CLOSE WINDOW

D1955
བོད་ཡིག

/[ ]@##/ /rgya gar skad du/ /ga Na tsakra di d+hI nA ma/ bod skad du/ tshogs kyi 'khor lo'i cho ga zhes bya ba/ rje btsun mgon la phyag 'tshal lo/ /bsod nams khyad par bsags pa dang / / dam tshig nyams pa bskang ba dang / /bgegs rnams nye bar zhi bya'i phyir/ /bdag gi tshogs 'khor bshad par bya/ /yid dang mthun pa'i sa phyogs su/ /tshogs kyi khang pa yid 'ong ba/ /'khor khang rim gsum ran par brtsig /de nas tsan+dan gur gum dang / /dri yi tshogs ni bsgos nas kyang /sa gzhi bzang po legs byas te/ /rnam lngas skyong nul byas nas kyang / /gzhung dang mthun pa'i maN+Dal la/ /mdzes pa'i me tog legs bkram ste/ /mchod pa'i tshogs rnams tshang bar bsag /'byor pa'i yo byad ldan pa dang / /bsdu bar 'os pa'i rnal 'byor tshogs//ma lus par ni bsdus nas kyang / /slob dpon la ni zhu ba dbul/ /las kyi bum pa byin brlabs nas/ /mchod pa'i bum pa bsags nas kyang / /mdzes pa'i me tog legs btang ste/ /tshig 'dis gsol ba gdab par bya/ /khro bo sngon po mdzes pa che/ /khyod ni dam tshig yid du 'ong / / nor bu rin chen ches bcing ba'i/ /dbyug pa phyag na bsnams pa ste/ /bdag ni 'khor ba las bsgral phyir/ /dpa' bos gnang gis gtong du gsol/ /rnal 'byor ma yi tshogs dbus su/ /bzang po'i sgo ni rnam par dbye/ /gsol ba btab na nang bkug ste/ /las kyi bum pas chu gtor te/ /mna' chu blud la gral la dgod//de nas rdo rje slob dpon la/ /ma tog phul te gsol ba gdab/ /de nas rnal 'byor pho mo la/ /me tog gtor la bskul bar bya/ /de nas rdo rje slob dpon gyis/ /lhar bsgom lce lag byin gyis brlab/ /phyag rgya byin brlab mngon rtogs brjod/ /hUM/ thog mtha' med pa'i sems dpa' ni/ / rdo rje sems dpa' de bzhin gshegs/ /kun du bzang po kun bdag nyid/ /rdo rje sems dpa' bdag po'i gtso/ /oM ma hA badzra hUM/ a/ srid pa rang bzhin dag pa'i phyir/ /ngo bo nyid kyis gdod nas dag /rang bzhin dag pa'i sems dpa' yis/ /srid pa dam pa mchog tu byed/ /oM hrIHSh+T+r-iHwi kr-i tA na na hUM phaT/ oM ma hA badzra gan+d+ha/de nas mchod pa'i khyad par tshogs/ /de nyid gsum gyis byin brlabs la/ /snying ga'i sa bon 'phros pa yis/ /bla ma rje btsun mdun bsams te/ /mchod yon zhal bsil zhabs bkru dbul/ /mchod pa'i tshogs kyis rab mchod nas/ /de kho na nyid bstod pa bya/ /oM hrIHSh+T+r-iHwi kr-i tA na na hUM phaT/oM ma hA badzra pra tIts+tsha swA hA/ oM badzra d+hU pe hUM/ oM AHhUM/ de bzhin du puSh+pe/ dI pe/ gan+d+he/ nai wi d+ye shab+de/ oM AHhUM/ oM sarba ta thA ga ta pU dza badzra swA b+hA wa At+ma kou0f85haM/ rdo rje dril bu ldan pa yis/ /gti mug rdo rje'i ngo bo khyod/ /gshin rje gshed po shin tu 'jigs/ /ston pa sangs rgyas kun rang b zhin//rdo rje mi 'jigs phyag 'tshal bstod/ /gshin rje gshed po rab 'jigs pa/ /nga rgyal rdo rje ngo bo khyod/ /rdo rje thugs dang rab mtshungs pa/ /rin chen rdo rje ngo bo nyid/ /'dod chags rdo rje gtso bo khyod/ /'dod chags chos kyi rnam pa bsnyems/ /thams cad dbyangs ni mchog gi mchog /rdo rje gsung mchog phyag 'tshal bstod//phrag dog rdo rje ngo bo khyod/ /gshin rje gshed po las kun byed/ /sku yi rdo rje rab 'dra ba/ /ral gri phyag la phyag 'tshal bstod/ /sangs rgyas kun gyi dngos po khyod/ /sangs rgyas thams cad gcig tu bsdus/ /sangs rgyas kun mchog gtso bo'i gtso/ /dkyil 'khor gtso la phyag 'tshal bstod//bdag gi nyon mongs tshogs rnams las/ /byung ba'i sdig pa'i tshogs rnams ni/ /rje btsun 'jam dbyangs spyan snga ru/ /de dag thams cad bshags par bgyi/ /rdzogs pa'i sangs rgyas nyid dang ni/ /byang chub sems