CLOSE WINDOW

D2229
བོད་ཡིག

@##/ /rgya gar skad du/ ku dr-iSh+Ti ni rga ta nA ma/ bod skad du/ lta ba ngan pa sel ba zhes bya ba/ 'jam dpal gzhon nur gyur pa la phyag 'tshal lo/ /sangs rgyas la phyag 'tshal lo/ /gang zhig 'di la gnas gyur na/ /rgyal ba'i go 'phang thob 'gyur ba/ /dang po las pa'i cho ga nyid//lta ngan sel ba bshad bar bya/ /'dir ni sems can ni rnam pa gnyis te/ slob pa dang / mi slob pa'o/ /de la lhag pa'i bsam pas mos pa'i sbyor ba dang / sa la zhugs pa'i sbyor ba dang / lnga la dbang thob par mthar thug pa'i bar du rgyu'i gnas skabs la gnas pa'i slob pa rnams shin tu rnam par dag pa'i las dang po'i cho gas tshogs gnyis bsags nas yang dag par rdzogs pa'i byang chub yang dag par 'thob bo//mi slob pa yang de kho na nyid dang / 'bras bu rnam par rtog pa ni gnyen po'i phyogs kyis gsal la/ shAkya thub pa ltar sngon gyi smon lam gyi shugs kyi nus pas zung du 'jug pa nyid du 'bad pa med par sems can gyi don byed pa ni//mtshan nyid rgyun mi 'chad par dang po'i las la 'jug go zhes bya bar gnas so/ /de yang / mgon po sems dpa' mi mnga' zhing / /rnam rtog g.yo ba mi mnga' yang //khyod nyid ngang gis 'jig rten la/ /sangs rgyas mdzad pa 'jug par 'gyur/ /gzhan don phun tshogs sangs rgyas kyi/ /'bras bu gtso bo gzhan ma yin/ /des na sangs rgyas 'bras bur brjod/ /kun rtog rlung dmar thams cad kyis/ /dpag bsam shing ltar mi bskyod pa//de ltar sems can thams cad kyi/ /bsam pa ma lus yongs rdzogs byed/ /'bras bu de nyid mi mthun phyogs/ /blang dang dor ba rnam spangs nas/ /blo ldan rdzogs pa'i byang chub rtogs/ /dang po las pa 'bad pas sam/ /zhes bstan pa yin no/ /'on te las dang po pas ni slob pa'i cho ga nyid rigs na'ang mi slob rang bzhin med pa bsgom par gyur pa rnams la las dang po ba'i rtsom pa yod pa ji lta bu/dper na 'dir yang gser gyi sgrog gis bcings pa lta bu nyid do zhe na bden te/ shes rab kyi pha rol tu phyin pa rtogs pa dang ma bral ba'i phyir ro/ /shes rab kyi pha rol tu phyin pa lnga'i bdag nyid do//de lta bas na rnam pa thams cad kyi mchog dang ldan pa'i stong pa nyid do zhes bstan pa yin no/ /de yang bcom ldan 'das shes rab kyi pha rol tu phyin pa dang bral ba'i pha rol tu phyin pa lngas ni pha rol tu phyin pa'i ming mi thob bo zhes gsungs pa dang /'phags pa dri ma med par grags pas bstan pa zhes bya ba theg pa chen po'i mdo las kyang / shes rab dang bral ba'i thabs ni 'ching ba'o/ /thabs dang bral ba'i shes rab kyang 'ching ba'o/ /shes rab dang bcas pa'i thabs ni thar ba'o/ /thabs dang bcas pa'i shes rab kyang thar pa'o zhes gsungs so//'di dag ni 'di'i bdag nyid bla ma dam pa'i man ngag nyid las sgron ma dang snang ba bzhin du lhan cig skyes pa grub pa bzhin du rtogs par bya'o/ /de lta bas na/ stong nyid snying rje dbyer med pa/ /sangs rgyas ye shes 'dod pa gang / /rnal 'byor pa kun