CLOSE WINDOW

D1895
བོད་ཡིག

@##/ /rgya gar skad du/ da sha ta t+t+wA/ bod skad du/ de kho na nyid bcu pa/ bcom ldan 'das 'jam dpal gzhon nur gyur pa la phyag 'tshal lo/ /dkyil 'khor yang dag ji lta bar/ /rab tu brtag par su yis nus/ /rang gi 'khor lo gnas bsnyen pa//byas nas de 'og dkyil 'khor bri/ /dkyil 'khor sa ni sbyang bya ba/ /phyi rol mchod pa'i yon gyis te/ /dgongs ka nang gis dag pa/ /btab nas sa gzhi yongs su gzung / /lhag par gnas pa nyid gnyis pa/ /rab gnas cho gas bum pa dang me long a r+g+ha bla re sogs//las ni thams cad pa yi snod/ /srod la slob ma dam pa dang / /sa dang 'khor lo gtso skyob pa/ /ye shes srad bu sbyangs nas ni/ /de nas tshon yang dgye bya ste/ /nyin gsum pa la mtshan ma ni/ /dgod pa la sogs rdzogs par blta//dkyil 'khor mtshan mo bsgrub bya zhing / /gsol gdab phyogs skyong gtor ma sbyin/ /gdong g.yogs la sogs cho ga bzhin/ /so sor rang sngags ldan pa yis/ /bla ma bdag po blo yis ni/ /'jug par slob dpon yang dag bya//chu dang cod pan rdo rje bdag /ming dang bum pa gsang ba dang / /shes rab ye shes dbang bskur ba/ /yang dag brjod de de bzhin yang / /brtul zhugs lung bstan dbugs dbyung la/ /rjes gnang mtha' yi rim pas kyang / /de nas 'di ltar slob ma gzhug /yon blangs nas ni dbang bskur zhing / /thog ma dbus dang mtha' ma ru/ /sbyin sreg byas nas 'khor lo gshegs/ /gsang ba'i tshig ces bya ba yi/ /bcu po 'di dag bla mas kyang / /gzhan du mi 'gyur slob ma la/ / man ngag dag ni bstan par bya/ /bsrung dang phyir bzlog 'khor lo dang / /kha sbyar dbye dang gtor ma dang / /ma dang sngags btu bzlas brjod dang / /drag po dkyil 'khor sgrub pa'o/ /slob dpon las ni byas pa yis/ /bdag gis dge ba gang thob pas//'jig rten 'gro don gyis brgyan zhing / /dpal ldan gsang 'dus la gnas shog /tshigs su bcad pa bcu pa'o/ /brtan zhing dul la blo gros ldan/ /de la sogs pa'i yon tan ldan/ /slob ma'ang yon tan de lta bu/ /cung zad dman pas gsol ba gdab//de nas dpal ldan sngags tshul bshad/ /thar rgyal 'bras bu 'dod pas bya/ /gzhan du bla ma slob ma dang / /nges par nyams pa nyid du 'gyur/ /de la slob dpon la slob mas dkyil 'khor bri bar bya ba'i phyir lan gnyis lan gsum du gsol ba btab nas/de'i tshe sems can gyi khams 'di dag thams cad bla na med pa'i bde ba'i gnas la bdag gis dgod par bya'o zhes lhag pa'i bsam pa bskyed la/ /slob ma la khyod kyis yo byad thams cad tshogs par byas sam 'on te ma byas zhes dri bar bya'o//gal te cung zad ni tshogs so/ /cung zad ni ma tshogs so zhes zer na/ de'i tshe de'i lte ba la nyi ma'i dkyil 'khor la gnas pa'i hUM gi 'od zer rnams kyis snying gar gnas pa'i kaM las byung ba'i sdig pa kha dog gnag pa mi sdug pa sha za lta bu sna'i rtse mor byung ba dang /hUM de yang snying gar phyin te bdud rtsi thab sbyor gyi gzugs su gyur nas byung ste/ oM A na maHsa man+ta kA ya bAka tsit+ta badzra NAM na mo badzra kro d+ha ya zhes bya ba la sogs pa'i sngags kyis za ru bcug nas slob ma de yang saM las kun du bzang po'i gzugs su bskyed de bdud rtsi thab sbyor gyi phur bus de'i sems kyi bgegs la btab nas bgegs zhi bar bya ba'i phyir bdud rtsi thab sbyor gyi sngags 'di bzlas par sbyin par bya'o//bdag kyang sngon du bsnyen pa bya ba'i phyir ting nge 'dzin gsum bskyed de thun bzhir bzlas pas 'khor lo can sngags 'bum bzlas zhes bya ba la sogs pa'i grangs bzung ba la bzlas brjod bya'o//yang na phra mo'i rnal 'byor dang / thig le'i rnal 'byor la gnas pas sems kyi sbyong pa rtse gcig pas bya'o//sngon du bsnyen pa'i cho ga'o/ /de nas dkyil 'khor gyi khang pa'i phyir sa yongs su brtag par bya ste/ gtsug lag khang ngam mchod rten dang 'du khang la sogs pa gnas shis pa rnams su mchod yon dbul ba la sogs pa'i cho ga ji lta bas brko zhing slar dgang ba la sogs pa'i bshad pa rnams de bzhin du bya ste/dkyil 'khor gyi khang pa brtsig par bya'o/ /zug rngu'i nyes pa thams cad ni/ /gal te dbyung bar ma nus na/ /lag pas mnan zhing yi ge gsum/ / sngags bzlas slar ni brko bar bya'o/ /khang thog dang ni rdo leb dang / /ba lang lhas dang gtsug lag khang / /mchod rten drung dang 'bab chu'i 'gram/ /sa gzhi sngar ni yongs sbyangs pas/ /khung bu bkang ba la sogs pas/ /slar ni sbyang sogs bya mi dgos//phyi'i sa sbyang ba'i cho ga'o/ /mtshan mo der bdud rtsi thab sbyor gyi 'khor lo'i sbyor bas gnas te sa gzhi rdo rje'i rang bzhin du byin gyis brlab pa ni nang gi sa gzhi yongs su sbyong ba'i cho ga'o/ /de nas thig 'debs pa'i srad bus thig btab la/ji skad du bshad pa'i dkyil 'khor dang dkyil 'khor gyi khang pa'i dbus su 'dug ste/ rnal 'byor pa ting nge 'dzin gsum gyi sbyor ba bsgoms la sgo srung gi rang gi slob ma bzhi slob dpon du bskos pas/ de bzhin gshegs pa kun zhi ba/ /zhes pa la sogs pa nas kha los sgyur ba la thug pa'i tshigs su bcad pa re re 'don du gzhug par bya'o//de nas slob dpon gyis sprul pa'i 'khor lo yid kyis nam mkha' la bteg la/ rang gi lha khro bo'i sbyor ba bsgyings pa dang bcas pa'i rdo rje 'gros kyis gar byed cing lha la sogs pa zhes pa nas gdon mi za ba la thug pa brjod par bya ste/bgegs med par bya ba'i phyir phur bus btab la rdo rje ra ba'i phyi rol du dbang chen dang me'i dkyil 'khor dag gis phyogs dang mtshams bcing ba byas nas mnyam par bzhag pas de nyid du nyal bar bya'o//dang po yongs su gzung ba'i cho ga'o// //nyi ma gnyis pa la bum pa bcu dgu la sna tshogs pad+ma la gnas pa'i zla ba dang nyi ma la rang gi 'khor lo ji lta ba bzhin du lha bcu dgu'i mtshan ma rnams bris pa'i dkyil 'khor dang rjes su mthun par bri bar bya'o//de yang spyan gyi ni mig go/ /mA ma kI'i ni rdo rje sngon po'o/ /bum pa bcu byed na rnam par rgyal ba'i bum pa'i kha'i steng du gtso bo'i mtshan ma dang ngos bzhir de bzhin gshegs pa bzhi'i mtshan ma dang gzugs rdo rje la sogs gzhan gcig la'o/ / lhag ma brgyad la spyan la sogs pa dang gshin rje gshed la sogs pa'i mtshan ma dgod pa'o/ /bum pa lnga byed na spyan la sogs pa lha mo bzhi'i mtshan ma rnams bum pa gcig la bri/ /gshin rje mthar byed dang / shes rab mthar byed dang / pad+ma mthar byed kyi mtshan ma gcig la bri/bdud rtsi thab sbyor gyi mtshan ma las thams cad pa'i bum pa la bri/ bum pa lhag ma gnyis la ni snga ma bzhin du'o/ /de bzhin gshegs pa bdun gyi mtshan ma rdo rje bri ste/ rigs mi shes pa rnams kyi yang de bzhin no/ /shes rab kyi pha rol tu phyin pa'i glegs bam ste/shes rab kyi pha rol tu phyin pa dang lha mo gnyis su med pa las glegs bam gyis phyes nas thugs kyi nang du 'dus pa yin no/ /mchod rten ni 'khor lo ste/ de bzhin gshegs pa'i rigs yin pa'i phyir ro/ /glegs bam gzhan dag ni pad+ma'i mtshan ma ste/gsung rdo rje'i ngo bo yin pa'i phyir ro/ /de dag kyang kun nas 'khor bar bzhag la de rnams su mchod yon gyi snod las spos chu cung zad bcug nas rang rang gi 'khor lo bsams la mchod pa lngas mchod de/ rang rang gi sa bon yi ge gsum gyi nang du bcug ste/'khor lo'i dbang po rnam par rgyal ba la bzlas par bya'o/ /las thams cad pa la rig pa'i bdag po dang / rigs kyi snying po dang / rigs kyi rig ma rnams kyis bzlas par bya'o/ /dpal he ru ka'i rigs kyi bdag po ni mi bskyod ba'o//rigs kyi snying po ni hUM yig go/ /rigs kyi rig ma ni mA ma kI'o/ /badzra d+h+r-ika ces bya ba'i sngags yi ge gsum gyi nang du bcug pa dang / hUM zhes bya ba'i sngags yi ge gsum gyi nang du bcug pa dang / mA ma kI'i sngags yi ge gsum gyi nang du bcug pa ni rigs kyi bdag po dang /rigs kyi snying po dang rigs kyi rig ma rnams kyi las thams cad pa'i bum pa la bzlas par bya'o/ /bzlas brjod byas nas snod gcig tu yang mchod yon stsol ba bla na yod pa dang bcas pa'i phyi rol mchod pa dang /rab gnas kyi cho gar bshad pa'i rim pas bum pa legs par gnas pa dang me long la sogs pa'i yi ge gsum gyis byin gyis brlab po/ /nye bar mkho ba lhag par gnas pa'i cho ga'o/ /dgongs ka'i dus su yang dkyil 'khor gyi khang pa'i snga khang ngam khyams su slob dpon 'dug ste/mdun du 'dug pa'i slob ma phreng ba thogs pa dge bsnyen ma yin pa la dge bsnyen gyi sdom pa byin nas spro ba bskyed par bya ba'i phyir dkyil 'khor gyi ni zhes bya ba nas 'bras bu rgyas zhes bya ba'i bar du bshad par bya'o//de nas de rang gi lus su bcug ste rang gi rdo rje'i lam nas phyung nas rang gi shes rab kyi chu skyes kyi nang du de bcug la 'gro ba'i lus bzhin du dbang bkur te/ sa'i snying po la sogs pa bzhin du phyung nas dga' chen zhes bya ba nas 'jug par 'tshal zhes bya ba'i bar du lan gsum 'don du gzhug go//slob dpon gyis kyang khyod ni tshul chen zhes bya ba nas/ bu yis blo gros 'di gyis shig /ces bya ba la sogs pa'i bar gyis tshig spro ba bskyed par bya ba'i phyir/ lan gsum brjod pas gzengs bstod la/ gang zhig thog med ces bya ba nas da ni gnas par bgyi zhes bya ba la sogs pa'i bar du brjod par bya'o/ /de nas bsnyen pa la sogs pa'i yan lag dang ldan pas lhar bskyed pa phyi rol gyi dri la sogs pas kyang mchod nas thal mo de rnams la so shing sbyin par bya'o//des kyang mchod nas mdun du ba'i lci bas byugs pa'i gru bzhi pa'i sa la ltos pa med par dor bar bya'o/ /de nas hUM las bskyed pa'i chu de nyid bzlas la 'thor 'thung bya ba'i phyir sbyin par bya'o/ /oM hrIHzhes bya ba la sogs pa'i sngags kyis btab pa'i skyor chu lan gsum 'thung du bcug la bos nas mdun du bzhag ste/srad bu sum bsgril mdud pa gsum dang ldan pa dpung pa g.yas par bcings la/ hUM las bskyed pa'i ku sha sar pa ma nyams pa gcig ni sngags bya ba'i phyir sbyin/ gnyis pa yang hUM las bskyed de 'og tu stan du gding ba'i phyir byin la bdud rtsi thab sbyor gyis yang dag par bsrungs te chos bstan pas gzengs bstod pa'i phyir 'jig rten du ni zhes bya ba la sogs pa nas/de bzhin gshegs pa rnams su 'gyur/ /zhes bya ba'i bar gyi tshigs su bcad pa brjod la nang par nga la rmi lam smros shig ces bsgo ste/khang pa gzhan du seng ge'i nyal thabs kyis nyal du gzhug go/ /slob dpon don du gnyer ba'i slob ma la ni/ thub pa nyi ma ma lus pa/ /zhes bya ba nas/ mchod pa'i las kyang ci nus bya/ /zhes bya ba'i bar du 'khor lo phyir mi ldog pa'i dbang bskur ba'i sdom pa byin la/khyod kyis rtag tu bsrung bar bya/ /zhes brjod la de la khyad par gyi sdom pa bsgrags shing de bzhin du sdig pa bshags pa la sogs pa byed du gzhug go/ /slob ma lhag par gnas pa'i cho ga'o//de nas bla ma de las gzhan pa'i slob dpon bzhi dang bcas par dkyil 'khor gyi khang par zhugs la phyogs su phur bus yang dag par gdab ste/ rdo rje ra ba'i phyi rol du dbang chen dang me'i dkyil 'khor gnyis kyis phyogs mtshams bcing ba byas la 'di las bshad pa'i sa'i lha mo rnams mchod la/skyob pa sangs rgyas zhes bya ba nas dkyil 'khor bri zhes bya ba'i bar gyis gsol ba gdab pa'o/ /sa'i lha mo lhag par gnas pa'i cho ga'o/ /de nas nam mkha' na gnas pa'i dkyil 'khor yid kyis bkug la bdud rtsi lnga'i dkyil 'khor bcu dgu la rang rang ji lta ba bzhin du bcug ste/yang dag par mchod nas ni mi bskyod pa zhes bya ba la sogs pa'i tshigs su bcad pas bstod cing bdud rtsi lnga bstabs te/ pus mo g.yas pa'i lha nga sa la btsugs nas spos khang thogs la bcom ldan zhes bya ba nas mdzad du gsol zhes bya ba'i bar gyi tshigs su bcad pa lan gsum brjod pa 'dis ni 'khor lo'i gtso bo dang sangs rgyas thams cad lhag par gnas par bya'o//dkyil 'khor gyi lha lhag par gnas pa'i cho ga'o//de nas ji skad du bshad pa'i snod lnga la gzhag pa'i kha dog sna lnga pa'i srad bu la/ rtag pa la sogs pa'i 'khor lo'i gtso bo rnams bkod de/ rang gi phyogs na bzhugs pa'i rtag pa la sogs pa'i snying por gyur pa de kha dog rnams dang ldan pa'i 'od zer srad bur bsams te/oM AHpany+tsa shA shwa ta su traM sA tsakra su tra nA ya hUM/ zhes brjod pas 'dir bcom ldan 'das rnam par snang mdzad kyi gnas su bcom ldan 'das rin chen 'byung ldan la sogs pa yang de bzhin du sbyar bar bya'o/ /de ltar gsol ba gdab pas/mnyes pa de rnams gzhug pa'i srad bu la rdzi ma myur bar 'degs shing mig 'gul ba'i 'bar ba'i lta bas bkug ste/ lnga po 'di ltar gcig tu byas nas bsgril bar bya'o/ /oM AHa n+yo n+ya a nu ga ta sar+b+ba d+harmA hUM/ oM a s+pha ra s+phar a nu pra baSh+Ti sar+b+ba d+har+m+ma hUM/ oM AHA t+yan+ta a nu pra biSh+Ti sarba d+harmA hUM/ zhes brjod de/ de nas bdud rtsi thab sbyor gyi sbyor bas rdo rje dril bu thogs pa'i slob ma srad bu mtha' nas 'dzin pa dang bcas pas slob dpon rdo rje thogs la ye shes kyi srad bu g.yon pa'i khu tshur gyis bzung ste/dzaHzhes lan gsum brjod la slob ma la btang nas/ dzaHdzaHdzaHzhes brjod cing slob ma yang 'gro bar bya'o/ /slob dpon nub phyogs kyi sgor shar phyogs su bltas te 'dug la tshangs pa'i thig gdab par bya'o/ / de nas yang g.yas phyogs su bskor nas lho phyogs kyi sgor song ste byang du bltas te 'dug la/ tshangs pa'i thig gnyis gdab par bya'o/ /de bzhin du de nyid du shar lho mtshams su song ste/ byang phyogs su kha bltas te 'dug la shar phyogs kyi thig gdab par bya'o/ / de nas de bzhin du byang phyogs su song ste lho phyogs su bltas nas 'dug la nub phyogs kyi thig gdab par bya'o/ /de bzhin du de nyid shar phyogs su bltas te 'dug la/ byang phyogs kyi thig gdab par bya'o/ /de nas de bzhin du shar lho mtshams su song ste/ nub phyogs su bltas nas 'dug la lho phyogs kyi thig gdab par bya'o/ /de nas de nyid du 'dug ste nub byang phyogs su bltas la mtshams kyi thig gdab par bya'o/ /de nas de bzhin du song ste lho nub mtshams su 'dug la byang shar mtshams su bltas la mtshams kyi thig gdab par bya'o//slob ma yang bskor phyogs su song ste/ de yang der slob dpon la mngon du phyogs nas gdab par bya'o/ /'di ni ye shes kyi srad bu mngon par 'du bya ba dang gdab pa'o/ /de bzhin du tshon rtsi lnga yang bcom ldan 'das rnam par snang mdzad la sogs pa ye shes kyi tshon gang yin pa de bzhin du bkug ste/gzi byin bskyed la slob dpon nang du gnas nas shar du bltas te/ byang shar mtshams nas brtsams te/ g.yas su bskor zhing so sor tshon rtsi dgye bar bya'o/ /de'i 'og tu gzhan dag ni slob ma slob dpon bzhi dang bcas te dgye bar bya'o//nyi ma gsum pa la tshon rtsi dgye ba dang mtshan ma dgod pa la sogs pa legs par rdzogs pa dang / rdo rje hUM mdzad kyi sbyor bas zhugs la bskor ba bya ste/ bltas la ma tshang ba dang lhag ma'i nyes pa bskang ba'i phyir zhi ba'am rgyas pa'i sbyin sreg bya'o//bum pa rnams kyang 'khor lo'i phyi rol gyi mtshams su bzhag la rnam par rgyal ba'i bum pa shar phyogs kyi sgo dang nye ba'i gnas kyi cha sgo'i phyi rol du gzhag go zhes zer ro/ /la la ni lho phyogs kyi sgo'i phyi rol du gzhag go zhes zer ro//gzhan dag ni khri'i steng du rnam par rgyal ba'i bum pa bdag po'i g.yas dang bdud rtsi lnga'i snod dbus su gzhag go zhes zer ro/ /'jug par 'dod pas ku sha'i chun po dang bcas pa'i bdud rtsi thab sbyor gyi bum pa dkyil 'khor gyi khang pa'i shar gyi phyogs su gzhag cing slob dpon gyi stan yang bting la dgongs ka'i dus su dkyil 'khor bsgrubs la/bla na yod pa dang bcas pa'i mchod pas mchod la/ mgon po dngos grub thams cad kyis phyi rol 'gro ba sems can thams cad kyi don mdzod cig ces gsol ba gdab par bya'o//de nas phyir byung la 'di las bshad pa'i gtor ma cho ga bzhin du byin gyis brlabs te/ de'i 'og tu slob ma 'jug pa'i cho ga bzhin du slob dpon zhugs la so sor phyag bya ste/ dbang bskur ba la sogs pa yid kyis blangs nas rang gi bdag po'i bdag nyid kyi slob dpon du gyur pa las thams cad byed par mos par bya'o/ /'khor lo'i de kho na nyid kyang chos nyid kyi gzugs brnyan bzhin du shes par byas la/ nam mkha' las byung zhes bya ba nas dri ma med mthong shog ces bya ba'i bar du brjod par bya'o//de nas slob ma skal ba chen po'i cha lugs dang ldan pa la phyi rol du gdong g.yogs dmar pos gdong bkab ste/ thal mos me tog dkar po gcig thogs la skyes bu'i rig pas khrid la yol ba gnyis kyi bar du them pa la bzhag ste/bla mas hUM gis yol ba'i phyogs gcig bteg nas ku sha'i chun pos bsang gtor byas la sdug pa khyod su yin zhes dri bar bya'o/ /des kyang bdag ni skal ba bzang po zhes smra ba dang yang dag par mchod la dkyil 'khor gyi khang par bcug ste/oM sarba yo ga tsit+ta ut+pA da ya mi zhes bya ba dang / byang chub kyi sems dam pa bskyed la de'i snying gar sa bon las rdo rje bskyed la/ oM su ra ta sa ma ya s+t+waM/ zhes bya ba nas ma dad par mi bya'o zhes bya ba'i bar du brjod cing / dzaHhUM zhes bya ba gnyis kyis yid kyis bkug la der gzhug ste/ dkyil 'khor gyi cho gar bshad pa'i yi ge lnga po a khaM bI ra hUM zhes brjod de/ 'jug pa'i sgo'i stan gyi steng du bzhag la rnam par snang mdzad dang gshin rje gshed kyi bar du bzhag nas deng khyod ces bya ba nas dam tshig nyams par gyur ta re zhes bya ba'i bar du brjod la de'i snying gar rdo rje bzhag nas/oM rdo rje sems dpa' deng khyod kyis/ /zhes bya ba la sogs pa'i tshigs su bcad pa brjod par bya'o/ /de nas bdud rtsi lnga dung chos las mthe bo srin lag de'i khar mngon du byin la/'di ni zhes bya ba nas Tha zhes bya ba'i bar du brjod de/ 'thung du bcug la slob ma'i dam bca' ba brtan par bya ba'i phyir deng phyin chad ces bya ba nas gyur te re zhes bya ba'i bar du brjod par bya'o/ /de nas de bzhin gshegs pa thams cad kyis byin gyis rlobs la/rdo rje sems dpa' bdag la 'bab par gyur cig ces smrar bcug la slob ma rlung dang chu dang dbang chen gyi dkyil 'khor la bzhag ste/ ha a hUM zhes bya ba'i sku gsung thugs kyi snying po bkod pa dang / rkang pa gnyis kyi 'og tu dz+haiM zhes bya ba rlung dang me'i dkyil 'khor bsams la/A be sha ya nas dz+haiM zhes bya ba'i bar du dril bu dkrol zhing lan gsum brjod par bya'o/ /sgo srung gi slob ma bzhis kyang dril bu dkrol bar bya'o/ /de nas de'i lce la a dmar po dang 'od dpag tu med par bsams te babs par gyur pa dang /bru hi badzra shu b+ha a shu b+ha dri ba dang babs pa brtan par bya ba'i phyir/ tiSh+Tha badzra zhes brjod pas nye bar bsdu ba ni dbab pa'i cho ga'o/ /de nas pra tIts+tsha badzra hoH/ zhes 'don du bcug la de'i lag pa na gnas pa'i me tog dkyil 'khor du 'dor bcug nas me tog de gang gi rigs su babs par shes par bya ste/blangs nas de'i mgo la bcings la pra ti gr-ih+Na s+t+waM mi maM satwa ma hA ba la zhes brjod par byas nas rgyud gzhan las bshad pa'i phreng ba'i dbang bskur bar bya'o/ /de nas de'i mig gnyis la oM bsams la/rdo rje sems dpa' deng khyod kyi/ /zhes bya ba la sogs pa'i tshigs su bcad pa brjod de/ gdong g.yogs pa krol te dkyil 'khor gyi bdag po las brtsams te bdud rtsi thab sbyor gyi bar du brtan par bya'o/ /slob ma 'jug pa'i cho ga'o//stan de nyid la shar phyogs su kha bstan nas skyil mo krung gis 'dug tu bcug ste/ sngar bshad pa'i rnam par rgyal ba'i bum pa'i steng du mchod yon gyi snod bzhag pa'i nang du bum pa thams cad las chu nyung zad tsam zhig thug la lo ma'i chun pos blangs pa'i chu dang /slob ma bsnyen pa la sogs pa'i rim pas rang gi lhar bskyed pa'i mgo la/ oM badzra a b+hi Shiny+tsa/ zhes brjod cing dbang bskur bar bya ba'i chu'i dbang bskur ba'o/ /gos la sogs pas brgyan pa'i cod pan de'i rigs kyi gtso bos mtshan par bsams la de'i mgo la bskon la 'chad par 'gyur ba rnams so//cod pan dang dar dpyangs kyi dbang bskur ba'o/ /de'i snying gar rdo rje bzhag la des lag pa g.yas pas bzung nas sangs rgyas kun gyi zhes bya ba la sogs pa'i tshigs su bcad pa brjod par bya ba ni rdo rje'i dbang bskur ba'o//rang gi bdag po'i sbyor ba dang ldan pa las de'i snying gar rdo rje dang dril bu bzung nas lag pa g.yas pa dang g.yon gyis 'khyud cing / oM badzra ad+hi ba ti s+t+waM a b+hiShiny+tsA mi tiSh+Tha badzra sa ma ya s+t+waM/ zhes brjod par bya ste/ 'di ni bdag po'i dbang bskur ba'o//rdo rje dang dril bu dang ldan pa de'i mgo la de'i lag pa bzhag ste/ oM badzra sa twa s+t+waM/ a b+hi Shiny+tsA mi/ badzra nA ma a b+hi She ka ta kye che ge mo zhes brjod par