CLOSE WINDOW

D2255
བོད་ཡིག

@##/ /rgya gar skad du/ badzra pa da nA ma/ bod skad du/ rdo rje'i tshig ces bya ba/ rdo rje 'dzin pa la phyag 'tshal lo/ /dngos po kun gyis bdag gus pas/ /dang po bla ma mchog phyag 'tshal/ /slar yang ri khrod pa de bzhin/ /dgyes pa'i rdo rje ma rgyud du/ /de bzhin gshegs pas spangs pa gang / /rnam bshad phyag na rigs ldan pas//las kyi phyag rgya sogs sgrub thabs/ /slob ma yis ni rtogs phyir bri/ /sangs rgyas kun bdag sdom pa ni/ /e waM rnam par rab tu gnas/ /yang dag dbang bskur zhes bya ba/ /gcig pu'i rnam pa bde chen po/ /bum pa'i dbang ni dang po ste/ /gsang ba mchog ni gnyis pa yin//shes rab ye shes gsum pa ste/ /de ltar de bzhin bzhi pa yang / /e yi cha byad bzang po gang / /dbus su waM gis rnam par brgyan/ /bde ba thams cad kyi ni gnas/ /sangs rgyas rin chen za ma tog /de las dga' ba skye bar 'gyur/ /skad cig dbye ba tha dad pas/ /skad cig ye shes bde ye shes/ / e waM rnam par rab tu gnas/ /rnam pa sna tshogs rnam par smin/ /rnam nyed de ni mtshan nyid bral/ /skad cig ma bzhi yang dag rtogs/ /'di ltar rnal 'byor mas ni shes/ /sna tshogs rnam pa sna tshogs brjod/ /'khyud dang 'o byed la sogs pa/ /rnam par smin pa de las bzlog /bde ba'i ye shes za ba'o//rnam par nyed pa dpyod par brjod/ /bdag gis bde ba spyad do zhes/ /mtshan nyid bral ba gsum las gzhan/ /chags dang chags bral rnam par spangs/ /dang por dga' ba rnam sna tshogs/ /mchog tu dga' ba rnam par smin/ /dga' bral dga' ba rnam par nyed/ /lhan cig skyes dga' mtshan nyid bral//dga' ba dang po 'gro ba nyid/ /mchog tu dga' ba'ang 'gro ba nyid/ /dga' bral dga' ba 'gro ba nyid/ /lhan cig skyes pa gsum mi dmigs/ /pad+ma'i nam mkha' rdo rje ze'u 'bru dag /rdo rje skyil krung gis mnan gnas dag tu/ /sems ni nor bu'i nang du chud pas blta/ /ye shes gang skyes ye shes brjod med gzugs//shes rab bcu drug lon pa la/ /lag pa gnyis kyis dam 'khyud nas/ /rdo rje dril bu mnyam sbyor bas/ /slob dpon dbang du bzhed pa yin/ /slob dpon gsang ba shes rab dang / /de ltar de bzhin bzhi pa yang / /dbang bzhi yi ni grangs kyis kyang / /dga' ba la sogs rim bzhin shes/ /dgod pa'i dga' ba slob dpon te//lta ba de bzhin gsang ba'i dbang / /'khyud pa shes rab ye shes te/ /de yang gnyis kyis gnyis sprod rgyud/ /sems can rnams kyi dngos grub 'gyur/ /dbang bskur rnam pa bzhi ru bshad/ /blugs shing bkrus pa 'di yis ni/ /dbang bskur zhes bya mngon par brjod/ /sna tshogs spang ba'i skad cig la//mchog tu dga' ba yang dag rnyed/ /ston pas bka' stsal sems dpa' che/ /bde ba chen po yang dag gzugs/ /ji srid byang chub ma thob par/ /sems can don gyi rdo rje 'dzin/ /'di de nyid kyis ye shes che/ /lus kun la ni rnam par gnas/ /byang chub sems ni zla bar gyur/ / bco lnga'i cha'i bdag nyid can/ /A li'i gzugs kyis bde chen po/ /rnal 'byor ma ni de yi cha/ /don gyi bya ba mi byed phyir/ /thams cad mtha' ni 'bad pas spangs/ /bcu drug gi ni cha ma yin/ /lhan cig skyes pa'i ngo bo gang / /dga' bral dang po mchog gi mtha'/ /stong las stong nyid he ru ka /shrI ni gnyis med ye shes te//he ni rgyu sogs stong pa'o/ /ru ni tshogs dang bral ba nyid/ /ka ni gang du'ang mi gnas pa/ /khu ba'i rnam pa bcom ldan 'das/ /de yi bde ba 'dod mar brjod/ /'di ni gcig dang du ma bral/ /skad cig gcig la mchog tu dga'/ /gnyis su med dang gnyis kyi tshul/ /dngos dang dngos med