CLOSE WINDOW

D1878
བོད་ཡིག

/[ ]@##/ /rgya gar skad du/ At+ma ar+tha sid+d+hika ra nA ma yo ga kri ya kra ma/ bod skad du/ bdag gi don grub par byed pa zhes bya ba rnal 'byor gyi bya ba'i rim pa/ dpal rdo rje sems dpa' ye shes kyi sku can la phyag 'tshal lo//'jig rten spyod las nges grol nam mkha' dang mnyam ngo bo nyid/ /spros las rnam dben rgya che rang bzhin 'di yis ma lus don mdzad pa/ /srid dang zhi la mi gnas gnas te yongs rdzogs dpe med bde ba'i sku/ /dpal ldan 'jam pa'i rdo rje la btud rgyud don 'dzin bdag bla ma la'ang //sangs rgyas ye shes zhabs la sogs pa'i rim pa'i man ngag rang nyid kyis dran phyir/ /de la blo blun rnams kyi nyi ma lta bur 'di ni bdag gis bshad/ /'di la log par rtogs pa dag ni gnyis te/ phyi rol gyi don la log par rtogs pa dang / nang gi rnam par shes pa la log par rtogs pa'o//de la phyi rol gyi don la log par rtogs pa ni gnyis te/ mu stegs pa dang / nyan thos pa dag go/ /de dag ni phyi rol gyi don rnam par shes pa la sogs gcig na yod par 'dod cing / sna tshogs su yongs su rtog go/ /de yang ji ltar yongs su rtog ce na/mu stegs pa dag ni phyi rol gyi don 'das pa'i rgyun ngo bo da ltar dang ma 'ongs pa'i dus su yang rnam par gnas shing / de yang cha shas can rags pa gcig pa'i ngo bor yongs su rtog go/ /de nyan thos pa dag las kha cig ni don rnams rdul phra rab las grub cing / de dag kyang cha shas bral zhing mun pa dang snang ba'i skabs mi 'byed cing /rigs mthun pa'i skabs dang bcas par yongs su rtog go/ /kha cig ni de dag yang dag par 'dus nas rigs mthun pa'i go skabs kyang mi 'byed cing 'byar nas dmigs pa med par yongs su rtog go/ /de dag las phyogs dang po ma grub cing rig pa mi bzod par bstan pa'i phyir/bla ma chen po'i zhal snga nas/ /dkar po la sogs gang zhig dang po ru/ /mthong ba de nyid dus gzhan mthong ba min/ /de gnyis phan tshun mi mthun phyir na yang / /rtag tu bde ba la sogs dag dang mtshungs//gzugs la sogs pa gcig pa ma yin te/ thog mtha' la sogs dbye ba yis mthong ngo / /zhes gsungs te/ de yang yul dkar po la sogs pa rnam par shes pas skad cig ma dang por mthong ba de nyid skad cig ma gnyis pa la sogs par mthong ba ma yin no/ / 'bras bu skad cig ma yin pa'i phyir ro/ /de bas na dang po nye bar rnyed pa dang / phyi nas nye bar rnyed pa ni 'gags pa dang yod pa nyid yin pas/ bde ba dang sdug bsngal ltar dus gcig tu yod pa ma yin no/ /de ltar ma yin na ni 'bras bu rtag par thal bar 'gyur ro/ /de ci'i phyir zhe na/ rgyu rtag pa yin pa'i phyir ro/ /de bas na 'bras bu rim gyis 'byung bar snang bas/ rgyu rnams kyang rim gyis 'byung bar shes par bya'o/ /de bas na rgyu rnams rtag par ga la 'gyur/ de skad du 'phags pa byams pas kyang / 'bras bu rigs can nyer sbyor bas/ /rgyu rnams rtag pa'i bdag nyid min//zhes gsungs pa dang / slob dpon dbyig gnyen gyis kyang / /de yang gang tshe de yis tshe/ /khyod kyis don de mi snang na/ /de ni mngon sum ji ltar 'dod/ /ces pa'i phyir ro/ /de bzhin du don thams cad gcig pa ma yin te/ steng dang 'og la sogs pa'i cha sna tshogs su snang bas/zin pa dang ma zin pa 'dra bar snang bas/ /gom pa rim gyis kun du phyin pa dang / phra ba mi mthong zhing rags pa mthong ba dang / rta dang glang po che la sogs pa du mar snang ba'i phyir ro/ /de bzhin du slob dpon chen po dbyig gnyen gyis kyang / gcig na rim gyis 'gro ba med/ /zin pa ma zin cig car med/ /ris chad du mar snang ba dang / /mig gis mi sod phra ba'ang med/ /ces gsungs pa dang / slob dpon pradz+nyA sam+b+ha ba gu h+yas kyang / ka ba la sogs dngos po la/ /steng 'og la sogs dbye ba yis/ /de la du mar phye gyur na//gcig tu dmigs pa mi 'khrul ba'o/ /zhes gsungs so/ /phyogs gnyis pa yang ma grub par bstan pa'i phyir/ bla ma chen po'i zhal snga nas/ rdul phran rnams kyi cha yang ma mthong ste/ du ma'i gzugs kyang ma yin zhes pa yang de bzhin no zhes gsungs te/de yang don rnams rdul phra rab ma yin te/ rdul phra rab mi dmigs shing rags pa la dmigs pa'i phyir ro/ /rags pa ni cha shas kyi ngo bor snang bas rdul phra rab ma yin no/ /slob dpon pradz+nya sam+b+ha ba gu h+yas kyang / phra rab re re blos mi dmigs/ /blos ni sbom po la dmigs te//sbom po cha shas bcas pas na/ /rdul phran yul du ma grub po/ /zhes gsungs so/ /phyogs gsum pa ma grub par bstan pa'i phyir/ bla ma chen po'i zhal snga nas/ dbus kyi cha shas med pa'i rdul phran la/ /du ma'i rdul phran rjes 'brang med phyir dang / /sa yi dkyil 'khor la sogs gzugs kyi tshogs//rags pa'i dpung du 'ga' yang mi 'gyur ro/ /zhes gsungs te de yang yul du grub pa ma yin te/ rdul phra rab 'dus pa'i phyir ro/ /de yang rdul phra rab 'dus pa ni phyogs drug nas sam/ phyogs gcig nas 'dus grang na/ de la dang po ni rigs pa ma yin te/dbus na gnas pa'i rdul phra rab cha shas drug tu 'gyur ba'i phyir ro/ /de lta na ni rdul phra rab nyid nyams par 'gyur ro/ /gnyis pa ltar na yang ma yin te/ rang bzhin gcig pa'i phyir gcig gi go gang yin pa der gzhan thim pas sa'i dkyil 'khor la sogs pa gong bur snang bar mi 'gyur ro//de bas na rdul phra rab 'dus zhes byar mi rung ngo / /de las ma gtogs pa 'dus pa zhes bya ba'i gtan tshigs cung zad kyang mi snang bas 'dus pa yul ma yin no/ /de skad du/ slob dpon dbyig gnyen gyis kyang / drug gis cig car sbyar ba na//phra rab rdul cha drug tu 'gyur/ /drug po dag gi go gcig na/ /gong bu rdul phran tsam du 'gyur/ /rdul phran sbyor ba med na ni/ /de 'dus yod pa de gang gi/ /zhes gsungs so/ /slob dpon kA ma las kyang / rdul phran 'dus pa med na ni/ /gzhan gyi 'dus pa brjod dgos so//gtan tshigs cung zad mi snang bas/ /'dus pa yul du ma grub po/ /zhes gsungs so/ /de ltar gzugs can gyi yul ma grub par bsten nas/ da ni gzugs can ma yin pa rnams ma grub par bstan pa'i phyir/ bla ma chen po'i zhal snga nas/bde ba la sogs rang gi las gang ni/ /'ga' yang ma mthong de ni yongs bzung bas/ /dus gcig 'brel bar 'gyur ba med pas na/ /gzugs la sogs pa bzhin du gzung 'dzin med/ /ces gsungs so/ /de yang tshor ba la sogs pa rnams yul du grub pa ma yin te/ de ci'i phyir zhe na/tshor ba la sogs pa 'das pa dang ma 'ongs pa dag ni/ 'gags pa dang ma skyes pa'i phyir don gzhan du 'gyur ba la ni 'bras bu bskyed pa'i nus pa yod pa ma yin pa'i phyir dang / da ltar byung ba la yang skye ba zhig yul du gyur pa'am/ skyes zin pa zhig yul du 'gyur grang na/ dang po ni rigs pa can ma yin te/rang nyid skyes pa'i dus su ma byung ba'i phyir ro/ /gnyis pa yang rigs pa can ma yin te/ shes pa yang de'i rnam par skyes zin pa tshor ba la sogs pas phan btags pa cung zad kyang yod pa ma yin pas tshor ba la sogs pa yul du grub pa ma yin no/ /de skad du/ slob dpon chen po mche ba'i sdes kyang /sim pa la sogs 'das dang ma 'ongs pa/ /ma skyes pa dang 'gag pa dang / /nus med 'bras bu skyes pa yi/ /skye ba'i tshe na med pa dang / /skyes pa na ni skyes zin phyir/ /sim sogs yul du ma grub po/ /zhes gsungs so/ /de las gzhan pa'i chos nam mkha' la sogs pa yul du grub po zhe na/de ni rigs pa ma yin te/ btags pa tsam du yod pas 'bras bu skyed par mi nus pa dang / yang na 'bras bu dang rigs mthun zhing de dag nyid mi rtag par 'gyur ba dang / yang na dus thams cad pa nyid las 'bras bu dus gcig tu 'byung ba'i phyir ro//de skad du slob dpon mche ba'i sdes kyang / nam mkha' la sogs rdzas med pas/ /nus med 'bras bu skyed pa min/ /skyed na 'bras ltar mi rtag 'gyur/ /de dag rtag tshang de bas na/ /'bras bu rnams kyang tshang bar 'gyur/ /de bas de dag thams cad kun/ /yul du dmigs pa 'khrul ba'o//zhes gsungs so/ /de bas na yul rnams yod pa ma yin pas na/ des skyes pa'i 'dzin pa'i shes pa rnams kyang yod pa ma yin te/ gzung ba 'ga' yang med pa'i phyir ro/ /de skad du 'phags pa byams pas kyang gsungs pa/ don dang sems can bdag rnam rig /rna ba'i rnam par shes pa ni/ /rab tu skye'o de don med/ /de med pas na de yang med/ /ces gsungs so/ /de bsan 'di dag thams cad rnam par shes par snang ba kho na nyid do/ /mdo las kye rgyal ba'i sras dag /khams gsum pa 'di dag ni sems tsam mo zhes gsungs pa'i phyir ro//de la yang log par rtogs pa dag ni rnam pa gnyis te/ kha cig don dam pa yod pa nyid du rtog cing rdzas nyid du sems pa dang / de las gzhan pa ni kun rdzob tu yod pa nyid la gnyis su snang bar sems so/ /de dag kyang rigs pa ma yin te rnam par shes pa ni don dam par med cing kun rdzob nyid do//de ci'i phyir zhe na/ rnam par shes pa rang bzhin med pa'i gtan tshigs rgyas pa ni/ slob dpon klu sgrub la sogs pas/ dbu ma'i bstan bcos su bris pas 'dir 'bad par mi bya'o/ /de skad du skye ba med pa bstan pa'i mdo las/lha'i bu chos thams cad ni sems tsam mo/ /de yang kun rdzob nyid de/ don dam par mi dmigs so zhes 'byung ba dang / de nyid las de bas na gang nges par legs pa'i grong khyer du 'jug par 'dod pas rnam par shes pa kun rdzob nyid du shes par bya'o zhes gsungs so//de bzhin du mdo gzhan dag las kyang / rang bzhin med de rnam rig med/ /dngos po yang med gzhi yang med/ /ro dang 'dra ba'i mi mkhas pa/ /byis pas 'di dag brtags pa'o/ /zhes pa la sogs pa'o/ /bcom ldan 'das kyis lang kar gshegs pa las kyang /de'i phyir dngos bo thams cad rang bzhin med par grub bo zhes gsungs so/ /de nyid las yang gsungs pa/ gzhan brjod pa yi don dam pa/ /dngos po 'di dag rang bzhin med/ /gcig dang du ma'i rang bzhin gyis/ / 'byor pa med pa gzugs brnyan 'dra/ /zhes pa la sogs pa de dang de la rnam pa mang po gsungs so/ /de ltar rnam par shes pa kun rdzob nyid du shes na yang 'khor ba dang mya ngan las 'das pa gnyis su rtog pa ni rigs pa ma yin te/ de ci'i phyir zhe na/ 'khor ba'i chos ni med pa'i phyir ro//rtsa ba'i