CLOSE WINDOW

D1819
བོད་ཡིག

@##/ /rgya gar skad du/ shrI gu h+ya sa mA dza maN+Da la no pi ka /bod skad du/ dpal gsang ba 'dus pa'i dkyil 'khor gyi cho ga /oM dpal rdo rje sems dpa' la phyag 'tshal lo/ /rdo rje 'dzin 'di yon tan gyi/ /rin chen 'byung gnas la btud nas/ /man ngag ji ltar rnyed pa bzhin//dkyil 'khor cho ga bri bar bya/ /dang po re zhig slob dpon sngags kyi tshul rig cing sems can gyi don la gcig tu gzhol ba/ sngags zlos pa dang ldan pa la slob mas dkyil 'khor bri ba'i phyir lan gsum du gsol ba gdab par bya'o/ / de nas rang gi snying ga'i sa bon gyi 'od zer gyis slob ma'i sems las byung ba'i bgegs bsal la bdud rtsi 'khyil pa'i phreng ba'i sngags sam mtshan gyi sngags lan bdun bzlas pas bsrung bar bya'o/ /de nas bdag nyid lha'i rnal 'byor dang ldan pas dkyil 'khor gyi gtso bo'i sngags 'bum phrag bzlas par byas la/dkyil 'khor pa rnams kyi ni khri phrag re re bzlas pas sngon du bsnyen pa bya'o/ /de ltar mi nus na tshes dang skar ma bzang po la khrus byas la gos sar pa bsgos te/ bcom ldan 'das 'jig rten dbang phyug gi spyan sngar maN+Dal byas nas mchod pa phul te/oM mu tsi li swA hA/ oM mo hI ni swA hA/ oM dan+ti li swA hA/ zhes bya ba'i sngags khri phrag gcig bzlas la bcom ldan 'das kyi spyan sngar nyal lo/ /de nas rmi lam dge ba dang sdig pa bltas te/ gal te dge ba mthong na ni dkyil 'khor bri'o//de yang ri la sogs pa nyams dga' zhing slob ma dang rjes su mthun pa'i gnas su song ste byang dang shar du gzhol ba'i sa'i cha brtags la lci ba'i maN+Dal byas te/ dri zhim po'i chus bsang gtor byas la bdud rtsi 'khyil pa'i sngags zlos shing mtho gang tsam du sa'i dong brkos la lci bas byugs te sngags de nyid bzlas pa'i chus dgang ngo //de nas yi ge gsum gyi sngags zlos shing shar phyogs su gom pa brgyar phyin nas slar log nas blta'o/ /gal te chu skams par gyur na der mi bya ste gzhan du spo'o/ /ci ste gang bar gnas na ni dge ba'i mtshan ma yin no//de las bri bar gyur na ni der gnas te khro bo'i dkyil 'khor bsgoms la gnod mdzes la bka' bsgo bas phyogs skyong rnams bkug ste gtor ma byin nas mngon par rtogs pa ji lta ba bzhin du bdud rtsi 'khyil pa'i phur pas gdab po/ / de nas phur pa las byung ba'i 'od kyis rdo rje'i sa gzhi dang / steng du rdo rje'i dra ba dang / phyogs mtshams su rdo rje'i ra ba dang / phyi rol du me lce'i phreng bas bskor bar byas la sa'i lha mo sku mdog ser mo phyag gnyis na gser gyi bum pa bsnams pa blos bkug la me tog la sogs pas mchod de/slob dpon gyis gsol ba gdab par bya ste/ skyob pa sangs rgyas thams cad la/ /lha mo khyod ni dbang du gyur/ /rin chen sna tshogs 'dzin pa yis/ /sa 'dir dkyil 'khor bri bar bya/ /zhes brjod de/ nam mkha' la yid kyis bteg ste gzhag go//de nas las byed pa bdud rtsi 'khyil par bsgoms la de'i sngags bzlas pa'i chus bsang gtor byas te/ dkyil 'khor gyis pus nub tsam brkos nas gyo mo dang sol ba la sogs pa'i sa'i nad rnams bsal te/ dri zhim po dang bcas pa'i sa de nyid kyis dgang ngo //de skad du yang gsungs pa/ pus mo nub tsam brkos nas su/ /sa de nyid kyis dgang bar byas/ /gal te lhag par gyur na ni/ /der ni dngos grub yod par bshad/ /ces pa'o/ /de nas mtshan nyid dang ldan par bcags te/ der dkyil 'khor gyi khang pa bya'o//slob dpon gyis ni rig sngags bzla bar bya'o/ /khang pa zin nas der slob dpon rang gi lha'i rnal 'byor dang ldan pas/ oM b+hu khaM zhes bya bas sa gzhi nam mkha'i rang bzhin du byas la/ oM hUM hUM hUM zhes bya bas sa gzhi rdo rje'i rang bzhin du bsgoms la/ oM me di nI badzrI b+ha ba badzra ban+d+ha hUM zhes bya bas byin gyis brlabs te/ 'di ni sa sbyang ba'i cho ga'o/ /de nas rdo rje dril bu thogs pa'i slob ma bzhi dkyil 'khor gyi sa'i phyogs bzhir bzhag la slob dpon rdo rje dang dril bu thogs pa dbus su 'dug ste/ dkyil 'khor gyi 'khor lo'i ting nge 'dzin rdzogs par byas la gos sar pa bgos shing me tog gi phreng ba dang cod pan la sogs pa dang ldan pa'i slob ma bzhis shar phyogs nas brtsams te/rim bzhin du gsol ba gdab bo/ /de la shar phyogs nas gsol ba gdab pa'i tshig ni/ de bzhin gshegs pa kun zhi ba//de bzhin gshegs pa kun gyi gnas/ /chos kun bdag med pa yi mchog /dkyil 'khor dam pa bshad du gsol/ /gnyis pa'i ni/ mtshan nyid thams cad yang dag rdzogs/ /mtshan min thams cad rnam par spangs/ /kun du bzang po sku yi mchog /dkyil 'khor dam pa bshad du gsol/ /gsum pa'i ni/ zhi ba'i chos ni mchog las byung / /ye shes spyod pas rnam sbyang ba/ /kun du bzang po gsung gi mchog /dkyil 'khor snying po bshad du gsol/ /bzhi pa'i ni/ sems can kun gyi sems chen po/ /rang bzhin dag pa dri ma med//kun du bzang po thugs kyi mchog /dkyil 'khor snying po bshad du gsol/ /de ltar gsol ba btab pa'i mthar langs te bsgoms pa'i dkyil 'khor gyi 'khor lo nam mkha' la bteg la bdag nyid bdud rtsi 'khyil bar bsgoms nas/ mig g.yas pa dang g.yon par ma dang Ta las nyi ma dang zla ba'i dkyil 'khor bsams te/rkang mthil du hUM las sna tshogs rdo rje gdengs pa bltas la dbang ldan nas brtsams te hUM zhes brjod cing rdo rje 'gros kyis dkyil 'khor gyi sa gzhi kun du bskor las de na gnas pa'i bgegs rnams la 'di skad ces bsgo'o//lus ngag sems la gnas pa yi/ /bgegs kyi tshogs kun nga la nyon/ /nga ni dpal ldan rdo rje 'dzin/ /bka' yi 'khor lo sbyor ba yi/ /rdo rje rab tu 'bar ba 'dis/ /sku gsum las byung dgas par bya/ /gal te dam tshig las 'das na/ /tshal par 'gas par gdon mi za//zhes bya ba 'dis bgegs rnams bskrad la