CLOSE WINDOW

D2201
བོད་ཡིག

@##/ /rgya gar skad du/ sarba kalpa sa muts+tsa ya nA ma dIp+ta/ bod skad du/ rtog pa thams cad bsdus pa'i sgron ma zhes bya ba/ dkon mchog gsum la phyag 'tshal lo/ /skye bo phal cher 'dod pa'i yul la chags shing rang gi bde bas gzhan gyi don du mi bsgrub pa/ /de la gsang phyir phyag na rdo rjes rang gi rgyud du ma byas sangs rgyas yul du 'gyur//gsang ba nyer bkod de nyid rtog pa bsdus dang me lce 'byed sogs rjes 'brangs nas/ /ji srid klu yi man ngag ma chad gsang ba'i bdag la btud de bdag gis bshad/ /mngon par byang chub sku mnga' ba'i/ / gsang ba'i bdag po gos sngon can/ /'jig rten lha la sogs pas bstod/ /rdo rje 'chang ba'i dbang mchog thob/ /nyi ma dang 'dra'i bdag nyid can/ /gnyis med lhun grub bde gnas su/ /gsang bdag gos sngon der sangs rgyas/ /'og min chos dbyings pho brang du/ / longs spyod rdzogs pa'i sku sprul nas/ /byang chub mang po'i 'khor dang bcas/ /stobs chen gsang ba'i don bka' stsal/ /sprul ba'i sku yi tshul bstan nas/ /ri rab ri yi rtse mo la/ /lha srin sde brgyad 'khor dang bcas/ /gsang chen rgyud dang thun mong dag /legs par bstan pa'i don rnams la//sde tshan lnga lnga nyi shu lnga/ /mtha' dang lhag pa'i mtha' bcas pa/ /sum cu rtsa bzhi rtsa bar ldan/ /yan lag rgyud ni grangs las 'das/ /de dag gsum mam bzhir 'dus te/ /rtsa ba bshad dang phyi ma dang / /phyi ma'i rgyud du nges par gsungs/ / de dag don 'di thub chen dang / /rdo rje 'chang dang gos sngon can/ /de la sogs pas rgyas par gsungs/ /de nyid bsdus pa'i don gsum ste/ /bskyed rdzogs grogs dang rnam pa gsum/ /bskyed pa dag ni gnyis yin te/ /rim gyis bskyed dang cig car ba/ /yi ge phyag mtshan skur gyur bar//rim gyis bskyed pa zhes su gsungs/ /dran pas ldang ba chu bur tshul/ /cig car bskyed pa nyid du gsungs/ /rdzogs pa'i don ni rnam gnyis te/ /rim gyis 'jug dang cig car 'jug /rtsa dang yan lag rten byed pa/ /rim gyis 'jug pa'i tshul du gsungs//cig car 'jug pa zhes bya ba/ /rgyu dang 'bras bu skad cig ma/ /khyad par rgyud kyi dbang du gsungs/ /grogs ni dam tshig shes rab dang / /snying rje 'khor lo la sogs dang / /khyad par spyod pa'i don shes pa'o/ /de dag bshad pa'i yan lag ni/ /drang ba'i don dang nges pa'i don//dgongs pas bshad dang dgongs pa min/ /ji bzhin sgra dang ji bzhin min/ /de dag bshad pa rnam pa gsum/ /dgongs pa'i gzhi dang gang zag dang / /dgongs pa skyon dang bcas pa'o/ /sems can mos pa mi mthun pas/ /gsang ba ma yin so sor ston//drang ba'i don du gsungs pa yin/ /yang dag don dang ldan pa la/ /de nyid man ngag rab ston pa/ /nges pa'i don du 'gyur ba yin/ /ma byin len pa la sogs pa/ /spyad pas grol bar gsungs pa ste/ dgongs pas bshad pa zhes byar gsungs/ / de nyid don dang mthun gyur pa/ /dgongs pa min pa zhes su gsungs/ /shu kra su kha zhes pa dang / /ma nu ta ra zhes bya ba/ /ji bzhin ma yin sgra ru 'dod/ /phung po khams dang skye mched la/ /de nyid brda min skye ba'i tshig /rgyud kyi bshad pa mdor bsdus yin//de la gsang ba'i bdag po lag na rdo rje'i rgyud du legs par ma gsungs te/ de'i don ma lus pa bshad pa'i rgyud kyi rjes su 'brangs nas/ bshad par bya dgos so/ /'o na rtsa ba'i rgyud du legs par ma gsungs pa ci'i phyir zhe na/ de ni gang zag gzu lums mkhan gyis rang dgar spyad kyis dogs pa'i phyir ro//'o na de bzhin gshegs pa'i thugs rje chen pos sems can gyi don la ma khyab pas lung dang 'gal lo zhe na ma yin te/ sems can thams cad theg pa chen po'i rigs can du gyur na mi bden te ma yin/ 'di ni gang zag theg pa chen po'i rigs can ma yin pa lam bstan te/de yang thugs rjes ma khyab pa ma yin te/ de la de'i rnam par ston pa'i phyir ro/ /de ni lung gzhan dag las kyang / /theg chen rigs min 'og ma pa/ /gsang ba'i don 'di thos na skrag /gang zag gzu lums mkhan dag ni//bla ma'i kha dang rab bral nas/ /thug thub gzu lums ras chod byed/ /de ni ngan song sdug bsngal myong / /de bas sangs rgyas thams cad kyis/ /ji lta ji ltar 'dul 'gyur ba/ /de lta de ltar rnam par sprul/ /zhes pa'o/ /de la re zhig dang por rgyud kyi phyungs gang par bya ste/de yang le'u dang pos ni rgyud kyi gleng gzhi bstan to/ /le'u gnyis pas bskyed rdzogs rim gyis 'byung ba bstan to/ /le'u gsum pas ni las sna tshogs kyi sngags bstan to/ /le'u bzhi pas ni bsreg pa'i sngags la sogs pa'i yon tan bstan to/ /le'u lnga pas ni 'khor lo sum cu rtsa gnyis kyi don bstan to//le'u drug pas ni las bcu'i sbyin sreg bstan to/ /le'u bdun pas ni bdud btul ba bstod pa dang bcas pa bstan to/ /le'u brgyad pas ni phyi nang gi gtor ma'i cho ga bstan to/ /le'u dgu pas ni sngags thams cad bstan to//le'u bcu pas ni klu dgug cing dug gzhom pa dang bcas pa bstan to/ /le'u bcu gcig pas ni klu gzir ba bstan to/ /le'u bcu gnyis pas ni mchod pa'i cho ga bstan to/ /le'u bcu gsum pas ni 'khor lo brgyad kyi yan lag dang yon tan sngon byung ba bstan to//le'u bcu bzhi pas ni rdzogs rim 'ba' zhig bstan to/ /le'u bco lnga pas ni rjes su yi rang ba'i bstod pa bstan to/ /de la le'u gnyis pas ni/ bskyed rdzogs rim gyis 'jug pa'i tshul bstan to/ /gzhan ni phal cher grogs su 'gyur ro/ /de la gleng gzhi bstan pa'i phyir/'di skad bdag gis thos pa'i dus gcig na zhes bya ba la sogs pa gsungs te/ de la dang por 'phags pa lag na rdo rjes yi ge dang phyag mtshan la sogs pa'i sgo nas 'bras bu'i chos thams cad kyi chos nyid mngon du gyur to/ /de'i tshe chos nyid rang bzhin gyis 'od gsal ba ni rdo rje sems dpa' 'am/rdo rje 'chang chen po'i ngo bo nyid do/ /de bas na rdo rje sems dpa' la phyag na rdo rjes thos zhes pa'o/ /yang na phyag na rdo rje nyid 'og min chos kyi dbyings kyi pho brang du/ longs spyod rdzogs pa'i skur sprul te de nyid las tha dad pa'i 'khor khams gsum rnam par rgyal bas don zhus nas gsungs pa'ang thos she na/yang na phyag na rdo rje nyid brgya byin lha'i dbang po'i gnas su sprul pa'i skur phyung ste/ de nyid la tha dad pa'i 'khor la bshad cing sdud pa ni thos pa zhes so/ /de dag ni drang ba'i don to/ / yang nges pa'i don du bshad pa/ de bzhin gshegs pa rdo rje 'chang nyid phyag na rdo rje'i skur sprul te/ mngon par byang chub pa lnga'i sgo nas phyag rgya chen po'i tshul bstan