CLOSE WINDOW

D2268
བོད་ཡིག

rgya gar lho phyogs yul ko sa lar sku 'khrungs pa'i rnal 'byor gyi dbang phyug chen po shrI bai ro tsa na badzra'i zhal snga nas rang 'gyur du mdzad pa'o/ /[ ]@##/ /rgya gar skad du/ do ha ko Sha hr-i da ya ar+tha gI ti TI kA nA ma/ bod skad du/ do ha mdzod kyi snying po don gyi glu'i 'grel pa zhes bya ba/ 'jam dpal gzhon nur gyur pa la phyag 'tshal lo/ /sprul pa'i byang chub sems dpa' rin chen blo gros dang / /dpal ldan rnal 'byor dbang phyug chen po mda' bsnun gyi//ji bzhin dgongs pa lon pa dpal ldan sa ra ha'i/ /zhabs kyi rdul la sgo gsum dang bas phyag 'tshal 'dud/ /snying po'i don ni blo yi yul du ma gyur pas/ /bdag 'dras tshig tu brjod kyang don dang shin du ring / /tshig dang don gyi 'brel pa med de 'o na yang //dran rig sgron me 'di la brten pa'i don 'grel 'di/ /mu stegs la sogs gzhan gyi gzhung la mi smod do/ /rtogs na de dag snying po'i don las ma g.yos pas/ /'on te log par rtogs pas grol bar mi 'gyur te/ /don la dgos pa med pas zhib tu ma gsungs so//gzhan gyi gzhung gi rtsa ba'i rjes la 'grel pas bshad/ /bdag 'dra'i lugs kyis bshad pa'i rjes la rtsa ba bri/ /de yang sde snod rnams kyi lung tshig mi 'dren la/ /sngags dang rgyud rnams lung tshig bris pas rdzogs pa med/ / dpal ldan ri khrod zhabs kyi thugs dgongs 'ba' zhig la/ /brten nas gsung gi bdud rtsi'i thig pa'i brjed byang 'di/ /bdag dang bdag 'dra mos pa rnams kyi don du ni/ /don gyi gdams ngag 'ba' zhig bsdus nas bri bar bya// //de la re zhig do ha ko Sha gI ti 'di la don rnam pa gnyis so//snying po'i don ma rtogs pa la brgal ba dang / rtogs pa gsal bar byed pa'o/ /ma rtogs pa la brgal ba ni/ phyi rol mu stegs pa dang / nang pa sangs rgyas pa'o/ /de yang mu stegs bdag tu lta ba la/ /rtag pa dang bde ba dang / khyab pa dang /gcig pu dang bzhi khas lan te/ mi gsal ba'i mtshan ma dang / gsal ba'i mtshan ma zhi la bzhi pa la bzhed de/ de las 'gro ba'i don du rigs rnam pa bzhir gzigs nas/ ston pa rnam pa bzhir sprul pa/ tshangs pa dang / dbang phyug chen po dang / khyab 'jug dang / drag po 'jigs byed dang bzhi'o/ /de yang ma 'ongs pa'i dus na/ bram ze'i rigs dang / rje'u rigs dang / rgyal rigs dang / dmangs rigs rnams kyi don du'o// //de la bdag rtag pa ni/ tshangs pa'i zhal nas gsungs/ bdag bde ba ni dbang phyug chen po yab yum gyi zhal nas gsungs/bdag kun la khyab pa ni khyab 'jug gi zhal nas gsungs/ bdag gcig pu ni drag po 'jigs byed kyi zhal nas gsungs/ de la tshangs pa'i zhal bzhi nas bram ze'i don du rig byed bzhi gsungs kyang / don dam pa'i lta ba ma rtogs pas/de nyid mi shes bram ze ni/ /nges brjod kyi rig byed dang / mchod sbyin gyi rig byed dang / snyan dngags kyi rig byed dang / srid srung gi rig byed bzhi po tshul tsam bsgoms pas ma rtogs pas/ gyi na rig byed bzhi dag 'don/ /lus dag par byed pa sa/ ngag dag par byed pa chu/sems dag par byed pa rtswa ku sha/ rang bzhin dag par byed pa'i skud pa'i spyod pas ma rtogs pas/ sa chu ku sha'i dag byed dang / sbyin sreg phyi nang gi srog dang ma bral yang phung po me la sreg /don dam pa'i 'bras bu ma rtogs pa'i phyir na/ khyim na gnas shing me la sreg /tshe 'di la ni tsha ba'i sdug bsngal la sogs pa'i don med/ phyi ma'i tshe la ni grol bar mi nus pas/ don med sbyin sreg byed pa ni/ /yang dag pa'i lta ba ni ma rtogs/ sgrib pa 'ba' zhig nga la gnod pas/ du bas mi la gnod pa bas/ da ni dbang phyug chen po'i zhal nas gsung pa rje'u rigs kyi chos/legs ldan dang / dbyu gu pa dang / tha dad pa dang / ngang pa'i spyod pa dag la brgal ba/ nyi ma dang / zla ba la phyi rol gyi dbyu gu la brtsis nas sam/ pho smos kyi bde ba la brten nas legs par grol bar mthong bas/ dbyu gu dbyug gsum legs ldan gzugs//de yang pa dag la yab yum gnyis su bsgoms pa'am/ pho smos ngang pa ltar 'grogs pa'am/ rlung ngang pa ltar shes nas grol bar 'dod pas/ tha dad pa dang dad pa'i bstan pa dag /pho smos kyi bde ba'am/ dbyu gu rlung rgyu ba'i bde ba myong na dkar po'i chos sam nag po'i chos la khyad med pas/chos dang chos min mi shes par mnyam zhing don dam pa'i bde ba ma yin pa la don dam pa yin snyam pas/ 'gro ba rnams ni brdzun pa nyid du gol/ da ni khyab 'jug gi zhal nas gsungs pa rgyal rigs kyi chos/brtan pa dang g.yo ba la khyab pa'i e ril brgal ba/ de kho na nyid ni ma rtogs pa'i lci ba'am/ mi rus kyi thal bas lus la/ e ril thal bas lus la byugs nas su/ /khyab 'jug mgo bo la yod par bsams la spyod pa byed pas/ mgo la ral pa'i khur bu khur bar byed//sgom pa ni snying gar mar me lta bu nang gi phyogs bzhi'i mar me phyi'i khyim/ khyim du mar me btang nas gnas zur bzhir bud med bzhi bzhag la/ rang dbus su mtshan ma 'greng bas mtshams su 'dug nas dril bu dkrol/ man ngag gi snying ga'i mar me rlung gis tal gyis bskul ba'i dus su/skyil krung bcas nas mig btsum ste/ /snying dang 'dra ba'i slob ma la snying gar rna ba gtod pa'i dus su haM dgu'i sgras/ rna bar shub shub skye bo slu bar byed/ /gang slu zhe na thabs med pas reng mo'am/ go ba med pa skra med pa yin pas/ khyo mo skra med 'di 'dra gzhan la ston/ /snying gar a haM gi sgra thos pa tsam dris pa la/ dbang thob po zer nas yon 'dod/ dbang rnams bskur zhing bla ma'i yon rnams len/ /drag po 'jigs byed kyi zhal nas gsungs pa/ dmangs rigs grangs can la brgal ba/'dod pa la yengs pa'i skye bo rnams ni sen mo bcad cing byi dor byas so/ /nga ni 'dod pa spangs pa'i ched du sen mo ring zhing lus la dri mas g.yogs/ dge sbyong ni ngo shes pas chos gos dang skra spu gris bzhar la/ nga ni ngo tsha don dam par med pas/gos dang bral zhing skra ni 'bal bar byed/ lta ba ni ston ka'i nam mkha' la bltas pas yid chags/ rang gis rang la gnod pa skyel ba de la lam yin pas/ nam mkha'i yid can gnod byed lam gyi gzugs/ /bdag dang 'gro ba'i ched du sdug bsngal du byas na thar pa thob zer bas thar pa'i ched du bdag nyid 'gro byed slu/brgal ba rnams ni go'o/ /de nyid ma rtogs pa'i nang pa sangs rgyas pa la brgal ba/ de yang 'khor ba dang mya ngan las 'das pa'i 'dam gyis ma gos pa'i don dam pa'i bden pa ni ngo ma shes pas/ theg pa thun mong ba tsam gyis pha rol tu phyin pa drug la spyod kyang grol bas/ bde ba'i de nyid dang ni bral gyur zhing / /de yang sems kyi dka' thub kyi man ngag ni ma rtogs/ lus kyi dka' thub 'ba' zhig gis mi grol bas/ lus kyi dka' thub 'ba' zhig tsam ldan pas/ / de yang theg pa gsum/ gnas pa ni bzhi/ sbyor ba ni dgu kho na'o/ /de rnams kyi don lta ba dang / spyod pa dang / bsgom pa dang / bsam gtan gyi dri ma ni gzhan na gsal bas 'dir ma bris so/ /de la nyan thos tha ma 'bring rab gsum ni/ tshul dge slong gnas brtan zhes bya'o//tshogs la spyod pa dang bse ru lta bu'i rang rgyal ba ni/ ben+de rnams ni de ltar rab byung nas/ /theg pa chen po'i tha ma mdo sde ni/ /kha cig mdo sde 'chad par byed cing 'dug /'bring po sems tsam rnam bcas dang rnam med ni/ sems kyi nyams myong las ma bral bas/ la la ro gcig sems kyi tshul 'dzin mthong / rab dbu ma pa ni chos thams cad sgyu ma dang gnyis su med par smra ba dang / rnam grangs ma yin pa chos thams cad rab tu mi gnas pa rgyu mtshan nyid theg pa yin pas/ kha cig theg chen 'di la sgyu byed cing / /de la lung dang bstan bcos dang //tshad mas shes bya gtan la phab pa la/ /bskal pa du ma'i bar du gzhung la zhugs pa'i phyir na/ de ni gzhung lugs tshad ma'i bstan bcos yin/ /de la rdo rje theg pa ni/ 'khor lo sdom pa'am/ dgyes pa'i rdo rje la sogs pa bskyed pa'i rim pa bsgoms pas/gzhan yang dkyil 'khor 'khor lo ma lus bsgom/ de yang dbang bzhi pa la brten nas 'khor lo bzhi pa la thig le bzhi pa'i man ngag rdzogs pa'i rim pa 'chad pas na kha cig bzhi pa'i don 'chad pa la zhugs/ de yang stong pa nyid kyi zhi gnas mthong bas/la la nam mkha'i khams la rtog par snang / /la la ni sna tshogs dang / stong pa nyid ni dbyer med pa cig la blta bar byas pas/ gzhan dag stong pa nyid lta bar byed pa ste/ la la na re snang ba ni bems po ma yin la/ shes pa ni rig pa ma yin pas lha'i dkyil 'khor dang shes pa la 'brel pa med do zhes/ phal cher mi mthun phyogs la zhugs pa yin/ /de ci'i phyir zhe na/ chos thams cad kyi lhan cig skyes pa rnam pa gsum ngo shes pas na/ gzhan gang gis kyang mi grol bas/ lhan cig skyes bral gzhan gang gis/ /de yang zhi gnas phyogs gcig pas thar pa mi mthong bas/ mya ngan 'das gang sgom byed pa/ /'di ni zhi gnas so/ /'di ni lhag mthong ngo / /'di ni mnyam gzhag go/ /'di ni rjes thob po zhes bya ba la sogs pa'i rlom sems kyis don dam pa la mi reg pas/de dag 'gas kyang don dam ni/ /don dam pa ni blos reg tu mi btub pas/ brjod pa dang bral ba de'i phyir na ming gdags su ma btub pa de shes bya'i yul ma yin pas/ cig shos 'grub par mi 'gyur ro/ /cig shos ni blos yi reg la/zhi gnas la sogs pa ni blos mos pa yod pas/ gang zhig la mos par gyur pa des/ mos pa'i phyir na yang dag pa ma yin pas/ sangs rgyas kyi dgongs pa mi 'thob pas/ bsam gtan pas thar pa thob bam ci/ yang dag pa'i lta ba rtogs na/mchod pa'i rnam pa'am/ 'od gsal ba'am/ stong pa'am/ mi rtog pa mi dgos pas na/ mar me ci dgos lha bshos de ci dgos/ /yang dag pa'i ji lta ba bzhin du rtogs na/ phyi'i sngags ni khro bo'i sngags dang / nang gi sngags ni rlung rgyu ba la sems 'dzin pa dang /gsang ba'i sngags yid skyob ba mi dgos pas/ de la ci bya gsang sngags brten pas ci zhig dgos/ phyi rol pa bzhin du 'bab chu'i stegs la brten pa'am/ nags su 'gro nas dka' thub bya ba mi dgos pa bzhin du/ nang gi 'khor lo'i rim pa nas byang chub sems dbab pa dang /'khor lo'i rim pas stegs bya ba dang / byang chub kyi sems de nyid gyen la bzlog nas/ 'gro ba dang / de la brjod du med pa'i dka' thub mi dgos pas/ 'bab stegs 'gro dang dka' thub ci dgos te/ /phyi rol pa bzhin du khrus byas pa'am/sngags pa bzhin du mi gtsang ba la gtsang bar bsgoms pas thar pa mi thob pas chu la zhugs pas thar pa thob bam ci/ thabs dang / snang ba dang / dran pa dang / bde ba dang / gsal ba dang / bral ba'i stong pa nyid kyi zhi gnas 'ba' zhig la zhugs pa de don ma yin pas/snying rje dang bral stong pa nyid zhugs gang / /des phyag rgya chen po'i lam thun mong ma yin pa mi mthong bas/ des ni lam mchog rnyed pa ma yin no/ /yang na thabs kyi rnam grangs du ma yod kyang / blo'i pha rol tu phyin pa'am/ shes rab kyi pha rol tu phyin pa rtogs na/ bsgom pa ni tshu rol yin pas/ 'on te snying rje 'ba' zhig bsgoms na yang / /bsgom pa ni yid la byas pas khams gsum las mi thar bas/ 'khor ba 'dir gnas thar pa thob mi 'gyur/ /de yan du gzhan gyi gzhung bstan zin to// //da ni rang gi gzhung gsal bar bstan par bya ste/ de la lta ba la sogs pa nas 'bras bu re dogs pas 'jug bsdus la/ dpe sum cu rtsa lngas rtsa ba'i dpes bsdu bar bya'o/ /sum cu rtsa lnga de dag ni/ /snying po'i don yid la ma byas pa lta ba 'gyur ba med pa lag mthil du gnas pa'i dpe dang /spyod pa 'khrul dang ma 'khrul dbyer med pa la chu la chu bzhag pa'i dpe dang / bsgom pa zhen pa la brgal nas rang gzhung bstan pa ni sgyu 'phrul dra ba pang du 'khyud pa'i dpe dang / 'bras bu mtshon du med pa nam mkha'i dpe dang /sems nyid yid bzhin gyi nor bu'i dpe dang / de'i yon tan sbyor ba bzhi nam mkha'i dpe dang / rgyun mi 'chad pa'i bsam gtan rtogs na snyim pa chus bkang ba'i dpe dang / so ma rang tang lhug pa ni rnga mo'i dpe dang / rlung gi rnal 'byor la brgal nas rang gi gzhung bstan pa ni shing gi rnal 'byor gyi dpe dang /re dogs med pa bu chung gi dpe dang / rang gis nyams su myong yang gzhan la bstan du med pa gzhon nu ma'i bde ba'i dpe dang / yul gyi 'dam gyis ma gos pa ut+pala'i dpe dang /nyon mongs pas mi gnod pa dug can sngags can gyi dpe dang / mnyam gzhag dang rjes thob dbyer med pa glang chen lom pa'i dpe dang / chos sku las ma g.yos pa gzings las 'phur ba'i bya rog gi dpe dang / yul gnyis kyi skyon gyis 'ching ba ni thag pa la sbrul du mthong ba'i dpe dang /'dod pa'i yon tan lngas 'ching ba ni nya dang phye leb glang chen bung ba ri dgas kyi dpe dang / chos nyid rtogs pas 'dod yon spyod kyang mi gnod pa chu dang rlabs kyi dpe dang / rnam rtog glo bur ba chos sku la nub pa nyid rdul gyi dpe dang /du ma ro gcig ni chu la chu bzhag pa'i dpe dang / thug phrad kyi rnal 'byor ni nags la mched pa'i me lce'i dpe dang / gang la zhen pa 'gal ba ni til gyi shun pa'i dpe dang / dbang po'i mngon sum dang rnal 'byor gyi mngon sum 'dra la mi 'dra ba ni phag dang glang po'i dpe dang /rig pa med kyang 'gro don byed pa yid bzhin nor bu'i dpe dang / snod rtag pa'am dran du ma btub ka la ku ta'i dpe dang / chos nyid kyi ro ma stor ba ni lan tshwa chu la thim pa'i dpe dang / sems dang sems las byung ba dbyer med pa ni chu nang gi mar me'i dpe dang /sna tshogs chos sku las ma g.yos pas rgyal po la sgyu ma bstan pa'i dpe dang / rig pa zas su zos pa chung mas khyo zos pa'i dpe dang / 'khor ba dang mya ngan las 'das pa lhan cig skyes pa'i sdom pa me shel chu shel gyi dpe dang / chos sku blos reg reg 'dra ste mi reg pa ni gdol pa'i rig byed kyi dpe dang /longs sku ma rtogs kun tu ru la 'tshol na smig rgyu'i chu'i dpe dang / bzhi pa'i man ngag rtogs na zla ba'i nor bu'i dpe dang / sprul sku rtogs nas sems yan par glang po che skyong ba'i dpe dang / ngo bo dbyer med par rtogs na chu bur gyi dpe'o// //dpe de rnams gsal bar bya ba ni/ dang po kho na dus gsum gyi bde bar gshegs pa'i dgongs pa lta ba rtogs bya ma yin pa rtogs dgos te/ de yang 'khor ba dang mya ngan las 'das pa la sogs pa'i chos ji snyed pa cig gnyis su med par shes dgos so//'di la brjod bya mang po yod de bla ma'i zhal las shes par bya'o/ /de la rnal 'byor tha ma dang 'bring dang rab kyi dbang du byas na/ tha ma snang stong dbyer med lta ba/ bde stong dbyer med bsgom pa/ sku gsum dbyer med 'bras bu'o//rnal 'byor 'bring po na re/ rnal 'byor tha ma ni rnam par rtog pa 'ba' zhig la ming du btags pa'o/ /rnam rtog de yang dran pa tsam yin pas me long lta bu'i ye shes dang / man ngag gis dran med myong ba mnyam pa nyid kyi ye shes dang / skye med sa bstan pas so sor rtog pa'i ye shes dang /bya ba dang bral ba rtogs pas bya ba nan tan gyi ye shes dang / bsam du med pa shin tu rnam par dag pas chos kyi dbyings shin du rnam par dag pa'i dbyings de dag man ngag gis nyams su myong bas rnal 'byor 'bring po zhes bya'o/ / rnal 'byor rab na re/ rnal 'byor 'bring pos ye shes su ming du btags pa ni sgyu ma lta bu dran pa dang yid la ma byas pa dbyer mi phyed pa zung 'jug rab tu mi gnas pa tsam yin gyi/ gang dran pa med cing yid la bya ba med pa de stong nyid rab tu mi gnas pa dang / skye ba med cing dgag tu med pa de btang snyoms rab tu mi gnas pa/gang gis blos mi rig pa bsam du med pas rgyun chad rab tu mi gnas pa'o/ /de yang rab tu mi gnas pa de dag yid la mi byed pa dang dbyer mi phyed pas/ gang yang gnyis po'i sbyar ba'i nus pa des/ 'khor ba rnam pa gsum dang mya ngan las 'das pa gsum ni sems dang ye shes kyi sprul pa'o//sems dang ye shes gang yin pa de ni dngos po med pa'o/ /dngos po med pas ni dngos po ma yin pa la gnas par mi bya ste/ chos nyid skye ba med pa de ni sems las byung pa ngan pa 'di la gnas par mi bya la/sems nyid dran med shes bya yin pas gnas par mi byed pas/ 'khor bar mi gnas mya ngan 'das mi gnas/ /skye ba med pa de yang dran pa dang dran med la brten nas rtogs par 'gyur gyi/ dper na bud shing ma zad kyi bar du me gnas par 'gyur gyi/bud shing zad pa dang me la gnas med pa bzhin du/ dran dang dran med ma zad par du skye ba med pa zhes gnas par 'gyur gyi/ de gnyis rmi lam gyi sgyu ma lta bur shes pa/ skye ba med pa de dmigs su med pa'i phyir long ba lta bu yin pas brjod du med pa/kye lags gang smras brdzun pa long ba bor la/ sems la snang ba ni rkyen bag chags la rag lus/ sems la stong pa ni ltos pa'i chos la rag lus sems skye ba med pa de gnyis la rag lus pas/ snang ba dang / stong pa dang / skye ba med pa/gang la zhen pa yod pa de yang thong / zhi bsdus kyi chos thams cad yid la ma byas pa thug phrad du rtogs pas/ rtogs par gyur na de yin te/ yid la ma byas pa bla na med pas brda dang thabs kyis bstan yang rtags de ma yin/ dper na bram ze ma yin pa bos shig byas pas/gzhan ni ngos bzung ba med pa de bzhin du/ des gzhan zhig ni shes par bya ba'i yul ma yin pas/ de las gzhan zhig sus kyang shes mi 'gyur/ /de yang thos pa'i shes rab dang / bsams pa'i shes rab dang bsgoms pa'i shes rab sku gsum shes pas klog pa de yin 'dzin dang bsgom pa de yin te/de nyid thog ma med pa nas 'gyur ba med pa/ srid pa chags pa dang de'i bstan bcos kyang de las gzhan ma yin pas/ bstan bcos snying las 'chang ba'ang de yin no/ /bla ma dam pas brda dang thabs kyi sgo nas yid la mi byed pa'i lta ba mtshon na/gzhan rnam rtog yid la byas pas lta ba 'gyur ba med pa ni ma rtogs pas/ de mi mtshon pa'i lta ba yod min te/ 'o na yid la byas pa'i lta ba de rtogs su rung ba yin na shes bya yin la/ ma rtogs na nyon mongs pa yin no/ /de bas na brgyud pa'i bla ma dang dngos kyi bla mas brda dang thabs khyad par can gyis bstan du yod pas/'on kyang gcig tu bla ma'i zhal la ltos pa yin/ brgyud pa'i bla mas brdas bstan la/ /dngos kyi bla mas ni thabs kyis rtogs pa/ snying gi dkyil 'khor la gnas pas/brgyud pa'i bla mas smras pa dngos kyi bla ma'i gang gi snying zhugs pa/ dpe ci dang 'dra zhe na/ yid bzhin nor bu'am/ nor lha bsgrubs pa'i skyes bu'i lag pa'i mthil nas ci bsams pa 'grub pa de bzhin du/ lta ba 'gyur ba med pa rtogs na/ zad pa med cing 'phel ba med pas/lag pa'i mthil du gnas pa'i gter mthong 'dra// //da ni lta ba rtogs pa'i rnal 'byor gyi spyod pa/ chu la chu bzhag gi dpes bstan par bya'o/ /de yang 'khrul pa dang ma 'khrul pa gnyis su snang yang / gnyug ma'i ngang du gnyis su med do//byis pa so so'i skye bo la gnyug ma rnal ma lhan cig skyes pa yod pa de ma mtshon pa'i dus su yid la ma byas pa rtogs na/ gnyug ma'i rang bzhin byas pas ma mtshon par/ /gnyug ma ma bcos pa rang bzhin gyis rnam par dag pa'i dbyings de nyid brda yis ma mtshon par sgra dang tha snyad kyis mtshon pa tsam 'khrul pas/'di gtsang 'di mi gtsang 'di dge 'di mi dge la sogs pa bslabs shing bcos pas bus pa bslus pas na/ 'khrul pas bus pa bslus zhes mda' bsnun smra/ /don dam pa'i lhan cig skyes pa de bsgom du yang med la/de las khyad par 'phags pa yang med pas/ bsam gtan med cing rab tu byung ba'ang med/ /'o na yul dang yul gyi dga' ba spang dgos sam zhe na ma yin gyi/ dran pa'i khyim na gnas