CLOSE WINDOW

D2098
བོད་ཡིག

@#/ /rgya gar skad du/ Ar+ya many+dzu shrI nA ma saM gI ti TI kA sA ra no pi ka nA ma/ bod skad du/ /'phags pa 'jam dpal gyi mtshan yang dag par brjod pa'i 'grel pa snying po mngon par rtogs pa zhes bya ba/ 'phags pa 'jam dpal gzhon nur gyur pa la phyag 'tshal lo/ / gzugs sogs dbang po'i yul las 'das pa yi/ /rnam dag 'dus ma byas pa'i chos kyi sku/ /dbang po'i gzhu 'dras sa lam rab grol zhing / /gzhon nu'i 'o mas bu ltar gso mdzad lha/ /dam pa'i skyes mchog nges ston mdzad pa yi/ /zhabs kyi mtsho skyes gnas der spyis btud nas//tshig rgyas pa yi las rab bsdus pa'i don/ /dpag med 'byung gnas thabs mang ston pa'o/ /blo ni rmongs 'gyur rig pa'i gnas med kyang / /rje btsun drin gyis rgyud rnams kun gyi bcud/ /rtogs shing gsung rab la sogs gzhung gzhan yang / /mthong bas snying po'i mngon rtogs bshad par bya//rgyud gzhan rim pa ma yin pa'i/ /'jam dpal sgyu 'phrul dra ba las/ /thig le bzhir 'gyur dgur bcas pa/ /mda' gnyis rab tu phye ba la/ /rim gnyis rab tu sbyor ba ste/ /rgyud kyi rgyud nyid bshad kyis nyon/ /de la rgyud 'di ni rin po che lta bu yin te/ dbang po bzhi dang shin tu sbyor ba'i phyir ro//la la dag ni bya ba dang / spyod pa dang / rnal 'byor dang / /rnal 'byor chen po'i rgyud kyi thabs dang shes rab kyi rgyud kho na'o zhes zer te/ /de dag ni snying po la spyod pa'i gang zag ma yin no/ /de ci'i phyir zhe na/ chos thams cad kyi rang bzhin spros pa thams cad kyis dben zhing brtags pa'i rtog pa gang gis kyang ma gos par gcig pas du ma mi gnas kyis kyang gdul bya'i blo'i khyad par gyis du mar snang zhing rang rang gi rtog pa la bden par 'dzin pa'i phyir ro//de'i phyir/ sangs rgyas rnams kyis 'ga' zhig tu/ /yi ge gcig kyang ma gsungs par/ / chos kyi char gyis tshim mdzad pa/ /sems can gzhug pa'i ched du gnas/ /zhes gsungs pas so/ /de bas na kho bo ni 'og nas 'byung ba'i 'bras bu ni gtso bor ston to/ /gzhan gyi rig pa ma yin pa'ang / /chos kyi dbyings la dbyer med phyir/ /gtso bos theg dbye ma mchis kyang / / gang gis theg pa gsum bstan pa/ /nga ni thabs la mkhas pa'i dngos/ /zhes gsungs pas na/ dman pa dang 'bring dang rab kyi khyad par gyis nyan thos dang / rang sangs rgyas dang / theg pa chen po bstan pa yin no/ /rgyud du ston pa nyid du yang rigs te/ sngon du byung bas yang rgyud gcig nyid la du mar gzhag pa nyid de/de ltar yang rgyud gcig nyid la du mar go ba'o/ /de yang mkha' 'gro ma rdo rje dra ba'i gur las/ skyes bu bsdu bar bya ba'i phyir/ /rnal 'byor pa yi rgyud bshad do/ /btsun mo bsdu bar bya ba'i phyir/ /rnal 'byor ma yi rgyud bshad do/ /dman pa las ni las kyi rgyud/ / las kyi rnal 'byor de ltag la/ /sems can mchog la lhag rnal 'byor/ /bla med rnal 'byor de ltag la/ /zhes gsungs pas na/ rten la sogs pa'i khyad par du shes par bya'o/ /gling gzhi bstan pa nyid kyis chog pa ma yin te/ /sngar bzhin no/ /dbang po rab dang yang rab tu gyur ba la/ e waM ma ya shru ta sa ma ya e ka /zhes gsungs pa nyid kyis snying po la 'gro ba brtson par 'gyur ro/ /thams cad kyang ldan pa yin te/ /chos kyi phung po brgyad khri dang / /bzhi stong gi ni grangs snyed kyi/ /kun gyi gzhi dang pha ma ni/ /yi ge gnyis su yang dag bstan/ /yi ge e ni mar gyur la/ / waM ni pha zhes bya bar grags/ /thig le de gnyis sbyor ba ste/ /sbyor de shin tu rmad du 'byung / /zhes gsungs pas so/ /thams cad du mi 'gyur ba ma yin te/ thabs dang shes rab 'dus byas pa'i sbyor ba las nam mkha' dang mnyam pa'i sangs rgyas kyi chos gsungs par gyur to/ /de bas na skyes pa dang bud med gnyis sbyor ba ni ma ning ste/de 'jug pa'i khyad par gcig pu pa lhan cig skyes pa'i rang bzhin phyag rgya chen po brjod pa ni nges pa ste/ de bas na/ /gcig pu thams cad mkhyen pa ste/ /kun du 'gro ba shin tu phra/ /zhes gsungs pa dang / gzhung gzhan gyis kyang shes par bya'o//de ltar don gyi rang bzhin gtan la phab nas/ /tshig gi tshogs blo la rab tu sbyor ba'i dgos pas don bsdus nas bstan par bya ste/ /de nas dpal ldan rdo rje 'chang / /zhes pa nas/ /yang dang yang du gsor byed pa/ /zhes bya ba'i par gyis thun mong ma yin pa'i 'khor bstan to//khro gnyer rim par ldan la sogs/ /zhes pa nas/ lus btud rnams dang lhan cig tu/ /zhes pa'i bar gyis thun mong gi 'khor bstan to/ /de bzhin gshegs pa bcom ldan 'das/ /zhes pa nas/ /spyan sngar 'dug ste 'di skad gsol/ /zhes pa'i bar gyis mchod par brjod pa bstan to//khyab bdag bdag la sman pa dang / /zhes pa nas/ byang chub ci nas bdag thob mdzad/ /ces pa'i bar gyis bdag gi don du gsol ba bstan to/ /nyon mongs pas ni sems dkrugs shing / /zhes pa nas/ bla med 'bras bu thob bya'i bar gyis gzhan gyi don du gsol ba bstan to//rdzogs pa'i sangs rgyas bcom ldan 'das/ /zhes pa nas/ dbang po'i bsam pa mkhyen mchog gis/ /zhes pa'i bar gyis spangs pa dang ye shes phun sum tshogs pa'i gnas bstan to/ /bcom ldan 'das kyi ye shes sku/ /zhes pa nas/ glur blangs gang lags bshad du gsol//zhes bya ba'i bar gyis yang dag pa'i mtshan gyi don gsol ba bstan to/ /mgon po rdzogs sangs rgyas kun gyi/ /zhes pa nas/ sems can rnams la bshad par 'tshal/ /zhes pa'i bar gyis mi gnas pa'i mya ngan las 'das pa'i don gyi gsol ba'o/ / de dag ni gleng gzhi'i don gleng bslang ba dang 'brel bar bstan pa ste 'khor phun sum tshogs pa'o/ /gsang dbang lag na rdo rje yis/ /zhes pa nas/ /lus btud nas ni spyan sngar 'dug /ces pa rgyud nyan pa la gus pa'i sbyor ba bstan to/ /de nas bcom ldan shAkya thub//ces pa nas/ /sbyong bar byed pa'i 'dzum bstan nas/ /zhes pa'i bar gyis ljags byin gyis brlabs pa bdud mthar byed pa'i sbyor ba bstan to/ /tshangs pa'i gsung ni snyan pa yis/ /zhes pa nas/ legs so dpal ldan rdo rje 'chang / /zhes pa'i bar gyis tshangs pa'i gsung gi 'khor la ched du brjod pa bstan to//lag na rdo rje khyod legs so/ /zhes pa nas/ /khyod ni rtse gcig yid kyis nyon/ /zhes pa'i bar gyis nyan pa po thos pa dang sbyar bar bstan to/ /rkang pa ya gcig gis mtshams sbyar bar bstan to/ /'di dag ni sbyor ba phun sum tshogs pa'o//de nas bcom ldan shAkya thub/ /ces pa nas/ rigs chen gtsug tor cher gzigs nas/ /zhes pa'i bar gyis rigs la gzigs pa bstan to/ /tshig gi bdag pos tshigs su bcad/ /ces pa nas/ sde tshan bzhi pa dang lnga pa'i mthas byang chub kyi sems rdo rje'i ting nge 'dzin bstan cing bshad do//'di ltar sangs rgyas bcom ldan 'das/ /zhes pa nas/ /tshig kun rab tu gsal bar byed/ /ces pa'i bar gyis chos thams cad yi ge gcig gi lus la gnas par bstan to/ /mchod pa chen po 'dod chags che/ /zhes pa nas/ chags pa thams cad sel bar byed/ / ces pa'i bar gyis nyon mongs pa dang rigs rnam par dag pa'i mchod pa bstan to/ /'dod pa chen po bde ba che/ /zhes pa nas/ /sgyu 'phrul chen po mig 'phrul che/ /zhes pa'i bar gyis khams dang che ba bcu drug gi rnam dag bstan to/ /sbyin bdag chen po gtso bo che/ /zhes pa nas/ bsam pa'i ye shes rgya mtsho ste//zhes pa'i bar gyis rnam shes tshogs dang lha mo'i rnam dag bstan to/ /byams chen rang bzhin dpag tu med/ /ces pa nas/ theg pa chen po'i tshul gyi mchog /ces pa'i bar gyis sa dang bskal bzang bcu drug gi rnam dag bstan to/ /de dag ni rdo rje dbyings kyi dkyil 'khor chen po'i rnam dag de kho na nyid kyi snying po bstan pa'o//sangs rgyas rnam par snang mdzad che/ /zhes pa nas/ gsang sngags tshul chen bdag nyid can/ /zhes pa'i bar gyis chos kyi dbyings kyi rang bzhin bstan to/ /pha rol phyin bcu thob pa ste/ /zhes pa nas/ rnam bcu dbang ldan che ba po//zhes pa'i bar gyis lam gyi yon tan rdzogs par bstod pa bstan to/ /thog ma med pa spros med bdag /ces pa nas/ yang dag mtha' la rnam par gnas/ /zhes pa'i bar gyis thugs kyi byin rlabs la bstod pa bstan to/ /bdag med seng ge'i sgra dang ldan/ /zhes pa nas/ 'khor los sgyur ba stobs po che/ /zhes pa'i bar gyis gsung gi byin rlabs la bstod pa bstan to/ /tshogs kyi slob dpon tshogs kyi bdag /ces pa nas/ /tshul chen gzhan gyi dring mi 'jog /ces pa'i bar gyis sku'i byin rlabs la bstod pa bstan to/ /tshig rje tshig bdag smra mkhas pa//zhes pa nas/ bden pa bzhi ni ston pa po/ /zhes pa'i bar gyis 'gro ba'i 'dren ston du gyur pa bstan to/ /phyir mi ldog pa phyir mi 'ong / /zhes pa nas/ /bde gshegs 'jig rten rig pa'i mchog /ces pa'i bar gyis theg pa gsum gyi lus ye shes su bstan to//bdag gir mi 'dzin ngar mi 'dzin/ /zhes pa nas/ /'jig rten snang bar byed pa'i mchog /ces pa'i bar gyis 'jam dpal ye shes sems dpa'i ye shes bstan to/ /chos kyi dbang phyug chos kyi rgyal/ /zhes pa nas/ /bsam gtan bsam bya blo ldan bdag /ces pa'i bar gyis de thams cad rnal 'byor gyi ye shes kyi bdag nyid du bstan to//so so rang rig mi g.yo ba/ /zhes pa nas/ sangs rgyas sras po dam pa'i mchog /ces pa'i bar gyis rang rig tu gzhi gcig par bstan to/ /shes pa srid 'byung skye gnas med/ /ces pa nas/ /gzi brjid chen po 'od gsal ba//zhes pa'i bar gyis de nyid la rnyog pa bcus ma gos par bstan to/ /sngags mchog mnga' bdag rig sngags rgyal/ /zhes pa nas/ /drang srong che dgus mchod cing rjed/ /ces pa'i bar gyis sku'i 'khor lo bstan to/ /rigs gsum 'chang ba gsang sngags 'chang / /zhes pa nas/ theg pa mchog gsum ston pa po/ /zhes pa'i bar gyis ye shes kyi 'khor lo bstan to/ /don yod zhags pa rnam par rgyal/ /zhes pa nas/ /rdo rje lcags kyu zhags pa che/ /zhes pa'i bar gyis rigs kyi 'khor lo bstan to/ /rdo rje 'jigs byed 'jigs par byed/ /ces pa nas/ sgra dang ldan pa rnams kyi mchog /ces pa'i bar gyis me long lta bu'i ye shes kyi 'khor lo bstan to/ /yang dag bdag med la sogs pa'i rkang pa gnyis kyis don gyi rgyud la bstod pa bston to/ /stong nyid smra ba'i khyung mchog ste/ /zhes pa nas/ /chos kyi gaN+DI sgra bo che/ /zhes pa'i bar gyis tshig gi rgyud bstan to//mi gnas pa la sogs pa rkang pa gnyis kyis rab tu byed pa'i rgyud bstan to/ /gzugs med gzugs bzang dam pa ste/ /zhes pa nas/ /gzugs rnams ma lus 'chang ba po/ /zhes pa'i bar gyis bde ba chen po'i rgyud bstan to/ /mtshungs pa med cing che bar grags//zhes pa nas/ dar ba chen po chos kyi tog /ces pa'i bar gyis bsam gyis mi khyab pa'i rgyud bstan to/ /'jig rten gsum na gzhon lus gcig /ces pa nas/ sdu gu 'jig rten gsum na mdzes/ /zhes pa'i bar gyis 'bras bu'i rgyud bstan to//'jig rten shes legs slob dpon te/ /zhes pa nas/ /skyabs dang skyob pa bla na med/ /ces pa'i bar gyis thabs kyi rgyud bstan to/ /nam mkha'i mtha' la longs spyod pa/ /zhes pa nas/ /'khor ba'i rgya mtsho pha rol phyin/ /zhes pa'i bar gyis thabs ye shes sems dpa'i rgyud bstan to//ye shes dbang bskur cod pan can/ /zhes pa nas/ gsum sel mtha' yas grol gsum thob/ /ces pa'i bar gyis dri ma rnam par dag pa'i rgyud bstan to/ /sgrib pa kun las nges par grol/ /zhes pa nas/ /lus kun las ni rnam par gnas/ /zhes pa'i bar gyis bya ba dang bral ba'i rgyud bstan to//nam mkha'i mtha' la rab gnas pa/ /zhes pa nas/ yon tan ldan zhing yon tan shes/ /zhes pa'i bar gyis gzhan gyi don phun sum tshogs pa bstan to/ /chos shes bkra shis bkra shis 'byung / /zhes pa nas/ /bkur sti rim gro phun sum tshogs//zhes bya ba'i bar gyis rang don bkra shis rgyud las skye bar bstan to/ /mchog tu dga' ba grags bdag dpal/ /zhes pa nas/ 'jig rten sgra ste rab kyi mchog /ces bya ba'i bar gyis rang bzhin brtags pas dben pa bstan to/ /'jigs pa ma lus sel ba po/ /zhes pa nas//gdong lnga gtsug phud lnga dang ldan/ /zhes pa'i bar gyis tha mar dge ba phyag rgya chen por bstan to/ /zur phud lnga pa me tog thod/ /ces pa nas/ /dka' thub mthar phyin dka' thub che/ /zhes pa'i bar gyis bar du dge ba chos kyi phyag rgya bstan to/ /gtsang gnas dam pa gau ta ma/ / zhes pa nas/ /grol ba thar pa rnam grol lus/ /zhes pa'i bar gyis tha mar dge ba las kyi phyag rgya bstan to/ /rnam grol zhi ba zhi ba nyid/ /ces pa nas/ /ye shes lus can de bzhin gshegs/ /zhes bya ba'i bar gyis bde ba chen po'i lus lhan cig skyes pa bstan to/ /tshig gi dbang phyug smra ba che//zhes pa nas/ smra ba'i seng ge tshugs pa med/ /ces bya ba'i bar gyis tshig la mi gnas pa'i tshig gi gnas su bstan to/ /kun du dga' ba mchog tu dga'/ /zhes pa nas/ lag na 'od 'bar snang ba bo/ /zhes pa'i bar gyis sku dang ye shes la sogs pa'i snang ba bstan to//sman pa che mchog gtso bo ste/ /zhes pa nas/ nad do cog gi dgra che ba/ /zhes pa'i bar gyis 'gro ba la sman par snang ba bstan to/ /sdu gu 'jig rten gsum gyi mchog /ces pa nas/ chos kyi rgyal mtshan legs par 'dzugs/ /zhes pa'i bar gyis chos kyi rgyal mtshan du snang ba bstan to/ /'gro na gdugs gcig yangs pa ste//zhes pa nas/ sangs rgyas kun gyi bstan pa gcig /ces pa'i bar gyis rim pa gnyis su snang ba bstan to/ /rdo rje rin chen dbang bskur dpal/ /zhes pa nas/ /sangs rgyas kun gyi gsung yang yin/ /zhes pa'i bar gyis rigs su snang ba bstan to/ /rdo rje'i nyi ma nas rkang pa gnyis kyis bklag pa'i thabs dang mi gnas pa bstan to//chags bral la sogs chags pa che/ /zhes pa nas/ yi ge mchog ste rnam par dag /ces pa'i bar gyis lam gyi ye shes lhun gyis grub pa bstan to/ /theg pa chen po sdug bsngal gcod/ /ces pa nas/ rgyud kun gyi ni bdag po mchog /ces pa'i bar gyis ye shes lhun gyis grub pa bstan to/ /rdo rje gdan ni ma lus ldan/ /zhes pa nas/ sprul pa'i 'khor lo sna tshogs 'chang / /zhes pa'i bar gyis gsang don lhun gyis grub pa bstan to/ /dngos po kun gyi rang bzhin mchog /ces pa nas//ye shes me lce 'od rab gsal/ /zhes pa'i bar gyis ye shes lhun gyis grub pa bstan to/ /'dod pa'i don grub dam pa ste/ /zhes pa nas/ /sems can thams cad rab grol byed/ /ces pa'i bar gyis mnyam pa nyid kyi ye shes mdor bstan to/ /nyon mongs g.yul du gcig dpa' ba//zhes pa nas/ /tshangs pa'i g.yul sa rtse nas gnon/ /zhes pa'i bar gyis las kyi phyag rgya bstan to/ /don gcig gnyis med chos kyi don/ /zhes pa nas/ nyi ma 'char ka'i dkyil ltar mdzes/ /zhes pa'i bar gyis dpe don gyi 'brel ba bstan to/ /sen mo'i 'od ni shas cher dmar//zhes pa nas/ sangs rgyas sprul pa'i rgyud dang ldan/ /zhes pa'i bar gyis mtshan dpe bstan to/ /'jig rten khams brgya kun bskyod pa/ /zhes pa nas/ nges par 'byung ba kun ston pa/ /zhes pa'i bar gyis thun mong gi lam rdzogs par bstan to/ /yan lag bcu gnyis srid rtsa bton//zhes pa nas/ /bye ba dpag med 'gyed pa po/ /zhes pa'i bar gyis spangs pa phun sum tshogs pa bstan to/ /skad cig thams cad mngon par rtogs/ /zhes pa nas/ theg pa gcig gi 'bras bur gnas/ /zhes pa'i bar gyis skad cig gi ye shes bstan to/ /nyon mongs khams rnams dag pa'i bdag /ces pa nas/ sbyor ba'i dgon pa las byung ba/ /zhes bya ba'i bar gyis gsang sngags mtha'i don du bstan to/ /nyon mongs pa la sogs pa rkang pa gnyis kyis 'khor ba'i sa bon dang bral bar bstan to/ /snying rje chen po shes rab thabs/ /zhes pa nas/ / nor ba thams cad rnam par spangs/ /zhes pa'i bar gyis gzhan don mdzad pa bstan to/ /don gsum the tshom med pa'i blo/ /zhes pa nas/ /sangs rgyas kun gyi rang bzhin 'chang / /zhes pa'i bar gyis de nyid kyi 'thad pa bstan to/ /lus med lus te lus kyi mchog /ces pa nas/ /nor bu chen po rin chen tog /ces pa'i bar gyis ye shes kyi lus kyi mdzad pa bstan to/ /sangs rgyas la sogs pa rkang pa gnyis kyis bya ba nan tan gyi ye shes mdor bstan to/ /gsang sngags las byung yi ge med/ /ces pa nas/ thig le stong pa yi ge brgya/ /zhes pa'i bar gyis yi ge thams cad tshogs gcig pa'i stong par bstan to//rnam pa kun ldan rnam pa med/ /ces pa nas/ /bsam gtan bzhi yi rtse mo can/ /zhes pa'i bar gyis e waM gyis dbugs dbyung ba bstan to/ /bsam gtan yan lag kun shes shing / /zhes pa nas/ /phyogs bcur sprul pa sna tshogs 'gyed/ /ces pa'i bar gyis sku gsum du bstan to//de bzhin 'gro ba'i don byed pa/ /zhes pa nas/ /srid pa'i dgon pa las brgal ba/ /zhes pa'i bar gyis 'gro ba gsum gyi gtso bor snang ba bstan to/ /ston pa gcig pu 'gro ba'i bla/ /zhes pa nas/ /bdud kyi dpung rnams pham byed pa/ /zhes pa'i bar gyis bdud pham par byed pa bstan to//rdzogs pa'i sangs rgyas 'jig rten 'dren/ /zhes pa nas/ /phyag byar 'os pa bla ma'i rab/ /ces pa'i bar gyis bsnyen bkur gyi gnas su bstan to/ /'jig rten gsum po gom gcig bgrod/ /ces pa nas/ /shes dang shes bya'i bdag po mchog /ces pa'i bar gyis 'jig rten dang 'jig rten las 'das pa'i sprul pa mnga' bar bstan to/ /gtso bo chos kyi sbyin bdag ste/ /zhes pa nas/ /'jam dpal dpal dang ldan pa'i mchog /ces pa'i bar gyis mjug bsdu ba bstan te/ de dag gis ni byang chub kyi sems rdo rje zhes bya ba'i snang ba ye shes lngar bstod pa'o//mchog sbyin rdo rje mchog khyod 'dud/ /ces pa nas/ /yi ge re re zhing chos kyi dbyings la sogs pa la bstod pa bstan to/ /rigs kyi bdag po nas bzung ste/ an+tas+tha dang / ush+ma Sha'i gnyis pa dang / bzhi pa'i bar gyis ye shes sngags kyi rang bzhin du bstan to//rigs kyi bdag po nas bcu drug pa'i bar gyis de yang 'jam dpal ye shes sems dpa'i sngags kyi rang bzhin du bstan te/ de dag ni don gyi snying po yon tan bsdus pa'i don gyi bstod pa'o/ /de nas dpal ldan rdo rje 'chang / /zhes pa nas/ rdzogs sangs rgyas la phyag 'tshal nas//zhes pa'i bar gyis 'khor gyi mchod pa brjod par bstan to/ /de ni mgon po gsang ba'i bdag /ces pa nas/ /rdzogs pa'i sangs rgyas kun gyis bshad/ /ces pa'i bar gyis ched du brjod pa'i bstod pa bstan to/ /de dag ni ye shes kyi rjes su mthun pa'o/ /mtshan nas rjod pa'i yon tan gyi sgo nas bstod pa ni sgo lnga'i khyad par shes par bya'o//de ltar bsdus pa'i don