CLOSE WINDOW

D1826
བོད་ཡིག

@##/ /rgya gar skad du/ piN+Da kri ta sA d+ha no pi ka br-it+ti rat+na wa li nA ma/ bod skad du/ mdor bsdus pa'i sgrub thabs kyi 'grel pa rin chen phreng ba zhes bya ba/ dpal rdo rje sems dpa' la phyag 'tshal lo//sangs rgyas kun gyi sku gcig pa/ /rdo rje 'chang chen la btud de/ /mdor bsdus pa yi 'grel pa 'di/ /don gsal bdag gis bshad par bya/ /dpal ldan klu sgrub zhal snga yi//ji ltar man ngag thugs la gnas/ /de bzhin du ni phye ba ste/ me long la ni gzugs brnyan bzhin/ /'phags skor shin tu rtogs dka' ba/ /bdag gis yang dag gsal bar bya//nyi mas phyogs rnams gsal gyur na/ /lam log par ni 'khrul pa med/ /'dir bcom ldan 'das rdo rje sems dpa'i sku'i ngo bo 'gro ba'i don du spros pa gzhon nu don thams cad grub pas chu bo nai rany+dza na'i 'gram du byang chub kyi shing drung du/stong pa nyid bcu drug bsdus par gyur pa mi g.yo ba zhes bya ba'i ting nge 'dzin la snyoms par zhugs te/ yang dag par rdzogs pa'i byang chub bdag gis thob po zhes bsams pas brag bzhin du mi g.yo bar gnas par gyur to//de'i tshe srid pa'i rtse mo'i steng du dkyil 'khor gyi 'khor lo rim pa'am/ dpag tshad lnga stong gi bar gyi tshad kyi steng dang 'og gi rim pas mngon par dga' ba dang /'og min dang / rin chen 'byung gnas dang / bde ba can dang / me tog can zhes bya ba thugs rdo rje 'chang la sogs pa de bzhin gshegs pa lngas byin gyi brlabs pa rin chen sna bdun gyi rang bzhin gyi sangs rgyas kyi zhing lnga g.yo bar gyur te/ting nge 'dzin las ldang ba'i sangs rgyas lngas kyang gzhan gyi sems mkhyen pa'i dbang gis gzhon nu don thams cad grub pa byin gyis brlab pa'i ting nge 'dzin mkhyen par gyur to//de'i tshe phan tshun bsam pa gcig pas/ /gang na gzhon nu don thams cad grub pa gnas pa der nye bar gshegs so/ /nye bar gshegs nas bar snang gi nam mkha' la til gyi gang bu bzhin du khyab nas kye don thams cad grub pa'i byang chub sems dpa' bsam gtan 'di ni mthar thug pa'i gnas thob pa'i rgyu ma yin pas de nyid spongs shig ces bka' stsal to//de bzhin gshegs pa'i gsung thos nas ting nge 'dzin las langs nas lha'i mig gis mtha' yas pa'i de bzhin gshegs pa'i skus yongs su gang ba'i nam mkha'i khams la bltas nas pus mo gnyis sa la btsugs te/phyag bzhi byas nas bcom ldan 'das yang dag pa'i ting nge 'dzin ji lta bu lags zhes gsol ba btab pa byas so//de'i tshig gsan ma thag tu bcom ldan 'das mi bskyod pa la sogs pas ye shes kyi phyag rgya'i rang bzhin gyi spyan la sogs pa'i lha mo bzhi thugs ka nas sprul te/ dang po 'od zer gyi 'khor los dbang bskur zhing slob dpon la sogs pa dbang bzhi pos dbang bskur te/rnal 'byor bzhi la sogs pa'i rim gyis man ngag nye bar bstan la yang dag par rdzogs pa'i byang chub la bcug cing mi snang bar gyur to/ /byang chub sems dpas kyang sa bcu gcig pa thob nas mtshan phyed kyi dus su sangs rgyas te thor ngas kyi dus su bdud bcom nas gong du dga' ldan gyi gnas der gshegs so//nye bar gshegs nas rin po che sna bdun gyi rang bzhin gyi khang bzangs sprul la/ thugs ka nas de bzhin gshegs pa lnga spros te/ de rnams kyis gsol ba btab pas dpal gsang ba 'dus pa'i rgyud nyi khri lnga stong gsungs so//che'i snyigs ma dang / lta ba'i snyigs ma dang / nyon mongs pa'i snyigs ma dang / sems can gyi snyigs ma dang / bskal pa'i snyigs ma dang ldan pa shes rab dang brtson 'grus dman pa'i sems can rnams la phan gdags pa'i phyir yang gsol ba btab pa byas te/bcom ldan 'das mdor bsdus pa'i rgyud bka' stsol cig dang / gang gi phyir da ltar byung ba'i sems can rnams ni rgya che ba'i don 'dzin par mi nus so/ /thugs rje chen po dang ldan pa'i bcom ldan 'das rdo rje 'chang gis kyang de las bsdus pa le'u bco brgyad pa brgya phrag bco brgyad kyi tshad tsam gyi rgyud gsungs so//lag na rdo rje yang sdud pa po yin te/ des ni gcig nas gcig gi rim gyis mi'i yul du 'jug par byas so/ /de nas brtsams te glegs bam la sogs pa byung ngo / /gang gi phyir lo 'bum phrag nyi shu'i tshad tsam gyi rdzogs ldan gyi dus su zhal gyi man ngag 'ba' zhig tu byung ngo //gsum ldan gyi dus su rtsa ba'i rgyud byung bar gyur pa dang / gnyis ldan gyi dus su de dag gtan la 'bebs par byed pa de'i yan lag byung ba dang / / skal ldan gyi dus su de'i bshad pa'i rgyud dang / de ma rtogs pas gang zag gis brtsams pa'i 'grel pa la sogs pa yang 'byung ngo / /gsum ldan ni lo 'bum phrag bco lnga'i tshad dang / gnyis ldan ni lo 'bum phrag bcu'i tshad dang / skal ldan ni lo 'bum phrag lnga'i tshad yin no//de la dpal gyi ri bo la gnas pa'i 'phags pa klu sgrub kyi zhal snga nas kyis dpal gsang ba 'dus pa'i rgyud las mdor bsdus pa zhes bya ba'i sgrub pa'i thabs 'di ma 'ongs pa'i sems can la phan gdags par bya ba'i phyir bsdus te/ de dang por nyan pa po 'jug pa'i ched du brjod pa la sogs pa lnga po des bshad par bya ba yin te/de ma brjod na nyan pa po 'jug pa med pa'i phyir rab tu byed pa 'di ni don med par thal bar 'gyur ro/ /de rnams kyang rjod par byed pa dang / brjod par bya ba dang / 'brel pa dang / dgos pa dang de'i dgos pa'o/ /gang gi phyir//tha snyad la ni 'jug phyir dang / /gzhan rnams la ni dngos gzhi'i phyir/ /brjod pa med pas 'jig rten 'di/ /long dang lkugs pa 'dra bar 'gyur/ /zhes bshad pa'i phyir ro/ /de la rjod par byed pa ni mdor bsdus pa zhes bya ba'i sgrub pa'i thabs te/ de ni don dang bcas pa yin na don med pa yin zhe na/smras pa/ don dang bcas pa yin te/ de'i don yang dpal gsang ba 'dus pa'i rgyud kyi rgyal po'i le'u bco brgyad kyis sgrub pa'i bskyed pa'i rim pa byis pa'i blo gros kyis khong du chud par mi nus pa bsdus nas bstan pa ni mdor bsdus pa dang / bcom ldan 'das rdo rje 'chang gi dkyil 'khor bsgrub pa'i don du thabs ni 'di nyid yin no zhes sgrub pa'i thabs so//mdor bsdus pa yang yin la sgrub thabs kyang yin pas mdor bsdus pa'i sgrub pa'i thabs te las 'dzin pa'o/ /brjod par bya ba ni don gyi mtshan nyid de/ bskyed pa'i rim pa zhes bya'o/ / de'i dbye ba ni dang po'i sbyor ba dang / dkyil 'khor rgyal po mchog dang las kyi rgyal po mchog ste gsum mo/ /de rnams kyi dbye ba sum cu rtsa brgyad ni gzhan las gsungs te 'dir ma bstan to/ /le'u bcu bdun pa las de'i mdo bsres byas te/ de la le'u bcu gnyis pa las/ dgon pa chen po'i sa phyogs su//me tog 'bras bu sogs kyis brgyan/ /ri bo dben par dngos grub kun/ /bsdus pa yang dag sgrub par byed/ /ces bya ba'i mdos khyad par gyi gnas dmigs pa bstan to/ /le'u gsum pa las gsungs pa'i/ /nam mkha'i dbyings kyi dbus gnas pa'i//sangs rgyas dkyil 'khor bsgom par bya/ /zhes bya ba la sogs pa'i mdos byang chub sems kyi rdo rje'i gzugs bsgoms la/ le'u bco lnga pa las gsungs pa'i/ rnam par snang mdzad 'od dang mtshungs/ /zhes bya ba la sogs pa'i mdos kha dog dkar por bdag nyid bsgoms la/le'u bcu gsum pa dang bcu bzhi pa las gsungs pa'i oM suM b+ha ni suM b+ha zhes bya ba la sogs pa'i sngags dang / bsam gtan las skyes zhes bya ba la sogs pas kyang bgegs bskrad pa bstan to/ /dngos po med pas sgom pa med/ / bsgom par bya ba bsgom pa min/ /de phyir dngos po dngos med pas/ /bsgom pa dmigs su med pa'o/ /zhes bya ba le'u gnyis pa las gsungs pa'i mdos stong pa nyid bsgom pa bstan to/ /de nas bcu gcig pa dang brgyad pa dang / le'u bcu gnyis pa ste gsum pa las gsungs pa'i//nam mkha' rdo rje dbus gnas pa'i/ /rdo rje kun 'byung dkyil 'khor bsam/ /zhes bya ba la sogs pa'i mdos ye shes kyi sa gzhi sgom pa bstan to/ /yi ge b+h+rUM gyis gnas bsgoms te/ /zhes bya ba la sogs pa le'u bcu gsum pa las gsungs pa'i mdos gzhal yas khang pa bsgom pa bstan te//gsal ba la sogs dkyil 'khor ldan/ /de bzhin gshegs pa kun gyi gnas/ /zhes bya ba la sogs pa le'u dang po las gsungs pa'i rdo rje'i mdos sna tshogs pad+ma la gnas pa'i zla ba dang nyi ma'i dkyil 'khor gyi steng du le'u gsum pa las gsungs pa'i//lhag par mos pa'i dkyil 'khor der/ /gsal ba de yi ngo bo nyid/ /sna tshogs gzugs kyis kun du khyab/ /ces bya ba la sogs pa le'u dang po las gsungs pa'i mdos bsgom pa bstan to/ /dam tshig las ni re re spro/ /zhes bya ba la sogs pa le'u bdun pa las gsungs pa'i mdos don dam pa'i dkyil 'khor bsgom pa bstan to//le'u brgyad pa las gsungs pa'i/ nam mkha' dbyings kyi dbus gnas pa'i/ /zhes bya ba la sogs pa'i mdos ye shes kyi rgya mtsho'i rang bzhin don dam pa'i dkyil 'khor bsam par bya'o zhes bstan to//yi ge oM ni sku rdo rje/ /zhes bya ba la sogs pa le'u bcu gnyis pa las gsungs pa'i mdos yi ge gsum yongs su gyur pa'i zla ba la sogs pa'i gdan gyi dbye ba bstan to/ /le'u bcu gsum pa las gsungs pa'i yi ge gsum zhes bya ba la sogs pa'i mdos yi ge gsum dgod pa la sogs pa bstan to//le'u gsum pa las gsungs pa'i chos kyi dbyings kyi de kho na nyid bstan to/ /le'u bcu gsum pa las gsungs pa'i oM yig ces bya ba la sogs pa'i mdos yi ge gsum dgod pa sngon du 'gro bar rdo rje'i nga rgyal byas la sku rdzogs pa bstan to zhes rnal 'byor ro//snying gar zla ba bsgom par bya ba la sogs pa le'u bcu gnyis pa las gsungs pa'i mdos ye shes sems dpa' dang ting nge 'dzin sems dpa' bsgom par bstan te/ rjes su rnal 'byor ro/ /le'u bcu gcig pa las gsungs pa'i th+l+hiM zhes bya ba la sogs pa'i mdos skye mched byin gyis brlab pa bstan to//nu ma nas brtsams spyi bo'i bar/ /zhes bya ba la sogs pa le'u brgyad pa las gsungs pa'i mdos phung po byin gyis brlab pa bstan to/ /sa ni sangs rgyas spyan bshad pa/ zhes bya ba la sogs pa le'u bcu bdun pa las gsungs pa'i rdo rje'i mdos khams byin gyis brlab pa bstan to//le'u bcu gsum pa las gsungs pa'i khro bo'i 'khor lo bsgom pas yan lag dang nying lag la dgod pa bstan to zhes shin tu rnal 'byor ro/ /rdo rje dkyil 'khor dbus gnas pa/ /zhes bya ba la sogs pa le'u bcu gcig pa las gsungs pa'i mdos yi ge hUM la sogs pa yongs su gyur pa las mi bskyod pa la sogs pa bsgom par bya ste/le'u bcu gnyis pa las gsungs pa'i/ dpal ldan sangs rgyas sku 'chang ba/ /zhes bya ba la sogs pa'i tshigs su bcad pa rnams kyis gsol ba gdab par bya ste/le'u bdun pa las gsungs pa'i rigs gsum gyi tshigs su bcad pa rnams kyis nga rgyal byas la/ le'u drug pa las gsungs pa'i sngags rnams kyis byin gyis brlabs nas/ sku la sogs pa byin gyis brlab pa bstan to zhes rnal 'byor chen po'o//phyag rgya 'dus byas pa ni le'u brgyad pa las bstan to/ /le'u bco lnga pa las gsungs pa'i rigs kyi dbye ba'i mdos de la dmigs pa bstan to/ /le'u bdun pa las gsungs pa'i rdo rje mdos rdo rje dang pad+ma la snyoms par 'jug pa bstan to/ /le'u dang po las gsungs pa'i rdo rje mdos de bzhin gshegs pa thams cad 'jug pa bstan to//de nyid las gsungs pa'i mdos dam tshig gi dkyil 'khor spro bar bstan to/ /le'u dang po nas gsungs pa'i phyung ba'i sngags kyis pha rol tu spro ba bstan to/ /le'u dang po nas gsungs pa de nyid dang / le'u bcu gcig pa las gsungs pa'i mdos dbang bskur ba bstan to/ /le'u bco lnga pa las gsungs pa'i rdo rje mdos rgyas gdab pa bstan to/ /dkyil 'khor rgyal po mchog go/ /le'u drug pa nas gsungs pa'i rdo rje mdos phra mo'i rnal 'byor bstan to/ /le'u gsum pa las gsungs pa'i rdo rje mdos de'i dbye ba bstan to//le'u bcu gsum pa'am bdun pa las gsungs pa'i mdos bzlas pa'i cho ga bstan to/ /le'u bcu bdun pa las gsungs pa'i mdos 'od du zhu ba dang / slar ldang ba dang / lha mo rnams kyis bskul ba dang / /de bzhin gshegs pa rnams kyis bstod pa bstan to//le'u bcu bdun pa dang / bcu gnyis pa dang / bco lnga pa las gsungs pa'i mdos tshim pa'i cho ga bstan to/ /le'u bcu bdun pa las gsungs pa'i mdos dkyil 'khor gyi 'khor lo nye bar bsdu ba bstan to/ /le'u bcu gnyis pa las gsungs pa'i mdos nang gi sbyin sreg dang /mchod pa dang / gtor ma bstan to/ /le'u bcu bdun pa dang bco lnga pa las gsungs pa'i mdo dag gis gshegs su gsol ba dang / nyal ba'i cho ga dag bstan to zhes las kyi rgyal po mchog go/ / de ltar brjod par bya ba rnam pa du ma 'og nas dbye bas 'chad par 'gyur ro/ /sgra dang don dag gi brjod par bya ba dang / rjod par byed pa'i mtshan nyid nyi 'brel pa'o/ /'dir smras pa/ sgra dang don dag gi 'brel pa ji ltar bshad par rigs she na/ gang gi phyir bde bar gshegs pa rnams kyi rjes su 'gro ba dang ldog pa med pa'i phyir sgra dang don dag gi 'brel pa med pa'o//de la 'brel pa ni rnam pa gnyis te de'i bdag nyid kyi mtshan nyid dang / de las byung ba'i mtshan nyid de mi rtag pa dang byas pa la sogs pa bzhin dang me dang du ba la sogs pa bzhin no/ /gnyis po de dag kyang sgra dang don gyi phyogs su med do//gang gi phyir sgras ni skyes bu'i dgongs pa mngon par brjod pa'i phyi rol gyi don la skye bar mi 'gyur ro/ /phyi rol gyi don yod na yang de mi 'byung ba ste/ skyes bu'i 'dod pa med pa'i phyir ro/ /phyi rol gyi don med kyang sgra 'byung ba mthong ba ste/skyes bu'i 'dod pa 'jug pa'i phyir rgya mtsho la sogs pa'i sgra brjod pa bzhin no zhes rjes su 'gro ba dang ldog pa med do/ /rgyu dang 'bras bu'i dngos po ni rjes su 'gro ba dang ldog pa med pa sngon du 'gro ba yin la dper na me yod pas du ba 'byung ba dang / me med pas du ba skye bar mi 'gyur ro zhes skye ba'i rim pa'o//rtogs pa'i rim pa yang du ba mthong bas me shes pa dang / me med pas du ba med pa shes par 'gyur ro zhes sgra dang don dag gis de las byung ba'i 'brel pa med do/ /de'i bdag nyid kyi mtshan nyid kyi 'brel pa yang yod pa ma yin te/ tha dad pa dmigs pa'i phyir ro//de'i bdag nyid kyi mtshan nyid kyi 'brel pa ni tha mi dad pa gtso bo yin te/ shing dang sha pa bzhin no/ /bsgrub bya dang sgrub pa'i dngos po'i mtshan nyid kyi tha snyad ni gzhan sel ba'i blos byas te/ dngos po thams cad ni ldog pa du ma dang ldan pa'i phyir ro/ /gang phyir dngos kun rang bzhin gyis//rang rang ngo bo la gnas phyir/ /mthun dngos gzhan gyi dngos dag la/ /ldog pa la ni brten pa can/ /zhes 'byung ba'i phyir ro/ /sgra dang don dag la de lta bu'i mtshan nyid ma mthong ste/ gang gi phyir sgra ni khar yod pa dang / dngos po ni phyi rol du yod pa ste de dag tha dad pa yin no//phan tshun las tha mi dad pa khas blangs nas bum pas kha khengs par 'gyur ba dang / me zhes brjod pas kha tshig par thal bar 'gyur ro zhes rigs pas de'i bdag nyid kyang med do/ /de bas na brjod par bya ba dang / rjod par byed pa'i 'brel pa ni sgra dang don dag la mi rigs so//bden te rang gi mtshan nyid kyi 'brel pa ni med de don gyi bya ba byed pa med pa'i phyir ro/ /de med pa ni dngos po thams cad skad cig ma yin pa'i phyir ro/ /dngos po'i skad cig ma 'jig na sgra 'byung ste/ de'i tshe rang gi mtshan nyid med pas brdar byas pa yang med do zhes sgras ni tha snyad gang la bya ba yin/rnam 'grel las kyang / sgra rnams brdar byas pas don te/ de ni tha snyad bya phyir bshad/ /de tshe rang gi mtshan nyid med/ /des na de la brda med do/ /zhes 'byung ngo / /gal te rnam par rtog pa'i rnam par shes pa'i mtshan nyid kyi bya ba don gyi bya ba yin no zhes brjod na/de yang mi rigs te/ gsal bar snang ba med pa'i phyir ro/ /gsal bar snang ba nyid ni don gyi bya ba yin no/ /rigs pa'i thigs pa las kyang / /don gang zhig nye ba dang mi nye ba dag las shes pa la snang ba tha dad pa de ni rang gi mtshan nyid do/ /de las gzhan ni spyi'i mtshan nyid do zhes 'byung ba'i phyir ro//de bas na spyi'i mtshan nyid kyi 'brel pa yod de/ rnam par rtog pa'i rnam par shes pa la so sor snang ba'i don ni spyi'i mtshan nyid ces bshad pa yin no/ /de bas na rnam rtog la snang ba'i bum pa'i rnam pa las bum pa zhes bya ba'i sgra 'byung ba ste/ rgyu dang 'bras bu'i 'brel pa yod do//'chad pa pos smras pa'i bum pa'i sgra las kyang nyan pa po rnam lar shes pa la bum pa'i rnam pa skye zhes go bzlogs pas kyang rgyu dang 'bras bu'i 'brel pa yod do/ /sgra rnams rnam rtog las byung ba dang / sgra las rnam rtog rnams 'byung ba'i zhes bshad pa'i phyir ro//de ltar dngos po'i 'brel ba bgag nas sgra dang don gyi rnam par rtag pa'i 'brel ba bstan to/ /brjod pa kun rdzob kyis sgra dang don gnyis byas pa'i tha snyad thams cad 'di yin no zhes shin tu phal cher thal bas chog go/ /ji skad du/ gang phyir 'brel ba bstan pa yis//nyan pa po rnams 'jug par 'gyur/ /de phyir bstan bcos thams cad kyi/ /'brel pa sngon du bshad pa yin/ /zhes bshad pa'i phyir ro/ /dgos pa bstan par ma byas pas/ /dman pa yang ni 'jug mi 'gyur/ /zhes bya ba'i tshig gi dgos pa ni nges par brjod par bya ste de yang thos pa la sogs pa rab kyi tha mal pa'i lus spangs nas 'jig rten las 'das pa'i lha'i sku thob pa'i mtshan nyid do zhes bya ba ste/rang gi don phun sum tshogs pa'o/ /de'i dgos pa yang bstan pa la sogs pa'i rnam pas 'gro ba'i don byed pa'i mtshan nyid de gzhan gyi don phun sum tshogs pa'o//ji skad du/ 'gro ba ma lus rang bzhin mngon mdzad pa'i/ /de bzhin gshegs nyid gang gi zhal las byung / /zhes bshad pa lta bu'o/ /gzhan dag na re phyin ci ma log pa'i rtogs pa'i mtshan nyid ni dgos pa yin la/ de khong du chud pas yi dam gyi lha'i sku thob pa ni de'i dgos pa yin no zhes zer ro//de ni mi rigs te/ gzhan gyi don med pa'i phyir byang chub sems dpa' rnams kyi gzhan gyi bya ba gtso bo yin no zhes brjod pa la sogs pa lnga po bstan to/ /yang na rab tu byed pa 'di'i dngos po gsum ni gtso bo yin te/bya ba dang / bya ba'i 'bras bu dang / bya ba'i 'bras bu'i 'bras bu'o/ /de las mdor bsdus pa 'di le'u bcu bdun pa las bsdus pa ni bya ba'o/ /bde blag tu 'gro bar rtogs pa ni bya ba'i 'bras bu'o/ /de rtogs pas dpal rdo rje 'chang gi go 'phang thob pa ni bya ba'i 'bras bu'i 'bras bu yin no zhes kha cig zer ro//de la dang po bgegs zhi bar bya ba'i phyag btsal bar bya ste/ gang gi phyir mngon par 'dod pa'i lha la phyag 'tshal ba sngon du 'gro ba ni 'jug pa yin no zhes dam pa rnams kyi spyod pa yin no/ /de la bgegs rnam pa gsum ste/ lus kyi ni rims la sogs pa'o//ngag gi ni tshig rtsub la sogs pa'o/ /sems kyi ni 'dod chags la sogs pa'o/ /yang na bems po dang bems po ma yin pa dang / gnyi ga'i rang bzhin ni bgegs so/ /be+ems po ni grang ba dang dro ba la sogs pa'o/ /bems po ma yin pa ni rgyal po'i rtsod pa la sogs pa'o//gnyi ga ni gnyi gas sbrul pa'o/ /ji skad du/ shin tu char dang char dkon dang / /byi ba cha ga ne tsho dang / /phan tshun rtsod pa'i rgyal po rnams/ /drug po rnam par 'tshe bar bshad/ /ces 'byung ngo / /bgegs rnams de dag thams cad bcom ldan 'das la phyag 'tshal bas rab tu zhi bar 'gyur ro//'dir rigs pa ni phyag 'tshal bar byas nas skyes bu chen po la rab tu bstod pas bsod nams thob cing bsod nams ma yin pas ldog pas mi dge ba las byung ba'i phyi dang nang gi bgegs rnams nye bar zhi bar 'gyur ro zhes bde bas bstan bcos rdzogs par 'gyur ro zhes 'gal ba dmigs pa'am/'gal ba'i 'bras bu dmigs pa'i phyag 'tshal bas bgegs nye bar zhi bar 'gyur ro/ /dper na 'dir ni grang ba'i reg pa med de me yod pa'i phyir dang de bzhin du 'di na ba mo'i reg pa med de du ba yod pa'i phyir ro zhes bya ba la sogs pa bzhin no//khams gsum spyod pa las grol mkha' dang mnyam gyur dngos kun ngo bo nyid/ /dag cing zhi ba rnams dben bde mchog rang bzhin rnal 'byor pa nyid yul/ /rtogs dka' brtag par dka' la bdag gzhan rab phan khyab cing spros pa med/ /rgyal ba rnams kyi zhi ba mnyam med mnyam sku mi rtogs tshul gcig la phyag 'tshal//zhes smros pa las/ rgyal ba ni sangs rgyas rnams kyi sku ste/ sku gsum la phyag 'tshal ba ni 'dud de ji lta bu yin zhe na/ khams gsum spyod pa ni nyon mongs pa dang shes bya'i sgrib pa rnams so/ / de rnams las grol ba ni bral ba'o/ /de bzhin du mkha' dang mnyam gyur pa ni nam mkha' dang 'dra bar gnas pa'o/ /bum pa'i nam mkha' dang 'dra ba'i phyogs gcig pa yin nam zhe na ma yin te/ dngos po kun gyi ngo bo nyid/ /ces bya ba ni sems can dang / snod kyi 'jig rten dag gi chos nyid kyi rang bzhin no//des ni chos kyi sku'i rang bzhin gyi phyag 'tshal bar bstan to/ /sangs rgyas kyis ni zhing yongs su dag pas na dag pa'o/ /'od gsal ba'i rang bzhin yin pas na zhi ba'o/ /chos kyi sku las byung bas na rnam dben pa'o//chos kyi bdud rtsis gang bas na bde mchog gi rang bzhin no/ /sa thob pa'i byang chub sems dpa'i spyod yul yin pas na rnal 'byor pa nyid yul lo/ /des ni longs spyod rdzogs pa'i sku'i rang bzhin gyi phyag 'tshal bar bstan to/ /sems dang sems las byung ba'i chos dang bral bas na rtogs dka' brtag par dka' ba ste/sku dang gsung gi ngo bo yin pa'i phyir ro/ /skye ba la sogs pa bstan pas bdag la rab phan no/ /sems can gyi don bya ba bstan pas gzhan la rab phan no/ /kun du 'gro bas na khyab pa ste/ dgon pa la 'bar ba'i me bzhin no//chos kyi skur gyur pas na spros pa med pa'o/ /des ni sprul pa'i sku'i rang bzhin gyis phyag 'tshal bar bstan to/ /nye bar bsdu bar bshad par bya ste/ zhi ba ni chos kyi sku'o/ /mnyam med ni de nyid do/ /de dang mnyam pa ni longs spyod rdzogs pa'i sku'o/ /sems dang bral ba'i phyir mi rtogs tshul gcig ces bya ba ni sprul pa'i sku'o//de ltar rgyal ba rnams kyi rnam pa gsum gyi sku la phyag 'tshal lo zhes yi ge'i don to/ /khams gsum spyod pa las 'grol ba ni bgegs bskrad pa'o/ /mkha' dang mnyam par gyur pa ni stong pa nyid kyi rang bzhin no//dngos kun ngo bo nyid ni de bzhin gshegs pa lnga'i rang bzhin gyi ye shes kyi gzhi'i ngo bo'o/ /dag pa ni rin chen sna bdun gyi rang bzhin gyi gzhal yas khang gi ngo bo'o/ /lhag par mos pa'i dkyil 'khor gyi rang bzhin yin pas na zhi ba'o/ /don dam pa'i dkyil 'khor gyi ngo bo yin pas na rnam dben no//gdan gyi dbye ba'i ngo bo yin pas na bde mchog rang bzhin no/ /chos kyi dbyings kyi ye shes kyi rang bzhin yin pas na rnal 'byor pa nyid yul lo/ /yi ge gsum gyi bdag nyid yin pas na rtogs dka' ba'o/ /de yongs su gyur pa las rdo rje'i rnam pa yin pas na brtag par dka' ba'o//spro ba'i bdag nyid yin pas na bdag dang gzhan la rab phan no/ /de'i nga rgyal gyi bdag nyid yin pas na khyab pa'o/ /de bzhin gshegs pa thams cad gcig tu bsdus pas na spros pa med pa'o/ /rgyal ba'i sku ni dpal rdo rje 'chang gi sku 'grub pa ste rnal 'byor ro//ye shes sems dpa' dang ting nge 'dzin sems dpa'i bdag nyid yin pas na zhi ba ste/ rjes su rnal 'byor ro/ /mnyam med ni de bzhin gshegs pa dang byang chub sems dpa' rnams te/ de rnams kyis byin gyis brlabs pas na mnyam med mnyam pa ste/ shin tu rnal 'byor ro/ /sku gsung thugs byin gyis brlabs pas na mi rtog tshul gcig ces bya ba ste/ rnal 'byor chen po'o/ /de ltar dang po'i sbyor ba'i bdag nyid yin pas na spyi'i don to/ /khams gsum spyod pa las grol ba/ /zhes bya ba ni rlung gsum nye bar bsdus pas gcig tu gyur pa'o//mkha' dang mnyam gyur pa ni 'dod pa'i gdugs kyi rtsa la gnas pa ste/ rtsa dbu ma la gnas pa'o/ /dngos kun ngo bo nyid ces bya ba ni spyod pa dang mi spyod pa'i bdag nyid do/ /sna yi rtse mor yungs kar bsam/ /'gro dang mi 'gro yungs kar las/ /zhes bshad pa'i phyir ro//kun+da ltar dkar ba yin pas na dag pa'o/ /rnam par mi rtog pa'i ngo bo yin pas na zhi ba'o/ /yungs kar gyi tshad tsam yin pa'i phyir rnam dben no/ /thabs dang shes rab snyoms par 'jug pa las byung bas na bde mchog rang bzhin no/ /rang rigs pas na rnal 'byor pa nyid yul lo//rags pa dang phra ba'i rnam par rtog pa dang bral bas na rtogs dka' brtag par dka' ba'o/ /spro ba dang bsdu bdag gis 'gro ba'i don mdzad pas na bdag dang gzhan la rab phan no/ /'gro ba skyed pa'i rgyur gyur pas na khyab pa'o/ /phung po dang dbang po dang rlung nye bar bsdus pas na spros pa med pa'o//de nyid kyi phyir phung po rnams kyi nye bar grags pa'i rgyal ba rnams nye bar bsdus pas na rgyal ba'i sku ste/ chos dang longs spyod rdzogs pa dang sprul pa'i sku'i rang bzhin no/ /de nyid bshad pa zhi ba ni gsang ba'i sna rtse la gnas pa'o/ /mnyam med mnyam pa ni snying ga'i pad+ma'i nang na gnas pa'o//mi rtog tshul gcig ces bya ba ni kun rdzob sna'i rtse la gnas pa'o/ /phyag 'tshal ba ni nyams su myong ba ste sbas pa'o/ /snang ba gsum dang bral bas na khams gsum spyod pa las grol ba'o/ /'od gsal ba'i rang bzhin yin pas na nam mkha' dang mnyam gyur pa'o//brtan pa dang g.yo ba'i ngo bo yin pas na dngos kun ngo bo nyid do/ /shes rab kyi rang bzhin dang bral bas na dag pa'o/ /thabs kyi rang bzhin dang bral bas na zhi ba'o/ /ma rig pa'i rang bzhin dang bral bas na rnam dben no//phyag rgya'i thabs kyis thob pas na bde mchog rang bzhin no/ /rdzogs pa'i rim pa'i rnal 'byor pas blang bar bya bas na rnal 'byor pa nyid yul lo/ /pha rol tu phyin pa'i rnal 'byor pa rnams kyis mi shes pas rtogs par dka'o/ /bskyed pa'i rim pa'i rnal 'byor pa rnams kyis rtogs par dka' bas na brtag par dka' ba'o//bdag dang gzhan la phan 'dogs pa'i rgyur gyur pas na bdag gzhan rab phan no/ /chos kyi dbyings kyi ye shes kyi rang bzhin yin pas na khyab pa'o/ /snang ba la sogs pa'i gsal ba gsum bral bas na spros pa med pa'o//de bzhin gshegs pa thams cad kyi ngo bo yin pas na rgyal ba rnams kyi sku'o/ /zla ba'i snang ba yin pas na zhi ba'o/ /nyi ma ltar snang ba yin pas na mnyam med mnyam pa'o/ /mtshams kyi snang ba dang de dag dang bral bas na mi rtog tshul gcig ces bya ba ste sbas pa'o//snang ba nye bar thob pa la sogs pa dang bral pa'i bsgoms pa las byung bas na khams gsum spyod pa las grol ba'o/ /'od gsal ba las byung bas na nam mkha' dang mnyam par gyur pa'o/ /sgyu ma'i dpe bcu gnyis dang mtshungs pas na dngos kun ngo bo nyid do//chos kyi skur bdag byin gyis brlabs pas na dag pa'o/ /longs spyod rdzogs pa'i skur bdag byin gyis brlabs pas na zhi ba'o/ /sprul pa'i skur bdag byin gyis brlabs pas na rnam dben no/ /rang rig pas na bde ba mchog rang bzhin no/ /sa bcu pa la ye shes kyi dbang nyid thob pas na rnal 'byor pa nyid yul lo//bdag dang gzhan gyi rgyud la gnas pa'i rnam par rtog pa bcom pas na rtogs dka' brtag par dka' ba'o/ /sgyu ma lta bu yin na yang bdag dang gzhan la phan par mdzad pas na bdag gzhan rab phan no/ /chu'i zla ba dang 'dra bas na khyab pa'o//'od gsal ba las byung bas na spros pa med pa'o/ /de nyid kyi phyir mos pa'i dbye bas de bzhin gshegs pa lnga'i sku 'chang bas na rgyal ba rnams kyi sku'o/ /dam tshig sems dpa'i ngo bo yin pas na zhi ba'o/ /ye shes sems dpa'i ngo bo yin pas na mnyam med mnyam pa'o//ting nge 'dzin sems dpa'i ngo bo yin pas na rtog med tshul gcig ste sbas pa'o/ /chags pa dang chags pa dang bral ba dang / chags pa bar ma dang bral bas na khams gsum spyod pa las grol ba'o/ /nam mkha' spros pa thams cad zhi ba yin pas nam mkha' dang mnyam gyur ba'o//khams gsum gyi bdag nyid yin pas na dngos kun ngo bo nyid do/ /chags pa spong bas na dag pa'o/ /chags pa dang bral ba med pas na zhi ba'o/ /chags pa dang bral bas rnam dben no/ /lhan cig skyes pa'i phyir bde mchog gi rang bzhin no/ /rnal 'byor gyi mngon sum gyi tshad mas rtogs pas na rnal 'byor pa nyid yul lo//smig rgyu la sogs pa'i rtags med pas na rtogs dka'o/ /phra ba'i lta bas rtogs pas brtag dka' ba'o/ /de las ldang ba ni bdag dang gzhan gyi don grub pas na bdag gzhan rab phan no/ /kun rdzob byang chub kyi sems kyi nam mkha'i khams thams cad khyab pas na khyab pa'o//don dam pa byang chub sems ni rnam par rtog pa dang bral bas na spros pa med pa'o/ /de nyid kyi phyir rgyal ba rnams kyi sku ni sangs rgyas rnams kyi chos kyi sku'o/ /zhi ba ni ril por 'dzin pa'i ting nge 'dzin gyis rtogs pa'o//mnyam med mnyam pa ni rjes su gzhig pa'i ting nge 'dzin gyis thob pa'o/ /thams cad kyi 'bras bu yin pas na mi rtog tshul gcig go/ /phyag 'tshal lo zhes bya ba ni bdag nyid du byas pa ste mthar thug pa'o/ /khams gsum spyod pa las grol ba ni 'jig rten gyi chos brgyad dang bral ba'o//mkha' dang mnyam gyur pa ni sa bcu gnyis pa thob pa'o/ /rdo rje lta bu'i ting nge 'dzin gyi rang bzhin yin pas na dngos kun ngo bo nyid do/ /kun rdzob kyi rnam par rtog pa spong bas na dag pa'o/ /don dam pa'i rnam par rtog pa dang bral bas na zhi ba'o//bden pa gnyis dang gnyis su med pas na rnam dben no/ /chos kyi bdud rtsi'i char 'bebs pas na bde mchog gi rang bzhin no/ /zag pa med pa'i ye shes kyi rnal 'byor pa rnams kyis khong du chud pas na rnal 'byor pa nyid yul lo/ /'jig rten las 'das pa'i ye shes kyi yul yin pas na rtogs dka'o//de'i rjes las thob pa'i ye shes kyi rnam pa yin pas na brtag dka' ba'o/ /sems can thams cad kyi rgyud la phan 'dogs pas na bdag gzhan rab phan no/ /mtha' gnyis dang bral bas na khyab pa'o/ /de nyid kyi phyir spros pa med pa'o/ /rgyal ba rnams kyi sku zhes bya ba ni sangs rgyas thams cad kyi bdag nyid do//phung po lhag ma dang bcas pa dang / phung po lhag ma med pa'i mya ngan las 'das pa'i dbyings kyi rnam par rtog pa med pas na zhi ba'o/ /rnam pa dang bcas pa dang rnam pa med pa la sogs pa spong bas na mnyam med mnyam pa'o//'bras bu'i ngo bo yin pas na mi rtog tshul gcig go/ /phyag 'tshal zhes bya ba ni de'i bdag nyid du 'jug par bya zhes pa'i don te mthar thug pa'o/ /de ni bshad pa rnam pa bzhi'o/ /yang na khams gsum spyod pa las grol zhes bya ba ni thugs rdo rje 'chang gi rang bzhin no/ /mkha' dang mnyam gyur zhes bya ba ni rin chen 'byung ldan gyi rang bzhin no//dngos kun ngo bo nyid ces bya ba ni 'od dpag tu med pa'i ngo bo'o/ /dag pa ni rnam par snang mdzad kyi rang bzhin no/ /zhi ba ni don yod grub pa'i rang bzhin no/ /rnam dben ni spyan gyi rang bzhin no/ /bde mchog rang bzhin ni mA ma kI'i ngo bo'o//rnal 'byor pa nyid yul ni gos dkar mo'i bdag nyid do/ /rtogs dka' ni sgrol ma'i bdag nyid do/ /brtag par dka' ba ni gshin rje mthar byed kyi bdag nyid do/ /bdag gzhan rab phan ni shes rab mthar byed kyi bdag nyid do/ /khyab pa ni pad+ma mthar byed kyi bdag nyid do//spros pa med pa ni bgegs mthar byed kyi bdag nyid do/ /zhi ba ni byams pa la sogs pa byang chub sems dpa' brgyad kyi rang bzhin no/ /mnyam med mnyam pa ni gzugs rdo rje ma la sogs pa mchod pa'i lha mo lnga'i rang bzhin no/ /mi rtog tshul gcig ni khro bo'i rgyal po bcu'i rang bzhin no//de dang 'dra ba rgyal ba rnams kyi sku ni/ rdo rje 'chang sum cu rtsa gnyis kyi dkyil 'khor gyi 'khor lo la phyag 'tshal ba ni 'dud ces bya ba tshig gi don te sgra ji bzhin pa'o/ /khams gsum spyod pa las grol ba ni nang stong pa nyid kyi rang bzhin no/ /mkha' dang mnyam gyur pa ni phyi stong pa nyid kyi rang bzhin no//dngos kun ngo bo nyid ni phyi nang stong pa nyid kyi rang bzhin no/ /dag pa ni stong pa nyid stong pa nyid kyi rang bzhin no/ /zhi ba ni chen po stong pa nyid kyi rang bzhin no/ /rnam dben ni don dam pa stong pa nyid kyi rang bzhin no/ /bde mchog rang bzhin ni 'dus byas stong pa nyid kyi rang bzhin no//rnal 'byor pa nyid yul ni 'dus ma byas stong pa nyid kyi rang bzhin no/ /rtogs dka' ba ni mtha' las 'das pa stong pa nyid kyi rang bzhin no/ /brtag par dka' ba ni dor ba med pa stong pa nyid kyi rang bzhin no/ /bdag gzhan rab phan ni thog ma dang tha ma med pa stong pa nyid kyi rang bzhin no//khyab pa ni rang bzhin stong pa nyid kyi rang bzhin no/ /spros pa med pa ni chos thams cad stong pa nyid kyi rang bzhin no/ /zhi ba ni rang gi mtshan nyid stong pa nyid kyi rang bzhin no/ /mnyam med mnyam pa ni mi dmigs pa stong pa nyid kyi rang bzhin no/ / mi rtog tshul gcig ni dngos po med pa stong pa nyid kyi rang bzhin no/ /de ltar stong pa nyid bcu drug gi rang bzhin rgyal ba rnams kyi sku ni rdo rje sems dpa' la phyag 'tshal lo zhes sgra ji bzhin ma yin pa'o/ /khams gsum spyod pa las grol ba ni snang ba chung ba'i bdag nyid do//mkha' dang mnyam gyur pa ni snang ba 'bring gi bdag nyid do/ /dngos kun ngo bo nyid ni snang ba rab kyi bdag nyid do/ /dag pa ni snang ba rab kyi bdag nyid do/ /zhi ba ni snang ba mched pa chung ba'i rang bzhin no/ /rnam dben ni snang ba mched pa 'bring gi bdag nyid do/ / bde mchog rang bzhin ni snang ba mched ba rab kyi bdag nyid do/ /rnal 'byor pa nyid yul ni snang ba mched pa rab kyi rab kyi bdag nyid do/ /rtogs dka' ba ni snang ba nye bar thob pa chung ngu'i bdag nyid do/ /brtag par dka' ba ni snang ba nye bar thob pa 'bring gi bdag nyid do//bdag gzhan rab phan ni snang ba nye bar thob pa rab kyi bdag nyid do/ /khyab pa ni snang ba nye bar thob pa'i rab kyi rab kyi bdag nyid do/ /spros pa med pa ni 'od gsal ba chung ngu'i bdag nyid do/ /zhi ba ni 'od gsal ba 'bring gi bdag nyid do/ /mnyam med mnyam pa ni 'od gsal ba rab kyi bdag nyid do//mi rtog tshul gcig ni 'od gsal ba rab kyi rab kyi bdag nyid do/ /de rnams kyi dbye ba ni nyin par gyi zla ba'i snang ba dang / zla ba phyed kyi snang ba dang sprin dang bcas pa'i zla ba'i snang ba dang / sprin med pa'i zla ba'i snang ba bzhin du snang ba'i ye shes so//de bzhin du nyi ma shar ba'i snang ba dang / nyi ma nub bzhin pa'i snang ba dang / sprin dang bcas pa'i nyi ma'i snang ba dang / sprin med pa'i nyi ma'i snang ba lta bu ni snang ba mched pa'i ye shes so/ /srod kyi mtshams dang nang par gyi mtshams dang / sprin dang bcas pa'i mtshams dang / sprin med pa'i mtshams lta bu ni snang ba nye bar thob pa'i ye shes so/ /mar ngo phyogs kyi nam mkha' dang / yar ngo phyogs kyi nam mkha' dang / sprin dang bcas pa'i nam mkha' dang / sprin med pa'i nam mkha' lta bu ni 'od gsal ba'i ye shes te/ dgongs pas bshad pa'o/ /khams gsum spyod pa las grol ba ni srog gi rlung kun du rgyu ba dang bral ba'o//mkha' dang mnyam gyur ni thur du sel ba'i rlung gi kun du rgyu ba dang bral ba'o/ /dngos kun ngo bo nyid ni me dang mnyam pa'i rlung kun du rgyu ba dang bral ba'o/ /dag pa ni gyen du rgyu ba'i rlung kun du rgyu ba dang bral ba'o/ / zhi ba ni khyab byed kyi rlung nye bar sdud par byed pa'o/ /rnam dben ni rgyu ba dang bral ba'o/ /bde mchog rang bzhin ni rnam par rgyu ba dang bral ba'o/ /rnal 'byor pa nyid yul ni yang dag par rgyu ba dang bral ba'o/ /rtogs dka' ni rab tu rgyu ba dang bral ba'o/ /brtag par dka' ba ni nges par rgyu ba dang bral ba'o//bdag gzhan rab phan ni lus kyi rlung nye bar sdud pa'o/ /khyab pa ni ngag gi rlung nye bar sdud pa'o/ /spros pa med pa ni sems kyi rlung nye bar sdud pa'o/ /de la lus kyi rlung ni 'gro ba dang / bsgul ba dang bskyod pa'i mtshan nyid do/ /ngag gi rlung ni rtog dpyod kyi mtshan nyid do//brtags shing dpyad nas tshig brjod pa yin no zhes rigs pas so/ /sems kyi rlung ni 'dod chags dang zhe sdang dang gti mug gi bdag nyid do/ /zhi ba ni 'jug pa med pa'o/ /mnyam med mnyam pa ni gnas pa med pa'o/ /mi rtog tshul gcig ni 'byung ba med pa'o//de lta bu'i rgyal ba rnams kyi sku ni de bzhin gshegs pa thams cad nye bar sdud par byed pa ma ning gi bzlas pa'i bdag nyid rdo rje 'chang la phyag 'tshal lo zhes dgongs pa yin pa'o/ /khams gsum spyod pa las grol ba ni 'chi ba las pha rol na de bzhin gshegs pa med do zhes rnam par rtog pa dang bral ba'o//mkha' dang mnyam gyur pa ni 'chi ba las pha rol na de bzhin gshegs pa yod do zhes rnam par rtog pa dang bral ba'o/ /dngos kun ngo bo nyid ni 'chi ba las pha rol na de bzhin gshegs pa yod pa yang yin/ med pa yang yin zhes rnam par rtog pa dang bral ba'o//dag pa ni 'chi ba las pha rol na de bzhin gshegs pa yod pa yang ma yin med pa yang ma yin zhes rnam par rtog pa dang bral ba'o/ /zhi ba ni 'jig rten mtha' dang ldan pa zhes rnam par rtog pa dang bral ba'o/ /rnam dben ni 'jig rten mtha' dang ldan pa'ang ma yin no zhes rnam par rtog pa dang bral ba'o//bde mchog rang bzhin ni 'jig rten mtha' dang ldan pa yang ma yin mtha' dang mi ldan pa yang ma yin zhes rnam par rtog pa dang bral ba'o/ /rnal 'byor pa nyid yul ni 'jig rten ni mtha' dang ldan pa yang ma yin/ mtha' dang mi ldan pa yang ma yin zhes rnam par rtog pa dang bral ba'o//rtogs dka' ni 'jig rten rtag pa yin no zhes rnam par rtog pa dang bral ba'o/ /brtag par dka' ba ni 'jig rten mi rtag pa'o zhes rnam par rtog pa dang bral ba'o/ /bdag gzhan rab phan ni 'jig rten ni rtag pa yang ma yin mi rtag pa yang ma yin zhes rnam par rtog pa dang bral ba'o//khyab pa ni 'jig rten ni rtag pa yang ma yin mi rtag pa yang ma yin zhes rnam par rtog pa dang bral ba'o/ /de nyid kyi phyir spros pa med pa'o/ /stong pa nyid kyi rang bzhin yin pas na zhi ba'o/ /mtshan ma med pas na mnyam med mnyam pa'o//smon pa med pas na mi rtog tshul gcig go/ /rgyal ba rnams kyi sku ni rdo rje 'chang la phyag 'tshal lo zhes bya ba ni drang ba'i don to/ /khams gsum spyod pa las gros ba ni rdo rje 'chang chen po'i bzlas pa'i rang bzhin no/ /mkha' dang mnyam gyur ni thugs kyi bzlas pa'i rang bzhin no//dngos kun ngo bo nyid ni ngag gi bzlas pa'i rang bzhin no/ /dag pa ni sku'i bzlas pa'i rang bzhin no/ /zhi ba ni rin chen bzlas pa'i rang bzhin no/ /rnam dben ni don yod bzlas pa'i rang bzhin no/ /bde mchog rang bzhin ni zhe sdang bzlas pa'i rang bzhin no/ /rnal 'byor pa nyid yul ni 'dod chags bzlas pa'i rang bzhin no//rtogs dka' ni gti mug bzlas pa'i rang bzhin no/ /brtag par dka' ba ni khro bo'i bzlas pa'i rang bzhin no/ /bdag gzhan rab phan ni ma ning gi bzlas pa'i rang bzhin no/ /de nyid kyi khyad par ni khyab pa ste/ 'od gsal ba'i ngo bo yin pa'i phyir ro//spros pa med pa ni ngag gi spros pa las 'das pa'o/ /'jug pa la sogs pa dang / bral bas zhi ba dang mnyam med mnyam pa dang / mi rtog tshul gcig ste nges pa'i don to/ /de ltar don bcu bzhi ston par byed pa'i phyag 'tshal ba'i tshig gis rgyud kyi don ma lus par bstan to//da ni sngar bstan pa'i brjod pa la sogs pa bshad par bya ste/ dpal ldan 'dus pa'i rgyud kyi ni/ /don bsdus rtogs par bya ba'i phyir/ /sems can kun la phan bskyed pa/ /mdor byas bdag gis bshad par bya/ /zhes bya ba ni mdor byas pa zhes bya ba sgrub pa'i thabs ni bdag gis bshad par bya ste dbye bar bya'o//'o na gal te sgrub pa'i thabs 'dis dpal gsang ba 'dus pa'i rgyud kyi don bsdus pa yin na de gzhung gis bsdus sam don gyis bsdus gal te gzhung gis bsdus na de'i tshe don rdzogs par bsdus par mi 'gyur ro/ / gal te don gyis bsdus na de'i tshe rab tu byed pas ci zhig bya zhe na smras pa gzhung dang don gyis bsdus so/ /'o na gzhung nyung bas don rgyas pa ji ltar bsdu bar nus she na/ smras pa/ tshig gi don zab mo yin pa'i phyir don rgyas pa yang bsdus te/ dper na ji ltar sor gdub kyi me long la glang po che'i gzugs brnyan snang ba de bzhin du tshig nyung ba la yang don mang po bsdus par shes par bya ste/chos gang rgyu las byung ba zhes bya ba la sogs pa bzhin no/ /phur bu na re yid ma ches/ /lnga len na re bud med 'jam/ /zla ba na re zhun bza'/ /ser skye na re srog chags brtse//zhes bya ba'i mdos rgyal po'i bstan bcos dang 'dod pa'i bstan bcos dang / sman pa'i bstan bcos dang / chos kyi bstan bcos te/ 'bum phrag bzhi ji ltar bsdus pa de bzhin du 'dir yang bsdus pa yin no/ /'o na rang dbang gis bshad pa yin nam zhe na ma yin te/dpal ldan 'dus pa'i rgyud kyi ni/ /zhes bya ba ni thabs dang shes rab kyi bdag nyid yin pas na dpal ldan nam/ bsod nams dang ye shes kyi tshogs gtso bor gyur pas na dpal ldan no/ /sangs rgyas lnga yang dag par sbyor ba ni 'dus pa ste yi ge'i don to/ /yi ge gsum 'dus pas na 'dus pa ste spyi'i don to//stong pa nyid bsgom pa ni 'dus pa ste yang spyi'i don to/ /thabs dang shes rab snyoms par 'jug pa ni 'dus pa ste sbas pa'o/ /yi ge gsum nye bar 'dus pa ni 'dus pa ste yang sbas pa'o/ /snang ba nye bar thob pa la sogs pa 'dus pa ni 'dus pa ste yang sbas pa'o//byang chub kyi sems 'dzin pa ni 'dus pa ste mthar thug pa'o/ /bden pa gnyis 'dus pa ni 'dus pa ste yang mthar thug pa'o/ /le'u bco brgyad kyi bdag nyid kyi rgyud ni 'dus pa ste/ sgra ji bzhin pa'o/ /sa ni srog gi rlung ngo / /ma ni thur du sel ba'i rlung ngo //dza ni me dang mnyam pa'i rlung ngo / /sgra ji bzhin ma yin pa'o/ /yi ge gsum nye bar bsdus pa ni 'dus pa ste dgongs pas bshad pa'o/ /phyir mi ldog pa'i dbang bskur ba'i dus su tshangs pa'i sgo nas de bzhin gshegs pa thams cad 'jug pa ni 'dus pa ste dgongs pa ma yin pa'o//sku rdo rje 'chang la sogs pa dkyil 'khor bsgom pa ni 'dus pa ste drang ba'i don to/ /lus la sogs pa'i rnam par rtog pa nye bar bsdus pa ni 'dus pa ste nges pa'i don to/ /yang na sku'i dkyil 'khor 'dus pa ni 'di lta ste/gzugs kyi phung po ni rnam par snang mdzad do/ /tshor ba'i phung po ni rin chen 'byung ldan no/ /'du shes kyi phung po ni 'od dpag tu med pa'o/ /'du byed kyi phung po ni don yod par grub pa'o/ /rnam par shes pa'i phung po ni mi bskyod pa'o/ /sa'i khams ni sangs rgyas spyan no//chu'i khams ni mA ma kI'o/ /me'i khams ni gos dkar mo'o/ /rlung gi khams ni dam tshig sgrol ma'o/ /mig gi dbang po ni sa'i snying po'o/ /rna ba'i dbang po ni lag na rdo rje'o/ /sna'i dbang po ni nam mkha'i snying po'o/ /lce'i dbang po ni 'jig rten dbang phyug go//lus kyi dbang po ni sgrib pa thams cad rnam par sel ba'o/ /yid kyi dbang po ni 'jam dpal lo/ /tshigs kun ni kun du bzang po'o/ /rtsa rgyud thams cad dang rtsa bdun khri nyis stong ni byams pa'o/ /gzugs ni gzugs rdo rje ma'o/ /sgra ni sgra rdo rje ma'o/ /dri ni dri rdo rje ma'o//ro ni ro rdo rje ma'o/ /reg bya ni reg bya rdo rje ma'o/ /dpung pa g.yas pa'i rtsa bar ni gshin rje mthar byed do/ /dpung pa g.yon par ni gzhan gyis mi thub pa'o/ /kha'i pad+mar ni rta mgrin no/ /gsang bar ni bdud rtsi 'khyil pa'o/ /lag ngar g.yas par ni mi g.yo ba'o/ /lag ngar g.yon par ni 'dod pa'i rgyal po'o//pus mo g.yas par ni dbyig sngon no/ /pus mo g.yon par ni stobs po che'o/ /tshangs pa'i sgor ni gtsug tor 'khor los sgyur ba'o/ /rkang pa'i dkyil 'khor la gnod mdzes kyi rgyal po ste/ de bzhin gshegs pa thams cad kyi rang bzhin gyi sku'i dkyil 'khor ni 'dus pa ste sgra ji bzhin pa'o//yang na gsung gi dkyil 'khor 'dus pa ni 'di lta ste/ a A ni mi bskyod pa dang mA ma kI'o/ /i I ni rnam par snang mdzad dang spyan no/ /u U ni rin chen 'byung ldan dang gzhan mA ma kI'o/ /r-i r-I ni 'od dpag tu med pa dang gos dkar mo'o//l-i l-I ni don yod grub pa dang sgrol ma'o/ /e ni gshin rje mthar byed do/ /ai ni shes rab mthar byed do/ /o ni pad+ma mthar byed do/ /au ni bgegs mthar byed do/ /ka kha ga g+ha nga ni mi bskyod pa dang spyan la sogs pa'o/ /tsa tsha dza dz+nya nya ni rnam par snang mdzad kyi dkyil 'khor ro//Ta Tha Da D+ha Na ni rin chen 'byung ldan gyi dkyil 'khor ro/ /ta tha da d+ha na ni 'od dpag tu med pa'i dkyil 'khor ro/ /pa pha ba b+ha ma ni don yod grub pa'i dkyil 'khor ro/ /ya ra la wa sha Sha sa ha oM AH ni khro bo bcu'i dkyil 'khor ro/yang na A li ni lha mo'i rang bzhin dang / kA li ni thabs kyi rang bzhin te/ gsung gi dkyil 'khor ni 'dus pa ste spyi'i don to/ /yang na thugs kyi dkyil 'khor 'dus pa ni 'di lta ste/ zhe sdang ni mi bskyod pa'o/ /gti mug ni rnam par snang mdzad do/ /'dod chags ni 'od dpag tu med pa'o//nga rgyal ni rin chen 'byung ldan no/ /phrag dog ni don yod grub pa'o/ /bdag tu lta ba ni spyan no/ /bdag tu rmongs pa ni mA ma kI'o/ /bdag tu nga rgyal ba ni gos dkar mo'o/ /bdag la chags pa ni sgrol ma'o/ /khro ba ni sa'i snying po'o/ / khon du 'dzin pa ni byams pa'o/ /'tshig pa ni rdo rje'o/ /'chab pa ni mA ma kI'i snying po'o/ /rgyags pa ni 'jam dpal lo/ /rnam par 'tshe ba ni 'jig rten dbang phyug go/ /sgyu ni sgrib pa thams cad rnam par sel ba'o/ /g.yo ni kun du bzang po'o/ /ngo tsha med pa ni gshin rje mthar byed do//khrel med pa ni shes rab mthar byed do/ /phrag dog ni pad+ma mthar byed do/ /ser sna ni bgegs mthar byed do/ /rnam par g.yeng ba ni mi g.yo ba'o/ /'gyod pa ni 'dod pa'i rgyal po'o/ /bying ba ni dbyug sngon no/ /rgod pa ni stobs po che'o/ /rtog pa ni gnod mdzes so//dpyod pa ni gtsug tor 'khor los sgyur ba ste/ thugs kyi dkyil 'khor zhes bya ba ste nges pa'i don to/ /de dang 'dra ba'i dpal ldan 'dus pa ni/ /rgyud kyi ngo bo yin pas na rgyud do/ /de ni rnam pa gsum ste rgyu'i rgyud dang / 'bras bu'i rgyud dang / thabs kyi rgyud do//de la rgyu'i rgyud ni rim pa gnyis bsgom pa'o/ /'bras bu'i rgyud ni rdo rje 'chang gi go 'phang thob pa'i mtshan nyid do/ /thabs kyi rgyud ni byang chub kyi sems bskyed pa la sogs pa'i mtshan nyid do/ /de nyid kyi phyir rdo rje 'chang yang rnam pa gsum ste/ rgyu'i rdo rje 'chang dang / 'bras bu'i rdo rje 'chang dang / thabs kyi rdo rje 'chang ngo / /de la rgyu'i rdo rje 'chang ni rdo rje'i 'chang chen po ste drug pa'o/ /'bras bu'i rdo rje 'chang ni snying ga las mi bskyod pa spro zhing de dang rjes su 'jug pas byung ba ni thugs rdo rje 'chang ngo / /thabs kyi rdo rje 'chang ni 'khor los sgyur ba'i dkyil 'khor gyi rang bzhin no//de ni rgyud la gtan la dbab pa'o/ /de nas las 'dzin pas te dpal ldan yang yin la 'dus pa yang yin pas na dpal ldan 'dus pa'o/ /dpal ldan 'dus pa yang yin la rgyud kyang yin pas na dpal ldan 'dus pa'i rgyud de gzhi mthun pa gnyis so//de'i 'brel ba dang ldan pa don bsdus pa ni brjod par bya ba'i ngo bo sgra dang don gyi rgyan