CLOSE WINDOW

D1872
བོད་ཡིག

@##/ /rgya gar skad du/ tsa tu raM ga sA d+ha na no pi ka sa man+ta b+ha dri nA ma TI kA/ bod skad du/ yan lag bzhi ba'i sgrub thabs kun du bzang mo zhes bya ba'i rnam par bshad pa/ dpal rdo rje sems dpa' la phyag 'tshal lo/ /dpal ldan sgrib kun bsal bas dri ma med cing ye shes rgyas//rgya cher rang bzhin 'das dang da ltar ma 'ongs kun du son/ /bde ba chen mo lha mo bcud gzugs rig mas rtogs pa can/ /bde ba'i sku can 'jam dpal rdo rje de la phyag 'tshal nas/ /dpal ldan gsang ba 'dus pa'i rgyud kyi cho ga bzhin/ /bcom ldan 'jam pa'i dbyangs kyi ma nor sgrub pa'i thabs//sangs rgyas ye shes zhabs kyis yang dag mdzad pa gang / /de nyid ci nus yang dag dran phyir bri bar bya/ /de la rab tu byed pa brtsam par 'dod pa'i rje btsun 'dis rang gi spyod pa bsrung bar bya ba'i phyir/ 'dod pa'i lha la yon tan 'dod pa sngon du 'gro ba'i mchod pas bsod nams 'phel zhing bgegs kyi bar chad mi 'ong zhing bsam pa rdzogs pa'i ched du de nyid du byas nas/yang dag pa'i shes pa dang ldan pa rnams 'jug pa'i rgyu gsungs so/ /de la dpal ldan zhes bya ba la sogs pas 'dir mchod pa dang / bstod pa dang / phyag 'tshal ba'o/ /gang gi phyir mnyes shing yang dag par yon tan brjod pa dang / lus ngag gis 'dud pa'i dngos po la shes par bya'o/ /de yang gzi brjid kyi khyad par gyi sgo nas bcom ldan 'das nyid kyi khyad par byas pa yang dag par na khyad par de rnams bzhi dang bral ba'i phyir/zla ba dang zla ba'i 'od lta bur rtogs par bya'o/ /de ltar bsdus pa'i don bstan nas yan lag gi don bstan par bya ba'i phyir/ de la dpal ldan zhes bya ba ni bsod nams dang ye shes kyi tshogs kyi mtshan nyid do/ /de nyid gang la yod pa de dpal ldan no/ /des ni rang gi don phun sum tshogs pa'i rgyu gsungs so//ci'i phyir zhe na/ rnam pa thams cad mkhyen pa'i mtshan nyid rang gi don phun sum tshogs pa ni gzi brjid de gnyis las byung ba'i phyir ro/ /de ni bcom ldan 'das dang 'brel pa'i phyir/ rgyu'i dus su ni nye ba'i mtshan nyid du zad kyi 'bras bu'i gnas skabs la yang rtogs par bya'o//des ni tshangs pa la sogs pa las che bar brjod pa'o/ /gang gi phyir na tshogs las rnam pa thams cad skye bar 'gyur ba de'i phyir/ 'jig rten gyi dpal gyi don las byung ba ma yin no/ /'khrul pa kun zhes pa ni yang dag pa'i don mthong ba la bgegs su 'gyur ba'i phyir/bag chags dang bcas pa'i nyon mongs pa'i sgrib pa la sogs pa mi shes pa'i 'khrul pa kun bsal zhes bcom par bya ba de yang / bla ma dam pa las dbang thob pa la sogs rim pas so/ /dri ma med pa zhes bya ba ni kun gzhi la sogs pa me long lta bu'i ye shes la sogs par gnas gyur pa'i ngo bo rang gi don phun sum tshogs pa dri ma med pa thams cad mkhyen pas gsungs so//des nyan thos la sogs pa las che bar brjod pa'o/ /de yang 'phags pa lang kar gshegs pa las/ dper na shing ni rgya mtsho ru/ / rlabs rnams kun gyis rab g.yengs ltar/ /de bzhin nyan thos rmongs pa yang / /mtshan nyid kyis ni rab tu g.yengs/ /kun nas nyon mongs bag chags 'brel/ /kun nas ldan dang ldan ma yin/ zhes bya ba la sogs pas rtogs par bya'o/ /yang dag par gsal ba'i sgo nas gzhan gyi don phun sum tshogs pa gsungs pa/gzi brjid bsam yas zhes pa la sogs pa gsungs so/ /gzi brjid kyang de bsam yas kyang de rigs kyang de sprul pa yang de nyid yin pas de skad do/ /des rnam par brgyan pa'i bcom ldan 'das gang yin pa de la de skad ces bya'o//de'i don ni 'di lta ste rigs gcig la sogs pas gdul bya'i rgyud la snang bar gyur pa'i gzugs kyis rtag tu don mdzad pa can de'i dbang gis gdul bya rnams kyis thams cad shes par grub pa'i phyir gzhan gyi don to/ /de lta bu yod pa de la brgyan pa zhes bya ba'i tha tshig go//rang dang gzhan gyi don phun sum tshogs pa 'grub par byed pa gsungs pa/ shes rab ma yin zhes pa la sogs pa'o/ /de la shes rab ma zhes bya ba ni rang gi rig ma ste/ de yang rgyu'i gnas skabs su byin la sogs pa'i tshogs gnyis rnam par dag pa'i bzhin gang gi stobs kyis thams cad mkhyen pa skye bar 'gyur ba ste/'bras bu'i gnas skabs la gnas pa yang yang dag pa'i byang chub kyi ngo bo phyi stong pa nyid la sogs pa rnam par dag pa'i rang bzhin de'i dbang gis gdul bya rnams kyi rgyud yongs su dag par byed pa'i rgyu'i ngo bo ste/ de zab mo dang yang dag par gsal bar snang ba'i sku'i ngo bo de'i lus ni shes rab ma'i lus te/des 'khyud cing mdzes par longs spyod cing klubs pa gang yin pa de la de skad ces bya ste/ dbyer med pa'i ye shes dang sems can gyi don byed pa la chags pa'i phyir ro/ /de bas na 'dod chags chen po'i rgyu yin par bstan pa'i phyir/'phags pa de kho na nyid bsdus pa la sogs pa las che bar brjod pa'o/ /de ltar nges khyad par byas pa gang zhe na/ 'jam dpal de la zhes te/ 'jam zhes pa ni mnyen pa ste gnyis su med pa'i longs spyod dang ldan pa'i phyir ro/ /dpal zhes pa ni bshad zin to/ /mchod pa'i don du mngon phyogs te//zhes pa ni mnyes par bya ba'i don du lus ngag yid kyis mngon du phyogs pa'i mchod pa byas nas/ dpal gsang ba 'dus pa'i rim pas/ dngos po'i cho ga bshad par bya/ /zhes sbyar ro/ /de nyid bstan pa'i phyir dpal ldan zhes bya ba la sogs pa'o/ /dpal ldan zhes pa ni 'jig rten las 'das pa'i phun sum tshogs pa thob par byed pa'i phyir dang /yang na nyon mongs pa'i skyon gyis ma gos pa'i phyir ro/ /de gang zhe na/ 'dus pa zhes te dag pa dang ma dag pa thams cad don dam pa dang kun rdzob tu 'dus pa'i phyir rdo rje 'dzin pa la de skad ces brjod do/ / dbyer med pa'i phyir des grub pa'i gzhung la yang de skad ces bya'o/ /de'i rim pas zhes pa ni gzhan gyi rim pa dgag pa'o/ /dam pa'i bshes gnyen zhes pa ni bla ma ste/ bla ma nyid bsrung ba'i zhabs kyis sgrub pa'i thabs byed pa'i don du gsol ba btab ste/ des rang yid ches nas brod pas rtsom pa'i sbyor ba la zhugs pa'o//yang na dam pa'i bshes gnyen ni 'jam dpal dbyangs te/ des gsol ba ni bkas gnang ba la de skad ces bya ste/ der rang la shin tu yid ches nas brod pas brtsams so zhes so/ /des ni gzhung brtsam pa'i rgyu gsungs so/ /'gro ba'i don zhes pa ni 'gro ba'i don nyid phun sum tshogs pa zhes te mngon par mtho ba dang nges par legs pa'i mtshan nyid do//de'i rgyu ni bzhi ste de yang gang zhe na dngos po'i cho ga ste bsnyen sgrub yan lag bzhi la sogs pa'o/ /de 'gro ba rnams kyis rtogs par bya ba'i phyir bshad par bya'o zhes/de ltar na rgyud chen po las sam gzhan slob dpon gyi man ngag rgya chen po las 'gro ba rnams kyis rtogs par 'gyur te 'ong bas sgrub pa'i thabs 'dis ci zhig bya zhe na/ de'i phyir skal ldan zhes bya ba la sogs pas khyad par gyi dgongs pa gsungs pa skal ldan zhes bya ba la sogs pa ni mi khom pa brgyad spangs pa'o//mi khom pa brgyad ni dmyal bar skye ba dang yi dwags su skye ba dang song du skye ba dang / mtha' khob tu skye ba dang / 'du shes med pa dang / 'on pa dang lkugs pa la sogs pa dang sangs rgyas med pa'i bskal par skye ba dang / lta ba log pa zhes bya ste/de dag spangs nas 'byor ba dang ldan pa'i lus thob pa la skal ba dang ldan zhes bya'o/ /de yang yun ring du gnas pa ma yin pa'i phyir 'jig pa'o/ /dam pa'i skyes bu zhes pa ni rnal 'byor chen po'i rgyud yang dag par ston pa po rnams so/ /rnal 'byor rgyud rnams 'byung bar dka' ba'i phyir ston pa po rnams kyang 'byung bar dka'o//de dka' bas de dang 'grogs pa'ang shin tu dka'o zhes te/ ji skad du/thams cad mkhyen pa 'jig rten na/ /bde ba skye'am mi skye ba/ u dum+bA ra'i me tog bzhin/ /gal te brgya lam re 'ga' 'byung //de bas thob dka' 'byung ba ni/ /gsang sngags spyod pa'i tshul 'di ni/ /de bas kyang ni shin tu dkon/ /zhes pa dang / rtsa ba'i rgyud las/ mar me mdzad dang / thub ba 'od srungs la sogs pa'i dus su sngags ma bshad de/ de'i phyir zhe na/ de'i dus na sems can rnams la skal ba med pa'i phyir ro zhes pa la sogs pa rgya cher gsungs so//de'i phyir mchog tu 'gyur ba zhes ba ni dbyer med pa/thabs dang shes rab zhes pa ni zab pa dang rgya che ba'i bdag nyid do/ /de des rtogs par bya ba'i phyir byed 'dod pa ste/ dngos po'i cho ga bshad par bya zhes bya ba dang sbyar bar bya'o//de'i don ni 'di lta ste/ skal ba dang ldan zhing 'jig par sla ba 'di dang ston pa rnams phrad par dka' bas rgyas par bshad pa la nyan pa la sogs pa la bar chad kyis dogs pas mdor bsdus pas rtogs par bya ba'i phyir mchog tu gyur ba'i thabs dang shes rab byed 'dod de de'i phyir brtsams so zhes so//de ltar des ni blo gros dang ldan pa'i 'jug pa'i yan lag dngos po la sogs pa bstan to/ /de yang 'gro ba'i don phun sum tshogs pa'i dngos po'i cho ga rgyud las yang dag par bstan pa ni brjod par bya'o/ /de 'gro ba rnams dang khyad par can gyi 'gro bas rtogs pa ni dgos pa'o//dgos pa de yang rab tu byed pa 'dis byed pa na thabs las byung ba'i mtshan nyid kyi 'brel bar gnas so/ /dngos po'i cho ga de bstan par gyur ba'i stobs kyis bdag nyid lha'i go 'phang thob pa ni dgos pa'i yang dgos pa'o//de rnams dang ldan pa ni chos yang dag pa'o zhes gsungs pa'i phyir ro/ /da ni sgrub pa po dang bsgrub par bya ba phun sum tshogs pa gsungs par rigs pa las 'bras bu mngon du byed pa la sgrub pa po ni gtso bo'am/ rgyu yin pa'i phyir de'i phun sum tshogs pa dang por gsung bar rigs so//de'i bya ba'i las yin pa'i phyir bsgrub par bya ba ni phyis bstan pa'o/ /de bas na de nas zhes pa la sogs pa nas shes rab ldan zhes pa'i bar gyi gzhung gis don de ston te/de la snying rje chen po zhes pa ni sems can sdug bsngal dang de'i rgyu las grol bar 'dod pa'i ngo bo ste 'gro ba kun la khyab pa'o//de 'og nas 'byung ba'i yon tan thams cad kyi rtsa bar gyur pa'i phyir thog mar smras so/ /de bas na/ snying rje 'ba' zhig gzhir gyur pas/ /yon tan thams cad rab tu skye/ /zhes 'byung ba'i phyir ro/ /de'i phyir mthu las skyes zhes pa ste de'i stobs las skyes zhes te kun la sbyar bar bya'o//de bas na de 'ba' zhig rtsa bar gyur ba'i phyir gzhan rnams ni yan lag tu shes par bya'o/ /skyes ba de kho na gang zhe na byang chub sems ldan zhes pa la sogs pa'o/ /byang chub ni rnam pa thams cad mkhyen pa mngon par rdzogs par byang chub pa'o//de mngon par 'dod pa'i sems gang la yod pa de la ldan zhes bya ba ste de nyid shes pa dang skyob par ldan pas sngags pa zhes bya'o/ /gtong phod ces pa ni sbyin pa ste dang por byas pa'i tshul khrims la sogs pa'o/ /de nyid 'di'i tshul gyis 'jug cing goms par byas pas na yon tan no//de gang la yod pa de la brgyan pa zhes bya'o/ /zab mo'i gzhung zhes pa ni lha'i rnal 'byor chen po'i gzhung ste rgyu ba dang mi rgyu ba thams cad bdag nyid dang lhar dbyer med par ston pa'i phyir ro/ de la de kho na nyid bzhin du nges par 'dzin pa ni mos pa'o//sngags la spyod pa thams cad ni dbang dang ldan pas bsnyen pa la sogs pa la 'jug par rigs pas dpal ldan zhes bya ba la sogs te/ dpal ldan gsang 'dus zhes pa ni brjod zin to/ /de'i dkyil 'khor ni rdul tshon dang yid do/ /der legs pa cho ga gang gis dbang bskur ba ste/chu dang cod pan la sogs pa'i rim pas bka' lung gsal ba'i bar du dbang phun sum tshogs pa dang bcas pa zhes pa ni ldan pa'o/ /des 'di skad du ston to/ /bla ma dam pa rnams las gang yang rung ba cig mnyes par byas te/ cho ga ma tshang ba med pa'i dkyil 'khor gang rung du zhugs pa nas bum pa la sogs pa'i dbang thob par byas nas/gsang ba dang mchog tu gsang ba la sogs pa rig par byas pa'i rnal 'byor pa zhes bya ba'i tha tshig go/ /de ltar des ni rnal 'byor pa thams cad kyi thun mong du gyur ba'i yon tan bstan nas/ /da ni sgrub pa la 'jug pa'i yon tan gsungs pa/cho ga bzhin du zhes pa la sogs pa smras te/ bka' stsal thob ces pa ni sngon gyi dus su slob dpon gyi bka' stsal ba thob pa dang phyis kyi dus su rang gi bka' stsal thob pa'o/ /de las kyang dang po ni spyir shes par bya ste/ gnyis pa ni khyad par ro//cho ga bzhin du bzhis sngags snyoms bsgoms pa/ /zhes pa ni rang lha'i sa bon te/ cho ga bzhin du bsgom pa ni dang po'i rnal 'byor la sogs pa'i rim pas mnyes par byed pa'o/ /de'i gong du smos pa la sogs pa thob par byed par sgrub pa la 'jug par 'gyur gyi gzhan ni ma yin zhes so//de nyid shes rab ldan zhes te bsam gyis mi khyab pa thams cad dkyil 'khor gyi 'khor lo'i tshul du shes pas phyi rol du snang ba med pas rtogs pa'o/ /'dir smos pa las gzhan bla ma'i zhal snga nas gsungs pa/ gsang zhes sbyor ba'i de kho na/ /shes shing theg pa gsum gyis ni//de bzhin nyid du rig pa po/ /zhes bya ba la sogs pa yang 'dir rtogs par bya ba'o/ /de ma thag tu thams cad mdor bsdus nas sgrub pa po'i phun sum tshogs pa gsungs pa'o/ /da ni yid du 'ong ba'i gnas su zhes shin tu sbyangs par gyur shel lus shin du sbyangs pas bde ba la reg par 'gyur ro//bde ba la reg pas mnyam par 'jog pas ji lta ba bzhin du shes par 'gyur bas yid spro ba'i gnas bstan pa'i phyir gang zhig ces pa la sogs pa smos te/gang zhig ces pa ni dngos su mi 'dzin te/ spyir shes par bya'o/ /khyad par gsungs pa/ dri med chu la sogs zhes pa la sogs pa'o/ /dri ma med pa ste chu la sogs kyang de yin pas de skad ces bya'o//de 'ba' zhig gam zhes na ma yin te/ ljon pa'i shing mchog ni tsU ta la sogs pas phreng ba'i tshul du nye logs kun du mdzes par byas pa la klubs pa zhes bya'o/ /ri zhes pa ni nye ba'i mtshan nyid can du ma zad de don du na sems rnam par dag pa las ye shes 'byung ba'i phyir ro//de lta bu'i gnas de phyi'i tshul du dag par byas pa'i phyir tsan+dan la sogs pa 'og nas smos so/ /tsan+dan ni nyi ma dang zla ba'o/ /sogs kyi sgras bsdus pa dri chu dang dri ma rnams bzung ste/de yang rnam par snang mdzad la sogs pa'i rang bzhin de rnams kyis stegs bu gru bzhir byas pa byugs te zhes pa la/ dri zhim pa'i me tog kha dog dang dbyibs la sogs pa yang dag par bkram ste der bla re la sogs pa yid dga' ba gzhan yang rtogs par bya'o/ /de lta bu ni bsam gtan dang mthun pa'i gnas te/der bde ba'i stan la rdo rje skyil krung gis 'dug nas/ bcom ldan 'das 'jam dbyangs shes bya rab tu bsgrub par bya zhes bya bar sbyar ro/ /de la bcom ldan 'das zhes pa ni me long lta bu'i ye shes la sogs pas dngos po thams cad 'joms pa'i phyir ro//de rnams dang gang ldan pa'o/ /yang na bcom pas na bcom zhes te gnyis su med pa'i shes rab kyis bdud bzhi bcom pa'i phyir ro/ /de yang nyon mongs shes rab rag las pas/ shes rab de phyir bcom zhes gsungs so/ /de gang dang ldan pa de de ltar ro//yang na dbang phyug la sogs pas mi sdug pa la sogs pa bcom pa'i phyir bcom zhes gsungs so/ /de rnams gang dang ldan pa de de ltar ro/ /'jam zhes pa ni bshad zin to/ /dbyangs ni gsungs te de nyid 'di na 'og nas 'chad pa'i rim pas rab tu bsgrub par bya zhes pa'i don to//da ni lam gyi rim pa gang gis byang chub sems dpa' 'jam pa'i dbyangs bsgrub par bya ba gang yin pa'i lam gyi rim pa de la rnal 'byor dang po gsungs pa dang po zhes pa la sogs pa'o/ /dang po zhes pa ni dus bzhi'am yang na rnal 'byor gyi dang po'o/ /dus gang zhe na tho rangs pa zhes pa la sogs pa smos te/tho rangs ni skya rengs kyi mtshams so/ /de ni nye ba'i mtshan nyid tsam du zad de/nyin phyed la sogs par yang rtogs par bya ba'i las kyis bskal pa rnams phal cher de'i dus su bstan par snang ba'i phyir yang smos so/ /dus der rnal 'byor gyi dang por bsgom par gang zhe na/snying ga'i zla dbus zhes te rang gi snying gar zla ba'i dkyil 'khor gyi dbus su bdag gi dus ring por goms pas gcig tu gyur pa'i tshangs pa chen po'i spyod pa bzhi'i rgyu'i dngos por gyur pa kha dog lnga'i 'od zer 'phro ba de nyid ces pa phyin ci ma log pa'i mtshan ma dang ldan pa/de nyid ni sngags kyi gzhung gi 'dod chags chen po nas/ don thams cad 'byung bas dmar ser du gnas pa maM bkod pa'o/ /de bkod pas snying rje la sogs pa'i rgyu yin par bka' stsal lo/ /de yang rdo rje 'dzin pas bdag gi sa bon 'di dran pa tsam gyis snying rje la sogs pa sems can de'i rgyun la 'byung bar gyur cig ces smon lam gyi shugs kyis 'byung ba'i tshad med pa bzhi bsgom par bya ba'i phyir/snying rje dang ldan zhes bya ba smos te/ snying rje ni sems can rnams sdug bsngal dang de'i rgyu la grol bar 'dod pa'o/ /de yid la byed pa ni ldan zhes bya'o//de na nye bar mtshon pa tsam du zad de byams pa la sogs pa yang rtogs par bya'o/ /de la byams pa ni phan pa'i bde ba ma lus pa nye bar bsdu bar 'dod pa'o/ /dga' ba ni de'i thabs lam gyi rim pa gang gis 'bras bu mngon du byas nas sems can gyi don byed pa la rangs pa'o//de yang btang snyoms ni zab mo dang rgya che ba'i rang bzhin bsgom pa'i sgo nas bstod pa la sogs pa'i bya ba mi byed pa ste/ de rnams las kyang snying rje ni rtsa ba lta bu ste/ snying rje 'ba' zhig gzhir gyur pas yon tan thams cad rab tu skye/ / zhes 'byung ba'i phyir ro/ /de bas na byams pa ni sdong bu lta bu'o/ /dga' ba ni yan lag lta bu'o/ /tshogs gnyis sogs pa ni lo ma lta bu'o/ /rnal 'byor gzhan rnams ni me tog lta bu'o/ /rnal 'byor der rang dang gzhan gyi rgyud yongs su smin pa ni 'bras bu lta bu yin no zhes gsungs so//ji skad du/ snying rje dang ldan byams pa ni/ /sems can sdug bsngal rnams kyi ni/ /bde ba byed la shin du rgyas/ /sdong bu la ni yal ga 'phel/ /sems kyi de kho na nyid rigs/ /spong ba len pa lo ma ni/ /smon lam rnams kyis rgyun mi 'chad/ rten cing 'brel 'byung rnam pa gnyis//rang rgyud nang du smin pa'i phyir/ /mo gsham me tog lta bu min/ /bdag gzhan yongs su smin pa'i phyir/ /snying rje'i 'bras bu de la spyod/ ces bya ba la sogs pa grol ba'i thig le las bla ma chen pos gsung bar mdzad do/ /de bas tshangs pa'i spyod pa bzhi ba 'di 'og nas rdo rje thugs khyod ces pa la sogs pa'i gnas su rtogs par bya'o//chos kyi dbyings yangs pa la mi snang bar mi 'gyur te/ me tog dang 'bras bu lta bu 'byung ba'i phyir ro//kha la sogs pa dag par bya/ /zhes pa ni stong pa nyid dang mtshan ma med pa dang smon pa med pa'o/ /de dang por byas nas dran pa nye bar gzhag pa la sogs pas rgyud la yod pa'i blo gros ni rang bzhin med pa dang gang du yang ma grub par rnal 'byor pas bsgom par bya'o//yang sa bon bkod pa'i rjes la shes par bya ste/ bla ma'i zhal snga nas kyang / rnam par thar pa'i sgo dag pa'i/ rang snying zla bar 'od 'bar mi//zhes gsungs pa'i phyir ro/ /de'i dgongs pa ni zab mo dang gsal bas sems dag par 'gyur ba'i phyir ro zhes gsungs bar mdzad do/ /de bas na thams cad du rtogs par bya'o/ /de ni 'og nas byung ba rnams bsgrub pa'i phyir rten gsungs pa dus gsum rgyal ba zhes bya ba smos te de yang 'gro ba rnams kyi dbul ba la sogs pa sdug bsngal gcod par byed pa'i bdag nyid la de bzhin gyi nor bu rin po che lta bu sa bon gong du gsungs pa yud tsam gyis byas pas/de'i 'od zer las byung ba sangs rgyas la sogs pa'i dkyil 'khor dang /de dang tha mi dad pa'i bla ma'i gzugs rnams kyis nam mkha'i khams thams cad til gyi gang bu bzhin du rgyas par dmigs te/ de'i mdun du 'og nas 'byung ba bzhin thams cad bya'o/ /cho ga de gang zhe na/mchod pa'i sprin spro zhes bya ba la sogs pa smos te/mchod pa'i sprin spros pa ni maM gyi 'od zer las byung ba'i spyan la sogs pa spros nas thim pa dang / gzhan yang 'od zer las tshal dang theg pa la sogs pa phyi'i yo byad rnams kyang rtogs par bya'o/ /de bzhin du bstod pa dang / bdud rtsi yang sogs pa'i sgras rtogs par bya'o//de'i 'og tu dpag tu med pa'i lus sprul pa la sogs pas kyang phyag bya bar shes par bya'o/ /shes rab ldan zhes pa ni 'og tu bstan pa rnam gsum mnyam pa nyid du rtogs pa'o/ /sdig pa bshags pa la sogs pa bya ba ni 'og nas 'byung ba rnams de'i spyan sngar bya'o zhes bya ba'i don to//de ci'i phyir zhe na/ dge ba 'phel don du zhes bya ba gsungs te/ bstan pa la ni mtshams med pa lnga la sogs pa zad par 'gyur ba'i don du'o/ /ji ltar ras shin tu dri ma med par byas pa la tshon 'dzin pa dang 'dra bar/ gang zhig gi rgyud la mi 'dod pa'i las kyi bag chags med pa de la ni dkyil 'khor gyi 'khor lo 'jug sla bar 'gyur ba'i phyir ro//de kho na'i don du gsungs pa thog med dus na zhes pa la sogs pa'o/ /'khor ba gang la dang po med pa de ni thog ma med pa ste/ dus de nas srid pa'i rgyun chad pa med ces pa ni phung po lnga'i rgyun rgyu 'bras kyi tshul du gnas pa la/rtog pa kun gyis zhes pa ni gzung ba dang 'dzin pa la sogs pa yang dag pa ma yin pa rnams kyis bsgos te bsags pa ste mtshams med pa la sogs pa'o/ /de ni dam pa rnams kyis smad cing 'bras bu 'byin par byed pa'i phyir sdig pa ste snying rje chen po mdun du zhes pa ni gong tu bstan pa rnams kyi'o//cho ga bzhin zhes pa ni sdig la sogs pa mnyam pa nyid du rtogs pa'o/ /sogs kyi sgras bzung ba'i rjes su yi rang ba la sogs pa gsungs pa sangs rgyas zhes pa la sogs pa'o//de la sangs rgyas zhes pa ni rtag pa la sogs pa'o/ /byang chub sems dpa' zhes pa ni sa'i snying po la sogs pa'o/ /'phags pa zhes pa ni bdud rtsi 'khyil pa la sogs pa'o/ /rtsa ba'i rgyud las de rnams sangs rgyas dang byang chub sems dpa' zhes bya ba'i sgras ma bstan to//'o na ci'i phyir zhe na/ 'phags pa bdud rtsi 'khyil pa dpa' bo zhes bla ma chen pos 'di na gsungs par mdzad do/ /gzhan kun zhes pa ni rdo rje he ru ka pa la sogs pa ste/ de rnams 'di las sgra rnam pa gsum gyis ma bstan pa'i phyir ro//de rnams kyi dge ba ni ngan pa spong ba ste zab mo dang gsal bar spyod pa'o//yang na thun mong du na byang chub sems dpa' ni sa bcu la gnas pa rnams so/ /sangs rgyas ni chos kyi sku mngon du mnyes pa rnams so/ /'phags pa ni nyan thos dang rang rgyal ba rnams so/ /bzhi ni sems dang po bskyed pa la sogs pa de'i dge ba'i rtsa ba ni gong du smos pa lta bu'o//de thams cad la phrag cing dog pas bsdus nas yi rang ste bdag gi bya ba'o/ /'di ni gzhung gi sangs rgyas la sogs pa// de dag kyang gcig kyang du ma'i chu snod ces pa la sogs pa rdo rje 'dzin pa kho nar rtogs par bya'o//de ltar byas pa las byung ba'i dge ba de dag kyang gong gi don du bsngo zhe na/ phyin ci ma log ces te phyin ci ma log pa'i don yang dag pa de zab pa dang rgya che ba'i rang bzhin dkyil 'khor gyi 'khor lo ste de nyid byang chub pa'o/ /de'i phyir dge ba'i rtsa ba de rnams bsngo ba'i stobs kyis drang bar bya'o//yang dag par 'phags pa'i dkon mchog gsum la skyabs su 'gro bas bsod nams rdzogs shing gzhan gyis mi thub pas khyad par gyi sangs rgyas la skyabs su 'gro ba ston te/ so sor med ces bya ba la sogs pa ste/ de la spros med ces pa ni sgrub pa thams cad yang dag par bsal ba'i byang chub kyi sems zab mo'i ngo bo'o//gang gi phyir dri ma med cing yon tan thams cad dang ldan pa 'gro ba rnams kyi rgyud kyi ma rig pa'i mun pa sel bar mdzad pa'i mtha' yas pa'i khams nas/ phyag rgya chen po la sogs pas 'gengs par mdzad pa de'i phyir de nyid ni zla ba lta bu de dang 'dra ba'i phyir ro//de'i stobs kyis 'grub cing rdzogs pa ye shes kyi dkyil 'khor mtha' yas kyi khams na sems can ji snyed pa thams cad kyi yul can thams cad kyi yul du gyur pa snying rje chen po'i ngo bo yang dam par gsal ba'o//de kho na'i khyad par gsungs pa rang yid la gnas zhes gsungs te/ rang gi sems dang dbyer med par gnas pa shel dang kha dog lta bu'o/ /de la rtag tu skyabs su mchi/ /zhes pa ni mtha' yas pa'i 'khor ba yan chad kyi bar du rang gi yid dang tha mi dad pa'i blos skyabs su mchi ba ste/gzhan ltar ci srid 'tsho'i bar du skyabs su mchi zhes pa ni ma yin no/ /rtog pa thams cad ces bya ba la sogs pas skyabs su mchi gsungs pa/ de la rtogs pa thams cad ces pa ni gzung ba dang 'dzin pa la sogs pa yang dag pa ma yin pa thams cad las gzod ma nas grol ba ste byed pa ni ma yin no//de yang chos thams cad kyi de bzhin nyid zab mo'i ngo bo nyid do/ /dam pa'i sems can zhes pa ni byang chub sems dpa' rnams so/ /de'i bkra shis zhes pa ni de bzhin gshegs pa'i stobs bcu la sogs pa'o//de'i rten zhes pa ni gzhig ste gang gi phyir byang chub sems dpa' rnams kyi zab mo'i mtshan nyid kyi chos kyi de kho na nyid bsgoms pa'i stobs kyis de'i rgyud la de bzhin gshegs pa'i yon tan rnams 'byung ba'i phyir de skad do/ /dngos kun ro gcig ces pa ni rgyu ba dang mi rgyu ba'i chos thams cad yang dag pa ma yin pa rnams las rang bzhin gyis grol ba'i chos la gong du gsungs pa ltar skyabs su mchi'o//de ltar yang gsungs pa thams cad/ kun rdzob sna tshogs sprul