yongs su shes shing / don lhag par rnyed pa'i gang zag gis rgyud kyi rab tu byed pa'i don 'di nyid kyang bde blag tu rnyed par 'gyur ro/ /da ni tshig gi don gsal bar dbye bar bya ste/ /de nas dpal ldan rdo rje 'chang //zhes bya ba la sogs pa la mchog dang thun mong gi dngos grub thams cad 'byung ba'i gnas mtshon pa la gang nas she na/ man+t+ra'i rang bzhin shes shing skyob pa'o/ /des spangs pa dang ye shes phun sum tshogs par 'gyur ba'i phyir dpal ldan rdo rje 'chang ngo / /gdul dka' ba ni theg pa gsum ste/sprul pa dang / longs spyod rdzogs pa'i 'khor los skyar ba dang / longs spyod rdzogs pa'i 'dul ba rnams so/ /kyi zhes pa ni drug pa'i don gyi gnyis pa'o/ /'dod chags dang zhe sdang dang gti mug rnam par dag pa ni theg pa'i yang rnam par dag pa ste/ bde ba dang / stong pa dang / gnyis su med pas na mchog go/ /dpa' bo ni 'jigs shing thub pa med pa ste sku dang / gsung dang thugs kyi khyad par gyis sa 'og dang sa steng dang / /sa bla las rgyal ba'o/ /rdo rje ni stong pa nyid bde ba chen po'i snying po can te/ gang la yod pa ni dbang phyug go/ /de lnga'i gsang ba las thob pa ni rgyal po'o//pad+ma dkar po ni dkar ba la sogs pa'i yon tan lnga dang ldan pa ste/ /'dir rnam par rtog pa bzhi pa la sogs pa dang ldan pa'o/ /ye shes la ched du brjod pa ni rang las te/ 'gro ba 'dzin pa'i don gyis na yang zhes sbyar ro/ /khro gnyer dang sku dang / og spu ser la brdzes pa dang / mig dmar dang /lce 'dril zhing ya sos ma mchu mnan pa dang / thung zhing gel ba dang / gsus pa che ba dang / yan lag rab tu bgrad pa dang / nying lag rdo rje rtse mo lta bu dang / dur khrod dang / gdug pa'i rgyan gyis brgyan pa dang / /mtshon cha 'bar zhing 'phro ba dang / mgo bo'i do shal dang / me 'bar ba'i gnas ni rim par ldan pa la sogs pa ste/lag na rdo rje dang mtshungs par mtha' yas pa la yod pa ni ma rig pa la sogs pa rten cing 'brel bar 'byung ba bcu gnyis zad pa'i don to/ /de snyed kyi ba spu'i khung nas 'phro ba yang rdo rje rtse mo ste khro bo'i gzugs so/ /rang gi lag gis gsor bar byed pa ni snga ma bzhin te//de'i don kyang snying rje chen po dang shes rab dang zhes pa'o/ /thabs ni sngon rang gi don du gyur pa ji ltar de nyid kyis gzhan don du 'gyur ba'o/ /de ltar sprul pa dang yang sprul gyi gzugs thams cad bcom ldan 'das rdo rje 'chang gi rang bzhin lus ngag yid gsum gyis mchod pa'i phyir/dga' mgu rangs pa'i bsam pa can no/ /khro bo 'ba' zhig mi rigs pa ma yin te/ sangs rgyas kyi phrin las sems can gyi mgon du gyur pas so/ /de dang lhan cig pa ni phyag na rdo rje'o/ /thams cad bsam pa mthun par zhes pa'o/ /de bzhin gshegs pa ni de bzhin nyid snang ba med pa'i ye shes thugs su chud nas 'gro ba'i don la gshegs pas so//shes rab kyis bcom pa nyid kyi phyir dang / dbang phyug la sogs pa'i yon tan dang ldan pas mi gnas pa brnyes pas na bcom ldan 'das so/ /de bzhin gshegs pa zhes bya ba'i sgra ni byang chub sems dpa' la yang gsungs shing bshad pa ste/yang dag par rdzogs pa'i sangs rgyas la sogs pa'i yon tan ni bde ba chen po thob pa 'ba' zhig la'o/ /khyab bdag ni yongs su dag pa'i ye shes thams cad la khyab pa'i bdag nyid do/ /yang na sems can thams cad kyi snying por gnas pa dang /chos thams cad kyi rang bzhin du gnas pa dang / kun nas nyon mongs pa dang rnam par byang ba'i byed pa po nyid kyis 'gro ba bzhi'i dbang po la khyab pa'i bdag nyid do/ /bdag ni bdag nyid kho na'o/ /sman pa ni tshig dang / don dang spobs pa'i gzungs kyis so/ /bdag don ni mthar thug pa'i don to//phyir ni dgos pa'o/ /thabs khyad par can gyi sgyu ma dang 'phrul gyi rnam pa lta bu ste/ nang gi rten cing 'brel par 'byung ba'i sbyor bar bde ba chen po'i dra bas kun la g.yogs par bya ba nyid kyis rdzogs pa'i byang chub tu 'gyur bar ro/ /ci nas zhes pa ni/ nan tan du bya ba'i tha tshig go//theg pa chen por 'gyur ba nyid yin te/ dper na sa bon gyi ma gtogs par myu gu la sogs pa'i yon tan 'byin par ga la nus/ de bas na/ /ma rdzogs rdzogs byed mda' yin no/ /zhes gsungs pas/ rgyu'i gnas skabs kyi thabs kyi sbyor ba la yang bkag na/ phun sum tshogs pa'i 'bras bu'i phyir lta smos kyang ci dgos/ dang por nang gi bdag nyid la bzhag cing sbyar bar bya ba'i phyir/ /sems can mos pa sna tshogs pa/ /rgyal bas kyang ni ma gsungs na/ /bdag 'dra ngan pa smos ci dgos/ /de bas 'jig rten bsam pa btang / /zhes gsungs pa'i don kyang de'o//rgyu 'bras rjes su mi mthun pa ma yin te/ byams pa dang snying rje sngon du song ba'i byang chub kyi sems smon pa dang 'jug pa dang / shin tu 'jug pa la sogs pas sems can gyi don gyi phyir nang du gzhag pa'o/ /de bas na rnam par rtog pa gang gang gis/ gang gang blo ni bsgoms pa dang //bsgoms pa'i stobs ni rdzogs pa dang / /bde gsal mi rtog blo 'bras can/ /zhes pas kyang shes par bya'o/ /nyon mongs pa ni thams cad rang bzhin dngos po dang / dngos po med pa dang / btang snyoms kyi rnyog bas sems dkrugs pa'o/ /mi shes pa ni brgyud pa'i gzhung lugs dang bral bas don ma phrad de smig rgyu la chur bzung bas ngal zhing gdungs pa bzhin/'dir yang brtags pa'i rnyog pa'i 'dam du bying bar gyur pa rnams so/ /sman pa ni gzhan shes rab gsum la sbyar ro/ /nang gi bdag nyid la 'jug pa'i dgos pas na phyir ro/ /bla ni 'bras bu ster ba'i don gyis so/ / ston pa ni log rtog bzlog pa'o/ /dam tshig ni sdom pa ste/ bde ba dang stong pa'i dra ba phyed pa de nyid ji lta ba mkhyen cing thugs su chud pa'o/ /de nyid kyi phyir sangs rgyas kun gyi sdom pa ni/ e waM las ni rab tu zhugs/ /zhes gsungs so/ /dbang po gdul bya'i rgyud mkhyen pa'o/ /bsam pa ni gdul bya'i 'dod pa mkhyen pa'o//de dag ni gnas su gyur pas mchog go/ /gis ni drug pa'i don gyi gnyis pa'o/ /ye shes sku ni ye shes phung po can te bde ba chen po'i rang bzhin gyis rtag pa nyid rtag tu 'byung ba'o/ /de bas na/ gang gis nga la gzugs su mthong / /gang gis ngal sgrar shes pa//log par rtog pa spang ba ste/ /skye bo de yis nga mi mthong / /sangs rgyas rnams ni chos kyi sku/ /'dren pa rnams kyi chos nyid ni/ /de ni rnam par shes mi nus/ /zhes gsungs pa'i phyir ro/ /gtsug tor ni bltar mi mngon pa ste/ /de nyid zil gyis mi non pa'i rtags yin pas na gtsug tor chen po'o//tshig gis rjod par byed pa ste/ mi zad pa'i gsung mnga' bas bdag po'o/ /ye shes ni mtha' dang bral ba ste mi 'gyur bas na sku'o/ /de'i mtshan nyid ni rang 'byung ba ste/ 'jam dpal ye shes sems dpa'i mtshan gyi don brjod pa'o/ /'brel pa gcig pas mchog go/ /don zab pa ni rtogs par dka' ba'o/ / don rgya che ba ni blo'i yul ma yin pas so/ /don chen po ni rang gzhan grub pas so/ /mtshungs pa med pa ni gcig pur gyur pas so/ /zhi ba ni glo bur gyi dri ma dang bral bas so/ /dge ba gsum ni skye ba dang / /gnas pa dang / 'gag pas dben pa'o/ /yang na lus dang ngag dang / yid gsum las 'byung ba gsum mo/ /yang na dus gsum du gsungs pa dang //gsung bar 'gyur ba dang gsung ba'o/ /de nyid ni yang dag pa'i shes par sgrub par byed par yang sbyar bar bya'o/ /rgyud ni tshig dang don to/ /rgyu dang lam dang 'bras bu chen po ste/ de rab tu rgyas par gsal bar byed pas tshig la yang ngo / /thabs kyi rgyud sgyu 'phrul dra ba mtshon pas btags pa ste/lha sbyin zhang po can zhes bya ba lta bu'o/ /las ni skal ba'i rgyud de gong du bstan zin to/ /rdo rje 'chang chen ni grags chen la/ /gsang sngags 'chang ni snying po don gyi sangs rgyas so/ /ji snyed pa ni dpag med rnams kyis so/ /dgyes bzhin du glur blangs pa bshad du gsol zhes pa ni nges pa'i don to//gsang 'dzin ni rgyud 'di nyid sngar bshad pa'i don yang ngo / /phyir ni gtso bor gyur pa gzhan med pa'o/ /nges pa ni mi gnas pa'i mya ngan las 'das pa ste/ der ma byung gi bar la 'byung gi bar zhes bya'o/ /gzung ba ni bdag don du'o/ / gsang ba spang ba ni gzhan gyi don gyi phyir ro/ /bsam pa'i khyad par ni dbang po'i bye brag la'o/ /bshad par 'tshal ba ni de kho na nyid bcu dang / rim pa gnyis dang zung du 'jug pa'o/ /gsang dbang ni dug bcom pa'i de nyid la dbang ba'i lag na rdo rjes so/ /de skad du zhes pa ni lnga'i gsol ba gdab bo//spyod lam ni gus pa'i rtags so/ /de nas de ma thag tu'o/ /rigs dang stobs mtshon pas shAkya thub pa'o/ /rkang gnyis ni lha dang mi'i ste/ de'i mchog tu gyur pa'o/ /bzang ba dang / kha dog dang dbyibs phun sum tshogs pa'o/ /ring zhing yangs pa ni chu dang zheng ngo / / brkyang ba dang / 'od phyung ba dang / /'dzum pa bstan pa'i bdud btul ba dang / 'khor bag dang ldan pa la dgod pa dang / thugs rje chen pos sems can gyi yid dang mthun par bstan pa'o/ /tshangs pa'i gsung dbyangs ni yan lag drug cu dang ldan pa ste/ /'dir snyan pa dang / che ba dang gsal ba dang /don go bar nus par 'dus pa ston pa'o/ /bkang ba ni grags pa'o/ /gsang ba ni gsang ba chen po la'o/ /slar gsungs pa ni zhus pa'i lan no/ /snying rje chen po ni thun mong dang thun mong ma yin pa'o/ /dag par byed pa ni nyon mongs pa dag par byed pa ste/ bkra shis par ro//sdig sel ba ni rdul dang bral ba'o/ /brtson pa ni ma yengs par rtse gcig pa'o/ /rang don nyid kyis legs so zhes pa'o/ /gnyis pas gzhan don gzung ba'o/ /legs par bstan pa ni 'bras bu dang bcas pa'i lam du'o/ /nyon zhes pa ni/ rdo rje 'chang sangs rgyas thams cad kyi rang bzhin du blta ba dang rgyud kyi rgyal po 'di nyid yid bzhin gyi nor bu rin po ches brtan pa ltar blta ba dang /thun mong gi 'khor rin po che lta bu'i gang zag tu blta ba dang / bshad bya sems kyi rang bzhin shes rab dang snying rje dbyer mi phyed par blta ba dang / gsung dri ma med pa'i bdud rtsis dbang po tshim zhing khyab par 'gyur ba'i phyir//gsang sngags ni 'gro ba 'dul ba'i dum bu lha'i 'khor lo ste/ snying po dang / phyag rgya dang / rig sngags rnams la thams cad ces bya'o/ /de dag ni rdo rje dbyings la sogs pa'i lha'i 'khor lo gzung ngo / /de nyid kyi rigs shes par yang bya'o/ /rigs chen ni rnam par snang mdzad chen po'i rang bzhin lnga pa dang drug pa'o//kho bo ni rigs 'pho bar 'dod pa ste/ dam pa'i zhal las 'ongs pa ni rgyas gdab gsum gyi ngo bo nyid yin pa'i phyir te mdor bstan pa'o/ /gsang sngags rig sngags 'chang ba'i rigs/ /zhes pa ni gsang sngags la sogs pa ni rig sngags kyi las byed cing /don bsgrubs na 'chang ba ste las kyi rigs so/ /yang na thams cad shes rab kyi rtags su shes par byas la/ des de la nan tan du byas pas de 'grub ces pa'o/ /sku dang gsung dang thugs ni rigs gsum ste/ la ni de nyid gzhir byas pa'o//de bzhin gshegs pa'i rigs la ni/ /zhes bya ba la rnam par gzigs pa ni sku'o/ /'jig rten ni log pa'i shes pas brtags pa'i 'khor ba ste/ de nyid rang gi ngo bo rnam par dag pa ni 'jig rten las 'das pa'i rang bzhin la/ 'khor ba'i skyon gyis ma gos pas na pad+ma'i rigs so//de bas na/ dpal dgyes pa'i rdo rje las gti mug la sogs kyis mi 'ching / /rang rang nyid ni rdzogs byang chub/ /ces gsungs pa'i phyir ro/ /'jig rten gzugs la sogs pa ste/ /snang ba'i dbang po'i yul du 'gyur ba'o/ /de'i byed pa po ni mnyam pa nyid kyi ye shes te//rin po che'i rigs la phyogs med pas na chen po'o/ /phyag rgya ni khyab cing mi 'da' ba'i don gyis te/ 'bras bu 'ba' zhig pas chen po'o/ /rigs mchog ces pa ni/ rigs lnga dbyer mi phyed pas rtsod 'das kyi rigs so/ /rdo rje'i rigs ni chen po ste/ rigs bzhi'i bdag nyid yin pa'i phyir 'khor rnams la zil gyis mi gnon pa'i skye mched yod pa dang nyid kyis zil gyis mi gnon pa'i skye mched kyi 'khor rnams rigs drug gi rgyud du mkhyen pas gtsug tor cher gzigs nas zhes bya'o//gtso bo rdo rje dbang phyug la dgongs pa dang / 'bras bu kho na lam du bya ba'i phyir/rigs drug gi rang bzhin byang chub kyi sems bde ba chen po nyid bshad par bya ste/ tshig ces pa ni tshig gi rgyud do/ /bdag po ni 'jam dpal ye shes sems dpa' ste rdo rje 'chang ngo / /tshigs su bcad pa ni rkyang ba bsdus pa'o/ /bka' stsal pa shugs kyis shes par bya ste/longs spyod rdzogs pa chen po dang / 'khor los sgyur ba dang / bstan pa'i bdag pos so/ /gsang sngags ni skye ba med pa'i snying po can yi ge a'o/ /rgyal po ni thams cad kyi bdag por gyur bas so/ /drug ni sde tshan shes rab kyi yi ge'o/ /ldan pa ni sde tshan bdun pa'i thabs kyi yi ge'o//de mtshon byed du gyur cing / /thun mong dang mchog gi nus pa 'byung zhing shes par bya'o/ /gnyis su med par 'byung ba dang / /zhes bya ba ni ma ning yi ge'i rang bzhin mtshon par bya'o/ /mi skye ba ni ngo bo ste chos so/ /chos ni rkyen las skyes pa ste chos can no//can ni tha mi dad pa'i rang bzhin 'di gsungs pa'o/ /de ltar gnyis su med pa'i ye shes yongs su dag cing dri ma med pa ji ltar gnas she na/ ring thung gi bye brag gis rigs dang rigs kyi ye shes so/ /de bzhin gshegs pa'i rigs ni me long lta bu'i ye shes te/ mtshan dang dpe byad kyi 'khor lor snang ba dang /sna tshogs dkar dmar gyi rnam par snang ba ni gdul bya'i snang ba'i khyad par te/ de nyid rnam par dag pa dang rnam pas rang bzhin gyis 'od gsal ba i I zhes bya'o/ /rin po che'i rigs ni mnyam pa nyid kyi ye shes te/ thun mong ma yin pa'i dbang po'i longs spyod du gyur pa dang /thun mong gi dbang po'i spyod yul du gyur pa ni gdul bya'i dbang po'i khyad par te/ rnam par dag pa dang rnam par dag pas mtha' bzhi la mi gnas pa ni au au zhes bya'o/ /pad+ma'i rigs ni so sor rtog pa'i ye shes te/ khro ba dang mnyam pa dang zhi ba'i khyad par gyi rigs bsdus rgyas bye brag tu snang ba dang / rnam shes skye ba'i sgo tha dad par snang ba ni gdul bya'i dbang po'i khyad par te/ rnam par dag pa dang rnam par dag pas kun nas nyon mongs pa dang rnam par byang ba rgyud gcig tu gnas pa u U zhes bya'o//las kyi rigs ni bya ba nan tan gyi ye shes te/ thogs pa med pa'i skus rigs so so'i phrin las rtag tu rgyun mi 'chad par mdzad pa dang / dag pa'i kun rdzob kyi mtshan nyid rang dang mthun pa'i don byed/ gdul bya'i snang ba'i khyad par te/ rnam par dag pa dang rnam par dag pas 'bad pa med par rang gi ngang gis 'byung ba ni aM a'o//rdo rje'i rigs chos kyi dbyings kyi ye shes te/ thams cad gcig tu gyur pa nyid dang / sgro skur dang bral ba nyid ni de bzhin gshegs pa dang gang zag gi khyad par te/ rang gi ngo bos ni gcig la rtag tu 'byung ba dang rjes 'jog tu gnas pas rnam par dag pa dang /rnam par dag pas 'di'i zhes 'ga' la yang mi gnas pa'i e ai zhes bya'o/ /rdo rje sems dpa'i rigs ni bde ba chen po'i ye shes te/ gzugs can ma yin pa dang / skye 'jig med pa dang / yul la mi gnas pa dang / 'gro 'ong med pa dang / phyi dang nang gi chos thams cad de'i ngo bor gcig pa dang /zug rngu gang gis kyang ma gos pa'i ye shes snang ba med pa la sogs pa 'bras bu'i lus brgyad dang ldan pa dang / mtshan ma thams cad rang grol bas dbang po rang bzhi zhing ming gis dben pa'i zung 'jug rgyud las skyes pa ni/ rigs thams cad ye shes thams cad nyid yin pas rtsod 'das zhes bya ste/dbye ba med pa la a A zhes bya'o/ /de rtogs par bya ba ni rnam par rtog pa'i blo'i khyad par nang rten cing 'brel te 'byung bas 'jug pa ste/ s+thi to hr-i de zhes bya ba ni re zhig pa'i gnas mtshon pa ste/ snying ga chos kyi 'khor lo la sogs pa'o//dz+nyA na zhes bya ba ni dga' ba dang mchog tu dga' ba dang / dga' bral dang / lhan cig skyes pa'i dga' ba'i ye shes gnas de dag tu rnyed par 'gyur ba'o/ /mUrti zhes bya ba ni spyi gtsug la bya ste/ phra mo'i rnal 'byor gyi sbyor bas 'khrul 'khor gyi sbyor bas lam nges par sbyangs nas thig le'i rnal 'byor gyis shigs pa med pa'i yi ge haM las byang chub kyi sems 'dzag pa 'dren cing rol pas bde ba rnyed par 'gyur ba'o//ra ga ra ste chags pa chen po'i sbyor bas 'og nas 'byung ba'i bcom ldan 'das ma'i ye shes de nyid haM ngo / /ji ltar rnal 'byor du bya ba ni ra ste rdo rje dang pad+ma'o//de yang ye shes kyi byed pa po dang phrad pa las byang chub kyi sems gnyis ni a dang bud+d+ho'o/ /de nyid nang gi 'jug pa'i rim pas rtogs par gyur pa ni bud+d+ha nAM no/ /dga' ba gsum lhan cig skyes pa'i ngo bor 'byung ba dang / lhan cig skyes pa dus gsum du 'byung ba ni t+r+ya d+h+wa brti nI'o//man ngag bla ma'i zhal las shes par bya'o/ /ji ltar nyams su blang ba yang dbyer mi phyed pa'i ye shes blo'i yul ring du gyur pa ni badzra tI k+Sh+Na'o/ /de ltar yang sdug bsngal gcod par nus pa yang ma yin te/ dam pa'i zhabs kyi pad+mo la btud pa'i drin gyis/skad cig la rnyed par gyur pas duHkha ts+tshe da'o/ /de bas/ kye ho grogs dag lhan cig skyes pa de/ /gzhan nas mi rnyed bla ma'i zhal las dris/ /zhes gsungs pas so/ /des gnang bar gyur pa'i rim pa ni pradz+nyA dz+nyA na'o/ /mUrti ni rgyun te bzhi pa'o/ /ya ni ya te gnas pa'i don to//de nyid gnyug ma'i ye shes rang gi mtshan nyid du byas pa ni dz+nyA na ste/ de bzhin gshegs pa thams cad kyi sku gsung thugs rdo rje nyid yin par kA ya wAka go/ /yang ni bA gI shwa ri ni gsung gi dbang phyug gi rgyud pas de nyid shes par bya ste/ lung dang rang gi rigs pa dang bla ma'i gdams ngag gis zhes gzhan du bstan to//a la sogs pa'i don ni skye ba med pa'i bde ba chen po'i snying po zhes dang / mngon par zhen pa dang bral ba'i stobs kyis dam tshig gi spyod pa dang / /rigs pas thams cad kyang de bzhin du bsdu ba dang / de kho na nyid re re dang bral ba dang zhes bya ba'i don la yang mi gnas pa'o//'di ltar ni bshad zin pa dang sbyar ro/ /a las 'byung ba ni sangs rgyas kyi rgyud don A'o/ /don chen la sogs pa ni don che bas phan yon che ba 'byung bas na skye ba med pa'i snying rje'i snying