CLOSE WINDOW

D2172
བོད་ཡིག

dkyil 'khor gyi cho ga slob dpon b+ha bas mdzad pa rdzogs so// //lo tsA ba dge slong gzhon nu tshul khrims kyis bsgyur cing gtan la phab pa//[ ]@/ /lung bstan sbyor ba'i man ngag bzhugs// @##/ /bcom ldan 'das rdo rje 'dzin pa la phyag 'tshal lo//lung bstan sbyor ba'i man ngag 'di/ /rgyud rnams kun las mi gsal ba'i/ /mkha' 'gro ma yis rgyas btab la/ /rnal 'byor blo dman don du ni/ /yang nas yang du gsol btab nas/ /yid ches brod pa bskyed pa'i phyir/ /man ngag rim pa bstan pa la//bla ma las ni mnyan par gyis/ /gsang sngags sgo ni dpag med nas/ /thabs kyi rim pa mang gsungs pa/ /sems can las ni sna tshogs pas/ /so so mos pa mi mthun phyir/ /dper na sman rnams nus pa yis/ /nad rnams so sor sel ba bzhin/ /man ngag thabs rnams so sos kyang //dug gi nad rnams 'joms par byed/ /dper na sman nus gcig gis kyang / /phrad pa tsam gyis nad 'joms pa'o/ /yang na gnyis 'joms gsum 'joms dang / /bzhi 'joms lnga 'joms la sogs dang / /mang po 'dus nas 'joms pa dang / /de dag kun gyis ma choms pa//sbyor ba gzhan log 'joms pa dang / /gnyan pa kho nas 'joms pa dang / /sman dang sbyor ba de dag kyang / /mkhas pa yis ni 'joms par 'gyur/ /mi mkhas pas ni gnod par 'gyur/ /sman pa mkhas par gyur kyang ni/ /brtson 'grus nan tan ma byas na//nad rnams 'joms par mi 'gyur ro/ /de bzhin mthun pa'i dpe rnams kyang / /mkha' 'gro ma yis lung bstan na/ /zhib pas 'di ru ma phye'o/ /bsgoms pa'i stobs kyis nyon mongs 'joms/ /bsgoms pa las byung dngos grub kyis/ /mchog gi dngos grub thob par 'gyur//ting 'dzin thob par ma gyur pas/ /tshogs 'khor tshogs mchod dngos grub po/ /de ma byung na sbyin sreg gis/ /dngos grub sgrub par gsungs pa yin/ /de ma byung ba bzlas brjod do/ /de ni ma byung gtor ma bya/ /de rnams kun las ma byung na/ /las ni phran tshegs gzhan yang bstan//yang na de dag thams cad kyang / /gcig 'dus gnyis 'dus gsum 'dus dang / /bzhi 'dus lnga 'dus la sogs pas/ /'byung bar 'gyur ba gsungs pa yin/ /yang na mchog 'dod pa la ni/ /thams cad rdzogs par dgos par gsungs/ /thun mong dngos grub sgrub pa la//che chung gis na rim pas gsungs/ /sbyor ba re res kyang ni 'grub/ /gsang sngags la la'i bzhed kyis ni/ /dper na sbrul ni gshu bur zhugs/ /rtsa bar 'gro dang co tor 'gro/ /de bzhin rnal 'byor sngags pa yang / /rig 'dzin sa dang rdo rje dmyal/ /la la dag gi gzhung gis ni//bar ma do nas 'gro ba'o/ /la la skye ba phyi ma la/ /la la dag gis bzhed kyis ni/ /gnyis dang gsum pa dag la'o/ /bzhi pa'am lnga par 'dod pa'ang yod/ /la la skye ba bdun pa la/ /phyag rgya'i dngos grub thob par 'dod/ /de ltar gzhung lugs mi 'dra ba//mang du gsungs pa de dag kyang / /'gal ba med de kun kyang bden/ /gsang sngags kyi ni gzhung gis kyang / /skye ba bdun las mi dma' bas/ /skye ba bdun gyi tha ma la/ /ma bsgoms kyang ni sangs rgyas