shes rab kyi cho ga ni bzlas brjod kyi skabs su slar bshad zin pas de ltar rig par bya'o//rig sngags kyi cho ga yang bshad par bya ste zhes pa rin po che'i rigs kyi dkyil 'khor du rig sngags su bstan pa'i lha'i dngos grub sgrub pa'i yan lag bshad par bya'o/ /de la chos thams cad kyi rang dang spyi'i mtshan nyid ces pa ni/ chos ni phyi dang nang gi chos su brjod pa gang phung po dang khams dang /skye mched kyis bsdus pa'o/ /de dag gi rang gi mtshan nyid mi rtag pa dang / sdug bsngal ba yin/ spyi'i mtshan nyid stong pa dang bdag med pa ste/ de'i don de ltar nges pa ste/ brtags shing dpyad nas ji lta ba bzhin rig par bya ba ni tshogs kyi cho ga ste/ci'i phyir zhe na/ de ltar brtags pa des gsang sngags kyi dngos grub myur du 'grub pa'i rgyu'am grogs su gyur pa'i phyir na tshogs zhes bya'o/ /de yang rgyud las/ ma rig shin tu spangs pas na/ /ye shes pha rol phyin tshul gyis/ /tshogs ni yongs su rdzogs pa las//dngos grub myur du thob par 'gyur/ /zhes gsungs pa de/ de la ma rig shin tu spangs pa zhes pa ni/ chos spyi dang rang gi mtshan nyid ji lta ba bzhin du gtan tshigs kyis gzhigs nas rang bzhin med par gtan la phab pa ni/ sgrib pa'i tshogs bcom pa ste ma rig pa spangs pa'o//ye shes pha rol phyin tshul gyis/ /zhes pa ni/ ma rig pa spangs pa nyid ye shes te pha rol tu phyin pa'ang de nyid pas ye shes kyi pha rol tu phyin pa'o/ /tshogs ni yongs su rdzogs par 'gyur/ /zhes pa ni/ ye shes kyi pha rol tu phyin pa'i tshul gyis tshogs yongs su rdzogs te dngos grub myur du thob par 'gyur ro zhes bstan pas na/ dngos grub myur du thob par 'gyur/ /zhes gsungs pa yin no/ /sbyin pa goms par byed pa ni 'dir bsod nams kyi tshogs te zhes pa ni ji ltar sbyin pa bzhi dus drug tu sbyin pa ni skabs 'dir bsod nams kyi tshogs yin te/ci'i phyir zhe na/ de ltar byas pa nyid kyang bsod nams kyi tshogs yin la/ de ltar byas pas dngos grub thob pa'i rgyur gyur pa'i phyir na bsod nams kyi tshogs te zhes bya ste/ de yang 'di skad du rgyud las/bsod nams nang du sbyin pa mchog /byin na grub pa thob par 'gyur/ /sbyin pa'i pha rol phyin rdzogs pas/ /dngos grub myur du thob par 'gyur/ /zhes gsungs so/ /sangs rgyas dang zhes pa ni rigs bzhir bsdus pa'o/ /byang chub sems dpa' zhes pa ni/rgyu dang 'bras bu'i byang chub sems dpa' ste/ rgyu'i byang chub sems dpa' pha rol tu phyin pa las skyes pa dang / 'bras bu'i byang chub sems dpa' ye shes las skyes pa'o/ /sku dang gsung dang thugs kyi phrin las zhes pa ni/ mtshan nyid kyi theg pa'i dbang du na/mdo sde dang 'dul ba dang / ma mo'i sde snod gsum gyi nang nas ji skad du grags pa dang / 'bras bu'i theg pa'i dbang du na rtsa ba'i rgyud chen po de kho na nyid bsdus pa la sogs pa rnal 'byor gyi rgyud rnams las ji skad du gsungs pa dang / de'i sgrub thabs su gyur pa gzhung 'di nyid las ji skad du bstan pa'i don de dag la mos shing nyams su len pa ni thabs kyi cho ga ste/ ci'i phyir zhe na/ rig sngags kyi dngos grub bsgrub pa la grub pa myur du thob pa'i thabs su grub pa'i phyir na thabs kyi cho ga zhes bya ste/de ltar yang rgyud las/ 'jig rten ma rig pa la zhe na/ /rig sngags dngos grub mi thob pa/ /de la thabs ni rgya chen te/ /thams cad grub par byed pa'i mchog /ces gsungs te/ 'jig rten pa ni ma rig pa la zhen la/ de bzhin gshegs pa ni ma rig pa spangs pas 'jig rten pa rig sngags kyi dngos grub mi thob pa'i rgyu ni ma rig pa la zhen pa kho na yin pas/spyod pa bsdus pa'o zhes pa ni/ rigs bzhi'i lha bsgom pa'i lus dang ngag dang yid kyi spyod pa bsdus pa ste der phyogs gcig tu bsdus pa'o/ /rig sngags kyi dngos grub mi thob pa thob par bya ba'i thabs ni/de bzhin gshegs pa dang / rgyal ba'i sras rnams kyi sku dang gsung dang thugs kyi phrin las rgya chen po la mos par byas pa yin te/ rig sngags thams cad grub par byed pa'i thabs chen po ni de yin zhes bstan to//kun du bsngags pa dang shes rab kyi thabs ni/ bzlas brjod kyi skabs nyid du bshad zin pas 'dir yang de bzhin du rig par bya'o/ /rigs bzhi dang dkyil 'khor bzhi'i dbang gis snying po dang phyag rgya dang / sngags dang rigs su brjod pa'i lha rnams sgrub pa'i rgyu yan lag gi cho ga tshogs dang /bsod nams kyi tshogs dang thabs dang / kun du bsngags pa dang / shes rab kyi thabs rgyud las spyir bstan pa 'dir slob dpon gyis bsdus nas sgrub pa 'di la phan par byas pa bshad zin to/ /da ni zhi ba la sogs pa'i sbyin sreg gi las kyi dngos grub sgrub pa'i thabs bstan to//de la rgyud 'dir dngos grub rnam pa gsum gyi cho ga bstan pa ni zhes pa ni/ rtsa ba'i rgyud chen po dpal de kho na nyid bsdus pa'i rgyud 'dir dngos grub sgrub pa'i thabs kyi cho ga ni rnam pa bsdus nas bstan te/ gang zhe na/ 'di lta ste zhes bya ba la sogs pa ste/ phyag rgya chen po la sogs pa/ /zhes pa ni/ phyag rgya rnam pa bzhir brjod pa dag go/ /bsgoms pa las byung ba'i dngos grub dang zhes pa ni phyag brgya bzhi po dang 'dris shing goms pa las skal ba'i rim pas dngos grub rab 'bring rnam pa gsum thob par 'gyur ba'o//de bzhin du snying po dang / phyag rgya dang / gsang sngags dang rig sngags bzlas brjod goms pa las byung ba dang zhes pa ni/ phyag rgya bzhi po dag goms pa las byung ba'i dngos grub ji lta ba de bzhin du snying po bzlas brjod goms pa las byung ba'i dngos grub dang /gsang sngags bzlas brjod goms pa las byung ba'i dngos grub dang / rig sngags bzlas brjod goms pa las byung ba'i dngos grub ste/ de yang dbang po dang skal ba'i rim pas rab 'bring tha ma gsum du 'gyur bar rig par bya'o//de bzhin du zhi ba la sogs pa'i sbyin sreg las byung ba'i dngos grub dang las kyi mtshan nyid ces pa ni/ phyag rgya dang / snying po dang / gsang sngags dang / rig sngags kyi dngos grub bsgoms pa dang / bzlas brjod las byung ba ji lta ba bzhin du zhi ba'i sbyin sreg dang /sogs kyis rgyas pa dang / dbang dang drag po dag bsdu ste/ las rnam pa bzhi po de dag goms par byas pa las byung ba'i dngos grub rnam pa gsum gyi mtshan nyid bstan to zhes bya ba'i tha tshig go/ /de la gzhung 'di yan chad kyis ni dngos grub rnam pa gnyis kyi cho ga bstan to zhes pa ni/rgyud las de ltar bstan pa dag sgrub thabs 'dir phyogs gcig tu byas nas gsal bar bstan pa las/ gzhung de yan chad du phyag rgya bzhi bsgom pa goms pa las byung ba'i dngos grub dang / snying po dang gsang sngags dang /rig sngags bzlas brjod byas pa goms pa las byung ba'i dngos grub sgrub pa'i cho ga rnams bstan zin to zhes pa'i don to/ /da ni sdig pa sbyang ba la sogs pa las sbyin sreg gi las 'byung ba'i zhi ba la sogs pa'i las grub pa'i mtshan nyid grub pa'i cho ga btu bar bya ste zhes bya ba la sogs pa ni zhi ba la sogs pa'i sbyin sreg gi las grub pa'i mtshan nyid sdig pa sbyang ba la sogs pa sgrub pa'i cho ga bstan pa ste/de la sdig pa sbyang ba nad dang gnod pa thams cad zhi ba dang / bag chags kyi mtshams sbyor ba thams cad zad par byed pa ni sdig pa sbyang ba ste/de ltar yang rgyud las/ dus min 'chi dang nad rnams dang / /sems kyi nad dang gnod pa dang / /de bzhin nad dang nad 'go rnams/ /zhi bar byed pas zhi zhes bya/ /zhes gsungs pa'i las grub pa'i mtshan nyid dang /sogs kyi sgras ni rgyas pas dpal dang bsod nams rgyas par bya ba dang / dbang gi las kyis bdag la mi 'jar zhing dka' blo mi bde ba rnams bdag gi dbang du bya ba dang / mngon spyod kyis gang gi lus sems kyi rgyud ma rungs pa dang ldan pa rnams rang bzhin bsgyur zhing gtan 'pho bar bya ba'i yon tan gyi rnam pa'i mtshan nyid bsdu bar bya'o//sogs 'og mas ni de ltar grub par bya ba'i rgyu las lhag ma gsum ste/ rgyas pa'i las dang / dbang gi las dang / mngon spyod kyi las bsdu bar bya'o/ /las grub pa zhes pa ni/ 'bras bu la de'i mtshan nyid sgrub pa'i cho ga ni rgyu'i don de ji ltar bya ba'i thabs so//btu bar bya zhes pa ni/ rgyud las bkram zhing thod rgal du ston pa rnams 'dir phyogs gcig