CLOSE WINDOW

D2488
བོད་ཡིག

@##/ /rgya gar skad du/ badzra yA na mU la pat+ti TIkA/ /bod skad du/ rdo rje theg pa'i rtsa ba'i ltung ba'i rgya cher bshad pa/ 'jam dpal gzhon nur gyur pa la phyag 'tshal lo/ /rtag gnas dus gsum bde gshegs mnyam nyid sgu/ /kha sbyar bde chen longs spyod yongs rdzogs dpal//bdud bzhi las rgyal 'gro kun re 'dod skong / /thugs rje bdag nyid 'jam mgon phyag 'tshal te/ /'dir ni mi mkhas gsang sngags don la mngon rmongs pa'i/ /dbang bskur dam tshig med de zhal gyi bdud rtsi bral/ /bdud kyis mngon bslus rang nyid phung ba kho nar zad//snying rje gso thabs bdud rtsi 'di ni bshad par bya/ /lam mchog rnams kyi gzhir 'gyur dam tshig 'di/ /theg mchog rgyud kun las ni rab bstan pa/ /slob dpon gzhan dag gzhan du 'chad de 'di yi don/ /bdag gis bla ma las rnyed theg mchog spyod pa nyon//de la gsang sngags kyi tshul spyod pa rnams kyis skye ba med pa'i rgyud khong du chud par bya ste/ 'gro ba thams cad snying rjes bsgral ba'i sems sngon du btang ba thig le chen po yongs su rdzogs par 'dod pas mtshan nyid dang ldan pa'i slob dpon ting nge 'dzin gyi dkyil 'khor mngon sum du snang ba'am/gzhon nu ma la phab ste dkyil 'khor 'dri ba'am/ yang na de nyid bcu dang ldan pas mngon du bris pas bum pa'i dbang dang / gsang ba'i dbang dang / shes rab ye shes kyi dbang dang / yongs su rdzogs pa'i cho ga dang ldan pa'i slob ma la slob dpon gyis rtsa ba'i dam tshig pham pa dang /ltung ba dang / lci ba dang / sbom po dang / yan lag dang / nyes byas dang / phra mo dang / nyes pa med pa dang / dam tshig gi tshogs rnams dpog par bya'o/ /de nas bskyed pa'i rim pa dang rdzogs pa'i tshul gyis bsgrubs na tshe gcig la sogs pas mchog gi dngos grub dang /thun mong gi dngos grub rnams zhar la rgyas par 'gyur ro/ /de nas lhun gyis grub pa'i don thob nas dmigs pa med pa'i snying rje chen pos rtog pa med par sems can gyi don byed pa ni gsang sngags kyi tshul lo// //gzhan dag rdo rje rtse mo'i rgyud la sogs pa bya ba spyod pa gtso bor gyur pa las kyang / gnyis su med pa'i don khong du chud cing dam tshig can gyi skye bos brtags pa'i lha dang ye shes kyi lha dang dbang po'i sgo mnyam par sbyar nas/ dka' thub dang / dka' spyad dang khrus la sogs pa'i las dang bya ba gtsor mi 'dzin par 'grub par gsungs te/de skad du yang / khrus dang gtsang sbra 'dir mi dgos/ /dka' thub dka' spyad 'dir mi dgos/ /sangs rgyas rnams dang sems dpa' che/ /rtag tu sbyor bas 'grub par 'gyur/ /zhes 'byung ba dang /gzhan yang thig le mnyam gnas kyi rgyud las/ bde ba chen po'i ngang gnas na/ /dam tshig med cing sdom pa 'ang med/ /bya dang byed pa rtsol ba med/ /nam mkha' lta bur 'grub par 'gyur/ /zhes 'byung ba dang / byang chub kyi sems 'byung ba'i rgyud las/ byang chub sems la mnyam gnas na//dam tshig sdom pa nyams ma yin/ /zhes 'byung ba dang / thugs gsang ba'i rgyud las kyang / spros med thig le'i ngang gnas na/ /bya ba ma yin spyad kyang 'grub/ /ces 'byung ba dang / rtog pa yongs su zad pa'i rgyud las kyang / dam tshig la sogs brtags pas 'ching //sgyu ma'i sbyor shes stong pas 'grub/ /ces 'byung ba dang / mkha' 'gro ma gsang ba mdzod las kyang / 'di ltar snang ba'i dngos po rnams/ /sgyu ma lha dang lha mor gnas/ /bsdam bya med cing sdom byed med/ /rtsa dang rlung dang thig le med//stong pa nyid kyis 'grub par 'gyur/ /zhes 'byung ba dang / gzhan yang rnal 'byor dang rnal 'byor ma'i rgyud thams cad las kyang / bde ba chen po'i don rtogs na/ /smyung bar gnas pa la sogs pa/ /dman pa'i spyod pa bshad pas na zab mo'i don rdo rje theg pa rnams kyis ni rang bzhin gyis gnas pa'i lha'i sbyor bas rtag par thig le chen po mnyam pa nyid la gnas na/dngos grub kyi mchog sku gsum ye shes lnga la sogs pa thob par 'gyur ro/ /gzhan dag bya ba dang spyod pa'i rgyud rdo rje theg pa ma yin nam/ de dag las ni las dang bya bas 'grub par bshad na/gzhan yang theg pa chen po'i mdo sde rnams las kyang sbyin pa la sogs pa bsod nams kyi tshogs kyis thams cad mkhyen pa rgyu'i gtso bo zhes gsungs pa dang 'gal lo zhe na/ de dag ni bcom ldan 'das kyis dgongs te bshad pa yin no/ /bus pa blo dman pa dang /spros bcas la dga' ba dang / shin tu zab mo'i don la 'jigs pa rnams nye bar gzung ba'i phyir gsungs pa yin no/ /de skad du yang / gsang sngags kyi don la de kho na nyid la 'jug pa las/ stong nyid lta bas grol 'gyur te/ /sgom pa lhag ma de don yin//lus ngag yid kyi spyod pa kun/ /theg pa dman la bstan pa yin/ /zhes 'byung ba dang / slob dpon klu sgrub kyi zhal snga nas kyang / de nyid tshol la thog mar ni/ /thams cad yod ces smra bar bya/ /don rnams rtogs shing chags med la/ /phyis ni rnam par dben don nyid//ces bshad pas so/ /gzhan du 'jam dpal sgyu 'phrul dra ba las kyang / lag na rdo rje ngas sems can rnams kyi blo'i khyad par dang / rigs kyi bye brag gis theg pa'i khyad par rnams bstan te/ la la la phyi rol pa'i tshul lo/ /la la la nyan thos kyi theg pa'o/ / la la la rang sangs rgyas kyi theg pa dang / gzhan yang pha rol tu phyin pa'i theg pa dang / rig pa 'dzin pa'i rgyud dpag tu med pa bstan kyang / thig le chen po yi ge med pa brda dang bral bas gnyis su med pas sangs rgyas par rig par bya'o zhes gsungs pas gsal bar byas pas rig par bya'o//gzhan yang rdo rje rtse mo la sogs pa'i khungs dang / rdo rje gtsug tor las kyang / de kho na la mnyam gnas na/ /dam tshig med cing sngar spyad med/ /rdo rje dril bu gzung mi dgos/ /de nyid bcu bral 'grub par 'gyur/ /zhes 'byung ba dang / shes rab kyi pha rol tu phyin pa las kyang /rab 'byor byang chub sems dpa' rnams kyi sbyin pa la sogs pa rnams ni spros ba dang bcas pa ste mtshan mar rig par bya'o/ /don dam pa ni chos kyi dbyings rgyal ba rnams kyi yum mo zhes bya ba la sogs pas bstan to/ /gzhan yang rdo rje 'dzin pa ni dam tshig dang spyod pas thob pa ma yin te/yang dag pa'i lta ba dang bral bas rig byed gsang tshig gi cho ga bzhin no/ /de'i phyir na stong pa nyid kyi don rtogs na lus ngag gi spyod pa dang dam tshig la sogs pa theg pa 'og ma'i tshul yin te/ rnal 'byor chen po'i rgyud las ni dam tshig dang bya spyod la sogs pa mi dgos te/de ltar rtogs pa ni zab mo'i don khong du chud pa yin no zhes slob dpon gzhan dag zer ro/ /de yan chod nges don no// //phyogs gzhan dag la yang dbang bskur pa'i cho ga dang / dkyil 'khor gyi las dang / dam tshig gi sbyor ba la gnas na lta ba gtso bor gyur pa ma yin te/thun mong dang mchog gi dngos grub rten cing 'brel pa'i dngos pos kyang 'byung bar 'gyur ro/ /de dag kyang ci'i phyir zhe na/ lung dang rig pa dag ste/ rdo rje sa 'og gi rgyud las/ dkyil 'khor rdzas kyi sbyor ldan zhing / / sbyin sreg las kyi de nyid shes/ /dam tshig sdom pa'i rgyud ldan na/ /mtshan mar bltas kyang grol bar 'gyur/ /zhes 'byung ba'i phyir dang / gzhan yang sku khros pa'i rgyud las/ las kyi sbyor ba rab shes shing / /gsang sngags sbyor ba'i tshul bdun ldan/ spros bcas spyod pa rab mkhas na//spros pa nyid kyis grol bar 'gyur/ /zhes 'byung ba'i phyir dang / gzhan yang gcig tu spros pa'i rgyud las/ mnyam ldan de nyid bcu shes na/ /dngos por zhen pas bgegs mi 'gyur/ /zhes 'byung ba dang / gzhan yang dam tshig rtogs pa'i rgyal po'i rgyud las/sbyor la gnas pa cho ga'i mchog /gsang sngags cho ga sbyor bas 'grub/ /ces 'byung ba dang / de nyid bsdus pa chen po'i rgyud las/ gsang sngags spyod pas grol 'gyur te/ /rdo rje 'dzin pa gsang ba'i mchog /ces 'byung ba'i phyir dang /thugs khros pa'i rgyud las/ zung du 'brel pa spyod pa'i mchog /spyod pa'i gzhis ni rdo rje 'dzin/ /zhes 'byung ba dang / phrin las rdzogs pa'i rgyud las/ rdo rje pad+mar rab sbyar nas/ /bde ba chen po chos kyi sku/ /zhes 'byung ba'i phyir ro/ /slob dpon klu sgrub kyi don de yang de nyid las/rnam par dben don mi shes par/ /thos pa tsam la 'jug byed cing / /gang dag bsod nams mi byed pa/ /skyes bu tha shal de dag brlag /'bras bur bcas pa'i las rnams dang / /'gro ba dag kyang yang dag brjod/ /de yi rang bzhin yongs shes na//skye ba med par bstan pa yin/ /zhes bshad pa de yang bdag tu lta ba la sogs pa dgag pa las kun rdzob bsod nams kyi tshogs kyis grub par gsal bar gsungs na/ gang dag khyed kyi gzhung la ni/ /brlag par 'gyur bar gsal bar gsungs te/gzhan yang sangs rgyas ni chos can sgyu ma'i mtshan nyid 'dus byas yin te/ rten cing 'brel bar 'byung ba'i phyir sa bon las myu gu 'byung ba bzhin no zhes lta ba gtso bor mi 'dzin par dam tshig la sogs pa'i spyod pas 'grub po zhes slob dpon kha cig 'dod do//de dag gi gzhung la brjod par bya ste/ re zhig phyogs snga ma ltar na don dam pa'i lta ba gtso che ste/ dam tshig la sogs pa'i spyod pa khyad du gsod pa'i tshul 'di rigs pa ma yin te/ bcom ldan 'das kyis sngags kyi rgyud sde mtha' dag dang theg pa chen po'i mdo sde rnams las lta ba dang spyod pa cha mnyam pa las 'grub par gsungs te/gsang ba mchog gi rgyud las/ spros pa'i don ni rab rtogs pa/ /theg pa mchog la mngon dad cing / /snying rjes gzhan gyi don la mos/ /bdud rtsi lnga ni rab spyod cing / /snang srid sgyu ma sbyor shes pas//lha yi sbyor ba de nyid kyis/ /bsgrub pas dngos grub mchog tu 'gyur/ /las kyi dngos grub sbyor shes pas/ /zhes 'byung ba'i phyir ro/ /gzhan yang rdo rje pad+ma snyoms par 'jug pa'i rgyud las/ gsang ba'i bdag po gsang sngags kyi sbyor bas gnyis su med par sbyor ba'i thabs rten cing 'brel par 'byung ba'i cho gas dngos grub bsgrubs na 'grub par 'gyur te/gsang ba'i bdag po dper na skyes bu'i rtsol ba dang / gtsub shing dang / gtsub stan dang / lag pa dang / rtswa rnams 'dus pa las me 'byung ba bzhin du gsang sngags kyi sbyor ba yang stong nyid kyi don dang /rten cing 'brel par 'byung ba'i che ba dang / dbang dang dam tshig thob pas 'grub par 'gyur gyi/ gzhan du na ltung bar 'gyur ro zhes 'byung ba dang / dur khrod gsang ba'i rgyud las 'jam dpal gsang sngags la mngon par dad pa'i rnal 'byor pas dur khrod dam chu 'gram du dogs pa med pa'i sems kyis bskyed pa'i rim pa dang /rdzogs pa'i rim pa'i sbyor bas grub pa dang / sgrub pa chen po la gnas te zla ba drug tu rig pa'i brtul zhugs spyad na rdo rje 'dzin pa'i sa bcu gsum bsgrod par 'gyur ro zhes bshad pa dang /dam tshig bkod pa'i rgyud las/ rdo rje 'dzin pa'i tshogs rab tu nyon cig /phyi rabs kyi rnal 'byor pas byang chub kyi sems snying rje chen po dang / phyin ci ma log pa'i dam tshig yongs su 'dzin pa dang / dogs pa med cing the tshom dang bral ba dang / rang gi lus la chags pa med cing sems can gyi don la dga' ba dang / gsang sngags kyi las kyi cho ga shes pa dang / de dag kyang chos dbyings las ma g.yos na sangs rgyas kyi sa yongs su 'dzin par 'gyur ro zhes 'byung ba dang / de'i phyir na sgyu ma mkhan gyis ji ltar rdzas dang sngags kyi khang bzangs la sogs pa bzhin du 'di ltar yang cho ga 'dus pas 'grub par 'gyur te/ji skad du/ dper na sgyu ma mkhan po 'gas/ /sgyu ma thar par bya phyir brtson/ /gang phyir de ni mngon shes pas/ /sgyu ma la ni de mi chags/ /de bzhin srid gsum sgyu ma ltar//rdzogs pa'i byang chub mkhas pas mkhyen/ /zhes gsungs te/ de'i phyir kun rdzob dang don dam pa la gnas nas de bzhin gshegs pa rnams kyang 'gro ba'i don la 'jug ste/ rnal 'byor ba rnams kyang tshul de las nyams pas 'grub pa ma yin no/ /rdo rje thod pa'i rgyud las kyang /mkha' 'gro ma rnams rab tu nyon cig /'od gsal ba la snyoms par zhugs nas/ spros bcas kyi spyod pa yongs su rdzogs na zhing las skyes pa dang / sngags las skyes pa la sogs pas dngos grub thams cad byin cig ces 'byung ba dang / rgyan dam pa'i rgyud las kyang /kun rdzob spros bcas yongs rdzogs shing / /spros med mtshan ma med bltas na/ /tshe gcig dngos grub mchog tu 'byung / /zhes 'byung ba dang / gzhan yang dpal gsang ba 'dus pa chen po las/ spros bcas spyod pa la gnas shing / /spros med mtshan ma med gnas te//rdo rje glu yis yongs bskul nas/ /lha mo'i tshogs dang mnyam du rol/ zhes 'byung ba dang / thig le gcig pa'i rgyud las/ dpa' bos rnal 'byor yongs byas te/ /bsgrubs kyang dngos grub ma thob ste/ /mtshan ma med pas lha bsad de//bden pa gnyis kyis 'grub par 'gyur/ /zhes 'byung ba dang / las rgya mtsho'i rgyud las/ spros bcas la ni brten nas kyang / /spros pa med pa rab tu skye/ /mtshan ma gzugs kyi sku nyid kyang / /'gro ba'i don la rtag tu 'jug/ /ces 'byung ba dang /gzhung 'bum pa las kyang / snying rjes mya ngan 'das mi gnas/ /shes rab kyis ni 'khor ba min/ /mtha' gnyis rnam par dor nas kyang / /rtog pa med pas 'gro don spyod/ /ces 'byung ba dang / gsang ba shin tu mtho ba'i rgyud las/ dngos por lta ba rab spangs te//sgyu ma lta bur sbyor shes pas/ /sngags pas yid bzhin nor bu ltar/ /sems can don la mnyam med byos/ /zhes 'byung ba dang / bshad pa'i rgyud rdo rje phreng ba las kyang / gsang sngags lha yi tshul gyis ni/ /dngos grub thams cad bsgrubs pas 'grub//chos kyi sku la rab gnas te/ /sprul sku phyogs bcu'i 'gro don byed/ /de ltar phyi rabs rnal 'byor pas/ /tshul de nyid kyis 'grub par 'gyur/ /zhes 'byung ba'i phyir ro/ /de ltar na phyogs gnyis ka 'gog par byed pa'i lung bcom ldan 'das nyid kyis rgyud de dag dang /gzhan yang theg pa chen po'i mdo sde dang / bya ba dang spyod pa'i rgyud mtha' dag dang / rnal 'byor dang rnal 'byor ma'i rgyud rnams las gzhung 'di nyid shin tu gsal bar bstan pa'i phyir/ re zhig phyogs dang po ltar na dam tshig la sogs pa'i spyod pa khyad du bsad de lta ba gtso bor byas nas rdo rje 'dzin pa'i sa thob par 'gyur ro zhes bya ba'i gzhung 'di phyogs gnyis pa'i lung dang /gzhung gzhan dag gis kyang bsal ba yin te/ 'di ni ha cang thal bar 'gyur ba'i phyir ro/ /rdo rje rtse mo la sogs pa'i khungs ma brjod dam zhe na/ rdo rje rtse mo la sogs pa'i khungs de nyid las kyang /lta ba dang spyod pa cha mnyam par ston te/ sangs rgyas rnams dang sems dpa' che/ /bdag tu lta bas 'grub par 'gyur/ /zhes 'byung ba nyid kyi phyir ro/ /gzhan yang de nyid las/ rang gi lha yi sbyor ba yis/ /bdag dang gzhan la mchod par bya//dam tshig sdom la gnas pa yis/ /gsang sngags rgyal po 'grub par 'gyur/ /zhes 'byung ba'i phyir ro/ /khrus dang gtsang sbra 'dir mi dgos/ /zhes bya ba ni sems brtan par gyur nas/ nyan thos la sogs pa'i lus ngag gtso bor gyur pa dgag pa yin pa'i phyir dgongs te bshad pa'o//gzhan yang rgyud gzhan dag gi khungs rnams kyang bden pa gnyis kyi tshul gyis lta ba dang spyod pa cha mnyam par gzhung 'di nyid las gsal la/ 'dir ni gzhung mangs kyis dogs pas bdag gis ma spros so/ /bcom ldan 'das kyis ni sems can gdul ba'i don du tshul sna tshogs kyis bshad pas phyogs re tsam la rtog pa ni rmongs pa'o//de'i phyir na las dang po pa dang / spros bcas la dga' ba'i phyir spros pa shas cher bstan to/ /sems brtan pa dang mtshan ma med pa la dga' ba'i dbang du byas te spros pa med pa'i don shas cher bstan to//de'i phyir dgongs pa'i don rig par bya'o/ /las dang po bas ni dam tshig la sogs pa gtsor gzung ngo zhes bya ba'i gzhung ngo / /phyogs gnyis pa ltar na lta ba khyad du bsad cing spyod pa lhur len pa yang phyogs snga ma'i lung dang gzhung gzhan gyis bkag pa ste/de nyid kyi dbang du mdzad nas/ stong nyid lta bas grol 'gyur te/ /zhes bya ba la sogs pas sngar bshad zin to/ /des na phyogs de gnyis ka'i gzhung gis kyang phan tshun dgag par nus pa ma yin te/ de nyid la lta ba dang spyod pa mnyam pas 'grub par gsal bar gsungs te/'on kyang skyes bu'i 'dod pas zhugs pa'i phyir 'di tsam gyis ni bden pa gnyis la 'jug pa dgag par gal 'gyur te/ thabs dang shes rab kyi rgyud la mkhas pa'i rnal 'byor pa rnams dga' ba bskyed par yang mi 'gyur te/ phyogs de dag la bden pa gnyis la ji ltar 'jug pa dang /de dag phan tshun rim pa dang rim pa ma yin par sbyar ba rgyas par ni bdag gis ma spros so/ /de ltar na phyogs gnyis ka bkag nas/ gsang sngags kyi tshul gyi ni lta ba dang spyod pa cha mnyam pas 'grub bo zhes bya ba ni gzhung ngo // //da ni gzhung dbu ma pa gsal bar bya ba'i phyir gzhung gi don la 'jug par bya ste/ rdo rje theg pa'i rtsa ba'i ltung ba zhes bya ba ni thabs dang shes rab kyi bdag nyid kyis gzung ba dang 'dzin pa'i dngos po yongs su bcom ste/ chos kyi sku skye ba med pa'i ngang du lta ba dang spyod pa phyin ci ma log par zhon te 'gro zhes bya ba'i don to//rtsa ba ni bcu bzhi pa ste/ de chad nas ma gsos na rdo rje'i dmyal bar ltung zhes bya ba'i don to/ /yang na rdo rje theg pa ni 'bras bu lam du zhugs pa'i mtshan nyid de/ so so'i skye bo mtshan nyid dang skal ba ldan pas sku gsung thugs kyi nga rgyal byas te sangs rgyas kyi mdzad pa mthar 'byin pa'i phyir des 'gro bas na theg pa ste/thabs dang shes