CLOSE WINDOW

D2226
བོད་ཡིག

bod kyi lo tsA ba rma ban chos 'bar gyis bsgyur cing zhus te gtan la phab pa'o/ / @##/ /rgya gar skad du/ pradz+nyA dz+nyA na pra kA saM/ bod skad du/ shes rab ye shes gsal ba/ bla ma dam pa la phyag 'tshal lo/ / gang zhig nyi ma'i 'od zer shar bas pad+ma zum pa'i nags rnams 'byed par byed pa bzhin/ /thams cad mkhyen pa'i bde ba ma lus 'dzin pa'i mdzes pa'i go 'phang skad cig nyid tsam gyis/ /skye ba nying mtshams sbyor ba'i 'ching ba gcod cing 'gro ba'i long tog skyon rnams sel bar byed pa gang //rgyal ba'i bka' lung dge ba'i bshes gnyen las 'ongs de yis rgyal ba'i 'gro ba rtag tu zhi bar shog /'jam pa'i rdo rje la sogs rgyal ba'i sras rnams kyis/ /shes rab phun tshogs rtogs pa'i lam ni su la yod/ /so so skye bo dman pa bdag 'dra'i blo gros la//ji srid dran par brjod pa 'di la bzod par 'os/ /ston pa dpal ldan ri khrod dbang phyug nyi ma 'char ka'i ri las rnyed de 'ongs pa'i lam/ /'di ni gsal byed rgyal ba can gyis bdag la mngon sum nyid du bstan/ /de ni dri ma med pa'i yid kyis 'di ru bshad kyis skye bo dad par byos//'dir ni gang yang lung dang rigs pas mi 'thad pa de mkhas pa rnams kyis spang bar gyis/ /phung po khams dang skye mched rnams/ /de dag yod med brtag pas stong / /shes rab ye shes nyid de bzhin/ /des na shes rab ye shes bshad/ / 'di ni bcom ldan 'das phul du byung ba dmigs pa med pa'i snying rje chen pos rnam pa thams cad kyi mchog dang ldan pa'i de bzhin nyid bla na med pa zhes bya ba/ gzhan gyi ming can rang bzhin med pa yin yang / sngon gyi smon lam gyi shugs kyis nus pas 'bad pa med par zung du 'jug pa/sems can thams cad la gcig tu phan pa'i sku legs par 'dzin pas bde ba chen po'i 'byor pa zab pa dang rgya chen po bstan yang / srid pa 'khrul pas 'khyams pa'i sems can mtha' yas pa la phan 'dogs pa'i bsam pas/ sems can mang po sgrol ba'i thabs sna tshogs dang ldan pa rnam pa sna tshogs pa'i bkas nyan thos dang rang sangs rgyas dang /theg pa chen po mtshungs par mdzad pas/ shin tu dang bas bla ma dang / sangs rgyas dang byang chub sems dpa' la bsnyen bkur byed pa'i tshangs par spyod pa can blo shin tu dag pa'i shes rab can/mdo sde dang / chos mngon pa dang / 'dul ba dang / skyes pa'i rabs rtogs pa legs par bcos pa'i blo gros can/ sbyangs shing dul bas mi dge ba'i las spangs pa/ dge ba'i las la gnas shing snying rje 'jug pa'i yid can/ 'khor ba la zhen pa la rgyab kyis phyogs pa'i slob pa'i phyir/ /dge ba'i bshes gnyen dam pa la brten pa'i rang bzhin gyis myur du bla na med pa yang dag par rdzogs pa'i byang chub thob par bya ba'i phyir dkyil 'khor du 'jug pa nas chu dang dbu rgyan la sogs pa sngon du 'gro bas/mchog tu gyur pa'i shes rab ye shes ston par mdzad do/ /'o na ci'i phyir 'di ston te/ 'dod chags la sogs pa 'khor bar yun ring du ngan 'gror 'khyam pa'i rgyu yin la/ de yang sems can rnams yun ring du zhen nas ya nga bar skye ba rmongs par gyur nas chags te sdang bar byed pa'i sdig pa mi dge ba'i las byed par gyur nas/dud 'gro dang / yi dwags dang / dmyal ba la sogs par sdug bsngal chen po nyams su myong bar 'gyur zhing / 'dod chags la sogs pa la sbyor ba de lta bu dug 'dzin pa dag la 'o ma blud pa bzhin du dug 'phel bar mthong ba ma yin nam zhe na/'di ni bden te dge ba'i bshes gnyen dang bral ba rnams 'dod chags la sogs pa de dag chags pa dang bcas nas gcig tu sdug bsngal bar 'gyur ro/ /de nyid kyi phyir na/ nyan thos dang rang sangs rgyas kyi theg pa la sogs pa mang po bstan pa yin no//gzhan yang shin tu 'dod chags dang bral ba rnams 'dod chags la sngangs pas de shin tu sdug bsngal bar byed de/ de dag gi don du 'dod chags par ma ston no/ /de yang / gang gis 'dod chags dang chags pa/ /slar yang the tshom za bar 'gyur/ /de dag 'dod chags spangs pa'i phyir//'dod chags bral yang reg mi bya/ /zhes gsungs pa dang / 'dod chags bral ba lta bu'i sdig /khams gsum na ni gzhan med do/ /de phyir 'dod la chags bral ba/ /khyod kyis nam yang mi bya'o/ /zhes bcom ldan 'das kyis gsungs so//gang la 'dod chags bral ba ma yin pa de dag la 'dod chags chen po bstan te/ de skad du yang / 'dod chags dga' zhig spyod de yul/ /'dod chags bral bas dga' spangs te/ /dri med blo yis rnal 'byor pas/ /mi len spang bar ru mi byed/ /ces gsungs so//dpal mda' bsnun gyi zhal snga nas kyang / kha cig yul rnams 'dor byed cing / /kha cig yul gyis 'ching bar byed/ /la la yul de nyid kyis ni/ /mi mchog byang chub thob par byed/ /ces gsungs so/ /de bas na 'dod chags can gyi sems can rnams 'dod chags bral ba la 'dzud/'dod chags bral ba rnams 'dod chags bar ma la'o/ /'dod chags bar ma rnams 'dod chags chen po la dgod do/ /de bas na sems can mchog tu gyur pa'i dbang du mdzad nas/ bla na med pa shin tu zab mo'i shes rab ye shes 'di bstan to//'dir yang bcom ldan 'das kyis/ dug gi dum bu gang zhig gis/ /skye bo thams cad 'ching 'gyur ba/ /dug gi de nyid shes gyur na/ /dug gis de nyid sel bar byed/ /ces gsungs so/ /gzhan nas kyang 'dod chags ni byang chub kyi yan lag go//zhe sdang ni byang chub kyi yan lag go zhes bya ba la sogs pa 'byung ngo / /ye shes grub pa las kyang / dper na bcud kyis phug pa'i zangs/ /mdzes pa'i gser du 'gyur ba bzhin/ /ye shes bcud kyis phug pas na/ /nyon mongs dge bar byed pa yin/ / zhes gsungs so/ /des na phung po lnga ste/ gzugs dang / tshor ba dang / 'du shes dang / 'du byed dang / rnam par shes pa zhes bya ba yin la/ rnam par snang mdzad dang / rin chen 'byung ldan dang / snang ba mtha' yas dang / don yod grub pa dang / mi bskyod pa rnam par dag pa'o/ /skye mched bcu gnyis ni/ dbang po drug dang / yul drug go/ /khams bco brgyad ni/ mig gi khams dang / mig gi rnam par shes pa'i khams dang / de bzhin du rna ba'i rnam par shes pa'i khams la sogs pa yang shes par bya'o//'byung ba chen po bzhi ni/ sa'i khams dang / chu'i khams dang / me'i khams dang / rlung gi khams te rang gi mtshan nyid 'dzin pa'i phyir khams so/ /yod pa dang med pa'i rtogs pas stong pa'i phyir/ mtha' bzhi dang bral ba ste/ ma skyes pa dang / mi 'dzin pa