CLOSE WINDOW

D2269
བོད་ཡིག

/kye ho bdag dang byed par 'dzin pa ral pa can/ /bram ze gcer bu sad ga pa dang ni/ /kho na nyid bzhi 'dod pa'i rgyang phan pa/ /thams cad mkhyen zhes zer nas rang ma rig /des ni slu bar 'ong ste thar lam ring / /bye brag pa dang mdo sde sngags pa dang //rnal 'byor pa dang dbu ma la sogs te/ /gcig la gcig skyon 'gel zhing rtsod par byed/ /snang stong mkha' mnyam de nyid mi shes pa/ /lhan cig skyes la rgyab kyis phyogs par 'gyur/ /sku gsung thugs gsal mar mer ras dang mar nag bzhin//kho na nyid ldan rang snang mar me lta bur gsal/ /rang rig gsal bas 'gro ba kun la khyab/ /dbyer med tshul gyis ma skyes pa yi rang bzhin yin/ /bdag tu 'dzin pa'i sems kyis dran pa sna tshogs rgyu/ /ngo bo nyid la snang tshul cir yang 'char//mun pa lta bu'i bag la kun gnas kyang / /de nyid rnyed pa'i rnal 'byor sgron me 'bar/ /snying po'i don ni rtog ge'i yul las 'das/ /mngon du mi gsal dran pa'i mthu yis bsgribs/ /rtog med des shes dran med bde ba'i lam/ / bgrod med 'bras bu blo las 'das par snang / /lhan cig skyes pa thugs kyi gter mdzod nas/ /dag dang ma dag 'khor 'das gzugs su snang / /snang yang skye ba med pa'i ngang du gcig /de nyid mi g.yo tha snyad rang bzhin med/ /phyag rgya chen po 'gyur med bde chen dang //rgyu la mi ltos 'bras bu blo las 'das/ /phyag rgya chen po rdzogs pa'i 'bras bu yin/ /tha snyad lam gyi don la mtshon te sbyar/ /brjod bya rjod byed med pa snying po'i don/ /kun gyi brjod bya dran med rig pa'i dbyings/ /mos pa'i shes pas rtogs pa tha dad kyang //dran med 'di la brdzun pa yod re skan/ /lam gyi rtsol bas 'bras bu so so yang / /dran pa 'di la bden pa yod re skan/ /btang snyoms dbang gis re 'jog tha dad kyang / /skye med 'di la gnyis su yod re skan/ /yid la bya dang mi bya snyad 'dogs kyang //blo 'das 'di la btsal du yod re skan/ /snang ba'i rkyen gyis dran pa skye 'gyur yang / /stong pa'i dran med rkyen las 'da' ba med/ /rtog med don la bya bral blta ru med/ /rang la gzhan nas tshol ba a re 'khrul/ /kye ho rdo rje lta bur rtogs dka' kho na nyid//ma shes rtsol bas sgra phyir 'brang sems kyis/ /bya ba med pa'i don dang phrad par dka'/ /bya ba'i rang bzhin mi bya shes gyur na/ /rgyal ba'i dgongs pa nyag gcig yul las 'das/ /sku ni mi 'gyur chos nyid khong stong lags//lus la mi gnas bya dang byed pa bral/ /lam bslad lam gyi 'bras bu mthong mi 'gyur/ /skye med ngang la mi 'byed rgyal ba'i thugs/ /dran med ngang la mnyam gzhag bde ba che/ /bde chen ngang la mi rtog rgyun la gnas/ /yid la mi byed snang ba rang sar dag /rkyen ni dran pa ma 'gag ye shes gsal/ /rtsa ba gcig rgyas skyon med pad+ma bzhin/ /'gro ba kun la lhan cig skyes bzhin gnas/ /gzhan yod long mthong stobs kyis bslad mod kyang / /ji bzhin thog ma'i pad+ma me tog bzhin/ /legs mthong stobs kyi phyag rgya che mi g.yo//gzung dang 'dzin pa'i rnyog mas bslad gyur kyang / /dus gsum 'gyur