rgyud las kyang / mdor na phung po lnga rnams ni/ /sangs rgyas lngar ni rab tu grags/ /rdo rje skye mched nyid dag kyang / /byang chub sems dpa'i dkyil 'khor ro/ /zhes gsungs pa dang / sa ni spyan zhes bya ba dang / /chu yi khams ni mA ma kI//dkar dang sgrol ma zhes bya ba/ /me dang rlung du rab tu grags/ /zhes gsungs so/ /'o na srid par snang zhing bya ba byed nus pa'i dngos po 'di 'khor ba ma yin nam de med na mya ngan las 'das pa yang gang la yod ce na/ de'i phyir bla ma chen po'i zhal snga nas/ bdag tu 'dzin dang bdag gir 'dzin pa yis//'khor ba 'di ni btags pa tsam du yang / /de yi ngo bo log pa'i rang bzhin gyis/ /kun las 'das pa'i ngo bor shes par bya/ /zhes gsungs te/ de bas na srid pa'i chos ni gtan nas yod par mi 'dod kyi/ 'on kyang log par btags pa tsam nyid do//de yang gang zhe na/ rtag pa la sogs par 'khrul pa ni srid pa'i sdug bsngal yin no/ /dper na thag pa'i sbrul bzhin du snang ba med pa nyid do/ /bla ma chen po'i zhal snga nas kyang / sgyu ltar snang ba'i rnam par rtog pa las/ /srid pa'i sdug bsngal gzhan na yod pa min//zhes gsungs so/ /de bas na de zlog par byed pa'i thabs su 'dir zab mo dang yang dag par gsal ba'i dkyil 'khor de gsungs pa yin no/ /de skad du dpal ye shes rdo rje kun las btus pa zhes bya ba rnal 'byor chen po'i rgyud las/ gsang ba'i bdag po thag pa'i sbrul gang yin pa de ni yod pa ma yin no//'on kyang rab rib kyis de ltar snang ba yin no/ /skyes bu gang gis rab rib spangs te brtags na thag par mthong zhing don gzhan med do/ /gsang ba'i bdag po de bzhin du rtag pa la sogs pa la/ gzugs la sogs par snang ba gang yin pa de ni yod pa ma yin no//'on kyang gzugs la sogs par zhen pa'i bag chags kyi phyir ro/ /skyes bu la la zhig gis ngas bstan pa'i lam la gzhol zhing bag chags de bzlog nas rtag pa la sogs par mthong zhing gzhan ci yang mi dmigs so zhes gsungs pa'i phyir ro//de bas na de med pa'i phyir 'di thams cad zab mo dang yang dag par gsal ba'i dkyil 'khor ro/ /de la zab mo gang zhe na/ rang 'byung bar byed pa'i rgyu nyon mongs pa la sogs pa dang / gdod ma nas bral ba mi dmigs shing mi 'gyur ba'o/ /yang dag par gsal ba gang zhe na/de'i sgo nas phun sum tshogs pa yod pa gzhan la ston pa'i rkyen 'jig rten dang 'jig rten las 'das pa thob par byed pa'i phyag rgya chen por snang ba thams cad do/ /de bas na de'i ngo bor gsal bar 'dod pa'i skyes bu dam pa zhig gis gsang ba 'dus pa zhes bya ba rnal 'byor chen po'i rgyud las gsungs pa'i lam gyi rim pa la nye bar gnas nas rnal 'byor bzhi'i rim gyis 'jug cing rtogs par bya'o//de'i rim pa bla ma'i zhal snga nas brgyud cing 'byung ba cung zad bdag gis dbye bar bya'o/ /de'i rim pa ni 'di lta ste/ de la dang por 'jig rten gyi chos brgyad spangs pa'i rnal 'byor pas tshogs la 'jigs pa'i skyon med pa/snying rje chen po dang de las byung ba'i yon tan dang ldan pas bla ma dam pa rnams las gang yang rung ba cig mnyes par byas te/ cho ga ma tshang ba med pa'i dkyil 'khor gnyis gang yang rung bar zhugs nas/ bum pa dang gsang ba dang / shes rab ye shes kyi dbang rnams thob pas gsang ba dang mchog tu gsang ba la sogs pa rim par bya ste/ ji ltar gsungs ba'i gnas su dang por bya bar 'os pa rnams tshogs par bya ste/ des mtshams bzhi'i dang po tho rangs la sgo dag par bya ba la sogs pa nas/ rjes su chags pa'i mtha' la thug pa byas nas dkyil 'khor gyi 'khor lo rdzogs pa'i rnal 'byor pas/thig le dang phra mo dang bzlas brjod byas nas 'khor lo bsdu ba brtsam mo/ /de ltar ting nge 'dzin gsum rdzogs pa'i rnal 'byor pas de'i yan lag gzhan smon lam btab pa dang / sdom pa bskyang ba dang / kha zas sbyang ba dang / las gnyis kyi sgo nas sems can gyi don bya ba dang / brjed pa la sogs pa'i dbang gis dam tshig nyams pa bskang ba'i cho ga byas nas/ brtags pa'i mtshan nyid las dben par bya zhing rang gi sems nyid dag par bya'o//de kho na bzhin du nyi ma'i gung dang / phyi 'bred kyi dus su yang de thams cad ma lus par brtsam par bya'o/ /nam phyed la yang de bzhin du bzlas pa'i mthar thug pa'i bar byas nas/ nyal bar 'dod na gshegs su gsol ba dang / snying ga'i gnas su ye shes sems dpa'i 'khor lo la phyi rol 'khor lo bsdus nas shes rab kyang snying rjer ldan pas nyal bar bya'o//tho rangs langs nas yang gong ma kho na bzhin du dang po'i las la zhugs pas thams cad bya zhing / dus mtshams gzhan la yang de bzhin du bsgom par bya'o/ /de skad du bla ma'i zhal snga nas kyang /tho rangs langs nas gong ma ltar/ /gdod ma gtogs pas bzlas pa bya/ /zhes bya'o/ /de ltar nyin re dus bzhir ting nge 'dzin yan lag dang bcas pa la gzhol zhing mtshan ma ma thob kyi bar du bsgom par bya'o/ /de ltar rgyun ring du bsgoms pas phra mo dang thig les sems brtan par gyur nas/phra mo'i ting nge 'dzin gsum pa las spro bsdu sngon du 