slar yang sgrub thabs las 'byung ba bzhin du gnod mdzes la bka' bsgo bas bgegs rnams la phur bus gdab pa dang / sa gzhi dang ra ba la sogs pa bsgoms la/ slar yang sa'i lha mo bkug ste mchod pa byas nas dkyil 'khor bri bar bya ba'i phyir gsol ba gdab par bya'o//skyob pa sangs rgyas thams cad kyi/ /spyod pa'i tshul gyi khyad par ni/ /sa dang pha rol phyin pa la/ /lha mo khyod ni dbang du gyur/ /shAkya seng ge skyob pa yis/ / ji ltar bdud kyi stobs bcom pa/ /de bzhin bdag gis bdud las ni/ /rgyal bar byas nas dkyil 'khor bri/ /zhes bya'o/ /de nas dkyil 'khor gyi sa'i char dri zhim pos byugs te/ me tog dri zhim pos gtor ba 'di ni sa gzung ba'i cho ga'o/ /de nas dkyil 'khor gyi sa'i cha so so'i gnas su bdud rtsi lngas maN+Dal tshom bu sum cu rtsa gnyis byas la nam mkha' la gnas pa'i lha'i 'khor lo spyan drangs te/so so'i gnas su bzhugs su gsol ba la me tog la sogs pa'i mchod pa'i yo byad rnams kyis mchod de bdug spos kyis bdug cing dril bu dkrol nas bstod pa 'dis bstod par bya'o//mi bskyod pa ni ye shes che/ /chos kyi dbyings ni mkha' chen po/ /rdo rje gsum mchog dkyil 'khor gsum/ /rdo rje'i dbyings la phyag 'tshal bstod/ /rnam par snang mdzad rab tu dag /rdo rje zhi ba dga' ba che//rang bzhin 'od gsal mchog gi mchog /ston pa rdo rje phyag 'tshal bstod/ /rin chen rgyal po rab tu zab/ /rdo rje nam mkha' dri ma med/ /rang bzhin dag pas gos pa med/ /rdo rje sku la phyag 'tshal bstod/ /rdo rje dpag med rgyal po che/ /mi rtog nam mkha' rdo rje 'dzin//'dod chags pha rol byin pa brnyes/ /rdo rje gsung la phyag 'tshal bstod/ /don yod rdo rje rdzogs sangs rgyas/ /bsam pa thams cad rdzogs mdzad pa/ /rang bzhin dag pa nyid las byung / /rdo rje sems dpa' phyag 'tshal bstod/ /ces bya bas bstod la phyag byas te/pus mo g.yas pa'i lha nga sa la btsugs nas thal mo sbyar ba btud de 'og nas 'byung ba 'dis lha rnams la snyan gsan dbab par bya'o/ /bcom ldan rdo rje che ge mo/ /rig pa'i rgyal po phyag 'tshal bstod/ /khyed rnams la ni mchod pa dang / /slob ma rnams la brtse ba'i phyir//mgon po thugs rje'i bdag nyid kyis/ /dkyil 'khor 'dir ni bri bar 'tshal/ /bcom ldan bdag ni gus pa la/ /de bas bka' drin mdzad par 'os/ /'gro ba'i 'khor lo don mdzad pa'i/ /sangs rgyas bdag la dgongs su gsol/ / byang chub sems dpa'i dgra bcom dang / /gang gzhan gsang sngags lha rnams dang / /'jig rten skyong ba'i lha gang yin/ /'byung po gang dag mthu chen dang / /bstan la dga' ba'i sems can ni/ /gang su rdo rje'i mig ldan rnams/ /rdo rje can bdag che ge mos/ /che ge 'byung ba'i dkyil 'khor ni//yo byad ji ltar 'byor pa yis/ /'gro ba dag phyir bdag 'dri na/ /thugs rjes nye bar dgongs nas ni/ /bdag dang slob mar bcas pa yi/ /tshogs pa kun la dkyil 'khor du/ /khyod kyis byin brlab mdzad par 'os/ /zhes bya ba 'di lan gsum brjod de//'di ni lha sta gon la gnas pa'i cho ga'o/ /de nas dkyil 'khor gyi gtso bo dang dkyil 'khor pa'i sngags kyang ci nus par bzlas la gshegs su gsol ba'i phyir slar yang mchod pa dang gtor ma phul la/ dri'i maN+Dal la bzhugs pa rnams yid kyis nam mkha' la bteg ste/bkod nas rim pa 'dis dkyil 'khor thig gdab bo/ /tshangs pa'i thig gnyis btab nas su/ /mtshams kyi thig gnyis bri bar bya/ /gru bzhi dang ni skud pa bzhi/ /dkyil 'khor tshad bzhin gzhal te gdab/ /sgo ni 'khor lo'i brgyad cha ru/ /tshangs skud gnyis kyi ngos su bya//sgo yi ngos su tshon rtsi'i sa/ /de phyed skud pa gnyis kyis bri/ /sgo yi bzhi char yang btab nas/ /sgo phyed gsum yang de nas gdab/ /mtshams su sgo yi thad du ni/ /lha yi snam bu'i thig gdab bya/ /ri mo lnga yi sa yi cha/ /sgo yi bzhi char gdab par bya//kha khyer sgo yi phyed du ste/ /de yi phyed ni rin chen sa/ /dra ba dang ni dra phyed gnas/ /kha khyer dang ni mnyam par bya/ /de phyed ba gam sa yin te/ /'di ni thig skud bri ba yin/ /so so'i gnas su thig bri ba/ /skye bo rang gis shes sla zhing / /gzhan du lta bar sla bas na/ /'dir ni spros te ma bshad do//dbang ldan mtshams nas brtsams nas ni/ /mtshams su so sor bor ba la/ /pad+ma rdo rje phreng ba dag /zlum por kun du bskor bar bya/ /snying po'i dkyil 'khor bskor ba'o/ /rdo rje phreng ba de bzhin bya/ /sgo yi sum 'gyur twa ra Na//shes rab can gyis bri bya ste/ /snam bu bcu gcig phye ba la/ /ci ltar mdzes par brtag par bya/ /de nas ye shes kyi skud pa tshon rtsi lngas kha bsgyur zhing dkyil 'khor gyi nyis 'gyur dang ldan pa snod dri zhim par gzhag ste 'bar ba'i lta bas de bzhin gshegs pa thams cad kyi thugs ka nas ye shes kyi thig skud drangs te der bstims nas bdud rtsi rnam pa lngas byugs te/yi ge gsum mngon par bzlas pas byin kyis brlab po/ /de nas oM e h+ye hi b+ha ga wAn pra yats+tsha sha sha ta sU traM sa tsakra sU tra nA ya swA hA hUM zhes bya bas nam mkha' la bzhugs pa'i dkyil 'khor la thig skud bslang bar bya'o//de nas oM a n+yo n+yA nu ga ta sarba d+harma hUM/ oM a n+yo n+yA nu pra be sha sarba d+harma hUM/ zhes bya bas slob ma bdud rtsi 'khyil par bsgoms pa dang / lan cig tu skud pa bsgril nas bdag dang slob ma gnyis ka yi ge dz+dza gsum bzlas pas bskul la g.yon pa rdo rje khu tshur lte bar bzhag la skud pa bzung ste/slob dpon nub sgor gnas la/ slob ma shar sgor gnas pa dang / oM badzra sU tra sa ma ya mA ti kra ma hUM zhes brjod de gnam thig dang sa thig gdab bo/ /de yang sems can gyi dus su ni/ nam mkha' khyab pa'i de bzhin gshegs//thig skud sgra yis bskul nas su/ /de dag 'dir ni gshegs par mdzad/ /de nas skor phyogs kyis gshin rje'i phyogs su song ste byang phyogs na gnas pa'i slob ma de bzhin du thig gdab bo/ /de nas me'i mtshams su song ste dbang ldan gyi mtshams na gnas pa dang /shar phyogs kyi thig gdab bo/ /yang rlung mtshams su song ste bden bral gyi mtshams na gnas pa dang / nub logs kyi thig gdab bo/ /de nas de nyid du bsgyur te dbang ldan gyi mtshams na gnas pa dang byang logs kyi thig gdab bo/ /yang me'i mtshams su song ste bden bral gyi mtshams na gnas pa dang lho ngos kyi thig gdab bo//de nyid du gnas nas rlung mtshams su gnas pa dang mtshams kyi thig gdab bo/ /bden bral gyi mtshams su song ste dbang ldan gyi mtshams na gnas pa dang / mtshams kyi thig gnyis pa gdab bo//de nas thig skud nyis 'gyur du byas te slob dpon dbus su 'dug nas slob mas dbang ldan gyi mtshams nas phyi nang gi 'khor lo bskor bar bya'o/ /de ltar ye shes kyi thig btab nas bdag nyid khro zhing bsgyings pa dang bcas pas smin ma bcum pa'i khro bo'i lta bas bltas te sgo phye la phyi rol du phyung ste/oM AHmuHzhes bya bas ye shes kyi skud pa gshegs su gsol lo/ /'di ni ye shes kyi thig gdab pa'i cho ga'o/ /de nas de bzhin gshegs pa lnga'i kha dog tu btsos pa'i tshon rtsi snga ma ltar snod bzang por bzhag la 'bar ba'i lta bas de bzhin gshegs pa rnams las tshon rtsi bkug ste/so so'i kha dog ji lta ba bzhin du bstims la oM badzra tsi tra sa ma ya hUM/ zhes bya bas mngon par bsngags pas byin gyis brlab bo/ /de nas oM badzra be+e ga zhes bya bas ye shes kyi skud pa yid kyis bteg ste/ tshon rtsi rnams bzung la 'di skad ces brjod par bya'o/ /chos dbyings 'di ni rnam par dag /sems can khams ni rab sgrol ba/ /rdo rje sems dpa' rgyal po che/ /dkyil 'khor rang gis bri bar bya/ /de nas tshon rtsi khu tshur g.yon pas bzung ste/ dbang ldan gyi mtshams nas brtsams te ri mo rnams ma 'byar zhing drang la mtho ba g.yas skor du bri'o//rim pa ni sngon po dang / dkar po dang / ser po dang / dmar po dang / ljang gu rnams te slob dpon rang gis de ltar bris la kham phor la sogs pas bkab ste/ rdo rje shugs kyis 'jug pa dang 'byung ba bya'o//de'i 'og tu gzhan gyis ci dga' bar bri'o/ /'di ni tshon bri ba'i dam tshig go/ /de la mi bskyod pa gtso bor gyur pa'i dkyil 'khor la ni rdo rje phreng ba'i nang gi sa gzhi sngon por byas la/ shar gyi char ni dkar po'o/ /lhor ni ser po'o/ /nub ni dmar po'o//byang ni ljang gu'o/ /snying po'i dkyil 'khor gyi dbus su ni sna tshogs pad+ma dang rdo rje'i gdan la rdo rje rtse lnga pa sngon po phyag rgya dang bcas pas bri'o/ /shar du ni 'khor lo dang bcas pa'i pad+ma la 'khor lo dkar po'o/ /de bzhin du lhor ni rin po che la gnas pa'i rin po che ser po'o//nub tu ni pad+ma la gnas pa'i pad+ma dmar po'o/ /byang du ni sna tshogs rdo rje la gnas pa'i rdo rje ljang gu'o/ /mtshams rnams su ni gdan de dag nyid la 'khor lo dang rdo rje dang pad+ma dang sna tshogs rdo rje rnams so/ /rim pa gnyis par gdan de dag nyid la me mtshams la sogs par me long dang /pi wang dang dri'i dung chos dang ro snod rnams so/ /kha dog rnams kyang sngar bshad pa bzhin no/ /de'i snam bu'i shar phyogs kyi ngos gnyis su ni gdan de nyid la nA ga puSh+pa dkar po dang / 'khor lo dkar po'o/ /lhor ni rin po che ser po gnyis so//nub tu ni pad+ma dmar po gnyis so/ /byang du ni ral gri ljang gu gnyis so/ /shar la sogs pa'i sgo bzhir ni pad+ma dang nyi ma'i gdan la rdo rje tho ba sngon po dang / rdo rje dbyig pa dkar po dang / sdong bu dang bcas pa'i pad+ma dmar po dang / sna tshogs rdo rje ljang gu'o//dbang ldan la sogs pa'i mtshams su ni pad+ma dang nyi ma la ral gri sngon po dang / rdo rje dang / rdo rje sngon pos mtshan pa'i dbyig pa dang / yang dbyig pa'o/ /steng 'og tu pad+ma dang nyi ma la rdo rje nag po dang sngon po'o/ /de nas bum pa mgrin pa ring zhing mchu 'phyang pa lto ba yangs pa rnams nas dang gro dang mon sran gre'u dang /'bras kyi so ba dang / til te 'bru lnga dang / br-i ha ti dang / kaN+Da ka ri dang / a pa rA dzi ta dkar po dang / ha sa dang / ha sa de ba ste sman lnga dang / gser dang / dngul dang / byi ru dang / mu tig dang mu men te rin po che lnga rnams de'i nang du blugs la dri zhim po'i chus bkang ste/snam bu sar pas mgrin pa bcings la shing los kha brgyan pa'i bum pa rim pa 'dis sta gon la gnas par bya'o/ /bdag nyid dkyil 'khor gyi rnal 'byor la gnas nas rnam par rgyal ba'i bum pa'i nang du dkyil 'khor gyi bdag po sa bon las bskyed la/bum pa gzhan rnams su yang dkyil 'khor pa'i lha rnams so so'i sa bon las bskyed de ye shes kyi 'khor lo spyan drangs nas gnyis su med par byas la/ mchod yon dang zhabs bkru dang zhal bsil la sogs pa phul la so so'i sngags yi ge gsum dang spel ba ci nus su bzlas so//gzhan yang skye bo thams cad la bsang gtor bya ba'i phyir bgegs mthar byed kyi sngags yi ge gsum dang spel ba lan mang du bzlas pa'i bum pa rtsa ba'i sgo drung du gzhag go/ /rnam par rgyal ba'i bum pa ni mdun logs su bzhag la/lhag ma ni ci rigs par gzhag ste bum pa sta gon la gnas pa'i cho ga'o/ /de'i 'og tu slob ma me tog 'dzin cing phan pa don du gnyer ba bde bar gshegs pa'i bstan pa la dga' bas dkyil 'khor gyi khang pa'i sgor maN+Dal byas la/ slob dpon gyis 'di skad brjod par bya'o//sngags kyi dngos grub don gnyer gang / /dkyil 'khor 'dir ni gzhug par bya/ /bsod nams 'dod pas de las gzhan/ /gzhan dag 'jig rten pha rol gnyer/ /dad pa chen po ldan pa dag /'jig rten pha rol la dmigs