med rtsa ba bdag nyid che/ /rnam shes rlung dang 'og sgo sngags la sogs/ /ye nas spyod bral rang gzhan btang gzhag bral/ /'khor bar mi sems mya ngan 'das mi ltos//dus gsum srid gsum sku gsung thugs la 'dus/ /gang la mi 'bad blang dor lta ba med/ /mtha' dbus mi 'byed dbu ma drang po'i lam/ /bcas bcos bral na thugs kyi lam mchog ste/ /bgrod 'jug rim sogs pha rol phyin pa'i lam/ /nye lam gzhag nas ring du 'khor ba'i rgyu//lhan cig skyes dang gnyen po 'gran zla bral/ /kho na nyid la sku bzhi ye shes lnga/ /nyon mongs la sogs tshogs pas 'khor ba'i lam/ /yul du gang skyes mi spyad yul med mthong / /ngo bo nyid la dga' dang mi dga' med/ / 'dzin rtog gnyis bcas ma bcos chos kyi sku/ /dbang po rang yan ma zin stong par gnas/ /smrar med nyams su myong ba rgyun mi 'chad/ /rang gi rgyud la sbyar te shes par bya/ /dri ma med pa'i don la phyag rgya che/ /rgya mtsho nam mkha' lta bu'i nyams myong 'byung / / dbang po yul bral ltung ba'i g.yang sa med/ /dran pas zin pas khyod nyid chags pa ste/ /rang btang gzhag pas spros pa slar la ldog /'char nub med na rnam rtog mun pa nub/ /chos nyid ro mnyam bud pa'i me tog mtshungs/ /skyon dang yon tan dbyer med nyid du mtshungs//ngo mtshar che ste nyams myong smrar ma gtub/ /bde ba dbyer med ji ltar chu gzhag bzhin/ /lhan cig skyes dang rnal 'byor de mi 'bral/ /dngos gcig bsam pa du mar dran mthong yang / /dran med gcig yin du ma nyid du yin/ /gang zhig lhan cig skyes dga' bde chen stong //rnal 'byor spyod pa blo las 'das par spyod/ /chags lam gnyug ma'i don la sbyor 'dod na/ /nang dang phyi rol ma dmigs bdag gzhan min/ /de nyid don shes rang bzhin grol bar bstan/ /sku gsum chos skur dbye ba med mod kyang //nyams su blangs na 'bras bu so so 'byung / /kye ho dbyer med rtogs na lta ngan myur du 'joms/ /skye med stong pa dbyer med thug phrad don/ /yin par shes na nags 'dab rten dang bral/ /thug phrad ma shes mtshan ma'i snying rje ni/ /'khor ba'i gnas su ci spyad zag pa'i rgyu//stong dang snying rje dbyer med skye ba med/ /gang zhig 'khor dang myang 'das re dogs bral/ /lus sems ma rnyed dran med rang dgar gzhag /de nyid blo yis ma rnyed rang byung yin/ /mnyam gzhag rjes thob zhi gnas mtshan nyid de/ / don dam ma yin blo yis bsgom du med/ /lus ngag sems kyis gzugs sogs rtsol med gsal/ /sna rtse la sogs dbyibs dang nam mkha' dang / /rtsa la reg par ma spyad gnyug mar gnas/ /snang ba thams cad bde ba yod mi byed/ /dran pa snang tsam sgyu mar shes tsam gsal//zla ba'i gzugs brnyan cha med gzung bas stong / /btsal kyang med la bltas kyang mthong ba med/ /sgyu mar snang ba'i dran pa de dran te/ /dran pa med las cir yang mthong ba med/ /dran par snang yang de la 'dzin pa med/ /dran pas reg kyang reg gi bsam bral bas//bsam du med pas bral bas skye ba med/ /dran pa skyes kyang yul la mi spyod par/ /cir yang ma grub stong pa'i rang sor gzhag /ji ltar byas kyang