CLOSE WINDOW

D1974
བོད་ཡིག

/ //paN+Di ta mkhas pa chen po ta thA ga ta rak+Shi ta dang / lo tsA ba dge slong ba ri rin chen grags pas bsgyur cing zhus te gtan pa phab pa'o// //[ ]@##/ /rgya gar skad du/badzra b+hai ra wa tan+t+ra pany+tsi kA rat+na mA lA nA ma/ bod skad du/ rdo rje 'jigs byed kyi rgyud kyi 'grel pa rin po che'i phreng ba zhes bya ba/ dpal rdo rje 'jigs byed la phyag 'tshal lo/ /stong pa snying rje mi phyed pas/ /'gro ba'i 'jigs pa bsel mdzad pa'i/ /dpal ldan rdo rje 'jigs byed 'jigs//khro rgyal de la gus pas mchod/ /de yi le'u bdun don mchog ni/ /snyigs dus rnal 'byor pa rnams la/ /bde blag 'gro la phan spyod phyir/ /rin chen phreng bas gsal bar phye/ /rgyud thams cad ni phun sum tshogs pa lngas ston te/ zhes the tshom med pa ni 'jam dpal gyi rgyud stong phrag bco brgyad nas byung ba rdo rje mkha' 'gro ma rnams kyis byin pa yin te/ don ni ston pa rdo rje 'chang chen po de gnas rdo rje phag mo chos kyi dbyings b+ha ga la bzhugs nas/ 'khor gshed bzhi la sogs pa la chos gsungs pa phyag na rdo rjes bsdus par shes par bya'o//'dir de nas kyi sgra ni de ma thag pa ste/ sngon du song ba bshad nas dang / ma rdzogs pa'i chos le'u bdun ston pa ste/ de yang rjes su ston pa dang bkra shis pa ma rdzogs pa bos pa yin par go bar bya'o/ /gzhung mtshams sbyor ba'i skabs le'u dang po rgyud kyi don bsgrub par bya ba ston pa'i phyir ro//de nas yang dag rab bshad bya/ /zhes pa ni de nas sngon ma'i rjes su yang dag pa bzang ba mchog dang thun mong gi don ma nor ba le'u bdun pa bsnyen sgrub dkyil 'khor dang 'khrul 'khor dang bsam gtan dang bzlas pa dang sbyin sreg la sogs pa rnams tshang la ma nor bar sgrub pa po rnams la lam nye bar bde bar rab tu gsal bar phye nas gsungs pas bshad bya zhes zhal gyis bzhes pa'o//rdo rje ni chos sku stong pa nyid dang shes rab ston pa yin la/ 'jigs byed gzugs sku thugs rjes thabs rnams grub par ston pa'o//thabs zhes pa ni 'bras bu ste/ gzhung 'dis rnal 'byor pa la sgrub pa'i thabs su bstan pa'o/ /sgrub pa zhes thabs des bdag gzhan gyi don grub par byed pa'o/ /lha rnams zhes pa rdo rje 'jigs byed kyis lha rnams drag shul dang bcas tshangs pa la sogs pa thams cad kyang 'jigs shing drag shul bskyed pa'o//de yang stong pa nyid dang snying rjes 'bras bu chos sku dang gzugs sku nyid de gang gdug pa dang ldan pa'i sems can rnams la snying rjes phan par mi 'gyur bas rdo rje 'chang des 'jigs par mdzad pa de/ sku shin tu 'jigs pa dbu dang phyag dang mtshan ma dang rgyan dang /na bza' dang gdan dang nyi ma'i 'od zer dus mtha'i me ltar drag po mtshungs pa med pa'i khro bo chen po snying rjes bskul ba'o/ /de yang nang na kha ba lta bur bsil/ /phyi rol drag pos 'gro la skyob/ /ces pas bstan pa'o/ /bcom ldan 'das rdo rje 'chang de nyid bsgrub bya 'bras bu'i rgyud 'dis bsgrub par byas pas lam sgrub byed do//rnal 'byor pa la dngos grub dgos pas dgos pa'o/ /de yang rang bzhin gyi don phun sum tshogs pa gnyis te spangs pa phun sum tshogs pa nyon mongs pa dang shes bya'i sgrib pa ma lus pa spong ba'o/ /de yang thob bya phun sum tshogs pa thob pa las te/mngon par byang chub pas mngon par byang chub pa'o/ /dgos pa de yang thabs rgyud las byung ba nyid sgrub thabs so/ /dgos pa de'i dgos pa ni gzhan gyi don phun sum tshogs pa ste/ bdud dang mu stegs dang / klu dang / gnod sbyin dang / drag po dang / tsaN+Di dang / 'jigs byed drag po la sogs pa bstan pa la gnod pa dang / sems can dang slob dpon la gnod pa la rgyud 'dis bsgrubs pas phan 'dogs pa'o/ /rnal 'byor pas bsgrubs pas bdag dang gzhan gyi don thob pa dang / brjod par bya ba dang rjod par byed pa de phan tshun 'brel bas de dang de las byung ba dang /bdag nyid gcig par 'brel pa bstan pa'o/ /de la zhes bya ba ni brjod bya la sogs pa de 'dod pa la'o/ /dang po zhes pa ni dgos pa de bsgrub pa rtsom pa'i sngon du'o/ /sngags pa zhes pa ni dbang thob cing sngags kyi bsnyen pa dang dkyil 'khor la sogs pa shes pa'i rnal 'byor pas brjod pa'o//yid du 'ong zhes pa dur khrod la sogs pa yid dang mthun pa spro ba'i gnas gcig tu gnas par bya'o/ /yang grogs dang rdzas dang ldan par byas la sdod par shes par bya'o/ /dgos pa zhes pa bdag dang gzhan gyi don/dbang zhes pa la sogs pa zhi ba dang rgyas pa dang dbang dang drag po rnams/ dkyil 'khor dang 'khrul 'khor dang bsam gtan dang bzlas pa dang sbyin sreg la sogs pa bsgrub pa'o/ /dur khrod ces pa ni bsad pa'i gnas ro skyel sa la bya'o/ /chu'i ngos zhes pa ni chu bo'am mtshan gling yin te/der gnod sbyin pho mo dang klu pho mo bsgrub par bya'o/ /shing gcig ces pa ni