CLOSE WINDOW

D1841
བོད་ཡིག

@##/ /rgya gar skad du/ pany+tsa kra ma pany+tsi kA/ bod skad du/ rim pa lnga'i dka' 'grel/ 'jam dpal gzhon nur gyur pa la phyag 'tshal lo/ /rdo rje sems dpa' la phyag 'tshal lo/ /gang zhig brtson 'grus phul byung lhag pa'i ro ldan gyur pas dbu yang bcad nas sbyin mdzad cing //rab tu dang ba'i 'od ces bya bar ye shes 'byung gnas zhes bya'i bde bar gshegs gyur pa/ /mtha' drug don ldan gsang ba 'dus pa'i rgyud kyi snying por gyur pa'i rim pa lnga pa gang / /mdzad pa'i dpal ldan klu sgrub zhabs zhes sgra yis gang zhig brjod pa de la phyag 'tshal lo/ / bla ma nyid kyi man ngag gis/ /bdag nyid dran par bya ba'i phyir/ /rim pa lnga yi tshig rnams bshad/ /dpa' bo rnams kyis bzod par rigs/ /'dir slob dpon snying rje mchog dang ldan pas sems can gyi don thugs la bzhag nas mdor bsdus pa la sogs pa'i chos kyi sku'i ngo bo rdo rje 'chang gi yon tan gcig tu brjod pa'i sgo nas bstod pa sngon du 'gro ba'i phyag 'tshal ba bstan pa ni/khams gsum spyod pa las grol zhes bya ba la sogs pa ste/ rgyal ba'i sku la phyag 'tshal lo/ /zhes sbyar te khyad par ji lta bu dang ldan pa zhig ce na/ 'jig rten gsum ste lus dang ngag dang yid de de'i tha snyad las grol ba'o//mkha' dang mnyam par gyur pa ni sgrib pa dang bral ba'i ngo bo yin pa'i phyir ro/ /dngos kun ngo bo ni chos rnams don dam par na yang dag pa'i mtha'i ngo bo yin pa'i phyir ro/ /dag pa ni rnam par rtog pa'i rnyog ma dang bral ba'i phyir ro/ /zhi ba ni nyon mongs pa'i me ma lus pa zhi ba'i phyir ro//rnam dben ni brtags nas stong pa nyid kyi phyir ro/ /mchog zhi ba ni sems can ma lus pa la phan pa'i rgyu'i ngo bo yin pa'i phyir ro/ /rnal 'byor pa nyid yul zhes bya ba ni sangs rgyas rnams kyis so so rang gis rig par bya ba yin pa'i phyir ro/ /rtogs dka' ni de las gzhan pa'i spyod yul ma yin pa'i phyir ro//brtag par dka' ba ni lus dang ngag dang yid kyi spyod yul ma yin pa'i phyir ro/ /bdag gzhan rab phan ni bdag dang gzhan gyi don phun sum tshogs pa'i rten gyi ngo bo yin pa'i phyir ro/ /khyab pa ni dngos po thams cad kyi ngo bo yin pa'i phyir ro/ /mtshan ma med pa ni ma skyes pa'i ngo bo yin pa'i phyir ro//bde ba ni sdug bsngal thams cad dang bral ba'i phyir ro/ /mnyam med ni de las gzhan pa'i bde bas so/ /mnyam zhes bya ba ni bde ba tsam gyis rigs su byung ba'o/ /de'i phyir mi rtog tshul gcig la/ /zhes bya'o/ /dpal ldan mnyam 'dus rgyud kyi ni//zhes bya ba la sogs pa/ mdor bsdus bdag gis bshad par bya/ /zhes bya bar sbyar te/ bshad pa'i rgyud dang gsang ba 'dus pa'i rgyud du bstan pa'i lha rnams yang dag par mdor bsdus pa ste gcig tu byas pa'i rim pa gang yin pa'i rim pa'o/ /mtha' drug rtogs pa'i phyir zhes bya ba la/dgongs pas bshad pa dgongs min dang / /nges don drang don 'byed pa dang / /ji bzhin sgra dang sgra min te/ /mtha' drug ces ni grags pa yin/ /zhes bya ba rtogs pa'i phyir ro/ /dngos grub thams cad mdor bsdus pa/ /zhes bya ba ni 'jig rten dang 'jig rten las 'das pa'i dngos grub kun gyi rgyur gyur pa'o//de ni nyan thos la sogs pa'i lugs dag pas gsang sngags kyi theg pa ni sgrub pa'i thabs bde ba nyid yin no zhes 'dul ba'i skye bo rnams spro ba skyed pa'i phyir/ rnam rtog bag chags nyes pa'i sa/ /zhes bya ba la sogs pa smos te/ rnam par rtog pa snga ma snga ma'i bag chags las yang dag par 'byung ba'i gzugs la sogs pa nyid ni rang gi sems las ma gtogs pa'i gzugs don dam par yod pa ma yin gyi gzung ba dang 'dzin pa'i ngo bo 'ba' zhig gis 'gro ba gsum po rnam par rmongs par gyur pa yin no//de'i phyir de dag la legs par bltas la rnal 'byor gyi rgyud kyi rjes su 'brangs nas sbyar bar bya'o//de lta bas na 'dod pa lnga'i longs spyod yongs su spangs nas dka' thub ste/ dka' thub kyi spyod pa la sogs pas gdung bar mi bya'o/ /de nas 'dir ni sdom gnas 'di/ /zhes bya ba la sogs pa ni/ sdom gnas zhes bya ba ni dbang bskur ba thob pa'o//mi phyed ces bya ba ni dam tshig nyams pa med pa'o/ /brtul zhugs ni sgrub pa po'o/ /sku gsung thugs kyi rdo rje zhes bya ba ni rdo rje 'chang ngo / /dgon pa chen po'i sa phyogs zhes bya ba la sogs pa ni lha mnyes par bya ba'i skabs yin pas sgra ji bzhin bshad pa ste go sla'o/ /'jam pa'i stan la 'dug nas ni//zhes bya ba la sogs pa la/ zhe sdang rdo rje ting nge 'dzin/ /zhes bya ba ni rdo rje hUM mdzad kyi ting nge 'dzin la gnas pa'o/ /de la ting nge 'dzin 'di yin te/ yi ge hUM las gsal por yang dag par 'byung ba zhal gsum pa phyag drug pa sku mdog sngon po/ g.yas dkar ba/ g.yon dmar ba/ nyi ma'i dkyil 'khor gyi steng du 'jigs byed dang mtshan mo nag mo g.yon brkyang pas mnan pa/ phyag dang po gnyis kyis 'jig rten gsum las rnam par rgyal ba'i phyag rgya dang rdo rje dang dril bu thugs kar 'dzin pa/ gzhan dag gis 'khor lo dang / pad+ma dang / rin po che dang / ral gri 'dzin pa'i thugs ka'i sa bon las rim pa ji lta ba bzhin du khro bo bcu gnas ji lta ba bzhin du spro bar bya'o//bgegs kun rnam par gzhig pa'i phyir gnod mdzes rgyal po spro ba'i rnal 'byor gyis yang bka' nod par bsgoms nas rdo rje tho ba dang ldan pa'i phyag gis bka' bsgo bar byed do/ /khro bo'i gzugs can 'di yin no/ /zhes bya ba ni gnod mdzes rgyal po'o//bgegs kyi bdag po ni 'jig rten skyong ba brgyad 'khor dang bcas pa dang steng 'og na gnas pa'i bgegs rnams so/ /cho ga bzhin du zhes bya ba ni yang dag par bkug nas khron pa'i nang du chud par byas pa'o/ /sbyor ba yis zhes bya ba ni rdo rje bdud rtsi 'khyil pa'i phur bu ste/lte ba man chad smad kyi cha phur bu'i gzugs can gyis phyogs brgyad kyi khron pa'i nang du bdud rtsi 'khyil pa phur bu'i rnam pa 'dra ba rnam par bkod la/ b+ha ga zhes bya ba la sogs pa'i sngags dang rdo rje phur bu dang tho bas brdung bar bya zhing bstan par bya'o/ /rdo rje me ni kun du yang / /zhes bya ba la sogs pa la/yang zhes bya ba'i sgra ni rdo rje'i rang bzhin gyi sa gzhi dang / rdo rje'i ra ba dang / steng du rdo rje'i bla re dang / phyi rol kun nas rdo rje'i ra ba dang me ris bskor bar rnam par bsam par bya'o/ /steng 'og yang dag byin gyis brlabs/ /zhes bya ba ni gnod mdzes rgyal po dang / gtsug tor 'khor los sgyur ba dag gis so//dngos po med pa bsgom pa'i dngos/ /zhes bya ba la sogs pa la/ brtan pa dang g.yo ba'i dngos po don ma lus pa dngos po med par gyur pas bsgom pa yod pa ma yin te bsgom par bya ba med pa'i phyir ro/ /bsgom par bya ba bsgom pa med/ /ces bya ba ni gang yod pa de ni bsgom par bya ba ma yin te ma bsgoms su zin kyang yod pa'i phyir ro//de ltar na dngos po med pa dang ldan pa de yang yod pa ma yin no/ /de bas na sgom pa po dang bsgom par bya ba dang / sgom pa dmigs su yod pa ma yin te yi ge'i don to/ /'dus byas dang 'dus ma byas dang sa la sogs pa'i chos thams cad stong pa'o zhes gang bsgom pa de ni yod pa ma yin te stong pa nyid la mngon par zhen pa'i phyir ro//mtshan ma spang bar bya ba'i phyir/ /bsgom par bya ba bsgom pa min/ /zhes smras te/ gang rgyu dang 'bras bu'i rnam par mngon par zhen pas bsgom pa de yang rigs pa ma yin te rgyu dang 'bras bu gnyis su med pa'i phyir ro//smon pa dgag pa'i phyir/ de bas dngos po dngos med par/ /zhes bya ba smos te/ de bas de ltar na phyi rol gyi rnam pa'i smon lam gang yin pa'i 'bras bu de yang yod pa ma yin te smon lam gyis dmigs pa gang yod pa ma yin pa'i phyir ro//de'i phyi rol gyi rdzas kyi rnam pa bsgom pa dmigs su med pa zhes bya ba ni yod pa ma yin te sems kyi rang bzhin yin pa'i phyir ro/ /spyi'i don to/ /dngos po med pa bsgom pa'i dngos/ /zhes bya ba la phung po la sogs pa de dag dngos po med pas gang bsgom par bya ba sems tsam nyid kyang med pas de'i phyir rnam par dag pa ma yin te rtag tu yod pa ma yin pa'i phyir ro//kun rdzob kyi bden pa gsal bar 'dod pas/ bsgom par bya ba bsgom pa min/ /zhes bya ba smras te/ gang kun rdzob kyi bden pa'i bdag nyid can sgyu ma lta bu'i lha'i gzugs bsgom pa de yang rigs pa ma yin te 'od gsal bas rnam par dag par byed pa'i phyir ro//de ltar na kun rdzob kyi bden pa'i rang bzhin gyi dngos po ni yod pa ma yin te bden pa gnyis gnyis su med pa yin pa'i phyir ro/ /de'i phyir bsgom pa ste bden pa gnyis su med pa'i rnam pa can dmigs su med pa yin te/ dka' bas dmigs par 'gyur zhes bya ba'i bar du'o//sbas pa'o/ /don dam pa'i bden pa'i dngos po med pas bsgom par bya ba bsgom pa ma yin te gdod ma nas dag pa'i phyir ro/ /gang kun rdzob kyi bden pa'i bdag nyid can gyi bsgom pa de yang bsgom pa ma yin te bden pa'i phyir ro/ /rnam pa 'di dag gis ni bden pa gnyis kyi bdag nyid can gyi bsgom pa gang yin pa de yang bsgom par bya ba ma yin te/bden pa gnyis su med par mthong ba tsam gyi thar pa yin pa'i phyir ro/ /des ni sgom pa po dang bsgom pa dang bsgom par bya ba de dag tu mngon par zhen pa ni zung du 'jug pa'i ting nge 'dzin du rtogs par dmigs su med pa'o zhes bya ba yod pa ma yin par rdo rje 'chang gis gsungs pa yin no//mthar thug pa'o/ /tshigs bcad 'di yis zhes bya ba la sogs pa la rgyu mi rgyu'i bdag nyid can ni sgom pa po'o/ /ye shes kyi byin gyis brlab pa'i phyir hUM gnyis sa bon yaM las 'byung ba zhes bya ba la/ gzhu'i rnam pa lta bu mdog sngo ba'o/ / me'i dkyil 'khor ni gru gsum mdog dmar po'o/ /chu'i dkyil 'khor ni zlum po kha dog dkar po'o/ /sa'i dkyil 'khor ni gru bzhi mdog ser po'o/ /de'i steng du yi ge hUM dkar po bsgoms la dkyil 'khor bzhi dang / bruM bsdus pa las gzhal yas khang bsgom par bya ba yin pas/ zur bzhi dang ni sgo bzhi dang /zhes bya ba la sogs pa smras te/ thig bzhi dag dang yang dag ldan/ /zhes bya ba ni zur bzhi mnyam par bya ba'o/ /rdo rje nor bu zla phyed brgyan/ /zhes bya ba ni rdo rje dang nor bu dang zla ba dang / zla ba phyed pa dang / dra ba dang / dra ba phyed pas brgyan pa/ sgo dang sgo khyud mtshams rnams su//zhes bya ba ni sgo'i mtshams kyi zur ro/ /bum pa dang ka bas nye bar mdzes par byas pa'o/ /rdo rje zhes bya ba ni sna tshogs rdo rje'i steng du gzhal yas khang ngo / /bre yi phreng ni bya yis mdzes/ /zhes bya ba ni bya'i tshogs kyis mdzes par byas pa'o/ /de lta bu'i tshogs gzhal yas khang rnam par bsams la/yud tsam gyi bdag nyid can du 'chad par 'gyur ba'i brten pa'i dkyil 'khor gyi 'khor lo ma lus pa dang bcas par zhal gsum phyag drug par in+d+ra nI la'i 'od dang mnyam pa nyid dang mtshungs pa'i shes rab kyis 'khyud pa bsgom par bya'o/ /de ltar lhag par mos par bsams nas zhes bya ba ni lhag par mos pa tsam gyis yin gyi/phyag mtshan dang sa bon la sogs pa yongs su gyur pa las ni ma yin no/ /de lta bu'i lhag par mos pa'i dkyil 'khor yin no/ /cho ga ji bzhin zhes bya ba ni phyag dang mdog dang phyag mtshan la sogs pas mdzes pa'o/ /slar yang kha sbyor sbyor ba yis zhes bya ba ni snyoms par 'jug pa'i bde ba'i ros so//rim pa ji bzhin zhes bya ba ni gang dang gang gi bdag nyid can yin pa'i rigs kyi gnas de re re nye bar bzhugs par bsam par bya'o/ /don dam pa yi 'khor lo yis/ /zhes bya ba ni bde ba chen po'i bdag nyid du 'jug par bya'o/ / bsad nas zhes bya ba ni mi dmigs par bya ba ni bsad pa'i don to/ /de ltar byas pa la yon tan ci yod ce na/ sgrub pa pos dngos grub rab mchog ste/ shin tu myur bar dngos grub 'thob par 'gyur ba'o/ /gzugs phung rtogs pa me long zhes bya ba la rnam par snang mdzad dang sangs rgyas spyan la sogs pa'o//me long zhes bya ba ni me long lta bu'i ye shes so/ /sa'i khams ni sa'i khams so/ /mig gi dbang po ni mig go/ /gzugs kyang zhes bya ba ni mig gis gzung bar bya ba'i tshogs so/ /khro bo zhes bya ba ni gshin rje gshed dang 'dod pa'i rgyal po'o/ /byams pa zhes bya ba ni sa'i snying po dang bcas pa'o//tshor ba'i phung po ni rin chen 'byung ldan no/ /mnyam pa nyid ces bya ba ni mnyam pa nyid kyi ye shes so/ /khro bo gnyis zhes bya ba ni gzhan gyis mi thub pa dang dbyug sngon can no/ /'du shes kyi phung po ni 'od dpag tu med pa'o/ /so sor rtog pa ni so sor rtog pa'i ye shes so/ / byin za ni me'o/ /khro bo gnyis ni pad+ma mthar byed dang stobs po che'o/ /'du byed ni don yod grub pa'o/ /bya ba grub pa ni bya ba grub pa'i ye shes so/ /khro bo gnyis ni bdud rtsi 'khyil pa dang mi g.yo ba'o/ /steng 'og khro bo gnyis dang bcas/ /zhes bya ba ni gtsug tor 'khor los sgyur ba dang gnod mdzes rgyal po dang yang dag par ldan pa'o//rang bzhin gyis ni snang ba nyid/ /ces bya ba ni rnam par shes pa gsum dang 'brel pa'i rang bzhin brgyad cu'o/ /rnam par shes pa'i phung po ni mi bskyod pa'o/ /de yang 'od gsal bar gzhug par bya'o/ /mya ngan 'das bcas kun stong dang / / zhes bya ba la sogs pa la chos kyi sku ni chos rnams kyi rang bzhin no/ /da ni sku'i dkyil 'khor rdzogs par bya ba'i phyir ldang ba bstan pa ni/ sngags kyi zhes bya ba la sogs pa la bstan te/ sngags la yongs su rdzogs pa ni sngags kyi sku'o/ /sbyor ba yis zhes bya ba la/ nam mkha'i khams kyi dbus gnas par//zhes bya ba la sogs pa la/ gzhal yas khang gi nang gi nam mkha'i khams kyi dbus so/ /dbyangs kyi yi ge a las gyur pa'i nyi ma'i dkyil 'khor thabs kyi ye shes kyi ngo bo dang oM gyi yi ge las byung ba zla ba'i dkyil 'khor shes rab kyi ye shes kyi rang bzhin bsgom par bya'o/ / pad+ma 'dab ma brgyad ces bya ba ni ma las byung ba nyid do/ /yi ge gsum zhes bya ba ni oM AHhUM ngo / /byang chub sems zhes bya ba ni gsum pa'i don gyi dang po'o/ /de'i 'od kyis bkug pa ni/ /rgyu dang mi rgyu thams cad kyang / /zhes bya ba la sogs pa ste/ gsang sngags 'di ni brjod par bya/ /zhes bya ba ste/'di ni dang po'i rnal 'byor gyi cho ga'i ting nge 'dzin no/ /rjes su sbyor ba brtsam par bya/ /zhes bya ba la sogs pa brtsam par bya ste/ rnal 'byor pa'i yi ge gsum yang zhes bya ba la sogs pa la/ las byung zhes bya ba ni yi ge gsum yongs su gyur pa las skyes pa'o/ /kun+da zla ba dkar dang mtshungs//zhes bya ba ni mdog dkar ba phyag gnyis pa zhal gcig pa 'od kyi dkyil 'khor dkar po can rdo rje dang dril bu yang dag par ldan pa'o/ /dang po'i mgon po zhes bya ba ni rdo rje 'chang ngo / /rjes su rnal 'byor gyi ting nge 'dzin no/ /mi bskyod pa yi rjes zhugs pas/ /zhes bya ba la sogs pa la/de la rim pa ni 'di yin te/ thugs ka'i yi ge gsum gyi sa bon las 'chad par 'gyur ba'i mtshan nyid can gyi mi bskyod pa phyung la/ 'gro ba rnams kyi don byas nas slar yang bkug nas yi ge gsum po de nyid du zhugs par bya'o/ /zhugs pa tsam gyis zhal gsum phyag drug 'bar ba dang bcas pa'i rdo rje sems dpa'i bdag nyid bsgom par bya'o//de nas phung po la sogs pa zhes bya ba la sogs pa la phung po zhes bya ba ni de bzhin gshegs pa rnams so/ /dbye ba shes pa zhes bya ba ni dbye ba la mkhas pa'o/ /snang mdzad sogs zhes bya ba ni rnam par snang mdzad nas brtsams nas gnod mdzes kyi bar du'o//kha la zhes bya ba ni kha'i phugs su ste mgrin pa'i bar du'o/ /rab tu bzang po'i mthing shing mdog /ces bya ba ni mdog sngon po'o/ /sngags pas gti mug dga' sogs ni/ /zhes bya ba ni spyan dang mA ma kI dang / gos dkar mo dang / sgrol ma la sogs pa sa'i khams la sogs pa sbyong bar byed do//de'i phyir/ sa la sogs pa rab tu gzhug /ces bya ba ste zhugs par byas nas so/ /mig gi 'bras bu'i nang du th+l+hiM gi yi ge las yongs su rdzogs pa'i 'chad par 'gyur ba'i sa'i snying po'i gzugs rnam par bsgom par bya'o/ /de bzhin du rna ba la phyag na rdo rje'o//yi ge me ni rtsar bkod de/ /zhes bya ba la sogs pa la/ lus thams cad la gnas pa'i rtsa la yongs su brtag par bya'o/ /kun du bzang po zhes bya ba ni kun du bzang po'o/ /dgod byas de nas zhes pa la sogs pa la/ cho ga bzhin zhes bya ba de ni de bzhin gshegs pa rnams ni yi ge'i gzugs kyis so//spyan la sogs pa ni khams la bzhugs pas so/ /byang chub sems dpa' rnams dang khro bo rnams ni sngags las nges par bskyed pa'i gzugs kyis so/ /sku yi dkyil 'khor rdzogs gyur nas/ /zhes bya ba la sogs pa ni shin tu rnal 'byor gyi ting nge 'dzin no//spyi bo'i dbus su gnas par bsam/ zhes bya ba la/ dpral ba'i dbus su oM yongs su gyur pa las byung ba'i zla ba'i dkyil 'khor ro/ /bdag po dang ni bcas pa ru/ /zhes bya ba la/ bdag po ni rnam par snang mdzad do/ /de dang lhan cig pa'i mthar thug par sbyor ba dang ldan pa ni/bdag po dang ni bcas pa ru/ /zhes bya ba ste/ de'i phyir de la de skad ces bya'o/ /de dbus bdag po zhes bya ba la