phyag rgya rgyun mi 'chad/ /yan lag bzhi ldan phyag rgya chen po bzhi/ /skye med don rtogs pa yi yan lag dang //bden gnyis tha mi dad kyi yan lag dang / /snang ba skye med thug phrad nyid du rtogs/ /dran pa gzung du med pa'i yan lag dang / /stong pa rkyen dang dran med blo las 'das/ /dngos po dgag sgrub med pa'i yan lag go/ /de nyid gzhir ldan 'dod pas dben pa dang //rtog pa dang bcas dpyod par bcas pa dang / /dga' dang bde dang dben par gnas la sogs/ /tha snyad de nyid mtshon pa'i yul du gsungs/ /gzhir ldan rab 'bring tha mar gsungs pa yang / /dman pa'i don du mkhas bas rab tu bshad/ / phyag rgya chen po gang la gnas mi byed/ /blang dor bral ba'i don du de bzhin bshad/ /gtsang smer mi 'byed gang yang dngos grub dag tu byed/ /lhan cig skyes dang yul la gtum mo sbar la sogs/ /dam tshig bdag gi kho na nyid dang rnal 'byor bsgom/ /dngos po thams cad mnyam nyid phyag rgya chen po la//rtog pa spang zhing mi rtog bsgom pa ci zhig 'gyur/ /bla ma la gus gsang ba'i 'dul sdom de ru rdzogs/ /phyi nang gsang ba'i dbang bskur so so'i mtshan nyid dang / /bum pa gsang ba shes rab ye shes dang / /ngo bo nges tshig dbye ba la sogs kun//thun mong mthu skyes phyag rgya che la reg mi nus/ /kye ho phyag rgya che la 'bras bu'i bdag nyid sku gsung thugs ldan pas/ /'bras bu de yang snying po'i don la 'thad kyis drang dang nges pa'i don la min/ /lam dang 'bras bu'i snying po thams cad bcud bsdus dang //theg chen bla na med pa'i dngos dang theg pa dag gi khyad par dang / /kun gyi snying por gyur nas gsang ba bla na med/ /phyag rgya chen po nges pa'i mtshan nyid ni/ /dran dang dran med gnyis su med pas skye med de/ /blo las 'das shing nam mkha' lta bur cir mi gnas//las kyi phyag rgya dpe dang chos kyi phyag rgya'i lam/ /phyag rgya chen po 'bras bu dam tshig phyag rgya gzhan don te/ /chos kyi phyag rgya man chad bsten pas mthar mi 'gro/ /re dogs mthar lhung 'du 'dzi bya ba'i skyon du 'gyur/ /kho na nyid la gnyen po dbyer med rang sor gzhag /rnam rtog ji snyed shar yang lhug pa nyid la shar/ /dran pa rang sar grol nas dran med lhug pa nyid/ /gang yang longs spyod snang bar shes shing dran med gsos/ /rang bzhin nyams nyid skye med dag tu ldan/ /kun la khyab cing 'bab chu lta bur gnas//rgyun mi chad pa'i 'bab chu lta bu dang / /mar me ltar gsal rang rig byang chub sems/ /'gog pa med bzhin dran rig rang gis stong / /yang dag kho na nyid ni gang zhe na/ /gzhan na yod na kun gyis mthong bar rigs//rang la yod kyang lkog gyur bla ma'i zhal/ /sems nyid sangs rgyas kho na nyid yin te/ /dran pas bslad cing de nyid gzhan du brtags/ /sangs rgyas yin phyir yon tan gang zhe na/ /yon tan ras dang dkar po lta bu ste/ /kho na nyid kyi yon tan phyag rgya che/ / ngo bo yon tan so so tha dad min/ /phyag rgya che dang bzhi pa la sogs kun/ /yon tan so so ma yin tha dad min/ /dran med yon tan rgya mtsho ma 'gul bar/ /dran