tu rim par byas nas ston pa'o/ /de bstan pa'i phyir zhes pa ni/ zhi ba la sogs pa'i las bzhi po rnams so//'dir ni zhi ba la sogs pa'i las grub pa'i sbyin sreg gi cho ga zhes pa ni/ sgrub thabs 'dir zhi ba'i sbyin sreg la sogs pa'i las grub pa'i cho ga 'byung ba'i rgyud dpal de kho na nyid bsdus pa chen po dang / rtog pa thams cad bsdus pa zhes pa ni/ 'dir yang rnal 'byor gyi rgyud rnams kyi dgongs pa 'grel par byed pa ste/rgyud gzhan las ma gsungs pa'i sbyin sreg la sogs pa de las ston par byed pa dang / sogs kyi sgras rdo rje rtse mo'i rgyud la sogs pa'i nang nas 'byung ba'i sbyin sreg gi las kyi mtshan nyid ston pa dag go//don rnams 'dir phyogs gcig tu rim par bsdus la bstan par bya'o zhes pa'i don to/ /gzhan dag na re 'dir rtsa ba'i rgyud chen po dpal de kho na nyid bsdus pa las 'byung ba'i las bzhi'i mtshan nyid bstan pas cho ga pa yin na/ rgyud thams cad kyis bstan pa ci dgos she na/smras pa/ rtsa ba'i rgyud de kho na nyid bsdus pa'i nang nas ni las bzhi gsungs pa yod kyang / de dag bye brag tu byas pa ni/ rnam pa gzhan dag mi ston la/ rgyud gzhan rnams las so so'i sbyin sreg gi mtshan nyid rgyas par ston pa'o//de bas de dag thams cad las byung ba'i sbyin sreg gi las rnams 'dir bsdus na/ cho ga phun sum tshogs pa'i dbang gis sgrub pa myur bar 'gyur ba dang / sngags spyod pa'i rnal 'byor pa rnams sbyin sreg gi las la mgo rmongs par mi 'gyur ba'i phyir ro//de la de kho na nyid bsdus pa'i rgyud 'dir rdo rje rigs kyi las kyi dkyil 'khor du zhes pa ni/ rtsa ba'i rgyud chen po dpal de kho na nyid bsdus pa'i rgyud las rigs bzhi'i dbang du byas nas dkyil 'khor dum bu bzhi gsungs pa'i nang nas rdo rje rigs kyi las kyi dkyil 'khor du gsungs pa'i lha bsgom par bya bar 'gyur te/rdo rje khro bo mnyam gzhag pas/ /zhes pa ni/ skabs de las gsungs pa'i rdo rje khro bo zhes 'byung ba de'i ting nge 'dzin du bsgom zhing mdun du yang bsams nas de'i rig sngags kyis sbyin sreg byas pas tshe ring ba dang nad med par byas pa dang /ji ltar 'dod pa'i las 'grub par 'gyur bar gsungs so/ /de la tshe bsring ba zhes pa ni/ dus ma yin par 'chi ba rnams zlog par byed pa'o/ /nad med pa zhes pa ni tshe ring bar byed pa'i rgyu ste/ rlung dang mkhris pa dang / bad kan dang /'dus pa las 'byung ba'i nad kyi rigs thams cad zhi bar byed pa'o/ /de ltar byed pa'i rig sngags ni/ rdo rje khro bo'i snying po la sogs pa las kyi dkyil 'khor du gsungs pa rnams kyis sbyin sreg byed pa'o/ /ji ltar 'dod pa las grub pa/ /zhes pa ni/ gang tshe ring ba dang /nad med pa dang / zhi ba dang rgyas pa la sogs pa gang 'dod pa'i las de grub par 'gyur bar bstan pa'o/ /'o na sgrub pa'i lha khro bo bsgoms nas sbyin sreg byas nas de ltar grub par zad kyi/ lha zhi ba la sogs pa bsgoms nas sbyin sreg byas pas ni de ltar grub par mi 'gyur ram zhe na/mod kyi zhes pa'i sgras de kho na nyid bsdus pa'i rgyud 'dir/ 'dis 'di ltar byas pas 'grub par 'gyur ba bstan mod kyi/ rtog pa thams cad bsdus pa las/ zhi ba'i lha dag bsgoms nas sbyin sreg byas pas de bzhin du 'grub par gsungs te/de bas na rtog pa thams cad bsdus pa las bshad pa zhes bya ba la sogs pa yin te/ so sor mnyes par bya ba dang / /zhes pa ni/ gang yang rung ba'i dkyil 'khor du 'jug cing dbang bskur ba la sogs pa'i las byed pa'i rang rang so so'i lha mnyes par bya ba'o//dpal rdo rje sems dpa' la sogs pa zhes pa'i dpal rdo rje sems dpa' la sogs pa chen po bcu drug po de nyid ye shes kyi sems dpa' ste/ bdag dang mi gnyis mnyam par gzhag par zhes pa ni bdag dang dbyer med par bsgom zhing mdun du yang de bzhin du bsam par bya'o//ji ltar rigs par zhes pa ni ting nge 'dzin gyi sbyor ba dang / cho ga'i thabs de ji ltar rigs shing 'tsham pa bzhin du bya bar zad kyi 'di kho na ltar zhes phyogs gcig tu ma bcad par bstan pa yin no/ /de dag gi snying po dang zhes pa ni/de bzhin gshegs pa'i dkyil 'khor du gsungs pa'i dbang du byas pa de brjod pa'o/ /phyag rgya dang zhes pa ni/ rdo rje rigs kyi dkyil 'khor du gsungs pa dbang du byas pa de brjod pa'o/ /gsang sngags dang zhes pa ni/ chos kyi rigs kyi dkyil 'khor gyi dbang du byas pa de brjod pa'o//rig sngags rnams kyis zhes pa ni/ las kyi dkyil 'khor gyi dbang du byas pa de brjod pa ste/ de rnams kyis sbyin sreg bya bar rigs par ston te/ kyang zhes pa ni the tshom can gyi tshig ste/ de rnams kyis sam/ gcig gis kyang byar rung bar ston pa ste/mkhas pa rnams 'chad do zhes pa ni rgyud kyi don dang las kyi bye brag la mkhas pa'i slob dpon rnams kyis de ltar gsungs pas na/ sgrub pa po lha zhi bar bsgoms pas kyang nad zhi ba dang / tshe bsring ba dang / sdig pa sbyang ba la sogs pa sbyin sreg gis ji ltar 'dod pa'i las grub par byas nas nyes pa med cing grub par 'gyur ro zhes bstan pa yin no//gang gi phyir de'i phyir ram/de bas na de zhes bya ba'i don to/ /gang gi phyir so so'i mnyan par bya ba'i lha de dag gi snying po la sogs pas tshe bsring ba la sogs pa'i las bya ba yin zhe na/rtag pa thams cad bsdus pa'i sbyin sreg gi skabs nas cho ga 'di dag snang ste zhes bya ba la sogs pa 'byung ba ni/ de bas na slob dpon nam sgrub pa po dkyil 'khor 'di 'dri bar sogs pa'i zhes bya ba nas/ sbyin sreg bya bar nges so zhes bya ba dang 'brel pa yin no/ /de la/ bdag nyid khrus byas byugs pa'i lus/ sna tshogs pa yi rgyan dang gos/ /lha yi dpung rgyan dbang bskur ba'i/ /rgyan ni rnam pa kun gyis brgyan/ /zhes pa ni rtog pa thams cad bsdus pa las sbyin sreg gi thabs bstan pa'i gzhung de 'dir bsdus pa ste/bdag nyid kyi lus khrus byas nas/ byug pa la sogs pas byugs te/ gos dang rgyan sna tshogs pas bsgos shing brgyan nas/ dbu rgyan rin po ches dbang bskur bar bya'o zhes bstan pa yin la/ bdag nyid pad+ma 'dzin pa'i rgyal//bdag gi thor tshugs de bzhin gshegs/ /yang na rdo rje sems dpa' dag /rin chen rgyal po dbang bskur 'dzin/ /zhes pas ni/ rigs bzhi 'khor lo bzhi'i mtshan nyid bstan pa ste/ de la/ bdag ni pad+ma 'dzin pa'i rgyal/ zhes pa ni/ pad+ma'i rigs kyi 'khor los sgyur ba spyan ras gzigs dbang po ste/ pad+ma'i rigs thams cad kyi nang na rgyal por gyur pa'o/ /bdag gi gtsug tor de bzhin gshegs/ /zhes pa ni/ bdag nyid spyan ras gzigs kyi dbang po'i mgo'i gtsug tor du 'od dpag med bzhugs pa ste rnal 'byor pas kyang de ltar bsgom pa'o//yang na rdo rje sems dpa' bdag /zhes pa ni/ rdo rje rigs kyi dkyil 'khor 'khor los sgyur ba dpal rdo rje sems dpa' la bya ste/ bdag nyid de'i ting nge 'dzin du bsgom pa'o/ / rin chen rgyal po dbang bskur 'dzin/ /zhes pa ni/ rin po che'i rigs kyi 'khor los sgyur ba rdo rje rin chen te/ de'i ting nge 'dzin du bsgom par bya ba'o/ /de bzhin du las kyi 'khor los sgyur ba sems dpa' chen po rdo rje sna tshogs kyang de'i zhar la gsungs par bya'o//bud med sdug dang lhan cig tu/ /zhes pa ni/ rang gi bsnyen par byed pa'i lha'i phyag rgyar gnas pa la bya'o/ /dpung pa dam por bsdams nas su/ /zhes pa ni/ ji ltar rgyud 'di las/ lus kun yongs su 'khyud pa yi/ /zhes bya ba la sogs pa sngar gsungs pa'i don gyis bdag dang lha gnyis dbyer med par byas nas ngang du bsgom pa'o//mtshan ma brtan por gyur na zhes pa ni gang de ltar bsgoms nas sems las su rung ba'i mtshan ma nges par thob pa ni mtshan ma brtan por ste/ de ltar nam gyur pa dang / sbyin sreg gi las brtsam par bya'o//de ltar ma gyur pa'i kha lag tsam pa dag gis rang 'dod kyi dbang du byas na ni 'phags pa'i zhal du mi rtogs shing bgegs kyi kha zas su 'gyur ro zhes byang chub chen po'i rgyud las gsungs so/ /'o na 'dir rigs bzhi 'khor los sgyur ba kho nas bya'i/gzhan gyis ma yin nam zhe na/ smras pa/ 'dir rigs bzhi 'khor los sgyur bas bya bar bstan pa'am sa 'dzin tsam du bstan par zad kyi/ rang gi lha sems dpa' chen po gang yang rung ba bsgoms nas sbyin sreg bya ba yang rigs par gsungs te/de ltar na khro bo gcig pur bsgom pa'am/ rigs