bya ste/ 'di ni ming gi dbang bskur ba'o/ /la la dag ni me tog gang du babs pa de'i rigs dang rjes su mthun par ming gdags par bya'o zhes zer ro//de nas rang gi bdag po zhes bya ba nas dbang bskur ba yang 'di yin zhes bya ba'i bar du brjod cing chos bshad de/ dbang bskur lnga pos ni mi bskyod pa la sogs pa'i rnam par dag pa shes par bya'o//'di ni rig pa'i dbang bskur ba'o/ /dbang bskur ba de rnams kyis ni 'bras bur gyur pa'i ye shes lnga rdzogs par 'gyur te/ de bas slob ma mi phyed par gyur cing stong pa nyid kyi khams so/ /rigs kyi skye ba'i gnas su 'gyur zhing byang chub la dbang ba'i skal ba dang ldan par 'gyur ro//de nas de la rdo rje'i brtul zhugs dang lung bstan pa dang dbugs dbyung ba dag bstan par bya ste/ de la 'di ni zhes bya ba la sogs pa'i tshigs su bcad pa brjod la de'i lag tu rdo rje byin te/ oM sar+b+ba ta thA ga ta zhes bya ba la sogs pa brjod nas de'i lag pa g.yas par 'dzin du gzhug ste 'di ni rdo rje'i brtul zhugs so//de nas thog mtha' med pa'i zhes bya ba la sogs pa tshigs su bcad pa bla mas brjod la de kho na nyid kyis rdo rje gzung bar bya'o/ /de nas 'di de zhes bya ba la sogs pa'i tshigs su bcad pa brjod la lag pa g.yon par dril bu 'dzin du bcug nas/srid pa ngo bo nyid kyis dag /ces bya ba la sogs pa'i tshigs su bcad pa brjod du bcug la/ snying po bsnyen pa sogs bshad pa/ /zhes bya ba nas bsgom pas so zhes bya ba'i bar du brjod par bya'o//de ltar srid pa'i longs spyod rnam par dag pa'i thabs bstan nas de'i 'og tu phyir mi ldog pa'i dbang bskur ba mi byed na lung bstan pa dang dbugs dbyung ba dag bya ste/ 'di ni rig pa'i dbang bskur ba dang rjes su 'brel pa'i cho ga'o/ / de nas babs la slob dpon la mchod la/ bla ma la byang chub rdo rje zhes bya ba la sogs pa tshigs su bcad pa brjod par bya'o/ /de nas bla ma mgu bas sdom pa bzhi byin nas stan de nyid la snga ma bzhin du 'dug tu bcug nas/ yan lag bzhi'i cho gas rang gi sngags kyi sbyor ba bya ste/rang gi snying ga las sprul pa'i rig ma mchod pa'i lha mo rnams kyis dbang bskur ba ni rdo rje che zhes bya ba'i tshigs su bcad pa zlos pas dbang bskur bar bya'o/ /de nas dkyil 'khor la bltas te snga ma bzhin du stan la 'dug tu bcug la mi mnyam med pa zhes bya ba nas pha rol tu phyin pa la sogs pa'o zhes bya ba'i bar du bstan par bya ste 'di ni phyir mi ldog pa'i dbang bskur ba'o//gal te gsang ba dang shes rab ye shes kyi dbang bskur ba mi ster na de'i tshe 'dir lung bstan pa dang /dbugs dbyung ba byin la rjes su gnang ba byin par bya ste/ de ni bya ba'i rgyud dang spyod pa'i rgyud dang / rnal 'byor gyi rgyud la sogs pa ston pa la sogs pa la dbang bar gyur te/ 'di'i ming ni slob dpon du dbang bskur ba zhes bya'o//de nas yang dag par mchod la shes rab gtad nas/ byang chub rdo rje zhes bya ba la sogs pa'i tshigs su bcad pas bla ma la gsol ba gdab ste/ des sdom pa bzhi byin la slob ma yol bas bar du bcad par bzhag nas gsang ba'i mchod pa ni mthar yol ba'i mtha' ma bteg ste/mthe bong dang srin lag gis rdo rje bzung nas gsang ba'i dbang sbyin par bya'o/ /des kyang kye ma bde'o zhes brjod de myang bar bya'o/ /slob dpon rang nyid phyir log nas pad+ma la gnas pa rang gis myang ste/ des kyang kha yis rang gi rdo rje myang du bcug nas rang gi stan nang tshangs can la sogs pa la 'dug par bya'o/ /de nas phan yon brjod par bya ste/ zhugs par gyur pa'i slob ma la/ /'di ni rdo rje can kun gyis/ /zhes bya ba la sogs pa brjod par bya'o/ /la la dag ni yang de bzhin du gsol ba gdab par bya'o zhes zer ro//de nas mdun du 'dug pa de dag gi lag pa g.yas pa g.yon pa'i steng du bzhag ste/ mngon sum du shes rab yan lag 'dus zhes bya ba la sogs pa nas khongs su gtogs par bsams zhes bya ba'i bar du brjod par bya'o//yol ba'i nang du bsangs te 'dug nas gsang ba'i mchod pa la gnas pa'i slob ma la bltas te/ gal te rnam par snang mdzad kyi rnal 'byor pa'am/ de'i rigs kyi rnal 'byor pa yin na de'i tshe rnam par snang mdzad kyi rnal 'byor byas la rang gi snying ga nas rnam par snang mdzad spro ba ni/rig ma la 'khyud pa'i lus bde ba chen po'i cha byad du byas la/ rdo rje dang pad+ma dag las bdud rtsi'i chu rgyun 'bab par bsams la 'bab pa de nyid bcom ldan 'das kyis zla ba'i kha dog dang ldan pas de la dbang bskur bar bsams nas/rnam par snang mdzad slob ma de nyid la thim par byas la mar gyi bum pa bzhin du zhugs par sems kyis bsam par bya'o/ /yang na rigs gzhan gyi rnal 'byor pa yin na de'i tshe de'i rigs kyi lha spros te/ de'i rigs kyi mdog dang ldan pa'i bdud rtsi'i rgyun gyis dbang bskur ba de bzhin du bsam par bya zhing /gti mug ces bya ba nas rang nyid gyur ces bya ba'i bar du brjod par bya'o/ /mthar bla ma yol ba nas byung ste/ rang gi stan la 'dug pa de dag mdun na tsog tsog por 'dug pa la/ de dag gi rig ma'i lag pa g.yon pa slob ma'i lag pa g.yas par bzhag pa bzung nas rang gi lag pa g.yas pa slob ma'i mgo bor bzhag nas/thabs gzhan gyis ni zhes bya ba nas mchog ma yin zhes bya ba'i bar dang / byang chub spyod pa gzhan zhes bya ba nas thob mi 'gyur zhes bya ba'i bar du brjod do/ /de nas slob dpon de lha las babs pa'i phyag rgya dang ldan pas 'di nyid ces bya ba nas/bde bar gshegs zhes bya ba'i bar du brjod par bya'o/ /rjes su gnang ba yang byin nas ji lta ji lta zhes bya ba nas/ byang chub mchog tu 'gyur zhes bya ba'i bar du brjod la/ dbugs dbyung ba'i phyir mthong ba dang ni zhugs pa zhes bya ba la sogs pa nas 'gyur zhes bya ba'i bar du brjod par bya'o//gzhan dag ni phyag rgya byin gyis brlabs zhes bya ba la sogs pa yang 'dir brjod par bya'o zhes zer ro/ /de nas slob mas bla ma'i zhabs gnyis la phyag byas te 'di skad ces brjod par bya ste/gtso bos ji ltar bka' stsal pa/ /de bzhin du ni bgyid par 'tshal/ /zhes brjod par bya'o/ /phyag 'tshal ba dang legs par gnas so/ /zhes bkra shis pa'i tshig kyang brjod par bya'o/ /de nas 'di la gsang ba'i gnas bslab par bya'o//hUM badzra kri ta b+hu me hUM zhes bya bas rdo rje ra ba dang gur gyi phyi rol tu dbang chen la sogs pa'i dkyil 'khor bzhi ni bsrung ba yin par la la dag 'dod de/ sa bon laM ser po las sa'i dkyil 'khor zur bzhi pa mtshams su rdo rje rtse gsum pas mtshan ma dang /yaM sngon po las byung ba'i rlung gi dkyil 'khor gzhu lta bu ba dan gyis mtshan pa dang / de'i phyi rim du chu'i dkyil 'khor bsam par bya ste/ sa bon baM las byung ba mdog dkar po dang / de'i phyi rim du sa bon raM las byung ba'i me'i dkyil 'khor dmar po bsam mo//mchog tu bsam pa ni nam mkha' la nyi ma'i dkyil 'khor la gnas pa'i yi ge b+h+rUM 'od zer ser po dang ldan pa bsams nas/ b+h+rUM las byung ba'i 'khor lo mdog ser po rtsibs bcu pa bsams la/ de'i dbus su dpal rdo rje hUM mdzad bsams te/des lha chen po dang u ma mnan par bsam mo/ /de yang / g.yas na rdo rje ral gri ste/ /g.yon na zhags pa lcags kyu bsnams/ /sgeg pa khro bo'i gzugs 'chang zhing / /khams gsum dag ni 'dul bar brtson/ /gshin rje gshed sogs khro bo rnams//mkhas pas phyogs kyi rtsibs la bsam/ /'dod rgyal dbyig sngon stobs mi g.yo/ /shar lho mtshams sogs rtsibs la bsams/ /gtsug tor 'khor los sgyur ba ste/ /gnod mdzes 'og ste rim bzhin bsam/ /zhes bshad pa yin no/ /de la khro bo bcu'i sa bon ni yi ge hUM ste gzhan gtsug tor 'khor los sgyur ba'i sa bon ni yi ge b+h+rUM mo//gzhan dag ni praM dang hUM dag gzhan gyis mi thub pa dang / stobs po che'i sa bon yin par 'dod do/ /'dod pa'i rgyal po gnod mdzes dang / /mi g.yo gtsug tor 'khor los sgyur/ /'khor lo'i gtso bo dang bcas pa//ag tshom med par rin chen gcod/ /gzhan dag de las bzlog pa'o/ /kun kyang nyi ma'i dkyil 'khor la/ /g.yon brkyang nas ni bzhugs pa'o/ /nyi ma'i 'od dang ldan pa la/ /rang snang rig pa'i bde myong dang / /ldan pa 'khyud pa yi ni lus/ /khro bo chen po pad+ma mthar byed kyi zhal dang po dang /sku mdog dmar po zhal g.yas nag po g.yon dkar po'o/ /gtsug tor 'khor los sgyur ba'i zhal dang po dang sku mdog ser po zhal g.yas sngon po g.yon dkar po'o/ /shes rab mthar byed kyi zhal dang po dang / sku mdog dkar po la zhal g.yas sngon po/g.yon dmar po'o/ /gang gzhan sku mdog sngon por bzhugs pa de dag gi zhal g.yas dkar po g.yon dmar po ste/ zhal dang po sku'i mdog dang mthun no/ /thams cad kyi cod pan la ni mi bskyod pa bzhugs pa/ gshin rje gshed kyi cod pan la rnam par snang mdzad/pad+ma mthar byed kyi cod pan la 'od dpag tu med pa bzhugs pa'o/ /thams cad kyi yang phyag g.yas na ral gri/ phyag g.yon gnyis na rin po che dang pad+ma/ pad+ma mthar byed kyi phyag g.yas gnyis na pad+ma dang ral gri/ g.yon gnyis na 'khor lo dang rin po che bsnams pa'o//rtsibs bcu la gnas pa'i khro bo bcu po rnams kyi phyag g.yas kyi dang po ni rtsa ba'i phyag mtshan thob dang / lcags kyu dang dbyig pa dang / dbyug pa sngon po dang / pad+ma dang rtse gsum pa dang / rdo rje dang / ral gri dang / 'khor lo ser po dang / rdo rje bsnams pa'o/ /gshin rje gshed la sogs pa shar la sogs pa'i rtsibs la ji lta ba bzhin du bsam par bya'o/ /khro bo mi g.yo ba'i khyad par bshad par bya ste/ phyag g.yas na rdo rje dang ral gri 'dzin pa/ g.yon na 'khor lo dang zhags pa bsnams pa/spyan yo ba byis pa'i rgyan gyis brgyan pa bsam par bya'o/ /spyan yo rdo rje 'dzin pa ni/ /mi g.yo byis pa'i rgyan gyis brgyan/ /zhes bya ba yin no/ /'di'i mtshon cha gtso bo ni rdo rjer kha cig 'dod do/ /mi g.yo ba'i mtshon cha'i gtso bo ni ral gri yin par kha cig 'dod do//'og gi cha'i 'khor lo'i rtsibs la gnod mdzes rgyal po phyag g.yas na rdo rje nag po bsnams pa'o/ /steng gi rtsibs la bzhugs pa'i gtsug tor 'khor los sgyur ba'i phyag g.yas na 'khor lo rtsibs brgyad pa bsnams pa 'od kyi 'khor lo can bsam par bya'o//khro bo 'jigs phyag ldan pas khyab/ /'bar ba'i phreng bas 'khrug pa'i 'od/ /mi 'gyur lta bu'i shugs kyis ni/ /g.yas phyogs bskor bas 'khor bar 'gyur/ /phyogs bcur