par mi 'gyur chu yi dba' rlabs med/ /skye med yon tan mi 'gyur brag dang 'dra/ /brag ca grag tsam rjes su 'brang ba med//blo yis 'das shing yul du ma gyur pa/ /phyag rgya chen po'i yon tan nam mkha' 'dra/ /dran pa sems can sems las byung ba yin/ /de phyir stong pa gzhan nas btsal mi dgos/ /bzhi ru snang yang gcig gi yon tan ni/ /phyag rgya bzhi ru snang ba ci phyir mtshon//gong gi khyad par dag gi bzhi ru byung / /phyag rgya chen po gsum du rtog mi byed/ /gang la mi gnas chags pa med par spyod/ /me tog sbrang rtsi sbrang mas 'thung dang 'dra/ /so sor rtog pa'i ye shes thabs yin te/ /ro dang phrad na ro la zhen pa med/ / de ltar kun gyis shes par 'gyur ma yin/ /snying po'i don gyi 'gro drug khyab mod kyang / /'gro ba dran pas bcings te pad tra'i srin/ /sems las dran pa byung phyir 'khrul pa'i rgyu/ /yid la mi byed shes na sangs rgyas nyid/ /'khrul pa de la thabs dang shes rab med/ / kye ho dbyer med shes na thabs mchog de kho na/ /sangs rgyas sems can chos rnams thams cad kun/ /rang gi sems nyid dag dang lhan cig skyes/ /yid la mi byed yid la skyes tsam na/ /dran pa'i snang ba nub ste bden brdzun med/ /de phyir de nyid kho na'i yul ma yin//dper na mig gi yul du sgra mi snang / /rnam par mi rtog rtog pa'i yul ma yin/ /stong pa'i rkyen gyis dran pa gsal tsam na/ /dran pa'i snang ba nub nas mthong ba med/ /ye shes 'on long lkugs par mi 'gyur te/ /ma dran pa la 'on long lkugs rgyu med/ / bems po la sogs tha snyad kun dang bral/ /snang ba nub ces bya ba'i tha snyad ni/ /dran pa phyags te dran med gsos su spungs/ /de nyid skye med blo las 'das pa ni/ /dran pa med dang skye med ye shes mes/ /gzung 'dzin bsregs sbyangs blo las 'das phul bas/ /smon lam dbang gis skye ba phyis mi brgyud//de phyir phyag rgya chen po sngon song la/ /su la mi brten gang la rag ma lus/ /chu la zhugs dang tshogs dang za 'gyed byed/ /rig byed grong khyer dkrog pa dag dang mtshungs/ /phyag rgya chen po rang las gzhan med phyir/ /mchod rdzas dran pa mgron dang mchod gnas rang shes pas//mchod pa rang gi dran pa med la mchod/ /blo las 'das kyi skye med tshogs la rol/ /phyag rgya chen po gzhan la mi ltos phyir/ /bsgom bya rang la sgom byed rang gi sems/ /blo 'das rang la dmigs pa nyid dang bral/ / de nyid 'bras bu yin phyir gzhan la rag ma lus/ /bsgom bsgrub sngags bzlas rang gi sems yin te/ /yi dam lha dang rang gi sems yin pas/ /de phyir mkha' 'gro lung ston la sogs rang gi sems/ /sems ni dran pa cir yang snang bar ston/ /ma dran pa la thams cad dmigs su med//phyag rgya chen po rang las gzhan med phyir/ /sangs rgyas chos dang dge 'dun la sogs te/ /pha ma dkon mchog rang bzhin byang chub sems/ /mchod dang bsnyen bkur byas na dran pa'i rgyu/ /tha dad med na skye med rang sar grol/ /blo las 'das na bya dang mi bya med//sangs rgyas sems can mtshon tshul so so yang / /lhan cig dag tu skyes te rig ma rig /gang