bdag nyid gtso//brtan dang g.yo ba khyab ste gnas/ /sgyu ma'i gzugs ni nyid du snang / /dkyil 'khor 'khor lo sogs thabs dang / /de ni rtag tu nges par grol/ /dkyil ni snying por brjod pa ste/ /byang chub sems ni bde chen por/ /len par byed pas dkyil 'khor te/ /'dus pas dkyil 'khor du ni bshad/ /'khor lo'i tshogs ni nam mkha'i khams//yul la sogs pa rnam spyod pa'o/ /rdo rje pad+ma sbyor ba'i thabs/ /de yi bde ba rtogs par byed/ /nam mkha'i khams su b+ha ga bsam/ /dbus su bsgom par bya ba ni/ /'khor lo sngon 'gro tshul ji bzhin/ /lha rnams ji ltar 'byung ba bsam/ /mkha' dbyings zhes bya'i pad+ma la/ /b+ha ga 'dir ni ye shes brjod//bsgoms pa 'dir ni snyoms 'jug pa/ /de yi bde ba 'khor lor brjod/ /phyag rgya chen po dbang bskur ba/ /ji ltar bde ba chen po yi/ /de nyid 'di yi mthu stobs kyis/ /dkyil 'khor gzhan du mi 'byung ngo / /bde ba nag po bde ba ser/ /bde ba dmar po bde ba dkar/ /bde ba ljang gu bde ba sngo/ /bde ba rgyu dang mi rgyu kun//bde ba shes rab bde ba thabs/ /de bzhin kun du ru skyes bde/ /bde ba dngos dang dngos med bde/ /rdo rje sems dpa' bde chen brjod/ /dngos dang dngos med gnyis kyang ngo / /dngos po rtogs phyir sangs rgyas pa/ /le los nye bar bcom pa dang / /rmongs pa rnams kyis nga mi shes/ /rdo rje btsun mo'i b+ha ga mchog /bde ba can nang gnas te/ /e yi cha byad kyi ni gzugs/ /sangs rgyas rin chen za ma tog /'chad pa po nga chos kyang nga / /rang gi tshogs ldan nyan pa nga / /'gro ba ston pa bsgrub bya nga / /'jig rten 'jig rten 'das pa nga / /lhan cig skyes gzhan rang bzhin nga / /mchog mtha' bral ba dang po ste//bol+la ka ko la sbyor bas/ /reg pa las ni sra ba'i rdzas/ /sa ni de las skyes par 'gyur/ /byang chub sems ni zhu ba las/ /chu yi khams su yang ni 'byung / /bskyod pa las ni me yin te/ /'gro ba rlung du rab tu grags/ /bde ba yang ni nam mkha'i khams/ /lnga po rnams kyis yongs su bskor/ / de phyir bde ba de nyid min/ /gang phyir 'byung ba che bde ba/ /lhan cig skyes pa'i ngo bo gang / /lhan cig skyes par nges par bshad/ /las kyi phyag rgya bstan pa'o/ /rang bzhin nyid ni ma skyes na/ /bden pa ma yin brdzun pa min/ /thams cad chu zla lta bu de/ /rnal 'byor ma rnams shes par 'dod/ /'di lta ste/ gtsub gtan dang / gtsub shing dang / skyes bu'i lag pa bskyod pa las glo bur du me mngon sum du 'byung ste/ me de ni gtsub shing la yang mi gnas/ gtsub gtan la yang med/ skyes bu'i lag pa la yang ma yin te/ rnam pa thams cad du yongs su btsal na gcig la yang gnas pa med do/ /me de yang bden pa yang ma yin brdzun pa yang ma yin te/de ltar chos thams cad yid la gyis shig /de ltar 'khor ba de nyid do/ /'khor ba ma rtogs gzhan du ni/ /mya ngan 'das pa mi shes so/ /'khor ba gzugs dang sgra la sogs/ /'khor ba tshor ba la sogs te/ /'khor ba dbang po rnams nyid do/ /'khor ba zhe sdang la sogs pa/ / chos 'di dag ni mya ngan 'das/ /rmongs pas 'khor ba'i gzugs can nyid/ /'khor ba gti mug med pa dag /byang chub sems ni mya ngan 'das/ /don dam kun rdzob rang bzhin no/ /'dod chags zhe sdang med cing gti mug med/ /phrag dog med cing ser sna med/ /nga rgyal med cing lta ba med/ /sgom pa po dang bsgom pa med//sna tshogs lhan cig skyes pa rlabs bral ba/ /rang bzhin lhan cig skyes zhes brjod/ /thams cad gcig pa'i sdom pa ni/ /rnal 'byor snying rje'i thabs su 'gyur/ /phyag rgya rgyu dang rnam