shing gzhan gyi grib mas mi sleb mi reg pa'o/ /mtshan ma gcig pa ni dbang phyug chen po'i mtshan ma thang stong la yod pa'o/ /bzhi mdo zhes pa ni lam rgya gram ste/der rengs pa'i gnas bya'o/ /de yang grong dang rdzas dang ldan par byas la sdod par shes par bya'o/ /ri rtse zhes pa ni ri mtho ba'i steng du ste bskrad pa'i gnas so/ /khang stong lha khang stong pa dngos po der bsnyen sgrub dang / ral gri dang / mig sman dang / ri lu dang / gser 'gyur dang /bcud kyis len dang / gter dang 'byung po dang ro langs bsgrub pa'i gnas so/ /ma mo'i khyim zhes pa ni lha brgyad kyi chung ma gang na yod pa'i brten sa la bya ste/ der dbang dang dgug pa dang bsgrub pa'i gnas so/ /'thab mo'i sa zhes pa ni phan tshun 'thabs pa'i sa ro mang du shi ba'i sa ste dbye ba'i gnas so//grong ngam nag khrod ces pa ni rang gi khyim dang shing gseb dang sha za dang / dbang du bya ba sgrub pa'i gnas so/ /dpal rdo rje 'jigs byed chen por dbang bskur ba'i rnal 'byor bas zhes pa ni/ ya las bskyed pa'i rdo rje 'jigs byed kyi hrIH Sh+T+r-iHya 'bum/k+She ma la sogs las bskyed pa/ 'khor bcu gnyis la dzi na dzika sogs khri khri'i bsnyen pa rnal 'byor bzhi dang ldan pas bsnyen pa byas la/ sta gon dang dkyil 'khor bsgrub pa dang dbang bzhi'am ci rigs pa thob pa'o/ /rnal 'byor bzhi la brten nas bsnyen pa byas pas dbang la sogs pa bsgrub pa dang las la sbyar ba'o//ral gri dang mig sman zhes pa la sogs pa ni lha dang sngags dang rgyud 'dis khyad par du byas pa'i bya ba rdzas thams cad rgyud gzhan las khyad par med de thun mongs du go bar bya'o/ /'byung po zhes pa ni a pa ra dzi ta'o//ro langs zhes pa ni ro rma med pa'i rigs dang stobs dang gzhon pa la sogs pa bya'o/ /sha za zhes pa ni srin po tsaN+Di ka'o/ /gnod sbyin zhes pa ni dzam+b+ha la ma bu'o/ /mo ni de'i chung ma dang nor rgyun ma'o/ /klu ni klu chen po brgyad dang sog ma med la sogs pa'i char 'bebs pa rnams so//mo yang klu mo brgyad la sogs pa'o/ /sogs zhes pa ni yul gyi khyad par gyis grogs nus pa rnams so/ /gzhan rnams ni go sla ba nyid do/ /dkyil 'khor bri bar bya zhes pa ni bsgrub pa'i dus te/ dur khrod kyi tshon gyis bri ba ste/ sa'i cho ga dang thig sngon du song bar byas la bri ba ste/ thig skud yang ro'i srad bus bya'o/ /gru bzhi zhes bya ba ni mi mnyam pa med cing mnyam pa nyid do/ /sgo bzhi zhes pa ni stong pa nyid dang mtshan ma med pa dang smon pa med pa dang / mngon par 'dus ma byas pa nyid rnam par dag pa'o/ /rta babs bzhi zhes pa ni bsam gtan bzhi'i rang bzhin no//dril bu zhes pa ni chos thams cad stong par rtogs pa'o/ /ral gri zhes pa ni rnam par shes pa brgyad dag pa'o/ /ba dan zhes pa ni gsung rab yan lag dgu rnam par dag pa'o/ /me tog phreng ba zhes pa ni 'dod pa'i yon tan lnga rnam par dag par ro//rdo rje zhes pa ni mi phyed pa'o/ /rin po che zhes pa ni bla na med pa'i dga' ba rgyas pa'i snying rje chen po'o/ /zla ba phyed pa zhes pa ni byang chub kyi sems 'phel ba'o/ /dra ba dra phyed dang zhes pa ni thabs dang shes rab kyi skyob pa rnam par dag pa'o/ /de'i dbus zhes pa ni lha'i khang pa'o//re'u mig dgu zhes pa ni lha dgu'i gnas te sna tshogs rdo rje dang mtshams bzhir sna tshogs pad+ma bzhi'o/ /lha'i snam bu dang rdo rje ra ba dang sgo rnams kyang bri zhing lha'i mtshan ma dgod pa'o/ /sgo gcig ces pa ni sgrub pa po gcig las med na gzhan bcad pa'o//drag po dang 'di nyid kyis lho'i sgo gcig kho nas bya'o/ /dbang dang zhi ba'ang lho'i sgo kho na'o/ /yang rdzogs rim gyi sgo rnam par thar pa'i sgo bzhi ste/ sgo ni 'gro dang 'ong bas sgo ste/ stong pa nyid kyi sgor rnal 'byor bzhi dbyibs su 'jug pa mngon par rtogs pa'i dkyil 'khor gyi sgor 'gro ba'o//gzhan du mi 'jug mi 'gro ba'o/ /mtshan ma med pa'i sgor sngags bzhi gzhug cing bzlas thabs bzhi rlung gi sgor dkyil 'khor bzhir 'ong ba'o/ /smon pa med pa'i sgo chos bzhi lte bar yang / rtsa 'dab bcu drug la k+She la sogs dang rlung dang me'i sbyor bas 'bar ba'i rnam pa dang snying gar rtsa 'dab brgyad la hi la sogs pa lte bar oM dang hUM la sogs pa 'bar ba'i rnam pa dang /mgrin par rtsa 'dab brgyad la lte bar oM la ya la sogs pa'i snying po rnams 'bab pa'i sgo nas/ spyi bor rtsa 'dab bzhi la oM ya d+hIHhUM haM lte bar 'bab pa'i sgor 'jug bde ba chen por 'ong ba'o//mngon par 'dus ma byas pa'i sgo de gsum mi phyed par gcig tu dbyibs dang sngags dang chos rnams yod pa ma yin med pa ma yin gnyis ka med pa ma yin par bsgom pa'o/ /de yang rang rang sgor 'gro 'ong la/ gzhan dang gzhan du mi 'gro mi 'ong bas bcad pa'o//'jug pa'i sgo la gcig la grol ba'i sgo 'ong ba'ang gcig kho nas so/ /dbus su ro langs bri zhes pa ni lha'i gdan mgo bo gcig lag pa gnyis mig dmar ba skra ser ba gyen du brdzes pa gcer bu mdog nag pa/ so dang mche ba gtsigs pa/ g.yas ral gri/ g.yon thod pa thogs pa brgyad dang / dbus ngos su ma hA de ba dang / u ma de ba bri'o/ /grwa bzhir thod pa bdud rtsis gang ba bzhi bum pa'i khar bri'o/ /shar du mgo bo zhes pa ni sgo bzhir ro'i mgo dang lag pa dang rgyu ma dang rkang pa bri'o/ /byang gi grwar thod pa zhes bya ba ni byang shar gyi grwa la sogs pa g.yas skor ro//de nas dkyil 'khor phyi rol zhes pa ni lha snam de dbang ldan gyi gnas nas dgod pa g.yas skor du dgod pa'o/ /mtshon rtse gcig pa zhes pa ni lcags mdung rma bya'i sgro'i chun po dang ldan pa'o/ /rdo rje rtse gcig pa zhes pa ni phyed mdung ngo //gzhan rnams ni go sla'o/ /mar khu chen po zhes pa ni mi'i tshil bzhu ba'i mar me'o/ /sngags chen po zhes pa ni khyim bya'o/ /shin tu mnyam par gzhag ces pa ni lha dang stong pa nyid du sems bzhag pa rtog pa gzhan spangs pa'o/ /sbyin sreg dang gtor ma la sogs zhes pa ni bdag rdo rje 'jigs byed kyi lto bar me 'bar ba la me'i dkyil snying gar me lha rdo rje 'jigs byed bskyed la ye shes pa me lha spyan drangs pa'i bstim la/me lha'i ljags dang rang gi lce rdo rje'i sbu gur byas la bza' ba kun dbul zhing dang sa mas lha rnams mnyes/ snyigs ma thab khung du pho bas thal bar gyur par bsam pa'o//sha de rnams gtor ma dang lha la yang dbul ba bdud rtsir byin gyis brlabs pa me rlung gi sbyor ba gzhan ltar ro/ /khrag chen pos gdab ces pa ni gong gi dkyil 'khor bri ba'i tshe'o/ /lha bshos thams cad dbul bar bya/ /zhes pa ni bdag gi bza' ba'i dus gsungs pa de 'jigs byed yin pa dang bdun dag pa'i dus dang /ye shes sems dpa' bstim pa'i dus dang / dbang bskur ba dang / las 'chol ba'i dus thams cad la bdag lha'i nga rgyal gyis dpal rdo rje 'jigs byed la dbul ba'o/ /ha ha zhes pa ni ho hi la sogs pa brgyad de lta ba'i gad mo brgyad bya'o//bar chad sel ba'i phyir dgod pa'o/ /mnyam par gzhag ces pa ni cho ga'i rim pa las sems gzhan du ma yengs pa'o/ /dkyil 'khor dngos grub 'dod pas 'jug par bya zhes pa ni zhi ba la sogs pa gang 'dod pas rnal 'byor bzhi sgom pa dang dbang bskur ba'i dus dang 'brel to//zhim pa'i chang zhes pa ni tshogs kyi 'khor lo dang dpa' bo'i ston mo de nas 'dod pa'i dngos grub la dmigs zhes pa ni dbang nod pa'i slob ma'i dus dang / slob dpon mchog gam rang la mos pa yod la dpal rdo rje 'jigs byed las blang ba'o//de'i dbus su zhes pa dbang bskur ba'i dus su lha bsgom pa dang sgrub pa'i dus su dngos grub nod pa'o/ /slob ma la dbang bskur ba'i dus su slob dpon gyis dbang la khro bcas pa dang / gsang ba'i dbang nod pa dang shes rab ye shes la rdul tshon steng ngam bsdus la rdo rje 'jigs byed dang ldan pas bsdad pa'o//de nas 'jigs pa chen po zhes pa ni bcom ldan 'das byon pa'am gzugs dang / sgra dang / dri dang / ro dang / reg mi sdug pa 'byung ba'o/ /bar chod ni sgrub pa po la gnod pa dngos grub kyi gegs byed pa'o/ /'jigs pa ma byas na de'i rjes la dngos grub gang 'dod ster ba'o//rig pa 'dzin pa zhes pa ni sgrub pa po'o/ /phra mo las thams cad ces pa ni 'khrul 'khor dang 'brel ba'i las ston pa rnams grub pa'o/ /rnal 'byor gyi rgyud ces pa ni pha'i rgyud sde lnga las phrin las kyi rdo rje 'jigs byed chen po'i le'u bdun las sgrub pa'i dkyil 'khor bstan pa'o//de yang bsnyen pa dang dbang sngon du song bas sgrub pa'o/ /rtog pa dang po rdzogs so zhes pa ni las so so la rtog dpyod pa'o/ /dang po ni bdun pa'i sngon du bdun pa rdzogs pa ni dkyil 'khor gyi cho ga ma lus par bstan pa'o//dpal rdo rje 'jigs byed kyi rtog pa dang po'i bshad pa'o/ /dkyil 'khor de yang ci snyam pa la zhi bas mi 'dul ba'i rigs mi dang mi ma yin pa la phan pa'o/ /de nas zhes bya ba la sogs pa phal cher go sla ba nyid do/ /dur khrod kyi ras zhes pa 'di grir shi ba'i ro dur khrod du bskyal ba mar gyi ngo'i nyi shu gnyis la blangs la/thal chen dang / sa dkar dang / bdud rtsi lnga dang mi dang khyi la sogs pa'i khrag dang / dug gi rigs sna tshogs dang / tshon rtsi lnga dang sbyar/ rgyar khru do kha sbyar ba'am rkyang pa brgyangs la/ gshin rje'i lus dang ldan pa'i 'khor lo rten 'brel 'khor lo bcu gnyis bri bar bya zhing /dbus su re'u mig brgyad pa bri'o/ /bcu drug ces pa dgra nag ltar phyi rol du las kyi sngags phyogs dang phyogs bral du dgod cing de'i bar du ming spel bar bya'o/ /bcu gnyis dang phyogs bzhi dbus dang lnga la rtsa sngags bcu bdun bri zhing mi'i sa bon bzhi bsgrub bya'i yang ming bar du bcug la bri'o//las sngags kyis spyi bo la sogs pa'i gnas rnams snying