CLOSE WINDOW

D2256
བོད་ཡིག

[ ]@##/ /rgya gar skad du/ do ha ko Sha pany+tsi kA/ bod skad du/ do ha mdzod kyi dka' 'grel/ dpal rdo rje sems dpa' la phyag 'tshal lo/ /rtag tu gus pas bla ma ni/ /'gro ba'i mgon la phyag 'tshal te//do ha mdzod kyi dka' 'grel ni/ /sa ra ha pa'i brgyud pa bri/ /pad+ma rdo rje'i zhabs kyis ni/ /des byas lung gi rjes 'brangs nas/ /bcom ldan 'das kyis sngon gsungs las/ /sngon med cung zad brjod pa med/ /bstan pa drug gi de nyid ni/ /de la brten pas mi shes so//rigs la rtsod pa sogs bsten nas/ /bram ze la sogs don med yin/ /bdag lta thar pa las nyams shing / /'gro ba drug gi 'khor bar 'khor/ /mngon sum dang ni rjes dpag gi/ /mtshan ma gnyis kyi phyir spangs shing / /sdig pa'i grogs po bsten pa yis//yang dag lam las nyams pa yin/ /de phyir bla ma bsten pa ni/ /legs 'dod rnams kyis rtag tu bya/ /de mnyes pa las thar ba dang / /'jig rten 'di dang pha rol 'byung / /de bzhin gshegs gsungs bden pa kun/ /mnyes byed slob ma dag la ster//'dir re zhig bsnyen pa rnam pa drug ni tshangs pa pa dang / dbang phyug pa dang / gcer bu pa dang / rgyang pan pa dang / grangs can pa dang / sangs rgyas pa'o/ /de rnams go rims dang go rims las bzlog pa'i sgo nas gzhung mkhan pos bstan pa ni/ bram ze bye brag mi shes par//zhes bya ba la sogs pa nas/ /chos dang chos min mnyam dang mi mnyam mi shes zhes bya ba'i bar ni bram ze sun dbyung ba'i phyir brjod de/ bram zes bye brag mi shes par/ /zhes bya ba ni/ bram ze ni mi shes pa ste/ so so'i bye brag mi shes pa de ji ltar yin zhe na/dang po rigs kyi bye brag la de dag gi lung las kyang / rigs bzhi'i nang nas mchog tu gyur pa ni bram ze yin zhes smra ba de lung dang rigs pa dang ldan pas sun dbyung bar bya ste/ khyod kyi lugs las bram ze ni tshangs pa'i kha nas skyes so zhes zer ba'i phyir/gang gi tshe rigs kyi bram ze zhes zer na/ sngon gyi dus na bram ze yin gyi da ltar gyi dus na bram ze ma yin par thal te/ sngon gyi de ni 'das zin pas da ltar 'dir ni mngon sum gyi tshad mas bram ze rnams bud med kyi skye gnas las byung ba'i phyir sngon gyi bram ze ni med do//de'i phyir rigs gcig med pa bzhin du gzhan bye brag mang po yang yod do/ /de rnams dag gi lung gis tshangs pa'i kha las skyes so zhes zer ba de yang / sgyu can gyi tshig yin pas brdzun tshig go/ /yang na/ 'dus byas la bram ze yin par 'dod na/ /de yang ma yin te/rigs ngan yang 'dus byas ci ste ma yin te ma yin no/ /de'i phyir rigs ma grub pas rig byed rang byung ji ltar grub ste/ mi 'grub ces pa'o/ /gyi na rig byed bzhi dag 'dod/ /ces gsungs te/ rigs kyi bye brag mi shes pa rnams kyis rang rang gi rig byed bzhi 'don te/snyan ngag gi rig byed dang / srid srung dang / nges brjod dang / mchod sbyin gyi rig byed do/ /'di nyid klog pa la sogs pa ni/ /rigs ngan rnams dang yang 'gal ba med do/ /bram ze dang rigs ngan gnyis kyang klog pa las don mi shes par 'dra ba'i phyir ro/ / yang na gal te bram ze rnams kyis sgra tsam rtogs so zhe na/ de lta na ni sgra tsam gyi rtogs pa ni thams cad kyi thun mong yin te/ ji ltar sgra'i nang na rig byed kyis sgra sgrub pa de ni sgra tsam nyid de/ 'jig rten pas brjod pas mtshan nyid yin gyis/ /don dam pa ni brjod pa cung zad kyang med do//sgra mi rtag pa'i ngo bo nyid yin pas sgra rtag pa dang rang byung du ji ltar brjod de mi brjod do/ /ji ltar 'jig rten pa rnams ni yod pa ma yin te/ mi rtag pa nyid yin pa'i phyir ro/ /de bzhin du rig byed la tshad ma med do/ /byas pa ni nyams pa yin gyi rig byed la ni nyams pa med do//grong gtan med pas grong gi mtshams gsal bar yod ces zer ba bzhin no/ /ji ltar na byed pa po med pa yin zhes dris pa la/ lan du rang gi grub pa'i ngo bo nyid yin pa'i phyir/ skyes bus byas pa nyid ni ma yin no zhes zer na/ /de ni ma yin te/ mngon sum gyis kyang phung po rnams 'jig pa yod par dmigs te/rten 'brel yin pa'i phyir/ rgyu med pas 'bras bu med do/ sgyu ma lta bu'i ngo bo nyid du ma mthong ba'i phyir ro/ /rgyu dang rkyen tshogs pa tsam las 'khrul pa dbyung ba'i phyir/ de ltar 'khor ba ma lus pa 'khrul ba tsam du mi shes pa rnams 'gro ba drug gi 'khor bar 'khor ro//de la 'khrul pa de dgag nam lus pa bde ba la gnas par 'gyur ro/ /'thad pa 'dis kyang rig byed ni bya ba tsam ste rgyu med pa'i 'bras bu brtags pas 'bras bu gang las skyes te/ brdzun pa nyid do zhes rgyas par sbyar ro//de'i phyir brdzun pa ma lus pa byed pa ston pa ni/ /khyim na gnas shing me la sreg /don med sbyin sreg byed pa ni/ /du bas mig la gnod par bas/ /zhes bya ba gsungs te/ sa chu ku shas dag par byed/ /ces bya ba la sogs pa smos te/ /me la bsreg pa ni me la bsregs pas don ci yod ces bya ba ste/don med pa'i mar la sogs pa'i sbyin sreg gis ni mchog gi don ma shes na 'bras bu med do/ /gal te 'bras bu yod na rigs ngan gyis kyang / /de lta bu byas pas 'bras bu yod par 'gyur te/ /nges par de 'ba' zhig gis ni du bas mig la gnod par byas te/shing rlon pa'i du bas mig gdungs pas na zhing sdug bsngal bar 'gyur ro/ /de lta na de kun gyis de nyid gang yin zhe na/ tshangs pa dang mchog gi tshongs pa yin no zhes zer te/ de yang tshangs pa'i ye shes ni rnam pa sna tshogs su smra ste/mchog gi tshangs pa ni mchod sbyin pa gcig bu'i tshig ste/ sbyin sreg gi sgo nas thar pa thob par 'dod do/ /mtho ris kyi longs spyod la nye bar longs spyod pa'i 'bras bu 'dod pa'o/ /'dod pa des ra dkar mo bsad nas mchod sbyin byas pas bsad pas dmyal ba la sogs pa'i sdug bsngal nyams su myong ste/dgongs pas gsungs pa'i don mi shes pa'i phyir ro/ /de'i phyir kun tshangs pa'i rang bzhin yin pas tshangs pa bsad pa ste/ thams cad du tshangs pa'i rang bzhin yin no zhes bram ze'i lung las snang ba'i phyir ro//de ltar tshangs pa'i ye shes gang yin pa yang mi 'grub ste/ bzhi pa mchod sbyin gyi rig byed ni rnal 'byor gyi spyod pa mi shes pas rig byed gsum du mchod sbyin byed kyi/ tshig brjod pa tsam yang bkag go/ /de ltar rgyun chad pas mchod sbyin byed kyi tshig 'di ni brdzun pa'o//'di mchod sbyin gyi nang na tshangs pa'i ye shes las gzhan thams cad med do zhes zer bas/ de ltar yin pas rig byed gsum yang tshad ma ma yin te/ des na bkag pa'i phyir ro/ /de ci'i phyir zhe na/ rig byed gsum nas kyang bkag pa'i phyir ro/ /de [(]ltan [,]lta na [)]ni bzhi pa mchod sbyin byed med de//rig byed gsum ka bkag pa'i phyir ro/ /de'i phyir lung gi tshig med pas tshangs pa'i ye shes ga la 'grub ste/ mi 'grub po zhes bya ba'i don to/ /gal te tshangs pa'i ye shes nyams su myong ba yod do zhe na/ shin tu yang brdzun gyi tshig ste/ / dngos po thams cad stong pa nyid yin pas mi dmigs na de'i ye shes ji ltar yod de med do/ /nyams su myong ba yang rnam pa dang bcas pas dmigs pa nyid yin na/ de'i tshe de nyid shes pa yin pas phyi rol gyi dngos po thams cad mi dmigs pa'i phyir ro/ /dngos po ni 'jig rten pas btags pa ste/mi shes pa'i rang bzhin yin pas don dam par mi 'gyur ro/ /kho bo cag gi lugs kyis don dam pa ni bla ma'i zhal las rnyed pa yin no/ /de ltar bram ze'i bye brag kyang bzhi ste/ tshangs par spyod pa dang / nags na gnas pa dang / khyim du gnas pa dang /dka' thub pa'o/ /de yang rigs pa ma yin te/ ci'i phyir zhe na/ byis pa'i dus ni bsrung ba dang bza' ba la sogs pa mi shes pas/ tshangs par spyod pa ni brtan pa thams cad kyi lugs kyis ji srid 'tsho'i bar du dam bcas pa brtan po nyid yin par byas pa yin pas/ 'dir byis pa rnams la ni de lta bu'i nges pa med de/ yang bag ma la sogs pa byas pa'i sgo nas khyim la brten pa yin no/ /de la yang nges pa med de/ yang tshangs par spyod pa la sogs pa srid pas so/ /nags na gnas pa yang de nyid la brten nas bsam gtan dang bzlas pa la sogs pa byed de/mi byed pa yang mi srid pa'i phyir ro/ /gal te dka' thub tu mngon par 'dod na yang thams cad mchod phyir thogs par 'tshad pa dang / bza' ba gnyis kyis bram ze dang rigs dan gnyis bye brag med do/ /gnas skabs kha cig tu bram ze nyid rigs ngan nyid de/ji ltar bram ze mo rkun ma dang rigs ngan gyi spyod pa byed pas/ de'i tshe bram ze rnams kyi rig byed kyi lung bltas nas/ bram ze'i mtshan ma mar dang ku sha brkus nas bram zes 'thungs pas bram ze dag par 'dod pa ni rigs ngan gyi bya ba nyid do/ /yang dka' thub la gsum ste/ dbyu gu/ dbyu gu gsum dang legs ldan zhes gsungs te/ de ltar dbyu gu gcig pa dang / dbyu gu gsum pa dang / legs ldan pa'i cha lugs can no/ /yang des de lta bu'i dka' thub spangs nas gzhan la brten pa ston pa ni/ 'dul ba ba dang dad pa'i cha lugs can dag gi/ / zhes gsungs te/ ji srid mchog gi dad pa'i cha lugs su ma gyur pa de srid du ye shes mi rnyed de/ bya ba kun ma spangs pa'i phyir ro zhe na/ de yang ma yin te/ ci'i phyir zhe na/ ma rig pa'i bag chags kyis bzung ba'i phyir ro/ /mngon sum du mthong ste/ khyim spangs nas dka' thub byed pa'i dus su ji snyed rang gi nor la sogs pa yod pa de thams cad bu dang tsha bo la sogs pa la ster zhing /sems can kun la mi ster te rang gi rigs rgyud 'ba' zhig la chags pas rang gi rigs rgyud nyams par mi 'dod do/ /de'i phyir/ nyams shing rmongs pa yi ni lus/ /rtag tu legs smin la smra ba//bde ba nyid ni de mi shes/ /sngon gyi las kyis rmongs par byas/ /de dag gis ni rang yang nyams shing gzhan yang nyams par byed do/ /de nyid bstan pa'i phyir/ 'gro ba rnams ni 'khrul pa nyid du bkol/ zhes gsungs te/ 'gro ba rnams ni rmongs pa lam ngan pa la zhugs pa rnams so//'khrul pa ni brdzun pa'i ngag gis so/ /gzhan yang / chos dang chos min mnyam dang mnyam mi shes/ /zhes gsungs te/ 'dir chos ni dngos po'i chos thams cad de/ sems can gyi rigs la sogs pa'i ngo bo snying rje'i yul du gyur pa rnams so//gzhan de dang bral ba ni chos ma yin pa ste/ bya ba ma yin pa'i mtshan nyid dang ldan pa rnams so/ /mnyam pa ni de dang gnyis su med pa'o/ /mi shes pa ni khyad par gyi lam mi shes pa ste/ mdor bsdus na khyad par can gyi grub mtha' mi shes pa'o//rgyas par ni gzhan du shes par bya'o/ /dge ba dang sdig pa gnyis mnyam pa ni ma yin no/ /da ni dbang phyug la brtan pa rnams sun dbyung ba'i dbang du byas nas/ e ri'i lus la zhes bya ba la sogs pa nas/ bla ma'i yon tan rnams lan zhes bya ba'i bar gyis gsungs te/de yang / i ri lus la thal bas byug /ces bya ba ni/ lho phyogs pa'i mu stegs pa'i slob dpon gyis thal bas lus la byug pa ni phyi rol gyi thal bas lus g.yogs pa ste/ legs ldan gyi lus la nges pa ma rnyed pa'i phyir ro/ /de yang / mgo la ral pa'i khur bu khur//zhes gsungs te/ mgo la skra sna tshogs kyis byas pa'i ral pa'i khur bu khur ba'o/ /gzhan yang 'jig rten pa la tshul 'chos byed cing / rang gi khyim du zhugs shing mar me spar nas 'dug pa'o/ /mtshams su 'dug nas dril bu 'khrol/ /zhes pa ni dbang ldan du 'dug nas dril bu dkrol ba'o//skyil krung bcas nas mig btsums te/ /zhes bya ba ni/ tshul 'chos kyi rab chen po ni 'di nyid de/ mig bar bar du blta zhing btsum nas skyil krung bcas pa ni rdo rje'i skyil mo krung ngo / /de nas/ rna bar shub shub skye bo slu ba ni de ltar sngon du bstan pa'i i ri'i slob dpon gyi mtshan nyid mthong nas rmongs pa'i skye bo blang bya dang dor bya mi shes pa rnams kyi rna bar phan tshun shub shub gang la ngag gnas pa'i lam 'di ni khyad par can yin pas khyed rnams nyon cig zer ba'o//yugs sa mo dang co reg mo/ /'di 'dri'i cha lugs gzhan 'ongs la//zhes pa ni yugs sa mo ni khyo dang bral ba'o/ /co reg mo ni zla ba gcig la 'khor cig za ba'o/ /gzhan ni sna tshogs kyi cha lugs kyis gnas pa'i dka' thub rnams so/ /de rnams rang gi lam de 'jug cing ngo ston pa'o/ /de lta bu'i bla ma de la khyad par ci yod ce na/dbang rnams bskur zhing bla ma yi/ /yon rnams len par byed pa yin/ /zhes pa ni rang gi don du yon blang ba'i ched du dbang bskur zhing sems can rnams nyon mongs pa la sbyor bar byed pa ni rang nyid mi shes pa'i phyir ro/ /de ni dbang phyug la brten pa rnams sun dbyung ba'o//nga ni gcer bu pa rnams yin te/ sen mo ring zhing zhes bya ba la sogs pa nas/ lus kyi dka' thub tsam gyis gdungs/ /zhes bya ba'i bar gyis ston te/ sen mo ring zhing ni de'i lus dri ma'i cha byad can zhes pa ni lus can sgyu dang / g.yo la brten nas rang gi 'dod pa gang yin pa de la ni thar pa'i lam med do//ci'i phyir zhe na/ dngos po gcig la rtag pa yang ma yin/ mi rtag pa yang ma yin/ zer zhing lam mi shes pa'i phyir ro/ /gang dag de la brten pa ni/ /thar pa thob pa'i lam med do/ /zhes so/ /de ci'i phyir zhe na/ ched du bdag nyid bkol zhes gsungs te/bdag nyid las ngan pa dang lam ngan pas gnod par byed cing / thar pa'i ched du byas kyang thar pa ni mi 'grub ste/ 'og nas 'chad pa'i phyir ro/ /gcer bu gang zhig grol 'gyur na/ /zhes gsungs te/ gal te gcer bu tsam gyis grol ba yin na/ khyi dang ce spyang la sogs