gyi rang bzhin mtha' drug ste dgongs pas bshad pa la sogs pa'o/ /de nyid brjod par bya ba yin pas na don to/ /de rtogs par bya ba'i phyir na de nyid khong du chud par bya ba'i phyir ro//sems can kun la phan skyed pa/ /zhes bya ba ni de la sems can kun ni gang zag lnga ste tsan+dan dang / ut+pal la dang / pad+ma dkar po dang / pad+ma dang / rin po che'o/ /de la tsan+dan ni bems po lta bu'o/ /ut+pal ni dbang po dman pa'o/ / pad+ma dkar po ni dbang po bar pa'o/ /pad+ma ni dbang po rab po/ /rin po che lta bu ni dbang po rab kyi rab po/ /de la dang po bzhi po la bskyed pa'i rim pa bshad pa rigs dang / lnga pa la ni rdzogs pa'i rim pa bshad pa'i rigs so zhes 'dir gang gzung bar 'gyur zhe na smras pa/ 'dir re zhig rab tu byed pa 'dis tsan+dan gyi bems po nyid bsal nas/ yang dag pa'i lta ba la 'jug go/ /ut+pal gyi dbang po dman pa nyid bsal nas bar pa nyid du bskyed do/ /pad+ma dkar po'i bde ba rtogs pas 'khrul pa zlog cing dbang po rno ba nyid du byed do/ /dbang po rno ba'i pad+ma la bsgom pa'i rang bzhin shes rab bskyed de rin po che lta bu ni rang gi de kho na nyid khong du chud pa la yang yid dga' ba dang rjes su dran pa tsam byed do zhes gang zag lnga ni sems can kun gyi sgras bstan to//de rnams la phan skyed pa na sngar bshad pa'i rim pas phan 'dogs par byed pa zhes bya ba'i don to//de gang yin zhe na/ mdor byas pa ni mdor bsdus pa zhes bya ba sgrub pa'i thabs te/ bdag gis bshad pa ni so sor bstan pa yin gyi rang bzor brtsams pa ma yin no/ /de ni lung dang rtogs pa'i bdag nyid ston pa'i gsung gi rjes su 'brang ba yin no//ston pa'i dam chos rnam gnyis te lung dang rtogs pa'i bdag nyid do zhes bshad pa'i phyir ro/ /des ni brjod pa la sogs pa lnga po bstan pa yin te/ de la mdor byas zhes bya ba ni rjod pa'o/ /don bsdus zhes bya ba ni brjod par bya ba'o/ /brjod bya rjod byed 'brel ba ni//ma bstan par yang don gyis rtogs/ /'jig rten 'brel pa'i sgra dag ni/ /gnyis la gnas te ring thung bzhin/ /sems can kun la phan skyed pa/ /zhes bya ba ni dgongs pa'i dgos pa ste/ gzhan gyi don phun sum tshogs pa'o/ /dgos pa ni don gyis rtogs pa ste/rang gi don phun sum tshogs pa ma thob pa'i skyes bus gzhan gyi don ji ltar byed nus zhes bya ba'i don to/ /kha cig na re/ don bsdus rtogs par bya ba'i phyir/ /zhes bya ba'i rtogs pa'i tshig gis dgos pa 'chad par byed de de la don bsdus pa ni mngon du rtogs la bsgom pa'i rang bzhin gyi shes rab kyis bsgom zhing rdo rje 'chang gi sku thob par 'gyur ro zhes bya ba'i don to//de ltar brjod pa la sogs pa lnga po bstan nas/ sgrub pa'i thabs 'di gang las bsdus pa de nyid nyon mongs pa rnams las grol ba'i rgyu dang thar pa thob pa'i rgyu yin no zhes rgyud kyi phan yon bstan par bya ba'i phyir bshad par bya ste/thog med bag chags nyes pa rnams/ /'gro gsum rnam par rmongs byed pa/ /blo dang ldan pas de bstan te/ /rnal 'byor rgyud kyis sbyang bar bya/ /zhes smos pa la/ gang la thog ma med pa de ni thog ma med pa'o//des ni dngos po thams cad rten cing 'brel pa las byung ba yin gyis/ dbang phyug la sogs pas sprul pa ni ma yin no zhes bstan te/ dbang phyug la sogs pa rnams dpyad na med pa'i phyir ro/ /de la dbang phyug ces bya ba ni rtag pa yin nam mi rtag pa yin/gal te rtag pa yin na dngos po rnams ji ltar skyed par byed de/ skyed pa po ni rim dang cig car gyi don gyi bya ba byung na rtag pa nyid dang bral bar 'gyur ro/ /de bas na de ni byed pa po nyid ma yin no/ /byed pa yin na rtag pa nyams/ /rtag pa yin na byed pa min//phan tshun rnam par 'gal ba nyid/ /ji ltar gcig la rigs par 'gyur/ /'dir sbyor ba ni gang dang gang / /don gyi bya byed pa de ni/ /mi rtag pa ste bum pa bzhin no/ /rim pa dang cig car gyis 'gro ba dbang phyug gis byed do zhes rang bzhin gyi gtan tshigs kyi sbyor ba'o//gzhan yang nye bar len pa'i phung po lnga las zlog pa'i dbang phyug gzhan ni ma mthong ngo / /de bas ma mthong ba de ni ji ltar stobs kyis 'jog par byed/ /chos can med pa de la rtag pa dang byed pa nyid mi rigs te chos can med pa'i phyir ro/ /bdag ces bya ba dngos po med//byed pa po zhes ji ltar brjod/ /chos can yod na chos rnams ni/ /'jig rten pa ni rtogs par byed/ /ces byang chub sems kyi rnam 'grel las gsungs pa'i phyir ro/ /'dir sbyor ba ni gang dang gang chos can de dang de mi rtag pa'i chos dang 'brel pa yod de bum pa'i byas pa dang mi rtag pa bzhin no//phung po lnga la sogs pa'i dbang phyug ni mi dmigs pas de'i rtag pa dang byed pa nyid kyang med do zhes rang bzhin mi dmigs pa'i sbyor ba'o/ /rigs pa po dang bye brag pa rnams kyi 'dod pa'i bdag nyid kyang logs par brtags pa yin no/ /de la de rnams ni 'di skad smra ste/bdag nyid phung po dang bdag la phung po dang / phung po bdag dang / me dang bud shing bzhin du phung po dang bdag tha mi dad pa ste rtog pa bzhi'o/ /gzugs kyi phung po la sogs pa'i dbye bas rnam pa nyi shu 'jig tshogs la lta ba mi rigs te/ rigs pas 'di mi 'grub pa'i phyir ro//gal te phyogs dang po yin na de'i tshe phung po rnams mi rtag pas bdag kyang mi rtag par thal bar 'gyur ro/ /bar pa phyogs gnyis po'ang mi rigs te/ rtag pa dang mi rtag pa la rten dang / brten pa'i 'brel pa mi rigs pa'i phyir ro/ /gal te shing bcad pas bya rog ma bcad pa dang /bya rog shi bas shing mi 'jig go zhes/ ji ltar rten dang rten pa'i 'brel pa mi 'grub ces zer na/ de ni mi 'dra ste/ bya rog dang shing dag mi rtag pa'i phyir ro/ /phyi rol gyi dngos po rnams la sngar bshad pa'i tshad mas mi rtag pa nyid grub po/ /me dang bud shing bzhin yang mi rigs te/bud shing 'jig na me 'byung bas tha dad pas mi 'grub pa'i phyir ro/ /de bzhin du bdag 'jig pas phung po 'byung ba dang / phung po 'jig pas bdag 'byung ba'i phyir ro/ /dpyod pa pas brtags pa'i zhi ba'i tshangs pa dang / sna tshogs kyi tshangs pa ni mi rigs te/byas pa yin pas mi rtag par thal bar 'gyur ba'i phyir ro/ /grangs can gyis brtags pa'i de kho na nyid nyi shu rtsa lnga'i bdag nyid kyi skyes bu rtag par bshad pa mi rigs te/ rang bzhin nyid la de kho na nyid thams cad byung na de'i dgos pa med pa'i phyir ro/ / de'i rtogs pa nyid dgos pa yin no zhes zer na de ni yang dag pa ma yin te/ de'i bya ba ni blos gzung ba yin na ji ltar gzhan gyi bya ba byed pa'i skyes bu yin/ de'i lta ba po nyid gtso bo yin no zhes zer na de ni mi rigs te/ lta ba po nyid ni mig la sogs pa'i bya ba yin no zhes de byed na de dang 'dra bar thal bar 'gyur bas mi rtag pa nyid du 'gyur ro//btang snyoms yin na skyes bu nyid med par rigs kyi yod pa ni ma yin no/ /'byung ba sems su smra ba rnams la yang bems po'i ngo bor thal bar 'gyur bas 'gro ba dang 'ong ba la sogs pa med par 'gyur ro/ / rjes su dpag pa'i tshad ma ma yin no zhes tshad ma gang gis sun 'byin pa de nyid rjes su dpag pa yin no zhes 'jig rten rgyang pan pa ni rang gi tshig dang 'gal ba yin no/ /phyogs kyi gos can ngo tsha med pas kyang zho yang rnga mo yin la/ rnga mo yang zho yin no/ /zhes dngos po thams cad yongs su 'gyur na mi 'gyur ba'i chos can gang zag ji ltar yin/de dang 'dra ba gzhan dag du ma yang mi rigs par smra ba mi rung ngo / /de ltar bdag la sogs pa bkag nas/ dngos po thams cad rten cing 'brel pa las byung zhes sgrub po de nyid kyi phyir/thog ma med pa'i bag chags las byung ba'i nyes pa ni/ sems kyi rgyud rnyog par byed pas na 'dod chags la sogs pa'o/ /'o na thog ma med pa'i bag chags nyid ni bdag la sogs pa yin no zhes zer na de ni yang dag pa ma yin te/ gang gi phyir bag chags zhes bya ba rten cing 'brel ba las byung ba'i dngos po'i 'khrul pas med par yang byis pa rnams kyis brtags so//don dam par ni de nyid stong pa'o/ /de nyid kyi phyir dngos po stong pa la chos rnams stong par 'byung ba dang / rgyu dang 'bras bu ni brdzun pa'i rang bzhin no//de la brten nas gang skye ba/ /de ni de nyid skye ba min/ /gang zhig rang bzhin ma skyes pa/ /de ni ji ltar skyed pa yin/ /zhes bshad pa dang / de bzhin du/ stong pa yi ni chos rnams la/ /chos rnams stong pa nyid 'byung ngo / /zhes bshad pa'i phyir ro/ / gang gi phyir de ltar gyur pa'i dngos po rnams las stong pa'i rang bzhin gyi 'jig rten pha rol la sogs pa tha snyad du byas te/ kha thon mar me me long brgya/ /brag ca me shel sa bon rgyur/ /phung po so sor chags pa dang / /mi 'pho mkhas pa des gzung bya/ /zhes bshad pa'i phyir ro//gang gi phyir de ltar gyur pa'i dngos po rnams de ltar thog ma med pa'i bag chags kyi nyes pa ni 'dod chags la sogs pa nyon mongs pa dgu bcu rtsa brgyad de nyin dang mtshan mo rang bzhin brgya drug cu'i ngo bo sems can gyi khams thams cad la 'gro drug gi srid pa'i 'khor lor 'khor ba'i rgyu yin no//de rnams rnam par dpyad na phyi la sogs pa'i dbye bas rang bzhin med de/ de la nyon mongs pa rnams ni yul na mi gnas te/ yul ni bems po yin pa'i phyir ro/ /dbang po la mi gnas te/ dbang po rnams sems las byung ba ma yin pa'i phyir ro//sems la mi gnas te/ rten dang brten pa dag la med pa'i phyir ro/ /rgyu dang rkyen med na 'bras bu gang las byung / de ltar rang bzhin pa'i thog ma med pa'i bag chags las byung ba'i nyes pas 'gro ba gsum rnam par rmongs pa ste rmugs par byed pa yin no//de rnams thabs gang gis spang bar bya zhe na smras pa/ blo dang ldan pas de bltas te/ zhes bya ba ni de ltar yang bshad pa'i rigs pa'i khyad par gyis nyes pa de rnams yang dag par bltas te/ thos pa la sogs pa'i rang bzhin gyi shes rab kyis phyin ci ma logs par brtags la/rnal 'byor rgyud kyis sbyang bar bya/ /zhes bya ba ni rnal 'byor chen po'i rgyud kyis sbyang bar bya'i nyan thos la sogs pa'i theg pas ni ma yin no zhes bya ba'i tha tshig go/ /gang gi phyir nyan thos pa ni mi sdug pa bsgoms pa tsam gyis rus pa'i keng rus tsam de kho na nyid sgom par byed de/de ni yang dag pa ma yin te/ bag chags byung na yang 'khor ba'i rgya mtshor ltung ba'i phyir srin bu bzhin no/ /de ni dgun gyi dus su mi 'gul bar 'gyur zhing dpyid kyi dus su 'gul ba de bzhin du nyan thos pa ni 'gog pa'i snyoms par 'jug pa la zhugs te/yang nyon mongs pa 'byung bas 'khor ba par 'gyur ro zhes de rnams kyi de kho na nyid dang de thob pa'i rgyu yang yang dag pa ma yin no/ /rnal 'byor spyod pa rnams kyang rnam pa dang bcas pa dang / rnam pa med pa'i dbye bas rnam pa gnyis kyi rnam rig tsam chos kyi skur 'dod pa de rnams kyi ye shes ni yang dag pa ma yin te/gang gi phyir gcig dang du ma dang bral bas phyi rol gyi don med na/ 'dzin par byed pa rnam rig ni ji ltar rigs/ gal te rnam pa dang bcas pa yin na ji ltar don med/gal te rnam pa med pa yin na stong pa nyid rigs kyi rnam rig ni ma yin no/ /ji srid dmigs pa so sor snang ba de srid rnam par rtog pa'i ngo bo yin pas na 'khor ba'i phyogs so/ /spros pa thams cad rab tu zhi ba ni mya ngan las 'das pa yin no/ /ji skad du/ rkyen gzhan med pa zhi ba ste//spros pa rnams kyis ma spros pa/ /tha dad don min rnam mi rtog /de ni yang dag mtshan nyid do/ /zhes bshad pa'i phyir ro/ /de bas na rnal 'byor spyod pa'i phyogs kyis thar pa ni ma dag pa yin no/ /dbu ma pa rnams kyang gcig dang du ma dang bral ba'i phyir dngos po thams cad stong pa nyid du khas blangs pas chos kyi dbyings tha mi dad pa yang tha mal pa'i lus ma spangs pas yun ring pos byang chub thob par mi 'gyur te/thabs la mi mkhas pa'i phyir ro/ /de la de rnams ni sems can gcig gi phyir gos la sogs pa sbyin pas sbyin pa'i pha rol tu phyin pa rdzogs par 'dod pa de rnams kyi sbyin pa de ni pha rol tu phyin pa ma yin te/sems can gyi khams thams cad la yongs su gzung ba med pa'i phyir ro/ /de bas na bskal pa grangs med pa gsum gyis byang chub thob pa yin no zhes nyon mongs pa rnam par dag pa'i phyir theg pa chen po ni myur ba'i thabs ma yin no//bya ba'i rgyud la sogs pa'i rnal 'byor pa rnams kyang spros pa mang bas pha rol tu phyin pa'i rnal 'byor pa bzhin du shes par bya'o/ /de bas na rnal 'byor pa chen po'i rgyud nyid ni nyes pa de rnams sbyong ba'i thabs yin no//de la 'dod chags la sogs pa nyon mongs pa rnams bcom ldan 'das mi bskyod pa la sogs pa'i de bzhin gshegs pa'i rang bzhin yin no zhes bsgoms pas de yongs su gyur cing de'i ye shes thob nas tshe 'di nyid du rdo rje 'chang nyid 'thob par 'gyur ro/ /de bzhin du zhe sdang ni zhe sdang chen po'i ting nge 'dzin gyis dang /'dod chags ni 'dod chags chen po'i ting nge 'dzin gyis dang / gti mug ni gti mug chen po'i ting nge 'dzin gyis zlog ste 'gal ba'i chos kyi nyon mongs pa rnams sbyang bar bya ste/ rna ba la zhugs pa'i chu ni chu gzhan gyis dgug pa bzhin dang yan lag tshig pa ni mes bsros pa bzhin no zhes rnal 'byor pa chen po'i rgyud ni rnam pa sna tshogs pa'i thabs dang ldan pa yin no//de la rdo rje dang pad+ma snyoms par 'jug pas 'dod chags la sogs pa spong bar 'gyur ba dang khro bo'i ting nge 'dzin gyis zhe sdang spong bar 'gyur te/de dag gi rang bzhin yongs su shes pa'i phyir ro/ /rang bzhin mi shes pa rnams la spong ba rnams kyis dgos pa med do/ /'o na rnal 'byor gyi rgyud ni rnal 'byor chen po'i rgyud ji ltar yin zhe na snga ma'i tshig mi mngon pas bden par khros pa la khros pa bzhin no//rnal 'byor zhes bya ba don gang zhig yin zhe na/ stong pa nyid dang snying rje dbyer med pa ni rnal 'byor te yi ge'i don to/ /thabs dang shes rab snyoms par 'jug pa ni rnal 'byor te spyi'i don to/ /rdo rje dang pad+ma snyoms par 'jug pa ni rnal 'byor te sbas pa'o/ /'od gsal ba dang gnyis su med pa'i rtogs pa ni rnal 'byor te mthar thug pa'o//so sor sdud dang bsam gtan dang / /srog dang rtsol ba 'dzin pa dang / /rjes su dran dang ting 'dzin ni/ /yan lag drug gi rnal 'byor bshad/ /ces pa dgongs pa ma yin pa'o/ /dkyil 'khor bzhi 'byung ba ni rnal 'byor te dgongs pas bshad pa'o//le'u bcu bdun gyi rgyud ni rnal 'byor te sgra ji bzhin pa'o/ /sems kyi rtog pa 'gog pa ni rnal 'byor te nges pa'i don to/ /thabs dang shes rab snyoms 'jug pa/ /rnal 'byor zhes ni bshad pa yin/ /zhes gsungs pa'i phyir ro//de ltar na rnal 'byor gyi rgyud ni nyon mongs pa thams cad sbyang ba'i phyir thabs yin no zhes rab tu bsgrubs nas/ da ni de'i rjes su 'brang bas lus kyi nyon mongs pa thams cad spang bar bya ba'i phyir bshad par bya ste/ 'dod pa lnga ni yongs spangs nas/ /dka' thub kyis ni ma gdungs par//rnal 'byor rgyud kyi rjes 'brangs la/ /bde bas byang chub bsgrub par bya/ /zhes smos pa la/ rnal 'byor rgyud kyi rjes 'brangs la/ /zhes bya ba ni rnal 'byor chen po'i rgyud la brten nas so/ /bde bas ni 'dod pa'i yon tan dang longs spyod kyi sgo nas so//byang chub ni rdo rje 'chang gi go 'phang ste/ bsgrub par bya ba ni rdzogs par bya'o/ /ci'i phyir zhe na/ 'dod pa'i yon tan lnga ni gzugs la sogs pa yongs su spangs te bral nas dka' thub kyis ni lus ngal ba'i rgyur gyur pa brtul zhugs dang sbyangs pa'i yon tan la sogs bsam lus gdung bar bya'o//bde ba dang ldan pa'i sems ni mnyam par gzhag par 'gyur ro zhes 'byung ba'i phyir ro/ /mnyam par gzhag pa'i sems kyis yang dag par gyur pa shes par 'gyur ro/ /'on 'dod pa'i yon tan lnga ni sems rnam par g.yeng pa'i rgyu yin pas na de rnams kyis ji ltar byang chub thob par 'gyur zhe na smras pa/thabs la mkhas pa dang ldan pa'i byang chub sems dpa' rnams kyi nyon mongs pa rnams ni phan 'dogs par gyur pa yin te/ dper na ke ta ke'i me tog spos kyi glang pos zos na gla rtsi'i ngo bor 'gyur ro//de nyid tha mal pa'i glang pos zos na mi gtsang bar yongs su 'gyur ro/ /de bzhin du dkon mchog brtsegs pa'i mdo las kyang 'di lta ste/ 'od srungs bu ram shing dang 'bras sA lu'i zhing la lud kyis phan 'dogs pa de bzhin du byang chub sems dpa' sems dpa' chen po la nyon mongs pa rnams phan 'dogs par 'gyur ro//de bzhin du dug gi de kho na nyid mi shes pa'i skyes bus dug zos na 'chi bar 'gyur ro/ /de nyid dug gi de nyid shes pas zos na bdud rtsi nyid du 'gyur ro/ /rnam par snang mdzad mngon par byang chub pa'i rgyud las/ 'dod chags zhe sdang gti mug ni/ /'jig rten la ni dug chen gsum/ /dug nyid rnam par bcom pa yis/ /dug ni dug nyid med par byas/ /zhes bshad pa'i phyir ro/ /don yod grub pa'i rgyud las kyang / /gang gis rmongs pa 'ching 'gyur ba/ /des ni mkhas pa grol bar 'gyur//de ltar byang chub bsgom pa yi/ /thams cad rnam par ldog pa yin/ /zhes gsungs so/ /'dir man ngag ni re zhig las dang po pa'i rnal 'byor pa spros pa dang bcas pa'i spyod pa la gnas par gyur pas lha khang sum brtsegs kyi 'og khang du bza' ba la sogs pa gzhag ste/bar khang du rol mo la sogs pa bzhag la/ khang tog tu rnam pa sna tshogs pa'i gdan la 'dug ste/ dam tshig gi phyag rgya bzhi lo bcu gnyis pa'am/ bcu drug pa'am nyi shu lon pa gzugs bzang ba legs par brgyan pa dkyil 'khor du rim gyis bzhag la/dang po'i sbyor ba la sogs pa'i rim gyis lha'i rnam pa thams cad byas la bza' ba dang btung ba la sogs pa dang bdud rtsi myong bas tshim par byas la/ bud pa'i dra ba la sogs pas bde ba nyams su myong zhing bde ba la sogs pa'i rim gyis 'od gsal ba mngon du bya'o//de bas na rgyud 'di nyid las bde bas byang chub bsgrub par bya'i/ lus gdungs pas ni ma yin no/ /zhes so/ /da ni rnal 'byor pa rnams kyi dbang bstan par bya ba'i phyir bshad par bya ste/ de na 'di ni sdom gnas 'di/ /rtag tu mi phyed brtul zhugs gang //sku gsung thugs kyi rdo rje yi/ /bsgrub pa dag kyang brtsam par bya/ /zhes smos pa la don ni 'di yin te/ des na ni sngar bshad pa'i bde ba'i thabs kyi rgyu yis so/ /'dir dpal gsang ba 'dus pa'i rgyud las sdom pa bsrungs pa gang yin pa de rnams la gnas pa'i rnal 'byor pa gang yin pa de ni brtul zhugs so//rtag tu ni dus gsum du yang mi phyed pa ste phyir mi ldog pas bcom ldan 'das sku gsung thugs kyi rdo rje ni rdo rje 'chang chen po'i sgrub pa ste mngon du byed pa'i thabs brtsam pa ni brtsam par bya'o/ /don ni 'di yin te/ re zhig dang po sbyin pa la sogs pa pha rol tu phyin pa drug gi spyod pa bsgrub pa'i don du snying rje chen po'i dbang gis byang chub kyi sems bskyed cing gtong ba la sogs pa la 'jug pa zab pa dang rgya che ba'i bdag nyid kyi sngags kyi theg pa chen po la mos pa dang ldan pas rdo rje slob dpon gyi spyan sngar phyin te/dkon mchog gsum la skyabs su 'gro ba la sogs pa sngon du 'gro bar maN+Dal byas nas mchod cing gsol ba gdab pa mang por byas nas/ mgu bar gyur pa'i slob dpon des dpal gsang ba 'dus pa'i dkyil 'khor bri ba sngon du 'gro bas slob dpon dang / gsang ba dang / shes rab dang / bzhi pa'i dbang bskur dang / bza' bar bya ba dang / bsrung ba'i dam tshig dang / sdom pa sbyin pa'i sngon du 'gro bas dbang bskur ba'i rdo rje brtul zhugs dang / spyod pa'i brtul zhugs dang / rig pa'i brtul zhugs dang ldan pa/ pha rol rgol ba rnams kyis mi zlogs pa/ dpal gsang ba 'dus pa'i rgyud phyin ci ma log par bshad pa rnam pa bzhi la sogs pa'i rim gyis bla ma'i zhal nas khong du chud de rig pa bzhi'i rim gyis bsams la bdag dang gzhan la phan pa'i phyir slob dpon gyi spyan sngar phyin te/mchod pa rnam pa lngas mchod cing thal mo sbyar te/ bcom ldan 'das slob dpon dam pa 'khor ba'i sems can thams cad kyi sdug bsngal las dgrol ba'i don du thugs rje bskyed pa/ bdag ni bcom ldan 'das rdo rje 'chang ba bsgrub par 'dod de/ de bas na slob dpon gyi zhal snga nas phyis dben par bsgom par bya ba'i phyir bdag la rjes su gnang bar mdzod cig ces gsol ba gdab par bya'o//de'i rjes la slob ma 'di skal ba dang ldan pa yin no zhes nges par byas la/ rdo rje slob dpon gyis de la smra bar bya ste/ rigs kyi bu rang dang gzhan la phan par bya ba'i phyir dben pa la 'dug ste/ji ltar thos pa de bzhin du bsgom pa'i rang bzhin gyi shes rab kyis rdo rje 'chang gi dkyil 'khor bsgrub par gyis shig ces des rjes su gnang bas de'i zhabs la gtugs te/ khyed kyi bkas rdo rje 'chang gi dkyil 'khor bdag la myur du sgrubs shig ces smras la dben par song ste/sku gsung thugs kyi rdo rje bsgrub par bya ba'i phyir bsgom pa la brtson par bya'o zhes ngag gi don to/ /de ltar rjes su gnang ba byang chub bsgrub pa'i phyir snod du rung ba yin gyis gzhan du ni ma yin no/ /'dir sdom pa'i sgra ni nye bar mtshon pa'i don te/dam tshig la gnas pa yang bshad par bya'o/ /de la rig pa'i dbang bskur la/ /rigs lnga'i dam tshig ni dkon mchog gsum la skyabs su 'gro ba dang / rdo rje dang / dril bu dang / slob dpon 'dzin pa dang / sbyin pa bzhi dang / dam pa'i chos rnam pa gsum po 'dzin pa dang /ci nus pas mchod pa'i cho ga'o/ /sdom pa ni lnga ste/ mi dge ba bcu spang ba dang / theg pa dman pa la 'dod pa mi byed pa dang / chang spong ba dang / sems can gyi don la rgyab kyis phyogs pa spong ba dang / lha la sogs pa'i mtshan ma la sogs mi 'gom pa'o//phyir mi ldog pa'i dbang bskur ba la dam tshig ni bcu bzhi ste/ slob dpon la smod pa dang / bde bar gshegs pa'i bka' las 'das pa dang / rdo rje spun la smod pa dang / byams pa chen po spong ba dang / byang chub kyi sems gtong ba dang / theg pa gsum la smod pa dang /skal ba med pa la gsang ba'i chos ston pa dang / rang gi phung po smod pa dang / chos rang bzhin med pa la som nyi za ba dang / gdug pa can la byams pa dang / chags pa dang bral ba dang / chos rnams la mtha' gnyis gzhag pa dang / dad pa'i sems smod pa dang / ji snyed pa'i dam tshig la mi brten pa dang / shes rab kyi pha rol tu phyin pa'i rang bzhin bud med la smod pa'o zhes rtsa ba'i ltung ba bcu bzhi spong ba ni dam tshig go/ /mi dga' ba'i rigs bsten pa dang / dam tshig rnams mi sbyor ba dang / tshogs kyi dkyil 'khor la rtsod pa dang / dad pa'i sems smod pa dang /zhag bdun gyi bar du nyan thos pa'i nang na gnas pa dang / rnal 'byor pa'i nga rgyal dang / dad pa dang ldan pa'i sems can rnams la log pa'i chos ston pa dang / ma nges pa la chos ston pa dang / ma sbyor ba la gsang ba ston pa dang / snod ma yin pa la zab mo'i chos ston pa ste/kha na ma thob bcu mi byed pa ni sdom pa'o/ /gsang ba'i dbang bskur ba la dam tshig gsum ste/ rdo rje'i de kho na nyid dang / dril bu'i de kho na nyid dang / phyag rgya'i de kho na nyid do/ /sdom pa gsum ste/ sgron ma myang ba dang / lcags kyu myang ba dang / b+ha ga la tsum+ba na'o//shes rab kyi dbang bskur ba la dam tshig lnga ste/ srog gcod pa dang / ma sbyin par len pa dang / 'dod pas log par spyod pa dang / brdzun du smra ba dang phra ma'o/ /sdom pa ni lnga ste/ gti mug gi sdom pa dang / zhe sdang gi sdom pa dang / 'dod chags kyi sdom pa dang / nga rgyal gyi sdom pa dang /phrag dog gi sdom pa'o/ /de rnams la gnas par gyur na zhes bya ba'i tha tshig go/ /de bzhin du mi phyed pa zhes bya ba ni nyan thos la sogs pas mi g.yo ba ste drang ba'i don to/ /byang chub kyi sems mi gtong ba ni mi phyed pa ste nges pa'i don to/ /spyod pa'i brtul zhugs la mi phyed pa ste sgra ji bzhin pa'o//ku go da ha na la brten pa ni mi phyed pa ste sgra ji bzhin ma yin pa'o/ /'dod pa'i gzugs la gnas pa ni dgongs pas bshad pa'o/ /gnyis su med pa'i ye shes la dga' ba ni dgongs pas ma yin pa'o/ /dam tshig dang sdom pa la brten pa ni yi ge'i don to//dkyil 'khor gyi 'khor lo bsgom pa la brtson pa ni spyi'i don to/ /snyoms par 'jug pa la mkhas pa ste sbas pa'o/ /pad+ma can dang dung can dang / /ut+pal can dang / sbyor ba'i dbye bas 'dod ma la dga' ba ste mthar thug pa'o/ /rdo rje'i brtul zhugs dang / spyod pa'i brtul zhugs dang / rig pa'i brtul zhugs dang ldan pa ni brtul zhugs te drang ba'i don to/ /'od gsal ba rtogs pas brtul zhugs te nges pa'i don to/ /ral can gcer bu mgo reg dang / /gtsug pud can dang 'du 'dzi bral/ /rtags ni de de sna tshogs pas/ /mngon par byang chub 'dod pa yin//zhes bshad pa'i phyir ro/ /sku rdo rje ni rnam par snang mdzad do/ /gsung rdo rje ni 'od dpag tu med pa'o/ /thugs rdo rje ni mi bskyod pa ste/ yi ge'i don to/ /sku rdo rje ni yi ge oM mo/ /gsung rdo rje ni yi ge AH 'o/ /thugs rdo rje ni yi ge hUM ste/ spyi'i don to/ /sku rdo rje ni rus sbal gyi rtsa dang /gsung rdo rje ni zla ba'i rtsa dang / thugs rdo rje ni 'dod pa'i gdugs kyi rtsa ste sbas pa'o/ /sku rdo rje ni chags pa dang / gsung rdo rje ni chags pa dang bral ba dang / thugs rdo rje ni chags pa bar ma ste/ mthar thug pa'o/ /sku rdo rje ni khrag dang / gsung rdo rje ni shu kra dang /thugs rdo rje ni dri chab ste/ dgongs pas bshad pa'o/ /sku rdo rje ni snang ba'o/ /gsung rdo rje ni snang ba mched pa'o/ /thugs rdo rje ni snang ba nye bar thob pa ste/ dgongs pa ma yin pa'o/ /sku rdo rje ni khru nyi shu pa'i dkyil 'khor dang / gsung rdo rje ni khru bcu drug pa'i dkyil 'khor dang //thugs rdo rje ni khru gnyis pa'i dkyil 'khor te sgra ji bzhin pa'o/ /sku rdo rje ni tshangs pa'o/ /gsung rdo rje ni dbang phyug chen po dang / thugs rdo rje ni khyab 'jug ste/ sgra ji bzhin ma yin pa'o/ /sku rdo rje ni zhib dang / gsung rdo rje ni dbang dang / thugs rdo rje ni mngon spyod de/ drang ba'i don to//sku rdo rje ni sku'i dkyil 'khor dang / gsung rdo rje ni gsung gi dkyil 'khor dang / thugs rdo rje ni thugs kyi dkyil 'khor te nges pa'i don to/ /man ngag ji lta ba bzhin du bsgom pa ni bsgrub pa zhes bya ba'i tha tshig go/ /da ni snying rje chen po mngon spyod du gyur pa sngon du 'gro bas khyad par gyi gnas la brten pa bshad par bya ste//dgon pa chen po'i sa phyogs ni/ /me tog 'bras bu sogs kyis brgyan/ /ri bo dben pa dag tu ni/ /dngos grub thams cad bsdus pas 'grub/ /ces smos pa la/ 'dir dang por snying rje chen po'i sems bskyed la/ phyis gnas la brten par bya ste/dgon pa chen po'i sa phyogs ni khyad par gyi gnas yin te/ rdzing bu la sogs pas yid 'phrog pa'i phyir ro/ /me tog 'bras bu sogs kyis brgyan pa ni ri bo'i khyad par ro/ /dben pa ni gzhan yang dben pa'i sa la'o/ /'jig rten pa dang 'jig rten las 'das pa'i dngos grub thams cad bsdus pa ni gang du bsdus par gyur pa de ni dngos grub thams cad bsdus pa ste sangs rgyas nyid do//sgrub pa ni bsgrub par bya ba ste drang ba'i don to/ /nam mkhar rtogs pa'i sbyor ba yis/ /phung po dgon pa chen por 'dod/ /gnas med gnas kyi sbyor ba yis//sa yi phyogs ni gnas chen po/ /dpag bsam shing ltar longs spyod ni/ /sna tshogs dngos grub me tog can/ /sprul pa'i 'bras bu kun mdzes pa'o/ /yang dag byang chub ri bo yin/ /rang bzhin med pa dben pa la/ /sangs rgyas mdzes te bsgrub par bya/ /zhes nges pa'i don to//dgon pa chen po ni chos 'byung gi phyag rgya ste/ de'i sa phyogs ni 'dod pa'i gdugs so/ /'bras bu ni byang chub kyi sems 'dzag pa zla ba ma'i rtsa'o/ /me tog ni rang byung gi me tog 'dzag pa rus sbal ma'i rtsa'o/ /sogs pa'i sgras ni bshang gci dang ldan pa'i lhas byin ma dang /nor rgyal ma'i rtsa gzung ngo / /de rnams kyis brgyan pa'i b+ha ga la'o/ /ri bo ni sor bzhi'i tshad tsam gyi mo'i dbang po'i rtsa'o/ /de nyid chags pa la sogs pa spong bar byed pas na dben pa'o/ /de la dngos grub thams cad bsdus pa ni thig le tsam sgrub pa ste/ dgongs pas bshad pa'o//dgon pa chen po ni gsang ba'i dkyil 'khor ro/ /de nyid sa phyogs te gsang ba yin pa'i phyir ro/ /me tog 'bras bu sogs kyis brgyan pa ni lte ba'i dkyil 'khor ro/ /ri bo ni snying ga'i dkyil 'khor ro/ /dben pa ni mgrin pa'i dkyil 'khor ro//de la bsgrub pa ste dgongs pa ma yin pa'o/ /dgon pa chen po ni 'dod pa'i gdugs kyi nam mkha'o/ /sa phyogs ni lha sbyin ma'i nam mkha'o/ /me tog 'bras bu sogs kyis brgyan pa ni zla ba ma'i nam mkha'o/ /ri bo ni rus sbal ma'i nam mkha'o/ /dben pa ni nor rgyal ma'i nam mkha' ste sgra ji bzhin ma yin pa'o//ji skad du/ b+ha ga'i dbus na nam mkha' gang / /nam mkha' lnga yis brgyan pa ste/ /lte ba ge sar dang ldan pa/ /'dab ma brgyad kyis rnam par mdzes/ /shu kra'i gzugs can bdud rtsi ni/ /der gnas rtag tu 'dzag par 'gyur/ /zhes bshad pa'i phyir ro//dgon pa chen po'i ni dbyangs so/ /me tog 'bras bu sogs kyis brgyan pa ni gsal byed rnams so/ /de rnams kyis nye bar mtshon pa ni ri bo dben pa ste lus so/ /de la bsgrub par bya ste sgra ji bzhin pa'o/ /dgon pa chen po ni pad+ma can no/ /sa phyogs ni dung can ma'o//me tog 'bras bu sogs kyis brgyan pa ni ut+pal can no/ /ri bo dben pa ni b+ha ga'o/ /de la pad+ma can ni 'bring gi pad+ma'o/ /dung can ni g.yon pa'i pad+ma'o/ /ut+pal can ni phra mo'i pad+ma'o/ /ba ni rgyas pa'i pad+ma'o/ /de rnams la dngos grub thams cad bsdus pa bsgrub par bya ste sbas pa'o//dgon pa chen po ni las kyi phyag rgya'o/ /sa phyogs ni dam tshig gi phyag rgya'o/ /me tog 'bras bu sogs kyis brgyan pa ni ye shes kyi phyag rgya'o/ /ri bo dben pa ni phyag rgya chen po'o/ /de rnams la sgrub pa ste yi ge'i don to/ /dgon pa chen po ni snying gar yi ge hUM ngo / /me tog 'bras bu sogs kyis brgyan pa ni lkog mar yi ge AH'o//ri bo dben pa ni spyi bor yi ge oM mo/ /de la bsgrub pa ste spyi'i don to/ /dgon pa chen po ni chos kyi sku'o/ /me tog 'bras bu sogs kyis brgyan pa ni ye shes kyi sku'o/ /ri bo dben pa ni de dang tha mi dad pa rdo rje'i sku'o/ /de la bsgrub par bya ste mthar thug pa'o//de la bsdus pa'i don ni 'di yin te/ re zhig dang por skye bos dben pa'i sa phyogs su bdud rtsi lngas gru bzhi pa'i dkyil 'khor byugs la/ der bya 'gan la sogs pa'i 'jam pa'i stan la 'dug ste/ sdug bsngal du mas mnan pa'i khams gsum pa mngon du byas la/sems can thams cad bde ba dang / sbyor bar 'dod pa'i rnam pa byams pa dang / sems can thams cad sdug bsngal thams cad dang bral bar 'dod pa'i rnam pa'i snying rje dang 'phags pa dang so so skye bo'i bsod nams la rjes su yi rang ba'i rnam pa'am/sems can thams cad byang chub la gzhug par bgyi zhes de'i rnam pa dga' ba dang / sems can thams cad lan cig snod min pa ste/ smin pa'i dus gdul bar bgyi zhes btang snyoms te/ rnam par sdang ba dang / rnam par 'tshe ba dang / rnam par mi dga' ba dang /'dod pa'i 'dod chags rnams kyi gnyen por gyur pa mtha' yas pa'i sems can rnams la dmigs pa tshad med pa bzhi ste/ rnal 'byor bsrung ba'i don du bsgom par bya'o/ /ji skad du/ byams pa dang / snying rje dang / dga' ba dang / btang snyoms ni bde ba dang /sdug bsngal ba dang bsod nams dang / bsod nams ma yin pa'i yul la bsgoms pas sems dang bar 'gyur ro zhes 'byung ngo / /da ni gnas bsrung bar bya ba'i phyir bsgom pa bshad par bya ste/ 'jam pa'i stan la 'dug nas ni/ /sems dpa'i skyil krung legs gnas te//zhe sdang rdo rje'i ting 'dzin gnas/ /gnas bsrung ba ni bsam par bya/ /zhes smos pa la/ rnal 'byor bsrung ba'i 'og tu rnal 'byor pas cig car du bcom ldan 'das zhal gcig pa/ phyag gnyis pa/ rdo rje dang dril bu 'chang ba dkar zhing zhi ba rdo rje 'chang chen pos sems dpa'i skyil mo krung gis gnas pa bsgom par bya'o//de nas bgegs bskrad par mngon par dgongs nas/ thugs ka nas spros pa'i cung zad khros pa'i in+d+ra nI la'i kha dog 'dra ba'i zhe sdang rdo rje dang dbyer med par byas la bcom ldan 'das de nyid du bdag nyid bsgom par bya ste/gang gi phyir khro bo'i dkyil 'khor ni zhe sdang rdo rje las byung ngo zhes de nyid bsgom par bya bar rigs kyi mi bskyod pa ni ma yin no/ /thugs rdo rje'i dbye bas gnyis te/ zhe sdang rdo rje dang mi bskyod pa'o/ /de la zhe sdang rdo rje ni mche ba rnam par gtsigs pa kha dog mthing nag go//mi bskyod pa ni sgeg cing zhi ba in+d+ra nI la'i kha dog go/ /gnas bsrung ba ni phyogs bcu'i bgegs rab tu zhi ba'i mtshan nyid bsam par bya zhes drang ba'i don to/ /'jam pa'i stan ni shes rab kyi mtsho skyes kyi ze 'bru ste/ 'dod pa'i gdugs kyi rtsa'o/ /de la 'dug nas ni de'i reg pa tsam la dga' ba'o//sems dpa'i skyil mo krung ni rdo rje pad+ma snyoms par 'jug pa ste/ des legs gnas te bde bar gnas par gyur nas so/ /zhe sdang rdo rje ni nyon mongs pa thams cad bcom pa'i mtshan nyid 'od gsal ba ste/ de nyid ting 'dzin ni sems rtse gcig pa bskyed pa'i phyir ro//der gnas pa ni 'jug par 'gyur zhing / gnas bsrung pa ni sgo bcu'i gnas las srog la sogs pa rlung bcu 'gog pa bsam par bya zhes nges pa'i don to/ /da ni de nyid bstan par bya ba'i phyir bshad par bya ste/ 'bar ba'i 'od 'phro 'jigs par byed/ / nyi ma la gnas hUM las byung / /g.yon brkyang ba yis gnas la gnas/ /khro bo bcu ni spro bar bya/ /zhes smos pa la sngar bshad pa'i zhe sdang rdo rje'i ting nge 'dzin la dmigs te/ thugs ka nas rang dang 'dra ba'i reg bya rdo rje ma spros la des b+ha gar hUM yongs su gyur pa las sna tshogs rdo rje'i steng du raM yongs su gyur pa las byung ba'i nyi ma'i dkyil 'khor gyi dbus su snying ga'i pad+ma la gnas pa'i ting nge 'dzin sems dpa'i yig 'bru las 'od zer gyi 'khor lo ba spu'i bu ga thams cad las spros pa lcags kyu'i rnam pa des phyogs bcu'i 'jig rten gyi khams na gnas pa'i khro bo'i rgyal po rnams bkug cing ngag gi lam nas zhugs te rtsa dbu ma'i lam nas byang chub kyi sems kyi rnam par spros la thig le yongs su gyur pa las byung ba'i yi ge hUM bcu bsgoms te/de yongs su gyur pa las gtsigs pa'i rdo rje bcu 'bar ba'i 'od 'phro ba hUM gis mtshan pa bsams te/ spro ba dang bsdu ba sngon du 'gro bar yongs su gyur pa las byung ba'i gshin rje mthar byed la sogs pa khro bo bcu ji ltar bshad pa'i dbyibs dang kha dog dang phyag mtshan dang ldan pa bskyed la/de rnams bskyed pa'i sngon du hUM las byung ba gnod mdzes kyi rgyal po zhal gsum phyag drug pa kha dog sngon po nyi ma'i dkyil 'khor gyi steng du gnas par bsams te/de nas lha mo'i ba spu'i bu ga thams cad kyi sgo nas khro bo bcu gcig spros te/ bdag nyid kyi phyogs bcu dang mdun du nyi ma'i dkyil 'khor la gnas par bsam par bya'o/ /de la gshin rje mthar byed ni sngon po/ sngon po dang / dkar po dang / dmar po'i zhal mnga' ba/ dbyug to dang / 'khor lo dang / rdo rje dang / pad+ma dang / sdigs mdzub dang bcas pa'i zhags pa dang dril bu 'chang ba/ ma he'i steng du gshin rje mnan nas g.yas brkyang gis gnas pa'o/ /shes rab mthar byed dkar po/dkar po dang / sngon po dang / dmar po'i zhal mnga' ba/ dbyig pa dang / ral gri dang / rdo rje dang / nor bu dang / sdigs mdzub dang bcas pa'i zhags pa dang dril bu 'dzin pa/ khyab 'jug gi steng du g.yon brkyang bas gnas pa'o/ /pad+ma mthar byed dmar po/ dmar po dang /sngon po dang / dkar po'i zhal mnga' ba/ pad+ma dang / ral gri dang / rdo rje dang / nor bu dang / sdigs mdzub dang bcas pa'i zhags pa dang / dril bu 'chang ba/ lha chen po'i steng du rkang pa mnyam pas gnas pa'o/ /bgegs mthar byed ni ljang gu/ ljang gu dang /sngon po dang / dmar po'i zhal mnga' ba rdo rje dang / ral gri dang / pad+ma dang / nor bu dang / sdigs mdzub zhags pa dang / dril bu 'chang ba log 'dren gyi steng du mi mnyam pa'i rkang pas gnas pa'o/ /mi g.yo ba dang / 'dod pa'i rgyal po dang / dbyig sngon dang / stobs po che dang / gnod mdzes dang gtsug tor 'khor lo ste zhal gsum phyag drug pa/ kha dog nag po/ g.yon brkyang bas nyi ma la gnas pa/ gtso bo'i phyag gis lcags kyu dang / rtse gsum dang / dbyig pa dang / ral gri dang / 'khor lo dang / rdo rje 'chang ba dang / lhag ma rnams kyis gshin rje mthar byed la sogs pa bzhin du phyag mtshan 'dzin pa bsgom par bya'o/ /khro bo de dag kyang mi'u thung lto 'phyang ba/ sku rgyas pa/ mche ba rnam par gtsigs pa ha har sgrogs pa/ skra 'bar ba gyen du brdzes pa/ nyi ma dang zla ba dang me'i rang bzhin spyan gsum pa/smin ma dang / sma ra dang / dbu skra kham pa/ ral pa'i thor tshugs 'jog pos bcings pa/ pad+ma dang / pad+ma chen pos rna cha byas pa/ nor rgyas kyi bus tshangs skud btang ba/ dung skyong dang rigs ldan dag gis rkang gdub byas pa/ mtha' yas kyis stag gi bags pa'i sham thabs bcings pa/hu lu tas byas pa'i gdu bus brgyan pa/ ha har dgod pas brag rnams 'jig pa/ so rnams kyis mchu 'dzin pa bsam par bya'o/ /de nyid kyi phyir hUM las byung / /zhes bya ba ni yi ge hUM bcu las byung ba'o/ /g.yon brkyang ba zhes bya ba ni nye bar mtshon pa ste/sngar bshad pa'i stang stabs kyis gnas pa zhes bya ba'i don to/ /'bar ba'i 'od 'phro 'jigs par byed/ /ces bya ba ni mtha' yas pa'i khro bo'i rgyal po spro bar byed pa'o/ /bcu zhes bya ba ni gnod mdzes kyi rgyal po bcu gcig pa yang spro bar bya'o/ /de la bka' sbyin par bya ba'i phyir bshad par bya ste/phyogs bcu'i dkyil 'khor rtse mor ni/ /rim pa bzhin du bsam bya ste/ /bgegs kun rnam par gzhig pa'i phyir/ /gnod mdzes bka' stsal phur bus gdab/ /ces smos pa la/ khro bo bcu po de dag phyogs bcu'i dkyil 'khor rtse mor te/bdag nyid kyi phyogs bcu'i mthar rim pa bzhin ni rim pa ji lta ba bzhin du shar la sogs par rim gyis bsam par bya ste zhes bya ba ni dgod cing gsal bar bltas la/ de'i nang du bcu gcig pa gnod mdzes ni bka' nyan gyi gzugs can bka' stsal pa ni bka' byin nas bgegs kun ni 'jig rten skyong ba ste/dbang po la sogs pa de rnams 'jig par bya ba'i phyir phur bus gdab pa'i cho ga bya ste drang ba'i don to/ /'od gsal ba la skad cig ma bcu ste/ smig rgyu la sogs pa rtags lnga dang / de 'das pa'i skad cig ma lnga'o/ /de rnams rlung bcu po'i bgegs 'gog par byed pas na phur bu ste/'od gsal ba sngon du byed pa ni gnod mdzes te nges pa'i don to/ /phur phu gdab pa'i sngags bshad par bya ste/ oM suM b+ha ni suM b+ha hUM hUM phaT/ gr-ih+Na gr-ih+Na hUM hUM phaT/ gr-ih+NA ba ya gr-ih+NA pa ya hUM hUM phaT/ A na ya ho b+ha ga bAn bid+ya rA dza badzra hUM hUM phaT/ces smos pa la/ de nas zhe sdang rdo rjes bgegs kyi bdag po dgug par bya ba'i don du sdigs mdzub dang mthe bong gi phyag rgyas phyogs bcur bskul ba'i phyir sngags 'dis gnod mdzes la bka' stsal to/ /oM ni rdo rje 'chang ba'o/ /suM b+ha ni bod pa'o//ni sum b+ha ni bgegs gnon pa'o/ /hUM ni mi bskyod pa'i snying po'o/ /hUM gnyis pa ni snying po bskul ba'o/ /phaT ni gsod pa la'o/ /gr-ih+Na gr-ih+Na ni song ba rnams chings shig chings shig pa'o/ /gr-ih+NA pa ya gr-ih+NA pa ya ni 'khor rnams kyis chings shig chings shig pa'o//bcings nas bdag gi gam du A na ya ho zhes khrid cig pa'o/ /b+ha ga bA na badzra zhes bya ba ni dad pas dgug pa'o/ /lhag ma ni snga ma bzhin no/ /sngags de gnod mdzes kyi rgyal po thal mo sbyor zhing nyan par bsgom par bya'o/ /song nas ci byed ce na/ smras pa/ khro bo'i gzugs can 'di yis ni//bgegs kyi dbang po nyid bkug nas/ /blo dang ldan pas sbyor ba yis/ /cho ga bzhin du phur bus gdab/ /ces smos pa la/ khro bo'i gzugs can de nyid ni gnod mdzes kyi rgyal po'i gzugs dang / khro bo bcu'i gzugs kyis so/ /bgegs kyi dbang po ni brgya byin la sogs pa'o//bkug pa ni mnan nas so/ /blo dang ldan pas ni dran pa dang ldan pa'i ngang tshul can gyi rnal 'byor pas so/ /sbyor ba yis ni phur bus gdab pa'i sbyor ba'i ting nge 'dzin gyis so/ /cho ga bzhin du ni le'u bco lnga pa las gsungs pa'i bsam gtan gyis de rnams phur bus gdab par bya'o//de'i don ni 'di yin te/ zhe sdang rdo rje'i bka' blangs la/ /gnod mdzes kyi rgyal pos rdo rje sems dpa' phyogs bcur spros la/ des brgya byin la sogs pa 'jig rten skyong ba rnams dgug cing zhe sdang rdo rje'i phyogs bcur 'jog par byed par bsam par bya'o//de la shar phyogs su brgya byin dkar po gdong gcig pa/ lag pa gnyis pa/ rdo rje dang ut+pal 'dzin pa/ glang po che la gnas pa/ bde sogs ma dang bcas pa/ lho phyogs su gshin rje kha dog sngon po gdong gcig pa/lag pa gnyis pa/ dbyig pa dang mi mgo 'dzin pa/ ma he la gnas pa/ nag mo dang bcas pa/ nub phyogs su chu lha dkar po gdong gcig pa/ lag pa gnyis pa/ lag pa gnyis kyis klu'i zhags pa 'dzin pa/ chu srin la zhon pa/ mdzes ma dang bcas pa'o/ /byang phyogs su rnam thos sras dmar po gdong gcig pa/ lag pa gnyis pa/ seng ge'i rgyal mtshan dang ne'u le'i gter 'dzin pa/ seng ge'i khri la gnas pa/ zla ba'i 'od dang bcas pa'o/ /me'i mtshams su me lha dmar po gdong gcig pa/lag pa gnyis pa/ gun+d+he dang phreng ba 'dzin pa/ ne tso la zhon pa swA hA ma dang bcas pa'o/ /bden bral gyi mtshams su bden bral nag po gdong gcig pa/ lag pa gnyis pa/ ral phub 'dzin pa/ yi dwags la gnas pa/ rnam par gtsigs ma dang bcas pa'o//rlung gi mtshams su rlung lha ljang gu gdong gcig pa/ lag pa gnyis pa/ rgyal mtshan 'dzin pa/ sha ba la gnas pa/ rlung ma dang bcas pa'o/ /dbang ldan gyi mtshams su dbang ldan dkar po gdong gcig pa/ lag pa gnyis pa/ ma tu lung ga dang rtse gsum 'chang ba/khyu mchog la zhon pa/ u ma dang bcas pa'o/ /steng du tshangs pa dang nyi ma dang zla ba ste gdong gcig pa/ lag pa gnyis pa/ ser po dang dmar po dang dkar po'o/ /gun+d+he dang / phreng ba dang / pad+ma dang / ku mu ta 'dzin pa/ ngang pa dang rta dang ku mu ta la gnas pa/grags ma dang 'od ldan ma dang be rdzi dang bcas pa'o/ /'og tu thags pa zangs ris nag po gdong gcig pa/ lag pa gnyis pa/ ral gri dang sdigs mdzub 'dzin pa glang po che la zhon pa sa'i lha mo yang lus phyed 'thon pa ser mo lag pa gnyis kyis gser gyi bum pa 'dzin pa de dag thams cad bu smad dang 'khor dang bcas pa/kun co du ma byed pa bsam par bya'o/ /de nas zhe sdang rdo rje'i bkas gnod mdzes kyi rgyal pos khro bo bcu smad rdo rje rtse gcig pa lta bu stod khro bo'i rnam pa can blangs te/ rta mgrin gyi rang bzhin gyi tho bas brgya byin la sogs pa'i spyi bor gang ba cing rdung bzhin par bsam par bya'o//phur bus gdab pa'i dus su khro bo bcu bcom ldan 'das bdud rtsi 'khyil pa dang 'dra ba/ ut+pal sngon po lta bu bsam par bya ste/ bdud rtsi 'khyil pa ni las thams cad pa yin pa'i phyir ro//de nas khro bo'i rgyal po de rnams kyis bgegs de dag sa 'og bdun gyi bar du son par bsam par bya'o/ /de las byung ba'i khro bo 'bar ba'i tshogs kyis khyud mo lcags ri'i mthar de rnams kyi 'khor gnod sbyin dang / srin po dang / 'byung po dang / sha za dang / yi dags dang /smyo byed dang / grul bul sogs pa bsregs shing thal bar gyur pa khro bo'i zhal nas byung ba'i yi ge hUM gi dbugs kyi rlung gis khyer bas mi snang bar byas par bsgom par bya'o zhes 'khor dang bcas pa'i bgegs rab tu zhi ba bstan to/ /de nyid bshad par bya ba'i phyir/ /rdo rje bdud rtsi rgyal po che//ut+pal sngon po'i 'dab ma'i mdog /'bar phreng 'khrigs pa'i 'od ldan pa/ /rdo rje phur bu rnam par bsgom/ /zhes smos pa la/ phur bus gdab pa'i dus su sgrub pa pos rdo rje bdud rtsi ni bdud rtsi 'khyil pa ste/ de nyid rgyal po che ste khro bo thams cad kyi nang na gtso bor gyur pa las thams cad kyi rigs las byung ba'i phyir ro//ut+pal sngon po'i 'dab ma'i mdog ni ljang gu'o/ /'bar phreng 'khrigs pa'i 'od ldan pa/ /zhes bya ba ni khro bo'i 'bar ba spro bar byed pa'o/ /rdo rje phur bu ni khro bo'i rgyal po bcu'i rang bzhin du bsam par bya'o//gal te kha dog gis bdud rtsi 'khyil pa dang 'dra bar bsgom na de rnams kyi dbyibs ji lta bu yin zhe na smras pa/ lte ba'i phyogs nas smad kyi cha/ /rtse mo lta bur rnam bsam zhing / /stod ni khro bo'i dbyibs can te/ /zhal gsum phyag drug lta bur bsgom//zhes smos pa la/ khro bo bcu po de dag steng du ni lte ba'i bar du zhal gsum phyag drug pa lta bu'o/ /de'i lte ba man chad ni rdo rje rtse gcig pa lta bu bsam par bya'o/ /gang gis bgegs rnams phur bus btab par gyur te drang ba'i don to/ / 'dod pa'i gdugs dang / rus sbal ma dang / zla ba ma ste rtsa gsum lte ba yan chad cha gnyis kyis gnas pas phyag drug pa lta bu'o/ /snyoms par 'jug pa'i dus su ro gcig par 'gyur bas rtse gcig pa'i rdo rje lta bur gyur pa de'i tshe snang ba la sogs pa'i bgegs la phur bus btab par 'gyur ro zhes pa nges pa'i don to//de nyid spro bar bya ba'i phyir bshad par bya ste/ /de yi gsang sngags legs brjod la/ /bltas pas 'og tu bgegs kyi tshogs/ /rdo rje'i phur bus nges btab na/ /bgegs kyi lus la mi g.yo 'gyur/ /zhes smos pa la/rdo rje bdud rtsi 'khyil pa'i gzugs kyis gnod mdzes kyi rgyal pos mgo bo nas brtsams te/ rkang pa'i mthil gyi bar du phur bus btab nas sa 'og bdun gyi bar du son par bltas te/ de byin gyis brlab par bya ba'i phyir/ sngags 'di brjod par bya ste drang ba'i don to//rnam par rtog pa'i tshogs zhi bar 'gyur na 'od gsal ba'i bdag nyid kyi sngags yid kyis bsam par bya ste nges pa'i don to/ /sngags de nyid bshad par bya ste/ oM g+ha g+ha g+hA ta ya g+hA ta ya sarba du Sh+TAM hUM phaT phaT/ kI la ya kI la ya sarba pA paM phaT phaT hUM hUM badzra kI la ya badzra d+ha ro Adz+nyA pa ya ti/sarba bi g+hanAM kA ya bA ka tsit+taM kI la ya hUM hUM phaT phaT/ ces smos pa la/ zhe sdang rdo rje'i rang bzhin gyi rnal 'byor pas sngags 'di brjod pas bka' bsgo bar bya ste/ oM ni bshad za ni to/ /g+ha g+ha zhes bya ba la sogs pa ni sod cig pa'o/ /sarba duSh+TAM ni dbang po la sogs pa'o//hUM zhes bya ba la sogs pa ni snga ma bzhin no/ /kI la ya ni spyi bor phur bus thob shig pa'o/ /sarba pA paM zhes bya ba ni khyab 'jug la sogs pa'o/ /badzra kI la ya zhes bya ba ni khro bo bcu bod pa'o/ /badzra d+ha ra Adz+nyA pa ya ti zhes bya ba ni bdag zhe sdang rdo rje bka' stsal pa'o//sarba big+ha naM zhes bya ba ni sngar bshad pa rnams kyi'o/ /kA ya bAka tsit+taM ni lus la sogs pa'o/ /b+dz+ra kI la ya ni dbye bar gyis shig pa'o/ /hUM gsum ni lus la sogs pa phur bus [(]gtab [,]gdab [)]pa'i phyir ro/ /lhag ma ni snga ma bzhin no/ /sngags kyi tshig gnyis po de dag gis bgegs rnams la phur bus btab pa dang /gcig gis ni brdung bar bya ste drang ba'i don to/ /rnam par rtogs pa thams cad sel ba ni phur bus btab pa dang / 'od gsal bal brten par bya ba ni brdung bar bya ste nges pa'i don to/ /brdung ba ni ji ltar byed ce na smras pa/ rdo rje tho ba phyag bsnams pa'i//gnod mdzes rgyal po rnam par bsam/ /rdo rje me ni sngags bcas pas/ /rnam par 'phro ba nges par bsgom/ /zhes smos pa la/ gnod mdzes kyi rgyal po yang rdo rje lcags kyu yongs su gyur pas rdo rje tho ba lag na bsnams pa bsgom par bya'o/ /de yang rta mgrin gyi rang bzhin zhes man ngag go//rdo rje tho ba de yang rdo rje'i me 'phro bar byed par bsam mo/ /rdo rje tho ba des de dag brdung zhing sa 'og bdun du son par bsam ste/ khro bo'i sku las byung ba'i 'bar ba'i tshogs kyis bsregs la dbugs kyi rlung gis thal bar 'gyur bar bya'o zhes drang ba'i don to//gnod mdzes kyi rgyal po ni rtsa dbu ma ste/ de nyid kyi rdo rje'i tho ba'i dbyibs can 'od gsal ba'i me 'phro ba bsam pa ni nges pa'i don to/ /de nyid bshad pa/ gdug pa tshig pas phan tshun du/ /'bros par gyur par rnam par bsam/ /zhes bya ba ni phan tshun te/bdag po rnams phur bus btab na 'khor rnams kyang 'jigs pa dang ldan par 'gyur zhing 'bros par gyur par bltas te/ snga ma'i rim gyis bsreg par bya ste drang ba'i don to/ /snang ba gsum spangs par gyur na/ de'i 'khor du gyur pa'i rang bzhin brgya drug cu khros par gyur ba ni mi snang bar gyur par bsam par bya ste nges pa'i don to//nye bar bsdu ba bshad par bya ste/ phyogs bcur phur bus btab nas ni/ /steng 'og yang dag byin gyis brlab/ /ces bya ba ni de ltar sngar bshad pa'i rim gyis phyogs bcur phur bus btab par bstan to/ / 'o na phyogs brgyad ni rab tu grags pa ste/ ji ltar phyogs bcu zhes bshad ce na smras pa/ steng 'og yang dag byin gyis brlab/ /ces bya ba ni steng 'og dang lhan cig phyogs bcur phur bus gdab pas skyon med do/ /de nyid bshad pa yang dag byin gyis brlab pa ni phur bus gdab par bya zhes bya ba'i tha tshig go//de nas ye shes sems dpa'i sa bon las 'od zer gyi 'khor lo spros la lcags kyu'i rnam pa des khro bo bcu gcig po bkug cing rang gi snying gar bcug ste/ thabs dang shes rab 'ba' zhig tu gnas par blta bar bya'o/ / de ltar byas na yang gal te las dang po pa yin pa'i phyir bgegs zhi bar ma gyur na de'i tshe ji ltar byed ce na smras pa/ dam pa'i don du srid gsum ni/ /dngos po med par bsgom par bya/ /zhes bya ba ni 'dod pa dang / gzugs dang gzugs med pa ni srid gsum mo/ /gcig dang du ma dang bral bas na stong pa/ dbang phyug la sogs pa rgyu med pas na mtshan ma med pa ste/ rtog pa dang bral bas smon pa med pa ste/ de nyid kyi phyir dngos po med pa ste/ 'di nyid kyi ngo bo zhes brjod du mi nus pa thams cad stong pa'i rang bzhin du bsgom par bya'o/ /ji skad du/ gzugs ni dbu ba lta bur bshad//tshor ba chu bur dang mtshungs pa/ /'du shes smig rgyu lta bur te/ /'du byed chu shing dang 'dra ba/ /sgyu ma lta bur rnam par shes/ /de ltar phung po rnams bstan pa'o zhes 'byung ngo / /de bzhin du/ rang bzhin bral ba stong pa nyid yin te/ /rgyu dang bral bas de bzhin mtshan ma med//rtog pa med pas dngos po ma lus ni/ /smon pa las ni nges par grol ba yin/ /zhes 'byung ngo / /de bzhin du/ rang las ma yin gzhan las min/ /gnyi ga las min rgyu med min/ /dngos po gang dag gang na yang / /skye ba nam yang yod ma yin/ / zhes 'byung ngo / /dngos po 'di dag rang bzhin med/ /gcig dang du ma dang bral phyir/ /gzugs brnyan bzhin zhes gzhan las kyang 'byung ngo / /'dir man ngag ni thabs dang shes rab snyoms par 'jug pas yab yum zhu ste stong pa nyid kyi rang bzhin du bdag nyid bsam par bya'o zhes bya ba'i don to//de nyid spros te bshad par bya ba'i phyir/ /dngos po med pas sgom pa med/ /bsgom par bya ba sgom pa min/ /de bas dngos po dngos med pas/ /sgom pa dmigs su med pa'o/ /zhes smos pa la/ brtan pa dang g.yo ba'i dngos po thams cad med na sgom pa ni med de/bsgom par bya ba med pa'i phyir ro/ /bsgom par bya ba sgom pa min/ /zhes bya ba ni/ gang yod pa'i sgom pa de yang sgom pa ma yin te/ sgom pa med pas kyang yod pa'i phyir ro/ /de bas na dngos po dang dngos po med pa dang ldan pa ni dngos po ma yin no//de bas na bsgom par bya ba dang / sgom pa po dang sgom pa ni mi dmigs te yi ge'i don to/ /steng la sogs pa'i dbye bas chos thams cad sel cing 'dus byas dang 'dus ma byas pa'i chos rnams stong pa zhes bsgom pa gang yin pa de ni med pa ste/ stong pa nyid la mngon par zhen pa'i lta ba yin pa'i phyir ro//mtshan ma sel bar bya ba'i phyir/ /bsgom par bya ba bsgom pa min/ /zhes smos te/ rgyu dang 'bras bu'i rnam pa la mngon par zhen pa'i sgom pa gang yin pa de yang mi rigs te/ rgyu dang 'bras bu gnyis su med pa'i phyir ro/ /smon pa sel bar bya ba'i phyir de bas dngos po zhes bya ba la sogs pa smos te/de ltar phyi'i rnam pa'i smon pa'i 'bras bu gang yin pa de ni yod pa ma yin te/ smon pa la sogs pa dmigs pa med pa'i phyir ro/ /de bas na phyi'i dngos po'i rnam pa'i bsgom pa dmigs su med pa ni yod pa ma yin te/sems kyi rang bzhin yin pa'i phyir ro/ /spyi'i don to/ /dngos po med pa ni phung po la sogs pa gang yin pa de rnams med pas bsgom par gyur pa sems tsam gang yin pa de ni med de/ ma dag pa dang rtag tu med pa'i phyir ro/ /kun rdzob kyi bden pa sel bar bya ba'i phyir/bsgom par bya ba sgom pa min/ /zhes smos te/ kun rdzob kyi bden pa'i bdag nyid kyi lha'i sku bsgom pa gang yin pa de ni mi rigs te/ 'od gsal bas rnam par dag par bya ba'i phyir ro/ /de bas na kun rdzob kyi bden pa tsam gyi dngos po ni dngos po ma yin te bden pa gnyis dbyer med pa'i phyir ro//des na sgom pa ni bden pa gnyis kyi rnam pa'i sgom pa dmigs pa med pa ste/ dka' bas dmigs pa zhes bya ba ste sbas pa'o/ /dngos po med pa ni don dam pa'i bden pa bsgom pa med de/ thog ma nas dag pa'i phyir ro//kun rdzob kyi bden pa'i bdag nyid sgom pa gang yin pa de ni bsgom par bya ba ma yin te/ bden pa ma yin pa'i phyir ro/ /de bas na bden pa gnyis kyi bdag nyid kyi dngos po ni bsgom par bya ba ma yin no/ /bden pa gnyis su med par bya ba mthong ba tsam gyis thar pa yin pa'i phyir ro//des na sgom pa po dang / bsgom pa dang bsgom par bya bar mngon par zhen pa 'di zung 'jug gi rim pa khong du chud pas mi dmigs so zhes mthar thug pa'o/ /dngos po med pa ni lta ba drug cu rtsa gnyis med na de la mngon par zhen pa'i mtshan nyid kyi sgom pa med de/de'i rang bzhin mi dmigs pa'i phyir ro/ /phung po lnga dang / skye mched bcu gnyis dang / khams bco brgyad ni yod do zhes nyan thos pa rnams kyi sgom pa gang yin pa de ni sgom pa ma yin te/ gcig dang du ma dang bral bas de rnams med pa'i phyir ro/ /de bas na rnam pa 'dis dngos po ni phung po lnga la sogs pa'i mtshan nyid dngos po med pa ste/rdzas su yod pa ma yin te/ de bas na bsgom pa ni de las ldog pa'i phyir mi sdug pa la sogs pa dmigs pa med pa ste sgra ji bzhin pa'o/ /dngos po med pa ni chos thams cad med pas chos la mngon par zhen pa'i mtshan nyid kyi sgom pa med do zhes stong pa'o/bsgom par bya ba ni kun brtags kyi bsgom pa ste/ sgom pa ma yin no zhes shin tu stong pa'o/ /de bas na dngos po ni gzhan dbang gi mtshan nyid gang yin pa de ni dngos po ma yin te/ rdzas ma yin no zhes stong pa chen po'o//bsgom pa dmigs su med pa ni yongs su grub pa'i bsgom pa brtags pa ma yin no zhes thams cad stong pa ste/ sgra ji bzhin pa ma yin pa'o/ /dngos po med pa ni rnyed pa'o/ /sgom pa min pa ni ma rnyed pa'o/ /bsgom par bya ba ni bde ba'o/ /sgom pa min pa ni sdug bsngal lo//de ltar dngos po ni grags pa'o/ /dngos po med pa ni ma grags pa'o/ /bsgom pa ni bstod pa'o/ /dmigs su med pa ni smod pa ste/ dgongs pas bshad pa'o/ /dngos po med pa ni las kyi phyag rgyas spangs nas sgom pa med pa ste/ de'i spros pa ni sgom pa rigs te/bskyed pa'i rim par thal bar 'gyur ba'i phyir ro/ /bsgom par bya ba sgom pa min ni dam tshig gi phyag rgya'i sgom pa ni 'jig rten las 'das pa ma yin te/ sngags la sogs pas sbyor ba la ltos pa'i phyir ro/ /de bas na dngos po ni ye shes kyi phyag rgya'i bsgom pa yang dngos po ma yin te/don dam pa yin gyi brtags pa'i phyir ro/ /de bas na sgom pa ni phyag rgya chen po'i sgom pa dmigs su med pa ste/ phyag rgya gsum gyi rnam par rtog pa de la mi dmigs so zhes dgongs pa ma yin pa'o/ /'jig tshogs kyi lta ba dngos po med na mthar 'dzin pa'i lta ba'i sgom pa med do//bsgom par bya ba ni log pa'i lta ba'i rtog pa ni mi dmigs te/ brdzun pa yin pa'i phyir ro/ /de bas na lta ba mchog tu 'dzin pa'i dngos po de ni dngos po ma yin pas med de/ de bas tshul khrims dang brtul zhugs mchog tu 'dzin pa'i lta ba'i mtshan nyid kyi sgom pa ni dmigs pa med pa ste drang ba'i don to//dngos po med pa ni rnam rig tsam med pas sgom pa med pa ste/ de thob par byed pa'i lam gyi sgom pa med do/ /bsgom par bya ba sgom pa min ni stong pa nyid kyi sgom pa yang mi rigs te/bco brgyad la ltos pa'i phyir dang chad pa'i phyogs yin pa'i phyir ro/ /de bas dngos po dngos med pa ni bskyed pa'i rim pa bsgom pa'i bdag nyid don dam pa ma yin te brtags pa'i phyir ro/ /de bas na rdzogs pa'i rim pa bsgom pa ni dmigs pa med pa ste/spros pa med pa'i phyir dang / ngo bo nyid kyis grub pa'i phyir ro zhes nges pa'i don to/ /de nyid bsdu bar bya ba'i phyir/ /tshigs bcad 'di yis rgyu mi rgyu'i/ /bdag nyid can rnams stong par bsgom/ /zhes smos te/ tshigs bcad 'di yis ni sngar bshad pas so/ / rgyu dang mi rgyu'i bdag nyid can brtan pa dang g.yo ba'i bdag nyid can gyi khams gsum pa stong pa nyid du bsam par bya'o/ /de'i rim pa ni rang gi thugs ka nas 'od zer gyi 'khor lo spros la des snod dang bcud kyi 'jig rten gnyis dgug cing der bcug la thabs dang shes rab snyoms par 'jug pas bdag nyid stong pa nyid du bsgom mo//de bas na 'od gsal ba'i sems la bgegs 'byung ba gang yin pa de ni gnas ma yin gyi klags skabs kyang ma yin no/ /de ni bgegs rab tu zhi bar bya ba'i thabs dam pa yin no/ /thig le tsam lus par gyur tam zhe na ma yin te/thig le yang sgra la thim pa dang / sgra ni sgra tsam la/ sgra tsam ni 'od gsal ba la zhes rnam rig tsam du thal bar mi 'gyur te/ gzhung mkhan ni dbu ma pa yin pa'i phyir ro/ /de ni yan lag gsum pa'o/ /da ni 'chad pa'i lta ba sel ba'i phyir dang /'gro ba'i don bya ba'i phyir bskyed pa'i rim pa bshad par bya ste/ de'i dang po'i ye shes kyi sa gzhi bsgom pa ni/ cho ga'i sbyor ba 'di yis ni/ /ye shes sa gzhi byin gyis brlab/ /ces smos te/ 'dir dang po'i rten gyi dkyil 'khor bsgom par bya ba dang /phyi nas brten pa'i dkyil 'khor ro/ /rten gyi 'khor gang yin pa/ /de ni ye shes sa gzhi ste/ /de bzhin gshegs pa lnga'i ngo bo nam mkha' dang / rlung dang / me dang / chu dang / sa'i dkyil 'khor ni chos kyi dbyings kyi ye shes la sogs pa'i rang bzhin yin pa'i phyir ro//gang gi phyir snod kyi 'jig rten ni gling gzhi dang / ri rab kyi rang bzhin yin no zhes de'i rnam par dag pa yin pas ye shes kyi sa gzhi bsgom par bya'o/ /de nyid bstan pa ni/ nam mkha'i khams kyi dbus gnas par/ /hUM/ gnyis sa bon yaM las byung / /rdo rje gnyis dang yang dag ldan/ /rlung gi dkyil 'khor bsgom par bya/ /zhes smos te/ dang po hUM las byung ba'i chos 'byung gi phyag rgya'i steng du hUM gnyis kyis mtshan pa'i yi ge yaM sngon po yongs su gyur pa las rdo rje gnyis kyis mtshan pa'i rlung gi dkyil 'khor bsgom par bya'o//de nas/ hUM gnyis sa bon raM las byung / /rdo rje gnyis kyis yang dag mtshan/ /me yi dkyil 'khor nyid kyang ni/ /de yi steng du rnam par bsam/ /zhes smos te/ rlung gi dkyil 'khor gyi steng du hUM gnyis kyis mtshan pa yi ge raM dmar po yongs su gyur pa rdo rje gnyis kyis mtshan pa me'i dkyil 'khor bsgom par bya'o//de nas/ hUM gnyis sa bon baM las byung / /rdo rje gnyis dang yang dag ldan/ /chu yi dkyil 'khor nyid kyang ni/ /de yi steng du rnam par bsam/ /zhes smos te/ me yi dkyil 'khor gyi steng du hUM gnyis kyis mtshan pa baM dkar po las skyes pa'i rdo rje gnyis kyis mtshan pa'i chu'i dkyil 'khor bsgom mo//de nas/ hUM gnyis sa bon laM las byung / /rdo rje gnyis dang yang dag ldan/ /sa yi dkyil 'khor nyid kyang ni/ /de yi steng du yang dag bsam/ /zhes smos te/hUM gnyis kyis mtshan pa'i laM ser po las byung ba chu'i dkyil 'khor gyi steng du sa'i dkyil 'khor bsgom par bya'o/ /de nas/ dkyil 'khor bzhi po yang dag bsdu/ /rdo rje'i sa gzhi dkyil 'khor la/ /zhes smos te/ chos 'byung ba'i phyag rgya spangs nas lhag ma rlung gi dkyil 'khor la sogs pa bzhi gcig tu gyur pas ye shes kyis gzhir gyur par bsam mo//'dir zhal gyi man ngag ni dang po thams cad stong pa'i rang bzhin 'od gsal ba las cig car du sprin med pa'i nam mkha'i dbus nas sprin gyi dum bu bzhin du yi ge hUM bsgoms nas de yongs su gyur pas khams gsum gyi rang bzhin gyi phyag rgya chos 'byung dkar po nang khong stong nam mkha'i khams kyi rang bzhin bsams te/de'i steng du kha dog dkar po dbyangs dang po las byung ba'i zla ba'i dkyil 'khor de nyid la khyab nas gnas pa bltas te/de'i dbus su hUM sngon po bkod la/ de las 'phros pa'i dbyangs dang gsal byed phreng ba dkar po dang / dmar po shes rab dang thabs kyi rang bzhin bsams te/ hUM spangs nas dbyangs dang gsal byed yongs su gyur cing / lha mo dang thabs sum cu rtsa gnyis kyi bdag nyid lha sum cu rtsa gsum gyi dkyil 'khor gyi 'khor lo zhal gsum phyag drug pa zhi ba snyoms par 'jug pa'i bde ba nyams su myong ba sems dpa' gsum gyi bdag nyid bsam mo//de nas chags pa chen po las byung ba'i sgras nam mkha'i khams na gnas pa'i de bzhin gshegs pa'i tshogs dgug cing ngag gi lam nas zhugs te/de ma thag tu zhu zhing zla ba'i dkyil 'khor gyi steng du ro gcig par bsam mo/ /hUM dang bcas pa'i zla ba'i dkyil 'khor yang chos 'byung la thim mo/ / chos 'byung ni dbus su sngon po dang / g.yon dang g.yas phyogs su dkar po dang dmar po ste/ nam mkha'i khams zhes bya ba'i don to/ /de'i steng du hUM gnyis kyis mtshan pa'i yi ge yaM sngon po bkod de/ de yongs su gyur pa las ba dan gyis mtshan pa gzhu'i dbyibs can rdo rje gnyis dang ldan pas 'og nas brtsams te/mtha' yas par rlung gi dkyil 'khor sngon po bsam mo/ /de'i steng du bcom ldan 'das don yod par grub pa'i sa bon yi ge khaM bkod la de yongs su gyur pa las khaM dang bcas pa'i ral gri bsams la/de'i 'od zer gyis me tog can gyi sangs rgyas kyi zhing na gnas pa'i don yod grub pa'i dkyil 'khor bkug cing bcug la/ de yongs su gyur pa las don yod grub pa zhal gsum phyag drug pa ljang gu sgrol ma dang snyoms par 'jug pa sems dpa' gsum gyi bdag nyid blta ste/dga' ba'i sgras de bzhin gshegs pa thams cad 'jug pa sngon du 'gro bar zhu ste/ rlung gi dkyil 'khor dang tha mi dad par bsgom mo/ /de nas rlung gi dkyil 'khor nyid yongs su gyur pa las hUM gnyis dang ldan pa'i yi ge raM las byung zhing de las skyes pa dmar po gru gsum la 'bar ba'i phreng bas mtshan pa me'i dkyil 'khor bsgoms te/de'i steng du yi ge AHyongs su gyur pa las pad+ma 'dab ma brgyad pa dmar po de nyid kyis mtshan pa bsams la/ de'i 'od zer gyis bde ba can gyi sangs rgyas kyi zhing las 'od dpag tu med pa bkug cing bcug la de yongs su gyur pa las 'od dpag tu med pa zhal gsum phyag drug pa dmar po gos dkar mo dang snyoms par 'jug par bsams te/dga' ba'i sgras de bzhin gshegs pa thams cad 'jug par sngon du 'gro bar zhu zhing yang me'i dkyil 'khor bsam mo//de nas me'i dkyil 'khor nyid hUM gnyis kyis mtshan pa paM dkar por gyur cing de las byung ba'i chu'i dkyil 'khor dkar po zlum po rdo rje gnyis kyis mtshan pa/ 'o ma'i rgya mtsho dang 'dra ba dba' rlabs 'phro ba bsams te/ de'i dbus su hUM sngon po las byung ba'i rdo rje rtse lnga pa bsams te/de'i 'od zer gyis mngon par dga' ba'i sangs rgyas kyi zhing na bzhugs pa'i mi bskyod pa bkug cing bcug la/ de las byung ba zhal gsum phyag drug pa sngon po mi bskyod pa mA ma kI dang bcas par bsgoms te/ dga' ba'i sgras de bzhin gshegs pa thams cad 'jug pa sngon du 'gro bar zhu zhing yang chu'i dkyil 'khor bsam mo//de nas chu'i dkyil 'khor nyid hUM gnyis kyis mtshan pa laM ser por gyur cing de las byung ba dbang chen gyi dkyil 'khor gru bzhi pa bsams te/ de'i steng du oM dkar po las rtsibs brgyad pa'i 'khor lo de nyid kyis mtshan pa bsams te/de'i 'od zer gyis 'og min dang rnam par snang mdzad spyan ma dang bcas pa bkug cing bcug la de yongs su gyur pa las zhal gsum phyag drug pa dkar po rnam par snang mdzad spyan ma dang snyoms par 'jug pa bsgoms la dga' ba'i sgras de bzhin gshegs pa thams cad 'jug pa sngon du 'gro bar zhu zhing yang dbang chen gyi dkyil 'khor bsam mo//de'i ster du trAM las zung drug pa'i rin po che'i 'od zer gyis rin chen 'byung gnas na gnas pa'i rin chen 'byung ldan mA ma kI dang bcas pa bkug cing bcug la/de yongs su gyur pa las rin chen 'byung ldan snyoms par 'jug pa bsams te/ de bzhin gshegs pa 'jug pa sngon du 'gro bar zhu zhing dbang chen gyi dkyil 'khor nyid nam mkha' bzhin du rgya che bar bsgom ste drang ba'i don to//tshangs pa'i bu ga ni mchod sbyin gyi phyag rgya'o/ /lte bar rlung gi dkyil 'khor dang / /lkog mar me'i dkyil 'khor dang / /snying gar chu'i dkyil 'khor dang / /gsang bar dbang chen gyi dkyil 'khor ro/ /g.yas pa las byung ba'i 'od zer ni me'i dkyil 'khor nyid do zhes bshad pa'i phyir te nges pa'i don to//de nyid bshad pa/ dkyil 'khor bzhi po yang dag bsdu/ /rdo rje sa gzhi'i dkyil 'khor la/ /steng du dbang chen dkyil 'khor nyid/ /'byung ba bzhi yi rang bzhin te/ /drang ba'i don to/ / lkog ma la sogs pa'i dkyil 'khor bzhi nye bar sdud par byed pa rdo rje sa gzhi'i dkyil 'khor te/ rdo rje sa gzhi'i dkyil 'khor ni 'od gsal ba ste nges pa'i don to/ /da ni ye shes sems dpa' bsgom pa bstan par bya ba'i phyir/ de la b+h+rUM las byung ba yi/ /gzhal yang khang pa rnam par bsgom//zur bzhi dang ni sgo bzhi dang / /rta babs bzhi yis mdzes byas la/ /thig bzhi dang ni yang dag ldan/ /ka ba brgyad kyis nye bar mdzes/ /dra ba dra ba phyed pa dang / /rdo rje nor bu zla phyed brgyan/ /grwa yi mtshams ni thams cad ni/ /sgo dang sgo khyud mtshams rnams su//rdo rje rin chen rnams kyis spras/ /phyi yi dkyil 'khor thig gdab bya/ /bum pa ka ba rdo rje che/ /bre yi phreng ba bya rnams gnas/ /ba dan dril bu mdzes byas la/ /rnga yab sogs kyis rnam par brgyan/ /zhes smos te/ tshigs su bcad pa bzhi pos gzhal yas khang sgom pa bshad par bya ste/de la zhes bya ba ni rdo rje'i dkyil 'khor gyi steng du kha dog ser po'i yi ge gsum bkod la/ de las ri'i rgyal po ri rab rtse mo brgyad kyis mdzes pa/ rin po che sna bzhi'i rang bzhin rgyal po chen po la sogs pa lha'i ris drug gis brgyan pa/dga' bo la sogs pa nags tshal chen po'i tshogs dang ldan pa bsams te/ de'i steng du sprin sgra las byung ba'i sna tshogs rdo rje'i chang gzungs la ba las byung ba'i sna tshogs pad+ma'i ze 'brur b+h+rUM yongs su gyur pa las rin po che sna bdun gyi rang bzhin gyis mchod rten gyi bum pa'i nang du b+h+rUM bkod la spro ba dang bsdu ba sngon du 'gro bar yongs su gyur pa las byung ba'i rtsibs brgyad pa'i 'khor lo'i ste bar sa bon de nyid las byung ba'i 'od zer gyi phreng bas rnam par snang mdzad kyi rigs bkug cing bcug la/de yongs su gyur pa las sku rdo rje dkar po kun du zhal dkar po spyan dang bcas pa'i sems dpa' gsum gyi bdag nyid 'khor lo dang /dril bu 'chang ba bsams te/ thugs ka'i sa bon las byung ba'i 'od zer gyi 'khor los bkug pa'i sangs rgyas bzhugs pa zhu ste/ thig le nyid du gyur pa bltas te/thig le'i drod kyis mchod rten dang / sna tshogs pad+ma dang / sna tshogs rdo rje dang / ri rab dang dbang chen gyi dkyil 'khor gcig tu gyur pa las byung ba'i gzhal yas khang pa 'og tu hUM ha las byung ba'i sna tshogs rdo rje'i steng na gnas par bsam par bya'o zhes tshig gi don to//de yang ji lta bu yin zhe na/ zur bzhi pa'i nang du khyud mo lcags ri'i mthar khyab pa sor bzhi dang ldan pa ste/ mnyam pa nyid kyi ye shes rnam par dag pa'i phyir ro/ /sgo bzhi pa ni phyogs re rer sgo dang bcas pa ste/ rnam par thar ba'i sgo bzhi dang /dran pa nye bar gzhag pa rnam par dag pa'i phyir ro/ /rtab bas bzhi ni sgo'i steng du dbyibs kyi khyad par te/ des mdzes pa ni spras pa ste/ bsam gtan bzhi rnam par dag pa'i phyir ro/ /de bzhin du thig bzhi tshangs pa'i thig gnyis las byung ba'am/ phyogs kyi thig bzhi las byung ba ni de dang ldan pa ste/tshangs pa'i gnas bzhi rnam par dag pa'i phyir ro/ /ka ba brgyad ni 'khor los sgyur ba'i re'u mig gi shar la sogs pa rnams la gnas pa de rnams kyis mdzes pa ni/ rnam pa sna tshogs pa'i rin po che dang ldan pa dang / rdo rje me long la sogs pas mtshan pa'i phyir te/bsam gtan gyi rnam par thar pa rnam par dag pa'i phyir ro/ /de bzhin du dra ba ni gtso bo dang bcas pa dang / dra ba phyed pa ni gtso bo med pa dang / zla ba phyed pa dang / rdo rje rin po che ste/ de rnams kyis brgyan pa ni brgyan pa ste/byang chub kyi yan lag bdun rnam par dag pa'i phyir ro/ /de bzhin du grwa bzhi'i mtshams thams cad ni phyogs bzhi'i mtshams dang / de bzhin du sgo khyud ni phyi'i cha dang / mtshams ni nang gi cha ste/ de rnams la rdo rje rin chen ni cung zad 'phyang ba/rin po ches mtshan pa rdo rjes spras pa ni 'od 'phro ba ste/ ye shes lnga'i rang bzhin yin pa'i phyir ro/ /de bzhin du bum pa ni sgo re rer logs gnyis gnyis la gnas pa gser gyi bum pa brgyad de/ de la shar gyi sgor rgyal ba dang bkra shis/ lhor cho 'phrul dang dngos grub po//nub tu rgyal ba dang zhi ba'o/ /byang du grub pa dang sprul pa ste/ zhi ba la sogs pa'i dngos grub brgyad kyi bdag nyid yin pa'i phyir ro/ /ka ba ni sgo re re la gnyis gnyis yin pas na brgyad de/ de rnams kyis brgyan pa ni snga ma bzhin no/ /rdo rje chen po ni rdo rje bcu gcig ste sa rnam par dag pa'i phyir ro//bre yi phreng la bya rnams gnas/ /zhes bya ba ni/ rta babs kyi rtse mor shar phyogs su rma bya gnyis dang / lho phyogs su ngang pa gnyis dang / nub phyogs su dur pa gnyis dang / byang phyogs su shang shang te'u gnyis gnas te/'dod chags rnam par dag pa'i phyir ro/ /de bzhin du dril bu dang bcas pa'i ba dan ni dril bu ba dan te/ rgyal mtshan gyi rtse mor 'dzugs pa'i dar dpyangs dang / pa dan dang g.yer kha'i dra ba dang ldan pa'o/ /de bzhin rnga yab la sogs pa ni rnga yab dang / me tog gi phreng ba la sogs pa ste/de rnams kyis rnam par brgyan pa ni brgyan pa ste/ gsung rab yan lag dgu rnam par dag pa ste drang ba'i don to/ /de la ri rab ni lus te/ sgo brgyad ni rtse mo brgyad do/ /sna tshogs rdo rje dang sna tshogs pad+ma ni dbang po gnyis te/ bud med dang skyes pa'i dbye bas so//gzhal yas khang ni lus nyid do/ /zur bzhi pa ni mdun dang rgyab dang / g.yas dang g.yon gyi cha'o/ /sgo bzhi ni kha dang / gsang ba dang / lte ba dang / tshangs pa'i sgo'o/ /rta babs bzhi ni mig gnyis dang rna ba gnyis so/ /thig bzhi ni rus sbal ma dang /zla ba ma dang / lha sbyin ma dang / nor rgyal ma'o/ /ka ba brgyad ni dpung pa gnyis dang / lag ngar gnyis dang / brla gnyis dang / rje ngar gnyis so/ /dra ba ni rtsa rags pa'o/ /dra ba phyed pa ni rtsa rgyus te/ bdun khri nyis stong ngo / /shes rab kyi cha nye bar bsdus pas thabs kyi cha ni byang chub kyi sems te zla ba phyed pa'o//rdo rje ni gsang ba'i rdo rje'o/ /rin chen ni de'i rtse mo'o/ /grwa'i cha ni g.yon gyi sgo dang / sgo khyud mtshams ni sna bug g.yas kyi sgo'o/ /de rnams la rdo rje ni rnam par shes pa'o/ /rin chen ni de las 'dzag pa'i rdzas te de dang ldan pa'o/ /bum pa ni lto ba'o//ka ba ni sgal bu'o/ /rdo rje chen po ni khams drug go/ /bya rnams ni rlung bcu ste/ g.yo ba'i phyir ro/ /dril bu ni lce ste sgra sgrogs pa'i phyir ro/ /ba dan ni rtsa dbus ma'o/ /rnga yab ni skra'i tshogs so/ /sogs pa'i sgras ni me tog gi phreng ba ni rgyu ma'o/ /ri dwags ni rnam par shes pa'i tshogs brgyad de nges pa'i don te/bdag nyid phyag rgyar ldan pa ni/ /zhal gsum phyag drug lta bu la/ /in+d+ra nI la'i 'od mnyam pa/ /dkyil 'khor dbus su bsgom par bya/ /rnam snang mdzad dpal rin chen dang / /'od dpag med dang las kyi rgyal//zhal gsum phyag drug lta bur ni/ /shar la sogs pa'i phyogs su bsam/ /gti mug dga' sogs lha mo rnams/ /zhal gsum phyag drug lta bur ni/ /me yi phyogs nas brtsams nas su/ /rim pa ji bzhin nges par dgod/ /de bzhin gzugs rdo rje la sogs/ / phyi yi mtshams ni rnam pa bzhir/ /reg bya rdo rje nyid kyang ni/ /rdo rje sems dpa' dang ldan nas/ /byams pa sa yi snying po ste/ /shar gyi snam bur dgod par bya/ /phyag na rdo rje mkha' snying po/ /brtul zhugs can gyis lho ru dgod/ /'jig rten dbang phyug 'jam pa'i dbyangs//nub tu yang ni dgod par bya/ /sgrib pa thams cad sel ba dang / /kun du bzang po byang phyogs su/ /gshin rje gshed ni shar gyi sgor/ /gzhan gyis mi thub lho phyogs su/ /nub phyogs su ni rta mgrin te/ /bdud rtsi 'khyil pa byang du'o/ /mi g.yo 'dod pa'i rgyal po dang //dbyig sngon dang ni stobs po che/ /shar lho'i mtshams sogs nas brtsams te/ /rim pa bzhin du dgod par bya/ /gnod mdzes rgyal po khro bo che/ /de yi 'og tu rnam par bsam/ /gtsug tor 'khor los sgyur rgyal yang / /de bzhin steng du rab tu bsgom//cho ga ji bzhin dkyil 'khor ba/ /de ltar lhag par mos bsams nas/ /zhes smos te/ gzhal yas khang gi dbus su paM las byung ba'i sna tshogs pad+ma'i lte ba las byung ba'i 'od zer gyis/ sna tshogs pad+ma sum cu spros la/ de rnams kyi lte bar dbyangs yig dang po las byung ba'i nyi ma dang /zla ba'i gdan bsam mo/ /de la dbus dang shar phyogs su zla ba gnyis dang / lho dang nub dang byang phyogs su nyi ma gsum mo/ /mA ma kI'i gnas su nyi ma'i dkyil 'khor dang spyan la sogs pa'i zla ba gsum mo/ /phyag na rdo rje'i nyi ma'i dkyil 'khor dang /byang chub sems dpa' lhag ma rnams kyi zla ba'i gdan no/ /mchod pa'i lha mo'i zla ba'i gdan dang / khro bo bcu ni nyi ma'i gdan no/ /de ltar gdan gyi dbye ba bsgoms nas/ phyi nas zla ba'i dbus su mi bskyod pa zhal gsum phyag drug pa/kha dog sngon po cig car du byung ba de dang 'dra ba'i reg bya rdo rje ma dang snyoms par zhugs pa/ rdo rje dang / 'khor lo dang / pad+ma dang / nor bu dang / ral gri dang / dril bu 'chang ba/ sems dpa' gsum dang ldan par bdag nyid bsam mo/ /de bzhin du shar la sogs pa'i phyogs bzhir kha dog dang zhal dang phyag mtshan 'chang bar 'gyur ba'i rnam par snang mdzad la sogs pa bzhi bsgom mo//me'i mtshams la sogs pa la rnam par snang mdzad la sogs pa'i lha mo bzhi zhal gsum phyag drug pa la sogs pa lta bur bsgom mo/ mchod pa'i lha mo bzhi po yang spyan la sogs pa bzhin du dbyibs dang kha dog dang ldan pa bsgom mo/ /shar la sogs pa'i snam bu rnams la byang chub sems dpa' byams pa dang sa'i snying po ni dkar po'o/ /phyag na rdo rje dang nam mkha'i snying po ni sngon po'o/ /'jig rten dbang phyug dang 'jam dpal ni dmar po'o//sel ba dang kun du bzang po ni ljang gu ste/ rigs dang mthun pa'i kha dog go/ /yang na sa'i snying po ni dkar po/ byams pa ni dmar po/ phyag na rdo rje sngon po/ nam mkha'i snying po ser po/ 'jig rten dbang phyug dmar po/'jam dpal dkar po/ sel ba ljang gu/ kun du bzang po dmar po'o/ /gshin rje mthar byed nag po/ shes rab mthar byed dkar po/ pad+ma mthar byed dmar po/ bgegs mthar byed ni ljang gu'o/ /mi g.yo ba la sogs pa drug ni nag po'o/ / zhal gsum pa la sogs pa snga ma bzhin no/ /de la de bzhin gshegs pa dang lha mo rnams ni rdo rje'i skyil mo krung gis gnas pa'o/ /byang chub sems dpa' dang mchod pa'i lha mo rnams ni sems dpa'i skyil mo krung can no/ /gshin rje mthar byed ni g.yas brkyang ba/shes rab mthar byed ni g.yon brkyang ba/ rta mgrin ni rkang pa mnyam pa/ bdud rtsi 'khyil pa ni rkang pa mi mnyam pa dang / mi g.yo ba la sogs pa khro bo drug ni g.yon brkyang bas gnas pa'o/ /mi bskyod pa ni drag po dang zhi ba dang / sgeg pa'i nyams 'chang ba'o//rnam par snang mdzad la sogs pa ni zhi ba'i nyams 'chang ba'o/ /rigs kyi yul ni zhi ba dang sgeg pa'i nyams 'chang ba'o/ /mchod pa'i lha mo ni sgeg pa'i nyams 'chang ba dang / byang chub sems dpa' ni zhi ba'i nyams 'chang ba'o/ /khro bo rnams ni drag po dang dpa' bo dang 'jigs su rung ba'i nyams 'chang ba'o//de bzhin gshegs pa dang lha mo dang / byang chub sems dpa' ni rdo rje zlos pas rang gi snying po brjod bzhin pa dang / khro bo rnams ni khro bo'i bzlas pa yi ge hUM brjod bzhin pa'o/ /dkyil 'khor pa thams cad ni dbus kyi gtso bo la mngon par bltas pa dang /gtsug tor 'khor los sgyur ba ni steng du zhal bltas pa dang / gnod mdzes rgyal po ni 'og tu zhal bltas pa'o/ /de rnams ni ye shes sems dpa'i thugs kar sna tshogs pad+ma dang / zla ba dang / nyi ma la gnas pa'i rang dang rang gi mtshan ma la rang rang gi yig 'bru'i thig le re rer lha sum cu rtsa gnyis kyi dkyil 'khor gyi 'khor lo phra mo rnal 'byor gyis bsgom bzhin pa bsam par bya'o//bsdus na de bzhin gshegs pa ni stong phrag gcig dang nyi shu rtsa bzhir 'gyur ro zhes pa ste drang ba'i don to//'dod pa'i gdugs ni mi bskyod pa ste/ de nyid steng dang bar dang 'og gi dbye ba snang ba la sogs pa'i rang bzhin yin pas zhal gsum pa'o/ /smig rgyu la sogs pa rtags lnga dang / 'od gsal ba ni phyag drug pa'o//rus sbal la sogs pa ni rnam par snang mdzad la sogs pa'o/ /dkyil 'khor bzhi'i rtsa ni spyan la sogs pa'o/ /mig dang / rna ba dang / sna dang / lce dang / lus dang / yid dang / yan lag thams cad kyi tshigs dang / rtsa rgyus thams cad kyi rtsa ni byang chub sems dpa' rnams so//mig g.yon pa'i rtsa ni gzugs rdo rje ma/ rna ba g.yon pa'i rtsa ni sgra rdo rje ma dang / sna g.yon pa'i rtsa ni dri rdo rje ma dang / lce'i rtsa ni ro rdo rje ma dang / rdo rje'i dbus kyi rtsa ni reg bya rdo rje ma'o/ /dpung pa gnyis dang / lag ngar gnyis dang / kha dang /gsang ba dang / pus mo gnyis dang / tshangs pa'i sgo dang / rkang pa'i mthil gyi rtsa ni khro bo bcu'o/ /steng la sogs pa'i dbye bas zhal gsum la sogs pa ste/ snga ma bzhin te nges pa'i don to/ /spros pa spang bar bya ba'i phyir/ /don dam pa'i dkyil 'khor gyi bsgom pa bshad par bya ste/slar yang kha sbyar sbyor ba yis/ /rang gi lus la de rnams gzhug /ces smos pa la/ de ltar sngar bshad pa'i rim pas lhag par mos pa'i dkyil 'khor byin gyis brlabs la/ slar yang kha sbyar sbyor ba yis/ /zhes bya ba ni lus kyi dkyil 'khor dang /phyi rol gyi dkyil 'khor gcig tu gyur pas rang gi lus la de rnams ni dkyil 'khor pa rnams gzhug par bya ste drang ba'i don to/ /slar yang kha sbyar sbyor ba yis/ /zhes bya ba ni kha sbyor ni bzhi ste kha gnyis kyi kha sbyor dang / dbang po gnyis kyi kha sbyor dang /rtsa gnyis kyi kha sbyor dang / /byang chub kyi sems gnyis kyi kha sbyor ro/ /de'i sbyor ba ni de dag gcig tu gyur pas de rnams ni rtsa sum cu rtsa gnyis rang gi lus ni dbus ma la gzhug par bya ba ni mi snang bar byas te nges pa'i don to/ /phyi'i dkyil 'khor dang / lus kyi dkyil 'khor dang /ngag gi dkyil 'khor dang / sems kyi dkyil 'khor te kha sbyar ro/ /de rnams kyi sbyor ba ni gcig tu gyur pas so/ /de rnams ni dkyil 'khor bzhi ste/ rang gi lus ni rang gi lus la 'jug par bya ste yi ge'i don to/ /stong pa nyid dang snying rje dbyer med pa'i byang chub kyi sems kyi kha sbyor gyis rang gi lus ni chos dang /longs spyod rdzogs pa'i sku'i bdag nyid kyi rdo rje 'chang chen po la 'jug par bya ste spyi'i don to/ /kha sbyor gyi sbyor ba ste snang ba ni snang ba mched pa la 'jug go/ /snang ba mched pa ni snang ba nye bar thob pa la'o/ / snang ba nye bar thob pa ni 'od gsal ba ste sbas pa'o/ /oM ni AH la'o/ /AH ni hUM la'o/ /hUM ni a la'o/ /a ni chos kyi dbyings kyi 'khor lo la'o/ /chos kyi dbyings kyi 'khor lo ni lte ba'i nam mkha' la ste sbas pa'o/ /chags pa dang bral ba ni chags pa la'o/ / chags pa ni chags pa bar pa la'o/ /chags pa bar pa ni 'od gsal ba ste mthar thug pa'o/ /kun rdzob dang don dam pa kha sbyor gyi sbyor ba ni tha mi dad pa'i ting nge 'dzin gyis de rnams ni de bzhin gshegs pa thams cad de/ rang gi lus la 'jug par bya ste/ rnam par mi rtog par bya ba ni mthar thug pa'o//de nyid bshad par bya ste/ lus kyi 'khor lor rdzogs sangs rgyas/ /rim pa ji bzhin yang dag bsams/ /don dam pa yi rdo rje yis/ /de bzhin nyid la gzhug bya bas/ /de bzhin gshegs pa'i tshogs bsags na/ / dngos grub rab mchog 'grub par 'gyur/ /zhes smos te/ lhag par mos pa'i bdag nyid kyi lus kyi dkyil 'khor la sngar bshad pa'i rim gyis rdzogs pa'i sangs rgyas sum cu rtsa gnyis bshad pa gang yin pa de rnams rim pa ji bzhin du ni phyin ci ma log pa'i rim gyis yang dag par bsam pa ni/rnam par bsgoms te/ slar yang kha sbyar sbyor ba'i ting nge 'dzin ni don dam pa'i rdo rje ste/ rang bzhin med pa'i bdag nyid kyis de ni 'od gsal ba la 'jug par bya'o/ /de nyid bshad pa de bzhin gshegs pa'i tshogs ni sangs rgyas dang byang chub sems dpa'i tshogs te/bsad pa ni gang gi tshe mi snang bar byas pa de'i tshe dngos grub rab mchog ni rdo rje 'chang gi go 'phang thob par gyur te dgongs pa bshad pa'o/ /de nyid tshad ma nyid du bya ba'i phyir bshad par bya ste/ 'di don rdo rje phreng ba las/ /gsal ba ru ni rnam phye ste//zhes smos te/ 'di don ni don dam pa'i dkyil 'khor gyi don to/ /rdo rje phreng ba zhes pa ni rnal 'byor chen po'i rgyud las/ gsal ba du ni rnam phye ste/ /rab tu gsal ba nyid byas so/ /zhes lung gi tshad ma nyid du ston to/ /de nyid bshad pa/ gzugs phung gtogs la me long dang //sa'i khams dang mig dbang po/ /gzugs kyang rigs ni lnga pa ste/ /khro bo byams pa yang dag ldan/ /zhes smos pa la/ gzugs kyi phung po la rnam par snang mdzad bsdu ba dang / de nyid me long lta bu'i ye shes so/ /sa'i khams la spyan no/ / mig gi dbang po sa'i snying po'o/ /gzugs la gzugs rdo rje ma'o/ /khro bo gnyis ni gshin rje mthar byed dang / mi g.yo ba ni dpung pa g.yas pa dang pus mo g.yas pa la'o/ /byams pa ni rtsa rgyus thams cad la'o/ /des ni shar phyogs kyi cha dang / me'i mtshams kyi cha la gnas pa'i dkyil 'khor pa rnams bsdu bar bstan to//de bzhin du tshor ba'i phung po mnyam pa nyid dang / chu khams rna ba'i dbang po dang / sgra yang rigs ni lnga pa ste/ /khro bo gnyis dang yang dag ldan/ /zhes smos te/ tshor ba'i phung po la rin chen 'byung ldan dang /de nyid mnyam pa nyid kyi ye shes so/ /chu'i khams la mA ma kI'o/ /rna ba'i dbang po la phyag na rdo rje dang / nam mkha'i snying po'o/ sgra la sgra rdo rje ma'o/ /khro bo gnyis ni gshin rje mthar byed dang / 'dod pa'i rgyal po ste/ dpung pa g.yon dang pus mo g.yon pa la 'jug go//des ni lho'i phyogs dang bden bral mtshams kyi dkyil 'khor pa rnams bsdu ba bstan to/ /'du shes so sor rtog pa dang / /byin za sna yi dbang po dang / /dri yang rigs ni lnga pa ste/ /khro bo gnyis dang yang dag ldan/ /zhes smos te/ 'du shes la 'od dpag tu med pa dang /de nyid so sor rtog pa'i ye shes so/ /me'i khams la gos dkar mo'o/ /sna'i dbang po la 'jig rten dbang phyug go/ /yid la 'jam dpal lo/ /dri la dri rdo rje ma'o/ /khro bo gnyis ni pad+ma mthar byed dang dbyig pa sngon po'o/ /kha dang lag ngar g.yas pa la 'jug go//des ni nub phyogs dang rlung gi phyogs kyi dkyil 'khor rnams bsdu ba bstan to/ /'du byed bya ba nan tan sgrub/ /rlung dang lce yi dbang po dang / /ro yang rigs ni lnga pa ste/ /khro bo gnyis dang yang dag ldan/ /zhes smos te/ 'du byed la don yod par grub pa bsdu ba dang /de nyid bya ba nan tan sgrub pa'i ye shes so/ /rlung gi khams la sgrol ma'o/ /lce'i dbang po la sel ba'o/ /tshigs thams cad la kun du bzang po'o/ /ro la ro rdo rje ma'o/ /khro bo gnyis ni bgegs mthar byed dang stobs po che ste/gsang ba dang lag ngar g.yon pa la 'jug go/ /des ni byang phyogs dang dbang ldan gyi mtshams kyi dkyil 'khor pa rnams bsdu ba bstan to/ /steng 'og khro bor yang dag ldan/ /rang bzhin gyis ni snang ba nyid/ /rnam shes phung por zhugs pa ste/ /rnam shes kyang ni 'od gsal ba'o//zhes smos te/ steng du ni tshangs pa'i sgor ro/ /khro bo ni gtsug tor 'khor los sgyur ba bsdu ba'o/ /'og ni rkang pa'i mthil la khro bo ni gnod mdzes kyi rgyal po 'jug go/ /rang bzhin snang ba ni rang bzhin brgya drug cu ste/ rnam par shes pa'i phung po la'o//rnam par shes pa'i phung po ni mi bskyod pa dang mA ma kI'o/ /'og gsal ba la 'jug go/ /'dir ni 'di skad bshad pa yin te/ dpral ba las spros pa'i 'od zer gyis rnam par snang mdzad bkug cing de nyid du gzhug pa dang / sha dang rus pa'i 'od zer gyis spyan ma'o//mig g.yas pa'i 'od zer gyis sa'i snying po'o/ /mig g.yon pa'i 'od zer gyis gzugs rdo rje ma'o/ /rtsa rgyus thams cad kyi 'od zer gyis byams pa'o/ /dpung pa g.yas pa'i 'od zer gyis gshin rje mthar byed do//dpung pa g.yon pa'i 'od zer gyis mi g.yo ba'o/ /de ni me long lta bu'i ye shes thob pa rgyu mthun pa'i 'bras bu'o/ /lta ba'i 'od zer gyis rin chen 'byung ldan no/ /shu kra dang chu la sogs pa'i 'od zer gyis mA ma kI'o/ /rna ba g.yas pa'i 'od zer gyis phyag na rdo rje dang nam mkha'i snying po'o//rna ba g.yon pa'i 'od zer gyis sgra rdo rje ma'o/ /dpung pa g.yas pa'i 'od zer gyis shes rab mthar byed do/ /lag ngar g.yon pa'i 'od zer gyis 'dod pa'i rgyal po'o/ /de ni mnyam pa nyid kyi ye shes thob pa rgyu mthun pa'i 'bras bu'o/ /lkog ma'i rtsa'i 'od zer gyis 'od dpag tu med pa dang dro ba'i reg pa'i 'od zer gyis gos dkar mo'o//snying ga'i pad+ma'i 'od zer gyis 'jam pa'i rdo rje'o/ /sna'i 'od zer gyis 'jig rten dbang phyug go/ /lus kyi dri'i 'od zer gyis dri rdo rje ma'o/ /kha'i 'od zer gyis pad+ma mthar byed do//pus mo g.yas pa'i 'od zer gyis dbyig sngon no/ /des ni so sor rtog pa'i ye shes thob pa ni rgyu mthun pa'i 'bras bu'o/ /gsang ba'i 'od zer gyis don yod par grub pa'o/ /'gro ba la sogs pa'i 'od zer gyis sgrol ma'o/ /rdo rje rtse mo'i 'od zer gyis sel ba'o//lce'i 'od zer gyis ro rdo rje ma'o/ /tshigs thams cad kyi 'od zer gyis kun du bzang po'o/ /gsang ba'i 'od zer gyis bdud rtsi 'khyil pa'o/ /pus mo g.yas pa'i 'od zer gyis stobs po che'o/ /tshangs pa'i sgo'i 'od zer gyis gtsug tor 'khor los sgyur ba'o//rkang pa'i 'og gi 'od zer gyis gnod mdzes 'jug par bya'o/ /des ni bya ba nan tan sgrub pa'i ye shes thob pa ni rgyu mthun pa'i 'bras bu'o/ /des na reg bya rdo rje ma dang snyoms par zhugs pa'i rim gyis tshangs pa'i bu gnas byang chub kyi sems 'dzag pa dang /yan lag gi tshigs thams cad la byang chub kyi sems phyin pa dang / rdo rje'i dkyil du byang chub kyi sems 'bab pa'i tshe shes rab dang / thabs dang ma rig pa'i rang bzhin spangs la/ rnam par shes pa gsum nub cing 'od gsal ba'i sngon du 'gro bas dang / chu dang / me dang / rlung dang / nam mkha'i rnam par dag pas rtags lnga ma mthong ste/ thams cad stong pa 'od gsal ba nyams su myong zhing yab yum zhu nas thig ler 'gyur zhing thig le yang sgra dang sgra tsam gyis thim la rang dang gzhan gyi dbye ba mchog tu 'dzin pa med pas 'ba' zhig dri ma med pa/mtha' yas pa nam mkha' dang mtshungs pa'i ye shes mngon du bya'o/ /'dis chos kyi dbyings kyi ye shes mngon du bya ba ni rgyu mthun pa'i 'bras bu dang / rnam par shes pa'i phung po yang gnas par 'gyur ro zhes don dam pa'i dkyil 'khor/ de nyid brtan par bya ba'i phyir/mya ngan 'das bcas kun slong dang / /chos kyi sku yang bshad pa yin/ /bstan par bya ba'i don du ni/ /gsang sngags 'di ni brjod par bya/ /zhes smos te de nyid mya ngan las 'das pa ste/ mi gnas pa'i mya ngan las 'das pa'i dbyings kyi mtshan nyid do/ /de nyid kun slong ni de kho na nyid bzhi pa'o//sangs rgyas bcom ldan 'das rnams kyi de nyid chos kyi sku bshad pa yin te/ rnam par mi rtog pa'i ye shes kyi rnam pa yin pa'i phyir ro/ /gang gi tshe bskal pa grangs med pa gsum gyis byang chub sems dpa' sangs rgyas nyid thob pa de'i tshe/ sngags kyi theg pa la de las khyad par gang yin zhes rtog ste/ sngags kyi theg pa la sngags kyi mthu bshad par bya ste/ de kho na nyid de bstan pa'i don du ni mi g.yo bar bya ba'i phyir 'og nas bshad pa'i sngags 'di brjod par bya ste/ nang gi bzlas pa dang / rdo rje'i tshig gis zhes tshig gi lhag ma'o//sngags brjod par bya ste/ oM shU n+ya tA dz+nyA na badzra swa b+hA wa At+ma kou0f85haM zhes bya ba la/ oM ni rnam par snang mdzad do/ /shU n+ya tA ni rin chen 'byung ldan no/ /dz+nyA na ni 'od dpag tu med pa'o/ /badzra ni mi bskyod pa'o/ /swa b+hA ba At+ma ko ni don yod grub p a'o//a haM zhes bya ba ni drug pa rdo rje 'chang chen po'o/ /des ni de bzhin gshegs pa drug gi nga rgyal bya ste/ rdo rje 'chang ni kun gyi bdag nyid yin pa'i phyir ro/ /yang na oM shU n+ya tA zhes bya ba ni stong pa nyid kyi rnam par thar pa'i sgo'o/ /dz+nyA na badzra ni mtshan ma med pa'i rnam par thar pa'i sgo'o//swa b+hA ba At+ma ko ni smon pa med pa'i rnam par thar pa'i sgo'o/ /de'i rang bzhin du a haM zhes nga rgyal bya'o/ /nye bar bsdu ba bshad par bya ste/ 'di ni don dem dkyil 'khor te/ /snang ba med cing mtshan nyid med/ /don dam bden pa zhes bya ba//de bzhin gshegs pa kun gyi gnas/ /zhes smos te/ de ni sngar bshad pa'o/ /don dam pa'i dkyil 'khor phung po lnga dang / dbang po dang / yul dang / khams nye bar sdud par byed pa'o/ /mtha' drug las kyang lnga bcu nas brtsams te/phung po la sogs pa btung bar bya'o/ /de'i don 'di yin te/ gzugs ni rnam pa gnyis te/ kha dog gi rnam pa bcu gnyis dang / dbyibs kyi bdag nyid brgyad do/ /dbang po'i dbye bas tshor ba ni bco brgyad do/ /'du shes ni gcig go/ /dge ba dang / mi dge ba dang /lung du ma bstan pa'i 'du byed rnam pa gsum mo/ /kun gzhi la sogs pa'i dbye bas rnam par shes pa ni brgyad de/ lnga bcu de dag don dam pa'i bsgoms pas btung ba ni bsdu bar bya'o zhes bya ba'i don to/ /snying por gyur pas na dkyil 'khor ro/ /rang bzhin dang snang ba bral bas na snang ba med pa'o//mtshan ni bzhi ste/ skye ba dang / gnas pa dang / rga ba dang / mi rtag pa'o/ /de dang bral bas na mtshan nyid med pas te/ 'dus ma byas pa'i phyir ro/ /de nyid don dam pa'i bden pa ste/ kun rdzob nye bar bsdus pa'i phyir ro//de nyid kyi phyir de bzhin gshegs pa kun gyi gnas te/ skye ba'i gnas yin la/ sngar bshad pa'i rim pas thams cad de nyid du bsdu zhing 'og nas bshad pa'i rim pas de nyid nas 'byung ba'i phyir ro/ /da ni chad pa'i phyogs spang bar bya ba'i phyir/ don dam pa'i bden pa las ldang ba bstan par bya ste/'od gsal bar ni rab zhugs nas/ /ldang ba yang ni bstan par bya/ /zhes smos te/ sngar bshad pa'i rim gyis 'od gsal ba ni chos kyi dbyings kyi ye shes la zhugs pa'i rnal 'byor pa gang yin pa de'i de las ldang ba ni 'og nas bshad pa'i rim gyis lha'i sku 'dzin pa bstan par bya ba ni bshad par bya ste/snga ma'i smon lam 'bras bur bcas pa dang / chad pa'i lta ba spong ba dang / sems can gyi don bya ba'i phyir ro/ /de nyid bshad pa/ sngags kyi sku yi sbyor ba yis/ /lha yi gzugs la dmigs pa'i phyir//zhes smos te/ sngags yongs su gyur pa las skyes pa'i sku ni sngags kyi ste/ rdo rje 'chang la sogs pa'i mtshan nyid do/ /de'i sbyor ba ni bsgom pa'i rang bzhin gyi shes rab kyis mngon du byed pa'o/ /des lha'i gzugs ni lha sum cu rtsa gnyis kyi dkyil 'khor ro//de la dmigs pa ni spro ba sngon du 'gro bar bsgom pa ste/ de'i phyir de ni de'i don du'o/ /des ni ting nge 'dzin gsum bstan pa yin no/ /de la sngags kyi sku'i sbyor ba ni dang po'i sbyor ba'o/ /lha'i gzugs la dmigs pa'i phyir ni dkyil 'khor rgyal po mchog dang /las rgyal ba mchog bstan to/ /de nyid bshad pa/ nam mkha'i khams kyi dbus gnas pa/ /nyi ma'i dkyil 'khor bsgom par bya/ /sngags pas kyang ni de steng du/ /zla ba'i dkyil 'khor rnam par bsam/ /der yang pad+ma 'dab ma brgyad//kha dog dmar po bsgom par bya/ /zhes smos te/ 'dis ni gdan gyi dbye ba bshad par bya ste/ re zhig dang po sna tshogs pad+ma'i steng du yi ge hUM sngon po bkod la de'i 'od zer gyis nam mkha' las mi bskyod pa'i rigs bkug cing bcug la/ de yongs su gyur pa las cha bcu gnyis pa nyi ma'i dkyil 'khor bskal pa'i me ltar 'bar ba'i dpe byad kyi rang bzhin bsgom mo//de nas de'i nyi ma'i dkyil 'khor gyi steng du yi ge oM dkar po bkod la/ de'i 'od zer gyis nam mkha' las rnam par snang mdzad kyi rigs bkug cing bcug la de yongs su gyur pa las cha bcu drug gi rang bzhin dkar po skyes bu chen po'i mtshan sum cu rtsa gnyis kyi ngo bo zla ba'i dkyil 'khor bsam mo//de nas zla ba'i dkyil 'khor gyi steng du kha dog dmar po'i yi ge a bkod la de'i 'od zer gyis nam mkha' las 'od dpag tu med pa'i rigs bkug cing bcug la de yongs su gyur pa las pad+ma dmar po 'dab ma brgyad pa bsam ste drang ba'i don to//mi bskyod pa'i rang bzhin nyi ma'i dkyil 'khor dang / rnam par snang mdzad kyi rang bzhin zla ba'i dkyil 'khor dang / 'od