po dang spel ba dgod do/ /hUM dang phaT brgyad kyang mgo lhor byas pa'i phyogs dang phyogs bral du bri'o/ /man ngag gis lha'i gnas dang bcas pas 'bar ba'i gzugs dmigs pa'o//rims kyis zin par 'dod na zhes pa ni bstan pa la gnod pa la sogs pa de la/ rims na nas 'chi ba'i thabs rnal 'byor pa snying rje dang ldan pa des rims nad gtang bar bya ba ste/ dpyangs pa la sogs pa'i grir shi ba'i thod pa la rgya skyegs dang khrag chen pos byugs la rdo rgyus kyi 'brel bar mgo bstan pa'i bsgrub bya de tsha ba'i rims kyis 'chi bar 'dod na/lus dmar ba gyen du 'bar ba lus rngul ba tsha bas rab tu rgyas pa dbugs tsha ba can bri bar bya'o/ /grang ba'i rims gtang bar 'dod na/ dkar ba gsus pa che ba skra grol ba 'dar ba dbugs grang ba can bri bar bya'o//gnyis ka 'dra bar mgo gsum pa lag pa gsum pa nyam thag pa bris la/ gzhan yang dur khrod kyi ro bsregs pa'i sol ba dang / sa dang / so phag dang bsgrub bya de'i rkang rjes dang / drin chen dri chu bsres pas gzugs byas pa'i snying gar sngags kyi 'khor lo thod par bcug la/lha'i nga rgyal gyis dgug gzhug bya zhing thod pa steng ma la yang de ltar bris pas dgab/ dug dang skye tshe la sogs pas byug /mar nag dang rgya skyegs kyis bskus la bsgrub bya de skra'i skud pas bcings la/ ro bsregs pa'i thal ba'i 'og tu bzhag nas rdo rje 'jigs byed shin tu khros pa can du bdag nyid bsgoms te/sngags tshan gcig bzlas la sbas na/ nges par rims kyis 'chi'o/ /spel te sngags yi ge rnams dgod par bya zhes pa ni/ sngon du bstan pa'i bcu bdun po de yang mA ra ya phaT dang / uts+tsha ta ya dang /bi dwe Sha ya dang spel te bri ba dang / phyis bzlas pa dang yang 'brel to/ /sngon du bstan pa'i rdzas zhes pa thal chen dang / sa dkar la sogs pa dang / bya rog gis zos pa'i 'phro'i gtor ma dang / dri chen gyi ro ras la ma spangs pa yang / 'khor lo rkyang pa rtsibs bcu drug ces bcu gnyis nang gi bzhi dang bcas pa bri zhing /bsgrub bya sngar bris pa spangs pa ste/ de yang gsad pa ni dur khrod nyid/ bskrad pa ni rnga mo'i gzugs rgyab tu 'khor lo can bris pa la rlung gi 'khor lo dang 'og gi bya ba dang lnga ldan par skrod par 'gyur ro/ /gzhan yang 'og dang steng gi 'khor lo sbyar zhing bya ba man ngag yin no//chu zhes pa ni drag tu mi 'bab par ngag rengs pa'o/ /dbang la ni bud med kyi b+ha gar sba'o/ /dbye ba rta dang ma he'i rgyab tu bya'o/ /spyi bo las zhes pa ni/ dpral ba dang / kha dang snying ga dang gsang gnas dang spyi bo sngon po gshin rje'i gzugs zhes pa ni rab tu gnas pa byas nas rtags byung ba dang sba'o//pags pa zhes pa kha na mar bshus pa'i nang du dri dang chu dang rkang rjes kyi sa blugs/ nub bdun du sngags dang yungs kar blugs la mnan pa bya'o/ /gzhung man ngag gis zhi ba la/ dbus kyi ya dbyi ba dang / zla ba'i dkyil 'khor la bsgrub bya gzhag par bya'o//rgyas pa la zla ba ser po la bzhag pa dang 'khor lo la rab gnas bya ba'o/ /dpal rdo rje 'jigs byed kyi rtog pa gnyis pa'i bshad pa'o// //de nas zhes pa ni 'khor lo dang sgrub pa la sngags dgos shing sngags nor na mi grub pas sngags btu ba bstan te/de yang sa gzhi dri zhim pos byugs pa la A li dang kA li bri zhing mchod pas mchod pa dang / gtor ma yang gtang bar bya'o/ /drug pa'i dang po zhes pa ya yin te/ de yang ka'i sde tshan dang / tsa'i sde tshan dang / Ta'i sde tshan dang / ta'i sde tshan dang / pa'i sde tshan dang / ya'i sde tshan dang drug /sha'i sde tshan dang bdun du phye bas shes pa'o/ /lnga pa zhes pa ma'o/ /drug pa'i gnyis pa zhes pa ni ra'o/ /dbyangs yig gnyis pa zhes pa ni A ring po ste ra dang sbyar bas rA ring por 'bod pa'o/ /gnyis pa'i gsum pa zhes pa dza/ dbyangs yig gnyis pa zhes pa ni A ring po dza dang sbyar bas dzA ring po'o//bdun pa zhes pa sha'i sde tshan/ gsum pa zhes pa ni sa/ bzhi pa zhes pa ni ta'i sde tshan/ gsum pa zhes pa ni da/ dbyangs yig bcu gsum zhes pa ni o thung ngu dang sbyar bas do thung ngur 'gyur ba'o/ /gzhan rnams kyang de ltar shes par 'gyur bas gzhung mangs pas 'jigs pas ma bris pa'o//'bum dang sum 'bum dang bdun 'bum zhes pa ni bsnyen pa dang sgrub pa dang las sbyor gyi sgrub pa zla gnyis dang drug gis 'grub par 'gyur zhing / phyis snying rje dang ldan pa'i sems kyis zhag re dang nyin res bya'o//de yang ya yig zhe sdang nyid du 'gyur/ /k+She yi yi ge gti mug brjod/ /ma yig phra ma nyid du 'gyur/ /me ni 'dod chags gshin rje 'joms/ /da yig phrag dog las kun byed/ /ya tsa tho ba dbyug pa dang / /ni ra pad+ma ral gri gshed/ /dza yig lha mo tsArtsi kA/ /phag mo yum gyi sa nyid do//de las dbyangs can yum du grub/ /ru ni gau rI'i rang bzhin no/ /Na yo ni ra