pa cis mi grol te grol bar 'gyur ro//yang / sbu btogs pas ni grol 'gyur na/ /zhes gsungs te/ gal te sbu btogs pas grol ba yin na/ /bud med gzhon nu ma spu ngan rtag tu btags pas bud med grol bar 'gyur ro/ /mjug sbu g.yobs pas thar thob na/ /zhes gsungs pa ni gcer bu ba gang gis rma bya'i sgro'i chun po blangs shing lag pa g.yob bas grol ba yin na/rma bya dang g.yag la sogs pa grol bar 'gyur ro/ /langs te za bas grol 'gyur na/ /zhes smos te/ gal te langs te za bas grol na/ rta dang glang po la sogs pa ci'i phyir mi grol bar thal lo//de la mda' bsnun na re gcer bu pa'i/ /theg pa'i thar pa nga mi 'dod/ /ces pa ni sa ra ha'i zhal na re/ /nam mkha'i gos can rnams kyi thar pa gang yin pa de ni/ kho bo cung zad kyang mi 'dod do zhes pa'o/ /de nyid dang ni bral ba yi//lus kyi dka' thub tsam gyis gdungs/ /zhes gsungs te/ de kho na nyid dang bral zhing ci yang ma shes pas 'jig rten pa gzhan yang don med pa la sbyor zhing ltung bar byed do/ /da ni nyan thos rnams ston te/ dge tshul zhes bya ba la sogs pa nas/ / de dag /don dam par ni gcig mi 'grub/ /ces bya ba'i bar du'o/ /dge tshul dge slong gnas brtan gzugs/ /ban+de 'di ltar rab byung nas/ /zhes smos te/ dge tshul ni bslab pa'i gnas bcu pa'o/ /dge slong ni bslab pa'i gnas nyis brgya lnga bcu pa'o/ / gnas brtan ni bsnyen par rdzogs nas lo bcu lon pa'o/ /ban+de ni de rnams la gzhan dang gzhan gyis phyag 'tshal ba'i ched du rab tu byung bar khas blangs nas bsod snyoms dang bslab pa la slob kyang mchog ni ma yin te/ de nyid mi shes pa'i phyir dang / sgyu dang tshul 'chos kyi gzugs kyis sems can rnams kyis smod pa'i phyir ro//de ltar yang bcom ldan 'das kyis nga yongs su mya ngan las 'das nas/ phyi ma'i tshe phyi ma'i dus na snyigs ma lnga dang ldan pa'i dus su nga'i bstan pa la dge slong gang zhig 'byung ba rnams ma lus par sgyu dang tshul 'chos la dga' bar 'gyur ro//de bzhin du khyim la brtson zhing zhing rmo ba dang / tshong byed pa la sogs pa la dga' zhing sdig pa'i las byed pa la dga' bar 'gyur ro/ /bstan pa la bzhad gang byed par 'gyur te/ de rnams ni sngon gyi dus na bdud kyi rigs kyi lha yin te/de ltar ni dge sbyong gi gzugs kyis 'ongs nas gnas so/ /de rnams kyi nang nas gnas brtan kha cig dge 'dun gyi longs spyod thams cad phrogs shing / /rang gi dbang du byas nas longs spyod ces bya ba la sogs pa rgyas par gsungs so//de'i phyir de rnams la byang chub med do/ /gang nyan thos kyi theg pa la brten pa sngon du bstan pa'i mtshan nyid dang ldan pa de rnams ni gal te bslab pa zhig na dmyal bar 'gro ba'o/ /yang na bslab pa ma zhig cing bsrungs pa tsam po des ni mtho ris kyi longs spyod tsam thob kyi/byang chub mchog ni med do/ /gal te theg pa chen po la brten to zhe na/ de la yang nges pa med de/ sngon bdud kyi ris kyi lha yin pa'i phyir ro/ /gal te legs par gnas pa yin na yang de lta na yang nges pa med do/ /de nyid bstan pa'i phyir/ kha cig mdo sde 'chad par byed la zhugs//zhes gsungs te/ dge slong kha cig rdzas kyi srid pa'i dbang gis sngon ma mthong ba'i mdo sde la sogs pa'i de nyid 'chad pa ni dmyal bar 'gro'o/ /la la bsam khral mang pos bskams pa mthong / /zhes gsungs te/ kha cig ma thos pas chos la lta rtog mang po byed pa de yang rigs pa ma yin no//dge sbyong kha cig lung gi pu sti mang po bltas nas zhu gtugs byed de/ lung gi don mi shes pas sdig pa'i 'gro bar 'gro bar 'gyur ro/ /de ltar bsam khral mang po byas pa las lus bskams te/ nad dang ldan par 'gyur ro//kha cig theg pa che la rgyug byed cing / /zhes gsungs te/ dge slong kha cig theg pa chen po'i don la 'jug cing / de nyid kyi theg pa chen po la sbyor bar byed do/ /gzhan dag dkyil 'khor 'khor lo ma lus sgom/ /zhes gsungs te/ 'dis ni theg pa chen po sngags kyi nga rgyal la brten nas de yang dmyal ba la sogs par 'gro'o//gzhan yang / kha cig bzhi pa'i don 'chad pa la zhugs/ /zhes gsungs te/ dge slong kha cig bzhi pa'i don 'chad pa ni bye brag tu smra ba dang / mdo sde pa dang / rnal 'byor spyod pa dang / dbu ma pa la zhugs pa de yang tshig gi brjod pa mang po tsam ste de nyid med pa'i phyir don med do//yang na bzhi pa ni lhan cig skyes pa ste/ de'i man ngag 'chad pa la zhugs te/ de bu sti bltas pa'i nga rgyal tsam gyis 'chad cing / rang gi don mi shes so zhe na yang / de'i tshe bshad pas ci zhig bya ste/de ltar na phan tshun 'gal ba spyod pas dmyal bar 'gro ba'o/ /kha cig dpyad cing bltas pas lam las nyams/ /zhes pa ni/ kha cig blta zhing dpyad pas rang gi 'dod pa las rnam par nyams te/ lam ni rtog dpyod kyi yul las 'das pa'i phyir ro/ /de yang snying rje dang bral bas mya ngan las 'das pa rnams su ltung ngo //la la nam mkha'i khams la rtog par byed/ /ces gsungs te/ la la ngan gyi nam mkha'i khams la rtog cing dpyad pas rang gi 'dod pa mi 'grub ste/ brtag pa'i phyi rol gyi yan lag can la mngon par zhen pas so//lhan cig skyes pa bor nas ni/ /mya ngan 'das pa gzhan la rgyug /ces gsungs te/ lhan cig skyes ba por nas mya ngan las 'das pa'i mtshan nyid gzhan med do/ /de ma shes pas ming gi rnam grangs tsam gyi sgo nas 'khrul pa'i phyir gzhan gyi mya ngan las 'das pa la 'jug par 'gyur pas de ltar 'khrul pas ngan 'gror 'gro bar 'gyur ro//de'i phyir 'khrul pa ni rnam par rtog pa ste/ de spangs pas grol ba'o/ /de ltar/ de dag don dam gcig mi 'grub/ /ces gsungs te/ des ni dge ba la sogs pa rnams rig pas dpyad bzhin pa'i nyan thos la sogs pa'i mya ngan las 'das pa gcig kyang mi 'grub po//'tsho ba'i ched du brtul zhugs dang / /spyod pa 'ba' zhig la zhugs pa'o/ /de la bsdus pa'i don ni/ gang zhig gang la mos par gyur pa de/ / theg pa der zhugs thar pa thob pa ma ci/ /zhes gsungs te/ gang dang gang mthong bas mos pa gang yin pa de ni nyan thos kyi theg pa'i lam tsam ste/ de bcom ldan 'das kyis bstan te/ theg pa de la zhugs pa rnams kyis thar pa mi thob ste/ brjod bya dang rjod byed kyi mtshan nyid can yin pa'i phyir ro//ji srid du bla ma la bsnyen bkur ma byas pa de srid du rnyed par dka'o zhes bya ba'i don to/ /de ltar phyi rol mu stegs pa la sogs pa de nyid dang bral ba thun mong pa rnams la ston pa ni/ mar me lha bshos des ci bya/ /zhes gsungs te/ci zhig mthong ba dang phyag byas pas ci zhig bya zhes pa'o/ /sngags kyi bzlas brjod ci zhig bya/ /zhes gsungs te/ de nyid dang bral ba'i mar me dang / lha bshos dang / sngags bzlas pa la sogs pas ci bya ste/ dgos pa cung zad med do zhes dgongs so//gsang sngags bstan pa de ci dgos/ /zhes pa ni sngags bsten pa ste/ sngags kyi bzlas pas ci zhig bya/ /zhes pa'o/ /yang na ye shes kyis de nyid dang bral ba'i mar me dang / lha bshos kyis ni dgos pa cung zad kyang med do zhes pa'o/ / de ltar yang / /'bab stegs 'gro dang dka' thub dang / /nags la 'gro bas ci zhig bya/ /zhes gsungs te/ 'bab stegs ni bA rA Na sI la sogs pa dang / nags su 'gro ba la sogs pas ci zhig bya zhes pa'o/ /chu la khrus byas tsam gyis ni/ /thar pa rnyed par 'gyur ram ci//zhes gsungs te/ 'dis ni khrus stegs la brten nas chu la khrus byas pas thar pa ci la thob ste/ mi thob ces pa'o/ /kye ho brdzun zhing log pa de bor la/ /zhes gsungs te/ kye skyes bu rnams brdzun pa'i 'ching ba log pa'i bshes gnyen gyis smras pa'i khrus stegs la sogs pa 'di thong zhes pa'o//'jig rten rgyang pan la sogs pa'i 'dod pas dmyal ba la sogs par 'gro ba gang yin pa 'di thong zhes pa'o/ /sbyin pa med do/ /sbyin sreg med do/ /dge sbyong med do//bram ze med do/ /'jig rten pha rol med do/ /ma shi bar du bde bar 'tsho/ /shi nas de yi spyod yul med/ /lus kyang thal ba bzhin song nas/ /slar 'tsho ba lta ga la yod/ /ces bya ba la sogs pa spang par bya ba nyid yin te/ chad par lta ba yin pa'i phyir ro/ /yang grangs can pa rnams na re//rtag tu 'gro ba rnams kyi rgyu/ /grangs can gtso bo yin par 'dod/ /ces bya ba la sogs pa rtag par khas len no/ /de'i dge ba ci'i phyir mi byed ce na/ /gang gis 'ching bar byed pa thong / /zhes gsungs te/ mdor bsdus nas khyad par can gyi lam ston te/ dam pa'i lam la mos par gyis dang / de la mos par byas pa gang gis rang gi don dang gzhan gyi don 'grub bo/ /rigs pa ma yin pa'i lam bor cig /gang gis rang gi blo rmongs par gnas pa de thong cig ces pa'o//des log pa'i lam dang bral nas lhan cig skyes pa nyid rnyed par 'gyur te/ gzhan gyis ni ma yin no/ /de nyid yongs su shes na gzhan med de/ zhes bya ba ni de nyid lhan cig skyes pa'i ye shes te/ de yongs su shes na gzhan yang thar pa ni cung zad cang med do zhes pa'o//gzhan gyi rnam pa kun kyang 'di yin te/ /zhes gsungs te/ gzhan thams cad kyi thar pa'i tshogs gang yin par rtag pa de kun kyang lhan cig skyes pa ni 'di nyid yin pas gzhan na med do/ /de lta yin na lhan cig skyes pa brjod bya rjod byed kyi 'brel pa'i sgo nas mi rnyed do//brjod bya rjod byed 'brel pa ste/ /gsum gyis lhan cig skyes mi rnyed/ /bstan pa'i tshig gis sbyor ba yis/ /bcom ldan 'das kyis cung zad gsungs/ /glegs bam mthong ba tsam gyis te/ /sems can rnams kyis mi rtogs phyir//gang dang gang gis dngos mthong ba/ /rang bzhin 'khrul cing rtogs pa ste/ /de dang de yis dngos mi mthong / /'khrul med bla ma'i brgyud pas so/ /de'i phyir/ klog pa de yin zhes bya ba la sogs pa gsungs te/ klog pa dang / 'don pa cung zad ci byed pa thams cad 'jig rten las 'das pa'i lhan cig skyes pa'i ngo bo nyid yin no/ /'jig rten las 'das pa 'ba' zhig ni ma yin te/ 'jig rten pa'i yang / bstan bcos rnying pa 'chad pa'ang de yin no/ /zhes gsungs te/ gang cung zad bstan bcos rnying pa la sogs pa 'chad pa de thams cad lhan cig skyes pa nyid yin te/gzhan ni ma yin no/ /yang de lta bu'i lta ba ni/ mtshon par nus pa yod min de/ /zhes pa ni/ /de ltar lhan cig skyes pa bstan pa'i rim pas ji srid du skyes bu lam ma mtshon na de srid du thar pa mi 'thob ste//gang gi de'i dus de nyid du nyon mongs pa zad par byed pa'o/ /de ji ltar rtogs she na/ 'on kyang gcig tu zhes bya ba la sogs pa gsungs te/ 'di ni bla ma mchog gi zhabs la gus pas rnyed do/ /de gsal bar bya ba'i don du/ gal te bla mas gsungs pa ni/ /gang gi snying la zhugs pa ni/ /zhes gsungs te/ gal te bla mas gsungs pa'i lam snying la zhugs shing rtogs pa de'i phyir/ lag pa'i mthil du bzhag pa'i gter mthong ba 'dra ba'o zhes gsungs te/ ji ltar skyes bu kha cig gis yid bzhin gyi nor bu rnyed na/de'i tshe de'i stobs kyis nges par sbyin pa la sogs pa byed do/ /de bzhin du 'dir yang lhan cig skyes pa'i ngo bo nyid thob na/ yid bzhin gyi nor bu yin pas sems can thams cad lhan cig skyes pa'i ngo bo nyid du byed pa dang /nor la sogs pa'i dngos po thams cad yongs su gtong bar byed do/ /'di lta bu'i lam mi shes pas gzhung mkhan po mda' bsnun na re/ 'di skad smra zhes mi shes pa'i yul la yid gdung bar byed pa'o/ /'gro ba rnams ni 'khrul pas bslus/ / zhes pa ni/ 'gro ba thams cad 'khrul pa ste/ mu stegs pa'i lam la sogs pa bslus pa'o/ /gnyug ma yi yang rang bzhin ni/ /byis pa rnams kyis ma mtshon no/ /zhes bya ba ni byis pa'i skye bo rnams kyis gnyug ma'i rang bzhin lhan cig skyes pa mtshon pa ni/bla ma dam pa mnyes par ma byas pas so/ /de'i phyir de rnams 'gro ba rigs drug gi sdug bsngal nyams su myong bar 'gyur ro/ /skyon 'di rnams ni mu stegs pa 'ba' zhig gi ni ma yin gyis/ dge sbyong la yang yod pa min par bstan pa'i phyir/ bsam gtan med cing rang byung med/ /ces gsungs te/ gang gi tshe yang dag pa'i ye shes dang bral ba'i dge slong des rab tu byung ba blangs te/ 'dul ba las byung ba'i mtshan nyid kyi bslab pa la slob kyang de rnams la 'bras bu med do//de ci'i phyir zhe na/ khyim na gnas pa'i chung ma dag dang lhan cig tu/ /zhes gsungs te/ gang gi tshe khyim la sogs pa la brten par gyur ba de'i tshe spyod lam phun sum tshogs pa nyams pas tshul khrims nyams dang dam bcas pa gcig nyams pas thams cad nyams par 'gyur ro//ji ltar skyes bu gcig gis dug zos nas shi ba mthong ba las skyes bu gzhan kun kyang dug la 'jigs pa skye ste/ de'i tshe gang cung zad legs par brtags te za bar byed pa'am/ dug gi de nyid la bslab par bya'o/ /de'i phyir dang po nyid nas legs par dpyad cing brtag par bya'o//de ltar ma byas na nyams par 'gyur ro/ /de ltar gang cung zad spyod lam dang dka' thub la sogs pa blangs pa de thams cad dam bcas pa brtan pa'i sgo nas bsrung bar bya'o/ /yang gang zhig/ 'dod pa'i yon tan rnams/ / spyod pa yis kyang mi grol na/ /zhes gsungs te/ gal te legs shing brtan pas yul brten pa'i dga' ba mi gtong na/ de'i tshe/ mda' bsnun na re de nyid ni/ /yongs su shes pas min zhes smra/ /zhes gsungs te/ de'i tshe gzhan yongs su brjod pa la dgos pa ci yod do/skad cig ma'i bde ba ma spangs pa'i phyir gang gis sdug bsngal nyams su myong ba nyid du byed pa'o/ /yang na yul gyi