dpag tu med pa'i rang bzhin gyi pad+ma'o//chos kyi dbyings kyi ye shes kyi rang bzhin nyi ma dang / me long lta bu'i ye shes kyi rang bzhin zla ba dang / so sor rtog pa'i ye shes kyi rang bzhin pad+ma'o/ /mngon spyod ni nyi ma dang / zhi ba ni zla ba dang / dbang ni pad+ma'o/ /sems kyi rang bzhin nyi ma dang / lus kyi rang bzhin zla ba dang /ngag gi rang bzhin pad+ma'o/ /khrag gi khams ni nyi ma dang / shu kra'i khams ni zla ba dang / de dag gi rten ni pad+ma'o/ /dbus ma'i rtsa nyi ma dang / g.yon pa'i zla ba dang / g.yas pa'i pad+ma'o/ /'dod pa'i khams ni nyi ma dang / gzugs kyi khams ni zla ba dang /gzugs med pa'i khams ni pad+ma'o/ /longs spyod rdzogs pa'i sku ni nyi ma dang / sprul pa'i sku ni zla ba dang / chos kyi sku ni pad+ma'o/ /snang ba ni zla ba dang / snang ba mched pa ni nyi ma dang / snang ba nye bar thob pa ni pad+ma'o/ /chags pa dang bral ba ni zla ba dang / chags pa ni nyi ma dang /chags pa bar ma ni pad+ma'o/ /tshul khrims ni zla ba dang / ting nge 'dzin ni nyi ma dang / shes rab ni pad+ma'o/ /stong pa nyid ni nyi ma dang / snying rje ni zla ba dang / gnyi ga ni pad+ma'o/ /'jam pa ni zla ba dang / rno ba ni nyi ma dang / gnyi ga ni pad+ma'o/ /kun brtags ni nyi ma dang /gzhan dbang ni zla ba dang / yongs su grub pa ni pad+ma'o/ /mo rtags ni zla ba dang / pho rtags ni nyi ma dang / ma ning gi rtags ni pad+ma'o/ /mtshan mo ni zla ba dang / nyin mo ni nyi ma dang / mtshams ni pad+ma'o/ /oM zla ba dang / a nyi ma dang / gnyi ga med pa ni pad+ma'o/ / shes rab zla ba dang / thabs nyi ma dang / gnyi ga'i bdag nyid pad+ma'o/ /hUM nyi ma dang / oM zla ba dang / a pad+ma'o/ /stong pa zla ba dang / shin tu stong pa nyi ma dang / chen po stong pa pad+ma'o/ /khyab byed zla ba dang / khyab bya nyi ma dang / gnyi ga ni pad+ma'o/ /stong pa nyid zla ba dang /mtshan ma med pa nyi ma dang / smon pa med pa ni pad+ma'o/ /tshangs pa ni zla ba dang / dbang phyug chen po ni nyi ma dang / khyab 'jug ni pad+ma'o/ /'das pa ni zla ba dang / da ltar byung ba ni nyi ma dang / ma 'ongs pa ni pad+ma'o/ /zhe sdang zla ba dang / 'dod chags nyi ma dang / gti mug ni pad+ma'o/ /chu'i khams ni zla ba dang / me'i khams ni nyi ma dang / sa'i khams ni pad+ma'o/ /gzugs kyi phung po zla ba dang / rnam par shes pa'i phung po nyi ma dang / 'du shes kyi phung po ni pad+ma'o/ /sa bla ni zla ba dang / sa steng ni nyi ma dang / sa 'og ni pad+ma'o/ /dam tshig sems dpa' ni zla ba dang /ye shes sems dpa' ni nyi ma dang / ting nge 'dzin sems dpa' ni pad+ma'o/ /sems can la dmigs pa ni zla ba dang / chos la dmigs pa ni nyi ma dang / dmigs pa med pa ni pad+ma'o/ /dpyid ni zla ba dang / so ga ni nyi ma dang / ston ka ni pad+ma'o//bde ba'i dus ni zla ba dang / sdug bsngal gyi dus ni nyi ma dang / bsam gyis mi khyab pa'i dus ni pad+ma'o/ /cha dang bcas pa zla ba dang / cha med pa ni nyi ma dang / gnyi ga dang bral ba ni pad+ma'o/ /de ltar rigs brgya'i dbye bas bcom ldan 'das kyi gdan gyi dbye ba bstan te nges pa'i don to//chos kyi dbyings kyi bsgom pa bshad par bya ste/ pad+ma'i steng du sngags chen po/ /yi ge gsum yang rnam par bsam/ /zhes smos pa la de nas pad+ma 'dab ma brgyad pa dmar po'i lte bar dkar po dang / dmar po dang / nag po'i yi ge gsum bkod la/de yongs su gyur pa las sems so sor rtog pa'i bdag nyid kyi zla ba'i dkyil 'khor nyid bsam par bya zhes man ngag go/ /don dam pa byang chub kyi sems kyi rang bzhin yin pa'i phyir ro/ /de nas kun rdzob kyi bden pa don dam pa nyid du bsgrub par bya ba bshad par bya ste/sngags dang pad+ma nyi ma dag /zla ba'i dkyil 'khor la zhugs pas/ /zhes smos pa la/ sngags ni oM yongs su gyur pa las zla ba'i dkyil 'khor dang / de bzhin du pad+ma dang nyi ma'i dkyil 'khor gsum po de dag kyang zla ba'i dkyil 'khor ni yi ge gsum po yongs su gyur pa las skyes pa la zhugs par bsam par bya'o//des ni sku gsung thugs gcig tu gyur pa'i mtshan nyid kyi chos kyi dbyings de kho na nyid mngon du byas par bstan te/ nye bar bsdu ba'i dgongs pa ma yin pa'o//nye bar bsdu ba'i sgo de nyid kyi khyad par bshad pa/ zla ba'i dkyil 'khor kun rdzogs pa/ /byang chub sems su rnam par brtag /ces smos pa la/ gdan gsum po yongs su gyur pa las skyes pa'i zla ba'i dkyil 'khor bsod nams dang ye shes kyi tshogs yongs su rdzogs pas kun du rdzogs pa gang yin pa de ni bden pa gnyis kyi bdag nyid yin pas na byang chub kyi sems te/don dam pa byang chub kyi sems kyi brda rnam par brtag pa ste/ rjes su dran par bya'o/ /phyogs gnyis po las rnam grol ba'i//rnam rtog mun pa sel byed pa/ /nyon mongs dri ma kun las dag /zla ba bzhin sems zla ba'o/ /zhes bshad pa'i phyir ro/ /de kho na nyid bsdus pa las kyang bcom ldan 'das zla ba'i dkyil 'khor lta bur sems mthong ngo zhes 'byung ngo / /de'i khyab pa nyid du bstan pa'i phyir/rgyu dang mi rgyu thams cad kyang / /de nyid du ni rnam bsam zhing / /zhes smos te/ zla ba'i dkyil 'khor de nyid la rgyu dang mi rgyu ba'i rang bzhin thams cad ni khams gsum par gnas par bsam pa ste/ chos kyi dbyings kyi ye shes kyis thams cad la khyab pa'i phyir te drang ba'i don to//sa la sogs pa'i mi rgyu ba'i khams dang bshang gci la sogs pa rgyu ba ste/ byang chub kyi sems kyi zla bas khams thams cad khyab pa'i phyir te nges pa'i don to/ /de nyid brtan par bya ba'i phyir sngags bstan pa/ brtan par bya ba'i don du ni//gsang sngags 'di ni brjod par bya/ /zhes bya ba smos te/ las dang po pa yin pas chos kyi dbyings mngon du ma gyur na/ de'i tshe de nyid bstan par bya ba'i don du 'og nas bshad pa'i sngags brjod de/ rdo rje'i tshig gis zhes tshig lhag ma ste sgra ji bzhin pa'o/ / sngags brjod pa ni/ oM d+harma d+hA tu swa b+hA ba At+ma kou0f85haM/ oM ni rdo rje 'chang chen po'o/ /de nyid ni d+harma d+hA tu ste 'od gsal ba'o/ /de'i swa b+hA ba ni rnam par mi rtog pa nyid do/ /At+makou0f85haM ni de'i bdag nyid de/ dgongs pa ma yin pa'o/ /sku bskyed pa'i phyir/ de nas rnal 'byor p a yis kyang //zla ba'i dbus su yig gsum bsam/ /zhes smos te/ de nas chos kyi dbyings kyi rang bzhin gyi sku gsung thugs gcig tu gyur pa las byung ba'i zla ba'i dbus su kha dog dkar po las rnam par snang mdzad la sogs pa'i rang bzhin gyis yi ge gsum bsam pa ni dgod pa ste sgra ji bzhin pa'o//de nas yig gsum las byung ba/ /kun+da zla ba dkar dang mtshungs/ /dang po'i mgon po bsams nas kyang / /zhes smos pa la/ de nas yi ge gsum las 'od zer gyi tshogs spros la/ de nyid kyis rnam par snang mdzad la sogs pa 'khor dang bcas pa bkug cing de nyid du bcug ste/rdo rje rtse lnga pa dmar po bsam mo/ /de'i rnam par dag pa ni steng gi rtse lnga ni mi bskyod pa la sogs pa dang / 'og gi rtse lnga ni reg bya rdo rje ma la sogs pa'o/ /steng gi rtse mo'i 'og tu pad+ma 'dab ma brgyad pa ni byams pa la sogs pa dang /'og ma'i rtse mo'i 'og tu pad+ma 'dab ma brgyad pa ni gzugs dang sgra dang dri dang ro rdo rje ma dang / byams pa dang / snying rje dang / dga' ba dang / btang snyoms kyi lha mo'o/ /steng dang 'og gi chu srin gyi kha ni gshin rje mthar byed la sogs pa brgyad do//steng dang 'og gi dbu ma'i rtse mo ni/ /gtsug tor dang gnod mdzes rgyal po'o/ /chang gzungs la rdo rje dbyings kyi dbang phyug ma dang / snyoms par zhugs pa ni rdo rje 'chang ngo / /de ltar de bzhin gshegs pa thams cad kyi rang bzhin rdo rje bsams la/ badzra At+ma kou0f85haM zhes nga rgyal bya ste/de'i rtse mor hUM bkod cing spro ba dang / bsdu ba'i rim gyis 'gro ba'i don byas te/ sangs rgyas kyi zhing la 'jug cing / de bzhin gshegs pa thams cad zhugs la sngon du 'gro bar rdo rje las byung ba'i bcom ldan 'das rdo rje 'chang chen po zhal gsum phyag drug pa zhi ba dkar po rdo rje skyil krung bcas pa zhal dkar po dang /dmar po dang sngon po mnga' ba 'od gsal ba'i ye shes kyi rnam pa rang gi sku las byung ba'i 'od zer gyi 'khor los nam mkha'i khams kyi dkyil de bzhin gshegs pa dang / lha mo dang khro bo'i tshogs kyis gang bar mdzad pa bsam par bya ste spyi'i don to//de ni yan lag bcu pa'i rnal 'byor ro/ /nye bar bsdu ba bshad par bya ste/ de ltar rnal 'byor dmigs nas ni/ /zhes smos pa la/ de bzhin gshegs pa'i rigs drug pa bskyed pa'i bar du rnal 'byor gyi ting nge 'dzin te dang po'o//rjes su rnal 'byor bshad par bya ste/ rjes su rnal 'byor ba rtsam par bya/ /zhes smos te/ rnal 'byor gyi phyi nas 'byung bas rjes su rnal 'byor te yi ge'i don to/ /de nyid bshad pa/ mi bskyod pa ni rjes zhugs pa//zhal gsum phyag drug 'bar ba dang / /in+d+ra nI la'i 'od 'bar ba'i/ /rdo rje sems dpa' rnam par bsgom/ /zhes smos te/ bcom ldan 'das dbus kyi gtso bo rdo rje 'chang gi thugs ka nas 'od zer spros te/ de yongs su gyur pa las bcom ldan 'das mi bskyod pa bsgoms la/de dang rjes su zhugs pa las byung ba'i rdo rje sems dpa' thugs rdo rje'i rnam pa in+d+ra nI la nor bu dang 'dra ba zhe sdang gi rigs yin pas na khro bo 'bar ba spro ba rnam par thar pa gsum rnam par dag pas zhal gsum pa pha rol tu phyin pa drug rnam par dag pas phyag drug pa bsam mo//de nas de'i snying gar paM las byung ba'i sna tshogs pad+ma'i lte bar dbyangs dang po las byung ba'i zla ba la yi ge hUM las skyes pa'i rdo rje rtse lnga pa las byung ba'i thugs rdo rje 'chang de dang 'dra bar bsams te/ de'i thugs kar yang de bzhin du sna tshogs pad+ma dang /zla ba la yi ge hUM las byung ba'i rdo rje yi ge hUM nyid bsam par bya ste/ ye shes sems dpa' dang / ting nge 'dzin sems dpa' bsgom pa ni rjes su rnal 'byor te ting nge 'dzin gnyis pa'o/ /de nyid kyi phyag mtshan bstan pa'i phyir/ /rdo rje 'khor lo pad+ma rnams//g.yas pa'i phyag tu bsam par bya/ /dril bu rin chen ral gri ni/ /g.yon pa'i phyag tu bsam par bya/ /zhes smos te/ de la rdo rje mi bskyod pa'i phyag mtshan te/ ye shes lnga'i rang bzhin no/ /'khor lo rnam par snang mdzad kyi phyag mtshan te/ chos kyi 'khor lo bskor ba'i rang bzhin no//pad+ma ni 'od dpag tu med pa'i phyag mtshan te/ 'dod chags la sogs pa'i 'dam gyis ma gos pa'i shes rab kyi rang bzhin no/ /dril bu ni srid pa rnam par dag pa ste shes rab kyi ngo bo nyid do/ /yid bzhin nor bu ni rin chen 'byung ldan gyi phyag mtshan te/bsam pa thams cad rdzogs par byed pa'i ye shes so/ /ral gri ni don yod par grub pa'i phyag mtshan te/ nyon mongs pa gcod pa'i shes rab bo/ /de ltar rigs drug gi mtshan ma 'dzin pa bcom ldan 'das pad+ma dang nyi ma'i dbus su bzhugs pa bsgom mo zhes rjes su rnal 'byor ro//shin tu rnal 'byor gyi bsgom pa bshad par bya ste/ de nas phung po la sogs pa'i/ /dbye ba shes pas snang mdzad sogs/ /gnod mdzes bar du bon gyi/ /dgod pas yang dag nyid du dgod/ /ces smos te/ de nas zhes bya ba ni rjes su rnal 'byor gyi 'og tu/phung po la sogs pa ni phung po dang / skye mched dang / khams dang / yan lag dang nying lag la'o/ /dgod pa ni sa bon gyi yi ge dgod pa ste mtshon par bya'o/ /sa bon yongs su gyur pa las snang mdzad sogs zhes bya ba ni de bzhin gshegs pa dang / lha mo dang byang chub sems dpa' dang khro bo ste/gnod mdzes kyi bar du bsgom mo/ /de nyid rnam par snang mdzad la sogs pa gnod mdzes zhes bshad pa yin no/ /sa bon dgod pa ni oM la sogs pa'i sa bon dgod pas so/ /yang dag ces bya ba ni rang bzhin rjes su dran pas so//yang na/ gang dang gang gis kha dog dang / /gzugs la sogs pa de dang de'i/ /rim pa de nyid kyis bsam mo/ /rgyas par bshad par bya ste/ rnam par snang mdzad 'di yi sa bon ni/ /kha dog dkar po yi ge oM//gzugs phung ngo bo nyid kyis ni/ /sngags shes pas ni spyi bor dgod/ /ces smos te/ dang por spyi bor pad+ma dang zla ba'i steng du oM dkar po bkod la/ de'i 'od zer gyis nam mkha' nas rnam par snang mdzad kyi rigs bkug la de nyid du bcug ste/de yongs su gyur pa las rnam par snang mdzad zhal gsum phyag drug pa zhi ba dkar po'o/ /gzugs kyi phung po rnam par dag pa'i rang bzhin 'og nas/ bshad pa'i phyag mtshan 'dzin pa/ sems dpa' gsum gyi bdag nyid can/ting nge 'dzin sems dpa'i yi ge oM gyi thig ler lha sum cu rtsa gnyis kyi bdag nyid dang bcas pa/ mtha' yas pa'i sangs rgyas kyi 'od zer gyis phyogs bcu khyab par byed pa bsgoms na/ de'i tshe me long lta bu'i ye shes 'byung bar 'gyur ro//'du shes byin gyis brlab pa bshad par bya ste/ aH ni mgon po 'od dpag med/ /'du shes phung po bdag nyid can/ /mdog dmar kha la bsams nas ni/ /ngag gi dbang phyug nyid thob 'gyur/ /zhes smos te//de nas lkog ma'i dbus su pad+ma 'dab ma brgyad pa dmar po dang / nyi ma'i steng du aH dmar po bkod nas de'i 'od zer gyis nam mkha' la 'od dpag tu med pa'i rigs bkug cing bcug la/ de yongs su gyur pa las 'od dpag tu med pa zhal gsum phyag drug pa dmar po zhi ba/'du shes kyi phung po'i rang bzhin 'og nas bshad pa'i phyag mtshan 'dzin pa/ /sems dpa' gsum gyi bdag nyid can/ ting nge 'dzin sems dpa'i thig ler lha sum cu rtsa gnyis dang bcas pas/sangs rgyas mtha' yas pa'i 'od zer gyis phyogs bcu khyab par bsgoms na/ de'i tshe so sor rtog pa'i ye shes dang thob pa dang / ngag gi dbang phyug nyid thob par 'gyur ro/ / rnam par shes pa'i phung po nyid byin gyis brlab pa bshad par bya ste/ mi bskyod pa yi yi ge hUM/ /rab tu bzang po'i mthing shun mdog /rnam shes phung po'i ngo bo nyid/ /sngags pas snying gar rnam par dgod/ /ces smos te snying ga'i steng du pad+ma dang /nyi ma'i dkyil 'khor gyi steng du hUM las byung ba'i mi bskyod pa zhal gsum phyag drug pa sngon po rnam par shes pa'i phung po'i ngo bo 'og nas bshad pa'i phyag mtshan 'dzin pa/ ting nge 'dzin sems dpa'i thig ler lha sum cu rtsa gnyis dang bcas pa/sangs rgyas mtha' yas pa'i 'od zer gyis phyogs bcur khyab par bsgoms nas/ de'i tshe chos kyi dbyings kyi ye shes 'byung bar 'gyur ro/ /tshor ba byin gyis brlab pa bshad pa ni/ rin chen mgon po'i yi ge swA/ /tshor ba'i phung po'i ngo bo nyid/ /tshor ba dag pa'i rgyu can ni/ /kha dog ser po lte bar dgod/ /ces smos te/ de nas lte bar pad+ma dang nyi ma'i steng du kha dog ser po'i yi ge swA dgod cing / de las byung ba'i rin chen 'byung ldan zhi ba ser po zhal gsum phyag drug pa/ tshor ba'i phung po'i ngo bo 'og nas bshad pa'i phyag mtshan 'dzin pa/ sems dpa' gsum gyi bdag nyid ting nge 'dzin sems dpa'i thig ler lha sum cu rtsa gnyis dang bcas pa/sangs rgyas mtha' yas pa'i 'od zer gyis phyogs bcu khyab par bsgoms na/ de'i tshe mnyam pa nyid kyi ye shes 'byung ngo / /'du byed rnam par dag pa bshad par bya ste/ rkang pa gnyis la yi ge hA//'du byed phung po'i ngo bo nyid/ /las kyi mgon po nyid ni/ /sngags pas kha dog ljang gur dgod/ /ces smos te/ de nas rkang pa gnyis kyi steng du kha dog ljang gu'i hA gnyis bkod la/ de yongs su gyur pa las don yod grub pa zhal gsum phyag drug pa zhi ba ljang gu 'du byed kyi phung po'i ngo bo 'og nas bshad pa'i phyag mtshan 'dzin pa/sems dpa' gsum gyi bdag nyid ting nge 'dzin sems dpa'i thig ler lha sum cu rtsa gnyis dang bcas pa sangs rgyas mtha' yas pa'i 'od zer spro bas phyogs bcu khyab par bsgoms na de'i tshe bya ba nan tan bsgrub pa'i ye shes 'byung ngo zhes phung po byin gyis brlab pa'o//khams byin gyis brlab pa'i phyir bshad par bya ste/ sngags pas gti mug dga' sogs ni/ /sa la sogs par rab tu gzhag /sra dang gsher dang dro ba dang / /g.yo ba nyid shes rim pa bzhin//zhes smos te/ lus po 'di la sha dang rus pa la sogs pa sra ba'i rang bzhin ni sa ste/ de la mo ha ra ti zhes bya ba'i sngags las byung ba sangs rgyas spyan dkar mo zhal gsum phyag drug pa rnam par snang mdzad dang snyoms par zhugs pa bde ba chen po'i dbang gis zhu ste/yang sha dang rus pa la sogs par yongs su gyur te/ de la mo ha ra ti zhes sngags dgod par bya ste/ de'i tshe sa'i khams rnam par dag par 'gyur ro/ /de nas dwe Sha ra ti zhes bya ba'i sngags las byung ba chu dang khrag la sogs pa zhu ba'i rdzas la mA ma kI bkod de/mi bskyod pa dang lhan cig tu zhu zhing / yang khrag la sogs pa'i rang bzhin du yongs su gyur te/ yang dwe Sha ra ti zhes sngags bkod na/ de'i tshe chu'i khams rnam par dag par 'gyur ro/ /de nas srog gi dbang po dang / nye ba'i dro ba'i reg pa'i rang bzhin gyis me'i khams la rA ga ra ti zhes bya ba'i sngags dgod pa sngon du 'gro bas gos dkar mo dmar po zhal gsum phyag drug pa bsgoms te/'od dpag tu med pa dang lhan cig tu zhu ste/ slar yang me'i khams su gyur cing de nyid la rA ga ra ti zhes bya ba'i sngags bkod na/ de'i tshe me'i khams rnam par dag par 'gyur ro//de nas rtsa'i khong stong gi nang du rgyu ba'i rlung gi khams la badzra ra ti zhes bya ba'i sngags dgod pa sngon du 'gro ba las byung ba'i sgrol ma zhal gsum phyag drug pa ljang gu don yod grub pa dang bcas par bsgoms te snyoms par zhugs pas zhu zhing yang rlung gi khams su 'gyur zhing de nyid la badzra ra ti zhes bya ba'i sngags bkod na/de'i tshe rlung gi khams rnam par dag par 'gyur ro/ /skye mched byin gyis brlab pa bshad par bya ste/ th+l+hiM ni mig tu bkod nas ni/ /sa'i snying po rnam par bsgom/ /oM ni rna bdag la dgod/ /phyag na rdo rje bsgom par bya//oM ni sna la rnam bkod de/ /nam mkha'i snying po rab tu bsgom/ /oM ni lce la bkod nas ni/ /'jig rten dbang por brtag par bya/ /yid la oM dang hUM bkod de/ /'jam pa'i dbyangs ni rab tu bsgom/ /yi ge oM ni lus kun la'ang / /bsgoms pas sgrib sel dran par bya//maM yig rtsa rgyus la bkod de/ /byams pa nyid du yongs su brtag /tshigs kun la ni saM bkod de/ /kun du bzang po bsam par bya/ /zhes smos te/ tshigs su bcad pa bzhis skye mched drug dang rtsa'i 'khor lo dang tshigs thams cad la dgod pa bshad par bya ste/de la dang po mig gi dbang po stong pa nyid du bsgoms la/ stong pa'i gnas su yi ge th+l+hiM dkar po dgod cing de yongs su gyur pa las sa'i snying po zhal gsum phyag drug pa zhi ba dkar po 'chad par 'gyur ba'i phyag mtshan 'dzin pa sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa sangs rgyas mtha' yas pa'i 'od zer spros pas phyogs bcu khyab par bsams na de'i tshe tha mal pa'i mig gi dbang po log nas lha'i mig tu 'gyur ro//de bzhin du rna ba'i dbang po stong par bsgoms nas/stong pa'i gnas su oM sngon po bkod la de yongs su gyur pa las phyag na rdo rje zhal gsum phyag drug pa zhi ba sngon po 'og nas 'chad pa'i phyag mtshan 'dzin pa/ sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa sangs rgyas mtha' yas pa'i 'od zer spros pas phyogs bcu khyab par bsams na de'i tshe tha mal pa'i rna ba'i dbang po log nas lha'i rna ba thob par 'gyur ro//de'i rjes la sna'i dbang po stong par bsgoms la/ stong pa'i gnas su oM ser po bkod la de las nam mkha'i snying bo zhal gsum phyag drug pa zhi ba ser po 'og nas 'chad pa'i phyag mtshan 'dzin pa/sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis kyi bdag nyid sangs rgyas mtha' yas pa'i 'od zer spros pas phyogs bcu khyab par bsgoms na/de'i tshe tha mal pa'i sna'i dbang po log nas lha'i sna thob par 'gyur ro/ de bzhin du lce'i dbang po stong par bsgoms la stong pa'i gnas su oM dmar po las 'jig rten dbang phyug zhal gsum phyug drug pa zhi ba dmar po 'og nas 'chang pa'i phyag mtshan nyid 'dzin pa/sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis kyi bdag nyid dang bcas pa sangs rgyas mtha' yas pa'i 'od zer spros pas phyogs bcu khyab par bsams nas/ de'i tshe tha mal pa'i lce'i dbang po log nas lha'i [(]l+tse [,]lce [)]thob par 'gyur ro//de nas yid kyi gnas snying gar oM dang bcas dang bcas pa'i hUM yongs su gyur pa las kha dog dkar po zhal gsum phyag drug pa'i 'jal pa'i dbyangs 'og nas 'chad pa'i phyag mtshan 'dzin pa/ sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa sangs rgyas mtha' yas pa'i 'od zer spros pas phyogs bcu khyab par bsams nas/de'i tshe tha mal pa'i yid 'og nas gzhan gyi sems shes pa dang / 'das pa dang ma 'ongs pa dang /da ltar byung ba'i shes pa thob par 'gyur ro/ /de'i rjes la lus kun ni gsang ba'i rdo rje'i mthar yi ge oM yongs su gyur pa las zhal gsum phyag drug pa zhig ljang gu sgrib pa thams cad rnam par sel ba 'og nas 'chad pa'i phyag mtshan 'dzin pa/sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa sangs rgyas mtha' yas pa'i 'od zer spros pas phyogs bcu khyab par bsams na/ de'i tshe tha mal pa'i lus log nas lha'i sku thob par 'gyur ro/ /de nas rtsa rgyus thams cad la yi ge maiM las byams pa zhal gsum phyag drug pa zhi ba dmar po 'og nas 'chad pa'i phyag mtshan 'dzin pa/sems dpa' gsum gyi bdag nyid ye shes sems dpa'i sa bon thig ler lha sum cu rtsa gnyis dang bcas pa sangs rgyas mtha' yas pa'i 'od zer spros pas phyogs bcu khyab par bsams na/de'i tshe rtsa'i khong stong log nas mi phyed pa'i sku thob par 'gyur ro/ /de nas yan lag thams cad kyi tshigs la saM dmar po las kun du bzang po zhal gsum phyag drug pa zhi ba dmar po 'og nas 'chad pa'i phyag mtshan 'dzin pa/sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa/ sangs rgyas mtha' yas pa'i 'od zer spros pas phyogs bcu khyab par bsams na/ de'i tshe rdo rje'i sku thob par 'gyur ro//byang chub sems dpa' brgyad po de dag yongs su gyur nas yang mig la sogs par sngar bshad pa'i yi ge'i 'bru rnams dgod par bya'o/ /kha cig na re mi 'gyur ba nyid yin no zhes zer ro/ /yan lag dang nying lag la dgod pa bshad par bya ste/ lag pa g.yas par gshin rje gshed//g.yon par gzhan gyis mi thub pa/ /rta mgrin kha la bsam par bya/ /rdo rje la ni bdud rtsi 'khyil/ /dpung pa g.yas par mi g.yo ba/ /g.yon par 'dod pa'i rgyal po'o/ /pus mo g.yas par bsam pa ni/ /dbyig pa sngon po cher 'bar ba//pus mo g.yon par stobs po che/ /spyi bor gtsug tor 'khor los sgyur/ /gnod mdzes rgyal po bsam pa ni/ /rkang pa gnyis la dgod par bya/ /zhes smos pa la/ dpung pa g.yas pa dang / g.yon pa dang / kha dang / gsang ba dang / lag ngar gnyis dang /pus mo gnyis dang / tshangs pa'i sgo dang / rkang pa'i mthil la yi ge hUM sngon po bcu dgod pa'am/ yang na/ ya mAn+ta kr-ita/ pradz+nyAn+ta kr-ita/ pad mAn+ta kr-ita/ big+h+nAn+ta kr-ita dang / hA swA AH oM b+hUM hUM yongs su gyur pa las byung ba'i gshin rje gshed la sogs pa 'og nas 'chad par 'gyur ba'i phyag mtshan dang kha dog 'dzin pa khro bo bcu zhal gsum phyag drug pa/sems dpa' gsum gyi bdag nyid ye shes sems dpa'i sa bon gyi thig ler lha sum cu rtsa gnyis dang bcas pa/ sangs rgyas mtha' yas pa'i 'od zer spros pas phyogs bcu khyab par bsams na/de'i tshe 'bar ba dang snang ba dang / glog ston pa dang / gsal ba dang / char 'bebs pa dang / mi snang ba dang / gzugs bsgyur ba dang / skad cig gcig gis gling bzhi bskor ba dang / mkha' spyod dang / sa 'og spyod pa'i dngos grub thob par 'gyur ro//nye bar bsdu ba bshad par bya ste/ /dgod byas de nas sngags pa yis/ /phung po la sogs cho ga bzhin/ /sku yi dkyil 'khor rdzogs gyur nas/ /rnal 'byor chen po yang dag bsam/ /zhes smos pa la/ dgod byas ni shin tu rnal 'byor gyi rim gyis lha sum cu rtsa gnyis kyi 'khor lo bkod nas so//phung po la sogs pa ni phung po dang / khams dang skye mched dang / yan lag dang nying lag la'o/ /cho ga bzhin sngar bshad pa'i rim pas so/ /des ni lus kyi dkyil 'khor yongs su rdzogs par 'gyur ro/ /lus kyi dkyil 'khor yongs su rdzogs par gyur nas/rnal 'byor chen po ni sku la sogs pa byin gyis rlob pa'i bdag nyid kyi ting nge 'dzin to/ /yang dag bsam ni bsgom par bya'o/ /de nyid bshad pa/ zla ba'i dkyil 'khor yang dag rdzogs/ /spyi bo'i dbus su gnas par bsam/ / der ni yi ge oM dkar po/ /'od zer lnga ni rab 'phro ba'o/ /zhes smos pa la/ re zhig dang po spyi bo'i dbus su klad pa'i nang rtsa la dgod pa'i dbyangs dang po las byung ba zla ba'i dkyil 'khor yang dag rdzogs ni nya'i zla ba dang 'dra bar bsgom mo/ /de'i steng du kha dog dkar po'i yi ge oM ni rnam par snang mdzad kyi sa bon 'od zer lnga spro bar byed pa ni lha sum cu rtsa gnyis kyi bdag nyid du bsgoms te/de las 'od zer gyi 'khor lo spros la nam mkhar de yongs su gyur pa las spyan mtha' yas pa'i spyan gyi tshogs kyis bskor ba bsgoms te/ / 'og min gyi gnas su song nas de las ye shes kyi rnam par snang ba la mchod pa lnga dang snyoms par 'jug pas mchod cing mgrin par lag ngar gyi zhags pa bcug ste 'og tu bkug cing de'i 'khor du ma yang sprul pa'i spyan gyi tshogs kyis bkug par bsams la/ shar phyogs kyi sgo'i mdun du paM las skyes pa'i sna tshogs pad+ma dang / a las skyes pa'i zla ba'i dkyil 'khor la bzhugs su gsol la/ snying gnas mchod pa'i lha mo spro zhing mchod nas/ dpal ldan sangs rgyas sku 'chang ba/ /zhes bya ba la sogs pa'i tshigs su bcad pa gnyis kyis gsol ba btab nas/dba' rlabs bzhin du oM gyi thig ler zhugs la/ sangs rgyas kun gyi sku gang yin/ /zhes bya ba la sogs pa tshigs su bcad pas nga rgyal byas la brtan par byed pa'i sngags brjod par bya ste sku byin gyis brlab pa'o//de ltar gyur nas skyes bu chen po'i mtshan sum cu rtsa gnyis dang / dpe byad brgyad cus spras pa'i bdag nyid thob par 'gyur ro zhes phan yon no/ /de nyid bshad pa/ de nas lha mo phyung nas ni/ /bdag po'i rab tu sbyor ba yis/ /spyan ni du ma bsams nas ni//nam mkha' thams cad rab tu gang / /zhes smos pa la/ lha mo ni spyan gtso mo'o/ /bdag po'i sbyor ba yis ni dbus kyi gtso bo la 'khyud nas gnas pa'o/ /spyan du ma ni des spros pa'i spyan mang po ste/ 'khor gyi rang bzhin no/ /nam mkha' thams cad rab tu gang /zhes bya ba ni nam mkha'i khams ma lus pa khyab cing lag na mchod pa thogs pa'o/ /de nas sku yi rdo rje ni/ /nam mkha' gang bar bzhugs bsams te/ /zhes smos pa la/ de nas 'og min gyi gnas thob nas sku rdo rje ni rnam par snang mdzad la mchod cing snyoms par 'jug pa chen pos mchod la/nam mkha' gang bar bzhugs pa ni sangs rgyas kyi zhing las byung zhing gang du bsgrubs pa'i gnas de'i nam mkha' la khyab nas bzhugs par bsam par bya'o/ / de dbus bdag po bsgom pa ni/ /bdag nyid kyi ni mdun du gnas/ /zhes smos te/ de nas bar snang gi nam mkha' la bkug cing bdag nyid kyi mdun du zhes bya ba ni shar phyogs kyi sgo'i mdun du pad+ma dang zla ba'i steng du bzhugs su gsol bar bya ba ni blta bar bya ba'o/ / mchod pa byas nas gsol ba gdab pa'i phyir bshad pa/ de nas sngags pas tshigs bcad 'dis/ /gnyis brjod nas ni gsol ba gdab/ /ces smos te/ de nas bcom ldan 'das rnam par snang mdzad skyes bu chen po'i mtshan sum cu rtsa gnyis kyis brgyan pa/dpe byad brgyad cus sku la spras pa/ sngags pa ni bsgom pa mi brjed pa'i ngang tshul gyis 'og nas 'chad pa'i tshigs su bcad pa gnyis brjod pas gsol ba gdab pa ni don du gnyer ba'o/ /de nyid bshad pa/ dpal ldan sangs rgyas sku 'chang ba/ / rdo rje mi phyed gsum bsgoms pas/ /deng bdag byin gyis brlabs nas su/ /rdo rje skus ni mdzad du gsol/ /zhes smos te/ sangs rgyas kyi sku ni rdo rje'i sku ste/ de 'chang bas na sangs rgyas sku 'chang ba'o/ /dpal ni spyan te de dang ldan no/ /rdo rje gsum ni sku rdo rje la sogs pa ste/de dang mi phyed par bsgoms pa ni tha mi dad pa'i rang bzhin no/ /bcom ldan 'das sku rdo rje ni khyed bdag la byin gyis brlab pa'i gnas ni yang dag par byin gyis brlab par mdzad du gsol zhes gsol ba btab pa'o/ /'khor rnams la yang bshad pa/phyogs bcur bzhugs pa'i sangs rgyas rnams/ /rdo rje mi phyed gsum bsgoms pas/ /deng bdag byin gyis brlabs nas su/ /rdo rje skus ni mdzad du gsol/ /zhes pa ni go sla'o/ /gsol ba btab cing zhus pa bshad pa ste/ spyan dang lhan cig ldan pa yi//rnam par snang mdzad bsams nas su/ /de bcug nas ni byin brlabs te/ phung po lnga yis rab bkang ba'o/ /zhes smos te/ mchod pa'i mthar yang oM gyi 'od zer gyis spyan dang ldan pa'i rnam par snang mdzad bzhugs shing byin gyis brlabs te nga rgyal bya'o/ / sangs rgyas kun gyi sku gang yin/ /phung po lnga yis rab bkang ba/ /sangs rgyas sku yi ngo bo yis/ /bdag kyang de dang 'dra bar shog /ces smos pa la/ sangs rgyas kun ni rnam par snang mdzad kyi rigs can gyi sku ni rdo rje'i sku'o/ /ji lta bu yin zhe na/ phung po lnga yis rab bkang ba ni ye shes lnga'i rang bzhin dang /de'i rgyu mthun par 'gyur ba 'jig rten las 'das pa'i tshul khrims la sogs pa'i phung po lngas rab bkang ba ni gang ba'o/ /de bzhin du/ bdag kyang de dang 'dra bar shog /ces bya ba ni grub par gyur cig pa'o/ /sangs rgyas sku yi ngo bo yis//zhes bya ba ni rnam par snang mdzad kyi rigs kyi sku'i rnam pas so/ /sngags bshad pa/ oM sarba ta thA ga ta kA ya badzra swa b+hA ba At+ma kou0f85ho zhes smos te/ oM ni rnam par snang mdzad do/ /sarba ta thA ga ta kA ya badzra ni sku mi phyed pa'i sku'i rang bzhin n o//de'i swa b+hA ba ni mtshan ma la sogs pas brgyan pa nyid dang / mi 'jigs pa nyid do/ /At+ma kou0f85haM ni de'i rang bzhin nga yin no zhes brtan par bya ba'o/ /ngag byin gyis brlab pa bshad par bya ste/ AH ni kha dog dmar ldan pa/ /lce yi dbus su gnas b sams te//gos dkar zhes bya nam mkha' ru/ /spros nas nam mkha'i khams rnams dgang / zhes smos te/ re zhig dang po lkog ma'i dbus su paM las skyes pa'i pad+ma 'dab ma brgyad pa'i lte bar yi ge AH dmar po las 'od zer spros la/ de yongs su gyur pa las gos dkar mo mtha' yas pa'i gos dkar mos bskor bar bsgoms te/bde ba can gyi bar du 'gro zhing de la mchod pa rnam pa lngas ye shes kyi 'od dpag tu med pa la mchod cing 'khyud la/ snyoms par 'jug pa'i mchod pas kyang mchod de/ mgrin par lag ngar gyi zhags pas dgug cing de'i 'khor rnams du ma yang sprul pa'i gos dkar mo'i tshogs kyis bkug par bsams la/ shar gyi sgo'i mdun du paM las skyes pa'i pad+ma dang zla ba la bzhugs su gsol zhing rang gi snying gnas snga ma bzhin du mchod pa'i lha mo spro zhing mchod la/chos kyi gsung lam dpal dang ldan/ /zhes bya bra la sogs pa tshigs su bcad pa gnyis kyis gsol ba btab la 'od zer gyi dba' rlabs bzhin du AH 'i thig ler ngag gi lam nas zhugs la/ gang zhig rdo rje chos kyi ni/ zhes bya ba la sogs pas nga rgyal byas la brtan par byed pa'i sngags brjod par bya'o zhes gsung byin gyis brlab pa'o/ /de ltar gyur na g.yas su 'khyil pa'i dung dang 'dra ba mgrin pa dang gdong gi dkyil 'khor 'byog par byed pa'i lce dang bstan bcos sna tshogs rtsom pa gzhung dang /don dang nges tshig dang so sor snang ba rnams kyi gzhir gyur par ngag 'gyur ro zhes phan yon no/ /de nyid bshad pa/ gsung gi rdo rje sngags pas ni/ /nam mkha'i dbus su bzhugs pa la/ /de nas sngags pas tshigs bcad ni/ /gnyis brjod pas ni gsol ba gdab//ces smos pa la/ lha mo'i mchod pa'i mthar gsung rdo rje ni 'od dpag tu med pa ste/ 'od dpag tu med pa'i 'khor dang bcas pa 'gugs shing nam mkha'i dbus su snga ma bzhin du pad+ma dang / zla ba'i dbus su bzhugs par bltas la mchod cing 'og nas bshad pa'i tshigs su bcad pa gnyis kyis gsol ba gdab par bya'o//chos kyi gsung lam dpal dang ldan/ /rdo rje mi phyed gsum bsgoms pas/ /deng bdag byin gyis brlab gnas su/ /rdo rje gsung gis mdzad du gsol/ /zhes smos pa la/ gsung rab yan lag dgu'i rang bzhin yin pas na/chos ni 'od dpag tu med pa'o/ /de nyid gsung gi lam ste ngag gi dbang phyug yin pa'i phyir ro/ /de bzhin du sku rdo rje la sogs pa dang dbyer med pas na rdo rje mi phyed gsum bsgom pa'o/ /rdo rje gsum gyis bdag la byin gyis brlab pa ni gsung gyis brlab pa mdzad du gsol zhes gsol ba btab pa'o//'khor rnams la bshad par bya ste/ phyogs bcur bzhugs pa'i sangs rgyas rnams/ /rdo rje mi phyed gsum bsgoms pas/ /deng bdag byin gyis brlab gnas su//rdo rje gsung gis mdzad du gsol/ /zhes pa ni go sla'o/ /zhugs pa brtan par bya ste/ gos dkar mo dang lhan cig nyid/ /rang gi gtso bor yang dag ldan/ /lce la zhugs par rab bsams te/ /gsung gis byin gyis brlab pa brtsam/ /zhes smos te/mchod pa'i mthar AH 'i 'od zer gyis rang gi gtso bo dang bcas pa'i gos dkar mo'i tshogs dba' rlabs bzhin du ngag gi lam nas zhugs shing nga rgyal bya'o/ /rdo rje chos kyi gsung gang yin/ /nges pa'i tshig ni phun sum tshogs/ /bdag gi tshig kyang de 'dra zhing / / chos 'dzin pa dang 'dra bar shog /ces smos pa la/ rdo rje chos ni 'od dpag tu med pa'o/ /de ji ltar phun sum tshogs pa ni gzhung dang / don dam tshig dang / so so'i snang ba yang dag par rig pa de bzhin du bdag kyang 'gyur ro zhes nga rgyal bya'o/ /sngags bshad pa/ o sarba ta thA ga ta wAka badzra swa b+hA ba At+ma kou0f85haM zhes smos te/ oM ni rdo rje 'chang chen po'o/ /de nyid sarba ta thA ga ta wAka badzra ni 'od dpag tu med pa ste de nyid mi phyed pa yin pas badzra'o/ /de'i swa b+hA ba ni yan lag drug cu la sogs pa dang ldan pa nyid do/ /de'i At+ma kou0f85haM ni brtan par bya'o//thugs byin gyis brlab pa bshad par bya ste/ sngags pas snying gar zla ba yi/ /gzugs brnyan 'bar ba bsam bya ste/ /der ni mthing shun lta bu yi/ /'od zer lnga ldan hUM dgod do/ /zhes smos pa la/ re zhig dang po snying ga'i paM las skyes pa'i sna tshogs pad+ma'i lte bar dbyangs dang po las skyes pa'i zla ba'i dkyil 'khor gyi dbus su mthing shun gyi 'od dang 'dra ba'i yi ge hUM 'od zer mtha' yas pa spro zhing lha sum cu rtsa gnyis dang bcas pa bsgoms te/de las 'od zer spro zhing / de yongs su gyur pa las mtha' yas pa'i mA ma kI'i tshogs kyis bskor ba'i mA ma kI bsgoms la/mngon par dga' ba'i bar du gshegs nas de la ye shes kyi mi bskyod pa la mchod pa rnam pa lnga dang / snyoms par 'jug pa'i mchod pas mchod la/ mgrin par lag ngar gyi zhags pas bkug cing de'i 'khor du ma yang sprul pa'i mA ma kI'i tshogs kyis bkug par bsams la/shar phyogs kyi sgo'i mdun du paM las skyes pa'i pad+ma dang zla ba'i steng du bzhugs su gsol te/ rang gi snying gnas snga ma bzhin du mchod pa'i lha mo spro zhing mchod la/dpal ldan rdo rje thugs 'chang ba/ /zhes bya ba la sogs pa'i tshigs su bcad pa gnyis kyis gsol ba btab la/ 'od zer gyi dba' rlabs bzhin du hUM gi thig ler nu ma gnyis kyi lam nas zhugs la/ kun du bzang po'i thugs gang yin/ / zhes bya ba la sogs pa'i tshigs su bcad pas nga rgyal byas la/ brtan par byed pa'i sngags brjod par bya ste thugs byin gyis brlab pa'o/ /de ltar gyur na gsal ba zla ba'i dkyil 'khor dang 'dra ba nyon mongs pa dang shes bya'i sgrib pa dang bral ba 'das pa dang / ma 'ongs pa dang da ltar byung ba'i dus gsum la gnas pa'i dngos po mkhyen pa'i thugs su 'gyur ro zhes phan yon no//de nyid brtan pa/ de nas lha mo mA ma kI'i/ /tshogs dang bcas pa'ang dbyung bar bya/ /zhes smos te/ de nas zhes bya ba ni hUM las so/ /mA ma kI ni dbus kyi gtso bo'i ngo bo nyid do//tshogs dang bcas pa ni 'khor dang bcas pa mtha' yas pa'i mA ma kI dbyung bar bya ste/ 'od zer dbyung ba zhes bya ba'i don to/ /de nas de mngon par dga' bar song nas snga ma bzhin du mi bskyod pa dgug cing shar gyi sgor pad+ma dang zla ba la gnas pa la gsol ba gdab par bya ba'i phyir bshad pa/de bzhin thugs kyi rdo rje bsgom/ /de la sngon bzhin gsol ba gdab/ /ces smos te/ thugs rdo rje ni mi bskyod pa de bzhin du bsams la/ snga ma bzhin du mi bskyod pas bskor bar bltas la/gsol ba gdab pa ni don du gnyer ba'o/ /sngon bzhin ni sku dang gsung rdo rje la gsol ba btab pa bzhin no/ /de nyid bshad pa/ dpal ldan rdo rje thugs 'chang ba/ /rdo rje mi phyed gsum bsgoms pas/ /deng bdag byin gyis brlab gnas su/ /rdo rje thugs kyis mdzad du gsol//zhes smos te/ ye shes lnga'i rang bzhin gyi thugs ni rdo rje ste mi phyed pa'i phyir ro/ /de 'chang ba ni thugs rdo rje 'chang ste mi bskyod pa'o/ /dpal ni mA ma kI ste de dang ldan pas na dpal ldan no/ /rdo rje gsum ni sku la sogs pa'i rdo rje ste/ deng bdag mi phyed par bsgoms pas ni tha mi dad pa'i rang bzhin khyod kyis bdag la byin gyis brlab pa'i gnas mdzad du gsol zhes gsol ba btab pa'o//'khor rnams la yang bshad par bya ste/ phyogs bcur bzhugs pa'i sangs rgyas rnams/ /rdo rje mi phyed gsum bsgoms pas//deng bdag byin gyis brlab gnas su/ /rdo rje thugs kyis mdzad du gsol/ /zhes bya ba ni go sla'o/ /gsol ba btab nas zhugs pa bshad par bya ste/ mA ma kI tshogs ma lus pa/ /rdo rje thugs dang yang dag ldan/ /snying gar yang ni bcug nas su//thugs kyis byin gyis brlabs pa brtsam/ /zhes smos te/ snga ma bzhin du 'od zer gyi 'khor los mchod pa sngon du 'gro bar mA ma kI'i tshogs dang bcas pa'i mA ma kI bzhugs par nga rgyal bya'o/ /kun du bzang po'i thugs ni gang / /gsang ba'i dbang po blo ldan pa//bdag kyang de dang 'drar gyur cig/ /rdo rje 'dzin dang 'dra bar shog /ces smos te/ kun ni thog ma dang bar ma dang / tha mar mngon par mtho ba dang nges par legs pa'i mtshan nyid gang las byung ba de ni kun du bzang po ste/ bcom ldan 'das mi bskyod pa yin gyi/byang chub sems dpa' rnams ni ma yin te/ 'dir ni mi dgos pa'i phyir ro/ /de'i thugs gang yin pa ni ye shes lnga'i bdag nyid do/ /ji lta bu zhe na/ gsang ba'i dbang po ste/ gsang ba ni gsum ste/ sku gsung thugs kyi rdo rje'o//de rnams kyi dbang po ni bdag po ste thugs rdo rje'o/ /de bzhin du blo ni mA ma kI ste/ de gang la yod pa de ni blo ldan pa'o/ /blo dang ldan pa de ji lta bu'i thugs mnga' bde bzhin du bdag kyang rdo rje 'chang dang 'dra ba ste sngar bshad pa'i mi bskyod pa dang mtshungs par shog ces nga rgyal bya'o//sngags bshad par bya ste/ oM sarba ta thA ga ta tsit+ta badzra swa b+hA ba At+ma kou0f85haM/ zhes smos te/ oM ni rdo rje 'chang ngo / /sarba ta thA ga ta tsit+ta badzra ni mi bskyod pa ste/ swA b+hA ba ni/ de yi rang bzhin bdag yin no/ /zhes b stan par bya'o//tha mi dad par bshad par bya ste/ de ltar rigs gsum dbye ba yis/ /so sor byin gyis brlabs nas su/ /blo dang ldan pas gsang sngags 'dis/ /sngar yang thams cad bdag nyid bya/ /zhes smos te/ de ltar sngar bshad pa'i rim gyis so sor byin gyis brlabs pa ni sku la sogs pa so sor byin gyis brlabs nas/rigs gsum gyi dbye ba zhes bya ba ni sku la sogs pa rigs gsum gyi dbye bas byin gyis brlabs la/ slar yang ni thams cad bdag nyid de sku la sogs pa tha mi dad par byin gyis brlabs la sngags 'dis ni 'og nas bshad par bya'o//blo dang ldan pa ni rnal 'byor gyi bsgom pa la mkhas pas so/ /sngags bshad par bya ste/ oM sarba ta thA ga ta kA ya wA ka tsit+ta badzra swa b+hA ba At+ma kou0f85haM/ zhes smos te/ oM ni bshad zin to/ /sarba t a thA ga ta kA ya la sogs pa rdo rje'i sku gsung thugs ni ye shes lnga'i rang bzhin gang yin pa de rnams rdo rje ste mi phyed pa'o//de rnams kyi swa b+hA ba ni sngar bshad pa'i mtshan la sogs pas brgyan pa ste/ de yi bdag nyid nga yin no/ /zhes nga rgyal bya'o/ /sngar bshad pa'i sems dpa' gsum char nye bar bsdu bar bya ba'i phyir bshad par bya ste/de ltar bdag nyid byin brlabs nas/ /zla ba'i dkyil 'khor dbus gnas pa'i/ /mtshan ma drug dang yang dag ldan/ /dam tshig sems dpa' bsam par bya/ /zhes smos te/ dang po sbyor ba'i yan lag dang pos rdzogs pa dam tshig sems dpa' gang yin pa de ni sngar bshad pa'i rdo rje la sogs pa mtshan ma drug dang ldan pa/zla ba'i dkyil 'khor la gnas pa bsgom par bya'o zhes sprul pa'i sku bstan pa'o/ /snying ga'i dbus na phra ba yi/ /ye shes sems dpa' rnam par bsgom//ting 'dzin sems dpa' zhes bya ba'i/ /yi ge hUM ni de ru dgod/ /ces smos te/ sngar bshad pa'i dam tshig sems dpa'i thugs kar paM las skyes pa'i pad+ma la gnas pa'i zla ba la hUM las skyes pa'i rdo rje yongs su gyur pa las de dang 'dra ba'i ye shes sems dpa' bsgoms la/de'i thugs kar pad+ma dang zla ba la gnas pa'i rdo rje'i rtse mor hUM gi thig ler lha sum cu rtsa gnyis dang bcas par dgod par bya'o zhes longs spyod rdzogs pa dang chos kyi sku bstan to/ /'dir ni grangs kyi rim pa 'di yin te/ rnal 'byor gyi phyogs su rdo rje 'chang gcig go/ /rjes su rnal 'byor gyi phyogs su ye shes sems dpa' dang ting nge 'dzin sems dpa'i dbye bas rnam pa gsum/ shin tu rnal 'byor gyi phyogs su lha sum cu rtsa gnyis bkod pas sum cu rtsa lngar 'gyur ro/ /rnal 'byor chen po'i ting nge 'dzin gyis lha sum cu rtsa brgyad du 'gyur ro//'og nas bshad pa'i dkyil 'khor rgyal ba mchog gi phyogs su ye shes kyi 'khor lo 'jug pa dang / rgyas gdab pa'i lha gnyis te/ lha bzhi bcu'i mtshan nyid do/ /re re yang lha bzhi bcu'i dbye bas brgya phrag bcu gnyis dang brgyad cur 'gyur ro//yang re re thabs dang shes rab kyi dbye bas stong phrag gnyis dang lnga brgya drug cur 'gyur ro/ /de ni dbus kyi gtso bo gcig pu la grangs kyi rim pas shes par bya'o/ /dkyil 'khor ba rnams la grangs de lta bus bdun khri bzhi stong brgyad brgyar 'gyur te mi bskyod pa'i dkyil 'khor ro//rnam par snang mdzad la sogs pa'i dbang du byas na dkyil 'khor sum cu rtsa gnyis ni sngar bshad pa'i rtsis kyis bgrangs na 'bum phrag nyi shu rtsa gnyis dang stong phrag nyi shu rtsa brgyad dang / brgya phrag nyi shu rtsa lnga dang bzhi bcur 'gyur ro/ /rtsis so nye bar bsdu ba bshad par bya ste/ sems dpa' gsum gyi bdag nyid can/ /de ltar rnal 'byor cher bskyed nas/ /zhes smos te/ de ltar zhes bya ba ni sngar bshad pa'i rim gyis rnal 'byor chen po sems dpa' gsum gyi bdag nyid bskyed la phyi nas dkyil 'khor rgyal ba mchog bsgom par bya ba'i phyir bshad par bya ste/cho ga'i sbyor ba 'di yis ni/ /phyag rgya bsgrub pa brtsam par bya/ /zhes smos te/ 'og nas bshad pa'i cho ga'i sbyor ba ni bsgom pa'i rim pas phyag rgya bsgrub pa ni de'i dbye ba yongs su shes pa'i mtshan nyid la brtson pa ni brtsam par bya'o//dang po phyag rgya'i dbye ba bstan par bya ste/ bu mo gzugs bzang phun sum tshogs/ /sme sha can ni bdag nyid che/ /bu mo ut+pal mthing ga'i mdog /mig yangs dam pa rnyed nas ni//zhes smos pa la/ bu mo zhes bya ba ni lo bcu gnyis lon pa'o/ /mig yangs zhes bya ba ni skrag pa'i sha ba'i mig dang mtshungs pa'o/ /yang na mig yangs pa ni gsang ba'i pad+ma gang la yod pa de ni mig yangs te/ pad+ma can yin gyi dung can ma dang ri dwags can ma ni ma yin no zhes pa'i tha tshig go//de bzhin du gzugs ni na tshod yan lag dang nying lag gi mtshan nyid do/ /bzang ba ni lo bcu gnyis lon pa'o/ /de dag gis phun sum tshogs pa ni brgyan pa ste/ bcos ma'i phyi'i rgyan gyis brgyan pa ni ma yin no/ / de bzhin du ut+pal mthing ga'i mdog ces bya ba ni mi bskyod pa'i rigs kyi kha dog dang mthun pa'o/ /sme sha can zhes bya ba ni sme sha can gyi bu mo'o/ /bdag nyid che zhes bya ba ni bcom ldan 'das kyis lung bstan pa'o/ /yang na rnal 'byor pa'i'o/ /rnyed na ni zhes bya ba ni bcom ldan 'das kyis rjes su gnang ba'am rmi lam du mthong ba'o//gzhan yang ji lta bu yin zhe na/ mnyam par gzhag cing legs par bslab/ /sgrub pa po la shin tu mos/ /zhes smos te/ dam tshig dang sdom pa la pha rol tu phyin pas na legs par bslab ba'o//de bzhin du sgrub pa po ni de nyid len pa'i rnal 'byor pa la shin tu mos pa ni chags pa dang bcas pa'am dad pa dang ldan pa'o/ /de ni mi bskyod pa'i rigs kyi phyag rgya'i dbye ba'o/ /khrus mkhan dang gar mkhan gyi bu mo dag ni sku'i rigs dang / gsung gi rigs kyi phyag rgya ste/nyi shu lon pa dang / bcu drug lon pa ni 'dir mi dgos pa'i phyir ma bstan to/ /de ni phyag rgya'i dbye ba'o/ /'dus byas pa bshad par bya ste/ oM ni spyi bor bsam par bya/ /zhes bya ba la sogs pa smos te/ de'i man ngag ni 'di yin te dang po'i sbyor ba'i ting nge 'dzin la pha rol tu phyin pa'i sgrub pa pos dur khrod du song ste/zla ba gsum gyi bar du bsgom par bya'o/ /de nas de ni nam mkha' las bcom ldan 'das kyis rjes su gnang ba yin te/ che ge mo zhes bya ba'i sgrub pa pos che ge mo zhes bya ba'i yul nas/che ge mo zhes bya ba'i phyag rgya blangs te/ de dang lhan cig tu snyoms par 'jug pa'i rim gyis dkyil 'khor rgyal mchog bsgoms na rang dang gzhan gyi don sgrub pa la nus pa dang ldan par 'gyur ro zhes thos nas mtshan ma de dag gi rigs dang / na tshod dang /mtshan nyid dang / yi dam du bsgom pa dang / kha dog la sogs pas nye bar mtshon la/ rang gi snying ga nas reg bya rdo rje ma spros nas de'i chos 'byung du pad+ma dang zla ba'i dkyil 'khor dag bkod la/ dam tshig gi phyag rgya yang de'i g.yon phyogs su bzhag la/ting nge 'dzin sems dpa'i sa bon las me'i rang bzhin gyi 'od zer sna khung g.yas pa las phyung ste/ de'i rkang pa'i 'og tu yaM las skyes pa'i rlung gi dkyil 'khor gyi steng du raM las skyes pa'i me'i dkyil 'khor 'bar ba dang / 'od zer des de'i lus po bsreg cing rlung gis kyang thal ba khyer bar bsams te/de'i rnam par shes pa yang gsal zhing mar me'i rtse mo lta bur bltas la/ yang sna khung g.yon pa nas spros pa'i 'od zer kha dog sngon po lcags kyu'i rnam pas bcings shing bkug la bcug ste/ rtsa dbus mar zhu ba'i gzugs su bsgom ste/sngar bshad pa'i reg bya rdo rje ma'i chos 'byung gi dbus su khaM yongs su gyur pa las reg bya rdo rje ma spros la sems dpa' gsum gyi bdag nyid du byas te/ mgo bo dang / lkog ma dang / snying ga dang / lte ba dang / rkang pa gnyis la oM la sogs pa yongs su gyur pa las sangs rgyas spyan ma la sogs pa dang snyoms par zhugs pa sems dpa' gsum gyi bdag nyid lha'i 'khor lo ma lus par bkod par bsam par bya'o/ /nu ma gnyis rtse ma mchu gnyis dang ni/ /b+ha ga b+ha ga'i khong stong