na yang / /de dag ngo bo ro gcig ste/ /de yang sangs rgyas rnams kyis dbyer med bstan//gang dag de la dbye bar brtag byed pa/ /de ni log pa'i lam la zhugs par 'gyur/ /zhes gsungs so/ /dge 'dun la skyabs su 'gro ba gsungs pa bcing ba zhes pa la sogs pa'o/ /bcing ba ma lus pa zhes pa ni 'dod chags la sogs pa phyin ci log gi mtshan nyid do//de spangs pa zhes pa ni yang dag par spangs pa ste gsang dang mchog tu gsang ba la sogs pa rigs pas so/ /snying rje zhes pa ni bshad zin to/ /dpal ldan zhes pa ni bdag dang gzhan gyi dpal dang ldan no/ /de kho na la khyad par gsungs pa//rab tu dga' ba la sogs pa/ /zhes pa ste/ sa dgu pa la rab tu bzhugs pa rnams/ /zhes mkhas pa rnams 'chad do/ /gang gi phyir sa bcu pa la byang chub sems dpa' nyid sangs rgyas zhes gsungs pa de'i phyir yang dag par rdzogs pa'i sangs rgyas ni ma yin no//rnam par snang mdzad kyi rgyud las/ gang gis sa bcu thob nas ni/ /dbang gi rnam pa khong du chud/ /rnam pa thams cad mkhyen pa 'dir/ /'jig rten kun gyi tshul mkhyen pas/ /de yi phyir na sangs rgyas gsungs/ /zhes pa'i phyir ro/ /de yang thun mong du bstan pa ste/rnal 'byor pa zhes chen po rnams kyi skabs su ni de ltar 'dod pa ma yin no/ /'dul ba'i dbang po zhes pa ni dman pa'i theg pa la zhugs pa rnams kyi bdag por gyur ba'i phyir byang chub sems dpa' rnams la de skad ces bya'o/ /de la gong du gsungs pa ltar skyabs su mchi'o zhes so//'di na yang sangs rgyas la sogs pa rdo rje 'dzin las tha mi dad pa yin mod kyi/ 'on kyang / mos pa tha dad sems can bsam dbang gis/ /gcig nyid yin yang chu snod zla ba bzhin/ /zhes stug po bkod pa las gsungs so/ / sems can gyi sems 'phyo'i dbang gis gar mkhan gyi tshul du bstan par mngon no/ /bsod nams kyi tshogs la gnas pa'i rnal 'byor pa byang chub la smon pa bskyed pa gsungs pa bsam dang zhes pa la sogs pa'o/ /de nyid mngon du byas nas sems can rnams 'khor ba'i 'brog dgon pa la 'dren pa'i blo gros ni bsam pa rnam par dag pa'o//de dag pa'i rten du gyur pa'i rnam par smin pa'i tshogs rnam par dag pa ste/ dri ma med pa'i las kyi 'bras bu rgyun mi 'chad pa'i phyir ro/ /sgrib pa kun zhes pa ni nyon mongs pa la sogs pa'o//de la nyon mongs pa gang zhe na 'dod chags la sogs pa'o/ /shes bya'i sgrib pa gang zhe na/ /gzung ba dang 'dzin pa la mngon par zhen pa'i bag chags nyon mongs pa can ma yin pa'i mi shes pa'o/ /las kyi sgrib pa gang zhe na/ mtshams med pa la sogs pa'o//rnam par smin pa'i sgrib pa gang zhe na/dmyal ba la sogs pa'o/ /de'i bag chags ni de bskyed pa'i mthu ni mtshan nyid kun gzhi la gnas pa'o/ /de bcom pa ni bsam pa dang rnam par smin par dag pas mthu dang ldan pa'o/ /yang dag mos pa zhes pa ni de kho na nyid la nges par 'dzin pas na mos pa'o//gzhan gyis phrogs shing som nyi la sogs par thal ba yin no/ /de gang la yod pa de la brgyan pa zhes bya ste/ des byang chub ni zhes pa ni sngags kyi byang chub ni sngags kyi byang chub tu'o/ /bskyed par bya ba ni de kho na'i phyir bdun pa'o//byang chub de yang lam gyis 'thob par bya ba'i phyir lam la brten pa gsungs pa sras ldan zhes bya ba la sogs pa'o/ /de la sras zhes pa ni byang chub sems dpa' ste de dang ldan pa ni bde bar gshegs pa rnams so/ /de rnams dang lhan cig tu thun mong gi lam gcig pa bdag gis bsten par bya zhes bya ba'i don to//thun mong gi lam ni gang zhe na/ sbyin sogs zhes pa la sogs pa ste/ pha rol tu phyin pa bcu'o/ /de nyid ser sna la sogs pas ma bsgribs pas na dkar po'o/ /de nyid 'di'i tshul gyis goms par byed pas yon tan no//de la tshul ji lta bus brten par bya zhe na/ ma lus yang dag ces pa ni rdzogs pa'i sangs rgyas ma lus pa thams cad kyi rang bzhin de rgyu ba dang mi rgyu ba'i chos thams cad zab mo dang gsal ba'i gzugs la sogs pa'i dkyil 'khor gyi 'khor lo yang dag pa ma yin pa'i kun du rtog pa ma lus par yang sgyu ma lta bu la sogs pa 'og nas 'byung ba'i rim pas bdag gis bsten pa'i rim pas/bla ma chen pos smon pa dang 'jug pa'i byang chub kyi sems kyi bar du lam la brten par gsungs pa khong du chud par bya ba'i phyir gong du bstan par shes par bya'o//bla ma chen po'i zhal snga nas kyis de'i dgongs pa gsal bar byed pa'i ched lam la brten par byas nas 'jug pa byang chub kyi sems gsungs so/ /de nyid lam la brten pa smon pa yin pa'i phyir ro zhes dgongs pa'i phyir ro/ /de ltar bsod nams kyi tshogs rdzogs par byas nas ye shes kyi tshogs kyi don du 'jug pa byang chub kyi sems gsungs pa//snying rje zhes pa la sogs pa'o/ /thams cad du yang snying rje 'ba' zhig gtso bor gyur pa'i phyir ye shes kyi tshogs kyi don du yang gsungs pa/ 'jig rten rnams zhes pa ni srid pa gsum du yongs su gang ba'i sems can rnams so//lta ba'i dra ba ni mthar 'dzin pa la sogs pa ste de nyid tshogs yin pas na dra ba ste dra ba dang 'dra ba'i phyir ro/ /des g.yogs pa ni khebs pa ste gang sems can rnams yang dag pa'i lta ba bcom zhing de'i dbang gis rgya mtsho'i tshong pa gru zhig pa bzhin du sdug bsngal gsum la sogs pas gtses pa'o//snying rje bskyed byas zhes pa ni de rnams la snying rje bskyed pa'o/ /ded dpon chen po gru 'cha' ba dang 'dra bar rnal 'byor pa sngags kyi dngos grub sgrub pa la zhugs par 'gyur ro/ / de bas na bla ma chen po'i zhal snga nas/ phyin ci log par zhen pa'i 'gro ba de dag thar par byed pa'i ched du yang dag pa'i snying rje bskyed pa'i bsam pa can gyis chos thams cad stong pa nyid du mngon du 'gyur bar bya'o zhes gzhan dag las kyang gsungs so/ /byang chub yang dag ces pa ni rang bzhin gyis dag pa'i phyir yang dag ste don dam pa'o//de nyid bsam med ces bya ste/ nyan thos la sogs pas gzhal du med cing kun du khyab pa'i rang bzhin yin pa'i phyir ro/ /de bsgoms nas rim pa 'di zhes pa ni shU n+ya tA'i sngags bzla bar bya ba dang /de hUM las byung ba'i sa gzhir byas pa dang / de 'og ston zla dkar po zhes pa la sogs pa bsgom pa ni sngags pa'o/ /de'i don ni 'di lta ste/ de ltar snying rje chen po bskyed nas 'jug pa byang chub sems kyi mtshan nyid rnam par thar pa'i sgo gsum bsgom par bya'o zhes bya ba de gang zhe na/rang bzhin med pa'i phyir zhes pa la sogs pa'o/ /chos gang dang gang gi mtshan nyid kyi ngo bor rab tu bsgrags pa de shin tu mi rigs pa'i phyir de dang bral ba'o/ /yang na byis pas kun du brtags pa'i gzung ba dang 'dzin pa gcig dang du ma la sogs pa dang bral ba'i phyir dngos po thams cad dang bral ba'i phyir dngos po ji snyed pa thams cad stong pa nyid do//rgyu med na zhes pa ni mu stegs la sogs pas brtags pa'i dbang phyug la sogs pa yod pa ma yin pa'i phyir chos thams cad mtshan ma med pa'o/ /tha snyad tsam du snang ba'i rgyu bkag pa ni ma yin no//mtshan ma med pa ni dngos po med pa ste mtshan ma nyid dngos po zhes gsungs so/ /rjes su dpag pa zhes bya ba ni rjes su dpyad pa ste lha dang mi la sogs pa'i 'gro ba bde ba la sogs pa ni rnam par dpyad pa dang bral ba'i phyir rjes su dpag pa med pa ste/ de bas na smon pa des bral lo zhes pa ste/de dang de la sogs pa'i bde ba dang gzugs dang longs spyod la sogs pa 'dun pa'i ngo bor smon pa ni rjes su dpag pa'i sngon du 'gro ba ste/ 'dir chos thams cad rang gi ye shes 'ba' zhig snang ba las ma gtogs pa longs spyod pa la sogs pa gud na med pas smon pa med pa'o//de ltar rnam pa gsum bstan pa ni brjod pas phye ba tsam ste don dam par stong pa nyid kho nar 'dus par shes par bya'o/ /gang gi phyir gzung ba dang 'dzin pa la sogs pa rdzas ji snyed pa thams cad dang bral ba'i ngo bo nyid ni stong pa nyid de/gzugs la sogs pa'i snang ba las ni grol/ /zhes bya ba la sogs pa gcig dang du ma dang bral ba'i rigs pas bla ma chen po 'di na gsung bar mdzad de/ slob dpon d+harma kIrtis tshad mar smra ba la/ dngos po rnams ni gang gis rtogs/ / don dam du ni de med de/ /gang phyir gcig dang du ma yi/ /ngo bo nyid ni med pa la/ /de phyir thams cad stong pa nyid/ /ces gsungs so/ de bas na de rgyu rkyen mi 'byor ba'i phyir dang por ma skyes pas mtshan ma med pa'o/ /'phags pa rgyu bstan pa'i gtsug lag las/ snang dang mi snang ba yin no/ /dngos po las rkyen 'thad ma yin/ /mi snang ba rgyu gang la yod/ /snang ba la rgyu ci zhig bya/ /zhes gsungs so/ /slob dpon d+harma kIrtis gsungs pa/ /skyes pa gzhan rag ma lus kyang / /rang gi rgyu la sogs pa ni/ /'brel par gyur pa brtags pa yi//gcig pu blo ni mi snang ba/ /gang phyir gzhan la rag lus 'brel/ /ji ltar rag lus de med pas/ /snang ba kun la rag ma lus/ /dngos po ci ste rag lus pa/ /de nyid smon pa med pa yin/ zhes so/ /rang bzhin med pa rgyu dang 'bras bu'i ngo bo sbyor ba med pa la/de bas na smon pa rigs par mi 'gyur te mi snang ba ri bong gi rwa bzhin du de la rgyu ni mi 'os pa ma yin/ /snang bar 'gyur na de la dgos pa med/ /rgyu stong pa nyid la snang bar gyur pa 'os pa ma yin no/ /de'i phyir chos thams cad sgyu ma lta bu dang / thog ma dang tha ma med pa ma dpyad par yid du 'ong ba//dngos po thams cad ni stong pa nyid ces bya bar yod par mi 'gyur ro/ /ha cang spros pa ni btang ngo / /de ltar chos thams cad kyi de bzhin nyid la dmigs pa 'jug pa/ byang chub kyi sems kyi brtan par byed pa'i ched du sngags kyis byin gyis brlabs pa gsungs pa oM zhes bya ba ni bsam gyis mi khyab pa'i lha'i sku nyid do//shU n+ya tA ni stong pa nyid/ dz+nyA na ste ye shes so/ /de nyid badzra ste dbyer med pa'i phyir ro/ /de'i swa b+hA ba de rang bzhin te/ de At+ma ko dang haM zhes bdag gi rang bzhin yin no zhes so/ / de bas na 'phags pa klu sgrub kyis gsungs pa/ dngos las stong nyid gzhan ma yin/ de ma gtogs pa dngos kyang med/ /ces so/ /sngags de'i mthus bdag dang 'gro ba thams cad kyi lus ngag yid gsum rang dbang du brtags pa yin pa'i phyir na de 'dod pa tsam gyi dbang du gyur pa gong du gsungs pa lta bu rnams par sun phyung nas kun rdzob kyi mtshan nyid du mi snang bar gyur te de kho na nyid gsum gyi yi ger gyur nas de thams cad zab pa dang rgya che bas dam du bzung ba'i phyir hoHgnyis kyi bar du gnas pa zla ba'i steng du mngon par bsams nas bgegs dgag par bya'o zhes gsungs so//de ltar tshogs rdzogs par byas pa'i rnal 'byor pas bgegs dgag pa'i don gsungs pa/ hUM las rdo rjer byas pa'i sa gzhi zhes bya bar smos te de ltar de kho na nyid mngon du byas pa'i rnal 'byor pa ni bdag dang 'gro ba thams cad de kho na nyid du gcig pa'i phyir bgegs la sogs pa srung ba nan tan du bya ba ci dgos she na/de ni nyes pa med de dngos po'i stobs kyis tshad mar gnas pa la las dang po pas rtog pa thams cad dag par byas pa ma yin pas bgegs kyi rgyu thams cad rnal 'byor pa'i rgyud la yod do//de yod pas de las byung ba'i bgegs rnams 'byung bar 'gyur bas srung ba la sogs pa yang dag par 'gal ba ma yin no/ /de bas na bsam gtan phyi ma rim par phye ba las/ /bde ba dang ni sdug bsngal dang / /zhe sdang 'dod dang rmongs pa dang //nad kyis 'chi dang bgegs rnams kun/ /de rgyu sngags pa'i rgyud la gnas/ zhes gsungs so/ /de bas rgyud yongs su dag par ma byas pa'i bar du srung ba yongs su dag par 'gyur ro/ /de la srung ba ni hUM las rdo rjer byas pa'i zhes bya ste/ rang gi mdun du nyi ma'i dkyil 'khor kyi steng du yi ge hUM sngon po las bskyed pa'i bum pa la yang nyi ma la gnas pa'i hUM gis mtshan pa bsgoms te/de nas hUM las 'od zer 'phro zhing / 'du ba'i sbyor bas sa gzhi rdo rje'i rang bzhin du gyur pa bsgoms pa ni hUM las rdo rjer byas pa'i sa'o//de ni nye ba'i mtshan nyid du zad de de'i 'og tu 'od zer las byung ba'i bdud rtsi thab sbyor kyi sku 'ba' zhig gis 'phro bar mtshams phyi rol bcad pa dang rdo rje ra ba nam mkha' khyab par bya ba la sogs pa yang rtogs par bya'o/ /bla ma chen po'i zhal snga nas de ni sems tham la gsungs so/ rtse gcig pa la ni de'i dbus su rdo rje'i rang bzhin gyi sa gzhi la skad cig gis 'khor bar byed pa'i 'khor lo'o/ /rtsibs bcu sa bcu rnam par dag pa la dad pa la sogs pa rnam par dag pa gshin rje gshed po la sogs pa bgegs rab du 'joms par byed pa rnams ji lta ba bzhin du bsam pa'i don rtogs par bya'o//de'i cho ga ni man ngag gis shes par bya'o/ /de ltar bgegs kyi dogs pa med par byas nas chos kyi dbyings phyag rgyar bsgoms pa'i phyir de'i rgyu gsungs pa kun tu bzang mo las byung zhes te/ rgyu ba dang mi rgyu ba'i bdag nyid du gyur pa'i phyir kun tu bzang po ste rdo rje sems dpa'o//de nyid 'di na 'og nas 'byung ba'i rim pas bsgoms nas de gnas gyur pa las chos dbyings kyi phyag rgyar bsgom par bya zhes bya bar sbyor ro/ /bsgom par bya ba de yang gang zhe na/de 'og ces pa la sogs pa'o/ /de 'og ces pa ni rdo rje sems dpa' las yongs su gyur pa'o//ston zla dkar po zhes pa ni kha dog ste phrad par sla'o/ /phyogs 'khor sna tshogs zhes pa ni kha dog lnga'i 'od zer 'phro ba dang ldan pa 'od zer de nyid thug pa med par spro ba'i phyir mtha' yas zhes so/ /gyen du 'greng ba zhes pa ni phra mo srung ba'i 'khor lo la brten pa gyen du gnas pa ste bsten pa'o//gru gsum zhes pa ni sku la sogs pa ste phyogs thams cad nas so/ /nang gi rang bzhin rdo rje 'dzin pa ni nang gi nam mkha' nyid rdo rje ste de 'dzin pa'i phyir ro/ /yang na rdo rje de bzhin gshegs pa la sogs pa 'dzin pa'i phyir na yang de skad ces bya'o//chos kyi 'byung gnas zhes pa ni stobs bcu la sogs pa'o/ /de rnams 'dir dkyil 'khor gyi 'khor lo'i tshul du skye ba thob pa la bya'o/ /de'i dbus gnas zhes pa ni chos kyi 'byung gnas bskyed pa dang dus gcig tu paM ser po las bskyed pa'i sna tshogs pad+ma'i steng du/sna tshogs rdo rjes brgyan zhes pa ni khaM ljang gu las bskyed pa kha dog sna tshogs pa'i rdo rje rgya gram gyis brgyan pa bsgom par bya'o zhes so/ /da ni de'i dbus su rten gyi dkyil 'khor bskyed pa gsungs pa/b+h+rUM las zhes pa la sogs pa'o/ /de la sna tshogs rdo rje'i dbus su b+h+rUM las zhes te dkar po las so/ /de las bskyed pa'i 'khor lo rtsibs brgyad pa'o//de yang shes bya'i sgrib pa la sogs pa bsal ba'i phyir na bsgom pa'i lam gyi stobs las 'byung ba lam gyi yan lag brgyad yin te/de yang gang zhe na/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i stsol ba dang / yang dag pa'i dran pa dang / yang dag pa'i ting nge 'dzin to//de rnams rnam par dag pa'i rang bzhin 'khor lo dkar po rtsibs brgyad pa de'i lte ba la yang zla ba la b+h+rUM gyis mtshan pa bsgoms te/ de'i 'od zer 'phro zhing 'du ba'i sbyor bas rig ma dang bcas zhes pa ni rang snang ba'i rig ma dang ldan pa'o/ rnam par snang mdzad ces pa ni 'og nas 'byung ba'i rim pas bsams nas de'i sku 'byung ba zhes te/ ji skad gsungs pa'i chos 'byung nang du 'chad pa'i sna tshogs pad+ma dang rdo rje rgya gram gyi lte bar rnam par snang mdzad kyi sku las 'byung ba'i gzhal yas khang brtsegs ma bsam par bya'o zhes so//de kho na'i khyad par gsungs pa/ thub dbang gsal ba zhes pa ni thub pa'i dbang po rnams 'od zer gsal ba'i phyir ni de skad do/ /de nyid dkyil 'khor ni sna tshogs de dag gi 'od zer rnams ni sna tshogs pa'i 'od zer rnams so//des gzhal yas khang gi phyogs 'khor ba kun du 'od zer 'phro bas khyab pa ni de skad do//rtsa ba'i rgyud las kyang / sangs rgyas 'bar ba'i 'od dang mnyam/ /'od zer sna lngas kun du khyab/ /ces gsungs so/ /mi mnyam pa ni ma yin phyir/ /zhes pa ni/ de bzhin gshegs pa dang so so'i skye bo rnams de bzhin nyid du mnyam pa'i phyir na gru bzhi'o//mchog bzhi ni/ dran pa dbang stobs sgo rnams kyis/ /zhes pa ni mchog ces pa ni rab tu brgyan zhing nyon mongs pa ma yin pa'o/ /gang zhig brgyan zhe na sgo bzhis so/ /de yang gang zhe na dran pa nye bar gzhag pa nas dbang po dang stobs kyi bar du'o//don 'di dpyad par bya ste/ 'di ni smos pa'i dge ba'i rtsa ba thams cad ni mi gtsang ba la sogs pa bsgoms nas chud pa ma yin te dge ba'i rtsa ba rnams ni sngags kyi stobs kyi mthus rdzogs pa yin par rnal 'byor pa dam pa rnams kyis shes par bya'o//de lta ma yin par gyur na log par gyur ba'i phyir ro/ /de ci'i phyir zhe na/ de dag thams cad 'di las ma bstan pa'i phyir ro/ /de dran pa zhes pa ni/ lus dang tshor ba dang sems dang chos la dmigs pa gcig pa nyid skyob pa gang yan lag sna tshogs bsdus pa tsam gyi lus 'di ni gzung ba la sogs pas rnam par dben pa'i sems kyi dran pa nye bar 'jogs pas na/lus dang / tshor ba dang / sems dang / chos zhes bya ba'i dran pa nye bar gzhag pa ni shar gyi sgo'o/ /de bas na gsungs pa/ lus dang tshor ba sems chos rnams//du ma nyid min sogs sbyor bas/ /de dran de la dad pa gang / /byang chub don du shar sgor 'dod/ /ces so/ /mi dge ba ma skyes pa dang / skyes pa rnams yang zhing mi bskyed pa'i phyir dang / dge ba skyes pa dang ma skyes pa rnams bskyed pa dang /gnas pa'i phyir rim gyis rtsom pa dang yongs su sbyong ba dang so sor rtog pa dang nan tan lhur byed pa zhes bya ba brtson 'grus bzhi rnam par dag pa ni gnyis pa lho'i sgo'o/ /de bas na gsungs pa/ ma 'ongs da ltar phyin ci log/mi bskyed pa dang yang byed pa'i/ / skyes pa gnas par bya ba yang / /brtson 'grus bzhi ni lho sgo yin/ /zhes so/ /'dun pa dang / brtson 'grus dang / sems pa dang / dpyod pa'i ting nge 'dzin spong ba'i 'du byed dang ldan pa'i rdzu 'phrul zhes nam mkha' la 'gro ba rkang pa zhes rgyu rnams rnam par dag pa ni gsum pa nub kyi sgo'o//de bas na gsungs pa/ 'dun pa brod pa gnas pa blo/ /rdzu 'phrul rkang pa dang dran pa/ /nub kyi sgor ni de 'dod do/ /zhes so/ /de'i 'og tu nges par byed pa'i yan lag drod dang rtse mo dang 'brel pa/ dad pa dang / dran pa dang / ting nge 'dzin dang / shes rab dang / de bzhin du bzod pa dang / 'jig rten chos mchog dang 'brel pa stobs lnga rnam par dag pa ni bzhi pa byang phyogs kyi sgo'o/ /de bas na gsungs pa/ dad dang brtson 'grus dran pa dang / /ting 'dzin shes rab dbang dang stobs/ /gzhal du med pa'i ting nge 'dzin ni/ /bzhi pa byang gi sgo nyid do//bsam gtan bzhi'i rta babs zhes pa ni rtog pa dang / dpyod pa dang / dga' ba dang / bde ba dang / sems rtse gcig pa ste/ yan lag lnga dang ldan pa'i bsam gtan dang po dang / de la brten pa ye shes kyis rab tu dga' ba dang po dang / gnyis pa rnam par dag pa'i rta babs dang po dang //de'i mu tig dang me tog phreng ba la sogs pa'o/ /nang gi bdag nyid rab tu dang ba dang / bde ba dang / gsal ba dang / sems rtse gcig pa ste/ yan lag bzhi dang ldan pa'i bsam gtan gnyis pa dang / de la brten pa sa gsum pa dang sa bzhi pa rnam par dag pa'i rta babs gnyis pa dang /de'i mu tig gi phreng ba la sogs pa'o/ /btang snyoms dang / dran pa dang / shes bzhin dang / bde ba dang / sems rtse gcig pa ste/ yan lag lnga dang ldan pa'i bsam gtan gsum gsungs pa dang / de la brten pa ye shes kyi sa ring du song ba la sogs pa rnam par dag pa rta babs bzhi pa dang /de'i mu tig gi phreng ba dang shro ta ka la sogs pa/ ting 'dzin kha khyer zhes pa ni de bzhin gshegs pa rnams kyi sems rtse gcig par byas pa'i mthu stobs las byung ba dang dpa' bar 'gro ba dang / nam mkha' mdzod dang /dri ma med pa dang / seng ge rnam par rol ba rnams rnam par dag pa phyogs kun du kha khyer gyis yongs su bskor ba'o/ /kha khyer de la gnas pa ni kha khyer de la bzhugs pa'o/ /dam pa'i mchod pa lha mo'i gzugs sgeg pa'i ros rnam par brgyan zhing me tog la sogs pas phyag brel bar gnas pas kha khyer la sogs pa kun du rgyun ma chad par gnas pa ste bzod pa dang /chos dang / don dang / sngags kyi gzungs rnam par dag pa'o/ /sna tshogs rgyan rnams zhes pa ni kha dog dang dbyibs sna tshogs pa'i rin po che ma lus par rnam par spras shing gzhal yas khang bkod pa'o//de ci'i phyir zhe na/ 'gro ba'i re ba thams cad yongs su skong ba'i phyir gsungs te/ 'dul ba 'byung zhes pa ni sems can rnams kyi dbang gis byung ba ste gsungs pa'o/ /de gang zhe na/ gsung rab yan lag dgu zhes te/mdo'i sde dang / dbyangs kyis bsnyad pa dang / lung bstan pa dang / tshigs su bcad pa dang / ched du brjod pa dang / gleng gzhi dang / de lta bu dang / skyes pa'i rabs dang / shin tu rgyas pa'i sde'o/ /de nyid chos zhes te gzings dang 'dra ba'i chos so/ /de kun du 'gro ba zhes pa ni 'gro ba rnams kyi rgyud la 'jug par 'gyur ba'i phyir ro//de rnams rnam par dag pa gang zhe na rlung gis bskyod pa'i zhes pa la sogs pa ste/ rgyal mtshan nang logs su dril bu 'khrol zhing phyi rol du cod pa na rtse mo sna tshogs rlung gis g.yo bar byed cing 'greng ba bsgrengs pa ste/brgya byin gyi phyogs su dkar po/ me mtshams su smug po/ /gshin rje'i phyogs su nag po/ bden bral gyi phyogs su thal ka /rlung gi phyogs su kha dog sna tshogs/ gnod sbyin phyogs su ser po/ /dbang ldan phyogs su ljang gu shes par bya'o//me long lta bu'i ye shes rnams nyid 'od gsal ba nyid kyi phyir me long ste thams cad gzung bar bya'o/ /rtag tu dri ma med pa de yin par shes par bya'o/ /byang chub yan lag ces pa ni dran pa dang / chos rab tu rnam par 'byed pa dang / dga' ba dang / sbyangs pa dang / ting nge 'dzin dang /brtson 'grus dang / btang snyoms te/ mthu stobs las byung ba chos kyi dbyings spyod yul nyon mongs pa'i gnyen por 'gyur ba rnams yan lag tu 'gyur ba'o/ /de rnam par dag pa ni dri ma med pa'i me tog dang spos bkram zhing de bzhin du dra ba dang dra ba phyed pa nyi ma dang zla ba'i me long dang me tog phreng ba sgo logs su btags pa la sogs pa'o//sna tshogs brgyan pa zhes pa ni legs par byas pa zhes pa'i don to/ /rnam par thar pa brgyad ces pa ni gzugs can gzugs rnams lta ba ni rnam par thar pa dang po'o/ /nang gzugs med par 'du shes pas phyi rol gyi gzugs la lta bar ni gnyis pa'o//sdug pa'i rnam par thar ba lus kyis mngon du byas te rdzogs par byas nas gnas pa ni gsum pa'o/ /nam mkha' mtha' yas skye mched ni bzhi pa'o/ /rnam shes mtha' yas skye mched ni lnga pa'o/ / ci yang med pa'i skye mched ni drug pa'o/ /'du shes med 'du shes med min skye mched ni bdun pa'o/ /'gog pa'i snyoms par 'jug pa ni brgyad pa ste de rnams mdo dang rgyas pa las gzugs can gzugs rnams la lta ba rnams ni de stong pa nyid dang mtshan ma med pa dang / /smon pa med pa'i rnam pas zil gyis mnan nas shes shing mthong ba 'di ni rnam par thar pa dang po zhes bya ba nas//de bzhin du 'gog pa'i snyoms par zhugs pa stong pa nyid dang mtshan ma med pa dang smon pa med pa'i rnam pas zil gyis mnan nas mthong ba 'di ni rnam par thar pa gnyis pa'o zhes 'byung ba dang /don 'di nyid kun dga' snying po'i zhal snga nas kyis bshad pa yang yin te/ de rnam par dag pa'i ka ba brgyad kyis zhes pa ni 'khor lo la sogs pa'i ka ba brgyad do/ /des klubs shing nye bar mdzes par byas shing mchog tu gyur pa'o/ /rdo rje'i tshul zhes pa ni gsang sngags kyi tshul lo//bsam gyis mi khyab pa'i chos dbyer med par ston pa'i phyir tshul lo/ /de'i lus kyi chos kyi 'khor los sgyur ba ni bskor ba ste de'i ka ba brgyad kyi steng du rdo rje phreng ba zlum pos bskor ba dang ldan pa'o/ /gzugs la sogs pa zhes pa ni skra dang /dri dang / ro dang / reg bya rnams so/ /de nyid spyod yul du gyur pa'i phyir spyod yul lo/ /de rnam par dag pas bla na med pa'i 'dod pa'i yon tan lnga zhes te don dam rang bzhin med pa'i rgyus tha mal ba'i gzugs la sogs par ma rig pa'i phyir gzhal yas khang snang ba'i kha dog dang dbyibs la sogs pas brgyan pa ste skabs 'dir lha mo'i ngo bo nyid du gzung ngo //de ci'i phyir zhe na/ stong pa'i dkyil 'khor ston pa'i skabs min pa'i phyir ro/ /rtsa ba'i rgyud las kyang / 'dod pa'i yon tan lngas brgyan zhes gsungs so/ /chos kyi dbyings kyi rgyu mthun dag pas zhes pa ni/de la chos kyi dbyings ni gnyis su med pa'i shes rab kyi pha rol tu phyin pa'o/ /de'i rgyu mthun pa de ni de las byung ba'i stobs bcu dang 'dzem pa med pa bzhi dang / /so so yang dag pa bzhi dang / byams pa chen po dang / snying rje chen po dang /sangs rgyas kyi chos ma 'dres pa bco brgyad do/ /'gyur ba med par gcig pa'i phyir de skad ces bya'o/ /de rnam par dag pas zas lnga zhes me tog dang spos dang mar me dang dri dang lha bshos dang de rnams kyi gzhal yas khang brgyan pa la de skad ces bya'o/ /de la sogs pa sangs rgyas kyi yon tan ji snyed pa thams cad kyang de ltar snang bar 'dod de/thams cad kyang chos kyi dbyings kyi rgyu mthun pa yin pa'i phyir ro/ /de bas na bla ma'i zhal snga nas/me tog spos chab mar me che/ /dri