bde ba 'dod pa'i yon tan lnga la de nyid shes pas longs spyod kyang grol bar mi 'gyur na/ de'i tshe gzhan yongs su brjod pa las dgos pa ci yod de skad cig ye shes skam po brjod pas grol lam ste/mi grol lo zhes bya ba'i don to/ /gal te mngon du gyur na/ bsam gtan gyis ni ci zhig bya/ /gal te lkog tu gyur na yang / /mun pa yis ni bkol ba'o/ /zhes gsungs te/ gal te mngon sum du gyur na de'i tshe bsam gtan gyis ci bya//gal te lkog tu gyur pas ma mthong na mun pa 'jal ba dang 'dra bas ci yang mthong bar mi 'gyur ro/ /'dis ci bstan zhe na/ brtul zhugs la rab tu byung ba la sogs pa brtul zhugs ma lus pa ci'i phyir byed de/ mun pa nang 'jal ba dang 'dra bar 'jig rten pha rol gyi 'bras bu ma mthong ba'i phyir ro/ mngon sum gyi shes pa de ji lta bu yin zhe na/ mda' bsnun ngas ni bos pa yin/ /zhes gsungs te/ gsang nas bzlas pa ni ma yin te/ sems can thams cad la skad chen pos gsal por bdag gis de nyid bstan pa'o//de yang gang yin zhe na/ lhan cig skyes pa'i rang bzhin ni/ /dngos dang dngos med ma yin no/ /'dir dngos po ni mig la sogs pa la snang ba'i dngos po gang yin pa dang / yid kyis brtag pa'i dngos po rnams so/ / gang gi phyir de dag thams cad lhan cig skyes pa'i ngo bo nyid sna tshogs su bskyed pa'o zhes de ltar rtogs par byed na/ de yang grol bar mi 'gyur ro/ /de bas na so so rang gis rig par bya ba yin pas dngos po med pa ma yin no/ /de ltar yang / 'di la bsal bya ci yang med//gzhag par bya ba cung zad med/ /yang dag nyid la yang dag lta/ /yang dag mthong na rnam par grol/ /zhes gsungs so/ /de ji ltar zhe na/ /rig pa bstan par bya ste/ 'dir rkang gnyis la sogs pa bde ba las skyes shing bde ba 'dod pa'i pha dang ma'i sbyor ba las skye bar 'gyur ro//ma rtog pa de cis lan zhe na/ de'i phyir so so rang gis rig par bya ba yin pas dngos po med pa ma yin no/ /de ci'i phyir zhe na/ de'i rang bzhin brjod du med pa'i phyir 'chi ba mtha'i bde ba zhes bstan te/ de nyid kyi phyir/gang la brten te 'chi ba dang / /skye dang gnas dang 'ching 'gyur ba/ /de la brten nas mchog gi ni/ /bde ba chen po mchog grub po/ /zhes gsungs te/ bde ba gang gis 'ching bar 'gyur ba de nyid kyis skyes nas gnas shing 'ching ste/ de nyid phal pa'i bde ba la chags pa'i phyir ro//de nyid kyang yang dag pa'i bla ma'i brgyud pas blangs nas mchog gi bde ba chen po zhes bya ba'i don to/ /skad gsang zhes bya ba la sogs pa ni go sla'o/ /de so sor bshad pa ni/ bsam gtan dag dang bral bas na//bsam gtan gyis ni ci zhig bya/ /rnal 'byor lung gang brjod du med/ /de la ji ltar bshad du yod/ /ces gsungs te/ 'dir dang por re zhig sems ni brjod bya dang rjod byed kyi mtshan nyid dang bral ba'o/ /de gang yin zhe na/ lhan cig skyes pa'i ye shes te//de ni rtog pas byas pa ma yin te/ /rgyu dang 'bras bu dang bral ba'i phyir/ /'bras bu'i rnam par gzhag pa med do/ /de'i phyir gang brjod du med pa de la ji ltar bshad du yod ces pa'o/ /de ltar yang / 'di ni re zhig brdzun kun te//ji srid ji srid rtog gyur pa/ /ji ltar gyur pa de de bden/ /de nyid gang du mi rtog pa'o/ /gzhan yang / 'di yi rang bzhin dang ba ste/ /rnam pa med cing rdul bral ba/ /sangs rgyas ma gtogs gzhan gyis ni/ /de ni rtogs par mi nus so/ /gcig shos skye 'gros rtogs pa ltar//sangs rgyas kyis kyang mi rtogs so/ /de nyid rten cing 'brel 'byung nyid/ /de nyid sangs rgyas kho nas shes/ /zhes gsungs so/ /de'i phyir mi shes pas g.yogs pa rnams kyis de nyid rtogs par mi nus zhes pa'o/ / mi shes pa de gang yin zhe na/ srid pa'i phyag rgyas 'gro ba rnams/ /ma lus pa ni khol por byas/ /gnyug ma yi ni rang bzhin ni/ /sus kyang blangs pa yod ma yin/ /zhes gsungs te/ srid pa'i phyag rgyas 'gro ba ma lus pa rnams dbang du byas pa yin te/srid pa'i phyag rgya ni yan lag can ma ste sems sdig che ba dang rgyu dang ldan pa des 'gro ba rnams khol por byas pas/ gal te 'dod na 'dod pa'i srid pas srog gcod pa la sogs pa thams cad byed pa la 'jug ste/ 'dod pa'i bde ba des 'gro ba kun smyon pa lta bur byed pa'i phyir ro//de'i phyir rang bzhin gnyug ma ni yang dag pa'i de nyid do/ /sus kyang blangs pa med pa ni sus kyang rtog pa med pa'o/ /gzhan yang nor gyis srid pas sngags dang rgyud la sogs pa bshad pas 'gro ba rnams rmongs par byed par 'gyur pa ni/rgyud med sngags kyang med pa ste/ /bsam bya dang ni bsam gtan med/ /ces gsungs te/ 'di ni gzhung byed pa pos snying rje'i dbang gis gsungs te/ rgyud dang sngags tsam pos ni thar pa thob pa ma yin no/ /de dag gis ni/ kye rmongs pa de kun 'khrul pa'i rgyu//zhes gsungs te/ kye blun po rgyud dang sngags de dag ni/ /srid pa thams cad phun sum tshogs pa'i 'byor ba'i rgyu'o/ /yang na 'khrul pa ni gang gi sdug bsngal nyams su myong bar byed pa'o/ /de'i phyir/ dri ma med pa'i sems la ni//bsam gtan gyis kyang bslang mi bya/ /zhes gsungs te/ dri ma med pa'i sems mi shes pas mi bslad cing ma bcings pa zhes bya ba'i don to/ /ci'i phyir dri ma med ce na/ sems zhes bya ba ni gnyis te 'jig rten dang 'jig rten las 'das pa'o/ / 'jig rten pa'i rnam par rtog pa'i mtshan nyid can ni sngon du sun phyung zin to/ /'jig rten las 'das pa gang yin pa de ni lhan cig skyes pa'i ngo bo'am chos kyi sku'i mtshan nyid do/ /de'i phyir/ bdag nyid bde nas gdung ma byed/ /ces gsungs te/ 'dis ni rnam par mi rtog pa'i bde ba chen po'i ngo bo nyid du/khams gsum rnam par gnas pa'o/ /de bas na bdag nyid brlag par ma byed cig ces sdug bsngal la mi gnas zhes bya ba'i don to/ /bde ba'i rang bzhin du gyis shig ces pa'o/ /de ji ltar bya zhe na/za zhing 'thung la zhes bya ba la sogs pa nas mnan nas 'gro ba'i bar gyis ni spros pa dang bcas pa'i spyod pa ston te/ ji ltar rgyal po in+d+ra b+hU tis byis pa lta bu za ba dang 'thung ba dang 'dod pa'i yon tan lnga la longs spyod cing gnyis sprod pa'i bde ba gyis shig /ces pa'o/ /yang dang yang du 'khor lo 'gengs/ /zhes pa dang / yang thod pa la sogs pa blangs la gtor ma sbyin zhing tshogs kyi 'khor lo'i gang zag rnams lha'i gzugs kyis gnas pa'o/ /'dis ni grub par 'gyur te/skal ba dang ldan pa'i 'jig rten pa rnams ye shes grub pa ste/ phyag rgya chen po'i dngos grub 'grub pa'o/ /rmongs pa'i 'jig rten ni mu stegs pa la sogs pa'i 'jig rten pa bsten pa ste/ de'i mgo bor rdog pas mnan nas 'gro ba thams cad 'dul bar byed pa'o//'dis ni phyag rgya chen po 'grub pa ste/ de'i gdams ngag gang yin zhe na/ /gang du rlung dang sems mi rgyu/ /nyi ma zla ba 'jug med pa/ /de la rmongs pas sems ngal sos/ /mda' bsnun gyis ni man ngag bstan/ /zhes gsungs te/gang bla ma'i man ngag gis skye 'gro thams cad kyis de kho na nyid rang gis nyams su myong ba yin pa de la/ sems ngal sos pa dang bdag nyid chen po thob par 'gyur ro/ /de lta bu'i gnas pa de la rlung dang sems mi rgyu zhing de nyid la nyi ma dang zla ba 'jug pa med de/rnam par rtog pa med pa tsam ni ma yin te/ dngos po thams cad 'gag par 'gyur ro/ /ji ltar byis pa rnams kyis dgongs te bstan pa'i skad mi shes pas/ yid dang rlung mnyam par 'gag pa la brten nas sdug bsngal bar 'gyur ro/ /de bas na 'dir 'gog pa zhes bya ba ni 'gag pa'i tshig ste/rlung 'gog pa rba rlabs kyis dgos ba ci yod ces pa'o/ /ji srid du lus yod par rlung rgyu ste/ de srid du rlung 'gags pas 'gog pa'i snyoms 'jug gam 'ching bar gyur pa ste/ de'i phyir bla ma dam pa'i man ngag las shes par bya'o//mda' bsnun zhes bya ba la sogs pa ni go sla'o/ /'on kyang rlung ni byang chub kyi sems so/ /de nyid bdud rtsi yang yin te yid bde ba'i ngo bo'o/ /de ltar nyi ma dang zla ba ni 'dod chags dang / 'dod chags dang bral ba'o//de dag gi rtag pa ma yin pa'i lhan cig skyes pa gang yin pa de blang bar bya'o/ /de lta bu'i gdams pa ni thob nas/ gnyis su mi bya gcig tu 'ang min/ /zhes bya ba nas/ rigs la bye brag med par ni/ /khams gsum ma lus 'di thams cad//'dod chags chen po gcig tu 'gyur/ /de de thog ma bar mtha' med/ /srid min mya ngan 'das pa min/ /bde ba chen po mchog 'di la/ /bdag dang gzhan du yod ma yin/ /mdun dang rgyab dang phyogs bcu ru/ /gang gang mthong ba de de nyid//de ring da ltar 'khrul pa chad/ /da ni su la'ang dri mi bya/ /dbang gang du nub gyur tsam na/ /rang gi ngo bo nyams par gyur/ /grogs dag de ni lhan cig skyes/ /bla ma'i zhal nas gsal bar dris/ /zhes bya ba'i bar ni go sla'o//'on kyang thams cad bla ma'i gdams ngag gis khyab pa'o/ /de'i phyir de thams cad lhan cig skyes pa'i rang bzhin du gyis shig ces pa'o/ /kha cig tu gal te 'khrul pa yod na de'i tshe/ bla ma'i zhabs kyi gan du gsal por dri bar gyis shig dang /des 'khrul pa med par 'gyur ro/ /des na de'i tshe bla ma'i bka' lung gis gdams ngag bsten pa'i tshul gsungs te/ yid ni gang shi rlung gar dengs/ /zhes gsungs te/ gang gi phyir yid shi ba dang rlung yang zad cing dengs par 'gyur ro//de gnyis 'ba' zhig ni ma yin te/ gzhan yang / 'di ni bde chen mchog yin te/ /spangs nas gang yang mi 'gro'o/ /zhes gsungs te/ 'di ltar ston te/ mchog gi bde ba chen po gang gis ma thob pa de yang spangs la ste/ yang dag pa'i bla ma'i gdams ngag med pas brjod bya dang rjod byed kyi 'brel pa ston pa'i sgo nas cung zad kyang mi rnyed do zhes pa'o/ /gar yang mi 'gro'o zhes pa ni gang du yang mi 'gro ba ste/ ngag gi spyod yul ma yin zhes dgongs so/ /de skad du yang /blo yi spyod yul ma yin ngag gi spyod yul dag las 'das/ /bla mas bstan pa'i dngos po brjod cing 'jug pa dag la ring / /de yang rigs kyi snying rje dag sogs yon tan dri med pa'i/ /dad ldan sems kyi go 'phang la ni rang nyid kyi ni 'char//zhes gsungs so/ /kye ho rang gi 'di la ma 'khrul cig /dngos po dngos po med pa ni/ /bde bar 'gro ba'ang 'ching ba ste/ /zhes gsungs te/ rang rig pa ste thog ma med pa'i dus nas brtags pa'i bde ba zhes grogs po dag rtog par ma byed cig /gal te byed na rmongs par 'gyur ro zhes pa'o/ /de'i phyir dngos po ste gong du bstan pa'i mtshan nyid dang dngos po med pa'i mtshan nyid ni/ bde 'gro'i rnam par rtog pa ste/ /kye rmongs pa de thams cad 'ching ba yin no/ / gser gyi sgrog dang lcags kyi sgrog la 'ching bar bye brag med de/ de'i phyir 'di thams cad bor bar bya'o/ /de ltar dam par yang rtog pa med pa ste/ 'jug par mi 'gyur mkhas pa yin/ /dge ba dang ni mi dge yang / /rtog pa nyid du bye brag med/ / mes ni sreg par byed pa la/ /bud shing khyad kyi bye brag med/ /reg bzhin pas na de sreg ste/ /tsan+dan la 'bar me yang ngo / /'di ji ltar bya zhe na/ kye ho rnal 'byor gnyug ma yi/ /yid la nan tan gyis la ltos/ /ji ltar chu la chu 'dres bzhin/ / zhes gsungs te/ kye rnal 'byor pa gcig tu sdod dang / gnyug ma'i yid dngos po dang / dngos po med pa spangs pa'am/ 'od gsal gyi ngo bo nyid la ltos shig ces pa'o/ /gcig tu sdod pa'i rnal 'byor ni sems kyi 'jug pa dmigs pa la sems rtse gcig pa'am shes pa dang shes bya'i mtshan nyid do//de yang gang chu la chu bzhag pa bzhin du bzhag ste 'dres pa de lta bur gyur na rnal 'byor du 'gyur ro/ /brdzun pa'i bsam gtan dag gis ni/ /thar pa nyid ni ji ltar rnyed/ /sgyu 'phrul gyi ni dra ba dag/ji ltar pang du blang bar bya/ /zhes gsungs te/ brdzun pa'i skra shad ni rab rib can gyi lta bur thar pa rtog par ga la 'gyur te mi 'gyur ro/ /de'i phyir de lta bu'i dka' thub des shin tu rnyed par dka'o/ /ci'i phyir zhe na/ sgyu 'phrul dra ba ni khams gsum ma lus pa'o//ji ltar pang du blang bar bya ba ni/ de lta bus rtogs par mi nus zhes pa'o/ /'on kyang / bla ma mchog gis gsungs pa rnams/ /thams cad la ni yid chos kyis/ /mda' bsnun nga yi ngag gis bstan/ /zhes gsungs te/gal te re zhig bla ma'i bka' bden par yid ches pa de'i tshe/ bla ma mtsho skyes rdo rje mchog gi zhabs kyi gsung gis ngas 'dir do ha ko sha'i 'grel pa byas so/ /gdod nas dag pa'i nam mkha' la/ /zhes gsungs te/ de ltar bla ma'i gdams ngag gis yid ches par byas na srid pa thams cad kyi ngal ba gang yin pa de thams cad dag par 'gyur ro//ci'i phyir zhe na/ bltas shing bltas shing mthong ba dga'/ /ces gsungs te/ ji ltar thag ring la smig rgyu la chur mthong ba yang dang yang du bltas pas mthar 'gags par 'gyur ro//de bzhin du 'dir yang dpyad bzhin pas thams cad khyad par can gyi chos sku'i rang bzhin 'gyur te/ gzhan du ni ma yin no/ /ji ltar dpyad ce na/ bla ma dam pa'i gdams ngag mngon du byas pa'i rgyun gyi ni/de yang rnam par rtog pa'i sgom pa ni smig rgyu'i chu bzhin no/ /gal te de nyid kyis sangs rgyas 'grub po zhes zer na/ de'i tshe sangs rgyas rten 'brel du 'gyur ro/ /mun pa med pa'i snang ba bzhin no/ /grib ma med pa dang nyi 'od bzhin du khyad par can gyi sprul pa'i sku 'di las 'byung ngo //yi dags 'gog pa las ni khyad par can gyi chos sku'i rang bzhin du 'gyur ro/ /de yang thams cad kyi rang bzhin yin no zhes dgongs te/ yang de la yid shi