CLOSE WINDOW

D1983
བོད་ཡིག

bod kyi lo tsA ba rong zom chos kyi bzang pos bsgyur cing / slar yang phyug mtshams dbang phyug rgyal pos bsgyur cing gtan la yang dag par phab pa'o/ /[ ]@##/ /rgya gar skad du/ maN+Dal bi d+hiH/ bod skad du/ dkyil 'khor gyi cho ga /dpal gshin rje gshed po la phyag 'tshal lo//dad pa dang ldan pa/ dam tshig dang rang gi brtul zhugs bsrung ba/ rnam par rtog pa med cing rgyud gcig pa/ bla ma dang rdo rje 'jigs byed la mos pa'i yon tan dang ldan pa'i slob mas/ dang por dkyil 'khor dang tshogs kyi mchod pa chen po byas nas/ bla ma la gsol ba gdab par bya'o//de nas bla ma khro ba med pa/ sngags dang rgyud la mkhas pa/ thos pa'i pha rol tu son pa/ rgyud 'dir dbang thob pa/ dam tshig dang / sdom pa la gnas pa des/ dkyil 'khor gyi lha rnams bskyed pa dang / mnyes pa la thug pa byas nas yi ge bcu pa'i snying po 'bum phrag gcig tu bzlas pa bya ste/dang po'i bsnyen pa'o/ /de nas rgyud las/ dur khrod chu bo'i 'gram dag dang / /shing gcig drung dang mtshan ma gcig /lam gyi bzhi mdo'i ri bo'i steng / /khang stong dang ni ma mo'i gnas/ /lha gnas 'thab mo'i gnas dag dang / /grong 'dab dang ni nags kyi khrod/ / ces gsungs pa'i gnas gang yang rung bar song nas bdud rtsi 'khyil ba'i sngags bzlas pa'i chus gtor te/ der dkyil 'khor gyi lha rnams bsam par byas nas mchod pa dang gtor ma bya ste/ sa'i lha mo la bslang ba ni/ skyob pa sangs rgyas thams cad kyi/ /spyod pa'i tshul dang khyad par dang //sa dang pha rol phyin pa la/ /lha mo khyod ni dpang du gyur/ /skyob pa shAkya seng ge yis/ /ji ltar bdud kyi tshogs bcom pa/ /de ltar bdag gis bdud bcom nas/ /bdag ni dkyil 'khor 'dri bar byed/ /ces brjod nas thal mo sa la brdab pas/ sa'i lha mo sku phyed tsam sa las 'thon pa dang /sems can gyi don du dkyil 'khor byed pas bdag las byin cig ces brjod pa las/ khyod dkyil 'khor gyi bdag po yin pas/ dkyil 'khor gyis shig ces brjod nas/ slar yang sa la thim par bsam mo/ /sa blang pa'i rim pa'o// //de nas bdud rtsi 'khyil ba'i rnal 'byor du byas te/sa'i lha mo nam mkhar gshegs par bsams la sa brko ste/ sa'i ro lnga bsal la/ der rin po che lnga dang 'bru lnga dang ldan pa'i bum pa bcug la rang gi sas dgang ngo / /de nas dkyil 'khor gyi sa nyis 'gyur du spos kyis chag chag dang / ba'i rnam lngas byug par bya'o//de nas rdo rje slob dpon gyis dkyil 'khor gyi dbus su 'dug nas/ stong pa nyid sngon du 'gro ba'i lha'i nga rgyal byas te/ sa gzhi thams cad stong pa'i rang bzhin las/ hUM las rdo rje'i sa gzhir bsgoms nas de'i dbus su rang gi lhag pa'i lha'i nga rgyal du gnas par byas la/slob ma lha'i nga rgyal can dag gis dkyil 'khor bri bar gsol ba gdab par byas nas/ rdo rje slob dpon gyis mig tu ma las grub pa'i nyi ma 'bar ba dang / a las grub pa'i zla ba 'od zer dang ldan pa bsam/ rkang pa'i 'og tu hUM las rdo rje rgya gram 'od 'bar ba bsgoms nas/langs te byang shar gyi mtshams nas bskor ba byas te rdo rje'i lta ba dang / rdo rje'i 'gros kyis bgegs gzhom par bya'o/ /de nas yang dkyil 'khor gyi dbus su 'dug nas/ gshin rje gshed kyi nga