CLOSE WINDOW

D1877
བོད་ཡིག

bod kyi lo tsA ba chen po mnga' bdag lha ye shes rgyal mtshan gyis bsgyur cing zhus te gtan la phab ba//[ ]@##/ /rgya gar skad du/ /rat+na ma ti nA ma sA d+ha naM/ /bod skad du/ mi shigs pa'i rin po che zhes bya ba'i sgrub thabs/ thams cad mkhyen pa la phyag 'tshal lo//gang zhig dri med gzi brjid ldan/ /spros pa'i rnam pa kun bral te/ /mtha' yas rigs kyi sprul 'phro ba/ /'jam dbyangs de btud bla ma la'ang / /blo gros gzhan yang dad pa yis/ /'dus ba'i don gyis de bzhin nyid/ /rang gzhan dran par byed pa'i don/ / mi shigs rin chen bshad par bya/ /de la yang dag pa'i man ngag dang bral ba rnams ni chos kyi phung po brgyad khri bzhi stong ston cing shes kyang / bskal ba bye ba khrag khrig gi bar du bsgrubs kyang bla na med pa'i sangs rgyas rdo rje 'dzin pa'i go 'phong thob par mi nus so/ /de'i phyir bdag gis kyang bdag cag gi bla ma chen po sangs rgyas ye shes kyi zhal snga nas kyi rim pa nas 'ongs pa'i rlung gi de nyid kyi sgo nas mi shigs pa'i rin po che sgrub pa'i thabs cung zad ston pas skyes bu chen po rnams kyis 'bad de gzung bar bya'o//de la dngos po thams cad kyi mtha'i de bzhin nyid ni zab mo dang gsal ba gnyis su med pa'i de bzhin nyid de//de yang chos kyi dbyings spros pa'i mtha' thams cad dang bral ba nam mkha'i dkyil ltar rnam par dag pa'i ngo bo/ /de lta bu'i rnam par dag pa'i ngo bo la thog ma med pa'i dus nas sems can rnams kyis phyin ci log tu brtags pas rlung gi khams bsgrubs te/de las me/ de las chu/ de las sa'i khams bsgrubs pas phung po dang skye mched dang khams su snang zhing 'khor ba'i chos kyis rnam par snang ngo / /de ltar snang ba'i dus nyid na yang rnam par dag pa'i don la ni g.yo ba rdul tsam yang med do//de lta bu'i don de sems can thams cad la kun rdzob kyi rnam pa'i gzugs kyi gnas su rnam par gnas kyang bla ma'i zhal las bstan pa med par rtogs par mi 'gyur ro/ /de bas na lhan cig byed pa'i slob dpon gyi byin gyis brlabs pas rlung gi sgo nas spros pa dang bral ba'i ngo bo gnas dang ngal so ba'i de kho na nyid bla ma'i zhal las rtogs par 'gyur ro//rtogs pa de bsgoms pas phyin ci log tu snang ba'i phung po la sogs pa rim gyis log pas yang dag pa'i phung po la sogs pa zab pa dang gsal ba dbyer med pa'i ngo bo 'thob pa'i rtags rnams rnyed par 'gyur ro//de rnyed pas bsgom pa la sogs pa dang bcas pas mi gnas pa'i mya ngan las 'das pa thob par 'gyur te/ de bas na ji skad bshad pa'i bya bas de rtogs par bya ste/ de phyin chad dgon pa'am gang yang rung ba'i gnas su rnam par gnas nas/sngon du bya bar 'os pa thams cad tshogs par byas te/ thabs 'dir ni rim pa gnyis pa'i don bsgom par bya'o/ /de yang dang po sems can thams cad la mi btang ba'i snying rje chen po'i sems bskyed de/ de nas rang gi thugs ka nas ye shes sems dpa'i sa bon de bzhin gshegs pa thams cad kyi ye shes rim pa dang po rnams la yi ge'i gzugs su snang ba gzhom du med pa de las/yi ge kha dog lnga'i 'od zer steng gi sgo'i g.yas nas byung ste/ de'i rtse las dkyil 'khor dang ldan pa'i de bzhin gshegs pa spros pas phyogs bcu'i sems can thams cad kyi kun du rtog pa rlung gi bzhon pa dang ldan pa rnams/de rnams bla ma lta bur gyur pa la thim pas rnam par dag par byas te/ /de nyid slar bsdus te ye shes kyi ngo bor gyur te g.yon nas zhugs te/ mtshan ma'i dbus kyi bum pa'i sa bon la thim pas/ /de sangs rgyas thams cad kyi yon tan bskyed pa'i rin po che dngos po thams cad la khyab pa'i rang bzhin mi shigs pa'i thig