sa/ /zhes su rgyud las bstan pa yin/ /skye ba bdun zhes bya ba yang //sngags pa'i byang chub sems dpa' yin/ /sngags dang sman la sogs pa yi/ /stobs kyis lus sems las rung bas/ /sha dang thod pa la sogs pa/ /bsten cing zos pas dngos grub thob/ /de bas sngags mthu'i yon tan no/ /sa dang pha rol phyin pa la//skye ba bdun pa 'ong srid kyang / /de ltar 'ong ba shin tu dkon/ /skye ba bdun pa zhes bya'i gnas/ /phal cher dur khrod chen po yi/ /mkha' 'gro ma yi gnas su skye/ /rig 'dzin sa zhes bya ba yang / /gcig ni de la'ang bya ba yin/ /rig 'dzin sa la'ang gsum yod de//dur khrod rin chen sa dang ni/ /bar snang lha gnas lha rtan sa/ /mkha' spyod 'og min stug po'i sa/ /gnas ni de gsum yin par gsungs/ /skye ba bdun pa'i gang zag ni/ lus dang gnas ni khyad par can/ /sngags spyod pa yi yul dag tu/ /'ga' tsam byung ba dag kyang yod//skye ba gcig sogs gzhan pa ni/ /de rnams gnas kyang de bzhin no/ /skye ba bdun pa'i gang zag ni/ /dad dang snying rje la sogs ldan/ /pha rol phyin bcu'i chos la spyod/ /mthun 'jug spyod pa kun la mkhas/ /bzo dang rig pa gnas la mkhas/ /lta ba ma nor gdeng du gyur//spyod pa la dor thabs la mkhas/ /man ngag mthong ba tsam gyis ni/ /the tshom med par 'jug par byed/ /man ngag bsgoms ma thag tu ni/ /ting 'dzin skye 'gyur rang gi ni/ /khams dang dus kyi bye brag shes/ /rgyud lus mtshan gyi man ngag la/ /thos pa tsam gyis dbu zhabs kyi//man ngag rnams ni khong du chud/ /bshad pa'i rgyud dang 'grel pa dang / /mngon rtogs pa yi rim pa rnams/ /ma thos pa ru shes par 'gyur/ /dper na shing 'dzer stsal pa tsam/ /rgyud lus man ngag mdo mdo yi/ /mkhas pa la ni brten pa su//thams cad don rnams khong chud nas/ /skabs phyed spyi don shin tu rgyas/ /dka' 'grel mngon rtogs rim pa ni/ /rtsom nus don la shin tu mkhas/ /mig ni yun ring mi 'dzum zhing / /yi dam lha bsgom dus su ni/ /skye ba bdun pa'i grib ma snang / /skye ba gnyis sogs gzhan po la//grib ma'i rtags kyang de bzhin no/ /bsgoms pa'i stobs kyi khyad par gyis/ /zhag bdun zla gcig zla bdun du/ /mkha' 'gro mas ni lung ston zhing / /chos bshad rtags rnams ston par mdzad/ /chos pa yi ni mdzad spyod kyang / /dngos su sprul nas ston pa dang //yang sprul sum sprul la sogs su/ /sprul nas ston dang yang na ni/ /sku ni mi snang sgra yis su/ /nam mkha' las su ston pa dang / /yang na phyag mtshan la sogs la/ /sgra byung nas ni ston pa dang / /yang na rmi lam mtshan mas su/ /dus bzhi dus gsum dus gcig tu//yang nas yang du ston pa'o/ /ma thos pa yi man ngag rnams/ /ston mor byed na skye bdun sogs/ /sngags kyi dngos grub thob pa yi/ /rnal 'byor rig 'dzin byang chub sems/ /yang na dang po skyes nas ni/ /theg chen chos la mos nas kyang / /man ngag bsgoms la shin tu dga'//slob dpon la ni man ngag gi/ /rna brgyud gcig tsam thos pas su/ /bsgoms pas dngos grub thob