rgyal du byas te/ de'i snying gar gnas pa'i sa bon las byung ba'i khro bo'i phur pa bskyed nas bdag gis ske nas bzung bas phyogs bcu'i bgegs dag la gdab par bya'o//oM g+ha g+ha g+hA ta ya g+hA ta ya/ sarba du Sh+TAn phaT phaT/ kI la ya kI la ya sarba pA paM phaT phaT/ hUM hUM hUM badzra kI la ya/ badzra d+ha rod A dz+nyA pa ya ti/ kA ya wA ka tsit+ta badzra kI la ya hUM phaT/ ces bdud rtsi 'khyil ba'i sngags kyis gdab par bya'o//sa bzung ba'i rim pa'o// //de nas dkyil 'khor gyi dbus su/ khru gang ba'i dkyil 'khor zlum por byas nas/ /lha'i grangs dang mnyam pa'i thig le dri dang ldan par bya ste/ me tog re dbus su bzhag pa gdan du dbul bar byas nas/'khor lo'i rang bzhin bskyed pa dang / dang po bsnyen pa'i dus na spyan drangs pa'i lha rnams mdun gyi nam mkha' la bzhugs pa rnams der spyan drangs te/ mchod pa dang bstod pa byas te/ mkhyen par gsol ba ni/ bcom ldan 'jam dpal rdo rje ni/ /rig sngags bdag po phyag 'tshal bstod//snying rje yid kyis dkyil 'khor bri/ /de phyir byin rlabs gnang bar mdzod/ /dgongs shig sangs rgyas sde dang tshogs/ gang gzhan sngags kyi lha tshogs dang / /lha rnams bstan la mngon dga' ba'i/ /dkyil 'khor byin rlabs dngos grub mdzod/ /ces lan gsum brjod de lha gnas pa'i rim pa'o//de nas dngul lam gser gyi bum pa kha dog dkar por bsgyur ba lha'i grangs dang mnyam pa ste dgu dang / las byed pa dang bcu po de dag tshang bar byas la/ dgu la sna tshogs pad+ma'i steng du rang gi mtshan ma bri bar bya'o/ /las byed pa'i bum par pad+ma'i lha la sna tshogs rdo rje bri bar bya'o//gtso bo'i bum par 'bru lnga dang / rin po che sna lnga dang / sman lnga dang / dri chab bzang pos dgang bar bya'o/ /gzhan dag tu yang dri'i chus dgang bar bya'o/ /mgul chings nyis rim bya'o/ /shing bzang po'i lo mas kha rgyan bya'o/ /de nas gtso bo'i bum par pad+ma'i steng du cho ga gsum pa las gtso bo'i sku bskyed/phyag rgya bzhi dang ldan par bya/ ye shes kyi gtso bo bkug la gzhug /mchod pa dang bstod pa bzlas pa bya/ de nas snying ga'i sa bon las byung ba'i 'od zer gyis bkug pa'i sangs rgyas dang bcas pa bdud rtsi chu'i rang bzhin du zhu bar bya'o//de nas bum pa gzhan du yang de bzhin du bskyed pa dang / gzhug pa dang / mchod pa dang / zhu bar byas te gzhag go/ /las byed pa'i bum par pad+ma'i steng du bskyed pa'i las thams cad pa'i khro bo bskyed pa dang / gzhug pa dang / mchod pa yan chad byas nas bzlas pa byas la zhu bar mi bya ste/de nas bum pa de dag rang gi khang par sba bar bya ste/ bum pa gnas pa'i rim pa'o// //de nas slob ma shar ngos su maN+Dal bya ste/ der 'dug nas/ rdo rje slob dpon gyi gtso bo'i nga rgyal byas pa la gsol ba gdab pa/ ston pa khyod la bdag dga'o//slob dpon khyod ni dgongs su gsol/ /byang chub chen po'i tshul chen ni/ /mgon po chen po bdag 'tshal lo/ /de nyid dam tshig rim pa dang / /byang chub sems kyang bdag la stsol/ /gsum la skyabs su 'gro ba stsol/ /thar pa chen po'i grong khyer du/ /mgon pos bdag ni gzhug par mdzod//ces gsol ba gdab bo/ /de nas rdo rje slob dpon gyis slob ma'i lag pa nas bzung ste/ bu