CLOSE WINDOW

D2222
བོད་ཡིག

/[ ]@##/ /rgya gar skad du/ byak+ta b+hA ba a nu ga Tan+t+rA sid+d+hi/ bod skad du/ dngos po gsal ba'i rjes su 'gro ba'i de kho na nyid grub pa/ dkon mchog gsum la phyag 'tshal lo//dpal rdo rje sems dpa' la phyag 'tshal lo/ /bcom ldan 'das 'jig rten dbang phyug la phyag 'tshal lo/ /'gro ba rnams kyi bde chen rgyal po gcig pu nyid/ /rgyu rnams dang bral rtag tu 'byung bar gyur pa ste/ /gang zhig gis ni nye bar brjod pa'i dus dag tu//thams cad mkhyen pa tshig gis dbul gyur rgyal gyur cig /bla ma dam pa'i zhabs la yun ring du/ /rtag tu gus pas bkas gnang khyad par ni/ /bdag nyid dran phyir bdag nyid bris 'di la/ /skye bo mkhas pa su zhig sdang bar byed/ /'dir gnyis su med cing rang bzhin gyis rnam par dag pa'i lhan cig skyes pa'i gnas skabs su/bdag nyid kyis don te rtogs par bya ba'i phyir/ bdag nyid skyes pa dang bud med kyi gzugs su mngon par sprul te/ rang gi ngo bo nyid 'byin pa po'i rang bzhin du dngos po gsal ba'i rjes su ston par mdzad de/lhan cig skyes pa'i rnam par sprul pa'i nyams dga' ba'i bu mo la kun du bltas nas dga' ba dang bde ba'i 'dod pa'i yid du gyur nas/ bcom ldan 'das shin tu chags pa dang bcas pa'i rol pa dang bcas nas kun du gzigs par mdzad do/ /de nas shin tu 'jam zhing nges pa'i gsung gis thugs 'dzin par mdzad cing /de'i 'og tu de la dri zhim pos mthug por byug pa'i dri bsung chags pa bsnams pas thugs tshim par mdzad do/ /de nas thugs nyams su lon pa'i bdud rtsi'i bum pa brgyas bkus pa bzhin du dga' ba dang bde ba chen po thob nas/tsham tshom med par bde ba'i bye brag dag gis 'khyud do/ /de nas bdag nyid don byas pa bzhin du yid la sems shing dpe med pa'i ro myang ba'i phyir 'o bya ba'i rnam pa dag mdzad do/ /de las kyang sos 'debs pas gcod pa dang / 'bigs pa la sogs pa'i bye brag dag khyad par du mdzad do//de'i rjes la yang shin tu bde ba skyes pas rmongs pa bsal ba'i phyir/ /skabs skabs su shin tu 'jam pa'i sen mos 'debs pas sad par byed do/ /de nas kyang mgrin pa nas gya gyu'i sgra zab mo sgrogs pa la sogs pa rol pa'i rang bzhin gyi rnam pa lnga rmi lam lta bu la bdag nyid gar mkhan lta bus kun du rtse bar mdzad do//de dag gis ni de'i sems kyi khyad par thob par bya ba'i phyir rab tu spyod pa'i sgrub pas rjes su spyod par mdzad par gyur pa yin no/ /mdza' bos chags pas kun du blta zhing de yi rjes su sbrang rtsi 'dzag 'dra'i tshig 'jam dang //de nas dga' ba'i char 'bebs lags pa'i mtsho skyes bskyod pas de la kun 'khyud pa'i/ /rim gyis chags pa'i ro yis de ni su yin bdag kyang cir 'gyur ma shes te/ /grogs rnams sngar mi bde ba tshig gis brjod du ma btub pa zhig skyes par 'gyur//'dzin pa dang bcas pa'i spyod pa la 'jug pa'o/ /yid las byung ba las skyes pa'i spros pa'i rgyun gyis 'ching ba 'dis gnyis ka bcing ste gang gi gnyi ga'i sems kyi 'jug pa ji srid du gzhan mi dran zhing dga' ba'i dran pa la phyogs pa ste/'jug pa'i dga' ba'i gdung bas chags