rab kyi rtsa ba yongs su nyams na mi 'dod pa'i 'bras bu thob pa ni ltung ba zhes bya'o/ /dper na 'jig rten na yang rtsa ba chad na yal ga dang me tog dang 'bras bu med do zhes bya ba lta bu'o//'di ni re zhig bsdus pa'i don to/ /da ni yan lag gi don brjod par bya ste/ de yang ya rabs kyi tshul dang bstun par bya ba'i phyir/ kun nas dang bas bla ma yi/ /zhabs kyi pad+mar rab btud de/ /zhes smros te/ bstan bcos rtsom pa pos lus ngag yid gsum shin tu dang bas bdag gi bla ma gsum dang rdo rje 'dzin pa tha dad du mi rtog ste/gus pa'i tshul gyis zhabs dang gdan dang pad+mar bcas par btud de phyag 'tshal ba'i don to/ /gzhung yongs su rdzogs par bya ba'i phyir/ rtsa ba'i ltung ba bcu bzhi ni/ / rgyud las 'byung ba bshad par bya/ /zhes smos te rtsa ba ni rgyu'i don te/ de chad na 'bras bu ltung ba'i mtshan nyid do/ /bcu bzhi ni gsal ba'i dbye bas te gzhung gi tshogs so/ /yang na rtsa ba ni yan lag brgyad dang / nyi shu rtsa brgyad dang / gsang ba chen po'i rgyud las 'bum sde bzhugs pa'i gzhir gyur pas na rtsa ba'o//de las nyams na ni ltung ba'o/ /de'i phyir thabs la brten pa kho na'o/ /rgyud ni rgyun te/ rgyu'i rgyud dang / 'bras bu'i rgyud dang / thabs kyi rgyud do/ /de la rigs kyi dbye bas ni rgyu'i rgyud do/ /de la rigs kyi dbye ba las 'bras bur gyur pa rdo rje 'chang chen po'i dbye bas ni 'bras bu'i rgyud do//rgyu las 'bras bu grub par bya ba'i phyir sngags dang phyag rgya dang / dkyil 'khor la sogs pa'i rkyen gyis tshogs pa ni thabs kyi rgyud do/ /rnal 'byor gtso bor gyur pa'i rgyud yin pas na rnal 'byor gyi rgyud de/ /de ston par byed pa yin pas tshig gi gzhung la yang de skad ces bya'o//de yang / shes rab thabs kyi snyoms 'jug pa/ /rnal 'byor ces ni bya bar bshad/ /gang zhig dngos med shes rab ste/ /thabs ni dngos po'i mtshan nyid do/ /rgyud ni rgyun zhes bya bar grags/ /rgyun de rnam pa gsum 'gyur te//gzhi dang de bzhin rang bzhin dang / /mi 'phrogs pa yi rab phye ba/ /gzhi dang rang bzhin rgyu yin te/ /de bzhin mi 'phrogs 'bras bu'o/ /gzhi ni thabs zhes bya ba ste/ /rang bzhin rgyu yi rgyud du bshad/ /gsum gyi rgyud kyi don bsdus so/ /zhes bshad pa yin no//las ni kun la khyab ste mang po'i don du sbyar ro/ /de yang rtsa ba'i rgyud gsang ba 'dus pa dang / snying po'i rgyud 'jam dpal gshin rje nag po la sogs te/ rnal 'byor dang rnal 'byor ma'i rgyud rnams las 'byung ba bshad par bya zhes dam bcas pa'i don to// //da ni gzhung gi tshogs bcu bzhi bshad par bya ste/dngos grub kyi rtsa bar gyur pa'i bla ma la sogs pa dngos grub kyi gzhir gyur pas thog mar brjod par bya ste/ de'i phyir/ gang phyir rdo rje 'dzin pa yis/ /dngos grub slob dpon rjes 'brang gsum/ /de bas de la brnyas pa ni/ /rtsa ba'i ltung ba dang por bshad//ces smos te/ thun mong dang mchog gi dngos grub slob dpon las thob par gsungs te/ gal te de las dam tshig nyams na rtsa ba'i ltung bar 'gyur ro/ /thun mong gi dngos grub ni mig rnon dang rkang mgyogs la sogs te dngos grub chen po rnams so//mchog gi dngos grub ni sangs rgyas kyis bcu gsum pa la sogs pa'o/ /de thob par byed pa ni slob dpon la rag las te gsal ba'i dbye bas rnam pa gsum ste/ dbang bskur ba dang / man ngag ster ba dang / rgyud bshad pa'o/ /dbang gi dbye ba'i tshul gyis ni bum pa dang /gsang ba dang / shes rab ye shes dang bzhi pa'i 'bras bu'i rtags dang rnam pa bzhi'o/ /gang gi phyir na rdo rje 'dzin pa yis/ dam tshig bkod pa'i rgyal po'i rgyud las/ snying rje ldan zhing rab tu dul/ /dpa' brtan brtul zhugs rab tu che/ gtong phod bla ma la gus pa/ /mtshan nyid ldan pa'i slob ma la/ /slob dpon de nyid bcu shes pas/ /dbang ni gsum gyis rdzogs byas te/ /man ngag dam pa'i snod yin no/ /gsang sngags rgyud kun de nas sbyin/ /las kyi sbyor ba sbyin par bya/ /gal te gcig la gsum rdzogs pa//de nyid shin tu lci ba ste/ /gnyis la sogs te gcig mthar thug /'di ni dam tshig sbyor ba'o/ /zhes 'byung ba'i phyir mtshan nyid dang ldan pa'i slob ma la slob dpon gcig gis dbang bskur ba dang / man ngag byin pa dang / rgyud bshad pa dang / gsum gang gcig la ldan pa dang /gnyis gcig la ldan pa dang / gsum bye brag tu gnas pa'o/ /gsum gcig la ldan pa la bdun gyi sbyor ba dang ldan pas ltung bar 'gyur te/ nyon mongs pas kun nas bslang ba'i bsam pas de la der shes pa dang / lus ngag gi sbyor ba dang / mtshon cha la sogs pas 'tsho ba phrogs pa dang / yongs su shes shing 'gyod pa med pa dang / rjes su yi rang ba dang bdag nyid ma 'khrul pa'o/ /phyis tshad du bshags na ltung ba 'ba' zhig par 'gyur ro/ /'tsho ba dang ma phral na ltung bar mi 'gyur te sbom po'o/ /de nyid dus 'das na lci ba'o//yan lag dang mi ldan pas dngos gzhi rdzogs na nyes byas so/ /gal te sbyor ba de dag tshang bas 'tsho ba phral na tshad las 'das pa ste pham pa'o/ /ltung ba dang pham pa la khyad par ci yod ce na/ pham pa ni sbyor ba rdzogs nas ma bshags pa'o//ltung ba ni 'tsho ba dang phral nas bshags pa'i tshad 'og nas 'byung ba byas pa'o/ /'o na ci'i phyir ltung ba zhes bya zhe na/ rdo rje dmyal ba ma yin pa myong zhes bya ba'i don to/ /gal te bskang ba'i tshad ni sbyin sreg 'bum phrag bdun no/ /rig pa ni bye ba phrag lnga'o/ /dbang bskur ba'i cho ga rdzogs pas kyang ngo //gtor ma ni bye ba phrag gcig go/ /dkyil 'khor gyi cho ga 'bum phrag gnyis so/ /de lta bu yongs su rdzogs pa ni bskang pa'i cho ga'o/ /yan lag gi gtso bo byung ba ma bshags na dus sum ldan du 'das na lci ba ste/ gnyis ldan gyi cha bzhi pas bshags so//gal te sbyor ba yongs su ma rdzogs na cho ga'i khyad par yang de bzhin no/ /gcig la gnyis ldan na cha gnyis pa'i bskang ba'i cho ga'i rgyu'o/ /bye brag tu gnas pa la ni cha gcig pa'i bskang ba'i tshad do/ /bye brag tu gnas pa gcig ma bskang bar lo gsum du gnas pa na/sum ldan gcig gi tshad kyis bshags so/ /gcig la gnyis ldan pa lo gsum gyi bar du gnas na/ sum ldan gyi bskang tshad phyed dang gnyis dus de nyid de'i tshe na bskang ba'i cho ga dgu rgyu'o/ /yan lag phra mo gcig bshags tshad ni cha gcig pa'i mchod pa dang /maN+Dal sngon du 'gro ba'o/ /gzhan blos zhib tu dbye bar bya'o/ /cho ga zhib mo'i tshul gyis ni 'gom par bya ba dang / brdzi bar bya ba ma yin pa la ni sbyin sreg gcig gis so/ /ngag gi nyes pa re re la ni gtor ma bcu bcu'o/ /yid kyi nyes byas pa la bsam gtan gyi sbyor ba lnga'o//gzhan du slob dpon klu sgrub kyi zhal snga nas/ lus ngag yid kyi nyes byas la/ /lus kyi dkyil 'khor mchod rten la/ /ngag gi yi ge brgya pa'o/ /yid kyi sgyu ma'i don shes shing / /gzhan la sbyin sreg dag tu bshad/ /kun gyi kha bskang gtor ma shis/ / zhes bshad pa dang / gzhan yang dam tshig bkod pa'i rgyud las/ phyag na rdo rje legs par nyon/ /dam tshig las kyi cho ga bshad/ /gal te rtsa ba'i slob dpon la/ /dam tshig rdzogs par nyams 'gyur na/ /de la bskang ba'i cho ga bshad/ /yongs su bskang ba'i cho ga bya/ / rnal 'byor bskang ba ma byas na/ /rdo rje dmyal bar grags pa yi/ /sdug bsngal mi bzad myong bar 'gyur/ /yan lag nyes pa lo lnga'i bar/ /ma bshags dmyal ba chung ngu'i tshad/ /de ni nges par 'tshed par 'gyur/ /gzhan yang sdug bsngal 'di dag ste//shin tu grang sgrib yi dwags dang / /byol song gnas su skye bar 'gyur/ /de dag bshags pa'i cho ga ni/ /gtor ma dkyil 'khor sbyin sreg dbang / /rig pa bskang ba'i cho ga bya/ /zhes 'byung ba'i phyir dang / las kyi sbyor ba rnams nges pa kho nar bya zhes dgongs so/ gzhan du sdug bsngal chen po myong bar 'gyur ro/ /skye ba med par rtogs pa dang / gzhan gyi don mthong ba dang / bar chad du 'gro ba dang / gnang ba thob pa dang / na ba la sogs pa la nyes pa med do/ /gzhan dag ci'i phyir nyan thos bzhin du pham par bzhag//gzhan yang gsang sngags thabs che bas bskang thabs la mkhas na pham par bzhag par mi rigs so zhe na/'dir log sred can tshul bzhin du zhugs nas sbyor ba rdzogs kyang bshags pa'i tshul du mi byed pa dang / phyi rol gyi chos la zhugs nas zab mo'i don la rgyab kyis phyogs pa'o zhes bya bas kyang gzhung gi don bshad pa dang /gzhan yang slob dpon gzhan dang tshul gzhan gyis don de nyid rgyas par bshad de/ de yang rdo rje thig le 'byung ba'i rgyud las/ dngos grub 'dod pa'i don du ni/ /rtag tu slob dpon bsten par bya/ /des ni 'dod pa'i 'bras bu ster//de las nyams na sdug bsngal 'thob/ /de phyir bskang ba'i cho ga ni/ /nyams pa'i tshad dang sbyar ba ste/ /bla ma las ni rgyur shes bya/ /ltung ba'i mtshan nyid shes pa ste/ /lus kyis ma spyad chung ba ste/ /zin dang ma zin 'bring du bshad/ /zin cing ma bshags chen po yin//ngag gi sbyor ba'i rnam pa yang / /ma brtags 'khrul na chung ba ste/ /brtags dpyad nyes pas 'bring du bshad/ /tshad 'das chen po'i sbyor ba'o/ /rnal 'byor sems kyi mtshan nyid ni/ /shin tu lci ba'i rim pa yin/ /gnod sems gsum gyis brtag par bya//de dag bskang ba'i rim pa 'di dag ste/ /lus las nyams pa chung ngu las/ /lus nyid sgyu ma'i tshul gnas bya/ /gnang ba thob pas khrag phyung la/ /mkhas pas maN+Dal mdun byas te/ /bla ma nyid la phul te bshags/ /'bring dang chen po'i tshul gyis ni/ / yang na sbyin sreg lnga lngas bskyed/ /gzhan du 'khor lo bzhi yi tshul/ /chu tshod nas brtsis rab bsgoms na/ /de ni bskang pa'i mchog yin no/ /ngag gi brdzun par shes pa yis/ /smre bshags bzlas pa'i phreng bas ni/ /tshad 'das gsum po ma lus sbyang / /yid kyis sgyu ma lta bu'i tshul//bdud rtsi dbab cing dri ma bkru/ /'di dag rdo rje 'dzin pas nyon/ /zhes bya ba la sogs pa rgya cher 'byung ba 'di dag bskang ba'i tshad yin te/ /dbang gi dbye bas ni bshad pa'i rgyud rdo rje phreng ba las/ bum pa'i dbang ni dang po la/ /gnyis pa gsang ba'i dbang du brjod//gsum pa shes rab ye shes te/ /bzhi pa de bzhin 'bras bu'o/ /de bskur bla ma nyams gyur na/ /phyir la dbang bskur cho ga dang / /gnang ba thob pas dri ma 'dag /ces 'byung bas bshad pa'o/ /gzhan yang 'jam dpal sgyu 'phrul dra ba'i rgyud las/ dbang bskur sogs thob slob dpon la//rmongs par gyur pa'i slob ma yis/ /sbyor ba'i dngos gzhi rab rdzogs pas/ /rtsa ba yan lag nyams gyur na/ /blo ngan slob mas bshags par bya/ /gal te ma bshags dus 'das na/ /phyi yi rgya mtsho chen po yi/ /chu de skra yis gtor nus pa/ / de yi tshad du sdug bsngal myong / /rdo rje dmyal bar grags pa yin/ /rdo rje 'dzin pa rab tu nyon/ /bskang pa'i cho ga bshad par bya/ /gcig la slob dpon gsum rdzogs la/ /sbyor ba bdun dang ldan pas ni/ /rtsa ba'i ltung ba byung gyur na/ /sdug bsngal bskyed pa'i rtsa ba yin/ /rang gi bsam pa rdzogs byas kyang //slob dpon gnang bar ma gyur na/ /dang po sdug bsngal dka' spyad de/ /de nas bdog pa thams cad dbul/ /rjes su gnang ba bsgrub par bya/ /dbang bskur cho ga lan bdun bya/ /tshogs kyi 'khor lo nyi shu gcig /sbyin sreg gis ni 'bum phrag bdun//gsang sngags bye ba lnga yis so/ /me tog tshom bu 'bum phrag gnyis/ /srog chags bye ba tshe bskyabs na/ /'di ni bshags pa dam pa'o/ /'jig rten chos brgyad mi chags shing / /drang srong spyod pa yang dag bya/ /yang na lus las khrag phyung ste//brgya rtsa brgyad kyi dkyil 'khor ni/ /byas te bla mar dbul bar bya/ /yang na gnang ba thob pa yis/ /bsam gtan gyis ni zla ba bdun/ /rdo rje 'dzin pa rab tu nyon/ /gzhan yang las kyi cho ga ni/ /slob dpon bye brag gnas gyur na/ /blo ldan mkhas pas rab dpyad de//rtsa ba yan lag dam tshig las/ /nyams par gyur pa'i bshags tshad kyang / /de bzhin gnyis ldan sum ldan te/ /mkhas pas rab tu bshags par bya/ /kha na ma tho phra mo la/ /yang na sku gzugs mdun du ste/ /yid kyi bshags pa mchog yin no//rdo rje 'dzin pa rab tu nyon/ /slob dpon la ni dus gsum du/ /gsong pos bya ba thams cad dri/ /lus ngag spyod pa rab bsdams te/ /ha cang nye min ring ba 'ang min/ /rtag tu bral ba ma yin no/ /dus gsum du ni me tog dbul/ /blo ldan nang nub phyag bya ste//zas la sogs pas dang por mchod/ /gal te dus 'das ring gyur na/ /de la rtag tu mngon par phyogs/ /de spun grogs dang bla ma la/ /rtag tu de dang 'dra bar mchod/ /'di yi rigs ni rtag tu gzung / /lham dang stan ni spyi bor blang / /thugs kar pho brang bca' ba ste//rtag tu de bsam gzhan du min/ /de yi bka' las 'da' mi bya/ /sems dpa' chen po gzhan yang nyon/ /gal te dran pa nyams gyur cing / /chang la sogs pas myos gyur te/ /sems ni gnyid kyis non gyur te/ /de dag byung yang nyams mi 'gyur/ /dran pa rnyed de bshags par bya//zhes bya ba la sogs pa ste/ rgyud sna tshogs nas bstan pa dang / spyan ras gzigs dbang phyug snying gur gcig pa'i rgyud las/ pad+ma'i phreng bas legs dag pa'i/ /gdams ngag sems kyi rgyud dag pa/ /ster byed slob mas mi smad do/ / slob dpon las ni dngos grub thob/ /gal te de la brnyas byed na/ /bskal pa bye ba brgya dag tu/ /dam chos ming yang mi thos na/ /gsang sngags byang chub smos ci dgos/ /zhes 'byung ba'i phyir dang / /gzhan yang rgyud sna tshogs las/ slob dpon smad par mi bya ste/ /'di ni sangs rgyas kun dang 'dra//sangs rgyas tshul mtshungs bla ma yi/ slob dpon la ni gang smod pa/ /des ni sangs rgyas kun smad pas/ /rtag tu sdug bsngal thob par 'gyur/ /rims dang dug dang dbyig dug dang / /mkha' 'gro rnams kyis gtses pa dang / /gdon dang log 'dren gtum po yis//bsad nas sems can dmyal bar ltung / /de bas nan tan thams cad kyis/ /rdo rje slob dpon blo gros che/ /dge ba rab tu mi spyoms pa/ /nam yang smad par mi bya'o/ /bla ma la ni gus bcas yon/ /rjes mthun khyod kyis sbyin par bya/ /des ni rims sogs gnod pa rnams//phyir zhing 'byung bar mi 'gyur ro/ /rtag tu rang gi dam tshig bsrung / /rtag tu de bzhin gshegs pa mchod/ /rtag tu bla ma la yang dbul/ /'di ni sangs rgyas kun dang 'dra/ /de byin sangs rgyas thams cad la/ /rtag tu byin pa nyid du 'gyur//de byin bsod nams tshogs yin te/ /tshogs las dngos grub mchog tu 'gyur/ /zhes 'byung bas mkhas pas blos phye ste dam tshig gzung bar bya'o/ /gzhan yang de'i phyir gsang sngags kyi chos ni thabs gtso bor gyur pa na kun rdzob kyi bden pa shas che ste/ /rten cing 'brel par 'byung ba'o//'on kyang 'di ni zung du 'jug pas 'grub ste/ mtha' gnyis su smra ba ni spang bar bya'o/ /de ltar yang nor bu snying po gsang ba'i rgyud las/ slob dpon las ni dngos grub 'thob/ /rig ma las ni brtul zhugs te/ /bu mo sdug gu rgyun du bstan//dam tshig la ni nyams mi bya/ /gsang sngags sbyor bas 'grub par 'gyur/ /'on kyang de la chags min te/ /thig le chen po de las min/ /rtag pa ma yin chad pa min/ /yod med ces brjod yul las 'das/ /spros pa'i mtshan ma rnam spangs shing / lus med kha dog dbyibs med cing / /bde ba chen po'i ngang gnas na/ /nam mkha' bzhin du rtog pa med/ /rtsa dang dbugs dang thig le med/ /sngags dang phyag rgya bya brtsal med/ /mchog gi bde ba chen po ster/ /'on kyang kun rdzob tshul gnas te/ /bskyed rdzogs gnyis kyi tshul gyis 'grub//mkhas pas tshul gnyis spang mi bya/ /shing rta yi ni 'khor lo bzhin/ /zhes gsungs pas na tshul de lta bus 'grub cing mtha' gzhan du smra ba bkag pa yin no/ /de'i phyir 'di'i don ni slob dpon las dbang thob cing / /dam tshig phog na gnyis rdzogs dang sum rdzogs kyi tshul gyis mchog dang thun mong gi dngos grub bsgrub par bya'o//gal te tshul de lta bu la rtsa ba dang yan lag gi dam tshig dngos gzhi dang sbyor ba rdzogs te/ nyams par gyur kyang slob dpon gnang bar gyur na bskang ba'i tshad do/ /gnang bar ma gyur cing dus las 'das na tshad las 'das pa'o//bshags kyang ltung ba'i 'bras bu myong la pham par gyur pa la ni log sred can ma bshags pa ste/ de'i rnam smin rdo rje'i dmyal ba myong ba yin no/ /byang chub sems dpa' bcu drug gi rgya cher bshad pa las ni snying rje dang ldan pa'i rnal 'byor pas rdzu 'phrul la sogs pas gang zag de lta bu yang sbyor bas bskang ba'i tshad dang ldan pa ni zhes gsungs so//de nas yi ge'i don bshad par bya ste/ gang zhes bya ba ni bod pa'i tshig ste dang po'o/ /phyir zhes bya ba ni ched kyi don to/ /rdo rje ni thabs dang shes rab ste/ de 'dzin pas na rdo rje 'dzin pa'o//dngos grub kyi don ni bshad zin to/ /gong du bstan pa'i dngos grub de bla ma la rag las pa'i phyir rjes su 'brang zhes bshad do/ /de yis de la brnyas pas ltung bar 'gyur ro/ /ltung ba dang po'i bshad pa'o// //da ni ltung ba gnyis pa'i mtshan nyid bshad par bya ste/bde gshegs bka' las 'das pa ni/ /ltung ba gnyis pa yin par bshad/ /ces bya ba smos pa yin te/ bde bar gshegs pa zhes bya ba ni rdo rje 'chang chen po'o/ /de yang gsang sngags kyi tshul gyis ni sngar spyad pa la sogs pa med pas dgag pa med par lam dang 'jug pa bde bas 'bras bu sangs rgyas kyi sar gshegs zhes bya ba'i don to//de yang gang zhe na rdo rje 'dzin pa dang / de'i ye shes kyi cha'o/ /de yang gsang ba yongs su rdzogs pa zhes bya ba'i rgyud las/ sdom pa'i tshul khrims sngar bshad med//thabs dang shes rab mnyam sbyor bas/ /gsang sngags tshul nyid bde bas 'grub/ /'bras bu rdo rje 'dzin pa ste/ /'di ni gzhan don lhun gyis grub/ /ces 'byung ba'i phyir ro/ /de bas na de'i bka' las 'das pa ni ltung ba ste/ bde bar gshegs pa'i bka' ni dgongs pa sna tshogs pa ste/drang ba'i don dang / nges pa'i don dang / dgongs te bshad pa dang / dgongs pa ma yin par bshad pa dang / don du bshad pa dang / don gcus te bshad pa dang / spyi'i don du bshad pa dang / yan lag gi don du bshad pa dang / slob ma la bshad pa dang /tshogs la bshad pa dang / gsang sngags kyi tshul gyis sgra ji bzhin du bshad pa dang / sgra ji bzhin ma yin par bshad pa ste/ gdul bya'i snod kyi rim pas ko Ta khya la sogs pa brda'i don sna tshogs kyis bshad pa dang / de'i phyir na gsang sngags kyi tshul 'di shin tu zab ste/de'i phyir sgra'i don la 'jug cing yang dag pa'i don la rmongs pas gzhan dang gzhan gyi sgra'i rjes su 'brangs nas bka' log par spyad pas de'i phyir bka' las 'das pa'o/ /de ltar yang theg pa bla na med pa'i rgyud las/ rdo rje 'dzin pa rab tu nyon/ /'di ltar sangs rgyas bstan pa la//theg chen chos la rab zhugs kyang / /de don gsal bar mi shes pas/ /sngags kyi tshul ni rtogs dka' ste/ /brda dang dgongs pas bshad pa dang / /ji bzhin sgra min drang po'i don/ /dngos po'i don la mi dpyod par/ /sgra dang tshig gi rjes su 'brang //phyi rol bstan bcos la dga' zhing / /tshig gi bdud rtsi rgyab kyis phyogs/ /de la dngos grub mi 'byung ste/ /rdo rje 'dzin pa spong bar 'gyur/ /zhes 'byung ba dang / rdo rje gyur pa rab tu gnas pa zhes bya ba'i rgyud las/ yang dag don la mi chags par/ /log pa'i don la mngon dga' bas//bde gshegs bka' las 'das pa yin/ /sa gzhi lcags bzhin mnar med skye/ /zhes pa dang / rdo rje 'khor lo'i rgyud las kyang / gang zhig gang la mngon zhen pa/ /de la bde ba'i don mi gnas/ /de phyir gzugs la zhen mi bya//'dod chags zhe sdang lam dag gis/ /tshig gi don la chags mi bya/ /chags na bde gshegs bka' las 'das/ /zhes 'byung ba dang / rtog pa zhi ba'i rgyud las/ stong pa nyid du mi lta zhing / /mtshan ma dag tu lta mi bya/ /zab pa'i sgra la mi zhen cing / /rtsa dang dbugs kyi sgor bzlog kyang //dngos po yin te zhen mi bya/ /gang zhig mngon par zhen pa dang / /bde gshegs bka' las 'das pa'o/ /zhes 'byung ba dang / gzhan yang rin po che phung po'i mdo las/ shA ri'i bu don la rton la tshig la ma rton cig /ye shes la rton la rnam par shes pa lam rton cig /nges pa'i don la rton la drang ba'i don la ma rton cig /chos la rton la gang zag lam rton cig ces 'byung ba dang / gzhan yang / dge slong dag gam mkhas rnams kyis/ /bsregs bcad bdar ba'i gser bzhin du/ /yongs su brtags nas nga yi bka'/ / blang bar bya yis gus phyir min/ /zhes 'byung ba dang / gzhan yang byams ma'i bu gang po 'jig rten pa dag gi sgra'i don la mngon par zhen pas phal cher ngan song gsum du skye ste de dag thams cad kyang phal cher bde bar gshegs pa'i bka' las byung ba'i don byang chub tu sems bskyed pa dang /sems can gyi don bya ba dang / bsdu ba'i dngos po bzhis bsdu bar bya ba dang / sbyin pa la sogs pa'i pha rol tu phyin pa rnam par spang ba dang / sa dang lam rnam par spong zhing byang chub kyi spyod pa bor nas/ log pa'i don la mngon par zhen pa yod de de'i rgyus ngan song du skye ste/de bka' las mi 'byung ba'i chos rnams spyad pa'i nyes pa'o zhes 'byung ba'i phyir ro/ /bdag cag la sogs pa rnal 'byor gyi lam la dad pa rnams kyang theg pa chen po'i don la rnam par phye ste yang dag pa'i don la 'jug par bya'o/ /de gang zhig bka'i don la rmongs pas dgongs te bstan pa la mngon par 'chel nas spyad par bya ba ma yin pa'i spyod pa la mngon par zhen na de nyid kyi bka' las 'das pas de'i phyir bla ma dam pa nye bar bsten la rgyud kyi don shes par bya ste/spyad par bya ba dang spyad par bya ba ma yin par shes par bya'o/ /'dod chags zhe sdang lam du khyer ba ni gdul bya drang ba'i don to//gzhan du stong pa nyid la goms pas nyon mongs pa'i mtha' shes pas dug sngags kyis btul ba bzhin no/ /'di ni brtan pa thob pa rnams kyi'o/ /de skad du/ thabs chen rnams dang ldan pa la/ /nyon mongs byang chub yan lag 'gyur//'khor ba zhi ba'i bdag nyid la/ /sngags kyis bsad pa'i dug bzhin no/ /zhes bshad pas so/ /gzhan yang don de nyid la dgongs nas/ bdud rtsi 'byung ba'i rgyud las/ ji ltar mar dang kar dang / /sbrang rtsi 'o ma la sogs pa/ /'thungs te zhu na sman du 'gyur//ma zhu dug tu 'gro zhes bya/ /de bzhin gsang sngags theg chen 'di/ /mkhas pa rnams kyi sman yin te/ /brda dang don la rab rmongs pa'i/ /byis pas 'dod pas sgra don 'brangs/ /tshul bzhin ma yin log spyad pas/ /dug gis 'chi dang ltung bar 'gyur//kha cig dug gi dbang gis 'tsho/ /kha cig dug gi rkyen gyis 'chi/ /nga yi bstan pa'i snyigs ma la/ /tshong dus kyi ni 'o ma bzhin/ /bslad nas thur du ltung bar byed/ /ces bya ba rgyas par bshad de/ /de bas na don de las dgongs nas/ /kun du kha sbyor gyi rgyud las kyang bshad de/de bas na gang gi phyir de sbra tsam la mngon par zhugs pa ni phal cher nyon mongs pas zil gyis non pas lam du gyur pa lta ga la yod/ dus shes pa med par ston pa de dag phal cher ltung bar 'gyur te/ ji skad lam du 'gyur ba yang 'og nas bstan par bya'o/ / skabs kha cig tu ni 'dod chags can gzung ba'i skabs su thabs des bshad de gzhan gyis mi 'dul ba'i phyir ro/ /gzhan yang rdo rje gcod pa las/ gang zhig nga la gzugs su mthong / /zhes bya ba la sogs pa dang / gzhan du rgyud la sogs pa'i dgongs pa sna tshogs kyis bshad pa dang /bde bar gshegs pa'i bka' mtha' dag gi don dgongs pa rtogs par byas la bya ba dang bya ba ma yin pa la 'jug par bya'o/ /gzhan du sgra tsam la gzhol bar bya ba dang / 'dod pas zhugs pa dang / gang zag tsam gyi rjes su 'brang bas 'khrul par spyad pas bka' las 'das pas ltung bar 'gyur te/phyi rol mu stegs pa bzhin du sangs rgyas kyi bka' yang dag par spangs shing 'das pa'o/ /de'i phyir/ bde gshegs zab mo'i chos rnams spangs/ /phyi rol bstan bcos dag la dga'/ /dam tshig bslab pa khyad du gsod//de phyir bka' las 'das pa'o/ /zhes 'byung ba dang / bcom ldan 'das kyi dgongs pa sna tshogs kyi don ma shes shing phyi rol gyi bstan bcos la zhugs pa'am/ ma zhugs kyang dam tshig dang bslab pa khyad du gsod na bka' la ma gus pa ste/dam tshig rnams mi 'dzin pa'i phyir bka' las 'das pa'o/ /rgyud gzhan las/ de yi bka' las 'das pa ni/ /ltung ba mig tu brjod pa yin/ /zhes bstan pa ltar na yang slob dpon gyi bka' las mi 'da' bar bshad pa ste/ ltung ba dang po'i bshad pa dang / shan 'dra ba phyogs su bsdu'o/ /'di'i dgongs pa ni slob dpon dang / rdo rje 'dzin pa tha dad du med pas drug pa'i sgra gzhi gcig par bsdu pa yin no/ /'di yang bdun gyi sbyor ba dang ldan pas ltung bar gyur te/ bde bar gshegs pa dang slob dpon gyi bka' la nyon mongs pa'i bsam pa dang /de la der shes pa dang / lus ngag gi sbyor ba bstan pa dang / rang nyid snang bar ma gyur pa dang / shes shing 'gyod pa med pa dang / rjes su yi rang ba dang / ma 'khrul pa'o/ /'di la pham pa med de ma bshags na ltung ba'o/ /yan lag gi gtso bo chang ni sbom po'o//yan lag drug med pa nyes byas so/ /sbyor ba'i grogs tsam ni phra mo'o/ /bshags pa dus 'das na lci ba'o/ /khyad par gyi dgag pa yod pa na nyes med do/ /shan 'dra ba ni phyogs su bsdu'o/ /bshags pa'i tshad ni yul dang / bsam pa dang / rkyen gyis so/ /ltung ba byung ste lo gsum du 'das na dbang rdzogs pas so/ /gzhan du ni dbang gi rim pas na smad do/ /lci ba ni tshogs kyi 'khor los so/ /sbom po ni tshogs pa'i nang du tshogs kyi mchod pas so/ /nyes byas ni maN+Dal sngon du 'gro bas so/ /phra mo ni smre bshags so//gzhan yang / bde gshegs bka' las 'das pa la/ /yid ni lha yi rnal 'byor gyis/ /phra mo'i thig le bsgoms pas 'dag /mi rtog pa yis thams cad sreg /sems sun phyung ste bsdams la bslabs/ /ngag gis sngags bzlas sgyu mar shes//lus kyis mchod pa'i tshul du sbyar/ /de ltar nyes pa'i bye brag rnams/ /zhing dang bsam pa'i khyad par dang / /dus dang nus pa'i bye brag gis/ /mkhas pas blo yis phye nas ni/ /dri ma 'dag par bshad pa yin/ /zhes gsungs pa dang / gzhan yang /gang dang gang la khyad par du dgag pa yod pa ni zhing dang / bsam pa dang / sbyor ba dang / rkyen dang / dus dang / gnang ba dang / de dag rnams la bshags tshad dang ldang tshad kyang shes par bya'o/ /gang la khyad par gyi dgag pa med pa ni ltung ba 'di thams cad kyang phyogs su bsdu bar shes par bya'o//gzhi gcig la ltung ba du 'byung ba dang ltung ba gcig la gzhi du yod pa shes par bya'o/ /gang yang phyogs tsam cig brjod na/ /dam pa dang po'i rgyud las/ dpal ldan bla ma'i thugs sun phyung / /ltung ba de ni ri bong can/ / de yi bka' las 'das pa ni/ /ltung ba mig tu brjod pa yin/ /bla ma'i de nyid shes rab ma/ /ltung ba yan lag la sogs kyi/ /de ni yon tan zhes su brjod/ /de nyid rdo rje spun du gyur/ /ltung ba de ni rig byed yin/ /de yi grub pa'i mtha' smod pa/ /ltung ba mda' zhes bya bar grags//zhes bya ba la sogs pa rgyud de nyid las phye ba dang / gzhan yang rnal 'byor gyi rgyud las mang du phye bas de dag blos phye ste shes par bya'o/ /'dir ni ma spros so/ /ltung ba gnyis pa'i don bshad zin to// //da ni ltung ba gsum pa'i mtshan nyid bshad par bya ste/rdo rje spun la khros pas ni/ /nyes pa brjod pa gsum pa yin/ /zhes bya bas bshad de/ rdo rje spun gyi ni gsang ba 'dus pa la sogs pa'i dkyil 'khor gcig gi nang du zhugs pa'o/ /rdo rje theg pa la zhugs pa thams cad kyang nye ba'i spun no//bstan pa gcig la gnas pa thams cad kyang mdzes pa'i spun no/ /rnam pa gsum mo/ /gzhan du sems can thams cad kyang rdo rje sems dpa'i rang bzhin yin pas rdo rje spun no/ /bum pa dang / gsang ba dang / shes rab ye shes dang mtshon byed bzhi pa slob dpon gcig dang rig ma gcig las thob pa ni khyad par gyi rdo rje spun no//bye brag tu thob pa ni bye brag gi rdo rje spun no/ /de rnams las ltung ba'i lci yang yang de bzhin no/ /de ltar slob dpon sangs rgyas ye shes zhabs kyis rim pa rnam par gzhag pa las/bstan pa gcig dang rdo rje theg pa la zhugs pa thams cad rdo rje'i spun du brjod/ kun kyang ye shes ldan pas na/ /rdo rje sems dpa'i rdo rje spun/ /dkyil 'khor gcig dang slob dpon gcig /dbang bzhi dag gi bye brag gis/ /nye dang bye brag khyad par ro/ /zhes bshad do//de'i ldang tshad kyang ka ma la zhabs kyis bshad pa/ theg mchog rdo rje spun rnams kyis/ /nyes pa byung na rgyur shes bya/ /de las ldang bar 'dod rnams kyis/ /lus ngag yid gsum la gsum ste/ /lus kyi nyes pa dang po yis/ /tshe gcig tu ni spyod pa bya//gnyis pa nyes pa'i tshad kyis ni/ /spyod pa dag tu spyad pa yin/ /gsum pa maN+Dal phyag sogs so/ /gzhan du sgo gsum yid kyis bsdam/ /ngag gi 'dus la bshags pa dang / /de bzhin sngags dang ngag gis bshags/ /yid kyis tshogs dang skye ba med/ / rig pa'i brtul zhugs zla ba drug /ma go nyes chung mthol ba ste/ /bar ma man chad lkog gyur yin/ /yang na gang zag yul dang dus/ /rkyen gyi bye brag shes pas dpyad/ /ces 'byung ste/ 'di ni don gzhan la dgongs pa med pas blang bar bya'o/ /yang na ltung ba dang po'i bshad pa'i gsum ldan gyi cha gcig nas brtsis pas rnam par phye ba 'di'i bskang tshad yin no//'di yang bdun dang ldan pa'i sbyor bas ltung bar 'gyur te/ rdo rje spun yin zhing nyon mongs pas bslang ba dang / der 'du shes pa dang / sbyor ba gnyis pa bstan pa dang / rang dus 'das pa dang /yid la mi gcags pa dang / yi rang ba dang / ma 'khrul pa'o/ /'di'i pham pa'i phyogs dang mthun pa'o/ /don 'di skad bstan te/ rdo rje theg pa la dam tshig gi dbye ba la gnyis te/ rtsa ba dang yan lag go/ /rnam par phye ba ni de'i yan lag gi bye brag go//de skad du yang slob dpon mtsho skyes kyis rnam par bsdus pa las/ dngos grub thams cad gzhir gyur pa/ /rtsa ba dang ni yan lag go/ /rtsa ba dus 'das pham pa 'dra/ /tshad ldan ltung bar bshad pa yin/ /yan lag rtsa ba dus 'das pa/ /lci ba zhes ni bshad pa ste//sbyor ba ma rdzogs sbom po'o/ /yan lag phra ba nyes byas so/ /phra mo'i phra ba dkyil 'khor gcig /nyes pa med pa gnang la sogs/ /zhes bshad pa'i phyir rigs gnyis su shes par bya'o/ /yang de nyid las bshags tshad bstan pa/ pham pa rdzu 'phrul sogs kyis 'dul//ltung ba dbang gi rim pas so/ /lci ba tshogs kyi 'khor lo ste/ /sbom po tshogs pa'i nang du mchod/ /yan lag tshogs la bshags pa ste/ /nyes byas phra mo'i dkyil 'khor sogs/ /nyes pa med pa mkhas pas brtag /nyes pa chung ngu phra mo yang //gong bzhin 'dud pa 'dzin na lci/ /gong bzhin dngos po lci 'gyur yang / /mi 'jigs ster zhing gsong por smra/ /de sogs ma go bshad pa yang / /phyir zhing sdom pa dga' ba ni/ /nyes pa che yang yang bar bshad/ /bshags kyang mdud par 'dzin byed na//nyes pa chung yang lci bar bshad/ /khyad du bsad de ma bshags na/ /nyes pa chung yang lci bar bshad/ /rtag tu 'dzem zhing 'jigs 'gyur na/ /nyon mongs zil non nyes 'byung yang / /nyes pa che bar mi 'gyur ro/ /de bas grogs la sogs pa brtag / ces 'byung bas rnam par phye ste bshad pa'o/ /phal cher ltung ba dang po las shes par bya'o/ /shan 'dra ba ni phyogs su bsdu'o/ /dam pa rnams kyi nyes pa mi 'byung ba la 'bad par bya'o/ /byung yang dus ma yol bar chad du bshags par bya'o/ /bya ba dang bya ba ma yin pa yang shes pas brtag par bya'o//gzhan du na ltung ba rnam par gzhag pa'i rgyud las/ dkyil 'khor thar pa'i grong mchog 'dir/ /zhugs pa dang ni dbang bskur bas/ /phyir ldog pa ni yod ma yin/ /'dir zhugs bu rnams skad cig kyang / /'bral med 'og min gnas su 'gro//nyams nas 'bral bar gyur pa na/ /thur du bltas nas dmyal bar 'gro/ /zhes bshad pas shes par bya'o/ /de'i phyir/ rdo rje spun la khros pa ni sems khong nas 'khrugs shing mnar sems dgu dang ldan pa'o/ /'dir lus ngag gtso bo ma yin pas phal cher ltung ba'i sems la bzhag pa'o//nyes pa ni 'dod pa ma yin par ltung ba'o/ /ltung ba gsum pa'i bshad pa'o// //da ni ltung ba bzhi pa'i mtshan nyid bshad par bya ste/ sems can rnams la byams sems spong / /bzhi pa yin par rgyal bas gsungs//zhes bya bas bshad de/ 'dir sems can gyi khams gsum pa ste/ rang gi de nyid ma rtogs pas 'khrul ba'i dbang gis sdug bsngal ba'o/ /theg pa chen po pas snying rje dang byams pa dang skad cig kyang bral bar mi bya ste/ gzhan gyi don du zhugs pas bu gcig pa la sdug pa'i ma bzhin no//de bas na gzhan gyi don mthong na bdag nyid kyi lus dang srog la ma chags pa ste/ gzhan du na theg pa chen po rnam par spangs pa'o/ /de yang yul rnam pa gsum la khyad par mi rtog par snyoms par rgyu snying rje'i stobs kyis don la 'jug pa ste/de bas na sangs rgyas kyi byang chub 'dod pas ci'i phyir byams pa dang snying rje don du mi gnyer/ byol song gi skye gnas su skyes pa'i ri dwags khri snyan sa le yang rtag tu sems can la bu gcig pa bzhin du sems pa'i snying rje dang ldan na theg pa chen po rnams kyis lta ci smos/de'i phyir bcom ldan 'das kyis gsungs pa/ sangs rgyas byang chub 'dod pa yis/ /rtsa ba chad pa'i zhe sdang ni/ /skad cig tsam yang bsten mi bya/ /sems 'khrugs pa la thar lam med/ /ces bstan to/ /gzhan yang byang chub tu sems bskyed pa rnams kyis ni 'dod chags kyi phung po ri rab tsam ni bla'i zhe sdang skad cig ni de lta ma yin no//de'i phyir/ sems bskyed pas ni gzhan don phyir/ /yang dag rdzogs pa'i byang chub 'dod/ /ces bsten pa gzhan gyi don ni byams pa dang snying rjes rjes su gzung gi zhe sdang gis gzhan don byed pa ma yin no//gzhan yang theg pa chen po'i mdo dang rgyud mtha' dag las zhe sdang spang zhing byams pa dang snying rje bsten par gsungs pa shes par bya'o/ /'dir yang sbyor ba bdun dang ldan pas nyes pa ci byung ba' nga gong du bsten pa las shes par bya'o/ /'dir mnar sems dgu dang ldan pa ni ltung ba'o//sems khong nas 'khrugs pa ni sbom po'o/ /dus 'das su mdud par 'dzin pa ni lci ba'o/ /sbyor ba tsam nyes byas so/ /lus ngag gi nyes pa ni phra mo'o/ /gzhan la sbyor ba'i dngos gzhi skyes pa ma bshags par mi gnang bar gyur pa dang /rang la de lta bu gzhan chos bzhin du bshags pa las rang dang gzhan dri ma las ldang bar mi byed par snang bar ma gyur na pham pa'i phyogs su bsdus pa'o/ /bshags pa'i tshad ni zhing bla ma dang rdo rje spun la gang gi nyes pa bshags pa'o/ /sems can thams cad la yang zhing dang bsam pa dang sbyor ba'i nyes pa dang sbyar te nges tshangs pa sbyin pa dang /rgyun de las log pa dang / sems sun phyung ba ste/ sdom pa dang / 'tshogs pa la tshogs dang maN+Dal dang / ngag gi sbyor ba dang / nor la sogs pas rjes su dga' bar bya ba dang /yul de nyid las bshags pa dang / srog chags gzhan tshe bskyab pa la sogs pas nyes pa la 