zhes bya ba'i dkyil 'khor la/ /yid dga' chos kyi sgron ma dang //bsngags pa 'dus pa'i bdug spos dang / /byang chub yan lag me tog dang / /chos kyi zas ni lha bshos so/ /zhes so/ /rtsa ba'i rgyud las kyang / mchod pa rnam pa lngas brgyan pa/ /zhes so/ sna tshogs pad+ma zhes pa ni kha dog sna tshogs pa'i pad+ma'i lha'i gdan bcu dgu'o//de yang 'gro ba ma lus pa dang tha mi dad par bstan kyang der gtogs pa'i nyes bas ma gos pas sdong bu dang bcas pa'i gdan gyis nye bar mdzes par byas pa'o/ /nyi ma zhes pa ni bdun te/ lho dang nub dang byang gi re'u mig dang sgo bzhi sna tshogs pad+ma gnas bar shes par bya'o//de yang sems can ma lus pa'i rgyud du gtogs pa'i ma rig pa'i mun nag rnam par sel cing mi dge ba bcu'i 'dam rdzab skem par byed pa dang / byang chub kyi sems kyi myu gu smin par byed pa'i phyir shes rab kyi ngo bo'o/ /zla bar bcas zhes pa ni bcu gnyis te gnas lhag ma rnams su sna tshogs pa la gnas pa'o//de yang sems can thams cad kyi nyon mongs pa'i gdung ba zhi bar byed pa'i phyir dang / dge ba'i rtsa ba'i myu gu smin par byed pas snying rje chen po'i ngo bo nyid do/ /lha'i gdan zhes pa ni lha bcu dgu grangs su bcad pa rnams kyi gdan yin par bstan to//tshogs rdzogs shing snying rjes sems can brlan pa'i phyir bum pa gang bas kyang brgyan pa'o/ /de bas gsungs pa/ tshogs ni rdzogs pa'i rgyu mthun pa/ /bum pa gang ba snying rjes brlan/ /zhes so/ /de lta bu'i gdan de gong du smos pa'i yon tan dang ldan pa'i gzhal yas khang du bstan pa'i phyir/ma lus rin chen zhes pa la sogs pa'o/ /de la ma lus rin chen ni shel dang pad+ma rA gA dang ma ra ka ta dang in+d+ra nI la la sogs pa'o/ /des bkod pa ni phyogs rnams dgod cing mdzes par byas pa'o//gzhal yas khang brtsegs pa zhes pa ni dbu'i gtsug tor la sogs pas brgyan pa ste/ shin tu mi sgrib pa'i khang ba sum brtsegs kyi tshul du gnas pa'o/ /de lta bu la gong du gsungs pa'i gdan rnams rab du bsgom par bya'o zhes so/ /da ni rig pa skyes bu dang po'i sems skyed par byed pa'i rgyu rnam pa lnga gsungs pa/bcu drug ces pa la sogs pa'o/ /de la bcu drug cha zhes pa ni A li sogs te cha shas su gyur pa'i phyir ro/ /tshogs zhes pa ni ka la sogs pa so sor sder gyur pa'i phyir ro/ /de las byung ba ni rdzogs pa zla ba'i dkyil 'khor zhes te zla ba gnyis su des 'di ston par 'gyur te/mtha' yas tshogs kyis bsdus pa'i yi ge gsum dbus kyi gdan steng du babs pa las yongs su dag pa'i de bzhin gshegs pa rnams kyis de rnams la ye shes kyi spyan gyis gzigs nas sngon rdzogs par byed pa'i ched du rang gi bya ba bar chad pa bshig dogs nas mngon dga'i 'jig rten du gshegs par byas nas thabs dang shes rab gnyis kyi gzugs gong du smos pa'i cha shas kyi yi ge nyid ldan pa/de bzhin du tshogs kyi yi ge ka la sogs pa glang po'i yi ges bstan pa bzhi bcu rtsa gnyis ldab kyi gzugs su gyur te/de nas byon par byas te/ gzhal yas khang gi gtsug tor la gnas par byas nas des yi ge gsum pa las nang du zhugs par byas nas ye shes kyi yi ge dang gcig tu gyur nas ji lta ba bzhin du 'og dang steng du bkod pa las rim pa bzhin du skyes bu chen po'i mtshan sum cu rtsa gnyis su gyur pa dang /dpe byad bzang po brgyad cu dang 'jug pa dang / smon pa dang / shes rab dang / snying rje'i rang bzhin zla ba gnyis bsgom par bya'o zhes bya ba'i don to/ /de ltar zla ba gnyis thogs pa dri ma dang bral zhing shin tu 'od gsal ba'i phyir na gzhal yas khang gi'o//cho ga bzhin du zhes pa ni de gnyis 'phro zhing 'du ba'i sbyor bas 'od du zhun sa gcig tu gyur pa'o/ /tshad med 'od gzhi zhes pa ni tshad med pa'i 'od kyi gzhi 'dus pa gang zla ba'i dkyil 'khor la mnga' ba de la/tshad med 'od gzhi bsam par bya/ /zhes so/ /des ni mnyam pa nyid kyi ye shes bstan pa'o/ /dam pa zhes pa ni de bzhin gshegs pa'i mngon par byang chub pa'i ngo bo yin pa'i phyir ro/ /dang po zhes pa ni thams cad kyi rgyur gyur pa'i phyir rdo rje sems dpa'o/ /de'i snying po ni yi ge hUM dmar po'o//de las byung ba'i mchog gi rdo rje'i ye shes gzugs la sogs pa'i phung po lnga rnam par dag pa'i ngo bo nyid me long lta bu'i ye shes la sogs pa'i ye shes lnga rgyu dang 'bras bu yang dag par ston par byed pa ste/ rdo rje rtse lnga pa dmar po nor bu dmar skya bsgoms te/de yang / dpag med 'od zer 'phro ba rnams kyis rab brgyan pa/ /zhes pa ni thub pa grangs med pa'i 'od zer dpag tu med pa rnams kyis rdo rje'i phyogs kun du 'phro zhing rnam par brgyan par byas par bsams nas/ dang po'i snying por ldan par zhes pa ni bum pa zla ba'i steng du mgon po hUM gi byin gyis brlabs pa dang ldan par byas nas oM badzra At+ma kou0f85haM zhes nga rgyal dang ldan par bya'o//de rnams kyi so sor kun du rtog pa'i ye shes bstan pa'o/ /sprul pa dpag med kyis zhes pa ni bum pa las 'phro ba'i rnam par snang mdzad la sogs rnams kyis so//'gro don bla med mdzad ces pa ni sems can rnams 'phros pas de bzhin gshegs pa byas pa rnams nang du thim par byas nas oM dz+nyA na sar+b+ba ta thA ga ta sta thA a haM zhes nga rgyal dang ldan pa de 'dir yang shes par bya'o/ /de bas na nga rgyal de ldan zhes pa ni tshig gnyis kar rtogs par bya'o//de ni bya ba sgrub pa'i ye shes bstan pa'o/ /thub mchog rdul phran rnams bskyed pa/ /zhes pa ni sa bon gyi 'od zer gyi de bzhin gshegs pa rnams la reg pas rdo rje sems dpar byas nas sa bon nang du zhugs par mthong ba dang / de yongs su gyur nas rgyal ba skyed byed sku bzhi mngon du bya bar sbyar ro//thub pa mchog de dag gis bskyed pa ni bkod pa'o/ /so so'i skye bo rnams kyi lus ni sa la sogs pa'i rdul phra rab kyis byas pa yin no/ /bcom ldan 'das kyi sku ni thub pa'i mchog gi rdul phra rab kyis bkod pas gzhal med ces so//zhal dang sku de ji lta bu zhe na g.yas g.yon zhes bya ba la sogs pa'o/ /de g.yas dang g.yon gyi zhal ni nag po dang dmar po'o/ /dbus kyi zhal dang sku ni zla ba rdzogs pa ltar dkar po'i mdog ces so/ /gsal ba zhes pa ni 'od zer gsal ba dang ldan pa'i rgyan gdu bu la sogs pa'o//des rnam par brgyan pa'i phyag drug las dang po gnyis kyis rang snang ba'i rig ma la 'khyud cing mchu 'dzin pa'o/ /lhag ma'i phyag ces pa ni bzhi'o/ /go rims bzhin du rdo rje dang ral gri dang rin po che dang pad+ma 'dzin pa'o//gzhan yang de'i khyad par gsungs pa/ 'jig rten gsum zhes pa ni sa 'og dang sa steng dang mtho ris so/ /de'i nang gi nam mkha'i khams te der thub pa'i dbang po'i 'od zer gyi rnam par 'phro ba de la de skad ces bya'o/ /rnam thar gsum zhes pa ni rnam par thar pa'i sgo gsum ste bshad zin to//de rnam par thar pa ni de'i rang bzhin yin pa'i phyir na shes rab kyi bdag nyid do/ /snying rje mchog ces pa ni rtag pa la sogs pa ro brgyad do/ /de'i rang bzhin gyi thabs dang ldan pa zhes pa ni thabs su gsal bar snang ba'o/ /de'i don ni 'di lta ste don dam par shes rab kyi rang bzhin yin zhing de'i ngo bor gnas kyang kun rdzob tu thabs gtso bor byed cing gzhan gyi don yod pas de ltar snang ba zhes so//'gro ba thams cad ces pa ni dag pa dang ma dag pa'o/ /rang bzhin gcig pa zhes pa ni don dam pa dang kun rdzob tu'o/ /rgyal ba ni 'jam pa'i dbyangs la sogs pa ste/de skyed par byed pa'i sku'i rgyu ni mngon du zhes te gsal por bsgom par bya zhes bya'i don to/ /des ni shin du rnam par dag pa'i chos kyi dbyings kyi ye shes bstan pa'o/ /de ltar rdo rje sems dpa'i sku rnam par bskyed nas nga ni des sems can rnam snod du rung bar bya ba'i phyir dbang bskur ba'i ched du pad+ma'i nang du dkyil 'khor bsrung bar bya ba'i phyir shes rab dang thabs yang dag par dga' bar bya ba ston to//mchog tu zhes pa la sogs pa'o/ /mchog tu rjes chags zhes pa de ni gnyis su med pa'i bde ba chen po ste yang dag par gsal ba'o/ / de nyid bde ba phun sum tshogs pa'i rgyu nyid kyi phyir na phun sum tshogs pa'o/ /'jig rten thams cad ces pa ni srid pa gsum ste khyad par du na gnyis kyis gnyis sprod pa'i sems can no/ /'dul dmigs nas zhes pa ni 'dod chags chen po des 'dul ba ni gsang ba 'dul pa'i snod du mthong ba'o//sbyor ba'i sgyu 'phrul sgra yis zhes pa ni rdo rje pad+ma yang dag par sbyor ba'i sgra sgyu ma lta bu sing sgra la sogs pa'o/ /bde bar gshegs pa rnams zhes pa la sogs pa ni rnam par snang mdzad la sogs pa'o/ /rang gi lus nang zhes pa ni rdo rje 'dzin pa'i ba spu'i bu gar thugs shing thim par bya'o zhes so//thim nas ci bya zhe na/de ni zhes pa ste rnam par snang mdzad la sogs pa'o/ /spyan sogs zhes pa ni spyan dang / mA ma kI dang na bza' dkar mo dang dam tshig sgrol ma'i lha mo'o/ /gzugs la sogs pa yul gyi rang bzhin zhes pa ni gzugs rdo rje la sogs pa rnam pa lnga'o//byung nas zhes pa ni rang gi ba spu'i bu ga las zhes so/ /rig ma thams cad ces pa ni lha mo dgu nyid do/ /rang snang rig pa zhes pa ni rang gi 'khyud pa'i phyag rgya thim par bya'o zhes so/ /chos kyi dbyings rdo rje gsungs te/ chos kyi dbyings spyi'i mtshan nyid yin pa dang /rang la snang ba'i rig pa la gnas pa dang / reg pa bde ba'i gtso bo yin pas gzugs can las reg pa 'byung ba dang / yang na rdo rje 'dzin pa ma zhums pa'i phyir ro/ /de ltar rgyud phyi ma las/ 'dod chags chen po'i tshul gyis su//ye shes 'khor lo thams cad bsdu/ /bud med dgu ru spros nas kyang / /bsgrub bya ma yi sku la dgod/ /ces so/ /sems can gzung ba'i phyir gsang ba'i dkyil 'khor bskyed par gsungs pa'i de'i pad+ma'i zhes pa la sogs pa'o/ /de'i pad+ma'i zhes pa ni rang snang ba'i 'o//snying po'i dbus zhes pa ni gser gyi bum pa'i nang du'o/ /dkyil 'khor blo yis bsams zhes pa ni rten dang brten can du rdo rje sems dpa'i dkyil 'khor ro/ /de gang las byung zhe na/ dri med zla 'od las byung zhes te sa bon gyi 'od zer gyis de bzhin gshegs pa mjug bsdu ba la sogs pa'i rim gyis so//de la/ blo yis skye bo rnams gzhug bya/ /zhes pa ni sems can rnams gsang ba'i dkyil 'khor de la so so'i sgo nas chud par bya'o zhes so/ /da ni de rnams sdod du rung bar bya ba'i dbang bskur gsungs pa dam pa'i zhes pa la sogs pa'o//dam pa'i rdo rje ni hUM la sogs pa las bskyed cing de'i rang bzhin no/ /snang mdzad la sogs zhes pa ni sa bon gyi 'od zer gyis bskul ba'i dkyil 'khor gyi 'khor lo'i tshul du gnas pa rnams so/ /der zhugs pa ni zla ba zhu ba'i ngo bor gyur pas zhugs pa'o/ /dbang bskur byas pa ni zhugs pa'i sems can rnams la reg cing kha'i lam nas snying ga'i pad+mar zhugs pa'o//da ni de 'og ces pa la sogs pas dbang bskur ba'i sems can rnams bde ba dang yid bde ba thob par gyur pa ste/ de 'og ces pa ni dbang bskur ba'i 'og tu'o/ /de la dmigs pa'i grangs su 'gro zhes pa ni de ltar dbang bskur ba'i stobs kyis chos kyi rang bzhin rnams zla bar zhu bar gyur to//de tsam na mig la sogs pa rnams sa'i snying po la sogs pa'i rang bzhin du gnas te grangs su 'gro zhes so/ /de bzhin du gzugs la sogs pa zla bar zhub gzugs rdo rje la sogs pa'i rang bzhin du'o//de bzhin dus la sogs pa zla bar zhu ba spyan ma la sogs pa'i rang bzhin du 'od de bzhin du gzugs zhes pa ni gzugs kyi phung po'o/ /myong ba ni tshor ba'i phung po'o/ /mtshan ma ni mtshan mar 'dzin pa ste/ 'du shes kyi phung po'o/ /'du byed ni 'du byed kyi phung po'o//yid ces pa ni rig pa ste rnam par shes pa'i phung po'o/ /de rnams zla bar zhu ba rnam par snang mdzad la sogs pa'i rang bzhin du gnas te/ de lta bu'i rang bzhin te 'og nas 'byung ba'i sa bon gyis rnam par bsgrubs te dbyung bar bya zhes so/ /dang po yang blos yang dag par bcug nas man ngag gzhan de la srid pa ma yin no//sa bon gyis dbyung bar bya'o zhes pa ni skabs mi shes pa'o/ /sa bon thug pa med par thal ba'i skyon du 'gyur ba'i phyir ro/ /mtshan gyi sngags dang bye brag ni byA ka ra Na'i gzhung las shes par bya'o/ /de bas na bla ma chen pos kyang 'di nyid du bskyed par bya ba'i don du gsungs te/dbyung bar bya ba ni ma yin no zhes gsungs so/ /skyed par byed pa'i sa bon dngos gang zhe na/ k+ShiM zhes pa la sogs pa'o/ /de'i don ni 'di lta ste/ sems can de rnams dbang bskur bas chos rnams zla bar zhu ba'i rang bzhin de las k+ShiM la sogs pa'i sa bon du gyur te/de las 'khor lo la sogs pa'i phyag mtshan bsgoms te/ de las sa'i snying po la sogs pa'i gzugs nyi shu rtsa gcig tu khams kun 'dus par byas nas gong du gsungs pa'i rim pas dbyung bar bya'o zhes so/ /'di rnams rang gi rang bzhin dang / chos kyi rang bzhin dang sa bon gyi rang bzhin las byung ba rnams so//da ni bar gyi srid pa'i sems las mchog gi bsnyen pas 'jam pa'i rdo rje'i bskyed pa gsungs pa/ oM AH hUM zhes pa la sogs pa'o/ /de la oM AH hUM zhes sems pa ni bar gyi srid pa'i sems so/ /de rnams 'od zer 'bar ba'o//hoH dmar po gnyis kyi bar du bcug par bsams nas cho ga bzhin zhes pa ni nam mkha' las rang gi zhal du zhugs par byas nas dam pa'i gsang ba'i rdo rje'i lam du byung ba'o/ /de gang du gnas she na/ pad+ma'i nang gnas zhes te shes rab ma'i pad+ma'i ge sar gyi dbus su chud par gnas te de yang sems can thams cad kyi lus la sogs pa'i rang bzhin yin pa'i phyir gzhal med ces so//shes rab chags pas zhes pa ni shes rab ma yang dag pa'i 'dod chags chen po dang ldan pas gdong pad+ma rA ga ltar gyur pa'i stobs kyis yi ge lnga po zhu bar byed pa mtho ste zhes so//de'i 'od kyi mthu yis zhes pa ni yig 'bru zhu ba'i 'od zer dmar bas so/ /gnyis kyang zla bar zhu zhes pa ni rdo rje sems dpa' dang rang snang ba'i rig ma yang 'od zer des dbus kyi zla ba'i gdan la byang chub sems kyi gzugs su mthong bar bya ste bsgom zhes so//de ltar snang ba med pas gzhan gyi don phun sum tshogs pa dang bral ba'i phyir sngon goms pa'i tshad med pa bzhi'i gzugs spyan ma la sogs pa rang rang gi rigs kyi bdag po'i sgo nas bskul gsungs pa 'di ltar zhes pa la sogs pa'o/ /de yang bdag gis sngon sdug bsngal dang de'i rgyu las grol bar bya'o zhes gang bsam pa ste snang ba med pas de rnams spangs pa yin pas te de rnams nyid lha mo'i gzugs su gyur nas 'od kyi gong bu las phyung nas 'og nas 'byung ba'i bstod pas bskul te thim par gyur to zhes so//'dir go rims kyis spyan ma la sogs bskul bar rigs pa la mA ma kIs dang por bskul ba ni rgyud 'di la thugs gtso bor bstan pa'i phyir ro//de yang gang zhe na/ sems can zhes pa la sogs pa'o/ /de yang sems can gyi khams gsum ste/ der gnas pa ni sems can rnams so/ /de rnams kyi gtso bo ni dbang phyug go//de gang zhe na/ rdo rje thugs zhes so/ /chos kyi dbyings ye shes rnam par dag pa'i gzugs su gyur pas na rdo rje thugs zhes bod pa ste/ kye khyod bdag la bskyab tu gsol/ /zhes bya bar sbyar ro/ /gang gis she na/ dga' ba yid 'ong zhes bya ba la sogs pa ste dga' ba ni thabs dang shes rab kyi'o//de nyid yid tshim par byed pas na yid 'ong zhes so//don chen ni don chen po yin pa'am de'i rgyur gyur pa'i phyir ro/ /'dod pa ni gzugs la sogs pa ste de rnams kyi bdag la bskyab tu gsol zhes te dgyes par mdzod ces so/ /mgon po zhes bos nas gal te bdag mA ma kI dus di ring gson par mchis bzhed na zhes pa ni bcom ldan 'das nyid ye shes kyi sku 'byung ba chen po gzugs su mdzad nas byams pa tshad med pa spangs pas bdag shi ba dang 'dra bas bdag srid par bzhed na sems can yab chen po gnyen po zhes bos nas gal te sems can thams cad dang sangs rgyas thams cad skyed par byed pas de skad ces bya'o//bdag la dgyes par mdzod ces pa ni ye shes kyi sku snang ba med rnam par spongs la zab mo dang yang dag par gsal ba'i sku ston cig pa'o/ /rdo rje sku khyod ces pa ni spyan mas sku'i rigs kyi sgo nas me long lta bu'i ngo bo nyid du gyur pas de skad do//bka'i 'khor lo zhes pa ni bka' nyid kyi 'khor los 'gro ba rnams kyi rgyud la 'jug par mdzad pas na sems can kun la phan zhes tshim par mdzad pa'o/ /sangs rgyas don dang byang chub dang don dam pa'i ye shes kyi mtshan nyid de/sangs rgyas pa'i don du byang chub don dam phan par rjes su dgongs pa'i gzigs pa'i ngang tshul gang yin pa de skad du zhes bya'o/ /mgon po zhes pa la sogs pa ni brda phrad par zad do/ /'dod chags ni mchog tu bde ba chen po'o/ /de nyid don chen po las mi 'da' bas na dam tshig go//de lta bu'i rol bas bdag spyan ma la zhes so/ /dgyes par mdzod ces pa ni snga ma bzhin du'o/ /khyod ni rdo rje gsungs te zhes pa ni na bza' dkar mos rang gi rigs kyi bdag po'i sgo nas so so'i kun du rtog pa'i ye shes kyi ngo bo nyid du gyur pas na de skad do/ /sems can kun la byams pas phan zhing snying rje chen pos thugs brtse ba'i ngang tshul mnga' bas de la de skad ces bya'o//'jig rten dag gi don zhes pa ni bla na med pa yang dag par rdzogs pa'i byang chub bo/ /dgos pa ni 'jig rten pa'i bde ba phun sum tshogs pa'i mtshan nyid do/ /de mdzad pa la rtag tu brtson 'grus chen po dang ldan pas na de skad ces bya'o//mgon po zhes bya ba la sogs pa gong ma bzhin du'o/ /spyod pa dri med ces pa thabs dang shes rab kyi spyod pa'o/ /de nyid gzung ba dang 'dzin pa dang bral bas na dri med do/ /gang ltar spyad kyang nyes pa med pas na kun du bzang po'o/ / bdag la dgyes par mdzod ces pa ni gong ma bzhin du'o/ /khyod ni rdo rje 'dod pa zhes pa la sogs pas lha mo sgrol mas rang gi rigs kyi bdag po'i sgo nas rdo rjer gyur cing gnyis su med pa'i ye shes kyi ngo bor gyur pa'i dngos po lnga'i rang bzhin de ni rdo rjer 'dod ces bod pa'o//dam tshig ces pa ni don yod grub pa ste de nyid mchog tu gyur pas na dam tshig mchog go/ /phan don che zhes pa ni bdag 'khor ba nas don bya'i gzhan gyi go skabs mi sbyin no zhes bya ba'i ngang tshul gyi 'gro ba thams cad la phan pa rgya chen po mdzad pas na de skad do/ /yang dag rdzogs sangs rgyas kyi gdung //zhes pa ni rigs te de nyid thig ler gyur pas na mchog gi mnyam pa nyid ni zab mo dang gsal bar dbyer med pa'o/ /de skad cig gis rtogs pa de la mnyam pa nyid gzigs pa zhes bya'o/ /mgon po zhes pa la sogs pa ni bshad zin to/ /yon tan rin chen mang po'i gter gyur zhes pa ni stobs bcu la sogs pa'i yon tan rin chen mang po'i 'byung gnas su gyur pa'i phyir ro//bdag la dgyes par mdzod ces pa ni snga ma bzhin du'o/ /da ni de lta bu'i ngang tshul las zab mo dang yang dag par gsal ba'i ngo bo chos kyi dbyings kyi sku 'byung ba gsungs ba de ltar zhes pa la sogs pa'o//de ltar dbyangs kyis bskul zhes pa ni bshad ma thag pa'i glus so/ /chos kun sgyu ma lta bur legs bsams nas/ /zhes pa ni 'khor ba dang mya ngan las 'das ba sgyu ma 'dra bar bsgrub pas te/ gang rgyu rkyen tshogs pa'i dbang gis rnam pa sna tshogs su snang yang de nyid na de nyid kyis dben pa de ltar 'khor ba dang mya ngan las 'das pa gnyi ga yang de dang mtshungs pa'i phyir ro//de gnyi ga la mi gnas pa'i sbyor ba bya'o zhes so/ /dngos po rnams de ltar bsams nas khu ba las byung ba'i maM las gyur ba'i ral gri chang gzungs dkyil du zla ba cig bsgoms te de yang ci 'dra zhe na/snang ba'i 'od zer gyis bskor gzhi sngags lus su rung nyid gyur zhes te 'od zer dpag tu med pa'i 'phro ba'i maM gyi gzugs su rang gi sems nyid bsam mo zhes so/ /de'i stobs kyis zhes pa ni sa bon de'i'o/ /lha rnam par 'phrul ba'i thub dbang gis zhes pa ni/'od kyis reg pa'i sangs rgyas la sogs pa ji snyed pa'i gzugs byang chub sems dpa' 'jam pa'i dbyangs kyi gzugs su gyur nas rnam par sprul zhes so/ /nang du thim nas zhes pa ni de rnams 'od zer gyis bkug nas nang gi sa bon gyi nang du chud pas de ma thag tu yid kyi dpal ldan 'jam pa'i rdo rjer gyur par bya zhes so//dpal ni gong du bshad par zad do/ /'jam pa'i rdo rje ji lta bu zhe na gur gum zhes pa la sogs pa'o/ /dbus kyi zhal dang sku ni gur gum bzang po ltar dmar ser du gnas la g.yas sngo g.yon dkar ba'i mdog tu gnas pa'o/ /sna tshogs rgyan zhes pa ni gdu bu la sogs pa ste des rnam par brgyan pa'i phyag drug pa dang po gnyis kyis dmar pa'i shes rab ma 'khyud nas ma mchu tshems kyis bzung nas gnas pa'o//lhag ma na gnas pa'i ral gri dang mda' dang gzhan yang ut+pal sngon po dang gzhung bsnams pa'o/ /mtha' yas ni mang po'o//'od ni zer de las kyang ma lus rigs rnams 'phro bas brgyan pa'i mkha' zhes pa ni de bzhin gshegs pa la sogs pa 'phros pas nam mkha'i khams gang ba'i rgyan gang la mnga' ba de la de skad ces bya'o/ /de skyob pa zhes pa ni rang gi mthong ba'i lam gzhan la ston pa yod pas na de skad ces bya'o//sku de'i dag pa ni 'di lta ste/ dbu gsum ni rnam par thar pa'i sgo gsum mo/ /kha dog gsum ni sku gsung thugs gsum mo/ /phyag drug ni pha rol tu phyin pa drug go/ /snang ba'i rig mas 'khyud pa ni gnyis su med pa'i ye shes kyis mi gtong ba'o/ / phyag mtshan rnams ni rigs sna tshogs kyi yon tan mnga' ba'i rtags te/ gzhan yang sna tshogs kyis brgyan pa'i bud med las don thams cad 'byung bas na shes rab de'i yul du mdzes par bya ba'i phyir ro/ /gzhan yang rang bzhin med pas gang de chos skur brjod cing sku de ni rnam pa'i mchog rnams dang ldan pas longs spyod rdzogs par bshad pa'o//'gro ba rnams kyi rgyud smin pa/ /sprul pa'i skur yang bshad pa yin/ /zhes pa 'di rnams lha thams cad bsgre bar bya'o/ /da ni 'di'i chos kyi dbyings rnam par bsgrub pa'i phyir gzung 'dzin zhes pa la sogs pa'o//de la gzung bzhes pa ni phyi'i dngos po rnams so/ /'dzin pa zhes pa ni rnam par shes pa nang nas yongs su gsal ba'i bdag nyid can te dngos po thams cad ces pa ni phyi nang gi dngos po thams cad do/ /dngos po thams cad kyang gzung 'dzin gyi dngos po'i ngo bo nyid med par shes par byas nas kyang byin gyis brlab par bya'o zhes so//de ltar ngo bo nyid med pa'i snang ba dang bral ba yin pas des don ji ltar byed ce na/ rnam par byang la mngon par zhe na/ /zhes gsungs la rnam par byang ba ni mya ngan las 'das pa'o/ / de la mngon par zhen pa ni thal byung gi zab mo la blo shin tu chags pa'o/ /de zad pa ni spangs pa'o/ /sems can gyi ji lta bu zhe na/ sgyu ma lta bu sku'o/ /de bas na zhen pa gnyis bsal ba'i don du chos kyi dbyings su byin gyis brlab pa 'di ltar bya'o zhes so/ /oM zhes pa ni bshad zin to//d+har+m+ma zhes pa ni stobs bcu la sogs pa'i chos so/ /d+hA tu zhes pa ni dbyings te zab mo dang gsal ba'i sku'o/ /sems can gyi bsam pa'i dbang gis kha dog la sogs pa'i dbye ba las thams cad 'grub pa'i phyir byang chub kyi rgyu yin no/ /de lta bu'i swa b+hA wa At+ma kou0f85haM zhes nga rgyal bya'o//de bas na snang ba las dngos por dmigs par thal ba ma yin no/ /snang ba'i rnam pas chos kyi dbyings brtag pa'i phyir de med na chos kyi dbyings dang 'brel ba med do/ /'di ni sngags kyi theg pa ni thabs gsal ba'i sgo nas sems can gyi don rnam pa sna tshogs yod pa'i phyir ro//gang gi phyir zab mo la zhen pa'i blo ni mya ngan las 'das pa la chags pa ste/ des phan pa med pa'i steng du dge ba 'jig pa'i phyir ro/ /de bas na zab mo dang gsal ba dbyer med pa thams cad 'grub pa'i phyir de skad ma yin no/ /de bas na bla ma chen po'i zhal snga nas kyang /zab mo kho nas bsgom pa yang / /rnam par dag pa bsgom mi bya/ /gsal ba dag kyang de bzhin no/ /de gnyis dbyer med bsgom 'gyur ba/ /bcings ba kun las grol ba yin/ /zhes so/ /yang de nyid las/ zab mo yis ni sems can don/ / thabs ltar yang dag byed mi nus/ /de bas de la blo chags pa/ /da ni yang dag ma dad do/ /de nyid zung du 'jug shes na/ /ngas bstan de nyid rtogs par 'gyur/ /zhes pa la sogs pas bstan to/ /de bas na 'di ni shes pa nyid dbyer med pas srid pa dang zhi ba so sor nye bas na bsnyen pa zhes bya ste/de nyid ye shes yongs su dag pa'i de bzhin gshegs pa la sogs pa rang dang 'dra ba las byung bas rgyu mthun pa zhes bya'o/ /'dis ni rgyu mthun pa'i 'bras bu chung ngu dang bsnyen pa'i yan lag chung ngu ste dang po'o//da ni de 'og ces pa la sogs pas skye mched rnams byin gyis brlabs na thams cad mkhyen pa'i mtshan nyid med de/de med pas yang dag pa'i sangs rgyas ma yin pas sgyu ma tsam du snang ba'i sku de'i mig la sogs pa byin gyis brlab pa ston to/ /de'i 'og ces pa ni sngags kyi byin gyis brlabs pa'i rjes la'o/ / rang snying sa bon zhes pa ni phyag mtshan gyi bum pa la gnas pa'i k+ShiM la sogs pa'o/ /'od kyis zhes pa ni de'i 'od kyis de bzhin gshegs pa thams cad sa'i snying po la sogs pa'i gzugs su byas nas de la thim pas mig la sogs pa rnams sa'i snying po la sogs pas zhes te gnas drug bskyed do zhes pa'i don to//de yang 'di lta ste mig gnyis kyi steng du zla