'gro ba ma btang zhing bzung bas brtan par gyur pa'i mtshan ma lnga bo 'di thob par 'gyur ro/ /de yang gang zhe na/ ye shes lnga yi ngo bo nyid/ /kha dog lnga yi thig le gzer//gsal ba dang ni mi gsal ba/ /dang po smig rgyu lta bu dang / /gnyis pa du ba lta bu ste/ /gsum pa me khyer lta bu dang / /bzhi pa mar me nyer 'bar ba/ /lnga pa sprin med nam mkha' ste/ /lha dang phyag mtshan la sogs pa'o/ /de rnams ni 'og nas bshad pa'i rnal 'byor pa rnams su 'gyur ba'i mtshan ma'o//de nas spro bsdu'i sgo nas rjes su dran pa bsgom zhing / phyis gnas dang gnas pa'i bdag nyid spros nas bzlas brjod kyi sbyar ba brtsam par bya'o/ /rtsa ba'i rgyud las kyang / sangs rgyas byang chub gnas rnams ni//de ru mdor na spro bar bya/ /sku gsung thugs kyi mtshan ma yi/ /sngags kyi tshig rnams rab tu brjod/ /ces 'byung bas so/ /de ltar brtan par 'gyur ba'i mtshan ma rnam pa lnga mngon du gyur pa de la ni las dang po pa'i rnal 'byor ba zhes gsungs so/ /rnal 'byor pa de mtshan ma mthong yang rung ma mthong yang rung ste/dad pa dang ldan zhing snod du rung bas zhus pa'am/ gzugs brnyan glegs bam la sogs pa bsgom par 'dod pas zhus pa'am/ de las gzhan pa'i sems can sdig pa'i dbang gis mtshan ma ngan pa mthong bas zhus pa'am/snod du rung zhing ngang tshul bzang bo dang ldan pa rnams kyis ma zhus kyang btsud de/ de rnams kyi don du gong nas gsungs pa'i bsnyen pa'i cho ga la gnas nas 'dzab tu ma bzlas pa'am/ 'dzab 'bum la sogs pa bzlas pa byas nas/ ri mo'i dkyil 'khor bri ba brtsam par bya'o//de slad du slob dpon dza ba di ba'i zhal snga nas/ las dang po yi rnal 'byor gyis/ /gong gsungs mtshan ma ma mthong mthong / /de yis 'di dag don gyi phyir/ /dpag med bzlas pa byas pa'am/ /bzlas brjod grangs tshang nges byas nas/ /snod du rung zhing dad ldan dang //gzugs brnyan pu sti la sogs dang / /sdig pa'i dbang gis mtshan ngan mthong / /snod ldan rnams kyis ma zhus kyang / /ri mo'i dkyil 'khor bri ba brtsam/ /zhes 'byung bas so/ /des dkyil 'khor bri ba yang bdag nyid slob dpon dang slob ma gnyis kyis bri bar byas nas/slob ma gzhug pa la sogs pa byas nas dbang rnams bskur bar bya'o/ /rtsa ba'i rgyud las kyang / thig gdab pa yi cho ga 'di/ /bdag nyid nam zhig spyod pa na/ /rnam par snang mdzad rab bsgoms te/ /rdo rje sems dpa' bsgom pa'am/ /slob ma rdo rje 'od po che//rdo rje mi 'chi bsgom par bya/ /zhes gsungs so/ /dkyus ma brjod de/ las dang po pa de brtan par gyur pa'i mtshan ma lan grangs mang du mthong nas sems brtan par shes nas gnyis par 'gyur bar bya ba'i phyir sbyor ba 'di la 'bad par bya'o/ /de'i sbyor ba ni 'di lta ste/sgo dag par bya ba la sogs pa nas rjes su chags par bya ba'i bar gyis dang po'i rnal 'byor rdzogs par byas te/ de bzhin gshegs pa thams cad rjes su zhugs pa sngon du byas nas rig pa'i chos kyi dbyings kyi pad+ma'i nang du stong pa nyid dam sa bon dang lha'i ngo bo bsgom par bya'o//de la mi g.yo zhing brtan par gyur pa las/ rigs kyi bdag po'i gnang ba thob pa'i dus su rnal 'byor pa gnyis par gyur pa yin no/ /de skad du bla ma'i zhal snga nas/ pad+ma la gnas brtan byas te/ /rigs bdag gnang ba thob nas su//rang gi sbyor bas 'phro ba yin/ /zhes pa'o/ /de ltar las dang po pa'i cho ga cung zad bstan pa yin no/ /de nas rnal 'byor pa de ye shes 'ga' zhig dbang du gyur ba ni snod rnam pa gnyis la ye shes kyi lha gnyis 'bebs par nus pa thob pas de skad brjod do/ / bla ma'i zhal nas kyang / ye shes shin tu 'bebs thob bas/ /'bebs pa'i cho ga gsungs pa'o/ /zhes so/ /des thun mtshams bzhir mig la sogs pa byin gyis brlab pa dang / sku gsung thugs byin gyis brlab pa dang / dbang bskur ba rdzogs par byas nas/ de'i rjes la mchod pa la sogs pa brtsams te/ thig le dang phra mo ni mi brtan pa'i lha'i nga rgyal dang bral bas nan tan du bya ba ni ma yin no/ /de gong nas gong du nus pa mthu can du bya zhing grub pa'i mtshan ma mthong bar bya zhing bzlas brjod kyi cho ga la 'bad par bya'o/ /de nas 'khor lo bsdus nas gong ma bzhin du sdom pa bskyed pa la sogs pa thams cad bya'o//de skad du bla ma chen po'i zhal snga nas/ brtul zhugs tshul khrims sngags ldan pas/ /mig dang sku sogs byin brlabs nas/ /ye shes 'ga' zhig dbang gyur pas/ / mtshams bzhir 'khrul med bzlas brjod bya/ /zhes gsungs so/ /rnal 'byor pa de de ltar bsnyen pa'i cho ga la gnas nas gong du smos pa'i snod du rung zhing / dad pa dang ldan pa la sogs pa'i don du/ /khye'u dang bu mo lo bcu gnyis lon pa la ye shes kyi lha gnyis phab la/ de gnyis kyis thig dang rdul tshon la sogs pa bya'o/ /rtsa ba'i rgyud las kyang / bu mo lo grangs bcu gnyis pa/ /lo grangs bcu gnyis lon pa'i khye'u/ /bzung nas dbab pa rab tu brtag/ /cho ga thams cad byas nas ni/ /de nas las rnams rab tu bsgom/ /rnam pa gzhan du byas na ni//khams gsum skye bos