CLOSE WINDOW

D1986
བོད་ཡིག

ji ltar nang bzhin phyi rol te/ /gnyis su med pa'i rnal 'byor 'dis/ /sgrub pa ru ni rigs pa yin/ /slob dpon chen po ke ra li pas mdzad pa de kho na nyid grub pa rdzogs so/ /[ ]@##/ /rgya gar skad du/ shrI badzra b+hai ra wa sa ma ya maN+Dal bi d+hiH/ bod skad du/ dpal rdo rje 'jigs byed kyi dam tshig la 'jug pa'i dkyil 'khor gyi cho ga /'jam dpal gzhon nur gyur pa la phyag 'tshal lo/ /thog mar nges par rim par brgyud pa dang / /de kho na nyid bcu la sogs pa'i yon tan dang ldan pa'i bla ma la/ theg pa chen por rigs nges shing dad pa dang ldan pa'i slob mas/ go 'phang mchog thob par 'dod pa'i don du/yang dang yang du gsol ba btab pa dang / bkra shis pa'i gnas dang / dus der rjes su gzung bar byas nas/ /bla ma la mchod pa rgya chen po dang bcas pas/ dpal rdo rje 'jigs byed mnyes par bya ba'i don du/ gnang ba rab 'bring tha ma gang yang rung ba thob pa des/slob ma rnams kyang ji lta ba bzhin sbyang ba byas la/ sbyin sreg la sogs pa'i yo byad rnams tshul bzhin du tshogs par gyur pa ni/ sngon du bsnyen pa'i cho ga'o/ /de nas ji skad du gsungs pa'i gnas su sems dpa' dang bcas pas/ las thams cad pa'i chus bsang gtor byas la/der dkyil 'khor gyi 'khor lo bsgoms shing mchod nas gtor ma btang ba'i bar du bya ste/ de nas sa'i lha mo la sa blang ba la sogs pa byas la/ de nas bdud rtsi 'khyil pa'i ting nge 'dzin la gnas pas/ gang la dmigs pa'i sa de la tshon thag dang / phur bus bskor te ji lta bar brko zhing sbyangs nas/maN+Dal ba'i ko ba tsam pa byas la/ ci rigs pa'i sa gter gzhug cing ba'i rnam lnga spos dang bcas pas 'thas par bcags te/ rgyan gyis brgyan pa dang / mchod pa'i yo byad kun bkram la/ rgyan cha dang bcas pa'i slob dpon des/ maN+Dal gyi steng du rnal 'byor rdzogs par bsgoms pa'i rjes la/sa gzhi thams cad stong pa'i ngang las byung ba'i sna tshogs rdo rje rgya gram 'bar bar gyur par mthong ba dang slob ma lha mo bzhi'i ting nge 'dzin la gnas pas/ phyogs bzhi nas dkyil 'khor byin gyis rlob pa'i don du bzhengs par gsol ba btab pa'i rjes la/ rdo rje slob dpon de mnyam par bzhag pa las langs te/mig gnyis su ma dang a las nyi ma dang zla ba gsal bar byas te/ de dag gi 'od zer gyis 'jig rten gyi khams thams cad zil gyis gnon par bsgoms te/ rkang pa gnyis haM las rdo rje rgya gram 'bar bar bsam ste/ dbang ldan mtshams nas g.yas phyogs su bskor ba lan gsum gsum tsam du bskor zhing /hUM bzhi pa dang bcas pas 'byung po kun la 'jigs pa sbyin par bya ste/ de nas dkyil 'khor gyi steng du 'jigs pa chen pos gnas te/ phyogs kun du rnam par blta ba'i gar rnams byas la/ de nyid du 'dug nas nan tan du bgegs byed par 'dod pa rnams gzhom par 'dod pa'i don du/bdag nyid kyi snying ga nas nges par 'phros pa'i khro bo bdud rtsi 'khyil pa lnga bton pa'i phur pa la stod khro bor gyur pa dag /dkyil 'khor de'i dbus dang grwa bzhir gdab ste/ de'ang g.yas pas tho ba g.yon pas phur pa bzung ste/ phyogs skyong bcu la/ btab cing / thal phyin par gyur par dmigs te/ oM g+ha g+ha g+hA ta ya g+hA ta ya/ /sarba duSh+Tan phaT phaT/ kI la ya kI la ya/ sarba pA paM phaT phaT/ hUM badzra kI la ya sarba big+h+nA na/ badzra d+ha ra A dz+nyA pa ya ti kA ya wA ka tsit+ta badzra kI la ya hUM phaT/ ces pas gdab par bya'o/ /bdud rtsi 'khyil pa'i sngags la sogs pas kyang tshar gcad pa'o//sa yongs su gzung ba'i cho ga'o// //de'i rjes la stan la legs par 'dug nas/ g.yas pa'i rtse gsum phyag rgyas ni/ /sa la bsnun pa tsam gyi tshe/ /pad+ma dang bcas lha mo ni/ /lte ba yan chad 'thon pa la/ /thal sbyar bka' nyan tshul bsgoms nas//mchod cing gsol gdab bka' bsgo nas/ /gnang ba byin te sa der thim/ /de nas maN+Dal de dbus su/ /dri yis byugs pa'i maN+Dal gru bzhi pa cig byas te/ me tog gi tshom bu bya'o/ /de bzhin dri'i thig le re re dang / me tog gi tshom bu lha'i grangs dang mnyam pa dgod par bya'o//shrI badzra b+hai ra wa a d+hi Sh+Than/ zhes pas bsnyen par gyur ba'i dkyil 'khor de nyid 'dir brtan par gyur par blta'o/ /de nas rang bzhin gyi dkyil 