CLOSE WINDOW

D1869
བོད་ཡིག

@##/ /rgya gar skad du/ tsa tu ra~M` ga sA d+ha naM TI kA sA ra many+dza ra nA ma/ bod skad du/ yan lag bzhi pa'i sgrub thabs kyi rgya cher bshad pa snying po snye ma zhes bya ba/ bcom ldan 'das bdud kyi stobs rab tu 'joms pa la phyag 'tshal lo//zab yangs dam pa'i rang bzhin can/ /rnam kun gcig tu rab mdzes pa/ /mchog tu dga' ba rnam mi rtog /'jam pa'i gsung mchog la phyag 'tshal//ye shes zhabs kyis gang mdzad yin/ /de yi man ngag rjes 'brangs te/ /grags pa'i zhabs kyis bkas bskul bas/ /sgrub pa'i thabs ni bdag gis bya/ /gal te 'ga' yis bkral gyur kyang //de kun de yi man ngag gi/ /rjes su 'gro ba ma yin pas/ /de phyir bdag gis cher 'bad do/ /gang phyir bskal pa bye ba brgya/ /snyed du de la yid bsgoms kyang / /ma tshang ba dang lhag pa yi//nyes pas dngos grub thob mi 'gyur/ /de la re zhig slob dpon 'di sgrub thabs mdzad par bzhed pas mngon par 'dod pa'i lha la mchod pas bsod nams spel ba la 'jug pa ni mngon par 'dod pa la bgegs med par bzhed de/de la mchod pa sngon du 'gro ba can rtog pa dang ldan pa rnams 'jug par byed pa'i brjod par bya ba la sogs pa gsungs pa ni/ gang la dpal ldan zhes bya ba la sogs pa'o//'dir bcom ldan 'das la mchod pa ni bstod pa dang phyag 'tshal bas so/ /de la bstod pa ni yang dag pa'i yon tan brjod pa'o/ /de la yang 'od zer gyi khyad par gyi sgo nas 'jam dpal nyid la byed pa yin te/de dag dang 'brel pa'i phyir ram/ de kho nar dbye ba med pa'i phyir ro/ /de la dpal ni bsod nams dang ye shes kyi tshogs te/de gang la yod pa de dag ni dpal ldan no/ /'dis ni rang gi don phun sum tshogs pa'i rgyu brjod de/thams cad mkhyen pa'i mtshan nyid can rang gi don phun sum tshogs pa'i rgyu ni bsod nams dang ye shes yin pa'i phyir ro/ /gang dag gis ma rig pa'i mtshan nyid kyi 'khrul pa mtha' dag spangs pa de dag la de skad ces bya'o//de nyid kyis ni dri ma med cing zhes bya ba la rnam par dag pa yin te/ bag chags dang bcas pa dang nyon mongs pa la sogs pa'i sgrib pa dang bral ba zhes bya ba'i don to/ /'dis ni thams cad mkhyen pa nyid bstan pa'i phyir rang gi don phun sum tshogs pa brjod la/nyan thos la sogs pa las phul du byung bar yang brjod do/ /mtha' yas pa rigs gcig la sogs pa rnams sprul pa ni gdul bya'i skye bo rnams kyi rgyud la bskyed pa'o/ /gang la rgyan de yod pa de dag la de skad ces bya'o/ /'dis ni gzhan gyi don phun sum tshogs pa brjod de/de'i bdag pos gdul bya rnams la de'i rnam par snang ba rab tu 'grub pa'i phyir ro/ /shes rab ni ngo bo nyid med pa'i rang bzhin gyi rig ma'o/ /de'i yan lag ni rang gi snang ba'i rnam pa'o/ /de dang 'brel pa ni thabs dang lhan cig ro gcig pa nyid de/stong pa nyid dang snying rje tha mi dad pa'i sems zhes bya ba'i don to/ /des mdzes pa rnam par gsal ba dang ldan pa ni shes rab yan lag dang 'brel pas mdzes pa'o/ /'dis ni gzhan gyi don phun sum tshogs pa'i rgyu brjod de/ gzhan gyi don phun sum tshogs pa'i rgyu ni chags pa chen po'i nye bar mtshon pa can yin pa'i phyir ro//des kyang rtsa ba'i rgyud dang po'i sangs rgyas la sogs pa dag las khyad par du gyur par brjod do/ /mngon phyag 'tshal nas zhes bya ba 'dis ni lus la sogs pas rab tu 'dud pa'i mchod pa brjod do/ /de nas gang la rnam pa 'di lta bur gyur pa'i 'od zer dag ni rnam par 'tshe ba'i 'jam dpal te/mngon phyag 'tshal nas de nyid mchod pa'i phyir cho ga brjod par bya zhes 'brel to/ /cho ga 'di phul du byung ba bstan pa'i don du gsungs pa ni dpal ldan zhes bya ba la sogs pa'o/ /dpal ni 'jig rten pa dang 'jig rten las 'das pa'i phun sum tshogs pa'o//de'i 'bras bu nyid du gang la yod pa de dpal ldan yang yin la 'dus pa yang yin no/ /de'i lugs ni de'i man ngag go/ /de bzhin du rang gi khyad par brjod pa ni bshes gnyen dam pas zhes bya ba la sogs pa'o/ /bshes gnyen dam pas bskyangs pa'i zhabs te//de ltar slob dpon lnga brgya dag gis bskor ba nyid na 'dus pa'i lugs yang dag par shes par bya ba'i phyir de rig pa tshol bas de'i yul du song bar gyur pa dang / ha cang mi ring ba gang na 'dug pa de 'ong bar shes nas de'i zhabs la phyag bya ba'i phyir ye shes zhabs chas par gyur pa de'i tshe mtshan ma thob pas ni de 'dus pa'i don rtogs par dpyad cing 'ong bar yang rig nas bskyangs pa'i zhabs rang nyid de'i thad du song ste 'dus pa'i don bstan pa'i don du de la gsol ba gdab po//de nas de'i slob ma yin pas de'i dbang du bya ba dang bral ba nas des khas blangs so//de nas de la sgrub thabs bya ba'i don du gsol ba btab cing don du gnyer ba des spro bar byas shing bdag brtson pa bskyed pas brjod par bya'o zhes bya ba yin no/ /'dis ni srid par rung bas bdag nyid mi slu par ston par byed do/ /'gro kun don ni zhes bya ba la sogs pas ni cho ga khyad par du byed do//'gro ba'i don rdzogs pa'i byang chub kyi mthar thug pa 'jig rten pa dang 'jig rten las 'das pa'i phun sum tshogs pa gang yin pa de thams cad kyi gzhir gyur pa ste rgyu nyid du gyur pa'o/ /'dis ni rtog pa dang ldan pa rnams kyi 'jug pa'i yan lag dgos pa la sogs pa bstan pa yin no//'di ltar 'gro ba'i don phun sum tshogs pa ni 'dir rab tu byed pa'i brjod par bya ba'i dgos pa yin la/ de'i gzhir gyur pa'i cho ga ni brjod par bya ba yin zhing de phyin ci ma log par rtogs pa ni rab tu byed pa dang / nyan pa'i dgos pa yin pa dang / de yang rab tu byed pa 'dis bsgrub par bya ba yin pa'i phyir rab tu byed pa dang /dgos pa dag ni thabs dang thabs las byung ba'i mtshan nyid kyis 'brel pa yang don gyis brjod pa yin no/ /gal te bcom ldan 'das kyi lung las sam slob dpon gzhan gyis nye bar bstan pa las 'jam dpal gyi sgrub thabs kyi cho gshes par 'gyur ba ma yin nam/des na 'di ci zhig bya snyam du dgongs pa la/ sgrub thabs 'di'i dgos pa'i khyad par brjod pa ni dal 'byor zhes bya ba la sogs pa'o/ /dal ba bdag gi lus kyi 'byor ba ni mi khom pa brgyad dang bral ba'o/ /de yang mi khom pa brgyad ni 'di yin te/ log par lta ba dang /dmyal ba rnams su skyes pa dang / yi dags rnams su skyes pa dang / dud 'gro rnams su skyes pa dang / sangs rgyas kyi gsung mi grags par skyes pa dang / yul mtha' khob rnams su skyes pa dang / dbang po blun zhing lkugs pa dang / lha tshe rings rnams su skyes pa'o/ /mi khom pa brgyad dang bral ba'i mtshan nyid can gyi dal 'byor g.yo ba ste 'jig pa 'di dang drug pa dang bdun pa dag tha mi dad pa'i phyir na 'jig rten zhes bya ba 'jig rten gyi dam pa'i skye bo 'dus pa'i lus su yang dag par ston pa rnams dang 'grogs pa yang rnyed par shin tu dka' ba yin te/kun mkhyen rnams ni 'jig rten du//nam zhig 'byung 'gyur srid dam min/ /u dum+WA ra'i me tog ltar/ /la lar 'ga' zhig chen 'byung / /de bas kyang ni gsang sngags kyi/ /spyod tshul shin tu rnyed par dka'/ /zhes gsungs pa yin no/ /'dus pa las kyang bcom ldan 'das sems can rnams ni gsang ba'i tshig gi don gyi skal ba dang mi ldan pas na/de'i tshe de'i dus na bdag gis ma bshad do zhes rdo rje 'chang gis gsol ba dang / de nyid du de'i rjes thogs la de bzhin gshegs pa rnams kyis kyang rigs kyi bu ji ltar khyod kyis spyi'i yi ge ma shes shing ma thos pa de bzhin du de bzhin gshegs pa nged cag thams cad dang /byang chub sems dpa' thams cad kyis kyang gsang ba'i yi ge ma thob cing mngon par rdzogs par byang chub bo zhes gsungs so/ /'dis ni sngags kyi tshul rnyed par dka' ba nyid kyis de ston par byed pa rnams kyang rnyed par dka' ba nyid du bstan to/ / des na zhes bya ba'i phyir te/ dal 'byor g.yo ba'i khongs su gtogs pa'i sems can 'di thabs dang shes rab la gzhol ba ste zab pa dang rgya che ba'i bdag nyid can stong pa nyid dang snying rje la gnas par zhes bya ba'i don to/ /mchog tu zhes bya ba ni rab tu'o/ /gnyis su med par bya ba'i ched du sngar brjod pa'i cho ga zhes snga ma dang 'brel to//ji skad du gang gi phyir dal 'byor phun sum tshogs pa 'di shin tu rnyed par dka' zhing 'jig pa dang / bla ma rnams dang 'grogs pa yang rnyed par dka' ba de'i phyir gzhung rgya chen por bshad pa dang nyan pa la sogs pa la bgegs srid par dogs pa de bkag nas sems de shes rab dang thabs la mchog tu gzhol bar byas pa'i don du brjod ma thag pa'i cho ga 'di mdor bsdus nas brjod par bya'o zhes bya bar dgongs so//da ni sgrub pa po dang gnas dang bsgrub par bya ba phun sum tshogs pa rnams brjod par bya ba yin pa las/grub pa la sgrub pa po nyid gtso bo yin pa'i phyir na/dang po de'i dngos grub skal ba yod pa nyid ston te/ bsgrub par bya ba ni rnam par gnas pa yin yang rgyu sngon du 'gro ba nyid kyis phyis 'byung ba yin pa'i phyir phyis ston to/ /de'i phyir ji ltar sgrub pa po skal ba yod par gyur pa de ltar de la zhes bya ba la sogs pa'i khyad par du 'phags pa gnyis kyis brjod do//de la zhes bya ba ni gang nye bar bkod pa'o/ /sngags pa zhes bya ba ni rnal 'byor pa ste/'jam pa'i dbyangs zhes bya ba rab tu bsgrub pas zhes bya bar 'brel to/ /sdug bsngal dang sdug bsngal gyi rgyu las bsgral bar 'dod pa ni snying po'o//de'i mthu nyid las byang chub nyid du ste/ sangs rgyas nyid du yid de sems gang gis rab tu bskyed par gyur pa de la de skad ces bya'o/ /de ltar yang brtse ba dang ldan pa ni gdon mi za bar skye bo la phan par 'dod pas de'i thabs tshol ba la gzhol par 'gyur ro/ de nas snying rje mchog tu gyur pa de rnam pa thams cad mkhyen pa ma yin pas ni rnam pa thams cad du 'gro ba'i don bya bar mi nus so zhes mthong bas thams cad mkhyen pa nyid du sems skyed par byed do//de nas de'i thabs goms par byed do/ /de nas ni de mngon par rdzogs par sangs rgyas nas chos bstan pas 'gro ba la phan pa sgrub par byed do zhes bya ba ni rim pa yin no//shes rab 'byung gnas sbas pas/ pha rol sdug bsngal de bzhin du/ /sdug bsngal rgyu dang bral 'dod gang / /de brtse des na de ldan pa/ de yi thabs ni bsgrub par 'dod/ /ces gsungs so/ /de nyid kyi phyir de'i de bzhin gshegs pa nyid ni zhar la yin no zhes de dang der gsungs so//thabs de dag nyid mdor bsdus te/ sgrub pa po'i khyad par du brjod pa ni gtong sogs te/ sbyin pa'i pha rol tu phyin pa la sogs pa'o/ /de dag nyid yang dang yang du goms par byas pa na yon tan te/ sgrub pa po gang la rgyan de dag yod pa de la de skad ces bya'o/ /zab mo'i tshul ni bdag med pa'i rang bzhin sngags kyi tshul lo//de la lhag par mos pa ni 'di kho na nyid yin no zhes nges pa dang ldan zhing 'dod pa dang ldan pa'o/ /gtong ba la sogs pa'i yon tan gyi rgyan dang ldan pa yang yin la zab mo'i tshul la lhag par mos pa yang yin zhes bsdu ba'o/ / dpal ldan 'dus pa'i man ngag gi dkyil 'khor gyi cho ga gang yin pa des legs par dbang bskur ba gang yin pa ste/ mdzes par dbang bskur ba'o/ /mdzes pa yang bla ma dam pa dang phrad pa'i phyir ro/ /de dag gi phun sum tshogs pa dang ldan pa ni bcas pa'o/ /tshul bzhin du zhes bya ba ni chu dang cod pan la sogs pa'i rim pas bla ma las rjes gnang thob par gyur pa ste/gang gi rjes su gnang ba thams cad thob pa de ni tshul bzhin rjes su gnang ba thob pa yin no/ /rang sngags ni rang gang gi 'dod lha'o/ /de mnyes pa ni bsnyen pa la sogs pa thabs kyis rab tu bsgrub po/ / de la blo ldan ni yan lag bzhi la sogs pa bsgom pa'i rim pa byas pa ste/ bcom ldan 'das kyis/ /yan lag ma nyams gsang sngags brjod/ /ces gsungs pa yin no/ /yang na rang sngags ni rang gi 'dod pa'i lha'i sngags so/ /de mnyes pa ni bsgom pa la sogs pa'i rim pa'o//der blo ldan ni bsam du med pa nyid kyi rang bzhin gyis mi phyed pa'i blo dang ldan pa zhes bya ba'i don to/ /'dir gtong ba la sogs pa ni ma 'brel pa rnam par gcod pa nyid kyi khyad par yin pa'i phyir gsang ba shes pa nyid dang / rnal 'byor gyi de kho na shes pa nyid la sogs pa yang sgrub pa po'i khyad par du brtag par bya ste/de ltar ma yin na don thams cad la skal ba yod pa nyid du mi 'thad pa'i phyir ro/ /de skad du yang bzang po'i zhal snga nas/gang phyir sngar bshad yon tan mchog /de dag med na gtong rten sogs/ /ldan te sems can don la ni/ /skal med pas na de yod 'gyur//zhes gang gsungs pa yin no/ /gnas yid du 'ong bar sems bde ba la ting nge 'dzin 'byung ngo / /sems mnyam par gzhag pa ni yang dag pa ji lta ba bzhin du shes par 'gyur ro/ /yang dag pa ji lta ba bzhin du shes pa ni rnam par grol bar 'gyur ro snyam du yid la bzhag nas yid dga' ba'i yul phyogs nye bar mtshon pa'i don du gnas kyi khyad par gsungs pa ni chu gtsang zhes bya ba la sogs pa'o//chu gtsang ma phun sum tshogs pa dang / shing mchog rnams kyi phreng ba de gnyis kyis mdzes par byas pa ni snga par byas pa'o/ / sa 'dzin te ri go skabs zhes bya ba phyogs kyi cha gang yin pa de la de skad ces bya ste der ro/ /'ga' zhig tu zhes bya ba ni khyad par ma bstan pa'o/ /bcom ldan zhes bya ba la/ nyon mongs pa'i sgra la sogs pa 'joms pa'i phyir na 'joms pa la b+ha ga zhes brjod do/ /nyon mongs shes rab kyis gzhom pa//des na shes rab 'joms par brjod/ /ces gsungs pa'i phyir na nyon mongs pa dang / phung po dang / 'che ba dang / lha'i bu'i bdud rnams 'joms par byed pa rnam par dag pa'i shes rab kyi rang bzhin gyis 'joms pa dang ldan pa'o/ /yang na/ dbang phyug phun sum tshogs pa dang //gzugs dang grags dang dpal dang ni/ /ye shes dang ni brtson 'grus don/ /drug po la ni skal zhes brjod/ /ces gsungs pa'i phyir ro/ /dbang phyug dang gzugs dang grags pa dang / dpal dang / ye shes dang / rtsol ba'i mtshan nyid can gyi don chen po ni b+ha ga yin te de gang la yod pa'o//'jam pa ni bde ba ste nye bar gdung ba thams cad sel pa'i phyir ro/ /dbyangs ni gsungs te de gang la de nyid du grags pa yod pa'o/ /'di ltar zhes bya ba ni/ 'chad par 'gyur ba'i rim pas so/ /rab tu bsgrub ces bya ba ni khyad par du 'phags pas thun bzhir bsgom par bya'o zhes bya ba'i don to//'di ni 'jam pa'i rdo rje rnal 'byor pa'i dbang du byas nas de'i sgrub pa brjod pa yin te/ lha gzhan gyi rnal 'byor pas ni rang gi lha bsgrub par 'dod pa yin no zhes shes par bya ste/ 'khor lo de ni gang zhig de nyid kyi/ /dbus su gnas pa de'i yin par 'gyur ro zhes 'chad par 'gyur ro//de ni ting nge 'dzin gsum gyi bdag nyid can gyi sgom pa de nyid brjod pa ni nang par zhes bya ba la sogs pa'o/ /nang par ni tho rangs kyi thun mtshams te/ 'di ni rnal 'byor pa brel ba'i khyad par yin te/ sgom pa tsam gyi bya ba dang ldan pa'i sgrub pa pos thun mtshams gzhan dag tu yang thams cad bsgom par bya ba yin no//de la ni de'i tshe phal cher sems brel ba med pa'i phyir nang par zhes bya'o/ /thog mar zhes bya ba ni bsgom pa rtsom pa na'o/ /snying ga ni rang gi snying ga'o/ /zla dbus zhes bya ba ni zla ba'i dkyil 'khor gyi dkyil du'o//zla ba'i dbus su yi ge maM bkod nas sgo la sogs pa yongs su dag par bya'o zhes 'brel te/ yi ge maM gang la dri med 'od zer rnam par 'phro ba yod pa'o/ /de nyid ni de nyid ces grags pa yin te/ phyin ci ma log pa'i rang bzhin gyi ming dang ldan pa yin no/ /dri med 'od zer rnam par 'phro ba'i maM//de nyid ces grags zhes bya ba ni gur kum lta bur dmar ser gyi rnam pa can no/ /snying rje'i mthu las zhes bshad zin yang brtser ldan gyis zhes yang brjod pa ni brtse ba nyid kyang 'jug pa la gtso bo yin par bstan pa'i don du'o/ /sgo ni rnam par thar pa'i sgo gsum ste/stong pa nyid dang mtshan ma med pa dang smon pa med pa'i mtshan nyid can no/ /de la sogs pa ni lus dran pa nye bar gzhag pa la sogs pa rnams so/ /de dag bsgoms pas rnal 'byor pa rang gi rgyud yongs su dag pa ngo bo nyid med par gyur pa nyid du bya'o/ / des ni 'dir sa bon bkod pa'i de ma thag tu rnam par dag pa brjod pa yin no/ /bzang po zhabs kyis ni snga ma dang phyi ma'i ngo bo 'gal ba med par nges par bzung nas rnam par thar pa'i sgo gsum rnam par dag pas na/snying ga'i zla bar 'od zer 'phro ba'i maM/ /zhes bya ba 'dis sa bon bkod pa las rnam par dag pa sngar gsungs te/rtag tu nye bar mkho bar bstan pa'i don du'o/ /de nas bla ma dang sangs rgyas la sogs pa'i spyan sngar mchod pa sngon du 'gro bas sdig pa bshags pa la sogs pa bya'o zhes gsungs pa ni/ cha mchog ces bya ba la sogs pas gsungs so//cha mchog ni cha dam pa'o/ /tsan+dan la sogs pa byugs shing bsgos pas me tog dri zhim pos mngon par bkram pa nyid mchog tu gyur pa gang yin pa'i bsam gtan gyi khang pa der gnas te'o/ /'di ni bsgom pa dang rjes su mthun pa'i tshogs pa gzhan nye bar mtshon par blta bar bya'o//de ltar gnas pa'i blo ldan bshags par bya ba dang bshags par byed pa la sogs pa tha mi dad pa'i sems dang ldan pa des dus gsum bzhugs pa'i zhes bya ba ni 'das pa dang ma byon pa dang da ltar gyi dus na bzhugs pa'i sangs rgyas rnams so/ /gal te 'das pa dang da ltar ba rnams kyi spyan sngar sdig pa bshags par bya ba la sogs pa yin yang ma 'ongs pa rnams kyi spyan sngar ni mi 'thad de de dag ni med pa'i phyir ro zhe na/ma yin te/ sangs rgyas kyi bdag nyid can gyi dkyil 'khor gyi 'khor lo mtha' dag gi bdag nyid du gyur pa'i ye shes la dbang ba yongs su rdzogs pa rnams nyid sangs rgyas kyi yon tan phun sum tshogs pa nyid kyis 'dir ma 'ongs par brjod pa'i phyir ro//dmigs nas zhes bya ba ni yid la bsams nas so/ /mchod pa'i sprin sna tshogs pa ni yi ge maM gyi 'od zer rnams kyis sprul pa ste/ nye bar spyad pa lnga dang rin po che sna bdun dang / gar dang glu la sogs pa'i phyi rol pa dang / gzugs rdo rje ma la sogs pa gsang ba'o/ /de dag gi sprin ni tshogs so/ /de spro ba ni nam mkha'i dbyings khyab par byed pa'o/ /de la sogs pa gang yin pa ste bstod pa la sogs pa'o/ / de sngon du 'gro ba gang yin pa de la de skad ces bya'o/ /'di ni bya ba 'am las kyi khyad par yin no/ /sdig pa bshags pa la sogs pa gang yin pa bsod nams la rjes su yi rang ba la sogs pa de ni sdig pa bshags pa la sogs pa dag go/ /'di ltar zhes bya ba ni 'chad par 'gyur ba'i tshul du bya'o//bya zhes bya ba ni sgrub pa'o/ /ci'i don du byed ce na brjod pa dge ba mngon par 'phel ba'i don du ste/ bsod nams 'phel ba'i ched du'o/ /'di ltar sdig pa bshags pa la sogs pas ni mtshams med pa lnga'i las zad par byed pa yin te/ /sdig pa shin tu mi bzad byas pa ni/ / bdag la rnam par smod pas srab 'gyur te/ /rab tu bshags dang sdom par byed pas ni/ /de dag rtsad nas 'byin par ngas bshad do/ /zhes gsungs pa yin no/ /de las nyes pa thams cad bral ba ni bsod nams la rjes su yi rang ba la sogs pas bsod nams 'phel bar 'gyur te/ dper na legs par 'dus byas pa'i zhing la sa bon btab na skye ba dang / legs par bkrus pa'i gos la gur kum la sogs pa'i tshon len la shin tu gsal bar 'chags so/ /de bzhin du sdig pa med pas bsod nams bsgrubs na bgegs med pa kho nar 'grub par 'gyur ro/ /de nyid kyi phyir dang po sdig pa bshags pa gsungs pa ni/thog med ces bya ba la sogs pa'o/ /thog ma dang tha ma med pa'i srid pa'i chu bo ste/ 'khor ba'i rgyun du bdag dang bdag gi ba la sogs pa'i rnam par 'jug pa'i kun du rtog pa kun gyi nyes pa ste/ sdig pa gang zhig bsags shing bsgrubs pa de dag thams cad brtse ba chen po can sangs rgyas rnams kyi spyan sngar zhes bya ba mdun du bshags par bgyi'o//tshul bzhin du zhes bya ba ni ngan song la 'jigs pas bla ma dang mchod par 'os pa la sogs pa rnams kyi rkang pa la spyi bos skyabs su song zhing me tog lag pa'i snyim pas yongs su bzung ba'o//gzhan dag ni tshul bzhin du sgra'i don ni mchod pa la sogs pa sngon du 'gro ba can yin no zhes rnam pa gzhan du bshad pa ni mi rigs te/ mchod pa'i sprin sna tshogs spro ba la sogs sngon 'gro bas zhes dngos su brjod pa'i phyir ro zhes bya ba ni gzhan gyi'o//sogs pa'i sgras bsdus pa'i don rnams las re zhig bsod nams la rjes su yi rang ba brjod pa ni rdzogs sangs rgyas zhes bya ba la sogs pa'o/ /rdzogs sangs rgyas ni rnam par snang mdzad la sogs pa'i de bzhin gshegs pa rnams so/ /byang chub sems dpa' ni sa'i snying po la sogs pa'o//'phags pa ni 'phags pa bdud rtsi 'khyil pa la sogs pa rnams so/ /de dag ni rgyud las sangs rgyas kyi sgra dang byang chub sems dpa'i sgras ma bstan pa'i phyir dang / 'phags pa'i sgras ni bstan pa'i phyir te/ dpa' bo 'phags pa bdud rtsi 'khyil pa zhes gsungs pa yin no//gzhan ni rgyud gzhan gyi he ru ka la sogs pa ste/ de dag ni rnam pa gsum kar yang tha snyad du byas pa'i phyir ro/ /'dir sangs rgyas la sogs pa'i dbye ba dang dngos po ni ma yin te/ de dag ni rdo rje 'chang gi rang bzhin yin pa'i phyir ro/ /bcom ldan 'das kyis kyang bcom ldan 'das de nyid ni shar gyi zla gam la bzhugs par gyur pa yin no zhes bya ba la sogs pa gsungs pa yin no//tha snyad tsam du tha dad pa yin te/ de la tha snyad mtha' dag 'grub pa'i phyir ro/ /gzhan dag ni rdzogs sangs rgyas ni yang dag par rdzogs pa'i byang chub thob pa'o//byang chub sems dpa' ni rab tu dga' ba la sogs pa'i sa la zhugs pa ste/ yang dag par rdzogs pa'i byang chub don du gnyer ba'o/ /'phags pa ni rgyun du zhugs pa la sogs pa ste/ nyan thos dang rang sangs rgyas rnams so/ /gzhan ni sangs rgyas la mngon par dad pa ste/dge ba'i las byed pa rnams te de dag gi dge ba'i rtsa ba gang byas pa lam mo/ /yang dag yongs su bsngo ba zhes bya ba la/ dad pa mchog gi rjes su yi rangs nas so/ /de'i lhag ces bya ba ni rjes su yi rang ba las bskyed pa'i dge ba ste/ rjes su yi rang ba dang mtshungs par ldan pa'am zhes bya ba'i don to//lhag pa'i bsam pa phun sum tshogs pa'i dge ba'i rtsa ba la yang dag par rjes su yi rang bas ni bsod nams 'phel bar 'gyur te/ dge ba dang sdig pa dag la ni sems gtso bo yin pa'i phyir ro/ /des ni rjes su yi rang ba dang ldan pa'i dge ba rnams yang dag par rdzogs pa'i byang chub tu yongs su bsngo ste/rdzogs pa'i byang chub kyi rgyu mtshan du bya'o zhes bya ba'i don 'di yin no/ /dkon mchog gsum la skyabs su song bas ni bsod nams kyi tshogs bsags pa rnams gzhan thams cad kyis 'phrog par mi nus par 'gyur te/des na dang po sangs rgyas la skyabs su 'gro ba gsungs pa ni/ yid kyi mdzes pa zhes bya ba la sogs pa'o/ /yid kyi mdzes pa zhes bya ba las ni nyes pa thams cad dang bral ba'i sems rin po che brjod pa yin no/ /de nyid 'gro ba'i mi shes pa'i rab rib sel ba nyid kyis zla ba dang 'dra ba'i phyir dri med zla ba ste/shin tu rnam par dag pa'i rang bzhin gyi shes rab ces bya ba'i don to/ /de dang