nang du ni//rim pa ji bzhin rigs kyi lha mo yis/ /phyung ba'i sngags ni nges par dgod par bya/ /de yongs su gyur pa las spyan ma la sogs pa rigs kyi lha mo bzhi sems dpa' gsum gyi bdag nyid rang rang gi bdag po la 'khyud pa/ chags pa chen po'i mes bzhus pa/nu ma la sogs pa'i dngos po yongs su gyur pa las kyang phyung ba'i sngags dgod pa bsgom par bya'o/ /mig dang rna ba sna dang lce rtsa dang / /snying ga dang ni rtsa rgyus tshigs rnams la/ /gzugs rdo rje sogs lha mo rnams kyang ni/ /sa snying la sogs pas ni 'khyud par dgod//de la mig gnyis la dzaH yongs su gyur pa las gzugs rdo rje ma sa'i snying pos 'khyud pa'o/ /rna ba gnyis la hUM yongs su gyur pa las sgra rdo rje ma phyag na rdo rje dang bcas pa'o/ /sna gnyis la baM yongs su gyur pa las dri rdo rje ma nam mkha'i snying po dang bcas pa'o//lce la hoH yongs su gyur pa las ro rdo rje ma 'jig rten dbang phyug dang bcas pa'o/ /b+ha ga'i rtse mor khaM yongs su gyur pa las reg bya rdo rje ma sgrib sel dang ldan pa'o/ /snying gar raM yongs su gyur pa las snying rje lha mo 'jam dpal dang bcas pa'o/ /rtsa rgyus la maiM yongs su gyur pa las byams pa dang bcas pa'o//tshigs rnams la gaM yongs su gyur pa las chos kyi dbyings kyi rdo rje ma kun du bzang po dang ldan pa bkod la/ de rnams yongs su gyur pa las yang mig la sogs pa sa bon de rnams kyi mtshan mar bsam par bya'o/ / de bzhin du dpung pa g.yas pa dang / g.yon pa'i rtsa ba dang / kha dang / gsang ba dang / de bzhin du rje ngar g.yas pa dang / g.yon pa dang / pus mo g.yas pa dang / g.yon pa dang / spyi bo dang / rkang pa'i mthil la rdo rje ro langs ma dang / khro gnyer ma dang / gzhan gyis mi thub ma dang /ral pa gcig ma dang / sna tshogs rdo rje ma dang / sna tshogs rin chen ma dang / sna tshogs pad+ma dang / sna tshogs las ma dang / nam mkha'i rdo rje ma dang / sa 'dzin ma ste/ khro bo'i rgyal po bcu'i btsun mo yi ge hUM bcu las byung ba gshin rje gshed la sogs pa rang rang gi bdag pos 'khyud pa snga ma bzhin du lha'i 'khor lo bsgom par bya'o//des ni phyag rgya'i sku pad+ma'i nang du bskyed la/ dbang po gnyis kyi lam nas phyung la/ reg bya rdo rje'i sku la mar la mar bcug pa bzhin du gcig tu gyur pa las phyag rgya bsgom par bya'o/ / de nyid bshad pa/ oM ni spyi bor dgod par bya/ /AH ni ngag gi lam la dgod/ /hUM ni snying gar bsam bya zhing / /lte bar swA dang rkang gnyis hA/ /zhes smos pa la/ mgo bo la sogs pa la sa bon de dag yongs su gyur pa las phyag rgya dang bcas pa'i de bzhin gshegs pa bsgom par bya'o zhes phung po byin gyis brlab pa'o//khams byin gyis brlab par bya ste/ /spyan dang mA ma kI dang ni/ /de bzhin du ni gos dkar mo'o/ /sgrol ma yang ni sngags pa yis/ /sa la sogs par rnam par dgod/ /ces smos pa la/ de nas mo ha ra ti la sogs pa lha mo bzhi phyung ba'i sngags yongs su gyur pa las rigs kyi yum bzhi nu ma la sogs par bsgom par bya'o//de yongs su gyur pa las kyang sa bon de rnams kyis mtshan pa'i nu ma la sogs pa bzhin no/ /skye mched byin gyis brlab pa bshad par bya ste/ lha mo rdo rje gzugs la sogs/ /de nyid la ni rnam bsams la/ /sa snying la sogs de rnams dang / /snyoms par 'jug pa bsgom par bya/ /zhes smos te/ mig la sogs pa'i skye mched drug dang / rtsa rgyus dang tshigs rnams la dzaH la sogs pa yongs su gyur pa las gzugs rdo rje ma la sogs pa'i sa'i snying po la sogs pas 'khyud pa bde ba chen po'i dbang gis zhu zhing yang sa bon de rnams kyis mtshan pa'i mig la sogs par bsgom par bya'o//yan lag dang nying lag la dgod pa bshad pa ni/ lag g.yas rdo rje ro langs ma/ /g.yon la gzhan gyis mi thub ma/ /de yi khar ni khro gnyer ma/ /gsang bar ral pa gcig ma'o/ /gzhan yang dpung pa g.yas par ni/ /de bzhin gshegs yum rdo rje ma/ /g.yon du sna tshogs rin chen gyi/ /phyag rgya dag ni bsgom par bya//pus mo g.yas la gnas pa yang / /sna tshogs pad+ma de bzhin gshegs/ /g.yon pa la ni sna tshogs las/ /spyi bor nam mkha' rdo rje ma/ /rkang pa gnyis las yi ni/ /sa 'dzin lha mo gzhag par bya/ /zhes bya ba ni yi ge hUM bcu po yongs su gyur pa las gshin rje gshed la sogs pas 'khyud pa'i rdo rje ro langs ma la sogs pa zhal gsum phyag drug rang rang gi bdag po dang 'dra ba'i kha dog dang /phyag mtshan dang stang stabs dang bcas pa/ dpung pa g.yas pa la sogs pa la dgod do/ /'o na thabs byin gyis brlabs pa'i dus de bzhin gshegs pa 'ba' zhig bsgom par bya ste/phyag rgya ni byin gyis brlabs pa'i dus su ji ltar snyoms par 'jug pa dang bcas pa lha mo rnams bsgom par bya zhe na smras pa/ phyag rgya rnams ni sgeg pa'i ro gtso bo yin no zhes de byin gyis rlob par byed pa'i lha'i 'khor lo yang de bzhin du bsgom par bya'o//thabs rnams ni zhi ba'i nyams gtso bor gyur pas lha mo rnams kyi nang du chung pa'i snyoms par 'jug pa dang bcas pa yin no zhes skyon med do/ /phyag rgya 'dus byas nas rdo rje dang pad+ma byin gyis brlab pa bshad par bya ste/de ltar 'dus byas rnal 'byor pas/ /rdo rje pad+ma yang dag brtsam/ /zhes smos te/ de ltar ni sngar bshad pa'i rim gyis lha mo rnams de ni phyag rgyar 'dus byas la/ phyi nas rdo rje dang pad+ma 'dus pa brtsam par bya'o//thabs dang shes rab 'dus ma byas pa ni tha mal pa'i skyes bu bzhin du ma dag par thal bar 'gyur ro zhes de'i 'dus byas pa brtsam par bya'o/ /de'i rim pa ni 'di yin te/ re zhig dang po rang gi gsang ba'i gnas stong par bsgoms la/ de nas kha dog sngon po'i yi ge hUM las skyes pa'i rdo rje rtse lnga pa yi ge oM gyis rtse mor mtshan pa/'od zer lnga 'phro bar byed par bsams la/ phyag rgya'i pad+ma yang stong pa nyid du bsgoms la/ de nyid a yongs su gyur pa las pad+ma 'dab ma brgyad pa de'i rtsa'i rtse mo'i char nges par byed pa phaT ser po bkod pa la de dag kyang thabs dang shes rab kyi bdag nyid du bsams la/rjes su chags pa brtsam par bya ste drad pa'i don to/ /rtsa lnga rang bzhin gyis gsang ba rdo rje dang / rtsa brgyad kyis yongs su bskor ba'i chos 'byung gi phyag rgya ste nges pa'i don to/ / de nas rjes su chags pa'i cho ga bsgom par bya'o/ /de nyid bshad pa/ hUM gi sngags kyis rdo rje ni/ /rtse mo lnga pa bsam par bya/ /de tshe de yi rtse dbus su/ /yi ge oM ni rnam par bsgom/ /de bzhin pad+ma 'dab ma brgyad/ /yi ge a las byung bar bsam/ /'od zer lnga yis khyab bsams la//de 'og bsgrub pa brtsam par bya/ /zhes smos pa la/ hUM sngon po las byung ba'i don to/ /ye shes lnga'i rang bzhin yin pas na rtse lnga pa'o/ /rtsa dbus ma la ni rtsa dbus ma'i rtse mor ro/ /oM ni rnam par snang mdzad kyi sa bon te/ sa'i khams kyi rang bzhin yin pa'i phyir dang /sra ba dang lci ba yin pa'i phyir ro/ /'dab ma brgyad pa ni sde tshan brgyad pa'i rang bzhin dang / rtsa brgyad pa'i rang bzhin no/ /aH ni ngag gi dbang phyug gi sa bon te/ 'dod chags kyi rang bzhin yin pa'i phyir ro/ /'od zer lnga dang ldan pa ni gnyi ga yang zhes tshig gi lhag ma'o//de 'og bsgrub pa zhes bya ba ni snyoms par 'jug pa brtsam par bya ba'o/ /rjes su chags pa'i tshogs bshad pa ni/ oM sarba ta thA ga ta a nu rA ga na badzra swa b+hA ba At+ma kophohaM zhes smos pa la/ re zhig dang po rdo rje dang pad+ma 'dus byas la ye shes kyi gsang ba'i rdo rje las kha dog lnga pa'i 'od zer spros la/dam tshig rdo rje las byung zhing / /dam tshig gi lha mo'i pad+ma las ye shes kyi lha mo'i pad+mar zhugs te/ ye shes dang dam tshig gi lha mo'i ngag gi lam nas byung zhing dam tshig dang /ye shes sems dpa'i ngag gi lam nas zhugs te/ yang rang gi gsang ba'i gnas su phyin par bsam par bya'o/ /de nas ye shes kyi lha mo'i lte bar pad+ma'i 'od zer dang / dam tshig gi lha mo'i lte ba'i pad+ma'i 'od zer phyung zhing thabs kyi dam tshig sems dpa'i rdo rje las/ye shes kyi gsang ba'i rdo rje'i nang du zhugs te/ yang ye shes dang dam tshig gi zhal nas byung zhing lha mo gnyis po'i ngag gi lam nas rang gi gsang ba'i gnas su phyin par bsam par bya'o/ /de la dam tshig sems dpa'i rdo rje la/de la phyag rgya'i gsang bar 'od zer thob na snang ba'i ye shes so/ /lte bar snang ba mched pa'i ye shes so/ /snying gar snang ba nye bar thob pa'i ye shes so/ /lkog mar 'od gsal ba'o/ /thabs kyi lkog mar snang ba'i ye shes so//snying gar snang ba mched pa'i ye shes so/ /lte bar snang ba nye bar thob pa'i ye shes so/ /gsang bar 'od gsal ba'o/ /yang lha mo spro ba'i dus su thabs kyi gsang bar snang ba'i ye shes so/ /lte bar snang ba nye bar mched pa'i ye shes so/ / snying gar snang ba nye bar thob pa'i ye shes so/ /lkog mar 'od gsal ba ste nges pa'i don to/ /rjes su chags pa'i cho ga 'dis phan tshun sku gnyis gsal ba dang dga' ba'i rang bzhin du bsgom par bya'o/ /sems rtse gcig pa thob nas sngags brjod par bya ste/oM ni rdo rje 'chang chen po'o/ /de nyid sarba ta thA ga ta a nu rA ga ni bde ba chen pos dga' ba ste/ de nyid mi phyed pas na badzra'o/ /de'i swa b+hA ba ni/ 'od gsal ba khong du chud pa ste/ de'i bdag nyid nga yin no zhes nga rgyal bya'o/ /des ni bsnyen pa dang nye bar sgrub pa bstan to//bsgrub bya bsgrub pa sbyor ba ni/ /gang phyir bsnyen pa zhes bshad do/ /rdo rje pad+ma sbyor ba yis/ /nye bar sgrub pa zhes bshad do/ /zhes gsungs pa'i phyir ro/ /de nas sgrub pa'i yan lag bshad par bya ste/ rdo rje 'dzin pa'i nga rgyal legs 'chang ste//hUM gi glu yis kyang ni bskyod bya zhing / /rang gi byang chub sems nyid byung ba'i tshe/ /des ni phaT kyi gsang sngags brjod par bya/ /zhes smos pa la/ dang po mig la sogs pa'i phyag rgyas pad+ma bskul zhing rtsa rnams gsher bar bya ste/ dro ba'i reg pa'i rtags kyis byang chub kyi sems byung ba nye bar mtshon te/lce rdo rjes cung zad myang zhing rdo rje 'greng bar 'gyur bas pad+ma rdo rje dag sbyor te/ g.yo ba brtsams nas kha gnyis dang / dbang po gnyis las byung ba'i sgra ni hUM gi rang bzhin du dmigs la/ rdo rje 'chang gi nga rgyal 'chang bas bde ba chen po'i sgra dang /sbyor ba'i sgra dang / ting nge 'dzin sems dpa'i sa bon gyi 'od zer gyis bar snang nam mkha' las de bzhin gshegs pa thams cad zhugs te/ rtsa dbus mar byang chub kyis sems zhu bar byas la tshangs pa'i sgo nas byang chub kyi sems 'dzags nas snang ba dang yan lag kun khyab pa'i dus su snang ba mched pa dang /rdo rje dkyil du snang ba nye bar thob pa dang / rdo rje'i rtse mor 'od gsal ba myong zhing phaT kyi sgra'i rang bzhin pad+ma'i nang du byang chub sems kyi thig le'i rnam par phab par bya'o//mchod pa'i cho ga bshad par bya ste/ phyung nas sngags pas slar yang ni/ /phyogs bcur bzhugs pa'i sangs rgyas rnams/ /byang chub sems kyis mchod nas ni/ /gsang sngags 'di ni brjod par bya/ /zhes smos te/ phyung nas zhes bya ba ni byang chub kyi sems spro ba'i mthar ro//des phyogs bcu na bzhugs pa'i sangs rgyas rnams te/ de bzhin gshegs pa rnams mchod par bya zhing mchod pa'i mthar 'og nas byung ba'i sngags brjod do/ /man ngag ni pad+ma'i nang du byang chub kyi sems yongs su gyur pa badzra d+h+r-i ka ces bya ba la sogs pa'i sngags rnams las de bzhin gshegs pa lnga zhal gsum phyag drug pa rang gi rig ma dang 'khyud pa bsgoms te/reg pa'i bde ba la zhu zhing byung ba mchod pa'i lha mo phyi dang nang gi mchod pa'i rdzas dang bcas pa bsams la/lha mo ba spu'i bu ga nas phyung zhing nam mkha'i khams na gnas pa'i de bzhin gshegs pa rnams la phyi dang nang dang gsang ba'i mchod pas mchod la/ mchod pa'i mthar sngags rjod cing / de bzhin gshegs pa dang / lha mo de rnams 'od zer gyis rang gi khar bcug par bya'o//oM sarba ta thA ga ta pU dza badzra swa b+hA ba At+ma kou0f85haM/ zhes pa las oM ni rdo rje 'chang chen po'o/ /de ni sarba ta thA ga ta'i rang bzhin no/ /de la pU dza ni mchod pa ste/ sngar bshad pa'i rnam pa gsum dang bla na med pa'o/ /de nyid mi phyed p as na badzra'o//de'i swa b+hA ba ni bde ba chen po bskyed pa ste/ de yi bdag nyid nga yin no/ /zhes nga rgyal bya'o/ /da ni spros pa'i cho ga bshad par bya ste/ rang sngags sa yig las byung ba/ /rdo rje gsum gyis byin brlabs bdag /pad+ma'i dbus su bskyed nas ni/ /slar yang zhe sdang rdo rjer gyur//zhes smos te/ de nas rdo rje 'chang gi nga rgyal gyis sngar bsdus pa'i de bzhin gshegs pa rnams thig le'i gzugs su lha mo'i pad+ma dang zla bar spros la de yongs su gyur pa las badzra d+h+r-i ka ces bya ba la sogs pa'i rang bzhin sngags las byung ba'i rang gi mtshan ma las spros pa'i mi bskyod pa la sogs pa sems dpa' gsum gyi bdag nyid can/ye shes sems dpa'i sa bon gyi thig ler lha sum cu rtsa gnyis bkod la/ rnal 'byor dang / rjes su rnal 'byor dang / shin tu rnal 'byor dang / rnal 'byor chen po'i rim gyis rdzogs pa de rnams kyi spyi por rdo rje bdud rtsis dbang bskur la/spyi bor dbang gi bdag pos dam tshig sems dpas rgyas btab ste/ phyi rol du phyung zhing zhe sdang la sogs pa'i spyod pa can gyi sems can gyi khams sbyong zhing sangs rgyas kyi zhing la rab tu 'jug pa sngon du 'gro ba gshegs te/dbus [(]gyi [,]kyi [)]gtso bo la 'jug pa dang / shar phyogs la sogs par bzhugs par bya'o/ /de nyid bshad pa/ rang sngags yi ge ni 'og nas 'chad pa'i phyung ba'i sngags so/ /de nas byung ba ni mtshan ma las byung ba'o/ / rdo rje gsum gyis byin gyis brlabs pa ni sems dpa' gsum gyi bdag nyid do/ /pad+ma'i dbus su ni reg bya rdo rje ma'i chos 'byung gi nang du'o/ /zhe sdang rdo rje ni thugs rdo rje 'chang du 'gyur ba'o/ /de nyid bshad pa/ badzra d+h+r-i ka sngags las byung ba'i/ /mi bskyod rdo rje can bsams pa//mgon po ral pa'i thor tshugs 'chang / /mi bskyod pas ni dbu rgyan byas/ /zhes smos pa la/ thig le yongs su gyur pa las byung ba'i badzra d+h+r-i ka ces bya ba'i sngags dang / de las byung ba'i rdo rje 'bar ba de nyid kyis mtshan pa'o/ /de nas spro ba dang /bsdu ba dang / gnas pa dang / brtan pa dang / rjes su chags pa sngon du 'gro bar yongs su gyur pa las byung ba sems dpa' gsum gyi bdag nyid lha sum cu rtsa gnyis kyis byin gyis brlabs pa mi bskyod pa'i gzugs can chos kyi dbyings kyi ye shes kyi rang bzhin dmigs pa ni bsam par bya'o//ral pa'i thor tshugs 'chang ba ni thub pa'i cha lugs so/ /mi bskyod pas ni cod pan byas/ /zhes bya ba ni ngag gi rigs kyi mtshan ma'o/ /kha dog la sogs pa bshad pa/ mthing shun bzang po'i mdog ltar snang / / sngo nag dmar dang dkar ba'i zhal/ /rgyan rnams thams cad yongs su rdzogs/ /phyag drug par ni rnam par bsgom/ /zhes smos te/ mthing shun bzang po ni rgyal po'i mthing shun te/ de dang mtshungs pa'i sngon po ste/ byams pa rnam par dag pa dang mngon spyod kyi phyir ro//dbus ma ni nag po ste/ thugs rdo rje'i rang bzhin no/ /g.yon pa ni dmar po ste gsung rdo rje rang bzhin no/ /g.yas pa ni dkar po ste sku rdo rje'i rang bzhin no/ /rgyan rnams thams cad ni dra ba dang / gdu bu dang / rkang gdub dang / rna cha dang / dpung rgyan la sogs pas brgyan pa ste/byang chub kyi yan lag thob pa'i phyir ro/ /pha rol tu phyin pa drug rnam par dag pa ste drang ba'i don to/ /rtsa dbus ma ni nag po ste chu rgyu ba'i phyir ro/ /g.yas pa ni dkar po ste/ steng du byang chub kyi sems 'dzag pa'i phyir ro//g.yon pa ni dmar po ste steng du khrag 'dzag pa'i phyir ro/ /rtsa gnyis po de dag gi 'og tu rak+ta dang shu kra rgyu ba ste man ngag go/ /phyag mtshan bshad par bya ste/ rdo rje 'khor lo pad+ma ni/ /g.yas pa'i phyag tu bsam bya zhing / /dril bu rin chen ral gri ni//de yi g.yon la bsam par bya/ /zhes smos pa la/ rdo rje ni mi bskyod pa'i phyag mtshan no/ /'khor lo ni rnam par snang mdzad kyi phyag mtshan no/ /pad+ma ni 'od dpag tu med pa'i phyag mtshan no/ /dril bu ni rdo rje 'chang chen po'i phyag mtshan no//rin po che ni rin chen 'byung ldan gyi phyag mtshan no/ /ral gri ni don yod grub pa'i phyag mtshan te drang ba'i don to/ /rtsa gsum ni steng dang 'og gi dbye bas rdo rje la sogs pa'i rnam pa ste nges pa'i don to/ /de bzhin du 'og ma la yang ngo / /phyi rol du spro ba bshad par bya ste/'di ni snying po phyung nas ni/ /phyogs bcu rnams su gzigs nas kyang / chos kyi 'khor lo bskor ba dang / /sangs rgyas mdzad pa kun mdzad de/ /sems can ma lus legs sbyangs nas/ /zhe sdang rdo rje la gnas 'jog /slar byon rdo rje mgon po yi//spyan snga ru ni 'dug par 'gyur/ /zhes smos pa la/ tshigs su bcad pa gnyis kyis phyi rol du spro ba dang sems can gyi don mdzad pa dang / yang gshegs pa rnams bstan te/ snying pos zhes bya ba ni lha mo'i pad+ma nas so/ /phyogs bcur gzigs pa ni ma grol ba la sogs pa dgrol ba'i don du'o//sangs rgyas mdzad pa zhes bya ba ni zhe sdang gi spyod pa can gyi sems can sbyong ba'o/ /de nas chos kyi 'khor lo zhes bya ba ni sngags kyi theg pa chen po'i chos ston pa bskor nas so/ /sbyangs pa ni zhe sdang las bzlog nas so//zhe sdang rdo rje ni mi bskyod pa'i'o/ /gnas ni mngon par dga' ba'i sangs rgyas kyi zhing ste/ de la gnas pa ni 'jog par mdzad nas so/ /rdo rje mgon po ni rdo rje 'chang chen po'i spyan sngar te/ sngar bshad pa'i shar phyogs kyi re'u mig la gnas pa bsam pa'o//dbus kyi gtso bo dang mi bskyod pa dag tha mi dad par bshad par bya ste/ sngags pas de ni snying ga ru/ /rjes zhugs bdag nyid rnam bsgoms pas/ /snga ma'i gzugs ni yongs gyur nas/ /zhe sdang rdo rje'i gnas na bzhugs/ /zhes smos pa la/ de nas dkyil 'khor gyi 'khor lo'i mdzad pa'i nus pa dang ldan pa yin pas mi bskyod pa de 'o ma dang chu bzhin du gcig tu byas nas bdag nyid snga ma'i gzugs yongs su log ste/rdo rje 'chang gi gzugs yongs su spangs te/ zhe sdang rdo rje'i gnas la gnas par bsam par bya'o zhes 'bras bu'i rdo rje 'chang gi bsgom pa bstan to//de nyid kyi khyad par bshad pa/ in+d+ra nI la'i 'od 'bar ba/ /nyi ma'i dkyil 'khor dbus na bzhugs/ /dpa' bo rang gi phyag rgyas 'khyud/ /rgyan rnams kun gyis rnam par brgyan/ /zhes smos te/in+d+ra nI la zhes bya ba ni rin po che rgya mtsho las byung ba'o/ /in+d+ra nI la'i mdog ni de dang 'dra bas te/ drag po'i las dang mthun pa'i phyir ro/ /nyi ma'i dkyil 'khor dbus gnas pa/ /zhes bya ba ni thabs kyi rang bzhin dang rno ba'i phyir ro/ /rang gi phyag rgyas 'khyud pa ni sngar bshad pa'i reg bya rdo rje mas so//rgyan rnams kun gyis rnam par brgyan/ /zhes bya ba ni 'khor los sgyur ba'i gnyen po yin pa'i phyir ro/ /gzhan yang ji lta bu yin zhe na smras pa/ drag po zhi dang 'dod chags che/ /zhal gsum gyis ni rnam mdzes pa'i//zhe sdang rdo rje'i ting 'dzin gnas/ /dkyil 'khor thams cad spro bar bya/ /zhes smos te/ dang po'i zhal ni drag po ste/ /gdul dka' 'dul ba'i phyir ro/ /g.yas pa ni zhi ba ste/ rnam par snang mdzad bdag po yin pas na zhi ba mdzad pa'i phyir ro//chags pa che ni g.yon pa ste/ 'od dpag tu med pa bdag po yin pas na dbang mdzad pa'i phyir ro/ /de lta bu'i zhe sdang rdo rje'i ting nge 'dzin la gnas pa'i rnal 'byor pas dkyil 'khor thams cad ni sum cu'i bdag nyid kyi dkyil 'khor thams cad spro ba ni pad+ma'i nang du spro bar bya ba'o//de nyid spro ba bshad par bya ste/ dzi na dzika sngags las byung ba'i/ /gtso bo rnam par snang mdzad dbyung / /mi bskyod pas ni dbu rgyan byas/ /ston ka'i zla zer ltar snang zhing / /gtsug tor cod pan dag gis brgyan//dkar dang nag dang dmar ba'i zhal/ /phyag drug zhi ba'i tshul can te/ /'khor lo rin chen pad+ma dag /g.yas pa yi ni phyag la bsam/ /dril bu rin chen ral gri ni/ /de yi g.yon du rnam par bsam/ /zhes smos pa la/ snga ma bzhin du lha mo'i pad+ma'i dbus su thig le yongs su gyur pa las/ dzi na dzikasngags las byung ba'i rnam par snang mdzad sems dpa' gsum gyi bdag nyid/ gtso bo ni rang gi rigs kyi bdag po'o/ /spro ba ni phyung bar bya'o/ /ston ka'i zla zer ni 'od de/de dang 'dra ba ni zhi ba mdzad pa'o/ /ral pa'i thor tshugs ni snga ma bzhin no/ /gzhan yang zhal dang po ni dkar po ste zhi ba yin pa'i phyir ro/ /zhal g.yas pa dang g.yon pa ni nag po dang dmar po ste/ thugs rdo rje dang / gsung rdo rje ste/ mngon spyod dang dbang mdzad pa'i phyir ro//phyag drug ni bshad zin to/ /zhi ba'i tshul can ni nad thams cad 'joms pa'i phyir ro/ /phyag g.yas pa'i dang po la 'khor lo rtsibs brgyad pa dkar po ste/ chos kyi 'khor lo bskor ba'i phyir dang / bsgribs pa'i dri ma 'joms pa'i phyir ro//g.yas pa'i gnyis pa la rdo rje sngon po ste/ mngon par byang chub pa'i rang bzhin yin pa'i phyir ro/ /g.yas pa'i gsum pa la pad+ma dkar po ni zhi ba dang mthun pa'i phyir ro/ /rtsa ba'i phyag g.yon pa la dril bu ste/ rang bzhin med par ston pa'o//g.yon pa gnyis la rin po che ste/ bsam pa thams cad rdzogs pa'o/ /g.yon pa'i gsum pa la ral gri ni nyon mongs pa'i zhags pa gcod pa ste/ don yod grub pa'i rang bzhin yin pa'i phyir ro/ /phyi rol du spro ba bshad par bya ste/ de bzhin thugs ka las byung ste//gti mug spyod gnas sems can rnams/ /yang dag sbyangs te slad byon nas/ /shar phyogs kyi ni zla bar bzhugs/ /zhes smos te/ thugs ka las ni lha mo'i pad+ma las so/ /gti mug spyod pa la gnas pa ni gti mug gi rigs can no/ / sems can ni khams gsum pa'o/ /sbyang ba ni sprul pa spro ba dang / ston pa la sogs pa dri ma med par byas pa'o/ /byon pa ni rang gi sangs rgyas kyi zhing las so/ /shar phyogs ni shar phyogs kyi re mig la'o/ /zla ba ni sna tshogs pad+ma dang / zla ba dang 'khor lo'i steng du bzhugs par bsam par bya'o//rin chen 'byung ldan gyi spro ba bshad par bya ste/ rat+na d+h+r-i ka sngags las byung ba'i/ /rin chen tog ni mkhas pas dbyung / /zhi ba thor tshugs cod pan 'chang / /mi bskyod pas ni dbu rgyan byas/ /ser dang gnag dang dkar ba'i zhal//phyag drug pa ni rnam par bsgom/ /yid bzhin nor bu rdo rje dang / /'khor lo de yi g.yas su bsgom/ /dril bu pad+ma ser po dang / /ral gri g.yon du bsgom par bya'o/ /zhes smos pa la snga ma bzhin du lha mo'i pad+ma'i dbus su thig le yongs su gyur pa las/rat+na d+h+r-i ka sngags las byung ba'i rin po che zur drug pa las rin chen tog dbyung ba spro bar bya'o/ /ral pa'i thor tshugs 'chang ba ni snga ma bzhin no/ /zhi ba ni dbul ba'i sems can rnams rgyas pa'i phyir ro/ /byams pa dang /chos dang / mi 'jigs pa dang / zang zing gi sbyin pas 'jigs pa zhi ba'o/ /mi bskyod pa ni rdo rje 'chang chen po ste/ des dbu rgyan byas pa ste brgyan pa'o/ /mkhas pa ni mi brjed pa'i ngang tshul gyis so/ /gzhan yang zhal dang po ni ser po ste/ rgyas par mdzad pa'i phyir ro//g.yas pa dang g.yon pa ni nag po dang dkar po ste/ thugs dang sku'i bdag nyid de/ drag po dang zhi ba mdzad pa'i phyir ro/ /phyag drug gi don ni bshad zin to/ /de ni rin chen dpal gyi'o/ /rin chen ni bsam pa thams cad yongs su rdzogs pa'o//pad+ma ser po ni rgyas par byed pa'o/ /lhag pa'i don ni snga ma bzhin no/ /phyi rol du spro ba la sogs pa bshad par bya'o/ /de bzhin thugs ka las byung ste/ /nga rgyal gnas la gnas pa rnams/ /yang dag sbyangs nas lha mo'i char/ /rin chen dbus su bzhugs par 'gyur//zhes smos te/ thugs ka nas ni pad+ma nas so/ /nga rgyal gnas la gnas pa ni/ /nga rgyal dang bcas pa'i sems can rnams bstan pa la sogs pas sbyangs te/ byon zhing lho phyogs kyi re mig la gnas pa pad+ma dang nyi ma dang zur drug pa'i rin po che'i steng du gnas par bsam par bya'o//'od dpag tu med pa spro ba bshad par bya ste/ A ro l-ika sngags las byung ba'i/ /mtha' yas rdo rje can dbyung ste/ /zhi ba pad+ma rA ga'i mdog /mi bskyod pas ni dbu brgyan byas/ /zhes smos te/ snga ma bzhin du lha mo'i pad+ma'i dbus su thig le yongs su gyur pa las/A ro l-ika sngags las byung ba pad+ma 'dab ma brgyad pa las 'od dpag tu med pa sems gsum gyi bdag nyid dbyung ba ni spro bar bya ba'o/ /pad+ma rA ga ni nor bu ste de'i mdog ni de dang mtshungs pa ste dbang mdzad pa'i phyir ro//zhi ba ni sgeg pa'i ro gtso bor gyur pa'o/ /mi bskyod pa ni snga ma bzhin no/ /de nas gzhan yang / mgon po ral pa'i thor tshugs 'chang / /dmar dang gnag dang dkar ba'i zhal/ /sgeg pa'i nyams dang yang dag ldan/ /phyag drug pa ni rnam par bsgom//zhes smos pa la/ ral pa'i thor tshugs kyi don ni bshad zin to/ /pad+ma'i rigs kyi bdag po yin pas na mgon po'o/ /rtsa ba'i zhal ni dmar po ste dbang mdzad pa'i phyir ro/ /zhal g.yas pa dang g.yon pa ni nag po dang dkar po ste/ rnam par dag pa sngar bshad zin to//sgeg pa'i nyams dang ldan pa ni chags pa'i rang bzhin yin pa'i phyir ro/ /phyag drug gi don ni bshad zin to/ /phyag mtshan bshad par bya ste/ g.yon pa'i phyag gis dril bu dang / /pad+ma'i sdong bu'ang 'dzin par mdzad/ /pad+ma thugs ka'i phyogs gnas pa//g.yas pa yis ni 'dzin par mdzad/ /ces pa la/ dril bu ni shes rab kyi pha rol tu phyin pa'i rang bzhin phyag g.yon pas 'dzin pas de'i phyogs gcig las byung ba'i pad+ma'i 'dab ma brgyad pa ni mtsho skyes te/ thugs kyi phyogs gnyis kar phyag g.yas pa'i mthe bo dang /gung mo dang / mdzub mo dag gi lte ba nas brtsams te/ 'dab ma'i bar du dbye bar mdzad par bsgom par bya'o/ /ji ltar pad+ma dmar po 'di/ /gnas kyi skyon gyis ma gos pa/ /dngos po'i yon tan tshogs pas na/ /de bzhin khams gsum dag pa'o//zhes bya ba dngos po'i rang bzhin ston par mdzad pa pad+ma dbye ba'i phyag rgya ste drang ba'i don to/ /g.yon phyogs su gnas pa'i shes rab kyi chos 'byung gi pad+ma'i g.yas phyogs kyi thabs kyi rang bzhin gyis rtse lnga pa'i gsang ba'i rdo rje'i phyag gis dbye bar mdzad pa zhes pa ni nges pa'i don to//phyag mtshan lhag ma bshad par bya ste/ rdo rje 'khor lo g.yas gnyis la/ /rin chen ral gri g.yon gnyis la/ /zhes smos te/ phyag mtshan gyi don ni sngar bshad zin to/ /phyi rol spro ba bshad par bya ste/ sngon bzhin 'dod chags can sbyangs nas//rgyab kyi pad+ma la bzhugs gyur/ /ces smos te/ sngon bzhin ni pad+ma las byung nas so/ /'dod chags can ni tha mal pa'i 'dod chags can no/ /sbyangs pa ni bstan pa la sogs pas so/ /rgyab kyi ni sangs rgyas kyi zhing las byung zhing / nub phyogs su pad+ma dang /nyi ma dang / pad+ma'i steng du bzhugs par bsam par bya'o/ /don yod grub pa'i spro ba bshad par bya ste/ pra dz+nyA d+h+r-i ka sngags las byung ba'i/ /sngags pas don yod rdo rje can/ /mgon po sku mdog ljang gu dbyung / /thor tshugs cod pan dag gis brgyan/ / zhes smos te/ snga ma bzhin du lha mo'i pad+mar byang chub kyi sems kyi thig le yongs su gyur pa las pradz+nya d+h+r-ika gi sngags las byung ba'i ral gri las byung ba/ sems dpa' gsum gyi bdag nyid mgon po ni las kyi rigs kyi bdag po bsam par bya'o/ / thor tshugs cod pan ni snga ma bzhin no/ /gzhan yang / ljang dang gnag dang dkar ba'i zhal/ /phyag drug 'od zer rnam par 'phro/ /zhes pa las dang po'i zhal ni dmar po ste/ dgug par mdzad pa'i phyir ro/ /zhal g.yas pa dang g.yon pa ni gnag pa dang dkar ba ste/thugs dang sku'i rigs kyis drag po dang zhi ba mdzad pa'i phyir ro/ /phyag drug ni snga ma bzhin no/ /'od zer 'phro ba ni 'od zer lngas khyab pa ste/ las thams cad pa yin pa'i phyir ro/ /phyag mtshan bshad par bya ste/ ral gri sna tshogs rdo rje dang / 'khor lo g.yas su bsgom par bya//phyag g.yon gyis ni dril bu dang / /de bzhin pad ljang nor bu'o/ /zhes smos pa la/ nyon mongs pa gcod pa'i shes rab ni ral gri'o/ /mngon par byang chub pa rnam pa nyi shu ni sna tshogs rdo rje'o/ /pad+ma ljang gu ni las thams cad ma yin pa'i phyir ro//dril bu la sogs pa ni snga ma bzhin no/ /mdzad pa bshad par bya ste/ log pa'i ngag can sems can rnams/ /rnam par sbyangs nas slar byon te/ /de bzhin byang gi phyogs su ni/ /sna tshogs rdo rje dag la bzhugs/ /zhes pa la snga ma bzhin du chos 'byung las byung zhing log pa'i tshig can gyi sems can rnams bstan pa la sogs pas sbyangs shing sangs rgyas kyi zhing la 'jug cing slar log nas byang phyogs su pad+ma dang nyi ma dang sna tshogs rdo rje la bzhugs par bsam par bya'o//nye bar bsdu ba bshad par bya ste/ zhe sdang gti mug de bzhin chags/ /yid bzhin nor bu dam tshig ste/ /rigs ni lnga po 'di dag nyid/ /'dod dang thar pa rab bsgrub pa'o/ /zhes pa la zhe sdang rnam par dag pa ni mi bskyod pa dang / gti mug rnam par dag pa ni rnam par snang mdzad dang / 'dod chags rnam par bdag pa ni 'od dpag tu med pa dang /yid bzhin nor bu ni rin chen 'byung ldan no/ /dam tshig nyams pa rnams slar yang dam tshig gso bar byed pas na dam tshig pa ni don yod grub pa'o/ /rigs lnga po de dag ni nyon mongs pa rnam par dag pa'o/ /'dod pa ni bde ba'i thabs kyis thar pa bsgrub pa ste/mi gnas pa'i mya ngan las 'das pa'i dbyings thob par byed pa'o/ /yang na 'dod pa dang thar pa ni 'dod pa dang thar pa dag ste/ longs spyod dang grol ba'o/ /de dag 'grub pa ni rtsol ba'o/ /de ni nye bar mtshon pa tsam yin te/ chos kyi dbyings dang me long mnyam pa nyid dang /so sor rtog pa dang bya ba nan tan sgrub pa'i ye shes kyi rang bzhin dang / kun gzhi dang / nyon mongs pa can gyi yid dang / 'jug pa dang / gzugs la sogs pa'i rnam par shes pa rnam par dag pa dang / gzugs dang / tshor ba dang /'du shes dang / 'du byed dang / rnam par shes pa'i phung po rnam par dag pa dang / zhi ba dang / rgyas pa dang / dbang dang / mngon spyod dang / dgug pa rnam par dag pa dang / tshul khrims dang / ting nge 'dzin dang / shes rab dang / rnam par grol ba dang rnam par grol ba'i ye shes mthong ba'i rang bzhin dang /sa dang / chu dang / me dang / rlung dang / nam mkha' dang / gzugs dang / sgra dang / dri dang / ro dang / reg bya dang / mig dang / rna ba dang / sna dang / lce dang / lus dang / sems dang / don dang / bdag dang / rnam par rtog pa dang /'jug pa'i rnam par shes pa rnam par dag pa'i rang bzhin shes par bya'o/ /lha mo rnams kyi spro ba bshad par bya ste/ mo ha ra ti sngags las byung / /lha mo spyan ni dbyung bar bya/ /dkar zhing zhi ba'i nyams dang ldan/ /rnam snang mdzad kyis spyi bor mtshan/ /zhes smos te/ snga ma bzhin du lha mo'i pad+ma'i dbus su byang chub kyi sems kyi thig le yongs su gyur pa las mo ha ra ti'i sngags las 'khor lo rtsibs brgyad pa las byung ba'i lha mo spyan sems dpa' gsum gyi bdag nyid dbyung ba ni spro bar bya'o/ /ji lta bu yin zhe na/ dkar po zhes bya ba ni zhi ba mdzad pa'i phyir ro//zhi ba'i nyams dang ldan pa ni rgyu de nyid las so/ /rnam par snang mdzad kyis mtshan pa ni rang gi bdag po'i cod pan te/ rigs rjes su dran pa'i phyir ro/ /gzhan yang / dkar dang gnag dang dmar ba'i zhal/ /phyag drug par ni rnam par bsgom//'khor lo rdo rje de bzhin du/ /ut+pal dkar po g.yas su bsam/ /dril bu de bzhin rin chen dang / /ral gri g.yon du bsgom par bya/ /zhes smos pa la/ ut+pal dkar po ni zhi ba dang mthun pa'i phyir ro/ /zhal dkar po la sogs pa dang / 'khor lo la sogs pa'i don ni bshad zin to//da ni phyi rol du spro ba bshad par bya ste/ de bzhin thugs ka nas byung ste/ /phyogs bcu ngag tu gzigs nas ni/ /gdon dang nad gdungs 'jig rten rnams/ /thugs rje chen pos zhi mdzad de/ /slar byon nas ni zla dkyil du/ /shar gyi mtshams su bzhugs par gyur/ / zhes smos pa la/ thugs ka nas zhes pa ni pad+ma'i dbus nas so/ /phyogs bcur gzigs pa ni nad dang ldan pa'i nad zhi bar bya ba'i don du'o/ /gdon ni re ba ti'i gdon la sogs pas byas pa'o/ /nad ni rims la sogs pa ste/ de rnams kyis gdungs pa ni mnan pa'i 'jig rten pa gang yin pa de la bdud rtsi'i 'od zer spro bas zhi bar mdzad pa ni/rab tu zhi bar byas nas rang gi sangs rgyas kyi zhing la 'jog cing / slar log ste shar lho'i mtshams su sna tshogs pad+ma dang / zla ba dang / 'khor lo la bzhugs par bsam par bya'o/ /mA ma kI'i spro ba bshad par bya ste/dwe Sha ra ti'i sngags las byung / /lha mo mA ma kI dbyung ste/ /ut+pal sngon po'i 'dab ltar sngo/ /bzhin bzangs shin tu yid du 'ong / /zhes smos pa la/ snga ma bzhin du lha mo'i pad+ma'i dbus su thig le yongs su gyur pas dwe Sha ra ti'i sngags las byung ba rdo rje rtse lnga pa las lha mo mA ma kI spro bar bya ste/ji lta bu yin zhe na/ ut+pal sngon po'i 'dab ltar sngo ba ni kha dog sngo ba'o/ /de bzhin du bzhin bzangs ni zhal mdzes pa'o/ /de nyid kyi phyir yid du 'ong ba ni bcom ldan 'das mi bskyod pa'am/ rin chen 'byung ldan gyi thugs 'phros pa ste/ mA ma kI ni rigs gnyis pa yin pa'i phyir ro//gzhan yang ji lta bu yin zhe na/ gnag dang dkar dang dmar ba ste/ /mi bskyod pas ni dbu rgyan byas/ /rdo rje 'khor lo de bzhin du/ /ut+pal sngo dmar g.yas pa la/ /dril bu rin chen ral gri ni/ /g.yon pa'i phyag na bsnams par mdzad//ces smos pa la/ zhal nag po la sogs pa'i don ni bshad zin to/ /mi bskyod pas ni dbu rgyan byas pa ni rang gi bdag nyid can no/ /gang gi tshe rin chen 'byung ldan gyi rigs yin na/ de'i tshe rin chen 'byung ldan gyi cod pan bya'o/ /rdo rje la sogs pa'i don ni bshad zin to//sngon po dang dmar po 'dres par gyur pa na ser po dang nag por snang bar 'gyur te/ gnyi ga'i rigs kyi rtags bshad do/ /phyi rol du spro ba bshad par bya ste/ bgegs chen 'jigs pas gzir ba rnams/ /thugs rje chen pos srung mdzad par/ /byung nas slar ni byon nas su//lho nub tu ni bzhugs par gyur/ /ces smos te/ bgegs chen po ni srin po la sogs pa ste/ de rnams kyis 'jigs pa ni rmi lam ngan pa la sogs pa de rnams kyis gzir ba ni gnod pa gang yin pa de rnams las srung ba mdzad nas so/ /srin po la sogs pa bskrad cing rang gi sangs rgyas kyi zhing nas log cing lho nub ni bden bral gyi mtshams su sna tshogs pad+ma dang /nyi ma dang / rdo rje'i steng du bzhugs par bya'o/ /gos dkar mo'i spro ba bshad par bya ste/ rA ga ra ti'i sngags las byung / /gos dkar mo ni dbyung bya ste//zhal ni dmar dang gnag dang dkar/ /pad+ma rA ga'i 'od dang ldan/ /zhes smos te/ snga ma bzhin du lha mo'i pad+ma'i dbus su thig le las rA ga ra ti yongs su gyur pa las pad+ma dmar po las byung ba'i gos dkar mo pad+ma rA ga'i nor bu'i kha dog dang 'dra ba spro bar bya'o//dmar po la sogs pa zhal gyi don ni bshad zin to/ /gzhan yang / 'od dpag med bcas ral pa'i tshogs/ /phyag drug pa ni rnam bsgoms te/ /g.yon pa'i dril bur bcas pa yis/ /ut+pal sdong bu 'dzin mdzad la/ /thugs kar gnas pa'i ut+pal/ / dmar po g.yas kyis 'dzin par mdzad/ /ces smos pa la/ ral pa rnams kyi tshogs ni ral pa'i tshogs so/ /'od dpag tu med pa dang bcas pa'i ral pa'i tshogs gang la yod pa de ni 'od dpag med dang bcas pa'i ral pa'i tshogs te/ rang gi bdag po'i cod pan zhes bya ba'i don to//phyag drug gi don ni bshad zin to/ /phyag g.yon pa dril bu dang bcas pas phyogs gcig tu pad+ma'i sdong bu bzung ste/ phyag g.yas pas thugs kar kha dog dmar po nyid dbye bar mdzad par bsam par bya'o/ /rnam par dag pa ni 'od dpag tu med pa bzhin no//phyag mtshan lhag ma rnams bshad par bya ste/ rdo rje'i 'khor lo g.yas dag la/ /nor bu ral gri g.yon pa na/ /bsnams par mdzad pa byung nas ni/ /gdon gyis nyen pa zhi mdzad de/ /slar byon pad+mo'i dbus nyid du/ /nub byang mtshams su bzhugs par gyur//zhes smos te/ rdo rje la sogs pa'i don ni bshad zin to/ /gdon gyis nyen pa ni dbul ba'i gdon gyis nyen pa la zhi bar mdzad pa ni rgyas par mdzad nas so/ /yang na dbang du ma gyur pa'i gdon gyis nyen pa la zhi bar mdzad pa ste/ dbang du mdzad nas sangs rgyas kyi zhing las byung ste/rlung gi mtshams su sna tshogs pad+ma dang / zla ba dang / mtsho skyes la bzhugs par bsam par bya'o/ /sgrol ma'i spro ba bshad par bya ste/ badzra ra ti'i sngags las byung / /yid 'ong sgrol ma dbyung bya ste/ /ljang dang gnag dang dkar ba'i zhal//dUr ba'i lo ma'i mdog dang mnyam/ /zhes smos te/ snga ma bzhin du lha mo'i pad+ma'i dbus su thig le yongs su gyur pa las badzra ra ti'i sngags las byung ba'i ut+pal las skyes pa dUr ba'i lo ma bzhin ni ljang skya'i lha mo sgrol ma spro bar bya ste/ ljang gu la sogs pa'i don ni bshad zin to//gzhan yang / don yod pas ni gtsug tor byas/ /phyag drug par ni rnam par bsgom/ /sna tshogs rdo rje 'khor lo dang / /ut+pal dkar po g.yas pa na/ /dril bu rin chen ral gri ni/ /brtul zhugs can gyis g.yon du bsam/ /zhes smos te/don yod ces bya ba ni rang gi bdag pos so/ /phyag drug la sogs pa'i don bshad zin to/ /bya ba bshad par bya ste/ sems can thams cad dbang mdzad de/ /sna tshogs rdo rje'i stan la yang / /byung nas slar ni byon nas su/ /byang shar mtshams su bzhugs par gyur//zhes smos pa la/ sems can thams cad ni 'jigs pa chen po brgyad 'di lta ste/ seng ge dang / glang po dang / me dang / sbrul dang / chom rkun dang / btson ra dang / rgya mtsho dang / sha za'i 'jigs pa'o/ /kha cig na re mdze dang / dbul ba'i 'jigs pa dang bcas pa'i 'jigs pa chen po bcu yin no zhes zer ro//de rnams dbang du byas pa ni sel nas so/ /byung nas ni pad+ma las so/ /byon nas ni sangs rgyas kyi zhing las so/ /byang shar mtshams su ni dbang ldan gyi mtshams su sna tshogs pad+ma dang / zla ba dang / sna tshogs rdo rje la bzhugs par bsam par bya'o/ /yum bzhi po de rnams kyi rnam par dag pa bshad par bya ste/ de la sa'i khams dang / rnam par thar pa'i sgo stong pa nyid dang / snying rje chen po dang / thabs kyi pha rol tu phyin pa rnam par dag pa'i rang bzhin ni gti mug dga' ma ste/rnam par snang mdzad kyi rang snang ba'i rig ma de dang mtshungs pa thabs kyi pha rol tu phyin pa dang / snying rje chen po dang bral ba'i sems can rnams sdug bsngal ma lus pa las skyob pa las sbyar zhing chos thams cad stong pa nyid du bstan nas sems can thams cad kyi don gyi khur theg pa dang /mnyam pa nyid kyi rang gi skyon dgug pa dang / sems can gyi don la 'jug pa dang / myur du rang bde bar byang chub thob pa rnam pa gsum gyi thabs kyi pha rol tu phyin pa la nges par sbyar zhing ring du song ba'i sa la sems can rnams 'jog cing me'i mtshams la zhi ba mdzad pa'o//zhe sdang dga' ma ni byams pa chen po dang / rnam par thar pa mtshan ma med pa dang / chu'i khams dang / smon lam gyi pha rol tu phyin pa rnam par dag pa'i lha mo mA ma kI ste/ mi bskyod pa'i rang gi rig ma de dang 'dra ba byams pa chen po dang /smon lam dang bral ba'i sems can thams cad la phan pa dang / bde ba la nges par sbyar zhing chos thams cad mtshan ma med pa nyid du bskyed la/ sems can thams cad kyi srid pa nye bar zhi ba la sogs pa'i don gyi bya ba dang thugs mnyam pa nyid kyi tshogs kyi rgyu dang /sems can gyi don gyi rgyu dang / sangs rgyas kyi zhing yongs su dag pa zhes bya ba rnam pa gsum gyis smon lam gyi pha rol tu phyin pa la nges par sbyar zhing mi g.yo ba'i sa la 'jog cing bden bral gyi mtshams su gdul dka' ba 'dul bar mdzad pa'o//'dod chags dga' ma zhes bya ba dga' ba chen po dang / rnam par thar pa smon pa med pa dang / me'i khams dang / stobs kyi pha rol tu phyin pa rnam par dag pa ni gos dkar mo ste/ 'od dpag tu med pa'i rang snang ba'i rig ma de dang 'dra ba dang /dga' ba chen po dang stobs kyi pha rol tu phyin pa dang bral ba'i sems can rnams sangs rgyas kyi chos kyi dga' bas yang dag par rab tu sbyor la/ rang rig las ldog pa'i chos thams cad med pa'i phyir chos thams cad la smon pa med pa nyid gsal bar byas la/'dar ba sel ba dang / smin pa la sogs pa'i bya bas me dang mtshungs pa dang / de bzhin du las las ldog pa dang / nyon mongs pa bcom pa dang / bdud dang pha rol rgol ba rnams 'joms par byed pa/ rnam pa gsum gyi stobs kyis pha rol tu phyin pa la nges par sbyar zhing legs pa'i blo gros kyi sa la 'jog cing rlung gi mtshams su rgyas par mdzad pa'o//rdo rje dga' ma zhes bya ba btang snyoms chen po dang / rang bzhin gyis 'od gsal ba'i rnam par thar pa dang /rlung gi khams dang / ye shes kyi pha rol tu phyin pa rnam par dag pa ni sgrol ma ste/ btang snyoms chen po dang / ye shes kyi pha rol tu phyin pa dang bral ba'i sems can rnams rnyed pa dang / ma rnyed pa dang / bde ba dang / sdug bsngal ba dang / grags pa dang / ma grags pa dang / bstod pa dang / smad pa la btang snyoms dang / sems can thams cad kyi gdung ba rab tu zhi ba la sogs pa'i bya bas rlung dang 'dra ba'i sems nyid rab tu sbyar te/ nyon mongs pa rnams glo bur ba yin pa'i phyir chos thams cad kyi rang bzhin gyis 'od gsal ba nyid gsal bar byas la rnam par mi rtog pa dang /rtog pa mnyam pa nyid du rtogs pa dang / sems can gyi don gyi thabs lkog tu gyur pa ma yin pa zhes pa rnam pa gsum gyi ye shes kyi pha rol tu phyin pa la nges par sbyor zhing chos kyi sprin gyi sa la 'jog cing dbang ldan gyi mtshams su dbang mdzad pa ste drang ba'i don to//snang ba dang / zla ba'i snang ba dang / mo rtags dang / gzhan dbang dang / rjes su 'jug pa'i dbyangs dang / 'jam pa dang / chags pa dang bral ba la sogs pa rang bzhin gyis gnyen po stong pa nyid kyi rang bzhin ni spyan no//snang ba mched pa dang / nyi ma'i snang ba dang / pho rtags dang / kun brtags dang / tsheg drag dang / bar pa dang / 'dod chags la sogs pa'i rang bzhin gyi gnyen po shin tu stong pa'i ngo bo ni lha mo mA ma kI'o//snang ba nye bar thob pa dang / mtshams kyi snang ba dang ma ning gi rtags dang / thig le dang / tsheg drag dang bral ba dang / yongs su rdzogs pa dang / ma rig pa la sogs pa rang bzhin gyis gnyen po stong pa chen po'i rang bzhin ni gos dkar mo'o/ /snang ba la sogs pa dang bral ba dang zla ba dang nyi ma dang /mtshams kyi snang ba med pa dang / pho dang / mo dang / ma ning gi rtags med pa dang / rjes su 'jug pa'i dbyangs dang / tsheg drag dang / de med pa ma yin pa dang / rang bzhin gsum dang bral ba dang / 'jam pa dang /bar ma dang / rab spong pa dang / chags pa dang bral ba dang / chags pa dang / chags pa bar pa dang bral ba dang / stong pa dang / shin tu stong pa dang / stong pa chen po'i gnyen po thams cad stong pa'i rang bzhin ni sgrol ma ste nges pa'i don to/ /mchod pa'i lha mo'i spro ba bshad par bya ste/rnal 'byor pas ni rim gnyis par/ /rdo rje gzugs la sogs pa dbyung / /zhes smos te rim pa gnyis pa ni cha chen bzhi las phyi rol gyi cha chen gcig la me'i mtshams la sogs pa bzhi por cha chung cig la rdo rje rab bris pa la lhag ma rnams gzugs rdo rje ma la sogs pa dgod do//de nyid bshad pa/ me yi phyogs su dgod bya ba/ /rdo rje gzugs ni yid 'ong ba/ /zhal gsum phyag drug dkar ba ste/ /dbu rgyan rnam par snang mdzad dpal/ /gnyis kyis me long 'dzin mdzad de/ / lhag ma gti mug dga' dang mtshungs/ /zhes pa la snga ma bzhin lha mo'i pad+mar thig le yongs su gyur pa'i dza las byung ba'i me long las skyes pa'i gzugs rdo rje ma sems dpa' gsum gyi bdag nyid yid du 'ong ba la ni chu shel gyi nor bu'i 'od dang ldan pas sems 'phrog pa rnam par snang mdzad kyi cod pan can/rtsa ba'i phyag gnyis kyis shel gyi nor bu'i me long gi nang gi dkyil 'khor la bzhugs pa'i de bzhin gshegs pa dang / lha mo rnams kyi sku gsal bar mdzad pa/ phyag lhag ma rnams kyis bdag po spyan ma dang 'dra ba'i phyag mtshan 'dzin pa spros te/des ni gzugs la mngon par zhen pa'i sems can gyi khams sbyangs pa las byung ste/ me'i mtshams su pad+ma dang zla ba'i dkyil 'khor la bzhugs pa bsam par bya'o/ /sgra rdo rje ma'i spro ba bshad par bya ste/ bden bral phyogs dgod lha mo ni//rdo rje sgra ste phyag drug pa/ /zhal gsum sku mdog ser mo ste/ /dbu rgyan rin chen 'byung ldan yin/ /phyag gnyis kyis ni pi wang bsnams/ /lhag ma mA ma kI dang mtshungs/ /zhes smos pa la/ snga ma bzhin du lha mo'i pad+ma'i dbus su thig le yongs su gyur pa'i hUM las byung ba'i pi wang las sgra rdo rje ma sems dpa' gsum gyi bdag nyid rin chen 'byung ldan gyi cod pan can/rtsa ba'i phyag gis rgyud mangs bsgrengs pa'i sgras nang gi de bzhin gshegs pa'i snyan tshim zhing thugs bde bas rtse gcig ba nyid skyed par byed pa/phyag lhag ma rnams kyis mA ma kI dang 'dra ba'i phyag mtshan spros te/ des ni sgra la mngon par zhen pa'i sems can gyi khams sbyangs nas slar log ste bden bral gyi mtshams su sna tshogs pad+ma dang zla ba la bzhugs par bsam mo/ / dri rdo rje ma'i spro ba bshad par bya ste/ rlung gi phyogs dgod lha mo ni/ /rdo rje dri ste phyag drug ma/ /zhal gsum sku mdog dmar mo ste/ /'od dpag med kyi thor tshugs 'chang / /phyag gnyis kyis ni dung bsnams te/ /lhag ma gos dkar ma dang mtshungs/ /zhes smos pa la/snga ma bzhin du lha mo'i pad+ma'i dbus su thig le yongs su gyur pa'i baM las byung ba'i dung phor las skyes pa'i dri rdo rje ma sems dpa' gsum gyi sku'i bdag nyid can pad+ma rA ga'i nor bu dang 'dra ba dag gi dbang phyug gi cod pan can rtsa ba'i phyag dag gis ga pur dang /gur gum dang / tsan+dan dang / gla rtsi dang / yang dag par sbyar ba'i dris gang ba'i tshes brgyad pa'i rnam pa dang mtshungs pa'i dung phor 'dzin pa spros te/ lhag ma rnams kyis gos dkar mo dang 'dra ba'i phyag mtshan 'chang ba/ des ni dri la mngon par zhen pa'i sems can gyi khams sbyangs te rlung gi mtshams su sna tshogs pad+ma dang /zla ba'i dkyil 'khor la bzhugs par bsam mo/ /ro rdo rje ma'i spro ba bshad par bya ste/ dbang ldan phyogs dgod lha mo ni/ /rdo rje ro ste phyag drug pa/ /zhal gsum kha dog ljang gu ste//dbu rgyan la ni rnga sgra bzhugs/ /phyag gnyis na ni ro yi snod/ /lhag ma sgrol ma lta bu yin/ /zhes smos te/ snga ma bzhin du lha mo'i pad+mar thig le yongs su gyur pa las hoH las