shing dran med kyi chung ma shes rab ma rnam pa gsum dang ma bral bar/khyim na gnas shing chung ma dag dang lhan cig tu/ /'o na phyi'i yul ni 'dod yon lnga/ nang gi yul ni dran pas mi 'ching ngam zer ba la rtogs na grol bas/ gang zhig yul gyi dga' bas bcings pas mi grol na/ de nyid yid la byas nas 'bad pa byas pas/mda' bsnun ngas ni de nyid shes pa yin/ /zhes smra/ gal te rgyun mi 'chad pa'i bsam gtan bzhi rtogs na/ yid la byas pa'i bsam gtan bya mi dgos pas/ gal te mngon du gyur na bsam gtan ci/ / yang na rgyun mi 'chad pa'i bsam gtan bla ma dam pas bstan pas ma rtogs na/ yid la byas pa yal bas/ gal te lkog tu gyur na mun pa 'jal/ /de la chos thams cad skye sa dang / gnas sa dang / 'gag sa ni don gyi lhan cig skyes pa'i rang bzhin rtogs na/lhan cig skyes pa'i rang bzhin de nyid ni/ lhan cig skyes pa'i rang bzhin dran pa dang bcas pa zhig yin nam/ dran pa med pa zhig yin nam zhen ma yin gyi/ dngos dang dngos po med pa ma yin te/ /rgyun mi 'chad pa'i bsam gtan sems ma lus pa yod pa ngo ma shes pas/mda' bsnun 'o dod rtag tu 'bad par byed/ /sems can thams cad kyis ma rig la des skye rga na 'chir 'gyur bas gang zhig blangs nas skye shi'i gnas gyur pa/ ma rig pa de nyid chos nyid kyi dbyings su yal ba'i dus su ma rig pa nyid chos kyi sku yin pas blos ma reg pas don dam pa yin pas/de nyid blangs nas bde chen mchog sgrub byed ces/ de yang 'dam gyis ma gos pa bde ba chen po de nyid brda'i skad du skad sprul sku'i sang ba longs sku/ mthon po'i chos sku/ ma rtogs pas/ skad gsang mthon pos mda' bsnun smra byed kyang //khams gsum gyi sems can rnams kyis rang la yod pa ngo ma shes pas/ byol song 'jig rten mi go ji ltar bya/ go zhing rtogs na bsam du yod dam zhe na/ bsgom pa dang bsam pa dang / dran pa ni rnam par rtog pa yin pas/ don dam pa ni bsam bsgom las 'das pas/blos ma reg pa'i dbyings de/ bsam gtan bral bas ci zhig bsam du yod/ /'o na bsam du ma btub pa na/ slob dpon dang slob bu bshad pa'i 'brel pa yod dam zhe na/ blo'i yul du ma gyur bas tshig gis brjod par mi nus pas/brjod du med gang ji ltar bshad du yod/ /bshad par byed na dran dgos te/ dran pa'i rnam par rtog pa ni 'khor ba yin la de nyid yal bar ma shes pas/ srad pa'i phyag rgyas 'gro ba ma lus bslus/ /dran pa ni rang bzhin gyis yal/ gnyug ma'i shes bya ma yin pas/rang bzhin gnyug ma sus kyang blangs pa med/ /gnyug ma rnal ma lhan cig skyes pa la/ /rgyud gsum mam lnga med/ phyi nang gsang sngags med/ de la brten nas bsgom bya sgom byed med pas/ rgyud med sngags med bsam bya bsam gtan med//bsgom pa bsam pa dran pa yid la byed/ /de kun rang yid 'khrul par byed pa'i rgyu/ /shes dang shes bya la sogs pa'i dri ma rang bzhin gyis dag la/ byas pa'i bsam gtan gyis bslad du mi btub pas/ rang bzhin dag pa'i sems la bsam gtan dag gis mi bslad de/dbang gi nyams su myong ba'i bde bas lus dang sems dang snang ba'i bde ba myong bar 'gyur yang glo bur ba yin pas bdag nyid bde la gnas shing gdung bar ma byed cig /de la ma 'khrul pa tshangs pa dgu'i man ngag bstan par bya'o//de dag gang zhe na/ tshogs kyi 'khor lo dang / las kyi phyag rgya dang / chos kyi phyag rgya dang / phyag rgya chen po dang / dam tshig gi phyag rgya dang / don gyi lus dang / don gyi ngag dang / don gyi yid dang / de dag dbyer med pa'o/ /tshogs kyi 'khor lo la/phyi dang nang dang gsang ba'o/ /phyi ni rnal 'byor pho mo yab yum tshogs pa'i dus su za zhing 'thung la gnyis sprod dga' zhing / lus lha'i 'du shes dang / ngag sngags kyi 'du shes dang / sems de kho na nyid kyi 'du shes dang ma bral bar bskyed pa'i rim pa bsgoms pas/rtag tu yang dang yang du 'khor lo 'gengs/ /'bras bu rdo rje theg pa'i bskyed pa'i rim pa la sogs pa ji bzhin pa rtogs na/ chos 'di lta bus 'jig rten pha rol 'grub 'gyur te/ de ma rtogs na/ rmongs pa'i mgo bor rdog pas mnan nas song /nang gi tshogs ni bdud rtsi lnga dang sha lnga ni za la/ rdo rje chu 'thung gi man ngag gis 'thung la/ bde ba dang stong pa dbyer mi phyed pas za zhing 'thung la gnyis sprod kyis dga' zhing / 'khor lo rim pa bzhin du byang chub kyi sems kyi bde bas 'gengs pas na/rtag tu yang dang yang du 'khor lo'i 'gengs/ /thabs khyad par can gyi man ngag rtogs na/ chos 'di lta bus 'jig rten pha rol 'grub 'gyur te/ de lta bu'i chos ma rtogs na rmongs pa 'jig rten mgo bor rdog pas mnan nas song /gsang ba'i tshogs ni zas su dran pa za/ skom du dran pa 'thung la/ skye ba med pa dbyer med pas/ za zhing 'thung la gnyis sprod kyi dga' zhing / dran dang dran sprul pa'i sku yin pa dang / skye ba med pa longs sku blos ma reg pa chos sku yin pas/rtag tu yang dang yang du 'khor lo 'gengs/ /de lta bu'i chos nyid yang dag par rtogs na/ chos 'di lta bus 'jig rten pha rol 'grub 'gyur te/ chos nyid blo las 'das pa ma rtogs pas/ rmongs pa'i 'jig rten mgo bor rdog pas mnan nas song /da ni las kyi phyag rgya'i dpe don gnyis la/ dpe las kyi phyag rgya ni gzhan gyis bshad zin to/ /don las kyi phyag rgya ni/ rang gi byang chub sems thig le rnam pa bzhi/ de yang man ngag gis bstan pa'i dus su dran pa'i thig le 'khor ba/dran pa med pa mya ngan las 'das pa skye ba med pa'i mtshan nyid yid la ma byas pas/ blo las 'das pa'i mtshan nyid yid la ma byas pa'i dus su/ bla ma'i man ngag gi rnam rtog mi rgyu rig pa mi rgyu bas/ gang du rlung dang sems ni mi rgyu zhing //dus de la dran pa'i nyi ma snang ba mi 'jug /dran pa med pa zla ba mi snang ba mi 'jug pas/ nyi ma zla ba 'jug pa med gyur pa/ /shes bya shes bya ma yin la/ /man ngag bstan pa'i dus su sems dal sos yin la/ dran dang dran med de bzhin gshegs pa'i dbugs dbyung ba dang /skye ba med pa rdo rje 'chang gi dbugs dbyung ba dang / blo las 'das pa bde ba chen po'i dbugs dbyung bas/ mi shes pa dag gnas der sems ni dbugs dbyung zhig bla ma dang slob ma'i man ngag bstan du btub pas/ mda' bsnun gyis ni man ngag thams cad bstan nas song //dpe'i chos kyi phyag rgya dang / don gyi chos kyi phyag rgya gnyis la/ dpe'i phyogs kyi phyag rgya ni gzhan gyis bshad zin to/ /don gyi chos kyi phyag rgya ni/ chos ma lus pa sems la bsdus/ de yang sems rtsa gsum la'o//dran pa'i rtsa ni rol mo mkhan dang 'dra bas la la nA'o/ /dran pa med pa'i rtsa ni mnyam pa nyid la gnas pas ra sa nA de gnyis las gzhan skye ba med pa ngos bstan yod la ngos gzung med pas a wa d+hU tI'o/ /de las dran pa dang ma dran pa byung yang dbyings de la/gnyis su mi bya gcig tu bya ba ste/ /dran pa sku'i rigs/ dran med gsung gi rigs/ skye med thugs kyi rigs/ dbyings de la tha mi dad pas/ rigs la bye brag dag tu ma byed par/ dran pa la chags na 'dod pa'i khams kyi rgyu/ dran med la chags na gzugs kyi khams kyi rgyu/ skye med la chags na gzugs med pa'i rgyu yin la/sems kyi cho 'phrul yin pas de la yang dag tu mi 'dzin pas na/ khams gsum ma lus 'di thams cad ni/ de'i phyir blos ma reg pa'i bde ba bla ma dam pas bstan pa de la chos ma lus pa de'i dang las ma g.yos pas 'dod chags chen po gcig tu kha dog sgyur cig dang /phyag rgya chen po rang bzhin gyi rnam par dag pa la ni dpes mtshon par bya ba ma yin gyis/ don 'di lta bu zhes mtshon du med de/ 'o na yang bla ma dam pa'i gdams ngag gis bstan ma thag tu rnal 'byor mngon sum rkyen gsum gyis ma bslad pa de ni dus gsum mnyam pa nyid sprul pa'i sku gnas pas/der ni thog ma bar mtha' med/ /srid pa dang mya ngan las 'das pa skye ba med pa'i dbyings su longs sku gnas pas/ srid med mya ngan 'das pa min/ /'khor ba dang mya ngan las 'das pa'i 'dam gang gis kyang ma gos pas ni chu'i nang gi zla ba bzhin du 'dres la ma 'dres pa chos kyi sku ni bla ma'i zhal las shes par byas la de yang rkyen gsum gyis ma bslad pas/bde ba chen po mchog 'di la/ /bdag gi don dang gzhan gyi don gnyis ma grub bas na/bdag dang gzhan ma grub ba'i ngo bo nyid kyis tha dad pas ma yin te/ glo bur gyi dran pas ma byung ba'i ngo bo nyid kyi sprul sku dang / dran med ma byung ba'i ngo bo nyid kyi longs sku dang / skye med ma byung ba'i ngo bo nyid kyi chos sku de la bdag don dang gzhan don dang gnyis su ma grub pas/bdag dang gzhan na yod ma yin/ /dam tshig gi phyag rgya dpe don gnyis la/ dpe ni gzhan gyis bshad zin to/ /don ni da ltar gyi dran pa 'dis sna tshogs su snang bas rnam par snang mdzad mdun du/de'i pha rol na dran pa med pa'i snang bas khyab pas snang ba mtha' yas rgyu ba/ de gnyis dbyer med pa las yid bzhin gyi nor bu bzhin du sna tshogs 'byung bas rin chen 'byung ldan/ sna tshogs de nyid las 'gro don mdzad pas don yod grub pa/ rang gi ngo bo las ma g.yos pas mi bskyod pa/'khor ba dang mya ngan las 'das pa de dag dang po rgyu med pa de nyid rgyu gcig par rtogs pa byams pa/ ma rtogs pa rtogs par byed pa thabs snying rje/ rtogs nas bral du med pa dga' ba/ de nyid blo'i yul las 'das pa btang snyoms/de rnams yid la ma byas pas rdo rje sems dpa' ste bcu'o/ /de gang ltar bltas kyang de las ma g.yos ba ni/ mdun dang rgyab dang phyogs bcu ru/ /yang na bskyal sa gang du bskyal ba bstan pa ni/ /rang gi shes pa la snang ba ni gzugs kyi phung po rnam par snang mdzad dang /rang gi tshor bas tshor ba'i phung po rin chen 'byung ldan dang / de nyid kyi 'du shes su yod pas 'du shes kyi phung po snang ba mtha' yas dang / de ltar 'du byed kyi rnam pa ni 'du byed kyi phung po don yod grub pa dang / shes pas ma rtogs pas gzhan pas rnam par shes pa'i phung po mi bskyod pa ni ye shes lnga ste 'jig rten pa'i phung po lnga'o//man ngag gis bstan pa de ni dran pa med cing yid la bya ba med pa de ni tshul khrims kyi phung po rnam par snang mdzad dang / de nyid rgyun mi 'chad pa ting nge 'dzin gyi phung po rin chen 'byung ldan dang /de nyid blos mi reg pa shes rab kyi phung po snang ba mtha' yas dang / de nyid gang gis kyang ma bcings pa rnam par grol ba'i phung po don yod grub pa dang / gang gis kyang ma bcings pa'i de nyid la sangs rgyas kyi dgongs pa yod pas rnam par grol pa'i ye shes gzigs pa'i phung po mi bskyod pa/de dag ye shes lngas rgyas btab pa ni 'jig rten las 'das pa'i phung po lnga ste/ rnal 'byor pa 'ga' tsam gyi spyod yul lo/ /ma rtogs na 'jig rten pa'i phung po dang 'grogs la/ rtogs na 'jig rten las 'das pa'i phung po dang /lhan cig tu sgyu ma lta bus chags pa dang grol ba'i lam gnyis las/ 'jig rten pa'i phung po lnga ni chags pa'i lam dang / 'jig rten las 'das pa'i phung po lnga ni grol ba'i lam gnyis la gnas pas/ mdun dang rgyab dang phyogs bcu ru//gang ltar bltas kyang yid la ma byas pa'i de kho na nyid dang mi 'bral ba yin pas/ gang gang mthong ba de de nyid/ /bla ma dam pas brdas bstan pa'i dus su/ rtsa rdul tsam gyi the tshom med par yang dag pa ji lta ba bzhin don rtogs pas/de ring nyid du mgon po da ltar 'khrul pa chad/ dri ba dang dri ba'i lan ni dran pa 'ba' zhig yin la/ cig shos ni gtan yid la byar med pas/ da ni su la'ang dri bar mi bya'o/ /lhan cig skyes pa'i lus la dpe don gnyis las/ dpe'i lhan cig skyes pa'i lus ni thig le dkar dmar gnyis la mig gi dbang po la sogs pa med/don gyi lhan cig skyes pa'i lus la yang dpe don gnyis/ dpe ni bag chags dang bcas pa dang bag chags med pa'o/ /bag chags dang bcas pa ni yid kyis gzugs la bltas ba'i dus su/lus de la sha khrag dang dbang po gang yang med/ bag chags med pa dpe'i lus ni rang gis ma phyin pa'i sar yid kyis bltar med pa'i phyir yid kyi gzugs med pa'i phyir dbang po med/ de dag gis ma mtshon pa'i dus gsum mnyam pa nyid du 'du shes pas dus gsum rtsa ba dang bral la gnas pa don gyi lus ni brgyud pa'i bla ma dam pas bstan pas/dbang po gang du nub 'gyur zhing / /de la bdag dang bdag gir bgyi ba la sogs pa'i ngo bo nyid kyis ma grub pas rang gi ngo bo'ang nyams par 'gyur/de ltar dus gsum gyi bde bar gshegs pa'i dgongs pa yid la bya ba ma yin pa ni ma rtogs/ yid la byas pa 'di dag gis 'khor ba las thar pa mi thob pas/ sdig pa'i grogs po yin/ don dam ni yid la byar mi btub pas lhan cig skyes pa rtogs na dge ba'i bshes gnyen yin pas/grogs dag de ni lhan cig skyes pa'i lus/ /de yang brgyud pa'i bla ma dam pa'i zhal gyi brdas bstan ma thag tu dngos kyi bla ma yid kyi brdas the tshom mi za ba de/ dpe'i lhan cig skyes pa la ma dri bar/don gyi lhan cig skyes pa bla ma dam pa la rag lus pas/ bla ma dam pa'i zhal la gsal bar dris/ /da ltar gyi ngag ni dbyangs dang gsal byed dang yid dang rlung rgyu ba las/ brjod byas don ji bzhin pa tshol ba yin gyi/ ji bzhin pa de brjod bya ma yin pa/ de yang dpe'i lhan cig skyes pa'i dbang gis thig le dkar dmar gyi bar na yid kyi rlung mi rgyu ba'i dus su snang ba ni nub/ stong pa ni ma shar ba de bzhin du/ don dam pa'i ngag la yid dang sems dang rig pa dang / rnam par shes pa'i dran pa'i rlung mi rgyu/ yid ni gar 'chi rlung gar dengs//de la sangs rgyas kyi yon tan sku'i rnam pa'i gzhir gyur pas/ sa steng 'di na yan lag thams cad gnas/ /gang du shes par bya zhe na/ dpe'i thig le dkar dmar gnyis sam nyi zla'i bar na brjod du med de/ don gyi thig le dran dang dran med kyi mtshams su shes pas/de ni rmis pas mtshams su yongs shes bya/ /de yang shes dang shes bya ma yin pa ni zab pa dang brjod du med pa de nyid shes pas/ gti mug rgya mtsho 'chad pas gang shes pa/ /da ltar gyi sems ni rkyen dang bag chags la sogs pas bsgyur ba'i phyir na dpe tsam du shes par bya'o//don dam pa'i sems ni 'gyur ba med cing rnam par rtog pa med pa'o/ /rtogs pa med pa de yang thog ma med pas na glo bur gyi dran pa'i 'dam dang / dran med kyi 'dam gang gis kyang ma gos pas/'di ni bde chen mchog yin te/ /rtogs pa'i rnal 'byor pa rnams kyi 'gro sa ni/ lus kyi thim sa dran med sprul sku'o/ /ngag gi thim sa skye med longs sku la'o/ /yid kyi thim sa blo las 'das pa chos sku man ngag gis bstan pas/ sa ra ha yis bstan nas 'gro/ /'o na bstan du yod dam zhe na/ dran pa 'di nyid kyi sgron ma la brten nas/ dran med skye med blo las 'das pa ngo bstan pa ni/ kye ho 'di ni rang rig ste/ /don gyi ngo bo la ni 'khrul pa med de/ de ma rtogs pa'i dbang gis dran pa'i 'khrul pas 'khrul zhing gda' na/rtogs pa'i dbang gis dran pa dbyings su dag nas blo'i yul du ma gyur pa de la ni the tshom mi za bas/ 'di las 'khrul par ma byed cig /dus gsum gyi bde bar gshegs pa'i dgongs pa ni/ dngos po ji lta ba bzhin yid la byas bas 'ching la/dngos po med pa stong pa nyid ji lta ba bzhin yid la byas pas kyang 'ching bas dngos dang dngos med bde bar gshegs pa 'ching ba ste ji srid gzung dang 'dzin pa ni srid pa'o/ /gzung ba dang 'dzin pa med pa'o zhes de yang yid la byas na dran pa dang rang gi srid pa'o//chos rnams kyi ngo bo yid la ma byas ba de ni mnyam pa nyid do/ /mnyam pa nyid mnyam pa nyid ces bya ba de ming tsam yin pas/ srid dang mnyam pa nyid tha dad ma byed par/ gnyug ma rnal ma lhan cig skyes pa'i rang bzhin ni yid la byar med do/ / rnam par rtog pa ni yid yin pas dran pa'o/ /dran pa de ni na bun bzhin du yal bas/ gnyug ma'i yid ni gcig tu sdod dang rnal 'byor pa/ de yang na ma dran pa 'di la mngon par zhen na/ chu la 'bru mar thigs pa gnas pa bzhin du/ spros pa dang bcas pa yin no/ /dran pa 'di nyid go bar shes na chos thams cad ni chos nyid du thim pas/ chu la chu bzhag bzhin du shes par byos// //da ni bsgom pa 'phrul pa dang ma 'khrul pa sgyu 'khrul dra ba pang du 'khyud pa'i dpes bstan par bya'o//snang stong dang bde stong dang gsal stong dang rig stong dang zung 'jug la sogs pa'i bsam gtan yid la byas pas thar pa mi thob po/ /yid la byas pas ni khams gsum las 'da' bar mi nus so/ /la la na re zhi gnas la mnyam par bzhag nas/ lhag mthong dang rjes las thob pa'i shes pa de nyid ji lta ba bzhin du rtogs pa la ma yengs par byas na thar pa thob zer te/ rtag tu mnyam gzhag yin par ma shes na yid la byas pa'i mnyam gzhag gis ni thar ba mi thob pas/ bsam gtan brdzun pas thar ba rnyed min no//rgyun mi 'chad pa'i bsam gtan ma shes na/ /glo bur du dran pa'i bsam gtan ni/ dper na sgyu ma mkhan gyis ri mo mkhan bslus pa'i sgrung brgyud dang / tshong dpon gyi bu rin chen gling du song pa smad 'tshong ma sgyu 'phrul zhes bya bas bslus pa dang / tshong dpon gyi bu dra ba zhes bya ba spre'u yis smad 'tshong mo sgyu 'phrul bslus pa'i sgrung brgyud bzhin du/zhi gnas kyis lhag mthong bslus pa dang / lhag mthong gis zhi gnas bslus pa dang / mnyam gzhag gis rjes thob bslus/ rjes thob kyis mnyam gzhag bsdus pa dang /snang bas stong pa bslus pa/ stong pas snang ba bslus pas/ sgyu 'phrul dra bas ji ltar pang du 'khyud/ /de dag rang bzhin ji lta ba bzhin du shes na/ dper na sgyu ma mkhan cig gis rgyal po'am/ blun po mkhas pa rig pa can cig la/ rta dang glang po dang /skyes pa dang / bud med gzhon nu ma/ yid 'phrog par sprul nas bstan na/ de yis yid 'phrog par mi 'gyur ro/ ci'i phyir zhe na sgyu ma yin par shes so/ /de bzhin du bla ma dam pas brda dang thabs kyi sgo nas rgyun mi 'chad pa'i bsam gtan bstan pa'i dus su don dam pa'i bden pa mthong bas/kun rdzob kyi bden pa sgyu ma tsam la yid ches par mi 'gyur ro/ /sku gsum gyi bsam gtan rang la yod par bla ma dam pas bstan pas yid ches par 'gyur bas na/ the tshom med par rtogs pas na/ / bla ma dam pa'i bka' yis bden par yid ches pa/ brgyud pa'i bla ma dam pa'i brdas bstan pa de rtag pa dang chad pa dang / bde ba dang stong pa dang / 'khor ba dang mya ngan las 'das pa'i tha snyad gdags su ma btub pas/ yid brjod du yod ma yin zhes mda' bsnun smra// //da ni re dogs med pa'i 'bras bu mtshon du med pa nam mkha'i dpes bstan par bya'o/ /nam mkha' ni yod pa dang med pa la sogs pa'i tha snyad gang gis kyang mi gos so/ /nam mkha' zhes bya ba ming du btags pas ming tsam yin pas/nam mkha' dngos po med pas gzugs la sogs pa de dag mig gi 'dus te reg pa las byung ba'i tshor ba la sogs pas tshor bar 'gyur gyi/ nam mkha' dngos po can cig yin na ni/ /bde sdug la sogs pa'i tshor bar mi 'gyur ro/ /nam mkha' ni skye 'gag la sogs pas ma gos pas/gdod nas dag pa nam mkha'i rang bzhin la/ /don sems nyid de yang rkyen gang yang ma byung ba'i dus su bltas pas dran rig tu shes/ yang bltas pas skye med du shes/ yang gcig bltas pas blos reg pas/ bltas shing bltas shing mthong ba 'gag par 'gyur/ /de nyid 'bras bu chos kyi sku rtogs pas ni/ shes dang shes bya 'gags pas/ de lta bu nyid dus su 'gog par 'gyur/ de nyid gnyug ma'i chos rnams kyi lhan cig skyes pa yid la bya ba ma yin pa ni ma rtogs/yid la byas pa 'di 'bras bu chos kyi sku yin snyam pas/ gnyug ma'i yid la skyon gyi bus