pa'o/ /'o na gang rdo rje 'chang chen po nyid phyag na rdo rje'i skur sprul pa ci'i phyir yin zhe na/ de ni 'di ltar phyag na rdo rje la dad pa'i gang zag gdul ba'i phyir ro//'o na rdo rje 'chang chen po nyid phyag na rdo rje'i skur bstan pa ma nges pa ma yin nam/ dngos su sprul pa zhig gam 'on te ma sprul zhe na/ de ni sprul du yang rung ma sprul du yang rung ngo / /rgol te dngos su sprul na ni sa bcu'i byang chub sems dpa'i yang dngos su sprul pas khyad med pa dang /ji ltar rang gi gnas par 'gyur/ 'on te ma sprul na snang bar mi rigs so zhe na/ bden te log pa'i shes pa'am/ rnam par rtog pa ldan nas ni shes pa de gsum 'byung ste/ de ma yin/ de bzhin gshegs pa rdo rje 'chang chen po ni/ /yang dag pa'i ye shes kyis rnam par rtog pa thams cad ring du spangs te thams cad mkhyen pa'i ye shes kyi bye brag dang ldan pas dngos su sprul pa'ang log pa ma yin no/ /de ci'i phyir zhe na/ ji lta ba'i las su gyur ba thams cad la thogs pa med de//de lta na ni sems can gyi shes pas gos par 'gyur zhe na/ ma yin te/ sangs rgyas kyi yon tan thams cad dang ldan pa'i phyir/ gal te ma sprul yang 'gal ba ma yin te/ smon lam dang thugs rje chen po'i byin gyi rlabs dang / sems can gyi mos pa tha dad pas ji ltar yang snang du rung ngo //de bas na ston pa phyag na rdo rje ni 'dir rdo rje 'chang chen po nyid do/ /thos pa zhes pa ni/ 'di ltar shes rab mchog tu gyur pa dang / rgyud thos par dka' ba dang / thos pa mang po'i sgo nas bdag gis thos she'o/ /de la shes rab mchog tu gyur pa ni skad cig tsam gyis thos she'o//rgyud 'di thos par dka' ba ni gzhan du 'di ma thos she'o/ /thos pa mang ba ni 'di'i tshe 'di thos la gzhan gyi tshe gzhan thos she'o/ /de la khams gsum rnam par rgyal ba ni gnas der ston pa de las thos pa ni gzhan thos pa ste/ pha rol tu phyin pa la sogs pa'o//gnas 'dir 'di la 'di dang lhan cig thos pa zhes pa ni phyag na rdo rje'i rgyud do/ /theg pa chen po'i khams gsum rnam par rgyal ba ma yin no zhe na/ de ni bden te/ theg pa chen po'i khams gsum rnam par rgyal ba zhes bya ba ni ma yin te/ 'on kyang shA ri'i bu la sogs par snang ngo //de bas na khams gsum rnam par rgyal ba zhes bya ba dngos su phyag na rdo rje nyid do/ /rgol te 'on sdud pa po med par thal bar 'gyur ro zhe na/ de ni bden te/ sdud pa po ni med do/ /de'i phyir 'di skad ces ston pa'am yang dag pa'i don ston pa'i brdar bshad do/ / phyag na rdo rje 'chi bdag gi rgyud phyi ma las/ /gang tshe bcom ldan gos sngon can/ /'dus pa chen po'i 'khor dang bcas/ /ji ltar gzugs su snang ba dang / /gzhan yang sangs rgyas dkyil 'khor dag /gcig dang tha dad ci 'gyur ba/ /gsang ba'i bdag pos bka' stsal mdzod//de skad gsungs par gyur pa dang / /legs zhes lan gsum gsungs mdzad nas/ /bdud rtsi 'khyil la slar gsol pa/ /de bzhin gshegs pa'i thugs rje dang / /sems can so so'i las 'gro yis/ /sku gcig bstan pa'i sangs rgyas la/ /sna tshogs gzugs su rnam par snang //gcig dang lnga dang brgya dang stong / /de la sogs pa mtha' yas pa/ /gtso dang 'khor gyi rnam par snang / /spyi bo mgrin pa lte ba dang / /snying nang btsun mo'i b+ha ga na/ /gsang ba'i thig le'i gzugs gnas tshe/ /kun gyi snang ba so sor snang / / zhes 'byung ba'i phyir ro/ /de nas gnas phun sum tshogs pa bstan pa'i phyir/ gnod sbyin thams cad yongs su 'gyur ba zhes bya ba la sogs pa smos te/ de la gnod sbyin ni gnod sbyin gos sngon can te/ gnod sbyin thams cad kyi sde dpon du gyur pa'o/ /de'i gnas yin pas de la de skad ces bya'o//yang na stug po bkod pa'i pho brang du phyag na rdo rje mthong ba'i skal ba med pas de na bzhugs zhes bya'o/ /shin tu dben pa yongs su dag pa zhes pa ni/ 'og min gyi gnas te/ de bas na gnas gnyis kho na'o zhes la la 'chad do/ /la la dag ni gnas ni gsum du'ang 'dod do//de dag ni phyag na rdo rje'i sprul pa'i sku kho na'i gnas yin te/ 'byung po dang bar du gcod pa'i rnam pas dben pas dben pa'o/ /yongs su dag pa'ang de nyid de/ de las ring du gyur pa'o/ /de ci'i phyir zhe na/ phyag na rdo rje'i byin gyi brlabs kyis khyab pa'i phyir ro//yon tan rnam pa mang po dang ldan pa'i gnas ni ston pa bzhugs pa'i tshul 'dis ston to/ /gnod sbyin gyi sde dpon chen po zhes pa ni/ gnod sbyin ni gang ba bzang pa la sogs pa ste/ de'i dpon du gyur pa ni gos sngon can/ chen po ni phyag na rdo rje'o//de'i don ni gnod sbyin gyi gtso bor gyur pa lag na rdo rje zhes bya ba yin te/ de gdul ba'i phyir sprul pa'i sku lag na rdo rje khro bor bstan pa'o zhe'o/ /lag na rdo rje thogs pas lag na rdo rje'o/ /de yang ye shes rnam pa lnga gsang ba'i thig les 'dzin pas lag na rdo rje'o zhes kyang bshad do//gos sngon po gon pas 'di ni gos sngon po can nyid de phyi ltar bshad pa'o/ /thabs dang shes rab kyi bar na byang chub sems kyi thig le yod pas na/ gos sngon po can te sbas pa'o/ /gnyis su med pa'i chos kyi sku ni/ gos sngon po can te mthar thug pa'o//dus gsum gyi sangs rgyas ni mar me mdzad la sogs pa ste/ de thams cad kyis las kyi khro bor dbang bskur ba ni/ /las kyi khro bo gyis shig pa'o/ /lung gzhan las kyang / phyag na rdo rje khyod song la 'jig rten gyi khams lha dang bdud la sogs pa sems can rnams kyi mdangs 'phrog cing 'tshe bar byed pa gang dag zung zhig ces lung bstan pa'i phyir ro//mche ba gtsigs pa ni mche ba bzhi gtsigs pa'o/ /yid khros pa ni khros pa'i bzhin bstan pa'o/ /mig me mdag gi phung po 'dra ba ni/ mig rtsa dmar ser 'bar bar 'dug pa'o//dbugs me lce ltar 'bar ba ni/ dbugs me ltar tsha bar gyur pa'o/ /'jigs pa'i nga ro ni/ hUM dang phaT da nga ha la sogs pas rang las gzhan pa'i 'khor 'jigs par byed pa'o/ /lag pa dang rkang pa klu nor rgyas kyi bus brgyan ba zhes pa ni sbrul dkar pos brgyan pa'o//klu nag po ser la khar thogs pa ni/ sbrul nag po se ral la gzed pa'o/ /dga' bo dang nye dga' bos snyan brgyan pa ni/ sbrul ser pos snyan brgyan pa'o/ /sbrul 'bar ba ni rin po che'i cod pan thogs pa ni sbrul mgo rin po che'i cod pan gyis dbul gdengs pa'o//sbrul gdug pa za ba zhes pa ni/ zhal nas sbrul phyed 'phyang nas 'dug pa'o/ /bzhin rgyas pa zhes pa ni/ bzhin gyis dkyil 'khor 'phel kha che ba'o/ /smin ma dang 'phral ba bsdus pa ni/ khro gnyer