bzhi 'khor los sgyur ba kho nar bsgoms pas bya'i gzhan du bsgoms pas ni bya ba ma yin no zhes gcig tu ma bcad par rig par bya'o/ /e ma'o bde ba e ma'o bdag /ces pa ni/ e ma'o zhes pa ni ngo mtshar ba dang ngom pa'i don te/gang la zhe na/ bde ba dag dga' ba'i don la ngom zhing ngo mtshar che ba ste/ bde ba zhes pa ni lha dang mi gnyis par bsgom pa'i ting nge 'dzin gyi skabs su glo bur ba'i nyon mongs pa'i skabs mi 'byed pas na/ bde ba'o/ /lha mnyes pa dang bdag nyid dngos grub thob par 'gyur ba'i rgyu bas na/dga' ba'o/ /chags pa de kho na/ chags pa'i dga' ba bla na med/ /ces bya ste/ lha bdag la dgongs pa dang / bdag lha la sems nye bar 'jog pa ni chags pa'i dga' ba ste chags pa dang dga' ba thams cad kyi nang na bla na med pa'o//rdo rje sems dpa' chags chen pos/ /zhes pa ni/ nyan thos dang / rang rgyal ba dag gis ni srid pa'i chags pa spangs shing 'gro ba'i don mi mdzad pa rdo rje sems dpa' ni srid pa'i chags pa la gnas shing 'khor ba'i sems can gyi don mdzad pas na chags pa chen po zhes bya ba ste/rnal 'byor pas kyang de dang rjes su mthun par bya dgos par bstan pa'o/ /'jig rten dbang po bdag la dgyes/ /zhes pa ni/ de ltar lha dang mi gnyis par bsgom zhing srid pa na gnas shing 'khor ba'i don mdzad pa'i rnal 'byor pa de la 'jig rten dbang po spyan ras gzigs shing dgyes par 'gyur ba bstan te/de yang 'dir bstan pa'i phyir rdo rje sems dpa' la sogs pa ye shes kyi sems dpa' lhag ma rnams kyang 'jig rten dbang po ji ltar mnyes pa de bzhin du mnyes par 'gyur ro zhes bstan pa yin te/sogs pa rgya cher gsungs zhes pa ni rtog pa bsdus pa'i skabs der ni de la sogs pa mang du gsungs nas/ 'dir nyung shas tsam bstan pa yin zhes pa'i tha tshig go/ /de ltar dgongs pa'i mdo'i tshig 'di rnams zhes pa ni/ de ltar ldem po dag dang dgongs pa'i tshig rtog pa bsdus pa las 'byung ba brjod pa 'di rnams so//gdul ba rnams kha cig gis de'i don ji lta ba de bzhin du rtogs pa gzigs nas zhes pa ni/ 'gro ba gang 'di la 'jug par mos pa kha cig gis gzhung 'di mthong bar gyur na gzhung de'i don ldem po dang dgongs pa'i dbang gis bstan par ma rig cing tshig gi sgras ji bzhin pa'i don ji lta ba de bzhin du 'dzin par dgongs nas bcom ldan 'das nyid kyis nges pa'i tshig gzhan rnams kyis gzhung de'i tshig rnams yongs su bkrol ba'i don gsungs pa 'dir bstan pa ji skad du rdo rje rtse mo'i rgyud las/khrus kyi sbyor ba rnam bzhi dang / /phyag rgya de la bzhon pa yis/ /sangs rgyas chos dang dge 'dun dang / /slob dpon dag ni phyi ma'o/ /zhes bya ba la sogs pa gsungs pa yang 'dir bstan te/ de dag gi don ni bkrol zin pas de las rig par bya'o//bdag ni pad+ma 'dzin rgyal po/ /zhes bya ba la sogs pa'i rigs bzhi 'khor los sgyur bstan pas/ /zhes pa ni/ 'di dag bstan pa ni sems dpa' chen po rnams kyi nye ba'i mtshan nyid du dgongs pa ste/ /de dag kun gyis kyang byar rung bar dgongs pa'o//chags pa'i dga' ba rjes dran pa/ /zhes pa ni/ rang gi lha mnyes par bya ba'i phyir/ dga' ba'i sems kyis chags par byed pa'i ting nge 'dzin la gnas pa'o/ /'dod pa'i chags par mi brtag go/ /zhes pa ni de ltar 'dir chags pa zhes smos pa'i don de ltar rig par bya ba'i phyin ci log gi 'dod chags yin par ma bzung ngo zhe'o//bud med la ni chags nas su/ /zhes pa ni/ rang gi lha mnyes par byed pa'i lha'i phyag rgya chen po la chags pa ste/ dngos su bud med la chags pa ma yin pas na/ 'khrig pa bdun ni spang bar bya//zhes bya'o/ /mtshan ma brtan por rang gyur nas/ /zhes bya ba la sogs pa'i dgongs pa'i tshig gi don bshad pa ni/ mtshan ma rtags zhes bya bar bshad/ /de yi bstan pa lhag pa yin/ /rdo rje can gyi mtshan ma gang / /mkhas pas der ni lhag par gzung //zhes bya ba la sogs pa dag ste/ de la mtshan ma zhes bya ba ni/ rtags de gang me yod pa na rtags du ba yod pa dang / gang chu yod pa na rtags chu skyar lding ba dang 'dra bar/ gang theg pa chen po'i rigs su 'gyur cing gsang sngags spyod pa'i skal pa rnams kyi rtags ni/snying rje dang byams pa la sogs pa dang ldan par bshad do/ /de yi bstan pa lhag pa yin/ /zhes pa ni/ snying rje la sogs pa de dag nyams su blangs shing spyod pa'i bsam pa dang / sbyor ba can gyi rang bzhin du gnas par 'gyur ba'o/ / rdo rje can gyi mtshan ma gang / /zhes pa ni/ dpal rdo rje sems dpa' la bya ste/ de'i mtshan ma ni phyag rgya chen po la sogs pa yid la byed cing bcing pa dang bzlog pa'o/ /mkhas pa des ni lhag par gzung / /zhes pa ni/ de ltar rdo rje sems dpa'i phyag rgya chen po la sogs pa yid la byed pa dang /brjod pa dang 'ching ba dang / bsam par bya ba'i rim pas 'dris shing goms par byed pa'o/ /byang chub sems dpa' rdo rje can/ /zhes pa ni/ rdo rje sems dpa' ste/ byang chub sems dpa' ni gang bstan pa'o zhes pa ni byang chub sems dpa' rdo rje can ji lta ba bzhin du byang chub sems dpa' gang bstan pa yang de bzhin du rig par bya'o//pha rol phyin pa drug gi mtshan/ zhes pa ni/ sbyin pa la sogs pa pha rol tu phyin pa drug gi mtshan nyid ji lta ba bzhin du spyod pa'o/ /snying rje dang ni byams par ldan//zhes pa ni/ tshad med pa rnam pa bzhi'o/ /shes rab thabs la mos brtan pa/ /zhes pa ni/ de kho na nyid sum cu rtsa bdun la sogs pa ji lta ba bzhin du rig pa'i shes rab dang / 'gro ba ji ltar 'dul ba bzhin du ston par mdzad pa'i snying rje chen po dang 'brel ba'i thabs so//de la mos shing zhen pa'i dbang du spyod pas na mos pa brtan pa'o/ /skye dgu rnams kyis bsngags par 'gyur/ /zhes pa ni/ tshul de lta bu dang ldan pa'i rnal 'byor pa de la ni lha dang mi la sogs pa'i skye dgu rnams kyis bsngags pa brjod cing rjes su dga' bar byed ces pa'i don to//mtshan ma brtan par rang gyur na/ /de la lhag par bsnyen byed pa'i/ /zhes pa ni/ de lta bu'i mtshan ma de dag brtan por gyur nas kyang 'phral gtang ba ma yin te/ lhag par rtag tu 'dris shing goms par bstan pa yin no/ /rnal 'byor rig sngags gang 'dod pa//zhes pa ni/ gang bsgrub par 'dod pa'i rig sngags kyi lha'o/ /de dag lhan cig 'dug par bya/ /zhes pa ni/ de dang bdag nyid dbyer med par bsgom pa'o/ /phyag rgya chen por bsgoms nas su/ /zhes pa ni gang sgrub par 'dod pa'i lha de'i phyag rgya chen por bsgoms pa'o//dbu ma dam pa bsdam par bya/ /zhes pa yang sngar bshad pa bzhin du gnyis su med pa nas sems rtse gcig par bsgom pa'o/ /rab tu dga' ba gang mang ba/ /zhes pa ni/ de ltar bstan pa'i byang chub kyi sems 'dris shing goms par bsgoms pa las byung ba'i dga' ba mang du 'phel ba'o//de ni dga' ba'i sa zhes pa byang chub sems bsgom pa goms pa las byung ba'i dga' ba mang du 'phel ba dang ldan pa'i ye shes kyis rtogs pa'i khyad par de'i dga' ba'i sa zhes bya'o/ /brtan pa chen po gang chags pa//zhes pa ni sems brtan pa chen po dang ldan pas na/ rnal 'byor pa de'i brtan pa chen po zhes bya ba la gang chags pa ni/ gang rnal 'byor pa de sgrub par byed pa'i rang gi lha'o/ /yang dang yang du rjes dran pa/ /zhes pa ni/ lan cig tsam dran pa byas pas ma yin/me chu'i rgyun ltar yang dang yang du rgyun mi 'chad par yid la dran par bya'o/ /snying rje byams pas kun du byugs/ /zhes pa ni/ gong du byug pas lus byugs zhes bstan pa de'i tshul 'di dang ldan pa'o/ /khrel yod ngo tshar shes pa yis/ / zhes pa ni gong du sna tshogs pa'i gos bgo zhes bstan pa de bstan pa'o/ /brtul zhugs tshul khrims byugs pa'i lus/ /zhes pa ni/ 'di yang gong du lus byug pas byugs par bstan pa'i don yin no/ /byang chub sems kyis shin tu brgyan/ /zhes pa ni/ don dam pa dang kun rdzob byang chub sems brgyan pa ste/gong du brgyan zhes bstan pa de'i don yin no/ /brtul zhugs de dang ldan nus zhes pa ni/ don de lta bu dang mi 'bral ba'o/ /chags pa chen po bsnyen par bya/ /zhes pa ni/ chags pa chen po ni rang gi lha bsten cing goms pa dang 'dris par byed pa'o//phyi rol yan lag ma dag kyang / /zhes pa ni/ yo byad ma tshogs pa dang / cho ga ma tshang ba'o/ /rdo rje 