bya ba nyid//dang po'i las can bstan pa gang / /pha rol phyin lngar gang bstan pa/ /dang po'i las can zhes bya ba/ /shes rab pha rol phyin pa yi/ /ngo bo nyid ni dpyad mi bya/ /de bzhin du/ sbyin dang tshul khrims bzod brtson 'grus/ /bsam gtan shes rab la gus pas/ /rtag tu blo ldan gyis bsten na//bde bar shes rab 'byung bar 'gyur/ /longs spyod rdzogs dang sprul pa'i sku/ /sbyin dang tshul khrims bzod pa gsum/ /bsam gtan shes rab chos kyi'o/ /brtson 'grus gnyis kar 'dod pa yin/ /zhes bstan pas na/ byang chub sems dpa' las dang po pas/shin tu rnam par dag pas gnas par bya'o/ /zlog pa ni med par smra bar thal bar 'gyur ro/ /de yang / dge dang mi dge gang phyir dngos med kyang / /de ltar dge ba nyid bya mi dge min/ /'jig rten kun rdzob chu yi zla 'dra yang / /de las yid 'ong sdug bsngal yid mi bde//zhes bstan pa yin na/ de ltar na slob pas smyon pa'i brtul zhugs la gnas nas/ rnam par mi rtog pa myong bar 'dod pas las dang po pa la 'jug pa ji lta bu zhe na/ lus sbyin par gtong ba dang ldan pa'i spyod pa ste/ /lus ni sbyin par btang byas la/ /phyin nas spyod pa brtsam par bya//zhes bya ba'i tha tshig go/ /lus gtong ba'i sbyin pa dang lus dang ngag dang yid kyis sems can thams cad kyi don mdzad pa'i tshul khrims dang / grang ba dang / tsha ba dang / sog les gshag pa la bzod pa'i bzod pa dang / 'jig rten gyi chos brgyad kyi gnod pa las mnyam pa nyid kyi brtson 'grus dang /dngos po thams cad kyi rjes su zhugs pa'i 'bad pa med pa'i rang gi ngang gis 'byung ba'i bsam gtan dang / chos thams cad mi dmigs par rjes su brtag pa'i mtshan nyid kyi shes rab ste/ 'bad pa med par ro gcig pa'i ngang gis thams cad du ro gcig par 'dod pa'i pha rol tu phyin pa thams cad kyi mchog go//de lta bas na/ smyon pa'i brtul zhugs la gnas pa yang dang po las la 'jug pa nyid yin no/ /tshu rol mthong bar grags pa nyams pa 'jig rten pha rol slu ba thams cad du rigs pa tsam ma yin pa smra ba ltar ni ma yin no//de la slob ma brtul zhugs can byang chub sems dpa' la ni/ dang por gso sbyong sbyin par bya/ /phyin nas bslab pa sbyin par bya/ /zhes dgyes pa'i rdo rje las gsungs so/ /dang por gso sbyong sbyin pa ni/ /btsun pa'am slob dpon dgongs su gsol//bdag dge bsnyen ming 'di zhes bya ba/ byang chub kyi snying po la mchis kyi bar du/ sangs rgyas dang chos dang dge 'dun la skyabs su mchi'o/ /de ltar lan gnyis lan gsum gyi bar du bya'o/ /bdag gsum la skyabs su song bar btsun pas gzung du gsol//slob dpon dgongs su gsol/ bdag dge bsnyen ming 'di zhes bgyi ba/ dus 'di nas nye bar bzung nas nyi ma ma shar gyi bar du srog chags gsod pa dang / gzhan gyi nor rku ba dang / mi tshangs par spyod pa dang / brdzun du smra ba dang / de bzhin du myos par 'gyur ba'i btung ba 'thung ba dang / dus ma yin par za ba dang / phreng ba dang / kha dog dang / glu dang gar dang / rtse 'jo dang / khri stan dang / khri stan chen po las ldog par bgyi'o/ /bdag yon tan brgyad kyis dgra bcom pa'i tshul du gnas par gyi'o zhes bya ba ni gso sbyong sbyin pa'i tshig ste/byang chub sems dpa' khyim pa dkon mchog gsum la skyabs su 'gro bas/ srog gcod pa dang / ma byin par len pa dang / 'dod pas log par g.yem pa la spyod pa dang / brdzun du smra ba dang / rang bzhin gyi kha na ma tho ba dang bcas pas myos par 'gyur ba'i btung ba chang 'thung ba dang lnga las log par bgyi'o//mos pa dang spyod pa dang ldan pa'i byang chub sems dpa' khyim pa'i mi dge bcu yongs su shes par byas la/ yang mi bya bar yongs su bsdam par bya zhing / dge ba'i las rnams ni bya'o//tho rangs kyi thun la langs la gdong bkru ba la sogs byas nas/ dkon mchog gsum rjes su dran pas/ oM AHhUM zhes pas/ bdag dang / gnas dang / rnal 'byor srung bar byas la/ rtog pa ji lta ba bzhin du bsam gtan dang bzlas pa dang bstod pa la sogs pa bya ba'o//mtshan yang dag par brjod pa yang lan gsum du brjod par bya'o/ /de yi rjes la/ oM dzam+b+ha la dza len+d+ra ye swA hA/ zhes pa brgya rtsa brgyad bzlas pa'i chu khyor ba brgya rtsa brgyad dpal gnod gnas la dbul bar bya'o/ /de nas na maHsa man+ta bud+d+hA nAM sarba ta thA ga ta a ba lo ki te/oM sam+b+har sam+b+ha ra hUM phaT swAhA/ zhes bya ba'i gtor ma'i sngags lan bdun bzlas shing / lag pa g.yas pa'i sor mo lnga brkyang pa las/ bdud rtsi lngas sgo drung na 'dug pa'i gtor ma'i zas chu dang bcas pa zan 'bru gcig gi kyang yul ma gad+hI bre bo che re re 'byung bar gyur par bsams la/yi dwags kyi tshogs ma lus pa la se gol lan gsum gtogs pas sbyin par bya'o/ /da ni sems can thams cad la bu gcig pa'i rnam pa ltar blta ba'i byams pa dang / sdug bsngal dang sdug bsngal gyi rgyu 'khor ba'i rgya mtsho las 'byin par bsam pa'i ngo bo nyid kyi snying rje'i bsam pa dang /dkon mchog gsum la skyabs su 'gro ba spros par 'gyur ba'i yid las byung ba'i dga' ba dang / mi bden pa la chags pa yongs su spong ba'i mtshan nyid kyi btang snyoms bsgom la/ sems can thams cad kyi don la spro ba'i sems kyis ba'i lci ba gtsang ma blangs la chu gtsang ma dang bsres la/oM badzra re khe hUM zhes bya bas dkyil 'khor byin gyis brlabs la/ sa'i cha gru bzhi pa la sogs pa gang yang rung bar 'dod pa'i maN+Dal byas la/ de'i steng du sna tshogs pad+ma 'dab ma brgyad pa'i lte bar zla ba dang /nyi ma'i dkyil 'khor gyi steng du/ hUM sngon po yongs su rdzogs pa'i mi bskyod pas gnon gyi phyag rgya 'dzin pa sku mdog sngon po'o/ /de'i rjes la shar phyogs kyi 'dab ma la/ yi ge oM dkar po las rdzogs pa'i byang chub mchog gi phyag rgya 'dzin pa'i rnam par snang mdzad dang /de nas lho phyogs kyi 'dab ma la yi ge traM ser po las yang dag par byung ba'i sku mdog ser po mchog sbyin gyi phyag rgya 'dzin pa'i rin chen 'byung ldan no/ /de nas nub phyogs