par 'gyur/ /de nas gong bzhin byung nas su/ /gzhan la yang ni ston par nus/ /yang na skye bdun gang zag ste/ /skyes ma thag tu yi dam lhas//rmi lam na ni chos bstan nas/ /man ngag de bsgoms dngos grub ni/ /phra mo dag ni thob nas kyang / /gzhan la chos ni ston par nus/ /de nas rim gyis gzhan yang 'byung / /yang na skye bdun gang zag de/ /rkyen ni gnyis po 'dzom pa las/ /bsgom pa la ni dga' bar 'gyur/ / son gyi bsgoms pa'i stobs kyis ni/ /'bad rtsol drag po ma byas par/ /thun gcig la ni sgom pa rnyed/ /de nas rim gyis bsgoms pas su/ /zhag bdun nas ni lung ston 'byung / /de nas rim gsum gong ma bzhin/ /de nas mngon shes drug ldan nas/ /phyag rgya'i dngos grub thob par 'gyur//sngags pa'i dngos grub thams cad kun/ /skye ba 'di la phyag rgya thob/ /de ltar ma gyur rnal 'byor pa/ /gong ma bzhin du skye bdun du/ /len pa'i rtags ni gong bzhin 'byung / /skye ba 'di thob tshul rnams kyang / /theg chen snod du rung ba la/ /dbang bskur man ngag thob pa yis//dam tshig ma nyams bshags la brtson/ /bskyed rim brtan par gyur pas ni/ /lus kyi rnam rtog bzlog nas kyang / /rdo rje bzlas la brten nas kyang / /ngag gi rnam rtog bzlog nas ni/ /sems dben pa la brten par bya/ /sems kyi 'khrul rtog bzlog nas kyang //sgyu ma'i ting 'dzin la gnas nas/ /'od gsal la ni 'jug par bya/ /de nas spros med man ngag la/ /lhun gyis grub 'gyur phyag rgya'i mchog /yang na bskyed rim la brten nas/ /tshe la dbang ba'i rig 'dzin sgrub/ /tshe la dbang sgrub rig 'dzin gyi/ /rdzogs pa'i man ngag bsgom par bya//des su phyag rgya'i dngos grub 'thob/ /yang na bskyed rim brtan pa yis/ /rdzogs pa'i man ngag gang bsgoms kyang / /zla ba drug gis phyag rgya 'thob/ /rdzogs rim bskyed pa la brten nas/ /de nas rdzogs pa'i rdzogs pas ni/ /phyag rgya'i dngos grub thob par gsungs//de ni slob dpon chen po'i gzhung / /sbyor na lta ba gdeng 'gyur gtso/ /lhan cig ldog bya'i tshul du ni/ /byas nas the tshom mi skye zhing / /ldog par mi 'gyur 'byung pos kyang / /tshugs par mi 'gyur 'bras bu myur/ /de ltar ma gyur rnal 'byor pas/ /man ngag nyams su lon par bya//man ngag bsgoms pa'i stobs kyis ni/ /mkha' 'gro ma yis lung ston pas/ /lung bstan pa yi dus su ni/ /lta ba man ngag zab mo ni/ /bstan pa bsgoms pas phyag rgya 'thob/ /mang na rnal 'byor rim pas ni/ /blo yi rab 'bring khyad par ni/ /bag chags rkyen la sogs pa yis//rab 'bring dgu dang gsum dang ni/ /dbye bar bya ba'i don shes bya/ /rgyu rkyen 'dzom pa'i gang zag ni/ /skye ba 'di la lung ston pas/ /phyag rgya'i dngos grub thob par 'gyur/ /rkyen ni rab tu mang gyur pa'i/ /rab kyi 'bring sogs ldan pa can/ /bar ma do la lung bstan no//rab kyi tha ma ldan pa ni/ /skye ba phyi ma lung ston no/ /'bring gi gsum po'i rigs ldan yang / /gnyis dang gsum dang bzhi ru sbyar/ /tha ma'i rigs ldan gsum po yang / /lnga dang