gcig 'dir shog theg chen gyi/ /cho ga sngags kyi spyod pa'i tshul/ /khyod la yang dag bstan par bya/ /khyod kyis tshul chen rnyed par gyis/ /dus gsum sangs rgyas 'byung ba ni//sku gsung thugs kyi rdo rje can/ /dpag med ye shes thob pa ni/ /rdo rje gsang sngags smos pa ni/ /gang zhig mnyam med sngags sbyor bas/ /shAkya seng ge skyob pa yis/ /drag po bdud kyi sde bcom nas/ /'jig rten mthun par chos kyi ni/ / 'khor lo bskor nas mya ngan 'das/ /de phyir blo ldan bu khyod kyis/ /thams cad mkhyen pa'i don thob gyis/ /zhes brjod do/ /de nas bya ba'i rgyud la sogs pa dang thun mong gi sdom pa dang / rnal 'byor gyi rgyud bla na med pa'i phas pham pa bcu bzhi dang / sdom pa sbom po drug la sogs pa dag kyang dgod par bya'o//de nas slob ma'i gnas gsum dri'i thig le re re byas te/ rdo rje dang / 'khor lo dang / pad+ma dag bskyed la/ de dag gi lte bar sa bon gsum bsam zhing / oM AHhUM zhes pas gnas gsum du rdo rje gzhag par bya'o/ /de nas so shing me tog gi phreng ba can bdud rtsi 'khyil ba'i sngags kyis btab pa sbyin par byas nas/slob mas rang gi so'i rtsa ba dag brud nas/ dkyil 'khor gyi steng du dor te/ zhi ba la sogs pa'i las dang dngos grub kyi rtags dag shes par bya'o/ /srung skud la bdud rtsi 'khyil ba'i sngags kyis mdud pa bor te/ dpung pa g.yon par gdags par bya'o//de nas ku sha las thams cad pa'i sngags kyis btab pa byin la sngas su byas/ shar lho'i mtshams su mgo bstan zhing nyal/ rmi lam gyi ltas brtag par bya'o/ /slob ma gnas pa'i rim pa'o// //de nas nang par sngar spyan drangs pa'i sngags kyis de bzhin gshegs pa rnams mdun gyi nam mkha' la gshegs su gsol nas thig gi las bya ste/tshon sna lnga'i skud pas so sor bskal pa la/ stong pa nyid sngon du 'gro bas yi ge lnga las byung bar bsam/ de nas de dag gcig tu bsgril la dri dang bdud rtsi lnga blugs/ g.yas g.yon dang dbus su/oM AHhUM rim par bkod de/ dam tshig gi skud pa'i rim pa'o// //de nas mdun gyi nam mkha' la bzhugs pa'i rigs lnga'i thugs gnas ye shes kyi skud pa 'od du 'bar ba bsams te/ rang gi mig gnyis su nyi ma bsams la de'i steng du dzaHdmar po bsam/ de nas mig gi rdzi ma lheb lheb byed pas ye shes kyi skud pa dzaHsa drangs nas dam tshig gi skud par gzhug /de nas mchod pa lnga dbul lo/ /ye shes kyi skud pa'i rim pa'o// //de nas mchod pa dang gtor ma byas te/ bskul ba dang bcas te bsgril bar bya'o/ /de nas rdo rje slob dpon nub tu 'dug nas/rdo rje khu tshur g.yon pas bzung la/ gtso bor bsgoms pa'i lte bar khu tshur bzhag la/ dza dza dza gsum gyis slob ma'i lag mthil du g.yas pas drangs te byin la tshangs thig dang po gdab/ oM badzra sa ma ya sU tra ma ti kra ma hUM/ zhes gyen du btab pa'i sgras de bzhin gshegs pa dag 'gro ba'i don gyi dus la bab par bskul/de nas tshangs thig gnyis pa yang de bzhin du gdab par bya'o/ /de nas kha dog gcig pa'i skud pa las thams cad par byin gyis brlabs pas sa'i thig btab la/ thig de'i steng du ye shes lnga'i thig btab la/ snga ma'i thig byin gyis brlab par bya'o//de nas ye shes kyi thig la mchod pa byas slar yang gshegs su gsol lo/ /de