CLOSE WINDOW

D2133
བོད་ཡིག

/[ ]@##/ /rgya gar skad du/ ku la lo kA nA tha sA d+ha na A lo ka nA ma/ bod skad du/ rigs kyi 'jig rten mgon po'i sgrub thabs kyi snang ba zhes bya ba/ 'phags pa spyan ras gzigs dbang phyug thugs rje chen po dang ldan pa la phyag 'tshal lo//ri bo'i mchog la rab tu reg /sngags kyi gzugs kyis rab tu shar/ /dri med 'od zer snang bar mdzad/ /rang bdag de nyid 'phro ba yi/ /ma lus rigs tshogs rnam pa can/ /srid pa zhi mdzad 'jig rten dbang / /nam mkha' yi ni nyi ma ste//'od zer rab dmar rgyal gyur cig /gnyis med snang ba sngags kyi bdag /zab cing rgya che'i tshul dang ldan/ /rigs dang rigs byung rnam grangs kyis/ /gdul dka' rnams ni rnam par gdul/ /gang de'i rjes mchog bdag nyid kyis/ /rig nas khyab bdag rnams kyis gsal/ / ma lus sems can tshogs rnams la/ /rnam par dag pas tshim mdzad pa/ /sngags chen snying po'i tshul 'dzin pa'i/ /bla ma de ni rgyal gyur cig /dpal ldan rje btsun b+haMng+ga ras/ /yang dag bdud rtsi cha rtogs nas/ /de mkhyen rjes rtogs las byung ba'i/ /gsung gis yongs su legs par 'gro//dpal ldan 'jig rten rigs dbang sgras/ /de nyid brgyad cu rtsa lnga mchog /de don rnam 'grel rab tu gsal/ /de nyid gsum gyi rim pa sbyor/ /rang gi rjes rtogs snang ba yis/ /sgrub thabs snang ba bdag gis brjod/ /dang por pad+ma'i rigs don shes/ /slob ma'i gang zag rnam par brtag /'jig rten spyod pa rnam spangs shing / /sems nyid dag pas mnyam gzhag pa/ /bla ma dam pa'i man ngag thob/ /ting 'dzin bde ba phun sum tshogs/ /shin tu bde ba'i ngo bo nyid/ /bag chags dang ni chags pa spangs/ /sngags dang phyag rgya'i sbyor ba shes/ /brtse ba'i bdud rtsis yongs su gang //de 'dir 'jig rten dbang phyug gis/ /tshul ldan pad+ma'i rigs las byung / /'di yis spobs pa rab thob nas/ /sgrub pa po yis dben pa'i phyogs/ /'jig rten rigs dbang bdag nyid kyi/ /mtshungs med sngags ni brtsam par bya/ /sngon du thugs kar chu skyes dmar/ /zla ba'i dkyil 'khor dbus su ni//nyid kyi sa bon las byung ba'i/ /rigs lnga 'od zer rab 'phro bar/ /bsgom bya de 'od snang ba yis/ /sku la sogs pa rjes su dran/ /de nas thugs pad las byung ba'i/ /ba spu'i khung nas 'od 'phros pas/ /'od zer nam mkha'i khams su gnas/ /mtha' yas rgyal ba rnam blta zhing //bla ma yi dam dkyil 'khor la/ /de mchod 'od zer lha rnams ni/ /spro bya de yis kun nas gang / /gus pas thal mo sbyar bar bya/ /dkon mchog gsum la bdag sogs zhes/ /tshigs bcad dam pa lan gsum brjod/ /de nas sems can la phan byams/ /gzhan don nges dga' snying rje dang //'gro rnams bde phyir dga' ba dang / /'gro ba'i skyon la btang snyoms bsten/ /rang nyid phyi nas 'di kun la/ /mkhas pas bsam par mi bya'o/ /phyi rol du ni de mi 'thob/ /sad dang rmi lam nyams myong las/ /bag chags sa bon 'ba' zhig gis/ /'du byed khams gsum 'gro bar byed//so sor snang ba rnam spang ni/ /sems la de bzhin gsal ba min/ /de phyir bden med gyur pa yis/ /'gro ba 'di rnams rang bzhin med/ /srid gsum gnas kyi sgrib kun las/ /nges par grol bar bsgom par bya/ /nyi mas mun pa nges bcom ltar/ /dri med nang du rnam par blta//byang chub sems ni gsal byas nas/ /byang chub sku ni rab tu 'thob/ /ma rig las skyes nga rgyal dang / /de skyes phung po de bdag nyid/ /yang dag spyad par bya ba'i phyir/ /gang la sngags ni