po can ni yi ge dam pa a las 'byung ba yin no zhes bya'o//mchog ni mchod pa dang rjed gzhi thams cad kyi srog tu gyur pa ste/ khong nas 'byung bas na srog go/ /de'i phyir skye ba med pa mtshon par nus te/ dper na srog gi rlung 'gags na thams cad 'gag par 'gyur ba bzhin no/ /brjod pa dang bral bas phun sum tshogs pa 'byung ba ste/brjod pa ni ming yin la de las blo skye ba'i phyir ro/ /thams cad du brjod pa ma bkag pa ni ma yin te/ srog yin pas rgyur 'gyur la/ yan lag gi gsal bar byed pa'o/ /de ltar yi ge gtso bo las mngon par 'phel ba ni dkyil 'khor gyi 'khor lo thams cad kyi sa bon dang /snying po dang sngags su gyur pa'o/ /gsal yig ma 'phel ba ma yin te/ srog tu brjod pa'i phyir dang / bcu gcig pa'i thig les thabs kyi rang bzhin gzung ba'o/ /thabs su mi 'gyur ba ma yin te/ mkha' 'gro ma dra ba'i gur las/ bde ba chen po 'khor ba khyab/ bde ba spangs ni de ma yin/ /zhes pas/ thig le spangs pa la rnyed par ma gsungs so/ /bde ba chen po ni shes rab ma yin te/ de nyid las/ bud med bzang mo'i reg bde ba/ /glu thos pa yi zhi ba bde/ /dri bsnams pa yi bde ba che/ /skyes nas reg pa'i bde ba che/ /bcud len rab tu sbyor ba yis//bde ba su zhig 'gog par byed/ /ces gsungs pas na/ shes rab dang thabs tha mi dad pa nyid las dkyil 'khor pa thams cad rdzogs par 'gyur ba'i phyir mchod pa chen po zhes bya ba la sogs pa gsungs te/ 'dod chags dang / 'du shes dang / me'i khams rnam par dag pa ni mchod pa chen po ste bde ba'o//des rgyu dang 'bras bu'i skabs su sems can thams cad dga' bar byed do/ /zhe sdang dang / rnam par shes pa dang / chu'i khams rnam par dag pa ni zhe sdang chen po ste mchod pa'o/ /des nyon mongs pa dang nye ba'i nyon mongs pa gcod par byed do//gti mug dang gzugs dang / sa'i khams rnam par dag pa ni gnyis med de/ gti mug chen po'i mchod pa'o/ /de mi shes shing shes pa med pas na gti mug blo ste ma rig pa'i rtsa ba can gyi gti mug sel to/ /phrag dog dang / 'du byed dang / rlung gi khams rnam par dag pa ni 'gro 'ong med pa'i rang grol du gyur pa ste/ phrag dog chen po'i mchod pa'o/ /de yang tha mal pa'i phrag dog gcod par byed pas na sgra che ba zhes bya'o/ /ser sna dang / tshor ba rnam par dag pa'i khams ni blo yis ma spags pa ste/ chags pa chen po'i mchod pa'o//des mngon par zhen pa thams cad sel bar byed do/ /de ltar 'khor ba'i rnam par dag pa rigs dang de bzhin gshegs par bstan la/ de yang ye shes kyis dag par byas la rtsod 'das su shes par bya'o/ /bstan pa la dgos pa med pa ma yin te/ phal ba'i rnam par spangs pa'i phyir/ /bsgom par yang dag rab tu grags/ /phal ba'i rang bzhin spangs nas ni/ /bsgom pa de ni sgom pa min/ /zhes gsungs pas so/ /'dod pa chen po zhes bya ba la sogs pa las sems bskyed pa'i rang bzhin du bstan par bya ste/ dga' ba dang mchog tu dga' ba dang /lhan cig skyes pa'i dga' ba dang / dga' bral gyi mtshan nyid ni/ 'dod chags chen po dang / bde ba chen po dang / mgu ba chen po ste/ de yang / sna tshogs rnam pa sna tshogs brjod/ /'khyud dang 'o byed la sogs pa/ /rnam par smin pa de las bzlog /bde ba'i ye shes za ba nyid//rnam par nyed pa spyod pa mdzod/ /bdag gis bde ba spyad do zhes/ /mtshan nyid bral la gsum las gzhan/ /chags dang chags med rnam par spangs/ /zhes gsungs pas shes par bya'o/ /gzugs chen zhes bya ba la sogs pas ni dbang bskur ba'i rang bzhin du bshad par bya ste/de yang ye shes la dbang ba dang / nyon mongs pa la dbang ba dang / rlung la dbang ba dang / bdud la dbang ba ste/ de yang gzugs lus che ba dang / kha dog dang dbyibs che ba dang / ming dang rgya che ba dang / dkyil 'khor che zhing yangs pa ste/ brda dang nyams su myong ba rtogs pa dang /don gcig pa nyid kyis gzugs dang don lus ni snang ba thams cad de chen po ni brdar gyur pa'i don bsam gyis mi khyab pa nyid du'o/ /kha dog dang lus ni bye brag 'dzin pa'i shes pa ste/ nyon mongs brgyad khri bzhi stong ngo / /che ba ni mchod pa mchog gi dus su'o//snying por gyur pa ni de bzhin nyid rig pa ste/ de bas na/ rang rig pa yi bdag nyid de/ /dag pa gzhan gyis grol mi 'gyur/ /zhes gsungs pas so/ /ming dang rgya che ba ni ji srid du ming du btags pa de srid du brtags pa'i rtogs pa ste/ de dag thams cad kyi byed pa po ni rlung lnga'i bdag nyid bcu'i ming can rnam shes kyi bzhon pa ste/de yang dag par byed pa ni bla ma'i zhabs kyi pad+mo las rnyed pa'o/ /thams cad lhan cig skyes pa'i 'jug pa nyid kyi che ba ste/ de ni yang dag pa ma yin pa'i rtog pa'i chos mtha' dag gi 'obs kyis bskor ba'i nang du dri ma dang bcas pa'i srid pa'i chus bkang ba ste/srid pa'i shing spangs shing gtor bas bskyed pa las shin tu ring du skyes nas 'dod pa'i 'bras bu mig dga' ba bskyed pa dang / rna ba bde ba byed pa dang / dri zhim pa dang / ro zhim pa mkhrang zhing spom la sna tshogs rnam pa mang po nyams su myong bar byed cing /rgyu gsar du bskyed pa'i sred pa las ldog par 'gyur zhes gsungs pas so/ /dkyil 'khor chen po ni sku bzhi dbyer med 'khor lo ste/ bde ba chen por gcig pas yangs pa'o/ /de nyid la dngos grub dang bar du gcod pa mi gnas pa'i don to/ /dman pa rnams kyis ni lus ngag gi brdas so//shes rab mtshon chen po la sogs pas ni chos bshad pa'i rang bzhin du bstan par bya ste/ don gcig pa dang / ma rmongs pa dang / thabs mang ba dang / dka' ba med pa'o/ /de nyid dgag sgrub dang bral ba dang nyams su myong ba dang / phyag rgya bzhi pa dang / 'bras bu lam du byed pa'o/ /de ni 'di ltar shes par bya ste/ shes rab kyi pha rol tu phyin pa rig pas dbu mar shes par bya ste/ de ni mtshon chen po yin pas/ /sgro btags kun las rnam grol ba/ /de ni dbu ma pa yis rig /ces bshad pa yang ming du btags pa dang /blo yis brtags pa thams cad grol ba ye shes kyi rgyud nyid du 'chang ba'o/ /nyon mongs pa ni 'dod chags la sogs pa ste/ rlung gnas su zhugs pa'i man ngag ni lcags kyu chen po'o/ /de yang spyi'i rnam pa las grol ba ste/ spyi'i rnam pa ni slob dpon klu sgrub kyi zhal snga nas//'on kyang sgra las skyes pa yi/ /rnam rtog gzugs brnyan nyid yin no/ /zhes gsungs pas so/ /rang gi mtshan nyid ni/ /lhan cig skyes pa'i ngo bo dang / /mchog mtha' dga' bral dang po can/ /mun pa la ni mar me bzhin/ /de bzhin bus kyang yid ches gyis//zhes gsungs pa'i phyir mchog go/ /grags chen ni pha rol tu phyin pa drug ste/ snyan par grags pa ni thabs che ba la sogs pa'o/ /snang ba chen po ni bdag dang gzhan gyi don phun sum tshogs pa'i 'bras bu ste/ de nyid rgyu'i dus nyid du rang gi ngo bor gyur pa gsal ba che zhes pa'o//tha dad pa ma yin te/ /de yi rang bzhin de yin phyir/ /de yi nus pa de la gnas/ /de phyir de yi rang bzhin no/ /lam nyid nas ni bsgom par bya/ /zhes gsungs pas so/ /mkhas pa la sogs pa phrin las kyi rang bzhin du bshad par bya ste/ de yang rigs mtha' yas pa rigs gcig tu byed pa yang rigs mthun pa gnyen por byed pa dang /rigs kyi mtshan ma dngos grub bsgrub pa dang chos thams cad lhan cig skyes par byed pa'i las so/ /de ni rnam 'phrul sna tshogs pa gcig pa nyid dang / thabs khyad par can nyid dang rjes su mthun pas byin gyis brlabs pa nyid dang /'khrul pa zhig pa'i rang bzhin te/ de ni dper na chu zla dang / dug gis dug gso ba dang / 'khor los sgyur ba'i rgyal po'i bu dang / chu rnams rgya mtsho chen por lan tshwar ro gcig pa bzhin no/ /de lta bas na/ mkhas pa rnams ni bde ba chen po ste/ /bden pa gnyis las yongs su grub pas so/ /sgyu 'phrul chen po ni de nyid las rigs snang ba'o/ /'chang ba ni mnga' ba zhes bya ba'i don to/ /de bas na/ gang+gA'i klung bcu'i bye ma dang mtshungs pa/ /rigs gcig la ni de bzhin gshegs pa'i tshogs//rigs kyi tshogs las rigs ni du ma ste/ /rigs de las ni rigs ni du ma brgya/ /de las yang ni rigs 'bum chen po ste/ /rigs ni sa ya phrag mang po yin pas/ /mi yi rigs ni grangs med de/ /dam pa dga' ba'i rigs las 'byung ba'o/ / zhes gsungs pa'i phyir ro/ /sgyu 'phrul chen po ni bskyed pa longs spyod rdzogs pa'i 'khor lo'o/ /de dag gi dgos pa ni kun du brtags par byed pa'i don te/ de yang / bskyed pa'i rim pa'i yi ge phyogs/ /gang dang gang gis 'jig rten bcings/ /de dang de ni bcings las grol/ /de nyid mi shes 'jig rten 'ching //de nyid rnam spangs grub mi thob/ /ces gsungs pas so/ /mtshan mas mtshan ma 'jig pa mi 'thad pa ma yin te/ de yang / /zhal phyag kha dog dbyibs las ni/ /'on kyang tha mal bag chags 'jigs/ /dug gi dum bu gang nyid kyis/ /skye bo thams cad 'chi ba ste//dug gi de nyid shes de yis/ dug gis dug ni 'joms par byed/ /ces bya ba la sogs pa gsungs so/ /de bas na don grub pa zhes bya'o/ /dga' ba ni sngar bzhin la/ de bas dga' ba ni rigs kyi mtshan mas mtshan pa'o/ /de'i dgos pa ni dgos pas gzhan ldog pa dang /dngos grub myur du grub pa'i phyag rgya'o/ /de yang dbang bskur nas spyi bor rang gi rigs kyi bdag por gyur par bsam mo zhes gsungs pa ni 'khor rnams ye shes la dmigs pa yin pa'i phyir lus spangs sems spangs kyis/ bsgrub bya zung 'jug bsgrub par bya ba'i rgyu nyid du gsungs so//ma nges pa ma yin te/ ye shes mngon du gyur pa nyid kyis/ gtso bos ni bde ba chen po mtshon pa'o/ /sgyu 'phrul chen po ni chos thams cad de/ de'i mtshan nyid ni mig 'phrul lta bu'o/ /can zhes bya ba ni sems lhan cig skyes pa'i ngo bor gyur pa ni sangs rgyas nyid de//'jig rten khams ni gang nas kyang / /gzhan du sangs rgyas mi rnyed de/ /sems nyid rdzogs pa'i sangs rgyas nyid/ /sangs rgyas gzhan du bstan du med/ /ces gsungs pas so/ /sbyin bdag chen po la sogs pa'i pha rol tu phyin pa'i rnam par dag pa bshad par bya ste/sbyin bdag chen po ni sbyin pa'i pha rol tu phyin pa ste/ tshul khrims chen po la sogs pa yang ngo / /gtso bo chen po ni bde ba chen po'i nyams myong gis sgeg pa'o/ /'chang ba ni brgyud pa'i gzhung lugs kyi phreng ba 'dzin pa ste/de nyid las mi 'da' ba'i don gyis na mchog go/ /bstan pa ni rang byung gi ye shes kyis rgyud la goms pa'o/ /brtul ba ni sna tshogs pa thams cad rdo rje 'chang gi bar du goms pa ste/ de yang khams gsum sna tshogs pa 'di thams cad sems kyi rang bzhin du gnas pa ste/de ltar la lar ni snying rje dang srin po'i bdag nyid do/ /la lar ni mi snang ba dang / mu cor du smra bar ro/ /la lar ni srid pa dang nor bu bzhin no/ /la lar ni gnyid log pa dang sad cing bsdams par ro zhes bya ba la sogs pa rgya cher gsungs pas so/ /ting nge 'dzin gnas ni blos ma bslad pa'i me tog go//lus 'chang ba ni dbang po rang snang ba'i 'jug pa'o/ /stobs dang thabs ni ltos pa med par rang nyid gsal ba ste/ de yang / chu bo klung 'bab rgyun dang ni/ /mar me 'bar ba'i rtse mo bzhin/ /sngags kyi de rig rnal 'byor pas/ rgyun mi 'chad pa'i bsam gtan bsgom/ /zhes pa gsungs pas so/ /rgya mtsho ni bdag gzhan gyi dbye ba spangs pa'i ye shes kyi byug pa chen po'o/ /ma chags pa dang / mi 'da' ba dang / mi 'khrug pa dang / bar chad med pa dang / rtse gcig pa dang / rgya che ba dang / mi thub pa pa dang /tshegs chung ba dang / don 'byung ba dang / zung du 'jug par yang sbyar ro/ /gnyis ldan pa ni thams cad la khyab par sbyar ba'i tha tshig go/ /byams chen la sogs pa ni me long lta bu'i ye shes su bshad par bya ste/ phyogs med par snang ba dang / nyams su myong ba dang / mtshan ma'i rlom sems dang bral ba dang /'bad pa la rag ma las par snang ba'o/ /de yang byams pa ni byams pa chen po ste/ de'i rang bzhin dpag tu med pa ste tshad ma bshad pa'o/ /snying rje chen po ni bsam gyis mi khyab pa'i nyams myong ste/ blo thams cad las mchog tu gyur pa'o/ / shes rab chen po ni mi dmigs pa dang mi gnas pa ste/ 'bras bu dang shes rab dang ldan pa'o/ /mkhas pa chen po ni 'khrul ba zhig pa ste/ rang gi ngang gis 'byung bas na thabs che ba zhes bya'o/ /rdzu 'phrul chen po mnyam snyoms pa ni mnyam pa nyid kyi ye shes su bshad par bya ste/ snang brtags mnyam pa nyid dang /rgyu 'bras dang / dpe don dang / 'khor 'das mnyam pa nyid do/ /de yang rdzu 'phrul chen po ni gzugs la sogs pa ste/ rgyu rkyen la rag las pa'i phyir skye ba med pa'i stobs dang ldan pa'o/ /shugs chen zhes bya ba ni the tshom med pa ste/ gnyug ma'i shes pa rgyur brtags pa nyid la 'bras bu yang de kho na nyid yin pa'i phyir/bskal pa du ma la rag ma las pas mgyogs pa chen po tha dad pa ma yin te/ nye bar len pa'i rgyu ni 'bras bu dang rjes su mthun par dgos pa las 'dir mi ldan pa'i phyir ro/ /rgyu dang 'bras bur ma grub phyir/ /byang chub med cing bsgom pa med//ces gsungs pas so/ /rdzu 'phrul chen po 'dra bas 'dra ba mtshon par nus pa ste/ de yang dngos ma yin pa nyid do/ /de bas na me long gi nang du byed kyi gzugs brnyan 'byung ba de byed du mi 'gyur ba dang 'dra'o zhes gsungs so/ /gzhan dag la khyad par ni dpe don de dag yod pa ma yin te/las kyi phyag rgya la brten nas/ /chos kyi phyag rgya rnam par bsgom/ /de yi steng du phyag rgya che/ /gang las dam tshig 'byung ba'o/ /zhes bshad pa yang / de lta na ni rnal 'byor pa'i/ /nyams su myong ba skye mi 'gyur/ /zhes gsungs pa'i phyir ro/ /de nyid tshad mar dbye ba yang brgya la dul ba'i sems kyi mtshon cha mngon sum du byas na ni/tshe 'di nyid la sangs rgyas sam rdo rje sems dpa' nyid kyang 'thob la sems can gang gis mtshon bya ji ltar bstan pa bzhin mtshon nam bstan pa tsam gyis bsam gyis mi khyab pa'i gnas ma rnyed kyi bar du mtho ris dag tu bde blag tu 'gyur ro zhes gsungs pas na cher grags zhes bya'o//stobs chen po ni 'khor ba dang mya ngan las 'das pa ste/ rtogs pa dang ma rtogs pa'i khyad par gyi pha rol gnon pa ste/ bdag nyid gcig pu shes par bya'o/ /srid pa'i ri la sogs pa ni so sor rtog pa'i ye shes su bshad par bya ste/sangs rgyas dang sems can rgyu gcig pa dang / rtogs shing myong nas rgyud la goms par bya ba dang / bag chags gcig bcad pas gcod pa dang / gnyis su zhen pas gnyis med du rtogs pa'o/ / de yang srid pa ni ma rig pa ste/ ri bo chen po ni khams gsum pa'o/ /'joms pa ni sangs rgyas kyi ye shes 'dir rig pa'o/ /mkhregs shing zhes bya ba ni/ /rdo rje chen po'i mtshan nyid de/ /snying po brtan zhing khang stong med/ /mi chod mi phyed mtshan nyid can/ /mi shigs pa ni mi nyams pas//stong pa rdo rje zhes bshad do/ /zhes gsungs pas so/ /'chang ba ni bde ba dang tha mi dad pa ste/ 'bras bu thams cad pa nyid kyi bar du'o/ /drag po chen po ni rnyed par gyur pa'o/ /drag shul che zhes pa ni bag chags thams cad kyi ye shes ngo bor mkhyen nas gnyen po med pa ste/de bas na/ bsod nams sdig pa dag dang 'bral med pa/ /zhes gsungs so/ /'jigs pa chen po ni gzung ba dang 'dzin pa ste/ de yang 'jigs par byed pa ni dus gsum gyi cha dang bral ba'i ye shes so/ /mgon po rigs mchog la sogs pa ni bya ba nan tan gyi ye shes su bshad par bya ste/rigs gcig tu nan tan bya ba dang / bla mas bstan pa'i don dang / de nyid lam du bya ba dang rang dang gzhan gyi don du phun sum tshogs pa la nan tan du bya ba'o/ /de yang mgon po ni sangs rgyas so/ /rigs mchog ni lnga'o/ /chen po ste zhes bya ba ni bde ba chen po'i rigs so//bla ma gsang sngags ni bla mas bstan pa gsang sngags kyi de kho na nyid de/ chos thams cad la rab tu mi gnas pa'i zung 'jug ni che ba'i mchog go/ /de nyid lam du byed pa ni tshul la gnas pa'o/ /de ji lta bur 'gyur zhe na/ rang dang gzhan gyi phun sum tshogs pa ste/theg pa chen po'i tshul gyi mchog /ces bya'o/ /don mchog ma yin par bstan pa yang / gzhan don phun tshogs sangs rgyas kyi 'bras bu gtso bor bshad pa ste/ sangs rgyas la sogs go 'phang gzhan/ /des na don de 'bras bur brjod//ces gsungs so/ /ma ning gi yi ge ni/ sdud par byed pa nyid kyis lcags kyu la sogs pa'i rnam par dag pa ste/ ye shes mthar thug pa mtshon pa'i phyir ro/ /sangs rgyas la sogs pa rgyud nyid du bshad par bya ste/ /sangs rgyas ni spangs pa dang ye shes phun sum tshogs pa'i bdag nyid spros pa thams cad dang bral ba'i dbyings so//rnam par snang ba ni longs spyod rdzogs pa'i 'khor los sgyur ba'o/ /mdzad pa ni sems can gyi don du sprul pa'i sku'o/ /dbyer mi phyed pa ni che ba ste/ rang bzhin nyid kyis gnas pa'i ngo bo nyid kyi sku'o/ /thub pa chen po ni yon tan brjod kyis mi lang ba dang ldan pa'o//gang gis mthu dang ldan zhe na/ thub chen ldan zhes bya ste/ dus rtag tu mnyam par gzhag pa dang ldan pas so/ /'bras bu de dang nye bar gyur pa ni gsang sngags kyi tshul chen po ste/ de yang / phyi rol nang dang gnas 'di kun//yang dag tu ni rang bzhin med/ /gcig dang du ma'i rang bzhin no/ /bral ba'i phyir ni gzugs brnyan bzhin/ /zhes gsungs pa ni/ mngon par zhen pa dang bral ba'i gzugs brnyan tsam mam/ 'di ni gzugs brnyan no zhes brtags pa tsam yang bral ba ni mtha' bzhis dben pa'i dbu ma chen po'o//de nyid la yang gsungs pa/ sna tshogs rtag pa ma yin zhing / /chad par yang ni khas mi len/ /rtag dang chad pa gnyi ga med/ /gnyi ga yin pa ma yin pa/ /mtha' bzhi las ni rnam grol ba/ /de ni dbu ma pa yi rigs/ /zhes gsungs so/ /rig pa rdzas yang dag tu 'dod pa dang bcas pa ma yin te/dper na shing sna tshogs pa las me byung ba'i dus na me lce gcig tu gnas so/ /shing zad pa'i dus na me de nyid gnas pa bzhin du ming du btags pa dang blo yis brtags pa sna tshogs pa la skye ba med pa'i me lce gcig tu gyur nas gang gzhan gyi sgro 'dogs zad pa de'i tshe/skye ba med pa tsam yang mi gnas pa ste kho bo ni 'dod pas stong pa'i phyir/ de yang sems rang gi skal bar bya ba'i phyir/ slob dpon gsang ba shes rab dang / /de nas de ltar yang bzhi pa/ /zhes