CLOSE WINDOW

D2272
བོད་ཡིག

@##/ /rgya gar skad du/ kA ya bAka tsit+ta a ma na si ka ra nA ma/ bod skad du/ sku gsung thugs yid la mi byed pa zhes bya ba/ mtshan ma rab tu mi gnas pa la phyag 'tshal lo/ /rdo rje 'dzin pa la phyag 'tshal lo/ /gang zhig sku yi khyad par bdud bzhi rab tu 'joms mdzad cing //rnal 'byor rnam par grol bas mdzad pa gang gis ni/ /'dod pa'i don ni yang dag sbyin par gang 'gyur ba/ /'gro la byams pa'i cha lugs mchog gi don ston pa/ /don dam rab tu mi gnas dgongs pa rgyal ba'i thugs/ /gang gi sems la 'di kun bsam du med do kye//khyod ni phrin las yan lag mang po ston mdzad cing / /dgyes shing nam mkha'i khams kun thams cad 'gengs par byed/ /gsung mchog yan lag drug cus sgra skad sna tshogs sgrogs/ /thugs kyi khyad par dgongs pa dbyings las mi bskyod kyang / / thams cad tshim zhing mgu nas rab tu bstod par byed/ /byams dang snying rje'i gdugs kyi dkyil 'khor gsal bar ston/ /ma hA de ba u ma de ba rab tu 'joms par byed/ /phyogs bcu dus gsum sangs rgyas kun gyi bdag nyid de/ /thar pa'i sgo ni rnal 'byor rnams kyi lam 'di nyid//gang yang gtso mchog ldan pa'i sbyor ba dag gis rab tu mi dbye bar/ /rnal 'byor chen po tha mi dad pa yin/ /gang gis de ni mi shes pa'i/ /dri ma'i tshul gyis gang yang mthong ba med/ /gang gis de kun 'chang bar byed pa de yis ni/ /gzi mdangs gnyis las brten te las kun ston par byed//bdag med ro gcig khyab par byed pa'i gzugs ldan ni/ /'di na mi gnas kun kyang 'gro bar byed/ /sngags dang mdo sde kun gyi rgyal por dbang bskur bas/ /'di dag kun gyi rtsa ba yid la mi byed par/ /khyed kyis gcig dang gnyis la ma sems kye//kun rdzob dran pa'i cho 'phrul sna tshogs par ston pa/ /don dam mi dmigs pa yi dbyings su ro gcig nyid/ /dug lnga la sogs nad kyis nyen pa'i mun pa sel/ /thog ma'i mtha' dang tha ma'i dngos gzhi ma mthong bar/ /'dus ma byas la yid kyi dmigs su med do kye//gzung 'dzin gnyis kyi bar na ming dang bral 'dug pa/ /yan lag log na gcig gi ngo bo nyid/ /shes par bya dang bya'o cog gi tha snyad kun/ /'di las gzhan du lta ba mtshan mas myong bar 'gyur/ /sgra gcan zin gyis zla ba zos pa ji bzhin te//ma mthong ba nyid byis dang bar nas shor bar 'gyur/ /yengs dang gnas pa'i bar na ngo bo 'di zhes med/ /rgyu med rkyen bral skye ba med pa gnyis bar na/ /log par lta ba'i tshogs kyis 'di la gzhol du med/ /gi wang gur gum tsan+dan thig le bris pa bzhin//zla ba bzang po rgyu skar 'od kyis 'gebs pa nyid/ /snying po'i 'od kyis yan lag zil gyis gnon par 'gyur/ /'di nas 'di ru zad ces 'di byung brtag dka' nyid/ /gang gis nam mkha' dag la longs spyod pa'i/ /'dod pa'i yon tan 'di la 'phel 'grib med par 'byung //gang zhig nor bu dri ma med pa 'chang ba yi/ /sems kyi yon tan gter chen 'di las 'byung 'gyur te/ /mthong ba med pa'i tshul gyis rtag tu blta ba nyid/ /chos nyid mtshon pa'i ngo bo 'di zhes 'das 'gyur ba/ /blo mchog rnams kyis kyang ni phigs par nus ma yin//gnyis med tshul gyis de bzhin gshegs gang nyid/ /'di nas song ba gang yang med par shes pa de/ /'di ni mi gnas gang na'ang gnas pa med/ /yul med 'di la rtag tu lta ba dang bral nyid/ /'di nas gang du 'gro ba'i phyogs mtshams de kun na//'jigs par byed pa'i sgra