CLOSE WINDOW

D1835
བོད་ཡིག

[ ]@##/ /rgya gar skad du/ badzra satwa sA d+ha naM b+hA khyA/ bod skad du/ rdo rje sems dpa'i sgrub pa'i thabs kyi bshad pa/ bcom ldan 'das rdo rje sems dpa' la phyag 'tshal lo//mdun gnas rgyal dang rgyal sras klu sgrub dag la ni/ /dang zhing gus pa chen pos spyi bos phyag 'tshal nas/ /dpal ldan zla ba grags pas mdo ni bsdus mdzad pa'i/ /rtogs dka'i tshig ni 'bad pas rnam par bshad par bya/ /sangs rgyas kyi theg pa mngon par rtogs pa'i rigs can zhes bya ba la/sangs rgyas kyi theg pa ni pha rol tu phyin pa'i theg pa ste/ de'i mngon par rtogs pa sgrub pa rigs kyi bsam pa'i bye brag gang la yod pa de dag la de skad ces bya'o/ /gsung rab pa zhes bya ba ni gsung rab ni lung ngo //des spyod pas ni gsung rab pa'o/ /rtog pa'i rnal 'byor gyi ting nge 'dzin la snyoms par 'jug cing zhes bya ba ni 'od gsal ba bsgom pa'i rim pa dang bral bas bskyed pa'i rim pa lha'i rnal 'byor gyi mtshan nyid bsgom pa la mkhas pa'o/ /mtha' drug gi bshad pa las kha phyir bltas pa zhes bya ba ni nges pa'i don dang drang ba'i don la sogs pa'i bshad pa las kha phyir bltas pa'o//sgra ji bzhin pa'i don gyi sgo nas zhes bya ba ni zab mo'i don yongs su mi shes pas ji ltar rab tu grags pa'i sgra'i sgo nas zhes bya bar dgongs so/ / zla ba dang rdo rje dag gis bskyed pa'i sgo nas so/ /srid pa skye ba'i rim pas zhes bya ba ni mngal nas skyes pa'i rim pas so/ /mngon par byang chub pa lnga'i rim pas zhes bya ba ni zla ba dang nyi ma dang sa bon spro ba dang sdud pa'i rim pas so/ /skad cig bzhi zhes pa ni/ sa bon dang phyag 'tshal la mi ltos pas so//bcu gsum du 'dod do zhes pa ni snying po'i dkyil 'khor du spyan ma la sogs pa'i lha mo bzhi dang bcas pa'i mi bskyod pa la sogs pa de bzhin gshegs pa lnga ste dgur 'gyur la/ phyi rol gyi sgo bzhi'i gshin rje mthar byed la sogs pa khro bo bzhi dang bcu gsum mo//bcu dgur 'dod do zhes bya ba ni dpal sgyu 'phrul dra ba las 'byung ba la sogs pa'i rim pas so/ /lha nyi shu rtsa lngar 'dod do zhes bya ba ni snga ma bzhin du snying po'i dkyil 'khor la dgu dang / gzugs rdo rje ma la sogs pa'i phyi rol du rnal 'byor ma drug dang /de'i phyi rol du phyogs mtshams su khro bo gshin rje mthar byed la sogs pa bcu dang nyi shu rtsa lnga yin no zhes bya'o/ /rim pa gnyis rtogs nas zhes bya ba ni thos pa'i sgo nas rim pa gnyis kyi don rab tu shes nas so/ /sngags kyi des pa dang po ste/zhes bya ba ni lhag par mos pa'i dkyil 'khor dang / lus kyi dkyil 'khor dang / 'od gsal bar 'jug pa dag gis de ma thag tu skyes pa'i sngags kyi ngo bo nyid kyi rdo rje sems dpa'i rang bzhin du nges pa'o/ /dgong pa bstan pa zhes bya ba ni rdo rje sems dpa'i sku la oM la sogs pa'i sa bon mnyam par bkod la gsal bar byed pa'o//rnam par gzhag