kyi 'dab ma la/ yi ge hri dmar po las yang dag par byung ba'i ting nge 'dzin gyi phyag rgya 'dzin pa'i snang ba mtha' yas sku mdog dmar ba'o//de nas byang phyogs kyi 'dab ma la yi ge khaM ljang gu las byung ba'i mdog ljang gu mi 'jigs pa'i phyag rgya 'dzin pa'i don yod grub pa bsgoms la/ oM badzra puSh+pe hUM zhes pa la sogs pa mngon par zhen pa'i sngags pas 'dod pa thams cad kyi mchog tu gyur pa dbul bar bya'o//de bzhin gshegs pa lnga po 'di dag ni/ na bza' dur smrig bsnams pa/ gtsug tor dang bcas pa'o/ /nyi ma'i dkyil 'khor dang bcas pa ste rnam par snang mdzad ni zla ba'i dkyil 'khor la'o/ /de la bzhi po ni mi bskyod pa la phyogs pa'o//mi bskyod pa ni sgrub pa po la phyogs pa'o/ /de dag gi mdun na gsum la skyabs su 'gro ba'i tshigs su bcad pa rtogs pa'i don ji lta ba bzhin du mngon du byas nas gdon par bya'o/ /de la gsum la skyabs su 'gro ba'i tshigs su bcad pa ni 'di yin te/sangs rgyas gtso la phyag 'tshal lo/ /skyob pa'i chos la phyag 'tshal lo/ /dge 'dun che la phyag 'tshal lo/ /gsum la rtag tu phyag 'tshal lo/ /dkon mchog gsum la skyabs su mchi/ /sdig pa thams cad so sor bshags/ /'gro ba'i dge la rjes yi rang //sangs rgyas byang chub yid kyis bzung / /sangs rgyas chos dang tshogs kyi mchog rnams la/ /byang chub bar du bdag ni skyabs su mchi/ /bdag dang gzhan don rab tu bsgrub pa'i phyir/ /bdag gis byang chub mchog tu sems bskyed cing / /sems can 'di dag thams cad mgron gnyer nas//byang chub spyod mchog yid 'ong spyad par bgyi/ /'gro la phan phyir sangs rgyas 'grub par shog /sdig pa thams cad bshags par bgyi/ /bsod nams kun la rjes yi rang / /gso sbyong 'phags pa'i yan lag brgyad/ /bsnyung bar bya ba spyad par bya//zhes bya'o/ /de nas/ tshul khrims tsan+dan lus la byugs/ /bsam gtan gyi ni gos kyis g.yogs/ /byang chub yan lag me tog brgyan/ /ji ltar bde ba nyid du gnas/ /zhes brjod nas/ oM badzra maN+Dal hUM muHzhes bya bas gshegs su gsol lo/ /de bzhin du 'jam dpal sogs pa yang man ngag ji lta ba bzhin mchod par bya'o//dkyil 'khor gyi cho ga'o/ /lci ba chu dang bcas pa sbyin pa ste/ /legs par byugs pa tshul khrims bzod pa ni/ /srog chags phra mo sel bar byed pa yin/ /brtson 'grus bya ba dag la 'jug pa'o/ /bsam gtan de dus rtse gcig byed pa'i sems//shes rab tshogs sogs legs par mdzes pa yin/ /thub pa rnams kyi dkyil 'khor byas pa yis/ /pha rol phyin pa drug ni des thob shog /nad kun las grol gser gyi mdog tu 'gyur/ /lha dang mi'i chos zla ba bzhin par mdangs/ / nor dang gser phyug rgyal po'i rgyud skye bar/ /bde gshegs gnas mchog lus kyis byas par 'gyur/ /zhes bya ba ni/ dkyil 'khor gyi phan yon gyi tshigs su bcad pa'o/ /lci ba chu dang me tog gis/ /rtag tu dkyil 'khor byas nas ni/ /cung zad phul nas bla ma la/ /dus gsum du ni gus phyag bya//gzhan dag gi ni sems mgu zhing / /rang gi sems kyang 'phel