zhig snang yang dran par mi rtog na/ /sems can nyid ni 'bras bu skye ba med/ /gang zhig mi snang dran par rtog ce na/ /sangs rgyas nyid kyang khams gsum 'khor ba'i rgyu//gang zhig dran med yid la 'chang byed ci/ /sems can snang yang sangs rgyas dag dang mtshungs/ /gang zhig dran pa sangs rgyas rtogs 'dod na/ /sangs rgyas snang yang sems can khyad par med/ /des na snang brtags gnyis la brtag tu med de bor//bor yang rang las gzhan med 'gro rgyun 'chad/ /rang las yod snyam rtog ge dran pas bslad/ /snang ba gsal la mi rtog ma zhen sems/ /de phyir yod dang med pa'i rtog pa gnyis bral te/ /gnyug mar gnas na gang ltar byas kyang bde//dran pa 'od gsal 'dzin pa'i snying po can/ /zhen pa gnyis dang bral te rang bzhin gnyug mar gzhag /des na phyag rgya chen po zung du rab 'jug ste/ /dran pa dran med skye med zung du 'jug /dran med mi rtog pa yi rang bzhin dang / /rten 'brel glo bur skye ba'i dran pa gnyis//skye ba med pa'i ngang du ro gcig phyir/ /des na skye dang skye ba blo las 'das/ /'od gsal stong dang zung du 'jug la sogs/ /ma bcos ma byas skye med rang sar grol/ /de la sku gsum chos sku longs sku dang / /sna tshogs snang ba sprul sku zhes su bshad//gnyug ma ngo bo nyid kyi sku yin te/ /snying rje stong dang dbyer med skye ba med/ /las kyi phyag rgya la brten nyams myong ni/ /bcos ma yin phyir rkyen gyi stobs las byung / /gzhan la ltos phyir kho na nyid ma yin/ /chos kyi phyag rgya bcos ma ma yin kyang //nyams su myong bas ma grub nyid mi mthong / /phyag rgya chen po nyams su myong 'gyur na/ /dran pa sna tshogs skye ba med par shes/ /dngos por snang ba ngo bo nyid kyis stong / /sems can skye ba med dang dbyer med don/ /snying rje thabs kyis mtshon bya dpe yis bstan//sna tshogs snang yang blo 'das yul mi g.yo/ /bdag nyid rnal 'byor de nyid rtag tu blta/ /spyod lam thams cad phyag rgya che la gnas/ /dngos po'i gnas lugs skye med ngang du gzhag /rlung gi rkyen bcas rgya mtsho dang bral/ /dba' rlabs chu yi gnyer ma glo bur skye//de nyid rgya mtsho dag dang dbyer med do/ /dran pas rkyen byas rtog pa glo bur skye/ /de nyid sngar gyi dran pa med dang ni/ /skye med blo 'das ngag gis ngo mtshar mtshungs/ /de ltar phyag rgya che la skyes pa sngar med bzhin/ /phyis kyang rkyen gyi stobs kyis skyes srid kyang //skye ba med pa de dag dbyer med do/ /gzugs can ma yin kun la khyab pa dang / /mi 'gyur ba dang dus rnams thams cad pa'o/ /nam mkha' lta bur skye 'gag med pa dang / /thag pa sbrul bzung sbrul gyi stong pa dang / / chos sku longs sku sprul sku dbyer med de/ /ngo bo nyid ni blo yi yul las 'das/ /phyag rgya chen po skad cig mngon sangs rgyas/ /de nyid sems can don du gzugs skur byung / /rgyu mthun 'bras bu rnam smin 'bras bu dang / /dri ma med pa'i 'bras bu gzhan don byed//go 'phang khyad par brjod las 'das par bshad/ /kye ho ma bcos phyag rgya bde ba che/ /dran med klong du rang shar