me'i phreng ba dang ldan pa'o/ /ya sos ma mchu mnan pa ni/ ya sos ma mchu'i steng du phyin pa'o//gshin rje'i cha byad ni gshin rje dang gzugs mthun pa'am/ gshin rje'i skyes bu ltar gsus pa 'phyang ba'o/ /gsum pa che ba ni gsus khyem che ba'o/ /lag pa brdabs pa'i sgras 'jigs par byed pa ni rdo rje dang ldan pa'i lag pa brdabs pas 'byung po thams cad 'jigs par byed pa'o//ye shes rdo rje lag pa dag /sa la brdabs pas brgyal bar 'gyur/ /zhes pa lta bu'o/ /'dab bzangs ni sbrul dmar po ste/ de nyid ska rags su bcings pa'o/ /a la la zhes pa ni/ ngo mtshar gyi tshig ste/ de sgrogs pa de la de skad ces bya'o//rgya mtsho'i zabs su dpag tshad brgyad khri bzhi stong yod pas rkang pa'i pus mor phyin pa ni pus mo man chad nub pa'o/ /dbang po dang nyi ma phrag pa la khur zhes pa ni/ A li dang kA lir ldan pa'i nyi zla'i steng du lha'i dbang po 'dug ste/ dper na nyi zla phrag pa la khur zhes la la dag 'dod do//la la dag ni lha'i dbang pos nyi zla phrag pa la khur zhing de'i steng du 'dug go zhes 'dod do/ /la la dag ni phyag na rdo rje'i phrag pa la dbang po khur te/ des dbang po khur ro zhes 'dod do/ /klu thams cad ni ma lus pa ste klu'i rigs su gtogs pa thams cad rlag par byed ce'o//gad rgyangs ni drag po'i shugs kyis ha ha zhes dgod pa ste/ des 'jig rten gyi 'byung po thams cad 'khrugs par byed pa'o/ /klu thams cad 'ching ba zhes pa ni 'gul mi nus par byed pa'o/ /de dag ni spyir gdug pa can 'dul bar byed pa dang /khyad par klu dang gshin rje'i tshogs dang lha thams cad 'dul bar byed pa'o/ /'byung po thams cad 'gugs shing 'ching ba zhes pa ni/ 'byung po'i bdag po dbang ldan la sogs pa thams cad lcags kyu'i spyor bas 'gugs shing zhags pas bcings te 'gul mi nus par byed pa'o//sbyor ba ni dugs dang khrag byugs pa dang / sngags kyi sbyor ba ste dbang phyug la sogs pa'i sbyor ba'o/ /de gcod pa ni ral gri'i sbyor bas gtubs te gcod pa'o/ /lung gzhan las kyang / byas pa'i gzugs dang ming rus la/ ral gris gtubs te gcod par byed/ /ces pa lta bu'o/ /bzlog pa ni rang gi gnas su bzlog pa'o/ /gnod pa ni phyis mi ldang bar byed pa ste/ gang la de lta bu'i nus pa yod pa de la de skad ces bya'o/ /yon tan ma lus pa thams cad kyi bdag po ni phyag na rdo rje nyid do//sangs rgyas kyi yon tan thams cad kyis brgyan pa de bzhugs zhes bya bar sbyar ro/ /gang dang lhan cig bzhugs she na/ 'khor gnod sbyin gyi sde dpon nyi shu rtsa brgyad ces bya ba la sogs pa smos te/ nor bu bzang po la sogs pa'o/ /yang na gang po dang mig mi bzang la sogs pa'o//gnod sbyin mthu bo che ni rang gi gdul bya 'joms pa'i mthu khyad par yod pa'o/ /drag po ni zhi ba'i las kyi sbyor ba dang bral ba'o/ /lha ni dbang phyug chen po la sogs pa rnam pa brgyad de/ de ltar de'i 'khor dang bcas pa thams cad do/ /klu ni dga' bo la sogs pa ste/de yang gong ma bzhin no/ /dri za ni gtsug phud lnga po la sogs pa'o/ /lha ma yin ni thags bzangs ris la sogs pa thams cad do/ /nam mkha' lding ni gser mig can la sogs pa'o/ /mi'am ci ni ljon pa la sogs pa'o/ /lto 'phye ni lto 'phye nyid do//de la sogs pa dang thabs cig tu bzhugs she'o/ /nyi ma la sogs pa ni 'di yin te/ 'di ltar ston pa po dang / sdud pa dang 'khor gyi rnam par bzhugs she'o/ /zla ba zhes pa ni thun mong pa'i sdud pa bstan to/ /khyad par du rdo rje khros ma la la dag na re sdud pa po ni med kyi 'dir 'dus pa chen po thams cad kyis zhus pa'i phyir ro she'o//de ni ma yin te/ 'dus pa chen po'i 'khor gyi nang nas khams gsum rnam par rgyal ba stan las langs te/ 'dus pa chen po'i 'khor dang mgrin gcig tu gsol ba btab po zhes pa ni tshig tu ma smos kyang don gyi shugs kyis shes par bya'o//don gyi shugs kyis gang las shes she na/ dur khrod chen po'i gnas na rdo rje be con gyi rgyud ces bya ba bam po nyi khri bstod yod de/ der bstan pa'i phyir ro/ /gzhan ni go sla'o/ /gos sngon po can khyod ni zhes bya 'og ma dang 'brel te/bde gshegs kun gye sprul pa 'am/ /zhes pa ni/ de bzhin gshegs pa thams cad kyi thugs las sprul pa'i khro bo yin nam zhes pa'o/ /las kyi khro bor dbang bskur ba'am zhes pa ni/ las thams cad grub pa'i dbang bskur ba'am zhes pa'o//'on te bsdus pa'i sku yin nam zhes pa ni/ de bzhin gshegs pa thams cad bsdus pa'i sku yin zhes pa'o/ /de'i don ni gsang ba'i bdag po gos sngon can khyod ci yin/ bdag cag la bka' stsol mdzod cig ces sbyar ro/ /de ni tshig tu ma smos kyang don gyis ni gcig tu bsdus pa'i sku yin/rdo rje sems dpa' nyid de ltar snang ba'i phyir ro/ /gzhan gyi sdud pa por gyur pa'i dus na ni thugs las sprul pa'i sku yin pa'i phyir ro/ /de'i dus na ni las kyi khro bor dbang bskur ba yang yin te/ gong du bstan pa'i phyir ro/ /lung las/ ji lta'i rnam par snang mdzad dang / /de lta'i zhi ba'i lha tshogs kun/ /rdo rje sems las gzhan ma yin/ /de nyid nga yi dbang yang rdzogs/ /zhes 'byung ba dang / 'khor lo nye bar bkod pa'i rgyud las/ phyag na rdo rje'i rigs can dang / /des 'dul ba yi skye bo la/ /sangs rgyas rdo rje'i rigs can dang //phyag na rdo rje'i sku ru snang / /dngos su snang ba ma yin te/ /smon lam thugs rje'i byin rlabs dang / /sems can mos pa'i dbang du snang / /ji ltar snang yang rang bzhin med/ /ces 'byung ba lta bu'o/ /gleng gzhi ni dus dang / gnas dang / 'khor la sogs pa ston te/ /le'u gang la gleng gzhi gtan la dbab pa yod pa de la de skad ces bya'o/ /rtog pa thams cad bsdus pa'i sgron me zhes bya ba las le'u dang po'i bshad pa'o// //de ltar gleng gzhi bstan kyang bskyed pa'i rim pa'i sgrub pa'i thabs dang /las kyi rim pa'i don mdor bsdus pa ma bstan na med par 'gyur bas de'i phyir le'u gnyis pa bstan to/ /de nas zhes pa ni bar cis kyang ma chod pa ste/ gleng gzhi bstan ma thag pa de nas zhes sbyar ro/ /rdo rje drag po ni rdo rje drag po ste sku gsung thugs kyi rdo rje drag po zhes bya'i ming gang la yod pa'i ting nge 'dzin de la de skad ces bya'o//yang na sku gsung thugs drag po thob par byed pa'i rgyu rim pa gnyis te ting nge 'dzin de la snyoms par zhugs zhes bya'o/ /zhugs nas de'i tshe 'di skad ces gsungs so//phyag rgya gsang sngags thugs sbyor las/ /zhes pa ni/ dang por bskyed pa'i rim pa'i dbang du yi ge hUM las rdo rje/ de