ba'i dkyil 'khor re re la k+ShiM dkar po las gyur pa'i 'khor lo re re'i lte ba la k+ShiM bsgom pa ste mtshan ma'i 'od kyis de bzhin gshegs pa thams cad sa'i snying po'i gzugs su byas nas de la thim pa de gnyis ka gnas gyur te/sa'i snying po sku mdog dang phyag mtshan rnam par snang mdzad dang 'dra bas byin gyis brlab par bya'o/ /de bzhin rna ba'i bug gnyis su dzri nag po las rdo rjer gyur pa'i phyag na rdo rje mi bskyod pa lta bus byin gyis brlab bo/ /sna bug gnyis su khaM ser po dang rin po che ljang gu las byung ba'i nam mkha'i snying po rin chen 'byung ldan lta bus byin gyis brlab bo//lce'i dbus su gaM dmar po dang pad+ma las gyur pa'i 'jig rten dbang phyug tshe dpag med lta bus byin gyis brlab bo/ /dpral ba'i dbus su Sh+kaM ljang gu dang ral gri las gyur pa'i sgrib pa rnam par sel ba don yod grub pa lta bus byin gyis brlab bo//lte ba'i dbus su saM dkar po dang rdo rje las gyur pa las kun du bzang po rdo rje sems dpa' lta bus byin gyis brlab par bya'o/ /de zla ba'i gdan dang rgya brten du ldan pa rgyan sna tshogs kyis brgyan pa rin po che'i dbu rgyan can dang /dang po gnyis rang snang ba'i rig ma la 'khyud pa'o/ /mig la sogs pa rnams yul so sor nges pa'i phyir re re zhing rnam par shes te de rnams log pas re res kyang thams cad yongs su shes pa'i phyir thams cad mkhyen pa zhes bya'o/ /mig la sogs pa rnam par smin pa las byung ba'i phyir rnam par smin pa'o//'og nas 'byung ba'i sgrub pa dang nye ba'i phyir nye ba'i sgrub pa'o/ /'dis rnam par smin pa'i 'bras bu chung ngu dang nye bar sgrub pa'i yan lag chung ngu ste gnyis pa'o/ /da ni dri med ces pa la sogs pas ni sku gsung thugs la 'gro ba'i don yod pa yin no zhes 'byung bas des byin gyis brlab pa'i mtshan nyid bar gzhan gyi don phun sum tshogs pa dang bral ba'i phyir sku gsung thugs byin gyis brlab pa'i cho ga ston te/dri ma med pa yang zla ba'i dkyil 'khor te de bas na dri med rang gi snying gar zla ba'i dkyil 'khor cig bsgom zhes so//rdo rje bum pa'i dbus gnas zhes pa ni de'i steng du hUM yongs su gyur pa las rdo rje rtse lnga pa bsgoms te de bum pa'i dkyil du gnas pa zhes pa'i don to/ /ji lta bu zhe na/ hUM gis thugs kyi rdo rje zhes te bum pa'i dbus su zla ba'i steng du hUM phra mo yongs su gyur pa las rdo rje phra mo hUM gis mtshan pa bsgoms te/de gnyi ga gyur pa las thugs kyi rdo rje mi bskyod pa dang thams cad 'dra ba'i phyag rgya chen po'i rang bzhin chos kyi sku 'dus byas zag pa med pa ye shes kyi bdag nyid dran pa nye bar gzhag pa nas brtsams te/ thams cad mkhyen pa'i bar gyis bsdus pa'i de bzhin gshegs ba'i chos kyi sku'i rang bzhin rnam par dag pa'i gzugs bsgoms te zhes so//der man ngag tu de'i thugs kar zla ba'i steng du hUM las gyur pa'i rdo rje'i bum pa la hUM gis mtshan pa bsgom par bya'o zhes so/ /de bzhin du kha dang mgo la ste mgrin pa dang spyi bor zhes so/ /pad+ma 'khor lo zhes pa ni gdan no//de'i dkyil du yang zhes te dbus su'o/ /a dang phyag mtshan gnyis kyis zhes pa ni a phra mo dang oM phra mo'o/ /sku'i rdo rje phra mo gsum gyis rdo rje yang bsam par bya zhes pa'i rim pa ni 'di lta ste/ mgrin pa'i gnas su zla ba'i steng du a yongs su gyur pa las pad+ma'i steng du a phra mo yongs su gyur pa las pad+ma phra mo as mtshan pa bsgoms te/gnyis gnas gyur pa las gsung gi rdo rje thams cad tshe dpag tu med pa dang 'dra ba chos kyi phyag rgya'i rang bzhin mtshan sum cu rtsa gnyis dang dpe byad bzang po brgyad cu ngo bo nyid sa bcu la bzhugs pa'i byang chub sems dpa' dang thabs cig tu chos kyi longs spyod kyi dga' ba dang bde ba kha na ma tho ba med pa nye bar longs spyod pas longs spyod rdzogs pa'i sku rnam par dag pa'i gzugs bsgoms te/de'i thugs kar zla ba'i steng du a las gyur pa'i pad+ma'i dbus su a bsgom par bya'o zhes so/ /de bzhin du spyi bo'i dbus su zla ba'i steng du oM las gyur pa'i 'khor lo'i steng du oM phra mo yongs su gyur pa las 'khor lo phra mo oM gyis mtshan pa bsgoms te/de gyur pa las sku'i rdo rje thams cad rnam par snang mdzad 'dra ba las kyi phyag rgya'i rang bzhin shAkya thub pa la sogs pa gang gi 'khor ba ji srid pa'i khams thams cad du sems can gyi 'dod pa'i don mnyam du mdzad pa de ni rgyun chags pa nyid kyis na sprul pa'i sku ste des rnam par dag pa'i gzugs bsgoms te de'i thugs kar oM las 'khor lo de'i lte ba la oM kyis mtshan pa bsgom par bya zhes so//de'i snying po 'od zer rgyun gyis zhes pa ni so so'i thugs ka'i sa bon gyi 'od zer gyi tshogs rgyun ma chad pa dkyil 'khor gyi 'khor lo lta bu ste 'od zer de las gzugs kyi rdo rje ma la sogs pa'i mchod pa yang dag par spros nas mchod par bya'o zhes so//ji lta bu zhe na/ shes rab dam pa 'dus pa'i 'od rnams kyis zhes te shes rab ni rang snang ba'i rig ma'o//de dang 'dus pa ni yang dag par sbyor ba ste/ nang du chud pa'i shugs kyis de lta bu'i ngang tshul yod pas de skad ces bya'o zhes so/ /des mchod pa dngos gang zhe na/ rgyal ba'i dbang po zhes te phyogs bcu gnas pa'i thugs kyi rdo rje la sogs pa'o/ /mchod nas ci bya zhe na/ thugs kyi rdo rje la sogs byin gyis brlabs zhes te rang nyid thugs rdo rje la sogs pa'i rang bzhin du byin gyis brlab pa'i phyir gsol ba gdab par bya'o zhes so//de gang zhe na/ dpal ldan zhes pa la sogs pa'o/ /dpal ldan zhes pa ni rang gi rig ma dang ldan pa'o/ /rdo rje thugs 'chang ba zhes pa ni chos kyi dbyings kyi mtshan nyid 'dzin pas na de skad de/rdo rje mi phyed gsum bsgoms pa ste sku dang gsung dang thugs ni gang du yang dbye ba med pa de bsgoms pas zhes so/ /deng bdag byin gyis brlabs nas su/ /zhes pa ni thugs rdo rje'i rang bzhin du khyed kyis byin gyis rlobs shig ces pa ste/rdo rje thugs kyis mdzad du gsol/ /zhes pa ste bsgoms pa'i thugs kyi rdo rje snying ga nas gnas pa khyed kyis bdag rdo rje thugs can du mdzod cig ces pa'o/ /phyogs bcur bzhugs pa'i sangs rgyas zhes pa ni phyogs bcu'i sangs rgyas thams cad kyi thugs ka na gnas pa zhes bya'o//rdo rje thugs kyis zhes pa ni lhun gyis grub pa'i thugs ka na gnas pa'i thugs kyi rdo rje ste/ khyod kyis bdag thugs kyi rdo rje can du mdzod cig ces pa'o/ /de nas lhung yis grub pa'i thugs kyi rdo rje rnams rang gi thugs kyi rdo rje la gnyis su med par zhugs te sngags 'dis byin gyis brlab par bya'o//oM sar+b+ba zhes pa la sogs pa'o/ /gsung lam zhes pa ni gsung nyid lam ste des sangs rgyas dang byang chub sems dpa' thams cad rab tu gzhug par mdzad cing bdag med pa ston pa'i gsung ngo / /lhag ma ni sngar bshad pas go bar zad do//sku'i skyes bu la sogs pas sems can smin cing grol bar byed pa ni skyes bu byed pa'i 'bras bu ste nye bar spyod pa'i phyir rgyu la yang de skad ces bya'o/ /sku rdo rje la sogs pa 'dis sprul pa'i sku la sogs pa 'grub pa'i phyir sgrub pa'o/ /'dis ni skyes bu byed pa'i 'bras bu chung ngu dang sgrub pa'i yan lag chung ngu ste gsum pa'o//rdo rje gsum ni zhes pa la sogs pas khams gsum gyi dbang por bskos pa med na sangs rgyas yang dag pa ma yin pas rigs kyi dbang phyug gis dbang bskur ba gsungs pa rdo rje gsum zhes pa ni sku la sogs pa'o/ /de nyid mkha' 'dra'i rang bzhin zhes te rang gi mtshan nyid dang bral ba'i nam mkha' ltar thams cad la khyab par gnas so zhes so//ci'i phyir nam mkha' dang 'dra zhe na/ mtshan ma spangs pas zhes te ji ltar nam mkha' dngos po thams cad spangs pas kun la khyab pa bzhin du rdo rje gsum yang 'dzin pa la sogs pa'i mtshan ma med par ji ltar gnas so//mtshan byas te zhes pa ni/ bdag gi thugs ka la sogs par byas te/ /rang rigs gtso bos brgyan pa'i cod pan 'gyur/ /zhes bya bar sbyar ro/ /'dir man ngag gi thugs rdo rje la sogs pa bskyed pa'i dus su nu ma gnyis kyi bar du zla ba la gnas pa'i laM las gyur pa'i ral gri'i dbus su maM phra mo las gyur pa'i ral gri phra mo maM dang ldan par bsgoms te/de gnyi ga gnas gyur pa las so/ /thams cad bdag dang 'dra ba'i ye shes sems dpa' dam tshig gi phyag rgya'i rang bzhin chos kyi sku 'dus ma byas pa'i dran pa nye bar gzhag pa la sogs pa'i bdag nyid 'jig rten las 'das pa'i chos kyi dbyings kyi ngo bo nyid zag pa med pa/dri ma rnams glo bur nyid kyis rnam pa thams cad du dag pa rang bzhin gyis dben pa nyid du gang gyur pa de rang bzhin gyis skye ba med pa ste/ bcos ma ma yin pa'i don gyis 'jig rten las 'das pa'i lam gyis thob par byed pa yin pas rnam par shes pa sgyu ma lta bur thams cad rdzogs pas theg pa'i skus rnam par dag pa'i gzugs bsgoms te/de'i thugs kar zla ba'i steng du maM las gyur ba'i ral gri'i yu ba las maM bsgoms te zhes so//de bas sems kyi 'od zer rnams kyis bskul/ /zhes pa ni sa bon gyi 'od zer spros pas bskul nas zhes sogs gang bskul zhe na/ thams cad tshogs su gyur pa'i thub pa de/ /zhes phyogs bcu'i mi bskyod pa la sogs pa'o/ /des ci bya zhe na/ thub mchog 'od zer las byung zhes bla mar snang ba'i de bzhin gshegs pa rnams las 'od zer byung ste de'i rtse mo las rig mchog spyan ma la sogs pa ye shes kyi bum pa byang chub sems kyi chu rgyun gyis bkang ba lag na bzung ba'i tshogs byung ste/ bum pa'i chu blugs pas zhes te de rnams kyis bkra shis kyi dbyangs la sogs pa dang ldan par bdag gi spyi bor blugs te chu dang la sogs pa thams cad zhugs par bya'o zhes so//des cir 'gyur zhe na/ rang rigs gtso bos brgyan pa'i cod pan 'gyur/ /zhes te kun gnas gyur te 'jam pa'i rdo rje'i cod pan la mi bskyod pas mtshan par bsam mo zhes so//sku gsum du bsgrub pa ni sgrub pa ste sku gsum thob kyang khams gsum chos kyi rgyal po'i dbang thob pa ni dam pa yang dag pa'i sangs rgyas ma yin pas dbang bskur ba ni sgrub pa bas kyang chen por gyur pas na sgrub pa chen po zhes bya'o//dbang bskur bas dri ma thams cad med par byas pa'i 'bras bu rang gi bdag por snang bas na dri ma med pa'i 'bras bu zhes bya'o/ /'dis ni dri ma med pa'i 'bras bu chung ngu dang sgrub pa chen po'i yan lag chung ngu ste bzhi ba'o/ /de rnams lha gtso bo gcig pu la gtsogs pa'i phyir mchog ces so//lha gcig bsgoms pas ye shes yang dag par bya ba'i ngo bo ma yin pas mi mthun pa'i phyogs 'joms par byed pa'i nus pa ha cang yang mi drag pa'i phyir chung ngu zhes bya'o/ /re res dgos pa rdzogs pa min pas phan tshun gyi yan lag tu gyur pa'i phyir yan lag go//'di dag gis rdo rje 'dzin par bsgrubs pas na 'bras bu zhes bya'o/ /da ni de bzhin zhes la sogs pas ni chung ngu dang chen po'i bar na gnas pa nyid kyi 'bring po zhes khyad par byas pas bar ma'i bsnyen sgrub bzhi la sogs pas rig ma dag par byas pa'i cho ga gsungs pa'o//de bzhin gshegs pa zhes pa ni chung ngu bzhin du'o/ /rang gi lha dang 'dra ba zhes pa ni rig ma ste/ mdog la sogs pa ste rang bdag dang 'dra ba'i phyir ro/ /rang gi snying po zhes pa ni maM des bskyed pa zhes so/ /de'i don ni 'di lta ste rang gi gnas kyi mdun du zla ba'i gdan cig bsgoms te de gong ma bzhin du yi ge gsum zhugs pa dang de bzhin gshegs pa rnams mngon dgar gshegs nas phreng ba gnyis pa'i yi ger byas pa dang /der byon nas yi ge gsum nang du bcug ste gdan la babs pa'i rim pas zla ba gnyis su gyur pa la sogs pa ye shes lnga bskyed nas gong ma ltar yang yi ge gsum zhal du zhugs pa la sogs pa'i rim pas 'od du zhu ba las mA ma kI la sogs pas dbyangs kyis bskul nas thim ste yongs su gyur pa las rang gi snying po bsgoms te maM dmar ser du gyur par bsam mo//de gyur pa las ral gri yu ba maM gyis mtshan pa bsgoms te de'i 'od zer gyis de bzhin gshegs pa thams cad 'jam dbyangs kyi skur gyur te bkug nas de la thim par rigs sprul zhes so/ /ji lta bu zhe na phyag mtshan la sogs pa 'jam dbyangs 'dra ba me tog gi cod pan dang ku tsas khyad par byas par bsgom par bya ste/'dir ni bsnyen pa bar ma dang rgyu mthun par gsungs so/ /rang snang ba'i rig ma la dmigs pa tsam 'bring po'i bsnyen pa zhes 'dod pa de ni skabs med ces pa'o/ /chung ngu'i dus su de nyid dmigs pa'i phyir ro/ /de ltar ma yin na ni mthun pa'i phyogs 'bring po rtog pa nyid du 'gyur ro//de bas na bla ma chen po'i zhal snga nas kyang 'di nyid du bskyed par gsungs te dmigs pa tsam du gsungs so/ /mig la sogs pa bkang nas zhes pa ni gong ma kho na ltar sa'i snying po la sogs pa bsgom pa'o/ / 'dis ni nye bar sgrub pa'i yan lag dang bar ma dang rnam par smin pa'i 'bras bu bar ma gsungs so/ /yi ge 'bru gsum bkod pas zhes pa ni gong ma ltar yi ge gsum gyis rdo rje gsum bskyed pa la sogs pa byas nas sngags kyis byin gyis brlab pa tsam byas pa ni sgrub pa bar ma dang skyes bu byed pa'i 'bras bu bar ma gsungs so//'bar ba'i 'od ldan zhes pa ni rang gi sa bon gyis gong ma ltar bskul ba'i rim pas dbang bskur ba dri ma med par byas nas 'bar ba'i 'od dang ldan pas na de skad do/ /'dis sgrub pa chen po bar ma dang dri ma med pa'i 'bras bu bar ma gsungs so//de ltar bsnyen sgrub bzhis rig ma bsgrubs nas da ni de byin gyis brlab pa'i cho ga gsungs te mgo snying zhes pa la sogs pa'o/ /de'i rim pa ni 'di lta ste/ rig ma de'i mgo'i dkyil du zla ba la gnas pa'i oM dkar po sku'i rigs kyi bdag nyid bsgoms te/de la oM dpag tu med pa 'phros pas nu ma yan chad du khyab par bsam pa dang / de bzhin du snying gar nyi ma'i dkyil 'khor la hUM nag po yid rdo rje zhes pa thugs kyi rigs kyi bdag nyid bsgoms te/de las 'phros pa'i hUM gis lte ba yan chad khyab par bsam pa dang /lte bar nyi ma'i dkyil 'khor du swA ser po cig bsgoms te/ de yang sogs pa'i sgras bsdus pa'i rin po che'i rigs kyi bdag nyid de/ de las swAs rked pa yan chad du khyab par bsam pa dang / gsang ba'i dbus su nyi ma'i dkyil 'khor du a dmar po pad+ma'i rigs kyi bdag nyid bsgoms te/de las spros pa'i as rked pa yan chad khyab par bsam pa dang / brla gnyis kyi dbus su nyi ma'i dkyil 'khor du hA ljang gu las/ las kyi rigs kyi bdag nyid bsgoms te/ de las spros pa'i hAs rkang mthil yan chad khyab par bsam mo/ / de nyid shes pas zhes pa ni thams cad mnyam pa nyid du shes pa ste de bas na de nyid shes pas sa bon dang phyag mtshan dang sku gang yang rung bas byin gyis brlabs mi 'gal te/tha mal pa'i rtog pa log pa'i phyir ro/ /des byin gyis brlabs pas de'i lus ni 'gro gsum zhes te sa 'og dang sa steng dang mtho ris so//des khyab par byed pa'i dam pa'i 'od zer gyi tshogs dang ldan par shes par bya'o/ /de ltar rig ma rigs lnga dang ldan par byas nas da ni de'i gsang ba gnas byin gyis brlab pa'i cho ga ston te/ a yi rnam par bkod pa'i snying po zhes pa ni pad+ma'i ze'u 'bru bum pa ste de yi ge as bskyed nas cung zad ser bar bsam mo//hUM gis pad+ma 'dab brgyad sprul/ /zhes pa ni yi ge hUM gis pad+ma 'dab ma brgyad par rnam par bsgrubs te/ byang chub kyi sems 'byung ba'i lam du phaT ser pos 'gog par bsgom par bya'o zhes so/ /de bzhin du bdag gi rdo rje yang ting nge 'dzin gnyis par gsungs pa bzhin du hUM gis rdo rje rtse lnga pa dmar po nor bu'i skye ba/oM gyis bskyed pa rnam par bsams la byang chub kyi sems 'byung ba'i lam du phaT ser pos 'gog par bya'o zhes so/ /dam pa'i shes pa ni 'ja' tshon lta bu'i lus su gsal ba'o//de nyid shes rab ces te rang bzhin med pa'o/ /rgyu mthun rang bzhin zhes pa ni rdo rje sems dpa' rang snang ba'i rig ma dang 'dra bas na de skad ces bya'o/ /thabs bcas gyur pa'i lus zhes pa ni rdo rje sems dpa' rang snang ba'i rig ma dang bcas pa gnas gyur pa'i lus 'jam dbyangs kyi shes rab po//de nyid bzhi ste bdag dang gzhan gyi don phun sum tshogs pa'i rgyur gyur pa'i phyir ro/ /de yang snang ba'i thabs dang bcas pa ste rnam par smin pa dgu rnam par dag pa'i gzugs kyis rtag tu gnas pa/ ye shes gsum gyi ming gis bstan pa'i bcu pa myong bar byed pa ste de dang lhan cig ces pa ni 'di lta ste/phyi rol gyi bud med bde ba dam pa'i rgyu ma yin pas de 'dod chags kyi mtshan nyid lnga dang ldan par byas nas sa bon gyi 'od zer gyis bskul te/ rang gi rig ma la grib ma thim nas gzod bde bar gshegs pa rnams mnyes par bya'o zhes mos pa bskyed nas rdo rje dang pad+ma sbyor ba brtsam par bya'o//rjes su mnyes pa'i sngags ni oM sarba ta thA ga ta a nu rA ga Na badzra swa b+hA ba At+ma kou0f85haM zhes so/ /gzhung de yan chad ni sbyor ba dang po zhes bya ba'i ting nge 'dzin to/ /de ltar 'bring la goms pas c hen por gyur par bya ba'i phyir dkyil 'khor rgyal ba mchog gsungs pa/thugs kyi zhes pa la sogs pa'o/ /thugs kyi zhes pa ni ye shes sems dpa'i thugs kyi zla ba la gnas pa'i ral gri'i yu ba zla ba la bsten pa'o/ /rang gis bon ni thugs kyi zla ba'i sngags te de'i 'od kyis zhes te lcags kyu'i rnam pa 'phros pas zhes so//ma lus sangs rgyas tshogs bkug ces te mi bskyod pa la sogs pa lhun gyis grub pa'i dkyil 'khor gyi 'khor lo bkug nas rang gi zhal du zhugs te/ zhugs nas hUM gi rdo rje zhes te gong du bskyed pa de las byung ba ste thon par byas nas zhes so//ji lta bu zhe na/ dri ma med pa'i byang chub kyi sems dam pa'i yid ces te zla ba zhu ba'i pad+ma la gnas zhes pa ni ze'u 'bru bum pa'i nang du sa bon la sogs pas stong pa zla ba zhu ba'i rnam pa ste cho ga dang po'o/ /rang gi snying pos bskyed pa zhes pa ni de nyid maM gyi rnam pa'i gzugs rnams su gyur pas bskyed pa ste cho ga gnyis pa'o//thams cad rang gi dkyil 'khor zhes pa ni de kun gnas gyur nas rang gi dkyil 'khor te gtso bo mi bskyod pas byas pa'i lha'i gzugs su bsams nas zhes te byang chub sems dpa'i gzugs nyid kyi phyir ro//de nyid lha'i gzugs su gyur pa ste cho ga gsum pa'o/ /brtan pa'i sems kyis zhes pa ni mnyam par gzhag pa'i sems kyis gsal por ma 'khrugs par byas na gong du bskyed pa'i byang chub sems kyi dkyil 'khor des sems can la phan gdags par bya ba'i phyir dbyung bar bya zhes gdon par bya ba ste cho ga bzhi pa gsungs so//de nyid kyang gang zhe na/ badzra d+h+r-ika ces pa la sogs pa'o/ /de la phung po lnga dang rigs lnga dbyer med pa'i rnam par dag pa'i ni badzra ste de 'dzin pas badzra d+h+r-ika go/ /des bskul nas thim par bya zhes bya bar sbyar ro//thugs kyi rdo rje zhes bya ba ni mi bskyod pa'o/ /'gro ba'i don rab byed ces pa ni de 'phros pa'i gzugs kyi sh+'+k+ya thub pa la sogs pas mdzad pa'i chos bstan pa dang sems can tha mal pas 'dul ba'i gzugs su yang bstan pa la sogs pa thams cad byas nas khyad par du sems can kun la mnar sems pa'i zhe sdang las rnam par bzlog ste/de'i mi mthun pa'i phyogs dngos po thams cad khyab bdag tu gnas pa'i zhe sdang la sbyar nas chos rang bzhin gyis 'od gsal bar rtogs par byas pas/ rnam par shes pa'i phung po la sogs pa rnam par dag pa'i mtshan nyid du byed pa'o//ji lta bu zhe na/ g.yas g.yon zhes pa la sogs pa'o/ /g.yas dkar g.yon dmar ba sku dang dbus nor bu mthing ga lta bu nag por gnas pa'o/ /mchog gi dang po ni dpal rdo rje sems dpa'o/ /phyag dang ldan pa zhes pa ni phyag mtshan de dang 'dra ba ste rdo rje dang ral gri dang rin po che dang pad+ma'o//de yang rdo rje sngon po kha bye zhes khyad par ro/ /du ma'i 'od zer tshogs zhes pa ni kha dog du ma'i 'od kyi tshogs 'phro ba gang la mnga' ba mi bskyod pa de la de skad ces bya'o/ /'dus nas zhes pa ni de lta bu des gong du smon pa'i phrin las mdzad de sku gcig tu gyur nas zhes so//dngos po kun gyis zhes pa ni sku dang phyag mtshan dang gdan la sogs pa dang ldan par shes so/ /blo dang ldan pas zhes pa ni thim pa dang po dang / bral ba ste dbyer med pa'i shes pa'o/ /de ni 'og ma rnams la phal cher bsgre bar bya'o//khyad par gang yin brjod par bya ste dzi na dzika ces pa la sogs pa'o/ /yod pa la sogs pa'i rnam pa dang bral ba 'byung ba la sogs pa'i gzugs kun brtags kyi bdag nyid du mi bskyed pa ni dzi na dzikaces bya'o/ /des bskul nas zhes so/ /ji lta bu zhe na/sku'i rdo rje ste rnam par snang mdzad mdog dang zhal la sogs pa rdo rje 'dzin pa dang 'dra ba dkar po dang nag po dang dmar por gnas pa'o/ /'khor la sogs zhes pa ni 'khor lo dang ral gre dang pad+ma dang rin po che bsnams pa'o/ /de bzhin bsam zhes pa ni thugs kyi rdo rje ltar bskul nas 'phro ba'i gzugs kyis gong ma lta bu'i phrin las mdzad de/khyad par du sogs pa ni shes pa'i gti mug las rnam par bzlog ste/ de'i mi mthun pa'i phyogs thams cad la khyab pa'i ngo bo 'byed pa med pa'i gti mug la sems rnam par sbyar bar gzugs kyi phung po la sogs pa rnam par dag pa'i mtshan nyid du byas nas slar 'dus te shar gyi sna tshogs pad+ma'i gdan la bsgom par bya'o zhes pa'i tha tshig go//rat+na d+h+r-ika ces bya ba ni tshig gi don thams cad mnyam pa nyid las phyung bas de dang ldan pa'i sems ni rat+na t+n-i d+h+r-ika go/ /des bskul nas zhes so//rin chen dbang phyug ces pa ni rin chen 'byung ldan no/ /zhal rnams gzhon nu 'dra zhes pa ni g.yas dang g.yon pa'i zhal ni 'jam dbyangs dang 'dra ste nag po dang dkar po dang ngo / /btso ma gser 'dra zhes pa ni dbus kyi zhal dang sku'o/ /margad rin chen la sogs zhes pa ni ma rag ta zur dgu pa dang ral gri dang 'khor los mdzes pa'i phyag drug pa ste/des gong ma ltar phrin las mdzad nas/ khyad par du nga rgyal la sogs pa bdun las rnam par bzlog ste thams cad la rang gi yang dag pa'i nga rgyal chen po la sbyar bas tshor ba'i phung po la sogs pa rnam par dag par byas nas slar 'dus te lho phyogs su bsam zhes bya'o//A ro l-ika ces pa la sogs pas mtshon pa'i 'dod pa de yang dag par rig pa'i yid ni A ro l-ika ces bya'o//des bskul nas zhes bya'o/ /pad+ma rA ga zhes pa ni dbus kyi zhal dang sku'o/ / zhal gnyis de dang 'dra zhes pa ni rin chen 'byung ldan lta bu ste nag po dang dkar po lta bu'o/ /'bar ba'i 'od ldan zhes pa ni 'bar ba'i 'od ldan kha dog sna tshogs 'phro ba dang ldan pas na de skad do/ /pad+ma rA ga la sogs pa zhes pa ni pad+ma dang ral gri dang 'khor lo dang rin po che bsnams pa'i phyag ste des phrin las gong ma lta bu rnam par mdzad nas khyad par du nye bar len pa'i phung po lnga zhen pa dang lhag par chags pa'i 'dod chags bzlog ste/dngos po thams cad kyi rang bzhin la mi gtong ba'i mtshan nyid la sbyar bas 'du shes kyi phung po la sogs pa rnam par dag par byas nas slar 'dus te nub tu bsam par bya'o zhes so//pradz+nyA d+h+r-ika ces pa ni bsgom pa la sogs pas rnam par shes pa gsal bar byed pa'i shes rab 'dzin par byed pas na pradz+nyA d+h+r-ika go/ /des bskul nas zhes bya'o/ /mar ga ta zhes pa ni sku dang dbus kyi zhal ljang gu zhes so//sngon bzhin zhes pa ni g.yas g.yon rin chen 'byung ldan lta bu nag po dang dkar po zhes so/ /ral gri la sogs pa zhes pa ni 'khor lo dang pad+ma dang rin po che dang ldan pa'o/ /des phrin las gong ma bzhin mdzad nas gzhan gyi phun sum tshogs pa la sems khong nas 'khrugs pa'i phrag dog las rnam par bzlog ste theg pa dman pa la zhugs pa rnams la skabs mi sbyin pa'i phrag dog chen po la sbyar bas 'du byed kyi phung po la sogs pa rnam par dag par byas nas slar 'dus byas su bsam zhes so//de ni de rnams kyi ting nge 'dzin gyi khyad par gzhan gsungs pa/mdzes pa'i zhes pa la sogs pa'o/ /mdzes pa'i ral gri ni 'od dang ldan pa'i skra bcings pa'i ngang tshul du gnas pa'o/ /rin chen mchog 'od ces pa ni rin chen sna tshogs kyis spras pa'i dbu rgyan prog ze'u tshul du gnas pas rnam par brgyan pa zhes te dbu brgyan pa'o//de thams cad kyang rig dang bcas pa ste de bas na dang po gnyis kyis 'khyud cing ma mchu 'dzin pa'o/ /lus thams cad ces pa ni rin chen 'byung ldan dang snang ba mtha' yas dang don yod grub pa ste/ nyi ma'i dkyil 'khor la ni bsam/ /zhes pa ste sna tshogs pad+ma'i steng du nyi ma'i dkyil 'khor la ni bsam pa'o//rnam par snang mdzad kyang lus can yin mod kyi gong du zla ba'i dkyil 'khor bsam par bya zhes pas gsal lo/ /de bas na sgra la spyod pas kyang spyi 'gro dmigs kyis bkag pa ni/ rab byed rnams la shin tu gces/ /zhes so/ /de bas na de rnams rgyab rten yang de dang 'dra bar shes par bya'o//mo ha ra ti zhes pa ni chos kyi dbyings gnyis su med pa'i longs spyod cing 'bras bu 'byin pa mo ha ra ti zhes so/ /des spyan ma bskul zhes so/ /mchog gi zhes pa ni sa dang snying rje dang thabs kyi pha rol tu phyin pa rnam par dag pas des de skad do//'jo sgeg ces pa ni lha'i bu mo'i cha lugs 'dzin cing sgeg pa'i ros rnam par brgyan pas na'o/ /sku'i rdo rje 'dra zhes pa ni sku mdog dang mtshan thams cad ces so/ /des gong ma ltar phrin las mdzad nas