pa zhes bya ba ni 'di'i 'og tu 'di bsgom par bya'o zhes rnam par gzhag pa'i dgongs pa nges pa'o/ /de nyid bstan pa zhes bya ba ni gnas skabs ji ltar 'od gsal la 'jug pa'o//sems can thams cad la snying rje chen po'i sems bskyed la zhes bya ba ni dang po gdams ngag ji lta ba bzhin du bcom ldan 'das la mngon par mchod nas/ de'i mdun du sdig pa bshags pa la sogs pa byas te/ sdug bsngal ba'i sems can thams cad la snying rje bsgom par bya'o zhes bya ba'i don to//dgon pa chen po'i sa phyogs zhes bya ba ni phyogs rnams las dgon pa chen po'i khyad par can la'o/ /me tog 'bras bu sogs kyis brgyan/ /zhes bya ba ni 'bras bu dang me tog dang chu la sogs pa khyad par 'phags pa yid du 'ong ba'i ri'i phyogs gcig dben pa dang /dben pa gzhan la yang ngo / /dngos grub thams cad bsdus pa bsgrub/ /ces bya ba ni dngos grub thams cad ni 'jig rten dang 'jig rten las 'das pa ste/ de dag bsdus pa ni gang la yang dag bsdus pa de rdo rje sems dpa'i sku'o//kha dog dkar por lhag par mos pa zhes bya ba ni 'di la 'khor lo rtsibs bcu pa'i lte ba'i dbus su gnas la zhes bya ba ni lhag ma'o/ /nam mkha'i khams kyi dbus gnas par/ /zhes bya ba la sogs pa la/ nam mkha'i khams kyi dbus gnas zhes bya ba ni skad cig gi 'od gsal ba las langs nas de'i dbus su gnas pa'o//sangs rgyas dkyil 'khor ni rdo rje sems dpa'o/ /'od zer sprin gyi tshogs ni 'od kyi phung po'o/ /sangs rgyas 'bar ba'i 'od mnyam pa/ /zhes bya ba ni 'ja' tshon lta bu'i 'od lngas brgyan pa'o//le'u dang po las gsungs pa'i ye shes rdo rje'i ting nge 'dzin zhes bya ba ni ye shes sgron ma mi bskyod pa de nyid dbyer mi phyed pas rdo rje ste/ de la dmigs pa'i ting nge 'dzin sems ni rtse gcig pa mngon du byed pa'i don to/ /de bzhin gshegs pa thams cad kyi sku dang gsung dang thugs rig pa'i skyes bu zhes bya ba la/de bzhin gshegs pa thams cad kyi sku gsung thugs kyi bdag po nyid rdo rje 'chang chen po ste/ rig pa'i skyes bu ni gnyis su med pa'i bdag nyid do/ /mi bskyod pa'i phyag rgya chen por sbyor ba'i go 'phang zhes bya ba ni mi bskyod pa'i sku'i rnam pas so//de bzhin gshegs pa thams cad kyi sku gsung thugs rdo rje la zhes bya ba ni rdo rje 'dzin pa chen po la'o/ /hUM ring po brjod par bya zhes bya ba ni rigs pa'i pad+ma lhung pa'i byang chub kyi sems gyur pa las hUM bcur dmigs nas so//phyogs bcur rnam par gnas pa zhes bya ba ni phyogs bcur rnam par gnas pa'i rtse mo la gnas so zhes bya ba'i don to/ /khro bo zhes bya ba la sogs pa la/ zhe sdang gnas las skyes zhes bya ba ni zhe sdang ni mi bskyod pa de'i gnas ni bskyed pa'i sa bon yi ge hUM ngo //de las skyes pa ni de nas skyes pa'o/ /gsod don gnyer ba zhes bya ba ni de rnams gsod pa'i ngo bo nyid dgos pa ste/ bsgom pa'i sgo nas so/ /rdo rje khro bo bdud rtsi che/ /zhes bya ba ni bdud rtsi 'khyil pa'o/ /rdo rje phur bu zhes bya ba ni phur bu bcu'i rnam par ro//phyogs bcu'i rtse mor zhes bya ba ni phyogs bcu la'o/ /shin tu 'bar zhing legs pa'i 'od/ /ces bya ba ni 'od 'bar ba rnams kyis gsal bzhin pa'o/ /de nas 'dod pa'i rgyal po'i sngags kyis zhes bya ba ni phyogs bzhir gnas pa'o/ / bsam gtan gang gis zhes bya ba la sogs pa ni bsam gtan gang gis gdug pa can rnams phur bus gdab pas so/ /yi dam ni dus bzhir byin gyis brlabs pa'o/ /gnas gang du ni mnyam spyod pa/ /zhes bya ba ni gang der yang dag pa brtsam mo/ /bsam gtan sbyor ba 'di yi ni//zhes bya ba ni bsrung ba'i cho ga 'di'i bsgom pas so/ /gnas nas sangs rgyas byin gyis brlab/ /ces bya ba ni rdo rje sems dpa'i rnal 'byor goms pas sangs rgyas te/ rang gi lha rnams kyis byin gyis brlabs te mnyam pa nyid du sgrub pa'o/ /dngos po med pa bsgom du med//ces bya ba la sogs pa 'di ni mdor byas pa'i dka' 'grel legs par byas so/ /nam mkha'i rdo rje dbus gnas pa/ /zhes bya ba ni nam mkha'i rdo rje ni/ /de'i dbus su gnas pa ni de'i nang du gtogs pa'o/ /dkyil 'khor rdo rje kun las skyes//zhes bya ba ni rlung la sogs pa'i dkyil 'khor thams cad gyur pa'o/ /der ni b+h+rUM yig bsgom par bya/ /zhes bya ba ni de sa'i cha'i steng du yi ge b+h+rUM gzhal yas khang bskyed pa'i rgyur gyur pa'o/ /rdo rje sprin ni mnyam pa zhes bya ba ni phyogs bcur spros pa'i de bzhin gshegs pa skyed par byed pa'o//dpag tshad brgya yi khyon tshad du/ /zhes bya ba la sogs pa ni dpag tshad brgya'i khyon tsam ni phyogs re re la dpag tshad nyi shu'i tshad tsam yin no/ /gru bzhi ni mtshams bzhi dang ldan pa'i phyir ro/ /rab brgyan pa ni lha dang mi la sogs pa las 'phags pa'o//rin chen bzhi'i rang bzhin ni kha dog bzhi dang ldan pa'i phyir ro/ /mchod rten ni mchod rten ltar mchod par bya ba yin pa'i phyir ro/ /gsal ba ni shel lta bu'o/ /rang bzhin dri ma med pa ni skyon ma lus pa dang bral ba'i phyir ro/ /gsal ba de yi ngo bo nyid//ces bya ba la sogs pa la/ gsal ba de'i ngo bo nyid ces bya ba ni gang gsal ba ni shel te/ de'i rang gi ngo bo gzhal yas khang yin te/ phyi rol na gnas pa rnams kyis kyang dkyil 'khor ba'i lha rnams kyi gzugs mthong ba'i phyir ro/ /kun nas sna tshogs gzugs ldan zhes bya ba ni in+d+ra nI la sogs pa'i kha dog dang ldan pa'i phyir ro//sangs rgyas sprin dang yang dag ldan/ /zhes bya ba ni spros pa'i dkyil 'khor gyi lha rnams kyis mngon par khyab pa'o/ /'od zer 'bar zhing 'khrugs pa zhes bya ba ni phyogs bcu nam mkha'i dkyil 'khor du khro bo'i 'od 'bar ba'o//gsal ba la sogs pa yi dkyil 'khor ldan/ /zhes bya ba ni zla ba dang nyi ma'i gdan dang ldan pa'o/ /de bzhin gshegs pa kun gyi gnas/ /zhes bya ba ni de bzhin gshegs pa thams cad kyi gnas gzhal yas khang zhes