las phyag rgya chen por gyur pa'o/ /khro bo'i rgyal po'ang de nyid de/ gdug pa can ru tra la sogs pa las khyad par du byas pa'o/ /khro bo rdo rje'ang de nyid de/rnam par rtog pa'i ri 'joms pas rdo rje'o/ /de la bstan par gyur nas byin gyi rlabs sna tshogs pa dang ldan pa ni/ 'di rim gyis bskyed pa'i dbang du byas pa'o/ /cig car 'byung ba'i dbang du byas pa ni/ phyag rgya ni dran pa tsam gyis lha'i skur gyur pa'o//de'i snying gi nang na ye shes sems dpa'i sku gsung thugs kyi ngo bor gnas pa dang / de'i gsang ba'i gnas nas ni thugs sbyor zhes bya'o/ /de ye shes kyi dkyil 'khor gyis byin gyis brlabs pas khyad par du gyur pa'i sku ni khro bo'i rgyal po'o/ /khro bo'i rdo rje ni khro bo rdo rje'i rigs te/des ni rin po che dang / pad+ma dang / las kyi rigs dang / mnyes shing srung bar byed pa'ang gzung ngo / /de bsgoms pa'i byin gyi rlabs las thams cad thogs pa med pas ni/ ya mtshan sna tshogs ldan zhes bya'o/ /de ni gsang ba'i dbyings chen zhes bya ba'i rgyud la brten nas/sgrub pa'i thabs su bsdu bar bya'o/ /yid dang mthun zhing nyams dga' bar/ /phyi na khrus la legs gnas te/ /stegs bu me tog gcal bkram la/ /gsang bdag sku gzugs mdun du dgram/ /rang gi lus spangs bde gshegs sku/ /nyi ma'i dkyil 'khor mdun du bsam//de'i steng khyad par bla ma dgug /'od zhu rdo rje sems dpar brlab/ /ye shes sems dpa' spyan drangs gzhug /phyag 'tshal mchod pa la sogs bya/ /de nas bde gshegs kun bkug nas/ /sems dpa' dgu yi steng du bzhugs//de la phyag 'tshal mchod pa dang / /sdig bshags sdom pa gzung bar bya/ /yi rang bskul zhing skyabs su 'gro/ /sems bskyed smon lam gdab par bya/ /tshad med bzhi po sngon du bsam/ /de nas stong pa nyid du bsgom/ /oM ma hA shU n+ya tA dz+nyA na badzra swA b+hA ba At+ma kou0f85haM/de nas snying rje'i ngo bo las/ /sems nyid yi ge hUM du gsal/ /yaM raM baM laM kaM bruM gyi/ /rlung me chu yi dkyil 'khor dang / /sa gzhi ri rab gzhal yas khang / /'khor lo brgyad dang mu khyud dang / /gru chad khyams dang sgo bzhir ldan/ /dra ba dra ba phyed pa dang //ka ba brgyad dang pha gus brgyan/ /twa ra bzhis ni yang dag brgyan/ /nyi ma'i steng du hUM bsams te/ /'phro 'du rtse lnga khro bo yi/ /rdo rje gdengs po hU dang ldan/ /de nas 'phags pa gos sngon can/ /sku mdog sngo skya 'bar ba la/ /zhal gcig phyag ni gnyis pa ste//g.yas na rdo rje rtse lnga thogs/ /g.yon na be con dbyug to 'dzin/ /mi bskyod pa yis dbu la brgyan/ /spyan dmar mche gtsigs khro gnyer ldan/ /bzhin gyi dkyil 'khor nyi ma 'dra/ /hUM gi rlangs pa me lce 'bar/ /glog gi ljags ldan gsus pa 'phyang / /sbrul ser rna chas rab tu mdzes//rin chen sbrul brgyad gdengs ka can/ /ltos 'gro dkar pos rkang lag brgyan/ /dmar po'i ska rags 'ching bar mdzad/ /sbrul gye za 'phros brang du slebs/ /dbang po nyi ma phrag par khur/ /rdo rje gos sngon sku la 'khril/ /snying nas nyi ma'i dkyil 'khor te/mtshon gang snying nang rdo rje ldan/ /bum par hUM dang bzlas par ldan/ /ye shes dkyil 'khor mdun du dgug /mchod dang gtor mas mnyes byas nas/ /'dod pa'i dngos grub gsol ba gdab/ /thim 'gyur sbyor ba'am 'od zer las/ /hUM 'phros stod gsum bkang bar gyur//slar 'dus tshom bu lnga ru gyur/ /dbus las gos sngon bdag la bstim/ /rdo rje sku yi gos sngon can/ /'khor lo dril bu thogs pa dkar/ /shar gyi phyogs su bsam par bya/ /yon tan rin chen gos sngon can/ /rin chen dril bu thogs pa ser//lho yi phyogs su bsam par bya/ /pad+ma gsung mchog gos sngon can/ /pad+ma dril bu thogs pa dmar/ /nub kyi phyogs su bsam par bya/ /las kyi gos sngon sku mdog ljang / /rgya gram dril bu thogs pa ni/ /byang gi phyogs su bsam par bya//dkar mo bdug pa shar lho ste/ /lho nub ser mo me tog ma/ /yang na mthing ga'i kha dog ldan/ /dmar mo mar me nub byang ste/ /ljang gu dri chab byang shar ldan/ /gsal nas ye shes dkyil 'khor gzhug /mchod dang bstod pa rnam gnyis ni/ /cho ga bzhin du dbul bar bya//sngags kyi bsnyen pa thim gyur nas/ /spyi bo dpral ba mgrin pa snying / /gnas bzhir bzhi po bsdu bar bya/ /mig dang rna ba la sogs la/ /sa yi snying po la sogs ldan/ /zhes 'byung ba dang / lung gzhan las/ bskyed pa brtan pa thob gyur nas//las rnams thams cad bya bar gsungs/ /mthar phyin gyur nas smos ci dgos/ /she'o/ /de nyid slar bshad pa/ rin po che sgron ma'i rgyud las/ /gos sngon phyag rgya ldan gyur nas/ /bar ma chad par bye ba bzlas/ /rtags thob gyur nas las rnams brtsam//zhes 'byung ngo / /'di dag ni nang gi dbang du gsungs so/ /phyi'i dbang du ni khams gsum rnam rgyal dang / /mgon po mi srid dang / 'phags skyes po dang / mig mi bzad dgod ce'o/ /dkyil 'khor dag ni 'khor lo'am/ /pad+ma rdo rje rgya gram mam/ /tshom bu lnga'am dgur 'dod pa//gsang ba'i snying po'i rgyud las 'byung / /zhes kyang gsungs so/ /yang na phyag rgya ni bskyed pa'i rim pa las byung ba'i sku'o/ /gsang sngags ni sngags kyi bzlas pa ste/ /'dir dang por rlung dang sngags 'dres pa'i bzlas pa'o/ /de'i don yang bskyed pa'i lha'i sku'i gnas bzhir rlung gi dkyil 'khor la bltas te/de nas g.yas nas 'gyu ba dang / g.yon du 'gyu ba dang / gnyis nas 'gyu ba kun/ oM AHhUM 'di la bslabs pas gnas pa la brtan par gyur pa dang / de nyid rang bzhin med par bsams pa'i/ thugs ni sems te/ 'dir sems la dmigs pa de yang gnas pa'i a'i thig le la blo gtad de/ thams cad de'i ngo bor bsgom pa'o/ /khro bo'i rgyal po ni sgyu ma lta bu'i sku ste/ sgyu ma'i dpe bcu gnyis kyis nye bar mtshon pa'o/ /de dang de yang de nyid kyi rnam par dag pa dang /gong ma la rag las par 'dod pa'o/ /khro bo ni gong ma nyid de/ de rang bzhin gyis yongs su dag pa ni rdo rje'o/ /de bas na de thob pa'i thabs la'ang de skad ces bya'o/ /byin brlabs zhes pa ni gnyis su med par byin gyis brlabs pa'o/ /ting nge 'dzin de la dbang thob nas zhes pa ni gnyis su med ba'i bsam gtan mthar phyin nas sems can gyi snang ba la longs spyod rdzogs pa dang /sprul pa'i sku ji ltar yang snang ba ste go sla'o/ /yang na phyag rgya ni phyag rgya ma ste/ lhan cig skyes pa'i rigs can nam/ pad+ma can la sogs pa'o//gsang sngags ni de'i gnas thams cad du yi ge bkod pa'o/ /de la phyag mtshan du gyur pa ni thugs sbyor zhes bya'o/ /khro bo'i rgyal