CLOSE WINDOW

D1789
བོད་ཡིག

/ @##/ /ye shes rdo rje kun las btus pa'i rgyud las 'byung ba'i rgyan bdun rnam par dgrol ba bzhugs/ @##// //bcom ldan 'das dpal kun du bzang po la phyag 'tshal lo/ /dngos kun rang bzhin stong bdag nyid//dngos po kun gyi ngo bo nyid/ /thams cad bdag nyid rdo rje 'dzin/ /gnyis med de la rab tu 'dud/ /ye shes kun btus rgyud las ni/ /rnal 'byor bla ma'i rgyud dgrol lugs/ /rgyan ni bdun po gang yin pa/ /mkhas pa dga' ba skyed phyir bshad//rnal 'byor rgyud tshul gang la yang / /rgyud tshul rnam pa gsum du snang / /rgyu yi rgyud dang thabs kyi rgyud/ /'bras bu'i rgyud ces mkhas pas bshad/ /rgyud la gang zag mtha' yas kyang / /cung zad dbye na rnam pa lnga//rin chen tsan+dan pad+ma dang / /pad dkar ut+pa la zhes gsungs/ /de la bsdus pa rnam gnyis te/ /tshogs dang slob ma'i gang zag go/ /de dag re re dag la yang / /blo ni rab 'bring tha ma gsum/ /chos smra ba dang sgrub byed pa'o/ /rgyan ni lnga pa drug par bshad//thabs kyi rgyud las rnam pa gnyis/ /brda dang don du mkhas pas bshad/ /de 'dzin byed pa smra byed dang / /sgrub par byed pa kho na yin/ /gleng bslang lnga dang mtha' drug rgyan/ /brda yi rgyud la 'jug pa yin/ /rigs pa rnam bzhi bshad pa bzhi//bden gnyis nges pa'i rgyan dag ni/ /don la 'jug pa'i rgyan zhes bya'o/ /gleng bslang dbye na rnam pa lnga/ /cung zad rim par dbye bar bya/ /brda yi rgyud du gsungs pa yi/ /ming dang ched dang byed pa po/ /tshad dag dang ni dgos pa'o/ /ming ni khri sum stong phrag bzhi//rnal 'byor chen po'i rgyud du grags/ /ka nas ya yi bar du ni/ /nyi shu rtsa drug ming gi mtha'o/ /de tsam cung zad dbye ba ste/ /rgyas par dbye na grangs med do/ /bsdus pa'i rtsa ba yi ge gsum/ /gsungs pa sku gsung thugs zhes gsungs//ched ni gdul bya rgya mtsho snyed/ /brjod mi lang ba'i don du gsungs/ /bsdus na skye bo 'dod chags can/ /'dod khams dbang du gsungs pa yin/ /byed pa po ni rdo rje sems/ /sangs rgyas drug pa de kho na/ /tshad ni dpal ldan gsang 'dus kyi//le'u dang cho ga dum bu dang / /rim pa bshad pa rnam pa bzhi/ /le'u ni rnam pa bcu bdun te/ /cho ga nyi shur mkhas pas bshad/ /dum bu phyi ma'i rgyud dang ni/ /bshad pa'i rgyud rnams grags pa yin/ /bskyed dang rdzogs pa'i sgrub thabs dang //srid pa skye 'chi'i rim pa yi/ /dbye ba brjod pa rim pa yin/ /thun mong mchog dang rnam bzhi las/ /bdag gzhan don byas dgos pa'o/ /rgyud gzhan la yang de bzhin no/ /mtha' rnam drug ces bya ba yang / /dgongs dang dgongs min drang dang nges//ji bzhin sgra dang sgra min no/ /'dod chags ma yin chags bral min/ /dbu mar mi dmigs la sogs pa'i/ /rdo rje'i tshig ni dgongs bshad pa'o/ /stong pa bdag med 'od gsal ba/ /zhes sogs tshig ni dgongs pa min/ /ga pur tsan+dan rdo rje pad//ces sogs tshig ni drang ba'i don/ /khu ba khrag dang btsun mo sogs/ /rdo rje'i tshig ni nges pa'i don/ /dkyil 'khor mchod sbyin la sogs pa/ /don gsal gsungs pa ji bzhin sgra/ /ko Ta k+Sha sogs ji bzhin min/ /de tsam zhig