bar byed/ /bde zhing tshad med nor dang ldan/ /bde ba can du skye bar 'gyur/ /pha rol phyin drug rdzogs par 'gyur/ /sangs rgyas sogs kyis byin gyis brlabs/ /dkyil 'khor rab tu byed pa po/ / dpag med yon tan rdzogs par 'gyur/ /zhes bya ba la sogs pa phan yon rgyas par 'byung ba yin no/ /dkyil 'khor la sogs cho ga yis/ /yang dag shes rab pha rol phyin/ /rtag tu mchod cing bklag par bya/ /de yi don yang rtogs par bya/ /tshigs bcad gcig dang tshigs bcad bzhi//tshigs bcad gnyis dang sgo drug pa'i/ /gzungs dang bzang po spyod pa dang / /phung po gsum pa dus gsum du/ /yi ge gcig nas nyer bzung nas/ /gsum gyi bar du mnyam gzhag pas/ /yi dam nyams pa med pa yis/ /blo ldan ji ltar rnyed pa bklag /sangs rgyas dang byang chub sems dpa'i ras ris dang / glegs bam dang / lugs ma la sogs pa mchod par bya'o/ /ras ris dang glegs bam dang sku gzugs la sogs pa mchod pa'i cho ga'o/ /da ni dkyil 'khor chen po bkod pa'i rjes su 'brangs nas tsha tsha gdab pa'i cho ga bshad par bya ste/na ma s+sa man+ta bud+d+hA nAM/ oM badzra A yu She swA hA/ 'jim pa blang ba'i sngags so/ /oM badzrod b+ha bA ya swA hA/ 'bi 'bi bya ba'i sngags so/ /oM a ra dze bi ra dze swA hA/ snum bsku ba'i sngags so/ /oM d+harma d+hA tu garbe swA hA/rgyar gzhug pa'i sngags so/ /oM badzra mung+ga ra A ko Ta ya swAhA/ gdab pa'i sngags so/ /oM d+harma A yu She swA hA/ spyan drang ba'i sngags so/ /oM su pra tiSh+Tha badzrA ya swA hA/ bzhugs su gsol ba'i sngags so/ /oM sarba ta thA ga ta ma Ni sha ta dI pa te dz+wa la dz+wa la d+harma d+hA tu gar+b+he swA hA/rab tu gnas pa'i sngags so/ /oM swa b+hA ba bI shud+d+he a ha ra a ha ra A gats+tsha A gats+tsha d+harma d+hA tu gar+b+he swA hA/ gshegs su gsol ba'i sngags so/ /oM A kA sha d+harma d+hA tu gar+b+he swA hA/ bzod par gsol ba'i sngags so/ /de lta bu ni tsha tsha gdab pa'i cho ga'o//na mo b+ha ga ba te bai ro tsa na/ pra b+ha rA dzA ya/ ta thA ga tA ya/ aR+ha te samyak+shi bud+d+hA ya/ tad+ya thA/ oM su k+Sh+me su k+Sh+me/ sa ma ye pras ma ye/ shAn+te ngAn+te/ sa ma ro pe/ a na lam+b+he/ ta ram+phe ya sho ba ti ma hA te dza ni rku le/ nirbA na/ sarba bud+d+hA d+hiSh+ThA na a d+hiSh+Thi te swA hA/ zhes bya ba'i gzungs 'di 'jim pa'am/ bye ma la lan nyi shu rtsa gcig gi bar du bzlas te/ mchod rten byas na/ de la rdul phra rab ji snyed yod pa de snyed kyi bye ma snyed kyi 'gyur gyi mchod rten byas pa'i bsod nams thob par 'gyur ro/ /sa bcu'i dbang phyug tu 'gyur ro/ / myur du bla na med pa yang dag par rdzogs pa'i byang chub tu 'gyur ro zhes bcom ldan 'das rnam par snang mdzad kyis gsungs te/ gzungs 'di ni phan yon dpag tu med do/ /ye d+harmA he tu pra b+ha bA he tun+te ShAn+ta thA ga to h+ya ba data/ te ShAny+tsa yo ni ro d+ha e baM bA dI ma hA shra ma NaHtshigs su bcad pas rab gnas byas la/na mo b+ha ga ba te rat+na