po ni de las byung ba'i khro bo'o/ /gzhan las rdo rje khros ma'i gnas rnams su/ rim gyis 'byung ba bsam zhes so/ /khro bo rdo rje ni gos sngon po can te/bdag nyid de ltar gsal ba'o/ /byin gyis brlabs pa ni/ pad+ma dang rdo rje byin gyis brlabs pa ste/ gnyis su med pa'i sbyor ba las byung ba'i byang chub kyi sems slob pa'i lce la bzhag pa 'di ni gsang ba'o/ /yang na phyag rgya ma'i gsang ba'i 'khor lo'i yi ge ni/gsang sngags te 'khor lo ni phyag mtshan thugs kyi ngo bo'o/ /yang na de bzhin gshegs pa thams cad kyi ngo bo ni byang chub kyi sems te/ de gang la yod pa de la de skad ces bya'o/ /khro bo'i rgyal po ni gos sngon te/ de'i ting nge 'dzin dang ldan pas kha kha mu kha byin gyis brlabs te/ de ni byin gyis brlabs zhes bya'o//gnas der shes rab ye shes kyi dbang bskur te/ bde ba chen po nyams su myong ba ni ya mtshan sna tshogs ldan zhes so/ /sbas pa'i dbang du bshad pa'o/ /lung gzhan las kyang / phyag rgya la sogs rnam pa lnga/ /bskyed pa'i ting 'dzin la mdzes la//rlung dang sngags gnyis 'dres pa ye/ /rdo rje'i bzlas pa brtsam par bya/ /sems dang sgyu ma don dam pa/ /gnyis med ting nge 'dzin la gnas/ /'bras bu bla med thob par 'gyur/ /zhes pa dang gos sngon po can me ri 'bar ba'i rgyud las/ phyag rgya ma ni legs mdzes la//gnas kun du ni yi ge bsam/ /de las phyag mtshan sku gyur te/ /nyid ni rdo rje khros mar bsam/ /gnyis med sbyor ba'i sems dbang bskur/ /zhes 'byung ba dang / phyag na rdo rje bde ba rgyan gyi rgyud las/ /gang la gsang ba'i rtsa yod pa'i/ /phyag rgya ma ni legs mdzes la//yi ge tsa ya gi byin brlabs te/ /btang zhing bzlog pas dngos grub 'gyur/ zhes pa lta bu'o/ /de nas de nyid kyi grogs bstan pa'i phyir/ rang bzhin 'phags dang bla ma dang / /zhes bya ba la sogs pa smos te/ mchod pa'i yul du rab tu gyur ba rdo rje 'chang chen po dang /de las gzhan pa ni sangs rgyas dang byang chub sems dpa' gzhan rnams so/ /bla ma ni lung ston pa'i slob dpon te/ dbang bskur ba ni bla mar gzung ngo / /de ni 'jig rten gyi lha ma hA de ba la sogs pa dang / log pa'i slob dpon bsal lo/ /gong ma de la mchod na ni//dngos grub myur du 'thob pa ste/ /sngon du 'gro ba dang 'brel to/ /gal te gzhan la phan 'dogs na/ /sku de sna tshogs sku ru snang / /zhes pa ni/ gang dag lha'i snyan dang ldan pa la/ /lha'i skur snang ste/ de bas na de la sogs pa la de dang de'i rnam pa bstan to//gzhan ni go sla'o/ /le'u gnyis pa ni grangs kyi gnyis pa'o/ rtog pa thams cad bsdus pa'i sgron ma las le'u gnyis pa'i bshad pa'o// //de ltar le'u gnyis par rim pa gnyis bdag dang gzhan gyi don phun sum tshogs par bstan kyang / sngags kyi mtha' ma shes na de nyid kyi don mi 'grub pas de'i phyir de la de bstan to/ /gzhan yang gsang sngags sbyor ba na/ /zhes pa ni/ bsam gtan dang phyag rgya la sogs pa'i sbyor ba ma yin gyi sngags kho na'i shas che ba ste/ gang la de yod pa de la de skad ces bya'o/ / de nyid gang zhe na/ da lha zhes pa ni dngos su bstan pa ste/ des 'og ma'ang shes par bya'o/ /thogs med ces pa ni rdo rje bzhin thogs pa med pa ste/ de'i don yang bdag nyid kyi sku dang ldan pas bsgrub bya'i ming gi mthar da ha zhes bya ba'i ming dang spel te/ de'i sbyor ba dang ldan par gyur na rdo rje bzhin thogs pa med par sreg pa'i las grub par 'gyur te/gzhan la'ang de ltar shes par bya'o/ /gnyis kyi 'og min ni i'o/ /gsum pa ni ga'o/ /ra'i mtha' ni ring po ste/ gsum pa'i mtha' ni na ste/ drag po dga' ba'i ha gnyis lan/ /zhes pa ni ga la ha btags pa dang /na'i go ste dngos su gr-ih+Na grih+Na zhes pa'o/ /lan gnyis smos pa ni zung shig pa'o/ /de'i bsam gtan ni lcags kyu can gyi tshogs spros te/ zhes pa dang gnas pa'i sa nas snying gnas bzung nas 'ong bar bsam pa ni lcags kyu'i sbyor ba zhes bya'o//hUM phaT ni kun la sbyor ro/ /badzra pA Ni ni phyag na rdo rje'o/ /nI lAM ba ra ni gos sngon can te gong ma dang 'brel pas kye phyag na rdo rje gos sngon po can che ge mo zung shig rab tu zung shig pa'o/ /mjug tu rdzogs pa ni k+Sha ste de'i gong na 'dug pa ni ha'o/ /gsum pa'i mtha' ni na'o//lan gnyis ni ha na ha na zhes pa ste rgyob cig pa'o/ /gsum pa ni sde tshan gsum pa ste de'i dang po ni ta'o/ /gnyis pa ni tha ste/ drug pa'i dang po'i yi ge ni ya'o/ /lan gnyis ni ta thA ya ta thA ya zhes pa ste/ gtogs shig pa'o/ /de gnyis ni tho ba can dang gtun phrugs can bskul ba'o//gnyis pa'i dang po ni tsa'o/ /lnga pa'i dang po ni pa'o/ /drag po dga' ba'i sa bon ni ha ste gong ma'ang shes par bya'o/ /'di ni pa tsa pa tsa zhes pas tshos shig pa ste/ gnyis gnyis shes par bya'o/ /le'u gsum pa ni le'u gsum pa'o//rtog pa thams cad bsdus pa'i sgron ma las le'u gsum pa'i bshad pa'o// //de ltar sngags rab tu bshad kyang spel ba dang yon tan ma shes na 'grub par mi 'gyur bas de'i phyir de la de bstan to/ /de la sna tshogs mngon par 'grub pa ni/ sku gsung thugs sna tshogs par 'gyur ba ste/las bcu'i phyag rgya la stsogs pa'o/ /ting nge 'dzin gang la de skad ces bya ba yod pa'i ting nge 'dzin de la snyoms par zhugs te gsungs zhes bya bar sbyar ro/ /gang gsungs she na/ sngags dang don du bcas pa 'og ma'o//de la da ha ni sregs shig pa'o/ /badzra ni rdo rje ste rdo rje bzhin thogs pa med par sregs shig pa'o/ /gang gis gang zhe na/ phyag na rdo rje gos sngon po can bsam gtan gyi mes sregs shig pa'o/ /de yang klu bsreg pa ni nA ga rA dza zhes pa'am/ yang na sarba nA ga ya rak+Sha rak+Shas zhes pa dang sbyar ro//lha bsregs na sarba de ba rA dza zhes pa dang sbyar ro/ /gnod sbyin bsregs na ku ber sarba zhes pa dang sbyar ro/ /yi dags bsregs nas sarba ya ma zhes pa dang sbyar ro/ /srin po bsregs na sarba rak+Shas zhes pa'o/ /dgra bsregs na sarba sha hUM zhes pa dang sbyar ro//de la sogs pa gang la bya ba'i ming gi sngags dang bsregs pa'i sngags spel te/ sngags 'di dag ni phyag na rdo rje la sogs pa'i rgyud las gsal bar gsungs so/ /ji ltar bsreg pa'i sngags la spel ba de ltar dgug pa la sogs pa la'ang spel lo/ /gang zhig 'di 'dzin rnal 'byor de//zhes pa ni/ rnal 'byor pa gang zhig sngags 'di 'dzin par 'gyur te zhes pa'o/ /nyes pa kun las rab tu thar/ /zhes pa ni/ 'byung po dang yi dags la sogs pas byas pa'i rig