gnas pa'i khro bo ni//stobs chen pha rol gnon pa ste/ /de rnams g.yo ba med pa ni/ /shes rab thabs kyi bde ba'i bdag /bsrung phyir rnal 'byor pas brtags bsam/ /theg pa dman par lhung rnams la/ /srung ba'i don du 'khor lo dang / /lte nang khong stong gnas pa yang //rdo rje hUM mdzad snying dbus su/ /chos kyi 'byung gnas phyag rgya der/ /gzhal yas khang sogs bsgom par bya/ /'khor lo ser po rtsibs bcu la/ /de yi dbus su bsgom par bya/ /zhes le'u bco brgyad pa las brjod pa'i dbus kyi sgra'i dgos pa ni 'dis bshad par 'gyur ro//de bzhin gang tshe des 'khor lo/ /dbus su gtsug tor gyis brgyan na/ /steng gi rtsibs la hUM mdzad de/ /g.yon du 'khor bar bsam par bya/ /mchod pa la sogs sngon byas nas/ /mtshan mo dag ni lan gsum zhig /gsang sngags brjod de mchod byas nas/ /phyir zlog zhes byar gyur pa yin/ oM aHuSh+NI Sha badzra tsakra brti/ sarba lo kot+ta rA man+t+ra tan+t+ra/ tsur+Na pra yo gi nI sarba bi Sha bi tsur+Na ya/ ma ma kr-i ta ye na ke na tsita/ kr-i te ni ka ri Ni pa tA ni sar+b+ba ni/ tshin+da tshin+da/ b+hin+da b+hin+da/ kaM pa kaM pa/ ha na ha na/ da ha da ha/ pa tsa pa tsa/ bi d+h+wa n+sa ya/ bi d+h+wa n+sa ya/ sha ta sa ha sra/ bi tsur+Na ya pi tsur+Na ya/ uSh+NI Sha badzra tsakra brti/ b+h+rUM b+h+rUM b+h+rUM/ hUM hUM hUM/ zhes nyin mo dang mtshan mo lan gsum brjod nas/ rnal 'byor pa'am 'ga' zhig gnod pa bya bar rtsom pa de nyid la de thams cad dbab par 'gyur ro//phyir bzlog pa'o/ /gro ga la sogs pa la 'khor lo gnyis bris te zhes bya ba la sogs pa'i don ni 'di yin te/ rnam par snang mdzad kyi sbyor ba ji lta ba dang ldan pas gro ga'am dar la sogs pa la skyes pa bsrung ba'i phyir gur gum/bud med bsrung ba'i phyir ni gi wang gis dkyil 'khor zur bzhi pa/ sgo bzhi pa rta babs bzhi dang ldan pa bris pa de'i nang du sna tshogs rdo rje rtse mo bcu gnyis pa'i lte ba la 'khor lo rtsibs brgyad pa de'i lte ba la gsum/ steng du zla ba phyed pa la thig les brgyan pa/ la la nas drug par 'gyur ba'i sa bon ni ha zhes bya ba'i don te/ de'i nang du oM AHdzin dzika che ge mo shAn+tiM ku ru hUM zhes bya ba bri'o/ /shar la sogs pa'i phyogs kyi rtsibs kyi dbus su ni mi bskyod pa la sogs pa phyung ba'i sngags bri bar bya'o//me la sogs pa mtshams kyi rtsibs la ni spyan la sogs pa phyung ba'i sngags bri'o/ /'khor lo'i mu khyud la ni oM aHoM hU lu hu lu/ tiSh+Tha tiSh+Tha/ che ge mo'i u pa dra ba di kaM ban+d+ha ban+d+ha/ ha na ha na/ da ha da ha/ a mr-i te hUM phaT ces bya ba mgo nang du bstan la g.yas phyogs su bskor nas 'khor bar bri'o//shar la sogs pa'i sgo bzhir ni/ gshin rje gshed la sogs pa phyung ba'i sngags bri'o/ /gzugs rdo rje la sogs pa lha mo drug gi gnas su ni oM AHhUM zhes bya ba'i yi ge gsum mam/ rang rang gi sa bon dang bcas pa ste/oM dzaHhUM zhes bya ba la sogs pa'o/ /dar la sogs pa de rim pa brgyad la sogs par lte ba la sbu gu la dkris nas srad bus dkris te/ rgya skyegs la sogs pas byugs la/ rab tu gnas par byas nas dpung pa'am mgul du gdags par bya'o/ /de nas ting nge 'dzin gsum dang ldan pa'i slob dpon gyis rang gi 'dod pa'i lha'i thugs kar bshad ma thag pa'i gzhal yas khang gi nang du chud pa'i 'khor lo der gnas ji lta bar bcom ldan 'das rnam par snang mdzad la sogs pa'i lha bcu dgu'i ngo bo nyid kyi sngags dang ldan pa/mu khyud la bkod pa'i yi ge re re'i 'od las byung ba'i 'phags pa bdud rtsi 'khyil pa'i tshogs rnams kyis rnam par 'tshe ba thams cad rnam par 'jigs shing de'i lte ba'i rang gi ming gi yi ge dang po las byung ba'i bsgrub par bya ba bsams nas/de'i shes pa bkug ste gcig tu byas nas yi ge haM gi cho gas go bskon pa'i lus la bcom ldan 'das rnam par snang mdzad 'byin pa'i sngags kyi phreng ba las bdud rtsi'i rgyun 'dzag pas lus khyab par bsams la/'od kyi sgo las byung ba'i lha sku mdog dkar po dang ldan pa'i lha'i tshogs bum pa dkar po las bdud rtsis dbang bskur ro//yang na yang dag par sbyor ba las byung ba'i byang chub kyi sems kyis sam/ yang na zhu bar gyur nas bdag nyid la zhugs pa'i dbang bskur bas dbang bskur ba dang / nyes pa thams cad dang bral bar bsams la yang dang yang du gsang sngags bzlas brjod byas nas bla na yod pa dang bcas pa'i mchod pa byas la/lha'i mchod pa'i gnas su kha sbyar la gzhag pa'am/ mgul la sogs par gdags par bya ste/ de de nas zhi bar 'gyur ba ni zhi ba'i las yin la las thams cad ni 'di nang du 'dus pa yin te mngon par 'dod pa ma yin pa'i nyes pa thams cad zhi bar byed pa'i phyir zhi ba'i bsrung ba'o//rig pa'i don du ni phyir bzlog pa'i 'khor ba'o/ /gang zhig dkon mchog gsum gnod byed/ /mi gang slob dpon la 'khu dang / /pha dang ma ni gnod byed dang / / de bzhin gzhan yang rtag gsod pa/ /de la rnal dbang mgon pos ni/ /brtse bas gzhan dbang 'gyur sems kyis/ /sbyin dang brjod pas las de las/ /bzlog par bya zhing gsol ba gdab/ /gal te rmongs pa mi ldog na/ /de tshe las 'di brtsam par bya/ /kha sbyor dbye ba bshad par bya ste/thun mtshams dang po'i mthar rang gi lha'i sbyor ba rang gi phyag rgya legs par bslabs pa dang lhan cig skad cig gis byas la ye shes sems dpa'i thugs ka'i sa bon las sangs rgyas thams cad kyi tshogs spros la 'od zer de nyid las bsgrub bya spros te/rang gi mdun du yang spros pa'i sangs rgyas kyi sku dang / phyogs bcur gnas pa'i sems can thams cad kyi tshogs bsgrub par bya ba des mtshon cha sna tshogs kyis dum bu brgyar byas shing phye mar byas pa dang khros pa'i sems dang ngag rtsub pos kyang gnod pa byas par bsams la sems can gdug pa de nga ni sangs rgyas gsod pa'o zhes 'gyod pa skyes shing dmyal ba'i 'jigs pas skrag cing skyabs med par bltas nas de gnon par bya ba'i don du snying rje chen pos khro ba bskyed la/de las gang byas pa rang gi bdag po la gsang bar gsol lo//de nas bdag po de dkyil 'khor dang bcas pa sngon por gyur pa la/ mchod pa dang bstod pa dang bdud rtsi myang bar byas nas las yang dag par brtsam par bya ste/ rang gi ye shes sems dpa'i thugs ka'i mtshan ma la gnas pa'i snying po'i 'od zer gyis gtso bo drangs la/rdo rje'i lam nas zhu bar gyur pas chu skyes su gnod mdzes lta bur byung bar bsam mo/ /la la dag ni 'di'i phyag na lcags kyu dang / ral gri dang / rin po che dang / zhags pa bsnams pa'o zhes zer ro/ /gzhan dag ni gnod mdzes zhes bya ba'i sgra rdo rje hUM mdzad la bya'o zhes zer ro//des bsgrub par bya ba'i bsrung ba phrogs par blo dang ldan pas bsam par bya'o/ /steng 'og gi char yang hUM dang baM las byung ba'i kha sbyor rim pa bzhin du mgo dang rkang pa la gnas pa'i phyi'i bsrung ba'i kha sbyor dang mgor gnas pa'i dbyangs kyi yi ge tha ma las byung ba'i sna tshogs rdo rje hUM gis byin gyis brlabs pa drangs te/gnod mdzes nyid kyis sgrub pa po'i g.yon phyogs su bzhag la/ de nas yang bsgrub par bya ba'i rdo rje'i lam nas de bcug nas/ snying gar gnas pa'i mi bskyod pa'i ye shes sems dpa'i mdun phyogs na gnas pa'i dpal ldan gnod mdzes kyis ye shes sems dpa' la rigs pa mang pos gsol ba gdab ste/gang zhig las ni 'di lta bu/ /gnas gyur rnam pa thams cad du/ /phyis legs 'gyur phyir spang du gsol//'di ni ma dad par smra ba/ slob dpon la smod pa/ sangs rgyas mang po gsod par byed pa lags kyis/ 'di la byin gyis rlob pa dang bsrung ba spang du gsol/ de lta ma yin na khyed rnams ni brdzun du smra ba dang / rang gis gsungs pa'i dam tshig las 'das pa yin no//des na nged kyis ni 'di'i lus btang gis ji ltar 'dod pa bzhin du gyis shig ces gsungs shing zhal gyis bzhes te/ ye shes sems dpa' dgyes na ni/ /bsgrub par bya ba'i lus las gshegs/ /gnod mdzes skad cig de nyid la/kha sbyar 'byed cing gsod par byed/ /ji lta bu'i kha sbyar bkug nas khyer te 'ongs pa de lta bu bshad par bya ste/ rdo rje'i kha sbyar dang / ral gri'i kha sbyar dang / pad+ma'i kha sbyar dang / nor bu'i kha sbyar dang / 'khor lo'i kha sbyar rim pa ji lta ba bzhin du steng 'og gi char kha sbyar gyi dbus su gnas pa'i ye shes sems dpa' dang lhan cig bkug la g.yon phyogs su gtad nas/de nyid du rang gi lha mo'i pad+ma la bsrung ba dang / 'khrul 'khor dang / sngags dang / yams dang / 'tshe ba la sogs pa byed pa zhu bar gyur nas/rdo rje'i lam nas bgegs mthar byed kyi phur bu'i gzugs kyis gtso bo'i sa bon gyis drangs la lag pa g.yon pas mgul nas bzung ba'i phur bu 'debs byed kyi lag pa g.yas na gnas pa'i rdo rje tho bas brdungs nas de'i sngags gsal por brjod cing thams cad spangs par bsams la/phur bus gdab par bya'o/ /de'i sngags ni oM g+ha g+ha zhes bya ba la sogs pa yin no/ /des na lus la til mar gyis bskus pa/ gos med pa/ skyabs med pa/ 'jigs pas nyen pa/ skra grol ba/ nus pa dang bral ba/me'i dkyil 'khor gyi mdun na gnas pa/ bsrung ba thams cad spangs par bsams la/ ye shes sems dpa'i thugs ka'i snying po'i 'od kyis sangs rgyas kyi sprin gyi tshogs bkug la rang gi lus la gzhug par bya'o/ /de nas de zhi ba'i tshul las khro bo'i nyams dang cha lugs su bsgyur te/shin tu tsha ba'i til mar gyi nang du chu bsil bzhugs pa bzhin du yongs su gyur cing / shin tu 'bar ba khro bas 'khrugs par rnam par 'gyur zhing / gtsigs pa 'jigs su rung ba/ rdo rje la sogs pa'i mtshon cha sna tshogs pa bsnams pa spros te/de rnams kyis gtubs pa dang / ce spyang la sogs pas zos pa dang / nad kyis gdungs shing phye mar byas nas bsad par bsams la/ 'khrul 'khor dang sngags la sogs pas bya'o/ /de ltar bsgrub par bya ba bsad nas/ bsam gtan dang sngags la sogs pa'i las kyis zhu ba'i dngos por gyur pa dang /lha mo thams cad kyis yongs su bskul la/ de'i tshe hUM las byung ba'i rdo rje hUM gis mtshan pas mi bskyod rdo rje'am/ gzhan dag tu sngags pas bya'o/ /de nas oM AHbadzra kI li kI la ya hUM zhes brjod de phur bu gdab par bya'o//de nas rang rang gi sa bon gyi lcags kyus drangs pa'i spyan la sogs pa'i rig ma rnams kyis ye shes rdo rje can la dbang bskur zhing rig pa de nyid du zhugs par bsam par