yis ma khyer bar/ /ci bde ba dang lhan cig dag tu byos/ /kye ho grogs dag 'di la sems gnyis yod de med kyi brtag pa kun/ /rnam rtog rlung gis bskyod de smyon pa'i tshig tu 'gyur/ /smyo bar gyur nas rgya mtshor lhung ba nyid//tshangs pa rdul dang mtshan ma'i mun pa dag dang ma bral ba/ /de nyid gnyis bral rtogs par 'dod pa dang / /rgya mtsho sa dang gshag mar nor bu 'gyur mthong nyid/ /brtul zhugs mya ngan 'da' ba'i spyod pa gang byed pa/ /'di ni mi shes de 'drar ston par byed//bden pa gnyis bral sgro skur med pa'i gnyug ma gang / /gang du mthong ba med pa de yin te/ /nges par grub cing 'di la rang bzhin med par 'gyur/ /gang gis ma mthong ba las de ni rgyal bar 'gyur/ /theg pa gsum gyis mya ngan 'das ston pa/ /'di ru ma shes de nyid mthong ba med//rnam grol lam ston bye brag gang du'ang phye ba med pa de/ /byis pa rnams kyis shes par 'gyur ma yin/ /gang zhig 'dod chags bral ba rtogs par 'dod pa de/ /sdug bsngal gsum mam brgyad la sogs pa kun spangs nyid/ /bden pa gnyis las mi 'da' thabs tshul sna tshogs kyis//'gro ba'i don mdzad 'od zer g.yas g.yon rab tu 'gyed/ /bum ril kha sbub ma dag pa nyid dag ston pa/ /tshang tshing 'brel ba'i yul drug la sogs rab tu 'joms/ /thams cad mkhyen ldan sus kyang mthong ba med pa de//grags pa la sogs kun gyis bstod dang bskyod pa med/ /kye ho 'di ltar gnas na kun gyis shes 'gyur te/ /thog mtha' med nas srid pa'i rgya mtsho g.yengs 'gyur ba/ /sdug bsngal nyid kyi rtsa ba 'di ru byas/ /'di la shes dang nyon mongs la sogs pa'i/ /dri mas ma gos 'dam gyi pad+ma bzhin//kha dog ma 'dres yul la so sor snang / /sgyu mar rtogs tsam gar mkhan mig 'phrul bzhin/ /'du byed sna tshogs gang la bsags pa de/ /glo bur rten 'brel dag las goms pa'i stobs/ /'di goms gang yang shes par mi 'gyur te//ma goms pas na thams cad shes par 'gyur/ /'dres pa'i chos ni gang yang gnas par mi byed do/ /sku gsung thugs dang phyag rgya la sogs rim pa kun/ /'di la skad cig tsam du rtogs par ma byed cig /'jig rten bstan bcos dag dang glegs bam gyis//gsung gi bdag nyid brjod par bya ba min/ /nyi ma zla ba gnyis su gnas 'gyur ba/ /de dang gcig tu 'dres par gyur nas ni/ /gang gis gang spyod de yis rab tu brgyan/ /skye ba med pa'i rnam par nges brjod pa'i/ /dbus su brjod pas mtha' rnams rab tu spangs//ji ltar bstan pas go bar mi 'gyur ba'i/ /'jig rten khams su gtan 'khyams rigs chad de/ /bag chags las kyis mnar ba ma tshor bas/ /chos nyid dri ma med pa'i don mi mthong / /gang yang 'di dang bral ba med pa de/ /dran 'dzin lus las myur du skad cig grol//rdo rje'i sems ni yongs su brtag dka' ba/ /sems la sems su ma mthong ro snyoms nas/ /phyi nang bsam gtan rtse mos brtags pas stong / /rnal ma'i don la gnas pa'i rnal 'byor ni/ /ye shes shes rab gsang ba'i dbyings la rdzogs/ /rang gis ma mthong mtshan nyid kun ldan pa//zhes ni bsngags pa brjod 'gyur ba'i/ /dran med mnyam pa'i dbyings la skur gsal mos pa med par spyod/ /thugs rjes mi gzigs sku gsung thugs kyis ma gos pa/ /gnyis su ma mthong gsum gyi dri ma bral/ /sna tshogs par snang gang la ngos gzung med pa ste//lus ngag yid gsum 'bad pa'i rtsol bas gdung bar ma byed cig /ngas ni rdo rje'i glu dang long gtam rgyob sod