zhing 'gags pa zhes ni mi bya'o/ /de lta bu mi shes pa rnams la//'di lta bu yi nam mkha' la/ /gang zhig gi ni dus su 'gog /gnyug ma'i yid kyi skyon gyis ni/ /byis pa rnams kyis ma go'o/ /zhes gsungs te/ de lta bu'i nyon mongs pa dus su 'gog pa ni ma skyes pa'i dus te thams cad kyis 'jig pa'i dus zhes dgongs so//de'i tshe nges par sred pa la mngon par zhen pa'i skyon gyis byis pa dang / mu stegs pa rnams bslus te ma rig pa'o/ /de nyid kyi phyir/ nga rgyal gyi ni skyon gyis ni/ /de nyid mtshon par mi nus so//zhes gsungs te/ log pa'i shes pa'i nga rgyal gyis de nyid mtshon par mi nus so/ /theg pa ma lus sun 'byin cing / /zhes gsungs te/ de skyon dang ldan pas ma lus pa'i theg pa sun 'byin te/ ma rungs pa'i skyes bu bzhin no/ / 'jig rten pa kun theg pas rmongs/ /zhes gsungs te/ 'jig rten pa kun rang rang gi theg pa ste mu stegs pa kun rang rang gi theg pa rnams rmongs pa'o/ /gnyug ma'i rang bzhin gang yin pa/ /de ni sus kyang ma rtogs so/ /zhes gzhung byed pa'i mkhan po ha las pa'o//yang sems kyi rtsa ba mtshon te/ /lhan cig skyes pa de nyid gsum/ /de dang der skyes de ru nub/ /de ni gsal por gnas pa'o/ /zhes gsungs te/ 'dir ni gdams ngag gsal por ston te/ sems kyi ni gdams ngag sems pa ste gcig /de bzhin du rtsa ba mi mngon pa ni bla ma'i gsung gis bstan pa'i don mtshon byed de gnyis/ lhan cig skyes pa'i rang bzhin gyi ngo bo nyid mtshon byed kyis ma mtshon pa dang / de nyid rnam pa gsum gyis de ltar mtshon bya dang mtshon pa po gsum brdzun zhing log pa ste/de ltar yin na lhan cig skyes pa ni rjod byed kyi 'brel ba'i sgo nas mi rnyed de/ brjod bya rjod byed 'brel pa ste/ /gsum gyis lhan cig skyes mi rnyed/ /bsten pa'i tshig gi sbyor ba yis/ /bcom ldan 'das kyis cung zad gsungs//glegs bam mthong ba tsam gyis ni/ /sems can rnams kyis mi rtogs so/ /gang dang gang gis dngos mthong ba/ /rang bzhin 'khrul cing rtog pa ste/ /de dang de yi dngos mi mthong / /'khrul med bla ma'i brgyud pas so//zhes gsungs so/ /gal te bzung nas kyang de'i tshe thams cad sems las byung ba'i ngo bor 'gyur te/ des ni gdams ngag gi brgyud pa rgyun chad par 'gyur ro/ /de lta bu'i gnas la rnal 'byor pa dpa' bo 'ga' tsam grol bar 'gyur ro//de'i phyir 'di lta bus gnas par bya'o/ /de la chos thams cad 'jug par byed pa ni don dam pa zhes bya'o/ /de nyid bde ba chen po gcig tu rgyal gyur cing / /'gro ba rnams la rtag 'char rgyu rkyen bral 'gyur ba/ /gang zhig gis ni de nyid brjod pa'i dus dag na//thams cad mkhyen pa dag kyang tshig gis phongs/ /zhes gsungs so/ /rtsa ba bral ba'i de nyid ni/ /gang gis sems pa bla ma yi/ /man ngag gis ni de nyid rtogs/ /zhes gsungs te/ gang kha cig rtsa ba dang bral ba'i de nyid sems pa ni bla ma'i man ngag ste/de nyid skyes bu rin po ches rtogs pa'o/ /chos rnams mda' bsnun gyis smras zhes par byos/ /gang zhig 'khor ba 'joms pa ni/ /sems kyi ngo bo nyid yin no/ /zhes gsungs te/ 'di ni gzhung mkhan pos gsal por ston te/ gang kha cig sems kyi ngo bo nyid bsgom pa de nyid 'khor ba 'jig pa'i rgyur 'gyur ro/ /bla ma dam pa'i gdams ngag gis de nyid nges pa brtan pos mtshon pa des sems kyi 'khor ba de 'jig par 'gyur ro zhes gsungs so//de'i phyir/ gnyug ma'i rang bzhin de nyid ni/ /ngag gis brjod du yod ma yin/ /zhes gsungs te/ rang bzhin gnyug ma ni rang 'byung gi shes pa'i ngo bo nyid do/ /gzhan gyis brjod bya ma yin pa ni mu stegs pa la sogs pa rnams kyis so//'o na de gang gis ston zhe na/ bla ma'i gdams ngag mig gis mthong / /zhes gsungs te/ sar ha bdag gis bla ma sangs rgyas la brten pa'i gdams ngag gis rtog pa yin gyis gzhan gyis ni ma yin no//bla ma'i gdams ngag gis nyams su myong ba'o/ /de ltar 'di lta bu la yon tan ci yod ce na/ 'di la skyon ni rdul tsam med/ /ces gsungs te/ 'di la skyon gyi gnas rdul tsam yang med do/ /gang gi phyir zhe na/ /chos dang chos min mnyes nas zos//zhes gsungs te/ bla ma dam pa'i gdams ngag gis sngon du bstan pa'i chos dang chos ma yin pa dag par byas nas za zhing longs spyod par byed do/ /'di'i nye bar spyod par byed do/ /'di'i nye bar spyod pa ni/ gang gi tshe na gnyug ma'i yid/ /thams cad sbyangs pa de yi tshe//zhes gsungs te/ de ltar chos thams cad yid la byed pa med pa ste/ ngo bo nyid kyis ma skyes pas gzhan rgyu la sogs pa la ltos pa med pa'o/ /gang gi tshe yid la 'khrul pa yod pa spangs pa de'i tshe/ chos thams cad dag par 'gyur ba yin te/de'i rang bzhin yin pa'i phyir ro/ /bla ma'i yon tan snying la 'jug /ces pa ni/ bla mas byin pa'i man ngag gi yon tan rang gi snying la zhugs shing rtogs na de la dag par byed pa dang / za ba'i dus su lus la sogs pa btang bar byed pas yid ches pa'o//bla ma'i gdams ngag rtogs nas kyang gzhan la mi ster na/ des gdams ngag ma rtogs zhes bya ste/ shin tu 'dzin chags dang ldan pa'i phyir ro/ /'di lta bu yi yid med pa/ /thub pa mda' bsnun nga yis rtogs/ /zhes gsungs te/'di lta bu yid med par mtshon pa'am/ yang na yid med pa thub pa ste/ bcom ldan 'das so/ /de ni slob dpon mtsho skyes rdo rje'i zhabs yin te/ des don dam pa'i ngo bo nyid kyi chos kyi dbyings kyi mtshan nyid gsungs pa'o/ /yid med ni ri bong rwa lta bu yang med pa ni ma yin no//de ltar de yi gnas skabs su/ /ye shes kho bo lta bus stong par brjod/ /yang ni 'jig rten grags pa yi/ /med pa ltar rjes 'brangs pa min/ /don ni med pa'i ngo bo nyid/ /tha snyad tsam du yod pa nyid/ /rang bzhin med pa'i chos rnams la//yod nyid med nyid ga la yod/ /khyod nyid dran par mi bya ba/ /bkag pa nyid de dran par byed/ /ji ltar de bzhin med sgra las/ /zhi ba dag ni sgrub par byed/ /ces rgyas par gsungs so/ /gal te sgrib pa dang bcas pa'i yid 'gags pas khyad par can gyi yid sangs rgyas su 'grub tsam na/sngags rnams dang ni rgyud rnams ni/ /gcig kyang bdag gis ma mthong ngo / /zhes gsungs te/ rgyud ni rnam pa mang pa'o/ /de las gsungs pa ni sngags te/ de rnams kyi grub pa'i mtha' dang / gzhan gyis brtags pa'i lta ba dang /sgom pa dang / bsgom bya dang / sgom pa po la sogs pa'i mtshan nyid bdag gis gcig kyang mi mthong ngo / /ci'i phyir zhe na/ de ni 'jig rten pa 'dul ba'i phyir gsungs te/ khyad par can gyi 'bras bu ni ma mthong ngo / /rnal 'byor goms pas ci zhig bya//gdong nas dag pa'i ngo bo nyid/ /rang bzhin gyis ni grub pa ste/ /rtog las de bzhin nyid mi skye/ /dngos med mtshan nyid byang chub ste/ /chos rnams ma lus de dngos nyid/ /de phyir spyod pas bskul ba ni/ /rang gi phung po gzings bzhin no/ /de'i phyir/ 'gro rnams las kyis 'ching 'gyur te//las las grol ba'i thar pa yin/ /zhes gsungs te/ las gang gis skye bo rnams 'ching ba de nyid btang na yid kyi thar pa yin no/ /thar pa ni bdag dang bdag gir 'dzin pa'i rnam par rtog pa dang bral ba'o/ /legs par bsgoms pa'i yid kyi mtshan mar 'dzin pa nyid 'ching ba yin no//de ltar chags pa de yongs su shes pa ni yid kyi thar pa yin no zhes dgongs so/ /yid kyi thar pa gzhan du mi rnyed de/ /de ni mchog gi mya ngan 'das pa yin/ /zhes gsungs te de ltar gang du yid kyi thar pa de phan tshun du ma spangs pa ni nges par mchog gi mya ngan las 'das pa'i mtshan nyid do//sems nyid gcig pu kun gyi sa bon te/ gang las srid dang mya ngan 'das 'phro ba/ /zhes gsungs te/ de ltar gong du bstan pa'i mya ngan las 'das pa'i mtshan nyid mthong na de'i tshe ji ltar bsam zhe na/sems las ma lus pa'i ma rig pa'i sa bon las byung ba 'khor ba dang mya ngan las 'das pa'i mtshan nyid dag par mi nus par snang zhing 'phro'o/ /de dag kyang srid pa'i ngo bo nyid du rnam par gzhag par mi nus so/ /de'i phyir/'dod pa'i 'bras bu ster bar byed pa yi/ /yid bzhin nor 'dra'i sems la phyag 'tshal lo/ /zhes gsungs te/ mchog gi mya ngan las 'das pa'i khyad par ni yid bzhin gyi nor bu lta bu'o/ /de la phyag 'tshal lo/ /de ci'i phyir zhe na/ 'dod pa'i 'bras bu ster ba'i phyir ro//'dod pa ni snying rje chen pos 'gro ba'i don byed pa'i bdag nyid de/ de ni lhun gyis grub pa'i 'bras bu gang gis ster ba'o/ /de nyid bla ma yid bzhin gyi nor bu lta bu'o/ /de ltar/ sems bcings na ni bcings pa yin/ /grol bas grol bar the tshom med//ces gsungs te/ sems bcings pa ni rnam par rtog pa la sogs pas bcings pa'o/ /de ltar yang de dag shes pa'i grol ba'i thob par 'gyur te/ grol ba ni gnyis su med pa'i ye shes te/ des grol ba la the tshom med do/ /de ltar ma shes na byis pa'i skye bo rnams 'khor bar 'khyams par 'gyur ro//de'i dbang du byas nas/ blun po gang gis 'ching 'gyur ba/ /mkhas pa de yis rnam par grol/ /zhes gsungs/ gang gis 'dod pa'i yon tan lnga la longs spyod pas rmongs pa'i 'jig rten pa rnams 'ching bar 'gyur ba de nyid kyis bla ma'i gdams ngag rtogs pa yod pa'i mkhas pa myur du 'khor ba las grol bar 'gyur ro//de ltar yang / bcings pa rnams ni phyogs bcur rgyug /btang na mi g.yo brtan par gnas/ /zhes gsungs te/ ji ltar skye 'gro bdag dang bdag gir 'dzin pa'i rtog pas bcings pa 'gro ba drug gi 'khor bar 'khor zhing 'khyams te/skye 'gro de nyid yang dag pa'i lam gyis grol ba na/ de'i tshe sna tshogs su snang ba lhag par mos pa las mi g.yo ba'i gnas la gnas pa ni chos kyi sku'i bdag nyid yin zhes dgongs so//grogs dag 'di ni rnga mo bzhin/ /go bzlog pa ni nga yis rtogs/ /zhes gsungs te/ 'dir bsdus pa'i don ni/ ji ltar rnga mo la khal chen po bka' na nus tshad kyis rgyug ste/ sus kyang bzung bar mi nus pa de nyid khal phog pa'i dus na sa gzhi la brten pa de bzhin du/de lta bu'i rnga mo dang 'dra ba'i sems rang gis rnam pa can du snang ngo / /'di'i dgos pa ni/ rlung spangs rang nyid ma sems shing / /shing gi rnal 'byor dag gis kyang / /sna yi rtse mor ma gtug cing / /ces gsungs te/ rlung sna bug nas 'byung ba dang 'jug pa'i mtshan nyid kyi rlung ste/spangs pa ni rang nyid med cing shi'o zhes bya'o/ /ci'i phyir zhe na/ ji srid du rlung gnas pa de srid du lus gnas la/ rlung med na lus gang du gnas te mi gnas so/ /de ltar bla ma'i man ngag gis rlung dang lus kyi bdag nyid du byas nas de la lus mi dmigs te/ gzhan ni lus mi dmigs so//shing gi rnal 'byor ni rnam par rtog pa'i bdag nyid kyi rnal 'byor la chags par mi byed ces pa'o/ /nges par ji ltar bya zhe na/ e ma'o skye bo rmongs pa rnams/ /lhan cig skyes pa'i mchog tu son/ /srid pa'i bag chags 'ching ba spongs/ /zhes gsungs te/kye rmongs pa'i skye bo bsam pa chung ngu thong la bsam pa rgya chen po gyis shig /de gang yin zhe na/ lhan cig skyes pa tshol cig /de la zhugs la don chen po la lhag par mos par gyis shig pa'o/ /srid pa'i bag chags ni bar mdo'i skye ba'o/ /des na/ srid par 'gro 'ong srid pa'i 'ching ba ste//mgal me 'khor lo bzhin du 'gyur ba'i phyir/ /de la chags par mi byed gcig par spongs/ /zhes bya ba'i don to/ /'di na yid dang rlung ni g.yo zhing 'phyar/ /shin tu mi srun pa yi rta 'dra thong / /lhan cig skyes pa'i rang bzhin rtogs gyur pa/ /de yis yid ni brtan par 'gyur ba yin/zhes gsungs te/ 'di lta bu'i yid dang rlung ni shin tu yang mi thub cing g.yo ba'i rta lta bu ste de btang ngo / /'di gzung bar bya ste gang zhe na/ lhan cig skyes pa'i rang bzhin gyi gnas bla ma dam pa'i gdams ngag la brten nas mi g.yo zhing brtan par 'gyur te/rang gi bsod nams dbang gis rtogs/ /zhes bya ba la sogs pa gsungs pa'i phyir ro/ /'di'i khyad par ni/ gang tshe yid ni nye bar nub gyur na/ /de yi tshe na 'ching ba thams cad 'chad/ /gang la lhan cig skyes pa ro mnyam pa/ / de la dmangs rigs dang ni bram ze med/ /ces gsungs te/ rnam par rtog pa'i yid gang gi tshe 'gags pa de'i tshe bcings pa thams cad spong bar byed do/ /bdag nyid 'ba' zhig 'ching ba med pa ni ma yin gyis/ de'i tshe khyad par du lhan cig skyes pa'i ro mnyam pa la skye 'gro thams cad 'jug par byed do//de'i tshe dmangs rigs dang bram ze'i rigs la yang khyad par med do/ /des don 'di 'grub ste/ 'jig rten pa thams cad lhan cig skyes pa'i ngo bor rigs gcig go zhes dgongs so/ /de'i phan yon ston pa ni lhan cig skyes pa las ma rtogs pa'i grub mtha' gzhan med par bstan pa'i phyir/'di na chu bo ya mu na/ /'di na gang+gA rgya mtsho phrad/ /'di na pra ya g+ha yin te/ /'di na wA rA Na sI nyid/ /'di na nyi ma zla ba yin/ /zhes gsungs te/ 'di ltar lha'i chu bo 'di rnams ni rang bzhin gyi lhan cig skyes pa'i rgyun mi 'chad pa la ro gcig pa'o//'di nyid la gang+gA dang / ya mu na la sogs pa'i ming btags pa yin gyis khrus byed pa'i rten gyi chu bo ni ma yin no/ /'on kyang ya mu na ni theg pa thams cad 'di la bsten pa'i phyir ro/ /gang+gA ni de nyid du rtogs shing 'gro ba'i ngang tshul can yin no/ /gang+gA dang rgya mtsho phrad pa ni stong pa dang snying rje ro gcig pa la 'gro ba ma lus pa 'jug pa'o//rgya mtsho ni ting nge 'dzin gyi gdams ngag thams cad kyi rgya mtsho yin pa'i phyir ro/ /bra ya g+ha ni gnyis su