dang /rang bzhin med pa shes pa la shes rab ces brjod do/ /de yang / gang zhig rkyen las skyes pa de ma skyes/ /de la skye ba'i rang bzhin yod ma yin/ /rkyen la rag las gang de stong pa nyid/ /gang gis stong nyid shes de bag yod yin/ /zhes gsungs pa dang /de kho na nyid la 'jug pa las kyang / gang zhig spros bcas kun gyi yul min pas/ /de ni ngag gi yul yang ma yin no/ /rdo rje 'dzin pas rigs pa de nyid la/ /shes rab ces byar yongs su bsgrags pa yin/ /zhes gsungs so/ /de nyid kyi phyir rten cing 'brel par 'byung ba'i sems sna tshogs pa bde ba chen po rang rig pa tsam ste/dmigs pa med pa'i snying rje chen po zhes bya ba ming gzhan pa can gyi ye shes yin no/ /shes rab kyang de yin la/ ye shes kyang de yin pas tshig bsdus pa'o/ /bla ma dam pa'i zhal snga nas kyang / mkhas pa kun rtog spangs nas ni/ /rnam kun bde ba'i de nyid min/ /stong nyid bde ba'i de nyid min/ /bsam mi khyab min bde ba min/ /zhes gsungs pa dang / rnam pa mngon sum byang chub ste/ /bsam pa med pa'i blo chen po/ /gzhan yin na ni long bar 'gyur/ /gzhan ma yin na bems por 'gyur/ / zhes gsungs so/ /bcom ldan 'das kyis kyang / /'byung ba che las byung bde ba/ /bde ba de nyid kho na min/ /zhes gsungs pa dang / gzhan yang / bde ba dkar po bde bar gnas/ /kun du ru skyes bde ba dran/ /bde ba dngos po dngos med pa'o/ /zhes bya ba la sogs pa rgyas par gsungs so//de nyid rnam pa thams cad kyi mchog dang ldan pa'i stong pa dang / bcom ldan 'das ma shes rab kyi pha rol tu phyin pa ste/ lam gyi yan lag ma'i gzugs kyis thams cad du gnas pa yin no/ /de skad du yang / kun du thar pa 'dod pa yis//don dam dag la gang gnas pa/ /kun rdzob kyi ni lus 'dzin pa'i/ /shes rab pha rol phyin pa'o/ /zhes gsungs pa dang / e yi cha byad bzang po gang / /dbus su waM gis rnam par brgyan/ /bde ba kun gyi gnas yin te/ /sangs rgyas dkon mchog zam tog /ces bcom ldan 'das kyis gsungs pa'i phyir/ 'di ni yang dag rdzogs pa'i byang chub kyi sgrub pa'i thabs dam pa dang por bya ba yin pas dogs pa med pa'i yid kyis 'gro ba thams cad 'don pa'i bsam pas snying rje chen po'i ros chags pa bde ba yang dag pa'i dbang bskur zhing rjes su gnas pa dang /ji skad gsungs pa'i shes rab dam tshig can man ngag ji lta ba bzhin brtan par bya'o/ /de skad du yang / thabs gzhan gyis ni sangs rgyas min/ /'gro ba gsum ni dag par nyid/ /de phyir yid kyis bral ba ru/ /khyod kyis nam yang mi bya'o//zhes gsungs pa dang / 'di de sangs rgyas thams cad kyi/ /rig pa'i brtul zhugs bla na med/ /rmongs pa gang zhig 'da' byed na/ /de la mchog gi dngos grub med/ /ces gsungs so/ /'o na 'di ji ltar 'thad par 'gyur te/ /las kyi phyag rgya khro rgyu can//sdig ldan g.yon ma 'jigs rung ma/ /thag ring yongs su spang bar bya/ /gzhan yang a ra li las kyang / /mi yi bud med 'jigs tshul can/ /de yi ye shes 'jig par nges/ /zhes gsungs pa dang / ye shes grub pa las kyang / dbang gnyis byung ba'i bde ba ni//de nyid yin zhes skye ngan smra/ /de yang bde ba chen po ru/ /rgyal ba mchog gis ma gsungs so/ /zhes bya ba la sogs pa gsungs pas/ las kyi phyag rgya ni lhan cig skyes pa'i rang bzhin ma yin pas spang bar bya ba'i phyir ro zhe na/ bden te las kyi phyag rgya bcos ma yin pa'i phyir ro/ /'di ltar las ni bya ba ste lus dang ngag dang sems kyi bsam pa'i mtshan nyid can te/ des mtshon pa'i phyag rgya brtag pa'i phyir ngo bo nyid la las kyi phyag rgya zhes brjod de/ chos kyi phyag rgya ni bcos pa ma yin pa'i phyir/ mtshan nyid tha mi dad pas tha dad pa ma yin no//phyag rgya chen po rang bzhin med par rtogs pa'i mtshan nyid can te de ni ma bcos pa'o/ /de ni bcos ma'i shes rab ye shes tsam gyis chu rgyun bzhin du rgyun mi 'chad pa'i bde ba chen po'i ngo bo nyid rnam pa thams cad du bla na med pa'i de bzhin nyid kyi de kho na nyid 'jig pa med pa thams cad mkhyen pa'i ye shes skye ba ma yin pa kho na'o//de nyid kyi phyir klu sgrub kyi zhal snga nas kyang / rgyu mthun pa'i 'bras bur bstan to/ /lhan cig skyes pa bstan pa yang lhan cig skyes pa'i grib ma'i rjes su byed pa'i phyir ro/ / de yang kho bo'i bla ma'i zhal snga nas kyang / phyag rgya chen po mi shes par/ /las kyi phyag rgya gcig sgrub pa/ /de nyid brgyud pa las nyams nas/ /rnal 'byor pa de du 'bod 'gro/ /zhes gsungs so/ /'o na ji ltar/ thabs gzhan gyis ni 'tshang mi rgya/ /zhes las kyi phyag rgya 'di nyid las gdon mi za bar sangs rgyas dkon mchog gi za ma tog tu bstan zhe na/de ni mi 'thad pa ma yin te/ chags pa chen po zhes bya ba ni/ phyag rgya chen po bde ba mtha' yas pa'i rang bzhin dngos po thams cad kyi ngo bo nyid chags pa chen po ste/ stong pa dang snying rje gnyis zung du 'jug pa'i ngo bo nyid 'dod chags nyid la 'dod chags nyid gsal ba rab kyi mthar thug pa nyid la bde zhing chags pa ste/de yang las kyi phyag rgya ma gtogs par nyams su mi myong bas mngon sum bstan par mi nus la/ chen po rab kyi mthar phyin pa yang goms pa dang / bla ma dam pa'i man ngag gis thob par 'gyur ba'i phyir/dang po las kyi phyag rgya bstan pa la 'gal ba med do/ /bla ma dam pa'i man ngag 'di yang / las kyi phyag rgya legs bsgrubs nas/ /chos kyi phyag rgya rnam par bsgom/ /de'i steng phyag rgya chen po ste/ /gang las dam tshig 'byung ba'o//zhes gsungs so/ /dga' ba tsam pa de la rgyu mthun pa'i 'bras bu dang / de ltar slob dpon gyis phyag rgya bzhir gang zhig gsungs pa dang / rnam par smin pa dang dri ma med pa'i 'bras bu dang / de nas rim gyis skyes bu byed par 'gyur ro/ /bla ma dam pas kyang / las kyi phyag rgya rnams sna tshogs/ /rnam smin las byung chos phyag rgya/ /mtshan nyid bral ba phyag rgya che/ /rnam nyid dam tshig phyag rgya yin/ /zhes bya ba gsungs so/ /de la phyag rgya chen po ma gtogs pa'i phyag rgya re re la dga' ba bzhi bzhi 'byung ba'i phyir/ las kyi phyag rgya yan lag ma dang dga' ba bzhi dang /skad cig ma bzhi'i grangs gzhan man ngag gis rtogs par bya'o/ /sna tshogs pas ni mgrin sna tshogs/ /nor bu'i nang du bde smin pa/ /bla mar de nyid shes par bya'o/ /dga' bral rnam pa nyed pa'o/ /zhes gsungs pa dang /gsung rab las