ba bslus/ /khams gsum gyi sems can rnams ni nyon mongs pa'i sgrib pa dang bral bar bya'o snyam nas lhag pa'i bsam pas/ skye bo ma lus lhag par sun 'byin cing //nyon mongs pas sun 'byin na/ shes byas sun 'byin pa ni/ dper na btson ra nas byung yang btson ra'i nang du chud pa bzhin du/ shes bya'i nga rgyal de nyid blo las 'das pa la thim par ma shes na/ nga rgyal skyon gyis de nyid mtshon mi nus//khams gsum gyi 'jig rten ma lus pas ni rang la yod pa'i bsam gtan ma rtogs pas/ 'jig rten ma lus bsam gtan gyis rmongs 'gyur/ /rang bzhin gyis rnam par dag pa'i chos nyid spros pa thams cad dang bral ba rnal 'byor gyi dgongs pa ni dpe dang don gyis mtshon du med pas blos byas mi rtogs pas/gnyug ma'i rang bzhin sus kyang mtshon du med/ /chos rnams kyi rtsa bar gyur pa sems yin te/ sems rang bzhin gyis ma grub pas/ rtsa ba mtshon du med pas sems kyi rtsa ba mi mtshon te/ sems las byung ba 'di ltar snang ba dang po dran med las skyes/ dran med la gnas dran med la thim pas/ snang ba'i lhan cig skyes pa ni dran pa med la nyams su myong du yod pa'o/ /sems ni rkyen ma byung ba'i dus su dran pa med de stong pa nyid/ dang po skye med las skyes/skye med la gnas/ skye med la thim pas stong pa nyid kyi lhan cig skyes pa ni skye ba med la nyams su myang du yod pa'o/ /sems nyid dran dang dran med ma byung ba'i dus su skye ba dang / 'gag pa las bral ba'i sems nyid de yang blo'i yul las 'das nas/chos rnams kyi chos nyid dus gsum gyi snying po de las skyes pa dang / gnas pa dang thim pas/ skye ba med pa'i lhan cig skyes pas bsam du med pa rtogs par byed na/ lhan cig skyes pa rnam pa gsum gyis/ sems rtogs na/ snang ba dang / stong pa dang /skye ba med pa de dag skyes nyid la 'gag pas gang la de skyes gang du nub/ chos rnams kyi chos nyid btsal na mi rnyed pas/ gang na gnas gyur gsal bar mi shes so/ /sems can rnams kyi gzhi rtsa med pas/ sangs rgyas rnams kyi ye shes kyi gzhi rtsa med do//rtsa ba med pa ni byang chub sems kyi rtsa ba ste/ dmigs su med pas na rtsa ba bral ba'i de nyid gang sems pa/ byang chub sems kyi rang bzhin rtogs par byed na/ lhan cig skyes pa'i man ngag bla ma dam pas bstan ma thag tu dran pa med cing brjed pa med pas/bla ma'i man ngag thob pa de yis chog /de yis chog ni 'khor ba la 'khor yin gda' zer na/ sems kyi rang bzhin ma shes na 'khor gyi/ dper na rmi lam gyi dus su bde sdug la sogs pa de dag sems las byung ba ma gtogs pa gang yang med de/gnyid sad pa'i dus shes pa dang / rmi lam rmis pa dang / rmi lam gyi shes pa ma skyes pa de dag tha dad pa med de/ de bzhin du sems las byung ba dran pa dang / sems dran pa med pa dang / sems nyid ma skyes tha mi dad de/ 'khor ba dang mya ngan las 'das pa ma skyes pa'i sems nyid kyi cho 'phrul yin pas/'khor ba'i rang bzhin sems kyi ngo bo nyid yin zhes bya/ de ltar thabs khyad par can gyis sems kyi rang bzhin shes pa bor bas/ rmongs rnams mda' bsnun gyis smras shes par byos/ rnal 'byor gyi dgos pa ni gnyug ma/ de nyid blos ma reg pas tshig gis brjod par mi 'gyur ro/ /tshig gis brjod pa las dran pa skye bar 'gyur gyi/ cig shes ni tshig gis mi brjod pas/ dran pa skye bar mi 'gyur ba de nyid/ gnyug ma'i rang bzhin tshig gis de brjod kyang //de lta bu'i chos nyid bla ma dam pas ye shes mig gcig dri ma med pa gnang btsam gyis mthong bas/ slob dpon man ngag gis mthong bar 'gyur/ de ltar rtogs pa'i dus su shes dang shes bya bsregs na/ dkar po'i chos dang nag po'i chos lta ci smos te/chos dang chos min mnyes nas zos pa yis/ /'o na dkar po'i chos rnams kyis phan pa'am/ nag po'i chos rnams kyis gnod pa byed pa yin zhe na/ de ltar ma yin pas/ 'di la nyes pa rdul tsam yod ma lags/ / da ni sems nyid kyi don blo'i yul las 'das pa las sna tshogs shar ba yid bzhin nor bu'i dpes bstan par bya'o/ /de yang sems nyid ni rang bzhin gyis rnam par dag kyang / sems las byung ba'i glo bur gyi dran pa 'dis/ shes dang shes bya dang nyon mongs pa la sogs pa mkhregs shing 'khor ba las thar bar mi byed do//de dag las thar bar 'dod pas/ brgyud pa'i man ngag dang ldan pa'i bla ma'i zhabs kyi drung du yang nas yang du thug pas/ brgyud pa'i bla ma'i zhal nas gnyug ma'i lhan cig skyes pa/ chos thams cad kyi gzhir gyur pa/rnam pa thams cad mkhyen pa'i ngo bo nyid dran pas ni dbang du bsgyur la/ dran pa'i 'dam gyis ma gos pa yin yang / yid la byas pa'i dri ma ma 'byangs na phrad par mi 'gyur ro/ /de bas na 'das pa dang / ma 'ongs pa dang / da ltar byung ba ni rang bzhin gyis stong pa nyid kyi thug phrad rnal 'byor rnams kyi dgongs pa chos rnams kyi lhan cig skyes pa las dran pa'i yid ni/ de nyid la dngos po'i mngon par zhen pa sbyangs pas rtogs pa ni/ gnyug ma'i yid ni thams cad gang tshe sbyangs gyur pa/ de yang dngos kyi bla mas ji bzhin pa nyams su myong ba de'i dus su dus gsum gyi bde bar gshegs pa'i yon tan rnams chos kyi sku las ma g.yos par shes pas/ de tshe bla ma'i yon tan snying la 'jug par 'gyur/ de ltar 'das pa dang / ma 'ongs pa dang / de ltar ni dran pa med pa dang / skye ba med pa gang gi yang blos ma reg pa rtogs na/ rgyun mi 'chad pas sangs rgyas rnams kyi dgongs pa'i glu yin pas/ 'di ltar rtogs na mda' bsnun glu len te/ de ltar rtogs par byed na/ bla ma dam pa'i gdams ngag ma yin pa gzhan la rag lus pa ma yin pa/phyi nang gsang ba'i sngags la blo sbyangs pa ma yin/ lung ni rjes su 'brangs nas rgyud sde lnga khungs drangs pa med/ lung gi gar drangs kyang yod la rigs pa ni ji ltar yang 'char du rung / man ngag ni ci la yad byed pas/yid la mi byed pa ni lung dang rigs pa man ngag gis brjod du med la/ brda dang thabs kyis bstan du yod pa'i phyir/ /sngags dang rgyud rnams gcig kyang ma mthong ngo / /de ltar ma rtogs pa'i gang zag rnams ni dar gyi srin bu bzhin du rang gi rnam par rtog pa'i dran pa 'di nyid la don dam pa yin no snyam nas 'bad pa byed de/de kho na nyid ni ma mthong bas/ ji ltar byis pa rnams kyis bye ma'i lha khang brtsigs pa dang 'jig pa la dge ba dang mi dge ba bzhin du/ 'gro ba rnams kyis so sor bcings 'gyur te//dge ba dang mi dge ba'i las kyi rnam par smin pa la don dam du mi 'dzin na/ las las grol na rang yid ni thar pa yin/ 'gro ba rigs drug gi sems can ni/ ji lta bus 'bad pa'i 'gros bzhin du rang rang gi las kyi rnam par smin pa las 'bad pas bsnyags te/srid pa'i 'khor ba'i 'khor ba las thar bar mi byed do/ /rtogs pa'i rnal 'byor pas ni dran pa'i 'dam mi gtsang ba las pad+ma skyes pa bzhin du/ dran pa med las nyams su myong bas/ rang rgyud grol na nges par gzhan med de/ /'bras bu chos sku 'gyur ba med cing rnam par rtog pa med pa de nyid/mchog gi myo ngan 'das pa thob par 'gyur/ /chos sku ma rtogs na 'khor bar 'khor la/ rtogs na mya ngan las 'das pas/ skye med kyi dbyings de/ sems nyid gcig pu kun gyi sa bon te/ / rang gi ngo bo mi 'gyur bas/ /gang las srid dang mya ngan 'das 'phro las/ /sems nyid kyi dbyings rnam par dag pa la glo bur gyi dran rig gi dri mas ma gos pa la/ snang ba'i rkyen dang / bag chags kyi rkyen dang / brda'i rkyen gyis cir yang 'byung bas/ 'dod pa'i 'bras bu ster bar byed pa yis/ /dran rig med pa'i chos sku las gzugs sku gnyis ji ltar 'byung zhe na/ dpag bsam shing ngam bum pa bzang po'am/ /yid bzhin nor bu la dran rig med de sems po'ang ma yin no/ / de bzhin du rtogs pa'i rnal 'byor pa rnams kyis mi bsgom pa'i phyir bsam gyis mi khyab pas/ yi dam lha la don gyi lus ngag sems dang bas/ yid bzhin nor 'dra'i sems la phyag 'tshal lo// //da ni sbyor ba bzhi rtogs na sems nyid gang gis kyang ma bcings ma grol ba la/sems las byung ba glo bur gyi dran pa de nyid la mngon par zhen na 'chad bas/ sems bcings na ni 'ching bar 'gyur te/ de nyid la don dam du 'dzin cing dbyings rnam par dag pa'i ngang du rang grol na/ de nyid grol na the tshom med//ma rtogs pa rnams ni nyon mongs pa rnams kyis 'ching bas na/ blun po gang gis bcing 'gyur ba/ /de nyid chos kyi dbyings su skyol ba'i tshe 'di nyid la bla ma dam pa'i gdams ngag la mkhas pa de yis myur du grol/ sems ji ltar gzung bar bya zhe na/ dran med kyi dbyings kyi nam mkha' la khyab pas/ sems ni nam mkha' 'dra bar gzung bya ste/ nam mkha' la dbyibs dang kha dog dang dran rig med pa las sna tshogs shar yang phan gnod med pa de bzhin du/ sems nyid las dran pa sna tshogs shar na phan gnod med pas/nam mkha'i rang bzhin du sems nyid gzung bar bya/ yid la byas pa'i chos kun yid la ma byas par shes na/ rtogs par gyur na/ yid de yid min byed 'gyur na/ /des dran med las cir yang shar du rung ba'i sprul sku dang / skye med kyi dbyings su gnas pa'i longs sku dang /blo las 'das nas bsgom du med pas chos sku des na/ de ni bla med byang chub thob par 'gyur/ /nam mkha' la ni 'khor ba dang mya ngan las 'das pa'i tha snyad gang la yang mi dmigs pas/ rnam rtog rlung 'ching bas/ mkha' 'dra byas na rlung ni rnam par 'ching //sangs rgyas dang sems can dbyings su tha dad pa med pas/ mnyam nyid yongs su shes pa rab tu thim/ /sku gsum las ma g.yos par sems nyid gnas par ngag gi dus su shes na/ mda' bsnun gyis smras nam zhig nus ldan na//sems las byung ba dran 'gyur ba can gyis bcings pa'i 'gro ba ris drug gis 'khor ba la 'khor lo'i rang bzhin mi rtag pa de ni/ sems dran med kyi dbyings su gnas pa rtogs na/ mi rtag g.yo ba myur du spong bar 'gyur/ /sbyor ba bzhi ni las kyi phyag rgya'i sbyor ba bzhi dang /'da' ka ye shes kyi sbyor ba bzhi dang / sems nyid gnas lugs rtogs par byed pa'i sbyor ba bzhi dang / lus kyi sbyor ba bzhi dang gling bzhi bsdu ba dang / rgya mtsho ri rab la sbyar ba dang / lce rkan la gtad pa dang / mig gyen la bzlog pa'o//ngag gi sbyor ba bzhi ni/ lte bar AH snying gar hUM/ mgrin par oM/ spyi bor haM ngo / /yid kyi sbyor ba bzhi ni/ shes pa de ltar gtad do/ /de'i dus su steng gi rlung dang / 'og gi me dang / thig le dbang chen 'gags pas/ rlung dang me dang dbang chen 'gags pa na//rtsa a wa d+hU tI'i nang du rlung dang sems bsdus pas bdud rtsi'i rgyu ba'i dus su rlung ni sems la 'jug /bde ba chen po'i gnas su nam zhig sbyor ba bzhi gnas gcig la ni zhugs pa na/ kun rdzob byang chub sems kyi bde ba haM gi thig le la skyol ba'i dus/bde chen mchog gi nam mkha'i khams su mi shong ngo / /'da' ka ye shes kyi sbyor ba bzhi ni/ snang ba stong pa la 'gag /stong pa snang ba la 'gag /dbang po rnams dbang chen la 'gag /sems dran pa tsam la 'gag pa'i dus su/ rlung dang me dang dbang chen 'gag pa na/ /don dam pa'i 'byung ba chen po bzhi ni/ dran pa sa'i khams/ dran med chu'i khams/ skye med me'i khams/ blo las 'das pa rlung gi khams/ skye shi med pa'i bdud rtsi rgyu ba'i dus rlung ni sems la 'jug /don dam pa'i 'byung ba bzhi chos sku'i gnas su/nam zhig spyor zhig gnas gcig la zhugs pa ni/ bde ba chen po'i sku ni 'dam gang gis kyang ma gos/ nam mkha' tshad gzung du med pa bzhin du/ de bzhin nyid la tshad gzung du med pas/bde chen mchog ni nam mkha'i khams su mi shong ngo / /sems nyid kyi gnas lugs kyi sbyor ba bzhi ni/ zhe sdang sbrul/ gti mug phag pa/ 'dod chags glang po che/ nyam nga med pa seng ge /dpe bzhis bstan par bya'o/ /zhe sdang dran pa'i sems dug sbrul lta bu de/dran med dran med gti mug phag pas za bar bya'o/ /dran med gti mug phag pa lta bu de/ 'dod chags skye med glang chen lta bus za bar bya'o/ /'dod chags skye med glang chen lta bu de/ nyam nga med pa blo las 'das pa seng ge lta bus za bar bya'o//de ltar sems kyi gnas lugs rtogs pa'i rnal 'byor pa des rlung rnam par rtog pa/ mi rtog pa dbang chen de nyid dran pa tsam 'gags pas/ rlung dang me dang dbang chen 'gags pa na/ /dran pa med cing brjed pa rtogs pas/skye shi med pa bdud rtsi rgyu/ sems las byung ba'i rnam rtog rlung ni dran med sems la 'jug pas/ bdud rtsi rgyu ba'i dus su rlung ni sems la 'jug /nam zhig bla ma dam pa'i brda dang thabs khyad par can gyi sgo nas bsam du med pa'i gnas su/nam zhig sbyor bzhi gnas gcig la ni zhugs pa na/ rkyen gsum gyis ma bslad pas/ bde chen mchog ni nam mkha'i khams su mi shong ngo // //da ni rtogs pa'i dus su rgyun mi 'chad pa'i bsam gtan snyim pa chus bkang ba'i dpes bstan par bya'o//de ltar ma rtogs na ni/ dran pa'i srog chags las khyad par med pas phyi'i yul gyi khyim dang / nang gi khyim sems can dran pa dang / de la gleng yang khyim dang khyim na de'i gtam smra yang / bsam brjod las 'das pas/bde chen gnas ni yongs su shes pa med/ /'gro ba ma lus pas ni rang gi bsam gtan du ma shes pas/ 'gro kun bsam pas sun 'byin mda' bsnun smra/ /blo las 'das pas bsam du med pa rtogs pa 'ga' yang med pas/ bsam gyis mi khyab pa grub pa 'ga' yang med/de lta bu de sems can thams cad la yod de/ srog chags thams cad kun la yang / /dus gsum bde bar gshegs pa rnams kyi dgongs pa/ de nyid yod de rtogs pa med/ /rtogs pa'i dus gcig na mnyam pa nyid du ro gcig pa yin pas/thams cad ro mnyam rang bzhin pas/ /de nyid dran med skye med blo las 'das pa de bla na med pa'i ye shes yin pas/ bsam yas ye shes bla med pa'o/ /de ltar rtogs par bya ba dus gzhan la rag lus pas sam/ 'das pa dang ma 'ongs pa dang / da ltar byung ba la/ khang sar de ring sang dang gzhan/ /rim gyis brlabs nas sangs rgyas kyi yon tan mtshan dang dpe byad du byung bar 'dod pas/ don rnams phun sum tshogs par skye bo 'dod/ rgyun mi 'chad pa dang nyams pa med pa ma rtogs pa'i gang zag rnams ni/phyi'i yul la yengs pa'i dper na/ kye ho bzhin bzang snyim pa chus bkang ba/ /rgyun du 'dzag pas kyang nyams pa med pas/ 'dzag pa gzhan du nyams pa ma tshor ro/ /'khor ba'i sems dran pas bya ba byed pa dang /mya ngan las 'das pa'i sems dran pa med pas bya ba mi byed pas/ bya ba byed dang bya ba mi byed pa/ /'khor ba dang mya ngan las 'das pa sgyu ma tsam du rtogs pas/ nges par rtogs na 'ching dang grol ba med/ /blo'i yul ma yin na tshig gis brjod du med pas/yi ge med la 'chad par yod 'dod pa/ /bcos ma'i rnal 'byor pa rnams kyis dran pa kho na la rnal 'byor zer bas/ dran pa ni rkyen la rag lus pas gnyid mthug po'am/ 'bogs pa'am/ brgyal ba la sogs pa la dran pa med pa'i phyir don dam pa ni ma yin no//blos ma bzhag pa rgyun mi 'chad pa ni/ /gang zhig rnal 'byor brgya la 'ga' yis mtshon// //da ni sems dran pa'i 'jur bus me 'ching bar yan pa rnga mo'i dpes bstan par bya'o/ / de yang ma bcos pa'i de nyid ma rtogs dran rtog kho na la gzhag la/ 'jur bus bcings pa'i sems 'di ni/ /phyi rol gyi yul lnga las zhan pa'i 'jur bu dang / nang bde rlung stong pa la zhen pa'i 'jur bu de dus 'di nyid la dran pa med cing brjed pa med pa rtogs na grol ba yin pas glod na grol bar the tshom med/ma rtogs na dran pa 'di nyid kyis 'ching bas/ dngos po rnam pa gnyis kyis dngos po gang gis rmongs pa 'ching / chos nyid kyi dngos po ma rtogs na/ dran pa 'di nyid la yengs par shes pas/ mkhas rnams de yis rnam par grol//rtogs na sems rang thang du yan pas/ de ma shes pas/ 'khor ba'i thag pa dran rig gi thag pas bcings pas 'gro ba rigs drug tu gyur pa nas/ bcings pa dag ni phyogs bcur 'gro bar rtsol/ /sems nyid kyi don rtogs na dran pa glo bur ba la yan yang /dran med kyi dbyings su ldog par 'gyur bas/ thongs par gyur na mi g.yo ba brtan par gnas/ /ji ltar rnga mo ni bcings pas mi 'chag btang na mi 'gro ba bzhin du/ sems nyid kyang bsgoms na yengs pa'o/ /de'i skad cig ma la ma [(]yings [,]yengs [)]pa rtogs pas/sems kyi thag pas bcings pa'i dus khams gsum du 'khor zhing 'khyams la/ sems thag chod na 'khor 'phro dang 'khyam 'phro 'chad pas na/ go bzlog rnga mo lta bur grogs dag bdag gis rtogs pa/ de ltar yin nam ma yin bla ma dam pa rnams la zhus la/rang la rgyun du gnas pa de bu dang 'dra ba'i slob ma la gnang ba'i dus su bu khyed rnams kyang de ltar rang la tshor te ltos shig dang / ci la lta zhe na/ dbang po rang log gi man ngag gis yongs su chug pa yid kyi dbang po de/kye lags dbang po ltos shig dang / /dus 'di la rang gis myong dang mi myong gi tha snyad dang bral bas/ 'di las ngas ni ma rtogs so/ /ma rtogs pa de nyid las kyi rnam par smin pa las grol bas/ brgyud pa'i man ngag dang ldan pas/ las zin pa'i skyes bu yi/ji srid sems kyi thag pa ma bcad par du de srid sems dang bcas pa'i sems can du lhung bas/ ji srid spre'u thag pas bcings nas sdong po la mthon dman du 'gro yang sdong po las mi thar ba de bzhin du/ sems can rnams kyi 'du shes dang ma bral na/mthon dman du yod kyang thar pa med de/ phyis sems gsod shes pa'i drung du sems thag bcad par bya'o// //da ni brgyud pa'i man ngag ma rtogs pa rnams kyis rlung la bslabs pas la brgal ba shing gi rnal 'byor gyi dpes bstan par bya'o//de yang rtsa dang rlung la brten pa'i bcos ma'i rnal 'byor pas/ bde ba gsal ba stong pa'i gzugs brnyan mthong ba tsam yin gyis/ rtogs pa'i rnal 'byor pa rnams kyis rtsa rlung la ma bslabs kyang don dam pa rtogs na grol bas/ rlung 'ching ba la rang nyid ma sems kyi/rnal 'byor pa la rtsa nyi khri chig stong drug brgya/ bsdu na shin tu bsdu na gsum ste/ de bas bsdu na a wa d+hU tI la/ rtsa ga na gnas pa na rlung / rlung ga na gnas pa na byang chub sems/ byang chub sems ga na gnas pa na bde ba/ bde ba gang na gnas pa de sangs rgyas yin zer te/de ma yin pas shing gi rnal 'byor sna rtser ma 'dug cig /'o na lus kyi bde ba myong ba de ma yin nam zer na ma yin te/ rtogs pa'i rnal 'byor pas lhan cig skyes pas khyad par 'phags pas/ e ma ho ma yin lhan cig skyes pa mchog chags byos snang ba dbyibs kyi sna rtse/skye med dus kyi sna rtse/ nyams myong bde ba'i sna rtse/ las kyi phyag rgya'i srid pa'i sna rtse 'ching ba yongs su spangs/ /rnam rtog shas che bas yid la byas pa ni/ dga' ba bzhi skad cig ma bzhi dang rlung a wa d+hU tIr 'dzud pa la yid ches pa ni/'di na yid 'dus pa rlung gi rlabs/ rlung gi rnal 'byor gyis yon tan thob kyang / g.yos shing 'phyar la shin du mi srun 'gyur/ /chos thams cad snang ba dang stong pa dang skye ba med pas bsdus la/de dag gi skye sa gnas sa 'gags rtogs nas/ lhan cig skyes pa'i rang bzhin rtogs 'gyur na/ /de ltar rtogs pas mi g.yo ba'i rdo rje lta bu'i ting nge 'dzin/ de yis bdag nyid brtan par 'gyur ba yin/ /gang gi tshe yid sems rig pa dran pa blo rnams 'gags na/gang tshe yid ni nye bar 'gags gyur na/ /da lta'i skye rga na 'chi'i lus kyis sems 'ching bas/ don dam pa'i lus rtogs na/ lus kyi 'ching ba rnam par 'chad par 'gyur/ /phyi'i chos ni sgyu ma dang / rmi lam dang mtshungs pas/nang gi nyams su myong ba kun dran pa dang / ma dran pa dang skye