ba/ /skye med nam mkha' lta bur khyab/ /blo las 'das pa'i ngang la gnas/ /snang ba spros bral bde ba che/ /dran med cir yang mi rtog pa/ /dran pa sna tshogs sems su gsal//brtag cing btsal na dmigs su med/ /skye ba med pa 'dzin dang bral/ /'dzin dang bral ba'i rgyu ba med/ /dran pa sgyu ma rang rig tsam/ /sgyu med thar med dran med gsal/ /skye med don dam kun gsal bas/ /thams cad blo las 'das par snang //khams gsum blo 'das ye shes nyid/ /lhan cig skyes pa de kho na/ /dran pa'i rtsa ba ma lus thag bcad do/ /dran med skye ba med pa'i dbyings la dgod/ /de nyid ma bcos blo yi yul las 'das/ /dran rig sems kyi rang 'bar nyid du gsal/ / gsal bas rnam rtog 'khor ba'i grogs su 'gyur/ /thar pa'i lam ni kho na nyid shes nas/ /rang 'byung ji bzhin bsam bral ngang la gnas/ /dran pa rang gsal dngos por grub pa med/ /bcos med dgongs pa skye med bde chen 'di/ /mngon sum snang bas ngos gzung gang yang med//dran med yul du cir yang mthong ba med/ /rten dang bral bas slob pa gang yang med/ /gang la yid la byar med phyag rgya che/ /mtshan ma'i dran rig sna tshogs ji snyed pa/ /de nyid phyag rgya che la dbye ba med/ /rtogs dang mi rtogs gnyi ga so so min//rtag chad mtha' la mi gnas skyon dang bral/ /rang gi de nyid rtogs na gzhan las min/ /rten 'brel mya ngan 'das lam bstan pa dang / /skye ba med par rtogs na phyag rgya che/ /de nyid mi shes las kyi phyag rgya dang / /dam tshig chos la sogs pa rtsol 'dod pa//de nyid mtshon pa'i dpe tsam don mi nus/ /gzung 'dzin bral ba'i phyag rgya che brten pa/ /shes pa rang lugs so ma nyid la byung / /'dod med rang gzhan gnyug ma'i ngo bor gnas/ /tha mal snang ba'i shes pa 'di nyid blo/ /yin min dran pa'i sems la rang gzhag yin//yid ches rin chen gdams ngag yid bzhin gter/ /yid la bya dang mi bya med par gzhag /rang rig phyag rgya chen po nyid yin pas/ /phyag rgya chen po nyid la nyid kyis bstan/ /dran pa sna tshogs don la sems ma 'jug /phyi nang bral bas rtsod med phyag rgya dang //phyag rgya chen po srog ldan 'dod pa med/ /'dod pa byung na de yang dran pa'i rgyu/ /rang sems phyag rgya chen po la/ /dran dang ma dran tha dad skye pa med/ /'khrul dang ma 'khrul blo yi yul las 'das/ /dran pa'i zhen rtog brtas pas 'khor ba'i rgyu/ /'od gsal phyag rgya chen po gnyug ma'i ngo bo nyid//gang yang 'gyur med byang chub sems su gcig /kho na nyid la gzung 'dzin ngo bo bral/ /snang ba don ldan ye shes nyid du mthong / /bsam pas brtags pas dran pa'i tshogs su rgyus/ /snang ba skye ba log pa'i stobs kyis mthong / / dran pa dran med ngang la shes 'jug pa/ /lus ngag yid kyis 'bad kyang dran rgyu med/ /gnyis su med na 'khor ba'i rang bzhin med/ /dran pa sna tshogs 'gyu ba'i rang bzhin 'di/ /sna rtse'i phyag rgya dag la ye nas med/ /des na phyag rgya chen po bsam med blang dor gzhag /kye ho phyi nang zab dang mi zab bskyed rim dang / /yongs grub ngo bo nyid dang dbugs dbyung