nas las kyi thig ni/ dang por sa la tshangs thig dang po btab la/ der bya rog rjes gnyis bri'o/ /de nas gnyis pa btab ste/ zur bzhir bya rog rjes bri ste/ dang por kun gyi thig shar du gdab/ de nas nub/ de nas byang / de nas lhor gdab bo//de nas me dang rlung gi grwar/ de nas bden bral dang dbang ldan gyi grwar gdab bo/ /de nas shar gyi tshangs pa'i thig nas lhor tshangs pa'i thig gi snar gdab bo/ /de nas de bzhin du lho nas nub tu/ de nas yang byang / byang nas kyang shar gyi tshangs thig tu gdab bo/ /de nas nang gi bya rjes bzhir thig bzhag nas/nang gi ngos bzhir btab pas ni pho brang dang / sgo dang / rta babs kyi snam bur gsal bar 'gyur ro/ /de nas snam bu bzhi po de re re la snam bu bzhi bzhir bgos te/ cha chen po bcu drug tu bya'o/ /de re re la yang cha chung bzhi bzhir bgo bar bya'o/ / thig de dag gi cha rnam par bgos te/ dbus kyi pho brang zlum po dang grwa dang sgo la sogs pa kun char bgo bar bya ste/ thig gi rim pa'o// //de nas tshon sna lnga rim par bzhag ste/ stong pa nyid sngon du 'gro bas yi ge lnga las bskyed de/ dri dang bdud rtsis bsang / de nas snga ma bzhin du ye shes kyi tshon mig gi tshon la bstim ste/oM badzra tsi tra sa ma ya s+t+waM/ zhes bzlas/ de nas byang shar mtshams su dkar ba dang nang nas drangs te mdzub gang bla ma'i lag pa g.yon pas bris la chos kyi dbyings de dag pas na/ sems can khams ni rab sgrol byed/ /rgyal ba 'jam dpal rdo rje nyid//de bzhin gshegs pa kun gyi gnas/ /zhes brjod nas zangs gzhong la sogs pas dgab par bya'o/ /de nas dbus nas bri bar bya ste/ rgyud nyid las ji skad gsungs pa ni/ nam phyed kyi ni dus dag tu/ /ma he'i gdong gi sbyor ldan pas/ /gcer bu skra ni lhug par byas/ / dur khrod sol ba la sogs pas/ /dkyil 'khor dag ni bri bar bya/ /gru bzhi pa dang sgo bzhi pa/ /rta babs bzhi dang yang dag ldan/ /dril bu dang ni 'phan la sogs/ /me tog phreng ba rnams kyis brgyan/ /grwa rnams dang ni sgo khyud dang / /rdo rje rin chen spras pa dang / /de bzhin zla ba phyed pa'o/ / de dbus 'khor lo bri ba ni/ /re mig dgu pa zlum po ste/ /sgo gcig dag tu 'dug nas su/ /gzhan gyi sgo rnams gcad par bya/ /zhes gsungs pa de bzhin du bri bar bya ste/ dbus lte ba zlum po re mig dgu pa/ de'i phyir gru bzhi pa sgo bzhi pa/ rta babs dang bcas pa/ rdo rje'i phreng ba dang / me'i phreng ba dang / pad+ma'i phreng ba bya'o/ /mtshan ma bri bar dgod pa yang de'i dbus su ro bri bar bya'o/ /shar du mgo bo/ lhor lag pa/ nub tu rgyu ma/ byang du rkang pa/ shar gyi grwar ka pA la/ lho'i grwar thod pa'i dum bu/ /nub kyi grwar dur khrod kyi ras/ byang gi grwar mdung gi phug pa'i skyes bu'o//'di dag nang gi mtshan ma ste/ de nas phyi rol phyag rgya dgod/ shar gyi snam bur ni gri gug dang / b+hi ti pA la dang / rtse gsum dang / chu gri dang / gtun shing dang / lcags kyu la sogs pa bri bar bya'o/ /lho'i snam bu la sta re dang / mda' dang / dbyug to dang / kha T+wAM ga dang /'khor lo dang / rdo rje zhags pa la sogs pa bri bar bya'o/ /nub tu ni rdo rje dang / cang te'u dang / phub dang / gzhu dang / dril bu dang / rlung gis bskyod pa'i ras la sogs pa bri bar bya'o/ /byang du ni sdigs mdzub dang / 'phan rtse gsum pa dang / glang po'i pags pa dang / rdo rje'i tho ba dang /mdung dang / me thab la sogs pa bri bar bya'o zhes gsungs pa bzhin bri bar bya'o/ /khyad par du ni sgo bzhi dang / grwa bzhir sna tshogs pad+ma'i steng du gri gug bri bar bya'o/ /dbus su yang ro'i steng du pad+ma'i steng du gri gug bri bar bya'o/ /dkyil 'khor bri ba'i rim pa'o// // de nas bum pa dgod de/ gtso bo'i dbus su bzhag /gzhan dgu las/ las kyi bum pa byang shar du bzhag ste/ khyod kyis bgegs bsrung bar gyis shig ces brjod nas/ big+h+nA ta kr-i ta bzlas so/ /gzhan brgyad ni/ /dang po lha mo bsgom pa de'i sa phyogs sgo dang grwa bzhir gzhag go//de nas mchod rdzas ni mi dang / bong bu dang / rnga mo dang / khyi dang / ce spyang dang / ma he dang / glang po la sogs pa dang / gzhan yang bya rgod dang / 'ug pa dang / khra dang / bya rog dang / chu skyar dang / thing ril dang / rma bya dang / ne tso la sogs pa'i sha las byas pa'i lha bshos brgyad phyogs mtshams su gzhag /tshil chen po'i mar khu'i mar me brgyad kyang de bzhin du gzhag /sgo bzhi dang grwa bzhir khrag sna tshogs pa'i dmar gyi ar+g+ha thod pa brgyad gang ba gzhag par bya'o/ /ma hA maM sa'i d+hU pe dang / me tog gi snod brgyad dag kyang phyogs mtshams su gzhag par bya'o/ /slob ma dkyil 'khor du 'jug pa'i dus na grangs dang mthun pa'i gtor ma dang /gzhan yang lha rnams la dbul ba'i tshogs kyi rdzas dang / bdud rtsi lnga dang / ras zung dang bcas pa yang bzhag ste/ mchod rdzas kyi rim pa'o// //de nas rdo rje slob dpon gyis dkyil 'khor gyi cha rkyen thams cad phun sum tshogs par shes nas/rang gi lha'i rnal 'byor la 'jug par bya ste/ dang po gnod mdzes kyis bgegs bsal ba'i sbyor ba sngon du byas nas de nas bla ma'i mchod pa dang / stong pa nyid dang / bsod nams dang ye shes kyi yan lag bsgom pa dang / 'byung ba rim pa brtsegs dang gzhal yas khang la sogs pa bsgom pa dang /dam tshig gi 'khor lo bskyed pa dang / ye shes kyi 'khor lo spyan drangs pa la mnyes par bya ba dang / mthar snying gar bsdu ba byas nas/ sbyang ba dang / 'bar ba dang / rtogs pas nang du yongs su tshim par byas te/ phyi'i sbyin sreg gis kyang mchod nas/de nas stong pa nyid bsgom pa sngon du 'gro bas slob ma dkyil 'khor du gzhug pa'i phyir rdo rje slob dpon gyis bsgom par bya ste/ ye shes kyi 'khor lo dang 'dres par gyur nas/ bsang gtor dang / mchod pa lnga dang / bdud rtsi lnga dang / ras zung thams cad kyang dbul bar bya'o//mchod pa'i rim pa'o// //de nas slob ma phyi rol du gnas pa de'i drung du bla mas las kyi bum pa khyer te/ big+h+nA ta kr-i ta ces brjod cing phyin te/ de rnam par snang mdzad du byin gyis brlabs nas/ a khaM bI ra hUM/ zhes pas me tog gi phreng ba len du gzhug go/ / de nas dar dmar po ma rmas pas mig dgab par byas la chus gtor ro/ /de nas yol ba'i phyi rol du bkug la dri bar bya ste/ kye de na gnas pa'i de su zhig ces bya'o/ /skal ba bzang po bdag lags so zhes so/ /de nas byang chub tu sems bskyed par byas te/ oM bo