te zhu bar gyur nas chu dang 'o ma 'dres pa bzhin du ltos pa med par rgyun mi 'chad par 'gyur ro/ /de'i 'og tu nang du rgyu ba'i sems kyi 'jug pa'i stobs kyis brtson 'grus la 'jug par 'gyur ro//ma bsams par ka ra na'i bye brag dag las gsal bar byed cing / gnyi ga yang sid ces zer zhing thams cad la cher ltos pa med cing tsham tshom med pa dang bcas pas shin tu rgya che ba'i dga' ba'i sgrub pa spel bar gyur to/ /de las kyang bde ba'i bya ba shin tu goms pa'i longs spyod kyis thibs po kun sad par byas te/dga' ba dang bde bas yang dag par spel ba 'jug pas bskyed pa ni/ dbang po las 'das shing rang gi rtag pa'i spyod yul 'khor ba'i snying por gyur pa bde ba'i phung po skyes par gyur to/ /'gro ba rnams kyi bde ba mtshan mar bcas pa ni/gang yin de nyid mtshan ma spangs par gyur pa na/ /rang byung ye shes nyid kyi ngo bor gyur pa ste/ rtog pa rnams kyi stong pa'i bde ba chen po yin/ bag chags dang bcas pa'i sems kyis de kho na nyid 'byung ba'o/ /de lta bu 'di las sgyu ma lta bu thog ma med pa nas rang gis byas pa'i 'khor ba na bag chags kyi rgyun shin tu phra bas shin tu g.yo zhing gzung du med pa'i sems kyi rgyun gyis 'jug pas nyams pa'i gnas skabs kyi dus blang bar gyur pas/phyi rol du gzhag pa'i rtog pa mtha' dag gi sgrib pas g.yogs te/mi mngon par gyur pa'i bde ba'i bdag nyid dag pa'i rang bzhin skye 'gro'i gtso bo gang yin pa de rlung dang bcas pa'i khu ba'i thigs pa rnams dang lhan cig tu btsun mo'i tshigs la bab pa rnyed pa na/ lte ba'i 'og tu kha thur la bltas pa'i pad+ma dmar po 'dab ma brgyad pa'i nang du khrag 'dzag pa'i lhag ma kun du gzung ba ste/de'i rjes la yang dag par pad+ma zum par gyur to/ /de yang khrag dang khu ba gnyis ka yang chu dang 'o ma 'dres pa bzhin du gyur nas gong bu gcig tu gyur te rang gi rang bzhin rtsom par byed do/ /de nas rjes su 'gro ba'i rim gyis nur nur po la sogs pa yongs su gyur pas rim gyis skye ste/'byung ba mtha' dag tshogs nye bar bsags pa rnyed nas gang dus la sogs pa lnga po 'dus pa der tshor ba des dngos po gsal ba'i de kho na nyid 'di ston par byed cing / phung po lnga dang ldan pa'i tshor ba'i bdag nyid kyi lus su 'gyur ro//nang gi tshor ba de so sor nye bar 'gro ba 'brel pa shin tu nges par thams cad la khyab cing thams cad du 'gro ba yang shin tu g.yo ba'i yid dang / 'byung ba yang dag par ldan pas de phyogs gcig par gyur nas phyi rol dbang po lnga'i grong gi rjes su 'gro zhing yid kyis brtags pa'i phyi rol du gyur pa'i gzugs la sogs pa gzung ba dang 'dzin par gyur pas mngon par zil gyis mnan te/nga rgyal dang gti mug dang ser sna dang 'jigs pa dang mya ngan dang phrag dog dang brtse ba dang sred pa dang sdug pa dang mi sdug pa la sogs pa shin tu yid du mi 'ong ba'i 'khor lor 'khyams par 'gyur ba yin no//skye ba snga mar byas pa'i las kyi rgyu las ni/ /sems de 'di ru skye ba yongs su len cing 'gro/ /de yi rgyu yis ma lus 'di dag thams cad ni/ /bag