ke tu rA dzA ya/ ta thA ga ta yAR+ha te samyak+saM bud+d+hA ya/ tad+ya thA/ oM rat+ne ma hA rat+ne rat+na bo d+hi swAhA/ zhes bya ba'i gzungs la sogs pa 'di brjod cing mchod rten la phyag 'tshal ba la sogs pa byas nas/ mchod rten gcig la phyag byas pas/mchod rten bye ba la phyag la sogs pa byas par 'gyur ro/ /'jim pa la sogs pa la mchod rten bya ba'i cho ga'o/ /'di dag thams cad khyad par can du yongs su bsngo ba las ni khyad par can gyi 'bras bu skye zhing 'byung bar 'gyur ro zhes bya ba shes rab kyi pha rol tu phyin pa las gsungs pa'i yongs su bsngo ba chen pos yongs su bsngo bar bya'o//de yang 'di ltar bya ste/ ji ltar de bzhin gshegs pa dgra bcom pa yang dag par rdzogs pa'i sangs rgyas rnams kyis sangs rgyas kyi ye shes dang / sangs rgyas kyi spyan gyis mkhyen cing gzigs pa'i dge ba'i rtsa ba 'dis rigs gang yin pa dang /sde gang yin pa dang / mtshan nyid ji lta ba dang / rang bzhin gang yin pa dang / chos nyid gang yin pas yang dag par gnas pa de dag gis ji lta ba mkhyen pa de ltar bdag kyang rjes su yi rang ngo / /de dag gis ni dge ba'i rtsa ba bla na med pa yang dag par rdzogs pa'i byang chub tu bsdos pa ltar/bdag gis kyang yongs su bsngo bar bgyi'o zhes brjod do/ /gzhan yang / dge ba'i las 'di bdag gis byas pa yis/ /ring por mi thogs 'jig rten sangs rgyas nas/ /'gro la phan phyir chos ni ston byed cing //sdug bsngal mang pos mnar ba'i sems can grol gyur cig /bsod nams la rjes su yi rang ba dang / yongs su bsngo ba'i cho ga'o/ /gang dang gang gis gang 'tsho ba/ /'tsho ba dag pa de rgyal ba/ /bkres dang skom sogs zhi bya'i phyir//sman bzhin du ni bsam par bya/ /zhes bya ba'i de'i rjes la ji ltar rnyed pa'i zas la/ oM a kA ro mu khaM sarba d+harmA NAM Ad+ya nut+pan na rwA ta/ oM AHhUM phaT swA hA/ zhes bya bas gtor ma sbyin par bya'o/ /de'i rjes la/ oM AHsarba bud+d+ha bo d+hi satwa b+h+yo badzra nai bi d+yai hUM zhes bya bas bshos gtsang dbul lo//oM ha ri ti ma hA yak+Shi ni ha ra ha ra sarba pA paM na k+Sha na swA hA/ zhes brjod la zan chang bu gnyis sbyin par bya'o/ /oM a gra pa Ni TA si b+h+yaHswA hA/ zhes bya bas ni zan gyi chang bu gsum pa sbyin par bya'o/ /de'i rjes la/ A+oM AH hUM zhes bya bas/rang gi snod kyi zan byin gyis brlab cing dug la sogs pa rnams zhi bar gyur gyi bar du dang po mthe bong dang srin lag gis bza' bar bya'o/ /de'i rjes la ji ltar bde bar bzod pa'i zas lhag ma la/ oM uts+tshiT ban+di a si b+h+yaHswA hA/ zhes bya bas lhag ma'i chang bu sbyin par bya'o//lhag ma gzhan byin gyis ma brlabs pa ni yongs su dor bar bya'o/ /de yang / gtor ma btang zhing bshos gtsang dbul/ /'phrog ma dang po chang bu dang / /lnga po lhag ma gtang ba ste/ /'bras bu longs spyod chen por 'gyur/ /zhes bstan pas so//de'i rjes la/ 'thor 'thung la sogs pa byas la/ /blo bde ba yongs su dag cing khyad par