264b3 @##/ /rgya gar skad du/ pA da yo ga pra dI paM na ma/ bod skad du/ rnal 'byor lam gyi sgron ma zhes bya ba/ 'jam dpal smra ba'i seng ge la phyag 'tshal lo/ /rnal 'byor lam gyi sgron ma 'di/ /bstan pas log pa'i lam mi 'jug /sdug bsngal thams cad zhi mdzad pa/ /dam
264b4 pa skyes mchog de la 'dud//A li kA li'i sgra don rtogs/ /sde snod gsum gyi don yang shes/ /bdag dang skye 'gro'i sems can rnams/ /ye nas skye med 'od gsal yang / /ma rig pa yi rlung gis 'khrul/ /'khor ba'i sdug bsngal nyams su myong / /de las grol bar
264b5 byed pa'i phyir//rnal 'byor lam pas 'di ltar bya/ /sdig pa'i las rnams rab spangs te/ /dge ba'i chos la brtson par bya/ /bka' la som nyi mi za zhing / /rtag tu skyabs 'gro ma nyams bya/ /byams pa'i sems dang rab ldan zhing / /'gro la snying rje ci nus bya/ /'dod
264b6 yon dngos po mi rtag pas//gzung 'dzin chags sems rnam par spangs/ /gzhan la smad par mi bya zhing / /'gro ba'i bla ma spyi bor bkur/ /log pa'i lam du mi 'jug cing / /mthu dang ngan sngags spel mi bya/ /longs spyod 'du 'dzi rnam spangs te/ /gcig pu
264b7 nags su 'dug la bsgom //'jig rten 'chal tshig mi brjod par/ /sngags dang snying po mdo yang brjod/ /yang na lkugs pa'i tshul du bsdad/ /rang byung dri ma med pa'i brda/ /lus la gru yi blo bzhag la/ /bcud len gyis ni zungs kyang bskyed/ /gtum
265a1 mo yis ni ro bsnyams te//'byung ba bsnyams zhing nad rnams dbyung / /gnod sbyin bar chad byed pa la/ /brtul zhugs gdams pa'i spyad pa bya/ /mi ngal gsum dang 'du ba gsum/ /'khor lo gsum dang rtsa ba gsum/ /'bar ba gsum dang chud mi za/ /
265a2 thim pa gsum dang rgyas gdab bo/ /mdor na thams cad sems yin te/ /sems las ma gtogs chos gzhan med/ /sems su 'dzin pa 'khrul pa'i blo/ /blo las grol na gnyis su med/ /gnyug ma'i ngang las ma yengs par/ /dngos por snang ba sgyu mar blta/ /sgyu
265a3 ma brdzun pa rmi lam tshul//rmi lam tshul sogs rab shes nas/ /dpe brgyad bzhin du shes par bya/ /rnal ma'i chos la rab gnas na/ /gang ltar spyad kyang bde ba thob/ /des na rnal 'byor brtson par bya/ /sdug bsngal zhi bar byed pa rnal 'byor lam gyi sgron ma zhes bya ba
rje btsun ka ma la shI las mdzad pa rdzogs so/