nas/ / blo ldan dkyil 'khor gzhug bya ste/ /'di yi 'bras bu gnyer mi bya/ /gal te 'bras bu don gnyer na/ /'jig rten pha rol mi 'grub 'gyur/ /'jig rten pha rol la dmigs na/ /'bad pa med par 'di 'bras 'grub/ /de nas slob ma rnams kyis tshigs su bcad pa 'dis gsol ba gdab par bya ste/dga' chen khyod bdag ston pa bas/ /slob dpon khyod ni dgongs su gsol/ /byang chub sems dpa'i tshul bstan pa/ /mgon po chen po bdag 'tshal lo/ /dam tshig de nyid stsal du gsol/ /byang chub sems kyang bdag la stsol//sangs rgyas chos dang dge 'dun te/ /skyabs gsum dag kyang bdag la stsol/ /thar pa chen po'i grong mchog tu/ /mgon po bdag ni 'jug par 'tshal/ /de nas slob dpon gyis slob ma'i gtso bo la dmigs te/ 'di skad ces brjod par bya'o/ /khyod ni tshul chen snod yin pas//khyod la yang dag bstan par bya/ /sku gsung thugs kyi rdo rje can/ /dus gsum sangs rgyas 'byung ba rnams/ /gsang sngags rdo rje'i mthu yis ni/ /ye shes mnyam med yang dag brnyes/ /gsang sngags sbyor ba mnyam med pa//shAkya seng sogs mchog gis ni/ /drag po chen po bdud kyi sde/ /stobs chen dag kyang des bcom mo/ /'jig rten mthun par gshegs nas su/ /'khor lo bskor nas mya ngan 'das/ /de bas kun mkhyen thob bya'i phyir/ /bu yis blo gros 'di gyis shig /de nas slob ma rnams snying ga'i sa bon gyi 'od zer gyis bkug la rang gi 'od kyis shes rab kyi pad+mar zhugs te/ de bzhin gshegs pa thams cad kyis dbang bskur bar bsgoms la phyung nas slob dpon rang nyid kyis/ dkon mchog gsum la skyabs su mchi//sdig pa thams cad so sor bshags/ /'gro ba'i dge la yi rang ste/ /sangs rgyas byang chub yid kyis gzung / /zhes lan gsum brjod la/ de nas slob ma rnams kyi mgo bor lag pa bzhag ste/ bdud rtsi 'khyil ba'i sngags lan bdun bzlas pas bsrungs te/de rnams kyi snying ga dang mgrin pa dang mgo bo rnams su rdo rje dang pad+ma dang 'khor lo bsams te/ de dag gi lte ba la hUM AHoM zhes bya bar bsgoms te/ spyi bor me tog /mdun du spos dang mar me dang snying gar dri byin la so shing sor bcu gnyis pa rtse mor me tog gi phreng ba btags la dri zhim pos byugs te bgegs mthar byed kyi sngags brjod la byin no//de rnams kyis kyang kha shar ram byang du bltas te zos la lci bas maN+Dal ba'i ko ba tsam byugs te der bor ro/ /de la shar dang lho dang nub dang byang du rtse mo bltas pa'i bye brag gis zhi ba dang rgyas pa dang dbang dang mngon spyod kyi snod yin par rim pa bzhin du bstan par bya'o//de nas sngags 'di bzlas pa'i chus kha bkru ba sbyin par bya ste/ oM hrIHbi shud+d+ha d+harma sarba pA paM ni sh+tsa sho d+ha ya/ sarba bi kalpa na a pa na ya hUM zhes bya ba ni sngags so/ /de nas skud pa mdud pa gsum dang ldan pa la bgegs mthar byed kyi sngags bzlas pas dpung pa g.yas par bcings nas de nyid bzlas pa'i ku sha stan dang sngas kyi phyir lag pa g.yon par byin la chos nyan du gzhug par bya ste/'jig rten du ni kun mkhyen pa/ /u dum+WA ra'i me tog bzhin//brgya lam na ni res 'ga' zhig /'byung 'gyur yang na mi 'byung ngo / /gsang sngags spyod pa'i tshul 'byung ba/ /de bas kyang ni dkon pa ste/ /gang gis sems can mnyam med don/ /bla med byed par nus pa yin/ /bskal pa bye ba du ma ru/ /sngon du sdig pa byas pa gang //dkyil 'khor 'di 'dra mthong ma thag /de dag zad par 'gyur yin na/ /grags pa mtha' yas sngags spyod pa'i/ /tshul la gnas na smos ci dgos/ /skyob pa'i gsang sngags bzlas nas ni/ /go 'phang bla na med par 'gyur/ /gang gi spyod pa mchog 'di la//blo gros shin du dri med na/ /sdug bsngal thams cad 'byung ba yi/ /ngan 'gro de yis gcod par 'gyur/ /bdag nyid chen po khyed rnams kyis/ /rnyed pa mnyam med de ring rnyed/ /gang phyir rgyal ba sras bcas pa'i/ /bdag nyid chen po thams cad kyis/ / bstan pa 'di la khyed rnams kun/ /yongs su bzung ste skye bzhin pa/ /de phyir khyed rnams theg chen du/ /legs pa nyid du 'gro bar 'gyur/ /theg pa chen po cher 'byung ba'i/ /lam mchog 'di ni dpal dang ldan/ /khyed rnams 'dir ni 'dod pas na/ /rang byung skal ba chen po pa//'jig rten thams cad mkhyen pa yi/ /de bzhin gshegs pa nyid du 'gyur/ /zhes brjod de/ bzhin bzangs dag song la rmi lam ci byung ba nang par nga la smros shig ces bsgo nas khyad par gyi sdom pa 'dzin du gzhug ste/ phyir mi ldog pa'i dkyil 'khor du//byin nas mgon po bdag la gsungs/ /dkyil 'khor lha yi de nyid dang / /slob dpon yongs su phrin las rnams/ /sangs rgyas kun gyi dam tshig dang / /gsang ba'i sdom pa bla na med/ /sems can kun gyi don gyi phyir/ /rtag tu bdag nyid slob dpon gyur/ / zhes bya ste/ 'di ni slob ma sta gon la gnas pa'i cho ga'o/ /de nas dkyil 'khor gyi khang par zhugs te slob ma la sogs pa bsrung ba'i phyir bdud rtsi 'khyil pa'i sngags bzlas so/ /nang par slob ma rnams bos la/ dge ba dang sdig pa'i mtshan ma rnams bltas te/gal te sdig pa mthong na sngags bzlas pa la sogs pa byas la rdul tshon bri bar zin nas dkyil 'khor gyi phyi rol dri zhim po'i chus byugs la me tog la sogs pa bkram ste/ rdul tshon lhag ma rnams yi ge gsum gyi mthar muHbzlas pas gshegs su gsol la gnas gtsang mar gzhag go//de nas mchod pa'i yo byad rnams bshams te mngon par 'du byas te bum pa rnams bshams pa'i gnas rnams su gzhag ste slob dpon bdag nyid sgo skyong gi sngags kyis lus khrus byas la gos sar pa bgos te/ ba dan la sogs pas brgyan pa dang / tsan+dan la sogs pas lus byugs nas me tog gi phreng ba dang dbu rgyan bcings te stan bde ba la 'dug ste/ dkyil 'khor gyi 'khor lo'i rnal 'byor dang ldan pas dga' ba'i