'dzin pas yongs su gzung ba zhes pa ni/ don de lta bu dang ldan na rdo rje sems dpa' yongs su gzung ba'i rang bzhin can yin pas phyi rol gyi yan lag ma tshang yang nyes par mi 'gyur zhing de nyid kyis gang 'dod pa'i las dang dngos grub thob par 'gyur ba zhes bstan pa'o//sbyin sreg gi las ni cho ga ji lta ba bzhin du shar phyogs su bltas la sbyin sreg bya ba la sogs pa bcom ldan 'das kyis rgyud las ji skad gsungs pa bzhin du slob dpon gyis zhes ston to//rdo rje slob dpon de tshe spyad/ /ces pa/ nam gang 'dod pa'i dngos grub sgrub pa de'i tshe rdo rje slob dpon gyis sbyin sreg gi las spyad dam brtsam par bya zhes bstan pa yin no/ /de bas na zhes pa ni/gong du gang gi phyir zhes gsungs pa de'i phyir zhes pa'i don du dgongs pa'i tshig go/ /dkyil 'khor 'dri ba la sogs pa'i tshe zhes pa ni/ 'dri ba dang der 'jug pa dang / dbang bskur ba dag byed pa'i tshe sbyin sreg gi las kyis sdig pa byang ba dang / / dngos grub sgrub pa la sogs pa'i las bya'o zhes bstan pa yin te/ ji ltar 'dod pa'i las byed pa/ /zhes pa ni/ sdig pa sbyang ba dang / nad dang gnod pa zhi bar bya ba la sogs pa'i las gang 'dod pa'o/ /lhag ma ni brda phrad par zad do/ /khyad par du ni dpal rdo rje hU~M zhes bya bar mnyam par gzhag pas zhes pa ni/rgyud gzhan dang khyad par du de kho na nyid bsdus pa 'dir ni rdo rje rigs kyi las kyi dkyil 'khor du gsungs pa'i dpal rdo rje hU~M zhes bya ba'i ting nge 'dzin du sems mnyam par gzhag pas drag shul gyi las bya bar bstan te/ hU~M bzhi po'i snying po zhes pa ni rigs bzhi'i hU~M ka ra bzhi'i snying po ste/ hU~M de ji ltar 'dod pa'i grangs bzhin du brjod pa gang la dmigs pa de'i drag shul spyod pa'i ting nge 'dzin gyi sbyor ba de kho na nyid bsdus pa'i rgyud 'di las gsungs te/ de yang 'og nas bshad par bya'o zhes bstan to//de la sbyin sreg gi yan lag rnams ni zhes pa ni/ zhi ba la sogs pa'i sbyin sreg gi sgo nas gang dang gang 'dod pa'i las de dang de sgrub pa la 'grub par 'gyur ba'i rgyu rnams la ni sbyin sreg gi yan lag ces bya ste/ gang zhe na/ lha dang sbyin sreg byed pa dang /thab dang / dgang gzar dang / blugs gzar dang / las ji ltar bya ba dang rjes su mthun pa'i bsreg par bya ba'i rdzas/ mar dang bud shing la sogs pa'i/ /zhes gsungs pa yin te/ de la sbyin sreg gi lha ni rnam pa gsum ste zhes pa ni sbyin sreg bya ba'i lha rnams kyi grangs ni spyir rnam pa gsum yod par rig par bya zhes bya'o//gcig ni rdo rje dbyings kyi dkyil 'khor na gnas pa zhes pa/ rdo rje dbyings kyi dkyil 'khor na gnas pa'i lha las rnam bzhi'i sbyin sreg gang byed pa'i tshe ji ltar rigs pa bzhin spyan 'dren zhing mchod pa'i lha thams cad la bya'o//de dag la mchod pa byas pas ji lta bu 'grub pa yin zhe na/ de dag la mchod pa yang bsod nams 'phel ba dang zhes bya ba la sogs pa gsungs te/ don de dag thob par 'gyur bar bya ba'i phyir ro/ /de rnams la mchod par bya'o zhes bstan to//gnyis pa sbyin sreg len pa po/ /zhes pa ni/ lha gnyis pa ni dkyil 'khor du gsungs pa'i lha rdo rje sems dpa' ye shes kyi sems dpa' de dag nyid kyi nang nas gang mnyes shing bsgrub par bya ba'i ye shes kyi sems dpa' gang yin pa'am/ gang yang rung ba'i mtshan nyid du rig par bya'o//gsum pa ni sbyin sreg gi lha gsum pa ste 'jig rten pa'i me lha rnams kyi nang na ming mi ta zhes bya ba de yin te/ de yang sbyin sreg len par byed pa'i lha nyid pas na/ lha de gsum kho nar rig par bya'o/ /gzhan dag na re 'o na sbyin sreg gi dkyil 'khor du ni ye shes kyi lha dang 'jig rten pa'i lha la sogs pa 'gro ba rigs drug gis bsdus pa thams cad kyang 'byung na/'dir lha rnam pa gsum du bstan pa ci'i phyir zhe na/ smras pa/ 'jig rten pa'i lha dag ni mchod mgron du gyur pa yin pa dang / 'gro ba ris drug po rnams ni snying rjes gzung ba'i yul yin pa dang /kha cig la ni sngon gyi las/ 'phral gyi rkyen gyis 'brel ba'i lan chags kyi bu lon gzhal bar byed pa'i phyir zhor la bstan pa yin te/ 'di dag kyang rdo rje dbyings kyi dkyil 'khor na gnas pa zhes sngar gsungs pas na/der thams cad 'dus pa'i phyir na/ gsum gyi khongs su yang ma chud par med par 'gyur te nyes pa med do/ /sreg par byed pa ni slob dpon nam sgrub pa po ste zhes pa ni/ gzhan grol zhing smin par byed pa'i gnas lnga dang / de kho na nyid rnam pa gzhan la sogs pa'i don gzhan la 'chad cing slob par byed pa'i slob dpon du gyur pa ni slob dpon no//bdag nyid dngos grub gang dang gang 'dod pa'i ngo bo de sgrub par byed pa'i sbyor ba la brtson pa'i mtshan nyid dang ldan pa ni sgrub pa po zhes bya ste/ bdag gzhan gyi don rnam pa gnyis kyi bye brag las ni slob dpon dang sgrub pa po zhes smos par rig par bya'o//yon tan ji lta bu dang ldan pa la bya zhe na/ de yang sngar gsungs pa'i phyag rgya chen po la sogs pa bsgom pa'am/ zhes bya ba la sogs pa ste/ phyag rgya chen po la sogs pa bsgom pa goms pa dang /snying po la sogs pa bzlas shing sbyin sreg byas pas ji lta na 'dod pa'i las sgrub pa la mkhas pa'i yon tan dang ldan pas bya ste/ sogs kyi sgras ni rkang stabs dang / lag stabs dang / 'dug stabs dang / gos dang rgyan stan dang / byug pa dang / phreng bas lus brgyan pa dang / yo byad bsag pa dang / rdzas dgram pa dang / dkyil 'khor 'dri ba dang / lha dgod pa dang / mchod rdzas dang / sreg rdzas dbul ba la sogs pa'i rnam pa rnams bsdu'o/ /sbyin sreg gi dgang gzar la sogs pa zhes pa ni/sbyin sreg byed pa'i dgang gzar dang blugs gzar gyi mtshan nyid do/ /rgyud 'di las ma gsungs pas zhes pa ni/ de kho na nyid bsdus pa'i rgyud 'dir ni ma bstan te/ spyi'i rnal 'byor rgyud las zhes pa ni rtog pa thams cad bsdus pa dang / rdo rje rtse mo'i rtog pa la sogs pa rnal 'byor gyi rgyud gzhan nas 'byung ba'i rgyud de dag las bsdus la sgrub thabs kyi skabs 'dir bri bar bya'o zhe'o//de la zhi ba la sogs pa'i zhes pa ni/ las rnam pa bzhi'o/ /dgang gzar gyi mtshan nyid ces pa ni gzar bu che chung rnam pa gnyis las gzar bu chen po'i mtshan nyid do//rnal 'byor gyi rgyud las gsungs pa ste zhes pa ni/ rtog pa thams cad bsdus pa las 'di ltar 'byung zhes pa'i tha tshig go/ /'di ltar yu ba chang pa lnga tsam du bya zhes pa ni/ gzar bu chen po'i tshad dam ring thung gi tshad ni sor chang pa lngas 'jal ba ste/sor nyi shu yod par rig par bya'o/ /kho ra khor yug sor bzhi tsam du bya zhes pa ni/ kha zhes khor khor yug gi che chung gi tshad do/ /zabs su sor gcig ces pa ni/ mthe bo'i sen mo nub pa tsam du bya'o/ /de'i mchu pad+ma'i 'dab ma 'dra ba ste zhes pa ni/gzar bu de'i mchu ni pad+ma'i 'dab ma bzhin du'am/ rnam gcig bya rog gi mjug sgro bzhin du byas pa'i dkyil 'khor du kha phra sbom ran par btod pa las mchu phra mo'i srid du tshad sor gcig yod par bya'o/ /de la sor bzhi pa ni mchog go zhes pa ni/chen po'i tshad yin no/ /de'i phyir ni 'bring ngo zhes pa ni sor gsum pa'o/ /de bas kyang cung zad chud pa ni tha ma ste zhes pa ni chung ba'i tshad do/ /dgang gzar thams cad spyi'i mtshan nyid do zhes pa ni las rnam bzhi gang yang rung ba'i spyi'i dgang gzar gyi mtshan nyid du rig par bya'o//khyad par du ni zhes pa ni de dag las khyad par ram bye brag tu dbye ba ste/ zhi ba'i sbyin sreg gi dgang gzar zlum po ste zhes pa ni/ zhi ba'i las kyi dgang gzar gyi dbyibs ni zlum por byas pa ste/ 'khor lo lta bu'o/ /'di'i dbus su'ang 'khor lo bri//zhes pa ni/ 'di'i dbus su 'khor lo rtsibs brgyad pa bri ste de'i zhi ba'i rigs kyi mtshan ma'o/ /rgyas pa ni gru bzhi ste zhes pa ni ya thog ma thog gnyis so/ /ngos gnyis dgu por bya zhes pa ni pha rol tshu rol gyi ngos gnyis ni cung zad dgu por bya'o/ /de'i dbus su pad+ma rim po ches mtshan pa'o zhes pa ni gzar bu de'i dbus su pad+ma rin po che'i rigs kyi mtshan ma'o//drag shul spyad pa'i dgang gzar ni gru gsum zhes pa mngon spyod kyi dgang gzar ni dbyibs gru gsum du bya'o/ /dbus su khro bo'i rdo rje bris pa'o zhes pa ni/ rdo rje