dpa' dge 'dun mchog/ /slob sogs dge ba thams cad la//rgya cher bdag ni rjes yi rang / /khams gsum rnam rtog dra ba yis/ /mngon par gtibs pa mun nag la/ /theg pa chen po'i ye shes che/ /chos kyi sgron mes 'od snang mdzod/ /rdzogs sangs 'khor ba'i chos rnams las/ /chos skur mya ngan 'da' bzhed pa/ /'khor ba ji srid gnas bar du//sems can don mdzad bzhugs su gsol/ /bsod nams tshogs las mngon byung ba'i/ /dge ba'i bsod nams ma lus kun/ /sems can 'khor ba las sgrol phyir/ /thams cad byang chub mchog tu bsngo/ /mchod pa nyi shu'i tshogs rnams kyang / / de sogs rol mo'i tshogs rnams ni/ /rnal 'byor pa yis 'bad pa yi/ /rdo rje chen po mchod byas la/ /de nas blo yis gshegs su gsol/ /de nas stong pa nyid bsgoms te/ /snying rjes byin pa'i gsal bar bya/ /de nas srung ba'i 'khor lo ni/ /rdo rje sa gzhi ra ba dang / /'bar ba'i khang pa drag po la//mtshon cha tshogs kyis spras par bsam/ /nang du chos 'byung dkar po ni/ /gru gsum mtshon pa dang bcas pa/ /rdo rje gzhal yas khang bskyed la/ /rnal 'byor bzhi yi tshul dag gis/ /de nyid dkyil 'khor smin par bya/ /de nas bdud rtsi byin brlabs te/ /rtsa ba'i dkyil 'khor rim bzhin mchod//de nas mthe bong srin lag gis/ /blangs pa'i bdud rtsi byugs pa yis/ /chos 'byung gru gsum dkar dmar bri/ /de nas bdud rtsi'i thig le yis/ /mdzes pa'i me tog legs bkram ste/ /skad cig bskyed dang dgug gzhug bya/ /de nas bdud rtsi phul nas kyang //bdag nyid la ni mchod par bya/ /thabs dang gsang bas blangs nas kyang / /lce rtse smin mtshams spyi bor gtor/ /de nas de dag mi dmigs bsgom/ /rtsa ba'i dkyil 'khor nyid la ni/ /gsang ba'i dkyil 'khor mchod nas kyang / /bstod cing bdud rtsi myangs nas kyang / / gsal bar dmigs nas bzhugs su gsol/ /de nas zhing skyong 'khor bcas la/ /gtor ma rgya chen btang ba ni/ /yi ge gsum gyi ngo bo yis/ /bsregs dang sbyangs dang gtor byas la/ /maN+Dal bzang po yid 'ong ste/ /thig le le tse dgu byas te/ /dbus la ye shes 'khor lo bsam//phyogs dang mtshams la zhing skyong brgyad/ /ma mo sum cu rtsa gnyis dang / /bcas pa spyan drangs mchod pa bya/ /oM/ /shing gcig dang ni dur khrod dang / /ri bo dang ni ri sul phug /grong dang bzhi mdo dag dang ni/ /khyad par du ni khang stong dang / /gdol pa'i snod dang thang dang ni/ / khyad par du ni chu la gnas/ /nag pa drag po drag po che/ /lha sbyin mnyam du bsten pa dang / /nag po gtsigs dang mi sdug drag /rgya las 'das dang log 'dren rnams/ /rgan byad mo dang drag mo dang / /mi sdug ma dang u ma dang / /rgyal ba rnam par rgyal ma dang / /mi thub gzhan gyis mi thub ma/ / nag mo bzang mo nag chen po/ /nag sbom ma dang rnal 'byor ma/ /dbang mo dang ni zla ba mo/ /drag tu sdang dang 'phyang ba mo/ /'phrog byed ma dang mar me ma/ /'jib byed grong gnas rnal 'byor ma/ /drag po'i gzugs dang drag chen mo/ /mche ba gtsigs pa'i thod chen mo/ /thod phreng phreng can kha T+wAM ma//sbrul chen ral gri dgra sta can/ /rdo rje de bzhin gzhu can ma/ /de bzhin chen mo mkha' 'gro ma/ /las kun rjes su grub byed ma/ /sbyor ba'i dkyil 'khor rgya chen mo/ /de bzhin rdo rje dbang phyug gtso/ /de bzhin gshegs pa'i sku che ste/ /rdul byed rnal 'byor 'byin pa mo/ /rdo rje dbang mo'i bka' 'di yis//thams cad ma lus 'dir 'dus shig /oM kak+ka D+hA na/ bab+ban na/ kha khA khA da na/ sarba duSh+TAn/ ha na ha na/ g+hA ta ya g+hA ta ya/ a mo ka s+ya hUM/ zhes pas bkug la/ pad+ma'i gdan la gnas par bsams la/ mchod pa lngar byin gyis brlabs pa de nyid dbul te//sngags de nyid kyi