med pa'i phyir ro/ /wA rA Na sI yang gnyis su med pa ste gnyis 'gog pa'o/ /zla ba nyi ma gza' rA hus gzung ba'i dus su gdams ngag gi dus kyi me hu'i ngo bo nyid kyi bram ze'o zhes pa'o//khrus stegs la sogs pa 'ba' zhig lhan cig skyes pa gnas par ma byas kyi gnas dang nye ba'i gnas la sogs pa yang lhan cig skyes pa'i ngo bor bstan pa'i phyir ro/ /zhing kun gnas dang nye gnas sogs//zhes bya ba gsungs te zhing dang nye ba la sogs pa'i gnas nyi shu rtsa bzhi ni 'dir lhan cig skyes pa'i ngo bo nyid yin pas phyi rol du 'khyam pa la sogs pa mi bya'o/ /ngas ni 'khyams te bltas shing rtogs/ /zhes gsungs te/ bdag gis phyir te/bltas shing rtog pa ni rnal 'byor ma'i gdams ngag gi rnam par gzhag ste/ phyi dang nang gis bsdus pa'i sna tshogs bde ba chen po'i rang bzhin yin no zhes dgongs pa'i don to/ /'dis ni 'di ston te/ rang gi lus ni bde ba'i ngo bo de'i khams gnas la sogs pa'i rang bzhin yin pa'i phyir/phyi rol du 'jug par mi bya'o/ /de'i phyir/ lus dang 'dra ba'i 'bab stegs gnas/ /bde ba gzhan ni ma mthong ngo / /zhes gsungs te/ rang gi lus dang 'dra ba'i khrus stegs bde ba'i rgyu ni mi mthong ngo //de'i phyir rnal 'byor pas gnyis su med par gnas par bya'o/ /de ltar gzhan yang nang gi bdag nyid kyi gnas la sogs pa la kun du spyod pa rtogs par bya ste/ de rnams la bde ba'i rang bzhin gyi kun du spyod pa yin gyi lus 'ba' zhig tsam na gnas pa ma yin no//de'i phyir/ mchog gi bde ba chen po gnas la sogs pa'i rang bzhin du grub pas/ 'di ltar nang gi bdag nyid kyi gnas la sogs pa la lha rnams kyi byin gyis brlabs pa'i rdzogs pa'i rnal 'byor pa phyi rol gyi yul du 'gro ba la sogs pa med do//ji ltar/ nyi shu rtsa bzhi'i bye brag gis/ /gnas la sogs pa 'di dag gnas/ /de phyir de nyid shes pa yis/ /'khyam zhing ngal bar mi bya'o/ /gal te de nyid bral gyur na/ /'khyams pas dgos pa cung zad med/ / de'i phyir gnyis su med pa'i ngo bo nyid gnas yin no zhes dgongs so/ /de ni bstan pa ni/ 'dab ldan pad sdong ge sar dbus/ /snal ma dri dang kha dog ldan/ /zhes gsungs te/ dpe'i sgo nas pad+ma'i 'dab ma la sogs pa'i bye brag tha dad pa spang bar bya ste/thams cad kyang pad+ma'i ngo bo nyid du gcig go/ /de ltar/ bye brag thong zhig rmongs pa rnams/ /log par 'dzin pas ma gdungs shig /ces gsungs te/ kye rmongs pa pad+ma'i bye brag re re'i rnam grangs kyi sgo nas pad+ma'i tha dad pa yin no zhes sems gdung bar ma byed cig /'di lta bu'i mi shes pa'i ngag sna tshogs kyi bstan bcos las nye bar bstan pa bde ba las phyi rol du gyur pas bstan par mi bya'o/ /de ltar yang / 'dod pa'i sngags kyi bstan bcos ni/ /zad phyir dris na rigs med phyir/ /tshangs pa khyab 'jug 'jig rten gsum//ma lus gang du son nas zhi/ /zhes bya ba gsungs te/ lhan cig skyes pa las phyi rol du gyur pa'i sngags kyi bstan bcos la dgos pa med de/ lhan cig skyes pa med na sngags kyi bstan bcos thams cad nyams shing zad par 'gyur ro//yid mi ches nas dris pa dang rigs med pa'i bus pha'i nor mi dbang ba bzhin no/ /ji ltar rigs rgyud bsrung ba'i bu ma yin pa'i pha shi na nor thams cad rgyal po la sogs pas khyer ba bzhin no/ /de ltar de kho na nyid dman na bstan bcos ma lus pa'am/ chos rnams ma rig pas bzung bas nyams shing zad par 'gyur ro//bsdus pa'i don ni/ lhan cig skyes pa nam mkha' lta bur byas te spangs na rnam par rtog pa'i rnam par shes pa la brten nas de bzhin gshegs pa 'am/ gzhan gyi ming tsam yang mi thob pa'i phyir/bstan bcos de thams cad zad par 'gyur ro/ /de ltar de bzhin gshegs pa rigs lnga la sogs pa thams cad lhan cig skyes pa'i ngo bo zhi bar 'gyur zhing / gzhan yang de la tshangs pa dang / khyab 'jug dang / bde byed dang / 'jig rten pa thams cad kyang zhi bar 'gyur/de med na thams cad la de nyid rig pa med cing / byas pa thams cad 'bras bu med/ /ces pa'o/ /thub pa chen pos chos phung po/ /brgyad khri bzhi stong grangs tshad kyi/ /gang gis de nyid mi shes pa/ /de dag thams cad don med yin//zhes gsungs so/ /'di nyid kyi phyir/ kye dngul chu'i bcud len mi shes pa'i/ /sa bcings dbye ba mi phyed spong / /'gro ba 'chad cing 'dod pa yis/ /de shes par ni nus ma yin/ /zhes gsungs te/ skyes na dngul chu'i bcud len sgrub pa'i dus su/de dag par byed pa'i thabs gsal por mi shes pa ji ltar nyams pa de bzhin du/ 'dod chags la sogs pa dag par mi shes na rang nyams par 'gro ste/ khyod kyis 'di lta bu ma byed ces pa'o/ /'dod chags kyi dbang gis mngon par 'dod pa'i yul lnga la de nyid dang bral bas rol pa gang yin pa de ni shin tu yang ma rig pas bzung ba kho na'o//khyed 'ba' zhig ni ma yin te/ skyes bu gzhan dga' chad par byed par gang 'dod pa de dag ni 'bras bu med do/ /de ci'i phyir zhe na/ skye 'gro 'khor ba de nyid kyis dag par mi shes pa'i phyir ro//yang de nyid shes pa'i dbang du byas nas/ skyes bu de nyid sna tshogs kyis/ /ro 'di rdzas su bstan mi nus/ /bde ba'i gnas mchog rang bzhin spangs/ /'gro ba nye bar skye ba der/ /zhes gsungs te/ skyes bu slob ma gang gis de nyid rnam par bsams pa de'i ro nyams su myong ba dang bcas pa brjod par mi nus te/dngos po 'di ni ser po'o zhes bstan par nus pa bzhin du ni ma yin no/ /de ston pa ni/ blo ni rnam 'gags yid zhi ba/ /gang du mngon pa'i nga rgyal chad/ /de ni sgyu ma'i rang bzhin nyid//mchog gi cha rtogs pa yi tshe/ /bsam gtan 'ching ba des ci bya/ /zhes gsungs te/ de ltar bla mas lhan cig skyes pa mngon du byas pa'i tshul bstan cing byin pa ste/ mngon du byas na ji srid rnam par rtog pa 'gag pa ni mi dran pa'o/ /rnam par rtog pa'i yid zhi bas phyi rol la sogs pa'i dngos por mtshon cing 'dzin par mi byed do//de lta bu'i gnas la mngon pa'i nga rgyal dang bdag dang bdag gir 'dzin pa'i rnam par rtog pa bcad cing zad de/ de nyid sgyu ma'i rang bzhin mchog gi cha ste/ cha ni bcu drug pa'o//de lta bu'i don gyi bya ba gang ci yang mi byed pa'o/ /de'i phyir 'dir bsam gtan gyi 'ching ba des ci bya ste/ yid kyis brtags pa la dgos pa ci yang med do zhes bya ba'i don to/ /'di khyad par ston pa ni/ srid pa las skyes mkha' la zad/ /dngos po spangs nas gang las skye//zhes gsungs te/ gnas gang srid pa zos pa de kho na la dngos po dang dngos po med pa'ang med do/ /de ltar dngos po dang dngos med spangs pas yang skye bar ga la 'gyur te/ skye ba med ces pa'o/ /de ltar smas pas chad par lta bar yang mi 'gyur te/ sangs rgyas la sogs pa'i mtshan sgyu ma lta bur dngos dang dngos med pa'i rnam par rtog pas bzung nas brjod pa'i phyir ro//de ltar yang / dbye ba spangs nas gang skyes pa/ /dpal ldan bla ma mgon po yis/ /bstan pa de la gnas par bya/ /zhes gsungs te/ dbye ba spangs pa ni gnyis su med pa'i ye shes te/gang dbus su nye bar dmigs pa'o/ /spangs zhes pa ni mchog dang dga' bral gyi dbus su de nyid spangs nas nye bar dmigs so zhes dgongs so/ /thams cad gnyis su med pa nyid yin pas de thams cad spangs nas dpal ldan bla mas gsungs pa spyi bor blang bar bya'o/ /de'i phyir/ rigs pa 'dis gnas par bya ste/ /mthong dang thos dang reg pa dang / /zas snom 'chag dang gnas su gnas/ /zhes gsungs te/ 'dir gang cung zad mthong ba dang / rna bas sgra thos pa de dang reg pa ste gos gyon pa dang / khar za ba dang / snar snom pa dang / gnas su gnas pa ni stan la gnas pa'o//cal col gtam dang lan smra la/ /sems ni rnam gcig las mi bskyod/ /ces gsungs te/ cal col gyi gtam ni nyo tshong la sogs pa'i gtam mo/ /sems gcig gi rnam pa gnyis su med pa'i rnal 'byor pas mi 'da' ba'o/ /de'i phyir bla ma dam pa'i gdams ngag dran par ston pa ni/bla ma'i man ngag bdud rtsi'i ro/ /gang gis ngoms par mi 'thung ba/ /ji ltar 'gron mya ngan gyis/ /thang la skom gdung shi ba bzhin/ /zhes gsungs te/ bla ma dam pa'i gdams ngag gis bdud rtsi'i ro mgyogs pa chen por song ste mi 'thung ba de ni sna tshogs kyis sems can gyi don las nyams pa yin te/ji ltar mya ngan gyi thang la tshong pa mang po skom pas gdungs pa la/ tshong dpon gyis phyogs gcig tu chu sbas nas yod par shes pa bstan pa las brtson 'grus dang ldan pa der song ste chu 'thungs bas 'tsho'o/ /brtson 'grus med pa rnams ni shi'o/ /gdams ngag gis rang gi mtshan nyid ston pa ni/bsam dang bsam min spangs nas ni/ /bu chung bzhin du gnas par gyis/ /bla ma'i lung la bstan gus nas/ /lhan cig skyes pa skye bar nges/ /zhes gsungs te/ bsam pa ni shes bya bsam pa'o/ /bsam min rang bzhin med pa la sogs pa ste gnyis spangs pa'o//nges ga dang bla ma dam pa'i man ngag la brtan por gus par gyis la bu chung gi tshul du gnas par mdzod cig dang des lhan cig skyes pa de ji lta ba skye bar 'gyur te/ de la goms pas de'i rang bzhin yang lhan cig skye bar 'gyur ro/ /de'i rang bzhin yang sgrib pa thams cad dang bral ba brjod du med par ston te/kha dog yi ge yon tan mchog /dpe spangs brjod du mi nus par/ /de ni bdag gis bstan pa yin/ /zhes gsungs te/ kha dog dang yi ge gnyis mi dmigs so/ /yang na yi ge ni don dam pa'i yi ge ste/ kha dog ni bde ba chen po'i rang bzhin yin pas gzung bar bya ba ma yin pa nyid du brjod do//de ltar dpe med pa ni gang gcig nas gcig tu brgyud pas mtshon pa'i sgo nas mi rtog pa'o/ /bdag gis mtshon ni bdag sa ra has 'di skad du smras pa'o/ /de ltar yang / ji snyed rnam par rtog pa'i yid las byung ba de ni thams cad yang dag par bya ste//bde ba'i ngo bo gang de nyid kyang snying la bde ba bskyed de de yang rnam par rtog pa tsam/ /gang yang 'dod bral rgyur gyur de yang gnyi ga gang min de yang srid pa'i gtso bo'i rgyu/ rnam par mi rtog bdag nyid la ma gtogs pa'i yul la mya ngan 'das pa cung zad med/ /ces gsungs so//de ci'i phyir zhe na/ dbang phyug mchog de su la bstan/ /gzhon nu'i bde ba snying zhugs bzhin/ /zhes gsungs te/ sems can gyi ris la ci yod pa ni 'khrul te/ de la gnas su zin gyi dbang phyug dam pa ni mchog gi de nyid do/ /de gzhan gyi grub mtha' la med pa'i phyir ro//su la ni so so'i skye bo'i gnas skabs su ci la brjod par bya/ brjod pa tsam gyis mi 'jug pa'i phyir ro/ /ci'i phyir zhe na/ gzhon nu ma'i bde ba skyes pa gzhan la brjod par mi nus pa'i phyir ro/ /de dang 'dra bas bla ma dam pa'i gdams ngag med par rtogs par bya bar mi nus so/ /de ston pa ni/dngos dang dngos med gang spangs ba/ /der ni 'gro ba ma lus thim/ /zhes gsungs te/ gang gi tshe bsam gyis mi khyab pa ni mchog gi de nyid yin te/ dngos dang dngos po med pa dag pa'i stong pa dang snying rje dbyer mi byed pa yin pas de dang 'dra ba'o/ /de la 'gro ba ma lus pa ni/ rtag pa'i sangs rgyas dang rdo rje 'chang la sogs pa ste/thim pa ni de'i rang bzhin yin pas mi dmigs pa'i phyir ro/ /gang tshe der yid brtan par gnas/ /de yi tshe na 'khor ba dang / /mya ngan 'das las grol bar 'gyur/ /zhes gsungs te/ gong du bstan pa'i rim pas gal te yid brtan par gnas pa ni bdag dang bdag gir 'dzin pa dang bral ba de'i tshe/'gro ba rigs drug gi 'khor ba'i skyon las grol bar 'gyur ro/ /de ltar ma byas na skyon ni/ gang gi tshe na bdag dang gzhan/ /ngo mi shes pa de yi tshe/ /bla med lus ni ga la rnyed/ /ces gsungs te/ ji srid bdag gis phul du byung ba de kho na nyid ma rtogs pa de srid du rang gi lus sprul pa'i sku'i bdag nyid dam/chos kyi skus khyab pa'i ngo bo nyid bla na med pa'i bde ba chen po de kho na nyid ci la thob ste/ mi thob par 'gyur ro/ /de ltar/ bstan pa 'di la ma 'khrul par/ /rang gis rang la legs par rtogs/ /zhes gsungs te/ de ltar sa ra ha bdag gis bstan pa 'di la 'khrul bar ma byed cig /'di bor nas gzhan cung zad kyang med do zhes bya ba'o/ /de nyid rang rig rang la legs par rtogs par 'gyur ro/ /rdul dang rdul bral ma sems shig /dngos po rgyun du zhen med 'phro/ /zhes gsungs te/ rdul dang rdul gnyis sems kyis ma bsam pa la rgyun mi 'chad pa'i bde ba chen po gcig tu snang ngo //mda' bsnun gyis smras pa de tsam zhig ces gsungs te/ rtog pa thams cad dang bral ba'i rnam par mi rtog pa'i de kho na nyid yin no zhes pa'o/ /de lta bu'i rnal 'byor la sems log par mi bya ste/ bdag gis yang dag par bstan pa'i phyir ro/ /kye ma lus don dam pa shes par gyis//zhes gsungs te/ kye grogs po rmongs pa ma lus pa ni rtsa ba med pa'i rang rig med pa ste/ thams cad sa bon dang rten dang gnas la sogs pa dang bral ba gang yin pa de nyid la don dam pa zhes go bar bya'o/ /de ltar yang / rtsa ba med pa gzhan sems bdag /bsgom pa'i bdag nyid rtsa ba med//bden pa'i shes bya rtsa ba med/ /rigs med de bzhin gshegs pa'o/ /zhes gsungs so/ /de'i phyir rang gi ngo bo nyid kyis snang zhing 'dod pa ni ma yin te/ de la zhen pa med pas legs shes pa'o/ /de lta bu'i don ni/ khyim na yod pa phyi rol tshol/ /khyim bdag khyim tshes dag la dris//zhes gsungs te/ bud med kha cig rang gi khyim na skyes bu gzhan nas khyim tshes la 'dri ba de bzhin du rang gi lus la de nyid gnas par bor nas/ gzhan