dpyas par 'gyur/ /zhes gsungs so/ /de nas bdag nyid zhugs pa la sogs pa'i cho ga ni las dang po pa'i rnal 'byor bzhin du thams cad bya'o/ /rtsa ba'i rgyud las kyang / snga ma bzhin du thams cad 'gyur/ /zhes pa dang / bla ma'i zhal snga nas kyang / /slob dpon slob ma'i cho ga ni/ /sngon du goms pa la gnas pa'o/ /zhes gsungs so/ /de bzhin du rnal 'byor pa des dngos grub tha mal pa'i grub pa'i mtshan ma mthong zhing lha'i lung thob nas/ 'dzab bzlas pa sngon du 'gro ba'i snod la phab pa'i lha gnyis kyis bris pa'i ri mo'i dkyil 'khor du lhas dbang bskur ba'i cho ga yan chad kyis zhugs nas/ji ltar rtsa ba'i rgyud las gsungs pa'i lam gyi rim pa dkyil 'khor chen po la sogs pa la gnas nas/ zla ba phyed dang zhag bdun gyi bar du bzlas pas ji skad gsungs pa'i tha mal pa'i dngos grub gang yang rung ba 'grub par 'gyur ro//de skad du rtsa ba'i rgyud las kyang / dben zhing rab tu nyams dga' bar/ /sbyor ba 'di ni kun brtsams na/ /rdo rje sku dang gsung dang thugs/ /zla ba phyed kyis 'grub par 'gyur/ /zhes gsungs so/ /dkyus ma brjod de/de lta bu'i rnal 'byor pa de gong du gsungs pa'i cho ga rgyun ring du brtsams nas/ rnal 'byor pa gsum par gyur pa ni zab mo dang yang dag par gsal ba'i dkyil 'khor rmi lam ltar rang 'ba' zhig tu ma zad de/ gzhan la yang ston par nus pa thob pas de skad ces bya'o/ /bla ma'i zhal snga nas kyang /de byin rlabs kyis dkyil 'khor rnams/ /bdag gzhan gyis ni mthong ba de/ /gsal ba rmi lam bzhin du 'dod/ /ces so/ /rnal 'byor pa des rgyu ba dang mi rgyu ba'i bdag nyid yi ge gsum gyi ting nge 'dzin kun du spyod pa can gyi sems can gyi sems las lhan cig dbyer med pa rtogs pas/bzlas brjod kyi spro bsdu kho na'i sgo nas rdzogs pa'i ting nge 'dzin bsgom pa ni kha cig nyin mtshan du sbyor ba la brten pa yin no/ /de skad du gsungs pa/ ye shes dbang du gyur pa yis/ /spro dang bsdu ba byed pa ni/ /nyin mtshan sbyor ba brtan par bya//zhes so/ /de ltar bsnyen pa'i cho ga la gnas nas/ des 'di lta ste/ slob ma snod du rung zhing dad pa dang ldan pa/ sngon du dkyil 'khor mthong zhing dbang thob nas sbyor ba'i khyad par shes shing de la gzhol ba rnams kyi don du rnal 'byor rnam pa gsum rdzogs pa'i ting nge 'dzin gyis bsgoms te/der bcug nas khyad par can gyi slob ma de la bka' stsal pa'i dbang gis mthar thug pa'i bar gyis dbang bskur bar bya'o/ /rtsa ba'i rgyud las kyang / nam mkha'i dbyings kyi dbus bsam pa/ /gru bzhi lham pa rab tu bzang / /sangs rgyas dkyil khor sbyor ba yis//bsam gtan rdo rje bsgom par bya/ /rdo rje dkyil 'khor bsam gtan gyis/ /'khor lo can kun zhugs par bya/ /mchod pa'i cho ga de nyid kyis/ /blo dang ldan pas rab tu bya/ /slob dpon snying gar bsgoms na ni/ /dbang bskur ba ni brtsam par bya//sangs rgyas kun gyis nam mkha'i khams/ /yongs su gang bar rnam par bsam/ /dbang bskur ba ni gnas gsum gyis/ /thams cad cho ga bzhin du dbab/ /de yis byang chub thob pa ni/ /sems can kun la phan 'dogs pa/ /sku dang gsung thugs dngos grub ni//ngo mtshar chen po thams cad 'grub/ /byang chub sems dpa' thams cad kyi 'khor lo zhes bya ba bsam gtan gyi dkyil 'khor rdzogs so zhes bya ba gsungs so/ /de nas bla ma'i zhal snga nas/ dkyil 'khor rgyal mchog las rgyal mchog/ /rnam pa kun la rdzogs byas te//zhes so/ /de ni slob ma gzhug pa dang / sgrub pa'i don du dgongs pa'o/ /de las gzhan pa'i slob ma der 'jug par mi nus pa'i mtshan nyid can gyi phyi'i bya ba la mngon par zhen cing blo dman pa rnams la ni/ /rnal 'byor pa des ye shes 'ga' zhig la dbang thob pa'i tshul du yang /ri mo'i dkyil 'khor bris nas dbang bskur bar bya'o zhes slob dpon chen po'i zhal snga nas gsung bar mdzad do/ /de bas slob dpon Dom+bi pa'i zhal snga nas kyang / ye shes dbang du gyur pas ni/ /slob ma snod rung dad ldan dang / /dkyil 'khor mthong ba dbang bskur ba//sbyor ba shes shing de don sgom/ /khyad par can shes don gyi phyir/ /rdzogs pa'i dkyil 'khor bsam gtan gyis/ /dbang bskur ba ni brtsam par bya/ /gnyis pa de ru 'jug mi nus/ /mthong ba'i chos la mngon zhen nas/ /blo gros dman zhing sbyor spangs pa/ /de yis de yi don gyi phyir//rnal 'byor 'og ma'i cho ga ltar/ /ri mo'i dkyil 'khor bris nas ni/ /dbang bskur ba ni brtsam par bya/ /de las gzhan pa rnal 'byor pa des tha mal pa'i dngos grub kyi mtshan ma rnams thob cing lha'i bka' thob nas/ bzlas pa'i cho ga sngon du 'gro bas snod la phab pa'i lhas bris pa'i ri mo'i dkyil 'khor du zhugs nas/lam gyi sbyor ba'i mtshan ma gang mthong ba'i bye brag gis gnas te bsgrubs na ji ltar gsungs pa'i yon tan zla ba phyed la sogs pas 'grub par 'gyur ro/ /de bas na de sgrub pa'i dkyil 'khor ni ri mor bya'o//de yang gang ltar bya zhe na/ las dang po ltar bdag nyid kyis bya ba ma yin te ye shes 'ga' tsam pa'i ltar snod la phab pa'i lhas bya'o/ /de bas na