thod pa bzhi/ /yi ge bcu bdun lha bcu bdun/ /las kun de yis byed par 'gyur/ /zhes pas dbang bskur ba'i dkyil 'khor dang / bsnyen sgrub la lha bcu gsum sgrub cing bskul ba'o/ /de nyid nas oM ni brgya byin/hrIHgshin rje/ Sh+T+r-iHla sogs phyogs skyong yin/ /rnal 'byor pa yis las bcol lo/ /ya mAn+ta kas rang rig byed/ /ces pas lha la bskul zhing / chos skyong bskul ba'i bya bas chos bshad/ nor byin bsdigs pa dngos dang bsam gtan gyis gdug pa can la bya ba man ngag go//de yang rnal 'byor pa lha bcu gsum dang / sangs rgyas kyi 'khor lo bcu gsum dang / rdul tshon gyi dkyil 'khor lha bcu gsum dang / 'khrul 'khor lha bcu gsum gyis dgug pa sogs dang / bsang sbyang bya ba'o/ /las thams cad ces pa ni de ltar shes pas bsnyen sgrub song bas mchog dang zhi ba la sogs pa'i las thams cad byed pa'o//rtog pa gsum pa'i bshad pa'o/ /sngags kyis 'grub pa la lha la dmigs pa med na mi 'grub pas mngon par rtogs pa'i don du/ de nas zhes bya ba la sogs pa sgrub pa'i thabs gsungs pa nyid do/ / de nas zhes pa ni sngags btus pa song ba dang lha bsgom dgos pa 'brel to/ /yang dag rab bshad bya zhes bya ba ni thabs so/ /rdo rje 'jigs byed sgrub pa'i thabs yang dag par 'chad pa'o/ /rdo rje 'jigs byed ces pa ni bsgrub par bya ba yin la/ thabs yang dag par bshad pa ni sgrub byed yin no//de yang sgrub thabs yang dag par 'chad pa ste/ bla ma'i man ngag gis rnal 'byor pas chos thams cad stong par rtogs shing lha la dmigs pa gsal bas sngags 'grub po/ /man ngag ni sngar gyi gnas bstan par rdzas dang grogs dang bcas pas dkyil 'khor bri ba dang sku gzugs dgram pa dang mchod gtor dbul ba la sogs pa bya'o//dang po kho nar zhes pa ni de'i tshe dang po ste gnas der stan bde ba la 'dug ste/ bdud rtsi lnga yis kha dag par byas la/ gcer bu skra grol ba lhor mngon par phyogs par bya ste/ snying ga'i ma dang sa bon gyis dra gur gyi bsrung bas/gnas dang snying rje chen po dang lha dang stong pa nyid kyi ting nge 'dzin bsrung bas rnal 'byor pa yang bsrung bar 'gyur ro/ /snying ga'i sa bon gyi 'od zer lnga dang ldan pa'i 'od de nyid kyis phyogs bcu'i 'jig rten gyi khams thams cad du khyab pas sangs rgyas thams cad rigs lnga bskul/'gro ba'i rgyud lnga sbyangs nas/ sangs rgyas dang byang chub sems dpa' dang khro bo dang bla ma thams cad mdun gyi nam mkha' la dmigs la/ rang gi snying ga'i sa bon las mchod pa'i lha mo spros la rdo rje tsArtsi kA la sogs kyis phyi dang nang dang de kho na nyid kyi mchod pas yang dag par mchod pa dang /sdig pa bshags pa la sogs pa rnams byas la tshangs pa'i gnas bzhi bsgoms te/ sems can thams cad la brtse bas khyab pa mi gtong ba byams pa'i mtshan nyid/ sdug bsngal las skyob par 'dod pa'i snying rje'i mtshan nyid de/'khor ba las bsgral bar 'dod pa'i bde bar 'dod pa dang / mi 'bral bar 'dod pa dga' ba'i mtshan nyid do/ /nye ring gis mi 'byed cing chos brgyad spangs pa btang snyoms su shes pa'o/ /de'i rjes su chos gcig dang du mas stong pa mu bzhi dang bral ba rten cing 'brel bar 'byung ba'i rang bzhin ma grub par rtogs nas/oM shU n+ya tA dz+nyA na badzra swa b+hA wa At+ma kou0f85haM zhes brjod la/ sngags de'i don stong pa nyid kyi ye shes mi 'gyur ba'i rang bzhin du nam mkhas khyab pa rang gi blo mi dmigs par gzhag go/ /nam mkha'i dkyil du yaM yig las/ /zhes pa ni chos nyid l as sngon du tshogs dang smon lam song ba'i mthus/yaM raM baM laM suM gyi rim pa las sngo ba dang dmar po dang dkar po dang ser po'i kha dog can gyi 'byung ba bzhi'i dkyil 'khor gling bzhir chags pa'i dkyil du suM ri rab ri'i rgyal por gyur pa lcog bzhi dang bcas pa'i steng du/ ma las nyi ma'i dkyil 'khor dang /de'i steng du hUM las sna tshogs rdo rjer gyur nas rdo rje'i sa gzhi dang / ra ba dang / gur dang / bla re dag bsgom mo/ /de'i nang du gzhal yas khang 'jam dpal ye shes sems dpar gyur pa las/ /gru bzhi sgo bzhi dur khrod dang bcas pa sngon bzhin bskyed la/de'i nang du d+hIHyig las zhes pa ni dang po'i sangs rgyas rnal 'byor dang rjes su rnal 'byor dang shin tu rnal 'byor dang / rnal 'byor chen po rnams bsgom pa'o/ /las sbyor gyi dus su dpa' bo gcig pa ni dkyus kyi gsal ba de nyid do/ /khyad par ni d+hIHdang ral gri lha rnams ser ba'o//g.yon po ti bsnams pa nyid bsgom pa'o/ /pad+ma dang zla ba la rdo rje skyil mo krung du bzhugs pa'o/ /rdo rje de nyid zhal dgu pa zhes pa ni 'bras bu rdo rje 'chang rdo rje 'jigs byed du grub pa'i dus der/ /srid pa dang zhi ba dbyer med pa chos kyi dbyings kyi rang bzhin du byin gyis brlab cing nga rgyal du bya ba/oM badzra d+harma d+hA tu swa b+ha wa At+ma kou0f85haM/ zhes