can gyi bde ba dang ldan pas/ sems can thams cad la phan pa dang bde bar bya ba'i phyir/ lan gsum gyi bar du 'di brjod par bya ste/ rgyal po dang ni yon bdag dang / / sems can phung po gzhan dag kyang / /tshe dang nad med phun sum tshogs/ /rtag tu bde ba thob gyur cig/ /ces bya'o/ /de'i rjes la/ /yongs su dag pa'i lus dang ngag dang yid kyi las ji ltar 'dod pas gnas par bya'o/ /de'i rjes la/ dge ba'i bshes gnyen bsten nas lhan cig spyod pa dang /skyes pa'i rabs sam/ gtam rgyud dam/ gleng gzhi 'am/ rtogs pa brjod pa'i gtam gyis nyin dang mtshan du yid shin tu gnas pas gnas par bya'o/ /de nas phyi dro'i dus su yang bzlas pa dang bstod pa la sogs pa ji lta ba bzhin du skye ba med pa'i yid kyis byas la/yi ge a la sogs pas gtor ma byin la rnal 'byor gyi gnyid kyis nyal bar bya'o/ /u sangs rgyas chos la rtag tu 'jug /nye bar zhi ba'i dge bsnyen te/ /sems can rnams la nye bar phan/ /thams cad nye bar phan gyur pas/ /rtag tu sdig pa spong bar byed//sdig pa can dang 'grogs pa spang / /skyes bu sdig pa spong bar byed/ /kun du sdig pa bshags byed pa'o/ /sgro btags thams cad u0f85rnam par grol/ /ting nge 'dzin la legs mnyam 'jog /kun du mchog tu dga' ba yis/ /mkhas pas rdzogs pa'i byang chub b sgrub//dus kun du ni 'bad med pas/ /snying rjes yongs su skyong ba nyid/ /sdug bsngal gyur kyang mi 'dod min/ /phan pa mchog ni byed par 'gyur/ /zhes bya ba'i tshig gis yi ge bzhi pa'i don dang ldan pa'i tshig gis bsnyen no/ /dge ba'i las ni yongs su byas/ / bsod nams tshogs ni nye bar bsags/ /goms pa'i dbang gis sad pa bzhin/ /dge ba rmi lam nyid na 'ang byed/ /'gro ba thams cad dri med pa'i/ /gzugs brnyan gzhan du mthong 'gyur na/ /thams cad smra ba'i skyes bu ltar/ /rjes su mi dmigs bzhin du byed//de lta bas na phyir mi ldog/ /zhes brjod do/ /de ltar nyin dang mtshan du rgyun mi 'chad par bsod nams kyi tshogs nye bar bsags pa byang chub kyi snying po'i bar du sems can la phan pa dang / bde bas yang dag par gnas so zhes bya ba yin no/ /dbu ma'i don la mchog gzhol ba/ / nam mkha' snying po zhes bya bas/ /dang po las la mnyam 'jog cing / /yi dam nyid du 'di byed pa/ /rdo rje gdan nas 'ongs 'gyur te/ /bram ze'i rigs la zhi ba'i sems/ /nam mkha'i snying por gsol btab bdag gis dang po'i las/ /cho ga'i tshig 'ga' tsam zhig bstan par byas pa 'dis//byang chub goms par byas nas myur du nyon mongs pa'i/ /sdig pa'i blo yi dri ma'i rab rib 'dis sel shog /dang po las pa'i chog 'dis/ /bdag gis bsod nams gang thob pa/ /dang po'i las can de dag dang / /'gro ba gnyis med thob par shog /slob dpon mkhas pa chen po nges par sbyangs pa gnyis su med pa'i rdo rjes mdzad pa lta ba ngan pa sel bzhes bya ba rdzogs so// //rgya gar gyi mkhan po bla ma badzra pA Ni'i zhal snga nas dang / bod kyi lo tsA ba mtshur ston ye shes 'byung gnas kyis bsgyur ba'o/