'jigs shing bshags par bya'o/ /phyogs su bsdu ba ni khams gsum gyi sems can thams cad la tshad med bzhi bsgom pa'o/ /khyad par du ni yul nye ba rnams la'o//slob dpon klu sgrub kyis bshad pa/ /theg pa che la zhugs pa yis/ /sems can rnams la bu bzhin byams/ /snying rjes gzhan don rang srog sbyin/ /nyan thos rnams kyang gnod las log /snod du ma gyur log sred can/ /nam yang dor bar mi bya'o//nyes pa byung na bshags par bya/ /snying rje byams pas zhugs gyur na/ /sngar byas nyes pa de yis ldang / /bshags kyang phyir zhing mi sdom na/ /bshags pas dri ma ldang ba med/ /ces bya bas bshad pa'o/ /de bas na dam pa rnams kyis bshags te bsdam par bya'o zhes bshad do//de bas na sems can rnams zhes pa ni mang ba'i tshig go/ /byams pa'i sems spong ba ni mnar sems kyi zhe sdang ngo / /de sems la skyed pa ni ltung ba'o/ /yid ches par bya ba'i phyir rgyal bas gsungs pa'o/ /ltung ba bzhi pa'i bshad pa'o// //da ni ltung ba lnga pa'i mtshan nyid bshad par bya ste/ chos kyi rtsa ba byang chub sems/ /de spong ba ni lnga pa yin/ /zhes smos te/ 'dir 'bru mang po par sbyar te/ bi bag sha ste/ skyes pa lta bu'i don to/ /de ltar yang / rang bzhin gzhi mthun byang chub sems//sgra gcig gis ni dngos rnams brjod/ /kun rdzob la sogs dbye ba yis/ /sen+ta pa yi sgra bzhin no/ /zhes 'byung ste/ sen+ta pa yi gnas skabs kyis rta dang chu dang ral gri dang lan tshwa'o/ /'dir yang don dam pa dang / kun rdzob kyi dbye bas so//'dir don dam pa'i byang chub kyi sems spong ba ni rang bzhin gyis sems can thams cad la ye shes gnas pa ma rtogs par spong ba'o/ /de'i phyir/ rgyu dang mi rgyu'i dngos po kun/ /khyab bdag rdo rje sems dpa' yis/ /gzod gnas dag pa'i ye shes gnas//thabs gzhan sangs rgyas mi rnyed do/ /zhes bshad pa dang / ji ltar mar la mar bzhag bzhin/ /ji ltar chu la chu bzhag bzhin/ /rang gi ye shes de rtogs bya/ /zhes bya bas kyang bshad la/ rang gi ye shes gang yin pa/ /de rtogs pa ni 'dir phyag yin//zhes 'byung bas sems can thams cad kyi rgyud la byang chub kyi snying po sangs rgyas kyi ye shes gnas pas de rtogs na sems can thams cad mya ngan las 'das par 'gyur ro zhes bshad pa dang / gzhan yang 'di ni theg pa chen po'i mdo sde dang rgyud mtha' dag nas gsal bar bsten pas de'i phyir yul stong pa nyid dang /yul can rang bzhin gyis 'od gsal ba gnyis tha dad pa med pa ni byang chub kyi sems te/ de ni sangs rgyas kyi yon tan thams cad kyi rtsa ba yin pas de la mi mos shing spong ba chos kyi rtsa ba spong ba'o/ /de ma rtogs na thar pa dang thams cad mkhyen pa mi thob ste/de'i phyir nyan thos kyis kyang chos kyi dbyings kyi bye brag rtogs pa'o/ /de skad du slob dpon klu sgrub kyis/ skye med rtogs pas mya ngan 'das/ /nyan thos gang zag bdag med pas/ /chos dbyings bye brag rtogs pas thar/ /mkhas pas rang sems dag la brtag /rang sangs rgyas kyi bye brag cha/ /dngos kun skye med thams cad mkhyen/ /zhes bshad pas khong du chud par bya'o/ /de bas na de rtogs par bya ste bye brag gi rgyud las/ byang chub nam mkha'i mtshan nyid de/ /kun tu rtog pa thams cad spangs/ /gang zhig de rtogs 'dod pa ste/ / byang chub sems dpa' zhes bya'o/ /zhes bshad pa'o/ /de bas de la smon pa dang / 'bad rtsol gyis 'jug pa dang / lam du bstan pa la 'bad par bya ste/ gzhan du na de spong ba'o/ /de'i phyir/ byang chub sems la 'jug pa dang / /gang zhig rtogs par 'dod pa ste/ /sgrib pa thams cad sel byed cing //bdud rnams shin tu skrag byed de/ /ji ltar sgron ma skyes ma thag /mun pa lo stong sel ba bzhin/ /de bzhin seng ge'i phru gus kyang / /shin tu rgas pa'i gcan gzan 'jigs/ /zhes bshad pas de ni chos thams cad kyi rtsa ba'o/ /de spong ba'i ltung ba'o//sgra'i don gyi kun rdzob kun+da lta bu'i byang chub kyi sems la bya ste/ de ni byang chub kyi ched du dam tshig ma dang / lag gi 'du byed kyis dor bar mi bya ste/ sems ma bltas pas kyang lces blang bar bya'o zhes bshad pas so/ /gzhan yang gsang ba'i dbang gi dus su goms pas sangs rgyas kyi ye shes 'dra ba phab ste sbyin par bya'o//gzhan du spangs na ltung ba'o/ /gzhan du shes rab ye shes dang / dam tshig ma las rnal 'byor goms par byed pas ni spong bar thabs dang shes rab kyi rgyud las bstan pa'o/ / sbyor ba dus dngos gzhir gyur pa yang shes par bya'o/ /dbye ba'i gzhi yang de nyid do/ /sun phyung ba la rim pa bzhin rjes su 'jug pa la bslab par bya'o/ /dbang gi rim pa de nyid kyis bskang bar bya'o/ /gzhan du chu tshod gsum dang / lnga dang / dgu dang / bcu bdun dang / nyi shu rtsa brgyad dang /sum cu rtsa lnga dang / bzhi bcu rtsa bdun dang / lnga bcu rtsa lnga dang / drug cu rtsa gnyis kyis bskyed de/ de dam tshig gi rim pa la sogs pa la bde ba chen po dang / dga' ba bzhi'i dkyil 'khor ba mnyes par byas pas ldang ba'o/ /de'i phyir in+d+ra b+hU tis bshad pa/ gang zhig don dam kun rdzob kyi/ /byang chub sems las nyams gyur na/ /don dam don dam nyid kyis te/ /kun rdzob lces blang ga la nyams/ /de nyid las ni bslab par bya/ /shukra dor na rtsa ba nyams/ /chu tshod nas brtsis dga' ba bzhi/ /goms pas dri ma de las ldang / / de phyir dam tshig rig ma dang / /rnal 'byor tshad ldan med pas ni/ /nam yang 'jug par mi bya'o/ /gzhan du ltung ba'i rtsa ba ste/ /rdo rje 'dzin pa spangs na ltung / /zhes bshad pa'i phyir ro/ /de bas na brtan pa thob pas 'bad par bya'o/ /gzhan du yang / skye bo 'dod chags can don du//'di yi byed pa rdo rje 'dzin/ /zhes bshad pa dang / shes rab kyi rgyud las kyang / ji ltar me yis tshig pa las/ /me de nyid la bsro bar bya/ /de bzhin rna bar chu song ba/ /chu de nyid kyis slar dbyung bya/ /'dod chags ldan pa'i gang zag kyang / /'dod chags nyid kyis gdul bar bya//zhes bshad pa yang brtan pa dang ldan pa la lam du 'gyur bar shes par bya'o/ /de lta ma yin par 'dod chags kyi rjes su 'brangs te sgra tsam gyi phyogs su gzhol ba la ltung ba dang sbom po la sogs par 'gyur bas tshogs pa la bshags la don ma yin par mi 'jug par bsdams la rjes su bskang zhing don du bslab par bya'o zhes bshad pa ste lnga pa yin pas lnga pa ste ltung ba lnga pa'i bshad pa'o// //da ni ltung ba drug pa'i mtshan nyid bshad par 'dod nas/ rang ngam gzhan gyi grub pa'i mtha'/ /chos la smod pa drug pa yin//zhes smos te rang ni bdag med par smra ba dang / gzhan ni phyi rol pa'o/ /de la smad par mi bya'o/ /gzhan dag ni theg pa chen po'i mdo dang rgyud la bya ste/ mu stegs sun dbyung ba'o zhes zer te/ de yang gzhan de la 'jug pa bzlog pa'i phyir bshad pa ste/ nyon mongs pas kun nas bslang ste smad pa ma yin te/bye brag gi rgyud las/ rnam par snang mdzad ring ba'i rgyu/ /mu stegs can la smad mi bya/ /zhes bshad pa dang / de bzhin du/ grub pa'i mtha' yis blo bskyed phyir/ /phyi rol ba yang lam tshol zhugs/ /de phyir de la smad mi bya//lam zhugs nyan thos smos ci dgos/ /zhes bshad pas so/ /de'i phyir/ sems can bsam pa tha dad pas/ /mya ngan 'das par drang ba'i phyir/ /byin gyis brlabs dang mngon sum pas/ /'di dang phyi rol bstan pa yin/ /de phyir smad par mi bya ste/ / phal cher thar lam 'dod pas so/ /zhes bshad de/ de'i phyir lha sbyin yang yang dag pas na lha sbyin ma yin la/ mu stegs can gyi grub pa'i mtha' la yang smad par mi bya'o zhes 'byung ba ste/ theg pa chen po la gzud pa dang / lta ba ngan pa la dad pa sun dbyung ba dang / gdul bya'i bsam pas smad pa la nyes pa med do//bsod nams kyang mang du 'phel lo/ /de'i phyir rgyud la smad na ltung ba'o/ /theg pa chen po'i mdo sde la smad na spom po'o/ /nyan thos kyi la nyes byas so/ /phyi rol pa yang phra mo'i nyes byas so/ /sbyor ba du dang ldan pas dngos gzhir 'gyur bas ltung ba dang /na smad pas re re la yang yul dang bsam pas na smad pas bshags pa'i dus yol ba lci ba la sogs pa'i nyes byas dang nyes pa med pa shes par bya'o/ /de bas na lam tshol ba la zhugs pa dang / lam la zhugs pa dang / lam chen po la zhugs pa dang /lam ches che ba'i lam bla na med pa la zhugs pa'i snod kyi rim pas lam la ma zhugs pa gzhug pa dang / phyi rol pa la bdag med par bstan pa dang / nyan thos la sogs pa la khyad par gyi lam bstan pa'i phyir ro/ /lam med grub pa'i mtha' la dgod//phyi rol pa la bdag med bstan/ /nyan thos la sogs rim pas drang / /rnam pa sna tshogs thabs kyis gdul/ /zhes bshad pa dang / dgyes pa'i rdo rje las kyang / dang po'i bye brag smra ba ste/ /zhes bya ba nas/ kun gyi tha mar theg pa'i mchog /ces bya bar bshad do//de'i dbang du mdzad nas/ mtshan yang dag par brjod pa las bya ba grub pa'i ye shes la bstod pa las/ theg pa sna tshogs thabs tshul rig /'gro ba'i don la rtogs pa po/ /theg pa gsum gyi nges 'byung la/ /theg pa gcig gi 'bras bur gnas/ /nyon mongs khams rnams dag pa'i bdag /las kyi khams rnams zad byed pa/ /zhes bshad pas/ thabs sna tshogs kyis gdul bya gdul bar bya'o/ /de bas na dgongs pa sna tshogs shes pas skabs kha cig tu theg pa gsum la zhugs pa'o/ /zhugs pa ni 'og ma spong bcug la gong ma la dgod pa'o//de'i dbang du mdzad nas/ dmyal bar 'gro ba byang chub la/ /rtag tu gegs byed ma yin te/ /rang sangs rgyas kyi sa rnams dang / /nyan thos sa yis gegs byed do/ /zhes bshad pa dang / de bzhin du 'jig rten pa'i dbang du mdzad nas/ bden par smra bya khro mi bya/ / slong na chung yang sbyin par bya/ /snyan par smra bya khro mi bya/ /rnam pa 'di gsum gnas kyis ni/ /lha yi nang du skye bar 'gyur/ /zhes bya ba dang / 'jig rten pa yis yang dag lta/ /chen po su la yod gyur pa/ /de ni tshe rabs stong du yang / /ngan 'gror 'gro bar mi 'gyur ro/ /zhes bya bas bshad do/ /de bas na dgongs pas rig par bya'o//de'i phyir bskang ba yang phal cher yul dang bsam pa dang dus la sogs pa shes par bya ste/ de nyid las bzlog ste/ dgongs pa sna tshogs pa'i don dang / yang dag pa'i don shes pa la gzhug cing phyis bsdams te/ tshogs pa'i nang du bshags pas dri ma las ldang ngo //gzhan du na phyis sdom pa dang dam pa gcig la bshags pas ldang ste de'i phyir blos phye bas shes par bya ste ltung ba drug pa'i bshad pa'o// //da ni ltung ba bdun pa'i mtshan nyid bshad par 'dod pas/ yongs su ma smin sems can la/ /gsang ba sgrogs pa bdun pa yin//zhes bshad de/ de yang snod ma smin pa dang / cho gas smin par ma byas pa dang / cho ga rdzogs pas smin par ma byas pa dang / zab pas 'jigs pas ma smin pa dang / nyams pas ma smin pa'o/ /de la rang bzhin gyi log sred can snod kha spub pa thabs sna tshogs kyis btul yang snod du ma gyur pa yod de/skur zhing smod par byas pas bstan par bya ba ma yin pa'o/ /gzhan du na snod du ma gyur pa med de/ 'dus pa las/ rigs ngan sme sha can la sogs/ /gsod pa don du gnyer ba rnams/ /theg mchog 'di las 'grub par 'gyur//zhes bshad pa dang / gzhan yang / mtshams med lnga po byed pa dang / /gsod la sogs pa'i mi dge sogs/ /dbang ma bskur ba'i mi rnams kyang / /nag pos bka' stsal bzhin du 'grub/ /ces 'byung ba'i phyir ro/ /sbyor ba phul du gyur pa'i tshig go/ /byang chub kyi sems dang ldan pa la snod du rung bar bshad kyi/thams cad du cho ga med pas ni 'grub pa ma yin no/ /slob dpon dang slob ma rkyen ma tshang pas snod du rung yang dbang ma thob pa'i gang zag kyang ngo / /bum pa'i dbang tsam thob pa la gsang ba la sogs pa ma thob pa yang ngo / /dbang rdzogs kyang spyod pa dang rig pa'i brtul zhugs dang /lam rnam pa bzhi'i tshul dang zab mo'i don la 'jigs pa yang snod du ma gyur pa'o/ /thob kyang ltung ba la sogs pa 'byung ste/ nyams kyang rkyen ma tshang ba dang / ma gus pas dri ma las mi ldang ba yang ma smin par shes par bya'o//de lta bu la snyigs ma lnga'i dus kyi rdo rje slob dpon gyi 'dod pa dang 'jig rten gyi chos brgyad kyis bsam pas mi 'dul zhing ma gus pa la skur bas ltung bar 'gyur la/ smin par byas kyang dri ma ma dag pa la ston pa ni ltung ba ste/ snying rje zhugs na sbom po'o/ /tshul ma yin par bstan te lus ngag gis bsdam pa ma byas na nyes byas so//'og ma'i cho ga byas ba la gong ma ston na lci ba'o/ /ma rtogs pa phra mo'i nyes byas so/ /zhing dang bsam pas lci yang dang sbyor ba dus dngos gzhir gyur pa yang shes par bya'o/ /zab pa ma yin pa bstan pa'i dus su zab mo'i don ston pa dang /tshogs kyi 'khor lo'i nang du 'dus pa dang / nyes byas bshags pa'i dus su 'dus pa dang / sba bar bya ba brda dang phyag rgya gcig tsam mthong bas bshags pa'i tshad kyang dus yol ba dang ma yol bas de nyid dbang rnam pa gsum nyid dang tshogs kyi 'khor lo dang /dpa' bo'i ston mo dang / tshogs kyi mchod pas 'dus pa la bshags pa dang / chad pa'i las dang / maN+Dal sngon du 'gro bas dri ma las ldang bar bya'o/ /'di ni slob dpon gyi nyes pa'o/ /de yang slob dpon ku ku ri pas bshad pa/ snod min pa la gsang mi bsgrags//smin dang ma smin rim pa rnams/ /gung mo'i rtse mo brda sbyor sogs/ /mkhas pas rtogs par mi byed na/ /gal te 'dod pa'i bsam pas zhugs/ /de ni shin tu lci ba ste/ /snying rje can la shin tu yang / /snyom las la sogs nyes pa chung / / rkun thabs slob ma'i nyes pa'o/ /dbang bskur tshogs 'khor la sogs dang / /maN+Dal ngag gi bshags pas bsdam/ /gzhan du skyes bu tha shal brlag /ces bshad pas rgya cher shes par bya'o/ /shan 'dra ba phyogs su bsdu bar bya'o/ /phal cher yul dang dngos po dang /dus dang sbyor ba dang / bsam pa dang / gang zag dang / gzhan gyi don la sogs spyad de dri ma las ldang bar bya'o/ /slob dpon gyi nyes pa ni ltung ba dang po dang sbyar te bshags par bya'o/ /gzhan du na/ yongs su smin par ma byas shing / /bla ma la sogs mchod mi byed//zab mo'i don la zhugs gyur kyang / /nyan la sogs te phyag rgya 'ching / /ji ltar sa bon tshig pa las/ /myu gu 'bras bu mi 'byung bzhin/ /zhes bya bas gsal bar bstan te/ de'i phyir slob dpon dang slob ma yongs su smin na 'bras bu chen por 'gyur ro zhes bstan pa'o//de bas na 'dod pa la sogs pas zab mo'i don bstan na ltung ba'o zhes bshad pa ste ltung ba bdun pa'i bshad pa'o// //da ni ltung ba brgyad pa'i mtshan nyid brjod par bya ste/ phung po sangs rgyas mnga' bdag nyid/ /de la smod byed brgyad pa yin/ / zhes bya ba bshad do/ phung po ni gzugs la sogs pa lnga'o/ /sangs rgyas ni de dag gi rang bzhin dang / byin gyis brlabs pa ste/ rang bzhin gyis ni gzod ma nas ma skyes pa'o/ /gzod ma nas rang bzhin gyis 'od gsal ba ni shes pa dang shes bya tha dad du med pa'i phyir 'di ni sems can thams cad kyi rgyud la rang bzhin gyis rnam par mi rtog pa'i ye shes rnam pa lnga gnas te/glo bur gyi dri ma mthong bas spang bar bya ba dang / bsgom pas spang bar bya bas ma thob pa thob par bya ba ni ma yin te/ gzhan du na thog ma med pa'i dus nas ma rig pa'i bag chags kyis yongs su dkrugs pa'i phyir shin tu bag chags kyi mthu brtas pas ma rig pa'i thibs po sa non pa'i phyir tshe gcig la sogs te/bskal pa grangs med pa gsum gyis rnam pa thams cad mkhyen par ga la 'gyur/ de'i phyir sems can thams cad kyi rgyud la rang bzhin gyis 'od gsal ba'i rnam par mi rtog pa'i ye shes gnas te/de'i nus pa'i khyad par dang / yon tan gyi khyad par las gnyis su med pa'i khyad par dang / yul dang yul can du snang ba ste/ de'i phyir dpal gsang ba 'dus pa la sogs pa rnal 'byor dang rnal 'byor ma'i rgyud mtha' dag las/lus kyi dkyil 'khor bkod pa snang ba ste don de nyid la dgongs pa'i phyir ro/ /de skad du yang / phung po sangs rgyas mnga' bdag nyid/ /spyan la sogs pa chen po bzhi/ /sgrol ma la sogs de bzhin no/ /yul dang yul can rang snang ba'i/ / khams dang skye mched mang po ni/ /sa snying la sogs byang chub sems/ /gzugs kyi phung po bgegs mthar byed/ /lus kyi dkyil 'khor rnam par snang / /zhes bshad de/ gzhan yang / gzugs ni rnam par snang mdzad de/ /tshor ba rin chen 'byung ldan yin/ / 'du shes snang ba mtha' yas so/ /'du byed don yod grub pa yin/ /rnam par shes pa mi bskyod pa/ /zhes bya ba la sogs pa thabs dang shes rab kyi rgyud mang po las gsal bar bstan te/ bdag dang gzhan rdo rje theg pa'i rnal 'byor pa rnams la 'di ni bsgrub pa'i phyir rgyud de dag gi dgongs pa bdag gis 'dir ma spros so//rgyud de dag las kyang lha'i grangs tha dad par snang ste/ de dag kyang gdul ba'i bsam pa dang / rten cing 'brel par 'byung ba'i nus pa dang / dbang po'i bye brag gis gsungs kyi/ rnam par dag pa lus kyi dkyil 'khor bkod pa phung po las tha dad par brjod pa ni ma yin no//de'i phyir/ de yi rang bzhin de yin phyir/ /de yi nus pa de la gnas/ /de phyir sems can sangs rgyas te/ /thabs kyis 'khrul pa bzlog pa'i phyir/ /de phyir sangs rgyas tha dad snang / /lus la dkyil 'khor rnam par dgod//ces bshad pa'i phyir ro/ /byin gyis brlabs pa'i tshul gyis kyang rnam par rtog pa'i bag chags zad par bya ba'i phyir dang / bsod nams kyi tshogs yongs su rdzogs par bya ba'i phyir dang / las