mjug la/ a mu ka s+ya shAn+ting ku ru hUM hUM phaT swA hA/ zhes pas dbul te/ so so'i lce la hUM las rdo rjer byin gyis brlabs par bsams pa'i sbu gu'i 'od kyis drangs te mchod par bsams la/ de nas chos bshad de/ chos rnams gzugs brnyan lta bu ste//dag cing gsal zhes bya ba brjod nas/ smon lam btab ste/ sems can thams cad sdig med cing / /sems can thams cad bde gyur cig /gang gi lam nas 'gro ba yi/ /sangs rgyas nyid dang phrad par shog /ma bsgral ba rnams bsgral ba dang / /ma grol ba rnams bdag gis dgrol//da lta nyid du rjes brtse bas/ /rnal 'byor bstan bcos gnas la dgod/ /ces bya bas bsngo bar byas gshegs su mi gsol/ de nas rnal 'byor pho mo kun lha'i dkyil 'khor du bltas la/ dang po dri yis mchod/ de nas me tog dang bdug pa dang mar me dang /lha bshos kyi tshul bzhin du mchod la/ de'i 'og tu bdud rtsi dang bcas pa'i chang gis mchod de/ lag pa g.yon pas chang bzung nas/ /g.yas pas rtse gsum pa byas la/ /tshigs su bcad pa 'dis sbyin te/ /ltos shig mdzes pa dam pa'i chos//'di la the tshom yod ma yin/ /bram ze khyi dang gdol pa gsum/ /rang bzhin gcig tu rtogs par bza'/ /zhes bya bas drang ngo / /len pa pos brjod pa/ 'dod chags dri ma bral ba yi/ /rin thang med las legs 'ongs chos/ /gzung dang 'dzin pa rnam par spangs//de kho na nyid bdag phyag 'tshal/ /zhes pas pad+ma'i bskor ba dang bcas pas blang ngo / /'og ma rnams la drang ba la 'di skad brjod/ /sbyor ba'i dus na dngos grub ni/ /spyod kun de nyid de bzhin du/ /rnal 'byor pas ni kun du spyad/ /ji ltar bde bar spyad par bya//zhes bya ba brjod la brim mo/ /de'i 'og tu sha khu dang gur mar gyis mchod/ /de nas lha bshos so sor drangs la/ de nas kun gyis phud bsdus la/ slob dpon la phul nas/ slob dpon gyis cha gnyis su bgos te/ cha gcig g.yon gyi phyogs su bgos la byin gyis brlabs la/dkyil 'khor gyi lha la dbul/ cha gcig g.yas su bzhag la/ byin gyis brlabs la phyogs skyong la dbul te/ oM a kA ro mu khaM zhes pa'i sngags kyis mchod/ de nas ci bder rol cing longs spyod/ skabs der bkra shis bya'o//de nyid yang dag spyod pa yi/ /rnal 'byor pa ni kun nas bdag /ji ltar bde bar brjod par bya/ /sgyu ma lta bur mdzes pa yis/ /gnyis sprod kun 'khyud sogs sbyong ba/ /lus can don du yang dag spyad/ /dngos po bral la phyag 'tshal lo/ /de nas lha dang phyogs skyong la gnang ba nod pa dang //badzra satwas bzod par gsol ba byas te/ badzra muHzhes pas gshegs su gsol/ dam tshig gi lha snying gar bsdus la/ oM pad+ma ko shi hUM/ zhes bsdu'o/ /oM badzra d+hu pe gr-ih+Na gats+tsha hUM/ zhes bya bas phyi rol gyi lha gshegs su gsol lo//de nas lhag ma bsdus te/ de la yang gnyis te/ rnal 'byor pho mo'i lhag ma ni phyi rol gyi sha za la sogs pa mi ma yin pa rnams la btang ste/ phyi sgor bton la btang ngo / /khyim pa'i lhag ma ni khyim pa de nyid kyi mi ma yin pa la bsngo'o/ /lhag ma de lta bu'i skal ba med pa la/slob dpon gyi kha nas bdud rtsir byas la sbyin no/ /de nas yon bdag dang 'khor la bkra shis dang smon lam gdab bo/ /de nas gtor skyel de log pa dang / tshogs kyi khang sgor me long dang dung bud pa dkrol chu can gyi zan ni mchod/ de nas nang du log nas rnal 'byor pho mo la yang de bzhin mchod pa bya'o//ma 'ongs skye bo'i tshogs rnams bsags par 'dod pa dang / /bslab pa'i lam la zhugs pa'i rnal 'byor pa/ /don du dri med lung dang bla ma'i man ngag ltar/ /ma nor bzung ste bdag dang gzhan la phan phyir bris pa yin/ /tshogs kyi 'khor lo'i rim pa slob dpon nag po zhabs kyis mdzad pa rdzogs so/