bya'o/ /de nas ye shes rdo rje can de nyid kyi snying gar bzhag ste/ yang de bzhin du dbang bskur la/de zhu bar gyur nas zhugs pa dang / de mi bskyod pa'i bdag nyid du bya ste/ mchod cing bstod pa dang bdud rtsi myang ba la sogs pa bya'o/ /yang dag gsungs pas ji skad du/ /bshad pa'i cho ga 'di yis ni/ /mi bskyod rdo rje sangs rgyas kyi/ / zhing du sdig can khrid 'gyur te/ /rmongs pa 'di yis 'chi ba ni/ /phyin ci log tu btags par zad/ /chags dang zhe sdang gti mug gis/ /gang gis log par bzung gyur nas/ /'gro ba rnams ni gsod byas na/ /'og tu bltas te mnar med skye/ /gal te sems can gdug pa'i 'dod pa'i lha shes na de'i tshe de lta bu'i sems dpa'i hUM la sogs pa las byung ba rdo rje la sogs pa'i kha sbyor gyi nang na gnas pa'i rim gyis rang gi rigs dang rjes su mthun pa'i mtshan ma'i kha sbyar phyi rol na gnas pa mchog tu kha sbyar byas par 'gyur ro// gal te de'i lhag pa'i lha ma shes na de'i tshe mi bskyod pa'i gzugs su blta bar bya'o/ /gzhung gzhan dag ni rang gi mtshan ma gcig gi nang du chud pa'i ye shes sems dpa'o zhes 'dod do/ /bsgrub par bya ba la las 'di byas nas dge ba'i bshes gnyen mnyes par byas nas sdig pa sbyang ba'i thabs nyams su ma blangs na 'chi ba'i 'og tu ngan 'gror skye bar 'gyur te/gang zhig mngon par shes pa thob cing / shin tu shes pa dag gis mngon spyod kyi las bya bar bcom ldan 'das kyis rjes su gnang ba yin no/ /de yang /gang gis thog mtha' dbus dag tu/ /snying rje nyams par ma gyur cing / /gang gis snying rje sngon byas la/ /de yis bya yi gzhan gyis min/ /de la dang po kho nar sngags pas bza' ba dang / bca' ba dang / gzhib pa dang / bldag pa la sogs pa rnam pa mang po sna tshogs pa dang ldan pa dang /dri dang / phreng ba dang / byug pa dang / phye ma dang / gos dang / gdugs dang / rgyal mtshan dang / ba dan dang / dril bu la sogs pa yongs su rdzogs pa dang / rol mo'i sgra chen po rnam pa lnga bzhag la/ gtor ma mdun du gzhag pa ni shing rta'am tsel po'am khur bu gzhag pa'am tha na snyim pa gsum yan chad ci 'byor pa'am ma 'byor na thams cad yid kyis bskyed la gtor ma la bltas te skad cig ma rang gi lha sku mdog nag po dang ldan pas ye shes sems dpa'i thugs ka'i snying po'i 'od zer gyis 'jig rten skyong ba thams cad bkug la rang rang gi gzugs kyis rang rang gi phyogs su bzhag ste/rang gi snying ga'i 'od zer las byung ba'i phur bu bcu'i steng du rang gi phyogs kyi khro bo dbyibs su gnas pa la lte ba man chad rdo rje rtse gcig pa lta bu shes rab dam pa la 'khyud pa/srung ba'i 'khor lor bshad pa'i mtshon bya la sogs pa dang ldan pa spro bar bya'o/ /spros nas rang gi lhag pa'i lha mchog khros nas g.yas na rdo rje tho ba bsnams pa/ g.yon pas phur bu'i mgul nas bzung ste spyi bo nas brdungs shing spyi bo nas rkang pa'i mthar thug pa'i bar du phyogs skyong rnams la phur bu gdab par bya'o//gsang sngags 'di yang bsgyings pa dang bcas pas gdon par bya ste/ oM AHya mAn+ta kr-ita sarba duSh+Ta in+d+ro piN+DAn sa pa ri bA ra Na kI la ya hUM phaT/ oM AHpradz+nyAn+ta kr-ita sarba duSh+Ta ya mAn sa pa ri bA rAn kI la ya hUM phaT/oM AHpad+mAn+ta kr-ita sarba duSh+Ta nA gAn sa pa ri bA rAn kI la ya hUM phaT/ oM AHbig+h+nAM ta kr-ita sarba duSh+Ta ga na pa ti ku be rA Na sa pa ri bA rA na kI la ya hUM phaT/ oM AHhUM Tak+kI rA dzAn sarba duSh+Ta ag+ni na sa pa ri bA rAn kI la ya hUM phaT/oM AHhUM nI la daN+Da sarba duSh+Ta nai r+r-i t+ya na sa pa ri bA rAn kI la ya hUM phaT/ oM AHhUM ma hA ba la sarba duSh+Ta ba yu na sa pa ri bA rAn kI la ya hUM phaT/ oM AHhUM a tsa la sarba duSh+Ta I sha nA na sa pa ri bA rAn kI la ya hUM phaT/ oM AHbruM tsakra sarba duSh+Ta tsan+d+ra arka pa ti ma hA na sa pa ri bA rAn kI la ya hUM phaT/oM AHhUM suM b+ha sarba duSh+Ta be ma tsi tra pr-i th+wi de ba tAn sa pa ri bA rA na kI la ya hUM phaT/ de ltar phur bu btab pa'i rjes thogs la gsang ba 'dus pa'i lha'i rnam par gyur to/ /de nas 'di rnams kyi mtshan ma la sogs pa bshad par bya ste/rdo rje mtshon cha ni lus dang gdong dang po ser po/ g.yas nag po/ g.yon dkar po/ lag pa g.yas gnyis na rdo rje dang ral gri thogs pa/ g.yon gnyis na rin po che dang pad+ma thogs pa/ zla ba'i steng na 'dug pa/ rin po che'i cod pan gyi steng du mi bskyod pas mtshan pa/mig stong dang ldan pa shar du gnas par bsam par bya'o/ /de dang ha cang mi ring ba'i g.yon logs su rdo rje sgyu ma sngon po/ gdong g.yas dkar po/ g.yon dmar po/ lag pa g.yas gnyis na 'khor lo dang ral gri thogs pa/ g.yon gnyis na dung dang pad+ma thogs pa/nyi ma'i stan la gnas pa/ nyi ma'i 'od yod pa/ mi bskyod pa'i cod pan can no/ /me'i phyogs su rdo rje sngon po me/ gdong dang po dang lus mdog dmar po/ gdong g.yas sngon po/ g.yon dkar po/ lag pa g.yas gnyis na bgrang phreng dang mi 'jigs pa ste/ lag pa g.yon gnyis na dbyig pa dang gun+d+he thogs pa mig dmar ba/nyi ma'i stan la 'dug pa/ nyi ma'i 'od yod pa/ mi bskyod pa'i cod pan can no/ /bden bral gyi phyogs su rdo rje gtun shing mdog nag po/ gdong g.yas dkar po/ g.yon dmar po/ lag pa g.yas gnyis na gri gug dang ral gri thogs pa/g.yon gnyis na rin po che dang khrag gis bkang ba'i thod pa thogs pa/ skra kham pa gyen du brdzes pa/ ag tshom gyi phreng bas rnam par mdzes pa/ nyi ma'i stan la g.yon brkyang bas gnas pa/ mi bskyod pa'i cod pan can no//nub phyogs su rdo rje sku mdog dkar po/ gdong g.yas sngon po/ g.yon dmar po/ lag pa gnyis na sbrul gyi zhags pa dang ral gri thogs pa/ g.yon gnyis na rin po che dang pad+ma thogs pa/ zla ba'i steng dang pad+ma'i 'od yod pa 'od dpag med kyi cod pan can no//rlung gi phyogs su rdo rje rlung mdog ljang gu gdong g.yas sngon po/ g.yon dmar po/ lag pa g.yas gnyis na gos dang ral gri thogs pa/ g.yon gnyis na rin po che dang pad+ma thogs pa/ zla ba'i stan dang zla ba'i 'od yod pa/ don yod grub pa'i cod pan can no/ /de dang ha cang mi ring ba'i g.yon logs su rdo rje sna mdog dkar po/gdong g.yas sngon po/ g.yon dmar po/ lag pa g.yas gnyis na la du dang ral gri thogs pa/ g.yon gnyis na rin po che dang chang gis bkang ba'i kham phor thogs pa/ zla ba'i stan la 'dug cing nyi ma'i 'od yod pa/mi bskyod pa'i cod pan can no/ /byang phyogs su rdo rje 'jigs byed mdog ser po/ gdong g.yas nag po/ g.yon dkar po/ lag pa g.yas gnyis na bi dza pU ra dang ral gri thogs pa/ g.yon gnyis na pad+ma dang ne'u le thogs pa/ nyi ma'i stan la 'dug cing nyi ma'i 'od yod pa/mi bskyod pa'i cod pan can no/ /dbang ldan gyi phyogs su rdo rje khro bo mdog dkar po/ gdong g.yas sngon po/ g.yon dmar po/ lag pa g.yas gnyis na rtse gsum dang ral gri thogs pa/ g.yon gnyis na rin po che dang pad+ma bsnams pa/mi'i rus pa'i rgyan can zla ba'i stan la 'dug cing zla ba'i 'od dang rgyan yod pa 'od dpag tu med pa'i cod pan can no/ /steng gi phyogs kyi cha la rdo rje 'od mdog dkar po/ gdong g.yas sngon po/ g.yon dmar po/ lag pa g.yas gnyis na pad+ma dmar po dang ral gri thogs pa/g.yon gnyis na rin po che dang 'khor lo thogs pa/ zla ba'i stan la 'dug cing zla ba'i 'od yod pa mi bskyod pa'i cod pan can no/ /de nyid kyi g.yon logs su rdo rje 'khyil pa mdog dmar po/ gdong g.yas sngon po/ g.yon dkar po/ lag pa g.yas gnyis na pad+ma dmar po dang ral gri thogs pa/g.yon gnyis na rin po che dang 'khor lo thogs pa/ nyi ma'i stan la 'dug cing nyi ma'i 'od yod pa/ rin chen 'byung ldan gyi cod pan can no/ /'di nyid kyi g.yon logs su rdo rje mi smra ba mdog ser po/ /gdong g.yas nag po/ g.yon dkar po/lag pa g.yas gnyis na pad+ma ser po dang / ral gri thogs pa/ g.yon gnyis na rin po che dang 'khor lo thogs pa/ zla ba'i gdan la 'dug cing zla ba'i 'od yod pa/ rnam par snang mdzad kyi cod pan can no/ /'og tu thags bzangs ris mdog sngon po/ gdong g.yas dkar po/ g.yon dmar po/ lag pa g.yas gnyis na rdo rje dang 'khor lo thogs pa/ g.yon gnyis na rin po che dang pad+ma thogs pa/ nyi ma'i gdan la 'dug cing nyi ma'i 'od yod pa mi bskyod pa'i cod pan can no/ /de'i g.yon logs su sa'i lha mo mdog ser ba/ gdong g.yas sngo ba/ g.yon dkar ba/lag pa dang po gnyis kyis rang snang ba la 'khyud pa lhur byed pa/ g.yas gnyis na pad+ma ser po dang / ral gri thogs pa/ g.yon gnyis na rin po che dang 'khor lo thogs pa/ zla ba'i gdan la 'dug cing zla ba'i 'od yod pa/ rnam par snang mdzad kyi cod pan can no/ /'di dag thams cad kyang sna tshogs pad+ma'i steng na rdo rje skyil krung gis bzhugs pa/lag pa dang po gnyis kyis rang snang la 'khyud pa'i rin po che'i cod pan can no/ /rgyan thams cad kyis brgyan pa dang lha'i gos dang phreng ba dang / byug pa dang ldan pa/ mtshan dang dpe byad nye bar 'bar ba/ phyag rgya bzhis rgyas btab pa ste/de lta bur gyur pa bde bar gshegs pa dang 'dra bar bsams la/ 'dod pa'i lha sku mdog sngon po yongs su gyur te/ lhan cig skyes pa'i mdog dang ldan pa'i 'dod pa'i lha'i dkyil 'khor gyi 'khor lo mchod par bshad pa'i cho gas shes rab kyi ba spu re re nas byung ba/ 'od zer sna tshogs rgya chen po 'thon pa las byung ba'i gzugs rdo rje la sogs pa'i lha mo rnams dang de bzhin du phyi'i dri la sogs pa thams cad kyis kyang mchod la/sngar yang dag par brtags pa'i gtor ma bdud rtsi lnga dang ldan pa la gtor ma'i sngags mngon par bzlas pas tshim par bya zhing /mi bskyod pa ni ye shes che/ /zhes bya ba'i tshigs su bcad pas bstod la/ dga' zhing mgu nas mngon par 'dod pa'i dngos grub ster bar brtson pa rnams la gsol ba btab nas bzod pa gsol te sngags 'dis gshegs su gsol bar bya ste/ oM AHoM a kA ro mu khaM sarba d+har+m+mA NAM A d+ya nu t+pan+na twAta hUM muHzhes pas so//tshon dang lha rnams kyi mtshan ma dang / snying po la sogs pa 'di nyid kyis gshegs su gsol bar bya'o/ /oM AHsarba trai d+h+wa dza da sha di ka lo ka d+hA tu A nan+ta ga ga na/ sa mu dra me g+ha byU ha pra sa ra pa ra mA nu dzo maN+Dal/ pa raM pa ra an+targa ta sa ma pat+t+yA ba s+thI