kyang / 'khyud dang 'o byed la sogs pa/ /rnam pa sna tshogs du ma brjod/ /rnam smin de las bzlog pa ste/ /bde ba'i ye shes spyod pa'o/ /bdag ni bde ba spyod do zhes/ /rnam par nyed pa spyod par bshad//ces gsungs so/ /de lta bas na mchog dga' dang dga' bral gyi dbus na gnas pa/ btsan thabs pa'i dbang dang log pa'i dbang spangs pa/ 'dod chags dang 'dod chags bral bas dben pa'i stong pa nyid dang / snying rje dbyer med pa'i lhan cig skyes pa de bla ma dam pa'i zhal nas nyams su myong ba bas khong du chud par bya'o//de lta bu las gzhan du su zhig gis rtogs par nus te/ 'di ltar chos thams cad rang bzhin med par ni grub par bya'o/ /de yang gzugs stong pa'o/ /stong pa nyid gzugs so/ /de bzhin du tshor ba dang zhes bya ba la sogs pa'i lung dang //gang zhig rten cing 'brel 'byung ba/ /de yis rang bzhin skye ba med/ /gang zhig ngo bo ma skyes pa/ /de la skyes zhes ji ltar bya/ /zhes bya ba la sogs pa dang / tshad ma'i tshig gsungs pa ni/ gang dang gang ci 'byung ba'i shes pa de ni rang bzhin med pa'o//de lta bas na chos thams cad ngo bo nyid kyis yongs su dag pa yin gyi/ las kyi phyag rgya 'ba' zhig ni ma yin no/ /de ni de bzhin gshegs pa'i dag pa sngon du 'gro ba shes rab kyi yan lag ma'i ye shes bstan pas cho ga tshig tu ma spros pas ci dgos/ de nas yang pha rol tu phyin pa'i theg pa pa rnams kyi grub mtha' ni 'di yin te/gang dag bskal pa grangs med pas rdzogs pa'i sangs rgyas su 'gyur ro/ /sngags kyi tshul gyis ni tshe 'di la sangs rgyas sam rdo rje sems dpar 'gyur ro zhes rtogs pa rnams yan lag bdun dang ldan pa'i bsgrub byar 'dod de/longs spyod rdzogs la kha sbyor bde chen rang bzhin med pa dang / /snying rje des gang rgyun mi 'chad dang 'gog pa med pa ste/ /yan lag bdun dang ldan pa 'di ni bdag gis bsgrub byar 'dod/ /tshad mar blo sbyongs pa yis 'di dag rab tu bsngags pa yin//zhes gsungs pa yin no/ /de yang las kyi phyag rgya yan lag med par nyams su myong bar shes par nus pa ma yin no zhe na/ 'di yang mdzes pa ma yin te/ phyi rol gyi phyag rgya ni rgyu mthun pa'i 'bras bur brjod kyi/ de ni de kho na nyid ma yin no/ /yan lag bdun dang ldan pa stong pa nyid dang /snying rje dbyer med pa'i ye shes la 'thad par 'gyur te/ 'di ltar longs spyod rdzogs pa ste nyams su myong ba rten cing 'brel bar 'byang ba las rnam pa thams cad du snang ba yin no/ /kha sbyor ni stong pa nyid dang snying rje dbyer med par yang dag par sbyor ba'i phyir ro//bde ba chen po ni yod pa dang med pa la sogs pa'i rtog pa thams cad spangs pa'i phyir ro/ /rang bzhin med pa ni skye ba med pa'o/ /snying rjes nges pa gang ni snying rje chen po'i bdag nyid yin pa'i phyir ro/ /rgyun mi 'chad pa ni rgyun gyi rtag pa yin pa'i phyir ro/ / 'gag pa med pa ni chad pa med pa'i phyir ro/ /las kyi yan lag ma'i ye shes la ni khyad par can du gyur pa de dag yod pa ma yin no/ /gang yang tshe 'di nyid kyis sangs rgyas nyid dam rdo rje 'chang nyid du 'gyur ro zhes gsungs pa gang yin pa de yang bus pa'i tshig bzhin du snang bar 'gyur te/'di ltar bsnyems pas kho bo ni rdo rje sems dpa'o zhes smras pa 'di rang nyid kyis rang la sems dang ldan pa rnams ci ste smod par byed/ dper na shin tu blun po dag kho bo ni rgyal po'o zhes smra ba bzhin/ rgyal po ma yin pa gcig pur ma zad kyi rlung can du yang smras pa ma yin nam/de'i phyir pha rol tu phyin pa'i theg pa las sngags la khyad par ma mthong ngo / /'di skad du brjod pa de yang ma yin te/ don gcig na yang ma rmongs dang / /thabs mong dka' ba med pa dang / /dbang po rnon po'i dbang byas pas/ /sngags kyi bstan bcos khyad par 'phags//zhes gsungs pa de yang / chos rnams thams cad nyid kyi ni/ /dag pa de bzhin nyid du 'dod/ /ces sngags kyi theg pa las gsungs pa'i phyir/ gnyis kas de bzhin sgrub par byed pas don gcig pa ni bden pa kho na ste ma rmongs pa'i gtan tshigs pha rol tu phyin pa la yang mtshungs pa'i phyir khyad par ci yod//'dir rmongs pa'i skyes bu'i skyon yin nam/ 'on te theg pa 'di'i skyon yin/ de la re zhig rang bzhin med par byed pa'i mtshan nyid can gyis theg pa la ni rmongs pa yod pa ma yin te gnyis ka la thal bar mtshungs pa'i phyir ro//skyes bu don la mos pa'i rmongs pa yin no zhe na/ de ltar 'dra mod kyi sngags kyi theg pa la yang skyes bu'i rmongs pa snang ba yin no/ /thabs mang ba nyid kyang 'khor gsum mi dmigs pa'i sbyin pa'i pha rol tu phyin pa la sogs pa'i thabs dang /kun brtags dang / gzhan dbang dang / yongs su grub pa ste/ mtshan nyid gsum bsgom pas kyang de bzhin nyid mthong bar 'gyur ba'i phyir ro/ /dga' ba la sogs pa'i thabs khyad par kho na yod pas na chags pa la 'jug pa tsam gyis ni rigs pa ma yin te/shes rab kyi pha rol tu phyin pa'i thabs mkhas pas zin pa'i byang chub sems dpa' sems dpa' chen po rnams myur du bla na med pa yang dag par rdzogs pa'i byang chub tu mngon par rdzogs par 'tshang rgya bar 'gyur ro zhes gsungs pa'i phyir ro//dka' ba med pa yang gnyi ga la mtshungs te/ 'di ltar yang gang dag sngon po dang ser po la sogs pa'i dngos po thams cad ngo bo nyid kyis rnam par dag pa rtogs pa'i phyir/ /de dag la dka' ba zhes bya ba ci zhig yod/ dbang po rnon bos dbang byas pa yang mtshungs pa nyid do//gang gi phyir chos thams cad rkyen las skyes pa ni ngo bo nyid kyis ma skyes shing mi 'gag pa'i phyir ro/ /dbang po rnon po nyid kyis mos pa byed kyi/ dman pa dag gis ni ma yin no/ /gzhan yang rang rang gi ngo bo nyid las rnam par dpyad na pha rol tu phyin pa'i bstan bcos kho na nges pa'i don yin pa'i phyir lhag par 'gyur ba ste/drang ba'i don ni gzhan dag yin no/ /dper na gtsub stan dang / gtsub shing la sogs pa las me byung ba'am/ pi wang las sgra byung ba bzhin du gzugs rnam par snang mdzad de/de yang mi bskyod pa'i ming can gyi rnam par shes pas rgyas btab pa'i ngo bo nyid yin pa'i phyir spros pa tsam ste/ yang dag par sna tshogs nyams su myong ba tsam gzod ma nas 'od gsal bsgrub par bya'o/ /'di ha cang spros pa la dga' bas bsdus pas chog gi/ / bkrus pa nyid bkru dgos pa'i las kyi phyag rgya nyid dgos pa med par 'gyur te/ de yang / mgon pos 'dir ni brjod med dam/ /rgyab ces bya ba su yis bstan/ /dbu gtsug g.yas su 'khyil pa yang / /lag pa bkyigs pas ston byed dam/ /zhes gsungs pa lta bu'o/ / gzhan yang gang las kyi phyag rgya'i bde ba 'dod pa de dag ni nyi tshe ba'i rnam par dag pa ste/ phung po dang khams dang skye mched kyi rang bzhin can gyi shes rab kyis sbyang bar bya'o/ /de dngos su dngos po thams cad rnam par dag pa nyid ci'i phyir goms par mi byed/ 'on te 'dod chags chen po'i theg pa 'dir/'dod pa'i yon tan lnga la longs spyod pas zag pa med pa'i bde ba'i rnam pa rdzogs pa'i sangs rgyas 'grub par 'gyur te/ dbang po gnyis kyi sbyor ba yis/ /bde ba chen po rab sgrub phyir/ /sangs rgyas byang chub go 'phang mchog /bla med 'di ni 'grub par 'gyur//zhes gsungs na/ pha rol tu phyin pa'i theg pa las kyang shin tu 'jigs pa'i tshul gyis 'dod pa lnga la longs spyad par bya'o zhes gsungs pa'i phyir ro/ /'jigs shing skrag pa'i bde bas byang chub 'thob par byed pa ma yin no zhe na de yang mdzes pa ma yin te/ sems can ni dman pa dang /'bring dang rab kyi dbye ba rnam pa gsum yin no/ /de la dman pa dang 'bring la 'di dag bstan pa yin gyi/ rab dmigs pa med pa la spyod pa rnams kyis ni 'phags pa chos 'phags bzhin bag tsha ba med par bud med stong phrag drug cu rtsa brgyad dang lhan cig tu 'dod pa'i longs spyod lnga rnams la rol pas 'dod pa'i yon tan lnga la longs spyod pas spangs pa ma yin pa'i phyir ro//gzhan yang de bzhin gshegs pa'i sku ni chos kyi dbyings la yang dag par byung bar bstan la/ de yang / 'dod chags dang bral bar 'gyur ba ma yin zhing //bde ba dang sdug bsngal zhes bya ba ni/ ma rig pas yid bslad ba rnams 'di ltar mngon par zhen pa/ de ltar yang skad cig gam thang cig gis bya ba myur du nyams par 'gyur te/ gsal bar byed pa'i zla bas bde ba byed pa de dag kyang skar mdas kyang gdung bar byed pa bzhin du kho bo cag ni bred pa yang med la dga' ba yang med de/de bas gnyis ka nyams par 'gyur bas grang ba yang med cing dro ba yang med do/ /don dam pa kun du rtog pa med pa'i phyir ro/ /'o na bsgrub bya'i rang bzhin gang yin zhe na/ dbang po gnyis kyi sbyor ba ni/ 'dod chags can 'dul ba'i don du bcom ldan 'das kyis bstan te/ de bas na pha rol tu phyin pa ni theg pa nyid kyi don du gzung bar bya'o/ /las kyi phyag rgya dang bral na/ /phyag rgya chen po yod ma yin/ /rang gi tshig la nyams dga' ba/ /rtog ldan gus par mi 'os te/ /las kyi phyag rgya la sogs kyang //med na phyag rgya chen po min/ /zhes gsungs so/ /de bas na las kyi phyag la sogs pa'i sgom pa yang gzod ma nas dag pa nyid de rgyu dang 'bras bu'i bye brag de sems can 'jug pa'i phyir brjod kyi/ phyag rgya chen po'i bye brag gis/ / las kyi phyag rgya la sogs gnas/ /phyag rgya chen po ma gtogs par/ /nam yang las la sogs pa med/ /de kho na nyid la 'jug pa las kyang / las kyi phyag rgya sogs bsgom pa/ /phyi ma phyi ma mchog yin te/ /de phyir snga ma spang bar bya/ /bla ma dam pa 'di ltar gnas//zhes bstan pa dang / de kho na dam pa zhes bshad do/ /chad pa ma yin nam zhe na/ /de dag ni rig pa ma yin te/ rkyen las skyes pa rten 'brel nyid ni skye ba med pa ste/ de yang / gang zhig rten cing 'brel 'byung ba/ /de nyid rang bzhin med par 'dod/ /de lta bu ni dam chos te//de bzhin gshegs pa de dang mtshungs/ /zhes gsungs pa dang / gzhan yang gang zhig rten cing 'brel pa mthong ba de ni chos mthong ba ste/ gang gi chos mthong ba de bla na med pa'i sangs rgyas kyi sku mthong bar 'gyur ro zhes gsungs pa dang / tshangs pa khyad par sems kyis zhus pa theg pa chen po'i mdo las kyang /gang gis rten cing 'byung ba shes/ /des ni chos nyid 'di rtogs la/ /gang gis chos nyid shes pa ni/ /de yis stong nyid de rtogs so/ /gang gis stong par shes gyur pa/ /de dag 'dren par mthong ba yin/ /zhes gsungs so//rten cing 'brel pa de yang nyams su myong ba ste/ /mtha' yas bde ba'i rang bzhin gyi/ /bde ba chen po'i bdag nyid do/ /de yang yan lag med pa'i rdo rje'i zhal snga nas kyang / mtha' yas bde ba'i ngo bo'i phyir/ /dpal ldan bde mchog ces bya'o//zhes gsungs so/ /sngon po dang ser po la sogs pa'i rnam pa ma lus pa rnam pa sna tshogs pa ni/ rmi lam dang dri za'i grong khyer bzhin snang ba yin gyi rtag pa ni ma yin te/ dngos po med pa'i phyir ro/ /de skad du yang / rten cing 'brel par 'byung ba nyid/ / dri za'i grong khyer bzhin du gsal/ /sna tshogs rang bzhin gyis mi gnas/ /nam mkha'i me tog lta bu'ang min/ /zhes gsungs so/ /de lta bas na lhun gyis grub pa zung du 'jug pa gnyis su med pa'i rgyu ni rten cing 'brel par 'byung ba sna tshogs pa ni/ bde ba chen po nyams su myong ba ste/gzod ma nyid nas rang bzhin med pa nyid du bsgrub par bya'o/ /de nyid kyi phyir/ gang yang rten cing 'brel 'byung ba/ /sna tshogs sems ni gnyis su med/ /tha dad stong la sems sna tshogs/ /chos dang longs spyod sprul pa nyid/ /ces gsungs so/ /de la gang zhig gis stong pa nyid 'ba' zhig gam/chad pa'i rang bzhin nam/ rten cing 'brel par 'byung ba dang stong ba tha mi dad pa'am/ rnam pa med pa'am/ rnam bcas sam/ btang snyoms kyi rnam pa can gyis sgom par byed ba de dag gis ni nam yang bde ba chen po'i ngo bo nyid grub pa ma yin te/dbang po gnyis snyoms par 'jug pa med par bde ba'i rnam pa can nyid mi rtogs pa'i phyir ro/ /de med par ni bde ba chen po'i ngo bo nyid can gyi longs spyod pa'i sku 'grub par mi 'gyur ba nyid de/ /'di ltar gang rgya mtsho'i chu rlabs bzhin du phung po dang / khams dang skye mched kyi bye brag thabs dang shes rab bsgom pa rtog pa med pa'i bdag nyid chen po'i bde ba'i ye shes rtogs pas de bsgom par bya ste/sgom pa rab kyi mthar phyin na dngos po thams cad kyi ngo bo nyid du gyur pa'i bde ba chen por 'gyur gyi/ gnyen po bsgoms pas ni ma yin no/ / de'i phyir las kyi phyag rgya la sogs pa'i ye shes bsgoms pas bde ba chen po'i ngo bo nyid kyi yang dag par rdzogs pa'i sangs rgyas 'grub par 'gyur gyi/ rtog pa thams cad spangs pas bde ba cung zad tsam yang nyams su myong ba ma yin no/ /de bas na rgyu dang mthun pa'i 'bras bu mthong ba'i phyir ro//gzhan yang