gsungs pa nyid kyis/ phyi'i tshul la 'jug pa'i sbyor ba ni ma yin te//dbang bskur bzhi yi grangs kyis ni/ /dga' ba la sogs rim zhes bya/ /zhes gsungs pa nyid kyis nang gi bdag nyid can du bya ba'i tha tshig ste/ gzhan du rgyas par bstan pas 'dir rgya cher ma spros so/ /'on kyang cung zad tsam zhig bstan par bya ste/dang por dga' ba tsam nyid de/ mchog tu dga' ba de las lhag /dga' bral dga' ba gsum pa ste/ /bzhi pa lhan cig skyes pa brjod/ /ces gsungs pas gsum pas mtshon pa'i gzhi pa bstan pa'o/ /mtshon par byed pa dga' bral ni ma yin te/ dang po dga' ba 'gro ba'i tshul//de bzhin mchog dga' 'gro ba nyid/ /dga' bral dga' ba 'gro ba ste/ /gsum pa lhan cig skyes med do/ /zhes gsungs pas so/ /de dag tu ji ltar rig pa'i tshul ni/ /de ltar slob ma'i spyod yul du/ /ro gcig par yang bya ba nyid/ /rang rig ye shes gyur pa ni/ /rang bzhin rig pa spangs pa yin//mkha' mnyam rdul bral stong pa ste/ /dngos dang dngos med bdag nyid mchog /ces bya ba la sogs pa gsungs te/ zhi ba'i bde ba rnyed pa zhes bya ba'i don to/ /de lta bu'i ye shes brtan par byed pa yang thun mong dang thun mong ma yin pa'i khyad par gyis/ khyod kyis srog chags gsad par bya//ma byin par yang blang bar bya/ /mi tshangs par yang spyad par bya/ /brdzun gyi tshig kyang smra bar bya/ /zhes gsungs pa ni/ shes pa'i gnas skabs kyis shes par bya'o/ /de las gzhan pa yang / sha chen dam tshig mchog gis ni/ /rdo rje gsum mchog bsgrub par bya//bshang gci'i dam tshig mchog gis ni/ /rig pa 'dzin pa'i gtso bor 'gyur/ /glang po'i sha yi dam tshig gis/ /mngon shes lnga yang thob par 'gyur/ /rta sha dag gi dam tshig gis/ /mi snang ba yi bdag por 'gyur/ /khyi sha dag gis dam tshig gis/ / dngos grub thams cad 'grub par 'gyur/ /ba lang sha yi dam tshig gis/ /rdo rje dgug pa mchog tu 'gyur/ /zhes bya ba la sogs pa spyad par bya'o/ /gal te rnyed par dka' ba dang / /las dang po par gyur pa na/ /sha rnams thams cad med na yang / /thams cad bsam pa rnam par dag /ces bsam pa'i stobs kyis spyad par bya'o/ /gzhan/ 'grub pa'i thabs ni 'gyur phyir dang / /nor la sogs pa bsgrub phyir dang / /sems can don du de nyid bcas/ /brtul zhugs zhal gyis bzhes pa yin/ /zhes pas drod dang 'brel par spyad par bya'o/ /gzhan yang / /gang gis shes na ming po ste//sring mo yang ni the tshom med/ /ces pas brda dang mtshan mas shes par byas la/ /gnas la sogs pa phyi nang du sbyar ba dang / skye ba bdun pa'i bsgrub pa brtsam par bya'o/ /de dag thams cad kyi byed pa por gyur pa ni bla ma rdo rje 'dzin pas mnyes par bya'o/ /de lta bu'i rgyud sbyang zhing grol bar bya ba ni//rim pa gnyis kyi khyad par te/ /de yang bskyed pa'i rim pa dang / /rdzogs pa yi ni rim pa gnyis/ /rim pa gnyis la brten nas ni/ /rdo rje 'chang gis chos ston to/ /zhes gsungs pa'i phyir/ las dang po pa rnams kyis bskyed pa'i rim pa'o/ / rnal 'byor bas bsgom par bya ba ste/ /de yang / bskyed pa'i rim pa'i ngo bo nyid/ /dang por re zhig shes byas la/ /zhes gsungs pa nyid kyis re zhig pa'i rnal 'byor la gnas par bya'o/ /de dag gis sbyor bar 'gyur ba yang / /gzugs sogs yul ni gzhan dag kyang / /rnal 'byor pa la gang snang ba//de kun dag pa'i rang bzhin te/ /'gro ba sangs rgyas rang bzhin nyid/ /ces gsungs pa bsgom par bya ba kho na'o/ /gzhan yang rdzogs pa'i rim pa ni dbang po mchog gi rnal 'byor gyis bsgom par bya ste/ de yang / rdzogs pa'i rim pa'i rnal 'byor gyis/ / 'bad pa thams cad spang bar bya/ /zhes gsungs pas/ /'bad pa med pa'i rnal 'byor bsam gtan du bya'o/ /gzhan la ni sems gzhag par bya ba'i phyir/ rin chen chen po'i kha dog lnga/ /yungs kar gyi ni 'bru tshod tsam/ /sna yi rtse mor nan tan du/ rnal 'byor pa yis rtag tu bsgom/zhes gsungs so/ /de la/ /brtan pa cung zhig thob pa yis/ /rang bzhin gyis 'od gsal ba/ /thams cad ma skyes zag pa med/ /byang chub med cing mngon rtogs med/ ces gsungs pa ni shes rab kyi pha rol tu phyin pa'i dam tshig rjes su dran pa'i mchod pa'o/ / gzhan yang / /thams cad rang bzhin 'od gsal ba/ /mtshan med mi 'gyur nam mkha' bzhin/ /gnyis med gnyis su med min bzhin/ /zhes gsungs pas/ /gong du bshad pa'i byang chub kyi sems rdo rje'i rnal 'byor du bya ba'o/ /de yang nang gi spyod pa la mnyam par ma bzhag na/ye shes chen po las sems thogs pa med par mi 'gyur ba'i phyir/ /yid pham par 'gyur ba'i gnas gsungs pa ni/ /sa phyogs gtsang zhing rnam par dben pa'am/ /rgyal nyid skye zhing zhi ba'i gnas rnams kun/ /bshang gci khu ba sogs pas byugs pa 'am/ /rgyal ba mchod phyir rtag par rab tu bya//zhes pas na/ dang po pas chad du brjod pa'i gnas bar du gcod pa dang bral ba/ /'tsho ba rnyed par sla ba rtag tu mchod par bya ba ni/ /bud med sems ni rab brtan pa/ /lo grangs bcu gnyis lo rnyed pa/ /rigs kyi sbyor ba rab bsgoms te/ /bdag gi khu bas mchod par bya//zhes gsungs pa'i don ni/ /dbang po gnyis ni mnyam gzhag ste/ /mkhas pas rang gi khu bdag /rnal 'byor bas ni rtag tu dbyung / /dkyil 'khor dkyil 'khor tshul du bya/ /zhes gsungs pas/ /de la dngos grub tu 'gyur ba ni/ dbang po gnyis ni mnyam sbyor bas//sangs rgyas dngos grub thob par 'gyur/ /zhes gsungs pa dang / /skye ba med pa'i yid ngal sos pa'i bde bas ni thams cad spyad par bya ba kho na ste/ 'dod pa'i longs spyod thams cad la/ /ji ltar 'dod pa bsten na ni/ /'di lta bu yi sbyor ba yis/ /byang chub myur du thob par 'gyur//zhes bya ba 'dis ni rten gyi skye 'jig med pa'i rnal 'byor du 'gyur ro/ /gzhan yang rim pa gnyis kyi gnas skabs 'ga' la yang bdag dang gzhan gyi don du dngos grub sgrub pa dang / zhi ba la sogs pa'i las sna tshogs pa ni rdzas 'ba' zhig gis 'byung ba dang bsam gtan tsam gyis 'grub pa dang /sngags dang ldan pas 'grub pa dang / de yang 'khrul 'khor dang ldan pas 'grub pa ste/ de bas na/ byang chub med par dge mi 'jug /ces gsungs pas/ 'gro ba'i don du don chen po la dmigs par bya ba ste/ de las 'byung ba ni 'bras bu'o//de ltar gsang sngags kyi tshul chen po'i bdag nyid can ni dman pa'i gang zag gis mi 'grub ste/ de yang / /thos pa chung zhing nga rgyal ldan/ /sba ba med par mang du smra/ /rjes su gzung bar mi nus pa/ tsan+dan zhes bya ba'i gang zag go/ /zhes bya ba la sogs pa ni ma yin te/ / de yang gang la bshad par bya ba ni/ /rdzogs pa'i rim pa'i skal ldan zhing / /rtag tu spyod pas rnam brgyan pa/ /de ni rin chen gang zag ste/ /slob ma la bshad snod yin no/ /zhes gsungs so/ /de lta bu'i gang zag ni khyu mchog dang mtshungs pa ste/ mngon par rnyed pa'i don du 'gyur ro/ / pha rol tu phyin pa bcu la sogs pa ni pha rol tu phyin pa'i rang bzhin thams cad rdzogs par bshad par bya ste/ /bcu ni sbyin pa la sogs pa la bya la/ /de yang / sbyin dang tshul khrims bzod brtson 'grus/ /bsam gtan dang ni shes rab thabs/ /stobs dang smon lam ye shes dang / / 'di dag pha rol phyin bcur 'dod/ /ces gsungs pas kho bo sangs rgyas kyi gsung gi sdom pa las ma rmongs par bya ba'i phyir rab tu dbye bar bya ste/ zang zing dang / skyabs dang / chos kyi sbyin pa'o/ /sdom pa dang / dge ba chos sdud pa dang / sems can don byed pa ni tshul khrims so/ /sdug bsngal dang du len pa dang /gnod pa byed pa la ji mi snyam pa dang / zab mo'i chos la bzod pa'o/ /go cha dang / sbyor ba dang mthar phyin pa ni brtson 'grus so/ /yon tan mngon par grub pa dang / mi g.yo ba dang / sems can gyi don byed pa ni bsam gtan no/ /thos pa dang bsam pa dang /bsgom pa ni shes rab bo/ /rang gi skyon mi sdug pa dang / sems can gyi don byed pa dang / myur du byang chub pa ni thabs so/ /rang gi tshogs rgyun du sogs pa dang / de sems can gyi don dang 'brel ba dang / sangs rgyas kyi zhing yongs su dag par smon pa ni smon lam mo//las dang las kyi rnam par smin pa mi 'jug pa dang / nyon mongs pa mi sdud pa dang / bdud dang rgol bas mi tshugs pa ni stobs so/ /rtog pa dang mi rtog pa mnyam par 'bigs pa dang / ro gcig pa dang / thams cad las mi 'da' ba ni ye shes so/ /thob pa ni de thams cad shes rab kyis zin par thugs su chud pa'o//ste zhes pas gzhan sdud pa'o/ /bcu la gnas pa ni legs par sbyangs pa dang / bcu gnas pa zhes bya bar yang sbyar te/ stong nyid bsgoms pas grol 'gyur gyi/ /sgom pa lhag ma de don yin/ /zhes gsungs pa'i don yin no//bcu pa dag ni 'khor gsum yongs su dag pa'i bsngo ba ste/ ldan pa yang sbyar bar bya'o/ /shes bcu ni chos shes pa dang / rjes su rtogs pa shes pa dang / pha rol gyi sems shes pa dang / kun rdzob shes pa dang / sdug bsngal shes pa dang / kun 'byung shes pa dang /'gog pa shes pa dang / lam shes pa dang / zad pa shes pa dang / mi skye ba shes pa'o/ /rnam par dag pa'i bdag nyid ni shes par byas shing / de nyid dang bral bas dbu mar 'gyur ba'o/ /rnam dag 'chang ba po ni spang bya dang spong byed gnyis gnyis med du gyur ba'i bde ba chen po brnyes pa'o//rnam pa bcu po ni 'jig rten pa'i lta bar phal cher 'gyur ba ste/ gcig pur 'dzin pa dang / rgyur 'dzin pa dang / za bar 'dzin pa dang / byed pa por 'dzin pa dang / rang dbang du 'dzin pa dang / rtag par 'dzin pa dang / kun nas nyon mongs par 'dzin pa dang / rnam par byang bar 'dzin pa dang /rnal 'byor can du 'dzin pa dang / ma grol ba grol bar 'dzin pa'o/ /don bcu zhes pa ni 'dzin pa bcu rnam par dag pas de kho na nyid bcur 'gyur la/ de nyid ming dang bral bar 'gyur bas don zhes bya ba ste/ de yang rtsa ba'i de kho na nyid dang / mtshan nyid kyi de kho na nyid dang /phyin ci ma log pa'i de kho na nyid dang / 'bras bu'i de kho na nyid dang / rgyu'i de kho na nyid dang / rnam par dag pa'i spyod yul gyi de kho na nyid dang / bsdu pa'i de kho na nyid dang / dbye ba'i de kho na nyid dang / mkhas pa'i de kho na nyid dang / rags pa dang phra ba'i de kho na nyid do//thub pa'i dbang po'i don ni 'jam dpal ye shes sems dpa'o/ /stobs bcu ni gnas dang gnas ma yin pa mkhyen pa'i stobs dang / mos pa sna tshogs pa mkhyen pa'i stobs dang / bsam gtan dang ting nge 'dzin mkhyen pa'i stobs dang / rnam par thar pa pa dang /snyoms par 'jug pa mkhyen pa'i stobs dang / kun nas nyon mongs pa dang / rnam par byang ba mkhyen pa'i stobs dang / las dang las kyi rnam par smin pa mkhyen pa'i stobs dang / thams cad du 'gro ba'i lam mkhyen pa'i stobs dang / sngon gyi gnas rjes su dran pa mkhyen pa'i stobs dang /'chi 'pho dang skye ba mkhyen pa'i stobs dang / zag pa zad pa mkhyen pa'i stobs kyis 'gro ba'i don mdzad pas na khyab pa'i stobs kyi bdag ces bya'o/ /de dag la 'khor ba'i skyon gyis ma gos pa ma yin te/ rnam bcu dbang ldan zhes bya ba ni dbang rnam pa bcu dang ldan pa ste/tshe la dbang ba dang / las la dbang ba dang / yo byad la dbang ba dang / mos pa la dbang ba dang / smon lam la dbang ba dang / rdzu 'phrul la dbang ba dang / skye ba la dbang ba dang / chos la dbang ba dang / sems la dbang ba dang / ye shes la dbang ba'o//che ba po zhes bya ba ni de ltar theg pa chen po dang / theg pa chung ngu dang / phyi rol pa dang / sangs rgyas kyi che ba thams cad dang ldan par bstod pa'o/ /thog ma med pa zhes bya ba la sogs pas ni byin rlabs kyi rang bzhin du bshad par bya ste/ rgyus stong bas na thog ma med pa'o/ / rkyen dang bral bas na spros med bdag ces bya'o/ /de bzhin nyid bdag ni mi 'gyur ba'i ye shes snang ba med pa de nyid do/ /de yang / sku dang gsung thugs rab tu dag /nam mkha' dang ni mnyam pa nyid/ /rnam par mi 'gyur snang ba med/ /rdo rje'i sku la phyag 'tshal 'dud/ / ces pa gsungs pa nyid kyis dag pa'i bdag nyid do/ /bden par smra zhes pa ni rten cing 'brel par 'byung ba'i don zab mo dbang po mchog las gsungs pa ste/ 'di la bsal bar bya ba med/ /gzhag par bya ba cung zad med/ /yang dag nyid la yang dag blta/ /yang dag mthong na rnam par grol//zhes gsungs pa la sogs pa'o/ /zhing zhes pa ni gang dang gang 'dul ba la de dang de'i gzugs kyis rang rang gi bsam pa dang rjes su mthun par ston pa'o/ /tshig mi 'gyur zhes pa ni ji skad smras pa de bzhin du mdzad pa ste/ chos thams cad sgyu ma dang /smig rgyu dang / chu zla dang / brag ca dang / mig yor dang / sprul pa lta bur mkhyen cing gzhan la yang ston par mdzad pas/ gnyis med gnyis su med par ston/ /zhes bya'o/ /de'i rgyus yang dag pa'i mtha' la rnam par gnas shing / byin gyi rlabs mnga' yang de nyid kyi mthur rig par bya'o//bdag med ces bya ba ni dbugs dbyung ba gnyis kyis lta ba gnyis mi gnas pa ste/ dper na seng ge'i sgras ri dwags la sogs pa thams cad 'jigs par byed pa ltar/ bdag med pa'i sgras mu stegs kyi rtag chad gnyis 'jig par byed do/ /kun du 'gro ba ni kun du bzhud pa'o//ci mdzad ce na/ don yod pa'i stobs kyis bzhud pa'o/ /thams cad du mi 'byon pa yang ma yin te/ de bzhin gshegs pa bzhud pa ni/ dper na sngon du bgrod pa'i yul yid 'jug pa ltar mgyogs pa'o/ /thog ma dang bcas pa ma yin te/ rgyal ba ni 'khor ba las rnam par rgyal ba'o//byang chub sems dpa' dang mtshungs pa ma yin te/ bdud bzhi dang nyon mongs pa'i dgra las rgyal ba'o/ /byang chub sems dpar mdzad pa ma yin te/ rigs kyi 'khor los sgyur bas chos ston pa'o/ /'gal bar dgongs pa stobs po che/ /zhes gsungs pa ste/sprul pa dang rang rgyud kyi khyad par gyis so/ /dgos pa rnam pa gnyis ltar ma yin te/ gcig gi rang bzhin gyi nus pas sprul ba yin/ 'dir rtogs pa dang snying rje dang smon lam mngon du gyur pas snang ba yin no/ /tshogs zhes bya ba ni 'phags pa nyan thos kyi dge 'dun de'i slob dpon du gyur pa ni sprul pa'i sku'o//gnyis pa ni rang sangs rgyas kyi dge 'dun te/ de'i bdag po ni 'khor los sgyur ba'o/ /gsum pa ni byang chub sems dpa'i dge 'dun te/ de'i rje ni longs spyod rdzogs pa'i sku'o/ /bzhi pa ni de bzhin gshegs pa ste/ de'i bdag po ni rdo rje 'chang ngo / / de dag thams cad kyi dbang dang ldan pa ni 'jam dpal ye shes sems dpa'o/ /khyad par bstan pa'i dgos pa ni mthu chen po dang ldan pa'i rdo rje 'chang gis snod dang ldan pa'i slob ma ni gces pa ste/ de 'dzin par mdzad pa ste/ 'dir ni gzhung lugs la yang sbyar bar bya'o/ /rnam rtog mnga' ba ma yin te/dper na dpag bsam shing la rnam par rtog pa med kyang 'dod yon mi 'dra bar 'byung ba'i so so'i bsam pa'i khyad par gyis so/ /de bzhin du 'jam dpal ye shes sems dpa' la rnam par rtog pa mi mnga' yang / sems can gyi bsam pa'i stobs kyis sku sna tshogs su snang bar 'gyur ro//skyon med pa ma yin te/ blo chung ba rnams zab mo la 'jigs pa dang / dngangs pa dang / skrag pa dang / skyi g.ya' ba dang / skur pa 'debs pa dang / mi 'jug cing gzhan 'jug tu mi ster bar 'gyur bas bstan par mi bya'o/ /de yang / chung ngu rnams mi brid pa'i phyir/ /de nyid tshol ba thog ma yin//thams cad yod ces brjod par bya/ /don rnams mtshungs shing chags med pa/ /phyis ni rnam par bden don nyid/ /ces gsungs so/ /rlom sems dang bcas pa ma yin te/ tshul dang tshul chen po 'chad kyang gzhan gyir dring mi 'jog go/ /yang na mchog tu gyur ba gzhan mi gnas pa'o//tshig ces pa ni/ e waM ste de'i rje bo ni bcom ldan 'das so/ /gnyis pa ni dbyangs dang gsal byed de'i bdag po ni sku gnyis pa'o/ /smra ba ni ming gi tshogs te/ gzhung lugs 'dzin pas na mkhas pa'o/ /tshig ni glegs bam gyi tshig ste la zhes pas de nyid gzhir byas la/dbang ni thabs sna tshogs pa ston pa'o/ /tshig ni 'gro ba mtha' yas pa'i skad la/ gsung dbyangs yan lag drug cu dang ldan pa sgrogs pas mtha' yas so/ /tshig ni theg pa chen por gsungs la bden par smra ba ni bshad zin to/ /ste zhes pas khyab par ston pa'o//de yang brtags pas sdug bsngal gyi bden pa dang / rlung bcu kun 'byung gi bden pa dang / sgyu ma 'gog pa'i bden pa dang / stong pa lam gyi bden pa'o/ /yang na log pa'i kun rdzob dang / yang dag pa'i kun rdzob dang / rnam grangs pa'i don dam pa'i bden pa dang //rnam grangs ma yin pa'i don dam pa'i bden pa ston pa'o/ /de las gzhan pa ni sdug bsngal shes par bya/ kun 'byung spang bar bya/ 'gog pa mngon du bya/ lam sgom par bya ba ston pa'o/ /de las byung ba'i 'bras bu bshad par bya ste/ phyir mi ldog pa phyir mi 'ong / / zhes pa ni 'bras bu thob pa smos pas rgyu la zhugs pa shes par bya ste/ nyan thos kyi theg pa'i 'bras bu'o/ /rang rgyal bse ru'i tshul zhes bya ba ni tshogs na gnas pa yang shes par bya ste/ rang sangs rgyas kyi 'bras bu'o/ /de yang khyad par ji lta bu dang ldan zhe na/ nges par 'byung ba ni nges par 'byung ba'i tshul khrims so/ /sna tshogs ni so so'i sgo'i khyad par ro/ /spong ba bdun dang bcu'o/ /de las 'byung ba ni dge slong la sogs pa'i yon tan ni 'byung ba sa la sogs pa'o/ /chen po ni nang rten cing 'brel par 'byung ba'i sbyor ba'o/ / rgyu ni byed pa po ste gcig po zhes bya ba ni lhan cig skyes pa'i ye shes so/ /de'i khyad bar ni bde ba chen po rnyed pas mtha' gnyis la 'jigs pa med pa thob pa'o/ /mngon zhen gyi gdung ba dang bral bas/ stong pa dang / gsal ba dang / bde ba ngang gis 'byung bas dri mas ma gos pa ni/ gsal bar 'gyur bas rnyog pa med ces pa ste/ thun mong ma yin pa'i theg pa chen po'o/ /rig pa dang ni zhes pa ni lhag pa'i tshul khrims kyi bslab pa'o/ /rkang par ldan zhes pa ni lhag pa'i sems dang lhag pa'i shes rab kyi bslab pa'o/ /de las bde bar gshegs pa la sogs pa'i yon tan 'byung ba ni thun mong gi theg pa chen po ste/de thams cad kyi ston par gyur pa'i 'dren pa zhes gsungs so/ /bdag gi la sogs pa ni gnyis dang bral ba'o/ /bden pa la sogs pa ni gnyis su med pa'o/ /'khor ba la sogs pa ni yongs su dag pa'i dri ma med pa'i cha'i phun sum tshogs pa'o//bya