'khor spyan drangs te/ /de nyid du dbyer med par bzhugs pa la mchod pa dang bstod pa'i sgo nas gsol ba gdab ste/ bcom ldan 'jam pa'i rdo rje dang //rig sngags rgyal la phyag 'tshal lo/ /bdag gis gshin rje gshed dkyil 'khor/ /mgon po bdag ni 'dri bar 'tshal/ /slob ma rnams la phan phyir dang / /khyed rnams la yang mchod pa'i phyir/ /bcom ldan bdag ni gus pa la/ byin gyis rlobs par mdzad du gsol/ / sangs rgyas thams cad bdag la dgongs/ /'khor los 'gro ba'i don mdzad dang / /'bras gnas byang chub sems dpa' dang / /gsang sngags kyi ni lha gzhan dang / /'jig rten skyong ba'i lha rnams dang / /'byung po yang dag rdzogs pa yi/ /sangs rgyas bstan la mngon dga' ba'i/ / gang su lha yi mig can kun/ /che ge zhes pa'i rdo rje yis/ /gshin rje'i dkyil 'khor las byung ba'i/ /ji ltar nye bar spyod nus pa/ /'gro rnams don du bri bar bya/ /bdag dang slob mar bcas pa kun/ /thugs rjes nye bar bzung nas ni/ /thams cad dkyil 'khor la bzhugs phyir/ / byin gyis rlob par mdzad du gsol/ /bdug spos rol mo bcas pa yis/ /kun gyis pus btsugs gsol ba gdab/ /de dag gis kyang rjes gnang ba/ /'gro mgon skyobs gnas yin par bsgo/ /dris lan tshul du mchod bstod bya'o/ /lha lhag par gnas pa'i cho ga'o// //de nas rin po che'i bum pa tshad dang dbyibs kyis mdzes pa drug gam//bcu gnyis la sogs pa la dkar por bsgyur zhing / sna tshogs pad+ma'i steng du rigs so so'i phyag rgya bris te/ las thams cad pa la rdo rje rgya gram bri'o/ /snying po'i 'bru lnga dang / rin po che dang / sman dang / dri dang / snying po rnams kyis dgang bar bya zhing /spos rnams dang bcas pas bkang la mgul chings dang / me tog gi phreng ba dang / kha rgyan dang / gzungs thag rdo rje la btags pa dang bcas pa/ yol ba byas la/ de dag mi dmigs pa las/ rin po che las grub pa'i gzhal yas khang pa'i nang du/ pad+ma'i sdong po'i steng du nyi zla'o//de'i steng du cho ga gsum las gtso bo'i sku bskyed la/ ye shes sems dpa' bsgrubs te/ mchod cing bstod nas/ bzlas pa bya ste/ brgya rtsa brgyad la sogs pa ci rigs par bzlas pa'i rjes la/ mchod yon la yi ge brgya pa ci rigs pa bzlas pa'i chus reg pa'i tshe na zhu ba'i thig le'i rang bzhin du blta'o//bum pa kun la'ang de bzhin du sbyar zhing / las thams cad pa ni pad+ma'i steng du bskyed par bya'o/ /bum pa lhag par gnas pa'i cho ga'o/ /de nas shar phyogs su maN+Dal bya ste/ slob mas slob dpon la nye bar longs spyod pa rnams kyis mchod par bya ste/ yang slob ma la skyabs su 'gro ba la sogs pa byin pa des slob dpon la gsol ba gdab ste/dga' chen khyod bdag ston pa ste/ /slob dpon khyod ni dgongs su gsol/ /byang chub chen po'i tshul bstan pa'i/ /mgon po chen po bdag la gsol/ /dam tshig de nyid bdag la stsol/ /byang chub sems kyang bdag la stsol//sangs rgyas chos dang dge 'dun te/ /skyabs gsum dag kyang bdag la stsol/ /thar pa chen po'i grong mchog tu/ /mgon po bdag ni 'jug par 'tshal/ /zhes lan gsum gsol ba btab pa'i rjes la/ de nas rdo rje slob dpon des slob ma rnams spro ba bskyed par bya ba ni/'jig rten 'dir ni kun mkhyen rnams/ /u dum+WA ra'i me tog ltar/ /brgya lam na ni res 'ga' zhig /'byung 'gyur yang ni mi 'byung ste/ /gsang sngags spyod pa'i cho ga rnams/ /de bas ches cher dkon pa ste/ /de ltar yid bzhin nor bu'i mchog / ded dpon bzang dang bcas pas blang / /gal te bag med gang gyur na/ /duHkha rgya mtsho skyed par byed/ /ces brjod cing / de nas gsang sngags kyi che ba'i yon tan nye bar brjod pa ni/ bu tshur theg pa chen po yi/ /gsang sngags spyod pa'i cho ga rnams/ /khyod la yang dag bstan par bya//khyod kyis tshul chen brten par byos/ /rdzogs pa'i sangs rgyas gang 'das dang / de bzhin gang dag ma byon dang / da ltar byung ba'i rdzogs sangs rgyas/ /'gro la phan phyir bzhugs pa rnams/ /de dag gis kyang gsang sngags kyi/ /cho ga bzang po 'di rnyed nas/ /dpa' bos byang chub shing drung du//thams cad mkhyen pa tshad med brnyes/ /gsang sngags cho ga mnyam med des/ /shAkya seng ge la sogs kyis/ /bdud sde shin tu mi bzad pa'i/ /dpung chen dag kyang de