tAH/d+hArma d+hA tu saM ba sa ra A kA sha d+hA tu par+ya bA sa na/ sarba t+r+ya d+h+wa dza da sha dika lo ka d+hA tu A nan+ta ga ga na/ sa mu dra me g+ha na byU ha pra sa ra ga ga na sa mA/ sarba lo ka pA la sarba satwAsh+tsa/ tad+ya thA/ badzrA yu d+ha/ mA ya badzra badzrA na la/ badzra kA la/ badzra mu Sha la/ nA ga badzra/ badzrA nI la/ badzra shoN+Da/ badzra b+hai ra ba/ badzra kro d+hA/ badzra pra b+hA/ badzra kuN+Da li/ mU na badzra/ bi ma tsi tra/ pr-i th+wI de ba tA/ sa pa ri bA ra i dan/ puSh+pa/ d+hU pa/ dI pa/ gan+d+ha/ nai bi d+yA di saM yu k+taM/ ba liM u pa ha raM pra tIts+tsha/ u pa b+hu dz+ya ma ma sarba satwA nAny+tsa/ hi ra N+ya su bar+Na/ d+ha na d+hA n+ya/ A yuHyo ba na a ro gya/ sat+su kha A pa ha ra kAn sarba big+h+nAM bi nA ya kAn/sarba duSh+DAn pra duSh+TAn/ ma nuSh+ya a ma nuSh+yA na/ dzaM b+ha ya staM b+ha ya/ ban+d+ha ya/ bid+h+wan+sA ya ma ma hi ra N+ya su bar+Na/ d+ha na d+hA n+ya/ A yuHyo ba na/ a ro gya/ sat+su khA ni ma hA su khA ni/ pra br-id+d+ha ye/ yA ba da A bo d+hi maN+Da paR+Yan+taM/ D+hau ka ya t+ya ma ta sa ha yi twaM/ shAn+tiM rak+ShAny+tsa ku ru hUM/ oM AHoM a kA ro mu khaM sarba d+har+m+mA NAM A d+ya nut+pa n+na twAta hUM phaT swA hA hUM/dkyil 'khor gyi khang pa'i phyi rol du phyogs dang mtshams rnams su maN+Dal zlum po bya'o/ /dbang ldan dang dbang po'i maN+Dal gyi bar du zla ba dang nyi ma dang / tshangs pa chen po'i maN+Dal gcig bya'o/ /de bzhin du srin po dang / chu lha'i maN+Dal gyi dbus su thags bzangs ris dang /sa yi lha mo'i maN+Dal gcig bya'o/ /der rdo rje mtshon cha la sogs pa la sngags kyis mngon par bsngags te/ gtor ma dang / dri dang / me tog dang / bdug pa dang / mar me dang / chang la sogs pa dbul bar bya'o/ /rig pa'i dbang bskur ba dang /phyir mi ldog pa'i dbang bskur ba 'di gnyis ni bum pa'i dbang bskur ba ste/ dang por bshad pa yin no/ /de nas kye ma bde ba zhes brjod de/ sems kyi dam pa myang ba ni gnyis pa'o/ /rmongs pa zhes bya ba'i tshigs su bcad pa'i don nyams su blang ba gsum pa'o//bdag gi ston zhes bya ba la sogs pa'i tshigs su bcad pa'i don byed pas de yang zhes bya ba'i tshigs su bcad pa'i don yang bshad pa ni bzhi pa'o/ /sngar bshad pa'i bris pa'i dkyil 'khor ram/ yid kyis brtags pa'i ye shes kyi dkyil 'khor ram/ras kyi ri mo la dmigs pa yang rung ste/ gtsang zhing nyams dga' ba rnam par dben pa'i sa phyogs su bum pa'i dbang bskur ba thob pa'i slob ma sngags dang rgyud legs par bslab pa bzhin legs pa mi g.yengs ba/ de kho na nyid rig pa la brtson pa dang dam tshig bsrung ba la brtson pa/rang gi rigs sam gzhan yang rung ste/ rgyud las bshad pa'i bden pa'i rgyu thams cad dang ldan pa rdo rje slob dpon la dbul bar bya'o/ /de nas de g.yon logs su gnas pa dang lhan cig bzhugs pa'i bla ma la/ 'o ma dang mar me dang bsnyen bkur ba dang / dri dang phreng ba la sogs pa rgya chen pos mchod la phyi rol gyi yo byad bla na yod pa'i mchod pa dang bcas pas kyang yang dag par mchod la pus mo g.yas pa'i lha nga sa la btsugs nas thal mo sbyar la/slob dpon chen po la gsol ba gdab par bya ste/ khyed kyi zhabs kyi bka' drin gyis/ /bla med bya ba bdag gis rig /de yang dbang bskur rin chen gyis/ /mgon po rjes su bzung bar mdzod/ /bde chen dpal gyi mgon po yis/ /sangs rgyas skyob pa ji ltar ni/ /bdag po'i de nyid ston mdzad pa/ /de bzhin bdag la mgon dgyes mdzod/ /sdug bsngal kun gyi gnas gyur pa'i/ /dmyal las gtso bos gdon du gsol//sdug bsngal thams cad bcad pa dang / /mgon med pa la snying rje mdzod/ /khyod zhabs pad+ma spangs nas ni/ /gtso bo gzhan la skyabs ma mchis/ /'gron dpa' bo thub chen po/ /de bas sangs rgyas mchog brnyes mdzod/ /de ltar gsol ba'i cho ga mchog / dam pa de ni thos gyur nas/ /bla ma dpal ldan yon tan mtshos/ /snying rje slob pa la bskyed la/ /bzhin ni rab tu dang gyur pas/ /rang gi brtse ba rab dga' zhing / /rnal 'byor rgyud las 'byung ba'i mchog /dam tshig bzang po bstan par bya/ /srog chags bu khyod kyis sod cig /brdzun gyi tshig kyang smra bar bya//ma byin par yang blang bar bya/ /gzhan gyi chung ma bsten par bya/ /dam tshig sdom pa mchog bzhi ni/ /bzang po khyod kyis bskyang bar bya/ /dri chu bshang dang sha mtshal chen/ /lnga pa sems las byung ba dang / /khyi mi rta dang glang chen ba/ /sbyang ba la sogs cho gas ni/ /khyod kyis rtag tu bza' bya ste//dam tshig 'di ni rmad byung ba'o/ /de nas sngar bshad pa'i dkyil 'khor nyid du bsgoms pas yongs su brtags pa'i dkyil 'khor la slob dpon lha thams cad kyi 'khor lo'i dbus su gnas te rang gi lhag pa'i lha'i sbyor ba ji lta bu dang ldan pas rang gi rig ma'i pad+mar bdud rtsi rnam pa lnga bcug ste/man ngag ji lta ba bzhin du de'i rnal 'byor dang ldan pas/ /dbang bskur bar bya ba'i rang gi lhag pa'i lha spros nas des sems can gyi don byed du bcug ste bkug nas rang gi lus la bcug ste/ de'i rnam par gyur pas slob ma yang de'i rang bzhin du byin gyis brlabs te/mig la sogs pa rang gi lha dang ldan par bsgoms te/ rang gi ba spu'i bu ga rnams las byung ba'i 'od zer gyi lcags kyu'i tshogs kyis nam mkha'i khams thams cad du khyab pa'i de bzhin gshegs pa thams cad spyan drangs te/ rang gi lus la bcug nas las la gnas pa zhu bar gyur te/mchog tu dga' ba ni gnas skabs na/ rdo rje'i lam nas byung nas mthe bo dang srin lag gis bzung ste/ slob ma'i kha ru sbyin par bya'o/ /rnam par snang mdzad kyi rnal 'byor dang ldan pa'i slob mas bde ba che zhes brjod nas sems las byung ba 'di btung bar bya'o//'di ni rdo rje can kun gyi/ /dbang bskur cho ga mchog yin te/ /sngags 'di thams cad grub pa dang / /las kyi mchog ni 'grub par 'gyur/ /zhes bya ba ni gnyis pa'o/ /de nas pad+ma la gnas bla/ /me tog dang ldan sems byung ba/ /rang gi kha yis mchod don dang //rdo rjer son pa'i rig ma'i khas/ /mi yi thod pa'i nang blugs pa/ /dri chen dri chu sha ldan pa/ /lha rnams la ni dbul bar bya/ /de nas de'am gzhan shin tu dad pa dang ldan pa/ shes rab che ba/ gzugs bzang ba/ sgrub pa po la dga' ba/ sbyor ba gcig pa'i bya ba la goms pa/dam tshig shes shing legs spras pa/ /bla ma la ni sgrub pa pos/ /yon gyi don du dbul bar bya/ /yang slob mas bla ma la gsol ba btab la mchod pa la sogs pa byas te/ bla mas byin gyis brlabs nas phyag rgya de slob pa'i ched du sbyin par bya'o/ /me tog la sogs dam tshig ldan/ /sangs rgyas sogs par byin gyis brlabs//de dang rnal 'byor snyoms 'jug cing / /bla na yod dang bcas pas mchod/ /slob ma phyi rol mchod pa yis/ /rdo rje 'dzin ni gnyis pa bzhin/ /bkra shis sna tshogs sgrogs pa dang / /rol mo'i sgra ni du ma dang / rnga yab rgyal mtshan gdugs la sogs//me tog phreng bzang tsan+dan sogs/ /rdo rje skyil krung sbyor ba yis/ /brtan zhing mnyam par bzhag nas su/ /de la cho ga bzhin dbang bskur/ /me tog phreng thogs bzhi thal sbyar/ /der slob dpon rang gi bdag po'i sbyor ba dang ldan pas slob ma yang de'i sbyor ba dang ldan par byed du bcug la mnyam par bzhag nas rang gi rigs kyi sa'i sprin rnams byang chub kyi sems kyis yongs su gang ba'i chu shel gyi bum pa thogs pa spros te/des byang chub kyi sems kyi rgyun phab pas dbang bskur ba stsol nas de dag thams cad mchog tu bde ba'i ting nge 'dzin la snyoms par zhugs pas zhu bar gyur te/ye shes kyi bdud rtsi'i rnam par red nas slob ma'i lus la zhugs pa dang de yang lha'i lus bde ba chen po'i ngo bo nyid du gyur par bsam par bya'o zhes bya ba'i don 'di ston pa yin te/ rmongs pa'i gti mug sbyor ba can/ /zhes bya ba nas/ shes rab ye shes bdag nyid 'gyur//zhes bya ba'i bar ni gsum pa yin no/ /de ltar gnas pa'i rig ma yi/ /de tshe bla mas lag bzung nas/ /slob ma yi ni lag tu gtad/ /de bzhin gshegs pa dbang du stsol/ /bdag gis de ring nas brtsams nas/ /sgrub pa po la bu mo gtad//byang chub chen po bsgrub pa'i phyir/ /de bzhin gshegs pa mkhyen par gsol/ /zhes so/ /de nas de la/ gzungs ma de nyid nyams dga' ba/ /khyod kyis rtag tu bsgrub par bya/ /zhes brjod do/ /lag par gtad nas zhes pa nas mchog ma yin zhes bya ba'i bar te 'di ni bzhi pa'o//de nas brtsams te de la ni/ /gsang ba'i mchog ni bshad par bya/ /rgyud kun du ni gang sbas pa/ /yi ge phyag rgya sbas rnams kyang / /bshad ma thag pa'i cho gas 'di la byin gyis brlabs la de la bla mas sbyin par bya ste/ 'di ni sangs rgyas ma ru bsgrags/ / zhes bya ba'i phyir dang / rdo rje 'dzin pa'i sprul pa'i bdag nyid bla ma dang 'brel pa de ma thag tu longs spyod pa'i phyir ro/ /sems can khams ni dpag med pa/ /zhes bya ba la sogs pa'i don ni 'di yin no/ /de nyid gsum dang sbyin pa spel/ /zhes bya ba'i don ni 'byin pa'i sngags de kho na nyid gsum dang spel bar bya ste/oM AHbadzra d+h+r-ika hUM/ zhes bya ba la sogs pa'o/ /snying po'i sa bon yang / yi ge gsum dang spel na sngags su 'gyur te/ oM AHbruM hUM zhes bya ba la sogs pa'o/ /snying po mi shes pa dag ni ming gi yi ge'i nang na gang dang po yod pa de thig le dang bcas nas snying po'i sa bon du 'gyur te/de ba dat+t+wa zhes bya ba la de zhes bya ba la sogs pa'o/ /phreng ba'i sngags kyang yi ge gsum dang spel na sngags zhes bya ba'i ming thob ste/ oM AHoM ru ru s+phu ru dz+wa la tiSh+Tha sid+d+ha lo tsa ne sarbar+tha sA d+ha naM swA hA hUM zhes bya'o zhes la la 'dod do/ /gzhan dag ni phreng ba'i sngags rnams ni sgra ji bzhin du bya'o zhes zer ro//rgyas pa la sogs pa'i dus su ni swA hA'i gnas su oM la sogs par 'gyur te/ puSh+TiM ku ru oM/ shAn+tiM ku ru swA hA/ sid+d+hi me ba shiM ku ru ho/ /A kaR+Sha ya dzaHbai de sha ya hUM/ uts+tsha Ta ya phaT/ uts+tsha Ta ya hUM/ uts+tsha Ta ya hUM phaT ces bya ba gang yang rung ba'o//mA ra ya phaT/ de skad du brjod pa rgyas pa dang zhi ba la sogs pa ni sngags kyi mtha' mar bskul ba'i tshig gzhug par bshad pa ni 'di dag gis bya'o zhes pa'o/ /yang zhes bya ba'i sgras ni ming nang du chud pas thog ma dang tha mar 'di dag