rigs kyi mtshan ma'o/ /de ltar dgang gzar gsum po 'di dag ni zhes pa ni/ de ltar bstan pa'i dgang gzar che chung gi tshad rab 'bring rnam gsum du phye nas bstan pa 'di dag go/ /dgang blugs dbul ba'i phyir zhes pa ni/ rdzas kyi gzar bu chen po dgang ba'i phyir chung du na blugs pa ni dgang blugs te/lha la dbul bar bya ba'i phyir ji ltar rigs par blos rnam par phye zhes pa la/ bzhi pa la sogs pa las bzhi gang ltar byed pa la gzar bu gang ltar rigs pa bzhin du de'i dus su blos rnam par phye nas bye brag tu byas te/ las kyi rjes su mthun par sbyar/ /zhes pa ni las bzhi gang byed pa dang rjes su mthun par bya'o/ /blugs gzar ni zhes pa ni/ gzar bu chung ngu ste/ yu ba chang pa lnga pa zhes pa ni/ yu ba'i tshad ring thung gzar bu chen po dang mthun no/ /zabs su sor gcig ces pa ni/ mdzub mo'i sor te mdzub mo'i ba tsam mo/ /de las yang rab 'bring rnam pa gsum ste/ kho ra khor yug tu ni mthe bo'i sen mo'i steng tsam ni mchog go zhes pa ni mthe bo'i steng gi khor yug tsam ste/ de'i ni chen po'o/ /kho ra khor yug tu mthe bo'i sen mo'i phyed tsam ni 'bring ngo zhes bya ba la sogs pa ni brda phrad par zad do/las kyi rjes su mthun pa'i yo byad rnam pa lnga'i zhes pa ni thab kyi dbyibs dang / bye brag dang / yam shing dang bsreg shing gi khyad par dang / sreg rdzas dang mchod rdzas kyi so so'i bye brag gis bsag cing byin gyis brlabs pa dang /sngags mkhan gyi cha lugs dang / ting nge 'dzin dang / mchod pa 'bul ba'i thabs dang / bsam rgyud rnams te las rnam bzhi'i bye brag ji lta ba bzhin du rjes su mthun par bya'o/ /rab tu shis pa'i tshes grangs zhes pa ni/ tshes bcu bzhi dang bco lnga dang /zla ba phyed dang tshes brgyad la sogs pa'o/ /de yang zhi ba'i las ni tshes lnga dang / brgyad dang / bcu gsum dang / bcu bzhi dang / nya'i nyin par mgo gzugs so/ /rgyas pa'i las ni tshes gsum dang lnga dang / bdun dang zla ba nyal mgo gzugs so//dbang gi las ni mar gyi ngo tshes dgu la mgo gzugs so/ /mngon spyod kyi las ni tshes nyi shu gsum dang nyi shu dgu la mgo gzugs la brtsam mo/ /zhi ba'i las bya ba'i gnas ni/ sku gdung dang ring bsrel gyi mchod rten yod pa'am/ yang na gtsug lag khang dang lha khang dang /'jig rten pa'i lha chen po lha rten nam khang pa yod pa 'bab chu dang / lteng ka dang / mtsho dang pad+mo yod pa/ shing dang / khri dang / shing sna tshogs pa dang / ldum bu dang / shing lo dang / me tog sna tshogs pas brgyan pa/ ngang pa dang /khrung khrung dang / rma bya la sogs pa skad 'byin pa/ snga nas sangs rgyas dang byang chub sems dpa' kho na bzhugs pa'i gnas dag tu bya bar shis so/ /rgyas pa'i las bya ba'i gnas ni ri'i rtse mo'am/ 'bras bu dang ldan pa'i nags tshal lam ba lang gi lhas sam/mchod rten gyi drung ngam/ lha khang gi gnas sam/ mchod khang ngam/ phyug po'i khyim mam/ rgyal po'i pho brang ngam/ rgyal rigs kyi khyim du bya bar shis so/ /dbang gi las kyi gnas ni/ grong khyer gyi me phyogs su me tog dkar po'i skyed mos tshal dben pa'am/shing gcig pa'i drung ngam/ zhing gi lha khang ngam/ ma mo'i gnas sam/ dur khrod dam brag phug gam/ khyim stong pa'am/ btso blag mkhan nam/ zla mtshan can nam/ smad 'tshong ma'i khyim lta bur bya ba shis so/ /mngon spyod kyi las kyi gnas ni grong khyer gyi lho phyogs sa gzhi nag po yod pa'am/dur khrod dang / dgon pa dben pa dang / lcong ra rnying pa dang / gu lang gi gnas la sogs par bya bar shis so/ /skar ma la sogs pa dang ldan pa zhes pa ni/ zhi ba'i las ni skar ma khrums smad dang /gre dang skag dang / mchu dang gza' zla ba dang / pa sangs dang / gza' lag gi nyin par brtsam mo/ /rgyas pa'i las ni/ rgyu skar gro bzhin dang mon gru dang / gza' lag pa dang / phur bu la bya bar shis so/ /dbang gi las ni/ rgyu skar rgyal dang /smin drug dang / mchu dang / sa ga dang / gza' nyi ma dang / mig dmar gyi nyin par brtsam mo/ /mngon spyod kyi las ni rgyu skar rlung gi bu dang / me bzhi dang / nag pa dang / tha skar dang / gre dang / dbo dang / nab so dang / sa ri dang / gza' spen pa dang / mig dmar gyi nyin par brtsam mo/ /'am zhes pa'i sgras ni der ma bcad pa yin la/ yang na zhes pa'i sgras ni rnam pa bzhin du ston par byed pa ste/ chos thams cad mnyam pa nyid du goms pa mang du byas pa zhes pa ni/ las dang / rgyu dang / 'bras bu'i tshul du gnas pas bskyed pa'i phung po dang / skye mched dang / khams la sogs pa'i dngos po rnams dang bral ba byang chub sems rnam par dag pa mngon du byas na/ gnas de dag gi tshogs pa dang ldan pa yang nyes pa med la/ de bzhin du rings pa'i zhes pa ni/chos thams cad mnyam pa nyid du goms pas gnas dang / tshes grangs dang / gza' skar la sogs pa phun sum tshogs kyang nyes pa bzhin du/ nad pa tshabs po che dang / glo bur du gdon chen pos zin pa dang / rkyen dbang gis myur bar byed par 'dod pa dag gis kyang tshes grangs dang /gza' dang / skar ma dang / gnas la sogs pa'i phun sum tshogs pa dang mi ldan par gyur na yang rnam par rtog pa med pa nyid kyis bsgrubs na nyes pa med do/ /de la re zhig rdo rje dbyings kyi dkyil 'khor chen por gsungs pa zhes pa/ rdo rje sems dpa' la sogs pa ye shes kyi sems dpa' gang yang rung ba'i snying po dang /rdo rje rigs kyi las kyi dkyil 'khor las gsungs pa/ las rnam pa bzhi'i rig sngags rnams kyis las sgrub par 'dod pa dag gis kyang sngar bstan pa'i phyag rgya bzhi bsgom pa dang / snying po bzlas brjod bya ba'i cho gas lha dang / bdag mi gnyis par gyur pa'i rnal 'byor mngon du bya'o zhe'o/ /de la re zhig sngar smos pa nyid kyis zhes pa ni/ rdo rje dbyings kyi dkyil 'khor chen po la sogs pa rgyas pa dang / 'bring dang / mdor bsdus pa rnam pa gsum las gang yang rung ba'i dkyil 'khor bkod de//sa bstar ba'am/ ras la sogs pa'am zhes pa/ sa btsal ba dang / brtag pa dang / bslang ba dang / byin gyis brlab pa la sogs pa zhes pa ni/ lha rnams nam mkha'i ngos su bsam pa dang / rtsig pa'i ngos la bri ba dang / thang bu la bris pa dang / lugs su byas pa dang / shing las btod pa dag kyang bsdu'o/ /de bzhin gshegs pa zhes pa ni/ de bzhin gshegs pa dang / rdo rje dang / pad+ma dang / las kyi rigs kyi ye shes sems dpa' gang yang rung ba'o//zhi ba la sogs pa zhes pa ni/ las rnam pa bzhi badzra d+harma hrIHzhes gsung gi bdag nyid pad+ma'i rigs kyi sngags bzlas brjod byas pas btab pa'i chus me la bsang gtor byas pa thab tu bcug la/ las sna tshogs pa'i snying po zhes pa rdo rje las kyi snying po ste/badzra karma zhes brjod cing rlung yab kyis me sbar bar bya'o/ /de nas hUM zhes rang gi snying gar bsams te zhes pa ni/ rdo rje khro bo'am ye shes kyi sems dpa' la sogs pa'i lha'i gang bsgom yang rung ste/ skabs 'dir hUM snying gar nyi ma'am zla ba la bsam ste/ hUM zhes brjod pas rang gi lha'i rnal 'byor gang gis bsgom pa de gsal bar dran par bya'o//rdo rje me zhes pa ni me lha nyid rdo rje me ste/ ci'i phyir zhe na/ rdo rje gsum las rnam par rgyal ba'i dkyil 'khor du 'jig rten pa'i lha thams cad btul nas rdo rje ming gi dbang bskur ba'i phyir na rdo rje me zhes bya'o//rdo rje me'i dam tshig gi phyag rgya ni/ /rdo rje bsrung ba brtan byas nas/ /rdo rje bcing ba bsdam par bya/ /'di ni me yi dam tshig ste/ /thams cad byed pa 'da' bar dka'/ /zhes bya ba dag ste/ de la/ rdo rje bsrung ba brtan byas te/ /zhes pa ni/sems brtag pa nas bzung ste/ go cha bcing ba'i mthar thug gi bar du bsgom pa ni rdo rje bsrung ba brtan par byas pa'o/ /rdo rje bcing ba bsdam par bya/ /zhes te/ de ltar byas pa'i rjes la lag pa gnyis rdo rje bcing ba bsdams la/ gzung ba 'di ni me'i dam tshig gi phyag rgya ste/de brtan na gang bsgom pa las gzhan du 'da' bar mi nus pas na thams cad byed pa 'da' dka' zhes bya ste/ rdo rje me'i dam tshig gi phyag rgya de bcing bar bya'o/ /rdo rje'i dam tshig gi sngags hUM gi bar du bcug pas zhes pa ni/ hUM badzrA na la/ma hA b+hU ta dz+wa la ya/ sarba b+ha smiM ku ru sarba duSh+TAn hU~M phaT hU~M zhes brjod pa'o/ /rdo rje me mi ta'i me gzugs der gzhag go/ /sngags de brjod pas rdo rje me nyid mi ta'i me gzugs su dmigs nas de'i cha lugs su dmigs par bya'o/ /de la mi ta'i me yang mid pa ring zhes pa ni/mi ta'i me'i cha lugs bstan pa ste/ mgrin pa ring la gzi che ba g.yas bgrang phreng dang / g.yon ril pa spyi blugs thogs pa/ skra'i thor tshugs ser por 'dug pa lus yon po la las rnam pa gang byed pa dang rjes su mthun pa'i kha dog dang ldan par bsgom mo//de nas der byug spos dang / me tog la sogs pa de'i gsang sngags nyid kyis byin la zhes pa ni/ de nas thab der me lha de nyid la de ngos kyi sngags kyis byug spos dang / me tog la sogs pa rim par byin la/sngar smos pa'i zhi ba'i dgang gzar gyis zhes pa gzar bu chen po lan gsum du me lha mchod pa rang gi sngags brjod cing dbul lo/ /yam sreg shing gi thor to gnyis mar la btags pa zhes pa/ ji ltar rgyud las/ pa la sha dang n+ya gro d+ha/ /blak+Sha seng ldeng a rka dang /be tang ka ta a mra dang / kas ma d+hi dang shi ma dang / a pa marga las byung dang / u dum a shwat+thar bcas pa/ yam shing bcu gnyis dag tu bstan/ /zhes gsungs pa'i yam shing ngam/ rnam gcig sha ma'i yam sreg shing dag gam/mchod sbyin dag gis ljon shing ngam/ /lo mar bcas shing lo ma can/ /yam shing skyed mos las skyes rlon/ /zhes gsungs pa'i yam shing tshad dang ldan pa la shing gi thor to gnyis mar las btags pa gsum bsres la/ gung mo dang srin lag dang mthe bos sam zhes pa de'i rting la ting dang sprus pa'i sreg blugs dag gung mo dang srin lag dang mthe bong gsum bsdus pas sam/yang na blugs gzar nyid kyis lan gsum du sreg blugs sbyin no/ /de nas de yi kha bkrus la/ /zhes pa ni de ltar mchod pa phul ba'i 'og tu me thab mchod yon gyi chu rdo rje chos kyi sngags bzlas brjod byas pas btab pa des bsang gtor byas pas bkru ste/'di skad du zhes pa ni me lha bsgom pa'i tshig 'di skad du brjod de/ drang srong chen po zhes pa ni me lha'o/ /bdag nyid ji ltar 'dod pa'i zhes pa ni bdag las rnam pa bzhi gang yang rung ba 'di byed pa zin gyi bar du ma bzhud par 'byung ba'i me 'bar ba 'di nyid du gnas par mdzod cig ces bsgom par bya'o//de la me las bcol ba'i don ni rnam pa gnyis te/ mchod pa rnams dag cing dri ma med par gyur pa dang / lha rnams kyi zhal du phyin par mdzad cing bsgom par bya'o/ /de'i 'og tu rdo rje sems mas bzlas brjod byas pa'i mchod yon gyi snod ces bya ba la sogs pa ni brda phrad par zad do/ /ji ltar byas pas yud tsam cig dran pa'i lum du byas nas zhes pa ni/ bdag dang lha mi gnyis par bsgom pa'i ting nge 'dzin brtan par gyur pa snga nas byas pa de yang 'dir slar yud tsam gyis gsal bar byas pa'o//rang gi lha'i ye shes kyi sems dpa' byin gyis rlob pa'i phyir zhes pa ni grub cing bsgom par bya'i ye shes sems dpa' mdun na bzhugs pa de nyid 'bar ba'i bsreg khang gi thab tu bsam par bya ba ni byin gyis rlob pa'i phyir zhes bya'o//de'i snying pos bzlas brjod byas me tog gcig me'i nang du bcug la zhes pa ni gang bsgrub par bya ba'i lha de nyid kyi snying po snga nas kyang bzlas pas byin gyis brlabs la/phyir dor ka nas yang bzlas la me tog de me'i nang du dor nas der bzhugs su gsol nas ye shes sems dpa' de me'i nang na pad+ma'i nang na bzhugs par bsams nas/ gzod 'og nas 'byung ba'i rim gyis sreg blugs kyis mchod pa dbul bar bya'o/yang na de bzhin du me la sreg blugs sngar byas te zhes pa ye shes sems dpa' la bya ba'i tshul de bzhin du mi ta'i me la sreg blugs kyi mchod pa sngar byin gyis brlabs te/ bcom ldan 'das la sna tshogs pa'i snying po zhes brjod pas me'i nang du gzhal yas khang rgyan dang gdan gyis brgyan pa khyad par can bsams pa'i steng du rang gi gang bsgrub par bya ba'i lha de nyid bzhugs par bsams nas sngar bshad pa bzhin du bsdus pa la sogs pa'i sbyor ba byas nas me'i nang du bsam par der rang gi lha'i dam tshig sems dpa' bcug ste/mchod yon bsam pa dang / phyi'i mchod pa rnams 'og nas 'byung ba'i tshul gyis sbyin par bya'o/ /cho ga 'di yang bya ste zhes pa ni/ de ltar sbyin sreg byed pa'i tshe cho ga 'di yang yid la bsam par bya ste/bdag la ji ltar byin gyis brlab pa rang gi lha'i dam tshig sems dpa' zhes pa ni/ ji ltar bdag la dgongs shing dngos grub stsol ba'i lha de lha'i dam tshig sems dpa' bdag tu gyur nas dbyer med par byas nas bdag dang mi gnyis pa'i sbyor ba mngon du byas nas sems can la yang sngar bzlas brjod kyi skabs su bstan pa'i rim pa nyid kyis bu gcig pa la mas sems pa bzhin du snying rje chen pos yongs su khyab cing zin par bya'o//de nas me dang dgang gzar dang blugs gzar dang mar la sogs pa bsreg pa'i rdzas rnams la zhes pa 'di rnams la rang gis gang bsgrub pa'i lha'i snying po'i yig 'bru dgod de/de las kha dog dkar po dang ldan pa'i 'od zer 'phros pas gdul bya la bstims pas nad dang gnod pa la sogs pa yongs su zhi bar gyur nus pa'i ting nge 'dzin bsgom par bya'o//de bzhin du rgyas pa la sogs pa'i las rnams la yang sbyor ba de dag slar btang ba'i ting nge 'dzin bsgom par bya'o/ /rdo rje'i lta bas blta zhes pa lha'i bye brag rnams slar bshad pa de bzhin du blta bar bya'o/ /swA hA'i mthar dbul lo zhes pa sngags kyi mjug la swA hA zhes brjod pa dang ldan pa'i tshig gis dbul ba ste/de la swA hA zhes pa ni rin po che dang las gcig tu bsdus nas 'grel pas bstan pa ste/ las dang byed pa tha mi dad pas 'phags pa mchod pa dang / sems can gyi don bya ba'i las mngon par grub pa'i mtshan nyid du bstan par rig par bya'o//badzra d+hA tu badzra satwa zhes pa ni mnyes par byas pa'i sems dpa' rnams kyi snying po ste/ de dag bsgrub pa'i phyir sbyin sreg gi mchod pas mnyes par byed pa'i las brtsam pa'i dus/ badzra d+hAtu swAhA/badzra satwa swAhA/ zhes brjod par bya ste/ de bzhin sems dpa' gang sgrub par byed pa de rang gi snying po dang swA hA ldan pa'i sngags kyis dgang blugs kyis mchod pa dbul bar bya'o/ /sdig pa sbyang ba'i sbyin sreg gi sngags zhes pa ni bdag gzhan gnyi ga'i sdig pa'i bag chags thams cad zad pa dang mi skye bar byed pa ni sdig pa sbyang ba ste/de'i sngags ni/ oM sarba pA pa da ha na badzrA ya swA hA/ zhes bya ba 'di'o/ /'dir yang de bzhin gshegs pa'i rigs kyi sbyin sreg thams cad kyi cho ga zhes pa ni rdo rje dbyings kyi dkyil 'khor chen po'i tshul lam/phyag rgya bzhi pa'am phyag rgya gcig pa'i lha'i sbyin sreg gi tshul ni sbyin sreg thams cad kyi cho ga zhes bya'o/ /cho ga de dag la ni lag pa g.yon pa'i rdo rje khu tshur chos gos kyis g.yogs te zhes pa de bzhin gshegs pa'i sbyin sreg gi cho ga thams cad la rang gi lag pa g.yon pa rdo rje khu tshur du byas nas chos gos kyis g.yogs te/der rang gi snying gar dpung pa dam du bcum ste sbyar la zhes pa ni dpung pa bcum nas rdo rje khu tshur rang gi snying gar gtad de dam du bcar nas sbyin sreg lag pa g.yas pas bya'o//rdo rje khro bo'i mnyam par gzhag par sbyin sreg byed na zhes pa ni/ rdo rje rigs kyi las dkyil 'khor du gsungs pa'i rdo rje khro bo'i ting nge 'dzin du sems mnyam par gzhag pas sbyin sreg byed pa ni/ lag pa g.yon pa khro bo'i khu tshur du byas te zhes pa ni/lag pa g.yon pa khu tshur bcangs te/ mdzub mo bsgreng ba'o/ /byams pa la sogs pa'i lta bas kyang zhes pa ni/ de'i dus su sngags mkhan gyis mig ni byams pa'i lta ba dang sbyar la blta'o/ /las kyi rjes su mthun par zhes pa ni/ las kyis rjes su mthun pa ni byams pa'i lta ba ste/des bsgrub bya'i ming ngam rdzas la sogs pa gang yin pa de blta bar bya'o/ /de ltar nyi ma re re zhing mtshams kyi rim pa nyid kyis zhes pa ni nyin par bzlas brjod kyi mtshams te/ nyin gyi dus bzhin brjod kyi mtshams su sbyin sreg bya'o//bdag gam gzhan gyi sdig pa byang nas zhes pa ni/ sdig pa sbyong ba'i phyir sbyin sreg byas pa yin na ji ltar sdig pa byang ba'i mtshan ma rgyud las gsungs pa'i/ dkar po nyid dang g.yas su 'bar/ /gyen du 'bar zhing dri ma med/ /zlum zhing rnam par mi 'phro ba/ brten la glog bzhin dri ma med/ /ces bya ba la sogs pa dag gi mtshan ma byung na/ lus dang ngag dang sems la rnyog pa med pa'i mtshan ma ste/ tshe 'di nyid la byung gi bar du sbyin sreg bya'o zhes pa ni phyi'i dus su mi bsdad de ci srid mtshan ma de lta bu dag byung gi bar du sbyin sreg gi cho ga 'di dag ces pa ni/sngar bstan pa rim pa de dag go/ /'og nas 'byung ba'i zhes pa ni/ rigs rgyas pa la sogs pa'i sbyin sreg ste/ de la rigs rgyas pa zhes pa ni/ bu dang bu mo dang nor dang 'bru rnams rgyas shing 'phel bar byed pa'o/ /sogs pa'i sgras ni de'i rting thogs su 'byung ba'i sbyin sreg gi cho ga gzhan rnams kyang bsdu bar bya'o//phal cher sbyar bar bya'o zhes pa ni sdig pa sbyang ba'i sbyin sreg gi cho ga des ni/ rigs rgyas pa la sogs pa'i sbyin sreg gi cho ga gzhan 'byung ba rnams la yang sbyar bar bya zhe na/rigs pas sbyor cig ces bstan pa'o/ /de dag so so'i khyad par gyi cho ga zhes pa ni/ sdig pa sbyang ba dang rigs rgyas pa la sogs pa las rnam pa bzhis bsdus pa'i sbyin sreg gi cho ga'i bye brag rnams te/ tshul mi 'dra bar ston pa'i de dag gang yin pa'i mtshan nyid 'dir bstan par bya'o zhe'o//'dir thab rnams kyi zabs dang zhes pa ni/ skabs 'dir bstan pa'i sbyin sreg gi thab 'di dag ni/ thab khung thabs su mthon dman ci yod pa'o/ /khor yug dang zhes pa ni yangs dog gi rim pa ji ltar bya ba'o/ / kha khyer gyi tshad ni zhes pa ni mu ran dang kha khyer ji tsam bya ba'i tshad do/ /ji tsam 'dod par bya ste zhes pa slob dpon nas sgrub pa po bdag nyid kyis che chung ji tsam 'dod pa'i tshad du bya ba ste/ bdag gi phyir zhes pa ni gang gi phyir tshad nges par ma bstan nas der bya bar bshad ce na/rdo rje rtse mo'i rgyud las phal cher de rnams kyi che chung ji tsam du bya ba'i tshad des gsal por mi 'byung ste/ mi snang ba'i phyir ni tshad nges par bstan pas ji tsam 'dod pa bzhin bya bar bstan to/ /thab de dag gi dbyibs kyi khyad par zhes pa ni/ thab de dang dbyibs mi mthun par ston pa'i bye brag khyad par ro//de las gsungs pa gang yin pa dang zhes pa ni rdo rje rtse mo'i rgyud de las gsungs pa gang yin pa dang de kho na nyid bsdus pa'i rgyud 'di las 'byung ba dang zhes cho ga rgyud las gsungs pa'i zhes pa ni rtog pa bsdus pa la sogs pa'i rgyud bzhin no//lus dang bcas pa la sogs pa zhes pa ni lus kyi mdog dang cha lugs dang sems kyi bsam pa'i ting nge 'dzin gyi bsam rgyud dang / sogs pas zas dang yo byad bsags pa bsdu ste/ de dag bye brag rnams sgrub thabs 'dir bshad par bya'o zhes/rin po che 'dra ba'i thab pad+mas mtshan pa zhes pa ni phyi rin po che zur brgyad pa lta bur byas pa'i nang du pad+ma brgyad pas mtshan pa ste/ rigs rgyas pa zhes pa ni/ bu dang bu mo dang nor la sogs pa rgyas shing 'phel bar byed pa ni rigs rgyas pa ste/ ji ltar rin po che las dgos pa thams cad 'byung ba dang 'dra bar rin po che lta bu'i thab 'dis kyang dgos pa thams cad grub par byed pas na 'di ltar bya bar bstan to/ /las byed pa'i dus ni zhes pa ni rigs rgyas par byed pa'i sbyin sreg byed pa'i dus na'o/ /stan dang zhes pa la sogs pa 'di dag kyang spyi rgyud las ji skad du 'byung ba bzhin du rig par bya ste/'dir ni gzhung mangs su dogs pa dang / gcig tu chad pa med pa'i phyir na mdzad mkhan gyis ma bstan to/ /cho ga snga ma thams cad byas pa zhes pa ni/ lha bsgom pa dang spyan drangs shing mchod pa'i thabs dang /me lha bsgom zhing spyan drang ba dang / dgang blugs byin nas las bcol ba dang / mchod pa dbul zhing dngos grub stsol ba dang / mchod rdzas la sogs pa lha'i snying po sngags kyi yig 'bru bkod pa las 'od zer 'phro 'du bya zhing rang gi las dang mthun par bsam pa la sogs pa bstan bzhin du 'dir yang bya'o bar bstan pa yin no//mar dang bsres pa'i 'bras kyi sreg blugs zhes pa ni/ 'bras so ba mar dang sbrus nas gdus pa'i sreg blugs la ni mar dang bsres pa'i 'bras kyi sreg blugs zhes bya'o//zla ba kham pa 'dra ba'i thab 'khor los mtshan pa zhes pa ni/ zla ba tshes brgyad pa lta bu'i thab kyi dbus su 'khor lo rtsibs brgyad pa 'phang du sor gcig yod pas mtshan pa'o/ /yam sreg shing mngar pos zhes pa ni/yam shing sreg shing gnyi ga mngar po me tog dang 'bras bur bcas pa la sogs pa'o/ /mi gnyer ba la sogs pa'i cho ga thams cad byas la zhes pa ni bsam pa dang dgug pa dang mchod pa dang / las bcol ba la sogs pa snga ma bzhin du bya'o//go cha 'dra ba thab 'khor los mtshan pa zhes pa ni ya lad dang / phub kyang rung ba'i dbyibs kyi thab la dbus su 'khor los mtshan pa'o/ yam sreg shing mngar po zhes pa ni/ 'di yang shing dmar po me tog dang 'bras bur bcas pa ste/snga ma lta bu'i shing gis me sbar ro/ /ku sha'i nyag ma 'bru mar la btags la zhes pa ni/ sreg rdzas ku sha'i chun po dag re re nas yungs kar gyi mar la sbags shing sbyin sreg bya ba'o/ /rdo rje 'dra ba'i thab lcags kyus mtshan pa zhes pa ni/ thab kyi dbyibs rdo rje ltar byas la nang du lcags kyus mtshan pa'o/ /rdo rje 'dra ba'i thab nyid du/ /zhes pa ni rdo rje 'dra ba'i thab nyid du de'i bum par sbyin sreg bya'o/ /me tog dmar po'i 'bras bu ni gang me tog dmar po skyes pa las byung ba'i 'bras bu ni me tog dkar po'i 'bras bu ste/kham bu dang se ba dang / khre'i shing la sogs pa'i 'bras bu lta bu'o/ /'obs dang bcas pa'i rtsig pa 'dra ba'i thab ces pa ni/ zhugs thab zlum po la thab 'obs zhes zhing sor bzhi yod pa'i 'bras bu ral gris mtshan pa ni rdo rje rnon pos mtshan pa'o/ /gzhu 'dra ba'i zhugs thab mdas mtshan pa zhes pa ni/mda' bkang ba 'dra ba'i zhugs thab ni gzhu 'dra ba'i zhugs thab mdas mtshan ma'o/ /lcags kyu 'dra ba'i thab pad+mas mtshan pa zhes pa ni/ lcags kyu'i mu khyud pad+mas mtshan pa'i thab po/ /zhi ba la sogs pa'i sbyin sreg gi las ni gang 'dod pa'i dngos grub grub pa'i thabs bshad zin to//da ni de ltar sbyin sreg bya ba de'i sngon du bya ba dang / phyi nas bya ba'i cho ga'i thabs bstan par bya'i phyir na/ sbyin sreg gi las rnam pa bcu drug po 'di gang bshad pa'i lhag ma sngon gyi dus na bya ba'i spyi'i cho ga de bshad par bya'o zhes pa la sogs pa gsungs te/de la sbyin sreg gi las bcu drug po 'di zhes pa ni/ sbyin sreg gi bye brag gi rnam grangs bcu drug tu phye nas bstan pa 'di'o/ /gang bshad pa'i lhag ma zhes pa ni/ bcu drug po de las tshang ba'am gcig rtsom yang rung ste/de'i lhag ma ni sbyin sreg de ma byas pa'i sngon rol du dang po'i dus su bya ba'i cho ga dang / byas zin pa'i cho ga dang bya ba'i cho ga ni lhag ma ste/ phyi'i zhes pa ni las bcu drug po dag gi kun gyi thun mong du gyur pa'i spyi'i cho ga ni sngon dang phyi nas 'byung ba 'di yin pas de bshad par bya zhe'o//de la sgrub pa po gang yang rung ba sbyin sreg gi las byed par 'dod pa zhes pa ni/ sgrub pa pos sdig pa byang ba'i sbyin sreg la sogs pa rnams la gang la mos par byed par 'dod pa des sngar smos pa'i rim gyis zhes pa ni/gong du bstan pa'i rim pa'o/ /rdo rje phra mo'i ting nge 'dzin la mos pa rab tu goms par byas pas zhes pa ni/ dang po rdo rje phra mo'i ting nge 'dzin sngar bshad pa bzhin du bsgom pa goms shing sems la dbang thob ste/ ting nge 'dzin las su rung bar byas nas bdag dang mi gnyis par gyur pa'i ye shes sems dpa' zhes pa bdag dang gang bsgrub pa'i ye shes sems dpa' so so ma yin tha mi dad de/dbyer med par bsgom pa'i rnal 'byor goms pa mngon du bya'o zhe'o/ /phyi ma'i dus su bya ba yang / zhes pa ni sdig pa sbyang ba dang / tshe bsring ba dang zhes pa ni sdig pa sbyang ba la sogs pa nyi ma re re sbyin sreg bya bar 'dod pa sgrub pa pos de'i mtha' mar mtshan thog thag tu sbyin sreg bya ste zhes pa de ltar nyi ma re re zhing sbyin sreg byas pa de'i rting la mtha' mar thog thag ste rang gi lha ye shes sems dpa' nyid la goms pa byas nas zhes pa ni rang gis gang bsgrub par bya ba'i ye shes kyi sems dpa' la sems thag pas gsol