yis bcom/ /'khor lo bskor nas mya ngan 'das/ /de bas kun mkhyen thob bya'i phyir/ /bu yis blo gros 'di gyis shig /ces lan gsum du brjod cing / cho ga ji lta ba bzhin du rgyun bshags dang / /byang chub mchog tu sems bskyed par byas la/ de'i cho ga ni slob ma'i lus la/ 'byung ba bzhi'i 'khrul 'khor gyis 'od kyi gong bu de las yi ge 'bru gsum du gsal ba dang / sna g.yas g.yon gang nas rgyu ba'i rlung gis bsdus te/thugs ka nas gsang ba'i gnas nas bton te/ mdun du rdo rje sems dpar gyur pa de la/ sku gsung thugs rdo rjer gyur par byin gyis brlabs la/ mchod pa rnams phul te/ rang gi rigs kyi sngags brgya rtsa brgyad zlos su gzhug go/ /de nas bya ba'i rgyud la sogs pa'i sdom pa dang /dam tshig la sogs pa ci rigs pa dbog cing / dgag pa dang gnang ba la sogs pa'i bye brag dang / nyes dmigs kun kyang bsgrag par bya'o/ /de nas so shing sbyin zhing dag pa brjod par bya ste/ oM hrIHbi shud+d+ha d+harmA sarba pA paM ni tsA s+ya bi shod+ha ya sarba bi kalpa na pA paM a pa nA ya hUM/zhes kun la mngon par byin gyis brlab par bya'o/ /srung skud la rigs kyi snying po bzlas par rig par bya'o/ /ku sha'i chun po la sngas dang stan la yang dag par bsngags la yang sbyin te/ bya ba gzhan gyis blo ma yengs par/ snying po'i don dpal gshin rje gshed po 'ba' zhig la sems par gyis shig ces pa dang /de nas bsgo ba byas la ci bde bar gnas so/ /mdun gyi dkyil 'khor thabs shes rab kyi rang bzhin du gnas par bsam mo/ /slob ma lhag par gnas pa'i cho ga'o/ /de nas snga dro'i dus kyi tshe na/ rnal 'byor dang bcas pa'i sngags pas/ sngar gyi dkyil 'khor mngon sum du gsal ba de la yang dag par mchod nas/bar snang la gnas par bltas la/ maN+Dal la byi dor byas te/ de nas thig skud ni/ dog pa lnga dbus dang / phyogs bzhir bkod/ dang por mi dmigs par bya'o/ /de nas yig 'bru lnga dang phyag mtshan lnga yongs su gyur pa las rigs lngar grub pa la/ye shes sems dpas byin gyis brlab cing / mchod pas mchod cing / slar skud par gnas pa de la bsgril bar bya ste/ dza'i sgra las byung ba'i sgrub pa'i grogs la skud pa'i sna gtad de/ rang gi sor mo lnga'i bar nas skud pa lnga bkod la/ a n+yo n+ya a nu ga ta sarba d+harmA pa ra spa ra a nu pra biSh+Ta sarba d+harmA a t+yan+ta a nu pra biSh+Ta sarba d+harmA badzra si d+d+hi hUM aHzhes pas sor mo bcu'i bar du bsgril bar bya ste/de ltar legs par grub pa'i thig skud de la/ oM badzra sa ma ya sU tra ma ti kra ma hUM/ zhes bzla zhing dri dang spos kyis bsgos pa de la ji lta ba bzhin du mchod par bya ste/ de nas slob dpon gyis sngags dang bcas pas thig skud bsdogs te/dza'i sgra dang bcas pas thig sna gtad de/ rang bzhin gyi dkyil 'khor du gsal bar dmigs te/ de nas slob dpon lho nas byang du bltas te thig gcig gdab bo/ /de nas lho nas byang du bltas te shar gyi kha khyer gyi thig gdab bo//de bzhin du byang dang lhor bltas te nub kyi kha khyer gyi thig go/ /de bzhin du nub dang shar du bltas pas byang gi kha khyer gyi thig go/ /de nas nub dang shar du bltas pas lho'i kha khyer gyi thig gdab bo/ /de nas me dang rlung gi mtshams su gnas pa dang / srin po dang dbang ldan du gnas pas mtshams kyi thig gdab bo//de nas cha chen bcu drug tu phye ba las/ cha phran rnams ji ltar rig par gdab bo/ /de nas bskor thig gi grangs nges par bya'o/ /bcu drug gi phyi rol tu lhag par yang yongs su shes par bya'o/ /de nas tshon rtsi'i cho ga ni/ dkar po/ ser po/ dmar po/ ljang gu mthing ga rnams thod pa'i nang du so sor bkod la/ ye shes lngar gsal ba la mchod cing / slar tshon rtsi yongs su gyur ba la byin gyis brlab pa'i sngags ni/ oM badzra sa ma ya hUM/ zhes pas ye shes lnga'i rang bzhin du bltas la/ byang shar mtshams su re khA lnga bri'o/ /de nas thod pa bkab la rkang pa'i 'og tu mnan te/chos dbyings 'di ni rnam par dag /sems can khams rnams rab sgrol byed/ /rgyal ba 'jam mgon rdo rje 'dzin/ /de bzhin gshegs pa kun gyi gnas/ /zhes brjod cing tshom bu btab la/ de nas phur pa'i shul dgang ngo / /de nas yang rgyud nas ji skad gsungs pa ltar du dbus nas