drug dang bdun du sbyar/ /yang na rkyen sogs ldan gyur kyang / /rgyu la sogs pa'i nus pa rnams//drag zhan gyi ni rim pa yis/ /rkyen gyi tshul bzhin sbyor shes bya'o/ /rgyu rkyen gnyi ga 'bring sogs kyi/ /rim pa dang ni ldan pa rnams/ /gong ma gnyis dang mi mthun pas/ /gsum dang bdun du sbyar shes bya/ /gnyis ka zhan par gyur pa na/ /gsang sngags snod du mi rung bas//dbang bskur mi bya 'jug pa tsam/ /dge ba'i sa bon chung gyur kyang / /smon lam btab pa'i dad ldan de/ /gsang sngags la ni mos gyur nas/ /yang nas yang du gsol 'debs la/ /phyi ma'i dbang bskur tsam byas la/ /mi zab dbyibs kyi man ngag bstan/ / de las bstan pa'i gang zag la/ /lhag ma rnams ni rim gyis bstan/ /yang na rnal 'byor rim pa ni/ /yi dam lha tshogs so so ru/ /so so bag chags gzhag pa dang / /mos pa la sogs rim pa yis/ /the tshom la sogs med mod kyang / /dngos grub 'grub par ma gyur na//sgyu ma lta bu'i 'du shes kyi/ /tha mi dad par bsgoms nas kyang / /man ngag yang yang spros kyang ni/ /'gal ba med de dngos grub 'grub/ /de ltar byas kyang ma byung na/ /sgrib pa shin tu che gsungs pas/ /sbyin sreg tshogs 'khor bzlas brjod dang / /gtor ma la sogs cho ga yis//bdun nas stong gi bar du ni/ /mkhas pas ci nus rgyud brtags la/ /sna tshogs sdig pa sbyang ba gsung / /lus kun la ni gnod pa yi/ /tsher ma'i phung pos lam rnams 'gags/ /me yi sbyor ba mkhas pa yis/ /bsregs pas thams cad med par byed/ / de nas lam ni rnyed nas ni/ /gang du phyin par 'gro bar byed/ /de bzhin sngags sogs mthun rnams kyis/ /sgrib pa la sogs bcom nas kyang / /ting nge 'dzin gyi lam rnyed nas/ /dngos grub kyang ni thob par 'gyur/ /dngos grub khyad par ma thob kyang / /phra mo la sogs thob par 'gyur//mtshan ma'i lung ston phra mo 'byung / /gal te de ltar ma gyur par/ /tshe dbang ma thob rnal 'byor pas/ /sgrib pa rnams ni byang gyur nas/ /skye ba phyi ma la sogs su/ /dngos grub kyang ni thob par 'gyur/ /yang na sngags kyi mthu rnams kyis/ /sdig sgrib rtsad nas mchod kyang //che long rags pa mgo bcom nas/ /gzhan dag mi skye mgo gnon zhing / /dam tshig ma nyams bshags la brtson/ /smon lam dge rtsa bsngo legs pas/ /skye ba 'di rjes gzhan dag tu/ /dus dang gnas dang slob dpon dang / /grogs dang phyag rgya man ngag sogs//skyes ma thag tu rnyed par 'gyur/ /de ru dam tshig ldan sogs pas/ /rim gyis skye bdun brgyud nas su/ /'bad rtsol drag po ma byas par/ /sangs rgyas sa la 'gro bar gsungs/ /de sogs lung bstan sbyor ba rnams/ /mkha' 'gro ma yi lung ston du//rnal 'byor mkhas pas shes par bya/ /'di ni blo dman don ched du/ /cung zad bsdus te bstan pa yin/ /mkha' 'gro ma yis lung ston kyang / /'jig rten 'das dang 'jig rten pa/ /'jig rten 'das pa gnyis yod de/ /sa nas rig 'dzin mkha' 'gro dang / /bde gshegs byin rlabs mkha' 'gro'o//mkha' 'gro de dag gnyi ga yang / /mdzes pa'i gzugs