chags bcas pa'i sems kyi byed par 'gyur ba nyid//de ltar 'khor ba'i gnas skabs so/ /de ltar 'khor ba'i rgya mtsho 'jigs su rung zhing rgal dka' ba/ nga rgyal chu bo gting zab pa/ yul gyi rlung shin tu dag pas gcig nas gcig tu phan tshun brlabs pas rba rlabs shin tu 'khor zhing 'khrigs pas steng du 'gro ba dang 'og tu 'gro ba gcig nas gcig tu brgyud pas rgyun chags pa'i 'khor ba las shin tu sgrol bar byed pa'i gru thugs brtse ba'i bdag nyid can/mchog tu mnyes gshin pa'i bdag nyid rang bzhin thugs rje chen po dang ldan pa/ smon lam rgya chen por btab pa'i bla ma dam pa'i zhabs kyi pad+ma dag la 'khor ba gang zhig mchog tu gus pas phyag 'tshal bar mi byed/stod par mi byed sten par mi byed/ mnyes par mi byed pa de dag ni rgal dka' ba'i 'khor ba'i rgya mtsho phun sum tshogs pa ma yin pa las rgal bar mi 'gyur bas yongs su brtag par bya'o//de bas na rnam pa thams cad kyi thams cad du bla ma dam pa'i zhabs kyi pad+ma dag la nges par legs pa don du gnyer bas bsten par bya ba kho na yin no/ /shin tu 'jigs su rung ba 'khor ba'i rgya mtsho mtha' med yul dang gdul dka'i dus kyis gang //rang gi rnam rtog tshogs kyis sprul sogs mang pos kun du 'khrugs las skye ba 'di dag ni/ /ji ste gru dang 'dra ba'i bla ma dam pa skyob pa byed pa de ni med gyur na/ /mchog tu bde ba gcig pu'i gnas gyur sangs rgyas nyid ni 'di ru ji ltar thob par gyur//bla ma dam pa bsnyen bkur ro// //'di ltar rnam par shes pa'i bdag nyid rlung shin tu g.yo zhing bcing mi nus pa dbang po'i grong khyer mtha' dag zil gyis mnan pa/ dpe med pa'i yul gyi bde bas bril zhing zin pa/ dper na ri mo mkhan gyis rang gis bris pa'i ri mo shin tu 'jigs su rung ba mthong nas/bdag nyid 'jigs shing dngas te sa la brdabs nas brgyal bar gyur pa de bzhin du/ 'dir yang rang nyid kyis bde ba ma yin pa'i tshogs kyis yongs su brtags pa'i 'dod pa dang / mi 'dod pa la sogs pa'i rgyur gyur pa las byas pa'i chags pas zil gyis non pa'i dbang gis rang gi rang bzhin mthong ste/'khor lo lta bu'i 'khor ba'i 'khor lor 'khyam zhing 'byung ba'i dbang po gang yin pa'i rnam par shes pa 'byung ba 'di la gnas shing sna tshogs gzung ste gnas so/ /de yongs su mnyes pa las de'i bka' lung gis de lta bu'i rlung dbang po rnams las bkug ste/rgyun du 'jug pa dang 'byung ba'i bya ba byed pa'i lam la rnal ma nyid du gnas par byed do/ /des ni yang dag pa ma yin pa'i rtog pa'i tshogs mtha' dag gi 'obs kyis bskor ba'i nang du dri ma dang bcas pa'i srid pa'i chu'i tshogs kyis bkang ste//srid pa'i shing spangs shing chus gtor bas bskyed de/ shin tu ring bar skyes pas 'dod pa'i 'bras bu mi dga' bar skyed pa dang / dri zhim pa dang / ro zhim pa dang / mkhrang zhing sbom la sna tshogs rnam pa mang po nyams su myong bar byed pa'i rgyu gsar du skye ba'i srid pa ldog par 'gyur ro//de yang lhan cig skyes pa'i rjes su tshol te/ der gnas nas phyi rol thams cad spong mod kyi/ de lhan cig skyes pa'i bya