brtsams nas kyang /go rims ma nor bar bri bar bya ba ni/ mtshan mo phyed ni dus dag ste/ /ma he gdong gi sbyor ldan pas/ /gcer bu skra grol bdud rtsis byug /dur khrod sol ba rus phye sogs/ /sna tshogs ldan pa'i tshon rnams kyis/ /dkyil 'khor mdzes par bri bar bya'o//gru bzhi pa la sgo bzhi pa/ /rta babs bzhi dang dra bas brgyan/ /dril bu dril bu g.yer ka'i phyed/ /nyi ma zla ba rin chen phreng / /rin chen gdung dang mdzes pa'i thog /tog gis brgyan zhing 'od zer sprin/ /ngos rnams 'dod pa'i yon tan lngas/ /mdzes par bltams shing 'khrigs par spras//me tog phreng ba sna tshogs dang / /rin chen rgyal mtshan la sogs brgyad/ /gru rnams kun du bsgrengs pas brgyan/ /sa gzhi rdo rje rgya gram 'bar/ /de yi lte ba'i dkyil du ni/ /'khor lo'i mchog gi rnam pa la/ /zlum po re mig dgu pa ste/ / thod pa skam rlon phreng gis brgyan/ /bar khyams gru chad sgo bzhi mdzes/ /sgo gcig tu ni 'dug nas ni/ /sgo gzhan yongs su gcad par bya'o/ /zhes gsungs pas na/ de bzhin du yang dbus ni zlum po la re mig dgu pa'o/ /de'i phyi rol sna tshogs rdo rje rgya gram la rtse mos sgo'i nang du slebs pa la/ra'i mtha' me zlum bskor 'od zer bcas pa ni ci rigs su bya'o/ /mtshan ma dngos su dgod par bya ba ni/ dbus su ro mgo lhor bstan pa'o/ /bar khyams la shar du mgo bo/ lhor lag pa/ nub tu rgyu ma/ byang du rkang pa'o/ /shar gyi grwar thod pa khrag gis bkang ba/ lho'i grwar thod tshal gyi phreng ba/nub kyi grwar dur khrod kyi ras te zhing lpags brgyangs pa/ byang gi grwar gsal shing la btsugs pa'i mi ste/ 'di dag ni nang gi mtshan ma dag yin la/ de nas phyi rol gyi phyag rgya dgod de shar gyi snam bu la ni gri gug dang / /mtshon rtse gcig pa dang / gtun shing dang / chu gri dang / rdo rje rtse gcig pa dang / lcags kyu la sogs pa bri'o/ /lho phyogs kyi snam bu la sta re dang / mda' dang / kha T+wAM ga dang / dbyug to dang / 'khor lo dang / rdo rje'i zhags pa la sogs pa bri'o/ /nub phyogs kyi snam bu la rdo rje dang / rnge'u chung dang / phub dang / gzhu dang / dril bu dang / rlung gis 'phyar ba'i ras la sogs pa bri'o/ /byang phyogs kyi snam bu la/ sdigs mdzub dang / 'phan rtse gsum pa dang / glang po che'i pags pa dang / rdo rje'i tho ba dang / mdung dang / rdo rje'i me thab la sogs pa bri'o/ /khyad par du sgo bzhi dang grwa bzhir ro langs ma rungs pa'i cha byad can re re dgod do//dbus kyi ro langs kyi steng du sna tshogs kyi pad+ma la gri gug gam/ ral gri 'bar bas mtshan pa bkod do/ /dkyil 'khor bri ba'i rim pa'o/ /de nas bum pa dgod de/ gtso bo'i bum pa dbus su dgod do/ /gzhan dgu dang las bum dang bcas pa byang shar du bzhag la big+h+nAn ta kr-i ta la bsrung ba'i las bcol lo//de nas mchod pa'i yo byad dgod pa ni/ spyir sha dang khrag thams cad gtso bor gsungs so/ /mchod pa rnams ni bsham pa dang / grangs dang / go rims ni ji ltar gsungs pa bzhin no/ /mar me chen po brgyad ni/ phyogs mtshams brgyad du dgod pa la sogs pa dang /sgo bzhi dang grwa bzhir ni sha khrag sna tshogs pas bkang ba'i thod pa chen po'i gtor ma brgyad dang / gzhan ci rigs par bshams pa'i tshogs kyi yo byad rnams dang / 'dod pa'i yon tan lnga'i yo byad de/ gos zung du sbyar ba la sogs pa dang / rgyan gyi yo byad ni/ bla re dang / 'phan dang / gdugs dang / yol ba la sogs pa dang / bsrung ba'i yo byad ni gri phur dang / mda' bo che dang / sgo mtshams ma la sogs pa dang / sgrub pa'i yo byad ni rnal 'byor du 'dus pa rnams ni/ ting nge 'dzin gcig tu gyur pa'am/ ma gyur ba'ang rung ste/ mnyam par 'jog nus pa rnams te/de dag gis ni dkyil 'khor brgyan par byas pa'i rim pa'o/ /de nas rdo rje slob dpon gyis rdo rje dang dril bu 'dzin cing / 'bar ba'i lta ba dang bcas pas dkyil 'khor la bskor ba bya zhing / nor ba rnams bcos par bya'o/ /srung ba'i 'khor los byin gyis brlab par rig par bya'o//de nas lho'i sgor stan la 'dug nas/ sems mnyam par bzhag pas/ cho ga ji lta ba bzhin du dam tshig sems dpa'i 'khor lor sprul la/ bar snang la gnas pa de yang 'bar ba'i lta ba dang / yi ge ja'i sbyor bas/ shrI