gtso bor gyur pa gcig la'o/ /gsol ba gdab ces bya ba la sogs pa la/ tshigs bcad dang pos ni gtso bo la'o/ /gnyis pas ni 'khor rnams la'o/ /spyan dang lhan cig ldan pa'i zhes bya ba la sogs pa la spros pa'i gzugs ma lus pa dang lhan cig tu zhugs par bsgom par bya'o//gnyis brjod pas ni gsol ba gdab/ /ces bya ba ni thams cad snga ma bzhin du bya ba'o/ /rang gi gtso bor yang dag ldan/ /zhes bya ba ni snga ma bzhin no/ /de ltar rigs gsum dbye ba yis//zhes bya ba la sogs pa la rigs gsum dbye ba yis zhes bya ba ni rnam par snang mdzad dang 'khor ba las 'das pa dang mi bskyod pa'i gzugs nyid do/ /slar yang zhes bya ba la sogs pa thams cad bdag nyid ces bya ba ni de bzhin gshegs pa lnga'i ngo bo'o/ /zla ba'i dkyil 'khor dbus gnas pa'i//zhes bya ba ni ri bong can la nye bar gzhug pa'o/ /dam tshig sems dpa' zhes bya ba ni dam tshig sems dpa' zhes bya ba'i ming can no/ /snying ga'i dbus na gnas phra mo'i/ /zhes bya ba ni ye shes sems dpa'i zhes bya ba tshad chung ba'i rnam par bsgom par bya'o//de'i thugs kar zla ba'i dkyil 'khor la ting nge 'dzin sems dpa' zhes bya ba yi ge hUM dgod par bya'o/ /rnal 'byor chen po rdzogs par bskyed pa'o/ /de ltar sbyor ba chen po bskyed nas zhes bya ba la sogs pa la cho ga zhes bya ba ni 'chad par 'gyur ba'i mtshan nyid can no/ /sbyor ba yis zhes bya ba ni ting nge 'dzin las bskyed pas so//sgrub pa chen po brtsam par bya/ /zhes bya ba ni 'khor dang bcas pa'i dkyil 'khor pa'i 'khor lo'i bdag nyid thams cad bskyed par brtsam pa'o/ /rnyed nas ni zhes bya ba la sogs pa la/ bu mo zhes bya ba ni gzugs dang lang tsho dang ldan pa gang la mig yangs pa yod pa de la de skad ces bya'o//khrus mkhan gyi ni bu mo zhes bya ba ni nye bar mtshon pa tsam ste rigs gzhan dag kyang yin no/ /lha mo rdo rje gzugs la sogs/ /zhes bya ba ni gzugs rdo rje la sogs pa rnams dang / sa'i snying po la sogs pa'i byang chub sems dpa' rnams ji ltar rigs pa snyoms par zhugs pa'o//de nyid la ni rnam bsams la/ /zhes bya ba ni de nyid kyi mig la sogs pa'i skye mched snga ma bzhin du sngags kyi yi ge las rdzogs pa rnam par bsgom par bya'o/ /'jig rten dbang phyug la sogs pa dag kyang sngar bstan pa'i sngags las rdzogs pa nyid dang mtshungs pa'i 'khyud pa lce la sogs pa'i gnas rnams su dgod par bya'o zhes bsams pas so//lag g.yas zhes bya ba la/ rdo rje ro langs ma ni gshin rje gshed dang snyoms par zhugs pa'o/ /gzhan gyis mi thub ma ni shes rab mthar byed dang snyoms par zhugs pa'o//khro gnyer ma zhes pa ni rta mgrin dang snyoms par zhugs pa'o/ /ral pa gcig ma zhes bya ba ni bdud rtsi 'khyil pa dang snyoms par zhugs pa'o/ /gzhan yang dpung pa g.yas pa la zhes bya ba la sogs pa la/ sna tshogs rdo rje ma mi g.yo ba dang snyoms par zhugs pa'o/ /g.yas pa'i phyag gi lhag ma la ni sna tshogs rin chen ma 'dod pa'i rgyal po dang snyoms par zhugs pa'o//pus mo g.yas pa gnas pa yang / /zhes bya ba la yang zhes bya ba ni phyag rgya'i'o/ /sna tshogs pad+ma ni dbyug pa sngon po dang snyoms par zhugs pa'o/ /sna tshogs las ma ni stobs po che dang snyoms par zhugs pa'o//nam mkha'i rdo rje ma zhes bya ba ni gtsug tor 'khor los sgyur ba dang snyoms par zhugs pa'o/ /sa 'dzin lha mo ni gnod mdzes rgyal po dang snyoms par zhugs pa'o/ /de ltar zhes bya ba la sogs pa la/ sku dang gsung dang thugs byin gyis brlab pa la sogs pa thams cad cho ga bzhin byin gyis brlabs nas rjes thogs su rdo rje dang pad+ma sbyar ba brtsam par bya'o//hUM gi sngags kyi zhes bya ba ni yi ge hUM yongs su gyur pa las rang gi rdo rje rdo rje rtse lnga pa'i rnam pa lta bu bsgom par bya'o/ /oM zhes bya ba ni oM yongs su gyur pa las byung ba'o/ /de bzhin zhes bya ba la sogs pa la pad+ma'i zhes bya ba ni shes rab kyi ste yi ge hri las rnam par bsgoms la/yi ge a las ni de'i lte ba bsgom par bya'o/ /'od zer lnga yis khyab bsams la/ /zhes bya ba ni de bzhin gshegs pa lnga'i rang gi 'od zer spros pa ste/ rdo rje 'chang chen po'i rang bzhin dang /thar pa chen po'i grong khyer chen po dang / shes rab kyi pha rol tu phyin pa'i ngo bor mos par byas nas/ /de'i 'og tu rdo rje 'chang gi bsgrub pa brtsam par bya'o/ /rang gi byang chub sems zhes bya ba la sogs pa la/ byang chub sems nyid 'byung ba ni phyir 'chor ba'o/ /de'i tshe phaT ces bya ba'i sngags brjod par bya ste/nor bu'i rtse mo'i bu gar pra phaT kha dog ser po rnam par bsgoms la phyir 'byung bas byung nas brjod par bya'o/ /des zhes bya ba ni sgrub pa po'o/ /rnal 'byor rab kyi mtha' thob par gyur pa ni byang chub kyi sems 'chor bar mi 'gyur te/ 'di ltar bde ba chen po'i rnal 'byor yang dang yang goms par byas par ring du 'jug pa 'phel bar 'gyur ro//gal te goms par ma gyur par shor bar gyur na de'i phyir/ phyung nas sngags pas slar yang ni/ /zhes bya ba la sogs pa smras te/ byang chub sems zhes bya ba ni rang gi khams kyi thig le pad+ma'i nang na gnas pa'i g.yon pa'i srin lag dang mthe bong gnyis kyis blangs la bya'o//phyogs bcu'i zhes bya ba ni dkyil 'khor gyi 'khor lo ma lus pa rang rang gi sngags brjod pa sngon du 'gro bas so/ /de'i rjes thogs su 'di ni brjod par zhes bya ba ni gdon par bya ba'o/ /rang sngags kyi yi ge las byung ba zhes bya ba ni hUM las bskyed pa'o//rdo rje gsum byin gyis brlabs bdag /ces bya ba'i sku dang gsung dang thugs byin gyis brlabs nas pad+ma'i nang du sprul te/ slar yang zhe sdang rdo rjer sprul la/ mi bskyod rdo rje can zhes bya ba ni sngags kyis spro zhing blta bar bya'o/ /mi bskyod pas ni dbu rgyan zhes bya ba ni rdo rje sems dpas dbu rgyan byas pa'o//mthing shun bzang po zhes bya ba ni in+d+ra ni la'i mdog can no/ /'di ni thugs ka las byung nas/ /zhes bya ba ni shes rab kyi thugs ka nas so/ /byung nas des 'dul ba'i sems can phyogs bcu na gnas pa rnams la gzigs par mdzad do/ /sbyangs nas zhes bya ba ni nyon mongs pa med par byas pa'o//zhe sdang rdo rje'i gnas 'jog ces pa ni mi bskyod pa'i rigs can rnams rigs de la'o/ /rdo rje mgon po zhes bya ba ni rdo rje 'chang ngo / /spyan snga ru zhes bya ba ni sngon du'o/ /rjes zhugs zhes bya ba ni kha'i sgo nas so/ /sa snying ga zhes bya ba ni snying ga'i sa bon du'o/ / bdag nyid mi bskyod pa'i rnam pa'o/ /rang gis phyag rgyas 'khyud ces bya ba ni reg rdo rjes 'khyud pa'o/ /zhe sdang rdo rje'i ting 'dzin gnas/ /zhes bya ba ni thugs rdo rje nyid dkyil 'khor sprul pa'i byed pa po yin pa'i phyir ro/ /dzi na dzika ces bya ba dang / 'byung zhes bya ba la shes rab kyi pad+ma'i nang du'o//ston ka'i zla ba'i zhes bya ba la sogs pa ni mdog dkar po'o/ /de bzhin du thugs ka las byung ste zhes bya ba ni shes rab kyi thugs ka las so/ /gti mug spyod gnas zhes bya ba ni de bzhin gshegs pa'i rigs can rnams de'i rigs la'o/ /shar phyogs kyi zhes bya ba mdun du'o/ / 'khor lo ni rten gyi dkyil 'khor ro/ /bzhugs zhes bya ba ni gnas par 'gyur zhes bya ba'i bar du'o/ /rin chen tog ni rin chen 'byung ldan der dbyung bar bya'o/ /zhi ba zhes bya ba ni zhi ba dang sgeg pa'i ro dang ldan pa'o/ /g.yas su zhes bya ba ni phyag g.yas su'o/ /nga rgyal gnas la gnas pa rnams//zhes bya ba ni nga rgyal la gnas pa'o/ /lho'i char zhes bya ba ni dkyil 'khor gyi gtso bo'i ngo bo'o/ /rin chen dbus su zhes bya ba ni rin po che'i gdan la'o/ /rdo rje mtha' yas 'od 'byung ste/ /zhes bya ba snang ba mtha' yas so/ /sngon bzhin 'dod chags can sbyangs nas//zhes bya ba ni de'i rigs can rnams so/ /rgyab kyi pad+mar zhes bya ba ni dkyil 'khor gyi gtso bo'o/ /sngags pas don yod rdo rje can/ /zhes bya ba la sogs pa la/ 'od zer rnam par 'phro zhes bya ba ni 'od zer gyi tshogs so/ /log pa'i dag can zhes bya ba ni ser sna can no/ /byang gi phyogs su zhes bya ba ni gtso bo'i'o//zhe sdang zhes bya ba la sogs pa la/ zhe sdang ni mi bskyod pa'o/ /gti mug ni rnam par snang mdzad do/ /chags pa ni snang ba mtha' yas so/ /yid bzhin gyi nor bu ni rin chen 'byung ldan no/ /dam tshig ni don yod grub pa'o/ /rigs ni lnga po 'di dag ces bya ba ni rigs rnams kyi gtso bo'o//'dod dang thar pa zhes bya ba la sogs pa la/ 'dod par bya bas na 'dod pa ste/ 'jig rten pa'i dngos grub sgrub pa la sogs pa'o/ /'dod chags la sogs pa'i 'ching ba las grol bas thar pa ste/ nges par legs pa'i mtshan nyid can no/ /mo ha rA ti'i sngags las byung //zhes bya ba la sogs pa la/ ut+pa la dkar po zhes bya ba ni chu skyes dkar po'o/ /dwe Sha rA ti'i sngags las skyes/ /zhes bya ba la sogs pa la/ ut+pa la sngon dmar zhes bya ba ni mdog sngon dmar du 'dug pa'o/ /byung zhes bya ba ni shes rab kyi thugs ka nas so/ / rA ga rA ti'i sngags las skyes/ /zhes bya ba la sogs pa la/ pad+ma rA ga'i nor bu'i 'od/ /ces bya ba ni mdog dmar po'o/ /gang gi ral pa'i tshogs la 'od dpag med dang bcas pa de la de skad ces bya'o/ /'byed par mdzad ces bya ba ni rnam par rgyas par mdzad pa'o/ /gdon ni gnod pa chen po'o//badzra rA ti'i sngags las skyes/ /zhes bya ba la sogs pa la/ yid 'ong zhes pa ni yid dang 'tsham pa'o/ /dUR+Wa'i lo ma'i 'od kyi mnyam/ /zhes bya ba ni mdog ljang gu'o/ /don yod pas ni zhes bya bas ni don yod par grub pas so/ /ut+pa la sngon po zhes bya ba ni ut+pal sngon po'o//byung nas zhes pa ni snga ma bzhin no/ /rnal 'byor pas ni rim gnyis par/ /zhes bya ba ni sgom pa pos so/ /dbyung zhes bya ba ni de bzhin du sprul pa dgod par bya'o/ /me'i phyogs su zhes bya ba la sogs pa la/ me long 'dzin mdzad de zhes bya ba ni me long 'dzin par mdzad pa'o/ / gnyis zhes bya ba ni g.yas g.yon dang po gnyis kyis so/ /lhag mas gti mug dga' dang mtshungs/ /zhes bya ba ni sangs rgyas spyan gyi phyag mtshan dang kha dog 'dzin pa'o/ /bden bral phyogs su zhes bya ba la sogs pa la ser mo zhes bya ba ni ser zhing rtsa dmar ba'o/ /zhal gsum zhes bya ba ni ser po dang dmar po dang dkar po ste zhal gsum dang ldan pa'o//phyag gnyis na zhes bya ba ni phyag dang po gnyis na'o/ /rlung gi phyogs dgod ces bya ba la/ zhal gsum sku mdog dmar mo zhes bya ba ni dmar po dang sngon po dang dkar po'i zhal can no/ /phyag gnyis kyis ni dung bsnams te/ zhes bya ba ni g.yas g.yon gnyis kyi dang po gnyis na'o/ /lhag ma gos dkar can dang mtshungs/ /zhes bya ba ni de'i phyag mtshan 'dzin pa'o/ /dbang ldan phyogs zhes bya ba la/ zhal gsum zhes bya ba ni ljang gu dang nag po dang dkar po'o/ /rnga sgra ni don yod par grub pa'o/ /phyag gnyis na ni ro yi snod//ces bya ba ni g.yas g.yon gyi phyag dang po gnyis na'o/ /rdo rje sems dpa' zhes bya ba la sogs pa la mi bskyod pa legs par 'khyud nas gnas par bsam par bya ste zhes pa bsgom par bya ba'o/ /bdag po lta bu zhes bya ba ni 'khor lo'i bdag po gang yin pa de dang 'dra bar gyur pa'o/ / rigs gsum zhes bya ba la sogs pa la 'byung ba ni zhes bya ba ni sprul nas dgod par bya'o/ /mai th+l+hiM sa bon las byung ba/ /zhes bya ba la sogs pa la phyag mtshan dang dbyibs la sogs pa ni rnam par snang mdzad dang mtshungs pa'o/ /oM gyi sa bon zhes bya ba la sogs pa la yi ge oM gyi sa bon las byung ba rin chen 'byung ldan dang mtshungs pa'o//go rims bzhin du zhes bya ba ni go rims ma 'chol bar ji ltar 'byung ba bzhin du zhes bya ba'i don to/ /oM dang hUM las yang dag 'byung / /zhes bya ba ni yi ge oM las 'jig rten dbang phyug yi ge hUM las ni 'jam pa'i dbyangs so/ /nub tu zhes bya ba ni nub phyogs kyi snam bu la ste snang ba mtha' yas dang 'dra'o//de lta bas na lha zhes bya ste/ nor bu pad+ma rA ga'i 'od ltar gsal bar byed pa byas nas so/ /byang phyogs su yang 'byung ba ni/ /zhes bya ba dgod par bya'o/ /oM dang saM gyi sa bon skyes/ /zhes pa la sogs pa la/ sgrib sel zhes bya ba ni sgrib pa thams cad rnam par sel ba'o//kun du bzang po zhes bya ba ni kun du bzang po ste rim pa bzhin no/ /'di dag ces bya ba la sogs pa la/ dbu rgyan rang gi mgon zhes bya ba ni rang gi phyogs na rnam par gnas pa'i bdag pos dbu rgyan byas pa'o/ /byams pa 'ba' zhig ces bya ba la sogs pa la/ de 'ba' zhig klu shing gi me tog rnams te gzhan dag la ni rang rang gi phyag mtshan med do/ /'di dag skye mched rnam sbyong zhing / /zhes bya ba la sogs pa la/ skye mched kyi sgo nas dge ba dang mi dge ba'i las kyi mtshan nyid can rgyas pas na de'i phyir skye mched ces bya ste mig dang rna ba dang sna dang lce dang lus dang yid ces bya ba'o//'di dag ces bya ba ni byang chub sems dpa' rnams so/ /lha yi mig sogs rtsol ba po/ /zhes bya ba ni zag pa med pa'i mig la sogs pa skye bar byed pa'o/ /slar byon zhes bya ba ni thugs ka las byung nas sems can rnams kyi skye mched dag par byas te/ slar yang byon nas rang rang gi gdan la ci rigs par bzhugs so zhes bya ba ni lhag ma'o//ya mAn+ta kr-ita sngags las byung / /zhes bya ba la sogs pa la sngags las byung zhes bya ba ni yi ge hUM las bskyed pa'o/ /byung zhes bya ba ni bshad ma thag pa'i sngags kyis so/ /'bar ba'i tshogs kyis rnam par 'khrigs/ /zhes bya ba ni 'bar ba'i phreng ba'i rnam par bskor ba'o//pradz+nyAn+ta kr-ita sngags las byung / /zhes bya ba la sogs pa la/ sngags byung zhes bya ba ni snga ma bzhin no/ gzhan gyis mi thub pa zhes bya ba ni shes rab mthar byed do/ /sku mdog dkar zhes bya ba ni mdog dkar po'o/ /sbrul gyis brgyan zhes bya ba ni khro bo thams cad la sbyar bar bya'o//gsus khyim che ba'i mi'u thung gi gzugs can spyan gsum pa zhes bya ba yang thams cad la sbyar bar bya'o/ /lho'i phyogs su zhes bya ba ni gshin rje'i phyogs su'o/ /bzhugs par gyur zhes bya ba ni bzhugs par gyur pa'o/ /pad+mAn+ta kr-ita ces bya ba la sogs pa la/ rta mgrin zhes bya ba ni pad+ma mthar byed do/ /spyan gsum zhes bya ba ni spyan gsum dang ldan pa'o/ /zhal gdangs zhes bya ba ni zhal rnam par 'gyur ba'o/ /dpa' bo zhes bya ba ni bla na med pa'i brtson 'grus dang ldan pa'i phyir ro/ /snyems dang bcas pas zhes bya ba ni dgra sta la rten dang bcas pa'o/ /g.yon zhes bya ba ni g.yas pa ma yin pa'o//nub kyi phyogs su zhes bya ba ni chu dbang gi phyogs su'o/ /big+h+nAM ta kr-ita sngags las byung / /ut+pal sngon po'i 'dab ltar ljang / /zhes bya ba ni in+d+ra nI la'i mdog can no/ /byang gi phyogs su zhes bya ba ni ku be ra'i phyogs su'o/ /rang gi gsang sngags las byung ba//zhes bya ba la sogs pa la/ byung ba zhes bya ba ni sprul nas dgod pa'o/ /mi bzad ha ha zhes bya ba'i sgra dang ldan pa'o/ /shar lho mtshams su zhes bya ba ni me'i phyogs su'o/ /rang gi gsang sngags zhes bya ba la sogs pa la/ 'dod rgyal ni khro bo chen po'o/ /phyag rgya dag gis 'ching ba mdzad/ / ces bya ba ni lag pa g.yas g.yon gnyis kyi rgyab sprad la mthe'u chung gnyis dang mdzub mo gnyis sbrel ba snying gar 'dzin pa'o/ /bden bral bgegs ni 'dzin pa'o/ /zhes bya ba ni bgegs 'jigs par byed pa'o/ /dbyig sngon zhes bya ba ni khro bo'i rgyal po'o/ /brtul zhugs can ni stobs po che ste/ 'od dpag tu med pa'i dbu rgyan can no/ /bsal nas ni zhes bya ba la sogs pa la/ yams zhes bya ba ni gnod pa ltar des byas pa'i sems can nyams par byed pa ni 'jig pa ste bsal ba'o/ /rang sngags yi ge las byung ba/ /zhes bya ba la sogs pa la/ don yod grub pa'i dbu rgyan can no/ / stobs po che ni sngags pas dbyung / /zhes bya ba ni snga ma bzhin no/ /'jigs pa'i sgra ni gad rgyangs ha ha zhes sgrogs pa'o/ /yan lag thams cad sbrul gyis brgyan/ /zhes bya ba ni mgo bo dang mgrin pa dang rna ba gnyis dang lag pa gnyis dang rkang pa dag la'o/ /dgra s+t+wa zhes bya ba ni s+t+wa re'o/ /mkha' 'gro zhes bya ba ni grong gi mkha' 'gro ma'o//sogs kyi sgras ni srin po la sogs pa bsdu'o/ /gnas zhes bya ba ni stobs po che'o/ /rang sngags kyi yi ge las byung ba la sogs pa la/ mkha' ltar sngo sangs zhes bya ba ni sngo skya'o/ /gsus pa 'phyang ba ni gsus khyim che ba'o/ /gzhan na zhes bya ba ni g.yon na'o//gtum po g.yon brkyang gnas pa yis/ /zhes bya ba ni drag po'i gzi brjid can no/ /tshangs pa'i gnas zhes bya ba ni dkyil 'khor gyi bdag po'i steng gi cha'o/ /rang sngags yi ge zhes bya ba la sogs pa la/ gzhan nam mkha' bzang po'i mdog ces bya ba ni zar ma'i me tog gi mdog 'dra ba'o//sa'i 'og tu zhes bya ba ni rten gyi dkyil 'khor gyi 'og tu'o/ /de zhes bya ba ni gnod mdzes rgyal po'o/ /bskyed nas ni zhes bya ba la sogs pa la/ dkyil 'khor zhes bya ba ni sprul pa'i dkyil 'khor ro/ /'khor lo'i zhes bya ba la sogs pa la/ dbus su gnas pa'i dkyil 'khor gyi bdag po'o//pad+mo'i rnal 'byor zhes bya ba la/ rnal 'byor ni ting nge 'dzin no/ /yang 'di'i phra ba ni rgyas pa la ltos nas 'byung bar 'gyur te/ de ni brtan pa nyid yin no/ /rang gi sems brtan par bya ba'i phyir bstan pa'i ting nge 'dzin gyis rjes thogs su de bstan par rtsom pa ni sna'i rtse mor zhes bya ba la sogs pa ste/shes rab kyi chu skyes kyi sna'i rtser ro/ /yungs kar zhes bya ba ni yungs kar gyi 'bras bu'i tshad tsam gyis rang gi lha'i phyag mtshan no/ /bsam zhes bya ba ni bsgom pa'o/ /'gro dang mi 'gro yungs kar la/ /zhes bya ba ni 'gro ba dang mi 'gro ba 'jug par gyur pas 'gro ba dang mi 'gro ba ni dkyil 'khor gyi 'khor lo zhes bya ba'i bar du ste/dkyil 'khor ba ni rgyu ba'o/ /mi rgyu ba ni rten gyi dkyil 'khor ro/ /bsgom mo zhes bya ba ni brten par bya ba'o/ /ye shes zhes bya ba ni bla na med pa'i ye shes so/ /de'i gnas ni rab tu gnas pa ste/ ye shes 'char ba'i sa'o/ /de nyid kyi phyir nyams dga' ste/yang dag par dga' bar bya ba ste bsgom par bya ba yin no zhes bya ba'i bar du'o/ /gsang ba ni shin tu sbas pa ste/ bskyed pa'i rim pa'i rnal 'byor pa la'o/ /brtags zhes bya ba ni bla na med pa'i 'bras bu 'byung bar byed pa'i ye shes te thig le gzugs su brtags pa'o/ / rin chen kha dog sna lnga pa/ /zhes bya ba la sogs pa la/ de bzhin gshegs pa lnga'i ngo bo yin pa'i phyir ro/ /rin chen ni mu stegs la sogs pa bsod nams dang mi ldan pa rnams kyis rnyed dka' ba'i phyir ro/ /yungs kar gyi 'bru tshod tsam zhes bya ba ni de tsam gyis tshad dang ldan pa'o/ /sna yi rtse mor nan tan du//zhes bya bas ni rnal 'byor gnyis pa ston par byed pa'o/ /sna'i rtse mo ste smin mtshams su der 'bad pas zhes bya ba ni man ngag ste nges zhes bya ba'i don to/ /bsgom zhes bya ba ni brtan par bya ba'o/ /rnal 'byor zhes bya ba ni yang dag par sbyor ba 'byung ba dang 'jug pa shes so//de lta bas na rtag tu ste dus thams cad du'o/ /brtan par gyur nas zhes bya ba la sogs pa la/ spro ba ni de bzhin gshegs pa lnga'i 'od zer gyi tshogs so/ /rin chen zhes bya ba ni bdun pa'i don gyi gnyis pa'o/ /rin chen brtan par gyur nas spro bar bya'o zhes bya ba'i don to/ /brtan par ma gyur zhes bya ba ni de la sems mi brtan pa'o//de mi spro zhes bya ba ni 'bras bu med pa'i dgag par bya ba'o/ /rab mchog sprin ni spro bar bya/ /zhes bya ba la sogs pa la/ sangs rgyas ni de bzhin gshegs pa rigs lnga'i bdag po'o/ /de rnams 'bar ba ni 'od zer te de dang 'od mnyam pa'o//sus she na 'khor gyi ste de dag gi rigs kyi lha rnams kyis so/ /sprin zhes bya ba ni tshogs so/ /phra mo'i rnal 'byor rnam pa gnyis bstan nas/ bzlas pa rnam pa gnyis smra bar 'dod nas slong mo za zhing zhes bya ba la sogs pa smras te/ slong bar byed pas na slong mo ste/ de za ba ni slong mo za ba'o des sangs rgyas bsgrub pa'i phyir gsang sngags bzla bar mi bya'o//gal te bzar med na ci zhig bza' ba yin zhe na/ ma bslangs pa la chags mi bya/ /zhes bya ba smras te/ chags pa ni dga' ba ste nges par bya zhes dam bca' ba'o/ /yan lag gnyis med ces bya ba ni/ lha'i gzugs dang gnyis su med pa'o//'dod pa kun la longs spyod cing / /zhes bya ba ni 'bad pa med par rnyed pa'o/ /rdo rje bzlas nas spro bar bya/ /zhes bya ba la sogs pa la yi ge gsum bzlas nas dam tshig sems dpa' spro bar bya'o/ /rdo rje zhes bya ba ni de bzhin gshegs pa'i bkod pa'o/ rdzogs par gyur nas zhes bya ba ni sngags bzla ba rdzogs nas so//bsdu bar bya ba ni de ltar yang dang yang du bsdu bar bya ba'o/ /yang na tha dad yi ge slong mo ste/ de brjod pa'i ngang tshul can ni slong mo za ba'o/ /de lta bu'i ngo bos bzlas par mi bya ba'o/ /ma blangs pa la chags mi bya/ /zhes bya ba ni tha dad pa'i yi ge la mos par mi bya'o zhes bya ba'i don te lha'i rnal 'byor dang 'gal ba'i phyir ro//bzlas nas zhes bya ba la sogs pa ni rlung phyir byung nas bya ba'i don to/ /rdo rje spro bar bya zhes bya ba ni yi ge hUM ngo / /rdzogs nas zhes bya ba ni sngags rdzogs nas so/ /bsdu bar bya zhes bya ba ni sngags kyi dang po brjod nas bsdu bar bya ba'o//'di ni zhes bya ba la sogs pa la/ don dam pa yi bzlas par bshad/ /ces bya ba ni/ phra mo'i rnal 'byor bzlas pa yang / /zhes bya ba la sogs pa ste/ ci 'dod pa zhes bya ba ni gzhan dag kyang bya ba'o/ /bdag nyid ces bya ba ni dkyil 'khor gyi gtso bo'o/ /slar yang zhes bya ba ni snga ma bzhin du snang ba med par bya ba'o//de nas dkyil 'khor gnas pa'i lha mo zhes bya ba ni sangs rgyas spyan dang mA ma kI dang gos dkar mo dang sgrol ma'o/ /bdag po zhes bya ba ni dkyil 'khor gyi gtso bo'o/ /tshigs su bcad pa 'di zhes bya ba la sogs pa la 'di zhes bya ba ni 'chad par 'gyur ba'o//skul bar byed ces bya ba ni stong pa nyid kyi ting nge 'dzin las slong bar byed pa'o/ /khyod ni rdo rje'i thugs zhes bya ba la sogs pa la/ mdun na gnas pa lta bur rnam par bsams nas smra ba ste/ thugs la dbang mnyes pa thob par gyur pa'i phyir dang / khams gsum gyi chos kyi rgyal srid brnyes par gyur pa'i phyir ro//gnas pa'i dbang phyug ces bya ba ni skul bar byed pa'o/ /sems can khams zhes bya ba ni thams cad kyi bdag nyid yin pa'i phyir ro/ /dga' ba ni rtsed mo'o/ /de'i yid du 'ong ba gang yin pa de la de skad ces bya'o/ /don chen po mchog tu dga' ba'o/ /de ni 'dod par bya ba yin zhing bsgrub par bya ba yin pas na don byed 'dod pa ste/de ni 'khyud pa la sogs pa'i rtsed mos bdag la bskyab tu gsol cig pa'o/ /sems can thams cad skye ba'i rgyur gyur pas na yab ces bya'o/ /mchog tu thugs rje can nyid kyi phyir sems can rnams kyi gnyen mchog go//bdag ni zhes bya ba ni bdag nyid do/ /gson pa ni srog dang ldan pa'o/ /mgon po ni bdag po'o/ /gal te bzhed na bdag la bstod pa'i rol pa mdzad du gsol zhes bya ba'o/ /gzhan yang mA ma kIs bskul bar bstan pa'i phyir/ rdo rje sku khyod ces bya ba la sogs pa smras te nyams pa med pa'i sku yin pa'i phyir ro//bka' yi 'khor los sems can kun la phan/ /zhes bya ba ni bka'i 'khor lo gang la sems can kun la don yod pa nyid kyi phyir ro/ /sangs rgyas ni phung po lnga'o/ /de dag gi don ni kun rdzob kyi bden pa'o/ /byang chub ni don dam pa'i bden pa'o/ /de dag sbyar ba las byung ba'i gzugs ni mdog ces bya'o//de sems can la phan pa'i bsam pa nyid kyis rab tu ston pa ni rab tu phan par gzigs so/ /'dod chags zhes bya ba ni 'dod chags rnam par sbyang bar bya ba'i phyir ro/ /dam tshig chags pa ni 'dod chags kyi spyod pa'i ngo bo nyid do/ /bdag la dgyes pas zhes bya ba bdag la rol mo mdzod cig pa'o//khyod ni rdo rje gsung ste zhes bya ba la sogs pa ni gsung gi dbang phyug nyid thob pa'i phyir ro/ /phan zhing thugs brtse ba ni sems can gyi khams ma lus pa la'o/ /sems can gyi dgongs pa nyid don de mdzad pa'o/ /rtag tu dus thams cad du 'jug pa'o/ /bdag la dgyes par mdzod cig ces bya ba ni 'dod pa'i spyod pa'o//kun ni sems can gyi khams so/ /bzang po ni dge ba'o/ /de byed pas ni kun du bzang po'o/ /khyod ni rdo rje'i sku ste zhes bya ba la sogs pa la rdo rje zhes bya ba ni mi phyed pa'i sku'o/ /las kyi rigs kyi bdag po yin pa'i phyir dam tshig mchog ces bya'o//sems can thams cad la phan pa'i rgyur gyur pa'i phyir phan don che'o/ /shAkya'i rigs su 'byung ba rnams kyi mchog tu gyur pa'i phyir/ yang dag rdzogs sangs rgyas kyi gdung mchog ces bya'o/ /bdag dang gzhan gyi cha la dmigs pa dang bral ba nyid yin na yang sems can rnams la mnyam pa nyid du gzigs pa nyid do//yon tan rin chen mang po'i gter gyur bdag /ces bya ba ni chags pa dang chags pa dang bral ba dang / chags pa bar ma dang 'od gsal ba skyed par byed pa'o/ /de ltar yang dag yon tan ni/ /zhes bya ba la sogs pa la/ mgon po zhes bya ba ni dkyil 'khor gyi gtso bo'o//yang dag yon tan ni brjod pas zhes bya ba ni sngar bstan pa'o/ /de bzhin gshegs pa zhes bya ba ni dkyil 'khor pa'o/ /mi bskyod pa la sogs zhes bya ba la nyon mongs pa'i bkod pa thams cad kyis mi g.yo bas na mi bskyod pa'o/ /gang gi thugs rdo rje yin pa de la de skad ces bya'o//stong pa bzhi'i bdag nyid yin pa'i phyir ye shes che'o/ /rdo rje ni de bzhin gshegs pa thams cad dang / ting nge 'dzin par mdzad pas na rdo rje dbyings so/ /bden pa gnyis rnam par dbye ba yongs su shes pas mkhas chen po'o/ /don dam pa'i dkyil 'khor dang /sku'i dkyil 'khor dang / 'byin pa'i dkyil 'khor gyi rang bzhin yin pa'i phyir dkyil 'khor gsum mo/ /sku dang gsung dang thugs rdo rje rnams kyi mchog tu gyur pa'i phyir rdo rje mchog go/ /gsang ba'i dbyangs zhes bya ba ni dam tshig gi de kho na nyid bdag la rab tu ston cig pa'o//rnam par snang mdzad ces bya ba la sogs pa la/ 'od gsal ba'i mes gsal bar gyur pas na rnam par snang mdzad do/ /de nyid kyi phyir rab tu dga' ba'o/ /rdo rje ni de bzhin gshegs pa rnams so/ /de rnams dag pa'i ngo bo nyid yin pa'i phyir zhi ba zhes bya'o/ /mchog tu dga' ba'i bdag nyid yin pa'i phyir dga' ba ma zhes bya'o//rang bzhin gyis 'od gsal ba yin zhing dag pa'i chos ston pa ste rab tu ston pa'o/ /rdo rje zhes bya ba ni bod pa'o/ /rin chen ni rin po che'i rigs so/ /de dag gi rgyal por gyur cing gsal bar byed pa yin pas na rin chen rgyal po'o/ /mnyam pa nyid kyi ye shes kyi rang bzhin yin pa'i phyir rab tu zab ces bya'o//de nyid kyi phyir rdo rje nam mkha' dri med ces bya'o/ /gdod ma nas dag pa'i phyir dngos nyid dag pa'o/ /chos thams cad dri ma med pa'i phyir gos pa med pa'o/ /gsang ba'i gsung ni ston par byed pa'o/ /rdo rje mi 'chi 'dod chags che/ / zhes bya ba la sogs pa la/ rdo rje mi 'chi ba ni pad+ma'i rigs can rnams so/ /de rnams kyi bdag por gyur pa ni rgyal po che'o/ /so sor rtog pa'i ye shes kyi ngo bo nyid yin pa'i phyir mi rtog ces bya'o/ /'dod chags ni 'khor ba la chags pa'i mtshan nyid can no/ /de'i pha rol tu phyin pa'i blo gang la yod pa de ni brnyes pa'o//rdo rje dag pa gdon mi za/ /zhes bya ba la sogs pa la/ gdon mi za ni don yod grub pa'i rigs can rnams so/ /de rnams yang dag par rdzogs pa'i sangs rgyas pa ni rdo rje'o/ /zhi ba la sogs pa'i las bsams pa rnams rdzogs par byed par byas pas na/bsams pa thams cad yongs su rdzogs pa zhes bya'o/ /'od gsal ba las yang dag par byung ba'i phyir/ dag pa'i ngo bo nyid las byung / /zhes pa ste/ kye'i rdo rje sems dpa' khyod la phyag 'tshal lo zhes bya ba'o/ /de nas/ 'khor lo sangs rgyas kyis bstod gsol/ /zhes bya ba la sogs pa la/ de bzhin gshegs pa lnga'i ngo bos phyag byas pas rjes thogs su lha mo'i 'khor lo 'phro bas rjes su chags par gyur pas gsang ba'i don bshad ces bya ba ni dkyil 'khor pa la'o//ji bzhin mchog tu zhes bya ba ni kun kyang 'od gsal ba'i ngo bo yin pa'i phyir ro/ /rang gi sku yi 'khor lo gzhug / ces bya ba la sogs pa la/ sku'i dkyil 'khor la snga ma bzhin du zhugs pa'o/ /bden pa chen po zhes bya ba ni rdo rje 'chang ngo / /de ltar zhes bya ba la sogs pa la/ rnal 'byor bzhi med ces bya ba ni rnal 'byor dang shin tu rnal 'byor dang rnal 'byor chen po byed ces bya ba ste legs par bslabs pa nyid do//hUM gi snying por zhes bya ba ni yi ge hUM snying gar bsam pa'o/ /de byung rdo rje sems dpa' zhes bya ba ni de yongs su gyur pa las byung ba'i rdo rje sems dpa'i gzugs su'o/ /de blos zhes bya ba ni 'gro ba rnams la rdo rje sems dpa'i blo bskyed pa'o/ /sngags pas ting nge 'dzin zhes bya ba la sogs pa la dmigs pa'i tshe zhes bya ba rgyun mi 'chad par byed pa'i dus su'o//lus ni bskams par 'gyur zhes bya ba lus yongs su bskams par gyur nas so/ /sbyor ba zhes bya ba'i ting nge 'dzin no/ /tshim byed pa zhes bya ba ni rgyas par byed pa'o/ /mtho gang tsam zhes bya ba la sogs pa la dkyil 'khor brtag par bya zhes bya ba ste/a las byung ba'i zla ba'i dkyil 'khor brtag par bya ba ste sgom pa'o/ /oM ni de ru brtag par bya/ /zhes bya ba ni yi ge oM kha dog dkar po de'i dbus su kha thur du bltas pa las kha ba ltar bsil ba'i bdud rtsi rnam pa lnga'i rgyun 'bebs pa'i de'i rim gyis bdag gi lus tshim par gyur par bsgom par bya'o//rdo rje sbyor ba de yis ni/ /zhes bya ba la sogs pa la/ rdo rje'i sbyor ba ni sangs rgyas kyi ting nge 'dzin no/ /gzi can zhes bya ba ni stobs dang kha dog dang ldan pas bkres pa dang skom pa dang bral ba'o/ /skad cig gis ni zhes yud tsam goms par byas pa'o/ / yang gang gi tshe nyin re yi dam du goms par byed na de'i tshe tshe ring bar 'gyur gnyer ma dang skra dkar med par 'gyur ro/ /de'i phyir/ lus ngag yid ni bde ba bdag /ces bya ba la sogs pas bstan pa yin no/ /de ltar zhes bya ba la sogs pas ni sngags pas goms par bya ba'i rnam pa gzhan bstan pa'o//sbyang dang de bzhin rtogs par bya/ /zhes bya ba ni bza' bar bya ba'i rdzas dang snying ga dang lkog ma la sogs pa la rim pa bzhin du sbyar ro/ /de bzhin zhes bya ba ni 'chad par gyur pa'i rim gyis so/ /de nyid bstan pa'i phyir hUM gis legs par zhes bya ba la sogs pa smras te/yi ge hUM las rdo rje dkar po rnam par bsams la de'i 'og gi phyogs su a las pad+ma'i snod do/ /der rdzas rnams ni yi ge oM gyis byin gyis brlabs pa rnam par bsams la/ snod kyi 'og gi phyogs su rlung dang me'i dkyil 'khor ro/ /dang por hUM gis zhes bya ba hUM las byung ba'i rdo rje'i rdul phra rab kyis rdzas rnams sbyangs la/a yig ces bya ba ni a yongs su gyur pa las byung ba'i thod pa'i steng du'o/ /rtogs byas zhes bya ba rang gi sems kyis sems rtogs par bya ba'o/ /phyi nas oM gyis mnan nas 'og gi phyogs na gnas pa'i rlung gis me sbar bar bya'o//'di skad bstan par 'gyur te/ rdzas de dag thod pa'i nang du zhu bar gyur nas dkar por snang bar byas nas 'od zer gyis de bzhin gshegs pa thams cad kyi thugs ka nas bdud rtsi'i mchog drangs nas/ der chud par byas nas yi ge gsum gyis lan bdun gyi bar du byin gyis brlab par bya'o//'di ni zas sbyang ba'o zhes bya ba ni de lta bu'o/ /mgrin pa sbyang ba'i phyir/ dang po'i mgrin mtshams gtso mkha' bsam/ /zhes bya ba la sogs pa la/ mgrin pa'i gtso bo ni snang ba mtha' yas so/ /mkha' ni nam mkha'i phyogs su rnam par bsam pa'o/ /dang po zhes bya ba ni dang po nyid du'o//hrIHlas byung ba'i pad+ma 'dab ma brgyad pa mgrin pa'i dkyil du bsams la der snang ba mtha' yas gzhug par bya'o/ /sprin gyi sgra ni zhes bya ba la sogs pa la snying gar sna tshogs pad+ma dang nyi ma'i dkyil 'khor gyi steng du sprin gyi sgra zhes bya ba'i yi ge hUM bsgoms la/ der ni bza' ba zhes bya ba ni sngar sbyangs pa rnams so/ /rlung gis zhes bya ba ni dbugs rgyu ba bkag la me sbar bar byed do/ /chu zhes bya ba ni lhor phyin pa dang / de 'tshed par byed pa yin pas 'tshed par byed ces bya'o/ /de zhes bya ba ni bza' ba'o/ /dbang chen zhes bya ba ni lte ba'i 'og tu'o/ /gnas su zhes bya ba ni rtsa'i sgo nas zhugs nas phyi nas gnas par 'gyur ro//gang du phyi ni rgyu ba dag /ces bya ba ni gang yang phyir 'byung bar gyur pa'o/ /bza' ba dang zhes bya ba la sogs pa la chu ste lte bar phyin pa dang yongs su zhu bar 'gyur ro/ /bza' ba zhes bya ba la sogs pa la/ kha'i pad+ma zhes bya ba ni sbyangs pa'i mgrin pa'o//snying ga'i pad+ma zhes bya ba ni/ lte ba'i pad+mar phyin 'og tu/ /zhes bya ba ni zhu ba dang ma zhu ba'i gnas skabs so/ /kha sbyor bya ba'i sbyor ba yis/ /zhes bya ba ni man ngag go/ /gsang ba'i pad+ma zhes bya ba la sogs pa la/ thal ba'i mthar zhes bya ba nang gi bdag nyid can gyi me'o//rnal 'byor gyi che ba'i bdag nyid bstan pa'i phyir/ rim rnams zhes bya ba la sogs pa la smras pa yin no/ /rdo rje phreng ba zhes bya ba la sogs pa ni bshad pa'i rgyud kyi ming yin no/ /de nyid ni srub shing ste/ gsang 'dus sbas chu'i rgya mtsho bsrubs pa las so/ /sbas zhes bya ba ni gsang ba'o//gang zhes bya ba ni de ltar gang bstan pa dag go/ /sgrub pa'i thabs kyi yan lag nyid ni bdud rtsi yin no/ /thob pa de zhes bya ba ni thob par gyur pa ste/ des zhes bya ba ni sgrub pa'i thabs kyi bdud rtsi des 'jig rten ngoms par gyur cig pa'o/ /'chi med ni nyams pa med pa ste/ longs spyod rdzogs pa'i sku thob par gyur pa'o//sgrub pa'i thabs mdor byas pa'i dka' 'grel lo// //rnal 'byor rgyud kyi rjes 'brangs nas/ /rdzogs pa'i rim pa shes bya'i phyir/ /dpal ldan klu sgrub phyag 'tshal nas/ /bla mas bstan bya dran bya'i phyir/ /rdo rje bzlas pa'i rim 'ga' zhig / tshig la gnas pa 'dir dgrol bya/ /gang 'dir rigs pa de gzung zhing / /gzhan dag spang ba mkhas pas