CLOSE WINDOW

D2500
བོད་ཡིག

/[ ]@##/ /rgya gar skad du/ kA ma shA s+t+ra nA ma/ bod skad du/ 'dod pa'i bstan bcos zhes bya ba/ thams cad mkhyen pa la phyag 'tshal lo/ /gsal dang yan lag bde stangs dang / /rigs dang rdzas dang sngags rnams ni//sngags pas shes nas 'jig rten 'dir/ /bde ba'i mchog ni bsgrub par bya/ /bde ba'i khyad par bskyed pa'i phyir/ /drang srong swA ra ya nas gsungs/ /'dod pa'i bstan bcos 'bum sde las/ /klu sgrub kyis ni stong phrag gcig /bsdus te de las bdag gis kyang //bde ba bsgrub phyir 'di gsung ngo / /'bad pas rol byed ma rnams kyi/ /mkhas pas bde ba bskyed par bya/ /yang na shes pa tsam gyis ni/ /rol byad ma yi rigs shes 'gyur/ /'dod pa bsten pa'i dus su ni/ /bud med rnams ni mgu bar 'gyur//bud med rigs ni rnam bzhi ste/ /skyes pa rnams kyang de bzhin no/ /pad+ma can dang dung can ma/ /glang chen ma dang sna tshogs ma/ /ri bong dang ni khyu mchog dang / /rta dang de bzhin dgo ba dang / /pad+ma'i gdong can skal bzang ma/ /'dod pa'i gzugs can bud med mchog /khams gsum kun du grags pa yi/ /pad+ma can gyi mtshan nyid do/ /gdong pa ring zhing gzugs bzang ma/ /skal ldan kun gyi yid du 'ong / /ngang pa'i 'gros can blo bzang ma/ /'di ni dung can ma zhes bya/ /tsho zhing cung zad mche ba can/ / yan lag ma nyams mdzes ldan mchog /mdog ldan skal bzang gsang ba thub/ /de ni glang chen ma ru grags/ /skyung ka'i dbyangs can yan lag gnag /sna tshogs gzugs can snyan par smra/ /byams ldan sems ni ma dkrugs mchog /de ni sna tshogs ma zhes bya//pags pa stong zhing 'jam pa dang / /gser gyi me tog dang mtshungs rtags/ /yan lag bkra zhing kha dog gnag /gang gi rtags ni de ri bong / /gdong ba ring zhing skad bzang mchog /rol byed ma rnams mgu bar byed/ /pags pa dmar ldan rtsed mo mdzes//de yi rtags ldan khyu mchog yin/ /shin tu ring zhing sbom pa ni/ /dpag med yon tan ster ba'o/ /mgrin sngon dang ni mtshungs pa ste/ /'bras can ltar ni bshad pa yin/ /thung zhing sbom pa glang nya yin/ /brtan zhing rol byed ma yid 'ong //rtags kyi tha snyad de yis ni/ /ri dwags dgo ba zhes su brjod/ /'dod pa'i bstan bcos mtha' dag las/ /rtags kyi mtshan nyid 'di bzhi bstan/ /lhan cig skyes pa pad kan can/ /ring ba rlung can mkhris pa can/ /rked pa zlum zhing bzang mo ste//pad+ma'i 'dab ma dang mtshungs mig /yongs su rdzogs shing 'dod pa rdzogs/ /skye gnas mdzes pa lhan cig skyes/ /bud med mdog dkar pad+ma can/ /yid 'byung las byung ring bar bshad/ /tshe zhing gsang ba rgyas pa ni/ /grang ba'i reg ldan bad kan can//mgo yi sha rgyas bzang mo ste/ /kha yi 'gram gnyis shin tu dog /skra li mgo bo lhag par che/ /gang gi mtshan ma de rlung can/ /sbal ba'i rgyab 'dra mgrin pa sra/ /dro ba'i reg pa yang dag ldan/ /mdog ser zla mtshan myur ba ni/ /mtshan ma de yod mkhris pa can//dus kyi sor ni ri bong ste/ /de bzhin rgu ba khyu mchog bcad/ /rta ni lo yi zla ba'i tshad/ /bzang po'i tshad ni dgo ba'o/ /rigs kyi sbyor ba 'di yis ni/ /mkhas pa rnams kyis shes par bya/ /bud med ngag gi rigs dag dang / /mtshon pas the tshom med par shes//pad+ma can ni nor sbyin mo/ /dung ma dri za mo ru bshad/ /glang chen sha za ma yin te/ /sna tshogs ma ni sring mor bshad/ /ri bong pad+ma can gyi bdag /khyu mchog dung ma de bzhin te/ /rta ni glang chen ma yi bdag /sna tshogs ma ni nga go ba'o//nor sbyin mo ni nor gyis mgu/ /dri zhim spos sogs dri za mo/ /bza' dang bcas pa sha za mgu/ /dpa' ba gnyis kyis srin mo mgu/ /rigs mi mthun pa mthun bya'i phyir/ /rdzas kyi sbyor ba bshad par bya/ /lan brgya bkrus pa'i mar gyis ni/ / rtags ni 'bad pas bsku bar bya/ /me la cung zad bsros gyur na/ /'dod pa'i dus su sbom par 'gyur/ /rtsa ba bcu pa'i bcud kyis len/ /bzhos thog 'o ma bsres te btung / /'dod pa'i nus pa med pa rnams/ /bzlog dka'i 'dod pa skye bar 'byung / / sbal pa'i yan lag lnga blangs nas/ /chu skyes dmar po'i ze'u 'bru bsres/ /phye ma b+ha ga'i nang du ni/ /zhag gsum bcug pas chung bar 'gyur/ /gang du zla ba gnas par ni/ /der ni 'dod pa rtag tu gnas/ /gcig tu gyur pas mnyam pa'i bde//longs spyod grol bar mkhas pas bskyed/ /yul dang rigs kyi bye brag ni/ /shes nas las kyi tshogs rnams sbyar/ /so dang sen mo gnas rnams ni/ /tshes kyi sbyor bas shes par bya/ /tshes gcig la ni spyi bo ste/ /gnyis pa la ni rna bar bshad/ /gsum pa la ni sna ru ste//de bzhin bzhi pa gdong yin te/ /lnga pa la ni mgrin par gnas/ /drug pa la ni dpung par ro/ /bdun pa la ni snying gar gnas/ /brgyad pa de bzhin snying gar bstan/ /dgu pa lte bar blta bar bya/ /bcu pa skye rags 'khor bar gnas/ / bcu gcig pa ni gsang bar brtag /bcu gnyis pa ni brla dag gnas/ /bcu gsum pa ni pus mo ste/ /bcu bzhi pa ni byin pa gnyis/ /gnam stong la ni rkang bol du'o/ /yar ngo'i zla ba gnas la ni/ /rim bzhin du ni bzlog par bya/ /'phel dang 'grib pa'i tshul du ni//mkhas pas shes nas spel bar bya/ /smin drug dang ni smal po mgo /kha dang rta chung de bzhin te/ /bre dang phul dag tshes la ni/ /mkhas pas rtag tu spang bar bya/ /dus min la ni mi brtsam ste/ /rol byed ma dang phrad mi bya//gal te chags pas 'jug gyur na/ /the tshom med par 'chi bar 'gyur/ /mnyam pa'i bde ba dus su ni/ /rol mo sna tshogs bsten par bya/ /bud med mchog rnams mgu bya'i phyir/ /dang po thun gnyis bsten par bya/ /so dang sen mos gdab pa ni//bde ba'i dus su bsten par bya/ /bde bas myos pa'i dus su ni/ /sen mo la sogs khyad par gdab/ /nyi ma zla ba 'pho dus dang / /zla ba zhag gi mtshams de bzhir/ /'chi bas 'dod pa spyad mi bya/ /bud med zla mtshan dus su ni/ /sa bon len pas spang bar bsngags//skal ldan ma yi b+ha ga las/ /mkhas pas me tog blang byas nas/ /bzhos thog 'o mar bsres byas nas/ /bud med mo gsham rnams la ni/ /byin pas bu bzang skye bar 'gyur/ /gzhan gyis mi thub dkar po'i rtsi//skud pa dkar pos dkri bar bya/ /bud med rked par bcing byas na/ /bde bar bu ni btsa' bar 'gyur/ /'dod pa'i bstan bcos rgyas pa las/ /bcing thabs bzhi po bshad par bya/ /pad+ma'i bcing thabs nyis log dang / /brla bsdams dang ni reg pa'o//b+ha ga la ni 'o byas nas/ /skye gnas