CLOSE WINDOW

D1903
བོད་ཡིག

@##/ /rgya gar skad du/ ar+g+ha bi d+hi/ bod skad du/ ar+g+ha'i cho ga /dpal rdo rje sems dpa' la phyag 'tshal lo/ /sangs rgyas rgyal ba rnam 'phro shin tu rnam rgyal byang chub pa/ / rig ma'i lus sbyor las skyes bde bas shin tu khyab pa'i sku/ /'khrul pa ma lus spangs shing 'gro ba rnams kyi don mdzad la/ /phyag byas nas ni 'dus pa'i gzhung gi ar+g+ha'i cho ga bshad/ /gtsug lag khang dang mchod rten ras ris gsung rab sku gzugs dang //khang bzangs gzhal med khang dang khyams dang rdzing bu wa chu rnams/ /khron pa chu mig shing bzangs ljon shing rnams kyi nags/ /rtsed mo'i de'u skyed mos tshal ni sbyin pa'i sa la mdor bsdus na'o//de la thog ma nyid du slob dpon gyi mtshan nyid dang ldan pa'i slob dpon gzhan gyis maN+Dal sngon du song bas lan gnyis sam gsum gsol ba btab pas sam/rang nyid bsod nams 'dod pa la sogs pas gtsug lag khang brtsig pa'i phyir bgros pas nyin zhag dge ba rgyu skar bzang po la tho rangs kyi dus su sa brtag par bya'o/ /tsiny+tsa skyer pa ba hur rams shing dang //ko pi da ra ka rany+dza dang yungs kar dgod/ /ri yi ze'u 'bras bur bcas dang rus sbal rgyan dang ni/ /glang po'i bshul pa lta bu'i sa ni rnam par spang / /shar phyogs su ni pi pa la yi shing rnams dang //pAg sha'i shing dang gshin rje'i phyogs su yang dag ldan/ /n+ya gro d+ha yi ljon shing rnams dang nub phyogs su/ /sa gzhi'i byang phyogs su ni ba ku la dang bcas/ /me yi mtshams su ka ku b+he dang yang dag ldan//pa la sha yi ljon shing srin po'i phyogs su grags/ /sa skyes shal ma li ni rlung gi phyogs su ste/ /dbang ldan u dum+WA rar bcas pa'i sa gzhi spang / /mya ngan med dang pri yang ku dang ku sha nim/ /a shwad+tha mal mo tsa la ku tsa dang ni//a mra da dim sa ni byang dang shar du gzhol/ /sa ni dkar ldan gru bzhi yang ni mtshan nyid bzang / /de ru dong ni gru bzhir brkos te de nyid las/ /byung ba'i sa yis de ni dgang bar bya ba nyid/ /de ni gal te ma khengs na ni ma bsngags so//gal te sa ni dang po las lhag rab tu bsngags/ /sa yi khung bu mtho gang tsam du brkos nas su/ /de ni lhag med chu yis rab tu dgang bar bya/ /gom pa brgya ni song nas log ste blta bar bya//chu ni gal te ma 'grib dge ba'o gzhan du gzhan/ /sa la gnas pa'i chu ni g.yas skor gyis/ /dbang ldan mtshams su myur du bab na ni/ /brtan byed sa gzhi shin tu dag pa ste/ /'jigs pa'i dus su yang ni nyams pa med/ /de la de ltar sa'i mtshan nyid rig pa'i sngags pas lus bkru zhing dri zhim pas ji ltar rnyed pas gos dang rgyan dang cod pan dang bde ba'i stan mthon po la 'dug ste/dgos pa yong su tshang ba dang bsrung ba'i sngags bzlas pa 'grub pas lag pa rdo rje dang dril bu 'dzin pas mnyam par gzhag par bya ste/ lha'i rnal 'byor byas nas dgongs ka zhi ba'i gtor ma byin te/dag pa'am sbyangs pa'i sa gzhir lci ba dang sas ba lang gi ko ba tsam byugs pa'i dbus su maN+Dal bya ba 'am byed du gzhug go/ /de nas de ru dkyil 'khor gyi 'khor lo rnam par bsgoms la mchod pa lnga yis de la yang dag par mchod de/ gtor ma rgya chen po man ngag ji lta ba bzhin du sbyangs te/phyogs skyong ba thams cad la tu R+Ya'i sgra dang bcas pas 'bul lo/ /de'i rjes la pus mo g.yas pa'i lha nga sa la btsugs nas lus btud de sangs rgyas dang byang chub sems dpa' thams cad dang lha rnams las bslang bar bya'o/ /khams gsum