khyad par du thabs dang bral ba la sogs pa de dang mdzad pas sa la sogs pa rnams dag par byas nas slar 'dus te me'i mtshams su sna tshogs pad+ma'i steng du zla ba gang ba'i dkyil 'khor la gnas te zhi ba'i phrin las mdzad par bsam par ro//dwe Sha ra ti zhes pa ni gnyis su med pa'i ye shes gang gi phyogs thams cad du 'byor ba des 'bras bu rdzogs par byed pas na dwe Sha'o//des mA ma kI bskul nas zhes so/ /thugs kyi dbang phyug ces pa ni mi bskyod pa lta bu'i sku mdog dang mtshan ma'i lha 'dra zhes so/ /dga' chen spros pa zhes pa ni gnyis su med dga' ba la spros pa'i tshul te steg pa la sogs pa'o//mchog ces pa ni chu dang byams pa dang smon lam gyi pha rol tu phyin pa rnam par dag go/ /des phrin las gong ma ltar mdzad nas khyad par du smon lam gyi pha rol tu phyin pa la sogs dang bral ba la de dang ldan par mdzad pas chu la sogs pa rnam par 'dus te bden bral gyi grwa la sna tshogs pad+ma'i steng zla ba'i dbus su sgeg pa'i tshul du gnas nas srung ba'i las mdzad par bsam mo//rA ga ra ti zhes pa ni gnyis su med pa'i ye shes kyi rang bzhin mi gtong pas 'bras bu longs spyod pas na rA ga ra ti'o/ /des gos dkar mo bskul nas zhes so//gsung dbang dri med sku med pa ni sku mdog dang phyag mtshan de dang 'dra'o/ /mchog ces pa ni me dang dga' ba dang stobs kyi pha rol tu phyin pa rnam par dag pa'i rang bzhin no/ /mtha' yas yon tan rin chen ma/ /zhes pa ni mtha' yas pa'i yon tan nyid rin po che ste stobs la sogs pa'o//de 'dir rgyas par byed pas na de skad do/ /des phrin las gong ma ltar khyad par gyi stobs la sogs pa dang bral ba'i sems can de dang ldan par byas nas me la sogs pa rnam par dag par byas nas slar 'dus te/rab g.yeng zhes te rlung gi phyogs su sna tshogs pad+ma'i steng du zla ba'i dbus su rgyas pa'i las mdzad par bsam mo//badzra rA ti zhes pa ni gnyis su med pa'i ye shes de kho nas 'bras bu la longs spyod pas badzra ra ti zhes so/ /des sgrol ma bskul nas zhes so/ /rin chen dbang phyug 'dra ba zhes pa ni sku mdog go/ / mtshan ma'i lhag ma ni rang gi gtso bo 'dra'o/ /dri med rin chen 'od ces pa ni dri ma med pa'i 'od zer gyis phyogs thams cad khengs shing sgrib pa'i tshul du gnas pa'o/ /des phrin las gong ma ltar mdzad nas khyad par du ye shes kyi pha rol tu phyin pa la sogs pa dang bral ba'i sems can de dang ldan par byas nas slar 'dus te/dbang ldan gyi grwar sna tshogs pad+ma'i steng du zla ba'i dbus su dbang gi las byed par bsam mo/ /de rnams kyi mtshan ma bstan pa ni dam pa'i 'khor lo zhes pa la sogs pa'o/ /lhag ma'i mtshan ma bdag po bzhin du 'dod// ces pa ni spyan ma'i phyag mtshan lhag ma ni ral gri dang pad+ma dang rin po che'o/ /mA ma kI yang de'i gos dkar mo ni ral gri dang 'khor lo dang rin po che'o/ /sgo srung ma'i ral gri dang pad+ma dang rin po che'o/ /de nyid gsum zhes pa ni thun mong gi sngags te lha mo drug dbyung ba'o/ /de bas na le'u bco brgyad pa las/sku gsung thugs kyi rdo rje las/ /bdag nyid chen po 'byung ba yin/ /zhes pa'i phyir dbyung bar bya ste khyad par gyi sngags ma smos pa'i phyir ro/ /de gang zhe na/ gzugs sogs lha mo rdo rje lha mo zhes te rnam pa drug go/ /sku la sogs zhes pa ni go rims bzhin du sku rdo rje dang rin chen dbang phyug dang /gsung rdo rje dang don yod grub pa dang rdo rje sems dpa' sku mdog dang phyag mtshan lhag ma 'dra ba ste gtso bo'i phyag mtshan me long dang pi wang dang dung phor dang spyan dang gos dang chos 'byung bsnams pa'o/ /de'i don ni 'di lta ste/ oM AHhUM zhes pa'i sngags kyi rim pa gcig tu ma yin gzugs rdo rje la sogs pa'o//sku rdo rje la sogs pa dang 'dra bas phyung ste phrin las gong ma ltar mdzad nas khyad par du sbyin pa la sogs pa dang bral ba'i sems can de dang ldan par byas nas slar 'dus te/ ji skad du gsungs pa'i phyi'i dkyil 'khor kyi me mtshams la sogs pa'i grwar sna tshogs pad+ma'i steng du zla ba'i dbus su bsam pas bya'o//da ni yid ches pa'i dad pa la sogs pa rnam par dag pa'i mtshan nyid ces bya ba'i sgrib pa la sogs pa bkag pa po'i gti mug la sogs pa'i gnyen po bsrung ba dang dgug pa la sogs pa'i don du sgo srung dbyung ba'o//shar gyi sgor zhes pa la sogs pa'o/ /ya mAn+t-i kr-ita chos thams cad kun brtags kyi mtshan nyid mi skye ba'i phyir na mi 'jigs pa'i ngo bo ste dngos po thams cad de las mi 'da' ba'i don gyis na de skad do//ci'i phyir zhe na/bzung bar rtog pa ni ya ma'o/ /de nyid dad pas med par byed pas na ta kr-ita ces so/ /des bskul nas zhes so/ /ci 'dra ba zhe na/ mtha' yas la tshad med la 'jigs shing skrag tu rung ba'i 'od kyi sa phyogs thams cad du khyab pa gang la yod pa de la de skad ces bya'o//dus mtha' zhes pa ni bskal pa 'jig pa'i dus so/ /de'i dus kyi drag po'i sprin ni kha dog nag po ste de'i dkyil 'khor ni phung po'i tshogs te de dang 'dra ba'i dngos po gang la yod pa de la de skad ces bya'o/ /thugs bdag rgyal po zhes pa ni mi bskyod pa'o//de dang mnyam pa'i sku mdog mnga' ba ste nag po dang dkar po dang dmar po 'od dpag med khro bo rigs kyi 'od phyung ba zhes pa ni dpag tu mi bzad pa'i khro ba'i tshogs sku las 'phro ba dang ldan pas na de skad do/ /gshin rje mthar byed ces pa ni ma dad pa dang bzung ba dang gti mug dag dang shes bya'i sgrib pa dang phung po'i bdud ni gshin rje'o//de nyid dag pas na mthar byed do/ /gdug pa'i sprul gyis sku la brgyan/ /zhes pa ni ma rig pas bdag po byas pa'i kun du sbyor ba dgu rnam par dag pa klu brgyad lce rnam par bskyod pa dang ldan zhing ldengs ka rnam par g.yo ba klu brgyad kyis dbu la sogs pa rnam par brgyan pa'o//de la khong khro'i kun du sbyor ba sems can la mnar sems pa'i ngo bo rnam par dag pa mtha' yas nag pos dbu'i ral ba bcings pa/ de bzhin du 'dod chags kyi kun du sbyor ba nye bar len pa'i phung po lnga la chags shing zhen pa de rnam par dag pa 'jog po dmar pos snyan cha byas pa yin no//nga rgyal gyi kun du sbyor ba rnam pa bdun sems khengs shing mi gus pa dang sdug bsngal 'byung ba de rnam par dag pa pad+ma chen po dkar pos do shal byas pa yin no/ / phrag dog gi kun du sbyor ba gzhan gyis phun sum tshogs pa la sems 'khrugs pa'i ngo bo de rnam par dag pa karko Ta ljang gus tshangs pa'i skud pa byas pa dang / ser sna'i kun du sbyor ba sems kyis kun nas 'dzin pa'i mtshan nyid de/ de rnam par dag pa rigs ldan kha dog sna tshogs pas dbu rgyan byas pa dang /lta ba'i kun du sbyor ba 'jig tshogs la lta ba lus la mchog tu lta ba dang / mthar 'dzin par lta ba dang / nang la mchog tu lta ba dang / log par lta ba skur pa 'debs pa'i rnam par dag pa dung skyong ser pos phyag gdub byas pa yin no/ / spyod pa'i kun du sbyor ba lta bu mchog tu 'dzin pa'i lta ba dang spyod pa dang tshul khrims dang / brtul zhugs mchog tu 'dzin pa rab tu byung ba'i mtshan ma spyod pa'i de rnam par dag pa nor rgyas dkar pos 'og pag byas pa yin no/ /the tshom gyis kun du sbyor ba bden pa la sogs pa la yid gnyis za ba'i ngo bo de rnam par dag pa pad+ma dkar pos rkang gdub byas pa ni gdug pa'i sbrul gyis sku la brgyan zhes te/khro bo lhag ma rnams la yang rtogs par bya'o/ /de lta bu des 'phros pas gong ma ltar phrin las mdzad nas khyad par du ma dad pa la sogs pa bcom par byas nas shes bya'i sgrib pa dag par byas nas slar 'dus te shar gyi sgor sna tshogs pad+ma'i steng du nyi ma'i gdan la gnas par bya'o//pradz+nyAn+ta kr-ita ces pa ni chos nyid kyis rnam par dag pa'i ngo bo 'di nyid mi shes pa ste 'dzin pa'i bdag nyid ma yin pas pradz+nyA n+ta kr-ita ngo //de brtson 'grus kyi ngo bo pradz+nyA de'i skyon kho na ta kr-ita ces so/ /des bskul nas zhes so/ /bla na med par ldan pa zhes pa 'gro ba ma lus pa'i 'od gsal mnga' ba de la de skad ces bya'o/ /phyag sogs sku yi dbang phyug 'dra/ /zhes pa ni rnam par snang mdzad dang phyag dang zhal la sogs 'dra ste dkar po dang nag po dang dmar po'o//drag po zhes pa ni mngon sum du gtum par snang ba ste zhal dgod pa dang gdangs pa dang mche ba gtsigs pa dang khro ba dang gsus pa che zhing yangs pa dang / dbu skra dmar ser gyen du brdzes pa la sogs par snang bas drag po'o//'di ni khro bo ltag 'og tu sbyar bar bya'o/ /gzhan gyis mi thub ces pa ni nyon mongs pa'i bdud la sogs pas de skad do/ /de lta bu 'phros pas gong ma ltar phrin las mdzad nas khyad par du le lo la sogs pa bcom par byas nas nyon mongs pa'i sgrib pa dag par byas nas slar 'dus te lho phyogs kyi sgor sna tshogs pad+ma'i steng du nyi ma'i dkyil 'khor la nyi ma'i 'od kyis bskor nas bzhugs par bsam mo//gzhan rnams ni me lta bu'i 'od kyis so/ /pad+ma'+n+ta kr-ita ces pa ni tshig dang tshig bya dang bral ba'i phyir chos thams cad brjod du med pa ste de lta bu'i yul can dran pa ni pad+ma ste/de nyid mi dran pa la sogs pa'i skyon med par byed pas ta kr-ita do/ /des bskul nas zhes so/ /'od zer 'khrigs pas phyogs 'khor ba/ /zhes pa ni phyogs thams cad du ye shes kyi 'od zer 'phro bas bsgribs pas shin tu mi gsal bas na de skad do//'od mdangs 'jig pa'i me ltar zhes pa ni 'od kyi tshogs kyis bskal pa 'jig pa'i dus kyi me ltar shin tu yang 'jigs par byed pa'i gzugs su gnas pa la de skad do/ /phyag sogs gsung gi rdo rje 'dra/ /zhes pa ni phyag la sogs pa snang ba mtha' yas 'dra ba ste/dmar po dang dkar po dang nag por gnas pa'o/ /gdug pa du ma 'jigs byed zhal/ /zhes pa ni bgegs la sogs pa du ma rnam par 'jigs par byed pa'i zhal la de skad do/ /zhal nas ci mdzad ce na/ ha has bzhad pas zhes bya'o/ /de yang gsangs mtho ba'i ha has bzhad pas ri'i rgyal po bsgyel bar mdzad cing /shAkya thub pa la sogs skrag par mdzad pas de skad do/ /'di ni khro bo ltag 'og tu sbyar bya'o/ /de lta bu 'phros pas phrin las gong ma ltar mdzad nas khyad par du brjed ngas pa la sogs pa bsal bas skye bo'i sgrib pa bcom par byas nas slar 'dus te/nub kyi sgor sna tshogs pad+ma'i steng na nyi ma'i gdan la bsam par bya'o/ /big+ha nAn+ta kr-ita ces pa ni gzung ba dang 'dzin pa dang tshig dang bya ba dang bral ba'i phyir rnam par mi rtog pa'i chos la rtse gcig pa'i mtshan nyid kyis gzung ba la sogs pa'i big+ha nAn med par byed pas na ta kr-ita to//des bskul nas zhes so/ /zhal sogs mi bskyod 'dra zhes pa ni zhal sogs pa mi bskyod pa dang 'dra zhe na nag po dang dkar po dang dmar po'o/ /zad dus me ltar drag ces pa ni bskal pa zad pa'i dus kyi me ltar shin tu drag cing rno bar snang ba drag pa'o/ /'phags pa zhes pa ni dbang la sogs pas sdig pa'i chos las ring du gyur pas na'o//'di ni khro bo ltag 'og tu sbyar bar bya'o/ /bdud rtsi 'khyil pa zhes pa ni rnam par rtog pa'i shi ba dang bral bar byed pa'i ting nge 'dzin la de skad ces bya'o/ /dang po zhes pa ni bgegs rnams 'jigs par mdzad pas na'o/ /de 'phros pas gong ma ltar 'phros phrin las mdzad nas khyad par du rnam par g.yeng ba la sogs pa bsal bar byas pas las kyi sgrib pa bcom par byas nas slar 'dus te byang gi skor sna tshogs pad+ma dang nyi ma'i dbus su bsam par bya'o//khro bo de dag ni g.yas bskum g.yon pa brkyang ba'i tshul du gnas pa/bde bar gshegs pa dang sems ma rnams ni rdo rje skyil mo krung gis shin tu brtan par gnas pa'o/ /khro bo 'di rnams dbang bskur ba'i dus su dbu rgyan bdag po bstan pa'i phyir rnam par snang mdzad ces pa la sogs pa'o/ /rim bzhin no zhes pa ni 'dir sbyar bar bya'o/ /de bzhin phyag mtshan gyi gtso bo yang tho ba be con zhes pa la sogs pa'o//sogs pa'i sgras phyag mtshan lhag ma bdag po dang mthun pa'o/ /de ltar bskyed pa'i dkyil 'khor byin gyis brlab pa'i phyir ye shes kyi dkyil 'khor spyan drang ba gsungs pa de ltar zhes pa la sogs pa'o/ /de ltar rdzogs par bskyed pa zhes pa ni dam pa'i dkyil 'khor gong ma ltar rnam par bskyed pa'o//de mngon sum bzhin du gsal por bsams nas so/ /gang gis she na/ dngos po thams cad ces te sku mdog dang phyag mtshan dang rgyan dang gdan la sogs pa thams cad kyis gsal bar byas nas zhes so/ /de byin gyis brlab par bya ba'i phyir snying po zhes so/de yang rang thugs ka'i ye shes sems dpa'i snying po las 'od zer lcags kyu lta bu rnam par 'phros pas gshin rje'i gshed la sogs pa bskul nas gshin rje'i gshed kyis rang gi las bsgrub pa'i phyir dzaHzhes brjod do/ /de'i thugs ka nas 'phros pa'i kho bo lcags kyu thogs pas bgegs rnams bskrad nas/lcags kyus bde bar gshegs pa rnams/ /zhes te lhun gyis grub pa'i dkyil 'khor gyi 'khor lo spyan drangs par bsgom par bya'o/ /thabs dang shes rab zhes te thabs dang shes rab kyi gzugs su snang ba sngon du song ba'i rgyu dri ma med pa'i ting nge 'dzin las byung pa'i bde ba dang dus thams cad ldan pa'o//de lta bu'i dkyil 'khor bsams nas zhes pa ni kun nas shar gyi sgo'i phyogs su sna tshogs pad+ma'i steng du bsam par bya'o/ /de nas mthar byed la sogs zhes pa ni gong du 'phros pa'i khro bo rnams kyis so/ /bsrung byas zhes pa ni dkyil 'khor du bcug pa'i dus su gsal ba'i rab la sogs pa rnam par bsgrubs nas de rnam gshin rje'i gshed kyi thugs kar thim zhes so//de nas rang snying gi bzlas pa'i zhes pa ni rang gi sa bon gyi bar du bcug pa'i yi ge gsum bzlas she na/ dam pa'i tsan+dan la sogs zhes so//de'i don ni 'di lta ste/ /gong du bkug pa'i 'khor lo la/ /dung phor gyi chus bsang gtor byas nas dung phor gnyis pa me tog dang ldan pa'i chus nye reg byas la/ dung phor gsum pa bdud rtsi dang ldan pa'i chus mchod yon phul te mtha' sogs dbye ba'i phyag rgyas dung phor bar pa'i me tog lag tu blangs te mchod yon dbul bar bya'o//de nas thim zhes pa ni shes rab mthar byed kyis hUM brjod pas de las 'od 'phros pa'i 'od zer dkar pos dkyil 'khor bteg nas bskor tshul tu grib ma zhugs ltar bsam mo/ /yang pad+ma mthar byed kyis baM brjod pas de las 'phros pa'i 'od zer ser po zhugs pas bcing bar bya'o//yang bgegs mthar byed kyis hoHbrjod pas de las 'od 'phros pa'i 'od zer dmar po zhugs pas thams cad dga' bar bsam mo/ /de nas oM d+har+m+ma d+hA tu swA b+hA ba At+ma kou0f85haM zhes byin gyis brlab pa ni bsnyen pa'i yan lag d ang rgyu mthun pa'i 'bras bu chen po'o//go cha dang po grub pa'i de bzhin gshegs pa dang 'dra bas na rgyu mthun zhes so/ /de nas de rnams kyi mig la sogs pa sa'i snying po la sogs par lhag par mos par byas pa ni chen po'i nye bar sgrub pa'i yan lag dang rnam par smin pa'i 'bras bu chen po'o//de bzhin du gnas gsum du sku gsung thugs kyi rdo rje dang ye shes sems dpa' yang lhag par mos ba byas nas sngags kyis byin gyis brlab pa tsam byas pa ni chen po sgrub pa'i yan lag dang skyes bu byed pa'i 'bras bu chen po'o/ /de nas rang dang 'dra bar cho gas dbang bskur byas nas zhes pa ni gong ma ltar rang gi sa bon gyi 'od kyis bskul ba'i de bzhin gshegs pa'i tshogs las byung ba'i lha mo bum pa 'dzin pa'i sdes lha rnams dbang bskur bar bya ste/de chu dang lha mor bcas pa zhugs pas de'i rjes la rnam par snang mdzad la sogs pa bzhis cod pan la mi bskyod pa'o//spyan dang gzugs kyi rdo rje ma'i dbu la rtag pa'o/ /mA ma kI dang sgra rdo rje ma chos kyi dbyings kyi rdo rje ma'i dbu la mi bskyod pa'o/ /dri rdo rje'i dbu la rin chen dbang phyug go/ /gos dkar mo dang ro rdo rje ma'i dbul snang ba mtha' yas so/ /sgrol ma dang reg gi rdo rje ma'i dbu la don yod grub pa'o//gshin rje gshed la sogs pa ni gong du bshad zin to/ /de ni sgrub pa chen po'i yan lag dang dri ma dang bral ba'i 'bras bu chen po'o/ /de rnams ni dkyil 'khor lha rnams la gtogs pa'i mchog thun mong gi bsnyen pa la sogs pa'o/ /ye shes thams cad rdzogs pas mi mthun pa'i phyogs 'joms pa la drag po chen po'i sgras brjod do//gzhan ni bshad zin to/ /de ltar bsnyen sgrub bzhi dang ldan par byas nas/ da ni de rnams mnyes par bya ba'i sbyor ba gsungs pa/ 'di ltar nan tan mchod par bya/ /zhes so/ /de la dang po gsang ba'i mchod pa gsungs pa/pad nang zhes pa la sogs pa'o/ /rang gi sa bon zhes pa ni ye shes sems dpa'i sa bon gyi 'od kyis gzugs thams cad ces pa ni lha mo rnam bcu bkug nas rang gi snying gar bcud de/ /dkyil 'khor yang dag byang chub yid de lhag par byang chub kyi sems bdud rtsi'i gzugs su zhu nas rdo rje'i lam du phyung ste rig pa'i pad+ma'i nang na de las gyur pa sa bon bsam par bya zhes te/dzaHhUM baM hoHkhaM raM/ lAM mAM bAM tAM zhes par gyur nas 'od zer gyis lha mo bcu bkug nas de la thim par gyur pas sa bon nus pa dang ldan par gyur te shes rab ces pa rang snang ba'i rig ma'o/ /so so ba spu'i bu ga ni yan lag dang nying lag la sogs pa'i ba spu'i bu ga las 'phros te de ci lta bu 'phros she na/kha dog dang dbyibs sna tshogs pa 'od zer dpag tu med pa'o/ /gang du 'phro zhe na/ ma lus nam mkha'i gtos ni de nas spro/ /zhes so/ /de nas ji lta bu spro zhe na 'od kyi sgo la sogs pa'o//'od kyi sgo ni 'od kyi rtse mo la ste gzugs kyi rdo rje ma la sogs pa spro zhes so/ /ji lta bu'i lha mo zhe na/ dri ma rgyan kun zhes te dri ma med pa'i rgyan gdu bu dang dpung rgyan dang rna cha la sogs pas brgyan pa'i sku rtog pa med pa dang / de'i khyad par gzhan yang me long dang pi wang dang dri'i dung dang ro'i snod dang sna tshogs kyi gos dang chos 'byung ba'i phyag rgya dang /sogs pa'i sgras bsdus pa 'khor lo dang ut+pal dmar po dang ut+pal ser pos mtshan pa ste de lta bu'i mtshan mas lha mo rnams rim pa bzhin mtshan zhing mdzes par gnas la/ ldem bag chags ni lo ma 'od dang bcas//zhes te yan lag rnams shing mya ngan med pa'i yal ga sar pa lta bu mnyen zhing 'jam pa dang bcas pas de skad do/ /yang na mtshan ma rnams shing mya ngan med pa'i yal ga la brgyan pa zhes kha cig 'dod do/ /de nyid kyi khyad par gzhan yang gsal ba'i zhes te gzugs kyi lha mo la sogs pa 'od zer gsal zhing sprul pa sna tshogs pa ste 'phros ba'o//de nyid mchod pa'i sprin gyi dra ba ste mang po'i tshogs so/ /des nam mkha' khyab cing 'byung ba la de skad ces bya'o/ /de nyid kyi khyad par gzhan yang dngos po rnams sgyu ma dang mig yor gyi rnam pa lta bu ste lha mo'o//de nyid so so yang dag par rig pa'i ngo bo ste phyin ci log gi kun rdzob dag pa'o/ /de nyid 'jig rten ltar dge zhes te 'jig rten dang mthun pa'i yid dga' bar byed pa'i glu dang gar dang dbyangs la sogs pa so so'i snang ba tsam la bya'o/ /gzhan yang de nyid rtog pa kun las nges grol zhes te gzung ba dang 'dzin pa'i rtog pa gnyis la grol ba ste/de yang mchog gi bde ba zhes te gsang chen mchog rdo rje 'dzin pa chen po'i rang bzhin 'byung ba rgyu'i dngos por gnas pa/ de lta bur spros pas so so'i rig ma dang thabs la thim pas mchod pa ste/ de bzhin du gzugs la sogs pa rnams kyis phyi'i dril sogs pa'i sgras bsdus pa'i rin po che bdun la sogs pa yang spros nas mchod par bya'o zhes so//tha dad rtog pa grol bas zhes pa ni mchod par bya ba dang mchod pa dang mchod pa'i rnam par rtog pa dang bral ba'o/ /rgyal ba'i dbang po ni gnyis su med pa'i dkyil 'khor gyi 'khor lo'o//mchod pa dang bdag mnyam par bya ba'i don du sngags 'dis byin gyis brlab par bya'o/ /oM sar+b+ba ta thA ga ta pU dza badzra swa b+hA ba ni gong du smos pa rnams so/ /de'i ngo bo de At+ma kou0f85haM zhes so/ /da ni dkyil 'khor te ye s hes nyi shu rtsa lnga'i bye brag gi bstod pa'i mchod pa gsungs pa/de 'og ces pa la sogs pa'o/ /de 'og ces pa ni gsang ba'i mchod pa'i 'og tu'o/ /brag ca bzhin du zhes pa ni bstod pa'i sgra dang sgra yul thams cad brag ca ltar mos pa byas nas rang gi sems rig pa'i lha zhes pa ni rang gi sems kho na rig pa'i lha ste dkyil 'khor pa rnams so//phyi rol gyi lha'i gzugs med pa'i phyir ro/ /de'i bstod pa'i sgra dang chos thams cad rjes su ldan par bsgoms nas rdo rje dril bu dang ldan par byas te dbyangs 'dis bstod do/ /mi bskyod ces pa la sogs pa'o//de la dngos po 'di rnams ma skyes pas nyon mongs pa'i bdud la sogs pas bskyod du med pas mi bskyod pa'o/ /de nyid mi phyed pas na rdo rje ste chos kyi dbyings kyi ye shes so/ /ye shes che zhes pa ni thog ma la sogs pa dang bral bas ma grub pa me long lta bu'o/ /rdo rje dbyings zhes pa ni mtha' rnams dang bral ba sku la sogs pa'i skye ba'i rgyu'i phyir na de skad do//de nyid mkhas pa chen po ste thams cad dri ma med par shes pa'i phyir mnyam pa nyid do/ /rdo rje gsum zhes pa ni bdag med pa'i chos nam mkha' lta bu dang ye shes kyi sku dbyer mi phyed pa'i ste/ de thams cad de'i ngo bo bas na dkyil 'khor gsum zhes te so sor rtog pa'o//g.yeng ba'i rang gi ngo bos mi bskyod pas na rdo rje'o/ /de nyid dbyangs zhes te bla na med pa'i chos gsungs pa'i phyir bya ba nan tan gyi ye shes so/ /de lta bu'i mi bskyod pa'i tshig so so'i sgo nas bskul nas phyag 'tshal bstod ces pa ste chos kyi tshig brjod pa'i sgo nas so//lus dang sems shugs kyis rtogs par bya'o/ /de bzhin du phyi ma la'ang sbyar bar bya'o/ /rnam par snang mdzad ces pa ni phung po la sogs pa bdag med pa'i rang bzhin du 'thar zhing stod pa ste chos kyi dbyings so/ /dga' chen po zhes pa ni kun gzhi gnas gyur pa'i ngo bo bzung ba la sogs pa dang bral ba ste me long lta bu'o//rdo rje zhi ba zhes pa ni rgyu 'bras mnyam pa nyid du dmigs pas spros pa dang bral ba ste mnyam pa nyid do/ /dga' ba chen po zhes pa ni dang po ma skyes pas sgyu ma'i rnam par dag pa'i chos la mnga' brnyes pa ste so sor rtog pa'o//rang bzhin gyis 'od gsal ba'i mchog ste bya ba nan tan gyi ye shes kyis dang po nas 'od gsal ba ste/ de ltar yin pas na mchog go/ /de nyid las sku'i khyad par ston pas na ston pa ste de la phyag 'tshal bstod ces pa gong du bstan pa'o//dngos po med pa'i byang chub kyi sems khyad par can brod pa'i rgyu yin pas na rin chen no/ /de nyid mdzes par byed pas na rgyal po ste chos kyi dbyings kyi ye shes so/ /gzugs brnyan dang 'dra ba'i chos kyis kun nas khyab kyang mtshan nyid dang bral ba'i phyir shin tu zab ba'i me long lta bu'o//rdo rje nam mkha' dri med pa/ /zhes pa ni nam mkha' ltar mnyam pa nyid du gnas pa 'dzin pa la sogs pa dang bral ba'i phyir mnyam pa nyid do/ /rang bzhin dag pas gos pa med/ /ces pa ni nyon mongs pa'i skyon dang po nas dag pa skyon gos pa med pa ste so sor rtog pa'o//de nyid yon tan rin po che thams cad kyi 'byung ba'i sku'i rang bzhin rdo rje'i sku ste/de la phyag 'tshal bstod ces pa ni gong ma bzhin du bya ba nan tan no/ /rdo rje dpag med ces pa ni sems kyi ngo bo ma skyes pas tshang bar byed pa'i yul ma yin pas chos kyi dbyings so//de nyid 'dod chags che ste de bzhin nyid mi gtong bas me long lta bu'i ye shes so/ /mi rtog nam mkha' rdo rje 'dzin/ /zhes pa ni bzung ba la sogs pa'i ngo bo dang bral bas mi rtog pa ste rdo rje 'dzin pas mnyam pa nyid do/ /'dod chags pha rol phyin pa brnyes/ /zhes pa phyin ci log gi 'dod chags kyi pha rol tu phyin pa rnam par dag pa'i 'dod chags brnyes pa ste so sor rtog pa'o//rdo rje gsungs zhes pa ni dbyer med pa'i don gsungs pa ste bya ba la nan tan no/ /de la phyag 'tshal bstod ces pa ni gong ma ltar ro/ /don yod rdo rje zhes pa ni rang bzhin dag pa'i sku la sogs pas sems can gyi don 'bras bu dang bcas pa mi 'byung ba ma yin pas chos kyi dbyings kyi ye shes so//de nyid phyin ci ma log par rdzogs par sangs rgyas pas ni me long lta bu'o/ /bsam pa thams cad ces pa ni ma skyes pa'i sprul pas don rdzogs par mdzad pa ste mnyam pa nyid do//rang bzhin dag pa zhes pa ni 'od gsal ba'i ye shes de las byung ba ste sgyur ma lta bu'i sku ste so sor rtog pa'o/ /rdo rje sems dpa' zhes pa ni stong pa nyid kyi ngo bo la brtan par gnas pa ste bya ba nan tan gyi ye shes so/ /de la phyag 'tshal bstod ces pa ni gong ma bzhin du'o//da ni gtsang ba'i dang mi gtsang ba'i rtog pa bzlog pa dang / nang gi mes sbyangs pas mthu dang ldan pa'i phyir bdud rtsi'i mchod pa gsungs pa/ 'bar ba'i oM zhes pa la sogs pa'o/ /de 'ang dang po rlung me'i zhes te rang gi mdun du yaM las byung ba'i rlung gi dkyil 'khor gzhu lta bu ba dan kyis mtshan pa yaM dang ldan pa de'i steng du raM las byung ba'i me'i dkyil 'khor gru gsum raM gyis mtshan pa bsgoms te/de la gnas pa a las gyur pa'i pad+ma'i snod as mtshan pa la/ bdud rtsi lnga zhes te dri chu dang dri chen dang rak+ta dang byang chub kyi sems dang sha chen po dbus la sogs par rim bzhin du bzhag la/de la zla ba dang nyi ma'i steng du hUM b+h+rUM AM dzr-IM khaM zhes