ba med pa du ma ro gcig yin pa/ gang tshe lhan cig skyes dang ro mnyam pas/ /dman pa'i rigs dang 'khor ba/ bram ze'i rigs mya ngan las 'das pa rtogs na mnyam pas/ de tshe dman pa'i rigs dang bram ze med// //da ni dam pa'i lus rtogs na/ /re dogs med pa bu chung gi tshul du gnas pa'i dpes bstan pa'o/ /des na phyi rol mu stegs pa na re/ lus dang sems kyi gtsang ba 'di khrus dang dus dang gnas khyad par can gyis lus dag par bya zer/bsam pa ngo dang mchod pa'i gnas kyis sems dag par bya zer/ de yang zla ba'i rgya mtsho la sogs pa la khrus byas pas/ zla ba nya ba'i dus su zhing dang nye ba'i zhing la sogs pa'i gnas su phyin te/ lus kyi bde ba 'dab ldan la sogs pa'i bsgom pa dang /tshangs pa la sogs pa la mchod na sems kyi dge ba zer ro/ /don dam pa'i blo'i spyod yul ma yin pa rtogs pa'i rnal 'byor pas ni snang la rang bzhin med pa chu nang gi zla ba dang 'dra bas/ 'di na zla ba'i rgya mtsho nyid dang ni/ sna tshogs chos nyid kyi dbyings su dbyer mi phyed pas na/ stong nyid dbyer med du shes pas/ 'di na gang gA'i rgya mtsho nyid dang ni/ /gtsang la mi gtsang ba ni bram ze chang skyugs nas chus khyer ba dang 'dra bar/ thog ma med pa nas yod dang med pa ma yin pas/bA rA Na sI pra yag ya 'di/ /stong pa mtshan mo zla ba dang / /snang ba nyin mo gsal byed yin pas/ 'dir ni zla ba gsal byed nyid/ /chos thams cad skyes gnas sa 'gag sa gnas nyi shu rtsa bzhi dang 'dra bas/ zhing kun gnas dang nye ba'i gnas sogs pa//'gro 'ong med pa'i tshul gyis rtogs pas/ phyin de bltas pas rtogs par gang smra ba/ /don gyi lus kyis kun la khyab pa de rtogs na/ lus dang 'dra ba'i mu gnas gzhan na med/ /yid la byas na mi dge ba yin la/ yid la byas na dge ba yin pas/dge ba nga yis nges par yang dag mthong / /phyi rol pa'am nang pa la la na re/ lus 'khor lo bzhi'am drug tu pad+ma'i 'dab ma grangs ji bzhin dang sdong po ge sar la/ 'dab ldan pad+ma'i sdong po ge sar gyi dbus na/ de las nyams su myong ba'i dga' ba dang bde ba de nyid/shin du phra ba'i rnal ma'i dri dang kha dog ldan/ dus nyi tshe ba yin pas/ thob shor gyi dus su/ bye brag 'ongs shing rmongs pa mya ngan gyis/ /'dus ma byas pa'i chos sku rgyun du gnas pa ma shes pa na/ 'dus byas la/gdung bas 'bras bu med par ma byed cig /phyi rol pa na re/ mi dge ba'i las kyi rnam par smin pa zad par byed na/ tshangs pa la sogs pa mchod nas bde bar 'gyur zer/ rtogs pa'i rnal 'byor pas ni gti mug chen po tshangs pa chos sku dang / zhe sdang chen po khyab 'jug sprul sku dang / 'dod chags chen po mig gsum pa longs sku ni/ khams gsum dang sku gsum gyi gzhi yin pas na/ gang du tshangs pa khyab 'jug mig gsum 'jig rten ma lus gzhir gyur pa/ /nyon mongs pa dag nas rigs su phye pa med pa dang /dkar nag gi las kyis ma gos pas/ rigs med de la mchod na las kyi mtha'i tshogs ni yang dag zad par 'gyur/ de gang zhe na/ slob ma snod dang ldan pa la bstan pa'i dus su 'dam gyis ma gos pa'i bde ba'i gnas ni bu dang 'dra ba la bstan par bya'i/gzhan la bstan du med pas/ kye ho bu nyon rtsod pa'i ro ni dga' bar yang dag gnas/ /zhes pas de ma rtogs na brtan pa ri rab la sogs pa/ /g.yo ba 'gro ba ris drug gi sgrung brgyud dang mdo dang dbyangs kyis ma rtogs pas/'gro ba 'chang cing 'don pa la sogs pas de shes par nus ma yin/ 'o na 'gro ba las log na'ang zhe na ma yin te/ 'gro ba'i rang bzhin sems yin te/ de yang brtan pa ni dran med/ g.yo ba ni dran pa'i rnam pa sna tshogs so/ /skye med de yang bu dang 'dra ba la//kye ho bu nyon de nyid sna tshogs kyi/ /rkyen gyis ma bslad pa'i yang dag pa'i shes pa'i ro 'di bstan par nus pa ma yin te/ yang dag pa'i shes pa de nyid rtog ge ba'i blo'i yul ma yin/ sangs rgyas kyi dgongs pa ma yin pas/ bde ba'i gnas mchog rtogs pa spangs pa ste/ /'gro ba'i rang bzhin de yang logs nas skyes med pas/ 'gro ba nye bar skye ba nyid bzhin no/ /blo sems rig pa dran pa rang bzhin gyis 'gags la yid kyi rnam par shes pa dbyings su yal bas na/ blo ni rnam 'gags yid ni pham 'gyur ba//shes bya shes bya'i nga rgyal dang rlom sems dbyings su dag pas na/ gang du mngon pa'i nga rgyal chad pa'o/ /dran pa la 'khor bar 'khor la/ dran pa med pa las ma g.yos na mya ngan las 'das pa'o/ /de yang rnam par rtog pa sgyu ma yin par ni ma shes/mi rtog pa ltos pa'i chos can yin par ma shes pas 'bad pa byed do/ /dran ma dran sgyu ma tsam du shes te de'i rang bzhin skye ba med pa de blos ma reg pa'i dbyings su thim pa de khyad par du 'phags pas na/ rtogs pa'i rnal 'byor pas ni rig pa sna tshogs 'khor ba'i rnam grangs yin la/dran pa dran med las 'das pas mya ngan las 'das pa'o/ /dran med skye med las 'das pas mya ngan las 'das pa'o/ /skye med blos ma reg pa las 'das pas mya ngan las 'das pa'o//de yang 'khor ba spang bar bya ba dang / /mya ngan las 'das pa thob par bya ba de gnyis/ de nyid sgyu ma'i rang bzhin mchog tu rtogs te/ sems kyi gnas lugs rtogs na bsam gtan du ma gyur pa gang yang med de/ dran pa ni sgyu ma lta bu'i ting nge 'dzin rkyen la rag lus pa'i phyir ro//de'i pha rol na dran pa med pa de seng ge rnam par bsgyings pa'i ting nge 'dzin gang la yang nyam nga med pa'i phyir ro/ /de las gzhan skye ba med pa'i dpa' bar 'gro ba'i ting nge 'dzin 'khor ba dang / mya ngan las 'das pa la mi gnas pa'i phyir ro//sems dang sems las byung ba mi rgyu ni rdo rje lta bu'i ting nge 'dzin blo las 'das pa nas mi 'gyur ba'i phyir ro/ /de nyid bsam gtan bzhi yin pas de la bsam gtan 'ching bas des ni ci byar yod/ sems kyi gnas lugs ni nam mkha' dang 'dra la/sems las byung ba'i dran pa ni na bun dang mtshungs pas yal bas/ dngos po skye ba mkha' ltar rab zhi na/ /dngos po skye ba ni sems las logs na ma yin te/ de yang dran nas skye ba dang / dran pa med nas skye ba'o//de gnyis spangs pa'i pha rol na ci skyes/ dngos po rnams spangs phyi nas ci zhig skye/ /thog ma med pa nas skye ba med pa las skye na nam mkha'i me tog kyang skye'o zer te/ 'di ltar snang ba kun nam mkha'i me tog tu shes par bya'o/ /ci'i phyir zhe na/ nam mkha' 'byung ba rim gyis chags shing sna tshogs su snang bas nam mkha'i me tog yin no//de bzhin du sems nyid nam mkha' dang 'dra la/ sems las byung ba'i dran pa ni nam mkha'i me tog dang 'dra bas dran bsgom la re dogs mi bya'o/ /de'i phyir na dran pa dang dran pa med pas ma bslad pa gang yin pa de ni/gdod nas skye med rang bzhin yin pa la/ /snang ba dang lus kyi brda/ ngag gi brda/ yid kyi brda gsum ni snang ba'i brda'o/ /stong pa dang skye ba med pa brdas bstan pa'i dus su/de ring dpal ldan bla ma mgon pos bstan pas rtogs/ rtogs pa'i yon tan du gang gi tshe chos thams cad yid la mi byed pa'i dus su/ gzugs dang sgra dang dri dang ro dang reg bya'i dran pa'i brdas bstan pas mthong dang thos dang reg dang dran pa dang / gtsang ba dang btsog pa dang 'gro ba dang 'ong ba med pa'i brdas/ zas skom 'khyam dang 'gro dang 'dug pa dang / /dri ba dang dri ba'i lan btab pa'i brdas bstan pas/ cal col gtam dang lan smrar gyur pa la/ /sems nyid kyi rang bzhin blo las 'das pa las ma g.yos pas/sems so zhe na gcig gi rnam pa las mi bskyod/ de ltar phyag rgya chen po'i brda'i sgo nas bstan ma thag tu skye shi med pa bdud rtsi dang 'dra ba de rtogs pas/ gang zhig bla ma'i man ngag bdud rtsi'i chu/ /'khor ba'i thang stong shin du sgrol dka' ba la nyon mongs pa'i chom rkun mang la/skye rga na 'chi'i tshad pas bskal pa grangs med pa'i bar du dang / bla ma dam pa'i zhabs kyi mtsho skyes kyi mtsho ma rnyed/ gal te rnyed par gyur yang ma 'khrul pa la 'khrul par mthong nas spyi bor blang bar mi byed/gdams ngag gi bdud rtsi'i chu rna bas 'thung bar mi byed la/ snying gi pad+ma'i nang du mi 'jog pas/ /gdung sel bsil bas ngoms par mi 'thung ba/ /de ci 'dra zhe na/ mya ngan gyi thang stong dang 'dra ba 'khor ba'i thang stong shin du sgrol dka' ba de/bla ma dam pa'i zhabs dang ma bral ba'i pad+ma'i mtsho de la thabs kyis blang bar med la/ sgra dang / tshad ma dang / lung dang / bstan bcos kyi tshig dang tha snyad la mkhas kyang don med pas/ de ni bstan bcos don mang mya ngan gyis/ / skom pas shin du gdung ba'i smre sngags 'don yang ro skam la bung ba mthong ba dang 'dra ba'i bstan bcos kyi/ thang la skom pas gdungs te 'tsho bar zad/ /bla ma dam pas brda dang thabs kyis bstan par 'gyur gyi/ lung dang bstan bcos la ma yin no/ /lung dang bstan bcos la yod na man ngag ma yin gyi/de dang mi mthun na man ngag yin no/ /yang dag pa'i don de kho na nyid kyi man ngag ni/ blo'i yul du ma gyur pas/ tshig gis brjod par mi 'gyur bas/ /bla mas bstan pas brjod min ni/ /slob mas kyang 'di lta bu'o zhes yid la byar med do//go ba shes bya'i sgrib pa yin te/ yang dag bya'i bden pa ma yin pas/ /ma go ba nyon mongs pa'i sgrib pa yin no/ /de nyid shes bya bden pa ma yin pas/ /shes pa yang bden pa ma yin no/ /'o na yang shes dang shes bya'i sgron me lta bu la brten nas/dran pas dran pa go ba lta bu'i ni ma yin gyi/ go ba de las go ba med pa de nyid/ slob mas go ba ma yin te/ de yang chos rnams skye ba med pa las skyes pa dang / gnas pa med pa las gnas pa dang / 'gags pa med pa la 'gags pa dang lhan cig skyes pa bdud rtsi'i ro/de yang sems kyis sems bstan du yod pa ma yin/ yid kyis yid la byed du mi btub pas/ gang gis ji ltar bstan par bya/ /gal te ma rtogs pa la bstan yang / sgra dang tshad ma'i bstan bcos kyi dbang du byas nas/gang gis tshad mar 'dzin pa'i dbang gis su/ /rtog pa la sogs pa'i tha snyad la ni mkhas la don la mi mkhas pas/ blun pos bye brag rnyed pa ste/ /de'i tshe na mi mkhas pa'i dbang gis dran pa kho na la 'bad par byed pas na/sgrib pa las thar bar mi byed do/ /cig shos ni blos reg med la gdol ba dang 'dra bas/ de tshe gdol pa'i khyim du rol/ /de yang dri ma gnyis dag pa'i nyi ma'i dkyil 'khor dang 'dra ba'i rgyun mi 'chad pa'i mi bsgom pa'i dbyings su gnas pa de/ 'on kyang dri mas mi gos so/ /de lta bu'i dri ma dag pa'i nor bu rin po che lag tu thob pa ni ngo ma shes/ dper na ri khrod pa'i lag na yod pa'i nor bu rin po che mig phigs par dka' ba bor nas/ de bas sla ba 'ol ma si lag tu blangs nas rgyan du byas pa de bzhin du/dus gsum gyi sangs rgyas kyi dgongs pa de/ blos phigs par dka'o snyam nas/ khams gsum gyi sems can rnams kyi dgongs pa dran pa 'di kho na yid la byas nas/ rang rang gi yul dang bstan nas/ dge ba'i chos la 'bad par byed do//rnal 'byor pa'i dgongs pa ni 'jig rten pa'i chos dang mi mthun yang / 'jig rten las 'das pa ni yid kyis phigs par dka' yang / bla ma dam pa'i gdams ngag rin po che rdo rje pha lam dang 'dra ba thob nas/ brda'i khyad par gyis phigs pa de ni/'jig rten pas smod pa de ni blangs pa'o/ /de ci 'dra zhe na/ 'jig rten pas longs spyad nas bor bas srang ka'i kham phor blangs pa'i phung po'i dum bu la su zhig re ba byed/ de bzhin du phal pas dran pa kho na la spyod pa'i dus su bor bas/dran med skye med blo las 'das pa de nyid sku gsum pas slong na de nyid slong dgos pa yin pas na/ gang tshe slong na srang ka'i kham phor gyis spyod de/ sku gsum de nyid dkon mchog rin po che zad pa med pa'i gter de yin pas/ phyi rol pa'i rgyal po la mi smod pas/bdag nyid rgyal po yin na der ni slar yang ci byar yod/ rtogs pa'i dus su ye shes kyi mig gis phyogs ma lus par bltas pas/ 'di dag ni 'khor ba'o/ /'di dag ni mya ngan las 'das pa'o zhes de kho na nyid la dbyer med pas/ dbye ba rnam par spangs nas de nyid gnas pa la/ chos kyi sku'i rang bzhin g.yo ba med cing rnam par rtog pa med pas/ rang bzhin mi g.yo btang snyoms lhun gyis grub/ /de'i phyir snang ba'i rgyan du stong pa mdzes la/ stong pa'i rgyan du snang ba mdzes so/ / mi rtog pa'i mya ngan las 'das pa de bas kyang rtogs pa'i srid pa la gnas su rung bas/ mya ngan 'das pa la gnas srid par mdzes/ /yid la byas pa'i mi rtog pa bsgoms pas rtogs pa'i de nyid la yengs par byas na nyon mongs pa'i nad zhi bar byed do/ / dper na mes tshig pa de me la bsro bar bya'o/ /rlung langs pa ni rlung nyid la'o/ /rna bar chu songs ni yang chu ni thigs pas rung ba de bzhin du/ 'dod chags kyi nad zhi bar byed pa ni bde stong dbyer med pa'o/ /zhe sdang zhi bar byed pa ni lha'i dkyil 'khor ro//gti mug zhi bar byed pa ni stong pa nyid kyi zhi gnas yin pas/ nad gzhan dag la sman gzhan gtang mi bya/ /de lta bu la yengs pa la gzhan gyis bsgom par mthong ste de ni ma yin no/ /chos nyid kyi ngo bo ni yid la byar mi btub pas na/ bsam dang bsam bya rab tu spangs nas su//re ba dang dogs pa dang / gtsang btsog med pa dang blang dor med pa'i tshul gyis/ ji ltar bu chung tshul du gnas par bya// //da ni rang gis nyams su myong yang / gzhan la bzlas su med pa gzhon nu ma'i bde ba'i dpes bstan par bya'o//de yang lung dang bstan bcos mang po la yid ma ches pa'i skyes bus/ bla ma dam pa'i brda dang thabs kyis man ngag la yid ches pas/ rtag tu rgyun mi 'chad du gnas pa'i bsam gtan de/ bla ma'i lung la bsgoms te gus 'bad na/ / de la chos thams cad kyi lhan cig skyes pa'i rang bzhin gsum ma 'khrul bar byung ba des/ lhan cig skyes pa 'byung bar the tshom med/ /lhan cig skyes pa de yang sngon po la sogs pa'i kha dog med/ snying stobs rdul dang mun pa'am/ /yang ba la sogs pa'i yon tan nam/tshig dang tha snyad dam sgyu ma la sogs pa'i dpes mtshon du med pas/ kha dog yon tan yi ge dpe bral ba/ /nyams su myong ba de ri bong gi rwa ltar gtan med pa ma yin/ ba lang gi rwa ltar gtan yod pa ma yin pas dran med skye med blo las 'das pa yod med las grol ba rgyun mi 'chad pa'i bsam gtan/nyams su myong ba ni/ smra ru mi btub bdag gis gyin mtshon/ /de ji ltar shes par bya na/ gzhon nu ma'i bu chung skyes pa'i dus su mas ste ba bcad pa'i dus su / oM zhes bya ba ltar gnas pa dang / pha las byung ba haM zhes bya ba spyi bor gnas pa dang / de gnyis shes rab dang thabs kyi yi ge gnyis kyi thig le dkar dmar gnyis so/ /de gnyis kyi dus dang rkyen 'dzom pa'i dus su thig le gnyis snying gar phrad pas dga' bas bu chung gnyid log pas 'dzum pa byas pa dang /yang na don dran pa'i thig le ma dran pa'i thig le gnyis skye ba med pa'i dbyings su phrad pa mi la bzlas su ma btub pas na/ yang na gzhon nu ma de dar la bab pa cig dang / /yid du 'ong ba'i skyes bu gzhon pa dang snyom par zhugs pa'i dus su dga' ba dang /mchog dga' dang / dga' bral gsum gzhan la bzlas su yod la/ de las gzhan lhan cig skyes pa snying la zhen pa bzlas su ma btub pas na/ gzhon nu ma'i bde ba snying la zhen pa bzhin/ /don dam pa'i lhan cig skyes pa de yang chos rnams kyi gzhir gyur pa blos mi reg pas/blos gzhag pa rnams kyi snying la zil gyis mnan nas dus gsum dang khams gsum dbang du sgyur ba de ni su'i blos kyang myong du med pas/ dbang phyug dam pa de ni su la bstan nus sam/ / de yang dngos po sems las byung ba'i dran pa'i rnam pa de lta bu cig med na ni/ dngos po med pa dran pa med la nyams myong ba sus kyang rtogs par mi 'gyur ro/ /dper na nam mkha' las sna tshogs kyi go bde bar byed pa ma yin na ni/ nam mkha' yangs pa zhes rtogs par mi 'gyur ro//de bzhin du sems las byung ba dran pa 'di med na ni/ sems kyi dran med nyams su myong ba sus kyang rtogs par mi 'gyur ro/ /de bas na sems las byung ba'i dran pa'i dngos po dang / sems de rkyen med na dran med pas dngos po med pa de gnyis skye ba med pa la thim pas/dngos dang dngos med yongs su bcad pa dang / /yid la byas pa'i chos thams cad ni mi brtan pa dang g.yo ba'i rang bzhin can yin pas/ der ni 'gro ba ma lus rab thim 'gyur/ /yid la byas pa'i chos thams cad ni mi rtag pa dang g.yo ba'i rang bzhin can yin pas/gang gi tshe na yid bzhin la ma byas pa'i don rtogs pa'i dus der/ gang tshe yid ni mi g.yo rang gnas brtan pa der/ /'khor ba 'khor mod/ 'khor ba ni yid la byas pa'i rnam par rtog pa mkhregs shing brtan pa las yin gyi/'o na stong pa nyid yid la byas na thar pa thob zer ba la/ stong pa nyid yid la byas pas skye mched bzhi la skye bar 'gyur gyi/ yid las byas pa'i dus gsum mnyam pa nyid yin pas/ 'khor bar 'khor ba'i dngos po med pas rang grol ba na/ sprul gyi phung po'i nang du rkang pa chud pa de ma 'gyur bar bsdad na rang grol ba bzhin du/ bla ma'i man ngag gis gnyug ma ma bcos pa'i don rtogs na/ dran pa rang grol bas na/ de tshe 'khor ba'i dngos po las ni rang grol 'gyur/ /sems dang sems las byung ba las ni bdag dang bdag gir bgyi ba yod kyi/de dag gi dngos po yang dag par ma grub pa'o/ /don dam par ni bdag gi don du sangs rgyas ma grub pas/ gang tshe bdag gzhan yongs su shes na sems las byung ba'i dran pa ni yal ba sprul sku bla na med pa'i lus dang /de nyid la skye 'gag med pa longs spyod rdzogs pa bla na med pa'i lus dang / de nyid gang gis kyang blos gzhag tu mi btub pa/ chos sku bla med lus thob pas/ /de tshe bla med lus ni thob par 'gyur// //da ni sems dang sems las byung ba'i 'dam gyis ma gos pa ut+pala'i 'dab ma'i dpes bstan par bya'o//de gang zhe na/ bla ma dam pas brdas bstan pa'i dus dang / brdas ma mtshon pa'i dus su shes par shes bya las 'das pa ngo bo nyid kyis 'od gsal ba de la 'khrul pa'i zug rngu rdul tsam yang med pas/de ltar bstan pa nyid la nges par ma 'khrul par/ de yang gzhan la rag ma lus par/ rang la rgyun du gnas pa'i bsam gtan de/ thabs gang yang rung ba cig la brten nas don de nyid dran pas ma gos pa'i sku gsum rang la yod pa de/rang gis rang la legs par shes par byas nas ni/ phyi'i dngos po ma lus pa rdzas su shes pa ma grub pas na/ rdul dang phyi nang gi dngos po ma lus pa rdzas su ma grub pas 'dod pa de nyid dkyil 'khor la bsdus pas sam/ yi ge'i thig le nA da la sems bsdu ba ni rdul phran nam ston ka'i nyi ma phyed kyi dri ma dag pa'i nam mkha' ltar spros pa dang bral ba'i sems su smra ba ni sems tsam mam/de dag gis kyang rnal 'byor pa'i ji bzhin pa'i dgongs pa ma rtogs pas/ rdul min rdul bral ma yin sems kyang min/ / yang dag pa'i rnal 'byor pa'i dgongs pa ni/ snang ba dang / stong pa dang / skye ba med pa dang / sems kyi spyod yul ma yin pas de dag gi dngos po la yang 'das pa ni brjed pa'i phyir zhen pa med/ ma 'ongs pa ni ma dran pa'i phyir zhen pa med/ da ltar gyi shes pa ni rkyen la rag lus pa'i phyir zhen pa med pas/dngos po de dag gdod nas rtag tu zhen pa med/ de yang las dang nyon mongs pa dang skye ba'i rgyun gyis yid ces bya ba dang / yid la byas pa zhes bya ba dang / yid la ma byas pa zhes bya ba ni ming tsam du btags mod kyi/byas pa ni mi rtag la/ ma byas pa ni ming med la/ dper na mdang gi rmi lam ni nyams