bde ba'i ngo bo nyid yin du chug na yang / rnam par mi rtog pa ni 'dod pa'i yon tan lnga la bag tsha bas gnyen po dang / de kho na nyid dang 'bras bu'i rgyu mtshan rtogs pa ji ltar 'grub par 'gyur/ de yang / gnyen po'i phyogs la mi gnas shing / / de nyid la yang ma zhen gang / /'bras bu la ni srid min par/ /phyag rgya chen po de yis mthong / /zhes gsungs pas/ de ni gdon mi za bar yid brtan pa'am/ g.yo bar 'gyur yang 'dod pa'i yon tan lnga la dogs pa med par brten par bya ste/ de nas nyon mongs pa yang ngo bo nyid kyis yongs su dag pa'o snyam du sems pas/nyon mongs pa'i 'ching ba'i 'jigs pa med do/ /'di ltar/ byang chub nyon mongs las gzhan min/ /nyon mongs byang chub las mi 'byung / /'khrul pas nyon mongs rtogs pa ste/ / 'khrul pas ngo bo dri ma med/ /ces gsungs pa dang / de lta bu la ni nyon mongs pa'i glags skabs med de/ rnal 'byor gyi kun rdzob kyis so so'i skye bo'i kun rdzob la gnod pa'i phyir ro/ /dge ba ni rtag tu goms pas sems can gyi don du byang chub sems bskyed pa nyid kyis yid bzhin du sems can thams cad kyi mngon par 'dod pa'i don la 'jug par byed pas na nyams par mi 'gyur ro//gzhan yang rang bzhin med pa la mos kyang / gal te 'jigs shing bag tsha ba 'byung na yang / de'i tshe ji bzhin pa'i don rtogs par mi bya ste/ de yang / nyan thos rnal 'byor skom pas gdungs/ /rkyen rtog lus la zon dang ldan/ /theg pa chen po 'jigs shing skrag /nyon mongs lnga dag sngags kyi tshul/ /zhes gsungs so/ /de'i phyir pha rol tu phyin pa'i lugs la de lta de ltar brjod na yang / las kyi phyag rgya la sogs pa med par de lta bur gyur pa rtog pa dang bral ba/yan lag bdun dang ldan pa'i sangs rgyas mngon sum du byed pa ma yin no/ /gzhan yang e ma'o skye bo 'di dag ni phyin ci log gis bcom pas rang gi bdag nyid mya ngan las 'das pa'i ngo bo nyid kyi lha'i rang bzhin ma rtogs pa dang / rab rib can bzhin mngon pa'i nga rgyal can dang / ji bzhin pa'i lha'i nga rgyal can shing thun rnams dang brtsad par mi rigs kyi snying rje bar 'os so/ /de nyid kyi phyir byang chub sems dpa' rnams ni/ sems can gti mug chen po'i rab rib kyis bcom pa rnams la rnam par gzigs nas snying rje chen po'i thugs skyes te//stong pa sna tshogs gzugs 'di ni/ /sems can don ni byed pa'o/ /rang gi lus ni lha rnams yin/ /'di lta bu ni cis mi 'dod/ /'gro rnams rgyal ba'i bdag nyid ma yin nam/ /rang nyid ngo bo nyid kyis dri ma med pa ste/ /'on kyang shin tu byis pa'i tshul can te//'dir seng ge phru gu dogs pa chung bas rang gi mthu stobs mi shes na yang / gzhan pha rol gzhom pa'i nus pa yod pa bzhin/ skye bo zhal gcig la lag pa gnyis dang ldan pa la sogs pa'i tshul gyi/ so so'i skye bo thang chad pa ma yin te/ phyag gnyis pa rdo rje can yang ma yin no//blang zhing dor ba cung zad ma yin te/ /byad kyi rang bzhin legs mthong byang chub yin/ /de ltar bskyed pa'i rim pa dang mi 'gal bar rang byin gyis brlab pa bsgoms nas/ sna tshogs nyid lha'i bdag nyid kyi dkyil 'khor 'khor los lhan cig skyes pa grub pa yin/de skad du yang / klu sgrub kyi zhal snga nas kyang / 'di ni gzhal yas khang yin khams gsum po min yul min dbang po 'byung ba bas min/ /gzugs la sogs pa ma yin srog chags min zhing mi min 'di ni rgyal ba ste/ /'khor lo gtso bo chos nyid bdag nyid yin te des ni dkyil 'khor ma yin la//khams gsum po 'di sna tshogs 'khor lor shes na sems ni ci ste 'khrul par byed/ /ces gsungs la/ dgyes pa'i rdo rje las kyang / sngags bzlas med cing dka' thub med de sbyin sreg med/ /dkyil 'khor pa med dkyil 'khor nyid kyang med//de ni sngags bzlas dka' thub sbyin sreg de/ /de nyid dkyil 'khor ba dang dkyil 'khor nyid/ /mdor bsdus sems su 'dus pa'i tshul can no/ /zhes gsungs pa dang / gzhan nas kyang / yan lag kun bsgom las 'das shing / / rtog dang brtag pa rnam par spangs/ /gug skyed thig le las 'das pa/ /'di ni dkyil 'khor dam pa yin/ /zhes gsungs so/ /de nyid bsgom pa yis ni gang 'di 'bad pa med par rten cing 'brel par 'byung ba la sogs par bya ste/ mnyam par bzhag pa dang mnyam par ma bzhag pa las langs pa las kyang 'gro ba shin tu rnam par dag pa phyin ci ma log par lta ba yin no//de yang yan lag med pa'i rdo rje'i zhal snga nas/ gang la sgom pa po med cing / rnam par bsgom pa ci yang med/ /bsgom bya nyid kyang yod min pa//de ni de nyid bsgom par bshad/ /ces gsungs so/ /bcom ldan 'das kyis lang kar gshegs pa las kyang / sems pa bsam gtan bsam bya dang / /spro dang bden pa mthong ba dang / /'di dag rtog pa tsam nyid de/ /gang gis shes pa de grol 'gyur/ / zhes gsungs pa dang / dpal gsang ba 'dus pa'i rgyud las kyang / sgom du med pa bsgom pa des/ /sgom pa nyid ni sgom pa min/ /de ltar dngos po dngos med pas/ /sgom pa dmigs su med pa'o/ /zhes gsungs so/ /de bas na/ dgos med spyod pa bsam gtan te//yod dang med ces mi brjod do/ /rtag tu shar ba'i ro de bzhin/ /rten cing 'brel bar 'byung ba'i phyir/ /zhes gsungs so/ /de nyid tshor bas yod pa ru/ /'du shes can la bsam gtan brjod/ /goms pa las gzhan bsam gtan med//de phyir bsam gtan 'bad par bya/ /des na las kyi phyag rgya ma gtogs par skye ba med par mngon sum du byed pa gtan med pa zhig ste/ de'i rgyu mthun par bstan pa yang mi nus pa'i phyir/ pha rol tu phyin pa'i theg pa nye bar bstan pas de ltar brjod kyang bsam pa rdzogs par mi 'gyur ro//'di ltar mngon du de mthong dang / mthong dang thos dang de bzhin du/ /smra ba'i tshul la khyad med kyang / /snga ma'i 'dod pa zad pa yin/ /de kho na nyid de yang rgyal ba'i dbang pos pha rol tu phyin pa'i tshul du lung dang / rigs pa dag gis gsungs pa'i phyir ro//'o na rang rig pa'i sgrub pa'i thabs kyi de kho na nyid ni/ sngags kyi tshul las mngon du byed pa ma yin nam/ de nyid kyi phyir don gcig yin na yang bcom ldan 'das kyis rgyu'i bstan bcos zhes pha rol tu phyin pa'i theg pa logs su bstan to/ /rdo rje theg pa 'di ni 'bras bu'i bstan bcos te 'bras bu ston pa'i phyir ro//smra mkhas pas gnyi ga la rmongs pa 'byung ngo zhes zer ba de yang / gang gi phyir dug gi de nyid shes pas dug dang bsres te bza' ba dang / sbrul gyi rgyan