pa'i sa bon bkod nas/ de nas dkyil nas grangs med pa'i thub pa'i dbang po sa bon gyi 'od kyis bskul nas sa bon du gzhug par bya'o/ /de nas rlung gi sbar ba la sogs pa'i rim pas bdud rtsi blangs pa'i tshogs hUM las rdo rje hUM gis mtshan pa'i gzugs bsgoms te/dbab pa'i rim pas 'o ma'i rgyun ltar 'ong zhing 'bab par bsam mo/ /de nas gdod oM dkar po 'bar bas stong du byin gyis brlabs pas de nang du zhugs pas bsil bar bya'o/ /de nas 'bru gsum bzlas pa zhes te/oM AHhUM zhes ji tsam 'dod pa bzlas nas gdab par bya'o/ /de tsam na ye shes bdud rtsi rang bzhin shi ba la sogs pa sdug bsngal dang bral bar byed pa shel dang zla ba ltar dag par bsams nas/ hUM dkar zhes te bdag dang lha thams cad kyi lce la hUM las byung ba'i rdo rje dam pa rtse gsum pa bum pa la hUM bkod pas lce dag par byas nas rang gi sa bon gyi 'od kyis pad+ma du mar spros nas lha so so'i phyag na gnas pa rdo rje hUM gi lce'u chung gis chu btung ba'i tshul tu drangs nas/des snying ga na gnas pa'i zla ba'i dkyil 'khor la bzhugs pa'i ye shes kyi 'khor lo tshim par bya'o zhes par mos par byas nas myang bar bya'o//de ni dkyil 'khor rgyal po mchog ces bya ba'i ting nge 'dzin gnyis pa'o// //de ltar dkyil 'khor gyi 'khor lo rdzogs pa'i rnal 'byor pas/ che ba'i che ba de kho na nyid bsgoms pas sems dbang du bya ba'i phyir thig le'i sbyor ba gsungs pa/dam par 'khus pa la sogs pa'o/ /yang / snying ga'i 'od zer las phyung ba/ /zhes pa ni ye shes sems dpa'i sa bon gyi 'od zer kha dog lnga pa 'phros pa las phyung bzhes so/ /ci 'byung zhe na/ grub dbang mtha' yas zhes te rnam par snang mdzad la sogs pa'i thub pa'i dbang po mtha' yas pa'i tshogs 'phros nas zhes so//des ci byed ce na/ kun du 'khrul pa spangs te 'gro ba thams cad kyi mi shes pa'i 'khrul pa thams cad spangs pa'i dkyil 'khor gyi 'khor lo yang dag par rdzogs pa'i sangs rgyas su byas nas rang sngags su thim par bya zhes te/byed pa po dang bya bar bcas pa 'dus nas ye shes sems dpa'i thugs ka na gnas pa'i mtshan ma'i bum pa gnas pa'i sa bon la zhugs par bsams te 'grub pa'i rgyu'o/ /de lta na phyi rol gyi gzugs ni gdos pa dang bcas pas thig le la snang srid kyi chos 'dus par rigs pa gang gis nyams su myong zhes rgol ba la/da ni don med pa grub pa'i mtshan mas de mi 'gal ba'i gtan tshigs ston te/ gzugs la sogs pa zhes pa la sogs pa'o/ /de la gzugs la sogs pa zhes pa ni gzugs dang sgra dang dri dang ro dang reg bya'o//snang ba las ni grol zhes pa ni snang ba ltar ma grub ste/ de dkar po la sogs pas spyod na grol ba ste/ de grol bas na/ de la mngon sum gyis rtogs min/ /zhes te dbang po la sogs pa'i mngon sum gyi ye shes med pa'o/ /de bas na gzugs la sogs pa de mngon sum gyis 'dzin pa med ces so//ci'i phyir zhe na/ gzung ba 'ga' yang med do zhes pa ste gzugs la sogs pa'i gzung ba 'og nas 'byung ba'i rim pas dpyad na med pa ste de med pas 'dzin pa'i mngon sum yang med de/ rang rig pa'i rtog pa dang bral zhing ma 'khrul ba'i de nyid mngon sum zhes bstan to//'o na rjes su dpag pa'i shes pa yod do zhe na/ gzhan yang yod pa ma yin zhes te/ rjes su dpag pa zhes pas gzugs la sogs pa yin zhes so/ /ci'i phyir zhe na/ 'brel pa ma mthong bas zhes te/mngon sum ni rjes su dpag pa'i sngon du 'gro ba can gyi phyir ro/ /de yang don gyi dngos po mngon sum du snang ba phyi nas rjes su dpag pa ni rigs pa yin par shes par bya'o/ /'dir de lta bu'i 'brel pa ma mthong ba ste/ ci'i phyir zhe na/ gzung ba la sogs pa yang dag par ma grub pas mngon sum gyi ye shes med de/de med pas rjes su dpag pa yang yod pa ma yin zhes so/ /gzugs la sogs pa mi mngon pa'i don dang shes pa gnyis las med pa'i zhes pa ni ma grags pa dang mi rigs pa'i phyir ro/ /de ltar mig la sogs pa gzung ba dang 'dzin pa bral bar bstan nas/da ni yid kyi rnam par shes pa gzung 'dzin dang bral ba bstan pa/ bde ba la sogs pa zhes te bde ba ni tshor ba bde ba ste/ de dang por byas pa'i 'du shes dang 'du byed dang rnam par rig byed ma yin pa dang nam mkha' la sogs pa'o/ /rang gi las zhes pa ni rang gi rnam pa lta bu'i rnam par shes pa skye bar byed pa'o//de lta bu'i las 'ga' yang mthong zhes pa'o/ /ci'i phyir zhe na/ bde ba la sogs pa ma grub pa'i phyir ro/ /ji ltar ma grub ce na/tshor ba la sogs pa dus snga ma dang phyi ma rjes su med par shes pa skyed mi nus te/ 'gags pa dang ma byung ba'i phyir ro//da ltar byung ba la skye bzhin pa zhig yul du gyur pa'am skyes pa zhig yul du gyur grang na/ dang po ni ma yin te/da rung rdzogs pa ma yin pa'i phyir ro/ /gnyis pa'ang mi rigs te shes pa yang skyes zin pa'i phyir ro/ /de bas na tshor ba la sogs pas phan btags pa cung zad kyang yod pa ma yin pas rang gi las ma mthong ngo //'o na nam mkha' la sogs pa yul du grub po zhe na de yang mi rigs te/ brtags pa tsam yin pa'i phyir shes pa bskyed par mi nus pa dang / bskyed na 'bras bu dang mthun pas de 'dus byas su 'gyur ba dang / de dus thams cad na yod pa 'bras bu rtag tu tshar 'gyur ba'o/ /de bas na de rnams kyang ma grub pas rang gi las ma mthong ba'o/ /slob dpon chen po mche ba sdes/ /bde sogs 'das dang ma 'ongs pa/ /ma skyes pa dang 'gags pa dang / /bud med 'bras bu skyed pa yi/ / skyed pa'i tshe na med pa dang / /skyes pa na ni skyes zin phyir/ /sim sogs yul du ma grub po/ /nam mkha' la sogs rdzas med pas/ /bud med 'bras bu skyed pa'i phyir/ /skyes na 'bras ltar mi rtag 'gyur/ /de dag rtag tu tshang bas na/ /'bras bu rnams kyang tshang bar 'gyur//de bas de dag thams cad kun/ /yul du dmigs pa'ang 'khrul pa'o/ /zhes gsungs so/ /gong ma'i rim pas ma grub pas 'brel par gyur pa med de/ mngon sum dang rjes su dpag pa yang med pa'o/ /de bas na gzugs la sogs pa bzhin du de dag gzung 'dzin med ces te/gzugs la sogs pa gzung ba dang 'dzin pa gong ma'i rim pas bral ba de bzhin du gzung ba dang 'dzin pa dang bral ba zhes mngon no/ /da ni gong du/ gzugs la sogs pa snang ba las ni grol/ /zhes pa ji ltar snang ba las grol ba gzung ba 'ga' yang med ces de rgyas pa bstan pa'i phyir/dang po rgyun du gtogs pa'i rtag pa ma grub pa bstan pa'i phyir/dkar po zhes pa la sogs pa'o/ /dkar po la sogs pa zhes pa ni gzugs la sogs pa'i don to/ /gang gis shes she na rnam par shes pas so/ /dang por mthong ba de nyid ces pa ni/ skad cig ma dang po mthong ba de nyid dus gzhan te skad cig ma gnyis pa la sogs par mthong ba ma yin zhes te 'bras bu skad cig ma yin pa'i phyir ro//de ltar ma yin na 'bras bu rtag par thal bar 'gyur ro/ /ci'i phyir zhe na/ rgyu rtag pa ma yin pa'i phyir ro/ / de bas na 'bras bu yang rim par 'byung bar snang bas rgyu rnams kyang de bzhin du shes par bya ste/ rtag par ga la 'gyur/ 'phags pa byams pas kyang / /'bras bu rim can nyer sbyor bas/ /rgyu rnams rtag pa'i bdag nyid min/ /zhes so/ /slob dpon dbyig gnyen gyis kyang //de yang gang tshe de yi tshe/ /khyed kyi don de mi snang na/ /de ni mngon sum ji ltar 'dod/ /ces so/ /de bas na de gnyis zhes pa ni/ gong du rnyed pa dang phyis nye bar rnyed pa'o/ /phun tshun ni mthun zhes pa 'gags pa dang yod pas na'o/ /dpe gsungs pa/ bde la sogs zhes pa ni bde ba dang sdug bsngal dus thams cad du mi mthun pa ste de dang 'dra ba'o//da ni rigs par rtogs pa'i gcig pa nyid ma grub par bstan pa'i phyir/ gzugs la sogs pa zhes pa la sogs pa'o/ /de la gzugs la sogs pa zhes pa ni ka ba la sogs pa dngos po thams cad do//gcig min zhes pa ni dgag par dam bcas pa'o/ /ci'i phyir zhe na/ thog ma zhes pa la sogs pa'o/ /thog ma zhes pa ni ka ba la sogs pa'i steng gi cha'o/ /tha ma zhes pa ni 'og gi cha'o/ /sogs kyi dkyil 'khor la sogs pa'i cha bzung ba'o/ / de ltar snang bas zin pa dang ma zin pa snang ba dang / /gom pa rim gyis kun du phyin pa dang phra ba mi mthong zhing rags pa mthong ba dang / rta dang glang po che la sogs pa du mar snang ba'i phyir gcig tu dmigs pa nyid 'khrul pa'o/ /de bas na slob dpon dbyig gnyen gyis/ gcig ni rim gyis 'gro ba med//zin dang ma zin cig car med/ /ris chad du mar snang ba dang / /mig gis mi sod phra ba 'ang med/ /ces so/ /shes rab 'byung gnas gsang ba kyang / /ka ba la sogs dngos po la/ /steng 'og la sogs dbye ba yis/ /de las du mar phyer gyur na/ /gcig tu dmigs pa 'khrul pa'o//zhes gsungs pas gcig pa yul ma yin no/ /da ni du mar gtogs pa'i rdul phra rab ma grub par bstan pa'i phyir rdul phran zhes pa la sogs pa'o/ /de dag gi ltar na don rnams rdul phra rab las grub cing de dag kyang cha shas dang bral zhing mun pa dang snang ba'i skabs mi 'byed cing rigs mthun pa'i skabs dang bcas par rtog go//de yang mi rigs par bstan pa'i phyir/ rdul phran cha shas mi mthong zhes te/ rdul phra rab re re mi dmigs shing rags pa la dmigs pa'i phyir ro/ /rags pa'i cha shas kyi ngo bor stong pas rdul phra rab ma yin no//shes rab 'byung gnas gsang bas kyang / /phra rab re re blo yis dmigs/ /blo ni sbom po la dmigs te/ /sbom po cha shas dang bcas pas/ /rdul phran yul du ma grub po/ /zhes so/ /de bas na du ma'i rdul phra rab kyang blo'i yul ma yin zhes pa'i gtan tshigs kyang gcig pa sun dbyung ba de bzhin te cha shas can gtogs pa'i phyir ro//da ni rdzas rtags bcom par gtogs pa'i 'dus pa nyid ma grub par bstan pa'i phyir/ dbus kyi zhes pa la sogs pa'o/ /de dag gi ltar na rdul phra rab re re nas 'dus nas rigs mthun pa'i skabs mi 'byed cing 'byar nas dmigs pa med pa rtog go//de nyid mi rigs par bstan pa'i phyir dbus kyi cha cha shas med pa'i rdul phran zhes te/ gang gi tshe 'dus pa de'i tshe/ dbus kyi rdul phra rab cha shas dang bral ba de la du ma'i rdul phra rab rjes su 'brang zhing 'dus pa de mi rigs te cha shas med pa'i phyir ro//de ltar na go sa de'i rjes su 'brang ba de phyogs drug nas sam 'on te phyogs gcig nas bgrang na/ dang po ni rigs pa yin te/ dbus na gnas pa cha drug tu gyur pa'i phyir ro/ /de na rdul phra rab nyid nyams par 'gyur ro/ / gnyis pa yang rigs pa ma yin te/ sa'i dkyil 'khor zhes pa la sogs pa'o/ /rang bzhin gcig pa'i phyir gcig gi go sa gang yin pa der gzhan thim pas sa'i dkyil 'khor la sogs pa rags pa'i dpung thams cad snang bar mi 'gyur te thams cad rdul phra rab tsam du 'gyur ro//de bas rdul phra rab tu 'du shes byar mi rung ngo / /de las ma gtogs pa'i 'dus pa zhes bya ba'i rigs yod pa ma yin pas na 'dus pa ma yin no/ /slob dpon dbyig gnyen gyis kyang / drug gis cig car sbyar ba na/ /phra rab rdul cha drug tu 'gyur/ /drug po dag ni go gcig na//gong du rdul phran tsam du 'gyur/ /rdul phran sbyor ba med na ni/ /de 'dus yod pa de gang gi/ /zhes pas so/ /slob dpon la ba can gyis kyang / rdul phran 'dus par mi 'dod na/ /gzhan pa'i 'dus pa brjod dgos so/ /gtan tshigs cung zad mi snang bas//'dus pa'ang yul du ma 'grub po/ /zhes gsungs so/ /de ltar yul rnams yod pa yin pas/des bskyed pa'i 'dzin pa'i bdag nyid rnams kyang yod pa ma yin te gzung ba 'ga' yang med pa'i phyir ro/ /'phags pa byams pas kyang / don dang sems can bdag rnams rig /snang ba'i rnam par shes pa ni/ /rab tu skye bo de don med/ /de med pas na de yang med/ /ces gsungs so/ /de ltar snga ma'i phyogs ma grub pa bstan nas/ da ni rang gi grub pa'i don nye bar 'dus pa gsungs pa/ de bas zhes pa la sogs pa'o/ /de bas zhes pa ni gong du gsungs pa'i rigs pa'i stobs des so//'dzin pa la sogs zhes pa ni gzung ba med pas 'dzin pa 'ang med pa ste/ gnyis kyi bdag dang bral bas zhes so/ /rang dbang zhes pa ni gzung ba la sogs pa de'i phyir dngos po med kyang rang rang gi bag chags kyis 'dod dgar brtags pa ste/gzung ba dang 'dzin pa gnyis kyang phan tshun 'brel pa med pas rang dbang ste/ de kun brtags pa rang gi ngo bo yin/ /zhes so/ /de bas na kun brtags pa'i rang gi ngo bo ni yang dag pa ma yin te thar par 'dod pa de dgag par bya'o/ /gzhan yang rtog pa dag par bya ba la nan tan bya'o zhes so//bde mchog gi rgyud phyi ma las/ rtog pa yongs su dag phyir na/ /de bas rtog pa yongs su dag /ces bshad do/ /de yang thar pa 'dod pas phyi rol gyi zhen pa bzlog ste/ rang gi ngo bo ji ltar gnas pa la blo bzhag ste/ des skyon med pa thob nas dag pa zhes mi thob po//yang gsungs pa/ ngo bo tsam la gnas pa ni/ /blo yi dga' brod chen po min/ /zhes so/ /ma lus g.yo dang mi g.yo zhes pa ni snod dang bcud du bcas pa'i chos thams cad ma grub pa'i dpe gsungs pa/ dri za'i grong khyer zhes te chu bo la sogs pa'i rgyun phyi rol na med kyang khang pa dkar po la sogs pa snang ba skye ba bzhin du chos thams cad kyang thog ma med pa'i dus nas spros pa'i bag chags yongs su smin pa'i dbang gis gzugs la sogs pa snang bar skye ba ste/de yang ma dpyad na rung ba ste ci yang ma yin no//de bas na skye ba dang 'jig pa'i chos rnams ni/ ma dpyad par ni yid du 'ong / /don byed ldan par 'gyur na yang / de dngos kun rdzob shes par bya/ /zhes so/ /de bas na sngon gyi lha rnams sems rnam par dag pa'i sems kho na 'jug pa ste/ nye bar 'du byed pa 'dzin pa la sogs pa med pa ste/me la me ni zhu ba 'dra/ /zhes pa la sogs pa'o/ /'o na kun dag pa'i ngo bo 'khor bar ji ltar 'gyur/ de med pas na mya ngan las 'das pa'ang ga la yod ce na bdag ces pa la sogs pa'o/ /kho bo cag kyang 'khor ba'i chos gzhan nas med par mi 'dod mod kyi 'on kyang brtags pa tsam mo//de yang rtag pa la sogs pa la gzugs por 'khrul lo/ /thag pa'i sprul ltar snang la med pa nyid do/ /de nyid kyang bdag dang gzhan gyi gzugs la sogs pa med par de la mngon par zhen pa'o/ /de'i rgyun bar ma chad pa'o//de'i ngo bos zhes pa ni de'i rang bzhin gyis byin pa rnams la bde 'gro la sogs pa'i so sor snang ba'i skyes bu de la 'khor ba zhes bshad do/ /dang po dang zhes pa ni mya ngan las 'das pa ste dkyil 'khor gyi 'khor lo'o/ /de la sogs pa zhes pa ni rnam par rtog pa'i rgyun de las log pa sems kyi rgyal po ji bzhin du gnas pa rkyen khyad par can gyis bsgrubs nas rtog pa de'i ngo bo thams cad mya ngan las 'das zhes bya'o//ji skad du/ sems can kun gyi sems gang yin/ /brtan pa'i phyir na sems par brjod/ /mnyam par gzhag pas ting 'dzin gnas//nges pa las ni rdo rjer gyur/ /sems dpa'i byin rlabs sbyor ba yis/ /slar yang rdo rje sems dpar 'gyur/ /zhes so/ /'phags pa klu sgrub zhal snga nas/ /'khor ba dang ni mya ngan 'das/ /'di gnyis yod pa ma yin te/ /'khor ba yongs su shes pa ni/ /mya ngan 'das zhes de la bya//zhes so/ /de bas na sems kho na la bdag la sogs par sgro btags pa de'i tshe 'khor ba zhes bya la/ /sgro btags pa de kho na dang bral nas rang gi ngo bor gnas pa de la mya ngan las 'das pa zhes bya'o/ /de ltar gnas kyang chos nyid kyis ni zhes pa ni stong pa nyid kyis so//srid dang zhi ba ni 'khor ba dang mya ngan las 'das pa'o/ /de yang stong pa nyid 'khor ba spangs nas mya ngan las 'das pa tshol ba de lta bu'i dbye ba 'ga' yang med de gnyi gas stong pa'i phyir/ /ji skad du/ yang dag ma mthong 'jig rten dang / /mya ngan 'das par rlom sems te//yang dag mthong ba 'jig rten dang / mya ngan 'das pa rlom sems med/ /ces 'phags pa klu sgrub kyis bshad pa'o/ /bcom ldan 'das kyis kyang so so skye bo rnam par dag pa dang / de bzhin gshegs pa'i rnam par dag pa 'di la gnyis su med de gnyis su byar med so so ma yin tha mi dad do zhes rgyas par gsungs pa/de ci'i phyir zhe na/ gang gi phyir zhes te gtan tshigs gang gi phyir ro/ /'dzin pa la sogs pa'i sgro btags pa pa dang bral rtag tu steng du dus thams cad du kun la zhes te/ srid pa dang mya ngan las 'das pa kun las spros pa dang bral ba'i chos nyid grub pa yin pa'i phyir dbye ba med do//'phags pa lang kar gshegs pa las/ de bzhin gshegs pa rnams byung yang rung ma byung yang rung / chos rnams kyi chos nyid dang chos kyi dbyings dang chos mi 'gyur ba ni ye nas gnas pa nyid do zhes gsungs pa lta bu'o/ /sgro btags pa'i rnam pa ci gzhung tshugs pa ma yin nam/sems las gzhan zhes pa ni sems las gzhan nga rgyal gyi rkyen bdag dang gzung ba la sogs pa'i dbye ba 'ga' yang yod pa ma yin zhes so/ /de'i don ni 'di lta ste bdag la sogs pa med pa'i dbang gis sems de la btags te/de las log pa'i rgyu ba dang mi rgyu ba'i dngos po sna tshogs su snang ba ste de tha dad pa ltar snang yang sems de las gzhan na yod pa ltar ma yin te/ de nyid nga rgyal gyi yul yin zhes so/ /de ni srid pa dang zhi ba tha mi dad par bsdu ba'i phyir/ gang zhig ngo bo zhes te kun rdzob gang zhig ngo bo don dam pa ste de rtogs na de'i rtog pa'i gzhi kun rdzob kyi rang bzhin de ci'i phyir dngos por grub/lung dang rigs pas dpyad na ngo bo nyid dmigs su med pa'i phyir ro/ /'on kyang chu zla la sogs pa'i rnam pa ni mi 'gog go/ /de bas thams cad ces te srid pa dang zhi ba'o//dbyer med pa ni don dam par dbyer med par byas shing tha dad pa med pas thams cad dbyer med nyid yin no/ /de bas na/ dngos gcig dngos po kun gyi rang bzhin te/ /dngos kun dngos po gcig gi ngo bo nyid/ /gang gi dngos gcig de bzhin nyid mthong na//de yis dngos kun de bzhin nyid kyang mthong / /zhes gsungs pa dang / 'phags pa klu sgrub kyi zhal snga nas kyang / kun rdzob dag ni ma rtogs par/ /de bzhin nyid ni dmigs mi 'gyur/ /kun rdzob stong pa nyid gsungs te/ /stong pa nyid ni kun rdzob gsungs/zhes pa dang / 'phags pa brgyad stong pa las kyang / kau shi ka 'dzam bu gling na shing sna tshogs pa/ yal ga la sogs pa sna tshogs pa skyes kyang grib ma la bye brag med de grib ma grib ma zhes bya'o/ /chos thams cad kyang ngo bo nyid gcig pa ste stong pa nyid do zhes gsungs pa lta bu'o/ /da ni de rnams kyi mjug bsdu ba'i phyir kha cig ces pa la sogs pa'o//kha cig ces pa ni dngos po kho na ste gzugs la sogs pa'o/ /de yul la rnam par rtog pa'o/ /kha cig gzhan du zhes pa ni mig la sogs pa'i rnam par shes pa kha cig sems su rnam par rtog pa'o/ /rnam par rtog pa zhes pa ni nga rgyal gyi rgyus tha dad par ro//de nyid kyang gong ma'i rim pas gzung ba dang 'brel ba dang / 'dzin pa dang bral ba ste/ de bas na gzung ba dang 'dzin pa gang yang ma yin pas thams cad sems kho na'o/ /mdo las kyang / kye rgyal ba'i sras dag khams gsum pa 'di dag ni sems tsam mo zhes gsungs pa'o//de la 'khrul pa gang gnyis te/ /kha cig don dam par yod pa nyid du rtog cing rdzas nyid du sems pa dang / de las gzhan pa'i ni kun rdzob nyid la gnyis su snang bar sems so/ /dang po ni rigs pa ma yin te/ rnam par shes pa rang bzhin med pa'i phyir ro//de ni dbu ma'i bstan bcos su 'phags pa klu sgrub la sogs pas rgyas par gsungs te 'dir ma bshad do/ /skye ba med par bstan pa'i mdo las/ chos thams cad ni lha'i bu'i sems tsam mo/ /de nyid kyang rang bzhin med pa'o zhes gsungs so//de bas na nges par legs pa'i grong khyer du 'jug 'dod pas sems kun rdzob tu shes par bya'o/ /'phags pa lang kar gshegs pa las/ sngar bzhin med de rnam rig med/ /dngos po yang med kun gzhi med/ /ro dang 'dra ba'i mi mkhas pa/ /ngan rtog rnams kyis brtags pa'o//zhes pa la sogs pa gsungs so/ /gnyis par yang ma yin te/ 'khor ba'i chos ni med pa'i phyir ro/ /ci'i phyir rtsa ba'i rgyud las/ mdor na phung po lnga rnams ni/ /sangs rgyas lngar ni rab tu brtag /ces pa la sogs pa gsungs so/ /de yang rtog pa la sogs pa la gzugs la sogs par 'khrul pa ste/'khor ba de thag pa'i sbrul ltar snang ba la med pa zhes gong du bstan to/ /dpal ye shes rdo rje kun las btus pa las/ gsang ba'i bdag po thag pa'i sprul gang yin pa de ni yod pa ma yin no/ /'on kyang rab rib spangs te thag par mthong na don gzhan med do//gsang ba'i bdag po de bzhin du rtog pa la sogs pa la gzugs la sogs par 'khrul pa yin no/ /'on kyang zhes pa ni bag chags kyi phyir ro/ /skyes bu la la zhig gis ngas bstan pa'i lam la gzhol zhing bag chags de bzlog na rtag pa la sogs par mthong zhing gzhan ci yang mi dmigs so zhes gsungs so//de bas na mya ngan las 'das pa kho na'o zhes pa ni grub pa'i mtha'o/ /de ltar gong du bshad pa'i rigs pas gzugs la sogs pa dang bral bas thams cad sems tsam du bstan nas/ de nyid log par rtog pa yang bkag nas de nyid kyang dkyil 'khor gyi 'khor lo'i rnam pa kho na yin pas gsungs pa/dad dang zhes pa ni/ las dang 'bras bu dang bden pa dang dkon mchog la mngon par yid ches pas sems dad pa'o//brtson 'grus ni dge ba la sems mngon par spro ba'o/ /de rnams dag pa dang de bzhin du 'dris pa'i dngos po nyid la ma brjed pa ste/sems kyis mngon par brjod pa'o/ /ting nge 'dzin brtags pa'i dngos po la sems rtse gcig pa nyid do/ /de rnam par dag pa go rims bzhin du gshin rje gshed la sogs bzhi ste sgo srung rnam par dag pa'o/ /dran pa nye bar gzhag pa la sogs pa byang chub sems kyi mtshan nyid 'dzin cing 'jug pas na sgo'o//de'i bdag por dgug pa la sogs pa'i yon tan gyi mthu mi nyams par srung zhing gti mug la sogs pa skye ba'i sgo 'gog cing bsrung bar gyur pas na sgo srung ste/ de nyid sems yin no/ /shes rab ces pa ni rigs pas bskyed pa ste gzugs la sogs pa btags pa tsam du shes pa'o//de rnam par dag pas thams cad yul du snang zhes te/ gzugs la sogs pa'i lha mo drug tu snang ba ste de nyid sems so/ /mtshan ma med pa'i zhes pa ni gzung ba la sogs pa spangs te de'i dga' ba ni mchog gi bde ba'o//de'i rnam par dag pa ni spyan ma la sogs pa lha mo'i tshogs te bzhi'o/ /de nyid kyang mchog gi dga' ba'i dus na dbye ba med pa dang kun khyab pa dang don mi gtong ba dang mi shigs pa ste/ de bas na/ ra ti shin tu longs spyod rdzogs//zhes khyad par byas pa'o/ /de nyid kyang sems so/ /sems can zhes pa ni dbang po lnga'o/ /don bzung ba la sogs pa lnga'o/ /des don dang sems can du snang ba'i kun gzhi bstan to/ /bdag po zhes pa ni nyon mongs pa can gyi yid do/ /thun mong ma yin pa'i 'khor bzhi dang ldan pa'i phyir ro//rnam par rtog pa zhes pa ni yid kyi rnam par shes pa ste chos thams cad kyi yul can du gyur pa'i phyir ro/ /rab tu 'jug pa zhes pa ni mig la sogs pa'i rnam par shes pa ste so sor 'jug pa'i phyir de skad do/ /de rnam par dag pa'ang yin zhes so//ji lta bu zhe na me long la sogs zhes te/ de la kun gzhi rnam par dag pa me long la gzugs brnyan snang ba ltar dngos po ma lus pa cig car shes pa ni me long lta bu'o/ /sogs pa'i sgras bsdus pa nyon mongs pa can gyi yid rnam par dag pa ni sems can thams cad kyi rang rig pa tsam mo zhes gcig tu rtogs pa ni mnyam pa nyid kyi ye shes so//yid kyi rnam par shes pa rnam par dag pa ni phung po la sogs pa'i dngos por rnam par dbye ba ste/sangs rgyas kyi rang bzhin du shes nas chos thams cad kyi cha shas ni 'di dag go zhes pad+ma'i 'dab ma ltar rtog cing rtog pa med pa na so sor rtog pa'i ye shes so//'jug pa'i rnam par shes pa rnam par dag pa bdag gzhan gyi lus las kyi bya ba rdzogs par byed pa bya ba la nan tan gyi ye shes so/ /de rnams su dag pa'i dus de na sgrib pa thams cad dag cing nyon mongs pa las grol ba rnam par rtog pa'i bag chags rnam par sbyangs pa/zab mo dang gsal ba ste chos kyi dbyings kyi ye shes so/ /de nyid dri ma med pa yang yin la sems kyang yin pas na de skad do/ /de rnams 'dir sangs rgyas rnams kyi gzugs zhes te/ go rims bzhin du rnam par snang mdzad la sogs pa'i ngo bo nyid sems so//de nyid ces pa ni gnyis su med pa'i ye shes te/ de rnam par dag pas de'i sbyor bas dkyil 'khor bdag po zhes te/ thams cad kyi bdag po rdo rje 'chang chen po'i ngo bo nyid du'o/ /cher gnas zhes pa ni de kho nas chos thams cad chos nyid kyis bsgrub par bya ba yin pa'i phyir ro//de dag go zhes pa ni rtag pa la sogs pa spyi'i mtshan nyid do zhes so/ /'di skad du/ dpal ldan sangs rgyas kun gyi bdag /rdo rje 'chang ba kun gyi gnas/ /chos rnams kun gyi chos nyid do/ /sangs rgyas kun gyi bsgrub bya yin/ /zhes shes so//gzugs kun zhes pa ni gzugs kyi phung po la sogs pa'o/ /de la 'khrul pa zhes pa ni phyi rol du sgro nan gyis btags pa gcig pa la sogs pa dang bral bas na dri med pa'i zhes te shel lta bu'i sku la sogs pa 'grub pas so/ /phung po la sogs zhes pas ni dri ma med pa'i phung po ni rtag pa la sogs pa'o//sogs pa'i sgras dri ma med pa'i skye mched ni sa'i snying po la sogs pa'o/ /dri ma med pa'i khams ni spyan ma la sogs pa'o/ /de lta bu'i dngos por grub po zhes so/ /ser sna ni sems kyis kun du 'dzin pa'o/ /de dang por byas pa'i sgras bsdus pa'i tshul