le 'od zer lnga dang ldan pa tsa na ka'i 'bru tshad tsam du gyur par bsam mo//de'i 'od zer gyis gnas dang ye shes sems dpa' la sogs pa gsal bar byas nas/ bdag gi mthe bo'i rtsa ba dang /rje ngar dang / brla gnyis dang / gsang ba'i gnas dang / lte ba dang / gsus pa dang / nu ma gnyis dang / lag rtse dang / mgrin pa dang / mchu dang / 'gram pa dang / mig gnyis dang / rna ba'i rtsa dang / spyi bo dang / lus kun gyi nang gsal bar byas te/de dag na gnas pa'i byang chub kyi sems sgra yig bcu drug gi gzugs su snang ba bkug ste/ thig ler zhugs par bsam mo/ /de bsams pa tsam gyis de'i nang du lha bcu dgu rten dang brten can lhag par mos pas bsgoms te/ de'i dbus kyi gtso bo'i thugs kar gong ma ltar ye shes kyi thig le bsgoms nas/de'i 'od kyi rim pas rten gyi thig le'i bar gsal bar bya'o/ /de nas gnas bcu drug nas 'od zer gzhag pa phyung ste/ des dkyil 'khor gyi 'khor lo la sogs pa gsal bar byas nas/ phyogs bcu'i 'jig rten gyi khams na bzhugs pa'i de bzhin gshegs pa thams cad kyi zhal du zhugs nas mi shigs pa'i thig ler song nas ye shes kyi bdud rtsi blangs te/rdo rje'i lam nas byung ste/ 'o ma'i rgyun ltar 'du zhing thabs dang shes rab kyi dbye bas/ sna bug g.yas g.yon du zhugs te ye shes kyi thig le la thim pas/de 'dzag pa'i ngang tshul dang ldan pa de la sems bzung ste/ yang gong gi rim pas spro ba dang bsdu ba dang gzung ba byas pas rtags rnams gdon mi za bar rnyed par 'gyur ro/ /de rnyed pas sangs rgyas rdo rje mchog 'dzin pa dang 'dra bar 'gyur ro/ /mi shigs pa'i thig le bsgom pa'i cho ga'o//gal te des rtags rnyed par ma gyur na de'i tshe mi shigs pa'i thig le de nyid rim pa 'dis bsgom par bya'o/ /de yang dang por rang gi ye shes sems dpa'i sa bon gyi 'od zer gyi lcags kyus dkyil 'khor 'khor lo dang ldan pa'i de bzhin gshegs pa rnams bsdus te/rang gi snying gar btsud pas thams cad zhu ste 'dzag pa'i ngang tshul dang ldan pas yang rdul dang mun pa dang snying stobs kyi tshul du snying ga'i pad+ma la babs nas/ rang gi rdo rje'i bum pa'i dkyil du gnas pa las de 'byung ba lnga dang ye shes lnga'i ngo bo'i rang gi mtshan ma phra mo 'od zer lnga dang ldan par bsams nas/de'i bum pa la lhag par mos pas/ rten dang brten can gyi 'khor lo thig le dang bcas pa bsgom par bya'o/ /gal te der sems bying bar song bas skyo bar gyur na nang gi gsang ba'i rdo rje las phyung ste/ lha mo'i pad+ma'i ge sar la bzhag nas bsgom par bya'o//de'i thig le las gong gi rim pa ltar 'od zer sna lnga pa/ steng gi sgo nas byung ba dang slar bdud rtsi bkug nas slar 'jug pa'i rim pa byed pa'o/ /de dbugs dgag stong gi yan lag go/ /de nas de lta bu'i gsang ba'i thig le la gong gi rim pa ltar sems dal bu'i bzung bas dngos po med pa'i gnas su 'gyur ro//de yang bzung ba yang dang yang du goms pa'i stobs kyis phyin ci log gis rnam par log pas smig rgyu lta bu byung ba ni rtags dang po'o/ /chu rnam par log pas du ba lta bu byung ba ni rtags gnyis pa'o/ /me rnam par 'gyur bas srin bu me khyer lta bu byung ba ni rtags gsum pa'o//rlung rnam par log pas mar me ltar 'bar ba ni rtags bzhi pa'o/ /rnam par shes pa log pas zab mo dang gsal ba gnyis su med pa'i nam mkha' ltar gsal ba ni rtags lnga pa'o/ /gzung ba'i yan lag go//de ltar mtshan ma lnga thob nas de kun khyab par bya ba'i phyir/ rdo rje'i lam nas nam mkha'i khams su ji skad gsungs pa'i cho gas spro bar bya'o/ /spro ba de las sngon du mthong ba'i don rjes su dran pa bskyed de/ de yang sangs rgyas rjes su dran