dang / /'gro ba kun gyis shes pa dag dang gar bder spyod/ /mi sgrim mi lta mi spyod 'di dang 'bral ma myong / /ye nas ma bcos thams cad 'byung 'jug go 'phang yang //kye ho sna tshogs gang yang rung ba 'di la bsam pa'i sems bral bas/ /yid kyi rtog pa sna tshogs 'di ni dran pa'i sems yin te/ /gang yang gzugs dang rtsa ba med pa dag las skyes pa yin/ /tha mal shes pa ma bzung bde chen rgyal po nyid//mtshan nyid cir yang ma mthong phyogs cha kun dang bral/ /'khrul pas brtags pa'i bsam brjod 'di ni glo bur te/ /blo las byung phyir blo yis bsgom du ga la yod/ /gang la yan lag med pa de nyid kun gyi khyim du ltung bar 'gyur/ /go ba'i tshe na ci yang med pa ste//dngos kun ci yang gsal ba mthong ba med/ /gang la mya ngan 'das dang srid pa kha sbyor ba/ /gnyis su snang ba khyod la rten dang 'byung bar 'gyur ba yin/ /rgyal ba la sogs kun du sprul pa sna tshogs ston mdzad pa/ /dag pa'i rigs rnams kun la khyod kyis spyod/ /mi bsam thugs rje rang 'byung sprul pa ni//nor bu rin chen lta bur 'phel 'grib med par 'byung / /dngos po med pas nams kyang rtogs min pas/ /btang gzhag med cing rang bzhin rnam par grol/ /'dzin med yid la bya med rnal 'byor bsam gtan nyid/ /gang la mi bsgom gang du'ang btsal ba med pa de/ /bsam du med pas yid la mi byed ro snyoms kye//ye shes mkha' 'dra bsam bral ma bcos snying po'i don/ /'di la blo yis bsam zhing brjod du med do kye/ /ye btang rang yan tshogs drug lhug pa'i spyod pa 'di/ /tshogs drug rjes su sbyor ba'i mkhas pas btang gzhag med/ /kho na nyid kyi rnal 'byor lhag pa'i bsam bral bas//de bzhin nyid la mi gnas gang la rang bzhin med par grol/ /'od gsal rdzogs dang thim dang 'gags par 'gyur ba gang / /ji ltar bsgoms dang chags par 'gyur pa mtshan ma ste/ /phung po khams dang skye mched yan lag thams cad kun/ /gcig gi dbyings na mi mngon phra ba'i tshul du gnas/ / rgya mtsho'i dbyings nas nor bu rin chen rnyed 'gyur ba/ /chu srin dung dang gdug pa can gyis mthong mi 'gyur/ /phrag dog srid pa'i nyon mongs la sogs pa'i/ /mtshan ma'i dbyings nas ngos bzung med par mthong / /gsum la sogs pa'i sgo nas 'jug par byed pa ni/ /rnam rig bden pa gnyis kyi sgo nas rtsol bar byed//ji ltar snang bzhin 'jig rten tha snyad lam/ /rnam thar sgo gsum bslab pa rnam pa gsum/ /mtshan ma'i yid la byed pa'i rnal 'byor te/ /rnal 'byor chen po 'di la gnas mi byed/ /gang zhig shel sgong dag pa lta bur ni/ /dri ma gnyis bral srid dang 'das grol te/ /rin po che ltar dgos 'dod thams cad 'byung //yongs su zad pa zad phyir mtshan nyid med/ /dngos med bden pa gnyis bral gcig gi dngos po stong / /mtshan ma thams cad ye nas med pa'i phyir/ /mthong thos la sogs mtha' yi rtog pa med/ /med la med par 'dzin pa tha snyad de/ /'di ni tshor bar nus pa ma yin no//'di ni rtsa ba kun gyi rjes su rtog par ma byed cig /'di la gang tshe rtog par byed pa dang / /bskal par bgrangs kyang de nyid rnyed pa min/ /mgal me gtsub shing lta bur me mched 'bar ba bzhin/ /'di kun mched nas thams cad sreg par byed/ /kye ho grogs dag rgya mtsho nor bu lta bu'i sems ni 'di nyid yin te kye//ma he rwa rur seng ge'i 'o ma gang blugs pa/ /nor bu rin chen 'bar ba de yis thob par 'gyur/ /nyon mongs