sngags kyi sbyor ba las thar ba'o/ /legs pa'i yon tan thams cad 'thob//ces pa ni/ nyes pa las log pa'o/ /yang na rgyud 'di'i don 'dzin pa de rnam par rtog pa'i 'ching ba las thar nas dngos grub rnam gnyis 'thob bo/ /gzhan gang du bshad pas rtogs par nus so/ /rtog pa thams cad bsdus pa'i sgron ma las le'u bzhi pa'i bshad pa'o// // spel ba dang yon tan bstan kyang 'khor lo bsgom pa ma bstan na 'grub par mi 'gyur bas de'i phyir de la de bstan to/ /'od zer ni 'khor lo ste so so'i 'od dang ldan pa'o/ /des bsreg pa la sogs pa mngon par 'grub pa'i ting nge 'dzin gang la de skad ces bya ba yod pa'i ting nge 'dzin de la de skad ces bya'o//'byung bzhi'i sangs rgyas rab bsgoms nas/ /zhes pa ni las so so'i dbang du'o/ /me brgyad ni rkang mthil gnyis dang / dpyi mig gnyis dang / lag pa gnyis dang / mdoms dang mgrin pa brgyad du raM las byung ba'i gru gsum dmar ba brgyad bsgom mo//chu brgyad kyang de ltar brgyad du baM las bdud rtsi'i chu rgyun byung bas dag par bsam mo/ /gnas brgyad du laM las sa gzhi ser po gru bzhi pa zur bzhi rdo rje bzhis mtshan pa'o/ /de ni sa brgyad pa'o/ /yang na gnas der yaM brgyad las rlung gi dkyil 'khor brgyad bsgom pa'o//de ni rlung ngo / /'khor lo ni des de dang de'i rnam par gcod pa'i phyir ro/ /'bras bu rim gyis gnod sbyin gtso/ /zhes pa ni hUM dang rdo rje las gos sngon po'i skur 'grub pa'o/ /yang na 'di 'di ltar yang ston te/ slob dpon nam yang mdun gnas pas//bdag nyid mtha' yas me brgyad du/ /raM las byung ba'i me 'bar ba/ /'og tu rlung gis g.yab pas 'bar/ /'byung po thams cad tshig nas byer/ /thal ba'i shul du yaM las rlung / /bskyod pas gtor nas dag pa'i sar/ /yi ge baM las chu skyes pas/ / dngos dang bag chags dag pas dkrus/ /kun gzhi byang chub thig le las/ /hUM gyur de las rdo rje'i sku/ /gsang ba'i bdag po'i gos sngon gsal/ /ye shes gos sngon gnyis med bstim/ /yang na mdun gyi de nyid gzhug /gnas brgyad laM las sa gzhi brgyad/ / steng du rin chen 'byung ldan sku/ /bdud rtsi'i bum pa thogs pa brgyad/ /'od kyi 'phro 'dus stong gsum tshe/ /bdud rtsi'i bum par blugs shing dgas/ /mdun rgyab g.yas g.yon gos sngon bzhi/ /tshe la gnod pa'i bgegs rnams bsrung / /de ltar byas nas bzlas pa bya//phyi nang dgug dang brtan pa dang / /yi ge oM gyis gsum la dmigs/ /phyogs dus lha mos mchod pa byed/ /ces pa ni/ sgrub pa'i thabs su shes par bya'o/ /rtog pa thams cad bsdus pa'i sgron ma las le'u lnga pa'i bshad pa'o// //'khor lo'i sbyor ba dang ldan yang sbyin sreg gi cho ga med na 'grub par mi 'gyur bas de'i phyir de la de bstan to//las bcu'i sbyin sreg ni las bcu kho na'i sbyin sreg ste/ sbyin sreg gang la ming de skad ces bya ba yod pa de la de skad ces bya'o/ /gsungs zhes bya ba ni de lta bu'i sbyin sreg gsungs so//zhi la zhes pa ni zhi ba'i sbyin sreg gi sngags so/ /shAn+tiM ku ru zhes pa ni zhi bar gyir shig pa'o/ /des bdud dang srin po la sogs pa ni bar 'gyur bas de skad ces bya'o/ /rgyas pa ni tshe dang bsod nams la sogs pa rgyas par byed pa ste/de'i sngags gsungs pa buSh+TiM ku ru zhes pa ni rgyas par gyis shig pa'o/ /dbang ni klu'i bu mo dbang du bya ba dang / lha'i rgyal po dbang du bya ba la sogs pa'o/ /de'i sngags gsungs pa/ pa shaM ku ru zhes pa ni dbang du gyis shig pa'o/ /drag po ni drag po ste/ 'dir bsad pa'i las kho na drag po'o//de'i sngags gsungs pa/ mA ra ya'am yang na suM b+ha ni la sogs pa ste/ rtsa ba dang ming dang bskul bar bya ba spel ba ni sngags so/ /shing ni go sla'o/ /thab khung dbyibs ni las bzhi ste/ /zhes pa zlum po dang gru bzhi dang / zla gam dang b+ha ga lta bu'o//las thams cad pa'i ni pad+ma'i dbyibs kyi thab khung du tsan+dan gyi shing la me bas te bsregs pa'o/ /de nyid kyi sngags gsungs pa/ bi d+h+wan+sa ya ni dbye ba'o/ /uts+tsha ta ni bskrad pa'o/ /mo ha ya ni rmongs pa'o/ /stam b+ha ya ni mnan pa'o/ /ud man ni smyo ba'o/ / A kaR+Sha ya ni dgug pa'o/ /lhag ma ni smyo bar bya'o/ /de'i las kyi man ngag ni thab khung gzhal yas khang du so so'i me lha spyan drangs te/ mchod pa dang / bstod pa dang / gnyis su med par byas nas dbus su 'phags pa gos sngon po can las so so'i dbu rgyan dang ldan pa la ye shes kyi 'khor lo bcug ste/gnyis su med pa la sbyin sreg byas pas de dang de'i rnam par 'grub par 'gyur ro/ /rtog pa thams cad bsdus pa'i sgron ma las le'u drug pa'i bshad pa'o// //de ltar le'u drug par sbyin sreg gi cho ga bstan kyang / sme ba'i sbyin sreg ma bstan na don med par 'gyur bas de'i phyir de la de bstan to//dpal ldan gos sngon can zhes bya ba bshad zin to/ /gdul bar dka' ba 'dul ba'i mchog /ces pa ru tra la sogs pa 'dul ba'o/ /gsang ba ni sku gsung thugs te/ de'i bdag po yin pa de la de skad ces bya'o//drag po chen po ni drag po chen po ste/ drag po gang la rab tu 'bar ba yod pa de la de skad ces bya'o/ /ting nge 'dzin la snyoms par zhugs pa'i tshe 'khor gyi klu ni 'khor na gnas pa'i klu ste/ dga' bo la sogs pa'o/ /gang gis de dbang du bsdus pa'o//gang gi tshe klu dbang du sdud pa de'i tshe/ khams gsum rnam par rgyal bas zhus te lung bstan pa'o/ /zhus pa'i rgyud ni mkha' 'gro ma'i gling na 'dug pa'o/ /gang gis bsdus pa la dga' ba 'jug par 'gyur ba de'i tshe bsdus pa bstan to/ /gang gi tshe khams gsum rnam par rgyal bas zhus pa de'i tshe gsungs zhes sbyar ro//zhus pa'i le'u re re las sbyar te/ 'dir ma smos so/ /nyen bzlog pa'i gnas gsungs pa/ rim pa gsum ste/ 'di la rim pa gsum yod pas rim pa gsum pa'o/ /der ci bya zhe na/ phyi rol gyi khang par sme ba'i sbyin sreg ste/de nyid gsungs pa/ hom khung gru gsum gdengs pa'i steng / /dug sogs shing las me sbar te/ /steng du nad pa me brgyad bsgom/ /gu gul la sogs dud pas bdug /slob dpon gsang ba'i phyag rgya yis/ /bya khyung gzugs la dbab pa brtsam//de yis steng nas brdab pa dang / /klu gzir drag sngags bzlas par bya/ /de las thon pa'i klu rnams bkug /phyi yi gzhal yas khang du dgug /dug bcom sos nas gnas su bskyal/ /zhes so/ /bar du phyi nang khrus byas te/ /zhes pa ni/de nas bar gyi khang par phyi nang gi khrus kyis dag par bya'o/ /der ni tshogs kyi 'khor lo la sogs pa'ang bya ste mnyes par bya'o/ /nang du bum pa'i dbang bskur