badzra b+hai ra ba ma hA maN+Dal A be sha ya a a zhes pas gnyis su med par gyur par mthong nas/skye mched drug dang / sku gsung thugs rdo rje'i rang bzhin du sgrub ste/ de nas ye shes kyi 'khor lo spyan drang zhing / dbyer med par gyur ba'i tshe na/ sangs rgyas thams cad kyis dbang bskur bar rig par bya'o/ /de nas blo ldan slob ma gang / /dkyil 'khor mngon du gyur 'dod pas//mchod pa kun gyi mchog gyur pa'i/ /bla ma mchod la brtson bya ste/ /dad pas rang dang longs spyod bcas/ /ji ltar 'byor zhing yid 'thad kun/ /rje btsun zhabs la btud de 'bul/ /de nas snying po byang chub bar/ /zhabs kyi pad+ma la btud cing / /theg mchog bsrung bar bskul 'debs shing //'gro ba'i mun sel sgron me spro/ /de nas rdo rje slob dpon des/ /rang rig pa'i rgyal por nges par mthong nas/ skye mched drug dang lus ngag yid rdo rjer byin gyis rlob cing / ye shes kyi 'khor lor byin gyis brlabs te/ dbang bskur bar 'dod pas/ bsang gtor sngon du 'gro bas/mchod yon dang sku khrus gsol te/ bdug spos la sogs pa'i mchod pa'i bye brag du ma dang / 'dod pa'i yon tan lnga dang / sbyang ba dang / sbar zhing rtogs par bya ba'i bdud rtsi'i ros ni sangs rgyas thams cad la yang dag par mchod nas/ de bzhin du 'jig rten pa dag la yang rgya che bar mchod par byas nas/de dag sgyu ma'i rnam par shes par 'gyur ba dang / rang gi rtog pa las ji skad du gsungs pa ltar du zhi ba dang rgyas pa'i sbyin sreg gis kyang don thams cad sgrub par gsungs so/ /de nas slob ma dbang bskur phyir/ /'khor los sgyur rgyal sbyor bas 'jug /bdag nyid gnang ba thob gyur nas/ / gzhan don mchog 'gyur the tshom med/ /de nas yang slob mas dbang bskur ba'i don du/ slob dpon la gsol ba gdab ste/ kun mkhyen ye shes phung po can/ /srid pa'i 'khor lo rnam sbyong ba'i/ /ji ltar bshad pa'i rin chen ltar/ /gtso bos bdag la bka' drin stsol/ /khyod zhabs pad+ma spangs nas ni//mgon po gzhan la skyabs ma mchis/ /'gro ba'i mgon po thub chen gyis/ /blo mchog bdag la gnang bar mdzod/ /de nas yang phyogs bzhi nas gsol ba gdab pa ni/ de bzhin gshegs pa kun zhi ba/ /de bzhin gshegs pa kun gyi gnas/ /chos kun bdag med pa yi mchog /dkyil 'khor dam pa bshad du gsol/ /mtshan rnams thams cad yang dag rdzogs/ /mtshan min thams cad yang dag spangs/ /kun du bzang po sku yi mchog /dkyil 'khor dam pa zhi ba chos mchog yang dag 'byung / /ye shes spyod pa rnam sbyong ba/ /kun du bzang po gsung gi mchog /dkyil 'khor sems can kun gyi sems chen po/ /rang bzhin dag pa dri ma med/ /kun bzang thugs mchog kha los sgyur/ /dkyil 'khor de nas rigs lnga'i sdom pa dang / dam tshig rnams dbog cing / de dag gi sngon du rgyun bshags la sogs pas legs par sbyangs na/ slob dpon yol ba'i nang du gnas la/ las kyi rdo rjes phyi rol du las thams cad pa'i bum pa des ci rigs su bkru zhing / gos dmar pos gdong pa g.yogs te/ rnam par snang mdzad du bskyed de/ a khaM bI ra hUM/ zhes me tog gi phreng ba snyim par gtad la/ rdo rje nas 'dzin du bcug ste/ bslab bya dang bcas pa yol ba'i rtsar phyin pa dang /zhal bzhi pa dang / ta kr-i ta bzhi'i sngags dang bcas pas/ bgegs kyi tshogs kun bskrad de/ khyod ni gang zhig ci la dga'/ /zhes bsgo ba dang dad pas legs par bsgrubs pa ste/ skal ba bzang la bdag dga' 'o/ /zhes smra bar gyur pa dang /de la byang chub mchog tu sems bskyed par bya ste/ yol ba'i nang du 'ong ba na/ bo d+hi tsit+ta ut+pA da yA mi/ zhes brjod do/ /de'i snying gar rdo rje dang bdud rtsir bcas pas rgyas btab ste/ de ring khyod la de bzhin gshegs pa thams cad kyis byin gyis brlab par 'gyur te/ de bzhin gshegs pa thams cad kyi gsang ba dam pa de kho na nyid kyi gnas chen po 'di ni/phyin ci ma log par bstan par bya ste/ gang dag khyod kyi dkyil 'khor du ma zhugs pa rnams la smra bar mi bya ste/ dad pa chung ba dag dang / yongs su ma smin pa rnams la smra bar mi rigs so/ /gal te bag med par smras na mgo 'gas par 'gyur ro//de nas yi ge gsum gyis gnas gsum du byin gyis brlab cing / rdo rje dang bcas pa'i bdud rtsi'i thig le bya zhing / nyi zla kha