ba dang bral ba ni 'bad pa dang bral ba'o/ /des nyon mongs pa'i 'dam mi gnas pa ni skam sar gnas zhes bya'o/ /ye shes 'ba' zhig las byung ba/ /zhes bya ba ni rgyu dang lam dang 'bras bu thams cad lhan cig skyes pa ste/ des gzugs la sogs pa 'joms pas thams cad dam pa'i chos su 'gyur te/gnyug ma 'od gsal ba'i chos kyi rgyal po dang ldan no/ /de bas na 'jig rten pa thams cad la snang bar byed pa ni mchog rgya chen po nyid do/ /kho bo ni mi gnas pa'i sa bon las mi gnas pa'i 'bras bur 'byung zhes brtags pa ltar 'dir yang rnal 'byor gyi ye shes su bya ba'i phyir/chos ni sna tshogs la chos kyi dbang phyug ni sems so/ /chos rnams rigs brgyad la mchog gi rgyal po ni lhan cig skyes pa ste/ de legs par sangs rgyas kyi lam ston pa'i phyir/ the tshom la mi gnas so/ /don ni gzugs la sogs pa ste/ grub pa ni rang gi ngo bor ro/ /bsam pa ni ma bcos pa ste grub pa ni brtags mi gnas pa'o/ /rnam par mi rtog pa'i dbyings ni bstan pa thos pa dang 'phel ba dang 'grib pa med pas mi zad pa zhes bya'o/ /de'i phyir zad mi shes zhes gsungs te/rgyun chad la mi gnas so/ /bsod nams ldan pa ni rdo rje slob dpon mchog ma yin te/ bsod nams kyi shugs kyis bskyed pa'i phyag rgya ste/ ye shes ni gzugs brnyan gyi lhan cig skyes pa bsgoms pa la sogs pa'o/ /ye shes khyad par che zhes bya ba yongs su rdzogs pa'i rnal 'byor pa ste/ngo bo nyid kyi rnal 'byor pa ni ye shes ldan pa'o/ /de ni dogs pa med pa'i bde ba dang / stong pa nyid chen po gnyis zung 'jug tu tha dad pa yod med shes zhes bya'o/ /de la blo dang rang gi bye brag gis thun mong dang thun mong ma yin pa la sbyar bar bya ste/ spang bya dang spong byed gnyis gnyis la mi gnas zhes bya ba dang / spang bya gnyis med dang spong byed gnyis med ni gnyis su med pa ste/ de yang mi gnas pa ni tshogs gnyis la sogs pa'i yon tan dang ldan pa'o/ /rnal 'byor can zhes pa ni bden pa yang bral ba'i mi gnas pa'o/ / bsam gtan ni rtse gcig pa'o/ /bsam bya ni blo ste/ de rang gi ngo bor ldan pas mchog ces bya ste/ rang byung bas dus gsum la mi gnas so/ /de yang rang rig pa'i ngo bor bstan pa'i phyir/ so so rang rig ces pa ni rkyen gzhan la rag ma las pa'o/ /mi g.yo ba ni mi bskyod pa ste/ gnyis med gnyis la mi bskyod pa dang / gnyis kyis gnyis med mi bskyod pa ste/ /'khrul pa dang ma 'khrul pa'i bye brag gis so/ /de nyid ni dpal mchog dang po'i skyes bu ste/ bcom ldan 'das so/ /dang po zhes pa ni zla ba tshes gcig pa lta bu ste/ 'jam dpal ye shes sems dpa' dang po'o//sku gsum la sogs pa ni de nyid la thams cad mnga' ba'o/ /cod pan zhes pa ni dkyil 'khor pa thams cad do/ /skyed pa po zhes pa ni thams cad kyi byed pa po'o/ /sras po zhes bya ba ni rgyal po'i phru gu lta bu ste/ mngon sum du ma gyur pa la dgongs pa'o//dam pa'i mchog ces pa ni sras la khyad par du gyur pa'o/ /skye gnas kyi rnyog pa can ma yin te/ shes pa srid pa gsum du 'byung la/ srid gsum skye ba med pa'i sems kyi rang bzhin du rig pas skye gnas med pa'o/ /dngos po'i rnyog pa can ma yin te/ chos ni gzugs la sogs pa'o//de las 'byung ba ni srid pa gsum mo/ /de rten 'brel las skyes pa'i sbyor ba'i rang bzhin med pa ni sel zhes bya'o/ /du ma'i rnyog pa can ma yin te/ gcig pu zhes bya ba'i don bshad zin to/ /lam gyi rnyog pa can ma yin te/ skyes ma thag tu 'gro ba'i bdag /ces bya ba'i don ni/dper na 'khor los sgyur ba'i rgyal po'i bu bzhin du chos thams cad kyi bdag por gyur pas so/ /bcos ma'i rnyog pa can ma yin te/ nam mkha' las byung zhes bya ba ni rgyu las ma skyes pa ste/ rkyen la rag ma las par rang 'byung ba'o/ /btang snyoms kyi rnyog pa can ma yin te/ dper na mes bsregs shing gsal bar byed pa ltar/ 'dir yang mi bo che zhes pa ni/ mun pa la ni mar me bzhin/ /zhes bya ba ste bshad zin to/ /dngos po'i rnyog pa can ma yin te/ 'od chen la sogs pa'o/ /ma rig pa'i rnyog pa can ma yin te/ ye shes skar ma lam me ba/ /zhes bya ba la rtsod gzhi the tshom med par byed pa'o//phyogs kyi rnyog pa can ma yin te/ 'gro ba'i la sogs pas so/ /gzi brjid chen po zhes bya ba ni ye shes lngar dbyer mi phyed pa ste/ rang bzhin gyis 'od gsal bas brtags pa'i rnyog pa thams cad dang bral ba'o/ /da ni de nyid mya ngan las 'das pa'i 'khor lor snang bar bshad par bya ste/sngags mchog ni ye shes la gsungs la/ mnga' bdag ni rigs thams cad kyi'o/ rig sngags la sogs pa ni bshad zin to/ /des ci mdzad ce na/ 'gro ba kun dga' bar byed pa'i snying rje'i dmigs pa dang ldan pas so/ /drang srong ni rgyun dag pa ste che dgu ni de bzhin gshegs pa la sogs pas so//des mchod cing brjod pa'i gnas ni 'jam dpal ye shes sems dpa'o zhes dgongs so/ /de la rnal 'byor mchog gi mchod brjod ji ltar bya ba'i tshul bshad par bya ste/ rigs gsum ni sku gsung thugs 'chang ba ni gsang ba gsum tha mi dad par ro//gsang sngags ni thabs dang shes rab ste/ nang gi bdag nyid du ldan pa la can zhes bya'o/ /de la yang / la la shes rab rang bzhin te/ /ra sa thabs su yang dag gnas/ /a wa d+d+hU tI dbus nas su/ /gzung dang 'dzin pa spangs pa'o/ /zhes gsungs pas so/ / dam tshig chen po ni lhan cig ste/ gsang sngags 'dzin pa yang e waM gyi rnam grangs thams cad tha mi dad pa'o/ /gtso bo ni 'jig rten gyi skyabs su gyur pa'o/ /dkon mchog gsum 'dzin pa ni nang gi dkon mchog gsum ste/ de yang / /stong pa snying rje tha dad med/ /sems ni gang du rab bsgom pa//de nyid sangs rgyas chos dang ni/ /dge 'dun gyi yang bstan pa'o/ /zhes gsungs pa'i phyir ro/ /theg pa nyan thos la sogs pa ste/ dkon mchog gsum ni rnam dag tu ston pa'o/ /don yod zhags pa ni rnam par snang mdzad do/ /rnam par rgyal ba ni rin chen 'byung ldan no//'dzin pa chen po ni mi bskyod pa'o/ /rdo rje zhags pa ni snang ba mtha' yas so/ /rdo rje lcags kyu zhags pa che ni don yod grub pa'o/ /rdo rje chen po zhags pas ni sems can bskyed pa dang dbang bskur ba'i ye shes kyis 'khor ba las rgyal ba dang / de kho na nyid chen po 'dzin pa dang //snying rje'i zhags pas 'khor bar 'jug kyang skyon gyis ma gos pa dang / dam tshig gi lcags kyus 'gro ba'i don du phrin las mdzad pa'i rigs kyi 'khor lo brjod pa ste/ de dag ni chos kyi dbyings kyi ye shes la bstod pa'o/ /rdo rje 'jigs byed la sogs pa'i rgyud nas bshad pa'i bar gyis yon tan gyi rnam grangs su bshad par bya ste/de la rdo rje 'jigs byed ni rtags so/ /gnyis pa ni zhe sdang la sogs pa dag par byed pas don de nyid kyi rgyud las so/ /khro bo'i rgyal po ni ma rtogs pa dang rtogs pa'i khyad par gyis bde ba dang sdug bsngal gcod pa ste/khro bo rnam par rgyal ba'i rgyud las so/ /gdong drug la sogs pa ni phyag na rdo rje dbang bskur ba'i rgyud las gsungs so/ /de yang sku dang / gsung dang / thugs dang / ye shes dang / dam tshig dang / yon tan gyi mtshan nyid kun rdzob kyi thig le dang / dbyangs yig bcu gnyis dang / lhan cig skyes pa'i ye shes dang / bsam gyis mi khyab pa dang / dmigs pa med pa'i snying rje dang / de dang tha mi dad pa'i dam tshig ni bde ba dang / dus kyi rlung zin pa dang / zung du 'jug pa dang / thams cad ro gcig pa dang / re ba med pa'i smon lam dang / so sor rtog pa'i ye shes kyi mig gis bltas la zung rngu med pa dang / rgyun mi 'chad pa dang / sgro ma btags pa dang / rang nyid 'byung ba dang / re ba med pa dang sgro 'dogs chod pa'i lag tu thogs pas phyag rgya chen po'i stobs dang ldan pa'o/ /rig pa mchog gi rgyud las so/ /keng rus ni snying po mtshon pa ste/'khor lo bde mchog gi rgyud las so/ /mche ba gtsigs pa ni bdud bzhi bcom nas ye shes bzhi snang bar gyur pa ste/ /rdo rje gsang lus kyi rgyud las so/ /ha la ha la ni gnyis med kyi bcud kyis 'bigs pa ste/ don yod zhags pa'i rgyud las so/ /gdong brgya pa ni gdul bya'i rnam rtog dang mthun par 'byung bas rgyal ba rnams ni chos kyi sku yin te/rdo rje thod pa'i rgyud las so/ /gshin rje gshed po ni 'jig rten pa dang / theg pa dang / theg pa chen po la gnas pa ste/ de rtags dang lam dang / rnal 'byor gyi 'joms pa ni gsang ba 'dus pa las so//bgegs ni nyon mongs pa dang / snang ba dang / rnam par rtog pa dang / bdud de dag lhan cig skyes pa dang / skye ba med pa dang / gnyug ma dang / don gcig pa nyid kyis rgyal ba ni rnam par snang mdzad/ sgyu 'phrul dra ba'i rgyud las so/ /rdo rje shugs chen ni rgyu 'bras dbyer med pa ste/dam tshig chen po'i rgyud las so/ /'jigs par byed pa ni rigs pa'i mthus gti mug nyid de bzhin nyid du gyur pa ste/ zla gsang thig le'i rgyud las so/ /rdo rje grags pa ni ye shes nyid sna tshogs su grags pa ste/ gnyis med rnam par rgyal ba'i rgyud las so/ / rdo rje snying zhes bya ba ni ye shes lnga'i bsnyen par gyur ba ste/ zla gsang nor bu thig le rgyan gyi rgyud las so/ /sgyu 'phrul zhes pa ni thams cad sgyu ma dang 'phrul gyi rnam pa dang 'dra bar bstan pa ste/ khri drug stong pa 'di nyid las so/ /rdo rje gsus po che ni zung 'jug gis yid rgyas pa ste/ gsang ba mchog gi rgyud las so//rdo rje las skyes ni sems bde ba chen po las sna tshogs skyes pa ste/ 'byung phyogs bzhag pa'i rgyud las so/ /rdo rje bdag ces pa ni sna tshogs bde ba chen po nyid du bstan pa ste/ /rdo rjes 'og gi rgyud las so/ /rdo rje snying po mkha' 'dra ba/ /zhes pa ni skyes pa dang /theg pa gnyis kyis gcig pa ni nam mkha' dang 'dra ba ste/ nam mkha' 'dzin gyi rgyud las so/ /mi g.yo ba zhes bya ba ni sngar bshad do/ /he ru ka sgyu 'phrul dra ba'i rgyud las so/ /ral ba gcig gis bsgyings zhes pa ni/ rang gi ngo bor 'khor 'das thams cad ye shes gcig gis bsgyings shing /dbang po thams cad nyams myong gcig gis bsgyings pa ste/ rdo rje cod pan gyi rgyud las so/ /glang chen ko rlon gos su gyon/ /zhes pa ni/ rtogs pa la sems brtan pa dang / thabs dang shes rab rgyud la goms par bya ba ste/ 'khor lo bde mchog gi rgyud las so//drag chen ha ha zhes sgrogs pa/ /zhes pa ni mtha' gnyis sel ba dang / thabs dang shes rab kyi gsang ba gzhan la bsgrag par bya ste/ khams gsum rnam par rgyal ba'i rgyud las so/ /hi hi zhes sgrogs zhes pa ni/ /rang rgyud la sbyor ba ste/ khro bo thig le zla ba'i rgyud las so/ / 'jigs par byed pa zhes pa ni/ rtag chad dang kyi mtha' dang bral ba ste/ kun las btus pa'i rgyud las so/ /gad mo chen po ni rang 'byung gsang ba mthong ba ste/ sku khros pa'i rgyud las so/ /gad rgyangs can ni zil gyis gnon pa'i gsung ste/ rdo rje thod pa'i rgyud las so/ /rdo rje gad mo cher sgrogs bas zhes pa ni//rdo rje tsaN+Da lIr 'bar ba ste/ rdo rje bsam gtan gyi rgyud las so/ /rdo rje sems dpa' ni chos kyi sku ste/ de kho na nyid bsdus pa'i rgyud las so/ /sems dpa' che zhes pa ni longs spyod rdzogs pa'i sku ste/ dgyes pa rdo rje las so/ /rdo rje rgyal po bde ba che/ /zhes pa ni bde ba chen po'i sku ste/pad+ma dang rdo rje snyoms par 'jug pa'i rgyud las so/ /rdo rje drag po dga' ba che/ /zhes pa ni sprul pa'i sku ste/ rtog pa bzhi pa'i rgyud las so/ /rdo rje hUM ste zhes bya ba ni rgyu med pa dang / tshig dang bral ba dang / mi gnas pa rang rgyud la sbyangs pa ste/ he ru ka mngon par 'byung ba'i rgyud las so/ /hUM zhes sgrogs zhes pa ni/ de nyid gzhan la ston pa ste/ rdo rje mchog gi rgyud las so/ /mtshon du rdo rje mda' thogs pa/ /zhes pa ni tshogs drug thug phrad ye shes rang chas su ston pa ste/ sgyu 'phrul chen mo'i rgyud las so/ /rdo rje ral gris ma lus gcod//ces pa ni ting nge 'dzin gyis goms pa'i mthu bstan pa ste/ dpal mchog dang po'i rgyud las so/ /rdo rje kun 'chang rdo rje 'chang / /zhes pa ni sangs rgyas kyi ye shes yongs su rdzogs pa'i dus te/ dgongs pa 'dus pa'i lung bstan gyi rgyu las so/ /rdo rje gcig pu zhes pa ni sngar bshad zin to//'jam dpal lung bstan pa'i rgyud las so/ /g.yul sel ni phung po la sogs pa'i tshogs bzlog pa ste/ dam pa dang po'i rgyud las so/ /rdo rje 'bar ba zhes pa ni/ bde ba chen po nyid rigs kyi sku sna tshogs su snang ba'i snying rje'i spyan te/ dam tshig bkod pa'i rgyud las so//mig mi bzad ces pa ni/ sku sna tshogs nyid bde ba chen po'i skur gcig pa ye shes kyi spyan te/ bsam gtan rtse mo'i rgyud las so/ /skra yang rdo rje 'bar ba ste/ /zhes pa ni snying po srid pa gsum la khyab pa ste/ mngon par mthong ba'i rgyud las so/ rdo rje 'bebs pa ni sku gsung thugs rab tu gnas pas phyag gi 'os su gyur pa ste/bdud rtsi'i mchog gi rgyud las so/ /'bebs pa che zhes pa ni/ dam pa'i drin gyis bla ma'i bla ma dang / rdo rje 'chang gi byin rlabs zhugs pa ste/ thugs khros pa rdo rje'i rgyud las so/ /mig brgya pa ste zhes pa ni/ 'gro ba thams cad kyi rgyud gzigs pa ste/ spyan ras gzigs snying gur gcig pa'i rgyud las so/ /rdo rje mig ces bya ba ni/ sangs rgyas spyan dang ldan pa ste/ rdo rje zhi ba'i bde ba'i rgyud las so/ /lus ni rdo rje'i ba spu can/ /zhes pa ni/ rdo rje ye shes kyi rnal 'byor rgyud las skyes pa'i ba spu'i bu ga re re zhig nas sangs rgyas thams cad kyi thabs dang shes rab kyi kha sbyor ba'i sdom pa bzhugs so//kun du kha sbyor ba'i rgyud las so/ /sen mo skyes pa rdo rje'i rtse/ /zhes pa ni sa bcu'i ye shes thugs su chud pa'am/ stobs bcu dang ldan pa ste/ gshin rje gshed bzhi brgya lnga bcu'i rgyud las so//rdo rje snying po zhes pa ni 'khor ba bde chen gyi snying po can te/ mngon par byang chub pa'i rgyud las so/ /pags pa mkhregs zhes pa ni/ go cha gsum dang ldan pa ste/ sgyu ma bsgrags pa'i rgyud las so/ /rdo rje phreng thogs zhes pa ni/ tshogs gcig pa dang / rgyu gcig pa dang / mtshan nyid gcig pa ste/ lha mo bzhi'i rgyud las so/ /dpal dang ldan zhes pa ni mi slob pa'i sku ste/ rdo rje phreng ba'i rgyud las so/ /rdo rje rgyan gyis brgyan pa ste/ /zhes pa ni phung po la sogs pa thams cad ye shes rang chas su ldan pa ste/ mkha' 'gro ma rdo rje gur gyi rgyud las so/ /gad rgyangs ha ha nges par sgrogs//zhes pa ni zil gyis mi gnon pa'i phung po la sogs pa ste/ dpal rdo rje mkha' 'gro ma'i rgyud las so/ /yi ge drug pa zhes pa ni 'gro ba drug dang / rigs drug gi rnam par dag pa ni oM wA gI shwa ri muM zhes pa ste/ de yang chos thams cad ma skyes pa ste/ snying rje chen po'i rang bzhin gyis oM mo/ /bsam gyis mi khyab pa'i rang bzhin gyis aM ste/ yid kyi rnam par shes pa'o/ /wa zhes pa ni bcom ldan 'das so/ /a zhes pa ni mtshan dang dpe byad kyi bar du brgyan pa ste gzugs so/ /ga zhes pa ni bde ba'o/ /I zhes pa ni rnam par rtog pas dben pa ste tshor ba'o//shwa zhes pa ni mtshan ma'o/ /ba zhes pa ni gsung ste/ a zhes pa ni ming dang bral ba ste/ 'du shes so/ /ma zhes pa ni lam mo/ /u zhes pa ni 'gro ba'o/ /a zhes pa ni gnas te 'du byed do/ /a zhes pa ni mnyam pa ye shes kyi phung po can no/ /de dag ni khro bo'i rgyal po gdong drug gi rgyud las so//rdo rje sgra zhes pa ni gnyis med kyi gsung ste/ de gang las bstod ce na/ 'jam dpal ye shes sems dpa' zhes gsungs so/ /sgra che ba ni thams cad la grags pa'o/ /'jig rten gsum na sgra che ba/ /zhes pa ni de dag thams cad 'jam dpal ye shes sems dpa'i rnam grangs la ched du brjod pa'o//de la sogs pa'i nam mkha'i mthas klas pa ni/ sgra sgrogs pa thams cad 'jam dpal ye shes sems dpa' nyid la ched du brjod pa'o/ /gzhan ched du brjod pa'i gnas su mi 'gyur ba ma yin te/'di ni mchog go/ /de ci'i phyir zhe na/ yod pa dang yin pa'i khyad par te/ 'dod pa'i khams la sogs pa'i theg pa gsum zhes grags pa ni yod la/ don ji lta ba ni ma yin te/ de ci'i phyir zhe na phyogs na gnas pas so/ /'jam dpal ye shes sems dpa' ni yin no/ /yod pa ni ma yin te/de ci'i phyir zhe na/ rigs kyi bu 'di ltar dper na nam mkha' ni thams cad kyi rjes su song ba ste/ chos thams cad kyang nam mkha'i khongs su gtogs pa'o/ /chos de dag thams cad kyang 'dod pa'i khams na mi gnas/ gzugs kyi khams na mi gnas/ gzugs med pa'i khams na mi gnas/'byung ba chen po bzhi la yang mi gnas so/ /rigs kyi bu chos thams cad kyang de ltar rjes su rig par bya'o zhes gsungs pas so/ /de bas na 'jam dpal ye shes sems dpa' nyid gzugs sna tshogs su ston pa ni me long lta bu'i ye shes so/ / yang dag bdag med ces pa la sogs pa la rags pa'i rnam par rtog pa log bzhin pas na yang dag go/ /yang dag bdag med ni grub pa'i mtha'i don la dmigs pa med pa ste/ de bzhin nyid do/ /don gyis ming mtshon pa ni yang dag mtha' ste/ de dag dang bral bas na/ yi ge med ces bya ba'i cha rang bzhin med pa dang / 'dzin pas kyang stong pa ste/ de las kyang mchog tu gyur pa ni gsang sngags kyi theg pa chen po'o/ /ste zhas pa ni de'i yon tan bsdu bar bya ba'i don to/ zab cing zhes pa ni bde ba'o/ /rgya che ba zhes bya ba ni stong pa'o/ /sgra sgrogs pa zhes bya ba ni gnyis med du'o//de la slob ma la bstan par bya ba yin pas chos kyi dung zhes bya'o/ /ste zhes pas man ngag ston pa ste/ de nyid kyi yul so sor nges pa la yid ches par byas nas spros pa mi gnas par bya ba ni/ sgra che ldan zhes gsungs te/ bla ma'i zhal las rig par bya'o//chos kyi gaN+DI sgra bo che/ /zhes pa ni/ tshogs 'du ba'i don gyis na/ theg pa gsum gyi tshogs la bshad pa'o/ /mi gnas mya ngan 'das pa po/ /zhes pa ni/ slob ma la bshad pa'i snying po ston par byed pa ste/ de las bstan pa'i bdag po nyid kyang 'byung bar 'gyur na/ e ni shes rab nyid 'gyur la//waM ni rab dga'i bdag po ste/ /thig le mi shigs de nyid las/ /de la yi ge nyid kyang skyes/ /chos kyi phyag rgya'i yi ge gnyis/ /de nyid shes pa gang gis shes/ /des ni sems can thams cad la/ /chos kyi 'khor lo bskor bar 'gyur/ /zhes gsungs pa'i phyir/ phyogs bcu chos kyi rnga bo che/ /zhes pa ni tshogs la bshad pas