d+hi tsit+ta ut+pA da yA mi/zhes brjod nas yol ba'i nang du bkug pa la 'di brjod do/ /dus 'di nyid du khyod nyid ni/ /sangs rgyas rigs su chud pas na/ /nga yis ye shes rdo rje sbyin/ /des na sangs rgyas 'grub par gsungs/ /gang zhig 'di nyid ma mthong ba'i/ /mdun du smra bar ma byed cig /bag med smras na nyams par 'gyur//de bas nan tan gnas par bya'o/ /zhes snying gar rdo rje bzung la smra bar bya'o/ /de nas rdo rje spyi bor bzhag la/ gtam 'di smra bar ma byed cig /gal te gzhan la smras gyur na/ /klad pa tshal ba bdun du 'gas/ /de nas tsan+dan dang / gur kum la sogs pa dang /bdud rtsi lnga bsres pa'i chu lag par byin te/ 'di ni khyod kyi dmyal ba'i chu/ /dam tshig nyams na sreg par byed/ /dam tshig bsrungs na dngos grub thob/ /'thung zhig rdo rje bdud rtsi 'thung / /oM badzra a mr-i ta hUM zhes dam bdar ro/ /de'i rjes la dam tshig thun mong ma yin pa 'di smra bar bya ste/dus 'di nyid nas bu khyod kyi/ rdo rje 'dzin pa nga yin te/ /nga yis ji ltar bka' stsal te/ /khyod kyis skyo ba med par gyis/ /gang yang nga la ma mos min/ /de bzhin mos par ma byas na/ /bdud kyis bcom nas dmyal bar 'gro/ /de bas dam tshig gnas par gyis//mna' chu blud pa'i rim pa'o// //de nas slob ma 'od dpag tu med par bsgom pa la sogs pa'i rim pas gzhan nas bstan pas dbab par bya'o/ /de nas/ ji ltar bsod nams ji bzhin lha'i/ /rigs kyi bye brag 'di la yang / /rigs kyi nang na 'di bzang ngo / / de yi dngos grub 'dir byung nas/ /de yi bsod nams 'dir 'byung ba/ /de 'dra'i dkyil 'khor 'di la'o/ /zhes smras nas/ pra tIts+tsha badzra ho zhes lan gsum brjod de dor ro/ /lha gang la babs pa dang / lus kyi stod smad la sogs pa'i bye brag las dngos grub bzang ngan dag 'byung bar shes par bya ste/me tog ltas kyi rim pa'o/ /de nas/ rdo rje 'dzin pas de ring nyid/ /khyod ni ye shes mig phye ste/ /de bzhin thams cad mthong bar gyis/ /oM dz+nyA tsak+Shu pra be sha phaT/ ces brjod nas rang gsal ba'i sgo nas gtso bo la thug par bstan te/ dkyil 'khor du gzhug pa'i rim pa'o//de nas dkyil 'khor gyi bum pa dag gi chu gcig tu byas te/ des slob ma'i spyi bo nas dbang bskur ba sbyin te/ oM badzra a b+hi Shiny+tsA mi/ zhes spyi bor chu blugs pas/ rigs kyi bdag po mi bskyod pas mgo brgyan par bsam mo/ /de nas dbu rgyan stong pa nyid mngon du byas nas/oM hUM -IM dzrAM khaM lnga las rigs lnga bskyed de/ de bzhin gshegs pa lnga po dag der gzhug par byas nas slob ma'i mgo la bzhag nas/ oM rat+na ku la mu ku Ta a b+hi Shiny+tsA mi/ zhes brjod do/ /dbu rgyan gyi dbang bskur ba'o/ /de nas rdo rje stong pa nyid las paM las 'od dpag tu med par bskyed nas 'od dpag tu med par bcug la/de gyur pa las rdo rjer gyur pas dbang bskur bar bya ste/ oM badzra a b+hi Shi ny+tsA mis lag pa g.yas par rdo rje sbyin no/ /de nas dril bu yang snga ma bzhin/ /a mo g+ha sid+d+hir bskyed pa dang / gzhug pa byas te gyur pas dbang sbyin te/lag pa g.yon par dril bu sbyin par bya ste/ oM badzra a d+hi pa ti a d+hi Shiny+tsA mi zhes bdag po'i dbang sbyin no/ /de nas rdo rje dang dril bu gnyis slob ma'i spyi bor bsnol