yang dag par 'brel bas rab tu bsgrubs pa ste/ sgro btags pa bkag nas don dam pa'i rang bzhin snang bar yongs su grub par byas pa mtha' yas pa ste sems can thams cad la khyab cing dmigs pa med pa'i brtse ba dam pa gang yin pa'o//de nyid ni rang dang gzhan gyi don gyi rgyu yin pas na thabs yin te/ de gang la yod pa'i bde bar gshegs pa de dag la de skad ces bya'o/ /thabs dang shes rab kyi rang bzhin can zhes bya ba'i don to//de dag la skyabs su mchi'o zhes 'brel to/ /yang de nyid khyad par du byed pas brjod pa ni rang yid la ni gnas pa'i zhes pa'o/ /stong pa nyid du ro gcig pas na rang gi sems las tha mi dad pa'i rang bzhin la zhes bya ba'i don to/ /rtag tu zhes bya ba ni dus mu mtha' med pa ji srid par ro//chos la skyabs su 'gro ba gsungs pa ni rtog pa kun las zhes bya ba la sogs pa'o/ /gang gis gzung ba dang 'dzin pa la sogs pa'i mtshan nyid can gyi rtog pa kun las nges par rnam par grol zhing spangs pa'i chos la skyabs rab mchi zhes 'brel te/ ci 'dra ba zhig na zhe na/ sems can zhes bya ba la sogs pa gsungs te/sems can dam pa ni byang chub sems dpa' rnams so/ /de dag gi 'byor ba rdzogs pa'i byang chub mthar thug pa'i de dag ma lus pa'i gzhir gyur pa ste/ gang gi phyir chos kyi de kho na nyid ji lta ba bzhin bsgoms pas byang chub sems dpa' rnams kyis phun sum tshogs pa thams cad thob pa yin no//dngos po kun ro gcig pa'i rang bzhin zhes bya ba ni spyir rtogs pa tsam du tha mi dad pas na dngos po thams cad mnyam pa nyid kyi rang bzhin la'o/ /dge 'dun la skyabs su 'gro ba gsungs pa ni 'ching ba zhes bya ba la sogs pa'o//gang gis yang dag pa'i don rtogs pa 'dod chags dang zhe sdang dang gti mug ces bya ba'i 'ching ba spangs par gyur ba dang / snying rje mchog gis bsgrubs pa ste gtad pa'i dpal 'byor rang dang gzhan gyi don phun sum tshogs pa dang ldan pa dang / gang zhig rab tu dga' ba la sogs pa ste/rab tu dga' ba la sogs pa legs pa'i blo gros kyi mthar thug pa'i sa dgu po rnams su bzhugs pa ste/gang gi phyir byang chub sems dpa'i sa bcu pa ni sangs rgyas kho na yin gyi yang dag par rdzogs pa'i sangs rgyas ni ma yin pas so/ /sdom brtson dbang po'i tshogs la zhes bya ba la/sdom brtson ni nyan thos la sogs pa la'o/ /de dag gi dbang po ni byang chub sems dpa' rnams te/ de dag gi tshogs la bdag skyabs su mchi'o zhes 'brel to/ /yang de kho na nyid du sangs rgyas la sogs pa rnams tha mi dad kyang 'dir sangs rgyas la sogs pa la tha dad par skyabs su 'gro ba brjod pa gang yin pa ni sems can rnams kyi bsam pa'i dbang tsam gyis yin no//de skad du yang / du ma'i snod kyi chu zlar zla ba yi/ /gzugs bzhin sems can mos pa sna tshogs kyi/ /bsam pa tha dad pa yi dbang gis na//gcig kyang dbye ba rnam pa du mar 'gyur/ /zhes gsungs so/ /sngar bskyed zin pa'i byang chub kyi sems nyid brtan par bya ba'i don du smon pa byang chub kyi sems gsungs pa ni/ /bsam pa dang ni zhes bya ba la sogs pa'o/ /bsam pa rnam par dag pa ni sems can thams cad gnod pa'i bsam pa'o//rnam smin rnam par dag pa ni phyi ma la las dang 'bras bu dri ma med pa dang rjes su 'brel ba'o/ /bsam pa dang rnam smin dag pa des sems ni byang chub mchog sangs rgyas nyid du bskyed par bgyi zhes 'brel to/ /nyon mongs pa'i sgrib pa la sogs pa'i mtshan nyid can gyi sgrib pa'i bag chags thams cad ni sgrib pa kun gyi bag chags te/nyon mongs pa la sogs pa'i rnam pa skyed par byed pa'i nus pa gang yin pa de la de skad ces bya'o/ /de yang dag par 'joms pa'i ngang tshul gang la yod pa de ni sgrib pa kun gyi bag chags 'joms par byed pa'i sems so//lhag par mos pa ni de kho na nyid nges par de la mngon par 'dod pa'i rgyan de nyid gang la yod pa de la de skad ces bya ste/ de lta bur gyur pa'i sems bskyed par bya'o/ /'dod rgyal ba dang the tshom gyis nyams pa ni ma yin gyi 'on kyang lhag par mos pa kho nas brgyan pa'i sems bskyed par bya'o zhes bya ba'i don to//gang gis smon pa 'di 'grub par 'gyur ba'i lam de gsungs pa ni/ sbyin sogs zhes bya ba la sogs pa'o/ /sbyin sogs rnam bcu ni ye shes kyi pha rol tu phyin pa'i mthar thug pa rnams so/ /de dag nyid dmigs pa'i dri ma dang bral ba nyid kyis dkar po'i yon tan yin no//de'i rang bzhin te de'i ngo bo nyid gang la yod pa de la de skad ces bya'o/ /bde gshegs sras bcas ni byang chub sems dpa'i sras dang ldan pa'i bde bar gshegs pa gang dag yin pa de dag gi lam gcig pa ste thun mong ma yin pa gang yin pa de la yang dag par brten par bgyi zhes bya ba'i don to//rdzogs sangs rgyas ni rdo rje 'chang ste bsam gyis mi khyab pa'i bdag nyid do/ /de nyid kyi bdag nyid can thams cad kyi bdag nyid 'byung ba las gyur pa'i rang bzhin 'jig rten gsum gyi rnam par dag pa'i rang bzhin can/ dkyil 'khor dang bcas pa'i dkyil 'khor gyi bdag po'i lha'i 'khor lo gang la yod pa'i ngo bo kun rtogs pa ste/dkyil 'khor gyi 'khor lo de nyid lam gyi bden pa yin no zhes nges pas lam la brten par bgyi'o zhes bya ba'i don to/ /lam la brten pa'i sems 'di ni de kho nar smon pa byang chub sems kyi rang bzhin nyid yin pa'i phyir na smon pa dang 'jug pa'i sems tha dad par brjod pa dag gi bar du lam gyi sems brtan pas slob dpon gyis nang du 'du bar shes par byas pa yin no//de lta mod kyi 'di'i dgongs pa ni lam gyi sems gdon mi za bar logs su bstan par bya bar mngon par bzhed pa yin te/ 'di ltar dgongs pa 'di nyid gsal ba'i don du bzang po'i zhal snga nas kyi lam la brten pa brjod nas byang chub kyi sems spyir brjod par mdzad do/ /smon pa byas shing lam la brten pa'i rnal 'byor pa ni sngags kyi dngos grub la 'jug par 'gyur te/ des na ye shes kyi tshogs kyi don du 'jug par byang chub kyi sems gsungs pa ni lta ba'i zhes bya ba la sogs pa'o//lta ba'i dra bas yongs su bcings pa'i zhes bya ba la/ 'jig tshogs la lta ba la sogs pa de dag nyid ni dran pa yin te de dang chos mthun pa'i phyir ro/ /des yongs su bcings pa ni 'gro ba rnams 'khrul pa tsam gyis bsdams pa yin no zhes bya ba'i don to//brtse ba zhes bya ba ni thams cad du brtse ba kho na gtso bo yin no zhes shes par bya ba'i phyir ni brjod zin pa yin pa yang 'jug pa la yang brtse ba brjod pa yin no/ /des 'jig rten la rnam par bltas nas so/ /rdzogs pa'i byang chub sems ni zhes bya ba ni rdzogs pa'i byang chub kyi rang bzhin du zhugs pa'i byang chub kyi sems te chos bdag med par shes pa zhes bya ba'i don to//mnyam pa med pa zhes bya ba ni nyan thos la sogs pa dang thun mong ma yin pa'i phyir ro/ /'di ltar zhes bya ba ni ngo bo bral phyir stong pa zhes bya ba la sogs pa 'chad par 'gyur ba'i cho gas bsgoms nas so//sngags ldan 'gyur zhes bya ba ni oM shUn+ya tA zhes bya ba la sogs pa'i sngags brjod pa dang bcas par 'gyur ba'o/ /yang na de rjes ston ka'i zla ba ltar dkar zhing zhes bya ba la sogs pa 'chad par 'gyur ba'i tshul gyi sngags kyis lha ma nyes par bya'o zhes bya ba'i don to//de la da ni 'jug pa byang chub kyi sems bsgom pa'i cho ga brjod pa/ ngo bo bral phyir zhes bya ba la sogs pa'o/ /gzung ba dang 'dzin pa dang gcig dang du ma la sogs pa'i ngo bo dang bral ba'i phyir dngos po ma lus pa stong pa nyid yin no//de bzhin du dpyad cing zin pa'i rgyu dang mi ldan pa'i phyir na mtshan ma med pa yin no/ /tha snyad pa'i rgyu ni ma bkag go zhes pa'i sgras bstan to/ /dpyad pa ni lha dang mi la sogs pa'i 'gro ba dang bde ba la sogs pa la rnam par rtog pa ste/ de dang bral ba'i phyir na ma lus pa'i dngos po rnams smon pa las ni nges par grol te/khyad par gyi 'gro ba dang longs spyod phun sum tshogs pa la sogs pa mngon par 'dod pa'i rnam pa ni smon pa yin te/ de las nges par grol zhes bya ba'i don to/ /rnam par thar pa'i sgo rnam pa 'di gsum ka yang tshig gi don thams cad stong pa nyid kho nas 'grub bo//dngos po'i rigs thams cad ni gzung ba dang 'dzin pa dang bral ba yin te/ 'di nyid du gzugs sogs rnam pa las grol zhes bya ba la sogs pa bshad par gyur pa yin no/ /gcig min zhes bya ba la sogs pas thams cad gcig dang du ma'i rang bzhin dang bral ba yin no zhes bya ba 'di nyid du ston par 'gyur ro//rnam 'grel mdzad pas kyang / /gang gis dngos po rnams dpyad pas/ /de nyid du na de dngos med/ /gang gi phyir na de dag la/ /gcig dang du ma'i rang bzhin med//ces gsungs so/ /de'i phyir na ngo bo nyid med pa'i phyir stong pa yin no/ /de nyid kyi phyir rgyu dang rkyen dag dang mi ldan pas gdod ma nas ma skyes pa'i phyir mtshan ma med do/ /ji skad du rkyen brtags pa las/ /yod dam med pa'i don la yang / /rkyen ni 'thad pa ma yin te//yod na gang gi rkyen du 'gyur/ /med na rkyen gyis ci byar yod/ /ces gsungs so/ /slob dpon chos kyi grags pas kyang /grub phyir gzhan rag ma las pa'i/ /'bras bu 'ang gang gi rgyu dag dang / /rtog pa yis ni 'brel par byed/ /ces gsungs so/ /de bzhin du 'brel pa ni gzhan la ltos pa yin no//de med ji ltar ltos/ /yod pa cha med pa'i dngos po yang ji ltar ltos zhes bya ba la sogs pa'o/ /de nyid kyi phyir smon pa med de/ ngo bo nyid med pa la ni rgyu 'bras kyi dngos po dang bcas pa'i smon pa 'thad pa ma yin no/ /'di ltar med pa la ni mo gsham gyi bu bzhin du rgyu mi 'thad la/yod pa la yang don med de/ rgyus stong pa'i yod pa'ang 'thad pa ma yin no/ /des na dngos po'i rigs thams cad ni sgyu ma lta bur thog ma dang tha ma med pa ma brtags na nyams dga' bar snang ba tsam du zad do zhes gnas so/ /'thad pa 'di yang skabs ji lta ba bzhin du bstan par bya'o//dngos po'i de kho na nyid thams cad la dmigs pa'i 'jug pa byang chub kyi sems 'di brtan par bya ba'i don du byin gyis brlab pa'i sngags gsungs pa ni oM zhes bya ba la sogs pa'o/ /bsam gyis mi khyab pa'i rnam pa can gyi lha la sogs pa'i rnam pa khas len pa la yi ge oM la shU n+ya tA ni chos thams cad bdag med pa'i rang bzhin gyi ye shes so//de nyid mi phyed pa'i phyir rdo rje ste/ da ni de'i bdag nyid can yin no zhes bya'o/ /bcom ldan 'das kyis gzugs las stong pa nyid gzhan ma yin/ stong pa nyid las kyang gzugs gzhan ma yin zhes gsungs pa yin no//da ni lha bsgrub pa'i cho ga bshad pa ni de rjes ston ka'i zhes bya ba la sogs pa'o/ /de rjes te byin gyis brlab pa'i sngags kyi de ma thag tu chos 'byung zhes bya ba'i phyag rgya bsgom par bya zhes 'brel to/ /ston ka'i zla ba ltar dkar zhing zhes bya ba ni mtha' dag dag par byed pa'i mdog dkar ba'o//sna tshogs 'od kyis phyogs 'khor kun khyab pa/ /zhes bya ba la/ mtha' yas pa'ang de nyid yin phyogs kyang yin pas na mtha' yas phyogs so/ /phyogs de dag gi 'khor ni tshogs te/ de la khyab pa ni der 'phro ba'o//'od der snang ba sna tshogs pa ste/ rnam pa du ma'i rang bzhin gang la yod pa de la de skad ces bya'o/ /spyi'u tshugs su gnas zhes bya ba ni maM 'gyel ba'i rang bzhin can zhes bya ba'i don to/ /gru gsum zhes bya ba ni 'dir man ngag gis gru gnyis steng du yin par shes par bya'o//nang gi ni khong ba'o/ /de nam mkha'i rang bzhin yang yin la de bzhin gshegs pa rnams 'dzin par byed pas na rdo rje 'dzin yang yin pas na nam mkha'i rang bzhin can rdo rje 'dzin no/ /gang yang nang gi cha nam mkha'i rang bzhin can ni stong pa nyid kyi rang bzhin gyi rdo rje yin la de 'dzin par byed pas na rdo rje 'dzin yin no zhes bshad pa de ni yid 'phrog par byed pa ma yin no//'di ltar stong pa nyid ces bya ba ni ci dngos po bkag pa tsam yin nam/ 'on te sgyu ma lta bu'i dngos po yin/ /de la phyogs dang po ltar na/ nang nam mkha'i rang bzhin can nyid kyis dbus stong pa nyid du bstan pa'i phyir rdo rje 'dzin zhes bya ba don med do/ /'on te rdo rje la byed na ni de'i tshe nam mkha'i rang bzhin can gyi sgra bzung ba don med do/ /des na nang nam mkha'i rang bzhin can nam mkha'i rdo rje 'dzin zhes brjod pas sbyar bar 'gyur te/dbus stong pa nyid du gang rung cig gis ston pa'i phyir ro/ /de'i phyogs phyi ma yin na snga mas phyi ma dag brjod pa yin te/ snga mas ni nang gi bu ga dang / phyi mas ni sgyu ma lta bu'i dngos po bstan pa'i phyir ro/ /stobs la sogs pa chos rnams gang du 'byung zhing skye ba de la de skad ces bya ste/de skad ces grags pa'i phyag rgya'i dbus gnas pa'i mtsho skyes sna tshogs rdo rjes phyug gyur zhes bya ba ni dbus su gnas pa'i pad+ma 'dab ma sna tshogs pa la gnas pa'i sna tshogs rdo rjes phyug par gyur pa ste/ phun sum tshogs par gyur pa'o/ / don ni 'di yin te chos 'byung skye ba dang dus mtshungs pa kho nar paM ser po las skyes pa'i sna tshogs pad+ma'i steng du khaM ljang gu las byung ba'i sna tshogs rdo rje bsam par bya'o zhes bya ba yin no/ /kun du bzang po las byung zhes pa ni 'chad par 'gyur ba'i dkar po'i rnam pa'i rdo rje sems dpa' yongs su gyur pa'i chos 'byung ngo //gang du bsgom zhe na/brjod pa hUM gis zhes bya ba la sogs pa'o/ /nyi ma la gnas pa'i yi ge hUM gis zhes bya ba la sogs te/ nyi ma la gnas pa'i yi ge hUM las skyes pa'i rdo rje 'bar bas spros pa'i rdo rje'i rang bzhin gyis gzhi la'o/ / 'di ni bdud zad par byed pa'i bsrung ba'i 'khor lo nye bar mtshon pa'i don yin par shes par bya'o/ /de la bsrung ba'i 'khor lo bsgom pa'i rim pa ni 'di yin te/ oM shU n+ya tA zhes bya ba la sogs pa'i byin gyis brlab pa'i sngags kyi de ma thag tu bar snang gi zla ba la yi ge ho gnyis dang spel ba sku gsung thugs kyi rang bzhin can oM AHhUM zhes bya ba'i yi ge gsum gyi gzugs can du bdag nyid rnam par bsgoms nas/mdun du bgegs kyi tshogs tshar gcad pa'i don du nyi ma la gnas pa'i yi ge hUM sngon po yongs su gyur pa las rdo rje sa bon de dang ldan pa'o/ / oM hUM phyogs bcings shing mtshams bcings te rdo rje ra ba dang rdo rje dra ba dang / rdo rje'i rang bzhin gyi sa gzhi bsgoms nas de'i nang du bgegs med par snang bas lte ba'i rdo rje 'chang yongs su gyur pa las bshad zin pa'i mtshan nyid can gyi chos 'byung gi phyag rgya bsgom par bya'o zhes bya ba yin no/ / 'di yang sems rgya chung ba la brjod pa yin la/ sems rgya chen po'i bsrung ba'i 'khor lo ni 'di nyid kyis bstan par 'gyur te/ hUM yig ces bya ba la sogs pas bzang po'i zhal snga nas gsal bar mdzad pa yin no/ /gzhan dag gi bsrung ba'i 'khor lo gzhan brjod pa gang yin pa de ni ye shes zhabs kyi rjes su 'brangs pa dang mkhas pa rnams kyis gus par byas pa ma yin pa'i phyir ma bstan to//da ni khang pa brtsegs ma bstan pa'i don du gsungs pa ni/ der ni zhes bya ba la sogs pa ste/ chos 'byung gi nang na gnas pa sna tshogs pad+ma'i rdo rje der ni ji skad bshad pa'i khyad par gyis khyad par du byas pa'i khang pa brtsegs ma bsgom par bya zhes 'brel to//b+hUM yig dang des bskyed pa'i 'khor lo ste/ de las skyes shing byung ba'i rnam snang rig bcas ni rang snang ba'i shes rab dang ldan pa'i rnam par snang mdzad b+hUM yig dang bcas pa'i 'khor lo las byung ba'i rnam par snang mdzad rig ma dang bcas pa de'i yan lag ste de las skyes shing rdzogs pa'o//sna tshogs 'od kyis phyogs kyi 'khor lo kun/ /khyab byed thub dbang 'bar ba'i dkyil 'khor can/ /zhes pa la/ thub dbang 'bar ba ni rnam par snang mdzad la sogs pa rnams kyi dkyil 'khor gyi tshogs so//de'i sna tshogs kyi ste mdog rnam pa du ma dang ldan pa'i 'od de/ 'od zer gang yin pa de dag gis phyogs 'khor te/phyogs kyi tshogs khyab par byed pa dang ldan pa gang yin pa de ni thub dbang 'bar ba'i dkyil 'khor sna tshogs kyis phyogs 'khor thams cad khyab byed can yin no//mi mnyam med phyir zhes bya ba la sogs pa la/ sangs rgyas dang ma rgyas pa'i chos nyid du mnyam pa'i phyir zur bzhi pa'o/ /bzang po zhabs kyis kyang / sangs rgyas ma rgyas mnyam pas na/ /mi mnyam med phyir gru bzhi pa//zhes gsungs so/ /dran dbang sgo bzhi rnams kyi mchog gyur pa/ /zhes bya ba la/ dran pa ni lus la sogs pa'i dran pa nye bar gzhag pa'o/ /'dis ni yang dag pa'i spong ba bzhi dang / rdzu 'phrul gyi rkang pa bzhi yang nye bar mtshon par lta'o/ /dbang po ni dad pa la sogs pa'o//dran pa la sogs pa'i yul can gyi dbang po ni dran pa'i dbang po yin no/ /de dag nyid rnam par dag par gyur pa ni sgo bzhi po rnams te/ /de rnams kyi mchog tu gyur pa zhes bya bar rab tu gyur pa'o/ /don ni 'di yin te/ lus dang tshor ba dang sems dang chos rnams gcig la sogs par mi 'thad pa'i phyir ro//dran pa nye bar gzhag pa zhes bya ba'i dran pa gang yin pa thos pa dang bsams pa dang / bsgoms pa las byung ba'i shes rab kyi rang bzhin gyis rnam pa gsum du gyur pa de dag gi yang chos la 'jug pa'i rgyu yin pa nyid kyi sngon du 'gro ba yin pa'i phyir na dad pa tsam yin pa'i phyir/der dad pa gang yin pa de'i rnam par dag pas ni shar gyi sgo'o/ /bzang po'i zhabs kyis kyang / lus tshor sems dang chos rnams ni/ /gcig dang du sogs mi 'thad phyir/ /de dran der dang gang yin pa/ /shar sgo sogs pa'i don du 'dod//ces gsungs so/ /kha cig na re lus dang tshor ba dang sems dang chos kyi rang gi mtshan nyid ni 'byung ba dang 'byung ba las gyur pa yin no zhes zer ba gang yin pa de ni mi 'thad do/ /mtshan nyid 'di ni tshor ba dang sems la yod pa ma yin te/ 'di ltar tshor ba dang sems ni sa la sogs pa 'byung ba'i rang bzhin yang ma yin la/gzugs la sogs pa 'byung ba las gyur pa'i rang bzhin yang ma yin no/ /de ste 'di dag 'byung ba las gyur pa'i rang bzhin du khas len na ni 'byung ba sems dpa' can nyid la rnam 'grel mdzad pas gsungs pa'i skyon 'ong bar rtogs par bya'o//de nas khas blangs pa'i grub pa'i mtha' dang yang 'gal te grub pa'i mtha' las ni rkyen gyi dngos por khas blangs la/ 'byung ba sems can du khas blangs na ni de bkag par 'gyur ro/ /de bkag na ni dge ba'i las bsgrub pa dang mi dge ba 'gog pa'i bsgom pa la sogs pa'i cho ga mtha' dag bkag pa yin no//gzhan yang zab mo'i chos sems pa na tshu rol mdzes pa'i lta ba spyod pa ni btsun par mi 'gyur te/ /des na dpyad pas chog go/ /gang yang de nyid kyis spyi'i mtshan nyid kyang mi rtag pa dang bdag med pa la sogs pa yin te/mtshan nyid 'di gnyis gcig la sogs par mi 'thad ba'i phyir ro/ /zhes brjod pa de yang shin tu snying po med pa nyid kyi snying po'i rjes su 'gro ba ma yin no/ /'di ltar mi rtag pa zhes bya ba ni skad cig gnyis pa la sogs par mi gnas pa'i chos nyid yin la/de la ni rags pa nyid yod pa ma yin te/ rags pa ni yan lag can cig yin par 'dod de/ de la ni lag pa la sogs pa gcig g.yon thams cad g.yo bar 'gyur ro zhes bya ba la sogs pa 'gal ba'i chos gnas pa'i nyes pa 'byung bar 'gyur ro/ /de bzhin du 'di ni don du ma yin par mi nus te/'di ltar du ma zhes bya ba ni rdul phra rab kyi tshogs yin par 'dod la/ de la yang / drug gis cig car sbyar bas na/ /zhes bya ba la sogs pas bshad pa'i skyon gyis zin par 'gyur ro/ /mi rtag pa nyid ni rdul phra rab kyi tshogs kyang ma yin te/ 'on kyang rdul phra rab kyi tshogs kyi don gyi rigs ni rtag pa nyid la sogs pa yin no//'on kyang don dam par tha mi dad pa'i phyir log pa nyid la mngon par 'dod na de'i tshe sgra'i tha snyad 'jig par 'gyur te/ khyad par gzhan spong ba dang mi spong ba dag gi 'jig rten gyi chos dang chos can brjod pa'i sgra dang sbyor ba yin na/'di ni chos brjod pas chos can ston par byed pa'i phyir 'di la ci zhig byar yod/ de bzhin du sdug bsngal la sogs pa dag la yang blta bar bya'o/ /de nas lus la sogs pa chos can nyid du bstan par bya ba rnams ni gcig la sogs par mi 'thad pa nyid kyi ngo bo nyid kyis ngo bo nyid med par dran na ni dran pa nye bar gzhag pa yin gyi/ji skad brjod pa'i spyi dang khyad par mi 'thad pa'i phyir ni ma yin no zhes bya ba 'di ni gnas pa yin no/ /de bzhin du phyin ci log gi bag chags skyes pa bshig pa'i phyir dang / 'byung bar 'gyur ba'i log pa'i bag chags mi skye bar bya ba'i phyir dang /ma skyes pa'i de kho na'i bag chags bskyed pa'i phyir dang / skyes pa'i de kho na'i bag chags brtan par bya ba'i phyir dad pa'i nor can gyi yang dag par spong bzhes bya ba'i brtson 'grus bzhi po gang yin pa dge ba dang mi dge ba bskyed pa dang 'phel ba dang spang ba dang mi skye ba'i don du spro ba'i rang bzhin de'i rang bzhin ni lho'i sgo yin no//de skad du yang / de nas byung dang 'byung 'gyur ba'i/ /log pa spang dang mi skyed dang / /ma skyes skyes pa de nyid ni/ /skye ba dang ni gnas pa'i phyir/ /brtson pa lho yi sgo yin no/ /zhes gsungs pa yin no/ / de bzhin du phung po lnga po gzung ba dang 'dzin pa'i rang bzhin gyis stong pa la 'dun pa dang spro ba dang gnas pa dang blo gros su gyur pa rdzu 'phrul gyi rkang pa bzhi'o/ /nam mkha' la 'gro ba la sogs pa rdzu 'phrul gyi rgyur gyur pa nyid kyi rkang pa ni yan lag ste rgyu zhes bya ba'i don to/ /bdun pa la sogs pa yul du gyur pa de dag la ma brjed pa'i mtshan nyid kyi dran pa ni brtson 'grus brtsams pa kho na la nye bar gnas par 'gyur ro//des na chos rnam par 'byed pas bskyed pa'i dran pa rnam par dag pas nub kyi sgo yin no/ /de skad du/nub phyogs 'dir ni 'dun pa dang / brtson gnas blo gros rdzu 'phrul gyi//rkang pa de dag dran pa'i sgo/ /zhes gsungs so/ /de bzhin sngar brjod pa'i dngos po rnam par rtog pa spangs pa rnams la sems mngon par dang ba dang spro ba la dmigs pa dran pa'i 'khor dang ldan pa'i chos rab tu rnam par 'byed pa la mngon du phyogs par byed pa ni de las bzlog pa'i ma dad pa la sogs pa mthar byed pa dran pa nye bar gzhag pa la ni sems rtse gcig pa'i mtshan nyid ting nge 'dzin mngon du 'gyur bas de rnam par dag pa'i rang bzhin ni byang gi sgo yin no//'di yang / /dad brtson dran dang bsam gtan dang / /shes rab dbang po mnyam med pa'i//ting nge 'dzin ni byang sgo yin/ /zhes gsungs so/ /de nyid kyi phyir gzhan dag gi dad pa la sogs pa lnga po nyid gsal ba'i dngos po nyid du gyur pa na stobs lnga zhes bya bar gyur pa rnams kyi rnam par dag pa ni rim pa ji lta ba bzhin gshin rje mthar byed la sogs pa brten par gyur pa'i khro bo bzhi yin no zhes gang brjod pa de mi 'thad de/stobs zhes bya bar gyur pa rnams kyang byang gi sgo'i rnam par dag pa'i rang bzhin nyid du bstan pa'i phyir ro/ /gzhan yang / dad dang brtson 'grus rnam dag pa/ /zhes bya ba la sogs pa'i 'phags pa'i don yang de dag ma shes pa yin no//skye ba'i bsam gtan dang po la sogs pa bzhi dang / snyoms par 'jug pa'i bsam gtan dang po la sogs pa bzhi ste/ bsam gtan brgyad po de dag nyid mngon par bsdus nas bsam gtan bzhir bstan to/ /de'i rnam par dag pas rta babs bzhi gang la yod pa de ni bsam gtan bzhi'i rta babs zhes bya'o//ting nge 'dzin ni dpa' bar 'gro ba dang / nam mkha' mdzod dang / dri ma med pa dang / seng ge rnam par bsgyings pa zhes bya ba rnam pa bzhi'o/ /de dag nyid mtha' skor yin te/de dag nyid kyis kun nas te thams cad nas rab tu mdzes shing legs par bsgrubs pa'i bsam gtan bzhi'i rta babs can yang de yin la/ting nge 'dzin gyi mtha' skor gyis kun nas mdzes pa yang yin no zhes las 'dzin pa'o/ /mtha' skor de la zhes bya ba la sogs pa la/ brjod ma thag pa'i mtha' skor gang yin pa de la yang dag par rten cing gnas pa'i mchod pa dam pa thogs pa ste/bsams pa las 'das pa'i gzugs dang gar dang glu dang rol mo la sogs pa'i mchod pa rnams kyis brel par gyur pa'i gzugs te chos dang don dang nges pa'i tshig dang spobs pa so so yang dag par rig pa'i mtshan nyid can bzhi po rnams kyi tshogs khang pa brtsegs ma gang la yod pa de la de skad ces bya'o//gang gi phyir chos thams cad kyi nye bar mkho ba mngon par 'dod pa la sogs pa'i bsam pa rdzogs par byed pa gang yin pa de'i rnam par dag pa bstan pa'i don du khang ba brtsegs pa de rgyan rnams kun gyis spras pa yin no//gdul bya'i ni sems can gdul bar bya ba rnams so/ /de'i ched du phyar zhing bkram pa'i yan lag dgu ni/ mdo dang / dbyangs kyis bsnyad pa dang / tshigs su bcad pa dang / lung bstan pa dang / gleng gzhi dang / de lta bu byung ba dang / skyes pa'i rabs dang / shin tu rgyas pa dang / rmad du byung ba dang / bstan pa'i rang bzhin gyi gsung rab bo/ /dam pa'i chos de nyid de dag kun du 'gro ba zhes bya ba 'jug par byed cing khongs su 'du bar byed pas de skad ces bya'o/ /rgyal mtshan dkar po dang / smug po dang / nag po dang / dud ka dang / dmar po dang / khra bo dang / ser po dang / ljang gu'i mdog can dbang po'i phyogs la sogs pa'i yul du bsgreng ba rnams kyi phreng ba dang / rlung gis bskyod pa de'i dril bus phyogs sgo kun du sgra bsgrags pa ste/ sbra dang ldan par byed pa gang la yod pa de la de skad ces bya'o/ / rgyu gang gi phyir gdul bya la phyar ba'i yan lag dgu'i gsung rab dam pa'i chos kun du 'gro ba nyid khang pa brtsegs ma de gang yin pa de'i phyir na de'i rnam par dag pas rlung gis 'phyar ba'i rgyal mtshan gyi phreng ba'i dril bus phyogs kyi sgo thams cad du sgra sgrogs par byed pa yin no/ /ye shes me long zhes bya ba la sogs pa la/ye shes kyi sgra ni me long lta bu la sogs pa'i ye shes rnams bzung ste/ me long ni nye bar mtshon pa'i don yin pa'i phyir ro/ /ye shes kyi me long yang yin la/ byang chub kyi yan lag bdun po chos rnam par 'byed pa dang / brtson 'grus dang / ting nge 'dzin dang /dran pa dang / dga' ba dang / shin tu sbyangs pa dang / btang snyoms gang yin pa'o/ /de ni rtag tu dri ma med pa yang yin la de nyid byang chub kyi yan lag kyang yin zhing de nyid me tog dga' ba'ang yin zhes pa las 'dzin pa'o/ /de dag gi phun sum tshogs pa thob pa'i rgyu des na de'i rnam par dag pa'i ngo bo dra ba la sogs pas do zla med pa yin te/khang pa brtsegs ma de 'dra ba med pa yin no/ /rnam thar brgyad po zhes bya ba la sogs pa la/ rnam thar ni rgyab kyis phyogs pa ste 'dod chags dang bral ba zhes bya ba'i don to/ /de yang rnam pa brgyad de/ gzugs can dang rnam par bsngos pa dang rnam par rnags pa la sogs pa'i rnam pas gzugs rnams la lta ba zhes bya ba ni rnam par thar pa dang po'o/ /nang gzugs med pas snga ma ltar phyi rol gyi gzugs rnams la lta ba zhes bya ba ni gnyis pa'o/ /de dag ni mi sdug pa'i rang bzhin can yin te/rnam par bsngos pa la sogs pa'i rang bzhin yin pa'i phyir ro/ /'di gnyis ni grangs ji lta ba bzhin du 'dod pa na spyod pa dang / bsam gtan dang po nyid dag gi 'dod chags gnyis kyi gnyen po yin pas bsam gtan dang po dang gnyis pa dag yin no/ /sa gzhan la sdug pa'i rnam par thar pa lus kyis mngon sum du byas te bsgrubs nas gnas pa zhes bya ba gsum pa sdug pa'i rnam par thar pa ni bsam gtan bzhi la yod pa'o//de yang ma chags pa'i rang bzhin yin gyi mi sdug pa'i rang bzhin ni ma yin te/ sdug pa'i rnam pa can yin pa'i phyir ro//rnam par thar pa bzhi pa ni gzugs med pa yin no/ gzugs med pa zhes bya ba ni rnam par thar pa dag kyang dge ba mnyam par gzhag pa kho na nyid yin gyi 'chi ba'i srid pa la sogs pa ji lta ba bzhin du nyon mongs pa can yang ma yin pas mnyam par ma bzhag pa yang ma yin no//'du shes dang tshor ba 'gog pa ni rnam par thar pa brgyad yin te 'gog pa'i snyoms par 'jug pa ni 'du shes dang tshor ba la rgyab kyis phyogs pa yin pa'i phyir ro/ /de ltar rnam par thar pa brgyad po rnams kyis rnam par dag pas na lha rdzas ka ba brgyad kyis nye bar mdzes pa ste/'khor lo la sogs pa'i ka ba brgyad po de dag gis mdzes par byas shing rnam par brgyan pa mtho ris kyi'ang 'dra bas na lha rdzas so/ /rdo rje'i tshul ni sngags kyi tshul te/ de'i sgo nas chos kyi 'khor lo bskor ba'i phyir na rdo rje'i thig ste rdo rje'i phreng ba dang yang dag par ldan pa yin no//gzugs sogs zhes bya ba la sogs pa la/ sogs pa smos pas ro dang / dri dang / reg bya dang / sgra rnams bzung ngo / /yul de dag nyid ni tshu rol mthong ba'i mthong ba la bltas nas de kho nar yul gyi ngo bor mi 'thad pa'i phyir de rnams dag pa ste/rnam par dag pa'i ngo bo nyid dang bral ba yin pa'i rgyu des na 'dod pa'i yon tan lnga po bla na med pa de bsam gyis mi khyab pa'i rang bzhin no/ /de nyid kyi phyir/ mtha' yas pa ste de lta bu gang la yod kyang de skad ces bya'o/ /rnam dag ni shin tu rnam par dag pa'i chos kyi dbyings kyi ngo bo nyid de/dam pa'i chos ni stobs bcu dang mi 'jigs pa la sogs pa'o/ /de dag gi dbyings ni rigs te shes rab kyi pha rol tu phyin pa'i sems so/ /de'i rgyu mthun pa'i 'bras bu'i rang bzhin te stobs bcu la sogs pa'i yon tan ma lus pa rnam par dag pa'i rang bzhin zhes bya ba'i don to//mchod pa lnga ni me tog dang / bdug pa dang mar me dang / dri dang lha bshos kyi rang bzhin te/ de dag gis rnam par brgyan pa yang de yin la rnam par dag pa'i chos kyi dbyings kyi rgyu mthun pa yang yin no/ /'dab ma sna tshogs pa ste 'dab ma kha dog du ma can gyi pad+ma dang /'chad par 'gyur ba'i tshul du ji ltar rigs pa bzhin gnas pa'i nyi ma dang zla ba de dag gis lha bcu dgu po rnams kyis gnas pa rnams yongs su bzung zhing byin gyis brlabs pa gang na yod pa de la de skad ces bya'o/ /khang pa brtsegs ma rin chen ma lus pa ste ma rgad dang pad+ma rA ga la sogs pa rnams kyis ji ltar mdzes par rnam par spras par rab tu bsgom par bya zhing bsam par bya'o zhes bya ba'i don to//dbu ma'i zhes bya ba la sogs pa'o/ bcu drug gi cha can ni a la sogs pa'i yi ge rnams so/ / tshogs ni ka la sogs pa rnams so//de dag dang de dag las skyes shing byung ba gang yin pa'i zla ba'i dkyil 'khor yongs su rdzogs pa de la de skad ces bya'o/ /rigs kyis gcig gi tshig go/ /rim pa ji lta ba bzhin shes rab dang thabs mtshon par byed pa'i zung gnyis zhes bya ba'i don to//zla ba gnyis po 'di ni dpag tu med pa'i 'od kyi tshogs dang ldan pa yin no/ /dbu ma'i gdan dbus su bsam par bya'o/ /cho ga bzhin du zhes bya ba ni 'di'i don 'di yin te/ yi ge a ni chos thams cad kyi sgo yin te/ gdod ma nas skye ba med pa'i phyir ro zhes gsungs pa'i phyir na/dngos po mtha' dag 'gog pa'i bdag nyid shes rab kyi rang bzhin can de bzhin gshegs pa'i rang bzhin sems can mngon par rdzogs par byang chub pa'i dus su nye bar 'gro bar khas blangs shing dam bcas pa ye shes bskul ba'i don du 'jig rten gyi khams kA kan di can nas byon pa'i a la sogs pa nyi rim du gyur pa rnams yongs su gyur pa ni smon pa'i sems kyi rang bzhin shes rab kyi ngo bo skyes bu chen po'i mtshan sum cu rtsa gnyis rnam par dag pa'i rang bzhin gyi zla ba dang po yin no//de'i steng du snying rje'i bdag nyid can thabs kyi rang bzhin can de bzhin gshegs pa'i ngo bo de kho na bzhin byon pa/ya ra la wa Da D+ha lhag par byas pa'i ka la sogs pa'i gsal byed rnams kyis 'jug pa'i sems kyi rang bzhin dpe byad bzang po brgyad cu rnam par dag pa'i rang bzhin can gyi zla ba'i dkyil 'khor gnyis pa yin no/ / zla ba gnyis po 'di ni thogs pa dang dri ma dag dang bral bas bsal ba yin pa'i me long lta bu'i mtshon par byed pa yin la/gcig tu gyur pas ni mnyam pa nyid mtshon par byed pa yin no/ /de ltar 'dis ni mngon par byang chub pa rnam pa lnga las rnam pa gnyis brjod pa yin no zhes rnam pa gzhan gsum gsungs pa ni/der ni zhes bya ba la sogs pa'o/ /der ni zhes bya ba la sogs pa ni zla ba gnyis kyi gnas su ste/ de yongs su gyur pa las zhes bya ba'i don to/ /de'i steng du rdo rje mchog bsgoms nas de'i nga rgyal dang ldan pas rgyal ba skyed byed skur bdag nyid blta zhes 'brel te/de bzhin gshegs pa thams cad mngon par rdzogs par byang chub pa'i rang bzhin yin pas mchog kyang yin la/ thams cad kyi rgyu yin pas dang po yang yin pa ni dang po mchog ste rdo rje 'chang ngo / /de'i snying po ni sa bon te yi ge hUM ngo //de las byung zhing skyes pa gang la yod pa de la de skad ces bya'o/ /nor bu dmar 'dra zhes bya ba ni/ pad+ma rA ga dang 'dra ba'o/ /thub dbang dpag tu med cing grangs med pa 'phro bzhin pa rnams kyi 'od zer rnams kyis mtha' yas pa'i phyogs kyi sgo kun nas yongs su khyab par byed pa dang / mchog snying po rdo rje sems dpa'i sa bon des mgon dang bcas shing byin gyis brlabs pa ste/ yi ge hUM gyis byin gyis brlabs pa'i lte bar zhes bya ba'i don to/ /de'i nga rgyal dang ldan pas zhes bya ba ni 'di yang bya rog gi mig gi tshul gyis 'brel par bya ste/ de lta bu'i rdo rje bsgoms nas oM badzra At+ma kou0f85haM/zhes rdo rje'i nga rgyal dang ldan pa'i sngags pas bya ba yin no/ /'dis so sor rtog pa'i ye shes bstan to/ /rnam par snang mdzad la sogs pa'i rnam pa can mtha' yas pa'i sprul pa spro ba rnams kyis 'gro don mchog sangs rgyas nyid kyi mtshan nyid can gang gis bsgrubs pa de la de skad ces bya'o//de'i nga rgyal dang ldan pas bsams nas ni zhes bya ba la/ 'dis ni 'di skad du yi ge hUM las skyes pa'i de bzhin gshegs pa rnams kyis de bzhin gshegs par byas pa'i sems can rnams nang du 'dus shing / oM ya thA sarba ta thA ga ta sta thA a haM/ zhes nga rgyal byas pa ni bya ba sgrub pa yin no zhes brjod pa yin no/ /don 'di yang lus can rgyal bar snang bar byas pa'i don can de'i nga rgyal dang ldan pas zhes bya ba 'dis gsal bar byas pa yin te/'dis de'i nga rgyal du byas pa zhes gnyi ga'i nga rgyal gzung ba'i phyir ro/ /de 'dra ba'i lhag par mos par byas nas rdo rje 'chang du byas pa'i de bzhin gshegs pa rnams nang du 'dus pa na zla ba dang rdo rje yongs su gyur pa las rgyal ba skyed byed skur blta'o//ci 'dra bar zhe na brjod pa thub mchog ces bya ba la sogs pa'o/ /thub pa mchog gi rnam pa can gyi rdul phra rab rnams kyis rnam par spras pa nyid kyis na zla med pa mtshungs pa dang bral ba'o//tha mal pa rnams kyi lus ni sa la sogs pa'i rdul phra rab kyis spras pa nyid kyis mtshungs pa med pa yin no//g.yas g.yon gyi zhal sngo ba dang dmar bar snang ba yang yin la/ zla ba nya ba lta bur dkar ba'i mdog kyang yin no zhes bsdu ba'o//rdo rje sems dpa'i zhal g.yas pa dang cig shos ni sngo ba dang dmar ba yin la/ rtsa ba'i zhal dang sku thams cad ni dkar ba yin no zhes bya ba'i don to/ /rnam pa sna tshogs pa'i rgyan dang ldan zhing gzi brjid 'bar ba'i phyag gnyis kyis rig ma dam pa de la 'khyud nas rdo rje dang ral gri dang pad+ma dang nor bu 'dzin pa'i phyag lhag ma zung gnyis kyis phyug pa ste/g.yas dang cig shos kyi lhag ma phyag bzhi na rim pa bzhin du rdo rje dmar po dang ral gri dang nor bu dang pad+ma bsnams pa zhes bya ba'i don to/ /khams gsum pa'i khongs te nam mkha'i dkyil 'khor du sna tshogs pa'i 'od tshogs las 'thon pa'i thub pa'i dbang po rnams nam mkha'i khongs khyab par byed pa'i rgyal ba rgyun mi 'chad par spro zhes bya ba'i don to//rnam thar gsum zhes bya ba la/ rnam par thar pa'i sgo gsum ni stong pa nyid dang mtshan ma med pa dang smon pa med pa'i rang bzhin te/de'i rang bzhin gyi rnam par dag pas shes rab dang thabs kyi bdag nyid can no/ /dngos po ni shes rab kyi ngo bo nyid yin yang thabs gtso bor gyur pa yin no/ /'gro ba kun gyi de nyid gcig pu ba/ /zhes bya ba ni 'gro ba thams cad kyi gnyis su med pa'i rang bzhin yin pa nyid kyis rang gi snang ba las tha mi dad pa yin pa'i phyir de nyid gcig pu gang la yod pa de la de skad ces bya'o//rgyal ba skyed byed skur ni zhes bya ba ni rgyal ba'i ngo bo'i lha'i 'khor lo skyed pa'i rgyu rdo rje sems dpar zhes bya ba'i don to/ /bdag nyid ces bya ba ni rnal 'byor pa'i snang ba las tha mi dad par ro//blta ba zhes bya ba ni bsgom par bya'o/ /'dis ni chos kyi dbyings rnam par dag pa'i ye shes ston to/ /rdo rje sems dpa'i mngon par byang chub pa rnam pa lnga brjod nas gdul bya'i sems can rnam par dag par bya ba'i don du dbang bskur ba sbyin pa'i phyir pad+ma'i nang gi dkyil 'khor bkod pa'i ched du sems can gyi bsam pa'i dbang gis shes rab dang thabs mnyes par byed pa re zhig brjod pa/mchog tu zhes bya ba la sogs pa'o/ /mchog tu dga' ba bde ba chen po phun sum tshogs pas gdul bya'i 'jig rten kun la gzigs nas te/bltas nas dga' ba'i sgra sgyu ma'i rang bzhin sgyu ma lta bu des rgyal ba'i tshogs rnams thams cad ba spu'i bu ga rnams nas lus kyi nang du zhugs par bya'o/ /'dis ni shes rab mnyes par byed pa brjod do/ /'dus pa las de nas zhes bya ba la sogs pas rgyal ba lha mo'i gzugs su song nas mnyes par byed pa ni gnyis pa thabs mnyes par byed pa'i don nyid du brjod pa'i phyir ro//de dag ces bya ba ni rgyal ba'i tshogs so/ /spyan sogs zhes bya ba ni spyan ma la sogs pa'i lha mo bzhi'o/ /gzugs la sogs pa yul rnams thams cad ni gzugs dang /sgra dang / dri dang / ro dang / reg bya rnam par dag pa'i rang bzhin gzugs rdo rje ma la sogs pa lnga'i ste/ de rnams kyi ngo bor spros nas zhes bya ba ni de dag rang bzhin du ba spu'i bu ga nas spros nas rang gi rigs kyi rgyal ba'i tshogs kyi ngo bo spyan ma la sogs pa gzugs can de dag nyid mdor bsdu bar byas pa yin no/rig ma thams cad ni zhes bya ba ni rig ma rnam pa dgu po rnams so/ /rang gi rig ma'i nang du bsdu bar bya/ /zhes bya ba ni bdag nyid kyi phyag gnyis kyis 'khyud pa'i na chung gi lus su gzhug par bya'o/ /'dis ni thabs mnyes par byed par brjod do//de skad du yang 'dus pa las de nas de bzhin gshegs pa thams cad bcom ldan 'das sku dang gsung dang thugs kyi bdag po mnyes par bya ba'i don du rang gi gzugs rnams su mngon par sprul to zhes bya ba la sogs pa gsungs so/ /rang rang gi rigs kyi de bzhin gshegs pa rnams su yongs su gyur nas lha mo rnams spros nas bstan pa'i phyir de nyid las de la kha cig ni sangs rgyas spyan gyi rnam par zhes bya ba la sogs pa gsungs te/sangs rgyas ni rnam par snang mdzad do/ /de'i spyan ma ni rang bzhin du grub par gyur pa'o/ /de bzhin du dam tshig sgrol ma'i rnam par zhes bya ba la de bzhin du dam tshig ni don yod pa ste/de ni sgrol ma'i gzugs su grub pa'o/ /de bzhin du gzhan rnams la yang nye bar mtshon pa'i don du yin pas der rang gi rigs yongs su gyur par blta bar bya'o/ /chos kyi dbyings dbang phyug ma'i spro ba ni ma gsungs te/chos kyi dbyings kun du 'gro ba yin pa'i phyir ram/ rdo rje 'chang gis 'khyud pa'i phyir ram/ yang dag par rtogs pa la reg pa las skyes pa'i bde ba chen po nyid gtso bor shes par bya ba'i don gyi phyir ro/ /de'i phyir yang 'dir rig ma thams cad ces bya ba ni lha mo rnam par dag pa yin par gzung ngo //de'i pad+ma zhes bya ba la sogs pa la/rang gi rig ma gang yin pa de'i pad+ma'i lte ba ste/ snying rje'i rang bzhin can de'i nang ste dbus so/ /dri med zla ba ni byang chub kyi sems so/ /de nyid mi shes pa'i mun pa mtha' dag sel ba'i phyir 'od zer te/de las byung ba'i dkyil 'khor der dkyil 'khor pa dang / dkyil 'khor gyi bdag po bsams nas so/ /dkyil 'khor der ni skye bo'i tshogs ma lus pa rnams blo yis gzhug par bya'o/ /de nas de la dbang bskur bar bya'o zhes gsungs pa ni gsang ba'i rdo rje zhes bya ba la sogs pa'o//kha nas bcug pa'i rgyal ba'i tshogs rnams gsang ba'i rdo rje pad+ma'i dbus su bcug nas zla ba zhu ba'i gzugs su yongs su gyur pa ste/ byang chub kyi sems kyi rnam par byung bas rgyal ba'i tshogs de la dbang bskur bar bya'o zhes bya ba'i don to/ /de nas dbang bskur ba'i mthar de bzhin gshegs pa thams cad kyi bde ba dang yid bde ba thob pa'i sems can de dag zla ba zhu ba'i dngos po k+ShiM yig la sogs pa yongs su gyur ba las skyes pa des byin gyis brlab pa'i rang rang gi phyag mtshan gyi rim pas mig la sogs pa rnam par dag pa sa'i snying po la sogs pa'i rang bzhin du mos pa ji lta ba bzhin rnam par dag par gyur pa na dgye bar bya'o zhes bstan pa'i don du sa'i snying po zhes bya ba la sogs pa'i tshigs su bcad pa 'phags pa lnga gsungs pa ni/rdo rje la zhes bya ba'o/ /dbang bskur ba ni de ma thag tu sa'i snying po la sogs pa drug mig la sogs par brjod pa zhes bya ba ni rim pa ji lta ba bzhin mig dang /rna ba dang / sna dang / lce dang / lus dang / yid rnam par dag pa rnams so/ /gzugs dang / sgra dang / dri dang / ro dang / reg bya chos dbyings rdo rje ma rnams dang zhes bya ba ni rim pa bzhin du gzugs la sogs pa rnam par dag pa gzugs rdo rje la sogs pa drug go//sa dang chu dang me dang rlung rnams kyi/ /ngo bor gyur pa zhes bya ba ni rim pa ji lta ba bzhin sa la sogs pa rnam par dag pas spyan ma la sogs pa grags pa bzhi'o/ /gzugs myong mtshan ma dang ni de bzhin du//'du byed rnams dang yid du rab brjod pa/ /zhes bya ba ni rim pa ji lta ba bzhin du gzugs dang / tshor ba dang / 'du shes dang / 'du byed dang / rnam par shes pa zhes bya ba'i phung po lnga'i ngo bo nyid du grags pa rnam par snang mdzad la sogs pa'i bde bar gshegs pa rnams so//rang gi sa bon gyis ni zhes bya ba ni de ma thag tu brjod pa'i yi ge k+ShiM la sogs pa rnams kyi cho ga bzhin du bskyed pa'i phyir ro/ /spro bar bya zhes bya ba ni blo kho nas lha mo'i pad+ma'i nang gi khang pa brtsegs ma las phyir dbyung bar bya ste/ blo de nyid kyis bcug pa'i phyir ro//da ni rim pa bzhin du sa'i snying po la sogs pa'i sa bon rnams nyid brjod pa ni k+ShiM zhes bya ba la sogs pa'o/ /rtag pa ni rnam par snang mdzad do/ /rim pa bzhin zhes bya ba la sogs pa ni thams cad la sbyor bar bya'o/ /'jam pa'i rdo rje bslang ba'i phyir yi ge gsum gzhug pa brjod pa ni oM dang zhes bya ba la sogs pa'o//sems zhes bya ba ni sngar brjod pa'i chos thams cad bdag med pa la dmigs pa bar ma do'i sems kyi rang bzhin ni 'bar ba'i yi ge chos spel zhes bya ba ni rang rdo rje 'chang mnyes par byed pa 'od dang bcas pa'i ho dmar po gnyis kyi bar du bcug pa'o//cho ga bzhin zhes bya ba ni kha nas zhugs nas rdo rje'i lam nas rang gi rig ma'i pad+ma'i nang du brtan par bya ste/ pad+ma'i nang na gnas pa'o/ /mnyam med ces bya ba ni sku la sogs pa'i rang bzhin min pa'i phyir ro/ /yi ge gsum po de shes rab kyi chags pa mchog tu dga' bas zhu bar byas par blta'o//de'i zhes bya ba la sogs pa la de yis zhes bya ba de ma thag tu brjod pa'i yi ge'i rnam pa can gyi sems zhu bar gyur pa'i 'od kyi mthu yis lha mo dang rdo rje 'chang gnyi ga yang zla ba'i khu ba ste mer mer por byas par blta'o/ /bcom ldan 'das kyis nye bar bstan pa ston pas mngal nas skyes pa'i rim pa bstan pa mdzad pa yin no//de de ltar byas nas spyan ma la sogs pa'i lha mo rnams rang gi bdag po slong bar byed pa ni glu'i sgras 'chad par 'gyur ba'i rnam par 'di skad du bskul bar bsam mo/ /bcom ldan 'das mkha' khyab kyi ting nge 'dzin la snyoms par zhugs pa na byams pa la sogs pa'i ngo bo spyan ma la sogs pa rnams rgud pas rang dang gzhan gyi don med par 'gyur ro snyam pas/skyes bu chen po'i mtshan sum cu rtsa gnyis la sogs pa dang ldan pa/ zab pa dang rgya che ba'i rnam pa can gyi lha'i rnam pa khas blang ba'i don du thabs rgya chen po yang brjod par 'dod pa na gtsor thabs med par rtogs te/sngar thabs nyid du bskyed pa brtse ba la sogs pa'i sems kyi khyad par zla ba'i khu ba las rim pa ji lta ba bzhin spyan ma la sogs pa'i ngo bor gyur pa rnams rang gi rigs kyi bdag po thugs rdo rje la sogs pa'i rang bzhin gyi rdo rje 'chang chen po la//bstod nas skul bar mdzad do/ /de la yang 'phags pa'i ma mo'i ngor spyan ma dang por brjod kyang der sems gtsor bstan pa'i phyir mA ma kI'i bskul ba dang por gsungs pa de bas na re zhig de nyid dang por rdo rje thugs khyod ces bya ba la sogs pas bstan to//rdo rje thugs ni thugs rdo rje sems dpa' ste/ chos kyi dbyings shin tu rnam par dag pa'i ye shes kyi rang bzhin yin pa'i phyir ro/ /sa'i 'khor lo'i dbang phyug sems can dbyings te de dag gi don byed pa'i phyir ro/ /de ltar bstod pas sad par byas nas rdo rje 'chang la zhus pa ni bdag la skyob pa zhes bya ba ste/bdag la skyob par mdzod cig pa'o/ /ji lta zhe na/ brjod pa dga' ba yid 'ong don chen gyis te/ 'jig rten dang 'jig rten las 'das pa'i dgos pa chen po can gyis/ kye mgon po gal te bdag ni gson par bzhed ce na/ dam pa'i ngo bo ni sems dpa' ste sangs rgyas nyid do//de'i skyed par byed pa ni skyed byed sems dpa' ste sems bskyed ces pa'i don to/ /yang na 'jam pa'i rdo rje la sogs pa skye ba'i rgyu yin pas na skyed byed sems dpa'o/ /de nyid kyi phyir gnyen chen mchog yin no/ /bdag la dgyes par rol zhes bya ba ni bdag la ni 'dod pa rol pa mdzod cig /mtshan dang dpe byad thams cad dang ldan pa bsam gyis mi khyab pa nye bar mtshon par byed pa lha'i rnam par bzhengs la rnam par dag pa'i yul la longs spyod cig pa ste byams pa la sogs pa'i rang bzhin kho mo la brten nas 'jig rten gyi don mdzod cig ces pa'i tha tshig go//de ltar na bdag bsrung bar 'gyur ba yin te gzhan du na sems can gyi don la 'jug pa med na kho mo 'gum par 'gyur ro zhes bya ba'i don to/ /da ni snying rje'i rang bzhin spyan mas bskul ba brjod pa ni rdo rje'i sku khyod ces bya ba la sogs pa'o/ /me long lta bu'i ye shes sku'i ngo bo yin pa'i phyir rdo rje'i sku'o//sku'i rdo rje ni bcom ldan 'das nyid yin te/ bsam gyis mi khyab pa'i rnam pa can yin pa'i phyir ro/ /sems can yang yin mang po yang yin pa de dag