dang po pa'i gang zag rnal 'byor pa'i sems goms par bya ba'i phyir dbang dang dam tshig sngon du 'gro bas yan lag bdun pas sems rgyud sbyangs te/stong pa nyid las lha'i gzugs su rnam par ldang zhing / ye shes kyi dkyil 'khor dang / gnyis su med pas phra mo dang thig le dang rtsa'i 'khor lo rnam par bsgoms te cho ga thams cad rdzogs par bya'o//rang bzhin du gnas pa'i don dang byin gyis brlabs pa'i lus kyi dkyil 'khor la thun bzhi'i rim pas tshogs kyi mchod pas bsnyen par byed cing / bdag dang tha mi dad par mnyam pa ni/ phung po sangs rgyas mnga' bdag nyid do/ /de skad du yang / rnal 'byor gyi lam gyi rim pa la 'jug pa las/brtags pas lha yi dkyil 'khor bsgom/ /thun bzhi'i rim pas tshogs kyis mchod/ /dka' thub la sogs rnam spangs te/ /skad cig sangs rgyas bral med 'grub/ /ces bshad pa'i phyir ro/ /de bas na de la brnyas pa ni ltung ba ste/de yang gsad pa dang / spyug pa dang / bcing ba dang / tha snyad du sems pa dang / smyung bar gnas pa dang / dka' thub dang / dka' spyod dang / sngar spyad dang / lus dran pa nye bar gzhag pas mi gtsang ba'i rdzas sum cu rtsa gnyis su sun 'byin par byed pa la/yan lag la sogs pa ma rung bar byed cing gsob nyid dang / gsog nyid dang / snying po med pa nyid dang zhes rnam par brnyas shing smod par byed de de ni ltung ba'o/ /de yang yan lag dus dngos gzhir gyur pa dang / ltung ba dang yan lag gi nyes pa yang shes par bya'o//tshogs kyi 'khor lo dang / tshogs kyi mchod pa dang / tshogs la bshags pa ste/ rang bzhin dang byin gyis brlabs pa'i dkyil 'khor bsgom zhing phyis skad cig kyang mi 'jug pa la bslab par bya'o/ /ltung ba brgyad pa'i bshad pa'o// //da ni ltung ba dgu pa'i mtshan nyid bshad par 'dod na/rang bzhin dag pa'i chos rnams la/ /som nyi za ba dgu pa yin/ /zhes bshad do/ /rang bzhin gyis dag pa ni bdag med pas rnam par dben pa'o/ /de'i phyir de ni rang bzhin gyis rnam par dben pa'o/ /gzhan phya dang dbang phyug dang byed pa po dang bdag tu 'dod pa ste/ de dag dang gzhan yang phyi rol gyi dngos po don du 'dod cing bsags pa dang 'dus pa'i dngos po dang / shes pa yang dus gsum rdzas su smra ba dang / gzhan yang nang gi shes byed ni don du yod la/ shes bya gnyis med pa la don lta bur snang ba'o zhes 'dod pa la sogs pa'i grub pa'i mtha' la rnam par rtog cing /ci rang bzhin rnam par dag pa'i chos su smra ba ni de bzhin gshegs pa'i bka' 'am bdud kyi tshig ces rtog ste/ yang dag pa'i don la the tshom za zhing phyi rol pa la sogs pa grub pa'i mtha' sna tshogs su rtog cing the tshom za ba'o/ / gzhan dag rjod byed kyi chos rgyud dang shes rab kyi pha rol tu phyin pa'i mdo rnams la smod pa'o/ /de yang tha dad par brjod pa ma yin te/ gzhi gcig tu brjod pa'o/ /de'i phyir de la the tshom za ba ni ltung ba'o/ /sbyor ba du dang ldan pas dngos gzhir 'gyur ba yang shes par bya'o/ / ltung ba dang yan lag gi nyes pa yang zhing dang bsam pa dang dus dang sbyor ba'i bye brag gis shes par bya'o/ /dri ma las ldang ba ni tshogs pa la bshags la phyis bsdams te skye ba med pa la 'jug par bya'o/ /gzhan gdul ba'i bsam pa dang / dngos po gtan la 'bebs pa dang /bcom ldan 'das kyi dgongs pa 'grel ba'i dus su nyes pa med do/ /gzhi mthun pa'i phyogs su bsdu'o/ /ltung ba dgu pa'i bshad pa'o// //da ni ltung ba bcu pa'i mtshan nyid bshad par 'dod nas/ /gdug la rtag tu byams sems ldan//byed pa de ni bcu par 'dod/ /ces bya ba bshad de/ de yang gdug pa ni bdud dang mu stegs dang / phyir rgol ba dregs pa can dang / log sred can la sogs pa ste/ yang dag pa'i bkas mi 'dul ba dang / byang chub kyi sems dang snying rje dang bral ba'i gang zag la snying rjes rdzu 'phrul gyis 'dul ba dang /thabs gzhan gyis mi 'dul ba la snying rjes bsgral ba la sogs pas 'di dang phyi ma'i don chen po thob par mi byed pa dang / bla ma dang dkon mchog dang sems can phal po che la gnod pa'i gang zag la dga' bar byed pa'o/ / de la snying rjes bsdu ba'i dngos po bzhi dang / thabs mkhas pa'i spyod pa sna tshogs kyis 'dul ba dang / rdzu 'phrul dang drag shul gyi spyod pas mi 'dul na ltung ba'o/ /de'i phyir bde mchog 'khor lo las/ shin tu khro zhing gtum pa la/ /zhi bas phan par mi 'gyur te/ / shes rab thabs kyi sbyor ba yis/ /khro bor de bzhin gshegs kun mdzad/ /ces bshad pa dang / gzhan yang / snying rje chen po'i stobs kyis ni/ /gdug pa yal bar mi 'dor te/ /rdzu 'phrul bsgral la sogs pas gdul/ /gzhan du bla ma dkon mchog spangs/ / zhes 'byung bas bshad pa'o/ /sbyor ba du dang ldan pas dngos gzhir 'gyur ba yang shes par bya'o/ /dri ma las ldang ba dang / tshogs la bshags pa ste/ phrin las rnam pa bzhis de bzhin gshegs pa'i phrin las mdzad pa'o/ /shan 'dra ba ni phyogs su bsdu ba'o/ / ltung ba bcu pa'i rnam par bshad pa'o// //da ni ltung ba bcu gcig pa'i mtshan nyid bshad par 'dod nas/ ming sogs bral ba'i chos rnams la/ /der rtog pa ni bcu gcig pa/ /zhes bshad pa ste/ ming sogs bral ba'i chos rnams ni/ /rjod par byed pa'i tha snyad las 'das pa ste/mi rtog pa'i ye shes kyi yul shes brjod kyi yul las 'das pa'o/ /de yang lung dang rigs pas grub ste/ lung ni theg pa chen po'i rgyud dang mdo mtha' dag las grub pa'o/ /de skad du yang / dngos rnams bdag dang gzhan las min/ /gnyis ka las te med mi skye//skye 'gag spros bral rnam par stong / /yod med shes brjod yul las 'das/ /gcig dang du ma'i mtha' shes shing / /skad cig cha shas brtags pas dben/ /gzugs dang stong pa tha dad min/ /kun nas nyon mongs rnam par byang / /'dod chags nyon mongs bdag lta dang //skye med thams cad mkhyen pa yang / /rang bzhin gcig ste tha dad med/ /'di dag dam pa'i don du'o/ /zhes 'byung ba dang / gzhan yang shes rab kyi pha rol tu phyin pa las chos thams cad rmi lam lta bu sgyu ma lta bu'o/ /mya ngan las 'das pa'i chos thams cad kyang rmi lam lta bu sgyu ma lta bu/mya ngan las 'das pa las ches lhag pa'i chos cig yod na yang rmi lam lta bu sgyu ma lta bu'o/ /rigs pa ni/ phyi dang nang gi dngos po ni/ /dam pa'i don du rang bzhin med/ /bdag las ma skyes gzhan las min/ / gnyis ka las te rgyu med min/ /gzugs brnyan la sogs bzhin du brtag /bdag la sogs pas rnam par dben/ /nang gi shes pa yod min te/ /rtag chad mtha' dang rnam par bral/ /gzhan du lung dang rigs pas gnod/ /ces bshad pa dang / slob dpon 'phags pa lhas bshad pa//ji srid yod par rtog pa na/ /de yang sgyu ma'i mtshan nyid min/ /ji srid med par rtog pa na/ /de yang sgyu ma'i mtshan nyid min/ /ji srid dbus mar rtog pa na/ /de yang sgyu ma'i mtshan nyid min/ /de kun rang bzhin med do zhes/ /theg pa che rnams smra byed kyang //bdag byin brlab las phyi rol phyogs/ /zhes bshad pas ming dang brda la sogs pa dang bral ba'i chos lung dang rigs pas yang dag par bsgrub ste/ rigs pa ni rgya cher slob dpon klu sgrub kyi zhal snga nas/ dbu ma rigs pa'i tshogs las rgya cher gtan la phab pas/de yang 'dir bdag gis spros na don med pa'i phyir ma spros so/ /de'i rtag pa dang chad pa'i mthar rtog na ni ltung ba'o/ /yan lag dus dngos gzhir 'gyur ba yang shes par bya'o/ /ldang ba ni tshogs pa la bshags te de nyid las log ste goms par byed pa'o//ltung ba bcu gcig pa'i bshad pa'o// //da ni ltung ba bcu gnyis pa'i mtshan nyid bshad par 'dod nas/ sems can dad dang ldan pa yi/ /sems sun 'byin pa bcu gnyis pa/ /zhes bshad de/ theg pa la gsar du zhugs pa'i las dang po pa la sogs pa la mi dad cing ma gus pa'i rnal 'byor pa lus ngag gis bag med par spyod cing /de'i rgyus gzhan ma dad cing rdo rje theg pa la smod cing ma zhugs pa rnams mi 'jug cing / zhugs pa rnams zlog par byed na ltung bar 'gyur te/ yan lag dus dngos gzhir 'gyur ba yang shes par bya'o//yan lag gi nyes byas la sogs pa lci yang gi bye brag gis dri ma las ldang ba yang tshogs pa la bshags pa dang / maN+Dal sngon du 'gro bas dam pa gcig la bshags pa dang / phra mo ni sems kyis bsdams te de nyid la sogs pa rjes su gzung ba'o//yul dang dus dang bsam pa dang / rkyen gyi bye brag gis nyes pa lci yang dang nyes med pa yang shes par bya'o/ /ltung ba bcu gnyis pa'i bshad pa'o// //da ni ltung ba bcu gsum pa'i mtshan nyid bshad par 'dod nas/dam tshig rdzas ni ji bzhin rnyed/ /mi bsten pa ni bcu gsum pa/ /zhes bya ba bshad de/ dam tshig ni 'dir bshad pa dang 'chad par 'gyur ba la bya ste/ de khyad du gsod cing ma gus pa dang / nyon mongs pas zil gyis non pas nyes pa byung yang dri ma las ldang bar mi byed pa dang /mi shes pa yang ltung ba 'byung ba'i rgyu ste/ de bas na skyes bu blun po smin par byas pa rnams kyang phal cher ltung ba'i gzhi yin pas/ de dag ni dri ma las ldang ba dka' ba ste/ de dag rang gi ldang ba'i nus pa chung ba'i phyir phal cher gzhan la bsten pa dang /dpa' bo'i ston mo la sogs pas ldang bar shes par bya'o/ /skyes bu shes rab can rnams kyis dri ma las ldang ba ni shin tu yang bas de dag kyang sgyu ma lta bu'i don la mkhas pa dag gis 'dag par 'gyur te/ de yang smras pa/ mkhas pas dri ma las ldang ba//bshags dang bral dang bkru ba dang / /dbyung dang bsreg dang dmigs pas stong / /dbang dang tshogs la sogs pa dang / /tshogs pa 'dus dang dam pa gcig /dkyil 'khor la sogs mdun du byas/ /dkyil 'khor sbyin sreg mchod rten dang / /gtor ma la sogs dri ma ldang //blun pos lci ba dri ma la/ /'dag pa'i shes pa min par rtog /ces bya ba la sogs pas bshad pa dang / gzhan yang de lta bu'i dbang du byas nas/ mkhas pas sdig pa bshags pa dang ldang ba yang / mkhas pas sdig pa byas pa rnam smin 'phral la sbyang //mi mkhas sdig pa byas pas de nyid thur du 'gro/ /lcags kyi gong bu chung yang chu yi gting du 'gro/ /de nyid snod du byas na che yang kha na 'phyo/ /zhes bshad pas kyang tshul de nyid bstan to/ /gzhan dag las/ mkhas pas sdig pa byas pa rnams//bka' sogs bslus te shin tu lci/ /blun pos sdig pa lci ba min/ /rang bzhin blun pa nyid kyis so/ /zhes bya ba yang mkhas pas bka' bslus pa dang / khyad du bsad pas lci bar shes par bya'o/ /de'i phyir don du mi gnyer ba ni ltung ba'o//gzhan yang sku gsung thugs kyi dam tshig thun bzhi'i rim pas sku'i dam tshig ni lha'i rnam par bsgom pa dang / gsung gi dam tshig ni sngags kyi grangs dang / thugs kyi dam tshig ni bden pa gnyis kyi tshul gyis mi rtog pa dang / gzhan yang rtsa ba'i 'khrul 'khor mi bsgom pa'o//gzhan yang 'dod chags la sogs pa nyon mongs pa lnga'i rang bzhin shes par byas te mi spad pa dang / rnam par snang mdzad dang / dri chu la sogs pa bdud rtsi rnam pa lnga'i rang bzhin shes par byas te/ sbar sbur la sogs pa sbyangs nas mi bsten par 'dor ba dang /gzhan yang byang chub kyi sems kyi rtsa sum cu rtsa gnyis nas/ chu ser la sogs pa'i byang chub kyi sems rnams bsten par mi byed cing 'dor ba dang / gzhan yang yan lag gi dam tshig mang du bshad pa rnams bsten par mi byed pa dang /rtog pa dang bral zhing mnyam pa nyid kyi don rtogs te/ blang ba dang dor ba med pa'i dam tshig la mi gnas pa'o/ /de dag las 'da' bar byed pa ni ltung ba'o/ /yan lag dus dngos gzhir gyur pa yang shes par bya'o/ /ldang ba ni bshad zin pa dang / 'chad par 'gyur ba rnams kyi dam tshig nyams par 'gyur ba dang / ldang ba yang de nyid las shes par bya'o/ /yul dang bsam pa dang dus dang rkyen gyi bye brag gis nyes pa dang nyes pa med pa yang shes par bya'o/ /ltung ba bcu gsum pa'i bshad pa'o// // da ni ltung ba bcu bzhi pa'i mtshan nyid bshad par bya ste/ shes rab rang bzhin bud med la/ /smod par byed pa bcu bzhi pa/ /zhes bya ba smos te/ shes rab kyi rang bzhin ni sangs rgyas kyi yum shes rab kyi pha rol tu phyin ma ste/ de yang gsang ba dang shes rab ye shes kyi dbang gi dus su gzung ba dang /rig pa'i brtul zhugs nye bar bsten pa la bya ste/ de dag kyang khyad par dang bye brag gi dbye ba yang shes par bya'o/ /yan lag dus dngos gzhir 'gyur ba dang / yul dang bsam pa dang / dus dang rkyen gyi bye brag gis nyes pa dang lci yang dang nyes pa med pa la sogs pa yang shes par bya'o//ldang ba ni tshogs kyi 'khor lo la sogs pas so/ /shan 'dra ba ni bud med thams cad de phyogs su bsdu ba'o/ /bshags pa'i tshad kyang yan lag gi nyes pa'i tshad do/ /ltung ba bcu bzhi pa'i bshad pa'o// //de dag nye bar bsdus te bshad pa/ sngags pas de dag spangs na ni/ /dngos grub myur du thob par 'gyur/ /gzhan du dam tshig nyams pas na/ /nyams pas bdud kyis gzung bar 'gyur/ /de nas sdug bsngal myong 'gyur zhing / /thur du bltas te dmyal bar 'gro//de bsang rgyal bcom nas ni/ /bdag nyid dad ldan gus pa dang / /ma 'khrul pas ni gzung bar bya/ /gal te nyams na bla ma la/ /phul la sogs pas dri ma 'dag /bdag nyid gzhan la phan 'dogs pas/ /bla ma dkon mchog mchod byas shing //gsum la skyabs 'gro nas brtsams te/ /bsod nams tshogs ni nyer bsags nas/ /byang chub sems la sogs pa yi/ /sdom pa thams cad gzung bar bya/ /zhes pa la sogs pas bshad de/ de dag kyang tshig gnyis kyis phan yon bstan pa dang /tshig bshad gcig gis dam tshig las nyams pa'i nyes dmigs bstan pa dang / tshig bshad phyed kyis bdag nyid gus pa dang ldan pas ma 'khrul pas dam tshig gzung bar bya'o zhes bstan pa'o/ /tshig rkang gnyis kyis ni dri ma las ldang bar bstan to/ / tshigs su bcad pa phyed dang gnyis kyis ni bla ma dang dkon mchog mchod cing tshogs de nye bar gzung zhing / dam tshig dang sdom pa gzung bar bstan to/ /'di dag ni bsdus pa'i don to/ /yan lag gi don yang thabs dang shes rab dang / de kho na nyid bcu dang / rgyu dang / 'bras bu dang / thabs kyi de kho na nyid do/ /tshul bdun dang / bskyed rdzogs gnyis dang / bsnyen sgrub kyi bye brag gis bdag dang / gzhan gyi don bya bar 'dod pa ni sngags pa ste/ de lta bus dam tshig gi dri ma spangs pa ni snod du gyur pa ste/ mchog dang thun mong gi dngos grub thob par 'gyur ba'o//gzhan du dam tshig las nyams na ni tshe 'di la yang bdud kyis gzung ste sdug bsngal myong bar 'gyur la/ phyi ma la yang rdo rje dmyal ba la sogs par skye bar 'gyur ro/ /de dag la sogs pa'i tshad ni gong du bstan pas 'dir ma bstan to//de bas na bdag nyid ma 'khrul par rtag tu dam tshig rnams rjes su gzung bar bya'o/ /gal te nyams na yang bla ma la phul ba dang bshags pa'i tshad rnams kyis dri ma las ldang bar bya'o/ /bdag nyid la phan par 'dod pas/ /dkon mchog gsum la sogs pa la//skyabs su 'gro ba nas brtsams te bsod nams kyi tshogs nye bar bsag par bya'o/ /byang chub sems kyi sdom pa la sogs te sdom pa thams cad gzung bar bya'o/ /rdo rje theg pa'i rtsa ba'i ltung ba bcu bzhi pa'i rgya cher bshad pa'i nye bar bsdus pa'i bshad pa'o// //da ni yan lag gi nyes pa bshad par 'dod nas/ he ru ka dang slob dpon la phyag 'tshal lo zhes pa ni mchod par brjod pa sngon du 'gro bas/ rnam par thar pa'i sgo gsum dang ldan pa'i rgyu dang lam dang 'bras bu rnam par dag pa'i he ru ka dang bla ma tha mi dad la phyag 'tshal ba'i don to//rab tu bde ba 'phrog par byed/ /yan lag nyes pa bdag gis bshad/ /ces bya ba ni rab tu bde ba 'phrog par byed pa ni gzhi dam tshig las bde ba thams cad skyed pa'o/ /yan lag nyes pa nga yis bshad/ /ces pa ni yan lag gi dngos gzhi ma rdzogs pa'o//yan lag gi gtso bo tsam yod pa ni sbom po'o/ /bshags pa dus 'das pa ni lci ba'o/ /gzhan du ni nyes pa dang phra mo'o/ /nyes pa med pa yang shes par bya'o/ /de dag bye brag tu phye bas na nga yis bshad pa'o/ /de nyid bshad par 'dod nas/dam tshig dang ni mi ldan pa'i/ /rig ma bsten par dga' ba dang / /zhes bya ba smos te/ dam tshig dang mi ldan pa ni dbang ma thob pa dang / gsang mi thub pa dang / sngags pa bdag nyid lam dad pa dang / sku gsung thugs kyi rig ma'i lo grangs dang mtshan nyid dang mi ldan pa'o//ldan yang chags pas nye bar bsten zhing mya ngan las 'das pa la mi dga' ba la sogs pas bsten par byed na yan lag gi nyes pa'o/ /dri ma las ldang ba ni tshogs la bshags pa ste/ dam tshig dang ldan pa la rjes su bslab pa'o/ /shan 'dra ba ni phyogs su bsdu ba'o//yan lag gi nyes pa dang po bshad pa'o// //gnyis pa bshad par 'dod nas/ tshogs kyi 'khor lor rtsod pa ni/ /yan lag nyes pa gnyis par bshad/ /ces pa ni tshogs kyi 'khor lo dang / dpa' bo'i ston mo dang / tshogs kyi nang du rtsod pa ste/stan de nyid la zhi ba ni yan lag gi nyes pa'o/ /dus las 'das pa ni sbom po'o/ /gzhan du nyes byas dang phra mo'o/ /ldang ba ni de nyid las bshags shing nyes pa'i rim pas tshogs kyi 'khor lo la sogs pas dri ma las ldang ngo / /shan 'dra ba ni phyogs su bsdu ba'o//zhing dang bsam pa'i khyad par las kyang shes par bya'o/ /nyes pa med pa yang shes par bya'o/ /yan lag gi nyes pa gnyis pa'i bshad pa'o// //yan lag gi nyes pa gsum pa bshad par 'dod nas/ ma gsungs pa yi rig ma las/ /sngags pas bdud rtsi thob byed pa//yan lag nyes pa