dang mi mdzes pa'i/ /gzugs ni sna tshogs sprul nas ston/ /de la 'jigs dang mi 'jigs dang / /re dang dogs pa'i sems spangs te/ /phyag rgya brda la sogs pa yis/ /ston pa'i dus su las rnams ni//ston par shes par ma gyur na/ /dngos grub med de nyams par 'gyur/ /de bas nan tan cher bskyed la/ /man ngag thos pa che ba gces/ /thos pa che bar ma gyur yang / /gang sgrub rgyud skor la sogs la/ /slob dpon la ni yang nas yang / /the tshom chod par mnyan par bya//rgyud rnams thos par mi nus pas/ /sgrub pa'i cha rkyen bcu bdun po/ /shes par de ni ma byas na/ /dngos grub 'grub par mi 'gyur ro/ /slob dpon la ni brten pa yis/ /ma tshang yang ni 'grub par gsungs/ /'jig rten pa la gnyis yod do/ / rgyal bas bka' la btags pa yis/ /sangs rgyas bstan pa bsrung ba dang / /bdud ni nag po la sogs pa/ /dam la ma thogs bar chod mkhan/ /de ltar gnyis su ma shes na/ /dngos grub thob kyang slar la 'tshor/ /de gnyis gzugs dang rtags sogs pa/ /gong ma bzhin du ston pas na//de yi rim pa gong bzhin bya/ /de dag brtags pa'i cho ga yang / /zhag gsum zhag bdun rtsa gcig tu/ /re dogs la sogs thams cad kun/ /spangs nas rnal 'byor ting 'dzin la/ /nan tan du ni brtson 'grus bya/ /tshogs 'khor la sogs yang dang yang byed pa'i dus su rdo rje glu//len cing phyag rgya sogs bstan pas/ /ting 'dzin phyag rgya gsal ba dang / /mtshan ma la sogs gsal 'bar zhing / /gzugs dang sgra dang dri la sogs/ /thams cad brtan zhing mi 'gyur na/ /lha yi mtshan mar shes par bya/ /de las bzlog pa thams cad kun//bdud kyi rtags su shes par bya/ /de la sogs pa mtha' yas mchog /mkha' 'gro'i lung du bstan pas na/ /'dir ni sgrub po'i don du bsdus/ /sgrub pa'i cha rkyen man ngag rnams/ /sgrub po nyams su len pa la/ /bstan zhing spel na bsod nams 'phel//nyams su mi len ser sna can/ /rdzas dang lus srog la sogs pa/ /bla ma la ni 'bul mi nus/ /de la man ngag bstan mi bya/ /de la man ngag bstan pa na/ /dngos grub nyams te sdig pa 'phel/ /dam tshig nyams nas mkha' 'gros gsod/ /cha rkyen la sogs bcu bdun po//ston pa phyag na rdo rje yis/ /sems dpa' phyag na rdo rje la/ /rna ba brgyud pa'i gdams ngag de/ /rdo rje mkha' 'gro ma la bstan/ /des ni ro langs ma la bstan/ /gnod sbyin phyag na rdo rje dang / /slob dpon phyag na rdo rje yis/ /brgyud pa'i gdams ngag rim pa rnams//nan tan gyis ni btsal bar bya/ /de la btsal ba ma shes na/ /dper na yid bzhin nor bu ni/ /klu rgyal gtsug nas rnyed nas ni/ /'dam rdzab nang du stor ba bzhin/ /de bzhin man ngag rin chen 'di/ /lus ngag yid gsum dka' ba yi/ /sgo nas slob dpon la btsal nas//dam med rmongs pa'i lag shor na/ /dngos grub mi thob nyams par 'gyur/ /de bas nan tan bskyed de btsal/ /lung bstan pa'i rim pa'i sbyor ka'o/ /slob dpon chen po b+ha bas mdzad pa rdzogs so// //lo tsA ba tshul khrims gzhon nus bsgyur cing gtan la phab pa// //