bstan pa'i gzugs brtan par byed pa'o/ /de yang / rtags can gzugs la gnas gyur na/ /'jig rten spyod las 'das 'gyur te/ /gang zhig cho ga 'dir gnas pa/ /de ni bstan pa 'jig byed gsungs/ /zhes gsungs pas//thun mong bstan pa gzung ngo / /de yang rang gi rang bzhin du bya ba'i phyir/ /gzugs med ces bya ba la sogs pa bshad par bya ste/ gzugs med ni phyag rgya chen po'o/ /de yang / /thog ma tha ma med zhi ba/ /dngos dang dngos med rnam par spangs/ /stong dang snying rje dbyer med pa/ /byang chub sems zhes bshad pa yin//zhes gsungs pas so/ /gzugs bzang zhes pa ni las kyi phyag rgya ste/ de yang / na chung gzhon nu mig yangs la/ /gzugs bzang gzhon pas brgyan pa yin/ /lo grangs nyi shu lnga lon rnyed/ /byol song las kyang rab tu brtag /ces gsungs pas so/ / dam pa ni chos kyi phyag rgya ste/ /de yang / e ma kun du bzang po yi/ /sku dang gsung thugs rdo rje can/ /skye ba med pa'i tshul gyis su/ /skye ba dam pa rab tu grags/ /zhes gsungs pas so/ /sna tshogs gzugs can ni dam tshig phyag rgya ste/ de yang / /ye shes la gzhan phyogs pa yang / / sangs rgyas sku ni ji ltar 'gyur/ /'di ltar sangs rgyas gzugs brnyan du/ /de ltar rnal 'byor smra bar rigs/ /zhes gsungs pas so/ /yid las skyes zhes pa ni phyag rgya chen po yid kyi rang bzhin du bstan pa ste/ de bas na/ de nyid gzugs rnams thams cad du snang ba'i dpal zhes bya'o//gzugs rnams ma lus 'chang ba po/ /zhes pa ni sngar gyi don 'di nyid de 'bras bu zung du 'jug pa 'di nyid dang / don dang / dpe dang / rtags zung du 'jug pa'o/ /mtshungs pa med pa la sogs pa ni bsam gyis mi khyab pa ste/ de nyid rgyu yin pas 'gran zla med cing bdag po dang bral bas che bar grags pa'o//khams gsum gyi dbang phyug chen po ni yul med pa'i shes pa ste/ bsam du med pa'o/ /de yang / bsam pa bzhin du mi sems pa/ /de ni bsam gyis mi khyab brjod/ /ces gsungs pas so/ /'phags pa'i lam ni drang po'o/ /shin tu mtho ba ni rdo rje 'dzin pa'i sa'o//de la gnas pa ni rang 'byung ste/ de yang / rang 'byung rtogs pas bsam gtan min/ sangs rgyas sprul pa rgyun mi 'chad/ /ces gsungs pas so/ /dar ba chen po ni rgyas pa ste de las rang gi don du 'gyur ba'o/ /chos kyi tog ni rgyal mtshan te gzhan du'o/ / 'jig rten la sogs pa ni 'bras bur bshad pa ste/ /'jig rten gsum na gzhon lus gcig /ces pa ni/ bgres pa mi mnga' ba'i phyir chos kyi sku'o/ /gnas brtan ni theg pa gsum gyi lus su gyur pas so/ /rgan po ni thog ma med pas so/ /skye dgu'i bdag ni 'khor 'das kyi skyed mar gyur pas so//sum cu rtsa gnyis la sogs pa'i don ni bshad zin to/ /de gsal ba'i thabs bstan pa'i phyir/ 'jig rten zhes bya ba la sogs pa smos te/ 'jig rten shes pa ni rnam par shes pa ste/ lung dang rigs pas so/ /'jig rten legs par shes pa ni de nyid sems kyi khyad par du shes pa ste/rdo rje slob dpon las so/ /ste zhes pa slob dpon gyi bye brag gzhan du bsdu ba'o/ /'jig rten slob dpon 'jigs pa med/ /ces pa snang ba slob dpon du gyur pa ste/ mngon zhen dang bral bas 'jigs pa med pa'o/ /mgon skyabs 'jig rten yid gcugs pa//zhes pa ni rang sems bla mar gyur pas mgon po mya ngan las 'das pa dang / 'jig rten 'khor ba gnyis dang / yid phyag rgya chen po tha mi dad par gcugs pa'o/ /skyabs dang zhes pa ni/ skyabs ni bla ma ste/ dang zhes pas de'i che ba dang drin dran par bya'o/ /skyob pa zhes pa ni snang bas yid skyob pas dbang po rang snang du rol par bya'o//bla na med ces pa ni sems nyid bla ma bla na med pa ste/ skyo bar mi bya ba'i tha tshig go/ /de yang / /ji ltar skyo bar mi 'gyur bar/ /thams cad rim gyis rim gyis bya/ /skyo bar gyur nas sangs rgyas nyid/ /nam yang 'grub par mi 'gyur ro//zhes gsungs pas so/ /nam mkha'i mtha' la longs spyod pa/ /zhes pa ni thams cad ye shes sems dpar shes par bya'o/ /thams cad mkhyen pa'i ye shes mtha'/ /zhes pa ni de lta bu nyid rang la gnas par bstan pa'o/ /ma rig sgo nga'i sbubs 'byed pa/ /zhes pa ni bstan pa dang dge ba'i bshes gnyen la dgos pa med pa ma yin te/dbul po'i gter bzhin du mtshon dgos pa'i phyir ro/ /des ji ltar 'gyur zhe na/ srid pa'i dra ba 'joms pa po/ /zhes bya'o/ /dgos pa bzlog pa'i phyir dper na sA lu'i sa bon la srin bu ga snga zhugs pas ljang pa skams par 'gyur ba bzhin/dra ba ma rig pa bcom pas sngar bskyed pa'i nyon mongs pa ma lus par yang zhi bar byed pa'o/ /de las khyad par med pa ma yin te/ dper na dug la sngags kyis btab pas dug zhi ba dang sman du gyur pa gnyi ga 'byung ste/ de bzhin du thabs ye shes sems dpa'i dus na 'khor bzhi pa'am/sangs rgyas kyi yon tan thams cad 'byung bas/ /'khor ba'i rgyu mtsho pha rol phyin/ /zhes bya'o/ /ye shes la sogs pa ni dri ma dang bral bar bshad par bya ste/ /ye shes dbang bskur cod pan zhes pa ni/ ye shes kyi bdud rtsi byin gyis brlabs pa'i bus dbang bskur ba'i rigs lnga'i cod pan du gyur te/can zhes pa ni rdo rje sems dpa'i dbang bstan pa de dang po'o/ /rdzogs pa'i sangs rgyas rgyan du thogs/ /zhes pa ni sku gnyis kyis slob ma'i 'khor lo bzhir byin gyis brlabs shing thig le rgyan dang ldan pa ste/ de bas na/ ni raM su yis yan lag brgyan//zhes pa dang bla ma cod pan du gzung bar bya ba'i tha tshig kyang ngo / /sdug bsngal gyi sdug bsngal zhes pa ni/ 'du byed dang / 'gyur ba dang / sdug bsngal gyi sdug bsngal gyis 'dus pa'i 'gro ba ste/ de las grol zhing bde ba chen po rnyed par 'gyur bas na/ gsum sel mtha' yas zhes bya'o//grol gsum thob ces pa ni/ the tshom du 'dzin pa dang / du mar 'dzin pa dang / phyogs char 'dzin pa la sogs pa ni bzhi pa'o/ /de lta bu'i rnal 'byor pa bya ba dang bral ba ston te/ sgrib pa ni nyon mongs pa la sogs pa'o/ /dus med rtogs pas rgyun mi 'chad pa'o//yon tan ni sgrib pa spangs pa dang / ye shes thob pa ste/ cod pan ni sangs rgyas so/ /de'i yang thod du gyur pa ni bla ma dang rdo rje 'dzin pa'o/ /de ci'i phyir zhe na/ dam tshig dag ni thams cad las/ /bla ma mchod pa mchog yin te/ /sangs rgyas rin chen za ma tog/ dpal ldan 'dus pa'am gzhan du bstan/ /zhes gsungs so/ /dogs pa bzlog pa'i phyir/ khams gsum rin po cher gyur pa/ /slob dpon las ni mchog gzhan med/ /gang las bka' drin thob pa yis/ /mkhas pas dngos grub du ma thob/ /ces gsungs pas so/ /lus kun las ni rnam grol ba//zhes pa ni 'khor 'das kyi bye brag gis dkar po'i chos dang / dam tshig gi nor dang / yul la 'dod pa dang / sdug bsngal gyi 'jigs pa las grol bar 'gyur te/ de ci'i phyir zhe na/ 'khrul pa zhig pas gnyen po mi gnas pa'i phyir ro/ /nam mkha' la sogs pa ni gzhan gyi gtso bor gyur pa'o//bzang ngan shes pa ni snod kyi bye brag mkhyen pa'o/ /dus shes pa ni bstan pa'i go rims mkhyen pa'o/ /dam shes pa ni 'khor ba'i skyon gyis ma gos pa'o/ /rtag tu don mdzad pa ni dam tshig dang ldan pa'o/ /dbang po shes pa ni dus shes pa'o//rnam grol gsum la mkhas pa po/ /zhes pa ni dus gsum las rnam par grol ba'i thabs gsum la mkhas pa'o/ /nyid kyi thugs su chud cing gzhan la ston pas/ yon tan ldan zhing yon tan shes/ /gsungs pa'o/ /swa sti rgyud las skyes pa'i rang bzhin du bshad pa'i phyir/shes pa lnga'i khyad par ni bla ma la gus par 'byung ba dang / rjes thob med par 'byung ba dang / 'khor ba las ni ring du gyur par 'byung ba dang / sems la dbang bar 'byung ba dang / zug rngu med par 'byung ba ste/ de yang gzhi bla ma dang / dbang dang //sgom pa dang / rtogs pa dang / brda las chos kyi de nyid shes pa dang / nyams su myong ba dang / rgyun ma chad pa dang / sgro 'dogs chod pa dang / sna tshogs rol mo las 'byung bar 'gyur ro/ /de rang dbang du gyur pa ste/ spyod pa'i khyad par ni 'dis 'gro bar 'gyur te/ snyan grags dge dang zhes pa ni kun bzang dge ba'i spyod pa ste/bla ma la brten par bya'o/ /dbugs 'byin chen po zhes pa ni/ sems dbugs 'byin pa'i gsang spyod do/ /dga' ston che zhes pa ni dga' ba ston pa'i rig pa'i spyod pa'o/ /dga' chen rol mo chen po ste/ /zhes pa ni dga' ba chen po'i nyams kyis snang ba la rol mo lta bur spyod pa ste/tshogs kyi spyod pa'o/ /bkur sti rim gro phun sum tshogs/ /zhes pa ni/ de kho na nyid dang ldan pa'i sems la sna tshogs kyi spyod pas bsnyen bkur bas phun sum tshogs pa rnyed par gyur pa ste bsnyen spyod do/ /de yang / rtag tu ngu ba'i spyod pa bzhin/ / mi g.yo ba yi sems kyis ni/ /dngos grub ster ba'i bla ma la/ /'gro ba'i mgon po bsnyen bkur bya/ /zhes pa dang / /bud med rab tu mdangs bzang ma/ /lo grangs bcu gnyis lon pa ni/ /dri dang me tog phreng brgyan pa'i/ /yon tan ske rags mA ma kI/ /shes rab can gyis byin brlabs la//de yi dbus su mnyes par bya/ /zhes gsungs pa la sogs pa'i rgyas par bshad pa ste/ rig ma'i bye brag ni/ dbugs 'byin mchog dang bar ma dang / /dri yi chu dang bcas pas kyang / /rtag tu dus kyi khyad par gyis/ /rigs ldan rnams ni mchod par bya/ /dogs pa bzlog pa'i phyir gsungs la/rigs kyi sman pa'i 'du shes dang / /'jigs pa'i 'du shes ma bskyed cig /de ci'i phyir zhe na/ rigs kyi bu 'di lta ste/ sngags kyi spyod pa ni spyod pa'i mchog go/ /'di lta ste/ sngags kyi spyod pa ni de bzhin gshegs pa'i spyod pa'o zhes gsungs pa'i phyir ro/ / gzhan yang rang gi don dang phal cher gzhan gyi don du/ dag cing yon tan gyi ni gnas/ /sna tshogs yon tan phun sum tshogs/ /zhes pa la sogs pa nus pa dgug pa dang / grub pa'i rnal 'byor la yang rung / /zhes pa ni brda mtshon pa dang / mi yi bu mo mthu chen gyis/ /zhes pa ni yon tan gyis dgug pa dang /lha rdzas btsun mo dgug pa'o/ /nus pa gal te med 'gyur ram/ /'dod pas gnod pa nyid 'gyur na/ /des ni mi yi bu mo bsten/ /zhes pa la sogs pas bye brag shes par byas la/ bsten par bya ba'i dgos pa ni/ nor zhes pa dang 'brel to//gzhan yang / lus kyi sbyin pa byas nas ni/ /phyis ni spyod pa yang dag brtsam/ /skal ldan skal min spyad nas ni/ /de yi sbyin pa gtang mi bya/ /zhes pas/ cung zad nus pa bskyed nas ni/ rol zhing grong du 'jug par bya/ /zhes pa dang 'brel to/ /gzhan yang bza' btung thob pa dang /bgrod dang bgrod min spang bar bya/ khrus dang gtsang sbra mi bya ste/ /grong gi chos ni spang mi bya/ /blo ldan sngags ni bzla mi bya/ /bsam gtan dmigs par mi bya ste/ /gnyid ni spang bar mi bya'o/ /dbang po dgag par mi bya ste/ /sha rnams thams cad bza' ba'o/ /rigs lnga la ni mnyam par spyod//ces pa la sogs pa ni/ gnyis med ye shes sems kyis ni/ /mi bza' cung zad yod ma yin/ /zhes pas 'brel to/ /de ltar spyod pa bye brag ni gang zag gi rim pas rim dang cig car dang rang bzhin pa'o/ /mchog tu dga' ba la sogs pa ni bzhi pa'i don du bshad par bya ste//mchog tu dga' ba ni dam par dga' ba ste/ /rnam gcod yongs gcod dang bral ba'o/ /de ston par mdzad pa ni/ mchog sbyin gtso bo zhes bya ste/ snying bo ni don gyi sangs rgyas so/ /des gang la bstan par bya ba yang grags bdag dpal ni byang chub sems dpa'o/ /bcom ldan ni de bzhin gshegs pa'o//de'i yang skyabs kyi dam par gyur pa ni bla ma rdo rje 'dzin pa ste/ de ci'i phyir zhe na/ dngos grub 'byung ba'i gnas gzhan med pa'i phyir skyabs su 'os zhes bya'o/ /de ji ltar 'gyur ba ni/ 'jig rten sgra ste zhes pas ma rtogs pa log par rtog pa dang / the tshom mthar byed pa'i don to//de nas gnyug ma ston pa'i phyir rab kyi mchog ces bya'o/ /da ni tha mar dge ba ston te/ sel ba po ni phyag rgya chen pos so/ /gtsug phud la sogs pa'i bye brag ni ye shes lnga dang ldan pa'o/ /gdong lnga zhes pa ni rigs kyi de bzhin gshegs pa'o/ /gtsug phud lnga dang ldan zhes pa ni de nyid gzhan gyi don du bstan pa'o//nges par du dge ba bstan te/ zur phud lnga pa zhes pa ni 'dod yon lnga pa'o/ /me tog ces pa ni dbang po'o/ /thod ces pa ni rgyan te bde ba chen por ro/ /mgo zlum dang brtul zhugs chen po gnyis ni tshangs par spyod pa brtul zhugs mchog gi rtags te/theg pa thun mong ba khyad par gyi bye brag gis so/ /'dir ni mtshan ma'i rten la phyag 'tshal ba la sogs pas ting nge 'dzin rgyun mi 'chad par 'gyur ba'i phyir/ dka' thub mthar phyin pa ste tshangs par spyod pa zhes bya'o/ /de yang / tshangs pa mya ngan 'das sangs rgyas/ /'jug pas khyab 'jug tu ni brjod//rtag par dge ba bzhi pa ste/ /thams cad bdag nyid gnas pa kun/ /dam pa'i bde bde nyid do/ /zhes gsungs pa'i phyir ro/ /nyon mongs pa mi spong ba la sogs pa ni dka' thub chen po ste/ phyag rgya chen po nyid nas smyon pa'i brtul zhugs mchog go/ /dang por dge ba bstan par bya ste/gtsang gnas zhes pa ni sku gsung thugs rdo rje'o/ /gnas pa dam pa zhes pa ni btsun mo'i b+ha ga'o/ /gau ta ma zhes pa ni bcom ldan 'das so/ /nyon mongs pa mi mnga' ba bram ze'o/ /tshangs pa ni gzung bas stong ba ste/ dga' ba'o/ /gnyis pa ni 'dzin pas stong pa ste mchog tu dga' ba'o//shes pa ni bde ba chen po ste rnyed pa'o/ /mya ngan 'das zhes pa ni dri ma dang bral ba'i lhan cig skyes pa'o/ /tshangs pa ni btang snyoms dang bral ba ste snying po len pas na thob pa'o/ /grol ba ni bzhi pa'o/ /thar pa ni bzhi pa'i man ngag go/ /rnal grol lus ni bzhi pa'i dbang ngo //mtshan nyid gsum ni bshad zin to/ /rang gi ngo bo 'ba' zhig bstan par bya ste/ zhi ba gnyis ni nang dang nang du yang dag par gzhag pa'o/ /mya ngan las 'das pa gsum ni grags chen dang snying po don dang rdo rje 'chang ngo / /bde sdug sel ba ni 'khor ba gnyis kyi skyon dang bral ba'o//chags bral lus las 'das pa po/ /zhes pa ni nyan thos zhi ba'i sa las 'das pa'o/ /thub pa med pa ni mi 'jigs pa bzhi dang ldan pa'o/ /dpe med pa ni sangs rgyas kyi chos ma 'dres pa bco brgyad dang ldan pa'o/ /mi mngon pa ni mi 'jigs pa'i shes pas so//mi snang ba ni blo'i yul la mi snang ba'o/ /gsal byed min ni lus kyis gsal bar mi nus pa'o/ /phra ba ni rtogs par dka' ba'o/ /zag med ni mngon du rgyu dang bral ba'o/ /sa bon zhes pa ni ma rig pa'i bag chags dang bral ba'o/ /shin tu sad pa ni ma rig pa'i gnyid sad pa'o//sad pa'i bdag ni rang bzhin gyis grol ba'o/ /kun shes ni chos thams cad do/ /kun rig ni don thams cad do/ /rnam par shes pa chos nyid 'das/ /zhes pa ni rtog dpyod dang bral ba'o/ /las byed pa ni gdul bya'i blo la snang ba'o/ /thog ma tha ma med pa ni skye 'jig dang bral ba'o//dang po'i sangs rgyas rgyu med pa/ /zhes pa ni/ log rtog can kha cig dang po'i 'dren par gyur pa thabs gang la brten nas sangs rgyas zhes zer ba'i log rtogs bzlog par bya ste/ dper na nam mkha' la sprin dang / 'ja' tshon dang / na bun dang / khug rna dang / 'byung ba chen po bzhi 'byung gi / nam mkha' rgyu rkyen gang las skye rtogs shig /gal te nam mkha' las byung ngo zhe na/ da lta'i ri rab gling dang bcas pa 'di dag gis go phye ste gang gis rjes su song zhing bskyed/ gal te bskyed na nam mkha' snang bar bstan pa yin no/ /gal te mtshan nyid mi mthun na chos 'di dag thams cad kyi mtshan nyid gang du yin/gal te mtshan nyid gcig na tha dad pa med par 'gyur ba nyid do/ /de bzhin du dang por rang bzhin gyi chos las nus pa sna tshogs su 'char bar 'gyur te/ de nyid rgyu rkyen las skyes par snang mod kyi/ rang bzhin gyi chos rgyu dang rkyen gang gis bskyed rtogs shig /gal te tha dad na brtags pa dang brtags pa thams cad kyi rang bzhin gang dag yin/ mtshan nyid gcig ni 'gal ba gang la yod de med do/ /de bas na rang bzhin nyid las lhun gyis grub pa dang / mngon du gyur pa ni bde ba chen por ro gcig pa nyid do//de'i phyir/ dang po'i sangs rgyas rgyu med pa/ /zhes pas rgyu la mi gnas pa nyid du bstan pa yin no/ /blo dngos gcig tu 'brel par byed pa ni/ ye shes kyi mig gcig pa ste/ de la dri ma med pa'o/ /don mi 'byung ba ma yin te/ /ye shes lus can de bzhin gshegs//zhes pa yin no/ /mi gnas pa nyid du bstan par bya ste/ tshig gi dbang phyug ni bcom ldan 'das so/ /rtogs pa dang ma rtogs pa'i bye brag gis don gnyis su ston pa na smra ba che zhes bya'o/ /smra ba'i skyes mchog gis thogs pa mi mnga' ba'o/ / smra ba'i rkyen ni dbang po dang sbyar bas ston pa'o/ /smra ba'i dam pa zhes pa ni thams cad sems kyi rang bzhin gcig pur ston pa'o/ /mchog gi gnas ni mchog gi dngos po grub pa'i gsung 'byung ba'i gnas so/ /smra ba'i seng ge ni nyam ming bas so/ /smra ba'i rgyal ni tshugs pa med pa zhes pa phyogs su blta ba'i rigs kyis so//da ni snang ba'i rang bzhin du bshad par bya ste/ kun du blta ba ni ye shes brnyes pas kun du blta ba'o/ /mchog tu blta ba ni don dang chos so so yang dag par rig pa'i phyir ro/ /gzi brjid ni ye shes so/ /snang ba ni phung po'o/ / blta na sdug pa ni nyams myong du'o/ /'od bzang du ni snying po len pa'i dkyil 'khor du'o/ 'bar ba ni rang gi shes pa nyid do/ /dpal be'u ni sems can thams cad la khyab pa'i ye shes so/ /lag na 'od 'bar ni 'jig rten gyi khams lag pa'i 'od la sogs pa rnams so/ /snang ba po ni yang dag thams cad ye shes kyi snang ba'o//sman pa che mchog ni mi shes pas na nad rab tu 'joms pa'o/ /gtso bo ste zhes pa ni phyin ci ma log pa'i sman gyis gso bar mdzad pa'o/ /zug rngu ni dug gsum ste seng ldeng gi tsher ma lta bu'o/ /'byin pa ni dbang po la sogs pa gsum gyis so//bla na med pa ni phyis mi 'byung bas so/ /sman rnams ma lus pa ni chos kyi phung po brgyad khri bzhi stong ngo / /ljon pa'i shing ni 'jam dpal ye shes sems dpa'o/ /'dir ni rje btsun pas gzung bar bya'o/ /des ci 'gyur zhe na/ nang do cog gi dgra che ba//zhes gsungs pa ni/ nyon mongs pa de snyed kyi'o/ /rdo rje nyi ma snang ba che/ /zhes pa ni/ sems ye shes kyi dkyil du snang ba ste thabs so/ /rdo rje zla ba dri med 'od/ /ces pa ni de nyid rnam par dag pa'i ngo bo snang ba ste shes rab po/ /de gnyis tha mi