su myong yang dngos po yod par ma grub la/ do nub kyi rmi lam ni nyams su ma myong yang dngos po med par ma grub pa de bzhin du/ dran nas nyams su myong yang yid la ma byas pa med/ma dran nas nyams su myong yang yid la ma byas zhes bsam pa dang brjod pa las 'das pa de ni mda' bsnun gyis smras pa de tsam zhig tu zad/ 'o na yid la ma byas pa'i bsam gtan ni dri ma dang bcas pa cig yin nam zer na/ ma rtogs na nyon mongs pas kyang nyon mongs par 'gyur la/shes byas byas kyang sgrib par 'gyur ro/ /rtogs pa'i rnal 'byor pa'i dpe ni nyi ma'i dkyil 'khor dang 'dra la/ gnam stong gi nyin par ni zla ba de nyi ma'i dbyings su thim pas bsil bar mi 'gyur/ nyi ma de nyid nya'i nyin par zla ba dang rgyang ring bas lhag par dro bar mi 'gyur ba de bzhin du/rnal 'byor pa'i dgongs pa de yang glo bur gyi nyon mongs pa dran pa dang shes bya dran pa med pa'i dri ma gnyis med pas/ kye ho bu ma lus dri med don dam shes par byos/ de ltar na mi rtogs pa rnam par rtog pa'i rnam grangs la yid ches la phyi rol gyi rig ma las byung ba'i bde ba de nyams su myong ba de don dam pa yin no snyam nas mngon par zhen pas 'bad pa byas na/rang la rgyun du gnas pa'i bsam gtan rtogs pa'i ngang las 'bad pa dang / rtsol sgrub las 'das pa de ngo ma shes pas/khyim na yod pa phyi rol song nas tshol/ /chos nyid rang la yod pa ngo ma shes pas phyi rol gyi dran pa la dris pas sam/ nang gi khyim ni dran pa dran med kyi bdag po skye med yin par ngo ma shes pas/ glo bur du 'ongs pa'i khyim tshes dang 'dra ba'i dran pa'i rnam rtog la dris pas/khyim bdag mthong nas khyim tshes dag la 'dri/ /de lta bu'i blos reg par bya ba'am/ tshig gis brjod par bya ba ma yin te/ bla ma dam pa'i brda'i gdams ngag dran pa'i sgron ma des mtshon nas rtogs par bya ba ma yin pa rtogs pa de mda' bsnun gyis smras bdag nyid shes par byos/ji ltar shes par bya zhe na/ tha mal pa bzhin du bsam bya dang / bsam gtan dang / bzlas bya dang / bzlas pa dang / brjod bya dang / brjod pa las 'das pa'i phyir/ blun po'i bsam gtan bsam bya bzlas brjod min//de yang bla ma dam pas bstan ma thag tu dran pa med cing brjed pa med pa rnyed pa med cing stor ba med pa/ skye ba med cing 'gag pa med pa/ bsgom du med cing mi bsgom pa'i dbang med pa de/ rgyun du gnas par zhes bstan kyang the tshom ma chod na/gang tshe bla mas bstan cing bden par thams cad shes byas kyang / bdag gis 'di ltas blta zhing brtag par bya'o/ /rkyen gang yang rung ba cig dran du bcug la/ man ngag gis dran pa med cing nyams su myong ba'i dus su 'di lta bu dran pa ni/chu'i thigs pa tsam du shes par bya'o/ /de'i pha rol na rnam par rtog pa gang la yang mi skye ba ni rgya mtsho tsam du shes par bya'o/ /rnam par mi rtog pa ni rgya mtsho tsam la dran pa med pa nam mkha' tsam du shes par bya'o/ / dran pa med pa ni nam mkha' tsam du shes par bya ba yin pas/ shes dang shes bya'i yul las 'das pa ni dpe dang don gyis mtshon du med pa de ngo ma shes pa ni dper na bu chung la mdzub mos zla ba mtshon pa'i dus su zla ba la mi lta bar mdzub mo la blta'o/ /de bzhin de kho na nyid ma rtogs pa'i gang zag rnams kyis dus gsum gyi de bzhin gshegs pa'i snying po'i don la dgongs pa mi mdzad par dran pa'i rnam par rtog pa la bsgom pa mdzad do//de'i phyir dran pas mtshon yang dran pa'i 'dam gyis ma gos pa'i don ma rtogs pas bdag gis yongs su brtags pas ma rtogs thar pa thob bam ci/'o na phyi'i yul ni 'dod pa'i yon tan lnga yin la/ nang gi yul ni dran pa yin no/ /de lta bu la spyod kyang yang dag pa'i don ni mi shes/ phyi dang nang du lha dang lha mo'i dkyil 'khor gyi 'du shes kyis/yul rnams bgrod cing yul gyi gdung bas nyen byas kyang / /lhan cig skyes pa'i lha ni yid la byar med/ yid la byas pa'i lha ni mi dge ba yin pas/ lhan cig skyes pa mi rnyed sdig pa 'dzin/ /chos rnams kyi gzhir gyur pa lhan cig skyes pa yid la ma byas pa shes na/yul rnams bsten pas yul gyis mi gos te/ dper na ut+pal dang pad+ma dang puN+Da rI ka dang / sau gan+d+hi la sogs pa kha dog yid du 'ong ba dang reg bya 'jam pa dang / dri zhim pos kha cig gi yid 'phrog nus pa/de yang gzhan gyi yon tan ma yin gyi/ rgyu de rnams ni grong dang grong khyer la sogs pa'i mi gtsang ba'i mtsho'i rkyen gyi yon tan no/ /me tog de dag la mi gtsang ba'i skyon gyis gos pa ma yin pas/ de bzhin du rnal 'byor pa rnams kyi dgongs pa yang phyi dang nang gi yul la dran pa skyes kyang /yang dag pa'i don ji lta ba bzhin shes pas na/ yul gyi 'dam gyis ma gos pa ni 'dam dang gnas ma gos par ut+pal la blangs pa bzhin du/ dran pas ma gos par chos nyid rtogs pa'o/ /ut+pal 'dab ma chu yis mi reg bzhin// //de ltar rtogs na ye shes kyi tshogs dang bsod nams kyi tshogs rnal 'byor pa'i skyabs su 'gro bas dug sngags can gyi dpes bstan par bya'o/ /rtsa ba la 'chos pa'i ye shes kyi tshogs rgyun mi 'chad pa'i dpes ma du lung ga'i dpe dang /me tog la 'chos pa bsod nams kyi tshogs 'du du ra'i dpe ni/ 'du du ra'i zhes bya ba me tog gi sbrang rtsi la tshon rtsi gang yang rung bas bcos pas 'bru smin nas sa bon de btab pas me tog de'i kha dog tu 'gyur ro/ /de bzhin du bsod nams kyi tshogs bsags pas ni bskal pa grangs med pa na 'bras bu smin par 'gyur ro//ma du lung ga zhes bya ba ni me tog gi shing gi rtsa ba la thabs mkhas pas tshon gang yang rung ba cig gis bskus na/ de'i kha dog tu myur bar 'gyur ro/ /de bzhin du rnal 'byor pas sems nyid kyi rtsa ba rtogs na 'bras bu chos sku smin pas/gang ltar rtsa ba rnal 'byor skyabs su 'gro/ /de ltar khong du chud pa'i rnal 'byor pa ni/ dper na dug sngags gdeng du gyur pa cig gis dug zos pas gnod par mi 'gyur ba de bzhin du/ yul gyi dug gis mi tshugs pas/dug gi sngags can dug gis ga la tshugs// //de ltar shes nas mnyam gzhag dang rjes thob zhi gnas dang lhag mthong dbyer med pa'i dpe glang chen lam nas tshags chud pa'i dpes bstan par bya'o/ /de yang rjes thob kyi dus su phyi rol gyi lha khang la sogs pa mchod pa dang /nang gi gzhal yas khang la mchod pa byas nas/ de'i yon tan gyis lha'i dkyil 'khor mngon sum du zhal mthong bar 'gyur ro zhes/ de yang rgan mo bu gcig pa shi bas gdungs ba bzhin du/ rtag tu lha'i dkyil 'khor yid la byas na/ mthong bar 'gyur ba la/ de nyid ma yin pa'i phyir na brgal ba/ lha la mchod pa khri phrag mang byas kyang / /'di ltar shes na nang dang phyi rol gyi mngon par byang chub pas/ yul dang dbang po lha dang lha mo'i dkyil 'khor bsgom pa dang /nang gi mngon par byang chub pas bde ba stong pa bsgom pa ni thag pa dkar nag gis 'ching bar 'dra ba bzhin du/ dran pa'i rnam par rtog pa/ bdag nyid 'ching 'gyur de yis ci zhig bya/ /'o na mngon par byang chub pas bsod nams kyi tshogs dang /de nyid stong pa nyid du shes pa ye shes kyi tshogs la goms nas skye ba phyi ma nas phyi ma'i dus su yang nas yang du bla ma slob ma dang mjal bar 'gyur ro zhe na/ skye rga na 'chi las brgal ba/ de 'dra 'khor ba 'di ni 'chad min te/ 'o na 'khor ba rnam pa gsum las thar nas sku gsum mngon du 'gyur bar bya na/gnyug ma rnal ma lhan cig skyes pa de bla ma dam pa'i gdams ngag gis rtog par byas la/ sems nyid rtogs na 'khor ba las brgal bar 'gyur gyis/ de ma rtogs pa rnams la brgal bas gnyug ma'i rang bzhin ma rtogs brgal mi nus/'o na gnyug ma'i rang bzhin de sangs rgyas dngos yin yang 'gro don mdzad pas/ mchod pa mi dgos sam zer na ma yin gyis/ mchod pa nyi shu rtsa lnga shes par byas la/ de nyid na bun nam me long gi kha rlangs bzhin du yal nas/de nyid kho na la gzhan 'byung ba med pas sna tshogs dran yang chos nyid kyi dba' rlabs yin pa de nyid las shar zhing / de nyid du nub par shes na snang ba mi 'gog la mi snang mi bsgrub pas/ mig ni mi 'dzums sems 'gog dang / /rlung khyab byed dang / rtogs byed de gnyis ka dran pa tsam la bsdus la/de yang rkyen gzhan la rag lus pa yin pas rig pa rang bzhin gyis 'gag la/ chos nyid kyi dbyings brgyud pa'i bla mas bstan pas/ rlung 'gag pa ni dpal ldan bla mas rtogs/ rnam rtog de nyid dran pa'i tshul gyis rgyu ba'i dus su/de'i tshe rnam par rtog pa med pa de nyid skye shi med pa'i don rtogs na de las mi g.yo bas/ gang tshe rlung rgyu de ni mi g.yo ste/ de ltar don rtogs pa'i gting la 'chi ba bslu bar mi bya'o/ /skye ba bslu na 'khor ba dang mya ngan las 'das pa las thar ba yin te 'chi zhes bya ba ni dran pa yal ba yin pas 'chi ka ma'i gdams ngag 'dir ma gsungs so//gzhan na re bar mdo'i dus su bzhed de/ 'byung ba rim gyis thim par goms pa'i yi dam lha la shes pa gtad pa'i man ngag gis shes dang shes bya las thar par bzhed de/don dam par na shes dang shes bya ma grub pas/ thar pa ma yin no/ /la la na re rlung dang byang chub sems dran pas bsdus la de yang 'og sgo ngan song du lhung gis dogs pas rim gyis te sgo kha phye la/ rlung dang rnam par shes pa tshangs pa'i gnas na haM gi dbyings su rlung dang byang chub sems yal ba'i man ngag gis sgrol bar 'dod de legs pa ma yin no//la la na re bdag gi lus gzhan yi dam lha mtshan dang dpe byad dang ldan pa cig mnga' ba bsgoms la/ de gnyis ka la sems med pas yid kyi gzugs tsam zhig shes la/bdag rang gi skye ba dang na ba dang 'chi ba 'di lta bu yid gzugs brnyan du sems la shar ba yin par shes pas/ de nyid lha'i gzugs brnyan du shes par byas la/ 'gro ba ris drug gi grong khyer mthong ba la goms na/ bar ma do na lha'i sku bsgom par 'dod pa de yang 'thad pa ma yin no//'o na gang zhe na/ sems las 'byung ba'i 'byung ba bzhi lus la gnas pa dang / sems la gnas pa'i 'byung ba bzhi ni sems dran pa sra ba nyid sa/ sems nyid de dran med dbyings su gnas pa rgya mtsho ltar shes pa chu/sems de nyid bskal ba'i me ltar sreg pa tsha ba me/ sems de nyid blo'i yul las 'das nas gzung du med par dag pa rlung de dag dbyings su dag par byas nas/ snyan nas snyan du zhal nas zhal du brgyud pa'i man ngag gis shes par byas la/rig pas nyams su blang bar mi bya'o/ /nyams su blangs na shes bya'i sgrib pa las ma rtogs pa 'khor ba'i nyon mongs pa las thar pa med do/ /don dam shes rab kyi pha rol tu phyin pa'am/ blo'i pha rol tu phyin pa rtogs na/ bde ba'i pha rol tu phyin pa de nyid dus gsum gyi de bzhin gshegs pa'i yum yin par shes nas/de'i phyir phyi rol gyi rig ma las byung ba'i bde ba de rag mi lus pa dang / 'chi ka ma'i gdams ngag logs nas mi tshol bas/ 'chi ba'i tshe na rnal 'byor mas ci bya/ de nyid kyi don gsal bar byed pa yul la yengs pa'i dus su 'dre ba med pa dang / 'da' ka'i yid kyi dbang po 'gro ba rigs drug grong la lhung ba'i dus su 'dre ba med rtogs pa ni/ ji srid dbang po'i yul gyi grong la lhung ba na/ /skye ba med pa de nyid las kyi rnam par smin pas ma g.yos pas/dus gsum mnyam pa nyid du rgyas pas/ ji srid rang nyid las med rab tu rgyas/ /skye ba med pa'i don rtogs na/ phyi ma'i tshe gar 'gro mi shes/ da ltar ci byed mi shes pas khyed cag da ltar ci byed gar 'gro soms dang kye/ skye shi med pa'i don rtogs pa rnams kyis gzhan la bstan du ma btub pa ni dran med skye med blo las 'das pa nyams su myong ba de nyams su myong na dran med ma yin la/ dran pa med na nyams su myong ba ma yin zer/ de bzhin du skye ba med pa dang blo las 'das pa de sangs rgyas kyi dgongs pa yin pas brjod du med pa'i phyir/de ni shin du dka' ba'i dgongs pas 'jug /rang la gnas pa sangs rgyas kyi dgongs pa ni ma mthong / rnam rtog 'ba' zhig la sangs rgyas kyi mdzad pa bcu gnyis kyi sgrung dang lad mo byas pas thar pa thob tu re ba ni dper na byis pa rnams kyis rnam par rgyal ba'i gzhal yas khang ni ma mthong ltad mo byas pas thog tu ma pheb bzhin du/sangs rgyas ni rang la gnas pa ma mthong ba yin pas/ gang zhig gang la gnas pa ni/ /yang na rang sems mnyam pa nyid kyi ngang la gnas pa ni/gzugs yang dag par rjes su ma mthong ngo / /bla ma dam pas bstan gyi bar du dper na lus dang grib ma dang 'dra ste/ mun nag gi nang na mi mthong / de yang nyi ma dang zla ba dang mar mes bstan nas mthong bar 'gyur ba de bzhin du chos kyi dbyings bsam du med pa de yang ma mthong bas/de ni de ru ma mthong ste/ de mthong ba ni don la mkhas pa yin la/ de ma mthong na lung dang bstan bcos kyi tshig dang tha snyad la/ mkhas pa thams cad bstan bcos 'chad pa yis/ /lus la gnas pa'i sems nyid ma mthong la//sems nyid la gnas pa'i sangs rgyas kyi sku gsung thugs kyi yon tan dpag tu med pa ma rtogs pa ni/ dper na dbul mo'i lto na 'khor los sgyur ba'i rgyal po'i ma nor bu rin po che'i sgyed[(] po'am [,]pu'am[)]/ gyad kyi rin po che stor ba bzhin du rang bzhin du rang la yod pa'i sems nyid bsam du med pa ni ma rtogs/bsam bsgoms byas nas sku mdog dang phyag mtshan la sogs pa la 'bad pa byas pas lus la sangs rgyas yod pa ma rtogs so/ /rtogs na ni mnyam gzhag rjes thob ji bzhin pa la ni rdul tsam yang khyad med do//de ltar rtogs na blo sems bde ba ni/ /dper na bram ze rgan po glang po che dang / glang po che thub pa'i skyes bu dang / lcags kyu ba lom pa'i sgrung brgyud bzhin du/ dran pa'i rnam rtog glang chen dang 'dra la/ /dran med rnam par mi rtog pa skyes bu dang 'dra la/skye med kyi dbyings lcags kyu dang 'dra la/ de dag lom pa'i nor dang 'dra ba blo las 'das pa zad pa med cing 'phel ba med pa rtogs na/ glang chen lom nas sems tshags chud pas na/ de ltar rtogs pa'i rnal 'byor pa ni/ dper na rang thag chu chad pa bzhin du/ rnam rtog dran pa de nyid dbyings su ngag tu bcug la/ de la yang re dogs med la/ sangs rgyas zhes bya ba ming du btags pa tsam gang nas kyang 'gro ba dang 'ong ba med pas/ de ni 'gro 'ong bcad nas dal ba ste//'di ltar rgyun mi 'chad pa'i bsam gtan rang la gnas pa rtogs na gzhan du btsal mi dgos pas/ 'di ltar rtogs nas gang du'ang dris sa med/ /phyi rol gyi lung dang bstan bcos la sogs pa la mkhas kyang / dran pa'i nga rgyal las bogs ma thon pas/tshig la nan tan byas kyang don la rtogs par mi 'gyur bas/ mkhas pa ngo tsha med pas de ma rtogs/ /rtogs pa'i yul ma yin pa de nyid skye rga na 'chi las 'das pa/ rgyu dang rkyen la rag ma lus pas ltos pa med pa'i phyir ro/ /gson po gang zhig rnam par ma gyur pa//thog ma med pa yod med la sogs pa'i tshig gi bla dgas dang bral bas/ de ni rgas shing 'chi bar 'gyur ram ci/ de yang bla ma dam pas bstan pas/ mnyam gzhag dang rjes thob dbyer med par rtogs pa ni/ las dang nyon mongs pa dang shes bya'i sgrib pa rnams kyis ma gnod pas na/bla mas bstan pas dri med blo gros ni/ /de nyid khams gsum gyi sems can rnams dang / dus gsum gyi bde bar gshegs pa rnams kyi de bzhin nyid gcig pa la spyod kyang / zad pa med cing 'phel ba med pa'i phyir//glang po che lom pa'i nor dang 'dra bas/ de nyid gter yin gzhan po gang yin lo// //da ni rdzings las 'phur ba'i bya rog gi dpes bstan par bya'o/ /de yang yul rnam pa gnyis so/ /phyi'i yul ni gzugs la sogs pa de dag dngos por ma grub pas sems kyis bsten par mi bya/nang gi yul rkyen la rag las pa na/ dran pa la yang bsten par mi bya'o/ /dran pa ni mtshan ma dang bcas pa'i stong nyid du shes la/ nang gi yul la yang yul nyid rnam par dag ste bstan bya min/ mtshan ma med pa'i stong pa nyid ni/ dran pa med pa 'ba' zhig yid la byas pa'i tshul gyis/ stong pa 'ba' zhig gis ni spyad par bya/ /shes bya ma grub pas shes pa la gnas med do/ /shes dang shes bya ma grub pas sems zhes bya ba'i ming ma grub pa'o/ de las dran pa byung yang de'i tshe mtshan nyid yid la ma byas pas/ dper na rgya mtsho'i pha rol du 'gro bar 'dod pa'i tshong pa rnams kyis rdzing la bya rog gzhag pa bzhin du/ rnal 'byor pa rnams kyis 'khor ba'i pha rol du 'gro bar 'dod na/ dran pa'i bya rog gis bya ra ba byas la/ji ltar rdzings las 'phur ba'i bya rog ni/ /ji ltar bya rog gis yul ma mthong bas rdzing la bab pa bzhin du/ de ltar dran pa'i bya rog kyang dran med skye med blo las 'das pa la/ bskor zhing bskor zhing slar yang de ru 'bab// // da ni thag pa la sprul du mthong ba'i dpes bstan par bya'o/ /de la bcos ma'i rnal 'byor pas phyi rol gyi yul mi sdug pa bsgoms nas spangs te/ nang gi dran rig nyams su myong ba la zhen pa ni/ rig pa gnyis bsgril ba thag pa nag po dang 'dra la rdzas su ma grub pa'o//yul mi sdug par bsgom pa ni/ sprul nag po dang 'dra la/ 'khrul pa ma grub pas thag pa nag po dug sbrul bzhin/ de la yang rang gi shes byas rang sngags pa ni/ dper na ri mo mkhan mkhas pa bzo ba pa [(]cig [,]zhig [)]gis khro ba'i gzugs shin tu 'jigs su rung ba cig bris pa la/nam zhig kho rang gis mthong bas sngangs pa bzhin du/ gang zag kha cig kyang shes bya rang las byung ba la/ mthong ba tsam gyis sngangs par 'gyur/ /shes dang shes bya 'dra ba la shes par byos la/ shes bya don dam du 'dzin pas/ grogs skye bo dam pa ni/dngos po med bzhin du shes bya dngos po can du 'dzin pa ni/ dper na ri mo mkhan de rang gi bud med mtshan dang ldan pa yid du 'ong ba cig bris pa la nam zhig bltas pas/ kho rang gi ri mo la kho rang chags pa skyes pa bzhin du/ rnal 'byor pa kha cig gis phyi rol gyi yul la brten nas snang stong dbyer med 'dod pa dang /nang gi yul la brten nas rig stong dbyer med 'dod pas/ yul gnyis skyon gyis bcings par 'gyur/ /de nyid gsal bar bya bar 'dod pa'i yon tan lngas 'ching ba'i dpes bstan par bya'o//de nyid ma rtogs pas ni phyi dang nang gi yul la zhen pa'i 'khor ba las thar bar mi byed pas na rmongs pa dang 'dra'o/ /rtogs pa'i rnal 'byor pas ni phyi dang nang gnyis ka rkyen la rag lus pas dngos po ma grub par shes so/ / de ltar ma rtogs pa ni zhen pas 'ching la/ rtogs pa ni zhen pas 'ching bar mi 'gyur ro/ /la la na re phyi rol gyi yul las byung ba'i bde ba las zhen par bya zhe na/ phyi rol gyi dbang po'i yul gzugs la sogs pa dang / nang rig pa'i yul bde ba stong pa 'dra bas/yul la zhen pas 'ching bar ma byed cig /don dam pa'i bden pa ni bsgom par bya ba ma yin pas/ de'i nan tan du/ kye ho rmongs pa mda' bsnun gyis smras pa/ de la yid ma ches na dpe lnga ni thun mong ni go sla'o/ /thun mong ma yin pa'i yul ni bde ba'i ro la chags pa nya lta bu dang /lha dang lha mo'i dkyil 'khor la chags pa phye ma leb lta bu dang / shes rab ye shes kyi nyams su myong ba dpe yin la don du khyer ba glang po che lta bu dang / stong pa nyid kyi dril chags pa bung ba lta bu ste/ bzhi po de dag nyams su myong ba la bstan to//nya dang phye leb glang chen bung ba dang / /bla ma dam pa'i gdams ngag gis yul la spyad kyang mi 'ching ba'i thabs la/ gdams ngag nyi ma lta bu yul me tog sil ma lta bu dran pa bung ba lta bu de yul la spyad cing chos kyi dbyings su bros pa'o/ /bung ba dang / sgra dang / tshad ma dang / lung dang bstan bcos mang po'i tha snyad la dga' ba ni/ tha snyad mang pos sangs rgyas kyi dgongs pa tshig gsum gyi gdams ngag gsang gtam lta bu myong du mi ster ba gzhon nu ma gsang gtam nyams pa lta bu 'di ni ri dgas bzhin du blta bar byos// //da ni rtogs na chu dang rlabs kyi dpes bstan par bya'o/ /de yang sems dang sems las byung ba'i rig pa yang gzhan ma yin la/ stong pa dang bde ba dang / gsal ba yang gzhan ma yin no/ /dran rtog ji snyed pa gang yang gzhan ma yin pas/gang zhig sems las rnam 'phro ba/ /chos nyid las logs na gang yang sems las 'byung mi srid pas na/ de dag yid la ma byas pa rtogs pa/ de srid mgon po'i rang bzhin te/ /rkyen glo bur bas bskul bas/ sems las rtog pa byung yang chu bur chu las byung zhing chu'i nang du thim pa dang /sprin nam mkha' las byung zhing nam mkha' la thim pa dang 'dra bar chos nyid zab mo'i dbyings las sna tshogs shar yang dbyer mi phyed pa'i dpe chu dang rlabs dag gzhan yin nam/ 'khor ba rnam pa gsum dang mnyam pa nyid tha dad pa med pas/srid dang mnyam nyid nam mkha'i rang bzhin no// //de lta bu nyid las byung zhing de nyid la brlag pa nyid rdul gyi dpes bstan par bya'o/ /yang dag pa'i don rtogs na lha yi mig dang lha'i rna ba dang pha rol gyi sems shes pa dang 'dra la/ ci'i phyir zhe na/ sems zhes bya ba ni khams gsum gyi sems can dang / dus gsum gyi bde bar gshegs pa'i gnyis su med pa gang yin pa de ni tshu rol gyi bag chags kyis ma gos pa pha rol gyi sems zhes bya'o/ /de lta bu'i yon tan dang ldan pa'i sems nyid kyi rang bzhin ni sems can kun la yod pa ni ma shes/sems las byung ba'i rnam par rtog pa phyogs re ba shes pa la sems nyid shes pa mi zer ro/ /'du shes kyi pha rol sems ni sems las 'das pa las/ mthong ba dang thos pa de chos nyid kyi ngang las ma 'das pas/gang zhig bsten te gang thos pa/ /rtogs pa'i rnal 'byor pas don dam pa gzhan don la dgongs pas gzugs sku gnyis ma dmigs pas/ dgongs pa gang yin dam pa skyol ba na smon lam gyi dbang gis 'jig rten gyi khams su snang yang kun rdzob tsam yin pas nyi zer rdul dang 'dra la/rnal 'byor pa'i dran rtog ji snyed cig dge ba dang mi dge ba/ nyi zer lkugs rdul bzhi brlag /gzugs sku ni yang dag par rdzogs pa'i sangs rgyas ma yin pas mya ngan las 'das la chos sku ni blo las 'das pa de nyid yin pas mya ngan las 'das pa gzhan na med do//rnal 'byor pas dran pa byung yang dran med la nub pas/ snying gnyid du nub par 'gyur ba yin// //da ni chu la chu gzhag pa'i dpes bstan par bya'o/ /de nyid rtogs par 'gyur ba'i rnal 'byor pas mi mthun pa dang gnyen po blang dor med pa'i tshul gyis chos kyi dbyings las mi gnyis pas/ji ltar chu la chu gzhag na/ /chos ma lus pa'i dbyings shin du rnam par dag pa'i phyir/ sems la du ma shar yang ro la tha dad med de/ dper na bu ram la rta dang glang po che la sogs pa'i gzugs byas kyang /ro ma stor ba bzhin du chos rnams kyi lhan cig skyes pa la sna tshogs dran yang de kho na nyid kyi dbyings la thim pas/ de snyed chu ru ro mnyam 'gyur/ /de ltar ma rtogs pas ser sna la sogs pa'i 'am/ tshul bzhin ma yin pa'am bag la nyal las/'dod pa la sogs pa sdang bas de las 'khor bar 'khor ba'i/ ngan 'gro'i lam du 'gro ba'i skyon dang / sbyin pa la sogs pha rol tu phyin pa rnams dang / de las thob bya sa dang po la sogs pa ma yengs par bya ba ni tshul bzhin yid la byas pas tshangs pa'i gnas la sogs pa la goms pas/sku gsung thugs kyi yon tan dpag tu med pa la sogs pa'i yon tan thob par bya ba'i don du/ skyon dang yon tan rnam ldan sems/ /de la skyon spang bar bya ba'am/ yon tan bsgrub par bya ba'i gang zag gis/de dag rnam par smin pas smin yang / de nyid mthong ba ma yin pas/ /mgon po sus kyang mthong mi 'gyur// //da ni nags la mched pa'i me lce'i dpes bstan par bya'o/ /ma rtogs pa'i dus su ma rig pas 'khor bar 'khor la/rtogs pa'i dus su ma rig pa de nyid chos sku yin pas/ rnal 'byor pa rnams kyis chos thams cad yid la ma byas pas dgongs pa mdzad do/ /ma rig pa dang / ma shes pa dang / ma rtogs pa mi dmigs pa'i dus su/ bla ma dam pas brda dang thabs kyis bstan pa de ni/dran pa spangs pa sbyin pa/ dran med myong ba tshul khrims/ skye med bzod pa/ dbyer med brtson 'grus/ rgyun mi 'chad pa bsam gtan/ blo las 'das pa shes rab/ rtogs par bya ba thabs/ bdud rnams bcom pas stobs sku gsum thob pa smon lam/sangs rgyas kyi dgongs pa ye shes kyi pha rol tu phyin pa yin pas na/ gzhan nas gnyen po mi tshol bas/ /rmongs pa dag la gnyen po gang yang med/ /chos nyid stong pa nyid kyi mes bsregs pas ni stong pa nyid du ma gyur pa gang yang med do//de bas kyang sems nyid kyi dbyings blo las 'das pa dang thug phrad du gyur pa'i dus su yid la byas pa gang yang med de/ snang ba thug phrad ni dran pa'o/ /stong pa thug phrad ni dran med do/ /skye med thug phrad ni de nyid ma skyes pa'o/ /rtogs par gyur pa'i rnal 'byor pas ni/gang dang gang phrad pa de nags la mched pa'i me lce bzhin/ rnam par thar pa sgo gsum gyi man ngag gis shes par byas la/ gdong du sna tshogs shar ba de dag blang ba dang dor ba gang yang med pas/ gdong du bab pa 'di ltar snang ba kun/ /chos thams cad kyi rtsa ba ni sems yin la/sems ni stong pa nyid do/ /stong pa nyid gang yin pa de ni/ blo'i yul ma yin pa/ blo'i yul ma yin pa gang yin pa de ni/ bsgom par bya ba ma yin pas/ sems kyi rtsa ba stong pa nyid dang lhan cig byos// //da ni zhen pa'i skyon til gyi shun pa'i dpes bstan par bya'o//de la yid la byas pas ni khams gsum las thar bar mi 'gyur gyi/ de yang dbang gi nyams myong yid la byed na 'dod pa'i khams/ lha dang lha mo'i dkyil 'khor yid la byed na gzugs kyi khams/ stong pa nyid kyi zhi gnas yid la byed na gzugs med pa'i khams su 'dre bar 'gyur bas/gal te yid du 'ong ba snyam pa'i sems/ /de yang gang dang gang la zhen par byas kyang khams gsum gyi sdug bsngal du 'gyur ba ni/ bde ba 'dod pa'i khams gsal ba gzugs kyi khams/mi rtog pa gzugs med pa'i khams su gang yang rung ba'i yid la byas na ni/ de dang bral bar mi phod pas/ /snying la gces par byas nas ni/ /'phags pa rnams kyis srid pa'i rtse mo nas sdug bsngal du shes la/ 'khor ba'i sems can gyis dmyal ba ngal so ba la yang bde bar mthong ngo //mkhas pa rnams ni mig dang 'dra la/ til gyi shun pa tsam la yang zhen par mi byed do/ /mi mkhas pa rnams ni mgo lus dang 'dra la/ rnam par rtog pa la bde bar mthong ngo / /de'i phyir ston pa'i bka' la stong pa nyid bsgoms pas grol lo zhes gsungs kyang /snang ba la zhen pa'i gang zag gi don du yin gyi/ stong pa nyid la yang rlom sems su byed na/ til gyi shun pa tsam gyi zug rngus kyang / /yid la ma byas pa ni ma rtogs/ yid la byas pa 'ba' zhig 'khor ba'i rgyur gyur pas/nam yang sdug bsngal 'ba' zhig byed par zad// //da ni phag dang glang po che'i dpes bstan par bya'o/ /de la yang gnyis so/ /dbang po'i mngon sum dang / rnal 'byor gyi mngon sum gyis bstan pa dang / blang dor med pa phag pa'i dpe dang /nyam nga med pa glang po che'i dpes bstan par bya'o/ /de ltar dbang po'i mngon sum gtan la phab pa ni/ yid kyis gang yang rung ba cig dran du bcug la/ de yid kyi dbang pos snang la rang bzhin med la shes pa gtad pa'i dus su/ snang ba stong pa dbyer med pa dbang po'i mngon sum yin gyi/ rnal 'byor gyi mngon sum ni ma yin no/ /rnal 'byor gyi mngon sum da lta'i dus ma yin zer te/ bla ma dam pas brdas bstan na da ltar gyi dus yin no/ /brda'i sgo nas bstan pa dang / ngag gi sgo nas bstan pas gdams ngag ces bya ste/brda ni lus kyi brda dang / ngag gi brda dang / yid kyi brda'o/ /de yang snang ba'i brda dang / stong pa'i brda dang / skye ba med pa'i brdas shes par bya'o/ /ngag gis ni dran pa myong ba dang / dran med myong ba dang / skye med mthong ba dang / blo las 'das pa yin par yid ches pas so/ /de yang mngon sum rnam pa bzhis so/ /dbang po'i mngon sum ni dran pa yin pa la rnal 'byor gyi mngon sum ni blo las 'das pa yin no/ /'dra 'dra 'dra la mi 'dra ba phag dang glang po ni u pa de sha zhes bya ba yin te/u pa ni brda nye bar mtshon pa yin la de sha ni yul yin no/ /de yang yid kyis yid la byar mi btub pa ni/ dran med skye med blo las 'das pa gang yin pa de ni/ sangs rgyas kyi yul lo/ /sangs rgyas kyi yul gang yin pa de ni/sems can gyis mi bsgom mo/ /sems can gyis mi bsgom pa gang yin pa de ni/ rnal 'byor pa rnams kyi thugs dam mo/ /'o na sems can pa dang / rnal 'byor pa dang / sangs rgyas pa dang / chos nyid tha dad pa yin nam zhe na ma yin te/ chos nyid gcig pa la/ sems can gyis dran pa'i rnam par rtog pa don dam du mthong la/ rnal 'byor pas ni dran pa de nyid glo bur bar snang ba'o/ /de'i phyir sems can gyi snang ba ni snang stong dbyer med yin la/ rnal 'byor pa'i bde stong dbyer med ni ma yin pas so//yang na snang ba brnyags pas stong pa yin par go/ /stong pa nyid las sna tshogs myong bas snang ba yin par go/ /de gnyis dbyer med pa dbang po'i mngon sum yin te/ thar pa thob par byed pa'i lam ma yin pas na de ni ma yin no/ /de ltar yin te de ni ma yin no//de lta bu de klu daSha ka'i gtsug gi nor bu rgyan gyi man ngag bzhin no/ /nyams su blang bar dka' ba ma yin gyi/ de lta bu de bla ma dam pa'i zhal gyi drin gyis rtag tu blta bar 'dod pas/ gtsang btsog med pas phag pa dang 'dra la/ nyam nga med pas glang po che dang 'dra'o//grogs po gnyis kyi ma mthong ba'i ming so sor btags pa'i sgrung brgyud bzhin du/ phyogs su mi ltung bas/ grogs po phag dang glang por ltos// //da ni yid bzhin gyi nor bu'i dpes bstan par bya'o//sems yid blo rnam par shes pa rig pa dran pa med na/ sems can gyi dgongs pa ji ltar bya zhe na/ de dag ldan gyi bar du sems can zhes bya'o/ /de dag kun dbyings su dag la yid la med pas/ 'gro ba dang 'gro ba'i don du sku yin par sprul nas/ ji ltar yid bzhin nor bu'i dgongs pa bzhin/ /'khrul pa ni sems can rnams kyi rang rang gi rnam par rtog pa yin la/ de yang sems las byung ba'i dran pa kho na'o/ /rnal 'byor pa rnams kyis dran pa glo bur bar shes la/ rtag tu dran pa med cing yid la bya ba med par rtogs pas/'khrul pa ni rang bzhin gyis zhi la/ sangs rgyas kyi dgongs pa ni rang gis lhun gyis grub/ sems can rnams kyi sems kyi dngos po'i gnas lugs shes pas/ 'khrul pa zhig pa'i mkhas pa ngo mtshar che/ /de gang la gang gis bstan par bya zhe na/rang la gnas pa rang la rang gis shes par bya ste/ sems kyi rang bzhin 'od gsal ba/ /glo bur gyi dra ba'i dri mas ma gos pa/ rgyun mi 'chad pa'i bsam gtan gyi bag chags blo las 'das pa bde ba chen po'i ngang la gnas pas/ rang la rang gi bde ba chen po'i bag chags gzugs de ltar rtogs pa'i tshe/sems las byung ba'i dran pa ni sprin bzhin yal/ ston ka'i nyi ma phyed kyi dri ma dag pa'i nam mkha' ltar/ dus rtag tu mnyam pa nyid la gnas pas/ thams cad de tshe mkha' mnyam byed par 'gyur// // da ni kA la kU Ta'i dpes bstan par bya ste/ kA la kU Ta ni nag po brtsegs pa'i dus skad cig ma brtsegs pa yin te/ de yang snod brtag par bya ba gser gyi gter rnyed pa'i sgrung brgyud dang / rang gis nyams su myong ba dran du ma btub pa'i dpe sprul gyi sgo nga zos pa'i sgrung brgyud dang /blo'i spyod yul ma yin pas tshig gis brjod du med pa ni/ shin tu rnam par dag pa la ye shes zhes ming med pa la ming du btags pas 'khrul pa ni/ spun lnga las bzhi shi nas gcig lus pa de rtag tu 'bogs pa'i sgrung brgyud dang / rgya mtsho bsrubs pa las tha ma kA ma la kU Ta byung ba de dbang phyug chen pos mgrin pa la bzhag nas/de'i gnyen po klu'i rgyal po nor rgyas snyan cha byas pa'i sgrung brgyud dang / byi ba dug can gyis sos btab pas dran pa tsam gyis na ba'i sgrung brgyud dang / dug gi sdong po dang de'i gnyen po tsan+dan sprul gyi snying po zhes bya ba'i sdong po gnyis gcig tu bsregs pa'i thal ba dbyer mi phyed pa'i sgrung brgyud kyis bstan la/mdor na yang dag par rdzogs pa'i sangs rgyas kyi dgongs pa ni/ shes dang shes byas 'jal du mi btub pa'i tshig bla dgas kyi brda yin yang /da ltar yin na yang bla ma dam pa'i bka' drin go ba med pa'i go ba/ rtogs pa med pa'i rtogs pa/ shes pa med pa'i shes pa de ni brdas bstan pa'i dus su/ blo las 'das pa tshig las 'das pa tha snyad las 'das pa gang yin pa de dran pa mi rung la brjod du mi rung bas/kA la kU Ta smos su mi rung ba ste/ dran du mi rung na ji ltar dran par bya zhe na/ de'i rang bzhin ni ji ltar nam mkha' la sprin la sogs pa de las byung zhing de la thim zhing dag pa de bzhin du sems nam mkha' dang mtshungs pa las/dran pa'i bzang rtog dang ngan rtog dkar nag gi chos ji snyed pa dbyings su dag nas/ rang bzhin mkha' mnyam yid kyis 'dzin pa yis/ /yid la byas pa'i chos thams cad ni mi dge ba yin la/ yid la ma byas pa'i chos kun sangs rgyas kyi dgongs pa la skyel shes na yid de yid ma yin par byed 'gyur na/chos rnams kyi gzhi ni lhan cig skyes pa yin te/ lhan cig skyes pa ni rang bzhin gyis rnam par dag pa la/ kun du bzang po yin pas/ rang bzhin lhan cig skyes pa mchog tu mdzes/ /phyi'i yul dang nang gi yul/brjod bya dang brjod pa ji snyed pa de ni lhan cig skyes pa las logs na ma grub pas/ khyim dang khyim na bde ba brjod pa ste/ /de ltar sems can dang sangs rgyas dbyer mi phyed pa'i bde ba chen po'i gnas khyad par 'phags pa ma shes pas/bde chen gnas ni yongs su shes pa min/ /de cis lan zhe na/ 'gro ba 'di dag ni rang rang gi dran pa'i rnam par rtog pa'i khur bus rang gi sems la khal bkal nas/ 'gro ba rigs drug gi grong nas grong du 'pho bas/ 'gro kun sems khral khur bar mda' bsnun smra//'gro ba rigs drug gi grong du mi gtong na/ bsam du med pa bsgom du med pas/ dran du med pa rtogs dgos te/ rtogs pa tsam khur lci bas mnan pa'i gang zag gang yang rung ba cig gis khur bor ba bzhin du/ dran pa'i rnam par rtog pa dang 'brel pa med par bya/bla na med pa'i 'bras bu ster ba'i bsam du med pa ma rtogs pas/ de ni bsam med sus kyang rtogs ma yin// //da ni ro ma stor ba la lan tshwa chu la thim pa'i dpes bstan par bya'o/ /sangs rgyas kyi dgongs pa ni sems can gyis bsgom mi shes la/sems can gyi rnam rtog dran pa 'di la sangs rgyas kyis zhen par mi mdzad pa'i gnas lugs bde ba chos sku/ gsang ba longs sku/ yan lag sprul sku/ ngo bo nyid kyis spros pa dang bral bas/ bde gsang yan lag yongs su spangs pa na//so so skye bo'i bsgom pa ni bsam pa/ bsam pa ni dran pa/ dran pa ni rtog pa/ rtog pa ni 'khor ba/ 'khor ba ni mi rtag pa la sogs pas g.yos par byed do/ /rnal 'byor pa rnams kyi rgyun mi 'chad pa rnams kyi bsam gtan mi bsgom/ mi bsgom pas ni mi bsam pa/mi bsam pas ni mi dran pa/ mi dran pas ni mi rtog pa/ mi rtog pas ni mi 'khor ba'o/ /mi 'khor bas ni mi g.yo ba de ni bsgom pa dang mi bsgom pa khyad par med pas/ bdag ni mnyam par gzhag ce'am langs zhes rlom sems med/ bsgom dang mi bsgom dbyer med bdag gis mthong / /phyi rol gyi yul la brten nas nang gi yul dran pas myong la/ bram ze ma yin pa bos la shog byas pa'i dpe de bzhin du/ de las yengs kyi bar du gzhan dran pa med pa de/ yul gyis mtshon pas gzhan dag bsam par byed//sems dang sems las byung ba'i mi rgyu ba gang yin pa de/ gdams ngag gis bstan pas de nyid ngo shes/ rnam rtog dran pa de rang bzhin gyis yal bas/ de nyid bsam pas rnam rtog rang bzhin 'gag par 'gyur/ gal te sems kyi rang bzhin ni dran pa med cing rnam par rtog pa med la/sems las byung ba dran pa de yang sems las logs na ma yin pa des mtshon du 'gro bas/ gal te sems kyis sems ni mtshon du 'gro/ /de ltar rtogs pa'i dus su kun gzhi rnam shes yid de dang / phyi rol rkyen gyis dran pa glo bur ba de dag ni/g.yo ba med pa'i ting nge 'dzin gyi dbyings su/ rnam rtog dang ni yid ni mi g.yo brtan par gnas/ /chos rnams kyi ngo bo nyid blos reg tu mi btub la/ blo dang rig pa ni rkyen la rag lus pas glo bur ba yin no/ /glo bur ba ni dngos po med pa'o//'khrul pa'i dus su dngos po mthong yang / ma mthong ba'i chos nyid la bde ba'i ro ma stong bas/ ji ltar lan tshwa chu la thim pa ltar/ /de bzhin du sems dang sems las byung ba ji snyed pa de ni skye ba med pa'i dbyings su thim pas/ / de ltar sems ni rang bzhin la thim 'gyur/ /bdag gi don du sangs rgyas pa ni skye ba med pa chos kyi sku'o/ /gzhan gyi don du 'tshang rgya ba ni gzugs sku rnam pa gnyis mnyam pa nyid la gnas pas tha dad pa ma yin te/ bdag dang sems can la sogs pa mi dmigs pas/de tshe bdag dang gzhan ni mnyam par mthong / /mnyam pa nyid ni dus la tha dad med pas rtsol ba dang 'bad pa byas pas thob pa ma yin gyi/ spyod pa nges pa med par rtogs pas dran pas mi gos pa tsam yin gyi/ dran pa la 'bad pas bsam gtan du ma gyur pas/'bad de bsam gtan byas pas ci byar yod// //da ni chu dang mar me'i dpes bstan par bya'o/ /chos rnams kyi gzhi dran med/ lam skye med/ 'bras bu blo las 'das pa'i phyir/ dang po'i sems nyid chos nyid nam mkha'i mtshan nyid gang yang ming du gdags pa ma mchis pa gang yin pa de ni dang po rgyu dang /rkyen gyis ma bslad pa de la lha zhes bya'o/ /de lta bu de khams gsum gyi sems can rnams kyi rang rang gi gzhung then nas lha du mar snang ngo / /de ltar rtogs par byed la lan re bden pa gnyis su 'dod/kun rdzob kyi bden pa ni mi bden la/ don dam pa'i bden pa ni dmigs su med pas/ de nyid lung rigs pa bstan bcos kyis 'jal du mi btub pa lha/ lhan cig la ni lus rnams mang por mthong / /rtag chad la sogs pa'i lta ba dang rang gi 'dod gzhung then pas lha nyid ma rtogs so//dper na sngar mthong ba'i mi rnams kyis/ mun nag nang na glang po che la reg pa la la la'i sems la shar lugs mi bden pa bzhin du/ rang 'dod pa'i mang po gsal bar snang / glang po che de nyid mun pa dkar ba'i nang phyung bas/gang dang yang mi 'dra ba de bzhin du/ bla ma dam pas bstan pas sgra dang tshad ma dang / lung dang bstan bcos mkhas pa rnams kyis ma rtogs pas/ mgon po bdag nyid gcig pu gzhan rnams 'gal/ /'o na phyi nang gi yul las logs na cig grub mtha' yin nam zer ba la ma yin te/phyi'i yul gzugs la sogs pa dang / nang gi yul dran pa la gleng zhen yang grub mtha' logs nas tshol mi dgos pas/ khyim dang khyim na grub mtha' de grub pa'o/ /kun rdzob kyi chos rnams ni dran pa kho na la bsdus la/dran pa de yang 'das pa ni brjed la/ ma 'ongs pa ni ma dran pas/ da ltar ni de las logs na dran du med de/ dran pa de nyid zas su shes pas gzhan gang yang bsam mi dgos so/ /dper na ras bal gyi phung po mes tshig pa dang 'dra la/dran pa tshig par 'gyur ro/ /sgyur po sngar zos pa cig gis phyis mthong ba tsam gyis ro bro ba bza' mi dgos pa de bzhin du/ gcig gi rang bzhin shes pas kun gyi rang bzhin