gang na sangs rgyas dang //byang chub sems dpa' rdzu 'phrul che/ /lha klu gnod sbyin chen po dang / /dri za rnams dang lha min sogs/ /thams cad la ni gsol bar 'tshal/ /sems can kun gyi don bsgrub phyir/ /sa yi cha ni mdzes pa 'dir/ /gtsug lag 'byor pa rgyas phyir dang / /thos dang bsam sogs 'phel ba yi//dam pa'i ches ni rtogs phyir dang / /grags pa mthar thug gtsug lag khang / /lus can kun gyi yang dag 'tsho/ /bdag ming 'di zhes bgyi ba yis/ /bzang po 'di ni bdag phyir yang / /khyed la gnod pa mi mnga' bas/ /grags pa dam pa bgyid par 'tshal//khyed kyis bzod cing gnang ba ni/ /bgyid par 'tshal gyi gzhan du min/ /rmi lam la sogs mtshan ma yis/ /dge ba'i sa 'di bdag la stsol/ /zhes bya bas so/ /de ltar lan gsum brjod nas oM mu tsu le swA hA/ oM mo hA ni swA hA/ oM dat+ta li swA hA/ zhes bya ba rmi lam ston pa'i sngags 'dis lag pa g.yon pa lan nyi shu rtsa gcig tu mngon par bsngags te/sa phyogs gtsang mar gos dang rgyan gtsang mas sngas lhor bstan te/ ba shar du bltas pas seng ge'i nyal stabs kyis nyal bar bya'o/ /yang na rje btsun 'jig rten dbang phyug yang dag par mchod de/de dang nye bar snga ma bzhin nyal bar bya'o/ /tho rangs rmi lam gyi mtshan ma dge mi dge nye bar gzung bar bya ste/ rmi lam sangs rgyas zhal mthong dang / /mchod rten sku gzugs mchod pa dang / /dam chos nyan dang de shes pa'i/ /dge slong dge 'dun mthong ba dang //gtsug lag khang dang sangs rgyas sras/ /dge slong ma rnams skyed mos tshal/ /sa 'dzin 'dzegs dang bsti gnas dang / /chu bo rdzing bu rgya mtsho dang / /ri bo can dang ri dgas dang / /e na ya dang ba la bsngags/ /ngur pa rma bya la sogs khyad 'phags 'dab gshog can/ /ting 'dzin ldan pas rmi lam du ni nges par mthong //bzhon pa glang chen khyu mchog dang ni sa 'dzin dang / /gzhal med gnas mchog dpag bsam gyi ni shing rnams dang / /dge bsnyen dang ni sdom can mi yi bdag po rnams/ /gsang sngags dbang phyug rnams dang bud med mchog/ pha dang ma dang lha rnams dang ni bla ma dang / /lha yi btsun mo rnams dang mchog gi gsang ba pa/ /sgrub po dam pa dang ni yon tan can dang gnyis skyes rnams/ /dga' ston chen po dang ni rgyal ba'i mchog gi dkyil 'khor rnams/ /rgyan rnams dang ni gos dang 'bru dang nor dang mchog /sbyin sreg las dang 'bras bu dang ni me tog rnams/ /rgyal po dbang bskur thob byed phun sum tshogs pa'i dngos/ /g.yul las rgyal dang rkun po bcings dang rang gi tshogs/ /rgya mtsho dang ni chu bo rnams dang 'phrang la sogs/ /rgal bar dka' ba rnams las nges par thar ba yang //der de lta bu la sogs pa'i rmi lam ni bzang ste/ de las bzlog pa ni ngan par shes nas gal te ngan pa mthong na de'i tsho bgegs mthar mdzad kyi sngags bzlas te/ chos thams cad ni rmi lam lta bu ste/ rmi lam nye bar mi dmigs pa'i nye bar len pas so zhes lhag par mos pas sam/yang na rmi lam ston pa'i sngags brjod pas/ rmi lam ngan pa zhi bar bya'o/ /de nas rmi lam bzang po 'am bzang por bsgyur nas/ oM b+hu khaM zhes bya ba'i sngags kyis nam mkha' lta bur bsams nas/ hUM laM hUM zhes bya ba'i sngags kyis rdo rje'i rdul phra rab kyi rang bzhin gyis gzhi rnam par bsgoms nas/oM me di nI badzra b+ha ba badzra ban+d+ha hUM zhes bya ba 'dis byin gyis brlab par bya'o/ /de nas der lus phyed 'thon pa gser gyi mdog can rin po che'i bum pa phyag na bsnams shing na