zhes pa ni/ nang du dkyil 'khor chen po'i cho ga rdzogs par byas te/ bum pa la sogs pa'i dbang bskur ba'o//des cir 'gyur zhe na/ nyen rnams bzlog la the tshom med/ /ces gsungs te/ 'byung po'i nyen la sogs pa myur du bzlog par 'gyur ro/ /rigs mthun pa'i klu la sogs pa kha cig la ni rung ba ma yin no/ /gzhan ni go sla'o/ /rtog pa thams cad bsdus pa'i sgron ma las li'u bdun pa'i bshad pa'o// //yi dags thams cad bzlog pa'i cho ga gsungs kyang gtor ma'i las med na 'grub par mi 'gyur bas de'i phyir de la de bstan to/ /thams cad ldan pa'i gtor ma ni/ /phye dang me tog la sogs pa dang sman dang 'bru dang dri dang snying po'o//raM gyis sbyangs zhes pa ni/ yi ge raM gyis dngos po bag chags su gyur pa bsregs pa dang / aM las rlung gi bus khaM las chus bkrus/ de'i dbus su baM las chu rgyun byung bas mnyes par byas te/ phyi ltar bshad pa'o/ / yang na thams cad ldan pa ni sha lnga dang bdud rtsi lnga la sogs pa ste/ de la yi ge gsum gyis dag pa las sha lnga bdud rtsi lnga bskyed de/ dbab pa ni oM las 'od byung bas ye shes kyi bdud rtsi pa ba ste/ gnyis su med pa ni sbyor ba'o/ /dza yis bkug ste zhes pa ni bdag 'phags pa gos sngon po can gyi bsam gtan dang ldan pa'i 'od zer las lha mo lcags kyu can gyi tshogs kyis 'byung po thams cad bkug ste/ye shes kyi 'khor lo bkug nas gtor ma sbyin no/ /nga ni zhes bya ba la sogs pa ni go sla'o/ /rtog pa thams cad bsdus pa'i sgron ma las le'u brgyad pa'i bshad pa'o// //bsam gtan 'khor lo med pa la/ /zhes pa ni bsam gtan mi nus pa'o/ /sngags kyi nges pa ni sngags kyi man ngag ste/ nus pa khyad par can 'byung ba'i sngags bshad pa'o/ /de la tad+ya thA zhes pa ni/ dang pa las thams cad pa'i sngags so//de bas sngags de ni kun la sbyor ro/ /las so so ba ni 'byung po so so 'dul ba'i sngags te/ de ni dang po klu 'dul ba'i sngags so/ /bud+d+ha la sogs pa ni sme ba'i sbyin sreg gi dus so/ /yang na/ dkyil 'khor pad+ma 'dab brgyad la/ /dga' bo la sogs klu brgyad dgod//mnyes par byas nas bdug pa dbul/ /zhe'o/ /de'i 'og ma gshin rje dgod pa dang bzlog pa ste/ 'khor lo bcu drug dkyil 'khor du/ /'jam dpal sprul pa bcu drug dgod/ /mnyes nas 'khor du gtogs pas bzlog / ce'o/ /pre ta ni yi dags bzlog pa ste/ de yang / 'khor lo brgyad kyi dkyil 'khor du/ /yi dags gtso bo brgyad pa mnan/ /'dod rgyal 'ching byed srog len dang / /ral gcig gcer bu bum pa'i sna/ /mgo skyes mig bzang zhes su bshad/ /de yis de dag gdul bar mdzad//ce'o/ /gnod sbyin bzlog pa ni/ gnod sbyin sde dpon nyi shu lnga/ /bsdus pa'i gtso bo rnam pa brgyad/ /'dab ma brgyad la bkod cing bzlog /ce'o/ /gzhan ni gzhung las shes par bya'o/ /de lta bu'i sngags gsungs par 'gyur bas bdag po ste/de lta bu'i sgo nas yon tan brjod pa ni bstod pa'o/ /rtog pa thams cad bsdus pa'i sgron ma las le'u dgu pa'i bshad pa'o// //de nas dgug pa'i las bshad par bya ste/ rdo rje lcags kyu ni phyag na rdo rje'i 'od zer las byung bas lcags kyu'o/ /yang na rlung gi rnga mo'am/rlung gi dkyil 'khor gyi steng du bkug nas 'ong bar bsam mo/ /rlung dang lcags kyus 'grub pa de bzhin du me yis kyang nus zhes sbyar ro/ /sngags gong du bstan to/ /bsam gtan drag po ni gong ma nyid do/ /klu rigs du ma thams cad kun/ / zhes pa ni rgyal rigs la sogs pa'o/ /'gugs 'gyur zhes pa thabs 'di las gzhan gyis ma yin no/ /khugs pa de ji ltar bya zhe na/ zangs gzhong nang du spyan drangs te/ /zhes pa zangs gzhong du dgug ces so/ /de ni nyen gyis zin pa'i lus la sbal pa la sogs pa bkod la sngags dang phyag rgyas dbyung ba byas te/zangs gzhong du dgug ce'o/ /dug gzhom pa ni 'dod chags la sogs pa'o/ /sman gyis gso zhes pa ni/ dbang po la sogs pas gso ba'o/ /gang gnod phyogs su bskyal zhes pa ni/ gang la gnas pa'i sar bskyal ba'o//rtog pa thams cad bsdus pa'i sgron ma las le'u bcu pa'i bshad pa'o// //de nas klu gzir ba bshad par bya ste/ zhi ba'i las kyis mi 'dul ba ni zhi bar mi 'gyur ba'o/ /de gzir ba'i sngags ni ha na la sogs pa'o/ / bsam gtan zhes pa ni sngags de dang 'brel pa'i bsam gtan no/ /de ni gang zhe na/ rdo rje la sogs pa thogs pa'i khro bos brdegs par bsam mo/ /'og tu me yi 'khor lo bsam/ /zhes pa me brgyad bsgom pa'o/ /gzhan go sla ro/ /yungs kar yungs nag la sogs pa khro bo'i tshogs su bsams la brdeg ce'o//khra spyang la sogs pa ni/ khra dang spyang ki la sogs pa'i gsob kyis brdab cing sngags gong ma'o/ /klu gzir ba'i cho ga bstan pa de bzhin du yi dags gzhan la yang shes par bya'o/ /myur du thar ba ni myur du gnod pa sel ba'o//rtog pa thams cad bsdus pa'o sgron ma las le'u bcu gcig pa'i bshad pa'o// //de nas mchod pa ston te/ nyid la nyid mchod pa zhes pa ni nyid kyis mchod pa nyid la khyab pa ste/ 'og nas ston to/ /rdo rje bdug pa mo ni phyag na rdo rje mnyes par byed pa'i spos so//yang na thogs pa med pas rdo rje'o/ /bdag nyid dri yis rgyas mdzad ma/ /zhes bya ba ni/ dri'i mchod pas mnyes par byed ma zhe'o/ /me tog thogs pa me tog ma'o/ /bdag nyid dkyil 'khor gsal bar bkra bas bkra ba'o/ /spos dang sman gyi 'de gu thogs pas dri chab ma'o//nyon mongs pa thams cad dag par byed pas dag ma'o/ /mar me thogs pas mar me ma'o/ /bdag nyid kyi dkyil 'khor gsal bar byed pas gsal byed ma'o/ /ji srid thams cad mchod pa che/ /zhes pa ni/ ji srid du bsam gtan gyis khyab pa de srid du mchod pa'o//yang na ji srid du nam mkha'i gar khyab pa de srid du mchod pa chen po zhe'o/ /de nyid kyis dbang po'i rgyud tshim pas bde ba'o/ /yang na/ rtsa yi pad+ma'i sangs rgyas la/ /byang chub sems kyis mchod pas bde/ /zhe'o/ /de nyid ni bla na med pa'i mchod pa ste/khyad par du 'phags pa'o/ /yang dag pa'i mchod pa ni lag pa'i mchod pa dang bral ba'o/ /rtog pa thams cad bsdus pa'i sgron ma las le'u bcu gnyis pa'i bshad pa'o// //de nas 'khor lo sngon byung ston te/ bsdu ba ni klu'i tshogs la sogs pa bsdu ba'o//sdud par byed pa'i ting nge 'dzin gang la ming de skad ces bya ba yod ting nge 'dzin de la snyoms par zhugs so/ /me'i 'khor lo ni 'khor lo brgyad pa'o/ /de'i sngags ni gong du bstan pa'o/ /des ci byed ce na/ klu tshig par byas zhes so//bral nas dpag tshad gnas su 'bros/ /zhes pa'o/ /bred sha thod nas bros pa'o/ /slar bsdus bdud