sbyar re re bkod par bsgoms nas/ de nas yang 'di skad du bsgo ste/ deng nas khyod de bzhin gshegs pa thams cad kyi rigs su chud pa yin par shes par byos shig /de lta bas na/ ngas khyod la ye shes chen po'i rdo rje nges par bskyed par bya'o/ /ye shes gang gis khyod la de bzhin gshegs pa thams cad kyi dngos grub kyang 'grub par 'gyur te dngos grub gzhan lta ci smos/ 'di dag ni dkyil 'khor chen po ma mthong ba dag gi drung du brjod par mi bya ste/dam tshig nyams par gyur ta re'o/ /rdo rje sems dpa' 'ang deng khyod kyis/ /snying la yang dag gnas par byas/ /gal te tshul 'di smras gyur na/ /de ma thag tu dral te gshegs/ /oM badzra sa twa hUM/ de nas pad+ma'i snod du bsgrubs pa'i 'chi med de las rdo rje blangs te/ de'i lce la bzhag ste/'di ni rdo rje'i bdud rtsi'i chu/ /dam tshig 'das na sreg par byed/ /dam tshig bsrungs na dngos grub kun/ /rdo rje bdud rtsi'i chu 'dis 'grub/ /oM badzra a mr-i ta u da ka ThaHde ring phan chad khyod kyi phyag na rdo rje nga yin pas ngas ji ltar bsgo ba'i dge ba'i las rnams khyod kyis bya dgos pas/ nga la brnyas par 'gyur ba'i las dag ma byed cig /ji ltar du mi bde ba dag ma spangs par tshe'i dus byas nas/ sems can dmyal bar gyur ta re'o/ /de nas yang slob mas 'di skad du gsol ba gdab par bya ste/ bdag ni de nas bzung nas de bzhin gshegs pa thams cad kyis byin gyis brlabs nas/ rdo rje sems dpa' bdag la 'bab par gyur cig /ces brjod la/ byin rlabs rgyud ldan bla mas ni/ /rdo rje'i slob ma byin brlab phyir/ /slob ma'i lus dang rten 'brel rdzas/ /thugs kyi byin rlabs dkyil 'khor gyis/ /gsung gi rdo rje'i rnal 'byor des/ /sems ni byin gyis brlabs tsam gyis/ /g.yo zhing rtogs thob gang yin pa//stobs su gyur phyir kun gyis kyang / /rol mo'i sgrar bcas rtogs pa bskyed/ /brtan pa'i cho ga ci rigs spyad/ /de las shes pa brtan gyur nas/ /kha dog la sogs snang ba bri'o/ /de nas las kyi rdo rje dang bcas pas bstod pa'i tshigs su bcad pa dang / dkyil 'khor chen po la bskor ba byas nas/nub kyi sgo nas shar du blta bas/ me tog gi phreng ba de dkyil 'khor chen por dor bar bya ste/ ma hA pU dz+ya pra tIts+tsha badzra ho zhes brjod de/ slar yang blangs te/ gtsug phud du bcings la/ pra ti gr-ih+Na badzra hoHgang la bab pa'i lha de nyid yi dam lha ru bskyed cing dbog go/ /de nas mig gnyis oM du bsam//'od 'phros khams gsum dag par mthong / /rdo rje sems dpa' deng khyod kyi/ /mig 'byed pa la brtson par bya/ /rdo rje'i mig ni bla na med/ /ye shes mchog tu gsal bar byed/ /he badzra pA sha/ /gdong g.yogs bkrol te/ oM badzra tsak+Shu ma hA maN+Dal pra be sha ya phaT/ chos rnams gzugs brnyan lta bu'i dngos//dag cing gsal la ma rnyogs par/ /gang rtog zhing khams rnam dag mchog /bla na med pa'i gnas mchog yin/ /rdo rje thugs rje'i rgyun gnas pas/ /sprul pa'i dkyil 'khor rgyun mi 'chad/ /bden pa'i byin gyi rlabs kyis mthong / /phun sum tshogs kun 'dis 'grub 'gyur//dngos grub sgrub phyir dam tshig skyongs/ /gsang sngags don la brtson par gyis/ /shar sogs sgo bzhi nas brtsams te/ /ji srid gtso tshogs rim par bstan/ /der rjes rnal 'byor thams cad kyis/ /mgrin gcig tu ni bsngags pa yis/ /bkra shis glu dbyangs du mar bcas//bum pa blangs te dbang bskur bya'o/ /ji ltar bltams pa'i dus kyi tshe/ /lha rnams kun gyis dbang bskur ltar/ /de ltar de bzhin gshegs kun gyis/ /rigs kyi bu khyod dbang bskur bya'o/ /oM sarba ta thA ga ta a b+hi She ka ta shrI sa ma ye hUM/ a khaM bI ra hUM/ zhes pa cho ga gsum las rigs lnga'i skur gsal bas/ snga ma bzhin du dbang bskur bya ste/ sangs rgyas kun dngos cod pan dbang / /rdzogs sangs rgyas nyid rab bsgrub phyir/ /cod pan mchog gi dbang bskur bas/ /'khor los sgyur rgyal mgon dbang bskur/ /oM lAM mAM pAM tAM hUM/rat+na mu ku Ta a b+hi Shiny+tsa hUM/ rdo rje 'di ni rdo rje che/ /sangs rgyas kun gyi byin gyis brlabs/ /sangs rgyas kun du rab bsgrub phyir/ /rdo rje mchog gis dbang bskur bya'o/ /oM sarba ta thA ga ta ma hA shU n+ya tA dz+nyA na badzra a b+hi Shiny+tsa mi/ chos kyi dril bu bla med don/ /stong nyid ye shes sgra sgrogs pa'i/ /thams cad stong nyid don ston pa'i//dril bu'i dbang bskur bla na med/ /oM sarba ta thA ga ta shap+ta pa ta le d+harma d+hA tu a b+hi She ka ta shrI sa ma ye hUM/ de nas rtag pa chen po'i don/ /mnyam nyid bde ba chen po'i skur/ /rdo rje'i rgyal po byin gyis brlabs/ /nges par ma yengs rgyun du bsgoms/ /oM badzra a d+hi pa ti s+t+waM/oM badzra a b+hi Shiny+tsa maM/ tiSh+Tha badzra sa ma ya hUM/ oM badzra satwa s+t+waM/ badzra a b+hi She ka ta shrIs ma ya hUM/ lhag pa'i lha ni gang gang gi/ /de dang de yi mtshon byed brda/ /shrI yi sgra yis mdzes byas ming / /ma 'ongs zhing du lung ston 'gyur/ /brtul zhugs dbugs phyung lung bstan pas/ / cho ga'i rjes 'gror gsungs pa ste/ /brtul zhugs sku gsung thugs yin te/ /phyag rgya gsum gyi thugs rgyas gdab/ /phyag rgya chen por gang gyur pa/ /rdo rje dril bu byin rlabs gtad/ /oM sarba ta thA ga ta sid+d+hi badzra tiSh+Tha e Sha s+t+waM d+ha ra ya mi hi hi hi hi ho hUM oM/ thog mtha' med pa'i sems dpa' ni//rdo rje sems dpa' dga' ba che/ /kun du bzang po kun bdag nyid/ /rdo rje bdag snyems bdag mdzod cig /hoHchos kyi dril bu gzung bar bya'o/ /'di de sangs rgyas thams cad kyi/ /shes rab dbyangs kyi rjes 'gro ba'i/ /rtag tu khyod kyis gzung bya ste/ /byang chub mchog tu rgyal bas gsungs//chos kyi dril bu dkrol bar bya'o/ /srid pa rang bzhin gyis dag phyir/ /ngo bo nyid kyis srid bral byas/ /rang bzhin dag pa'i sems dpa' mchog /srid pa mchog tu sgrub par byed/ /'khor ba'i bde ba shin tu chung / /duHkha chen po dag bya'i phyir/ /mchog tu bde ba dam pa'i thabs//dam tshig 'di dag rtag tu skyongs/ /'dod pa'i longs spyod thams cad la/ /ji ltar bde ba brten bzhin du/ /rang gi lha yi sbyor ba yis/ /bdag dang gzhan la mchod par bya'o/ /ji srid 'khor ba'i gnas mchog tu/ /thabs mkhas mchog chen bzhugs pa'i tshe/ / de srid mtshungs med sems can don/ /mya ngan mi 'da' byed par nus/ /shes rab pha rol phyin mchog thabs/ /bsod nams byin rlabs kyis bsgrubs pa'i/ /dam tshig 'di dag rtag tu bsrungs/ /dngos grub thams cad phun sum tshogs/ /phyag rgya chen po'i brtul zhugs mchog /sangs rgyas kun gyi gnang ba sbyin//de nas bdud dpung 'joms byed mchog /'bar ba chen po'i sku dbang bskur/ /gri gug la sogs phyag mtshan bsnams/ /yi ge bcu pa'i gsang sngags mchog /mngon par bzlas shing rim gyis gtad/ /stod g.yogs smad g.yogs dag la yang / /nye ba'i snying pos byin brlabs la//theg chen don ldan dbang bskur te/ /sbrul sogs thod pa'i phreng ba la/ /phreng ba'i sngags kyis byin brlabs la/ /longs spyod rdzogs skur dbang bskur ro/ /gsung gi brtul zhugs brtan pa ni/ /gsang sngags sgrub dang nyan pa dang / /dam tshig rjes gnang mchod pa gnang //las bzhi grub chen brgyad sgrub gnang / /cho ga ji bzhin rgyas par gtad/ /de nas rdo rje slob dpon mchog /'khor los sgyur bar dbang bskur te/ /pad+ma'am seng ge'i khri steng du/ /rgyal por dbang bskur don phyir gzhag /steng nas rin chen gdugs dkar dbub/ /des kyang ji bzhin gsol ba gdab//byang chub rdo rje sangs rgyas la/ /ji ltar mchod chen gsol btab ltar/ /bdag kyang nges par grol ba'i phyir/ /nam mkha'i rdo rje deng bdag stsol/ /de yi rjes la rnal 'byor ba'i/ /tshogs kyi sngags bcas bkra shis dang / /bum pa la sogs kyis dbang bskur/ /khyad par du yang rdo rje'i ming //kun gyi bkra shis brjod nas ni/ /dbang rnams ji lta bar yang bskur/ /kun gyis tshig tu rjod byed pa/ /oM nam mkha' las byung mtshan ldan phyir/ /thog ma tha ma med pa'i mchog /rdo rje sems dpa' che rang bzhin/ /sems dpa'i mchog tu deng grub mdzod/ /kun mchog dngos grub chen po ste//dbang phyug chen po lhag pa'i lha/ /rdo rje 'dzin pa kun gyi rgyal/ /mi 'gyur mchog tu grub par mdzod/ /nyes pa mi mnga' rtag pa khyod/ /'dod chags kun gyi rjes chags pa/ /'dod chags chen po dga' ba che/ /bcom ldan de nyid grub par mdzod/ / shin tu dag pa kun gyi mchog /gdod nas grol ba de bzhin gshegs/ /kun du bzang po kun bdag nyid/ /byang chub mchog tu bdag grub mdzod/ /dngos grub chen po kun gyi