la 'dri ba de ni mi shes pa'i rang bzhin no/ /yang bla ma dam pa'i gdams ngag gis nyams su myong ba bzhin du gzhan la 'dri ba de ni mi shes pa nyid du gzung bar bya'o//gang gi phyir chos thams cad rang bzhin med pa nyid yin pas de la ji ltar skye ba yod de med do/ /'di yang bstan pa'i phyir/ mda' bsnun na re rmongs pa rnams/ /rang nyid rang gis shes par gyis/ /de yi tshe na bsam gtan dang / /bsam pa dang ni bzlas brjod med/ /ces gsungs te/bstan pa de nyid thams cad rang nyid la rang gis legs par rtogs par bya ste/ yang de ni rnam par rtog pa'i bdag nyid bsam gtan dang bsam bya la sogs par brtags pa ni ma yin no/ /gang gi tshe na bla ma yis/ /bstan pa tsam gyis thams cad shes/ /de med thar pa ga la shes/ / zhes gsungs te/ 'di skad ston pa ni kha cig bla mas bstan pa thams cad ni mi shes te/ de ji ltar shes na goms pa las shes so zhe na/ goms pa tsam gyis shes pa ni ma yin te/ bdag tu 'dzin pa dang bcas pa'i phyir ro/ /de nyid bstan pa'i phyir/ yul rnams bgrod cing goms pas ni/ /lhan skyes mi shes sdig pa 'dzin//zhes gsungs te/ 'dir skyes bu rnal 'byor ba kha cig rang gi gnas bor nas yul thams cad du 'khyam ste/ bza' bya dang bza' bya ma yin pa la sogs pa'i ched du byed pa de ni rang gi lus nyon mongs pa kho nar zad kyi/ /goms par bya ba ni ci yang med do//de'i phyir bla na med pa'i lhan cig skyes pa mi shes pa 'dzin te/ ci dran dran tsam la yang rtogs pas goms pa ni med do zhes dgongs so/ /de ltar yang / shing gi nang na me yod pa/ /ma gtsubs bar du 'byung ba min/ /de bzhin bla med byang chub ni/ /ma bsgrubs par du skye ba min/ / zhes gsungs te/ gal te re zhig bsgom par bya ba med na/ 'o na bsgom pa dang bzlas pa la sogs pa gsungs pa ji ltar yin snyam pa la de nyid bstan pa'i phyir/ yul rnams bstan pas yul gyis na/ /gos par 'gyur ba ma yin te/ /ji ltar chu las ut+pal/ /blangs kyang chu yis ma reg bzhin//zhes gsungs te/ ji ltar chu'i nang du gru la zhugs nas ut+pal blangs kyang chu las ma gos pa bzhin du/ de kho na nyid du shes pa'i rtog pa yod na/ 'dod pa'i yon tan lnga la longs spyod kyang nyon mongs pas gos par mi 'gyur ro/ /de ltar goms par rnal 'byor ni/ / 'di lta bu yi bdag nyid kyis/ /rtsa ba'i rnal 'byor skyabs 'gro ba/ /dug gi sngags can dag la ni/ /dug gis tshugs par ga la 'gyur/ /zhes gsungs te/ 'di lta bu'i rnal 'byor pas rtsa ba ste bla ma dam pa'i gdams ngag rnam pa thams cad kyis bsgoms na de yul gyi nyes pas mi gos so//de'i phyir yul rnams kyi dri mas mi gos te/ phyi rol gang yin de med de/ /shes pa phyi rol don ltar snang / /mkhas pa rnams kyis stong brtag pa/ /de yang stong pa nyid mi 'dod/ /'di ni shes na dngos po dngos med pa/ /de nyid shes pa de nyid gcig pu blo/ / sgyu ma mkhan dang gar byed mkhan po ni/ /de bzhin rnal 'byor dbang phyug rol par byed/ /ces gsungs so/ /lha la mchod pa 'byor byas kyang / /bdag nyid 'ching 'gyur des ci bya/ /zhes gsungs te/ gal te re zhig lha'i gzugs su mchod cing grub pa mngon du mngon yang rang nyid 'ching na de lha yis dgos pa ci yod de/cung zad kyang med do zhes pa'o/ /de 'dras 'khor ba de chad min/ /'dir goms med pas 'byung mi nus/ /zhes gsungs te/ lha'i gzugs kyi rnam pas rang gis dngos su mngon du byas kyang 'khor ba ni nyams par mi 'gyur ro//ci'i phyir zhe na/ sems can rnams nye bar len pa'i phung po lnga dang bral nas kun gzhi rnam par shes pa 'ba' zhig tu 'jug pa na bar ma do'i srid pa'i bdag nyid de/ sngon gyi las kyi dbang gis yang 'khor bar 'jug go/ /lha'i rnam pa yang de dang 'dra ba yin te/ rnam par shes pa dmigs pa'i phyir ro//de bas na 'khor ba nyams par mi 'gyur te/ zo chun gyi 'khrul 'khor dang 'dra bar 'khor zhes dgongs so/ /lha bsgom pa la sogs pa la dgos pa med do/ /'o na bsgom pa dang bzlas pa la sogs pa gsungs pa ltar yin snyam pa la/ 'on kyang de nyid kyi phyir ye shes kyi rtogs pa yod pa yin na/de'i tshe goms pas 'khor ba las 'byung ba mi rtogs pa gzhan gyis ni grol bar mi 'gyur ro snyam du dgongs so/ /de bas na bla ma dam pa'i gdams ngag gis phrin tsam yang khyod kyis ma thos te/ de ji ltar yin pa bstan pa'i phyir/mig ni mi 'dzum pa dag dang / /sems 'gags pa dang rlung 'gags pa/ /dpal ldan bla ma'i man ngag yin/ /zhes gsungs te/ 'dir blo ngan pa rnams kyis rnam par rtog pa'i bdag nyid bla ma'i gdams ngag yin no zhes brtags pa ni bla ma'i gdams ngag ma yin no//ji ltar mig mi 'dzum pa ni cung zad phye zhing mi 'gul ba'o/ /sems 'gags pa ni nam mkha' la sogs par thim pa'o/ /des rlung 'gags par 'gyur te/ de ni dpal ldan bla ma'i gdams ngag yin no/ /ci'i phyir zhe na/ gang tshe rlung rgyu mi g.yo ba/ /de yi tshe na rnal 'byor ba//'chi bdag gis ni ci zhig bya/ /zhes gsungs te/ gang gi tshe yid kyis bzhon par gyur pa'i srog brtan par 'gyur ba de'i tshe/ rmongs pa skyes bu rnal 'byor pa 'chi bdag gis ci bya ste/ 'chi bar mi 'gyur zhes bya ba'i don to/ /ji srid dbang po rnams grong zhen//de srid re ba med par 'phro/ /zhes gsungs te/ ji srid de rnal 'byor pa dbang po yul gyi grong khyer la zhan pa de srid du bla ma dam pa'i gdams ngag mi shes so/ /ji srid du dbang po yul gyi grong khyer la lung dang rigs pas dpyad na stong pa nyid du ma rtogs pa de'i tshe/rang bzhin gyis de ltar snang zhing 'dzin pa de su yis bzlog par nus te/ mi nus zhes bya ba'o/ /de ni goms pa las nges par ston te/ 'dir ni shin tu dka' ba yis/ /dgongs pa la ni su zhig 'jug /gang zhig 'di ru yod pa nyid/ /de ni 'di ru ma mthong ste/ /zhes gsungs te/gong du bstan pa 'di lta bu'i shin tu dka' ba'i dgongs pa la skyes bu ji ltar 'jug par 'gyur te mi 'gyur ro/ /ci'i phyir zhe na/ dngos po gang zhig gong na med pa'i bla ma'i gdams ngag gis ji srid du 'jug par mi 'gyur ro/ /bsgom pa dang bsgom bya la sogs pa med do zhes pa'o//de ltar mi shes pa la ston te/ mkhas pa ma lus bstan bcos 'chad/ /lus la sangs rgyas yod mi shes/ /'ong dang 'gro ba bcad mi nus/ /mkhas pa ngo tsha med par smra/ /zhes gsungs te/ mkhas pa thams cad kyi sna tshogs pa'i bstan bcos 'chad par byed kyang /ngag gi spro ba tsam nyid yin pa'i phyir/ nor don du gnyer bas dmyal bar 'gro ba'i rgyu kho na'o/ /rang gi lus la yod pa'i sangs rgyas nyid bla ma dam pa'i gdams ngag mi shes shing / /yi ge tsam la brten nas bla ma'i brgyud pa med par 'chad par byed pa dag ni rang nyams shing gzhan yang nyams par byed do//ci'i phyir zhe na/ skye ba dpag tu med par 'gro ba dang 'ong ba'i 'khor ba'i rgyu nyid yin pa'i phyir ro/ /de ltar yang / la ba can gyi zhal snga nas/ /yi ge tshig dang ngag rnams ni/ /gzung bar bya ba'i chos rnams la/ /mkhas pa'am ni gzhan yang rung / / sgra ni yongs su sgrub pa la/ /rgan po 'jig rten ci phyir slad/ /sgra ni gang yin dris pa las/ /thad sor ston pa bor nas ni/ /kha cig mgo la bskor nas ston/ /zhes so/ /gson po rgas bar ma gyur bar/ /de ni rgas med 'chi med yin/ /zhes gsungs te/ 'di ni gong du bstan pa'i don gyi dpe ste/ gal te ma shi bar rgas pa la sogs par ma gyur na/de'i tshe de ni rgas shing 'chi bar mi 'gyur ba de lta bu ni gang du yang ma mthong ngo / /yang na ji ltar dngul chu'i rigs bsad pa du ma bzhus shing bsregs pa tsam gyis/ lcags srang brgya gser du sgyur bar byed do/ /de bzhin du sems can rnams rgas pa dang 'chi ba med par byed do//dang po nyid nas blo gros dag pa'i rnal 'byor ba bza' ba la sogs pa ji srid du glas par 'gyur ba su zhig rgas pa dang 'chi ba med pa mthong zhe na/ bla mas bstan pa'i dri med blo/ /de ni gter dang ldan pa'o/ /zhes gsungs te/ bla ma dam pa'i gdams ngag gis dri ma med pa'i blo gros kyi rnal 'byor grub pa'i skye ba dang 'chi ba med pa ni chos dang /longs spyod rdzogs pa dang / sprul pa dang / bde ba chen po'i sku bzhi'i ngo bo nyid do/ /zag pa dang bcas pa thams cad des 'gog ste/ gzhan gyis ni ma yin no/ /de'i phyir/ skyes bu de ni gter ldan mchog yin no/ /zhes bya ba'o/ / yul rnams rnam dag mi bsten zhing / /gang gis stong pa 'ba' zhig spyod/ /gzings la 'phur ba'i bya rog bzhin/ /bskor zhing slar yang de ru 'bab/ /ces gsungs te/ skyes bu gang zhig rnam par dag pa'i yul 'dod pa'i yon tan rnam pa lnga bla mas gnang ba gang gis thob pa la mi spyod cing / de dang bral ba'i stong pa nyid tsam sgom zhing tha mal pa'i yul 'ba' zhig sten par byed pa des ni cung zad kyang sgrub par mi byed do/ /dper na rgya mtsho chen po'i gru la gnas pa'i bya rog 'phur nas/ gzhan du 'bab sa ma rnyed tsam na slar yang der 'ong ba bzhin du/ de ltar byis pa'i skye bo rnams 'khor ba'i las kyis 'khor ba nyid du ltung ste/gzhan nyi tshe ba'i stong pa nyid la bsten pa'i phyir ro/ /de'i phyir yul la zhen pas 'ching bar ma byed cig /kye rmongs pa mda' bsnun gyis ni smras/ nya dang phye ma leb dang ni/ /glang po che dang bung ba dang / /ri dgas bzhin du blta bar bya/ /zhes gsungs te/yul la zhen pa'i 'dod pa'i yon tan rnam pa lnga la longs spyod pas 'ching bar ma byed cig ces mda' bsnun gyis smras pa'o/ /gal te byed na nya ro la chags pa gnam chu 'dod pas gzhan du 'gro ba gzhan gyis gsod pa dang / phye ma leb gzugs la chags pas mar me la shi ba dang / glang chen reg pa la chags pa dang / bung ba dri la chags pa dang / ri dgas sgra la chags pas 'chi ba bzhin du thams cad kyang chags pa sngon du 'gro ba'i phyir ro/ /gang zhig sems la rnam 'phrul pa/ /de ni rang bzhin med pa ste/ /zhes gsungs te/ gang sems kyi rnam 'phrul bza' ba dang bgrod pa la sogs pa de ni rang bzhin med pa ste/mi shes pa las byung ba nyid kyi phyir ro/ /sred pa can ni nya pas nya la sogs pa'i sems can srog gcod par byed pa dang / 'dod pa can gyi skyes bus de ring bud med 'di lta bu spyad do zhes mi shes pas bsam pa'i phyir ro//gzhan yang gzhung mkhan pos/ /snying rje'i dbang gis ston pa ni/ /chu gzhan rlabs kyang gzhan yin nam/ /srid pa zhi ba mkha' rang bzhin/ /zhes gsungs te/ ji ltar chu klung gang yin pa de nyid rlabs dang bcas pa de bzhin du 'khor ba rnam par dag pa nyid mya ngan las 'das pa'o//'dis ci bstan zhe na/ bla ma dam pa'i gdams ngag shes pa rnams la 'khor ba gang yin pa de nyid mya ngan las 'das pa'o/ /mi shes pa rnams ni de ni mi mthun par rtog go/ /de lta bu'i ye shes ni/ gang la ston cing gang la nyan/ /don 'di la ni gang zhugs te/ / gdug pa'i khung bu'i rdul bzhin du/ /sems ni de ru nub pa yin/ /zhes gsungs te/ mchog tu zab pa'i lam mi shes pa'i gang zag la ji ltar bstan cing de bstan du rung ba'i skyes bu ga la yod de/ med ces pa'o/ /gang zhig zhugs ni mkhas pa 'di'i don gzung bar byed pa ni su zhig yod de med ces pa'o//de lta bu'i dam pa'i skyes bu ni kha cig tsam mo/ /ji ltar kha cig gzhan gyis mkhar gzhom pa'i ched du thag ring por sa'i 'og nas sa brkos te/ de lta bu'i rko ba de ni sngon goms pa can gyi gang zag gis nus kyi/ gzhan gyis ni mi nus so/ /de ci'i phyir zhe na/ shin tu khung dog mor brko bas de'i nang gi shin tu gdug pa'i rdul gyis srog snyi ba rnams de ma thag tu 'tshubs nas 'chi ba'i phyir ro//sems brtan pa rnams ni gang gis gdug pa'i rdul des 'chi bar mi 'gyur te/ sa brkos pa rnams ni khung bu de nyid du thim par 'gyur zhing dang po rko ba'i dus su cung zad phyir phyung bas so//de ltar skyes bu sngon du goms pas 'khor ba las byang chub chen po 'grub ste/ de dag gi ni snod yin pa'i phyir ro/ /de'i yon tan ston pa ni/ ji srid chu la chu zhugs na/ /de srid chu ni ro mnyam 'gyur/ /skyon dang yon tan sems rnams ni/ /blun po 'di la mi mthun tsha med//ji ltar rgya mtsho chen po'i chu la chu gzhan zhugs na chu ro mnyam pa bzhin du 'khor ba la sogs pa'i skyon dang yon tan yongs su shes pa dang ldan pa'i skyes bu chen po la ni mi mthun pa'i phyogs gang yang med do/ /ci'i phyir zhe na/ skyon ni 'dod pa'i yon tan rnam pa lnga ste/ de dag par byed pa ni bla ma sna tshogs pa'i bka'i gdams pa ste de dran pa'i phyir ro//yang de nyid gsal bar bya ba'i phyir/ khyed kyis stong par ma zhen cig /grogs dag sems ni mnyam par gyis/ /til phub tsam gyi zug rngus kyang / /sdug bsngal nges par 'byin pa bzhin/ /zhes gsungs te/stong pa nyid 'ba' zhig la ni zhen par ma byed cig /des chad par smra bar thal bar 'gyur ro/ /gang dang gang dngos po de dang dngos po med pa de dang de la sems mnyam par gyis shig /de ltar bdag dang gzhan sna tshogs kyi dngos pos bsdus pa sna tshogs med par gyis shig gal te sna tshogs su byed na/skyon du 'gyur te/ ji ltar til gyi shun pa tsam mig gi nang du zhugs kyang sdug bsngal skye ba bzhin du rnal 'byor gyi dbang phyug gis stong pa nyid la zhen na yang de dang 'dra'o/ /gal te stong pa dang stong pa ma yin pa dang / gnyis ka dang gnyis ka ma yin pa mi bsgoms na/ ji lta bu sgom zhe na/ de ltar yin te de ni ma yin no/ /ji ltar/ yid bzhin nor bu'i dgos pa bzhin/ /zhes gsungs te/ de lta bu'i sngon po dang ser po dang dmar po la sogs pa'i rnam pa'am/ nyams su myong ba'i ngo bo nyid du mtshon pa yin yang de lta bu ni ma yin te/ dmigs pa dang bcas pa dang dmigs pa med pa dang sems dang sems med pa'i rnam par rtog pa gnyis dang /zag pa dang bcas pa'i chos thams cad ni rten med pa yin pa'i phyir ro/ /ji ltar zhe na/ yid bzhin gyi nor bu rin po che dang 'dra bas 'bras bu 'byung ba ni/ ji ltar yid bzhin gyi nor bu rin po che la dngos po thams cad 'byung ba mthong yang lag pa na yod pa dang 'dra bar bems po yin yang rang gi ci bsams pa'i dgos pa byed pa de bzhin du/rnal 'byor pa yang bla ma'i gdams ngag gi nor bu rin po che lag pa na yod pas/ 'dod na yang dag par rdzogs pa'i sangs rgyas sgrub par byed do zhes dgongs so//de lta bu mi shes par mkhas par rlom pa rnams kyi gnas lugs ston te/ 'khrul gzhig mkhas pa ngo mtshar che/ /rang rig bde chen bag chags kyis/ /zhes gsungs te/ ngo mtshar che ni bzhad gang du byed pa'o/ /mkhas pa ni dbyangs dang gsal byed sogs pa brten nas 'khrul pa gzhig bar 'dod de//dngos po la ni mi 'jig go zhes pa'o/ /ci'i phyir zhe na/ gang gis rang rig pas dngos po thams cad nang du rtog pa de yang mi dmigs shing mi rig go zhes dgongs so/ /'khrul pa de yang / 'di ltar bshad pa 'dis sems dang sems med pa'i rang bzhin gyis/'di ni rang rig pa'i mtshan nyid bde ba chen po'o/ /phyi rol gyi yan lag la rig pa'i bde ba de ni kun rdzob tu gsungs so/ /yang phyi rol la brten pa'i bde ba de nyid brten pa'i phyir/ chos kun nam mkha'i rang bzhin te/ /sems kyang nam mkha'i rang bzhin gzung / / zhes gsungs te/ gzugs la sogs pa thams cad kyi yul de yang nam mkha' dang mnyam par bya ba dang / yid kyang nam mkha'i rang bzhin gzung bar bya'o/ /de ltar byas nas/ sems de yid med par byas nas/ lhan cig skyes pa mchog tu mdzes/ /zhes gsungs te/ nam mkha'i rang bzhin gyi sems de la yid med par bya ste/ de ltar gang byed pa de ni skyes bu'i mchog ste lhan cig skyes pa mchog tu mdzes pa de la rol zhes bya ba'i don to/ /de ltar mi shes pas/ khyim dang khyim ni de yi gtam/ /brjod pas bde ba chen po yis//gnas ni yongs su shes pa min/ /zhes gsungs te/ 'dir blo ngan pa rnams kyis khyim dang khyim du sems can rnams bslu bar bya ba'i ched du bshad par byed kyang de ni kha gtam snying tsam du bas so/ /de ltar yang / chu la chu sprul rjes mthong dang //nam mkha'i me tog phreng rgyan dang / /snal ma med pa'i snam bu rnams/ /'jig rten ngo tsha med pa yin/ /zhes gsungs te/ de lta bu dman pa mthong nas gzhung mkhan po ngo mtshar nas ston pa ni/ mda' bsnun na re 'gro kun sems khral khur//sems med pas ni sus kyang rtog pa med/ /ces gsungs te/ mkhas pa mngon pa'i nga rgyal can dang rmongs pa'i 'gro ba rnams gang du bstan pa'i sems sna tshogs kyis sems khral khur ba ni khol por byas pas so/ /bdag gi gdams ngag gis de lta bu'i sems de mthong na sems med pa'i ngo bo nyid thob par 'gyur ro//sems mthong ba dang sems med pa des ci mtshon zhe na/ mtshon par mi nus zhes bya ste/ gdod ma nas sems rang bzhin med pa'i phyir ro/ /lhan cig lung ni mang por mthong //rang dgar bzhag na gsal por snang / /zhes gsungs te/ lhan cig gi rnam par ming tsam gyis rang rang gi bstan pa'i lung mang po las mthong ste/ de ni rang rang gi 'dod pa nyid kyi de dang de'i rnam par snang ste gzhan du ma yin no//de ltar yang dpal dgyes pa'i rdo rje las/ rang gis byed cing rang gis 'phrog /rang nyid rgyal po rang gtso bo/ /zhes bya ba la sogs pa gsungs so/ /de nyid bstan pa'i phyir/ mgon po bdag dang gzhan rnams 'gal/ /khyim dang khyim na grub pa'i mtha'//'di ni rab tu grags pa yin/ /zhes gsungs te/ bdag dang bdag gir 'dzin pa'i sgo nas/ 'dod pas rang nyid 'ching bar byed pa ni ngan pa ste/ rnam par rtog pas yongs su bzung pa'i phyir ro/ /gzhan yang dngos po gzhan rnams 'gog pas 'gal ba yin te/dang po skyes pa nyid yin pa'i phyir ro/ /khyim dang khyim ni grub pa'i mtha' rnams skyes nas 'jug pa 'di rab tu grags pa yin te/ de ci'i phyir zhe na/ skyes nas 'jig pa'i phyir ro/ /'gal ba ni gal te skyes pa yin na 'jig par ji ltar 'gyur zhes pa'o//de'i phyir gnyis ka mi bden pa zhes pa'o/ /dpe ngan pa'i sgo nas bstan pa ni/ gcig nas zos shing gzhan kun bsreg /phyi rol song nas khyim bdag tshol/ /zhes gsungs te/ kha cig rang bza' ba za zhing bza' ba gzhan po thams cad nyams par byed de/gzhan rnams la snying po med pa'i phyir ro/ /yang khyim bdag mos rang gi khyim bor te phyi rol du khyo gzhan po tshol ba ni sems ngan pa yin pa'i phyir skyes bu ngan pa rnams kyi sems kyang de dang 'dra'o/ /'ong ba dag kyang mi mthong zhing / /'dug pa yang ni mi mthong ngo / / dba' rlabs med pa'i dbang phyug mchog /rnyog pa med pa bsgom par bya/ /zhes gsungs te/ 'di ni sngon du bstan pa'i tshigs bcad kyi rjes su 'brang nas blo gros bzang po dag gi bsam gtan 'di lta bu yin no zhes ston te/ ji ltar khyim bdag mos rang gi khyim bdag la bza' ba byin nas/khyim bdag gzhan gyi yang bza' ba bsgrub pas rang gi khyim nas byung ste khyo gzhan pa tshol ba de ni song ba yang mi mthong 'ong ba yang mi tshor/ 'dug par 'gyur ba yang mi shes so/ /de yang 'dra bar rba rlabs med pa'i ye shes ni rang gi yid kyi dbang phyug gi mchog rnyog pa med cing sdig pa spangs pa de yongs su gzung bar bya'o//de yis ci brjod ce na/ 'dir zhing skyes kyi rnal 'byor ba rnams ni rang bzhin gyi ye shes skye'o/ /de yang cung zad mi rigs te/ thams cad kyi rang bzhin du bdag nyid mthong bas bdag gis byas shing bdag gis skyed do zhes bya bar sems so//de ltar bla ma dam pa'i gdams ngag gis shes par bya'o/ /gzhan yang / 'gro dang 'ong ba mi 'dor ro/ /sngar med sgeg mo ga la rnyed/ /ces gsungs te/ 'gro zhing 'ong ba la rang gi rigs kyi chung ma yang ma yin khyo 'dri bar yang byed do/ /de lta bu ni ka ma ru la sogs pa'i gnas rnams na rab tu grags nas yod pa'o//ji ltar skyes bu kha cig rang gi khyim nas yul gzhan du 'gro ste/ song nas kyang lam phyir 'ong ba de lta bu ni rnal 'byor pa'i nus pa yin no/ /ci'i phyir 'di lta bu byed ce na/ song nas kyang sngar na med pa'i sgeg mo dang phrad nas 'jug par 'dod de/de dang mi phrad pas phyir log pa'o/ /ci'i phyir zhe na/ byang sems dpral ba'i glad rgyas son/ /rang gi gzugs dang tha mi dad/ /ces gsungs so/ /gang gi tshe rnal 'byor pa'i bde ba'i sems dpral ba'i glang rgyas su phyin nas mdzes te/mi 'dod kyang rang gi gzugs dang tha mi dad par 'gro ste/ lus dang bde ba gnyis tha mi dad par 'gyur ro/ /gang tshe lus ngag yid dbyer med/ /lhan skyes rang bzhin de tshe mdzes/ /zhes gsungs te/ ye shes 'dis so so'i skye bo'i lus dang ngag dbyer med par chud pa ni/bla ma dam pa'i gdams ngag gis der thim par 'gyur ro/ /ji srid zag pa dang bcas pa'i chos med par ma gyur pa de srid du/ lhan cig skyes pa'i rang bzhin mi mdzes te/ gang gis bla na med pa'i rnal 'byor ma'i tshul ji ltar thob par 'gyur/ /rnal 'byor ma'i tshul de gang yin zhe na/khyim bdag khyim bdag mi yis zos/ /yul de gang mthong dpyad mi bya/ /zhes gsungs te/ gnas la sogs pa'i yul gang zhig ni khyim bdag khyim bdag mo yis za ba lta bu'i yul gang mthong ba de la dpyad par mi bya'o/ /de'i dgos pa ni/kye gzhan po de ru ga la 'du/ /rnal 'byor mi spyod mi mthun pas/ /zhes gsungs te/ gang du rang gi khyo yang gsod na/ gzhan po ga la 'dus te/ 'on kyang gzhan rnams kyis mchod pa byas na rnal 'byor ma ye shes kyi bdag nyid yin pas de ni mi gsod do//gzhan ngan pa rnams kyis sha'i mig gis gsod par mthong ste/ rnal 'byor ma rnams kyis gsod pa yang ma yin zos par yang med do/ /'on kyang lhan cig skyes pa'i ngo bor thim par byas so zhes bya ba'i don to/ /de ni rnal 'byor ma rnams kyi spyod pa'i lung thams cad 'jig rten pa'i tha snyad dang mi mthun pa ste/bsam gyis mi khyab pa'o/ /de nyid gsal bar bya ba'i phyir/ /bdag po za zhing lhan skyes mdzes/ /chags dang chags bral byas nas ni/ /gnyug ma'i drung gnas sems mnyam pa'i/ / rnal 'byor ma ni nga yis mthong / /zhes gsungs te/ rang gi khyim bdag zos nas lhan cig skyes pa'i rang bzhin du mdzes par bya ste/ gzhan yang 'dod chags dang 'dod chags bral bar byed do/ /khyo gzhan yang ste/ sngon gyi khyo dang 'dra ba'i sgo nas mya ngan yang byed de/ rang gi yid du 'ong ba'i gnas na yang 'dug par byed do/ /de lta bu'i rnal 'byor ma de ni sems nyams pa ste/ rnal 'byor gyi dbang phyug ngas ni bsam gyis mi khyab par mthong ngo / /de la bsdus pa'i don ni rnal 'byor ma'i ye shes ni gnyis su med pa yin te/ bya ba dang byed pa'i rnam par snang zhing /dge ba dang sdig pa'i rnam pa byed kyang des gnod par mi 'gyur te/ phal pa rnams la ni de ltar snang ba'i phyir ro/ /yang na thams cad sems kyi rnam 'phrul yin pa'i phyir ro/ /khyim bdag sems dbang du gyur pa'i phyir sems ni lus kyi rnam pa ste/ gnas dang nye ba'i gnas la sogs pa'o//rnal 'byor ma ni rang bzhin te/ de bkag pas ci yang dmigs par mi 'gyur ro/ /de ni bla ma dam pa'i gdams ngag gis shes par bya'o/ /za zhing 'thung la bsam mi bya/ /ji ltar sems las ci 'byung ba/ /phyi rol gyur pa sdug bsngal 'dzin//sgyu ma'i rnal 'byor ma dpe bral/ /zhes gsungs te/ gang cung zad za ba dang 'thung ba la sogs pa'i bya ba byed pa la/ de ni rgyun mi 'chad par byed de/ gang dang gang sems las byung ba de bya'o/ /'on kyang sems la gnod pa ni mi bya'o/ /sgyu ma'i rnal 'byor mas mtshon par dga' ba'i ye shes dang 'dra ba lhan cig skyes par thim pa ni sngon bzhin no//rnal 'byor ma'i lam ni thun mong ma yin pa dka' ba'i lam yin pas de'i bdud rtsi thams cad bde bar gyur na/ thams cad legs par gnas pa yin te/ gzhan du ni ma yin no//'di ru nyin mtshan dbyer med blo/ /sa gsum gang gis sprul pa des/ /sems nyid grub pa'i rnal 'byor ma/ /lhan cig skyes sdom shes par bya/ /zhes gsungs te/ gang de ltar nyin mo yang mi shes shing mtshan mo yang mi shes pas lus ngag yid gsum dbyer med pa'i ye shes kyi rang bzhin sa gsum sprul pa gang yin pa'i sems de ni grub pa'i rnal 'byor ma ste/lhan cig skyes pa'i sdom pa ni ye shes su gyur pa'am/ dngos su mngon du byed pa'o/ /yi ge'i 'gro ba ma lus pa/ /yi ge med pa gcig kyang med/ / ji srid yi ge rab shes pa/ /de srid yi ge med par 'gyur/ /zhes gsungs te/ yi ge'i 'gro ba ma lus pa la gnod do/ /'di ni khyod do/ /'di ni bum pa'o/ /'di ni snam bu'o zhes mkhas pa rnams brjod de/ don dam par ni cung zad med do/ /gang gis sangs rgyas nyid grub par byed pa'i yi ge med pa ni gcig kyang med do//de'i phyir yi ge rab tu shes pa ni yongs su dpyad nas ngag gi spros pa'i dri ma bcom nas brdzun par byas pas ji srid du yi ge med par gyur pa'o/ /ji srid de ltar ma byas pa de srid du mchog gi don mi thob pa'o//de gang yin zhes 'dri na/ ji ltar phyi rol de bzhin nang / /bcu bzhi'i sa la rgyun du gnas/ /zhes gsungs te/ rnal 'byor gyi dbang phyug la ji ltar phyi rol bzhin du nang yang ye shes kyi snang ba yin pa'i phyir/ des bcu bzhi pa la rgyun du thog ma dang tha ma med par gnas te/mchog gi cha med pa'i phyir ro/ /de yang cha ni bcu drug ste/ gnam stong gi mthar zla ba'i cha med pa bzhin du lus med pa'i phyir ro/ /de stong pa ni/ lus med lus la gab pa ni/ /gang gis de shes de grol 'gyur/ /zhes gsungs te/lus med pa ni dngos su nus par song bas gab pa ste/ de gang gis shes pa de grol bar 'gyur ro/ /ji ltar so so rang gi rig par bya ba'i lhan skyes da ltar 'jig rten pa rnams kyi med pa ste/ lus med pa dang / gdod ma nas ma skyes pa'i phyir ro/ /'dir brjod pas gzhung mkhan pos rang dang gzhan gyi dngos po ma mthong ba de ston pa ni/grub par gyur cig nga yis ston/ /khu ba 'thungs pas brjod par 'gyur/ /gang gis yi ge gcig shes pa/ /de yi ming ni mi shes so/ /zhes gsungs te/ ji ltar byis pa'i dus su yi ge slob pa ni/slob dpon gyi mdun du yi ge'i pha ma la sogs pa slob pa'i dus su/ dang po 'di grub par gyur cig ces bya ba la sogs pa dang / sgra'i rtsa ba dang skad kyi dbyings la sogs pa slob cing / /dpyod pa la sogs pa thams cad kyi yi ge rnams la 'bras bu ni gcig kyang ma mthong ba yin te/don mi shes pa'i phyir ro/ /gzhan yang dam pa'i dge ba'i bshes gnyen las don yongs su shes pa skye zhing 'dir dpyad tsam na/ dang po grub par gyur cig ces bya ba de bde bar bklags kyi gzhan yang snying po med pa bklags pa'o/ / ji ltar zan 'tshed pa'i dus su snying po khu ba blangs nas 'thung ste/ gzhan ni snying po med pa'o/ /'dir grub par gyur cig ces bya ba'i yi ge gcig po de bdag gis shes kyis/ de'i ming mang pas de'i ming mi shes te/ 'di lta bu yin zhes brjod du med pa'i phyir ro/ /ji ltar byis pa'i dus su 'di grub par gyur cig ces byas pa'i ming shes kyang /don mi shes pa bzhin du cher skyes pa'i dus na/ don shes kyang ming mi shes pa'o/ /ma lus