pa rnams nyi mas rab tu skams pa'i 'od zer 'di/ /ngan 'gro la sogs log par lta bas 'jigs pa med pa de/ /gang dag rnyed pa de dag gzhal gyis mi lang ngo //ji ltar chos kyi dbyings su snang ba de srid du/ /zag pa med gang thams cad de yis spyad pa yin/ /dug sbrul phag rgod glang chen seng ges zos pa bzhin/ /de bzhin srid dang mya ngan 'das pa khyur mi 'das/ /bskal pa brjod du med pa brgya stong du ma ru/ /nyon mongs la sogs bsags pa'i sa bon ni//sems gcig snang bar 'gyur bas 'bras bu gcig tu log par 'gyur/ /sgron me khang bur nor bu gnas gyur pa'i/ /'od kyis thams cad zil gyis mnan par 'gyur/ /dman pa'i lta spyod nyan thos la sogs pa'i/ /sems de yang dag blangs nas 'jug par 'gyur//'di la gang na byang chub sems dpar gyur pa de/ /rdzogs pa'i sangs rgyas dka' bar 'gyur ba ma yin no/ /sems kyi skad cig 'di la mtha' yas mu med de/ /yan lag thams cad skad cig 'di la log par 'gyur/ /chos rnams thams cad kho na nyid la rdzogs par 'gyur ba yi//gzhan med gang zhig gang nas 'ongs par 'gyur ba ma yin no/ /zla ba'i snying po mun pa'i g.yul las rgyal bar 'gyur ba gang / /'jig rten rmi lam lta bu 'di la yang dag rnyed par 'gyur/ /brdzun pa gang yin 'di la yang dag sus mthong ba/ /bltar med de la gzugs su mthong bar ga la 'gyur//don dam par ni gang yang yod par 'gyur ba ma yin na/ /pha rol gzhan du mthong nas 'gro bar 'dod pa'i gang zag de/ /'di las gzhan du 'gro ba'i khyad par bse dri can bzhin no/ /'di ni pha rol brtol bas gang du ma bor bar/ /gcig kyang phyin pa med par 'dis brtol lo//kye ho gang 'di tha snyad lam 'dis btsal ma yin/ /thar pa rtag tu byi la lta bu'i mchongs pas nags su lhung bar 'gyur/ /gal te stag dang wa mo lta bu'i stobs ni go bzlog na/ /de nyid yod pas de la ci zhig phan par mi 'gyur ro/ /de nyid shes na mi bsam mi rtog par/ / gzugs mthong cir yang snang ba'i yul ni de ru stong par 'gyur/ /'di la yengs nas de la gnas par 'gyur ba ma tshor ro/ /dran dang shes bzhin gnyis ni bar gyi de la gang yang ma mthong ste/ /chos kun stor na 'di yi khong nas gnas par 'gyur ba yin/ /'di la dngos po med cing bsam du med pa de//khyod kyis rtswa mchog tsam du gnyis ka med par byos/ /kye ho sangs rgyas kun gyi yan lag bzhi pa 'di kun gsum du ston par ni/ /khyod kyis yang nas yang du bsams pas mthong ba gang yang med mod kye/ /'khor ba'i dran pas rten 'brel dag las 'byung ba ni/ /sna tshogs bar snang rang gi ngo bo ma skyes phyir//mi 'gyur bde ba chen po'i rang bzhin dag dang lhan cig skyes/ /sems kyi don dang de bzhin gshegs pa thams cad kyi/ /rang bzhin rnam par dag pa'i yon tan nyid/ /chos rnams thams cad gnyis su gdod nas ma byung ste/ /gnyis dang gcig gi dran pas du ma dag dang 'bral bar 'gyur//gang yang brjod par bya ba'i dngos po gang zhig rang gis stong pa ste/ /blo las 'das phyir mtshan ma rab tu 'joms/ /de med pa de gang yin gang na gnas par mi 'gyur ro/ /rgyun mi 'chad pa'i bsam gtan gang tshe thob par 'gyur ba la/ /bral bas 'di las gzhan du song bas ma mthong ngo //gsang sngags 'di kun rtsa ba de las bskyed par ni/ /de med pa las 'byung bar 'gyur ba gang yang yod pa ma yin kye/ /su zhig 'di la rtog par byed pa'i blun po de/ /bskal pa brgyar yang mchog