CLOSE WINDOW

D2280
བོད་ཡིག

bod kyi lo tsA ba rma ba na chos 'bar gyis bsgyur ba'o//[ ]@##/ /rgya gar skad du/ do ha ko Sha nA ma/ bod skad du/ do ha mdzod ces bya ba/ dpal rdo rje sems dpa' la phyag 'tshal lo/ /bcom ldan 'das bdag med ma la phyag 'tshal lo//e ma ho/ /srid dang zhi ba phyag rgya chen po ni/ /ngo bo nyid kyis mkha' ltar rnam par dag /mtshon bya'i gnas lugs med pas tha snyad tshig lam chad/ /rang bzhin spros med ngo bo ltos chos kun dang bral//brtag dang dpyad du med cing mtshon pa'i dpe dang bral/ /dpe bral nyid la'ang mi gnas blo yi yul las 'das/ /rtag min chad min 'khor dang mya ngan 'das pa min/ /snang min stong min dngos dang dngos med skye med min/ /chos nyid gnyug ma ma yin blo las 'das pa'ang min//min pa'ang min zhing yin min blo yis brjod med phyir/ /gnyis chos gang dang 'brel med gzod nas mnyam pa nyid/ /ngo bo des tshig byed pa'i las rnams bshad pa yang / /ri bong rwa brdzun de yi rno rtul brdzun dang mtshungs//chos rnams thams cad mtshan nyid de dang khyad par med/ /ji ltar snang zhing srid pa'i kun rdzob chos can rnams/ /ngo bo nyid med ming tsam sgra tsam btags pa tsam/ /ming dang don la khyad par bye brag cung zad med/ /gdod nas lhan cig skyes pas gzhan nas btsal du med//sems nyid ming stong spros bral phyag rgya chen po ste/ /nam mkha' rang bzhin gdod nas ming stong yin dang mtshungs/ /ngo bo nyid kyis ma skyes mtshan ma'i spros dang bral/ /mkha' ltar kun la khyab cing 'pho dang 'gyur ba med//dus rnams kun du stong zhing ye nas bdag med de/ /dran rtog mtshan ma med de smig rgyu'i chu bo ltar/ /ma bcing ma grol gnyug ma'i ngang las ma g.yos so/ /sems can thams cad phyag rgya chen po'i sprul pa la//sprul pa'i ngo bo ye shes nas skye med chos kyi dbyings/ /bde sdug la sogs gnyis snang mtshan ma thams cad kyang / /chos nyid gnyug ma phyag rgya chen po'i rol pa'o/ /rol pa nyid la bden med mi brtan 'gyur ba'i phyir/ /gnas lugs stong pa'i rgya las nam yang ma 'das so//kha cig dbang bskur ba yis yongs su gdung bar byed/ /kha cig hUM phaT zer zhing phreng ba yongs su bgrang / /kha cig bshang gci khrag dang khu ba sha rnams za/ /kha cig rtsa dang rlung gi rnal 'byor bsgom ste yongs su 'khrul//e ma ho/ /bla ma dam pas zin pas cig shos 'di ltar rtogs/ /gang yang 'khrul pa yin phyir yang dag rtogs pa med/ /rtogs bya rtogs byed med pas phyogs ris mtha' dang bral/ /bral dang ma bral med pas mnyam nyid gnyug ma'i ngang //'di ltar rtogs na nges par gzhan du dri sa med/ /sna tshogs chos skur gsal bas spong len sems mi 'byung / /bsgom dang mi bsgom med cing mtshan mas gos pa med/ /snang dang mi snang yul la nam yang brten mi byed/ / bya dang byed pa'i sems med dmigs pa kun dang bral/ /re dang dog pa'i sems med kun la zhen pa log /bla mas bstan pas gnyug ma'i gnas lugs rtogs gyur na/ /dran rig sna tshogs chos kyi dbyings su rang rlag ste/ /rnam shes yul la mi gnas chags zhen kun bral bas//ma bcos gnyug ma'i ngang du chos kun grol bar 'gyur/ /kun la ma chags nga rgyal la sogs dri ma bral/ /gus par ldan zhing dam pas yongs su zin pa dang / /gang yang yid byed bral na dri med the tshom med//shes dang shes bya dag pas chos nyid mngon sum 'char/ /gnyug ma phyag rgya chen po rtogs par ma gyur na/ /rtag tu gnyis 'dzin dbang gis kun la zhen gyur pas/ /bsam rig rab rib sna tshogs rgyun du skye 'gyur zhing / /ma nor don la mi gnas srid par 'khor zhing 'khyam//snyan grags bsnyen bkur kun la chags zhing zhen pa dang / /thos bsam go rtogs che dang nyams myong bzang po dang / /dngos grub byin rlabs nus pa'i rtags byung bcos ma'i lam//don gyis dri ma yin phyir mkhas pas yid mi gtad/ /de nyid yid la byed cing gnyis mtha'i phyogs lhung na/ /'khor bar 'khor zhing srid pa'i rtsa ba yin