ba yod de/ de nyid kyis 'brel zhing nyams su myong ba g.yo ba'i bdag nyid du rnam par gnas so/ /der yang khyad par mi dmigs pa nyams su myong ba'i dngos po slar yang nyams su myong bar bya ba'i rjes su chags pa'i 'jug pa gtod par byed do//mang pos ci zhig bya ste/ gang gi tshe na phyi rol du gyur pa'i brtag pa'i rang bzhin rnam par bcad pa de'i tshe 'di rang gi ngo bo la gnas par 'gyur ro//de yang gnyug ma'i yul phra mo 'jug pa la rjes su chags pa zad pas 'bad pa bcom nas bdag nyid kyi gnas la mngon par phyogs par 'gyur ro/ /de nas yon tan mtha' dag dang ldan par gyur pas brtan pa'i yon tan dang ldan par 'gyur te/ brtan pas na gzhan gyi don gyi yon tan du 'gyur ro/ /dper na nam mkha'i ngos su khyab pa'i chu 'dzin gyi tshogs stug po dengs par gyur pa na/ gang du song ba mi shes pa de bzhin du rlung 'di yang sngar rgyun ma chad par 'byung ba las de ltar thim par gyur na/ mchog tu ldog cing tshim pa theb pas gang du yang 'gro bar mi 'gyur ro//lhan cig skyes pa'i rlung rang gi gnas su gnas pas rtog pa'i tshogs las grol zhing stong pa nyid kyi rang bzhin gyis thugs tshim par byed pa ci zhig ltar skye ste/ 'di las 'khor ba 'dir thabs thugs rje chen po mang du rgyun mi chad par goms par byas pas/mtha' yas pa'i sems can rnams kyi don mdzad pa'i rgyu thob pa yin pas sems brtan par bya'o/ /'di ltar nyon cig g.yo ba dang ldan pas dbang por mngon par 'gro la/ dbang por mngon par 'gro bas dbang po dang don phrad par gyur la/dbang po dang don phrad pas dngos por dmigs par 'dod pa dang mi 'dod pa la sogs pa mngon par zhen pa shin tu mang po'i gdon gyis zin pas shin tu rgal dka' ba'i 'khor bar 'khor ro/ /brtan pa las spros pa'i khyad par skyes pa rnams spangs te/gnyug ma'i rang bzhin byang chub kyi ngo bo shin tu gzi brjid dang ldan pa'i blo rjes su tshol te/ gang gi tshe des kun du 'khyud par gyur na/ de'i tshe nam mkha' bzhin du 'dres par gyur te/ sngar yul rnams la dga' ba dang chags pa dang ldan pa'i rnam par g.yeng ba'i khyad par skye ba rnams med cing /nam mkha' dang mtshungs par rtog pa dang bral bas phyag rgya thams cad kyis byin gyis brlabs shing / dbang po las 'das pa skye ba med pa dang ldan pa rang gi rig pa'i spyod yul can/ tha snyad las 'das pa sngar mngon du ma byas pa'i thabs dang shes rab kyi rang bzhin bde ba'i bdag nyid gtso bor gyur pa skye bar 'gyur ro//rlung gi blo ni rjes su btsal bas ni/ /bde ba dam pa'i ngo bo rang sems ni/ /tshim byed de dag las gzhan mi g.yo ba/ /shes rab thabs kyi rang bzhin 'ga' zhig yin/ thabs dang shes rab kyi rang gzhan gsal ba de kho na nyid du sems gnas so//des sngon yongs su btang ba'i dbang po de yang yid dang bral bas byed pa med par 'gyur te/ a mas bor bas be'u ma nyid rjes su tshol ba de bzhin du de yang dbang po rnams ni yid kyi rjes su 'brang bar 'gyur ro//gang du yid 'jug pa der rab tu 'jug ste/ gang gi phyir de ma gtogs par de dag rab tu sbyor ba med pa