rdzogs pa'o/ /der yang ye shes sems dpa' gzhug pa dang / skye mched byin gyis brlab pa dang / sku gsung thugs sgrub pa dang / dbang bskur ba dang / mchod pa dang / bstod pa dang bdud rtsi m yang ba la sogs pa yang man ngag las bya'o//zhal dgu zhes pa ni mthar gyis snyoms par 'jug pa dgu ste sems can smin par byed pa'o/ /ma he ni lha drag po ma he'i gdong 'dul ba'i phyir ro/ /me ltar 'bar ba ni thugs rjes thugs bskyed pa'i 'bras bu bdud 'dul ba'o/ / khams gsum za ba ni chos thams cad stong pa nyid du rtogs pa'o/ /zhal brtsegs pa ni bdud bzhi spa bkong ba'o/ /ha ha ni sems rtas par byed de dbugs 'byin pa'o/ /ljags 'dril ba ni dbang du byed pa'o/ /mi sha zhes pa bde ba chen por 'grub pa'o/ /sdigs mdzub ces pa ni mi yangs par 'gro don mdzad pa'o//brgya byin zhes pa bka' nyan byed pa'i rtags su bstan pa'o/ /mgo bo'i phreng ba'i thod de ni rigs lnga'i bdag po'o/ /phaT kyi sgra ni thams cad bsdigs pa'o/ /thod pa'i phreng ba ni dbyangs dang gsal byed kyi yi ge dag pa'o/ /sbrul ni klu chen po rnams 'dul ba'o//zhabs bcu drug ni stong pa nyid bcu drug go/ /g.yon brkyang ba ni 'gro don mdzad pa'o/ /gcer bu ni chos kyi sku spros pa dang bral ba'o/ /mtshan ma gyen du 'greng ba ni bde ba chen po'i sku'o/ /skra gyen du brdzes pa ni nang na ye shes 'bar zhing phyi rol du bdud bsdigs par mdzad pa'o//phyag sum cu rtsa bzhi ni byang chub kyi phyogs sum cu rtsa gnyis so/ /gnyis glang po che'i pags pa bzung ba ni gti mug dag nas chos kyi dbyings dang mi 'bral ba dang / thabs dang shes rab kyis gzhan yang chos kyi dbyings la sbyor ba'o/ / de nyid kyi rnal 'byor la mnyam par gzhag ces pa ni rnal 'byor chen po'i rim pa'o/ /rdo rje ni ye shes lnga'i ngo bos phas kyi dug lnga sbyong ba'o/ /rtse gsum ni lus ngag yid gsum gyi nyes pa 'bigs pa'o/ /gtun shing ni brjed ngas pa 'joms pa'o/ /chu gri ni sred pa gcod pa'o//rtse gcig pa ni phung po gsum 'bigs pa'o/ /sta res 'khor ba'i skye rga gcod pa'o/ /mdung ni zab pa'i don chos thams cad stong pa nyid du rtogs pa'o/ /mda' ni ma rig pa 'bigs pa'o/ /lcags kyu ni 'gro ba 'dren par byed pa'o/ /Da ma ru ni chos kyi sgra sgrogs par byed pa'o//kha T+wAM ga ni lha rnams gsal ba'o/ /'khor lo ni bar chad kyi bdud bzhi sel ba'o/ /gri gug ni skyon drug nga rgyal la sogs pa gcod pa'o/ /tho ba ni stobs dang mi 'jigs pa dang ldan pa'o/ /ral gri ni ral gri'i dngos grub dang ldan pa'o/ /dbyug pa ni lha ma yin pham par byed pa'o//thod pa khrag gis bkang ba ni bde ba chen por rol pa'o/ /bram ze'i mgo bo ni rtag lta sel ba'o/ /phub ni 'gro ba rnams skyob pa'o/ /rkang pa ni rdzu 'phrul gyi rkang pa bzhi dang ldan pa'o/ /zhags pa ni thugs rje chen pos ngan 'gro rnams 'dren pa'o//gzhu ni 'jig rten gsum las rgyal ba'i stong pa nyid kyi shes rab mnga' ba'o/ /rgyu ma ni mnyam pa nyid kyi ye shes so/ /dril bu ni so sor rtog pa'i ye shes so/ /lag pa ni bya ba nan tan gyi ye shes so/ /dur khrod ras ni me long lta bu'i ye shes so/ /gsal shing gis phug pa'i ro ni chos thams cad ngo bo gcig pa'o//me thab ni snang ba gsum gyis 'gro ba la skyob cing bdud sreg par byed pa'o/ /thod tshal ni chos nyid kyi snying rje mnga' bas so/ /sdigs mdzub ni bdud la bsdigs pa'o/ /'phan rtse gsum ni sku gsum ngo bo gcig pa'o/ /rlung ras ni rtag chad las grol ba'o//zhabs g.yas kyi gdan rnams ni dngos grub brgyad bsgrub pa'o/ /g.yon pa'i bya rgod la sogs pas ni mkha' spyod kyi 'gro ba skyob pa'o/ /rwa gnyis ni bden pa gnyis so/ /zhal gyi mdog ni rigs drug gi ngo bo'o/ /dmar ba ni 'gro ba la shin tu chags pa'o//khros pa ni skyob pa'o/ /'jam dpal gyi zhal ni ngo bo mi 'gyur ba'o/ /gzhon pa ni byang chub sems dpa'i skur bzhugs pa'o/ /ral pa lnga ni ye shes lnga dang ldan pa'o/ /spyan gsum ni snying rje gsum gyis gzigs pa'o/ /de ltar shes par byas nas ma yengs pa'i sems kyis lha la dmigs la sngags bzlas pa ni/gang yang rung ba snying gar pad+ma dang nyi ma la sa bon gyi yi ge la g.yas skor du bkod pa la/ sna bug gi rlung 'byung ba las spros pas sangs rgyas thams cad kyi thugs dam bskul/ sems can thams cad kyi sgrib pa sbyangs la 'jug pa'i rlung gis tshur bsdus la sngags la bstim mo//mi skyo'i bar du bzlas shing rang gang 'dod bsgrub pa'o/ /mtshan mo rgyu zhes pa ni mis ma tshor bar gsung ba'i don to/ /dpal rdo rje 'jigs byed kyi rtog pa bzhi pa'i bshad pa'o// //lha'i dmigs pa gsal bar bya ba la rten bsgom par bya ba'i phyir/de nas zhes bya ba la sogs pas bshad de gzhan gsal ba nyid do/ /ri mo mkhan bzang zhes pa ni dbang thob pa'o/ /rtog pa med pa zhes pa ni chos thams cad stong par rtogs pa'o/ /mi khro zhes pa ni snying rje dang ldan pa'o/ / gtsang zhes pa ni dam tshig dang ldan pa'o/ /brtse ba dang ldan zhes pa ni rgyu med sgrub pa po de la phan gdags snyam pa'o/ /dpa' bo'i cho gas bri zhes pa ni gnas dben par mchod pa dang gtor ma dus gsum du dbul zhing / dpal rdo rje 'jigs byed kyi rnal 'byor pas ras la dkyil 'khor du byin gyis brlab pa dang /sngags rnams snying po thugs kar bri ba dang / sngags zhal du bri ba dang / rtsa sngags lte bar dgod pa dang / mig la sogs pa'i skye mched la oM sarba ta thA ga ta badzra tsak+Shu swa b+hA wa At+ma kou0f85haM/ zhes bya ba la sogs pa dgod pa dang / sku gsum gyi s nying po'ang gnas gsum du dgod do//dbang bskur ba'i snying po spyi bor dgod par bya'o/ /shin tu mnyam par zhes pa ni dus gsum du tshogs sngon du song ba can gyis sbyor ba bzhi rdzogs par byas shing / dung chen po'i phreng bas las sngags la ma yengs par bzla ba'o/ / phreng ba hUM gi gong du khro bo spro ba'i dmigs pas tshig dang ma 'dres par bgrangs pa'o/ /de'i phyi rol dur khrod ces pa ni dur khrod brgyad bri ba ste/ phyogs skyong brgyad dang / lha brgyad dang / klu brgyad dang / shing dang / mchod rten dang / sgrub pa po dang / yi dwags dang / bya dang gcan gzan dang / sbrul dang / ro sna tshogs shin tu 'jigs pas bskor ba bri'o/ /gcer bu zhes pa ni sgrub pa po rang nyid bri ba'o/ /gnas gcig tu zhes pa bri ba dang bsnyen sgrub kyi gnas spor mi rung ba'o/ /bza' btung thams cad mtshan mo dang phyi dro longs spyod cing mang bar spyod pa'o//mchog 'dod na zhes pa ni bskyed pa dang rdzogs pa'i rim gyis bris sku la mchod cing bsgom par bya'o/ /de dang po'i le'u dang tha ma'i le'u 'brel par byas la bsgom pa'o/ /la la bla ma'i ngag la yang ngo / /rtog pa lnga pa'i rnam par bshad pa'o// //las kyi tshogs de dag sbyin sreg gis bsgrub cing gzhung bsdu ba'i phyir/de yang sems can rnams la cho ga'i mchog /sbyin sreg byed par 'dod rnams la/ /rdo rje sems dpa' nyid kyis bstan/ /gang 'dod las rnams 'grub pa'o/ /zhes bya bas sbyin sreg gi cho ga bya ba ste/ ji ltar sngon gyi rim pa zhes pa ni drag las sngon du bstan pa'i bsad pa la sogs pa'i rim pa nyid do//bsad par 'dod pa zhes pa ni zhi bas mi 'dul ba'i mi dang mi ma yin pa de la snying rje chen pos/ bcom ldan 'das rdo rje 'jigs byed kyi bsnyen pa nas sbyin sreg la sogs pa'i rim pas tshe 'dir 'phor bcug la/ma 'ongs pa'i lus mi bskyod pa'i zhing khams dag der sgrub snyam pa dang / sngon ltar ting nge 'dzin sbyang bar bya'o/ /de yang dur khrod du song ste thab khung gru gsum nag po rgyar sor nyi shu sor bcu brkos par rdo rje gdengs pa'i phreng bas bskor zhing /raM dang rlung gis kyang bskor te/ dur khrod kyi me'am lcags las byung ba'am tsaN+Da lI'i me la dur khrod shing gis me sbar la me'i gzi byin mar me chen pos bskyed cing me'i dbus su paM las sna tshogs pad+ma 'dab ma brgyad pa/ de'i steng du raM las nyi ma'i gdan la raM las byung ba'i me'i lha sku mdog nag po zhal gsum phyag drug pa/dbu skra dang spyan dang zhal la sogs pa khros pa rus pa'i rgyan can/ g.yas rnams su gri gug dang bgrang phreng dang mi 'jigs pa rnams so/ /g.yon rnams su thod pa dang dbyu gu rtse gsum dang ril ba spyi blugs so/ / g.yon brkyang ba'i stabs kyis bzhugs pa bskyed la/ thugs ka'i sa bon las me lha bkug la zhabs dang phyag dang zhal bsil ba dang mchod pa rnams byas la dam tshig la bcug /lha de'i khar raM dmigs la ha ha oM ag+na ye zhes bya bas rdzas dang bsgrub bya'i ming ci rigs par bsreg go//de nas de'i snying gar gong gi dpal rdo rje 'jigs byed bskyed la/ skye mched byin gyis brlab pa nas ye shes nas dbang gi bar bya ba bsgrubs la/ mchod pa rnams rim pas mchod cing bstod pa la sogs pa ci rigs pa yang bya'o/ /de'i lto bar me'i dur khrod chen po dngos po thams cad stong pa nyid du bsgrub pa dang /zhal du raM dang me gru gsum brtsegs ma rkan gnyis la bsgoms la/ rdzas dang bsgrub bya'i ming dang bcas pa bsregs pas gsungs pa ltar 'gyur ro/ /yang na phyogs gcig ces pa ni rang gi khyim gyi lhor phyogs par bstan pa ltar bsregs nas yang gsungs pa ltar 'gyur ro//yang na khyim gyi phyogs ni mar tshes zla ba bri ba'i bcu bzhi nas las de 'grub pa'o/ /de nas dbye bar 'dod na zhes pa ni thab dang lha dang me lha rnams bsad pa ltar ro/ /de nas yang bskrad par 'dod na zhes pa ni thab khung khru gang rgya dang dpangs su bya zhing kha dog sngon po gzhu'i dbyibs can du tho ba dang rdo rje dbyug pa'i phreng bas bskor ba'o//mchod pa dang rdzas bsregs pa yang bskrad pa'i sems gtsor bya ba'o/ /skrod pa'i sbyin sreg dag dus gcig yin no/ /me sbar zhing me