bya/ /sems can kun gyi bdag nyid mgon/ /zhes bya ba la sogs pa ni dngos po kun gyi ngo bo nyid yin pa'i phyir ro/ /mgon zhes bya ba ni 'gro ba'i skyabs gcig pur gyur pa'i phyir ro//dpal ldan zhes bya ba ni bsod nams dang ye shes kyi tshogs kyi rang bzhin gyi bde ba chen po'i ngo bo nyid yin pa'i phyir ro/ /de lta bu'i thugs rje chen po can gyi rdo rje 'chang chen po rje btsun la phyag 'tshal nas ci zhig bya zhe na/ rdo rje bzlas pa'i rim bshad bya//zhes bya ba la sogs pa smras te/ rdo rje ni dbyer med pa'i ye shes te don dam pa'o/ /don dam gyi mchog kyang yin la dgongs pa yang yin pas zhes byas nas so/ /don de bzlas pa ni rdo rje bzlas pa ste yid kyi rnam pa'o/ /de yang bzlas pa'i yid kyi rnam pa zhes bya ba'i skad kyi dbyings kyi sbyor bas bzlas pa zhes bya ba'i brjod pa ni bzlas pa ma yin te/rdzogs pa'i rim pa'i phyogs 'dir de'i skabs ma yin pa'i phyir ro/ /rim zhes bya ni go rims te/ de bshad bya zhes bya ba ni/ bskyed pa'i rim pa legs gnas shing / /zhes bya ba la sogs pa la mdor bsdus pa'i rim par bstan pa'i lha'i rnal 'byor la gnas pa rnams so//rdzogs pa zhes bya ba ni rdo rje bzlas pa la sogs pa'i rim par 'dod pa'o/ /'di zhes bya ba ni 'chad par 'gyur ba rnams so/ /skas kyi rim pa zhes bya ba ni 'dzeg pa dang 'bab pa'i gnas dang 'dra ba'o/ /skas kyi rim pa lta bu de nyid kyang bstan par bya ba'i phyir/sems can rnams kyi srog gyur pa/ /zhes bya ba la sogs pa smras te/ rlung zhes bya ba zhes pa ni rlung zhes ming du btags pa'o/ /las kun byed ces bya ba ni zhi ba la sogs pa'i las thams cad byed pa'o/ /rnam shes bzhon pa bya ba ni rnam par shes pa'i bzhon par gyur pa'o//lnga'i bdag nyid ces bya ba ni rnam pa lnga ste yang phye yang phye ba ni rnam pa bcu'o/ /de yang 'di lta ste/ srog dang thur sel dang / gyen rgyu dang / mnyam par gnas pa dang / khyab pa dang / rgyu ba dang / rnam par rgyu ba dang / mnyam par rgyu ba dang / rab tu rgyu ba dang / nges par rgyu ba zhes bya ba'o//de lta bu'i srog la sogs pa'i rlung bcu po de dag sems can rnams kyi lus kha dog ji ltar nges par gnas nas ci zhig byed/ ci thams cad rdo rje bzlas pa'i skabs su smra bar bya ba yin nam zhes phyogs snga ma dogs pas de'i phyir 'di dag gi las gzhan nas drangs nas bri bar bya'o//de la rlung lnga ni lus kyi cha la gnas nas lus kyi bya ba rnams byed do/ /rlung lnga ni mig la sogs pa'i skye mched la gnas nas dbang po rnams kyi bya ba byed do/ /srog ni snying ga na gnas te/ mi bskyod pa'i ngo bo nyid do/ /thur du sel ba ni mdoms na gnas pa ste rin chen 'byung ldan gyi ngo bo nyid do//gyen du rgyu ba ni mgrin pa la gnas pa ste/ snang ba mtha' yas kyi ngo bo nyid do/ /mnyam par gnas pa ni lte ba na gnas pa ste/ don yod grub pa'i ngo bo nyid do/ /khyab par gnas pa ni lus kun gyi tshigs la gnas pa ste/ rnam par snang mdzad kyi ngo bo nyid do/ / rgyu ba ni gzugs so/ /rnam par rgyu ba ni sgra'o/ /mnyam par rgyu ba ni dri'o/ /rab tu rgyu ba ni ro'o/ /nges par rgyu ba ni reg go/ /rlung bcu po de dag kyang dbugs dbyung ba dang rngub par gyur nas/ rlung la sogs pa'i dkyil 'khor bzhi dang / lha mo bzhi'i ngo bor yang 'gyur ro/ /de bzhin du 'byung ba lnga'i ngo bos sangs rgyas lnga'i bdag nyid du yang 'gyur ro//yang yi ge gsum gyi ngo bor gyur nas 'jug pa dang gnas pa dang ldang ba'i rim gyis rdo rje bzlas pa'i byed par yang 'gyur ro/ /yang de dag yi ge a bzhi'i ngo bor gyur nas ngag gi brjod pa ma lus par 'byung bar byed do/ /yang de dag mi shigs pa thob nas dngos po med par yang 'gyur ro//rgyu de'i phyir/ rlung gi de nyid rim gyis ni/ /zhes bya ba la sogs pa smras te/ rlung gi de nyid dang por bstan pas na rim gyis ni zhes bya ba ste/ rlung gi de nyid la goms pa sngon du song ba nyid kyis sngags kyi de nyid ces bya ba dag rnam par dag pa'i tshig go//yang dag 'jug ces bya ba rab tu 'jug par 'gyur ro/ /sngags kyi zhes bya ba la sogs pa la/ sngags kyi don gyi mthar thug pa ni sngags kyi nges pa'o/ /de rtogs nas rdo rje bzlas pa la legs par slob par 'gyur ro/ /rdo rje bzlas nas zhes bya ba la sogs pa la/ting nge 'dzin de la gnas par gyur nas sems la dmigs pa zhes bya ba mthar thug pa phyin pa ste/ de'i rang gi ngo bo rig par 'gyur ro/ /de ni bdag byin gyis brlab pa'i ting nge 'dzin no/ /'thob par 'gyur ro zhes bya ba ni rnyed par 'gyur zhes bya ba'i don to/ /sgyu ma lta bu'i ting nge 'dzin de la gnas nas/yang dag mtha' zhes bya ba chos thams cad 'byung bar 'gyur bas na yang dag mtha' zhes bya'o/ /de rnams kyi mtha' ni rtse mo ste mthar thug pa'i zhes bya ba'i bar du'o/ /'od gsal ba'i ngo bor gyur pa des sgyu ma lta bu'i ting nge 'dzin rnam par sbyong bar byed do/ /de las langs nas gnyis med ye shes bya ba rdo rje 'chang chen po'i go 'phang thob par 'gyur ro//zung du 'jug pa'i ting nge 'dzin la gnas nas/ slar zhing gang la'ang mi slob po zhes bya ba ni bdag nyid kyis bsgrub par bya ba gang ci yang yod pa ma yin no zhes bya ba'i bar du'o/ /'di ni zhes bya ba la sogs pa la rdzogs pa'i rnal 'byor pa zhes bya ba ni don dam pa'o//rdo rje bzlas pa la sogs pa ni brtags pa nyid do/ /de nas zhes bya ba ni 'od gsal las langs nas so/ /'das pa dang ni ma 'ongs la/ /zhes bya ba la sogs pa la srid gsum zhes bya ba ni 'dod pa dang gzugs dang gzugs med pa'i mtshan nyid can no//skad cig de la zhes bya ba ni skad cig gcig nyid la'o/ /ji ltar zhe na/ 'od gsal bas rnam par dag pas zhes bya ba la sogs pa smras te/ 'di dag ces bya ba ni bstan ma thag pa rnams so/ /de nyid ces bya ba ni man ngag go/ /rgyas btab ces bya ba ni shin tu sbas pa'o//'o na ji ltar shes she na/ bshad pa'i rgyud kyi rjes 'brangs nas/ /zhes bya ba la sogs pa smras te/ de ltar na yang ji ltar shes par 'gyur zhe na/ bla ma'i kha las zhes bya ba la sogs pa smras so/ /bcom ldan 'das kyis dgongs pas bshad pa'i rdzogs pa'i rim pa'i phyogs kyi bshad pa'i rnam pa gzhan yod pas de cung zhig 'dir brjod par 'dod nas/sna'i rtse mor zhes bya ba la sogs pa smras te kun rdzob kyi sna'i rtse mo'o/ /yungs kar zhes bya ba ni rlung la chos kyi brdar btags pa'o/ /bsam zhes bya ba ni sems nges par gtad par bya ba'o//ci'i phyir zhe na/ gang gi phyir yungs kar zhes bya ba ni rlung ngo / /'gro dang mi 'gro zhes bya ba ni 'gro ba dang mi 'gro ba 'jug par byed pas na 'gro ba dang mi 'gro ba ste yid nyid yin no/ /gang gi phyir rlung med par yid kyi 'gro ba dang 'ong ba la sogs pa'i bya ba thams cad du yod pa ma yin pa'i phyir ro//de'i phyir yungs kar te/ rlung de'i gnas skabs su bsgom par bya ba'o/ /ye shes gnas ni nyams dga' ba ni ye shes kyi gsal ba ste rab tu gnas pa dang bzhon pa zhes bya ba'i bar du'o/ /gsang ba ni ba skyed pa'i rim pa la gnas pa'i rnal 'byor pa la sba bar bya ba'o/ /ye shes zhes bya ba ni de kho na nyid kyi sgras btags pa'o//kha dog sna lnga pa zhes bya ba la sogs pa ni de bzhin gshegs pa lnga'i ngo bo nyid yin pa'i phyir ro/ /rin chen zhes bya ba ni legs par spyad pa dang ldan pa rnams kyi spyod yul nyid yin pa'i phyir ro/ /yungs kar gyi ni 'bru tshod tsam/ /zhes bya ba ni yungs kar gyi 'bru tsam phra ba'o//gang la yungs kar gyi 'bru tshod tsam yod pa de la yungs kar gyi 'bru tshod tsam zhes bya ste/ khams phra ba'i gzugs can rlung zhes bya ba'i don to/ /sna'i rtse mos zhes bya ba la sogs pa la rnal 'byor zhes bya ba ni lha'i rnal 'byor te bshad pa gcig yin no/ / sna'i rtse mor yungs kar zhes bya ba ni A li dang kA li'i dbus su'o/ /yungs kar zhes bya ba ni phra ba'i gzugs can nyid kyi yid do/ /bsam zhes bya ba ni dran par bya/ gtad par bya/ brtan par bya zhes bya bar dgongs pa'o/ /gang gi phyir yungs kar zhes bya ba yid kyi 'gro ba dang mi 'gro ba ste rten dang brten par gyur pa'i dkyil 'khor gyi 'khor lo'i gzugs su sgom par byed pa'i phyir ro//de lta bas na 'ba' zhig bsgoms pas so/ /rdo rje 'chang gi dkyil 'khor dang / dkyil 'khor pa dang bcas pa bsgom par byas par 'gyur ro/ /ci'i phyir de ltar 'gyur zhe na/ ye shes kyi gnas dang /rab tu gnas pa dang / gnyug ma'i gnas zhes bya ba'i bar du yin no/ /nyams dga' ba ni mchog tu gyur pa'o/ /gsang ba ni sba bar bya ba ste/ bla ma'i zhal nas thob par bya ba ste sngar bstan pa bzhin du rtogs par bya'o/ /ye shes kyi brtags zhes bya ba ni ye shes gsum gyi ngo bo rlung zhes bya bar brtags pa yin no zhes bya ba'i don to//rigs lnga'i ngo bo nyid yin pa'i phyir kha dog rnam lnga pa zhes bya'o/ /rin chen lta bu'i gang zag las gzhan gyi spyod yul ma yin pa'i phyir rin chen zhes bya'o/ /yungs kar gyi 'bru tshod tsam zhes bya ba ni shin tu phra ba'o//sna'i rtse mor zhes bya ba ni sdig pa spangs par ro/ /nan tan du zhes bya ba ni mnyam par gzhag pa'i yid kyis so/ /rnal 'byor zhes bya ba ni ro ma dang rkyang ma dag yang dag par 'byor pa'o/ /rtag tu zhes bya ba ni nyin dang mtshan du'o/ /de'i phyir slob dpon gyis kyang 'di ni dgongs pas bshad pa'o zhes bstan pa yin te/bla ma gcig nas gcig tu brgyud pa las shes par bya ba yin gyi gzhan du ni ma yin no zhes bya ba'i bar du'o/ /rdo rje'i tshig 'di zhes bya ba la/ rdo rje mi phyed pa'i ye shes so/ /de gsal bar byed pa'i bshad pa snga ma bzhin pa'i don ston pa'i phyir bshad pa zhes bya ba smos te/ma lus par ston cing rab tu gsal bar byed pa gang yin pa de bcom ldan 'das kyis dpal gsang ba 'dus pa zhes bya ba'i tshig bshad pa'i rgyud las gsungs te/ de ni zhes bya ba ni sna'i rtse mor zhes bya ba la sogs pas gang bsgrubs pa'o/ /snying po zhes bya ba ni bskyed pa'i rim par bstan pa'i phra mo'i rnal 'byor ro//de bas na snying por gyur cing snying por 'jug pa'o/ /mchog tu zhes bya ba ni phul du byung ba ste/ rnal 'byor byis pa'i spyod yul ma yin pa'i phyir ro/ /gsang ba zhes bya ba ni bstan par bya ba ma yin pa'o/ /sangs rgyas kun zhes bya ba 'dis ni rnal 'byor 'di la shin tu gus par bya ba bstan te/sangs rgyas rnams la yang gsang bar bya ba yin na/ de las gzhan dag la lta smos kyang ci dgos zhes bstan pa yin no/ /gang de zhes bya ba ni sngar bstan pa'o/ /ci zhig ce na thams cad bdag nyid ces bya ba ste//'gro ba'i lus la mngon par khyab pa'o/ /ye shes lnga'i dngos zhes bya ba ni me long lta bu'i ye shes la sogs pa lnga'i rang bzhin no/ /de nyid ces bya ba ni rdzogs pa'i rim pa'i 'dod pa rnams la de nyid thob pa'i rgyu mtshan nyid du 'gyur ba yin pa'i phyir de nyid do/ /yungs kar gyi ni zhes bya ba la sogs pa ni don sngar bstan pa nyid dran par bya'o//de'i dbus na zhes bya ba la sogs pa la/ lha rdzas yin pas na rnam par shes pa'i khams la lha zhes bya ste/ lha la sogs pa'i 'gro ba rnam par rol par byed pa'i phyir ro/ /mi gsal zhes bya ba ni shes par mi nus pa'i phyir ro/ / gzugs dang ldan zhes bya ba ni de nyid rnam pa sna tshogs kyis rnam par snang ba'i phyir ro/ /don 'di nyid ces bya ba ni bstan ma thag pa'i don to/ /ye shes lnga yis zhes bya ba la sogs pa la 'byung ba zhes bya ba dang / pad+ma'i sna'i rtse mor zhes bya ba ni gdong gi pad+ma'i sna'i rtse mor ro/ /gong bu'i gzugs kyis zhes bya ba ni srog la sogs pa'i rlung bcu bsdus pa'i gzugs kyis so//de nyid kyi phyir/ rin chen kha dog rnam lnga pa/ /zhes bya ba la sogs pa smras so/ /rang sngags zhes bya ba la sogs pa la/ snying gar zhes bya ba ni ye shes sems dpa'i thugs kar ro/ /sems ni zhes bya ba ni yid do//thig ler gnas par zhes bya ba ni thig le de'o/ /gang yin zhe na/ srog ni thig ler gtogs par dgod/ /rang dbang rin chen 'gog pa las/ /gzung ba 'dzin pa yin par dran/ /sems ni 'gog pa'i rdo rjer 'gyur/ /mtshan mar snang ba 'byung bar 'gyur/ /mtshan ma de yang rnam pa lngar//byang chub rdo rjes gsungs pa yin/ /dang po smig rgyu lta bu ste/ /gnyis pa du ba lta bu yin/ /gsum pa me khyer rnam pa 'dra/ /mar me ltar 'bar bzhi pa'o/ /nam mkha' sprin med lta bur ni/ /rtag tu snang ba lnga pa'o/ /brtan 'gyur rdo rje'i lam nas ni/ /nam mkha'i khams su spro bar bya//rjes su dran pa gang bsgom pa/ /de yis rnam par spro byed pa/ /rjes dran zhes byar dran par bya/ /so sor snang bar de las bskyed/ /shes rab thabs dang snyoms 'jug pas/ /dngos po thams cad mdor bsdus nas/ /ril por bsdus pa'i rnal 'byor gyis//gzugs brnyan dbus su bsgom par bya/ /yud kyis ye shes bskyed pa ni/ /ting nge 'dzin gyi ming can te/ /zhes gsungs pa dang / de nyid slar bshad pa zhes bya ba dang / sna rtser zhes bya ba la sogs pa la/ srog dang rtsol ba'i brtag pa ste/ /zhes bya ba ni ming gi rnam pa'o//steng du srog las zhes bya ba sna'i nyid du'o/ /dal bar zhes bya ba ni rgyu ba zhan pa'o/ /rnam bzhir zhes bya ba ni rnam bzhi nyid do/ /dus zhes bya ba ni thun phyed kyi dus te/ thun phyed re rer 'byung bar 'gyur/ /zhes bya ba'i bar du'o/ /lhag ma zhes bya ba la sogs pa la/ /'gro 'ong zhes bya ba ni phyir 'byung ba dang nang du 'jug pa'o//bstan zhes bya ba ni slob ma rnams la bstan par bya zhes bya ba'i don to/ /gnas pa zhes bya ba ni rab tu 'jug pa'o/ /go rims zhes bya ba ni 'chad par 'gyur ba'i rim gyis so/ /ji bzhin zhes bya ba ni gang gi bdag nyid yin pa'i gnas de nas so//g.yas pa nas zhes bya ba ni sna'i bu ga g.yas pa nas so/ /me'i dkyil 'khor zhes bya ba ni byin za'i dkyil 'khor ro/ /pad+ma mgon po zhes bya ba ni snang ba mtha' yas so/ /g.yon pa nas zhes bya ba ni sna'i bu ga g.yon pa nas so/ /rlung gi dkyil 'khor zhes bya ba de/ljang ser bya ba zhes bya ba ni shin tu yang sngo sangs so/ /las kyi mgon po zhes bya ba ni don yod grub pa'o/ /gnyis ka las ni zhes bya ba la ni g.yon dang g.yas pa dag go/ /mdangs chen zhes bya ba ni gzi brjid dang ldan pa'o/ /rin chen mgon po zhes bya ba ni rin chen 'byung ldan no//dal zhing zhes bya ba ni nang du gtogs pa'o/ /rgyu ba zhan pa zhes bya ba ni 'byung ba dang 'jug pa mtshon par mi nus pa'o/ /lus kun la ni gnas pa yis/ /zhes bya ba ni lus thams cad kyi tshogs la gnas pa'o/ /bya ba kun la zhes bya ba ni lus kyi las thams cad la 'jug pa'o/ /'chi ba'i dus las zhes bya ba ni 'chi ba'i lus las phyir 'byung bar 'gyur gyi gzhan du ni ma yin no zhes bya ba'i don to//rlung gi de nyid ces bya ba la sogs pa la/ gsal ba zhes bya ba ni bshad pa'i rgyud kyi rjes su 'brangs nas gsal por byas pa'o/ /rtog ge pa zhes bya ba ni pha rol tu phyin pa'i theg pa'i rnal 'byor pa'o//yul min zhes bya ba la sogs pa la/ rnal 'byor byis pa zhes bya ba ni bskyed pa'i rim pa la gnas pa'i rnal 'byor pa'o/ /de ltar zhes bya ba ni ji ltar bstan pa'i rim pas so/ /da ni zhes bya ba ni da ltar ro/ /sngags kyi de nyid ces bya ba ni brjod pa dang dmigs pa'i sngags kyi mtshan nyid can no//'jug par zhes bya ba ni drangs nas bstan par bya ba'o/ /de bzhin gshegs pa thams cad ces bya ba la sogs pa la/ sku dang gsung dang thugs kyi ngo bo nyid yin pa'i phyir gsang ba ste sba bar bya'o/ /sngags thams cad kyi snying po kun du bskul ba zhes bya ba ni thugs 'gugs pa'o/ gsungs so zhes bya ba ni gsungs pa dang ldan pa'o/ /gang nas 'byung bar 'gyur zhe na/ nyid kyi sku dang zhes bya ba la sogs pa gsungs te/ tshig gi lam nges par brjod pas zhes bya ba ni ngag tu brjod pa dang ldan pas so/ /don rtogs pa'i bzlas pa zhes bya ba ni 'jug pa gnas pa dang ldan pa'i don rtogs pa'o//ngo bo nyid med ces bya ba ni rnam pa gnyis par bstan pa'o/ /de'i phyir bzang po ste mdzes pa zhes bya bar bsam pa'o/ /brtags pa zhes bya ba la/ rnam pa sna tshogs par spyod cing spro bar byed pa ni rdo rje bzlas pa'o/ /de zhes bya ba ni rnam pa gnyis so/ /bzlas zhes bya ba ni rim pa 'di bzhin no/ /dbyer med ces bya ba ni lha'i gzugs dang gnyis su med par ro//'dod par bya ba yin zhing mos par bya ba yin pas na/ 'dod pa ste gzugs la sogs pa'o/ /skyes gyur pas zhes bya ba ni gzugs su byung ba longs spyod ni de rnams bstan pa'o/ /bstan pa'i de nyid ces bya ba la sogs pa la slar bshad pa zhes bya ba ni gtam dris pa'i rjes thogs su'o//don dam pa mkhyen pas na thub pa'o/ /sna tshogs gzugs can zhes bya ba la sogs pa la/ skyes gyur pas zhes bya ba gzugs su byung bar gyur pas so/ /ji ltar zhe na/ rab tu grags pa zhes bya ba ste/ de lta bas na ma lus pa 'di dag rang bzhin gyis dngos po med pa nyid yin no//'dis ni byang chub kyi sems nyams su myong bar bya bar mi nus pas 'dod pa bkag pa yin no/ /de'i phyir/ legs