dad pa ni bskyed rdzogs gnyis zung du 'jug pa ste/kho bo'i bla ma ri khrod dgon pa'i gzhung lugs so/ /de nyid bklag pa'i man ngag tu bstan par bya ste/ bdag nyid mya ngan las 'das pa'i grong khyer du zhugs pa'i tshe/ rigs kyi lha dang mthun pa'i ched du brjod par bya ba ni/ dbang bskur ba dang dngos grub grub pa'i bye brag gis rang rang gi nga rgyal du zhugs la ji lta ba bzhin du byin gyis brlabs pa byas nas gnyis pa'am sgrub byed du gnas pa'i rnal 'byor pas so so rigs kyi ched du brjod pa gdon pa dang /rigs bsdus pa'i ched du brjod pa bstan pa'o/ /yang mchod pa la sogs pas mnyes par byas nas phyag brgya bkrol ba'o//de'i man ngag ni rang gi sbyor ba dang ldan pas thabs dang shes rab la gnas te/ dbyangs yig dang po'i rang bzhin las/ /mchod sbyin sbyor bar byed pa yin/ /zhes gsungs pa ni man ngag ste/ bskyed pa'i tshul lo/ / sdu gu 'jig rten gsum gyi mchog /ces pa ni/ rtags dang don gyi khyad par gyis srid pa gsum dang lus ngag yid gsum gyi mchog go/ /dpal ldan rgyu skar dkyil 'khor can/ /zhes pa ni mi 'char ba med pa dang / de ma yin pa'i srid pa'o/ /gang du zhe na/ phyogs bcu zhes pa ni gnas so//nam mkha' ni dus so/ /mthar thug pa zhes pa ni rgya de srid du chos kyi rgyal mtshan legs par 'dzugs pa ni skal ba dang dbang po'i bye brag gis snying bo dang sbun pa la sogs par ro/ /'gro na gdugs gcig yangs pa ste/ /zhes pa ni/ bla na med pa thob par 'dod pa zhig rang la yod pa'i de nyid yod par shes pa dang /ji lta ba bzhin rtogs pa'o/ /des snang ba med pa dang brtags par rang grol bar gyur pa ni spangs pa ste/ de'i snying po byams pa dang snying rje'i dkyil 'khor can no/ /de'i rnal 'byor ni/ /dpal ldan pad+ma gar gyi bdag ste/ nang rten cing 'brel bar 'byung ba'i ting nge 'dzin dang /shes rab kyi pha rol tu phyin pa'i rang bzhin gyis thams cad gar gyi rnam pa lta bur mthong ba'o/ /de gnyis ka la yang khyab bdag chen po rin po ches khyab pas na gdugs so/ /sangs rgyas kun gyi gzi brjid che/ /zhes pa ni snang grags thams cad la skye med ston par nus pa'i mthu'i rang bzhin yod de/de ci'i phyir zhe na/ ma skyes pa'i snying po can yin pa'i phyir ro/ /dper na rkun mo zhig chang gis rab tu myos na/ bdag gis che ge mo'i nor brkus so zhes sngon par 'gyur te/ de ci'i phyir zhe na/ rang rgyud chang gis bzi ba yin pa'i phyir//de bas na sangs rgyas la sogs pa'i don mthong nas ji ltar bya ba'i tshul ni de nyid sangs rgyas kun gyi rnal 'byor chen po ste de nyid bsgom par bya'o/ /sangs rgyas la rang rgyud mi gnas pa'i phyir dgongs pa gcig ste/ sangs rgyas kun gyi bstan pa gcig /ces bya'o/ /bsgrub par mi nus pa ma yin te/tha dad pa ni sems can gyi rgyu yin la/ de la ma rig pa dang / glo bur ba dang / blo yis brtags pa dang / phyogs na gnas pa dang / 'dus byas pa'o/ /de la sogs pa'i sangs rgyas te/ rang bzhin gyis 'od gsal ba dang / gdod ma nas lhun gyis grub pa dang /blo yis ma brtags pa dang / dus dang mtha' la mi gnas pa dang / 'dus ma byas pa'i gcig pa'o/ /'gal bar gyur pa ma yin te/ ldog chos tha dad kyang / bdag nyid gcig pa'i bum pa bzhin no/ /da ni du mar rigs pa ston te/ rdo rje rin po che ni rin chen 'byung ldan no/ / dbang bskur dpal ni rin chen sems ma'o/ /rin chen kun bdag ni mi bskyod pa'o/ /dbang phyug ste zhes pa ni rdo rje sems ma'o/ /'jig rten dbang phyug ni snang ba mtha' yas so/ /kun gyi bdag ces pa ni chos kyi sems ma'o/ /rdo rje 'chang zhes pa ni don yod grub pa'o/ /kun gyi rje zhes pa ni las kyi sems ma'o//sangs rgyas kun gyi zhes pa ni rnam par snang mdzad do/ /thugs che ba zhes pa ni rdo rje dbyings kyi dbang phyug ma'o/ /'dres shing gcig pa ni/ rigs ni rnam pa drug tu brjod/ mdor bsdus pa ni rnam pa lnga/ sku gsung thugs kyi dbye ba yin/ / phyis ni rnam pa gsum du 'gyur/ /zhes gsungs pas/ sku gsung thugs rdo rje 'dus pa ste/ de yang 'jam dpal ye shes sems dpa' kho nar bstod pa'o/ /rdzogs pa'i rim pa'i tshul gyis ni/ spros pa med pa'i rang bzhin du/ /sngags dang lhar ni yang dag gnas/ /zhes gsungs pas na/don dang don gyi khyad par brlag par bya'o/ /chags bral la sogs chags pa che/ /zhes pa ni/ pha rol tu phyin pa dang sngags kyi gzhung lugs ni chos can dang chos nyid kyi lam ste/ de'i dgongs pa yang 'jam dpal ye shes sems dpa' sems can rig pa dang /bsam pa dang dbang po dang / mos pa mkhyen pas kha dog sna tshogs 'bar ba'i 'od du 'phros nas chos ston to/ /gnyis ka theg pa chen por 'thad de/ /rdo rje skyil krung rdzogs sangs rgyas/ /zhes pas gcig ni bden pa rnam pa gnyis la/ 'dir ni pad+ma'i nam mkhar ze'u 'bru gang / /rdo rje skyil mo krung gis gnas dag tu//sems kyi nor bu nang du chud pa la/ /ye shes gang skyes de ni brjod med gzugs/ /zhes gsungs pa'i man ngag gis sangs rgyas pa'o/ /dman pa ma yin te/ sangs rgyas kyi thugs rje chen po'i stobs kyis 'gro ba dang mthun pa'i tshod 'dod chags la sogs pa de nyid thabs khyad par can gyis byang chub kyi yan lag tu 'gyur ba'i sgo nas sems can 'dzin par mdzad pa ste/de yang / thabs chen rnams dang ldan pa la/ /nyon mongs byang chub yan lag 'gyur/ /sngags kyis bsad pa'i dug bzhin du/ /'khor ba zhi ba'i bdag nyid do/ /zhes gsungs so//drang ba'i don ma yin te/ dpal ldan sangs rgyas pad+ma skyes/ /zhes gsungs so/ /de bas ni kun mkhyen ye shes mdzod 'dzin par mdzad pa'o/ /rgyal po ni bde bar gshegs pa ste/ sgyu 'phrul sna tshogs 'chang ba ni/ rten cing 'brel bar 'byung ba zab mo'i man ngag go/ / che ba sangs rgyas rig sngags rgyal/ /zhes pa ni/ chos cha shas dang bcas par rig pa dang / don ma skyes par rig pa dang / sngags chos nyid lam du rig pa dang / bzod pa chos nyid du rig pa dus kyi tshe che ba ste/ sangs rgyas kyi rang bzhin no/ /de'i phrin las ni rig sngags la sogs pa'o//de kho na ma yin pa ni rdo rje rnon po zhes pas yid la mi byed pa'o/ /ral gri che zhes pas de dang 'dra ba'i ye shes so/ /yi ge ni lnga ste/ skye med bde ba'i snying po can ni mchog ste zhes pa de nyid kyang bcos par ston pa'o/ /rnam par dag pa ni snying rje chen po'i dam tshig go/ /de yang / thabs dang shes rab snyoms 'jug pa/ /rnal 'byor zhes ni bshad pa yin/ /zhes gsungs pas/ gang la zung du 'jug pa gnas pa ni theg pa chen po ste/ des nyer len gyi phung po lnga 'joms pa sdug bsngal gcod ces bya'o/ /mtshon cha chen po ni lam gyi bden pa ste/ ldang 'jug med pa'o/ / de yang / gzugs la rnam gsum shes bya ste/ /mchod pa byed pas mchod par bya/ /zhes bya ba la sogs pas so/ /rdo rje ni chos so/ /rdo rje zab mo ni thugs so/ /dzi na dzika ni sku ste/ de gsum dbyer mi phyed pa ni rdo rje'o/ /blo gros ni shes rab ste/ don bzhin rig pa ni ji bzhin pa'o/ /pha rol tu phyin pa ni bshad zin to//brtson chen zhes pa ni brtson 'grus chen po sgyu 'phrul dra bar rdzogs par mdzad de/ de ci'i phyir zhe na/ bya ba la sogs pa'i rgyud kun gyi rgyal po 'jam dpal ye shes sems dpa' nyid ma yin la/ de'i ched du brjod pa'i mchog 'dir ston pa'i phyir ro//rdo rje gdan ni ma lus ldan/ /zhes pa ni gser dang gser bzhin nam/ rgya mtshor chu bo 'bab pa bzhin rig par bya'o/ /ye shes kyi sku ni ye shes sku rnams so/ /kun du bzang po dang blo gros bzang po ni 'jam dpal dang / sa'i snying po dang 'gro ba 'dzin ni spyan ras gzigs dbang phyug la sogs pa ste/de'i rnam par dag pa ni thabs du ma sprul pa'o/ /mtshan ma mi dmigs pa dang / thams cad yod pa dang / snying rje'i snying po can nyid kyis gsang ba chen po'o/ /yang nas dang 'gro ba'i rten gzhal yas khang dang / brten pa lha'i 'khor los mtshon pa'o//sangs rgyas kun gyi zhes pa ni/ rigs so so'i dkyil 'khor gyi 'khor lo'o/ /snying po che zhes pa ni byang chub kyi sems rdo rje'o/ /de las thams cad du snang bas/ sprul pa'i 'khor lo sna tshogs 'chang / /zhes ston te/ 'jig rten dang 'jig rten las 'das pa thams cad lha'i 'khor lor snang ba'o//dngos po kun gyi rang bzhin mchog /ces pa ni stong pa'o/ /dngos po kun gyi rang bzhin 'dzin/ /zhes pa ni snang ba'o/ /skye med chos te zhes pa dang / sna tshogs don zhes pa ni rang rang gi ngo bo ston pa'o/ /chos kun ngo bo nyid 'chang ba/zhes pas thun mong dang thun mong ma yin pa'i dbyer med bstan pa'o/ /shes rab la sogs pa ni dus kyi mtha'i skad cig ma'o/ /de nyid 'dir rnal 'byor gyi lam du bya ba'i phyir mi g.yo zhes pa ni ting nge 'dzin gyi skyon drug dang bral ba'o/ /rab tu dang ba'i bdag ces pa ni/lam gyi lus kyi rnyog pa brgyad pa'o/ /mngon sum pa zhes pa ni mngon sum pa 'dir rig pa'o/ /ji ltar na ye shes la sogs pa'o/ /de dag gis ni so sor rtog pa'i ye shes la bstod pa'o// //'dod pa la sogs pa ni 'dir bshad par bya ste/ 'dod pa ni mthun pa ste rab tu bstan pa'i 'dod pa'o//don ni bsgrub par bya ste/ rin chen 'byung ldan no/ /grub pa ni ma chags pa'o/ /dam pa ni sbyin pa'i pha rol tu phyin pas ser sna dag par byas pa'o/ /ngan song thams cad rnam sbyong ba/ /zhes pa ni/ sbyin pa'i pha rol tu phyin pa'i ma chags pa'i dmyal ba sbyong bar byed do//byin pas yi dwags sbyong bar byed do/ /re ba med pas byol song sbyong bar byed do/ /yang na mnyam pa nyid kyi ye shes so/ /de bas na/ mgon po sems can kun gyi mchog /ces bya ste/ gzhan gyi don la dmigs pas so/ /ji ltar na sems can thams cad sgrol ba zhes pa ni mdzad pa ste/rigs la spyod pa dang / bag la nyal ba la spyod pa dang / mos pa la spyod pa dang / las dang po pa rnams la gsang sngags dang / pha rol tu phyin pa bcu dang / bslab pa gnyis dang / bden pa bzhi bstan pa'o/ /nyon mongs pa zhes bya ba la sogs pa rgyas par bshad pa ste/de yang / 'di ni rang byung bcom ldan 'das/ /gcig pu kho na lhag pa'i dbye/ /zhes gsungs pa'i phyir ro/ /mi shes pa ni gti mug go/ /dgra'i dregs pa ni bden pa gnyis med la the tshom za ba'o/ /de yang rig pa'i ye shes kyis 'joms pa'o//dpal ldan blo dang steg par ldan/ /zhes pa ni/ dpal ni gzhung lugs kyi byin gyi rlabs so/ /blo ni sangs rgyas kyi snying po'i sa bon no/ /steg ni lhag pa byang chub kyi sems so/ /de rnams ro gcig tu skyes pa ni ldan pa ste/ de yang bla ma'i brgyud thabs bsten pa dang /bsod nams las ni yang dag shes/ zhes gsungs pa'i phyir ro/ /brtan po mi sdug gzugs 'chang ba/ /zhes pa ni/ rtog pa la sems brtan pas 'khor ba bsdigs pa'i brda'o/ /lag pa brgyad po kun bskyod cing / /zhes pa ni/ phyi nang gsang ba'i bye brag gis/rtags dang thabs kyi bye brag dang / yul sna tshogs pa thams cad bde bar bskyod pa'o/ /gom pa'i stobs kyis gar byed pa yang de bzhin te/ rtags la 'byung ba bzhi bde bas non pa dang / dga' ba bzhi don gyis lhan cig skyes pas gnon pa ste/ bcom ldan 'das kyi zhabs kyi mthe bo gcig gis gdan la reg par bzhengs so zhes pa'i don to//des don kun du bsgrub pa'i phyir rkang mtheb la sogs pa gsungs te/ srid pa de nyid du byed par yang sbyang ro/ /don gcig ces pa la sogs pa ni 'brel pa ste/ de yang don gnyis med ni gnyug ma'o//chos kyi don ni dpe'o/ /des cir 'gyur zhe na/ dam pa'i don de zhes pa ni ma bcos pa ste/ 'khor bas 'jig pa med pa de ni mtshon pa'o/ /nyams su myong ba ni rnam par rig pa nyid las sna tshogs par snang ba gzugs la sogs pa'i don dang / gnyis su med pa myong bas na can zhes bya'o//rnam par shes pa'i tshogs ni thams cad lhan cig skyes pa'i rjes su 'jug par 'gyur te/ rnam shes sna tshogs rgyud dang ldan/ /zhes pas/ thams cad don dam pa byang chub kyi sems su ldan zhes bya'o/ /de bas bla ma mnyes pa las de'i bka' lung gis de lta bu'i rlung dbang po rnams la bkug ste/rgyun du 'jug pa dang 'byung ba'i bya ba byed pa'i rnal ma'i yid nyid du 'jog par byed do zhes gsungs pas so/ /phyis zhen par mi 'gyur ba ni/ dngos don ma lus rnams la dga'/ /zhes bya ste/ nyams su myong ba'i phyir na des na sngon yongs su btang ba'i dbang po de yang yid dang bral bar byed pa med par 'gyur te/mas bor ba'i be'u nyid rjes su 'tshol ba bzhin du 'dir yang dbang po rnams yid kyi rjes su 'brang bar 'gyur te/ gang du yid 'jug pa der rab tu 'jug ste/ gang gi phyir de ma rtogs par 'di dag rab tu sbyor bar med pa ma yin zhes gsungs pas so//zung 'jug tu mi 'gyur ba ma yin pa ni/ stong pa nyid dga' 'dod chags blo/ /zhes bya'o/ /srid par gyur pa ma yin pa ni/ /srid pa'i 'dod chags spangs pa ste/ /zhes bya'o/ /log par rtogs pa bsal ba'i phyir srid pa'i 'dod chags ni srid pa'i 'dod chags te/brgyud thabs bsten pa nyid kyis 'dra bar gyur pa ste/ zangs las ra gan du gyur te/ gser ma yin pa bzhin no/ /spangs pa ni spangs pa ste gser rnyed pa'i dus na sngar gyi 'dra ba la dgos pa med pa'o//bde ba dang bral ba ma yin te/ srid pa gsum gyi rang bzhin dga' ba yin la/ de la yang chen po pas dogs pa med pa'i lhan cig skyes ba nyid de/ dper na nam mkha' la sprin nag po dang ser po la sogs pa bsal ba'i rjes sprin dkar yang dag pa'i dkar ba bzhin du dkar ba'i bde ba stong ba phra mo tsam mi gnas kyang bde bar 'thad de//'od bzangs ston ka'i zla ba'i 'od/ /ces pas zla ba dang 'od bzhin dag pa dang bde ba la tha mi dad par 'char ro/ /phyi'i sgro 'dogs chod pa'i dag pa'i 'char ba ma yin te/ nang rten 'brel gyi dus na nyi ma 'char ka dang shar ba'i dkyil ltar mdzes so//des tha dad gyur pa ma yin te/ mtshon par byed pa gcig gis mtshon pa'i phyir ro/ /phyis rang rgyud du 'gyur ba ma yin te/ 'di ni thabs dang shes rab las skyes pa'i bde ba chen po nyid yin pas/ /rnam par rtog pa'i tshogs mtha' dag yongs su spangs nas bla na med pa'i longs spyod du nye bar 'gro zhing //'gro ba 'di dag ni bde ba chen po'i rnam par 'gro bar 'gyur te/ dper na nyi ma'i 'od zer gyi tshogs kyis phog pa'i zla ba'i dkyil 'khor gyi gzugs bzhin du/ 'gro ba rnams snying po med par snang ngo zhes gsungs pas so//sen mo 'od la sogs pa la phyi nang sbyar bar bya ste/ sngar bshad pa dang 'chad par 'gyur ba thams cad grags pa'i mtshan dpe la sbyar ba dang / de nyid rnam par dag pa bde ba la sbyar ba'o/ /de ltar na bde ba nyams su myong ba'i gnas bstan pa'i phyir//nor bu chen po 'od chags dpal/ /zhes gsungs te/ nor bu ni rin po che'o/ /chen po ni pad+ma'i ze'u 'bru'o/ /chags pa ni thig le ste bde ba dang ldan pa'o/ /dpal ni des gzhan gyi don du 'gyur ba'o/ /ji ltar 'gyur ba bstan pa'i phyir/ /sangs rgyas ni shigs pa med pa'i haM ngo //sprul pa ni byang chub kyi sems so/ /rgyud ni dga' ba bzhi'o/ /mtshan nyid mi mthun pas mtshon par mi nus pa ma yin te/ dad ldan zhes pas snga ma bzhin no/ /'jig rten khams brgya kun bskyod pa/ /zhes pa ni/ phyi nang gi bye brag gis sangs rgyas kyi rdzu 'phrul dang / ye shes mthong ba'i dus ni sa g.yos la sogs pa'i rtags 'byung bar bshad pa bzhin no//rdzu 'phrul rkang pa'i stobs chen ldan/ /zhes pa ni/ sngar bzhin gyis kun rdzob kyi rdzu 'phrul bstan pa las/ don gyi stobs chen po lnga dang ldan pa thob par 'gyur ro/ /de nyid dran pa chen po 'chang / /zhes pa ni/ sngar gyi bye brag gis dbang po dman pos mtshan ma'i rnal 'byor du bya ba dang /de las gzhan pas bde ba chen po'i dran pa 'chang ba bo/ dran pa bzhi po zhes pa ni sngar gyi bye brag gis tshor ba dran pa nye bar gzhag pa dang / dus kyi ye shes dran pa dang / chos dran pa nye bar gzhag pa dang / dus kyi ye shes snang bar dran pa'o//sems dran pa nye bar gzhag pa dang / dus kyi ye shes sdug bsngal du dran pa'o/ /lus dran pa nye bar gzhag pa dang / dus kyi ye shes bden par dran pa'o/ /ting nge 'dzin rgyal zhes pa ni sngar bzhin gyi bye brag gis seng ge rnam par rtse ba dang / nam mkha' mdzod dang / dri ma med pa dang / kun du snang ba'i ting nge 'dzin dang / 'bras bu dang rjes su mthun pa'i kha sbyor ba la sogs pa'i yan lag brgyad do/ /byang chub kyi yan lag gi sngar bzhin gyi bye brag gis bdun dang rnam par shes pa'i bdun gyis lus rgyun gyis rtag pa nyid do/ /me tog spos ni dngos dang ma bcos shing rang snang ba'o//de bzhin gshegs pa'i yon tan mtsho/ /zhes pa ni/ sngar bzhin gyi bye brag gis 'phags pa'i bden pa bzhi la sogs pa thams cad dang / yon tan mtsho ji snyed kyi gnas byang chub kyi sems so/ /lam gyi yan lag brgyad rig pa/ /zhes pa ni/ sngar gyi bye brag gis de nyid dang 'jig rten las 'das pa'i lta ba gang gis bdag dang /sems can dang / srog dang / gso ba dang / skyes bu dang / gang zag dang / shed bu dang / shed las skyes pa dang / byed pa po dang / tshor ba po dang / mthong ba po'i lta ba kun nas ldang bar mi byed cing / rtag pa dang / chad pa dang / skye ba dang / 'gag pa dang / dge ba dang / mi dge ba kun nas bslang ba dang / srid pa dang bral ba'i lta ba kun nas bslang ba dang / srid pa dang bral bar bstan pas lta ba kun nas bslang ba dang / 'khor ba dang mya ngan las 'das pa'i lta ba kun nas ldang bar mi byed pa ni yang dag pa'i lta ba'o//kun du rtog pa gang gis 'dod chags dang / zhe sdang dang / gti mug gi kun nas nyon mongs pa skye ba dang mthun par gang du mi rtog cing tshul khrims dang / ting nge 'dzin dang shes rab dang / rnam par grol ba dang / rnam par grol ba'i ye shes mthong ba'i phung po skye ba dang mthun par kun du rtog pa 'di ni yang dag par rtogs pa'o//ngag gang gis bdag dang gzhan gdung bar mi 'gyur ba dang / nyon mongs par mi 'gyur ba dang / bsnun par mi 'gyur ba dang / bzhad gad du mi 'gyur zhing / rigs pa dang bral bas yang dag pa'i ngag la 'dzud par byed pa 'di ni yang dag pa'i ngag go//las gang las kyang gnag la rnam par smin pa yang gnag pa'i mngon par 'du mi byed pa dang / las gang las kyang dkar ba rnam par smin pa yang dkar ba de mngon par 