bza' dang rgyan mchog dang ldan pa'i sa'i lha mo mdun du rnam par bltas te/ tshigs su bcad pa gnyis kyis lhag par gnas par bya'o//'byung po kun gyi 'dren pa yin/ /spyod pa'i tshul gyi bya ba dang / /sa dang pha rol phyin pa la/ /lha mo khyod ni dbang du gyur/ /skyob pa shAkya seng ge yis/ /ji ltar bdud kyi sde bcom pa/ /de bzhin bdag gis bdud kyi sde/ /bcom nas gtsug lag khang mchog byed//ces bya bas so/ /lan gsum du ni bskul nas su/ /sa la yon chab la sogs pa/ /nye bar spyod pa legs mchod de/ /de nyid du ni thim par bsam/ /de nas yongs su dag pa thob pa'i sa'i char sems mgu ba'i sngags pas chos thams cad rang bzhin gyis rnam par dag pa'o zhes lhag par mos pas chos thams cad kun du spyod do//sna tshogs pad+mar sna tshogs rdo rje'i stegs bu la/ /zla bar b+hUM las dag pa'i 'khor lo rtsibs brgyad pa/ /de yi ltir gnas b+h+rUM gyi 'od kyi dra ba las/ /nges par 'byung ba'i de bzhin gshegs pa thams cad rnams//kun nas bsdus te gyur ba las ni khyad 'phags pa'i/ /rig ma mchog ni bzhi po las byung mdzes pa yi/ /khang pa brtsegs pa thar pa'i grong khyer ngo mtshar can/ /nor bu chen po 'od 'bar ba yi rang bzhin rab tu blta/ /der ni dkyil 'khor dri bzangs sogs kyis byas nas ni/ / 'di la dkyil 'khor 'khor lo rnam par bsgom par bya/ /de la sna tshogs nyer spyod rnams kyis yang dag mchod/ /phyogs rnams su ni rim pa bzhin du gtor ma sbyin/ /de nas dri zhim po'i me tog dang bcas pa'i thal mos oM sarba ta thA ga ta su la li ta/ bi lA si nA mi tai rnA mA mi b+ha ga bAn+ti dzaHhUM baM hoH/pra tIts+tsha ku su ma any+dza li nA tha ho/ zhes brjod bzhin du steng du bltas te snyim pas me tog gtor bar bya'o/ /de nas pus mo g.yas pa'i lha ngas la btsugs te lag pa g.yas pas dri zhim po'i bdug spos kyi reng bu bzung nas sngags lce la hUM yig las byung ba'i rdo rje dkar po phra mo rnam par bsgoms nas/sangs rgyas dang byang chub sems dpa' thams cad dang gzhan dag kyang snyan gsan dbab par bya'o/ /bcom ldan che ge rdo rje mchog /rig pa'i rgyal po phyag 'tshal stod/ /mgon po thugs rje'i bdag nyid bdag /gtsug lag khang ni bgyid par 'tshal//slob ma rnams la phan phyir dang / /khyed rnams la yang mchod pa'i phyir/ /bcom ldan gus byed bdag la ni/ /rjes su gzung bar mdzad pa'i rigs/ /'gro ba'i 'khor lo'i don mdzad pa/ /sangs rgyas rnams dang dgra bcom pa/ /'jig rten skyong dang gsang sngags lha//gang gzhan rnams dang 'jig rten skyong / /lha rnams dang ni rdzogs sangs kyi/ /bstan la gnas pa'i 'byung po dang / /sems can gang zhig bstan dga' ba/ /rdo rje'i mig ldan dgongs su gsol/ /rdo rje can bdag che ge mo/ /gtsug lag khang ni cho ga bzhin//'gro ba rnams ni dag bya'i phyir/ /ci nus bya ba bgyid par 'tshal/ /de phyir bdag dang slob ma la/ /rjes su brtse bas nyer dgongs te/ /'dir ni 'khor bcas thams cad kyis/ /gdan ni gnod par mdzad pa'i rigs/ /de ltar lan gsum brjod pas snyan gsan phab nas yang dag par mchod de bstod pa yang bya'o//de nas legs par brtags shing shin tu mnyam pa'i sa'i char stan bde ba la 'dug ste/ mdun du chu gtsang ku sha'i tshom bu dang bcas pa dang / 'om dUr ba dang bcas pa dang / dri chu me tog dkar po dang bcas pa chu la sogs pa'i snod yongs su bzlas pa rnams g.yon du rim pas bzhag cing /ting nge 'dzin gsum dang ldan pa'i rnal 'byor pas bum pa lhag par gnas par bya'o/ /de la