te bzung la/ ming gi dbang rnam par snang mdzad kyi rang bzhin chos kyi dbyings rnam par dag pa'i rang bzhin bdag nyid sbyin par bya ste/badzra nA ma a b+hi Shiny+tsa/ zhes pas sbyin te/ kye dpal che ge mo zhes lha gang la bab pa'i zhabs kyis mtshan pa'i ming gi dbang sbyin no/ /dbang lnga po 'di ni rigs lnga'i dbang ngo / /de nas slob dpon gyi dbang sbyin par bya ste/ bdag dang gzhan gyi don byed pa ni rdo rje slob dpon gyi dbang yin te/thugs rje'i bdag pos stsal du gsol zhes zhu'o/ /de nas hUM las rdo rjer bsgoms te/ thog ma tha ma med sems dpa'i/ /rdo rje sems dpa' dga' ba che/ /kun du bzang po thugs kyi bdag /rdo rje snying po thugs kyi gtso/ /zhes brjod nas sbyin no/ /de nas a las dril bu bskyed de/'di ni sangs rgyas thams cad kyi/ /shes rab dbyangs kyi rjes 'gror 'dod/ /rtag par khyod kyis bzung ba yin/ /rgyal ba'i byang chub mchod par gyis/ /zhes lag pa g.yon par sbyin no/ /srid pa'i tshig dag brjod de des dkrol lo/ /de nas slob ma yi dam gyi lha'i sku phyag rgya bsgom pa byin te sku'i dbang sbyin no//de nas gzhal yas khang gi rnam par dag pa dang lha'i rnam par dag pa bshad nas/ de nas gnang ba sbyin te/ 'jig rten khams ni ma lus par/ /ji ltar 'dul ba'i 'khor lo bskor/ /zhes so/ /de nas brtul zhugs sbyin par bya ste/ 'di de sangs rgyas thams cad kyi/ /rdo rje sems dpa'i phyag na gnas/ /rtag par khyod kyis gzung bar gyis/ /phyag na rdo rje'i brtul zhugs yin/ /rdo rje byin nas brtul zhugs brtan pa'o/ /de nas slob dpon sangs rgyas kyi skur bskyed de/ bla gos kyi mtha' ma g.yon pas bzung ba'i khu tshur snying gar bzung bas/g.yas pa mchog sbyin du byas la lung bstan par bya ste/ sangs rgyas dang byang chub sems dpa' dang 'phags pa rnams kyis mgrin gcig tu/ rdo rje 'dzin pa lung bstan gyis/ /sngags kyi dngos grub dang bar gyis/ /zhes lung bstan pa sbyin par bya'o/ /de nas skyabs sbyin byas te/'dod chags bral ba lta bu yi/ /khams gsum na yang sdig med de/ /de bas 'dod la chags bral bas/ /khyod kyis nam yang ma byed cig /bde chen theg pa 'di la ni/ /phyi nas shi ba yod med de/ /sdug bsngal srid la mya ngan 'das/ /srid pa brtan du dngos grub 'gyur//rang bdag yongs su dor nas ni/ /dka' thub spyad par mi bya ste/ /ji ltar bde bar bzung nas ni/ /sangs rgyas dngos grub thob par 'gyur/ /de ltar slob dpon dkyil 'khor ni/ /sngags dang rgyud kyi phrin las can/ /sangs rgyas dang ni byang chub sems/ /snying rje'i dbang gis sems can don//khyod kyis dkyil 'khor cho ga dag /brtson par bri dang rgyud la ni/ /nyan dang bsgrub pa dag tu gyis/ /zhes skyabs sbyin no/ /dbang de ltar rdzogs nas/ dkyil 'khor dang / slob dpon la sgra dang / rol mo'i bye brag gis bskor ba dang / mchod pa byas nas/dkyil 'khor gyi lha rnams rang gi snying gar bkod pa byas nas/ nang gi sbyin sreg gis tshim par bya'o/ /gtor ma yang bya'o/ /de nas gsang ba dang / shes rab dang ye shes kyi dbang bskur ba ni/ bla ma'i zhal las shes par bya'o/ /dpal 'jam pa'i rdo rje zhes bya ba'i dkyil 'khor kyi cho ga slob dpon chen po dpal don yod pa'i zhabs kyis mdzad pa rdzogs so/