rtsa ba'i rgyud las kyang / rdo rje thig ni gdab pa dang / /tshon rtsi dag ni dgye ba dag/ /sngags kyi sems pas mi bya ste//byas na byang chub rnyed par dka'/ /de bas dam tshig tshul shes pas/ /sngags kyi lha rnams gnas gnas su/ /byin gyis brlab pa yang byas te/ /dkyil 'khor rnams ni rnam par brtag/ /rgyal chen rnam par snang mdzad dam/ /yang ni spyan ni dbab par bya//sku yi kha dog go 'phang mchog/ /rdo rje sku yi yon tan 'byung / /rdo rje chos ni rgyal po che/ /bdag gi rig pas dbab par bya/ /'di ni sngags rnams thams cad kyi/ /gsang ba rab tu brtag pa yin/ /rdo rje sems dpa' rgyal chen dang / /mA ma kI yang dbab par bya/ / 'di ni sngags rnams thams cad kyi/ /gsang ba rmad du byung ba'o/ /de ltar byas na byin gyis rlob/ /sems la dbang ba nyid shes te/ /gsang ba dag ni mchog stsol lo/ /zhes so/ /de nas tha mal pa'i dngos grub grub pa'i rnal 'byor pa des grub pa'i mngag gzhug bskul nas des sangs rgyas thams cad kyi zhing du khrid nas zab cing rgya che ba'i chos thos par byas nas//rnal 'byor pa bzhi par 'gyur ba'i mtshan ma rnams 'byung bar 'gyur ro/ /de bas na rtsa ba'i rgyud las kyang / sangs rgyas zhing du 'gro bar 'gyur/ / zab mo'i chos kyang thos par 'gyur/ /sangs rgyas sa yang thob par 'gyur/ /zhes pa ste/ 'dir sangs rgyas sa yang thob par 'gyur zhes pa ni/ sangs rgyas nyid thob par 'gyur ba la dgongs pa'o/ /de yang sangs rgyas thams cad kyis byin gyis brlabs pa'i gnyid cung zad 'ong bar 'gyur te/de'i dus su mtshan ma ni 'di dag ste/ rtsa ba'i rgyud las kyang / bsam gtan bzlas la 'bad pa yis/ /sgrub pa pos ni rtag tu mthong / /de la 'dir ni rmi lam dam tshig chen po'i tshig go/ /sangs rgyas byang chub sems dpa' ni/ /rnam pa'i dbye ba gnyis su snang //chos kyi ye shes mchog thob pas/ /sangs rgyas mthu dang 'dra bar mthong / /sangs rgyas rdzogs longs sprul pa'i sku/ /dpag med pa ni myur du mthong / /sems dpa' chen po khams gsum pa/ /mchod par byas par de mthong ngo / / ye shes chen po 'di 'dra'i gzugs/ /sangs rgyas byang chub sems dpa' yis/ /'dod pa'i yon tan lnga rnams kyis/ /rtag tu mchod pa byas par mthong / /rdo rje sems dpa' gzugs chen dang / /grags chen rdo rje mchog dag tu/ /rmi lam dag na rang gzugs mthong //grags chen rdo rje gsang ba dang / /byang chub sems dpa' 'khor lo can/ /sangs rgyas chen pos phyag 'tshal ba'i/ /rmi lam 'di 'dra mthong bar 'gyur/ /lus ngag sems kyi mthu las skyes/ /rgyan rnams thams cad yongs rdzogs pa'i/ /lha yi bu mo yid 'ong dang //khye'u bu mo dag mthong na/ /des ni dngos grub thob par 'gyur/ /phyogs bcu sangs rgyas mang po rnams/ /zhing na gnas pa nges par mthong / /thugs ni dgyes par gyur nas kyang / /chos mdzod yid du 'ong ba stsol/ /chos kyi 'khor lo sgyu ma'i sku/ / sems can kun gyis yongs bskor ba/ /bsam gtan rdo rje la gnas pa'i/ /dam tshig sbyor bas mthong bar 'gyur/ /sna tshogs kun dga' skyed mos tshal/ /lha yi bu mo la sogs rgyan/ /sangs rgyas kun gyis byin brlabs pas/ /bsam gtan dam tshig can gyis mthong //sangs rgyas byang chub sems dpa' yis/ /de ni dbang bskur mngon par mthong / /rig 'dzin rgyal po chen po yis/ /mchod pa byas par de mthong ngo / /rdo rje las byung sna tshogs pa'i/ /rmi lam dri ma med mthong na/ /sku gsung thugs kyi rdo rje las/ /skyes pa bla na med pa 'grub//gdul bya'i sbyor the tshom la sogs/ /rdo rje 'dzin pas mthong nas ni/ /blo ldan rdo rje sems dpa' yis/ /sems kyi gnas ni 'grub par 'gyur/ /zhes bya ba gsungs te/ de dag las kyang / rgyan rnams thams cad yongs rdzogs pa'i/ /lha yi bu mo yid 'ong dang //khye'u dang bu mo dag mthong na/ /de yis dngos grub thob par 'gyur/ /zhes pa dang / sna tshogs kun dga' skyed mos tshal/ /lha yi bu mo la sogs brgyan/ /zhes bya ba dang / tha mal pa'i dngos grub kyi mtshan ma'o/ /tha mal pa nyid dngos grub chen po'i mtshan ma'o//de bas na grub pa'i mtshan ma thams cad ni bzhi ste/ dbab pa dang / rmi lam dang / lha'i lung dang / tha mal pa thams cad ni mtshan ma'o/ /de rnams ni ci rigs par thob pa'i rnal 'byor bas ci rigs par dngos grub bsgrub par bya'o/ /bla ma chen po'i zhal snga nas kyang /grub pa'i mtshan ma thob pa'i rnal 'byor pas/ /de nyid gsum gyi cho ga'i gzhi sngags pas/ /gong du gsungs pa'i dkyil 'khor cho ga yis/ /mngon par 'dod pa'i dngos grub rab tu 'grub/ /ces gsungs so/ /de ltar mtshan ma mthong zhing lha'i bka' thob pa des bzhi par gyur par bya ba'i phyir dgug pa'i cho ga'am/gdon gnas pa'i cho gas ji ltar gsungs pa'i rigs sme sha can la sogs pa'i bu mo bkug ste/ sngags kyi rgyud la sogs pa legs par bslabs nas ji ltar bla ma'i bka' las byung ba'i man ngag gis bstan pa ltar byas nas dpang por bzhag ste sgrub pa chen po brtsam par bya'o//de yang snod la phab pa'i lha gnyis kyis bris pa'i ri mo'i dkyil 'khor la gnas nas zhi ba'i