sgras de bzhin gshegs pa thams cad spyan drangs te kha'i lam nas zhugs te zhu nas shes rab kyi pad+mar phab la dkyil 'khor gyi 'khor lo'i tshul du spros nas rdul tshon gyi dkyil 'khor la bstims te/ar+g+ha dang zhabs bkru dang / zhal bsil dang / bdug spos phul te/ dril bu gsil zhing / mi bskyod pa zhes bya ba la sogs pas bstod par bya'o//de nas bdud rtsi lnga'i dkyil 'khor du gtor te bdag nyid kyang myang ngo / /sgrub pa'i grogs dkyil 'khor du gzhag ste bdag nyid phyir byung nas phyogs skyong rnams la gtor ma rgya chen po sbyin par bya ste/ 'di ni dkyil 'khor bsgrub pa'i thabs so/ / de nas slar yang dkyil 'khor du zhugs te/ dril bu gsil zhing dkyil 'khor la bskor ba byas la bdag nyid dkyil 'khor du 'jug pa'i phyir/ byang chub rdo rje zhes bya ba la sogs pa 'og nas 'byung ba'i tshigs bcad kyis dkyil 'khor gyi bdag po la gsol ba btab ste yol ba'i phyi rol du byung la dkyil 'khor gyi bdag pos dkyil 'khor du zhugs pa nas rjes su gnang ba'i dbang bskur ba byin par bsgoms te/chags chen las byung de nyid ni/ /'khor lo gzugs brnyan lta bu ste/ /zhes bya bas dkyil 'khor gzugs brnyan dang 'dra bar bltas la/slob ma rnams gzhug par bya ba'i phyir tshigs su bcad pa 'dis gsol ba gdab par bya ste/ nam mkha' las byung mtshan ma'i phyir/ /thog ma tha ma med pa'i mchog /sems dpa' rdo rje che rang bzhin/ /rdo rje sems dpa' bdag sgrubs shig / dngos grub chen po kun gyi mchog /dbang phyug chen po lhag pa'i lha/ /rdo rje 'dzin pa kun gyi rgyal/ /mi 'gyur mchog tu bdag sgrubs shig /nyes pa mi 'da' rtag pa ste/ /'dod chags kun gyi rjes su chags/ /'dod chags chen po dga' ba che/ /bcom ldan de nyid kyis sgrubs shig /shin tu dag pa kun gyi mchog /gdod nas grol ba de bzhin gshegs/ /kun du bzang po kun bdag nyid/ /byang chub sems dpa' bdag sgrubs shig /dngos grub chen po kun gyi mchog /dbang phyug chen po phyag rgya'i mchog /grub pa'i rdo rje cher bstod pa//rdo rje snyems bdag bdag po'i bdag /sems can kun gyi yid khyab pa/ /sems can kun gyi snying la gnas/ /sems can kun gyi yab nyid de/ /'dod chags mnyam pa'i dam tshig mchog /ces bya ba'i dam tshig gi glu blangs nas bden pa'i tshig 'di bsgrags par bya ste/shes rab thabs bdag dkyil 'khor gyi/ /bden pa'i byin rlabs gang yin pa/ /bden pa de yis mgon khyod kyis/ /bdag gi 'dod pa skong byed shog /chos rnams gzugs brnyan lta bu ste/ /gsal zhing dag la rnyog pa med//gzung du med cing brjod du med/ /rgyu dang las las byung ba dang / /de bzhin de kho na las byung / /bden pa de yis dkyil 'khor ni/ /gzugs brnyan gsal bar sems can rnams/ /dri med thams cad mthong bar shog /ces brjod la phyag byas te/ dril bu gsil lo/ /'di ni slob dpon 'jug pa'i cho ga'o/ /de nas slob ma khrus byas shing gos sar pa bgos la bkug la/ tshig 'dis gsol ba 'debs su gzhug ste/ byang chub rdo rje sangs rgyas la/ /mchod chen ji ltar bgyis pa bzhin/ / bdag kyang bsgral ba'i don du ni/ /nam mkha'i rdo rje bdag la stsol/ /zhes brjod nas maN+Dal byed du bcug ste/ yon dbul bar bya'o/ /de nas bgegs mthar byed kyi sngags bzlas pa'i chus bsang gtor byas la/ yi ge gsum bzlas pa'i snam bus gdong g.yogs/dkyil 'khor du gzhug pa'i phyir/ 'dod par dga' ba gang yin smros/ /zhes dri'o/ /des kyang / skal ba bzang po la dga'o/ /zhes smra'o/ /de'i rjes la A khaM bI ra hUM zhes bya bas me tog gi phreng ba byin la rdo rje snying gar bzhag ste/ oM badzra yo ga tsi t+to t+pA da yA mi/ zhes bya bas byang chub tu sems bskyed la/ oM su ra te sa ma ya s+t+waM ho/ badzra sid+d+hi ya thA su khaM/ zhes brjod la/ de ring khyod de bzhin gshegs pa thams cad kyis byin gyis brlabs par gyur gyis gsang chen dam pa 'di de bzhin gshegs pa thams cad kyi dkyil 'khor du ma zhugs pa rnams la smra bar mi bya zhing ma dad pa rnams la yang ma yin no zhes bsgo nas/A khaM ba'i ra hUM zhes bya bas yol ba'i nang du bcug la 'di skad ces brjod par bya ste/ de ring khyod de bzhin gshegs pa thams cad kyi rigs su zhugs te/ gzhan yang khyod la ye shes gang gis de bzhin gshegs pa thams cad kyi dngos grub kyang thob par 'gyur na dngos grub gzhan 'grub pa lta smos kyang ci dgos te/de lta bu'i ye shes bskyed par bya'i/ khyod kyis dkyil 'khor ma mthong ba rnams kyi mdun du smra bar mi bya ste/ khyod dam tshig nyams par gyur ta re/ de nas spyi bor rdo rje bzhag la 'di ni khyod kyi dam tshig gi rdo rje ste/ gal te tshul 'di su yang rung ba la smras na 'dis khyod kyi mgo 'gems par byed do zhes brjod la slar yang snying gar rdo rje bzhag ste/ oM rdo rje sems dpa' deng khyod kyi/ /snying la de ring yang dag zhugs/ /gal te tshul 'di smras na ni//de ma thag tu dral te gshegs/ /zhes brjod nas mna' bsgag par bya ste/ /rnam par rgyal ba'i bum pa'i steng na gnas pa'i pad+ma'i nang du song ba'i bdud rtsi lnga la/ oM badzra a mr-i to da ka Tha/ zhes bya ba mngon par bzlas la/ 'di ni khyod kyi dmyal ba'i chu//dam tshig 'das na sreg par byed/ /dam tshig bsrungs na dngos grub 'thob/ /rdo rje bdud rtsi'i chu 'thung shig /ces brjod de blud la de ring phyin chad khyod kyi rdo rje sems dpa' nga yin gyis/ ngas de ring phan chad 'di gyis shig ces bsgo ba rnams bu khyod kyis bya dgos so//nga la brnyas pa ma byed cig /byas na yang ba ma spangs par 'chi ba'i dus byas nas sems can dmyal ba chen por lhung bar gyur ta re zhes brjod do/ /de nas bden pa'i byin gyi rlabs brjod par bya ste/ snying po'i dkyil 'khor 'di ru ni/ /bdag gis slob ma gzhug par bya//lha