brjod par bya/ /mtshams sbyor lung bstan las gsungs pa'i/ rigs drug pa yi rang bzhin nyid/ / tshig drug pa yi sngags 'di yis/ /de ni bri bar shes bya ste/ /dang po 'di la oM zhes gcig /stong pa nyid ni gnyis pa ste/ /gsum pa ye shes zhes gsungs te/ /bzhi pa la ni rdo rje zhes/ /lnga pa rang bzhin nyid du bshad/ /drug pa nga rgyal nyid du brjod/ /de nas bag chags sa bon las/ / sangs rgyas nyid kyi 'bras bur sgrub/ /sngags pas gnyis med yid de yis/ /khams gsum po ni rtogs par bya/ /sgyu ma'i sprul pa dpag med rnams/ /phyi rol du ni dmigs par bya/ /pad nyi'i dkyil 'khor sa bon las/ /skyes shing khro bo'i 'od zer 'gyed/ /bgegs la bsgo zhing de nas ni//de yi dbus la rdo rje'i gur/ /nam mkha'i dbyings su shin tu dkar/ /steng du sa bon las skyes pa'i/ /chu skyes dmar po'i ze 'bru bzhin/ /brtse bas chags shing 'od dmar gsal/ /rigs kyi 'jig rten dbang phyug bdag /hrIM gi sa bon 'od lcags kyus/ /rang nyid bsgom zhing bsam par bya//bsam gtan rang bzhin yang dag ldan/ /skad cig nyid kyis rdzogs byang chub/ /gzugs las zhal ni gcig gyur pa/ /rdo rje gsum gyi thabs thob phyir/ /de nyid gsum dang yang dag ldan/ /'gro ba gsum zad snying ga mig /sngags gsum sa bon dgod par bya/ / gang las spyan ni gsum gyur pa/ /'od dpag med kyis dbu brgyan pa/ /zhi ba la sogs las mdzad cing / /rol pa las ni lha yi mchog /bdud bzhi'i dgra ni 'dul mdzad las/ /phyag ni bzhi yis rnam par brgyan/ /dam chos bdud rtsi sbyin pa'i phyir/ /phyag na rin chen rab tu brkyang //gdug pa 'gugs phyir phyag g.yas na/ /pad+ma lcags kyu gyen du 'phyar/ /pad+ma'i phyag dang zhags pas mtshan/ /phyag rgya gcig sbyor rgya yis gdab/ /grol ba nor bu'i dpal gyis 'khyud/ /mu tig nor bus rnam par brgyan/ /rdzogs pa'i byang chub brtan pa thob/ / sems dpa'i skyil krung legs par bzhugs/ /phyag rgya'i pad+ma mnyam sbyor las/ /'dod lha dang mtshungs gzi brjid dang / /sgeg pa'i nyams las skyes pa'i phyir/ /rnal 'byor ma rnams thugs ni dga'/ /dngos kun gcig gi gzugs nyid phyir/ /sna tshogs gzugs kyi sku 'dzin pa//nyon mongs chen po'i dgra 'joms pa'i/ /dpa' bo'i dbang phyug 'jigs chen po/ /rnal 'byor ma rnams ye shes chus/ /dbang bskur de yi steng du gang / /snying ga'i sa bon lcags kyu yis/ /ye shes sems dpa' dgug par bya/ /de bzhin ye shes gcig gnas pa'i/ / sngags kyi de nyid rab gsal bya/ /phung po khams dang skye mched rnams/ /rang bzhin bral zhing mtshan nyid gcig /zab dang brling ba'i bkod pa rnams/ /bla ma'i zhal gyis brjod par bya/ /der gyur mchog gi ngag gzugs rnams/ /srog gi shing rta steng du 'gro/ /kun rdzob don gyi bya byed rnams//yi ge'i rnam pa nyid las thob/ /ha yig mtha' la tsheg drag bcas/ /ri gcig gzhan ni ha yu dang / /rdzas gsum sa bon gsum po ni/ /brgyad cu lnga las bsdu ba gsungs/ /bskyed pa'i rim pa 'di yis ni/ /rang lus lha sku'i bdag nyid do/ /lha dang sngags dang dbyer med cing //sngags kyi de nyid bsam gtan bya/ /de yi mtha' la de brda yi/ /gnas la lha yi sku ru bsgom/ /bla ma'i man ngag bka' stsal gsungs/ /bdag gis de nyid rjes su myong / /sngags dang phyag rgya'i sku la 'khyud/ /dang por mtshan nyid de bzhin sgrub/ /gnyis gsum gzhan dag de spangs nas//bde chen de la kun khyad 'phags/ /de bzhin lte ba'i pad mthar yang / /sku gsung thugs rnams gsal