sbyor bas rnal 'byor gsum rdzogs pa'i ting nge 'dzin gyis ji srid blo rab dang tha ma'i bye brag gis/zla ba drug gsum gyi bar du cho ga des bsgrub par bya'o/ /des byin gyis brlab par ma gyur cing byang chub kyang ma grub na/ de'i tshe zhag bdun la sogs dbye bas drag shul du bsgrub par bya'o/ /de las gzhan pa dbang du bya ba dang bsrung ba'i sbyor ba yang bya'o//le'u bco brgyad pa las kyang / dbang du byas dang bsrung ba dang / /de yi bya ba rab tu sbyar/ /zhes gsungs pa'i phyir ro/ /de la drag shul gyi sbyor ba ni 'di lta ste/ le'u bcu pa las kyang / rang sngags skyes bu bsgoms nas ni/ /gnas gzhi rnams su gzugs kyi tshul//zhag gsum tshul du sbyor ba yis/ /kha dog gsum du rab tu bsgom/ /zhes bcom ldan 'das rdo rje 'chang gis de skad ces bka' stsal to/ /de la 'di ni rdo rje dam tshig mchog gis gsang ba'o/ /snying ga'i gnas su phra mo yis/ /dkyil 'khor rnams ni dgod par bya//yi ge mchog tu gyur pa'i tshig/ /de yi dbus su bsam par bya/ /rdo rje chen po rtse lnga pa/ /rtag tu sbyor bas bsgom par bya/ /rdo rje kyo ba'i khyad par gyis/ /rdo rje gsum rnams bsam par bya/ /de yi snying gar gdab bya ste/ /lha rnams rab tu bskul bar bya//oM a phaT dza/ 'di ni rdo rje thams cad kyi/ /sangs rgyas byang chub rab bsgrub pa'o/ /'khor lo pad+mo rigs la sogs/ /rdo rje kyo ba rnam bsgom zhing / /snying ga ru ni bskul bar bshad/ /'di ni rol mo 'byung ba ste/ /rdo rje yi ni tshul mchog 'di/ / zhag bdun bar du byas nas/ /ye shes rdo rje can gyi gsang / /sku dang gsung thugs 'grub par 'gyur/ /mchog stsol ba dag rnam par gzigs/ /yid ni 'jigs shing skrag gyur nas/ /yid ni ma gu zhing dgar 'gyur ba'i/ /dngos grub rgya chen 'grub par 'gyur/ / sangs rgyas byang chub sems dpa' dang / /sngags kyi spyod pa'i don grub pas/ /rmongs pas 'gal bar byas nas ni/ /de yi srog ni der zad 'gyur/ /zhes pa la sogs pas sku gsung thugs rlung gi shing rta la zhon pa rnams kyis mi gnas pa'i phyir mya ngan las 'das pa'i dbyings na bzhugs pa'i ye shes kyi 'khor lo'i thugs kar lcags kyus brdeg cing /nga ni dpal ldan che ge mo/ /zhes bya ba la sogs pas bka' bsgo zhing bskul nas rang dang lhan cig tu bsgom pa dang / le'u bcu bzhi pa las/ phan tshun dkri ba'i tshul du bya/ /mthe bong gnyis ni rab tu bsdam//rnam par snang mdzad tshul gnas te/ /zhes pa dang / ye shes pad+ma kha dbye ba/ /rdo rje sor mo nges par gzhag/ /'dod chags rdo rje'i tshul gnas te/ /zhes pa dang / rtse mo lnga pa bcings nas ni/ /'od 'phro mang po 'khrug cing 'bar/ /rdo rje sems dpa' mnyam gzhag la//zhes bya ba'i rim pas rnam par snang mdzad dang spyan ma gnyis dkris la rdo rje dang pad+ma sbyar te gdab pa dang / snang ba mtha' yas dang na bza' dkar mo dkris te pad+ma kha phye ba'i tshul du 'od zer dang ldan pa'i rdo rje bzhag nas gdab pa dang / mi bskyod pa dang mA ma kI dkris te rtse mo lnga pa'i gsang ba'i rdo rje chos 'byung gi nang du nyi ma bye ba phrag brgya'i 'od dang ldan pa bsams te gdab pa ste/de ltar rdo rje dang pad+ma sbyar nas thams cad gnag cing khros par bsams la/ rang gi rig ma'i chos 'byung gi nang du chud pa'i gru gsum me'i dkyil 'khor gyi steng du rnam par snang mdzad la sogs pa dam tshig la bsnyengs par bsams la/rang gi rigs dang 'brel pa'i phur bu gshin rje gshed po la sogs pa rang gi gsang ba'i rdo rje las phyung ste gnas rnams su bstan nas dngos grub chen po dgug pa zhag bdun la sogs pa'i bar du byas nas mchog gi yang mchog gi bsnyen sgrub bzhi la gnas nas cho ga 'di thams cad ma lus par bsam par bya'o//dpung pa rab brkyang mgul pa nas/ /mi g.yo zhing ni brtan par 'khyud/ /brla gnyis rab tu blo ldan pas//bung ba'i tshul du rtse bar bya/ /'gying bag stabs kyis 'khyud nas ni/ /g.yon gyi spyi bor rab brten nas/ /g.yas kyi ko sko bteg nas su/ /ma mchu gzhib cing sbyor ba brtsam/ /sid sgra'i sngags ni brjod nas kyang / /dpung pa'i bar du rab byas nas/ /kha yis de la rtse bar bya//rnam pa de bzhin mchan khung dang / /mgrin pa'i glo dang sum mdo rnams/ /sen mo re mos gdab bya zhing / /yang dang yang du byug pa dang / /g.yon gyis pad+ma mnye ba dang / /lag pa sbyor ba'i dkyil 'khor la/ /rdo rje g.yon gyi sor mo gsum/ /chos 'byung nang du brud cing rtse//hUM yig las bskyed rdo rje yi/ /'od zer sna lnga 'phro ba yis/ /byang chub sems kyi na ri la/ /lce de yis ni bskyod nas kyang / /sngags 'di ched du brjod par bya/ /oM sarba ta thA ga ta a nu rA ga Na badzra swA b+hA ba At+ma kou0f85haM/ /de yis bskul ba tsam g yis ni//snying 'dar dran pa nyams par 'gyur/ /spyi bo skra grol gos kyang 'dor/ /'byung ba'i rngul chus kun tu khyab/ /brtan pa'i ngang tshul shor nas ni/ /rang gi ba spu kun kyang g.yo/ /dmar ba'i mig ni phra bar blta/ /bdag nyid mgul nas yang 'khyud nas/ /dga' ba'i dbyangs kyis glu blang zhing //sid sgra'i