shes so/ /gzugs kyi de bzhin nyid shes na chos thams cad kyi mdo dang rgyas pa shes par 'gyur ro//gcig zos pas ni gzhan kun 'tshig /de ma rtogs pas rnam rtog 'ba' zhig pa dran pa bsgom pa ni/ phyi rol pa dang khyad par med pas/ phyi rol song nas khyim bdag tshol/ /chos nyid yang dag don gyi dngos gzhi ni/ /'gro ba dang 'ong ba med pa'o//de blo dang rig pa'i yul ma yin pas/ 'ongs kyang ma mthong phyin kyang med la/ lus dang grib ma bzhin du rtag tu spros pa med pa'i bde ba dang / 'grogs pa la de ngo ma shes pas 'dug par gyur kyang ngo ma shes/ nyon mongs pa'i rlung dang /gzugs sgra la yengs pa dang / nyams su myong ba la yengs pa/ shes bya'i rlabs dag gis mi tshugs/ rnam pa thams cad mchog dang ldan pa'i stong pa nyid kyi ye shes kyi rgya mtsho la dbang du sgyur bas/ dba' rlabs med pa'i dbang phyug mchog /rkyen rnam pa gsum gyis ma bslad pas bag la nyal las bsgribs pa gang yang mi ldan la/'bad pa med pa'i chu bo'i rgyun gyi rnal 'byor du gyur pas/ rnyog pa med pa'i bsam gtan 'gyur/ /ji ltar chu ma rlogs pa'i nang na/ zla ba dang mar me'i gzugs brnyan shar ba de ni chu la sogs pa ma yin pa bzhin du/rnal 'byor pa'i sems dngas ma las sna tshogs dran yang de nyid yin pas/ chu dang mar me rang gsal gcig pur zhog /de ltar rtogs pa'i rnal 'byor pa yin pas/ gang yang mi len la gang yang mi 'dor bas/ thams cad chos nyid kyi cho 'phrul cir yang 'gro 'ong du snang bas/ 'gro 'ong nga yis mi 'dor mi len no/ /thog ma med pa nas yod dang med kyi tha snyad dang bral ba ni blo'i yul las 'das pa bde ba chen po ni gzhir gyur pa rnal 'byor pa thams cad kyi sems yid blo rig pa dran pa 'phrog nus pa gang yin pa de/bla ma dam pas bstan pas/ gang yang snga na med pa'i sgeg mo dang phrad nas/ yid 'phrog ma sgeg mo de dang nyal na/ sems la ni gzhi rtsa med pas/ rten med pa la brten pa ni/ /bar snang gi bya sa ku ne bzhin du sa la mi 'bab/rnal 'byor pa rnams kyis dran pa glo bur ba la yid mi ches pa/ nyal ba'i sems ni gzhi med pa la brten/ de ltar yin na yang sna tshogs dang bral ba ma yin gyi/ dper na rmi lam gyi dus na yid 'phrog ma dang snyoms par zhugs pas/ bde ba myong la gnyid sad pa'i dus su rang las logs na gang yang med pa de bzhin du sems nyid dran pa med pa las logs na gang yang ma grub pas/ rang gi gzugs dang tha dad ma lta zhig /de ltar rtogs na ni lhun gyis grub pa'i sangs rgyas yin la/ sku gsum las ma g.yos pa yin pas/de ltar sangs rgyas lag tu gtod pa yin/ /dpe'i lhan cig skyes pa'i dus su thig le gnyis la lus ngag yid dbyer mi phyed pa bzhin du/ don dam pa'i lus rtogs pa'i tshe/ de la yang gang tshe lus dang ngag yid dbyer med pa/ de'i tshe na don dam pa'i lhan cig skyes pa yid la byar ma btub pas/ lhan cig skyes pa'i rang bzhin de tshe mdzes/ /de ci ltar na rig pa dran pa zos nas dran med kyis khams gsum la longs spyod pas/ khyim bdag zos nas khyim bdag mo longs spyod/ /de ltar gnas pa'i sems nyid nam mkha'i mtshan nyid dang 'dra bas/dran pa ci byung yang nyam nga med pas/ yul ni gang gang mthong de spyod par bya'o// //da ni sgyu mas bslus pa'i dpes bstan par bya'o/ /de yang rgyal po seng ge zla ba'i sgrung brgyud dang / /rgyal po rang la sgyu ma mkhan gyis sgyu ma byas pa'i sgrung brgyud dang /rnal 'byor pas bzhad gad byas pa'i sgrung brgyud do/ /de la sgyu ma sgyu mar shes pa dang ma shes pa'o/ /chos nyid yang dag pa'i don ni mi 'gyur bas sna tshogs 'gyur yang rtogs pa la 'gal ba med do/ / ma rtogs pa rnams kyis sna tshogs mthong la chos nyid mi 'gyur ba ma mthong bas/ nga yis rtsed mo byas pa la/ so so'i skye bo ni phyi dang nang gnyis kyi yul la chags nas/ rang rang gi las kyi rnam par smin pa'i khur bu khur nas/ byis pa rnams ni sha thang chad/ /chos rnams kyi gzhi dran med las dran pa'i rnam pa skye bar 'gyur gyi/de nyid ni spros pa med pa'i phyir yum shes rab kyi pha rol tu phyin ma dus gsum gyi bde bar gshegs pa'i skye gnas yin la/ de nyid ma rtogs pas khams gsum gyi sems can gyi skye gnas yin pas de'i phyir/a ma gzhan nas bu de skye mi 'gyur/ /phyag rgya chen po'i rnal 'byor pa'i spyod pa'i dpe ni/ gsang spyod rig spyod kun du bzang po'i spyod pa bzhin du dus kyi nges pa med do/ /ji ltar nam mkha' ni chags pa'am 'jig pa'i dus med pas/ dngos po med pa la ming du btags pa bzhin du/phyag rgya chen po de yang dngos po med pa la dpes mtshon du med pas/ de'i phyir rnal 'byor spyod pas dpe dang bral// //da ni bdag po lta bu rig pa'i ye shes zos pa'i dpes bstan par bya'o/ /de yang bud med kyi gling gi sgrung brgyud khyo gzhan nas tshol ba bzhin du/rnal 'byor pa'i nyams su myong nas rkyen la rag lus pas/ nyams su myong ba don dam pa ni ma yin gyi/ dran rig glo bur bzos pas chos nyid kyi ngo bo ni blo las 'das pa la rang bzhin gyis rmad du byung bas/ bdag po za shing rang bzhin mdzes//sems nyid spros pa dang bral ba la/ dran pa'i chags pas gang bar 'gyur yang / de nyid las ma g.yos pas chags pa'i yul gyis gang ba'i sems de nyid/ 'dod chags mchog dga' dran pa'i thig le/ chags bral dga' bral dran pa med pa'i thig le/spang ba chos nyid skye ba med pas/ chags dang chags bral spangs nas gnyug mar zhugs/ /rang bzhin gyis rnam par dag pa'i chos nyid spros pa dang bral ba la sems kyi ming yang med de/ chos rnams kyi skye sa rnal 'byor ma ni sems med pas na/ sems nyams pa ni rnal 'byor ma ngas mthong / /de'i rang bzhin rnal 'byor pa rnams kyis bsam du yod dam zhe na/ dran pa glo bur ba yin pas zas su shes/ ma dran pa ni ltos pa'i chos nyid mnyam pa nyid kyi ro ni sgom du shes/ de gnyis la bsam pas dgos pa med/de'i phyir gang yang mi bsgom pas/ za zhing 'thung la bsam du med/ /sems nyid ni spros pa dang bral ba nam mkha' dang 'dra/ sems las byung ba'i dran pa ni sprin pa dang 'dra bas grogs ma yin te/ nam mkha' dang ba 'dra ba dang 'grogs pas/grogs mo 'di ni sems la gang snang ba/ /phyi rol pas sems kyi de nyid dran pa yin zer te/ sems ni dran pa med pa rnam par rtog pa med pa yin te/ gang gis kyang mtshon du med pas/ phyi rol sems kyis mtshon du med pa bdag gis mthong //de'i rang bzhin ni sgyu ma'i skyes bu'i rmi lam bzhin du 'di lta bu zhes pa brjod du med do/ /rig pa'i ye shes la ma rtogs pa rnams kyis 'bad par byed de/ don gyi rnal 'byor mas ni rig pa zas shes pas/ /sgyu ma'i rnal 'byor ma ni dpe dang bral ba ste// // da ni shel sgong g.ya' dag la rkyen gyis me dang chu 'byung ba'i dpes bstan par bya'o/ /de yang khams gsum gyi sems can dang / dus gsum gyi bde bar gshegs pa'i gzhi gcig tu dri ma med pa de/ gang nas byung ba dang / gang du gnas pa med pas/ sa gsum gang du'ang dri med mi gnas mi 'byung ste/nyi ma'i 'od zer dang shel sgong dang / spra ba thug phrad kyi rkyen gyis me 'byung ba bzhin du/ rnal 'byor pa'i sems phyi dang nang thams cad gsal la ma 'gags pa las rkyen gyi dbang gis/ sna tshogs myong yang dngos po med par shes pas/me ni spra ba nyid la rkyen gyis 'bar/ /shel sgong de nyid nye ba'i zla ba dang phrad pas/ snod gtsang ma'i nang du zed pas chu 'dzag pa bzhin du/ snod dang ldan pa'i gang zag la bstan ma thag tu/ rang dbang med par phyag rgya chen po rgyun du myong bas zla ba chu 'dzag nor bu rang dbang med/de yang 'khor ba dang mya ngan las 'das pa rang gi dbang du byas pa'i thabs mkhas pas/ rgyal srid dbang du bsdus pa bzhin du thabs kyis rgyal srid kun la dbang bsgyur ba'i/ sems kyi rang bzhin 'od gsal ba/ dran pa'i dri mas ma gos pa sems nyid ces bya'o/ /de nyid rnal 'byor du grub pa dang dbyer med pas na/ chos thams cad bskyed pa'i yul shes rab kyi pha rol tu phyin ma 'di ni sems nyid de ni grub pa'i rnal 'byor ma'o/ /chos thams cad ni snang ba stong pa skye ba med pa gsum la bsdus la/de yang rang gi sems las ma gtogs pa chos gang yang med de/ de yang bzang dang ngan la sogs pa'i rnam rtog yin pas dran pa tsam mo/ /dran pa de yang kun rdzob tsam du yod la brjed pa'i rgyu yin no/ /brjed pa de yang dran pa med pa yin te/rnal 'byor pa'i sna tshogs skye sa yin pas/ snang ba'i lhan cig skyes pa'o/ /dran pa med pa de rtag tu skye ba med pa yin te/ stong pa nyid kyi skye sa yin pas stong pa nyid kyi lhan cig skyes pa'o/ /skye ba med pa de dus rtag tu blo'i yul las 'das pa yin la/ skye ba med pa de nyid kyi skye sa yin pas/ skye med kyi lhan cig skyes pa'o/ /de ni sdom pa gsum gyi dbang du byas nas/ don dam pa'i lhan cig skyes pa'i sdom pa shes par bstan par bya'o/ /lhan cig skyes pa'i sdom pa shes par bya'o// //da ni de dag gis 'bras bu chos kyi sku gdol ba'i rig byed kyi dpes bstan par bya'o//de la dang po chos sku tha snyad las 'das pa ma rtogs pa rnams las brgal ba ni/ 'gro ba ma lus pa'i tha snyad yin gyis/ la la ni dran pa'i tha snyad kyi phyir 'brangs nas/ 'khor ba las thar pa thams cad thob par mi byed/la las ni sgra dang tshad ma dang lung dang bstan bcos las byung ba'i tshig la mkhas par byas pas kyang / thar pa'i lam ring bar byed do/ /la las ni bsam gtan dang ting nge 'dzin dang zhi gnas dang / mnyam par gzhag pa bsgoms nas rnal 'byor du byas pas thar pa rang du mthong ba yod de//de dag dran pa las ma 'das pas/ yi ge ba'i 'gro ba ma lus pa/ dran pa'i tha snyad rang la sna tshogs kyi ming btags na/ tha snyad dang bral ba'i ngo ma shes pas/ yi ge med pa gcig kyang med//don dam pa ni blos gzhag tu'ang mi btub la/ tshig gis brjod du ma btub pa gang yin pa de ni yi ge med pa'o/ /ji srid bla ma dam pas ma bstan gyi bar du yi ge dang tha snyad la sems ma yengs pa'o/ /brda dang thabs kyis bstan nas ma yengs pa de ni/ji srid yi ge med 'gyur ba/ /brjod pa kun dang bral ba de nyid sangs rgyas kyi gsung rab thams cad kyi 'byung gnas yin pas/ de srid yi ge rab tu shes/ snag tsha mnyes pa'i yi ge rab tu shes/ nang na yi ge bklag tu btub pa gang yang med do//gsung rab tu bris nas bklag pa med yang gzhan ma yin no/ /de bzhin du chos sku bsgom du med pas bltar med do/ /de las logs na 'gro don med do/ /snag tsha mnyes pas bklag tu med/ /'gro don byas pa ni sprul pas sprul pa la byed par 'gyur gyi/chos kyi skus ni mdzad pa dang ni mdzad pa mi mnga' ste/ bram ze ma lags pas rig byed 'don yang don med pas/ rig byed don med 'don pas nyams/ /blo'i spyod yul ma yin pa don dam pa cig shos shes kyang / shes pa ma yin pas dam pa soms dang cig shos mi shes na/chos thams cad snang ba dang stong pa dang skye ba med pa las skye ba'i rnam pa shar yang / de'i rang bzhin las ma g.yos pas/ gang nas shar cing gang du nub/ /phyi rol gyi dngos po 'di dag ni sgyu ma'am/ de bzhin du nang du dran rig nyams su mi bden pa'i rnam pa yin pas/ji ltar phyi rol de bzhin nas/ /dran rig nyams su myong ba ni/ /gzhan gyis rgyun du gnas par mthong yang dran pa rgyun du mi gnas pas/ 'dod pa'i khams 'gro ba rigs drug dang / gzugs khams bsam gtan bzhi dang /gzugs med pa'i khams skye mched bzhi ste bcu bzhi'o/ /de la rdo rje 'dzin pa'i mi g.yo ba rgyun du gnas pas/ bcu bzhi pa'i sa la rgyun du gnas/ /sa la rgyun du gnas pa'i lus ni dpe don gnyis so/ /lus 'di la rkang mthil yan chad spyi bo man chad la sems btsal bas mi rnyed pa bzhin du/bcu bzhi pa'i sa la mnyam pa nyid kyi don gyi lus shin tu dang ba/ lus la don gyi sems sbas pa mi rnyed de/ ji ltar sems can gyi lus la sems sbas pa bzhin du/ sku gsum la sbas pa ni lus med lus la sbas pa ste/ji ltar sems can la snying po med par shes pa bzhin du/ sangs rgyas la ye shes don dam par mi mnga' bas/ de thob pa gang zhig thob pa gang yin pa de ni med de de bas na rnal 'byor pa rnams kyis thob pa med pa'i tshul gyis/ blos mi reg pa'i de nyid bla ma dam pas bstan pa tsam gyis grol bas/gang gis de shes de yis grol bar 'gyur/ /slob bya ni yi ge bzhi la slob dgos so/ /de yang sgrub par gyur cig smon lam gyi yi ge bzhi la'o/ /don la ni brjod bya ji snyed pa la shes par bya'o/ /sangs rgyas kyi chos ji snyed pa ni e waM ma yA la slob par bya ba yin pas/dang po nas chos kyi gnas lugs kyi ngo bo bstan la/ de nas chos thams cad bzhi bzhi'i man ngag gis shes par bya'o/ /de yang ji lta ba bzhin du nyams su blangs la gnas par mi bya'o/ / las dang po pas yi ge 'bru bzhi'i man ngag la bslab par bya gnas par mi bya'o/ /yi ge med las yi ge'i tha snyad yin pas bsgrub yig bzhi la dang po bdag gis bton/ de lta bu rtogs pa'i dus su snying po don gyi rnal 'byor gyi khu ba 'thung bar bya na/ blo yi yul las 'das pa rtogs pa'i rnal 'byor bas ni/chos rnams dran brjed gnyis la bsdu'o/ /dran pa de yang bag chags sam rkyen la rag lus pas kun rdzob sgyu ma tsam mo/ /so so'i skye bos ni chos rnams kyi snyigs ma za ba dang / 'dra ba ni dran pa kho na la spyod pas so//rnal 'byor pas ni chos kyi snying po khu bo bor ba 'thung ba dang 'dra ba ni brjed pa kho na spyod pas/ khu ba 'thungs pas ngas ni brjed par 'gyur/ /brjed pa de yang dran pa la mi gnas par bya ba'i don du yin gyis/ sems ni dran pa dang brjed pa lags/ci yang skye ba'i rgyu med skye ba med pa de nyid/ gang gis yi ge gcig shes la/ /skye ba med pa'i zhes chos thams cad kyi snying po yin yang skye ba'i rnam pa zad par bya ba'i don du yin gyi/ de lta bu'i tha snyad las 'das nas sems kyi yul dang yul can dang bral ba de gang gis gang la'ang ming med pas/de'i ming ni mi shes so/ /dus gsum gyi bde bar gshegs pa rnams kyi yang dag pa'i mtha' ni/ rkyen gyis ma bslad pa yid la byar med pa de ni/ rkyen bral gsum ni yi ge gcig /de las zag pa dang bcas pa'i yi ge ni/khams gsum gyi sems can gyi lus ngag yid gsum mo/ /de yang ji srid dran pa dang bcas pa'i dus su'o/ /zag pa med pa ni sems de nyid dran med skye med blo las 'das pa ngos bstan du yod la/ ngos gzung dang bral ba'o/ / de'i rang bzhin yid la byas pa ma yin pas yi dam gyi lha nyid du shes la/ rtogs pa'i rnal 'byor pa rnams kyis dgongs pa de la mdzad pas/ zag med gsum gyi dbus na lha/ /lha de nyid ni blos reg tu mi btub la/ de las zag pa dang bcas pa dran pa byung yang / cig shos dang ma bral bar shes na/ gang zhig gsum pa zag pa ni/ /don dam par ni bsgom du med pa yin pa la/ bsgoms pa ni blos bzhag nas dran pa'i bar du yengs pa ni yin gyi/ bcos ma yin no/ /dper na reg tu mi btub pa gdol pa bram ze bcos nas rig byed bton yang /dang po reg tu mi btub pas/ /bar du reg tu btub btub dran te tha ma reg tu ma btub bar song ba'i sgrung brgyud bzhin du/ yang dag pa'i cig shos ni blos reg tu mi btub la/ bar du blos reg tu btub btub 'dra ste tha ma reg tu mi btub pas/gdol pa'i rig byed de bzhin no// //de la longs sku ma shes pa la smig rgyu'i dpes bstan par bya'o/ /de la dang po ma shes pa brgal ba/ 'gro ba ma lus pa la skye ba med pa'i rang bzhin gyis/ khyab pa de nyid longs spyod rdzogs pa'i sku yin par ma shes pas ma lus rang bzhin gang gis mi shes pa/phyag rgya chen po'i byin gyi rlabs ma shes na/ shes rab ye shes kyi dbang gi dus su bde ba chen po ma yin pas/ kun du ru'i skabs su bde chen sgrub pa ni/ /las kyi phyag rgya'i nyams su myong ba la yid la byas pa de phyag rgya chen po ma yin pas na/ji ltar skom pas smig rgyu snyegs pa bzhin du/ chu ma yin pa la chu'i 'du shes kyis mi ngoms pa bzhin du/ phyag rgya chen po ni sna tshogs kyi 'du shes dang bral ba nam mkha' dang 'dra ba bsam du med pa ma shes na/ bsam pa dang dran pas don dam du 'dod pa de snyegs pas/ skom nas 'chi yang nam mkha'i chu snyed dam/ /rdo rje pad+ma gnyis ni gnas nyi tshe ba yin la/ de las byung ba'i dus su byang chub sems ni rgyu nyi tshe ba yin te/ skad cig ma de las gzhan na med pas dus nyi tshe ba yin no//de yang thig le bzhi pa gnyis shor bas 'dod chags kyi ngad yal/ gnyis mnyam pas 'dod chags dang bral ba yang ma yin/ de yang thig le gcig rdo rje rtse mor gnas/ thig le gcig pad+ma'i ze 'bru la gnas pa'i dus su/ rdo rje pad+ma gnyis kyi bar gnas pa de'i bde ba ni/dpe'i lhan cig skyes pa tsam yin pa la/ don dam pa'i bden pa yin snyam nas 'bad pas/ bde ba gang gi rnam par rol pa ni/ /ci ste ma yin zer na phyag rgya chen po'i bde ba ni nam mkha' bzhin du gang la yang mi rten pas/ chos thams cad kyi rten du 'gyur ba yin gyi/gnyis shor gnyis mnyam gyi bde ba ni bde ba nyi tshe ba yin pas/ rten nus pa med pa'i phyir/ ci ste de rten nus pa med pas na/ /yid la ma byas pa'i phyag rgya chen po'i bde bas ni/ khams gsum gyi re ba skong bar 'gyur gyi gnyis shor gnyis mnyam gyi bde ba ni/'dod khams kyi phyogs gcig pa yin pas/ sa gsum re ba gang gis rdzogs par 'gyur/ /mtshan nyid dang bral ba'i skad cig ma'i bde ba ni dbang gsum pa yin pas na/ dpe'i ye shes kyis mtshon la/don gyi ye shes kyi phyag rgya yang dran dgos pa'i phyir thabs tsam du gyur pas yang na thabs kyi bde ba skad cig ma/ yang na dran tsam yod la ma dran tsam na med pas/ yang na de nyid gnyis su 'gyur ba ste/ /bla ma dam pas bstan tsam na/ dran na pa de nyid sems ngal sos par shes pas/bla ma'i drin gyis slar yang ni/ /dran pa med cing yid la bya ba med pa/ phyag rgya chen po'i rang bzhin sems dang yid dang blo dang rnam par shes pa dang / dran pa dang rig pa dang / ye shes kyi spyod yul ma yin pa/ brgyud pa'i bka' gdams pas shes par 'gyur gyi/gzhan gyis shes par bya ba ma yin pas/ /brgya la 'ga' yis shes par 'gyur// //shes pa'i yon tan zla ba'i nor bu'i dpes bstan par bya'o/ /rtogs pa rnams ni brgyud pa'i grogs po yin la/ rgya mtsho bzhin du zab pa dang //nam mkha' bzhin du rgya che bas/ /grogs dag zab mo dang ni rgya che ba/ /de lta bu la ni bdag dang gzhan gyi dmigs pa dang bral bas gzhan min bdag nyid ma yin no/ /de gang gi dus su zhe na/ phyag rgya chen po'i dbang gi dus su yid la byas pa thams cad dang bral ba de nyid gsum pa/dran med skye med blo las 'das pa gsum dbang gsum pa yin pas na/ de las ma g.yos pa bzhi pa'i man ngag gis shes pas ni/ lhan cig skyes pa bzhi pa'i dus/ /de nyid blo las 'das nas rtag tu rgyun du gnas pa gnyug ma/de ltar rtogs pas nyams su myong ba ni/ gnyug ma nyams su myong bas shes/ /des ci 'dra zhe na nyon mongs pa dang shes bya'i sgrib pa ni/ mun nag thibs po dang 'dra ba la/ de 'joms par byed pa klu'i yul gyi zla ba'i nor bu dang 'dra ba bla ma dam pa'i gdams ngag gis ma rtogs pa rtogs par byed pa/mun nag chen por zla ba'i nor bu ni/ /ji ltar zla ba'i nor bus mun nag de rang las gzhan du skyel mi dgos pa de bzhin du/ nyon mongs pa dang shes bya spang mi dgos pas/ ji ltar 'char bar byed pa de bzhin du//'khor ba'i 'dam dang mya ngan las 'das pa'i 'dam gyis kyang ma gos pa'i bde ba chen po'i gang