pa dang / chos rjes su dran pa dang / rdo rje rjes su dran pa dang / rigs rjes su dran pa dang / khro bo rjes su dran pa dang / lha rjes su dran pa ni/ dkyil 'khor gyi 'khor lo re re'i dbang du byas pa yin no/ /gcig pa la yang rtogs par bya'o/ /lha rjes su dran pa kun la yang rtogs par bya'o/ /de yang rjes su dran pa lnga ni/ sku la sogs pa'i dkyil 'khor gyi 'khor lo sngon du bstan pa de spro ba dang bsdu bas gsal bar bya'o/ /dam tshig rjes su dran pa ni de dang spro ba las sngags brjod pa dang / cho ga dang po'i don rjes su dran pa'o/ /dkyil 'khor rjes su dran pa ni cho ga gnyis pa la sogs pa'i dkyil 'khor de dang de spro ba las dran pa'o//sku dang gsung dang thugs rjes su dran pa dang sems can rjes su dran pa ni/ sku dang gsung dang thugs rdo rje bsgom pa rnam par smon pa ste/ spros pa las rjes su dran pa'o/ /sngags thams cad kyi spyi gzugs rjes su dran pa ni rdo rje sems dpa' dang rang gi lha'i gzugs longs spyod bzhis brgyan pa spros pa las rjes su dran pa'o//dam tshig rjes su dran pa ni bdud rtsis byin gyis brlab pa la sogs pa las rjes su dran pa'o/ /shes rab kyi pha rol tu phyin pa dang / skyes pa rjes su dran pa ni/ spros pa de dag kyang ci yang med ces bya ba dang /de gnyis su med pa'i ngo bo yin pas rjes su dran pa'o/ /zhe sdang gi rigs la sogs pa'i mchod pa rjes su dran pa ni/ rang gi rigs kyi bu mo 'bring gi yan lag bzhis dag pa ni/ rjes su chags pas mnyes par byas pa'i don rjes su dran pa'o/ /gang dag gzung ba las blo nyams pa'i blo gros dman pa rnams kyis bcu drug po 'di bya'o zhes gzhan dag 'chad do//rjes su dran pa bcu drug po 'di phra mo'i rnal 'byor pas gzhan dang gzhan du spros pa las grub par shes par bya'o/ /de bzhin bsdu ba yang shes par bya'o/ /rjes su dran pa'i yan lag go//gsang ba'i thig le bsgom pa'i cho ga'o/ /de ltar des rtags rnyed par gyur nas rim pa 'dis sprul pa'i thig le spro bsdu bya'o/ /de yang spyi bo'i gnas su rlung gi dkyil 'khor dud ka la oM dkar po 'ong ba'i rang bzhin bsam mo/ /mgrin pa'i gnas su chu'i dkyil 'khor dkar po la AHdmar po gnas pa'i rang bzhin bsam mo//thugs kyi gnas su me'i dkyil 'khor dmar po la hUM nag po 'gro ba'i rang bzhin bsam mo/ /nu ma'i bar du dbang chen gyi dkyil 'khor la rang gi lha'i sa bon 'byung ba dang 'jug pa dang / gnas pa las grol ba'i ngo bo'o//de nyid las g.yas nas 'byung ba'i rlung gi dkyil 'khor dud ka las/ hUM gi rang bzhin 'gro ba snang srid kyi chos kun khyab cing dag par byas nas bdud rtsi'i rang bzhin oM gyi ngo bo 'ong bas nang gi chos kun dag par byas nas zhugs te/ AH'i ngo bos cung zad gnas par byas te/de la rang gi lha'i de nyid dal bu dal bus dngos po med pa'i gnas su 'gyur ro/ /de bzhin du g.yon pa nas byung ba'i chu'i dkyil 'khor dkar po las/ hUM gi rang bzhin spro ba dang / oM gyi rang bzhin bsdu ba dang / AH'i rang bzhin gnas pa la rang gi de bzhin bzung ba gong ma bzhin no//de ltar gnyi ga las drag tu 'byung ba me'i dkyil 'khor dmar po las/ hUM gi ngo bo spro ba dang / oM gyi ngo bo bsdu ba dang / AH'i ngo bo gnas pa las rang gi ngo bo de nyid bzung ba gong ma bzhin no/ /de bzhin du gnyi ga las dal bus 'byung ba'i dbang chen gyi dkyil 'khor ser po las//hUM gi ngo bo spro zhing / oM gyi ngo bo bsdu zhing / AH'i ngo bo gnas pa las 'byung ba dang / 'jug pa dang / gnas pa las grol ba'i ye shes rnyed par byed par som nyi mi bya'o/ /de ltar phyag rgya bzhi'i dbye bas re re la nyis brgya nyi shu rtsa lngar rnam par zlo ste/ de 'pho