pa'i phyir/ /kun gyi gzhi rtsa yid kyi ri bo gang yin ltos/ /bltas pas ma mthong yid dang bral na nges par grol//sems kyis chos kyi dbyings la 'di zhes med pas na/ /de la sgom dang bsgom par bya ba gnyis su med/ /yod med cir yang mi rtog ma yengs ngang la zhog /stong pa nyid dang skye med blo las 'das pa dang / /mtha' bral la sogs gang yang yid la byed pa na//gnas lugs don la mi gnas shin tu yengs pa'o/ /stong dang mi stong rtsis med lhug pa'i ngang la zhog /gzhag dang mi gzhag med par rang dga' yan par thong / /btang dang bzung ba'i sems med ro langs ji bzhin gyis/ / de nyid gnas lugs rig nas de yi ngang gnas na/ /gnyis snang mtshan ma'i bag chags myur du 'jig par 'gyur/ /rtogs pa'i ngang la mi gnas mtshan mas g.yengs gyur na/ /gnyis snang mtshan ma'i bag chags ldog par mi 'gyur te/ /rab rib can gyi mig gi nang du shes gyur kyang //mig gi nad ma byang bar rab rib snang mi ldog /gnas lugs yid la byed cing nyams la zhen pa dang / /de nyid don la goms shing bsgoms na gol ba'i rgyu/ /mthun 'jug rnams la chags sdang skye phyir 'ching ba'o//mi mthun rkyen ngan thams cad dngos grub dam pa ste/ /mi mthun rkyen gyis rnal 'byor nyams kyi gsal 'debs phyir/ /rkyen ngan mi spang de nyid shes pas de la sbyang / /de ltar skyong zhing nyams rtogs mthar 'byin spyod pa ste/ / gyi ling dag la lcag gis bskul ba ji bzhin no/ /gal te rtogs ldan nyams bzang spyod pa'i grogs med na/ /ji ltar mi ldan skyes bu dag ni rkang pa med dang mtshungs/ /don dam rnal ma chags med don la sbyang bya ste/ /mi spang mi sgrub mi zhen mi spyod mi 'gog par//rang lus ci bder spyod pa rab mchog dam pa'o/ /kun rdzob sangs rgyas mi ro'i gdeng chen ldan gyur kyang / /sems can tshogs chen mi spang ci nus 'bad par bya/ /'khor ba dag la dog pa'i sems med 'jigs bral yang / / sdig pa'i las rnams phra mo dag nas 'dzem par bya/ /chos rnams stong pa mkha' ltar rtsa bral rtogs gyur kyang / /chags sdang 'dzin chags mtha' dag rtsad nas spang bar bya/ /chos nyid mtha' bral zang thal chen po'i don rtogs kyang / /brtan pa ma thob bar du nyams rtogs gzhan la gsang //don dam bdag gzhan gnyis su med pa rtogs gyur kyang / /kun rdzob 'gro la phan pa'i don chen dag la bsam/ /'dren pa gzhan la mi ltos gdeng dang ldan gyur kyang / /bka' drin can gyi bla ma spyi bo'i gtsug tu bkur//chags shing zhen par bcas pas kun la dgag sgrub byed/ /rgyud dang mi 'tsham 'gal ba'i spyod pa gol ba'o/ /mthong bya mthong byed med pas tha dad rang sar grol/ /nyams su myong mkhan stor bas rtsol sgrub kun dang bral//thob bya'i 'bras bu stor bas re dog kun las grol/ /nga bdag rtsad nas thon pas bdud kyi g.yul las rgyal/ /dngos 'dzin rang sar zhig pas 'khor 'das kun la grol/ /rig pa gzhi la dag pas rdzogs sangs rgyas zhes brjod/ / chos blo zad sar zad pas mya ngan 'das zhes bshad pa'i phyir/ /ma bcos ma bsgyur spangs thob kun las yongs su grol/ /e ma ho/ /phyag rgya chen po zhes bya zab mo'i sgra chen de/ /gdags gzhi gang yin stong pa zhes bya'ang btags pa tsam/ / skad cig ngo bos stong par bdag med su yis rtogs/ /rtog mkhan nyid med ming tsam sgra tsam btags pa tsam/ /de nyid yang dag ma yin gdul bya'i snang ba'o/ /gdul bya nyid la'ang bdag med sgyu ma sprul pa 'dra/ /phyag rgya chen po zhes bya byis pa'i blos brtags so//'khrul dang ma 'khrul zhes bya ming tsam btags pa tsam/ /'khrul par tshor zhing rig pa'i skyes bu su zhig yin/ /'bras bu myang 'das rdul tsam med cing mi dmigs na/ /grol dang ma grol zhes bya glo bur sgro btags te//nam mkha' zhi zhing dag la med pa grol lam ci/ /kun rdzob don dam zhes bya'ang nan gyis btags pa ste/ /chos kyi dbyings la bden pa gnyis med chos dbyings med/ /do ha mdzod ces bya ba rnal 'byor gyi dbang phyug biR+Wa pas mdzad pa rdzogs so/