byung ba'i rin chen sna bdun gyi ro'i snod las skyes pa/ ro rdo rje ma sems dpa' gsum gyi bdag nyid ut+pal sngon po dang nam mkha' lding gi nor bu dang 'dra ba don yod grub pa'i cod pan can rtsa ba'i phyag gis ro drug gis gang ba'i rin po che'i snod phul bas de bzhin gshegs pa rnams tshim par byed pa/phyag lhag ma rnams kyis sgrol ma dang 'dra ba'i phyag mtshan 'dzin pa spros te/rol mngon par zhen pa'i sems can gyi khams sbyangs te log nas dbang ldan du sna tshogs pad+ma dang zla ba la bzhugs par bsam mo/ /reg bya rdo rje ma'i gnas bshad par bya ste/ rdo rje sems dpa' legs 'khyud de//'khor lo'i dbus na rnam bzhugs par/ /reg bya rdo rje bsam bya ste/ /zhal sogs bdag po lta bu'o/ /zhes pa la/ dkyil 'khor rgyal ba mchog gi dang po phyag rgya 'dus pa'i dus su dam tshig gi phyag rgya dang gnyis su med pa'i ye shes kyi phyag rgya ni reg bya rdo rje ma'o//de ni rdo rje sems dpa' ste/ mi bskyod pa la legs par 'khyud pa ni brtan par 'khyud cing 'khor lo'i dbus su gnas pa'o/ /de nyid kyi phyir/ zhal sogs bdag po lta bu'o/ /zhes bya ba ni zhal la sogs pa 'dra ba zhes bya ba'i tha tshig go//de bas na de'i spro ba'i cho ga ma bshad do/ /de nas ser sna'i gnyen po sbyin pa'i pha rol tu phyin pa rnam par dag pa ste/ gzugs rdo rje ma'o/ /ser sna gtso bor gyur pa chos dang kha zas dang / byams pa dang zhes bya ba rnam pa gsum gyis sbyin pa'i pha rol tu phyin pa la nges par sbyar zhing rab tu dga' ba'i sa la 'jog ste/chos kyi dbyings kyi ye shes me long gis ston pa phyi'i me'i mtshams la gnas pa'o/ /tshul khrims 'chal ba'i gnyen por gyur pa tshul khrims kyi pha rol tu phyin pa'i rnam par dag pa ni sgra rdo rje ma ste tshul khrims 'chal pa rnams ni sdom pa'i tshul khrims dang /sems can gyi don byed pa'i tshul khrims dang / dge ba chos sdud pa'i tshul khrims te/ rnam pa gsum gyi tshul khrims la nges par sbyar zhing dri ma med pa'i sa la 'jog ste/chos kyi dbyings kyi mtshan nyid kyi chos sgra la dga' bar byed pa'i phyi'i bden bral gyi mtshams su gnas pa'o/ /de bzhin du khong khro'i gnyen po bzod pa'i pha rol tu phyin pa ni dri rdo rje ma ste/ mi bzod pa gtso bor gyur pa gzhan gyi gnod pa dang /sdug bsngal myong ba dang / chos la dmigs pa'i mtshan nyid kyis rnam pa gsum gyi bzod pa'i pha rol tu phyin pa la nges par sbyar zhing 'od byed pa'i sa la 'jog ste/ so sor rtog pa'i ye shes kyi dris sems can rnams la dga' bar byed pa phyi'i rlung gi mtshams la gnas pa'o//de bzhin du le lo'i gnyen po brtson 'grus kyi pha rol tu phyin pa rnam par dag pa ni ro rdo rje ma ste/ le lo'i gtso bor gyur pa rnams go cha'i brtson 'grus dang / sbyor ba'i brtson 'grus dang / yongs su rdzogs pa'i brtson 'grus te/rnam pa gsum gyi pha rol tu phyin pa la nges par sbyar zhing 'od 'phro ba'i sa la 'jog ste/ chos kyi bdud rtsi'i zas kyis sems can rnams tshim par byed pa phyi'i dbang ldan gyi mtshams la gnas pa'o/ /g.yeng ba'i gnyen po bsam gtan gyi pha rol tu phyin pa'i rnam par dag pa ni reg bya rdo rje ma ste/g.yeng ba gtso bor gyur pa'i skyon rnams 'joms pa dang / rnam par bzhugs pa dang sbyor ba can te/ rnam pa gsum gyi bsam gtan gyi pha rol tu phyin pa la nges par sbyar zhing sbyang dka' ba'i sa la 'jog cing 'od gsal ba'i reg pa'i bde bas tshim par byed pa dbus kyi gtso bo la 'khyud nas 'khor lo'i dbus su gnas pa'o//shes rab 'chal pa'i gnyen por gyur pa shes rab kyi pha rol tu phyin pa'i rang bzhin ni mi bskyod pa ste/ shes rab kyi pha rol tu phyin pa dang bral ba rnams thos pa dang /bsam pa dang bsgom pa'i shes rab kyi pha rol tu phyin pa la nges par sbyor zhing chos kyi dbyings kyi ye shes mngon du byed pas mngon du gyur pa'i sa la 'jog cing dbus su gnas pa'o/ /de rnams kyis phyung ba'i sngags ni dzaH hUM baM hoHkhaM ste drang ba'i don to//gsang ba'i dkyil 'khor gyi rtsa ni me long lta bu'i gzugs yin pas gzugs rdo rje ma'o/ /snying ga'i dkyil 'khor gyi rtsa ni pi wang lta bu ste/ sgra rdo rje ma'o/ /lkog ma'i dkyil 'khor gyi rtsa ni dung lta bu ste/ dri rdo rje ma'o//lte ba'i dkyil 'khor gyi rtsa ni ro'i snod lta bu'i rtsa ste/ ro rdo rje ma'o/ /'dod pa'i gdugs kyi rtsa ni reg bya rdo rje ma ste/ de nyid mi bskyod pa ste nges pa'i don to/ /byang chub sems dpa'i spro ba bshad par bya ste/ rim gsum shar gyi snam bu la//brtul zhugs can gyis dbyung ba ni/ /maiM th+l+hiM sa bon las byung ba'i/ /byams pa sa yi snying po gnyis/ /zhes smos te/ thig le gnyis yongs su gyur pa las maiM dang th+l+hiM gi sa bon las skyes pa nA ga ge sar gyi yal ga dang / 'khor lo yongs su gyur pa las dmar po dang dkar po'am/yang na dkar po sems dpa' gsum gyi bdag nyid zhal gsum phyag drug pa byams pa dang sa'i snying po spros la mig gi skye mched dang / rtsa rgyus thams cad sbyangs te log nas rim pa gsum pa'i shar gyi snam bu'i logs gnyis la sna tshogs pad+ma dang zla ba la gnas par bsam par bya'o//de nas/ oM gyi sa bon las byung ba/ /phyag na rdo rje nam mkha'i snying po/ /lho yi phyogs kyi snam bu la/ /go rims bzhin du dbyung bar bya/ /zhes smos te/ de nas snga ma bzhin du lha mo'i pad+ma'i thig le yongs su gyur pa'i oM las skyes pa'i rdo rje dang rin po che las byung ba/sngon po dang / ser po'am/ yang na ser po sems dpa' gsum gyi bdag nyid zhal gsum phyag drug pa phyag na rdo rje dang / nam mkha'i snying po spros te/ rna ba dang / sna la mngon par zhen pa sbyangs te/log nas lho phyogs kyi snam bu'i logs gnyis la sna tshogs pad+ma dang / nyi ma dang zla ba la gnas par bsam par bya'o/ /de nas/ oM dang hUM las yang dag byung / /'jig rten dbang po 'jam pa'i dbyangs/ /'di dag nub tu dbyung bar bya/ / zhes bya la de nas snga ma bzhin du lha mo'i pad+mar thig le yongs su gyur pa las/ oM dang hUM las byung ba dmar po dang / dkar po'am yang na dmar po sems dpa' gsum gyi bdag nyid zhal gsum phyag drug pa/ 'jig rten dbang phyug dang / 'jam pa'i dbyangs spros te/lce dang yid kyi dbang po la mngon par zhen pa'i sems can rnams sbyangs nas log ste nub kyi snam bu'i logs gnyis su sna tshogs pad+ma dang zla ba la bzhugs par bsam par bya'o/ /de nas/ byang phyogs su yang dbyung ba ni/ /oM dang saM gi sa bon skyes/ /sgrib sel kun du bzang por bcas//zhes pa las/ snga ma bzhin du lha mo'i pad+mar thig le yongs su gyur pa las oM dang saM las byung ba'i ljang gu dang / dmar po'am yang na ljang gu sems dpa' gsum gyi bdag nyid zhal gsum phyag drug pa/ rdo rje dang ral gri las byung ba sgrib pa rnam par sel ba dang /kun du bzang po ste/ lus dang yan lag thams cad kyi tshigs la mngon par zhen pa sbyangs te/ log nas byang gi snam bu'i logs gnyis su sna tshogs pad+ma dang / zla ba la bzhugs par bsam par bya'o/ /de rnams bdag po dang 'dra bar bstan par bya ba'i phyir bshad par bya ste/'di dag dbu rgyan rang gi mgon/ /sku mdog sogs pa'ang de dang mtshungs/ /phyag dang mtshon cha dag kyang ni/ /rang rang gi ni bdag por mtshungs/ /zhes pa la/ de dag ni byang chub sems dpa' brgyad do//cod pan rang gi mgon po ni rang gi rigs kyi bdag pos cod pan byas pa'o/ /de la byams pa dang / sa'i snying po dag la rnam par snang mdzad do/ /phyag na rdo rje la mi bskyod pa'o/ /nam mkha'i snying po la rin chen 'byung ldan no/ /'jig rten dbang phyug dang 'jam pa'i dbyangs la 'od dpag tu med pa'o//sgrib pa rnam par sel ba dang kun du bzang po la don yod grub pa dbu rgyan du bsgom par bya'o/ /kha dog la sogs pa ni kha dog dang zhal dang nyams kyis so/ /de dang mtshungs pa ni rang rang gi bdag po dang 'dra ba'o/ / phyag ni phyag drug dang phyag mtshan ni 'khor lo la sogs pas rang rang gi bdag po ni rnam par snang mdzad la sogs pa dang mtshungs par shes par bya'o zhes dpe bstan pa dang spyir btang ba yin no/ /dmigs kyis dgar ba bshad par bya ste/ byams pa 'ba' zhig g.yas na ni//klu shing me tog bsnams par mdzad/ /ces pa la/ byams pa 'ba' zhig ni rtsa ba'i phyag g.yas pas klu shing gi me tog ste/ nA ga ge sar gyi yal ga bsnams pa ste/ ma 'ongs pa'i dus su de'i drung du sangs rgyas par 'gyur ba'i phyir te drang ba'i don to//rtsa rgyus thams cad kyi yal ga ni klu'i me tog ste nges pa'i don to/ /de rnams kyi mdzad pa bshad par bya ste/ 'di dag skye mched rnams sbyong zhing / /lha yi mig sogs stsol ba po/ /sems can skye mched sbyangs nas su/ /slar byon nas ni stan la bzhugs//zhes smos te/ byang chub sems dpa' de rnams sems can rnams kyi tha mal pa'i mig la sogs pa sbyangs shing lha'i mig la sogs pa bskyed nas rang rang gi sangs rgyas kyi zhing las byon zhing / sngar bshad pa'i gdan rnams la bzhug par bsam mo//yid du 'ong ba dang / mi 'ong ba dang / gnyi ga'i gzugs rnam par dag pas so sor sdud pa'i rang bzhin mig gi dbang po sbyangs pas mig lnga rtsol ba sa'i snying po'o/ /de bzhin du rnam pa gsum gyi sgra rnam par dag pas bsam gtan gyi rang bzhin rna ba'i dbang po sbyong bar byed pa/lha'i rna ba rtsol ba phyag na rdo rje'o/ /de bzhin du rnam pa gsum gyi dri ma rnam par dag pas srog dang rtsol ba'i rang bzhin sna sbyong bar byed pa lha'i sna rtsol ba ni nam mkha'i snying po'o/ /de bzhin du rnam pa gsum gyi ro rnam par dag pas 'dzin pa'i rang bzhin lce sbyong bar byed pa/lha'i lce rtsol ba ni 'jig rten dbang phyug go/ /de bzhin du rnam pa gsum gyi reg bya rnam par dag pas rjes su dran pa'i rang bzhin lus sbyong bar byed pa/ lha'i sku rtsol ba ni sgrib pa sel ba'o/ /de bzhin du rnam pa gsum gyi chos rnam par dag pas ting nge 'dzin gyi rang bzhin 'das pa dang /ma 'ongs pa dang / da ltar byung ba yongs su shes pa'i mtshan nyid yid rnam par dag pa ni 'jam dpal lo/ /de bzhin du 'dod chags dang / zhe sdang dang / gti mug gi rtsa ba rnam par sbyong bar byed pa ni ril por 'dzin pa'i ting nge 'dzin gyi rang bzhin ni byams pa'o//de bzhin du khams drug gi rang bzhin gyi tshigs thams cad sbyong bar byed pa rjes su gzhig pa'i ting nge 'dzin gyi rang bzhin ni kun du bzang po ste drang ba'i don to/ /mig dang / rna ba dang / sna dang /lce dang / lus dang / yid dang / rtsa rgyus thams cad dang / tshigs thams cad kyi rtsa'i khong stong rnam par dag pas sa'i snying po la sogs pa ste nges pa'i don to/ /khro bo rnams kyi spro ba bshad par bya ste/ ya mAn+ta kr-i ta sngags las byung / /sngags pas gshin rje gshed dbyung ba//zhal ni gnag dang dkar dang dmar/ /'bar ba'i tshogs kyis rnam par dkrigs/ /zhes smos te/ snga ma bzhin du lha mo'i pad+mar thig le yongs su gyur pa las ya mAn+ta kr-ita sngags las byung ba'i dbyig to las skyes pa sngon po dang / dkar po dang / dmar po'i zhal mnga' ba/ zhal gsum phyag drug sems dpa' gsum gyi bdag nyid gshin rje mthar byed khro bo'i me 'bar ba'i phreng bas phyogs bcur khyab pa spro bar bya'o/ /phyag mtshan rnams bshad par bya ste/ thob 'khor lo rdo rje rnams/ /phyag g.yas na ni bsnams par mdzad//thugs kar sdigs mdzub zhags pa dang / /dril bu dgra sta g.yon pa na/ /zhes smos te/ sdigs mdzub dang bcas pa'i zhags pa ni sdigs mdzub zhags pa ste/ bgegs rnams 'gugs pa'i phyir ro/ /'khor lo sogs pa'i don ni snga ma bzhin no//mdzad pa bshad par bya ste/ dbang po la sogs tshogs dang bcas/ /mi bzad bgegs kyang skrag par mdzad/ /pad+ma nyi ma mnan nas ni/ /shar gyi phyogs su bzhugs par gyur/ /zhes smos te/ dbang po la sogs pa'i bgegs rnams ni shar phyogs la dbang byed pa'o//tshogs dang bcas pa ni 'khor dang bcas pa'o/ /skrag par mdzad pa ni lam ngan pa las bzlog pa ste/ shar phyogs kyi sgor sna tshogs pad+ma dang / ma he dang / gshin rje'i steng du nyi ma'i dkyil 'khor la bzhugs par bsam par bya'o//shes rab mthar byed kyi spro ba bshad par bya ste/ pradz+nyAn+ta kr-ita sngags las byung / /rin chen 'byung ldan dbu rgyan can/ /sku mdog dkar zhing nor bus brgyan/ /gzhan gyis mi thub sngags las byung / /zhes smos te snga ma bzhin du lha mo'i pad+mar thig le yongs su gyur pa las pradz+nyAn+ta kr-ita sngags las byung ba'i dbyig pa las shes rab mthar byed gzhan gyis mi thub pa'i rnam grangs can kha dog dkar po rin chen 'byung ldan gyi cod pan can spro bar bya'o//gti mug gi rigs kyi nang du bsdus pas rin chen 'byung ldan gyi rigs kyang shes rab mthar byed dkar po zhes bya'o//zhal dang dbyibs la sogs pa bshad par bya ste/ gsus khyim che zhing spyan gsum pa/ /dkar dang gnag dang dmar ba'i zhal/ /mche ba gtsigs shing rnam par 'gyur/ /'bar ba'i tshogs kyis rnam par 'khrigs//zhes smos te/ don gsal ba'o/ /phyag mtshan bshad par bya ste/ rdo rje dbyig pa ral gri ni/ /g.yas kyi phyag na bsnams par mdzad/ /snying gar sdigs mdzub zhags pa dang / /dril bu dgra sta g.yon pa na/ /zhes smos te/ rtsa ba'i phyag g.yas pa la dbyig pa dang lhag ma rnams ni snga ma bzhin no//mdzad pa bshad par bya ste/ g.yon brkyang ba yis gnas pa yis/ /mi bzad bgegs rnams skrag par mdzad/ /pad+ma nyi ma mnan nas ni/ lho yi phyogs su bzhugs par gyur/ /zhes smos te/ bgegs ni khyab 'jug gi sprul pa yi dwags la sogs pa'o//skrag pa ni sdigs mdzub can byung nas lho'i sgor sna tshogs pad+ma dang / khyab 'jug dang nyi ma'i steng du bzhugs par bsam par bya'o/ /pad+ma mthar byed kyi spro ba bshad par bya ste/ pad+mAn+ta kr-ita sngags las byung / /rta mgrin sngags pas dbyung bar bya//spyan gsum pad+ma rA ga'i mdog /zhal ni dmar dang gnag dang dkar/ /zhal gsum gsus khyim che ba dang / /'od dpag med kyi cod pan can/ /dpa' bo g.yon brkyang pa yis gnas/ /'bar ba'i tshogs kyis rnam par 'khrugs/ / zhes smos pa la/ snga ma bzhin du lha mo'i pad+mar thig le yongs su gyur pa las pad+mAn+ta kr-ita sngags las byung ba kha dog dmar po pad+ma dmar po las skyes pa'i pad+ma mthar byed pad+ma rA ga'i 'od dang 'dra ba spyan gsum pa ste/ ting nge 'dzin gsum gyi rang bzhin yin pa'i phyir ro/ / zhal gsum pa phyag drug pa sems dpa' gsum gyi bdag nyid de/ steng gi zhal ni rta'i rnam par 'dzin pa/ 'od dpag tu med pa'i cod pan can spro bar bya'o/ /zhal gsum ni yas so'i rtse mos mchu 'dzin pa ste/ bgegs 'joms pa'i phyir ro/ /g.yon brkyang ba ni 'dir rkang pa mnyam pa'i dbyibs mtshon pa'i phyir ro//dpa' bo ni lha chen po mnan nas bzhugs pa'o/ /'bar ba'i tshogs ni rnam par 'khrugs/ /zhes bya ba ni khro bo'i 'bar ba 'phro ba'o/ /phyag mtshan bshad par bya ste/ pad+ma ral gri gtun shing ni/ /g.yas pa'i phyag na bsnams par mdzad//snyan dang bcas pa'i dril bu dang / /dgra sta zhags pa g.yon na bsnams/ /zhes smos te/ rtsa ba'i phyag la pad+ma dmar po bsnams pa dang lhag ma rnams la ral gri la sogs pa ste go sla'o/ /mdzad pa bshad par bya ste/ pad+ma nyi ma la gnas te//phyogs bcu dag tu gzigs nas ni/ /klu rnams skrag par mdzad nas su/ /nub kyi phyogs su bzhugs par gyur/ /zhes smos la/ de la bgegs ni klu dang lha ma yin la sogs pa sa 'og las byung ba'o/ /de rnams skrag cing nub phyogs su ste/ nub kyi sgo sna tshogs pad+ma dang / lha chen po dang nyi ma'i gdan la bzhugs par bsam par bya'o/ /bgegs mthar byed kyi spro ba bshad par bya ste/ big+h+nAn+ta kr-ita sngags las byung / /rnga sgra'i cod pan dag dang ldan/ /ut+pal sngon po'i 'dab ltar ljang / /bdud rtsi thab sbyor dbyung bar bya//zhal ni sngo dang dmar dang dkar/ /zhal ni gdangs pas rnam par 'gyur/ /gsus khyim che zhing spyan gsum pa/ /'bar ba'i 'od kyis rnam par brgyan/ /zhes pa la/ snga ma bzhin du lha mo'i pad+mar thig le yongs su gyur pa las byung ba'i big+h+nAn+ta kr-ita sngags las skyes pa drag po rdo rje las byung ba//kha dog ljang gu don yod grub pa'i cod pan can/ /zhal gsum phyag drug pa sems dpa' gsum gyi bdag nyid spyan gsum pa bdud rtsi 'khyil pa bsam par bya'o/ /'bar ba'i 'od ni ljang ba dang dmar po khro bo'i 'bar ba ste/de rnams kyi rgyan ni rnam par brgyan pa ste/ khro bo dang mthun pa'i thugs bstan te/ bgegs skrod pa'i phyir ro/ /zhal gdangs pas ni rnam par 'gyur/ /zhes bya ba zhal rnam par phye zhing ha har dgod pa drag po 'byin pa'o/ /de'i phyag mtshan bshad par bya ste/ sna tshogs rdo rje 'khor lo dang / /gtun shin rnams ni g.yas pa na/ sdigs mdzub zhags pa bsnams pa dang / /dril bu dgra sta g.yon na bsnams/ /zhes smos te/ rtsa ba'i phyag gis sna tshogs rdo rje bsnams pa dang / lhag ma ni snga ma bzhin no/ /mdzad pa bshad par bya ste/bgegs ni skrag par byas nas su/ /g.yon brkyang ba yis gnas pa yis/ /pad+ma nyi ma mnan nas ni/ /byang gi phyogs su bzhugs par gyur/ /ces pa la/ bgegs ni dbang phyug chen po'i 'khor rnams te/ dga' byed dbang phyug dang nag po chen po dang / b+h+r-ing gi ri ti dang / gzhon nu karti la sogs pa'o/ /de rnams bskrang pa ni sdigs mdzub mdzad nas byon te byang phyogs su sna tshogs pad+ma dang / log 'dren dang nyi ma la bzhugs par gyur par bya'o/ /mi g.yo ba'i spro ba bshad par bya ste/ rang gi gsang sngags las byung ba'i//mi g.yo ba yang dbyung bar bya/ /spyan gsum in+d+ra nI la'i mdog /dbu rgyan rnam par snang mdzad dpal/ /zhes smos te/ snga ma bzhin du lha mo'i pad+mar thig le yongs su gyur pa las/ oM las byung ba ral gri las skyes pa'i in+d+ra nI la'i mdog can/ khro bo mi g.yo ba zhal gsum phyag drug pa spyan gsum pa sems dpa' gsum gyi bdag nyid can rnam par snang mdzad kyi dbu rgyan spro bar bya'o/ /gzhan yang / mche ba rnam par gtsigs pa'i zhal/ /zhal ni gnag dang dmar dang dkar/ /mi bzad ha ha zhes bzhad sgra/ / gsus khyim che zhing stobs po che/ /zhes pa la mche ba bzhi po gtsigs pa'i zhal gang la yod pa de la de skad ces bya'o/ /lhag ma ni snga ma bzhin no/ /de'i phyag mtshan bshad par bya ste/ ral gri rdo rje 'khor lo rnams/ /g.yas pa'i phyag na bsnams par mdzad/ /sdigs mdzub dang ni dgra sta dang //zhags pa g.yon gyi phyag na bsnams/ /zhes smos te/ de la rtsa ba'i phyag gis ral gri 'dzin pa dang / lhag ma ni snga ma bzhin no/ /mdzad pa bshad par bya ste/ /yams sogs 'jigs pa'i gnod bcom ste/ /g.yon brkyang ba yis gnas pa yis//pad+ma nyi ma la gnas nas/ /shar lho'i mtshams su bzhugs par 'gyur/ /zhes smos te/ yams la sogs pa ni me lhas sprul pa'i bgegs rnams te/ rlung dang / mkhris pa dang / bad kan dang / 'dus pa las byung ba'i zhag gcig dang / zhag gnyis dang /zhag gsum dang / zhag bzhi pa la sogs pa 'joms pa ni bka' ste/ byon nas shar lho'i mtshams su sna tshogs pad+ma dang / nyi ma la bzhugs par bsam par bya'o/ /'dod pa'i rgyal po'i spro ba bshad par bya ste/ rang gi gsang sngags las byung ba/ /brtul zhugs can gyis 'dod rgyal dbyung //drag po in+d+ra nI la'i mdog /rin chen 'byung ldan dbu rgyan can/ /zhes smos te/ snga ma bzhin du lha mo'i pad+mar thig le yongs su gyur pa las lcags kyu las byung ba sngon po rin chen 'byung ldan gyi cod pan can 'dod pa'i rgyal po spro bar bya'o//ji lta bu yin zhe na/ /zhal ni gnag dang dkar dang dmar/ spyan gsum mche ba 'jigs su rung / /phyag gnyis rdo rje hUM mdzad kyi/ /phyag rgya dag ni 'ching bar mdzad/ /ces smos te/ nag po la sogs pa'i don ni bshad zin to/ /rdo rje khu tshur gnyis bzlog la mdzub mo 'khyud cing lu gu rgyud du bcings te/mthe bo gnyis gung mo'i rtsa ba'i tshigs la btsugs te/ sor mo lhag ma rnams brkyang ba ni rdo rje hUM mdzad kyi phyag rgya'o/ /phyag mtshan lhag ma bshad par bya ste/ rdo rje ral gri g.yas dag la/ /g.yon na zhags pa zhags pa lcags kyu'o//bden bral bgegs ni 'jigs pa'o/ /g.yon brkyang gnas pas nyi mar bzhugs/ /zhes pa la/ rdo rje la sogs pa'i don ni bshad zin to/ /srin po la sogs pa bgegs 'joms shing sna tshogs pad+ma dang / nyi ma la g.yon brkyang bas gnas par bsam mo//dbyig sngon gyi spro ba bshad par bya ste/ rang sngags yi ge las byung ba/ brtul zhugs can gyis dbyig sngon bskyed/ /spyan gsum sprin sngon lta bu ste/ /'od dpag med kyi dbu rgyan can/ /zhal ni sngo dang dmar dang dkar/ / mi bzad ha ha zhes bzhad sgra/ /zhes bya ba la/ snga ma bzhin du lha mo'i pad+ma thig le yongs su gyur pa las a las byung ba/ dbyig pa las skyes pa zhal gsum phyag drug spyan gsum pa sprin gyi mdog 'jigs byed kyi rnam pa 'od dpag tu med pa'i cod pan can khro bo'i rgyal po dbyig sngon spro bar bya'o//de'i phyag mtshan bshad par bya ste/ /dbyig pa ral gri 'khor lo ni/ /g.yas pa'i phyag na bsnams par mdzad/ /snying gar sdigs mdzub ral gri dang / /dgra sta rnams ni g.yon na bsnams/ /zhes pa la rtsa ba'i phyag gis dbyig pa sngon po bsnams pa dang /ral gri la sogs pa ni snga ma bzhin no/ /mdzad pa bshad par bya ste/ yams kyi 'jigs pa bsal nas ni/ /gtum mo g.yon brkyang gnas pa yis/ /pad+ma nyi ma la gnas te/ /nub byang mtshams su bzhugs par gyur/ /zhes smos te/yams ni rnam par 'tshe ba ste/ 'bras dang / 'brum bu dang / lud pa la sogs pa ste/ de rnams las 'jigs pa ni 'chi ba'i 'jigs pa ste/ sems can rnams kyi 'jigs pa bsal nas byon te/ rlung gi mtshams su sna tshogs pad+ma dang / nyi ma la bzhugs par bsam mo//stobs po che'i spro ba bshad par bya ste/ rang sngags yi ge las byung ba'i/ /rnga sgra yi ni dbu rgyan can/ /stobs po che ni sngags pas dbyung / /ut+pal sngon po'i mdog 'dra ba/ /zhes smos pa la snga ma bzhin du lha mo'i pad+mar thig le yongs su gyur pa las ha las byung ba'i ral gri yongs su gyur pa las kha dog sngon po zhal gsum phyag drug pa/spyan gsum pa sems dpa' gsum gyi bdag nyid stobs po che spro bar bya'o/ /ji lta bu yin zhe na/ rnga sgra ni rta mchog ste/ don yod grub pa de'i cod pan ni dbu rgyan gang la yod pa de spro bar bya'o//gzhan yang ji lta bu yin zhe na/ zhal ni gnag dang dmar dang dkar/ /spyan gsum 'jigs pa'i sgra dang ldan/ /yan lag thams cad sprul gyis brgyan/ /gsus khyim che zhing 'jigs par mdzad/ /ces smos te/ nag po la sogs pa'i zhal gyi kha dog ni snga ma bzhin no//'jigs pa'i sgra dang ldan pa ni bskal pa'i mthar sprin gyi 'brug sgra lta bur byed pa'o/ /yan lag thams cad sbrul gyis brgyan pa ni 'jog po la sogs pa'i klu'i rgyal pos sku brgyan pa ste drag po yin pa'i phyir ro/ /lhag ma ni go sla'o/ /phyag mtshan bshad par bya ste/dbyig pa ral gri 'khor lo ni/ /g.yas pa'i phyag na bsnams par mdzad/ /snying gar sdigs mdzub ral gri dang / /zhags pa dgra sta g.yon na bsnams/ /zhes smos pa la/ rtsa ba'i phyag na ral gri dang / lhag ma ni snga ma bzhin no/ / mdzad pa bshad par bya ste/ g.yon brkyang ba yis gnas pa ste/ /mkha' 'gro la sogs 'jigs pa 'joms/ /pad+ma nyi ma la gnas te/ /byang shar mtshams su bzhugs par gyur/ /ces smos te/ pad+ma'i nang nas byung zhing khyab 'jug dang / drag po dang / tshangs pa dang / brgya byin gyi sprul pa'i tshangs pa mo dang / phag mo dang / gzhon nu ma dang / dbang mo dang / chu lha mo dang / rlung lha mo dang / tsa muN+DI la sogs pas byas pa'i 'jigs pa sel zhing byon te sna tshogs pad+ma dang / nyi ma la bzhugs par bsam mo//gtsug tor 'khor los sgyur ba'i spro ba bshad par bya ste/ rang sngags yi ge las byung ba'i/ /gtsug tor 'khor los sgyur ba dbyung / /mkha' ltar sngo bsangs 'jigs pa'o/ /mi bskyod pa yis dbu rgyan byas/ /zhal ni sngo dang dkar dang dmar/gtso bo spyan gsum gsus pa 'chang / /zhes smos pa la/ snga ma bzhin du lha mo'i pad+mar thig le yongs su gyur pa las rgyu las skyes pa'i 'khor lo las byung ba'i gtsug tor 'khor los sgyur ba zhal gsum phyag drug pa nam mkha'i mdog can thub dbang gi cod pan can spro bar bya'o//de'i phyag mtshan bshad par bya ste/ g.yas dang g.yon gyi phyag gnyis kyis/ /spyi bor gtsug tor 'dzin par mdzad/ /rdo rje pad+ma g.yas dag la/ /sdigs mdzub ral gri g.yon na bsnams/ /zhes smos pa la rtsa ba'i phyag gnyis kyis bsod nams dang ye shes kyi tshogs bsdu ba'i rang bzhin rin chen thams cad kyi ngo bo gtsug tor spyi bor 'chang ba ste/rnam par snang mdzad dang / rin chen ldan rnam par dag pa'i phyir ro/ /lhag mi ni go sla'o/ /mdzad pa bshad par bya ste/'tshe ba thams cad rnam 'jig cing / /gtum po g.yon brkyang gnas pa yis/ /pad+ma nyi ma la gnas te/ /tshangs pa'i gnas su de bzhugs so/ /zhes smos pa la/ sems can thams cad kyi 'tshe ba thams cad ni/ lha dang / dri za dang / rig pa 'dzin pas byas pa'i steng nas byung ste/de rnams sbyang zhing byon te tshangs pa'i gnas ni bar snang gi nam mkha'i steng du'am/ /yang na pad+ma mthar byed kyi cung zad rgyab tu sna tshogs pad+ma dang nyi ma'i steng du bzhugs par bsam par bya'o/ /gnod mdzes kyi spro ba bshad par bya ste/rang sngags yi ge las byung ba/ /brtul zhugs can gyis gnod mdzes dbyung / /spyan gsum nam mkha' bzang po'i mdog /zhal ni gnag dang dkar dang dmar/ /gsus khyim che zhing 'jigs pa'i zhal/ /mi bskyod pas ni dbu rgyan byas//zhes smos pa la/ snga ma bzhin du lha mo'i pad+mar thig le yongs su gyur pa las sprin sgra las byung ba 'bar ba'i rdo rje las skyes pa/ gnod mdzes rgyal po sngon po mi bskyod pa'i cod pan can/ zhal gsum phyag drug pa spyan gsum pa spro bar bya'o/ /de'i phyag mtshan bshad par bya ste/rdo rje 'khor lo rin chen ni/ /g.yas pa'i phyag na 'dzin par mdzad/ /snying gar sdigs mdzub zhags pa dang / /pad+ma ral gri g.yon na bsnams/ /zhes pa rtsa ba'i phyag gis 'bar ba'i rdo rje dang lhag ma ni go sla'o/ /mdzad pa bshad par bya ste/ rgyu ba dang ni gnas pa'i dug /ka la ku Ta sogs kun dang / /bgegs kyi bdag po kun bcom ste/ /thams cad zhi bar mdzad nas ni/ /ma lus bka' ni rdzogs byas nas/ /g.yon brkyang ba yis gnas pa yis/ /pad+ma nyi ma la gnas te/ /sa yi 'og tu de bzhin bzhugs//zhes smos te/ pad+ma'i nang nas byung zhing sems can thams cad kyi srog zad par byed pa ka la ku Ta la sogs pa brtan pa dang g.yo ba'i bdag nyid dang / mche ba'i dug dang / lta ba'i dug dang / reg pa'i dug dang / dran pa'i dug kyang bcom zhing bsal te/ de bzhin du bgegs ni 'jog po la sogs pa klu'i rgyal po ste/de rnams bcom zhing zhi ba bskyed nas ni/ de bzhin du bcom ldan 'das dkyil 'khor gyi bdag po bgegs thams cad 'gugs pa'i phyir bka' rdzogs te/ sa 'og gam gshin rje mthar byed kyi cung zad kyi rgyab tu sna tshogs pad+ma dang nyi ma la bzhugs par bsam mo//khro bo'i rgyal po drug po de dag kha dog nag po g.yon brkyang bar bsgom par bya ste/ zhe sdang gi rigs yin pa'i phyir ro/ /gal te de ltar yin na rnam par snang mdzad la sogs pa'i dbu rgyan de rnams ji ltar rigs she na smras pa/rten dang rjes su mthun pa'i phyir ro/ /de la mig la sogs pa rnam par shes pa'i tshogs drug rnam par dag pa'i khro bo de rnams yin no zhes 'byung ngo / /de ltar rten gyi phyogs rnam par dag pas ni rnam par snang mdzad la sogs pa'i cod pan can yin la brten pa'i chos rnam par dag pas ni kha dog nag po dang g.yon brkyang ba nyid yin no zhes skyon med do//de rnams kyi rnam par dag pa ni ma dad pa dang / phung po'i bdud dang / 'jig chogs su lta ba dang shes bya'i sgrib pa'i gnyen po dad pa'i rang bzhin ni gshin rje mthar byed de/rtog pa'i gshin rje dgag par byed pas so/ /le lo dang nyon mongs pa'i bdud dang / mthar 'dzin pa'i lta ba dang / nyon mongs pa'i sgrib pa'i gnyen po brtson 'grus kyi rang bzhin shes rab mthar byed de blo ngan pa dgag par byed pa'i phyir ro//brjed ngas dang / 'chi bdag gi bdud dang / log pa'i lta ba dang / skye ba'i sgrib pa'i gnyen po dran pa'i rang bzhin pad+ma mthar byed de/ pad+ma bzhin du ma gos pas sngar bshad pa'i nyon mongs pa gcod pa'i phyir ro/ /rnam par g.yeng ba dang / lha'i bu'i bdud dang / lta ba mchog tu 'dzin pa dang / las kyi sgrib pa'i gnyen po ting nge 'dzin gyi rang bzhin bgegs mthar byed de/ sdar bshad pa'i rnam par rtog pa rnams bcom pa'i phyir ro/ /mig gi rnam par shes pa'i rnam par rtog pa'i gnyen po shes rab kyi dbang po'i rang bzhin mi g.yo ba'o//rna ba'i rnam par shes pa'i gnyen po dad pa'i stobs kyi rang bzhin ni 'dod pa'i rgyal po'o/ /sna'i rnam par shes pa'i gnyen po brtson 'grus kyi stobs kyi rang bzhin ni dbyig sngon no/ /lce'i rnam par shes pa'i gnyen po dran pa'i stobs kyi rang bzhin ni stobs po che'o//lus kyi rnam par shes pa'i gnyen po ting nge 'dzin gyi stobs kyi rang bzhin ni gtsug tor 'khor los sgyur ba'o/ /yid kyi rnam par shes pa'i gnyen po shes rab kyi stobs kyi rang bzhin ni gnod mdzes rgyal po ste drang ba'i don to/ /srog la sogs pa rlung bcu bkag pa ni khro bo bcu ste nges pa'i don to//de nas rang gi snying ga nas 'od zer gyi 'khor lo spros la des de bzhin gshegs pa rnams mchod cing bkug ste gsol ba btab la phyir mi ldog pa'i dbang bskur blangs la slar yang dba' rlabs bzhin du rang rang gi ting nge 'dzin sems dpa' la tshangs pa'i sgo nas zhugs te spyi bo nas cig car du byung ba'i 'od zer gyi tshogs kyis dam tshig sems dpa' rgyas btab pa'i rang bzhin gyi de bzhin gshegs pa rnams la ye shes sems dpas rgyas gdab par bya'o// zhes yan lag gnyis po ni rdo rje hUM mdzad kyi sgrub thabs las shes par bya'o/ /sku ni phyag rgya chen po ste/ /las kyi phyag rgya gsum yin dang / /thugs ni chos kyi phyag rgya ste/ /shes rab mchog ni dam tshig mchog /ces bshad pas phyag rgya bzhis rgyas btab pa bsgom par bya'o//de la sems ni drag po dang / zhi ba dang / 'od gsal ba'i dbye bas rnam pa gsum mo/ /gsung yang khro bo dang rdo rje dang dga' ba'i dbye bas rnam pa gsum mo/ /sku yang chos dang longs spyod rdzogs pa dang sprul pa'i dbye bas rnam pa gsum mo//shes rab mchog ni rnam pa gsum gyi phyag rgya'o/ /yang na dgug pa la sogs pa bzhi'am spyan la sogs pa bzhi'o/ /gzhal yas khang de'i shar phyogs kyi sgor lha'i dbang po ni gdugs 'dzin pa'o/ /lho phyogs su khyab 'jug rnga yab thogs pa'o/ /nub phyogs su lha chen po ba dan thogs pa'o//byang gi sgor tshangs pa dbyig pa thogs pa ste phyi'i 'khor ro/ /de'i phyi rol ni rin po che'i rdzing bu las byung ba'i bai DUr+ya'i sdong bu can gser gyi pad+ma'i lte bar bzhugs pa/ bsam gtan la chags pa yang dag par rdzogs pa'i sangs rgyas dang /de'i phyi rol du chos gos kyis spyi bor bkab pa spyod lam zhi ba'i sangs rgyas dang / de'i phyi rol du 'dod chags dang bral ba'i cha lugs 'phags pa nyan thos dang / de'i phyi rol du sku rgyan thams cad kyis brgyan pa'i lo bcu drug lon pa'i byang chub sems dpa' grangs med pa dang /de'i phyi rol du rin po che sna bdun te/ de la 'khor lo rin po che ni be sha rA ga'i lte ba can/ rtsibs bai DUr+ya'i rtsibs kyi mtha' pad+ma rA ga'i rang bzhin pad+ma'i gdan la gnas pa'o/ /glang po rin po che ni dkar po mche ba drug pa rnam pa sna tshogs kyi rgyan gyis brgyan pa/pus mo gnyis sa la btsugs te gyen du bsgreng ba'i sna'i ka bas bdag nyid kyi sgra sgrogs pa'o/ /rta rin po che ni rma bya'i mdog can sga dang rin po che'i srab kyi 'od zer gyi 'ja' tshon dang 'dra ba'o/ /btsun mo rin po che ni kha dog ljang gu lo bcu gnyis lon pa nu ma rgyas pa'i khur gyis stod kyi cha 'dud pa/rgyan thams cad kyis brgyan pa/ rin po che'i phreng ba dbul bar bya'o/ /khyim bdag rin po che ni kha do gser po rnam pa sna tshogs kyi gdan la gnas pa/ rin po ches bkang ba'i snod 'bul ba'o/ /dmag mi rin po che ni nag po khrab dang rmog gyon pa ral gri dang mdung thogs pa'o/ /yid bzhin nor bu rin po che ni ser po zung drug pa rnam pa sna tshogs kyi 'od zer gyis rin po che'i sprin spro bar byed pa bsam mo//de'i phyi rol du lha dang / klu dang / gnod sbyin dang / dri za dang / lha ma yin dang / nam mkha' lding dang / mi'am ci dang / lto 'phye chen po dag thal mo sbyar ba ste/ la la ni rnam pa sna tshogs pa'i mchod pa thogs pa dang / la la ni rnam pa sna tshogs pa'i rin po che thogs pa dang /la la ni rnam pa sna tshogs pa'i rol mo brdung bas phyogs bcu khyab pa dang / la la ni dga' ba'i dbang gis mchod pa'i don du gar byed pa dang / lha dang klu'i bu mo rnams kyang mgo bo btud de rin po che'i snod rnams su lha'i kha zas ro drug pa 'bul bar byed pa'o//shar gyi sgo'i logs gnyis su seng ge gnyis dang / lhor glang po che gnyis dang / nub tu rma bya gnyis dang / byang du nam mkha' lding gnyis bsgom par bya'o/ /gzhal yas khang gi ba dan yang / /srid pa'i rtse mo'i bar du khyab//gling bzhi khyung kor kun khyab pa'i/ /sgo bzhi dag kyang bsgom par bya/ /zhes dkyil 'khor rgyal ba mchog ste/ ting nge 'dzin gnyis pa'o// //da ni yan lag bcu gnyis pa las kyi rgyal ba mchog bstan par bya ste/ lha ni sum cu gnyis rang bzhin/ / dkyil 'khor thams cad bskyed nas ni/ /'khor lo'i dbus su gnas gyur nas/ /de nas phra mo'i rnal 'byor brtsam/ /zhes smos pa la/ sngar bshad pa'i rim gyis lha sum cu rtsa gnyis bdag nyid kyi dkyil 'khor bskyed cing spros pa la/ sems can gyi don dang sems brtan par bya ba'i phyir 'khor lo'i dbus su gnas pa ni 'khor los sgyur ba'i gzugs su gyur te/phra mo'i rnal 'byor ni 'og nas bshad pa'i ting nge 'dzin gyi khyad par brtsam par bya'o/ /dgongs pa ma yin pa'o/ /de nyid gsal bar bya ba'i phyir bshad par bya ste/sna'i rtse mor yungs kar bsam/ /'gro dang mi 'gro yungs kar la/ /gsang ba'i mchog gis brtags pa yis/ /ye shes mchog gi gnas bsgom mo/ /zhes smos pa la/ sna'i rtse mor ni reg bya rdo rje ma'i chos 'byung ba'i nang gi rtsa dbus ma la'o/ /yungs kar ni byang chub kyi sems kyis phra mo'i thig le la'o//yungs kar de las 'gro dang mi 'gro ni gzhal yas khang dang bcas pa'i lha sum cu rtsa gnyis kyi bdag nyid kyi lha'i 'khor lo bsgom par bya'o/ /de yang ji lta bu yin zhe na/ ye shes mchog gi gnas ni ye shes lnga'i gzhi ste de'i rang bzhin no//de la de'i gsal ba nyid gang yin pa de ni me long lta bu'i ye shes dang / khams thams cad ro gcig pa gang yin pa de ni mnyam pa nyid kyi ye shes dang / de'i bde ba chen po myong ba gang yin pa de ni so sor rtog pa'i ye shes dang / de'i spro ba dang bsdu ba gang yin pa de ni bya ba nan tan sgrub pa'i ye shes dang /de'i 'od gsal ba'i cha gang yin pa de ni chos kyi dbyings kyi ye shes so/ /mchog gi yid dga' ba ste bde ba'i rgyu mthun pa'o/ /gsang ba'i thabs dang shes rab gnyis su med pa thob pa'o//ye shes kyis brtags pa ni rnal 'byor pa rnams kyis rang rig pa'i ye shes kyis brtags pa'o/ /gzhan yang ji lta bu yin zhe na/ rin chen kha dog sna lnga pa/ /yungs kar gyi ni 'bru tshod tsam/ /sna yi rtse mor nan tan du/ /rnal 'byor rigs pas rtag tu bsgom//zhes smos te/ rigs lnga'i ngo bo yin pas na kha dog sna lnga pa'o/ /rang dang gzhan gyi don gyi rgyur gyur pa dang / 'gro ba skyob pa'i rgyur gyur pas na rin chen no/ /yungs kar gyi ni 'bru tshod tsam/ /zhes bya ba ni skra'i rtse mo'i brgya stong gi cha'i tshad tsam mo//sna'i rtse mo ni sngar bshad pa la'o/ /nan tan ni sku gsung thugs bsdams pas so/ /rnal 'byor rig pa ni rtse gcig pa la gzhol bas so/ /rtag tu ni mtshan ma thob pa'i bar du ste dgongs pa ma yin pa'o/ /spro ba bshad par bya ste/rin chen brtan par gyur nas spro/ /brtan par ma gyur de mi spro/ /sangs rgyas 'bar ba'i 'od mnyam pa'i/ /rab mchog sprin ni spro bar bya/ /zhes smos te/ phyi rol gyi yul mi dmigs pas mi myong bar de la rtse gcig pa nyid ni brtan pa ste/ gang gi tshe byung na/de'i tshe rin chen ni thig le spro bar bya'o/ /brtan par ma gyur par ni bsgom par bya ba spro bar mi bya ste/ brtan par ma gyur pa'i phyir ro/ /rab mchog ni hUM la sogs pa'i yi ge rnams so/ /sprin ni sangs rgyas dang byang chub sems dpa' dang / lha mo dang khro bo'i tshogs so//sangs rgyas 'bar ba ni kha dog lnga pa'i 'od zer gyi tshogs so/ /'od mnyam pa ni de'i phyag mtshan te rdo rje la sogs pa spro bar bya ste/ gzhan gyi don phun sum tshogs pa bshad do/ /'dir man ngag ni 'di yin te/ re zhig dang por rang snang ba'i chos 'byung ba'i pad+ma dang zla ba'i steng du snyoms par 'jug pa'i sbyor bas nam mkha'i khams ma lus pa na gnas pa'i sangs rgyas kyi tshogs dgug cing bcug ste/rtsa dbus mar thim zhing byang chub kyi sems zhu bar gyur pa spros la/ skra'i rtse mo'i tshad tsam gyi thig le tho rangs kyi skar ma dang 'dra ba'i sems dpa' gsum gyi bdag nyid lha sum cu rtsa gnyis dang bcas pa bsam te/chags pa chen po'i dbang gis rang gi lus ngag yid kyang de nyid du zhugs la ye shes sems dpa'i sa bon gyi thig le'i dbus su yid mi g.yo bar byas la chos thams cad kyi rang dang spyi'i mtshan nyid mngon du byas te/phra ba dang rigs pa'i rnam par rtog pa med cid phyi'i yul gyis ma bsgribs par gnas par bya'o/ /de la rnam pa sna tshogs kyi gos gyon pa'i 'dod pa'i gzugs mthong na yang mig gi rnam par shes pa mi 'byung ba dang pi wang la sogs pa'i sgras kyang rna ba'i rnam par shes pa mi 'byung ba dang /gur kum la sogs pa'i dris sna'i rnam par shes pa mi skye ba dang / rnam pa sna tshogs pa dang ldan pa'i ro'i kha zas mi myang ba dang mya ngan yang lce'i rnam par shes pa mi 'byung ba dang /ka tsa lin di dang dar la sogs pa dang / na so gzhon pa'i 'dod ma'i rgyas pa dang sra ba dang / mtho ba gser gyi bum pa dang 'dra ba'i nu ma'i reg pas kyang reg bya'i blo mi skye ba dang lus kyi rnam par shes pa'i blo mi 'byung ngo / /de bzhin du lcag dang lag pas brdung ba la sogs pas sdug bsngal mi tshor ba dang /tsan+dan gyis byug pa la sogs pas bde ba mi tshor ba dang / bkres skom dang / grang ba dang / dro ba dang / rnam par 'tshe ba'i sems can rnams kyi gnod pa dang / rlung dang / tshad pa dang / char pa la sogs pas mi gnod par 'gyur ro/ /de bzhin du bcom ldan 'das rdo rje sems dpa' mthong ba dang / des lung ston pa yang myong ste/ che ge mo zhes bya ba'i sgrub pa po longs shig/ rab tu gnas pa dang / dkyil 'khor bri ba dang bshad pa dang / slob ma bsdu ba la sogs pa gyis shig /gang gi phyir khyod las gzhan rtse gcig pa'i sgrub pa po med do zhes rmi lam bzhin du lung bstan pa thos shing ldang bar 'gyur ro/ /de'i thig le'i rnal 'byor bstan par 'gyur bas dang po kha dog lnga'i 'od zer gyis nam mkha' bkang bar byas la yang bsdus te/de nas hUM la sogs pa'i yi ge dang rdo rje la sogs pa phyag mtshan dang dkyil 'khor pa'i lha spro zhing 'gro ba'i don byas la bsdus te ldang bar bya'o zhes rdo rje 'chang chen po'i phra mo'i rnal 'byor ro/ /de bzhin du mA ma kI'i pad+ma'i lte bar yungs kar gyi tshad tsam gyi byang chub kyi sems kyi thig le'i dbus su rdo rje rtse lnga pa phra mo'i chang gzungs la thugs rdo rje'i dkyil 'khor bsams te/snga ma bzhin du rtags dmigs pa sngon du 'gro bar yi ge'i 'bru dang / 'od dang mtshan ma dang phyag rgya chen po spro zhing 'gro ba'i don byas nas bsdus pa ni mi bskyod pa'i phra mo'i rnal 'byor ro//de bzhin du spyan gyi pad+ma'i lte bar phra mo'i thig le'i dbus su tsa na ka'i tshad tsam gyi rtsibs bcu gnyis pa'i 'khor lo'i lte bar rtag pa'i dkyil 'khor bsgom ste/ snga ma bzhin du rtags mthong ba sngon du 'gro bar 'od dang yig 'bru dang /mtshan ma dang phyag rgya chen po spro zhing 'gro ba'i don bya'o zhes rnam par snang mdzad kyi phra mo'i rnal 'byor ro/ /de bzhin du mA ma kI'i chos 'byung la yungs kar gyi tshad tsam gyi phra mo'i thig le'i dbus su rdul phra rab kyi tshad tsam gyi zur drug pa'i rin po che'i dkyil du rin chen 'byung ldan gyi dkyil 'khor dmigs la/snga ma bzhin du rtags mthong ba sngon du 'gro bar 'od dang / yig 'bru dang / phyag mtshan dang / phyag rgya chen po spro zhing 'gro ba'i don bya'o zhes rin chen 'byung ldan gyi phra mo'i rnal 'byor ro//de nas gos dkar mo'i chos 'byung gi nang du tsa na ka'i tshad tsam gyi phra mo'i thig le'i dbus su de'i tshad tsam gyi pad+ma 'dab ma brgyad pa ge sar dang bcas pa'i lte bar ngag gi dbang phyug gi dkyil 'khor dmigs la/ snga ma bzhin du mtshan ma mthong ba sngon du 'gro bar 'od dang /yig 'bru dang / mtshan ma dang / phyag rgya chen po spro zhing 'gro ba'i don bya'o zhes 'od dpag tu med pa'i phra mo'i rnal 'byor ro/ /de bzhin du dam tshig sgrol ma'i chos 'byung la rdul phra rab kyi tshad tsam gyi phra mo'i thig le'i dbus su ral gri sngon po'i dkyil la don yod grub pa'i dkyil 'khor dmigs la/snga ma bzhin du mtshan ma mthong ba sngon du 'gro bar 'od dang / yig 'bru dang / mtshan ma dang / phyag rgya chen po spro zhing 'gro ba'i don yod grub pa'i phra mo'i rnal 'byor ro//de ni yan lag gcig go/ /bzlas pa'i cho ga bshad par bya ste/ slong mo za zhing mi bzla ste/ ma bslangs pa la chags mi bya/ /'dod pa kun la longs spyod cing / /sngags kyi yan lag ma nyams zlas/ /zhes smos pa la slong mo za ba ni/ slong mo za ba'i ngang tshul gyis bzlas par mi bya ste brjed par mi bya'o//slong mo za ba ni nye bar mtshon pa'i don to/ /de bas na slong mo za ba bzhin du tshol khro la sogs pa dman pa'i 'tsho bas bzla bar mi bya'o/ /ma bslangs pa la chags par mi bya ba ni slong ba'i kha zas la chags par mi bya'o//ji srid kyi lus 'tsho ba de srid kyi cho ga shes pas bzla bar bya'o/ /bzla bar bya ba ni nang gi bzlas pa dang / phyi'i bzlas pa bya ba'o/ /ci bzla zhe na sngags zhes bya ba ni dkyil 'khor ba dang / gtso bo sum cu rtsa gnyis kyi sngags bzla bar bya'o/ / ji ltar bzla bar bya zhe na/ yan lag ma nyams pa zhes bya ba ni rdo rje'i tshig gis yid kyis bzlas par bya ba dang / phyi'i bzlas pa ni khro bo'i bzlas pas bya'o/ /de ltar gyur na/ 'dod pa kun la longs spyod cing / /zhes sngags par 'gyur ro/ /kun gyis 'dod pas na 'dod pa kun te rdo rje 'chang ngo //de'i longs spyod pa ni 'dod pa'i dbang phyug la sogs pa cho 'phrul gyi khyad par te/ de rnams byed pa ni mngon du byed pa ste/ mngon du byed pa zhes bya ba'o/ /bsdus pa'i don ni 'di yin te ye shes sems dpa'i thugs kar sna tshogs pad+ma dang zla ba'i dbus su oM badzra d+h+r-i ka ces bya ba la sogs pa bcom ldan 'das mi bskyod pa'i sngags gyen du 'greng ba shel ltar dag pa sngags kyi yi ge'i khong stong srog dang rtsol ba'i rlung kha dog dmar po srad bu dang 'dra ba dang ldan pa bkod de/ye shes sems dpa'i zhal nas dam tshig sems dpa'i zhal du spros te/dam tshig gi lha mo'i zhal nas ye shes kyi lha mo'i zhal du zhugs te/ rtsa dbus ma'i nang nas ye shes kyi lha mo'i pad+ma dang / dam tshig gi lha mo'i pad+ma'i lam nas phyung ste/ dam tshig sems dpa'i gsang ba'i rdo rje dang /ye shes sems dpa'i gsang ba'i rdo rje'i steng gi lam nas yang snying ga'i zla ba'i dkyil 'khor du phyin par bsam mo/ /zhi ba dang rgyas pa bsgrub pa la steng gi rim pas spro ba dang 'og tu bsdu bar bya'o/ /dbang dang dgug pa dang / drag po'i/ las la 'og nas spro ba dang / steng du bsdu ba ste rim pa'o/ /de bzhin du rnam par snang mdzad la sogs pa dkyil 'khor ba sum cu'i bzlas pa shes par bya ba'o/ /sngags kyi phreng ba ni mu tig gi phreng ba bzhin du yongs su 'khor ba ji srid mi skyo bde srid kyi bar du bsgom par bya'o//de nas ngag gi bzlas pa bya ste/ lag pa g.yas pa dang / g.yon pa'i dkyil la rim pa ji lta ba bzhin du dbyangs dang po dang / re ba yongs su gyur pa las zla ba dang nyi ma'i dkyil 'khor de dag gis mtshan bar bsgoms te/ g.yon pa'i sor mo rnams la rang rang gi sa bon yongs su gyur pa las spyan la sogs pa bkod de/g.yas pa'i sor mo rnams la/ de bzhin du rang gi chos kyi yi ge yongs su gyur pa las rnam par snang mdzad la sogs pa dgod cing pad+ma'i lag kor lnga byas la dgra bcom pa'i rang bzhin gyi ril bu can shel gyi phreng ba blangs te/yi ge brgya pa mngon par bzlas la dkyil 'khor sum cu rtsa gnyis kyi bzlas pa myur ba yang ma yin dal ba yang ma yin par zhi ba'i ngo bo rang gi rna bas thos pa bzlas par bya'o/ /de'i snying po ni 'di yin te/ oM badzra d+h+r-i ka AH hUM swA hA/oM ji na dzi ka AHhUM swA hA/ oM A ro l-i ka AHhUM swA hA/ oM pradz+nyA d+h+r-i ka AHhUM swA hA/ de bzhin gshegs pa rnams kyi'o/ /oM mo ha ra ti AHhUM swA hA/ oM dwe Sha ra ti AHhUM swA hA/ oM rA ga ra ti AHhUM swA hA/ oM badzra ra ti AHhUM swA hA/rigs kyi lha mo rnams kyi'o/ /oM dzAHrU pa badzra AH hUM swA hA/ oM hUM shab+ta badzre AH hUM swA hA/ oM baM gan+d+ha badzre AH hUM swA hA/ oM hoHra sa badzre AHhUM swA hA/ oM khaM spa R+she badzra AHhUM swA hA/ mchod pa'i lha mo rnams kyi'o/ /oM th+l+hiM k+Shi ti gar+b+ha aH hUM swA hA/ oM maM mai tri ya badzra AH hUM swA hA/oM oM badzra pA Ni AHhUM swA hA/ oM oM kha gar+b+ha AHhUM swA hA/ oM oM lo ke shwa re AH hUM swA hA/ oM oM many+dzu g+ho sha AH hUM swA hA/ oM oM sar+b+ba ni bar+Na bi skaM b+hi ni AH hUM swA hA/ oM saM sa man+ta b+ha dra AH hUM swA hA/ byang chub sems dpa' rnams kyi'o/ /oM ya mAn+ta kr-ita AHhUM phaT swA hA/oM pradz+nyAn+ta kr-ita AHhUM phaT swA hA/ oM pad+man+ta kr-ita AHhUM phaT swA hA/ oM big+h+nA n+ta kr-ita AHhUM phaT swA hA/ oM a tsa la AHhUM phaT swA hA/ oM Tak+ki rA dza AHhUM phaT swA hA/ oM nI la daN+Da AHhUM phaT swA hA/ oM ma hA ba la AHhUM phaT swA hA/ oM b+h+rUM uSh+NI Sha tsakra brti ni AH hUM phaT swA hA/oM hUM suM b+ha rA dza AHhUM phaT swA hA/ khro bo rnams kyi'o/ /'di dag ni snying po'o/ /oM AHbaM hUM/ /oM AH bruM hUM/ oM AH rAM hUM/ oM AH dziM hUM/ de bzhin gshegs pa rnams kyi nye ba'i snying po'o/ /oM AH laM hUM/ oM AH maM hUM/ oM AHpaM hUM/ oM AH tAM hUM/ lha mo rnams kyi nye ba'i snying po'o/ /oM AH th+l+hiM hUM/ oM AH maiM hUM/ oM AH dzaM hUM/ oM AHkhaM hUM/ oM AH g+haM hUM/ oM AH maM hUM/ oM AH k+ShaM hUM/ oM AH saM hUM/ byang chub sems dpa' rnams kyi nye