dga' bar byed pa 'di la yod pas ni sems can gang dga'o/ /bka'i 'khor los sgyur ba yin pa'i phyir na bka'i 'khor lo sangs rgyas don du ste dgos pas byang chub mthar thug ste byang chub kyi mtha' mtshams la thug par sems can la phan pa'i thabs dang don ston par byed pas na sangs rgyas don du byang chub mthar thug pa phan don ston pa'o//de ltar bos nas rdo rje 'chang la gsol ba ni mgon po zhes bya ba la sogs pa'o//chags pa zhes bya bas ni bde ba chen pos so/ /'dod chags ni 'gro ba bsgral bar 'dod pa'o/ /'da' bar mi bya ba'i phyir dam tshig de nyid gang la yod pa 'dod chags kyi dam tshig can de la ste/brtse ba'i bdag nyid can de la zhes pa'i don te/bdag la ni mA ma kI la'o/ /lhag ma ni snga ma dang 'dra'o/ /dga' ba'i rang bzhin gos dkar mos bskul ba brjod pa ni rdo rje gsung khyod ces pa la sogs pa'o/ /rdo rje gsung zhes bya ba ni gsung rdo rje'i ngo bo yin pa'i phyir de skad ces bya ste/ snga ma bzhin bcom ldan 'das nyid yin no//sems can gyi tshogs thams cad la phan pa rjes su brtse ba'i ngang tshul can dang ldan pa 'jig rten rnams kyi don te dam pa'i don sangs rgyas nyid dang 'bras bu 'jig rten pa'i bde ba ste de gnyis mdzad pa la rtag tu 'jug pa ste/ so sor rtog pa'i bdag nyid can yin pa'i phyir ro//de ltar bcom ldan 'das la bos nas gsol ba ni mgon po zhes bya ba'o/ /rab dgyes te shin tu rnam par dag pa'i mchog tu dga' bas spyod pa gang la mnga' ba de la de skad ces bya'o/ /kun du bzang zhing dge ba 'di las byung bas na de skad ces bya'o/ /gzhan ni snga ma bzhin no//bdag la dgyes par rol zhes bya ba ni gos dkar mo la'o/ /da ni btang snyoms kyi rang bzhin sgrol mas bskul ba brjod pa ni/ rdo rje 'dod khyod ces bya ba la sogs pa'o/ /rdo rje'i rang bzhin gnyis su med pa ye shes kyi bdag nyid kyi 'dod pa gzugs la sogs pa 'di la yod pas rdo rje 'dod pa'o//dam tshig ni don yod de de'i rang bzhin yin pas so/ /mchog kyang yin te bya ba sgrub pa'i rang bzhin nyid kyis sems can gyi don byed pa'i phyir dam tshig mchog go/ /phyi ma la phan pa chen po'i gdul bya rnams kyi don 'dod pas 'byung bas na phan chen don to/ / rdzogs sangs rigs ni de'i thig le ste mchog tu gyur pa'o/ /mnyam nyid stong pa nyid kyi rjes su brtse ba'i phyir mnyam nyid rjes brtse can no/ /de 'dra ba'i rdo rje sems dpa' la gsol ba ni mgon po gal te zhes bya ba la sogs pa'o/ /yon tan gyi gter du gyur pa nyid kyi phyir rin chen mang ldan yin no//bdag la rol zhes bya ba ni sgrol ma la ste/ lhag ma ni snga ma bzhin no/ /da ni sa bon dang phyag mtshan gyi rim gyis 'jam pa'i rdo rje bzhengs pa brjod pa ni/ de lta'i blo ngor zhes bya ba la sogs pa'o/ /thams cad sgyu ma lta bur rtogs pa'i sngags pas zhu ba las byung ba'i yi ge maM mdangs gsal ba las skyes pa'i ral gri'i yu ba'i dbus kyi zla ba la gnas la 'od kyi dkyil 'khor 'phro ba'i yi ge maM gyi rnam par bdag nyid gyur te/yi ge maM de'i 'od zer rnams kyis yi ge maM de nyid kyi nang du/ rang gi lha 'jam pa'i rdo rje de'i rnam par sprul pa'i thub pa'i tshogs ma lus pa rnams yid kyis bcug pas na 'chad par 'gyur ba'i khyad par can 'di 'dra ba'i/dpal ldan 'jam pa'i rdo rjer 'gyur/ /zhes bya ba ni bdag nyid 'jam pa'i rdo rje blta'o zhes bya ba'i don to/ /'di 'dra ba'i sgras bstan pa'i khyad par gzhan yang brjod pa ni/gur kum mchog 'dra zhes bya ba la sogs pa'o/ /skyob pa nyid kyis gzigs pa'i lam gsungs pa'o/ /'gro ba bsgral ba'i don du de gang la yod pa ni skyob can no/ /gang gis nam mkha'i dkyil 'khor thams cad de bzhin gshegs pa la sogs pa'i rigs ma lus pa spros pa rnams kyis rgyan par mdzad pa de la de skad ces bya'o//srid pa chags pas srid mtha' med/ /zhi la chags pas rgyud la brten/ /zhes gsungs pas na/'dis ni chos kyi dbyings kyi rang bzhin du bstan pa'i phyir gsungs pa ni gzung 'dzin dag pa dang zhes bya ba la sogs pa'o//de kho nar gzung 'dzin dang bral ba'i phyir dngos po mtha' dag ngo bo med pa yin te/ ngo bo'i rang bzhin gzung ba dang 'dzin pa nyid yin pa'i phyir ro/ /de skad du yang / gzung dang 'dzin pa'i rnam pa las/ /gzhan pa'i mtshan nyid yod ma yin//des na mtshan nyid stong pa'i phyir/ /ngo bo med par rab tu bstan/ /zhes gsungs so/ /ngo bo med par bsams nas rnam par byang ba mya ngan las 'das pa la mngon par zhen pa gang yin pa de zad phyir te zad pa'i don du/ oM d+harma d+hA tu swa b+hA ba At+ma kou0f85haM/ zhes 'di ltar b yin gyis brlab par bya'o//yi ge oM la sogs pa swa b+hA ba At+ma kou0f85haM/ zhes bya ba ni tshig gnyis su byas nas tshig drug gis lus la sogs pa rnam pa drug gi de nyid bskul ba'o/ /stobs bcu dang mi 'jigs pa bzhi la sogs pa chos kyi dbyings ni rten te sgrub par byed pa yin pa'i phyir r o//'di ltar bsam pa ji lta ba bzhin du thabs du mas sems can don rnam pa du ma sgrub pa'i phyir/ 'khor ba dang mya ngan las 'das pa la mi gnas pa chos kyi dbyings kyi ngo bo nyid shes rab dang thabs kyi rang bzhin 'jam pa'i rdo rje'i bdag nyid can ni nga yin no zhes bya ba'i don to/ / chos thams cad bdag med par rtogs pa ni srid par mngon par zhen pa spangs pa kho na yin te/ 'on kyang mya ngan las 'das par mngon par zhen par 'gyur la/de yang nges par legs par 'jig par byed pa yin pa des na de yang spang pa'i phyir chos kyi dbyings kyi rang bzhin du byin gyis brlab par bya'o//de skad du yang / bcings pa dang thar pa brtag pa las kyang / nyon mongs med par mya ngan 'da'/ /mya ngan 'das pa bdag gi zhes/ /gang dag sems dpa' de dag ni/ /'dzin pa chen po nye bar len/ /gang la mya ngan 'das pa dang / /'khor ba snon dang 'bri med pa//de la mya ngan 'das pa dang / /'khor bar gang zhig rab tu brtag /ces gsungs so/ /mya ngan las 'das pa brtag pa las kyang / mya ngan 'das pa'i mtha' dang ni/ /'khor ba'i mtha' ni gang yin pa/ /'di dag bar na phra mo yang / /'ga' zhig yod pa ma yin no//zhes gsungs so/ /don ni 'di yin te/ mtha' bzhi las rnam par grol ba'i de kho na rig pa'i rang bzhin bsam gyis mi khyab pa'i rnam pa can 'jam pa'i rdo rje'i nga rgyal ni thun mong ma yin pa nyid kyis bla na med pa yang dag par rdzogs pa'i byang chub kyi rgyu'i dngos po nyams su myong ba yin no zhes bya ba'o//'dis ni bsnyen pa zhes bya ba yan lag dang po rgyu dang 'dra ba'i lha zhes bya ba rgyu mthun pa'i 'bras bu chung ngu brjod pa yin no// //yan lag gnyis pa brjod pa ni de rjes zhes bya ba la sogs pa ste bsnyen pa'i de ma thag tu'o/ /rang gi sa bon 'od rnams las sa'i snying po la sogs pa rnams kyi yi ge k+ShiM la sogs pa rim pa ji lta ba bzhin mig la sogs pa'i gnas rnams su rang rang gi mtshan ma'i lte ba la gnas pa rnams dang /de dag gi 'od rnams las te/ 'od zer dang bcas pa de dag nyid rgyur gyur pa las grub pa'i sa'i snying po la sogs pa drug po gang dag yin pa de dag gis mig sogs bkang nas bsgom par bya zhes gzhan dang 'brel to//bdag nyid ji lta ba bzhin du zhes bya ba ni mig dag gi dbus su zla ba la k+ShiM dkar po'i 'khor lo yongs su gyur pa las sa'i snying po dkar po'o/ /rna ba'i bu ga las j-i nag po'i rdo rje las byung ba phyag na rdo rje sngon po'o//sna'i bug dag tu khaM ser po'i rin po che ljang gu las byung ba nam mkha'i snying po ser po'o/ /lce'i dkyil du gaM dmar po'i pad+ma las byung ba spyan ras gzigs dmar po'o/ /dpral ba la kaM ljang gu'i ral gri las byung ba'i sgrib pa rnam par sel ba ljang gu'o//lte ba'i steng du saM dkar po'i rdo rje yongs su gyur pa las kun du bzang po cho ga bzhin du bsam par bya'o zhes bya ba'i don to/ /'dis ni nye bar bsgrub pa'i yan lag thams cad mkhyen pa nyid rnam par smin pa'i 'bras bu chung ngu brjod pa yin te/ mig la sogs pa rnams sa'i snying po la sogs pa'i rang bzhin lha'i rnam par byed pa'i phyir dang /so so la rna ba la sogs pa'i dbang po drug yod pas sgra la sogs pa'i yul yongs su shes pa srid pa'i phyir dang / yul gyi khyad par phra ba la sogs ba la yongs su shes pa srid pa'i phyir ro// //yan lag gsum pa brjod pa ni rang snying dri med zlar zhes bya ba la sogs pa ste rang gi snying ga zla ba dri ma med pa la'o/ /rdo rje lte ba'i nang gnas zhes bya ba ni hUM nag po las skyes pa'i rdo rje'i lte ba la gnas pa'o/ /hUM yig las rdo rje thugs bsgom zhes bya ba ni hUM las skyes pa'i rdo rje'i dbus na gnas pa'i yi ge hUM las skyes pa'i thugs kyi rdo rje phyag na rdo rje kho na 'dra ba zhig bsgom par bya'o zhes bya ba'i don to//kha dang mgo bo la pad+ma 'khor lo dag gi lte ba'i zhes bya ba ni lce'i rtsa bar AHdmar po las skyes pa'i pad+ma'i dbus kyi dang mgo bor yi ge oM las skyes pa'i 'khor lo'i lte ba la'o//AHdang srog las zhes bya ba ni AHdmar po las skyes pa'i pad+ma la gnas pa'i yi ge AHdang / oM dkar po las skyes pa'i 'khor lo la gnas pa'i yi ge oM dag las rim pa ji lta ba bzhin gsung gi rdo rje 'jig rten dbang phyug ji lta bu zhig dang /sku rdo rje sa'i snying po 'dra ba bsgom par bya zhes 'brel to/ /thugs rdo rje la sogs pa de dag gi snying po ni de dag gi snying po zhes bya'o/ /snying po de dag gi 'od zer tshogs zhes bya ba ni thugs rdo rje la sogs pa'i thugs ka na gnas pa'i zla ba'i gdan gyi rdo rje dang / pad+ma dang 'khor lo'i dkyil 'khor na gnas pa hUM dang AHdang oM gyi yi ge'i 'od zer rnams kyi zhes bya ba'i don to//shes rab mchog dang 'brel pa mdzes pa rnams kyis ni zhes bya ba ni 'od zer las 'thon pa gzugs rdo rje ma la sogs pa rnam pa bcu po rnams kyis so/ /phyogs bcu na bzhugs pa'i thub pa'i dbang po rnams kyi thugs ka na gnas pa'i thugs kyi rdo rje la sogs pa rnams kun du mchod nas kun du mchod pa'i rgyal dbang rnams kyis ni zhes bya ba thugs kyi rdo rje la sogs pa shes pa mchog dang 'brel pas mdzes pa rnams kyis so//dpal ldan thugs kyi rdo rje 'chang / / zhes bya ba la sogs pa ni rim gyis thugs kyi rdo rje la sogs pa byin gyis brlabs pa'o/ /rdo rje mi phyed gsum bsgoms pa/ /zhes bya ba ni sku rdo rje la sogs pa rnams tha mi dad par bsgoms pa ste de'i rang bzhin zhes bya ba'i don to/ /gsung gi lam ldan zhes bya ba ni lce'i rtsa bar bskyed pa'o//gzhan ni grags par zad do/ /de nas tshigs su bcad pa rnams kyis byin gyis brlabs pa'i rdo rje gsum po bsam gyis mi khyab pa'i rnam pa nyid du bstan pa'i phyir brjod pa ni mtshan nyid dang bral ba zhes bya ba la sogs pa'o/ /tha dad pa'i mtshan nyid dang bral ba nyid kyi phyir na nam mkha' lta bu'i ngo bo nyid yin te/bsam gyis mi khyab pa yin no zhes bya ba'i don to/ /de ni 'di 'dra ba'i rdo rje gsum po kun du rtogs te/ rang rig bdag po'i cod pan gyis brgyan gyur/ /ces gzhan dang 'brel to/ /'dis ni bsgrub pa'i yan lag chos dang longs spyod rdzogs pa dang sprul pa'i mtshan nyid sku gsum gyi rang bzhin thugs dang gsung dang sku rdo rje zhes bya ba skyes bu byed pa'i 'bras bu chung ngu brjod pa yin no//de skad du/ chos dang longs spyod sprul pa rnams/ /'gro ba'i don nyid sgrub byed pa/ /de phyir thugs kyi rdo rje sogs/ /byin rlabs sgrub pa'i don du 'gyur//zhes gsungs so/ /phyogs 'khor kun na zhes bya ba la sogs pas ni yan lag bzhi pa bshad do//'dir yang thugs kyi rdo rje la sogs pa grub pa'i dus nyid na/ gsung rdo rje dang thugs rdo rje gnyis kyi bar du zla ba la gnas pa'i ral gri'i yu ba'i dkyil du skyes pa ye shes sems dpa' dam tshig sems dpa' dang 'dra bar blta bar bya'o//phyogs kyi 'khor lo kun na bzhugs pa'i thub pa'i dbang po rnams ni de'i 'od zer rnams kyis bskul nas bskul ba'i thub pa'i mchog de rnams nyid kyi 'od zer rnams las nges par 'byung ba'i rig ma'i tshogs gzugs rdo rje ma la sogs pa gang dag yin pa de dag rnams kyi lag pa rnams kyis bzung ba ye shes kyi chus gang ba'i bum pa gang dag yin pa de dag rnams kyis ye shes kyi chus dbang bskur bar gyur pa ni 'jam pa'i rdo rje'i rnal 'byor pa rang gi rigs kyi bdag po'i cod pan gyis brgyan 'gyur zhes bya ba mi bskyod pa'i cod pan gyis mdzes par 'gyur ro zhes bya ba'o//dbang bskur ma thag tu dbang bskur ba'i lha mo nang du 'dus pa dang / lha mo'i khu ba dag gis bskyed pa'i mi bskyod pa 'jam pa'i rdo rje'i cod pan du blta bar bya'o zhes bya ba'i don to/ / 'dis ni sgrub pa chen po'i yan lag dbang bskur ba'i rang bzhin dri ma dang bral ba'i 'bras bu chen po brjod pa yin te/ dbang bskur ba'i dri ma dang bral ba skye ba'i phyir ro/ /bsnyen pa la sogs pa yan lag bzhi po de nyid ni bdag po la brten pa nyid kyi mchog tu gyur pa dang / mi mthun pa ma lus pa zad par mi nus pas na chung ngu'i sgras brjod pa yin no//rgyu mthun pa'i 'bras bu la sogs pa chung ngu brjod zin to/ /de ni bsnyen pa'i yan lag gzhan bzhi rgyu mthun pa la sogs pa'i 'bras bu dang bcas pa shes rab sbyong bar byed pa chung ngu dang chen po'i yan lag bzhi po dag gi bar na gnas pa'i phyir na 'bring gi sgra'i khyad par du brjod par bzhed nas de bzhin zhes bya ba la sogs pa gsungs so//de bzhin zhes bya ba ni 'jam pa'i rdo rje bzhin du'o/ /bsnyen pa la sogs pa'i rim gyis rig ma mchog rnam par bsams nas de nyid shes pa'i sngags pas bde bar gshegs pa rnams mnyes par bya'o snyam du lhag par mos pas de dang lhan cig dga' bar brtsam mo zhes 'brel to//bsnyen pa la sogs pa de nyid ston pas na lha mo khyad par du byed pa ni rang gi snying gis te 'jam pa'i rdo rjes sprul pa'o/ /man ngag ni 'di yin te/ mdun du zla ba la gnas pa'i 'od kyis bskul bar gyur pa'i 'jig rten gyi khams kA kan di na gnas pa'i yi ge a la sogs pa'i rang bzhin can gyi de bzhin gshegs pa rnams nang du 'dus pa la sogs pa gnyi ga'i mnyes par byed pa dang sems can dbang bskur ba dang bral ba'i tshogs bskyed pa zhes bya ba'i rang lha'i snang ba zhes bya ba ni 'jam pa'i rdo rje'i rnam pa can yin no//'dis ni rgyu mthun pa'i 'bras bu 'bring po de'i bsnyen pa bstan pa yin no/ /mig sogs khengs gyur cing zhes bya ba ni snga ma bzhin du rang rang gi sa bon las skyes pa'i sa'i snying po la sogs pas mig la sogs pa drug po byin gyis brlab pa'o//'dis ni nye bar bsgrub pa rnam smin gyi 'bras bu 'bring mtshon pa yin no/ /yi ge gsum ni hUM AHoM ste 'di rnams snga ma bzhin du rdo rje thugs la sogs pa'i rang bzhin gyis sngar brjod pa'i gnas rnams su bsams pa ni bkod pa yin no//de ltar 'dis ni sgrub pa skyes bu byed pa'i 'bras bu 'bring bstan to/ /de nas snga ma bzhin du ye shes kyi chus dbang bskur ba la sogs pas mdangs dang ldan pa'i lus tsan ma ste/ dri ma med pa'i lus gang la yod pa de ni yi ge gsum bkod mdangs ldan lus can ma'o/ / 'dis ni sgrub pa chen po dri ma dang bral ba'i 'bras bu 'bring mtshon to/ /de nyid rigs lnga'i tshogs dang ldan pa de nyid kyis khyad par du byed pa brjod pa ni spyi bo zhes bya ba la sogs pa'o/ /spyi bo snying ga dang lte ba dang gsang ba bral gnyis la'o/ /sogs pa smos pas ni cha rnams bdag nyid ji lta ba'i rdul phra mos khyab pa'ang bsdu'o//rim pa ji lta ba bzhin oM hUM swA AHhA zhes bya ba rnams kyis so/ /sku yid rdo rje'i rigs mchog ces bya ba ni sku la sogs pa'i rigs lnga'i rang bzhin gyi lha ste sngags dang lha dag tha mi dad pa'i phyir na lnga po'i rnam pa can nyid kyi lus po byin gyis brlab pa ni de la sku rdo rje zhes bya ba'i rigs mchog dang yid kyi rdo rje zhes pa'i rigs mchog zhe sdang gi rigs dang /sogs pa smos pas rin po che'i rigs dang pad+ma'i rigs dang las kyi rigs kyang bsdu'o/ /'gro ba gsum po khyab par byed pa'i 'od kyi dkyil 'khor mchog ldan zhes bya ba ni 'od zer gyi tshogs thams cad du khyab par 'phro ba'o//da ni yi ge hUM gis rang gi rdo rje dang / yi ge oM gyis snying po rnam par sbyangs ma thag tu rang gi rig ma'i mtsho skyes yongs su sbyong ba nye bar bstan pa'i don du'ang khyad par byed pa ni a yig gis zhes bya ba la sogs pa gsungs so//yi ge a yis rmad du byung ba'i snying po mchog tu byas pa'ang yin la/ hUM gi yi ges 'dab ma brgyad sprul pa'ang yin pa'i pad+ma gang la yod pa de la de skad ces bya'o/ /de lta bur gyur pa sa bon gyi yi ges bskul ba'i man ngag las gnas skabs las thob pa nang du 'dus pa de ni rnam par bsams nas so//ji ltar gyur pas dga' ba brtsam zhe na/ brjod pa de nyid shes pa'i sngags pas zhes bya ba la sogs pa'o/ /rig ma dam pa ni rgyu'i rdo rje 'chang gi rig ma ste/ de'i rgyu mthun pa'i ngo bo'o/ /thabs dang bcas par gyur pa'i rang gi lus gang la yod pa'i sngags pa de la de skad ces bya'o//bcom ldan 'das kyi rdo rje ni yi ge hUM gis dang de'i snying po yi ge maM gyis bskyed par bya ba yin te/ de nyid kyi phyir de ma thag tu/ hUM gi rdo rje las 'thon dri med pa/ /zhes bshad par 'gyur ro/ /rjes su mnyes pa'i rnal 'byor byin gyis rlob pa'i sngags gsungs pa ni oM zhes bya ba la sogs pa'o//gzhung de dag gi bar gyis ni dang po'i rnal 'byor pa'i zhes bya ba'i ting nge 'dzin dang po brjod pa yin no/ /da ni dkyil 'khor rgyal po mchog brjod pa'i don du gsungs pa ni/snying ga'i zla ba'i zhes bya ba la sogs pa'o//snying ka'i zla ba'i sngags ni ye shes sems dpa'i thugs ka'i zla ba la gnas pa'i mtshan ma'i dbus ni gnas pa'i zla ba la gnas pa'i yi ge maM ste/ de'i 'od rnams kyis ma lus par rgyal ba'i tshogs rnams bdag nyid la kha nas bcug nas de nyid yi ge hUM las skyes pa'i rdo rje'i lam nas byung ba'ang yin la/rig ma'i mtsho skyes su gnas par byas pas na/ mtsho skyes kyi nang na gnas pa'ang de yin zhing / zla ba'i khu bar gyur pa nyid kyis yid mchog gi rang bzhin can yang yin no zhes de las 'dzin pa'o//phyi nas de nyid rang gi snying pos rang gi dkyil 'khor pa kun gyi ngo bor bskyed pa ste/khu ba de las bskyed pa'i yi ge maM las skyes par bsam byas te'o/ /'gro ba dang rang gi shes pa sbyang ba'i don du brten pa'i sems dang ldan pas 'chad par 'gyur ba'i cho ga 'di yis su'o/ /yang dag spros zhes bya ba ni rang gi dkyil 'khor pa bzhag pa'i don du pad+ma'i nang gi dkyil 'khor las gdon par bya'o zhes bya ba'i don to//spro ba'i cho ga brjod pa ni/ badzra d+h+r-ika ces bya ba la sogs pa'o/ /thugs kyi rdo rje mi bskyod pa'i dang po mchog 'dra ba'i phyag na rdo rje la sogs pa 'dzin pa dang ldan pa'o/ /bsdus nas zhes bya ba ni spros pa'i rnam pa bsdus pas khyer te 'ongs pa'o//blo dang ldan pas zhes bya ba ni 'jug pa po dang gzhug par bya ba la sogs pa 'dzin pa dang bral ba'o/ /bdag nyid la dngos po kun gyis rab tu gzhug pa ni bdag nyid thams cad kyis gzhug pa'o/ /dzi na dzika ces bya ba dang spros pa'i sngags kyis bskul nas so//sku rdo rje ni rnam par snang mdzad do/ /de bzhin zhes bya ba ni thugs kyi rdo rje bzhin du sngags kyis bskul bas so/ /shar gyi zla ba la bsam mo/ /zhal ras gzhon nu lta bu'i zhes bya ba ni zhal 'jam pa'i rdo rje dang 'dra ba'o/ /gser mchog btso ma'i mdog 'dra ba//margad sogs kyis phyag drug mdzes pa'i zhes bya ba ni gser gyi mdog can rin po che ljang gul sogs pas g.yas dang cig shos kyi phyag drug spras pa'o/ /lhor rat+n-i d+h+raka ces bya bas rin chen dbang bsgom par bya'o zhes 'brel to/ /pad+ma rA ga ni nor bu pad+ma rA ga'o/ / de'i mdog dang 'dra ba'i 'od dpag med do/ /zhal gnyis zhes bya ba ni g.yas dang cig shos kyis so/ /de bzhin zhes bya ba ni gzhon nu bzhin du sngo ba dkar po'o/ /de'i nub tu ni A ro l-i ka ces bya bas bskul nas 'od dpag med bsgom par bya'o zhes bya ba'i don to/ /nor bu margad ltar snang zhes bya ba ni rin po che ljang gu ltar snang ba'o//snga ma bzhin/ zhal ras la sogs phun sum tshogs ldan zhing / /zhes bya ba la phun sum tshogs pa dang bcas pa'o/ /don yod ces bya ba ni pradz+nyA+e d+h+r-ika ces bya bas bskul nas byang phyogs su bsgom par bya'o zhes bya ba'i don to//rgyal ba'i thun mong gi khyad par brjod pa ni/ ral pa'i cod pan gyis mdzes pa'ang yin la 'od 'bar ba'i rin chen dam pa sna tshogs kyi rgyan dang ldan pa'ang yin pas de skad ces bya'o/ /rig mas 'khyud cing rang gi snang ba'i rig mas mgon dang bcas pa ni rig mas yongs su bzung ba'i sku can gang yin pa de dag la de skad ces bya'o//thams cad ces bya ba ni brjod pa rnams nyi ma'i gdan la brjod pa yin no/ /rnam par snang mdzad ni zla ba'i gdan dang ldan par khyad par brjod pa'i phyir de'i gdan nyi ma yin par thal ba med do/ /de ltar yang sgra shes pa'i gzhung lugs ni spyir byas pa'i sgrub pa ni khyad par du byas pas gnod pa yin no zhes bya ba yin no//mchog ces bya ba ni snying rje dang sa dang thabs dang ring du song ba rnam par dag pa'i rang bzhin yin pas phul du phyin pa'o/ /sgeg ma rdo rje sku bzhin snang ba zhes bya ba ni sgeg pa'i ros brgyan zhing zhal la sogs pa rnam par snang mdzad dang 'dra ba'o//spyan ma ni mo ha ra ti zhes bya bas bskul bas me'i phyogs kyi yul gyi char gyur pa'o/ /dga' chen bde ba la mchog tu brtson pa gang la yod pa de la de skad ces bya'o/ /byams pa dang chu dang smon lam dang mi g.yo ba'i rang bzhin gyi mA ma kI ni dwe Sha ra ti zhes bya bas bskul nas bden bral gyi mtshams su bsgom mo zhes bya ba'i don to//gsung gi dbang phyug lta bur dri ma med pa ni lus gang la yod pa de la de skad ces bya ste mdog dmar po zhes bya ba'i don to/ /dam pa zhes bya ba ni dga' ba dang me dang stobs dang legs pa'i blo gros rnam par dag pa'i ngo bo nyid kyis mchog tu gyur pa ste/gos dkar zhes bya ba rA ga ra ti zhes bya bas bskul nas rab 'jig gi phyogs su bsgom par bya'o/ /btang snyoms dang rlung dang ye shes kyi pha rol tu phyin pa dang chos kyi sprin rnam par dag pa'i sgrol ma ji skad bshad pa'i mtshan nyid can no//badzra ra ti zhes bya bas bskul nas dbang ldan du bsgom par bya'o/ /'di dag gi gtso bo'i mtshan ma rnams brjod pa ni 'khor lo mchog dang zhes bya ba la sogs pa'o/ /lhag ma zhes bya ba ni ral gri la sogs pa'i mtshan ma lhag ma rnams so//dkyil 'khor gyi grwa bzhi po rnams dang rtsa ba'i sgo'i ngos gnyis su ni gzugs rdo rje ma la sogs pa'i lha mo drug po rnams rin pa ji lta ba bzhin du zhes sku la sogs bzhin zhes bya ba rnam par snang mdzad la sogs pa dang 'dra ba ste bdag nyid ji lta ba bzhin rigs kyi bdag po'i mdog 'dra ba yin no zhes bya ba'i don to//chos kyi dbyings rdo rje ma ni mdog dkar po yin no/ /de nyid gsum gyis zhes bya ba ni/ oM AHhUM zhes bya ba'i sngags kyis spros nas 'chad par 'gyur ba'i me long la sogs pa'i rtsa ba'i mtshan ma dang ldan par bsgom mo zhes bya ba'i don to//da ni sgo'i khro bo rnams brjod pa ni ya mAn+ta