yi rigs kyi rim pa dag /bsod nams ji bzhin de bzhin shog /'dis ni dngos grub gang 'grub dang / /rigs ni gang gi snod du gyur/ /'di ni bsod nams ci yod las/ /dkyil 'khor 'dir ni de bzhin shog /ces pas bden pa'i byin gyi rlabs byas la/de nas phyag byas la mig tu ci zhig snang zhes dris la/ des dkar po dang / ser po dang / dmar po dang / sngon po'i kha dog rnams bstan pa las/ zhi ba dang / rgyas pa dang / dbang dang / mngon spyod kyi las rnams so sor bstan par bya'o/ /de nas oM pra tI ts+tsha badzra ho/zhes bya ba'i sngags kyis slob mas dkyil 'khor du me tog phul te/ gang la bab pa de'i rigs so/ /ci ste lha gnyis kyi bar du lhung na gang la nye ba de'i rigs so/ /gal te ri mo la bab na slar bskyar te dor ro/ /lan gsum du bskyar te dor yang ri mo la phog na ni de la dngos grub med do//rdo rje ra ba'i phyi rol du lhung na yang de bzhin no/ /gal te gtso bo la phog na/ phyag rgya chen po'i dngos grub thob ste/ me tog dor ba'i cho ga'o/ /de nas dbang nod pa'i phyir slob dpon la yon phul la byang chub rdo rje zhes bya ba'i tshigs bcad kyis gsol ba btab ste phyag bya'o//slob dpon gyis kyang slob ma de dbang bskur ba'i phyir rtsa ba'i dkyil 'khor gyi phyi rol du snying po'i dkyil 'khor gyi tshad tsam pa'i gru bzhi sgo bzhi pa'i dkyil 'khor bris la/ de'i dbus su pad+ma 'dab brgyad bris te/ sgo dang mtshams rnams su de bzhin gshegs pa rnams dang /lha mo'i mtshan mas mtshan par bya'o/ /slob ma la khrus byas shing gos sar pa bgos pa bzhag la shis pa'i cho ga byas te/ nyungs kar bdud rtsi 'khyil pa'i sngags bzlas pa/ lag pa g.yas g.yon gyis lan gnyis gnyis bskor te/khom phor gyi me'i nang du blugs so/ /de ltar lan gsum du byas la/ de nas chu'i shis pa yang de ltar bya'o/ /de nas sngags de nyid bzlas pas bsrungs te/ nye reg byas la/ yang dri zhim po sngags bzlas pas byugs la/ sngags bzlas pa'i me tog gi phreng ba mgo la bcings te/mar me mdun du bkor zhing bdug spos kyis kyang bdugs te/ shis pa'i cho ga'o/ /de nas me tog gi phreng bas dbang bskur la rdo rje 'dzin pa'i skur bsgoms nas mig la sogs pa byin gyis brlabs te/ steng du bla re bres la hUM las byung ba'i gser gyi yu ba can gyi gdugs dkar po steng du bzung nas g.yon phyogs su ba dan dang rgyal mtshan bres te dung dang /zangs dung dang rnga bo che la sogs pa'i sgras nam mkha' gang bar bsams la dril bu gsil zhing khrus bya ste/ ji ltar bltams pa tsam gyis kyang / /de bzhin gshegs kun khrus gsol ba//lha yi chu ni dag pa yis/ /de bzhin bdag gis khrus bya'o/ /oM sarba ta thA ga ta a b+hi She ka te sa ma ya shri ye hUM/ dang po rnam par rgyal ba'i bum pas bkrus la de'i 'og tu gzhan gyis bkru'o/ /de ltar phyi rol du dbang bskur nas rang gi snying ga'i sa bon gyi 'od zer gyis mtha' yas pa'i phyogs nas 'khor los sgyur ba'i de bzhin gshegs pa rnams spyan drangs te/de rnams kyi 'od zer las byung ba'i dbang bskur ba'i yo byad thams cad kyis dbang bskur bar bsgoms la/ bdag nyid kyis kyang / oM sangs rgyas rnams ni thams cad kyi//rdo rje gsang ba gsum las byung / /khams gsum kun gyis phyag byas pa/ /rdo rje dbang bskur chen po sbyin/ /zhes brjod do/ /mi bskyod pa'i rang bzhin gyi chu'i dbang ngo / /de nas gser la sogs pa las brdungs pa'am de med na ras la sogs pa las byas pa'ang rung ste/ sngar bstan pa'i tshigs bcad kyis slob ma'i spyi bor bcings la nam mkha'i dbus na bzhugs pa'i de bzhin gshegs pa thams cad rin chen 'byung ldan gyi gzugs kyis der thim ste byin gyis brlab bo/ /rin chen 'byung ldan gyi rang bzhin gyi cod pan gyi dbang ngam rdzogs pa'i sangs rgyas kyi dbang ngo //de'i 'og tu hUM las bskyed pa'i rdo rje rtse lnga pa bzung ste/ /slob ma'i snying ga la sogs par gtugs la/ sangs rgyas kyi ni rdo rje'i dbang / /de ring khyod la bskur bar bya/ /'di de sangs rgyas thams cad nyid/ /rab tu grub phyir rdo rje zung / /zhes pas slob ma'i lag pa g.yas par rdo rje sbyin te/snang ba mtha' yas kyi rang bzhin rdo rje'i dbang ngo / /de nas a las bskyed pa'i dril bu lag pa g.yon par byin la/ lag pa g.yas g.yon gnyis ka bsnol te/ oM badzra a d+hi pa d+hi s+t+waM a b+hi Shiny+tsA mi badzra sa ma ya s+t+waM zhes brjod de/ dam tshig rdo rje'i rang bzhin bdag po'i dbang ngo //de nas me long la/ oM a badzras twa zhes bzlas la tshigs su bcad pa 'dis bstan par bya ste/ rdo rje sems dpa' me long ltar/ /gsal zhing dag la rnyog pa med/ /bu khyod kyi ni snying la gnas/ /sangs rgyas kun bdag rang nyid yin/ /de bzhin gshegs pa kun bdag gang //byang chub sems 'di shes par gyis/ /rdo rje sems dpa'i rang bzhin gyi me long gi dbang ngo / /de'i rjes la rdo rje dril bu slob ma'i spyi bor bzhag la/ oM badzra satwa s+t+waM a b+hi Shiny+tsA mi badzra nA mA b+hi She ka ta kye dpal che ge mo rdo rje zhes rigs mthun pa'i ming btags la/ gang gang snang ba de dang de//rdo rje 'dzin pa rang nyid gtso/ /gang phyir chos rnams rnam dag pas/ /sangs rgyas ye shes rang bzhin yin/ /zhes bsgrags te/ rnam par snang mdzad kyi rang bzhin gyi ming gi dbang ngo / /de nas slar yang slob mas/ bdag dang gzhan gyi don gyi phyir/ /rdo rje slob dpon dbang bskur ba//thugs rje can khyod bka' drin gyis/ /bdag la de ring stsal du gsol/ /zhes gsol ba btab pa dang nam mkha' khyab pa'i de bzhin gshegs pa lha mo rnams kyis dbang bskur bar bsgoms la/ rdo rje che dang dril bu che/ /zung shig rdo rjer byin gyis brlabs/ /di ring rdo rje slob dpon gyur/ /slob ma rnams ni bsdu bar gyis//zhes