nag po dang rtsa ba med pa/ mchu 'phyang ba/ mgrin pa ring ba lto ba che bar nas dang gro dang 'bras so ba dang ma sha dar til rnams te 'bru lnga dang /br-i ha ti dang ka N+Da ka ri dang a par dzi ta dkar po dang / ha sa dang ha sa de ba rnams te sman lnga dang / gser dang dngul dang mu tig dang byi ru dang / mu men te rin po che lnga dang ldan pa/ dri'i chus gang btsu ta la sogs pa'i yal gas kha brgyan pa gos zung gis mgrin pa dkris pa/de la chos 'byung gi nang du gnas pa rang gi lha'i mtshan mas mtshan pa/ yi ge baM las rin po che'i rang bzhin las byas nas gdugs dang bcas par 'khor dang bcas pa'i bdag por kun du btags te/ me tog gi phreng bas dkris pa'i rdo rje rnam par rgyal ba'i bum pa'i steng du bzhag ste/lag pa g.yon pa'i khu tshur gyis rdo rje dang 'brel pa'i me tog gi phreng ba'i rtse mo bzung nas/ sngags pas yi ge gsum dang spel te rang gi lha'i sngags brgya rtsa brgyad bzla bar bya'o/ /de bzhin du gzhan dkyil 'khor ba'i bum pa rnams kyang cho ga de bzhin du lha rang rang gi mtshan mas mtshan pa byas nas dkyil 'khor ba'i lhas byin gyis brlabs pa rnams la rang rang gi sngags yi ge gsum dang spel ba lan bdun du mngon par bzla bar bya'o//de bzhin du gzhi bdag gi bum pa yang ji lta bar rang gi mtshan mas mtshan pa rnams la yi ge gsum dang spel bas rang rang gi sngags bzlas par bya'o/ / thams cad kyang srog ldan nya dang bcas pa rnams la rim pa bzhin lhag par gnas par byas nas/ bsang gtor la sogs pa byas te mchod pa lngas yang dag par mchod de/ dril bu dkrol bzhin pas bstod par bya'o/ /de nas las byed kyi skyes bu bgegs mthar byed kyi rnam par bsgoms te/ rgya dang zabs su khru do ba'i dong gru bzhi par brkos la dbang ldan du de'i tshad dam/ de'i phyed du zlum por brkos te srol btod nas gnyis ka lci ba dang sa dang chu rnams kyis byug go/ /de nas ar+g+ha la sogs pa byin nas dong gru bzhi par go rims bzhin rnam par rgyal ba la sogs pa'i bum pa rnams kyis chu blugs par bya'o//der shar ram byang du ba ltas te nya rnams 'phyo ba na gtsug lag khang 'khor dang bcas pa myur du 'grub par 'dod pa yin no/ /de nas de'i sbubs phye ste dong zlum por chu btang ngo / /de'i chu'i bskor phyogs brtag par bya'o/ /gal te chu g.yas skor du 'bab na der dge slong brtul zhugs dam pa yon tan rnams nges par 'byung bar 'gyur ro//de'i rjes la klu ma lus pa dbang du bya ba'i phyir/ der 'o ma can gyi yal ga rnams kyis g.yogs te nyi ma la gnas pa'i dzaM yig las byung ba'i rdo rje yongs su gyur pa las/ dzaM gu li sku mdog ser po zhal ser po dang nag po dang dkar po/gdengs ka bdun gyis brgyan pa/ rin po che'i cod pan can/ rtsa ba'i phyag gnyis kyis rang snang gi thabs la 'khyud pa/ g.yas gnyis na rdo rje dang mda' 'dzin pa/ g.yon gnyis kyis gzhu dang sdigs mdzub dang bcas pa'i zhags pa can/sna tshogs pa'i na bza' dang bcas pa'i sbrul gyi rgyan gyis brgyan pa/ nyi ma'i gdan dang 'od can bsgoms nas bdag nyid kyang dzaM gu li'i gzugs su rnam par bsgoms te/ sa 'og tu dmigs nas sna tshogs rdo rje'i rang bzhin gyi sa gzhi bsgom par bya'o//de'i tshe yang ltad mo ba'i skye bo rnams tam+bo la dang dri zhim po'i me tog dang / tsan+dan la sogs pa byin pas mgu bar bya'o/ /de nas bsrung ba'i don du mchod sbyin gyi shing ngam seng ldeng gi rang bzhin las bde bar gshegs pa'i sor gyi brgyad kyi