par rjes su myong mdzad pa/ /zhes bya ba la sogs pa gsungs te/ mkha' mnyam pa zhes bya ba ni nam mkha'i ngo bo nyid do/ /de lta bas na/ 'gro ba'i don ni byed pa po/ /zhes bya ba smras te/ langs pa'i tshe na'o/ /de zhes bya ba ni byang chub kyi sems de 'thob pa'i thabs so/ /mchog ces bya ba ni rin po che lta bu'i gang zag la sogs pa'o/ /sgrub pa'i thabs tsam zhes bya ba ni lha'i rnal 'byor tsam mo/ /rgyud rnams 'chad par byed ces bya ba ni gsal bar byas pa'o//lus can zhes bya ba ni sngags kyi theg pa la'o/ /gtso bo zhes bya ba ni rdo rje 'chang gis so/ /bdag gi tshig 'di nyid dag ces bya ba la sogs pa la/ 'jig ces bya ba ni rab tu spong bar byed pa'o/ /bus pa zhes bya ba ni mi shes pa'o/ /dgongs pa zhes bya ba ni dgongs pas bstan pa'o//byang chub sems zhes bya ba ni gnyis su med pa'i ye shes so/ /ji bzhin don zhes bya ba ni man ngag nyid kyis so/ /de nas zhes bya ba la sogs pa la/ 'dis zhes bya ba ni sngar bstan pa'i tshig go/ /nyon mongs pa ma lus par bcom pas na bcom ldan 'das so/ / bdag po ni rdo rje 'dzin pa'o/ /rnam pa sna tshogs pa'i 'od zer gyis gsal bar mdzad pa 'di la yod pas na rnam par snang mdzad do/ /'di zhes bya ba ni 'chad par 'gyur ba'o/ /rab tu phye nas zhes bya ba ni yi ge gsum gyi dbye bas so/ /mi rtog don zhes bya ba ni byang chub kyi sems so/ /de nyid ni zhes bya ba ni kun rdzob dang don dam pa'i de nyid do//de nyid brjod dang zhes bya ba la sogs pas gsungs pa la/ thun mong zhes bya ba ni sems can ma lus pa'i thun mong gi gzugs so/ /thun mong gi gzugs gang yin pa de ni yi ge gsum gyi gzugs so/ /de nyid ni thun mong gi sngags kyi de nyid du brjod pa'o//gang de bzhin nyid kyi ngo bo yin pa de ni dmigs pa zhes bya bar bshad pa don dam pa'i gzugs so/ /de nyid ni dang po gcig ni zhes bya ba la sogs pa bstan te/ gcig ces bya ba ni mi nyams pa'i gzugs can yi ge a'o/ /sogs pa zhes bya ba'i sgras ni gnyis pa gzung ngo //dgu dbus zhes bya ba ni yi ge ya la sogs pa dgu'o/ /dbus zhes bya ba ni gtso bor gyur pa'i yi ge ha'o/ /dgu pa'i dang po zhes kha cig nas 'byung ba der ni dgu pa'i k+Sha yin la de'i dang po ni ha nyid yin no/ /bcu yis zhes bya ba ni de dag las gzhan pa'i dbyangs kyi yi ge rnams kyis so//ma bcings pa zhes bya ba ni de dag dang yang dag par ma 'brel pa'o/ /de bsam pa ni 'di yin te dbyangs kyi yi ge thams cad ni as bcings pa yin la des ma bcings pas na ma bcings pa'o/ /'di ma bcings pa zhes bya ba la yon tan ci zhig yod ce na/ de shes pa ni mchog gi gnas zhes bya ba dang /gang gis shes te zhes bya ba la sogs par sbyar ro/ /dbyangs zhes bya ba ni a la sogs pa bcu bzhi pa'o/ /gsal byed ni sum cu rtsa bzhi'o/ /yi ge ni de dag sbyar ba'i gzugs so/ /grangs dgu'i rjes 'jug pa zhes bya ba dbyangs yig rnams te tshan gcig go/ / ka tsa Ta ta pa ya sha ni bdun no/ /sbyor ba'i yi ge rnams ni gcig ste de ltar dgu'o/ /as bcings zhes bya ba ni yi ge as rab tu bcings pa ste so sor tha dad du byas pa'o/ /ci ltar shes par bya zhe na/ phan tshun yang dag sbyor zhes bya ba smras te/ gang gi phyir yi ge as bcings par ma gyur na/ yi ge thams cad gcig nyid du 'gyur bas brjod par bya ba'i ngo bor mi 'gyur ro/ /sus de ltar shes she na/ gang gis shes te zhes bya ba la sogs pa smras te/ 'byung ba'i mtha' dang zhes bya ba la sogs pa la/ 'byung ba zhes bya ba'i sgra ni grangs bzhi nye bar mtshon par byed pa'i tshig go/ / de'i phyir bzhi'i tha ma ni lnga pa dang drug pa ste/ u U zhes bya ba'i yi ge thung ngu dang ring po'o/ /de dag dang yang dag par ldan pa ni a dang ha'o/ /cha la sogs pa bcu drug ces bya ba ni a ste/ gsum pa'i don gyis bdun pa'o/ /gnas zhes bya ba ni dbus na gnas pa'i yi ge a ste/ de dang yang dag par ldan pa'o//lnga pa'i lnga pas zhes bya ba ni dbyangs yig dang bral ba'i ma'o/ /bzhi ni zhes bya ba ni so sor bzhi bzhi yod pas so/ /gsum du nges par sbyar zhes bya ba ni yi ge gsum du bya'o/ /ji ltar zhe na/ oM bcas zhes bya ba la sogs pa smras te ji ltar rigs par bya'o/ /dang po a'i gnas su oM nyid sbyar la de la thung ngu sbyar ba ni yon tan no//dkyil 'khor gyi mA ni ring po nyid do/ /u ha sbyar ba las der yang ma thung ngu nyid yin no/ /gzhan dag phyin par 'dra ba yin no/ /thung ngu ma lus zhes bya ba ni dbyangs yig dang po a'o/ /ma lus dag tu 'gyur zhes bya ba ni brjod par bya ba'i ngag ma lus pa'i ngo bo nyid do//de yang mtshan yang dag par brjod pa las/ a ni yig 'bru kun gyi mchog /don chen yi ge dam pa yin/ /zhes gsungs pa'i phyir ro/ /gcig min du ma ma yin no/ /zhes bya ba ni zhes gcig dang du ma'i rang bzhin dang bral bas mi shigs pa'i ngo bo nyid yin pa'i phyir ro//yi ge gang zhig ces bya ba la sogs pa la/ dgongs pa lung bstan pa las/ bcom ldan 'das rdo rje 'chang gi sku la dgod pa'i cho ga las so/ /khams la sogs par zhes bya ba ni/ ngag gis brjod par bya ba'i ngo bo ma lus pa'o/ /'og dang steng du zhes bya ba ni 'og phyogs su/ yi ge gsum gyi ngo bo ru/ /rtsal dang dregs pa'i gdugs dang dung / /zhes bya ba'i rtsa gsum shes pa'o/ /steng gi ni 'jug pa dang gnas pa dang 'byung ba'i rim gyis yi ge gsum shes par byas nas blos sbyar bar bya'o/ /brjod pa'i ni zhes bya ba la sogs pa la 'di dag ces bya ba ni yi ge gsum mo//dngos med ces bya ba ni don dam par ro/ /ngo bo las byung ba'i yi ge'i gzugs nyid do/ /'di ni zhes bya ba ni yi ge gsum mo/ /yongs su gyur pa zhes bya ba ni yi ge gsum yongs su gyur pa las lha'i rnam par gang gyur pa de ni nye bar dmigs pa ste nye bar dmigs pa zhes grags pa'o//a'i bshad pa zhes bya ba ni a'i nye bar bstan pa ste/ sdig spangs ma zhes bya bar gang grags pa'i ye shes ni sangs rgyas rnams kyi snang ba med pa'i thugs so/ /oM gyi zhes bya ba la sogs pa la/ sdud ces bya ba ni bdag la sdud par byed pa'o/ /hUM gi zhes bya ba la sogs pa la/ yang dag spros zhes bya ba ni sangs rgyas kyi gzugs su nye bar spro bar byed pa ste sangs rgyas kyi rang bzhin du byed pa'o//a ni gnas par gyur pa'o/ /zhes bya ba ni rang gi lus la gnas par byed pa'o/ /'jug pa dang ni zhes bya ba la sogs pa la/ rlung nyid oM gyis ni 'jug par byed do/ /as ni gnas par byed do//hUM gis ni spro bar byed pa nyid du rig par bya'o/ /sngags kyi yan lag ces bya ba ni dran pa gcig pa'i ting nge 'dzin gyis rlung 'jug pa dang gnas pa dang ldan pa'i rim gyis gnas pa'o/ /shes rab thabs kyi gzhir gnas te/ /zhes bya ba ni thabs dang shes rab gnyis su med pa'i ye shes kyi rang bzhin gyi rtsa gsum yi ge gsum gyi ngo bor yang dag par sbyor ba'i gzhir gnas pa'o//da ni bzlas pa'i grangs bstan pa'i phyir gos dkar la sogs zhes bya ba la sogs pas bstan pa ste/ bzlas zhes bya ba ni rlung gi 'gro ba dang 'ong ba'o/ /brgya phrag gnyis dang nyi shu lnga ni me la sogs pa'i dkyil 'khor so so la nyi shu rtsa lnga lhag pa'i nyis brgya 'byung ba'o//bzhi po legs par bsgres nas ni/ /zhes bya ba ni bzhi 'gyur du brtsis pa'o/ /des na sbyor ba bzhi bsdus nas brgya phrag dgur 'gyur ba yin pas/ sbyor bzhi bsdus pas brgya phrag dgu/ /zhes bya ba la sogs pa smras pa yin te/ dkyil 'khor bzhi nyi shu rtsa bzhir rim gyis 'byung ba'o/ /rim gyis zhes bya ba ni go rims bzhin du'o/ /so so 'byung ba las zhes bya ba ni bsgres na'o/ /nyi khri zhes bya ba la sogs pa ni stong phrag nyi shu dang brgya phrag drug lhag pa'o/ /nang gi dus 'di zhes bya ba la sogs pa la/ thun mtshams bzhir ni rab sbyor la//zhes bya ba ni nyin zhag gcig la'o/ /'bum zhes bya ba ni mtshon par bya ba'i ngo bo nyid do/ /yi ge grangs zhes bya ba ni 'jug pa dang gnas pa dang 'byung ba'i grangs kyis so/ /rdo rje can zhes bya ba ni rdo rje 'chang ngo / /ji ltar bzlas zhes bya ba ni ngag gi spyod yul ma yin pa'i phyir ro/ /brjod pas bzlas pa mi nus pa yin zhes bsams pa'o//glang po sngon du zhes bya ba la sogs pa la/ rdo rje 'chang gi ngo phra zhing shin tu phra ba'i mtshan nyid can rdo rje bzlas pa rnam pa gnyis rnyed nas rgyu gang gis de'i rjes lta bu yi ge gsum po ngag gi bzlas pa tsam gyi mtshan nyid tshol bar byed/ gal te yi ge gsum yongs su gyur pa'i gzugs la gnas nas/yi ge bzlas pa byed pa de nyid rdo rje bzlas pa zhes bstan pa yin no zhe na/ sngags lus rang nyid mngon gyur nas/ /zhes bya ba smras te/ bdag nyid yi ge gsum gyi ngo bo rtsa gsum gyis bskyed pa'i lus su gnas pa yin na/ gzhan brtag pa'i yi ge gsum gyi ngo bo nyid la 'dod par byed ces bya bar bsams pa'o//gzhan yang zhes bya ba ni phyogs gzhan ston pa'o/ /rdo rje 'dzin zhes bya ba ni rdo rje slob dpon no/ /sbyor ba gsum dang ldan pa zhes bya ba ni 'jug pa la sogs pa'i rim gyis so/ /spyan drangs zhes bya ba ni dgug pa'o/ /myur ba zhes bya ba ni phyir 'byung ba'i rlung ngo / / gshegs su gsol zhes bya ba ni khyad par can gyi gshegs su gsol ba'o/ /gnyi ga min par zhes bya ba ni rlung gnas pa'i ngo bo ste des bzhugs su gsol ba'o/ /sna tshogs zhes bya ba ni sna tshogs yongs su bskyod pa'i mtshan nyid can no/ /sngags sbyor ba zhes bya ba ni yi ge gsum dang sbyor ba'o/ /de nas zhes bya ba la sogs pa la rnal 'byor dbang phyug ces bya ba ni rdzogs pa'i rnal 'byor pa'o//gsang ba'i yi ge zhes bya ba ni gsang ba'i sna la gnas pa'i mi shigs pa'o/ /de nyid ni 'byung ba med pa yin pas na yi ge'o/ /rnal 'byor zhes bya ba ni shes rab dang thabs kyi rnal 'byor ro/ /des na dngos grub ni phyag rgya chen po'i mtshan nyid can no//de nyid ni 'bras bu'o/ /gang zhig ces bya ba ni rtsa gsum gyi rnal 'byor ro/ /bsams pa zhes bya ba ni bsgoms pa tsam gyis so/ /rnal 'byor can ni sangs rgyas dang rdo rje 'chang la sogs pa'o/ /rnal 'byor gnyis pa bstan pa'i phyir/ dang po'i yi ge zhes bya ba la sogs pa smras te/yi ge oM gyi ngo bos so/ /brgyad pa'i mtha' dang zhes bya ba ni yi ge hUM gis zhes bya ba'i don to/ /ci dga' ba'i bzlas pa zhes bya ba ni rang gi ngag gis zlos pa'o/ /khri phrag gnyis zhes bya ba la sogs pa la gsang ba'i dgongs pa zhes bya ba ni/ dgongs pa lung ston pa zhes bya ba rnal 'byor gyi rgyud do//bsam gtan kha thon zhes bya ba ni lha'i sku bsgom pa dang sngags zlos pa med kyang ngo / /'di yis ni zhes bya ba ni bstan pa'i rnam pa dang ldan pas so/ /cho ga bzhin zhes bya ba ni go rims bzhin no/ /bsgrub par bya zhes bya ba ni 'jig rten pa dang 'jig rten las 'das pa'o/ /sgyu ma lta bu zhes bya ba ni bdag byin gyis brlab pa'i ting nge 'dzin gyis zhes bya ba'i bar du'o//de bas na zhes bya ba la sogs pa ci zhig smra zhe na/ mnyam med sngags ni 'di nyid bzlas nas su/ /zhes bya ba la sogs pa smras te/ sngags zhes bya ba ni yid nyid skyob par byed pas na sngags te/ stong pa nyid dang snying rje gnyis su med pa'i ngo bo nyid mi shigs pa'o//yang na yi ge gsum gyi ngo bo nyid do/ /mnyam med ces bya ba ni mtshungs pa med pa'o/ /bsgrub pa'i bdag nyid can ni rnal 'byor pa'o/ /khams zhes bya ba ni 'jig rten gsum mnyam par bsdus pa ni khams gsum ste sku dang gsung dang thugs so/ /'bum phrag drug ces bya ba la sogs pa ni zla ba gcig bzlas pa'i brjod pa'o//rnam shes las ni 'byung ba zhes bya ba ni mi shigs pa las byung ba'i yi ge gsum gyi ngo bo 'jug pa dang gnas pa dang 'byung ba'i mtshan nyid can no/ /rdo rje sems dpa' phyag byas nas/ /zhes bya ba ni mchod pa byas nas so/ /de zhes bya ba ni 'dod pa'i don bsgrub pa'o//bsgrub pa ci bde ba bstan pa'i phyir de la brtul zhugs zhes bya ba la sogs pa smras te/ sngags mi dgos zhes bya ba ni sngags brjod pa mi dgos pa'o/ /gzungs zhes bya ba ni dbugs dbyung ba dang rngub pa 'gog pa'o/ /pha rol pha rol mi ldog 'gyur/ /zhes bya ba ni rdul tshon gyi dkyil 'khor dang phyag rgya la sogs pa'o//da ni las rab 'byam bstan pa'i phyir/ ya'i don gyis zhes bya ba la sogs pa smras te/ ya'i don ni rlung gi dkyil 'khor ro/ /gang ci yang rung ba zhes bya ba ni las drag po'i rnam pa'o/ /bya ba ni zhes pa ni 'di nyid kyis yin gyis gzhan gyis ni ma yin no zhes bya ba'i don to//ra la sogs pa gsum nyid kyis/ /zhes bya ba ni me dang dbang chen dang chu'i dkyil 'khor gyis so/ /gang ci yang rung ba zhes bya ba yang 'dir blta bar bya/ phyi rol gyi zhi ba dang rgyas pa la sogs pa 'gro ba'i don la 'jug par bya ba ste rab tu bsgrub par bya ba'o zhes bya ba'i don to/ / thun ni phyed phyed ces bya ba ni thun phyed kyi dus su'o/ /gnyis gnyis zhes bya ba ni dkyil 'khor re re la yang ste rlung gi dkyil 'khor gyis ni 'gugs pa'o/ /me yi dkyil 'khor gyis ni mngon spyod kyang ngo / /dbang chen gyi dkyil 'khor gyis ni zhi ba yang ngo / /chu'i dkyil 'khor gyis kyang rgyas pa bya'o//gnas par 'gyur zhes bya ba ni bzhi brgya'o zhes bya ba'i don to/ /da ni rdo rje bzlas pa'i rim pa yongs su rdzogs nas/ nang gi bdag nyid can dang phyi'i mchod pa dang bzlas pa dang / sbyin sreg dang bsam gtan la sogs pa'i phan yon bstan pa'i phyir/ mchod pa la brtson pa zhes bya ba la sogs pa bstan te/brtson pa zhes bya ba'i sgra ni 'dir gtsor byed pa'i tshig go/ /rnam par dag ces bya ba ni las kyi sgrib pa thams cad rnam par dag par 'gyur ba'o/ /me la sbyin sreg brtson pa zhes bya ba ni de phyed du byed pa'o/ /'byor zhes bya ba ni phun sum tshogs par 'gyur ba'o/ / ma rig pa la sogs pa'i 'ching ba las grol bas nas thar pa'o/ /de ni bsam gtan brtson pas 'thob/ /ces bya ste/ bsam gtan la gcig tu chags pas thob po/ /shes nas ni zhes bya ba la sogs pa la/ de ltar zhes bya ba ni bshad pa'i rim gyis so/ /'gro ba zhes bya ba ni sna tshogs kyi rang bzhin no//des cir 'gyur zhe na byis pa bzhin du zhes bya ba smras te/ ji ltar byis pa rnams 'dod pa'i yon tan lnga la sogs pa la 'jug pa de bzhin du'o/ /byis pa bzhin du spyod pa la dgos pa ci yod ce na/ des 'grub 'gyur zhes bya ba la sogs pa smras te/ de rnams ni zhes bya ba ni 'jig rten las 'das pa'i dngos grub rnams 'grub pa'o//mi rtog ces bya ba ni rnam par rtog pa dang bral ba nyid ces bya ba chos kyi mchog yin pas de la bya'o/ /gsal zhes bya ba ni gsal ba nyid do/ /gsung gi rdo rje ni snang ba mtha' yas so/ /ye shes gsum zhes bya ba ni snang ba nga /snang ba mched pa dang / snang ba thob pa'i mtshan nyid can no/ /dbye ba yis zhes bya ba ni 'chad par 'gyur ba'i mtshan nyid can no/ /de'i phyir sems tsam zhes bya ba ni bdag byin gyis brlab pa'i ting nge 'dzin la'o/ /da ni rdzogs pa'i rim pa'i skal ba dang mi ldan pa'i slob ma'i mtshan nyid bstan pa'i phyir/bla ma la brnyas zhes bya ba la sogs pa smras te/ sgyu zhes bya ba ni g.yo sgyu dang ldan pa'o/ /dad pa med ces bya ba ni bla ma la sems dang ba med pa'o/ /sngags kyis rlom zhing zhes bya ba ni sngags la sogs pa'i nus pa'i stobs kyis 'gying ba'o/ /glegs bam mthong bas khengs zhes bya ba ni glegs bam mthong ba tsam gyis bdag gis shes so snyam du nga rgyal bar byed pa'o//dad pa med cing zhes bya ba ni dad pa dang bral ba'o/ /dbang bskur dman pa la zhes bya ba ni dbang bskur ba ma thob pa'o/ /gtam gyis rim pa zhes bya ba la sogs pa la/ gtam gyi rim pa tsam yang brjod par mi bya'o zhes bcom ldan 'das rdo rje 'chang gis gsungs so//'o na gang gi phyed du bstan par bya zhe na/ dad pa dang ldan zhes bya ba ste dad pa can no/ /bsnyen bskur ni yongs su spyod pa'o/ /thos pa 'dzin gang zhes bya ba ni thos pa 'dzin par byed pa'o/ /nor mi rtag ces bya ba ni ltos pa med pa'o/ /bla mas drin zhes bya ba bla ma gtsor gyur pa'o//bla ma'i drin zhes bya ba rdzogs pa'i rim pa'i bka' drin no/ /bla mas rdzogs pa'i bka' drin gsal ba la yon tan ci zhig yod ce na/ ri dbang rtse las zhes bya ba la sogs pa smras te/ ji ltar skyes bu 'ga' zhig ri'i rtse mo nas lhung bar gyur la ri'i phyed du lhung bar mi bya'o snyam du yang lhung bar 'gyur ba dang 'dra bar bla ma'i drin gyis phan pa'i man ngag thob par gyur na/gal te srid pa'i 'ching ba las grol bar mi 'dod su zin kyang grol bar 'gyur ba yin te/ ri'i rtse nas lhung ba'i skyes bu dang 'dra'o/ /rdo rje bzlas pa'i rim pa'i dka' 'grel lo// //klu sgrub las skyes yon tan mtsho/ /shAkya bshes gnyen zhes bya bas/ /rim pa lnga yis bsdus pa'i don/ /slar yang gcig tu byas nas bstan/ /'dir 'di ltar shAkya bshes gnyen gyis mnyam par gzhag pa'i yid kyis gzhung rtsom pa'i dus su bcom ldan 'das rdo rje 'chang yid la yang dag par brtags nas ngo mtshar dang bcas pas bstod pa byed pa ni/phyag 'tshal 'dud cing zhes bya ba la