kr-ita ces bya ba la sogs pa'o/ /nyi mar zhes bya ba ni nyi ma'i gdan la'o/ /'di ni shes rab mthar byed la sogs pa la'ang rjes su 'jug par bya'o//mtha' yas pa 'jigs su rung zhing phyogs kun du khyab par byed pa'i 'od gang la yod pa de la de skad ces bya'o//'jigs byed dus mtha'i me mi bzad pa'i sprin gang yin pa de'i tshogs te phung po de lta bu'i mdog 'di gang la yod pa de la de skad ces bya'o/ /thugs bdag rgyal po ni mi bskyod pa ste de dang mtshungs pa'i zhal la sogs pa mtshungs pa'i sku ni gshin rje mthar byed do//de las drag po'i rigs du ma spros pa'i 'od rnams kyis mtshon pa'i gshin rje mthar byed do/ /brang 'gro gdug pa ste mi srun pa'i lus kyis rab tu brgyan pa gang yin pa de la de skad ces bya'o/ /don ni 'di yin te bung ba ltar gnag pa'i mtha' yas thod du bcings pa/le brgan gyi mdog can gyi 'jog po bsnyems pa dang bcas bas rna cha byas pa/ pad+ma dkar po chen pos do shal gyi rgyan byas pa/ karko Ta ljang gu'i mchod phyir thogs pa dang ldan pa/ dung skyong ser bos lag gdub byas pa/ mdog sna tshogs pa can gyi rigs can gyi dpung rgyan gyis kun nas spras pa/pad+ma dkar bo lta bu'i nor can gyis ske rags byas pa/ pad+ma'i rtsa ba ltar dkar bas rkang gdub byas pa'o/ /brang 'gro gdug pas brgyan pa'i khyad par ni shes rab mthar byed la sogs pa'i khro bo dag la yang blta bar bya'o//de lta bur gyur pa'i gshin rje mthar byed ni ya mAn+ta kr-ita ces bya bas bskul nas spro bar bsam mo/ /'gro ba'i rmongs pa rab rib 'joms pa'i phyir bla na med pa'i 'od ldan no/ /nyon mongs pa'i bdud la sogs bas thub par dka' ba'i phyir na gzhan gyis mi thub pa'o//drag shul can zhes bya ba ni rab tu gtum pa'i rnam pa can no/ /drag shul nyid kyang bzhin khro gnyer dang bcas pa'i mche ba rnam par gtsigs pa/ zhal gdangs shing khro ba dang bcas pas bzhad pa/gsus khyim dang brla dang brang gi khyon dag che zhing mkhregs la shin tu rgyas pa/g.yon brkyang bas bzhugs pa/ lce yug pa/ lus kyi yan lag thung zhing rgyas pa mi thung gi rnam pa can/ sma ra kham ser gyen du 'bar zhing dbu skra gyen du bsgreng ba/ 'od 'bar zhing mig zlum po nyi ma lta bur rab tu g.yo ba zhes bya ba'i don to/ / gtum pa'i khro bo nye bar mtshon pa nyid kyis ni khyad par 'di ni gshin rje mthar byed la sogs pa rnams la'ang sbyar bar bya'o/ /'di lta bu'i mtshan nyid dang ldan pa'i shes rab mthar byed ni pradz+nyAn+ta kr-ita ces bya bas bskul bas na lho sgor bsam mo/ /ji skad brjod pa'i khyad par can gyi rta mgrin te pad+ma mthar byed ni pad mAn+ta kr-ita ces bya bas bskul nas nub kyi sgor bsam mo zhes bya ba ni mdor bsdus pa'i don to//dus mtha'i me ltar rab tu mi bzad pa//zhes bya ba ni 'jig pa'i dus kyi me dpung ltar drag po'o/ /dpa' bo ni bgegs 'jigs par mdzad pas so/ / 'phags pa bdud rtsi 'khyil pa bgegs mthar byed ni big+hanAn+ta kr-ita ces bya bas bskul ba byung gi sgor bsgom mo zhes bya ba'i don to/ /da ni khro bo rnams la dbang bskur ma thag pa'i bdag po'i cod pan dang gtso bo'i mtshan ma rnams rim pa ji lta ba bzhin brjod par 'dod pas gsungs pa ni rnam snang zhes bya ba la sogs pa'o//rdo rje sogs zhes bya ba 'dir sogs pa smos pas ni mtshan ma lhag ma ral gri la sogs pa sdud pa'o/ /'di la'ang brjod pa lha thams cad zhal gsum pa phyag drug pa/ rtsa ba'i phyag gnyis kyis rang gi rig ma dang thabs la 'khyud pa/ de la dkar po rnams ni g.yas dang g.yon pa'i zhal gnag pa dang dmar ba'o//sngon po dag ni g.yas dang g.yon pa'i zhal dkar ba dang dmar ba'o/ /ser po dang dmar po dang ljang gu rnams ni g.yas g.yon gyi zhal sngo ba dang dkar ba'o/ /phyag lhag ma rnams kyis ni rim pa ji lta ba bzhin ral gri dang nor bu dang pad+ma bsnams pa'o//gang dag ral gri gtso bor 'dzin pa de dag gi g.yas pa'i phyag gnyis par 'khor lo'o/ /gang dag pad+ma dang rin po che gtso bor 'dzin pa de dag la ni g.yon pa'i phyag gnyis par 'khor lo bsgom zhes bya'o/ /ye shes kyi dkyil 'khor spyan drang ba brjod pa'i don du gsungs pa ni/de ltar zhes bya ba la sogs pa'o/ /brjod ma thag pa'i tshogs kun nas te thams cad nas rdzogs pa'i dkyil 'khor la dngos po kun gyis rnam par bltas nas ni/ snying ga'i sngags kyi 'od zer nyid lcags kyu yin pa des so//don ni 'di yin te/ rang rang gi sa bon gyi 'od zer gyi lcags kyu rnams dang yi ge dzaH brjod pa las gshin rje mthar byed kyi thugs ka nas spros pa'i khro bo rnams kyis bskul nas bkug pa 'jam pa'i rdo rje'i bdag po can gyi dkyil 'khor gyi rnam pa dam tshig gi 'khor lo'i mdun na gnas pa'i pad+ma la gnas par bsgom mo//gang dag gis mthar byed 'joms pa ste gshin rje mthar byed la sogs pas ye shes kyi 'khor lo bsrung ba byas pas te/ gang gis bgegs dang bral bar bsgrub pa'i rnal 'byor pa de ltar gyur pa des bsam byas te'o/ / shes rab thabs te rig ma dang skyes bu'i ngo bo dag gi rang bzhin gyi ting nge 'dzin dri ma med pa de las skyes pa'i bde mchog gang yin pa des khengs pa yang de yin la/ drangs pa'i thub pa'i 'khor lo yang yin pa'o/ /rang gi snying pos mngon bsngags ni rang gi sngags kyis byin gyis brlabs pa'o//tsan+dan dang me tog sogs ldan ni bdud rtsi lnga dang ldan pa ste lhan cig tu byed pa ldan pa zhes bya ba'i don to/ /yon chab ni nye bar mtshon pa yin pa'i phyir 'thor 'thung la sogs pa yang ngo / /phul nas ni zhes bya ba ni bsnams nas dkyil 'khor gyi 'khor lo de rim gyis rang gi snying ga'i 'od zer gyis bskul ba'i shes rab mthar byed la sogs pa brjod pa/dzaH hUM baM hoH zhes bya ba'i sngags rnams kyis gzhug pa dang bcing ba dang mnyes par bya ba'i rim pas dam tshig gi dkyil 'khor du grib ma bzhin gzhan bcug pa ltar gzhug par bya'o//de ltar bsnyen pa byas pas ni rang nyid bzhin du dbang bskur sogs byas la zhes bya ba 'jam pa'i rdo rje kho na ltar bsnyen pa la sogs pa'i rim gyis dbang bskur ba byas pa la 'chad par 'gyur ba'i cho ga 'dis ni 'bad nas mchod par bya ba yin no/ /'dir bsnyen pa la sogs pa'i yan lag bzhi ni de'i rgyu mthun pa'i 'bras bu yang yin la gsal bar gyur pa nyid kyis mi mthun pa'i phyogs zad par byed par nus pa'i phyir chen po'i sgra'i khyad par yin zhing /lha thams cad brten pa nyid kyis spyi yang yin no/ /dbang bskur ma thag tu rgyal ba rnams dang /mA ma kI dang sgra rdo rje dang / chos kyi dbyings kyi rdo rje ma rnams kyi cod pan ni mi bskyod pa yin par bsgom mo/ /de bzhin du spyan ma dang / gzugs rdo rje ma dag ni rnam par snang mdzad do/ /dkar mo dang rdo rje ma dag la ni 'od dpag med do/ /sgrol ma dang reg rdo rje ma dag ni don yod do//dri rdo rje ma dag ni rin chen dbang ngo / /de ltar dbang bskur ba byas pa'i 'khor lo mchod pa'i don to/ /rang gis bon gyis ni zhes bya ba la sogs pa mchod pa'i sngags kyi mthar thug pas brjod pa yin no/ /gzugs la sogs pa thams cad ces bya ba la/ gzugs ni gzugs kyi phung po ste de'i rnam par dag pa yin pa'i phyir rnam par snang mdzad do/ /tshor ba la sogs pa'i phung po rnam par dag pa rin chen dbang la sogs pa gang la de dang por yod pa gzugs la sogs pa de dag thams cad rang rang gis bon gyi 'od rnams kyis drangs nas kha nas rang gi lus la bcug ste/rdo rje las byung 'od kyi dkyil 'khor can byang chub yid kyi ngo bos te/ 'od kyi dkyil 'khor dang bcas pa'i zla ba'i khu ba'i rang bzhin du rig ma'i pad+ma'i nang du bsgom par bya'o/ /de nas zhes bya ba ni bsgom pa de'i de ma thag tu shes rab kyi ba spu so so nas byung ba rnam pa sna tshogs pa'i 'od zer gyi tshogs rgya chen po nam mkha'i dkyil ma lus pa khyab par byed pa rnams spro ba po dang /spro ba po la sogs pa'i shes pa dang bral ba'i blo gros dang ldan pas kun du ste mtha' dag nas spro bar bya'o/ /de nas 'od zer sgo nas 'thon pa dri ma med pa'i rgyan rnams kun gyis legs par brgyan pa'i lus gzugs la sogs pa'i lha mo rnams kyis rim bzhin zhes bya ba go rims ji lta ba bzhin me long la sogs pas rtsa ba'i phyag mtshan drug po yid du 'ong zhing mdzes par gyur pa lag pa'i yan lag rnam par sgeg pa dang bcas shing snang ba can dang /gang yang 'od zer gsal bas sprul pa sna tshogs kyi mchod pa'i sprin sna tshogs rnam par spro ba ste gzugs la sogs pa'i mchod pa'i sprin gyi tshogs spro bar byed cing gang dag dngos po rnams sgyu ma la sogs pa dang / gang yang 'jig rten gyi lta ba yul de la rjes su chags pa'i 'jig rten dang rjes su mthun pa'i gar dang glu la sogs pa bsten pa'i rang bzhin te gnyis la mkhas shing rtogs pa dang bral bar gyur pa'i bde ba skye ba'i rgyur gyur pa/rdzogs pa'i byang chub kyi yid kyis bskyed pa rang gi 'od zer gyis bkug pa'i gzugs la sogs pa'i khyad par bya ba'i sa bon bcu'i 'od zer las 'thon pa'i lha mo rnams dang /de bzhin du phyi rol gyi dril sogs pa thams cad kyis kyang mchod par bya ba dang mchod pa la sogs pa tha dad pa'i rtog pa las nges par grol ba'i sngags pas dkyil 'khor gyi nang du chud pa'i rgyal ba'i dbang po rnams la/oM sarba ta thA ga ta pU dza badzra swa b+hA ba At+ma kou0f85haM zhes bya ba'i sngags kyis byin gyis brlabs pas de ltar mchod par bya'o/ /bstod pa brjod pa ni/ der rjes zhes bya ba la sogs pa ste/ mchod pa'i de ma thag tu sgra brnyan lta bur bstod pa'i rang bzhin s gra'i tshogs mtha' dag nges par rtog cing kun du lta bar byed pas snang ba'i rang bzhin stod pa po'i chos rnams rang gi yid kho na lhag pa'i lha 'dod pa'i lha yin te/de la bstod pa 'di skad ces bya ba/ /mi bskyod rdo rje ye shes che/ /zhes bya ba la sogs pa'i tshigs su bcad pa rnams kyis bstod pa brjod pa bsgom par bya'o//bskyod du med pas ni mi bskyod pa ste/ skye ba med pa'i rang bzhin nyid kyis na nyon mongs pa'i bdud la sogs pas bskyod pa med pa'i phyir ro/ /sna tshogs pa'i rnam pa rnams gsang ba gsum gyi rang bzhin yin pas dbyer med pa'i phyir rdo rje ste shin tu rnam par dag pa'i ston pa'o//ye shes chen po mtshan nyid nges pa med pas kun du bzang po'i rnam pa yin pas 'gro ba me long lta bu'i ye shes kyi ngo bo yin pa'i phyir ro/ /chos med pas chos nyid la ldan pa med pa'i phyir byed pa med pa nyid kyis mtha' bzhi rnam par dag pas sems can gyi don yin pa'i phyir rdo rje'o//stobs bcu ni chos kyi gzhi yin pa'i phyir dbyings so/ /de nyid kyi phyir na chen po yin no/ /khams gsum pa'i rang bzhin rdo rje gsum gyi bdag nyid can yin pas na bsam gyis mi khyab pas sangs rgyas la sogs pa rnam pa du ma'i rang bzhin rtogs pa'i phyir mkhas pa yin te/mnyam pa nyid kyi ye shes kyi bdag nyid nye bar mtshon pa'o/ /chos thams cad bdag med pas chos kyi sku sna tshogs pa'i rnam pa byang chub kyi sems kyi rang bzhin yin pa'i phyir na dkyil 'khor gsum mo//de kho na nyid bzhin du gyur pa'i rdo rje gsum du gyur pa'i rang bzhin yin pas na mchog ste so sor rtog pa'i ye shes kyi bdag nyid du brjod do/ /rdo rje'i tshul du chos kyi 'khor lo bskor ba'i phyir na rdo rje'o/ /sgrogs zhes bya ba ni sgrogs shig ces bya ba ste bla na med pa'i sangs rgyas kyi chos zhes bya ba ni lhag ma'o//bya ba sgrub pa'i ye shes kyi rnam par dag pa brjod pa'i don du de lta bu'i mi bskyod pa la sogs pa la tshig so sos bos nas khyod la phyag 'tshal zhes bya ba phyag 'tshal lo zhes brjod pa'i chos rnams kyis sgrogs zhes brjod pa yin no//de bzhin du phung po la sogs pa bdag med pa'i rnam pa yin pas na bye brag tu snang ba'i las khyad par du 'phags par snang ba'i phyir rnam par snang mdzad de/shin tu rnam par dag pa brjod do/ /chos thams cad bdag med pas rgya che ba la sogs pas sku gsum gyi spyod pa zab mo'i rang bzhin yin pa'i phyir dag pa ste me long lta bu'i dag pas brjod pa'o//rgyu dang 'bras bu bdag med par mnyam pa nyid kyis rtog pa'i dra ba rnam par bsal bas dri ma dang bral ba'i phyir rdo rje zhi ba ste/ mnyam pa nyid kyi rang bzhin du brjod pa'o/ /mtshan ma med pa'i rnam par dag pa yin pas sgyu ma'i chags pa chen po'i rang bzhin yin pa'i phyir dgyes pa che ba ste so sor rtog pa'i khyad par ro//thun mong ma yin pa'i stong pa nyid ston pas dri ma med pa'i chos 'chad pa'i phyir dang / dbyer med pa'i byang chub kyi sems kyi rang bzhin yin pa'i phyir mchog gi yang mchog yin pas rang bzhin 'od gsal ba mchog gi mchog ste bya ba sgrub pa'i rnam par dag pa'o//de ltar bskul nas/ rdo rje khyod la phyag 'tshal bstod/ /ces snga ma bzhin smras pa'o/ /dngos po med pa'i rang bzhin byang chub sems kyi rang bzhin ni rin po che yin te/dga' ba'i rgyu yin pa'i phyir ro/ /des mdzes pas na rin chen rgyal po ste shin tu rnam par dag pa nyid brjod do/ /mtshan nyid dang bral ba rab tu gsang bar bya ba gzugs brnyan dang mtshungs pa'i 'gro ba'i rnam par spyod pa'i rang bzhin yin pas na shin tu zab ste/me long lta bu'i rnam par dag pa'o/ /dbye ba med pa nam mkha' dang mnyam pa bdag med pa'i bdag nyid chen po nyid kyis dri ma med pa'i phyir rdo rje nam mkha' dri ma med de mnyam pa nyid kyi khyad par ro/ /rten cing 'brel bar 'byung ba'i chos nyid rnam par dag pa gos pa med cing tha mi dad pa nyid mtshon par byed pa'i phyir ngo bo nyid dag gos pa med de so sor rtog pa'i ye shes rnam par dag pa'o//byang chub kyi tshul gyi rang bzhin byang chub sems kyi ngo bo nyid dbyer med pa'i chos bsdus pa ston par byed pa nyid kyis na rdo rje'i sku ste bya ba grub pa rnam par dag pa'o//de ltar bos nas smras pa ni snga ma bzhin no/ /skye ba med pa'i sems kyi rang bzhin nyid kyis dpag pa'i yul ma yin pa'i rdo rje dpag med de shin tu rnam par dag pa nyid do/ /dngos po la mngon par zhen pa la stong pa nyid kyi lhag par ston pas mdzes pa'i phyir rgyal po che ste me long lta bu rnam par dag pa'o//gzung ba la sogs pa'i rtog pas stong pa'i phyir mi rtog go/ /stong pa nyid kyi gzhi yin pa'i phyir nam mkha' rdo rje 'dzin pa'o/ /yang na dag pa nyid kyis brtags pa'i tha dad pa dang bral ba nyid kyis dang rdo rje sems dpa'i ngo bo nyid yin pa'i phyir mi rtog nam mkha' rdo rje 'dzin te mnyam pa nyid kyi khyad par ro//nam mkha' las skyes pa'i mtshan ma can nyid kyis 'dod chags chen po'i bdag nyid can sku dang gsung dang thugs kyi rang bzhin yin pa'i phyir ro/ /'dod chags pha rol phyin pa brnyes te/ so sor rtog pa rnam par dag pa'o//sna tshogs pa nyid ni de kho nar dbyer med pa'i mthar thug pa nyid kyis 'gro ba tshim par byed pa'i phyir rdo rje ste bya ba grub pa rnam par dag pa'o/ /de ltar bos nas rdo rje gsung khyod la phyag 'tshal zhes gsungs te snga ma bzhin smos so/ /rang bzhin rnam par dag pas sku la sogs pa dbyer med pa'o//de bzhin gshegs pa'i rang bzhin nyid kyis sems can gyi don la sogs pa 'bras bu med pa dang mi ldan pas na don yod rdo rje ste shin tu rnam par dag pa nyid bstan to/ /gzod nas dag pas shes rab kyi bdag nyid kyis sangs rgyas kyi ye shes kyi dri ma med pa'i rang bzhin yin pa'i phyir rdzogs pa'i sangs rgyas te me long lta bu bstan to//nam mkha' dang mnyam pa'i spyod pa'i bdag nyid can ston pas chos kyis thams cad kyi 'dod pas thams cad rdzogs par byed pa'i phyir 'dod pa thams cad yongs dgongs mdzad de mnyam pa nyid brjod do//ngo bo nyid med pa'i byang chub kyi sems kyi ngo bo las byung bas na dag pa'i ngo bo las byung ba ste so sor rtog pa'i rnam par dag pa brjod pa'o/ /stong pa nyid kyi tshul rang bzhin yin pa nyid kyis dbyer med pa'i sems kyi rang bzhin yin pa'i phyir rdo rje sems dpa' ste bya ba sgrub pa rnam par dag pa'o//de ltar bos nas smras pa ni khyod la 'dud ces bya ba ste/ snga ma bzhin no/ /bstod pa brjod nas da ni bdud rtsi myong ba brjod pa ni/ rlung dang zhes bya ba la sogs pa'o/ /yi ge yaM las skyes pa rgyal mtshan sngon pos mtshan pa gzhu lta bu'i rlung gi dkyil 'khor ro//der yi ge raM las skyes pa me'i dkyil 'khor ni me'i dkyil 'khor ro/ /der ni yi ge a las skyes pa'i ro 'dzin gyi snod dang / de la gnas pa'i rdzas lnga po so sor sa bon gyis byin gyis brlabs shing sa bon gyi 'od kyis drangs pa'i thub pa'i dbang po dpag tu med pa rnams nang du zhugs pa hUM yig dkar po'i rdo rjes spar zhing spos pas cho ga bzhin du bdud rtsi lngar gyur pa pad+ma'i nang na gnas pa 'bar ba'i yi ge oM gyis byin gyis brlabs shing mdangs gsal ba skad cig la rab tu sbar te/de nas zhes bya ba de'i 'og tu ji srid 'dod pa yi ge gsum gyis mngon par bsngags pa 'chi ba la sogs pa'i sdug bsngal sel ba nyid kyis ye shes kyi bdud rtsi'i rang bzhin du gyur pa bsgoms nas/hUM yig sngon pos bskyed pa rdo rje rtse gsum gyi bdag nyid can gyi lce dang ldan par bdag nyid kyang bsgoms te/ snying ga'i zla ba'i dkyil na gnas pa rgyal ba'i tshogs ma lus pa rnams rang gi sa bon 'od kyis bskul bas so so'i lag na gnas pa'i bdud rtsi des ma chags par tshim par bya'o zhes bya ba'i don to//'dir yang gtsang ba dang mi gtsang ba'i rnam par rtog pa bor bar bya ste thams cad ngo bo nyid kyis dag pa'i phyir ro/ /'di yan chad kyis ni dkyil 'khor rgyal po mchog ces bya ba'i ting nge 'dzin gnyis pa brjod pa yin no//da ni snying ga'i zhes bya ba la sogs pa thams cad yongs su dag par bya zhes bya ba'i mthar thug pa 'dis thig le'i rnal 'byor brjod pa yin no/ /ye shes sems dpa'i snying ga'i 'od kyis sprul pa mtha' yas pa'i thub pa'i dbang po gang dag yin pa de dag gis rdzogs par sangs rgyas su byas pa dang /de nyid kyi phyir kun nas 'khrul pa dang bral bar gyur pa'i 'gro ba ma lus pa rang gi sngags te ye shes sems dpa'i snying ga'i sngags la bsdus te/ gzugs sogs rnam pa dag las nges grol ba zhes bya ba la sogs pas brjod pa'i don dran par byas nas sngags kyi thig le'i rang bzhin rang gi yid yongs su bsgom mo zhes bya ba'i don to//gal te phyi rol gyi don yod na ye shes sems dpa'i thugs ka na gnas pa'i ral gri la 'dug pa'i sa bon gyi lus su rdzogs pa'i sangs rgyas su byas pa'i 'gro ba ma lus pa ji ltar nang du sdud/de grub na ni thams cad kyi rang bzhin gyi dkyil 'khor gyi 'khor lo rnam par bsgom pa 'thad par 'gyur ba yin no snyam pas don yod pa la sgrub byed kyi tshad ma med pa nyid re zhig brjod pa ni/gzugs sogs rnam pa zhes bya ba la sogs pa'o/ /gzugs sogs rnam pa dag las nges grol ba/ /zhes bya ba ni gzugs la sogs pa'i rnam pa dang bral ba'o/ /de 'dzin zhes bya ba ni gzugs la sogs pa de 'dzin pa mngon sum gyis mthong ba med la gzung ba 'ga' zhig kyang mngon sum gyis mthong ba med kyi/'on kyang gzugs la sogs pa'i rnam pa can rang rig pa'i mngon sum gyis rang bzhin rnam par rtog pa med cing ma 'khrul ba'i mngon sum nyid rab tu gsal bar zad do/ /gzung ba'i rang bzhin la sogs pa'i rnam par rtog pas bzor byas pa yin no zhes 'ongs pa'o//ji skad du/ /blo yis nyams myong bya gzhan med/ /de yis myong ba gzhan yod min/ /gzung dang 'dzin dang mi ldan phyir/ /de ni de ltar rang bzhin gsal/ /zhes gsungs pa'o/ /de bzhin du/ /blo bdag rnam par dbyer med kyang //mthong ba phyin ci log rnams kyis/ /gzung dang 'dzin pa myong ba rnams/ /tha dad bcas bzhin rtogs 'gyur te/ /zhes gsungs so/ /gal te don shes pa'i myong ba ni chos ma yin nam/ de ji ltar rig pa po med par 'gyur/ /chos ni chos can la ltos par mthong ste/dper na chos pa la sogs pa bzhin no/ /des na myong ba'i bya ba 'di la gdon mi za bar nyams su myong mkhan byed pa po gzhir gyur pa'i chos can 'ga' zhig yod dgos so/ /de gzugs la sogs pa'i yul can yin pa'i phyir na phyi rol yang 'grub bo/ /des na rjes su dpag pa 'am don gyi go bas gzung ba dang 'dzin pa grub pa yin pas de ji ltar bkag snyam du dgongs nas gzhan gyis kyang ma yin 'brel ba mthong ba med phyir ro zhes gsungs te/gzugs la sogs pa'i rnam pa las nges par grol ba gzung ba dang 'dzin pa mthong ba ma yin no zhes 'brel to//bsam pa ni 'di yin te rjes su dpag pa don gyi go ba 'am gzhan gyis nye bar brtags pa'i tshad ma gzhan gyis kyang rang nyid kyis lkog tu gyur pa'i don rtogs pa ni ma yin te/ mngon sum du gyur pa'i phyir ro/ /'brel pa gzhan las kyang ma yin te/ thams cad las thams cad rtogs par thal pa'i phyir ro//'brel pa yang de'i bdag nyid dang de las byung ba dag las mi 'khrul pa dang ldan pa gzhan ni yod pa ma yin no/ /de la de'i bdag nyid kyi 'brel pa khas len na chos dang chos can dag dngos po la gcig kho na yin pa'i phyir gzugs la sogs pa'i rnam pa can gyis myong ba nyid 'ba' zhig yod pa yin la 'dzin par byed pa la sogs pa'i dbye ba ni ldog pa'i rgyu mtshan can yin pa'i phyir rtogs pa po'i zhen pa'i dbang gis brtags pa kho na yin pa'i phyir yang dag par rtogs pa yin no//de las byung ba'i 'brel pa yang nges par byed pa'i mngon sum dang mi dmigs pa srid pa ma yin te chos can 'dzin pa po la lkog tu gyur pa ni de dag yod par mi 'os pa des na de las byung ba'ang srid pa ma yin no//gzugs la sogs pa'i shes pa gzhan du mi 'thad pas gzugs la sogs pa bzhin du 'dzin pa po rjes su dpag par bya ba yang ma yin te/rgyu'i tshogs snga ma tsam gyis gzugs la sogs pa'i rnam pa can gyi shes pa skyed pa'i phyir ro/ /de lta na yang rgyu mtshan gzhan khas len na thug pa med par thal ba'i nyes pa bsal bar dka'o/ /des na gzung ba dang 'dzin pa dang rig pa'i dbye ba ni dngos po ma yin no//chos la sogs pa ni don dam par de lta de ltar skyes pa'i don gyi rang bzhin nyid la ldog pa tsam gyis brtags pa'i tha dad pa yin no/ /de la yang dngos po nyid du bya ba dang byed pa po tha dad pa'i chos dang / chos can yod pa ni ma yin no/ /myong ba las gzhan pa'i 'dzin pa po med mod/nang du yang dag par myong bar 'gyur ba'i bde ba la sogs pa de nyid ni phyi rol na gnas pa'i gzugs la sogs pa 'dzin pa yin par yang dag par myong ba yin pa des na ji ltar gnyis su med par 'grub snyam du dogs pa la brjod pa ni bde sogs la ni zhes bya ba la sogs pa'o//bde ba la sogs pa myong ba la ni gzugs la sogs pa de dag 'dzin par byed pa la 'ga' yang mthong ba med do/ /gang gi phyir bde ba la sogs pa rab tu 'jug pa ni gzugs la sogs pa dang / lhan cig gcig pa nyid du rtogs pa de'i phyir gzugs la sogs pa bzhin du 'dzin pa ma yin par 'thad pa yin no//ji ltar gzugs la sogs pa cig car rtogs pa nyid kyis g.yas g.yon gyi rwa ltar phan gdags par bya ba dang phan 'dogs par byed pa med pa'i phyir bde ba la sogs pa 'dzin pa ma yin pa bzhin du bde ba la sogs pa yang gzugs la sogs pa 'dzin par byed pa ma yin te/lhan cig dmigs pa nges pa'i phyir tha dad pa med pa kho na'o/ /tha dad pa ni