bya ba'i don to//khams kyi rang bzhin rig pa'i lha mo rnams dang zhes bya ba ni de'i rjes su yul gzugs la sogs pa'i rang bzhin gzugs rdo rje ma la sogs pa zhes bya bar rig par bya'o/ /lugs ma la sogs pa zhes bya ba ni shing la sogs pas spras shing byas pa'o//dam tshig las byung khu ba ni/ /zhes bya ba la sogs pa la/ dam tshig las byung khu ba ni/ /zhes bya ba ni thabs dang shes rab snyoms par 'jug pas bskyed pa'i rang bzhin gyi dkyil 'khor gyi lha rnams skad cig gis gnas ji lta bar dgod par bya'o/ /'bras bu 'dod pas cho ga bzhin du btung zhes bya ba ni/gzugs phung gtogs la me long dang / /zhes bya ba la sogs pa'i tshogs sangs rgyas kyi 'bras bu don gnyer bas de rnams rang gi lus la gnas ji lta bar nang du gzhug par bya'o/ /de bzhin gshegs pa'i tshogs bsad nas//zhes bya ba ni rang gi lus la de bzhin gshegs pas yongs su zhugs pa'i ngo bo rim gyis stong pa nyid du zhugs par bya'o zhes bya ba'i don to/ /don dam pa'i bden pa zhes bya ba la sogs pa ni yi ge hUM yongs su gyur pa las nyi ma'i dkyil 'khor dang /yi ge oM las skyes pa'i zla ba'i dkyil 'khor dang yi ge aHyongs su gyur pa las pad+ma zhes bya ba'i don to/ /ye shes tsam la snyoms par 'jug pa zhes bya ba ni/ ye shes tsam ni sems tsam mo/ /snyoms par 'jug pa ni brtan pa dang g.yo ba nang du gzhug par bya ba'i don to/rdo rje gsum yig sngags mchog gi/ zhes bya ba ni/ sngags thams cad kyi gtso bor gyur pa'i yi ge gsum gyis so/ /phyag rgya chen po bsgom pa ni/ /zhes bya ba ni rdo rje sems dpa'i sku bsgom pa'o//srid pa tha ma pa'i sems can gyi don gyi phyir zhes bya ba ni srid pa gang gis de ma thag tu byang chub thob par 'gyur bas na de mthar gyur pas na tha ma zhes brjod do/ /de la gnas pa'i sa bcu'i dbang phyug rnams la nye ba'i gnas skabs byang chub sems dpa' 'am/ so so skye bo gang rung sngags kyi tshul gyi bsgoms pas bdag nyid chen po thob pa gang yin pa de srid pa tha ma ste/de rnams kyi rgyu mtshan zhes bya ba'i don to/ /phung po dang khams dang skye mched rjes su zhugs pa zhes bya ba ni ye shes kyi rang bzhin lus bsgyur nas 'byung bar 'gyur ba'i lus 'dzin pa'o//g.yo ba nyid rab tu bsam par bya zhes bya ba ni 'di'i de ma thag tu dzaH hUM baM hoHzhes bya ba'i sa bon rnam pa bzhi gzugs rdo rje ma la sogs pa'i lha mo'i ngo bo nyid rang gi lus la gnas pa'i gzugs la sogs pa'i yul rnams su 'god do zhes bya bar rtogs par bya'o//rig pa'i skyes bu chen po zhes bya ba la sogs pa la/ rig pa'i skyes bu chen po ni rdo rje 'dzin pa'o/ /de bzhin gshegs pa thams cad kyis byin gyis brlabs pa zhes bya ba ni bdag nyid de bzhin gshegs pa la sogs pa'i sa bon bkod par byas pa dang ldan pa'o//de bzhin gshegs pa thams cad ces bya ba ni de bzhin gshegs pa thams cad dang mnyam pa ste/ rin po che'i rigs