tshad du steng dang 'og rtse lnga ba dang rtse gcig pa'i rdo rje'i rnam pa can tsan+dan dmar pos byugs pa me tog dang skud pa dang /yungs kar dang bcas pa rnams la bgegs mthar byed kyi sngags kyis lan brgya rtsa brgyad bzlas te gdab par bya'o/ /oM g+ha g+ha g+hA ta ya g+hA ta la/ sarba duSh+TAn phaT/ kI la ya kI la ya sarba pA paM hUM hUM hUM/ badzra kI la ya badzra d+ha rod adz+nyA pa ya ti kA ya wAka tsit+ta badzra kI la ya hUM phaT ces bya ba'i sngags 'dis phyogs thams cad du brdeg par bya'o/ /slar yang bgegs thams cad rnam par gzhig pa'i ched du rang rang gi phyogs su son pa'i dpung dang bu dang chung mar bcas pa'i dbang po la sogs pa rnams bzhengs par 'gyur ba'i gtsug lag khang gi dbus sam/dbang ldan du gcig tu gnas par bltas la/ bdud rtsi 'khyil ba stong khro bo smad mdung gi rnam pas sngags de nyid kyi blos phur bu gdab par bya'o/ /de nas phyogs kyi dkyil 'khor bgegs med par rnam bar bsgoms nas sgrub pa'i grogs dang lhan cig tu rdo rje khu tshur gyis thig skud bzung nas g.yas skor du 'khor bas thig gdab pa bsgrub par bya'o//de nas slob dpon me'i mtshams nas byang du kha bltas te/ sgrub pa'i grogs dbang ldan nas lho ru mngon par phyogs pas shar gyi thig gdab par bya'o//de nas rlung gi mtshams su song ste lho ru mngon par phyogs pa dang / srin po'i mtshams nas byang du bltas pas nub kyi cha thig gdab par bya'o/ /slar yang g.yas skor gyis rlung gi mtshams su song ste dbang ldan du gnas pa dang byang gi cha thig gdab par bya'o/ /de bzhin me'i mtshams su song nas srin por 'dug pa dang /lho'i cha thig gdab po/ /de'i tshe yang sngags pas dge mi dge'i mtshan ma brtag par bya ste/ de tshe gal te dge slong ngam/ /bram ze mnyam gzhag 'ongs pa na/ /sbyin bdag la ni dge ba ste/ /zhi dang rgyas pa chen po byed//mkhas pa 'ongs par gyur pa na/ /rgyal po'i phun sum tshogs pa ston/ /gal te ba lang 'ongs pa na/ /bu dang bu mo sogs 'thob/ /bum pa gang ba 'ongs na ni/ /nor dang so ba la sogs 'phel/ /rgyal po 'am ni rgyal rigs 'ongs/ /ba lang ma he la sogs rnyed//gal te dga' byed gzugs ldan ma/ /'ongs na dpal ni 'phel bar 'gyur/ /me tog la sogs 'ongs na ni/ /grags pa yang dag 'phel bar 'gyur/ /sgur po mi'u thung rdum po sogs/ /yan lag dman dang mtha' skyes dag /de tshe der ni 'ongs pa na//dge legs byed 'gyur the tshom med/ /gtor zan bya rgod kang ka sogs/ /dur khrod bya ni gal te ni/ /steng gi nam mkhar rgyu ba na/ /'chi bar 'gyur ba nyid yin no/ /don rig pa yis thig 'debs tshe/ /de phyir brtag par bya ba ste/ /mi dge'i rtags ni byung ba na/ / mkhas pas thig ni bshol bar bya/ /gang du las kyis bskul ba yis/ /gal te thig ni 'gom pa na/ /'og na de yi rigs kyi ni/ /rus pa yod par mkhas pas bshad/ /gzhan yang cho ga ji bzhin du/ /blo ldan rdo du ma de ni gdon/ /gal te rdo de ma bton na/ /nyes pa skyed par 'gyur ba yin//rus pa'i zug rngus lus ni mdzes byed cing / /sol ba'i zug rngus me yi 'jigs pa skyed/ /thal bas nor brlag mi yi rus pas 'chi/ /sbrul sogs zug rngus sna tshogs nad la sogs/ /rdo brdul dang bye ma sen mo skra dang pags pa dang //shing dang pha gu bshang ba phub ma lcags dang chor ma sogs/ /zug rngu rnams kyis bcing dang brdeg sogs rnam pa mang po yi/ /nyon mongs rnams skyed de phyir zug rngu chung yang brtags te gzhom/ /de nas las kyi rdo rje yis/ /rtsig