rang bzhin mi shes gang zhig gis/ /zhes gsungs te/ lhan cig skyes pa mi shes pas khams gsum du ltung ste/ rang byung gi ye shes sam brjod du med pa'i rang bzhin du mi rtog pa'i phyir ro/ /gzhan yang de yis rang nyams shing gzhan yang nyams par byed do/ /de ji lta bu zhe na/ kun+d+ru ru yi skad cig la/ /bde ba chen po grub pa ni/ /zhes gsungs te/ kun+d+ru ru'i sgo nas bde chen grub ces zer ba ni rmongs pa'i phyir ro//ji ltar ri dgas skom pa yis/ /smig rgyu'i chu la rgyug pa ni/ /skom pas 'chi nas nam mkha'i chu rnyed dam/ /zhes gsungs te/ ji ltar ri dgas skom pas gdungs pas smig rgyu la chur mthong nas/ de'i gnas su rgyug pa las chu ma rnyed nas skom pas 'chi ste/nam mkha'i chu ji ltar rnyed par 'gyur te/ mi rnyed ces pa'o/ /gzhan du dbang po gnyis sbyor gyi bde bas ni mi rnyed de/ rmongs pa'i 'jig rten pa rnams ni 'di las 'di nyid rnyed par 'dod do/ /de nyid bstan pa'i phyir/ rdo rje pad+ma gnyis par gnas/ / bde ba gang gis rnam rol ba/ /ci ste de bde nus med pas/ /sa gsum re ba ji ltar rdzogs/ /zhes gsungs te/ 'di ni las dang po pa dang / dbang po tha ma'i rnal 'byor pa 'dod chags la zhen pa rnams las 'dod chags chen po rol pa'i thabs 'dis sangs rgyas 'grub par bcom ldan 'das kyis ston to//de bzhin du mda' bsnun gyis de nas phyung ste/ 'di bstan pa'o/ /rdo rje pad+ma gnyis kyi sbyor ba'i bde bas dbang po tha ma'i skyes bu rol par byed pa gang yin pa des ni sa gsum gyi bde ba yongs su rdzogs par ci ste mi byed de/ thams cad de'i rang bzhin gyis thams cad kyi bsam pa phyag rgya chen po yongs su rdzogs par byed do//snying rje chen po mngon du byed pa'i phyir ro zhes dgongs so/ /yang na thabs de skad cig ma/ /yang na de gnyis gnyis med de/ /bla ma'i drin gyi bsod nams kyis/ /brgya la 'ga' yis shes par 'gyur/ / zhes gsungs te/ skad cig ma ni dga' ba bzhi'i skad cig ma'i bye brag yin pa'i phyir ro/ /yang na gnyis su med pa'i dus su de nyid mtshon pa'o/ /de yang mchog dang dga' bral gyi dbus su yin pas tha dad pa ni mgo rtsom pas skad cig ma ste/ rnam pa sna tshogs pa la sogs pa skyes pa'i dus so//tha dad med pa ni lhan cig skyes pa'i ngo bo nyid de/ bla ma dam pa'i gdams ngag gi drin gyis skyes bu kha cig gis shes kyis 'jig rten pa thun mong bas ni ma yin no/ /de'i phyir bdag gi bla ma dam pa'i gdams ngag gi sgo nas gong du bstan pa'i rig pas skye 'gro thun mong ba rnams la gsal bar byas pa yin no//kye grogs dag zab dang rgya che ba/ /'di la bdag gzhan yod ma yin/ /lhan cig skyes dga' bzhi ba'i skabs/ /gnyug ma nyams su myong bas shes/ /zhes gsungs te/ zab mo ni dpyad pa'i stobs kyis rgyun mi chad par dran pas phyogs dang phyogs ma yin pa nus par 'gyur ro//de ltar mchog tu zab pa de la ni bdag dang gzhan thams cad nyams te gdod ma nas skye ba med pa'i phyir ro/ /'di lta bu'i lhan cig skyes pa dga' ba bzhi'i dus su lhan cig skyes pa nyams su myong ba rtogs par bya'o/ /'di'i phan yon ston pa ni/ /mun nag chen por zla shel gyis//ji ltar gsal bar byed pa bzhin/ /mchog tu bde ba skad cig la/ /sdig pa ma lus pham byed pa'o/ /zhes gsungs te/ 'di mun nag chen po'i nang du zla shel gyi nor bu'i snang bas gsal bar byed pa'i dus su rigs ngan rkun ma la sogs pas gzhan gyi nor rku bar byed pa bzhin du/mchog tu bde ba chen po'i mtshan nyid dang bral ba'i skad cig ma'i dus su 'khor ba'i sdig sbyong thams cad nyams par byed do/ /de ltar/ sdug bsngal snang byed nub pa na/ /skar ma pa wa sangs ni 'char/ /'di ltar gnas pa'i sprul pa sprul/ /'di ni dkyil 'khor 'khor lo'o//zhes gsungs te/ ji ltar so ga'i dus su sdug bsngal gyi nyin mtshan de nub nas shin tu bsil ba'i gtso bo skar ma pa wa sangs 'char te/ 'di lta bu'i dkyil 'khor gyi 'khor lo la sogs pa sgom zhing gnas pa gang gis sna tshogs sangs rgyas kyi sku kun rdzob kyi sprul pa sprul te/de'i ngo bo nyid du dkyil 'khor 'khor lo yang shes par bya'o zhes pa'i don to/ /yang rnal 'byor ba'i bya bston te/ rmongs pa sems kyis sems la rtogs/ /lta ba ngan pa kun las grol/ /mchog tu bde chen 'di yin te/ /de la dngos grub dam pa yod da/ / ces gsungs te/ khyod kyi sems kyis sems dpyod dang / ci sems dang sems med pa sngon du bstan pa'i rigs pa gnyis ka yang med do/ /de ltar yang / sems nyid dam pa sems med nyid/ /gnyis ka med cing cung zad med/ /'gro ba ma lus 'khrul ba'o/ /zhes gsungs so/ /de lta bu'i lta ba ngan pa bor te/ma lus pa'i bdag dang skyes bu dang / /srog la sogs pa bya ba ngan pa thams cad ni kun rdzob tsam yin pa'i phyir ro/ /de ltar bde ba chen po'i rang bzhin du thams cad dag par gyis shig dang / /'jig rten las 'das pa'i mchog thob pa ni de la rag las pa'i phyir ro//de'i phyir/ sems kyi glang po yan du chug /de la bdag ni ma 'dri shig /nam mkha'i ri bo chu 'thung dang / /de yi 'gram du rang dgar zhog /ces gsungs te/ 'khor ba'i nang du dga' ba'i sems kyi glang po yan du chug /ci'i phyir zhe na/ dngos po thams cad de nyid la brten pas de nyid du thim pa'i phyir//'on kyang mu stegs pa thams cad kyis srog gcod pa la sogs pa byas pas dmyal bar ltung ngo / /snying rje can dge ba bcu'i las kyi lam la yongs su gnas pas mtho ris su 'gro zhing bde bar gnas so/ /sems kyi glang po thams cad la khyab pa'i tshul gyis nam mkha'i chu 'thung zhig de'i 'gram du ni bde ba chen po'i chu 'gram mo//bde ba chen po yin yang mngon par zhen par ma byed ces dgongs so/ /de bzhin du/ yul gyi glang po'i snas blangs nas/ /ji ltar gsod pa ltar snang yang / /rnal 'byor glang po skyong ba bzhin/ /de'i tshe byung nas song ba yin/ /zhes gsungs te/ de bzhin du yul gyi glang po ni dngos po thams cad de/ yul dang dbang po lta bur chu yis blangs nas gsod pa lta bur snang yang mi 'chi ste/ glang po dang rtse mkhas pas so/ /rnal 'byor gyi dbang phyug gis phyir byung nas gnas su 'gro zhes bya'o/ /de ltar bza' bya ma yin pa de mi rigs so zhes dgongs so//de ltar yang / gang zhig srid de mya ngan 'das pa'o/ /de la dbye ba ma sems shig /rang bzhin gcig pas rnam par spongs/ /dri med de ni nga yis rtogs/ /zhes gsungs te/ ji ltar 'phags pa klu sgrub kyi zhal snga nas/ /zung du 'jug pa'i rim pa las//'khor ba dang ni mya ngan 'das/ /zhes bya ba la sogs pa gsungs pa de bzhin du/ 'khor ba dang mya ngan las 'das pa gnyis su med pa de ni dbyer med pa'i zung du 'jug pa zhes bya'o/ /de nyid gsal bar bstan pa'i phyir/ /khyim du ma 'dug nags ma 'gro/ /gang na 'dug kyang sems la ltos//ma lus rgyun du byang chub gnas/ /srid gang mya ngan 'das gang yin/ /zhes gsungs te/ khyim dang nags gnyis ka la yang nges par gnas par mi bya ste/ gnas gnyis po la zhen na rnam rtog skye ba'i phyir ro/ /'o na ji ltar bya zhe na/ gang dang gang zab dang /'chags pa dang nyal ba la sogs pa'i dus su de la sems yongs su chags par ma byed cig/ /brdzun pa'i rnam par rig pa tsam du gyis shig ces bya ba'o/ /de'i phyir/ mkhas pas ma lus rtag tu rgyun mi 'chad par byang chub gnas pa ste/ gang cung zad kyang skye ba ni med de/rang byung gi ye shes kyi phyir ro/ /de ltar yang / mya ngan 'das dang 'khor ba nyid/ /de nyid ma mthong rtogs par byed/ /'khor ba myang na 'das pa med/ /de nyid ma mthong rtogs par byed/ /'khor ba dang ni mya ngan 'das/ /gnyis ka yod pa ma yin te/ /'khor ba yongs su shes pa nyid//mya ngan 'das zhes de la bya/ /zhes gsungs te/ de'i phyir byang chub kyi ngo bo nyid ni gnyis su med pa'i ngo bo mchog yin par grub pa'o/ /de ston pa ni/ byang chub khyim dang nags na gnas/ /'di yi dbye ba shes par gyis/ /dri med sems kyi rang bzhin la/ / de ni rtog pa med par bya/ /zhes gsungs te/ gong du bstan pa'i mtshan nyid kyi byang chub ni khyim dang nags na med pa de lta bu'i dbye ba dgongs pa'i tshig gis shes par bya'o/ /khyim ni rang gi lus so/ /nags ni bum pa dang snam bu la sogs pa'i gzugs so/ /de la byang chub med do//'di ni bdag dang 'di ni gzhan/ /gang gis de ni yongs sems pa/ /dbye bas 'ching dang bral bar bya/ /des ni bdag nyid grol ba'o/ /zhes gsungs te/ /gang gis 'di ni bdag 'di na gzhan zhes gsungs te bya ba gang des phyin ci log tu yongs su sgom pa de dbye bas 'ching ba med kyang 'on kyang bdag nyid rnam par bcings pa'o//de'i tshe bdag nyid grol yang ma grol zhes bya ste/ de'i phyir bdag dang gzhan gyi char mi rtog go zhes dgongs so/ /de ltar yang / /bdag dang gzhan du 'khrul ma byed/ /ma lus rgyun du sangs rgyas yin//'di nyid dri med go 'phang mchog /sems nyid rang bzhin dag pa'o/ /zhes gsungs te/ /sems can gyi rigs rnams dang po nyid nas sangs rgyas yin te/ de nyid dang po nyid nas glo bur gyi rnam par rtog pas bsgos pas ma rtogs te/ rang nyid sangs rgyas yin pa ma shes so//de nyid dri ma med pa'i mchog /sems kyi ngo bo nyid byang chub kyi rang bzhin yin te/ dngos po thams cad 'dzin pa spangs pa'i phyir ro/ /gnyis med sems kyi sdong po mchog /sa gsum ma lus khyab par son/ /snying rje'i me tog 'bras bu 'dzin//ming ni gzhan la phan pa'o/ /zhes gsungs te/ de ltar mchog gi don bstan nas gzhan la phan pa ston te/ rnal 'byor pa'i sems gang gnyis su med pa ni dpag bsam gyi shing bzhin du khams gsum ma lus par khyab par son pa ste/ thams cad gnyis su med pa zhes bya ba'i don to//de'i snying rje'i me tog gi 'bras bu'i ming ni gzhan la phan pa ste/ thams cad kyi thams cad du sangs rgyas kyi byang chub la sogs pa rgyas par byed pa'i phyir ro/ /stong pa'i sdong po me tog skyes/ /snying rje rnam pa sna tshogs 'byung / / lhun grub gzhan gyi 'bras bu ste/ /bde ba 'di ni sems gzhan min/ /zhes gsungs te/ de ltar stong pa'i 'bras bu snying rje rnam pa sna tshogs kyis mi 'dod bzhin du yang bsam pa sna tshogs yongs su rdzogs par byed pa'i phyir ro/ /'on kyang yongs su rdzogs pa'i snying rje ston pa ni/stong pa'i sdong po snying rje min/ /gang la rtsa ba lo 'dab med/ /de la dmigs byed gang yin pa/ /de ni lhung nas yal ga chag /ces gsungs te/ stong pa'i sdong po snying rje min pa ni stong pa dang snying rje dbyer med pa'i phyir 'dir dmigs pa med pa'i snying rje la snying rje min pa zhes bya'o//stong pa nyid kyi sdong po de la rtsa ba dang lo 'dab med do/ /sgom pa dang sgom pa po dang / bsgom bya gdod ma nas med pa'i phyir ro/ /de la dmigs bar byed pa gang yin pa de ni lhung nas yal ga chag pa ni khams gsum gcig pa'i ngo bo nyid yin pas so/ /de nyid bstan pa'i phyir/sa bon gcig la sdong po gnyis/ /ltos pa med pas me tog gcig /'dir ni dbyer med gang mthong ste/ /srid dang mya ngan 'das las grol/ /zhes gsungs te/ sa bon gcig la sdong po dang yal ga'i bye brag gnyis skye ste/ de ltar rgyu dang 'bras bu rnam pa gnyis su 'gyur te/de yang 'bras bu las tha mi dad do/ /rgyu de lta bu las 'bras bu'o zhes gsungs pa'i phyir sangs rgyas dang 'khor ba dbyer med par mthong ba de ni thar par 'gyur te/ gnyis su med par rtogs pa'i phyir ro/ /gang zhig 'dod pa can 'ong hUMtshe//de ni re ba med song nas/ /kham por dum bu blangs nas ni/ /kye ho rang khyim bor la song / /zhes gsungs te/ gong du bstan pa'i don mtha' dag 'khor ba'i longs spyod la chags pa med pa de'i tshe rtogs par 'gyur ro/ /longs spyod la chags pa dang bu dang tsha bo la sogs pa yang dag par rgyas pa ni sbrul gyi dug dang 'dra bar gnod pa byed pa'i phyir ro//de'i phyir snying rje dang ldan pas 'dod pa can slong ba'i mi 'ongs pa'i tshe/ bdag nyid srid pa'i dbang gis cung zad kyang mi ster na nga la dngos grub mi 'byung ngo zhes bsams nas rang gi khyim nas thon te phyir bor ba'i kham phor blangs nas longs spyod la chags par mi bya'o zhes bya ba'i don to//de bstan pa'i phyir/ gzhan la phan pa ma byas shing / /'dod pa la ni mi ster ba/ /'di ni 'khor ba'i 'bras bu gang / /de bas ring por byas na rung //zhes gsungs te/ gzhan la phan pa ma nus na khyim dang longs spyod kyi dgos pa ci yod/ gal te gser la sogs pa'i nor yod pa sbyin par mi gtong na 'khor bar gnas pa la nor der 'bras bu med ces bya'o/ /de'i tshe rang nyid bor ba byas na rung gi khyim nas 'thon la lus dang srog la mi lta bar gnas so zhes bya ba'i don to//byis pa'i skye bo rnams kyi dor do ha mdzod kyi TI ka dka' ba'i don 'grel byas pa'o/ /rang gis go bar bya ba'i phyir/ /dka' 'grel byas pa 'di yis ni/ /ming ni bdag nyid go byed pa/ /bla ma brgyud rim gsal byed pa'o//gang tshe gzhan gyis bltas nas kyang / /de tshe de la phan gyur na/ /de na sems can don gyur yin/ /de lta min na bzod par zhu/ /rang gi don dang gzhan don du/ /bdag gis 'di byas bsod nams kyis/ /de yis 'jig rten thams cad kun/ / rang byung ye shes thob par shog /do ha mdzod kyi dka' 'grel slob dpon chen po dpal gnyis su med pa'i rdo rjes mdzad pa rdzogs so/ /rgya gar lho phyogs yul ko sa lar sku 'khrungs pa'i rnal 'byor pa chen po shrI bai ro tsa na badzras bsgyur ba'o// //