gang zhes bya ba'i don to/ /dpal ldan rdo rje sku 'chang ba/ /zhes bya ba la sogs pa la/ sangs rgyas de bzhin gshegs pa rnams kyi sku de'i bdag nyid can du 'dzin par byed pa zhes bya ba ni sangs rgyas sku 'chang ba'o//dpal ldan zhes bya ba ni spyan ma dang bcas pa'o/ /rdo rje mi phyed gsum bsgom pas/ /zhes bya ba ni rdo rje 'chang chen po ste/ de dang dbyer med par bsgom pa'o/ /deng bdag byin gyis brlabs nas su//rdo rje'i skur ni mdzad du gsol/ /zhes bya ba la/ deng bdag ni bdag nyid kyi lus so/ /byin gyis brlabs nas ni rab tu gnas pa'i gnas su gyis shig pa'o/ /rdo rje sku rnams kyi zhes bya ba ni rdo rje sku yis zhes gcig gi tshig tu 'thob bo/ /de ltar bdag po la gsol ba btab nas de'i 'khor la gsol ba gdab pa ni phyogs bcu zhes bya ba la sogs pa ni go sla'o//sku gang yin zhes bya ba la sogs pa la sku gang yin zhes bya ba ni lus ngag yin pa'o/ /phung po lnga ni rab tu dag /ces bya ba ni phung po lnga'i bdag nyid do//de dang 'dra ba zhes bya ba ni de'i ngo bo nyid kyi skur gyur cig pa'o/ /chos zhes bya ba la sogs pa la/ chos 'od dpag tu med pa la'o/ /gsung lam ni ngag gi rang bzhin nyid yin pas so/ /dpal ldan zhes bya ba ni gos dkar mo dang ldan pa'o/ / rdo rje mi phyed gsum la sogs la ni snga ma bzhin no/ /'dod chags chen po'i mes tshogs gnyis zhu ba las zhes bya ba ni 'dod chags chen po'i tshul dang ldan pa'i 'od dpag med dang gos dkar mo'i tshogs gnyis so/ /gang zhig ces bya ba la sogs pa ni gang dag kho na'o//nges pa'i tshig ni phun sum tshogs/ /zhes bya ba ni sgra ma lus pa brjod pa phun sum tshogs pa dang ldan pa zhes bya ba'i don to/ /chos 'dzin pa dang 'dra bar shog /ces bya ba ni 'od dpag med dang 'dra bar gyur cig ces dgongs pa'o/ /dpal ldan rdo rje thugs 'chang ba//zhes bya ba la sogs pa la/ rdo rje thugs 'chang ba zhes bya ba ni rdo rje'i ngo bo nyid kyi thugs 'dzin pas rdo rje thugs 'chang ba'o/ /mA ma kI dang ldan pas dpal dang ldan no/ /rdo rje gsum zhes bya ba la sogs pa ni snga ma bzhin no/ / kun du bzang po zhes bya ba ni sems can kun la bzang zhing phan par byed pa'i phyir kun du bzang po ste mi bskyod pa'o/ /gsang ba'i dpa' bo zhes bya ba ni gsang ba ni sbas pa'o/ /ston par byed pas gsang ba'o/ /rang gi rigs kyi bu byang chub sems dpa' yin la de dag gi dpa' bo ni gtso bo'o//de'i blo ldan pa zhes bya ba ni mA ma kI dang bcas pa'o/ /rdo rje 'dzin dang 'dra bar shog /ces bya ba la/ rdo rje 'dzin dang 'dra ba ni mi bskyod pa 'dra ba zhes bya ba'i don to/ /le'u dang po las gsungs pa'i dam tshig las byung ba rdo rje ting nge 'dzin gyi tshul zhes bya ba la/ dam tshig ni yi ge gsum mo/ /de las skyes pa'i phyir dam tshig las byung ba ni rdo rje 'chang chen po yin te/ ting nge 'dzin gyis dmigs pas zhes bya ba'i don