gsum pa yin/ /zhes bya bas bshad do/ ma gsungs pa ni smod pa'o/ /de las bdud rtsi lnga 'thob par byed pa ni yan lag gi nyes pa'o/ /bshags pa tshad las 'das pa lci ba'o/ /nyes pa phra mo dang nyes pa med pa yang shes par bya'o//ldang ba ni tshogs pa la bshags te/ dam tshig dang ldan pa'i bdud rtsi bsten par bya'o/ /gsungs pa'i rjes su 'jug par bya'o/ /yan lag gi nyes pa gsum pa'i bshad pa'o// //da ni yan lag gi nyes pa bzhi pa bshad par bya ste/ gsang chos yan lag shes gyur yang //gzhan la mi ston shes rab ngan/ /yan lag nyes pa bzhi pa yin/ /zhes bya ba smos te/ 'dod pa'i bsam pas gsang ba'i chos shes kyang gzhan la ston par mi byed na yan lag gi nyes pa spom po'o/ /bshags pa dus 'das pa ni lci ba'o//nyes pa dang phra mo dang nyes pa med pa yang shes par bya'o/ /ldang ba ni dam pa gcig la bshags te gcig la phan 'dogs pa la bya'o/ /yan lag gi nyes pa bzhi pa'i bshad pa'o// //da ni yan lag gi nyes pa lnga pa bshad par 'dod nas/ dad pas sems can chos kyi rgyu//gzhan gyi gtam byed byang chub sems/ /yan lag nyes pa lnga pa yin/ /zhes bya ba smos te/ dad pa dang ldan pa'i sems can chos kyi rgyu byang chub kyi sems la sogs pa'i gtam 'dri na chags pa'i dbang gis bre mo'i gtam la sbyor bar byed na yan lag gi nyes pa sbom po'o//bshags pa dus 'das pa ni lci ba'o/ /nyes pa dang phra mo dang nyes pa med pa yang shes par bya'o/ /ldang ba ni maN+Dal gcig sngon du 'gro bas dam pa gcig la bshags par bya'o/ /bsdam zhing rjes su gzung bar bya'o/ /yan lag gi nyes pa lnga pa'i bshad pa'o// //da ni yan lag gi nyes pa drug pa bshad par 'dod nas/ /nyan thos nang du zhag bdun 'das/ /yan lag nyes pa drug pa yin/ /zhes bya ba smos te/ nyan thos ni gang zag la bdag med pa tsam rtogs shing / lus ngag gi bslab pa la gnas nas rang gi don gyi mya ngan las 'das pa don du gnyer zhing zab mo'i don gyis 'jigs pa ni nyan thos so//de'i nang du zhag bdun 'das te rang gi spyod pa mi byed na yan lag gi nyes pa sbom po'o/ /bshags pa dus 'das pa lci ba'o/ /nyes pa phra mo dang nyes pa med pa yang shes par bya'o/ /dri ma las ldang ba ni tshogs pa la bshags te rjes su bslab pa'o//yul dang bsam pa dang dus 'das dang phra mo dang nyes byas dang / nyes pa med pa yang shes par bya'o/ /yan lag gi nyes pa drug pa'i bshad pa'o// //da ni yan lag gi nyes pa bdun pa bshad par 'dod nas/ rnal 'byor ye shes mi shes par//nga ni sngags pa yin zer ba/ /yan lag nyes pa bdun pa yin/ /zhes smos te/ rnal 'byor ye shes ni gsang sngags kyi de kho na nyid mi shes pa ste/ sgra tsam la mngon par zhen pas ni sngags pa'o zhes mngon pa'i nga rgyal gyis rlom sems pa ni yan lag gi nyes pa sbom po'o//bshags pa dus 'das pa ni lci ba'o/ /nyes pa phra mo dang nyes pa med pa yang shes par bya'o/ /ldang ba ni maN+Dal gcig tsam sngon du 'gro bas dam pa gcig gi mdun du bshags par bya ba dang / phyis bsdam zhing yang dag pa'i don la 'jug par bya'o//yan lag gi nyes pa bdun pa'i bshad pa'o// //da ni yan lag gi nyes pa brgyad pa bshad par 'dod nas/ /snod min sems can thams cad la/ /phyi yi chos 'chad byed pa las/ /gsang ba'i chos rnams 'chad pa ni/ /yan lag nyes pa brgyad pa yin/ /zhes bya ba smos te/'di yang rkyen du mi 'tsham pa'i gang zag la dus ma yin par 'dod pa'i bsam pas bshad na yan lag gi nyes pa sbom po'o/ /bshags pa dus las 'das na lci ba'o/ /nyes pa phra mo dang nyes pa med pa yang shes par bya'o/ /yul dang bsam pa dang dus dang rkyen gyi dbang las nyes pa lci yang dang nyes pa med pa yang shes par bya'o//dri ma las ldang ba ni tshogs pas ldang ba'o/ /'di dag thams cad shan 'dra ba ni phyogs su bsdu ba'o/ /khyad par gyi dgag pa med pa ni ltung ba bdun pa'i bshad pa las shes par bya'o/ /'di rnams yan lag nyes pa ste//bskal ba mang por dmyal bar skye/ /zhes bya ba smos te/ yan lag gi nyes pa gcig lo gsum ma bshags par dus 'das na bskal ba mang por dmyal bar 'gro'o/ /de'i phyir 'jigs pa dang bcas pa ste mi nyams par bya zhing / nyams na yang 'byor ba ci yod pas dri ma las ldang bar bya'o//yan lag gi nyes pa brgyad pa'i bshad pa'o// //rgyud gzhan las ltung ba'i mtshan nyid gzhan bshad pa yang brjod par bya ste/ rang lha blang dor ltung ba mig /de nyid dus 'das ri bong can/ /lha gzhan dga' ba yon tan no/ /rig byed dngos la zhen pa yin//ma rdzogs rdzogs byed mda' yin no/ /'jig rten chos phyir dbang po ste/ /khyad du gsod pa yang ni ri/ /gang min tshul ston bkra shis so/ /phrin las ma gtogs gza' zhes grags/ /don med gnas pa phyogs yin no/ /brtse ba gtong ba drag po ste/ /dman pa'i spyod pa nyi ma'o//zang zing rtog pa yan lag go/ /yongs su mi 'dzin sa zhes bya/ /rang spyod dor ba tshes zhes bya/ /zhes pa smos te/ de dag kyang yan lag du dang ldan pas nyes par 'gyur ba yang gong du bstan pa las shes par bya'o/ /de dag kyang rim pa bzhin du bshad par bya ste/mig ni gnyis so/ /rang lha dor ba ni yi dam spong ba'o/ /de la ma gus pa la sogs pa gnyis su brtags te blang dor ni ltung ba'o/ /thams cad mnyam pa nyid du rtogs pa dang / yang na rtog ge pa rnams kyis rang gi 'dod pa'i lha la dkyil 'khor gyi bdag po la sogs pa gzhug pa snang ste/gzhan yang mkha' 'gro ma sgyu ma bde ba mchog gi rgyud la dgongs nas/ de bzhin gshegs pa thams cad lus la bsdus nas byin gyis brlabs na khyad par du 'grub par 'gyur zhes bshad pas phyogs 'di lta bus kyang 'grub par 'gyur ro//gzhan yang dkyil 'khor gyi gtso bo 'pho ba la sogs pa yang tshul de nyid kyis shes par bya'o/ /dbang dang mi ldan pa la ldang ba'i dus na me tog bab pa dang / bla ma'i rjes su mos pa dang / thabs khyad par can thob pa dang / las gzhan dang 'brel pa'i dus rnams su nyes pa med do//thams cad du mnyam pa nyid rtogs na nyes pa med do/ /gzhan du nyes pa dang bcas pa'o/ /ri bong can ni zla ba ste gcig ces bya'o/ /de nyid dus 'das pa ni nyin dang mtshan mo 'das pa ste/ lha la lus dang ga dang yid kyis mchod pa dang yon tan gzung ba la sogs ma byas pa'o//le lo dang brjed ngas pa la sogs pas lan gnyis kyis bskang ba'o/ /bla ma'i bya ba dang na ba la nyes pa med do/ /yon tan ni gsum mo/ /lha gzhan ni mu stegs kyi lha rten pa la sogs pa la mchod cing phyag byed pa'o/ /bla ma la sogs pa mdun du byas nas gzhan 'dul ba dang /srog la bab pa dang / chad pa la sogs pa 'gal bar 'gyur na nyes pa med do/ /rig byed ni bzhi'o/ /dngos la zhen pa ni sgyu ma lta bur mi shes par dngos po ther zug tu dkyil 'khor la sogs pa bsgom pa'o/ /dmigs pa 'dzin pa dang rtas par byed la la nyes pa med do//mda' ni lnga'o/ /ma rdzogs pa ni bdag smin par ma byas pa'o/ /rdzogs pa ni gzhan smin par byed pa'o/ /rang rdzogs nas gzhan rdzogs par byed pa la nyes pa med do/ /dbang po ni drug ste/ 'jig rten chos ni tshe 'di tsam gyi don du zab mo la zhugs te phyi ma la sogs pa gzhan gyi don du byang chub 'dor ba'o//gtsor byas pa las zhar la rgyas pa la nyes pa med do/ /ri ni bdun no/ /khyad du gsod pa ni bslab pa 'og ma dang nyes byas la sogs pa'i dam tshig mi srung ba'o/ /gong ma dang 'gal ba dang / yar ldan pa dang / na ba la nyes pa med do//bkra shis ni brgyad do/ /gong min tshul ston pa ni gzhan dad par byas nas rnyed pa la sogs pa don du gnyer ba ste/ shes bzhin du yon tan dang ldan par bstan pa'o/ /'khrul ba dang gdul bya mthong ba dang ma rtogs pa la nyes pa med do/ /gza' ni dgu'o/ /phrin las ma rtogs pa ni zhi ba la sogs pa sngon du bsnyen pa ma byas par sbyor ba byas pas las gang yang mi 'grub pas skur pa dang the tshom skye ba ste nyes par 'gyur ro//'phral du spyad par 'os pa la mthus bstangs pa la nyes pa med do/ /phyogs zhes pa ni bcu'o/ /don med gnas pa ni smin par byas nas rkyen drag po med par snyom las dang bcas par dus 'da' bar byed pas nyes pa dang bcas pa'o//'dul ba dang gzhan dang 'gal ba na nyes pa med pa'o/ /drag po ni bcu gcig pa'o/ /rtse ba gtong ba ni don mthong ba yal bar 'dor ba ste nyes pa dang bcas pa'o/ /bdag gis mi nus pa dang gzhan yod pa la nyes pa med do//nyi ma ni bcu gnyis zhes bya ba ste/ dman pa'i spyod pa ni rnal 'byor chen po'i dam tshig blangs nas gong ma la skrag nas nyan thos la sogs pa'i spyod pa byed pa'o/ /gzhan 'dul ba dang / kha na ma tho ba spang ba'i phyir dang / dus shes pas spang pa la nyes pa med do//yan lag ni yid de bcu gsum mo/ /zang zing rtog pa ni 'jig rten chos la chags na bka' dang 'gal bas gzhan gyi ngor 'jug pa'o/ /gdul ba'i thabs dang / don chen por 'gyur na nyes pa med do/ /sa ni bcu bzhi pa'o/ /yongs su mi 'dzin pa ni sdom pa zhig pa rnams so//de yal bar 'dor ba ni nyes par 'gyur ro/ /rang nyes pa khas len pa dang / gzhan 'dul ba dang / 'du shes pa la nyes pa med pa'o/ /chos zhes bya ba ni bco lnga pa'o/ /rang spyod 'dor ba ni rang gi spyod pa mi byed pa'o/ /spyod pa de yang rnam pa bzhi ste las dang po pas kun du bzang po'i spyod pa bya bar gsungs te/rgyud gzhan las kun du bzang po'i spyod pa gnas skabs gzhan du yang bstan te dgongs pa gzhan no/ /cung zad brtan pa thob nas rig pa'i brtul zhugs kyi spyod pa ste/ sngags spyod kyis zla ba drug la sogs par bya bar bshad do//brtan pa thob pa rnams kyis mgon po kun du spyod pa la gnas par bya'o zhes bshad pa'i rgyud chen po las bshad do/ /de nas mnyam gzhag gi spyod pa chen po rang bzhin gyi rtog pa dang bral ba gnyis kyi rnam par bral ba ste/ de la ni blang ba dang dor ba'i shes pa las 'das pa'o zhes bshad pa ste/snod kyi rim pas rgyud sna tshogs la spyod pa'i tshul dpag tu med pa bstan te/ de'i phyir na de rnams kyi dgongs pa dang / snod kyi rim pas rdo rje slob dpon gyis spyod pa'i tshul yang mtha' yas pa de dag gi rim pa dang sbyar te/ sman dang sman pa dang / nad pa dang nad kyi bye brag gi tshul gyis shes par bya'o zhes gsungs pas shes par bya'o//'dir rnal 'byor gyi lam rnam pa gnyis su shes par bya ste/ rnal 'byor la brten pa dang / thabs kyi dam tshig la brten pa'o/ /kha cig dam tshig la brten nas rnal 'byor gyis grol ba yang yod/ kha cig rnal 'byor la brten nas dam tshig gis grol ba yang yod/ kha cig 'di la dngos grub thob pa yang yod/ kha cig bar ma dor thob pa yang yod/ kha cig skyes nas thob pa yang yod/ kha cig ni lan grangs gzhan la thob pa yang yod de/ de dag kyang rnal 'byor chen po'i tshul du spyod pa rnams so//de bas na las dang po pa'i rnal 'byor pas kun du bzang po'i spyod pa kha na ma tho ba dang bral bas gnas par bya ste/ de yang rnal 'byor gyi rgyud cho gzhi ba mo pa rdo rje rtse mo la sogs pa dang yang 'gal bar mi byed pa ste/ brtan pa ma thob pa nyams par 'gyur ba dang / kha na ma tho bas ma dad par 'gyur ba dang /mtshan ma'i g.yeng ba sna tshogs su 'gyur bas sdom pa gsum la gnas par bya'o/ /thabs dang shes rab kyi rgyud kyi rnal 'byor pas sdom pa gsum ldan la gnas pas kyang rang rang gi cho ga las nyams pa ni las dang po pas kyang mi bya'o/ /gzhan du ni khyim pa'i tshul gyis kyang sdom pa rang rang dang mthun pa la gnas par bya'o//dge slong rdo rje 'dzin pa ni thams cad kyi nang na mchog ste/ de skad du yang tshogs kyi 'khor lo'i dus su khyim pa'i rdo rje slob dpon mkhas shing nus pa dang ldan yang dge slong rdo rje 'dzin pa slob dpon du mchog go/ / de med kyang dge tshul gyis bya'o/ /de dag kyang med na khyim pa'i rdo rje slob dpon gyis bya'o zhes bshad pa'i phyir ro/ /de'i phyir/ byang chub sems 'dzin gyur nas ni/ /lha gzhan la ni mi mos pas/ /dkon mchog gsum la dad pa dang / /de la gzhol zhing 'bad pa yis/ / gsod dang rku dang 'khrig pa dang / /brdzun dang chang ni rnam par spang / /khyim pa'i tshul du gnas nas ni/ /gsang sngags rgyal po rnam par sgrub/ /gal te de ni rab byung na/ /sdom pa gsum la gnas par bya/ /so sor thar dang byang chub sems/ /rig 'dzin rang gi sdom pa'o/ / zhes bshad pa'o/ /gzhan yang / khyim pa'am rab tu byung yang rung / /brtan pa ma thob bar du ni/ /kha na ma tho rdul med par/ /bdud rtsi lnga la rtag tu spyad/ /khrus dang sdom pa sngar spyad med/ /dka' thub kyis kyang mi gdung bar/ /'dod pa thams cad spyad par bya/ /ci bde bar ni gnas nas bsgrub//'jig rten ma dang smod gyur nas/ /de nyid kyis ni nyams 'gyur bas/ /bskal pa brgyar yang mi 'grub bo/ /rang gi spyod pa ma yin pa/ /bslab pa kun dang grong khyer skad/ /de las nyams par mi bya'o/ /zhes bshad pa'i phyir las dang po pas rang gi spyod pa'i tshul las ma nyams par sdom pa thams cad la gnas par bya'o//de'i phyir sdom pa gsum la gnas pa ni rnal 'byor chen po'i don la 'jug pa thams cad kyis gnas par bya ste/ khyim pa la sogs pas kyang rang dang mthun pa'i sdom pa gsum la gnas par bya'o/ / de dag las dri ma las ldang ba yang bye brag tu ldang ba'am/ tshul gcig la ldang ba la mkhas pas tshul gcig pa'i tshul du ldang bar bya'o/ /de dag las phan tshul 'gal ba yang dus dang gang zag gi nus pa dang bsam pas mi 'gal bar shes par bya ste/ /yul dang rkyen dang gdul bya dag shes par bya'o//de'i phyir/ chags bcas nor bu 'das pa dang / /rin thang tshang ba thob blo ldan/ /shes bzhin mi gzhan bsad pa dang / /mi chos bla ma nga rgyal byed/ /khu ba 'byin la sogs pa rnams/ /chos 'dul 'dir ni rtsa ba chad/ /bdag bstod gzhan la smad sogs kyi//pham 'dra'i nyes pa byas pa rnams/ /tshul bzhin gnas pas rab tu bsten/ /bla ma la sogs gnod byed bsad/ /dge mthong dbang sogs brtul zhugs dus/ /gzhan gyi bud med spyad par bya/ /sems can don mthong chos rnams brdzun/ /'phags nor ser sna can nor phrogs//chos 'dul ba las rtsa ba chad/ /gzhan du sems dge thabs chen ldan/ /brtan pa ma thob bar du yang / /sdom gsum ldan pas 'jug mi bya/ /bde ba 'dzin nus ma yin par/ /gzhan yang 'jug pa ma yin no/ /de sogs bye brag tshul gnas kun/ /mkhas pas rang gis phye la dpyod//bstan la gnod pa 'jig pa rnams/ /dang po 'jig rten gnod sogs spang / /zhes bshad pa ste/ /de bas na brtan pa thob pa dang / gzhan gyi don khyad par du nus pa dang / dgon pa chen po dang / dur khrod la gnas pa dang / dgongs pa mtha' dag gi don shes pas dus la mkhas par bya ste/bag yangs su gnas par bya ba dang / spyod pa khyad par can la 'jug par bya'o/ /de'i phyir/ dang po bdud rtsi bsams te bza'/ /yang na dri bsang rim gyis bslab/ /gzhan du 'bar 'bud bdud rtsir mthong / /rtog dang bral ba mchog yin no//thams cad mkhas 'dra bdud rtsi yin/ /nyon mongs rigs shes mkhas pas so/ /bsad dang gso bar nus pa dang / /'gugs dang mi snang sbed shes pas/ /sngags kyi brtul zhugs spyad pa'o/ /zhes bya ba la sogs pas spyad par bya ba'i rim pa yang las dang po pas sdom pa gsum la gnas par bya'o//de'i phyir/ cho ga zhib mo'i tshul 'di dag kyang rang gi tshul 'di dang 'gal ba ma yin par spyad par bya'o zhes gsungs pa'i phyir cung zhig bshad par bya'o/ /gzhan dag phyi rol gyi tshul ni 'dir brtag pa ma yin no zhes smra ba de dag la bshad zin pas ma spros so//de'i phyir/ gtsang zhing gos kyang gtsang bar bya/ /gtsang ma'i grogs dang lhan cig tu/ /rdo rje sdom pa dam pa yi/ /bslab pa'i tshig ni yang dag blangs/ /dkon mchog bzhi yi sbyor ba dang / /phyag rgya de la gzhol bar bya/ /sangs rgyas chos dang dge 'dun dang / /slob dpon dang ni pha ma'o//nyin re zhing ni ci nus par/ /khrus bzhi rab tu sbyor bar bya/ /rnal 'byor ji ltar 'khru ba dag /go rims bzhin du bshad par bya/ /sdom pa gsum la gnas pa ni/ /dang po khrus su bshad pa yin/ /gnyis pa yi ni khrus bshad pa/ /bshags dang gsol ba la sogs pa'o/ /phyag rgya dgrol ba gsum pa'o//bzhi pa chu ste tha ma'o/ /khrus kyi cho ga 'di rnams kyis/ /mkhas pa rnams kyis de bzhin bkru/ /gos gsum dag kyang brje bar bya/ /dang po'i gos su bshad pa ni/ /sdom pa gsum la gnas pa dang / /sgrub po'i cho ga dag pa'o/ /gnyis pa khrel yod ngo tsha shes//gsum pa thub pa'i gos rnams so/ /gos gsum du ni yongs su bsgrags/ /thams cad bza' dang 'dod pa ni/ /kha na ma tho gang med pa/ /sha chang sgog pa la sogs pa/ /mi bza' rnam par spang bar bya/ /dri mi zhim dang mi gtsang ba'i/ /bza' dang btung ba rnams kyang spang / / gzhan la gnod dang ldan pa dag /sems kyis kyang ni mi bya'o/ /g.yem pa kun gyi sbyor ba yang / /mi sdug bsgoms la spang bar bya/ /bsod nams byed la rtag tu brtson/ /theg pa chen po'i don sems pa/ /byang chub sems dpa'i tshul rgya che/ /shes rab pha rol phyin la mkhas/ / klog cing rnam par sems pa dang / /yang dang yang du gsol ba 'debs/ /dgra dang zun dang tha ma la/ /sems snyoms mi 'jigs rab tu sbyin/ /zhe sdang 'joms pa bsgom pa ni/ /byams shing dga' la nges pa can/ /chos dang gang zag bdag med pa/ /'dus byas rnams kyang 'khrul ba tsam//mngon sum blo can brtan pa ni/ /'dus byas kun gyis mi rmongs so/ /srog la 'bab par gyur na yang / /byang chub sems ni mi gtong zhing / /rdo rje dril bu