khrims 'chal pa dang /bzod pa med pa dang le lo dang sems g.yeng ba dang / shes rab 'chal ba la sogs pa bcu'o/ de las log pa ni med pa ste/ pha rol phyin dang zhes te sbyin pa la sogs pa dang / de nyid sa dang zhes te rab tu dga' ba la sogs pa bcu ste/de nyid dkar po ste ser sna la sogs pas ma gos pa'i phyir ro/ /de yang 'dir gzugs la sogs par sbyor ba ste de nyid kyang sems so/ /de ltar sems nyid dkyil 'khor gyi 'khor lo'i rnam pa kho nar bstan pas/ da ni de rnams kyang zab mo dang gsal ba yin pas bstan pa/rnam par rtog pa med ces pa la sogs pa'o/ /rnam par rtog med ces pa ni gong ma de dag kyang rang 'byung bar byed pa'i rgyu gzung ba la sogs pa'i rnam par rtog pa dang bral zhing mi dmigs pa'o/ /bdag gzhan don 'byung ba zhes pa ni nyid kyang phun sum tshogs pa'i don yod pa gzhan ston pa'i rgyu 'jig rten dang 'jig rten las 'das pa'i bde ba thob par byed pa ste 'ja' tshon lta bu'i sku'o//de'i go rims zhes pa ni rnam par rtog pa med pa zad pa dang shes rab ces bya bar sbyar ro/ /gang zhig dngos med shes rab ste//zhes pa'o/ /de bzhin du bdag dang gzhan gyi don 'byung ba dang thabs zhes bya bar sbyar ro/ /rang gi mtshan nyid thabs yin no/ /zhes bya ba'o/ /de lta bu'i ngo bor bdag nyid sems dpa'o zhes so/ /da ni zab mo dang gsal ba de nyid dbyer mi phyed pa bstan pa'i phyir ro//don dam par zhes pa la sogs pa'o/ /don dam par zhes pa ni zab mo'i dbang du byas nas dbyer med ces te dbyer yod pa ma yin no/ /nam mkha' ltar rnam par dag pa'i phyir ro/ /dbyer med pa ma yin zhes pa ni gsal ba'i bdag nyid kyis dbang du byas nas dbyer med pa ma yin te 'ja' tshon ltar so sor snang ba'i phyir ro//de bas na dbyer med pas gnyis ka las rnam par grol ba thabs shes rab tu bcas pa'i byang chub kyi sems so/ /ji skad du/ stong nyid snying rje tha mi dad/ /byang chub sems zhes bshad pa yin/ / zhes so/ /ci'i phyir zhe na/ gzhan du gzung ba'i gnas min phyir/ /zhes te gzung ba la sogs pa'i rten du rung ba'i chos ni gang yang med de de nyid log par brtags pa ma yin pa'i phyir ro/ /de bas na dbye ba la sogs zhes te/ dbye ba dang mi dbye ba'i rtog pa sna tshogs pa bzhi po la mi 'byor ba'i phyir/bzhi po de nyid thabs dang shes rab dbyer med pa'i sems yin no/ /de ltar brtags nas zhes pa ni rang gi sems kho na las thams cad snang bar sems tsam la sems tsam 'jug par mi 'gal bar shes na shes so/ / gzhi'i snying po zhes pa ni sngags kyi yi ge maM ngo / /dri ma med pa'i zla bar gnas pa'i ral gri'i mtshan ma ste/ de'i dbus na gnas zhes te gnas bstan pa'o/ /dam pa'i sngags zhes te thig le'i gzugs zhes te/ kha dog lnga dang ldan pa tsa na ka'i 'bru tsam gyis gzugs su ste rang gi sems nyid 'od zer lnga dang ldan par 'bar ba dang bcas par bsgom par bya'o zhes so//yang na sngags de nyid ma 'phros pas thig le'i ste des gzhan 'dod do/ /sems de 'od zer 'phro bas zhes te thig le'i gzugs can gyi sems de'i 'od zer gyi phreng ba de'i gnas dang /ye shes sems dpa'i nang gi lus la sogs pa nas de'i gnas kyang 'od zer des sad cing snang bar byas nas/ des sku gsung thugs rdo rje mchog ces te 'jam pa'i rdo rje'i dam par gyur pa'i sku gsung thugs kyi rdo rje yang 'od zer des snang bar byas nas yang rang gi las sbyar ba'i phyir/slar yang de nyid du thim zhes pa ni gsal ba bzhin du rang rig pas thig le la zhugs pas ye shes bdud rtsi'i rgyun te/byang chub sems dpa' 'jam pa'i dbyangs kyi dkyil 'khor thig le sbyor ba yan chad kyis lhag par mos par byas la de'i thig le las ye shes kyi 'od zer gyi bdud rtsi ste gnyis su med pas rnam par rtog pa la sogs pa'i shi ba dang bral bar byed pa de la goms pa med par byas pas sangs rgyas nyid du mi 'gyur bas sems can thams cad gdon pa'i yid du byas la zab mo dang gsal bas zin pa'i thig le de 'dzag pa'i ngang tshul can la sems bzung zhing bsgom par bya'o//de la reg pas gnyis su med pa'i ye shes dang ldan par 'gyur ro/ /de nas lus nang thams cad ces te nang gi thig le'i 'od kyis rang gi gnas la sogs pa'i dkyil 'khor can thams cad sad par byas la/so so ma lus byung zhes te 'jam pa'i dbyangs kyi nang gi lus la 'od zer bzhag pa ba spu'i bu ga las 'phros pas kun du de nyid mtha' yas pas zhes pa ni dkyil 'khor la sogs pa'i rim gyis sad cing snang bar byas nas thams cad khyab ste/brgyud pa'i rim pa bzhin du byas nas slar yang rim bzhin du ye shes kyi bdud rtsi la thim par byas nas bsgom par bya'o/ /de lta bu'i rim pas yang dang yang du spro ba dang bsdu ba dang bzung ba la sogs pa bya'o/ /da ni phra mo'i ting nge 'dzin bsgom pas yang sems brtan par bya ba'i phyir gsungs pa/yang na zhes pa la sogs pa'o/ /yang na zhes pa ni gong mas kyang sems brtan par bya ba'i ched du 'di bsgom par bya'o zhes so/ /rang gi mtshan ma phra mo ni rang gi lha'i phyag mtshan de ral gri nas tsam mo/ /'dir man ngag ni snying po'i sa bon gyi 'od zer gyis de bzhin gshegs pa bkug pa la sogs pas byang chub sems su zhu nas/pad+ma'i lte ba'i nang du babs pa las de la gyur pa'i mtshan ma gong du gsungs pa lta bu'i nang du thub pa'i 'khor lo zhes te/ chos 'byung nas brtsams te thig le'i rnal 'byor yan chad kyis lhag par mos par bsgoms nas/de la bying bar song nas sems ma gsal na rang gi rdo rje rtse lnga pa dbus lcags kyur gyur par drangs nas/sna rtser zhes te pad+ma'i sna rtser bsgom par bya'o zhes te/ dgag pa dang gtong ba'i yan lag gsum pa'o/ /de yang rdo rje dang po'i shes rab tu ldan pa nyin mtshan du ste/dus bzhir bstan par bya ba'i don du bsgom par bya'o/ /byang chub sems rdo rje'i bum par mtshan ma'i dbus su maN+Dal bsgoms nas/sems bying bar song na dbugs phyung ba'i sna rtse la bsgom pa ni man ngag gzhan no/ /de'i thig le la gong ma'i rim pas spro ba dang bsdu ba ni dgag pa dang gtong ba'i yan lag gsum pa'o//de yang ye shes lnga'i 'od zer 'chang la zhugs shing gtong ba bzung ba'i yan lag go/ /de ltar bzung bas brtan pa'i mtshan ma zhes te/ phra mo'i ting nge 'dzin la brtan pas 'byung ba bzhir re re nas log pas//smig rgyu 'dra ba dang po dang / /du ba lta bu gnyis pa dang / /mkha' snang lta bu gsum pa dang / /mar me ltar 'bar ba bzhi pa dang / /sprin med nam mkha' lta bu ni rtag tu snang ba lnga pa ste/ de lta bu'i rtags de mthong nas brtan par yang shes na gdod spro bar bya ste/ de'i 'od zer zhes te mtshan ma phra mo'i dkyil 'khor gyi 'od zer te/de las byung ba'i mthu dbang ste de bzhin gshegs pa'i dkyil 'khor dang / rnam pa sna tshogs phyag mtshan zhes te/ rdo rje dang ral gri dang 'khor lo dang rin po che dang pad+ma la sogs pa spro bar bya ste/ spros pa gzhan dang gzhan gyi gzugs las man ngag gi rim pas rjes su dran pa bsgoms te/phyis gnas dang gnas pa'i bdag nyid kun du spros nas bzlas brjod bya'o zhes so/ /rtsa ba'i rgyud las kyang / sangs rgyas byang chub gnas rnams ni/ /de ru mdor na spros par bya/ /sku gsung thugs kyis mtshan pa yi/ / sngags kyi tshig ni rab tu brjod/ /ces so//da ni grub pa'i mtshan ma thob par bya ba'i phyir gsang sngags bzlas brjod kyi cho ga gsungs pa de nas bzlas pa zhes pa la sogs pa'o/ /de nas bzlas pa byed par 'dod pas rtse gcig pa'i sems kyis dngos po'i chos thams cad kyi bdag nyid rang gi sems dkyil 'khor gyi 'khor lo'i rang bzhin las phyi rol du gyur pa'i lha med pas rang gi sems kho na'i ngo bor byas nas zhes so//ci bya zhe na sems kyi 'od zer ldan zhes te/ rang gi sems kha dog sna tshogs pa'i 'od zer dang ldan pa/ gzhi'i sngags zhes pa ni ye shes sems dpa'i thugs kar gnas pa'i maM/sku rdo rje la sogs pa'i thugs ka'i 'khor lo la sogs pa'i dkyil du gnas pa'i oM la sogs pa'i dbus su chud pa mkhas pa ste/ man ngag shes pas bsgom par bya'o/ /zhes te thams cad la'o/ /gang gi dbang du byas nas bzlas she na//sngags kyi rgyal po zhes bya ba la sogs pa'o/ /gtong ba dang dgag pa'i dbang du byas zhes pa ni/ phyis dbugs phyir 'byung ba dang nang du 'jug pa ste/de'i dbang du byas la skad cig ma bcu gnyis kyi dbye pas spro ba dang mchod pa dang bsdu ba byas nas bzla zhes so/ /sku la sogs pa rnams kyis spro ba zhes pa ni sku rdo rje la sogs pa rnams kyi 'khor lo spro ba'o//ji ltar spro zhe na/ rim gyis sam zhes te/ sku'i dkyil 'khor gyi sngags brjod pa'i dus su sku kho na 'phro ba dang / gsung dang thugs kyang de bzhin du shes par bya'o/ /cig car byas pa yis des ni sku'i sngags brjod pa'i dus su gsung dang thugs kyang 'phro bar shes par bya'o//de bzhin du gsung dang thugs kyang shes par bya'o/ /sku gsung thugs kyi bzlas pa phyogs de gnyis so/ /ye shes sems dpa' ni cig car kho na ste/ rigs lnga'i dkyil 'khor gyi 'khor lo spro ba'o//bdag la ji lta ba bzhin du thams cad kyang de bzhin du zlos shing mos par bya ste maM ngo / /de lta bu'i tshul gyis spros pas nam mkha'i nang kun du sku la sogs pa'i 'od zer gsal ba dang ldan pas gsal bar byas te thig le sbyor ba yan chad mos par byas nas/de nas gong ma bzhin du zhes pa ni dkyil 'khor rgyal po mchog bzhin du'o/ /de yang ye shes sems dpa'i thugs ka las dngos po thams cad kyi 'od zer spros pas gzugs la sogs pa dgug pa la sogs pa'i rim gyis lha mo'i pad+ma'i nang du dzaHla sogs pa'i sa bon du gyur de nas de las yang thim pa dang /de'i 'od lha mo'i ba spu'i bu ga las sngags brjod pas dus su spros nas/ de las byung ba'i sna tshogs mchod pa'i sprin sna tshogs rnams zhes te/ gzugs kyi rdo rje ma la sogs pa rang gi mtshan ma 'dzin pa'i tshogs kyis bskor nas mchod par bya'o//ji ltar bya zhe na/ mchog gi rig ma 'khyud pa zhes te/ rang snang ba'i rig ma la thim pas bde mchog gi rten du gyur nas de dang bde ba chen po 'bebs pa ste rol pa'o/ /de nyams su myong zhing bde ba chen po de'i dbang du gyur par rtogs nas bsdu bar bya'o zhes so/ / ji ltar zhe na/ rgyas pa zhes te mtshan ma la sogs pa gang ba'o/ /thub pa'i dbang po'i tshogs ni spros pa'i dkyil 'khor ro/ /mthar ni zhes pa ni dbus 'jug pa'i dus so/ /lus la thim par bya zhes pa ni so so'i sa bon gyi dkyil du thim par bya zhes so/ /'di tsam gyis ni man ngag bzlas ba bshad do//nang gi bzlas pa ni bdag gis ma bshad do/ /thig le'i sbyor ba dang phra mo'i sbyor ba dang / gsang sngags bzlas brjod gsum la yang 'jam pa'i dbyangs dang / de'i rig ma dang / dkyil 'khor gyi lha rnams kyis go rims bzhin du chung ngu dang bar ma dang chen po'i bsnyen pa dang rgyu mthun pa'i 'bras bu la sogs par shes par bya ste/de bzhin dang po'i rnal 'byor la sogs pa yang shes par bya'o/ /gzhan dag na re thig le la sogs pa yan lag bzhi ni chen po'i bsnyen pa la sogs pa kho na yin no zhes zer ro/ / de ni rigs pa ma yin te/ ci'i phyir bcom ldan 'das la chung ngu'i yan lag dang de'i 'bras bu chung ngu'i yan lag dang / de'i 'bras bu dang ldan par gyur pa de'i tshe/ rig ma la bar ma rnams so/ /de bas na chung ngu'i bsnyen pa la sogs dang rgyu mthun pa'i 'bras bu la sogs pa rigs pa yin no//chen po'i rgyu mthun pa'i 'bras bu rnams ma yin no/ /de la 'di skad zer te/ting nge 'dzin gsum gyis mi mthun pa'i phyogs thams cad zad par nus pa'i phyir bcom ldan 'das kyang chen po'o/ /de bas na chung ngu med de de med pas bar ma yang med de/ de bas na chen po kho na'o zhes so/ /de lta na ni de dag bskyed pa'i rim pa dang 'brel ba med pa'o/ gang gi phyir bcom ldan 'das kyi yan lag bzhis mi mthun pa'i phyogs zad par nus pa'i phyir/ rim pa dang lha rnams kyi yan lag rnams don med par gyur pas skyon bkag tu nus pa yin no//de ltar 'jam pa'i dbyangs tsam bsgom mo/ /de ni rigs pa ma yin te/ bla ma chen po'i zhal snga nas/ /thub pa'i dkyil 'khor nang du bsgom/ /zhes gsungs pa'i phyir ro/ /de bas na de mi mthun pa'i phyogs zad par byas pa'i chung ngu dang / bar ma dang chen po'i yan lag 'bras bu dang bcas pa dang /thig le'i ting nge 'dzin du bcas pa zlos par bya'o/ /de bas na gong du bskyed pa'i thabs thams cad bsgoms te/ ci zhig 'chad par mdzad pas mos par bya/ bla ma'i zhal snga nas kyang / thig le phra mo gsang gsum la//rgyu mthun la sogs mos pa yis/ /sbyor ba bsnyen sogs de bzhin du/ /chung ngu 'bring sogs phye nas bsgom/ /zhes so/ /da ni gong gi bzlas brjod la sogs pa la gnas pa'i sngags pas phreng ba bzung nas gzi byin bskyed de/ yang yang brten par bya ba gsungs pa/gzhi'i snying po zhes pa la sogs pa'o/ /de la gzhi'i snying po zhes pa ni yi ge maM de nyid dang po'i rnal 'byor a sogs pa'i ting nge 'dzin sgrub par byed pas na de kho na nyid do/ /sems dpa' ni gong ma'i rim pas bsgom pa'o/ / lus nyams zhan zhes pa ni dub cing rgya chung ba'o/ /sems kyi spyod pa chung zhes pa ni slong ba ste mi gsal ba'o/ /de ltar rig ma mchog gis zhes te spyan ma la sogs pas dbyangs kyis gsol ba btab ces pa ni mtshams nas gong ma'i glus rdo rje thugs khyod ces pa la sogs pas gzengs bstod nas dkyil 'khor rgyal po mchog sngon bzhin gsang ba'i mchod par bya'o//de nas tshim par bya ba'i phyir/ dam pa'i sems kyi chu rgyun zhes pa ni lhag pa byang chub kyi ngo bo'o/ /'gags pa'i dbugs kyi lcags kyus zhes pa ni dbugs nyid lcags kyu ste nang du bsdus pas drangs nas so//cho ga bzhin du spyi bor 'dom gang tsam zhes pa ni/ mtho gang gi zla ba la bdud rtsi lnga'i yi ge dang steng du oM yang bsams nas/ yi ge'i 'od kyis rigs lnga drangs nas de la bcug nas/ de thams cad du zhu ste gcig tu gyur pa las oM gyis rig pa las chu ltar gnas pa des dbugs rngub pa'i lcags kyus sku'i rdo rje la sogs pa dbab par bya'o//de'i don ni dbu rgyan gyi lha dang sku rdo rje la sogs pa lus kyi rtsa rgyus thams cad khyab nas gzi byin dang ldan par bya'o/ /de nas skad cig 'dus nas zhes pa ni ngal cung zad so nas zhes so//yang bde ba la sogs pas sems g.yeng bar 'gyur bas/ gong nas gsungs pa'i cho gas zhes te rim pa 'am cig car bas rang gi sngags 'od dang ldan pa'i yi ge gsum gyi bar du bcug pa dam pa'i sngags de bzhin nyid ces pa'i rnal 'byor pas nyin mtshan du bzla'o zhes so//sngags la chags zhes pa ni bdag ni zlos pa'o/ /'di ni bzlas pa'o zhes zhen pa dang bral bar byas nas sngags bzla'o zhes so/ /de mang na de nyid shes pas zhes bya'o/ /da ni de ltar bsgom pa'i rnal 'byor pas dkyil 'khor ba'i cho ga gsungs pa bstod dang zhes pa la sogs pa'o//de yang gshegs su gsol bar brtson pa'i sngags pa'i zhes pa ni bsdu bar 'dod pas zhes so/ /ci bya zhe na gong ma'i rim pas mchod pa dang bstod pa dang bdud rtsi myang ba yang byas nas/ oM la sogs pa bkod pa zhes pa ste sku rdo rje la sogs pa'i thugs ka na gnas pa'i mtshan ma'i gnas la'o//sku la sogs pa brtags pa bsdu bar bya zhes pa ni oM AHhUM zhes brjod pas rtag pa dang spyan ma dang gzugs kyi rdo rje ma dang gshin rje gshed ni oM la thim mo/ /tshe dpag tu med pa dang na bza' dkar mo dang ro'i rdo rje ma dang pad+ma mthar byed ni AHla thim mo//lhag ma ni hUM la thim ste/ de rnams kyang nam mkha' bzhin du rnam par dag pa'i don bsam par bya'o/ /'di ni las kyi rgyal po mchog ces bya ba'i ting nge 'dzin to/ /de ltar ting nge 'dzin gsum gyi dngos gzhi'i cho ga bstan nas/ da ni de'i yan lag gzhan skabs su bya ba'i cho ga la bsngo ba dang smon lam gdab pa gsungs pa de 'dra'i zhes pa la sogs pa'o/ /de'i cho ga'i de nyid ces pa ni gong ma lta bu'i dkyil 'khor gyi 'khor lo'i sems so/ /de mthong ba ni bsgoms pas rtogs par gyur cing yid ches pa'o//sems can khams zhes pa ni khams gsum du gtogs pa'o/ /des grol zhes pa ni thams cad kyi dkyil 'khor gyi 'khor lo'i ste rtog pa dang bral ba'i rang bzhin las de ltar ma shes pas de la dmigs nas zhes so/ /gang gis she na snying rjes zhes te bshad zin to//'grol ba de lta bu la phan par bya ba'i phyir bsgoms pa'i dge ba'i rtsa ba bsngo ba dang / smon lam mngon du bya zhes pa ni 'jig rten 'di dag ces pa'i skabs su yid la smon pa de 'dir sngon du bya ste/ dge ba'i rtsa ba 'di dag 'jam dpal gyi skur gyur nas sems can thams cad kun mkhyen gyi sa la dgod par shog ci ga ces pa la sogs pa ste/bdag gis gzhan du bshad do/ /langs nas zhes pa ni ting nge 'dzin las so/ /dag pa'i sems dpa' ni tha mal pa'i rtog pa ma lus pa spangs par gyur pas rang gi 'dod pa'i lha'i rnam pa'i gzugs yid la byed pa ste dag pa'i sems so//kun du snang ba la gnas pa zhes pa ni 'gro ba la sogs pa'i dus su shes pa la snang ba'i yul lo/ /gong ma bzhin du yongs su bsgoms nas zhes pa ni gzugs la sogs pa'i rnam pa dang bral ba zhes pa la sogs pa'i rim pas dpyad na tha mal pa'i gzugs la sogs pa rung ba ma yin pas/sku la sogs pa rdo rje'i go rims zhes te/ gzugs sku'i rdo rje/ sgra thugs kyi rdo rje/ dri rin chen 'byung ldan/ ro snang ba mtha' yas/ reg don yod grub pa'i rang bzhin du blta bar bya'o//yang na rang gi rang bzhin dag pa yin zhes te rang rang gi rang bzhin dag pas gzugs kyi rdo rje ma la sogs pa'i rang bzhin du blta bar bya'o/ /chos nyid kyis ni zhes pa dam par ro//rdo rje 'dzin pa lta bu zhes pa ni rdo rje 'chang chen po ste thams cad kyi rang bzhin yin pa'i phyir ro/ /gzhan dang gzhan du tha mi dad ces pa ni gzugs la sogs pa de dag dbye ba med par rdo rje 'dzin pa'i rang bzhin du blta'o//yang na gong gi rang gi lha'i rnam par 'dzin pa'i zhes pas rang gi lha'i nyid du blta bar yang bya'o/ /de ltar shes pas bya ba thams cad bya'o zhes pa ni chos 'chad pa dang / mdo klog pa la sogs pa'i bya ba'o/ /phyin ci log gi rtog pa las ni grol ba yis/ /zhes pa ni gzung ba dang 'dzin pa 'am rnam pa tha mal pa'i nga rgyal gyis ngo bo las grol bar byas nas bya zhes bya'o/ /des cir 'gyur zhe na/thub pa'i dkyil 'khor thams cad de/ dkyil 'khor gyi 'khor lo rnams mnyes par 'gyur bas na mchod pa'i mchog ces te/gsang chen gyi mchod pa ste yid dga' bar byed pa'i phyir ro/ /rtag tu zhes pa ni dus thams cad du'o/ /de yis so zhes pa ni gong gi spyod yul du bsgom pa la sogs pas so/ /de la spyod yul la rnam par lta ba 'di la bsam pa'i dbang gis kha na ma tho ba dang bcas pa dang kha na ma tho ba med pa'o//gang gi tshe bsam pa nyon mongs pa'i dbang gis kha nam tho ba med pa'o/ /bsam pa de yang gsum ste/ 'jig rten gyi 'bras bu dang rjes su mthun pa dang rang gi mya ngan las 'das pa'i 'bras bu dang rjes su mthun pa dang bla na med pa'i 'bras bu dang rjes su mthun pa'i bsam pa'o//de yang dang por ni mtho ris la sogs la thob par bya ba'i phyir gzugs la sogs pa'i longs spyod kyis lha la dbul ba la sogs pa yid la byed pa'o/ /gnyis pa ni nyan thos la sogs pas rang gi byang chub 'dod pa'i phyir/gzugs la sogs pa mi rtag pa la sogs par shes par bya'o/ /lung las kyang 'di nas dge slong gi gzugs rnams las rgyal de gzugs kyi rgyal ba ma yin te mi rtag par mthong ba'o zhes rgyas par gsungs so/ /gsum pa ni bzhi ste smon lam gyis rnam par bsten pa dang /de kho na nyid gcig tu sa rnam par bsten pa dang / gsal ba 'ba' zhig gis bsten pa dang / zab mo dang gsal ba dbyer med pas bstan pa'o/ /de la dang po ni gzugs la sogs pa nyams su myong pa'i dus su 'gro ba la phan pa'i bsam pas smon lam mngon du byed pa ste/ji skad du byang chub sems dpas gzugs yid du 'ong ba cig mthong na/ 'di ltar sems bskyed de/ sems can thams cad kyis de bzhin gshegs pa'i yang dag par gzugs mthong bar gyur cig pa'o/ /mi sdug ba mthong ba'i dus su sems can thams cad 'khor ba'i sdug bsngal la yid mi dga' bar gyur cig /mnyam pa mthong ba'i dus sems can thams cad chos thams cad so so la mnyam pa nyid du gyur cig ces pa la sogs pa rgyas par gsungs so/ /'phags pa byams pas kyang / /ji ltar rang la snang ba yis//spyod yul la ni spyod pa'i dus/ /srid pa la gnas snying rje can/ /ji ltar ji ltar 'thad pa bzhin/ /sems can la ni phan pa'i sems/ /de yi sgo nas smon lam brtson/ /zhes gsungs so/ /gnyis pa ni spyod yul thams cad bdag med pa'i rigs pas yid la byed pa ste/mdo sde las kyang / rigs kyi bu dge slong klog mkhan gyis bdud sdig can rnams kyis bar chad byed pa'i don du bsgyur ba la/ des bdag med pa yid la byas pas de las rgyal nas longs spyod par byed ces rgya cher gsungs so/ /de bas na bdag med pa yid la byed pa ni phyin ci log gis gnyen pos sa las nges par bzlog par dka' ba yang de rtogs pas zad par 'gyur te/mi 'dod pa'i 'bras bu 'byung ba las mthu med pa bden pa kho na rtogs so/ /gzugs la sogs pa des zin pa las ngan pa ga la yod/de bas na phyin ci log de la bdag med cig car 'byung ba ma yin no/ /de skad du/ gang zhig sna tshogs 'dod ma yin/ /rtog pa'i 'dod chags 'jig rten du/ /de bzhin skyes bu 'dod pa ni/ /'jig rten gnas 'gyur sna tshogs te//de nyid brtan pos rang sems 'dul//zhes so/ /gsum pa ni gzugs la sogs pa la shin tu gsal ba kho nas dmigs pa tha mal pa'i rang bzhin du snang ba'i gnyen po yin pa ste/ de bas na sangs rgyas kyi sku la sogs pa 'ba' zhig tu dmigs te nyams su myong bar byed do/ /de bas na bdag dge ba nyid yin par mi 'dod do//bsam pa'i khyad par gyi dbang gis bye de nyid dge ba'i bdag nyid yin pa'i phyir ro/ /de bas na bka' stsal to/ /byang chub sems dpa' gang zhig gis sangs rgyas brgyad khri la re re la 'khor brgyad khri yod pa la bskal pa du ma'i bar du bde ba thams cad kyis 'tsho ba sbyor ba dang /byang chub sems dpa' kha cig gis dam pa'i chos gzung ba'i ched du rang nyid bsod snyoms kyi zas la longs spyod pa dang zhes bya ba la sogs pa rgyas par gsungs so//bzhi pa ni rnam par rtog pa thams cad bsal nas bde bar gshegs pa'i sku kun du 'od zer 'phro ba rnam pa thams cad kyi mchog dang ldan pa de bzhin nyid sno dang dbyer med par spyod yul rnams mnyam par 'jog pa ste/de nyid yang dag pa'i phun sum tshogs pa'i rgyu nyid kyi phyir yang dag pa'i mchod pa ste/ de la kho na kha na ma tho bar dogs pas sdig pa rgyas par 'gyur ro//de bas na tha mal pa dang zhen pa thams cad bkag pas na/ mya ngan las 'das pa'i yang dag pa'i sdom pa chen po ste de skad du/ mig gi sdom pa legs pa ste/ /sna yi sdom pa rab tu legs/ /legs so lce yi sdom pa ni/ /lus kyi sdom pa shin tu legs/ /yid kyi sdom pa legs pa'o//sdom pa legs pa'i dge slong khyod/ /sdug bsngal kun las grol bar 'gyur/ /zhes pa'i lung yang 'di'o/ /de bas rjes su mthun pa'i gzugs la sogs pa las ldog pa ni yang dag pa'i rgyu spangs pas byang chub kyi snod ma yin te/ mi skrag pa la skrag par 'gyur na sdug bsngal tha dad 'byung ba'i rgyu yin no//de skad du/ mi skrag pa la skrag par 'gyur/ /'gro ba de yis ltung ba'i rgyur/ /sdig pa'i phung po chen po'i rgyun/ /rgyu phyir shin tu yun ring du/ /rgyud nyams des kyang bshes gnyen spangs/ /shes rab dag kyang yongs su spangs//sngon du ma byas dge ba dang / /chos kyi don chen 'di nyid las/ /de nyid ltung bar 'gyur zhes so/ /de bas na 'di nyid rang gi yid yang dag par dga' bar byed pas na mchod pa'o/ /phyin ci log thams cad bkag pas na sdom pa'o/ /de nyid ser sna la sogs pa las ldog pa pha rol tu phyin pa'o//de bas na rnal 'byor pas kyang tha mal ltar kun du spyod do/ /da ni de lta bu'i rnal 'byor pas zas la spyad pa'i cho ga bstan pa/ /bza' ba'i dus shes pa la sogs pa'o/ /de la rnal 'byor pas la zas la longs spyod pa'i dus su snying zla'i dbus su zhes te/snying gar zla ba'i steng du ye shes sems dpa'i dkyil 'khor rang gi sngags kyi zhes pa buM la sogs pa 'am/ yang na maM kho nas kun du dmigs nas ni zhes so/ /de nas rang gi kha zas btung ba'i ngo bo ji snyed pa byang chub sems kyi ngo bo chu ltar dang bar rlung la sogs pa'i rim gyis sbyangs nas/kun nas 'od zer 'bar ba zhes te/ 'od zer lnga dang ldan pa'i oM gyis pa bsil bar byas nas/ dngos po thams cad mnyam pa nyid de/ gnyis su med ba'i sems kyis dag pa'i kha zas te/ de la de nyid gsum gyis btab nas dag par byas te/rang gi lce la rdo rje bsgom pa dang / dbu rgyan la bdag po bsgom par byas te/ des sku'i rdo rje la sogs pa'i zhes te/ thugs kyi dkyil 'khor gyi lha rnams tshim par bya'o zhes pa ni 'di yin no/ /kha zas dang btung ba de dag kyang bdud rtsi lnga dang mar me lngar mos par byas te/ ye shes kyi mes sbyangs pas phyi rol las khyad par du gyur pa'i phyir ro/ /de bas na lto ba ye shes me yis ni/ yang dag sbyangs pas phyi rol las/ /khyad par du ni legs pa yin/ /zhes so/ rnal 'byor pa zas la spyod pa nyid sbyin sreg yin pas sbyin sreg gi cho ga glengs pa/phyi'i zhes pa la sogs pa'o/ /de la