cha byed pa dang kha cig dug gis mi tshugs pa bzhin no/ /don dam pa de rtogs pa las gzhan med do snyam pa'i yid can rmongs par mi 'gyur ro//de bzhin du lung dang rigs pa dag gis dug ces bya ba 'di ni ci yang med pa yin yang don ma yin pa'i som nyi yod pa'i phyir 'jug par mi 'gyur ro/ /ma rig pa'i dug zhi bar byed pa'i sngags dang bcas pa'i gnyen po med pas/dug gi rdul myang nas de las gzhan du 'joms par mi byed do zhes brjod par mi nus so/ /gang yang pha rol tu phyin pa goms pa la kun du brtags pa dang / gzhan gyi dbang dang / yongs su grub pa ste/ mtshan nyid gsum sgom pa'i thabs kyis thabs mang po mtshungs so zer ba yang brtags na tshul ngan pa nyid de/dper na dmus long la gzugs dmigs pa'i nyams su myong bas stong pa la/ mig dang ldan pas phan par bstan par 'dod nas gzugs de'i rang bzhin 'di lta bu zhes blo bzod de/ thos pa la sogs pa'i sgo nas mos pas bsgoms kyang myur du gzugs mngon du mi byed do//de bzhin du pha rol tu phyin pas kyang gang dag rnam pa sna tshogs pa la sogs pa'i skad cig ma bzhi dang ldan pa'i dga' ba bzhi nyams su myong ba dang bral ba'i phyir/ mtshan nyid dang bral ba'i skad cig ma mngon du ma gyur pas/lhan cig skyes pa'i ngo bo nyid ma shes par mngon par byang chub pa chen po mngon sum du byed par mi nus kyi/ sngags kyi theg pa ni de bzhin gshegs pa'i rnam par dag pas so so skye bo'i bag chags dang bral ba'i phyir ro/ /lha'i nga rgyal dang ldan pa'i rnal 'byor dam tshig thams cad la spyad pas ro mnyam pa mngon du byas nas/phyag rgya bzhi la sogs pa'i sgrub thabs kyi yan lag bdun dang ldan pa'i yang dag par rdzogs pa'i sangs rgyas rang rig pa'i mngon sum du tshe 'di nyid la mngon du byed pa'i phyir/las kyi phyag rgya la sogs pa'i bdag byin gyis brlab pa ni thabs mang ba'o/ /bcom ldan 'das kyis kyang / thabs gzhan gyis ni sangs mi rgya/ /zhes gsungs so/ /gsang ba'i mdzod kyi mdo las kyang / /rdo rje sems dpa' nyon cig dang / / gsang sngags kyi theg pa mchog gis dbang bskur ba gsang ba chen po 'dis sangs rgyas thob par nus kyi/ theg pa gzhan gyis ni bskal pa grangs med pa bye bas kyang sangs rgyas thob par mi 'gyur ro zhes gsungs so/ /sangs rgyas thams cad mnyam par sbyor ba'i rgyud las kyang /bskal pa bye ba grangs med kyis/ /sangs rgyas kun dngos mi thob ste/ /phyag rgya 'di yi cho ga yis/ /tshe 'di nyid la thob par 'gyur/ /zhes gsungs te/ de'i dgongs pa ni 'di yin te/ gzhan gang gis kyang sangs rgyas tsam las yang dag par rdzogs pa'i sangs rgyas thob pa ma yin te/phyag rgya chen po bde ba'i ngo bo nyid kyi kha sbyor med pa'i phyir te/ 'jam dpal la sogs pa'i byang chub sems dpa' chen po rnams ye shes kyi ros longs spyod rdzogs par 'gyur ba'i longs spyod rdzogs pa'i sku mi 'thad pa'i phyir ro//stong pa nyid dang snying rje sbyor ba ni kha sbyor ma yin gyis/ bskyed pa'i rim pa tsam gyis sam/ /de lta bu la sogs pa yis/ rang rig pas stong pa nyid du bde ba'i rnam pa can gyi ye shes dbang po gnyis snyoms par 'jug pa las skyed pa bzhin du gang las kyang myong bar mi 'gyur ba'i phyir ro//de'i phyir na goms pa med pa'i de kho na nyid kyis bde ba chen po'i bdag nyid rdo rje sems dpa'i go 'phang mi 'thob pa'o/ /des na 'dod chags chen po'i tshul 'dir rdo rje sems dpa' grub par bya ba'i phyir kha sbyor bstan pa yin no/ /de nyid kyi phyir sangs rgyas nyid 'dir khyad par yod pa'i phyir rdo rje 'chang zhes bya'o//'o na pha rol tu phyin pa'i tshul la yang longs spyod rdzogs pa'i sku grub pa ste/ 'phags pa mgon po byams pas de gsungs pa/ mtshan mchog sum cu rtsa gnyis dang / /dpe byad bzang po'i bdag nyid 'di//theg chen nye bar longs spyod phyir/ /thub pa'i longs spyod rdzogs skur bzhed/ /ces bya ba'ang gsungs pa 'di yod pa la ci ste zhe na/ kho bo ni longs spyod rdzogs pa'i sku 'gegs pa ni ma yin gyi/ yang dag par rdzogs pa'i sangs rgyas med pa yang ma yin te/ gang yang 'gro ba 'di dag sangs rgyas rgyu//'di ni snod dang mi ldan gang yang med/ /ces gsungs pa'i phyir ro/ /gzhan yang 'khor gsum mi dmigs pa'i sbyin pa'i pha rol tu phyin pa la sogs pa rnams la goms pas sa thob nas bskal pa grangs med pa gsum gyis sa bcu'i bar bsgrubs nas rang bzhin med pa mngon sum du byas te/bsod nams dang ye shes kyi tshogs bsags nas rtsed mo tsam du sangs rgyas kyi dngos po bstan te/ yang dag par rdzogs pa'i byang chub thob pa'i phyir dus mi ring bar nus par 'gyur ro/ /de bzhin gshegs pa thams cad byon nas rjes su 'dzin par mthong nas de dag la sngags kyi tshul gyis nye bar bstan pa thob ste/se gol gtogs pa'i yud tsam gyis yang dag par rdzogs pa'i sangs rgyas mngon du byed pa yin no/ /sngags kyi theg pa ni mtshams med pa lnga byed pa yang rigs la sogs pa'i rkyen dang ldan na de yis dge ba'i bshes gnyen dam pa bsten pa las/las kyi phyag rgya'i thabs kyis ji bzhin pa'i don bsgrubs nas/ ji bzhin pa'i man ngag can sdig pa mi dge ba'i las spangs pa des/ dge ba'i spyod pa dang thabs la mkhas pa'i khyad par gyis se gol gtogs pa tsam gyis sbyin pa la sogs pa bla na med pa'i bsod nams kyi tshogs rdzogs te tshe 'di nyid la sangs rgyas rdo rje 'chang nyid thob par 'gyur ba ni khyud par ro//de skad du dgyes pa'i rdo rje'i rgyud las kyang / mtshams med lnga po byed pa dang //srog chags gsod la dga' ba dang / /gzhan yang skye ba dman pa dang / /khro zhing rmongs pa'i skye ba gang / /gzugs ngan yan lag ma tshang ba/ /des kyang bsgoms na skye bar 'gyur/ /zhes gsungs pa dang / rdo rje a ra li las kyang / /'dod chags zhe sdang gti mug kyang //theg pa che la longs spyod 'gyur/ /zhes gsungs so/ /yang de nyid las theg pa chen po 'di ni 'di lta bu ste/ rgyu dang 'bras bu'i dngos po pha rol tu phyin pa'i theg pa dang sngags kyi theg pa gnyis bstan to zhes gsungs pa ste/ theg pa gnyis ka de kho na nyid la spyod do zhes bya bar dgongs so//sbyin pas sa dang po rab tu dga' ba la gnas so zhes bya ba la sogs pa bstan pa'i phyir ro/ /pha rol tu phyin pa drug goms pas de dang de thob par gyur nas phyir mi ldog pa thob par 'gyur te/ /myur du bla na med pa yang dag par rdzogs pa'i sangs