yin no/ /'dir bye brag ni 'di yin te/ 'di ni thabs dang shes rab las skyes pa'i bde ba chen po'i snang ba gnas pa yin te rnam par rtog pa'i tshogs mtha' dag spangs nas/bla na med pa'i longs spyod du nye bar 'gro zhing byed pa'i grong khyer rnams rjes su zhugs pa dang ldan pas 'gro ba 'di dag nyid bde ba chen po'i rnam par ro gcig par 'gro bar 'gyur te/ dper na nyi ma'i 'od zer gyi tshogs kyis phog pa'i zla ba'i dkyil 'khor gyi gzugs bzhin du 'gro ba rnams snying po med par snang ngo //de ltar byed pa'i grong khyer rnams 'dzin pas stong zhing sems dang lhan cig 'dres pas/ g.yo ba dang mi g.yo ba sna tshogs mtha' dag 'di snyam pa med pa'i mnyam pa'i ro bde ba phun sum tshogs pa skye ba med pa'i dpal bde ba chen po'i rang bzhin rnam par 'gyur ro//de dag gis 'di skad du bstan par 'gyur te/ dbang po'i grong khyer mi snang bar gyur nas ro dang 'dra ba rjes su mthun par lhan cig tu 'jug pas 'gro ba rnams kyi gtso bo nyid 'thob ste/ blo'i dbang phyug gi gtso bo rang dbang can gang du 'jug pa der 'dzin pas stong pa'i dbang po rnams dang /skye ba'i dbang po dang 'dra bar 'jug ste/ de'i rjes su 'brang ba'i spyod pa rnams mdzes shing rjes su mthun par nye bar spyod la/ gsal ba nyid du ston cing nye bar brten pas rnam par rtog pa thams cad spangs pa'i gtso bo rang bzhin gyis rnam par dag pa'i ye shes kyi rnam pa gang yin pa der byed pa'i grong khyer 'di dag khyad par can du gyur nas rjes su 'gro zhing zhugs pas 'brang bar 'gyur te/rnam pa de ltar byed pa'i grong khyer rnams sems kyis med par 'gyur ro/ / gal te sems med par gyur na de'i tshe sna tshogs 'di dag nye bar zhig pas na gang du gnas par 'gyur/ de bas na sems las gzhan pa'i mchog tu gyur pa yod pa ma yin no/ /dbang po'i tshogs rnams thim zhing rnam rtog ni/ /zad pa srid pa'i sa bon mi mthun bral/ / dka' dang gsal ba'i rang bzhin bsil gyur pa'i/ /'di ni nam mkha' lta bur shin tu mtshar/ /dbang po'i grong khyer rnam par zhugs pas shes rab thabs kyi rjes su 'gro ba bde ba chen po'i sems so/ /yang thog ma med pa'i bag chags kyi tshogs kyi zil gyis mnan pa'i byis pa rnams 'byed par byed pas ci zhig bya ste/gal te sems nyid dngos po'i rang bzhin du ma gyur na/ de ltar na ni gang las phyi rol gyi don shes/ ji ste sems nyid dngos po'i bdag nyid du gyur na/ de ltar yang 'di dag sems nyid yin pas rnam pa thams cad du phyi rol gyi don skye ba yod pa ma yin te/'di ltar ma lus pa 'di dag brtags pas stong pa'i sems nyid de skye ba dang / 'gag pa dang bral zhing rang bzhin dag pa'i gnyis su med pa'i ye shes kyi rnam pa yongs su gsal ba yin no/ /de dag gis 'di skad du bstan par 'gyur te/rang bzhin dag pa'i byang chub kyis gang yang lhan cig skyes shing rnam par sprul pa'i yan lag bskyod pa ji snyed pa de dag phyag rgya rab tu dbye bar 'gyur la/ gang yang ngag gis brjod pa'i ji snyed pa de snyed sngags kyi rnam pa'o/ /gang yang lhan cig skyes pa las byung ba'i rgyun