'du byed pa dang / las gang las dkar ba yang rnam par smin pa gnag pa de mngon par 'du mi byed cing /las gang las gnag kyang rnam par smin pa dkar na nag po zad de/ dkar po'i phyogs 'phel bar byed cing / mngon par 'du byed cing dam pa'i las kyi rjes su 'brang ba 'di ni yang dag pa'i las kyi mtha'o/ /gang la yang 'phags pa'i rigs pa can gyi sbyangs pa'i yon tan cung zad la gnas shing /tshul 'chos dang kha gsag la sogs pas 'tsho ba spangs te rang gi spyod pa'i ngang tshul rig pa dang ldan pas skye bo gzhan las rnyed kyang rung ste/ cung zad tsam gyis ma gus shing / kha na ma thob med pa dang / 'phags pas rjes su gnang ba'i 'tsho ba 'di ni yang dag pa'i 'tsho ba'o//rtsol ba gang gis bsags pa rjes su gnang ba'i 'dod chags dang / zhe sdang dang / gti mug la sogs pa ston par mi byed cing / yang dag pa'i 'phags pa'i lam gyi bden par zhugs te/ mya ngan las 'das pa'i 'dod pa bsten cing rjes su 'gro ba 'di ni yang dag pa'i rtsol ba'o//gang du nye bar gnas na sku mi g.yo zhing 'khyogs pa ma yin par 'gyur ba ste/ 'khor ba'i skyon rnams dang mya ngan las 'das pa dang / lam gyi yon tan rjes su dran zhing lam gyi mthar thug pa la yang dag par sbyor ba 'di ni yang dag pa'i dran pa'o//de nyid kyi ting nge 'dzin gang la gnas nas sems can thams cad rnam par thar par mdzad cing / mya ngan las 'das par brtan por gnon pa 'di ni yang dag pa'i ting nge 'dzin te zhes dgongs so/ /de nyid gcig tu byas pa'i ye shes ni/ yang dag sangs rgyas lam rig pa/ /zhes bya ste/lhan cig skyes pa'i chos kyi dbyings kyi lam mo/ /sems can kun la shas cher chags/ /zhes pa ni sngar bzhin gyi bye brag gis sbyin pa dang / snyan par smra ba dang / don mthun pa dang / don byed pa'o/ /gnyis pa ni thun mong ma yin pa'i snying rje dang / de skye bar byed pa'i dbang la sogs pa gsum ston pa'o//nam mkha' lta bur chags pa med/ /ces pa ni/ dmigs pa med pa'i snying rje dang / sems can gyi yul mi snang ba'o/ /sems can kun gyi yid la 'jug /ces pa ni/ ye shes kyi snying po can du bstan cing / de gsal bar mdzad pa por yang 'gyur ba'o//sems can kun gyi yid ltar mgyogs/ /zhes pa ni/ sngar bshad pa dang byang chub la myur ba'o/ /de'i rgyu mtshan ni/ sems can kun gyi dbang don shes/ /zhes bya ste/ de nyid kyi phyir/ don mdzad pa dang / myur ba dang / snang ba dang / sems lhan cig skyes pa shes par myong ba'o/ / log rtogs bzlog pa'i phyir/ sems can kun gyi yid 'phrog pa/ /zhes gsungs pa ni/ gdul bya'i dbang po la mi bzad pa'i gzugs su gyur pa dang / yid rnam par dag nas lhan cig skyes par gyur pa la 'phrog ces bya ste/ gser 'gyur gyi rtsi bzhin no/ /phung po lnga don de nyid shes zhes pa ni/ji ltar ston pa bstan pa ste/ rigs lnga dang zag pa med pa'i phung po lngar shes pa dang / de kho na nyid du dbyer med pa'o/ /de'i phyir/ rnam dag phung po lnga 'chang ba/ /zhes pa ni gnyi ga la'o/ /nges 'byung kun ni theg pa gsum ste/ mtha' la gnas pa ni sa gnyis so/ /gzhan spangs pa ma yin te/nges par 'byung ba kun la mkhas/ /zhes pas so/ /nges 'byung kun gyi lam la gnas/ /zhes pas theg pa gsum gyi lam la rim gyis sbyangs pa dang / gnas zhes pas ldan pa ste skye ba rim pa bzhin no/ /nges par 'byung ba kun ston pa/ /zhes pa de ni bshad zin to/ /yan lag la sogs pas phun sum tshogs pa bshad par bya ste/yan lag bcu gnyis ni ma rig pa la sogs pa'o/ /srid rtsa bton pa ni dus kyi gsum pas byin rlabs thob pa dang / lam gyi gsum pa rten med pa las thos pas sa bon gyi bag chags dang / mngon du rgyu rtsa ba nas bton pa'o/ /phyis de ltar mi 'gyur ba ni//dag pa rnam pa bcu gnyis 'chang / /zhes pas/ skye mched bcu gnyis rang gi ngo bo dag pa ste/ de yang mig ces bya ba ni stong pa ste/ dbus na rnam shes ji ltar mchis/ /zhes pa la sogs pa la/ de ltar na gzugs ma mchis pas lta ba ma mchis so zhes pas so/ /srid pa'i rgyur 'gyur ba ma yin te/ bden bzhi'i tshul gyi rnam pa can zhes pas/ sdug bsngal gyi rgyu ye shes su shes pa dang / kun 'byung bde bar sad pa dang / 'gog pa rang 'byung ba dang / lam 'bras bu rang chas su ldan pa'o/ /nyan thos dang mtshungs pa ma yin te/ shes pa brgyad po rtogs pa 'chang / /zhes pas brgyad la zad pa shes pa dang /mi skye ba shes pas khyab pa'i phyir/ de nyid du byas pa'o/ /man ngag gi drin yin pas bstan pa'i phyir/ bden don rnam pa bcu gnyis ldan/ /zhes pa ste/ bden pa bzhi'i tshul gsum dga' ba bzhir rab tu ldan pas so/ /de nyid rnam pa bcu drug rig /ces pa ni/ 'di dang ldan pa'i phyag rgya las rig par 'gyur ba'am/ dga' ba nyid bye brag gi don gyis bcu drug tu 'gyur ba'am/ dga' ba nyid bcu drug 'gyur du bshad de/ de yang / ye shes sems dpa' 'dzin pa'i bdag /bcu drug char yang mi phod do/ /zhes gsungs pa'i don gyis so/ /rnam pa nyi shus byang chub pa//zhes pa ni/ sngar bzhin gyi bye brag gis/ ji ltar sa gser zla ba me/ /zhes pa la sogs pa dang / de nyid rnam par dag pa'i rigs lnga dang / sangs rgyas lnga dang / sku lnga dang / ye shes lnga dang dbyer mi phyed par gyur pas/ phung po lnga dang / 'byung ba lnga dang / 'dod yon lnga dang / dug lnga rang bzhin gyis zhi bar gyur pa la bya ste/de yang sa dang bcas pa dang / sa phyogs par shes par bya'o/ /de'i phyir rnam par dag pas sangs rgyas kun gyi ye shes rig pa ste/ mchog ces gsungs pa ni rang gi don te/ sangs rgyas dang chos la sogs pa ni gzhan gyi don to/ /da ni skad cig la sogs pa gzhan gyi don bstan par bya ste/skad cig ni mtshan nyid dang bral ba'o/ /thams cad ni thams cad kyi rang bzhin no/ /mngon par rtogs pa ni the tshom med pa'o/ /de yang ye shes tha dad pa ma yin pa ni sems kyi zhes pa ni lhan cig skyes pa ste/ rang gi rang bzhin du bstan pa ni kyi zhes bya/ de skad cig gi dus dmigs pa na/dga' ba sna tshogs nyid du brjod/ /mchog dga' rnam par smin pa nyid/ /dga' bral rnam pa med pa ste/ lhan cig dga' ba mtshan nyid bral/ zhes gsungs pas so/ /don kun rig ces pa ni/ gzhan mi dmigs par bstan pa'o/ /'gro ba la gdod ma nas bstan par rig pa ma yin te/theg pa sna tshogs thabs tshul gyis/ /'gro ba 'don par mdzad pa yin gyis don la rtogs pa bskyed pa'i phyir te bshad zin to/ /gong ma la 'jug par mi 'gyur ba ma yin te/ smon lam gyis dge ba'i bshes gnyen dang phrad la/ des go rims bstan pa'i phyir theg pa zhes bya ba la sogs pa gsungs so//theg pa bzhi po yod par ni ma yin te/ gcig nyid khyad par du byas pa'o/ /nyon mongs pa la sogs pa bag chags kyi sa bon mi gnas par ston te/ nyon mongs pa ni lnga'o/ /khams rnams zhes pa ni bco brgyad do/ /dag pa'i bdag ces pa ni rang bzhin gyis lus su gyur pa'o//las kyi khams rnams zhes pa ni gsum ste zad par byed pa'o/ /chu'i rgya mtsho ni 'dod pa dang / srid pa dang / lta ba dang / ma rig pa'o/ /brgal ba ni thar pa'o/ /de yang sbyor ba ni nang rten cing 'brel bar 'byung ba'i sbyor ba'o/ /sems dben pa thob pa'i dgon pa las 'bras bu 'byung bas na/theg pa'i bye brag bla na med pa la dgos pa yod do/ /bag chags dang rjes su mthun par sa bon bral ba ni ma rig pa dang / sred pa dang / len pa la nyon mongs pa zhes bya'o/ /srid pa dang / 'du byed la nye ba'i nyon mongs pa zhes bya'o//rnam par shes pa dang / ming dang gzugs dang / skye mched drug dang / reg pa dang / tshor ba dang / skye ba dang / rga shi ni kun nas nyon mongs pa zhes bya ste/ gtan spangs pa ni dug sngags kyis btul bas dug tu mi 'gyur ba bzhin no/ /bde ba chen po'i thabs kho nar gyur pa ma yin te/snying rje chen po shes rab thabs/ zhes pas zung du 'jug pa'o/ /des ji ltar 'gyur ba ni/ don chen 'gro ba'i don byed pa/ /zhes so/ /de yang 'gog pa'i snyoms par 'jug pa'i don dang / 'du shes med pa'i snyoms par 'jug pa'i don dang / gzugs kyi khams kyi don dang / gzugs med pa'i khams kyi don spong bas na/ 'du shes kun gyi don spangs shing / /zhes pa ni bcom ldan 'das so/ /rnam shes ni rnam shes mtha' yas la sogs pa ste/ gzugs med pa'i skye gnas kyi don ni 'gog par byed pa'o/ /gang gi don byed pa bstan pa'i phyir/ /sems can kun gyi yul dang ldan//zhes gsungs te/ yid dang mthun par ro/ /des ji ltar 'gyur zhe na/ sangs rgyas kun gyi thugs sems can gyi rigs par nus so/ /dpe nye bar grub pa ma yin te/ sems can kun gyi yid la gdod ma nas sangs rgyas kyi thugs gnas par sems can de dag gi sems dag dang /sangs rgyas kun gyi thugs kyi rang bzhin gcig pas mthun par 'jug pa'o/ /gzhan gyi don gyis 'gyur ba ma yin te/ /sems can gyi yid tshim par mi nus pa'i phyir ro/ /de bas na sems can kun gyi yid tshim par byed pa ste/ rnam rtog zad par byed pa'o/ /de tsam du ma zad kyi/sems can kun gyi yid dga' ba/ /zhes pas lhan cig skyes pa thob pa'o/ /gtan la phab pa'i yid med pas grub pa'i mthar phyin 'khrul ba med pa'o/ /nor ba thams cad rnam par spangs/ /zhes pas/ don ji lta ba la blo ji lta ba bzhin zhugs pa'o/ /don gsum ni 'das pa dang ma 'ongs pa dang /da ltar byung ba gsum du'o/ /the tshom med pa'i blo zhes pa ni rgyun gcig par ro/ /kun don ni g.yo ba dang mi g.yo ba kun gyi don mdzad pa'o/ /de'i 'thad pa ni/ yon tan gsum gyi bdag ces bya ste/ rdul mun pa snying stobs gsum yang 'gro ba'i don du bstan pa'o/ /nyan thos la phung po dang don gsum du bdag med par ston pa'o//theg pa chen po la/ skad cig thams cad bye brag phyed/ /ces pa ste/ rgyu'i dus su dge ba'i chos tshol ba dang thos pa dang bsam pa dang bsgom pa thams cad shes rab kyis so sor rig pas so/ /skad cig gcig gis rdzogs sangs rgyas/ /zhes pa ni 'bras bu'i dus na zad pa'i ye shes dang //mi skye ba'i ye shes thob par ston to/ /rgyu 'bras rjes su mthun te/ lhan cig skyes pa'i rkyen ni du ma yin la/ nye bar len pa'i rgyu ni gcig kho nas/ /sangs rgyas kun gyi rang bzhin 'chang / /zhes pas rgyu 'bras rjes su mthun pas thams cad gcig pa nyid do/ /lus mi 'byung ba ma yin te/ lus med ces pas rnam par smin pa'i lus med ces ni chos kyi sku can no/ /lus kyi mchog ces pas ye shes kyi phung po can du snang ba'o/ /du ma dang sna tshogs 'byung ba ni lus kyi mtha' rtogs pa'i phyir ro/ /de bas na gzugs la sogs pa'o/ /ji ltar 'gyur ba ni nor bu rin chen ltar ro/ /dga' ba ma yin te/rin chen rtog ces pas khams gsum gyi rgyal mtshan ni/ /de dag gis mnyam pa nyid kyi ye shes la bstod pa'o/ /da ni sangs rgyas zhes bya ba la sogs pas bsdus te bstan pa'i phyir ro/ /sangs rgyas kun gyi rtogs pa dang mkhyen pa dang / mngon du mdzad pa ni sangs rgyas kyi byang chub gsum dang / bla na med pa'i bde ba chen po ste/bya ba nan tan de bzhin du 'dir yang sangs rgyas dang sems can rgyud gcig tu rtogs par bya ba dang / thams cad sems kyi khyad par du shes par bya ba dang / 'bad pa med pa rang gi ngang gis 'byung ba la mngon du byung ba ni bla na med pa ste/ bya ba nan tan gyi ye shes so/ /de nyid gsal bar bya ba'i phyir/gsang sngags 'chang zhes bya ba la sogs pa gsungs te/ de yang ye shes nyid dang / de'i rnam 'phrul dang / ma rig pa'i rlung dang / rlung bcu dang / ngag dang / yi ge dang / ming dang / tshogs rnams ni bsam gyis mi khyab pa'i gsang sngags 'byung bas skye gnas so/ /yi ge med ces pa ni de nyid gdod ma'i gnas su thim pas spros pa las 'das pa'o//de nyid mtshon par byed pa ni yi ge ste/ oM AHhUM ngo / /de la gsang sngags chen po zhes gsungs te/ sku gsung thugs kyi rigs yin pa'i phyir ro/ /de las rigs lnga dang / drug tu 'gyur zhing gsang sngags kyi don mchog dang thun mong gi dngos grub don kun skyed pa por byed pa ni bya ba nan tan no//de yang thabs dang shes rab kyi rigs gnyis su bsdu ba'i phyir/ thig le chen po zhes bya ste/ e waM/ de yang bde ba chen po'i rigs gcig tu bya ba'i yi ge med ces bya'o/ /de nyid yi ge sna tshogs su snang bas stobs po che zhes bya'o/ /dbyangs yig bcu gnyis so//yi ge lnga ste/ oM hUM trAM hrIHa'o/ /thig le rang gi sa bon te/ muM sems kyi ngo bo'o/ /stong pa ni rig par 'dzin pa med par ro/ /yi ge brgya zhes pa ni phyogs gcig mtshon pa tsam du zad kyi/ ri rab kyi rdul phra rab snyed du yang 'gyur la/ yon tan yang de snyed du 'gyur ba ste/ don sngar bshad pa'i yi ge drug gi rang bzhin du bsdu bar bya'o//rnam pa kun ldan ni 'jig rten dang 'jig rten las 'das pa'o/ /rnam pa med pa de nyid gzugs brnyan gyi rnam par ro/ /bcu drug gi dbyangs yig go/ /phyed ni grong khyer dkrugs pa'o/ /gnyis pa ni gleng gzhi'o/ /thig le ni rdo rje 'chang dang mi bskyod pa'o/ /'chang ba ni dbugs dbyung ba'o/ / yan lag med pa ni phyi rol gyi rdzas dgag pa'o/ /rtsis ni brtags pa'o/ /de las 'das pa ni bde ba chen po'o/ /bsam gtan bzhi ni dga' ba dang / bde ba dang / sems rtse gcig pa dang / dran pa ste dga' ba la sogs pa nyid do/ /rtse mo can ni ro gcig pa nyid do/ /'jig rten par 'gyur ba ma yin te/ bsam gtan yan lag kun shes shing //zhes pas rtog pa dang / dpyod pa dang / dga' ba dang / bde ba ni dang po'o/ /rtog pa dang bcas dpyod pa med pa'i dga' ba dang / bde ba ni gnyis pa'o/ /dga' ba med pa'i btang snyoms dang / dran pa yang dag par brjod pa ni gsum pa'o/ /sdug bsngal dang / bde ba med pa btang snyoms kyi dran pa yongs su dag pa ni bzhi pa'o//mkhyen pas don yod pa ni ting nge 'dzin gyi rigs du ma dang / gang zag gi rgyud du ma rig pas rtse gcig bsgom pa'i rigs kyi dbye bas nyan thos la sogs pa'i gzung ba'i mchog la dbugs dbyung gnyis lhag par ston te/ /ting 'dzin lus can ni gang zag go/ /lus kyi mchog ni chos sku'o//de nyid ni 'jam dpal ye shes sems dpa' ste/ longs spyod rdzogs pa la sogs par snang ngo / /thun mong 'phrul pa ni/ de bzhin 'gro ba'i don byed pa/ /zhes pa ste/ lha'i dbang po ni khyab 'jug go/ /lha'i lha ni tshangs pa'o/ /lha'i bdag po ni brgya byin no/ /lha ma yin gyi bdag po ni rA hu la'o/ / 'chi med dbang po ni nye dbang ngo / /lha'i bla ma ni phur bu'o/ /'joms byed ni thags bzangs ris so/ /gnyis pa ni srin po'i bdag po'o/ /dbang phyug ni ma hA de ba ste/ bcom ldan 'das la sogs pa'i rang rang gi rgyal por bstod pa'o/ /de bas sems can thams cad sred pa'i dgon pa las rgal bar mdzad pa ni ston pa gcig pu ste/de bas na 'gro ba'i bla mar gyur pa'o/ /de ltar gyur par bstan pa'i phyir 'jig rten la sogs pa'o/ /dgongs pa ji lta bu mnga' ba bstan pa'i phyir/ byams pa'i go chas chas pa ste/ /zhes pa ni phyogs med pa'o/ /snying rje yi ni ya la dab gos/ /zhes pa ni sdug bsngal dang bral bar byed pa ste bsrung ba'o//shes rab ral gri mda' gzhu thogs/ /zhes pa ni rtags dang don te shes rab dang rigs pas nang dang / phyi'i sgro 'dogs mi mnga' ba dang kha sbyor snyoms par 'jug pa'o/ /mi shes pa ni gti mug go/ /g.yul ngo ni sems dang po bskyed pa'i dus so/ /sel ba ni dag par mdzad pa'o/ / dpa' bo ni bcom ldan 'das so/ /bdud ni bzhi'o/ /dgra ni log par 'dren pa'o/ /bdud 'dul ba ni btul ba ste rdo rje gdan la'o/ /de'i mthu ni bdud bzhi la sogs pa'o/ /mchod pa'i 'os su bstan pa'i phyir/ /de bas na/ rdzogs pa'i sangs rgyas 'jig rten 'dren/ /zhes bya ste/ khyod nyid thams cad du 'khrul zhing rim gyis dbang po'i bye brag dang mthun par bstan pa khyod nyid du ma gyur pa dang /mi 'gyur ba med ces bya ba'i don to/ /de bas na 'di dag la gnyis sbyar te/ rtags ni gzhung ltar ro/ /gzhan pa yang mchod 'os ni thos pa dang dran pa mthar phyin pa'o/ /bstod 'os ni rang bzhin gcig tu rtogs pa'o//phyag gi gnas ni thams cad kyi skye gnas su gyur pas so/ /rtag tu ri mor bya ba'i 'os ni theg pa gsum gyi rang rang gi lam rgyud la sbyangs pa'o/ /bkur 'os ni byang chub sems dpa' rnams kyi ste/ lam dngos bstan pa'o/ /brjod par bya ba'i mchog ni theg pa chen po pa rnams kyi ste rang bzhin gyis don phun sum tshogs pa snang bas so//phyag bya ba'i 'os ni sngags spyod pa rnams kyi ste rang rig ston pas so/ /bla ma'i rab ni dbang thob pa rnams kyi ste/ de kho na nyid mthong ba dang / chos thams cad byin gyis brlabs pas so/ /bya ba nan tan gyi ye shes thugs su chud pa'i rdzu 'phrul gyis 'jig rten la sogs pa'o//gsum rig ni dus mkhyen pa dang / mchod pa mkhyen pa dang mnyam pa'i mtshan nyid mkhyen pa yin la/ gtsang ma dag pa ste/ zhes bya ba ni mi slu zhing rig pa la the tshom mi mnga' ba'o/ /mngon shes drug ldan ni lha'i mig la sogs pa'o/ /rjes dran drug ni sangs rgyas dang chos dang dge 'dun dang yi dam dang tshig dran pa mnga' ba'o//byang chub sems dpa' ni theg pa gzhan gyi yab tu gyur pa'o/ /sems dpa' chen po ni theg pa chen po'i yang yab tu gyur pa'o/ /rdzu 'phrul chen po ni bsod nams kyi tshogs rdzogs pa'o/ /'jig rten 'das pa la sogs pa ni ye shes kyi tshogs rdzogs pa'o//mjug bsdu bar bya ba'i phyir/ /gtso bo chos kyi sbyin bdag ste/ /zhes bya ba'i don ni 'dir/ phyag rgya bzhi yi don ston pa/ /zhes bya ba'i don te/ rigs phyag rgya bzhi ni bskyed pa'i rim pa'o/ /rtags phyag rgya bzhi ni byin gyis brlabs pa'i dus su'o//don phyag rgya bzhi ni lam gyi dus su'o/ /nyes mchis gyur pa la sogs bzod par mdzod/ /shes rab yul ni mtha' dang bral/ /zab mo'i don ni gzhal dka' bas/ /gzhal bya 'jal byed kyis stong pa'i/ / 'gro kun snying po len par shog /sngags pa rnal 'byor la mi mkhas/ /phal cher bag med lam 'gro la/ /snying po mngon rtogs 'di brjod pas/ /thams cad rnal 'byor la 'jug cing / /'jam dpal ye shes sems dpa' yi/ /don ni ngo bor 'gyur bar shog /'phags pa 'jam dpal gyi mtshan yang dag par brjod pa'i 'grel pa snying po mngon par rtogs pa zhes bya ba/ slob dpon chen po dpal gnyis med rdo rjes mdzad pa rdzogs so// //rnal 'byor pa chen po pradz+nyA shrI dz+nyA na kI rtis rang 'gyur du byas pa'o// //