lha la sogs pa ser po sngon ltar bya'o//zhal du raM bkod la bsregs pas gzhan du mi 'gyur ba'o/ /zhi bar 'dod na zhes pa ni thab khung zlum po tshad la sogs pa gzhan ltar ro/ /dge 'dun gyi me la sogs pa dkar po'o/ /me lha zhal gcig phyag gnyis pa phreng ba dang ril ba 'dzin pa'o/ /rgyas par 'dod na zhes pa rnal 'byor nyid tshe dang bsod nams bu dang 'khor mang bar 'dod na bya ba ste/thab khung khru do khru gang gzhan ltar ro/ /khyim bdag gi me dang lha ser po la sogs pa'o/ /kha lta phyogs dang 'dug stangs dang ting nge 'dzin la sogs pa ma tshang ba gzhan ltar shes par bya'o//zhi ba brgyad dang bcu bzhi/ rgyas pa bco lnga/ dbang dang dgug pa nyi shu gnyis/ rengs par bya ba stong / drag po nyi shu dgu kho na la bya ba man ngag go/ /rdo rje 'jigs byed kyi rtog pa drug pa'i bshad pa'o// //bya ba de dag gis dub pa dang /bya ba de dag don yod par bya ba'i phyir de nas zhes bya ba la sogs pa gsungs te/ bsam gtan la rag las pas ting nge 'dzin bstan pa'o/ /bsam pa'i ting nge 'dzin brtan na las gong 'og thams cad 'grub pa'o/ /bsnyen pa song ba zhes pa ni bsnyen sgrub sngon du ma song bar mi 'grub pas bsnyen sgrub sngon du song ba las sbyor du bstan pa'o//re pha yongs su gyur pa zhes pa ni sngon du bshad pa'i bsgrub bya'i gzugs de gru gsum brtsegs ma me'i gzugs nang na yod pa de ni las dbyibs dang mdog dang ming du bcas pa bskyed la/ de'i snying rig pa'i gnas de ma rig pa'i mun pas bsgribs shing sdig pa sna tshogs bskyed pa dkar nag mtshams na gnas pa dang /sbu gus lus rnams gang ba cig me'i dkyil che ba drag par bskyed la/ de nas rang gi gzugs las zhes pa ni snying ga'i sa bon las phyogs bcur 'od lnga 'phros la sangs rgyas thams cad bskul zhing /thugs rje la gnad bor bar bya'o/ /sangs rgyas thams cad kyang yi rang ste gnang ba byin pa'i thugs ka nas sa bon rnams spros rang la bcug la/ khro bo'i tshogs nam mkha' gang ba ba spu'i bu ga nas spros la/ bsgrub bya de bkug mdun gyi de la bcug ste/sdig can de la ba spu ldang ba'i snying rje bskyed la khyod la ngas zang zing dang skyabs dang byams pa bsgoms pas/ ma nyan pa'i las kyi rnam smin 'di 'dra ba mthong ngam zhes bsgo zhing smras la/ de'i skyob pa'i sangs rgyas dang byang chub sems dpa' dang yi dam lha rnams gshegs su gsol la/bsrung ba'i 'khor lo rang la gzhug /'jig rten pa de rnams bskrad la song bar bsam zhing / gshin rje'i tshogs dang dmyal ba'i sgras 'dar zhes bya ba dang bred do/ /las su shes par bya zhing gong gi 'khor lo'i bya ba dur khrod du byas pas nges par 'grub pa'o/ /'di dag ni dkon mchog gsum la gnod ces gzhan yul ma yin pa dang /snying rje chen po med na mi 'grub cing rang ngan 'gror 'phen pas bya ba ma yin no/ /dpag tshad brgya nas zhes pa/ dbyibs mdog ming lo yod na sngon ltar byas pas 'grub bo/ /de nas dpral bar 'dod na zhes bya ba la sogs pa'i las thams cad ting nge 'dzin la rag las te/yul rung ba dang snying rjes zin pa dang thabs la mkhas pa'i rdzas dang 'khor lo dang sngags dang sngon du byas pa la ting nge 'dzin gyis rdzas kyi rten la bskyed pa dang / bsgrub bya de nyid bcug la bya ba'i khro bo dang gshin rje la sogs pa las dang sbyar la bya bas las sbyor du bstan par shes par bya'o//gzhan go sla'o/ /rang gi snying ga zhes pa rdo rje 'jigs byed kyi snying gar paM las pad+ma a las zla ba'i khar klu bskyed la/ pad+ma'i 'dab ma brgyad la a brgyad/ klu'i mgo bo la i/ de'i 'od zer gyis sangs rgyas thams cad kyi bdud rtsi blangs la snying gar dbab/klu la thim nas yang bsgrub bya'i lus la dbab cing nad zhi bar bsam mo/ /de nas bzhu ba zhes pa dbang du gyur pa'i bsgrub bya la bsgom pa go sla'o/ /rnal 'byor pas lus dub gso ba'i cho ga ni 'khor lo'i lha thams cad bsdus la rim pas 'dus nas spyi bor 'jam pa'i rdo rje'i zhal dang lus su bsdus la/gnas rnams su yi ge'i bshad pa ltar bsgom ste/ lte bar ni baM las dkyil 'khor spyi bor haM las thur du 'dus pa can bsgoms la/ rlung gis me sbar/ mes chu bskol chus sa dros pa'i rlangs kyis haM las bdud rtsi babs pas lus rgyas par gyur nas lo stong 'tsho bar 'gyur ro//de yang sa bon d+hIHsa ye shes kyi bdud rtsi dgug pa man ngag tu shes par bya'o/ /gzhan rnams ni shes par sla ba nyid do/ /dpal rdo rje 'jigs byed kyi rtog pa bdun pa'i bshad pa'o/ /dpal rdo rje 'jigs byed kyi rgyud kyi 'grel pa rin po che'i phreng ba zhes bya ba/slob dpon chen po nag po pa nyid kyis rdo rje mkha' 'gro ma nyid las blangs nas mdzad pa rdzogs so// //mkha' 'gro ma las gnang ba thob/ /'jigs byed rgyud kyi 'grel pa byas/ /bsod nams yid bzhin nor 'dra ste/ /'gro kun rdo rje 'jigs 'grub shog /