ba byas te/smes gsol ba btab nas nyi ma re re zhing thog thag sbyin sreg byas na 'grub par 'gyur ro zhe'o/ /gsol btab pa dang smes gsol yang ji lta bu sha stag bya ba yin zhe na/bcom ldan 'das bdag gis cho ga nyams pa lta bu mchis na de bdag la bzod par gsol lo zhes bya ste/ de la cho ga nyams pa ni dam tshig ma bsrungs pa dang / ting nge 'dzin ma khugs pa dang / sngags zur chag pa dang / bzlas brjod 'chol ba dang / phyag rgya log par bcings pa la sogs pa'o/ /de bzhin du mtshan mo'i sbyin sreg ces pa ni/ sgrub pa chen po'i dus su sbyin sreg gi las 'bad nas bya'o/ /ji ltar 'dod pa'i dngos grub ces pa ni sgrub pa po nyid gang la dga' zhing mos pa'i dngos grub sgrub par byed pa'o//mthu med par gyur na zhes pa ni/ bsgom pa dang bzlas brjod dang sbyin sreg byas pa la nus mthu med pa ni ji ltar bsgrubs kyang dngos grub ma thob pa'o/ /rtag tu nyi ma re re zhing sbyin sreg byed pa zhes pa ni/de ltar dngos grub ma thob na nyin mtshan gyis dus sam rtag par nyi ma re re zhing ngam mtshan mo ji lta ba bzhin du sbyin sreg gi las bar mtshams med par nus thang du bya ste/ btang bar bya zhes pa ni sbyin sreg brtag par byed pa'i sbyor ba la gnas shing de'i brtson 'grus dang ldan pa'o//sngon du bsnyen pa'i sbyin sreg ces pa ni/ slar sgrub pa chen po byed pa'i sngon du sbyin sreg byed pa'o/ /mtshan mo spyod pa'i zhes pa ni/ phyis sgrub pa chen po'i byed pa'i dus nyin ni sbyin sreg byas pa'i cho ga'o/ /ji ltar 'dod pa'i sbyin sreg byas zin nas zhes pa ni sdig pa sbyang ba la sogs pa'i sbyin sreg gang 'dod pa byas pa de tha mar grangs tshad dam mtshan ma byung ste zin par gyur pa ste/bsreg par bya ba'i rdzas yod na yang zhes pa ni/ sreg rdzas kyi lhag ma so so nas dbul rgyu yod na yang legs/med na yang ci yod pa thams cad gcig tu bsdus te dgang blugs dbul bar bya'o/ /de nas ji ltar spyan drangs pa'i rol mo dang zhes pa'i gang spyan drangs shing bsgrubs pa'i lha'i rim pa dang / rab 'bring du bsdus pa'i dkyil 'khor la gnas pa mdun na bzhugs pa'i lha ye shes sems dpa' rnams la sogs pa mngon par 'dra bar gsal bar mdun du dmigs te de bzhin du gsang ba'i mchod pa la sogs pa zhes pa/gsang ba'i mchod pa la sogs pa sngar bstan pa rnams kyis ci nus tshad du mchod nas/ ji ltar 'dod pa'i dngos grub sgrub pa'i gsol ba gdab pa dang / yi ge brgya pa brjod la rdo rje rin po che'i dbang bskur ba dang zhes pa sngar gsungs pa'i rdo rje rin po che'i dam tshig gi phyag rgya snying ga nas byung bas dbang bskur ba la sogs pa gong du ji ltar bshad pa bzhin du 'dir yang byas la/phyag rgya rnams dang po gong du gang nas byung ba de bzhin du rim gyis rang gnas su bkrol bar bya'o/ /de nas lha ye shes sems dpa' 'khor dang bcas pa la yang phyag 'tshal te/ gong du bstan pa'i cho ga bzhin du slar gshegs su gsol/ thab na gnas pa'i rdo rje me'i gzugs zhes pa/ thab tu bzhugs su gsol ba'i rdo rje me'i gzugs kyang sngar bsgoms pa bzhin du slar gsal bar dran par byas la/ dgang blugs dbul ba la sogs pa'i mchod pa phul la/ de nas me rang gi dam tshig gi phyag rgya dang /me lha de'i sngags de nyid kyis slar dang por rang gi gnas su btang la/ slad nas kyang srung ba la sogs pa'i ting nge 'dzin yang sngar bstan pa bzhin du skabs 'dir bya'o/ /zhi ba la sogs pa sbyin sreg gi las kyis sngon dang phyi na bya ba'i tshe yang bshad pa yin te/phyag rgya bzhi bsgom pas sgrub pa dang / snying po la sogs pa bzlas brjod bya bas sgrub pa dang / zhi ba la sogs pa'i sbyin sreg bya ba'i las kyis sgrub pa gsum ka rdzogs par bshad zin to/ / de ltar bsgom pa dang / bzlas pa dang / sbyin sreg la sogs pa'i las kyis gang 'dod pa'i dngos grub kyi rnam pa 'jig rten dang 'jig rten las 'das pa'i bye brag tu gyur pa'i thabs kyi yi ge 'di slob dpon sangs rgyas gsang bas mdzad pa yang bdag gcig pu'am/ gang zag gcig gi don du dgongs pa ma yin te/ ma 'ongs pa'i sgrub pa po gzhung 'di'i tshul gyis nges par 'byung ba'i skal ba yod pa rnams la phan gdags pa dang / skal ba dang mi ldan pa rnams kyang bskyang zhing khad kyis 'bras bu'i theg pa 'di la gzud par bya ba'i phyir/rgyud so so'i dgongs pa rnams 'dir rim par bsdebs shing phyogs gcig tu bsdus nas/ tshig dang yi ge'i rnam pa'i glegs bam du byas pa yin la/ 'di ltar byas pa'i dge ba'i rtsa ba yang bar ma dor chud mi gsan cing / sems can thams cad kyi gong du 'phags pa mnyes par bya ba'i phyir/ bsngo ba'i don du dge ba'i rtsa ba bsngo bar yang mdzad pas na/ de nyid bsdus pa'i tshul la ni/ /rgyal dang byang chub sems dpa' yi/ /sgrub pa'i cho ga bsdus pa yis/ / bsod nams bdag gis gang thob pa/ /des ni sangs rgyas gsang ba yi/ /tshig gi bdud rtsi 'thung ba rnams/ /bcom ldan rdo rje sems dpa'i thugs/ /yongs su mnyes pa nyid du gyur/ /zhes gsungs pa yin te/ de la de nyid bsdus pa'i tshul zhes pa ni/sgrub thabs 'di mdzad pa'i khungs te/ rtsa ba'i rgyud chen po dpal de kho na nyid bsdus pa ste/ btus kyang de las btus la/ sgrub thabs kyang de'i lha rnams kyi sgrub thabs su byas pa'o/ /lha yang gang zhe na/ rgyal dang byang chub sems dpa' yi/ /zhes bya ba dag ste/ rgyal dang zhes pa ni/ bcom ldan 'das rtag pa la sogs pa'i de bzhin gshegs pa lnga'o/ /byang chub sems dpa' ni de dag gi 'khor rdo rje sems dpa' la sogs pa ye shes kyi sems dpa' bcu drug la sogs pa rnams so//yi zhes pa ni/ 'brel pa can du bstan pa'i tshig rnams te/ sgrub pa'i cho ga bsdus pa zhes bya ste/ lha de dag so so'am gcig kyang rung ste/ gang la mos pa bzhin du bsgrub par bya ba'i thabs kyi tshig 'dir bsdus pa ste/phyogs gcig tu byas pa'o/ /de ltar de dag gi sgrub thabs phyogs gcig tu byas pa'i bsod nams ni med mi srid pas na zhes pa'i sgras/ bsod nams bdag gis gang thob pa//zhes bya ba'i tshig gis bsdus te/ sgrub thabs 'di byas pa'i bsod nams bdag gis thob pa gang yin pa des ni/ sangs rgyas gsang ba'i zhes pa ni/ bdag nyid sangs rgyas gsang ba'o/ /de'i tshig gi bdud rtsi 'thung ba ni/sgrub thabs tshig 'di nyams su len cing sgrub par byed pa yin pas/ tshig gi bdud rtsi 'thung ba rnams/ /zhes bya ste/ dper na bdud rtsis na ba gso zhing / 'chi ba slong ba dang 'dra bar/ sangs rgyas gsang ba bdag nyid kyi sgrub thabs kyi tshig 'dis kyang /sems can dug gsum gyi nad kyis zin kyang / mtha' rnam pa gnyis su 'chi ba rnams gso zhing slong bar byed pa'i bdud rtsi yin pas tshig gi bdud rtsi ste/ de bsgrub cing nyams su len pa ni/ tshig gi bdud rtsi 'thung ba rnams//zhes pas ma lus pa bsdu'o/ /tshig gi bdud rtsi 'thung ba rnams kyis cir 'gyur zhe na/ dpal ldan rdo rje sems dpa'i thugs/ /yongs su mnyes pa nyid du gyur/ /zhes bya ste/ zab pa dang rgya che ba'am/gzhan gyi dpal phun sum tshogs pa'i 'byor pa dang ldan pa'i bcom ldan 'das rdo rje sems dpa'i thugs ye shes rnam par rtog pa mi mnga' bzhin du/ thams cad mkhyen cing rtogs pa'i rim pa dang ldan pa de yongs su mnyes shing tshim par gyur/zhes gsungs pa yin no/ /slob dpon sangs rgyas gsang ba yis/ /mkhas pa dga' ba skyed pa'i phyir/ /phyogs 'di'i sgrub thabs brtsams pa 'di/ /don byed bdag gnyer yod min yang / /tshig tsam cung zad bkrol ba dag /sgro skur mtha' ldan 'gal bas na/ /de la nyes pa mi 'phel bar/ /dngos med ye shes rang snang ba'i/ /rgyal ba de yi sras rnams la/ /btud nas bshags na bzod par mdzod/ /bdag pas gzhan la phan don du//mkhas tshig lung la brten stobs kyis/ /'di la cung zad legs byung na/ /de ni 'phags pa'i byin rlabs pas/ /de yi rgyu de'i nus pa yis/ /ji snyed 'gro ba ma lus kun/ /sgrib pa'i bag chags gtan bral zhing / /skal bzang blo rab ldan gyur te//mnyam nyid don las nges byung nas/ /rnam snang chen po'i thabs thob shog /rdo rje dbyings kyi dkyil 'khor chen por gsungs pa'i ye shes sems dpa' mnyes par bya ba'i cho ga rgyud kyi don la 'jug pa'i tshig gi don la rnam par dbye ba slob dpon pad+ma badzras mdzad pa rdzogs so// //