sogs pas bstan pa yin te/ mthar phyag 'tshal 'dud ces bya ba'i bar du bstan pa ni ngo mtshar dang ldan pas yang dang yang byas pa yin no/ /tshig 'di dag ni rang gi ngo bo ston par byed pa yin no zhes bsgrub par bya ba'i phyir/de ltar zhes bya ba la sogs pa phyag 'tshal ba nyid kyis bstod pas bstod cing phyag 'tshal ba'i zhes bya ba'i sgra ni kye'i bcom ldan 'das zhes spyan drangs pa yin gyi gzhan du smra bar nus pa ma yin no/ /gang la bstod cing gang gis bstod//ces bya ba ni bcom ldan 'das khyod kyi mkhyen grangs zhes pa'o/ /da ni phyag 'tshal ba dang / phyag bya ba'i gnas dag dbyer med par bstan pa'i phyir/ ji ltar chu la chu bzhag dang / /zhes bya ba la sogs pa smras te/ gzhag ces bya ba ni der blugs pa'o/ / rang gis zhes bya ba ni bdag nyid kyis so/ /legs mthong zhes bya ba ni yid kyi yin gyis mig gis ni ma yin no/ /ye shes zhes bya ba ni gnyis su med pa'i ye shes so/ /'dir zhes bya ba ni gzhung rtsom pa'i skabs su'o/ /gal te 'ga' zhig 'di skad du gzhung thams cad du phyag 'tshal ba dang phyag bya ba dag dbye ba nyid dmigs pa yin pa las khyod kyi gzhung 'dir de med pas phyag 'tshal ba nyid kyang med par 'gyur ro zhe na/de'i phyir 'on kyang zhes bya ba la sogs pa smras te/ kun mkhyen ni sangs rgyas so/ /thob par zhes bya ba de dag gi lam mo/ /de med par nye bar dmigs par mi 'gyur ro//de ni zhes bya ba ni gang bdag phyag 'tshal ba dang phyag bya ba'o/ /de ji ltar na 'thob par 'gyur zhe na/ drin gyis zhes bya ba smras te drin ni bla ma'i'o/ /mun nag rab rib kyis khebs pa/ /zhes bya ba ni ma rig pa'i rab rib kyis khebs pa'o/ /de gsal bar byed pas na sgron ma ste man ngag dam pa'o//don ni 'di yin te/ bla ma'i drin med par de dmigs par mi 'gyur ro zhes bya ba'o/ /de ci zhig ce na/ stong nyid shin tu stong pa dang / /zhes bya ba smras te/ rgyu dang 'bras bu'i zhes bya ba la sogs pa la 'bras bu bsgrub par bya ba'i ngo bo ste thams cad stong pa'o//rgyu ni sgrub pa'i thabs te/ stong pa dang shin tu stong pa'i mtshan nyid do/ /de dag gi bye brag ni 'chad par 'gyur ba'i mtshan nyid can te/ de'i phyir shes rab thabs su zhes bya ba la sogs pa smras te/ shes rab stong pa dang snang ba dang sems so/ / thabs zhes bya ba ni shin tu stong pa dang / snang ba mched pa dang / sems las byung ba ste/ shes rab dang / thabs dang zhes bya ba gzhan dbang dang kun brtags zhes bya ba'i ming can no/ /de dag yang dag sbyor ba las ni rdzogs pa zhes bya ba yongs su gab pa'i shes pa'i ngo bo bdag byin gyis brlab pa'i rim pa'i mtshan nyid can nye bar 'byung bar 'gyur ro//nye bar thob par rdzogs gyur nas/ /zhes bya ba ni bdag byin gyis brlabs pa rdzogs nas ni thams cad stong pa thob par 'gyur ro/ /rgyu'i rim pa zhes bya ba ni bsgrub pa'i rim pa'o/ /rnam shes gsum po 'byor pa las/ /zhes bya ba ni sngar bstan pa'i bya ba ni rang gi las kyis bsgrub pa'i yul du'o//rang bzhin ni ngo bo nyid do/ /rlung ni rgyu ba dag ces bya ba ni rlung 'gro ba dang 'ong ba'o/ /snang ba nyid kyis rgyur gyur pa las zhes bya ba ni snang ba dang snang ba mched pa'i mtshan nyid can thabs dang shes rab kyi rgyu'o/ /bdag gi dngos por zhes bya ba ni lus yongs su gzung ba la rnam par rtogs pa'o//gnyis ka zhes bya ba ni thabs dang shes rab bo/ /yan lag ni cha shas so/ /'gyur zhes bya ba ni ji srid kyi bar du 'gyur ro zhes bya ba'o/ /don ni 'di yin te/ ji srid du thabs dang shes rab nye bar thob pa'i mtshan nyid can rtsa gsum gyi rnal 'byor gyis rlung gi rgyu ba mi g.yo bar ma gyur pa de srid du 'khor ba rnam par shes pa gsum bdag gi dngos por 'byung bar 'gyur ba nyid yin no//rnam par shes pa gsum gyi ngo bo nyid thabs gang gis shes par nus pa ste bstan pa'i phyir/ /sgyu ma dag ni thams cad 'dus pa las/ /zhes bya ba la sogs pa smras te/ye shes gsum gyi dbye ba zhes bya ba la sogs pa la/ 'dod chags zhes bya ba ni mchog tu dga' ba zhes brjod pa'i snang ba'o/ /chags bral zhes bya ba ni dga' bral thon par byed pa'i snang ba mched pa'o/ /de'i bar te zhes bya ba ni gnyi ga'i bar te chags pa bar ma lhan cig skyes pa zhes brjod pa snang ba nye bar thob pa'o//dbang po gnyis zhes bya ba ni skyes pa dang bud med kyi'o/ /mnyam sbyor ba zhes bya ba ni yang dag par sbyor ba'o/ /gsal por mtshon par 'gyur ba nyid do snyam du bsam pa'o/ /rdo rje pad+ma zhes bya ba la sogs pa la/ rdo rje zhes bya ba ni thabs kyi rtsa'o//pad+ma zhes bya ba ni shes rab kyi rtsa'o/ /ye shes gnyis ni mnyam sbyor ba'o/ /zhes bya ba ni de'i ngo bo nyid kyi rtsa gnyis so/ /bshad pa yin zhes bya ba ni nges par bstan pa'o/ /ye shes gnyis zhes bya ba ni phyi dang nang gi bdag nyid can gyi gzugs can nyid do/ /ji skad bshad ces bya ba ni phyi rol gyi phyogs la ni 'dod pa'i bstan bcos las bstan pa nyid kyis so//nang gi bdag nyid kyi phyogs la ni bla mas bstan pa nyid kyis so/ /bya ba yis zhes bya ba ni ting nge 'dzin gyis so/ /'bad pas ye shes gang thob pa/ /zhes bya ba la sogs pa la/ dmigs pa gzhan thams cad nub par gyur pa gnyis med par snang ba gang yin pa de ni snang ba nye bar thob pa yin par rig par bya'o//nang gi bdag nyid can gyis mthar thug pa'i rnal 'byor gzhan yang bstan pa'i phyir gang gis chu skyes zhes bya ba la sogs pa smras te/ rnal 'byor stobs kyis zhes bya ba ni nang gi thabs dang shes rab kyi rnal 'byor gyi stobs kyis so//lan cig ces bya ba ni dbang bskur ba'i dus su lan cig go/ /dbye ba ji bzhin zhes bya ba ni phyi dang nang gi bdag nyid can gyi ngo bo nyid do/ /ye shes tsam du gyur pa'i gzugs ni ye shes gzugs te/ bdag byin gyis brlab pa'i ting nge 'dzin no/ /de nyid ces bya ba ni sngar bstan pa'o//ji ltar sprin ni sna tshogs zhes bya ba la sogs pa la/ 'od gsal bar zhes bya ba ni yang dag pa'i mtha'o/ /de 'dra'i zhes bya ba ni 'di 'dra ba'i'o/ /rang bzhin ma shes pa zhes bya ba ni rang gi ngo bo ma shes pas so/ /byas nas zhes bya ba la sogs pa la/ 'gro ba lnga'i 'khor bar gyur pa'o//mtshams med pa la sogs zhes bya ba la sogs pa la/ 'thob pa zhes bya ba ni legs par byas pa dang nyes par byas pa la nye bar spyod pa'o/ /rmongs pa zhes bya ba ni gsal bor ma bstan pa'o/ /rang bzhin goms pa'i tshul gyis ni/ /zhes bya ba la sogs pa la/chags pa dang / chags pa dang bral ba dang / chags pa bar ma dag la goms pa'i sbyor bas so/ /shes nas zhes bya ba la sogs pa la/ ye shes can zhes bya ba ni bdag byin gyis brlab pa'i ting nge 'dzin thob pa de grol bar byed par 'gyur ro/ /da ni bskyed pa'i rim pa'i phyogs kyis kyang ye shes gsum gyi phyag rgya bsgom par bya'o zhes bya ba bstan pa'i phyir de bsgrub par bya ba'i phyir/shes rab ngo bo 'di nyid ni/ /zhes bya ba la sogs pa smras te/ thabs su bshad ces bya ba ni thabs kyi ye shes mtshon par byed pa'o/ /phyag rgya bzhis ni zhes bya ba la sogs pa la stong pa bzhi'i phyag rgyas mngon par rgyas btab pa'o//lha'i nga rgyal zhes bya ba ni mngon pa'i nga rgyal lo/ /ji ltar zhes bya ba la sogs pa nas/ yongs rdzogs rnal 'byor zhes bya ba la sogs pa ni 'od gsal ba'o zhes bya ba'i don to/ /de nyid ye shes rnam dag gnas/ /zhes bya ba ni de kho na nyid do//'gyur ba med ces bya ba ni rnam par mi 'gyur ba'o/ /'di la snang ba'i rnam pa yod pa ma yin pas snang ba med pa'o/ /chad pa dang rtag pa'i mtha' gnyis dang bral ba'i phyir gnyis med do/ /thams cad kyi dam par gyur pas na mchog go/ /'gro ba rnams kyi mngon par mtho ba dang nges par legs pa'i rgyu dang bcas pas na zhi ba'o//de ni tshig gi spyod yul min/ /zhes bya ba ni brjod du med pa'o/ /de nas zhes bya ba la sogs pa la/ ye shes gsum zhes bya ba ni zag pa med pa'i ye shes gsum mo/ /de nas zhes bya ba ni don 'di nyid gsal bar bstan pa'i phyir/ de skad du rgya cher rol pa las bstan pa yin no//'di zhes bya bas ni de bzhin gshegs pa'o/ /shAkya thub pas bstan pa yin no/ /stong pa chen po zhes bya ba ni chags pa bar ma'i mtshan nyid can snang ba nye bar thob pa'o/ /bzhugs zhes bya ba ni nye bar bzhugs pa'o/ /mi g.yo zhes bya ba ni stong pa chen po 'di nyid kyi ming yin no//til gyi gong bu zhes bya ba ni til gyi gong bu dang 'dra bar de bzhin gshegs pa rnams kyis shin tu yang dag par gyur par bstan to/ /dbyangs gcig gis zhes bya ba ni gsung gcig gis so/ /rnam dag min zhes bya ba la sogs pa la/ mthar thug mi 'thob ces bya ba ni yang dag par rdzogs pa'i byang chub po//'od gsal ba ni dmigs shig ces bya ba la sogs pa'o/ /kun gyi dbang phyug ces bya ba ni rdo rje 'chang nyid do/ /'di ltar sgra de gsan pa dang / /zhes bya ba la sogs pa la/ nam phyed dus su zhes bya ba ni nam phyed 'das pa'i tshe'o/ /de nyid ces bya ba ni man ngag rnyed pa'o/ /'od gsal ba'i ting nge 'dzin ji ltar 'dod par bstan pa'i phyir/sku ni drang por ma yin zhing / /zhes bya ba la sogs pa smras te dang ba ni rnyog ma med pa ste dri ma dang bral ba nyid kyi phyir ro/ /bla ma nyid kyi zhes bya ba ni de bzhin gshegs pas nye bar bstan pa nyid do/ /'das dang ma 'ongs zhes bya ba la sogs pa la chu zla dang zhes bya ba ni chu zla dang 'dra ba'o//skya rengs 'char ba zhes bya ba ni snang ba dang / snang ba mched pa dang / snang ba thob pa'i mtshan nyid dang bral ba'i skad cig la dus zhes bya'o/ /thabs dang shes rab ting 'dzin gyis/ /zhes bya ba ni gnyis su med pa'i rnal 'byor ro/ /byang chub snying po zhes bya ba ni byang chub kyi shing drung du'o//yang na byang chub snying por zhes bya ba ni shes rab dang thabs gnyis su med pa'i ting nge 'dzin te de nyid ni rtsa ba yin te byang chub 'thob pa'i byed pa po yin pa'i phyir ro/ /legs thob nas zhes bya ba la sogs pa la/ ye shes gsum ni bstan pa'i mtshan nyid can no/ /'gro ba gsum zhes bya ba ni 'dod pa dang gzugs dang gzugs med pa na spyod pa'o//ston par mtshan pa ni skad sna tshogs kyis so/ /de nyid ye shes zhes bya ba la sogs pa la/ mngon par byang chub ston pa ni 'od gsal ba'i go 'phang ngo / /de kho na nyid kyi 'bras bu ston pa'i phyir/ mtshams med lnga ni zhes bya ba la sogs pa smras te/'thob par 'gyur zhes bya ba ni sangs rgyas nyid do/ /de kho na nyid thob pa tsam gyis ci zhig byed ce na/ spyod pa ci dga' bar spyod de zhes bya ba la sogs pa smras te/ da ni de kho na nyid kyi rang gi ngo bo bstan pa'i phyir/ chags med ces bya ba la sogs pa smras te/ sangs rgyas kun dang mnyam sbyor ba//zhes bya ba ni chos kyi sku'i ngo bo nyid yin pa'i phyir sangs rgyas rnams tha dad pa nyid du mi rigs so/ /ye shes gsum bral zhes bya ba ni bstan pa'i mtshan nyid can gyis mi g.yo ba'i ting nge 'dzin no/ /dngos med la sogs pa zhes bya ba la sogs pa la/ dpal ldan gsang 'dus zhes bya ba ni dpal gsang ba 'dus pa nyid do/ /'dod chags la sogs zhes bya ba la sogs pa dang / sna tshogs zhes bya ba la sogs pa la/ gzhan dag ces bya ba ni gzhan gang yang rung ngo / /chos phung brgyad khri bzhi stong zhes bya ba la sogs pa la/ ral pa zhes bya ba ni ral pa can no//gcer bu zhes bya ba ni phyogs kyi gos can no/ /mgo reg ces bya ba ni bregs pa'i phyir mgo reg ste rab tu byung ba'o/ /cod pan ni cod pan 'chad pa'o/ /'dus pa spong 'jug ces bya ba ni khyim gyi gnas yongs su gtong ba'o/ /'dod pa zhes bya ba ni 'dod pa ldan pa'o/ /de nyid ye shes zhes bya ba ni 'od gsal ba'o//de nyid ces bya ba ni rtags kyi brtul zhugs can de'o/ /dang po'i las sbyor ba zhes bya ba ni bskyed pa'i rim pa tsam gyis ting nge 'dzin gyis so/ /snang ba gsum po mthong ba dag /ces bya ba ni bdag byin gyis brlab pa'i ting nge 'dzin tsam yongs su thob pa'o//gtsang ma'i gnas su zhes bya ba ni longs spyod rdzogs pa'i skus so/ /chos 'byung zhes bya ba la sogs pa la/ de ni mngon par byang chub pa'i mtshan nyid can thob nas 'dod chags la sogs pa'i rtsed mo rgya chen pos spros pa dang bcas pa'i spyod pas byang chub pa'o/ /chos dbyings mngon par byang chub pa ni ji ltar rnyed pa dang /'dod chags la sogs pa'i rtsed mos byang chub par 'dod pa ni chos dbyings mngon par byang chub pa'o/ /bla med mngon par byang chub ni mngon par rtogs pa ste/ gcig pu gnyis su med par bsam gtan gyi zas dang gnas pas spros pa med pa la sbyor ba nyid do//de nyid spros bcas la sogs pas bstan te/ spros bcas dang / spros med dang / shin tu spros med kyi spyod pas so/ /rnal 'byor pa zhes bya ba ni sgrub pa po'o/ /yang gang zhig 'di skad du/ mi dgos gzod nas dag pa yi/ /zhes bya ba la sogs pa smras nas/ lan ni gang zhig de ltar zhes bya ba la sogs pa ste/gang zhig ces bya ba ni med par smra ba'o/ /ye shes rim pa zhes bya ba ni thabs las byung ba'i ngo bo nyid kun rdzob dang don dam pa'i ngo bo nyid do/ /de'i dbye ba zhes bya ba ni ye shes gsum gyi dbye ba'o/ /slar yang slob par ni slob par 'gyur ba'o/ /bzhi pa zhes bya ba ni 'od gsal ba'o//rnam gsum slob pa zhes bya ba ni spros bcas la sogs pa'i spyod pa'o/ /ji ltar shing la zhes bya ba la sogs pa la/ ma gtsubs zhes bya ba ni mi bsrubs pa'o/ /de ni mngon par byang chub pa'i rim pa'i snod dang snod ma yin pa bstan pa'i phyir ro/ /gang zhig g.yo sgyu'i zhes bya ba la sogs pa smras te/g.yo sgyu'i blo ni sems nyon mongs pa can no/ /blo dman sems ldan zhes bya ba ni yid mi phyed pa'i sems dang ldan pa'o/ /de'i phyir skyon rnams mthong gi zhes bya ba smras te/ nyon mongs zhes bya ba ni chung bar brtsi ba'o/ /bsnyen bkur med par zhes bya ba la sogs pa la/myur du zhes bya ba ni mnyes par ma byas par ro/ /g.yo bar 'gyur zhes bya ba ni bla ma'i thad nas so/ /tshogs nang zhes bya ba ni skye bo 'dus pa'i nang du'o/ /'di la zhes bya ba ni bla ma'o/ /de ltar zhes bya ba ni de ltar gyur pa'o/ /bstan pas zhes bya ba ni bla ma'o/ /skal ba dang ldan pa'i phyir/yon tan mchog ldan zhes bya ba la sogs pa smras te/ bcas pa zhes bya ba ni shin tu yang dag par ldan pa'o/ /rgyud mang rab tu thos shing zhes bya ba la sogs pa la/ dbang med ces bya ba ni nus pa med pa'o/ /bstan bcos mchu zhes bya ba ni bstan bcos tsam thos pa la ngal ba byas pa'o//yang na zhes bya ba la sogs pa la/ sbyor mi nus zhes bya ba ni tshig rnams sbyor ba dang bsdu bar mi nus pa'o/ /gzhan don zhes bya ba la sogs pa ni gzhan la phan pa bya ba'i blo dang ldan pa'o/ /rgyud mang thos shing zhes bya ba la sogs pa la/ tshig don shes zhes bya ba ni mtha' drug gi don shes pa'o//rgyud rgyal zhes bya ba ni gsang ba 'dus pa'o/ /rgyud rnams mang po thos zhes bya ba la sogs pa la/ 'phags pa rdo rje yi zhes bya ba ni klu sgrub kyi zhal snga nas so/ /bla na med pa'i dgongs pa'i dka' 'grel lo/ /gus pas thal mo sbyar nas ni/ / mchog tu mgo bos rab btud nas/ /bdag gis byang chub bsgrub pa'i phyir/ /klu sgrub la ni phyag 'tshal lo/ /phyag 'tshal te zhes bya ba la sogs pa la/ rdo rje che zhes bya ba ni chos kyi sku'o/ /rdo rje sems dpa' la sogs pa dkyil 'khor gyi gtso bo'i gzugs ni longs spyod rdzogs pa'i sku'o//de la dang por zhes bya ba la sogs pa la/ rgyud rnam pa bzhi zhes bya ba ni bya ba dang / spyod pa dang / rnal 'byor dang / rnal 'byor bla na med pa'i dbye ba'o/ /thob par bya ba'i ched du zhes bya ba la sogs pa la/ slob dpon dang gsang ba dang shes rab ye shes kyi dbang bskur ba'o//lo bcu drug lon pa'i zhes bya ba ni nye bar mtshon pa ste rgyud las gsungs pa dag go/ /de'i 'og tu zhes bya ba ni dbang bskur ba'i rjes thogs so/ /khong stong zhes bya ba la sogs pa ni sbubs stong pa'o/ /bsnyun med ces bya ba ni skyon med pa'o/ /'jig rten rjes 'jug phyir zhes bya ba ni 'jig rten rjes su bskyang ba'i ched du'o//chos rnams kun la zhes bya ba la sogs pa la gnas pa med ces bya ba ni phyi rol du ma gyur pa'o/ /rtag tu mnyam 'jog pa zhes bya ba la sogs pa la/ spyod lam dag ni zhes bya ba ni langs pa dang 'dug pa dang 'chag pa dang nyal ba la sogs pa thams cad du'o//rnam 'phrul zhing zhes bya ba la sogs pa la/ rdzu 'phrul spros pa'o/ /sgyu ma lta bu zhes bya ba ni bdag byin gyis brlab pa'i ting nge 'dzin no/ /sna tshogs min la zhes bya ba ni 'gro ba rnams kyi dngos po gcig nyid du'o/ /de ltar zhes bya ba la sogs pa la kun mkhyen ye shes zhes bya ba la sogs pa dang /de ltar 'jigs med gsol 'debs zhes bya ba la sogs pa la/ thos pas ni gsol ba 'debs pa'i tshig go/ /bdag nyid byin gyis brlab pa zhes bya ba la sogs pa la/ rang gi rang bzhin byin gyis brlab pa ni bdag byin gyis brlab pa ste/ rang gi sems tsam