to/ /rang gi cod pan la bdag po dam pa zhes bya ba ni dbang bskur nas spyi bor mi bskyod pa bsam par bya'o/ / ye shes dam tshig ni ye shes sems dpa'o/ /yi ge hUM zhes bya ba ni kha dog nag po'o/ /sangs rgyas dkyil 'khor dbus gnas pa/ /zhes bya ba la sogs pa la/ /de'i dbus gnas pa ni de'i snying gar gnas pa'o/ /mi bskyod pa ni rdo rje sems dpa'o/ /hUM yig ces bya ba ni ting nge 'dzin sems dpa'o zhes brjod pa'o//thams cad mdzad ces bya ba ni dang po 'og min gyi gnas su chos kyi sku mngon du mdzad nas de las sprul ba'i sku byon te/ dga' ldan na gnas pa rnams kyi don du bsam pa ji ltar bzhin du chos ston par mdzad do/ /dga' ldan gyi gnas mchog nas byon te/thams cad mdzad nas zhes bya ba ni de las kyang byon te/ sa'i dkyil 'khor du skye ba dang byang chub la sogs pa thabs la bstan to zhes bya ba'i tha tshig go/ /'dod chags las skyes pa'i byang chub bstan pa'i don du zhes bya ba ni 'di shes rab dang thabs kyi bdag nyid rdo rje sems dpa' sprul pa'o zhes byar dgongs pa'o//'dod chags chen po'i tshul gyi ting nge 'dzin la snyoms par 'jug pa zhes bya ba la/ 'dod chags chen po ni 'dod chags che ba'i sems can rnams smin cing grol ba'i yul la chags pa'o/ / de nyid kyi tshul ni lugs te rnam par gzhag pa'i ting nge 'dzin gang yin pa de mngon du byed pa'o/ /dang po rnal 'byor byas nas zhes bya ba ni bdag nyid sems dpa' gsum gyi bdag nyid du bskyed pa'o/ /gnas par bya zhes pa ni spyod pa byed pa la bstan pa yin no/ / gang yang spyod pa byed par ma gyur pa de la phyogs gzhan bstan pa ni yang zhes bya ba la sogs pa la sngags gcig sprul pas sems can gyi don bya ba'o zhes bya ba ni byang chub sems sam rang gi snying ga na gnas pa'i sngags las dkyil 'khor sprul nas sems can gyi don bya zhing gnas ji lta bar dgod do zhes bya ba'i don to//byin rlabs go 'phang gsum gyis ni/ /zhes bya ba ni byin gyis brlabs pa yin pa'i phyir 'dod chags la sogs pa'i rang bzhin gsum byin gyis brlabs pa'o/ /de'i go 'phang zhes bya ba ni yid du 'ong ba la sogs pa'i yul yin la byin rlabs go 'phang de gsum dang lugs gzhan gyis zhes bya ba'i don to//mig la sogs pa'i skye mched kyi rang bzhin gzugs rdo rje ma la sogs pa dgod do zhes bya ba'i rnal 'byor ma gzugs rdo rje ma la sogs pa bzhi dang /sa'i snying po la sogs pa la bzhi yis snyoms par 'jug pa bkod la/ gzhan yang byang chub sems dpa' bzhi gnas ji lta ba bzhin du dgod par bya zhes bya ba'i don to/ /nu ma gnyis kyi bar zhes bya ba la sogs pa la/ nu ma gnyis kyi bar ni thugs ka ste/ de la yi ge hUM/ spyi bo'i bar ni zhes bya ba de ni spyi bor yi ge oM mo/ /bar du zhes bya ba ni mgrin pa'i phyogs de la aH'o/ /rkang pa thug pa'i bar du zhes bya ba ni rkang pa gnyis la yi ge hA'o/ /rked pa lte ba gsang bar zhes bya ba ni lte ba dang