gi don mi mthong / /gang zhig yid la byed pa'i mtshan mas brgyal ba kun//btang gzhag bral dang thob par mi 'gyur rgyal srid bzhin/ /cung zad drod thob byang chub sems dpa' dag /gang du g.yos pa med pa ma tshor ro/ /rnam par rtog can lam du zhugs pa'i phyir/ /byang chub sems kyi thig le rlung la gang bskyon pa/ / sa bon des ni 'khor ba 'di ru zags par 'gyur/ /yang dag pa yi de nyid thob par mi 'gyur zhing / /tshang tshing dra ba'i gseb tu 'brel bar 'gyur/ /shes rab mig gis log par tshar bcad na/ /gzhan gyi log par lta ba rang gi de ru grol/ /dka' thub la sogs gzhan du 'bad pa med//bdag med par ni rang byung gang yang rnam pa sna tshogs nyid/ /rgyu rkyen la sogs 'brel pa 'di ru stong par byos/ /rnal 'byor 'di la bdag gi gnas su 'dug pa ma mthong ngo / /sa dang pha rol phyin pa'i long ba gang 'chal 'dis/ /srid pa'i dra ba khur nas rgya mtshor mchong bar byed//de la gru med rgya mtsho'i zabs su zag par 'gyur/ /thog mtha' med pa'i phyag rgya chen po 'di/ /srid dang mya ngan 'das grol nyon mongs rgya mtsho skems par 'gyur/ /de la sems rgyun 'chad do snyam du sems shing stong par yid la ma byed cig /gang la don gyi brtul zhugs chen po 'di nyid ma thob par//brtul zhugs spyod pa'i dbang gis de la ma reg kye/ /byin gyis brlabs dang brlab bya med pas ngo mtshar che ba nyid/ /gnyis med sgro skur bral ba 'di la gnas pa gang / /rten dang bral ba'i tshul gyis gnas par 'gyur/ /'gro ba kun gyis de ltar shes par 'gyur gang ni//srid dang mya ngan 'das pa kun gyi don shes 'gyur/ /srid dang mya ngan 'das pa'i chos rnams rang gi sems yin par/ /gzhan du blta ba med par thag chod bsam med blo 'das nyid/ /de la bsgoms dang ma bsgoms rnam par rtog pa dang / /mtshan ma dgag dang spang bar bya ba mi dgos te//de la ci bya gang yang ma byas de nyid gsal bar 'gyur/ /ji ltar rnam rtog ma bkag ma spangs par/ /gzhan du ma mthong de nyid gsal 'gyur na/ /de ni gang la gnas kyang gzhan du mthong bar 'gyur ba ma yin no/ /ma bsgoms ched du ma byas 'bral ba med pa'i rang bzhin te//dus rnams kun du 'di don shes pa'i mtshan ma 'di la rtog par ma byed cig /rang la lhan cig gsal ba'i snang srid 'di la rtog med cing / /de las gzhan du rtogs pa'i blo can 'dis ni rgya mtsho nang gi nor bu rnyed mi 'gyur/ /gang nas byung zhing gang du gnas pa'i 'dzin pa 'di ni skye ba med 'gyur na//rgyun du 'gag pa med pas gzung 'dzin de ma skyes pas ye shes nyid/ /ngo bo de la dri ma ma spangs de nyid ma bsgoms par/ /nags khrod dag na gnas pa'i glang po yan par khye/ /mtshan ma'i yul gyi rnam g.yeng rtog pa bsam gyis mi khyab pas//gnod cing de la g.yeng bar mi 'gyur te/ /mtshon cha bral ba'i chom rkun dag gis gsad bcad ma yin no/ /mtshan ma de nyid snying po med 'gyur ba/ /sgyu ma'i dpe brgyad lta bur rang bzhin med par byos/ /gang mthong sems yin de la dngos po med 'gyur bas//dran med blo la mi gnas chos rnams thams cad ni/ /de las byung zhing de ru snang nas de nyid 'das 'gyur bas/ /'di la gzhan du g.yo ba gang yang med pa nyid/ /de la de nyid tsam du mkhyen gyis yid la ma byed kye/ /kye ho grogs dag blo la ci skyes sems de ni/ / dus rnams kun du gsal ba ma yin no/ /de la gsal rgyu ci yang med pa ste/ /brtsad