mthong ba phyin ci log pa rnams kyis mthong ba yin te zla ba tha dad pa med pa mthong ba bzhin no zhes dgongs so/ / de skad du/ nang gi longs spyod cha gzhan 'di/ /phyi rol lta bur gnas pa ste/ /tha dad med can shes pa yi/ /tha dad snang ba bslad pa yin/ /zhes gsungs so/ /gal te shes pa skyed par byed pa yin pa nyid kyis gzugs la sogs pa sngar nye bar gnas pa la phyis bde ba la sogs pa myong ba skye ba ma yin nam/des na ji ltar/ cig car rtogs pa yin zhe na/ 'di la brjod pa re zhig gal te bye brag tu smra ba'i 'dod pas rnam pa med pa'i rnam par shes pa de las byung ba'i 'brel pa las rnam pa dang ldan pa'i don 'dzin par 'dod pa de'i rtogs pa tsam don thams cad la khyad par med pa nyid kyis 'di ni sngon po'i rtogs pa'am ser po'i rtogs pa yin no zhes rtogs pa so sor nges pa med pa'i phyir tshon rtsi bya ba don du gnyer ba sngon po la sogs pa la nges par 'jug par mi 'gyur ro//des na don rig pa ni shin tu chos med do//'on te mod sde pa'i lugs kyis rnam pa dang ldan pa'i rnam par shes pas skyed par byed pa'i don gyi skad cig sngar yod pa de las byung ba las 'dzin par 'dod pa de'i tshe skad cig ma nyid kyis shes pa'i dus na skyed par byed pa'i don med pa'i phyir dang rnam pa gnyis myong ba med pa'i phyir shes pa'i rnam pa 'ba' zhig kho na rig pa'i phyir don gyi rang bzhin ni nam mkha'i me tog las khyad par med pa'i phyir ji ltar don khas len/'on te rmi lam la sogs par yang yul gzhan du mthong ba'i phyir phyi rol nyid rgyu mtshan yin te/ ji skad du/ rmi sogs shes las tha dad du//phyi rol don med 'dod ma yin/ /kun du dmigs pa la 'khrul pa/ /yul dang dus gzhan bdag nyid yin/ /zhes brjod pa yin no/ /des na ji ltar rmi lam la sogs pa'i dpe sad pa'i gnas skabs su 'byung ba'i rnam par shes pa yul la sogs pa nges par brjod ce na/de ni ma yin te/rmi lam la sogs pa'i shes pa la dmigs pa mi 'thad pa'i phyir ro/ /de ltar 'dzin pa'i rang bzhin nam dran pa'i rang bzhin zhig yin/ de la re zhig 'dzin pa ni ma yin te/ 'dzin pa ni sngon gyi 'dzin pa la mi ltos pa'i phyir ro//sngon mthong ba'i yul 'dzin pas ni so sor nges par mi 'gyur te mthong ba gzhan bzhin no/ /'di ni dran pa'i rang bzhin du yang mi 'thad de/ rnam par rtog pa med pa'i phyir dang / lta ba'i yul can yin pa'i phyir dang / gsal bar snang ba'i phyir ro/ /des na yul gzhan du mthong ba la sogs pa'i dngos po'i yul ji ltar yin pa mi shes so//'on te de rgyu mtshan yin du chug kyang yul la sogs pa nges pa ni rgyu mtshan des byed par mi nus so/ /gal te yul la sogs pa gang du phyi rol nye ba de nyid rmi lam du yang snang na de ni de'i rgyu mtshan du 'gyur ba zhig na/de ltar na mi srid de slu ba med par thal ba'i phyir ro/ /de dang bral ba 'ga' zhig kho nar de snang na ni 'di rgyur 'thad pa ma yin no/ /gal te de'i rang bzhin du bral bar snang bar byed na ni khyad par med pa'i phyir gang yang rung bar byed par 'gyur ro/ /thun mong ba'i don med kyang rgyu nges pa med par skye ba ni gang gi tshe gnyid kyi rmi lam mtshungs par dmigs pa 'am/'khrul pa'i shes pa can mang po rnams la skra la sogs pa snang ba bzhin no/ /de bzhin du phyi rol gyi don med kyang don byed pa ni rmi lam du dmigs pa kho na'o/ / ji ltar sad pa'i gnas skabs na bud med kyi rgyu mtshan can gyi bde ba la sogs pa dang de dang 'brel pa sa bon 'byung ba la sogs pa'i don bya ba la dngos su myong ba de kho na bzhin du rmi lam gyi gnas skabs su yang yin no/ /de'i phyir ji ltar rmi lam la sogs par phyi rol gyi don med par yul nges pa la sogs par 'gyur ba de bzhin du sad pa'i gnas skabs su yang 'gyur ba gang gis zil gyis mnan/ji skad du/ 'ga' yi nang gi bag chags ni/ /'ga' zhig nyid kyis zad byed pa/ /de phyir blo ni rnam nges kyis/ /phyi rol don ltos ma yin no/ zhes gsungs pas so/ /de na rig pa la phyi rol gyi rgyu mtshan med pa ni gzugs la sogs pa dang / bde ba la sogs pa dag snga phyir gyur pas cig car rtogs pa dang bral ba'i nyes pa brjod pa ji ltar 'thad par 'gyur ba ni mi shes so/ /gal te cig car rtogs pa yin yang / gzugs la sogs pa 'dzin par byed par nges par byas pa'i bde ba la sogs pa'i 'dzin pa kho na yin la/gzugs la sogs pa'i don rtogs pa thams cad la thun mong ma yin pa nyid kyis gzung ba kho na yin te/ rgyu'i tshogs snga ma snga ma nyid las yul dang shes pa'i skad cig rnams gzung ba dang 'dzin pa nyid du skyed nges pa'i phyir ji ltar gzung ba dang 'dzin pa 'chol bar 'gyur zhe na/'di la snying po ye med de/ gang gi phyir rnam par rtog pa med pa'i phyir bdag nyid mngon sum la ni sngon po la sogs pa'i rnam pa bzhin du gzung ba dang 'dzin pa nyid dam sngon po'i thun mong ba nyid ni snang ba med do//sngon po rtogs pa po gzhan gyis ba lta bar bya ba nyid ni mngon sum gyis rtogs par byed pa ma yin te/ gzhan gyis rtogs pa yang mngon sum nyid du thal ba'i phyir ro/ /spu langs pa la sogs pa'i rtags las skyes pa'i rjes su dpag pas rtogs par bya ba yang ma yin te/de'i yul ni spyi yin pa'i phyir ro/ /des na thun mong ma yin pa'i gzugs la sogs pa dus gcig tu rtogs pa ni shes pa kho na yin te/ yul rung bas na gnas pas ma shes pa rang gi shes pa yin pa'i phyir ro/ /gal te phyi rol gyi don ni skad cig ma yin pa yan lag can la sogs pa'i rang bzhin gcig pa kho na ma yin nam zhes dogs pa la brjod pa ni dkar po la sogs pa'o//dkar po la sogs pa ste gzugs dkar ba la sogs pa mthong ba ste/ mngon sum gyis rtogs pa gang yin pa de nyid ni des gzhan snga ma'am phyi ma dag tu mthong ba med do//snga phyi stong pa nyid mthong ba yin no zhes bya ba'i don to/ /gtan tshigs bshad pa mthong zin pa dang / mthong ba'am mthong bzhin pa dang mthong bar 'gyur ba 'di dag ni rtag tu phan tshun du gcig la gcig bde ba la sogs pa bzhin du 'gal ba'i phyir ro//mig la sogs pa'i rnam par shes pa ni nye bar gnas pa da ltar ba tsam 'dzin par byed pa yin te/ de lta ma yin na thag ring ba dang bar chod pa la sogs pa dang / 'das pa dang / ma 'ongs pa dang / byis ba dang / rgan pa la sogs pa yang cig car 'dzin par thal ba bzlog dka' bar 'gyur ro//de ltar 'di yan chad kyis ni gzung ba dang 'dzin pa sgrub pa'i tshad ma bkag pas bstan to/ /da ni gnod pa can gyi tshad ma las don rnams med pa'i phyir rnam par rig pa tsam ston pas brjod pa ni thog ma tha zhes bya ba la sogs pa'o/ /bsam pa ni 'di yin te/phyi rol gyi don ni yon tan dang rdzas la sogs pa'i dbye bas rnam pa mang pos pha rol po rnams kyis brtags pa yin no/ /de la yon tan la sogs pa chos rnams kyi rten ni rdzas yin pas de bkag pa'i rdzas de dag rtsa ba dang bcas pa du ma 'byung bar 'gyur ro//des na logs su su na 'byin pa ma brjod de/ /du ma yang 'du ba can med par ma yin pa des na de'i lugs su sun 'byin pa mi brjod do/ /rdzas kyang sa dang / chu dang / me dang / rlung dang / nam mkha' dang / dus dang / phyogs dang / bdag dang / yid ces bya ba rnam pa dgu yin no//de la bdag ni de ma thag tu bsam par bya'o/ /sgra yang nam mkha'i rang bzhin gyi yon tan can du 'dod do//de yang ci yin pas mtshungs pa'i phyir na sgra thams cad tha dad par thos par mi 'gyur ro/ /des na rang dang nye ba'i yul bzhin du bar chod pa'i yul du mngon par 'dod par yang sgra grags pa thos par 'gyur ba'am gzhan du yang mi 'gyur ro zhes pa ni gcig tu nges pa yin no//phyogs dang yul dag kyang gcig yin pa'i phyir na snga ma dang phyi ma la sogs pa'i rkyen du mi 'thad do/ /'di snyam du rnam par dbye ba 'di ni khyad par du byed pa rnams tha dad pas yin no//ci khyad par du byed pa dag gi snga ma dang phyi ma rang las yin nam 'on te gzhan las yin/ de la phyogs dang po ltar na de nyid las rtogs pa de grub pa'i phyir de dag don med do/ /phyogs gnyis pa ltar na yang gal te phyogs dang yul dag kho na las yin na de ni de'i tshe gcig yin pa'i phyir na 'di nyid kyi tshe 'gyur ba de dag mi 'thad do//gzhan yang yin no zhe na/ de dag don med pa por 'jug go/ /nam mkha' dang phyogs dang yul 'di rnams ni rtag pa yin pas lhan cig byed pa dang ldan pa'am/ de dang bral ba yang rung ste/rang bzhin gyi khyad par ma thob par rang gi 'bras bu res 'ga' kho na skyed par byed par ji ltar 'gyur/ 'di ltar/ de dag nus pa'am nus med pa/ /ngo bo nyid kyis gang gnas ni/ /rtag pa nyid phyir gso min na/ /de zad bya phyir nus pa gang / /zhes so/ /'dis ni yid kyang bsal to//yid smra ba rnams kyis yid 'di ni shes pa cig car mi skye ba las dpag par bya ba yin na/ gar lta ba la sogs pa la rnam par shes pa cig car nyams su myong ba yin na/ de ltar yin na ni nam yang mi 'thad par 'gyur ro/ /des na nam mkha' la sogs pa ni med pa kho na'o//sa la sogs pa lus pa yin na de yang yan lag can dang rdul phra rab kyi dbye bas rnam pa gnyis su brtags so/ /de la yan lag can yod pa ma yin la rdul phra rab kyang med de/ de gnyis ka la yang sgrub par byed pa med pa'i phyir ro/ /de nyid la gnod par byed pa rim pa ji lta ba bzhin du rjod par byed pa ni/thog ma tha ma zhes bya ba la sogs pa'o/ /snam bu la sogs pa dag ni rdul phra rab gnyis la sogs pas brtsams pa'i rim gyis brtsams pa yan lag can gyi rang bzhin du rab tu grags par yod pa ma yin no/ /ci'i phyir zhe na/ gzugs la sogs pa ni thog ma dang tha ma dang dbus la sogs pa'i dbye bas phan tshun 'gal ba'i rang bzhin rags pa gcig dang bral ba kho nar mthong ba'i gtan tshigs kyi phyir ro//de ltar 'dis ni shes pa gcig dang 'dres pa'i rang bzhin gyi dngos po dmigs pa'i mtshan nyid can mi dmigs pa'i gtan tshigs brjod do//de lta de ltar gnas 'gyur ba'i/ /cha shas 'ba' zhig snang ba ste/ /de dang ldan pa cha med pa/ /gzhan ni snang ba yod ma yin/ /yan lag gcig kha bsgyur ram g.yon na'ang de la 'du ba'i yan lag can yang kha bsgyur ba'am g.yo ba mthong bar 'gyur ro/ /'on te yan lag kha bsgyur ba dang g.yo ba yin gyi yan lag can ni ma yin no zhe na/'on de kha bsgyur ba dang mi g.yo bar mthong bar 'gyur ro/ /yan lag gcig bsgribs pa na yang de mi mthong ba kho nar 'gyur ro/ /de ma bsgribs na ni dmigs par thal bar 'gyur ba bzlog dka' bar 'gyur ro//de ltar tha dad pa'i bdag nyid can 'gal ba'i chos gnas pa'i phyir yan lag can gcig yin par mi 'os pas na 'di ni med pa'i tha snyad kyi yul du 'gyur ba'i dus la bab par mthong ngo / /de ltar gcig bkag pas da ni du ma'i rang bzhin lus pa yin no/ /de yang du ma rnams kyis rnam pa du mar nye bar brtags te/dper na bye brag tu smra ba rnams kyis dang po dngos su dbang po'i spyod yul yin pa dang / bye brag pa rnams kyis ni yan lag can rtsom par byed pa nyid dang / mdo sde pa rnams kyi sha za ltar rtag tu lkog tu gyur pa rang gi rnam par gtod pa nus pa yin no zhes rdul phra rab 'dod pa lta bu'o//de la re zhig bye brag tu smra bas brtags pa'i rdul phra rab bsal ba'i phyir gsungs pa ni/ phra rab rdul rnams zhes bya ba la sogs pa'o/ /ji ltar rags pa gcig med pa de bzhin du du ma nyid kyang yod pa ma yin no/ /gtan tshigs brjod pa ni phra rab rdul rnams mthong ba med pa'i phyir zhes bya ba'o//rdul phra rab kyi rang bzhin phan tshun tha dad pa ni mi dmigs pa'i phyir ro zhes bya ba'i don to/ /de ste rags pa gzhan du mi 'thad par rdul phra rab rjes su dpog go zhe na/ brjod pa ni/ rdul phran cha med yin na zhes bya ba la sogs pa'o//bsam pa ni 'di yin te/ re zhig rdul phra rab rnams cha shas dang bcas par ni 'dod par mi bya ste/ cig car 'gal ba'i yul ni gnas pa bcu po rnams dang drug gis sbyar ba la sogs pa 'gal ba'i chos dang ldan pas rags pa bzhin du du mar thal ba'i phyir ro//rdul phran cha med yin na ste/ yan lag gi mtshan nyid cha dang bral ba yin par gyur na du ma'i rdul phran du ma rnams kyis bskor ba ste/ du ma'i nang du bcug pa med par 'gyur ro/ /'di ltar rdul phra rab kyis bskor ba yin na steng dang 'og phyogs bzhi'i rdul phra rab kyi dbus na gnas pa de gdon mi za bar cha drug tu 'gyur te/'di'i rang bzhin gang zhig rdul phra rab gzhan dang nye ba de nyid du rdul phra rab de las gzhan dang nye bar ni mi 'byor te/ de dag yul gcig par 'gyur ba'i phyir ro/ /gal te de yang de na yod pa de lta na/ shar gyi rdul phra rab dang nye ba'i rang bzhin nyid nub kyi rdul phra rab dang nye bar gnas par 'gyur ro//nye bar gnas pa med pa na mngon du bltas pa tsam la yang nye ba 'di nyid yin no/ /de'i phyir gong bu'i rang bzhin rdul phra rab tsam du thal ba'i phyir ro/ /sa'i dkyil 'khor la sogs rang bzhin gyis/ bsags pa 'ga' yang 'di la med par 'gyur/ /ji skad du/ 'byar ba dang ni bskor ba'am/ /bar med rnam par gnas kyang rung / /dbus gnas rdul phran rdul gcig la/ /bltas pa'i rang bzhin gang yin pa/ /de nyid rdul phran gzhan dag la/ /gal te bltas par rtogs byed na//de ltar yin nas 'dzin las/ /sogs pa'i rags pa mi 'thad do/ /zhes gsungs so/ /gcig ma grub na du ma mi 'grub pa'i phyir rdul phra rab dag ni med pa kho na'o/ /'dis ni thun mong du sun phyung bas rdul phra rab tu smra ba rnams thams cad bsal ba'i phyir so sor sun phyung bsam gtan pa la thag pa gus par ma byas so//'di yan chad kyis ni sgrub byed kyi tshad ma med pa'i phyir dang gnod byed kyi tshad ma yod pa'i phyir phyi'i don ni med do zhes bstan nas da ni 'gro ba ma lus pa 'di rnam par rig pa tsam kho na'o zhes nye bar sdud par byed pas/ des na zhes bya ba gsungs so//des na zhes bya ba brjod ma thag pa'i rigs pa'i mthus 'dzin pa la sogs pa dang bral ba'i phyir rang rgyud kyi gzugs la sogs pa rtogs pa'i phyir rang bzhin can gyi rgyu ba dang mi rgyu ba'i dngos po thams cad ni phyi rol gyi don dang bral bas rang gi bag chags tsam las byung ba nyid kyis dri za'i grong khyer lta bu yin no//rnam par shes pa tsam yin mod de la snga ma bzhin du gcig dang du ma'i rang bzhin du mi bzod pas na nam mkha'i pad+ma bzhin du yod pa'i tha snyad du bya bar mi 'os so/ /yod pa'i dngos po la ni rnam pa gzhan med pa'i phyir des ni gcig dang du ma dag las gang yang rung ba gcig 'gyur dgos na de lta ma yin no//des na 'di ji ltar yod pa'i tha snyad kyi yul du 'gyur zhes bya ba mi shes so/ /'on te rnam par shes pa la ni gcig dang du ma dang mi ldan pa nyid mi srid do zhes bya bar sems na/ de ni mi bden te/ shes pa rnams dang bcas pa la ni phyi rol bzhin du gcig dang du ma'i rang bzhin dang bral ba nyid bsal ba'i phyir ro//gang yang 'jig rten gyis phyi rol gyi don du tha snyad byas pa de nyid rnam pa dang bcas par smra ba'i shes pa yin no/ /des na phyi rol gyi don yin pa la gnod pa gang yin pa de nyid ni nang gi dngos po yin pa la yang gnod pa kho na'o//'di ltar gnod pas ni rags pa gcig gam rdul phra rab ma yin pa sel bar byed do/ /shes pa'i rang bzhin du gyur pa'i rnam pa 'di yang gal te rags pa gcig yin nam/ gal te rdul phra rab mang po tha dad pa yin yang rung ste/ gnyi ga ltar yang phyi rol gyi don la 'byung ba'i sun 'byin pa spangs par mi nus so//gang gis de med pas med par 'gyur ba de rnam par shes pa las phyi rol yin pa'i rgyu mtshan gyis sun 'byin pa ni ma yin no/ /lus can gyi rgyu mtshan gyis gnod par byed pa ni lus can ma yin pa rnam par shes pa'i bdag nyid la yod pa ma yin no zhes bya ba yang snying po med de/sngon po la sogs pa'i rnam par shes pa nyid yin na rnam par shes pa yang lus can nyid yin pa'i phyir ro/ /yul khyab par byed pa dang ldan pa'i rnam pa 'di nyid lus can yin la de ni 'di la yod pa kho na'o//bde ba la sogs pa gsal ba bsnyon par mi nus pa nyid kyang ma yin te/ 'di ltar dub pa'i lus ji srid chu bur zhugs pa de srid du khyab pa'i bde ba skye bar nyams su myong ba yin la/ de lta bur gyur pa ni yul khyab pa ma yin pa yang ma yin te/ lus kyang de ltar yin par thal ba'i phyir ro//yul khyab par byed pa yin na lus bzhin du de las lus can yin pa'i phyir ro/ /des na rnam pa gzhan du rnam par shes pa rnam pa med pa yang phyi rol gyi don gyi sun dbyung ba las ma 'das pa'i phyir slob dpon gyis logs shig tu sun dbyung ba lhur ma byas so zhes rtogs par bya'o//des na rnam par shes pa de yang yod pa'i tha snyad du bya ba ma yin no zhes bya ba 'di gnas pa yin no/ /'o na rnam par shes pa dang shes bya dag med pa'i phyir med pa'i rang bzhin de kho na yin no zhes bya bar 'gyur ro zhe na/ ma yin te/ rnam par shes pa de kun rdzob tu yod pa yin te/kun rdzob ni bsnyon par mi nus pa yin pa'i phyir ro/ /yod pa nyid bkag pa'i phyir med pa nyid nan gyis byung ba yin nam zhe na/ ma yin te/med pa nyid ni yod pa nyid sngon du 'gro ba can yin pas de ma grub na de yang mi 'grub pa'i phyir ro/ /ji skad du/ med pa yod pa'i zlas drangs te//yod pa med pa'i zlas drangs yin/ /de phyir med pa mi brjod na/ /yod pa nyid du mi rtag go/ /zhes gsungs pa yin no/ /yod pa dang med pa'i bdag nyid gnyi ga'i rang bzhin yang ma yin te/ yod pa dang med pa dag ni 'gal ba'i phyir ro/ /yod pa med pa dag las gzhan gnyi ga ma yin pa'i ngo bo yang ma yin te/gzhi gang la phyi rol du gyur pa gzhan ni mi 'thad pa'i phyir ro/ /'o na ni de kho na nyid 'ga' yang yod pa ma yin no zhes bya bar 'gyur ro zhe na/'di nyid de kho na nyid ma yin nam/ 'di lta ste de kho na nyid dang bral ba zhes bya'o/ / des na mtha' bzhi las nges par grol ba'i rnam par shes pa snang ba'i phyir ro/ /de kho nar de kho na med pa nyid de kho na rig pa'i de kho na yin no zhes bya ba 'di gnas pa yin no/ /gal te de ltar yin na de'i tshe rtag tu rtag pa yin pa'i phyir ji ltar 'khor ba yin/ de med pa'i phyir rnam par byang ba yang ji ltar 'gyur zhes dogs pa la brjod pa ni/'di la zhes bya ba la sogs pa'o/ /mtha' bzhi dang bral ba'i sems 'di nyid la bdag la sogs par sgro 'dogs pa rnam par rtog pa'i rgyun gyi ngo bos ni 'khor ba'i rnam pa yin la bdag la sogs par sgro 'dogs pa las bzlog pa la bdag med pa'i rang bzhin tsam gyis mthar thug par rnam par shes pas ni rnam par dag pa ste thar pa yin no//'dir rtog pa sbyang ba la 'bad par bya'o zhes kyang gsungs ba yin no/ /'di ltar phyi rol gyi don du lhag par zhen pa'i rnam par rtog pa ni 'khrul pa dang bcas pa yin pa'i phyir srid pa dang rjes su mthun pas tha mal pa yin no//gang gi rang bzhin tsam la gnas pa nyid kyis rtog pa med cing ma 'khrul pa'i phyir mngon sum gyi rang bzhin ni yongs su dag pa yin no/ /ji skad du/ don la rnam par rtog pa'i phyir/ /rtog pa'ang rang rig la mi 'dod//ces gsungs pa bzhin no/ /de'i phyir rnam par rtog pa yang rang gi rang bzhin la rnam par mi rtog pa yin pa'i phyir ngo bo nyid kyis chos thams cad yongs su dag pa yin no/ /de nyid gsungs pa ni 'di la zhes bya ba la sogs pa'o/ /de nyid kyi phyi slob dpon klu sgrub kyi zhal snga nas kyang /mya ngan 'das dang srid pa nyid/ /gnyis po 'di ni yod min te/ /srid pa yongs su shes pa nyid/ /mya ngan 'das pa yin par brjod/ /mya ngan 'das pa 'khor ba las/ /khyad par cung zad yod min te/ /'khor ba mya ngan 'das pa las/ /khyad par cung zad yod ma yin//zhes gsungs so/ /'on te gal te de nyid du srid pa dang zhi ba'i rang bzhin dag la dbye ba med na 'o na ji ltar/ gang phyir gzugs sogs rnam pa dang bral ba/ /thams cad la ni zhes bya ba la sogs pa brjod pa'o/ /thams cad kyi sgra ni don du ma'i yul can yin no zhes grag go//de yang tha dad pa med na sbyor bar 'os pa ma yin no snyam pa'i dogs pa bsu nas gsungs pa ni/thams cad nyid kyang zhes bya ba la sogs pa'o/ /kun rdzob tu ni zhi ba dang srid pa la sogs pa tha dad pa yod pa kho na ste/ des na kun rdzob pa'i dngos po snang ba rang bzhin gyis kun du rtog pa gang yin pa de las gzhan pa'i thams cad ces bya ba ni 'ga' yang yod pa ma yin te thams cad kyi sgra ni rnam par rtog pas sgro btags pa'i yul can yin no//des na de lta bur gyur pa thams cad la de kho na nyid dang ldan pa'i tha dad pa'i don bden pa yin na bdag med pa bdag med pas srid pa yod pa yin pa'i phyir/srid pa dang zhi ba'i rang bzhin rnams ji ltar tha dad pa med pa yin zhe na de ni ma yin te/ bdag tu lta ba ni rnam pa gnyis te/ mngon par 'du byed pa las byung ba dang / lhan cig skyes pa'o/ /de la lus la sogs pas tha dad pa dge ba dang mi dge ba'i las byed pa po dang /de'i 'bras bu spyod pa po rtag pa dang khyab pa ni bdag yin no zhes bdag tu mngon par smra ba gzeg zan pa la sogs pa'i bstan bcos la sogs pa goms pas nye bar bskyed pa 'du byed las byung ba ni mngon par 'du byed las byung ba ste/bye brag pa la sogs pa yin no/ /thog ma med pa'i ma rig pa'i bag chags kyi dbang gis rnam par shes pa'i rgyun la brten par 'dzin pa la sogs pa'i rang bzhin zhes pa bdag tu rtogs pa gang yin pa de'i rang bzhin ni lhan cig skyes pa ste/ srog chags thams cad la thun mong du yod pa'i so so'i skye bo rnams kyi yin no//de la phyogs dang po la re zhig bdag yod pa sgrub par byed pa'i tshad ma yod pa ma yin no/ /mngon sum gyis ni bdag rtogs pa ma yin te/ mig la sogs pa'i rnam par shes pa rnams kyi yul ni gzugs la sogs pa so sor nges pa yin pa'i phyir ro//rjes su dpag pas rtogs pa yang ma yin te/ 'bras bu dang rang bzhin gyi rtags med pa'i phyir ro/ /rtag tu lkog tu gyur pa yul dang dus su ldog pa dang bral ba'i bdag dang gzhan 'ga' zhig lhan cig 'gro ba dang ldog pa'i bdag nyid bskyed par bya ba dang skyed par byed pa'i dngos po ma grub pas 'bras bu'i rtags med pa'i phyir dang /chos can yod par ma grub pa'i phyir na rang bzhin gyis rtags mi 'thad pa'i phyir ro/ /gang gi rjes su dpogs par 'gyur ba yod pa sgrub pa'i rtags gzhan yang srid pa ma yin no/ /rtags gzhan du gyur pa yang bsgrub byas khyad par 'gyur dgos na bsgrub par bya ba bdag ni 'ga' yang ma grub pa'i phyir khyab par byed pa nyid du gtan la ma phebs pas 'ga' yang des khyab par nges par mi nus pa'i phyir 'di la ni rtags 'ga' zhig kyang 'byung ba med do//mig la sogs pa'i rnam par shes pa'am rjes su dpag pa sgrub byed ma yin mod/nga zhes rtogs pa'i rang bzhin can bdag gi sgrub byed yin gyi mngon sum ni yod pa kho na snyam pa'i dogs pa bsu nas gsungs pa ni/ nga zhes bya ba la sogs pa'o/ /nga zhes bya ba rang rtogs pa'i yul du gyur pa sems las gzhan pa bdag la sogs pa ni 'ga' yang yod pa ma yin te/srid pa ma yin no/ /ngar rtogs pa'i yul ni gzugs la sogs pa yin pa'i phyir te/ nga skem pa nga sbom nga 'gro'o zhes bya ba la sogs pa'i rnam par nga'o snyam pa'i rtog pa skye ba