so sor snang ba'i lus so//de'i rim pa ni rlung dang rnam par shes pa gsum yang dag par ldan pa ste/ de nyid la bdag byin gyis brlab pa zhes bya'o/ /kun rdzob bden pa zhes bya ba ni de kun rdzob kyi bden pa mthong ba zhes bya ba brjod par bya ba'o/ /de ni bla ma'i drin dag gis/ /zhes bya ba la sogs pa la/ kun bdag nyid ces bya ba ni thams cad mkhyen pa'i rang bzhin can no//gtso bo zhes bya ba ni 'gro ba rnams so/ /tshe 'di nyid du zhes bya ba ni tshe 'di nyid la'o/ /bdag byin brlabs pa zhes bya ba la sogs pa la/ 'od gsal ba'i gnas zhes bya ba ni chos thams cad stong pa nyid do/ /bden pa gnyis su bya ba ni kun rdzob dang don dam pa'i dbye ba'o//'bras bu ni gong na med pa'i 'bras bu yin pa'i phyir ro/ /rgyu ni thabs kyi khyad par ro/ /gang yang 'di rnal 'byor pa'i kun rdzob kyi gzugs so/ /kun rdzob gzhan gcig nas gcig tu brgyud pa'i rgyur gyur pa'i ngo bo yang yod pa de dag ni bdag byin gyis brlab pa'i sgras brjod par bya ba zhes bya ba ma yin no//ci'i phyir zhe na/ bdag byin gyis brlab pa'i rim gyis ni zhes bya ba la sogs pa smras te/ gyis ni zhes bya ba ni gang gi phyir zhes bya ba'i don to/ /rgyu gang gis rim bzhin du rjes thogs la/ 'od gsal ba ni 'thob par 'gyur/ /zhes bya ba chos kyi sku 'thob pa'o//rdo rje slob dpon zhes bya ba ni bla na med pa'i bla ma'o/ /dang por zhes bya ba ni mchog tu gsang ba mngon par byang chub pa'i rim pa'o/ /rang dbang med pa zhes bya ba ni gtso bo ma yin pa ste/ brdzun pa dang sgyu ma'i rang bzhin zhes bya ba'i bar du'o/ /gang gi phyir zhe na/ rang rgyud ni zhes bya ba smras te/rang gi rang bzhin dang rang gi ngo bor 'byung ba ma yin zhing skye bar mi 'gyur ro zhes bya ba'i don te/ rang gi ngo bor skye ba dang bral ba'i phyir dang thug pa med pa'i skyon du thal bar 'gyur ba'i phyir ro/ /gal te 'gro ba sgyu ma'i rang bzhin yin na 'byung ba'i rgyu ci zhig yin zhe na/ de'i rgyu ni 'od gsal zhes bya ba smras so//de ltar na 'od gsal ba dngos po zhig tu 'gyur ro zhe na/ 'od gsal thams cad stong pa'o/ /zhes bya ba la sogs pa smras te/ de'i phyir khams gsum pa 'di dag thams cad stong pa las byung ba sems tsam yin gyis yang gtso bo dang dbang phyug la sogs pa ni med do//sems gang gis ni zhes bya ba la sogs pa la/ byis pa zhes bya ba ni mu stegs can dang rnam par shes par smras pa ste/ rang gi ngo bor sgro 'dogs pa'i phyir ro/ /bcings zhes bya ba ni bcings pa thob par 'gyur ba'o/ /rnal 'byor pa zhes bya ba ni rdzogs pa'i rim pa la gnas pa'i rnal 'byor pa'o//bde gshegs gnas ni lam ste thob par 'gyur ba'o/ /'dir ni zhes bya ba ni 'khor bar ro/ /skye ba zhes bya ba ni bden pa'i dngos po 'ga' zhig ste bdag dang dbang phyug la sogs pa'o/ /'chi ba ni nyams par 'gyur ba'o/ /de ltar na ci zhig mthong bar 'gyur zhe na/ sems nyid ces bya ba la sogs pa smras te/ gzugs la sogs pa'i rnam par 'dzin cing sgyu ma'i rang bzhin rnam pa sna tshogs su rnam par gnas pa'o/ /de ni gzugs la sogs pa'i rnam pa 'dzin pa'i rang sems thabs gang gis rtogs par 'gyur ba de bstan pa'i phyir/ rlung gi sbyor ba med par ni/ /zhes bya ba la sogs pa smras te/sems kyi rang bzhin zhes bya ba la sogs pa la/ sems kyi rang bzhin rgyur gyur pas/ /zhes bya ba ni rang bzhin brgya drug cu rgyur gyur pa las/ las dang skye ba kun du 'byung ba ste/ kun nas 'byung bar 'gyur ba'o/ /de nyid ces bya ba rnam par shes pa gsum mo/ /rlung dang yang dag par ldan pa las 'byung bar skye bar 'gyur ro//rnal 'byor pa zhes bya ba ni rdzogs pa'i rnal 'byor pa'o/ /lus su zhes bya ba ni lha la sogs pa'i gzugs can gyi gzugs brnyan dang 'dra ba'i lus so/ /sgyu ma'i lus zhes bya ba'i sgras kyang de la brjod pa yin no/ /de bas 'di ltar zhes bya ba ni rlung dang rnam shes ldan pa nyid kyis so//'gro ba zhes bya ba ni khams gsum pa'i 'gro ba dang snod kyi sgras brjod pa'o/ /rgyu de'i phyir sgyu ma lta bur 'dir bshad do/ /'dir zhes bya ba ni sangs rgyas kyi bstan pa 'dir te/ mthun pa'i rgyu las mthun pa'i 'bras bu 'byung bar 'gyur ro zhes bya ba'i rigs pas so/ /sgyu ma lta bu'i ting 'dzin gnas//zhes bya ba ni bdag byin gyis brlab pa'i ting nge 'dzin la gnas pa'i rnal 'byor pa'o/ /thams cad ces bya ba ni snod kyi 'jig rten thams cad do/ /de dang 'dra bar zhes bya ba ni sgyu ma'i rnam par ro/ /de nyid ni gzugs dang zhes bya ba la sogs pas gsungs te/ khams ni zhes bya ba ni sa dang chu dang me dang rlung ngo //mig la sogs dang zhes bya ba ni mig dang rna ba dang sna dang lce dang lus dang yid do/ /yul rnams ni gzugs dang sgra dang dri dang ro dang reg pa dang chos zhes bya bar grags pa'o/ /ye shes lnga po zhes bya ba ni me long lta bu dang / mnyam pa nyid dang / so sor rtog pa dang / bya ba grub pa dang / chos kyi dbyings shin tu rnam par dag pa zhes bya ba'o//nang du zhes bya ba ni khams bco brgyad do/ /phyi dang zhes bya ba ni brtan pa dang g.yo ba'o/ /thams cad ces bya ba ni sgyu ma nyid do zhes bya ba'i don to/ /da ni rnal 'byor pa'i rang gi sems kyi gzugs brnyan gyi ngo bo sgyu ma'i lus ngag byin gyis brlab pa'i zhes bya ba'i ming can gyi rang gi ngo bo dang kha dog dang khyab pa bsgrub par bya ba'i phyir me long nang gi gzugs brnyan lta bu zhes bya ba smras te gzugs brnyan dang 'dra ba'o//mtshon par bya ba zhes bya ba ni mdun na 'dug pa'i gzugs brnyan mthong bas so/ /'ja' lta bu zhes bya ba ni ji ltar dbang po'i gzhu 'od zer kha dog rnam lnga dang ldan par 'byung ba de bzhin du de'i kha dog mtshon par bya ba'o//khyab pa nyid ni chu'i zla bas mtshon par bya ba'i don to/ /da ni rnal 'byor la ma ltos par yang de gsal bar rtog par byed pa bstan par bya ba'i phyir/ me long dri ma med pa la/ /zhes bya ba la sogs pa smras te/ dngos dang dngos med las grol bas//zhes bya ba ni bden pa yang ma yin/ brdzun pa yang ma yin no/ /rdo rje sems dpa' zhes bya ba ni rdo rje sems dpa'i ngo bo'o/ /legs bris pa zhes bya ba ni kha dog dang dbyibs sna tshogs pa'o/ /de nyid gsungs pa/ sku ni blta bas mi ngoms pa/ /zhes bya ba ste/ nyams pa med pa'i ngo bo nyid do//bstan zhes bya ba ni phyi rol gyi dper gyur pas nang gi dpes bstan par bya ba rab tu bstan pa yin no/ /slob ma bzang po zhes bya ba ni rin po che lta bu'i gang zag go/ /'di nyid ces bya ba ni gzhan ni ma yin no zhes bya ba'i don to/ /nges par mtshon pa ste zhes bya ba ni yang dag par mtshon par bya ba'o//skyon med mtshan nyid kyis zhes bya ba ni sgrib pa thams cad zad pa'i mtshan nyid do/ /sku zhes bya ba ni longs spyod rdzogs pa'i mtshan nyid can no/ /de nyid kho na zhes bya ba ni de kho na zhes bya ba'i don to/ /dri za'i sems can zhes bya ba ni srid pa bar ma'i lus so/ /rdo rje'i sku zhes bya ba ni mi tshig mi chod mi phyed mi 'bangs pa'i gzugs yin pa'i phyir ro//rdo rje sems dpa' zhes bya ba dang / de bas zhes bya ba ni bdag byin gyis brlab pa'i ting nge 'dzin thob pa'o/ /bdag nyid ces bya ba ni rang nyid do/ /mchod ces bya ba ni de bzhin gshegs pa'i mchod pa'o/ /gang gi phyir zhe na/ bdag nyid sangs rgyas zhes bya ba la sogs pa smras te/bdag byin gyis brlab pa'i ting nge 'dzin thob pa ni sangs rgyas thams cad nyid do/ /lha rnams ni lha nyid do/ /de rnams kyi ngo bo ni lha nyid do/ /de bas zhes bya ba ni rgyu des so/ /sngags dang phyag rgyas zhes bya ba la sogs pa la/ dkyil 'khor la sogs zhes bya ba ni bzlas pa dang bsam gtan dang mchod pa la sogs pa'o//dbang po'i gzhu zhes bya ba ni sgyu ma'i dpe nyid du nye bar bstan pa yin no/ /sgeg dang zhes bya ba la sogs pa la/ sgyu rtsal zhes bya ba ni sgyu rtsal drug cu rtsa bzhi ste/ b+ha ra ta'i bstan bcos las bstan pa'o/ /mang du bshad ci dgos zhes bya ba la sogs pa la/ rdo rje theg pa zhes bya ba ni gsang sngags kyi theg pa chen po'o//da ni sgyu ma'i dpe nyid kyi dmigs pa bstan pa'i phyir me long gi ni zhes bya ba la sogs pa smras te/ sgyu ma ni sprul pa'o/ /chu bur zhes bya ba ni chu'i chu bur ro/ /mig 'phrul zhes bya ba ni sngags dang sman la sogs pa dang ldan pa'o/ /mtshungs par zhes bya ba ni khams gsum po 'di dag gi ngo bo 'dra ba nyid du mthong ba'o//de ni gtso bo zhes bya ba ni rdo rje 'chang ngo / /mthong ba dang ni zhes bya ba la sogs pa la dmigs med ces bya ba la sogs pa la/ dmigs par bya bas ni dmigs pa ste/ mig la sogs pas gzung bar bya ba'i yul lo/ /kun rdzob ces bya ba ni tha snyad tsam du rdo rje theg pa las sgyu ma zhes brjod pas sgyu ma dang 'dra bar yongs su brtags pa'o//'on kyang thams cad kyang ting nge 'dzin gyi stobs kyis sgyu ma lta bur mthong ba yin no/ /de nyid kyi phyir/ dbang po gang dang gang lam 'gyur/ /zhes bya ba la sogs pa smras te/ dbang po'i lam nyid du gyur pa ste dbang po'i spyod yul nyid do//gyur zhes bya ba ni der song ba'o/ /de dang zhes bya ba ni dngos po de'o/ /de ngo bor bya zhes bya ba ni bdag byin gyis brlab pa'i ting nge 'dzin de'i ngo bo nyid de ji srid sgyu ma lta bur mthong gi bar du'o/ /rgyu de'i phyir/ mnyam par ma bzhag sbyor ba yis/ /zhes bya ba smras te/ ting nge 'dzin las langs pa'i gnas skabs su'o//'chags pa la sogs pa'i dus su dngos po thams cad sangs rgyas kun dang mnyam par sbyor ba ste yang dag par mnyam pa nyid du blta bar bya'o/ /'di nyid ni sangs rgyas rnams kyi gang kun rdzob sgyu ma lta bu zhes bya ba nyid do/ /des cir 'gyur zhe na/ kun la zhes bya ba ni thams cad la'o/ /kun nas zhes bya ba ni thams cad nas so//thams cad du zhes bya ba ni brtan pa dang g.yo ba'o/ /kun gyis zhes bya ba ni rnam pa thams cad kyis so/ /rnam pa kun zhes bya ba ni mnyam par gzhag pa dang ma bzhag pa'i gnas skabs so/ /bdag nyid ces bya ba ni rang nyid do/ /sangs rgyas rang bzhin kun zhes bya ba ni sangs rgyas thams cad kyi byin gyi rlabs kyis byin gyis brlab pa'o//grub pas zhes bya ba ni gdod ma nas grub pa'o/ /rang nyid kyis zhes bya ba ni bdag nyid kyi lus so/ /de zhes bya ba ni sgom pa po'o/ /bsam gtan 'dis gnas pa'i rnal 'byor pa 'di ltar gyi 'bras bu bstan pa'i phyir/ sems dpa' chen po 'gro dang zhes bya ba la sogs pa smras te/ gnas zhes bya ba ni rnal 'byor pa'i 'dug gnas so//'gyur ba dang zhes bya ba la sogs pa la/ 'gro ba zhes bya ba ni 'gro ba gtso bo rnams kyi'o/ /lha dang bcas pa kun gyis mchod/ /ces bya ba ni lha rnams kyis so/ /ting nge 'dzin la gnas nas 'gro ba skyob pa bstan pa'i phyir/ /ji ltar zhes bya ba la sogs pa smras pa yin te/ de bzhin gshegs pa ni de lta bu nyid du'o//sna tshogs ye shes bya ba ni 'gro ba rnams kyi rang gi ngo bo yongs su shes pa ste/ sems tsam gyi ye shes sgyu ma lta bu'i ting nge 'dzin no/ /rjes su sdud ces bya ba ni de goms par byed pa'o/ /ji yang med ces bya ba la sogs pa la bsgrub par mi bya ba ste 'jig rten dang 'jig rten las 'das pa'i dngos grub kyi ngo bo'o//rdo rje sems dpa' zhes bya ba ni sangs rgyas so/ /brgyan pas zhes bya ba ni byin gyis brlab pa'o/ /de nyid kyi phyir rang nyid ces bya ba smras te/ dka' ba spyod pa med par yang ngo / /bde chen phyag rgya zhes bya ba ni las dang dam tshig dang chos dang phyag rgya chen po'o/ /bde chen zhes bya ba ni bde ba chen po'i 'bras bu ster ba'o//da ni sgrib pa thams cad rnam par dag par byed pa bstan pa'i phyir/ nyon mongs pa las kyi lam can zhes bya ba la sogs pa smras te/ nyon mongs pa ni 'dod chags la sogs pa'o/ /las can ni bde 'gro dang ngan 'gro'i rgyu'o/ /lus ni gzugs phung ngo / /byed pa po zhes bya ba ni bdag dang dbang phyug la sogs pa'o/ / 'bras bu ni legs par byas pa dang nyes par byas pa'i las las skyes pa'o/ /smig rgyu rmi lam lta bu de/ /zhes bya ba la sogs pa dang / 'di 'dra'i zhes bya ba la sogs pa la/ kun rdzob la zhes bya ba ni yongs su gsal bar 'gyur ba'i rdzas so/ /nye bar dmigs pa zhes bya ba ni rang gi ngo bor mngon par brtags pa nyid do/ /skye ba ni 'byung ba'o//de dag ces bya ba ni nad de dag go/ /sman zhes bya ba ni rtsi'o/ /rgyal ba ni rgyal ba'i ngang tshul dang ldan pa'o/ /ting nge 'dzin gyi che ba'i bdag nyid bstan pa ni bdag byin gyis brlab pa'i zhes bya ba la sogs pa ste/ rtag pa dang chad pa'i mtha' la dmigs par gyur pas de'i phyir/ mchod pa thams cad spangs nas ni//zhes bya ba'o/ /de zhes bya ba ni bla ma de'o/ /de zhes bya ba ni bdag byin gyis brlab pa'i ting nge 'dzin no/ /gal te ji ltar na bsod nams kyi rgyu gzhan dag la mchod pa la sogs pa spangs nas bla ma kho na la mchod pa bya ba yin zhe na/ de yis bsod nams ma byas ci/ /zhes bya ba la sogs pa smras te/bla med ces byed pa zhes bya ba ni lam bla na med pa ster ba'o/ /slob dpon nyid ni rdo rje sems dpa'o/ /ji lta bu'i mchod pa bya zhe na/ shin tu dga' ba gang dang gang / /zhes bya ba la sogs pa smras te/ de ltar byas pa la yon tan ci zhig yod ce na/ slob dpon gyis ni sdig pa 'phrog /ces bya ba la sogs pa smras te/slob dpon gyis ni sdug bsngal gyi rgya mtsho 'jigs las zhes bya ba ni 'khor ba'i rgya mtsho'o/ /da ni slob ma ngan pa la bstan par bya ba ma yin zhes dgag pa'i phyir/ gang zhig nga rgyal gyis rtsags shing / /zhes bya ba la sogs pa smras te/ yang dag rim pa sun 'byin pa/ /zhes bya ba ni rim pa lnga sun 'byin pa'o//slob ma bzang po'i mtshan nyid bstan pa ni/ bla ma la gus zhes bya ba la sogs pa ste/ bden par smra zhes bya ba ni bden pa'i tshig dang ldan pa'o/ /rnam par dben zhing zhes bya ba ni gcig pu dga' ba'i ngang tshul can no/ /bdag byin gyis brlab pa'i rim pa'i dka' 'grel lo// //rim pa bzhi pa reg gyur nas//'gro ba'i mun pa 'phrog mdzad cing / /sna tshogs don mdzad klu sgrub la/ /phyag 'tshal 'dud cing phyag 'tshal lo/ /slob dpon gyi rim pa bzhi pa'i don rab tu bsgrub par 'dod nas/ dang po nyid du rje btsun rdo rje 'chang la phyag 'tshal ba ni rdo rje sems dpa' zhes bya ba la sogs pa ste/ thams cad stong pa nyid ni 'od gsal ba ste de ston par mdzad pa'o//mngon par byang chub pa zhes bya ba ni mngon par rdzogs par sangs rgyas nas gang gis sangs rgyas nyid thob pa'o/ /'di zhes bya ba ni mngon par byang chub pa'i mtshan nyid can 'od gsal ba'o/ /rang nyid 'byung bar 'gyur ba nas rang 'byung ste/ rgyu gang gis kyang ma bskyed ces bya ba'i bar du'o/ /de'i phyir/ blo yi spyod yul min phyir ngag gis brjod du med/ /bla mas bstan pas dngos po rtogs par bya ba las ring gyur/ /snying rje la sogs yon tan dkar po'i de nyid ma yin pas/ /dad dang ldan pa'i snying gi gnas su rang nyid 'byung ba yin/ /zhes bstan pa yin no//bcom ldan zhes bya ba ni/ dbang phyug dang ni gzugs bzang dang / /dpal dang grags dang ye shes dang / /brtson 'grus phun sum tshogs pa ste/ /drug po de la ldan zhes bya/ /zhes 'byung bas de gang la yod pa de la de skad ces bya'o/ /gcig pu zhes bya ba ni gnyis su med pa'o/ /sangs rgyas thams cad kyi chos sku'i ngo bo nyid yin pa'i phyir dang sna tshogs dang mi ldan pa'i phyir ro//bdag nyid che ba'i lha zhes bya ba ni gtso bor gyur pa'o/ /man ngag ces bya ba la sogs pa la/ de bas lhag ces bya ba ni mchog tu phan pa mdzad pa nyid yin pa'i phyir ro/ /de bas zhes bya ba ni 'od gsal ba bas kyang ngo / /de ni zhes bya ba ni bla ma'o//ci nus pa zhes bya ba ni bdag nyid kyi nus pas so/ /ci 'byor pa zhes bya ba ni bcu drug lon pa'am gzhan dag kyang ngo / /dga' ba dang mgu ba bskyed pas na phyag rgya'o/ /tshogs kyi dkyil 'khor dbus su zhes bya ba la sogs pa ni tshogs kyi 'khor lo'i dbus su'o/ /mchod par bya ba ni rdo rje slob dpon la'o//mchod pa ni nang gi bdag nyid can gyi mtshan nyid can no/ /de nas zhes bya ba la sogs pa la rnal 'byor chen po ni rdo rje slob dpon no/ /snang ba zhes bya ba ni skad cig ma bzhi nye bar mtshon par byed pa'o/ /snyoms par 'jug pa zhes bya ba ni phyi rol gyi phyag rgya dang ngo / /cho ga yis zhes bya ba ni mdor bsdus pa'i rim par bstan pa'i cho gas so//ka la sha sogs zhes bya ba ni bum pa'i steng du dung chos sam/ nya phyis kha sbyor du byas par gzhag par bya'o/ /nam phyed ces bya ba ni nam phyed kyi dus su'o/ /dbang bskur yang dag thob nas zhes bya ba ni gsang ba'i dbang bskur ba'i cho ga dang shes rab ye shes kyi dbang bskur ba'i cho gas dbang bskur ba rnam pa gnyis thob pa'o//yang zhes bya ba ni zhag gzhan la'o/ /bstod pas zhes bya bas ni 'chad par 'gyur bas so/ /khams gsum zhes bya ba la sogs pas ni 'od gsal ba'i yon tan brjod pa'i sgo nas bla ma la mnyes par byed