ni brda rgyud rgyan/ /brda yis mtshon nas don la ni//'jug byed de yang thabs kyi rgyud/ /don ni rigs pa bzhir bshad pa/ /rgyud dang gleng gzhi nges tshig rgyu/ /chags bral chags bcas dbang du'o/ /mi yi skye 'khrungs 'thad pa sgrub/ /khyim nas byung ba bya ba med/ /'dul dang sdom pa la ltos pa'o//chos spyod chos nyid 'bras bu 'byung / /chags bral rigs pa bzhir 'dod do/ /phung po lnga dang 'byung ba lnga/ /dbang po lnga dang nyon mongs lnga/ /rigs lnga'i sangs rgyas lnga ru 'dod/ /rdo rje 'dzin 'gyur bya ba byed/ /ltos pa rang gi mtshan ma la'o//spros bcas la sogs spyod pa yi/ /chos nyid kyis ni 'bras 'byung ba/ /chags bcas rigs pa bzhir 'dod do/ /bshad gzhi yig don spyi yi don/ /sbas pa'i don dang mthar thug pa'o/ /sgra yi bkod pa bstan bcos bzhin/ /don gyis bkod pa'i yi ge'i don//tshig gcig 'bras bu bsnyen mthong ba/ /yul ring 'jug pa'i blo bzlog ste/ /'bras don gzhan don bskyed rim la/ /sbyor ba dang po la sogs pa/ /rgyas bshad don ni spyi yi don/ /chags bcas spyod pa don yod dang / /kun rdzob lam gyur don yod dang //snang gsum rtogs pas don yod pa'i/ /mi bstan sbas don rnam pa gsum/ /yang dag don nyid ston pa dang / /don dam la bden gnyis med thob/ /'od gsal ba dang zung 'jug ste/ /mthar thug pa ni yin par gsungs/ /sgyu ma'i dper byas bcu gnyis kyis//kun rdzob nges par shes par bya/ /thams cad stong pa 'od gsal ba/ /don dam du ni gang bstan pa/ /rdzogs pa sgrub par byed pa ste/ /don gyi rgyud du bstan pa yin/ /'bras bu'i rgyud ni rnam pa gsum/ /thun mong mchog dang gnyi ga yi/ /'bras bur rgyal ba dam pas gsungs//thun mong grub pa brgyad la sogs/ /bskyed pa'i rim pa'i nus pa yin/ /mchog ni sangs rgyas go 'phang ste/ /rdzogs pa'i rim pa'i 'bras bu yin/ /zung 'jug rim pa mthar phyin na/ /gnyi ga'i dngos grub rdzogs pa yin/ /thun mong thob la mchog ma yin/ /mchog la thun mong yod ma yin//rdo rje 'chang ba'i go 'phang ni/ /de dag gnyis su yod ma yin/ /rnal 'byor bla ma'i rgyud 'dzin pas/ /'bras bu rgyu la rag las te/ /sa bon lta bu yin pas na/ /rgyu yi gang zag rnam pa lnga/ /spang blang bye brag shes par bya/ /de nas rim par dbang blangs te/ /thabs kyi rgyud la 'jug par bya//dang po nyan pa'i shes rab kyis/ /tshig gi rgyud la thos pa bskyed/ /de nas bsams pa'i shes rab kyis/ /tshig dang don du 'brel pa bslab/ /de nas bsgom pa'i blo rtsal gyis/ /dang por bskyed pa'i rim pa bslab/ /de rjes rdzogs pa mthar dbyung ste/ /kha spubs rdol dang dug can gyi//skyon rnams spangs te rgyun gnas na/ /chu lud rkyen gyis 'bras bskyed bzhin/ /'bras bu mngon gyur the tshom med/ /rgyud gsum rgyan bdun sbyor ba'i lde mig gis/ /gsang 'dus la sogs rgyud kyi sgo phye nas/ /kun la dgos pa'i 'bras bu rin po che/ /rnal 'byor rnams kyi rgyud la thob par shog /rgyan bdun rnam par dgrol ba zhes bya ba/ a tsAr+ya shrad+d+hA ka ra warmas mdzad pa rdzogs so// //paN+Di ta de nyid dang / zhu chen gyi lo tsA ba dge slong rin chen bzang pos bsgyur ba'o// //