yin no/ /skem pa nyid dang sbom pa nyid de ni lus las gzhan du gyur pa'i chos ma yin no//khyab dang lus can ma yin pa la ni lus can gyi rdzas kyi rjes su byed pa can 'gro ba'i bya ba yang 'thad pa ma yin no/ /de nas bdag sgrub par byed pa'i tshad ma med pas yod pa'i tha snyad du byar rung ba las 'das pa dang / gnod par byed pa'i tshad ma yod pas kyang 'di med pa kho nar 'thad do zhes bya ba 'di gnas pa yin no//bdag ces bya ba yod pa yin na rtogs pa'i rang bzhin nam 'on te rtogs pa ma yin pa'i rang bzhin yin grang / de la phyogs dang po la ni mig la sogs pa 'bras bu med par thal ba bzlog dka'o//rtag tu gzugs la sogs pa la dmigs pa'i bdag nyid can gyi bdag la ni mig la sogs pa rnams yod pa 'bras bu dang bcas pa ma yin no/ /bdag rtogs pa med pa'i rang bzhin yin yang yod pa'i dngos po mi dmigs pas gnod do/ /des na 'di ni med pa kho nar 'thad do zhes gnas so//yang 'jig tshogs su lta ba lhan cig skyes pa ni 'jig rten kun la ji ltar grub pa ji ltar bsnyon par nus snyam du dogs pa bsu nas gsungs pa ni/ nga zhes bya ba la sogs pa'o/ /dgos pa ni 'di yin te/ ji skad brjod pa'i tshul du shes pa po dang /shes bya la sogs pa'i rang bzhin gyi dngos po thams cad med pa'i phyir/ nga zhes bya ba ngar 'dzin pa'i yul du gyur pa brtan pa dang / ngar 'dzin pa po la sogs pa'i rang bzhin ji skad brjod pa'i rang bzhin gyi sems las gzhan pa ni 'ga' yang yod min te/srid pa ma yin te/ des na bdag thams cad du med pa'i phyir na skra la sogs pa'i shes pa bzhin du bdag tu lta ba ni bden pa'i don can ma yin no/ /de'i phyir bdag med pa med pas srid pa dang dngos por yod pa'i phyir srid pa dang zhi ba'i dngos po rnams tha dad pa med pa bkag pa med pa yang ma yin no//ji skad du brjod pa mi 'thad pa nyid 'chad par byed pa brjod pa ni/gang phyir zhes bya ba ste/ gtan tshigs gang gi phyir kun rdzob pa byis pa rnams kyis rtogs pa'i rang bzhin gang yin pa de'i rang gi ngo bo ste de kho na nyid kyi rang bzhin blo ldan ma 'khrul ba rnams kyis rtogs pa de nyid de dang rang rang de nyid de'i rang bzhin no//des ni zhi ba dang srid pa'i rang bzhin thams cad tha dad pa med pa stong pa nyid du ro gcig pa nyid kyis dbyer med par rtog pa ste/tha dad pa med pa khong du chud pa'i phyir dngos po thams cad tha dad pa med pa nyid yin no//thams cad kyi 'ga' med ces bya ba de nyid gsal bar byed pas brjod pa ni/ yul gang zhes bya ba la sogs pa'o/ /gzugs la sogs pa gzung ba'i yul gang zhig snang bar 'gyur ba rnams dang / ngar 'dzin pa'i yul 'dzin pa po'i rang bzhin gzhan gang yin pa 'ga' zhig rtog pa'i rten du gyur pa ste/gzhir gyur pa gzung ba dang 'dzin pa po de dang de ni dbye ba ste so sor gyur cing bral bar gyur pa de dang bral ba'i phyir thams cad phan tshun dbyer med pa yin no/ /des na thams cad min te thams cad ces bya ba ni 'ga' yang yod pA ma yin no zhes bya ba ni de kho na yin no//du ma nyid ni rtog pa las gyur pa yin no zhes dgongs pa'o/ /de'i phyir de kho nar sangs rgyas dang sangs rgyas ma yin pa mnyam pa'i phyir sangs rgyas rnams ni tha mi dad la/ sems can rnams ni kun rdzob kho nar tha dad pa yin no/ /de ltar na yang rdzogs pa'i sangs rgyas su byas pa'i 'gro ba ma lus pa zhes gang brjod pa de 'thad pa nyid do zhes rtogs par bya ste/'gro ba ni ngo bo nyid kyis rnam par dag pa'i phyir ro/ /don dam pa goms pas ni rnam par rtog pa rnam par dag par bya ba yin te/ rtog pa'i dbang gis sangs rgyas la sogs pa'i dbye ba sgro 'dogs par bstan pa'i phyir ro//de bzhin du rdzogs pa'i sangs rgyas su byas pa'i 'gro ba ma lus pa rang gi sngags de'i thig ler bcug pa thams cad kyi rang bzhin gyi dkyil 'khor gyi 'khor lo'i rnam par bsgom pa ni 'thad pa nyid do zhes shes par bya ste zhes bya ba la sogs pa med na rang gi snang ba de kho na de ltar skye ba'i phyir ro//des na thams cad legs par gnas so/ /da ni thal zin pa la chos nyid sbyor bar byed pas thams cad rnam par dag pa thams cad kyi rang bzhin yin pas rtogs pa po'i lhag par zhen pas gshin rje mthar byed la sogs pa'i rang bzhin dkyil 'khor gyi 'khor lo'i rnam pa can gyi sems la dad pa la sogs pa rnam par dag pa nges pa nyid du brjod pa ni dad dang zhes bya ba la sogs pa'o//'di ltar dad pa la sogs pa'i sgras ni dad pa'i stobs la sogs pa gzung gi / dbang po rnams ni shin tu gsal bar gyur pa nyid kyis stobs kyi tha snyad brten pa ni ma yin te/de dag ni sgo'i rnam par dag pa'i rang bzhin du brjod zin pa'i phyir ro/ /des na de rnams kyi rnam par dag pas go rims ji lta ba bzhin du gshin rje mthar byed la sogs pa sgo srung dam pa bzhi'i rang bzhin dang /gzugs rdo rje ma la sogs pa yul mtha' dag gi rnam pa can gyi sems yin zhes de ltar brtags nas/ rang gi yid ni rnam par bsgom/ /zhes 'brel to/ /yang sems de nyid khyad par du byed pa ni mtshan ma med pa'i zhes bya ba la sogs pa'o/ /dga' ba ni bde ba chen po ste/mtshan ma med pa'i dga' ba chen po de rnam par dag pa'i phyir spyan ma la sogs pa'i lha mo'i tshogs mtha' dag gi rang bzhin ni dkyil 'khor gyi 'khor lo'i rnam pa can gyi sems de yin no/ /sems can ni sems can gyi tha snyad kyi rgyu yin pa'i phyir mig la sogs pa lnga'o//don ni gzugs la sogs pa yul gyi don to/ /bdag ni nyon mongs pa can gyi yid kyi rang bzhin te kun gzhi la 'jig tshogs su lta ba'o/ /rnam rtog ni rtog pa'i bdag nyid kyi rnam par shes pa'o/ /'jug pa'i rnam shes ni mig la sogs pa'i rnam par shes pa lnga'o//de rnams kyi rnam par dag pa ni dmigs su med pa ste/de'i phyir rim pa ji lta ba bzhin me long lta bu dang mnyam pa nyid dang so sor rtog pa dang bya ba grub pa dang shin tu rnam par dag pa'i ye shes rnams te/ me long la sogs pa de dag nyid dri ma med pa'i yid yin no//rnam par snang mdzad la sogs pa lnga de'i rang bzhin can yin pa'i phyir rang bzhin can sangs rgyas thams cad kyi ngo bo nyid ni sems de nyid yin no/ /des ni 'di skad du rim pa ji lta ba bzhin du phung po lnga rnam par dag pa'i rang bzhin me long lta bu la sogs pa lnga'i rang bzhin can rdzogs pa'i sangs rgyas lnga'i rang bzhin ni sems de yin no zhes brjod pa yin no//de bzhin nyid ni stong pa nyid de'i rnam par dag pa dang ldan pas 'khor lo'i dbang por te dkyil 'khor gyi bdag po nyid du rnam par gnas pa 'di ni sems yin no/ /gzugs la sogs pa 'khrul pa gang yin pa gcig nyid la sogs par sgro 'dogs pas de spangs pas dri ma med pa'i phung po dang khams gang dag yin pa de dag ni ngo bo don dam pa'i rang bzhin der grub par gyur pa de'i rang bzhin du yongs su rdzogs par gyur pa 'khor lo de'i dbang bo'i ngo bor rnam par gnas pa 'di ni sems yin no//ser sna mi gtong ba nyid do/ /de dang por byas pa gang dag yin pa 'chal ba'i tshul khrims dang bzod pa dang mi spro ba dang sems rnam par g.yeng ba dang / ma rig pa dang rnam par g.yeng ba dang thabs dang bral ba dang / smon lam med pa dang stobs med pa dang ye shes med pa ste de dag las log pa ste/yang mi 'byung bar 'gyur ba de'i phyir rim pa ji lta ba bzhin sbyin pa la sogs pa'i pha rol tu phyin pa bcu dang de yongs su gyur pa'i rang bzhin rab tu dga' ba dang dri ma med pa dang 'od byed pa dang 'od 'phro ba dang spyang dka' ba dang mngon du gyur pa dang ring du song ba dang mi g.yo ba dang legs pa'i blo gros dang chos kyi sprin zhes bya ba bcu'o//de dag nyid gzugs rdo rje ma la sogs pa'i rang bzhin yin pa nyid kyis dag pa'i phyir dkar po'i chos te kun nas nyon mongs pa'i dri ma dang bral ba nyid do/ /de'i rang bzhin gyi pha rol tu phyin pa dang /sa dkar po'i chos kyi rang bzhin ni sems nyid yin no/ /rnam par mi rtog pa ni 'bad pa med pa ste rang gi ngang gis 'jug pa nyid do/ /des rang dang gzhan gyi dge legs gang yin pa 'jig rten dang 'jig rten las 'das pa'i 'bras bu de'i rgyu mtshan nyid yin pas rim gyis te/goms pa yongs su smin pa'i rim pas de zab pa dang rgya che bas na shes rab dang thabs kyi bdag nyid can gyi sems yin no/ /'dis ni 'di skad du shes bya'i sgrib pa la sogs pa spangs pa'i mtshan nyid kyi lhun gyis grub par 'jug pa rang ni dge legs kyi rgyu yin pas stong pa nyid kyis dpag dka' ba yin pa'i phyir zab pa nyid kyis shes rab kyi rang bzhin no//rten dang brten pa'i rang bzhin can dkyil 'khor dam pa'i rnam pa can 'di ni sems yin te zhes bya ba ni 'di shes rab dang thabs kyi rang bzhin can 'di ni 'dir de'i rang bzhin gyi rig ma dang skyes bu'i rang bzhin kho nar shes par bya'o//de skad du/ ngo bo nyid med gang yin pa/ /shes rab dngos po'i mtshan nyid thabs/ /zhes gsungs so/ /'di 'dra ba nyid kyis sems ni yang dag par rdzogs pa'i byang chub kyi lam gyi bden pa yin te/ stong nyid snying rje dbyer med ni/ /byang chub sems zhes bya bar brjod//ces gsungs pa yin no/ /da ni 'di la chos nyid ni/ /zhes bya ba la sogs pas gang zhig tha dad par snang ba'i srid pa dang zhi ba'i rang bzhin tha dad pa med par brjod pa de yang dngos po ma yin zhes gsungs pa ni don dam du na zhes bya ba ste/ de kho na nyid du ni gzhan las cung zhig tha dad min pa zhes bya ba tha dad pa dang bral ba dang /tha mi dad pa min pa zhes bya ba tha mi dad pa dang bral bar 'dod do/ /ci'i phyir zhe na/ gzhan rang bzhin tha dad pa'i 'dzin pa ste yongs su gcod pa de ldog pa'i rgyu'i phyir ro/ /'di ltar bsam pa yin te/ shes pa ni rang nyid yang dag par rig pa tsam gyis mthar thug pa yin te/de gzung bar nus pa ma yin te/gnyis su thal ba'i phyir ro/ tha dad par 'dzin pa med na tha mi dad par 'dzin pa yang med do/ /tha mi dad pa na tha dad pa la ltos pa'i phyir te tshu rol dang pha rol bzhin no/ /de bzhin du blo ni sna tshogs pa nyid kyang ma yin te/sna tshogs pa ma yin pa las tha dad par ma rtogs pa'i phyir ro/ /des na tshad ma 'dis ni dngos po'i rang bzhin mtha' dag dang bral ba'i rtogs pa tsam ni kun rdzob pa'i de kho na yin no zhes gnas so/ /de ltar yin na yang tha dad pa dang tha mi dad pa la sogs pa tha snyad pa rnams kyis nges par byas pa gang yin pa de dag thams cad ni rtogs pa'i tshul las te rnam par rtog pas bzor bkod pa tsam yin no zhes bya ba'i don to//de ltar ni rnam pa de bzhin du zhes bya ba'i don to/ /bstan ma thag pa'i don de ltar brtags nas rnam par bltas nas rang gi snying ga'i ste ye shes sems dpa'i snying ga'i dri ma med pa'i zla ba gang yin pa de la gnas pa'i mtshan ma'i dbus na gnas pa'i sngags mchog maM gyi rang bzhin no//de nyid rang gi 'od zer las skyes pa'i rgyal ba rnams kyis rgyal ba'i ngo bor byas pa'i 'gro ba nang du zhugs pa ni 'od zer dang bcas pa 'od gsal ba'i thig le'i rnam pa can yin pa'i phyir thig le'o//rang bzhin rnams ngo bo de gang la yod pa'i rang gi yid de ni sngags mchog gi thig le 'od gsal ba'i rang bzhin rang gi yid de/ der rnam par bsgom zhes pa'o/ / thig le'i rnam pa can maM gyi rang bzhin gyi sa bon de'i 'od zer gyi phreng ba zhugs par rnam par bsam zhes 'brel to/ /ci zhig byas nas she na/ rtogs byas nas zhes bya ba gsungs so/ /gsung dang ni sku'i rdo rje'i lus mi phyed pa nyid kyi mchog tu gyur pa mtshan ma'i snying po can la sogs pa rim gyis gsal bar byas nas so//'od zer gyi phreng bas dam tshig sems dpa' dang 'brel pa'i sku rdo rje la sogs pa'i nang gsal bar byed pas bstan pa 'di ni da ltar de phyi rol gyi spro ba bkag pa yin te/phyi rol du yang spro ba ni de ma thag tu 'chad par 'gyur ba yin no/ /slar yang thig le'i rnam pa can gyi maM gyi rang bzhin de nyid la zhugs shing nang du 'dus par gyur pa na ye shes kyi bdud rtsi'i rgyun 'bebs par byed pa zhes bya ba ni ye shes kyi dkyil 'khor gyi 'khor lo'i rnam pa can gyi rnam par shes pa nyid nyon mongs pa'i gdung ba thams cad sel bar byed pas bdud rtsi ste/de 'bab par byed pa rnam par bsam mo zhes bya ba'i don 'di yin no/ /da ni nam mkha'i mthas gtugs par spro ba sngon du 'gro ba can gyi bsdu ba gsungs pa ni/ de nas zhes bya ba la sogs pa'o/ /de nas zhes bya ba ni thig ler dang po'i rnal 'byor dang thig le'i rnal 'byor pa mthar thug par bsgoms te/snang ba gzhan gyi thig ler bcug nas bskyed pa'i rim pas snga ma bzhin du 'di yud tsam gyis ting nge 'dzin gsum gyi rang bzhin rang gi bdag po lhag par mos par byas pa zhes bya ba'i de ma thag tu de ltar zhugs pa'i 'od kyi phreng bas 'jam pa'i rdo rje'i lus kyi nang mtshan ma'i snying po can la sogs pa'i rim gyi gsal bar byas nas ba spu so so nas byung ba'i 'od kyi dkyil 'khor gyi bkod pa mtha' yas pa rnams kyis thams cad yongs su dag par byas te de nyid du 'od zer gyi phreng ba'i rim gyis zhugs par rnam par bsam zhes snga ma dang 'brel to//don ni 'dir thig le'i dbus su yang 'khor lo sgom par byed pas ji srid 'dod pa'i bar du de ltar bsdu bar bya'o zhes bya ba'i don 'di yin no/ /'di yan chad kyis ni thig le'i rnal 'byor las rgyal po mchog gi ming can ting nge 'dzin gsum pa brjod pa yin no//phra mo'i rnal 'byor la sogs pa yang de dang nye ba'i phyir las rgyal po mchog gi ting nge 'dzin du 'dus pa yin no/ /thig le'i rnal 'byor mjug bsdus ma thag tu phra mo'i rnal 'byor bsgom pa'i cho ga brjod pa ni/ de nas zhes bya ba la sogs pa'o//gang gis shes rab dam pa yongs su gzung ba de ni shes rab dam pa yongs su gzung ba ste/ thabs dang shes rab kyi lus can gyis zhes bya ba'i don to/ /rang gi mtshan ma ni ral gri'o/ /phra mo ni nas 'bru'i tshad tsam mo/ /'od bcas shing zhes bya ba ni 'od gsal ba dang bcas pa'i rang gi mtshan ma gang la thub pa'i tshogs yod pa de ni thub tshogs nang zhugs so//rig ma'i sna'i rtse mo na gnas pa nor bu dang sbyar ba bsgom par bya'o/ /don ni snga ma ltar pad+ma'i nang du zhugs pa de bzhin gshegs pa zhu ba las skyes pa maM gyi rang bzhin gyi ral gri phra mo'i chang gzungs kyi nang du chud pa'i khang pa brtsegs pa na gnas pa'i rdo rje 'chang la sogs pa phra mo'i rnal 'byor gyi mthar thug par rdzogs pa'i thub pa'i 'khor lo rang gi rdo rje rtse mo lcags kyu'i rnam par byas pas pad+ma'i steng gi rig ma'i nang nas phyung ste rig ma'i sna'i rtse mo na gnas par byas par bsgom mo zhes bya ba 'di yin no//brtse bas zhes bya ba ni thabs kyis so/ /mtshan ma brtan po zhes bya ba ni/ dang po smig rgyu'i rnam pa ste/ /gnyis pa du ba'i rnam pa yin/ /gsum pa nam mkha'i rnam pa can/ /bzhi pa sgron ma lta bur 'bar/ /sprin med nam mkha' lta bur ni//rtag tu gsal ba lnga pa yin/ /phra mo'i rnal 'byor de'i mtshan ma brtan po 'di 'dra ba mthong nas de'i zhes bya ba mtshan ma phra mo'i 'od zer gang dag yin pa de dag las byung ba'i thub pa'i dbang po de dag dang rang gi mtshan ma rnam pa sna tshogs pa pad+ma'i mchog gi spugs lta bu'i phyag mtshan dang ldan pa'i byang chub sems dpa'i sprin chen po rnams blo dang ldan pas yang nas yang du spro bar bya'o//'dis ni phra mo'i rnal 'byor bstan to//thig le'i rnal 'byor dang phra mo'i rnal 'byor gnyi ga yang 'jam pa'i rdo rje dang / de'i rig ma dang /dkyil 'khor pa rnams kyi bsnyen pa dang / nye ba'i sgrub pa dang / sgrub pa chen po rgyu mthun pa la sogs pa ji skad brjod pa rnams ni rim pa ji lta ba bzhin du/ chung ngu dang 'bring dang chen po yin te snga ma bzhin shes par bya'o/ /thig le'i rnal 'byor dang phra mo'i rnal 'byor gnyi ga'i yang rgyu mthun pa'i 'bras bu la sogs pa'i yan lag bzhi po rnams ni chen po kho na yin no zhes kha cig gis brjod pa gang yin pa de ni mi 'thad de/'dir bcom ldan 'das kyis yan lag dang de'i 'bras bu ni chung ngu yin la shes rab kyis ni 'bring yin no zhes brjod par rigs kyi rgyu mthun pa'i 'bras bu chen po ni ma yin no//'on te ting nge 'dzin gsum pa la mi mthun phyogs mtha' dag zad par byed nus pa'i phyir bcom ldan 'das kyi yang chen po yin no/ /des na chung ngu med pas chung ngu dang chen po dag gi bar na gnas pa nyid med pas 'bring yang mi srid do//des na chen po yin no zhes brjod pa yin no zhe na/ de yang shin tu ma 'brel te/'di ltar de'i tshe bcom ldan 'das la brten pa'i yan lag bzhi bo nyid kyis mi mthun pa'i phyogs zad par mi nus pa'i phyir shes rab dang dkyil 'khor ba la sogs pa'i don med par thal ba bzlog dka'o//de ltar gyur na ni 'dir 'jam pa'i rdo rje tsam bsgom par bya bar 'gyur ro/ /de ltar ni 'thad pa ma yin te/ 'di ltar ye shes zhabs kyis ni 'di nyid du thub tshogs nang zhugs zhes gsungs pa yin no/ /des na mi mthun pa'i phyogs zad pa'i rim gyis don de las gzhan pa'i rgyu mthun pa la sogs pa'i yan lag ni gdon mi za bar 'dod par bya'o//des na 'dir yang ltos pa'i tha dad pas chung ngu la sogs pa nan gyis lhung ba yin no/ /gzhan yang / de bzhin sbyor ba bsnyen sogs ltar/ /rgyu mthun yongs su lhag mos pa/ /chu sogs dbye bas phra mo dang //thig le gsang gsum las skyes bsgom/ /zhes bzang po zhabs kyis gsungs ba gang yin pa de yang chen po'i yang chen po de skad du smra ba rnams kyis gsal bar 'gyur te/des na shin tu dpyad pas mchog go/ /des na thig le dang phra mo gnyi ga'i yang bsnyen pa la sogs pa'i yan lag dang de'i rgyu mthun pa'i 'bras bu la sogs pa rnams kyang chung ngu la sogs pa'i dbye bas tha dad pa yin no zhes bya ba 'di gnas pa yin no//'di thams cad kyang dkyil 'khor snga ma la gnas pa'i rnal 'byor pa kho nas snang ba gzhan du lhag par mos pas bya ba yin no/ / bzlas pas brjod pa'i don du gsungs pa ni/ dngos po kun gyis zhes bya ba la sogs pa'o/ /dngos po kun gyi bdag nyid de thams cad kyi bdag nyid can gyi dkyil 'khor gyi 'khor lo'i rang bzhin rang sems kyi dbang po ste/ sems kyi rgyal po la sems gang gis gzhag cing gtad pa de ni sems gzhag pa'o//dkyil 'khor gyi 'khor lo'i rnam pa can gyi sems kyi bdag nyid kyis zhes bya ba'i don to/ /rang gi sku rdo rje la sogs pa'i snying ga na gnas pa'i mtshan ma la sogs pa'i nang du chud pa'i oM la sogs pa'i rang bzhin rnams dang 'brel ba'i phyir sna tshogs pa'i 'od zer can gyi rang gi gsang sngags te ye shes sems dpa'i thugs ka na gnas pa'i maM gyi rang bzhin sgom par byed pa'i sngags pas bzlas par bya'o//ji ltar zhe na brjod pa 'byung dang 'jug pa ste/ dbugs dbyung ba dang rngub pa dag gis legs par dbang bskur ba sna tshogs kyi 'od zer can gyi gsang sngags kyi rgyal po'o//myur ba la sogs pa dang bral bas gsal bar brjod nas te/ spro ba dang brjod pa dag dus mtshungs pa yin yang brjod pa rtsom pa sngar byung bar bstan pa'i don du nas zhes twa'i rkyen gyis bstan to//des na don 'di yin te/ brjod pas spro bar bya'i spros pas brjod par bya ba ni ma yin no zhes bya'o/ /dpal gsang ba 'dus pa las kyang brjod pas/ rdo rje spro bya ste/ rdzogs pa yis ni bsdu bar bya zhes gsungs so/ /des na de ltar brjod nas sku la sogs pa rnams ni rim gyis dang /cig char dag ni rab tu spro bar bya/ /zhes bya ba ni sku la sogs pa'i yi ge rnams las rim pa bzhin cig car ram so sor lha mo bcu dang de bzhin gshegs pa dang bcas pa'i sku la sogs pa rnams spro zhing ye shes sems dpa'i sa bon las ni lha mo dang de bzhin gshegs pa rnams spro bar bya ba'i gnyi ga ltar yang ye shes sems dpa' ni spro bar mi bya'o//de nas 'od zer gyis gsal ba rnams kyis ni nam mkha'i khongs te nam mkha'i nang kun du bkang nas de nas sngar bzhin zhes bya ba'i ting nge 'dzin pas/rang gi sa bon gyi ni 'od rnams kyis/ gzugs la sogs pa thams cad drangs nas ni/ /pad+ma'i nang du 'od kyi dkyil 'khor can/ /byang chub yid kyi ngo bor bsgom par bya/ /zhes bya ba la sogs pa'i brjod pa'i cho gas gzugs rdo rje ma la sogs pa mchod pa'i sprin gyi bkod pa rnam pa sna tshogs pa kun du spro bar bya'o//de nas spros pa'i tshogs rnams gsang sngags brjod pa'o/ /mthar rang gi sa bon du gzhug par bya'o zhes brjod pa ni rig ma mchog dang zhes bya ba la sogs pa'o/ /rig ma mchog dang kun du 'khyud pa'i bde ba chen po gang yin pa de bstar zhing nyams su myong ba de'i gzhan gyi dbang du gyur pa de'i rang bzhin gyi thub pa'i dbang po mdzes pa'i tshogs la bltas nas rang gi lus nyid la gzhug par bya'o//'dis ni 'di skad brjod pa yin te/ phra mo'i rnal 'byor bsdus nas 'khor lo la sogs pa'i mtshan ma'i dbus na gnas pa'i oM la sogs pa'i rang bzhin rnams las lha mo dang de bzhin gshegs pa dang bcas pa'i sku rdo rje la sogs pa rnams so sor brjod pa'i dus su rim pa dang cig car spros nas mchod nas bsdus te 'jug par byed pas bzlas pa bya'o zhes bya ba ni sngags bzlas pa'o//tshim par byed pa brjod pa'i don du gsungs pa ni/ rang gi snying po zhes bya ba la sogs pa'o/ /rang gi snying po ni maM gyi rang bzhin no/ /de nyid ni dang po'i sbyor ba la sogs pa'i rang bzhin yin pa'i phyir de nyid do/ /de nges par rtog pa ni bsgom pa ste/ des skyo zhing ngal ba des na rang gi sems kyi rgyu ba dman zhing zhan pa de la de skad ces bya'o//de ltar sbyor bar gyur na snga ma bzhin spyan ma la sogs pa rig ma'i tshogs kyi glu dbyangs rnams kyi rab tu sad pas des bskul bas 'khor lo mngon par mchod do/ /tshim par byed pa nyid brjod pa ni 'byung dang 'jug pa ste 'byung ba dang rngub pa'o//de nyid 'od yin la de nyid lcags kyu yang yin te/ des dam pa'i sems de byang chub kyi sems de'i rang bzhin gyi chu rgyun bkug ste/ skyo ba gsal ba'i don du skyo ba zhi bar bya ba'i phyir sku rdo rje la sogs pa dag la dbab par bya ste bab par bsgom mo//cho ga bzhin zhes bya ba ni mtho gang tsam 'das pa'i spyi bo'i steng na zla ba mtho gang tsam la yod pa'i phyir rdzas lnga po sa bon lngas byin gyis brlabs pa rang rang gi 'od zer gyis bkug pa'i de bzhin gshegs pa rnams dang gcig tu gyur pa pra Na ba la bskor ba rang gi sa bon gyi 'od kyis reg pas khu bar gyur cing oM gyis reg pas thams cad bdud rtsir gyur pa rnam par bsams nas byang chub kyi sems kyi chu rgyun gyi rang bzhin des bshad ma thag pa'i cho gas so//de nyid shes pas sngags mchog gi sngags la yang ma chags par bya'o/ /gshegs su gsol ba brjod pa ni sngags pa zhes bya ba la sogs pa'o//sngags pa 'khor lo bsgom pa la sogs pa gshegs su gsol ba la spro ba skyes shing brtson pa langs pa'o/ /snga ma bzhin du bstod dang mchod pa la sogs byas gyur cing / gang gis srog la sogs pa yi ge gsum gyis ye shes sems dpa'i 'khor lo la phyi rol gyi 'khor lo bcug cing nang du bsdus pa'i srog la sogs pas 'khor lo byas pa des sku la sogs pa ji lta ba bzhin du yongs su brtags pa bsgom par bya'o//rnam pa 'di 'dra'i de nyid