mchog /rgyal ba bdag nyid che rang bzhin/ /grub pa'i rdo rje cher bstod pa/ /rdo rje snyems tshul bdag mdzod cig/ / de nas gzhal yas khang pa dang / /lha yi mtshan nyid rnam dag lam/ /mya ngan 'das dang 'khor ba'i dngos/ /ma bcos don dam rang bzhin mchog /skal bzang de la gsal bar bstan/ /dam tshig mchog tu grub par byed/ /de nas dben zhing bder gnas pas/ /tshogs kyi mchod pa la sogs kun//nye bar sta gon gnas byas te/ /rang bzhin dag cing sbyangs pas mdzes/ /chos kun mtshan nyid bshad pa des/ /nam gyi gung la mnyam sbyar nas/ /sangs rgyas kun gyis byin brlabs pa'i/ /dri med bdud rtsir byin brlabs pa'i/ /lce yi pad steng rdo rje'i rtser/ /bde ba chen po'i snying por sbyin//ngag gi sgrar bcas dam tshig bsgrags/ /de nas rigs dang rgyud sbyangs la/ /brda dang gar la sogs pa yis/ /nam phyed dus su bum dbang bskur/ /phyi rol sbyor ba dag pa dang / /rtsa gnas rlung gi sbyor ba mkhas/ /bde ba che la lhag par dang / /de la sgyu ma'i dkyil 'khor du//ye shes rtogs phyir dbang bskur mchog /bag yangs nyam nga blos thongs tshe/ /skad cig skad cig dbyer med par/ /bde ba chen po'i bdag nyid sad/ /ma ning mkhan po sgra mkhan dang / /tshad ma rtog ge'i spyod yul min/ /dgag cing sgrub las 'das pas na/ /brjod bral lhan cig skyes dgar gsungs//'di dag bde bar skyong byed rnams/ /bslab bzhi 'dul sgom dam tshig kun/ /nges par bsrung phyir sems bdag nyid/ /byang chub mchog tu rgyal ba bzhed/ /dkon mchog gsum gyi dgra bsad cing / /'dod la nges par chags phyir spyad/ / gzhan gyi longs spyod bag med blangs/ /dngos grub brdzun sogs sgyu mar smra/ /tshogs drug bde chen longs spyod spyad/ /grub pa lnga dang lcags kyu lnga/ /longs spyod lnga sogs rgyun du spyad/ /rtag tu sems las dngos grub bsgrubs/ /dus gsum rtag pa'i sku ru gnas/ /de ltar de bzhin gshegs gyur nas//sangs rgyas sras su lung bstan te/ /bu la ston pa'i phyag mtshan bskon/ /g.yas pa skyabs sbyin g.yon mnyam gzhag/ /sems can don sgrub tshul du langs/ /de la mgrin cig tshig 'di brjod/ /oM ngas khyod 'di ltar lung bstan te/ /srid pa'i ngan 'gro rnams las bton//srid pa mchog tu bsgrub pa'i phyir/ /rdo rje sems dpa' de bzhin gshegs/ /oM ya mAn+ta kr-ita hUM maM b+hur b+hu wa swaH/ de nas dbugs dbyung sbyin bya ste/ /de ring khyod bdag legs par rnyed/ /mi yi srid pa don dang bcas/ /sangs rgyas kun gyi rigs su skyes/ / sems nyid rang byung ba yi gter/ /phun sum tshogs pa'i nye ba gnas/ /gsang sngags mnyam med sems las grub/ /zag pa med pa'i dkyil 'khor che/ /mthong ba'am ni zhugs gyur pas/ /sdig pa kun las rnam par grol/ /byang chub sems mchog rmad byung rnyed/ /'gro ba kun gyi skyabs gnas mchog /bdud bzhi 'joms shing duHkha yi/ /skye rga na 'chi 'jig par byed/ /srid pa'i ngo bo nyid dag pa'i/ /phyag na rdo rje deng gyur to/ /de nas de'i sems kyi mtshan nyid bstan par bya ste/ byang chub chen po'i rgyur gnas pa'i/ /mdor na phung po lnga rnams ni/ /sangs rgyas lngar ni rab tu grags//skye mched khams rnams mang po kun/ /lha dang lha mo'i dkyil 'khor mchog /ye nas rang byung ye shes che'o/ /bdag nyid chen po rtag pa'i lha/ /ma bsgrubs rdo rje sems dpar gnas/ /de nas blo ldan slob ma yis/ /bdag nyid mchog tu gyur shes nas/ / bla ma la ni 'byor pa'i mchog /ci nus dad pas dbul bar bya'o/ /de nas tshogs kyis mchod pa dang / /zhi ba'i sbyin sreg brgya'am stong / /'byung po kun la gtor mas mchod/ /skye bo gzhan yang mgu bya yi/ /longs spyod ci rigs mkhas pas sbyin/ /de nas bzod gsol bshags pa dang //ye shes dkyil 'khor gshegs su gsol/ /rdul tshon mtshan ma kun bsdus te/ /bsngo bdag byas chu bor dor/ /bla ma mnyes byas ci rigs gshegs/ /mthar ni dam tshig mchog gis bstan/ /bdag gzhan don rnams rab bsgrub phyir/ /rtag tu bde ba'i mchog gnas pas//rang gi dam tshig bsrung bar gyis/ /dpal rdo rje 'jigs byed kyi dam tshig sgrub par byed pa'i cho ga /dngos grub mnyes pa'i slob dpon chen po dpal la li ta badzra'i zhal snga nas mdzad pa rdzogs so// //grub pa brnyes pa'i paN+Di ta chen po a mo g+ha badzra dang / /