rgyas 'grub par 'gyur ba nyid do//dang po sa ni mchog tu grub/ /zhes gsungs pas/ pha rol tu phyin pa'i theg par bstan pa'i phyir/ pha rol tu phyin pa'i theg pa chen po pa 'grub par ci'i phyir mi 'gyur zhe na/ de lta na ni ma yin te/ yin du chug kyang de lta bu yun ring por 'gyur la/ de ltar mi 'gyur ba yang srid pa ste/ las kyi phyag rgya la sogs pa bde ba chen po sgrub pa'i thabs dang bral ba'i phyir dang / de dag gis sa thob pa yang theg pa dman par ltung ba srid pa'i phyir ro/ /de lta na yang bcom ldan 'das kyis/rgyal ba'i sras kyi sa thob kyang / /blo brtan pa ni ma yin te/ /ji srid sa brgyad pa yi bar/ /de dag theg pa dman pas 'jigs/ /gsang ba'i 'khor lo chen po 'dir/ /bzhugs pa'i rgyal ba'i bdag nyid gang / /theg pa chen po la zhon nas//dbugs phyin pa ru gyur pa yin/ /zhes gsungs so/ /de'i phyir gtso bo ma yin par 'gyur ba'i thabs cung zad tsam gyi las kyi phyag rgya la sogs pa khyad par can gyi thabs dang bral nas/ thabs mang la gnyi ga la mtshungs pa ma yin no/ /de kho na dka' ba med par gang 'di 'dod pa'i yon tan lnga la longs spyod pa nyid kyis yun mi ring bar rdo rje 'chang gi ngo bo nyid 'bras bu chen po thob par 'gyur ba'i phyir ro//dka' thub brtul zhugs kyis brtul bas/ /sdug bsngal gyur nas lus bskams shing / /sdug bsngal nyid kyis sems g.yengs te//g.yeng bas byang chub gzhan du 'gyur/ /zhes gsungs pa dang / gzhan nas kyang / dka' thub dka' spyod drag po yis/ /bsten na 'grub par mi 'gyur te/ /'dod pa lnga la longs spyod cing / /bsten na myur du 'grub par 'gyur//zhes gsungs pa dang / pha rol phyin pa'i tshul la yun ring dka' bas 'bras bu smin/ /sngags tshul dka' ba med par myur du byang chub thob par 'gyur/ /zhes bstan pas so/ /chos thams cad ngo bo nyid kyi rnam par dag pa'o snyam du rtog pa de yang rang rig ma gtogs par med pa la/rang rig pa yang bde ba chen po'o zhes bya zhing / de yang sngags kyi bstan bcos kyi nye bar bsten pa ma gtogs par nam yang 'byung bar mi 'os te shin tu spros pas chog go/ /dbang po rnon po ni sngags kyi theg pa 'di la so so'i skye bo nyid kyis kyang sngags kyi de kho na nyid rtogs par nus te/dgyes pa'i rdo rje dang 'jam pa'i rdo rje la sogs pa'i nga rgyal la gnas pas slob bzhin pa'i gnas skabs su yang / de lta bu la bsten par 'gyur ba srid pa'i phyir/ rgyu dang 'bras bu 'dus par byas nas phyir mi ldog pa thob par 'gyur ro/ / gang gi phyir pha rol tu phyin pa'i theg pa'i rjes su 'brang ba rnams ni sa brgyad pa nyid la ni phyir mi ldog pa ste/ de skad du/ phyi nas sa brgyad pa la ni/ /dogs pa ldog par 'gyur ba yin/ /zhes gsungs so/ /pha rol tu phyin pa'i theg pa la ni/ de lta bu'i gyur pa nyid yin no zhes zer kyang /de lta bu nyams su myong ba med pa'i phyir/ so so'i skye bor 'gyur ba la phyir mi ldog par zhes brjod par mi nus te/ 'di ni ji srid du sa brgyad pa mthar thug pa'i dbugs phyin pa ma yin no zhes bstan pa'i phyir ro/ /grogs dag nyon cig theg pa chen po bas/gal te yul la spyod kyang mod la skrag /e ma'o 'khor ba 'di dag kun/ /yul gyi ngo bo rtogs pa nyid kyis su/ /de bzhin nyid kyis de dag rnam dag pa/ /yin nam snyam du de dag dran byed kyang / /spre'u na dza yi phung po la reg bzhin/ /'jigs pas nyug par byed cing bsnyems pa yin/gang yang chos thams cad skye ba med pa dang 'gag pa med par mos pa'i dbang po rnon po yod do zhe na de ma yin te/ rdo rje theg pa'i man ngag med na mi rung ba'i phyir shin tu rgyas pa 'dis chog go/ /gang yang 'phags pa chos 'phags sa bcu thob pa la 'dod pa nye bar longs spyod pa bag tsha ba med par smra ba 'di ni rigs pa kho na yin te/'dir ni de bzhin du khyad par can gyi thabs yod pa'i dbang gis slob bzhin pa khyad par du 'gyur ro/ /gzhan slob pa'i dbang du byas nas lam stobs can dang stobs med pa spyod pa'i skabs su byang chub sems dpa' sa bcu pa'i dbang phyug dper byed pa ni rigs pa med pa kho na'o//gzhan yang de bzhin nyid tsam la brten nas theg pa chen po'i don gang smras pa de ni rigs pa med pa ste/ sngags kyi de kho na nyid khong du chud pa ma gtogs pa de mngon par byed pa med pa'i phyir ro//de yang dngos po thams cad stong pa nyid du mi 'dod pa su zhig yod/ dngos po kun gyi ngo bo 'di/ /so sor rtogs par dka' ba yin/ /zhes gsungs so/ /gang yang bde ba dang sdug bsngal ba'i rtog pa dang bral ba zhes zer ba de ni bden te/ kho bo cag ni mchog dang dga' bral dag gi dbus su rang gi rig pa grub pa la/sdug bsngal lam bde bar rtogs pa ma yin no/ /bcom ldan 'das kyis kyang / /'dod chags ma yin chags bral min/ /dbu mar dmigs pa mi 'gyur te/ /gsum po spangs pa de nyid ni/ /lhan cig skyes pa'i byang chub 'dod//ces gsungs so/ /'on kyang kun du rtog pa med pas rang gi rten cing 'brel bar 'byung ba grub pa yang med do zhes gang smras pa de mngon sum du 'gal ba ste chad par smra bar thal bar 'gyur ba'i phyir ro/ /de skad du yang / rang rig mi rtog ye shes su//gal te spyod par byed na ni/ /sangs rgyas ye shes dag pa min/ /de dag mkhas pas spang bar bya/ /zhes gsungs so/ /dpal mda' bsnun gyi zhal snga nas kyang / /rtog pa zhi bas blo de'ang zhi bar 'gyur/ /blo gros dman pa kha cig smra zhes grags/ /blo bzang nyid ni blangs na ci yang rung //mkha' las lhag par ci ste mi 'gyur ro/ /rtog pa thams cad bcos par gyur pa'i blo/ /gang yin de ni bde ba dam par gsal/ /de ni bya ba byas pa mkhas pa ste/ /gzhan pa gang de rkang gnyis phyugs yin no/ /zhes gsungs so//gzhan dag 'dod chags kyis 'dul ba gang yin pa'i don du 'di bstan gyi de kho na nyid ma yin no zhe na/ de ni sangs rgyas pa'i tshig ma yin no/ /'dod chags can 'dul ba'i don du ni 'dod chags chen po bstan par mi rigs te/ de dag gis 'dod chags zhi bar bya ba'i phyir mi sdug pa bstan pa ma yin nam zhe na/'dod can 'dod pa zhi ba'i phyir/ /gtso bo mnyam par dgod par mdzad/ /chags bral chags pa bar ma la/ /'dod chags chen pos 'joms pa yin/ /de'i theg pa ni gcig nyid de/ /gang 'di theg pa chen pa'o//bstan pa yang ni gcig pu ste/ /gang 'di 'dod chags chen po bstan/ /zhes pa'o/ /de skad du yang bcom ldan 'das kyis/ /gang phyir theg pa gcig