pa'i rmang ni rim pa bzhin/ / gzhi bdag klu ni legs brtags te/ /tho rangs bsod nams 'phel phyir brko/ /mon gre tha skar smin drug zla ba dang / /nyi ma'i 'gros kyis dbang po'i phyogs su mgo / gshin rjer kha bltas klu ni nyal 'gyur te/ /thams cad du yang g.yon pa phab nas so/ /mgo dang rgyal mchu rnams la mgo bo ni//gshin rje'i phyogs su ston pa kho na ste/ nub tu kha bltas lus kyi dang po ni/ /mi yi cha byad ro smad sbrul dang 'dra/ /dbo dang nag pa sa ga'i zla ba la/ /byang gi phyogs su kha ni bltas gyur te/ /stobs chen sa gzhi bzhi ni bdag po'i klu/ /sngas ni nub kyi phyogs su bstan te nyal//snron dang chu stod byi bzhin rnams la ni/ /klu ni gzhogs kyis nyal bar byed pa ste/ /chur ni mgo bo bstan te shar phyogs su/ /kha bltas gzhi ni thams cad non par ro/ /kun du gal te klu 'di yis/ /snying ga'i mdun du brkos pa na/ /sbyin bdag gi ni 'dod pa yi//dngos grub 'byung bar the tshom med/ /gal te mgo bor brkos na ni/ /pha ma snying grogs rtsa lag dang / /bu dang bu mo la sogs rnams/ /nges par brlag par 'gyur ba yin/ /gal te rgyab tu brkos na ni/ /gnas nyams dga' ba'am yang na 'chi//mjug ma'i cha yis myur du yang / /ba lang ma he sogs brlag 'gyur/ /de ltar cho ga bzhin g.yas skor gyis snying ga'i mdun du brkos nas/ zug rngu thams cad kyang rnam par skyangs te slob dpon gyis g.yas skor du rim pa bzhin du kun nas grags pa dang ldan pa'i gnas brtag par bya'o//de nas yon bdag dang / sa dang gnas kyi lha dang phyogs skyong dang 'jig rten skyong ba dang / zhing skyong dang / mi'i bdag po la sogs pa'i zhi ba'i don du dgongs mo zhi ba'i sbyin sreg byas nas gtor ma gtang bar bya'o/ /de nas tshes grangs bzang po la yon bdag gi rjes su mthun pa'i gza' dang rgyu skar dang dus sbyor dang yud tsam la/shar la sogs pa'i phyogs thams cad du ba dan dkar po dang dmar po dang ser po dang sngon po dang dud mdog dang tshon sna tshogs dang ser po dang ljang gu rnams btsugs te sa gzhir me tog dri zhim po gcal bkram nas/dri zhim po'i spos khang mang po bkod de/ shin tu gsal ba'i mar me'i phreng ba'i tshogs rnams dang / /dri chu zhim pos bsangs te dam pa'i chos bklag pa dang / bstod pa dang / bkra shis dang glu dang tuR+Ya'i sgra dang bud med bzang mo rnams kyi ca co dang gzha'i sgra dang bcas pas phyogs kyi tshogs nas sa gzhi der byed du bcug nas ltad mo ba'i skye bo rnams mgu bar bya'o//de nas sbyin bdag dang gzhan dag gi yang rgyas pa'i don du sngags pa gos bzang po dang rgyan dang cod pan dang / yo byad yongs su tshang bas rgyas pa'i sbyin sreg byas nas yon bdag gis kyang de'i tshe gal te nus na rgyal po dbang por byas nas de'i bka' yang thog mar byas te/rtsig mkhan rgyan thams cad kyis brgyan nas gos la sogs pa'i sbyin pas yongs su mgu bar byas te/ pha gu 'dzeg tu gzhug par bya'o/ /de'i rjes la dga' ba'i yid kyis rang gi 'byor pa dang mthun pas rgyan thams cad kyis brgyan pa'i bu mo dang /glang po dang rta dang ba lang dang ma he la sogs pa'i nor dang / gser dang dngul dang zangs dang nor bu dang mu tig la sogs pa'i rdzas rnams dang / rgyan dang gos bzang po rnams dang / me tog yongs su rgyas pa'i zhing / khang khyim dang /kun dga' ra ba la sogs pa'i gnas dang / bran pho dang / bran mo la sogs pa'i 'khor rnams mngon par 'dod pa'i dgos pa bsgrub pa'i phyir thams cad kyis slob