rked pa dang gsang ba'i phyogs su ste/brla gnyis la yi ge swA'o/ /rgyal ba'i sras po ni/ rigs lnga rnams ni dgod par rab tu bya/ /zhes bya ba ni gzhan dag kyang rigs lngar bsdus pa'i byang chub sems dpa' gnas ji lta bar dgos par bya zhes bya ba ni bsdus pa'i don to/ /yi ge ni phaT rnams brtags te zhes bya ba ni rdo rje dang pad+ma gnyis kyi khar yi ge phaT bsgom par bya'o//ting nge 'dzin dang dbang bskur ba/ /zhes bya ba ni ye shes sems dpa' rab tu bcug pa'i ting nge 'dzin gyi de ma thag tu dbang bskur ba ni ting nge 'dzin dang dbang bskur ba'o/ /mchod pa'i mthar thug pa zhes bya ba ni gzugs rdo rje ma la sogs pa'i mchod pa byas nas so//snying po'i las thams cad ces bya ba ni de la mi bskyod pa'i ting nge 'dzin la sogs pa'o gnas 'chad par 'gyur ba'i rim pas sems can rnams kyi zhe sdang rnam par dag pa la sogs pa'i dgos pa byas nas zhes bya ba'i tha tshig go//phyi dang nang gi bdag nyid can gyi bzlas pa zhes bya ba ni ngag gi bzlas pa dang rdo rje'i bzlas pa'o/ /sngar bzhin du/ rang gi lus kyi dkyil 'khor la bcug nas/ /zhes bya ba ni mnyam par gzhag pa'i rnal 'byor gyi don du rim pas bdag nyid la gnas ji lta ba bzhin du gzhug par bya'o//nam mkha'i khams kyi dbus gnas par/ /bkod pa'i dkyil 'khor bsgom par bya/ /zhes bya ba ni 'jig rten gsum gyi dbus su gnas pa'i bdag nyid lha'i tshogs dang ldan par bsgom par bya'o//de byas nas ni ci zhig bya zhes zer ba la/ hUM ni de'i dbus su gnas par/ rang gi gzugs brnyan dag tu rtag /ces bya ba ni yi ge hUM ni snying gar gnas par bltas nas des kyang brtan pa dang g.yo ba thams cad rdo rje sems dpa'i gzugs brnyan gyi rnam par blta bar byas zhes bya ba'i tha tshig go//phyi dang nang gi bdag nyid can gyi sbyin sreg ces bya ba ni phyi rol gyi me la mar la sogs pa dag gis sbyin sreg byed pa'o/ /nang gi bdag nyid ni lha rnams la bza' ba la sogs pas tshim par byas te/ zhi ba la sogs pa la ltos nas byas so//yi ge gsum gyi zhes pa ni rdo rje bzlas pa'i sgo nas so/ /phreng ba'i sngags sam zhes bya ba ni rgyud nas gsungs pa'i khro bo la sogs pa'i sngags rgyas pas so/ /sngags dang sman gyi sbyor bas kyang / /zhes bya ba ni mngon par bsngags pa'i sman sbyin pas so//rdo rje dang pad+ma mnyam par sbyar ba zhes bya ba ni yongs su rdzogs pa la gnas te kha sbyar ba la gnas pa sgyu ma'i lus mngon du bya'o/ /dran pa'i don du 'grel byas gang / /bsod nams yang dag gang bsags pa/ /de yis myur du skye 'gro kun/ /yang dag byang chub don gnyer shog /rdo rje sems dpa'i sgrub thabs kyi bshad pa/ /slob dpon ta thA ga ta rak+Shi tas mdzad pa rdzogs so// //tho lding dpal dpe med lhun gyis grub pa'i gtsug lag khang du rgya gar gyi mkhan po mkhas pa chen po dI paM ka ra rak+Shi ta dang / kham pa ba ri lo tsA bas bsgyur ba'o/