par bral/ /stong nyid snying rje dbyer med pa/ /byang chub sems zhes bya bar brjod/ /chos kyi phyag rgya bstan pa'o/ /sngags bzlas dka' thub med cing sbyin sreg med//dkyil 'khor med cing dkyil 'khor ba yang med/ /de ni sngags bzlas dka' thub sbyin sreg yin/ /de ni dkyil 'khor ba dang dkyil 'khor nyid/ /mnyam pa nyid du sems ni 'dus pa'i rang bzhin no/ /dam pa'i dga' ba dngos dang dngos med dngos por ldan pa med//lus po med cing gzung ba med dang 'dzin pa med/ /sha dang khrag kyang med cing bshang dang gci ba med/ /mi gtsang ba dang rmongs med gtsang sa dag pa med/ /rang bzhin gzugs med lta ba med/ /sgra med pas na nyan pa med/ /dri yang med cing snom pa med/ /ro med myong ba po yang med/ /reg bya med cing reg pa med//sems med sems las byung ba med/ /dpal ldan de bzhin nyid gshegs shing / /slar yang de bzhin nyid gshegs pa'o/ /shes rab rigs pa 'di yis ni/ /de bzhin gshegs par mngon par brjod/ /sgom pa po dang bsgom bya med/ /lha med sngags kyang yod ma yin/ /spros dang bral ba'i rang bzhin du/ / sngags dang lha dag gnas pa dag /rnam snang mi bskyod don yod dang / /rin chen 'khor 'das snying stobs can/ /tshangs pa khyab 'jug zhi ba kun/ /rnam par sad dang de bzhin brjod/ /tshangs pa mya ngan 'das sangs rgyas/ /'jug pas khyab 'jug nyid du brjod/ /rtag tu dge bas zhi ba ste/ /thams cad bdag nyid gnas pa kun//rang rig pa yi ye shes 'di/ /ngag gi spyod yul lam las 'das/ /byin gyis brlabs pa'i rig pa gang / /kun mkhyen ye shes de rang bzhin/ /ji ltar pa las bde thob pa/ /de yi bde ba rang gis spyod/ /gang phyir 'chi ba'i bde ba 'di/ /de yi bde ba bsam gtan brjod/ /sems can sangs rgyas gcig pa las//'on kyang glo bur dri mas bsgribs/ /de dag spangs la lha nyid kyis/ /sangs rgyas nyid du the tshom med/ /de ltar de nyid bden brdzun min/ /gzhan gyis brjod min lhan cig skyes/ /gang las kyang ni rnyed mi 'gyur/ /bla ma'i dus thabs bsten pa las/ /rang gis shes bya bsod nams kyis//phyag rgya chen po bstan pa'o/ /mi shes pa yi 'jig rten gang / /btsan dug zos pas brgyal bar 'gyur/ /gti mug rnam spangs de nyid shes/ /de yis mya ngan yongs gcod 'gyur/ /de bzhin thar pa'i thabs shes pa/ /dgyes pa rdo rje shes byas nas/ /ma rig sogs pas gzung mi nus/ /gti mug la sogs kyis mi 'ching //rang rig gis ni yang dag rtog /sangs rgyas ma yin sems can med/ /dmyal ba yi dags byol song dang / /lha dang lha min mi rnams dang / /bshang gci'i srin bu la sogs pa/ /rtag tu bde ba'i rang bzhin las/ /lha dang lha ma yin gyis kyang / /de ltar bde ba mi shes so/ /'jig rten khams ni gang nas kyang //gzhan du sangs rgyas mi rnyed de/ /sems nyid rdzogs pa'i sangs rgyas yin/ /sangs rgyas gzhan du bstan du med/ /gdol pa smyig mkhan la sogs pa/ /gsod pa don du sems pa rnams/ /de yang dgyes rdor rje shes na/ /'grub ste 'di la the tshom med/ /byis pa mi shes pas bsgribs pas/ /bgrod pa 'di mi shes pa yin//rmongs pa de ni 'khor ba ste/ /'gro drug srid pa'i btson rar chud/ /rdo rje snying po snying rje che/ /dgyes pa'i rdo rje'i thabs rnyed pa/ /gang zhig yul rnams rnam sbyong ba/ /bla med go 'phang thob par 'gyur/ /dngos po'i 'ching bas bcings ba ni/ /de yongs shes bas grol bar 'gyur/ /dngos po med pa yongs shes pas//dngos po bsgom med shes rab can/ /dngos po bsgom pa yongs shes bya/ /de ltar he ru ka bsgom pa/ /ye shes chen po lus la gnas/ /rtog pa thams cad yang dag spangs/ /dngos po kun la khyab pa ste/ /lus la gnas kyang lus skyes min/ /chos 'byung las skyes ye shes yin/ /mkha' mnyam de yi thabs dang ldan//de las 'jig rten gsum po skyed/ /thabs dang shes rab rang bzhin te/ /dman dang 'bring po mchog dang ni/ /gzhan rnams gang rnams de rnams ni/ /de dag thams cad mnyam nyid du/ /de nyid bsgom pas blta bar bya/ /dman pa phra ba'i dngos po ste/ /mchog ni srid par brjod pa yin//'bring po gnyis la spangs pa las/ /gzhan rnams shes pa'i dbang po drug /gang rnams de rnams g.yo dang brtan/ /mnyam pa mtshungs pa'i rang bzhin te/ /ro mnyam de nyid bsgom par bya/ /mnyam pa mtshungs par brjod pa ste/ /de yi 'khor lo ror bshad do/ /ro mnyam pa yi ngo bo ru/ /don 'di yis ni brjod pa yin//'gro ba thams cad nga las skyes/ /nga las gnas gsum po yang byung / /nga yis 'di dag thams cad khyab/ /nga las gzhan pa'i 'gro ma mthong / /de ltar nges shes rnal 'byor pa/ /shin tu mnyam gzhag gang goms na/ /bsod nams chung ba'i mi yis kyang //de nyid 'grub 'gyur the tshom med/ /yan lag ji snyed bsgyur ba dang / /rab tu rgyas par smra ba rnams/ /de snyed sngags dang phyag rgya rnams/ /he ru ka dpal go 'phang gnas/ /bza' dang btung dang de bzhin khrus/ /'gro ba'am nyal bas bsam par bya/ /de rnyed de ni rgyun mi 'chad/ /phyag rgya chen po mngon 'dod pa//gang phyir brtan dang g.yo ba'i dngos/ /rtswa lcug 'khri shing la sogs pa/ /bdag gi dngos po'i rang bzhin las/ /dam pa'i de nyid nges par bsgom/ /rang rig pa yis bdag nyid dag /dag pa gzhan gyis rnam mi grol/ /yul rnams dag pa'i rang bzhin pas//rang rig pa yi bde ba mchog /gzugs sogs yul dang gzhan dag kyang / /rnal 'byor pa la gang snang ba/ /de kun dag pa'i rang bzhin te/ /'gro ba sangs rgyas rang bzhin nyid/ /gang dang gang gis 'jig rten bcings/ /de yis bcings pa las grol 'gyur/ /de nyid shes pas 'jig rten grol//de nyid rnam spangs grol ba min/ /de phyir gzugs med sgra dri med/ /ro med sems med rnam par dag /reg med chos med rnam par grol/ /dag pa'i rang bzhin 'gro bas shes/ /dug gi dum bu gang nyid kyis/ /skye bo thams cad 'chi ba ste/ /dug gi de nyid shes pa des/ /dug gis dug ni 'joms par byed//ji ltar rlung gis bzung de la/ /ma sha'i bza' ba sbyin par bya/ /rlung gis rlung ni 'joms byed de/ /bzlog pa'i sman du blta bar bya/ /srid pa nyid kyis srid dag byed/ /rnam rtog so sor rtog pa yin/ /ji ltar rna bar chu blugs pa/ /chu gzhan gyis ni dbyung bar bya/ / de bzhin dngos po'i rnam rtog kyang / /rnam par nges par sbyong bar byed/ /ji ltar me yis tshig pa la/ /slar yang me yis gdung bar bya/ /de bzhin 'dod chags mes tshig pa/ /'dod chags me yis gdung bar bya/ /skye bo mi bzad pa yi las/ /gang dang gang gis 'ching 'gyur ba/ /thabs dang bcas na de nyid kyis//srid pa'i 'ching ba las grol 'gyur/ /'dod chags kyis ni 'jig rten bcings/ /'dod chags kyis ni rnam par grol/ /bzlog pa'i bsgom pa 'di lta bu/ /sangs rgyas mu stegs kyis mi shes/ /dam tshig gi phyag rgya bstan pa'o/ /las kyi phyag rgya la sogs ldan//rdo rje tshig ni btu byas pa/ /bdag gis bsod nams gang thob pa/ /de yis 'jig rten rdor 'dzin shog /rdo rje slob dpon badzra pA Ni'i zhal snga nas mdzad pa rdo rje'i tshig rdzogs so// //rgya gar gyi mkhan po de nyid dang / lo tsA ba mtshur ston dge slong dz+nyA na A ka ras bsgyur cing zhus te gtan la phab pa'o /