CLOSE WINDOW

D2097
བོད་ཡིག

@##/ /rgya gar skad du/ dz+nyA na satwa many+dzu shrI na bi ma la rat+na mu dra bi d+hi nA ma/ bod skad du/ 'jam dpal ye shes sems dpa'i rin po che'i phyag rgya dri ma med pa'i cho ga zhes bya ba/ 'phags pa 'jam dpal ye shes sems dpa' chen po la phyag 'tshal lo/ /bdag blo yangs ldan cho ga rdzogs pa dang / /drin ldan mnyes gshin byang chub sems dpa' des//rtsod dus rkyen dbang shes rab nyam chung la/ /rgyud kyi rin chen phyag rgya btud de bshad/ /snying rje che dang chen por ldan/ /brtse bas don byed skyo ba med/ /spobs pa che zhing phan blor ldan/ /ngang tshul bzang zhing skyo bar bzod/ /shes rab che zhing nus pa yod/ /rtsod dang tshig gi sbyor sdeb mkhas//dpa' zhing rtul phod brtson 'grus che/ /bkas bsgo ba la dring mi 'jog /dad dang shes rab gtso bor gnas/ /bla ma'i brgyud thabs srog bzhin srung / /yid la mi byed don bstan na/ /pad+ma'i mdangs 'phro gnas las ldog /dam tshig gsum ni mig bzhin du//srung byed rin chen phyag rgya'i snod/ /de la 'jam dpal ye shes sems dpa'i mtshan thos pa tsam gyis yid la mos par 'gyur ba'i skyes bu des ni grub pa'i tshegs chung ngus bdag gis byed par 'gyur ro/ /de yang bsam gtan gyi khang par yid du 'ong ba'i ras ris kyi mdun du glegs bam rab tu gnas par byas te bzhag la/de dang nye bar tsan+dan dkar pos byugs pa'i maN+Dal khru gang ba gru bzhi pa'i steng du me tog gi tshom bus mchod la/ tsan+dan gyi bdar bu dang / me tog dkar po snyim pa gang thogs te/ 'phags pa 'jam dpal ye shes sems dpa' la phyag 'tshal lo/ / ye shes sems dpa' chen po mchog nyid la phyag 'tshal lo/ /mtshan gyi 'khor lo thams cad la phyag 'tshal lo/ /bdag gi rnam par shes pa'i tshogs thams cad dang yang dag pa'i don gyi rnal 'byor du mdzad du gsol zhes lan nyi shu rtsa gcig tu brjod la/ me tog dkar po'i phreng ba mgo la bcings te/tsan+dan sen rtse dang / til mar la bdar ba'i chu mig la byugs la/ rmi lam brtag pa'i ltas kyang shes par bya'o/ /de nas tho rangs ci rigs pa'i rnal 'byor du gnas te/ slob ma rtags dang rmi lam gyis shes par yo byad kyis spras nas nye ba dang lha'i maN+Dal dang / sems bskyed pa rin po che'i phyag rgya'i yon phul te/tshul dang mthun pa'i gnas la/ oM kye kye kye ye shes sems dang zhi ba rab mdzes sku/ /khyod thugs bskyed pa 'gro la sman pa'i gtso/ /'khor lo'i phyag rgyas gti mug dral mdzad cing / /me long lta bu'i mtshan bstod thugs chud ltar/ /sems bskyed la mos bde gshegs rigs 'gyur dag /'gro ba rnams kyi sku yi gdul bya'i phyir/ /bde gshegs rigs kyi sems bskyed gzung bar bgyi/ /dkyil 'khor 'khor lo bdag byin brlab tu gsol/ /zhes lan gsum dang gsum gsum du brjod pa ni dbang po dang shes pa'i bye brag gis shes par bya'o//phyag rgya'i bye brag ni man ngag gis so/ /de nas tshes gcig nas nye bar bzung ste/ rnal 'byor bas rang gi spyod pa bcu la zhugs nas/ lha'i bsgrub pa ldan pa'i mtshan yang dag par brjod pa'i bsnyen pa ji srid spro'i bar bya'o/ /thun mtshams dang glo bur gyi las ni mkhas pa dag gis ci rigs par sbyar ro//paN+Di ta dang / rgyal po dang / blon po chen po dang / dmag dpon dang / bram ze sgo ba dang grong du 'jug pa dang / don gnyer ba la sogs pa'i tshogs na gnas pa rnams kyis ni dran pa gcig pa'i byin gyis brlabs pa tsam la ci rigs pas bstod de/bdag dang 'gro ba sbyang tsam bya'o/ /tshe la sogs pa'i sbyor ba 'phel ba dang / /'dir gsungs yon tan rnams ni 'grub par 'gyur/ /lha dang mi yi mchog gyur gtso bo bzhin/ /lo ka dag las lhag pa'i gnas su 'gro/ /mun nag mthug po dag gis dkris pa rnams//zad 'gyur dri ma med pa'i 'od zer spung / /pad+ma'i rtsa bar rtsi yis mchog gnas gang / /g+ha tra shing gi 'dab mas len bzhin du/ /bskal pa'i grangs la rag las mi 'gyur bar/ /mi yi tshe 'di nyid kyis 'dod bzhin thob/ /yang dag mtshan 'di'i sgo la dad pa gang //de yi mtshams med lnga yang skad cig des/ /dag na 'don dang klog pa smos ci dgos/ /ri khrod mgon po las thob pa'i/ /rgyud kyi rin chen phyag rgya 'di/ /sgyu 'phrul dra ba'i ting nge 'dzin/ /skye ba'i rim 'byung byams pas byas/ / rigs gang rigs kyi lha las ni/ /dngos grub thogs med thob gyur cig /nam mkhas gar khyab lo ka 'gro ba rnams/ /ma rig phyag rgyas rab tu bcings gyur pa/ /blo gros chen po'i phyag rgyas bcad nas kyang / /'jam dpal ye shes sems dpa'i zhabs grub shog /'phags pa 'jam dpal ye shes sems dpa' rin po che'i phyag rgya dri ma med pa'i cho ga zhes bya ba rgya gar gyi mkhan po dpal ldan gnyis su med pa'i rdo rjes mdzad pa rdzogs so// //rnal 'byor pa bsod snyoms pa pradz+nyA shrI dz+nyA na kI rtis rang 'gyur du mdzad pa'o// //