spel bar bya'o zhes phyogs gnyis pa ston pa yin te/swA hA de ba dat+t+wa shAn+tiM ku ru swA hA zhes bya ba la sogs pa rgyas pa'i las rnams la yang ngo / /ji lta ba bzhin du gnas pa'i sngags nyid las thams cad byed de/ puSh+TiM ku ru zhes bya ba la sogs pa spel bar gzhan dag go/ /yang zhi ba la sogs pa bskul ba'i dbang gis las gang byed par gyur pa de ni rig pa zhes bya ba ste/oM AHdzi na dzika che ge mo shAn+tiM ku ru hUM/ zhes bya ba la sogs pa'o/ /phreng ba'i sngags kyang rig pa zhes bya ste/ de las bshad pa'i las rnams byed pa'o zhes bya ba la sogs pa'o/ /rdo rje gsal zhes bya ba la sogs pa la rlung dang chu dang /dbang chen dang / me'i dkyil 'khor la sogs pa'i sku la sogs pa'i sa bon bsam par bya'o zhes la la zer ro/ /rdo rje zhes pa ni mi shigs pa yin pas zla ba'i dkyil 'khor bzhin no/ /gsal ba zhes pa yang de bzhin no/ /chos zhes bya ba yang rang gi mtshan nyid 'dzin pa yin pas zla ba'i gzugs so//der 'khor lo zhes bya ba ni stan der ye shes sems dpa'i sa bon gang sngar gnas pa'i zla ba'i gdan nam nyi ma'i gdan no/ /de skad du le'u bco brgyad pa las bzlas pa la ni spro ba dang / bsdu zhes bya ba la sogs pa nas de nyid bskul bar smra ba'o zhes bya ba'i phyir ro//sna tshogs zhes pa ni sna tshogs pa'i rang bzhin ye shes sems dpa'i sa bon no/ /dus gsum sa bon ni yi ge gsum dang lhan cig tu bzlas pa'o/ /le'u bcu gsum pa las gsungs pa/ dam tshig de ni rdo rje gsum/ /dbu ma'i dam tshig rdo rje can/ / de nyid dam tshig rdo rje yi/ /bzlas pa ma ning zhes brjod do/ /rdo rje gsum ni sku dang gsung dang thugs rnams so/ /dam tshig ces bya ba ni 'da' bar mi bya ba'o/ /de kho na nyid ni sa bon te/ oM AHhUM zhes pa'o/ /dam tshig rdo rje can rnams ni/ /dam tshig sems dpa'i de kho na nyid yin la/ snying po dang 'byin pa dang phreng ba'i sngags kyang dbus su 'gyur te/oM AHmaM hUM zhes pa la sogs pa'o/ /de nyid ces pa ni brjod ma thag pa'i cho ga ste/ lha thams cad la yang sbyar bar bya'o/ /de ltar yang bshad do/ /yang na gzhan du bshad par bya ste/ rgyud kyi rgyal po yang yid bzhin gyi rin po che lta bu yin pa'i phyir/dam tshig rdo rje gsum ni sku dang gsung dang thugs dbyer med pa'i lha la dmigs pa'i ngo bo'o/ /de'i de nyid ni dbyer mi phyed pa'i shes rab lha mo'i rnam par yongs su gyur pa'o/ /de dag gi dbus su yang dag par sbyor ba las byung ba bde ba chen po'o/ /dam tshig rdo rje'i zhes pa gti mug gi rigs kyi lha rnams so//de skad du yang gsungs pa/ 'dod chags skyes pa bud med ni/ /zhe sdang gti mug gnyis spangs pa'o/ /zhes so/ /de nyid thun mong ba nyid du bstan par 'dod nas gsungs pa'o/ /de nyid ces pa ni rdo rje can thams cad kyi rigs kyi lha rnams so/ /bud med dang skyes pa'i rnam par rtog pa med pas ma ning gi bzlas pa zhes so//de ltar ye shes zhabs kyis gsungs pa/ rgya mtsho chu ru pad chen po/ /'od zer 'bar bas yang dag 'khrug /de rnams rig ma dang ldan pa/ /rmi lam yongs su gsal bar mthong / /de ru gang de skye 'gyur ba/ /brdzun dang bden pa spangs pa'o//'di ltar chos rnams thams cad kyi/ /rang bzhin rtogs bya mkhas pa yis/ /zhes so/ /phyi rol don med kyang dkar po dang bde ba la sogs pa'i rnam pa'i shes pa las dkar po dang bde ba la sogs pa'i rnam pa'i shes pa skye bar 'gyur ro/ /bag chags gtso bor gyur pa sad pa las rmi lam la sogs pa bzhin no/ / gang rnam 'grel las/ gang gi cung zad de nyid ni/ /gang gi bag chags sad byed yin/ /de la blo ni nges pa ste/ /phyi rol don la ltos pa yin/ /gang zhig gang gi rnam par bsgos/ /de ni de yi rnam par bskyed/ /gang dang gang gi dngos po yis/ /mi rnams yid ni yang dag sbyar/ /de rnams de yi rang bzhin 'thob/ /ji ltar sna tshogs nor bu bzhin//zhes brjod pa'i phyir ro/ /de yang sngon po la sogs pa'i rnam pa gang gi tshe rjes su mthun pa'i gzugs des rab tu snang ba yin te/ de'i tshe bde ba la sogs pa'i ngo bo nyid du brjod de/ rjes su 'dzin pa la sogs pa'i ngo bo yin pa'i phyir ro/ /thams cad nyid 'khor bar 'gyur te bde ba 'dod pa dang sdug bsngal dang bral bar 'dod pa'i phyir ro//lan ni des na 'di rnams mchog tu dga' ba'i bdag nyid kho na'i khyad par du 'phags pa'i rnam par 'gyur la de yang bsgoms pa'i stobs kyis gsal por 'gyur ro zhes te/ bde ba'i ngo bo sngon po la sogs pa'i rnam par shes pa ni de kho na nyid du 'gyur ro zhes so/ /de skad du ye shes zhabs kyis gsungs pa/ shes rab thabs kyi bdag nyid dri ma med pa yi/ /ting 'dzin las byung dam pa'i bdes gang bar/ /'khor lo bsams nas zhes pa dang / rtog pa kun las nges grol mchog /bde ba'i rgyur gyur pa rnams kyis ni zhes kyang ngo / /'dir tshigs su bcad pa rnams su 'gyur te/ dpal ldan chos 'byung nang gnas pa/ /ji ltar gzhal yas khang brjod par//'dod pa'i yon tan lngas dbang phyug /yid 'ong gnas ni phun sum tshogs/ /bsgoms te rgyal ba'i snyoms 'jug 'dod/ /dga' bas zab mo'i las gnas pa/ /de yi rjes la chen por gyur pa dgod la 'dod/ /'jig chags chen po dang ni 'dra bar 'gyur ba yin/ /de dag de ru rtog med pa de thabs dang blo//ting 'dzin yang dag byung bas rab tu bde bas gang / /gang zhig bde ba chen po skyes/ /'dod pa'i yon tan lnga rang bzhin/ /bsgoms pa'i stobs kyis gsal ba ni/ /nyin dang mtshan du rgyun mi chad/ /de shes rtogs pa'i rang bzhin phyir/ /gsal bar snang ba rtog pa med/ /ma dpyad nyams dgar yod pa ste/ /'dir ni brjod med rtog bral bas//sngar gyi goms pa'i stobs kyis kyang / /snying rjes spro dang bsdu ba yin/ /lhun gyis grub pas sems can don/ /de phyir yid bzhin nor bu bzhin/ /'tshe ba med dang yang dag don/ /ngo bo nyid la phyin log gis/ /dbang du zin kyang mi bzlogs te/ /blo ni de phyogs 'dzin phyir ro/ /zhes rigs pa las so/ /de ni rtog pa med pa'i chos yin te//bud med skyes pa'i rtog spangs pa/ /de ni ma ning bzlas pa yin/ /phyi rol dga' ba skad cig ste/ /dpe dang bral bas brjod par bya/ /rdo rje pad+ma 'dus pa las/ /las kyi phyag rgya dang ldan pa/ /gang zhig 'di ni bsgoms pa las so/ /bden pa gsungs pas mngon sum brjod/ /de ni las dang sems can gyi/ /byang chub sems ni bstan pa la//gang la las kyi phyag rgya spangs/ /gzhan du mtshon pa nus ma yin/ /rtogs pa dang po'i las can gyis/ /gzhan du rigs pa ma yin no/ /bzang po'i gnas la de nus pa/ /thog mtha' bar du dri med la/ /'di ltar de ni mchog zhi ba/ /nam mkha'i khams su grags par gnas/ /rdo rje pad+ma'i sbyor ba ni/ /yang dag rab sbyin las kyang thob//dang po'i las kyi sems can rnams/ /mtshon cha yid ches byed pa'o/ /rdo rje nam mkha'i khams sbyor dang / /rig pa las kyang rmad byung che/ /gang de bde ba skyed byed pa/ /mchog tu dga' bar byed pa po/ /de zad pa las dga' bral te/ /bral dga' mtha' yin de ni mchog /rang gi ngo bo bstan du med//cung zad de ru skye 'gyur ba/ /dbang po kun las grol ba yin/ /rtsod med mchog tu zhi ba po/ /khyab dang dngos po med pa yi/ /de ni byang chub gnas mchog go/ /kun tu bzang por grags pa bzang / /bral dga' mtha' ru rnam par gnas/ /sgrub pa po yi mchog gsang ste/ /de ni grol ba gnas su bsgrags/ /gzhan dag gi brjod pa ni dga' ba dang /mchog tu dga' ba dang / dga' bral du grags pa'i skad cig ma gsum rim gyis skye bar 'gyur te/ dga' bral gyi dbus su de bzhin gshegs pa drug pa ni de yin no zhes so/ /gzhan dag brjod pa ni skad cig ma dang / phra ba dang rten dang / de bzhin du rnam par gnon pa'i mtha' dang / chos thams cad gtod par byed pa zhes pa ste/dga' ba'i skad cig ma'i ngo bo zhes so/ /de rnams las gzhan pa ni dga' ba'i skad cig ma ste/ don dam par brjod du med pa dang / sgras kyang brjod du med pa gang yin pa de ni de bzhin gshegs pa drug pa'o/ /dga' ba'i skad cig ma 'di rnams ni phra mo'i rnal 'byor bsgoms pas brtan par byas pa'i sems rnal 'byor pa bsgom pa la mngon par dga' ba'i bsgoms pa'i stobs kyis rang gi rig pa'i skad cig ma gsal ba'i rnam pa skye bar 'gyur ro zhes pa la sogs pa'o//rig pa'i brtul zhugs kyi skabs su gsungs pa ni/ pad+mar rdo rje sbyar byas nas/ /byang chub sems ni gtang mi bya/ /bskyed par byas nas dga' ba de//sems kyis gang byas bsgom par bya/ /rnal 'byor pa yi byang chub sems/ /ji srid gtong bar mi byed pa/ /de srid rgyun mi 'chad pa ni/ /dga' ba cung zad 'byung ba bde/ /de nyid dang ldan bdag nyid ni/ /bsgoms pas nges par grol bar 'gyur/ /byang chub sems ni lhung gyur na/ /dngos grub kun gyi gter gyur pa/ / ma smad dngos grub ji ltar 'gyur/ /phyag rgya chen por ldan pa gang / /bde ba chen po myong byed pa/ /ye shes bdud rtsi de nyid mchog /de ni smra bar nus nyid min/ /gus par bsgoms pas go bya gang / /rang rig rang gi mtshan nyid yin/ /rnam pa kun gyi mchog ldan pa/ /spro dang bsdu ba mdzad pa po/ /rgyu'i gnas skabs su mchog tu dga' ba'i mtshan nyid kyi dkyil 'khor gyi 'khor lo'i rnam pa'i ye shes la sbyang bar bya ste/'dis kyang de'i rang bzhin nyid kyi ngo bor gyur pa ni dga' ba'i rang bzhin gyi byang chub tu brjod do/ /don dam par ni yul dang lhan cig pa'i bde ba'i sems las skyes pa'i bde ba dag srid pa ma yin te/ de'i tshe bde ba dang bde ba ma yin pa'i rnam par rtog pa med pa'i phyir ro//'on kyang ji ltar goms pa'i stobs kyis gsal ba'i rnam pa ni rang rig pa'i mthar thug pa sba bar nus pa ma yin pa'i gsal ba nyid do zhes gzhan dag go/ /mi rtog pa nyid kyis dbang po'i mngon sum bzhin du rnal 'byor gyi mngon sum yin no/ /de nyid kyi phyir gsungs pa/ 'dzin pa gzhan na de gzhan min//khyod kyang de bzhin nga yang gzhan/ /kye snying khyod kyang mnyam gyur na/ /nga yin zhes ni su yis shes/ /'dod chags ma yin chags bral min/ /dbu mar dmigs pa ma yin te/ /bud med thams cad rgyu phyag rgya/ /dmigs med theg pa bla na med/ /ces sdom pa las so/ /bde ba chen po'i rjes su dmigs pa'i dkyil 'khor gyi 'khor lo sems kyis bsgom par bya ste/de yang ma ning gi rtags yin pas ma ning gi bzlas par brjod do/ /dga' bral gyi ni dbus su ni/ /gang du mtshon bya rab tu gnas/ /sngon po la sogs rnam bral