dpon mnyes par bya'o/ /de'i rjes la slob dpon gyis bsang gtor la sogs pa phul nas yang dag par mchod de bstod pa byas nas bdud rtsi myang ba byas te yi ge brgya pa lan bdun brjod nas phyag byas te/bzod pa gsol nas sbyin sreg rdzogs pa dang / sangs rgyas la sogs pa gshegs su gsol bar bya'o/ /de nas yon bdag slob dpon gyi mdun du byas te rang gi khyim du song nas dge slong dang dge slong ma dang dge bsnyen dang dge bsnyen ma la sogs pa rnams la chos ston drangs te yon yang phul nas slar gshegs par bya'o//de nas slob dpon 'khor dang bcas pa rnams dang / rtsig mkhan dang las byed rnams dang / gzhan dag la yang ston mo byin nas nus pa dang mthun par phul te bzod pa gsol nas slar gtang ngo //mtshan mo tshogs kyi 'khor lo byas nas phyogs skyong la sogs pa rnams la gtor ma phul te/ thams cad nye bar bsdu bar bya'o/ /gtsug lag khang gi ar+g+ha'i cho ga'o// //de bzhin du mchod rten dang /gzhal med khang khyams kyi ar+g+ha yang rig par bya'o/ /gtsug lag khang sogs zhig ral rnying / /'chos par 'dod na sngags pa yis/ /gtor ma la sogs byin nas ni/ /der gnas lha ni spo bar bya/ /phyi nas snying rje'i bdag can gyis/ /rim pa bzhin du bcos nas ni//rdzogs par mthong nas spros pa de/ /der ni snga ma bzhin du gzhag /ces bya ba ni gtsug lag khang la sogs pa rnying pa dang zhig ral gyi ar+g+ha'i cho ga'o// //de nas ras ris la sogs pa brtsam par 'dod pa'i sngags pas stan bde ba la 'dug ste/ zhi ba'i gtor ma btang nas chos thams cad rang bzhin gyis dag par lhag par mos par byas te/brtsams pa'i lha'am rnam par snang mdzad kyi rnal 'byor byas nas de nas nam mkhar sangs rgyas la sogs pa mngon par bltas te/ snyim pa'i me tog gtor nas phyag byas te cho ga bzhin lhag par gnas par bya'o//de'i rjes la gos gtsang ma 'am/ /shing la sogs pa rnams la ji lta bar rang gi lha'i sa bon yongs su gyur pa las phyag mtshan sa bon gyis mtshan pa de yongs su gyur pa las zhal gsum phyag drug pa/ rjes su mthun pa'i gzugs sku mdog dang phyag mtshan dang gdan dang 'od can thugs kar mtshan ma dang sa bon gyis byin gyis brlabs pa/snying ga dang spyi bo dang lkog mar yi ge hUM dang oM dang AH/ zhes bya bas byin gyis brlabs pa la rigs dang mthun pa'i cod pan can snyoms par zhugs pa skad cig mas grub pa'i lha rnam par bsgoms nas mchod pa lnga yis mchod de bstod pa bya ba'o//de nas bzo byed rnams bgegs mthar byed kyi gzugs can la lus dang ngag dang yid la phyag mtshan dang sa bon gyis byin gyis brlabs pa rnam par bsams nas de'i lag pa g.yon dang g.yas dag zla ba rdo rjer byin gyis brlabs la bdud rtsi 'khyil pa'i sngags kyis lan brgya rtsa brgyad du pir dang tshon la sogs pa bsngags te shes rab kyi ye shes kyi bdud rtsir rnam par bsgoms nas slar yang yi ge brgya pa'i sngags kyis brtan par byas te gtad nas rtsom du gzhug par bya'o//de nas bsang gtor la sogs pa phul te legs par mchod de bstod pa byas nas bdud rtsi myang ba byas te/sangs rgyas la sogs pa gshegs su gsol bar bya'o/ /de nas phyogs skyong ba rnams la gtor ma btang nas slob dpon dang las byed dang gzhan dag kyang ston mo byin te nus pa bzhin yon phul nas gtang bar bya'o//ras ris la sogs pa'i ar+g+ha'i cho ga'o// //dam chos glegs bam rtsom pa yis/ /cho ga de bzhin byas nas ni/ /shog bu la ni d+hi las byung / /shes rab pha rol phyin bltas nas/ /de yongs