phyag rgya yang / /nam yang gtang bar mi bya'o/ /byang chub sems gang de rdo rje/ /shes rab dril bu zhes bshad do/ /slob dpon smad par mi bya ste/ /bla ma sangs rgyas kun dang 'dra//sbyor ba lhod par ma gyur pas/ /go cha rab tu brtan par gyis/ /pha rol phyin drug spyod pa yang / /rim pa bzhin du slob par byed/ /sems can kun gyi don dang ldan/ /byang chub sems dpa'i tshul spyod pa/ /kha na ma tho rdul tsam yang / /srog la yang de mi blta bar/ / rab tu byung dang khyim pa yi/ /'du 'dzi dag kyang rnam par spang / /bu dang chung ma dag la yang / /sred pa'i bcing ba dag las grol/ /brkam dang chags dang gdug pa med/ /rmongs pa dang ni le lo med/ /bag yod spyod cing brtson 'grus che/ /rnal 'byor sgrub pa bsgrub par bya/ /lta ba kun las rnam par grol//yang dag nyid kyi lam bsgom pa/ /dgongs pa'i tshig la rab tu mkhas/ /don shes don ni rtogs par 'gyur/ /tshul dang tshul min cho ga shes/ /de nyid rnal 'byor rab tu mkhas/ /sems can kun la rab tu byams/ /byang chub spyod pa'i don sems pa/ /'di 'dra'i tshul ni bzang po la/ /de lta bu yi sgrub pa yis//grol ba dang ni dngos grub 'thob/ /dngos grub thams cad dogs pa med/ /phyogs dang gos dang zas rnams la/ /'bags pa thams cad rnam par spang / /lha rnams smod par mi bya zhing / /rnam pa yang ni spang bar bya/ /nyi ma re re rab bsdams shing / /bsrung ba'i cho ga byas pa las/ / bgegs ni med kyis ma 'jigs shig /sems ni rab tu gdul dka' 'di/ /bgegs ni cung zad med snyam pas/ /sems ni dag pa nyid du 'gyur/ /rang gi sems ni bdud ces gsungs/ /rang gi sems ni bgegs yin no/ /rnam par rtog pa thams cad spangs/ /rnam par rtog las bgegs kun 'byung / / gdul dka'i sems ni rab bzung nas/ /'dod pa lnga ni spang bar bya/ /sngon gyi rjes su dran nas brtsam/ /rdo rje sems dpa' bsgom par bya/ /'jig rten na ni gang zag bzhi/ /bskal pa brgyar ni brtson byas kyang / /cho ga bzhin du kun spyad kyang / /de dag 'grub par yod mi 'gyur/ /byang chub sems ni ma bskyed dang //the tshom yod pa nyid dang ni/ /gang zhig bka' stsal mi byed dang / /ma dad pas ni mi grub bo/ /pha dang mar ni shes pa dang / /tshangs dang dge sbyong 'bad pa dang / /gtsang zhing zhi ba dul ba dang / /bsdams shing thar pa la sems pa/ /rgyal srid mtho ris longs spyod dang / /'dod pa'i yon tan brtson phyir min/ / gzhan du sems can thams cad phyir/ /rdzogs pa'i byang chub bsngo byas pa/ /de bzhin kha zas tshod shes shing / /mtshan mo mi nyal ba la dga'/ /'dod chags zhe sdang la sogs 'byung / /rnam par rtog pa mi sems shing / /sems ni rab tu dga' gyur nas/ /mi g.yo bar ni sems par bya/ /legs bshad shin tu rnam phye ba'i//chos kyi don la mngon par dga'/ /sems can gnod la sogs pa'i rgyu/ /drag shul spyod pa'i las mi byed/ /sems can gdug pa la sogs pa'i/ /nyes pa dag kyang rab tu bzod/ /rig sngags mtshon dang de bzhin mtshan/ /lha yi bcings pa rnams dang ni/ /dam nam dag dang lha yi grib//lha yi mtshan ma la sogs kun/ /bza' ba dag ni sna tshogs pa/ /mtshan ma'i mtshan nyid byas pa rnams/ /mi 'gong zhing ni mi bza' ste/ /nam yang brdzi bar mi bya'o/ /dkon mchog gsum gyi dkor rnams la/ /nam yang spyad par mi bya'o/ /zhes bya ba la sogs pa rgya cher bshad do/ /lus dang ngag dang spyod pa bstan pa yang rang gi tshul dang 'gal bar ma gyur pa rnams spyad par bya'o//de dag las/ dri mi zhim dang bcas pa yang / /'dod pa lnga ni spang bar bya/ /zhes bya ba la sogs pas rang gi tshul ci rigs par shes par bya'o/ /de dag la sogs pa yang tshul ji ltar spyad pa la sogs pa rdo rje phreng ba las bshad pa'i dgongs pa mkhas pas spyad par bya'o//de bas na brtan pa ma thob pa'i dbang du byas nas slob dpon ye shes zhabs kyis gzhan yang rgyud gzhung 'jug gi rnal 'byor pas/ /rnal 'byor bzhi yi cho ga dang / /snang srid sgyu ma'i sbyor ba yis/ /'gro 'chag nyal dang 'dug pa rnams/ /sku gsung thugs kyi mdzad pa'o//byed dang smra dang bskyod pa rnams/ /b+ha ga las ni g.yeng mi bya/ /zas ni bdud rtsir rab dmigs la/ /tha dad med pa'i dkyil 'khor du/ /phyi yi sbyin sreg tshul du ni/ /rtag tu tshogs kyi mchod pa bya/ /'gro ba rang bzhin dag pa yis/ /dbang bskur ba yi cho gas ni/ /phyi yi chus kyang bkru par bya//nyal ba shes rab snying rjes nyal/ /ldang na dpal ldan glu yis bskul/ /thams cad rang bzhin dag pa yis/ /dag pa'i lha dang gnas su snang / /sems nyid cir yang snang ba'i phyir/ /bde sdug rnam par grol ba'o/ /zhes bshad pa'i tshul gyis na brtan pa ma thob pa las dang po pa'i spyod pa rnams kyi spyad pa bstan pas shes par bya'o//de bas na las dang po bsdom pa la mi gnas shing rang gi spyod pa'i tshul cho ga zhib mo 'dor ba dang / gong ma'i spyod pa khyad par can la 'jug pa ni bya dgos pa'i spyod pa ma byas pa dang / re zhig bya ba ma yin pa'i spyod pa byas pa'i phyir ltung bar 'gyur ro/ /sdom pa gsum la gnas shing rang gi spyod pa tshul bzhin du byed pas gong ma'i spyod pa shes par bya ba la nyes pa med do//bslab par bya ba yin pas de bas na thos pa btsal zhing bsam par bya'o/ /de nas cung zad brtan pa thob nas gsang sngags kyi spyod pa la 'jug par bya ste/ rig ma mtshan dang ldan pa cha lnga dang ldan par byin gyis brlabs te/yongs su smin pa dang bde ba chen pos de kho na nyid brten par bya ba zla ba drug la sogs pa dgon pa chen por bdud rtsi rnam pa lnga la sogs par spyad cing / /rang gi de kho nas ri lu la sogs pa khar bcug la bsgrub par bya'o/ /de dag kyang rtog pa dang bral bas spyad par bya'o//de'i phyir bdud rtsi la sogs pa ni rtog pa med pas bsgrub par bya ba dang / rang bzhin gyi nus pa dang ldan pas grub pa'i phyir rjes su bsngags pa'i phyir rtag tu spyad par bya'o/ /gzhan yang bsams te bza' ba dang / thog ma nas bslab par bya'o/ /de'i phyir na rtog ge ba rnams kyi rtog pa bsal ba'i phyir sgyu 'phrul dra ba las gsungs pa/bshang gci khrag dang ga bur rnams/ /sha chen dag kyang sbyin sreg bya/ /ci ste ye shes sems dpa'i zhal/ /mi gtsang ba yis bkang na ko/ /ji ltar sdig pa skye mi 'gyur/ /gal te sdig gyur 'bras bu gang / /sems can mi shes pas rmongs nas//thabs dang shes rab rnam spangs shing / /phyi rol dngos la mngon zhen pa/ /rnam rtog dra bas blun byas gang / /de dag gis ni dge sdig gi/ /phung po gnyis su rnam par brtags/ /chos 'dir rang bzhin gyis dag ste/ /skye ba med cing gnas med kyang / /sems can gnod pa sel ba'i phyir//sangs rgyas rnams kyis thabs kyis bstan/ /dam pa'i don du dge spangs na/ /bsod nams med pa ci zhig smos/ /dper na chu klung chus gang ba/ /pha rol 'gro ba'i sems can dag /rtswa dang shing la sogs bsdus te/ /chu la rkyal ba'i gzings byas nas/ /de la 'jus te legs rgal nas//bor te bde bar 'gro ba ltar/ /de bzhin 'khor ba pha rol gyi/ /chos kyi lam ni bskyed byas nas/ /chos dang chos min rnam spangs la/ /byang chub bde ba 'thob pa bzhin/ /de bzhin rnam rtog dra spongs la/ /shin tu zab mo'i chos spel te/ /de bzhin gshegs pas gsungs lam la//sngags rig rnam rtog ma byed cig /rnam rtog rmongs pa chen po ste/ /'khor ba'i rgya mtshor ltung byed pas/ /nam mkha' lta bu dri med pa'i/ /rnam par mi rtog ting 'dzin gnas/ /dbang po gnyis ni mnyam sbyar te/ /lus dang ngag dang sems bsdus nas/ / nga'o snyam nas gzi bskyed gzugs/ /rnam pa kun gyis rnam brgyan nas/ /rnal 'byor ldan la tshe 'di la/ /ye shes rdzogs pa nyid du 'gyur/ /las las byung bar bstan pa yis/ /skyes pa bud med gzugs mang la/ /brnyas pa nyid du mi bya zhing / /rdo rje lus can dam tshig yin//ngan rtog bzang rtog dra ba yis/ /sems kyis sems can rnams la ni/ /sna tshogs gtum pas sun mi dbyung / /rdo rje sems ldan dam tshig yin/ /srid pas skye rtsub phra ma yis/ /tshig dag rnam par mi smra zhing / /nyan na bde bar 'dod pa yis/ /rdo rje ngag can dam tshig yin/ /rnam par snang mdzad cher 'khrugs mchog /sha yi khams la gnas pa yin/ /rkang la mi 'khrugs rgyal po ste/ /khrag la rin chen 'byung ba'i gtso/ /sems can rnams kyi rus phung po'i/ /rus gong la ni 'od dpag med/ /rtsa ba'i tshigs rnams ma bral ba/ /thub pa'i skyes mchog don yod grub//dam tshig shes pa rnams la ni/ /gsang chen nga yis bstan pa 'di/ /blo ldan rdo rje sems kyis ni/ /rtag tu bsten cing bsgom par bya/ /'dod chags zhe sdang de bzhin rmongs/ /sred dang 'du byed rnams 'phel ba'i/ /chos 'di rnam pa lnga po 'di/ /thub pa skyes mchog rnams kyis gsungs//bshang gci khu ba mchil ma khrag /'dzag pa 'byung ba bzhis bsdus pa/ /sgom pa'i blo gros rdzogs pa yis/ /dam tshig rtag par bya ba ste/ /rtag tu bza' zhing sbyin par bya/ /zhes bshad pas 'di'i don la mkhas pas rtog pa med pas 'grub par 'gyur ro/ /de bas na gsang sngags kyi brtul zhugs kyi skabs su khyad par du spyad par bya'o//rang gi rigs las byung ba'i bu mo smin par byas la spyad par bya ste/ kha na ma tho ba dang bral bas cho ga bzang po dang ldan pa bsten par bya ba'i phyir de nyid las/ de nas bu mo mig yangs mo/ /lo ni bcu drug lon pa la/ /gzugs dang mdangs dang lang tshor ldan//gser gyi rna cha g.yo ba can/ /gcig cig legs par btsal nas su/ /lha mo byi dor legs byas te/ /rigs lnga yi ni mtshon cha can/ /las kyi rjes su bsgoms byas nas/ /bzhag ste sprad pa'i sbyor ba yis/ /pad+ma la ni rdo rje gzhug /sprad pa dang ni 'khyud pa yis/ /rdo rje dang ni pad+mas bskul//gar gyi tshul du bsgyur ba dang / /de bzhin spro dang bsdu ba yis/ /zhes bya ba la sogs pas bstan pa dang / gzhan yang thabs dang shes rab kyi rgyud mang po las dgongs pa can gyi tshig bstan pa rnams/ don gzhan la dgongs pa rnams gdul bya khyad par du gyur pa'i phyir bsam pa la dgongs pa dang /brtan pa thob pa'i gang zag gi dbang du mdzad pa'i phyir gzhan du na ltung bar 'gyur ro/ /lam 'di lta bu la brten pa dang brten pa ma yin pa yang rnal 'byor pa'i nus pas 'gugs pa dang / mi snang bar byed pa la sogs pas bya bar gsungs kyi/ gzhan du snyigs ma lnga'i dus su gang zag ngan song du gzhol zhing 'dod pa dang ldan pas thabs shes rab kyi rgyud la brten nas dus dang snod du ma gyur pa yang /'dod chags la sogs pa'i bsam pas sgra ji bzhin du sbyar bas phal cher ngan song du skye ste rdo rje theg pa spong bar 'gyur ro zhes gsungs pa'i phyir/ dgongs pa'i don la mkhas par bya'o/ /brtan pa cher thob rnams kyis ni//mgon po kun du spyod bya ste/ /rtog pa dang bral brtan thob pas/ /thams cad bza' zhing thams cad byed/ /'di yis mi bya gang yang med/ /cung zad mi smra gang yang med/ /rtag tu mnyam par bzhag pa ste/ /'dzem dang 'jigs pa yod pa min/ /dogs pa med pa'i sems kyis su/ / sngags pa seng ge bzhin du rgyu/ /srog dang rtsol ba bsdams pa med/ /nyon mongs dug sogs rang bzhin dag /lam dang gnyen po spang bya med/ /mgo skyes gyen 'greng ras dang bral/ /thal bas byugs nas thod pas brgyan/ /thig le bkod nas kha T+wAM 'dzin/ /la lar smra bar mi byed cing / /drag tu rgyug cing grong khyer rgyu//rgyal mtshan ldan mthong chad 'gugs shing / /khrag dang khu ba de bzhin te/ /dge slong la sogs phyag mi byed/ /lha rten phyag byas 'gas par 'gyur/ /ri lu mi snang rgyal po'i khyim/ /yul gyis bskyod pa ma yin te/ /'jig rten chos la chags sdang med/ /sangs rgyas la sogs phyag mi byed//glang chen myos dang seng ge zhon/ /nags dang ri khrod bsod snyoms 'jug /dur khrod tshong khang srang du rgyu/ /'byung po bzhin du gnas pa mchog /'di ni kun du spyod pa'o/ /zhes bya ba la sogs pas bshad de/ de'i phyir 'di ni brtan pa thob pa rnams kyi'o/ /gzhan du thog ma nas 'jug pa de dag phal cher nyams te ltung bar 'gyur ro//de bas na rim pas 'jug pa rnams ltung bar mi 'gyur bar shes par bya'o/ /bskyed pa'i rim pa dang / rdzogs pa'i rim pa la rim pa bzhin du 'jug pa'i rnal 'byor pas kyang spyod pa'i tshul de bzhin du gnas par bya ste/ de'i phyir/ bskyed pa'i rim la legs gnas te//rdzogs pa'i rim pa 'dod rnams la/ /thabs ni rdzogs pa'i sangs rgyas kyis/ /skas kyi rim pa bzhin du gsungs/ /zhes bshad pa 'di yang legs par bshad par 'gyur ro/ /de nas mnyam par bzhag pa'i spyod pa chen po rang bzhin gyis rtog pa dang bral ba mi rtog pa'i ye shes la 'jug pa la gnas par bya ste/de'i phyir/ 'di yi spyod pa la gnas pas/ /spros bcas med cing mnyam gzhag med/ /bya dang byed dang rtsol las 'das/ /dag dang ma dag dngos po rnams/ /sgyu ma bzhin du dngos med par/ /brtags pas dben pas blang dor med/ /'dod chags la sogs mi spong ste/ /gzhan gyis sangs rgyas sgrub mi byed//yod med rtag chad mtha' las 'das/ /kha dog dbyibs med lus ngag med/ /srog rtsol rim dang cig car spong / /yi ge mtshan ma phyag rgya med/ /phyogs bcu gang la'ang gnas mi byed/ /gzung 'dzin rnam rtog yul las 'das/ /dam tshig sdom pa dkyil 'khor med/ / de nyid bcu la rnam mi rtog /bsgom bya sgom byed bsgom pa med/ /sangs rgyas sems can bdag rtsol bral/ /rgyu 'bras lam la sogs pa spong / /rgyu dang mi rgyu'i dngos rnams la/ /nam mkha' bzhin du rtog mi byed/ /mchod rten glegs bam la sogs spong / /bdud dang dngos grub gnyis su med/ / rang rig shes brjod yul las 'das/ /sgra dang brda dang dbang po yis/ /'di la bstan bya rdul yang med/ /rtog ge'i spyod las 'das pa ste/ /dam pa'i rjes 'brangs rang gis rig /mthong ba med pa'i dam pa mthong / /rjes su shes pa sgyu ma bzhin/ /rab mtha'i shes pa rtog goms pas/ / rtog med gzhan don nor bu bzhin/ /sku gsum ye shes lnga la sogs/ /thub pa'i yon tan dpag bsam shing / /ston dus skad cig gis rdzogs ltar/ /de phyir de la gsang ba 'dus/ /bzhi pa'i dbang gis rab tu brgyan/ /de nyid dpal mchog dang po ste/ /rdo rje sems dpa' mthar phyin lam/ zhes bshad pa'i phyir 'di ni mthar phyin pa'i spyod pa ste/ mnyam par bzhag pa'i spyod pa chen po'o/ /dus shes pa'i spyod pa las 'gal bar spyod pa rnams kyi ni bdud kyi las su rig par bya'o/ /bla ma'i bka' dang don chen po mthong ba dang / gang zag la sogs pa'i dus shes pa dang / srog gi bar chad du 'gyur ba la nyes pa med do//ltung ba de dag la nyes pa che 'bring gi rim pas dbang dang tshogs la bshags pa dang / dkyil 'khor sngon du 'gro bas dam pa gcig la bshags pa'o/ /phyis bsdam par bya ba la bslab par bya'o/ /ltung ba bco lnga pa'i rnam par bshad pa'o// //da ni yan lag gi nyes pa bshad par bya ste/de'i phyir/ dam pa nyer bsten cig shos min/ /snod dang ldan pa rnam par brtag /'dod phyir gzhan la gnod pa spang / /dkon mchog la sogs nor la min/ /gzhan don skad cig yal mi dor/ /byang chub min par dge mi 'jug /rnam shes 'pho ba de nyid mkhas//gzhan du yan lag nyes pa'o/ /de nas sdug bsngal chen po 'thob/ /zhes bshad pa ste/ 'di dag gi spyi'i mtshan nyid gong du bstan pa las shes par bya'o/ /dam pa nye bar bsten pa ni bla ma dam pa ste/ de yang sgyu 'phrul dra ba las/ slob dpon med par gyur na ni/ /dngos grub thob par mi 'gyur bas//slob dpon mtshan nyid bshad par bya/ /ye shes snying po khyod nyon cig /brtan zhing dul la blo gros ldan/ /bzod ldan drang zhing g.yo sgyu med/ /gsang sngags rgyud kyi sbyor shes pas/ /dkyil 'khor bri ba'i las bya'o/ /de nyid bcu ni yongs shes shing / /sems can kun la mi 'jigs sbyin//theg pa mchog la rtag dga' ba/ /de ni slob dpon yin par gsungs/ /zhes bshad pas dam pa ma yin pa bsten na yan lag gi nyes pa'o/ /cig shos min pa ni dam pa ma yin pa ste de nyid las/ phyi rol bstan bcos yongs shes shing / /nyan thos rnams kyi lam bsgrod kyang / /gsang ba de nyid bsdu ba dang //theg pa chen po mi shes pa/ /snying rje yod pa ma yin dang / /dad med brtson 'grus mi ldan pa/ /rtag tu ngan pa'i tshul spyod dang / /bstan bcos rnams la smod pa yin/ /zhes bshad pas so/ /de bas na bla ma gzhan gyi don byed pa mchog go/ /bdag gi don can nyon mongs pas zil gyis non pa ni mchog ma yin pa'o zhes bshad pas de bsten pa de ni yan lag gi nyes pa'o// //snod dang ldan pa ni yang slob ma ste/ de nyid las/ dge ba sgom la dga' ba dang / /rtag tu bla ma la gus dang / /rgyun du lha rnams mchod byed pa/ /yon tan ldan pa slob ma yin/ /slob dpon ci 'drar lta zhe na/ / bla ma sangs rgyas kun dang mnyam/ /de nyid rtag tu rdo rje 'chang / /zhes bya ba la sogs pa de nyid rgyas par shes par bya'o/ /de bas na snod min bsten pa ni yan lag gi nyes pa'o/ /rin chen can ni smin par byas pa'o/ /'dod phyir gzhan la gnod pa spang / /zhes bshad de/ 'dod pa ni nyon mongs pas kun nas bslang ba ste/des mi bzad pa dang / sha dang pags pa dang rus pa'i phyir yongs su smin par byas pas de dag spyad na yang yan lag gi nyes pa'o/ /min na ni ltung ba'i phyogs su bsdu bar bya'o/ /de ni dri ma las ldang ba yang de nyid kyi phyogs su bsdu'o/ /dkon mchog la sogs nor la min/ / zhes bshad pa ste/ dkon mchog gsum dang / grogs khyad par can rdo rje spun la sogs pa'i dkor la ma byin par mthu dang 'jab bus spyad na ltung ba la sogs par 'gyur