ba yis/ /gzung dang 'dzin pa'i rtog pa yi/ /mtshan ma rnams kyis ma mtshan pa/ /de thob ro gcig nyams myong gnas/ /snying ga'i 'khor lo'i dbus su 'gro/ /bsgom bya'i mchog gi pha rol phyin//zla ba khu ba'i 'od rab gsal/ /de mthar longs spyod rdzogs pa thob/ /gsal bar thob pa khu ba'i bdag /bde chen gnas su 'gro bar byed/ /nam mkha'i phyag rgya mchog la brten/ /lhan cig skyes chen gnas zhi ba'i/ /rang gi don ni yang dag rig /zag pa kun la rnam par grol//dper na sprin med nam mkha' bzhin/ /de nas smon lam gdab bya gang / /gzhan gyi don du rab tu grags/ /de yi rang bzhin kun rdzob kyi/ /sngags kun yid kyis bzlas par bya/ /bdag med chen po de nyid mchog /phung po'i bud shing yang dag sreg / chags sogs sa bon sbyin sreg bya/ /phyi rol tshogs kyang sbyor ba las/ /pad+ma'i phyag rgya nam mkha' yi/ /phyag rgya rnam rgyas 'od rab gsal/ /'jig rten dbang phyug snang ba ni/ /shes bya spyod lam gtor ma btang / /bdag gi de nyid ces bshad pa/ /bskyed pa'i rim pa sbyor ba las//de yi de nyid goms bstan nas/ /sna tshogs pa yi rkyen ni mthong / /'di ni rigs lnga'i rnam pa yi/ /mngon rdzogs byang chub bsgom par bya/ /rig pa nyid du gsungs pa yang / /da ni lha yi de nyid brjod/ /rin chen chen po'i yon tan khyim/ /ye shes yid bzhin nor bu gsal//dpal ldan 'jig rten dbang phyug sku/ /'od zer kha dog rnam lnga brten/ /zhi ba'i don gsungs byang chub ni/ /rnam snang dkar po 'od dang ldan/ /bdag nyid gsung ba rang bzhin med/ /gti mug chen po'i rigs kyi bdag /dbang dgug dag la dmar po ste/ /'od dpag med dang mtshungs pa'i 'od//sems can drang phyir snying rje can/ /'dod chags chen po'i rigs kyi bdag /sngo ser dmar ba zhe sdang ste/ /don yod grub pa dang mtshungs 'bar/ bdag gis de nyid byas nas ni/ /rnam par zhe sdang skye bo 'gugs/ /sems can don phyir rgya chen nyid/ /phrag dog chen po'i rigs kyi bdag /bdud dgra 'joms pa nag po ste/ /mi bskyod pa ni nam mkhar gnas/ /'khor ba'i rtsa don spro ba yi/ /zhe sdang chen po'i rigs bdag nyid/ /mtho ris la sogs rengs byed ser/ /rin chen 'byung ldan dang mtshungs so/ /phyag rgya rnams brten gzhan don gyis/ / nga rgyal chen po'i rigs kyi bdag /de bzhin khyod kyis dga' ba che/ /ye shes lnga yi rnam dbye'o/ /de ni dag pa'i gzhi la bri/ /rigs dang kha dog nyams dang ldan/ /phyag mdog dbu rgyan phun sum tshogs/ /sngon bzhin mtshan ma bsten la brten/ /rigs kyi 'jig rten dbang phyug bdag /gang gi las kun 'di yis so/ /brgyad cu lnga gsal khri shing 'bras/ /rnal 'byor dbang phyug rnams kyi spyod/ de phyir gcig tu bsam gtan dga'/ /rnal 'byor rol pas kun du chags/ /bla mar gus pa'i khur gyis bkur/ /de shes de bzhin rab gsal bya/ /bla ma dang ni slob ma dag /gzhan du dam tshig nyams par 'gyur/ /'di ni ma hi ma zhes pa'i/ /bsgom pa goms pa'i gsung gis bris/ /'dir bsdus mdzes par gyur pa yis/ /bla ma las 'ongs thob pa yis/ /rgyal ba'i tshul gyis rigs de nyid/ /rang gis rjes myong gcig tu rigs//'jig rten mtha' dag de yis ni/ /rdzogs pa'i byang chub mchog thob shog /dpal ldan rje btsun rigs kyi 'jig rten mgon po'i sgrub thabs kyi snang ba rje btsun ma hi mas mdzad pa rdzogs so// //rgya gar gyi mkhan po d+harma d+har dang / yar lungs pa grags pa rgyal mtshan gyis dpal ldan sa skya'i gtsug lag khang du bsgyur ba'o/