dang yang thun mong ma yin pa mchog bstan ma thag tu skad cig ma gcig la sangs rgyas kyi dgongs pa mthong bas/ mchog tu bde chen skad cig gcig la ni/ / yid la byas pa ni bsam pa'i sdig pa yin la/ yid la ma byas pa ni mi bsgom pa'i dge ba yin pas/ dran pa'i rnam rtog la sems ngal so ba shes la/ dran pa med pa la nyams su myong ba'i phyir yid pham pas/ bsams pa'i sdig pa ma lus pham par byed pa'o// //da ni rtogs na sems glang po che yan pa'i dpes bstan par bya'o/ /de la re zhig sprul sku rtogs par bya'o/ /tshad pas gdungs pa'i sems can ni/ /mig gis nyi ma'i dkyil 'khor gyi nang du ce re lta ba mi bzod pa bzhin du/ sems can la la'i lus kyang mig dang 'dra bas/nyi ma la sdug bsngal du mthong bas/ nam zhig nus par 'gyur snyam mo/ /nyi ma nub pa dang / nam mkha' la khyab pa skar ma'i bdag po zla ba dang / gza' dang bsil bar gyur pa mnyam du shar/ /de bzhin du rnal 'byor pa rnams kyis 'khor ba'i rgyur dran pa 'di/sdug bsngal gyi nyi ma dang 'dra bas na/ nam zhig nub par 'gyur snyam pas na/ sdug bsngal snang byed nub pa na/ /zla ba nya ba'i dus nyi ma nub pa dang / skar ma zla ba gza' gsum mnyam du shar ba bzhin du/ rnal 'byor pa'i dran pa nub pa'i dus dang /kun la khyab pa dran med dang / /gzugs can ma yin pa skye med dang / 'gro 'ong med pa blo las 'das pa/ man ngag gis bstan ma thag tu shar bas/ skar ma'i bdag po gza' dang mnyam du shar/ /'di ltar dran med skye med blo las 'das pa'i dbyings su gnas shing /sprul pa'i rnam pa du ma de las sprul pa yin pas/ 'di ltar gnas pas sprul pa sprul/ /dran med las sna tshogs shar bar/ sprul pa sku'i dkyil 'khor dang / skye med dbyings su gnas pa rtogs pa longs spyod rdzogs pa sku'i dkyil 'khor dang /blo las 'das shing bsgom du med pas chos kyi sku'i dkyil 'khor de nyid 'khor lo dam pa yin pas/ de ni dkyil 'khor 'khor lo dam pa'o/ /de lta bu ni ma rig pa'i dbang gis rmongs par gyur na yang gzung 'dzin dang bral ba'i sems dran pa tsam gyis dag pa'i sems ni dran med la/rtogs par bya ba ma yin pas/ /kye ho rmongs pa'i sems kyis sems la rtogs nas ni rtag chad la sogs pa'i lta ba ngan pas grol ba dang lta zhog gi/ de bas kyang sems tsam pa dang dbu ma pas/ yid la ma byas pa'i phyag rgya chen po ma rtogs na lta ba ngan pa yin te/ rnal 'byor pas gang gis kyang rtogs par bya ba ma yin pa rtogs pas na/ lta ba ngan pa thams cad ni rang grol 'gyur/ de yang shes dang shes bya'i sgrog gnyis kyis bcings pa ni sems tsam pa dang dbu ma pa yin gyi/rnal 'byor pa rnams ni shes dang shes bya gang gis kyang ma bcings la/ rnam pa thams cad mkhyen pa de nyid bla ma dam pas bstan pa ni mchog yin te/ de nyid 'dam gang gis kyang ma gos pa bde ba chen po'i dbang du 'gyur bas/mchog tu bde ba chen po'i dbang gis na/ /thun mong gi dngos grub ni sems kyi dran sgom dang sngags dang phyag rgya la sogs pa la byung ba yin gyi/ thun mong ma yin pa phyag rgya chen po'i dngos grub ni/ yid la ma byas pa'i ngang las ma g.yos pa rdo rje lta bu'i ting nge 'dzin de la gnas na dngos grub dam pa'o// //de ltar rtogs pa'i rjes la sems rang dgar gzhag pa ni glang po che shin tu mi srun pa'i thog tu/ lcags kyus goms pa rtsal po che cig gis btab pas yan yang mi ster ba bzhin du/rtogs pa'i rnal 'byor pas sems nyid skye med du shes/ sems kyi rang bzhin dran pa med par shes/ /sems las byung ba'i dran pa'i rnam pa la dgag sgrub ma byed par/ sems kyi glang po yan du chug / shes dang shes bya las grol ba'i rnal 'byor pa'i dgongs pa ni gzhan la dri sa med pas/ de nyid bdag nyid la dris shing / /sems nyid kyi rang bzhin nam mkha' bzhin du spros pa dang bral ba la/ shes dang shes bya'i ri bo'i skye ba med pa'i chu babs pas/ nam mkha'i ri bo'i chu 'thung dang / /de yang ji srid dran pa dang bcas pa'i sems de ni sgyu ma tsam du shes la/ 'khor ba'i 'gram dang de las gzhan dran pa med pa man ngag gis nyams su myong ba yod pa'i rmi lam lta bur shes la/ mya ngan las 'das pa'i 'gram de gnyis sems ngal so ba dang /yid 'pham skye med chu bo yi/ /de yi 'gram du zhog cig rang dga' bar/ /de yang sems kyi yul ni dran pa ni glang po lta bu yin te/ dran med dbang po lta bu des skye ba med pa'i lcags kyu lag pas/ yul gyi glang po'i dbang po'i lag pas blangs nas su/ji ltar glang po che de rtsal che yang lcags kyu mkhan thabs mkhas pa'i dbang du gyur pa bzhin du/ thabs mkhas pas sems kyi glang po che de yang gsod/ nam yang bde ba rang dbang du 'gyur pas/ ji ltar gsod pa rang dbang snang bar 'gyur//de ltar rtogs pa'i rnal 'byor pa ji ltar glang po che skyong ba bzhin du/ sems nyid skye med du shes na sems dran med la skyo bar bya ba yin pas/ rnal 'byor pas ni glang po che skyong ba bzhin/ ma rtogs na glang po ni nags kyi glang po che yin pas mi ldog pa bzhin du/'khor ba'i nags las rgal bar mi 'gyur ba/ /rtogs pa'i rnal 'byor pas ni sems rang dbang du 'gyur bas/ de kho na nyid las logs na 'gro sa med pas/ de nyid nas ni ldog par 'gyur ba yin// // da ni chos rnams ngo bo gcig pa'i mtsho la chu bur gyi dpes bstan par bya'o/ /de la 'khor ba dang mya ngan las 'das pa sems la gnyis su snang yang / de gnyis kyi rgyu'i rtsa med de/ rig pas ni 'khor bar 'khor la de'i rang bzhin ma grub pas mya ngan las 'das pa'i lam yin no//de'i phyir 'khor ba spangs pa'i pha rol na/ mya ngan las 'das pa med la/ gang zhig 'khor ba de ni mya ngan las 'das par nges/ sems nyid 'khor ba dang mya ngan las 'das pa la sogs pa'i tha snyad btags kyang / dbyings la tha dad pa ni rdul phra rab tsam yang yod pa ma yin pas/dbye ba gzhan du sems pa ma yin te/ sems kyi rang bzhin ni spros pa thams cad bral ba'i phyir gcig ces rtogs mod kyi/ de lta bur brjod du btub pa ma yin pas/ rang bzhin gcig gis dbye ba rnam par spangs//sems rang bzhin gyis 'od gsal ba la/ glo bur gyi nyon mongs pas kyang nyon mongs par mi 'gyur la/ shes byas kyang shes byar mi 'gyur bas/ dri ma med pa nga yis rab tu rtogs/ /dri ma med pa ni ma rtogs/ nyid kyi de nyid bsgoms nas/bla na med pa'i byang chub thob zer te/ /bsgom pa ni dmigs pa dang bcas pa yin pas/ yid kyi de nyid dmigs pa dang bcas/ 'o na stong pa nyid bsgoms na zer na/ stong pa nyid ni dmigs pa med pa yin pas bsgom du med/ bsgom du yod na yid kyi rnam par shes pa la dmigs pas sangs rgyas ma yin sangs rgyas ni chos sku nyag gcig yin pas/chos sku ni dmigs pa med pa stong pa nyid yin pas/ dmigs med stong pa nyid yin na/ /'o na chos sku nyag gcig yin pas yid kyi rnam shes bsgoms nas dran nas yin zer na/ji srid dran pa ni rnam rtog yin pas/ bsgom pa ma yin/ sems nyid rgyun mi 'chad pa dran pa med cing yid kyi bya ba med pas/ bsgom bya sgom byed med cing yid la bya ba med pas bsgom bya sgom byed med de/ dran nas bsgoms nas bsgom pa'i dus su yod la/mi bsgom pa'i dus su med pas gnyis la skyon ni yod pa ste/ rnal ma gnyug ma ni dran rig blo'i yul ma yin pas/ bsgom dang mi bsgom tha snyad med/ /dran pa dang bcas pa bsgom na rnal 'byor ba ma yin la/ dran pa med na rnal 'byor pa ma yin pas/rnal 'byor gang zhig sgom pa yin/ /bde ba stong par gsal ba de nyid dran nas bsgom na dmigs bcas yin la/ de las gzhan dran pa med pa dmigs med yin pas/ bsgom pa dmigs bcas dmigs med do/ /dmigs pa dang bcas pas ni 'khor bar 'khor la/dmigs pa med na mya ngan las 'das pa yin te/ de gnyis kyi 'dam gyis ma gos pa ni skye ba med pa de nyid mtshan ma med pa'i bde ba yin pas/ bde ba'i rnam pa'i rang bzhin no/ /de'i phyir blo las 'das pas khyad par 'phags/bla na med pa'i byang chub sems can ma lus pa la rang 'byung bas/ rab tu bla med rang byung ba bla na med pa'i byang chub ni sems can ma lus pa la yod pa la yod par ngo ma shes/ bla ma dam pas brdas bstan pa'i dus su thabs khyad par can gyis bstan ma thag tu shes pas bla ma'i dus thabs bsten pas shes/de ltar rtogs pa'i rnal 'byor pas gnas la nges pa mi bya/ de bzhin du sems kyi gnas mi rtog pa nags lta bu'am/ rtog pa'i khyim lta bu la 'gro ba dang 'dug pa'i bya bas/ nags su ma 'gro khyim du ma 'jug par//de ltar rtogs pa'i sems dang sems las byung ba gang yang rang bzhin med par shes pas/ de ru zhen par mi byed pas/ /gang yang de ru yid kyis spongs shes na/ /de ltar shes na sems can du blta bar mi bya/ khams gsum ma lus pa 'di dag lta bar 'gyur ba med pa la rgyun du gnas pa'i byang chub yin pas/ma lus rgyun du byang chub rtogs pas na/ /de ltar rtogs na dogs pa dang re ba mi bya/ 'khor ba la lhung ba ni rnam par rtog pa dran pa 'di yin pa la dngos por ma grub/ mya ngan las 'das par lhung ba ni rnam par mi rtog pa dran med de yang dngos por ma grub bas/ 'khor ba gang yin mya ngan 'das pa gang / /'khor ba dang mya ngan las 'das pa ni yid kyi dri ma yin gyis/ rang bzhin gyis dag na chos thams cad kyi lhan cig skyes pa yin pas/yid kyi dri ma dag na lhan cig skyes pa ste/ lhan cig skyes pa'i rang bzhin shin du rnam par dag pa yin pas/ gnyen po ma lus pa rdzogs pa la glo bur gyi mi mthun pas glags mi rnyed pas/ de'i tshe mi mthun phyogs kyi 'jug pa med pa/'o na rtogs pa'i rnal 'byor pa la yang nyon mongs pa'i dran pa skye yin gda' zer na/ ma rtogs pa'i so so'i skye bos ni dran pa'i rnam par smin pas/ 'khor ba'i bde sdug bsags la/ rang gis rang la gnod pa byas so/ /dper na mi mkhas pa'i ngang tshul can chu srin kum b+hi ra mtsho nang na gnas pas/nam mkha' la bya rgyu ba'i grib ma mthong nas bya yin snyam nas bsnyags pas/ rang gis rang la ngal bar byed do/ /mkhas pa'i ngang tshul can chu srin ma ka ras ni bya'i grib ma mthong yang chu rang du shes pas snyegs par mi byed pas ngal bar mi 'gyur ro//de bzhin du ma rtogs pa'i so so'i skye bo rnams kyis sems kyi dri ma dran pa la 'bad pas snyegs pa don dam pa la ngal bar byed do/ /de bzhin du rtogs pa'i rnal 'byor pas sems nyid kyi dri ma dran pa sems nyid du shes pas bsgoms nas snyegs par mi byed pas/sdug bsngal bar mi 'gyur ro/ /'di nyid kyis gsal bar byed pas/ ji ltar rgya mtsho dang bar gyur pa la/ /mtsho shin tu dang bar gyur pa de la rde'u bsgyur bas chu bur byung bas chu kho na yin pa de bzhin du/rnal 'byor pa'i sems shin du dang ba la glo bur du dran pa byung yang snying po med pa khong stong gis/ snang stong du glo bur bar shes pas/ chu bur chu nyid yin te de bzhin thim par 'gyur/ /de'i rang bzhin shes pa stong pa nyid kyi zhi gnas nags dang 'dra la/lhag mthong dbyer med khyim dang 'dra bas/ nags dang khyim na byang chub gnas pa med/ /de ltar dran las ma yengs pa'i dus su sangs rgyas yin la/ dran pa byung ba'i dus su sems can yin pas/ de ltar dbye ba yongs su shes nas ni/ /shes dang shes bya'i sgrib pa dag nas sems kyi rang bzhin 'od gsal ba yin pas/dri ma med pa'i sems kyi rang bzhin gyis/ /sems can ma lus pa de ltar rtogs su rung ba la/ rang la yod pa rtog med la brten par 'os pas/ ma lus mi rtog pa ru brten par 'os//sems can thams cad kyis bdag dang bdag gir bgyi ba de bzhin nyid la tha dad pa ma yin pas/ de ni bdag yin gzhan yang de bzhin no/ /bsgom dang sgom byed gnyis su med par rtogs na/ bsgom dang mi bsgom dbyer med pas/ /gang bsgoms yongs su bsgom pa gang //'di ni bsgom pa'o/ /'di yis bsgoms pa'o zhes/ bdag dang bdag gir bgyi bas sems can 'ching / /chos nyid la bdag dang bdag gir bgyi ba ma mchis pas/ dbye ba de nyid 'ching dang bral bar bya/ /bdag nyid grol ba ni skye ba med pa/bsam du med par rtogs na/ bdag gi don du sangs rgyas pa yin pas/ 'on kyang bdag nyid rnam par grol ba'o/ /bdag nyid dang gzhan gyi 'khrul pas sems can 'ching bar 'gyur ba yin pas de'i phyir/ bdag dang gzhan dang 'khrul bar ma byed par//khams gsum gyi sems can ma lus pa ni rgyun mi 'chad pa'i sangs rgyas kyi dgongs pa dang mi 'bral ba ma yin pas/ ma lus rgyun du gnas pa'i sangs rgyas te/ /sems ma dag na sems can zhes bgyi ba dang / sems rang bzhin gyis dag nas sangs rgyas zhes ming so sor btags kyang /sems nyid skye ba la sogs pa gang yang med/ sems ni rang bzhin gyis 'od gsal bas/ sems ni ngo bo nyid kyis dag pas na/ /sems zhes bgyi ba de yang dri ma yin te/ de'i phyir/ sems kyi 'du shes sam/ sems ma yin pa'i 'du shes dang bral rgyu med par bral ba/ de nyid dri med mchog gi go 'phang ngo / /sems nyid skye ba med pa la gzung ba dang 'dzin pas 'khor bar 'khor la/ de nyid dbyings su dag nas de nyid mnyam pa nyid la gnas na mya ngan las 'das pas/gnyis med sems kyi sdong po dam pa ni/ /dag pa'i sems dran pa med cing yid la bya ba med pa des ni/ khams gsum dang dus gsum du khyab pas/ khams gsum ma lus kun du khyab par song / /kun la khyab pa ni chos sku blo las 'das pa yin la/'gro la phan pa'i don mi mnga' yang / sems can gyi 'khrul pa'i dbang gis rang rang gi don byas so snyam pa yin/ dper na snod mang gi nang du chus gang ba la zla ba'i gzugs brnyan shar ba bzhin du/ snying rje mi rtogs gzhan phan 'bras bu 'dzin//de la chos skul ni ming yang med na/ gzugs sku gnyis kyi 'byung sa yin pas/ ming ni mchog tu gzhan la phan po'o/ /de la blo'i yul las 'das pa don dam pa stong pa nyid ni chos kyi sku'o/ /de la me tog rgyas pa ni/ / longs sku yin pas/ stong pa'i sdong po dam pa me tog rgyas/ /de yang 'gro ba'i rang gi rnam rtog gis rang la byas pas mthong ba sna tshogs dang ldan pas/ snying rje rnam pa sna tshogs du mar ldan/ /'bad pa las byung ba ma yin lhun grub yin/ snga ma ma dran pa rgyu yin la/phyi ma ma dran pas 'bras bu yin/ snga ma dran pa rgyu yin la/ phyi ma ma skyes pa 'bras bu yin/ snga ma ma skyes pa rgyu yin la/ phyi ma blo las 'das pa 'bras bu yin/ /de dag 'bad pa bya mi dgos pas/ lhun gyis grub pa phyi ma'i 'bras bu ste/ / 'bad rtsol dang bral ba blo'i yul las 'das pa de nyid sems kyi ming med de/ sems tsam pa la sogs pa gzhan gyi sems su khas blangs kyang ma yin pas/ bde ba 'di ni gzhan pa'i sems yin no/ /de'i phyir blo las 'das pa'i don dam pa'i stong pa nyid la ni gzugs sku gnyis yod pa ma yin pas/stong pa'i sdong po dam pa snying rje min/ /de lta bu'i chos nyid zab mo la rtsa ba sems nyid dam/ sdong po sems sam lo 'dab sems las byung ba med pas/ gang yang slar rtsa ba lo 'dab med/ de la blo dang rig pas dmigs su med de/de la blo dang rig pas dmigs par 'gyur na/ de la dmigs par byed pa gang yin pa/ bsgom du med pa'i dbyings yin pas/ /bsgoms na longs sku sprul sku ma tshang bas/ der lhung bas ni yan lag chag par 'gyur/ /blo las 'das shing skye ba med pa de las dran pa dang ma dran pa byung yang /sems nyid ma skyes pa yin/ de las 'khor ba dang mya ngan las 'das par gnyis su snang / sa bon gcig las sdong po gnyis/ /chos sku blo las 'das pa de ni 'bras bu tha dad pa med pas/ rgyu mtshan de las 'bras bu gcig /de yang 'khor ba'i rgyu yang de yin la/ mya ngan las 'das pa'i rgyu yang de yin pas/ de yang dbyer med gang sems pa/ /rnal 'byor pa tha mas 'khor ba'i phyogs gcig pa las grol bar mthong / 'bring pos mya ngan las 'das pa tsam las grol bar mthong /rnal 'byor pa rab kyi dgongs pa ni/ 'khor ba la gnas pa'i sems las byung ba'i rnam par rtog pa yang mi 'dor mi len/ mya ngan las 'das pa'i sems mnyam pa nyid la gnas pa yang mi 'dor mi len pas/ 'khor ba'i dngos po med pas dogs pa med//mya ngan las 'das pa de yang dngos por ma grub pa re ba mi byed pa ni rnal 'byor pa rnams kyi de bzhin nyid de/ des ni 'khor ba dang mya ngan las 'das pa rnams grol/ gal te so so'i skye bo'i sems kyis/ sangs rgyas thob par 'dod pas re ba dang bcas pa de'i tshe/yang dag pa'i don dang phrad par mi 'gyur ro/ /gang gi tshe gang dang yang ma phrad pa de'i tshe yang dag pa'i don dam pa dang phrad pa'o/ /de'i phyir so so'i skye bo ni chos kyi sku dang phrad par 'dod pas/ gang zhig 'dod pa can gyi skye bo 'ongs pa'i tshe/gal te so so'i skye bo des chos sku de la re ba med nas sems chos kyi sku la grol bar shes nas ni/ de ni re ba med nas gal te 'gro na ni/ /re ba med pa de ni 'jig rten pas bor ba'o/ /gang bor ba de ni rnal 'byor pas blangs pa'o//'jig rten pas blo dang sems dang yid dang rig pas blang ba gang yin pa de'i tshe/ bor ba blo'i yul ma yin bla ma dam pa'i brda'i man ngag gis blang bas/ phyir sgor bor ba'i kham phor blangs nas su/ /rtogs pa'i rnal 'byor pas sems kyi khyim thab dran pa 'di la don du ma bzung bas bor ba dang 'dra la/chos sku blo las 'das pa de nyid rtogs nas gzhan la re ba mi byed par bsdad pa rung / de las khyim thab bor nas bsdad pa rung / /chos sku blo las 'das pa ni gzugs sku rnam pa gnyis bya'o snyam pa'i sems dang ye shes mi mnga'o//rig pa'i ye shes mi mnga' yang dpag bsam gyi shing la sogs pas 'gro don mdzad pa med pa de/ byas pa ltar snang ba rang rang gi rnam rtog yin pas/ gzhan la phan pa'i don ni mi byed la/ / 'dod pa po ni phyi'i yul dang nang gi yul gnyis la so so'i skye bo sangs rgyas thob par 'dod pa'o/ /de dag gis chos kyi sku ma rtogs pas/ 'dod pa po la sbyin pa mi ster ba/ /rgyu 'khor ba las 'bras bu mya ngan las 'das pa don dam par ma grub pas/ 'di ni 'khor ba'i 'bras bu gang yin lo/ /rgyu sems can la 'bras bu sangs rgyas su 'dod pa ni/ bdag tu lta ba rgyun gyis 'dod pas/ de bas bdag nyid bor bar byas na rung / /gnyug ma rnal ma lhan cig skyes pa ma bral bas rnal 'byor/ dus gsum gyi bde bar gshegs pa'i dgongs pa la dbang bsgyur bas dbang phyug /phyag rgya chen po khong du chud pas chen mo/ chos rnams gnyis su med pas dpal/ de ltar rtogs pa'i mda' mkhan mo blangs pas sa ra ha/ sangs rgyas dang byang chub sems dpa' dang rnal 'byor pa las zhal nas zhal du brgyud pas zhal snga nas/ma 'ongs pa'i dus su snying po'i don la mos pa'i don du mdzad pas/ gnyis pa ma lus pa 'joms pa dang / brjod du med pa'i don rtogs pas do ha/ rgya rnam pa bdun gyis btab pas ko Sha/ mi g.yo ba'i chos nyid kyi don du ma gur du bzhengs pa'i glu/ 'di dpe don ma lus par bstan pa rdzogs so// //dus gsum bde gshegs rnams kyi dgongs pa mtshungs pa med pa la/ /dpal ldan ri khrod pa yi dgongs pa nam mkha' nyid dang mtshungs/ / gnyis med a wa d+hU tI'i dran pa 'ja' tshon 'dra ba des/ /do ha ko Sha'i don 'grel bris pas gong nas bzod par bzhes/ /snying gi pad+mo'i dkyil na gnas pa'i snying po'i don 'di ni/ /slob ma snying dang 'dra ba'i ngag gi nan gyis zhus nas su/ /'di la mos pa rnams kyi don du bdag gis 'di bsgyur bas//sems can ma lus snying po'i don 'di rtogs nas grol gyur cig /na moa+thi+iH/ //[ ]@##/ /rgya gar skad du/ kA ya koShA ma ri ta badzra gI ti/ bod skad du/ sku'i mdzod 'chi med rdo rje'i glu/ 'jam dpal gzhon nur gyur pa la phyag 'tshal lo/