te/ de yang zhing khyad par can gyi nor bdun ri ba phul te/ de nas dpa' bo'i ston mo byas la/ 'dus pa la bshags te bsdam par bya'o//tha na bdug spos kyang mnam par mi bya'o zhes bshad pas so/ /rim pas na smad pa'o/ /tha mal pa dus shes pas so/ /ser sna can la mthu la sogs pas phrogs te don dang bcas pas spyad par bya'o zhes bshad pas de'i phyir rim pa shes par bya'o/ /gzhan don skad cig yal mi 'dor//zhes bya ba ni gong du bshad zin to/ /byang chub med par dge mi 'jug /ces bshad pas ni/ smin par byas pas tha na lus ngag gi dge ba phra mo gcig kyang dang po byang chub tu sems bskyed pa dang / tha mar yongs su bsngo ba'o/ /bsngo ba yang 'khor gsum yongs su dag pa'o/ / de'i phyir sgyu ma'i blo can gyis bya bar gsungs te/ 'phags pa dkon mchog 'byung gnas las/ byang chub sems dpa' blo gros rab tu zhi ba byang chub kyi ched du spyod pas chos thams cad ngo bo nyid med par khong du chud par bya ste/ sbyin pa yang ngo bo nyid med par khong du chud par bya'o/ /len pa yang ngo bo nyid med par khong du chud par bya'o//yon gnas kyang ngo bo nyid med par khong du chud par bya'o/ /bsngo ba yang ngo bo nyid med par khong du chud par bya'o/ /gang yang sngo bar byed pa de yang ngo bo nyid med par khong du chud par bya'o/ /gang du sngo bar byed pa de yang ngo bo nyid med par khong du chud par bya'o/ /de ci'i phyir zhe na/ sbyin pa ni sbyin pa'i ngo bo nyid kyis stong ngo / /de bzhin du len pa po dang yon gnas dang sbyin pa'i 'bras bu dang / yongs su bsngo ba dang / gang byang chub kyi ngo bo nyid kyis stong pa dang sbyar bar bya ste/ de ltar na stong pa nyid la mos pa de ni bsam pa tshad med pa'i sgo nas sbyin pa'i pha rol tu phyin pa yongs su dag par 'gyur te/sbyin pa de ni sbyin pa'i pha rol tu phyin pa zhes bya ba'i ming yang 'thob ste zhes bya ba la sogs pas bshad de/ de yang sbyor ba sgyu ma lta bu la gnas la/ de'i dngos gzhi mi dmigs pas rnam par stong pa ste sgyu ma las kyang 'das pa'o/ /rjes la thob pa'i shes pas smon lam rgya chen po tshad gzung du med par bsngo bar bya'o zhes bshad pas/dad pa med pa la dngos grub 'byung bar mi 'gyur/ de'i phyir gzhan du nyes par 'gyur ro/ /rnam shes 'pho ba ni rnal 'byor pa 'chi ba shes rab kyi pha rol tu phyin pa'o/ /'chi ba'i tshe na bden pa gnyis kyi tshul gyis sgyu ma'i blo dang ldan pas chags sdang la sogs pa med pas dkyil 'khor gsal bar byas la dri ma las ldang ba sngon du 'gro bas/srog 'phrog pa'i rim pas dkyil 'khor gyi 'khor lo bsdus te/ rang gi ye shes dang mi gnyis par byas te/ 'od zer gyis khams gsum dag par byas la dkyil 'khor la bltas te/ thabs dang shes rab kyi dbus su rang gi yi ger bsdus la/rang gi de nyid kyi thugs kar 'od zer dang bcas pas 'jug par bya'o/ /gzhan du na nyes pa dang bcas pa'o/ /de dag kyang tshogs pa la bshags te bsdam par bya'o/ /gzhan yang lta ba dang spyod pa nges par gnas pa la the tshom skye ba dang / theg pa gsum gyis gdul bya'i rim pa dang sbyar nas mi 'dul bar gcig tu sbyor ba dang /de kho na nyid bcu la mi gnas par dkyil 'khor dang slob ma smin par byed pa dang / bdud brtag pa'i thabs la mkhas par mi byed pa dang / rtsa ba dang yan lag gi sdom pa zhig gam ma zhig pa bsam par bya ba dus 'das pa dang / phra mo'i nyes byas kyang khyad du bsad nas ma bshags par dus 'das na dug chung yang rma la mched pa bzhin du dus 'das pas gzhi de nyid las 'phel ba yang tshad de nyid du 'phel bas/de bas de dag kyang yan lag gi nyes pa'o/ /bla ma'i bka' dang bya ba byung ba dang / nab dang bar chad dang bcas pa dang / don chen po mthong ba la nyes pa med do//dri ma las ldang ba yang gong du bstan to/ /ltung ba'i rigs de dag kyang yul dang / bsam pa dang / rkyen gyi dbang dang sbyor ba'i bye brag gis lci yad la sogs pa bzhag ste yul las ni yul nye bar gnas pa dang / zhing gi bye brag go/ /des rtogs shing khong du chud pa dang /skyo zhing mi 'dod pa dang / bdag gis kyang shes pa'o/ /dus dang bsam pa las ched du bsams pa dang / rang bzhin du gnas pa'o/ /rkyen gyis ni nad dang 'jigs pa la sogs pa'i bar chad med pa dang / 'gro ba gzhan la sogs pa'i dgos pa ma mthong ba'o/ /sbyor bas ni lus kyi bya ba dang /ngag gi sbyor ba'o/ /de dag gis ni dngos gzhir 'gyur ba'o/ /gzhan du ci rigs pa'i nyes pa'o/ /nyes pa de dag kun gyi thun mong du dbang dang ldan pa kun la shes par bya'o/ /de dag las dri ma las ldang ba yang sbyor ba chung ba dang / de nyid kyis nyes par 'gyur ba dang / rang nyid kyis ldang bar nus pa dang /rkyen ma tshang ba dang / dur khrod la sogs par ni bdag nyid cho ga dang ldan pas byin gyis brlabs kyis ldang bar bya ste/ de'i phyir smras pa/ cho ga rdzogs pas rnam par sbyang / /yon tan phyogs kyis rnam par 'phel/ /mig gis rnam par brgyan byas la/ /thabs chen mtshan gyi tshad du mdzes//de dkyil ri bong brgyad pa'i gzhi/ /dang po'i lnga pas mdzes pas 'dzag /tshes la ri bong can gyis brgyan/ /sgra yig de nyid thig les mdzes/ /bcu drug phyed pa brgyad kyi 'og /dbang po'i phyogs kyis rnam par 'phel/ /rig byed lnga pas thabs kyis mdzes//yang na steng 'og dbang po yin/ /bcu drug phyed phyed thig le dbri/ /thig le las kyang rnam par 'das/ /thig le rnam par rdzogs par ldan/ /sgra yig dang po yon tan ldan/ /srog dang rtsol ba rnams bsdams nas/ /rim bzhin tsaN+Da lI 'bar bas/ /mkhas pas rim bzhin rnam par sbyang //zhes bya ba 'di dag gis kyang dri ma las ldang bar bshad pa'o/ /da ni ltung ba la sogs pa thams cad kyang chu tshod nas brtsis nas rim pas dri ma las ldang ngo / /gzhan du na yan lag gi nyes pas sdug bsngal 'thob po zhes pa'o/ /yan lag gi nyes pa'i rnam par bshad pa'o// //de nas de'i 'bras bu'i thabs dang shes rab kyi rgyud mang po nas 'byung ba bshad par bya ste/ de'i phyir/ dad ldan the tshom dman mi mos/ /tshul bzhin cho ga ldan pa ni/ /mngon sum rdo rje sems dpa' ste/ / mchog dang thun mong rgyas par 'gyur/ /zhes bshad pa ste/ dad ldan zhes pas dad pa dang ldan pa dngos grub kyi snod du bzhag pas kun gyi thun mong ma yin pa'i phyir ro/ /dad pa med pa la dngos grub 'byung bar mi 'gyur te/ de'i phyir dad pa dang ldan pa'i gang zag la rang bzhin gyis dngos grub 'grub/ji ltar dang ba'i snod du yang / /rtog med zla ba'i gzugs brnyan 'char/ /dad pa dkar po'i gzhi rten yin/ /dad pa med pa'i mi rnams la/ /dkar po'i lo tog mi skye ste/ /sa bon me yis tshig pa la/ /myu gu sngon po mi 'byung bzhin/ / zhes bshad pas snying rje dang shes rab dang brtson 'grus kyis grogs byas pa'i gzhan gyi don gnyer bar 'dod pa'i rnal 'byor pas bsten par bya'o zhes bshad par bya'o/ /the tshom yod pa ni yid gnyis za ba'o/ /de yang thabs shes rab kyi rgyud mang po las grub pa'i mtha' sna tshogs su brtags pa 'di dag 'gal ba mi srid pas don dang bcas pa dang don med par 'gyur ro zhes rtog pa de dag kyang /don de dag khong du chud pa ste/ thabs dang shes rab kyi rgyud de dag ji ltar dpag bsam gyi shing dang 'dra bas/ des kyang skyes bu mang po'i 'dod pa cha shas kyi bye brag gis kyang bsgrub par nus te/dngos po mtha' dag gis grub pa ni ma yin no/ /spros pa bral ba gnyis su med pa'i ye shes kyi ngo bo la rtog pa med pa'i tshul du gus pa dang bcas pa'i grub pa'i mtha' de dag kun gyi rtog pa med pa'i tshul du 'gal bar ga la 'gyur/ de'i phyir rtags kyi cha'i nus par byin gyis brlabs pa'i rten cing 'brel par 'byung ba re re la 'jug pas slu ba med pa'i don dang yang phrad par 'gyur ro//de'i phyir bshad pa'i rgyud chen po las/ nam mkha'i snying po khyod nyon cig /gnyis med ye shes don ldan pa'i/ /nga dang 'dra ba'i rgyud kun la//yid bzhin nor bu dpag bsam shing / /bum pa bzang po 'dra bar ni/ /gus pas tshul bzhin gnas pa la/ /gcig kyang thabs kyi bye brag gis/ /nus pa bsam gyis mi khyab ste/ /de lta de ltar de bzhin bsgrub/ /cho ga nyams pas 'grub pa'ang min/ / zhes bshad pa 'di ni tshul de dag las tha dad pa'i sgo nas 'bras bu dang ldan pa yang mngon sum du 'grub pa'i phyir ro/ /de'i phyir smras pa/ lha dang drang srong bden pa'i ngag /gang la sbyor ba'i nus pa yang / /slu bar byed pa ma mthong na/ /ye shes chags pa mi mnga' ba'i/ /smon lam snying rjes gzhan don 'jug /thams cad mkhyen pas smos ci dgos/ /zhes bshad pas de la brtag par mi bya'o/ /'on kyang skyes bu dam pa nye bar brten pa dang bral bas 'dod pa dang bral bar 'dod pa dang / phrag dog dang / nga rgyal gyis non pas zhugs pa rnams ni rtags 'khrul pas don dang phrad par byed pa ma yin no//de'i phyir/ slob dpon las ni dngos grub 'thob/ /ces bya ba la sogs pas rgya cher bshad do/ /gzhan yang de lta bu'i dbang du mdzad nas/ lung ma rtogs par rtog ge yi/ /chos rnams rnam par gnas ma yin/ /drang srong rnams kyi shes pa yang //de yang lung ni sngon du btang / /long ba'i rkang pas tshod dpag shing / /nyam nga'i g.yang sar rgyug byed pa/ /rjes su dpag la gtsor 'dzin pa/ /rnam par ltung bar dka' ma yin/ /zhes bshad pas de ni 'gal bar 'gyur ro/ /dman pa la mi mos pa ni nyan thos dang rang sangs rgyas la smod pa dang bral ba'o//gzhan yang skyes bu tshe 'di'i 'bras bu 'dod pa la phyi ma'i tshe la 'byung bar mi 'gyur ro/ /skyes bu phyi ma la 'dod pa 'di la yang rgyas par 'gyur ro/ /mchog 'dod pa la thun mong yang rgyas par 'gyur ro/ /thun mong la mos pa la mchog dang de nyid kyang thob par mi 'gyur ro//dngos grub rab dang 'bring dang tha ma yang rim pas thob par 'gyur ro/ /de'i phyir/ drug cu pa yi stsol pa yis/ /sA lu'i 'bras dang phrad ma yin/ /dman la mos pa'i sbyor ba yis/ /mchog rnams thob par ga la 'gyur/ /zhes bshad pas so/ /tshul bzhin cho ga ldan pa ni/ /zhes bshad pa yang tshul bzhin cho ga dang ldan pa ni thabs dang shes rab kyi rgyud las gang yang rung ba'i grub pa'i mtha'i cho ga dang ldan pa'o//de'i phyir rgyud mang ba dang grub pa'i mtha'i tshul thams cad du bdag gis bshad pa ste/ kun gyi thun mong ma yin pa'i phyir ro/ /de bas na dgongs pa'i don la mkhas pas brtag par mi bya'o//mngon sum rdo rje sems dpa' de ni dam tshig dang ldan pa dang / spyod pa la gnas pa rkyen gzhan gyis 'gal bar mi 'gyur ba'i phyir ro/ /mchog dang thun mong rgyas par 'gyur zhes bshad pas 'bras bu rgyas par bstan te/ thun mong brgyad la sogs pa dang rdo rje 'dzin pa'i sa thob pa'o//de'i phyir bshad pa/ rtog pa thams cad shes rab tu shes pas/ /dngos po sgyu 'dra bsdam bya sdom byed med/ /rang bzhin gnas dang gzhan gyi nus pa bskyed/ /ngo bo nyid dang bsdam bya sdom byed dang / /rtsa ba yan lag de bzhin yan lag go/ /rdo rje sems sogs bde gshegs ma lus kyang / / de la 'da' bar spyod pa ma yin no/ /mi 'dod dngos po thams cad sreg par byed/ /sdug bsngal sna tshogs rnams kyi gzhi rtsa ste/ /bde gshegs kun gyis bu bzhin rab dgongs nas/ /sku gsum ye shes chu yi zla ba bzhin/ /nad med nor dang rkang 'gro mang po 'phel/ /'bad pa med par 'dod pa 'grub par 'gyur//rgyal po la sogs gsong por smra byed cing / /skye bo mang pos rtag tu bkur bar 'gyur/ /'khor dang longs spyod mang pos rnam par mdzes/ /rims dang gdon la sogs pa'i gnod pa rnams/ /bla ma mkha' 'gro dam tshig rjes dran pas/ /de dag las kyang myur du thar bar 'gyur//rin thang med pa'i rin chen rnams kyang 'thob/ /gdon dang mkha' 'gro rnams kyis 'bar bar mthong / /rdo rje 'chang ba mang pos rjes su 'brang / /byang chub sems dpa' mang pos spun bzhin dgongs/ /sngags dang zhing las skyes pa'i mkha' 'gros kyang / /rgyang nas gzigs shing dngos grub ster bar byed//'jig rten skyong ba rnams kyis rtag tu skyog /gdug pa can rnams mthong nas dga' bar byed/ /'bad pa med par gsungs pa'i las rnams 'grub/ /bskal pa mang por sdom la gnas pa bas/ /skad cig gnas pas 'bras bu rdzogs par byed/ /ldog pa med pa'i byang chub sems bzung nas//thabs kyis bsod nams tshogs ni rab rdzogs byed/ /bde ba'i ngag can de ni lung bstan te/ /brtags pa rnams log bden pa'i don mthong nas/ /sa nas sar 'phar mi mthun phyogs spangs te/ /sgyu ma lta bus rtog med mnyam par gnas/ /kha sbyor bde chen mtshan gyis rnam brgyan pa//stobs dang mi 'jigs phyogs kyi chos rnams dang / /pha rol phyin pas sa dang dbang la sogs/ /dag pa'i zhing du rtag par tshogs chen bskor/ /'dul ba'i don du snang ba 'gag pa med/ /legs par mtshan pa'i rgyan gyis gar yang gnas/ / dus las yol med dang ba'i chu zla bzhin/ /'bad rtsol rtog med yid bzhin nor bu ltar/ /smon lam grub pas thugs rje 'gag pa min/ /longs spyod chen pos mnyam pa nyid la gnas/ /'dod pa'i yon tan grub pas 'gag pa med/ /sdom ldan rnams la mngon sum gnas zhes bshad//ces bshad pa yang thabs dang shes rab kyi rgyud mang po las 'bras bu mang du bshad pas bdag gis mdor bsdus te bshad pa'o/ /bskal pa mang por tshogs bsags nas/ /rin chen snod du bdud rtsi 'dzag /rtag tu brtson par mi byed par/ /ci phyir 'dod pa'i dug gis myos//zhes bshad pas kyang don de nyid grub par bstan te/ bskal pa mang po nas rgyud shin tu sbyangs pa dang / tshogs bsags pa dang / smon lam las grub pas rin po che'i snod lta bur gyur pa'i nang du bdud rtsi 'thung bar mi byed pa'i 'dod pa'i thag pas bcings nas/nyon mongs pa'i dug gis myos par byed ces bshad do/ /de'i phyir lam 'di lta bu ni shin tu thob par dka' ba'i lam ni rtag par bsten par bya ba dang / theg pa chen po shes rab kyi pha rol tu phyin pa thob pa rnams kyang phyir mi ldog par bshad do/ /de nyid kyang thob par dka' ba yang /sangs rgyas rnams la bkur sti byas/ /de las dge ba'i rtsa ba bskrun/ /dge ba'i bshes kyis mgon byas pa/ /'di mnyan pa yi snod yin no/ /zhes bshad do/ /de bas na gus pa dang bcas pas thob par dka' ba'i lam 'di rtag par bstan par bya'o/ /thabs dang shes rab kyi rgyud mang po las 'byung ba'i sdom pa'i 'bras bu rnam par bshad pa mdor bsdus pa'o// //de bas na rtsod pa'i dus kyi gang zag nyon mongs pas rgyud 'khrugs pa sdom pa dang dam tshig la gnas pa dka' ba ste/ de'i dus su sdom pa dang dam tshig la gnas te mnyam par bzhag nas skad cig tsam bsgoms pas kyang dus gzhan du bskal par gnas pa bas don chen por 'gyur zhes bshad do//de yang rtsod pa'i dus kyi gang zag gi mtshan nyid bcom ldan 'das kyis dam pa dang po'i rgyud las bka' stsal te/ rtsod pa'i dus kyi 'dzam bu gling gi mi rnams ni lhag par yang sdig pa'i las la gzhol zhing /tshe thung zhing shes rab zhen te/ rdo rje slob dpon gang yin pa dag kyang dge ba'i rtsa ba la log par gzhol ba dang / dge slong rnams kyang mi dge ba bcu byed pa la gzhol ba dang / khyim pa rnams kyang dkon mchog gsum gyi yo byad la longs spyod par 'gyur ba dang /mkhas pa rnams kyang ma thos pa'i rgyud 'chad cing mngon pa'i nga rgyal gyis rgyud kyi 'grel pa byas nas/ don phyin ci log tu bstan pas dmyal bar gzhol bar 'gyur ba dang / grong mi rmongs pa rnams kyang log par dad pas thams cad mkhyen pa'i rgyal mtshan rnams sun phyung nas/khyim pa la bsnyen bkur byed par 'gyur ba dang / slob ma rnams kyang zhe sdang gi blos slob dpon gyi skyon rtog pa dang / longs spyod la chags nas slob dpon dam pa ma yin pa la yang bstod cing mchod par 'gyur la/bla ma'i bsnyen bkur sangs rgyas kyis gsungs pa rnams ni byed par mi 'gyur zhing / 'chad pa po rnams ni mi dge ba bcu la 'jug par 'gyur zhing / sgrub pa po rnams kyang bza' btung la chags par byed pa dang / bud med rnams kyang 'dod pa la shin tu chags so zhes gsungs so//gzhan yang mngon pa'i bstan bcos las bstan pa ni srol gong ma bzhin zhes bshad do/ /de'i phyir rnal 'byor pas 'bad par bya'o zhes rjes su gdams pa'o/ /sna tshogs rgyud dang theg chen mdo/ /dam pa kun gyi dgongs pa dang //gzhan sogs gzhung lugs mang po las/ /zhal dang 'dra ba'i bshad pa 'di/ /rgya cher 'grel pa'i dri ma med/ /lam gyi sgron ma zhes bya ba'i/ /bla ma brgyud dang lhan cig skyes/ /dad dang snying rje gtsor byas pas/ /sna tshogs rgyud dang slob dpon gyi/ /dgongs pa sna tshogs brtags pa las//ngal las dge ba gang thob des/ /'das sogs bla ma rdo rje spun/ /dam tshig ma lus nyams pa gang / /bla ma 'jam bcas mdun byas te/ /bdag sogs dam tshig dag gyur cig /thams cad dngos grub snod gyur la/ /thun mong mchog gis rnam brgyan te//'gro kun rdo rje 'dzin gyur cig /rdo rje theg pa'i rtsa ba'i ltung ba'i rgya cher 'grel pa lam gyi sgron ma zhes bya ba de la phan par byed pa'i yan lag dang bcas pa slob dpon 'jam dpal grags pas mdzad pa rdzogs so// //myang ro stag tshal du dI paM ka ra bod du byon tsam na bsgyur/pu ri sha'i grong khyer du A tsAr+ya u pa d+ha shrI badzra shI la dang / lo tsA ba dge slong brtson 'grus seng ges legs par mnos te gus par bsgyur ba'o// //bal po'i khyim du du ma'i lo/ /rin chen grags pa bdag gis 'ongs/ /'grel dpe rnying pa la yang gtugs/ /shin tu yang ni dag par bgyis// //