ba'i snying po'o/ /oM AH dza hUM/ oM AHhUM hUM/ oM AH baM hUM/oM AHhoHhUM/ oM AHkhaM hUM/ mchod pa'i lha mo rnams kyi nye ba'i snying po'o/ /oM AH yaM hUM/ oM AH pra hUM/ oM AH baM hUM/ oM AHoM hUM/ oM AH oM hUM/ oM AH swA hUM/ oM AH hA hUM/ oM AH bruM hUM/ oM AH hUM hUM/ khro bo rnams kyi nye ba'i snying po'o/ / snying po dang nye ba'i snying po de dag 'bum bzlas pas zhi ba la sogs pa'i las kyi tshogs byed par 'gyur ro/ /ji skad du/ 'bum phrag bzlas pas 'grub par 'gyur/ /zhes gsungs pa'i phyir ro/ /phreng ba'i dbye ba ni las kyi dbye ba ste/ de skad du shel dang dung dang mu tig dang /de bzhin khams ni dkar po ste/ zhi ba'i las la blo ldan pas/ /'bras bu 'grub phyir blang bar bya/ /gser dang dngul dang zangs ma ni/ /rgyas pa'i las la rgyal bas gsungs/ /dbang la gur gum gla rtsi dang / /bzhi mnyam rim bzhin shes par bya/ /dgug pa la ni ru dAk+Sha/ / sdang ba la sogs glang po'i rus/ /rtsa ba yi ni sngags bzlas phyir/ /mu tig rin chen rang bzhin shel/ /las kun rab tu 'grub pa'i phyir/ /bo de tse ni 'dod pa yin/ /gzhan las kyang / rta yi rus pas gsod pa dang / /khwa yi rus pas dgug pa ste/ /bram ze'i rus pas rengs pa dang //khyi yi rus pas dgar ba yin/ /zhes gsungs pa dang / de bzhin du/ mthe bo mdzub mo sbyor ba yis/ /rgyal ba yis ni zhi ba gsungs/ /mthe bo gung mo sbyor ba yis/ /rgyas pa'i las ni 'grub par 'gyur/ /mthe bo srin lag sbyor ba yis//dbang gi las ni 'grub pa ste/ /mthe bo mthe'u chung sbyor ba yis/ /mkhas pas dgug pa'i don du bzla/ /g.yas dang g.yon pa'i mthe bong ni/ /gnyis pos gsod pa'i las 'grub 'gyur/ /lag pa g.yas pa nyid kyis ni/ /bgrang phreng yang dag blang bya ste//thabs dang rjes su mthun pas na/ /rnal 'byor dbang pos bzla bar bya/ /zhes bshad pa'i phyir ro/ /bzlas pa'i cho ga rdzogs nas/ za ma tog gi nang du sba bar bya ste/ ji skad du/ bris sku'am ni yang na glegs bam ste/ /yang na bgrang phreng rdo rje la sogs pa/ /so so'i skye bos gal te bag med pas//mthong na de ni dmyal bar 'gro ba yin/ /rnal 'byor pa ni le lo byed pa na/ /dam tshig dang ni sdom pa nyams par 'gyur/ /rims dang dug dang 'byung sogs kyis gsod pa'i/ /'og tu 'dod dang du 'bod dmyal bar ltung / /zhes gsungs so//sngar bshad pa'i don bsdu bar bya ba'i phyir/ brjod nas rdo rje spro ba ste/ /rdzogs nas bsdu ba kun du bya/ /'di ni sangs rgyas thams cad kyi/ /don dam pa yi bzlas par bshad/ /ces smos pa la/ brjod pa ni zhal gnyis po nas byung nas so/ /spro ba ni lha mo'i zhal gnyis po la zhugs nas so//rdzogs pa ni spro ba'i mthar ro/ /bsdu ba kun du bya ba ni pad+ma gnyis las gsang ba'i rdo rje gnyis kyis bsdu ba'o/ /de ni sangs rgyas thams cad kyi de bzhin gshegs pa thams cad kyi'o/ /don dam pa ni nang gi bdag nyid kyi bzlas pa ste dgongs pa ma yin pa'o//de ni yan lag gnyis pa'o/ /bya ba byas nas 'od du zhu ba'i cho ga bshad par bya ste/ phra mo'i rnal 'byor bzlas pa yang / /ci 'dod par ni rnam gnyis bya/ /slar yang sngags pa bdag nyid ni/ /de bzhin nyid la zhugs par bya//ces smos pa la/ sngar bshad pa'i phra mo'i rnal 'byor dang bzlas pa byas la/ phyi nas sngags pa bdag nyid shes rab dang bcas pa de bzhin nyid ni 'od gsal ba'i mtshan nyid mya ngan las 'das pa'i dbyings la zhugs pa ni thim par bya'o/ / 'dir man ngag ni 'di yin te dang po sbyor ba'i ting nge 'dzin gyis rang gi don bsgrubs la/ dkyil 'khor rgyal ba mchog gi ting nge 'dzin gyis gzhan gyi don rdzogs la phra mo'i rnal 'byor gyis sems brtan pas ting nge 'dzin gnyis po la dmigs pa nye bar mtshon nas bzlas pas kyang sngags sbyangs te/de bas na da ni bya ba byas pa dag yin no zhes rtogs te/ bdag gi rgyu mthun par gyur pa'i dkyil 'khor pa rnams kyis sems can gyi don byed par 'gyur ro zhes bsams nas bu dang tsha bo yod pas skyes bu dga' ba bzhin du mya ngan las 'das pa thob par 'dod pas reg bya rdo rje ma dang snyoms par zhugs pas yab yum gnyis kyang zhu ste thig le dang /sgra dang / sgra tsam gyi dbye bas khams phra ba la zhugs te/ sprin med pa'i nam mkha' dang 'dra ba thams cad stong ba'i rang bzhin gyi bdag nyid du bsgom par bya'o zhes yan lag gsum pa'o//lha mo rnams kyi bskul pa bshad par bya ste/ de nas dkyil 'khor gnas pa yi/ /lha mos bdag po ma mthong bas/ /tshigs su bcas pa bzhi yis ni/ /bde ba chen po skul bar byed/ /ces smos pa la/de nas tshangs pa'i gnas bzhi'i rang bzhin gyi lha mo spyan la sogs pas bdag po rdo rje 'chang chen po'i rang bzhin gyi mi bskyod pa mya ngan las 'das pa'i dbyings su zhugs pas mthong ba ni dbus kyi re mig stong par bltas te/ bcom ldan 'das bde ba chen po ni 'od gsal ba'i ting nge 'dzin la zhugs pa/'og nas bshad pa'i tshigs su bcad pa bzhi pos skul bar byed pa ni ldang bar byed pa ste/ tshig 'jam pa dang / dbyangs snyan pa zhes bya ba ni tshig gi lhag ma'o/ /'di'i dgongs pa ni 'di yin te//sngar gyi smon lam gyi bag chags kyi shugs kyis de'i so so'i snang ba nyid lha mo rnams bcom ldan 'das la skul bar byed par bsam mo/ /lha mo rnams skul bar byed pa ci'i phyir zhe na smras pa/ 'dir 'dod pa'i khams la phal cher bud med kyi tshig gis bskul bas zhugs pa mthong gis/skyes pa'i tshig gis bskul bas ni ma yin te/ 'dod pa'i khams ni de'i rang bzhin yin pa'i phyir dang / thabs dang shes rab dbyer med pa'i phyir skyon med do/ /tshigs su bcad pa bzhi po de nyid rim gyis bshad par bya ste/sems can khams na gnas pa'i dbang phyug khyod ni rdo rje'i thugs/ /dga' ba yid 'ong don chen 'dod pas bdag la bskyab tu gsol/ /mgon po gal te di ring bdag ni gson par mchis bzhed na/ /sems can yab chen gnyen mchog bdag la dgyes par mdzad du gsol//zhes smos pa la/ 'di ni spyan gyi tshigs su bcad pa ste/ khyod ni mdun du gnas pa bzhin du bltas nas bskul ba ste/ rdo rje thugs ni thugs kyi dbang nyid thob pa'o/ /khams gsum pa'i chos kyi rgyal srid thob pa'i phyir gnas kyi dbang phyug go//sems can gyi khams ni 'byung ba thams cad kyi rang bzhin gyi bdag po yin pa'i phyir ro/ /dga' ba ni rol ba ste/ de la yid 'ong ni dga' ba skyed pas dga' ba yid 'ong ngo / /don chen ni mchog tu dga' ba ste/ 'dod pas na don chen 'dod pa'o//de lta bu'i dga' ba yid 'ong don chen 'dod pa ni 'khyud pa la sogs pas so/ /bdag la bskyab tu gsol ba ni rol bar mdzad du gsol zhes pa'o/ /sems can thams cad kyi rgyur gyur pas yab chen ni sems can thams cad la phan 'dogs pa dang bde ba mdzad pa'i phyir ro//bdag ni gson par mchis bzhed pa ni gson par 'dod pa'o/ /mgon po ni gtso bo'o/ /bdag la dgyes par mdzad pa ni rol bar mdzad du gsol ba'o/ /mA ma kI'i bskul ba bshad par bya ste/ rdo rje sku khyod bka' yi 'khor lo sems can kun la phan//sangs rgyas don du byang chub mchog grub rab tu phan par gzigs/ /mgon po gal te di ring bdag ni gson par mchis bzhed na/ /'dod chags dam tshig chags pas bdag la dgyes par mdzad du gsol/ /zhes smos pa la/mi 'jig pa'i sku yin pas na rdo rje'i sku'o/ /bka'i 'khor lo sems can kun la phan pa ni sems can thams cad la phan 'dogs pa ste/ bka'i 'khor lo skor bar byed pa'i phyir ro/ /sangs rgyas don du byang chub mchog grub rab tu phan par gzigs pa ni sangs rgyas ni phung po lnga'o//don ni kun rdzob kyi bden pa'o/ /byang chub ni don dam pa'i bden pa'o/ /de dag gi mchog tu grub pa ni bde ba chen po'i sku'o/ /rab tu phan par gzigs pa ni sems can rnams la phan par mdzad pa'i dgongs pas gsal bar mdzad pa'o//'dod chags ni 'dod chags sbyong ba'i rnam pas so/ /dam tshig chags pa ni 'dod chags kyi sbyong ba'i rang bzhin gyis bdag dgyes bar mdzad pa ni rol bar mdzod cig pa'o/ /gal te zhes bya ba la sogs pa ni snga ma bzhin no/ /gos dkar mo'i bskul ba bshad par bya ste/khyod ni rdo rje gsung ste kun la phan zhing thugs brtse ba/ /'jig rten dag gi dgos pa'i don mdzad pa la rtag tu brtson/ /mgon po gal te di ring bdag ni gson par mchis bzhed na/ /spyod pa dri med kun du bzang po bdag la dgyes par mdzod//ces smos pa la/ khyod ni rdo rje gsung ste ni gsung gi dbang phyug nyid thob pa'i phyir ro/ /kun ni sems can gyi khams la phan pa thugs brtse ba ni thugs rje chen po'i bdag nyid do/ /de nyid kyi phyir tshangs pa'i gnas bzhis 'jig rten pa'i don mdzad pa'i phyir/rtag tu brtson pa ni dus thams cad du yang dag par gzhol ba'o/ /bdag la dgyes par mdzod ces pa ni rten par mdzod cig pa'o/ /bde ba'i spyod pas kun du ni sems can gyis khams la'o/ /bzang po ni dge ba mdzad pas na kun du bzang po'o/ /gzhan ni bshad zin to//sgrol ma'i bskul ba bshad par bya ste/ khyod ni rdo rje'i thugs te dam tshig mchog gi phan don che/ /yang dag rdzogs sangs rgyas kyi gsung mchog mnyam pa nyid gzigs pa/ /mgon po gal te de ring bdag nyid gson par mchis bzhed na//yon tan rin chen mang po'i gter gyur bdag la dgyes par mdzod/ /ces bya ba ni khyod ni rdo rje'i thugs te ni don yod grub pa'i sgo nas bod pa'o/ /rdo rje dang pad+ma yang dag par sbyor ba las/ dkyil 'khor gyi lha phyung zhing / zhe sdang la sogs pa la spyod pa'i sems can gyi khams sbyangs ba'i phyir rdo rje'i thugs so//las kyi rigs kyi bdag po yin pa'i phyir dam tshig mchog go/ /'dod chags kyi spyod pa can gyi sems can rnams la 'dod chags rnam par dag pa'i thabs kyis thar pa stsol bas na phan don che'o/ /shAkya'i rigs kyi gtso bor gyur pas na yang dag par rdzogs pa'i sangs rgyas kyi mchog go//yang na bya ba nan tan sgrub pa'i ye shes kyis 'gro ba ma lus pa'i don mdzad pas na yang dag par rdzogs pa'i sangs rgyas kyi mchog go/ /rang dang gzhan gyi dbye ba la dmigs pa dang bral bas kyang sems can thams cad la thugs brtse bas na mnyam nyid gzigs pa'o//yon tan rin chen mang po'i gter gyur bdag la dgyes par mdzod/ /ces pa ni rten par mdzod cig pa'o/ /gang gi phyir 'dod chags dang / 'dod chags dang bral ba dang / 'dod chags bar pa dang / 'od gsal ba skyed par byed do zhes bdag nyid la bsngags par byed de/ mgon po gal te bdag ni de ring gson par mchis bzhed na/ zhes bya ba ni 'dod chags dang zhe sdang dang / gti mug gi thabs kyis rdo rje sems dpa' lta bu'i tshe dang / srog sbyin pas gson par mdzod ces dgongs pa ste yan lag bzhi pa'o/ /de ltar tshad med pa rnam pa bzhi'i rang bzhin gyi lha mo rnams kyis bskul bar gyur pas smon lam gyi rgyun gyi shugs kyis stong pa nyid kyi rnal 'byor las ldang ste/ slar yang drag po dang zhi ba dang chags pa chen po nyid nyams dang ldan pas sems dpa' gsum gyi bdag nyid dang ldan pa'i rdo rje sems dpa'i 'khor lo'i dbus su gnas par bdag nyid bsgom par bya ste yan lag lnga pa'o//de nyid bshad par bya ste/ de ltar yang dag yon tan ni/ /brjod pas mgon po de bskul nas//mi bskyod pa sogs ngo bo yis/ /de bzhin gshegs pa bstod par mdzad/ /ces smos pa la/ 'dir tshigs su bcad pa phyed kyis yan lag lnga pa bstan to/ /yang dag yon tan brjod pas ni yang dag par gyur pa'i yon tan gyi tshogs la bstod pas bskul ba ni lnga pa ste/mgon po ni bcom ldan 'das rdo rje 'chang chen po'i rang bzhin mi bskyod pa yin la/ de bzhin gshegs pa ni rnam par snang mdzad la sogs pa bzhi ste/ bstod pa mdzad pa ni mi bskyod pa la sogs pa de bzhin gshegs pa'i rang bzhin gyi tshig gi rgyun gyi bstod pa mdzad pa bsgom par bya'o//de nyid rgyas par bshad par bya ste/ mi bskyod rdo rje ye shes che/ /rdo rje dbyings ni nam mkha' che'o/ /rdo rje gsum mchog dkyil 'khor gsum/ /gsang ba'i rdo rje la phyag 'tshal/ /zhes smos te/nyon mongs pa thams cad kyi tshogs kyis mi bskyod pa ni mi g.yo ba'o/ /rdo rje ni thugs gang la yod pa de la de skad ces bya'o/ /stong pa bzhi'i bdag nyid yin pas na ye shes che'o/ /rdo rje ni mi bskyod pa la sogs pa'o/ /de rnams 'dzin pas na rdo rje dbyings so/ / bden pa gnyis kyi dbye ba la yongs su mkhas pas nam mkha' chen po'o/ /don dam pa'i dkyil 'khor dang sku'i dkyil 'khor dang / phyung ba'i dkyil 'khor gyi rang bzhin yin pas na dkyil 'khor gsum mo/ /sku rdo rje la sogs pa'i nang na gtso bor gyur pas rdo rje gsum mchog go//gsang ba'i rdo rje ni dam tshig gi de kho na nyid kho bo cag la bstan du gsol zhes mi bskyod pa'i sgo nas bstod pa'o/ /rnam par snang mdzad dga' chen po/ /rdo rje zhi ba dga' ba che/ /rang bzhin gyis ni 'od gsal mchog /ston pa rdo rje phyag 'tshal lo//zhes smos te/ 'od gsal ba'i mes snang bar mdzad pas na rnam par snang mdzad do/ /de nyid kyi phyir dag pa chen po'o/ /de rnams kyi rnam par dag pa'i rang bzhin drug pa yin pas na zhi ba'o/ /mchog tu dga' ba'i bdag nyid yin pas na dga' ba chen po'o//rang bzhin gyis 'od gsal bas na rang bzhin dag pa'o/ /mchog ni chos te ston pa ni gsal bar mdzod cig pa'o/ /rdo rje ni bod pa'o/ /de ni rnam par snang mdzad kyi sgo nas bstod pa'o/ /rin chen rgyal po rab tu zab/ /rdo rje nam mkha' dri ma med//rang bzhin dag pas gos pa med/ /rdo rje sku la phyag 'tshal lo/ /zhes smos te/ rin chen ni rin po che'i rigs can no/ /de rnams gsal bar mdzad pas na rin chen rgyal po'o/ /mnyam pa nyid kyi rang bzhin yin pas na rab tu zab pa'o/ /de nyid kyi phyir nam mkha' rdo rje dri ma med pa'o//thog ma nas dag pas na rang bzhin dag pa'o/ /chos thams cad kyis ma rig pas na gos pa med pas so/ /sku rdo rje ni rin chen 'byung ldan gyi sgo nas bstod pa'o/ /rdo rje mi 'chi rgyal po che/ /mi rtog nam mkha' rdo rje 'dzin//'dod chags pha rol phyin brnyes pa/ /rdo rje gsung la phyag 'tshal lo/ /zhes smos te/ rdo rje mi 'chi ni pad+ma'i rigs can no/ /de rnams kyi bdag po yin pas na rgyal po che'o/ /so sor rtog pa'i bdag nyid yin pas na mi rtog pa'o/ /de bas nam mkha' rdo rje 'dzin pa'o//'dod chags ni 'khor ba la chags pa'i mtshan nyid de/ de'i pha rol ni mtha'o/ /der phyin pa ni son pa'i shes rab po/ /de brnyes pa ni/ 'dod chags pha rol phyin brnyes thob pa'o/ /de ni 'od dpag tu med pa'i sgo nas bstod pa'o/ /don yod rdo rje rdzogs sangs rgyas//bsam pa thams cad rdzogs byed pa/ /dag pa'i rang bzhin las byung ba/ /rdo rje sems dpa' la phyag 'tshal/ /zhes smos te/ don dang ldan pa'i ye shes stsol bas na don yod rdo rje ste/ don yod grub pa'i rigs rnams rdzogs sangs rgyas ni de rnams mchod par bya ste/don yod rdo rje rdzogs sangs rgyas so/ /sgrub pa po'i skyes bu la sogs pa'i las kyis bsam pa rdzogs pas na/ bsam pa thams cad rdzogs byed pa'o/ /dag pa'i rang bzhin 'od gsal ba ste/ de las byung bas na dag pa'i rang bzhin las byung ba'o//de dang 'dra ba'i rdo rje sems dpa' khyod la phyag 'tshal lo zhes don yod grub pa'i sgo nas bstod pa ste/ dgongs pa ma yin pa'o/ /yan lag drug pa'o/ /dkyil 'khor gyi 'khor lo bsdu ba bshad pa ni de nas/ sangs rgyas kyis bstod 'khor lo rjes chags nas//mchog tu gsang ba ji bzhin don bshad nas/ /rang sku'i 'khor lo la ni 'khor lo gzhug /mgon po bde ba chen po gcig pu bzhugs/ /zhes smos te/ de nas zhes bya ba'i tshig gi phrad ni cho ga gzhan gyi don du'o/ /sangs rgyas kyi bstod pa ni de bzhin gshegs pa lnga'i sgo nas bstod pa mdzad nas so//'khor lo rjes chags ni dkyil 'khor la'o/ /'dod pa thams cad kyi longs spyod dpal zhes bya ba'i ting nge 'dzin te/ 'khyud pa dang / tsum+ba na dang / tsu sha Na dang / so dang sen mos gdab pa dang / thabs dang shes rab snyoms par 'jug pas tshim nas so//de bzhin du ji bzhin don ni phyin ci ma log pa/ gsang ba mchog ni de kho na nyid de bshad nas ni bstan par mdzad nas te/ nges pa'i tshig gi sgo nas chos thams cad kyi rang bzhin ston pa ni 'di lta ste/ a ni chos thams cad kyi sgo yin te thog ma nas ma skyes pa'i phyir ro zhes bya ba nas brtsams te/k+Sha ni chos thams cad kyi sgo yin te/ nyes pa thams cad zad pa'i phyir ro zhes bya ba'i bar du gsang ba mchog bstan nas/ phyi nas spros pa 'dis ci zhig bya zhes dgongs te/ rang sku'i 'khor lo ni sngar bshad pa'i shin tu rnal 'byor gyi mtshan nyid la/'khor lo ni phyi rol gyi dkyil 'khor pa'i lha'i 'khor lo 'od zer gyi sgo nas zhugs te/ de rnams kyang yi ge gsum las byung ba'i 'od zer gyi lcags kyus dgug cing de nyid la zhugs te/ oM dang AH yang hUM la thim zhing mgon po bde ba chen po/ gcig pu ni reg bya rdo rje ma dang snyoms par zhugs par blta ste/ yi ge hUM gi dbus su yang 'od zer gyi khams gsum pa dang rang gi bdag nyid bkug cing bcug la hUM tsam la dmigs pas gnas par bya'o/ /de nyid bshad pa/ de ltar rnal 'byor bzhi byed rnal 'byor pa/hUM gi snying po'i 'jig rten rab tu bsgom/ /de byung 'gro kun rdo rje sems dpar bsam/ /langs nas 'gro la bltas te ji bzhin spyod/ /ces smos te/ rnal 'byor bzhi byed ni sngar bshad pa'i rnal 'byor bzhi pa dang po sbyor ba'i ting nge 'dzin sgom par byed pa'o//de yang nye ba'i mtshon pa yin te/ dkyil 'khor rgyal ba mchog dang / las kyi rgyal ba mchog kyang bsgom pa'o/ /rnal 'byor pa ni sgrub po'o/ /'jig rten ni snod dang sems can gyi 'jig rten te/ sngar bshad pa'i rim gyis hUM gi snying po ni yi ge hUM bzhugs pa ni bsam par bya'o//gzhan yang yan lag lhag ma rdzogs par bya ba'i phyir de las byung ba ni de yongs su gyur pa las byung ba'i rdo rje sems dpa' ni mi bskyod pa reg bya rdo rje ma dang bcas pa brtan pa dang g.yo ba'i bdag nyid bsams nas langs nas ni ting nge 'dzin las langs te/'gro ba la bltas pa ni de'i gcig pur so sor snang ba'i brtan pa dang / g.yo ba'i 'gro ba la blta ba'i blo dang ldan pa'o/ /ji bzhin spyod ni mnyam par gzhag pa'i blo dang ldan pas spyod lam bzhi dmigs par bya ba'am/ yang na gang zag dang chos bdag med par rtogs par bya'o zhes yan lag bdun pa'o//tshim par bya ba'i cho ga bshad par bya ste/ sngags pas ting 'dzin dmigs pa'i tshe/ /gang tshe lus ni skams kyur na/ /lus ngag yid ni tshim byed pa'i/ /rnal 'byor 'di ni bsgom par bya//zhes smos pa la/ ting nge 'dzin ni sngar bshad pa'i ting nge 'dzin gsum ste yun ring ba dang / rgyun ma chad pas dmigs pa bsgom par bya ba'i phyir ro/ /gang gi tshe lus skams pa ni khams zad par gyur na de'i tshe lus la sogs pa tshim par byed pa'i rnal 'byor 'di ni 'og nas bshad pa'i ting nge 'dzin bsgom par bya ba'i nan tan gyis bsam par bya ste/gzhan du na khams log pas bar chod du 'gyur ro/ /de nyid bshad pa/ mtho gang tsam gyis dpag pa ru/ /spyi bor dkyil 'khor brtag par bya/ /bdud rtsi lnga ni nges 'bebs pa'i//oM ni de ru brtag par bya/ /zhes smos te/ mtho gang tsam ni sor bcu gnyis kyi tshad tsam mo/ /dpag pa ni dpag nas so/ /spyi bor ni mgo bo'i steng du bar snang la'o/ /dkyil 'khor brtag pa ni cha bcu drug phyogs su gyur pa las zla ba'i dkyil 'khor bsgom par bya'o//de ru ni zla ba'i dkyil 'khor gyi dbus su'o/ /oM ni rnam par snang mdzad kyi sa bon 'od zer 'bar ba dgod cing / bdud rtsi lnga ni ye shes lnga'i rang bzhin gyi bdud rtsi tshangs pa'i sgo nas bab pa ni kun du spyod pa'i rim gyis phab par bya'o//phan yon bshad par bya ba ste/ rdo rje'i sbyor ba 'di yis ni/ /skad cig gis ni gzi can 'gyur/ /lus ngag yid kyis bde ba nyid/ /thob par 'gyur te the tshom med/ /ces ba la 'di yis ni sngar bshad pa'i rdo rje rnal 'byor te/ mi phyed pa ni tshim pa'i cho gas so/ / gzi can ni nyi ma shar ba'i 'od dang 'dra ba'o/ /skad cig gis ni bdud rtsi myangs pa tsam gyis 'gyur ro/ /de nyid kyi phyir lus ngag yid kyi bde ba nyid ni spyod pa bzang ba dang / las su rung ba dang / dran pa dang / brtan pa nyid du 'gyur te sgra ji bzhin pa'o/ /de ni yan lag brgyad pa'o//nang gi sbyin sreg bshad pa ni/ de ltar goms pa'i sngags pa yis/ /sbyang ba dang ni de bzhin sad/ /snying ga lkog ma dag sbyangs nas/ /de bzhin gshegs rnams tshim par bya/ /zhes smos te/ 'dir 'jig rten pa'i gtsang ba dang mi gtsang ba'i rtog pa spong ba'i phyir dang /tshe ring ba dang / nad med pa dang / bde ba thob pa'i phyir dang / de bzhin du bsam gtan gyi zas kyi phyir dang / kham gyi zas spang bar bya ba'i phyir bdud rtsi lngas nang gi sbyin sreg brtsam par bya'o/ /de ltar goms pa ni sngar bshad pa'i ting nge 'dzin la goms pas so//sbyang ba dang ni sad pa ni nye bar mtshon pa ste spar bar yang bya'o/ /snying ga lkog ma dag ni lag pa yang sbyar bar bya ste/ de bzhin gshegs pa ni phung po rnams tshim par bya'o zhes mdor bstan pa'o/ /rgyas par bshad par bya ste/ yi ge hUM gis sbyang ba ste/ /yi ge A yis sad par bya/ /oM gyis mnan zhing spar ba ste/ /'di ni bza' ba sgrub pa yin/ /zhes smos te/ re zhig dang po yi ge yaM las rlung gi dkyil 'khor dang raM las me'i dkyil 'khor la ba las pad+ma'i snod du mar bi shu mu'i sa bon dang / go ku da ha na dang bcas pa'i sa bon bkod de/yi ge bcu yongs su gyur pa las/ ga pur dang / gla rtsi dang / bzhi mnyam pa dang / rang byung dang / rtsa mchog gi rdzas dang / gdong 'gul ba dang / snying mo'i bu dang / sna can dang / mgyogs pa dang / drang srong gi bu las skyes pa'i be+e sha ta bsgoms te/bcu 'dres shing sgron ma lnga bsams la/ de'i steng du/ oM AH hUM swA hA zhes sa bon lnga bkod de/ de nyid kyi 'od zer gyis nam mkha' la bzhugs pa'i rnam par snang mdzad la sogs pa'i rigs bkug la de nyid du bcug ste/ de las byung ba'i rnam par snang mdzad la sogs pa zhal gsum phyag drug pa sems dpa' gsum gyi bdag nyid dkyil 'khor ma lus par bkad par bsams te/snyoms par zhugs pa'i dbang gis zhu zhing byang chub kyi sems kyi dba' rlabs su gyur par bltas te/ de la yi ge hUM sngon po dgod cing de spyad par byas la ngag gi dbang phyug gi sa bon gyis sad pa ni/g.yas dang g.yon du bskor bas yi ge oM dgod cid 'od zer lnga 'phro bar bsams la/ de nyid kyis de bzhin gshegs pa thams cad zhugs shing bdud rtsi sgrub pa bsgom mo/ /de nyid kyi phyir 'di ni bza' bsgrub pa ste/bdud rtsi lnga'i kha zas sgrub pa'o/ /de nas lkog ma'i phyogs su hrIH dmar po yongs su gyur pa las pad+ma 'dab ma brgyad pa dmar po bsams te/ de'i lte bar hUM las byung ba'i rdo rje rtse mo lnga pa bsams la/ de'i rtse mo dbus ma la yi ge oM bkod cing ye shes sems dpa'i thugs kar raM las skyes pa'i gru gsum gyi dbus su kha dog dmar po'i me lce gsum spro ba'i sprin sgra bsams te/kha ni me thab dang / lag pa g.yon pa dang g.yas pa ni dgang gzar dang / blugs bzar du bsams pa'i cho ga bzhin du yi ge dgod par bsams te/bdud rtsi'i snod blangs te/ oM swa b+hA ba shud+d+haH sarba d+har+m+mAH swa b+hA ba shud+d+hou0f85haM/ zhes bya ba 'dis rang bzhin dag par lhag par mos te/ dkyil 'khor pa rnams la sum cu rtsa gnyis kyi thigs pa srin lag dang mthe bo dag gis p hul la/ngag gi pad+ma'i lam nas ye shes sems dpa'i thugs ka'i me la bsreg par bya'o/ /de ni nang gi sbyin sreg go/ /de dus brtsams te de ni rtog pa med/ /de yi kha dog dbyibs dang mtshan ji bzhin/ /bsam gyis mi khyab rnam par smin pa'i sku/ /bya ba byas pas sdom pa de la thob//ces rdo rje hUM mdzad kyi sgrub thabs las gsungs pa'o/ /de nyid bshad pa/ dang po lkog mar pad+ma bsam/ /de la yi ge hrIH las byung / /'dab ma brgyad pa'i pad+ma ni/ /lte ba'i steng du hUM yig bsam/ /zhes smos te/ lkog ma'i pad+ma ni lce rtsa'o//hrIH las byung zhes bya ba ni kha dog dmar po'i hrIH las byung ba'o/ /pad+ma 'dang ma brgyad pa ni ngag gi rnam par dag pa ste/ ngag gi dbang phyug gi mtshan ma yin pa'i phyir ro/ /lte ba'i steng du ni pad+ma'o/ /hUM ni rnam par shes pa dang bcas ba lce'i dbang po bskyed pa'i phyir ro//de nas ci bya zhe na/ bshad pa/ hUM yig las byung rdo rje che/ /rtse lnga pa ni rnam par bsgom/ /lkog mar sbyong ba'i yi ge oM/ /dbus ma'i rtsa yi rtse mor dgod/ /ces smos te/ hUM yig las byung ba ni kha dog sngon po sprin sgra las byung ba'o/ /rdo rje che ni lce'i dbang po rnam par dag pa'i rang bzhin no//rtse lnga pa ni bdud rtsi lnga myang ba'i phyir ro/ /dbus ma'i rtsa'i rtse ni rdo rje lce'i rtse mo'o/ /yi ge oM ni 'jug pa'i rang bzhin dgod par bya'o/ /lkog ma sbyong ba zhes nye bar bsdu ba'o/ /snying ga sbyang ba bshad par bya ste/ snying gar sprin sgra bsams nas ni/ /de las me lce spro bar bya/ /zhes bya ba smos te sprin sgra ni yi ge hUM ste kha dog dang sgras sprin dang 'dra ba'i phyir ro/ /snying gar zhes bya ba ni ye shes sems dpa'i thugs kar gru gsum gyi dbus su'o/ /me lce zhes bya ba ni me lce gsum ste/sku gsung thugs kyi rang bzhin no/ /de las spro ba ni gyen du spro ba bsgom par bya'o/ /tshim pa'i chog bshad par bya ste/ de la bza' ba bsreg pa ni/ /nang gi sbyin sreg 'di yin no/ /zhes smos te/ de la ni dam tshig dang ye shes sems dpa'i zhal nas sprin sgra 'bar ba'i me la'o//bsreg pa ni dgang blugs dbul ba'o/ /de bas na nang gi sbyin sreg ni phyi'i til dang mar la sogs pa la mi ltos pa'i phyir ro/ /de ni bza' ba dang btung ba'i cho ga'i sgo nas nang gi sbyin sreg nyid spros nas bshad par bya ste/ rlung gis me ni sbar ba dang //chu yis yongs su smin par byed/ /dbang chen gyi ni dkyil 'khor gnas/ /gang du sreg blugs yang dag gnas/ /bza' ba btung ba gang yang rung / /de kun des ni 'dzin par byed/ /ces smos te/ 'dir lus po 'di la dkyil 'khor ni bzhi ste/ sa'i dkyil 'khor 'dzin pa'i rang bzhin gru bzhi pa gsang ba'i gnas su'o/ /chu'i dkyil 'khor tshim pa'i rang bzhin zlum po snying ga na'o/ /me'i dkyil 'khor 'tshed pa'i rang bzhin gru gsum pa lkog ma na'o/ /rlung gi dkyil 'khor 'bud pa'i rang bzhin gzhu'i dbyibs can te lte ba na'o//de la bza' ba dang btung ba'i dus su bza' ba dang btung ba la sogs pa sngar bkod pa'i rim gyis bdud rtsi lngar byas la/ kha'i pad+mar zhugs te/ gsang ba'i pad+ma la gnas pa'i sa'i khams kyi rang bzhin gyi dkyil 'khor gyis 'dzin la/ lte ba'i pad+ma la gnas pa'i rlung gi dkyil 'khor gyis lkog mar gnas pa'i de'i dkyil 'khor 'dud la/snying ga na gnas pa'i chu'i dkyil 'khor lhan cig byed pa'i rgyu'i rang bzhin gyis 'tshed par byas la/ rtsa rgyus thams cad la kun du spyad pa'i rim gyis khyab cing tshim par bya'o/ /de nyid bshad par bya ste/kha yi pad+mas bza' ba ni/ /snying ga'i pad+mar yang dag 'jug /lte ba'i pad+mar gnas pa ni/ /kha sbyar sbyor ba'i byed pa yis/ /gsang ba'i pad+ma las byung ba'i/ /mtha' mar thal bar nges par bstan/ /zhes smos te/ de la kha'i pad+ma ni lkog ma'i me'i dkyil 'khor gyi rang bzhin des bza' ba la sogs pa bza' bar bya ste/de'i tshe 'od dpag tu med pa'i nga rgyal bya'o/ /snying ga'i pad+ma ni chu'i dkyil 'khor la 'jug pa ni de'i tshe mi bskyod pa'i nga rgyal bya'o/ /lte ba'i pad+ma ni rlung gi dkyil 'khor te/ de la gnas pa na de'i tshe don yod grub pa'i nga rgyal bya'o//tha dad pa'i gnas la gnas pa'i bza' ba la sogs pa ji ltar 'tshed par 'gyur zhe na smras pa/ kha sbyor byed pa'i sbyor ba yis/ /zhes bya ba ni rlung dang me ni tha dad pa'i phyogs la gnas pa yin na/ ngo bo nyid kyi gam na gnas pa bzhin no//de ltar dbang chen dang chu dag la yang shes par bya'o/ /kha sbyor byed pa ni me dang rlung dag gis sbar ba dang smin pa'i don du'o/ /sa dang chu dag las 'dzin pa dang / smin pa la lhan cig byed pa nyid shes par bya'o/ /gsang ba ni pad+ma'am bshad sgo'i lam nas 'byung zhing phyi rol du phyung la thal bar nges par bstan pa ni me'i las byas nas thal ba'i rang bzhin gyi bshang ba dang /gci ba gtang bar bya'o/ /de'i tshe rnam par snang mdzad kyi nga rgyal bya'o/ /nang gi sbyin sreg gi phan yon bstan par bya ba'i phyir/ rga ba ma yin na ba min//'chi ba ma yin dug sogs min/ /des ni dus min 'chi ba min/ /'tshe ba thams cad rnams 'joms pa'o/ /zhes smos te/ rgas pa ni rgas pa nyid de skra dang kha spu dkar pa dang / pags pa kum pa nyid do/ /nad ni rims la sogs pa'o/ /'chi ba ni srog gi dbang po 'gags pas srog la sogs pa mi rgyu ba'o//dug ni brtan pa dang g.yo ba la sogs pa byas pa'i nyes pa'o/ /dus min 'chi ba ni gzhon pa'i dus su 'chi ba'o/ /'tshe ba thams cad ni gdon la sogs pa rnal 'byor pa de la med de bdud rtsi myang ba'i phyir ro zhes phan yon te yan lag dgu pa'o//da ni rdo rje hUM mdzad kyi sgrub thabs las bsdus te/ lhag ma yan lag gsum bri bar bya'o/ /'dir gzhal bya tsam gtso bo yin pas gzhung mkhan gyis ma bstan no/ /'dir tshigs su bcad pa ni/ dkyil 'khor 'khor lo la mchod cing / /de nas gtor ma gtang bar bya/ /de rnams gshegs su gsol byas nas/ /phyi nas ci bder nyal bar bya/ /'di ni mdor bstan pa ste/ dang po dkyil 'khor gyi 'khor lo la mchod pa byas nas phyi nas gtor ma gtang bar bya ste/gshegs su gsol zhing nyal bar bya'o/ /rgyas par bshad pa ni/ phyi dang nang gi dbye ba dang / /gsang ba yi ni dbye ba dang / /de bzhin bla med dbye ba yis/ /mchod pa rnam pa bzhi ru 'dod/ /de don gsal lo/ /yang bshad pa ni/ phyi ni mchod pa rnam pa lnga//nang ni lcags kyu sgron ma ste/ /phyag rgya'i sbyor ba gsang ba ni/ /bla med rnam pa bdun du 'dod/ /ces smos te/ de la phyi'i ni me tog dang / spos dang / mar me dang / dri dang lha bshos te rnam pa lnga'o/ /nang gi ni lcags kyu lnga ste/ go ku da ha na'o/ / sgron ma lnga ste/ ma ra bi shu mu'o/ /phyag rgya ni gsum ste/ las dang dam tshig dang ye shes kyi phyag rgya'o/ /de'i sbyor ba las skyes pa'i gsang ba'i snyoms par 'jug pa'i mtshan nyid do/ /bla na med pa'i mchod pa ni bdun te/ dkon mchog gsum la skyabs su 'gro ba dang /sdig pa bshags pa dang / bsod nams la rjes su yi rang ba dang / byang chub tu sems bskyed pa dang / lam la gnas pa dang / bdag nyid dbul pa dang / bsod nams bsngo ba'i mtshan nyid do/ /de rnams kyi cho ga rim gyis bshad par bya ste/ re zhig dang po rnal 'byor pa gnod mdzes kyi rgyal po'i ting nge 'dzin dang ldan pas gtsug lag khang ngam/kun dga' ra ba'am/ grong ngam grong rdal lam/ rgya mtsho'i 'gram du 'jam pa dang / snum pa dang kha dog dkar po'i sa phyogs su dngos grub kyi dbye bas pus mo dang / lte ba dang rked pa tsam brkos la/ thal ba dang / rus pa dang / zug rngu dang rdo dang / mi gtsang ba'i rdzas rnams bton te/ khung bu yang chus bkang bar byas la/ rdo rje shugs kyis gom pa brgyar song ste/ 'og nas gal te chu de de bzhin du gnas na de'i tshe 'di ni zhing bdag med pa zhes rtogs par bya'o//gang gi tshe chu nang du thim na de'i tshe zhing bdag dang ldan pa'i sa 'di yin no zhes sngags dang phyag rgyas de la gtor ma gtang ngo / /des ni de bskrad par 'gyur ro/ /sngags ni oM dzUM swA hA rdo rje khu tshur gnyis su brdung ba'i tshul du brdeg pa ni zhing skyong bskrad pa'i phyag rgya stes brko ba'i cho ga'o//de nas dri zhim gyis gzhan bdud rtsi lnga'i chu dang ldan pas khung bu dgang bar bya/ /bdud rtsi 'khyil pa bzlas pa'i tho bas brtan par brdungs la/ de'i nang du in+d+ra nI la dang / mar gad dang / pad+ma rA ga dang / bai DUr+ya dang / shel te/ me tog dang /gla rtsi la sogs pa dang ldan pa/ za ma tog la gnas pa gzhag par bya'o zhes gter gzhug pa'i cho ga'o/ /de nas gnod mdzes kyis bzlas pa'am/ bdud rtsi 'khyil pas bzlas pa'i bdud rtsi lnga dang ldan pa'i dri zhim pa'i chus dkyil 'khor gyis gzhi kun du khru bcu gnyis pa'am/logs re re la khru bcu gnyis yod pa byugs te/ me tog dgram zhing dbus kyi cha las byung ba lus phyed mi mngon pa kha dog ser mo zhal gcig phyag gnyis pa rgyan thams cad kyis brgyan pa/ lag pa gnyis kyis rin po ches bkang ba'i gser gyi bum pa bsnams pa sa'i lha mo bsgoms te/thal mo sbyar zhing de la gsol ba gdab par bya'o/ /skyob pa sangs rgyas thams cad kyi/ /spyod pa'i tshul gyi cho ga dang / /sa dang pha rol phyin pa la/ /lha mo khyod ni dpang du gyur/ /khyod ni sems can kun gyi ma//khyod ni khams gsum pa yi gzhi/ /khyod ni mngon sum lha mo ste/ /bdag la dgyes par mdzad du gsol/ /che ge mo zhes bdag sngags pa/ /thugs kyi rdo rje dkyil 'khor mchog /khyod ni kun du dpang byas nas/ /nang par dkyil 'khor bri bar bya/ / zhes zhus te mchod pa rnam pa lngas mchod la spos dang dril bu'i sgras/ khyod kyis sems can don kun mdzad/ /ces bya ba la sogs pas gshegs su gsol to/ /de nyid du thim par bsam mo/ /zhes sa gzhi gzung ba'i cho ga'o/ /de nas de'i dbus su hUM las byung ba'i chos 'byung ba'i phyag rgya bsgoms te/de'i steng du ya ra la wa'i sa bon yongs su gyur pa las sngar bshad pa'i rim gyis rlung la sogs pa'i dkyil 'khor bsgoms la de'i steng du hrIH las byung ba'i pad+ma 'dab ma brgyad pa dmar po'i lte bar suM las skyes pa'i mchod rten gyi bum pa'i nang du b+h+rUM las skyes pa rnam par snang mdzad kun du zhal yongs su gyur pa las snga ma bzhin du gzhal yas khang bsgoms te/de'i dbus su sna tshogs pad+ma dang / nyi ma'i gdan bkod la de'i nang nas cig car du byung ba mi bskyod pa'i dkyil 'khor bltas te/mchod pa rnam pa lngas mchod cing gshegs su gsol la/ ji'i thig le byas nas mchod cing gzhag par bya'o zhes ye shes kyi sa gzhi bsgrub pa'i cho ga'o/ /de nas ha las byung ba sna tshogs rdo rje yongs su gyur pa las rdo rje'i sa gzhi dang /steng du rdo rje'i bla re dang phyogs kun du rdo rje'i ra ba dang / dra ba dang mda'i dra ba dang / me 'od de rigs drug gi rang bzhin bcing bar bya ba ni bsrung ba'i 'khor lo'i cho ga'o/ /zhag gnyis pa la ku sha'i stan la 'dug ste/ dge ba dang mi dge ba mthun pa'i mtshan ma mthong bas bgegs bskrad pa'i don du bzhi chas sbyin sreg byas la/las thams cad pa bzlas pa'i chus sa gzhi la bsang gtor bya ste bgegs zhi ba'i cho ga'o/ /zhag gsum pa la rdo rje hUM mdzad kyi rnal 'byor gyis phyogs bcu'i brgya byin la sogs pa 'jig rten skyong ba rnams gnod mdzes kyis bkug ste/rang rang gi gnas su bzhag la rkang pa'i 'og tu dgod pa yi ge hUM las byung ba rdo rje lcags kyu can gyi rnal 'byor pa rdo rje dang dril bu thogs pa khro bo'i tshig gis khro bo'i sngags bzlas pa dkyil 'khor gyi phyogs dang / mtshams su g.yas brkyang ba dang /g.yon brkyang ba dang / rkang pa mnyam pa dang / rkang pa mi mnyam pa la sogs pa rkang pa'i tshul dang / thal mo sbyar ba dang / pad+ma bcing ba dang / rdo rje khu tshur dang / mchog sbyin pa dang / ting nge 'dzin dang / mi 'jigs pa dang / sa gnon la sogs pa'i lag pa'i phyag rgya dang /steng du lta ba dang / 'og tu lta ba dang / g.yon dang / g.yas dang / dal bus lta ba dang / nang du lta ba dang / mi dmigs pa la sogs pa lta ba'i phyag rgya dang / drug ldan dang / khyu mchog dang / sa 'dzin dang / bar ma dang / lha dang / lnga pa dang / bdug pa la sogs pa dbyangs kyi khyad par gyis glu len pas dkyil 'khor gyi sa gzhi kun du bskor nas shar phyogs su kha bltas pas 'dug ste/ bar snang nam mkha'i de bzhin gshegs pa la mchod cing gur gum la sogs pas byugs pa'i ras dkar pos dkyil 'khor dgab par bya ba ni dkyil 'khor gyi sa gzhi la byin gyis brlabs pa'i cho ga'o//zhag bzhi pa la rin po che'am/ 'bru'am/ kham pa las byung ba ci nus pas rnam pa lnga'i rdul tshon blangs la sangs rgyas lnga'i sngags kyis bsang gtor bya zhing de las byung ba'i 'od zer gyi tshogs kyis de bzhin gshegs pa bkug cing de nyid du bcug la/dkyil 'khor gyi shar phyogs kyi sgo'i lho phyogs su bzhag la/ bu mos bsgril ba'i tshon skud lnga a n+yo n+ya a nu ga ta sarba d+harmA zhes bya ba'i sngags gsum gyis bsgril te/snal ma las byung ba'i 'od zer gyis bar snang gi nam mkha' las de bzhin gshegs pa bkug cing bcug la rdo rje'i thig skud rdzogs shing a khaM bI ra hUM/ zhes bya ba'i sngags kyis kha sbyor gyi nang du byin gyis brlabs la bdag nyid mi bskyod pa dang /phyag rgya mA ma kIr dmigs la/ de med na slob ma bdud rtsi 'khyil pa'am/ rdo rje sems dpar bsams la/ slob dpon dang slob ma dag gis nam mkha' la thig btab cing tshangs pa'i thig gnyis gdab par bya'o/ /de nas me'i mtshams nas brtsams te/g.yas su bskor bas thig gdab po/ /cha chen po bcu drug thig gdab cing phyi dang nang gi dkyil 'khor phyed phyed du byas la/ nang gi phyed la cha chen po bzhi la cha gsum du byas te/ rdo rje gur ni cha chung bzhi dang / lhag ma cha chen gsum gyi cha chung bcu gnyis kyi re mig dgu 'byung ngo //cha chen po gcig gis mchod pa'i lha mo'i re mig gi thig gdab par bya'o/ /cha chung gsum dang cha chung gcig gis byang chub sems dpa'i gnas dang / rdo rje ra ba'i thig gdab par bya'o/ /phyogs gnyis pa la yang de bzhin no/ /phyi'i cha chen po la brgyad de/de la phyogs gcig gi cha chen po bzhi la cha chung bcu drug yin te/ de la pany+tsa re khA la cha chung gcig dang / 'dod yon la gnyis dang / rin chen pha gu la gcig dang / dra ba dang dra ba phyed pa la gnyis so/ /g.yer kha'i dra ba la gcig dang / rdo rje la gcig dang / rta babs la bzhi dang / pad+ma la gcig dang / 'khor lo la gnyis dang / bcugs la gcig go/ /rdo rje ra ba dang me 'od ni cha chung gsum du thig gdab par bya ste mdzes pa'i phyir ro/ /'dir thig skud chad pa la sogs pa'i nyes pa byung na bgegs gtor dang / zhi ba'i sbyin sreg bya ste/gzhan du ni ma yin no zhes thig gdab pa'i cho ga'o/ /de nas sngar lhag par gnas par byas pa'i rdul tshon bdud rtsi 'khyil pa bzlas pa'i sgrub pa pos lag pa g.yon pas dbang ldan gyi phyogs nas brtsams te rdul tshon dgye bar bya'o/ /sna tshogs pad+ma dang / zla ba dang / nyi ma'i gdan bris la dbus su rdo rje nag po'i phyag rgya bri'o/ /shar la sogs pa'i re mig la 'khor lo dang / rin po che dang / pad+ma dang / sna tshogs rdo rje bri ba dang / me'i mtshams la sogs pa'i re mig la/ mig dang / rdo rje dang / pad+ma dang / ut+pal bri bar bya'o//phyi'i me'i mtshams su me long dang / bden bral du pi wang dang / rlung du dung phor dang / dbang ldan la ro'i snod do/ /byang chub sems dpa'i snam bu rnams la/ rim pa ji lta ba bzhin du 'khor lo dang / nA ga ge sar gyi yal ga dang / rdo rje dang / / rin po che dang / pad+ma dang / ral gri dang / yang ral gri dang / sna tshogs rdo rje bri'o/ /sgo dang mtshoms rnams su dbyug to dang / dbyig pa dang / pad+ma dang / rdo rje dang / lcags kyu dang / dbyug pa dang / rtse gsum dang / ral gri rnams bri'o/ /'og nas steng du ni rdo rje dang 'khor lo bri'o//kha cig na re steng du ni rin po che'i gtsug tor bri'o zhes zer ro/ /lhag pa dang ma tshang ba'i nyes pa dang bral ba'i dkyil 'khor gsal po bri bar bya ste/ rdul tshon dgye ba'i cho ga'o/ /zhag lnga pa la bum pa sum cu rtsa gnyis dang / las thams cad pa'i bum pa bsdu bar bya ste/ma tshogs na de bzhin gshegs pa lnga dang / lha mo bzhi'i bum pa dang las thams cad pa'i bum pa yang bsdu ste/ bcu las nyung bar mi bya'o zhes gsungs pa'i phyir ro/ /de rnams kyang lo mas kha brgyan pa/ dar gyis bcings pa mgrin pa ring ba/lto ba che zhing rtsa ba dang nag nog med pa/ rang rang gi mtshan ma'am yig 'brus mtshan pa/ dri zhim pa'i chus bkang la/ 'bru dang rin po che dang / sman gyi snying po can bdud rtsi lnga dang ldan pa/ dkyil 'khor gyi g.yas phyogs su rdo rgyus kyis bris pa'i sna tshogs rdo rje'i steng du dkyil 'khor gyi rim pas gzhag cing me tog dor bar bya'o//rnam par rgyal ba'i nang du oM hUM las skyes pa/ zla ba dang rdo rje yongs su gyur pa las mi bskyod pa zhal gsum phyag drug pa spro ba dang bsdu ba'i rim gyis de bzhin gshegs pa 'jug pa sngon du 'gro ba bskyed la/lhag ma rnams la de bzhin du dkyil 'khor pa rnams bskyed cing las thams cad pa'i bum pa yang bdud rtsi 'khyil pas sdigs mdzub dang / rdo rje gsor bar byed par bsams te/ rang gi rig ma dang gnyis su med pas zhu bar bsam mo//de nas re re la badzra d+h+r-i ka ces bya ba la sogs pa'i sngags brgya rtsa brgyad kyis mngon par bsngags la mchod pa rnam pa lngas mchod cing gtor ma btang ste/ ras dmar pos dgab par bya'o zhes bum pa lhag par gnas pa'i cho ga'o/ / de'i 'og tu dang po sbyor ba'i ting nge 'dzin las gsungs pa'i ye shes kyi sa gzhi dang / gzhal yas khang bsgoms pas dkyil 'khor gyi 'khor lo bsgoms te/ sna khung g.yas pa dang / g.yon pa la ye shes sems dpa' 'khor dang bcas pa rang rang gi gnas las byung zhing /sna tshogs pad+ma sum cu dang / zla ba dang / nyi ma'i gdan la bzhugs su gsol zhing thugs ka'i 'od zer gyis ye shes kyi 'khor lo dgug cing bcug la ro mnyam par gyur par bltas te/ dkyil 'khor gyi g.yas phyogs su bzhag pa'i ar+g+haM dang /zhabs bsil gyi snod dag blangs la rdo rje'i phyag rgyas ar+g+haM dang zhabs bsil phul zhing / mchod pa rnam pa lngas mchod de/ gtor ma btang nas yi ge brgya pa dang bcas pa'i yi ge gsum gyis ye shes kyi 'khor lo gshegs su gsol la/dam tshig gi 'khor lo ni de nyid du bzhugs par bltas la/ ras dmar pos bkab la me tog gtor bar bya'o zhes dkyil 'khor lhag par gnas pa'o/ /gal te yon bdag gi rab tu gnas par byed pa 'dod na de'i tshe bris sku'am/ lugs sku'am/ dam chos kyi glegs bam mam/ rdo rje'am/ dril bu'am/ mchod rten nam/ phreng ba rab tu gnas par bya ste/ de nas bris sku dang gzugs sku mdun du bzhag nas stong pa nyid bsgom pa sngon du 'gro bar dang po sbyor ba'i rim gyis ji ltar 'dod pa'i lha bskyed de/de'i thugs kar sa bon gyi yi ges de dang 'dra ba'i ye shes sems dpa' bkug cing bcug la bcings te dbang du byas nas/ spos gtul zhing dril bu dkrol la de mngon du byas te mchod pa rnam pa lngas mchod la/ gtor ma gtang nas yi ge brgya pa dang bcas pa'i yi ge gsum gyis ye shes sems dpa' gshegs su gsol zhing /dam tshig sems dpa' de nyid du gnas par bltas te/ ras dmar pos bkab cing me tog gtor bar bya'o/ /rim pa de nyid kyis dam pa'i chos kyi glegs bam ni rdo rje chos kyi rang bzhin du bsgoms la/de yongs su gyur pa las kyang de bsam par bya'o/ /rdo rje ni rdo rje 'chang gi ngo bo dang dril bu ni shes rab kyi pha rol tu phyin pa'i ngo bo dang / mchod rten ni bcom ldan 'das rnam par snang mdzad kyi sku dang / phreng ba ni rang gi 'dod pa'i lha'i dkyil 'khor gyi 'khor lo'i bdag nyid du bsam par bya'o//lhag par gnas pa ni bris sku dang gzugs sku bzhin no zhes bris sku la sogs pa'i lhag par gnas pa'i cho ga'o/ /de nas dad pa dang ldan pa gtong ba che ba 'jig rten pha rol yod pa yin la/ yod pa'i slob ma gcig gam mang po dkyil 'khor du bcug ste/gsol ba gdab pa byed du gzhug go/ /bcom ldan 'das slob dpon chen po thog ma med pa'i 'khor ba'i bag chags dang nyon mongs pa rnams kyis bdag zil gyis non na/ de las grol bar bya ba'i phyir khyod la gsol ba btab pa ste/sangs rgyas chos dang dge 'dun dang / /skyabs gsum po ni bdag la stsol/ /dam tshig mchog ni bdag la stsol/ /sdom pa yang ni bdag la stsol/ /thar pa chen po'i grong khyer du/ /mgon po bdag ni gzhug tu gsol/ / zhes rdo rje slob dpon gyis gnas nas slob ma phyag bzhi byed du bcug la/ las thams cad pa'i bum pa nas chu blangs te/ de nas maN+Dal byas la/ gnas lnga la me tog gis mchod la de bzhin du spos dang / mar me dang / dri dang / lha bshos kyis kyang shes par bya'o//'dir rim pa ni dbus su sangs rgyas la phyag 'tshal lo/ /shar du chos la phyag 'tshal lo/ /lhor dge 'dun la phyag 'tshal lo/ /nub tu sangs rgyas dang byang chub sems dpa' dang / sngags dang / phyag rgya dang / dkyil 'khor pa dang / lha'i khyad par thams cad la phyag 'tshal lo/ /byang du ni bla ma la phyag 'tshal lo/ /yang dbus su/ oM sarba ta thA ga ta puSh+pe pu dza me g+ha sa mu dra spa raN sa ma ya shri ye a hUM zhes pa dang me tog gis mchod do/ /de bzhin du spos la sogs pas kyang shes par bya'o//de nas pus mo gnyis sa la btsugs shing thal mo sbyar la/ bla na med pa'i mchod pa byed du bcug ste/ dkon mchog gsum la skyabs su mchi/ /sdig pa thams cad so sor bshags/ /'gro ba'i dge la rjes yi rang / /sangs rgyas byang chub yid kyis gzung //sangs rgyas chos dang tshogs mchog la/ /byang chub bar du skyabs su mchi/ /rang dang gzhan don bsgrub pa'i phyir/ /byang chub tu ni sems bskyed bgyi/ /byang chub mchog gi sems ni bskyed bgyis nas/ /sems can thams cad bdag gis mgron du gnyer//byang chub mchog gi spyod pa 'dod spyod cing / /'gro la phan phyir sangs rgyas 'grub par shog /ces bya'o/ /de nas slob ma rnam par snang mdzad du bsams te/ oM pad+ma sa ra swa t+ya mA brta ya hrIH zhes pa'i sngags kyis sor bcu gnyis pa 'bus ma zos pa a shwat+tha dang /u du m+WA ra'i so shid sbyin te/ kha sbyang du bcug la ba'i ko ba tsam gyi sa gzhi la dor du bcug la/ shar phyogs la sogs par bltas pas/ zhi ba la sogs pa'i dngos grub nyan du bcug ste/ bdud rtsi 'khyil pa bzlas pa'i las thams cad pa'i chus kha dag cing /skyil mo krung gis gnas pas zhugs la/ le'u bco lnga pa las gsungs pa'i dbab pa'i cho gas rdo rje dbab pa dang / ye shes dbab pa bskyed cing spos gtul te/ dril bu'i sgra mngon du byas la/ 'das pa la sogs pa dri zhing lha gshegs su gsol te/snod kyi sku gsung thugs byin gyis brlabs la/ bdud rtsi 'khyil pa bzlas pa'i srung skud dpung pa la bcings te/ snga ma bzhin du ku sha la mngon par bzlas te/ gcig ni sngas dang / gcig ni stan du byin la rigs kyi bu seng ge'i tshul du nyal ba dang /ji ltar mthong ba'i rmi lam bdag la smros shig ces bstan par bya ba ni slob ma lcag par gnas pa'i cho ga'o/ /de nas zhag drug pa'i tho rangs langs te/ sku khrus kyi cho ga'i rim gyis khrus byas la me tog la sogs pa mchod pa'i yo byad bsogs te/rang gi yi dam gyi lha'i nga rgyal dang ldan pas/ sku khrus brtsam par bya ste/ de'i rim pa ni ji ltar rnyed pa'i me tog dang / spos dang / mar me dang / dri dang / lha bshos dang / na bza' dang / rgyan dang / mchod yon dang / bum pa dang /'bru lnga ni nas dang / gro dang / 'bras dang / so ba