mi 'chad par rnam par g.yo ba mngon par 'dus ma byas la ris su tshad med cing dpag tu med pa rnams sna tshogs pa'i ro dang ldan pas dgongs pa dang /bya ba rnams 'di ltar sgeg pa dang / dpa' ba dang / 'jigs su rung ba byed pa dang /snying rje dang / rngam pa dang / zhi ba la sogs pa'i 'dod chags dang / zhe sdang dang / dregs pa dang / ser sna dang / phrag dog la sogs pa cung zad skyes pa de dag ma lus par rang bzhin dag pa'i ye shes kyi rnam pa yongs su rdzogs pa yin no/ / khams gsum sna tshogs 'di dag thams cad sems kyi rang bzhin du gnas pa'o/ /spyod pa yang nges brjod du bstan to/ /de ltar la lar snying rje'i bdag nyid do/ /la lar kha cig tu ni srin po dang mtshungs par ro/ /la lar ni smra bar mdzad do/ /la lar ni mu cor smra bar ro//la lar ni srid par ro/ /la lar ni yid bzhin nor bu dang mtshungs par ro/ /la lar ni gnyid log par ro/ /la lar ni gnyid sad cing bsdams par ro/ /la lar ni zhim pas tshim par ro/ /la lar ni rul pa la sogs pa srid par ro/ /la lar ni chags shing zhen par ro//la lar ni gcig pu 'dod chags dang bral bar gnas par ro/ /la lar ni tshul khrims kyis gnas par ro/ /la lar ni tshul dang spyod lam ngan par ro/ /la lar ni brtan par gnas par ro/ /la lar ni rab tu g.yo bar ro//la lar ni rol pa chags par ro/ /la lar ni rgod pa gcig pu la'o/ /la lar ni rab tu ngu bar ro/ /la lar ni rang dga'i bdag nyid do/ /la lar ni gzhan gyi dbang du gyur pa'o/ /la lar ni mi gtsang bar gnas par ro/ /la lar ni shin tu gtsang sbra'i spyod pa'i lus su'o//la lar ni 'chad pa la 'khor bar ro/ /la lar ni rmongs shing glen par ro/ /la lar ni cung zad kyis tshim par ro/ /la lar ni tshim pa med par ro/ /la lar ni gar bya ba'i phyir lus glod pa yid kyis 'jug par ro/ /la lar ni glu len pa'i gsang ba mthon po las so//la lar ni bde ba'i gnas su'o/ /la lar ni gcig pu sdug bsngal gyi gnas su gyur par ro/ /la lar ni rgyan po rtse ba la goms shing dga' bar ro/ /la lar ni rdul gyis gos par ro/ /la lar ni khrus kyis gnas pa dang bskal pa bzang por ro//la lar ni gcer bur ro/ /la lar ni ri mo can gyi gos bgos par ro/ /la lar ni sbyin pa po dang longs spyod par ro/ /la lar ni shin tu phongs par ro/ /la lar ni shin tu nges par ro/ /la lar ni brdzun smra bar ro/ /la lar ni bden pa gcig pu smra bar ro//la lar ni chos kyi rgod pa dang ldan par ro/ /la lar ni sdig pa chen po byed par ro/ /la lar ni sbyin pa por ro/ /la lar ni dul zhing des par ro/ /la lar ni rgyu'i gnas par ro/ /la lar ni blo bzang zhing dag par ro/ /la lar ni snang bar ro//la lar ni mi mthong zhing mi snang bar ro/ /la lar ni bdag nyid chen por ro/ /la lar ni mngon par shes par ro/ /la lar ni de nyid thim par ro/ /la lar ni 'byung ba la gnas par ro/ /la lar ni 'byung ba dang bral bar ro/ /la lar ni rnam pa dang ldan par ro//la lar ni ngag gi yul las 'das par ro/ /de ltar gang zhig lhan cig skyes pa'i rnam rtog dang bral dmigs med par/ /sna tshogs 'di dag