mthong ba gang yin pa lha'i 'khor lo la sogs pa'i rnam pa de dang bral ba'i sems can gyi khams la blos dmigs nas 'gro ba la phan pa'i don du brtse bas rtag tu thams cad nas sems can gyi don byed par gyur cig ces bya ba la sogs pa byas zin pa'i smon lam la phyogs par bya'o//de nas bsam gtan la langs nas rang nyid kyi lha'i rnam pa'i nga rgyal 'dzin par byed pa'o//de nyid kyi phyir dag pa'i sems can yin te/ lha'i nga rgyal nyid kyis tha mal pa'i rang bzhin spong ba'i phyir ro/ /yul rnams yongs su sgom byed pas/ /bya ba mtha' dag yang dag bsgrub par bya/ /zhes 'brel to/ /yul ji lta bur gyur pa zhig ce na brjod pa/ snga ma bzhin du gzung ba dang 'dzin pa dang rnam par bral ba'i phyir sgyu ma lta bu'o//de nyid kyi phyir snang bar gnas pa'i yul lo/ /snang ba ni rang rig pa'i rang bzhin du snang ba'i tshul gyis so sor snang ba tsam ste/ shes pa'i rnam pa zhes bya ba'i don to/ /der gnas pa ni rnam par gnas pa ste/ gzugs dang sgra dang dri la sogs pa so sor nges pa'i yul rnams de tsam yin pas so/ /don ni 'di yin te/ phyi rol gzugs la sogs pa'i dngos po mtha' dag med pas gzugs la sogs pa yul rnam par gnas pa mtha' dag ni de'i bag chags tsam las skyes pa'i kun rdzob pa gzugs la sogs pa'i rnam par snang ba kho na yin no zhes bya ba'o//gzhan yang khyad par du byed pa de dag ni tshor ba dang dri dag rnam par dag pas rin chen 'byung ba'o/ /'du shes dang ro rnam par dag pas ni 'od dpag med do/ /'du byed dang reg bya rnam par dag pas ni don yod pa'o//rnam shes dang sgra'i skye mched rnam par dag pas ni thugs kyi rdo rje'o/ /rnam par dag pa 'di 'dra ba ni sems can mos pa sna tshogs can gyi ngor byas pa yin par blta bar bya ste/ don dam par ni sangs rgyas rnams thams cad rnam par dag pa'i rang bzhin du rtogs par bya'o//de'i phyir de ltar yul rnams sku rdo rje la sogs pa'i rang bzhin du gyur pa yin no/ /chos nyid kyis na zhes bya ba de kho nar ni phan tshun dbyer med pa'i phyir dpal ldan rdo rje 'chang gi rnam pa dang ldan pa ste/ gnyis su med pa'i ye shes kyi rang bzhin du yongs su sgom par byed pa'o//de nyid kyi phyir gzung ba la sogs pa'i rang bzhin can nam tha mal pa'i nga rgyal gyi bdag nyid can phyin ci log gi rtog pa dang bral zhing spangs pas dam pa'i chos bshad pa dang rgyu ba la sogs pa'i bya ba mtha' dag bsgrub par bya ste/ rjes su bsgrub par bya'o/ /de ltar ji skad brjod pa'i cho gas lha'i nga rgyal dang ldan pa'i rnal 'byor pa'i bya ba mtha' dag bsgrub pa 'di ni rnal 'byor pa de'i dus thams cad du thub pa'i 'khor lo mchod pa'i dam pa yin te/rtag tu mnyam par gzhag pa yin pa'i phyir ro/ /'dis ni tho rangs kyi thun mtshams brjod do/ /zas kyi cho ga gsungs pa ni zas kyi dus su zhes bya ba la sogs pa'o//zas kyi dus su dam tshig sems dpa'i snying ga'i zla ba la dkyil 'khor pa dang bcas pa'i 'khor lo'i dbang po dmigs shing bsams nas/ rang nyid kyi sa bon bdud rtsi skyed par byed pa'i yi ge rnams kyis snga ma ltar bdud rtsi myang ba'i cho gas byang chub kyi sems kyi ngo bor bskyed pa'i rang gi bza' ba oM gyi rang bzhin gyis kun du 'od gsal bar gyur pa de nyid gsum po oM AHhUM gi rang bzhin rnams kyis mngon par bsngags shing mnyam pa nyid kyis rnam par dag par bsgoms te/des sku rdo rje la sogs pa'i lha rnams la hUM gis rdo rje sems dpa'i lce bkod de des tshim par bya'o//des na de ltar sngags pas snying ga'i nang du chud pa'i thub pa'i tshogs mtha' dag tshim par lhag par mos pas bza' bar bya'o/ /rnal 'byor pa za ba ni sbyin sreg gi rang bzhin yin pa ni yid kyi kho na ste/de'i nga rgyal du lhag par mos pa kho nas yin par rtogs par bya'o/ /phung po la sogs pa rnams nyid ni bud shing ste/de rnams bsregs pas na ye shes me la zhes bya ba dngos po thams cad mnyam pa nyid du shes pa'i me la ni bla na med par brjod do/ /des na de ltar phyi rol dang yid kyi dang bla na med pa ste sbyin sreg rnam pa gsum brjod pa yin no//de ltar zhes bya ba brjod zin pa'i tshul gyis gzugs la sogs pa 'dod pa kun gyis rang rang gi lha'i rang bzhin dang ldan pa rang nyid dam pha rol po'i dag kyang rung ste yang dag par mchod par bya'o/ / brjod zin pa'i lha'i rang bzhin can rang nyid dam pa pha rol po dag kyang rung ste yang dag par mchod par bya'o/ /brjod zin pa'i lha'i rang bzhin can rang ngam gzhan dag rnam par dag ba'i gzugs la sogs pas mchod pa 'da' bar mi bya ba'i phyir dam tshig tu gyur pa 'di ni bde gshegs rnams kyis yang dag par bzhed pa yin no//de skad du/ 'dod pa kun gyi longs spyod ni/ /ji ltar 'dod pa bzhin ston zhing / /rang lhag lha yi rnal 'byor dang / /ldan pas rang dang gzhan mchod bya/ /dka' spyod nges pa'i sdug bsngal rnams/ /bsten pas 'grub par mi 'gyur gyi//'dod pa kun gyi longs spyod ni/ /bsten pas myur du 'grub par 'gyur/ /zhes gsungs so/ /dpal 'dus pa las kyang / dka' thub nges pa mi bzad pa/ /lus bskams pas ni sdug bsngal te/ /sdug bsngal ba la sems rnams g.yengs//g.yengs pas dngos grub las gzhan 'gyur/ /zhes gsungs so/ /'di yang lha'i nga rgyal brtan ba'i rnal 'byor ba'i dbang du byas nas gsungs pa yin te/ de lta ma yin na ni ngan song du ltung bar 'gyur ro/ /de skad du yang dpal gsang ba'i thig le la sogs pa dag las/mkhas pas nges par legs brtags shing / /legs par bsams nas 'jug par bya/ /de lta min na mer mchod pas/ /'di ni bcu drug char mi phod/ /gang zhig de nyid de nyid du/ /shes pa mos pa bsten pa ste/ /'grub 'gyur de lta ma yin na/ /dmyal ba chen po rnams su ltung //zhes gsungs so/ /da ni langs nas dag pa'i yid can rang gi ni/ /lha yi rnam pa 'dzin pa'i sems ldan pa/ /zhes bya ba la sogs pa 'phags pa rnams kyis de ma thag tu bshad zin pa'i don gyi bye brag nyid spros pa dang bcas shing 'thad pa dang bcas te tshigs su bcad pa bzhi gsungs pa ni/rjes su mthun pa'i zhes bya ba la sogs pa'o/ /rjes su mthun pa ste bdag dang pha rol gyi nus pa dang rjes su mthun pa'i 'jig rten dang 'jig rten las 'das pa'i 'gro ba'i don la yongs su rtogs pa dang / bde gshegs ma lus mchod pa ste/phyi rol gyi me tog la sogs pas mchod pa la yongs su rtogs pas lus la sogs pa las dag pa'i bdag nyid can rgyu ba la sogs pa de dang de rtag tu mnyam par gzhag pa'i phyi rol dang nang gi bdag nyid can gyi lha'i nga rgyal dang ldan pas bsgrub par bya'o/ /rnam pa 'di lta bu'i lha'i nga rgyal gyis khengs pa'i sems la lus dang ngag gi rang bzhin gyi lus cung zad yod pa gang yin pa ni phyag rgya dang sngags kyi rnam pa yin no zhes bya ba ni sangs rgyas thams cad kyis gsungs so//rnam pa gzhan du rtogs pa'i lus la sogs pa'i las phyag rgya la sogs pa'i rnam pa ga la 'gyur snyam du dogs pa bsu nas gsungs pa ni/dngos gcig nyid la zhes bya ba ste/ bud med la sogs pa'i dngos po gcig la chags pa dang bral ba dang chags pa can dang de kho na nyid rig pa rnams kyi kun du rtog pa rim pa ji lta ba bzhin du ro dang bud med dang sgyu ma yin no//snyam pa rnam pa sna tshogs pa de rnams kyis yang dag par bsags pa'i rnam pa ste bskyed pa'i rang bzhin gong nas gong du rjes su bsgrub pa la sogs pas bde ba dang sdug bsngal dang thar bsgrub par byed pa'i las kyi khyad par 'byung bar 'gyur ba'o/ /de brjod pa ni mang po zhes bya'o//de bzhin du dngos po thams cad la ji lta ji ltar kun du brtags pa de lta de ltar goms pa las rtogs par shes par bya'o/ /de bzhin du/ phyi rol don gyi tshul la yang / /phyi rol khyad par med na yang / /dga' dang yongs su gdung ba dag /goms las khyad par 'gyur ba'i phyir//bde sogs don gyi bdag nyid min/ /zhes gsungs so/ /de bzhin du/bud med lus ni gcig nyid la/ /ro dang 'dod pa bza' bya zhes/ /kun du 'dod can mi rnams kyi/ /rnam par rtog pa rnam gsum mo/ /zhes so/ /phyi rol don med na ni rtogs bzhin pa tsam 'dod pa'i dbang du gyur pa yin pa'i phyir ji ltar goms pa de ltar 'grub pa'i phyir thams cad legs par gnas so//gang gi phyir zhes bya ba gang gi phyir de ltar nyams su myong bas grub pa de'i phyir lus la sogs pa'i las dge ba dang mi dge ba'i rnam pa ni sems kyi dbang gis te/ dge ba dang mi dge ba kun du rtog pa'i dbang gi yin gyi dngos po nyid du ma yin no zhes gsungs pa de'i phyir kun du rtog pa'i dbang gis lus la sogs ba'i las rnams phyag rgya la sogs pa'i rang bzhin nyid dang kun du rtog pa yongs su dag pas dag pa nyid du 'thad pa kho na yin no//de skad du/ dngos po gang dang gang dang ni//mi rnams yid ni 'brel ba des/ /de yi rang bzhin nyid 'gyur te/ /sna tshogs nor bu ji bzhin no/ /zhes bshad pa yin no/ /des na zhes bya ba brjod ma thag ba'i rigs pas dge ba'i rang bzhin yin pa'i phyir nyes skyon mtha' dag med pa'i sems la nag po'i las ni ga la srid/de skad du/ byang chub sems dpa' rnams kyi ni/ /dge ba'am gal te mi dge 'ang rung / /rtog pa thams cad dge 'gyur te/ /gang phyir de yid dbang byas yin/ /zhes gsungs so/ /dam tshig nyams na zhes bya ba la sogs pa la bsrung bar bya ba la sogs pa'i dam tshig de nyams na de bshags ba'i don du dbang bskur blang zhes 'brel to//ji ltar zhe na/ ji bzhin zhes gsungs so/ /ji ltar nye bar bstan pa'i rim pas so/ /snying ga'i zla ba la sna tshogs rdo rje bkod par gyur pa ste/ sna tshogs pa'i 'gro ba dang ldan pas sna tshogs pa ste gdong bzhi pa'i rdo rje'o//khaM gi rang bzhin dang ldan pa'i rdo rje ni thugs kyi rdo rje'o/ /gang gis de ltar gyur pa de ni thugs kyi sna tshogs bkod par gyur pa yin no/ /dpal ldan dam tshig rdo rje ni don yod rdo rje'o/ /de'i rnal 'byor ni dang bo'i rnal 'byor la sogs ba bsgom pa'o/ /de gang la yod pa de ni/dpal ldan dam tshig rdo rje'i rnal 'byor pas/ /'gro ba rang bzhin dag par bsgoms nas ni/ /zhes bya ba yin no/ /sna tshogs 'dab ma can gyi 'dab ma'i dbus ni zhes bya ba ni sna tshogs rdo rje'i zla ba la'o/ /snga ma'i tshul gyis zhes bya ba ni/ thub mchog 'od zer las 'thon rigs tshogs kyi//phyag gis bzung ba'i bum pa rnams kyis ni/ /zhes bya ba la sogs pas brjod zin pa'i tshul gyis dbang bskur blang ste dbang bskur bar bya'o/ /bla ma la smod pa'i nyes pa la yang cho ga 'di ltar rjes su bsgrubs nas ston mo yon dang bcas pa la sogs pa lhag par bya ba yin no zhes shes par bya'o//dbang bskur ba'i tshul 'di nyid phyi rol gyi khrus kyi cho ga la yang bsgom par bya ba yin no zhes sbyor ba ni phyi rol zhes bya ba la sogs pa'o/ /thun mtshams gzhan du'ang zhes bya ba ni gong gi thun mtshams la sogs pa la yang rnal 'byor brel bas bde ba'i stan la rnag gi lha'i mtshan ma la sogs pa brtags te yi ge gsum gyis dkyil 'khor du spros nas dbang bskur blang zhing de bzhin du zhes bya ba snga ma ltar mchod pa la sogs pa sngon du 'gro bas bzlas pa byas nas gshegs su gsol ba la spro ba skyes pas mchod pa dang bstod pa dang bdud rtsi myang ba byas nas yi ge gsum gyis 'khor lo'i snying du chud par gyur pas snga ma bzhin gzhan las gzhan pa dag rjes su bsgrub par bya'o zhes bya ba ni lhag ma'o//mtshan phyed la ni mu'i mtha' can gyi yi ge gsum gyis ye shes kyi 'khor lo bkrol nas yi ge gsum gyis phyi rol gyi 'khor lo nang gi 'khor lor bcug nas brtse bas shes rab dang ldan pas rang nyid nyal bar bya'o//rtse gcig pa'i rnal 'byor pas ni dang po'i rnal 'byor la sogs pa'i rim gyis de bzhin du mchod pa la sogs pa sngon du song bas bzlas pa byas nas gshegs su gsol bar 'dod pas mchod pa dang bstod pa dang bdud rtsi myang ba byas la yi ge gsum gyi 'khor lo nang du chud par gyur par snga ma bzhin gzhan rjes su bsgrub par bya'o//mtshan phyed la ni de kho na bzhin gnyid log par bya ba yin no//mal nas ldang ba'i dus kyi bsgom par bya ba brjod pa/ langs pa'i dus kyi tshe gang yin pa ste nang par gyi thun mtshams kyi dus der lha mo'i glu dbyangs dag gis bskul bar gyur pas na dpal ldan snying ga'i zla ba'i sa bon tsam dang ldan ba tha mal ba'i rang bzhin gyi thub pa las dang po pas bzlas par bya'o//cho ga kho na bzhin du zhes bya ba ni rang gi gsang sngags sgom par byed pa'i blo ldan gyis ni de nas bzlas pa bya zhes brjod zin pa'i cho ga rnal 'byor pa dang po la sogs pa'i cho gas snga ma bzhin bzlas pa la sogs pa bsgrub par bya'o zhes bya ba'i don to//cung zad ye shes la dbang bas ni lha mo'i glu dbyangs kyis bskul bas nang par langs nas 'jam pa'i rdo rje'i rang bzhin dang bcas pas/ oM d+harma d+hA tu swa b+hA ba At+ma kou0f85haM zhes bya ba'i byin gyis rlob par byed pas byin gyis brlabs la/ de nas gzhan de ma yin pa thams c ad rdzogs par byas te/de ltar brtul zhugs can thun mtshams la sogs pa'i nges pa dang ldan pa yang dag par bsdams pas de kho na ltar bzlas pa la sogs par bya'o/ /ye shes la dbang thob pas ni goms pa shin tu legs par sems brtan zhing mdzes par gyur pa thun mtshams la sogs pa'i rtog pa las nges par grol ba dngos po kun gyi rdul phra rab tu gyur cing rnam pa thams cad shin tu rdzogs pa spro ba dang bsdu ba'i bdag nyid can gyi 'khor lo la sems par byed pas rgyun mi 'chad pa kho nar rnal 'byor la brten par bya'o//yang dag par ye shes la dbang bas ni goms pa ches shin tu legs par brtan pa'i phyir 'khor lo gsum gyi bdag nyid lhun gyis grub par 'jug cing thams cad du song ba skad cig gi rtog pa las nges par grol bas bsgom zhing 'gro ba'i don bya'o//dngos grub grub pa'i cho ga mtshon par byed pa gsungs pa ni grub pa zhes bya ba'o//dngos grub phra mo dang dngos grub chen po'i mtshan ma ji lta bu yin pa thob pas te/ le'u bco lnga pa las gsungs pa'i lhas bstan pa'i rmi lam la sogs pa'i mtshan ma bzang po thob pa dang ldan pas rang sems te bdag nyid kyi yid la de nyid gsum gyi mchod pa ste sku rdo rje la sogs ba'i mchod pa byas te/sngar bshad ba'i dkyil 'khor la gnas par gyur pas 'dod pa'i dngos grub ral gri la sogs pa grub pa rnams le'u bcu gcig pa nas bshad pa'i cho gas rab tu bsgrub par bya'o/ /dngos grub bsgrub pa'i dkyil 'khor la sogs pa bri ba'i dus na gal te bgegs byung na de'i tshe de'i bzlog pa'i cho ga gsungs pa ni/bdud rtsi 'khyil pa zhes bya ba la sogs pa'o/ /bdud rtsi 'khyil ba zhes bya ba'i 'khor lo snga ma bzhin du dbang bskur bzung na lha'i rnal 'byor de'i bdag nyid du gyur pa'i phyir 'bad pa med par bgegs 'joms par 'gyur ro//bdud rtsi 'khyil pa zhes bya ba'i 'khor lo de gang yin snyam na brjod pa/ 'khor lo de ni zhes bya'o/ /lha'i dkyil 'khor gyi 'khor lo de ni gang zhig dkyil 'khor gyi 'khor lo de'i dbus su gnas pa de ni yin par 'gyur ro zhes bya ba ni thun mong gi tshul yin no//de'i phyir de'i dbus su gnas pa nyid kyis 'khor lo de ni bgegs mthar byed nyid kyi yin pas bgegs gzhom pa'i ched du de bdag por gyur pa la bgegs 'joms kyi cho gas dbang bskur blang bar bya'o zhes bya ba'i don to/ /de ltar las rgyal po mchog dang nye ba'i phyir las rgyal po mchog ces bya ba'i ting nge 'dzin gsum pa brjod pa yin no//da ni skabs kyi don bsdu bar bzhed nas bsam gyis mi khyab pa'i rnam pa lha'i 'khor lo ni 'dir srid pa'i sdug bsngal gyi gnyen po nyid du bstan pa'i phyir gsungs pa ni/ tha mal pa'i zhes pa la sogs pa'o//tha mal pa'i rnam par rtog pa ni bdag dang bdag gi ba la sogs pa'i rtog pa ste/ de'i 'jug pa ni rgyun skye ba'o/ /de ma yin pa gzhan ni srid pa'i sdug bsngal cung zad kyang yod pa ma yin te/ de nyid srid pa'i sdug bsngal yin/ /zhes pa'i don to/ / tha mal pa'i rnam par rtog pa de dang dngos su 'gal ba ni chos thams cad bdag med pa'i ngo bo sems kyis rtogs pa'i dkyil 'khor gyi 'khor lo'i rnam pa 'di yin te/ bdag tu lta ba dang bdag med par lta ba ni dngos su 'gal ba'i phyir ro/ /'gal ba de nyid bstan pa'i phyir gsungs pa ni/gang phyir zhes bya ba la sogs pa'o/ /gang phyir ni gang gi phyir te/ 'dir zab pa dang rgya che ba'i bdag nyid thabs dang shes rab kyi rang bzhin dkyil 'khor gyi 'khor lo'i rnam pa lam gyi bden pa'i bdag nyid kyi sems so/ /snang ba med pa ni tha mal pa'i rnam par rtog pa mi mngon pa ste nyams su myong ba nyid tshad ma yin zhes pa'i don to//gal te bdag med pa'i shes pa ni bdag tu lta ba dang 'gal ba yin mod kyi bdag med pa nyid mi sgrub po zhes dgos pa bsu nas gsungs pa ni/ yang dag rig pa las ni zhes pa ste/kun rdzob kyi shes pa las ma gtogs pa gzhan bdag la sogs pa ci yang yod pa ma yin te/ gzugs sogs rnam pa dag las nges grol ba/ /zhes pa la sogs par sngar bsgrubs zin te/ ma lus pa mtha' bzhi las grol ba'i shes pa tsam mo zhes brjod zin to zhes pa'i don to//'o na gal te yang bdag tu lta ba dang bdag med par lta ba ni 'di ltar 'ga' zhig tu 'gal bar mthong ngo / /de lta mod kyi zhe sdang la sogs pa la byams pa la sogs pa bzhin du gtan nas ldog pa ni ma yin no zhes dogs pa bsu nas gsungs pa ni gang zhig ces pa la sogs pa'o//gang zhig ste dngos po gang gis lan cig gi tshe yang 'gal bar 'gyur te/ thams cad tshad mas nges par mthong ba goms pas 'phel ba rab tu song bar gyur pa ste/ rab kyi mtha' thob pa na'o/ /thod pa can gtsang sbra med par 'gyur ba bzhin du gtsang sbra la sogs par rang gi 'gal zla gtan nas 'gog pa de'i phyir bdag med par lta bas bdag tu lta ba gtan nas ldog par 'dod pa kho na'o zhes pa ni rig pa yin no//byams pa la sogs pa'i dmigs pa thams cad kyang zhe sdang la sogs pa gtan nas ldog par byed pa ma yin te/ gnyi ga'i yang rtsa ba 'jig tshogs su lta ba yin pa'i phyir ro//byams pa la sogs pas ni sdang ba la sogs pa'i dus su de srid kho nar sel ba yin te/ me la sogs pas g.yo ba la sogs pa byed pa bzhin no zhes bya ba ni rigs par brjod pa yin no/ /gal te sdug bsngal mang po dang 'gal pa sbyin pa la sogs pa'i thabs nyid yod pa ma yin nam/des na dkyil 'khor gyi 'khor lo'i rang bzhin gyis ci zhig bya snyam du dogs pa bsu nas gsungs pa ni tha mal zhes bya ba la sogs pa'o/ /so so'i skye bo tha mal pa'i bdag gi ste/ rang gi rang bzhin de dag gis byas pa'i sbyin pa la sogs pa ni gal te yang don dam bdag med pa dang ldan pa de lta na yang srid pa'i sdug bsngal dang lhan cig tu 'gal ba ma yin te/gang gi sbyin pa la sogs pa 'di yod pa yin na yang tha mal pa'i bdag gi rang bzhin srid pa'i sdug bsngal de la log par ma gyur pa'i phyir ro/ / don ni 'di yin te/ re zhig dmigs par lta bas byas pa'i sbyin pa la sogs pa ni tha mal pa'i rnam par rtog pa'i rang bzhin gyi srid pa'i sdug bsngal dang mi 'gal ba kho na'o/ /bdag med pa'i lta ba dang ldan pa'i sbyin pa la sogs pa yang yongs su 'gal ba ma yin te/ der ni bdag med par lta ba ni dngos su 'gal ba yin pa des na de dang dngos su 'gal ba med pa'i phyir bskal ba mang pos thob par bya ba'i byang chub kyi dka' ba spyod pa'i tshogs kyi ngal ba pha rol tu phyin pa'i tshul yang rdzogs pa'i byang chub kyi tshul mchog tu gyur pa ma yin no/ /'khor lo'i rnam pa can gyi sems 'di ni dngos su 'khor ba'i sdug bsngal ldog par byed pa'o//dam pa'i bden pa thabs bde ba mdor bsdus nas byed pa'i phyir na dam pa rnams kyi lam gyi bden pa de nyid bstan par bya ba yin no/ /yang na rang bzhin las byung bdag rang gis/ /byas pa'i sbyin pa la sogs bdag med dang //ldan yang 'gal ba ma yin gang gi phyir/ /'di yod na yang de yod ma gyur phyir/ /zhes bya ba yin no/ /rang bzhin las byung ba ni rang bzhin las byung ba'o/ /de nyid kyi phyir bdag gi ste sems kyi rang bzhin 'od gsal ba stong pa nyid la sogs pa'i rang bzhin yin pa sbyin pa la sogs pa'i 'bras bu rang gi mtshan nyid mang ba'i phyir mang po'i tshig go//de dag gis bcug pa'i sbyin pa la sogs pa yang lha'i 'khor lo'i rnam pa can gyi sems dang lhan cig 'gal ba ma yin te/ bdag med pa nyid yin pas na 'gal ba ma yin no zhes bya ba'i don to//'di nyid gsal 'debs pa ni gang gi phyir dkyil 'khor gyi 'khor lo'i rnam pa can thabs dang shes rab snyoms par 'jug pa'i rang bzhin chos thams cad bdag med pa'i sems nyid yod na yang sbyin pa dang tshul khrims la sogs pa'i brtul zhugs de log par ma gyur ba'i phyir ro//da ni rtser ldan su zhig ces bya ba la sogs pas mjug bsdu bar byed do/ /bshad ma thag pa'i don de ltar rtogs nas ji skad du brjod pa'i sems sdud pas yid la rab tu bsgrub pa'i grub par bya ba'i byung zin pa'i bstan pa ni 'di 'bad pa med par sgrub par byed pa yin par rtogs par byed do//myur du tshegs med par grub par byed nus pa yin no zhes bya ba'i don to/ /de nyid sems can thams cad kyi yul ma yin pa'i phyir bsam gyis mi khyab pa yin no/ /rang gi don phun sum tshogs pa ma lus pa'i gzhi yin pa'i phyir dpal ldan no/ /kun du ma lus par bzang po ste dge legs 'di las byung ba'i phyir gzhan gyi don phun sum tshogs pa'i rten yin pas kun du bzang po'o//thams cad rang gi snang ba'i rang bzhin yin pa nyid kyis na rang bzhin rtser ldan skye bo la phan par 'dod pa su zhig sgom par mi byed pa'o zhes bya ba'i sgra ni mi bzod pa ste/gang phyir blo dang ldan pas mi bsgom pa ji ltar zhes pa 'di ni mi bzod pa'o/ /da ni slob dpon bdag nyid kheng skyung bar bzhed nas blo gros dri med ces bya ba la sogs pa'o/ /blo gros dri med nyid 'od yin te/ de rmongs pa'i mun pa mtha' dag bsal ba'i chen po rnams kyis rnam par bkod par nus shing rung ba 'jam pa'i rdo rje sgrub pa'i thabs 'dir bdag 'dra ba'i go skabs ga la yod/de lta mod kyis 'on kyang gang gi phyir te rgyu gang gis skye bo bla mar gyur pa ni bla ma'i skye bo ste/ de bzhes pa cung zad zin cing len pa sgrub thabs su byas shing bkod pa des thog mar te/dang po srid par shin tu dam par bcings pa lhod par byed ces grags pa de'i phyir na sgrub thabs byed pa'i 'grel pa 'di byas kyis/ bdag nyid bdag nyid chen po ston par byed 'dod pas byas pa ni ma yin no zhes bya ba'i tshig gi lhag ma'o/ /da ni sgrub thabs bkod pa las byung ba'i bsod nams yongs su bsngo ba gsung pa ni 'di zhes bya ba la sogs pa'i sgrub thabs 'di bkod pa las byung ba'i dge ba dri ma med pa gang yin pa des ni 'gro ba rnams kyi yid kyis sangs rgyas kyi ye shes kyi mgon dang bcas shing der gzhol zhing der phyogs pa'i rang bzhin rang gi lha'i 'khor lo rtag tu bsgom par shog cig pa'o//yan lag bzhi pa'i sgrub thabs kyi rgya cher bshad pa snying po snye ma zhes bya ba slob dpon dpal kun du bzang po'i zhal snga nas kyis mdzad pa rdzogs so// //paN+Di ta chen po n+ya ya na shrI dang / bod kyi lo tsA ba chen po shAkya'i dge slong blo ldan shes rab kyis bal yul mthil du bsgyur ba'o/