pas slob ma bskul la/ dam tshig gsum po 'dzin du gzhug ste hUM gis rdo rje bsgoms la/ 'di ni sangs rgyas thams cad nyid/ /rdo rje sems dpa'i phyag na gnas/ /rtag tu khyod kyis kyang gzung ste/ /phyag na rdo rje brtul zhugs brtan/ /oM sarba ta thA ga ta sid+d+hi badzra sa ma ya tiSh+Tha e sha s+t+waM d+ha ra ya mi hi hi hi hi he zhes pa ste 'dis slob ma rdo rje bzung la de kho na nyid 'di brjod de/thog mtha' med pa'i sems dpa' ni/ /rdo rje sems dpa' dga' ba che/ /kun du bzang po thams cad bdag/ /rdo rje snying po bdag po'i gtso/ /bcom ldan 'das dpal mchog dang po'i skyes bu'o/ /oM ma hA badzra hUM/ de nas a las bskyed pa'i dril bu bzung la/'di de sangs rgyas thams cad kyi/ /shes rab dbyangs kyi rjes 'gror brjod/ /khyod kyis kyang ni rtag tu bcang / /byang chub mchog tu rgyal ba bzhed/ /ces pa 'dir dril bu byin la/ /srid pa'i rang bzhin dag pa'i phyir/ /rang bzhin gyis ni dngos med byas/ /rang bzhin dag pa'i sems ldan pas//srid pa dam pa mchog tu byed/ /ces bya ba'i chos kyis dkrol bar bya ste/ oM badzra g+ha N+Te a/ zhes brjod do/ /de yang yid kyi lus ni brtan pa'i phyir/ /dam tshig phyag rgya shes rab brjod/ /gang gi lus kun rten byed pa/ /de nas phyag rgya rab tu grags/ /zhes bya ba'i mngon par rtogs pas bskyed la/rdo rje sems dpa'i rnam par bltas te/ me tog la sogs pas mchod cing kun du bstod par byas te/ snyems pa dang bcas pas me tog cig slob ma la bsnun la/ deng nas brtsams te rdzogs sangs rgyas/ /sras dang bcas pas rnam rol cing / /rdo rje snyems pas rab sbyor gyis/ /dga' ston bde ba mchod pa gyis/a/ sgeg dang bcas pas phreng ba 'phang / /sangs rgyas thams cad mchod par bya/ /de ni bcom ldan 'bral mi 'gyur/ /phreng ba de ni rgyan yin no/ /oM/ lus can kun la dam chos kyi/ /khyod kyis glu ni blang bar bya/ de yi bder gshegs dngos grub ni/ myur du bde ba myong bar 'gyur/ /gi/ de nyid thal mo'i gar gyis ni/ sangs rgyas thams cad chags par byos/ /sangs rgyas 'dul ba'i phrin las kyis/ /gar mkhan tshul du bsgyur bar gyis/ /hoHrdzogs sangs rgyas la spos phul bas/ /brtul zhugs bzang pos legs tshim gyis/ /lus can bde gshegs cha lugs su/ /ye shes kyis ni tshim par gyis/ /aHsangs rgyas rnams la me tog gtor//byang chub yan lag tshogs 'gyur bas/ /mtshan dang dpe byad ldan pa yi/ /bde gshegs sku ni thob par gyis/ /b+hUM chos kyi me ni legs sbar bas/ /rdo rje chos dang 'dra bar 'gyur/ /sems can ma rig mdongs pa la/ /ye shes sgron ma sbar bar gyis/ /pra/ rgyal ba rnams la dri phul la/ /tshul khrims de bzhin shes rab dang //rnam grol ye shes mthong ba yi/ /byang chub lus can rnams la bsgo/ /g+haHde'i 'og tu gser gyi thur ma la bcom ldan 'das kyi rtsa ba'i sngags bzlas/ ji ltar mig mkhan rgyal po yis/ /'jig rten ling tog bsal ba ltar/ /bu khyod kyi ni mi shes pa'i/ /ling tog rgyal ba rnams kyis bsal//oM badzra nai tra a pa ha ra pa Ta laM hrIHzhes pas mig la byugs te dag par bya'o/ /de nas me long bstan te/ chos rnams gzugs brnyan lta bu ste/ /gsal zhing dag la rnyog pa med/ /gzung du med cing brjod du med/ /rgyu dang las las kun du byung / /rang bzhin dag cing bdag med pa/ /de ltar chos 'di shes byas nas//sems can don ni mnyam med byos/ /'on kyang skyob pa'i sras su skye/ /de nas a las bskyed pa'i dril bu byin te/ thams cad nam mkha'i mtshan nyid de/ /nam mkha' la yang mtshan nyid med/ /nam mkha' dang ni mnyam sbyor bas/ /kun mchog mnyam pa nyid du gsal/ /zhes pas dkrol bar bya'o//yang hoHzhes bya bas mda' gzhu byin la/ de bzhin gshegs pa thams cad rjes su chags par byos shig ces bsgo la/ phyogs bzhir mda' bzhi 'phang ba dang / steng dang 'og tu yang re re 'phen du gzhug go/ /oM a badzra satwa zhes bya ba 'dis me long bstan la/ rdo rje sems dpa' me long ltar//gsal zhing dag la rnyog pa med/ /bu khyod kyi ni snying la zhugs/ /rdo rje sems dpa' rang nyid gtso/ /zhes bya ba dang / gang yang sangs rgyas thams cad kyi bdag po byang chub kyi sems 'di nyid yin par shes par gyis shig ces brjod do/ /oM badzra he tu zhes bya bas 'khor lo rkang pa'i bar du bcug la/oM badzra b+ha Sha raM zhes bya bas lag pa g.yas su dung byin la/ g.yon par yi ge a las gsang ba 'dus pa'i po ti byin la/ dril bu yang dkrol zhing / deng nas brtsams te sems bskyed pa/ /tsam gyis chos kyi 'khor lo bskor/ /khyod kyis the tshom dogs med par/ /yid gnyis med pa'i sems kyis su//chos kyi dung ni bla med pa/ /dri med kun du gang bar gyis/ /sngags kyi tshul gyi cho ga rnams/ /skye bo rnams la rtag tu shod/ /de ltar byas na sangs rgyas la/ /phan 'dogs drin du gzo zhes bya/ /rdo rje 'dzin pa de kun yang / /khyod la rtag tu srung bar mdzad/ /de nas so so'i 'khor los sgyur ba'i rnal 'byor byas la/sems can kun la phan pa'i phyir/ /sems can ma lus thams cad la/ /ji ltar 'dul ba sna tshogs pa'i/ /chos kyi 'khor lo rab tu bskor/ /zhes bya ba dang / chos kyi gnas su rdo rje dang / rin po che dang / pad+ma dang / las kyi tshig bcug la tshigs su bcad pa lngas rjes su gnang ba byin la bdag nyid langs te sangs rgyas kyi gzugs su dmigs la g.yon pa snying gar chos gos 'dzin pa'i tshul du byas te/g.yas pa mi 'jigs pa sbyin pa'i phyag rgyar byas la/ rdo rje ming gi dbang bskur bas lung bstan to/ /'di ni khyod la ngas lung bstan/ /rdo rje slob dpon de bzhin gshegs/ /srid pa shin tu dag pas na/ / srid pa'i ngan 'gro rnams las bton/ /kye che ge mo zhes bya ba'i de bzhin gshegs pa b+hur b+hu ba swaH/ gang la 'di ltar lung