dang / /rgyas gdab las dang chos kyi phyag rgya ni/ /rnal 'byor yongs su rdzogs pa'i rim pa ste/ /phyag rgya chen po ngo bo nyid kyi rim/ /dam tshig phyag rgya yongs su grub pa'i rim//kun brtags yongs su grub pa'i rgya/ /las kyi phyag rgya dbang gi ngo bo dang / /dga' ba bzhi ldan thabs kyi rang bzhin can/ /chos kyi phyag rgya sna tshogs snang ba ste/ /dga' bzhi'i lhan cig skyes pa nyid/ /phyag rgya chen po skye ba med pa la/ /gzung 'dzin dran bral ngo bo blo las 'das//dri ma med pa'i 'bras bu mngon sangs rgyas/ /dam tshig phyag rgya mtshan ma'i rnal 'byor te/ /'bras bu lha yi dkyil 'khor 'gro ba'i don/ /rje btsun pha ma thabs dang shes rab mtshon/ /dga' ba bzhi ldan dam tshig phyag rgya che/ /de ltar thabs kyi sbyor ba kun 'dul yang //zab mo chos kyi phyag rgyas gtan la dbab/ /sems nyid phyag rgya chen po rang la bstan/ /dga' bas gzung ba'i dran pa bkar ba dang / /mchog dgas 'dzin pa'i dran phyed gtang ba dang / /lhan cig skyes dgas dran pa bkar bas dang / /dga' bral snang ba skye med dran pa gsal//de bzhin zab mo'i chos kyi phyag rgya bstan/ /dga' bzhi ye shes gang du skyes pa dang / /tha mi dad cing yongs su thim par gnas/ /rtog pa'i nyams myong dag la gnas pa dang / /yid la ma dran rtog pa tha mi dad/ /dpe dang lam ste tha snyad 'dul bar bstan//sems nyid phyag rgya chen po 'char ba ni/ /skye med skye ba'i cho 'phrul cir yang 'char/ /blo las 'das pas ma skyes ngo bor bstan/ /ma skyes pa dang skyes pa'i dngos po gnyis/ /tha dad med de gnyug ma'i ngo bor gzhag /dran pa sna tshogs gang la rgyu ba 'di/ / dran med 'jug pas rtog pa mi 'gag pa/ /shes pa rang lugs bzhag na gnas par 'gyur/ /snang dang stong dang gnyis 'dzin skye ba'i rgyu/ /tha mi dad par go na bde ba che/ /nyams myong shar bas mi mthun 'dzin pa bral/ /dran pa med de 'di 'dra'i yul med pa/ /dran pa med dang snang stong tha mi dad//ma skyes mtshan ma med pa'i rnal 'byor la/ /mnyam gzhag rjes thob med de rgyun gyi rnal 'byor la/ /snang dang skye ba dran pa gang skyes kyang / /de nyid stong pa dran pa med gnas pas/ /dran pa yid la byar med snang stong dbyer mi phyed//de nyid thug phrad skye med nyams myong la/ /snang ba'i ngo bo stong pa bde chen shar/ /chab rom chur bzhu btung du btub bzhin du/ /gang snang skye med bde ba chen por tshor/ /btang snyoms dran pa med de rtog pa ma bkag kyang / /blo las 'das bas rmongs pa sgom dang bral//'di la gnas na bde chen nyams 'byung ste/ /dang por snang ba stong pa'i nyams myong 'byung / /chab rom snang yang chu ngo shes bzhin du/ /gnyis pa dran pa'i snang ba ma 'gag par/ /stong pa bde dang tha mi dad par 'byung / /chab rom chu ru bzhu ba'i gnas skabs bzhin//dran pa dran med skye ba med la thim/ /thams cad tha mi dad pas bde ba chen por gcig /de nyid chab rom chu ru bzhu ba bzhin/ /thams cad rang bzhin thug phrad shes gyur na/ /bcing bkrol dag gis ma bzung dran pa'i rjes ma 