do/ /mi brten zhes bya ba ni phyi rol du ma gyur pa zhes bya ba ste/phung po dang khams dang skye mched du ma gyur pa'o/ /de ltar na gang la bstod pa dang khyad ci yod ce na/ phyin ci log las rnam grol ba/ /zhes bya ba la sogs pa smras te/ rnam rtog med cing zhes bya ba'i ched du bsam pa med pa'o/ /kun rtog med pa gang la 'jug pa'i kun du rtog pa med pa ni kun rtog med ces bya'o//de nyid kyi phyir/ yid ni rab tu mi gnas pa/ /zhes bya ste/ gang la bsam pa yod pa ma yin pa de la de skad ces bya ste/ yid ni yid kyi rnam rtog go/ /de nyid kyi phyir dmigs med do/ /gnas med ces bya ba la sogs pa la gos pa ni 'dod chags so/ /gos pa dang bral ba ni gos pa med pa'o//lta bar 'tshal zhes bya ba ni bskul nas yang gsol ba gdab po/ /bdag 'tshal lo zhes bya ba la sogs pa la/ mthong bar ni zhes bya ba ni 'dis mthong bar byed pas na mthong ba ste thabs so/ /snang ba gsum po zhes bya ba'i rnam par shes pa gsum po spangs pa'o/ /rdo rje ye shes zhes bya ba ni 'od gsal ba'i ye shes so//sangs rgyas kun gyi ye shes zhes bya ba ni de bzhin gshegs pa thams cad kyi chos kyi sku'i ngo bo'o/ /de nyid kyi phyir/ de bzhin gshegs pa kun gyi gnas/ /zhes bya ba gsungs te/ de bzhin gshegs pa thams cad kyi longs spyod rdzogs pa dang / sprul pa'i sku'i gnas kyi ngo bo yin pa'i phyir ro//thog mtha' med pa ni skye ba dang 'jig pa dang bral ba'o/ /nyon mongs pa dang nye ba'i nyon mongs pa dang bral ba'i phyir zhi ba'o/ /de ltar zhes bya ba la sogs pa la/ rim pa ni mngon par byang chub pa'i rim pa'o/ /mtshan mo snang ba'i cha zhes bya ba la sogs pa la ni phyi rol gyi sgo nas nang gi bdag nyid can ston par byed pa yin no//mtshan mo'i cha zhes bya ba ni mtshan mo'i dus su'o/ /gsal ba'i nyi ma'i zer 'gyed ces bya ba ni nyi ma 'char ba nas brtsams nas so/ /yin zhes bya ba ni snang ba mched pa 'byung ba'o/ /mtshams zhes bya ba ni mtshams kyi mun pa'i dus te/ snang ba nye bar thob pa'i mtshan nyid can no//rang gi rang bzhin brgya drug cu'o/ /lan cig mun pa zhes bya ba ni skad cig ma so sor ro/ /rang gi zhes bya ba ni bdag nyid kyi'o/ /de nyid kyi phyir de ni yang dag par rdzogs pa'i byang chub 'dren par byed pa ma yin no/ /'o na yang dag par rdzogs pa'i byang chub 'dren par byed pa gang yin zhe na mtshan min zhes bya ba la sogs pa smras te/gang zhig ces bya ba ni bzhi pa'o/ /de ni yin zhes bya ba ni de yin par 'gyur ba'o/ /bla ma mchog bshad ces bya ba ni rdo rje slob dpon rje btsun rdo rje 'chang gis bstan pa'o/ /rnal 'byor pa zhes bya ba ni bdag byin gyis brlab pa'i rnal 'byor pa'o/ /skad cig ma bzhi pa gsal bar bya ba'i phyir/mun pa'i mtha' ni zad dang zhes bya ba ni mtshan mo zad par gyur cing mun pa zad par gyur pa'o/ /'das pa ni bral bar gyur pa'o/ /mtshams kyi snang ba ni mtshams kyi mun pa'o/ /nyi ma ni nyi ma nyid do/ /ji srid ces bya ba ni dang por nyi ma 'char ba'i gnas skabs so/ /skad cig 'dir ni zhes bya ba ni skad cig la'o//bshad ces bya ba ni bstan pa'o/ /slob dpon mchog ces bya ba ni slob dpon thams cad kyi nang na gtso bor gyur pa'o/ /phyi rol byang chub bstan pa ni dpe ste/ bcom ldan 'das shAkya thub pas kyang skad cig ma 'di la rdo rje lta bu'i ting nge 'dzin mngon du mdzad do zhes bya ba 'dis ni phyi'i rdzogs par byang chub pa'i dpes bstan pa'o//nang gi bde ba rnyog bral thob par 'gyur/ /zhes bya ba ni nang gi 'od gsal ba'i mtshan nyid can no/ /de nyid ni rgyu la 'bras bu brtags nas sangs rgyas byang chub ces bya ste/ skad cig de la zhes bya ba'i don to/ /skad cig de'i rang gi ngo bo bstan par bya ba'i phyir thog mar 'byung min zhes bya ba smras te ma skyes pa'i phyir ro//yang na chos thams cad kyi thog mar 'byung ba ni rgyur gyur pa ste/ chos thams cad de las byung ba'i phyir ro/ /dbus su 'byung min zhes bya ba ni chos thams cad kyi mtshan nyid dang bral ba nyid yin pa'i phyir ro/ /dbus su 'byung ba yang yin te chos thams cad las 'das pa'i phyir ro/ / gang las mthar ma byung ba yod pa ma yin pa de ni mthar ni mi 'byung ngo / /yang na chos thams cad kyi mtha' zhes bya ba zad par gyur pa ste/ chos thams cad kyi mtha' 'od gsal ba'i mthar thug par 'gro ba'i phyir ro/ /de dag ces bya ba ni de lta bur gyur pa'o/ /'gro ba dang ni 'ong med ces bya ba la sogs pa la/ ngo mtshar zhes bya ba ni shin tu rmad du byung ba'o//yang na 'dir ngo mtshar ci zhig yod ces bya ba ste/ brtags pa thams cad dang bral ba'i mtshan nyid can stong pa la zhes bya ba'o/ /gnas par 'gyur min zhes bya ba ni gar yang gnas par 'gyur ba med pa'o/ /myur du 'gro ba min zhes bya ba ni gar yang 'gro ba'i ngang tshul can ma yin pa'o//mchog gyur pa ni gtso bor 'gyur ba'o/ /de lta bu 'di nyid ces bya ba la sogs pa la/ rgyu dang mi rgyu'i zhes bya ba ni brtan pa dang g.yo ba'i ngo bo nyid do/ /kun rgyu zhes bya ba ni sa stengs ma lus par 'khor ba'o/ /rnal 'byor pa de ni mi zad pa zhes bya ba chos kyi sku thob pa'o/ /yon po'i lus ni dman pa'i 'gro ba'o//bstan pa la gnas med ces bya ba ni bstan la mi 'dug na yang ngo / /mig btsums zhes bya ba ni mig ma phye ba yang ngo / /rnam rgyas mig ni rnam par gnas par gyur pa'i mig can no/ /mnyam par ma bzhag kyang zhes bya ba ni/ mnyam par ma bzhag tu zin kyang mnyam par gzhag pa yin no/ /de ni tshig dang ldan yang brjod bral yin no//de ni gzugs ngan par gyur kyang longs spyod chen po dang ldan pa yin no/ /gzhan gyi bran du gyur pa yin yang 'jig rten rnams kyi mgon po yin no/ /gang zhig de nyid rig ces bya ba ni skad cig ma bzhi pa shes pa'o/ /da ni rnal 'byor pa'i don de nyid gsal bar bya ba'i sbyor ba bstan pa'i phyir/man ngag thob pa'i zhes bya ba la sogs pa gsungs te/ rnam gnyis ni rnam pa gnyis so/ /de nas zhes bya ba ni man ngag bstan pa'i rjes thogs su'o/ /bslab ces bya ba ni goms par bya ba'o/ /ril por 'dzin pa zhes bya ba la sogs pa la/ de bzhin zhes bya ba ni de ltar rjes su gzhig par bya ba nyid de/ rdul phra rab kyi dbye ba nyid kyis so/ /mgo bo nas ni zhes bya ba la sogs pa la mgo bo nas brtsams nas rkang pa'i bar du dang rkang pa nas brtsams nas ni ji srid snying gar zhes bya ba'i snying ga'i sa bon la'o/ /yang dag pa'i mtha' zhes bya ba ni stong pa nyid la 'jug pa'o/ /'dir bsdus pa'i don ni 'di yin te rim gyi rim gyis yang dag pa'i mtha' la 'jug par bya ste//sa bon gyi mthar thug par zhugs la/ sa bon yang thig ler ro/ /de yang stong pa nyid du'o zhes bya ba 'di lta bu ni ril por 'dzin pa'i ting nge 'dzin no/ /rgyu ba dang ni zhes bya ba la sogs pa ni snod dang bcud kyi 'jig rten no/ /dang por zhes bya ba ni thog ma nyid du'o/ /phyi nas zhes bya ba ni de'i rjes thogs su ste/ ril por 'dzin pa'i bdag nyid can gyi'o/ /da ni bstan ma thag pa'i rnam pa gnyis po mdor bsdus nas 'od gsal du 'jug pa'i tshul bstan pa'i phyir/ dbugs kyi rlung ni zhes bya ba la sogs pa smras te/ me long la zhes bya ba ni kha rlangs kyi gzugs so/ /ji ltar kun du thim pa'i ni kun la khyab pa'o/ /de ltar zhes bya ba ni de ltar ro//yang dang yang zhes bya ba ni skad cig skad cig la goms par byed pa'o/ /'gro dang 'dug dang zhes bya ba la sogs par yang slob par byed pa'o/ /rtag tu gnas zhes bya ba ni gnas pa nyid do/ /sems can don du'ang zhes bya ba la sogs pa la/ lan 'ga' byed par 'dod pa'o/ /de dang de zhes bya ba ni 'od gsal ba'i ngo bo nyid yin pa'i phyir ro//yang na rnam shes rlung dang ldan pa'i zhes bya bas kyang ngo / /gal te 'od gsal ba tsam gyi ting nge 'dzin 'dis sangs rgyas par gyur nas kyang sems can gyi don ji ltar byed par 'gyur te/ gzugs kyi sku med par ni sems can gyi don yod pa ma yin pa'i phyir ro/ / zhe na/ de'i phyir/ ji ltar dang ba'i chu klung las/ /zhes bya ba la sogs pa smras te/ nya dag myur bar ldang ba ltar thams cad stong pa las kyang de dang 'dra'o/ /sgyu 'phrul dra ba zhes bya ba ni dkyil 'khor gyi 'khor lo la sogs pa'i rnam pas so/ /'byung bar bshad ces bya ba ni bstan pa 'jug par 'gyur ba'o/ / de nyid gsal bar bya ba'i phyir/ rigs lnga'i sangs rgyas zhes bya ba la sogs pa smras te/ phyag rgya chen po zhes bya ba ni lha la sogs pa'i rnam par rtog pa'o/ /'byung ba'i zhes bya ba ni kun nas 'byung ba ste/ nam mkha' la brgya byin gyi gzhu 'byung ba ji lta bu'o/ /da ni spyod pa bstan pa'i phyir/ phyag rgya 'ching bar byed pa'am//zhes bya ba smras te/ phyag rgya ma bcings pa'am yang na bcings par byed pa na'o/ /gang gzhan thams cad ces bya ba gang cung zhig byed par 'dod pa de dag thams cad thams cad stong pa'i gzhi la zhes bya ba stong pa nyid la gnas pas so/ /thams cad za zhes bya ba ni bza' ba dang mi za ba kun za ba'o//kun la phyag byed ces bya ba ni thams cad la phyag 'tshal ba'o/ /kun du 'gro zhes bya ba ni bgrod par bya ba dang bgrod par bya ba ma yin pa'i mi spyod pa'o/ /thams cad byed ces bya ba ni bsod nams dang bsod nams ma yin pa'o/ /rtags kun 'chang zhes bya ba ni bdag dang gzhan gyi lta ba can gyi rtags kun 'chang ba'o//'di ltar gnas par gyur pa'i rnam par dag par 'gyur ba yang ji lta bu zhe na/ thams cad stong pas zhes bya ba smras so/ /man ngag thob pa'i zhes bya ba la sogs pa la spyod pa'i dus su gnang ba thob nas yang byang chub kyi sems blang ba'i tshigs su bcad pa las skal bzangs zhes bya ba ni skal ba dang ldan pa'o//byang chub sems zhes bya ba ni don dam pa'i byang chub kyi sems so/ /slar yang zhes bya ba ni spyod pa byed pa'i dus so/ /khyad par ji lta bu dang ldan pa zhig ce na/ dngos po kun dang rnam bral zhing / /zhes bya ba smras te/ nam mkha' dang mnyam pa'i phyir ro/ /rnam par spangs pa'i ni phung po la sogs pa'i ngo bo dang bral ba'o//chos bdag med pa dang zhes bya ba ni ngo bo nyid med pa ste de dang mnyam pa'o/ /rang sems nyid ni byang chub kyi sems so/ /ci ste yod dam zhe na/ gzod ma nas ma skyes pa zhes bya ba smras so/ /de nas rjes su mthun pa'i yon/ /zhes bya ba la sogs pas ni bla ma la yon dbul ba bstan te/rjes su mthun pa ni rang gi rjes su mthun pa'o/ /bu mo ni bu mo nyid do/ /lhag ma rnams lta smos kyang ci dgos zhes bya ba ni mi sbyin pa yod pa ma yin no/ /slob dpon las ni drin thob ces bya ba ni spyod pa byed pa'i dus su'o/ /gang la dri ma med cing bstan pa'i blo ste mi g.yo ba gang la yod pa de la de skad ces bya'o/ / 'od gsal ba'i ngo bo nyid yin pa'i phyir dngos kun ngo bo nyid do/ /gsal ba ni dri ma med pa nyid kyi phyir ro/ /dag pa ni 'dod chags la sogs pa rnam par dag pa'i ngo bo nyid yin pa'i phyir ro/ /shin tu phra ba ni bdag byin gyis brlab pa'i rnal 'byor pa'i spyod yul yin pa'i phyir ro/ /mchog gi rang bzhin ni 'gro ba'i mngon par mtho ba dang /nges par legs pa'i rgyur gyur pa'i phyir ro/ /sangs rgyas mya ngan 'das pa'i khams ni sangs rgyas rnams kyi chos kyi sku'i ngo bo nyid yin pa'i phyir ro/ /gnyis med ni dngos po dang dngos po med pa'i mtha' gnyis spangs pa'i phyir ro/ /rtog bral ni rnam par rtog pa las 'das pa'i phyir ro//rtag tu bde ba'i rang bzhin ni rgyun mi 'chad pa'i bde ba'i ngo bo nyid yin pa'i phyir te/ 'di lta bu'i 'od gsal ba'i ngo bo nyid yin pa'i phyir bsgom par bya'o/ /de nyid rnal 'byor pas zhes bya ba ni bdag byin gyis brlab pa'i ting nge 'dzin thob pa'o/ /de nyid kyi phyir bsod nams min las grol zhes bya'o//rdo rje sems dpa' 'gyur zhes bya ba ni rdo rje sems dpar 'gyur ro zhes bya ba'i don to/ /mchog tu gsang ba'i mngon par byang chub pa'i rim pa'i dka' 'grel lo// //dpal ldan rdo rje 'dzin gtso dang / /klu sgrub bla ma la gus pas/ /phyag 'tshal nas ni zung 'jug pa'i/ /dka' 'grel cung zhig bri bar bya/ / mgon po rgyu dang 'bras bdag nyid/ /ces bya ba la sogs pa ni kun rdzob dang don dam pa'i bden pa gnyis su med pa'i mtshan nyid can no/ /chad pa dang rtag pa'i mtha' gnyis spangs pa'i phyir gnyis pa thams cad rnam par spangs pa'o/ /yang dag ces bya ba ni don ji lta ba'o/ /zung zhes bya ba ni zung du gzhibs pa ste/ dngos po dang dngos po med pa dang / rtag pa dang mi rtag pa dang / kun rdzob dang don dam pa'i bden pa la sogs pa'o/ /'jug ces bya ba ni ro gcig par gyur pa'o/ /de'i rim pa ni rdo rje 'chang chen po'i ngo bo rdzogs pa'i rim pa la gnas pa'i ngo bo nyid yin pa'i phyir mchog go/ /'khor ba dang ni zhes bya ba la sogs pa la/gcig gyur pa ni ro gcig par gyur pa'o/ /gang du zhes bya ba ni rdo rje 'chang gi go 'phang ngo / /kun nas nyon mongs zhes bya ba ni gti mug dang 'dod chags la sogs pa'i 'ching ba'o/ /rnam par byang ba ni thar pa ste gang gi don dam pa nyid shes pa'o/ /rnam bcas zhes pa ni gang rnam pa dang ldan zhing 'jug par 'gyur ba'o//rnam med ces bya ba ni gang la rnam pa yod pa ma yin pa ste/ rtog pa gnyis po de dag spangs pa nyid do/ /gzugs dang ni zhes pa la sogs pa la/ yod min zhes bya ba ni don dam pa'o/ /gang du zhes bya ba ni ting nge 'dzin gang du'o/ /spangs nas zhes bya ba ni yongs su btang ba'o/ /kun zhes bya ba ni brtan pa dang g.yo ba la sogs pa la/mkhas pa zhes bya ba spyod pa dang ldan pa'o/ /shes rab ces bya ba ni 'od gsal ba'i ye shes so/ /thabs zhes bya ba ni sems tsam gyi ting nge 'dzin no/ /de dag snyoms par 'jug pa'i 'dus pa'o/ /thams cad ces bya ba ni brtan pa dang g.yo ba'o/ /gang du zhes bya ba ni de las langs pa'i rdo rje 'chang gi go 'phang ngo //lhag mar bcas zhes bya ba ni phung po tsam gyi lhag ma dang bcas pa'o/ /phung po lhag ma med pa zhes bya ba ni phung po la sogs pa dang bral ba'o/ /gang zag bdag med ces bya ba ni bdag gi bdag med pa'o/ /chos la zhes bya ba ni chos thams cad la'o/ /de bzhin nyid gnas zhes bya ba ni yang dag pa'i mthar ro//ldang gyur zhes bya ba ni 'od gsal ba las so/ /de bzhin nyid la dmigs nyid ces bya ba la sogs pa la rnal 'byor pa zhes bya ba ni sangs rgyas so/ /gnyid log ces bya ba la sogs pa dang / dran pa dang dran min zhes bya ba la sogs pa la/ las grol zhes bya ba ni rnam par spangs pa'o/ /rtag tu mnyam par gzhag pa'i ngo bo'o//bskyed pa'i rim pa zhes bya ba la sogs pa dang / yongs su dag pa'i lha dang ni/ /zhes bya ba la sogs pa la/ de ltar zhes bya ba ni brtan pa'i rim pa nyid kyis so/ /brjod pa yin zhes bya ba ni bstan pa yin pa'o/ /sna tshogs 'dzin zhes bya ba ni sna tshogs 'jug par byed pa'o/ /sgyu 'phrul dra bas zhes bya ba la sogs pas ni de'i ming gi rnam grangs gzhan ston pa yin no//'di'i tshig ces bya ba la sogs pa ni gnas brjod pa ma yin pa ste gsung rab gang yang rung ba nas so/ /'di nyid dag ces bya ba la sogs pa la/ ji snyed ces bya ba ni bye ma dang mnyam pa'o/ /slob bzhin pa zhes bya ba ni 'od gsal ba'i ting nge 'dzin la gnas pa'o//zung du 'jug pa'i sgom gnas pa/ /zhes bya ba ni bstan pa'i rim pa la rnam par gnas pa'o/ /de dang gnyis su med ces bya ba ni mngon par byang chub pa'i rim pa nye bar bstan pa dang 'dir nye bar bstan pa dag go/ /de nyid bstan par bya ba'i phyir/ ji ltar bdag nyid ces bya ba la sogs pa smras te/ de bzhin sgra la yang de lta bu bskyed pa'o//gram pa ni rdo'i dum bu'o/ /bshang zhes bya ba ni mi gtsang ba'o/ /bshang las byung ba ni zhes bya ba ni mi gtsang ba las byung ba'i dri'o/ /drag po zhes bya ba la sogs pa la/ rdo rje can de bzhin zhes bya ba ni sangs rgyas so/ /ji ltar rmi lam zhes bya ba ni gnyid log pa'i gnas skabs kyi'o/ / mthong zhes bya ba ni sad pa'i gnas skabs su'o/ /sdang ba zhes bya ba ni rab tu sdang ba ste bu dang 'dra bar bya ba'o/ /de ltar zhes bya ba la sogs pa la shes na zhes bya ba ni zung du 'jug pa zhes grags pa'o/ /spyod ces bya ba ni spyod pa bya ba'o/ /sbas pa'i brtul zhugs zhes bya ba ni smyon pa'i gzugs 'dzin pa ste/ rtags ma lus pa dang bral ba ste/phun sum tshogs pa thams cad ces bya ba ni khams gsum gyi 'khor los sgyur ba'i bde ba phun sum tshogs pa'o/ /'phags pa'i thugs gyur rim pa lnga'i/ /de nyid su yis rig par 'gyur/ /de lta na yang bla ma yis/ /zhabs gsungs dran nas bdag gis bris/ /rim pa lnga pa rnam phye bas/ /'dir ni bsod nams gang bsgrubs pa//des ni 'gro ba thams cad kyang / /zung 'jug go 'phang gnas gyur cig /zung du 'jug pa'i rim pa'i dka' 'grel slob dpon mkhas pa chen po dam tshig rdo rje'i zhal snga nas mdzad pa rdzogs so// //rgya gar gyi mkhan po kr-iSh+Na paN+Di ta dang / lo tsA ba dge slong tshul khrims rgyal bas bsar cing zhus te gtan la phab pa// //