gyur las byung ba yi/ /yi ge'i phreng ni blta bar bya//snag tsha smyu gu yongs bzlas te/ /brtsam par bya ba nyid yin no/ /de dag la bzlas pa'i sngags ni/ /oM d+hi su ti smr-i ti ma ti bi dza ye sar+tha adz+nyA na pa Ta lA pa ha ri Ni hri swA hA/ slob dpon dang ni 'dri mkhan la 'ang / /ston mo drangs nas nan tan gyis/ /yon phul nas ni gtang bya ste//lhag pa sngar bzhin rig par bya/ /gsang sngags kyi glegs bam rtsom pa na yang snga ma bzhin thams cad bya ste/ shog bu la sa bon dang phyag mtshan gyi sa bon yongs su gyur pa las byung ba'i 'od dpag med yongs su gyur pa bris pa'i yi ge'i tshogs kyis dkrigs par rnam par bsgom mo//lhag ma ni thang ka rtsom pa'i cho ga bzhin bsgrub par bya'o/ /yang na ni dam pa'i chos kyi glegs bam yang cho ga 'di nyid kyis bya'o/ /gsung rab kyi ar+g+ha'i cho ga'o// //de nas gtor ma gtong ba yi/ /yo byad cho gas phul nas ni//sngags pas lhag gnas byas nas su/ /bsang gtor la sogs byin nas ni/ /der ni chu lha'i gzugs can du/ /rnam par snang mdzad blta bar bya/ /sbrul zhags ral gri rin chen dang / /chu skyes shes rab snyoms 'jug dkar/ /yi ge oM la sogs pa dang / / badzra ba ru Na hUM zhes brjod/ /de yongs gyur las byung ba yi/ /rigs brgyad klu yi pho brang ni/ /ye shes bdud rtsi'i chus gang ba/ /zhi ba'i klu yis byin gyis brlabs/ /dngos kun gyis ni rnam bsams nas/ /slar yang gsang sngags brjod par bya/ /oM badzra sa ma ya s+t+waM zhes bya'o/ / sa 'og mthar thug yan lag ni/ /brgyad ldan chu yis yongs gang ba/ /chu yi rgyun ni blta bya ste/ /gzhan ni thams cad snga ma bzhin/ /zhes bya ba ni rdzing bu dang wa chu dang khron pa la sogs pa'i ar+g+ha'i cho ga'o// //cho ga bzhin du mchod pa dang / /lhag gnas sngar bzhin byas nas ni//nang gi sa yi sbyang ba ni/ /rim bzhin dag par bya ba ste/ /blo ldan mnyam par bzhag pa yis/ /gsang sngags brjod de byin gyis brlab/ /rol mo'i gnas ni nyams dga' bar/ /sangs rgyas la sogs bsgom bya ste/ /de nas sbyin sreg kyang ni btab/ / sangs rgyas sangs rgyas sras de bzhin/ /gzhan yang lha rnams thams cad la/ /mkhyen bya de nas bzod par gsol/ /rdzogs sangs lha mo de sras dang / /tshangs sogs lha yi tshogs kyis gang / /cho ga ma tshang bzod mdzad rigs/ /thams cad du yang sbyin bdag ni/ / zhi dang rgyas chen mdzad nas kyang / /slar yang 'byon par mdzad slad du/ /sangs rgyas yul du gshegs su gsol/ /thams cad du bzod pa gsol ba dang gshegs su gsol ba'i sngags so/ /yang na/ oM khyed kyis sems can don kun mdzad/ /rjes su mthun pa'i dngos grub stsol//slar yang 'byon par mdzad pa'i phyir/ /sangs rgyas yul du gshegs su gsol/ /oM badzra muH /zhes bya ba 'dis gshegs su gsol bar bya'o/ /kun dga' ra ba dang rol mo'i de'u dang ldum ra'i sbyin pa'i sa gzhi'i ar+g+ha'i cho ga'o// //dpal ldan gsang 'dus gsung ba yi//cho ga gang zhig ma tshang ba/ /spyi rgyud gsungs pa'i cho ga la/ /brten nas de ni bskangs pa yin/ /dpal ldan zhi ba bzang po'i zhabs kyi sprin las byung / /man ngag chu rgyun dri med phun tshogs thob pa yis/ /snang byed zla ba'i sa gzhi la ni gang skyes pa'i//'dus pa'i ar+g+ha'i cho ga'i lo tog 'gro la bsngo/ /nyon mongs 'phrog byed ar+g+ha'i cho ga byas pa las/ /bdag la rnam dag bsod nams skyes pa gang gyur pa/ /de yis 'gro ba ma lus rdo rje sems dpa' ni/ /sems can gyi ni dgongs pa mdzad pa nyid du shog/ /