ba/ /bsgom par bya ba kha cig go/ /dbang po gnyis kyis snyoms par 'jug /lha rnams dmigs pa med pa ni//rten med pa la bsgom pa ni/ /nus par min zhes gzhan smra'o/ /reg las skyes kyi dga' mtshungs pa/ /bde dang bsgrub pa zag pa med/ /ji ltar gzhan yang rgyu las ni/ /de 'dra'i 'bras bu ji ltar 'dod/ /ces so/ /ting nge 'dzin gsum gyi sbyor ba dang ldan pas/ ji skad bshad pa'i cho ga yis/ /thun mtshams bzhir byin gyis rlob pa la brtson pa/dam tshig dang sdom pa la gnas te/ mtshan ma thob nas zla ba drug tu bsgom par bya'o/ /de lta na yang 'dod pa'i lha ma grub na slar yang cho ga ma tshang ba med pas/ dam tshig la sogs pa la gnas te slar yang zla ba bco brgyad kyi bar du bsgom par bya'o/ /de lta na yang gal te ma grub na thun mtshams kyi mthar drag po'i sbyor ba brtsam par bya'o//gang rnam par snang mdzad kyi rnal 'byor pa kha dog nag po dang ldan pa sbyangs pa'i shes rab ma dang lhan cig gnyis su med pa'i sbyor ba dang ldan pas dkyil 'khor ba dang zla ba'i dkyil 'khor la sogs pa dang / gzhal yas khang yang mngon spyod kyi cho ga bzhin du nag por bsgoms te mchod pa dang /bstod pa dang bdud rtsi myang ba byas nas de'i rjes la rang gi snying ga'i sa bon gyis de bzhin gshegs pa'i tshogs bkug ste/ shes rab dang thabs kyi sbyor bas chu skyes su phab nas ji ltar bsgom pa'i gzugs kyis dkyil 'khor gyi rnam par me'i dkyil 'khor la 'jigs shing 'dar ba dang ldan pa blta bar bya'o//de nas snying ga'i sa bon gyi 'od zer 'bar bas/ de bzhin gshegs pa'i tshogs bkug ste/ shes rab dang thabs kyi sbyor ba dang ldan pas zhu bar gyur pa rdo rje'i lam nas phyung ste/ gshin rje mthar byed kyi phur pa'i gzugs su byas la/ de bzhin du gzhan dag gi bdag po kha dog nag po khros pa rdo rje nas phyung ste/phyag g.yon pas ske nas bzung nas phyung ba'i phur pa'i mgo bor brdungs pa ni g.yas pa'i phyag gi rdo rje tho bas gdab par bya ste/ bsgyings pa dang bcas pas sngags zlos shing ngo / /oM AHtshin+da tshin+da/ ha na ha na/ da ha da ha d+hi pa ti tsakra bai ro tsa na badzra kI la ya hUM phaT ces pa'o//phur bu de yang rdo rjes mnan pa dang ldan par blta bar bya ste/ de dngos grub tu 'gyur ro/ /de nas oM AHbadzrod kI la ya hUM zhes sngags brjod pas phur pa dbyung bar bya'o/ /de nas rang gi kha dog gis gnas te rang gi sa bon gyis bskul ba'i spyan la sogs pa rnams kyis oM ru ru s+phu ru zhes bya ba la sogs pa'i sngags brjod cing phur pas btab pa'i dkyil 'khor gyi 'khor lo la dbang bskur ba sbyin par bya'o//'di'i rjes su 'brangs pas de'i rigs rnams kyis drag po'i sgrub pa'i thabs blta bar bya'o/ /rnam par snang mdzad kyi rigs kyi drag po'i bsgrub pa'o/ /de bzhin du kha dog nag po snang ba mtha' yas kyi dkyil 'khor ba'i lha rnams dang /zla ba'i gdan dang gzhal yas khang la sogs pa rnams lhan cig tu bsgoms te/ pad+ma mthar byed kha dog dmar po'i phur bas gdab par bya ste/ oM AHhri b+hur b+hu baHa mr-i tA b+haM kI la ya de'i rigs kyi lha rnams kyi yang rung ste/ hUM phaT 'od dpag tu med pa dang de'i rigs kyi lha rnams kyi drag po'i sgrub thabs so//mi bskyod pa dang rin chen 'byung ldan dang / don yod grub pa'i sbyor ba yis/ kha dog nag por dkyil 'khor dang bcas par bsgoms nas 'di rnams kyi rigs dang bdud rtsi 'khyil pa'i phur ba sngags 'dis gdab par bya ste/ oM AHbadzra rA dza a k+Shi bya kI la ya de'i rigs kyi lha rnams kyang rung /hUM phaT mi bskyod pa dang / rin chen 'byung ldan dang don yod grub pa'i drag po'i sgrub thabs so/ /gdab par bya ba dang phur bu dang 'debs par byed pa 'di dag thams cad la mngon par zhen pa med pas bya ste/ gzhan du na 'grub par mi 'gyur ro/ /drag po'i sgrub pa'i dus su de bzhin gshegs pa rnams kyi dbu rgyan du rdo rje sems dpa' bsgom par bya'o//gnod mdzes rgyal po yang de bzhin gshegs pa rnams kyi dbu rgyan gnyis par bsgom/ yang na rdo rje 'dzin pa sangs rgyas rnams kyi gnas lnga rnams su bsgom par bya ste/ spyi bo dang lkog ma dang thugs ka dang lte ba gsum 'dus gsang ba rnams su'o/ /de nas rnal 'byor dam tshig mchog /ces bya ba la sogs pa nas/ 'khor lo yang dag legs bris la/ /sngar zhes bya ba la sogs pa'i gzhung gi don ni 'di yin te/ tshon rtsi dgye ba dang / mtshan ma dgod pa la sogs pa rdzogs pa dang / rdo rje ra ba dang / 'od kyis bskor ba'i phyi rol du dkyil 'khor gyi khang pa'i sa gzhi ba'i lci bas byugs la spos chus chag chag btab ste/me tog gi sil ma gtor la bum pa rnams gzhan du bzhag ste/ bla res la sogs pa bre ba dang / mchod pa rnam pa lnga dang / phyi nang gi mchod pas rgya cher mchod par bya'o/ /de'i cho ga ni 'di yin te/ shar phyogs kyi sgor stan shin tu bzang po la slob dpon shin tu khrus byas pa yan lag dris byugs pa phreng ba dang gos kyis brgyan pa lha la mngon par phyogs nas 'dug ste/lo bcu gnyis lon pa rgyud las bshad pa'i mtshan nyid dang ldan pa'i phyi rol gyi bud med yod par gyur na de dang lhan cig snyoms par zhugs la/ ting nge 'dzin gsum gyi sbyor ba dang ldan pas dkyil 'khor bsgrub par bya'o/ /de'i rim pa ni 'di yin te rdul tshon gyi dkyil 'khor bsgrub pa la sgrub thabs kyi cho ga'i rim pas dang po'i sbyor ba ji lta ba bzhin du byas la/de nas rang 'od kyi chu skyes su yid kyis gzhal yas khang bskyed nas snying po 'od kyis drangs pa'i de bzhin gshegs pa'i tshogs rang gi lus la bcug ste/ zhu bar gyur pa'i rdo rje lam nas bton te/ sprul pa'i gzhal yas khang na gnas pa'i sna tshogs pad+ma la gnas pa'i zla ba dang nyi ma la gnas pa'i gdan bcu dgu la rang gi rigs kyi mdog dang ldan pa'i byang chub kyi sems kyi thig le'i gzugs su bsams la de yongs su gyur pa las 'khor lo'i gtso bo'i sa bon las byung ba'i lha bcu dgu'i bdag nyid ji skad du bshad pa'i dkyil 'khor bsams nas der slob ma 'jug pa'i cho gas zhugs te/dbang bskur ba thams cad thob pa'i 'og tu rjes su gnang ba thob nas ji lta ba bzhin du phyung ste rang gi mtshan ma ji lta ba'i gnas su bzhag nas rdo rje dang chu skyes bskyod pa'i phaT kyi sgras ye shes kyi dkyil 'khor bkug la/ dkyil 'khor gyi 'khor lo'i ngos la bzhag cing 'khor lo can dang lhan cig 'ongs pa'i bgegs rnams gshin rje gshed la sogs pa'i sbyor bas bskrad la rdo rje rab kha gyes pa'i mtshams yid kyis skad cig tsam gyis brtan par gyur par blta'o//de nas oM AHmaM pra bA ra sang+kA ra pra tIts+tsha hUM zhes pa 'di yis de la ar+g+ha dbul bar bya'o//oM AHmaM pa t+yaM pra tIts+tsha hUM zhes bya ba 'dis zhabs bsil dbul lo/ /de nas spyan ma la sogs pa spros pas mchod nas mi bskyod pa ni zhes bya ba la sogs pas bstod la sgo ba rnams kyis sgo'i bya ba'o/ /oM AHya man+ta kr-it+ta dz+nyA na maN+Dal a kaR+Sha ya dzaHhUM zhes brjod pa dang mdun na gnas pa'i 'khor lo gshin rje gshed kyi 'od zer gyis dgug par bya'o//oM AHpradz+nyAn+ta kr-it+ta dz+nyA na maN+Dal pra be sha ya hUM hUM zhes bya bas dam tshig gi dkyil 'khor la ye shes kyi dkyil 'khor gzhug par bya'o/ /oM AHpad+mAn+ta kr-it+ta dz+nyAn maN+Dal b+han+da yaM baM hUM zhes pas dam tshig gi dkyil 'khor la ye shes kyi dkyil 'khor bcing bar bya'o//oM AHbi g+h+nAn+ta kr-it+ta dz+nyA na maN+Dal to Sha ya hoHhUM zhes bya bas bdud rtsi 'khyil pa'i 'od zer rnams kyis dkyil 'khor pa dngos grub ster ba la mngon du phyogs par bya'o/ /ye shes kyi dkyil 'khor dang lhan cig dam tshig gi dkyil 'khor gcig tu byas te/ ye shes sems dpa' yang dkyil 'khor gyi bdag por 'gyur te 'di ni chen po'i bsnyen pa'o//rang 'od kyi lha mo'i snying ga'i ye shes sems ma ni bdag po med pa yin no/ /chen po'i nye bar sgrub pa dang / sgrub pa dang sgrub pa chen po dang ldan pa'i dkyil 'khor yang dag par mchod nas me tog dang / bdug pa dang / mar me dang / phreng ba dang byug pa dang /phye ma dang / chos gos dang / gdugs dang rgyal mtshan dang / ba dan dang / bla res dang / rnga yab la sogs pa dang / bza' ba dang / bca' ba dang / bldag pa dang / gzhib pa dang / btung ba la sogs pa'i gtor ma'i nye bar spyod pa dang / glu dang nye bar spyod pa dang / glu dang gar dang rol mo dang rgyan dang rang gis brtags pa'i glang po che dang /rta dang ba lang gi khyu la sogs pa bstabs te dril bu dkrol zhing mi bskyod rdo rje zhes bya ba la sogs pa'i tshigs su bcad pa rnams kyis bstod pa bya'o/ /sgo skyong bzhi yis kyang brjod ma thag pa'i dkyil 'khor sgrub pa'i cho ga dang / dril bu dkrol zhing bstod pa la thug pa thams cad nyams su blang bar bya'o//phyi nas las kyi phyag rgya'i chu skyes la gnas pa rang gi khas me tog dang bcas pa'i rang gi sems las byung ba blangs te rang gi rdo rje la gnas pa yang rig pa'i kha yis blangs nas tsan+dan bzang po la sogs pa dang ldan pa'i pad+ma'i snod du blugs pa'i ye shes kyi bdud rtsi bskyed pa la mchod pa'i don du dbul bar bya'o//mgon po rnams dang rang nyid kyis sprul pa la yang phyag bya ste/ bzod par gsol nas dngos grub thams cad kyi rjes su sems can gyi don mdzod cig ces gsol ba btab nas sgrub pa'i grogs mchog dkyil 'khor du bzhag ste/phyir byung la gtor ma btang nas 'di skad brjod pa'i rim gyis slob ma gzhug pa'i cho gas slob dpon nyid 'jug par bya'o/ /slar yang / bzang po zhabs kyis brjod pa'i don/ /sgo rnams kun du shes byas la//rang gi 'khor lor rab gsal bar/ /zhes pa la sogs pa'i don yin no/ /phyi rol gyi rig ma med na yang 'di kho na ltar dkyil 'khor bsgrub par bya'o/ /sngags btu ba dang gtor ma bsrung / /phur bus gdab dang 'khor lo sgrub//kha sbyar dbye dang dbang bskur bzlas/ /phyir bzlog pa ni gnyis su grags/ /gang yang bdag blo gti mug pas/ /legs spyad 'di la nyes byas gang / /gang phyir lus can skyabs gyur pa/ /de ni mgon pos bzod par mdzod/ /gtso bo nus pa ma mchis shing //ma rnyed pa dang ma 'byor pa/ /'dir ni bya ba gang byas rnams/ /de dag thams cad bzod par mdzod/ /de kho na nyid bcu pa slob dpon rgyan pas mdzad pa rdzogs so// //bod kyi lo tsA ba dge slong dar ma grags kyis bsgyur cing zhus te gtan la phab pa'o// //