phyi'i sbyin sreg ces pa ni thab khung dang gzar bu dang / mar dang bza' ba la sogs pa ste phyi rol la brten pa'i phyir ro/ /de nyid dpag pa tsam ste zhes pa ni 'dir bsam gtan gyi dbang du byas nas bris pas mang du dogs pas de'i cho ga ni ma bstan te/le'u bcu drug pa las dpags te shes par bya'o zhes so/ /yid las byung ba 'di nyid zhes pa ni/ nang ste kha zas za ba'i ting nge 'dzin te phung po la sogs zhes pa ni phung po dang skye mched dang / khams rnams bems po bas bud shing yin la/ de nyid ye shes me sbar ba zhes te/gnyis su med pa'i ye shes kyi me sbar bas phung po la sogs pa tha mal pa bsregs pas na bla na med par grags so/ /de ni rnam par ma bshad do/ /de bas gzhung 'dis ni phyi dang nang dang bla na med pa'i sbyin sreg gsum gsungs so/ /da ni gong gi mjug bsdu ba'i phyir zhes pa la sogs pa'o//de ltar bshad ma thag pa'i rim pas 'dod pa ste/ gzugs la sogs pa dag gam/ de las gzhan pa dag kyang lha'i gzugs zab mo dang gsal ba dbyer med par shes par byas nas mchod par bya'o zhes te/ mnyan par bya ba'i phyir ro//de lta bu'i mchod pa las dngos po thams cad mi 'da' bas na dam tshig ste/ bde bar gshegs pa rnams bzhed pa yin no/ /de bas na gsungs pa/ 'dod pa'i longs spyod thams cad la/ /ji ltar 'dod pa bstan na ni/ /rang gi lha yi sbyor ba yis/ /bdag dang gzhan la mchod par bya//dka' thub sdom bcas de dag ni/ /bsten kyang 'grub par mi 'gyur ro zhes so/ /de bas na gzugs la sogs ba'i mchod pa'i ngo bo phan pa'i rgyu dang / nyan thos la sogs pa gzugs la sogs pa'i 'dod chags la sogs pa 'byung ba'i dbang gis ltung bar 'gyur bas bkag pa yin te/ de lta ma yin na sems las ma gtogs pa'i ngo bo med pa yin pas sems nyid dkyil 'khor 'khor lo gong na gsungs pa las gzhan pa'i dbang phyug la sogs pas mchod par bya ba'i ngo bo med pas nyan thos phyi'i don la mngon par zhen pa thabs mi shes pa dngos po kun gyi de kho na nyid ma shes pa la/kye dge slong mig gi sdom pa legs pa yin/ /zhes pa la sogs pa'i lung gsungs so/ dngos po kun gyi de nyid shes shing shin tu brtan pa thabs shes pa dge ba'i bshes gnyen dam pas zin pa la/ gzugs la rnams gsum shes byas la/ /lha rnams la ni dbul bar bya/ / 'dod pa kun la longs spyod pas/ /bde bar 'gyur na byang chub thob/ /gzhan du dus min 'chib dang / /dmyal bar nges par sreg par 'gyur/ /dka' thub sdom pa mi bzad pas/ /lus can lus ni skams par 'gyur/ /sdug bsngal gyis ni sems g.yeng la/ g.yeng pas dngos grub gzhan du 'gyur//thabs dang shes rab bdag nyid la//byar mi rung ba gang yang med/ /dus kun du ni dngos med pa/ /'dod pa'i yon tan lnga rnams spyod/ /ces bya bas bde ba spro bas lus byang / lus byang bas ting nge 'dzin las su rung / de brtan pas ji lta ba bzhin du shes bas lung nas 'dod pa'i yon tan gnang ba yin no//da ni lus ngag gi las rnam par dag pa bstan pa'i phyir rjes su rig pa zhes pa la sogs pa'o/ /rjes su rig pa zhes pa ni bsam gtan las langs nas mnyam par gzhag pas chos bshad pa la sogs pa 'gro ba'i don la dmigs te bya ba dang /gzhan yang rjes su rigs pas mnyam par gzhag pas me tog la sogs pa phyi'i mchod pas bde bar gshegs pa rnams mchod par bsgom par bya'o/ /lus la sogs pa'i las shes pa ni tha mal pa dang khyad par can no/ /de la tha mal pa'i 'gro ba dang 'dug pa la sogs pa'o//khyad par can ni srog gcod pa la sogs pa'o/ /de gnyis ka yang rtag par te/ rgyun mi 'chad par mnyam par gzhag pas bya ba yin zhes te/ lha'i nga rgyal dang ldan pa zhes mnyam par bzhag cing spyad par bya'o zhes so/ /de la tha mal pa ni 'chag pa la sogs pa'i dus su ji ltar rigs par sku'i rdo rje la sogs pa rnams su shes par bya'o//khyad par can ni le'u dgu pa la sogs pa'i rim pas mnyam par bzhag nas bya ba yin no/ /dang po ni sdom pa ste/ gnyis pa ni dam tshig tu shes par bya'o/ /de 'dra zhes pa ni de lta bu'i dkyil 'khor 'khor lo'i rnam pa'i sems la zhes pa ni/lha'i nga rgyal du ldan pa'i sems la/ lus ngag las ni gang yin pa/ /zhes pa ni des lus kyi las tha mal pa dang ngag gi tha mal pa kun yang sems des phyag dang sngags kyi bdag nyid du 'gyur na/ /khyad par can lta smos kyang ci dgos zhes so// gang gi phyir thabs thams cad mkhyen pa'i byang chub sems dpa' la smad par bya ba 'ga' yang med do/ /de bas na thabs mi shes pas mi 'dod pa'i 'bras bur 'gyur ba'i phyir thun mong du lung gis bkag pa'o/ /thabs shes pa'i byang chub sems dpa' ni rang bzhin shes pa'i sems kyis rjes su lus la sogs pa'i las la 'jug pas de mi dge bar ga la 'gyur te/ji skad du/ byang chub sems dpa'i kun rtog pa'o/ /dge ba 'am gal te mi dge ba'i/ /gang phyir sems kyi dbang 'gyur ba/ /de yi bkra shis de kun 'gyur/ /zhes so/ /de bas na rnam par snang mdzad mngon par byang chub ba'i rgyud las/byang chub sems dpa' thams cad nas thams cad du srog gcod pa spangs par 'gyur/ /gzhan du dkon mchog gsum la gnod par byed pa ma mthong ba phan chad do zhes pa la sogs pa gsungs so/ /de ji ltar srog gcod pa la sogs pas sems dag par 'gyur zhing phyag rgya dang sngags kyi bdag nyid du 'gyur zhes pa la sogs pa'o//del dngos po gcig ces pa ni bud med lta bu'o/ /sna tshogs pa ni ro dang 'dod pa can bza' ba la sogs par mthong ba'o/ /de bzhin du bcom ldan 'das kho na yang rtog pa'i dbang gis so so'i snang ba ste/mu stegs pa skur ba btab pa'i rtog pas dmyal bar 'gyur la dge ba'i gshegs gnyen la brten te des bstan pa'i dge ba la gzhol bas mtho ris su 'gro bar 'gyur la/ /des brtan pa'i lam yang dag pa la brten te skal ba ji lta ba bzhin du byang chub tu 'gyur ro zhes so/ / de bas na dngos po gcig pu la sna tshogs pa'i rtog pa sdug bsngal te dmyal ba la sogs pa ste/ bde ba la sogs pa dang / 'gro ba ste byang chub gsum 'byung ba'i las kyi khyad par mang pos sems kyi ngo bo gcig la rtog pa tha dad pa'i dbye bas de ltar 'gyur ba yin no/ /ci'i phyir zhe na/ dge ba dang mi dge ba rnams zhes pa ni dge ba bcu la sogs pa'i rnam pa lus ngag gi las ji snyed pa rnams so/ /sems kyi dbang gi phyir zhes pa ni sems ji lta ba bzhin du ma shes pa'i rtog pa'i khyad par las 'byung zhing de'i phyir dge ba dang mi dge bar 'gyur ro/ /de bas zhes pa ni rtog pa las sna tshogs 'byung ba de'i phyir zhes so//kun du rtog pa thams cad spangs pa'i sems zhes pa ni thag pa'i sbrul ltar snang la med pa'i kun du rtog pa thams cad med pa las sgyu ma lta bu'i sems kyi srog gcod pa la sogs pa'i byed pa ni de rtog pa thams cad spangs pa'o/ /nag po'i las su ga la 'gyur//zhes pa ni zhe sdang gi dbang gis srog gcod pa lta bu ma yin pa'i phyir nag por mi 'gyur te ngan song gi rgyur mi 'gyur ro zhes so/ /gang gis zhe sdang la sogs pas srog gcod pa la sogs pa'i las kyis nag po'i las su gyur pa de'i phyir snying rje kho nas de ltar mi 'gyur ro/ /'o na ngan song gi rgyur ma gyur na mtho ris kyi rgyur 'gyur ro zhe na//de ltar yang mi 'gyur te/ chags pa'i dbang gis phyugs gsod cing mer 'jug pa'i mchod sbyin lta bu ma yin pas mtho ris kyi rgyur mi 'gyur ro/ /'o na ji ltar bur 'gyur zhe na/ snying rje rjes su spyod pas byang chub kho na'i rgyur te/ rang dang gzhan rnam par dag pa'i phyir ro//le'u bco brgyad pa las 'di skad du/gang la bsod nams sdig med na/ /de la byang chub rab tu gsungs/ /zhes so/ /da ni rjed pa la sogs pas dam tshig nyams pa bskang ba'i cho ga gsungs pa/ dam tshig ces pa la sogs pa'o/ /dam tshig ces pa ni 'da' bar mi bya ba ste rtsa ba dang yan lag la sogs pa ste/gang bla ma'i mdun du bdag gi bya ba khas blangs pa'o/ /de zad pa ni 'das par gyur pa'o/ /de 'das ma thag tu zhes te/ dpal ldan dam tshig rdo rje'i sbyor ba zhes te/ don yod grub pa'i rnal 'byor du byas nas so/ /de'i sbyor ba ni dang po'i sbyor ba la sogs pa dang ldan pa de la de skad do//rang bzhin rnam par dag pa 'gro ba bsams nas ni/ /zhes pa ni 'gro ba thams cad rang bzhin gyis skyon thams cad dag par byas nas bdag kyang de'i ngo bo yin par shes par byas nas/ sna tshogs pa'i pad+ma'i dbus su zhes pa ni don yod grub pa'i rnal 'byor pas rang gi snying gar ye shes sems dpa'/de'i snying gar sna tshogs pad+ma'i dbus su zla ba la khaM las sna tshogs rdo rje bsams te/ de'i bum pa la khaM bsam mo/ /lnga pa'i rim pas dbang bskur bya/ /zhes pa ni thub mchog 'od zer las byung zhes pa la sogs pa'i rim pas dbang skur te rigs kyi bdag po bzhag pas dag par 'gyur ro zhes so//de'i don ni ting nge 'dzin gsum bsgom pa'i rnal 'byor pas dus gzhan du rang gi dam tshig la sogs pa bgrang bar byas la gang la nyams pa la sbyor ba des dag par bya'o zhes spyir bstan to/ / khyad par du bla ma brnyas pa'i skyon byung na/ tshogs kyi mchod pa chen po la spyan drangs nas/ kha zas dang ras la sogs pa'i yon phul nas snga ma bzhin du sdom pa gzung bar bya'o/ /yang na mi nus na yid kyis kyang de bzhin du bsam par bya'o/ /dbang bskur ba'i rim pa 'di nyid phyi'i khrus kyi rim pa la yang 'gro ba'i phyir phyi'i khrus zhes pa la sogs pa'o//phyi'i khrus zhes pa ni phyi'i chus gdong bkru ba la sogs pa'o/ /de'i cho ga la yang zhes pa ni dbye ba'i dus su dbang bskur ba'i rim pas lha mos mgor blugs par bsam zhing dbang rdzogs pa'i dus su bdag po bzhag ba'i rim pa'o//khyad par du bsam zhes pa ni dam tshig nyams pa la khyad par du ste/ rang gi lha'i rnal 'byor 'di lta bu la phyi'i khrus mi bya bar mi rung ba ni ma yin te/yang dag pa'i khrus dang ldan pa'i phyir ro/ /gzhan du ni 'jig rten dang mthun par bya ba dang / lus la phan zhing bde ba'i phyir bya ba de bzhin du byas na nang gi khrus su 'gyur ro//ji skad du/ /gtsang sbra sdom pa mi dgos te/ /dka' thub dka' spyad 'dir mi dgos/ /sangs rgyas thams cad rdzu 'phrul che/ /bdag tu sbyor ba bsgrub par 'gyur/ /zhes so/ /de ltar ting 'dzin gsum yan lag dang bcas pa bstan nas da ni de nyid du mtshams gzhan las bsgom pa bstan pa'i phyir/thun mtshams zhes pa la sogs pa'o/ /de la mthun mtshams zhes pa ni nyi ma gung dang phyi dro dang nam phyed du'o/ /mchod pa la sogs pa zhes pa ni rang gang gi sngags bsgom pa nas brtsams te/ thig le dang phra mo'i sbyor ba sngon du byas nas zhes so/ /bzlas byas te zhes pa ni rim pa cig car ba'i bzlas pa byas te mchod pa la sogs pa byas nas gong ma bzhin du bsdus nas yan lag gzhan yang ci rigs par bsgom par bya'o zhes so//nam phyed dus su khyad par du bya ba gsungs pa/snying ga'i nang du gnas pa'i 'khor lo zhes te/ oM AH hUM muH/ zhes pa'i sngags kyis ye shes kyi dkyil 'khor gshegs su gsol bar byas nas/oM AH hUM zhes pa'i sngags kyis dam tshig gi dkyil 'khor snying ga'i 'khor lo la bsdus nas/ shes rab ces pa rang gi rig ma dang snying rje zhes pa thabs dang ldan pas nyal zhing gnyid log par bya'o/ / langs pa'i dus su zhes pa ni/ tho rangs mal nas ldang ba'i dus lha mo bzhis/ rdo rje thugs khyod ces pa la sogs pa'i dbyangs kyis bskul nas ldang bar bya'o zhes so/ /thub pas zhes ni phyi rol du gtam la sogs pa mi dgos par mi byed do/ /de bzlas pa la sogs pa zhes pa ni sa bon bsgom dang tshangs pa'i gnas bzhi bsgoms nas bzlas pa dang bsdu ba'i mthar thug pa byed pa'i dus su thub pa zhes so//de ltar ting nge 'dzin gsum yan lag dang bcas pa gong ma'i cho gnyid kyis bya zhing dus mtshams gzhan la yang de bzhin du bya'o zhes te/ rtse gcig pa'i rnal 'byor pas so//bya bas brel ba'i rnal 'byor pas ni tho rangs dus su ting nge 'dzin gsum ma lus pa bsgoms nas dus gzhan la rjes su mthun pa'i gdan la lha'i nga rgyal gyis gnas te/ oM AH hUM gis dkyil 'khor gyi lha spro bar byas nas dbang bskur blangs te mchod pa dang bstod pa dang bdud rtsi myang ba yang bya ste thig le'am phra mo gang yang rung ba cig la gnas nas bzlas te bsdu ba byas nas snga ma ltar sbyad par bya'o zhes so//de ltar gnyis kyi rang gi las kyis bstan pa'i mtshan ma sngar rnyed pa ni las dang po pa'i rnal 'byor pa'o/ /de las de ma thag pa'i rkyen kyis bsgyur ba ni cung zad ye shes dbang du gyur pa ste/de ltar thun bzhir rang gi lha'i gzugs dmigs pa'i phyir mig la sogs pa byin gyis brlab pa nas brtsams te thig le dang phra mo ni brtan pa'i nga rgyal dang ldan pas mi byed de/ grub pa'i mtshan ma mthong bar byas pa'i bzlas brjod kyi cho ga byas nas bsdu ba dang yan lag gzhan bya'o//de las de ma thag pa'i rkyen gyis bsgyur ba'i rnal 'byor pa ste/ des dus mtshams med par rang gi sems la thams cad dbyer med par rtogs nas rdo rje bzlas pa'i rim pa'i spro bsdu'i dkyil 'khor la sgyu ma lta bur gzhan gyis mthong ba'o//de las de ma thag pa'i rkyen gyis bsgyur ba ni yang dag pa'i ye shes dbang du gyur pa ste/ des srid pa ji srid yod pa de srid kyi bar du ro myong ba'i mtshan nyid brgyad dang ldan pa bzhugs nas 'gro ba'i don chen po byed pa'o zhes so/ /de ltar ting nge 'dzin gsum yan lag dang pos bsnyen pa'i cho ga ci rigs par bstan nas/da ni bar ma'i rim gyis dngos grub bsgrub pa'i cho ga gsungs pa grub pa'i mtshan ma zhes pa la sogs pa'o/ /de la grub pa zhes pa ni rig 'dzin la sogs pa phyag rgya chen po'o/ /de'i mtshan ma ni rtags rnyed pa ste/ bkra shis pa'i lha'i rmi lam dang lha'i lung dang dbab pa dang tha mal pa thams cad do//de mthong ba ni gzugs brnyan gyi mtshan ma'i bya ba byas nas mnyes pas bzlas pa la goms pas bar ma'i dus mthong ba'o zhes so/ /des de nyid gsum gyi mchod pa zhes pa ni 'bum la sogs pa bya ba byas nas/ gzugs brnyan gyi dkyil 'khor bris te bsgrub par bya'o zhes sbyar ro//ji lta bu'i zhig gis she na/ rang gi sems gong nas gsungs pa'i dkyil 'khor gyi 'khor lo la gnas pa mi mthun pa bcom pa de lta bu zhes so/ /'dod pa'i dngos grub ces pa ni phyag rgya chen po'i rig 'dzin la sogs pa rgyud las gsungs pa'i lam gyi rim pa la gnas nas bsgrub par bya'o zhes so//dngos grub bsgrub pa'i cho gal te bgegs byung na bzlog pa'i thabs gsungs pa/ bdud rtsi zhes pa ni bdud rtsi thab sbyor gyi dkyil 'khor bsgyur ba'o/ /nan tan dbang bskur byas nas zhes pa ni 'od kyis bskul ba sngon du byas nas dbang bskur ba blangs pa tsam gyis so//nan tan ma byas zhes pa ni bsgrim pa ma byas kyang bgegs rnams med par byed do/ /bar ma'i rim pa ni sbyor ba la brten pa'i phyir ro/ /bdud rtsi 'khyil ba'i 'khor lo de ci lta bu zhe na/ gang zhig ces pa la sogs pa'o/ /bdud rtsi 'khyil pa gang zhig 'khor lo de'i dbus su gnas par 'gyur ba de'i tshe dkyil 'khor de bdud rtsi 'khyil pa de yin no//bla ma'i zhal nas bsdus pa'i don las/ de'i dbus gnas pa gang yin pa/ /de yi 'khor lo de zhes bya/ /de bzhin gshegs pa kun bdag po/ /de yi gnas su mi bskyod gnas/ /gzhan la gtso bo de gnas la//rang bdag kho na rang gi bdag /phyung nas sngon du blo ldan pas/ /cho ga bzhin du thim par bya/ /zhes so/ /de bzhin du rnal 'byor pa gsum khyad par med par rdul tshon nam yid kyis dkyil 'khor byas nas dbang bskur bar bya'o zhes shes par bya'o/ /de dag kyang gzhan du rgya cher bstan te der shes par bya'o//'di ni brda sprod pa'i tshig tu shes par bya'o/ /da ni rab tu byed pa'i mdor bsdus nas bstan pa'i phyir gong du gsungs pa'i dkyil 'khor gyi 'khor lo bsam gyis mi khyab pa'i rang bzhin de nyid srid pa'i sdug bsngal gyi gnyen po yin par gsungs pa/ sgyu ma ltar zhes pa la sogs pa'o/ /de ltar sgyu ma ltar snang ba'i rnam par rtog pa zhes pa ni bdag dang bdag gir rnam par rtog pa'o/ /de'i rgyun ni bar ma chad par 'byung ba'o/ /de lta bu'i rtog pa las gzhan 'ga' srid pa'i sdug bsngal yod pa ma yin no/ /de nyid srid pa'i sdug bsngal yin no zhes pa'i don to//de'i don ni rtag pa la sogs pa rang rig pa'i mtshan nyid de la gzugs la sogs par brtags pa de nyid sdug bsngal yin no zhes so/ /thag pa'i sbrul bzhin du snang ba med pa nyid do//de dang mi mthun pa zhes pa ni srid pa'i sdug bsngal de dang mi mthun pa ni de dag sems pa zhes te/gnyen por gyur pa'i dkyil 'khor gyi 'khor lo'i rang bzhin gyis rnam par gnas pa de mngon sum du byang chub tu rtogs par bya'o/ /le'u bco brgyad ba las/ stong nyid snying rdze tha dad min/ /byang chub sems su bshad pa yin/ /zhes so/ /de ji ltar na srid pa'i sdug bsngal dang mi mthun pa yin zhe na/zab mo gsal ba de la zhes te/ gong du gsungs pa'i zab mo dang gsal ba'i dkyil 'khor gyi 'khor lo'i sems de la zhes so/ /gang yang snang ba ma yin no/ /zhes pa ni srid pa'i sdug bsngal gang yang snang ba ma yin zhing de'i rtog pa'ang so sor snang ba med do//'on kyang de zhen pa'i bag chags kyi phyir sems de nyid kyang srid pa'i sdug bsngal du'ang snang ngo / /de la srid pa'i sdug bsngal de ni kun rdzob tu 'ang yod pa ma yin na gzhan lta smos kyang ci dgos/de bas na rang rig pa las zhes pa ni shes pa zab mo dang gsal ba dbyer med pa'i rang rig pa'i dkyil 'khor gyi 'khor lo de las so//lhag pa gzhan zhes pa ni rtag dang gcig pa la sogs pa don gzhan du 'gyur ba med de de nyid 'khrul pa'o zhes pa'i bar ro/ /'khrul pa de nyid med par sgrub pa sngar byas so zhes pa ni gong du gzugs la sogs pa rnam par grol zhes pa'i skabs su bsgrubs so zhes so//'o na srid pa'i sdug bsngal gyis/ gnyen po zab mo dang gsal ba'i dkyil 'khor de mthong bas ji ltar ldog par 'gyur te/ me'am byams pa la sogs pa ma yin nam zhe na/ gang dang zhes pa la sogs pa'o/ /gang dang zhes pa ni srid pa'i sdug bsngal dang ngo //gang zhig ces pa ni zab mo gsal ba'i dkyil 'khor ro/ /de gnyis mi mthun pa ste/ dus lhan cig tu gyur pa zhes pa ni dus lhan cig tu gyur pa'ang 'debs gsal zhes te/ lam rgyas pa srid pa'i sdug bsngal de bsal mchog tu 'gyur ba ste dkyil 'khor gyi 'khor lo kho na'o//ci'i phyir zhe na/ mthong ba goms pas 'phel ba'i zhes pa ni/ srid pa'i sdug bsngal dang mi mthun par gyur pa rtogs nas de'i gnyen po mthong zhing nye bar dmigs pa yang nas yang du yid la byed pas rnam par 'phel bas rab kyi mthar thug par 'gyur bas rang gi mi mthun pa'i phyogs te/srid pa'i sdug bsngal gtan du 'gags pa yin zhes te/ gzhi gang rnam par rtog pa'i phyir byams pa la sogs pa de lta bu ma yin no/ /me la sogs pas bad kan la sogs khogs kyang phyis 'byung du rung ngo / /'dis ni gzhi yang dag par rtogs pa'i dkyil 'khor gyi 'khor lo ni srid pa'i sdug bsngal dang gtan nas mi mthun pa'i phyir de rtogs pas gtan du bkag pa yin no//dper na thag pa mthong ba tsam gyis sbrul gtan nas med par shes pa yin no/ /'o na srid pa'i sdug bsngal dang mi mthun pa'i lam gzhan yod pas 'dis ci zhig bya zhe na/lam 'di pha rol tu phyin pa'i tshul las khyad par du 'phags pa bstan pa/ rgyu'i zhes pa la sogs pa'o/ /rgyu gzhi'i ngo bo zhes pa ni sgyu ma lta bur snang ba'i bdag dang bdag gi ba la sogs par kun du snang ba'i ngo bo ste/ de las log par mi byed do/ /zhes pa ni slar mi ldog pa'o/ / gang gi zhe na bdag med dang ldan du zin yang sbyin pa la sogs pa gsal ba ma yin pas rgyu'i gzhi'i ngo bo las ldog par mi 'gyur te/ ci'i phyir zhe na/ gang phyir bden pa 'ang zhes te/ sbyin pa la sogs pa mi dmigs pas bdag med pa dang ldan pa zab mo ste/ der shes kyang tha mal ba nyid gzhi mi 'gyur bas ldog par mi 'gyur ro zhes sbyin pa la sogs pa mi 'gyur te/tha mal pa ltar snang ba ni bsal ba ma yin pa'i phyir der shes pa tsam gyis ldog go/ /gal te smon lam gyi dbang gis she na/ de nyid kyang mngon sum du gyur pa ma yin pa'i phyir ro/ /'di skad ston pa yin te/ gal te sbyin pa la sogs pa tha mal pa'i ngo bo mi mthun pa mthong bar gyur pa zhig na/de'i tshe mthong na ji ltar ldog par 'gyur/ de'i mthong ba de kho na ltar mthong bltar ro/ /dkyil 'khor gyi 'khor lo 'di ni bdag med pa dang yang ldan zhing srid pa'i sdug bsngal dang yang mi mthun pa des nges par ldog par 'gyur ba yin no//de nyid dam pa rnams kyi lam yin pas de la blo brtan por bya ba gsungs pa de ltar zhes pa la sogs pa'o/ /de ltar shes nas zhes pa ni bshad ma thag pa'i dkyil 'khor gyi 'khor lo de srid pa'i sdug bsngal gyi gnyen po yin yang de nyid tshul gzhan las khyad par du gyur par shes nas zhes so//rdzogs chen ye shes zhes pa ni dpag tu med pa'i ye shes gnyis su med pa bla ma la bsnyen bskur ba las byung ba rdzogs pa chen po'i ye shes so/ /skad cig gis bsgrub pa zhes pa ni de lta bu'i ye shes dang ldan na/ sems can gyi rgyud dang yang skad cig ces pa ste/tshe 'di nyid la sangs rgyas pa'i bar du 'gyur ro zhes pa'i don to/ /de bas na dpal kun du bzang po zhes te/ dpal ldan ni zhing kun gyi rang bzhin du gyur pas na kun du bzang po ste/ gnyis su med pa'i ye shes kyi rang bzhin bcom ldan 'das rdo rje sems dpa'o//gzhi'i dngos po zhes pa ni bcom ldan 'das ni chos thams cad kyi de kho na nyid yin zhing myur du dka' ba med par sangs rgyas par 'gyur bar byed pa dang 'dus byas smin par byed pa'i phyir rang bzhin gyi don phun sum tshogs pa bzhi'i dngos po'o/ /de nyid snying rje dang ldan pas zhes te/ / sems can sdug bsngal dang bral bar 'dod pas/ rang gi sems ji lta ba bzhin du gnas pa'i bcom ldan 'das te gang sgom par mi byed ces te/ gzhan bskal pa grangs med pa gsum na bla dang bcas pa'i sangs rgyas 'dod pa rnams kyis 'di lta bu'i dpal dang ldan pa'i kun nas bkra shis pa'i ngo bo 'di gang dag bsgom par mi byed de bsgom par bya ba kho na yin no zhes pa'i don to//de bas na/ dpal ldan sangs rgyas kun gyi bdag /rdo rje 'chang ba kun gyi gnas/ /chos rnams kun gyi chos nyid de/ /sangs rgyas kun gyis thabs bya yin/ /zhes le'u bco brgyad pa las gsungs so/ /da ni slob dpon bdag nyid nga rgyal gzhom pa bstan cing brtsams pa'i dgos pa bstan pa'i phyir/dri med ces pa la sogs pa dri ma med pa yang yin la blo gros kyang yin pas na dri med blo gros te/ /de nyid 'od zer te yang dag pa'i ye shes la dbang thob pa'i rnal 'byor pa de'i 'od zer gyi 'gro ba'i rgyud la gnas pa'i ma rig pa'i mun pa thams cad sel bar byed pa ste 'phags pa klu sgrub la sogs pa'o//de rnam par snang mdzad la sogs pa'o/ /'gro ba'i mun pa sel bar byed pa'i gsang ba 'dus pa'i lam gyi rim pa bstan pas chog go/ /de bdag 'dra bas mi dpogs so/ /zhes dpag par dka' ba zhes so//yang na sangs rgyas bcom ldan 'das dri ma med pa'i 'od zer mnga' bas bstan pa'i lam gyi rim pa de la bdag cag lta bus bshad pa'i go skabs ga la yod ces pa'o/ /de lta na ci'i phyir byas she na/ bla ma'i zhes pa la sogs pa'o/ /rang gi bla ma dam pa'i gzhung gis bstan pa de la cung zad tsam bzung nas/bcings pa grol bar 'dod ces te/ 'khor ba'i 'ching ba dang po grol bar 'dod pas/ sgrub pa'i thabs 'di 'bad pas bya zhes pa ni shin tu sems khral cher byas pa ste/ bdag gi nga rgyal gyi gnas ma yin no zhes pa'i don to/ /da ni sgrub pa'i thabs brtsams pa las byung ba'i dge ba'i rtsa ba yongs su bsngo ba gsungs pa de ltar zhes pa la sogs pa'o//de ltar byas pa zhes pa ni rnam par bkod par byas pas/ sgrub pa'i thabs su gyur pa'i yi ge 'di las byung ba'i dge ba'i rtsa ba zla ltar dag cing dkar po'i de'i/ 'gro ba'i yid ces pa ni 'gro ba thams cad kyi yid gzhan du mi gzhol zhing /sangs rgyas ye shes mgon po zhes pa ni ye shes lnga'i ngo bo dkyil 'khor gyi 'khor lo zab mo dang yang dag par gsal ba'i sems de la rtag tu bsam gyur cig ces pa ni/ dus rtag tu de bsgom zhing phyag rgya chen po la sogs dngos grub thob par gyur cig ces pa'o//de'i don ni 'di lta ste dge ba'i rtsa ba des sems can rnams dge ba'i gshegs gnyen mchog dang phrad nas de bsnyen bkur ba las byung ba'i de kho na nyid mngon du byas bsgoms pas/ sangs rgyas ye shes mgon po de la thim par gyur pas dang por lha'i 'khor lo bsgom par shog ces pa'o//zab cing rgya che 'od zer rab 'phro dpal ldan gsang 'dus kyi//rje btsun lha yi zhal snga nas kyi thugs rjes rab mdzad pa'i/ /sgrub pa'i thabs kyi bshad pa dad pas bdag gis bgyis pa las/ /sangs rgyas byang chub sems dpa' 'phags pa mkhas rnams bzod par mdzod//de ltar byas pa las byung dge ba zla 'dra de yis ni/ /skyes bu dam pa thams cad du yang snod gyur stobs kyis ni/ /sgrib pa la sogs mthu yis ma nyams dpal ldan gsang 'dus kyi/ /las kyi rdo rje 'dzin pa'i sa la myur du 'gro bar shog/ /yan lag bzhi pa'i sgrub pa'i thabs kun du bzang mo zhes bya ba'i rnam par bshad pa slob dpon chen po bi ta pA tas mdzad ba rdzogs so// //rgya gar gyi mkhan po chen po ka ma la gu h+ya dang / bod kyi lo tsA ba chen po mnga' bdag ye shes rgyal mtshan gyis bsgyur cing zhus te gtan la phab pa'o/