'brang //'jur bus bcings pa bzhin du sems mi sgrib/ /'jur bu klod na grol zhing sems nyid gar dgar btang / /ldog pas gzings la 'phur ba'i bya rog bzhin/ /de nyid shes na snang ba longs spyod yin/ /lcags kyus btab pas glang chen thim pa bzhin/ / bya bral bzhag pas glang chen lom pa bzhin/ /dran pa dran med ngo shes gnod pa med/ /snang dang stong pa shes pas rtog dang bral/ /skye bar gnas pas dbyer med dran mi rgyu/ /de nyid khyab bdag dgra kun ngo shes bzhin/ /snang ba stong par thim pas lan tshwa chur thim bzhin//dran pa dran med thim pa de kho na/ /skye ba rnam pa gnyis la skye rgyu med/ /thug phrad skye med ye shes shar bas na/ /dran pa blo yi yul med phyogs med ye shes 'char/ /spra ba me mched rang 'bar me bzhin du/ /nyams myong smrar mi btub pa gzhon nu'i bde ba bzhin//sna tshogs snang yang dran par mi 'gyur ba/ /dal ba'i 'bab chus dba' rlabs mi 'gyur bas/ /rang gi ngo bo gsal bas mar me dran/ /de ltar phyag rgya chen po gang la mi bstan pas/ /bya sar ko ne mkha' la gnas bzhin du/ /rtogs pa'i spyod pas blang dor mi byed pa//srog chags pa ta ri bzhin zhen chags med/ /blo 'das 'bras bu 'dod na med grub pa/ /sman mchog nang na pe ta ji bzhin nyid/ /kye ho de ltar mkhas pa thabs zin dag gis ni/ /dran pa med la skye med rgyas btab ste/ /dran pa med pas dran med rgya yis btab//snang bas stong pa la rgyas gdab/ /stong pas snang ba la rgyas gdab/ /dran dang snang ba bde ba'i ror shar na/ /stong dang dran med rgya yis thebs pa yin/ /snang dang dran pa stong pa'i rgya dang ni/ /dran med gnas pa dag gis rgyas gdab na/ /snang dang dran pa bde ba'i ror shar nas//mtshan ma'i bsgom pas ma dpyad mtshan ma'i blo las 'das/ /dran dang snang ba dag la skye med rgyas btab pa/ /skye med dag la blo 'das rgya yis thebs/ /dran pas dran med bde ba'i rgyas thebs pas/ /stong par ma song chad pa'i mthar ma lhung / / gnas pa skye ba dag la rgyas thebs pas/ /dngos por ma song rtag pa'i mthar ma lhung / /thams cad blo las 'das shing skye ba med/ /thams cad bde ba chen po'i rgyu dang ldan/ /de ltar shes pas btang snyoms mthar ma lhung / /dran pa 'khor ba'i dngos po dang / / dran pa med pa'i rtogs pa la/ /btang snyoms lam du khyer bar byed pa dang / /rig pas gzhigs nas stong pa btang snyoms dang / /gzung 'dzin bral ba'i rang rig btang snyoms pas/ /bden pa gnyis bral gnyis med btang snyoms bsgom/ /gang du ma dran bsam gtan btang snyoms mchog /lung du ma bstan btang snyoms sgom ma yin/ /shes pa sor gzhag dran med nyams 'phro ba/ /dran pa'i mtshan ma dran med lam du khyer/ /bde ba lam khyer blo 'das ma dmigs pa/ /gnyis la mi rtog bde ba rgyun ma 'chad/ / kye ho nyams dang bral bas gzung 'dzin gnyis las grol/ /de nyid phyag rgya chen po'i don mthong 'gyur/ /'bras bu mthar thug rin chen gter chen la/ /phyag rgya che la gnas 'dod gang / /dri med 'bras bu rtogs par shog /sa ra ha'i zhal snga nas gsungs pa/