ba re re la dgu brgyar rnam par bsgres pa'i nyi shu rtsa bzhis khri khrag gnyis dang / stong phrag gcig dang drug brgyar dbang phyug chen po'i rnal 'byor pas nyin mtshan du bzlas pa byed do/ /bzlas pa des chos thams cad sgyu ma'am/ smig rgyu dang / brag ca dang / mgal me'i 'khor lo dang /dri za'i grong khyer dang / sprul pa dang / mig 'phrul dang / gzugs brnyan dang / chu zla la sogs pa'i sku'i ngo bor thams cad rtogs shing shes nas rnam par gnas te/ des bcu'i dbang phyug rnams dang skal ba lhag par mnyam ste/ rnal 'byor rnams kyis don de la rab tu 'bad de nan tan bya'o//de lta bu'i rang bzhin gyis bzlas pa la sems can thams cad thog ma med pa'i dus nas bzlas pa byed kyang gang bla ma'i man ngag med par yang dag par mi shes so/ /de bas na bla ma yang dag par mnyes par byas te/ dga' bral gyi ngo bo rtogs par byas nas/ gong gi rim pas bsgoms na ji skad du gsungs pa'i yon tan du 'gyur ro//de bas na de yongs su shes pas rnal 'byor pa'i bar chad kyi ngag gi bzlas pa rnams yongs su spang bar bya'o/ /'on kyang de la gnas pa ni gal te cung zad kyang yod pa ma yin no/ /de mi shigs pas 'di'i don rdo rje 'chang chen po'i ngo bo gang gis ji ltar bzlas te/glang po rnyed na glang po'i rjes tshol ba lta bu'o/ /de bas na rdo rje 'chang gi bzlas pa 'di la rnal 'byor pas 'bad par byas pas de bzhin gshegs pa thams cad kyi byin gyis brlabs pa'i gnyid cung zad 'ong bas bzhi par 'gyur ba'i rtags lan grangs mang du rnyed par 'gyur ro//de skad du le'u bco lnga pa las/ bsam gtan bzlas la 'bad pa yis/ /sgrub pa pos ni rtag tu mthong / /zhes so/ /de mthong bas ji skad gsungs pa'i cho ga la gnas pas/ rnam pa thams cad mkhyen pa'i byang chub tshe 'di nyid la skad cig gis thob nas/ro myang ba'i mtshan nyid brgyad dang ldan par srid pa ji srid kyi bar du bzhugs par mdzad do/ /sprul pa'i thig le bsgom pa'i cho ga'o/ /de bas na gzhung 'di las rim pa gnyis ston te/ bskyed pa'i rim pa dang / rdzogs pa'i rim pa'o/ /bskyed pa'i rim pa de la gnyis te/bskyed pa'i rim pa dang / rdzogs pa'i rim pa'o/ /rdzogs pa'i rim pa la yang de bzhin te/ bskyed pa'i rim pa ni thig le gsum pa'i cho ga'o/ /rdzogs pa'i rim pa ni des mtshon pa'i ji bzhin pa'i don to/ /rim pa gnyis kyi bye brag gis lha'i sku yang rnam pa gnyis te/ sngags kyi sku dang ye shes kyi sku'o//ye shes kyi sku la yang rnam pa gnyis te/ ye shes cung zad dag pa'i sku dang / shin tu rnam par dag pa'i sku'o/ /shin tu rnam par dag pa'i sku mtshan nyid kyi tshul du gnas pas mi slu ba'i sku dang / ji bzhin pa'i 'bras bu'i sku'o/ /de yang sbyor ba bdun te/ dpe med bde rdzogs kyi sku dang /gnyis su med pa dang / bde ba chen po dang / rang bzhin med pa dang / thugs rje rgyas pa dang / bar chad med pa dang / 'gog pa med pa'i sbyor ba ste/ bla ma mnyes par bya ba las yang dag par shes par bya'o/ /nyag gcig rtogs pa'i spyod yul mchog/ /ji bzhin pa yi de kho na//bdag 'dra blun pos mi dpogs pas/ /gzhag par bya bar 'os pa yin/ /'on kyang yang dag lam stor la/ /phan snyam nas ni dad tsam gyis/ /cung zad tsam du bsdus pa la/ /dpa' bo mkhas pas bzod par mdzod/ /'gro ba thams cad dngos po yis/ / gnyis med de nyid rab rtogs nas/ /'bras bu rdo rje 'chang bar shog /mi shigs pa'i rin po che zhes bya ba'i sgrub thabs/ slob dpon chen po bi ta pA das mdzad pa rdzogs so// //rgya gar gyi mkhan po ka ma la gu h+ya dang / bod kyi lo tsA ba chen po mnga' bdag lha ye shes rgyal mtshan gyis bsgyur cing zhus te gtan la phab pa'o/