pa kun dang bral bar ni/ /rang gnas pas ni grol bar 'gyur/ /ji ltar tshul 'chos byas pa'i sangs rgyas 'di kun ni/ /dge slong ma yin rgya mtsho'i nang du ltung / /'di nyid las ni gzhan dag tu//gcig kyang lta bar mi byed pa/ /des ni thams cad mthong ba'i dge slong yin/ /gang zhig brdzun la goms pa'i gnas brtan des/ /srid pa nyam thag 'di las 'byung bar nus ma yin/ /gang gis srid pa'i chu bo 'di brdzun par/ /shes pa de ni gnas brtan mchog thob 'gyur/ / rnal 'byor de yi spyod yul ni/ /lha dang sngags dang phyag rgya'i yan lag kun/ /'di kun shes na dbab tu yod pa ma yin no/ /de nyid shes pa de la de kun mthong ba med/ /de ltar 'di las ma gtogs pa'i/ /'du shes yul gzhan dag las ni/ /skye bar 'gyur ba yod ma yin/ / yul can gang gi phyogs dag tu/ /gnyis su mthong ba med par 'gyur ba de/ /rnam pa sna tshogs de nyid grol ba yin/ /gang zhig phyogs su lta bar gyur pa de/ /mtshan ma'i dran rig phra rags goms pa yin/ /gang zhig 'di las goms 'gyur bas/ /spyod pa ji ltar byas pa kun//don dang ldan par 'gyur ba ma yin te/ /nyam thag mtshan mas myur du 'ching bar 'gyur/ /gang zhig 'di dang phyogs su ni/ /gtad la goms su yod ma yin/ /bsam med yid la goms su med/ /kye ho grogs dag rig pa'i ye shes gnyis su med pa ni/ /ye shes bla na med pa'i dbang bskur chen po ste//rdzogs ldan dpal ldan bla ma dag gis ni/ /bskur du med pa'i tshul gyis thob par byed pa ni/ /mchog gi rnal 'byor rnams kyis dbang bskur te/ /thob bya med pa'i tshul gyis thams cad rdzogs/ /de nyid ma shes log sred can gyi dbang rnams ni//mtshan ma'i rtog pa dag gis gsum du zag par 'gyur/ /'di la nyon mongs shes bya'i sgrib pa las bsags kun/ /shes rab ting 'dzin mi dgos rnam par grol bar 'gyur/ /khro gnyer med pas zug rngu thams cad 'joms par ni/ /ma skyes pa yi tshul gyis 'dzin par mi byed do//snang ba 'gag pa 'di la gsal ba'i rtog pas yid la ma byed cig /phyin ci log dang rnam par rtog pa thams cad ni/ /nyon mongs lnga yi gnas su thams cad zags par 'gyur ba yin/ /gzhan dag 'di nyid shes bas 'khor ba'i dra ba dag gis stong pa nyid/ / u dum wA ra lta bur dkon 'gyur ba'i/ /rmongs pa'i mun sel snying po gsang ba'i don/ /sus kyang shes pa med par kun la gsal 'gyur ba/ /snying gar gnas pa'i don la dri ma med 'gyur te/ /brtul zhugs spyod pas gang de mthong ba ma yin no/ /'di rnams rdzogs la sbyor bar nus pa de//yan lag thim nas stong pa nyid du gnas/ /kye ho grogs dag gyad dang rje rigs ji bzhin du/ /gang gis khengs par myur du thob par 'gyur/ /rim par sbyang ba gang yang yod pa ma yin no/ /chos rnams thams cad stong pa nyid du ro gcig dang / /khyod kyis rdzogs par 'gyur bas thob pa ma yin no//gang tshe 'di la rtsa ba med par rtogs pa ni/ /da lta nyid du gnyis med nges par 'gyur ba yin/ /ji ltar srin bu spyod pas bcings par gang 'gyur ba/ /'di rnams ro la chags pas 'ching bar 'gyur ba ste/ /tshang tshing 'di la za bar nus pa gang gis ni//'khor lo thams cad rgyun du bskor bar 'gyur ba yin/ /sangs rgyas rnams kyi sku gsung thugs gsal ba/ /'di kun gang gis yid la ma byas par/ /ston pa'i bla ma rdo rje 'dzin la 'dud/ /sku gsung thugs yid la mi byed pa'i phyag rgya chen po zhes bya ba sangs rgyas gnyis pa ltar grags pa/