sngags ni brjod par bya/ /de lta bu'i tshogs sgrub pa'i gnas skabs su stong phrag bdun cu rtsa gnyis kyi sbubs su A li dang kA li dang / ma da na pa tra dang / kun ma ka dang / shang shang ka dang / na ri gsum ste kun la bskul zhing bskyod pas bdag nyid kyi phung po dang khams dang skye mched gnyis su med pa rnams bzhi pa'i dus su dri ma med pa'i rgyun lta bur zhu bar gyur pa'i dus su bdag dngos po thams cad kyi rang bzhin du mthong ste de bzhin du rgyu ba dang mi rgyu ba thams cad kyi chos zab mo dang yang dag par gsal ba gang du smos pa ltar rtogs pa de las yang dag pa'i ye shes dbang du gyur pa'i rnal 'byor pa zhes bya'o//rtsa ba'i rgyud las kyang / rdo rje nyi ma nub nas kyang / /bsgrub pa kun du brtsam par bya/ /skya rings shar ba'i dus su ni/ /skyes bu de ni 'grub par 'gyur/ /zhes gsungs so/ /de nyid las/chags pa'i yid kyis 'dod pa yis/ /rtag tu 'dod pa'i yon tan bstan/ /zhes gsungs so/ /de nas rnal 'byor pa chen po de phyis mchog tu 'gyur zhing kun brtags pa'i mtshan nyid dang bral ba rnams kyi don du gong ma'i 'od gsal ba'i ngo bo las bzhengs te/ rtag pa la sogs pa'i dkyil 'khor gyi 'khor lo yis srid pa ji srid yod pa de srid kyi bar du ro myang ba'i mtshan nyid brgyad dang ldan par bzhugs nas de rnams kyi don mdzad do//bla ma'i zhal snga nas kyang / yang dag ye shes dbang thob pas/ /gzugs brnyan bdag nyid spyi gzugs kyis//dkyil 'khor gsum gyi mtha' yas khams/ /'gro ba'i phan 'dogs byed pa'o/ /zhes gsungs so/ /de bas na gzhan sdug bsngal gyi lam gyis bskal pa chen po gsum na bla na med pa'i sangs rgyas thob par 'dod pa rnams kyis kyang 'di lta bu'i dpal dang ldan pa'i kun nas bkra shis pa'i ngo bo bdag dang gzhan gyi don phun sum tshogs pa'i rten du gyur pa/tshe 'di la thob pa'i lam 'di skyes bu su yis mi bsgom/ bsgom par bya ba kho na yin no/ /de bas na bdag gi bla ma chen po'i zhal snga nas/ pha rol tu phyin pa rnams dang / gsang sngags la mchog tu gzhol ba'i sems can rnams gzung bar bya ba'i don du/rnal 'byor chen po'i rgyud thams cad dang / de las gzhan pa'i rgyud rnams dang / byin gyis brlabs pa'i rims pa'i man ngag tu yang dag par bltas nas rnal 'byor chen po'i mngon du byas te tshigs su bcad pa dang /de rkyang pa la sogs pa'i sgo nas tshig snyan cing yid du 'ong ba dang sgrub pa'i thabs kyi rim pa sgron ma lta bu rnams byis pa so so'i skye bo rnams kyis rtogs par bya ba'i don du sbas pa lta bu rnams phyung ste rnam par dgod pa mdzad do/ /kho bos kyang bla ma chen po de'i man ngag snyan khung nas brgyud pa rnams blo la gnas bzhin par byas nas/skye bo rnams gzung bar bya ba'i don du rnal 'byor ba rnams kyi bkod pa'i rim pa cung zad bstan par byas so/ /la la ni bdag la de bzhin gshegs pa thams cad kyis byin gyis brlabs pa'i man ngag slob dpon dag gi zhal snga nas ma thob cing /gzhan dag ni rigs pa ma yin pa'i shags tsam la brten nas bdag ni rnal 'byor ba'i man ngag yang dag par thob po zhes rlom sems shing / gzhan dag la yang de ltar bsnyad pa de ni bskal pa khrag khrig gi bar du yang //bdag la de bzhin gshegs pa thams cad kyis byin gyis rlob par mi 'gyur ro/ /slob dpon chen po shAkya mi tri'i zhal snga nas kyang / gang zhig bla ma'i zhal nas byin gyis brlabs pa'i man ngag ni/ /ma thob bzhin du rigs min chos la brten gyur nas/ / bdag ni rnal 'byor chen po yin zhes gang smra ba/ /blun chen skye bo de ni rgyal ba rnams dang ngas mi 'dod/ /ces gsungs so/ /de bas na skyes bu dam pa rnams de bzhin gshegs pa thams cad mnyes par 'dod na/ rang gi lhag pa'i lha slob dpon chen po thabs thams cad kyis mnyes par byas te/de'i zhal snga nas byin gyis brlabs pa'i rim pa'i man ngag thob par byas te/ bskyed pa dang rdzogs pa'i rim pas gong du smos pa ltar 'jug par byas nas/ zhugs pas kyang tshe 'di nyid la dngos grub thams cad mngon sum du byed par 'gyur ro/ /de skad du rtsa ba'i rgyud las kyang /'dis ni de bzhin gshegs pa'i sku/ /rdo rje 'dzin pa'i thugs dang ni/ /chos 'dzin mchog gi gsung dag kyang / /tshe 'di nyid la thob par 'gyur/ /sku dang gsung dang thugs kyang 'grub/ /gang gzhan phra mor bshad pa rnams/ /rdo rje mi phyed gsum bsgoms te//bzlas pa tsam gyis de 'grub 'gyur/ /zhes gsungs so/ /dpal ldan ye shes zhabs ni bla na med pa thugs rje chen po yi/ /drin gyis snang bas khebs phyir bdag ni blun yang cung zad tsam du phye/ /de yi dge ba zla ba lta bur 'dug pa de yis skyes bu ma lus rnams/ /'jam rgyal thob nas bdud las rgyal 'gyur zab cing rgya che'i don rtogs shog//bdag gi don 'grub par byed pa zhes bya ba rnal 'byor gyi bya ba'i rim pa slob dpon chen po bi ta pA das mdzad pa rdzogs so// //rgya gar gyi mkhan po ka ma la gu h+ya dang / bod kyi lo tsA ba chen po mnga' bdag lha ye shes rgyal mtshan gyis bsgyur cing zhus te gtan la phab pa'o/