rang bzhin dag pas spyod pa'i dgongs ldan mkhas pa ni/ /de yi lag na bde gshegs go 'phang bdag chen rtsom pa cher ldan pa//rab dga' gzhan don la dga' mchog gis bde ba dam pa legs par gnas/ /skye ba med cing dga' ba gcig pu'i ro dang ldan pa'i sems/ /dngos po kun gyi rang bzhin mchog /chos kun mnyam dang mi mnyam pa/ /kun mkhyen kun 'gro thams cad la//chos rnams kun gyi rang bzhin 'dzin/ /mi gnas mya ngan 'das pa'o/ /mnyam nyid 'gro ba'i don mdzad pa/ /gcig dang du ma'i rang bzhin gnas/ /tshor min g.yo ba rang bzhin med/ /bcom ldan so so rang rig pa/ /gtso bo dpe dang bral ba ste//bdag po kun 'gro kun khyab pa/ /byed pa po dang 'phrog pa yin/ /'di ni dpal ldan rdo rje sems/ /dngos po gsal ba gsal mdzad yin/ /dpal u rgyan gyi rdo rje chen po mchog gi gnas su rang byung gi ye shes phun sum tshogs pa'i dpal rnal 'byor ma rnams 'dus nas yang dag pa'i don la gzigs mo las byung ba'i ma nor ba'i chos kyi de kho na nyid kyi mod la byin gyis rlob par byed pa/sa gsum rdo rje lta bu'i ting nge 'dzin la snyoms par zhugs pa'i dus su/ /nem nur mi mnga' ba'i zhal gyi pad+ma rab tu rgyas pa las bde ba phun sum tshogs pa'i sbrang rtsi'i rgyun 'bab par gyur pa dngos po gsal ba'i rjes su 'gro ba de kho na nyid grub pa rdzogs so// //de ltar 'di ni bcom ldan 'das de'i bka' bsgo ba'i rjes su 'gro bas don chen po 'di rnams kyis yang da ga par bsdus nas/skye bo nyan 'dod pa rnams la ji ltar de rnams kyi mig gi yul du gyur pa'i gzugs snang zhing gsal bar mdzad nas/ /sngar ji ltar nyams su myong ba bzhin du gsal bar mdzad de mngon par bstan pa yin no/ /gang zhig 'byung ba'i tshogs su bgrang bar ma chud pa//des kyang bdag nyid 'ba' zhig dag par byed pa'i blos/ /dga' ba 'di ni grags par gyur pa rnam dag pa'o/ /bde ba dam pa thob gyur 'di ni ngo mtshar che/ /rnal 'byor ma tshul mtsho chen gyi ni /grur gyur pa/ /bde ba dam pa'i gnas su sgrol byed gang yin pa//de nyid grub pa bris pa 'di yis ni/ /skye 'gro gsum po rnams kyis dngos grub 'grub par shog /dngos po gsal ba'i rjes su grub pa de kho na nyid grub pa zhes bya ba/ lhan cig skyes pa'i rnal 'byor ma tsi tos mdzad pa rdzogs so// // paN+Di ta chen po zhi ba bzang po dang / zhu chen gyi lo tsA ba 'gos lhas btsas kyis bsgyur cing zhus te gtan la phab pa// //rang rig tsam gyi ye shes ni/ /nam mkha' 'dra bar mtshan nyid med/ /'on kyang de la dbye yod de/ /rab mtshams nyid dang mtshams mo'i bar//snang ba dang ni snang ba mched/ /de bzhin snang ba thob pa can/ /sems ni rnam pa gsum du bshad/ /de yi gzhi ni bshad par bya/ /phra ba'i gzugs can rlung dang ni/ /ye shes dag ni 'dres gyur pa/ /dbang po lam nas byung nas ni/ /yul rnams la ni smin par 'gyur//gang tsho snang ba ldan 'gyur ba/ /rlung ni bzhon par gyur pa yin/ /de tshe rang bzhin de thams cad/ /ma lus lus pa med par 'byung / /rlung ni gang dang gar gnas pa/ /rang bzhin de dang de rjes spyod/ /ces dgongs pa lung ston pas so/