bstan pa de la sangs rgyas dang byang chub sems dpa' dkyil 'khor gyi 'khor lo dang bcas pa rnams kyis mgrin gcig tu byang chub chen por lung ston par mdzad de/ /phyag rgya chen po dang sngags 'di'i mthu yin no zhes dad pa bskyed par bya'o//de nas gsang ba bsgrags te/ 'dod chags bral ba lta bu yi/ /khams gsum na ni sdig med de/ /de bas 'dod la chags bral ba/ /khyod kyis nam yang mi bya'o/ /ma hA sa ma ya ha na ha na hUM phaT/ de nas slob ma'i spyi bor gdugs bzung la bskor ba byas nas thal mo sbyar te/gdugs dang bcas pas dkyil 'khor gyi sgo drung du sa la 'dug la/ sngags rnams 'dzin par gyur pa yi/ /slob ma 'di ni phul ba lags/ /de nas gdugs gzhan du bzhag la/ /slob ma'i snying la gdab pa'i tshig 'di dag brjod do/ /de ring dkyil 'khor slob dpon gyur/ /gsang sngags rgyud rnams 'dzin gyur pas//sangs rgyas byang chub sems dpa' dang / /lha rnams kun gyis mthun par gsungs/ /sems can kun la sems brtse bas/ /dkyil 'khor cho ga bzhin du bri/ /khyod kyis nan tan bskyed nas su/ /sgrub pa po rnams sngags la sbyor/ /de nas slar yang bstod par bya ste/ mchog tu gsang ba'i dkyil 'khor 'dir//bcug pa dang ni mthong ba yis/ /de ring sdig las rnam grol nas/ /de ring khyed rnams dge bar gnas/ /bde chen theg pa 'di la ni/ /phyin chad 'chi ba yod min zhing / /thub pa tshugs pa yod min pas/ /cis kyang mi 'jigs dga' bar gyis/ /sdig pa shin tu dag pas na/ /srid pa'i sdig pa las 'das pa'o//byang chub sems ni yongs mi spong / /rdo rje zhes bya'i phyag rgya de/ /gang zhig bskyed pa tsam gyis ni/ /sangs rgyas nyid 'gyur the tshom med/ /dam pa'i chos ni smad mi bya/ /nam yang bor bar yang mi rung / /mi shes pa'am rmongs pa la/ /de ni bstan par mi bya'o/ /rdo rje dril bu mi spang ste/ /slob dpon nam yang smad mi bya/ /sangs rgyas kun dang mtshungs pa yin//rang bdag yongs su spangs nas su/ /dka' thub kyis ni gdung mi bya/ /ji ltar bde ba bde bzung nas/ /'di ni ma 'ongs rdzogs sangs rgyas/ /zhes bya bas dbugs dbyung ngo / /slob mas kyang phyag byas te/ gtso bos ci ltar bka' stsal pa/ /de dag thams cad bdag gis bgyi/ /zhes khas blang ngo / /slob dpon gyi dbang bskur ba'i cho ga'o// //de'i rjes la slob ma yid du 'ong ba'i gnas dben par yol ba la sogs pas bres la/ gzugs la sogs pa yon tan dang ldan pa dam tshig can gyi bu mo rdo rje slob dpon la phul te/ bza' dang bca' ba dang btung ba zhim po rnams kyis bla ma mnyes par byas la maN+Dal byas te/ tshigs su bcad pa 'dis gsang ba nod pa'i don du gsol ba gdab po//khyod kyi bka' drin gang gis bdag /bdag dang gzhan don byed nus pa/ /yang dag gsang ba'i dbang bskur ni/ /snying rje'i gter gyis bdag la stsol/ /zhes bya'o/ /de ltar gsol ba btab pa'i mthar bla mas slob ma la snying rje chen po bskyed de sgrub thabs las 'byung ba'i rim pa bzhin bdag nyid dang shes rab gsung rdo rje'i gzugs su mngon par 'dus byas la snyoms par 'jug par bya'o//de las byung ba'i bdud rtsi dang bdud rtsi lnga bsres la tshigs su bcad pa 'dis slob ma'i khar sbyin no/ /ji ltar 'phags pa sangs rgyas kyis/ /byang chub sras la dbang bskur ba/ /de bzhin gshegs pa'i dbang bskur ni//sems kyi rgyun gyis dbang bskur ro/ /des kyang a ho su kha zhes brjod de longs spyod rdzogs pa'i rgyun du gzhug go/ /de nas de snang ba mtha' yas su dmigs la de bzhin gshegs pa thams cad kyi gsang ba'i dbang bskur bar bsgom mo/ /gsang ba'i dbang bskur ba'i cho ga'o// //de'i 'og tu khyed kyi bka' drin gang gis bdag /bdag dang gzhan gyi don byed pas/ /shes rab ye shes dbang bskur ni/ /snying rje'i gter gyis bdag la stsol/ /zhes slob mas gsol ba btab pa dang / slob ma'i lag par shes rab kyi lag pa byin la/ rdo rje sems dpa'i gzugs su bsgoms te/ gzungs ma 'di ni yid 'ong ma/ / sangs rgyas rnams kyis bsten par gnang / /'khor lo rim gyi sbyor ba yis/ /bde ba dam pa myang bar gyis/ /thabs gzhan gyis ni 'tshang mi rgya/ /'gro ba gsum po 'di yis bdag /de bas 'di dang bral bar ni/ /khyod kyis nam yang mi bya'o/ /'di ni sangs rgyas thams cad kyi/ /rig pa'i brtul zhugs bla na med//blun po gang zhig 'di spong ba/ /de la mchog gi dngos grub med/ /ces brjod la sbyin no/ /de nas shes rab kyis 'di skad brjod par bya ste/ bshang dang gci ba bza' ba dang / /sha dang khu khrag de bzhin no/ /bu khyod ci dgar spro gyur tam/ /bud med rtag tu gus pa dang / b+ha ga'i pad+mar 'o byed pa/ /bu khyod ci bzhed bden par smros//slob mas kyang 'di skad brjod par bya ste/ /khu khrag la sogs bza' ba dang / /bud med rnams la rtag gus pas/ /b+ha ga'i pad+mar 'o byed pa/ /lha mo ci phyir bdag mi spro/ /zhes brjod pa dang / slar yang shes rab kyis 'di skad brjod par bya ste/ /e ma nga yi pad+ma 'di/ /bde ba kun dang yang dag ldan/ /blun po gang zhig 'da' byed pa//de la mchog gi dngos grub med/ /bde chen rgyal po rang nyid ni/ /'di nyid du ni rtag tu gnas/ /b+ha ny+dza mo k+Sha ho zhes bya'o/ /de'i 'og tu ji ltar bstan pa'i ka ra nas snyoms par 'jug par byas la bla ma'i man ngag gis de'i skad cig ma mtshon par bya'o/ /byang chub kyis sems phyung nas ro 'dzin gyis blang bar bya ste/'di ni shes rab ye shes kyi dbang bskur ba'i cho ga'o// //dkyil 'khor cho ga ji lta bar/ /ji bzhin du ni byas pa las/ /bsod nams gang zhig thob pa des/ /'gro kun rdo rje 'dzin gyur cig /slob dpon nag po pa'i zhal snga nas bla ma'i man ngag la brten te mdzad pa'i dpal gsang ba 'dus pa'i dkyil 'khor gyi cho ga rgya gar gyi mkhan po nag po pa'i zhal snga nas dang /