lag pas rtse bar bya/ /'bad pas ling+ga bcug byas nas/ /dal bas brgyab pa brtsam par bya/ /rkang pa byin pas gnas byas nas/ /mgul nas rtag tu 'khyud par bya/ /sen mo yan lag 'dri byas nas//myur ba'i brgyab pa brtsam par bya/ /'di ni pad+ma'i bcing thabs te/ /pad+ma can dang lhan cig brtsam/ /'di ni pad+ma can dgyes pas/ /lhan cig skyes pa'i yon tan te/ /rkang pa gcig gis mnan byas nas/ /rkang pa gcig bcings khyad par du//'bad pas rtag tu chud byas na/ /'jam pa'i brgyab pa brtsam par bya/ /byin pa yis ni phye bas na/ /rang gi byin pa'i nang du 'jug /de nas phrag par dgal bar bya/ /slar yang mgul nas gzung bar bya/ /rtags ni 'bad pas 'jug byas nas//yang dang yang du brgyab par bya/ /rang gi yon tan 'byung 'gyur na/ /'o mas lan gsum bkru byas nas/ /de bzhin b+ha ga bkru bar bya/ /dung can ma yi nu ma bzung / /snga ma'i 'dug stangs slar bcings nas/ /bsrub cing sngags 'di brjod par bya//oM tsa la tsa la swA hA/ /stong bzlas pas ni dngos grub ste/ /yon tan bslab rnams skye bar 'gyur/ /de ni gnyid log 'dug stangs te/ /dung can ma dang lhan cig bshad/ /brla gnyis kyis ni brla bsdams te/ /nu ma lag pas gzung bar bya//byin khung gru mos phye byas nas/ /'bad pas rtags ni 'jug par bya/ /de ni glang mo dag gis ni/ /rol byed ma yi byin pa phye/ /ma mchu tsum pa byas nas su/ /de yi 'og tu brgyab par bya/ /'di ni bsdams pa'i 'dug stangs te//glang chen ma la sbyar byas nas/ /yon tan rgyun rnams ster bar 'gyur/ /yan lag phan tshun 'khyud byas nas/ /rol byed ma yi nu drag 'jib/ /rang gi brla steng gzhag byas nas/ /rtags ni 'bad pas 'jug par bya/ /sa la bsdad par byas nas ni/ /de 'og mgrin pa g.yas pas 'khyud//lag pa g.yon pa gtso bos gzung / /yang dang yang du brgyab par bya/ /sna tshogs ma dang lhan cig tu/ /reg pa'i 'dug stangs tsog pur bshad/ /sna tshogs ma ni tsum pa nas/ /mgrin par 'khyud pas yon tan ster/ /de dang chang ni btung bar bya//bcud kyis len kyang khyad par du/ /yang dang yang du ngal so zhing / /so rtsi dag kyang bza' bar bya/ /tshig ni snyan par smra bar bya/ /'bad pas rigs kyi sgra ni brjod/ /dus shes pa yi mkhas pas ni/ /sna tshogs gos ni bgo bar bya/ /pad+ma'i dri can pad+ma can//dung ma mar gyi dri yis brtag /glang chen ma ni rdul dris so/ /'o ma'i dri yis sna tshogs brtag /nu ma btsir bar bya ba dang / /mkhas pas mang du tsum pa na/ /mgrin par 'khyud cing ma mchu myang / /de ltar las rnams byas nas ni/ /de nas glu dang gar rnams kyis/ / rol byed ma rnams mgu bar bya/ /'dod chags khyad par sbyar ba yis/ /'khor ba'i sdug bsngal skye mi 'gyur/ /'dod ldan gang zag rnams kyis ni/ /ser sna zhe sdang spang bar bya/ /dul zhing ngo tsha shes pa dang / /rol byed ma yi rtse zla rnams/ /'bad de kun du gsang bar bya/ /'jam pas 'dul te drag pos min//slob dpon klu sgrub kyis mdzad pa'i/ /'dod pa'i bstan bcos rgyas pa las/ /bsdus te gzugs bzang bdag gis ni/ /'gro la phan phyir snying por bsdus/ /'dod pa'i bstan bcos mdor bsdus pa slob dpon gzugs bzang gis mdzad pa rdzogs so// //