rtsi sman gyis gsos/ /zhes pa ni bdud rtsis sos par gyur pa'o/ /so so'i gnas su bkod ces pa ni/ so so'i gnas su song zhes so/ /gzhan go sla'o/ /chu yi ngang la gnas 'dod na//zhes pa ni/ chu yi 'khor lo bsgoms par 'dod/ /ce'o/ /chu brgyad ting 'dzin la gnas nas/ /zhes pa ni/ gong ma ltar bsam pa'o/ /'og ma ni sdod pa'o/ /gzhan la'ang de ltar shes par bya'o/ /de ltar 'khor lo bzhi bsgoms pas yon tan gong du smos pa nyid do//rtog pa thams cad bsdus pa'i sgron ma las le'u bcu gsum pa'i bshad pa'o// //de nas rdzogs pa'i rim pa bshad par bya ste/ phra mo'i ting 'dzin la gnas pas/ /zhes pa ni/ chos dang / sprul pa dang / longs spyod dang bde ba chen po la sogs pa la thig le gnas pa dang /rang byung gi yi ge gnas pa ni phra mo'o/ /ting nge 'dzin gang la ming de skad bya ba yod pa'i ting nge 'dzin de la snyoms par zhugs nas zhes pa'o/ /zhugs pa dang de'i ngang la gnas pa ni rnam grangs su gtogs pa'o//'khor gyi gnod sbyin ni mig mi bzang la sogs pa ste/ de dag gis zhus pa'o/ /phra mo'i thig le ni 'khor lo bzhi'i thig le'o/ /cir snang dngos po gcig tu 'dus/ /zhes pa ni/ 'bar ba'i me'i ngang la gnas pas byang chub sems kyi khu ba zhu ba'o/ /de nyid mtha' 'das rang bzhin med//ces pa ni/ 'od gsal chos sku thob pa ste/ rnal 'byor gyi lam gyi dbang du byas pa'o/ /'dod chags ting 'dzin la gnas nas/ /zhes pa ni/ rdo rje khros ma dang sbyor bas zhes pa ste/ gzhan las/ bde ba'i 'phro 'du rab byed cing //'o dang 'khyud pa la sogs pa/ /zhe'o/ /'khor gyi gnod sbyin mang po kun/ /zhes pa ni/ 'khor gyi gnod sbyin ni 'dod chags dang bral ba'o/ /sngags dang ngus dang brgyal ba dang / /zhes pa ni/ de lta bu'i 'dod chags kyi chos mthong bas sngangs pa la sogs pa'o//bslang ste bla med don bstan pas/ /zhes pa ni/ brgyal ba thams cad bslang ste/ bla na med pa'i pho nya'i man ngag bshad pa'o/ /des cir 'gyur zhe na/ thams cad 'dod chags mngon sangs rgyas/ /zhes pa ni/ gnod sbyin thams cad pho nya'i lam du zhugs pas sangs rgyas par 'gyur pa'o//'khor gyis sku la mngon par bstod/ /ces pa ni/ 'khor gnod sbyin gyi tshogs kyi yid rab tu dga' ste/ bstod pa byas she'o/ /lung gzhan las/ chos dang longs spyod bde chen sprul/ /sum cu gnyis dang bcu drug brgyad/ /drug cu gnyis kyi dbus dag tu//thig le bzhi las gcig tu gyur/ /des ni bla med mngon par 'grub/ /ce'o/ /rtog pa thams cad bsdus pa'i sgron ma las le'u bcu bzhi pa'i bshad pa'o// //de'i rjes su yi rang bston pa'i phyir/ /'dus ba'i 'khor rnams kyis zhes bya ba la sogs pa gsungs te/lcang lo can gyi pho brang na/ /zhes pa ni/ 'og min gyi gnas na zhes pa'o/ /gsang ba'i bdag po gos sngon can/ /zhes pa gong du bshad pa'o/ /yon tan thams cad sku la rdzogs/ /zhes pa ni/ mtshan dang dpe byad dang ldan pa'o//yang na dngos grub rnam pa gnyis 'byung ba'i gnas su gyur ba'o/ /dngos med dag pa ni thugs rnam par mi rtog pa'i ye shes so/ /de dang ldan pa de la phyag 'tshal lo/ /zhes sbyar ro/ /'khor gyi klu tshogs 'dul ba'i tshe//zhes pa ni/ /'khor na gnas pa klu rigs bzhi 'dul ba'o/ /klu brgyad sku la rab brgyan nas/ /zhes pa ni klu dga' bo la sogs pas brgyan pa'o/ /klu gtso zhal du gsol bar mdzad/ /ces pa ni/ sbrul nag po zhal du gsol bar mdzad ce'o/ /de ltar na klu thams cad 'dul bar 'gyur/de'i lus la brgyan pa ni sprul par shes par bya'o/ /klu 'dul ba'i byams pa chen pos klu thams cad 'dul bar byed ce'o/ /sna tshogs dag pa'i sku mnga' zhing / /zhes pa ni/ rang bzhin gyis rnam par dag pa las longs spyod rdzogs pa dang sprul pa'i sku sna tshogs par snang ba'o//rigs drug sde brgyad 'dul bar mdzad/ /ces pa ni 'gro ba rigs drug gam lha ma srin sde brgyad 'dul bar byed pa zhe'o/ /skyon gyis ma gos rang sangs rgyas/ /zhes pa ni/ dngos po dang mtshan ma'i skyon gyis ma gos shing rang bzhin gyis rnam par dag pa'o//thogs med kun 'dul zhes pa ni/ gdug pa can la sogs pa 'dul ba la thogs pa med pa zhe'o/ /ji ltar bsam pa'i dngos po kun/ /zhes pa ni/ ji ltar 'dod pa'i dngos grub kun shes pa'i don to/ /khyod las byung bas mi zad gter/ /zhes pa ni yid bzhin gyi nor bu bzhin du 'byung zhe'o//sna tshogs yid bzhin 'phrul po che/ /zhes pa ni/ sku gsung thugs sna tshogs par 'byung ba ste/ sgyu ma'am mig 'phrul dang 'dra ba zhes pa'i don to/ /yid bzhin nor bu khyod phyag 'tshal/ /zhes pa ni/ yid bzhin gyi nor bu dang 'dra ba'i sku mnga' ba khyod la phyag 'tshal lo zhes pa'i don to//nad dang rim gyi gnyen po mdzad/ /ces pa ni/ nad dang rims thams cad sel bar mdzad pa ste/ snang ba dang mun pa lta bu'o/ /nor dang rdzas kyi bdag po mdzad/ /ces pa ni/ nor dang rdzas thams cad la mnga' brnyes pa zhes pa'o//'jigs pa kun las bskyab par mdzad/ /ces pa ni/ nad dang dug dang sbrul la sogs pa'i 'jigs pa mi 'byung ba'o/ /de ci'i phyir zhe na/ 'phags pa lag na rdo rje gos sngon can la phyag 'tshal ba dang / mchod pa byed pa de ni nad la sogs pa'i 'jigs pa thams cad las thar bar 'gyur ro//chu dang me la sogs pas 'jigs/ /gos sngon ming tsam thos pas thar/ /zhe'o/ /bla med skyob mdzad ces pa ni/ /bla na med pa'i sku gsum ste de dang ldan pa de yang bla na med pa'o/ /des skyob pa ni gong du bshad pa'o//de lta bu'i yon tan dang ldan pa khyod la phyag 'tshal lo zhes pa'o/ /lha dang klu la sogs pa ni yi dags dang brjed byed dang mngag pa dang pho nya yang bsdu'o/ /yid dga'i mchod pas khyab par 'gyur/ /zhes pa ni gos sngon po can mnyes par 'gyur zhe'o//mi la sogs pa'i 'jig rten nyen dang ldan pa thams cad bde ba la bkod do zhes pa ni/ rims nad la sogs pa'i nyen thams cad las thar bar 'gyur zhe'o/ /'phags pa lag na rdo rje gos sngon po con rgyud/ /bde gshegs yul gyur rtogs dka' sbas pa'i gsang chen te//blo dman bdag gis shin tu brtsam par mi rigs kyang / /bde gshegs bka' la bdag gis rab brten nas/ /bdag pas dman la phan phyir rgyud kyi 'grel 'di brtsam/ /'di la nyes par gyur pa'i skyon rnams kun/ /phyogs bcu'i dus gsum bde gshegs thams cad dang //sa gnas rdo rje sems la bzod par gsol/ /bdag gis brtsams pa'i dge rtsa ci thob de dang de dag gis/ /'jig rten khams 'dir rtog pa bsdus pa'i sgron 'di 'dir gnas shing / /'di la brten nas bdag dang mtha' yas sems can thams cad kun/