dang / til dang / ma sha dang / 'bras yos dang / yungs kar dang / star ga dang / bil ba dang / gla gor zho sha dang / dzA ti pha la dang / sman lnga ni ha sa de ba dang / kaN+Da ka ri dang / sa la pa r+Ni dang / br-i ha ti dang / b+ha la mu dra dang / rin po che lnga ni/ in+d+ra nI la dang / mar gad dang / pad+ma rA ga dang / bai DUR+Ya dang / shel lo/ /sman thams cad dang / dri zhim pa'i til mar dang / mar dang / sbrang rtsi dang / zho dang / 'o ma dang / sran ma'i phye dang / gro'i phye dang / lo ma lnga dang /dar la sogs pa bsogs shing / rim pa ji lta ba bzhin du bum pa byin gyis brlab par bya ste/ de'i cho ga ni mdun du ji ltar nus pa'i dkyil 'khor gyi g.yas phyogs su yo byad thams cad bzhag la/ sngar lhag par gnas pa'i bum pa bcu 'am/ lnga'am gcig srog chags med pa dri zhim pa'i chus yongs su gang ba 'bru la sogs pa'i snying po can bzhag cing / ar+g+ha'i snod ni dri zhim pa'i chu dang / zho dang 'bras yos dang / ku sha dang / sman dang / yungs dkar dang / me tog dang / gla gor zhi sha dang / ldan pa g.yon phyogs su bzhag ste/ rang gi 'dod pa'i lha'i sngags kyis lan nyi shu rtsa gcig bzlas shing de nas las thams cad pa'i snod dri zhim pa'i chus bkang ba g.yas phyogs su bzhag ste/ bdud rtsi 'khyil pa'i sngags de bzhin du bzla'o/ /de nas rnam par rgyal ba'i bum pa mdor bsdus pa zla ba dang /rdo rje la sogs pa'i bsgom pa'i rim pas bskyed par bya ste/ paM las skyed pa'i pad+ma'i lte bar a las skyes pa'i zla bar hUM las skyes pa'i rdo rje'i hUM gi 'od zer gyis bkug pa'i de bzhin gshegs pa zhugs pa yongs su gyur pa las bcom ldan 'das rdo rje 'chang chen po dkar po zhal gcig phyag gnyis pa/rdo rje dang dril bu bsnams pa/ rgyan thams cad kyis brgyan pa/ snying gar zla ba dang / rdo rje dang hUM dang ldan pa yi ge gsum gyis byin gyis brlabs pa/ mi bskyod pa'i cod pan bsams te/de bzhin du bum pa gzhan la mi bskyod pa dang / rin chen 'byung ldan dang 'od dpag tu med pa dang don yod grub pa dang / spyan ma dang / mA ma kI dang / gos dkar mo dang / sgrol ma dang / bdud rtsi 'khyil pa'i bar du bskyed la/ de rnams kyang zhal gcig phyag gnyis pa/rang rang gi sku mdog dang phyag mtshan 'dzin pa/ sgeg pa dang bcas shing rgyan thams cad kyis brgyan pa/ rang gi sa bon dang mtshan ma dang bcas pa'i sems dpa'i skyil mo krung gis pad+ma dang / nyi ma'i steng du bzhugs pa bdud rtsi 'khyil pa ni nyi ma'i dkyil 'khor la g.yon brkyang bas bzhugs pa/sdigs mdzub dang rdo rje gsor bar byed pa bsams te/ rje btsun gyi yi ge brgya pa lan gsum brjod la rdo rje yi ge gsum dang / me tog la sogs pas mchod cing dril bu yang dril bu'i sngags kyis mchod par bya'o//sngags ni/ oM AH hUM/ oM badzra g+haN+Te ra Ni pra ra Ni/ saM pra ra Ni sarba bud+d+ha k+She tra pra tsa li te/ pradz+nyA pA ra mi tA nA da swa b+hA be ta badzra d+ha rmA hr-i da ya ni/ saM to Sha Ni hUM hUM hUM phaT phaT swA hA/ de nas rdo rje lag pa g.yas pas blangs te/g.yon pas dril bu bzung la/ g.yas pas kyang spos khang bzung ste dril bu dkrol zhing / rje btsun gyi yi ge brgya pa lan cig bzlas te/ oM badzra d+h+r-i ka AH hUM swA hA/ oM dzi na dzika AH hUM swA hA/ oM rat+na d+h+r-i ka AHhUM swA hA/ oM A ro l-i ka AH hUM swA hA/oM pradz+nyA d+h+r-i ka AH hUM swA hA/ oM ru ru sbu ru dz+wa la tiSh+Tha sid+d+hi lo tsa ne sarba ar+tha sA d+ha ni swA hA/ oM AHshaM ga re shAn+ti ka re g+hu Ta g+hu Ti ni g+hu Ta ya g+ha Ta ya g+hu Ti ni swA hA/ oM a ka Te bi ka Te ni ka Te ka TaM ka Te ga ro Ti bIr+ya swA hA/ oM tA re tut+tA re tu re swA hA/ oM na maHsa man+ta kA ya bAka tsit+ta badzrA NAM/na mo badzra kro d+hA ya/ ma hA daMShoT+T+ka Ta b+he ra bA ya a si mu sa la d+ha rA ya pa ri shu pA sha ha stA ya/ oM a mr-i ta kuN+Da li kha kha khA hi khA hi/ taSh+Thi TaSh+Thi/ b+nad+ha ban+d+ha/ ha na ha na/ da ha da ha/ pa tsa pa tsa/ gardza gardza/ bis+phoT ya bi s+pho Ta ya/sarba bi g+h+nAM bi nA ya ka ne ma hA gA Na pa ti dzI bi ta an+ta ka rA ya swA hA zhes bya ba sngags de rnams rim pa ji lta ba bzhin du rnam par rgyal ba la sogs pa la ar+g+ha dang me tog la sogs pas mchod cing snga ma bzhin du spos gtul ba dang / dril bu dkrol zhing mar me dang /lha bshos dang / snod gang ba la sogs pa phul zhing lag pa g.yon pa sgeg pa dang bcas pas dril bu blangs la/ lag pa g.yas pa ku sha dang bcas pas rdo rje rtse gsum gyi phyag rgya bum pa'i steng du bzhag la/ rang rang sngags kyi bum pa rnams rje btsun gyi yi ge brgya pa dang bcas pas lan brgya rtsa brgyad rnam par rgyal ba la yongs su bzlas la/de bzhin du bum pa gzhan dag kyang lan nyi shu rtsa bdun bzlas la/ yang me tog la sogs pas mchod cing thabs dang shes rab snyoms par 'jug pas zhu bar gyur par bsam pa ni bum pa byin gyis brlab pa'o//de nas sngar bshad pa'i bris sku la sogs pa'i bcom ldan 'das yi ge gsum gyis byin gyis brlabs la/ sku khrus kyi las brtsam par bya ste/ dang por snga ma bzhin du spos gtul la 'bras chan gyi chang bu gnyis dang me snod dang /mar me rnams snod dam bum pa la bzhag ste/ mdun du gnas pa'i yungs kar lag pas blangs te/ bdud rtsi 'khyil pa'i sngags kyis mngon par bsngags la/ oM sarba pA paM da ha na badzrA ya swA hA/ zhes bya ba'i sngags kyis me dang / chu la gtor la lag pa gnyis kyis blangs te/sku gzugs la sogs pa'i mdun du lan gsum bskor la phyi rol du bdud rtsi 'khyil pa'i sngags kyis gtor bar bya'o/ /de nas bsang gtor gyi chus khrus kyi rdzas bdud rtsi 'khyil pa'i sngags kyis lan gsum bsang gtor byas te/me tog la sogs pa yang de bzhin du bsang gtor byas la/ de nas dril bu'i sgra dang / spos gtul zhing shin tu phyis pa'i me long gi gzugs brnyan la rang gi sngags kyis zhabs bsil lan gsum phul te/ chus bkrus la rim gyis dri zhim po'i til mar dang /bag phyes me long mnyes te/ chus bkrus la/ yang ar+g+ha dang me tog phul la/ mar dang sbrang rtsis bkru zhing bag phyes mnye zhing chus bkrus te/ zho dang / 'o ma dang / 'bru dang / 'bras yos dang / star ka la sogs pa'i 'bras bu dang me tog dang /ar+g+ha dang lhan cig so sor khrus gsol la/ /oM sarba ta thA ga ta kA ya bi sho d+ha ni swA hA/ zhes bya ba'i sngags kyis de ltar byas la/ bum pa rnams me tog dang spos kyis mchod la/ rim gyis dbang bskur brtsam par bya'o/ /dang po las thams cad kyi bum pa sngags kyi rgyal po bdud rtsi 'khyil pa'i sngags dang /ji ltar bltams pa tsam gyis ni/ /lha rnams kyis ni khrus gsol ba/ /lha yi chu ni dag pa yis/ /de bzhin bdag gis khrus gsol lo/ /zhes dbang bskur ro/ /de nas shar gyi bum pas dzin dzika ces bya ba'i sngags dang /sngar bshad pa'i tshigs su bcad pas sku khrus phul la/ de bzhin du rat+na d+h+r-i ka ces bya ba dang / pradz+nyA d+h+r-i ka ces bya ba dang / A ro l-i ka ces bya ba dang / pad+ma d+h+r-i ka ces bya ba dang / ru ru s+phu ru dang / shaM ka ri dang / a ka Te dang /tA re zhes bya ba la sogs pa'i sngags rnams dang / rang rang gi bum pa dang / tshigs su bcad pa rnams kyis dbang bskur bar bya'o/ /yang rnam par rgyal ba'i bum pa la me tog gtor zhing spos gtul te/ rje btsun gyi yi ge brgya pa dang / oM badzra d+h+r-i ka ces bya ba'i sngags lan bdun bzlas la/oM sarba ta thA ga ta a b+hi She ka ta sa ma ya shri ye hUM zhes bya ba dang / yang sngags kyi rgyal po brjod cing dbang bskur bar bya'o/ /de nas legs par bdugs pa'i ras blangs te/ me long la chus phyis pa'i dri'i thig le lnga byas te/me tog gtor zhing bzhag la/ dril bu dang spos blangs te/ snga ma bzhin du mchod cing ci 'byor pas lha bshos phul te/ gtor ma gtong zhing phyag btsal nas ldang bar bya'o zhes sku khrus kyi cho ga'o/ /de nas sngar lhag par gnas pa'i bris sku la sogs pa la rab tu gnas pa bya ste/de'i rim pa ni bris sku dang / gzugs sku la sogs pa stong pa nyid du bsgoms te/ yang rang gi chos kyi yi ge yongs su gyur pa las skyes pa de'i sku bsgoms la/ mngon du gzhag cing mgo bo dang / lkog ma dang snying gar sna tshogs pad+ma dang nyi ma dang /zla ba'i steng du yi ge gsum bkod la de'i 'od zer gyis nam mkha' las rigs gsum bkug ste de nyid du bcug la/ de bzhin gshegs pa thams cad kyis byin gyis brlab par bsams la mngon du gyur par blta bar bya'o/ /de nas ye shes sems dpa'i sa bon gyi 'od zer gyis ye shes kyi 'khor lo bkug cing /de nyid du bcug la bcings shing dbang du byas te/ 'o ma dang chu bzhin du ro gcig par gyur par bsam par bya'o/ /dam tshig dang ye shes sems dpa' gcig tu gyur par bltas la/snga ma bzhin du bgegs bskrad cing bsrungs la yi ge brgya pas brtan par byas la/ yi ge gsum gyis rjes su chags la/ rdo rje dang dril bu blangs te/ spos gtul nas spyan drang bar bya ste/ mi bskyod rdo rje ye shes sogs/ /rdo rje mi phyed gsum bsgoms pas//'gro ba yi ni don mdzad phyir/ /'dir ni rtag tu bzhugs su gsol/ /ji srid nam mkha' ri rabs/ /ji srid nyi zla rgyu skar dang / /ji srid thub pa'i bstan bcos te/ /de srid 'dir ni bzhugs su gsol/ /rtag tu 'khor dang bcas pa yi//rgyal po dang ni yon bdag dang / /bdag dang slob mar bcas skyob phyir/ /'dir ni rtag tu bzhugs su gsol/ /zhes gsol ba btab nas sngar bzhin du bkug cing mchod pa rnam pa lnga sngon du 'gro bar gur kum gyis byugs pa'i ras gnyis phul nas ma sha lnga'i tshad tsam gyis gser gyi mig thur gyis oM tsuk+Sha tsuk+Sha sa man+ta tsak+Shu bi sho d+ha ni swA hA/zhes bya ba'i sngags kyis spyan phye ste/ zho dang 'bras chan me tog dang bcas pa'i lha bshos oM badzra a mr-i te swA hA/ zhes bya ba'i sngags kyis phul la/ rim pa ji lta ba bzhin du dbyibs dang bcas pa'i me tog gi phreng ba phul te/ mchod yon dang 'thor 'thung dang / zhabs bsil phul ba sngon du 'gro bar lhag ma'i rdzas kyis mchod cing bstod nas phyag 'tshal zhing bskor ba byas te/bzod par gsol nas mngon par 'dod pa'i don gnyer bar bya ste rab tu gnas pa'i cho ga'o/ /de nas mchod pa'i cho ga brtsam par bya ste/ snga ma bzhin du dkyil 'khor gyi gnas su lha rnams spros te/ ye shes sems dpa' dang gnyis su med par byas la/sku khrus dang / zhabs bsil dang / mchod yon dang / phyag bzhi sngon du 'gro ba'i mchod pa rnam pa lngas mchod par bya'o/ /de'i rim pa ni me tog 'di ni dge ba'i mchog /gtsang zhing gtsang ma'i rgyu dang ldan/ /bdag gis dad pas 'bul lags na//bzhes te bdag la dgyes par mdzod/ /oM sarba ta thA ga ta puSh+pe pU dza me g+ha sa mu dra s+pha ra Na sa ya shri ye hUM/ oM badzra puSh+pe AH hUM swA hA/ zhes bya ba rang rang gi sngags dang me tog dbul lo/ /de bzhin du lhan cig skyes pa dang sbyar ba'i spos gtul la/nags tshal bcud ni yi gar 'ong / /dri zhim rgyas pa lha yi spos/ /bdag gis dad pas 'bul lags na/ /bzhes nas bdag la dgyes par mdzod/ /oM sarba ta thA ga ta d+hU pa pU dza me g+ha sa mu dra s+pha ra Na sa ma ya shri ye hUM/ oM badzra d+hU pe AH hUM swA hA/zhes bya ba'i sngags kyis dbul lo/ /mar me'i snod blangs la/ gdon rnams 'joms shing bkra shis la/ /dge zhing mun sel mar me 'di/ /bdag gis dang bas 'bul lags na/ /bzhes nas bdag la dgyes par mdzod/ /oM sarba ta thA ga ta dI pa pU dza me g+ha sa mu dra s+pha ra Na sa ma ya shri ye hUM/oM badzra dI pe AH hUM swA hA/ zhes bya ba'i sngags kyis dbul lo/ /de bzhin du/ lhan cig skyes dang sbyar ba dang / /de bzhin yongs su gyur pa ste/ /bdag gis dad pas 'bul lags nas/ /bzhes nas bdag la dgyes par mdzod//oM sarba ta thA ga ta gan+d+he pU dza me g+ha sa mu dra spa ra Na sa ma ya shri ye hUM/ oM badzra gan+d+he AHhUM swA hA/ zhes bya ba'i sngags kyis dbul lo/ /de bzhin du ro drug dang ldan pa'i lha bshos kyi snod blangs te/ 'di ni bdud rtsi'i ngo bo ste/ kha zas rnams kyi gtsang sbra rnams//bdag gis dad pas 'bul lags na/ /bzhes nas bdag la dgyes par mdzod/ /oM sarba ta thA ga ta nai bi d+ye pU dza me g+ha sa mu dra s+pha ra Na sa ma ya shri ye hUM/ oM badzra ne bi d+ya AH hUM swA hA/ zhes bya ba'i sngags kyis dbul lo//de bzhin du na bza' dang / gdugs dang / rgyal mtshan dang / bden dang / rol mo dang / mchod pa'i khyad par ni rang gi sngags kyis dbul bar bya'o/ /'di ni phyi'i mchod pa'i rim pa'o/ /de nas pad+ma'i snod la bdud rtsi lnga sbyang ba dang / sad pa dang sbar ba'i rim pas bdud rtsir byas la lcags kyu rnams kyang de bzhin du bskyed la/dkyil 'khor pa rnams la dbul lo/ /oM a mr-i te na pr-i Na ya me swA hA/ zhes bya ba'i sngags so/ /de nas lo bcu gnyis sam/ bcu drug gam nyi shu lon pa'i bu mo rigs kyis dbye bas blangs nas rigs lngas khyab par byas te/rdo rje dang pad+ma 'dus byas pa sngon du 'gro bar snyoms par 'jug pa'i sbyor bas de bzhin gshegs pa thams cad dag gi lam nas zhugs te/ rtsa dbus ma nas snang ba la sogs pa myong ba sngon du 'gro bar pad+mar spros la/dung por gyis blangs te dkyil 'khor gyi dbus su dbul lo/ /oM ma hA su kha badzra ho su ra ta s+t+waM su ra te haM zhes bya ba sngags so/ /de nas dkon mchog gsum la skyabs su 'gro ba la sogs pa'i bla na med pa'i mchod pas bcom ldan 'das la mchod do//langs te phyag 'tshal zhing bskor ba byas te/ bzod par gsol nas smon lam btab ste/ chos thams cad so sor snang ba tsam du bltas te gnas par bya'o zhes mchod pa'i cho ga'o/ /de nas sngar lhag par gnas par byas pa'i slob ma rnams kyi gdong g.yogs te sgor bzhag la gsol ba gdab par byed du gzhug go//bcom ldan slob dpon dam pa ni/ /'khor ba las ni skyob pa'i phyir/ /skye dang sdug bsngal rga shi yi/ /zhags pas bdag ni rab tu gdungs/ /de phyir bdag ni 'jigs pa yis//khyod la rtag tu skyabs su mchi/ /sngags kyi lam gyi theg pa yis/ /bdag la rjes su bzung bar mdzod/ /slob dpon khyod ni dgongs su gsol/ /khyod ni ston pa dga' chen po/ /byang chub chen po'i tshul mchog ni/ /mgon po chen po bdag 'tshal lo/ / sangs rgyas chos dang dge 'dun dang / /skyabs gsum po ni bdag la stsol/ /dam tshig mchog ni bdag la stsol/ /sdom pa yang ni bdag la stsol/ /thar pa chen po'i grong khyer la/ /mgon po bdag ni 'jug par 'tshal/ /zhes bya bas slob mas gsol ba btab pa'i 'og tu rdo rje slob dpon gyis thal mo sbyar ba me tog dang ldan pa'i slob ma phyag bzhi byed du bcug la/oM sarba ta thA ga ta bud+d+ha ko la maN+Da le di ba ta b+h+ya kA ya bA ka tsit+ta pra Na me pA da ban+d+hA naM ka ro mi/ shar du'o/ /oM sarba ta thA ga ta rat+na ko la di ba ta b+h+ya kA ya bA ka tsit+ta pra Na me na pA da ban+d+hA naM ko ro mi/lho ru'o/ /oM sarba ta thA ga ta pad+ma ko la di ba ta b+h+ya kA ya bA ka tsit+ta pra Na me ban+d+hA naM ka ro mi/ nub tu'o/ /oM sarba ta thA ga ta karma ko la di ba ta b+h+ya kA ya bA ka tsit+ta pra Na me na pA da ban+d+hA naM ka ro mi/ byang du'o/ /de nas mdang khyod kyis rmi lam ji lta bu mthong zhes bla mas dris la/slob mas dge ba dang mi dge ba'i rmi lam brjod do/ /bla mas kyang de dang mthun pa'i dngos grub bstan par bya'o/ /de nas khyod kyi mig la ji ltar snang zhes dris la sngon po la sogs pa snang ngo zhes gal te smra na de'i tshe rigs dang mthun pa'i dngos grub bshad par bya'o//de nas bdud rtsi 'khyil pa bzlas pa'i las thams cad pa'i chu de'i lag par sbyin te/ 'di ni khyod kyi dmyal ba'i chu/ /dam tshig nyams na sreg par byed/ /dam tshig bsrungs pas dngos grub ster/ /rdo rje bdud rtsi'i chu 'thung shig /oM badzra a mr-i ta u da ka ThaHThaH ThaH traM AH hUM phaT swA hA/ zhes bya ba'i sngags kyis mna' chu sbyin par bya'o/ /de nas dkyil 'khor la me tog phreng ba 'thor du gzhug ste/ gang du me tog babs gyur pa/ /de la de yi rigs bstan bya// /dbus kyi re'u mig babs pa na//phyag rgya'i dngos grub thob par 'gyur/ /sangs rgyas lha mo'i re'u mig la/ /babs par gyur na dngos grub mchog /mchod pa'i lha mo'i re'u mig la/ /babs par gyur na zhi sogs 'gyur/ /sems dpa' khro bo'i gnas su ni/ /babs na de nyid bstan par bya//sgo la babs na bar pa ni/ /de yi phyi rol dngos grub dman/ /gang tshe kun gyi phyi rol du/ /me tog babs na de yi tshe/ /slar yang dbus su phab tu gzhug /der ma bab na dngos grub med/ /de nas dkyil 'khor gyi dbus nas me tog blangs te/gzugs rdo rje ma'i sngags kyis de'i spyi bor gdab par bya'o/ /de la zab pa dang / rgya che ba'i mtshan nyid kyi chos bstan pas mgu bar bya ste thar pa chen po'i dkyil 'khor du ni ltos shig ces smras te/ oM tsak+Shu zhes bya ba la sogs pa'i sngags dang /rdo rje sems dpa' deng khyod kyis/ /mig 'byed par ni brtson par mdzad/ /mig rnams thams cad 'byed mdzad de/ /rdo rje'i mig ni bla na med/ /ces bya ba'i tshigs su bcad pa brjod nas gdong g.yogs dgrol bar bya'o/ /de nas slob ma ngo mtshar gyis mig rgyas pas dkyil 'khor la bltas te/phyag bzhi bya'o/ /de nas snga ma bzhin du maN+Dal dang / mchod pa rnam pa lngas mchod nas gsol ba btab pa la 'jug ste/ skyabs med skyabs phyir skyob 'gyur ba/ /'gro ba skyob pa'i rgyu yin te/ /rdo rje 'chang chen mi phyed pa//bdag la di ring bskyab tu gsol/ /rnam shes lnga ni gti mug gi/ 'dam pa dag par bya ba'i phyir/ /rig pa'i dbang bskur chu yis ni/ /bdag gi yid ni dga' bar mdzod/ /ces bya bas gsol ba btab pa gsan nas/ /sangs rgyas chos dang dge 'dun te//dkon mchog gsum la skyabs su song / /de nas sangs rgyas rigs mchog la/ /dam tshig sdom par bshad pa yin/ /rdo rje dril bu phyag rgya dag /blo chen khyod kyis gzung bar bya/ /byang chub sems gang de rdo rje/ /shes rab dril bu zhes bshad do//slob dpon yang ni gzung bya ste/ /bla ma sangs rgyas kun dang mnyam/ /de ni rdo rje'i rigs dag la/ /dam tshig sdom pa yin par gsungs/ /nyin dang mtshan mo lan gsum du/ /sbyin pa rnam bzhi rtag tu sbyin/ /zang zing mi 'jigs chos dang byams/ / rin chen rigs la mtho ba'o/ /phyi nang gsang ba'i theg pa gsum/ /dam pa'i chos kyang khyod kyis gzung / /de ni pad+ma'i rigs dag la/ /dam tshig sdom pa yin par bshad/ /sdom pa thams cad dang ldan pa'i/ /de nyid du ni gzung bar gyis/ /mchod pa'i las ni ci nus gyis//las kyi rigs mchog dam pa'o/ /khyod kyis srog chags gsad mi bya/ /ma byin par yang blang mi bya/ /'dod pas log par mi spyad cing / /brdzun yang smra bar mi bya ste/ /nyes pa kun gyi rtsa ba yi/ /chang 'thung ba yang spang bar bya/ /bya ba ma yin thams cad spang //sems can don la rgyab phyogs min/ /'khor ba spang bar mi bya zhing / /mya ngan 'das la chags bya min/ /dam pa rnams kyi gam du gnas/ /rnal 'byor pa la bkur ste bya/ /lus kyi las ni rnam pa gsum/ /ngag gi rnam pa bzhi dag dang //yid kyi rnam pa gsum yin te/ /ci nus par ni gsung bar bgyi/ /theg pa chung la 'dod mi bya/ /sems can don ni kun du spyod/ /lha dang lha min gsang ba la/ /khyod kyis brnyas par bya ba min/ /phyag rgya bzhon pa phyag mtshan dang / / mtshan ma rnams kyang bgom mi bya/ /de ni sdom pa zhes gsungs te/ /blo chen khyod kyis bsrung bar gyis/ /de nas bla ma'i gsung des ni/ /sdom pa legs par gzung bar bya/ /ji ltar mgon pos bka' stsal pa/ /de bzhin du ni bdag gis spyad/ /dkon mchog gsum la skyabs 'gro la sogs dang //rdo rje la sogs gzung dang sbyin pa bzhi/ /rnam pa gsum gyis chos dang mchod pa dag /khyod kyis gsung gi bdag gis gzung bar bgyi/ /srog gcod pa la sogs pa dag las ni/ /so sor log dang gzhan yang sdom pa'i tshogs//'khor ba'i rgya mtsho pha rol bsgral ba'i phyir/ /mgon po yang dag bdag gis gzung bar bgyi/ /de nas dkyil 'khor pa'i bum pa rnams kyi chu pad+ma'i snod du gcig tu bsdus te/ rnal 'byor bzhi yi rim gyis mi bskyod par byas la/ /mchod cing snyoms par zhugs pas zhu zhing /chu'i rnam par bltas la rdo rje 'chang gi rang bzhin gyis slob ma'i spyi bor dbang bskur ro/ /dbang bskur ba ni/ oM badzra de ba dat+ta a b+hi Shiny+tsA mi/ zhes bya ba ni chu'i dbang ngo / /de nas lugs ma la sogs pa'i cod pan la de bzhin du rin chen 'byung ldan bsams la/snyoms par 'jug pas zhu zhing / dbu rgyan gyi rnam pa de'i spyi bor bzhag la/ oM rat+na d+h+r-i ka AHhUM/ zhes bya ba ste dbu rgyan gyi dbang ngo / /de bzhin du rdo rje 'od dpag tu med par bskyed la/ zhu zhing yang rdo rje'i rnam pa de'i lag par byin te/ di ring khyod ni dbang bskur ba//zhes bya ba la sogs pa'i tshigs su bcad pa dang / sngags kyis dbang bskur ba ni rdo rje'i dbang ngo / /de bzhin du dril bu don yod grub par bskyed la/ lag pa g.yon par gtad la/ 'di ni sangs rgyas thams cad kyi/ /zhes bya ba la sogs pas sbyin pa ni bdag po'i dbang ngo //sngar phog pa'i me tog gi gnas dang mthun par kye che ge mo rdo rje zhes bya ba ni ming gi dbang ngo / /de ni kun gzhi la sogs pa spong bas rig pa'i dbang yin no/ /de nas phyir mi ldog pa thob pa'i phyir/ gsol ba gdab pa la 'jug ste/phyir mi ldog pa'i 'khor lo la/ /mgon po dbang bskur bshad du gsol/ /'khor lo lha yi de nyid dang / /slob dpon gyi ni las rnams dang / /sangs rgyas kun gyi dam tshig dang / /sdom pa yang ni bdag la stsol/ /thar pa chen po'i grong khyer du//mgon po bdag ni gzhug tu gsol/ /zhes bya ba slob dpon gyis gsan nas rigs kyi bu slob dpon la smod pa dang / bde gshegs bka' las 'da' ba dang / rdo rje spun la sdang ba dang / byams pa spangs pa dang / byang chub kyi sems dang bral ba dang / theg pa gsum la smod pa dang /snod ma yin pa la gsang ba'i chos bshad pa dang / phung po smod pa dang / dag pa'i chos las som nyi dang / gdug pa la byams pa dang / chags pa dang bral ba dang / chos la mtha' gnyis bzhag pa dang / dad pa dang ldan pa'i sems smod pa dang /dam tshig dag mi bstan pa dang / /bud med rnams la mi smod pa'o/ /de bzhin du rig ma mi bsten ba dang / dam tshig mi sbyor ba dang / tshogs kyi 'khor lo la brtson pa dang / gsang ba'i chos ston pa dang / dad pa dang ldan pa'i sems can la dam pa'i chos log par ston pa dang /nyan thos kyi nang du zhag bdun gnas pa dang / nga rgyal dang / ma nges pa dang / ma sbyar ba dang / snod ma yin pa la gsang ba'i chos bstan par mi bya'o zhes slob mas thos nas/ rtsa ba'i ltung ba bcu bzhi dang / /sbom po sdig pa bcu dga' bar//di ring nas brtsams bdag nyid che/ /byang chub thob par mi bgyid do/ /zhes rdo rje slob dpon gyis thos nas phreng ba lag tu byin te/ oM badzra d+h+r-i ka ces bya ba la sogs pa'i sngags dang / rang gi yi dam yang khyod kyis bsgom pa dang bzla bar bya'o zhes sngags kyi dbang ngo //de nas rdo rjes mtshan pa'i rgyan sked pa la sogs pa la btags shing lag par rdo rje bzung la/ 'di ni sangs rgyas thams cad nyid/ /ces pa la sogs pas sbyin te/ rnam par dag pa bshad pa ni rdo rje brtul zhugs kyi dbang ngo / /de nas rnam pa gsum gyi spyod pa bstan zhing rna ba g.yas pa dang /g.yon pa la shing gi gdong pa gnyis dang / de dang 'dra ba phyag bzhi dang / ral pa'i thor tshugs btags la/ ji srid 'tsho'i bar du spyod pa 'di nyid kyis gnas par bya'o zhes spyod pa'i brtul zhugs so/ /de nas/slar yang khyod la 'chi ba med/ /theg pa chen po 'di nyid las/ /zil gyis mi gnon mi gnod pa/ /gang las 'jigs med rol bar gyis/ /zhes bya ba ni lung bstan pa'o/ /shAkya thub pa'i gzugs dang 'dra ba'i rdo rje slob dpon langs te/ g.yon pa'i chos gos kyi dkyil nas gzung la/g.yas pas mi 'jigs pa'i phyag rgya dang ldan pas/ oM sarba ta thA ga ta swa b+hA ba s+t+waM sarba badzra d+hA ra s+t+waM b+hA ba s+t+waM/ zhes bya ba ni dbugs dbyung ba'o/ /de nas rnam par snang mdzad dang / sgra rdo rje ma'i sngags bzlas pa'i 'khor lo dang / dung lag pa g.yas pa dang g.yon pa la byin te/ deng nas brtsams te/ chos kyi 'khor lo bskor ba dang / chos kyi dung bus shig ces bya ba ni/ 'khor lo dang dung gi dbang ngo / /de nas me long blangs te bstan par bya ba ni/ chos rnams gzugs brnyan lta bu ste/ /zhes bya ba la sogs pas me long gi dbang ngo //de nas mda' dang gzhu byin la/ phyogs bzhi dang steng 'og tu 'phang ba'i tshul gyis bdud bzhi las rgyal ba dang / chos kyi dbyings kyi de kho na nyid so sor rtog pa bshad pa ni mda' dang gzhu'i dbang ngo / /de nas gser gyi mig thur gyis//ji ltar mig mkhan rgyal po yis/ /rab rib ling tog bsal ba ltar/ /bu khyod kyi ni mi shes pa'i/ /rab rib rgyal ba dag gis bsal/ /zhes bya bas mig phye ba ni mig dbye ba'i dbang ngo / /de nas seng ge'i khri la sems dpa'i skyil mo krung gis 'dug tu bcug la/gdugs dang / rgyal mtshan dang / ba dan dang / bla re dang / rol mo'i sgras rdo rje slob dpon gyis rnam par rgyal ba'i bum pa blangs te/ nye ba'i sgrub pa po bzhi dang / dam tshig gi phyag rgya bzhi pos kyang rnam par snang mdzad la sogs pa'i bum pa dang /spyan la sogs pa'i bum pa brgyad blangs te/ rgyal ba'i dbang po thugs rdo rje/ /chos kyi dbyings kyi ngo bo nyid/ /gtso bo dam pa'i bkra shis gang / /khyod la de dang 'dra bar shog /ces bya ba la sogs pa dbyangs gcig dang / dus gcig tu bum pa dgu'i chu'i rgyun slob ma'i spyi bor phab cing /ji ltar bltams pa tsam gyis ni/ /de bzhin gshegs pas dbang bskur ba/ /lha yi chu ni dag pa yis/ /de bzhin bdag gis dbang bskur ro/ /zhes bya ba'i tshigs su bcad pa dang / oM sarba ta thA ga ta a b+hi She ka te sa ma ya shri ye hUM/zhes bya ba'i sngags kyis sbyin par bya'o/ /de nas nam mkha' nas de bzhin gshegs pa'i tshogs bkug cing tshangs pa'i sgo nas zhugs te/ ye shes sems dpa'i thugs ka'i sa bon gyi thig ler bsdu bar bya'o/ /de nas slob dpon gyis slob ma la mchod par bya ste/spyi bor me tog snying gar dri/ /spos dang mar me mdun du ste/ /lha bshos kyang ni mdun du sbyin/ /spos dang dril bus sad par bya/ /de nas/ mi bskyod rdo rje ye shes che/ /zhes bya ba la sogs pa tshigs su bcad pa lngas bstod la/ me tog gi phreng ba spyi bor btags la/oM su pra tiSh+Tha badzre swA hA/ zhes bya ba'i sngags kyis rab tu gnas par byas la dkyil 'khor gyi de kho na nyid dang / lha'i de kho na nyid bshad par bya ste/ de la dkyil 'khor gyi de kho na nyid ni mnyam pa nyid ye shes rnam par dag pas gru bzhi pa'o//dran pa nye bar gzhag pa ni sgo'o/ /rta babs ni bsam gtan no/ /rdo rje ra ba ni sngags kyi theg pa'i chos kyi 'khor lo rab tu bskor ba'o/ /me tog 'od ni de'i 'phro ba'o/ /tshon lnga ni de bzhin gshegs pa'i rang bzhin no/ /'dod yon ni 'dod pa'i yon tan lnga'i bdag nyid do//rin po che'i pha gu ni ye shes lnga'i bdag nyid do/ /dra ba dang dra ba phyed pa'i snam bu ni byang chub kyi yan lag gi rang bzhin no/ /sa gzhi ni de bzhin gshegs pa bzhi'i ngo bo'o/ /sna tshogs pad+ma ni shes rab kyi rang bzhin dang / zla ba dang nyi ma'i gdan ni thabs dang shes rab kyi rang bzhin no//rdo rje'i gur dang / rdo rje la sogs pa'i mtshan ma ni de bzhin gshegs pa'i ngo bo'o/ /ba dan ni gsung rab yan lag dgu'i rnam par dag pa dang / g.yer kha'i dra ba ni chos kyi sgra'i ngo bo'o/ /bcu gcig rdo rje ni sa bcu gcig go//'khor lo ni chos kyi 'khor lo bskor ba dang / ri dwags ni gti mug gi rang bzhin te/ gzhi'i dkyil 'khor gyi de kho na nyid do/ /ye shes lnga'i rang bzhin ni mi bskyod pa la sogs pa dang / sa la sogs pa rnam par dag pa ni spyan la sogs pa'o/ /phyi'i yul rnam par dag pa ni/gzugs rdo rje ma la sogs pa dang / skye mched drug dang / rtsa rgyus dang tshigs rnam par dag pa ni byang chub sems dpa' dang / bdud bzhi bcom pa ni gshin rje gshed la sogs pa dang / rnam par shes pa'i tshogs drug rnam par dag pa ni mi g.yo ba la sogs pa ste/lha'i de kho na nyid de phyir mi ldog pa'i dbang ngo / /de nas bris sku dang mda' la sogs pa dang bral ba'i sa phyogs gsang ba'i dbang thob pa'i phyir slob mas bla ma la gsol ba gdab par bya ste/ khams gsum las ni des grol ba'i/ /nam mkha' dang ni mnyam gyur nyid//'dod pa rnams kyis mi gos pa/ /dmigs med khyod la phyag 'tshal lo/ /zhes bya ba la sogs pa'i tshigs su bcad pa bzhis gsol ba btab pa gsan nas/ dam tshig gsum nyan pa'i don du bla mas bstan par bya ste/ spong ba lnga dang rig pa lnga//rdo rje zhes su bshad pa yin/ /zhes rdo rje'i de kho na nyid do/ /srid pa ngo bo nyid kyis dag /rang bzhin gyis ni srid bral byas/ /rang bzhin dag pa'i sems dpa' ni/ /srid pa dam pa 'grub pa yin/ /zhes bya ba ni dril bu'i de kho na nyid do/ /phyag rgya dam tshig bshad pa ste//yid kyi sku ni brtan phyir ro/ /gang gi sku kun brtan pas na/ /phyag rgya'i de nyid mngon par brjod/ /ces bya ba ni phyag rgya'i de kho na nyid do/ /de nas sdom pa gsum bshad par bya ste/ ma ra bi shu mu'i rdzas ni sbyang ba la sogs pa'i rin gyis bza' bar bya'o zhes sgron ma myang ba'o//go ku da ha na ni kha na ma tho ba med pa bza' bar bya ste/ lcags kyu myong ba'o/ /phyag rgya'i pad+ma la yang tsum+ba na bya ste/ b+ha ga la tsum+ba na smra bar bya'o/ /de rnams kyang slob mas ji ltar bka' stsal pa/ de bzhin bgyi'o zhes tshig gsan nas rdo rje slob dpon gyis slob mas phul ba'i lo bcu gnyis pa'i phyag rgya rigs lngas khyab pa/dang po snyoms par 'jug pa bya ste/ bde ba chen po'i sgras de bzhin gshegs pa thams cad nam mkha' nas ngag gi lam nas zhugs te/ rtsa dbus ma nas byang chub kyi sems zhu zhing pad+ma'i dbus su spros la/lag pas ma reg pa dung phor gyis blangs te slob ma'i khar gzhug go/ /slob mas kyang de bzhin gshegs pa thams cad 'dus pa'i blos longs spyad par bya'o/ /de nas lhag ma'i byang chub kyi sems rdo rje chu dang sbyar te/slob ma'i spyi bor sbyin par bya'o/ /slob mas kyang e ma'o bde ba chen po zhes tshig brjod par bya ste/ ji skad du zla gsang thig le las kyang / byang chub sems ni rin chen 'bar spros nas/ /rgyal ba ma lus yang dag dag pa'i sku/ / dag pa'i rdo rje ye shes las byung chu/ /rin chen char gyis spyi bor dbang bskur gsol/ /zhes bya ba ni gsang ba'i dbang bskur gyi cho ga'o/ /de nas rang spyod pa'am/ phyag rgya gzhan rdo rje slob dpon gyis slob ma la sbyin pa'i phyir gsol ba gdab pa byed du gzhug ste/khong stong khyod kyi sku la med/ /sha dang rus pa khrag kyang med/ /khyod kyis 'jig rten rjes 'jug phyir/ /'jig rten pa yi bya ba bstan/ /sku la nad min mi gtsang min/ /bkres dang skom pa yod ma yin/ /nam mkha'i 'ja' tshon dang mtshungs pa/ / khyod kyi sku ni bstan par mdzad/ /ces bya ba la sogs pas gsol ba btab pa gsan nas/ dam tshig dang sdom pa nyan du gzhug ste/ gang zhig dam tshig la sdang dang / /gang zhig dam tshig la smod pa/ /sangs rgyas bstan pa bsrung ba'i phyir/ /de dag 'bad de gsad par bya//sngags dang phyag rgya'i sbyor ba yis/ /ser sna can rnams bskyab pa'i phyir/ /gzhan gyi nor rnams phrogs pa na/ /khyod ni sdig pas gos mi 'gyur/ 'dod chags dang mtshungs bde ba med/ /de ni rgyal ba rnams phul na/ /sems can don du gzhan gyis smad//brtan pas dngos grub thob par 'gyur/ /rdo rje'i tshig gis brdzun smra ba/ don yod grub pa'i ting 'dzin gyis/ /tshig ni bden min smras pa na/ /khyod ni sdig pas gos mi 'gyur/ /rin chen 'byung ldan mgon po yi/ /ting nge 'dzin la yid zhugs pas//phan phyir rtsub mo smra bas na/ /khyod ni sdig pas gos mi 'gyur/ /da ni dam tshig lnga brjod par bya'o/ /de nas chags pas chags spong phyir/ /dpag med rdo rje bsgom par gyis/ /gti mug gti mug gis 'joms phyir/ /rnam par snang mdzad sku la brten//zhe sdang zhe sdang gis zhi phyir/ /mi bskyod yongs su bsam par gyis/ /nga rgyal nga rgyal gyis 'joms phyir/ /rin chen gtso bo bsgom par gyis/ /phrag dog phrag dog gis 'joms phyir/ /rta mchog rnam par bsgom par gyis/ /zhes sdom pa lnga sbyin par bya'o//des kyang brjod par bya ste/ ji ltar mgon pos bka' stsal pa/ /de lta bu ni bdag gis spyad/ /ces thos nas sngar bshad pa'i phyag rgya de la sbyin no/ /de nas khri la bzhugs pa'i phyag rgya phyogs kyi gos can skra grol zhing slob ma la 'di skad brjod par bya ste/bshang gci dag ni bza' ba ste/ /khyod kyis bud med spyod nus sam/ /rak+ta shu kra sha dang ni/ /bud med rnams ni mgu ba dang / /b+ha ga'i pad+ma tsum+ba na/ /ci bde bas ni smra bar gyis/ /slob mas kyang smra bar bya ste/ shu kra rak+ta la sogs dang / /lha mo bdag ni cis mi nus//bshang gci la sogs bsten par bgyi/ /bud med rnams ni mgu bar bgyi/ /b+ha ga la yang tsum+pa na/ /ji ltar bka' stsal de ltar bgyi/ /zhes gsan nas yid mgu bar gyur pa'i lha mos lag pa gnyis kyis pad+ma kha phye la slob ma la bstan par bya'o/ / e ma'o bdag gi pad+ma 'di/ /bde ba thams cad yang dag ldan/ /gang gis cho gas bsten pa na/ /bdag ni de yi mdun du gnas/ /'di ni chos dbyings dag pa ste/ /sems can khams ni rab grol ba/ /bde ba chen po rgyal po 'dir/ /dngos po kun gyis yang dag gnas//zhes smras te/ rtsa'i 'khor lo bstan par bya'o/ /'dir pad+ma'i dbus su rtsa sum cu rtsa gnyis gang yin pa de dag bcom ldan 'das mi bskyod pa dkyil 'khor pa thams cad kyi rang bzhin du shes par bya'o/ /de rnams kyi nang na rtsa lnga ni gtso bo ste/rtsa dbus ma gang yin pa de ni 'dod pa'i gdugs chu'i khams rgyu bas mi bskyod pa'i rang bzhin chos kyi dbyings kyi ye shes kyi ngo bo'o/ /mdun du gnas pa'i rtsa gang yin pa de ni/ lhas byin zhes bya ba bshang ba rgyu ba dang / bcom ldan 'das rnam par snang mdzad kyi rang bzhin me long lta bu'i ye shes kyi bdag nyid do//g.yas kyi rtsa rus sbal ma gang yin pa de ni khrag rgyu ba/ rin chen 'byung ldan gyi rang bzhin mnyam pa nyid kyi ye shes kyi ngo bo'o/ /rgyab tu nor rgyal ma gang yin pa de ni sha rgyu ba don yod grub pa'i rang bzhin bya ba nan tan sgrub pa'i bdag nyid do//de bzhin du g.yon gyi rtsa zla ba ma gang yin pa de ni byang chub kyi sems rgyu ba 'od dpag tu med pa'i rang bzhin so sor rtog pa'i ye shes kyi bdag nyid do/ /rdo rje bdud rtsi las/ b+ha ga'i dbus su nam mkha' gang //nam mkha' lnga yis brgyan pa ste/ /lte ba ge sar dang ldan pa/ /'dab ma brgyad kyis rnam par brgyan/ /bdud rtsi rgyu ba'i rtsa gang yin/ /b+ha ga'i dbus su rab tu gnas/ /rtsa gzhan sum cu rtsa gnyis ni/ /de yi dbus su gtso bo yin/ /zhes smos te slob ma las su rung ba'i rdo rje'i rtse mor snyoms par 'jug pas snang ba la sogs pa'i ye shes mtshon du gzhug go//de nas pad+mar spros pa'i byang chub kyi sems spro zhing lces myang bar bya ste shes rab kyi dbang ngo / /de nas slob mas bde ba chen po myong zhing / me tog gis gang ba'i thal mo sbyar te/rdo rje slob dpon gyi spyan sngar phyin nas khyod kyi sku drin gyis bdag gis de kho na nyid thob po zhes smos pa la/ slob dpon gyis smra bar bya ste/ rigs kyi bu byang chub kyi sems zhu ba'i dus su bde ba gang yin pa de ni snang ba dang / bsnyen pa dang / rnam pa sna tshogs pa'i skad cig ma'i ngo bo'o/ /yan lag thams cad du phyin pa'i dus su snang ba mched pa dang / nye bar bsgrub pa dang / rnam par smin pa'i skad cig ma'i bdag nyid do/ /de la dang po gsum rdo rje'i dkyil du phyin pa'i dus su snang ba thob pa dang / sgrub pa dang /rnam par 'joms pa'i skad cig ma'i bdag nyid do/ /rdo rje rtse mor gnas pa'i dus su 'od gsal ba dang / sgrub pa chen po dang / mtshan nyid dang bral ba'i skad cig ma'i bdag nyid do/ /de la dang po gsum ni spang bar bya ba dang bzhi pa ni blang bar bya ba'o zhes thos nas slob mas pus mo gnyis sa la btsugs te/dngos po thams cad dang bral ba/ /phung po khams dang skye mched rnams/ /gzung dang 'dzin pa rnams spangs pa/ /chos kun bdag med mnyam nyid kyis/ /rang sems mthong bar ma skyes pa//stong pa nyid kyi ngo bo'o/ /zhes brjod pa/ bla ma la me tog dbul zhing yon dbul bar bya ste/ gser dang dngul dang rin po che/ /ba glang rta dang glang po rnams/ /khang pa zhing dang bzhon pa dang / /rna cha mgul rgyan gdu bu dang / /dar dang za 'og na bza' dang / /nyal khri dang ni gdan rnams dang //bran dang bran mo btsun mo dang / /shin tu yid 'ong btsun mo dang / /bdag nyid kyang ni phul ba na/ /de las lhag ma gzhan ci mchis/ /zhes bya ba'o/ /gsang ba thams cad las bdag nyid bla ma la phul nas/ slar yang rin gyis bslu bar bya//zhes shes rab ye shes kyi dbang ste/ dbang bskur ba'i cho ga'o/ /de nas gtor ma bya ste/ de'i rim pa ni mdun gyi nam mkha' la 'dab ma sum cu rtsa gnyis pa'i sna tshogs pad+ma dmigs te/ de'i lte ba dang 'dab ma rnams la cig car du skyes pa/sum cu rtsa gnyis kyi bdag nyid kyi dkyil 'khor bsams te/ rang gi lha'i nga rgyal gyis spos dang / dril bus bkug la mdun du rlung dang me'i dkyil 'khor gyi steng du pad+ma'i snod la bdud rtsi lnga spyan ba la sogs pa'i rim gyis bsgrubs te/oM sarba ta thA ga ta pri Na ya me swA hA/ zhes bya ba'i sngags dang / snyoms par 'jug pa'i phyag rgyas phul la shing drung gi rtsa bar gtang ngo / /khyod kyis zhes bya ba la sogs pas gshegs su gsol ba ni dkyil 'khor gyi 'khor lo'i gtor ma'i cho ga'o/ / de nas de bzhin du mdun gyi nam mkha' la rtsibs bcu pa'i 'khor lo ser po dmigs la/ de'i dbus su bcom ldan 'das mi bskyod pa dmigs la/ de'i thugs ka'i 'od zer gyis khro bo bcu spros la/ rang rang gi rtsibs su dgod cing sems dpa' gsum gyi bdag nyid du byas la ye shes kyi 'khor lo bcug ste/spos dang / dril bu'i sgra dang / yi ge brgya pa brjod pas dgug par bya'o/ /de nas dkyil 'khor gyi phyogs dang mtshams bcu la chu'i maN+Dal bcu byas te/ de'i steng du snod bcu bza' ba la sogs pa dang / bcas pa bzhag cing bdud rtsir byas te/ rang rang gi sngags kyis dbul lo/ /de'i sngags ni/ na maH sa man+ta b+hud+d+he b+h+yo na mo badzra mung+ga ra hastA naya tsaN+Da maN+Dal oM k+She pa ka rA ya hUM phaT/ gshin rje gshed kyi'o/ /namaHsa man+ta bud+d+he b+h+yo ma hA daN+Da d+ha ra bi d+ha su rA su ra mar+d+ha na b+hu tra tAM nirma thA hUM phaT/shes rab mthar byed kyi'o/ /na maHsa man+ta bud+d+he b+ho/ hu lu hu lu ma hA pad+ma a mr-i te ku ru ma hA bi Sha NA aH/ pad+ma mthar byed kyi'o/ /na maH sa man+ta bud+d+he b+h+yo/ na mo badzra kro d+hA ya ma hA daM Sh+T+wo ta ka Ta b+he+e ra bA ya badzra san+do haM dar+pA ya a mr-i ta kuN+Da li hUM phaT/ bgegs mthar byed kyi'o/ /na maHsa man+ta bud+d+he b+ho ya ma daN+DA ya nI la daN+DA ya tu ru tu ru/ mu ru mu ru/ sarba duSh+TAM mA ra ya mA ra ya hUM phaT/ dbyig sngon gyi'o/ /na maHsa maN+Ta bud+d+he b+h+yo/ na mo ma hA ba lA ya u tsuSh+Tha po d+ha rA dzA ya sarba nA ga naM/ hr-i da yaM tA DA ya hUM phaT/ stobs po che'o/ /na maHsa man+ta bud+d+he b+h+yo/ /na mo a tsa la kA na tset+ta tsit+ta/ mot+ta mot+ta/ tut+ta tut+ta/ g+ha g+ha/ g+hA Ta ya g+hA Ta ya hUM phaT/ mi g.yo ba'i 'o/ /na maHsa man+ta bud+d+he b+ho/ /Tak+ki hUM dzaH 'dong ba'i rgyal po'i'o/ /oM suM b+ha ni suM b+ha hUM hUM phaT/ gr-i h+Na gr-i h+Na hUM hUM phaT/gr-i h+NA pa ya gr-i h+NA pa ya hUM hUM phaT/ oM A na ya ho b+ha ga bA na badzra rA dza hUM hUM phaT/ gnod mdzes kyi'o/ /na maH sa ma n+ta bud+d+hA nAM/ na maH sa man+ta d+ha rmA nAM/ na maH sa man+ta saM g+hA nAM/ oM si tA ta pa tre/ oM bi ma la/ oM shaM ka ra/ oM pra t+yaM gi ra badzra uSh+NI Sha tsakra brti sarba yan+t+ra man+t+ra mU la karma ban+d+ha naM/tA DA nAM/ ki lA nAM bA ma ma kr-i tam ta da sarbA n+du/ ts+tshin+d+ha ts+tshin+d+ha/ b+hin+da b+hin+da/ tsi ri tsi ri/ gi ri gi ri ma ra ma ra/ hUM hUM hUM hUM hUM hUM hUM hUM hUM hUM phaT phaT phaT swA hA/ gtsug tor 'khor los sgyur ba'o/ /de dag brjod cing rang rang gi gnas su gtor ma gtang ngo //gtor ma gtang ba ni khro bo'i rgyal po'i gtor ma'i cho ga'o/ /de nas rgyal po chen po bzhi'i gtor ma'i rim pa ni 'di yin te/ re zhig dang po'i dkyil 'khor gyi phyogs bzhir bza' ba la sogs pas gang ba'i snod bzhi bzhag la/mdun du dang po rang gi ming gi yi ge yongs su gyur pa las rgyal po chen po bzhi dkar po dang / ser po dang / dmar po dang / nag po rnams khro ba dang / rmog dang bcas pa/ dung dang ral gri 'chang ba/ sems dpa' gsum gyi bdag nyid ye shes sems dpa' dgug cing bzhugs par bsams la/snga ma bzhin du mngon du byas la rang rang gi sngags kyis gtor ma sbyin par bya ste/ oM d+h+r-i Ta raSh+Tha ya gan+d+ha r+b+ha se na de ba ta ye maM ba lim pra tIts+tsha sa ma ya/ ma nu sma ra AH hUM phaT swA hA/ yul 'khor skyong gi'o/ /oM bi rU b+ha kA ya ma hA kuM b+ha N+da de ba ta ye maM ba liM pra tIts+tsha sa ma ye ma nu sma ra AH hUM phaT swA hA/'phags skyes po'i'o/ /oM bi rU pAk+ShA ya ma hA nA ga de ba te ye ma ba liM pra tIts+tsha sa ma ya ma nu sma ra AH hUM phaT swA hA/ mig mi bzang gi'o/ /oM bai shra ba NA ya ma hA yak+Sha de ba ta ye maM ba liM pA tI ts+tsha sa ma ya ma nu sma ra AH hUM phaT swA hA/rnam thos sras kyi'o/ /sngags de rnams kyis byin gyis brlabs la/ rang rang gi phyogs su gtor ma gtang ba ni rgyal po chen po bzhi'i gtor ma'i cho ga'o/ /de nas 'byung po thams cad kyi gtor ma ni dang po nam mkha' la paM las pad+ma chen po 'dab ma brgyad pa dmar po bsgoms la/de'i lte bar chos 'byung gi nang du gnas pa'i rdo rje 'chang chen po bsams la grwa gsum la khams gsum dang / 'dab ma brgyad la brgya byin la sogs pa 'jig rten skyong ba brgyad dang /'dab ma'i 'og tu klu'i rgyal po brgyad dang / sdong bu la ri pa ji lta ba bzhin du lha ma yin dang / yi dwags dang / dud 'gro dang / dmyal ba pa rnams bsams la/ de rnams kyi sku la sogs pa byin gyis brlabs te rin chen snod dam bum pa bza' ba la sogs pas gang bar byas te/bdud rtsir byas nas/ spos gtul ba dang / dril bu'i sgras de rnams mngon du byas te/ mchod yon dang / zhabs bsil sbyin pa sngon du 'gro bar/ oM a kA ro mu khaM zhes bya ba la sogs pa'i sngags dang snyoms par 'jug pa'i phyag rgya'am/ut+pa la'i phyag rgyas gtog cig la sogs pas gtor ma gtang ba ni 'byung po thams cad kyi gtor ma'i cho ga ste yan lag bcu pa'o/ /de nas zhag bdun pa la dkyil 'khor pa rnams gshegs su gsol te/nang par langs nas mchod pa rnam pa lngas dkyil 'khor pa rnams mchod la thal mo sbyar zhing / /khyod kyis sems can kun don mdzad/ /rjes su mthun pa'i dngos grub stsol/ /sangs rgyas yul du gshegs su gsol/ / slar yang gshegs par mdzad du gsol/ /bskal pa'am bskal pa brgya yi bar/ /gang gis gzugs sku gnas gyur pa/ /sa dang chu dang me dang rlung / /lha rnams thams cad srung bar mdzod/ /thugs ni shin tu dgyes gyur nas/ /rang gi gnas su gshegs par mdzod//bu dang tsha bo slob mar bcas/ /sangs rgyas yul du gshegs nas kyang / /slob dpon srung bar mdzad du gsol/ /shes rab ye shes dri ma med/ /dpe med bsam mi khyab la 'dud/ /ces brjod pas yi ge muH'i mtha' can gyi yi ge brgya pas gshegs su gsol bar bya'o//dkyil 'khor gyi phur bu dang mnga' rnams phyung la 'o mas bkrus te/ rdul tshon chu bo la bskyal zhing / ba'i lci ba dang chus dkyil 'khor gyis gzhi byugs la me tog bkram nas phyag 'tshal zhing smon lam btab nas langs te/ji ltar bde bas gnas par bya ba ni gshegs su gsol ba'i cho ga ste yan lag bcu gcig pa'o/ /de nas nyi ma nub par gyur nas dben pa'i phyogs su thabs dang shes rab gnyis su med pa'i sbyor bas sems lhag par mos te/ rang gi snying gar khaM las skyes pa'i sna tshogs rdo rje'i chang gzungs la yi ge khaM bkod cing /de la sems gtad nas mig yor lta bur dmigs nas nyal bar bya'o/ /de'i sngon du mthe bo dang gung mos se gol bcu dang gnod mdzes kyi rgyal pos phyogs bcing ba byas na rmi lam bzang po mthong bar 'gyur ro//gal te rmi lam ngan pa mthong na de'i tshe khro bo'i gtor ma gtang na rmi lam bzang po mthong bar 'gyur ro/ /rmi lam bzang po yang bla ma la smra bar bya ste/ de mi bzhugs na bris sku dang gzugs sku'i spyan sngar smra'i/ gzhan su la yang smra bar mi bya'o zhes bya ba ste yan lag bcu gnyis pa'o//bsod nams yongs su bsngo ba bshad par bya ste/ dpal rdor phreng ba mchog gi srub shing gis/ /zab mo 'dus pa'i rgya mtsho bsrubs byas nas/ /sgrub thabs bdud rtsi rnyad pa gang yin pa/ /'jig rten kun des 'chi las 'das par shog /ces smos te/ dpal rdo rje phreng ba zhes bya ba ni bshad pa'i rgyud de stong phrag bcu gnyis pa'o/ /de nyid mchog gi srub shing ste/ /srub par byed pa'i shing dam pa des so/ /zab mo ni zab pa ste mtha' drug la sogs pa'i don gtso bor gyur pa'o//'dus pa'i rgya mtsho ni gsang ba 'dus pa'i rgya mtsho'o/ /bsrubs byas nas ni rab tu bskyod pa ste/ rnam par sbyangs nas bdag gi sgrub thabs ni mdor bsdus pa zhes bya ba sgrub pa'i thabs yan lag gsum cu rtsa brgyad pa/ bdud rtsi dang 'dra ba rnyed pa gang yin pa des ni 'jig rten kun te/ma lus lus pa med pa'i sems can gyi khams 'chi ba las 'das par shog ces bya ba skye ba dang / rga ba dang / 'chi ba las 'das pa'i rdo rje 'chang nyid thob par shog ces bsngo ba yin no/ /sa ni dang po thob pa yi/ /dpal ldan klu sgrub nyi ma yis//'dus pa'i mtsho skyes rgyas pa'i phyir/ /sgrub thabs 'od zer spros par mdzad/ /'gro ba la ni snang mdzad pa/ /mdor bsdus pa zhes bya ba 'di/ /yang dag man ngag la brten te/ /de ni bdag gis gsal bar byas/ /rtogs med dbul po'i sdug bsngal 'joms byed pa//'dus pa'i rgyud kyi rgya mtsho'i nang nas byung / /blo bzangs nor bu mkhan gyis legs byas pa/ /skye bo rnams kyi mgul par rgyan du 'gyur/ /rin chen phreng ba zhes bya ba/ /skye bo dam pa'i snying 'phrog cing / /rnal 'byor tshul rgyan gyis brgyus pa//mdor bsdus pa yi sgrub thabs 'grel/ /gangs dang kun+da zla ba ltar dkar ba'i/ /dge ba chen po bdag gis gang rnyed pa/ /'khor ba ma rungs btson ra rnams spangs nas/ /des ni 'gro bas rdo rje 'chang thob shog /mdor bsdus pa'i sgrub thabs kyi 'grel pa rin chen phreng ba zhes bya ba slob dpon rin chen 'byung gnas zhi ba'i zhal snga nas mdzad pa rdzogs so/