cing tshul yang gcig /'dren pas bstan pa 'di yang gcig pa ste/ /gang yang theg pa gsum du bstan pa ni/nga yi thabs la mkhas pa'i rang bzhin nyid/ /ces gsungs pa dang / gzhan yang / ji srid sems ni 'jug pa'i bar/ /theg pa'i mtha' la thug pa med/ /sems ni yongs su gyur pa ni/ theg pa med cing 'gro ba'ang med/ /ces gsungs so/ /gzhan yang nor bu dang sngags dang sman gyi mthu bsam gyis mi khyab ste/mtshams med pa lnga'i las byed pa yang gang zhig thob nas tshe 'di nyid la mchog gi dngos grub thob par 'gyur te bde ba'i lha bzhin du 'gyur ro/ /lam 'di ring du bgrod pa ste/ /rtog ge skam po'i bya dag gis/ / blo yi rgya mtsho'i pha rol 'gram/ /mtha' yas mthong nas song ba ldog /blo yi yul min de kho na/ /skye ba med pa rkyen las skyes/ /sna tshogs de ni rang rig ste/ /bla ma dam pa med par min/ /gsang sngags theg pa 'di la ni/ /bla ma dam pa skya ba 'dzin/ /de ltar kho bos skye bo dag /nyon mongs rgya mtsho rgal bar mthong / /de la sngags kyi theg pa chen po bstan pa ni gnyis te/ bskyed pa'i rim pa dang rdzogs pa'i rim pa'o/ /bskyed pa'i rim pa la rnam pa gnyis te/ phyi rol bskyed pa'i rim pa dang zab mo bskyed pa'i rim pa'o//rdzogs pa'i rim pa la gsum ste/ rdzogs pa dang / yongs su grub pa dang / ngo bo nyid kyi rim pa'o/ /rnam pa lnga po de dag ni rim pa gnyis su so sor mngon par sbyar ro/ /de la bskyed pa'i rim pa ni bdag med ma gsal ba las bstan pa ste/ ji skad du gsungs pa'i bdag med ma'i 'khor lo bsgom pa yang bla ma dam pa'i zhal snga nas kyi bka' drin las khong du chud par bya'o//de yang gzhung mangs kyis dogs pas ma bris so/ /rdzogs pa'i rim pa gang zhe na/ de yang bcom ldan 'das kyis 'dod pa na spyod pa'i lha rnams kyi don du/dgod pa dag la slob dpon te/ /de bzhin lta ba gsang ba nyid/ /lag bcangs pas ni shes rab ste/ /de yang gnyis 'khyud rgyu yin no/ /zhes gsungs pa gang yin pa dang / gzhan nas kyang dbang bskur ba drug ni de bzhin gshegs pas dbugs dbyung ba'o zhes gsungs pas phyi rol bskyed pa'i rim pa'o//zab mo'i rim pa ni/ las kyi phyag rgya ma'i ye shes ni rdo rje 'dzin pa'i dbugs dbyung ba'o/ /rdzogs pa'i rim pa ni chos kyi phyag rgya ste/ ngo bo nyid kyi bde ba gang thob pa de nyid 'di yin zhes pas mthong ba gang yin pa'o//skad cig la dmigs pa med pa'i snying rje chen pos mngon sum du byed pa'i phyir gzung ba dang 'dzin pa nyams na mchog tu bde ba nyid du brjod do/ /sngon po la sogs pa'i rnam pa can gyi chos rnams thams cad kyi phyag rgya ni sdom pa ste ro gcig pa'o/ / ngo bo nyid ma yin pa yang ngo bo nyid kyi rang bzhin yin pas/ chos kyi phyag rgya zhes brjod do/ /dga' bal sogs pa'i rnam par gzhag pa yang / 'dir dge ba'i bshes gnyen dam pa bsten pa las shes par bya ste/ bla ma dam pa'i zhal snga nas kyang / las kyi phyag rgya rnam pa sna tshogs zhes bya ba la sogs pas bstan to//dam tshig gi phyag rgya ni yongs su grub pa'i rim pa ste/ sems can gyi don bya ba'i phyir shes rab dang thabs kyi bdag nyid mtshan sum cu rtsa gnyis la sogs pa'i yon tan thams cad dang ldan pa'i dgyes pa'i rdo rje dang / 'jam pa'i rdo rje la sogs pa'i rnam pa can gyi longs spyod rdzogs pa dang / sprul pa'i sku dang / dkyil 'khor 'khor lo'i rang bzhin du gsal ba gang yin pa de ni dam tshig gi phyag rgya ste/ dga' ba la sogs pa ni las kyi phyag rgya bzhin bla ma dam pa'i man ngag las rtogs par bya'o/ /de yang /las kyi phyag rgya nyid bzhin du/ /zhes bya ba la sogs pa gsungs so/ /ngo bo nyid kyi rim pa yang gang kun du bzang por gyur pa ste/ bsam gyis mi khyab pa'i bsod nams dang ye shes kyi khyad par las/ bla ma dam pa'i man ngag gis 'bad pa med par skad cig ma gcig la mngon par byang chub pa'i rnam pa thams cad mkhyen pa nyid do//'di phyag rgya chen po zhes brjod do/ /chen po yang yin zhing phyag rgya thams cad la rgyas 'debs pa'i phyir ro/ /de nyid kyi phyir phyag rgya 'dis rgyas btab pas thams cad kyis kyang phyag rgya chen po'i go 'phang 'thob pa yin no//bcom ldan 'das kyis kyang gsungs pa/ lhan cig skyes pa brjod du med/ /ces gsungs so/ /phyag rgya chen po ni brtag tu med pa'i ngo bo nyid yin gyi/ lung bstan par sla ba ni ma yin pas 'dir dpyad par mi bya'o/ /blo yis dpyad na de 'di'o/ /zhes shes rab rgyal bas kyang mi dpyod do//'on kyang de yi bdag nyid ni/ /de nyid 'di yin snyam du gsal/ /blang dang dor bas stong pa'i phyir/ /bdag cag lta bu mi brtan pas/ /bskal pa bye ba brgyar brtags kyang / /mi rtogs ji ltar rnam rtog pa/ /byang chub nye ba ring bar 'gyur//dpyod pa min pa'i ngo bo nyid/ /chos nyid de bzhin nyid sna tshogs/ /rnam pa kun gyi mchog ldan pa/ /snying rje bdag nyid blangs pa ni/ /stong nyid snying rje dbyer med pa/ /byang chub bla ma bsten pa las/ /de phyir bla ma dam pa'i zhabs/ /pad+ma nyid las 'bad brten dang //dngos por 'khrul pa'i mun pa ni/ /nyi ma brgya yi 'od bzhin 'joms/ /dge ba'i bshes gnyen dam pa'i zhabs kyi ni/ /pad+ma'i rdul gyi bka' drin nyid thob pas/ /mngon sum pa yi lam son ji lta bzhin/ /thos pa'i lam las gnas pa gang yin pa//srid dang zhi ba ro mnyam par rig stong nyid de la 'dud/ /ma 'ongs pa yi de bzhin gshegs pa nyid ni bdag gis bya ba'i phyir/ /gang gis sems nyid glog gi 'od bzhin gsal gyur pa/ /dge ba'i lus can bsten bya de yi zhabs kyi pad+ma gnyis/ /rab tu gus pas thang cig tsam yang spyi bos len pa yin//bla ma'i zhabs kyi rdul nas rin chen 'od 'bar ba/ /yid kyi mun pa 'joms par skad cig tsam gyis byed/ /rnam pa thams cad kyis brgyan de bzhin nyid 'di ni/ /'jig rten 'di dag kun gyis mthong gyur cig /theg pa chen po'i gsang sngags thams cad dang 'brel pa//bla ma dam pas bstan pa nyams su myong ba ni/ /gang zhig bdag gis bstan pa'i dge ba bsags pa des/ /'gro ba thams cad rgyal ba mchog gi go 'phang thob par shog /shes rab ye shes gsal ba 'di/ /sems can kun la phan don du//dam pa'i lam ni thob bya'i phyir/ /mkhas pa pad+ma rdo rjes byas/ /shes rab ye shes gsal ba zhes bya ba/ mkhas pa chen po de ba tsan+d+ra'i zhal snga nas mdzad pa rdzogs so// //paN+Di ta badzra pA Ni dang / lo tsA ba d+harma kI rtis bsgyur ba'o/ /